Istorija e Isus Hristoski, čhavo e Davidesoro, e Avraamosere ćhavesko. O Avraam bijanda e Isake. A o Isak bijanda e Jakove. A o Jakov bijanda e Juda thaj e phraljen leseren. A o Juda bijanda e Farese thaj e Zara e Tamarasa. A o Fares bijanda e Esromo. A o Esrom bijanda e Aramo. A o Aram bijanda e Aminadave. A o Aminadav bijanda e Nasono. A o Nason bijanda e Salmono. A o Salmono bijanda e Voze e Rahavosa. A o Voz bijanda e Ovide e Rutasa. A o Ovid bijanda e Jeseje. A o Jesej bijanda e Davide thagare. A o David thagar bijanda e Solomono e Urijinicasa. A o Solomono bijanda e Rovoamo. A o Rovoam bijanda e Avija. A e Avija bijanda e Asa. A o Asa bijanda e Josafato. A o Josafat bijanda e Joramo. A o Joram bijanda e Ozija. A e Ozija bijanda e Joatamo. A o Joatam bijanda e Ahazo. A o Ahaz bijanda e Jezekija. A o Jezekija bijanda e Manasija. A o Manasija bijanda e Amono. A o Amon bijanda e Josija. A o Josija bijanda e Jehonija thaj e phralen leskeren, ano phiravipe vavilonsko. A palo phiravipe vavilonsko, o Jehonija bijanda e Salatilo. A o Salatilo bijanda e Zorovavelje. A o Zorovavelj bijanda e Aviuda. A o Aviud bijanda e Eliakimo. A o Eliakim bijanda e Azore. A o Azor bijanda e Sadoko. A o Sadok bijanda e Ahimo. A o Ahim bijanda e Eliude. A o Eliud bijanda e Eleazare. A o Eleazar bijanda e Matano. A o Matan bijanda e Jakove. A o Jakov bijanda e Josife, e rome Marijako, katar savi bijandilo o Isus akhardo Hristos. Sa, varekaj, kustika katar o Avramo đi o Davido, kustika dešuštar, a katar o David đi o phiravipe vavilonesoro kustika dešuštar, thaj katar o phiravipe vavilonesoro đi o Hristo, kustika dešuštar. A bijandipe e Isus Hristosoro ađaar ine: Kana e daj lesiri e Marija sine mangli e Josifese, a angleder so trubuje te oven kethane, arakhlja pes kaj khamnili katar o Sumnalo Đi. A o Josif o rom lakoro, avutno čačutno thaj na manglindoj putarune te phućarela, dija godi garandoj te mekela. Aj kana ov ađaar dija godi, dikh, mothodilo lese ano suno o phakalo e Devljutnesoro vakerindoj: o Josif, čhavo e Davidesoro, ma dara te le e Marija romnja kala; kaj odova so ano late astardilo katar o Sumnalo Đi. Ta ka bijanel čhave, thaj thode lese anav Isus; kaj ov ka inkalel e manušen plen kotar e bezaha lengere. A sa akava ćerdilope te pherel pe so o Devel phenđa prekal o profeto savo vakerel: Eke, e ćhaj ka ačhol khamni, thaj ka bijanel čhave, thaj ka del olese anav Emanuil, so ka phenel: Amencar o Devel. Uštindoj o Josif katar o suno, čerda sar lese phenđa o phakalo e Devljutnesoro thaj lija e romnja pla. Thaj ni džanglasa baš olake đikaj ni bijanda čhave ple anglune, thaj dinđa lese anav Isus. A kana o Isus bijandilo ano Vitlejem judejsko ano dive e Irodose e thagarese, dikh, ale e gođavarutne kotar o Istok ano Jerusalim thaj vakerde: Kaj si o thagar e judejesko savo bijandilo? Kaj dikhljam lesiri čeren ko Istok thaj avilam lese te pera ko čanga. Kana odova šunda o thagar Irod, darandilo, thaj sa o Jerusalim oleja. Thaj ćidindoj sa e anglunerašajen thaj e lilvarnen e manušengeren, phučlja len kaj ka o Hristos bijanđol. A on vakerde: Ano Vitlejem judejesko; kaj ađahar o profeto ramosarda: Thaj tu Vitlejemo, phuvone Judengiri, ni pe soste naj san najcikno maškar e knezura Judeskere; kaj andar tute ka ikljol Legavno savo ka ćaravel e selore mle e Izrailjesere. Atoska o Irod, garandoj thaj akharindoj e gođavarutnen, đangla lendar kana mothovdili e čeren. Thaj bićhalindoj len ano Vitlejem, phenđa: Đan thaj Phučen šukar baš o čhavoro, pa kana arakhen le, mothon mange, kaj vi me te avav leske pe čanga te perav. A on, ašundoj e thagare, đele po drom, thaj dikh, e čeren, savi dikhle ko Istok, đala anglal lende đikaj ni avili thaj aćhili upral kaj sine o čhavoro. A kana dikhle e čeren, pherdile lengere vile but bare lošalimasa. Thaj dindoj andre ano kher, dikhle e ćhavore e Marijaja dija lesera, thaj pele pe čanga pe lese, ta putarindoj e sobe ple pašarde leske e dindime: sumnakaj, tamjano thaj izmirna. Thaj lindoj ano suno o vakeripe te na irinen pe e Irodoske, avere dromeja đele ani pli phuv. A kana on đele, a odova o phakalo e Devljutnesoro mothovđape e Josifese ano suno thaj phenđa: Ušti, le e ćhavore thaj e dija lesera, ta naš ano Egipat, thaj ov odothe đikaj tuke ni phenav: kaj o Irod ka rodel e ćhavore te xasarel. Thaj vov uštindoj, lija e ćhavore thaj e dija lesera raćasa ta đelo ano Egipat. Thaj ine odothe đi o meripe e Irodosoro – te pherel pe so o Devel vakerda prekalo profeto savo vakerel: Andar o Egipat akharda e čhave ple. Teg o Irod, dikhindoj kaj le o gođavaratne xoxavde, xoljardilo but thaj bičhalda ta xasarda sa e čhavoren ano Vitlejem thaj pe sa o trujalipe plo katar e duj berša thaj najtele, po vaxto savo čače đangla katar e gođavarutne. Teg pherdilo so phenđa o profeto Jeremija vakerindoj: O Krlo ani Rama šundilo pe, rovipe thaj rovavdipe thaj dobođipe baro, e Rahilja rovel e čhavoren plen, thaj ni mangel te kovljarel o dukha, kaj len nane. A po meripe Irodosko, dikh, o phakalo e Devljutnesoro mothovdilo ano suno e Josifese ano Egipto, thaj vakerda: Ušti, le e ćhavore thaj e daja lesera thaj đa ani phuv Izrailjeski; mule odola save rodle o ođi e ćhavoresoro. A ov uštindoj, lija e ćhavore thaj e daja lesera, thaj avilo ani phuv e Izrailjeski. Numaj ašundoj kaj o Arhelaj thagaril ane Judeja pothan e Irodosko, ple dadesoro, darandilo odori te đal, sar, lindoj ano suno o vakeripe, đelo ane agora e galilejeske. Thaj avindoj thanardilo ano foro akhardo Nazaret, te pherđol so vakerde e profetura kaj Nazarećano ka akharelpe. Ane odola dive avilo o Jovan Bolipesarutno thaj vakerda ano pusto than e Judejaki. Thaj vakerda: Jertin tumen, kaj paše alo o Thagaripe e badalesoro. Kaj goda si odova baš saveske phenđa o profeto Isaija vakerindoj: Krlo riknimasko ano pusto than: laćharen o drom e Devljutnesoro, laćharen e dromora lesere. A korkoro o Jovan sine le fostani kotar e devake bala thaj kustik morčhakiri phandli ko kukija ple, a xape sine lese ćar thaj divo avđin. Teg ikljolape koro leste o Jerusalim thaj sa e Judeja, thaj sa o trujalipe e jordanosoro. Thaj ov len bolela ano Jordan, thaj mothovena e bezeha ple. A kana dikhlja bute farisejen thaj sadukejen kaj aven te bolen len, vakerda lenge: Njamura aspidenge, ko tumenge phenđa te našen katar holjanipe kova avel. Bijanen, akana, njamo paćivalo jertimasko. Thaj ma den godi thaj ma vakeren ana tumende: Isi amen dad o Avraamo; kaj tumenge phenav kaj šaj o Devel vi katar o bar akava te vazdel čhaven e Avraamoske. A ake thaj o tover ke darhina e kašteske terđol: sako, akana, kaš savo ni bijanel lačho bijanipe, čhinel pe thaj ane jag frdel. Me tumen bolav panjesa baš jertisaripe; a odova so avel pala mande najzuralo si katar mande: me najsem digamo lesko pođipe te ingarav; vov tumen ka bolel Đesa Sumnalesa thaj jagasa. Leske si o vatralji ano vas ta ka užavel o gumno plo, thaj ka kidel o điv plo an hambari, a e pljeva ka tharel jaga bimudarda. Teg alo o Isus kotar e Galileja po Jordan e Jovanose ta akava te bolel le. A o Jovan le na mukela vakerindoj: Tu trubul man te boles, a tu li ave mange? A o Isus irisarda thaj vakerda lese: Mek akana, kaj ađahar amenge trubul te pheras sarsavo čačipe. Teg ole meklja. Thaj bolindoj o Isus inklilo sigo andar o pani; thaj dikh, putardilo lese o badali, thaj dikhlja o Đi e Devlesoro kaj uljol sar golubo thaj avel pe leste. Thaj dikh, krlo katar o badali savo vakerel: Akava si Čhavo mlo čumidlo savo si pe mlo kamipe. Teg e Isuse legarđa o Đi ko pusto than kaj le o beng te zumavel. Thaj postindoj saranda dive thaj raća saranda, majpalal bokhajlo. Thaj avilo leske o zumavutno thaj vakerda: Te sijan o Čhavo e Devlesoro, vaker kaj e bara akala te oven mare. A ov vakerda thaj phenđa: Hramosardo si: Na đivdini o manuš jeke marestar, aj e sakoj lafestar savo ikljola andar o muj e Devlesoro. Teg le o beng legarđa ano Sumnalo foro thaj čhuta le pe phak e hramoski. Ta lese phenđa: Te san o Čhavo e Devlesoro, ripin tele, kaj si hramome: E Phakalenge plenge ka vakeren baš tute, thaj ka lel tut ano vasta, kaj sar te na khuvetu ko bar tire preja. A o Isus lese phenđa; Vi akava si hramome; Ma zumav tire Devljutne Devle. Pale le lelja o beng thaj inđarda pe plajin but uči, thaj sikada lese sa e thagarimata akale themestar thaj baro dive lengo. Thaj phenđa lese: Sa akava ka dav tuke te peljan thaj te pere pe duj čanga angla mande. Teg lese o Isus phenđa: Đa katar mande, Benga, kaj si hramome: E Devljutne Devlese plese per pe čanga thaj lese jekhunese te kande! Teg le o beng meklja, thaj dikh. E phakale ale thaj kandena lese. A kana ašunda o Isus kaj o Jovan si dindo, đelo ane Galileja. Thaj meklindoj o Nazaret, avilo thaj thanardilo ano Kapernaum pe phuv uzalo derav; ane agora e Zavulonovese thaj Neftalimovese. Te pherdol so phenđa o profeto Isaija vakerindoj: E phuv Zavulonovosi thaj e phuv Neftalimovesi, po drom karing o derav pe okoja rig e Jordanosiri, Galileja butedevlengiri; O seloro save bešen ano tunjariko dikhla rošlipe baro, vi odolenge save bešen ano umal thaj učhaljin merimaski, o rošlipe strefisarda. Kotar akana lija o Isus te mothovel thaj vakerel: Jertin tumen, kaj paše alo o Thagaripe e badalesko. A džandoj pašo derav e Galilejosko dikhlja dujen phraljen, e Simone, akhardo Petar, thaj e Andreja, phrale lesere, kaj čhuden e safin ano derav, kaj sine maćhara. Thaj phenđa lenge: Aven pala mande thaj ka kerav tumen maćhara e manušengere. A on sigate mukle e safina thaj lijepe palo leste. Thaj dželindoj othar dikhlja avren dujen phraljen, e Jakove Zevedejeve thaj e Jovane phrale lesere, ane barka e Zevedejevesa, lengere dadesa, kaj suvdaren e safina ple, thaj akharda len. A on sigo mekle e barka thaj e dade ple thaj lijepe palo leste. Thaj phirda o Isus pe sa e Galileja thaj sikavda pe sinagoge lengere, thaj mothovindoj o evangelium katar o Thagaripe, thaj sastarindoj sako nasvalipe thaj sako bizuralipe ano seloro. Thaj gelo o krlo katar leste pe sa e Sirija; thaj ande leske sa e nasvalen, savone nasvalimatar thaj pharimatenca linde, thaj diljarde, thaj čhonaren, thaj linden, thaj sastarda len. Thaj pala leste đana selore but andar e Galileja, thaj andar o Dekapolji, thaj andar o Jerusalim, thaj Judeja vi okole rigatar e Jordanosiri. A kana ov dikhlja buten seloren, uklilo pe plajin, thaj bešlo, thaj ale paše leste e sikljovne lesere. Thaj pravdindoj o muj plo, sikavela len vakerindoj: Baxtarde si e čorore ođesa, kaj si lengo thagaripe e badalesoro. Baxtarde save roven, kaj ka kovljardon. Baxtarde e kovle kaj ka len e phuv. Baxtarde e bokhale thaj e trošale e čačipnase, kaj ka čaljoven. Baxtarde e kovleođesere, kaj ka oven maznosarde. Baxtarde uže vilesa, kaj e Devle ka dikhen. Baxtarde e šandipekerutne, kaj ka e čhave Devleske akhardon. Baxtarde e tradine baš o čačipe, kaj si lengoro thagaripe e badalesoro. Baxtarde sen kana tumen lađaren thaj traden thaj xoxavindoj vakeren opipe tumendar savetane đungale lafija, paše mande. Lošalin tumen thaj lošalinen kaj si e bari poćin tumari po badali, kaj ađaar tradena vi e profetonen anglal tumende. Tumen sinjen lon e phuvjake; Ako o lon gunđavol sosa ka lonđarol pe? Ov ake na ka ovel ni sose, sem kaj te čhorel pe avri thaj kaj e manuša te uštaven le. Tumen sen rošlipe e themeske. Naštil o foro te garadol kana pe plajin ačhel; Ni na thabljola e memeli thaj čhivelpe telal o vaso sar po memeljako, ta te rošinel sarijenđe save si ano ćher. Ađahar kaj te rošinel tumaro rošlipe anglo manuša, kaj te dikhen tumare lačhe kotora thaj paćivin e Dade tumare savo si po badalija. Ma den godi kaj avilem te čhinavav o Krisi ja e Profeten; ni avilem te čhinavav aj te pherav. Kaj čače tumenge vakerav: Đikaj ni nakhel o badali thaj e phuv, ni ka xasavol najcikni grafema ja jek linija andar o Krisi đikaj sa ni ovel pe. Te, akana, kova čhinavel jekh katar akala najcikne vakerimata thaj sikavel ađahar e manušen, ka akharel pe najcikno ano Thagaripe e badalesko; a kova del agor thaj sićol, odova baro ka akharel pe ano Thagaripe e badalesko. Kaj tumenge vakerav, te na avilo o čačipe tumaro najbaro katar o čačipe e lilvarnengo thaj e Farisejengo, ni ka den ano Thagaripe e badalesko. Šunden sar si vakerdo e puranenge: Ma mudar; kaj kova mudarel, ka ovel bango e krisose. A me tumenge vakerav kaj sako savo holjavol po phral plo ni vaš so, ka ovel bango e krisose; a kaj li kova phenel e phralese plese: „Limori” ka ovel bango ćidutnake; a kova phenel: „Dileja!” ka ovel bango e bengesere jagaće. Te, akana, aneja o dinipe tiro po than viktimako thaj odothe de tut godi kaj o phral tiro isile khančik opipe tutar, mek odothe o dinipe tiro anglal o than viktimako, thaj đa ta majanglal baraštitu tire phralesa, ta teg ava thaj čhiv o dinipe tiro. Lačhardov e opipeutnesa tiresa sig, đikaj sijan ko drom oleja, kaj te o opipeutno ni dela tut e krisarese, a o krisari te na del tut e kandinese thaj ano phandlipe te na frdel tu. Čače tuke vakerav: Na ka ikljove odothar đikaj ni ka de đi o palune love. Ašunden sar si vakerdo e puranenge: Ma ćer angločumidipe. A me tumenge vakerav kaj sako savo dikhel pe đuvli mangimasa pala late, ake čerda angločumidipe lasa ano vilo plo. A kaj e jakh tiri daxni tradel po bezeh, ikal la thaj ćhudla katar tute; kaj tuće si najlaćhe te mudardol jekh katar e kotora tire na li sa o trupo tiro te ovel frdime ane bengesiri jag. Te li o daxno vas tiro tradel po bezeh, čhin le thaj frde katar tute; kaj tuće si najlaćhe te mudardol jekh katar e kotora tire na li sa o trupo tiro te ovel frdimo ane bengesiri jag. Ađahar si phendo: Ko mukel e romnja pla, nek lake del vi e pustik muklimasiri. A me tumenge phenav kaj sako savo mukel e romnja pla, sem ando angločumidipe, tradela te ćerel angločumidipe; thaj savo lel pe muklinasa, angločumidipe ćerel. Pana ašunden sar si phendo e puranenge: Ma xa sovli bange, a pher so e Devljutnese xalan sovli. A me tumenge phenav: Ma xan sovli nisar: ni badalesa, kaj si e skamin e Devlesiri; Ni phuvjasa kaj si telalplainipe e prenđe leserenđe: ni Jerusalimeja, kaj si foro e bare Thagaresoro. Ni tire šereja ma xa sovli, kaj našti ni bal jekh parno ja kalo te ćere. Akana, nek ovel o lafi tumaro: va, va; na, na; a so si pobut odolestar kotar đungalipe si. Ašunden kaj si phendo: Jakh baš e jakh, thaj dand baš o dand. A me tumenge phenav kaj te na opipen tumen e džungalimase, aj te ko čalada pe daxni čham tiri, irin lese vi aver; Thaj savo mangel kaj te krisil pe tusa thaj o gad tiro te lel, de lese vi o fostani; Thaj te ko tradla tut jekh milja, đa oleja duj. Savo rodel tutar, de lese; thaj savo mangel tutar te lel love, ma te na dele. Ašunden kaj si phendo: Čumid e pašune tire, thaj ma čumid e biamale tire. A me tumenge phenav: Čumiden e biamalen tumaren, baxtaren odolen save dena tumen arman, keren lačhipe odolenge save tumen na čumiden thaj ruđin tumen baš odola save tumen dukhaven thaj traden. Te oven čhave e Dadesere tumaresere savo si po badali; kaj Ov ple khameja strefila vi e džungalen vi e laćhen; thaj del bršin e čačunenge thaj e bičačunenge. Kaj te čumidljen odolen save tumen čumiden, savi počini isitumen? Na čeren li ađahar vi e šulkara? Thaj ake čerden barosastipe numaj phralenđe tumarenđe, so prabut čeren? Ni čeren li ađahar vi e butdevlengere? Oven tumen, akana, pramišto, sar so si pramišto o Dad tumaro e badalesoro. Arakhen kaj o davipe tumaro te na čeren anglo manuša kaj tumen on dikhen: te na e počini nane tumen katar o Dad tumaro savo si po badali. Kana, akana, deja e davuni, ma phurde angla tute, sar so čeren e dujemujenge pe sinagoge thaj pe droma kaj len e manuša ašarisaren. Čače tumenge phenav: Lije e počini pli. A tu kana ćere davuni, te na đanel e zervuni tiri so ćerel e daxnuni tiri. Kaj tiri davuni te ovel garavdi; thaj o Dad tiro savo dikhela garavde, ka irinel tuke bigaravde. Thaj kana ruđi tut e Devlese, ma ov sar e dujemujenge, save vođestar pe sinagoge thaj pe trušulime droma ačhen thaj ruđin pe kaj len te dikhen e manuša. Čače tumenge phenav: Lije e počini pli. A tu kana ruđi tut, de ano klijeto plo, thaj phanglindoj o udar tiro, ruđi tut e Dadese tirese savo si ano garajbe; thaj o Dad tiro savo dikhel garavde, ka irinel tuke bigaravde. A kana ruđin tumen, ma čuče vakeren sar e butdevlengere, kaj on den godi kaj ka aso but lafija ple ka oven paćavne. Ma oven, akana, jekh čhanutne olenca; kaj đanel o Dad tumaro so tumenge trubul pana anglal so roden kotar leste. Ađaar, akana, ruđin tumen: Dade amaro savo sijan ko badalija, ta te sumnalpe o anav tiro; Te avel o thagaripe tiro; te ovel o kamipe tiro vi pe phuv sar po badali; Maro amaro šukoro de amenge avdije; Thaj jertin amenge e kamimata amare sar so vi amen jertina e kamutnenge amarenge; Thaj ma čhuv amen ano zumavipe, aj inkal amen katar o đungalo. Kaj si tiro thagaripe thaj zor thaj ašundipe ano šelberšipe. Amin. Kaj te jertinen e manušenge čerde bezeha lenge, ka jertil vi tumenge o Dad tumaro badalesko. Te na li jertinen e manušenge čerde bezeha lenge, ni o Dad tumaro ni ka jertil tumenge čerde bezeha tumare. A kana postin, ma oven dukhade sar e dujemujenge; kaj von ricon e muja ple te mothoven e manušenge sar postin. Čače tumenge phenav: lije e počini pli. A tu kana posti, makh o šero tiro, thaj o muj tiro thov, te na dikhen tut e manuša kaj posti, sar o Dad tiro savo dikhel garavde, thaj o Dad tiro kova dikhel garavde ka irinel tuke bigaravde. Ma keden pese barvalipe pe phuv, kaj o moljco thaj e rđa rumil, thaj kaj e čora telalanden thaj čoren; Aj čeden tumenge barvalipe po badali, kaj ni o moljco ni e rđa ni rumil, thaj e čora ni telalanden thaj ni čoren. Kaj kote si o barvalipe tumaro, odothe ka ovel vi o vilo tumaro. Memeli e truposiri si e jakh. Te, akana, e jakh tiri ovel sasti, sa o trupo tiro videlo ovel. Te li e jakh tiri rumime ovel, sa ka o trupo tiro tunjariko ka ovel. Te si, akana, rošlipe savo si ana tute tunjariko, kobor si tek o tunjariko! Khoni naštil duj raja te kandel; kaj ja jekhe ka ritol, a e avere čumidol; ja ka jekheste inćardol pe, a e avere zalamoldisarel. Našti te kanden e Devlese thaj e mamoneske. Odolese tumenge phenav: Ma grižin tumen ođesa tumaresa, so ka xan, ja so ka pijen; ni truposa tumaresa, ano soste ka huraven tumen. Naj li o ođi majzuralo katar o xape, thaj o trupo katar e šeja? Dikhen ko čiriklja e badalesere sar ni sijisaren, ni čhinen, ni kiden ano givore; ta o Dad tumaro e badalesoro parvarel len. Najsen li tumen but majzurale katar lende? A ko katar tumende grižindoj pe, šaj te dodel ple barjopnase kuni jek? Thaj baš šeja so se grižin tumen? Dikhen pe krinura ano umal sar barjon; ni hajin ni katen. Aj me tumenge phenav kaj ni o Solomon ano sa plo ašundipe ni huradape sar jekh katar lende. Ta akana e ćar ano umal, savi avdive si a tehara ani kuba frdel pe. O Devel ađaar huravel; a na li tumen, zala paćamaske? Ma grižin, akana, vakerindoj: So ka xas, ja so ka pija, ja so ka hurava? Kaj sa akava e butdevlengerengere roden; a đanel vi o Dad tumaro e badalesko kaj tumenge trubul sa akava. Aj roden najanglal o Thagaripe e Devlesoro thaj čačipe lesoro, thaj akava tumenge sa ka delpe. Ma grižinen, akana, baš o tajsa; kaj tajsa ka grižinipe baš o pese. Ma maj si sakone divese o đungalipe plo. Ma krisinen, tumenge te na krisinelpe; Kaj save krisosa krisinen, gasavesa tumenge ka krisinelpe; thaj save merasa merin, gasavasa tumenge ka meril pe. A sose dikhe o buroro ani jakh tire phralese, a balvano ane jakh tiri ni haćare? Ja, sar ka phene tire phralese: ač te ikalav tuke o buroro andar e jakh tiri; a eke balvano ani jakh tiri? Dujemujenge, ikal najanglal o balvano andar e jakh tiri, ta napal ka dikhe te ikale o buroro andar e jakh tire phralesiri. Ma den e sumnale e džuklenge; ni ma čhuden o lafija tumare anglal e bale, te na uštaven len pumare prenca, thaj irindoj ni pharaven tumen. Ruđin tumen, thaj ka del pe tumenge; roden, thaj ka arakhen; maren, thaj ka phravelpe tumenge. Kaj sakoj savo rodel, lela; thaj savo rodel arakhel; thaj savo marel, lese ka phravelpe. Ja savo si maškar tumende o manuš katar savo te o čhavo lesoro rodel maro, bar lese te del? Ja e mačhen te roden, te del lese sape? Kana, akana, tumen, e đungale avutne, đanen davimata lačhe te den e ćhavorenge tumarenge, kozom ka majbut o Dad tumaro e badalesko del lačhimata odolenge save lestar roden? Sa, akana, so mangen te keren tumenge e manuša, ađahar keren vi tumen lenge: kaj odova si Kriso thaj Profetija. Đerdinen ko tanguno udar; kaj si o bulo udar thaj bulo drom so ingaren ano peripe, thaj but đene isi save lesa đan. Kaj si o tanguno udar thaj o tanguno drom so ingaren ano đivdipe, thaj hari đene isi save ole arakhen. Arakhen tumen e xoxamne profetonendar, save tumenge avena ano šeja e bakrengere, a andral si ruva astarutne. Pe lengoro bijanipe ka penđaren len. Da li čidel pe e karendar drakha, ja e luluđatar sumučinalin? Ađaar sakoj lačho kaš bijanimata lačhe bijanel, a o đungalo kaš, bijanimata đungale bijanel. Našti o kaš lačho e bijanimata đungale te bijanel, ni o kaš đungalo, bijanimata lačhe te bijanel. Sakoj kaš savo ni bijanel lačhe bijanimata čhinel pe thaj ani jag čhudel. Thaj ađahar, akana, pe bijanimata lengere ka penđaren len. Ni ka sakoj savo mange vakerel: Devljutnea, Devljutnea, del ano Thagaripe badalesko; no savo kerda o kamipe mle Dadesoro savo si po badali. But đene ka phenen mange odova dive: Devljutnea, Devljutnea, na li ano anav tiro profetisardam, thaj tire anavea e bengen tradlam, thaj tire anavea but bisiklimata kerdam? Thaj teg lenge themeske ka phenav: Nisar tumen ni đanglem; đan katar mande tumen save keren bikrisipe. Sakoj, akana, savo šunela akala lafija mle thaj čerela len, paraleliv le e manušesa gođaveresa savo kerda o ćher plo ko bar; Thaj khuvđa o bršin, thaj ale o panja, thaj phudinde e balvalja, thaj khuvde pe okova ćher, thaj ni pelo; kaj sine temeljime ko bar. A sakoj savo šunela akala lafija mle thaj ni kerel len, ka ovel sar o dilino manuš savo kerda o kher plo ki pošik; Thaj khuvda o bršin, thaj avile e panja, thaj phudinde e balvalja thaj čalade po ćher odova, thaj pelo, a o peripe lesoro sine daramno. Thaj kana vakerda o Isus o lafija akala, čerela baripe o seloro lesere džandipastar. Kaj len sikavela sar odova savo zor isile, a na sar e lilvarne thaj e Fariseja. A kana huljilo katar e plajin, lijepe pala leste bute selora. Thaj dikh, avilo o đeramno thaj pelo pe čanga vakerindoj: Devljutnea, te mangljan, šaj te užares ma. Thaj meklja po vas o Isus, astarda le vakerindoj: Mangav, užar tut. Thaj sigo užaras pe katar e đeramni pli. Thaj phenđa lese o Isus: Dikh, khanikase ma phen, aj đa thaj mothovtu e rašajese, thaj legar o davipe savo vakerda o Mojsije kotar lengoro mothovipe. A kana đerdinđa ano Kapernaum, alo đi leste o kapetano ruđindoj le thaj vakerindoj: Devljutnea, o kandino mlo pašljol ćhere lindo, thaj daramne mučil pe. A o Isus lese phenđa: Me ka avav thaj ka sastarav le. Thaj o kapetano irisarda thaj phenđa: Devljutnea, najsem moldino te telal o ćhatlo mlo đerdine, aj numa phen o lafi, thaj ka sastol o kandino mlo. Kaj vi me sem manuš telal e zor, thaj isi man telal mande urumnen, ta phenav jekhese: đa, thaj đal: thaj e averese: ava, thaj avel; thaj e kandinese mlese: ćer odova, thaj kerel. A kana ašunda o Isus, barikane thaj phenđa odolenge so đan palo leste: Čače tumenge phenav: ni ano Izrailj edobor paćape ni arakhljem. A phenav tumenge kaj but đene katar o istoko thaj zapado ka aven thaj ka bešen baš e astala e Avraameja, thaj e Isakeja, thaj e Jakoveja ano Thagaripe e badalesko; A čhave e thagaripasere ka oven tradine ano tunjariko najteluno; odothe ka ovel rovipe thaj krcope e dandengoro. A e kapetanose phenđa o Isus: Đa, thaj sar paćajan tuke nek ovel. Thaj sastilo o kandino lesoro ano odova časo. Thaj avindoj o Isus ano kher e Petrose, dikhlja e sasuja lesera kaj pašljol thaj i šilali ćinosarela. Thaj azbavda e vasta lake, thaj mekla la e jag, thaj uštini thaj kandlja le. A kana sine e rat, ande leste bute diljarden, thaj tradla o đi lafeja, thaj sa e nasvalen sastarda, kaj te pherel pe so phenđa o Isaija profeto vakerindoj: Ov e bizora amare lija thaj o nasvalipe legarda. A kana dikhlja o Isus buten selore uzal peste, phenđa te inkljoven pe okoja rig. Thaj alo đi oleste jek lilvarno phenđa lese: Sikamneja, ka đav pala tute katar kuri đa. Phenđa lese o Isus: E lungeporjaće silen xara thaj e čiriklja e badaleske kujbora, a o Čhavo e Manušesko najle kaj o šero te garavel. A o aver katar e sikljovne lesere phenđa lese: Devljutnea, mek mange najanglal te đav thaj te parunav e dade mle. A o Isus lese phenđa: Ava pala mande, a muk e mulen te parunen ple mulen. Thaj kana dija ani barka, pala leste dije e sikljovne lesere. Thaj dikh, balval bari mothodili po derav, ađaar kaj e barka učhardili panjesa ćinosardo; a vov sovela. Thaj ale đi leste e sikljovne lesere, džangavde le vakerindoj: Devljutnea, ikal amen, mudardiljam! Thaj phenđa lenge: Sose sijen daramne, zalapaćamne? Teg uštindoj daravda e balvalja ano derav, thaj ulo biašundipe baro. A e manuša ačharisajlje vakerindoj: Ko si akava kaj le šunena vi e balvalja vi o derav? A kana ov avilo pe okoja rig ani phuv e gergesinengi, resle le duj diljarde, iklindoj andar e limora, ađahar đungale kaj naštine khonik te nakhel odole dromeja. Thaj dikh, dije vika vakerindoj: So mange amendar, Isuse, Ćhaveja Devlesereja? Sar avilan akari anglal o vaxto amen te mučine? A dur lendar ćarjona bari gramada e balengiri. Thaj o benga ruđinde le vakerindoj: Te amen tradljan, muk amenge te đa ani gramada e balengiri. Thaj phenđa lenge: Đan. Thaj on iklindoj đele ani gramada e balengiri. Thaj dikh, prastandili sa e gramada e balengiri e učimastar ano derav, thaj taslile ano pani. A e balengere arakhavne našle; thaj avindoj ano foro mothode sa, vi e diljardenge. Thaj dikh, sa o foro iklistilo ano resipe e Isusese; thaj dikhindoj le, ruđisarde te đal kotar lengoro agor. Thaj dindoj ani barka, nakhlo thaj avilo ano plo foro. Thaj dikh, ande lese e linde savo pašljola po than. Thaj dikhindoj o Isus o paćape lengo, phenđa e lindese: Ma dara, ćhavoreja, jertisinipe tuke e bezaha tire. Thaj dikh, nesave kotar e lilvarne phende ana peste: Akava mahril po Devel. A o Isus, dikhindoj so den godi lenge, phenđa: Sose tumen đungalipe den godi ano vile tumare? Kaj so si najloke, te phene: Jertisavon tuke e bezeha; ja te phene: Ušti thaj phir? Aj te đanen kaj zor isi e Čhave e Manušesere pe phuv te jertini e bezeha; teg phenđa e lindese: Ušti, le o than tiro thaj đa te ćhereste. Thaj uštindoj gelo ple ćhereste. A o seloro dićhindoj barikane thaj ašardinde e Devle, savo dinđa asavko zor e manušenge. Thaj dželoindoj o Isus odothar dikhla e manuše kaj bešel pe šulka, po alav Mateja, thaj phenđa lese: Ava pala mande. Thaj uštindoj đelo palo leste. Thaj kana xana ano ćher, dikh, bute šulkara thaj došale avile thaj xale e Isuseja thaj lesere sikljovnenca. Thaj dićhindoj odova, e Fariseja phende lesere sikljovnenge: Sose e šulkunencar thaj bezehalencar o sikamno tumaro xal thaj pijel? A o Isus ašundoj phenđa lenge: Ni trubul e saste doktoren aj e nasvale. Aj đan thaj sićon so đanelpe: Kovlipe mangav, a na pašaripe viktimako. Kaj ni avilem te akharav e čačutnen aj e došalen ko jertipe. Teg lese ale e sikljovne e Jovanosere vakerindoj: Sose amen thaj e Fariseja postina but, a e sikljovne tire ni postinena? A o Isus lenge phenđa: Da li šaj e abavara te oven dukharde đikaj si lenca o unsurutno? Aj ka aven o dive kana ka ovel čordo lendar o unsurutno, thaj teg ka postinen. Kaj khonik na čhivela nevo kotor po purano fostani; kaj o kotor zurale čalavel e fostanostar, thaj najdžungale e xuv ka ovel. Ni kaj čhorel pe mol nevi ane xala morćhatar purane; te na xovardon e xala morćhatar a e mol čhordol pe, thaj e xala morćhatar ka peren. Aj čhorel pe mol nevi ane xala morćhatar neve, thaj solduj arakhen pe. Đikaj ov ađaar vakerda lenge, dikh, o thagarutno jekh avilo thaj pelo pe čanga leske vakerindoj: E ćhej mli akana merel: aj ava thaj čhiv pe late o vas tiro, thaj ka đivdinel. Thaj uštindoj o Isus lijape pala leste, thaj e sikljovne lesere. Thaj dikh, e đuvli savi dešuduj berša sine nasvali katar o ćhordipe e ratesoro avili palal thaj dolinđa pe ke pođi leske fostanoski. Kaj vakerela ana peste: Te numa dolinđum lesoro fostani, ka sastovav. A o Isus, irindoj thaj dikhindoj, phenđa: Ma dara, mi ćhaj, o paćape tiro ikalda tut. Thaj sastili e đuvli kotar odova časo. Thaj avindoj o Isus ano ćher e thagarutnesko thaj dikhindoj e bašalnen thaj e seloren tangamime, phenđa lenge: Čiden tumen, kaj e ćhaj ni muli, aj sovel. Thaj asandile lese. A kana tradla e seloren, đerdinđa thaj astardala vastestar, thaj uštini e ćhaj. Thaj legardape o krlo akalestar pe sa odoja phuv. A kana o Isus đelo odothar, pala leste đana duj korore vikindoj thaj vakerindoj: Maznosar amen, ćhaveja Davidoserea! A kana avilo ano ćher, ale paše leste e korore, thaj phenđa lenge o Isus: Paćan li kaj šaj odova te kerav? A on lese phenđe: Va, Devljutnea. Teg astarda pe ko lengere jača vakerindoj: Po paćape tumaro nek ovel tumenge. Thaj phravdile lengere jača. Thaj daravda len o Isus vakerindoj: Dikhen khonik te na đanel! A on iklindoj, mothovde le pe sa odoja phuv. Kana pale on ikljovena, dikh, ande lese e lalore manuše thaj e diljarde. Thaj kana tradla e benge, vakerda o laloro. Thaj baripe kerela o seloro vakerindoj: Nisar odova na dičhilo ano Izrailj. A e Fariseja vakerena: Mažutimasa e thagarutne bengencar tradla e bengen. Thaj phirda o Isus pe sa e forura thaj e gava sikavindoj pe sinagoge lenge thaj vakerindoj o evangelium e Thagaripastar, thaj sastarindoj sakoj nasvalipe thaj sako bizuralipe ano seloro. A dićhindoj buten seloren, kovljardilo pe lende, kaj sesa xasarde thaj mukle sar o bakre bizo čobano. Teg phenđa e sikljovnenge plenge: Čhinipe si but, a bućarne hari. Ruđin tumen akana e barutne čhinimase kaj te ikalel e bućarnen po čhinipe plo. Thaj akharindoj ple dešuduj sikljovnen, dija lenge kriso upral o biuže đe kaj len te traden, thaj te sastaren katar sakoj nasvalipe thaj sakoj bizuralipe. A e anava e dešuduje apostolengoro si akala: angluno o Simon, savo akharelpe Petar, thaj o Andrej o phral lesoro; o Jakov Zevedejev thaj o Jovan o phral lesoro; O Filip thaj o Vartolomej; o Toma thaj o Matej šulkari; o Jakov Alfejev thaj o Levej akhardo Tadej; O Simon Kananit thaj o Juda Iskariotsko, savo le vi dija muj. Kala Dešudujoren bičhalda o Isus thaj čhinada lenge vakerindoj: Po drom e butdevlengoro ma đan, thaj ano foro samarjango ma den. Aj đan majanglal e našalde bakrenge e khereske Izrailjeske! Thaj phirindoj mothoven thaj phenen kaj alo paše o Thagaripe badalesko. E nasvalen sastaren, e đeramnen khosen, e mulen vazden, e bengoren traden; po davipe lijen, po davipe thaj den. Ma inđaren sumnakaj, ni rup, ni xarkuma, ano kustika tumare. Ni traste po drom, ni duj fostanja, ni pođipe, ni rovli; kaj o bućarno si paćavdo xapesko piresko. A kana an savo foro ja gav den, Phučen kon si an leste paćavdo thaj gothe ačhen đikaj ni inklen. A dindoj ano kher, bahtaren vakerindoj: Šandipe akale khereske! Thaj te si o kher pačivuno, nek ovel o šandipe tumaro pe leste; a te na li avel pačivuno, nek o šandipe tumaro tumenge iril pes. Te tumen ko ni lel ni šunel e lafija tumare, iklindoj andar o kher, ja andar o foro godova, činosaren o praxo tumare prendar. Čače tumenge phenav: Majloke ka ovel e phuvjake sodomeski thaj gomoreski ano dive Krisosko na li godole foroske. Eke, me tumen bičhalav sar bakre maškar e ruva. Oven, akana, gođaver sar sapa thaj bidžungale sar golubura! A arakhen tumen katar e manuša; kaj tumen ka den e krisonenge, thaj pe sinagoge ple ka maren tumen. Thaj anglal e phurederutne thaj thagara ka inkalen tumen baše mande vaš mothodipe lenge thaj butedevlengere. A kana tumen den, ma grižen pes sar ka ja so ka vakeren; kaj tumenge an godova časo ka del pes so ka phenen. Kaj ni tumen ka vakeren, aj ka o Đi e Dadesko tumaresko ka vakerel andar tumende. A ka del o phral e phrale po meripe thaj o dad e čhave; thaj ka ušten e ćhavore pe bijande thaj ka mudaren len. Thaj savore tumen ka riton paše alav mlo; aj savo ka nakhavel đi agor godova ka inkalel pes. A kana tumen ka traden ano jekh foro, našen ano aver. Kaj čače tumenge phenav: Ni ka phiren e forura Izrailjeske đikaj ni avel o Čhavo e Manušesko. Naj sikljovno upral o sikamno plo ni kandino upral barutno plo. Ma maj si e sikljovnese te ovel sar sikamno lesko thaj e kandineske sar barutno lesko. Te e kherutne akharde Veelzevulosa, kobor ka anglal e kherune leskere? Ma daran lendar, akana; kaj naj khanči garavdino so ni ka phučarel pes, ni garadune so ni ka đanel pes. So tumenge vakerav an tunjariko, mothoven po rošlipe; thaj so tumenge vorbil pes ano kana, mothoven katar e ćatle. Thaj ma daran godolendar save mudaren o trupo, a o ođi našti mudaren; aj majbut daran godolestar savo šaj vi o ođi vi o trupo te xasarel ani benđenđi jag. Ni bikindon li duj čirikle vaš jekhe loveske? Ta ni jekh katar lende ni perel pe phuv bi e Dadesko tumaresko. A tumenge si thaj i e bala ko šero sa đende. Ma daran, akana; tumen sen majlačhe katar e but čirikle. Sakoj savo paćivalisarel man anglal e manuša, ka paćivalisarav thaj me le anglal o Dad mlo savo si po badali. A ko durol mandar anglal e manuša, ka durivavav vi me lestar anglal o Dad mlo savo si po badali. Ma den godi kaj aviljem te anav šandipe pe phuv; ni avilem te anav šandipe aj xanrri. Kaj avilem te ulavav e manuše katar o dad lesko thaj e ćheja katar e dej lakiri thaj e bora katar e sasuj lakiri. Thaj dušmaja e manušeske ka oven o kherutne leskere. Savo čumidel e dade ja e deja majbut katar mande, naj mlo paćavdo; thaj savo čumidel e čhave ja e ćheja majbut katar mande, naj mlo paćavdo. Thaj savo ni lel o trušul plo thaj ni phirel pala mande, naj mlo paćavdo. Savo arakhel o đivdipe plo, ka xasarel les, a savo xasarel o đivdipe plo ana mande, ka arakhel les. Savo tumen lel, man lel; a savo lel man, lel Godole savo man bičhalda. Savo lel e profeto ano alav profetosko, e počini profetoski ka lel; thaj savo lel e čačune ano alav čačimasko, e počini čačimaski ka lel. Thaj te savo del te pijel jekhe katar akala cikne numa taxtaj šudre pajesa ano alav sikavimasko, čače tumenge phenav, ni ka peradol leski počini. Thaj kana dija agor o Isus e vakerimata e Dešudujenge sikljovnenge plenge, đelo gothar te sićol thaj te vakerel pe lengere forura. A o Jovan, ašundoj ano phandipe kotar čerdipe e Hristosko, bičhalda dujen katar e sikljovne ple. Thaj phenđa leske: San li tu Godova so ka avel, ja avere te ađičera? A o Isus irisarindoj phenđa lenge: Đan thaj mothoven e Jovanoske akava so ašunen thaj dikhen: E korore dikhen thaj e bange phiren, e đeramne užen pes thaj e kašuke ašunen, e mule ušten thaj e čororenge vakerel pes o evangelium. Thaj bahtaripe godoleske savo ni tradla po bezeh mandar. A kana von đele, lija o Isus te vakerel e selorese e Jovanostar: So inklisten te dićhen an drmina? E trska savi banđarel e balval? Aj so inklisten te dićhen? E manuše an kovlo fustano uravdo? Eke, savo kovlo fustano inđaren ko thagareske si palate. Aj so inklisten te dikhen? E Profeto? Va, phenav tumenge, thaj majbut katar o profeto. Kaj vov si godova savestar si hramome: Eke, me bičhalav e phakale mle anglal o muj tiro, savo ka gatisarel o drom tiro anglal tute. Čače tumenge phenav: Maškar e bijande katar e đuvlja ni sikadilo majbaro katar o Jovano Bolipesarutno; a najcikno ano Thagaripe badalesko najbaro si lestar. A katar o vaxto e Jovan Bolipesarutnesko đi akana o Thagaripe badalesko zorasa astarel pes, thaj e mukljutne len les. Kaj sa e Profetura thaj o Kris mothona đi o Jovano. Thaj te manglen te paćan, vov si o Ilija so ka avel. Kas isi kana te šunel, nek šunel! Aj kasa ka sikavdol o bijandipe akava? Jekćhane si e ćhavorenge save bešen pe trgura thaj akharen e amalen plen vakerindoj: Bašaldam tumenge, thaj ni čhelden; kućisardam tumenge, thaj ni riknisarden. Kaj avilo o Jovan, savo ni xal ni pijel, a von phenen: O beng si ano leste. Avilo o Čhavo e Manušesko, savo vi xal vi pijel, a von phenen: Dikh manuše xandžvale thaj molpilo, amal e šulkarenge thaj e bezehenge. Thaj sas čačardo o bižajipe katar e ćhavore lake. Atoska lija o Isus te mahrisarel e forura ano save kerdile bute ačharhimata leske, kaj ni jertisajle pes: Pharipe tuke, Horazino! Pharipe tuke, Vitsaido! Kaj te ano Tiro thaj Sidona ačharhimata save ano tumende kerdile, dumutan ka ma ano gono thaj ano praxo jertisavona. Aj tumenge phenav: E Tiroske thaj e Sidonoske majloke ka ovel ano dive e Krisosko na tumenge. Thaj tu, Kapernaumo, savo đi ko badali vazdlan pes, đi ke bengengi jag ka ulje; kaj ano Sodomo te oven e ačhardimata so ana tute kerdile, ka ačhela đi avdive e ađivesesko. Aj tumenge phenav kaj e phuvjake sodomoski majloke ka ovel ano dive e Krisesko na tuke. Ano godova vaxto irisarda o Isus, thaj phenđa: Ašarav tut, Dade, Devlutneja badalesko thaj phuvjako, so akava garadan katar e gođaver thaj haljarune, a phućardan e bidžungalenge. Va, Dade, kaj geja sasa kovlo kamipe tiro. Sa mange mekla o Dad mlo, thaj khonik ni đanel e Čhave aj o Dad; ni e Dade ko đanel aj o Čhavo, thaj te o Čhavo mangel kaske phučarel. Aven mande savore save sen ćherdipe thaj ladavde thaj me tumen ka hodiniv. Len e drez mli pe tumende thaj sićon mandar; kaj sem me kovlo thaj kovljardo vilesa, thaj ka araćhen šandipe tumare ođenge. Kaj e drez si mli kovli, thaj o ladavipe si mlo loko. An godova vaxto đala o Isus ko savato maškar e givora; a e sikljovne leske bokhajlile thaj lije te čhinen e kaniša thaj xale. A e Fariseja dićhindoj godova phenđe leske: Dikh, e sikljovne tire keren so ni trubul te kerelpes ko savato. A ov lenge phenđa: Na li drabarden so kerda o David kana bokhajlo, ov thaj save sinele lesa? Sar dija ano kher e Devlesko thaj e mare inkaldenge xala, save ni trubuja te xal leske ni godolenge so sinele lesa, aj numa e rašajenge. Ja ni drabarden ano Kriso sar savatosa e rašaja o hramo savatone uštaven, ta naj bange? A me tumenge phenav kaj si akate majbaro e hramostar. Kana kama pale đanen so si godova: Mila mangav a na viktimapašaripe, ni ka krisisaren e bidošalen. Kaj si o Čhavo e Manušesko barutno thaj e savatoske. Thaj đapeindoj gothar, avilo ani sinagoga lengi. Thaj dikh, gothe sasa o manuš e šuke vasteso; thaj phučle les vakerindoj: Šaj li savatosa te sastarelpe? – kaj te krisisaren le. A vov lenge phenđa: Savo si maškar tumende o manuš savo isile bakri jek, ta voj ano savato te perel ane xar, te ni ka lela thaj inkalela? A kobor li si o manuš majbarikano e bakrijatar? Akana, šaj savatosa lačhe te keres. Atoska phenđa e manušeske: Inzar o vast tiro. Thaj inzarda. Thaj kerdilo sasto sar e dujto. A e Fariseja inklindoj inčarde svato opipe lestar sar te mudaren le. Aj o Isus, đanglindoj godova, đelo gothar. Thaj palo leste đana bute selore, thaj sastarda len sa. Thaj daravda len te na phučaren le; Te pherel pes so si phendo prekal o Isaija profeto, savo vakerel: Dikh, kandino mlo, save alosardem, Čumidino mlo, savo si po kamipe ođesko mlesko: ka ćhuvav o Đi mlo upro leste, thaj o kris e butdevleskerenge ka mothovel. Ni ka xal pes ni vika ka del, ni ka ko ašunel pe trgura o krlo lesko. E trska mardi ni ka phagel thaj e skimtija phabindoj ni ka aćhavel đikaj ni anel o čačipe đi o phagaripe. Thaj ano alav lesko ka paćan e selore. Atoska leske ande e diljarde savo sasa kororo thaj laloro; thaj sastarda les geja kaj o kororo thaj o laloro dikhlja thaj vakerda. Thaj kerena baripe sa o seloro vakerindoj: Naj li akava o Čhavo e Davidosko? A e Fariseja ašundoj godova phenđe: Akava averčhande ni tradla e bengen đi mažutimasa e Veelzevulesko, thagarutne e bengengo. A o Isus, đanglindoj e gnd lengiri, phenđa lenge: Sakoj thagaripe savo ulavel pes numa ana peste, ka šućarel; thaj sakoj foro ja kher savo ulavel pes korkoro ana peste, ni ka inćarel pes. Thaj te o beng e benge tradel, korkoro ana peste uladilo; sar akana, ka ačhel o thagaripe leskoro? A thaj me e Veelzevulesa mažutimasa tradav e bengen, e čhave tumare kase mažutimasa traden? Godolese tumenge von ka oven krisara. A ako li me Đi Devlesko tradav e bengen, napal avilo tumende o Thagaripe Devlesko. Ja sar šaj ko te del ano kher e zoraleske thaj e kheresko barvalipe te lel, te majanglal ni phandel e zorale? – thaj napal o kher lesko ka čorel. Savo naj manca, opipe mandar si; thaj savo ni čidel manca, čhorel. Godolese tumenge phenav: Sakoj bezeh thaj mahripe ka jertisavol pes e manušenge, a mahripe po Đi Sumnalo ni ka jertisarel pes e manušenge. Thaj te phenđa ko lafija opipe e Čhave Manušestar, ka jertisavol pe leske; a savo phenđa opipe e Đe Sumnalestar, ni ka jertisavol pes leske ni ano akava them ni ano avuno. Ja sijisaren lačho kaš, thaj o bijanipe lesko ka ovel lačho, ja sijisaren đungalo kaš, thaj o bijanipe lesko ka ovel đungalo; kaj po bijanipe o kaš penđarel pes. Njamura aspidenge, sar šaj lačhe te vakeren, kana sen đungale? Kaj katar o najbut vilo o muj vakarel. Lačho manuš andar e lačhi riznica inkalel lačhipe; a o đungalo manuš andar e džungali riznica inkalel đungalipe. A me tumenge phenav, kaj vaš sakoj čučo lafi savo vakeren e manuša ka del irisaripe ano dive e Krisosko. Kaj ando tire lafija ka ove čačardo thaj ando tire lafija ka ove krisime. Atoska irisarde nesave katar e lilvarne thaj e Fariseja vakerindoj: Sikamneja, manga tutar o semno te dikhas. A vov irisarindoj vakerda lenge: O bijanipe đungalo thaj anglačumidino rodel semno; thaj ni ka del pes leske o semno sem semno e Jone profetosko. Kaj sar so o Jona sas ano vođi kitosko trin dive thaj trin raća, geja vi o Čhavo e Manušesko ka ovel ano vilo e phuvjako trin dive thaj trin raća. E Ninevljanura ka ušten po Kris e bijanimasa akalesa, thaj ka krisin les; kaj jertisajle e Jonose vakerimasa; a dikh, akate si majbaro e Jonestar. E Thagarni jugoski ka uštel ko Kriso e bijanimasa akalesa, thaj ka krisil les; kaj voj avel katar o agor e phuvjako te ašunel baro bižajipe e Solomonosko; a dikh, akate si majbaro e Solomonostar. A kana o biužo đi inklel andar o manuš, đal andar e bipanjeske thana rodindoj lačhipe, a ni arakhel. Napal phenel: Te iriv man ano kher mlo katar inklilem; thaj avindoj arakhla čučo, šilado thaj lačhardo. Atoska đelo thaj lela pesa efta aver đi majdžungale pestar, thaj dindoj bešlo gothe; thaj ovel majpalal majdžungalje e manušeske godoleske e anglunestar. Geja ka ovel vi akale bijanimaske džungaleske. Đikaj vov vađe vakerela e selorenge, dikh, e daj thaj e phrala leske ačhena avral rodindoj te vakeren lesa. Thaj nesavo leske phenđa: Ake e daj tiri thaj e phrala tire ačhen avral, rodindoj te vakeren tusa. A vov irisarda thaj vakerda godoleske so leske phenđa: Ko si e daj mli, thaj ko si e phrala mle? Thaj inzarindoj o vast plo pe sikljovne ple, phenđa: Ake e daj mli thaj e phrala mle. Kaj ko del agor o kamipe e Dadesko mlesko savo si po badali, godova si o phral mlo thaj e phen thaj e daj. A godova dive, iklindoj o Isus andar o kher, bešela pašo derav. Thaj čidinisajle uzal leste o but seloro, geja kaj musaj te del ani barka thaj bešel; a o seloro sa terdine pe phuv zalo derav. Thaj vov lenge mothoda but ane paramiča vakerindoj: Dikh, inklilo o sijutno te sejil. Thaj kana sijisarda, jekh kučin peli pašo drom, thaj avile e čiriklja thaj xale len. A e avera pele pe barale thana, kaj najsas but phuv, thaj sigo inklile, kaj najsa e phuv xor. Thaj kana strefisarda o kham, šućile; thaj avune kaj najsalen žile, šućardile. A e avera pele ano kare, thaj barile e kare thaj tasavde len. A e avera pele pe phuv lačhi, thaj ande bijanipe, jekh po šel, a jekh po šovardeš, a jekh po trianda. Kas isi kana te šunel, nek šunel! Thaj avindoj e sikljovnenge phende leske: Sose lenge vakere ano paramiča? A ov irisarindoj phenđa lenge: Godolese kaj si tumenge dindo te đanen e garamne e Thagareske badalesko, a lenge naj dindo. Kaj kas isi, ka del pes leske, thaj ka nakhavel leske; a kas nane, ka lel pes lestar vi gova so sile. Godoleske lenge vakerav ano paramiča, kaj dićhindoj ni dićhen, thaj ašundoj ni ašunen, ni haljaren. Thaj pherel pes pe lende o anglalmothodipe e Isaijesko, savo vakerel: Kanenca ka ašunen, thaj ni ka haljaren; thaj jakhenca ka dikhen, thaj ni ka dićhen! Kaj si zorardilo o vilo akale seloroso, thaj kanenca phare ašunen, thaj jakhenca pirenca phangle kaj sar jakhenca ni dikhen, thaj kanenca ni ašunen, thaj vilesa ni haljaren, thaj ni aven te sastarav len. A mila tumare jakhenge kaj dićhen thaj kanenge tumarenge kaj ašunen. Kaj čače tumenge phenav, kaj si bute profetura thaj čačutne mangle te dikhen so tumen dikhen, a ni dikhle; thaj ašunen so tumen ašunen, thaj ni ašunde. Tumen pa šunen e paramiči e sijutnestar! Savoneske savo šunel o lafi e Thagaripastar thaj ni haljarel, avel o bilačho thaj čorel o sijisardo ano vilo lesko; godova si pašo drom sijisardo. A po baralo than sijisardo, godova si savo šunel o lafi thaj sigo lošalimasa lela, aj najle darhina ana peste, desar si binajstalo, ta kana si đi bilačhipe ja les traden pašo lafija, sigo tradel pes po bezeh. A sijisardo ano kare, godova si savo šunel o lafi, aj e pharipe akale themesko thaj xoxadipe barvalimasko tasaven o lafi thaj bi bijanimasko ačhel. A sijisardo pe lačhi phuv, godova si savo šunel o lafi thaj haljarel, savo, akana, vi bijanipe bijanel, thaj anel jekh po šel, a jekh po šovardeš, a jekh po trianda. Aver paramiči mothovda lenge vakerindoj: o Thagaripe badalesko si sar o manuš kaj sijisarda lačhi kučin ane umal pli. A kana e manuša zasute avilo olesko dušmano thaj sijisarda o kukolji po điv, thaj đelo. A kana inklilo o điv thaj bijanipe anda, atoska mothovda pes o kukolji. Atoska avile e kandine e kherutneske thaj phenđe leske: Barutnea, na li tu lačhe kučin sijisardan pe umal tiri? Kotar, akana, o kukolji? A vov lenge phenđa: O dušmano manuš godova čerđa. A e kandine leske phenđe: Mange li, akana, te đa te ikala les? A ov phenđa: Na, te na ka ma ikalindoj o kukolji ikala kethane lesa vi o điv. Meken nek barjon solduj kethane đi o čhinipe; a ano vaxto čhinimasko ka phenav e čhinutnenge: Čiden majanglal o kukolji thaj phanden les ane dreza ta te phabarel pes, a o điv inđaren ani mli đivutni. E aver paramiči mothovda lenge vakerindoj: O Thagaripe badalesko si sar e kučin morjaki savi lel o manuš thaj sijisarel pe pli umal. Godova si, čačipe, najcikni si katar e sa kučin, aj kana barjol, najbari si katar e sa vunatimata, thaj ovela kaš kaj e čiriklja badaleske avena thaj thanardon pe leske krangore. E aver paramiči mothovda lenge: O Thagaripe badalesko si sar e majava savi lel e đuvli thaj čhivel ano trin balaje varesere đikaj sa ni šukljol. Sa akava ano paramiča vakerel o Isus e manušenge, thaj bi paramičengo khančik lenge ni vakerda. Te pherel pes so si vakerdo prekal o profeto savo vakerel: Ka putrav ano paramiča o muj mlo, ka vakerav o garavdo katar o kerdipe e themesko. Atoska mekla o Isus e selore, thaj avilo ano kher. Thaj ale đi oleste e sikljovne leskere vakerindoj: Mothov amenge e paramiči e kukoljestar pe umal. A vov irisarindoj phenđa lenge: Savo sijisarel lačhi kučin, godova si o Čhavo e Manušesko; A e umal si them; a e lačhi poćin si e čhave Thagaripeske, a o kukolji si e čhave đungalimaske. A o dušmano savo les sijisarda si o beng; a čhinipe si agoripe e themesko, a o čhinutne si e phakale. Sar kaj, akana, o kukolji so čidel pes thaj jagasa phabarel, geja ka ovel pe agor akale themesko. Ka bičhalel o Čhavo e Manušesko e phakalen plen, thaj ka cidel andar o thagaripe lesko sa tradimata pe bezeha thaj godolen save čeren bikrisipe. Thaj ka čhudel len ane jagaći bov; gothe ka ovel rovipe thaj krcipe dandengo. Atoska e čačutne ka strefisaren pes sar o kham ano Thagaripe ple Dadesko. Kas isi kana te šunel, nek šunel! Panda si o Thagaripe e badalesko sar barvalipe garavdo ano umal, savo arakhavindoj, o manuš garavđa thaj katar o lošalipe plo đelo thaj sa so sinele bićinđa thaj ćinđa godi umal. Panda si o Thagaripe e badalesko sar manuš trgovco savo rodel lačhe kleja. Ta kana arakhlja jek butmoldi kučin klej, đelo thaj bićinda sa so sinele thaj ćindala. Panda si o Thagaripe e badalesko sar safin savi čhudel pes ano derav thaj čidel e mačhen katar sakoj njamo. Kana pherdol pes, ikalen la pe phuv zalo pani thaj, bešindoj, alosaren e lačhe ane vasore, a e đungale čhuden avrial. Geja ka ovel po agor e themeskosko: ka inklen e phakale thaj ka ulaven e džungalen e čačutnendar, thaj ka čhudel len ane jagaći bov; gothe ka ovel rovipe thaj krcipe dandengo. Phenđa lenge o Isus: Haljaren li sa akava? Phende leske: Va, Devljutneja! A vov lenge phenđa: Godolese sakoj lilvarno savo sićilo o Thagaripe e badalesko sar ćherutno savo ikalel andar e riznica pli nevo thaj purano. Thaj kana agorisarda o Isus e paramiča akala, đelo athar. Thaj avindoj ano plo bijandimasko than, sikavela len ane sinagoga lengiri geja kaj ćerena baripe lesa thaj vakerena: Katar akalese but gođovaripe akava thaj zor? Naj li akava e kaštunaresoro čhavo? Na vikinelpe li e daj lesiri Marija, thaj e phrala lesere o Jakov thaj o Josija thaj o Simon thaj o Juda? Thaj e phenja leske naj li sa ke amende? Kotar leske sa akava? Thaj tradena pes pe bezeha lestar. A o Isus lenge phenđa: Naj profeto bi paćivako sem ano than bijandimasko plo thaj ano kher plo. Thaj ni čerda gothe bute ačharhimata bašo lengo bipaćajpe. An godova vaxto avilo o krlo đi o Irod štarthagarunesko e Isusestar. Thaj phenđa ple kandinenge: Godova si o Jovan Bolipesarutno, vov uštino taro mule, thaj godolese ćerel ačharhimata. Kaj o Irod astarda e Jovano, phangla les thaj ćhudla ano phandipe paši Irodijada, e romni Filiposki ple phraleski; Kaj leske o Jovan vakerela: našti tu ola te le. Thaj mangla te mudarel les, aj darajlo e selorestar; kaj inćarena les baš o profeto. A kana sasa bijandimasko dive e Irodosko, khelel e ćhej e Irodijaki anglal lende thaj kerda šukaripe e Irodeske. Godolese pa xalja sovlja thaj dija lafi kaj ka dela so god mangela. A oj, sikavdi katar e daj pli, phenđa: De ma akate po čaro o šero e Jovan Bolipesarutnesko. Thaj dukhardilo o thagar; aj ando xape sovlji thaj godolengo save xale pile lesa, vakerda te den lake. Thaj bičhalda ta čhinde e Jovano ano phandipe. Thaj ande o šero lesko po čaro, thaj dije e ćhijake thaj inđarda ple dajake. Thaj avindoj e sikljovne leske, lije o trupo lesko thaj parunde les; thaj avile ta mothovde e Isuseske. Thaj ašundoj o Isus, đelo gothar barkasa ano čučo than korkoro. A kana godova šunda o seloro, lijape pala leste phirindoj andar e forura. Thaj inklindoj o Isus dikhlja but seloro, thaj kovljilo pe lende, thaj sastarda e nasvalen lengeren. A anglal e rat ale paše leske e sikljovne leskere vakerindoj: Akate si čučo than, a ake si majpalal; mukljar e manušen nek đan ano gava te ćinen peske xape. A o Isus lenge phenđa: Naj trubune te đan; den lenge tumen nek xan. A on leske phende: Najamen akate đi numa pandž mare thaj duj maćhe. A ov phenđa: Anen len mange akari. Thaj vakerda e selorenge te bešen pe ćar, ta leja godola pandž mare thaj e duj maćhe, thaj dićhindoj po badali baxtarda, thaj phađindoj dija e sikljovnenge, a e sikljovne e selorese. Thaj xale savore thaj čalile, thaj ćidle kotora kaj aćhile dešuduj krošnice pherde. A godola so xale sasa manuša trujal e pandž milje, sem đuvlja thaj ćhavore. Thaj sigo tradla o Isus ple sikljovnen te den ani barka thaj te đan anglal leste pe okoja rig đikaj ov mukljarel e selore. Thaj mukljarindoj e selore, inklilo pe plajin korkoro te ruđil pes. A raćajlo thaj sasa gothe korkoro. A e barka sasa ake maškar o derav, daravdi e talasendar, kaj sasa opipeuni balval. A ano štarto arakhajpe e raćako đelo lende o Isus phirindoj po derav. Thaj dićhindoj les e sikljovne kaj đal po derav, darandile vakerindoj: Godova si angladićhipe; thaj katar e dar dije vika. A o Isus lenge sigo phenđa vakerindoj: Ma daran, me sem, ma daran! A o Petar irisarindoj phenđa leske: Devljutneja, te san tu, phen mange te avav tuke po pani. A vov phenđa: Phir! Thaj iklindoj andar e barka, o Petar đala po pani te avel e Isusoske. Aj dićhindoj zorali balval darajlo, thaj lija te tasavdol, dija vika vakerindoj: Devljutneja, inkal man! Thaj sig o Isus lunđarindoj o vast astarda les, thaj phenđa leske: Zalapaćamneja, sose sungajan? Thaj kana dije ani barka, aćhadili e balval. A on ani barka ale paše thaj pele pe čanga leske vakerindoj: Čače tu sijan o Čhavo e Devlesko. Thaj nakhlindoj avile ani phuv e genisaretsko. Thaj penđarindoj les e manuša andar godova than, bićhalde pe sa godova trujalipe, thaj ande leske sa e nasvalen. Thaj ruđisarde les kaj numa te azbaven e pođa katar o fustano lesko; thaj save azbavde pes sastile. Atoska ale paše e Isusoske e lilvarne thaj e Fariseja katar o Jerusalim vakerindoj: Sose e sikljovne tire nakhen i tradicija e puranengi? Kaj ni thoven pe vasta kana maro xan. A ov irisarindoj phenđa lenge: Sose thaj tumen nakhen o vakeripe e Devlesko vaš tradicija tumari? Kaj o Devel čhinada vakerindoj: Paćivalisar e dade thaj e daja; thaj savo džungarel e dade ja e daja merimasa te merel. A tumen phenen: Te savo phenel e dadeske ja e dajake: pherdipe si godova soa ka tut me šaj te mažutiv; Šaj thaj te na paćivalisar e dade ple thaj e daja. Thaj čhinaden o vakeripe e Devlesko vaš tradicija tumari. E dujemujenge, lačhe baš tumenge anglaldikhljarda o Isaija vakerindoj: Pašol mange o seloro akava ple mujenca thaj voštenca man paćivalisaren, a o vilo lengo dur si mandar. Aj andodilipe man paćivalisaren sićindoj džanglimata thaj vakerimata e manušenge. Thaj akharindoj e selore phenđa lenge: Šunen thaj haljaren. Na mahril e manuše so đerdini ano muj; aj so inkjol andar o muj godova mahril e manuše. Atoska ale paše e sikljovne leske thaj phende lese: Đane li kaj e Fariseja, ašundoj godova lafi, kovlile peske? A ov irisarindoj phenđa: Sakoj kaš savo ni sijisarda o Dad mlo badalesko, ka xasavel pes. Muken len, o korore si e hulaje e kororenđe; a o kororo e korore te legarđa, sovduj ani xar ka peren. A o Petar irisarindoj phenđa leske: Mothov amenge akaja paramiči. A o Isus phenđa: Te na li sen vi tumen panda bihaljarutne? Sar panda ni đanen kaj sa so đerdini ano muj đal ano vođi thaj čhudel pes avrial? A so inkljol andar o muj inkljol andar o vilo, thaj godova mahril e manuše. Kaj andar o vilo ikljen e đungale ginda, mudaripe, anglačumidipe maladipe, čoripe, xoxamne mothojba, mahripe. Thaj akava si so mahril e manuše, a e bithode vastenca te xalpe ni mahril e manuše. Thaj iklindoj gothar o Isus đelo ane agora e tirskake thaj sidonoske. Thaj dikh, e đuvli Hananejka inklili andar akala agora thaj dija vika leske vakerindoj: Maznosar ma, Devljutneja, čhavo e Davidosko, e ćheja mla but mučil o beng! A ov lake ni irisarda ni lafi. Thaj paše ale e sikljovne leskere, ruđina les vakerindoj: Mukljar la, kaj dela vika pala mende. A ov irisarindoj phenđa: Me sem bičhaldo numa e našalde bakrenge e Izrailjeskere khereske. A oj ali paše peli pe čanga leske vakerindoj: Devljutneja, mažutisar man! A vov irisarindoj phenđa: Naj lačhe te lel pes o maro e ćhavorendar thaj te ćhudelpe e džuklenge. A voj phenđa: Va, Devljutnea! Aj vi e đućela xan katar e prušuka kaj peren e astalestar lengere barutnendar. Atoska irisarda o Isus thaj phenđa lake: O đuvlije, baro si o paćape tiro; nek tuke ovel sar mange! Thaj sastili e ćhej laki katar godova časo. Thaj đapeindoj o Isus gothar, avilo pe Galilejosko derav, thaj iklindoj pe plajin, bešlo gothe. Thaj ale paše leske but seloro savo sinele pesa bange, korore, lalore, sakata thaj but aver, thaj pašljarde len anglal e pre e Isusoske, thaj sastarda len, ađaar kaj o seloro barikindilo, dićhindoj e kašuken kaj šunen, e laloren kaj vakeren, e sakaten sastarde, e bangen kaj đan, e kororen kaj dikhen; thaj ašarisarena e Devle e Izrailjeske. A o Isus akharindoj e sikljovnen plen phenđa: Dukhalama e selorese, kaj ake trin dive ačhen ke mande thaj najlen so te xan; a najsem manglino te mekav len bokhale te na malaksin po drom. Thaj phende leske e sikljovne leskere: Katar amenge ani drmina edobor mare kaj te čaljardon edobor seloro? Thaj phenđa lenge o Isus: Kobor mare isi tumen? A on phende: efta, thaj zala mačhore. Thaj vakerda e selorese te bešen ki phuv. Thaj lelja okola efta mare thaj maćhe, thaj bahtarindoj, phaglja thaj dija ple sikljovnenge, a e sikljovne e selorese. Thaj xalje savore thaj čajlile; thaj ćidle kotora so aćhile efta krošnice pherde. A godola kaj xale sesa sine štar milje manuša, sem đuvlja thaj ćhavore. Thaj muklindoj e selore, dija ane barka thaj avilo ane agora e magdaleske. Thaj ale paše e Fariseja thaj sadukeja zumavindoj les rodle te mothovel lenge o semno e badalestar. A ov irisarindoj phenđa lenge: Raćate vakeren: ka ovel putardo, kaj si o badali lolo. Thaj sabajle: avdive ka ovel vrontipe, kaj si o badali lolo thaj trundo. E dujemujengere, o muj e badalesko đanen te penđaren, a semne e vaxtoske naštisaren? Bijanipe đungalo thaj anglačumidino rodel o semno, thaj ni ka del pes leske o semno sem semno e Jone profetosko. Thaj meklindoj len đelo. Thaj e sikljovne leske đapeindoj pe okoja rig, bisterde te len maro. A o Isus lenge phenđa: Arčinen thaj araćhen tumen e majavatar e Farisejoski thaj e sadukejoski. A on dije godi ana peste vakerindoj: Godova si kaj maro ni lejam. A o Isus haljarindoj phenđa lenge: So den godi ana tumende, zalapaćajutne, so maro ni lejen? Sar pana ni haljaren, ni inćaren ane godi pandž mare pe pandž milje, thaj kobor krošnice čidlen? Ni okola efta mare pe štar milje, thaj kobor krošnice čidlen? Sar ni haljaren thaj tumenge ni phendem baš o mare, aj te arakhen tumen e majavatar e Farisejoski thaj e sadukejoski? Atoska haljarde kaj ni phenđa te arakhen pes e majavatar e mareski, aj taro sikavipe e Farisejengo thaj e sadukejengo. A kana avilo o Isus ane agora e Kesarije Filiposi, phučla plen sikljovnen vakerindoj: So mandar vakeren o manuša ko si o Čhavo e Manušesko? A on phende: Jekhune vakeren kaj san o Jovan Bolipesarutno, a aver kaj san o Ilija, a aver palem o Jeremija, aj savo e profetondar. Phenđa lenge o Isus: A tumen so phenen ko sem me? A o Simon Petar irisarda thaj phenđa: Tu san o Hristos, o Čhavo e Devlesoro e đivdesoro. A o Isus irisarindoj phenđa leske: Kovljardo san, Simone, čhavo e Jonesko! Kaj o trupo thaj o rat ni phučarde tuke godova, aj o Dad mlo savo si po badalija. A vi me tuke phenav kaj san tu o Petar, thaj pe godova bar ka vazdav e Khangiri mli, thaj o udar e bengenge jagako na ka vazdivela. Thaj ka dav tut e klide e Thagaripeske badalesko: thaj so phandes pe phuv ka ovel phandlo pe badalura; thaj so putares pe phuv ka ovel putardo pe badalura. Atoska daravda e sikavnen plen kaj khanikaske te ni mothoven kaj si ov o Isus Hristos. Katar godova leja o Isus te mothovel ple sikljovnenge kaj leske trubul te đal ano Jerusalim, thaj but ka mudardol e phurederutnendar thaj e anglunerašajendar thaj e lilvarnendar, thaj mudardo ka ovel, thaj o trito dive ka uštel. Thaj lindoj les o Petar lija te aćhavel les vakerindoj: Devla arak, Devljutneja! Godova ni ka ovel tuke! A ov irindoj phenđa e Petroske: Đa mandar, benga! Bezehalo san mange, kaj ni de godi so si e Devlesko thaj so si e manušengo. Atoska o Isus phenđa ple sikljovnenge: Te manglja ko pala mande te avel, nek mukel pes pestar, thaj lel o trušul plo thaj đal pala mande. Kaj ko mangel o đivdipe plo te arakhel, ka našalel les; a te ko našalel o đivdipe plo baše mande, ka arakhel les. Kaj savo si lačhipe e manušeske te o sa them lel a ple ođeske kerel đungalipe? Ja savo kinipe ka del o manuš baš ođi plo? Kaj ka avel o Čhavo e Manušesko an baro dive ple Dadesko pe phakalenca, thaj atoska ka irisarel sarsavoneske pe kotora leske. Čače tumenge phenav: Isi nesave maškar tumende so ačhen kate save ni ka zumaven o meripe đikaj ni dićhen e Čhave Manušeskere kaj avel ano Thagaripe plo. Thaj pale šov dive lija o Isus e Petre thaj e Jakove thaj e Jovano, phrale leskere, thaj inkalda len pe uči plajin korkore. Thaj averćhandilo ulo anglal lende, thaj strefisajlo o muj lesko sar o kham, a e fustanja leske ćerdile parrne sar rošlipe. Thaj dikh, mothodilo lenge o Mojsije thaj o Ilija save lesa vakerde. A o Petar irisarindoj phenđa e Isuseske: Devljutneja, lačhe si amenge akate te ova; te manglan te ćeras akate trin khasora: tuke jekh, thaj e Mojsijaske jekh, thaj jekh e Ilijaske. Đikaj ov pana vakerela, e nuvera strefimi ućharda len, thaj dikh, krlo andar e nuvera savo vakerel: Akava si o Čhavo mlo čumidino, savo si pe mlo kamipe; les šunen. Thaj ašundoj e sikljovne pele mujea natele thaj but darajlje. Thaj alo paše o Isus astarda len thaj phenđa: Ušten thaj ma daran. A on, vazdindoj pe jakha, khanika ni dikhle sem e Isuse korkore. Thaj kana huljona e plajinatar, čhinada lenge o Isus vakerindoj: Khanikaske ma mothoven so dikhlen đikaj o Čhavo e Manušesko andar e mule ni đlvdinisavol. Thaj phučle les e sikljovne leskere vakerindoj: Sose, akana, e lilvarne phenen kaj o Ilija majanglal trubul te avel? A o Isus irisarindoj phenđa lenge: O Ilija čače ka avel majanglal thaj sa ka laćharen. Numaj phenav tumenge kaj o Ilija akana avilo, thaj ni penđarde les, aj čerde lesa so mangle; ađaar vi o Čhavo e Manušesko ka mudardol lendar. Atoska haljarde e sikljovne kaj lenge phenđa baš o Jovan Bolipesarutno. Thaj kana avile e selorese, alo đi o leske o manuš thaj pelo pe čanga anglal oleste vakerindoj: Devljutneja, maznosar e čhave mle, kaj si čhonutari thaj mučil pes xoljarne; kaj but droma perel ani jag, thaj but droma ano pani. Thaj andem les tire sikljovnenge thaj naštisarde te sastaren les. A o Isus irisarindoj phenđa: O bijanipe bipaćamno thaj rumime! Đikote ka ovav tumenca? Đikote tumen ka nakhavav? Anen le akari mange. Thaj daravda les o Isus; thaj o beng inklilo andar leste; thaj sastilo o ternoro katar godova časo. Atoska ale paše e sikljovne e Isuseske thaj korkore phenđe leske: Sose amen naštisardam ole te tradas? A o Isus lenge phenđa: Bašo bipaćajpe tumaro. Kaj čače tumenge phenav: Te isitumen paćape kobor e kučin morjaki, ka phenen e plajinake akalake: nakh akatar okori, thaj ka nakhel, thaj khanči tumenge ni ka ovel bišajune. A kava bijanipe ni tradla pes sem ruđipnasa thaj postimasa. A kana phirde pe Galileja, phenđa lenge o Isus: O Čhavo e Manušesko ka ovel muklo ano vasta e manušenge; Thaj ka mudaren les, ta o trito dive ka uštel. Thaj but dukhardile. A kana avile ano Kapernaum, paše ale e Petroske godola so ćinena didrahme, thaj phenđe: Sar o sikamno tumaro ni del didrahme? O Petar phenđa: Del. Thaj kana dija ano kher, angleder olestar o Isus vakerda: So de godi, Simone? E thagara e phuvjakere kastar len harači ja šulkara, ple ćhavendar ja avređenendar? Phenđa leske o Petar: E avređenendar. Phenđa leske o Isus: Viz e čhave si mukljarde. Numaj kaj len te na la po bezeh, đa po derav thaj čhude e vudica, thaj savo mačho angluno astare, le les; thaj kana putres lesko muj, ka arakhe o statiro; les le thaj de lenge baše mande thaj baše tute. Ano godova časo ale e sikljovne đi o Isus vakerindoj: Ko si, akana, najbaro ano Thagaripe e badalesko? Thaj akharđa o Isus e ćhavore, thaj čhuta les maškar olende, thaj phenđa: Čače tumenge phenav, te na irisajlen thaj oven sar e ćhavore, ni ka den ano Thagaripe e badalesko. Savo, akana, teljardol sar akava čhavoro, godova si najbaro ano Thagaripe e badalesko. Thaj savo lel jekhe asavke ćhavore maje ano anav, man lel. A savo tradel po bezeh jekhe akale tiknendar save paćan ana mande, majlačhe ka ovel leske kaj te umvlavol o bar e panjeso pese ki men, thaj te tasavdol ano xoripe e deravesko. Pharipe e themeske katar o tradipe po bezeh; kaj si trubul te oven tradine po bezeh, numaj pharipe e manušeske godoleske andar savo avel o tradipe po bezeh. Te li o vast tiro ja o plo tiro tradel po bezeh, čhin le thaj čhude tutar; majlačhe si te de ano đivdipe bango ja sakato na li te ovel tut duj vasta ja duj pre, a te čhuden tut ani jag biagorimaski. Thaj ako tiri jakh tut tradel po bezeh, ikala thaj ćhudla tutar; majlačhe si tuke jekhe jakhasa ano đivdipe te de ja te ovel tut duj jakha, a ta te čhuden tut ane bengesi jag. Dićhen te na čhon sama jekhe katar akala cikne; kaj tumenge phenav kaj e phakale lenge pe badalura saiekh dićhen o muj mle Dadesko e badalesko. Kaj o Čhavo e Manušesko avela te inkalel so našaldilo. So tumenge kerel pes? Te jekh manuš isile šel bakre thaj našaldol jekh katar lende na li mekel enjavardeš thaj enja ane plajin, thaj đal ta rodel godoja e xasardi? Thaj te kerel pes kaj arakhlala, čače tumenge phenav kaj lake lošalel pes majbut, katar godola enjavardeš thaj enja save ni našaldile. Ađaar naj o kamipe tumare Dadesko e badalesko te perel jekh katar akala cikne. Kaj li kerel bezex o phral tiro, đa thaj vaker lese korkoro, ako kandel tut, lijan e phrale tire. Kaj li ni kandel tut, le tusa pana jekhe ja dujen kaj pe muja duj ja trin dićhutnengo ačhel sakoj lafi. Kaj li len ni kandel, phen e Khangirjake; a kaj li ni kandel ni e Khangiri, nek ovel tuke sar butedevleskoro thaj šulkari. Čače tumenge phenav: Sa so phanden pe phuv ka ovel phandlo po badali, thaj sa so putren pe phuv ka ovel putardo po badali. Palem tumenge čače phenav: Kaj duj katar tumende jekhipe čeren pe phuv ano fijesavo šej baš savo ruđisavon, ka del lenge mlo Dad savo si pe badalura. Kaj si duj ja trin čidime ano alav mlo, gothe sem vi me maškar lende. Atoska olese paše alo o Petar thaj phenđa: Devljutneja, kobor droma, te čerda bezeh o phral mlo, te jertisarav lese? Đi efta li droma? Phenđa leske o Isus: Ni phenav tuke đi efta droma, aj đi eftavardeš droma po efta. Godolese si o Thagaripe badalesko čhutino e manušeske thagareske savo mangla kaj te đenel pes ple kandinenca. Thaj kana lija te đenel, ande leske jekhe kamutne katar e deš milje talanata. Thaj avune kaj ov najsale sosa te iril, čhinada o barutno lesko te bićinen les thaj e romnja leskera vi e čhavoren thaj sa so sinele, thaj te poćinel pes. Aj o kandino godova pelo pe čanga leske vakerindoj: Barutnea, ađučar man, thaj sa ka irinav tuke. A o barutno dukhardilo pes pe okova kandino, thaj mekla les ta o kamipe leske jertisarda. A kana inklilo o kandino godova, arakhla jekhe katar ple amale savo leske kamela šel dinara, thaj astarda les thaj ačhilo te tasavel le vakerindoj: De mange so kames! Pelo o amal leskoro anglal e pre leske thaj ruđila les vakerindoj: Ađučar ma, thaj sa ka iriv tuke. A ov ni mangla, aj les inđarda thaj ćhudla ano phandipe đikaj ni iril o kamipe. Dićhindoj e amala leske godova čeripe, dukhardile but, thaj đapeindoj, mothode ple barutnese sa so ćerdilo pes. Atoska les akharda o barutno lesko, thaj phenđa leske: Đungalo kandineja, sa o kamipe godova jertisardem tuke, kaj ruđisardan man. Naj li trubuja kaj vi tu te kovljardo pe plo amal, sar vi me pe tute so kovljardiljem? Thaj xoljardilo pes o barutno lesko, thaj dija les e mučutnenge đikaj ni irisarda sa so leske kamela. Ađaar vi o Dad mlo e badalesko ka ćerel tumenge, te na jertisarden sakoj ple phraleske katar o vilo plo sa e čerde bezeha lenge. Thaj kana agor dija o Isus e lafija akala, đelo andar e Galileja, thaj avilo ane agora e judejeske prekal o Jordano. Thaj pala leste đana e selore but thaj sastarda len gothe. Thaj paše ale leske e Fariseja te zumaven les, thaj phende leske: Si li muklo e manušeske te mukel e romnja pla baš sakoj doš? A ov irisarindoj phenđa lenge: Na li drabarden kaj len o Devel katar o anglipe čerda murš thaj đuvli? Thaj phenđa: Ando godova ka mukel o manuš ple dade thaj e deja, thaj ka astajvol ple romnjake, thaj ka oven duj jekh trupo, ađaar kaj naj o dujorre, thaj jekh trupo; a so o Devel phangla o manuš te na ulavel. Phende leske: Sose odothe o Mojsije vakerda kaj te del pes o lil muklimasko thaj te voj mukel pes? Phenđa lenge: Tumenge o Mojsije mekla po bimilope tumare vilesko te mukljaren tumare romnjen; a andar o anglipe nasine ađaar. A me tumenge phenav: Ko mukel ple romnja, sem bašo anglačumidipe, thaj unsuril pes averasa, kerel anglačumidipe; a ko unsuril pes mukljutnasa, kerel anglačumidipe. Phende leske e sikljovne leskere: Te si ađaar e manušeske e romnjasa, naj lačhe te unsuril pes. A ov lenge phenđa: Našti savore te len godova lafi đi godola savenge dindilo. Kaj isi bizurale save si ađaar bijande andar o vođi e dajako; a isi bizurale save e manuša bizurarde; a isi bizurale save korkore pes bizurarde bašo Thagaripe e badalesko. Ko šaj te lel nek lel! Atoska ande leske e čhavoren te čhuvel e vasta pe lende, thaj te ruđil pes; a e sikljovne tradle len. A o Isus phenđa: meken e čhavoren, thaj ma ačhaven len te aven mande, kaj gasavenge perel o Thagaripe e badalesko. Thaj čhuta e vasta pe lende, ta đelo odothar. Thaj dikh, khonik paše alo thaj phenđa leske: Sikamneja gudleja, savo lačhipe te čerav te ovel man đivdipe biagorimasko? A ov phenđa leske: Sose akharema gudleja? Khonik naj gudlo sem jekh Devel. A te manglan te deš ano đivdipe inćar e ćhinadimata. Phenđa leske: Save? A o Isus phenđa: Ma mudar; ma ker anglačumidipe; ma čor; ma mothov xoxamne; Paćiv e dade thaj e daja; thaj čumid e najpaše tire sar tut korkore. Phenđa leske o ternoro: Sa akava arakhlem katar o ternipe mlo; so panda trubul maje? Phenđa leske o Isus: Te manglan prelaćho te oves, đa bićin sa so situ thaj de e čororenge, thaj ka ovel tut barvalipe po badali, ta phir pala mande. A kana šunda o ternoro o lafi, đelo dukhardo; kaj sasa les but barvalipe. A o Isus phenđa ple sikljovnenge: Čače tumenge phenav kaj si phare e barvaleske te del ano Thagaripe e badalesko. Thaj palem tumenge phenav: Majloke si e devake te nakhel andar e suvjake kana nali e barvaleske te del ano Thagaripe e Devlesko. A kana godova šunde e sikljovne, čudavena pes but vakerindoj: Ko, akana, šaj te inkalel pes? A o Isus dićhindoj pe lende, phenđa lenge: E manušenge si akava bišajune, a e Devleske si sa šajune. Atoska irisarda o Petar thaj phenđa leske: Eke, amen meklam sa thaj pala tute đeljam; so, akana, amenge ka ovel? A o Isus lenge phenđa: Čače tumenge phenav kaj tumen save lijen pala mande te đan, ano nevo đivdipe, kana bešel o Čhavo e Manušesko pe skamin barederimaski pli, ka bešen vi korkore pe dešuduj skamina thaj ka krisisaren upral e dešuduj njamora e Izrailjeske. Thaj sakoj savo mekla o kher, ja e phralen, ja e phenjen, ja e dade, ja e daja, ja e romnja, ja e čhavoren, ja e phuv, ando alav mlo, ka lel šel droma agaći, thaj ka lel đivdipe biagorimasko. Numaj bute anglune ka oven palune thaj e palune anglune. Kaj si o Thagaripe e badalesko čhutino e manušeske kherutneske savo sabajle inklel te lel bućarnen ane drakhalina ple. Thaj ćhinavindoj e bučarnenca po dinari po đive, bičhalda len ane drakhalina ple. Thaj iklindoj trujal o trito časo, dikhla averen kaj ačhen po trgo bibućako. Thaj lenge phenđa: Đan vi tumen ane drakhalina mle, thaj so si vorta ka dav tumenge. Thaj von đele. Thaj palem iklindoj trujal o šovto thaj enjato časo, čerda ađaar. A trujal o dešujekto časo iklindoj, arakhla averen kaj ačhen bibućako thaj phenđa lenge: So ačhen akate soro dive bibućako? Phende leske: Kaj amen khoni ni lel. Phenđa lenge: Đan vi tumen ano mle drakhalina, thaj so ka ovel vorto ka len. A kana sas raći, phenđa o barutno e drakhalinako e čobanoske pleske: Akhar e bućarnen thaj de lenge e počini lindoj katar e palune đi e anglune. Thaj avindoj save si trujal o dešujekto časo linde, lije po dinari. A kana avile e anglune, dije godi kaj ka majbut ka len, thaj lije vi on po dinari. Thaj lindoj roptaha po kherutno. Vakerindoj: Ake, akala palune jekh časo čerde, thaj lije kobor amen save inđardam pharipe divesko thaj pećaripe. A ov irisarindoj phenđa jekheske katar lende: Amala, ni čerav tuke bičačipe. Na li ćhinadan mancar po dinari? Le tiro thaj đa; a me mangav vi akaleske e paluneske te dav sar thaj tuke. Ja sar me najsem zoruno an mlo te čerav so mangav? Sar si e jakh tiri džungali so me sem lačho? Ađaar ka ovel o paluno angluno thaj o angluno paluno; kaj si but akharde a zala si alosarde. Thaj đapeindoj o Isus upre ano Jerusalim, lija korkore po drom e Dešudujoren sikljovnen, thaj phenđa lenge: Ake ka đa upre ano Jerusalim, thaj o Čhavo e Manušesko ka ovel dindo e anglunerašajenge thaj e lilvarnenge; thaj ka krisisaren les po meripe; Thaj ka muken les e butdevlesereske te prasan leske thaj te maren les thaj te buhljaren; o tritodive ka đivdinisavol. Atoska leske paše ali e daj e ćhavengi Zevedejevengi ple ćhavenca perindoj pe čanga leske thaj ruđisarindoj les baš khanćeske. A ov lake phenđa: So mange? Phenđa leske: Phen te bešen akala mle duj čhave, jekh pe daxno rig tuke, a jekh pe zervo rig tuke, ano thagaripe tiro. A o Isus irisarindoj phenđa: Ni đanen so roden. Šaj li te pijen e taxtaj savi me ka pijav thaj te boles tut bolipnasa savesa me bolavma? Phende leske: Šaj. Thaj phenđa lenge: E taxtaj, akana, mli ka pijen thaj bolipnasa savesa me bolav ma ka bolen tumen; numaj te bešen mange pe daxni rig thaj zervo rig, naj mlo te dav, aj savenge laćharda o Dad mlo. Thaj ašundoj godova e dešore, xolajle pe godola duj phrala. A o Isus akharindoj len phenđa: Đanen kaj e šerune e selorenge barutinen lenca thaj e baredera thagaren upral lende. Te na ovel ađaar maškaro tumende; aj savo mangel te ovel baro maškar tumende, nek tumenge ovel kandino. Thaj savo mangel maškar tumende te ovel angluno, nek tumenge ovel kandino; Sar so ni o Čhavo e Manušesko ni avilo te kanden leske, aj te kandel thaj te del o đivdipe plo ano ćinipe baš butenge. Thaj kana on inklena andar o Jerihon, pala leste lijepe bute selore. Thaj dikh, duj korore bešena pašo drom, thaj ašundoj kaj o Isus nakhel, dije vika vakerindoj: Maznosar amen, Devljutnea, ćhaveja e Davidosko! A e selore len daravena te ačhen; a on pale majbut dije vika vakerindoj: Maznosar amen, Devljutnea, ćhaveja e Davidosko! Thaj aćhindoj o Isus akharda len, thaj phenđa: So mangen te čerav tumenge? Phende leske: Devljutnea, te phravđon e jakha amare. Thaj kovlilo o Isus, thaj azbavda e jakha lengere, thaj sigo dikhle e jakha lengere, thaj đele pala leste. Thaj kana ale paše e Jurusalimoske thaj avile ano Vitfago karing e Maslinoski plajin, napal o Isus bičhalda duje sikljovnen. Vakerindoj lenge: Đan ano gav kaj si karing tumende, thaj sigo ka arakhen e hernja phandli thaj e here lasa; phravenla thaj anenla maj. Thaj te tumenge ko vakerel so, phenen kaj on trubun e Devljutneske; thaj sigo ka bićhalen len. A akava sasa sa kaj te pherol pes so si phendo prekal o profeto savo vakerel: Phenen e ćhejake e Sionovake: Ake o Thagar ćiro đal tuke kovlo, thaj inklel pe herni, thaj po her, ternoro ladavimasko đuvdinutno. A e sikljovne đele thaj čerde sar lenge so vakerda o Isus. Ande e hernja thaj e here, thaj čhute pe lende o fostanja ple, thaj bešlo pe lende. A o seloro but đene buljarde o fostanja ple po drom, a e avera čhinena e krangore katar e kašta thaj buljarena po drom. A o seloro, savo đala anglalo leste thaj palo leste, dena vika vakerindoj: Osana e Ćhaveske e Davidosko! Baxtardo savo avel ano alav e Devljutnesko! Osana po ućipe! Thaj kana ov dija ano Jerusalim, darandilo soro foro vakerindoj: Ko si godova? A o seloro vakerda: Akava si o Isus, profeto andar o Nazaret e Galilejosko. Thaj dija o Isus ano hramo e Devlesko, thaj tradla sarijen save bikinena thaj kinena ano hramo, thaj perada e astala godolenge kaj arćhinena e love, thaj e bešalde godolenge so bikinena golubura. Thaj phenđa lenge: hramome si: O kher mlo – kher ruđipasko nek akharel pes; a tumen čerden lestar barastuni xuv čorengi. Thaj ale paše leske e bange thaj e korore ano hramo, thaj sastarda len. A kana dikhle e anglunerašaja thaj e lilvarne sikavimata save čerda, thaj e čhavoren kaj dena vika ano hramo thaj vakeren: Osana e Ćhaveske e Davidosko, xolisajle pes. Thaj vakerde leske: Ašune li so akala vakeren? A o Isus lenge phenđa: Va! Sar nisar ni drabarden: Andar e muja e ćhavorenge thaj so pijen čuči ćerdan tuke ašardipe? Thaj meklindoj len, inklilo avral andar o foro, ani Vitanija, thaj raćarda odothe. Sabajle irindoj ano foro bokhajlilo; Thaj dićhindoj e sumučilin jekh pašo drom avilo lake, thaj ni arakhla pe late khanči sem patra, thaj phenđa lake: Kaj nisar te na ovel tutar bijanipe đi šelberšipe! Thaj sigo šućarda pes e sumučilin. Thaj dićhindoj goda e sikade divinde pes vakarindoj: Sar sigo šućarda e sumučilin! A o Isus irisarindoj phenđa lenge: Čače tumenge phenav: Te isi tumen paćape thaj ni sungan, ka čeren na numa so ćerdilo pe e sumućilinasa, aj vi e plajinake akalake te vakerden: vazd tut thaj čhud tut ano derav, ka ćerdol pes. Thaj sa so roden ano ruđipe paćavindoj, ka len. Thaj kana dijas ano hramo thaj ačhilo te sikavel, ale paše leske e anglunerašaja thaj e phurederutne e selorenge vakerindoj: Save barederimasa godova ćere? Thaj ko tut dija godova baroderipe? A o Isus irisarindoj phenđa lenge: Vi me tumen ka phućav jekh lafi, savo te phenden mange, vi me tumenge ka phenav save barederimasa akava čerav. Bolipe e Jovanosko kotar sasa? E badalestar, ja e manušendar? A on dije godi ana peste vakerindoj: Te phendam: e badalestar, ka phenel amenge: Sose oleske, tad, ni paćajen? A te phendam: e manušendar, dara e selorestar; kaj savore e Jovano inćaren baš o profeto. Thaj irisarindoj e Isusoske phende: Ni đana. Phenđa vi ov lenge: Ni me tumenge na phenav save barederimasa akava čerav. A so tumenge ćerel pes? O manuš jekh sinele duj čhave, thaj avindoj e angluneske phenđa: Ćhaveja, đa avdive ćer buti an mli drakhalin. A ov irisarindoj phenđa: Na! Thaj pala godova dukhardilo thaj đelo. Thaj alo paše avereste phenđa pale ađaar. A ov irisarindoj phenđa: Mangav, barutnea! Thaj ni đelo. Kova si akale dujendar čerda o kamipe e dadesko? Vakerde leske: O Angluno, Phenđa lenge o Isus: Čače tumenge phenav kaj e šulkara thaj e anglačumdlja anglal tumendar ka den ano Thagaripe e Devlesko. Kaj tumenge avilo o Jovan čačune dromesa, thaj ni paćajen leske; a e šulkara thaj e anglačumidlja paćaje leske; a tumen dićhindoj godova, ni jertisaden tumen atoska te paćaven les. Aver paramiči šunen: Sasa o manuš kherutno savo sijisarda drakhalina thaj barada les barasa, thaj handlja ano leste pivnica, thaj čerda kula, thaj dija les e drakhalinarenge, thaj đelo. A kana alo paše o vaxto e ćidimasko, bičhalda e kandinen plen e drakhalinarenge te len o bijanipe lesko. Thaj e drakhalinara, astarindoj e kandinen leskeren, jekhe marde, a jekhe mudarde, a jekhe barenca čhudle. Palem bičhalda avere kandinen, majbut katar anglal, thaj čerde lenge ađaar pale. A majpalal bićhalđa lenge e čhave ple vakerindoj: Ka lađan mle čhavestar. A e drakhalinara dićhindoj e čhave, phende maškar peste: Akava si o avutno pe lesko than; phiren te mudara les, thaj te las o barvalipe lesko. Thaj astarde les, ta inkalde le avral andar e drakhalina, thaj mudarde le. Kana, akana, avela o barutno e drakhalinengo so ka ćerel e drakhalinarenge godolenge? Vakerde leske: E đungalećerutnen đungale merimasa ka mudarel, a e drakhalina ka del avere drakhalinarenge, save leske ka den bijanipe ano plo vaxto. Phenđa lenge o Isus: Sar nisar ni drabarden ano Lil: O bar savo čhudle o duvarđije, godova ulo šero e xinzatar; godova si e Devljutnestar thaj prašukar si ane amare jakha. Godolese tumenge phenav kaj tumendar ka lel pes o Thagaripe e Devlesko, thaj ka del pes e selorese savo anela bijanipe leske. Thaj kon perel pe akav bar, ka phagel pes; a pe kaste ov perel, ka xurdarel les. Thaj ašundoj e anglunerašaja thaj e Fariseja e paramiča leske, haljarde kaj lendar vakerel. Thaj zumavindoj te astaren les, darajle e selorestar, kaj inćarena les baš o profeto. Thaj irisarindoj o Isus palem lenge phenđa ano paramiča vakerindoj: O Thagaripe e badalesko si sar manuš o thagar, savo čerda bijav ple ćhaveske. Thaj bičhalda e kandinen plen te akharen e manušen ko bijav; thaj ni mangle te aven. Palem bičhalda avere kandinen vakerindoj: Phenen e akhardenge: Ake o xape mlo gatisardem, e guruva mle thaj e parvarutne čhinde si, thaj sa si gatime: aven ko bijav. A on na hajindoj đele, akava ani umal pli, a okova ani trgovina pli; A e avera astarde e kandinen leske, akušle len, thaj mudarde. Thaj kana godova šunda o thagar okova, xoljardilo thaj bićhalindoj e urumna pla, xasarda e ratvalen godolen, thaj o foro lengo phabarda. Atoska phenđa e kandinenge pirenge: O bijav si gatimo, a e akharde najsesa paćivale. Đan, akana, pe trušulime droma thaj kas araćhen, akharen len po bijav. Thaj iklindoj e kandine godola pe droma, ćidle sa saven arakhle, vi e džungalen vi e laćhen; thaj pherdili e bijaveski palata gostura. A dindoj andre o thagar te dikhel e gostonen, dikhla gothe e manuše biuravdo ane bijaveske šeja. Thaj phenđa leske: Amala, sar dijan akate bi bijaveske šeja? A ov traini. Atoska phenđa o thagar e kandinenge: Phanden leske vasta thaj e pre, ta len les thaj čhuden ano phandipe majpaluno; gothe ka vel rovipe thaj krcope e dandengo. Kaj si but akharde, aj si zala alosarde. Atoska đele e Farisaja thaj po čidipe čerde vorba sar te astaren les ano lafi. Thaj bićhalde leste e sikljovnen plen e Irodovcenca, vakerindoj: Sikamneja, đana kaj san čačutno thaj pe drom e Devlesko čače sikave thaj ni dikhe ni pe kaste, kaj ni dikhe ko si ko e manušendar. Phen amenge, akana, so tu deš godi: trubul li te da harači e thagareske ja na? Haljarindoj o Isus bižajipe lengo phenđa: So zumavena man, dujemujengere? Sikaven mange e love e haračeske. A on leske ande dinari. Thaj phenđa lenge: Kasko si akava muj thaj hramope? Phende leske: E Thagaresko. Atoska lenge phenđa: Den, akana, e thagaresko e thagareske, thaj e Devlesko e Devleske. Thaj ašundoj aćharhisajle thaj meklindoj les đele. Ano godova jekto dive ale paše leske e sadukeja, save vakeren kaj naj đivdinisaripe, thaj phučle les vakerindoj: Sikamneja, o Mojsije phenđa: Te mulo ko bi ćhavorengo, te lel o phral lesko e romnja leskera thaj te vazdel e kučin ple phraleske. An amende sasa efta phrala; thaj o angluno unsurindoj mulo, thaj najsa les bijanipe, meklja e romnja pla ple phraleske. Thaj ađaar vi o dujto, vi o trito, sa đi o eftato. A pala sarijende muli vi e romni. E đivdinisarimastar, akana, saveski katar o efta ovel romni? Kaj baš sarijenca sine. A o Isus irisarindoj phenđa lenge: Xoxadon, nađanglindoj e Lila ni e zor e Devleski. Kaj e đivdinisarimastar ni ka unsurin pes ni ka len pes, aj si sar phakale e Devleske po badali. A baš đivdinisaripe e mulengo ni drabarden li so tumenge phenđa o Devel vakerindoj: Me sem Devel e Avraamosko, thaj Devel e Isakosko, thaj Devel e Jakovesko? O Devel naj Devel e mulengo, aj e đivdengo. Thaj e manuša ašundoj barjona lengere vile leske džanglipastar. A e Fariseja ašundoj kaj phandla o muj e sadukejengo, čidisajle kethane. Thaj phučla jekh katar lende, o krisi, zumavindoj les thaj vakerindoj: Sikamneja, savo si čhinadipe najbaro ano Krisi? A o Isus leske phenđa: Čumid e Devljutne e Devle tire sa tire vilesa, thaj sa tire vođesa, thaj sa tire gođasa. Akava si angluno thaj najbaro čhinadipe. A o dujto si sar vi akava: Čumid e najpašune tire sar korkoro pes. Katar akala duj ćhinadimata umblaldol soro Krisi thaj e Profetura. A kana čidinisajle e Fariseja, phučla len o Isus vakerindoj: So den godi baš o Hristo? Kasko si čhavo? Phende leske: E Davidosko. Phenđa lenge: Sar, akana, o David les ano Đi akharel Devljutnesa vakerindoj: Phenđa o Devljutno e Devljutneske mleske: Beš mange pe daxni rig, đikaj pašljarav e dušmajen tiren baš o fundo tire prenđe? Kana, akana, o David akharel les Devljutnesa, sar si lesko čhavo? Thaj khonik leske naštine te irisarel ni lafi; ni na tromanđa ko katar godova dive te phučel les maj. Atoska o Isus phenđa e selorese thaj ple sikljovnenge vakerindoj: Pe Mojsijeski bešavni bešle e lilvarne thaj e Fariseja. Sa, akana, so tumenge phenen te ikeren, ikeren thaj čeren; aj pe kotora lenge ma đan, kaj vakeren a ni čeren, aj phanden e dreza phare thaj bilaćhe baš inđarimaske thaj ladaven po dumo e manušenge, ple najesa ni te mišin len. A sa e kotora tire čeren te dikhen len e manuša; kaj buljaren e amajlije pire thaj čeren baro res pe tire fostanja. Thaj kamen palune thana pe bijava thaj anglune thana pe sinagoge. Thaj lenge te banđol pes pe trgura, thaj e manuša te akharen len: sikamneja! A tumen ma te akhardon sikamne; kaj si ana tumende jekh Sikamno, o Hristos, a tumen sen savore phrala. Thaj tumare dadesa, ma akharen khanika ki phuv; kaj si ana tumende jekh Dad, savo si pe badalura. Ni ma te akharen tumen sikavutne; kaj si ana tumende jekh Sikavutno, o Hristos. A o najbaro maškaro tumende te ovel tumenđe kandino. Kaj savo vazdel pes ka teljarel pes, a savo teljarel pes ka vazdel pes. Pharipe tumenge lilvarnalen thaj Farisejalen, e dujemujenge, kaj phandena o Thagaripe e badalesko anglal o manuša; kaj ni tumen den andre, ni na muken te den godola save ka mangen. Pharipe tumenge lilvarnalen thaj Farisejalen, e dujemujenge, kaj xana o khera e phivljenge, thaj xoxamne ruđin tumen but; godoleske ka oven majbut krisime. Pharipe tumenge lilvarnalen thaj Farisejalen, e dujemujenge, kaj phiren o derav thaj e phuv zalo derav kaj te lena jekhe sikljovne, thaj kana len les, čeren les ćhavesa e bengenge jagasa duj droma pobare katar tumendar. Pharipe tumenge, e korore sikamnenge, save vakeren: Te ko xalpes sovli e hramosa, godova naj khanči; a ko xalpes sovli e hramoske sumnajesa, bango si. Bigođakere thaj kororalen! Kaj so si majbaro: o sumnakaj ja o hramo savo o sumnakaj sumnalil? Thaj te ko xal sovli viktimutnesa, khanči si godova, a savo xal sovli davimasa pe leste, bango si. Bigođakere thaj kororalen! Kaj so si majbaro: o davipe ja o viktimutno savo o davipe sumnalil? Savo, akana, xal sovli e viktimutnesa, xal sovli lesa thaj sa so si pe leste. Thaj savo xal sovli e hramosa, xal sovli lesa thaj Godolesa savo trail ano leste. A savo xal sovli badalesa, xal sovli skaminasa e Devleski thaj Godolesa savo bešel pe late. Pharipe tumenge lilvarnalen thaj Farisejalen, e dujemujenge, so den dešoro katar e menta thaj katar e kopra thaj katar e kima, a mekena so si najtrubune ano Kriso: o čačipe thaj mila thaj paćape; a akava trubuja te čerela pe thaj ovate na mukela pe. E hulajeske korore, save stranđin e cincare a e deva xandžvaren. Pharipe tumenge lilvarnalen thaj Farisejalen, e dujemujenge, kaj khosen avral e taxtaja thaj o čaro, a andral si pherde istaripe thaj bičačipe. Farisejo kororeja, khos najanglal andral e taxtaja thaj o čaro, te oven vi avral khosle. Pharipe tumenge lilvarnalen thaj Farisejalen, e dujemujenge, so sijen sar makhle limora, save avral dićhon šuže, a andre si pherde kokala mulikane thaj sakoj bikhoslimata. Ađaar vi tumen: avral mothoven tumen e manušenge čačune, a andral sen pherde dujemujimata thaj bikrisimata. Pharipe tumenge lilvarnalen thaj Farisejalen, e dujemujenge, kaj vazden limora e profetonge thaj prašukaren e bara čačutnenge. Thaj vakeren: Kaj amen te ova ano vaxto amare dadengo, na bi lencar aćhova ano rat e profetosko. Godolesa korkore mothona baš tumenge kaj sen čhave godolengere save mudarde e profetonen. Pheren vi tumen e mera tumare dadengi. E sapa, thaj bijanimata e aspidinenge, sar ka našen katar o krisipe baše bengengi jag? Godolese, ake, me ka bičhalav tumenge e profetonen thaj e bižajutnen thaj e lilvarnen; thaj tumen jekhen ka mudaren thaj buljaren, a e averen ka maren pe tumare sinagoge thaj ka traden katar o foro đi o foro; Te avel pe tumende sa o rat čačuno kaj si ćhordo pe phuv katar o rat e Aveljesko čačunesko đi o rat e Zaharijesko čhavo e Varahijinosko, save mudarden maškar o hramo thaj viktimutno. Čače tumenge phenav kaj sa akava ka avel po bijanipe akava. Jerusalime, Jerusalime, savo mudare e profetonen thaj ućhare barenca e bičhalden tuke, kobor droma mangljem te čidav e čhavoren tiren, sar so e khani čidel e pujen piren telal o phaka, thaj ni mangljen! Eke tumenge ka ačhol o kher tumaro čučo. Kaj tumenge phenav: Ni ka dikhenma akanatar đikaj ni phenen: Baxtarimo savo avel ano anav e Devljutnesko. Thaj iklindoj o Isus đala e hramostar, thaj ale paše lese e sikljovne leske te sikaven leske ćerdimata e hramoske. A o Isus lenge phenđa: Ni li dikhen sa akava? Čače tumenge phenav: Ni ka ačhol akate ni bar po bar savo ni ka čhordardol. A kana bešela pe plajin Maslinoski, ale paše leske sikljovne korkore vakerindoj: Mothov amenge kana godova ka ovel, thaj savo si semno tire avibasko thaj agoripe e šeleberšimasko? Thaj irisarindoj o Isus phenđa lenge: Arakhen tumen ko te ni xoxavel tumen. Kaj but đene ka aven ano alav mlo vakerindoj: Me sem o Hristos. Thaj buten ka xoxaven. Ka šunen maribe thaj krle e maribastar. Dićhen kaj te na daran; kaj trubul sa godova te ovel. Aj pana naj agor. Kaj ka uštel o seloro po seloro thaj o thagaripe po thagaripe thaj ka ovel bokhalipe thaj meripe thaj phuvjako izdrape po them. A godova si sa anglunipe e mudaripasko. Atoska tumen ka den pe munke, thaj ka mudaren tumen, thaj sa tumen o seloro ka riton bašo mlo anav. Thaj atoska bute ka traden pes po bezeh, thaj ka den avral jek avere thaj ka riton jek avere. Thaj ka inkljon but xoxamne profetora thaj ka xoxaven buten. Thaj godolese so but ka ovel bikrisope, ka šudrol o kamlipe butengoro. Aj ko nakhavel đi o agor, godova ka inkalel pes. Thaj ka vakerel pes akava evangelium e Thagaripestar po soro them bašo mothojpe sa e selorese. Thaj atoska ka ovel agor. Kana, akana, dićhen melaljipe šućarimasko, savestar vakerel o profeto Danilo, kaj ačhel po than sumnalo – ko drabarel te haljarel – Atoska save oven ani Judeja nek našen ane plajina; Thaj savo avel po ćatlo te na huljel te lel so leske si ano kher; Thaj savo ovel ane umal te na iril pes palal te lel e fostanja ple. A pharipe e khamnjenge thaj dinutne čučenge ane dive adala. Aj ruđin tumen e Devleske te na ovel o našipe tumaro ano jevend ni ano savato. Kaj atoska ka ovel baro bibaxtalipe savo na sine katar o čerdipe e themesko đi akana, ni ka ovel. Thaj te na ka čhinaven pes godola divesa, khonik ni ka aćhovel; aj bašo alosarde ka ćhinavelpe godola divesa. Atoska te tumenge ko phenel: Ake, akate si o Hristos ja okote, ma paćan. Kaj ka mothoven pes xoxamne hristora thaj xoxamne profetora, thaj ka mothoven semne bare thaj ačharhimata te bi xoxavena, te si šaj, vi e alosarden, eke tumenge mothodem anglal. Te tumenge, akana, phenen: Aketalo ani drmina, ma ikljoven. Eketalo ano sobe, ma paćan. Kaj sar so i strefin inkljel e istokostar thaj strefil đi o zapado, ađaar ka ovel vi avipe e Ćhavesko e Manušesko. Vi kaj si o trupo, gothe vi e orula ka čiden pes. Thaj sigo po bibaxtalipe godove divesa o kham ka tunjarićil pes, thaj o čhon po rošlipe ka xasarel, thaj e čerenja ka peren e badalestar, thaj e zor e badaleski ka miškon pes. Thaj atoska ka sikavdol o semno e Ćhavesko e Manušesko po badali; thaj atoska ka rovardon sa e njamura pe phuv; thaj ka dikhen e Čhave e Manušeske kaj avel pe nuvere e badaleske zorasa thaj bare ašundimasa. Thaj ka bičhalel e phakalen plen bare krlesa sar i truba; thaj ka čidel e alosarden plen štare balvalendar, katar o agor đi o agor e badalesko. A katar e sumučilin sićon o sikavipe: Kana e krangore lake ake ternjardon thaj patrinison, đanen kaj si paše o nilaj. Ađaar vi tumen kana dićhen sa akava, đanen kaj si paše anglal pe udara. Čače tumenge phenav: Akala manuša ni ka naćhen đikaj sa akava na ka ovel. O badali thaj e phuv ka nakhen, aj mle lafija ni ka nakhen. A katar o dive godova thaj katar o časo khoni ni đanel, ni phakale e badaleske, đi o Dad mlo korkoro. Kaj sar ine ano dive e Nojeske, ađaar ka ovel vi o avipe Ćhavesko e Manušesko. Kaj sar so ano dive anglal bašo tasipe e panjesa, xale thaj pile, unsurina pes thaj dindona đi godova dive kana o Noje dija ane barka, thaj ni haljarde đikaj ni avilo o baro pani thaj ingarda sa; ađaar ka ovel thaj o avipe Ćhavesko e Manušesko. Atoska ka oven duj pe umal: jekh ka lel pes, a i dujto ka ačhel. Duj đenja ka pišen pe asaveske bara; jekh ka lel pes, a i dujto ka ačhel. Araćhen, akana, kaj ni đanen ano savo časo ka avel o Devljutno tumaro. Aj akava đanen: Kana bi đanel o kherutno ano savo vaxto ka avel o čor, ka arakhel thaj ni ka del te phagel lesko kher. Godoleske vi tumen oven gatime; kaj ano savo časo ni den godi, ka avel o Čhavo e Manušesko. Ko si, akana, godova paćano thaj gođaver kandino save čhuta o barutno lesko, upral pire kherune, te del lenge xape po vaxto? Mila godole kandineske save o barutno lesko, avindoj, arakhel te ćerel ađaar. Čače tumenge phenav: ka čhuvel les upral, po sa barvalipe plo. Te li godova đungalo kandino phenđa ano vilo plo: Ni ka mlo barutno pana majlunđe avel; Thaj lel te marel e amalen plen, a xal thaj pijel e matenca; Ka avel o barutno godole kandinesko ano dive kana ni ađučarel, thaj ano časo kana ni del godi, thaj ka čhinel les ko ekvaš, thaj ka del lesko kotor e dujemujengenca; gothe ka ovel rovipe thaj krcope e dandengo. Atoska ka ovel o Thagaripe e badalesko sar deš ćhaja save lije ple lampe thaj inklile ano malavipe e unsurutneske. A pandž lendar sesa gođaver thaj pandž diline. Kaj e diline, lindoj e lampe ni lije pesa o ulje. A e gođaver lije o ulje ane vasore ple lampenca. A avune kaj o unsurutno ačhilo palal, pašlile sare, thaj zasute. A ani ekvaši rat dije vika: Ake o unsurutno avel, inkljen leske ano malavipe. Atoska uštile sa e ćhaja godola thaj prašukarde e lampe ple. A e diline phende e gođovarenge: Den amenge katar tumaro ulje, kaj amare lampe aćhadon. A e gođaver irisarde vakerindoj: Kaj te na ovela vi amenge vi tumenge, majlačhe đan e bikinutnenge thaj kinen tumenge. A kana von đele te kinen, avilo o unsurutno, thaj e gatime dije lesa ko bijav, thaj phandle o udar. A pala godova avile vi okola aver ćhaja vakerindoj: Barutnea, Barutnea! Phrav amenge. A ov irisarindoj phenđa lenge: Čače tumenge phenav, ni penđarav tumen. Arakhen, akana, kaj ni đanen o dive ni časo ano savo ka avel o Čhavo e Manušesko. Kaj sar o manuš đapeindoj ko drom akharda e kandinen plen thaj dija lenge o barvalipe plo; Thaj jekheske dija pandž talantija, a e avereske duj, a e tritoneske jekh, savoneske karing leski zor; thaj sigo đelo. A godova so lija pandž talantija đelo thaj čerda buti lenca, thaj lija pana pandž talantija. Ađaar vi godova so lija duj, lija vi ov pana duj. A savo lija jekh, đelo ta les handlja ani phuv thaj garada o rup ple barutnesko. A palo bute vaxto avilo o barutno akale kandinengo, thaj ačhilo te dikhel o đenipe lenca. Thaj alo paše godova so lija pandž talantija, anda pana pandž talantija vakerindoj: Barutnea, dijan mange pandž talantija; ake pana pandž talantija save lijem lenca. A o barutno lesko phenđa leske: Lačhe, kandineja laćheja thaj paćavneja, ano ari sana paćivalo, upral butuno ka ćhuvav tut; de ano lošalipe ple barutnesko. A paše alo vi okova so lija duj talantija thaj phenđa: Barutnea, dijan man duj talantija; ake pana duj talantija save lijem lenca. A o barutno lesko phenđa leske: Lačhe, kandineja laćheja thaj paćavneja, ano ari sana paćivalo, upral butuno ka ćhuvav tut; de ano lošalipe ple barutnesko. A paše alo vi godova so lija jekh talanti thaj phenđa: Barutnea đangljem kaj san tu zoralo manuš: ćhine kaj ni sijisardan, thaj cide kaj ni vijisardan. Ta darajlem thaj dželem garadem o talanti tiro ani phuv; thaj ake tuće tiro. A o barutno lesko irisarindoj phenđa leske: Đungalo thaj bibućarno kandino, džanglan kaj čhinav kaj ni sijisardem, thaj čidav kaj ni vijisardem. Trubuja godoleske mlo rup te de e paruvutnenge; thaj avindoj, me ka lav mle therimasa. Len, akana, lestar o talanti, thaj den godoleske so sile deš talantia. Kaj sakoneske savo isile ka del pes, thaj ka nakhavel leske; a katar godova savo najlje, thaj so isile ka lel pes lestar. A e bilaćhe kandine čhuden ano phandipe najpaluno; gothe ka ovel rovipe thaj krcope e dandengo. A kana avilo o Čhavo e Manušesko ano ašundipe plo thaj sa e sumnale phakale lesa, atoska ka bešel pe skamin ple ašundimaski. Thaj ka kiden pes anglal leste sa e selore, thaj ka ulavel len jekh averendar sar o čobano so ulavel e bakren e buznjendar. Thaj ka čhuvel e bakren pe čači rig peske, a e buznjen pe uči rig. Atoska ka phenel o Thagar godolenge so leske ačhen pe čači rig: Oven baxtarde mle Dadeske; len o Thagaripe savo si tumenge gatime katar o čerdipe e themesko. Kaj bokhajlem, thaj dijen man te xav; trošajlem, thaj dijen man te pijav; duralutno sema, a lijen man; Nango sema, thaj uravđena man; nasvalo sema, thaj dikhljardena man; ano phandipe sema, thaj avilen mande. Atoska ka irisaren leske e čačutne vakerindoj: Barutnea, kana dikhlam tut bokhale, thaj parvardam? Ja trošale, thaj dijam te pije? Kana li dikhlam tut duralutne, thaj lijam? Ja nange, thaj uravdam? Kana li dikhljam tut nasvale ja ano phandipe, thaj avilam tuke? Thaj irisarindoj o Thagar ka phenel lenge: Čače tumenge phenav: kana čerden jekheske katar akala mle najcikne phrala, mange čerden. Atoska ka phenel vi godolenge kaj ačhen pe uči rig: Đan mandar, armandine, ani jag biagorimaski savi si gatime e bengeske thaj leske phakalenge. Kaj bokhajlem, thaj ni dijena man te xav; trošajlem, thaj ni dijena man te pijav; Duralutno sema, thaj ni lijena man; nango sema, thaj ni uravdena man; nasvalo thaj ono phandipe sema, thaj ni dikhljardena man. Atoska leske ka irisaren thaj von vakerindoj: Devljutneja, kana dikhlam tut bokhale ja trošale, ja duralutne ja nange, ja nasvale ja ano phandipe, thaj ni kandljam tuke? Atoska lenge ka irisarel vakerindoj: Čače tumenge phenav: kana ni čerden jekheske katar akala najcikne, ni mange ni čerden. Thaj akala ka đan ano pharipe bimerimasko a e čačutne ano đivdipe e bimerimasko. Thaj kana dija agor o Isus sa e lafija akala, phenđa ple sikljovnenge; Đanen kaj ka baš o duj dive avel e Pasha, thaj o Čhavo e Manušesko ka ovel dindo te inzarelpe. Teg čedinde pe e anglunerašaja thaj e lilvarne thaj e phurederutne e manušenge ani palata e anglunerašajeso po alav Kajafa; Thaj phurederisajlje sar ka e Isuse ko xoxavipe te dolen thaj te mudaren. Thaj vakarena: Aj na e bare đivesestar, kaj o seloro te na vazdel pe. A kana o Isus sine ani Vitanija ano kher e Simonese e đeramnese, ali uzalo leste e đuvli e alavastrosere vasosa kuć sungasa, thaj čhorda ko šero lesoro kana beštino baš o astalja. A kana akava dikhle lesere sikljovne, čhudine vakerindoj: Sose akaja globa? Kaj šaine akaja sung te bićindol pe kuć thaj te del pe e čororenge. A haljarindoj o Isus phenđa lenge: Sose azbaven e đuvlja? Oj čerda lačho kotor pe mande. Kaj e čororen isi tumen sajekh tumencar, a man najtumen sajekh. A oj ćhorindoj e sung akaja po trupo mlo, čerda odova bašo mlo praxope. Čače tumenge phenav: Kaj god vakarel pes akava evangelium po sa o them, ka phenel pe baš liparipe lako thaj akava so voj čerda. Teg jekh e dešudujendar, po anav Juda Iskariotsko, đelo e anglunerašajenge, thaj phenđa: So ka den mange thaj me tumenge ka dav le muj? A on lese pašljarde trijanda rupa. Thaj kotar teg rodela lačho vaxto te del le muj. A ano angluno dive e bimavajake marengo, pašile e sikljovne e Isusese vakerindoj lese: Kaj mange te lačhara tuke te xas e Pasha? A ov phenđa: Đan an foro odova thaj odova, thaj phenen lese: O Sikamno phenel: O vaxto si mlo paše, ke tute ka čerav e Pasha mle sikljovnencar. Thaj e sikljovne čerde sar lenge vakerda o Isus, thaj lačharde e Pasha. A kana sine raći, bešlo baš o astali e Dešudujore sikljovnenca. Thaj đikaj xana phenđa lenge: Čače tumenge phenav: jekh tumendar ka del ma muj. Thaj dukhavindoj but, lija lese sako lendar te vakerel: Te najsem me, Devljutneja? A ov irisarindoj phenđa: Savo bolel mancar po vas ano čaro odova ka del ma muj. O Čhavo e Manušesko, akana, đal sar so si hramome baš leske; aj pharipe odole manušeske savo del muj e Čhave Manušesere; polačhe ka ma ovel lese te na bijanđol odova manuš. A o Juda, dinde mosoro lesoro, irisarindoj phenđa: Te najsem me, Sikamneja? Phenđa lese: Tu phendan! Thaj kana xale, lija o Isus maro thaj baxtarindoj phaglja le, ta dela e sikljovnenge, thaj phenđa: Len, xan; akava si o trupo mlo. Thaj lija e taxtaj ta baxtarindoj dija lenge vakerindoj: Pijen andar late sare; Kaj akava si o rat mlo e Neve xapesovljako savo čhordol baš butenge bašo mukipe e bezehengo. Phenav tumenge kaj akanatar ni ka pijav akava bijanipe e drakhalinako đi odova dive kana ka pijav tumenca nevo ano Thagaripe mle Dadesoro. Thaj đilabindoj e naisuni, iklile pe Maslinsko plajin. Teg lenge phenđa o Isus: Sare tumen ka peravđoven mandar akaja rat; kaj ano Lil terđol: „Ka khuvav e čobano, thaj e gramada e bakrengiri ka našen pes.” A po đivdinisaripe mlo ka đav anglal tumende ani Galileja. A o Petar irisarindoj phenđa lese: Te sare peravenpe tutar, me ni ka nisar peravama. Phenđa lese o Isus: Čače tuke phenav: Erat, anglal so ka o bašno đilabel, trin droma ka muke man. Phenđa lese o Petar: Ni ka mukav tut te šaj vi te merav tuja! Ađahar phenđe vi sare e sikljovne. Teg o Isus avilo lenca ano than savo akharel pe Getsimanija, thaj phenđa e sikljovnenge: Bešen akate đikaj me đav odori te ruđivma e Devlese. Thaj lindoj e Petre thaj solduj čhaven e Zevedejeveseren, lija te peravelpe thaj te dukhavel pe. Teg lenge phenđa o Isus: Peravdo si o ođi mlo đi o meripe; ačhen akate thaj džangadon manca. Thaj đapeindoj zala, pelo po muj plo ruđindoj thaj vakerindoj: Dade mleja, te si šajine, nek nakhavel man e taxtaj akaja; aj palem na sar me mangav, aj sar tu! Thaj avindoj e sikljovnenge, arakhlja len kaj soven, thaj phenđa e Petrese: Sar naštine jekh časo džangavde te oven mancar? Džangavdon thaj ruđin tumen kaj te na peren ano peripe; kaj si o đi zoralo, aj o trupo si bizoralo. Palem vi o dujto drom đelo thaj ruđisajlo pe vakerindoj: Dade mleja, te naštine te nakhavel man akaja taxtaj kaj te na pijav la, nek ovel o kamipe tiro. Thaj avindoj arakhlja len pale kaj soven; kaj lenge jakha sine but phare. Thaj meklindoj len, đelo palem ta o trito drom ruđisajlo vakerindoj odola jekhune lafija. Teg alo ple sikljovnenge thaj phenđa lenge: Pana soven thaj torđon! Ake alo o časo, thaj o Čhavo e Manušesko dindol ano vasta e bezahenge. Ušten, džaja! Ake, alo paše mlo dindine mosoro. Thaj đikaj ov vađe ađahar vakerela, dikh, o Juda, jekh kotar e Dešudujore, avilo, thaj lesa manuša but čhurjenca thaj buzenca kotar e anglunerašaja thaj phurederutne e selorestar. A lesoro dinde mosoro dija len semno vakerindoj: Kas me čumidav, odova si; dolen le. Thaj sigate alo paše e Isusese thaj phenđa: Sar sijan, Sikamneja! Thaj čumidlja le. A o Isus lese phenđa: Amala, ano odova li avilan? Teg ale paše, čivđe pe vasta po Isus thaj dolinde le. Thaj dikh, jekh katar odola, save sine e Isuseja, ćerindoj e vasteja, ikalda pli čhuri ta khuvđa e kandine e anglunerašajesere, thaj čhinda lesoro kan. Teg lese phenđa o Isus: Irin e čhuri tiri pe lako than; kaj sare save dolenape ki čhuri, kotar e čhuri ka mudarđon. Ja deja godi kaj našti te ruđisarav akana e Dade mle te bičhalel mange najbut kotar e dešuduj legionja phakale? Sar ka ma, akana, pherdona e Lila kaj ađahar trubul te ovel? An odova časo phenđa o Isus e manušenge: Sar upro čor iklistijen čhurjenca thaj buzenca te dolen man, a sako dive tumende bešljum sikavindoj ano hramo, thaj ni dolinđen man. A akava sa sine kaj te pherđon o Lila e profetosere. Teg sa lesere sikljovne ačhavde le thaj našle. A okola so dolinde e Isuse legarde le e anglunerašajese o Kajafa, kote o lilvarne thaj e phurederutne čedindepe. A o Petar đala palo leste dural đi e avlin e anglunerašajesiri thaj đerdindoj andre bešlo e kandinenca te dikhel o agorisaripe. A e anglunerašaja thaj e phurederutne thaj sa o sinedriono rodena xoxamne mothojba kotao o Isus te bi le mudarena, thaj ni arakhle; thaj vi but xoxamne mothoutne avena, ni arakhle. Najpalal avile duj xoxamne mothoutne. Thaj phenđe: Ov phenđa: Me šaj te peravav o hramo e Devlesoro thaj baš o trin dive te vazdav le. Thaj uštindoj o anglunorašaj phenđa lese: Sar khanči ni irisare so akala opipe tutar mothoven? A o Isus trajinela. Thaj o anglunorašaj irisarindoj phenđa lese: Dav tut sovel e đivde Devleja amenge te phene injan li tu o Hristos, o Čhavo e Devlesoro? Phenđa lese o Isus: Tu phendan. Aj me tumenge phenav: oto akana ka dikhen e Čhave Manušesere kaj bešel pe čači rig e Zorako thaj avel pe nuvere e badaleske. Teg o anglunorašaj pharada e šeja ple vakerindoj: Akošel upro Devel! So amenge maj trubun e mothoutne. Eke akana ašunden o akošipe lesoro. So den godi? A on irisarindoj phenđe: Therisarda meripe. Teg čhungarde lesoro muj thaj khuvena le, a e avera marena le pe čhama. Vakerindoj: Anglalmothov amenge, Hristo, ko khuvđa tu? A o Petar bešela avri ani avlin, thaj ali paše leste jekh kandini vakerindoj: Thaj em tu injanle e Isuseja e Galilejcoa. A ov ćhudla anglal savorende vakerindoj: Ni đanav so vakere. Thaj kana iklistilo ke udara, dikhlja le aver thaj phenđa odolenge kaj sine odothe: Vi akava sine e Isuseja e Nazarećanineja. Thaj palem ćhudla pes e sovljasa: Ni đanav odole manuše. A hari pale odova ale paše odola kaj ačhena thaj phenđe e Petrese: Hemčače vi tu san lendar; kaj vi o vakeripe tiro dela muj. Teg lija te ruđil thaj xal sovli kaj ni đanel odole manuše. Thaj sigo đilabda o bašno. Thaj liparda o Petar e lafija e Isusesere kaj lese phenđa: Đikaj o bašno ni đilabel, trin drom ka čhudes tu mandar. Thaj inklindoj avrijal, čerkipna runđa. A kana sine sabajle, čerde phurederipe sa e anglunerašaja thaj e phurederutne e seloresere opipe e Isusestar te xasaren le. Thaj phanglindoj le legarde, thaj dindo le e Pontijase e Pilatose, e regentose. Teg dićhindoj o Juda, dindo mujesoro lesoro, kaj les krisisarde, xor dukhavdilo, thaj irinđa o trijanda rupa e anglunerašajenge thaj phurederutnenge vakerindoj: Ćerdem bezeh kaj dinđum mujal o rat bidošalo. A on phende: So amen hajisara baš odova? Tu ka dikhe. Thaj čhudindoj e rupa ano hramo, iklilo, thaj đelo thaj umblavda pe. A e anglunerašaja, lindoj e rupa, phenđe: Nane šukar len te čhiva ane hramoski hasna, kaj si molipe baš o rat. Aj čerde svato ta ćinde baš lende e pirareski umal baše limora e durutnenge. Odolese adaja umal vi akhardili Rateski umal đi avdive. Teg pherdilo pe so si phendo prekal o profeto Jeremije savo vakerel: Thaj lije trijanda rupa, o molipe molipeutneso save molisarde e čhave e Izrailjesere; Thaj dije len bašo umal e pirareski, sar so mange phenđa o Devljutno. A o Isus ačhilo anglal o regento, thaj phučlja le o regento vakerindoj: Tu li sijan o thagar e judejengo? A o Isus lese phenđa: Tu phene. Thaj kana le došarena o anglunerašaja thaj o phurederutne, khančik ni irisarda. Teg lese phenđa o Pilat: Sar ni ašune kobor opipe tutar mothoven? Thaj ni irisarda lese ni pe jekh lafi, ađahar kaj o regento barikanisajlo but. A e Bare divese sine siklipe ano regento kaj e selorese te mukel po jekhe phandle save on mangena. A teg sinelen phandlo pendžarutno po anav Varava. Thaj kana ćedisajle, phenđa lenge o Pilat: Kas mangen tumenge te mekav? E Varava ja e Isuse akhardo Hristo? Kaj džanda kaj le kotar o korovanipe dinde. A kana bešela ane kriso, lese bičhalda vorba e romni lesiri vakerindoj: Ma hamisav tu khančik ano kriso odole čačutnesko, kaj avdive ano suno but mudardilem pašo leste. A e anglunerašaja thaj e phurederutne phukade e selore te roden e Varava, a e Isuse te xasaren. A o regento irisarindoj phenđa lenge: Kas mangen akale dujendar tumenge te mekav? A on phenđe: E Varava. Phenđa lenge o Pilat: So te čerav e Isuseja akhardo Hristos? Phenđe lese sare: Te inzarel pe! O regento pale phenđa: A savo džungalipe čerda? A on andar o krlo dije vika vakerindoj: Te inzarel pe! A kana dikhlja o Pilat kaj khančik ni mažutil, aj vađe pobaro vazdipe avel, lelja o pani thaj thovđa pe vasta anglo seloro vakerindoj: Me sem bidošalo ano rat akale čačutnesko; tumen ka dikhen. Thaj irisarindoj sa o seloro phenđe: O rat lesoro pe amende thaj pe amare čhave! Teg lenge meklja e Varava, a e Isuse, khuvindoj, dija te buhljarel pe. Teg e urumne e regentosere lije e Isuse ani krisuni thaj čedinde pe leste sa e četa urumnengi. Thaj huljavindoj ole, urjavde le purpuresko mantili. Thaj ćerindoj o venco e karendar, čhute lese ko šero, thaj dinđe lese trska ano čačuno vas; thaj perindoj pe čanga anglo leste, marena oleja muj vakerindoj: Sarsan, thagara judejengo! Thaj čhungarindoj pe leste, lije e trska thaj marena le po šero. Thaj kana marde muj, uljavde lestar o mantili, thaj urjavdele ane fostanja lesere, thaj legarena te inzaren le. Thaj inklindoj arakhle e manuše andar e Kirina po anav Simon thaj tradle le te legarel lese o trušul. Thaj avindoj po than savo akharel pe Golgota, goda va: Than šeresoro kokalo, dije lese te pijel šut hamime ferasa, thaj lindoj ano muj ni manglja te pijel. A kana inzardele, ulavđe o šeja lesere frdindoj barbuti. Thaj beštine odothe thaj arakhena ole. Thaj čhute lese upral o šero e doš lesiri hramosardi: Akava si o Isus thagar e judejengo. Teg buhljarde oleja duje čoren, jekhe po čače thaj jekhe pe zervo rig. A save nakhena mahrinena pe leste ćerindoj ple šerencar. Thaj vakerindoj: Tu savo o hramo perave thaj baš o trin dive vazdole, ikal korkore tut; te sijan Čhavo e Devlesoro, uli e trušulestar! A ađahar vi e anglunerašaja e lilvarnenca, e phurederutnenca thaj e Farisejenca telalasandoj vakerena: E averen ikalđa a pes naštil te ikali. Te si thagar e Izrailjesoro, nek uljel akana e trušulestar, ta ka paća ano leste. Paćaja ano Devel, nek les inkalel akana, te si lese po kamipe; kaj vakerela: Me sem o Čhavo e Devlesoro. Ađahar pa vi e čora inzarde oleja marena lese muj. A kotar o šovto časo sas raći pe sa e phuv đi o časo enjato. A trujal o enjato časo, dija vika o Isus andar o sa krlo vakerindoj: Ili, Ili, lima savahtani? Goda va: Devla mleja, Devla mleja, sose mukljan ma? A nesave katar akala so ačhena odothe ašundoj adava vakerena: Akava akharel e Ilija. Thaj sigate prastandilo jekh kotar olendar ta lija e svonga, thaj pherda šutesa, ta čhuta pe trska, te dija le te pijel. A e aver vakerena: Mek te dikha ka avel li o Ilija ole te ikalel. A o Isus palem dija vika andar o sa krlo, thaj mekla o đi. Thaj dikh, e pođa e hramoski pharavdili ko duj, kotar o upruno agor đi o teluno; thaj e phuv izdraja, thaj e bara čhordile; Vi e limorja phravdile, thaj uštine but sumnale trupija save mule; Thaj iklindoj andar e limora po đivdisaripe lesko, đele ano sumnalo foro thaj mothodepe butenđe. A o kapetano thaj save oleja arakhle e Isuse, dićhindoj kaj e phuv izdraja thaj so sine, darandile but vakerindoj: Čače akava sine o Čhavo e Devlesoro. Thaj odothe sine thaj dikhena dural but đuvlja save đana palo Isus kotar e Galileja thaj kandena lese, maškar save sine e Marija Magdalina vi e Marija, e daj Jakoveski thaj e Josijinoski, thaj e daj e Zevedejevesere ćhavengiri. A kana sine raćate, avilo o manuš barvalo andar e Arimateja, po anav Josif, savo geja sine sikljovno e Isusesoro. Akava alo paše uzal o Pilat ruđisarda le baš o trupo e Isusesoro. Teg o Pilat vakerda te den lese o trupo. Thaj lindoj o Josif o trupo, paćarda le ano čaršafi khoslo. Thaj čhuta le ano plo nevo limori kaj čhindasa ano bar; thaj rupuzindoj baro bar po udar e limorestar, đelo. A odothe sine e Marija Magdalina thaj e aver Marija, save bešena karing o limori. Tajsadive pe paračuj čedisalje e anglunerašaja thaj e Fariseja koro Pilat vakerindoj: Barutnea, dijam amen godi kaj odova xoxamno phenđa vađe baš o đivdipe: Palo trin dive ka uštav. Odolese činosar kaj te sikadol o limori đi o trito dive te na aven sar e sikljovne lesere raćasa, te na čoren le thaj ni phenen e selorese: Uštino kotar e mule; thaj ka ovel o paluno xoxavdipe podžungalo e anglunestar. Phenđa lenge o Pilat: Isitumen o arakhavne, đan thaj čeren sar đanen. A on dželindoj sikade o limori e arakhavnenca thaj khuvde štambilji ko bar. A sar nakhlo o savato, anglo sabajle e anglune divesko e purane kurćesko, avile e Marija Magdalina thaj e aver Marija te dićhen o limori. Thaj dikh, e phuv izdraja but; kaj o phakalo e Devljutnesko uljilo e badalestar, thaj pašindoj durarda o bar katar o udar e limoresko thaj bešlo pe leste. A o muj lesoro sine sar strefin, a e šeja lesere parne sar o iv. Thaj ani dar olestar izdrarde e arakhavne, thaj ule sar mule. A o phakalo irisarindoj phenđa e đuvljenđe: Ma daran tumen; đanav kaj e Isuse inzarde roden. Naj akate; kaj uštilo sar so phenđa. Phiren te dikhen o than kaj sine pašljardo o Devljutno. Thaj đan sigate thaj phenen e sikljovnenge leserenge kaj uštilo kotar e mule; thaj dikh, ov anglal tumende ka đal ani Galileja; odothe le ka dikhen. Eke phendem tumenge. Thaj iklindoj sigate andar o limori, darasa thaj bare lošalimasa siđarde te mothoven e sikkhovnenge leserenge. A kana đana te mothoven e sikljovnenđe leserenđe, thaj dikh, reslja len o Isus vakerindoj: Lošalinen tumen! A on pašindoj, astarde pe baš e pre lesere thaj pele pe čanga lesere. Teg phenđa lenge o Isus: Ma daran, đan thaj mothoven e phralenge mlenge nek đan ani Galileja, thaj odori ka dikhen ma. A đikaj on đele, dikh, nesave e arakhavnendar avile ano foro thaj mothode e anglunerašajenge sa so kerdilo. A on ćidindoj e phurederutnenca kerde phurederipe, thaj dije e urumnenge but love, vakerindoj: Phenen: e sikljovne lesere avile raćasa thaj čorde le đikaj amen sutam. Thaj te odova šunda o regento, amen ka paćivisara le thaj tumen te mukljarel e grižatar. A on lindoj e love, čerde sar so sine sikavde. Thaj ašundilo akava lafi maškar o Judeja đi avdive. A o Dešujekh sikljovne đele ani Galileja, pe plajin katar lenge čhinada o Isus. Thaj kana dikhle le, pele pe čanga lesere; a avera sungaje. Thaj paše alo o Isus phenđa lenge vakerindoj: Dindilo pe mange sarsavo kriso po badali thaj pe phuv. Đan, akana, thaj sikaven sa e seloren bolipendoj len ano anav e Dadesko thaj Ćhavesko thaj e Sumnale Đesko, sikavindoj len te inćaren sa so tumenge ćhinadem; thaj, eke, me sem tumencar ane sa divesa đi o agorisaripe e themesoro. Amin. I agra e evangeliumosko e Isus Hristosko, Čhavo e Devlesko. Sar kaj ačhel e profetunende: Ake me bičhalav e angelo morhe angla tute, savo ka laćharen o drom ćiro kaj ačhel angla tute. Ašundol o krlo godolesko savo an drmina muj del: O drom e Sumnalesko laćharen, ortosaren e dromora leske. Inklisto o Jovan thaj bolelas an drmina, thaj sikavelas o bolipen vaš jertipe e bezehengo. Thaj inkliles karing leste sa e Judengi phuv thaj e Jerusalimljanura; thaj bolela savoren and i len Jordan, thaj mothona e bezeha pire. A o Jovan sasa urado an šeja e devake balendar, thaj sinale phandli kustik morćhatar; thaj pharvarela pes e šimbasa thaj e divo avđinesa. Thaj mothovela vakerindoj: Avel pala mande majzuralo katar mande anglal savo me najsem paćivimasko te bandjardijav thaj e dora leske minijenge lav te putrav. Me tumen bolav pajesa, a vov tumen ka bolavel e Sumnale Đesa. Thaj kerdilo pes an gode divesa te avel o Isus andar o Nazaret e Galilejako, thaj o Jovan bolda les an o Jordan. Sar inklisto andar o pani, dikhla e badalen kaj putaren pes thaj o Đi sar golubo huljel pe leste. Thaj krlo avilo katar o badali: Tu san moro khamlo Čhavo savo si pe moro khamlipe. Thaj sig les o Đi legarda an drmina. Thaj sas gothe an e drmina saranda dive, zumavdo katar o beng, thaj sasa e divonenca, thaj e phakale ole kandine. Kana dije e Jovane, avilo o Isus an Galileja te vakerel o evangelium taro Thagaripe e Devlesko. Thaj vakerindoj: Pherdilo o vaxto thaj paše alo o Thagaripe e Devlesko; adošaren tumen thaj paćan an evangelium. A phirindoj pašo derav e Galilejosko dikhla e Simone thaj e Andreja leske phrale sar čhuden e safina an o derav; kaj sesa maćhara. Thaj phenda lenge o Isus: Phiren pala mande, thaj ka kerav tumendar te oven astarutne e manušenge. Thaj sigo, meklindoj e safina pire, lije te đan pala leste. Thaj đapeindoj zala gothar, dikhla e Jakove Zevedejeveskere, thaj e Jovane leske phrale, thaj von an barka suvdarena e safina. Thaj sigo akhardas len; thaj von meklindoj e dade pire e Zevedeje an e barka e kandinenca, đele pala leste. Thaj resle an o Kapernaum; thaj sig an savato dije an sinagoga thaj lije te sićon. O baripe lija len leske džanglipestar; kaj vov sikavela len sar godova savo zor si les a na sar e lilvarne. Thaj sasa an sinagoga lengiri o manuš đesa biužesa ta dija vika vakerindoj: Nak tuke, so manges amendar, Isuso e Nazaretosko? Avilan te xasares amen? Đanav tut ko sijan, o Sumnalo dženo e Devlesko. Thaj daravda les o Isuso vakerindoj: Ćo muj te phandes thaj andar leste te inkljes! Thaj ćinosarda les o đi biužo, ta dija vika andar sa o krlo thaj inklisto andar leste. Thaj savoren lija e dar geja kaj phučena jekh avere vakerindoj: So si akava? Thaj savo si akava nevo đanglipe, kaj barederimastar čhinavel e biuže đenca, thaj ašunen les. Thaj đelo o krlo lestar sigo pe sa o trujalipe e Galilejako. Thaj sigo inklindoj andar e sinagoga, avile ano kher e Simonosko thaj e Andrejosko e Jakovesa thaj e Jovanosa. A e sasuj e Simonoski pašljardi sas e šilale nasvalimastar, thaj sigo phende leske baš late. Thaj avilo paše late, vazdlas la lindoj vastestar, thaj meklas la o šilalo nasvalipen sigo, thaj kandlas len. A kana sasa rat, kana o kham iklilo, lije te anen leste sa e nasvalen thaj e dilen. Thaj sa e foroske đene kidlesa pes anglal e vudara. Thaj sastarda bute nasvalen katar e savetane nasvalimastar, thaj bute đungale ođenge tradla, thaj ni mekla e đungale ođengerenge te vakeren kaj đanen kaj si vov o Hristos. A detharinasa angleder e khamesko inklipe uštindoj inklilo, thaj đelo po čučo than, thaj gothe lija te ruđil pes e Devleske. Thaj pala leste siđarde o Simon thaj save sesa lesa. Thaj arakhadindoj les, phende leske: Savore roden tut. Thaj vakerda lenge: Aven te đas an pašutne gava thaj forura thaj gothe te vakerav, kaj me godoleske avilem. Thaj vakerdasa an lenge sinagoge pe sa e Galileja, thaj e džungalen ođen tradla. Thaj avilo leste o đeramno ruđindoj les, savo pelo pe čanga angla leste, thaj phenda leske: Te manglan, šaj te užavisares man. A o Isuso kovljardinoj pes lunđarda o vast, ta astarindoj vakerda leske: Mangav, užav tut. Thaj kana goda phenda leske, e đeramni sigo đeli lestar, thaj užavisajlo pes. Thaj daravindoj, sigo durada les. Thaj phenda leske: Dikh kaj khanikaske khanči te na vakere, đa sikav tut e rašajeske, thaj dikh te deš će užavipase so o Mojsija phendas vaš mothodimata lenge. A vov inklindoj lija but te vakerel thaj te mothovel so sas, geja kaj o Isus naštisarda bigarandoj an foro te del, aj sasa avral, an čuče thana, thaj avena leste katar e sa e riga. Thaj dijas pale an Kapernaum kana nakhle nekobor divesa, thaj ašundilo kaj si ano kher. Thaj sigo čidepe but đene, geja kaj naštisarde ni anglal o vudar sare te resen; Thaj lija te vakerel lenge o lafjori. Thaj avile leste e leljačerdea save indjarena štar đene. Thaj sar naštisarde te nakhen đi leste e bute manušendar, phutarde o ćhatlo e kheresko kaj vov sasa, handle o than thaj mekle e leljačerde unzardo kaj pašljola. A o Isus dikhla lengo paćape, phenda e lindineske: Ćhaveja, jertisavon tuke e bezexa ćire! A gothe bešena nesave e lilvarnendar thaj gindisarde an ile pire: So akava ađar dela armanja e Devle? Kova šaj te jertisarel e bezexa semo jekh Devel? Thaj sigo haljovindoj o Isuso đesa piresa kaj von geja gindisarde an peste, phenda lenge: So geja gindisaren an ile tumare? So si majloke? Te phenes e leljačerdese: Jertisaren pes tuke e bezexa; ja te phenel pes: Ušti thaj les pašljarimasko than ćiro, thaj phir? Si te đanen kaj o Čhavo Manušesko si les gavanmano pe phuv te jertisarel e bezexa, phenda e leljačerdese: Tuke vakerav: Ušti thaj les pašljarimasko than ćiro, thaj đa ćire khereske. Thaj uštilo sigo, thaj lindoj pašljarimasko than, inklisto angla savorende a von savore barikindepe thaj ašarisardes e Devle vakerindoj: Nikana geja so ni dikhlam. Thaj inklilo palem đi deraveste; thaj sa o manuša lije te đan leste, thaj sikavda len. Thaj nakhljindoj dikhla e Levija Alfejeve kaj bešel pe huduti, thaj phenda leske: Phir pala mande. Thaj uštindoj đelo pala leste. Thaj kana bešela o Isus te han maro ano kher lesko, bute hudutara thaj e bezaxale bešle lesa thaj leske sikavnenca, kaj sesa but save đana pala leste. A e lilvarne thaj e fariseja, dikhindoj les kaj xal e hudutnencar thaj e bezexalencar, phende leske sikavnenge: Soske e hudutnencar thaj e bezexalencar xal thaj pijel? Thaj ašundoj o Isus, phenda lenge: Ni trubun e saste sastarutne aj e nasvale. Me ni avilem te akharav e čačutnen po jertisaripe, aj e bezexalen. Thaj sesa e Jovanoske thaj farisejenge sikavne save postina, thaj avile thaj vakerde leske: Soske e sikavne Jovanoske thaj farisejenge postin a ćire sikavne ni postin? Thaj phenda lenge o Isus: Sar šaj e abijavara te postin đikaj si lenca o terno e borako? Sa đi kaj si lenca o terno e borako, von našti te postin. Aj ka aven e divesa kana ka našaldol katar lende o terno e borako, thaj tegani ka postisaren an odola dive. Thaj khonik ni suvdarel neve kotora po purano fustani kaj o nevo kotor šaj te perel e puranestar, thaj pobari xuv ka ovel. Thaj khonik ni čhorel i nevi mol an e xala purane; kaj i nevi mol pharavel e xala, thaj i mol čhordol thaj e xala ćernon; godoleske i mol nevi trubul te čhorel pes an neve xala. Thaj ine sasa kana vov iklilo an savato maškar o giv kaj e sikavne leske lije te keren drom te čhinen e giveske kaniša. A e fariseja phende leske: Dik, sose keren an savato godova so naj lačhe? A vov lenge vakerda: Ni drabarden nikana so kerdas o David kana pelo an pharipe thaj lija les i bokh thaj okola so sesa lesa. Sar dijas ano kher e Devlesko, vaš o vaxto Avijataresko anglunorašajesko thaj xala e čite mare, save ni tromaja khonik te xal, semo e rašaja, thaj dija godolenge, save sesa lesa. Thaj vakerela lenge: O savato si kerdo e manušeske, a naj kerdo o manuš e savatoske. Godoleske si o Čhavo Manušesko barutno thaj katar o savato. Thaj dija palem an sinagoga, thaj gothe sas o manuš šuke vastesko. Thaj dikhle pe leste na li an savato ka sastarel les te došaren les. Thaj phenda e manušeske e šuke vastesa: Ačhov an maškar. Thaj phenda lenge: Trubul li an savato lačhipe te kerelpe ja bilačhipe? O ođi te arakhadol ja te xasardol? A von trainde. Thaj dikhindoj pe lende xoljasa, dukhavindoj kaj si lenge vile zurale sar bara, vakerda e manušeske: Ikal o vast ćiro! Thaj ikalda; thaj kerdilo lesko vast sasto sar o aver. Thaj inklindoj e farisejura sigo kerde phurederipe kontral pe leste e irodovcunencar, sar te les xasarena. A o Isus gelo pire sikavnencar karing o derav; thaj but seloro andar e Galileja lije te đan pala leste, thaj andar e Judeja, vi andar o Jerusalimo, vi andar e Idumeja, thaj okotar e rig Jordanoski thaj katar i Tira thaj Sidona butipe baro, ašundoj so vov kerel, avile leste. Thaj phenda e sikavnenge pirenge kaj e barka baša leste te ovel po than baš o seloro, te na spiden les. Kaj buten sastardas, thaj but manuša, saven si pharo nasvalipe, dije pe leste pe vastencat te azbaven les. Thaj e biuže đe, kana dikhen les, avena paša leste thaj dena vika vakerindoj: Tu san Čhavo e Devlesko. Thaj but daravena len te na šunavenle. Thaj inklilo pe plajin thaj akharda godolen saven vov mangla, thaj avile leste. Thaj thoda e Dešudujen, te oven lesa, thaj te bičhalel len te vakeren, thaj te ovel len gavanman te sastaren o nasvalipe thaj te traden e bengen. Thaj dija e Simonoske anav Petar; Vi e Jakove Zevedejeveske vi e phrale e Jovano, e Jakovske, thaj dija len anava Voanerges, so aver ćhane phendo, e čhave grmavinače; Vi e Andreja, vi e Filipe, vi e Vartolomeja, vi e Mateja, vi e Tomo vi e Jakove Alfejeveskere thaj e Tadeja thaj e Simone e Kananejcoskere, vi e Judo Iskarioto, savo les phukada. Thaj avile ano kher, thaj kidlepe pale o seloro, geja kaj naštisarde ni maro te xan. Thaj kana godova ašunde leske, inklile te astaren les; kaj vakerena kaj si avral peste. A e lilvarne save andar o Jerusalimo avile, phende: An leste si o Veelzevul; a vov loćharipna o thagar e bengengo, tradel e bengen. A vov akharda len, thaj mothovda lenge an e paramiča: Sar šaj o beng e benge te tradel? Thaj kaj o thagaripe pestar ulavel pes, godova thagaripe našti te trainel; Thaj kaj o kher korkoro pe leste ulavel pes, godova kher našti te trainel; Thaj vi o beng te uštel korkoro pe peste thaj ulavel pes, našti te trainel, aj ka properel. Khonik našti te lel o kheripe e zuralesko, dindoj an kher lesko, te majangle e zurale ni phandel, thaj napal o kher lesko ka čorel. Čače tumenge vakerav: Sa e bezexa ka xasardon pe manušenge ćhavendar, thaj dejba armaja po Del, ma kobor ka delpe; A savo del armaja po Sumnalo Đi naj les xasardipe sa o vaxti, aj si došalo bimeripaske krisoske. Kaj vakerena: An leste si đi biužo. Thaj avile e daj leski thaj e phrala leske, thaj terdindoj avri bićhalde karing leste te akharen les. Thaj bešle o seloro trujal leste. Thaj phende leske: Eke e daj ćiri thaj e phrala ćire avri roden tut. Thaj irisarda lenge vakerindoj: Kon si daj munri ja phrala munre? Thaj dikhindoj uzal peste po seloro save bešen zalo leste, phenda: Ake e daj mori thaj e phrala morg! Kaj savo kerel o Devel so mangel, godova si phral moro thaj phen mori thaj daj mori. Thaj pale lija te sikavel ko derav. Thaj čidinisajle zalo leste e bute manuša, geja kaj vov dijas an e barka po derav thaj bešlo, a e manuša savore sesa pe phuv pašo derav. Thaj sikavela len bute paramićendar, thaj vakerela lenge pire sikavimastar: Ašunen: Ake, inklistilo o givarutno te čhudel o giv. Thaj kana o giv ćhudla, jek givoro pelo pe rig e dromesko, thaj avile e čiriklja thaj xale les. O dujto givoro pelo po barhastalo than pe savo naj sa but phuv thaj sigo inklilo, kaj najsala xor phuv; A kana tatarda o kham, šućilo thaj, sar najsa les darhin, šućilo. A o dujto pelo an karre; thaj barile e karre thaj tasada le, thaj ni anda bijanipe. Thaj aver pelo pe phuv lačhi; thaj dijasa bijanipe savo anglalisarde thaj bararde thaj ande po trinvardeš thaj po šovardeš thaj po šel. Thaj vakerela lenge: Kas si kana te ašunel, mek ašunel! A kana ačhilo korkoro, phučle les baš kaja paramiči godola trujal leste e Dešudujencar. Thaj phenda lenge: Tumenge dindilo te đanen o garadino Thagaripe Devlesko, a okolenge avral sa an paramiča avel. Kaj jakhencar dikhen thaj te na dikhen, thaj kanenca te ašunen thaj te na haljaren; kaj te sar te na Phučen pes thaj kaj lenge te na jertisavon e bezaxa. Thaj phenda lenge: Sar na haljoven e paramiči kaja? A sar sa e paramiča ka haljoven? O Givarutno lafjori sijisarel. A pašo drom, kaj sijisarel pes o lafjori, si godola save kana ašunen les, sigo avel o beng thaj lel o lafjori sijisardo an ile lenge. Geja vi godola sijime pe barhale thana si godola save kana ašunen o lafjori, sigo len les lošalimasa. Aj najlen darhina an peste, sar si najisovutne, pa kana aven đi o pharipe, ja tradipe baše lafjora, von pherdon došasa. A godola sijime ane karre, si godola save ašunen o lafjori. Numaj e griže akale šelberšimaske thaj xoxavdipe barvalimasko thaj manglimata vaš aćhune šeja den thaj tasaven o lafjori thaj bi bijanimasko ačhel. A godola pi lačhi phuv sijime, si godola save ašunen o lafjori thaj len, thaj anen bijanipe trinvardeš thaj po šovardeš thaj po šel. Thaj vakerda lenge: Va li e jagali anelape kaj te čhivel pes telal o vaso ja telal o pato? A na kaj po memeljako te čhivel pes? Kaj naj khančik garavdo so ni ka ovel phučardo; ni so si garavdo, a te na inklel po dikhipe. Kas si kana te ašunel, mek ašunel! Thaj vakerdasa lenge: Inćaren ane gođi so ašunen: pe savi merasa merin gasavi tumenge ka meril pes thaj pašarela pes tumenge so ašunen. Kaj kas si, leske dela pe; a savo najle, ka lela pe lestar vi godova so sile. Thaj vakerdasa lenge: Gasavo si o Thagaripe Devlesko sar o manuš kana čhudel e kučin ane phuv; Thaj sovel vi uštel raćasa thaj đivese; thaj e kučin inklel thaj barjovel, kaj vov ni na đanel. Kaj e phuv korrkori pestar anel majanglal e ćar, pegova e kaniša, thaj majpalal pherel o giv an kaniš. A kana pećol o bijanipe, sigo bičhalel o luno; kaj mothovel o čhinipe. Thaj vakerdasa: So te phenas, sarsavo si o Thagaripe Devlesko? Ja an sarsavi paramiči ka mothova les? Goda si sar kučin mojrako savi kana sijasarel pes an e phuv majcikni si katar e sa kućina pe phuv; A kana sijasarel pe, barol thaj ovel majbari katar e sa pherelina, thaj mekel bare ranja te šaj tela lende em badaleske čiriklja te oven ate. Thaj bute gasave paramićenca mothovdasa lenge o lafjori sa kobor šaj te ašunen. A bi paramićako ni vakerdasa lenge ni jek lafjori. A e sikavnenge korkoraso mothovela sa. Thaj phenda lenge pe godova đives raćate: Te nakha pe okoja rig. Thaj von, mekljindoj e vaso, lije les sar so sasa ane barka; a vi avera barke sesa lesa. Thaj resli bari zurali balval katar e balval; thaj o paj lija te vazdel pe thaj te ćinoj pe an barka kaj voj ake lija te perel. A vov sasa pe paluni rig sovindoj po šerano; thaj vazdine les thaj phende leske: Sikamneja, sar tu ni hajisare kaj pera natele? Thaj uštindoj daravda e balval, thaj penda e deraveske: Ać, aćhav! Thaj aćhadili e balval, thaj ćerdilo trainipe baro. Thaj phenda lenge: Sose sen geja daramne? Sar naj tumen paćape? Thaj bare darasa pherde pes, thaj vakerena jeka avreske: Ama ko si akava saves vi e balval vi o derav ašunel? Thaj avile prekal o derav ane phuv Gadarinoski. Thaj kana inklilo andar e barka, sigo malavda les andar e limora o manuš đesa biužesa. Savo đivdini an limora thaj khonik les naštisarda te phandel ni sinđirenca; Kaj but droma sasa phandlo an sastrena thaj sinđirja, vov pale čhinda e sinđira thaj e sastrena phagla; thaj khonik naštisarda te banđaren les. Thaj sajekh rat thaj dive vov sas an limora thaj pe plaina, vikindoj thaj marindoj pes barenca. A kana dikhla e Isuso dural, prasla thaj telilo angla leste. Thaj vikindoj andar sa o krlo phenda: So mange mandar, Isuso Ćhaveja Devlesko e Učesko? Sovel dav tut Devlesa, ma mučin man! Kaj leske vakerdasa: Ikljov, ođi biužo, andar o manuš! Thaj phučla les: Sar si ćiro alav? Thaj vov phenda leske: Legion si munro alav; kaj sam amen but. Thaj ruđisarde les but te na bičhalel len andar okova agor. A gothe pe jek plaj ćaronas but bale. Thaj ruđisarena les sa e benga vakerindoj: Bičhal amen an bale an lende te das. Thaj mekla lenge o Isuso sigo. Thaj inklindoj e biuže đi dije an bale: thaj prastande dije e bale oto plain an derav; a sesa von trujal duj milje; thaj taslile an derav. A e balenge arakhavne našle, thaj mothode ano foro thaj pe gava. Thaj inklile e manuša te dikhen so kerdilo pes. Thaj avile e Isusoske, thaj dikhle e diljarde an savo sas o legiono kaj bešel, uravdo thaj gođaver; thaj darajle. Thaj mothode lenge von so dikhle so kerdilo e diljardeske, thaj e balendar. Thaj lije te ruđisaren les te đal andar lenge agora. Thaj kana dija an barka, ruđisarda les godova so sas diljardo te ovel lesa. A o Isuso ni dija les, thaj leske phenda: Đa khere tute thaj će kherutne, thaj vaker lenge so o Devlutno kerdas, thaj sar sastarda tut. Thaj vov gelo thaj lijas te vakerel an Dekapoljo, so kerdas leske o Isuso; thaj savorenge ile bajrardile. Thaj kana nakhlo o Isuso an barka pale pe okoja rig, kidlepes butesa seloro uzalo leste; thaj sas uzal o derav. Thaj dikh, avilo jekh katar e phurederutne e sinagogako po anav Jair; thaj dikhindoj les pelo angla punre leske. Thaj ruđisardale but, vakerindoj: E ćhejori mori si po meripe; te aves thaj te meke pe late će vasta, te sastol thaj đivdi te ačhel. Thaj lija te đal lesa. Thaj pala leste đana manuša but thaj tanđarena les. Thaj e đuvli jek savi dešuduj berš nasvali sas katar o thavdipe e ratesko. Thaj but dukha sinela e bute sastarutnendar, thaj xala sa so sala, thaj khanči ni ažutisardala, no sar sas lake po bilaćhe sinele. Kana ašunda e Isusoske, avili ano seloro karing palal, thaj azbavda palal o fustano lesko. Kaj vakerela an peste: Te azbavdem o fustano lesko, ka sastijav. Thaj sigo ačhilo te thavdol o rat latar, thaj aćarda an peste kaj sastili e nasvalimastar. Thaj sigo o Isuso aćarda an peste i zor kaj inklistilo lestar, thaj irindoj po šel phenda: Kon godova azbavda pes munro fustano? Thaj phende lese e sikavne leske: Dikhes kaj e seloro tanđaren tut, thaj phućes: kon azbavda man? Thaj vov leja pese sama te dikhel godola savi godova kerda. A e đuvli, darandoj thaj tresindoj, đanglindoj so kerdilo lake, avili thaj peli pe čanga anglal leste, thaj phenda lese sa o čačipe. A vov lake phenda: Čhaje, o paćape ćiro sastarda tut; đa krotkipna, thaj ov sasti katar o nasvalipe ćiro. Đikaj vov vađe vakerela, avile katar e phurederutne sinagogake vakerindoj: E ćhej ćiri muli; so pana deš zori e Sikamne? A o Isuso sar ašundas o lafjori so vakerde, phenda e sinagogake phurederutnese: Ma dara, de paći! Thaj ni dija khanikas pala leste te đal sem o Petar thaj o Jakovo thaj o Jovano o phral Jakovesko. Thaj avilo ano kher e sinagogakere phurederutnese, thaj dikhla bute dženen sar e dukhatar roven thaj rindonena but. Thaj dindoj andre phenda lenge: So sen darade thaj roven? E ćhajori ni muli, aj sovel. Thaj asavile lestar. Vov tradla savoren avri thaj lija e dade thaj e daja e ćhajake thaj godolen save sesa lesa, thaj dijas kaj sasa pašljardi e ćhajori. Thaj lija e ćhajorja vastestar thaj phenda lake: Talita kumi, so averčhande si: Ćhajorije, tuke vakerav, ušti! Thaj sigo uštili e ćhajori, thaj phirda; voj sasa katar e dešuduj berš. Thaj naštisarde te aven peste bare sikadimasa. Thaj but darada len kaj khoni te na đanel godoleske; thaj phenda te den la te xal. Thaj gelo gothar, thaj avilo an than kaj bijandilo; thaj pala leste đana leske sikavne. Thaj kana avilo o savato, lija te sikavel an sinagoga. Thaj but đene save ašunende, pherde vileja vakerde: Katar akaleske godova? Thaj savo si lese baro godjaveripe dino? Thaj bare sikadimasa gasave vastenca leserenca ićeren pes? Naj li kava o kaštarutno, čhavo e Marijako, a phral e Jakovesko thaj e Josijinosko e Judinosko thaj Simonosko? Thaj naj li e pheja leske akate maškar amende? Thaj čerćaren pes dukhardile lestar. A o Isuso phendas lenge: Khatinde naj o profeto bi pativako sar kaj si an than an savo si bijando thaj maškar pire thaj an pesko kher. Thaj naštisarda gothe ni jek baro sikadipe te kerel, sem so hari nasvalen sastarda thodindoj pe lende e vasta. Thaj čudisajlo pe lengo bipaćajpe. Thaj phirde pe trujalime gava thaj sikavćherde. Thaj akharda e Dešudujoren, thaj lija len te bičhalel duj thaj duj, ta dija len gavanmano upral e biuže đe. Thaj vaćardine lenge kaj khanči te na len po drom sem e rovli: ni traste, ni maro, ni love an kustik; Sar pođime ane sandale, thaj te na urjaven duj fustanja. Thaj phenda lenge: Kaj den ano kher, gothe ačhen đikaj ni inkljen gothar. Thaj kaj ni kamela te len tumen thaj te na ašunel tumen, iklindoj gothar činosaren o praxo tumare pirendar vaš mothojpe lengo. Čače tumenge phenav: Majloke ka avel e Sodomake thaj e Gomorake an dive Krisosko katar godole forostar. Thaj phirindoj vakerde kaj te jertisarenpe. Thaj bengen buten tradle; thaj makhlje uljasa bute nasvalen, thaj sastarde. Thaj ašunda o thagar Irod, kaj o alav e Isusosko but šundilo thaj phenda: O Jovan Bolipesarutnesko mulendar uštilo, thaj godoleske kerel sikadimata. Veresave vakerde: Godova si o Ilija. A e aver vakerde: Godova si o profeto ja jek katar e profetura. A kana ašunda o Irod, phenda: Godova si o Jovan save me čhindem, vov uštilo e mulendar. Kaj akava Irod bičhalda ta astarde e Jovano, thaj phanglindoj ćhudla les an phandipe baš e Irodijada, romni Filiposki, peske phraleske, kaj vov lijala. Kaj o Jovan vakerdasa e Irodoske: Našti tut te ovel ćire phraleski romni. E Irodijada sas but xoljarni pe leste, thaj mangla te mudarel les, aj naštisarda. Kaj o Irod darala e Jovanostar, džandoj kaj si manuš čačuno thaj sumnalo, thaj arakhela les; thaj but so kerela sar lese vov phendas, thaj lošasa ašunela les. Thaj avilo o dive mišto, kana o Irodo po piro bijandimasko dive dela raćako xape barenge pirenge ta urumne phiravnenge thaj phurederuthenge e galilejoski. Thaj kana đerdinđa e ćhaj akala Irodijake thaj khelindoj pherda o vilo e Irodosko thaj leske dostunengo phenda o thagar e ćhajake: Rode mandar sa so manges, thaj ka dav tut. Thaj xala lake sovli: So god rode mandar ka dav tut, ta te si vi opaš o thagaripe moro. A voj iklindoj phendas pire dajake: So te rodav? A voj phendas: O šero e Jovan Bolipesarutnesko. Thaj sigo, sig dindoj andre ko thagar, mangla vakerindoj: mangav akana te deš man po čaro o šero e Jovan Bolipesarutnesko. Thaj dukhardilo but o thagar, numaj e sovljatar sebepi thaj pire dostunendar na mangla te phagel o lafjori paše lačhe. Thaj sigo bićhaldas o thagar e dželato, thaj vakerda te anel o šero lesko. Thaj vov gelo thaj čhinda les po than kaj phandlo sas, thaj anda o šero lesko po čaro, thaj dija e ćhajake, a e ćhaj dija pire dajake. Thaj ašunde e sikavne leske, avile thaj lije o trupo lesko, thaj pašljarde les ano limori. Thaj kidle pes e apostolura ko Isuso, thaj mothode leske sa, thaj so kerde thaj so e manušen sikavde. Thaj phendas lenge: Đan tumen korkore po korkoruno than, thaj soven zala. Kaj sesa but save aven thaj đan, ta najsa len vaxto ni te xan. Thaj gele barkasa an xalo than korkore. Thaj dikhle len e manuša kaj đan, thaj penđarde len buten, thaj phirindoj andar e sa e forura siđarena odori, thaj maj anglal lendar avile, thaj kidindepe uzal leste. Thaj inklindoj o Isuso dikhla bute seloro, thaj dukhardilo pe lende, kaj sesa sar e bakre bi čobanosko; thaj lija te sikavel len but. Thaj kana ake sine palutno raćakoro vakhti, avile leste e sikavne leske vakerindoj: Xalo si o than, a o vakto e sovimasko reslo. Muk len te đan ane trujalune gava thaj thana te kinen peske maro; kaj naj len so te xan. A vov irindoj vakerda lenge: Den lenge tumen te xan. Thaj phendes leske: Te đas te kinas maro vaš dušel dinarenge thaj te das lenge te xan? A vov phenda lenge: Kobor mare si tumen? Đan dikhen. Thaj đanglindoj phende: Panđ manre thaj duj maćhe. Thaj vakerda lenge savoren te bešljaren sa palo minorja pe vunato ćar. Thaj bešljarde rindo aso rindo po šel thaj po pinda. Thaj lindoj godola panđ mare thaj duj maćhe, dikhla po badali, thaj baxtarda, ta phagla e mare, thaj dijas e sikavnenge te čhon anglal lende; vi godola duj maćhe ulada savorenge. Thaj xale savore, thaj čalile. Thaj ćidle kotora dešuduj pherde sevlja, thaj katar e maćhe. A sesa godola kaj xale e mare paše panđ milje manuša. Thaj sigo tradla e sikavnen piren te den ane barka thaj te đan anglal pe okoja rig karing o Vidsaido đikaj vov mukel o seloro. Thaj kana gelo olendar, gelo pe plajin te ruđil pes. Thaj kana peli i rat, sasa e barka maškar o derav, a vov korkoro pe phuv. Thaj dikhla len sar mučin pes tradindoj, kaj i balval phudelas pe aver rig. Thaj trujal štarto arakhavni e raćake reslo lende phirimasa po derav; thaj mangla te nakhel paša lende. A von, dikhindoj les kaj phirel po derav, kerdilo pe lenge kaj si nesavo dikipe thaj dije vika; Kaj savore dikhle les thaj darandile. Thaj sigo lija te vakerel lenca, thaj phendas lenge: Ma daran, me sem, ma te daravdon! Thaj dija lende ane barka, thaj e balval aćhada; thaj sesa but avral peste thaj lesa kerena baripe. Kaj ni sićile o keripe e marenca; kaj sas lengo vilo barćherdo. Thaj nakhlindoj pe phuv, avile an Genisareto thaj aćhine. Thaj kana von inklistile andar e barka, sigo les penđarde. Thaj prastile soro Godova agor, thaj lije pe pašljarde te anen e nasvalen kaj bi ašunen kaj si vov. Thaj kaj dija an e gava ja an e forura ja an thana, pe trušulime droma, pašljarena e nasvalen thaj ruđisarena les kaj e pođi katar o fustano lesko te azbaven; Thaj savo god azbavda les, sastarena pes. Thaj kidine pes uzal leste e Fariseja thaj khajekh e lilvarnendar save avilesa andar o Jerusalimo. Thaj dikhle nesaven oto sikavne leseren so melale, godova bithovde vastenca xan maro, krisisarde len. Kaj e Fariseja thaj sa e Judejcura ni xan đikaj ni thoven pe vasta đi e kuja, inćerena sar ačhilo e puranendar. Thaj kana avena katar o pijaci ni xan đikaj ni thoven pes; thaj vađe but si kaj lije te inćaren; thoven e taxtaja thaj e vasore thaj e kikave thaj e skamina. A pegova pučle les e Fariseja thaj e lilvarne: Sose e sikavne ćire ni inćaren godolestar so ačhilo e phurendar, sar xan o maro bithode vastenca? A vov irindoj vakerda lenge: Lačhe anglalmothoda o Isaija vaš tumen dujemujenge, sar si ramosime: Kala manuša vuštencar paćivalisaren man, a o vilo si lengo dur mandar. No andodilipe paćivalisaren man, sikavindoj e sikavimata čhinade katar e manuša. Kaj meklen o vakeripe e Devlesko, a inćaren e manušengo mothovipe, thovipe vasonengo thaj taxtajengo; thaj but aver jekhčanutno keren. Thaj phenda lenge: Lačhe, čhinaven o vakeripe e Devlesko kaj tumaro mothovipe te arakhen! Kaj o Mojsije phenda: Paćiv de e dade ćire thaj e daja ćira; thaj: Savo akušel e dade ja e daja, merimasa te merel. A tumen phenen: Te phenda o manuš e dadeske ja e dajake: godova sosa ka šaj te mažutiv tut korvano si, godova si: dindo. Thaj ni den leske maj khanči te kerel vaš e dadeske ja e dajake. Čhinavdindoj o lafjori e Devlesko pire mothojmasa savo tumen majdur ingaren; thaj jekhčanutne godoleske but so keren. Thaj akharda sa e seloro phenda lenge: Ašunen man savore, thaj haćaren. Khanči naj so šaj e manuše te mahril katar godova so avrijal del an leste, aj so inkljel andar leste godova si so mahril e manuše. Kas si kana te ašunel, mek ašunel! Thaj kana avilo katar e seloro ano kher, phučle les e sikavne leske vaš e paramiči. Thaj phenda lenge: Sarsen em tumen geja bihaljovne? Sar ni haljoven kaj so god ano manuš avral del, našti te mahril les? Kaj ni del leske ano vilo aj ano vođi, thaj inkljel avri, khosljarindoj sa o abinja. Vađe phenda: So inkljel andar o manuš godova mahril e manuše. Kaj andral, andar o vilo manušesko, ikljen e đungale gindura, hohavipe maškar o rom thaj romni, biladžipe, mudaripe, čoripe, xandžvalipe, đungalipe, nasulipen, biladžipe, bičhelalijak, akušipe, po Devel, barikanipe, bigođalipe. Sa akala džungalipa aven andral, thaj mahrin e manuše. Thaj uštindoj gothar gelo ane agora e tirsake thaj sidonskake, thaj dindoj andre ano kher, mangla kaj godova khonik te na đanel; ta naštisarda te garavel pes. Kaj ašundoj leske e đuvli an savako ćhajako sasa đungalo đi, avili thaj peli ke punre leske. Godoja đuvli ni đangla e Devle bijanimasa Sirofeničanka, thaj ruđisarela les kaj te tradel e benge lake ćhajatar. A o Isuso lake phenda: Mek kaj te majanglal e ćhavore te parvaren pes; kaj naj lačhe te lel pe o maro e ćhavendar thaj te ćhudelpe e džuklenge. A voj irisardas thaj phenda leske: Va, Devlutnea, aj vi e đućela telal e astala xan katar e troške ćhavorenge. Thaj phenda lake: Vaš akava lafjori, đa, inkljilo o beng andar e ćhaj ćiri. Thaj avindoj khere arakhla e ćhaja pašljindoj po than, a o beng inkljilosa. Thaj pale inklistilo o Isuso andar e thana e tirskake thaj sidonskake ta avilo po derav Galilejosko andar e thana Dekapoljskake. Thaj ande leste e kašuke thaj lalore, thaj ruđisarde les te čhuvel pe vast upro lende. Thaj leljale ando seloro te oven korkore, čhuta pire naja an e kana leske, thaj čhungarindoj azbavdas e čhib leski; Thaj dikhindoj po badali akharda, thaj phenda leske: Efata, godova, putardov! Thaj sigo putardile leske kana, thaj putajlo o phanglipe leske čhibako, ta vakerela čačikane. Thaj čhinada lenge kaj khanikaske ni mothon; numaj so lenge majbut čhinavela godova von ake buljarena o krlo. Thaj but baro barikanipe čherde lesa vakerindoj: Sa lačhe kerel; vi e kašuken te ašunen vi e laloren te vakeren. An gode divesa pale, kana sasa but seloro thaj naj sasa len so te xan, akharas o Isuso e sikavnen piren thaj phendas lenge: I dukh lel man e selorose, sar ake trin dive terđon mande thaj naj len so te xan. Te meklem len bokhale te đan pire kherende, ka bizurajvov po drom; kaj khajekh katar lende avile dural. Thaj vakerde e sikavne leske: Katar len šaj khoni te parvaren maresa kate ane drmina? Thaj phučla len: Kobor mare si tumen? A von phende: efta. Thaj phendas e selorose te bešen pe phuv; thaj lija godola efta mare thaj naisćherda, phagla, ta dijae sikavnenge pirenge te ulaven thaj ulavde e selorose. Thaj sas len zala mačhore; thaj baxtarinde len, phendas kaj vi len te ulaven. Thaj xale, thaj čalile, thaj ćidle e kotora so aćhile efta sevlja. A godola kaj xale sasa trujal štar milje; thaj mekla len. Thaj sigo dijas an e barka e sikavnenca pirenca, thaj avilo ane thana dalmanutoske. Thaj inklistile e Fariseja, thaj lije te xan pes lesa, thaj zumavena les, rodle lestar o semno katar o badali. Thaj akharindoj ođesa piresa phenda: Sose akala manuša o semno roden? Čače tumenge phenav: Ni ka dolpe o semno akale njamoske. Thaj meklindoj len dijas pale an barka, thaj gelo pe okoja rig. Thaj bistarde e sikavne lesken te len e mare, thaj najsa len pesa an barka đi jek maro. Thaj dija godi len vakerindoj: Dikhen, arakhen tumen e Farisejenge majavatar thaj e majavatar e Irodoski. Thaj paćaje, jekh avereske vakerindoj: Godova si kaj maro naj amen. Thaj haljarindoj o Isus phenda lenge: Sose gindisaren te si godova kaj maro naj tumen? Sar pana ni anena ki godi ni haljoven thaj ni len kan? Sar si pana barastime o vilo tumaro? Situmen jakha sar ni dikhen, thaj kana situmen sar ni ašunen? Thaj ni den tumen gođi. Kana gode panđ mare phagljem pe panđ milje, kobor pherde sevlja kotora čiden? Phende leske: dešuduj. A kana gode efta pe štar milje, kobor pherde sevlja kotora čiden? A von phende: efta. Thaj phenda lenge: Sar ni haljaren? Thaj avilo an Vitsaido: Thaj ande leste e korore, thaj ruđisarde les te azbavel les. Thaj lija o vast e kororeso, inkalda les avral o gav, thaj čhungarindoj pe leske jakha, čhuta pe vasta pe leste, thaj phučla les dikhel li so. Thaj vov dikhindoj phenda: Dikhav e manušen kaj đan sar kašta. Thaj atoska palem čhuta pe vasta pe jakha, thaj kerda te dikhel: thaj sastilo, thaj dikhla sa šukar. Thaj bičhalda les pire khereske, vakerindoj: Ma đerdin ano gav, ni motov kase ano gav. Thaj inklistilo o Isus thaj e sikavne leske ane gava Kesarijake Filiposke; thaj dromal phućindoj e sikavnen piren vakerindoj lenge: So vakeren e manuša, kon se me? A von irisarde: o Jovan Bolipesarutnesko; a aver; Ilija; a aver jek katar e profetura. Thaj vov phenda lenge: A tumen so phenen kon sem me? A o Petar irisarindoj phenda leske: Tu san o Hristos. Thaj čhinada lenge kaj khanikaske te na vakeren lestar. Thaj lija len te sikavel kaj o Čhavo Manušesko trubal but te mudarđol, thaj kaj te čhuden les e phurederutne thaj e anglunerašaja thaj e lilvarne, thaj les ka mudaren, thaj kaj pala e trin dive ka đivdinisajvol. Thaj phenda lenge gadava putarune. Thaj lija les o Petar korkorune thaj lija lesa te xal pes. A vov, irisarindoj thaj dikhindoj pe sikavne pire, daravda e Petre vakerindoj: Đa mandar, benga; kaj tu ni paćas godova so si e Devlesko aj so si e manušesko. Thaj akharindoj e šel e sikavnenca pirenca, phenda lenge: Kon mangel pala mande te avel, mek čhudel pes thaj lel o trušul piro, thaj pala mande te đal. Kaj kon mangel đivdipe piro te arakhel, ka xasarel les, a kon xasarel o đivdipe piro ando mande thaj o evangelium godova ka arakhel les. Kaj savo si lačhipe e manušeske te lijas sa o them a ođeske pireske bibaxtalipe čerela. Ja savo ćinipe ka del o manuš vaš ođi piro? Kaj kon lađal mandar thaj munre lafendar an manušengoro njamo akava xoxavne kamipesoro thaj e došasoro, thaj o Čhavo manušesko ka lađal lestar kana ka avel an baro dive e Dadesko piresko e sumnale phakalenca. Thaj phenda lenge: Čače tumenge phenav: si khajekh maškar akala kaj ačhen kate save ni ka zumaven o meripe đikaj ni dikhen o Thagaripe Devlesko kaj avilo an zuralipe. Thaj pale šov dive lija o Isus e Petre, thaj e Jakove thaj e Jovano ta inkalda pe plajin uči, uladune numa len; thaj averćhandisajlo anglal lende. Thaj e fustanja leske kerdile strafune, but parne sar o iv, save našti e parnali te parnjarel pe phuv. Thaj sikadilo lenge o Ilija e Mojsijasa thaj sesa an vakeripe e Isusosa. Thaj o Petar irisarindoj phenda e Isusoske: Sikamneja, lačhe si amenge akate te ova; te keras trin ućharde thanora: Tuće jekh thaj e Mojsijaske jekh thaj e Ilijaske jekh. Kaj ni đangla so te phenel; kaj sesa daravde. Thaj sikadili e nuvera ta ućharda len; thaj avilo o krlo andar e nuvera vakerindoj: Kava si o Čhavo munro čumidino, les kanden. Thaj jećheakharatar averćhanindoj khanikas maj ni dikhle sem korkore e Isuso paša peste. Thaj kana hulile katar e plajin, čhinada lenge kaj khanikaske ni mothon so dikhle, sa đikaj o Čhavo Manušesko ni ka đivdinisajvol andar e mule. Thaj akava lafjori inčarde an peste, phućindoj jekh avre: So si godova te đivdinisajvol andar e mule. Thaj phučle les: Sose vakeren e lilvarne kaj majanglal o Ilija trubul te avel? A vov irisarindoj phenda lenge: Kana o Iliaja anglal avel, sa ka laćharen; vi sar si hramome vaš o Čhavo Manušesko kaj trubul but te dukhavdol thaj kaj teljardo avel? Aj tumenge phenav kaj vi o Ilija avilo, thaj čerde lesa so mangle, sar so si hramome vaš leske. Thaj avindoj pire sikavnenge, dikhla seloro but trujal lende thaj e lilvarne kaj xanape lenca. Thaj sigo dikhindoj les, sa e seloro barikane prastindoj, arakhadona lesa. Thaj phučla e lilvaren: So godova xana tumen lenca? Thaj irisarindoj jekh andar e seloro phenda: Sikamneja, andem tuće e čhave munre an savo si o đi kašuko. Thaj kana god astarel les phagel les, thaj spuma čhudel, thaj krcol dandenca; thaj šućarel les. Thaj phendem e sikavnenge ćirenge te traden les; thaj naštisarde. A vov irisarindoj phenda: O njamo bipaćamneja, džikana ka ovav tumenca? Džikana ka nakhava tumen? Anen les mande. Thaj ande les leste; thaj kana dikhlas les o đi, sigo les aćhadilo te phagel; thaj perindoj pe phuv lija te tuvulil pe čhudindoj spuma. Thaj phučla e dade leskere: Kobor si vaxto sar leske godova kerdilo pes? A vov phenda: Andar o ćhavoripe. Thaj but droma čhudel les ane jag thaj ano paj te mudarel les; aj te so šajisare, loćharsar amen, kovljardov pe amende. A o Isus leske phenda: Te šaj paćasa, sa si šajune godoleske savo paćal. Thaj sigo dindoj vika o dad e ćhavoresko asvenca vakerela: Paćav, Devlutneja, loćharsar munre bipaćajmaske! A o Isus dikhla kaj čiden pe e seloro, darada e đi biuže vakerindoj leske: đi laloreja thaj kašukeja, me čhinavav tuke, inkli andar leste thaj maj te deš an leste! Thaj vikindoj ta phagindoj les but, inklilo, thaj sasa sar mulo geja kaj but đene vakrde: mulo. A o Isus, lindoj vastestar, vazdla les; thaj uštilo. Thaj kana dijas ano kher, phučle les e sikavne leske korkore: Sose les amen naštisardam te tradas? Thaj phenda lenge: Kava njamo našti averčhande te tradel pe đi ruđipnasa thaj postimasa. Thaj inklidoj gothar đana maškar o Galilejo; thaj ni mangla kon te đanel. Kaj sikavela e sikavnen piren thaj vakerela lenge kaj ka o Čhavo Manušesko ka avel dindo ane vasta e manušenge, thaj ka mudaren les, thaj kana ka mudaren les, o trito dive ka uštel ando mulipe. Thaj von ni haljovde e lafija, thaj ni tromaje les te Phučen. Thaj avilo an Kapernaum, thaj kana sas ano kher phučla len. So xalenpes tumen dromal maškar tumende? A von trainđe; kaj dromal xale pes maškar peste kon si majbaro. Thaj sar bešlo akharda e Dešudujoren thaj phenda lenge: Savo mangel te ovel angluno mek ovel paluno katar savore, thaj savorengo kandino. Thaj lindoj e ćhavore, čhuta les maškar lende thaj lindoj ane angali phenda lenge: Kon jek katar gasave ćhavore lel an munro alav, man lel; thaj kon man lel, ni lel man aj Godole savo man bićhaldas. Irisarda leske o Jovan vakerindoj: Sikamneja, dikhlam jekhe savo ni đal pala amende: A ćire navesa tradla e bengen; thaj čhinadam leske, kaj ni đal pala amende. A o Isus phenda: Ma čhinaven les; kaj naj khonik savo bi morhe anavesa aščarja kerela thaj šaj sigo đungalipe te vakeri mandar. Kaj kon naj opipe tumendar tumenca si. Kaj kon tumen del te pijen taxtaja pani an alav munro, godoleske kaj sen e Hristoske, čače tumenge phenav: ni ka xasarel e počindi piri. A savo dukhardol jekhe akale ciknendar save paćan an mande, majlačhe ka ma avel leske kaj te umblavel pes leske o bar e asavesko pajesa khoratar thaj te čhudel pes ano derav. Thaj te ćiro vast dukhardola tut, čhin les: majlačhe si tuke bi vastesko an đivdipe te deš, na liduje vastenca te đas an bengengi jag, an jag biaćhadi. Kaj o ćermo lengo ni merel, vi e jag na aćhavel pes. Thaj te ćiro punro dukhardola tut, čhin le: majlačhe si tuće te deš an đivdipe langalo, na li duje punrenca te čhuden tut an bengengi jag, an e jag biaćhadimaski. Kaj e ćermo lengo ni merel, vi e jag ni aćhavel pes. Thaj te e jakh ćiri dukhardola tut, hanav la: majlačhe si tuće jekhe jakhasa te deš an Thagaripe Devlesko, na li duje jakhenca te oves čhudino an bengengi jag. Kaj o ćermo lengo ni merel, ni e jag ni aćhavel pes. Kaj sarsavo e jagasa ka lonđarel pes, thaj sarsavi viktima e lonesa ka lonđarel pes. Lačho si o lon; ma o lon bilondo te aćhavel, sosa ka lonđarel pes? Mek ovel tumen lon an tumende, thaj krotkipe mek ovel tumen maškar tumende. Thaj uštindoj gothar avilo an thana e Judejake prekal o Jordan, thaj čidena pes palem e šel leste; thaj sar so siklipe lesko sas, pale len sikavđa. Thaj e Fariseja avile paše leste, zumavindoj phučle les: Šaj li o rom te mekel e romnja? A vov irisarda thaj phenda lenge: So tumenge čhinavel o Mojsije? A von phende: o Mojsije mekla te del pes lake e muklimaski pustik thaj te mukel pes. Thaj irisarindoj o Isuso phenda lenge: Paše zoralo vilo tumaro hramosarda tumenge vov vaćavavipe akaja. A ano anglipe kerdipesko o Del kerdas len sar rome thaj romnja. Godolestar ka mekel o čhavo e dade pire thaj deja thaj ka astajavel pes ćire romnjaće. Thaj ka oven liduj jek badani. Geja naj maj liduj aj jek badani. A so o Del phangla o manuš kaj te na ulavel. Thaj ano kher palem phučle les katar godova e sikavne leske. Thaj phenda lenge: Savo mekel e romnja thaj les pes avera, kerel angločumidipe lasa. Thaj e romni mekelpe e romestar pirestar đal vaš avereske, kerel angločumidipe. Thaj anena leste čhavoren te azbaven len, a e sikavne čhinavena godolenge kaj anena len. Thaj dikhla o Isus i holi lija les thaj phenda lenge: Meken e čhavoren mek aven mande, thaj na te ačhaven len; kaj si gasavenge Thagaripe Devlesko. Čače tumenge phenav: Savo ni lel Thagaripe Devlesko sar čhavoro, ni ka del an leste. Thaj lija len an angali, čhuta pe vasta pe lende ta len baxtarda. Thaj kana inklistilo po drom, praslo vareko, thaj pelo pe čhanga anglal leste, phučla les: Sikamneja gudleja, so trubul mange te kerav te avel man đivdipe biagorutno? A o Isus leske phenda: Sose man akhares gudleja? Khonik naj gudlo sem jekh Devel. E vaćavavipe džanes: Ma ker angločumidipe; ma mudar; ma čor; ma motho xoxamne; ma ker bihakaja khanikaske; de pativ e dade ćire thaj e daja. A vov irisarindoj phenda leske: Sikamneja sa kava arakhlem katar o ternipe munro. A o Isuso dićhindoj pe leste, lošalas le, thaj phenda leske: Si vađe jek so naj tut: đa bikin sa so situ thaj de e čororenge; thaj ka ovel tut barvalipe po badali; thaj av, le o trušul ćiro thaj phir pala mande. A vov teljarda po šero ando kala lafjora, thaj đelo dukhado; kaj sas but barvalo. Thaj dićhindoj uzal peste, o Isus phenda e sikavnenge pirenge: Sar si phare e barvalenge te den an Thagaripe Devlesko! A e sikavnen lija e dar pe lafjora leske. A o Isus palem irisarindoj phenda lenge: Ćhavoralen, sar si phare godolenđe save paćan an barvalipe te den an Thagaripe Devlesko! Majloće si e devake andar e suvjake kana te nakhel, na li e barvaleske an Thagaripe e Devlesko te del. A von but biašuđarune vakerindoj an peste: ta kon napal šaj te inkalel pes? A o Isus dićhindoj pe lende phenda: E manušenge si godova bišajune, aj e Devleske naj; kaj sa si šajune e Devleske. A o Petar leske lija te vakerel: Eke amen meklam sa thaj pala tute avilam. A o Isus irisarindoj phenda: Čače tumenge phenav: naj khanika savo mekla o kher, ja e phraljen, ja e phejen, ja e dade, ja e daja, ja e romnja, ja e čhavoren, ja e phuv, ando mande thaj ando evangelium, a te na mangel te lel akana an akava vaxto šel droma gaći khera, thaj phrala, thaj e dade, thaj e daja, vi e čhavoren, vi e phuv, uzal tradipe, a ano šelberšipe savo avel đivdipe biagoresko. Aj but anglune ka oven palune thaj e palune anglune. Thaj đikaj đerdindoj e dromesa an Jerusalim, o Isus phirda anglal lende, a von ačarhime, thaj pala leste đana darasa. Thaj lija palem e Dešudujoren, lija lenge te mothovel so leske ka kerdol pes: Ake đas upre an Jerusalim, thaj o Čhavo Manušesko ka dindol anglunerašajenge thaj lilvarnenge, thaj ka krisisaren les po meripe, thaj ka den les nađangledevlese; Thaj ka maren prasape lestar, thaj ka maren les, thaj ka čhungaren les, thaj ka mudaren les, thaj o trito đive ka đivdinisavol. Thaj avile anglal leste o Jakov thaj o Jovan, e čhave Zevedejeske, vakerindoj: Sikamneja, manga te keres amenge so ka ruđisaras tut. A vov lenge phenda: So mangen tumenge te kerav? A von leske phende: De amen te bešas jekh pe čači rig tuke a o dujto pe uči, an sumnalipe ćiro. A o Isus phenda lenge: Ni đanen so roden; šaj li te pijen e taxtaj savi me pijav, thaj te trušulin tumen trušulimasa, savesa me trušuliv man? A von leske phende: Šajisara. A o Isus lenge phenda: E taxtaj, akana, savi me pijav ka pijen la; thaj trušulimasa savesa me trušuliv ma ka trušulin tumen; Aj te bešen pe čači rig mange thaj uči naj munro te dav, aj ka del pes savenge si gatime. Thaj ašundoj goda e dešore lije te xoljavon po Jakov thaj po Jovan. A o Isus akharindoj len phenda lenge: Đanen kaj godola save haćaren pes šerutnenca e manušenge divlisaren lenca, thaj e bare lenge šerutnin upral lende. Aj maškar tumende te na ovel geja; aj savo mangel te ovel maškar tumende baro, mek tumenge kandel; Thaj savo mangel maškar tumende te ovel angluno, mek ovel savorenge kandino. Kaj o Čhavo Manušesko ni avilo leske te kanden aj te kandel, thaj te del o trajo piro an kinipe vaš butenge. Thaj avile an Jerihon. Thaj kana inklistile andar o Jerihon, vov thaj e sikavne leske thaj e bute seloro, o čhavo e Timejevesko, o Vartimej kororo bešela pašo drom, manglindoj. Thaj ašundoj kaj si godova o Isuso Nazarećano, ačhilo te del vika thaj te vakerel: Ćhaveja e Davidosko Isuso, maznosar man! Thaj daravena les but đene te ačhel, a vov vađe najbut dela vika: Ćhaveja e Davidosko, maznosar man! Thaj aćhavindoj o Isus phenda: Akharen les! Thaj akharde e korore vakerindoj leske: Ma dara, ušti, akharel tut. A vov, čhudindoj pestar o fustano piro, uštilo thaj avilo e Isusoske. Thaj irisarindoj phenda leske o Isus: So mange tuke te kerav? A o kororo leske phenda: Sikamneja, te dikhav. A o Isus leske phenda: Đa, o paćape ćiro inkalda tut. Thaj sigo dikhla, thaj đelo dromal palo Isus. Thaj kana resle paše o Jerusalim, Vitfaga thaj Vitanija, ke plain Maslinaki, bićhaldas dujen katar e sikavne pire. Thaj phenda lenge: Đan ano gav kaj si nakoro tumende, thaj sigo sar den an leste ka araćhen e xere phanglo, pe savo khonik katar e manuša ni bešlo; putren les thaj anenle. Thaj te kon tumenge phenel: So godova keren? vakeren: E Devlutneske si trubul; thaj sigo ka bičhalel les akari. A von đele, arakhle e xere phanglo ko vudar avral pe trušule droma, thaj putarde les. A nesavore katar godola so ačhena gothe phende lenge: So godova keren thaj putren e xere? A von lenge phende sar so lenge čhinada o Isus; thaj mekle len. Thaj ande e xere e Isusoske, thaj čhute pe leste e fustanja pire; thaj bešlo pe leste. A but đene buljarde pire fustanja po drom; a e aver čhinena krangore katar e kašta, thaj buljarena po drom. A save đana anglal leste thaj pala leste, dinde vika vakerindoj: Osana! Baxtardo savo avel ano alav e Devlutnesko! Baxtaruno thagaripe e dadesko amaresko e Davidesko, savo avel ano alav e Devlutnesko. Osana po ućipe! Thaj dija o Isus an Jerusalim, thaj ano hramo; thaj dikhindoj sa, kana raćajlo, inklistilo ane Vitanija e Dešudujorenca. Thaj po taisutno dives kana inklistile andar e Vitanija, bokhajlo. Thaj dikhindoj dural e sumučinalin patrenca, avilo na li ka ma so khanči arakhel pe late; thaj avindoj lake khanči ni arakhla sem patrina; kaj vađe naj sa o vaxto sumučinengo. Thaj vakerindoj o Isus phenda lake: Katar akana khonik te na xal tutar bijanipe đišelberšipe! Thaj ašunde e sikavne leske. Thaj avile pale ano Jerusalim: thaj dindoj andre o Isuso ano hramo, ačhilo te tradel godolen save bikinena thaj kinena an hramo; thaj peravda e astale godolenge kaj arlisarena e love, thaj e bešavne godolenge kaj bikinena golubore. Thaj ni mekla khoni te ingarel savono vaso andar o hramo. Thaj sikavela vakerindoj lenge: Naj li hramome: O kher munrro ka akharel pes kher ruđimasko savorrenge e manušenge? A tumen kerden lestar xuv čorimaski. Thaj ašunde e lilvarne thaj e anglunerašajutne, thaj rodle sar les te mudaren kaj lestar darana; kaj sa e seloro but mangle o đanipe lesko. Thaj kana sas erat inklilo avral o foro. A sabajle nakhlindoj dikhle e sumučinalin kaj šućili andar e darhina. Thaj dinđa godi o Petar phenda leske: Sikamneja, dikh, e sumučinalin sava dijan arrman šućili. Thaj irisarindoj o Isuso phenda leske: Mek ovel tumen paćajpe ano Devel. Kaj čače tumenge phenav: Te kon phenel e plainake kalake ušti thaj čhud tut ano derav, a ni sungal an vilo piro, aj paćal kaj ka avel sar so vakerel, ka avel leske so god phenel. Godoleske tumenge phenav: Sa so roden an tumari ruđutni, paćan kaj ka len: thaj si te ovel tumen. Thaj kana ačhen pe ruđutni, jertisaren te situmen so opipe kastar; kaj vi o Dad tumaro savo si po badali jertisarel tumenge sa e bezaxa tumare. Te na tumen ni jertisaren, ni o Dad tumaro savo si po badali ni ka jertisarel tumenge e bezexa tumare. Thaj avile palem ano Jerusalim; thaj kana phirende andar o hramo avile leste e anglunerašajutne thaj e lilvarne phurederutne. Thaj phende leske: sarsave zorasa goda keres, ja kon tuke dija zor kaj kava te keres? A o Isuso irisarindaj phenda lenge: Vi me tumen te phućav jekh lav, thaj mothon mange, ta ka mothav tumenge sarsave zorasa kava kerav. Trušulisaripe e Jovanosko sa li e badalestar ja e manušendar? Mothon mange. Thaj gindisarindoj an peste vakerindoj: Te phendam, e badalestar; ka phenel: sose leske, akana, ni paćajen? A te phenas: e manušendar? – darana e manušendar; kaj savore gindisarde vaš Jovanoske kaj čače profeto sasa. Thaj irisarindoj phende e Isuseske: Ni đana. A o Isus irisarindoj phenda lenge: Ni me tumenge ni mothav save zorasa kava kerav. Thaj lija lenge te vakarel ane paramiča: Sijisarda o manuš drakhalina, thaj vazdla khuvdune barasa, thaj vazdla kula, dija les drakharenge, ta đelo. Thaj kana avilo o vaxto, bičhalda e drakharenge e kandine te lel katar e drakhara bijanipe drakhalinengo. A von les astarde, marde thaj bićhalde čuče vastengo. Thaj pale lenge bićalda avere kandine; vi godole čhudle barrenca, thaj pharrade lesko šero thaj bićhalde les ladžardino. Thaj pale bićhaldas avere, thaj les mudarde; thaj bute averen, jekhen marde a averen mudarde. A vov sas les vađe jekhorre čhave pire, kamle, ta lenge majpalal bićhaldas vi les, vakerindoj: Ka lađan e čhavestar munrrestar. A e drakhara von phende maškar peste: kava si dadesko čhavo phiren les te mudaras, thaj amaro ka avel o barvalipe lesko. Thaj astarde les, ta mudarde, thaj ćudle les avral andar e drakhalina. So ka, akana, kerel o barutno e drakhalinako? Ka avel thaj ka xasarel e drakharen, thaj ka del e drakhalina averenge. Sar ni drabarden ano Lil akava: O barr savo čhudle e duvarđije, vov kerdilo šero katar e xnz. Godova sas katar o Devlutno thaj but šukar si ane jakha amare. Thaj rodle les te astaren, aj darajle e selastar; kaj haljovde vaš lende vakerel e paramiči; thaj aćhalde les đele. Thaj bićhalde leske nesave katar e farisejura thaj Irodovcura sar bi les astaren ane lafija. A von avindoj phende leske: Sikamneja, đana kaj san čačuno, thaj ni čhotu sama ni pe kaste; kaj ni dikhe kon si kon, aj čače o drom e Devlesko sikave. Phen amenge, akana, trubul li e thagareske te del pes o harači ja na? Te das ja te na das? A vov đaglindoj lengo dujmujipe phenda lenge: So man zumaven? Anen mange o dinari, te dikhav. A von ande. Thaj phenda lenge: Kasko si kava muj thaj hramope? A von leske phende: E Thagaresko. Thaj irisarindoj o Isuso phenda lenge: Den e thagaresko e thagareske, a e Devlesko e Devleske. Thaj mištosajle leske. Thaj avile leske e sadukejura, save phenen kaj naj đivdinisaripe, thaj phučle les vakerindoj: Sikamneja, o Mojsija amenge hramosarda: Te khanikaske o phral merel thaj mekla e rromnja a ćhavore ni mekla, kaj o phral lesko lel e rromnja leskera thaj te vazdel e kučin phraleske pireske. Efta phrala sesa: thaj o angluno lija e rromnja, thaj mulo bi ćhavengo. Vi o dujto lija las, thaj mulo, thaj ni vov ni mekla čhaven; geja vi o trito. Thaj lije la eftavorre thaj ni meklje čhaven. A pala e savore muli vi e rromni. Katar o đivdinisaripe, akana, kana dživdinisavon, saveski katar lende ka avel e rromni? Kaj la so efta sesala vaš rromnjake. Thaj irisarindoj o Isuso phenda lenge. Ni xoxadon godoleske so ni đanen e Lila ni e zora Devleski? Kaj kana andar e mule dživdinisavon, ni lenape ni denape, aj si sar devleske phakale po badali. A vaš e mulenge te dživdinisavon na li drabarden ane Mojsijaske lila sar leske phenda o Del ke kalhalina vakerindoj: Me sem o Devel e Avramosko, thaj o Devel e Isakosko, thaj o Devel e Jakovesko? O Devel naj Devel e mulengo, aj e đivdengo. Tumen, akana, but xoxadon. Thaj alo đi lende jekh katar e lilvarne savo len ašunela sar vakerena, ta dikhindoj sar lenge lačhe irisarel, phučla les: Savo si čhinadino angluno katar e sarendar? A o Isuso leske irisarda: Angluno si čhinadino katar e sarendar; Ašun Izrailjona, o Devlutno Devel amaro si Devlutno jekhuno; Thaj čumid e Devlutne Devle ćire sa vilesa ćiresa, thaj sa ođe ćhiresa thaj sa gođasa ćirasa, thaj sa zuralimasa ćiresa. Kava si angluno čhinadino. Thaj o dujto si sar vi kava: Čumid pašune ćire sar korkorro tut. Aver čhinadine majbare katar kala naj. Thaj phenda leske o lilvarno: Lačhe, sikamneja, čačimasa mothodan kaj si o Devel jekh, thaj naj aver sem vov; Thaj te čumides les sa vilesa ćiresa thaj sa gođasa thaj sa ođesa thaj sa zuralimasa, thaj te čumides e pašune sar korkorro tut, majbare si katar e sa phabarutna thaj viktime. A o Isususo dikhindoj sar gođaverune irisarda phenda leske: Najsan dur katar o Thagaripe e Devlesko. Thaj khoni maj ni krisisajlo les te phučel. Thaj irisarindoj o Isuso phenda sikavindoj ano hramo: Sar vakeren e lilvarne kaj si o Hristos čhavo e Davidosko? Kaj korkorro o David phenda Đesa Sumnalesa: Phenda o Devlutno e Devlutneske munreske: beš mange pe čači rig, đikaj pašljarav e bikamnen ćiren vaš ni than thanende ćire punrengo. Korkorro o David, akana akharel les Devlutnesa, ta katar leske si čhavo: Thaj but šel ašunena les ođesa. Thaj vakerda lenge an đanipe piro: Arakhen tumen e lilvarnendar save kamen te phiren ane lunge fustanja, thaj len te arakhadon pe droma. Thaj mangen anglune thana pe sinagoge, thaj paćavdo than pe xamata. Kala kaj xan khera e phivljenge, ta xoxamne ruđina pes lunge, ka aven vađe akana krisime. Thaj bešlo o Isuso mamuj hramoski hasna thaj dikhela sar e manuša čhon love an late. Thaj bute barvale čhute but. Thaj avindoj jekh čorori phivli čhuta duj lepte, save keren jekh kodranto. Thaj akharindoj e sikavnen piren phenda lenge: Čače phenav tumenge: kaja čorori phivli čhuta majbut katar e sarendar save čhon ane hramoski hasna. Kaj savorre čhute katar o majbutipe piresko; a voj katar o čororipe piro čhuta sa so sala, sa o barvalipe piro. Thaj kana inklilo andar o hramo, phenda leske jekh katar e sikavne leskere: Sikamneja, dikh save barra, thaj save kerimata! Thaj irisarindoj o Isuso phenda leske: Dikhes li kala bare kerimata? Ni o barr po barr kate ni ka ačhel savo ni ka čhudel pes. Thaj kana bešela pe plajin e Maslinoski mamuj o hramo, phučle les korkorrune o Petar thaj o Jakovo vi o Jovano thaj o Andrej: Phen amenge: kana goda ka ovel? Thaj savo si o semno kana ka godova sa agorisarel? A o Isuso irisarindoj lija lenge te vakerel: Arakhen, kaj tumen kon ni xoxavel. Kaj bute ka aven an munrro alav vakerindoj: Me sem, thaj buten ka xoxaven. A kana ašunen marimata thaj krle marimatendar, ma daran; kaj trubul godova te ovel; aj godova vađe naj agor. Ka ušten o seloro po seloro thaj o thagaripe po thagaripe; thaj ka ovel e phuvljako tresibe po them; thaj ka avel bokh thaj gingula godova anglipe perimasko. A tumen te arakhen tumen; kaj tumen ka den krisonenge thaj pe sinagoge ka maren tumen thaj anglal e radža thaj thagara ka inkalen tumen baše mande, vaš mothodipe lenge. Thaj sarenge e manušenge trubul majanglal kaj te mothovel pes o evangelium. A kana tumen ka inđaren te meken tumen, ma arakhen tumen anglal so ka vakeren, ni ma te gatisavon, aj so del pes tumenge an godova vaxto goda vakeren; kaj ni ka vakeren tumen aj o Đi Sumnalo. Thaj ka mekel o phral e phrale po meripe thaj o dad e čhave, thaj ka ušten e ćhavorre pe save bijande len thaj ka mudaren len. Thaj savorre ka dikhen tumen bange bašo alav munrro. Aj savo ka nakhavel đi agor godova ka inkalel pes. A kana dićhen kaj o melalipe šućarimasko, vaš savo vakarel o profeto Danilo ačhel kaj ni trubul – savo drabarel te haljovel – atoska save ka aven ane Judeja mek našen ane plajina. Thaj savo ka avel po ćhatlo te na huljen ano kher, ni te del te lel so andar o kher piro; Thaj savo ka avel ane umalin te na iril pes palal te lel o fustani piro. Aj pharipe e khamnjenge thaj dinutne čučenge an gode đivesa. Aj ruđin tumen e Devleske te na avel našipe tumaro ivende. Kaj an gode đivesa si te ovel gasavi bibaxt savo najsa katar o anglipe ćerimasko so o Devel čerda đi akana ni maj te ovel. Thaj o Devlutno te ni čhinel gode đivesa, khoni ni ka inkalel pes; aj bašo alosardine, save alosarda čhinada godola đive. Thaj atoska tumenge te kon phenda: Ake kate si o Hristos; ja: Eke okote, ma paćan. Kaj ka mothoven pes xoxamne hristosura thaj xoxamne profetura, thaj ka mothon semne thaj aćhaja kaj, te si šajune, xoxaven vi e alosarden. Aj tumen araćhen tumen; ake sa tumenge mothodem angleder. Aj an gode đivesa, kana naćhela e bibaxt, o kham ka kaljardol, o čhon piro dikhipe ka našalel. Vi e čerenja ka peren katar o badali thaj e zora badaleske ka miškon pes. Thaj atoska ka dikhen e Čhave Manušesko kaj avel pe uprale zuralimasa thaj ašardimasa. Thaj atoska ka bičhalel pire devleske phakalen thaj kakedel e alosarden pire katar e štar balvalja, katar o agor e phuvljako đi o agor e badalesko. A katar e sumučinalin sićon sikajpe: Kana ake lake krangura terrnjardon thaj patrinjon, đanen kaj si paše o nilaj. Geja vi tumen kana dićhen kava kaj kerel pes, đanen kaj si paše ko vudar. Čače tumenge phenav kaj akala save barjon ni ka nakhel đikaj akava sa ni ovel. O badali thaj e phuv ka nakhel, aj e lafija munrre naj te nakhen. A katar o đive godova ja katar o vaxto khoni ni đanel, ni e devleske phakale po badali, ni o Čhavo, đi jekhuno o Dad. Arakhen, džangadon thaj ruđin tumen; kaj ni džanen kana o vaxto ka resel. Sar so o manuš džaltar mukel thaj o kher piro, thaj dija kandinenge pirenge o kriso, thaj sarsavoneske piri bući; thaj e vudarareske čhinavel te arakhel. Arakhen, akana, kaj ni đanen kana ka avel o baro barutno e kheresko: an raćipe ja an opašraći ja an đilabipe bašnengo ja sabajle. Te na avel biašuđarune thaj arakhel tumen katar soven. A so tumenge vakerav, savorrenge vakerav: Arakhen! Sesa vađe duj đive đi o baro đive Pashe thaj bimajavenge marre; thaj rodena e anglunerašaja thaj e lilvarne sar ka ma les xoxamne astarena thaj mudaren. Aj vakerena: Na e bare điveseske, kaj te na e selore uštena. Thaj kana vov sasa ane Vitanija ano kher e Simonosko e đeramnesko thaj bešla vaš e astala, avili e manušni vasosa katar o alvastro, pherdo vorto kuć nardoveske sungako, thaj phađindoj o vaso čhorda leske po šero. A sesa nesave save bićaljarde maškar peste vakerindoj: Sose godoj sung čhorel pes geja? Kaj šaine godi sung te bikinel pes vaš majbut katar e trišel dinara thaj te del pes e čororenge. Thaj dijes vika pe late. A o Isuso phenda: Meken la; so lake azbaven? Voj kerel lačho kotor pe mande. Kaj e čororen si tumen an sarsavo vaxto tumenca, thaj kana god mangen šaj lenđe lačhe te čeren; a man naj tumen an sarsavo vaxto. Voj čerda so šaine; makhla anglal o trupo munrro vaš praxope. Čače tumenge phenav: Kaj god te vakerelpe o evangelium kava pe saheste them, ka phenel pes vaš liparipe lako vi kava so voj čerda. A o Juda Iskariotosko, jekh katar e Dešudujorre, đelo e anglunerašajenge kaj te delmuj les. Thaj von ašundoj lošalisaj les thaj dije les o lav kaj ka den le love; thaj vov rodla lačho vaxto te delmuj les. Thaj an angluno đive bimajavenge marre, kana čhinde pashalune bakre, phende leske e sikavne leskere: Kaj manges te đas ta te gatisaras tuke e Pasha te xas? Thaj bićhaldas duje dženen katar e sikavne pire thaj phendas lenge: Đan ano foro, thaj ka arakhel tumen o manuš savo ingarel o khoro pajesa, đan pala leste, thaj kaj dijas mothon e kherutne khereske: O sikamno phenel: kaj si munrri odaja kaj ka xav e Pasha e sikavnenca munrrenca? Thaj vov tumenge ka sikavel bari upruni odaja, ućhardi thaj gatisardi: okote keraven amenge. Thaj inklistile e sikavne leske, thaj avile ano foro, thaj arakhlje sar so lenge phenda, thaj gatisarde e Pasha. Thaj kana raćajlo, avilo e Dešudujorrenca. Thaj kana bešle vaš e sofra thaj xana, phenda o Isuso: Čače tumenge phenav: Jekh katar tumende, savo xal manca ka phukavel man. A von aćhile te dukhardon thaj vakerindoj leske jekh pala avre: Te najsem me? Thaj o aver: Te najsem me? A vov irisarindoj phenda lenge: Jekh katar e Dešudujorre savo ka del vas manca ano čaro. O Čhavo Manušesko, akana, đal sar kaj si hramome vaš leske; aj pharipe godole manušeske savo ka phukavel e Čhave Manušeskere; majlačhe ka ma avel leske te na ni bijandola godova manuš. Thaj kana xana lija o Isuso marro thaj baxtarindoj phagla les, thaj dija lenge, thaj phenda: Len, xan; kava si o trupo munrro. Thaj lija e taxtaj thaj baxtarindoj dija lenge; thaj pile andar late savorre; Thaj phenda lenge: Kava si rat munrro Neve sovljako savo čhordol pe bute dženenge. Čače tumenge phenav: Maj naj te pijav katar o bijanipe drakhalinako đi godova đive kana ka pijav les nevo ano Thagaripe Devlesko. Thaj đilabindoj e naisuni inklistile pe plajin Maslinaki. Thaj phenda lenge o Isuso: Savorre tumen ka dukhavdon andar mande akaja rat, kaj si hramome: Ka čalavav e čobano thaj e bakre ka našen. Aj po đivdinisaripe munrro ka đav anglal tumende an Galileja. A o Petar leske phenda: Kaj te taj savore dukhadon, me ni mangav. Thaj phendas leske o Isuso: Čače tuke phenav: ađive, ajrat, anglal so ka o bašno duj droma đilabel, tu mandar trin droma ka durardo. A o Petar vađe majćhinadune vakerda: Te kama vi te merav tusa, ni ka durardivav tutar. Palem geja thaj savorre vakerena. Thaj avile po than savo akharel pes Getsimanija, thaj phenda e sikavnenge pirenge: Bešen kate đikaj me đav te ruđisajvav e Devleske. Thaj lija pesa e Petre thaj e Jakove thaj e Jovano, ta ačhilo but te dukhavdol thaj te dukhavel. Thaj phenda lenge: Dukhavdo si o đi munrro đi o meripe; ačhen kate thaj džangadon. Thaj đapeindoj zala pelo pe phuv, thaj ruđila pes kaj kama les nakhel o vaxto, te si šajune. Thaj vakerela: Ava, Dade, sa si šajune tuke; inđar e taxtaj kaja bi munrro; aj pale na sar me mangav aj sar tu. Thaj avilo thaj arakhla len kaj soven, thaj phenda e Petroske: Simono aj soves? Sar ni šajisarden jekh vaxto đangade? Džangadon thaj ruđin tumen te na peren an zumadipe; kaj o đi si vilojalo aj si o trupo ćišlo. Thaj pale dželo thaj ruđisajlo e Devleske vakerindoj pale godola lafija. Thaj irindoj arakhla len palem kaj soven; kaj lenge sesa jakha phararde; thaj ni đanena so ka ma leske irisarena. Thaj avilo vi o trito drom, thaj phenda lenge: Soven, akana, thaj lulinen. Mamaj sa. Avilo o vaxto eke mekel pes o Čhavo Manušesko ane va bezaxengo. Ušten te đas! Ake o phukavno munrro pašilo. Thaj sigo, đikaj vov vađe vakerela, avilo o Juda, jekh katar e Dešudujorre, thaj lesa bute manuša čhurenca thaj čilenca, bićhalde katar anglunerašaja thaj lilvarne ta phurederimata. A lesko phukavno avral dija len đanglipe vakerindoj: Kas čumidav, vov si; astaren les thaj inđaren arakhavnune. Thaj avindoj, sigo leske pašilo thaj phenda: Sar san, Sikamneja! Thaj čumidla les. A von čhute e vasta pire pe leste thaj astarde les. A jekh katar lende kaj ačhela gothe inkalda e čhuri ta čalada e kandine anglunerašajesko thaj čhinda lesko kan. Thaj irisarindoj o Isuso phenda lenge: Sar po čor inkliljen čhurenca thaj čilenca te astaren man. Sarsavo đive sema tumende ano hramo thaj sićavava, thaj ni asterden man. Aj te pherel pes o Lil. Thaj meklindoj les našle savorre. A pala leste đala khajekh raklo učhardo poxtanosa po nango trupo; thaj astarde godole rakle. A vov meklindoj o poxtan, nango našlo katar lende. Thaj ande e Isuso e anglunerašajeske, thaj činidisajle leste sa e anglunerašaja thaj e lilvarne thaj e phurederutne. A o Petar đala pala leste dural đi an avlin anglunerašajesko, thaj bešle e kandinenca, thaj tatona ke jag. A e anglune rašaja thaj o sa Sinedriono rodle opipe Isusostar mothojmata kaj te mudaren les; thaj ni arakhle. Varesave đene mothode xoxamne opipe lestar thaj e mothodimata naj sesa jekhune. Thaj khajekh uštindoj mothoda opipe lestar xoxamne, vakerindoj: Amen les ašundam kaj vakerel: Me ka phađarav kava hramo vastenca kerdo, thaj vaš trin đive te kerel aver bi vastencar kerdo. Thaj ni kava mothodipe lengo na sasa čačo. Thaj aćhindoj anglunorašaj po maškaripe phučla e Isuso, vakerindoj: Sar khanči ni irisare so kala opipe tutar mothon. A vov ačhela thaj khanči na irisarela. Palem les o anglunorašaj phučel thaj phenda: A san li tu o Hristos, Čhavo Baxtardejaso? A o Isuso phenda: Me sem goda; thaj ka dikhen e Čhave Manušesko kaj bešel pe čači rig Zorako thaj avel pe nuvere badeleske. A o anglunorašaj pharrada e fustanja pire, thaj phenda: So amenđe maj trubun e jaćhenca dikhle? Ašunden mahripe po Devel. So tumenge kerel pes? A von savone les krisisarde kaj ačhel leske o meripe. Thaj lije khajekh te čhungaren pe leste thaj učharen lesko muj, te čalaven les, thaj vakerindoj leske: Malav amenge kon čalada tut! Thaj e kandine marena les pe čhama. Thaj kana sasa o Petar tele ane avlin, avili jekh katar e kandina anglunerašajengi. Thaj dikhindoj e Petre kaj tatarel pes dikhlas les thaj phenda: Vi tu sana e Isusosa Nazarećaninosa. A vov durarel vakerindoj: Ni đanav, ni haljovav so tu vakeres. Thaj inklilo avral an angluni avlin, thaj o bašno đilabda. Thaj dikhla les e kandini pale, ta lija te vakerel godolenge so sesa gothe: Kava si katar lende. A vov pale durarela. Thaj zala pala goda godola kaj sesa gothe phende e Petroske: Čače san katar lende; kaj san Galilejco, vi o vakeripe si će čhutino. A vov lija te del pe sovli thaj xal sovel: Ni đanav godole manuše savestar vakerena. Thaj po dujto drom đilabda o bašno. Thaj dijas pes gođi o Petar e lavende so leske phenda o Isuso: Anglal so ka o bašno duj droma đilabel, trin droma ka durado. Thaj lija te rovel. Thaj sigo sabajle kerde phurederipe e anglunerašaja e phurederutnenca thaj e lilvarnenca, thaj sa o Sinedriono, thaj phanglindoj e Isuso inđarde les thaj dije les e Pilatoske. Thaj phučla les o Pilato: San li tu thagar e judejengo? A vov irisarindoj phenda leske: Tu phenes. Thaj krisisarde les e anglunerašaja but. Aj vov ni irisarda khanči. A o Pilato pale les phučla vakerindoj: Sar khanči ni irisare? Dikh kobor tut krisisaren! Aj o Isuso maj khanči ni irisarda geja ta o Pilato barikanisajlo. A katar o Baro đive mukljarena lenge po jekhe phangle save ka ma roden. A sasa khajekh, po alav Varava, ane sastra pire uštiutnenca, save si an uštipe čerde mudaripe. Thaj dindoj vika e manuša aćhile te roden godova so lenge sajekh kerela. A o Pilato lenge irisardas vakerindoj: Mangena li te mekav tumenge e thagare judejskone? Kaj džanglesa so ole andar o koronavipe dije e anglunerašaja. Aj e anglunerašaja vazdle e selore kaj si majlačhe te meken lenge o Varano. A o Pilato pale irisarindoj phenda lenge: A so mangen te kerav godolesa kaj akharen les thagaresa judejsko? A von pale dije vika: Tho les po trušul! A o Pilato lenge phendas: A savo đungalipe keras? A von vađe majzurale dije vika: Tho les po trušul! Thaj o Pilato maglindoj te pherel o manglipe e manušenge, mekla lenge e Varava, a e Isuso, čalavindoj, dija te thon les po trušul. A e urumne les ingarde andre ane avlin an gejaakhardo pretorijumo, thaj akharde sa e četa urumenge. Thaj urade leske purpuruno mantili, khuvindoj kanralo khuvdo čhute pe leste. Thaj aćhile te arakhadon lesa: Sar san, thagara judejsko! Thaj marena les po šero trskasa, ta čhungarena pe leste, thaj perindoj pe čanga bandživdepe le se. Thaj kana marde lestar prasape, uljarde lestar o purpuruno mantili, thaj hurade les an leske fustanja thaj inkalde les te thon po trušul! Thaj tradle jekhe nakhlutne, e Simono andar e Kirina, e dade Aleksandrovesko thaj e Rufovesko, savo đala andar e umala, te inđarel o trušul lesko. Thaj ande les po than Golgota, so viz: Than šeresko kokalo. Thaj dijesa leske te pijel mol tamjanosa, a vov ni lijas. Thaj kana thodeles po trušul ulade e fustanja leske čhudindoj zaro vaš lenge ko so ka lel. A saso o vaxto trito, thaj thode le po trušul. Thaj sasa telalhramono leske došako hramome: O Thagar judejsko. Thaj lesa thode po trušul dujen čoren jekhe pe čači, a jekhe pe uči rig leske. Thaj pherda pes o Lil savo vakerel: Thaj thanarde les maškar e bikrisutne. Thaj e nakhlutne mahrina pe leste kerindoj šerenca pirenca thaj vakerindoj: Ua! Tu kaj o hramo rumisares thaj trine đivesenge keres, ikal korkorro tut thaj huljov katar o trušul! Geja vi e anglunerašaja e lilvarencar marena prasape, vakerindoj jekh avreske: Averen ikalda, a pes naštil te ikalel. O Hristos, thagar Izrailjesko, mek huljol akana katar o trušul te dikhas, ta leske ka paćas. Thaj godola save sesa lesa po trušul dukhavena les. A kana pašilo o šovto vaxto, sas raćipe pe sa e phuv đi o vaxto enjato. Thaj ano enjato vaxto dija vika o Isuso andar o sa krlo vakerindoj: Eloi, Eloi, lima savahtani? So mandavel: Devla munrreja, Devla munrreja, sose muklan man? Thaj khajekh katar godola kaj sesa gothe ašundoj goda vakerena: Eke akharel e Ilija. A jekh praslo ta pherda i svonga šutesa, ta pusavindoj pe trska pajarda les, vakerindoj: Meken te dikhas mangel li te avel o Ilija te huljarel les. Thaj o Isuso dija vika andar o sa krlo thaj mulo. Thaj e pođa hramoski pharradili pe duj upral đi tele. A kana dikhla o kapetano savo ačhela mamuj leste kaj geja dijas vika mulindoj, phenda: Čače o manuš kava o Čhavo Devlesko sas. A sesa gothe vi e đuvlja dikhindoj dural, maškar save sesa vi e Marija Magdalina thaj e Marija e dej Jakoveski Cikneski thaj e Josiveski, thaj e Salomiveski, save thaj kana vov sasa an Galileja đana pala leste thaj kandena leske; thaj bute aver ta save sesa avile lesa an Jerusalimo. Thaj kana ake sas raći, kaj sasa paraštuj, goda va o đive angla savato, avilo o Josif, andar e Arimateja, dikhlo phurederutno, savo vi korkorro Thagaripe Devlesko ašuđarda, thaj tromarda ta dijas ko Pilato thaj rodla o trupo e Isusosko. A o Pilato čudisajlo kaj ake mulo; thaj akharindoj e kapetano, phučla les: Si li but sar mulo? Thaj đanglindoj katar o kapetano, dija o trupo e Josifeske. Thaj vov kindoj o poxtan ta huljarindoj les, paćarda poxtanosa, thaj pašljarda les ano limori savo sasa čhindo ano barr, thaj rrupuzisarda o barr po vudar limoresko. A e Marija Magdalina thaj e Marija Josijina dikhena kaj les pašljardes. Thaj sar nakhlo o savato, e Marija Magdalina thaj e Marija Jakoveski thaj e Salomiveski kinde sunga te aven te makhen les. Thaj but sabajle an angluno đive purane kurćesko avile po limori trujal inklipe e khamesko. Thaj vakerena maškar peste: Kon ka amenge cidel o barr katar o vudar e limoresko? Thaj dikhindoj dikhle kaj o barr sasa cidlo, a sasa but baro. Thaj dindoj andre ano limori, dikhle e rakle hurado an parrno fustano kaj bešel pe čači rig; thaj darajlje. A vov lenge phendas: Ma daran. E Isuso Nazarećanino roden, saves po trušul thode. Uštilo, naj kate; ake o than kaj les pašljardesa. Aj đan thaj phenen e sikavnenge leskere thaj e Petroske, kaj ka anglal tumende đal an Galileja; odothe ka dikhen les, sar so tumenge phendas. Thaj inklindoj našle katar o limori, kaj len astardas e dar thaj izdrajpe, thaj khanikaske khanči ni phende, kaj darana. A o Isuso, dživdinindoj but sabajle ano angluno đive e purane kurćesko, mothodilo majanglal e Marija Magdalinake, andar savi tradlasa efta bengen. Thaj voj đeli ta mothoda godolenge so sesa lesa, save rovena thaj pharipe lena. A von ašundoj kaj si đivdo thaj kaj les voj dikhlas, ni paćaje. A pala goda mothodilo po drom dujenge katar lende an aver ćhand, kana đana ano gav. Thaj vov đapeindoj mothode averenge; aj ni lenge ni paćaje. Majpalal mothodilo pes lenge Dešujekhenge kana sesa vaš e astala, thaj krisisarda len vaš lengo bipaćajpe thaj bikamlipe ilesko, kaj ni paćaje godolenge save dikhle les đivdinuno. Thaj phenda lenge: Đan po sa o them thaj vakeren o evangelium sarsavone dženeske. Savo paćal thaj bolel pes ka avel ikaldo, a savo ni paćal ka avel krisime. A e semne godolenge save paćan ka aven kala: alavesa munrresa ka traden e bengen; ka vakeren neve čhibenca; Ka len sapen ane vasta; te vi merikane so pijen, niso ni ovela lenge; pe nasvale ka thol pe va, thaj ka saston. A o Devljutno sar lenge kava vakerda, uraja po badali thaj bešlo e Devlese pe čači rig. A von đele thaj vakerde pe sa e riga, thaj o Devljutno mažutila lenge, thaj o lafjori čačavena semnonca save napal mothodona. Amen. Sar kaj but zumavde te čhiven mothovipe e ćerimatendar save ćerdile maškar amende, sar so amenge mukle godola save katar o anglunipe sine dićhutne thaj kandine Lafenge, dijemgodi vi me, phućindoj čače sa katar o anglunipe, rindosa hramindoj tuke, bareođesko Teofilo, te penđare o temelji odole lafjorengo savenca san sikavdo. Ano vaxto e Irodosko, thagar e judengo, sine nesavo rašaj katar o rindo e Avijinosko, po anav Zaharija, thaj e romni leskiri katar e ćhaj Aronongi, po anav Jelisaveta. A sesa solduj čačutne anglal o Devel, thaj đivdisarde pe sa e vaćerimata thaj prelače e Devljutnesere laćhardimata. Thaj najsalen ćhavore, kaj e Jelisaveta sine bibijavni, thaj ine solduj ake purane beršenge. Thaj kerdilo pe, kana vov kandla pe piro rindo anglal o Devel, kaj po siklipe e rašajengo pelo lese ane kotor te del ani khangiri e Devljutneski thaj te sungarel. Thaj sa but selore ruđina pes avrijal vaš o vaxto e sungarimasko. A leske mothodilo o phakalo e Devljutnesko aćhindoj pe daxni rig e sungarutne viktimutnesko. Thaj xasardilo o Zaharija dikhindoj les thaj lija le e dar. A o phakalo lese vačerđa: Ma dara, Zaharija, pherdino si o ruđipe tiro; thaj e romni tiri e Jelisaveta ka bijanel tuke čhave, thaj ka čhive lesoro anav Jovan. Thaj ka ovel tuke lošanipe thaj pherdo vilo, thaj bute ka lošanen pe pe leskoro bijandipe. Kaj ka ovel baro anglo o Devljutno, thaj ni ka pijel mol thaj jagakoro pipe; thaj ka pherel pes Đi Sumnalo pana ano vođi pe dajakoro; Thaj bute čhaven e Izrailjiske ka irisarel e Devljutnese lengere Devlese; Thaj vov angle ka đal anglal leste ano đi thaj zor e Ilijasko te irisarel e vile dadengoro karing e ćhavore, thaj e bikandinen karing o gođaveripe čačutnengo, thaj te laćharen e Devljutnese o seloro gatime. Thaj phenđa o Zaharija e phakalese: Pe soste me adava ka penđarav? Kaj me sem phuro thaj e romni mli si ano berša. Thaj irisarindoj o phakalo phenđa lese: Me sem o Gavrilo savo trđovav anglo Devel, thaj bičhaldo sem te vakerav tuke thaj akava te mothovav. Thaj ake, ka ove laloro thaj nakašaj te vakere đi ko odova dive đikaj odova na ka ovel, odolese so ni paćajan mle lafonenge save ka pherdon ano plo vaxto. Thaj e selore adžićerena e Zaharija, thaj phučena pe sose ačhilo ane khangiri. A iklindoj naštisarda te vakerel lenge; thaj haljarde kaj sasa le rošlipe ane khangiri, thaj vov lenge dela džanglipnaste, thaj ačhilo laloro. Thaj kana pherdile e dive lese kandimaske, gelo ple khereste. A pale odola dive aćili khamni e Jelisaveta lesiri romni, thaj garavela pe pandž masek vakerindoj: Geja kerda mange o Devel ane dive akala ane save dikhla pe mande te inkalel man kotar o ladžavipe, maškar e manuša. A ano šovto masek bičhaldo sine katar o Devel o phakalo o Gavrilo ani diz galilejesko po anav Nazaret, e ćhajake mangli baš romese, po anav Josif, andar o kher e Davidosko; thaj e ćhajako anav sine Marija. Thaj khuvindoj andre late o phakalo phenđa: Lošalisav, baxtalije! O Devel si tusa, baxtardini san tu maškar e romnja! A voj dikhindoj les, darandili kotar e lafija lesere thaj dija godi: savo bi akava arakhadipe ovel? Thaj phenđa lake o phakalo: Ma dara, Marija, kaj arakhlan baxtalipe ano Devel! Thaj ake khamnilan thaj ka bijane čhave, thaj ka čhive leso anav Isus. Ov ka ovel baro, thaj ka akharel pes Čhavo e Najućesko, thaj ka del le o Devljutno Devel skamin e Davidoski leske dadeski; Thaj ka thagaril upral o kher e Jakovesko sajekh, thaj leske thagarimaske ni ka ovel agor. A e Marija phenđa e phakalese: Sar odova ka ovel kana me ni đanav romese? Thaj irisarindoj o phakalo phenđa lake: O Đi Sumnalo ka avel pe tute, thaj e zor e Devlesiri ka strefisarel tut; odolese thaj odova so ka bijandol ka ovel sumnalo, thaj ka akharel pe Čhavo e Devlesoro. Thaj eke, e Jelisaveta tire njamoski, thaj voj khamnili ano phuripe plo, thaj akava si o šovto masek lake, sava akharena bibijavni. Kaj ano Devel si sa šaj so phenel. A e Marija phenđa: Ake kandini e Devlesiri – nek mange ovel pe lafija tire! Thaj o phakalo đelo latar. A e Marija uštindoj odole divesa đeli sigate ane plajinako agor, ani diz Judin. Thaj dija ano kher e Zaharijasko, thaj arakhavdili e Jelisavetasa. A kana e Jelisaveta šunda o arakhavdipe e Marijako, ćhelda o čhavoro ano vogi lako, thaj e Jelisaveta pherdili pes Đi Sumnalo, thaj dija vika uće krlesa thaj phenđa: Baxtardi san tu maškar e romnja, thaj baxtardo si o čhavoro tiro ano vogi! Thaj kotar mange akava te avel i daj mle Devljutneski pe mande ano vogi mlo? Egolese dikh, kana o krlo tiro arakhadimasko avel ane kana mle, ćhelel o čhavoro lošalimastar ano vogi mlo. Thaj baxtalipe odolake savi paćal, te ka kerel pe so lake vakerda o Devel. Thaj phenđa e Marija: Barjarel o ođi mlo e Devle; Thaj lošalisajlo mlo đi e Devlese, mle Ikalipnaske, kaj dikhlja po kovlipe ple kandinako; kaj dikh, akana ka akharen man baxtardinasa sa e generacije; So kerdan mange baripe Barezorako, thaj sumnalo anav lesoro. Thaj o kovljardipe lesoro katar e čang đi e čang odolenge save lestar daran. Pire vastesa čerđa e zor, phaglja e barikanen ane gindimata olenge vilenge. Frdinđa e zoralen katar o than thaj vazdinđa e teljarden. E bokhalen čaljarda laćhimatenca thaj e barvalen muklja čuče. Astarda e Izrailje e kandine ple te turnjivil pes kovlipese; Sar so vakerel e dadenge amarenge, e Avraamoske thaj leske semnoske đi šelberšipe. Thaj aćhili e Marija lasa trujal e trin masek, thaj irisajli ple khereste. A e Jelisavetake avilo o vaxto te bijanel, thaj bijanda murše. Thaj šunde lake pašutne thaj njamoske kaj o Devljutno mothovđa baro kovlipe plo pe late thaj lošalisajle lasa. Thaj ano oftoto dive avile te sunetinen e ćhavore, thaj čhute e dadesoro anav – Zaharija. Thaj irisarindoj i daj lesiri phenđa: Na, aj te akharel pes Jovan. Thaj phenđe lake: Khonik naj an familia tiri te akharel pes asavke anavesa. Thaj semnenca phučle e dade lesere sar ka ma vov mangela te akharenle. Thaj rodindoj e phalori hramosarda vakerindoj: Jovan si lesoro anav. Thaj čudisajle sare. Thaj sigo pravdilo o muj lesoro thaj e čhib lesiri, thaj vakerela baxtarindoj e Devle. Thaj đerdinđa e dar ane sa pašutne lengere; thaj pe sa e plajinaki Judeja buljardilo pe sa akava kerdipe. Thaj savore save šunde čhute ano vilo plo vakerindoj: So li ka ovel akava čhavoro? Thaj o vast e Devlesoro sine lesa. A o Zaharija o dad leskoro pherdilo pes Đi Sumnalo thaj anglamothovđa vakerindoj: Baxtardo o Devljutno Devel e Izrailesko so dikhljarda thaj inkalda ple selore. Thaj vazdla amenge o šing ikalipnasoro ano kher e Davidosko, ple kandinesoro, sar so phenđa mosa e sumnale profetongo lengo e šeleberšimastar. Kaj amen ka mukljarel amare dušmanondar thaj andar o vasta sarijendar save amen dikhena bange; Te kerelpe kovlipe amare dadenge, thaj te čhivel pes sama ple sumnale sovljake, sovljasa savasa xala sovli e Avraamoske amare dadeske, kaj amenge ka del: Inkalipe andar e vasta amare dušmanendar, kaj lese bi darako te kandas, ano sumnalipe thaj ano čačipe anglo leste ane sa dive amare đivdipase. Vi tu, ćhavoreja, ka akhares tut profeto e Devlikanesko; kaj ka đa anglal anglo muj e Devljutnesko te laćhares lesoro drom; Te de đandipe ikaldimasko lesere selorese vaš o jertipe lengere bezehendar, bašo vilalo kovlipe amare Devlestar, savesa amen dikhljarda o Istok učipestar; Te strefisarel odolen save bešena ano raćipe thaj učhaljin merimaski; te vortisarel amare pre po drom šandipesoro. A o čhavoro barjola thaj zurardola đesa thaj sine an drmina đi o dive đikaj ni mothovdilo e Izrailjiske. A ko odola dive iklistilo o čhinavdipe e thagaresko e Avgustesko kaj te ramosarenpe pe sa e vasiona. Kava sine angluno ramope vaš o vaxto e Kirinijeske vastarimasko e Sirijasa. Thaj gele savore te ramosaren pes, sarsavo ani pli diz. A atoska gelo vi o Josif andar e Galileja andar i diz Nazaret ane Judeja ani diz e Davidoski savo akharel pes Vitlejem, kaj vov sine andar o kher thaj njamo e Davidosko. Te hramol pe e Marija, mangli vaš leske romnjasa, savi sine khamni. Thaj kana odoring sesa, pherdile o dive kaj voj te bijanel. Thaj bijanda murše ple Anglune, thaj paćarda les, thaj pašljarda les ane balaja; kaj najsa lenge than ane mehana. Thaj sine e čobanja an odova agor bešindoj ane umal thaj arakhavindoj e arakhavni raćasa ke ple bakre. Thaj dikh, o phakalo e Devljutnesko ačhilo maškar lende, thaj o ašundipe e Devlesoro strefisarda len; thaj pherdile bari dar. Thaj phenđa lenge o phakalo: Ma daran; kaj tumenge, ake, mothovav lošalipe baro savo ka ovel sa e selorese. Kaj tumenge avdive bijandilo o Inkalipe, savo si o Hristos Devljutno, ani diz e Davidoski. Thaj akava si tumenge semno: ka arakhen e ćhavore paćardo kaj si pašljardo ane balaja. Thaj jekhedromestar e phakalea mothovdile but urumne e badaleske phakale, save ašarisarde e Devle vakerindoj: Ašundipe po ućipe e Devlese thaj pe phuv šandipe, maškaro manuša šukar kamipe. A kana e phakale gele lendar po badali, o manuša čobanja phende jekh avrese: Hajden, akana, đi o Vitlejemo, te dikha adova so kerdilo, so amenge phučarda o Devel. Thaj siđarindoj, avile thaj arakhle e Marija thaj e Josife thaj e ćhavore pašljardo ane balaja. A kana dikhle, phučarde sa so lenge phendo odole ćhavorese. Thaj savore save šunde kerde baripe odoleske so lenge phende e čobanja. A e Marija garavđa sa e lafija akala thaj čedinđalen ano plo vilo. Thaj irisajle e čobanja ašundoj thaj ašarindoj e Devle baš sa so šunde thaj dikhle sar so lenge phendilo. Thaj kana pherdile ofto dive te sunetinen e ćhavore, čhute lesoro anav Isus, dindo katar o phakale anglal so vov ka astardol ano vođi. A kana pherdile e dive pe lengoro čistibe pe Mojsijesoro kanuni, Ande le ano Jerusalim te ćhuven les anglal o Devljutno – Sar so si hramome ano Kanuni e Devljutnesoro, kaj sarsavo čhavoro murš savo najanglal pravel e materica te sfincol e Devljutnese – Thaj te anen viktima sar kaj si phendo ano Kanuni e Devljutnesoro: duj krlore ja duj golubore. Thaj dikh, sine ano Jerusalim manuš po anav Simeon, thaj odova manuš sine čačutno thaj paćavno, savo ađikerela lokipe e Izrailjesko, thaj o Đi Sumnalo sine pe leste. Thaj leske o Đi Sumnalo phučarda kaj ni ka dikhel o meripe đikaj ni dikhel e Hristo Devljutnesere. Thaj Đesa legardo alo ani khangiri; thaj kana legarde e bijande e ćhavore e Isuse te keren pe leste odova so si siklino po Kanuni, vov lija les ane angali pli thaj baxtarda e Devle thaj phenđa: Akana mukljare šandipasa e kandine tire, Devljutnea palo lafi tiro; Kaj dikhle o jakha mle o Iklipe tiro. Save gatisardan anglal o muja sa e selorenge. Rošlipe, te sikavel e bipaćamnen, thaj ašundipe e seloresoro tire Izrailjesko. A o Josif thaj e daj lesiri nišuđarde odolestar so vakerena lestar. Thaj baxtarda len o Simeon, thaj phenđa e Marijake, leske dajake: Dikh, akava pašlilo kaj buten te peravel thaj te vazdel ano Izrailj, thaj te ovel semno opipe kastar ka vakerel pes. A vi tuke korkorake ka pharavel e sablja o ođi, kaj te phućardon e gođa bute vilenge. Thaj sine e Ana profetka, ćhej e Fanuiloski, katar o njamo e Asiroveski, ake phure beršengi, savi efta berša đivdinđa e romeja katar o ćhajkanipe plo. Thaj oj, phivli katar e oftovardeš thaj štar berša, ni đeli kotar e khangiri, thaj kandlja e Devle dive thaj rat postimasa thaj ruđipnasa. Thaj oj an odova časo avili, thaj ašundisarda e Devle, thaj vakerda lestar sarijenđe save ađikerde ikaldipe ano Jerusalim. Thaj kana kerde sa po kanuni e Devljutnesoro, irisajle ani Galileja ani diz Nazaret. A o čhavoro barjola thaj zurardola đesa, pherdindoj gođaveripe, thaj baxtaripe e Devlesoro sine pe leste. Thaj e bijande lesere đana sarsavo berš ano Jerusalim ko baro dive Pasha. Thaj kana sas le dešuduj berša, đerdinde on ano Jerusalim po siklipe e bare divesoro. Thaj kana nakhavde e dive, thaj irina pes, ačhilo o čhavoro Isus ano Jerusalim; thaj ni đangla o Josif thaj e daj lesiri; Aj, dije godi kaj si amalenca, đele jek dive phirindoj, thaj rodle le maškar e njamonenge thaj e pendžarutne. Thaj kana ni arakljole, irisajle ano Jerusalim te roden le. Thaj pala e trin dive arakhlo le ani khangiri kaj bešel maškar e sikljovne, thaj šunel len, thaj phučel len. Thaj savore save šunena le but kerena baripe lesere vakerimastar thaj irisarimastar. Thaj dikhindoj les but darandile, thaj e dej lesiri phenđa lese: Ćhavoreja, so amenge adava kerdan? Ake o dad tiro thaj me rodinđam tut dukhasa. Thaj phenđa lenge: Sose rodinđen ma? Sar ni đanglen kaj mange trubul te ovav an odova so mle Dadesoro? Thaj on ni haljarde o lafji savo lenge phenđa. Thaj ulilo lenca thaj alo ano Nazaret; thaj sine lenge kandino. Thaj e daj leski garavđa sa e lafija akala ano plo vilo. Thaj o Isus anglalisarda ano gođaveripe thaj ano baripe thaj ano kovlipe koro Devel thaj koro manuša. A ano dešupandžto berš thagarimasko e thagaresko Tiverija, kana vastarđa o Pontije Pilat e Judejasa, thaj o Irod štarengopirutno e Galilejasa, a o Filip, o phral lesko štarengopirutno e Iturejako thaj e phuvjasa Trahonitidasa, thaj o Lisanije štarengopirutno e Avilinosa. Vaš o vaxto e anglunerašajengo e Anako thaj e Kajafako, alo o lafi e Devlestar e Jovanose čhavo e Zaharijasoro ani drmina, thaj ov lijape pe sa o trujalipe e Jordanosko sikavindoj katar o bolipe baš jertipe e bezehengo. Sar kaj si hramome ano lil o lafi e profetosko o Isaija savo vakerel: Krlo riknimasko ani drmina: laćharen o drom e Devljutnesoro; ortosaren o droma lesere; Sarsavi xar nek pherdol thaj sarsavi plajin thaj sarsavo brego nek pašljon; thaj so si bango nek ovel vorto thaj e bivortomata pe droma nek oven vortune; Thaj sarsavo trupo ka dikhel ikalipe e Devlesoro. O Jovan pale vakerda e selorese save ikljovena te bolel len. E bijandimata aspidinengere, kon phenđa tumenge te našen katar xoli savi avel? Bijanen, akana, semne paćivale jertimaske, thaj ma len te vakeren ana tumende: Isi amen o dad o Avraam; kaj tumenge phenav kaj o Devel šaj vi katar e bara akala te vazdel ćhavore e Avraamese. A eke vi o tover terđol e kaštese ki darhina; thaj sarsavo kaš savo si lačhe njamosko ni bijanel čhinel pes thaj ani jag frdel. Thaj phučena le e manuša vakerindoj: So, akana te kera? A irisarindoj phenđa lenge: Savo isile duj fostanja nek del odoleske save naj les; a save isile xape nek kerel jekhune ađakar. Avile pale vi e hudutne te bolel len, thaj phende leske: Sikavneja, so ka keras? A vov phenđa lenge: Ma keren khančik majbut sem so tumenge phendilo. A phučle le vi e uruvne vakerindoj: A so amen ka kera? Thaj phenđa lenge: Khanikaske đungalipe te na keren ni kas te phukaven, thaj oven čajljarde tumare pokindasa. A sar o seloro ađikerde savore dije godi ane ple vile baš e Jovanoske: naj li ov o Hristos? Irisarela o Jovan sarijenge vakerindoj: Me tumen bolav panjesa, aj avela pala mande po zoralo mandar, kaske me najsem paćivalo te putrav e aravlja po pođipe leskoro. Vov tumen ka bolel Đesa Sumnalesa thaj jagasa. Ano lesoro vas si o ašovi, thaj ka šulavel plo mardo điv, thaj ka kidel o điv ani đivarni pli, a o phus ka tharel jaga bimudarda. Thaj but pana aver loćarindoj len, vakerda e selorese o evangelium. A o Irod štarengopirutno, kas korinđa o Jovan ando Irodijada e romni leske phraleski, thaj ande sa lošnipa save kerda o Irod, pherda pe sa vađe vi akava: phandlja e Jovane ano phandlipe. A kerdilo pes kana bolda pe sa o seloro, thaj kana o Isus bolda pe, đikaj ov ruđindape e Devlese, pravdilo o badali. Thaj ulilo pe leste o Đi Sumnalo ani truposki forma sar golubo, thaj šundilo krlo e badalestar vakerindoj: Tu sijan Čhavo mlo o kamlo, tu san po mlo kamipe. Thaj korkoro o Isus sine le trujal e trijanda berša kana lija; thaj sine, sar so dijape godi, čhavo Josifesko, čhavo e Ilijevesko. Čhave e Matatosko, čhave e Levijesko, čhave e Melhijesko, čhave e Jenejesko, čhave e Josifesko, čhave e Matatijesko, čhave e Amososko, čhave e Naumosko, čhave e Eslimosko, čhave e Nagejesko, čhave e Maatosko, čhave e Matatijesko, čhave e Semejesko, čhave e Josifesko, čhave e Judinosko, čhave e Joananosko, čhave e Risajesko, čhave e Zorovaveljosko, čhave e Salatiilosko, čhave e Nirijesko, čhave e Melhijesko, čhave e Adijesko, čhave e Kosamosko, čhave e Elmodamosko, čhave e Irovosko, čhave e Josijinosko, čhave e Eliezerosko, čhave e Jorimosko, čhave e Matatosko, čhave e Levijesko, čhave e Simeonosko, čhave e Judinosko, čhave e Josifesko, čhave e Jonanosko, čhave e Eliakimosko, čhave e Melejesko, čhave e Mainanosko, čhave e Matatinosko, čhave e Natanosko, čhave e Davidosko, čhave e Jesejesko, čhave e Ovidosko, čhave e Voozosko, čhave e Salmonosko, čhave e Naasonosko, čhave e Aminadavosko, čhave e Aramosko, čhave e Joramosko, čhave e Esromosko, čhave e Faresosko, čhave e Judinosko, čhave e Jakovljesko, čhave e Isakosko, čhave e Avraamosko, čhave e Tarinosko, čhave e Nahorosko, čhave e Seruhosko, čhave e Ragavosko, čhave e Falekosko, čhave e Everosko, čhave e Salinosko, čhave e Kainanosko, čhave e Arfaksadosko, čhave e Simosko, čhave e Nojesko, čhave e Lamehosko, čhave e Matusalosko, čhave e Enohosko, čhave e Jaredosko, čhave e Maleleilosko, čhave e Kainanosko, čhave e Enososko, čhave e Sitosko, čhave e Adamosko, čhave e Devlesko. O Isus ta pherdo Đi Sumnalo irinđape katar o Jordan, thaj sine legardo Đesa ani drmina. Thaj saranda dive zumavda le o beng, thaj ni xalja khančik ane odola dive; thaj kana von pherdile, teg bokhalilo. Thaj phenđa leske o beng: Te sijan Čhavo e Devlesoro, phen akale barese te ovel maro. Thaj irisarda lese o Isus vakerindoj: Hramome si: Na đivdini o manuš numa e marestar, aj katar sarsavo lafi e Devlesoro. Thaj legarda le o beng pe plajin e uči thaj mothovđa lese sa e thagariba akale themesko baš momenti e jakhako. Thaj phenđa lese o beng: Tuke ka dav sa o barederipe akava thaj ašundipe lengo, kaj mange si dindini, thaj kase mangav dava ola. Tu, akana, te teljardiljan anglal mande, sa tiri ka ovel. Thaj irisarindoj o Isus phenđa lese: Đa mandar, Satano, kaj si hramome: E Devljutne Devlese teljardov, thaj lese jekheske kande. Thaj legarda le ano Jerusalim thaj čhuta le pe phak e khangirako, thaj phenđa lese: Te sijan Čhavo e Devlesoro, ripin akatar tele. Kaj si hramome so ple phakalenge ka vakerel baš tute ta te arakhen tut. Thaj ka len tut pe vasta te na khuvetu ko bar tire preja. Thaj irisarindoj o Isus phenđa lese: Vačerdo si: Ma zumav e tire Devljutne Devle. Thaj kana agorinđa o beng sa e zumaviba, đelo lestar baš nesavo vaxto. Thaj iranđape o Isus ani zor e Đeski ani Galileja; thaj gelo krlo lestar pe sa o trujalipe. Thaj vov sikavela pe lengere sinagoge, thaj savore le ašarena. Thaj avilo ano Nazaret kaj sine arakhlo, thaj đerdinđa po siklipe plo ano dive savatosko ani sinagoga, thaj uštino te đinavel. Thaj dije lese o lil e profetosoro Isaija, thaj putarindoj o lil arakhla than kaj sine hramome: O Đi e Devlesoro si pe mande; odoleske maznosardas man te mothovav lošalo nevipe e čororenge; bičhalda ma te sastarav e phagen ano vilo; te vakerav e phandlenđe kaj ka oven mukle, thaj e kororenđe kaj ka dikhen; te mekljarav e uštaden; Thaj te vakerav lačho berš e Devljutnesoro. Thaj phandindoj o lil, irinđa e kandineske thaj bešlo; thaj e jakha sarijengere ani sinagoga sine uperime pe leste. A lija lenge te vakerel: Avdive pherdilo akava Lil ane kana tumare. Thaj sare lese čačavde, Thaj pherdile lengere vile e bahtardimaskere laforenca, save ikljona andar o muj lesoro, thaj vakerena: Naj li akava o čhavo e Josifesoro. Thaj phenđa lenge: Sarjekh ka phenen mange akaja gođavarutni: Sastarutneja, sastar tut korkoro; so šunđam kaj sine ano Kapernaum ker vi akate ano tiro bijando than. Phenđa pale: Čače tumenge phenav kaj nijekh profeto nane penđardo ano plo bijando than. A o čačipe tumenge phenav: But phivlja sine ano Izrailj ano vaxto e Ilijasoro, kana o badali phandilo baš o trin berš thaj šov masek, thaj sine bari bokh pe sa e phuv; Thaj nijekhake katar lendar na sine bičhaldo o Ilija đi ani Sarepta e Sidonakiri e romnjake e phivljake. Thaj but sine đeramne ano Izrailj ano vaxto e profetosko Jelisejesko; thaj nijekh katar lendar ni khoslilo đi o Neeman Sirijano. Thaj sare ani sinagoga pherdile xoli kana šunde akava. Thaj uštindoj ikaldole avrijal andar i diz thaj legardole po ućipe e plajinako kaj sine lengi diz vazdime, thaj ole te frden upral. Aj ov nakhlo maškar olende, thaj gelo. Thaj hulilo ano Kapernaum, diz e galilejaki, thaj sikavela len savatose. Thaj xasardilesa pe lesoro đandipe but; kaj o džanipe lesoro sine zoralo. Thaj ani sinagoga sine o manuš e đesa džungalesa, thaj akharđa andar sa o krlo vakerindoj: Nakh tu, so mange amendar, Isuse Nazarećanino? Avilan te xasares amen? Đanav tut ko sijan: Sumnalo e Devlesoro. Thaj daravda le o Isus vakerindoj: Phande to muj, thaj ikljov andar leste! Thaj peravindoj le o đungalo đi ko maškar, iklistilo andar leste thaj nihari leske nakerda. Thaj e dar astarda sarijen thaj vakerena maškar peste vakerindoj: Savo si odova lafi kaj barederimasa thaj zorasa kerel e đi đungalenge, thaj ikljon? Thaj gelo o krlo olestar pe sa trujalime thana. Vazdindoj pe pale andar i sinagoga, alo e Simonese ano kher; a e sasuja e Simonesera astarda sine bari šilavni, thaj ruđisarde les baš olake. Thaj terdindoj upral late daravda e šilavna, thaj meklala. Thaj sigo uštili thaj kandla len. Thaj kana phađilo o kham, savore saven sine nasvale katar e savetane nasvalimata anena len leste; a ov pe sarijende katar lendar čhivela pe vasta, thaj sastarena len. A vi e đungale đe inkljona andar but đene vikindoj thaj vakerindoj: Tu sijan o Hristos Čhavo e Devlesoro. Thaj daravindoj len ni meklja te vakeren te đanen kaj si ov o Hristos. A kana alo dive, iklistilo thaj gelo ano čučo than; thaj o seloro rodinđale, thaj avena leste thaj ačhavena le te na đal katar lendar. A ov lenge phenđa: Thaj vi e avere diza trubul mange te mothovav lošalo nevipe kotar o Thagaripe e Devlesoro; kaj sem pe odova bičhaldo. Thaj vakerela pe sinagoge e galilejakere. A kerdilo pe kana o seloro reslja leste te šunen o lafi e Devlesoro thaj ov ačhilo uzalo Genisaretesko derav, thaj dikhlja duj barke kaj ačhen uzalo derav, a e maćhara iklistile andar lende thaj xalavena e safina. Thaj dija ani jekh barka, savi sine e Simonoski, thaj ruđisarda les te duralela ari katar e šuki phuv; thaj bešlo thaj sikavela e selore andi barka. A kana ačhavda te vakerel, phenđa e Simonoske: Hajde po xoripe thaj čhuden e safina tumare baš o dolipe. Thaj irisarindoj o Simon phenđa lese: Sikavneja, soro rat dijam zori, thaj khančik ni astardam; aj pe tiro lafi ka frdav i safin. Thaj kerindoj odova astarde but bute maćhe, ta lenge e safin lija te pharavđol. Thaj dije semno e amalenge save sine pe aver barka te aven kaj len te ažutinen; thaj avile, thaj pherde solduj barke ađakar kaj odola lije te pherđon pani. A kana dikhla o Simon Petar, pelo pe čanga uzalo Isus vakerindoj: Ikljov mandar, Devljutnea, kaj sam manuš bezehalo. Kaj o daravdipe lelja le thaj sarijen save sine lesa kotar astaripe e mačhengo so dolinde, a ađakar jekhune vi e Jakove thaj e Jovano, e čhaven e Zevedejeskeren, save sine amala e Simonosere. Thaj phenđa o Isus e Simonose: Ma dara, kotar akana e manušen ka astare. Thaj ikalindoj solduj barke ki phuv mukle sa, thaj gele palo leste. Thaj kana sine o Isus ani jekh diz, thaj dikh, o manuš sa ani đeramni, ta dikhindoj e Isuse pelo pe čanga thaj ruđisarda le vakerindoj: Devljutnea, te mangljan šaj te užarema. Thaj lunđarindoj po vast dolinđa le thaj phenđa: Mangav, užar tut! Thaj sigate e đeramni geli lestar. Thaj ov leske vakerda kaj nikaske te na phenel: Aj đa thaj sikav tut e rašajeske, thaj legar davipe baš užaripe, tiro, sar čhinada o Mojsije baš o čačavdipe lenđe. Aj o krlo lestar vađe majbut buhljola, thaj but seloro arakhadile pe te šunen le thaj len vov te sastarel lengere nasvalimastar. A ov durardola pe ani drmina thaj ruđila pe e Devlese. Thaj kerdilo pe jekh dive kana ov sikavđa, kaj bešle gothe o Fariseja thaj e kanunora save avile kotar o sa e gava galilejake thaj judejake vi andar o Jerusalim; thaj sine zor e Devljutnesiri len te sastarel; Thaj dikh, e manuša ande po pašljardo e manuše savo sine lindo, thaj rodena sar le anenle thaj te pašljaren le anglo leste. Thaj na arakhle kotar ka legarenle kotar o seloro, iklile po kher thaj andar o ćhatlo mekle le pašljardo ko maškar anglo Isus. Thaj dikhindoj o paćavipe lengoro phenđa leske: Manušeja, jertisaven pes tuke e bezeha tire. Thaj lije te den godi ana peste e lilvarne thaj e fariseja vakerindoj: Ko si akava so vakerel mahripe? Ko šaj te jertisarel e bezeha sem jekh Devel? A haljarindoj o Isus so dije godi irisarindoj phenđa lenge: So dijen godi ane tumare vile? So si po lokhe, te phene: Jertinpe e bezeha tire, ja te phene: Ušti thaj phir? Aj te đanen kaj o baroderipe isi e Čhave e Manušesere ki phuv te jertil o bezeha, – phenđa e lindeske: Tuke vakerav, ušti thaj le tiro pašljardo thaj đa tire khereste. Thaj sigo uštilo anglo lende, thaj lija pe soste pašljola, thaj gelo ple khereste ašundindoj e Devle. Thaj sare prašukarisajle, thaj ašudinde e Devle, thaj pherdine dar vakerena: Sastaripe baro dikhljam avdive! Thaj atoska iklistilo, thaj dikhlja e hudutne palo anav Levije kaj bešel ki hudutni, thaj phenđa lese: Ava pala mande. Thaj mekljindoj sa, uštino thaj lijape palo leste. Thaj kerda leske o Levije ko kher plo baro xape; thaj sine but hudutnara thaj avera save bešena oleja ko astalja. Thaj mrminđe e lilvarne lengere thaj e Fariseja vakerindoj lesere sikljovnenge: Sose e hudutnencar thaj e bezehutnencar xana thaj pijena? Thaj irisarindoj o Isus phenđa lenge: Ni trubun e saste sastarutne aj e nasvale. Ni avilem te akharav e vortutnen aj e bezehen ko jertipe. A on lese phenđe: Sose o sikljovne e Jovanosere but postinena thaj ruđipe keren, a ađakar vi e farisejengere; đikaj tire xana thaj pijena? A vov lenge phenđa: Sar šaj te traden e abavaren te postinen đikaj si o terno lenca? Aj ka aven o divesa kana ka čorel pe o terno lendar, thaj atoska ka postinen ano odola dive. Mothoda lenge vi e paramiči: Khonik ni čhivel o kotor katar o nevo fostani pe purano fostani, kaj ka vi e nevi ka pharavel, thaj e puranjake naj lačho kotor e nevastar. Thaj khonik ni čhorel mol nevi ane purane morćha, kaj e mol nevi ka pharavel e morćha, thaj odova ka čhordol, thaj e morćha ka pharavđon. Aj e mol nevi ane morćha neve trubul te čhorelpe, thaj solduj ka arakhen pe. Thaj khonik kova pilja purani ni mangel sigo nevi; kaj phenel e purani si polaćhi. Kerdilo pe aj ano dujto savato pale Pasha kaj ov gelo andar e givore, a e sikade lesere phagena e givora, phagena len vastencar thaj xana. A nesave e farisejendar phenđe lenge: Sose keren so ni tromal te kerel pe ano savato? Thaj irisarindoj o Isus phenđa lenge: Sar ni odova ni drabarden so kerda o David kana bokhalilo, ov thaj save sine lesa? Sar dija ano kher e Devlesoro, thaj lelja e mare čhutine, thaj xalja, thaj dija odolenge so sine lesa, savo nikaske na sine meklo te xan sem jekhune rašajenge. Thaj vakerena lenge: O Čhavo e Manušesko si Devljutno vi katar o savato. A kerdilo pe vi ano dujto savato kaj ov đerdinđa ani sinagoga thaj sikavđa thaj sine odote o manuš savese o daxno vast sine šuko. Dikhle pak pe leste e lilvarne thaj e fariseja na li ko savato ka sastarel, kaj te arakhen davijuni pe leste. A ov olendar đanela so den godi, thaj phenđa e manušese save sine šuko vast. Ušti thaj ačhov ko maškar! A ov uštindoj ačhilo. A o Isus lenge phenđa: Ka phućav tumen: so trubul ko savato: lačhe te kerelpe ja lošnipe te kerelpe? O ođi te mukljarelpe ja xasarelpe? A on trainde. Thaj dikhindoj pe sa lende, phenđa lese. Lunđar tiro vast. A ov kerda ađahar; thaj o vast leske ulo sasto sar vi o dujto. A on pherdile bigođovaripe, thaj vakerena maškar peste so te keren e Isusese. A kerdilo pe ano dive odola te ikljol pe plajin te ruđil pe; thaj nakhavđa soro rat ano ruđipe e Devlese. Thaj kana sine dive, akharda e sikaden plen, thaj alosarda lendar Dešudujen, saven vi apostolencar akharđa: E Simone, save akharđa Petar, thaj e Andreja phrale lesere, e Jakove thaj e Jovane, e Filipe thaj e Vartolomeje, e Mateje thaj e Toma, e Jakove Alfejeve thaj e Simone akharde Zilot, e Judo Jakovljeve, thaj e Judo Iskariotosere, savo vi ulo dije mujesoro. Thaj uljindoj lenca, ačhilo po than vorto thaj e but sikade lesere; thaj but selore andar e sa Judeja thaj Jerusalim, thaj andar e phuv e deravesi e tirskosoro thaj sidonskosoro. Save ale te šunen le thaj te sastaren pe katar ple nasvalipnastar thaj saven mučinde e đungale đe; thaj sastarena pe. Thaj sa o seloro rodena le te pipinen le: kaj kotar lestar ikljola zor thaj sastarela len sa. Thaj ov vazdindoj ple jakha pe sikljovne ple vakerđa: Bahtarde e čorore, kaj si tumaro o Thagaripe e Devlesoro. Bahtarde save sinen bokhale akana, kaj ka oven čaljarde. Bahtarde save rovena akana, kaj ka asan. Bahtarde sen kana tumen e manuša mrzinena thaj kana tumen čhuden thaj lađaren, thaj vakeren o anav tumaro sar đungalo katar o Čhavo e Manušesko. Lošaren tumen ko odova dive thaj khelen, ta dikh, bari si e pokindi tumari ko badali. Kaj ađahar kerde e profetonenge e dada lengere. Aj pharipe tumenge e barvalenge, kaj si akana lijen tumari počindi. Pharipe tumenge save sijen čaljarde akana, kaj ka bokhaljoven. Pharipe tumenge save asana akana, kaj ka rikninen thaj ka roven. Pharipe tumenge kana ačhena sa e manuša šukar te vakeren tumendar, kaj ađahar kerde e xoxamne profetonenge e dada lengere. Aj vakerav tumenge save šunen: Čumudinen tumare dušmane, šukaripe keren odolenge save tumen mrzinena; Baxtaren odolen save tumen dena armanja, thaj ruđin tumen baš odolenge save tumen dukhaven. Odoleske savo khuveltu ki čham, irin thaj aver; thaj savo mangel te lel tutar o fostani dode lese vi o gad. A savonese savo rodel an tute, dode; thaj savo tiro lela, ma rode. Thaj sar mangena tumenge te keren e manuša, keren ađahar thaj tumen lenge. Thaj te čumudinđen odolen save tumen čumuden, savi si tumenge nais? Kaj vi e bezexale čumudinen odolen save len čumudinen. Thaj te kerden šukaripe odolenge save tumenge keren šukaripe, savi si tumenge nais? Kaj vi e bezehale keren ađahar. Thaj te dijen ano udžilipe odolenge kastar ađičerena kaj ka len, savi si tumenge nais? Kaj vi e bezehale e bezehalenge den ano udžilipe te len pale odobor. Aj čumudinen e dušmanjen tumaren, thaj keren šukaripe, thaj den ano udžilipe na ašuđarindoj nisose; vi e počindi ka ovel tumenge bari, thaj ka oven čhave e Najućeske, kaj si ov kovlo vi e biašarutnende thaj e džungalende. Oven, akana, kovle sar vi o Dad tumaro so si kovlo. Thaj ma krisinen, vi ni ka krisil pe tumenge; thaj ma krisisaren, thaj ni ka oven krisime; jertinen, thaj ka jertinipe tumenge. Doden, thaj ka delpe tumenge; e mera lačhi thaj pherdi thaj ćinosardi thaj anglapherdi ka delpe tumenge ani angali tumari. Kaj sava merasa merina asavkaja tumenge ka merini pe. Thaj mothoda lenge e paramiči: Šaj li o kororo e korore te ingarel? Na li solduj ka peren ani xar? Nane sikado upral o sikljovno plo, aj vi kana anglisarel pe, ka ovel sarsavo sar vi o sikavno lesko. A sose dikhe o buroro savo si ani jakh tire phralesiri, a o kaš savo si ani tiri jakh na dikhe? Ja, sar šaj te phene tire phralese: Phrala, aš te ikalav o buroro savo si ani tiri jakh, kana korkoro ni dikhe o kaš ani jakh tiri? Dujemujengereja, ikal majanglal o kaš kotar tiri jakh, ta ka napal ka dikhe te ikale o buroro kotar e jakh tire phralesiri. Kaj nane kaš lačho te bijanel đungalo bijanipe, ni kaš đungalo te bijanel lačho bijanipe. Kaj si sarsavo kaš po bijanipe plo penđarel pe; kaj e sumučina ni keden pe katar e kare, ni e drakha kedel pe katar e kalina. Šukar manuš kotar o šukar trezori ple vilesoro ikalel šukaripe, a o đungalo manuš kotar o đungalo trezori ple vilesoro ikalel đungalipe, kaj o muj lesoro vakerel katar o butipe e vilesko. A sose vikinenama: Devljutnea, Devljutnea, a ni kerena so vakerav? Sarsavo kaj avel pe mande thaj šunel e lafija mle thaj kerel len, ka mothovav tumenge sar kase si miazutno: Miazutno si e manušese savo kerindoj o kher handlja thaj xorisarda thaj pašljarda o temeli ko bar; a kana avile e panja, rupuzisarda e len pe odova kher thaj naštine te peraven la, kaj lakoro temeli sine ko bar. A savo šunda thaj ni kerda miazutno si e manušeske savo kerda o kher pe phuv bizo temeli, pe savi rupuzisarda e len thaj sigo peli, thaj aradilo odova kher daramno. A kana agorisarda sa ple lafija anglal o seloro, dija ano Kapernaum. An kapetano sine jekh kandino nasvalo po meripe savo leske sine kamlo. A kana šunđa e Isusese, bičhalda lese phurederen e judejakere ruđindoj le te avel thaj te inkalel lesere kandine. A on avindoj e Isusese ruđisarde les putarune, vakerindoj: Paćivano si kaj leske odova te kere, kaj čumudinel e manušen amaren, thaj kerda amenge e sinagoga. A o Isus đala olenca. Thaj kana ake sine paše katar o kher, bičhalda o kapetano lese ple amalen kola lese vakerde: Devljutnea, ma munči tut, kaj najsem Paćivano kaj telal o ćatlo mlo te đerdine: Odoleske vi ni haćarav man pačivune te avav tuke; aj numa phen o lafi, thaj ka sastol o kandino mlo. Kaj vi me sem manuš telal o baroderipe, thaj isi man tela mande urumne, ta phenav jekheske: Đa, thaj đal; vi e dujtonese: Av, thaj avel; vi e kandineske mlese: Ker odova, thaj kerel. A kana šunđa odova o Isus, prašukarisalo lese, thaj irisarindoj e selorese save đana palo leste phenđa: Vakerav tumenge ni ano Izrailj asavko paćape ni arakhljem. Thaj kana e bićhalde irinđepe, arakhle e nasvale kandine sasto. Thaj kerdilo pe atoska ov te đal ani diz savo akharel pe Nain, thaj oleja đana but sikade lesere thaj but selore. A kana alo paše uzalo udar e dizijaki, thaj dikh, ikalena e mule, jekhoro čhavo lesere dajako, thaj voj sine phivli; thaj but seloro kotar e diz đana pale late. Thaj dikhindoj la o Devljutno kovlilo pe late, thaj phenđa lake: Ma rov! Thaj pašindoj dolisajlo pe legarutne, a e legarutne aćhile; thaj phenđa: Terneja, tuke vakerav, ušti! Thaj bešlo o mulo thaj ačhilo te vakerel; thaj dija le lesere dijake. A e dar lelja sarijen, thaj ašundisarena e Devle vakerindoj: O baro profeto vazdinđa pe maškar amende, thaj o Devel dikhljarda ple selore. Thaj gelo o krlo akava lestar pe sa e Judeja thaj pe sa o trujalipe. Thaj mothode e Jovanose e sikljovne lesere baš sa akava. Thaj akharda o Jovan dujen ple sikljovnendar thaj bičhalda len koro Isus, vakerindoj: Tu li sijan Odova so ka avel, ja avere te ađičera? Avindoj ta odola manuša koro leste phenđe: O Jovan Bolipesarutno bičhalda amen tuke vakerindoj: Tu li sijan Odova savo ka avel, ja avere te ađičera? A ano odova časo ov sastarđa buten e nasvalimastar, thaj kotar rane thaj e đungale đendar, thaj bute kororenge dija dikhibe. Thaj irisarindoj o Isus phenđa lenge: Đan thaj vakeren e Jovanoske so dikhlen thaj šunden: o korore dikhen, o bange phiren, o đeramne užaren pe, o kašuke šunen, o mule ušten, e čororenge vakerel pe o evangelium; Thaj baxtardino si odova savo na ka cidelpe mandar. A kana gele e Jovanosere sikljovne, lija e selorese te vakerel baš o Jovano: So ikliljen ani drmina te dikhen? E trska sava phudela e balval? Aj so iklistiljen te dikhen? E manuše ane kovle šeja urjavde? Eke, save rajonenge šeja phiraven thaj ano gudlipe đivdinen pe thagarenge palate si. Aj so iklistiljen te dikhen? E profeto? Va, me tumenge vakerav thaj pobuter e profetostar. Akava si odova baš savese si hramome: Ake, me bičhalav e phakale mle anglo muj tiro savo ka laćharen o drom tiro angla tute. Kaj tumenge phenav: Nijekh maškar o bijande e romnjendar naj pobaro profeto katar o Jovan Bolipesarutno; a o najcikno ano Thagaripe e Devlesoro pobaro si olestar. Thaj sa e selore save šunena thaj e hudutnara vortosarde e Devle, bolipen pes e Jovanosere bolipnasa; A o fariseja thaj o kanunđije frdinde o kamipe e Devlesoro olendar, save ni bolenape olestar. Kasa akana, ka rindosarav e manušen akale bijanimaske thaj kaske si miazutne? Miazutne si e ćhavorenge so bešen ko trgo thaj akharen jekke averen vakerindoj: Bašalđam tumenge, thaj na khelđen; kućisardam tumenge, thaj na runđen. Kaj avilo o Jovan Bolipesarutno savo maro na xal ni mol pijel, a tumen vakerena: O Đungalo đi si ano leste. Alo o Čhavo e Manušesko savo vi xal vi pijel, a tumen vakeren: Dikh manuše halane thaj mate, amale e hudutnengoro thaj bezehengoro. Thaj sas čačardo baro bižajipe katar sa e ćhavore lakere. Ruđisarda le ta jekh kotar e fariseja ta te xal koro leste; thaj đerdindoj ano kher e farisejesko, bešlo baš o astalja. Thaj dikh, e romni ani diz savi sine bezehali, đanglindoj kaj si o Isus baš e astalja ano kher e farisejesko, anda sung ano vaso e alavastrostar. Thaj terdindoj palal ke lesere pre runđa, thaj terdini te thovel o pre lesere asvenca, thaj ple balenca kosja e pre lesere thaj čumidela e pre lesere, thaj makhela sungasa. A kana dikhlja o farisej savo le akharđa, phenđa ana peste: Te si ov profeto, ka đanel si ko thaj savi đuvli azbavel le; kaj si bezehali. Thaj irisarindoj o Isus phenđa leske: Simone, isi man tuke khančik te vakerav. A ov phenđa: Sikamneja, vaker. A o Isus phenđa: Duj đene sine udžilime jekhe paćavutneske, jekh sine udžilime pandžšel dinara, a o aver pinda. A kana on na sine len te irinen leske, davisarda soldujenđe. Vaker, savo les katar lende dujende pobuderi ka čumidel? A o Simon irisarindoj phenđa: Dav godi odova savese pobuderi dinđa. A ov leske phenđa: Čače si krisisardan. Thaj irindoj e đuvljake, phenđa e Simonose: Dikhe li akala đuvlja? Đerdinđum tuke ano kher, ni pani pe mle pre na dinđan, a oj pe asvenca thovđa me pre, thaj ple balencar kosljalen. Čumudipe na dinđan ma; a oj, sar đerdinđa, ni ačhavđa te čumidel me pre. Uljesa ni makhljan o šero mlo, a oj sungasa makhlja me pre. Odolese phenav tuke: Jertinen pe olake but bezeha, kaj baro kamlipe sinela; a kaske hari jertine pe cikno kamlipe isile. A lake phenđa: Jertinipe tire bezeha. Thaj aćhile ana peste te vakeren odola so bešena oleja baš e astalja: Savo si akava so vi e bezeha jertinel? A e đuvljake phenđa: O paćape tiro ikalđa tut; đa ano šandipe. Thaj sine pale odova, thaj ov phiravđape ko dizija thaj pe gava vakerindoj thaj lošalindoj kotar o Thagaripe e Devlesoro, thaj e Dešudujore oleja, thaj nesave đuvlja save sine sastarde katar e đungale đe thaj nasvalipe: E Marija, akhardi Magdalina, andar savi iklile efta đungale đe, thaj e Jovana, e romni e Huzesiri e Irodosoro upravniko, thaj e Susanesoro, thaj aver but save kandena lese pumare kherenca. A kana kedle pe thaj but selore, thaj andar e sa dizija avena leste, mothovđa, ani paramiči: Iklistilo o sijutno te sijinel ple kućina; thaj kana sijinđa, jekh peli pašo drom, thaj uštadili, thaj e čiriklja e badalesere xale las. A e aver peli ko bar, thaj iklindoj šućili, kaj nasinela la pani ani phuv. A e aver peli maškar o kare, thaj barile o kare thaj tasavde la. A e aver peli ki phuv lačhi, thaj iklindoj anđa šeluno bijanipe. Vakerindoj akava dija vika: Kas isi kana te šunel, nek šunel! A e sikljovne lesere phučle le vakerindoj: So mandavel akaja paramiči? A ov phenđa: Tumenge dindo te đanen garajbe kotar Thagaripe e Devlesoro; a e averenge ovela ane paramiča, kaj dikhindoj te na dikhen, thaj šundidoj te na šunen. A akaja paramiči phenel: E kućina si o lafi e Devlesoro. A savo si pašo drom odola si save šunen, aj palo odova avel o beng thaj lel o lafi andar o vilo lengoro, te na paćan thaj te na inkalen pes. A save si ko bar odola si save kana šunen lošalimasa len o lafi; thaj vi akalen darhina na nelen te baš nesavo vaxto paćan, a ano vaxto zumavipasko peren. A save ano kare perena, odola si save šunde thaj, đivdindoj ano pharipe thaj barvalipe thaj gudlipe akale đivdimasko, oven tasavde, thaj ni anen bijanipe. A save si pe lačhi phuv, odola si save šunde o lafi, ano lačho thaj khoslovilo ićeren la, thaj bijanipe anen ano nakhavipe. Akava vakerindoj dija vika: Kas isi kana te šunel, nek šunel! A khonik ni ućharela vasosa e memeli kana tharela, ni čhivela telal o kreveto, aj čhivela pe memeljakoro than kaj odola save đerdinena te dikhen rošlipe. Kaj naj khančik garavdo so ni ka ovel putarno, ni o garavdino so ni ka ovel džangljardo thaj ko rošlipe ka ikljol. Arakhen, akana, sar šunen; kaj kas isi ka del pe lese, a kas nane, ka lel pe lestar vi odova so del godi kaj isi le. A e daj thaj e phrala leske avile leste, thaj naštine kotar e selore te malavdonpe lesa. Thaj mothode lese: E daj tiri thaj e phrala tire terđon avri, thaj mangen te dikhen tut. A ov irisarindoj phenđa lenge: akala so šunena thaj agorisinena o lafi e Devlesoro – von si miri daj thaj mire phrala. Thaj kerdilo pe jekh dive thaj đerdinda ov thaj lesere sikljovne ani barka, thaj phenđa lenge: Te nakha pe okoja rig e deravesoro. Thaj gele. Thaj đikote miškosajle, vov suća. Thaj vazdisalji e zorali balval ko derav, thaj o pani đerdini thaj sine ano daravdipe. Thaj pašindoj đangade le vakerindoj: Sikamneja, sikamneja, xasardiljam! A ov uštino, thaj daravda e balvalja thaj e panjesere talasen, thaj aćhavdile thaj ulo bišundipe. A lenge phenđa: Kaj si tumaro paćape? A on darandile, thaj dikhena pe vakerindoj jekh avrese: Ko si akava ta vi e balvaljenđe thaj e panjese te čhinavel, thaj šunen le? Thaj resle ani Gadarinsko phuv savi si karing e Galileja. A kana ov iklistilo ki phuv, reslja le nesavo manuš kotar e diz an savo sine e đungale đe but vaxto, thaj ane šeja ni huravela pe, thaj na đivdinela ano kher, aj ane limora. A kana dikhlja e Isuse, dindoj vika pelo anglalo leste thaj andar sa o krlo phenđa: So mange mandar, Isuse, Čhavo Devlesoro e Najućesoro? Ruđisarav tut, ma mučin man! Kaj ov čhinavda e đeske biužeske te ikljol andar o manuš; kaj mučindale but berša, thaj phandela le verigenca thaj sinđirenca thaj arakhela le, thaj činela e phandine, thaj tradela le o đungalo đe pe drmine. A o Isus phučla le vakerindoj: Sar si tiro anav? A ov phenđa: Legion; kaj but đungale đe đerdinde ano leste. Thaj ruđindo le kaj te na čhinavel te đan ano bezsan. A gothe čarljona pe plajin bari gramada e balengiri, thaj ruđisarena le kaj te mekel len te đerdinen ano lede. Thaj meklja lenge. A kana iklile e đungale đe andar o manuš, đerdinde ano bale; thaj prastile e gramada katar o brego ano derav, thaj tasavdile. A kana dikhle e balengere arakhavne so kerdilo pe, našle thaj mothode ani diz thaj pe gava. Thaj iklistile te dikhen so kerdilo, thaj avile e Isusese, thaj arakhle e manuše andar savo sine iklistile e đungale đe kaj bešel urjavdo thaj džangado koro pre e Isusesere; thaj darandile. A odola so sine thaj dikhle, vakerde olenge sar inklilo o dilino. Thaj ruđisarde le sa o seloro kotar o trujalipe gadarinsko te đal lendar; kaj sine astarde bare daraja. A ov đerdinda ani barka thaj iranđa pe. A o manuš andar kaste iklistile e đungale đe ruđisarda le oleja te ovel; aj le o Isus muklja vakerindoj: Irin tut tire khereste, thaj mothov so tuke kerda o Devel. Thaj gelo vakerindoj pe sa o dizija so lese kerda o Isus. A kana iranđape o Isus, reslja le o seloro, kaj sare ađičerenale. Thaj dikh, alo o manuš palo anav Jair, thaj ov sine phureder e sinagogakoro, thaj perindoj anglal o pre e Isusesere, ruđinela le te đerdini ano lesoro kher. Kaj ano leste sine jekhori ćhaj trujal e dešuduj berš, a oj merela. A kana đala o Isus, o seloro spidenape uzalo leste. Thaj sine jekh đuvli nasvali kotar e ratesoro thavdipe dešuduj berša, savi sa po barvalipe dinđa e sastarutnenge thaj nijekh naštine te sastarela; Thaj pašindoj palal, azbavda pe pođa lesere fostanostar, thaj sigo ačhilo lakoro ratesoro thavdipe. Thaj phenđa o Isus: Ko si odova so azbavda ma? A kana sare trainde, phenđa o Petar thaj save sine oleja: Sikamneja, o seloro trujalisarde tu thaj bucinen tu, a tu vakere: Ko si odova so azbavda ma? A o Isus phenđa: Nesabo azbavda ma, kaj me haćardem e zor savi iklistili andar mande. A kana dikhlja e đuvli kaj na garađape, avili izdravindoj, thaj peli anglo leste, thaj phenđa lese anglo sa e selore sose azbavda le thaj sar sigo sastili. A ov phenđa lake: Ma dara, mi ćhaj, o paćape tiro inkalda tu; đa ano šandipe. Đikaj ov pana vakerela alo nesavo phureder e sinagogakoro thaj phenđa lese: Muli e ćhaj tiri ma mučin e Sikamne. A kana šunda o Isus, irisarda lese vakerindoj: Ma dara, gaći paćav, thaj ka ovel inkaldi. Thaj avindoj ano kher, na meklja khanikaske te đerdini sem e Petrose thaj e Jovanose thaj e Jakovese, thaj e ćhajakere dadese thaj e dajake. Thaj sare rovena thaj rikninena palo late. A ov phenđa: Ma roven, ni muli aj sovel. Thaj asandile lese đanglindoj kaj muli. A ov ikalindoj sarijen, lija la baš vastestar thaj akharda, vakerindoj: Čhaje, ušti. Thaj irinđape olakoro đi, thaj sigo uštili; thaj ov čhinada te den la te xal. Thaj prašukarisajle but e bijande lakere. A ov olenge čhinada kaj khanikaske te na mothoven so kerdilo pe. Akharindoj ple sikljovnen e Dešudujen, dija lenge zor thaj baroderipe upral sa đungale đesa, thaj te sastaren e nasvalimastar. Thaj bičhalda len te vakeren o Thagaripe e Devlesoro, thaj te sastaren e nasvalen. Thaj phenđa lenge: Khančik ma len po drom, ni rovli, ni trasta, ni maro ni love, ni po duj fostanja te ovel tumen. Thaj ano savo kher đerdinen, athe aćhoven thaj athar te đan. Thaj save god tumen ni len, iklindoj kotar e diz odoja, činosaren vi o praxo tumare prendar, baš vakeribe opipe lendar. A on iklindoj nakhena pe gava vakerindoj o evangelium thaj sastarindoj pe sa e riga. A o Irod štarengophirutno šunda so ov kerel, thaj sine dujgođasa. Kaj nesave vakerena kaj o Jovan uštino kotar o mule. A aver kaj o Ilija sikavdilo; e aver palem, kaj đivdinisajlo nesavo kotar e phure profetonendar. Thaj phenđa o Irod: E Jovane me čhindem; aj kova si odova savestar šunava ađahar khančik? Thaj manglja te dikhel le. Thaj irindoj o apostolja, mothode lese sa so kerde. Thaj lija len pesa, ta crdinđape ano korkoripe karing i diz akhardi Vitsaida. A kana o seloro džanđarda, đele palo leste, thaj ov olen lelja thaj vakerda lenge kotar o Thagaripe e Devlesoro thaj sastarda odolen savenge trubuja sastaripe. A o dive ačhilo te teljarel. Atoska pašile e Dešudujore thaj phenđe lese: Mukljar e selore, mek đan po sojba ano trujale gava thaj gavora, thaj mek arakhen xape, kaj akate sinam ano pusto than. A ov lenge phenđa: Doden len tumen te xan. A on phenđe: Ana mende naj majbut kotar e pandž mare thaj duj maćhe; sem kaj amen te đa thaj kina xape baš sa akava seloro. Kaj sine manuša, trujal pandž milje. Aj ov phenđa ple sikljovnenge. Bešljaren len pe grupe po pinda. Thaj kerde ađahar, thaj bešljarde olen sarijen. A ov lelja odola pandž mare thaj solduj maćhe, thaj dikhindoj po badali baxtarda len thaj phaglja, thaj dijasa e sikljovnenge te čhiven e selorese. Thaj xale thaj čalile sare, thaj kedle kotora so ačhilo lenge dešuduj korpe. Thaj kana jekhdrom ruđisajlo e Devlese korkoro, lesa sine e sikljovne, thaj phučla len vakerindoj: So vakeren o seloro ko sem me? A on irisarindoj vakerde: Jekh phenen kaj sijan o Jovan Bolipesarutno, a e avera kaj san o Ilija; a avera palem kaj si khonik kotar e purane profetura kaj đivdinisajlo. A ov lenge phenđa: A tumen so vakeren ko sem me? A o Petar irisarindoj phenđa: O Hristos e Devlesoro. A ov len daravđa thaj čhinavđa kaj odova khanikaske te ni phenen, vakerindoj kaj e Manušesere Čhavese trubul but te mudarđol, thaj kaj les e phurederutne thaj e anglunerašajune thaj e lilvarne ka frden, thaj kaj ka ovel mudardo, thaj o trito dive kaj ka uštel. A sarijenge vakerđa: Te ko mangela te đal pala mande, mek nakhel pestar thaj lel o trušul plo thaj pala mande te đal. Kaj ko mangel o đivdipe plo te arakhel, ka xasarel le; a ko xasarel o đivdipe plo kotar mande, odova ka arakhel le. Kaj savo si o therdipe e manušese te lel sa o them a pes aravel ja pese anel đungalipe? Kaj savo ka lađal mandar thaj mle lafonendar, olestar o Čhavo e Manušesko ka lađal kana ka avel ano ašundipe plo thaj e Dadesoro thaj e sumnale phakalenge. A phenav tumenge čače: Isi nesave maškar akala so terđon akate save ni ka zumaven o meripe đikaj ni dikhen o Thagaripe e Devlesoro. A trujal ofto dive palo akala lafija, lelja ov e Petre thaj e Jovane thaj e Jakove thaj ukljinđa pe plajin te ruđil pe e Devlese. Thaj đi kaj ruđisajlo kerdilo o rošlipe lesere mujesoro averčhane, vi e šeja lesere parne thaj strefisarne. Thaj dikh, duj manuša vakerena oleja, a odola sine o Mojsije thaj o Ilija, save mothovdepe ano ašundipe, thaj vakerena kotar o iklipe lesoro sine le te pherel pe ano Jerusalim. A o Petar thaj on lesa sine peravde sovimasa; aj džangavindoj dikhle o ašundipe lesoro thaj duj manuša save terđona oleja. Thaj kana ulavde pe on lestar, phenđa o Petar e Isusese: Sikamneja, šukar si amenge akate te ova; te kera trin khasora: jekh tuke, thaj jekh e Mojsijase, thaj jekh e Ilijase, – na đanglindoj so vakerel. A đikaj ov odova vakerđa kerdilo nuvera thaj garavđa len; thaj darandile kana đerdinde ani nuvera. Thaj šundilo pe kotar e nuvera o krlo savo vakerda: Akava si o Čhavo mlo čumudino, ole šunen. Thaj kana si šundilo o krlo, arakhlja pe o Isus korkoro. Thaj on trainde thaj khanikase ni mothode ane odola dive khančik kotar odova so dikhle. A o aver dive kana ulile kotar e plajin, resle le but selore. Thaj dikh, manuš kotar o seloro dija vika vakerindoj: Sikamneja, ruđinav tut, dikh po čhavo mlo, kaj si mange jekhoro; Thaj ake, astarel les o đi thaj del vika kotarjekh; thaj phagel le uzal e spuma, thaj phare cidelpe lestar kana phagel le. Thaj ruđisardem tire sikaden te traden le, ta naštine. A o Isus irisarindoj phenđa: O bijavno bipaćavno thaj rumime! Đikote ka ovav tumencar thaj ka trpinav tumen? Ane akari e čhave tire. A pana ov đikaj alo, ačhilo o đungalo đi te khinele thaj te phagel le. A o Isus daravda e đe biuže, thaj sastarđa e ćhavore, thaj dija le lesere dadeste. Thaj sare but prašukarisajle e Devlesere barupnimase. A kana sare čhudisajle baš o sa so kerda o Isus phenđa ple sikljovnenge: Čhiven tumen ano kana tumare akala lafija: O Čhavo e Manušesko ka ovel dindo ane manušesere vasta. A on ni halile akava lafi; kaj sine garavdo lendar te na haljoven le; thaj darana te Phučen le baš akava lafi. A khuvđa dujgodi ano lende savo bi maškar lende ovela najbaro. A o Isus đanglindoj dejgodi olengere vilende lija e ćhavore thaj čhuta le uzal peste, thaj phenđa lenge: Savo lel akale ćhavore ano anav mlo, man lel; a savo man lel, lel Odole savo man bičhalda; kaj savo si najtikno maškar sarijende tumende, odova si baro. A o Jovan irisarindoj phenđa: Sikamneja, dikhljam jekhe kaj tire anaveja tradla e đungale đesa, thaj čhinadam le, kaj ni đala amenca pala tute. Thaj phenđa lese o Isus: Ma čhinaven, kaj naj opipe pe tumende; a kas nane opipe tumendar, tumenca si. Thaj kana pherđona o dive lesero iklimasko, ov zorale čhinada te đal ano Jerusalim. Thaj bičhalda e krleutnen anglal peste; thaj on đele thaj ale ano gav e samarjakoro te laćharen baš leste. Thaj ni lije le, odolese so ov đala ano Jerusalim. A kana dikhlje e sikljovne lesere o Jakov thaj o Jovan, phenđe: Devljutnea mange li te phena e jag te uljel e badalestar thaj len te xasarel, sar vi o Ilija so kerda? A ov irindoj daravđa len thaj phenđa: Ni đanen save sen tumen đesa. Kaj o Čhavo e Manušesko ni alo te xasarel e ođe manušengere aj te inkalel. Thaj đele ano aver gav. A kana on đana drumal, phenđa lese nesavo: Devljutnea, ka đav pala tute kuri tu đas. A o Isus leske phenđa: E baraporjakera isila xar thaj e čirikljen e badaleseren kujbo, a o Čhavo e Manušesko naj le kaj po šero te garavel. A e averese phenđa: Ava pala mande! A ov phenđa: Devljutnea, mek mange kaj najanglal te đav me dade te parunav. A o Isus lese phenđa: Mek nek e mule parunen ple mulen; a tu ava thaj mothov o Thagaripe e Devlesoro. A vi o aver phenđa: Devljutnea, ka đav pala tute, aj najanglal mek mange te đav te jertisavav mle kherutnenca. A o Isus lese phenđa: Nijekh savo čhuta o vast plo ko plugo ta irinipe palal, nane lačhardo baš Thagaripe e Devlesoro. A atoska alosarda o Devljutno vi averen Eftavardešudujen, thaj bičhalda len duj po duj anglo muj plo pe sa diz thaj than kotar manglja korkoro te đal. Thaj phenđa lenge: o čhinipe si but, a e bućarne si hari; odolese ruđin tumen e devljutneserese e ćhinipesko te ikalel e bućarnen po čhinipe plo. Đan; ake me tumen bičhalav sar e bakroren maškar o ruva. Ma legaren kesa ni trasta ni pođipe, thaj khanikasa ma te vakeren ko drom. An savo god kher đerdinen najangle phenen: Šandipe akale khereste! Thaj te ulo othe o čhavo šandipasoro, ka ačhol pe leste o šandipe tumaro; te na li ovel, ka irinelpe tumenđe. A ano odova kher oven, thaj xan thaj pijen so olen isi, kaj o bičhaldo si paćivalo e pokindako plakoro; ma nakhen kotar o kher ano kher. Thaj ani savi diz đerdinen thaj lena tumen, xan so tumenge ikalelpe. Thaj sastaren e nasvalen save si ano kher, thaj vakeren lenge: Paše alo tumenge o Thagaripe e Devlesoro. Thaj ani savi god diz đerdinen thaj ni meken tumen, iklindoj pe trgura lesere, phenen: Vi o praxo so amenge astardilo tumara dizijatar baš e pre amare ćinosara tumenge. Pale akava te đanen kaj tumenge paše alo o Thagaripe e Devlesoro! Phenav tumenge kaj e Sodomake ka ovel po lokhe ano Dive odova na li odola dizijake. Pharipe tuke, Horazine! Pharipe tuke, Vitsaido! Kaj si ano Tiro thaj Sidona te ovena prašukaripa so sine an tumende, dumutan ka ma, bešindoj ano ostro bala thaj praxo, jertona. Pale e Tiroske thaj Sidonake ka ovel po lokhe ko Kriso aj tumenge. Thaj tu, Kapernaume, savo si đi o badali vazdinđan tu, đi ke benđengiri jag ka pere. Ko tumen šunel, man šunel, thaj ko tumendar čhudel pe, mandar čhudel pe; a ko mandar čhudel pe, čhudel pe Odolestar savo man bičhalda. Irinđe pe e Eftavardešore lošajmasa vakerindoj: Devljutnea, vi e đungale đe amenge kandinena ano tiro anav. A ov lenge phenđa: Dikhljum e benge kaj pelo e badalestar sar strefin. Ake tumenge dav o baroderipe te terđon ko sapa thaj pe škorpije thaj pe sa e zor e bengesiri, thaj khančik tumenge ni ka ovel. Pale odolesa ma lošalen tumen so tumenge e đe kandinenape, aj lošalen tumen so si e anava tumare hramome po badali. An odova časo lošajlo pe đesa o Isus thaj phenđa: Ašarav tu, Dade, Devljutno e badalesoro thaj phuvjakoro, so akava garavđan e gođovarendar thaj e haljovnendar, a phućardan odova e bidžungalenge. Va, Dade, kaj ađahar sine o kamipe tiro. Thaj irindoj e sikadenge phenđa: Sa mange dinđa, o Dad mlo, thaj khonik na đanel ko si o Čhavo, sem o Dad, ni ko si o Dad, sem o Čhavo, thaj te o Čhavo manglja kaske te phučarel. Thaj irindoj e sikljovnenge korkorune phenđa: Bahtardipe e jakhenge save dikhen so tumen dikhen. Kaj tumenge phenav kaj but profetora thaj thagara mangle te dikhen so tumen dikhen, thaj na dikhle; thaj te šunen so tumen šunen, thaj na šunde. Thaj dikh, jekh sikljovno kanunesko uštilo thaj zumavindoj lese phenđa: Sikamneja, so mange trubul te kerav thaj te lav o đivdipe bimerimasoro? A ov leske phenđa: So si hramome ano Kanuni? Sar drabare? A ov irisarindoj phenđa: Čumudin e Devljutne Devle tire sa tire vileja, thaj sa ođesa tirea, thaj sa zorasa tirasa, thaj sa gođasa tirasa; thaj paše tire sar korkore tut. A ov leske phenđa: Čače irisardan; odova ker thaj ka đivdine. A ov, manglindoj pes te čačavel, phenđa e Isusese: A ko si mlo pašuno? A o Isus irisarindoj phenđa: O manuš nesavo huljela kotar o Jerusalim ano Jerihon, thaj zapelo maškar o čora, thaj akala le uljavde thaj marde ole sa ane rane, pa đele, a ole ekvašmule mekle. Nekotar pa huljela odole dromeja nesavo rašaj thaj dikhindoj le, nakhlo. A ađahar vi o levit, kana sine pe odova than, pašindoj, dikhlja le thaj nakhlo. A o Samarjanin nesavo drumarindoj avilo đi leste, ta kana dikhlja le kovlilo pe leste; Thaj pašindoj paćarda lesere rane thaj makhlja le uljea thaj e molja; thaj bešarindoj le pe plo gras, anđa le ane mehana, thaj phurederisajlo trujal leste. Thaj tajsa dive podžindoj ikalđa duj dinarja ta dinđa e mehanđijase, thaj phenđa lese: Phurederisavtu baš oleste, a so pobuter ka trošine me ka pokinav tuke kana ka irinama. So de godi, akana, savo si kotar odola trinendar sine najpašuno odolese so sine zapelo maškar o čora? A ov phenđa: Okova savo lese kovlipe kerda. A o Isus lese phenđa: Đa, ta vi tu ker ađahar. A kana gele po drom thaj ov dija ano jekh gav, a e đuvli nesavi, po anav Marta, priminđale ano plo kher. Thaj ano late sine e phen po anav Marija, savi bešli koro pre e Isusesere thaj šunela o vakeripe lesoro. A e Marta lija pe te bi so najlaćhe kandele, thaj pašindoj lese phenđa: Devljutnea, sar tu ni hajisare so mi phen man meklja korkori te kandav? Phen lake, akana, te ažutil man. A o Isus irisarindoj phenđa lake: Marta, Marta, de tut griža thaj daravejatu butese. A numa si jekh trubuno. Pale e Marija lačho kotor alosarda savo olatar na ka lelpe. Thaj kana ov ruđila pe e Devlese ko jekh than ta ačhavda, phenđa lese jekh kotar e sikljovne lesere: Devljutnea, sikav amen te ruđis amen, sar so vi o Jovan sikavđa e sikljovnen plen. A ov lenge phenđa: Kana ruđinen tumen vakeren: Dade amaro savo sijan po badali, te sumnalpe o anav tiro; te avel o thagaripe tiro; te ovel kamipe tiro vi pe phuv sar po badali. Maro amaro prekal trubuno de amenge sarsavo dive. Thaj jertisar amenge e bezeha amare, kaj vi amen jertisara sarsavonese udžilutnese amarese; thaj ma legar amen ano zumavipe; aj ikal amen e đungalestar. Thaj phenđa lenge: Savo tumendar isi le amal thaj gelo koro leste pe ekvaš rat thaj phenđa lese: Amala, de ma trin mare udžile, kaj alo maj o amal dromestar thaj naj ma sova te kaninav le. A ov andral irisarindoj te phenel: Ma le mo šandipe; akana o udar si phandlo, thaj e ćhavore si mle manca ano kreveto; našti te uštav tuke te dav. Phenav tumenge: Vi te na uštino te del lese odolese kaj si lesoro amal, aj baš lesoro bijakhipe ka uštel thaj ka del kobor trubul lese. Thaj me tumenge vakerav: Roden thaj ka delpe tumenge; roden thaj ka arakhen; khuven thaj ka phravelpe tumenge. Kaj sarsavo savo rodela, lela; thaj savo rodela, arakhi; thaj savo khuvela, phravelape lese. Savo si maškar tumende dad savestar te o čhavo rodel maro, te del lese bar? Ja te rodinđa mačho, te po than e mačhesko del le sape? Ja te rodinđa jaro, te del lese škorpija? Kana akana tumen, e đungale avune, džanen šukar davipe te den e ćhavorenge tumarenge, kobor najbut o Dad tumaro e badalesko ka del Đi Sumnalo odolenge save roden lestar? Thaj tradena e đungale đen, thaj odova sine laloro; thaj kana iklistilo o đungalo đi, vakerda o laloro; thaj prašukarena pe o seloro. A nesave lendar phenđe: Ažutimasa e Veelzevulosko, šerutno e đungale đeso, ikalda e đungale đen. A e aver zumavindoj le rodle lestar semno e badalestar. A ov đanglindoj lengere dije gođenge phenđa lenge: Sarsavo thagaripe savo ulavel pe korkoro ane peste, ka pustonel, vi o kher savo ulavel pe korkoro ane peste, ka peravđol. Te vi o beng ulavelpe korkoro ane peste, sar ka ačhol o thagaripe lesoro? Kaj vakaren kaj e Veelzevuleske ažutimasa tradav e đungale đen. Te li me e Veelzevuleske ažutimasa tradav e đungale đen, e čhave tumare kasera ažutimasa ka traden? Odolese tumenge on ka oven krisara. A me te e Devlesere najea tradlem e bengen, akana, reslo tumenge o Thagaripe Devlesoro. Kana o zoralo bandukil pe thaj arakhel boro plo, o barvalipe si lesoro ko šandipe. A kana avel o pozoralo lestar thaj zorarel le, lela sa o bandukipe lesoro ano savo paćaja, thaj ulavel so astarda lestar. Savo naj manca, opipe si mandar; thaj savo na kedel manca, čhorel. Kana o biužo đi ikljol andar o manuš, nakhel kotar bipanjesere thana rodindoj lačhipe, thaj na arakhindoj vakerel: Ka irinav maje ano kher mlo kotar ikliljem. Thaj avindoj arakhlja šulavdo thaj lačhardo. Teg đelo thaj lelja efta aver đe pođungale pestar, thaj đerdindoj đivdinen odothe; thaj najpalal e trujalipe oven e manušese okolese pođungale e anglunestar. A đikaj ov odova vakerđa, vazdinđa o krlo jekh đuvli kotar o seloro thaj phenđa lese: Baxtardino o vođi savo tut akharđa, thaj čučija save piljan! A ov phenđa: Čače, baxtarde si odola save šunena o lafi e Devlesoro thaj ićeren le. A e selorese save čedena pe ačhilo te vakerel: Generacija akaja si džungali generacija; roden o semno, thaj ni ka delpe lenge o semno sem o semno Jonesoro e profetosoro. Kaj sar si o Jona sine semno e Ninevljanenge, ađahar vi o Čhavo e Manušesko ka ovel semno akala generacijake. E thagarni kotar jug ka uštel po kriso e manušenca generacijake akalake, thaj ka krisinel len; kaj oj ali agorestar e phuvjako te šunel gođovaripe e Solomonosko, a dikh, akate si pobaro e Solomonostar. E manuša Ninevljaninja ka ušten po kriso akala generacija, thaj ka krisisaren la, kaj jertisajli po vakeripe e Jonesko, a dikh, akate si pobaro e Jonestar. Khoni ta ni čhivel e thari memeli po garavdo than, ni telal o vaso, aj po memeljako than te dikhen o rošlipe odola save đerdinen. E memeli e trupose si jak. Te, akana, e jak tiri ovel sasti, thaj sa o trupo tiro ka ovel rošlipe; te si e jak tiri ovel rumimi, vi o trupo tiro ka ovel kalipno. Arak, akana, kaj o rošlipe savo si ana tute te ni ovel kalipe. Kaj te si sa o trupo tiro rošlipe te na ovel le nijekh kotor kalipno, ka ovel rošlipe sasto sar kana e memeli strefisarel rošlipnasa. A kana ov odova vakerda, ruđisarda le nesavo farisej te xal ke leste. A ov đerdindoj bešlo uzal astalja. A o farisej čudisalo kana dikhlja kaj najanglal ni thovđa pe anglal o xape. A o Devljutno lese phenđa. Akana tumen e fariseja avrijal khosena e taxtaj thaj o čaro, a andral sijen pherde grabibe thaj đungalipe. Bigođarengere, na li odova kerda vi andral savo kerda vi avrijal? Pale den kovlipe odolestar so si andre; thaj dikh, sa ka ovel tumenge užo. Aj pharipe tumenge e farisejenge so dena dešoro e taxtajatar thaj ruta thaj katar sarsavo vunatuno, a trujalisaren o čačipe thaj o kamlipe e Devlesoro: akava trubuja te kerolpe, thaj odova te na mukljarelpe. Pharipe tumenge e farisejenge so kamena o paćivalo than pe sinagoge thaj resavnipe pe trgura. Pharipe tumenge, lilvarnalen thaj farisejalen, dujemujengere, so sijen sar bihaćarde limora, ta e manuša pe lende upral uštaven a ni đanen. A nesave e kanunendar irisarindoj phenđa lese: Sikamneja, vakerindoj odova vi amen dukhave. A ov phenđa: Pharipe vi tumenge e kanunonenge so ladaven pe manuša dreza phare baš o legaripe, a tumen ni jekhe najesa tumareja ni mangen te dolen tumen e drezatar. Pharipe tumenge so zidonena limorutne e profetonenge, a tumare dada len mudarde. Tumen, akana, čačaven thaj ačhen pe odola kotora tumare dadengere; kaj len on mudarde, a tumen lenge limorutne zidonena. Odolese o baro đanglipe e Devlesoro phenđa: Ka bičhalav lenge e profetonen thaj apostolen, thaj lendar jekhendar ka mudaren, a averen ka uspudinen; Te rodelpe akale bijanimastar o rat sarijengo e profetonengoro čhordi kotar o mothodipe e themesko. Kotar o rat e Aveljesoro sa đi o rat e Zaharijesoro, savo mudardilo maškar e viktimutne thaj hramo. Va, phenav tumenge, ka rodel pe akale bijanipestar. Pharipe tumenge e kanunđijenge, so leljen o klidi e džanipesoro: korkore ni đerdinđen, a odolen save bi đerdinen niden. A đikaj lenge ov akava vakerđa, lelje o lilvarne thaj o fariseja bara xolja te den pe leste thaj te rupuzinen sarsave phućimnasa. Ašuđarindoj thaj rodindoj na ka ma li so dolena andar o muj lesoro te bi došaren le. Kana maškarodova, kidinde pe milja thaj milja selore ta aćhile te uštaven jekh avre, lija te vakerel ple sikljovnenge: arakhen tumen e farisejengere majatar, a odova si dujmujipe. A khančik nane garavdo so ni ka phučarel pe, ni garavdo so ni ka đanel pe. Odolese, odova so ano kalipe phenden, ka šunel pe po rošlipe; thaj so po kan šušurisarden ane odaje, ka vakerel pe po ćatle. A vakerav tumenge, mle amalenge: Ma daran odolendar save mudaren o trupo thaj napal našti khančik najbut te keren. Aj tumenge ka sikavav kastar te daran: Daran odolestar savo, kana mudarel, isi le baroderipe te čhudel ane bengengi jag; va, phenav tumenge, lestar daran. Na bikinen pe li pandž čirikle baš o duj pare? Thaj nijekh lendar nane bisterdo anglo Devel. A ane tumende si sarsavo bal ko šero đendo. Ma daran akana; tumen sijen pošukar kotar e but čirikle. Aj tumenge phenav: Savo si man mothovel anglo manuša, ka mothovel vi o Čhavo e Manušesko ole anglo phakale e Devlesere; A savo čhudel man anglo manuša, odolestar vi me ka čhudivav anglo phakale e Devlesere. Thaj sarsavo savo phenela o lafi opipe e Čhavese Manušestar, ka jertinipe lese, a savo ka hulini e Sumnale Đe ni ka jertinipe lese. A kana tumen anen ano sinagoge thaj anglo šerutne thaj baroderipe, ma grižinen tumen sar ka so irisaren ja so ka vakeren; Kaj tumen o Sumnalo Đi ka sikavel ko odova časo so trubul te phenen. Phenđa lese pa neko kotar o seloro: Sikamneja, phen mle phralese te ulavel manca o aćhipe. A ov lese phenđa: Manušeja, ko man čhuta krisarese ja ulavdutnese upral tumende? A lenge phenđa: Dikhen thaj arakhen pe sarsave lipesko, kaj khonik na đivdini ple lačhalimatar, so si but barvalo. Mothoda lenge ta e paramiči vakerindoj: Ano jekh barvalo manuš bijanđa e umal. Thaj delape godi ana peste vakerindoj: So te kerav, kaj nane man ane soste te kedav o nilajipe mlo? Thaj phenđa: Akava ka kerav: ka peravav e ambara mle thaj ka vazdav pobare; thaj odote ka kedav sa e điva mle thaj lačhimata mla; Thaj ka phenav mle ođeske: Ođeja; isi tut bute lačhimata čedime baš bute beršenge; sov, xa, pi, lošarin tut. A o Devel lese phenđa: Bigođakereja, akaj rat ka roden o ođi tiro tutar; a odova so gatisardan kasoro ka ovel? Ađakar ovela odoleske savo peske čedel barvalipe, a ni barvajol e Devleja. A e sikljovnenge plenđe phenđa: Odoleske tumenge phenav: ma grižin tumen tumare ođesa so ka xan, ni truposa ano so ka urjaven tumen; O ođi si majšoruno e xamastar thaj o trupo e šejendar. Dikhen e garvajen sar ni sijinen, ni čhinen, ni naj len than garajmaske ni ambara, thaj o Devel len parvarel. A kobor sen tumen majšorune e čiriklendar! A ko tumendar grižindoj šaj te dodel ple barjopnase jekh kuj? Te, akana, naštine ni najhari sose grižinena tumen baš aćhuno? Dikhen e ljiljanura sar barjon: ni munčin pe, ni katen; aj tumenge phenav: ni o Solomon ano sa ašundipe plo ni urjavđa pe sar jekh lendar. Te li e ćar ane umalin, savi si avdije, a tajsa ani kuba frdel pe, O Devel ađahar urjavel, kobor ka ovel majbut tumen, haripaćamnalen! Ni tumen na roden so ka xan thaj so ka pijen, thaj ma te daravđon. Kaj sa akava rodena o bidevlesere akale themestar; a o Dad tumaro đanel kaj tumenge trubul akava. Aj roden o Thagaripe e Devlesoro, thaj sa akava tumenge ka del pe. Ma dara, e tikne paćavnengo, kaj sine o kamipe tumare Dadesoro te del tumenge o Thagaripe. Bikinen so isi tumen thaj doden kovlipe, keren tumenge traste save ni ka phuravđon o than po badali savo ni ka čučardol, kote o čor ni avel paše, ni e paparugori rumini. Kaj kote si o barvalipe tumaro odothe ka ovel o vilo tumaro. Nek oven o gruđa tumare phandine thaj o memelja tharde. A tumen miazutne e manušenge save ađikeren e rajo pumare, kana ka irinel pe e bijavestar te lese, sar avel thaj khuvel, sigate te phraven. Baxtaripe e kandinenge odolenge saven o rajo avindoj arakhel džangavde. Čače tumenge phenav kaj ka phanden pe, thaj ka sijisaren len, thaj ka aven paše thaj lenge ka kandel. Thaj te alo ano aver arakhajpe, thaj ano trito arakhajpe avel, thaj arakhel len ađahar, baxtaripe odole kandinenge. Aj akava đanen: kana bi đanela o kherutno ano savo časo ka avel o čor, ka ovel džangavdo, thaj ni ka mekel te hanen lesoro o ćher. Thaj tumen, akana, oven gatime, kaj ano savo časo na ka den godi, ka avel o Čhavo e Manušesko. A o Petar leske phenđa: Devljutneja, vakere li akaja paramiči amenge ja savorenge? A o Devljutno phenđa: Ko si, akana, odova paćavno thaj gođaver vastarutno, save ka čhivel o rajo upral ple kherutne te del len xape ko vaxto? Baxtaripe odole kandinese save o rajo lesoro, avindoj, arakhele te kerel ađahar. Čače tumenge phenav, upral o sa barvalipe plo ka čhuvel le. Te li phenđa o kandino odova ano plo vilo: Ni ka mlo rajo avel pana but vaxto; thaj ačhel te marel e kandinen thaj e kandinjen thaj xal thaj pijel, vi maćovel pe; Ka avel o rajo odole kandinesko ano dive kana na ađikerel, thaj ano časo kana ni đanel, thaj ka čhinel le, thaj o kotor lesoro ka čhivel e bipaćavnenca. A odova kandino savo đanđa o kamipe ple rajosoro thaj ni laćharda ni kerda po kamipe lesoro, ka ovel but mardo; A savo ni đanđa, pa kerda so therinđa mariba, ka ovel hari mardo. A sakonestar kase si but dindo, but vi ka rodel pe; a kase si paćavino but, lestar majbut ka rodel pe. Aljum te čhudav e jag ki phuv; thaj sar ka ma mangav te ovela thablini. Aj mange trubul te bolav ma bolipnasa, thaj sar mange si phare đikaj odova ni kerel pe! Den godi li kaj aljum šandipe te dav ki phuv? Na, phenav tumenge, aj ulavdipe. Kaj od akana pandžore ano jekh kher ka oven ulavde: trin opipe dujendar, thaj duj opipe trinendar. Ka ulavel pe o dad e čhavestar thaj o čhavo e dadestar; e daj e ćhajatar thaj e ćhaj e dajatar; ka ovel e sasuj opipe ple borjatar thaj e bori opipe ple sasujatar. A vi e selorese vakerđa: Kana dikhen e nuvera, kaj uštel katar o zapad, sigate vakeren: Avel zoralo bršin; thaj ovela ađahar. Thaj kana dikhen kaj o jugo phurdel vakeren: Ka ovel tatipe; thaj ovel. Dujemujengere, o muj e badalesko thaj e phuvjakoro đanen te penđaren, a o vaxto akava sar ni penđaren? A sose vi korkore pestar na krisinen odova so si čačutno? Kaj kana đa tire opipeutnesa koro šerutno, trudin tu ta vađe po drom inkaletu lestar, te na legareltu e krisose, thaj o krisari te na del tut e čhuvutneske, a o čhuvutno te na frdel tut ano phandipe. Vakerav tuke: Ni ka ikljove odothar đikaj na ka de o paluno lovo. Ano odova pale vaxto avile nesave thaj vakerde lese baš e Galilejenge kaskoro rat o Pilat haminđa e viktimenca lengerenca. Thaj irisarindoj o Isus phenđa lenge: Den godi li kaj odola Galileja sine bezehale kotar e sa Galileja, kana ađahar mudardile? Na, phenav tumenge, aj te na jertisajlen, sare ađahar ka mudarđoven. Ja odola dešofto so pe lende peli e kula ano Siloam thaj mudarđa len, den godi li kaj on sine najbange kotar e sa manuša so đivdinen ano Jerusalim? Na, phenav tumenge, aj te na jertinđen tumen, sare ađahar ka mudarđon. Phenđa pale akaja paramiči; Nekas sinele sumučinalin sijime ane ple drakhalina, thaj alo te rodel bijanipe pe late, thaj ni arakhlja. Teg phenđa e drakhalinarese: Ake trin berša sar avav thaj rodav bijanipe pe akaja sumučinalin, thaj ni arakhav. Čhin la! Sose vi e phuv te kovljol? A ov irisarindoj phenđa lese: Rajona mek la vi akava berš đikaj hanav trujal late thaj čhivav gunoj. Ta šaj ka bijanel; te li na, ka čhinela pala odova. A sikavđa ani jekh sinagoga ko savato. Thaj dikh, sine odothe e đuvli sava sine la đi bišaipno dešofto berša, thaj sine ćidimni thaj naštisarda nisar te vortosarel pe. A kana dikhljala o Isus, akharda la thaj phenđa lake: Đuvlije, mukljardi injan kotar o bizoraljipe tiro. Thaj čhuta pe late o vasta, thaj sigate vortisajli thaj ašundinđa e Devle. A o phurederutno e sinagogako, bičaljarindoj so o Isus sastarđala ko savato, irisarindoj phenđa e selorese: Šov dive si ane save trubul te keras; an akala, akana, aven ta sastaren tumen, a na ano dive e savatosoro. A o Devljutno lese irinđa thaj phenđa: Dujemujengere, sarsavo tumendar na li phravel ano savato ple guruve ja here e balajatar thaj ingarel le te pijel? A akala, ćhaja e Avraamosara, sava phandja o beng ake dešofto berša, na li trubuja te phravelpe kotar akava šelo ano dive e savatosoro? Thaj đikaj ov akava vakerda ladžandile sare save lese opipesajle; a sa o seloro lošalisajle pe baš e sa bare kotora so ov olen kerda. A ov vakerđa: Soske si miazutno o Thagaripe e Devlesoro, thaj soa le ka đirindosarav? Miazutne si vi e kućinake mojratar, save lindoj o manuš frdinđa ani bača pli, thaj barilo thaj ulo kaš baro, thaj e čiriklja e badaleske thanardile pe lesere krangora. Palem phenđa: Soa ka đirindosarav o Thagaripe e Devlesoro? Miazutne si vi e majake savi lija e đuvli thaj ućhardala ano trin balaje e varese, đikaj na ušlilo sa. Thaj nakhena pe dizija thaj gava sikavindoj thaj džandoj ano Jerusalim. Phenđa lese pale nesavo: Devljutnea, si li hari odola save mukljardon pe? A ov lenge phenđa: Maren tumen te đerdinen ko tanguno udar; kaj tumenge phenav: but đene ka roden te đerdinen thaj na ka šaj. Kana uštel o kherutno thaj phandela o udar, thaj len avrijal te terđon thaj te maren ano udar vakerindoj: Devljutnea, Devljutnea, phrav amenge! Thaj irisarindoj ka phenel tumenge: Na penđarav tumen kotar sijen. Atoska ka len te vakeren: Xaljam angla tute thaj piljam, thaj pe trgura amare sikavđan. A ov ka phenel: Vakerav tumenge, na penđarav tumen kotar sijen. Čiden tumen mandar sare save keren bičačipe! Odothe ka ovel rovipe thaj krcope dandengo, kana ka dikhen e Avraame thaj e Isake thaj e Jakove thaj sa e profetonen ano Thagaripe e Devlesoro, a pes avrijal ikalde. Thaj ka aven kotar o istoko thaj o zapado thaj kotar o severo thaj jugo thaj ka bešen baš o astalja ano Thagaripe e Devlesoro. Thaj dikh, isi palune save ka oven anglune, thaj isi anglune save ka oven palune. Ano odova dive ale paše nesave fariseja vakerindoj lese: Ikljov thaj đa akatar, kaj o Irod mangela te mudari tu. Thaj phenđa lenge: Đan thaj vakeren odola bareporake: Ake ikalav e bengen thaj kerav sastaripe avdive thaj tajsa, a o trito dive ka agorisarav. Aj avdive thaj tajsa thaj avertajsa trubul mange te đav; kaj o profeto našti te mudarđol avral kotar o Jerusalim. Jerusalime, Jerusalime, savo mudareja e profetonen thaj frdeja bara pe bičhalden tuke, kobor droma mangljum te čedav e čhavoren tiren sar e khani e pujen plen telal o phaka, thaj na mangljen! Eke, mekelpe tumenge o kher tumaro čučo. A vakerav tumenge: na ka dikhen man đikaj na aven te phenen: Baxtardo savo avel ano anav e Devlesoro! Thaj kerdilo pe te đerdini ko savato ano kher jekhe kotar e phureder e farisejengo te xal maro; thaj on dikhena pe leste. Thaj dikh, sine anglal leste khajekh manuš savo sine le panjesoro nasvalipe. Thaj irisarindoj o Isus phenđa e kanutnorenge thaj e farisejenge vakerindoj: Aj li muklino ano savato te sastarel pe? A on aćhile. Thaj ov astarda pes leste, sastarda le thaj meklja. Thaj irisarindoj phenđa lenge: Savo tumendar na ka ma pire here ja guruve, te perel ano bunari, sigo inkalela ano dive e savatosoro? Thaj naštisarde lese te irisaren pe odova. A e akharutnenge mothoda e paramiči, kana dikhlja sar alosarena e paćivale thana, thaj phenđa lenge: Ked ko akharel ko bijav, ma beš ano paćivalo than, te na ovel maškar e akharde khonik majdikhuno tutar; Thaj te na avel odova savo akharda vi tut thaj le, thaj phenel tuke: Dode o than akalese. Thaj teg lađasa ka đa te astare paluno than. Aj kana ove akhardo, avindoj beš po paluno than, kaj odova savo akharda tut phenel kana avel: Amala, cide tu poupre. Teg ka ovel tuke paćiv anglal odola save bešena tusa baš e astalja. Kaj sako savo pes vazdel ka teljarel pe, a savo pes teljarel ka vazdel pe. A vi odolese so le akharda phenđa: Kana deja divesko xape ja raćako xape, ma akhar e amalen tiren, ni e phralen tiren, ni tiren njamoren, ni e barvale pašunen, te na ma napal vi on tut akharena thaj irinena tuke. Aj kana kere xape, akhar e čororen, e sakaten, e langaljen, e kororen; Thaj baxtardo ka ove so tuke on nanelen sosa te irinen; aj ka iril pes tuke katar o đivdisaripe e čačutnengo. A kana odova šunđa khajekh odolendar so bešena lenca baš e astalja, phenđa lese: Baxtalo si odova savo ka xal xape ano Thagaripe e Devlesoro! A ov lese phenđa: Nesavo manuš gatisarda baro raćako xape thaj akharda buten. Than an vaxto raćake xapesko, bičhalda e kandine ple te phenel e akharutnenge: Aven, kaj si akana sa gatime. Thaj lije savore redosa te vakeren. O angluno lese phenđa: Ćindem umal, thaj musaj te ikljovav te dikhav la; ruđinav tut, mothov ma. Vi o dujto phenđa: Ćindem pandž jarmore guruva, thaj đav te dikhav olen; ruđinav tut, mothov ma. Vi o trito phenđa: Prandosajlem, thaj odolese našti te avav. Thaj avindoj o kandino odova, mothovda akava ple rajoske. Teg holjanđa o ćherutno thaj phenđa ple kandinese: Ikljov sigo pe trgura thaj dromora e dizjake, thaj ane akari e čororen, vi e sakatimen vi e langaljen, vi e kororen. Thaj phenđa o kandino: Rajo, kerdilo pe sar so phenđan, thaj pana isi than. Thaj phenđa o rajo e kandinese: Ikljov pe droma thaj maškar e bara, thaj khamisare len te đerdinen te pherelpe mlo ćher. Kaj tumenge vakerav nijekh katar odola akharde manuša na ka xal mle raćake xamata. Kaj si but akharde, aj si hari alosarde. Thaj kana đana pale leste bute selore, thaj dikhindoj phenđa lenge: Te khonik avel mange thaj ni ritol e dade ple, thaj daja, thaj e romnja, thaj e čhavoren, thaj e phralen, thaj e phenjen, ta vi o đivdipe plo, na ka šaj te ovel mlo sikamno. Thaj ko na igarel o trušul plo thaj pala mande na đal, na ka šaj te ovel mlo sikljovno. Kaj ko tumendar, kana mangel te vazdel e kula, na bešel najangle te kerel e trošipa, ka šaj li te điagorisarel? Te na ka ma, kana čhivel o temelji te naštil te điagorisarel, savore save dikhen ačhen te asan lese. Vakerindoj: Akava manuš lija te vazdel, te naštil te agorisarel. Ja savo thagar, kana đal ano maripe te malavel pe avre thagareja, ni bešel najangle thaj ni phurederisarel pe va li si zoralo te malavel pe deše miljenca odolesa so đal pe leste biše miljencar? Te naštisarda, ka bičhalel e bićhalutnen đikaj si odova pana dur thaj ruđil baš o baraštipe. Geja, akana, sako tumendar savo ni mukel sa so isile, našti te ovel mlo sikljovno. O lon si lačho, aj te vi o lon bihaćarel pe, sosa ka lonđarel pe? Naj lačho ni baš e phuvjake ni baš phubalimaske, aj čhoren le avrijal. Kas isi kana te šunel, nek šunel! A paše avena leste sa e hudutnara thaj e bezehale te šunen le. A e fariseja thaj e lilvarne mrmisarde vakerindoj: Akava lela e bezehalen thaj xala lencar. A ov lenge mothovđa e paramiči akaja vakerindoj: Savo manuš tumendar, isindoj le šel bakre thaj našalindoj jekha lendar, na mekela enjavardeš thaj enja ani drmina thaj ni đal pali našaldi đikaj ni arakhela? Thaj kana arakhel la, ladavel la piče ple lošalindoj, thaj avindoj khere, akharel ple amalen thaj pašunen vakerindoj lenge: Lošalen tumen manca, kaj arakhlem e bakrija mla e našalđa. Phenav tumenge kaj ađahar ka ovel pobaro lošalipe po badali aso jekh bezehalo savo jertilpe, nali baš enjavardeš thaj enja čačutne save naj len trubupe baš o jertipe. Ja savi romni, isindojla deš drahme, te našalđa jekh drahma, ni phabarda e memeli thaj ni šulavda o kher thaj ni rodel čhutune đikaj na arakhel? Thaj arakhindoj akharda e amalinjen thaj e pašutnjen, vakerindoj: Lošalen tumen mancar, kaj arakhlem e drahma savi našalđem. Ađahar, phenav tumenge, ovel lošalipe anglal e phakale e Devlesere aso jekh bezehalo savo jertil pe. Thaj phenđa: O manuš nesavo sine le duj čhave. Thaj phenđa o najterno lendar e dadese: Dade, de man kotor e barvalimasko so perel mange. Thaj ov ulavđa lenge o barvalipe. Thaj pale nesave dive čedinđa o najterno čhavo sa plo, thaj gelo ani phuv durutni, thaj odothe čhorda o barvalipe plo đivdindoj čhordane. A kana trošinđa sa, alo baro bokhalipe ani phuv odoja, thaj ov lelja te na ovel le. Thaj gelindoj avilo ke jekh thanutno odole phuvjako, thaj ov le bičhalda ani pli umalin te arakhel e balen. Thaj manglja te pherel o vođi plo kiflenca save o bale xana, thaj khonik lese na dela. A kana alo ane peste, phenđa: Kobor kandine ano dad mlo isi len maro pobuderi, a me merav bokhatar! Uštindoj ka džav mle dadese, ta lese ka phenav: Dade, kerdem došaripe e badalese thaj tuke, thaj maj najsem paćavuno te akharav man tire ćhavesa: le man sar jekh kotar tire kandine. Thaj uštindoj gelo ple dadese. A kana vađe podur sine, dikhlja le o dad lesoro thaj kovlilo pe leste, thaj prastandoj lelja le ane angali thaj čumidlja. A o čhavo lese phenđa: Dade, kerdem došaripe e badalese thaj tuke, thaj maj najsem paćavuno te akharav ma tire ćhavesa. A o dad phenđa ple kandinenge: Ikalen najšužo fostani thaj hurjaven le, thaj den lese e angustik po vast thaj pođipe ko pre. Thaj anen e guruvore thuljarde te čhinen, te xas thaj te lošajlivas. Kaj akava čhavo mlo sine mulo, thaj đivdinisajlo; thaj našaldo sine, thaj araklja pe. Thaj aćhile te lošalinen pe. A o čhavo lesoro o phureder sine ani umalin thaj avindoj, kana alo paše uzalo kher, šunđa đilabipe thaj ćhelipe. Thaj akharindoj jekhe e kandinendar phučla: So si odova? A ov lese phenđa: O phral tiro alo; thaj o dad tiro čhinda e thule guruve so saste ole ađićerda. A ov holjanđa pe thaj ni manglja te đerdini. Tegani iklistilo o dad lesoro thaj ruđisarda le. A ov irisarindoj phenđa e dadese: Eke, kandav tut edobor berša thaj nisar na nakhavdem o čhinavdipe tiro, ta mange nisar na dinđan ni buzno te lošalisavav mle amalencar. A kana avilo odova tiro čhavo, savo čhordarda o barvalipe tiro e lubnanca, ćhindan lese guruve thuljarde. A ov lese phenđa: Mlo čhavo, tu sijan sajekh mancar, thaj sa mlo si tiro. Trubul te pherđol tiro vilo thaj te lošare tut, kaj akava phral tiro mulo sine, thaj đivdinisajlo; thaj našaldo sine, thaj arakhlja pe. A ple sikamnenge vakerđa: Manuš nesavo sine barvalo thaj sine le vastarutno, a akava sasa phukavdo ke leste, kaj lese čhordarel o barvalipe. Thaj akharindoj le phenđa lese: So odova šunava baše tute? Pašljar o sačidipe sar vastardan e kheresa, kaj našti vađe lesa te vastare. A o vastarutno e kheresoro phenđa ane peste: So te kerav, kaj o rajo mlo lel mandar o vastaripe? Te hanavav našti, a lađava te mangav. Đanav so ka kerav kaj te len man ano khera ple, kana ka lel pe mandar o vastaripe. Thaj akharindoj redosa e udžilutnen ple rajoske, phenđa e anglunese: Kobor tu kames mle rajoske? A ov phenđa: Šel mere ulja. Thaj phenđa lese: Le o lil tiro aj beš thaj sigo hramosar pinda. Pale odova phenđa avrese: Aj tu kobor kames? A ov phenđa: Šel gone điv. Thaj phenđa lese: Le o lil tiro thaj hramosar oftovardeš. Thaj ašarisarda o rajo e bičačutne vastarutne so đangle čerda; kaj si e čhave akale šeleberšimasko pođangle kotar e čhave rošlipaske ane pli generacija. Thaj me tumenge phenav: Keren tumenge amalen barvalimasa bivortune ta kana ka tumen ovena čorore lena ane biagoresko thanbešipe. Savo si paćamno ane najtikno thaj ane butuno si paćamno; thaj ko si bičačutno ane najtikno thaj ane butuno si bičačuno. Kaj, akana, ane bičačuno barvalipe paćavne ni ka oven, ko tumenge ka paćavel o čačikano? Thaj ane avresko ni ka ma oven paćavne, ko tumenge ka del tumaro? Nijekh kandino našti duj rajen te kandel; kaj, ja ka jekhe ritol a e avere kamel, ja ka jekheste ka ićarel pe a avere ka teljarel. Našti te kanden e Devlese thaj e mamonose. A akava sa šunena vi e fariseja, save sine parnerupeske kamutne, thaj marena muj oleja. Thaj phenđa lenge: Tumen sen odola save keren tumen čačutne anglal e manuša, aj o Devel đanel e vile tumare; kaj so si ane manuša uće, đungalipe si anglal o Devel. O Kanuni thaj e Profetura si đi o Jovano; kotar odova o Thagaripe e Devlesoro mothovel lošalo nevipe, thaj sarsavo mučil pe te del ane leste. A najloke si e badalese thaj e phuvjake te nakhel nali jekhe linijake andar o Kanuni e peripesko. Sarsavo savo mukel e romnja pla thaj lel avera, lubnipe kerel, thaj sarsavo savo lel pe ulavdine romnjasa, lubnipe kerel. Manuš pa jekh sine barvalo thaj hurjavela pe ano skerleto thaj ani svila, thaj strefune lošarela pe sarsavo dive. A sine nesavo čororo, po anav Lazar, savo pašljola anglal o udar lesoro phumbalo, thaj mangla te čajljarel pe prušukenca save perena kotar e astalja e barvaleski; a vađe vi e đućela avena thaj čarena e phub lesiri. A kana mulo o čororo, ingarde le e phakale ane angali e Avraamoski; a mulo vi o barvalo, thaj parunde le. Vi ane bengesiri jag, arakhadindoj ane muke, vazdinđa e jakha ple thaj dikhlja dural e Avraamo thaj e Lazare ane angali lesiri. Thaj ov dija vika thaj phenđa: Dade Avraamo, kovljov pe mande thaj bičhal e Lazare nek bolel ano pani o ućipe ple najesko te šudrarel mi čhib; kaj munčiv ma ane akaja jag. A o Avraam phenđa: Ćhaveja, detu godi te lesa tu e lačhipa tire ano đivdipe tiro, a ađahar vi o Lazar o bilačhipe; akana pale ov kovljarel pe, a tu mučinetu. Thaj upral pe sa odova, čhivdo si maškar amende thaj tumende xaralipe baro, kaj odola save ka mangen akatar tumende te nakhen, naštisaren; ni okola okotar amende te nakhen. Tegani phenđa: Ruđiv tut pale, dade, te bičhale le mle dadesere khereste; Kaj isi man pandžore phralja: nek lenge čačavel te na bi vi on aven pe kava than mučimasko. Phenđa lese o Avraam: Isilen o Mojsije thaj e profetija, nek len šunen. A ov phenđa: Na, dade Avraamo, aj te lenge avilo khonik andar e mule, ka jertin pes. A ov lese phenđa: Te na šunde e Mojsije thaj e profetonen, te khonik vi andar e mule đivdinel, ni ka paćaven pe. A vi ple sikljovnenge vakerela: Naj šajine te na aven e tradine po bezeh; aj pharipe odolese prekalo kaste aven. Najlaćhe lese ka ovel te lese panjesoro bar umbladol ki men thaj te čhuden le ano derav, aj te na tradel po bezeh jekhe katar akala tikne. Arakhen pe tumende! A te tuke kerel došalipe o phral tiro, mahrisar le, ta te istarđa plo došalipe, jertisar lese. Thaj ako tuke efta droma po dive kerel došalipe, thaj efta droma vortolpe tuke thaj phenđa: istarav mo došalipe, jertisar lese. Thaj phenđe e apostola e Devljutnese: Pher amenge o paćavipe! A o Devljutno phenđa: Kana ka ma ovel tumen paćavipe sode e kučin mojraki, ka ma phenen akale dudoske: Ikal tut thaj sijisav ano derav! – thaj kandola bi tumen. A savo tumendar, te isile kandino savo pharavel e phuv ja savo arakhel e bakren, kana avel andar e umalin, ka phenel lese: Phir thaj sigate beš baš e astala? Sar lese ni phenel: Gatisar khančik te xav raćako xape thaj ker te kandes mange đikaj xav thaj pijav, thaj pale odova tu xa thaj pi? E da li ov ka ašarilpe odole kandinese kana kerda so lese čhinadilo? Ni gndiv. Ađahar vi tumen kana keren sa so tumenge si čhinadino, vakeren: Amen sam bitrubune kandine, kaj kerdam so sijam kamutne te kera. Thaj kana vov đala ano Jerusalim, nakhela maškar e Samarija thaj Galileja. Thaj kana đerdinela ano jekh gav, resle le deš đeramne manuša, save aćhile dural, thaj vazdije o krlo vakerindoj: Isuso, Sikamneja, maznosar amen! Thaj dikhindoj len, phenđa lenge: Đan thaj mothoven tumen e rašajenge. Thaj kerdilo pe, đikaj đana, te užaren pe. A jekh lendar, dikhindoj kaj si sastardo, irisajlo ašundindoj e Devle andar o sa krlo. Thaj pelo tele angle lesere pre thaj ašardisalo lese. Thaj odova sine o Samarjanino. A o Isus irisarindoj phenđa: Sar na užarde pe e dešore? A kaj si o enjatore? Sar ni arakhljape nijekh aver te irinelpe thaj te del ašundipe e Devlese, aj numa akava avere njamostar? Thaj phenđa lese: Ušti thaj đa; o paćavipe tiro ikalda tut. A phućlo e farisejendar, kana ka avel o Thagaripe e Devlesoro, ov lenge irisarda thaj phenđa: Thagaripe e Devlesoro ni avela po dikhlino ćhand. Ni ni ka phenel pe: Ake akate si, ja: eke le odori; kaj dikh, Thagaripe e Devlesoro si andre ana tumende. A e sikljovnenge phenđa: Ka aven e dive kana ka mangen te dikhen jekh kotar o dive e Čhave e Manušesere, thaj na ka dikhen. Thaj ka phenel tumenge: ake ov akate, ja eke ov okote; aj ma đan ni odori prastan! Kaj sar so e munja strefil e badalestar, thaj strefisarel sa so si telal o badali, ađahar ka ovel vi o Čhavo e Manušesko ano Dive plo. Aj lese najanglal trubul but te mudardol, thaj čhudino te ovel kotar o bijanipe akalesoro. Thaj sar sine ano dive e Nojese ađahar ka ovel vi ano dive e Čhavese e Manušeserese: Xana, pijena, lena pe, dindona pe đi odova dive kana o Noje đerdinđa ani barka, thaj alo o tasavipe thaj xasarda sa. Miazutne sar so sine ano dive e Lotose: xale, pile, kinde, bikinde, sijisarde, zidinđe. A ano dive kana iklistilo o Lot andar e Sodoma, čalavda e jag thaj o sumpor e badalestar thaj xasarda sa. Ađahar ka ovel vi ano odova Dive kana ka mothojpe o Čhavo e Manušesko. An odova Dive ko ka ovel po ćitlo, a e kherutne lesere ano kher, ma te huljel te le les; a ađahar vi odova ane umalin, ma te irinel pe palal. Den godi e Lotosara romnjaće. Te khonik mangel te arakhel o đivdipe plo, ka našalel le; a savo le ka našalel, ka đivdinel le. Phenav tumenge: Ane odoja rat duj ka oven ko jekh than, jekh ka lel pe a o dujto ka aćajpe; Duj đenja ka pišen khetane, jekh ka lel pe a e dujto ka aćajpe; Duj ka oven pe umalin, jekh ka lel pe a o dujto ka aćajpe. Thaj irisarindoj phenđe lese: Kaj, Devljutnea? A ov lenge phenđa: Kaj si o kaš odothe vi o barephakengere ka keden pe. Mothoda lenge pale vi e paramiči sar trubul sajekh te ruđin pe, thaj te na peren, vakerindoj: Ano nesavo foro sine nesavo krisari savo e Devlestar ni darala thaj e manušendar na lađala. A ane odova foro sine jekh phivli, thaj oj avela leste vakerindoj: Arakh man mle opipeutnestar. Thaj ni manglja butvahto. A najpalal phenđa ana peste: Te na vi darav e Devlestar vi e manušendar na lađav, pale avune kaj man phararel akaja phivli, ka arakhav la, kaj te na avel mange jekhune thaj na phararel. Thaj phenđa o Devljutno: Šunen so vakerel o bičačuno krisari! A kaj o Devel na ka arakhel ple alosarutnen save lese den krlo dive thaj rat, thaj sar ka meken? Phenav tumenge kaj len sigate ka arakhel Aj o Čhavo e Manušesko kana avel, ka arakhel li paćavipe ki phuv? A vi nesavenge save sine paćavune baš pese kaj si čačutne, a e averen nacaramoldisaren, mothoda e paramiči akaja: Duj đene đerdinde ano hramo te ruđin pe e Devlese, jekh farisej a o dujto hudutnari. O farisej ačhilo thaj ruđinela pe ana peste ađahar: Devla, nais tuke so najsem sar e avera manuša: xarundutne, bičačutne, anglaćumidutne ja sar akava hudutnari. Postisarav dujdrom ano kurko; dava dešipe odolestar so sa resav. A o hudutnari andaroduripe ačhela, thaj ni manglja ni e jakha te vazdel e badalese, aj marela pe ano kolin plo vakerindoj: Devla, kovljardo ov mange e bezehalese! Phenav tumenge, akava gelo čačavdo ple khereste, a na okova. Kaj sarsavo savo pes vazdela ka teljarel pe, a savo pes teljarel ka vazdel pe. A anena lese vi e čhavoren te len azbavel; a kana dikhle e sikljovne, čhinavde lenge. A o Isus akharindoj len phenđa: Meken e čhavoren nek aven ke mande, thaj ma ačhaven len; kaj asavkenge si o Thagaripe e Devlesoro. Čače tumenge phenav: Savo ni lel o Thagaripe e Devlesoro sar čhavoro ni ka del ane leste. Thaj phučlja le khajekh šeruno vakerindoj: Sikamneja gudleja, so te kerav ta te lungarav o đivdipe bimerimasko? A o Isus leske phenđa: Sose akhare man gudleja? Khonik naj gudlo sem jekhoro Devel. E čhinavdimata đane: Ma ker lubnipe; ma mudar; ma čor; ma vaker xoxamne; paćivalisar e dade tire thaj e daja tira. A ov phenđa: Sa akava garavdem kotar o ternipe mlo. A kana odova šunđa o Isus, phenđa lese: Pana jekh najstalo tuke: bikin sa so si tut thaj ulav e čororenge; thaj ka ovel tut barvalipe po badali; thaj ava pala mande. A kana ov odova šunđa, ulo dukhavdo; kaj sine but barvalo. A kana le o Isus dikhla kaj ulo dukhavdo, phenđa: Sar si phare odolenge save isilen barvalipe te đerdinen ano Thagaripe e Devlesoro! Kaj poloke si e devake te nakhel andar e suvjakere kana aj li e barvalese te đerdini ano Thagaripe e Devlesoro. A odola save šunđe phenđe: Ta ko si šaj te ikalel pe? A ov phenđa: So si e manušenge bišajine e Devlese si šajine. O Petar pale phenđa: Eke, amen meklam sa thaj lijampe pala tute. A ov lenge phenđa: Čače tumenge phenav: naj khonik savo meklja po kher, ja e bijanden, ja e phraljen, ja e phenjen, ja e romnja, ja e čhavoren ando Thagaripe e Devlesoro, savo ni ka lel butđutino ano akava vaxto thaj bimerimasko đivdipe ano them savo ka avel. Lija pale e Dešudujoren thaj phenđa lenge: Ake ka đa upre ano Jerusalimo, thaj sa ka kerel pe so e profetora hramonđe baš o Čhavo e Manušesko. Kaj ka ovel dindo e butedevljutnengerenge thaj ka maren oleja prasape, thaj ka mučinen le thaj ka čhungaren le. Thaj kana ka maren le rajenca ka mudaren le, thaj o trito dive ka đivdinisavel. A on khančik kotar odova ni haljarde thaj akava lafi sine garavdino olendar, thaj ni haljarde so lenge vakerel pe. A kana ale paše uzal o Jerihono, o kororo nesavo bešela pašo drom manglindoj. Ta kana šunđa sar o seloro nakhen, phućljape: So si odova? Thaj phenđe lese kaj o Isus Nazarećanino nakhel. Thaj dija vika vakerindoj: Isuso, čhavo e Davidosoro, maznosar ma! A odola so đana anglal dena lese vika te ačhel, a ov pana pozorale dela vika: Čhavo e Davidosoro, maznosar ma! A o Isus ačhilo thaj čhinavda ole te anen le; a kana alo paše, phučlja le vakerindoj: So mange tuke te kerav? A ov phenđa: Devljutnea, te dikhav. A o Isus lese phenđa: Dikh! O paćavipe tiro ikalda tut. Thaj sigo dikhla, thaj lijape palo leste ašundindoj e Devle. Thaj sa o seloro save dikhle dinde ašardipe e Devlese. Thaj đerdindoj ano Jerihono, nakhena andar leste. Thaj dikh, o manuš akhardo anavesa Zakej, aj ov sine phurederutno e hudutnorengo, thaj sine barvalo. Thaj rodinđa te dikhel e Isuse ko si ov; thaj naštisarda e selorestar, kaj sine e cikne barimasko. Thaj ov prastandoj anglal, uklinđa pe divo sumućalin te dikhel le; kaj paše late trubuja te nakhel. A kana o Isus avilo pe odova than, dikhindoj upre, dikhlja le thaj phenđa lese: Zakejo, hulji sigate; kaj mange avdive trubul te ovav ano kher tiro. Thaj huljilo sigate; thaj lija le lošalindoj. Thaj savore save dikhle bićajljardine, vakerindoj sar đerdinđa te gostil ke bezahalo manuš. A o Zakej ačhilo thaj phenđa e Devljutnese: Devljutnea, ake ekvaš o barvalipe mlo ka dav e čororenge, thaj te kas khanćesa globisardem, ka irisarav štardromune. A o Isus lese phenđa: Avdive avilo o inklipe e kherese akalese; kaj vi akava si čhavo e Avraamosoro. Kaj o Čhavo e Manušesko avilo te rodel thaj te ikalel o našaldino. A kana on odova šunđe, lunđarda te mothovel e paramiči, kaj ov sine pašo Jerusalimo, thaj on gindisarde kaj ka sigate ka sikavel pe o Thagaripe e Devlesoro. Phenđa akana: Manuš khajekh barvaleođesko e njamosko gelo ane duruni phuv te lel pese thagaripe, ta te iril pe. Akharindoj ple dešen kandinen, dija lenge deš kese parno rup thaj phenđa lenge: Trgujinen đikaj na irinape. A lesere dizutne ritona le, thaj bićhalde pala leste bićhaldipe vakerindoj: Na manga ov te thagaril upral amende. Thaj kerdilo pe, kana ov iranđa pe lindoj o thagaripe, phenđa te leske akharen odole kandinen savenge dija o parno rup, te dikhel so savo therdisarda. Thaj avilo angluno vakerindoj: Rajona, e kesa tiri anđa deš kese. Thaj phenđa lese: Lačhe, lačhe kandineja; baš odova so ane najhari sana paćamno, ake tuke o baroderipe upral o deš dizja. Thaj avilo o dujto vakerindoj: Rajona, e kesa tiri anđa pandž kese. A ov phenđa vi olese: Vi tu ov upral e pandž dizija. Thaj o trito avilo vakerindoj: Rajona, ake tiri kesa savi inćardem phandli ano mindili; Kaj darandiljem tutar, odolese kaj sijan manuš ostro: leja so ni mekljan, thaj ćhines so ni sijinđan, thaj kides kaj ni tradlan. A ov lese phenđa: Pe tire lafija ka krisarav tut, đungalo kandineja! Đangljan kaj sem me manuš ostro, savo lel so ni meklem, thaj čhinel so ni sijinđem, thaj kidav kaj ni tradljem. Ta sose ni dijan o parno rup mlo ane paruvutnara, thaj avindoj me ka ma lav le therimasa? Thaj phenđa e lipeutnenge: Len lestar e kesa thaj den odolese so sile deš kese. Thaj phenđe lese: Rajona, ole isi deš kese. Vakerav tumenge pale: Sarsavonese save isi le ka del pe; a odolestar save nanole, ka lel pe vi odova so isile. A okole dušmanjen mlen save ni mangle kaj me te thagariv upral lende, anen len akari, thaj čhinen len angla mande. Thaj vakerindoj kava o Isus lijape anglal đapeindoj naupre ano Jerusalimo. A kana pašilo e Vitfagake thaj Vitanijake, ke plajin akhardini Maslinska, bičhalda ple dujen sikljovnen. Vakerindoj: Đan ano gav so si anglo tumende, thaj kana đerdinena ane leste, ka arakhen e here phandlo pe savo nisar khonik e manušendar na beštino; phraven le thaj anen. Thaj te tumen ko phučlja: Sose pravena? Ađahar lese phenen: Odova trubul e Devlese. A kana gele e bićhalde, arakhle sar so olenđe phenđa. A kana on phravena e here, phende lenge e rajura lesere: Sose phraven e here? A on vakerde: Odova trubul e Devlese. Thaj ande le e Isusese, thaj frdinde ple fostanja po her, thaj thanarde e Isuse. Thaj kana ov đala buljarela o fostanja ple po drom. A kana ov akana pašilo telalplajin e Plajinako Maslinska, lije sa pobut e sikljovne ano lošaripe te ašarisaren e Devle bare krlesa baš o sa prašukaripa save dikhle. Vakerindoj: Baxtardo thagar savo avel ano anav e Devlesoro! Šandipe po badali thaj ašundipe pe ućimata! Thaj nesave e farisejendar kotar o seloro phende lese: Sikamneja, čhinav tire sikljovnenge. Thaj irisarindoj phenđa lenge: Phenav tumenge, te on ačhade, e bara ka den vika. Thaj kana pašilo, dikhindoj e diz rovđa upro leste. Vakerindoj: Kana ka ma vi tu đane, aj ane akav dive tiro, odova so si baš o šandipe tiro! Aj si akana garavdo tire jakhendar. Kaj ka aven pe tute e divesa, thaj ka trujalisaren tut e dušmanja tire honimatenca, thaj ka trujalisaren tut, thaj ka ćićiden tut kotar sa e riga; Thaj ka peraven tut thaj e čhavoren tiren ane tute, thaj ni ka meken ane tute ni bar po bar, odolese so ni penđarđan o vaxto ane saveste sijan dikhljardo. Thaj đerdindoj ano hramo, ačhilo te tradel odolen so bikinena ane leste thaj ćinena, vakerindoj lenge: Hramome si: O kher mlo, o kher si ruđipnasoro, a tumen kerden lestar bareski xuv e čorengiri. Thaj sikavda sako dive ano hramo. A e anglunerašaja thaj e lilvarne thaj selorengere anglune dikhena te xasaren le. Thaj na arakhena so ka ma lese kerena; kaj sa o seloro sine paš pašavre uzalo leste ašundoj le. Thaj kerdilo pe jekh kotar odola dive đikaj ov sikavela e selore ano hramo thaj vakerela o evangelium, avile e rašaja thaj e lilvarne e phurederutnenca. Thaj phende lese vakerindoj: Phen amenge, save barederimasa odova kere? Ja ko si odova so tuke dija odova baroderipe? A ov irisarindoj phenđa lenge: Vi me tumen ka phućav jekh lafi, thaj phenen mange: Bolipesaripe e Jovanosoro – aj li sine e badalestar ja e manušendar? A on gindisarde ana peste vakerindoj: Te phenđam: e badalestar, ka phenen: sose lese, akana, ni paćajen? Te li phenđam: e manušendar, sa ka amen e manuša bararen; kaj si paćavino kaj si o Jovan profeto. Thaj irisarde kaj ni đanen kotar. A o Isus lenge phenđa: Ni me tumenge na ka phenav save baroderimasa akava kerav. A e selorese lelja te mothovel e paramiči akaja: O manuš nesavo sijisarda drakhalina, thaj dija le e drakharutnenge, ta gelo po lungo vaxto. Thaj ane plo vaxto bičhalda e drakharutnenge e kandine te den lese kotar o bijanipe e drakhalinango; aj e drakharutne le marde, thaj bićhalde le čuče vastengere. Thaj palem bičhalda e avere kandine; a on vi le marindoj thaj lađarindoj bićhalde čuče vastengere. Thaj bičhalda palem e tritone; a on vi le ratvarde thaj frdinđe. Teg phenđa o rajo e drakhalinengo: So te kerav? Ka bičhalav mle čhave e kamle; bisum ka lađan kana ka dikhen le. A e drakharutne dikhindoj le gindisarde ana peste vakerindoj jekh avrese: Akava si avutno pe leso than; phiren le te mudara ta amenge te ačhel o barvalipe. Thaj frdinđe le avrijal andar e drakhalina thaj mudarde. So ka, akana kerel lenge o rajo e drakhalineso? Ka avel thaj ka xasarel akale drakharutnen, thaj ka del e drakhalina averenge. A on kana odova šunđe phenđe: Te na del o Devel! A ov dikhindoj pe lende phenđa: So mandarel, akana, odova so si hramome: O bar savo frdinđe e zidarja, ov ulo šero e xnzatar? Sarsavo savo perel pe odova bar ka phagel pe, a pe kaste ov perel ka xurdarel le. Thaj rodle e anglunerašaja thaj e lilvarne te ane odova časo vazden pe vast upro leste, aj darandile e selorestar; kaj haljarde kaj baš olenge akaja paramiči mothoda. Thaj vardinena pe leste; thaj bićhalde e phukavnen, save kerena pe kaj si čačutne, na bi li le astarena ano lafi, ta te ka ma le dena najuće phurederimase thaj barederimase e regentosi. Thaj phučle le vakerindoj: Sikamneja, đanas kaj vorto vakere thaj sikave, thaj na dikhe ko si ko, aj čače sikaveja e Devlesere dromeja: Aj li si amenge meklo te da porezi e thagareske ja na? A ov, haljovindoj o bižajipe lengoro, phenđa lenge: So man zumaven? Mothoven mange o dinari; kasoro muj si pe leste thaj telahramope? A on irisarindoj phende: E thagareso. A ov lenge phenđa: Den, akana, e thagaresoro e thagarese, a e Devlesoro e Devlese. Thaj ni šaisarde te astaren le ane lafija anglal e selore; thaj prašukarindoj e irisarimnasoro lesoro ačhade. Thaj pašile nesave e sadukejendar, save phenen kaj nane đivdisaripe, thaj phučle le, vakerindoj: Sikamneja, o Mojsije amenge hramonđa: Te kaske merel o phral save isile romni, thaj akava merel bi ćhavorengo, kaj o phral lesoro lel e romnja thaj te vazdel e ternen ple phralese. Sine, akana, efta phrala, thaj angluno lija e romnja, thaj mulo bi ćhavorengo; Thaj lelja o dujto e romnja, vi ov mulo bi ćhavorengo; Vi o trito lelja la jekhune ađahar; a ađahar vi so efta, ni mekle čhavoren thaj mule. A palo sarijende muli vi e romni. E đivdinipestar, akana, savesiri romni olendar ka ovel? Kaj so eftangiri romni sine. Thaj irisarindoj o Isus phenđa lenge: E čhave akale themeskere prandonpe thaj dindonpe; A save paćivisajle te len okova them thaj đivdisaripe andar e mule, ni prandonpe ni dindonpe; Kaj našti aj te meren, kaj si sar phakale, thaj čhave si e Devlesere kana si čhave e đivdisaripasere. A te e mule ušten, thaj o Mojsije sikada ke kalin akana akharda e Devljutne Devleja Avraamosereja thaj e Devleja e Isakosereja thaj Devleja e Jakovesereja. A o Devel nane Devel e mulengoro aj e đivdengoro; kaj si lese sare đivde. A nesave e lilvarnendar irisarindoj vakerde: Sikamneja, lačhe vakerdan. Thaj ni tromande maj khanči te Phučen le. A ov phenđa lenge: Sar vakerena kaj si o Hristos čhavo e Davidosoro? Kana korkoro o David vakerel ane pustik e Psalamengiri: Phenđa o Devljutno mle Devljutnese: beš mange pe daxni rig, đikaj pašljarav e dušmanjen tiren baš o thanipe tire prengere. O David, akana, le akharel Devljutnea; ta sar si lese čhavo? A kana sa e selore šunđe, phenđa ple sikljovnenge: Arakhen tumen e lilvarnendar, save vilea đana ane bare fostanja, thaj kamena arakhadipa pe trgura, thaj anglune thana pe sinagoge thaj paćivale thana baš e astalja po xape; Save xana o khera e phivljengere, thaj xoxamne ruđinen pe but, on ka pana anglal oven krisime. A dikhindoj upre dikhlja e barvalen kaj mekena plo davipe ane xasna e hramosiri. A dikhlja vi jekha čororja phivlja sar čhivel duj lepte; Thaj phenđa: Čače tumenge phenav: akaja čorori phivlji čhuta najbut sarijendar: Kaj sare akala čhute po davipe e Devlese kotar najbutipe plo, a oj kotar o čororipe plo čhuta sa o barvalipe plo so sinela. Thaj kana nesave vakerena baš o hramo kaj si lačhardo lačhe bareja thaj sovljakere daripendar, phenđa: Ka aven o dive ane save kotar sa so dikhen ni ka ačhel ni bar po bar savo ni ka čhudinil pe. Thaj phučle le vakerindoj: Sikamneja, kana odova ka ovel? Thaj savo si semno kana odova ka kerel pe? A ov phenđa: Arakhen te na xoxaven tumen, kaj bute ka aven ano anav mlo vakerindoj: Me sem, thaj: Alo paše o vaxto. Ma te, akana, te đan palo lende. A kana šunena baš o mariba thaj bilačhimata, ma te daran; kaj sa odova najanglal trubul te ovel, aj najsi sigo agor. Teg lenge phenđa: Ka ušten o seloro pe seloro thaj o thagaripe po thagaripe; Thaj barophuvjakoro izdrape ka ovel pe thana, thaj ka ovel bokhalipe thaj meripe, vi e darajmata thaj e semne bare ka oven e badalestar. A anglal akaleste akalesoro, ka vazden pe tumende ple vasta thaj ka traden tumen thaj ka den tumen ane sinagoge thaj ano phandipe; ka legaren tumen anglal e thagara thaj vortutne ando anav mlo. A odova ka kerelpe tumenge baš o čačavdipe. Čhiven, akana, ano vile tumare, te na godisaren sar anglal ka irinen; Kaj me tumenge ka dav vakeripe thaj bižajipe savake na ka šaj te anglathovel aj te irisaren sa tumare opipeutne. A ka anglameken tumen vi e bijande, vi e phralja, vi e bijanimasere, vi e amala, thaj ka mudaren nesaven tumendar. Thaj savore tumen ka riton ando anav mlo. Ni bal e šerestar tumarestar ni ka perel. Tumare nakhavipnaja ikalen e đe tumare. A kana dikhen kaj e askera trujalisarde o Jerusalim, teg te đanen kaj alo paše o peravdipe lesoro. Teg, save ka oven ani Judeja nek našen ane plajina, thaj save ka oven ano korkoruno foro nek ikljoven avrijal, thaj save si ane umalin ma te đerdinen ano foro; Kaj akala si divesa irinmaske, te pherel pe sa so si hramosardo. A pharipe si e khamnjenge thaj kola den čuči ane odola dive. Kaj ka ovel belava bari pe phuv, thaj xolji pe seloro akava. Thaj ka perel kotar e ostro sablja, thaj ka oven legarde ano phandipe pe sa e selore; thaj o Jerusalimo ka uštaven e butdevlese đikaj ni pheren pe e vaxtija e butdevlengere. Thaj ka oven semne po kham thaj čhon thaj čerenja; thaj pe phuv pharipe thaj belava e selorenge ane dar kotar o šušuripe e deravesoro thaj e talasengoro. Ka meren o manuša daratar thaj kotar o ašuđaripe odolestar so avel pe lumija; kaj e zora e badaleske ka miškon pe. Thaj teg ka dikhen e Čhave e Manušesere kaj avel pe nuvero zorasa thaj bara ašundipasa. A kana ka lel pe akava te kerelpe, ortosavon thaj vazden e šere tumare, kaj avela paše o ikalipe tumaro. Thaj vakerda lenge e paramiči: Dikhen pe sumučinalin thaj pe sa e kašta; Kana dikhen kaj akana ikljen e luluđa, korkore đanen kaj si eke paše o nilaj. Ađahar vi tumen kana dikhen kaj akava kerela pe, đanen kaj si paše o Thagaripe e Devlesoro. Čače tumenge vakerav kaj akaja generacija ni ka nakhel đikaj akava sa ni ovel. O badali thaj e phuv ka nakhen, a e lafija mle ni ka nakhen. Aj arakhen pe peste kaj e vile tumare ni phararen bute xamasa thaj pimasa thaj grižasa akale đivdimasko, thaj kaj o Dive odova ni maladol pe tumende biašuđarune. Kaj ka avel sar flinka pe sarijende save đivdinen po muj sa e phuvjako. Oven đangade, akana, ano sarsavo vaxto ruđindoj te mothoven paćavipe te duraren sa so si te kerel pe, thaj te ačhen anglal Čhavo e Manušesko. A sine ov diveja ano hramo thaj sikavđa, a raćasa ikljola thaj bešela pe plajin akhardi Maslinska. Thaj sa o selore siđarena sabalese pe leste ano hramo te šunen le. Pašola o baro dive e bimajavengere marenge akhardo Pasha. Thaj rodena e anglunerašaja thaj e lilvarne sar te mudaren le; aj darana e selorestar. A o beng đerdinđa ano Juda, akhardo Iskariotski, savo sine kotar o gindo e Dešudujengoro. Thaj gelindoj vaćerda e anglunerašajenca thaj lilvarnenca thaj e bare askeregenca sar lenge ole ka avrićhivel. A on lošalisajle, thaj čhinavde te den le love. Thaj ov dija po lafi, thaj rodela lačho momenti te del le lenge bi lipe e selorengoro. Aj alo o dive e bimajavengere marenge ane savo trubula te čhinel pe pashaluno bakro. Thaj bičhalda e Petre thaj e Jovane phenindoj: Đan thaj gatisaren amenge Pasha te xas. A on lese phenđe: Kaj mange te gatisara? A ov lenge phenđa: Ake, kana đerdinen ani diz, ka arakhel tumen o manuš savo ingarel khoro pani; đan pale leste ano kher ane savo ov đerdini. Thaj phenen e kherutne khereske: O sikamno tuke phenel: kaj si o than kaj ka xav e Pasha mle sikljovnenca? Thaj ov tumenge ka sikavel bari ućhardi upruni soba; gothe gatisaren. Thaj von gele thaj arakhle sar so lenge phenđa; thaj gatisarde e Pasha. Thaj kana alo o časo, bešlo baš e astala, thaj dešuduj apostolja oleja. Thaj phenđa lenge: But mangljem kaj akaja Pasha te xav tumencar anglal aj so ka mudarđovav; Kaj tumenge vakerav kaj ni ka xav la đikaj ni pherdol ano Thagaripe e Devlesoro. Thaj lindoj e taxtaj ašarisarda, thaj phenđa: Len thaj ulaven la maškaro tumende; Kaj tumenge phenav kaj ni ka pijav kotar o bijanipe drakhengo đikaj ni avel o Thagaripe e Devlesoro. Thaj lindoj o maro ašarisarda, phaglja le thaj dija lenge vakerindoj: Akava si o trupo mlo savo del pe tumenge; akava keren bašo mlo dindipe godi. A ađahar vi e taxtaj palo raćako xape, vakerindoj: Akaja taxtaj si Nevi sovli ano rat mlo, savi si baš tumenge čhorel pe. Aj ake e vasta mle avrićhutinese manca pe astalja. Thaj o Čhavo e Manušesko, akana, đal sar si čhinavdo; aj pharipe e manušese odolese savo ole avrićhudel! Thaj on aćhile te Phučen pe maškaro peste savo ka ma, akana, lendar ovela odova savo odova ka kerel. A ulo vi čingarori maškar lende savo lendar haćarel pe kaj si najbaro. A ov lenge phenđa: E thagara e selorengere rajosaren upral lende thaj e bareder inćarutne lengere akharen pe laćhekerutne. Aj tumen ma ađahar te keren; aj ko si maškar tumende najbaro, nek ovel sar najterno, thaj o phureder sar kandino. Kaj ko si najbaro, savo bešel baš e astalja ja savo kandel? Naj li odova savo bešel baš e astalja? A me sem maškaro tumende sar kandino. A tumen sen odola save inćardilen mancar ano zumavipe mlo. Thaj me tumenge mekav amaneti o Thagaripe sar so o Dad mlo mange muklja amaneti, te xan thaj pijen baše mle astalja ano Thagaripe mlo, thaj te bešen pe thana thaj te krisisaren upral e dešuduj njamora e Izrailjeske. Thaj phenđa o Devljutno: Simone, Simone, ake tumen čače o beng mangela te paćarel tumen sar o điv. A me ruđisajlem tuke kaj o paćavipe tiro ni ačhel: thaj tu, kana irinetu, zurar tire phraljen. A ov lese phenđa: Devljutnea, tusa sem gatime vi ano phandipe vi ano meripe te džav. A ov phenđa: Phenav tuke, Petre, na ka avdive đilabel o bašno đikaj trin droma na čhude kaj man penđare. Thaj phenđa lenge: Kana tumen bićhaldem bi kesako thaj trastako thaj pođimasko, da li tumenge so nasine? A on phende: Khanči. A ov lenge phenđa: Aj akana savo isi le kesa nek lela, ađahar vi e trasta; a savo naj le nek bikinel o fostani plo thaj te kinel čhuri. Egolese tumenge phenav, kaj vađe vi odova so si hramome: Thaj čhute le maškar e bikanunutne, trubul te kerelpe pe mande; Kaj so si mandar hramome agorisarel pe. A on vakerde: Devljutnea, ake akate si duj čhurja. A ov lenge phenđa: Ačhaven. Thaj iklindoj gelo po siklipe pe Maslinakiri plajin; a palo leste gele vi e sikljovne lesere. A kana sine po than phenđa lenge: Ruđin tumen te na peren ano zumavipe. Thaj korkoro durilo lendar kobor šaj e bareja te frdel pe, thaj telindoj pe kočija ruđisarela pe vakerindoj: Dade, kana bi mange te nakhave akaja taxtaj bizo mande! Aj na mlo kamipe, aj tiro nek ovel! A mothovđape lese o phakalo e badalestar zurarindoj le. Thaj avune ane merimasko maripe, ruđila pe tate; a o teri lesoro sine sar pića e ratesiri save pićan pe phuv. Thaj uštindoj e ruđutnatar avilo e sikljovnenge, thaj arakhlja len sovindoj dukhatar, thaj phenđa lenge: So soven? Ušten thaj ruđin tumen te na peren ano zumavipe! Đikaj ov vađe vakerela, dikh e selore, thaj jekh kotar e Dešudujore, akhardo Juda, đala anglo lende, thaj pašilo e Isusese te čumidel le. Kaj lenge dinđa asavko semno: kas čumidav, odova si! A o Isus lese phenđa: Judo, aj čumidimasa avri frde e Čhave e Manušesere? A kana on so sine lesa dikhle so ka ovel, phenđe lese: Devljutnea, te mara čhurjasa? Thaj khuvđa jekh lendar e kandine anglunerašajesere, thaj čhinđa lesoro daxno kan. A o Isus irisarindoj phenđa: Meken tumen odolestar. Thaj dolindoj pe lesoro kan, sastarda le. A e anglunerašajenge thaj e bare hramosere askerenge thaj phurederutnenge save avile pe leste phenđa o Isus: Aj tumen sar po čor ikliljen čhurjencar thaj čhinimasa te astaren man? Sako dive sinjum tumencar ano hramo thaj ni vazdijen e vasta pe mande; aj akava si tumaro časo thaj baroderipe e raćako. A kana astarde le, inđarde le thaj čhute ane palata e anglunerašajeski. A o Petar đala pala leste dural. Thaj kana tharđe e jag maškar e avlin thaj bešle khetane, vi o Petar bešlo maškar lende. Dikhindoj le ta jekh kandini kaj bešel ke jag, thaj dikhindoj pe leste phenđa: Vi akava sine lesa. A ov lestar durilo pe vakerindoj: Đuvlije, na penđarav le. Thaj hari pale odova dikhlja le vi aver thaj phenđa: Vi tu san lendar. A o Petar phenđa: Manušeja, najsem. Thaj kana nakhlo trujal jekh časo, aver khonik čačavda vakerindoj: Čače vi akava sine lesa; kaj si Galilejco. A o Petar phenđa: Manušeja, na đanav so vakereja. Thaj sigo đikaj ov pana vakerela đilabda o bašno. Thaj irindoj o Devljutno dikhlja po Petar, thaj pelo ane godi e Petroske e lafija e Devljutnesere sar lese phenđa: Anglal so ka o bašno đilabel ka čhudetu mandar trin droma. Thaj iklindoj avrijal, runđa ćerke. A e manuša save inćarena e Isuse prasana le, thaj marena le. Thaj ućharindoj marena le vakerindoj: Anglalmothov ko khuvđa tut? Thaj but aver akošiba vakarena pe leste. Thaj kana divesajlo pe, kidle pe e phurederutne e selorengere, e anglunerašaja thaj e lilvarne, thaj ingarde le ano plo Sinedrion vakerindoj: Te sijan tu o Hristos, vaker amenge. A ov lenge phenđa: Te tumenge vi phendem, ni ka paćan. A te tumen vi phućlem, na ka irisaren mange, ni na ka meken man. Akanatar o Čhavo e Manušesko ka bešel kotar e daxni rig e Devlesere zoraki. Savore ta phenđe: Tu li san, akana, o Čhavo e Devlesoro? A ov lenge phenđa: Tumen vakerena kaj sem me. A on phenđe: So amenge trubul čačavdimata? Kaj korkore šunđam lesere mujestar. Thaj uštile but manuša thaj legarde le ko Pilato. Thaj lije le te krisin vakerindoj: Akale arakhljam kaj ulavel e selore amare, thaj čhinavel te den e thagarese porezi, thaj vakerel kaj si ov Hristos thagar. A o Pilato phućja le vakerindoj: Aj tu li sijan o thagar e judejengo? A ov irisarindoj phenđa lese: Tu pheneja. A o Pilato phenđa e anglunerašajenge thaj e selorenge: Ni arakhav nisavi doš pe akava manuš. A on sajekh rupuzisarena vakerindoj: Ov vazdel e seloren sikavindoj pe sa e Judeja počindoj akatar e Galileja pa sa đi akate. A o Pilato ašundoj baš e Galilejake pučlja: Aj si akava manuš Galilejco? Thaj đanglindoj kaj si kotar o agor e Irodosko, bičhalda le e Irodose, savo vi korkoro sine ano Jerusalim odole divende. A o Irod dikhindoj e Isuse but lošalisajlo; kaj poangle manglja te dikhel le, kaj but šunđa lestar, thaj ašuđarela kaj ka dikhel lestar nesavo semno. Thaj čhivena lese but phućipa; aj lese ov khančik ni irinđa. Ačhena pale e anglunerašaja thaj e lilvarne thaj zorale le krisinena. A o Irod le teljarda ple askerencar thaj marda leja muj, urjavda le parno fostani thaj bičhalda le palal e Pilatose. Thaj ane odova dive baraštisajle o Pilat thaj o Irod maškaro peste; kaj angleder sine ane čingara. A o Pilat, akharindoj e anglunerašajen thaj e phurederutnen thaj e seloren, phenđa lenge: Anden mange akale manuše sar kaj ov dukhavel e seloren, thaj eke, me le anglal tumende phućljem, thaj ni arakhljem pe akava manuš nijekh doš kotar odola baš save le tumen krisinen; A ni o Irod, adalese tumenge le palal bičhalda. Thaj eke, ni kerda khančik so bi therela o meripe. Kaj le, akana, te pedepsiv thaj te mukav. A musaj sa te lenge e bare divesestar te mukljarel jekhe. A on savore khetane dije vika vakerindoj: Le akale, a mek amenge e Varava! Akava sine čhudino ano phandipe baš nesavo vazdipe kerdo ani diz thaj mudaripe. A o Pilato palem dija vika manglindoj te mukel e Isuse. A on dena vika vakerindoj: Inzar le, inzar! A ov lenge po trito drom phenđa: Savo si, akana, đungalipe ov kerda? Me khančik pe leste ni arakhljem so ka ma therela meripe; akana, te pedepsiv le thaj te mekav le. A on jekhune rupuzisarena bare viknipasa, thaj rodena kaj ov te inzardol; thaj upralzorarda e vika lengiri thaj e anglunerašajengi. Thaj o Pilat anglakrisisarda te ovel po lengo rodipe. Thaj meklja lenge e Varave, čhudino ano phandipe baš o vazdipe thaj mudaripe, save rodena, a e Isuse dija lenge pe lengo kamipe. Thaj kana legardele, ačhavde nesave Simone Kirinejco, savo irinelape kotar umalin, thaj čhute pe leste o trušul te legarel palo Isus. A palo leste đana baro bute selore thaj đuvlja, save rovena thaj rikninena palo leste. A o Isus irindoj pe lende phenđa: Ćhija e jerusalimesere, ma roven pala mande, aj roven pala tumende thaj palo ćhavore tumare. Kaj ake, avena e dive ane save ka phenel pe: Šukaripe e nabijanutnenge, thaj e vođijenge savena bijande, thaj e čučijenge save na dinde čuči. Teg ka lel te vakerel e plajinenge: Peren pe amende; thaj e ućipenge: Učharen amen! Ked akana kerena ađahar e sapane kašteja, so li ka ovel e šukeja? Legarena vi avera duj đungalećerutnen lesa te xasaren. Thaj kana avile po than akhardo Šeresko, odothe inzarde le thaj e đungalećerutnen, jekhe e daxne rigatar, a e dujtone zervatar. A o Isus vakerela: Dade, jertisar lenge, kaj na đanen so keren! Thaj ulavindoj e fostanja lesere čhudena barbuti. Thaj e selore ačhena dikhindoj. A vi e phurederutne marena muj oleja vakerindoj: Avren ikalđa, nek ikljarel vi pes, te si ov o Hristos, alosarutno e Devlesoro. A vi e askera marena muj, pašona thaj dena le šut. Thaj vakerena: Te sijan tu thagar e judejengo, ikal korkore tut! A sine upral oleste thaj hramope hramosardo grafemenca ko jelinsko thaj latinsko thaj ko jevrejsko: Akava si thagar e judejengo. A jekh kotar e umblavde džungalećerutne mahrisarela pe leste vakerindoj: Te sijan tu o Hristos, ikal tut thaj amen! A e aver irisarindoj krisarela le vakerindoj: Sar tu na dara e Devlestar, kana san vi korkoro krisime ađahar? A amen sam vortome krisime, kaj leljam pe amare kotora sar so therisardam; a ov nisave džungalipa ni kerda. Thaj phenđa e Isusese: Detu godi pe mande, Devljutnea, kana ka ave ano Thagaripe tiro. Thaj phenđa lese o Isus: Čače tuke phenav, avdive ka ove mancar ano raj. A sine trujal o šovto časo, thaj raćipe sine pe sa e phuv đi o časo enjato. Thaj raćisajlo o kham, thaj e perdava e hramoski pharavdili ano ekvaš. Thaj dindoj vika o Isus andar o sa krlo phenđa: Dade, ane vasta tire mekava o đi mlo. Thaj vakerindoj akava mulo. A kana dikhlja o kapetano so kerdilo pe, paćivisarda e Devle vakerindoj: Čače akava manuš sine vortutno. Thaj sa e selore save čedindepe te dikhen akava kerdipe, kana dikhle so ulo, irisajle marindoj ane kolina. A ačhena dural savore e pendžarutne lesere thaj e đuvlja save đana palo leste kotar e Galileja, dikhindoj akava. Thaj dikh, o manuš po anav Josif, savo sine phurederutno thaj manuš lačho thaj vortuno, kotar Arimateja, diz e judejakiri, savo ni aćhilosa pe lengo čhinadipe thaj pe lengo kotor, a vi korkoro ađikerela o Thagaripe e Devlesoro, pašindoj e Pilatose rodinđa o trupo e Isusesoro. Thaj huljarda le thaj ućharda poxtanosa, thaj pašljarda le ano limori čhindo ano bar, ano savo nasine nijek pašljardo. Thaj dive sine paračuvi, thaj o savato divesajvola. A đana ano phiripe vi e đuvlja, save ale e Isuseja kotar e Galileja, thaj dikhle o limori thaj sar sa pašljardo o trupo lesoro. Ta irisajle thaj gatisarde sungajipa thaj miro. O savato pale nakhavde ano šandipe po Kanuni. A ano angluno dive e kurkesoro avile but sabajle po limori, thaj ande sungipe so kerde, a olenca thaj nesave avera đuvlja; Aj arakhle o bar cidimo e limorestar. Thaj đerdindoj na arakhle o trupo e Devljutnesoro e Isusesoro. Thaj đikaj on odolese čudisajle, dikh, duj manuša aćhile anglo lende ane strefimasere fostanja; A kana on darandile thaj peravde pe muja pe phuv, phende lenge: So roden e đivde maškaro mule? Nane akate, aj uštino; den tumen godi sar tumenge phenđa đikaj pana sine ane Galileja, vakerindoj sar o Čhavo e Manušesko trubul te ovel dindo ane vasta e manušengere e bezahengere thaj te ovel inzardo thaj o trito dive te đivdinel. Thaj dindile gođate lesere lafonenge. Ta irindoj e limorestar, mothovde sa akava e Dešujekhenge thaj sarijenge avrenge. A odova sine e Magdalina Marija thaj e Jovana thaj e Marija Jakoveski thaj e avera olencar save phende akava e apostolenge. Thaj akalenge kerdilo pe lenge lafija sar vakeripe ano suno, thaj ni paćaje len. A o Petar uštilo ta prastandilo po limori, thaj telindoj dikhlja numa e učharutne kaj sa pašljardo, thaj gelo napaćavindoj ana peste odolese so kerdilo pe. Thaj dikh, dujore lendar đana ane odova dive ano gav savo sine dur e Jerusalimestar šovardeš stadijura thaj akharela pe Emaus. Thaj on vakarena maškaro peste kotar e sa akala kerdipa. Thaj đikaj on vakerena thaj mothovena, pašilo vi o korkoro Isus thaj đala lencar. Aj e jakha lengere sine ačhavde kaj le te na penđaren. A ov lenge phenđa: Savo si odova vakeripe savo keren maškaro tumende dok phiren, thaj sose sijen bilošale? A jekh palo anav Kleopa, irisarindoj phenđa lese: Sar tu san jekhuno avrutno ano Jerusalim, thaj sar ni džangljardan so ane leste kerdilo pe akala dive? Thaj phenđa lenge: So? A on phende lese: Kotar o Isuso Nazarećano, savo sine manuš profeto, zoralo pe kotor thaj ane lafija anglo Devel thaj pe sa e selore; Sar le dinde e anglunerašaja thaj e barederutne amare te ovel krisime po meripe, thaj inzarde le? A amen ašuđardam kaj si ov odova savo ka ikljarel e Izrailje. Aj upripe saheste odolese, akava si avdive o trito dive sarkana akava kerdilo. A daravde amen vi nesave đuvlja maškar amende save sine sabajle po limori, ta ni arakhavindoj o trupo lesoro, avile vakerindoj kaj dikhle vi o sikavipe e phakalengoro savo vakerđa kaj si ov đivdo. Thaj nesave amarendar gele po limori, thaj arakhle ađahar sar so vi e đuvlja phenđe, aj le ni dikhle. A ov lenge phenđa: O bigođakere thaj polokine vilese baš paćajmase ano sa so vakerđe e profetija! Na li trubuja kaj o Hristos odova te nakhel thaj te đerdini ano ašundipe plo? Thaj lindoj kotar o Mojsije thaj sarijendar e Profetondar mothoda lenge so si ane sa Lila lestar hramome. Thaj pašile e gaveske ane savo đana, thaj ov kerdola pe kaj mangel podur te đal. A on le ačhavena vakerindoj: Ačhov amencar, kaj o dive teljarda thaj paše si e rat. Thaj đerdinđa te ačhol olencar. Thaj đikaj ov bešela lencar baš o astalja, lindoj omaro baxtarda thaj phagindoj le dija olenge. A lenge pravdile e jakha thaj penđarde le. Thaj ov ulo nadikutno baš olenge. Thaj phenđe on jekh avrese: Na li thabjola o vilo amaro anamende đikaj amenge vakerda drumal thaj đikaj amenge mothovđa e Lila? Thaj uštindoj odova časo, irisajle pe ano Jerusalim, thaj arakhle čedime e Dešujekhen thaj odolen save sine lencar. Save vakerena: Čače uštino o Devljutno, thaj mothovđape e Simonose. Thaj on mothovđe so sine po drom, thaj sar le penđarde kana phaglja o maro. Thaj đikaj on akava vakerena, vi korkoro o Isus ačhilo maškar lende, thaj phenđa lenge: Šandipe tumenge! A on darandile, thaj avune darandine, gindisarde kaj dikhen e đe. Thaj phenđa lenge: So sen xasardine? Thaj sose asavke gindimata đerdinen ane tumare vile? Dikhen e vasta mle thaj e pre mle, kaj sem me šeresa; azbaven ma thaj dikhen; kaj o đi nanole trupo thaj kokala sar so dikhen kaj man isi. Thaj akava vakerindoj sikavđa lenge e vasta thaj e pre. A đikaj vađe na paćana e lošalipestar thaj đikaj na paćana, phenđa lenge: Isitumen li akate so xapeske? A on leske dinde kotor peke mačhesko, thaj avgin ane saća. Thaj lindoj xala anglo lende. A lenge phenđa: Akala si e lafija save tumenge vakerdem pana đikaj sema tumencar, kaj musaj sa te pherdol so si mandar hramome ano Kanuni e Mojsijasoro vi ano Profetija vi ano Psalmija. Tegani lenge putarđa e godi te haljoven e Lila. Thaj phenđa lenge: Ađahar si hramome, thaj ađahar trubuja kaj o Hristos te xasardol thaj te đivdinel andar e mule o trito dive, thaj kaj ano lesoro anav te mothovelpe o jertipe thaj meklipe e bezehengo pe sa e selore, lindoj kotar o Jerusalim. A tumen sen dikhutne akalese. Thaj eke, me ka bičhalav o alavdinipe mle Dadesoro pe tumende; a tumen bešen ani diz Jerusalim đikaj na ka urjaven tumen ane zor e učipestar. Thaj ikalđa len avri đi e Vitanija, thaj vazdindoj e vasta ple baxtarda len. Thaj đikaj len ov baxtarela, durilo lendar thaj legardilo po badali. A on lese teljardile thaj irinđepe ano Jerusalim bare lošalimasa. Thaj sine nakhinadine ano hramo ašarindoj thaj baxtarindoj e Devle. Amin! Ano anglipe sasa o Logos, thaj o Logos sasa ano Devel, thaj o Logos sasa Devel. Vov sasa ano anglipe ano Devel. Sa maškaro leste ulo, thaj bi lesoro khanči ni ulo so ulo. Ano leste sasa đivdipe, thaj o đivdipe sasa rošlipe e manušenge. Thaj o rošlipe dičhilo ano raćipe thaj o raćipe ni lija le. Sas o manuš bičhaldo e Devlestar, palo anav Jovan. Akava avilo baš mothovmnase, te mothoj kotar rošlipe, kaj savore te paćan andar leste. Vov na sine rošlipe, aj te mothoj kotar o rošlipe. Sasa o rošlipe čačutno savo strefinela sakone manuše savo avel po them. Ano them sasa, thaj o them maškaro leste ulo, thaj o them na penđarda le. Pumarenge avilo, thaj lesere ni lije le. A odolenge save lije le dija o baroderipe te oven čhave e Devlesere, odolenge save paćan ano anav lesoro; Save ni bijandile kotar o rat, ni kotar o mangipe e trupesoro, ni kotar o mangipe e romesoro, aj kotar o Devel. Thaj o Logos ulo trupo thaj arakhavdilo maškar amende, thaj dikhlam ašundipe lesoro, ašundipe sar Jekhebijando kotar o Dad, pherdo kovlipe thaj čačipe. O Jovan mothovel lestar thaj del vika vaćerindoj: Akava si odova savestar vaćardem: savo pala mande avel anglal mande si, kaj anglal mande sasa. Thaj kotar o pherdipe lesoro amen savore lijam, thaj kovlipe po kovlipe. Kaj o Kanuni dija pe prekalo Mojsija, a o kovlipe thaj o čačipe ulo maškar o Isuso Hristo. E Devle khonik na dikhlja nisar: Jekhunobijando Čhavo savo si ane angali e Dadesi, ov ole mothovđa. Thaj akava si mothovdipe e Jovanesoro kana bićhalđe e Judejura andar o Jerusalimo e rašajen thaj e levitonen te Phučen le: Ko sijan tu? Thaj mothoda thaj ni phenđa na; thaj mothoda: Me najsem o Hristos. Thaj phučle le: So akana? A san li tu o Ilija? Thaj phenđa: Najsem. A san li tu profeto? Thaj irisarda: Na. A on lese phenđe: Ko sijan? Te o iripe da odolenđe save amen bićhalđe: So vaćere korkoro tutar? Phenđa: Me sem krlo kućimasko ane drmina: Vortosaren o drom e Devljutnesoro, sar so phenđa o Isaija profeto. A e bićhaldine sine e farisejendar. Thaj phučle le thaj vaćerde lese: Sose, akana, bolisare kana tu najsan o Hristos, ni o Ilija, ni o profeto? Irisarda lenđe o Jovan vaćerindoj: Me bolisarav panjesa, a maškar tumende terđola save tumen na đanen. Odova si so avel pala mande, savo angla mande sine, savese me najsem paćivalo te putrav e aravlja pe urjavde lesere. Akava ulo ane Vitanija pe okoja rig e Jordanosi kote o Jovan bolisarela. A tajsa dive dikhlja o Jovan e Isuse kaj avel ke leste, thaj phenđa: Dikh, o Bakroro e Devlesoro savo lela upra peste e bezaha e themesere! Akava si odova baš savo me phendem: Pala mande avel o manuš savo angla mande sine, kaj anglal mande sasa. Thaj me le ni đangljem, aj te mothovel pe e Izrailjese, odolese avilem me te bolisarav panjesa. Thaj mothovda o Jovan vaćerindoj: Dikljem e Đe kaj huljel sar golubo e badalestar thaj ačhilo pe leste. Thaj me le ni đangljem, aj Odova savo bičhalda man te bolisarav panjesa ov mange phenđa: Pe kaste dikhe kaj huljol o Đi thaj ačhel pe leste adava si odova savo bolisarel Đesa Sumnalesa. Thaj me dikhljem thaj mothovdem kaj si ov o Čhavo e Devlesoro. Tajsa dive pale ačhela o Jovan thaj dujđene kotar e sikljovne lesere. Thaj dićhindoj e Isuse kaj đal, phenđa: Dikh, Bakroro e Devlesoro! Thaj šunde le solduj sikljovne kana vaćerda, thaj đele palo Isus. A o Isus irindoj thaj dikhindoj len, kaj đana palo leste, phenđa lenge: So roden? A on lese phenđe: Ravi, so nakhavne gindolpe: sikamneja, kaj beše? Phenđa lenge: Aven thaj dikhen! Thaj đele, thaj dikhlje kaj bešel; thaj aćhile ke leste odova dive. A sasa paše o dešoro časo. A jekh kotar e solduj save ašunde e Jovanostar thaj đele palo leste sine o Andrej, phral e Simone Petrosoro. Ov arakhlja majangle ple phrale e Simone, thaj phenđa lese: Arakhljam e Mesija, so nakhavne gindolpe: Hristos. Thaj anda le e Isusese. Thaj o Isus dićhindoj pe leste phenđa: Tu sijan o Simon, čhavo e Joninosko; tu ka vičinetu Kifa, so gindolpe Petar. Tajsa dive manglja o Isus te ikljol ane Galileja, thaj arakhlja e Filipe, thaj phenđa lese: Ava pala mande! A o Filip sasa andar e Vitsaida, andar e diz e Andrejesiri thaj e Petrosiri. O Filip arakhlja e Natanailo thaj phenđa lese: Arakhljam odole savese hramosarđa o Mojsije ano Kanuni thaj o Profetija: e Isuse, čhave e Josifesere, kotar o Nazaret. Thaj phenđa lese o Natanailo: Andar o Nazareto šaj li te ovel diso lačhe? Phenđa lese o Filip: Ava thaj dikh! A o Isus dikhlja e Natanailo kaj avel koro leste thaj phenđa lese: Ake čačuno Izrailjco ano saveste nane bižajipe. Phenđa lese o Natanailo: Kotar penđare ma? Irisarda o Isus thaj phenđa lese: Anglal so akharda tut o Filip, dikhljem tut kana sijan telal e sumučilin. Irisarda o Natanailo thaj phenđa lese: Ravi, tu san o Čhavo e Devlesoro, tu san thagar e Izrailjesoro. Irisarda o Isus thaj phenđa lese: Odolese so phendem će kaj dikhljem tut telal e sumučilin, paća? Ka dikhe pobut akalestar. Thaj phenđa lese: Čače, čače tumenđe phenav: oto akana ka dikhen o badali putardo thaj e phakalen e Devleseren sar ikljen thaj huljon ko Čhavo e Manušesko. Thaj ano trito dive sasa bijav ane Kana e Galilejaki, thaj odothe sine e daj e Isusesiri. A akhardo sasa vi o Isus thaj e sikljovne lesere ko bijav. Thaj kana na aćili mol, phenđa e daj e Isusesiri lese: Naj len mol. O Isus laće phenđa: So mange mandar, đuvlije? Panda ni avilo o časo mlo. Phenđa e daj lesiri e kandinenge: So ka phenel tumenge čeren. A odothe sine šov vasija kotar o bar panjese, čhute po adeti e judejengo thovipe, save astarena po duj ja po trin napija. Phenđa lenge o Isus: Pheren e vasija panjesa. Thaj pherde len đi o ućipe. Thaj phenđa lenge o Isus: Astaren akana thaj legaren e peharnikose. Thaj legarde. A kana pilja o peharniko e mol savi ćerdili e panjestar, thaj ni đangla kotar si, a e kandine đangle save astarde o pani, akharda o peharniko e terne borjakere. Thaj phenđa lese: Sakoj manuš majanglal e lačhi mol ikalel, a kana maćon, teg e bilaćhi; a tu ačavđan e lačhi mol đi akana. Akalesa, ane Kana e Galilejosi, čerda o Isus anglipe semnosko, thaj sikada o ašundipe plo; thaj paćaje ano leste e sikljovne lesere. Napal hulilo ano Kapernaum, ov thaj e daj lesiri thaj e phrala lesere thaj e sikljovne lesere, thaj odothe aćhile na but dive. Thaj paše sasa e Pasha e judejengi, thaj đelo o Isus ano Jerusalim. Thaj arakhla ano hramo odolen save bićinen guruven thaj bakren thaj goluben, thaj so paruvnen e love kaj bešen. Thaj ćerindoj čukno e dororendar, tradla sa andar o hramo, thaj e bakren thaj e guruven; a e paruvnenđe ćhorđa e love thaj peravđa e astalja. Thaj phenđa odolenge kaj bićinena goluben: Legaren odova akatar! Ma čeren kotar o ćher mle Dadesoro, ćher bikimnasoro. A e sikljovne lesere ande ki godi kaj si hramome: Putardipe aso ćher tiro xalja man. E Judejura pale irisarde thaj phende lese: Savo amenge semno mothoveja kaj odova ćereja? O Isus irisarda thaj phenđa lenge: Peraven akava hramo thaj trine divenge ka vazdav le. A e Judejura phende: Saranda thaj šov berša vazdilo akava hramo, a tu trine divenge ka vazde le? A ov vačerđa kotar o hramo ple truposoro. Kana uštilo andar e mule, dije godi e sikljovne lesere kaj akava vačerđa, thaj paćaje e Lilese thaj e lafenge save phenđa o Isus. A kana sasa ano Jerusalim kotar baro dive e Pasha, but đene paćaje ano anav lesoro, dićhindoj e semne lesere save kerda. A korkoro o Isus ni paćavisarda pes olenge, kaj ov olen đangla savoren. Thaj ni trubuja kaj lese khonik te mothovel kotar o manuš; kaj korkoro đangla so sasa ano manuš. A sine manuš maškar e fariseja, po anav Nikodim, knezo e judejengo. Ov avilo e Isusese raćasa thaj phenđa lese: Ravi, đana kaj san sikamno e Devlestar avilo; kaj khonik našti akala ćerimata te ćerel save tu ćereja te naj o Devel lesa. Irisarda o Isus thaj phenđa lese: Čače, čače tuće vaćerav: te na ko ni bijandol upral, našti dikhel o Thagaripe e Devlesoro. Phenđa lese o Nikodim: Sar šaj o manuš te bijandol kana si purano? E da li šaj po dujto drom te đerdini ano vođi ple dajako thaj te bijanđol? Irisarda o Isus: Čače, čače tuće phenav: te na ko ni bijanđol panjesa thaj Đesa, našti te đerdini ano Thagaripe e Devlesoro. So si bijando e trupostar, trupo si; a so si bijando e Đestar, đe si. Ma čudipe so phendem će: trubul tumenge te bijanđoven upral. O Đi phurdel kaj mangel, vi o krlo lesko ašune, a ni đane kotar avel thaj kotar đal: ađahar si sarsavo savo si bijando e Đestar. Irisarda o Nikodim thaj phenđa lese: Sar šaj odova te ovel? O Isus irisarđa thaj phenđa lese: Tu sijan sikamno e Izrailjeso, a odova li na đane? Čače, čače tuće vaćerav kaj odova so đana vaćera thaj so dikhljam mothova, thaj o mothovdipe amaro na lena. Kana tumenge vaćerdem odova so si phuvutno ta ni paćan, sar ka paćan te phendem tumenge odova so si badalesko? Thaj khonik ni uklilo po badali sem Odova savo hulilo e badalestar, o Čhavo e Devlesoro savo si po badali. Thaj sar so o Mojsije vazdla e sape ane drmina, ađahar trubul te vazdel pe o Čhavo e Manušesko, ta sarsavo savo paćal ano leste ni mudarđol, aj te ovele bimerutneso đivdipe, kaj o Devel ađahar kamlja o them kaj e Čhave ple Jekhebijande dija, kaj sarsavo savo paćal ano leste ni mudarđol, aj te ovele bimerutneso đivdipe. Kaj ni bičhalda o Devel e Čhave ple po them te krisil e themese, aj kaj o them te ikalel pe maškaro leste. Savo ano leste paćal ni krisil pe lese, a savo ni paćal ake si krisimo, kaj ni paćaja ano anav e Jekhebijande Čhave e Devlesere. A akava si kris so o rošlipe avilo po them, a e manuša majbut kamle o raćipe nali o rošlipe; kaj lengere kotora sine đungale. Kaj sarsavo savo kerel đungalipe mrzol o rošlipe thaj ni đal premalo o rošlipe, te na phućardon e kotora lesere, kaj si đungale. A ko o čačipe kerel, đala premalo o rošlipe, te dićhon e kotora lesere – kaj si ano Devel kerde. Pale odova avilo o Isus thaj e sikljovne lesere ane judejengiri phuv, thaj odothe thanardilo lencar thaj bolela. A vi o Jovan bolela ano Enon paše o Salimo, kaj odothe sine but pani; thaj avena ta bolena pe. Kaj pana na sine o Jovan čhudino ano phandlipe. Teg ulo ćingar maškar e sikljovne e Jovanosere thaj nesavo Judejco trujal o užaripe. Thaj avile e Jovanose thaj vaćerde lese: Ravi, odova so sine tusa prekal o Jordano, baš savese tu mothovdan, eke bolela, thaj savore đana leste. O Jovan irisarda thaj phenđa: Našti o manuš khanči te lel te na dindilo lese e badalestar. Tumen mange korkore mothoven kaj phendem: Najsem me o Hristos me sem bičhaldo anglal leste. Kas isi terni terno e borjako si, a o amal e ternese borjako ačhel thaj ašunel le, thaj lošalimasa lošalel pe krlese e borjakere ternese. Akaja, akana, lošalipa mli pherdini si. Ov trubul te barjol, a me te tiknovav. Savo upral avel upreder savorende si. Savo si e phuvjatar kotar e phuv si, thaj e phuvjatar vakerel; a savo avel e badalestar upreder savorende si; Thaj so dikhlja thaj šunđa, odova mothovel; thaj o mothovdipe lesoro khonik na lel. Ko lel o mothovdipe lesoro, čačavel kaj si o Devel čačuno. Kaj kas o Devel bičhalda, odova e lafija e Devlesere vaćerel: kaj o Devel e Đese ni del pe mera. Kaj o Dad čumidel e Čhave, thaj sa dija lese ano vast. Ko paćal ano Čhavo, isile đivdipe bimerutno; a te si bikandino e Čhavese, ni ka dikhel đivdipe, aj e xoli e Devlesiri ačhel pe leste. Kana, akana, haćarda o Devljutno kaj e fariseja šunđe kaj o Isus pobut sikljovnen resel thaj bolinel kotar o Jovano – Itakaj korkoro o Isus na bolela aj e sikljovne lesere, meklja e Judeja thaj gelo pale ane Galileja. A trubuja lese te nakhel andar e Samarija. Ađahar avilo ane diz e samarijengi akhardi Sihar, paše o gav savo dija o Jakov e Josifose, ple Čhavese. A odori sine bunari e Jakovesoro. O Isus ćhindino e dromestar bešela ađahar po bunari; sasa trujal šovto časo. Avili e đuvli andar e Samarija te pherel pani. Phenđa laće o Isus: De man te pijav. Kaj e sikljovne lesere sine thaj gele ano foro te ćinen xape. Phenđa lese e đuvli Samarjanka: Sar tu, savo san Judejco, rode mandar đuvljatar e Samarjankatar te pije? Kaj e Judeja ni amalisavon e Samarjanenca. Irisarda o Isus thaj phenđa laće: Kana ka ma tu đane o dindipe e Devlesoro, thaj ko si odova savo tuće vakerel: de man te pijav, tu bi rodeja lestar thaj bi dela tuće pani đivdo. Phenđa lese e đuvli: Devljutneja, ni tatoro naj tut, a o bunari si xor; kotar tuće akana pani đivdo? Aj li san tu pobaro kotar o dad amaro o Jakov, savo dija amenđe akava bunari, thaj ov andar leste pilja thaj e čhave lese thaj e đivdinutna lese? Irisarda o Isus thaj phenđa laće: Sakoj savo pijel kotar akava pani palem ka trošavol; A savo pijel kotar o pani savo lese me ka dav ni ka trošavol đimeripaste, aj o pani savo ka dav lese ka ovel ano leste panjesi xajing savo phirel ano bimerutnesoro đivdipe. Phenđa lese e đuvli: Devljutneja, de man odova pani te na trošavav thaj te na avav akari te pherav. Phenđa laće o Isus: Đa, akhar e rome tire, thaj ava akari. Irisarda e đuvli thaj phenđa: Nane ma rom. Phenđa laće o Isus: Lačhe phenđan: nane ma rom; Kaj sine tut pandž roma, thaj akana kova isitu naj tuće rom; odova čače vaćerdan. Phenđa lese e đuvli: Devljutneja, dikhav kaj san tu profeto. E dada amare ruđina pe e Devlese pe plain akaja, a tumen phenen kaj si ano Jerusalim o than kaj trubul te ruđilpe. Phenđa laće o Isus: Đuvlije, paća man kaj avel o časo kana ni ka ruđin tumen e Dadese ni pe plain akaja ni ano Jerusalim. Tumen ruđin tumen odolese so ni đanen; a amen ruđi amen odolese so đana; kaj si o inkalipe e Judejendar. Aj avel o časo, thaj eke akate si, kana ka e čačutne e devleseruđutne ka ruđinpe e Dadese ano đi thaj ano čačipe, kaj o Dad rodel kaj asavke aven odola save ruđinen pe lese. O Devel si đi; thaj save lese ruđinape, ano đi thaj čačipe trubul te ruđinenpe. Phenđa lese e đuvli: Đanav kaj avel o Mesija akhardo Hristos; kana ov avel, ka mothovel amenge sa. Phenđa laće o Isus: Me sem – savo vaćarel tuja. Thaj ane odova avile e sikljovne lesere, thaj čudisajle so e đuvljasa vaćarel, aj pa nijekh ni vaćerda: so rode, ja so vaćare laja? A e đuvli mekla plo khoro thaj đeli ane diz thaj phenđa e manušenge: Phiren te dikhen e manuše savo mange phenđa sa so ćerdem. Te naj ov o Hristos? Iklile, akana, andar e diz thaj đele leste. A ano maškarovakti ruđina le e sikljovne lesere vakerindoj: Ravi, xa! A ov lenđe phenđa: Man isima hape te xav savese tumen ni đanen. Teg e sikljovne vakerena maškar peste: Te olese nesavo na anel te xal? O Isus lenge phenđa: O xape si mlo te čerav o kamipe Odolesko savo bičhalda man, thaj te kerav lesko kotor. Ni phenena li tumen kaj si panda štar masek ta ka čhinel pes o điv? Eke, phenav tumenge: vazden e jakha tumare thaj dikhen e umala sar akana galbenin čhinimase. Thaj savo čhinel lel počindi, thaj cidel bijanipe baš o đivdipe bimerutno, te lošalel pe khetane vi savo sijinel vi savo čhinel. Kaj ane odova si čačuno lafi, kaj si aver savo sijinel, a o aver savo čhinel. Me bićhaldem tumen te čhinen kaj tumen ni čerden; e avera čerde, a tumen ane lengo čeripe đerdinđen. A andar e diz odoja but đene e Samarjanendar paćaje ano leste baš o lafi e đuvljako savi mothovđa: Phenđa mange sa so ćerdem. Kana, teg, avile ke leste e Samarjanja, ruđisarde le te ačhol ke lende; thaj ačhilo odothe duj dive. Thaj but lendar pobuter paćaje baš o lafi lesoro, ta e đuvljake vakerena: Akana ni paća maj ando tiro mothovipe, kaj korkore amen šunđam thaj đana kaj si akava čače Inkalutno e themesko, o Hristos. A palo duj dive iklilo odothar, thaj gelo ane Galileja. Kaj korkoro o Isus mothovda kaj o profeto ano plo bijando than najle pativ. A kana avilo ane Galileja, ašuđarde le e Galilejcura, save dikhle sa so čerda ano Jerusalim ko Baro dive, kaj thaj on ale ko Baro dive. O Isus palem avilo ane Kana e Galilejosi, kaj čerda o pani ane mol. Thaj sine nesavo thagaresoro manuš savesoro čhavo sine nasvalo ano Kapernaum. Akava ašundoj kaj o Isus avilo andar e Judeja ane Galileja, đelo ke leste thaj ruđinela le te huljel thaj te sastarel lesere čhave; kaj sasa po meripe. Phenđa lese, akana, o Isus: Te na dikhljen semne thaj prašukaripa, ni ka paćan. Phenđa lese e thagaresoro manuš: Devljutneja, ava đikaj ni mulo o čhavoro mlo. Phenđa lese o Isus: Đa, o čhavo tiro si đivdo. Thaj paćaja o manuš e lafija save lese phenđa o Isus thaj đelo. A đikaj ov huljela, dikh, resle le e kandine lesere thaj mothovđe lese vakerindoj: O čhavoro tiro si đivdo. Teg phučlja len baš o časo ane savo lese sine lačhe; thaj phende lese: Erati ano eftato časo meklja le e šilali. Teg haljovđa o dad kaj odova sine ane odova časo ane savo lese phenđa o Isus: O Čhavo tiro si đivdo. Thaj paćaja ov thaj sa o ćher lesoro. Akava si palem o dujto čeripe savo čerda o Isus avindoj andar e Judeja ane Galileja. Pale odova sine baro dive e judejengo, thaj iklilo o Isus ano Jerusalim. A ano Jerusalim ke Bakrengere udara isi banja, savi palo jevreja akharel pe Vitezda, thaj isila pandž trijemora. Ane lende pašljovena but đene nasvale, korore, langale, šukhe, save ađičerena kaj o pani te izdrarel pe. Kaj o phakalo e Devljutnesko harnevaktune huljela thaj izdrarela o pani; thaj savo bi angluno khuvela kana izdrarel pe o pani, ka sastarelape, ma kotar savo nasvalipe si nasvalo. A odothe sasa nesavo manuš savo trijana thaj ofto berša sasa nasvalo. Kana dikhlja o Isus akale kaj pašljol, thaj haljovđa kaj si ake but berša nasvalo, phenđa lese: Mange li sasto te ove? Irisarda lese o nasvalo: Devljutneja, najma manuš, te mekel man ane banja kana izdrarel pe o pani; a đikaj me avav, o aver huljel angleder mande. Phenđa lese o Isus: Ušti, le o kreveto tiro thaj phir! Thaj sigo sastilo o manuš, thaj lija o kreveto plo thaj phirda. A odova dive sine savato. Teg vakerena e Judeja e sastarutnese: Savato si, naj tuće muklino te legare o kreveto. Ov lenge irisarda: Savo kerda man sastesa ov mange phenđa: Le o kreveto tiro thaj phir. A on le phučle: Ko si odova manuš savo tuće phenđa: Le o kreveto tiro thaj phir? A o sastardo ni đangla ko si; kaj o Isus durilosa ando but seloro pe odova than. Pala odova arakhlja le o Isus ano hramo thaj phenđa lese: Eke sastiljan, ma pale te kere bezeha, te na so pođungale ovel tuće. O manuš đelo thaj mothoda e Judejenge kaj si o Isus odova savo le kerda sastesa. Thaj odolese prastavena e Judeja e Isuse, thaj dikhena le te mudaren, kaj čerda odova ko savato. A o Isus lenđe irisarda: O dad mlo đi akana čerda, vi me čerav. Thaj odolese panda pobut rodena e Judeja le te mudaren, na numa so peravela o savato, aj sar so vi e Devle akharela ple Dadeja kerindoj jekhune e Devleja. A o Isus irisarda thaj phenđa lenge: Čače, čače tumenge phenav: O Čhavo našti khanči te kerel korkoro pestar aj so dićhel kaj o Dad kerel; kaj so Ov kerel, odova jekhune kerel vi o Čhavo; Kaj o Dad čumidel e Čhave, thaj sa lese mothovel so korkoro kerel; thaj ka mothovel lese pobare kotora kotar akala ta tumen te habisavon. Kaj sar so o Dad vazdel e mulen thaj đivdinel, ađahar vi o Čhavo saven mangel đivdinel. Kaj o Dad ni krisinel khanikase, aj sa o kris dija e Čhavese. Kaj savore te paćivalin e Čhave sar so paćivalin e Dade. Ko ni paćavel e Čhave ni paćavel ni e Dade savo le bičhalda. Čače, čače tumenđe phenav: Ko mlo lafi šunel thaj paćal Odolese savo man bičhalda, isile đivdipe bimerutno, thaj ni avel po kris, aj nakhlo andar o meripe ano đivdipe. Čače, čače tumenđe phenav, kaj avel o časo, thaj eke mothovdilo, kana e mule ka šunen o krlo e Devlesere Ćhavesoro, thaj ašundoj le ka đivdinen. Kaj sar so o Dad isile đivdipe ana peste, ađahar dija thaj e Čhavese te ovel le đivdipe ana peste; Thaj dija le baroderipe thaj te krisinel, kaj si o Čhavo e Manušesko. Ma habisavon odolese, kaj avel o časo ano savo ka savore save si ane limora ka šunen o krlo e Devlesere Ćhavesoro. Thaj ka ikljoven odola save čerde lačhipe ano đivdisaripe e đivdimasoro, a odola save čerde đungalipe ano đivdisaripe e krisesko. Me našti khanči te čerav korkoro mandar; Sar šunava ađahar krisiv, thaj o kris mlo si vortuno; kaj ni rodav mlo kamipe aj o kamipe e Dadesoro savo man bičhalda. Te mothovdem me korkoro mandar, o mothovdipe mlo naj čačuno. O dujto si savo mothovel baše mande; thaj đanav kaj si čačuno mothovdipe saveja mothovel baše mande. Tumen bičhalden ko Jovano, thaj ov mothovđa baš o čačipe. A me ni lav o mothovdipe e manušestar, aj akava vakerav kaj tumen te inkalen tumen. Ov sine memeli savi thabjola thaj rošela; a tumen mangljen hari vakti te lošarenpe lesere rošimase. Aj man isi mothovdipe pobaro e Jovanostar; kaj e kotora save dija man o Dad te kerav len, akala kotora save me kerav mothoven baše mande kaj o Dad bićhalđa man. Thaj o Dad savo bićhalđa man thaj ov mothovđa baše mande. Nisar lesoro krlo ni šunđen, ni o muj lesoro na dikhljen. Thaj o lafi lesoro nane tumen te thanarelpe ana tumende; odolese so tumen na paćan Odolese save Ov bičhalda. Rodinen e Lila, kaj tumen gindinen kaj ane lende isitumen đivdipe bimerutno; a čače on mothovena mandar; Thaj na mangen te aven ke mande te ovel tumen đivdipe. Ašundipe e manušendar ni lav, aj tumen penđarav kaj kamlipe e Devlesoro najtumen ana tumende. Me avilem ano anav mle Dadesoro thaj na lena ma; te aver avela ano anav plo, ole ka len. Sar tumen šaj te paćan kana len ašundipe jekh avrestar, a o ašundipe savo si kotar o jekhuno Devel na roden? Ma gindinen kaj tumen me ka krisiv e Dadese; isi savo tumen ka krisil, o Mojsije, ana saveste tumen paćan. Kaj te paćana e Mojsije, ka ma paćan vi man; kaj ov hramosarda mandar. A kana lesere Lilenge na paćana, sar ka paćan mle lafonenge? Pale odova đelo o Isus prekal e Galilejesoro, Tiverijadesoro derav. Thaj palo leste đana bute selora, kaj dikhena lesere ćeripa save čerela pe nasvale. A o Isus iklilo pe plain, thaj odothe bešlo ple sikljovnencar. A sasa paše e Pasha, baro dive e judejengo. Vazdindoj o Isus pe jakha, thaj dikhindoj kaj but selora avel premalo leste, phenđa e Filipese: Kotar te ćina maro akala te han? A akava vačerđa zumavindoj le, kaj korkoro đanđa so ka ćerel. Irisarda lese o Filip: Ni baš o dušel dinarja marese naj lenđe te ikljol, kaj sakoj lendar numa hari te lel. Phenđa lese jekh kotar e sikljovne lesere, o Andrej, phral e Simone Petresoro: Akate isi jekh terno savo isile pandž mare šođatar thaj duj maćhe. Aj so si odova pe edobor butipe? A o Isus phenđa: Phenen e manušenge te bešen. A sasa ćar but pe odova than. Bešle, akana, e manuša po đindo trujal e pandž milje. A o Isus lija e mare, thaj ašarindoj, ulavđa e sikljovnenge, a e sikljovne odolenge save sesa bešune; ađahar thaj kotar e maćhe kobor mangle. A kana čalile, phenđa ple sikljovnenge: Čeden so aćhile e kotora, kaj khančik te na čhudel pe. Thaj ćidle, thaj pherde dešuduj sevlja kotora kotar e pandž mare šođatar so ačhilo pale odola save xale. Aj e manuša dićhindoj o čeripe save čerda o Isus vaćerena: Akava si čače Profeto savo trubul te avel po them. A kana haljovđa o Isus kaj mangen te aven te astaren le thaj te čeren le thagare, ov gelo pale pe plain korkoro. Kana ta peli e rat, hulile e sikljovne lesere po derav, thaj dindoj ani barka lijepe prekal o derav ano Kapernaum. Thaj teg peli e rat, a o Isus na sine te avel ke lende. A o derav vazdela pe kotar e bari balval. Kana, akana, nakhavde trujal e biš thaj pandž ja trijanda stadija, dikhle e Isuse sar đal po derav thaj paše avel pe barka, ta teg darandile. A ov lenge phenđa: Me sem; ma daran! Thaj mangle te len le ane barka; thaj sigo e barka arakhadili pe phuv ani savi đana. Tajsa dive o seloro savo terdino kotar okoja rig e deravestar, dikhle kaj odothe na sine aver barkori numa okoja jekh ane savi dije e sikljovne lesere, thaj kaj na đerdinda o Isus ple sikljovnencar ane barkori aj numa e sikljovne lesere đele; A e aver barkorja kotar e Tiverijada avile paše ko odova than kaj xale maro kana o Devljutno ašarisarda. Kana, akana, dikhlja o seloro kaj o Isus na sine odothe, ni e sikljovne lesere, đerdinde thaj on ane barke, thaj avile ano Kapernaum rodindoj e Isuse. Thaj arakhavindoj le pe okoja rig e deravesi, phenđe lese; Ravi, kana avilan akari? O Isus lenge irisarda thaj phenđa: Čače, čače tumenđe phenav: na rodena ma so keripe dikhljen, aj so maro xaljen thaj ćaliljen. Den zori na baš o xape savo nakhel, numa baš o habe savo ačhel baš o đivdipe bimerutno, savo ka del tumenđe o Čhavo e Manušesko, kaj akale mothovđa o Devel o Dad. A on lese phenđe: So te ćera kaj te ćerasa kotora e Devlesere? Irisarda o Isus thaj phenđa lenge: Akava si kotor e Devlesoro te paćan ane Odova save Ov bičhalda. A on lese phenđe: Savo, akana, semno tu mothove te dikha thaj te paća tut? So tu ćere? E dada amare xale mana ane drmina, sar kaj si hramome: Maro e badalestar dija lenge te han. Teg lenge phenđa o Isus: Čače, čače tumenge phenav: ni dija tumenge o Mojsije o maro e badalestar aj o Dad mlo dela tumenge čačuno maro e badalestar; Kaj o maro e Devlesoro si odova savo huljel kotar o badali thaj dela đivdipe e themese. Teg lese phenđe: Devljutneja, de amenge sajekh odova maro! A o Isus lenge phenđa: Me sem maro đivdipeso: savo mange avel ni ka bokhaljol, thaj savo ana mande paćal nisar ni ka trošavol. Aj tumenge phendem: thaj dikhljen man, aj ni paćan. Sa so del maje o Dad mange ka avel; thaj odole savo avel mange ni ka ikalav avrijal. Kaj huliljem e badalestar na te čerav mlo kamipe, aj o kamipe e Dadesoro, savo bićhaldama. A akava si kamipe e Dadesoro savo bićhaldama, kaj sa so dinđa man khanči odolestar te na našalav, numa odova te đivdinav ano paluno dive. Akava si kamipe e Dadesoro savo bićhaldama, ta sarsavo savo dićhel e Čhave thaj paćal ane leste isile đivdipe bimerutno; thaj me ka đivdiniv le ano paluno dive. Teg mrmisarde e Judejura pe leste so phenđa: Me sem maro savo hulilo e badalestar. Thaj vaćerena: Naj li akava o Isus, čhavo e Josifesoro, savese amen đana e dade thaj e daja? Sar, akana, ov vakerel: Kotar o badali huliljem? A o Isus lenge irisarda thaj phenđa: Ma mrmisaren maškar tumende. Khoni našti te avel ke mande te na na crdel le o Dad savo bićhaldama; thaj me le ka đivdisarav ano paluno dive. Ane Profetora si hramosardo: Thaj savore ka oven sikavde e Devlestar. Sarsavo savo šunel e Dadestar thaj sikljol, avel ke mande. Na kaj ko dikhlja e Dade sem Odova savo si e Devlestar: ov dikhlja e Dade. Čače, čače tumenđe phenav: Savo paćal ana mande isile đivdipe bimerutno. Me sem maro e đivdipasoro. E Dada tumare xale maro ane drmina, thaj mule. Akava si maro savo huljel e badalestar: te savo lestar xal ni merel. Me sem maro đivdo savo hulilo e badalestar; te xala ko kotar akava maro ka đivdinel bimerutne; thaj o maro savo me ka dav o trupo si mlo, savo ka dav baš o đivdipe e themesoro. E Judeja ćingarena pe maškar peste vakerindoj: Sar šaj akava te del amenge o trupo plo te has? A o Isus lenge phenđa: Čače, čače tumenđe phenav: te na haljen o trupo e Čhavese Manušesko thaj na pijen o rat lesoro, najtumen đivdipe ane tumende. Savo hal mlo trupo thaj pijel mlo rat isile đivdipe bimerutno; thaj me ka đivdinav le ano paluno dive. Kaj o trupo mlo si čačuno xape, a o rat si mlo čačuno pibe. Savo xal mlo trupo thaj pijel mlo rat ana mande bešel thaj me ane leste. Sar so man bičhalda o đivdo Dad, thaj sar me so đivdinav pašo mo Dad, thaj odova savo xala man vi ov ka đivdinel paše mande. Akava si maro savo hulilo e badalestar: na sar so e dada tumare xale maro, thaj mule; savo xal o maro akava ka đivdini bimerutne. Akava phenđa ane sinagoga kana sikavđa ano Kapernaum. Teg but kotar sikljovne lesere, ašundoj odova, phenđe: Akava si zoralo vaćeripe. Ko šaj te šunela. A o Isus, đanindoj ana peste kaj e sikljovne lesere mrmina ande odova, phenđa lenge: Aj tumen akava bezeharel? A so te dikhljen e Čhave e Manušesere kaj đala upre kaj sine angleder? O Đi si odova so đivdini, o trupo na mažutil khanči. E lafija save tumenge me vakerav đi si thaj đivdipe si. Aj isi maškar tumende nesave save ni paćan. Kaj đangla o Isus kotar o anglipe save si odola so ni paćana, thaj ko ka del le muj. Thaj vakerela: Odolese tumenge vakerdem kaj khonik našti te avel ke mande te na dindilo lese kotar o Dad mlo. Kotar odova but kotar e sikljovne lesere đele palal, thaj maj ni đele oleja. A o Isus phenđa e Dešudujorenge: Te na mangen vi tumen te đan? Teg lese irisarda o Simon Petar: Devljutneja, kase te đa? Tut isi lafija e bimerutne đivdipase. Thaj amen paćajam thaj penđardam kaj sijan tu o Hristos o Čhavo e Devlesoro e đivdesoro. O Isus lenge irisarda: Na alosardem li me tumen dešudujoren? Thaj jekh kotar tumende si o beng. A vakerela baš o Judo e Simonosoro e Iskariotesoro, kaj ov manglja le te del muj, thaj ako sine jekh kotar e Dešudujore. Thaj pale odova phirđa o Isus pe Galileja; kaj pe Judeja ni manglja te phirel, adalese so rodle e Judeja te mudaren le. Sine paše e judejengoro baro dive senica. Teg lese phenđe e phrala lesere: Đa akatar thaj đa ane Judeja, kaj vi e sikljovne tire te dikhen e kotora tire save kere; Kaj khonik na kerel khanči ano garavdipe, a korkoro rodel te ovel penđardo. Kana ađahar so kere, mothovtu e themese. Kaj vi e phrala lesere ni paćana ano leste. Teg lenđe phenđa o Isus: O vakti mlo panda na avilo, a o vakti tumaro sajekh si gatimo. Našti o them te mrzinel tumen; a man mrzinel kaj me mothovav lestar kaj si e kotora lesere đungale. Tumen đan pe akava Baro dive: me pana na ka đav pe akava Baro dive, kaj mlo vakti pana na pherdilo. Vakerindoj lenđe akava, ačhilo ani Galileja. A kana đele e phrala lesere, teg vi korkoro đelo ko Baro dive, na putarune, aj sar ano garavdipe. A e Judeja le rodena kotar o Baro dive thaj vakerena: Kaj si odova? Thaj sine kotar leste but čingara ano seloro: jekhune vakerena kaj si lačho, a e avera vakerena: na, aj xoxavel o seloro. Aj khoni na vakerena putarune olestar kotar e dar e Judejendar. A ake ane ekvaš e Bare divestar avilo o Isus ano hramo thaj sikavela. Thaj čudinena pe e Judeja vakerindoj: Sar akava đanel o lila a na siklilo? Teg lenge vakerda o Isus thaj phenđa: Mlo đanipe nane mlo, aj Odolesko savo man bićhaldama. Te manglja ko o kamipe lesoro te ćerel, ka penđarel da li si akava đanipe e Devlestar, ja me korkoro mandar vakerav. Savo vakerel korkoro pestar, plo ašundipe rodel; a ko rodel ašundipe Odolese savo le bičhalda, odova si čačuno thaj naj ano leste bihakaja. Na li o Mojsije dija tumenge o Kanuni? Thaj khoni kotar tumendar ni ćerel o Kanuni. Sose roden te mudaren man? Irisarda o seloro thaj phenđa: O đungalo đi si ane tute; ko rodel te mudarel tut? Irisarda o Isus thaj phenđa lenge: Jekh kotor ćerdem, thaj savore prašukaren tumen odolese. O Mojsije tumenge dinđa sunetipe, na so si odova kotar o Mojsije, aj kotar e dada, thaj ko savato sunetinena e manuše. Te ko savato o manuš lela o sunetipe, te odoleja na phagelape pe o Kanuni e Mojsijasoro, sose pe mande holjaven so sorone manuše sastardem ko savato? Ma krisinen po dićhipe, aj vortome kris krisinen. Teg vakerena nesave kotar e Jerusalimljanija: Naj li odova save rodena te mudaren? Thaj dikh, vakerel mukline thaj khanči lese ni phenen. Te čačutne na đangljarde amare šorutne kaj si ov čače o Hristos? Aj akale đana kotar si; a o Hristos kana avel, khoni ni ka đanel kotar si. Teg o Isus dija vika ano hramo siklindoj thaj vakerindoj: Thaj penđaren man thaj đanen kotar sem; thaj korkoro mandar ni aviljem, aj si čačuno Odova savo bićhaldama, save tumen ni đanen. Me đanav le, kaj lestar sinjum, thaj Ov bićhaldama. Teg rodle le te astaren, thaj khonik na ćuča pe leste po vast, kaj pana na alo o časo lesoro. A kotar o seloro but đene paćaje ano leste, thaj vakerena: Kana ka avel o Hristos, aj pobuter li ćerimata ka ćerel kotar akava aj so čerda? Ašunde e fariseja kaj o seloro lestar ađahar vakerel, thaj bićhalde e fariseja thaj e anglunerašaja e kandinen te astaren le. Teg o Isus phenđa: Pana hari vakti sem tumenca, te đava Odolese savo bićhaldama. Ka roden man thaj naj te arakhen ma; thaj kaj sem me tumen našti te aven. A e Judeja vakerde maškar peste: Kotar akava mangel te đal, a kaj le amen ni ka arakha? Na gndil li te del ano ćhordaripe jelinoso thaj te sikavel e Jelinen? So mandavel akava lafi savo phenđa: Ka roden man thaj ni ka arakhen; thaj kaj sem me tumen našti te aven? A ano paluno dive e Bare divesesko ačhela o Isus thaj dija vika vakerindoj: Ko si trošalo neka avel ke mande thaj pijel! Savo ana mande paćal, sar so o Lil phenđa, andar o vođi lesoro ka phiren e lenja đivde panjesere. Aj akava phenđa kotar o Đi save trubuje te len odola save paćan ano anav lesoro, kaj o Đi Sumnalo panda na sine dindo, odolese so o Isus pana na sine ašundino. A but đene kotar o seloro ašundoj odova lafi, vakerena: Akava si čače Profeto. Aver đene vakerena: Akava si o Hristos. A e avera vakerena: Aj ka o Hristos avela andar e Galileja? Sar na phenđa o Lil kaj ka o Hristos avel kotar e kučin e Davidesiri thaj andar o gav Vitlejem kaj sasa o David? Ađahar ulo ulavdipe ano seloro bašo leste. A nesave kotar lende mangle te astaren le; aj khonik ni čhuta po vast pe leste. Avile e kandine e anglunerašajenge thaj e farisejenge, thaj on lenge phenđe: Sose na anden le? E kandine irisarde: Niti ked o manuš ađahar na vakerđa sar akava manuš. Teg lenge irisarde e fariseja: Aj li vi tumen xoxavdiljen? Paćaja li khoni ane leste kotar o šerutne ja kotar e fariseja? Aj o seloro akava savo na đanel o Kanuni, armandindo si! Phenđa lenge o Nikodim, savo lese avela raćasa thaj sasa jekh kotar lende; E vaj li o Kanuni amaro krisinel e manušese đikaj les najanglal na ašunel thaj đanel so ćerel? Irisarde lese thaj phenđe: Te naj san vi tu andar e Galileja? Phuč thaj dikh kaj o profeto andar e Galileja na avel. Thaj gele sakoj ple kherese. A o Isus đelo pe Maslinaki plain. Thaj sabalje palem avilo ano hramo, thaj sa o seloro avena ke leste; thaj bešlo thaj sikavela len. A e lilvarne thaj e fariseja ande e đuvlja astardi ano anglačumidipe, thaj čhutela ko maškar. Thaj phende lese: Sikamneja, akaja đuvli si astardi ano anglačumidipe ko čeripe; A o Mojsije amenđe ano Kanuni vaćerda kaj asavken te khuva barencar. Tu akana, so phene? Akava phende zumavindoj le kaj te oven len baše sose te došaren le. A o Isus, telindoj tele, hramosarda najesa pe phuv. A kana zorale phučle le, vortosajlo pe thaj phenđa lenge: Savo si maškar tumende bi bezehengo nek angluno čhudel bar pe late. Ta pale telilo tele thaj hramosarda ki phuv. A on ašundoj odova, thaj došardo kotar lengiri godi, ikljona jekh po jekh, anglindoj kotar o phurederutno đi o paluno; thaj ačhilo o Isus korkoro thaj e đuvli terdindoj ko maškar. A kana o Isus vortosajlo, thaj na dićhindoj khanika đi korkore đuvlja, phenđa laće: Đuvlije, kaj si odola so došaren tut? Aj khoni ni krisinđatu? A oj phenđa: Nisavo, Devljutneja. A o Isus laće phenđa: Ni me na krisinav tut; đa, thaj akanatar ma ker doš. O Isus lenge pale phenđa, vakerindoj: Me sem rošlipe e themese; ko đal pala mande na ka phirel ano raćipe, aj ka ovel le rošlipe e đivdipeso. Teg lese phende e fariseja: Tu korkoro baše tuće mothove; o mothovdipe tiro nane čačuno. O Isus irisarda thaj phenđa lenge: Te me thaj mothovav baše korkoro mange, čačuno si o mothovdipe mlo, kaj đanav kotar avilem thaj kaj đav; a tumen ni đanen kotar avav thaj kaj đav. Tumen krisinen po trupo, me ni krisinav khanikase. Aj te me vi krisiv, o kriso si mlo čačuno, kaj najsem korkoro aj me thaj o Dad savo bićhaldama. A thaj ano Kanuni tumaro ačhel hramome kaj o mothovdipe duje manušengo si čačuno. Me sem odova savo mothovel baše pese, thaj mothovel baše mande o Dad savo bićhaldama. Teg lese vakerde: Kaj si o Dad tiro? O Isus irisarda: Ni đanen ni man ni e Dade mle; kana bi đanen man, đanena bi thaj e Dade mle. Akala lafija phenđa o Isus ki soba kana sikavđa ano hramo; thaj nijek ni astarda le, kaj pana ni avilo o časo lesoro. A o Isus lenge palem phenđa: Me đav, thaj ka roden man; thaj ka meren ano bezeh tumaro; kaj me đav tumen našti te aven. Teg phenđe e Judeja: Te na ka mudarel pe korkoro, kaj vakerel: kuri me đav tumen našti te aven? Thaj phenđa lenge: Tumen sijen telal, me sem upral; tumen sijen kotar akava them, me najsem kotar akava them. Odolese tumenge vi phendem kaj ka meren ane bezeha tumare; kaj te na paćajen kaj Me sem, ka meren ane bezeha tumare. Teg lese vakerde: Ko sijan tu? Thaj phenđa lenge o Isus: Anglipe, so tumenge thaj phenav. But isi man tumendar te vakerav thaj krisiv; aj Odova savo bićhaldama čačuno si, thaj me vakerav ano them odova so šundem lestar. Thaj ni haljovđe kaj lenge vakerel baš o Dad. A o Isus lenge phenđa: Kana ka vazden e Čhave e Manušesere, teg ka đanen kaj Me sem, thaj kaj khanči korkoro mandar ni čerav; aj sar sikavđa man o Dad mlo ađahar vakerav. Thaj Odova savo bićhaldama manca si. Ni meklja o Dad man korkoro; kaj me sajekh kerav so si lese lačhe. Kana ov akava vakerda, but đene paćaje ano leste. Teg o Isus vakerda odole Judejenge save lese paćaje: Tumen te aćhiljen ano đanipe mlo, čače sijen mle sikljovne; Thaj ka penđaren o čačipe, thaj o čačipe tumen ka mukljarel. Irisarde lese: Amen sam kućina e Avraamose, thaj nisar khanikase ni robujisardam. Sar tu vakere: ka oven muklime? O Isus lenge irisarda; Čače, čače tumenđe phenav kaj sarsavo kaj kerel bezeh robo si ano bezeh. A o robo ni ačhel ano ćher saberšenca, o čhavo ačhel saberšenca. Te tumen, akana, o Čhavo muklinel, čače ka oven muklime. Đanav kaj sijen kućina e Avraamose; aj roden te mudaren man, kaj mlo lafi naj le than ana tumende. Me vakerav so dikhljem kotar o Dad mlo, vi tumen, akana, čeren so dikhljen kotar o dad tumaro. Irisarde thaj phende lese: O Dad amaro si o Avraam. O Isus lenge phenđa: Te oven čhave e Avraamosere, kerena bi kotora e Avraamosere. A akana roden te mudaren man, manuše savo phenđa tumenge o čačipe, savo šundem kotar o Devel. Odova o Avraam ni čerda. Tumen keren kotora tumare dadesere. Teg lese phenđe: Amen najsam bijande e lubnimastar; jekhe dade isiamen – e Devle. A o Isus lenge phenđa: Kana bi o Devel ovela o dad tumaro, ka čumiden bi man; kaj me kotar o Devel ikliljem thaj aviljem; kaj ni aviljem korkoro mandar, kaj Ov bićhaldama. Sose na haljoven o vakeripe mlo? Kaj našti te šunen o lafi mlo. Tumenge si dad o beng, thaj e mangipa e dadese tumarese mangen te keren; ov sasa manušmudarutno kotar o anglipe, thaj ni terđol ano čačipe, kaj najle čačipe ano leste; kana vakerel xoxavipe, plo vakerel, kaj si ov xoxamno thaj dad xoxajimasko. A mange ni paćan, kaj me vakerav o čačipe. Savo man kotar tumende mahrisarda baš o bezeh? Te li o čačipe vakerav, sose man tumen ni paćan? Odova savo si kotar o Devel, e lafija e Devlesere šunel; odolese tumen ni šunen, kaj nasijen kotar o Devel. A e Judeja irisarde thaj phenđe lese: Ni phena li amen lačhe kaj sijan tu Samarjani, thaj kaj o đungalođi si ana tute? O Isus irisarda: Ana mande đungalođi nane, aj paćivav mle Dade; a tumen man lađarena. A me ni rodav o ašundipe mlo; isi Odova savo rodel thaj krisil. Čače, čače tumenđe phenav: Ko ikerel o lafi mlo ni ka dikhel o meripe saberšencar. Teg lese phende e Judeja: Akana đana kaj o đungalođi si ana tute. O Avraam mulo thaj e profetora, a tu vakere: ko ikerel o lafi mlo ni ka zumavel o meripe saberšencar. Aj li san tu pobaro kotar o dad amaro o Avraamo, savo mulo? Vi e profetora mule. Ko tu korkoro ćeretu? A o Isus irisarda: Te me ašundarav korkoro man, o ašundipe mlo si khanči. O Dad si mlo odova savo ašundarel man, baš savese tumen vakeren kaj si o Devel tumaro. Thaj ni penđaren le, a me le đanav. Thaj te phendem kaj le ni đanav, ka ovav xoxamno sar tumen. Aj đanav le, thaj o lafi lesoro ikerav. O Avraam, o dad tumaro, sasa manglo te dikhel o dive mlo; thaj dikhlja thaj lošalisajlo. A e Judeja lese phenđe: Pana nane tut ni pinda berša, a e Avraame dikhljan? A o Isus lenge phenđa: Čače, čače tumenđe phenav: anglal so o Avraam ulo, Me sem. Teg leje o bara te frden pe leste; a o Isus garadilo, thaj iklistilo kotar o hramo thaj nakhlo maškaro lende thaj ađahar đelo. Thaj nakhlindoj dikhlja e korore manuše kotar o bijandipe. Thaj phučle le e sikljovne lesere vakerindoj: Sikamneja, ko čerda bezeh, akava ja e bijande lesere, ta bijandilo kororo? O Isus irisarda: Ni čerda bezeh ni ov ni e bijande lesere, aj te mothovđon e kotora e Devlese pe leste. Mange trubul te čerav kotora Odolese savo bićhaldama, đikaj si dive. Avela e rat kana khonik našti te ćerel. Đikaj sem ano them, rošlipe sem e themese. Vakerindoj akava, čhungarda ki phuv thaj čerda čik e čhungarestar, thaj makhlja čikasa e jakha e kororese. Thaj phenđa lese: Đa thov tut ane banja Siloamosi, so nakhavne mandil: bičhaldo. Ov đelo, akana, thaj thovdape, thaj avilo dikhindoj. A e najpašune vi odola save dikhlesa le anglal kaj sine kororo vakerde: Naj li akava odova so bešela thaj mangela? Jekhune vakerena kaj si ov, a e avera kaj si miazutno pe leste. Ov vakerela: Me sem. Teg lese vakerena: Sar tuće phravdile o jakha? Ov irisarda thaj phenđa: O manuš savo akharel pes Isus čerda čik, thaj makhlja e jakha mle, thaj phenđa mange: đa ane banja Siloamosi thaj thov tut. Thaj kana geljem thaj thodema, dikhljem. Teg lese phenđe: Kaj si ov? Phenđa: Ni đanav. Akana ole, e varekanutne korore, ingarde ke fariseja. A sasa savato kana o Isus kerda e čik thaj phravđa lesere jakha. A e fariseja ole pale napal phučle sar dikhlja. A ov lenge phenđa: Čik čhuta mange pe jakha, thaj thovdema thaj dikhav. Teg vakerena nesave kotar e fariseja: Naj akava manuš kotar o Devel, kaj ni ikerel o savato. E avera vakerena: Sar šaj o manuš bezehalo asavke keripa te kerel? Thaj ulo phagipe maškaro lende. Pale phende e kororese: So tu phene baš odova so phravđa e jakha tire? A ov phenđa: Profeto si. Teg e Judejura ni paćaje baš lese kaj sasa kororo thaj dikhlja, đikaj ni akharde e bijanden odolesere so dikhlja. Thaj phučle len vakerindoj: Aj li si akava o čhavo tumaro baše savese tumen phenen kaj bijandilo kororo? Sar, durim, akana dikhel? A e bijande lesere irisarde lenge thaj phenđe: Đana kaj si akava o čhavo amaro, thaj kaj bijandilo kororo; A sar akana dikhel ni đana, ja ko lese phravđa e jakha amen ni đana; korkoro ake barilo, Phučen ole, nek korkoro phenel baše peste. Akava phenđe e bijande lesere kaj darandile e Judejendar; kaj e Judejura ake kerde lafi te ovel ćhinado kotar e sinagoga ko god ole mothoj bašo Hristos. Odolese phenđe e bijande lesere: Barilo, ole Phučen. Teg po dujto drom akharde e manuše savo sine kororo, thaj phenđe lese: De o ašundipe e Devlese, amen đana kaj si odova manuš bezehalo. A ov irisarda thaj phenđa: Aj li si bezehalo, ni đanav; jekh đanav – kaj me sema kororo, thaj akana dikhav. Teg lese pale phenđe: So tu ćerdan? Sar phravđa e jakha tire? Irisarda lenge: Ake tumenđe phendem thaj ni šunđen. So pale mangen te šunen? Te na mangen vi tumen te oven e sikljovne lesere? On ole mahrinde thaj phenđe: Tu sijan sikljavno lesoro, a amen sam sikljovne e Mojsijesere. Amen đana kaj e Mojsijese vačerđa o Devel; a akale ni đana kotar si. Irisarda o manuš thaj phenđa lenge: Ano odova vi si o biašuđaripe so tumen ni đanen kotar si, a ov phravđa e jakha mle. A đana kaj o Devel ni ašunel e bezehalen; aj te ko e Devle paćavel thaj o kamipe lesoro kerel, odole šunel. Oto sar si o them thaj o šelberšipe ni šundilo kaj khonik te phravel e jakha e bijande kororese. Kana ov na bi ovela oto o Devel, na bi šaj khanči te ćerel. Irisarde thaj phenđe lese: Tu bijandiljan sa ano bezeha, aj tu amen te sikave? Thaj čhudle le avrijal. Šunđa o Isus kaj čhudle ole avrijal, ta arakhavindoj le phenđa lese: Paćasa li tu ano Čhavo e Devlesoro? Ov irisarda thaj phenđa: A ko si ov, Devljutneja, te ano leste te paćav? A o Isus lese phenđa: Thaj dikhljan le thaj odova savo vakerel tusa, odova si. A ov phenđa: Paćav, Devljutneja! Thaj banđardilo lese. Thaj phenđa o Isus: Baš o kriso me aviljem ano akava them, te dikhen save ni dikhen, thaj save dikhen te oven korore. Thaj šunde akava nesave kotar e fariseja save sine lesa, thaj phende lese: Aj li si vi amen korore? Phenđa lenge o Isus: Kana bi ovena korore, na bi ovela tumen bezeha; a akana phenena: dikha, ađahar tumaro bezeh ačhola. Čače, čače tumenđe phenav: Ko na đerdini ko udara ano toro e bakrengo aj nakhela pe aver than, ov si čor thaj vošutno. A savo đerdini ko udara čobano si e bakrengo. Lese o udarutno phravela, thaj o bakre o krlo lesoro šunen, thaj ple bakren akharel ko anav, thaj ikalela len; Thaj kana ple bakren ikalela, đala anglo lende, thaj e bakre đana palo leste, kaj penđaren o krlo lesko. A palo avruno ni ka đan, aj ka našen kotar leste, kaj ni penđaren o krlo e avrunengo. Akaja paramiči mothoda lenge o Isus, aj on ni haljovde so sasa odova so lenge vakerda. Teg lenge pale phenđa o Isus: Čače, čače tumenđe phenav: me sem udar e bakrenge. Savore save god avile angleder mandar čora si thaj vošutne; aj len o bakre na šunde. Me sem udar; te ko đerdinđa andar mande ka inkalel pe, thaj ka đerdini thaj ka ikljol, thaj čaripe ka arakhel. O čor ni avela baš aver aj te čorel thaj te čhinel thaj aravel. Me avilem te ovel len đivdipe thaj te ovel len ano butipe. Me sem čobano lačho. O čobano lačho o đivdipe plo pašljarel e bakrenge. A o počindo, savo nane čobano, savese e bakre naj lesere, dikhel e ruve kaj avel, thaj mekel e bakren, thaj našel; thaj o ruv astarel e bakren thaj tradel len. A o počindo našel, kaj si počindo thaj ni hajil e bakrenge. Me sem čobano lačho thaj penđarav mlen, thaj mle man penđaren. Sar o Dad so penđarel man thaj me e Dade; thaj o đivdipe mlo pašljarav e bakrenge. Vi aver bakre isi ma save naje kotar akava toro, thaj len mange trubul te anen, thaj ka šunen o krlo mlo, thaj ka oven jekh čidipe bakrengo thaj jekh čobano. Odolese man o Dad čumidel, kaj me o đivdipe mlo pašljarav thaj pale ole te lav. Khonik ole na lel mandar, aj me ole korkoro mandar pašljarav. Baroderipe isi man te pašljarav le thaj baroderipe isi man pale te lav ole. Akava vakeripe lijem kotar o Dad mlo. Teg pale ulo čhinavdipe maškar e Judejura ando akala lafija. A but đene lendar vakerena: Ano leste si o đungalođi, thaj nahudil. Sose le šunen? E aver vakerena: Akala naje lafija nahudutnese. Sar šaj o đungalođi e kororenge jakha te phravel. A sasa tegani Baro dive iripasko e hramosko ano Jerusalim, thaj sine jevend. Thaj phirda o Isus ano hramo po tremo e Solomonesko. Thaj e Judejura ole trujalisarde thaj vakerde lese: Đikote ka mučine e ođe amare? Te san tu o Hristos, phen amenđe phravindoj. O Isus lenge irisarda: Vakerdem tumenđe aj ni paćan. E kotora save kerav me ano anav mle Dadesko, odola mothoven mandar, aj tumen ni paćan; kaj najsen kotar mle bakre, sar so tumenđe phendem. E bakre mle šunen o krlo mlo, thaj me len penđarav, thaj pala mande đan. Thaj me lenge dav o đivdipe bimerutno, thaj nisar naj te mudardon, thaj khonik olen na ka lel kotar mle vasta. O Dad mlo savo len dija man najbaro si kotar sarijende; thaj khonik olen našti te lel kotar o vasta mle Dadese. Me thaj o Dad jekh sam. A e Judejura pale vazdle e bara te čhuden le. O Isus lenge irisarda: But lačhe kotora mothovdem tumenđe kotar o Dad mlo, baše savenge kotar odola kotora čhuden man barencar? Irisarde lese e Judejura vakerindoj: Ni čhuda tut barencar bašo lačhe kotorenge, aj baše mahrimase, so tu, manuš avuno, ćereatu Devel. Irisarda lenge o Isus: Naj li hramome ano Kanuni tumaro: Me phendem devela sijen? Kana len akharda devlenca, savenge o lafi e Devlesoro dindo, a o Lil našti te čhinavđol, sar tumen vakeren odolese save o Dad sumnalinđa thaj bičhalda po them: mahrine, odolese so phendem: me sem Čhavo e Devlesoro? Te na ćerdem kotora mle Dadese, ma paćan man. A te ćerdem, thaj man te na paćajen, e kotorenđe paćan, te penđaren thaj paćan kaj si o Dad ana mande thaj me ano leste. Tegani pale rodle te astaren le; aj olendar crdisajlo kotar o vasta. Thaj gelo pale prekal o Jordano po than kote o Jovan najanglal bolipesarda: thaj ačhilo odothe. Thaj but đene avile ke leste thaj vakerena: O Jovan ni čerda nijekh čeripe, aj sa so phenđa o Jovan baš akalese čačipe sasa. Thaj but đene paćaje ano leste odothe. Sasa nesavo nasvalo, o Lazar andar e Vitanija, andar o gav e Marijako thaj e Martako, e phenja lesere. A e Marija, savakoro phral o Lazar sine nasvalo, sine odoja savi makhlja e Devljutne sungasa thaj khoslja e pre lesere ple balencar. Tegani o phenja bićhalde ke leste vakerindoj: Devljutneja, ake dukhavdo odova save tu čumide. A kana šunda o Isus, phenđa: Akava nasvalipe naj po meripe, aj po ašundipe e Devlesoro, kaj o Čhavo e Devlesoro te ašundol pe late. A o Isus čumidla e Marta thaj e phenja lakara thaj e Lazare. Ta kana šunda kaj si nasvalo, teg ačhilo duj dive ko than kaj sine. Pale odova phenđa e sikljovnenge: Aj te đa pale ani Judeja. Phende lese e sikljovne: Sikamneja, akana e Judejura rodle te čhuden tut barencar, ta sar pale đa odori? O Isus irisarda: Naj li dešuduj časora ano dive? Ko divese đal ni lel naj, kaj dikhel o rošlipe akale themesko; A ko đal raćate lel naj, kaj najle rošlipe ane leste. Akava phenđa, thaj napal lenge vakerda: o Lazar, amal amaro, zasuta, aj đava le te džangavav. Teg phende e sikljovne lesere: Devljutneja, te zasuča, ka uštel. A o Isus lenge phenđa bašo meripe lesoro, on ta gndisarde kaj vakerel kotar sojbesoro suno. Teg lenge o Isus phenđa phravde: o Lazar mulo. Thaj avol mange lačhe paše tumende kaj najsema odori, te paćan; aj hajde leste. Tegani o Toma, akhardo Dujoro, phenđa e avere sikljovnenge: Ajde thaj amen te mera oleja. Kana avilo o Isus, arakhlja ole, a ov ake štar dive ano limori. A e Vitanija sasa paše bašo Jerusalim trujal dešupanđ stadija. Thaj but oto e Judejura sesa avile e Martaće thaj e Marijaće te kovljaren e dukh pala o phral lengoro. Kana e Marta šunda kaj o Isus avel, iklistili anglo leste, a e Marija bešli ćhere. Teg phenđa e Marta e Isusese: Devljutneja, te ove tu akate, ni bi merela o phral mlo. Aj thaj akana đanav, ta sa so rode ano Devel, ka del tut o Devel. Phenđa lake o Isus: Ka đivdisinel o phral tiro. E Marta lese phenđa: Đanav kaj ka đivdisinel kotar o đivdisaripe ano paluno dive. O Isus lake phenđa: Me sem đivdisaripe thaj đivdipe; savo paćal ana mande thaj te mulo, ka đivdinel. Thaj sakoj savo đivdinel thaj paćal ana mande ni ka merel sajekh. Paćasa li akava? Phenđa lese: Va, Devljutneja! Me paćav kaj san tu o Hristos Čhavo e Devlesoro savo avel ano them. Thaj akava vakerindoj, đeli ta akharda garavdine e Marija, pla phenja, vakerindoj: O sikamno avilo thaj akharel tut. Voj, sar ašunda, uštili sig thaj geli ke leste. Kaj o Isus pana nasine te avel ano gav, aj sasa pe odova than kote le araklja e Marta. A e Judejura, save sine lasa ano kher thaj kovljarena laći dukh, kana dikhle e Marija kaj sig uštili thaj iklistili, đele pale late vakerindoj kaj đal po limori te rovel odori. A e Marija, sar avili kaj sine o Isus thaj dikhlja le, peli anglo pre lesere vakerindoj lese; Devljutneja, te ove tu akate, bi merela mlo phral. Teg o Isus, kana dikhljala kaj rovel, thaj kaj roven e Judejura save avile lasa, izdrardilo ano đi thaj korkoro đungadilo, thaj phenđa: Kaj ćhuten le? Phende lese: Devljutneja, ava te dikhe. E Isusese čalade e asva. Teg e Judejura vakerde: Dikh, sar čumidlja le. A nesave kotar lende phende: Naštine li akava savo phravđa e jakha e kororese te kerel kaj vi akava te na merel? A o Isus pale izdrardilo ana peste, thaj avilo po limori. A odova sine pečina, thaj o bar pašljola pe late. O Isus phenđa: Čiden o bar! Phenđa lese e Marta, phen e mulesiri: Devljutneja, eke khandel; kaj si štar dive ano limori. Phenđa lake o Isus: Na li phendem tuke kaj te paćajan, ka dikhe o ašundipe e Devlesoro? Tegani cidinde o bar kote pašlilo o mulo. A o Isus vazdinđa pe jakha upre, thaj phenđa: Dade, ašarisajvav tuće so šunđan man! A me đanglem kaj sajekh ašunema; aj phendem bašo seloro savo akate ačhel, te paćan kaj tu bićhaldanma. Thaj akava vakerindoj, dija vika bare krlesa: Lazare, ikljov avri! Thaj iklilo o mulo vulime ko vasta thaj ko pre mulikane fašenca, thaj o muj lesoro poxtanosa phandino. O Isus lenge phenđa: Phraven le thaj meken neka đal. Teg but kotar e Judejura save avile e Marijake, dićhindoj so čerda o Isus, paćaje ano leste. Nesave kotar lende gele e farisejenge thaj mothovde lenge so kerda o Isus. Teg e anglunerašaja thaj e fariseja čedinde o Sinedrion, thaj vakerde: So te kera? Akava manuš kerel but kerimata. Te mekljam le ađahar, savore ka paćan ano leste, ta ka aven e Rimljanja thaj ka len amendar vi e phuv thaj o seloro. A jekh kotar lende, po anav Kajafa, savo okova berš sine anglunorašaj, phenđa lenge: Tumen ni đanen khanči; Ni gndisaren kaj si baš amenđe najlaćhe kaj jekh manuš te merel bašo seloro, a na kaj sa o seloro te peravđol. A akava ni phenđa korkoro pestar, aj avuno anglunorašaj okole beršestar, anglaphenda kaj o Isus ka merel bašo seloro; Thaj na semo bašo seloro, aj vi e čhordarde čhavoren e Devlesere cidel ano jekh. Kotar odova, varekaj, dive kerde lafi le te mudaren. A o Isus ni phirda maj putarune maškar e Judejura, aj gelo odothar ano agor paše e drmina, ano foro akhardo Jefrem, thaj odothe beštino ple sikljovnencar. A sasa paše e Pasha e judejengi, thaj but đene kotar e sa phuv gele ano Jerusalim angleder e Pasha te užarenpe. Teg rodena e Isuse, thaj terdindoj ano hramo vakerena maškaro peste: So tumenđe kerdol pe, te na ka avel ko Baro dive? A e anglunerašaja thaj e fariseja dinesa čhinavdipe, te đangla khoni kaj si, nek mothoj te astaren le. A o Isus pe šov dive angleder e Pasha avilo ane Vitanija, kaj sasa o Lazar savo mulo, save ov vazdinđa kotar o mule. Odothe lese gatisarde raćako xape, thaj e Marta kandela, a o Lazar sasa jekh kotar odola so bešela lesa bašo astali. A e Marija, lindoj e litra čače nardose kuć sungakoro, makhlja e pre e Isusese, thaj khoslja ple balencar e pre lesere; a o kher pherdilo sung kotar o šandipe. Tegani phenđa jekh kotar e sikljovne lesere, o Juda e Simonoso e Iskariotoso, savo le mangla te del muj; Sose akava šandipe ni bićindilo bašo trišel dinara thaj ni dindilo e čororenge? A akava ni phenđa so lese ačhilo đi e čorore, thaj so sasa čor, thaj sinele kesa, thaj lelja so čhivelape ano late. A o Isus phenđa: Mek ola! Oj odova ačhavđa bašo dive mle parunipnaso; Kaj čororen sajekh isitumen tumencar, a man najtumen sajekh. Dođande but đene o seloro kotar e Judeja kaj si odori thaj avile na numa e Isusese, aj vi te dikhen e Lazare save ov vazdinđa kotar mule. A e anglunerašaja kerde lafi kaj vi e Lazare te mudaren. Kaj but đene kotar e Judejura avena bašo leste thaj paćana ano Isus. Tajsadive but seloro savo avilo ko Baro dive, ašundoj kaj o Isus avela ano Jerusalim, lije e krangore kotar e palma thaj iklistile lese ano malavdipe thaj dena vika: Osana! Baxtardino savo avel ano anav e Devljutnesko, o thagar e Izrailjesko! A o Isus arakhadinoj e here bešlo pe leste, sar so si hramome: Ma dara, čhaje Sionosi, ake o thagar tiro avela bešindoj ko her. Aj akava na haljovđe anglune e sikljovne lesere; ta kana ašundilo o Isus, teg dije godi kaj akava sine bašo leste hramome, thaj kaj olese akava kerde. A mothovda o seloro savo sine lesa kana e Lazare akharda andar o limori thaj vazdinđa le kotar mule. Baše odova olese thaj iklistilo o seloro ano malavdipe, kaj ašunda so ov kerda akava keripe. A e fariseja vakerde maškaro peste: Dikhen sar khanči ni ažutil. Eke, o them gelo palo leste. A sesa vi nesave Jelinija maškar odola save avile te ruđinenpe e Devlese ko Baro dive. On, varekaj, pašile e Filipese, savo sasa kotar Vitsaida e Galilejaki, thaj ruđisarda le vakerindoj: Rajo, manga te dikha e Isuse. Avilo o Filip thaj mothoda e Andrejese, a palem o Andrej thaj o Filip mothode e Isusese. A o Isus lenge irisarda vakerindoj: Avilo o časo te ašundelpe o Čhavo e Manušesko. Čače, čače tumenđe phenav: te e kučin e đivesi perindoj pe phuv ni merel, teg jekh ačhola; aj te muli, bijanipe but anela. Savo kamel o đivdipe plo ka xasarel le, a ko mrzinel o đivdipe plo pe akava them ka arakhel le bašo đivdipe bimerutno. Ko mange kandel, pala mande nek đal, thaj kaj sem me, odothe vi o kandino mlo ka ovel; thaj ko mange kandel odolese ka del paćiv o Dad mlo. Akana si ođi mlo izdardo, thaj so te phenav? Dade, ikal man kotar o časo akava; aj odolese avilem bašo časo akava. Dade, ašundare o anav tiro! Tegani o krlo avilo badalestar: Thaj ašundarem, thaj palem ka ašundarav! A o seloro savo terđola, kana odova šunda, vakerena kaj e grmavina grmisarda; a e aver vakerena: O Phakalo lese vakerda. O Isus irisarda thaj phenđa: Akava krlo nasine baše mande aj baše tumende. Akana si kris akale themese; akana o knezo akale themesko ka ovel frdimo avrijal. Thaj kana me ka ovav vazdimo e phuvjatar sa ka vazdav pe mande. A akava vakerda, mothovindoj sava merimasa ka merel. O seloro lese irisarda: Amen ašundam kotar o Kanuni kaj o Hristos ačhel sajekh; thaj sar tu vakere kaj e Čhavese e Manušesere trubul te vazdelpe? Ko si odova Čhavo e Manušesko? A o Isus lenge phenđa: Pana hari vakti si o rošlipe tumenca; đan đikaj rošlipe isitumen kaj tumen o raćipe te na astarel; a ko đal po raćipe ni đanel kuri đal. Đikaj rošlipe isitumen paćan ano rošlipe, te oven čhave rošlipasere. Vakerindoj akava, o Isus gelo thaj garadape olendar. Kaj vi te kerda edobor keripa anglo lende, ni paćana ano leste; Te pherdol o lafi e Isaijasoro o profeto savo phenđa: Devljutneja, ko paćaja ano vakeripe amaro? Thaj o vas e Devljutnesko kase phućardilo? Odolese naštisarde te paćan, kaj pale phenđa o Isaija: „Korarda e jakha lengere thaj barisarda e vile lengere, te na dikhen jačhencar ni vilesa te haljoven, thaj te na roden te sastarav len.” Akava phenđa o Isaija kana dikhlja o ašundipe lesko thaj vakerdasa olestar. Aj vi kotar e phurederutne but paćaje ano leste; no oto fariseja ni ačhena pe odova, te na oven čhudine kotar e sinagoga; Kaj kamle pobut o ašundipe e manušesoro kotar o ašundipe e Devlesoro. A o Isus dija vika thaj phenđa: Ko paćal ana mande, ni paćal ana mande, aj ane Odova savo bićhaldama. Thaj ko dikhel man, dikhel Odole savo bićhaldama. Me ano them avilem sar rošlipe, kaj sako ko paćal ana mande ni ačhel ano raćipe. Thaj ko šunel mle lafija thaj ni paćal, me lese ni krisiv; kaj ni avilem te krisiv e themese, aj te inkalav o them. Ko čhudel man, thaj ni lel e lafija mle, isile pese krisari: o lafi savo me vakerdem, odoja lese ka krisil ano paluno Dive. Kaj me ni vakerav korkoro mandar, aj o Dad mlo savo bićhaldama ov dija man vakeripe so te phenav thaj so te vakerav. Thaj đanav kaj si o vakeripe lesoro đivdipe bimerutno. So neso, akana, me vakerav, ađahar vakerav sar vakerda mange o Dad. A anglal o Baro dive e Pasha, đanglindoj o Isus kaj avilo lesko časo te nakhel kotar akava them koro Dad, čumidindoj plen save si ano them, čumidla len đi o agor. Thaj kana sine raćako xape, sar o beng ake čhuta ano vilo e Judase Simonose Iskariotose te del le muj, đanglindoj o Isus kaj lese o Dad sa dija ane vasta, thaj kaj kotar o Devel iklilo, thaj e Devlese đal. Uštilo kotar e raćako xape thaj huljarda e uprune šeja, ta lija o khoslo thaj phandla pe lesa. Pale odova čhorda pani ane thovimasi, thaj lija te thovel o pre e sikljovnengere thaj khosindoj e khoslesa saveja sine phandlo. Teg avilo e Simone Petrese, a akava lese phenđa: Devljutneja, aj tu mle pre te thove? Irisarda o Isus thaj phenđa lese: So me kerav, tu akana ni đane, aj pale odova ka haljove. Phenđa lese o Petar: Nisar tu na ka thove mle pre. O Isus lese irisarda: Te na thovdem tut, najtu kotor mancar. Phenđa lese o Simon Petar: Devljutneja, na numa e pre mle, aj vi e vasta thaj o šero. Phenđa lese o Isus: O najardo najle trubupe so te thovel sem o pre, kaj si soro khoslo; vi tumen sen khosle, aj na savore. Kaj đanela e avralćhutine ple, odolese phenđa: Najsen savore khosle. A kana lenge thovda e pre, lija e šeja ple ta palem bešlo bašo astala thaj phenđa lenge: Đanen li so tumenge kerdem? Tumen akharen man Sikamnesa thaj Devljutnesa, thaj čače vakeren, kaj me sem. Kana tumenge, akana, thovdem e pre, me Devljutno thaj Sikamno, vi tumen sijen udžilime jekh avrenge te thoven o pre. Kaj dijem tumen misal ta, sar so me kerdem tumenge, vi tumen keren. Čače, čače tumenđe phenav: Naj o kandino pobaro kotar o barutno plo, ni naj o bičhaldo pobaro kotar odova savo le bičhalda. Kana akava đanen, baxtarde sen te odova kerđen. Ni vakerav sarijendar tumendar: me đanav saven alosardem; aj te pherel pe o Lil: Savo mancar xal maro, vazdel e patum pli pe mande. Kotar akana tumenge vakerav anglal aj so ka ovel, va, kana ka ovel, paćan kaj Me sem. Čače, čače tumenđe phenav: Savo lel odole save bičhalav, man lel; a ko lel man, lel Odole savo bićhaldama. Vakerindoj akava o Isus haćarda đesa, thaj mothovda thaj phenđa: Čače, čače tumenđe phenav, jekh kotar tumende ka del ma muj. Tegani e sikljovne dikhenape maškaro peste, thaj sine ano dujgođipe kastar vakerel. A jekh kotar e sikljovne lesere, save o Isus čumidela, sine pašljardo pe angalin e Isusesiri. Lese, akana, O Simon Petar dija semno te phučel ko bi odova ovel savestar vakerel. A akava, pašljindoj pe kolin e Isusese, phenđa lese: Devljutneja, ko si odova? O Isus irisarda: Odova si savese me, bolindoj e buka dav. Thaj bolindoj e buka, dija e Juda Simonose e Iskariotose. Thaj pale buka teg đerdinđa ano leste e satana. Tegani lese phenđa o Isus: So kere, ker sigate. A akava na haljovde khonik kotar odola so sine baši sofra sose lese phenđa. A nesave gndisarde, avune kaj koro Juda sine e kesa, kaj lese o Isus phenđa: Ćin so amenge trubul bašo baro dive; ja te del bilo so e čororenge. A ov lindoj e buka sigate iklistilo; a sine rat. Kana ov iklistilo, o Isus phenđa: Akana ašundilo o Čhavo e Manušesko, thaj o Devel ašundilo ano leste. Te o Devel ašundilo ano leste, vi o Devel le ka ašundel ana peste, thaj sigate le ka ašundel. Ćhavoralen, pana sem hari tumencar; ka roden man, thaj sar so phendem e Judejenge kaj kuri me đav tumen našti te aven, odova vi tumenge akana vakerav. Čhinavdipe nevo dav tumenge: te čumiden jeke avren, sar so me tumen ćumidljem, ta vi tumen te čumiden jeke avren. Pe odova savore ka penđaren kaj sijen mle sikljovne te ulo tumen kamlipe maškaro tumende. Phenđa lese o Simon Petar: Devljutneja, kuri đa? O Isus lese irisarda: Kuri me đav našti akana te đa pala mande, aj pale odova ka ave pala mande. O Petar lese phenđa: Devljutneja, sose akana našti te avav pala tute? O đivdipe mlo ka pašljarav baše tuće. Irisarda lese o Isus: O đivdipe li tiro ka pašljare baše mande? Čače, čače phenav tuke: o bašno ni ka đilabel đikaj mandar trin droma ni crdetu. Ma te zalil pe o vilo tumaro, paćan ano Devel, thaj ana mande paćan. Ano kher mle Dadesoro khera si but. A te na ovel ađahar, sar ka phenav tumenđe: Đava tumenđe te laćharav o than. Thaj te gelem thaj laćharav tumenđe o than, pale ka avav, thaj ka lav tumen ke mande ta kaj sem me, te oven vi tumen. Thaj kuri me đava đanen, thaj o drom đanen. Phenđa lese o Toma: Devljutneja, na đana kuri đa; thaj sar šaj te đana o drom? O Isus lese phenđa: Me sem drom aj čačipe thaj đivdipe; khonik na avel e Dadese sem andar mande. Kana bi man đanen vi e Dade mle bi đanen: thaj akanatar penđaren le, thaj dikhljen le. Phenđa lese o Filip: Devljutneja, mothov amenge e Dade, thaj ka ovel amenge mamaj. O Isus lese phenđa: Edobor sem vakti tumencar thaj ni penđardan ma, Filipe? Ko dikhlja man, dikhlja e Dade; ta sar tu vakere: Mothov amenge e Dade? Sar ni paća kaj sem me ano Dad thaj o Dad ana mande? E lafija save tumenđe me vakerav ni vakerav korkoro mandar aj o Dad savo đivdini ana mande ov kerela o kotora. Paćan man kaj sem me ano Dad thaj o Dad ana mande; te na li, baše korkore kotora paćan man. Čače, čače tumenđe phenav: Ko paćal ana mande, kotora save me kerav thaj ov ka kerel, thaj pobare kotar akala ka kerel; kaj me đav e Dadese mlese. Thaj sa so roden ano anav mlo, odova ka kerav, kaj te ašundol o Dad ano Čhavo. Thaj te so roden ano anav mlo, me ka kerav. Te man čumidljen, o čhinavdipe mlo ikeren. Thaj me ka ruđisarav e Dade, thaj ka del tumenge avere Kovljarutne te đivdinel tumencar sajekh. Đi Čačimasko, save o them naštil te lel, kaj ni dikhel le, ni na penđarel le; a tumen le penđaren, kaj tumencar đivdinel, thaj ana tumende ka ovel. Na mekav tumen čorore; ka avav ke tumende. Pana hari thaj o them maj naj te dikhel man, a tumen ka dikhen man, kaj me đivdinav, thaj tumen ka đivdinen. Ane odova dive ka đanen tumen kaj sem me ano Dad mlo, thaj tumen ana mande, thaj me ana tumende. Kas isi o čhinavdipe mlo thaj ikerel le, odova si savo man čumidel; a savo man čumidel, odole ka čumidel o Dad mlo; thaj me le ka čumidav thaj ka mothovama lese korkoro. Phenđa lese o Juda, na Iskariotoso: Devljutneja, so si odova kaj ka mothovetu amenge, a na e themese? Irisarda lese o Isus thaj phenđa: Te man nesavo čumidel, o lafi mlo ka ikerel, thaj o Dad mlo ka čumidel le; thaj lese ka ava thaj ano leste ka ova. Ko man ni čumidel, e lafija mle ni ikerel; a lafi savo ašunen nane mlo aj e Dadesoro savo bićhaldama. Akava tumenđe vakerdem đikaj bešljem tumencar. A o Kovljarutno o Đi Sumnalo, save o Dad ka bičhalel ano anav mlo, Ov tumen ka sikavel bašo sa thaj ka del tumen godi pe sa so tumenđe vakerdem. Šandipe tumenđe ačhavav, o Šandipe mlo dava tumenđe; na dava le tumenđe sar so o them dela. Ma te zalil o vilo tumaro thaj ma te daral. Ašunden kaj tumenđe me phendem: Ka đav, thaj ka avav tumenđe. Kana bi čumidena ma, ka lošajvon bi so vakerdem: đav e Dadese; kaj o Dad mlo pobaro si mandar. A akana tumenđe phendem, anglal so ka ovel, te paćan kana ka ovel. Namangava pana but tumencar te vakerav, kaj avela o knezo akale themesko, thaj ana mande nane khančik. Aj te đanel o them kaj čumidav e Dade, thaj sar so mange čhinavel o Dad, ađahar kerav. Ušten, hajden akatar! Me sem čačuno bućum, thaj o Dad mlo si moljari. Sakoj kranga pe mande savo ni bijanel bijanipe čhinela ola; a sakoj savo bijanipe bijanel khosela ola kaj pobut bijanipe te bijanel. Tumen sen ake khosle baše lafija save tumenge vakerdem. Ačhen ana mande, thaj me ana tumende. Sar e drakhalin našti bijanipe te bijanel korkori pestar te na aćhili ko bućum, ađahar ni tumen ako ana mande na aćhoven. Me sem bućum, a tumen drakhalin. Ko ačhela ana mande vi me ano leste, odova anel but bijanipe, kaj bi mlo naštin te keren khanči. Ko ana mande ni ačhel, ka frdelpe pe avri sar e drakhalin, thaj ka šućarel pe, thaj ka kiden ola, thaj ani jag ka frden, thaj ka tharen. Te aćhiljen ana mande thaj e lafija mle ana tumende ačhen, sa so mangen roden thaj ka ovel tumenge. Akaleja ašundilo o Dad mlo kaj bijanipe but te anen, thaj ka oven mle sikljovne. Sar so o Čhavo čumidel man, vi me čumidav tumen; aćhoven ano kamlipe mlo. Te e čhinavipe mle ikerden, ka aćhoven ano kamlipe mlo, sar so me ikerdem o čhinavipe mle Dadesere thaj aćhovava ano kamlipe lesoro. Akava tumenge phendem kaj o lošaripe mlo ana tumende ačhola thaj o lošaripe tumaro te pherel pe. Akava si čhinavdipe mlo: te čumiden jeke avre sar so me tumen čumidav. Kotar akava kamlipe khonik naje pobaro, kaj sar o đivdipe plo te pašljarel ple amalenđe. Tumen sijen o amala mle te kerden so tumenđe me čhinavav. Aj tumen ni akharav kandinenca, kaj o kandino ni đanel so kerel o barutno lesoro; aj tumen akhardem amalencar, kaj sa so šundem kotar o Dad mlo, mothovdem tumenđe. Ni alosarden tumen man, aj me tumen alosardem thaj ćhutem tumen kaj tumen te đan thaj bijanipe te anen; thaj o bijanipe tumaro te ačhol, kaj sa so roden kotar o Dad ano anav mlo te del tumenđe. Akava tumenđe čhinavav: te čumiden jeke avre. Ako tumen ritola o them, te đanen kaj man ritonđa anglal tumende. Kana bi ovena kotar o them, o them bi plen čumidela, a sar nasijen kotar o them aj me tumen alosardem kotar o them, odolese tumen ritonela o them. Phučen tumen baše lafija save tumenđe me phendem: naj o kandino pobaro kotar o barutno plo. Te man tradinđe, vi tumen ka traden; te mlo lafi ikerde, vi tumaro ka ikeren. Aj sa akava tumenđe ka keren bašo anav mlo, kaj ni penđaren Odole savo bićhaldama. Te na avava thaj vakerava lenge, na bi ovel len bezeha; a akana irisaripe najelen bašo bezeh plo. Savo ritonel man thaj e Dade mle ritonel. Te na kerava maškaro lende kotora save khonik aver ni kerda, ni bi oven len bezeha: a akana thaj dikhle, thaj ritonđe vi man thaj e Dade mle. Aj te pherel pe o lafi hramosardo ano Kanuni lengoro: Ritonđema ni sose. A kana avel o Kovljarutno, save tumenđe me ka bičhalav kotar o Dad, Đi Čačipesko, savo kotar o Dad iklilo, Ov ka mothovel baše mande. A vi tumen ka mothoven, kaj sen kotar o anglipe mancar. Akava tumenge mothovdem te na zumaven tumen. Ka traden tumen kotar e sinagoge; Aj avela o časo kana ka sarsavo ko tumen mudarel gndisarel kaj e Devlese o kandipe anela. Thaj odova ka keren, kaj ni penđarde e Dade ni man. Aj akava tumenđe mothovdem ta, kana ka avel o časo, te anan ki godi akava kaj tumenđe me mothovdem; a kotar o anglipe ni mothovdem tumenđe akava, kaj sijum tumencar. A akana đav Okolese savo bićhaldama, thaj khonik tumendar ni phučel ma: kuri đa? Aj odolese so tumenđe akava mothovdem, o dukhavipe pherđa o vilo tumaro. Aj me tumenđe o čačipe vakerav: lačhe si tumenđe me te đav, te me na geljum, o Kovljarutno na ka avel ke tumende: aj te geljum, ka bičhalav le tumende. Thaj kana Ov avel, ka mahril o them bašo bezeh, thaj baš vortope, vi baš o kris. Bašo bezeh, akana, so ni paćan ana mande; Bašo vortope, so đav mle Dadese, thaj maj man na ka dikhen; A baš o kris, so si o knezo akale themesko krisime. Pana isi man but te vakerav, aj akana našti te legaren. A kana avel Ov, o Đi Čačimasko, ka andrisarel tumen ano sa čačipe; kaj ni ka vakerel pestar, aj ka vakerel odova so šunel, thaj ka mothovel tumenge odova so avel. Ov man ka ašundarel, kaj mlestar ka lel, thaj ka mothovel tumenđe. Sa so isi e Dade mlo si, odolese phendem kaj mlestar ka lel, thaj ka mothovel tumenđe. Pana hari, thaj ni ka dikhen ma, thaj pale hari thaj ka dikhen ma, kaj me đav e Dadese. Teg nesave kotar e sikljovne lesere phende maškaro peste: So si odova so amenge vakerel: Pana hari, thaj ni ka dikhen ma, thaj pale hari, thaj ka dikhen ma; thaj: Me đav e Dadese? Vakerena, akana: So si odova so phenel: hari? Ni đana so vakerel. A o Isus haljovel kaj mangle le te Phučen, thaj lenge phenđa: Odolese li Phučen tumen maškaro tumende, so phendem: Pana hari, thaj ni ka dikhen ma, thaj pale hari thaj ka dikhen ma. Čače, čače tumenge phenav kaj ka tumen roven thaj hincisaren, a o them ka lošarel pe; thaj vi tumen ka oven dukhavne, aj tumari dukh ka irinelpe po lošaripe. E đuvli kana bijanel crdel pharipe, kaj avilo o časo lakoro; a kana bijanel e ćhavore, maj ni peren lake ane godi e dukha, bašo lošaripe so bijandilo o manuš ko them. Thaj tumen, ađahar, isitumen akana dukh; aj tumen palem ka dikhav, thaj ka lošarel pe o vilo tumaro, thaj o lošaripe tumaro khonik na ka lel tumendar. Thaj ane odova dive naj te Phučen ma khanči. Čače, čače tumenge phenav kaj sa so roden kotar o Dad ano anav mlo, ka del tumenge. Đi akana ni rodinđen khanči ano anav mlo; roden thaj ka len, kaj o lošaripe tumaro te ovel pherdo. Akava vakerdem tumenge ane paramiča; aj avel o časo kana tumenge na ka vakerav ane paramiča, aj tumenge phravde ka mothovav e Dadestar. Ane odova dive ano anav mlo ka roden, thaj ni vakerav tumenge kaj me ka ruđisarav e Dade tumenge; Kaj korkoro o Dad čumidel tumen, odolese so tumen čumidlen man, thaj paćajen kaj me kotar o Devel ikliljem. Ikliljem kotar o Dad, thaj avilem po them; pale mekav o them, thaj đav e Dadese. Phende lese e sikljovne lesere: Ake akana phravde vakere, thaj e paramiči nisavi ni vakere. Akana đana kaj sa đane, thaj ni trubul ko te phučel tut. Pe odova paća kaj tu kotar o Devel ikliljan. O Isus lenge irisarda: Akana li paćan? Eke avel o časo, thaj ake vi avilo, te našena sakoj pe pli rig, a man korkoro meken; aj najsem korkoro, kaj si o Dad mancar. Akava tumenge mothovdem, kaj ana mande šandipe te ovel tumen. Ano them ka avol tumen dukha; aj ma daran, me upralzurardem o them. Akava vakerda o Isus, pa vazdinđa e jakha ple po badali thaj phenđa: Dade, avilo o časo, ašundare e Čhave tire, ta vi o Čhavo tiro te ašundarel tut; Sar so lese dijan o baroderipe upral sakoj trupo, ta sa so lese dijan, ov dela lenge đivdipe bimerutno. A akava si bimerutno đivdipe te penđaren tut jekhune čačune Devle thaj kas bićhaldan e Isuse Hristo. Me ašundarem tut pe phuv; o kotor kerdem savo dijan man te kerav. Thaj akana ašundar tu man, Dade, ane tute korkore, ašundimpnasa savo sine ma ana tute anglal no o them so kerdilo. Vakerdem o anav tiro e manušenge saven dinđan man e themestar; tire sine pa dinđan len mange, thaj tiro lafi ikerde. Akana haljovde kaj sa so dinđan man odova si tutar. Kaj e lafija save dinđan man, dijem lenge; thaj on lije len, thaj penđarde čače kaj tutar ikliljem, thaj paćaje kaj tu bićhaldanma. Me bašo olenge ruđiv ma, ni ruđiv ma baše themese, aj baše odola save man dinđan, kaj si tire. Thaj sa soj mlo tiro si, thaj tiro mlo; thaj ašundilem me ano lende. Thaj maj najsem ano them, a on si ano them, thaj me avav tuke. Dade sumnaleja, arakh len ano anav tiro, odolen save man dinđan, te oven jekh sar amen. Đikaj sema lencar ano them, me len arakhljem ano anav tiro; odolen saven man dinđan arakhljum; thaj khonik olendar ni mudardilo sem o čhavo mudaripnaso, te pherel pe o Lil. A akana avava tuke, thaj akava vakerav po them, te oven len lošaripe mlo pherdo ana peste. Me lenge dijem o lafi tiro; thaj o them len ritonđa, kaj naje kotar o them, sar so ni me najsem e themestar. Na ruđiv te le olen e themestar, aj len te arakhe e đungalestar. E themestar naje, sar ni me so najsem e themestar. Tire čačipnasa sumnalipesare olen: o lafi tiro si čačipe. Sar so tu bićhaldanma ano them, thaj me olen bićhaldem ano them. Me sumnalipesarav man baše lenge, kaj vi on te oven sumnalipesare čačimasa. Ni ruđiv eke numa bašo lenge, aj vi baš odola save bašo lafijaa lengere paćaje ana mande; Kaj savore jekh te oven, sar tu, Dade, so san ana mande thaj me ana tute, kaj thaj on anamende jekh te oven kaj o them te paćal kaj tu man bićhaldan. Thaj o ašundipe savo dijan mange me dijem lenge, te oven jekh sar so sinjam amen jekh. Me ano lende thaj tu ana mande, te oven federime ano jekh, thaj te penđarel o them kaj tu bićhaldanma thaj te čumide olen sar so man čumide. Dade, mangav kaj vi odola save man dinđan te oven mancar kuri sem me, te dikhen o ašundipe mlo savo maje dinđan, kaj čumidljan ma anglal o sikadipe so ulo e themesko. Dade čačuneja, o them tut na penđarda, a me penđardem tut, thaj akala penđarde kaj tu bićhaldanma. Thaj me lenge vakerdem o anav tiro thaj ka vakerav kaj o kamlipe savesa čumidema ano lende te ovel, thaj me ano lende. Vakerindoj akava o Isus iklilo ple sikljovnencar prekali lenori Kedron, kote sine bašča, ane savi dija ov thaj e sikljovne lesere. A thaj o Juda, o dindo mujalo lesoro, đanela odova than; kaj o Isus but droma kedelape odothe ple sikljovnencar. Teg o Juda lija e četa, thaj kotar e anglunerašaja thaj fariseja e kandinen, thaj avilo odori umlalencar thaj memeljencar thaj bandukencar. A o Isus đanglindoj sa so isi te kerelpe olese, iklilo thaj phenđa lenge: Kas roden? Irisarde lese: E Isuse Nazarećano. O Isus lenge phenđa: Me sem. A olencar terdino thaj o Juda, o dindo mujalo lesoro. A kana lenge phenđa: Me sem, čhutepe napalal thaj pele ki phuv. Teg olen pale phučlja: Kas roden? A on vakerde: E Isuse Nazarećano. Irisarda o Isus: Phendem tumenge kaj sem me. Te, akana, man roden, meken akalen mek đan. Te pherel pe o lafi savo phenđa: Ni hasardem ni jekhe kotar odola saven maje dinđan. A o Simon Petar sinele čhuri, ta crdlala thaj čalada e kandine e anglunerašajesere, thaj čhinda lesoro daxno kan. A e kandinesko anav sine Malho. Teg phenđa o Isus e Petrose: Čhuv e čhuri ano pajari! E taxtaj savi dija man o Dad aj li te na pijav? Teg e četa thaj o čhinadutno thaj e kandine e judejeske astarde e Isuse thaj phandle le. Thaj legarde le najanglal e Anake, kaj sine sastro e Kajafese, savo sine anglunorašaj odova berš. A O Kajafa sine odova so dinđa phurederipe e Judejenge kaj si polačhe kaj jekh manuš te merel bašo seloro. Palo Isus pak đala o Simon Petar thaj o aver sikljovno; a odova sikljovno sine penđardo e anglunerašajese, ta dija e Isusesa ane avlin e anglunerašajesi. A o Petar terđola avrijal ke udara. Teg iklilo odova aver sikljovno, savo sine penđardo e anglunerašajese, thaj phenđa e udarkače thaj čhuta andre e Petre. Teg e kandini udarka phenđa e Petrese: Te najsan thaj tu kotar e sikljovne akale manušese? Ov phenđa: Najsem. A e kandine thaj e terne phabardesa jag thaj terđona ta tačona, kaj sine šudripe; a vi o Petar sine lencar, thaj terđola thaj tačola. O Anglunorašaj phučlja e Isuse bašo sikljovne lesere thaj bašo džanipe lesoro. O Isus lese irisarda: Me vakerdem phravde e themese; me sajekh sikavdem ane sinagoga thaj ano hramo, kote sajekh čedisalje e Judejura, thaj khanči ano garavdipe ni vakerdem. So phuče man? Phuč odolen save ašunde so lenge vakerdem; eke, on đanen so me vakerdem. A kana ov akava vakerda, jekh kotar e kandine savo terđola odothe čalada e Isuse palma pe čham thaj phenđa: Aj li ađahar irisare e anglunerašajese? O Isus lese irisarda: Te đungalipe vakerdem, mothov kaj si đungalipe; te si lačhe, sose mare ma? E Ana le bičhalda phandle e Kajafese e anglunerašajese. A o Simon Petar terđola thaj tačola. Tegani lese phende: Te najsan vi tu kotar e sikljovne lesere? A ov crdlape thaj phenđa: Najsem. Phenđa jekh kotar o kandino e anglunerašajesko, savo sine jeri odolese kolese o Petar čhinda o kan: Na dikhljem li me tut ane bašča oleja? Teg o Petar pale crdlape; thaj sigo o bašno đilabda. E Isuse inđarde kotar o Kajafa ane krisuni. A sine sabalje, thaj on ni dije ane krisuni te na bi meljarena pe, aj te bi šaj te xan e Pasha. Teg o Pilat iklilo ke lende avrijal thaj phenđa: Savo krisipe mothovena opipe akale manušestar? Irisarde lese thaj phende: Kana ov ne bi ovela đungaloćherutno, ne bi mekale tuke. A o Pilat lenge phenđa: Len le tumen thaj po kanuni tumaro krisin lese. A e Judejura lese phenđe: Amen ni troma khanika te mudara. Te pherel pe o lafi e Isuseso savo phenđa, mothovindoj sava merimasa ka merel. Tegani đerdinđa o Pilat pale ani krisuni, ta akharda e Isuse thaj phenđa lese: Tu li sijan thagar e judejengo? Irisarda lese o Isus: Vakere li tu odova korkoro pestar, ja e aver đene phenđe tuke mandar? O Pilat irisarda: Aj me li sem Judejco? O seloro tiro thaj e anglunerašaja dinde tut mange. So kerdan? O Isus irisarda: O thagaripe mlo naj kotar akava them; kana bi ovela kotar akava them o thagaripe mlo, e kandine mle bi maren pe te na ovav dindo e Judejenge; aj o thagaripe mlo naje akatar. Teg lese phenđa o Pilat: Akana, tu san thagar? O Isus irisarda: Tu vakerea kaj sem me thagar. Me sem baš odova bijando thaj baš odova avilem po them te mothovav o čačipe. Thaj sakoj savo si kotar o čačipe šunela o krlo mlo. Phenđa lese o Pilat: So si o čačipe? Thaj akava vakerindoj, iklilo pale e Judejenge, thaj phenđa lenge: Me nijekh doš ni arakhav pe leste. A ane tumende si adeti kaj tumenge jekhe te mekav ki Pasha. Mangen li, akana, te mekav tumenge e judejenge thagare? Teg savore palem dije vika vakerindoj: Na akale, aj e Varava! A o Varavo sine vošutno. Teg, akana, o Pilat lija e Isuse thaj dabarda le. A e urumne khuvde khuvindo kotar e kare thaj čhute lese ko šero, thaj urjavde ole purpurno fostani, thaj vakerena: Sar sijan thagara e judejengo! Thaj čalavena le pe čhamlja. O Pilat palem iklilo avrijal thaj phenđa lenge: Ake tumenge ikalava le avrijal, te đanen kaj pe leste ni arakhav nijekh doš. A o Isus iklilo avri legarindoj o khuvdino kanralo thaj purpurno fostani. Thaj phenđa lenge o Pilat: Ake o manuš! Kana le, akana, dikhle e anglunerašaja thaj e kandine, dije vika vakerindoj: Buhljaren le, buhljaren! O Pilat lenge phenđa: Len le tumen thaj buhljaren, kaj me ni arakhav pe leste doš. Irisarde lese e Judejura: Amen isiamen kanuni thaj po kanuni amaro musaj te merel, kaj kerda pe Ćhavesa e Devleseja. Kana, akana, o Pilat šunđa akava lafi, darandilo pobuter. Thaj palem dija ane krisuni, thaj phenđa e Isusese: Kotar sijan tu? A o Isus lese ni dija iripe. O Pilat lese teg phenđa: Aj mange li ni irisare? Na đane li tu kaj man isi baroderipe te inzarav tut thaj baroderipe isi man te mekav tut? O Isus irisarda: Na bi ovelatu baroderipe nisavo upral mande kana tuke ne bi ovela upral dindo, odolese odova savo dija man tuke isile pobaro bezeh. Kotar odova dikhlja o Pilat le te mekel. Aj e Judejura dena vika vakerindoj: Te mekljan akale, najsan amal e ćesarese. Sakoj savo pes thagaresa kerel opipeil pe e ćesarese. O Pilat, akana, ašundoj akava lafi, ikalda e Isuse avrijal, thaj bešlo pe kriseski skamin, po than akhardo Litostroton, a judikane Gavata. A sine paračuvi anglaraći e Pasha, trujal o šovto časo; thaj ov phenđa e Judejenge: Ake o thagar tumaro! A on dije vika: Le, le inzaren le! O Pilat lenge phenđa: Sar e thagare tumare te inzarav? Irisarde e anglunerašaja: Naj amen thagar sem o ćesari. Teg, dinđa le olende kaj te inzardol. A on lije e Isuse thaj ingardele. Thaj ingarindoj o trušul plo iklilo po than akhardo Šereso kokalo, a judikane Golgota. Odothe le buhljarde, thaj olesa duje averen, pe jekh thaj pe aver rig, a e Isuse ko maškar. O Pilat hramosarda vi o telalhramope, ta čhuta po trušul; a sine hramome: O Isus Nazarećano thagar e judejengo. Thaj akava telalhramope drabarde but Judejura, kaj paše o foro sine o than kaj buhljarde e Isuse: thaj sasa hramome judejune, jeline thaj rimljane. A e judejenge anglunerašaja vakerena e Pilatose: Ma hramosar: thagar e judejengo, aj kaj ov phenđa: me sem thagar e judejengo. O Pilat irisarda: So hramosardem, hramosardem. E urumne kana inzarde e Isuse, lije e fostanja lesere thaj kerde štar kotora, sarsavone urumnese po kotor, thaj e dolama: a e dolama na sine sivdi aj khuvdini kotar jekh. Tegani phende maškaro peste: Te na pharavala, aj te čhuda batbuti baše laće kase ka perel. Te pherel pe o Lil savo vakerel: Ulavde e fostanja mle maškar peste, thaj baš e dolama mli čhudle barbuti. E urumne, akana, ađahar kerde. A terđona ke Isusesko trušul e daj lesiri, thaj e phen lesere dajaki e Marija Kleopova, thaj e Marija Magdalina. A o Isus dikhindoj e daja thaj e sikljovne save čumidela kaj terđola paše late, phenđa ple dajake: Đuvlije, eke će o čhavo! Teg phenđa e sikljovnese: Ake ti daj! Thaj kotar odova časo lija la o sikljovno ke peste. Pale odova, đanglindoj o Isus kaj si sa ćerdino, kaj sa pherdilo o Lil phenđa: Trošalo sem! Terdino o vaso pherdo šut; a on pherde o sunđeri šut, ćhutindoj pe trska, pašarde lesere voštenge. A kana o Isus zumavda o šut phenđa: Kerdilo pe! Thaj mekljarindoj o šero, muklja o đi. A avune kaj sine paračuvi, te na bi o trupo ačhola po trušul ano savato, kaj sasa baro dive odova savato, e Judejura ruđisarde e Pilate kaj te phagen lenge e koča, ta len te huljaren. Tegani avile e urumne, thaj e anglunese phagle e koča vi e averese so inzarde oleja; A avindoj đi o Isus, kana dikhle kaj ake mulo, ni phagle lesere koča. Aj jekh kotar e urumne posavda lese e pašavre buzasa; thaj sigo iklilo rat thaj pani. Thaj odova savo dikhlja, mothovđa, thaj čačuno si o mothovdipe lesoro, thaj ov đanel kaj o čačipe vakerel, kaj vi tumen te paćan. Kaj akava kerdilo kaj te pherdol o Lil: O kokalo lesoro naj te phagel pe. Thaj palem aver Lil vakerel: Ka dikhen pe odova kas posavde. A pale odova o Josif kotar e Arimateja, savo sine sikljovno e Isusesko, aj garandoj kotar e dar e Judejengi, ruđisarda e Pilate te lel o trupo e Isusesoro. Thaj dinđa o Pilat. Tegani avilo thaj lija o trupo e Isusesoro. A avilo vi o Nikodim, savo angluno drom avilosa raćasa e Isusese, thaj anda hamime smirne thaj aloja trujal šel litre. Teg lije o trupo e Isusosko, thaj paćarde le poxtanosa thaj sungencar, sar si o adeti ane Judejura te parunen. A pe odova than, kaj sine inzardo sasa bašča, thaj ani bašča nevo limori, ane savo pana khonik nasine pašljardo. Odothe, akana, kotar paračuvi e judejengi, kaj sine paše o limori, pašljarde e Isuse. A ano angluno dive e kurkesko avili e Marija Magdalina po limori rano, đikaj pana sine rat, thaj dikhlja kaj si o bar vazdimo e limorestar. Tegani prastandili thaj avili e Simone Petrese thaj e avere sikljovnese save čumidela o Isus, thaj phenđa lenge: Lije e Devljutne kotar o limori, thaj ni đana kaj le pašljarde. Teg iklilo o Petar thaj o aver sikljovno, thaj gele karing o limori. Prastandile pa solduj khetane, thaj o aver sikljovno prastandilo posig kotar o Petar thaj reslo angluno po limori. Thaj teljindoj, dikhlja o poxtan paćarimasko pašljardo, aj na đerdinda. Teg reslo o Simon Petar palo leste thaj dija ano limori thaj dikhlja o poxtan paćarimasko pašljardo. Thaj o khoslo savo sine ko šero lesoro, te na pašljol e poxtanosa paćarimase, aj ulavdine paćardo ko jekh than. Teg, akana, dija vi o aver sikljovno, savo angluno avilo po limori, thaj dikhlja thaj paćaja; Kaj pana ni đangle o Lil kaj Ov trubul te đivdisarel kotar o mule. Tegani o sikljovne pale irisajle khere. A e Marija terđola avrijal ko limori thaj rovela. Thaj kana rovda telili upral o limori. Thaj dikhlja duj phakale ane parne fostanja kaj bešen, jekh upral o šero, a o aver tele o pre, kaj sine pašljardo o trupo e Isusesoro. Thaj on lake phenđe: Đuvlije, so rove? Phenđa lenge: Odolese so lije e Devljutne mle, thaj ni đanav kaj ole pašljarde. Thaj akava vakerindoj, irisarindoj palal thaj dikhlja e Isuse kaj terđol, thaj ni đanglindoj kaj si o Isus. Phenđa lake o Isus: Đuvlije, so rove? Kas rode? Oj, gindindoj kaj si o baštinari, phenđa lese: Rajo, te inđardan le, phen mange kaj ole pašljardan, thaj me ka lav le. O Isus lake phenđa: Marija! Oj, irisarindoj, phenđa lese: Ravuni, so ka phenel: Sikamneja! Phenđa lake o Isus: Ma azbav man, kaj pana ni ikliljem mle Dadese; aj đa mle phralenge thaj phen lenge: Ukljarav e Dadese mlese thaj e Dadese tumarese, thaj e Devlese mlese thaj e Devlese tumarese. A e Marija Magdalina geli thaj mothoda e sikavnenge kaj dikhlja e Devljutne thaj kaj olake akava phenđa. A kana sine rat odova angluno dive e kurkesko, thaj đikaj o udar sine phandle, kaj ćidenape e sikljovne lesere kotar e dar e Judejengi, avilo o Isus, thaj terdino ko maškar thaj phenđa lenge: Šandipe tumenge! Thaj akava vakerindoj, mothovda lenge e vasta thaj e pašavre ple. Tegani e sikljovne lošarisajle dikhindoj e Devljutne. A o Isus lenge phenđa pale: Šandipe tumenge! Sar so o Dad bićhaldama, vi me bičhalav tumen. Thaj akava vakerindoj, phudinđa thaj phenđa lenge: Len o Đi Sumnalo! Savenge jertisaren e bezeha, ka jertisavon lenge; thaj savenge ačhaven, ačhavde si. A o Toma, akhardo Dujoro, jekh kotar e Dešudujore, na sine olencar kana avilo o Isus. A e avera lese e sikljovne vakerena: Dikhljam e Devljutne. A ov lenge phenđa: Te na dikhljem pe vasta lesere ćhindipe kotar e karfina, thaj ni čhivav o naj mlo ane ćhinipa kotar e karfina, thaj ni čhivav o vast mlo ane pašavre lesere, ni ka paćav. Thaj pale ofto dive pale sine andre e sikljovne lesere thaj o Toma lencar. Avilo o Isus kana sine o udara phandle, thaj terdino ko maškar thaj phenđa: Šandipe tumenge! Teg phenđa e Tomase: Lunđar o naj tiro akari thaj dikh e vasta mle; thaj lunđar o vast tiro thaj čhuv ane pašavre mle, thaj ma ov bipaćamno aj ov paćamno. Thaj irisarda o Toma thaj phenđa lese: Devljutno mlo thaj o Devel mlo! Phenđa lese o Isus: Odolese so dikhljan man, paćajan; baxtarde si save ni dikhle a paćaje. A thaj but avera keripna kerda o Isus anglal e sikljovne ple, save naj hramome ano lil akava. A akala si hramome te paćan kaj o Isus si Hristos, Čhavo e Devlesoro, thaj kaj paćavindoj isitumen đivdipe ano anav lesoro. Pale odova palem mothodape o Isus ple sikljovnenge ko derav e Tiverijadosko. A mothodape si ađahar: Sine khetane o Simon Petar thaj o Toma, akhardo Dujoro, thaj o Natanailo kotar Kana e Galilejaki, thaj e čhave e Zevedejese, thaj avera dujore kotar e sikljovne lesere. Phenđa lenge o Simon Petar: Đav te astarav mačhen. Phenđe lese: Ka ava vi amen tuja. Iklile thaj dije sigo ane barka, thaj odoja rat ni astarde khanči. A kana ake mothodili e javin, terdindoj o Isus ki phuv, aj e sikljovne ni penđarde kaj si odova o Isus. A o Isus lenge phenđa: Ćhavoralen, najtumen li so bašo xape? Irisarde lese: Najamen. A ov lenge phenđa: Čhuden e safin pe daxni rig e barkaki, thaj ka arakhen. Teg čhudle, thaj eke naštisarde te ikalen la kotar e but maćhe. Tegani odova sikljovno, save čumidela o Isus, phenđa e Petrese: Odova si o Devljutno! A o Simon Petar, kana šunda kaj si o Devljutno, vulisardape mantilesa, kaj sine nango, thaj ćhudlape ano derav. A e avera sikljovne resle e barkorasa, kaj nasine dur kotar e phuv aj trujal e dušel kunja, crdindoj e safin mačhencar. Sar so iklile pe phuv, dikhle e jag phabardi thaj pe late pašljardo mačho, thaj maro. O Isus lenge phenđa: Anen e mačhendar so akana astarden. A o Simon Petar dija thaj ikalda e safin pe phuv pherdi bare maćhe, šel thaj pindu trin; thaj kotar edobor butipe ni pharavdili e safin. Phenđa lenge o Isus: Aven, te xan. A nijekh kotar e sikljovne ni tromaje te phučel le: Ko sijan tu? Đangljindoj kaj si o Devljutno. Teg avilo o Isus, thaj lija o maro thaj dija lenge, ađahar thaj e maćhe. Akava ake o trito drom mothovdilo o Isus ple sikljovnenge sar uštino kotar o mule. A kana xale, phenđa o Isus e Simone Petrese: Simone e Jonesko, čumidema li pobut akalendar? Phenđa lese: Va, Devljutneja, tu đane kaj kamav tu. Phenđa lese: Ćarjar mle bakroren. Phenđa lese palem po dujto drom: Simone e Jonesko, čumidema li? Phenđa lese: Va, Devljutneja, tu đane kaj tut kamav. Phenđa lese: Arak e bakren mlen. Phenđa lese po trito drom: Simone e Jonesko, kamejama li? O Petar dukhavdilo so phenđa olese po trito drom: kamejama li? Thaj phenđa lese: Devljutneja, tu sa đane, tu đane kaj tut kamav. Phenđa lese o Isus: Ćarjar e bakren mlen. Čače, čače tuke phenav: Kana sijan poterno, kustisardan tut korkoro thaj phirdan kuri mangljan; a kana phuranđove, ka phrave e vasta tire thaj e avera ka kustisarden tut thaj ka inđaren kuri ni mange. A akava phenđa mothovindoj sava merimasa ka ašundisarel e Devle. Thaj vakerindoj akava, phenđa lese: Ava pale mande! A o Petar irisarindoj dikhlja kaj palo leste đala o sikljovno kas o Isus čumidlja, savo vi pe raćako xape pašlilo po kolin lesoro thaj phenđa: Devljutneja, ko si odova savo ka del tut muj? Dikhindoj o Petar akale, phenđa e Isusese: Devljutneja, a so si akava? O Isus lese phenđa: Te mangljem kaj ov te ačhol đikaj ni avav, so si tuke đi odova? Tu hajde pala mande. Teg iklilo akava lafi maškaro phralja kaj odova sikljovno ni ka merel; aj o Isus lese ni phenđa kaj na ka merel, sar: Te mangljem kaj ov te ačhol đikaj ni avav, so si tuke đi odova? Akava si odova sikljovno savo mothovel akalestar, thaj hramosarda akava, thaj đana kaj si čačuno o mothovdipe lesoro. A isi thaj but aver so kerda o Isus, save kana bi redosa hramosarelape, ni ano korkoro them, gndiv, na bi resen e hramosarde lila. Amin. Angluni tuke pustik hramondem, o Teofile, kotar sa so poćinđa o Isus thaj te kerel thaj te sikavel – đi o dive kana vazdisajlo, ta Đesa Sumnalesa dinđa vakeripe e apostolenge kolen alonđa; Savenge thaj po xasaripe plo sikavđa pes dživdo but čaće mothodipenca, sikavindoj lenge saranda dive thaj vakerindoj kotar o Thagaripe e Devlesoro. Lencar bešindoj phenđa lenge kaj te na durarjon oto Jerusalim, aj te ađikeren o dindo lafi e Dadesoro, „savo” phenđa „šunđen mandar: Kaj o Jovan bolavda panjesa, a tumen ka bolaventumen Đesa Sumnalesa” na but pale akala dive. Tegani save sine ćedime phućle le vakerindoj: Devljutneja, mange li ane akava vakti te ćhuvesa o thagaripe e Izrailjesoro? A ov lenge phenđa: Nane tumaro te đanen o vaktija thaj o ćhinade dive save o Dad ićerđa ane pli gavanman, aj ka len e zor kana ka uljel o Sumnalo Đi pe tumende; thaj ka oven mange jaćencadikhutne ano Jerusalim thaj pe sa e Judeja thaj Samarija thaj sa đi o agor e phuvljakoro. Thaj akava vakerindoj, đikaj on dikhena, vazdinđa pe, thaj lelja le e nuvera anglal e jakha lengere. Thaj đikaj samasa dikhena pala leste sar džala po badali, dikh, duj manuša ane fostanja parne aćhile paše lende. Thaj on phenđe: o manušalen Galilejcija, so terđovena thaj dikhena ko badali? Akava Isus savo tumendar vazdisajlo ko badali, ađahar pale ka avel sar so dikhljenle kaj džala ko badali. Teg irinđepe ano Jerusalim kotar e plain akhardi Maslinska, savi si paše o Jerusalim jek savatosoro dive phirindoj. Thaj kana đerdinde, uklinde ane upruni soba kote bešena, thaj odola: o Petar thaj o Jakov, thaj o Jovan thaj o Andrej, o Filip thaj o Toma, o Vartolomej thaj o Matej, o Jakov Alfejev thaj o Simon Zilot, thaj o Juda e Jakovesoro. Akala sare sine istrajine thaj jekheđesa pe ruđutni thaj ruđipe, e romnjencar thaj e Marijasa e dijasa e Isusesara thaj lesere phralencar. Thaj ane odola dive uštino o Petar maškaro sikavne, a sine selore ki kupa sar šel thaj biš manuša, thaj phenđa: Manušalen phraljalen, valjanđa kaj te perđol pe odova Lil so phenđa o Đi Sumnalo e Davidesere mujea e Judase, savo sine anglalisarutno okolengoro so astarđe e Isuse; Kaj đenđape amencar thaj sine lelja kotor akala kandipatar. Ov, akana, lel e umal kotar e pokindi bihakajuni, thaj natelešereja pharilo po maškar, thaj ćhordile sa e porja lesere. Thaj odova ulo džanglo sarijenđe save dživdinena ano Jerusalim, ađahar kaj odoja umal vićindape lengara ćhibijasa Akeldama, so semnol: umal ratesiri. Kaj si hramome ano lil Psalmengoro: Te ovel e avlin lesiri pusto, thaj te na ovel nikoj ko ka dživdinel ane leste; thaj: o Episkopipe lesoro te lel aver. Valjani, akana, kotar akala manuša save sine khatane amencar aso sa o vakti katarkana maškar amende alo thaj iklilo amendar o Devljutno Isus, poćindoj kotar o bolipe e Jovanesoro đi o dive kana vazdisajlo amendar, te jek akalendar te ovel amencar jakhencadikhutno lesere dživdisaripnastar. Thaj ćute dujen: e Josife akhardo Varsava, savo sine vićindo Just, thaj e Matija. Thaj ruđindoj phenđe: Tu, Devljutneja, penđarutneja o vile sarijengere, mothov jekhe akale dujendar kas alonđan, te lel kotor akale kandipastar thaj apostolipastar, andar savo pelo o Juda, te džal po than plo. Thaj ćhudle kocke baše lenge, thaj peli e kocka po Matija, thaj sine đendo e dešujekhende apostolenge. Thaj kana nakhine o Pinda dive sinele sa e apostolja jekheođesa ko katanipe. Thaj jekhedromesa šundilo bašipe kotar o badali sar phudipe e zorale balvaljakoro, thaj pherđa sa o kher kaj on beštine; Thaj mothovđape lenge ulavde ćhibija sar jagale, thaj ulilo po jekh upral sakoneste olendar. Thaj pherdile sare Đi Sumnalesoro thaj aćhile te vakeren avere ćhibijencar, sar so lenge o Đi dela te vakeren. A ano Jerusalim sinele e Judeja, manuša devleskere kotar sako seloro savo si telal o badali. Ta kana ulo akava phudipe, ćedisajlo o seloro, thaj aćhilo; kaj sakoj lendar šunela kaj on vakerena lengere ćhibijasa. Thaj prašukarena pe thaj biažućarune sare vakerindoj jek avrese: Dikh, aj nane li sare akala so vakerena o Galilejci? Pa sar amen šunaja sako pli ćhib ane savi bijandiljam: E Parćanja thaj e Miđanja thaj e Elamićanja, thaj save dživdinena ane Mesopotamija thaj e Judeja thaj e Kapadokija, ane Ponta thaj Azija, ane Frigija thaj Pamfilija, ano Egipat thaj agora e Libijake paše Kirina, thaj e avutne Rimljanja, thaj e Judejci thaj e prozeliti, e Krićanja thaj Arapija, šunaja kaj on vakerena pe amare ćhibija e Devlesere bare ćerdipnendar? Thaj sare čudinena pe thaj sine ane sung vakerindoj jek avrese: So bi akava šaj te ovel? A e avera telalasana thaj vakerena: Matile gudlja moljatar. A o Petar terdino e dešujekhencar thaj vazdinđa o krlo plo thaj phenđa lenge: Manušalen Judejci, thaj sa tumen sare so sijen ano Jerusalim: akava nek ovel tumenge ko džandipe, thaj ašunen e lafija mle. Kaj akala nane mate sar so tumen so den godi, kaj si eke o trito časo e divesoro. Aj odova si okova so phenđa o profeto Joil: Thaj ka ovel ane palune dive, vakerel o Devljutno, ka ćhorav kotar mlo Đi upro sako trupo, thaj ka anglavakeren e ćhave tumare thaj e ćhija tumare, thaj e terne tumare ka dikhen dikhipa thaj e phure tumare ka dikhen sune. Pa thaj pe ple kandine thaj pe ple kandinja ane adala dive ka ćhorav mle Đestar, thaj ka anglavakeren. Thaj ka dav prašukaripe upre po badali thaj semne tele ki phuv: rat thaj jag thaj phabaripe e čurosoro. O Kham ka kerel pes ano raćipe thaj o ćhonut ano rat angle so avel baro thaj šundo Dive e Devlesoro. Thaj ka ovel kaj ka inkalelpe sako savo ka vićini o anav e Devlesoro. Manušalen Izrailjci, šunen o lafija akala: E Isuse Nazarećano, manuše kotar o Devel ćaćavdo maškare tumende zoraja thaj prašukaripnaja thaj semnaja save kerda o Devel prekalo leste maškar tumende, sar so thaj korkore džanen. Akale, po rindosardo phurederipe thaj gndipe e Devlesoro paćamno leljen thaj vastencar bikanunese kovinđen thaj mudarđen. Le o Devel dživdisarinđa, putarindoj kotar o munke e meripnasere, kaj na sine šajine kaj oj le te ićerel. Kaj o David vakerela baše leste: E Devljutne bićhinadine dikhlem angla mande, kaj si mange pe laćhi rig, te na irinape. Odolese lošalisajlo o vilo mlo thaj lošalisajli e ćhib mli, pa vi mo trupo ka arakhavđol ano ađićeripe. Kaj ni ka meke o ođi mlo ano ad, ni ka de o Sumnalo klo te dikhel o ćirnipe. Mothovđan maje droma e dživdipasere, ka phere man lošasa kle mujeja. Manušalen phraljalen, nek ovel mukline muklipnasa te vakerav tumenge baše o najpurano dad o David kaj thaj mulo, thaj parume sine, thaj o limori lesoro si maškar amende đi akava dive. Avune, akana, kaj sine profeto, thaj đanglindoj kaj lese o Devel xapesovljasa xala sovli kaj kotar kućina e kolindar lesere po trupo ka vazdel e Hristo te bešel pe lesiri sumnali bešalutni, angladikhindoj vakerela baše dživdisaripe e Hristosoro te na bi aćavdi e ođi lesiri ane ad, ni o trupo lesoro te dikhel ćirnipe. Akale Isuse dživdisarinđa o Devel, sose sare amen sijam sadikhutne. Laćhe vasteja, akana, e Devlesereja vazdinđa pe, thaj lindoj kotar o Dad dindo lafi e Sumnale Đestar, ćhorđa akava so tumen akana dikhena thaj šunena. Kaj o David ni iklilo po badali, aj korkoro vakerel: Vakerđa o Devljutno e Devljutnese mlese: beš mange pe laćhi rig, đikaj pašljarav e dušmanjen klen baše telalfundo e prenđe klenđe. Zorale, akana, nek džanel sa o kher e Izrailjesoro kaj si thaj Devljutnesa thaj Hristosa kerđa o Devel le, akale Isuse, kole tumen inzarđen. A kana šunđe, dukhavdilo lenge ano vilo thaj phenđe e Petrese thaj avere apostolenge: So te kera, manušalen phraljalen? A o Petar lenge phenđa: Jertinen tumen, thaj te bolel pe sakoj tumendar ano anav e Isus Hristosko aso jertipe e bezehengoro; thaj ka len o dindipe e Sumnale Đesoro. Kaj o dindo lafi si tumenge thaj tumare ćhavorenge thaj baše sa e durumne saven ka vićinel o Devljutno o Devel amaro. Thaj aver bute lafencar sadikhutne, thaj ruđinela len vakerindoj: Ikalen tumen kotar akava rumimo bijanipe. Tegani on kola lošasa lelje o lafi lesoro bolavde pe; thaj pherdilo ane odova dive trujal trin milje ođe. Thaj sine arakhadine ano apostolsko džandipe, thaj ano khatanipe, ano phagipe e maresoro thaj ane ruđutna. A đerdinđa e dar ane sakoj ođi, kaj e apostolja kerde but biažućaripe thaj semne ano Jerusalim. Dar bari sine pe lende savorende. A sare kola paćaje sinele katane thaj sinelen sa khatano. Thaj sa so sinelen thaj e phuv bikinde thaj ulavđe sarijenđe sar kase so valjanđa. Thaj sako dive sinele trajune thaj jekhođine ano hramo, thaj phaglindoj o maro ane khera, lena o hape lošasa thaj ano sadipe e vilesoro, ašarindoj e Devle, thaj sine kamle pe sa o seloro. A o Devljutno sako dive pherela e Khanđirjaće okolen kola inkalena pe. A o Petar thaj o Jovan džana khatane upre ano hramo ano enjato vaxti e ruđutnjakoro. Thaj sinele nesavo manuš langalo kotar o vođi pla dijakoro, save legarena thaj pašljarena sako dive anglal o udar e hramosoro kola vićinenape Prašukar te mangel tikno dindipe kotar odola kola đerdinena ano hramo. Akava dikhindoj e Petre thaj e Jovane kaj mangena te đerdinen ano hramo, rodinđa tikno dindipe. A o Petar dikhindoj pe leste e Jovaneja phenđa: Dikh pe amende! A ov len ćhutune dikhela ađićerindoj kaj olendar neso te lel. A o Petar phenđa: Rup thaj sumnakaj nane man, aj so isi man odova dava tut: Ano anav e Isus Hristosko Nazarećano ušti thaj phir. Thaj lelja le kotar o laćho vas thaj vazdinđa. Thaj sigo zorardile lesere pre thaj o ćanga; Thaj ripindoj terdino, thaj phirđa, thaj đerdinđa lencar ano hramo phirindoj thaj ripindoj thaj ašarindoj e Devle. Thaj dikhla les soro seloro kaj džala thaj ašarela e Devle. A pendžarde le kaj odova sinele so tikne dindipase bešela ke Prašukar udara e hramosere thaj pherdile e biažućeripna, thaj sinele avral peste kotar odova so ulo leja. A đikote o sastardo langalo ićerđape e Petreja thaj e Jovaneja, sa o seloro prašukardo gele premalo lende ano tremo kova vićinđape e Solomonesoro. A dikhindoj odova, o Petar phenđa e selorese: Manušalen Izrailjci, so čudinena tumen akalese ja so dikhena ana mende, sar kaj da amare zoraja ja paćajmaja kerdam kaj akava te phirel. O Devel e Avraamosoro thaj Isakosoro thaj Jakovesoro, o Devel e dadengoro amarengoro, glorisinda e Ćhave ple Isuse, kole tumen dinđen, thaj cidinđen tumen lestar anglal o muj e Pilatesoro kana ov anglalkrisinđa te mukel le. A tumen ćhudlen tumen e Sumnalestar thaj e Hakajutnestar thaj mangljen e manuše mudarutne te den tumenge. A e Čikatutne dživdipasoro mudarden, kole o Devel dživdisarinđa kotar mule, kase amen sijam sadikhutne. Thaj bašo paćape ano anav lesoro, akale kas dikhena thaj penđarena steđinđa o anav lesoro, thaj o paćape savo si lestar dinđale akava sastaripe anglo tumende sarijende. Thaj akana, phraljalen, đanav kaj kotar o biđanglipe odova kerđen, sar thaj tumare phurutne. A o Devel odova so anglamothovđa e mujesa sa ple profetonencar, kaj o Hristos ka mudarđol, ađahar thaj pherđa. Jertinen tumen, akana, thaj mothovđon kaj te khosen tumen kotar o bezeha tumare, te aven kotar o muj e Devljutnese o vaxtija e lafesere, thaj te bićhalel anglal semnosarde tumenge e Hristo Isuse, save valjani te lel o badali đi o vaxti irisaripeso kotar o sa sostar o Devel vakerđa mujenca sa e sumnale profetonenca plengo kotar o dumutanipe. Kaj o Mojsije e dadenge phenđa: O Devljutno Devel tumaro ka vazdel tumenge e Profeto kotar tumare phralja, sar man; le kanden ano sa so god tumenge phenela. Thaj ka ovel da kaj sako ođi, savi na ka kandel odole Profeto, ka xasardol kotar o seloro. A thaj sa o profetija kotar o Samuilo thaj majdur save god vakerđe, ađahar mothovđe akala dive. Tumen sijen ćhave e profetosere thaj xapesovljake savo kerđa o Devel e dadencar tumarencar vakerindoj e Avraamose: Ane kućin kli ka baxtardon sa e manuša ki phuv. Tumenge angluno o Devel vazdindoj ple Ćhave e Isuse, bićhalda le te baxtarel tumen thaj te durarel sakone kotar e džungale kotora tumare. A džikaj on vakerena e selorese, maladile pe lende e rašaja thaj o šerutno e hrameskoro thaj e sadukeja, xoljarindoj so on sikavena e selore thaj mothovena ano Isus dživdisaripe kotar o mule. Thaj vazdinde upre lende o vasta, thaj ćhivđe len ano phandlipe dži sabajle, kaj već sinele raći. A but odolendar save šunđe o lafi paćaje, thaj reslo o đendo e manušengoro trujal e pandž milje. Thaj sine tajsa kaj kidindepe e knezija lengere thaj e phurederutne thaj e lilvarne ano Jerusalim, thaj e Ana anglunorašaj thaj e Kajafa thaj o Jovan thaj o Aleksandar thaj kozom god sine kotar o bijandipe e anglunerašajutnengoro; Thaj thodindoj len ano maškar phućena: Sava zoraja aj ane kasoro anav kerden tumen akava? Tegani o Petar, pherindoj pe Đi Sumnaleskoro, phenđa lenge: Knezija e seloresere thaj phurederutne e Izrailjesere, ako amen avdive phućena bašo laćhoćeripe e nasvale manušese, sar ov sastilo, nek ovel ano džandipe sarijenđe tumenđe, thaj sa e selorese e Izrailjesoro, kaj ano anav e Isus Hristosoro Nazarećano, kole tumen kovinđen ko trušul, kole o Devel vazdinđa kotar o mule, leja terđola akava anglal tumende sasto. Ov si bar kova tumen o duvarđije frdinđen, a savo kerdilo šero kotar o čoši: thaj nane ano ni jekh aver inkaldipe. Kaj nane aver Anav telal o badali dindo e manušenge saveja bi šaj te inkalamen. A dikhindoj o tromalipe e Petresoro thaj e Jovanesoro, thaj džanglindoj kaj si e manuša bisikavde thaj prosta, kerena baripe, a anglapenđarde len thaj kaj sine e Isuseja, aj dikhindoj e sastarde manuše kaj terđola lencar, naštine niso te vakeren opipe. Tegani ćhinade lenge te ikljon avri andral o Sinedrion, ta phućlepe maškaro peste, vakerindoj: So ka kera akale manušenge? Kaj o vasno biaćaripe so kerdilo andar lende angle jakha si sarijenđe save dživdinena ano Jerusalim, thaj našti te ćhuda. Aj te ne bi dur te na buljol po seloro, da ostro len te darava kaj nikase kotar o manuša aj te na vakeren kotar o Anav akava. Thaj akharindoj len ćhinade lenge kaj niso te na vakeren ni te sikaven kotar o Anav e Isusesoro. A o Petar thaj o Jovan irindoj lenge vakerđe: Krisinen, aj li si hakaj anglo Devel te šuna tumen majbut na e Devle? Kaj amen našti a te na vakera odova so dikhljam thaj so šunđam. A on daravindoj olen mekle len, na arakhavindoj niso sar bi len munčinena, thaj odova bašo seloro; kaj sare ašardinena e Devle baše odova so kerdilo pe. Kaj majbut kotar o saranda berša sinele odole manušese, pe kaste kerdilo pe akava čudo sastaripnasoro. A kana len mukle, akala ale pumarenge thaj mothovđe so lenge phenđe e anglunerašaja thaj e phuredera. A kana on šunđe, jekhođine vazdinde po krlo e Devlese thaj phenđe: Devljutneja, tu kova kerdan o badali thaj e phuv thaj o derav thaj sa so si ane lende; Tu e Davidesere mujeja, kandino klo, phenđan: Sose uštena o nađandedevlesere, thaj e selore dena godi e podiline šeja? Uštine e thagara e phuvljakere thaj e knezija ćedindepe khatane po Devljutno thaj po Makhaljutno lesoro. Kaj hemčaće ćedisajle ane akava foro pe Sumnalo Ćhavo klo o Isus, kole makhljan, o Irod thaj o Pontijsko Pilat e nađangledevleserencar thaj e bijamnencar e Izrailjesere, te keren odova so o vas klo thaj o lafi klo anglal ćhinada te ovel. Thaj akana, Devljutneja, dikh ko lengere darajba, thaj de kle kandinenge kaj sa sakoj tromalipnasa te vakeren o lafi klo, lunđarindoj thaj tu o vas klo po sastaripe, te oven semne thaj e prašukaripa anaveja e kle Sumnale Ćhaveja e Isuseja. Thaj sar on ruđindepe e Devlese, izdraja o than kote sine ćedime, thaj pherdile savore Đi Sumnalesoro, thaj vakerena o lafi e Devlesoro tromalipnaja. A ano seloro kola paćaje sine jekh vilo thaj jekh ođi; thaj nijekh na vakerela baše barvalipe plo kaj si lesoro, aj lenge sa sine khatano. Thaj e apostolja bare zorasa dena sadićhipe kotar o dživdisaripe e Devljutnesoro e Isus Hristosoro, thaj kovlipe baro sine pe lende sarijende. Kaj nikoj maškaro lende na sine le ano ćororipe, kaj savore save sinelen umalja ja khera, bikinena thaj anena e love kotar o biknipe, thaj mekena anglal o pre e apostolengere; thaj delape sakonese premalo trubupe savo sinele, a o Josija, akhardo kotar o apostoli Varnava, so značil: ćhavo utjehako, o Levit, bijando kotar o Kipar, sinele le umalin, thaj bikindoj la anđa e love thaj meklja anglal o pre e apostolengere. A nesavo manuš, po anav Ananija, pla romnjaja e Sapfira bikinda o barvalipe, thaj garavđa kotar o love džanglipnaja thaj pla romnjaja, thaj anindoj jekh kotor muklja anglal o pre e apostolengere. A o Petar phenđa: Ananija, sose pherđa o beng o vilo klo te xoxave e Đese Sumnalese thaj garave kotar o love so leljan baše umalin? Kana sinele ane tute, na sinele li kli? Thaj kana bikninđan la, na sinele li ane kle vasta? Sose asavko šej ćhutan ano vilo klo? Na xoxavdan e manušenge aj e Devlese. A kana šunđa o Ananija akala lafija, pelo thaj mulo; thaj bari dar lelja sarijen kola šunđe akava. Thaj uštindoj o terne lelje le thaj ikaldele ta praxosardole. A kana nakhlo trujal e trin vaxtija, đerdinđa vi e romni lesiri ni džanglindoj so kerdilo. A o Petar la phućlja: Vaker mange da li baše edobor bikninđen e umalin? A oj phenđa: Va, baše edobor. A o Petar lake phenđa: Sose kerden lafi te zumaven o Đi e Devljutnesoro? Dikh, o pre okolengere save kle rome praxonđe anglal o udara si, thaj tut ka ikalen. Thaj sigo peli paše pre lesere thaj muli. A o terne đerdindoj andre arakhlela muli, ta ikaldela thaj praxonđela ko rom lakoro. Thaj bari dar lelja sa e Khanđirja thaj sarijen save šunđe akava. A vastencar e apostolengerencar sinele bute semne thaj biaćaripa ano seloro; thaj sinele savore jekhođine ano hramo e Solomonesoro. Kotar avera pa nikoj na tromaja te avel paše lende, aj len o seloro ašarinela. Thaj sa pobuter bijanđona odola kola paćana ano Devljutno, but manuša thaj džuvlja, ađahar kaj ko droma ikalena e nasvalen thaj pašljarena pe thana thaj inđarutna, te bi kana nakhela o Petar bar e ućhalin lesiri ućhalinela đikas lendar. A resena bi but selora andar e trujalune fora ano Jerusalim anindoj e nasvalen thaj katar e džungale ođe mučime, thaj savore sastarđona. Aj uštino o anglunorašaj thaj savore save sinele lesa, e sekta sadukejesiri, thaj pherdile baripnasa, thaj vazdinđe e vasta ple pe apostolja, thaj frdinde len ano sakovnesoro phandlipe. A o phakalo e Devljutnesoro putarđa raćasa o udar e phandipasoro, ikalđa len thaj phenđa: Džan thaj terđoven ano hramo pa vakeren e selorese sa e lafija akale đivdipnastar. A on, šundoj odova, đerdinde sabale ano hramo, thaj sikavđe. Kana pak avilo o anglunorašaj thaj save sinele lesa, akharde o Sinedrion thaj sa e ćhaven e phurederutnen e Izrailjiskere, thaj bićhalde len ano phandlipe kaj akalen te anen. A kana o kandine džele thaj na arakhle len ano phandlipe, tegani irinđepe thaj mothovđe, vakerindoj: O phandlipe arakhljam zorale phandli thaj e arakhavnen kote terdžovena anglal o udara, aj kana pravđam, andre ni jekhe ni arakhljam. A kana šunđe akala lafija o rašaj thaj o šerutno e hramesoro thaj e anglunerašaja sinele dogođenca so odova kerdilo lenca. A nesavo alo thaj mothovđa lenge vakerindoj: Eke okola manuša so frdinđen len ano phandlipe terdžovena ano hramo thaj sikavena e selore. Tegani gelo o šerutno e raklencar thaj anđa len na zoraja; kaj so darandile e selorestar te na mudaren len barencar. A kana anđe len, ćhute len anglal o Sinedrion, thaj phućlja len o anglunorašaj vakerindoj: Na li tumenge oštro ćhinavđam kaj te na sikaven kotar o Anav akava? A tumen eke pherđen o Jerusalim tumare sikavipnasa, thaj mangena te frden pe amende o rat akale Manušesoro. A o Petar thaj e apostolija irisarindoj vakerde: E Devlese valjani te mekamen tele majbut kotar e manušenge. O Devel e dadengoro amarengoro dživdinđa e Isuse, save tumen mudarđen umblavindoj ko kaš le o Devel ple laćhe vasteja vazdinđa baše Čikatutnese thaj Ikalutnese, kaj dinđa e Izrailjese jertipe thaj jertisaripe e bezehengoro. Thaj amen sijam lesere sadikhutne akale lafengoro, thaj o Sumnalo Đi save o Devel dinđa odolenge kola olese mekenpe tele. A kana on odova šunđe, nahudisajle but thaj kerena lafi te mudaren len. Aj uštino ano Sinedrion jek farisej, po anav Gamalilo, kanunutno, paćavdo kotar sa o seloro, thaj ćhinada kaj e apostolen hari duralen avrijal, ta lenge phenđa: Manušalen Izrailjci, laćhe arakhen so ka keren akale manušencar. Kaj anglal akala dive uštino o Tevda vakerindoj kaj si ov nesavo baro; uzalo leste aćhile manuša đenindoj trujal e štaršel; ov sine mudardo, thaj savore save šunena le ulavdile thaj pele. Pale akava uštino o Juda Galilejco ane dive hramopase thaj crdinđa buten seloren pala peste; ov ađahar mudardilo thaj savore save šunena le ulavde pe. Thaj akana tumenge phenav: Nakhen tumen akale manušendar thaj meken len: aj te sinele kotar e manuša akaja gnd ja akava kotor, ka perel; No te si katar o Devel, nakašti le te peraven, kaj sar vi e develmarutne na arakhen. Tegani le ašunde, thaj akharindoj e apostolen marde len thaj ćhinavde lenge te vakeren kotar o Anav e Isusesoro, thaj mukle len. A akala teg gele peske andar o Sinedrion lošalindoj so paćavisajle te legaren e ladž bašo Anav lesoro. Thaj sako dive ano hramo thaj ko khera na ćhinavde te sikaven thaj te vakeren o evangelium kotar o Isus Hrist. Thaj ane akala dive, kana butisavona e sikavne, vazdinđe e jelinistija vika pe Jevreja so lengere phivlja bisterđona kana ulavđola dindipe sakoj dive. Tegani e Dešudujore, akharindoj buten sikavnen, phenđe: Na miazinel amenge kaj meklindoj o lafi e Devlesoro te kanda trujal e astalja. Roden, akana, phraljalen maškar tumende efta mothovdine manuša, pherde Đi Sumnalesoro thaj džanipesoro, saven ka ćhuva ane akaja sevipeni. A amen ane ruđutni thaj ane sevipeni e lafesiri grižune ka aćhova. Thaj o lafi akava sine ćajardo sa e selorese. Thaj alonđe e Stefane, manuše pherdo paćamnasa thaj Đesa Sumnalesa, thaj e Filipe, thaj e Prohore, thaj e Nikanore, thaj e Timone, thaj e Parmene, thaj e Nikola prozelito kotar Antiohija. Akalen ćhute anglal o apostolja thaj on ruđindoj e Devlese ćhute e vasta pe lende. Thaj o lafi e Devlesoro barjolape thaj but butisavola o đendo e sikavnengoro ano Jerusalim, thaj baro butipe e rašajengoro kandinena pe e paćapnase. A o Stefan pherdo paćape thaj zor kerela semne thaj biaćarune bare ano seloro. Tegani uštine nesave kotar e sinagoga savi vičini pe Libertinakiri, Karinskakiri thaj Aleksandrijakiri thaj kotar odola andar e Kilakija thaj Azija, thaj ćhingarena pe e Stefaneja, thaj naštisarde te opipeaćhen e đanipeske thaj đese saveja vakerela. Tegani telalćhute manušen save phenđe: Šunđam le kaj vakerel džungale lafija po Mojsija thaj po Devel. Thaj vazdinđe o seloro thaj e phurederutnen thaj e lilvarnen, thaj pele thaj astardele, thaj andele anglal o Sinedrion. Ta inkalde xoxamne sadikhutnen save vakerena: Akava manuš na aćhola te vakerel džungale pe akava sumnalo than thaj po Kanuni. Kaj šunđam le kaj vakerel: Akava Isus Nazarećani ka peravel akava than thaj ka arlisarel e adetija kola amenge dinđa o Mojsije. Thaj dikhindoj pe leste sare save bešena ano Sinedrion, dikhle o muj lesoro sar o muj e phakalesoro. A o anglunorašaj phenđa: Aj li odova ađahar? A ov phenđa: Manušalen phraljalen thaj dadalen, šunen! O Devel šundipasoro mothodilo amare dadese e Avraamese kana sine ane Mesopotamija, angleder so ka avel ano Haran. Thaj phenđa lese: Ikljov kotar e phuv kli thaj kotar o pašutne kle thaj kotar e dadesoro kher lesoro, thaj ava ane phuv savi ka mothovav tuke. Tegani iklilo kotar e phuv Haldejakiri, thaj avilo ano Haran; thaj odothar, palo meripe lesere dadesoro, anda le ane akaja phuv ane savi tumen akana dživdinen. Thaj ni dinđa le aćavdipe ane late ni jek pro, thaj dinđa o lafi kaj ka dela lese thaj olesera kućinake palo leste, đikaj ole pana nasinele ćhavoro. A o Devel phenđa ađahar: E kućin kli ka ovel avutne ane phuv avresiri thaj ka phanden len thaj ka džungaven len štaršel berša. Thaj odole selorese kase ka robinen me ka krisinav, phenđa o Devel; thaj pe odova ka ikljon, thaj ka kanden mange ko akava than. Thaj dinđa le xapesovli e sunetisese, thaj ađahar bijanđa e Isake, thaj sunetinđale ano ovtoto dive; thaj o Isak e Jakove, thaj Jakov e dešuduj dumutanedaden. A e dumutanedada bićaljarde e Josifese thaj bikinde le ano Egipat; thaj o Devel sine oleja, thaj ikalda le kotar sa e belava lesere, thaj dinđa le kovlipe thaj barođanipe anglal o Faraon, thagar egipateskoro, thaj ćhuta le šerutno upral o Egipat thaj upro sa o kher lesoro. Thaj avili e bokh pe sa e phuv Egipatesiri thaj Hanaanesiri thaj belava bari, thaj na arakhena xape o dada amare. A o Jakov ašundoj kaj isi điv ano Egipat bićhalda angluno drom e daden amaren. Thaj kana avile o dujto drom, mothovđa pe o Josif ple phraljenge, thaj o pašutne e Josifesere ule penđarde e Faraonese. A o Josif bićhalda thaj akharđa ple dade e Jakove thaj sa e bijandina pla, eftavardeš thaj panđ ođe. Thaj ulilo o Jakov ano Egipat, thaj agorinđa, ov thaj o dada amare; Thaj ingarde len ano Sihem, thaj pašljarde ano limori kova ćinđa o Avraam baše love kotar o ćhave e Emora Sihemljanina. Thaj sar avela o pašipe vakti e dinde lafesoro baš savese o Devel xala sovli e Avraamese, o seloro barilo thaj butisajlo ano Egipat. Đikaj na alo aver thagar upral o Egipat, savo na džanđa e Josife. Akava kerda bižajune amare pašutnencar, mučisarda e daden amaren te frden e ćhavoren plen te na aćhoven ano dživdipe. Ko odova vakti bijandilo o Mojsije thaj sine khamlo e Devlese, thaj sine trin ćhon barjardo ano kher lesere dadesoro. A kana sine le frdimo, lelja le e ćhaj Faraonesiri thaj barjarđa le ćhavese baše pese. Thaj siklilo o Mojsije pe sa egipatesoro džanipe, thaj sine zoralo ane lafija thaj ane kotora. A kana lese pherđalape o sarandato berš, alo lese ko vilo te dikhel e phraljen plen, ćhaven e Izrailjesere. Thaj dikhindoj nekas kaj kerela pe lese bičaćipe, lelja le ano arakhavdipe thaj irisarela e crdutnesoro, mudarindoj e Egipćane. A gindinela ov kaj e phralja lesere haljovena kaj lenge o Devel lesere vasteja dela ikaldipe; aj on na haljovđe. A tajsa dive mothovdilo maškaro lende đikote marena pe thaj aćhilo te baraštinel len vakerindoj: Manušalen, tumen sijen phralja, sose kerena bičaćipe jekh avrese? A odova so kerela bičaćipe e majpašutnese bucinđa le vakerindoj: Ko tut ćhuta bašo phureder thaj krisari upral amende? Ja mange thaj man te mudare sar so erati mudarđan e Egipćane? A o Mojsije naštino baše akala lafija, thaj kerdilo avutno ane phuv Madijamskiri, kote bijanđa dujen ćhaven. Thaj kana pherdilo saranda berša, sikavdilo lese ane drmina e Sinajakiri plajin o Phakalo e Devljutnesoro ane jagakiri bari jag ane kalin. A kana o Mojsije dikhlja, prašukarela pe e dikhipnase. Kana pa ov alo paše te dikhel, sine krlo e Devljutnesoro lese: Me sem Devel kle dadengoro, Devel e Avraamesoro thaj Devel e Isakosoro thaj Devel e Jakovesoro. A o Mojsije darandilo thaj na tromanđa te dikhel. A o Devljutno phenđa lese: Huljav o pođipe kotar o pre kle, kaj o than pe savo terdžoveja si sumnali phuv. Dikhindoj dikhljem e munka mle seloresiri savo si ano Egipat, thaj šunđum lengoro honđipe, thaj hulilem len te inkalav; thaj akana phir kaj te bićhalav tut ano Egipat. Akale Mojsija, savestar vazdinde pe vasta vakerindoj: Ko tut ćhuta bašo phureder thaj krisari? – odole o Devel bićhalđa bašo phureder thaj inkalutno – e Phakalesere vasteja savo lese sikavdilo ane kalin. Akava inkalda len kerindoj biaćaripa thaj semne ani phuv Egipatesiri thaj ano Lolo derav thaj ane drmina saranda berša. Akava si o Mojsije kova phenđa e ćhavenge Izrailjeserenge: O Devljutno Devel tumaro ka vazdel tumenge e Profeto kotar e phralja tumare, sar man: le te ašunen. Akava si odova so sinele ani khanđiri ane drmina e Phakaleja, savo lese vakerđa pe plain e Sinajasiri, thaj dadenca amarencar; savo lelja lafija dživde, kaj amenge te del len; Kole na mangle te ašunen e dada amare, aj le frdinde, thaj irinde pe ple vilea karing o Egipat. Vakerindoj e Aronese: Ker amenge devela save ka džan anglal amende, kaj akale Mojsijea, savo amen ikalđa kotar e phuv Egipatesiri, na džana so kerdilo lese. Thaj ane odola dive kerde guruvore thaj pašljarde viktima e idolese, thaj lošalisajle e kotorenge ple vastengere. A o Devel irinđape kotar lende thaj dija len te kanden e urumnakere badalese, sar so hramome ano lil e Profetosoro: Va so ćhindo thaj e viktime pašljarden mange baše saranda berša ane drmina, kher Izrailjesoro? Thaj lijen o šatori e Molohovesoro, thaj e čeren tumare devlesiri e Remfanesiri, e barale manušen save kerden kaj lenge pe koča te peren; thaj ka durarav tumen majdur kotar o Vaviloni. E dada amare sinelen šatori dikhejakengo ane drmina, sar so čhinavđa Odova so vakerel e Mojsijese te kerel le pe misal savo sine dikhlja; Le thaj palaleste amare dada anđe e Isus Navinesa ko astaripe phuvljakoro e nađangledevlengera, saven cidinđa o Devel anglal o muja amare dadengerendar; sa đi o dive e Davidesere, savo araklja kovlipe anglal o Devel thaj ruđinđa te arakhel kher e Jakovesere Devlese. A o Solomon olese kerđa kher. Aj o Saupruno na dživdinel ane vastencakerde hramija, sar so vakerel o profeto: O badali si mange skamin, a e phuv telalopre mle prenge; savo kher mange ka keren, vakerel o Devljutno; ja savo si o than baše mlo thanardipe? Na li o vas mlo kerda sa akava? Zoralemenjakere thaj bisunetime vileja thaj kanencar, tumen sajekh opipesajvon e Đese Sumnalese; sar e dada tumare, ađahar vi tumen. Kas kotar e profetija na uspudinđe e dada tumare? Thaj mudarđe odolen save anglalmothode o avipe e Hakajutnesoro, save akana tumen e avralćhutne thaj mudarutne kerdilen, tumen save leljen o Kanuni ćhinadipenca e phakalengeren, thaj na inkerden. Kana akava šunđe, thajardile pe but ane vile ple, thaj krcinena dandencar pe leste. A ov, pherdo Đesa Sumnalesa, dikhlja po badali thaj dikhlja e glorija e Devlesiri thaj e Isuse kaj terdžola pe laćhi rig e Devlese, thaj phenđa: Ake dikhav o badali putardo thaj e Ćhave Manušesoro kaj aćhel pe laćhi rig e Devlese. A on dindoj vika kotar o krlo phandle e kana ple, thaj rupuzisarde jekhođine pe leste, ta frdindoj le avri oto foro aćhile te frden le barencar. A e dićhutne ćhute e fostanja ple ke pre e ternese po anav Savle, thaj frdinđe barencar e Stefane, savo ruđinđape e Devlese thaj vakerela: Devljutneja Isuse, le o đi mlo! Teg pelo pe koča thaj dija vika kotar o krlo: Devljutneja, ma te le lenge o bezeh akava! Thaj akava vakerindoj, mulo. A o Savle mukljarisarda lesoro mudaripe. A ane odova dive kerdilo baro prastavipe pe Jerusalimesiri Khanđiri, thaj savore ćhordardile pe agora judejengere thaj samarijengere, semo e apostolija. A manuša e devlesere parunde e Stefane thaj kerde upral leste baro rovipe. A o Savle drminela e Khangiri, đerdindoj ane khera thaj zoraja ingarindoj e manušen thaj džuvljen dela len ano phandipe. Maškarodova, odola so ćhordardile nakhena thaj mothovena o lafi. A o Filip ulindoj ano foro samarijengoro vakerela lenge e Hristostar. A o seloro arakhela pe jekhođune pe odova so lenge vakerela o Filip, šundoj thaj dikhindoj e semne save kerela; Kaj o đungale đi bara vikaja ikljovena andral butendar save sine len, thaj but linde thaj bange sastile. Thaj sine baro lošalipe ano foro odova. A sine angleder ano foro nesavo manuš, po anav Simon, savo drabarela thaj anela ano biaćaripe o seloro samarijengoro, vakerindoj kaj si ov nesavo baro. Le savore samasa šunena, thaj tikoro thaj baro, vakerindoj: Akava si bari zor e Devlesiri. A odolese šunena le samasa so len but vakti drabaripnasa prašukarela. No kana paćaje e Filipe savo mothovela o evangelium kotar o Thagaripe Devlesoro thaj kotar o anav e Isus Hristosoro, bolena pe thaj e manuša thaj e džuvlja. Tegani thaj korkoro o Simon paćaja thaj bolindoj pe aćhilo koro Filip; thaj dikhindoj semne thaj biaćaripa bare kaj kerenape, prašukarela pe but. A kana šunđe e apostolja ano Jerusalim kaj e Samarija lija o lafi e Devlesoro, bićhalđe lenge e Petre thaj e Jovane. Akala ulindoj ruđindepe e Devlese base lenge te len o Đi Sumnalesoro; Kaj pana ni pe jekh kotar lende na sine te uljel, thaj sinele semo boldine ano anav e Devljutnesoro o Isus. Tegani pašljarde e vasta pe lende, thaj on lelje o Đi Sumnalesoro. A kana dikhlja o Simon kaj pašljaripnasa e apostolengere vastencar delape o Đi Sumnalo, anđa lenge love, vakerindoj: Doden thaj mange odoja zor kaj kana ka pašljarav mle vasta pe nekaste te lel o Đi Sumnalesoro. A o Petar lese phenđa: E love kle tua te oven ko mudaripe, so gindinđan kaj o dindipe e Devlesoro šaj te lel pe baš o love. Nane tuke ćerdipna ni ućerdipna ano akava lafi, kaj o vilo klo nane čaćimo anglo Devel. Odolese jerti tut kotar o đungalipe klo, thaj ruđisav e Devlese kaj bi tuke jertilpe e gind kle vilesiri; Kaj dikhav tut kaj sijan ane ćerki xoli thaj ane verige bihakajimasere. A o Simon irisarindoj phenđa: Ruđinen tumen baše mande e Devljutnese te na avel pe mande khanći kotar odova so vakerden. A on, jaćhencadikhindoj thaj vakerindoj o lafi e Devljutnesoro, irindepe ano Jerusalim, thaj ane but samarijska gava vakerendoj o evangelium. A o phakalo e Devljutnesoro phenđa e Filipese vakerindoj: Ušti thaj dža karing o jugo po drom savo uljel kotar o Jerusalim ane Gaza; ov si pusto. Thaj uštindoj lijape. Thaj dikh, manuš Etiopljano, ćišlo, aristokrato e Kandakijakoro, etiopesiri thagarni, so sine upral sa lakere molde šeja, savo sine alo ano Jerusalim sar paćavutno, ta irini pe, thaj bešindoj ple vordende drabarela profeto Isaija. A o Đi phenđa e Filipese: Paše ov thaj lepin tut odole vordende. A o Filip prastandoj šunđa le kaj drabarel profeto Isaija, thaj phenđa: Da li haljovea odova so drabare? A ov phenđa: Sar bi šaj ako man ko na sikavel? Thaj ruđinđa e Filipe te ukljel thaj te bešel oleja. A o than kotar o Lil savo drabarela sine akava: Sar bakri ko ćhinipe legarđa pe, thaj sar bakroro aćhuno anglal okova savo le kačarela, ađahar na pravđa o muj plo. Ane lesoro teljardipe ćhinavđape pe o kris lesoro. A o bijanipe lesoro ko ka mothovel? Kaj lela pe kotar e phuv o dživdipe lesoro. Tegani o ćišlo irinđa thaj phenđa e Filipese: Ruđinav tut, baše kase akava vakerel o profeto? Baše pese ja baše nekase avrese? A o Filip pravdindoj o muj plo, thaj poćindoj kotar o Lil akava, vakerđa lese o evangelium kotar o Isus. Sar eke džana dromea, avile pe nesavo pani, thaj phenđa o ćišlo: Ake pani, so man aćhavela te bolav man? A o Filip lese phenđa: Te paćajan kotar sa o vilo, šaj. A ov irisarindoj phenđa: Paćav kaj si o Isus Hristos Ćhavo e Devlesoro. Thaj vakerđa te aćhon o vorda, thaj ulile solduj ano pani, vi o Filip thaj o ćišlo, thaj bolavda le. A kana iklile kotar o pani o Đi (Sumnalo pelo ko ćišlo, a o phakalo) e Devljutnesoro lelja e Filipe, thaj maj ni diklja le o ćišlo, aj gelo ple dromea lošalindoj pe. A o Filip arakhavdilo ano Azoto; thaj nakhljindoj vakerela o evangelium sa e foronenge, đikaj na alo ane Kesarija. A o Savle, pana honđindoj daripnasa thaj mudaripnasa pe sikavde e Devljutnesere, avilo e anglunerašajese, thaj rodinđa kotar leste bićhalutne ano Damask baše sinagoge, kaj te arakhlja nekas savo si kotar akava Drom, thaj e manušen thaj e džuvljen, phandle te anel ano Jerusalim. A kana dromarđa thaj alo paše o Damask, kotarjekh strefinđa le o rošipe kotar o badali, thaj perindoj ki phuv šunđa o krlo kaj lese vakerel: Savle, Savle, sose prastave man? A ov phenđa: Ko sijan tu, Devljutneja? A o Devljutno phenđa: Me sem o Isus save tu prastavea, phare si tuke opipe e posavdipna te prohodi tu. A ov tresindoj kotar e dar phenđa: Devljutneja, so ka ćerav? A o Devljutno lese phenđa: aj ušti thaj đerdin ano foro, ta ka phenel pe tuke so valjani te ćere. A e manuša save dromarena leja aćhile kašuke, šundoj o krlo, a nikas na dikhindoj. A o Savle uštinđa kotar e phuv thaj ple phravde jaćhencar nikas na dikhlja. On leje le oto vas thaj dinde ano Damask. Thaj sine trin dive kororo, thaj ni halja, ni pilja. A ano Damask sine jekh sikavdo, po anav Ananija, thaj phenđa lese o Devljutno ano dikhipe: Ananija! A ov phenđa: Ake me, Devljutneja! A o Devljutno lese: Ušti thaj dža po dromoro savo akharel pe Prava, thaj rode ano kher e Judesoro po anav Savle Taršanino; kaj dikh, ov ruđinel pe e Devlese, thaj dikhlja ano dikhipe e manuše, po anav Ananija, kaj đerdinđa thaj ćhuta o vas pe leste te dikhel. A o Ananija irinđa: Devljutneja, šunđum butendar baše odova manuš kobor džungalipa kerđa kle sumnalenge ano Jerusalim. Thaj akate isile zor kotar o anglunorašaja te phandel sarijen save vičinena o Anav, klo. A o Devljutno lese phenđa: Dža, kaj si mange ov vaso alosardo, te ikalel o Anav mlo anglal o biđangledevlesere thaj thagara thaj ćhave Izrailjesere; A me ka sikavav lese kobor valjani te mudarđol baš o Anav mlo. Thaj gelo o Ananija, thaj đerdinđa ano kher, thaj thodindoj e vasta pe leste phenđa: Savle phrala, o Devljutno Isus savo tuće arakhadilo po drom koleja dželjan, bićhalda man te dikhe thaj te pherđove Đi Sumnalesoro. Thaj sigo pelo katar e jakha lesere sar solca, thaj dikhlja, thaj uštindoj bolela pe; Thaj lindoj o xape, zoralilo. Thaj sine o Savle nekobor dive e sikavdencar save sine le ano Damask. Thaj sigo ane sinagoge mothovela e Isusestar kaj si ov Ćhavo e Devlesoro. A sare save šunena čudinena pe thaj vakerena: Nane li akava odova so ano Jerusalim mučinela odolen save vičinena o Anav akava, thaj na alo li akate baš odolese kaj len phandle te legarel e anglunerašajenge? A o Savle sa pobuder zorarolja, ta hulainela e Judejcen save dživdinena ano Damask, mothovindoj kaj si akava o Hristos. A kana nakhine phobuter dive, kerde lafi o Judejura le te mudaren. Aj o Savle dođanda baše lengoro garavdipe; a on arakhena e udara dive thaj rat te bi le mudarena; No e sikavde lije le raćate thaj muklele prekal o duvari ane kotarica. Kana pak avilo o Savle ano Jerusalim, zumavela pe kaj te ćhivelpe e sikavdencar; thaj sare darana lestar, na paćavindoj kaj si sikavdo. A o Varnava lelja le thaj anđa le e apostolenge, thaj mothovđa lenge sar ko drom dikhlja e Devljutne thaj sar lese vakerela, thaj sar ano Damask tromane vakerela ano anav e Isusesoro. Thaj khatane lencar đerdini ano Jerusalim thaj ikljola thaj mukljune vakerela ano anav e Devljutnesoro e Isusesoro, thaj vakerela thaj hala pe e jelinistencar, a on dikhle le te mudaren. A kana o phralja akava džangljarde ande le ane Kesarija thaj prohodisarde le ano Tars. Maškarodova, e Khanđirja pe sa e Judeja thaj Galileja thaj Samarija dživdinde ano mirnipe anglisarindoj thaj phirindoj ane dar e Devljutnesiri, thaj butisavona zoralipnasa e Đe Sumnalea. Thaj kerdilo pe kaj o Petar dikhindoj sarijen, ulilo thaj e sumnalenge save dživdinena ane Lida. Thaj arakhlja odorin jekhe manuše po anav Eneja, savo ake ovto berša pašljola po pato, kaj sinele leljačerdo. Thaj phenđa lese o Petar: Eneja, sastarela tut o Isus Hristos; ušti thaj buljar korkoro tuke! Thaj sigo uštilo. Thaj dikhle le savore save dživdinena ano Lida thaj Sarona, thaj priminde e Devljutne. A ane Jopa sinele jekh sikavni, po anav Tavita, so po nakhavdipe semnol Kaprolka, thaj oj sinele pherdi laćhe kotora thaj davipna save kerđa. Thaj kerdilo pe ane odola dive kaj oj te nasvaljol thaj te merel; tegani nanđardola thaj pašljardela ane upruni soba. Thaj avune kaj e Lida si paše e Jopa, e sikavde šundoj kaj o Petar si ane late, bićhalde dujen manušen ruđindoj le kaj bi lunđaripnasoro avel dži lende. A o Petar uštindoj dželo lencar; thaj kana avilo, legarde le ane upruni soba thaj ćedindepe trujal leste sa e phivlja rovindoj thaj mothovindoj e gada thaj o fostanja so kerda e Kaprolka džikote sinele lencar. A o Petar uspudindoj sarijen avri, pelo pe kočija thaj ruđinđa pe e Devlese, thaj irindoj pe e trupose phenđa: Tavito, ušti! A oj phravđa e jakha ple, thaj dikhindoj e Petre uštinđa thaj bešli. Ov ta dindoj lake o vas vazdinđa la; thaj vičindoj e sumnale phivljen sikavđa la dživdi. Thaj akava šunđardape pe sa e Jopa, thaj but džene paćaje ano Devljutno. A ov aćhilo but dive ane Jopa ke nesavo Simon morćhari. A ane Kesarija nesavo manuš, po anav Kornilija, kapetano e četako savi vičinđa pe Italijanengo, devlikano thaj devlestardarutno pe sa ple khereja, savo kerela bute davipna e selorese thaj ruđinela pes sajekh e Devlese; Dikhlja po hemčaćipe ano dikhipe, trujal enjato vaxti e divesoro, e phakale e Devlesere kaj avilo leste thaj phenđa lese: Kornilija! A ov, dikhindoj pe leste thaj darandoj, phenđa: So si, Devljutneja? A ov lese phenđa: E ruđutna kle thaj dindipa kle iklile po dinipe gođi anglal o Devel. Thaj akana bićhal e manušen ane Jopa thaj vičin e Simone vičime Petar; Ov si gosto ke nesavo Simon morćhari, savesoro kher si ko derav. (Ov tuke ka phenel o lafia savencar ka inkaletu tu thaj sa o kher klo). A kana dželo o phakalo savo vakerđa e Kornilijase, ov vičinđa dujen kotar o kher plo thaj jekhe devlikane urumne odolendar save sine sajekh uzalo leste, thaj phenindoj lenge sa bićhalda len ane Jopa. A tajsadive đikaj on dromarena thaj avena po paše e forose, iklilo o Petar ko vorto čitlo e kheresoro te ruđinel pe e Devlese trujal o šovto vaxti. Thaj bokhalilo, thaj manglja te xal; a kana lese on ćeravde, avilo ane leste gindisaripe, thaj dikhlja o badali phravdo thaj vaso nesavo kaj uljel pe leste, sar baro poxtano phandlo pe štar agora thaj mekela pe ki phuv; Ane savo sinele sa e štareprenrengere dživdinutna pe phuv thaj divo dživdinutna thaj dživdinutna so vucinenpe pe phuv thaj čiriklja e badalesere. Thaj avilo lese krlo: Ušti, Petre, ćhin thaj xa. A o Petar phenđa: Nisar, Devljutneja, kaj nisar ni xalem bilo so đungale ja bikhoslo. Thaj palem krlo lese po dujto drom: So o Devel khoslja, tu ma pogani! Thaj akava sine trin droma, thaj o vaso palem vazdisajlo po badali. A đikaj o Petar ana peste phućela pe so bi ovela o dikhipe savo dikhlja, thaj dikh, e manuša bićhalde kotar o Kornilija, phućindoj baš o kher e Simonesoro, aćhile anglal o udar, thaj akharindoj phućle da li gostini akate o Simon vičimo Petar. Thaj đikaj o Petar gindisarda kotar o dićhipe, phenđa lese o Đi: Ake trin manuša roden tut; Aj ušti thaj uli thaj dža lencar na gindindoj khanći, kaj me len bićhaldem. A o Petar uljindoj e manušenge bićhalde lese kotar o Kornilija phenđa: Ake, me sem odova kas roden. Baše soste aljen? A on phenđe: o Kornilije kapetano, manuš čaćuno thaj devlestardarutno, pe šukar krlo ke sa o seloro judejengoro, lelja o vakeripe kotar o phakalo sumnalo te akharel tut ane plo kher thaj te šunel e lafija tutar. Tegani len vičinđa andre thaj dostinđa. A tajsadive uštindoj leljape lencar, thaj nesave kotar e phralja save sinele andar e Jopa leljepe leja. Thaj tajsadive đerdinde ane Kesarija. A o Kornilije len ađićerda akharindoj e familija pla thaj e pašutne amalen. A kana o Petar đerdinđa, reslja le o Kornilije, thaj perindoj anglal o pre lesere teljardilo pe. A o Petar vazdinđa le vakerindoj: Ušti, thaj me sem semo manuš thaj leja vakerindoj đerdinđa, thaj arakhlja buten save sinele ćedime, thaj phenđa lenge: Tumen đanen sar si ćhinado e manušese Judejcose te amalinel pe ja te avel avrafamilijatar; aj mange o Devel sikavđa kaj ni jekhe manuše na valjani te vičini pe pogano ja bikhoslo. Odolese thaj avilem bi vakeripnaso sar sem vičimo. Phućav tumen, akana, baše soste vikinden man? A o Kornilije phenđa: Angla o štar dive me postinđum dži akava časo, thaj ane enjato časo sema pe ruđutni ano kher mlo; thaj dikh, o manuš aćhilo angla mande ano fostani strefalo, thaj phenđa: Kornilije, šundili e ruđutni kli thaj o dindipa kle sinele mothovinde anglal o Devel. Bićhal, akana, ane Jopa thaj vičin e Simone savo si vičime Petar; ov dostinel ano kher e Simonosoro morćari uzalo derav; kana ov avel, ka phenel tuke. Teg sigate bićhaldem pe tute, thaj tu laćhe kerdan so aljan. Akana, eke sare amen terđova anglo Devel te šuna sa so tuke kotar o Devel ćhinavdape. A o Petar phravdindoj po muj phenđa: Emčaće dikhava kaj o Devel na dikhela ko si ko, aj si ano sakoj seloro khamlo lese odova savo lestar darala thaj kerel o čaćipe. O lafi savo bićhalđa e ćhavenge e Izrailjesere, lošalenevindoj o šandipe andar o Isus Hrist: Ov si Devljutno sarijengo. Tumen džanen o lafi savo kerdilo pe sa e Judeja, poćindoj kotar Galileja, palo bolipe savo vakerđa o Jovan: E Isuse andar o Nazaret, sar le makhlja o Devel Đesa Sumnalesa thaj zorasa, savo nakhlindoj kerela laćhipe thaj sastarindoj sa e crdinen kotar o beng, kaj o Devel sinele leja. Thaj amen sijam sadikhutne kotar sa so kerda ane phuv Judejengiri thaj ano Jerusalim. Le thaj mudarde, umblavindoj ko kaš. Akale o Devel dživdinisarda o trito dive, thaj kerda kaj ov te mothovel pe, na sa e selorese, aj amenge, sadikhutnenge anglal alosarde kotar o Devel, save lesa xaljam thaj piljam palo lesoro dživdinisaripe andar o mule. Thaj ćhinavda amenge te vakera e selorese thaj te mothova kaj si ov birimo kotar o Devel Krisari e dživdenge thaj mulenge. Baše leste mothovena sa e profetija kaj lesere Anaveja ka len jertipe e bezehengoro sako ko paćal ano leste. Đikaj o Petar pana vakerela akala lafija, ulilo o Đi Sumnalo pe sarijende save šunena o lafi. Thaj prašukarisajle e paćavne andar o sunetipe save ale e Petrea, kaj vi pe e nađangledevlesere ćhordilo o dindipe e Đeso Sumnalesoro. Kaj šunđa len kaj vakerena e ćhibija thaj barjarena e Devle. Tegani irinđa o Petar: Sar šaj điko te čhinavel o pani te na bolen pe akala save lelje o Đi Sumnalesoro sar thaj amen? Thaj ćhinavda lenge kaj te trušulinen pe ano anav e Isus Hristosoro. Tegani ruđinde le te aćhovel ke lende nekobor dive. A šunde e apostolja thaj e phralja save sinele ane Judeja kaj vi e nađangledevlesere lelje o lafi e Devlesoro. Thaj kana iklilo o Petar ano Jerusalim, xane pe leja odola andar o sunetipe. Vakerindoj: Đerdinđan e bisunetime manušencar thaj xaljan lencar. A o Petar lenge lelja te mothovel po rindo vakerindoj: Me sema ano foro e Jopa pe ruđutni, thaj dikhljem ano xoripe dikhipe: nesavo vaso uljela sar baro poxtan baše štar agora thaj mekelape kotar o badali, thaj alo đi mande. Dikhindoj ane leste samasa dikhljardem thaj dikhljum štareprengere phuvljakere dživdinutna thaj divutna thaj sapen thaj čiriklja e badalesere. Thaj šunđum krlo savo vakerel mange: Ušti, Petre, ćhin thaj xa. A me phenđum: Nisar, Devljutneja, kaj khanći pogano ja bikhoslo nisar na đerdinda maje ano muj. Thaj irinđa mange o krlo katar o badali po dujto drom: So o Devel khoslja, tu ma poganin! A akava sinele trindrom; thaj leljape pale sa ko badali. Thaj dikh, ane odova časo trin manuša aćhile anglal o kher ane savo sinjum, bićhalde andar e Kesarija ke mande. A o Đi phenđa mange te džav lencar na gindindoj khanći. A avile mancar thaj akala šovore phralja, thaj đerdinđam ano kher e manušesoro. Thaj ov amenge phenđa sar dikhlja e phakale ano kher plo savo aćhilo thaj phenđa lese: Bićhal e manušen ane Jopa thaj vičin e Simone vičimo Petar. Ov ka phenel tuke e lafija savencar ka inkale tut thaj sa o kher klo. A kana me leljum te vakerav, ulilo o Đi Sumnalo pe lende, sar thaj pe amende ano širdipe. Tegani dijema godi ke lafija e Devljutnesere sar vakerela: O Jovan bolela panjesa, a tumen ka bolen Đesa Sumnalesa. Te lenge, eke, o Devel dinđa jekhuno dindipe sar vi amenge save paćajam ano Devljutno o Isuso Hristo, ko sinjum me te bi šaj te aćhavav e Devle? A kana šunde akava aćhile, thaj glorisarena e Devle vakerindoj: Emčaće thaj e nađangledevlengerenge dinđa o Devel jertipe bašo dživdipe. Odola, maškargoda, save hasardile kotar e belava, savi uli bašo Stefane, nakhle sa đi e Fenikija thaj Kipar thaj Antiohija na vakerindoj lafi nikase kaj semo e Judejecenge. A nesave kotar lende sinele Kipranja thaj Kirinejcija, save đerdindoj ane Antiohija vakerena e jelinistijenge vakerindoj o evangelium kotar o Devljutno Isus. Thaj o vast e Devljutnesoro sinele lencar; thaj baro đendo olen paćaja thaj irisajle e Devlese. A avilo o lafi lendar đi o kana e Khanđirjake ano Jerusalim; thaj bićhalde e Varnava te nakhel sa đi Antiohija. Kana akava avilo thaj dikhlja o baxtaripe e Devlesoro, lošalisajlo thaj ruđinđa sarijen kaj phravde vileja te aćhoven ano Devljutno; Kaj sinele manuš kovlo thaj pherdo Đi Sumnalesoro thaj paćamnasoro. Thaj irinđape but seloro e Devljutnese. O Varnava eke iklistilo ano Tars te rodel e Savle, thaj kana arakhlja le, anđa le ane Antiohija. Thaj on soro berš kedena pe e Khanđirjasa, thaj sikavđe buten seloren; thaj najanglal ane Antiohija e sikavde sine vičime Hristijanja. A ane odola dive ulile andar o Jerusalim e profetija ane Antiohija. Thaj uštindoj jekh kotar lende, po anav Agav, anglalmothovđa đesa bari bokh savi valjanđa te ovel po soro them; savi thaj sine baš o Klaudije thagari. A e sikavde kerde lafi kaj sakoj kotar lendar, kobor savo šaj, te bićhalel, po ažutipe e phraljenge save dživdinena ane Judeja. Akava thaj kerde bićhalindoj e phurederutnenge prekal e vasta e Varnavesere thaj e Savlesere. A ane odova vakti vazdinđa o thagar Irod e vasta te munčinel nesaven kotar e Khanđiri. Thaj mudarđa e Jakovese phrale e Jovane mačesa. Thaj dikhindoj kaj si odova po kamipe e Judenge, mangljarde te dolen thaj e Petre; a sinele o dive bimajakere marenge. Le thaj dolinđa thaj frdinđa ano phandlipe, thaj dinđa le štarengere arakhavnenge kotar po štar urumne te arakhen le, manglindoj kaj le pale Pasha te ikalel anglal o seloro. E Petre, eke, arakhena ano phandlipe, a e Khanđiri putarune ruđina pe baše leste e Devlese. A kana manglja o Irod te ikalel le, odoja rat sovelape o Petar maškar e duj urumne, kovime ane duj verige, thaj e arakhavne anglal o udara arakhena o phandlipe. Thaj dikh, o phakalo e Devljutnesoro mothovdilo, thaj e roš strefinđa o than, thaj khuvindoj e Petre ane rafina vazdinđale vakerindoj: Ušti sigate! Thaj pele lestar o verige e vastendar. Thaj o phakalo lese phenđa: paćar tut, thaj urjav o pođipe klo. Thaj ćerda ađahar. Thaj phenđa lese: Urjav o fostani klo, ta hajde pala mande. Thaj iklindoj đalapese palo leste, thaj na đanela kaj si emčaćipe odova so o phakalo kerđa, aj gindinđa kaj dikhela dikhipe. A kana nakhle e anglune arakhavnen thaj dujtonen, ale ko sastrunale udara save legarena ano foro; oj lenge korkori phravdili, thaj iklindoj nakhle jekh dromoro, thaj o phakalo sigo cidinđape kotar leste. Thaj kana alo o Petar ana peste, phenđa: Akana emčaće džanav kaj o Devljutno bićhalđa ple phakale pa ikalđama kotar o vasta e Irodesere thaj kotar sa so ađikerđa o seloro e Judejesoro. Thaj džangljindoj avilope đi o kher e Marijakoro, daj e Jovanesiri vičime Marko, kote sinele butdžene ćedime thaj ruđinena pe e Devlese. A kana kuvđa o Petar ano udar kotar e avlin, avili e rakli po anav Roda, te šunel. Thaj penđarindoj o krlo e Petresoro, katar e lošalipe na phravđa o udar, aj prastandili thaj mothovđa kaj o Petar terđola anglo udara. A on lake phenđe: Sijan li dilini! Aj oj motoj lenge kaj si ađahar. A on vakerena: Odova si o phakalo lesoro. O Petar eke jekhune khuvela. A kana phravde, dikhle le thaj prašukarisajle. Kerindoj lenge e vasteja te trainen, ov lenge mothovđa sar le o Devljutno ikalđa kotar o phandlipe, thaj phenđa: Mothoven akava e Jakovese thaj e phraljenge. Thaj iklindoj dželo ko aver than. A kana ulo o dive, sinele na cikno bišandipe maškar o urumne, so odova sinele e Petreja. Thaj kana o Irod rodinđa le thaj na arakhlja, tegani phućlja e arakhavnen thaj čhinavda te legaren pe; a ov, uljindoj kotar e Judeja ane Kesarija, odothe bešela. A sinele o Irod oljamo pe Tirceja thaj Sidonceja, ta akala jekhođune avile leste, thaj lindoj e Vlasta, so kerel e thagaresiri postelja, rodinde šandipe, kaj lengiri phuv parvarela pe kotar e thagarengiri. Thaj ano rindosardo dive urjađape o Irod ane thagareskoro fostani, thaj bešindoj pe skamin inkerđa lenge vakeripe; A o seloro dela vika: Krlo e Devlesoro, a na e manušesoro! Aj kotar jekhvar khuvđa le o phakalo e Devljutnesoro, kaj na dinđa glorija e Devlese; thaj avune xalo kotar o čirme mulo. A lafi e Devlesoro barjola thaj butisavola pe. A o Varnava thaj o Savle dindoj o ažutipe irinđepe kotar o Jerusalim ane Antiohija, lindoj pesa thaj e Jovane vičime Marko. A ane Khanđiri savi sine ane Atiohija sinele nesave profetija thaj sikamne, thaj odova: o Varnava thaj o Simeon akhardo Niger, thaj o Lukije Kirinejac, thaj Manain bararjdo e Irodea e štarpirutnea thaj o Savle. A đikaj on kandena e Devljutnese thaj postinena, phenđa o Đi Sumnalo: Ulaven mange e Varnava thaj e Savle ko ćerdipe pe savo vičindem len. Tegani on, postindoj thaj ruđindoj e Devlese thaj pašljarindoj e vasta pe lende, mukle len. A akala, bićhalde kotar o Đi Sumnalo, ulile ane Selevkija, thaj odothar berisarde ano Kipar. Thaj resindoj ano Salamino mothovde o lafi e Devlesoro ane sinagoge e judejengere; a sine len thaj o Jovanoe baš e kandipnasoro. A kana nakhine e ostrvo sa đi o Pafa, arakhle nesave drabarne thaj xoxamne profeto, Judejco, po anav Varisus, savo sinele e anglamothodutnea e Sergije Pavleja, gođaver manušeja. Akava vikindoj e Varnava thaj e Savle, rodinđa te šunel o lafi e Devlesoro. A o Elima drabari, kaj odova semnol o anav lesoro, opipesajlo lenge dikhindoj te irinel e anglamothodutne kotar o paćape. A o Savle, vičime thaj Pavle, pherdo Đesa Sumnalesa, dikhindoj ostro pe leste, phenđa: O, phreperde sarsave bižajipnaja thaj sarsave džungalipnaja, ćhavo e bengesoro, dušmanona sarsave hakajesko! Sar na ka aćhove te rumine o čaće droma e Devljutnesere? Thaj akana ake o vast e Devljutnesoro pe tute, thaj ka ave kororo te na dikhe o kham baš nesavo vakti. Thaj sigo pelo pe leste e raći thaj raćipe thaj azbavindoj trujal rodela ingarutne. Tegani o anglalmothodutno, kana dikhlja so ulo, paćarda, prašukarime džanipnasa e Devljutnesara. A kana o Pavle thaj on lesa berosarde andral o Pafa, avile ane Perga Pamflijengiri; a o Jovan ta ulavindoj kotar lendar, irinđape ano Jerusalim. A on džandindoj andral o Pergo, avile ane Antiohija Pisidijengiri, thaj đerdindoj ane sinagoga ano dive e savatosoro beštine. Palo drabaripe e Kanunesoro thaj e Profetosoro e phurederutne e sinagogakere bićhalde ke lende vakerindoj: Manušalen phraljalen, te isitumen lafi zoralipnase e selorese, vakeren. A o Pavle uštindoj kerda vasteja thaj phenđa: Manušalen Izrailjci thaj save e Devlestar darana, šunen: O Devel akale seloresoro e Izrailjisoro alonđa e daden amaren, thaj vazdinđa o seloro kana sinele avutne ane phuv egipatesiri, thaj zorale vasteja ikalđa len andral late. Thaj aso saranda berša parvarda len ane dermina. Thaj xasarindoj efta selora ane phuv e hanaanengiri, ulavđa lenge kockaja e phuv lengiri. Thaj pale odova bašo štaršel thaj pinda berša dinđa lenge krisara đi o Samuilo profeto. Thaj kotar odova rodinđe thagare, thaj dinđa lenge o Devel e Saule, e Kisorese ćhave, manuše kotar kustik e Venijaminesero, baše saranda berša. Thaj durarindoj le vazdinđa lenge e Davide bašo thagar, kolese thaj phenđa sadikhindoj: Arakhljum e Davide, ćhave Jesejeveso, manuše po vilo mlo, savo ka pherel sako kamipe mlo. Kotar lesiri kućin, po dindo anav, vazdinđa o Devel e Izrailjese Ikalutne e Isuse, sar anglal lesoro avipe o Jovan vakerela bolipe jertipesoro sa e Izrailjesere selorese. Thaj kana o Jovan agorinela baro kotor plo, vakerela: Baš kase man tumen dikhena, me najsem odova, aj ake džala pala mande Odova savese me najsem paćivimasko te phravav e dora po pođipe lesoro. Manušalen phraljalen, ćhave e Avraamosere bijande, thaj save maškar tumende darana e Devlestar, tumenge bićhaldilo o lafi akale ikalipnastar. Kaj odola so dživdinena ano Jerusalim, thaj e phurederutne lengere, na džande Akale, aj krisindoj le, pherđe e profetosere lafija save drabarđon sako savato. Thaj na arakhavindoj ni jek meripnasiri doš, ruđinde e Pilate te mudarel le. A kana agorinđe sa so si hramome baše leste, uljavde le kotar o kaš thaj pašljarde ano limori. A o Devel vazdinđa le andar e mule. Ov mothovela pe pobut ane dive odolenđe save iklile leja andar Galileja ano Jerusalim, save si akana sadikhutne lesere anglal o seloro. Thaj amen tumenge mothova lošalo nevipe kaj o dindo lafi, dindo e dadenge, o Devel pherđa amenge, lengere ćhavorenge, dživdisarindoj e Isuse, sar so si thaj hramome ano dujto psalmo: Ćhavo mlo sijan tu, me tut avdive bijanđum. A te dživdisarel andar o mule Le savo maj nane te irinel ano ćirnipe ađahar phenđa: Ka dav tumenge e Davidesere Sumnalutna, paćamne. Odolese thaj ko aver than vaćeri: Na ka de kaj o Sveco klo te dikhel ćirnipe. Kaj o David, kandindoj ple familijake, po kamipe e Devlesoro mulo, thaj pašljarde le ke dada lesere, thaj dikhlja o ćirnipe. A Okova save o Devel vazdinđa na dikhlja ćirnipe. Nek tumenge si, akana, po džanipe, manušalen phraljalen, kaj si andar Leste tumenge mothovelape jertipe e bezehengoro. Thaj kotar o sa, kotar so naštine te mothoven ano Kanuni e Mojsijasoro, ane Leste mothovel pe sako kova paćal. Dikhen, akana, te na avel pe tumende odova so si phendo ane Profetija: Dikhena, tumen so na ćhiven sama, thaj čudinen tumen, thaj durjaron; kaj me kerav ćerdipe ane dive tumare, ćerdipe kova na ka paćan kaj ka tumenge điko ka phenela. A kana on ikljovena andar e sinagoga e judengiri, ruđinena e nađangledevlesere kaj lenge akala lafija thaj ane aver savato vakerena pe. Kana pak o ćedipe ulavđape, but kotar e Judejcija thaj devlikane nakhutne lijepe palo Pavle thaj Varnava save lenge vakerena thaj phurederena len te aćhoven ano baxtaripe e Devlesoro. Thaj ano aver savato ćedinđa pe sar celo foro te šunel o lafi e Devlesoro. A kana dikhle e Judejcija edobor seloro, pherdile pe bićaljardipe, thaj opipesajle e Pavlesere lafonenge, opipevakerindoj thaj mahrindoj. A o Pavle thaj o Varnava tromale phenđe: Tumenge majanglal valjanđa te vakerel pe o lafi e Devlesoro; aj sar ćhudena la, thaj na haćaren tumen paćivale e bimeripaske dživdipnaja, ake vakeraja e nađangledevleserenge. Kaj amenge ađahar ćhinada o Devljutno: „Čićum tut baše rošipe e nađangledevleserenge, te ove po ikaldipe dži o agor e phuvljakoro.” A kana šunđe e nađangledevlesere, lošalisajle thaj glorisarena o lafi e Devljutnesoro, thaj paćaje save sinele semnosarde bašo bimeripasko dživdipe. Thaj o lafi e Devljutnesoro buljardilo po soro trujalipe. A e Judejcija vazdinđe e devlikanen thaj e dikhutne džuvljen thaj forosere anglunen, ta vazdinđe prastipe po Pavle thaj Varnava, thaj ikalde len andar plo foro. On pak ćinosarde pe lende o praxo kotar e pre ple thaj ale ane Ikonija. A e sikavne pherena pe lošalipnaja thaj Đi Sumnaleja. A kerdilo pe thaj ane Ikonija kaj on ađahar jekhune đerdinen ane sinagoga e judejengiri, thaj vakerena ađahar kaj paćaja baro butipe Judejcongoro thaj Jelinengoro. A e Judejcija save aćhile nakhandune vazdinđe thaj xoljarđe e ođe e nađangledevleserengere pe phralja. Aj on aćhile but vakti, vakerindoj tromale kotar o Devljutno, kola mothovđe o lafi ple baxtaripase dindoj te oven semne thaj biaćaripa lengere vastencar. A butđene e forosere ulavđe pe, thaj jekhune sine e Judejencar, a e avera e apostolencar. Kana rupuzinđe thaj e nađangledevlese thaj e Judejcija ple šerutnencar len te akošen thaj te frden barencar, haljovindoj odova on našle ane forija e likaonese, Listra thaj Derva thaj ano trujalipe lengoro, thaj odori vakerena o evangelium. A nesavo manuš ane Listra bešela lindoj ane ple pre, avuno langalo kotar o vođi ple dajakoro, thaj nikana na phirđa. Akava šundindoj e Pavle kaj vakerel, savo dikhindoj pe leste thaj dikhindoj kaj isile paćape kaj ka sastol, phenđa zorale krleja: Tuke vakerav ano anav e Devljutnesoro e Isus Hristosoro, ušti tuće ko pre! Thaj ov ripinđa, thaj pirđa. A kana dikhla o seloro so o Pavle kerđa, vazdinđa o krlo plo vakerindoj likaonikane: E Devela kerdile miazune e manušenge thaj ulile ke amende. Thaj vičinde e Varnava Zevs a e Pavle Hermes, kaj ov anglinela o lafi. A o rašaj e Zevsosoro so sinele anglal o foro lengoro, anđa o guruvoren, thaj anđa vencija anglal o udar, thaj e seloreja manglja te pašjarel e viktima. A kana šunde e apostolija, o Varnava thaj o Pavle, pharavđe e fostanja ple, thaj ripinde maškar o seloro dindoj vika thaj vakerindoj: Manušalen, so odova keren? Thaj amen sam sar vi tumen meripnasere manuša, save tumenge bahtale mothova kaj kotar akala khanćune kotora te irinen tumen e đivde Devlese, savo kerđa o badali thaj e phuv thaj o derav thaj sa so si ane lende; Save ane nakhline bijanipnasa sinele meklja sa e seloren te džan pumare dromencar; Eke pak ni meklja pes namothovdo, kerindoj laćhipe, dindoj amenge kotar o badali bršin thaj bijande berša, pherindoj e vile amare xapesa thaj lošipnasa. Thaj akava vakerindoj pharipnaja baraštinđe e selore kaj lenge te na pašjaren viktime (aj te džan sako ple khereste. A đikaj on odothe bešena thaj sikavena), avile andar e Antiohija thaj Ikonija e Judejcija, (thaj ćingarindoj putarune lencar, vakerindoj e selorese te cidenpe lendar phenindoj kaj khanći čaće na vakerena, aj sa xoxavena), thaj vazdindoj e masa, frdinde barencar e Pavle thaj ikaldo le avrijal o foro gindindoj kaj mulo. A kana trujal leste ćedinđepe e sikavne, uštino thaj đerdinđa ano foro, thaj tajsadive iklistilo e Varnava ane Derva. Thaj vakerindoj o evangelium e forose odolese thaj crdindoj buten sikavnen, irisajle ane Listra thaj Ikonija thaj Antiohija, zoralindoj e ođe e sikavnegere thaj sikavindoj len te aćhoven ano paćape, thaj kaj amen andar e but belave valjani te da ano Thagaripe e Devlesoro. Thaj e vastencapašljarde e phurederutnen baše sakoj Khanđiri, ta ruđindoj e Devlese postipnaja, dinđelen e Devljutnese ane savo paćana. Thaj nakhlindoj e Pisidija, avile ane Pamfilija, thaj vakerindoj o lafi e Devljutnesoro ane Perga, ulile ane Atalija, thaj odothar berosarde ane Antiohija, kotar sinele dindine e Devlesere bahtalipnase pe kotor savo agorisarde. A kana avile thaj ćedinde e Khanđiri, phenđe sa so kerda o Devel lencar, thaj sar phravđa e nađangledevleserenge o udara paćapese. Thaj aćhile odothe na ari vakti e sikavnencar. Thaj nesave ulindoj andar e Judeja sikavena e phraljen: Te na sunetinen tumen, po adeti e Mojsijesoro, na kašti te ikalen tumen. A kana aćili e ćingar, thaj na cikno ćingaripe e Pavle thaj e Varnava lencar, phende kaj o Pavle thaj o Varnava thaj aver te džan upre ano Jerusalim e apostolenge thaj e prezviterenge baše akava phućipe. A on tegani bićhalutne kotar e Khanđiri, nakhindoj andar e Fenikija thaj Samarija mothovindoj kotar o iripe e nađangledevlesere, thaj kerena bari loš sa e phraljenge. A kana avile ano Jerusalim, sinele linde kotar e Khanđiri thaj kotar e apostolija thaj kotar e prezvitera thaj mothovde sa so kerda o Devel lencar, thaj sar putarđa e nađangledevleserenge e udara paćapese. A teg uštine nesave kotar e jeresi farisejengiri save paćaje, vakerindoj kaj len valjani te sunetinen thaj te ćhinavelpe lenge te ićeren o Kanuni e Mojsijesoro. A e apostolija thaj e prezvitera ćedindepe te dikhen akava gindipe. A palo but dikhljaripe uštino o Petar thaj phenđa lenge: Manušalen phraljalen, tumen đanen kaj o Devel kotar e anglune dive alonđa maškar amende kaj andar mlo muj ka šunen e nađangledevlesere o lafi e evangeliumosoro thaj te paćan. Thaj o Devel, savo penđarel o vile, mothovđa lenge dindoj lenge o Đi Sumnalo sar thaj amenge, thaj na ćhuta nisave ulavdipa maškar amende thaj lende, paćapesa khosindoj o vile lengere. Akana, eke, sose zumaven e Devle, thaj mangena te ćhiven e sikavnenge pharipe ki men savo ni e dada amare ni amen na šajinđam te akhara? Aj paća kaj ka ikalamen baxtarindoj e Devljutnestar e Isus Hristostar sar thaj on. Teg trajinde sa o ćedipe, thaj šunena e Varnava thaj e Pavle save mothovena kobor semne thaj biaćaripa kerda o Devel maškar e nađangledevleserengere prekalo lende. A kana on trajinde, irinđa o Jakov vakerindoj: Manušalen phraljalen, šunen ma! O Simon mothovđa sar o Devel angle grižinđape kaj kotar e nađangledevlesere lel o seloro baše plo Anav. Thaj akaleja haljovđepe e lafija e Profetosere, sar so si hramome: Pale odova ka irinape thaj duvarav o kher e Davidesoro, savo pelo, thaj lesere peravnipa ka laćharav, thaj ka vazdav le. Te roden e avera manuša e Devljutne thaj sa e nađangledevlesere pe savo si vičime o anav mlo, vakerel o Devljutno savo kerđa sa akava; E Devlese si penđarde kotar o kerdipe e themesoro sa e ćerdipna lesera. Odolese me zamariv kaj te na kerdon pe pharipa odolenge kotar e nađangledevlesere save irinen pe e Devlese; Aj te hraminel pe lenge te arakhen pe kotar o melalipa e idolengere thaj kotar o blud thaj kotar o tasavdino thaj kotar o rat; (thaj odova so lenge nane kamle averenge te na keren) Kaj e Mojsija isile kotar o dumutano vakti ane sa e forija okola save vakerena le, kaj ano sinagoge drabarela pe sako savato. Teg arakhle aso laćhe e apostolija thaj o prezvitera e sa Khanđirjaja te alonen maškar peste e manušen thaj te bićhalen ane Antiohija e Pavleja thaj e Varnavaja, e Juda vičimo Varsava thaj o Sila, e manušen kola ulavde maškar e phralja, thaj hramonđe pumare vastencar akava: E apostolija thaj e prezvitera thaj e phralja keren sastipe e phraljenge andar e nađangledevlesere save si ane Antiohija thaj Sirija thaj Kilikija. Sar šunđam kaj nesave iklindoj amendar daravde tumen lafonencar, thaj irinde tumare ođe vakerindoj te sunetinen tumen thaj te inkeren o Kanuni, so lenge amen na ćhinadam; Odolese amen ćedime jekhođine, arakhljam aso laćhe te bićhala tumenge e alome manušen amare kamle Varnavaja thaj e Pavleja, manušencar save dinde e ođe ple aso Anav e Devljutnesoro amare Isuse Hristosoro. Bićhaldam, eke, e Juda thaj e Sila, kaj tumenge thaj on odova jekhune e mujesa vakeren. Kaj laćhe sine e Sumnale Đese thaj amenge kaj nisavo ladavipe maj na ćhiva pe tumende semo akava so si majtrubuno: Te arakhen tumen kotar e idolengere viktime thaj kotar o rat thaj kotar o tasavdo thaj kotar o blud, (thaj so na mangena te kerel pe tumenge ma keren averenge); kotar akava te arakhljen tumen, laćhe ka keren. Oven saste. Odola, akana, saven bićhalđe, avile ane Antiohija, thaj ćedindoj o seloro dinde o bićhalipe. A kana drabarde, lošalile pe e zorale lafonenge. A o Juda thaj o Sila, save sinele thaj korkore profetija, avra vakerimasa tešinde e phraljen thaj zorarde. Thaj sar nakhavde othe nesavo vakti, mekle len e phralja sa šalom e apostolenge. Ta o Sila arakhla bašo laćhipe te aćhol othe, a o Juda korkoro irinđape ano Jerusalim. A o Pavle thaj o Varnava bešena ane Antiohija sikavindoj thaj vakerindoj butencar averencar o lafi e Devljutnesoro. Pale odova nesave dive phenđa o Pavle e Varnavase: Ajde te irinape thaj te dikha e phraljen amaren pe sa e forija ane save mothovđam o lafi e Devljutnesoro, te dikha sar si. A o Varnava manglja te lel peja e Jovane vičime Marko. A o Pavle mangljarda kaj odole savo len muklja ane Pamfilija thaj savo na đelo lencar po ćerdipe pe savo si bićhalde, te na len peja. Ađahar uli xoli, thaj on ulavđepe, thaj o Varnava lindoj e Marko berinđa ko Kipar. A o Pavle alosarindoj e Sila đelo, dindo kotar e phralja aso baxtardipe e Devlesoro; Thaj nakhela andar e Sirija thaj Kilikija zoralindoj o Khanđirja. Teg resela ane Derva thaj Listra, thaj dikh, odothe sine nesavo sikavno, po anav Timotej, ćhavo nesave džuvljakoro e Judejkakoro paćamnakoro thaj oto dad Jelina; Baše leste laćhe mothovde e phralja save sinele ane Listra thaj ane Ikonija. Akale manglja o Pavle te lel ko drom peja; thaj lelja le thaj sunetinđa bašo Judejcija save sinele ane odola thana, kaj savore džanena e dade lesere kaj sine o Jelin. Thaj kana nakhena andar e forija, sikavena len te ićeren o regule save zorarde e apostolija thaj e prezvitera ano Jerusalim. Ađahar e Khanđirja zorardile ano paćape thaj o đendo lengoro barjarelape sako dive. A kana nakhle e Firigija thaj Galatijakiri phuv, ćhinavda lenge o Đi Sumnalo te vakeren o lafi ane Azija. Avindoj đi e Mizija zumavđe te džan ane Vitinija, aj lenge o Đi na meklja. A kana nakhle e Mizija, ulile ane Troada. Thaj e Pavlese mothodilo pe dikhipe raćate: sine nesavo manuš Makedonco, savo terđola thaj ruđinela le vakerindoj: Nakh ane Makedonija thaj ažutin amenge! A kana dikhlja o dikhipe, sigo dikhljam te ikljova ane Makedonija, kaj haljovđam kaj amen o Devljutno vičinđa lenge te vakera o evangelium. Kana eke ingardilam andar e Troada, reslam mamuj po Samotrak, thaj tajsadive ano Neapolj, a othar ano Filipe, save si angluno foro odole ćerdipnaso e Makedonijakoro, thanbešipe e rimnjanengoro. Ane odova foro aćhiljam nekobor dive, thaj ano dive e savatosoro ikliljam avrijal o foro ke len, kaj gindiđa pe kaj si devlesiri ruđutni; thaj bešindoj vakerasa e romnjenge save si sinele ćedime. Thaj nesavi devlestardaravni romni, po anav Lidija, bikninutni porfiresiri andar o foro Tijatira, šunela; lake o Devljutno phravda o vilo te arakhel ko odova so vakerela o Pavle. A kana oj bolela pe thaj o kher lakoro, ruđinda amen vakerindoj: Te gindisarden kaj paćav ano Devljutno, đerdinen ane mlo kher thaj aćhoven. Thaj zoralinđa amen. Kerdilo pe eke kana geljam ko ruđipe te arakhel amen jekh robinka savi sinela đi dikhljaripasoro thaj drabarindoj anela bare love ple thagarnenge. Akaja leljape palo Pavle thaj pala amende, thaj dela vika vekerindoj: Akala si manuša kandine e Devlese e Ućesere, save amenge mothoven o drom e ikalipnasoro. Thaj ađahar kerda but dive. A kana e Pavlese pharilo, irinđape thaj phenđa e đese: Ćhinavav tuke anaveja e Devljutnesereja e Isus Hristosoro, ikljov andar late! Thaj iklilo ane odova časo. A kana dikhle lakere thagarne kaj iklilo o ažućaripe lengere lovendar, lelje e Pavle thaj e Sile thaj crdinđe len po trgo angal o šerutne. Thaj kana andelen e šerutnenge, phenđe: Akala manuša džungaven amaro foro, a Jevreja si. Thaj mothovena adetija save amenge na miazinen te la ni te kera, kaj sam Rimljanja. Thaj avilo o seloro pe lende, thaj e šerutne pharavde lengere fostanja, thaj ćhinavde te šibinen len. Thaj kana čalavde len but mariba, frdinde len ano phandlipe, thaj ćhinavde e arakhavne phandlengoro kaj len šukar te arakhel. Lindoj asavko ćhinavdipe, ov len frdinđa ane najteluni soba thaj lengere pre ćhuta ane kaštengoro phandlipe. A ane ekvaš e rat o Pavle thaj o Sila ruđinena pe thaj glorisinena e Devle; a e phandle šunena len. Kotarjek pak kerdilope baro phuvljakoro tresibe; ađahar kaj tresindepe o temelja e phandipasere; thaj sigo phravdile sa e udara thaj sarijendar pele e sinđirja. A ked džangavdilo o arakhavno e phandlengoro thaj dikhlja phravde e udara e phandimakere, ikalđa e ćhuri thaj manglja te mudarel pe, gindindoj kaj e phandle naštine. A o Pavle vičinđa zorale krloa vakerindoj: Ma ker tuke nisave lošipna, kaj sare sijam akate! A ov rodindoj e memeli đerdinđa thaj tresindoj pelo anglo Pavle thaj Sila; Thaj ikalindoj len avrijal phenđa Devljutnalen, so valjani mange te kerav te ikala man? A on phende: Paća ano Devljutno o Isus Hrist thaj ka ikaldepe tu thaj sa o kher klo. Thaj vakerena lese o lafi e Devljutnesoro, thaj sarijenđe ano kher lesoro. Thaj lindoj len an odova časo e raćako thovđa lenge e rane; thaj sigo bolavđa pe ov thaj sa lesere. Thaj legarda len ano plo kher thaj ćhuta o xape pe astala, thaj lošalisajlo sa ple kherea so paćaja ano Devel. A kana ulo dive, o šerutne bićhalde e kandinen vakerindoj: Mek odole manušen. A o arakhavno e phandlengoro mothovđa akala lafija e Pavlese: Bićhalđe e šerutnen te oven mukle. Akana, eke, ikljoven thaj džan šandipnasa. A o Pavle lenge phenđa. Marde amen putarune bi kriseso, manušen Rimljanja, frdinde ano phandlipe; thaj akana mangen garavdine te meken amen? Na ađahar, aj korkore nek aven thaj inkalen amen. A e kandine phende e šerutnenge akala lafija; thaj darandile kana šunde kaj si Rimljanja, thaj avindoj jertisajle lenge, thaj kana len ikalde, ruđinena te džan andar o foro. A kana iklile andar o phandlipe, avile e Lidijake, thaj dikhindoj e phraljen loćharde len, thaj džele. Nakhlindoj pak o Amfipolj thaj e Apolonija avile ano Solun, kaj sinele e sinagoga e judejengiri. Thaj o Pavle pale plo adeti đerdinda ke lende, thaj trin savatoa vakerela lenca kotar o Lil, phućarindoj thaj mothovindoj lengekaj valjanđa kaj o Hristo te mudarđol thaj te dživdinisavol pe andar e mule, thaj kaj akava Isus, save me tumenge mothovav si o Hristo. Thaj nesave katar lende paćavile, thaj pašile e Pavlese thaj Silase, thaj kotar devlikane Jelinija butipe baro, thaj kotar dikhle romnja na ari. A e Judejcija save na paćaje andar o korikanipe, lije nesave džungale manušen katar o drom, thaj ćedindoj gramada vazdinđe o foro, thaj pele po kher e Jasonesoro, thaj rodena te ikalen len anglal o seloro. A kana len na arakhle, crdinde e Jasone thaj nesaven kotar e phralja anglal e phurederutne forosere dindoj vika: Akala so džungavde soro them avile thaj akate; Len o Jason lelja; thaj akala sare keren opipe pe thagaresoro ćhinadipe, vakerindoj kaj isi aver thagar, o Isus. Thaj hulajinđe e seloro thaj e phurederutnen e forosere save akava šunđe. Aj kana len o Jason thaj e aćhune ćaljarde iripnasa, mekle len. A e phrala sigo raćate bićhalde e Pavle thaj e Sila ane Verija; on resindoj, đerdinde ane sinagoga e judengiri. Akala pak sine majpaćivale kotar okola ano Solun; akala lelje o lafi ano vilo, sako dive rodinindoj o Lil, da li si ađahar. Ađahar paćaje but lendar, thaj kotar dikhutne jelinosere romnja thaj kotar e manuša na ari. A kana dođande e solunesere Judejcija kaj o Pavle thaj ane Verija vakerela o lafi e Devlesoro, avile thaj odori vazdindoj thaj hulavindoj o seloro. A e phrala teg sigo bićhalde e Pavle te džal ane phuv pašo derav; a o Sila thaj o Timotej aćhile odothe. A e prohodutne ande e Pavle đi e Atina, thaj lindoj o ćhinavdipe baš e Silase thaj e Timotejese te aven ke leste po sig, irinde pe. A đikaj len o Pavle ađikerela ane Atina, baripsajlo o đi lesoro ane leste dikhindoj o foro pherdo aver devela; Thaj vakerela e Judejcencar thaj e devlikanencar ane sinagoga, thaj po trgo sako dive odolencar savencar arakhipe. A nesave katar e filosofija epikurejcija thaj stojičara xana pe lesa; thaj e jekhune vakerena: So mangel akava čućovakerutno te phenel? A e avera: Sar dikhel pe kaj si ov vakerutno avrengere develendar. Kaj lenge vakerela o evangelium katar o Isus thaj o dživdinisaripe. Ta lelje le thaj ingarde le pe Areopago vakerindoj: Šaj li te džana savi si odoja nevi džanipa savi tu mothoveja? Kaj nesavo nevo ćhivea ane amare kana; manga, eke, te džana so bi odova šaj te ovel. A sare e Atinjanja thaj e avune avrune ni sose avrese nahaljinde, aj kaj sogod nevo vakerena ja šunena. A o Pavle terdindoj ko maškar o Areopag phenđa: Manušalen Atinjanija, palo sa tumen dikhava kaj sijen but devlikane. Kaj nakhlindoj thaj dikhindoj tumare sumnale thana, arakhljum thaj o than ćhinipasoro pe savo sinele hramome: Napenđarde Devlese. Odole, eke, save na džanindoj paćaven odole tumenge me mothovav. O Devel savo kerda o them thaj sa so si ano leste, savo si Devljutno e badalesoro thaj e phuvljakoro, na bešela ane vastencakerde hramija, ni lela šukaripna katar o vasta e manušengere, sar kaj diso valjani Lese, savo korkoro dela sarijenđe dživdipe thaj dah thaj sa. Thaj kerda katar jekh rat sako seloro manušipesko te bešel pe sa o muj e phuvljakoro, thaj čuća anglal ćhinavdine vaktija thaj međe lengere bešipnase; Te roden e Devljutne, na bi li le azbavena thaj arakhena, kaj Ov si nane dur ni katar jekh amendar. Kaj ane Leste dživdina, thaj phira amen, thaj injam; sar so vi nesave katar tumare poetija phende: Kaj Lesoro thaj bijanipe sijam. Kana sijam, eke, bijanipe e Devlesoro, na valjani te gindina kaj o Devljutnipe si miazuno e sumnakajese ja rupese ja barese, ćhinđardo po džanglipe thaj gindisaripe e manušesoro. Aj na dikhindoj o Devel pe vaktija nadžanipnase, akana ćhinavel sa e manušenge pe sa e riga kaj te jertinen pe; Kaj ćhinavda o dive an savo ka krisinel e vasionake po hakaj prekal o Manuš save birinđa thaj dinđa sarijenđe paćape dživdisarindoj le andar o mule. A kana šunde bašo dživdisaripe e mulengoro, jekhune marde muj a e avera phende: Te šuna tut pale odolestar. Thaj ađahar o Pavle đelo andar lengoro maškaripe. A nesave manuša aćhindoj uzalo leste paćaje, maškar save sinele o Dionisije Areopagit, thaj e romni po anav Damara, thaj avera lencar. A napal durilo o Pavle andar e Atina thaj alo ano Korint. Thaj arakhlja jekhe Judejco, po anav Akilu bijando andar e Ponta, savo sinele tek alo andar e Italija thaj e romnja lesara e Priskila, kaj o Klaudije ćhinavda kaj sa e Judejcija te durardon andar o Rim, thaj te aven ke lende. Thaj sar sasa jekhune zanatosoro, aćhilo ke lende thaj kerda buti, kaj lengoro zanato sasa keripe šatorengoro. A mothovela ane sinagoga sako savato, thaj paćavela e Judejcen thaj e Jelinen. Thaj kana ulile andar e Makedonija o Sila thaj o Timotej, sumnale đesa o Pavle mothovela e Judejcejenge kaj si o Isus – Hristos. No kaj sar on opipesavona thaj akošena, ćinosarda e fostaja ple thaj phenđa lenge: O rat tumaro pe šere tumare; me sem khoslo, thaj kotar akana ka džav e nađangledevleserenge. Thaj dželipendoj othar, alo ano kher nesavese po anav Justa, savo paćivalela e Devle, kasoro kher sinele đi samti sinagoga. A o Krisp, phurederutno e sinagogako, paćaja ano Devljutno sa ple kheresa; thaj but katar e Korinćanija save šunena paćasarde thaj bolena pe. A o Devljutno phenđa e Pavlese raćate ano dikhipe: Ma dara, aj vaker, thaj te na trajine; Kaj me sem tuja, thaj nikoj na ka krisinel pe te kerel tuke džungalipe, kaj man isi but seloro ane akava foro. Thaj ov bešlo odothe berš dive thaj šov masek sikavindoj len e Devlesere lafestar. A kana sasa o Galion anglalthovdutno ane Ahaja, pele e Judejcija jekhođune po Pavle thaj anđe le ano kris, vakerindoj: Akava sikavela e manušen te paćivalen e Devle opipe o Kanuni. A kana o Pavle manglja te phravel po muj, phenđa o Galion e Judejcenge: Te si savo bihakajipe ovela ja đungalo ćerdipe, pale mlo ćhinadipe bi šunava tumen o Judejcija; Aj kana si ano phućipe o lafi thaj o anava thaj o kanuni tumaro, dikhen korkore; kaj me krisari odolese na mangav te ovav. Thaj ikalđa len andar e krisara. Teg sa e Jelinija astarđe e Sostene, phurederutne e sinagogakoro, thaj marde les anglal e krisara; a o Galion odolese khanći ni hajinela. A o Pavle aćhilo pana but dive, ta jertisajlo e phraljencar thaj berisarđa ane Sirija thaj lencar o Priskila thaj o Akila; a ćhinđa o bala e šeresere ane Kenhreja, kaj dinđape sovli. Thaj reslo ano Efes; thaj olen aćavđa athe, a ov đerdinđa ane sinagoga, thaj vakerela e Judejconencar. A kana le on ruđinđe te aćhovel ke lende pobuter vakti, na manglja, aj, jertisajlo lencar vakerindoj: Valjani mange pe sakoj ćhand kaj o baro dive savo avel te nakhavav ano Jerusalim; aj te o Devel mangel, ka irinape pale tumenge. Thaj vozinđa pe andar o Efes, a o Akila thaj o Priskila aćhile ano Efes. Thaj ulindoj ane Kesarija, iklilo thaj bahtarda e Khanđiri, ta meklilo pe ane Antiohija. Thaj aćhindoj nesavo vakti, iklilo thaj nakhlo redosa e Galatijakiri phuv thaj e Frigija zoralindoj sa e sikavnen. A avilo ano Efes nesavo Judejco po anav Apolos, bijanipnasa andar e Aleksandrija, manuš lafindo thaj zoralo ano Sumnalo Lil. Akava sinele bićhaldo po Drom e Devljutnesoro thaj, vakerindoj đesa, vakerela thaj sikavela hakaj katar o Devljutno, a đanela semo bolipe e Jovanesoro. Thaj akava lelja tromale te vakerel ane sinagoga. A kana šunđe le o Akila thaj o Priskila, lelje le thaj pobuter lese čaćune mothovđe o Drom e Devljutnesoro. A kana ov manglja te nakhel ane Ahaja, zorarde le o phralja thaj hramonđe e sikavnenge te lena le. Thaj ov avindoj odori ažutinđa but odolenge save e bahhtalipnasa paćaisarde. Kaj zorasa ćhudela e Judejcen anglal o seloro mothovindoj andar o Sumnalo Lil kaj si o Isus – Hristos. Kerdilo pe odova, kana sinele o Apolos ane Korinta, kaj o Pavle nakhavela e uprune phuvlja, thaj alo ano Efes, thaj arakhavindoj nesave sikavnen, phenda lenge: A leljen li e Đe Sumnale kana paćajen? A on phende lese: Ni na šunđam kaj isi Đi Sumnalo. A ov lenge phenđa: Ane soste, eke, bolen tumen? A on phenđe: Ano bolipe e Jovanesoro. A o Pavle phenđa: O Jovan bolela bolipnasa e jertipasoro, vakerindoj e selorese kaj te paćan ane Odova savo avela palo leste, odova thaj ano Hristo Isus. A kana odova šunde, bolena pe ano anav e Devljutnesoro e Isusesoro. Thaj kana o Pavle pašljarda e vasta pe lende, ulilo o Đi Sumnalo pe lende, thaj vakerena o ćhibija thaj anglalmothovena. A sinele manuša saćedime trujal dešuduj. Thaj đerdinđa ane sinagoga thaj vakerela tromalune trin masek, mothovindoj thaj paćavindoj katar o Thagaripe e Devlesoro. Thaj kana nesave aćhovena pe plo thaj na paćana, akošindoj po Drom e Devljutnesoro anglal o seloro, cidelape lendar thaj ulavela e sikavnen, ta kerela vakeripe sako dive ane sikamni nesave Tiranesoro. Thaj akava trajinđa duj berša, ađahar kaj savore save dživdinena ane Azija šunde o lafi e Devljutnesoro e Isusesoro, thaj e Judejcija thaj e Jelinija. Thaj o Devel kerela bidikhle biaćaripa e Pavlosere vastencar, ađahar kaj e pohtana sapane katar o trupo lesoro ja e kustika legarena pe nasvale thaj on sasljona katar o nasvalipe, thaj e džungale đe ikljona andar lende. A odova kerena thaj nesave katar e Judejcija dindesovlengiri, save phirena, kaj upral odola ane save sinele e džungale đe vakerena o anav e Devljutnesoro e Isusesoro, vakerindoj: Daja tumen sovli e Isuseja kastar o Pavle mothovela. A sinele nesave efta ćhave e Skeve Judejcose, anglunorašaj, savo akava kerena. A o džungalo đi irisarindoj phenđa: E Isuse penđarav, thaj e Pavle džanav; aj ko injen tumen? Thaj ripindoj pe lende o manuš ane savo sinele o džungalo đi upralzorarđa len thaj peravđa, ađahar kaj nange thaj izranime našle andar odova kher. Thaj akava dođande sare save đivdinena ano Efes, thaj e Judejcija thaj e Jelinija; thaj e dar astarđa sarijen olen, thaj ašarinelape o anav e Devljutnesoro Isus. Thaj but okolendar save paćaje, avena ta mothovena thaj phenena ple ćerdipna. A but okolendar save kerenape drabaripnasa, ćedinde e lila ple thaj tharena len anglal sarijende; thaj saćedinde thaj arakhle kaj si lengoro barvalipe pinda milje rupune love. Ađahar zorasa barjola thaj zorarjola o lafi e Devljutnesoro. Thaj kana akava agorisajlo, manglja o Pavle ano đi te nakhel e Makedonija thaj Ahaja, ta te džal ano Jerusalim phenindoj: Kaj odori ka ovav, valjani mange thaj o Rim te dikhav. Thaj bićhalda ane Makedonija dujen katar odola save le ažutinđe. E Timotije thaj e Eraste; a ov aćhilo nesavo vakti ane Azija. A ano vakti odova kerdilope na tikno uštipe bašo Drom e Devljutnesoro. Kaj nesavo sumnakari po anav Dimitrije, kerindoj tikne rupune Artemidine hramija, dindoj e phirnenge na tikuri buti; Ćedindoj akalen thaj lenge miazutne zanatlijen phenđa: Manušalen, tumen džanen kaj katar akaja buti umblavdol amaro barvalipe: Thaj dikhena thaj šunena kaj na semo ano Efes aj gati pe soro Azija akava Pavle paćavda thaj irinđa bute selore vakerindoj kaj odova so vastencar manušesere kerela pe nane devela. Thaj na semo so ka akaja rizika ka arakhel amaro zanato te ovel ritime, nego pa thaj o hramo e bara prašukara Artemidakoro na ka saćedel pe ane niso, thaj ka perel o baripe okolako savo sa e Azija thaj sa o them paćavel. A kana on akava šunde, pherdile pe holi, thaj dena vika vakerindoj: Bari si Artemida e Efeseskiri! Thaj soro foro pherdilo uštutne; thaj rupuzisarde jekheođesa po teatar thaj astarde e Makedoncen e Gaja thaj e Aristarha, dromarutne e Pavlesere. A kana o Pavle manglja te džal maškar o seloro, na dinde lesere sikavne. A nesave thaj katar e azijengere šerutne, save sinele lesere amala, bićhalđe ke leste ruđindoj le kaj te na sikavdol ano teatar. Jekhune pak dena vika jekh a e aver o dujto; kaj si o ćidipe sinele smutimo, thaj but džene lendar na džanena sose ćedisajle. A andar o seloro ikalde e Aleksandre kana le e Judejcija ulavđe. O Aleksandar pak kerindoj e vasteja manglja te arakhel pe anglal o seloro. A kana anglapenđarde kaj si Judejco, dije vika sare ano krlo, thaj dena vika pherde duj časija: Bari si Artemida e Efeseskiri! A e forosoro hramonari, aćhavindoj o seloro, phenđa: Manušalen Efescija, kova si odova manuš savo na džanel kaj si o foro Efes kandino e bara prašukarna Artemidako thaj lakere kipesko, savo katar o badali pelo? Pa kana si odova bipoloćino, valjani te oven šandune thaj niso siđarutne te na keren. Kaj anđen akale manušen, save ni o hramo naćorde ni e prašukarna tumara na lađarde. A o Dimitrije thaj o phirne oleja, te isilen davija pe nekaste, isi krisija thaj isi e anglalmothovdutne, nek davijinen jekh avre. Te li neso aver rodena, odova ka agorinel pe po kanunosoro ćedipe. Averćhane sijam ano riziko te ova davijime baše avdivesutno uštipe; a nane ni jekh karana savesa ka ma šaj te mothova akava uštipe. Thaj akava phenindoj mukljarda o ćedipe. A kana aćhavdilo o uštipe, vičinđa o Pavle e sikavnen, thaj zoralindoj len jertinisajlo lencar, thaj iklilo te džal ane Makedonija. Thaj sar nakhlo odola agora thaj phurederinđa len bute sikavipnencar, alo ane Jelada. Thaj aćhilo odori trin masekija; a sar e Judejcija kerde garavdo vakeripe opipe lestar kana manglja te dromarel ane Sirija, ov gindinđa kaj te irinel pe prekal e Makedonija. Thaj leljape leja đi e Azija o Sosipatar Pirov andar e Verija, thaj e Solunjanija o Aristarh thaj o Sekund, thaj o Gaj andar e Derva thaj o Timotej, thaj o Tihik thaj o Trofim andar e Azija. Akala đelindoj anglal ađikerena amen ane Troada. A amen berinđam palo dive e bimajakere marengoro andar o Filip, thaj aljam lenge ane Troada panđe divenđe, thaj othe aćhiljam efta dive. A ano angluno dive e kurkesoro, kana ćedindepe pe e sikavne te phagen o maro, vakerela lenge o Pavle, kaj manglja tajsadive te džal, thaj lunđarda o vakeripe đi ekvaširat. Thaj sinele but memelja ane upruni soba kaj sijam le ćedime. A bešela pe penđera jekh terno, po anav Evtih, lindoj xor sovipnasa; sar o Pavle lunđarda o vakeripe, ov, peravdo katar o sovlipe, pelo tele katar o trito kati, thaj vazdinde le mulo. A o Pavle ulindoj pelo pe leste, thaj lindoj le ane angali phenđa: Ma daran kaj o ođi lesoro si ane leste. Teg iklilo upre ta, phagindoj o maro thaj halja, lunđe vakerđa sa đi sabalje, thaj ađahar dželo. A e rakle ande dživdo thaj zoralile na ari. A amen aljam anglal ane barka thaj berinđam ano As, kaj othar te la e Pavle; kaj ađahar ćhinavda, manglindoj korkoro te džal phirindoj. A kana arakhljape amencar ano As, leljam le, thaj aljam ano Mitilin. Thaj othar berisardam thaj resljam tajsadive premal o Hios; a aver dive pašilam e Samose thaj terdinjam ane Trogilija, ta aver dive aljam ano Milit. Kaj o Pavle manglja te na nakhel ko Efes te na bi aćhovela ane Azija; kaj siđarela, te bi lese ovela šajine, kaj kotar e Pindatiri te ovel ano Jerusalim. Andar o Milit eke bićhalda ano Efes thaj vičinđa e khanđirjakere phurederutnen. Thaj kana ale ke leste, phenđa lenge: Tumen đanen kotar angluno dive kana aljum ane Azija, kaj sijum tumencar sa o vakti, kandindoj e Devljutnese sarsavone aćhavimasa thaj bute asvencar thaj perimatenca save arakhle man kotar garavdino vaćeripe e Judejcengoro. Kaj na mukljem khanći so si šukarimo tumenge te na mothav thaj tumen te sikavav sadikhime thaj andar e khera; Jaćhencadikhindoj thaj e Judejcenge thaj e Jelinenge o jertipe anglal o Devel thaj paćape ano Devljutno amaro Isus Hristo. Thaj akana eke, me phandlo Đesa džava ano Jerusalim na džandoj so ka kerdol pe mange ane leste. Semo kaj o Đi Sumnalo ane sako foro te mothovel, vakerindoj kaj man e sinđirja thaj e belave ađikerena. Aj ni baš soste na grižinama, ni hajinava baše mlo dživdipe, semo te dav agor pe drom mlo lošalipesa thaj kandipe savo leljem kotar o Devljutno Isus: kaj jaćhencartedikhav o evangelium o baxtaripe e Devlesoro. Thaj eke akana me džanav kaj maj na ka dikhen mlo muj tumen sare maškaro save nakhljem mothovindoj o Thagaripe e Devlesoro. Odolese tumenge mothovav ano avdivesutno dive kaj sem khoslo kotar o rat sarijengoro. Kaj ni mukljem tumenge te sikavav sa o kamipe e Devlesoro. Arakhen, eke, pe tumende thaj pe sa o stado ane savo tumen o Đi Sumnalo čuća baše episkopenge te ćarjaren e Khanđiri e Devljutnesiri thaj e Devlesiri sava poćinda ple rateja. Kaj me džanav odova kaj po džanipe mlo ka đerdinen maškaro tumende astarutne ruva save na arakhen o stado; Thaj maškar tumende korkore ka ušten e manuša save ka vakeren averćhane te ciden e sikavnen pala peste. Odolese arakhen thaj ćhuven tumen sama kaj trin berša dive thaj rat na aćhiljum te sikavav asvencar sakone kotar tumende. A od akana, phraljalen, dava tumen e Devlese thaj lesere baxtarimasere lafijenge, savo šaj te duvarel thaj te del tumen nakhavdipe maškar sarijende e posumnalenge. Rup, ja sumnakaj, ja šeja, ni kastar na mangljum. Korkore džanen kaj sa so valjanđa maj thaj odolenge save mancar sinele kandininde akala vasta mle. Sa tumenge sikavđum kaj ađahar valjani te kerelpe thaj te ažutinel pe e bizoralenge, thaj te setinen tumen e lafese e Devljutnese e Isuse koja ov phenđa: Poćaljardime si te de aj te le. Thaj akava phenindoj, pelo pe koćija ple sarijencar lencar thaj ruđinđape e Devlese. Thaj ulo baro rovipe sarijendar thaj lindoj ane angalin e Pavle ćumudinena le, ulavdine phageođese bašo lafi savo phenđa kaj on na ka dikhen o muj lesoro; thaj prohodinđe le ane barka. A kana amen ulavindoj lendar berisardam, gelindoj pravo aljam ko Kos, thaj o dujto dive ko Rodos a odothar ano Patar. Thaj arakhavindoj e barka savi džala ano Finiki, đerdinđam thaj legarđam amen. Kana eke sikavdilo o Kipar, mekljam le pe ući rig, berinđam ane Sirija, thaj terdinjam ano Tir; kaj othe valjanđa te čućarelpe e barka. Thaj arakhavindoj e sikavnen, aćhiljam odothe efta dive; on e Pavlese vakerena Đesa te na džal upre ano Jerusalim. A kana amenge pherdile o dive, iklindoj lijam amen prohodime kotar sarijendar e romnjencar thaj e ćhavorencar đi palal o foro, pa perindoj pe koćija ki obala ruđinđam amen e Devlese. Thaj jertindoj jekh avresa, dijam (khuvđam) ane barka; a von irinđe pes pire kherenge. A amen beriđandoj kotar o Tir, resljam ano Ptolemaid, thaj ćumudindoj e phraljen aćhiljam lende jek dive. A tajsadive ikliljam, o Pavle thaj amen save sijama lesa, thaj aljam ane Kesarija; thaj đerdindoj ano kher e Filipese evangelista, savo sinele jek katar o efta džakonija, aćhiljam ke leste. Thaj akale sinele štar ćhave ćhaja save anglalmothovena. Džikaj odothe beštinjam bute dive, ulilo upral andar e Judeja nesavo profeto po anav Agav; Thaj avindoj ke amende lelja e kustik e Pavlesiri thaj phandlja ple vasta thaj ple pre, thaj phenđa: Ađahar vakerela o Đi Sumnalo: e manuše kasiri akaja kustik, ađahar ka phanden ano Jerusalim e Judejcija, thaj ka den le ane vasta e nađangledevlengere. A kana šunđam akava, ruđinđam le thaj amen thaj e thanutne te na džal upre ano Jerusalim. A o Pavle irinđa: So kerena te rovena thaj pharavena mlo vilo? Kaj me sem gatavo na semo te ovav phandlo aj vi te merav ano Jerusalim baš o anav e Devljutne Isusesoro. A kana le na šajinđam te irina, aćhiljam phenindoj: o Kamipe Devljutnesoro nek ovel. Thaj pale akala dive gatisajlam thaj ikliljam ano Jerusalim. A avile amencar thaj nesave sikavne andar e Kesarija legavindoj amen nesave Mnasonese katar o Kipar, purane sikavnese te ova lesere dostija. Thaj kana aljam ano Jerusalim, lelje amen e phralja kamipne. A tajsadive gelo o Pavle amencar e Jakovese; thaj ale sa e phurederutne. Thaj ćumindoj lencar mothovđa sa palo redo so ćerda o Devel maškar e nađangledevlesere lesere kandipnaja. A on šundoj ašarena e Devle thaj phende lese: Dikhea li phrala, kobor milje Judejcija save paćaje, thaj sare si kamle e Kanunese. A šunde katar tu kaj sikave crdipe kotar o Mojsije sa e Judejconen save si maškar e nađangledevlese, vakerindoj lenge te na sunetinen e ćhavoren plen, ni te na ikeren o adetija e dadengere. So te kera, eke, akana? Sarjek o seloro ka ćedel pe, kaj ka šunen kaj aljan. Akava, eke, ker so tuke phena: Isiamen štar manuša save pe peste lelje o xapesovli; Le olen thaj khos tut lencar, thaj poćin love pe lende te randen o šere ple, thaj sare ka džanen kaj odova so šunđe baše tute nane niso, aj kaj vi korkoro ićerea o Kanuni thaj dživdine pe leste. A baš e nađangledevleserenge save paćaje amen hramonđam ćhinavindoj kaj on niso odolestar te na ićeren, semo te arakhen pe kotar e idolesere viktime, thaj kotar o rat, thaj kotar o tasavdino, thaj kotar o blud. Teg o Pavle lelja odole manušen, thaj tajsadive khosindoj lencar, đerdinđa ano hram, mothovindoj kana ka pherđon o dive e khosipesere te bi pašljarđola e viktima baš sakonese kotar lende. A kana valjanđa kaj te pherđol efta dive, dikhindoj le ano hramo odola Judejcija so sinele andar e Azija, vazdinđe sa o seloro thaj ćhute e vasta pe leste, vikadindoj: Manušalen Izrailjcija, ažutinen! Akava si manuš savo sa sikavel sugde opipe o seloro thaj o Kanuni thaj o than akalesoro; thaj pana vi e Jelinen anđa ano hram thaj meljarđa o sumnalo than akava. Kaj dikhle leja ano foro e Trofime andar o Efes, thaj gndinena kaj le o Pavle anđa ano hram. Thaj sa o foro uštino, thaj reslo o seloro, thaj dolindoj e Pavle, ikalde le avrijal andar o hramo; thaj sigo phandlile o udara. Thaj đikaj rodinde te mudaren le, avilo o krlo upre đi o vastarutno e četako te uštel celo Jerusalim. A ov sigo lindoj e urumnen thaj e kapetanen, prastandilo pe lende. On pak dikhindoj e vastarutne thaj e urumnen, ćhinavde te maren e Pavle. A o vastarutno alo paše thaj lelja le, ta ćhinavda kaj le te ćhiven ane duj verige, thaj phućle le ko si thaj so kerda. A ano seloro jekhore dena vika jekh a e avera aver. Kana pak naštisarda kotar e vika niso garavdine te džanel, ćhinavda te legaren le ano logori. A kana sinele ko basamaci, morandile o urumne te legaren le bašo spidipe e sumnalengoro. Kaj palo leste džala but seloro vikadindoj: Mudaren le! Anglo đerdipe ano logori o Pavle phenđa e vakerutnese: Si li mange mukluno te phenav tuke neso? A ov phenđa: Aj li džane jelikane? Najsan li tu odova Egipćano savo anglal akala dive vazdinđan thaj ikalđan ane drmina štar milje ćhudutne? A o Pavle phenđa: Me sem manuš Judejco andar e Tarsa, forutno e pendžarde forosko ane Kilikija; ruđinav tut mek mange te vakerav e selorese. A kana lese ov meklja, terdino o Pavle ko basamaci thaj kerda vasteja e selorese; thaj kana ulo baro š'tipe, vaćerda e judengere ćhibijasa thaj phenđa: Manušalen, phraljalen thaj dadalen, šunen akana mlo arakhavdipe anglal tumende. A kana šunde kaj lenge e judengere ćhibijasa vakerela, ulo si pobaro š'tipe. Thaj phenđa: Me sem manuš Judejco, bijando ano Tarso kilikijakoro, sikavdo ane akava foro ke pre e Gamalilengere, sikavdo čaće Kanunese e dadengoro, thaj sema butikerutno e Devlesoro sar so si sare vi tumen avdive. Me akava Drom prastajem dži o meripe, phandindoj thaj dindoj ane phandlipa thaj e manušen thaj e romnjen, sar so mange ka jakhencardikhinindoj thaj o anglunorašajutno thaj sa e phurederutne; kotar save thaj hramome bićhalutna leljem pe phrala ano Damask, thaj dželem kaj vi odolen so sinele odori phandine te anav ano Jerusalim te oven globime. A kana dželem thaj aljum paše e Damaskose, kerdilo mange kaj biašuđarune trujal o ekvašdive strefinđa trujal mande baro rošipe katar o badali. Thaj peljum ki phuv, thaj šunđum o krlo, savo vakerel mange: Savle, Savle, sose prastaveja man? A me irinđum: Ko sijan tu, Devljutneja? A ov mange phenda: Me sem o Isus Nazarećanin, save tu prastaveja. A odola save sinele mancar dikhle o rošipe thaj sinele daravde, aj na šunđe o krlo savo mange vakerela. A me phenđum: So te kerav Devljutneja? A o Devljutno mange phenđa: Ušti thaj dža ano Damask, thaj odori ka phenel pe tuke kotar o sa so si tuke čaćavdino te kere. Thaj sar me kororlijum kotar odolako glorijako rošipe, legarde ma vastestar odola save sinele mancar, thaj ađahar đerdinđum ano Damask. A nesavo Ananija, manuš devlikano po Kanuni, jakhencardikhutno kotar e sa Judejcija save dživdinena ano Damask, alo ke mande, terdino thaj phenda mange: Savle phrala, dikh! Thaj me ane odova časo dikhljem ane leste. A ov mange phenda: O Devel amare dadengoro alonđa tut te pendžare o kamipe lesoro, thaj te dikhe e Hakajutne, thaj te šune o krlo andar o muj lesoro: Te ove lese jakhencadikhutno anglal o sa manuša baš akava so dikhljan thaj šunđan. Thaj akana so trajine? Ušti thaj bol tut; thaj thov e bezeha kle, vikindoj o Lafi e Devljutnesoro. A kerdilo mange kana irisajlem ano Jerusalim thaj đikaj ruđinama ano hramo daljum ane sunesodikhipe, thaj dikhljum Le savo mange vakerel: Siđar thaj ikljov sigo andar o Jerusalim, kaj na ka len klo jakhencardikhutno mothojpe baš e mande. A me phenđum: Devljutneja, korkore džanen kaj me frdinđum ane phandlipa thaj marava andar e sinagoge, odolen save paćana ane tute. Thaj kana ćhordolape o rat e Stefanesoro jakhencadikhutne kle, thaj me korkoro sema othe thaj vi me mangljem lesoro meripe, thaj arakhljem e fostanja odolengere save le mudarena. Thaj phenđa mange: Dža, kaj me ka bićhalav tut dur maškar e nađangledevlesere. A on le šunena đi akava lafi, ta vazdinđe o krlo plo vakerindoj: Le kotar e phuv asavke, kaj vov na valjani te dživdinel! Thaj kana on dena vika thaj pestar frdena e fostanja thaj frdena praxo ano ajri, ćhinavda o vastarutno le te legaren ane kasarna, thaj phenđa kaj marimnasa te phućen le te bi džanola baš savi doš ađahar dena vika pe leste. Thaj kana čičidle le e haravlencar, phenđa o Pavle e kapetanose savo odothe terđola: Manuše Rimljanino, thaj bikrisime, sar tumenge si mukljuno te maren? A kana odova šunđa o kapetano, pašilo e vastarutnese thaj mothovđa vakerindoj: Arak so ka kere, kaj akava manuš si e rimoskoro forutno. A o vastarutno pašindoj phenda lese: Phen mange sijan li tu Rimljano? A ov phenđa: Va. A o vastarutno irinđa: Me sem baš e bare love akava forutnipe leljem. A o Pavle phenđa: A me thaj bijandiljem ane leste. Napal sigo durile lestar odola so mangle le te phućen, a vi o vastarutno darandilo kana dođanđa kaj si Rimljano thaj so phandlja le. Tajsadive pak manglindoj kaj paćavune te džanel sose le davijinen e Judejcija, meklja le andar e sinđirja thaj vakerda te aven e anglunerašajutne thaj sa lengoro Sinedrion, ta anđa e Pavle thaj ćhuta le anglal lende. A o Pavle dikhindoj po Sinedrion thaj phenđa: Manušalen phraljalen, me sa mle laćhe gndimasa dživdinđum anglal o Devel đi korkoro akava dive. A anglunorašaj o Ananija ćhinavda odolenge so terđona đi leste te maren le pe muj. Teg lese phenđa o Pavle: Tut o Devel ka marel, duvari makhločirećea! Thaj tu beše ta maje krisinea po kanuni, a opipe kanuneste ćhinave te maren man! A odola so terđona trujale phenđe: Sar e anglunerašaje e Devlesere dukhave? A o Pavle phenđa: Na džanđum, phraljalen, kaj si anglunorašaj; kaj si hramome: Ma vaker džungalipe kle seloresere phurederutnese. A o Pavle haljovinđoj kaj si jek kotor e sadukejengoro a o dujto farisejengoro, dinđa vika ano Sinedrion: Manušalen phraljalen, me sem farisej, ćhavo e farisejesoro, baš o ađikeripe thaj baš o dživdisaripe e mulengoro mange krisinel pe. A kana ov akava phenđa, ulo ćingara maškar e fariseja thaj sadukeja, thaj ulavdilo pe o seloro. Kaj e sadukeja vakerena kaj naj dživdisaripe, ni phakale, ni đi, a e fariseja aćhovena pe solduj. Thaj uli bari vika, thaj uštindoj e lilvarne kotar e rig e farisejengiri ćhingarena pe vakerindoj: Nisavo džungalipe na arakhaja pe akava manuš; te li lese pak vakerel o đi ja o phakalo, te na maren opipe e Devlestar. A kana ulo baro ćingaripe, darandilo o vastarutno kaj e Pavle te na ćinđeren, ćhinavđa te uljen e urumne thaj te len le kotar lende thaj te legaren ano logori. A e aver rat aćhilo o Devljutno anglal leste thaj phenđa: Ov zoralo, Pavle, kaj sar so mothovđan baš e mandar ano Jerusalim, ađahar valjani tuke thaj ano Rim te mothove. Kana eke, dislilo, kerde nesave kotar e Judejcija garavdino vakeripe thaj xale sovli vakerindoj kaj ni ka xan ni pijen đikaj na mudaren e Pavle. A sinele on pobuter kotar e saranda save odova garavdino vakeripe kerde. Akala paše ale e anglunerašajese thaj e šerutnenge thaj phenđe: Xapesovljasa xalam sovli kaj na manga niso te ćhiva ano muj, đikaj na mudara e Pavle. Akana, eke, tumen e Sinedrionesa phenen e šerutnese kaj le tajsa te anen tumende, sar bi te ka mangen te džanen polaćhe kotar lestar; a amen sijam gatime le te mudara anglal so ov ka avel paše. A o ćhavo e Pavlesere phenjakoro, šundoj baš akale garavdine ađikeripnase, alo thaj đerdinđa ano logori thaj mothovđa e Pavlese. O Pavle pak, vičindoj jekhe kotar o kapetanja phenđa: Akale terne legar e šerutnese, kaj isile neso te mothovel lese. A ov lelja le thaj anđale ko šerutno, thaj phenđa: O astarutno Pavle vičinđa ma thaj ruđinđa kaj tuke te anav akale terne savo isile neso tuke te phenel. A o šerutno lindoj le vastestar, thaj džanindoj korkoro, phućlja le: So si odova so isi tut te mothove mange? Thaj phenđa: E Judejcija kerđe lafi kaj te ruđinen tut kaj tajsa te ane e Pavle lenge ano Sinedrion, sar kaj te mangen neso čaćune te phućen lestar. Aj tu len ma te kande, kaj le garavdine on ađikeren pobuter kotar e saranda manuša save xale sovel kaj ni ka xan ni pijen đikaj le na mudaren; thaj akana si gatime, thaj ađikerena klo dindo lafi. O šerutno teg meklja e terne ćhinavdinoj lese: Nikase ma mothov kaj mange akava mothovđan. Thaj vikindoj dujen kotar o kapetanja phenđa: Gatinen dušel urumnen te džan ane Kesarija, thaj eftavardeš grastarutnen thaj dušel ćhudutnen, po trito časo raćate. Thaj nek anen e grasten te ćhuven e Pavle thaj te prohodinen le dživde dži o Felikso vastarutno. Thaj hramonđa lil asavka inćarimasa: Klaudije Lisija, zorale vastarutnese e Feliksose bićhaldo sastipe. E manuše akale astarđe e Judejcija thaj mangle le te mudaren; me pak aljum e urumnencar thaj leljum le, džanglindoj kaj si Rimljano. Thaj manglindoj te džanav so kerda baš savo le davijinen andem le ane lengoro Sinedrion, thaj arakhljum kaj le davijinen baš e phućipa lengere kanunesoro, a kaj nane le nisave bangipa savi therdinel meripa ja sinđirja. Kana mange pak mothovdilo o garavdino vakeripe e Judejcengoro opipe akale manušestar, sigo bićhalđum le tuke, ćhinavdinoj thaj leskere davijutnenge kaj anglal tute te phenen so isilen pe leste. Ov sasto! Teg e urumne, sar so ćhinavda pe lenge, lelje e Pavle thaj legardele le raćate ano Antipatrid. A tajsadive, aćhavindoj e grastarutnen te džan leja, irindepe ano logori. Thaj on avindoj ane Kesarija thaj dindoj o lil e vastarutnese, inkalde vi e Pavle anglal oleste. A o vastarutno drabarindoj o lil, phućlja andar savi si ov umalin; thaj džanglindoj kaj si andar e Kalikija phenđa: Ka šunav tut kana ka resen thaj kle davijutne. Thaj ćhinavđa kaj le te arakhen ane Irodesiri krisarutni. A palo pandž dive ulilo o anglunorašaj o Ananija e phurederutnencar thaj nesave vakerutneja e Tertuleja, save davijinđe e Pavle e vastarutnese. A kana vičinde le, lelja le o Tertul te davijinel vakerindoj: Kaj telal tute dživdina ano baro šalomipe, thaj kaj e šukaripna akale selorese kerela pe kla grižaja, aćhova pe odova sarsavona ašarutnaja sajekh thaj pe sa e riga, paćivalea Felikse! Aj te na but dosadinav tut, ruđinav tut kaj amen xarne te ašune palo klo phravdinipe. Kaj arakhljam akale manuše kaj si kuga, thaj kaj vazdel uštipe opipe e sa Judejcija pe sa o them, thaj kaj si orocrdutno pe Nazarejska jeresija, savo zumavđa thaj o hramo te lađarel; le thaj dolinđam thaj mangljam te krisina lese po kanuni amaro. Aj alo o Lisija ćhinavutno thaj bara zorasa lelja le andar amare vasta thaj bićhalđale tute, ćhinavdinoj kaj lesere davijutne aven ke tute; katar leste šaj korkoro, phućindoj le, te džane kotar sa akalestar sose amen le davijina, a thaj e Judejcija složisale vakerindoj kaj si odova ađahar. A o Pavle irinđa kana lese o vastarutno dinđa semno te vakerel: Džanglindoj kaj sijan but berša hakajuno krisari akale selorese, sa pobaro muklipe (sloboda) man arakhav. Tu šaj te dođane kaj nane pobut kotar e dešuduj dive sar me iklistijum ano Jerusalim te ruđinama e Devlese. Thaj ni man na arakhle ano hramo, ni ane sinagoge, ni ano foro kaj nekasa te ćhingara ma ja te kerav uštipe ano seloro, ni on našti te mothoven odova baš e sose man akana davijinena. A kava aćhovava pe odova, kaj odole Dromeja, save on vičinena jeres, me kandava e dadikane Devlese, paćavindoj baše sa odolese so si hramome ano Kanuni thaj ane Profetija. Isindoj anglunipe ko Devel kaj ka ovel dživdisaripe e mulenge, thaj e hakajutnenge thaj e bezehutnenge, savo thaj korkore akala ađićerena. Baš e odova pak thaj korkoro kerav buti te ovel man khoslo gindipe sajekh anglal o Devel thaj o manuša. Thaj palo but berša aljum te anav dindipe mle selorese thaj te pašljarav o viktime. Ane odova arakhle man khosle ano hramo, na e sumnalencar, ni vikaja, nesave Judejcija andar e Azija save valjande te aven anglal tute te davijin pe te isilen so pe mande. Ja akala korkore nek phenen, te arakhle pe mande nesavi doš, kana terdinjum anglal o Sinedrion, semo akava jekh lafi savo dijem vika terdindoj maškar olende: Baš e dživdisaripe e mulengoro tumen mange avdive krisinen. A kana o Feliks šunđa akava, durarđa lenge, džanglindoj but šukar baš akava Drom, thaj phenđa: Kana ka avel o Lisija ćhinavdino, ka dikhav tumaro stvaro. Thaj ćhinavda e kapetanose kaj o Pavle te arakhel pe, thaj te kerel pe lese loćaripe, thaj kaj ni jekhese katar lesere najpašutne te na ćhinavel pe o kandipe lese thaj o avipe ke leste. A palo nesave dive alo o Feliks e Drusilaja pla romnjaja, savi sinele Judejka, thaj vikindoj e Pavle šunela lestar katar o paćape ano Hristo Isus. A kana ov vakerela katar o hakajipe thaj inćardipe thaj katar o avuno krisi, darandilo o Feliks thaj irinđa: Dža akana, a kana ka ovel man vakti ka vičinav tut. Jekvaktune eke džakerela kaj ka del le o Pavle love te bi mukel le; odolese thaj but droma vičinela le thaj vakerela leja. A kana pherdile o duj berša, alo e Feliksese baš oleskoro than o Porkije Fest. A o Feliks, manglindoj e Judejconenge te kerel po kamipe, aćhavda e Pavle ano phandlipe. A o Fest teg, avindoj ko ćerdipe ane provincija, iklilo palo trin dive andar e Kesarija ano Jerusalim. Teg sikavđe pe anglal leste o anglunorašaj thaj e anglune judejcengere opipe e Pavlestar thaj ruđinena le, rodindoj kandinipe opipe lestar, te bićhalel le ano Jerusalim, kerindoj garavdino ađićeripe kaj le te mudaren ko drom. A o Fest irinđa kaj o Pavle ikerel pe ane Kesarija, thaj kaj ov korkoro sigate odori ka džal. Save, akana, šaj tumendar, phenđa nek aven mancar, ta te isi nesavo doš pe odova manuš, nek davijinen le. A sar nakhavđa ke lende na pobuter kotar deš dive, ulilo ane Kesarija, thaj tajsadive bešlo pe krisaresiri bešutni thaj ćhinavda te anen e Pavle. Kana pak le ande, terdine trujal e Judejcija save ale andar o Jerusalim, thaj bute thaj phare doša vakerena upro Pavle, save naštine te mothoven. A ov arakhela pe: Ni e Kanunese e judejengoro, ni hramose, ni e thagarese so bezehtindem. Aj o Fest, manglindoj e Judejcenge te kerel po kamipe, irinđa e Pavlese thaj phenđa: Mange li te dža upre ano Jerusalim thaj odori te krisinav tuke baš akava? A o Pavle phenđa: Me terđovav po kriso e thagaresoro, kaj vi valjani te krisinel pe mange. E Judejcenge niso na kerdem doš, sar so tu najlaćhe džane. Te li kerdem doš, ja kerdem diso so therdinela meripe, na hajinava te merav; te pak niso nane katar odova baše sose man akala davijinen, nikoj man našti lenge te del. E thagare vikinav! Teg o Fest, vakerindoj e gođovarutnencar, irinđa: Po thagar vičindan tut, e thagarese ka dža. A sar nakhlo nekobor dive, o Agrip thagar thaj o Vernikija ulile ane Kesarija te arakhen pe e Festeja. Thaj avune kaj odori bešle but dive, mothovđa o Fest e thagarese e Pavlestar vakerindoj: Jekhe manuše aćhavđa o Feliks sar phandlino. Baš saveste, kana me sema ano Jerusalim, sikavdile e anglunerašaja thaj e phurederutne e judejengere manglindoj kaj ov te krisinel pe. Me lenge irinđum kaj nane adeti ane Rimljanja kaj te dindol pe nesavo manuš po meripe anglal so o davijime malavel pe odolencar save le davijinen thaj na lela kradanat baš o arakhavdipe katar o davijipe. A kana on akate arakhlepe, nisave durardipa na kerdem, aj tajsadive bešljum pe krisaresiri bešutni thaj ćhinavdem te anen e manuše. Trujal leste terdine e davijutne thaj nijekh doš save me anglathovdem na ikalđe. Aj isilen opipe lestar nesave phućipa katar plo paćapesoro mothovdipe, thaj katar nesavo Isus savo mulo, baš savese o Pavle mothovela kaj si dživdo. A me dogođencar pe akava poloćipe phenđum da li bi mangea te đa ano Jerusalim thaj odori kaj lese te krisinel pe baš e akava. Kana pak o Pavle rodinđa te arakha le đi o anglokrisipe e Avgustosoro, ćhinavdem te arakhen le đikaj le bićhalava e thagarese. A o Agripa phenđa e Festese: Thaj korkoro bi mangava te šunav odole manuše. A ov phenđa: Tajsa ka šune le. Tajsadive pak, kana o Agrip thaj o Vernikija ale bare strefipnaja thaj đerdinde ane krisara e ćhinavdutnencar thaj najdikhutne manušencar e forosere, thaj kana o Fest ćhinavda, ande e Pavle. Thaj phenđa o Fest: Agripo thagara thaj sare manušalen save sijen amencar, dikhen akale manuše baše saveste sa butune Judejcija thaj ano Jerusalim thaj akate rupuzisarde pe mande dindoj vika kaj ov na valjani maj te dživdinel. A me džanglindoj kaj ov niso na ćerđa so therdinel meripe, a thaj ov korkoro manglja rodipe e rošune thagarese, ćhinavdem le te bićhalav. Baše leste nane man so paćavune te hramonav e thagarese. Odolese thaj anđum le anglal tumende, a ulavdune anglal tute, Agripo thagara, te bi, po kerdino phućljaripe, ovela man so te hramonav. Kaj kerela pe mange bihaljovine e phandle te bićhalav, a e doša lesere te na mothovav. A o Agripa phenđa e Pavlese: Mekela pe tuke te vakere korkoro tutar. Teg o Pavle vazdindoj po vast, poćinđa plo arakhavdipe: Haćarav man baxtalo, thagara Agripa, so avdive anglal tute ka arakhape kotar sa baše soste davijinen man e Judejcija. Ulavdine so tu penđarea sa e judejengere adetija thaj e poloćipa. Odolese ruđinav tut te bi man bi holjinako te šune. Mlo, akana, dživdipe kotar o ternipe, savo si kotar o anglunipe sinele maškar o seloro mlo ano Jerusalim, džanen sare e Judejcija, save džanen man angleder, te mangle te mothoven, kaj pe najostro struja amare paćapese dživdinđum sar farisej. Thaj akana terđovava anglal o kriso bašo džakeripe ano dindo lafi savo o Devel dinđa amare dadenge, đi kaste amare dešuduj njamija, kamikane kandinde dive thaj rat, ažućarindoj kaj ka doresen. Baš e akava ažućaripe, thagara Agripo, davijime sijum katar e Judejcija. Sose tumen gndinen kaj si bipaćajmase kaj o Devel e mulen dživdisarel? Thaj vi me, emčaće, vi korkoro gndinđum kaj valjani mange but te kerav opipe po anav e Isus Nazarećanesoro. So thaj kerdem ano Jerusalim; thaj buten katar e sumnale me phandljum ane phandlipa, lindoj zor katar o anglunorašaj; thaj kana mudarena len, me aćhovava pe odova. Thaj pe sa e sinagoge, butdroma len mučindoj dava zori te hulinen, thaj but bare xolinasa opipe lendar, prastavdem len pe vi ane averenge forore. Thaj ađahar džanglindoj ano Damask autorizimnaja thaj ćhinadimnaja katar o anglunorašaj, ano mesmeri, thagara, dikhljum po drom katar o badali roštipe pobaro katar o strefipe e khamesoro, savi srefinđa man thaj odolen so džana mancar. A kana amen savore peljam pe phuv, šunđum krlo kaj vakerela mange thaj phenel jevrejengara ćhibijasa: Savle, Savle, sose prastave man? Phare si tuke opipe e posavdipnastar te ritine tut! A me phenđum: Ko sijan tu, Devljutneja? A ov phenđa: Me sem o Isus save tu prastaveja. Aj ušti thaj terđov tuke ko pre; kaj odolese tuke mothovđuma te ćhivav tut baš kandinese thaj jakhencadikhutnese akalese so dikhljan thaj so ka sikavav tuke, ikalindoj tut katar o seloro e judejengoro thaj katar e nađangledevleserendar ane save me bićhalav tut, te phrave lengere jakha kaj katar o raćipe te irinen pe baš rošalipe thaj katar e zor e bengesiri e Devlese, kaj paćapesa ane mande len jertipe e bezehengoro thaj kotor e sumnalencar. Odolese, thagara Agripa, me na sijumle nakandino e badalesere dikhipnase; Aj najanglal odolenge ano Damask thaj ano Jerusalim, napal pe sa e phuv e judengiri thaj e nađangledevleserenge vakerdem kaj te jertinen pe thaj te irinen pe e Devlese kerindoj kotora paćivale e jertipnastar. Odolese man e Judejcija dolinde ano hramo thaj mangle te kotorisaren man. Aj lindoj ažutipe katar o Devel terđovava đi korkoro akava dive thaj mothovava e ciknese thaj e barese, na phenindoj niso semo odova so e Profetija thaj o Mojsije phenđe kaj ka ovel: Kaj o Hristos ka mudarđol, thaj kaj ka ovel angluno andar o dživdisaripe e mulengoro, thaj kaj ka mothovel roštipe e judejengere selorese thaj e nađangledevleserenge. A kana ov pes ađahar čačavela, phenđa o Fest zorale krleja: Dilinđovea Pavle! Bute lila ikalen tut andar e godi. A ov phenđa: Na dilinđovav, zoraleja Festo, aj mothovav e čačipnasere thaj e gođakere lafija. Kaj baše akava džanel o thagar, sevese thaj vakerav mukljune; kaj na paćav kaj lese diso katar akava si bipenđardo, kaj akava na kerdilope ane nesavi ćoška. Paća li, thagara Agripa, e Profetonenge? Džanav kaj paća. A o Agripa phenđa e Pavlese: Pana hari pa ka phere mi godi te ovav hristijano. A o Pavle phenđa: Ruđinava bi e Devle thaj haricake thaj buteske kaj bi na semo tu aj vi savore save šunen man avdive ovena asavke sar thaj me so sem, semo akala sinđirja. Thaj kana ov akava phenđa, uštino o thagar thaj o vastarutno thaj o Vernikija thaj save bešena lencar. Thaj durindoj vakerena pe maškar peste, vakerindoj: Akava manuš na kerda niso so therdinel meripe ja sinđirja. A o Agripa phenđa e Festese: Akava manuš šajine te ovel muklo te ne bi akhardola po thagar. (Thaj ađahar kerda o vastarutno te bićhalel le e thagarese) Thaj sar sinele ćhinavdo te berosara ane Italija, dinđe thaj e Pavle thaj nesave avere phandlen e kapetanose e thagarese četake, po anav Julije. A kana đerdinđam ane barka e adramitengiri manglindoj te berosara ane azijakere thana, duriljam; amenca sinele o Aristarh, Makedonco andar o Solun. O dujto dive terdinjam ano Sidon. A o Julije manušikane kamljune kerindoj mamuj o Pavle meklja le te džal e amalenge kaj te bi grižinenape lestar. Thaj odothar pođindoj berosardam telal o Kipar, kaj e balvalja sinele averatar. Thaj berindoj o buhlo derav e kilikijakiri, thaj e pamfilijakiri aljam ane Mira e Likijakiri. Thaj odothe arakhavdindoj o kapetano barka e aleksandrijakiri savi berol ane Italija, thanarda amen ane late. Berindoj pak poari but dive, thaj pharipnasa avindoj karing o Kind, kaj e balval na dinđamen, điberinđam telal o Krit ke Salmona. Thaj pharipnasa berindoj uzal e obala resljam ane nesavo than savo vičinela pe Laćhe aćhavdipa, paše savo sinele o foro Laseja. Ta sar nakhlo bute vaktija thaj o berope na sine bi darakoro, kaj vi o postipe eke sine nakhlo, phuredisarda o Pavle. Vakerindoj lenge: Manušalen, dikhava kaj o beripe ka ovel pharipnasa thaj bara globaja, na semo ladavipnase thaj e barkake, aj vi baše amare dživdipa. Aj o kapetano pobuter paćaja e vastarutnese thaj e barkakere manušese, na li e Pavlesere lafijenge. A sar e aćhavdimasoro than na sine laćho baš o jevendipe, bute phuredisarde kaj te džan odothar, na bi li sar šajine te aven đi o Finik, te jevendinen ane odova aćhadimasoro than e kritesoro savo dikhel karing o jugozapado thaj severozapado. Thaj kana phudinđa o jug, gndinđe kaj lengo mangipe pherdilo, ta vazdindoj o sidro berinena uzal o Krit. Aj na sigate pale odova phudinđa averatar lese bari balval savo vičinela pe severoistočnjak. Thaj kana astarđa e barka thaj oj naštisarda e balvaljake te opipeisajvol, mukljama men e talasijenge te legaren amen. A kana nakhinjam paše jekhe ostrvostar savo vičinel pe Klauda, pharipnasa šainđam te ićera e barka, savi inkalindoj, trubujisarde ažutimasere alatija thaj telalphandle e barka, ta darandoj te na khuven ko bar, mekle e poxtana thaj ađahar poari berinđe. A kana amenge but phararela e bari balval, tajsadive frdena e ladavipa. Thaj o trito dive amare vastencar frdinđam e alatija e barkakere. A kana ni o kham ni e ćerenja bute divenge na sikavdile, thaj e bari balval na tikni rupuzinđa, sinele najpalal xasardo sako ađikeripe kaj ka ikala men. Kaj pe but vakti na xala pe, teg o Pavle terdino maškar lende thaj phenđa: Valjanđape, o manušalen, te kanden man, thaj te na durarđova katar o Krit, pa te na arakhamen akava pharipe thaj e globa. Thaj ake akana tumenge phurederinav te oven lošale, kaj ni jekh ođi katar tumende na perel, semo e barka. Kaj akaja rat aćhilo anglal mande o phakalo e Devlesoro kaskoro sijum thaj kase kandav, vakerindoj: Ma dara, Pavle! Tu musaj si te ikljove anglal o thagar; thaj ake, o Devel dinđa tuke sa save berinena tuja. Odolese, manušalen, oven lošale, kaj paćav e Devlese kaj ađahar ka ovel sar so sine mange vakerdo. Amen, eke, ka ova frdime pe nesavo ostrvo. A kana sine e dešuštarto rat thaj amen berinđam pe Andrija, trujal ekvaširat gndinđe e barkarja kaj alopepaše nesave phuvljake. Thaj merindoj o oripe arakhle biš dolipe. Thaj hari nakhlindoj, pale merinđe thaj arakhle dešupanđ dolipe. Napal darindoj te na khuven pe telalpanjesere bara, frdinde katar e paluni rig štar sidrija, pa ruđinena pe te disjol o dive. A kana e barkarja dikhle te našen katar e barka, thaj mekle e barka ano derav vakerindoj pe sar kaj mangena katar e angluni rig te meken e sidrija, phenđa o Pavle e kapetanose thaj e urumnenge: Ako akala na aćhovena pe barka, tumen na ka šaj te ikalen tumen. Teg e urumne ćhinde e šele pe barka thaj mekle le pa pelo. A pana angle aj disjol o dive, ruđinela o Pavle sarijen te xan vakerindoj: Avdive si o dešuštarto dive sar ađićeren, thaj bi xabesko nakhavena, niso na ćhivindoj ano muj. Odolese tumen ruđinav te len xabe, kaj si odova baše tumaro ikalipe. Thaj vakerindoj akava, lelja o maro, thaj ašarisajlo e Devlese anglo sarijende thaj phagindoj, terdino te xal. Teg savore lošalisajle, pa thaj korkore lelje o xabe. A ane barka sinjamle amen ođe saćedime dušel eftavardeš thaj šov. Sar pak čalile o xabe, loćarde e barka frdindoj o điv ano derav. A kana ulo dive, na penđarde e phuv, aj dikhle nesavo zaliv obala e pošikasa, pe savo agorinđe, te si šajine, te ikalen e barka. Thaj phravdindoj e sidrija mekle ano derav, thaj phravde jekhune thaj o šele ko krme, ta buljarindoj ari o poxtani karing e balval upravisajle karing e obala. A kana arakhavdile pe deravesoro bar, ćalavde e barka; thaj o angluno kotor e barkakoro khuvđa thaj aćhilo bimiškome, a o paluno kotor phađola katar e zor e talasengiri. E urumne teg kerde lafi te mudaren e phandlen, kaj neko lendar te na notinel thaj na našel. Aj o kapetano manglindoj te arakhel e Pavle, aćhavđa lengiro vakeripe thaj ćhinavda odolenge kola šaj te notinen kaj anglune te ripinen thaj te ikljon ki phuv, a e aćhutne, jekhore ko phalja, a avera ko neso kotar e barka. Thaj ađahar sare iklistile dživde ki phuv. Thaj kana ikalđe pe katar e barka save sinele e Pavleja, teg dodžangle kaj o ostrvo vićinela pe Malta. A e thanutne amenđe mothode na ari manušo kamipe, kaj thabarindoj e jag sarijen amen lelje bašo bršin savo perela thaj bašo jevend. Thaj kana o Pavle ćedinđa gramada e krangonengiri thaj thabarđa pe jag, iklilo o sap katar o tatipe thaj xalja le ko vas. A kana dikhindoj o thanutne e sape kote umblavdo ko vas lesoro, vakerena jek avrese: Sarjek si akava manuš mudarutno, kaj le ikalindoj katar o derav o Hakajipe na meklja te dživdini. A vov ćinosarda e sape ane jag, thaj na inđarda nisavo džungalipe. A on adžićerde kaj ov ka šuvljol ja otojekhvar ka perel mulo. Aj kana pobuter adžićerde, thaj dikhle kaj lese niso džungale na ulo, paruvisajle thaj vakerena kaj si ov devel. Trujal okova than pak sinele o barvalipe e šerutnesoro katar o ostrvo, po anav Publija, savo amen lelja thaj kovljune dostinđa trin dive. A kerdilo pe kaj o dad e Publijeveso sine le šilali thaj dizenterija thaj pašljola. Lese o Pavle đerdinđa, ta ruđindoj e Devlese thaj pašljarindoj e vasta pe leste, sastarđa le. Kana pak odova ulo, thaj e avera ko ostrvo save sinele nasvale avena, thaj sastarena pe. Thaj on amenge mothovđe bare paćiva, a kana leljam te đa gatinđe amenge so sinele trubuno. A pale trin masekja inđardam amen pe barka e aleksandrijakiri, savi sinele nakhavđa o jevend ko, thaj sinela e perš Dioskur. Thaj aviberindoj ano Sirakus aćhiljam odothe trin dive. A odothar trujal resljam ane Rigija; thaj palo jekh dive, kana phudinđa o jugo aljam o dujto dive ano Potiole. Odothe arakhljam e phraljen thaj on ruđinde amen te aćhova ke lende efta dive, thaj ađahar aljam ano Rim. Thaj e odoringutne phralja, ašundoj amenge, iklile amenge ano arakhavdipe đi e Apijevesoro trgo thaj Trin mehane. Thaj kana dikhlja len o Pavle, ašarisajlo e Devlese thaj zorardilo pe. A kana avilam ano Rim, o kapetano dinđa e phandlen e urumnengere šerutnese. Aj e Pavlese sine mukljune te dživdinel ulavdine e urumneja savo arakhelale. Pale pak trin dive akharđa o Pavle e judejengere anglunen. Thaj kana on ćedinisajle, vakerela lenge: Manušalen phraljalen, me niso na kerdem opipe e seloresoro ja o adetija e dadengere, a dindino sem andar o Jerusalim sar phandlo ane vasta e Rimljanengere. On pak phućljindoj man, mangle te muken man, kaj na arakhljape pe mande ni jekh meripnasiri doš. Aj kana e Judejcija opipesajle, si njum le morandino te vičina ma po thagar, na sar te ovela man mlo seloro baše neso te davijivav. Kotar odova karano rodinđum tumen te dikhav thaj kerav lafi; kaj bašo džakeripe e Izrailjesoro kovime sem ane akala sinđirja. A von lese phende: Amen ni na leljam lila baše tute andar e Judeja, ni na alo džiko katar e phralja te mothovel ja phenel so đungale tutar. Najpalal, manga te šuna tutar so gndine; kaj amenge si penđardo baš akava jeres kaj pe sa e riga vakerela pe opipe latar. Thaj ćhinavindoj lese o dive, ale but džene ke leste ano stano; lenge vakerela mothovindoj katar o Thagaripe e Devlesoro kotar o sabajle đi e rat thaj paćavindoj len katar o Isus andar o Kanuni e Mojsijesoro thaj andar o Profeto. Thaj jekhune paćana odolese so ov vakerela, a e avera na paćana. A sar naštine te složinenpe maškar peste, lelje te đanpese, đikaj o Pavle phenđa jekh lafi: Šukar phenđa o Đi Sumnalo prekal o profeto Isaija amare dadenge, vakerindoj: Dža e selorese akalese thaj phen: Kanencar ka šunen thaj na ka haljoven, thaj jakhencar ka podikhen thaj na ka dikhen. Kaj zorardilo o vilo akale seloresoro, thaj kanencar phare šunena, thaj jakhencar plencar phandlinde ta sar jakhencar te na dikhen, thaj kanencar te na šunen, thaj vileja te na haljoven, thaj na jertinena pe kaj len te sastarav. Nek ovel tumenge, eke, po džandipe kaj e nadžangledevleserenge bićhaldilo akava inkaldipe e Devlesoro; on thaj ka šunen. Thaj kana ov akava phenđa, gele e Judejcija xapeindoj but maškare peste. A o Pavle aćhilo pherde duj berša ane plo uđilime kher, thaj lelja sarijen save leste avena, vakerindoj o Thagaripe e Devlesoro, thaj sikavindoj kotar o Devljutno Isuso Hristo sakone tromalipnaja thaj biaćhavutne. O Pavle, kandino e Isus Hristosoro, vičindo apostoli, alome baš o evangelium e Devlesoro, save o Devel anglal dinđa prekalo ple profetija ane Sumnale Lila, e Ćhavestar plestar, savo si po trupo bijando kotar kućin e Davidesiri, e Isus Hristose Devljutnese amarese, savo si mothovdo ani zor po Đi Sumnalo baš o Ćhavo e Devlesoro dživdisaripnaja andar e mule, maškar savo leljam dindipe thaj apostolipe, kaj bašo Anav lesoro anaja ano kandipe e paćapesoro sa e nađangledevleseren, maškar save sinjen thaj tumen akhardine e Isus Hristosere, sare kola si ano Rim ćumudime kotar o Devel, vičime sumnalenca dindipe tumenge thaj šalom kotar o Devel o Dad amaro thaj o Devljutno o Isuso Hristo. Jekto, akana, ašarisavav mle Devlese andar o Isus Hristo baše sa tumenge kaj kotar o paćape tumaro vakerela pe po sa o them. Kaj si mange sadikhutno o Devel, savese kandava mle đesa ano evangelium lesere Ćhavese, kaj tumenge dava godi bi ćhinavdipesoro, ruđindoj sajekh e Devlese ane ruđutna mle te bi mange nesar e Devlesere khamipasa resava te avav ke tumende; Kaj jagale mangava tumen te dikhav, te dav tumenge nesavo đesoro dindipe baše tumaro zoralipe, odova čaće, kaj othe tumencar te kovljardivav khatane paćapesa, vi tumaraja thaj mlaja. Aj tumendar na garavava, phraljalen, kaj but droma mangljum tumenge te avav, kaj bi maškar tumende te ovela man nesavo bijando sar vi maškar e aver nađangledevlesere, ta sema điakana aćhavdo. Kamuno sem vi e Jelinenge vi e Varvarenge, vi e gođaverenge vi e bihaljovnenge. Odothar mlo mangipe si kaj vi tumenge save sijen ano Rim te vakerav o evangelijum. Kaj na lađav e Hristosere evangeliumostar, kaj si odova zor e Devlesiri ko inkaldipe sakonese savo paćal, a najangle e Judejese thaj e Jelinese. Kaj ane leste phućarela pe hakaj e Devlesiri andar o paćape ano paćape, sar so si hramimo: A o hakajutno kotar o paćape ka dživdinel. Kaj phućarela pe xoli e Devlesiri kotar o badali pe sako bidevlipe thaj bihakajipe e manušengoro save ićerena o čaćipe ano bihakajipe. Kaj so šaj te dođanđolpe bašo Devel pendžardo si lenge, kaj o Devel mothovđa lenge. Kaj so si pe Leste bidikhlino, kotar keripe e themesoro gođaja pe kerutne haljovune dikhela pe, lesiri bimeripasiri zor thaj devlikanipe, kaj nanelen vakeripe. Kaj kana pendžarde e Devle, na glorisarde le sar Devel, ni na ašarisinde, aj dilindile ane ple gođa, thaj kaljardilo o nahaljovuno vilo lengoro; Vakerindoj kaj si gođavera, dilindile, thaj arlisarde e glorija e bimerutne Devlesoro e tasvira merutne manušesoro thaj čiriklengoro thaj štareprengere dživdinutna thaj crdino pe phuv. Odolese dinđalen o Devel ane mangipa lengere vilende ano melalipe, te oven melale e trupija lengere maškaro lende korkorende; Save arlisarde o čaćipe e Devlesoro xoxavipnaja, thaj najbut paćivalisarde thaj kandle e keripnase aj e Keripnaso, savo si baxtardo ano bimeripe. Amin. Odolese dinđalen o Devel ane lađamne gudlipa. Kaj vi e džuvlja lengere kerde naturuno kerdipe ano opipenaturuno, a jekhune ađahar vi e murša meklindoj o naturuno trubujipe e džuvljengoro, thabile pla mangipnaja jekh pe avereste, e murša e muršencar kerindoj ladž, lindoj pe peste trubuni pokindi baše plo xoxavdipe. Thaj sar na hajinena te pendžaren e Devle, dinđalen o Devel ane rumime godi te keren so si bimanušne, len save si pherde sarsavo bihakajipe, blud, džungalipe, lokoistaripe, bilaćhipe, pherde umblavipa, mudaripa, čingara, bižajipa, džungalearakhavdipa; Đišušurutne, phukavutne, bidevljutne, zorasilejđutne, barikane, ašarutne, gndisarutne e džungale lošipnastar, nakandutne e dadenđe, bihaljovne, bipaćamne, bihaćarutne, bibarašutne, bikamljune. On, penđarindoj hakaj e Devlesiri, ta save odova kerena lena meripe, na semo kaj odova kerena, aj vi mekena odolenge kola odova kerena. Odolese nanetu vakeripe, o manušeja, savo godi krisine, kaj ane soste krisine avrese, tut krisisare; kaj tu savo krisine kere odova jekhune. A đana kaj si o kris e Devlesoro čaćutno upral odola save odova keren. A gndisare li odova, o manušeja, savo krisine odolenge save odova keren, a kereja jekhune, kaj tu ka naše kotar o kris e Devlesoro? Ja telalmoldine o barvalipe lesere šukaripeso thaj kovlipeso thaj lungoingaripeso, na đanindoj kaj o šukaripe e Devlesoro po jertipe legareltu? Aj kle zoralešereja thaj najertime vileja čedeja tuke bari xoli bašo dive e bare xoljakoro thaj phućardipe e hakajune krisesoro e Devlesoro, savo ka del svakonese po ćerdipna lesere: Dživdipe bimeripasoro odolenge save trajipnasa ane šukar ćerdipna roden glorija thaj pačiv thaj bimeripe; A o haćaripe thaj e xoli odolenge save trajune opipesajvon e čaćipnase a peren pe čanga e bihakajipnase. Bibaxtalipe thaj dukh pe sako ođi e manušesoro savo kerel džungalipe, a najanglal e Judejcose thaj e Jelinose; A e glorija thaj o pačiv thaj o šalom svakonese savo kerel šukaripe, a najanglal e Judejcose thaj e Jelinose; Kaj O Devel na dikhela ko si ko. Kaj save bi kanuneso keren bezex, bi kanuneso thaj ka meren; a save telal o kanuni keren bezex, po kanuni ka krisinenpe. Kaj nane hakajutne anglal o Devel odola save šunen o kanuni, aj ka čaćavenpe odola save pheren o kanuni. Kaj kana e nađangledevlesere nanendoj o kanuni keren kotar e natura so si po kanuni, olen so nanelen kanuni korkore pese si kanuni; On mothovena kaj ane vile lengere si hramime odova so si po kanuni, kaj sar e gnda lengere maškar peste davijinenpe ja čaćavinenpe, po dive kana o Devel krisinel o garavdipa e manušengere palo mlo evangelium andar o Isus Hristo. Dikh, tu vičine tut Judejco thaj ikere tut po kanuni, thaj ašarisave tut e Devleja, thaj đane o kamipe (lesoro), thaj đane te ulave so si šukar, sikavdo e kanunestar; Thaj gndine kaj sijan anglalutno e kororengoro, rošipe odolenge save si ano raćipe, sikavutno e bihaljovutnenge, sikamno e ćhavorenge, sav isile simboli đanipaso thaj čaćipaso ano kanuni. Sar tu, akana, savo sikavel averen, tut na sikave? Tu kaj mothove te na ćorel pe, ćore? Savo vakereja te na kerel pe anglaćumidipe, kere anglaćumidipe? Tu savo gadoneja tu ko idolja, ćoreja e sumnali? Sar tu savo ašarinela pe e kanuneja, nakhavindoj o kanuni dukhave e Devle? Kaj o anav e Devlesoro baše tumende akošel pe maškaro nađangledevlesere, sar kaj si hramome. Kaj o sunetipe kerelape, te pherđan o kanuni; te sijan li pašuno e kanunesoro, o sunetipe klo bisunetipe ulo. Te, akana, o bisunetimo arakhel o ćhinadipe e kanunesoro, sar ni kaj lesoro bisunetipe ka kedelape bašo sunetipe? Thaj odova savo si pe natura bisunetimo, a pherela o kanuni, ka krisinel tut savo sinjan pašo Lil thaj sunetipa phagutno e kanunesoro. Kaj nane odova Judejco so si avrial, ni nane odova sunetipe so si avrial, po trupo, aj si odova Judejco savo si odova andral, thaj sunetipe si sunetipe e vilesoro ođesa a na lafeja; asavkese si ašaripe na kotar o manuša aj kotar o Devel. Savo si, akana, anglazoralipe e Judejcongo, ja savo si šukaripe e sunetipesoro? But ane sarsavo dikhipe. Angluno, kaj si lenge dindime o lafija e Devlesere. Kaj so te na nesave na paćaje? Sar bi lengoro bipaćajipe e Devlesere paćapese ka ćhinavel? Nisar! Aj, nek ovel o Devel čaćuno, a o manuš si sako xoxavipe, sar kaj si hramome: Te ikale tut ane lafija kle thaj te perave kana krisinen tut. Te li amaro bihakajipe mothovel e Devlesoro hakajipe, so ka phena? Sar si o Devel bihakajutno kana sikavel e bari xoli? Sar manuš vakerav. Nisar! Sar šaj bi teg o Devel te krisinel e themese? Kaj te o čaćipe e Devlesoro andar mlo xoxavipe sikavdilo butune pe glorija e Lesiri, sose pana thaj me sar bezexutno te ovav krisime? Thaj sar ka, sar so kušen amen thaj sar so phenen nesave kaj amen vakera, ker džungalipe te avel o šukaripe? Lengiri krisuni si hakajuni. So, akana? Isiamen li anglazoralipe? Nisar! Kaj angleder mothovđam kaj si thaj e Judejcija thaj e Jelinija sare telal o bezeh. Sar so si hramome: Nane nijekh hakajutno, nane odova savo haljovel, nane odova savo rodela e Devle. Sare rigosajle thaj khatane bilaćhe ule: nane odova savo kerel laćhipe, nane čaće nijekh. Lengoro si krlo limori phravdo, ple ćhibijencar xoxavena, drab si e aspidinako telal e vošta lengere. O muja si lengere pherde armanja thaj čerkipe. O pre si lengere sigutne te ćhoren rat. Mulanipe thaj ćororipe si ko droma lengere; Thaj drom šalomnasoro na penđarde. Nane dar e Devlesiri anglal e jakha lengere. A džana kaj odova so o kanuni vakerela, vakerela odolenge save si ano kanuni, kaj te phanden pe sako muj, thaj sa o them te ovel bango e Devlese; Kaj e kanunesere kotorencar nijekh trupo na ka čaćavelpe anglal o leste; kaj andar o kanuni avela o penđaripe e bezehesoro. A akana pak bizo kanuni sikavdilo o hakajipe e Devlesoro, mothovdino kotar o Kanuni thaj o Profeto; Thaj odova o hakajipe e Devlesoro andar o paćape ano Isus Hristo bašo sa thaj pe sarijende save paćan, kaj nane ulavdipe. Kaj sare kerde bezeh thaj mukline si kotar glorija e Devlesiri, a čaćavenape dindipnaja, lesere bahtaripnaja, andar ćedinipe savo si ano Hristo Isuso, save ulavđa o Devel te ovel ple rateja viktima baraštibasiri andar o paćape, te sikavel hakajipe plo jertipnaja e angleder bezehengoro, ano lungo dukhavipe e Devlesoro, te sikavel pe o hakajipe lesoro ano akava vakti, kaj si Ov hakajutno thaj kaj čaćavela odole kova si kotar o paćape e Isosesoro. Kaj si, akana, o ašaripe? Aćhavdo si. Save kanuneja? Da li ćerdipna e kanunesere? Na, aj kanunesere paćapnaja. Gndinaja, akana, kaj o manuš ka čaćavelpe paćapnaja bizo ćerdipe e kanunesoro. Ja si o Devel semo e Judejcongoro, a na thaj e nađangledevlengoro? Va, thaj e nađangledevlengoro. Kaj jekh si Devel, savo ka čaćavel o sunetipe andar o paćape thaj nasunetipe paćapnaja. Ćhinava li, akana, o kanuni paćapnaja? Nisar! Aj o kanuni zorara. So ka, akana, te phena e Avraamese, dadese amarese, kaj si reslonđa po trupo? Kaj te o Avraam ćerdipnaja čaćavdilo, i sile ašaripe, aj na anglo Devel. Kaj so phenel o Lil? Thaj paćaja o Avraam e Devlese thaj odova lese saćedinđape ano hakajipe. A odolese savo ćerel buti, na saćedelape e poćindi po davipe aj palo dužnipe; Odolese kaj ni ćerel buti, a paćal ane Odova savo čaćavel e bezexutne, saćedela pe lesoro paćape ano hakajipe. Sar so thaj o David vakerela kaj si bahtadino odova manuš savese o Devel saćedela o hakajipe bizo ćerdipe: Bahtadine si odola savenge jertisajle e bikanunja thaj savenge ućhardile e bezeha. Bahtardino si o manuš savese o Devljutno na saćedela o bezeh. Akava bahtadinipe, akana, da li ičerelpe po sunetipe ja vi po nasunetipe? Kaj vakeraja kaj e Avraamese saćedela pe o paćape ano hakajipe. Sar lese, akana, saćedela pe? Kana sine ano sunetipe ja nasunetipe? Na ano sunetipe, aj ano nasunetipe. Thaj lelja semno sunetipeso, štambili hakajipeso e paćapeso savo sinele ano nasunetipe, kaj te bi ov ovela dad sarijengo save paćana ano nasunetipe, kaj vi lenge te saćedel pe ano hakajipe; Thaj te bi ovela dad e sunetipaso na semo odolenge save si kotar o sunetipe, aj vi odolenge save phirena pe patuma paćapese e dadese amarese e Avraamese save sinele ano nasunetipe. Kaj dinde lafija e Avraamese ja lese kućinake kaj ov te ovel kustikutno e themeso na bi kanuneja aj hakajipnaja e paćapeso. Kaj te si e kustikutne odola save si kotar o kanuni, andodilipe si o paćape thaj pele o dinde lafija. Kaj o kanuni kerel bari xoli; a kote nane kanuni nane ni bezeha. Odolese si kotar o paćape, te ovel po bahtardipe, kaj e dinde lafija te oven arakhavne sa e bijatutnenđe, na semo odolese savo si kotar o kanuni, aj savo si kotar o paćape e Avraameso, savo si dad sarijenge amenge. Sar kaj si hramome: Kaj ćhutem tut baš dadese bute selorenge angal o Devel kase paćajan, savo dživdinel e mulen thaj vikinel e namanušen te oven manuša. Kana na sine nisavo adžićeripe ov adžićeripnasa paćaja kaj ka ovel dad bute selorenge, sar so phendilo: Ađahar ka ovel klo bijatutno. Thaj na ćišljindoj paćapesa na gndinđa pe plo eke mulikano trupo, a sine lese varekaj trujal šel berša, ni po mulikanipe e Sarake matericako. Thaj ano dinde lafija e Devlese ni sungaja napaćapesa, aj zorardilo ano paćape thaj dinđa glorija e Devlese, thaj sinele pherdo paćape kaj odova so o Devel dela lafija, kadari si thaj te ćerel. Odole se thaj saćedinđape lese ano hakajipe. A na bi hramome semo lese kaj si lese saćedimo, aj em amenge savenge ka saćedelape, save paća ane Odova savo dživdinisarinđa e Isuso Hristo e Devljutne amare andar o mule, savo sinele dindo baše bezeha amare thaj uštino bašo čaćavdipe amaro. Čaćavindoj, akana, paćamnaja, isi amen šalom ano Devel andar o Devljutno amaro o Isuso Hristo, andar savo thaj pašealjam paćapnaja ane akava dindipe ane savo terđova, thaj ašarina pe ađićeripnaja e Devlesere gloripnaja. Thaj na semo odova, aj vi ašarape ane bilaćhipa, đanindoj kaj o bilaćhipe kerel pharipe, a o pharipe siklipe, a o siklipe ađikeripe; A o ađikeripe na lađavel, kaj o kamlipe e Devlesoro ćhordilo ane vile amare Đesa Sumnalesa savo dindo amenge. Kaj o Hristo, pana đikaj sinjamle bizorale, mulo ano ćhinado vakti baš e nađandedevleserenge. Kaj phare ko ka merel baš e hakajutnese; a baš e šukarese šaj ka ma vi ko krisilape te merel. Aj o Devel sikavel plo kamipe mamuj amende, kaj pana sinjamle bezehutne, o Hristo mulo amenge. But, akana, angle ka ova andar leste ikalde kotar e bari xoli akana kana sam čaćavdune lesere rateja. Kaj kana sar biamala baraštisajlam e Devleja andar o meripe lesere Ćhaveja, but majangle ka, akana baraštime, ka ikalamen lesere dživdipnaja. A na semo odova, aj pa thaj ašisaramen e Devleja andar o Devljutno amaro Isus Hristo, andar savo akana leljam o baraštipe. Odolese sar so andar jekh manuš đerdinđa ano them o bezeh, thaj andar o bezeh o meripe, thaj ađahar o meripe đerdinđa ane sa manuša, kaj sare kerde bezehinde. Kaj o bezeh sine po them đi o kanuni, aj o bezeh na saćedelape kana nane kanuni. Aj o meripe thagarinđa kotar o Adam đi o Mojsije thaj upral odola save na bezehinde miazutne phagipastar sar o Adam, savo si tasvir Odolestar savo ka avel. Aj o bahtardimnaso dindipe nane ađahar sar o phagipe, kaj ako phagipnaja jekhesoro mule butđene, but so najbut o bahtardipe e Devlesoro thaj dindipe ano bahtardipe jekhe manušesoro e Isus Hristosoro barvaline ćhordilo ko butđene. Thaj na bi e dindipnaja ađahar sar bi e phagipnaja andar jekheste; kaj o kris bašo jekheste sine krisipe, a bahtardipnaso dindipe sine čaćavdipe kotar o but phagipa. Kaj te phagipnaja jekhesoro thagarinđa o meripe andar jekheste, teg anglal odola save len barvalipe e bahtardipnaso thaj dindipe hakajipnaso ano dživdipe ka thagarinen andar jekhoro Isus Hristo. Ađahar, akana, sar so jekhe phagipnaja alo o krisipe pe sa e manuša, ađahar thaj jekhe čaćavdipnaja alo pe sa e manuša čaćavdipe e dživdipasoro. Kaj sar so andar bikandipe jekhe manušesoro ule butđene bezehutne, ađahar vi andar o kandipe jekhesoro ka oven butđene hakajutne. A o kanuni uzal odova alo kaj te butbijanđol o phagipe; a kote butbijanđol o bezeh othe si pobut butbijanđol o bahtardipe, te bi, sar so thagarinđa o bezeh ano meripe, ađahar thaj o dindipe thagarinela e hakajipnaja bašo dživdipe e bimeripasoro andar o Isuso Hristo, Devljutno amaro. So, akana, ka phena? Mangaja li te aćhova ano bezeh kaj o dindipe te butbijanđol? Nisar! Amen save muljam e bezehese, sar pana ka dživdina ane leste? Ja sar ni džanen kaj sare save bolamen ano Hristo Isus, ano meripe lesoro bolamen? Ađahar leja parunđamen andar o bolipe ano meripe, te bi, sar so o Hristo so uštino andar e mule gloripnaja e Dadesara, ađahar thaj amen phiraja ano nevo dživdipe. Kaj te uljam khatane formaja lesere meripnaja, napal ka ova thaj e dživdipnaja, đanglindoj akava, kaj o purano amaro manuš inzardilo Leja, te bi merela o trupo o bezehutno, kaj te na robojina e bezehese. Kaj ko merela mukljarela pe kotar o bezeha. Te li muljam e Hristoja, paćaja kaj ka thaj dživdinaja leja, džanglindoj kaj o Hristo uštindoj andar e mule, naj na merela; o meripe naj na thagarinela leja. Kaj so mulo, e bezehese mulo jekhvar baše sa; a so dživdinel, e Devlese dživdinel. Ađahar thaj tumen gndinen tumen kaj sijen mule e bezehese, a dživde e Devlese ano Hristo Isus, Devljutnese amarese. Te na thagarinel, akana, o bezeh ane tumaro mulikano trupo, te šunen le ane thabutna lesere; Ni ma den tumare kotora e truposere e bezehese baše maripnaso bihajipe; aj doden tumen e Devlese, sar dživdinisarde andar e mule, thaj kotora e trupose tumare e Devlese baše maripnaso hakajipe. Kaj o bezeh na ka thagarel tumencar, kaj na sijen telal o kanuni thaj telal o bahtardipe. So akana? Manga li te bezehtara kana na sijam telal o kanuni aj telal o bahtardipe? Nisar! Na đanena li kaj kase dena tumen bašo kandine ano kandipe, kandine sijen odolengo kole kanden: ja bezeh bašo meripe, ja kandipe bašo hakajipe. Aj nais e Devlese so sinenle kandine e bezehese pa kandinijen vilestar e regula đanipase savake dinđen tumen; Mukljarindoj pak e bezehestar, uljen kandine e hakajipase. Sar manuš vakerav bašo bizor tumare truposo. Kaj sar so dijen tumare kotora e truposere te robuinen e melalipnase thaj bikanunese bašo bikanunipe, ađahar akana den tumare kotora e truposere te kanden hakajipnase baše sumnalosaripe. Kaj kana sinjenle robija e bezehese, mukline sijena kotar o hakajipe. Savo, akana, bijando sinele tumen teg kotar odova sostar akana lađan? Kaj si agor odolesoro meripe. A akana, mukljarindoj kotar o bezeh thaj ulindoj kandine e Devlesere, isitumen bijando tumaro baše sumnalosaripe, a agor o dživdipe e bimeripnasoro. Kaj si e pokindi bašo bezeh meripe, a dindipe e Devlesoro si dživdipe bimeripnasoro ano Hristo Isuso, o Devljutno amaro. Ja ni đanen, phraljalen, kaj vakerav odolenge save džanen o kanuni, kaj o kanuni thagarinel upral o manuš semo đikote ov dživdini? Kaj si e dindi romni phandli kanuneja bašo dživdo rom; te li o rom merela, mukljarel pe kotar o kanuni e romesoro. Odolese, akana, đikaj si lakoro rom dživdo ka ovel anglaćumudutni te dželi avere romese; te mulo lakoro rom, mukljuni si kotar o kanuni te na ovel anglaćumudutni, te dželi avere romese. Ađahar, phraljaljen mle, thaj tumen muljen e kanunese trupeja e Hristosereja, te peren averese, Odolese savo uštino andar e mule, kaj o bijando te ana e Devlese. Kaj kana sinjamle ano trupo, zoralo haćaripe e bezehese andar o kanuni kerde ane amare kotora e trupose kaj e meripnase bijando te anel pe. A akana mukljardiljam kotar o kanuni merindoj odolese so ićerđa amen, te kanda (e Devlese) ano nevo đi a na pe purano lafi. So akana, ka phena? Kaj si o kanuni bezeh? Nisar! Aj me o bezeh na penđarđum semo andar o kanuni; kaj ni mangljake na bi đanav kaj o kanuni te na phenel: Ma mang! A o bezeh lindoj phandipase andar o ćhinavdipe mothovda ane mande sako mangli; kaj si o bezeh bizo kanuni si mulo. A me dživdinđum ađahar bi kanuneso; a kana avela o ćhinavdipe, o bezeh dživdinela, a me muljum, thaj arakhlja pe kaj o ćhinavdipe mange dindino bašo dživdipe, sine ko meripe. Kaj o bezeh lindoj phandipase andar o ćhinavdipe xoxavđa man thaj mudarđa man olaja. Ađahar, akana, o kanuni si sumnal, thaj o ćhinavdipe si sumnali thaj hakajuni thaj laćhi. Sar maje, akana, o laćhipe anda meripe? Nisar! Aj o bezeh, te sikavđol sar bezeh, kerđa maj meripe andar o šukaripe, te ovel o bezeh đi o agorisaripe bezehindo andar o ćhinavdipe. Kaj đana kaj si o kanuni e đesoro, a me sem trupuno, biknindo ano robipe e bezehese. Kaj na đanav so kerav, kaj na kerav odova so mangav, aj so namangav odova kerav. Te li kerav odova so na mangav, aćhovav pe odova kaj si o kanuni šukar. Teg odova na kerav maj me, aj o bezeh savo dživdinel ane mande. Kaj džanav kaj o šukaripe na dživdinel ane mande, odova čaće, ano trupo mlo; kaj mangav isiman ane mande, aj te kerav šukaripe na arakhav. Kaj šukar, so mangav, na kerav, aj džungalipe, so na mangav, odova kerav. A kana kerav odova so na mangav, eke na kerav odova me, aj o bezeh savo dživdinel ane mande. Arakhav, akana, o kanuni: kana mangav šukaripe te kerav, o džungalipe si ane mande. Kaj lošalisajvav e kanunese e Devleserese po andruno manuš; Aj dikhav aver kanuni ane mle kotora e trupose save marena pe opipe e kanuneso mla gođaja, thaj roboinela man kanuneja e bezeheso savo si ane kotora mle trupose. Me bibahtalo manuš! Ko ka ikalela man kotar o trupo akale meripnasoro? Ašarisavav e Devlese andar o Isuso Hristo o Devljutno amaro. Ađahar, akana, me korkoro e gođaja kandava e Devlesere kanunese, a trupoja e kanunese e bezehesoro. Nisave, akana krisipa nane odolenge save ano Hristo Isuso na dživdinena po trupo aj po Đi. Kaj o kanuni e Đeso e dživdipasoro ano Hristo Isuso mukljarda man kotar o kanuni e bezehesoro thaj o meripe. Kaj so e kanunese sinele bišajune, kana sinele ćišljardo trupoja, o Devel bićhalindoj ple Ćhave ane manušikano trupo e bezehesere thaj bašo bezeh, krisinđa o bezeh ano trupo, kaj o hakajipe e kanunesoro te pherel pe ana mende save na dživdina po trupo aj po Đi. Kaj save si po trupo trupone gndinen, a save si po Đi đesune. Kaj si trupuno gndinipe meripe, a đesuno gndinipe dživdipe thaj šalomipe. Kaj si trupuno gndinipe naamalipe e Devlese, kaj na peravel pe e Devlesere kanunese, ni pak šaj. A save si po trupo našti keren kamipe e Devlese. A tumen nasinjen po trupo aj po Đi, kaj o Đi e Devlesoro dživdinel ane tumende. Te pak điko nane le Đi e Hristosoro, ov nane lesoro. A te si o Hristo ane tumende, teg si o trupo mulo bašo bezeh, a o Đi si dživdipe bašo hakajipe. Te li dživdinel ane tumende o Đi Odolesoro savo dživdinđa e Isuse andar o mule, Odova savo vazdinđa e Hristo andar e mule ka dživdinel vi tumare mule trupora ple Đesa savo dživdinel ane tumende. Ađahar, akana, phraljalen, nasinjam kamutne e trupose kaj po trupo te dživdina; Kaj te dživdinđen po trupo, ka meren; te li Đesa e kotora e truposere muljaren, ka dživdinen. Kaj saven legarel o Đi e Devlesoro on si ćhave e Devlesere. Kaj na lijen o đi robipesko, kaj palem te daran; aj lijen o Đi ćhavipesoro, saveja vičinaja: Ava, Dade! Akava Đi mothovel amare đese kaj sijam ćhave e Devlesere. A kana sijam ćhave, thaj kustikutne sijam: kustikutne, akana, e Devlesere a pokustikutne e Hristosere; kaj oleja mudarđova kaj oleja thaj te glorisinamen. Kaj gndinav kaj o mudaripe e akale vakteso nane niso premal e glorija savi amenge ka phućarel pe. Kaj jagale ađikeripnaja o keripe ađikerel te mothoven pe o ćhave e Devlesere. Kaj o keripe peravdilo e čućipase, na kotar plo kamipe, aj baše odova savo čućardala, ađikeripasa. Kaj vi korkoro keripe ka mukljardol kotar o roboipe e peripesoro po muklipe e glorija e ćhavengere Devlese. Kaj džana kaj sa o keripe khatane duhminel thaj dukhavel đi akana. A na semo oj, aj vi amen save anglune dindipa e Đesere isiamen, thaj amen korkore an amende duhmina ađikerindoj ćhavosaripe, mukljaripe amare trupesoro. Kaj e ađikeripnaja ikalđamen. A ađikeripe savo dikhela pe nane ađikeripe. Kaj kana ko dikhela neso, sar thaj te na ađikerel pe? Te li ađikeraja odova so na dikha, ađikera trajune inđaripasa. A ađahar amenge thaj o Đi ažutinela ane amare bizoralipa: kaj na đana so ka ruđinamen sar so valjani, aj o korkoro o Đi ruđinela pe baš amenge bisikavde duhmipnaja. A Odova so phućarel o vile, đanel so si mangipe e Ođesoro, kaj po kamipe e Devlesoro ruđinela pe baš e sumnalenge. A đana kaj odolenge save ćumiden e Devle sa ažutinel po laćhipe, lenge save si vičime pe arada; Kaj saven anglal penđarda, anglal thaj ćhinavđa, te oven laćharde e Ćhavesere mujese, kaj ov te ovel Anglunobijando maškar e but phralja. A saven anglal ćhinavđa, odolen thaj akharđa; a saven akharđa odolen vi čaćavđa; a saven čaćavđa odolen thaj glorisinđa. So ka, akana, phena pe akava? Te si o Devel amencar, ko ka ovel opipe amende? Ov savo ple Ćhave na arakhlja, aj les anglaldinđa baše sa amenge, sar kaj sa oleja thaj sa na ka del? Ko ka davijinel e alosarde e Devleseren? O Devel si odova savo čaćavel. Ko ka krisinel? O Hristo si odova savo mulo, ta vađe thaj dživdinđa, savo si pe laćhi rig e Devlese, savo thaj maškarinela amenge. Ko amen ka ulavel kotar o kamlipe e Hristosoro? E dukha ja tangaripe, ja prastavipe, ja bokh, ja nangipe, ja daravipe, ja bari ćhuri? Sar si hramome: Baše tute amen mudarena celodive, dikhena amen bakrencar bašo ćhinipe. Aj an pe sa akava vidžaina andar Odova savo amen kamlja. Kaj paćav kaj amen ni o meripe, ni o dživdipe, ni e phakale, ni e šerutnipa, ni e zora, ni akanutnipe, ni avutnipe, ni ućipe, ni xoripe, ni nisavo aver keripe na kašti te ulavel amen kotar o khamnipe e Devlesoro, savo si ano Hristo Isuso o Devljutno amaro. Čaćipe vakerav ano Hristo, na xoxavav, odova mothovela mange mlo mincope e Đesa Sumnalesa, kaj si mange but dukhavne thaj o vilo mlo dukhala man bi aćhavdipesoro; Kaj bi mangava kaj me korkoro te ovav ćhinavdo kotar o Hristo baše phrala mle, bijande mle po trupo, save si e Izrailjci, kasoro si lindoj o ćhavope thaj glorija thaj xapesovli thaj kanuni thaj devlesoro kandipe thaj dinde lafija, kasere si thaj e dada, thaj kotar save si o Hristo po trupo, savo si upral sarijende Devel bahtardino ane bimeripa. Amin. Aj na sar te perela o lafi e Devlesoro. Kaj nane sare Izrailjcija save si kotar o Izrailj; Ni nane sare e ćhave save si kotar e kućin e Avraamesiri, aj: Ano Isako ka vičinel pe tuke e kućin. Odova va, nane odola ćhave e Devlesere so si po trupo ćhave, aj ćhave dinde lafenge saćedime ane kućin. Kaj si akava lafi dinde lafengoro: Ane akava vakti ka avav thaj ane Sare ka ovel ćhavo. A na semo oj, aj vi e Reveka savi khamnili jekhestar, kotar o Isak o dad amaro. Kaj pana o ćhave na sine bijande, ni kerde laćhipa ni džungalipa, te aćhol ađahar sar o Devel po alope ćhinavđa, na bašo kotora, aj bašo Odova savo vičinela, phenđa pe lake: O pobaro ka kandel e potikorese. Sar so si hramome: E Jakove kamlem, a e Isave mrzindem. So akana, ka, phena? Sar isi bihakajipe ko Devel? Nisar! Kaj e Mojsijese phenel: Ka maznonav kas maznonav, thaj ka dukhavav ma pe kaste ka dhukavav. Ađahar, akana, nane ni đi odova savo mangel, ni đi odova savo prastal, aj đi o Devel savo maznonel. Kaj o Lil vakerela e Faraonese: Odolese vazdinđum tut kaj pe tute te sikavav e zor, mli thaj te buljarelpe pe o anav mlo pe sa e phuv. Ađahar, akana, kas mangel maznonel, a kas mangel zoralela o šero. Ka phene mange: Sose teg krisinela? Kaj ko arlisajlo lesere kamipase? A ko san tu, o manušeja, te kere čingara e Devleja? Sar o vastkerutno vakerel e phirnese plese: sose ađahar kerdan man? Ja sar o pirjari nane le thagarni upral e ćika, kaj kotar e jekhuni ćik kerel jek vaso bašo sumnipe, a o dujto bašo lađipe? A so ako o Devel, manglindoj te sikavel e bari xoli pli thaj te mothovel e zor pli, ingarel bare pharipnasa e vasija bare xolinake, save si gatime bašo peravipe. Kaj te sikavela o barvalipe pla glorijako pe vasija e dindipase, save kerda baše glorija, amen saven thaj vikinđa, na semo kotar e Judejcija aj vi kotar e nađangledevlesere. Sar so thaj vakerel ko Osije: Ka vičinav mle seloreja o seloro savo nane mlo, thaj e bikamle kamlipasa; Thaj ka ovel kaj po than kaj lenge sine phendino: Tumen nasijen mlo seloro, odori ka vičinen pe ćhave e Devlesere dživde. A o Isaija del vika bašo Izrailj: Te ulo đendo e ćhavengoro e Izrailjesoro sar pošik e deravesi, o aćhipe ka ikalel pe. Kaj ka agorisarel sigo o anav plo po hakajipe, ka agorisarel o Devljutno sigo o lafi plo pe phuv. Thaj sar so anglalmothovđa o Isaija: Kaj amenge o Devljuto Savaot te na aćhaj e kućin, bi ovaja sar e Sodom thaj miazutne e Gomorose. So akana, ka, phena? Kaj e nađangledevlesere save na rodinde hakajipe resle hakajipe, aj hakajipe kotar o paćape; A o Izrailj rodindoj kanuni e hakajipesoro na resla kanuni hakajipesoro. Sose? Odolese so na rodinde kotar o paćape, aj kotar e kotora kanunesere. Kaj khuvdepe ko Bar e peripnasoro, sar so si hramome: Ake ćhivava ano Siono Bar peripnasoro thaj Bar barengoro peravipe; thaj sakoj savo ane leste paćal na ka lađardol. Phraljalen, o mangipe mle vileso thaj ruđipe e Devlese bašo Izrailji te inkalel pe. Kaj lenge jakhenca dikhav te ovelen griža e Devlese, aj na pe godi. Kaj na penđarindoj o hakajipe e Devlesoro thaj manglindoj kaj plo hakajipe te zoralen, na peravde pe e Devlesere hakajipnase. Kaj si o Hristo agoripe e Kanunesoro bašo čaćavdipe sarsavonese savo paćal. Kaj o Mojsije hraminel bašo hakajipe savi si kotar o kanuni: Manuš kova odova kerel ka dživdinel ane odova. A o hakajipe savo si kotar o pačape ađahar vakerel: Te na phene ano vilo klo: Ko ka ukljel ko badali? Odova va, te huljarel e Hristo; Ja: Ko ka huljel ano biagor? Odova va, te inkalel e Hristo andar e mule. Aj so vakerel (o Lil)? Paše si tuke o lafi, ano muj klo thaj ano vilo klo, odova va o anav paćavipeso savo vakeraja. Kaj te vakerđan kle mujeja kaj si o Isus Devljutno, thaj paća ano vilo klo kaj o Devel le vazdela andar e mule, ka ove ikalutno. Kaj vileja paćala pe bašo hakajipe, a mujesa vakerela pe bašo ikaldipe. Kaj o Lil vakerela: Sako kova paćal ano Leste na ka lađardol. Kaj nane ulavdipe maškar o Judejco thaj Jelino; kaj si jekhuno Devljutno sarijengo, barvalo baše sa kola vičinen. Kaj sako kova vičinel o Anav e Devljutnesko ka ovel ikaldo. Sar ka, akana vičinela Odole ane saveste na paćaje? Sar li ka paćal ane Odova baše kaste na šunde? A sar ka šunel bizo vakerutno? A sar ka vakeren te nane bićhalde? Sar so si hramome: Save si šuže pre odolengere save anena krlo bašo šalomipe, save anena krlo bašo šukaripe! Aj sare na ašunde o evangelium; kaj o Isaija vakerel: Devljutneja, ko paćaja amare vakeripnase? Thaj ađahar o paćape ovela kotar o vakeripe, a o vakeripe kotar o lafi e Devlesoro. Aj phenava: Sar na šunđe? Sarjek: Pe sa e phuv gelo o krlo lengoro, thaj đi e agora lengere vaseljenake lafija. Aj phenav: Sar na haljovel o Izrailj? O Angluno Mojsije vakerel: Me tumen po korikanipe ka miškosarav andar odola save nane seloro, e bihaljovne seloresa ka xoljarav tumen. A o Isaija vakerela zoralipnaja: Arakhle man save ni roden man, mothode ma odolenge save ni phućena mange. A e Izrailjese vakerela: Sajekh lunđardem e vasta mle premalo seloro o bikandino thaj o bišandino. Thaj phenav, akana: Sar o Devel frdinđa o seloro plo? Nisar! Kaj sem thaj me Izrailjco, kotar e kućin e Avramosiri, kotar o njamo e Venijaminoso. Na frdinđa o Devel o seloro plo, savo anglal penđarda. Ja na đanen so vakerel o Lil bašo Ilija sar davijinel pe e Devlese ko Izrailj vakerindoj: Devljutneja, e profeton klen mudarđe thaj e viktima kle hondarde, thaj me aćhiljum jekhuno thaj roden o dživdipe mlo. A so lese phenela e Devlesoro iripe? Aćhavdem mange efta milje manuša, save na telile e čangencar anglal o Vaalo. Ađahar, akana, thaj ane akava vakti isi jekh aćhipe po alope e dindipase. Te li si po dindipe, teg nane kotar o xabe, kaj o dindipe eke ne bi ovela dindipe; te si li kotar o kotora, thaj nane dindipe, kaj o kotor eke ne bi ovela kotor. So, akana? Odova so o Izrailj rodela na resel, a e alosarde resle; e aćhutne eke kororile, sar so si hramome: Dija lenge o Devel đi bihaćaripaso, jakha te na dikhen thaj kana te na šunen đi o dive avdisutno. Thaj o David vakerel: Nek ovel lengere astalja šelo umblavdimaso thaj astarutni thaj crdipe thaj poćindi lenge; Nek kaljardon e jakha lengere te na dikhen, thaj e dume lengere sajekh te banđon! Vakerav, akana: Zapninde li te otperen? Nisar! Kaj lengo peripe si ikaldipe e nađangledevleserenge, te bi thaj on đungavđona po bućarnipe. A te si o peripe lengo barvalipe e themese thaj o phagipe lengo barvalipe e nađangledevleserengo, kozom li si majbut o pherdipe lengoro? Kaj vakerav tumenge e nađangledevleserenge; poso sem me apostolo e nađangledevleserenge, ašarav o kandipe mlo, na bi li sar đangavava po bućarnipe mlo njamo thaj ikaldav nesaven kotar lende. Kaj te si o ćhudipe lengoro baraštipe e themese, so bi ovela lenipe – te na dživdisaripe andar e mule? Te si e maja sumnal, odova si thaj o umer; thaj te si e darhin sumnal, odova si thaj e krangora. Te li si nesave krangora phađile, thaj tu, savo san divo maslina, kalemisajlan pe lende thaj uljan khatanutno e darhinakoro thaj sokija e maslinengoro, ma barjar pe upral e krangora; te pak tu barardiljan, na legare tu e darhin aj e darhin tut. Ka phene, akana: Phađile e krangora, kaj me te kalemisinama. Šukar! Napaćapesa phađile, a tu paćapesa terđove. Ma te barjove, aj te dara. Kaj kana o Devel e naturake krangora na arakhlja, na ka šaj ni tut te arakhel. Dikh, akana, o šukaripe thaj o ostripe e Devlesoro: pe okola save so otpele ostrope, a pe tute o šukaripe, te aćhiljan ano šukaripe; paše odova thaj tu ka ove ćhindo. A thaj on, te na aćhile ano napaćape, ka ove, kalemime, kaj si o Devel zoralo kaj len Pale te kaleminel. Kaj kana san tu ćhindo kotar e maslina, pe natura divo, thaj kalemisajlan, na pe natura, pe kovli maslina, kozom ka bi anglal, akala save si pe natura, kaleminenape pe pli maslina? Kaj na mangav, phraljalen, kaj tumen te na đanen akava garavdipe, te na gndinen kokore tumenđe: kotor e Izrailjesoro zorardilo, điko te na đerdini pherdo đendo e nađangledevlesere. Thaj ađahar ka ikalel pe sa o Izrailj, sar so si hramome: Ka avel kotar o Sion Ikalutno thaj ka irisarel o bidevlikanipe kotar o Jakov. Thaj akava lenge si xapesovli kotar mande, kana huljarav o bezeha lengere. Po evangelium, akana, dušmanja si baše tumende; a po alope, kovle si bašo dada. Kaj o Devel na ka jertini pe baše ple dindipenge thaj vičipnase. Kaj sar so thaj tumen varekana na kandijenpe e Devlese, a akana sen maznome baše lengoro nakandipe, ađahar on thaj akana na kandinde bašo tumaro maznope te bi thaj on ovena maznome; Kaj o Devel phandlja sa ano bikandipe, kaj sa te maznonel. O xoripe e barvalipeso thaj barogođaveripe thaj haljovipe e Devlesoro! Sar si naphućljune e krisora lesere thaj narodime e droma lesere! Kaj ko penđarđa e godi e Devljutnesiri? Ja ko lese sine phurederutno? Ja ko lese anglal dinđa, kaj lese te irinelpe? Kaj si olestar thaj andar lestar thaj bašo leste sa. Lese glorija ano bimeripe. Amin. Ruđinav tumen, akana, phraljalen, bašo dindipe e Devlesoro te den e trupija tumare ane viktima dživdi, sumnali, ćaljardi e Devlese, sar tumaro ođikano devlesokandipe. Thaj te na laćharen tumen akale themese, aj prelaćharen tumen iripna tumara gođaja kaj sikavipnaja te penđaren so si laćho thaj ćaljardo thaj pherutno kamipe e Devlesoro. Kaj andar o dindipe savo dindilo mange, vakerav svakonese savo si maškar tumende: te na gndinel pestar majbut aj so valjani te gndinel, aj te gndinel pašautnegođasa, sako po napi paćapesko sar lese o Devel ulavđa. Kaj sar so an jekh trupo isiamen bute kotora, a sa e kotora trupose nanolen jekhuni buti, ađahar sem bute jekh trupo ano Hristo, a korkorune kotora trupose sem jekh averenge. Isi amen pak, averćhane dindipa po baxtaripe savo si amenge dindo: te si profetipe, mek ovel po napi e paćapeso; Te si kandi, mek ovel ano kandipe; sikavnipe, mek ovel ano sikamnipe; Te si kovljarutno, mek kovljarol; savo del, mek del putarune; savo vastarel, mek ovel bućarno; savo kerel dindipe, mek kerel lošalune. O khamlipe te na ovel dujemujengo. Mrzindoj o đungalipe ićeren tumen ko šukaripe. Khamen jek avere e phralesere khamnipanaja; paćipnaja keren jekh avre pobare tumendar. Ano bućaripe ma oven bigrižale; oven đesa jagale; e Devljutnese kanden. Oven ano ađićeripe lošale, ano bilaćhipe trpinen, ano ruđipe jekhune. Ažutinen e sumnalenge ano valjanipe; oven laćheašuđarutne. Baxtaren odolen save prastaven tumen, baxtaren a ma den arman. Lošalen tumen e lošalutnencar, thaj roven odolencar save roven. Oven jekha gndipasa maškar tumende. Ma barikane gndinen aj ićeren tumen e pašavutnencar. Ma haćaren korkore tumen gođavarutne. Nikase ma irinen džungalipe bašo džungalipe; dikhen laćhipe te keren anglal o sa manuša. Te si šajune, kobor dži tumende terđola, mek ovel tumen šandipe sa e manušenca. Ma keren irinipe baše tumende, ćumudninalen, aj den than xolinake (e Devlesarake), kaj si hramome: Mlo si irinipe, me ka irinav, vakerela o Devljutno. Te si, akana, bokhalo o dušmani klo, parvar le; te si trošalo, dele pani te pijel; kaj ađahar kerindoj ka gramadine dživde angara ko šero lesoro. Ma de kaj o džungalipe te peravel tut, aj perav o džungalipe šukaripnaja. Sakoj đi te kandel e kanunenge save thagarinena, kaj nane kanuno kaj nane e Devlestar, a e kanunija so isi e Devlestar si kerdine. Odolese ko opipesavol e kanunose opipesavol e Devlesere ćhinadipenake, a save opipesavon, ka len o krisipe pe peste. Kaj e phurederutne nane dar baše šukar kotora aj baše džungalipa. Mange li pak te na dara e kanunendar? Ker šukaipe, thaj ka ovel tut ašarutni latar, kaj si kandino e Devlesoro tuke bašo šukaripe. Te li džungalipe kerđan dara, kaj na legarel o mači andodijipe, kaj si e Devlesoro kandino, badlutno, te ćhorel e xoli pe odova savo džungalipe kerel. Odolese si valjani te kandel pe na semo baše xoli, aj vi bašo mincipe. Kaj baše odova thaj porezi pokinen, kaj si e anavarutne e Devlesere save odoleja sajekh kerena. Doden, akana, sakonese so sijen kamutne: kase o porezi – porezi, kase dogana – e dogana, kase dar – e dar, kase paćiv – e paćiv. Ma oven nikase niso kamutne semo te ćumidinen jekh avre; kaj savo ćumidinel e avere pherđa o kanuni. Kaj odova: Ma ker anglaćumidipe, ma mudar, ma ćor, ma vaker xoxamne, ma mang, thaj fije savo ćhinadipe, pherela pe ane akava lafi: Ćumid e najpašutne kle sar tut korkore. O kamlipe na kerela džungalipe e najpašutnese; kamlipe si, akana, pherdipe e kanunesoro. Thaj akava angla aveste so đanen o vakti, kaj si eke o časo te ušta kotar o sojbe, kaj amenge si akana o ikaldipe popaše aj kana paćajam. E rat majnakhli, a o dive si popaše. Te phira paćivale sar ko dive: na ano barohabipe thaj matipe, na ano namorali thaj bilađipe, na ane ćingara thaj zavisto. Aj urjaven tumen ano Devljutno Isuso Hristo; thaj phuripe bašo trupo ma anglaćeren ano prekalmanglipe. A e ćišlje ano paćape len, bizo čingaripa kotar e gndipa. Kaj jekh paćal kaj tromal sa te xal, a savo si ćišlo xala šava. Savo xal ma te teljarel odole savo na xal; thaj savo na xal ma te krisinel odole savo xal, kaj le o Devel lelja. Ko sijan tu so krisine averesere kandine? Ple šerutnese ov terđola ja perela. Aj ka terđol, kaj si o Devel zoralo le te vazdele. Ađahar jekh ulavel o dive kotar o dive, a o aver ićeri sa o dive kaj si jekhune. Sako nek ovel emčaćuno ane godi pli. Savo ulavel o dive, e Devljutnese ulavel, a savo na ulavel o dive, e Devljutnese na ulavel. Savo xal e Devljutnese xal, kaj ašarisarda e Devlese; thaj savo na xal, e Devljutnese na xal thaj ašarisarda e Devlese. Kaj nikoj amendar na dživdinel korkoro pese, thaj nikoj na merel korkoro pese; Kaj te dživdinđam, e Devljutnese dživdina; te li mulam, e Devljutnese mera. Akana, thaj kana dživdina thaj kana mera, e Devljutnesere sijam. Kaj odolese o Hristo thaj mulo thaj dživdinisajlo thaj dživdinđa te thagarel vi e mulencar vi e dživdencar. A tu, sose krisinea e phrale kle? Ja tu, sose teljare e phrale kle? Kaj sare ka terđova e Hristose krisose. Kaj si hramome: Dživdo sem me, vakerel o Devljutno, ka peren pe koča sarsavi ćang, thaj sarsavi ćhib ka del glorija e Devlese. Akana, sakoj amendar ka del e Devlese iripe po phućipe baše peste. Odolese te na krisina maj jekh avre, aj majbut odolestar phurederisaven te na ćhuven e phralese pharipe ja dukhavdipe. Đanav thaj paćav ano Devljutno Isus kaj niso nane nakhoslo pe peste, semo kana ko gndinel te si so nakhoslo, odolese si nakhoslo. Te li o phral klo bašo xape dukhavel, eke na kere po kamlipe; ma te našale kle xapesa odole baše kaste o Hristo mulo. Ma te, akana, akošel pe tumaro šukaripe. Kaj o Thagaripe e Devlesoro nane xape ni pipe, aj hakajipe thaj šandipe thaj lošalipe ano Đi Sumnalo. Kaj kova akaleja kandela e Hristose, ćajljardo si e Devlese thaj e manušenge bućarno. Te phurardija, akana, baše odova so ažutinel šandipese, thaj uđiljune anglipese. Ma arav o kotor e Devlesoro bašo xape, kaj si sa khoslo; aj si džungalipe baš o manuš savo xal pharipnaja. Šukar si te na xa mas thaj na pije mol thaj na kere odova pe soste o phral klo perela ja dhukavđola ja ćhišljola. Tut isi paćape? Nek ovel tut korkoro baše tute anglo Devel. Baxtalo si odova savo na krisinel pes baše odova so arakhel baše šukar. A savo sungal krisime si te xala, kaj na kerel po paćape; a sa so nane kotar o paćape bezeh si. A Odolese savo tumen šaj te zorjarel po evangelium mlo thaj vakerel e Isus Hristo, po phućardipe e garadipeso kotar savo na vakerdilo kotar e bimeripaske vaktija, a akana mothovde thaj andar e lila e profetonenge, po ćhinadipe e bimerutne Devlese, mothovdine sarijenđe e nađangledevleserenge bašo kandipe e paćapese, jekhune baredžandipne Devlese, andar o Isuso Hristo, lese glorija ano bimeripa. Amin. Kamutne sem eke amen e zorale ćišljimastar e ćišljen te legara, thaj na pese te kera. Sako amendar nek kerel e najpašutnese ko šukaripe bašo anglipe. Kaj thaj o Hristo na kerđa pese, aj sar so si hramome: Akošipe odolengoro kola akošena tut peravde pe amende. Kaj so angleder hramosajlo baše amare siklipase hramosajlo, kaj andar o pharipe thaj zoralipe e Lilesko isiamen ađićeripe. A o Devel e pharipnaso thaj ađićeripnaso nek tumenge del jekhune te gndinen maškaro tumende po Hristo Isus, te bi jekhođine, jekhe mujesa ašarasa e Devle thaj Dade e Devljutnesere amare e Isus Hristo. Odolese len jekh avre, sar so vi o Hristos lelja tumen pe glorija e Devlesiri. Aj phenav, kaj o Isus Hristo sine kandino e sunetipaso baše Devlesoro čaćipe, te čaćavel o dindipa e dadengere. A e nađangledevlesere te ašaren e Devle bašo dindipe, sar so si hramome: Odolese ka mothovav tut maškar e nađangledevlesere, Devljutneja, thaj ka đilabav kle anavese. Thaj pale vakerel: Lošalen tumen, e nađangledevlesere, lesere seloresa. Thaj pale: Naisaren e Devljutne sa e nađangledevlesere, thaj glorisaren le sa e selora. Thaj pale o Isaija vakerel: Ka ovel darhin e Jesejevoso, thaj savo uštinđa te thagarel upral e nađangledevlesere, ane leste ka paćan e nađangledevlesere. A o Devel ađićeripnasoro tumen te pherel sakone lošalipasa thaj šalomnipasa ano paćape, te barvaren ano ađićeripe zorasa e Đeso Sumnalesoro. A me sem, mle phraljalen, thaj korkoro paćamno ane tumende, kaj sen thaj korkore pherde laćhipa, pherde sarsave džanipnasa, kaj šaj thaj jekh avren te sikaven. A hramonđum tumenge, phraljalen, ari zorale sar liparindoj tumenđe po baxtaripe savo dindilope mange kotar o Devel. Te ovav kandutno e Isus Hristoso maškar e nađangledevlesere rašajune kandindoj e Devlesere evangeliumose, kaj bijanipe e nađangledevleserengo ovel ćajljardipe sumnalo sime e Đesa Sumnalesa. Isima, akana, naisipe ano Hristo Isuso ane odova so si po Devel; Kaj na ka krisinav man te vaćerav neso so o Hristo na kerđa maškar mande lafesa thaj kotoresa baš o kandipe e nađangledevlenđe. Ane zor e semnongoro thaj prašukaripengo, ane zor Đeso e Devlesoro; ađahar kaj kotar o Jerusalimo thaj trujal sa đi o Iliriko pherdem evangeliumosa e Hristosoro. Thaj ađahar phurardilem te buljarav o evangeliumo, na odori kaj o anav e Hristosoro sine penđardo, te na duvarav pe avresoro temelji; Aj sar so si hramome: Savenge na sikavđape baše lese, ka dikhel; thaj save na šunđe, ka haljoven. Odolese thaj but droma sema aćhavdo te avav ke tumende; A akana majbut nanindoj thana ane akala agora, a manglindoj manglin kotar e but berša te avav ke tumende, kana ka džav ane Španija, ka avav tumende; kaj ađućarav, kaj tumen ano nakhlipe ka dikhav, thaj tumen man ka prohodinen odori kana majangle eke đivarekaj ćaljardovav tumendar. A akana džava ano Jerusalim kandindoj e sumnalenge. Kaj e Makedonija thaj e Ahaja laćhekamipasa ćhinade te ćeden nesavo khatano dindipe baš e ćororenge maškar e sumnale ano Jerusalim. Laćhekamipasa ćhinade, aj thaj kamutne si lenge; kaj kana e nađangledevlesere ule lipeutne ane lengere đesikane laćhipa, kamutne si thaj on lenge ane trupone trubupa te kanden. Kana akava, akana, agorinav, thaj akava lenge bijanipe dav, ka pođinav ane Španija prekalo tumende. A džanav kaj kana ka avav ke tumende, ka avav ano pherdipe e baxtaripnaso e evangeliumosoro e Hristosoro. Aj tumen ruđinav, phraljalen, bašo Devljutno amaro o Isus Hristo, thaj bašo kamlipe e Đesoro, mange te oven amala ruđutnake e Devlese baše mande; Te ikalav man kotar e nakandune ane Judeja, thaj kaj o kandipe mlo baš o Jerusalim ovel po kamipe e sumnalenge; Kaj lošalipnaja te avav ke tumende, po kamipe e Devlesoro, thaj te loćharama tumencar. A o Devel šalomnipaso nek ovel sarijencar tumencar. Amin. Anglabićhalav tumenge eke e Fiva phenja amara, savi si kandinutni e khanđirjaki ane Kenhreja, te len la ano Devljutnipe sar so miazil e sumnalenge, thaj te oven laće ano ažutipe ano sako šej savo tumendar ka rodel; kaj thaj oj butenge ažutinđa, thaj mange korkorese. Bićhalen sastipe e Priskilese thaj e Akilese, khetanutne mle ano Hristo Isus, save baš e mlo dživdipe ple menja pašljarde, savenge na ašarisajvav semo me, aj thaj e sa Khanđirja andar e nađangledevlesere; bićhalen sastipe thaj e ćherutna khanđirjake lengarake. Bićhalen sastipe mange kamle Epenetose, savo si anglalutno e Ahajako ano Hristo. Bićhalen sastipe e Marijake, savi but trudinđape amenge. Sastipe e Andronikose thaj Junijose, njamutnen mlen, thaj mle amalen ano phandipe, save si penđarde maškar e apostolja, save thaj angleder mande paćardine ano Hristo. Sastipe e Amplijase, ćumudime mange ano Devljutno. Sastipe e Urbanose, ažutno amaro ano Hristo, thaj mle kamle e Stahija. Sastipe e Apelijase, zorardine ano Hristo. Sastipe e Aristovulonge. Sastipe e Irodionese, mle njamutnese. Sastipe e Narkisovenge, save si ano Devljutno. Sastipe e Trifenake thaj e Trifose, save but keren ano Devljutno. Sastipe e kamlja Persidake, savi but kerđa ano Devljutno. Sastipe e Rufose alosarde ano Devljutno, thaj e daja lesera thaj mla. Sastipe e Asinkritose, Flemerontose, Ermose, Patrovose, Ermijose, thaj e phralja save si lencar. Sastipe e Filologose thaj e Julijose, Nijerose thaj e phenja lesera, thaj e Olimpese, thaj e sa sumnalen save si lencar. Bićhalen sastipe jekh averese e sumnale ćumudipnaja. Sastipe bićhalena tumenge e Khanđirja e Hristosere. Ruđinav tumen eke, phraljalen, te arakhen pe odola save keren ulavdipa thaj dukhavdipa opipe džanipasoro sava tumen siklijen, thaj durarjon lendar; Kaj asavke na kanden e Devljutnese amarese Isus Hristose aj pumare vogijenge, thaj kovle thaj pherde ašaripase lafonencar xoxaven e vile nađungalenge. A tumaro kandipe buljardilo pe sa e riga. Odolese lošalisavav baše tumende; aj mangav te oven gođaver bašo laćhipe, a bidžungalutne baš e džungalipnase. A o Devel e šalomnipaso sigate ka xurdarel e benge telal e pre tumare. Baxtaripe amare Devljutnesoro e Isus Hristosoro tumencar. *Bićhalen tumenge sastipe o Timotej, o pašutno mlo e bućakoro, thaj o Lukije thaj o Jason thaj o Sosipatar, njamutne mle. Bićhalav tumenge sastipe ano Devljutno thaj me o Tertije, savo hramosardem akaja bićhalutni. Bićhalel tumenge sastipe o Gaj, kherutno mlo thaj e sa khanđiri. Bićhalel tumenge sastipe o Erast, arkari e forosoro, thaj o phral Kvart. Dindipe amare Devljutnesko e Isuso Hristosko sarijencar tumencar. Amin. O Pavle, e Devlesere kamipnaja o vikindo apostoli e Isus Hristosoro, thaj o phral o Sosten, e Devlesere khanđirjake savi si ano Korint, sumnalenge ano Hristo Isuso, vičime sumnalenca, sarijencar save pe sakoj than vičinena o anav amare Devljutnesoro e Isuso Hristosoro, savo si lengoro thaj amaro: Dindipe tumenge thaj šalom e Devlestar amare Dadestar thaj e Devljutnestar e Isuso Hristostar. Ašarisajvav bićhinadune mle Devlese baše tumende, po dindipe e Devlesoro savo tumenge dinđape ano Hristo Isus, kaj ano sa barvalilen ano leste, ane sakoj lafi thaj sako džanipe, sar so o mothovdipe e Hristosoro čaćavdilo ane tumende; Ađahar kaj te na crden ni an jekh dindipaso dinipe, tumen save adžikerena o phućardipe amare Devljutnesoro e Isus Hristosoro, savo tumen thaj ka čaćavel dži o agor te oven bidošakere ko dive e Devljutnesoro amaresoro e Isus Hristosoro. Paćavino si o Devel savo tumen vičinđa ano khatanipe ple Ćhavesoro e Isus Hristoro, amare Devljutneso. Ruđinav tumen eke, phraljalen, anaveja amare Devljutnesereja e Isus Hristosereja kaj sare jekhune te vakeren, thaj te na ovel maškaro tumende ulavdipa, aj te oven zorjarde ani jekh godi thaj jekh gind. Kaj šunđum tumenđe, mle phraljalen, kotar o Hlojinija, kaj maškaro tumende si ćingara. A akava phenav odolese kaj sako tumendar vakerel: Me sem e Pavlesoro, a me e Apolosoro, a me e Kifinosoro, a me e Hristosoro. Sar o Hristos ulavel pe? Te na inzardilo o Pavle baše tumenge? Ja ano anav e Pavlesoro bolena tumen? Naisavav e Devlese kaj ni bolindem ni jekhe katar tumende semo e Kristo thaj e Gajo, te na bi ko phenela kaj ano anav mlo bolindem. A bolindem thaj o kher e Stefaninosoro; pe odova na džanav da li nekas avere bolindem. Kaj man o Hristos na bićhalđa te bolipenav, aj te vakerav o evangelium, na džanipasere lafonencar, te na lelpe e zor e trušulesi e Hristosi. Kaj o lafi e trušulestar si dilinipe odolenđe save mudarđona, a zor e Devlesi amenđe save ikalamen. Kaj si hramome: Ka xasarav o džandipe e džandengoro, thaj e godi e haljovutnengiri ka frdav. Kaj si o džanutno? Kaj si o lilvarno? Kaj o čingarutno akale bimeripnastar? Sar na ćerđa o Devel o džandipe akale themesoro ano dilinipe? Sar, akana, ano baro džandipe e Devlesoro o them džanipasa na penđarđa e Devle, mangljape e Devlese kaj dilipnasere vakeripnaja te ikalel odolen save paćan. Kaj vi e Judejcija roden e semne, thaj e Jelinija roden džanipe. A amen vakeraja e Hristo e inzardine, E Judejenge bar peravipnasoro, a e Jelinenge dilinipe; Odolenge eke e akhardenge, thaj e Judejcenge thaj e Jelinenge, e Hristo, E Devlesiri zor thaj e Devlesoro baro džanipe. Kaj si o dilinipe e Devlesoro podžanutno kotar e manuša, thaj bizor si e Devlesiri po zorali e manušendar. Kaj dikhen, phraljalen, pe tumende e vičime: nane odothe ni but džande po trupo, ni but zorale, ni but bareođesere e njamosere; Aj so si dilino anglo them odova alonđa o Devel te lađarel e džanglen; thaj so si ćišlo anglo them odova alonđa o Devel te lađarel e zoralen; Thaj so si bibareođesoro angal o them thaj peravdo alonđa o Devel, thaj odova so si bisemno, te hasarel odova so čaće, te na ašarel pe ni jekh trupo anglal o Devel. Andrar Leste sen thaj tumen ano Hristo Isuso, savo amenge kerdilope baro džanipe kotar o Devel thaj hakajipe thaj sumnalipe thaj inkaldipe. Te ovel sar so si hramome: Ko ašarelpe nek e Devljutneja ašarelpe. Thaj me avindoj ke tumende, phraljalen, na aljum uće lafeja ja džanipnaja te mothovav tumenge o mothovdipe e Devlesoro. Kaj anglakrisinđum kaj na džanav maškar tumende hari niso semo e Isuso Hristo, thaj odova inzarde. Thaj me sinjumle maškar tumende ano bizoralipe thaj ane dar thaj ano baro izdravipe, thaj o lafi mlo thaj o vakaripe mlo na sine ane paćavne lafija e manušengere džanipnase, feri ano mothovdipe e Đesoro thaj zorakoro. Kaj o paćape tumaro na ovela ano džanipe e manušengoro feri ane zor e Devlesiri. A džanipe vakera maškar e pherdine, aj na džanipe akale bimeripasoro, ni knezongoro akale bimeripasoro kola si nakhavde; Aj vakera baro džanipe e Devlesoro ano garavdipe garavdi, sava ćhinada o Devel angleder o bimeripa baše glorija amari, kola ni jekh kotar e knezija akale bimeripnastar na penđarđa; kaj te penđarena la na bi e Devljutne glorijakere inzarena. Aj sar so si hramome: So e jakh na dikhlja, thaj o kan na šunđa, thaj ano vilo e manušese na alo, odova gatinđa o Devel odolenge save ole ćumidinen. A amenge o Devel phućarđa ple Đesa; kaj o Đi sa phućel, thaj o horipna e Devlesere. Kaj ko kotar e manuša džanel so si ano manuš semo o đi manušesoro savo si ane leste? Ađahar thaj so si ano Devel nokoj na džanel semo o Đi e Devlesoro. A amen na leljam o đi akale themesoro, aj o Đi savo si kotar o Devel, te džana so si amenge dindino kotar o Devel; So thaj vakera, na lafencar sikavde kotar e manušengo džanipe, aj sikavde kotar o Đi Sumnalo; đesune đesunetno mothovdina. A o trupuno manuš na lela so si kotar o Đi e Devlesoro, kaj lese si dilinipe, thaj na šaj te haljovel, kaj odova phućela pe đesune. O đesuno eke sa phućela, a ole korkore nikoj na phućela. Kaj ko penđarđa e godi e Devljutnesiri te bi le sikavela? A amen isiamen godi e Hristosiri. Thaj me, phraljalen, naštinđum tumenge te vakerav sar e đesutnenge aj sar e truponenge, sar e tikne ćhavorenge ano Hristo. Thudeja tumen parvarđum a na xapeja, kaj pana naštinen. Aj ni akana pana naštinen, kaj sinjen pana trupune. Kaj sa džiko te si maškar tumende bićaljardipe thaj bijekhipe thaj ulavdipe, sar nasijen trupone thaj sar ni arakhen tumen po manuš? Kaj kana nekoj vakerela: Me sem e Pavlosoro, a o aver me sem e Apolosoro, sar nasijen trupone? Ko si, akana, o Pavle, a ko o Apolos, dži kandine andar save paćajen, thaj ađahar sar o Devljutno sakonese dinđa? Me sejinđum, o Apolos vadinđa, aj o Devel kerđa te barjol. Ađahar ni nane so odova savo sejinela, ni odova savo vadinela, aj o Devel savo kerel te barjol. A odova savo sejinela thaj odova savo vadinela jekh si, thaj sakoj ka lel pli poćindi mamuj plo ćeripe. Kaj amen sam e Devlesere kupakerutne, a tumen sen e Devlesiri njiva, e Devlesoro keripe. Po dindipe e Devlesoro savo dindilope mange, me sem sar džando kerutno kerdem o temelji, a e aver duvarini pe leste; aj sakoj nek dikhela sar duvarini. Kaj temelji aver nikoj našti te ćhivel semo o thovdino, savo si o Isus Hristos. Ako li ko duvarel pe akava temelji sumnakaj, rup, kamle bara, kašta, khas, phus, sakonesoro kotor ka ikljol ko dikhipe; kaj o Dive ka mothovel, kaj jagaja ka phućardol, thaj sakonesoro kotor jagaja ka phućel pe savo si. Te aćhilo kaskoro kotor so duvarinđa, ka lel e poćindi; Te kaskoro kotor thabljol, ka ovel zijanime, a korkoro ka ikalela pe, na ađahar sar andar e jag. Na džanena li kaj sen hramo e Devlesoro thaj kaj o Đi Devlesoro dživdinela ane tumende? Te điko ruminela o hramo e Devlesoro, ka ruminel ole o Devel; kaj si o hramo e Devlesoro sumnalo, a odova tumen sinjen. Nikoj ma te xoxavdol: te nekoj maškar tumende gndinel kaj si džanglo ano kava bimeripe, nek ovel dilino te bi ovela džanglo. Kaj si o džanipe akale themesoro dilinipe anglo Devel; kaj si hramome: Ov astarela e džanglen ano lengoro bižajipe. Thaj pale: O Devljutno džanela o gndipa e džanglengere kaj si khanćune. Odolese nikoj ma te kerel baripe e manušencar, kaj sa si tumaro: Ja o Pavle, ja o Apolos, ja Kifa, ja o them, ja o dživdipe, ja o meripe, ja akanutno, ja avutno, sa si tumaro, a tumen sen e Hristosere, a o Hristos si e Devlesoro. Ađahar kaj amen e manuša dikhenamen sar kandine e Hristosere thaj vastarutne e Devlesere garavipnase. A kotar o vastarutno, akana, rodela pe kaj sako te arakhel pe paćavuno. A me najhari hajiv so krisinena man tumen ja e manušesoro dive; a ni korkoro man na krisinav. Kaj na haćarav niso pe mli godi, aj odolese najsem funduno; a odova savo krisinela man si o Devljutno. Odolese ma krisinen niso anglal o vakti, džikote na avela o Devljutno, savo thaj ka rošinel so si garavdo ano raćipe thaj te mothovel so mangela o vilo; thaj teg ka ovel sakonese ašaripe e Devlestar. A akava, mle phraljalen, leljum pe mande thaj e Apolo baše tumende, kaj amendar te sikljoven na te godinen majbut kotar odova so si hramome, kaj te na bi bašo nekoj vazdena tumen jekh pe avreste. Kaj ko tut barjarela? So li isi tut so na leljan? A te leljan, so se ašarejatu sar kaj na leljan? Eke već ćaliljen; već barvaliljen; bi amaro thagarinđen tumen. O, kaj čaće thagarinđen, kaj thaj amen tumencar te thagarina! Ta gndinav kaj o Devel amen e apostolen mothovđa palune, sar po meripe krisime; kaj uljam dikhipe thaj e phakalenge thaj e manušenge. Amen diline bašo Hristo, a tumen džande ano Hristo; amen bizorale, a tumen zorale; tumen prešunde, a amen teljardine. Dži akava časo legara thaj e bokh thaj e truš thaj o nangipe thaj o khuvdipe, thaj phira amenge, thaj phurederiva kerindoj amare vastencar. Kana džungarena pe amende, ruđina; uljam sar gunojipe e themesoro, sarijenđe gunoj dži avdive. Na hraminava akava tumen te lađarav, aj tumen sikavava sar mle kamle ćhavoren. Kaj te isitumen thaj miljune sikavne ano Hristo, aj nane tumen but dada. Ruđinav tumen, akana, dikhen tumen upra mande. Odolese tumenge bićhalđum e Timotije, savo si mange ćhavoro ćumudino thaj paćavuno ano Devljutno; ov tumen ka del gođate pe mle droma save si ano Hristo Isuso, sar so pe sa e riga ane sakoj khanđiri sikavav. Nesave šuvlile sar kaj me na ka avav tumende. Aj tumende sigate ka avav, o Devljutno te manglja, thaj ni ka dikhav po lafi odolenge so šuvlile, aj pe zor; Kaj o Thagaripe e Devlesoro nane ane lafija aj ane zor. So mangena? Te avav ke tumende grankaja ja kamnipnaja thaj e đesa kovlipnasoro? Pe sa šunelape pe kaj si o rumipe maškar tumende, thaj odova asavko rumipe savo ni maškar e nađangledevlesere na liparela pe: kaj nekoj isile e romni ple dadesiri. Thaj tumen sijen šuvle, aj po than te roven, kaj bi te frdelape pe maškar tumende odova savo ćerda odova ćerdipe. Kaj me, nasijum trupoja no e đesa sinjum ate, kaj eke krisinđum, sar ka injum odori, odole savo ađahar kerda, ano anav amare Devljutnesoro e Isus Hristoso kana keden tumen thaj mlo đi, zorasa e Devljutneso amareso e Isus Hristoso, kaj asavko te dindol pe e bengese ano mučipe e truposo, te bi o đi mukljarela pe ano dive e Devljutnesoro e Isusesoro. Nane šukar o ašaripe tumaro. Na džanena li kaj hari majava sa o umer ušljarel? Frden, akana, e purani majava, te ovel nevo umer, sar so sijen bimajavako. Kaj thaj e Pasha amaro Hristos, viktiminđape amenge. Odolese te festujina na ane purani majava, ni ane majava džungalipase thaj bilaćhipase, aj ane bimajavune mare putaripase thaj čaćipase. Hramonđum tumenge ane bićhalutni te na bešen tumen e rumumencar; Aj na nisar e rumumencar akale themese, ja e therdećumidutnencar, ja e otimačinencar, ja e idolokamljutnencar; kaj bi valjani te ikljoven andar akava them. A akana tumenge hraminđum te na bešen tumen nikasa savo phral akharela pe te si rumume, ja therunoćumidutno, ja idolokamljutno, ja phukavutno, ja mato, ja otimačo; asavkencar khatane thaj te na xan. Kaj so te krisinav thaj odolenge save si avrijal? Sar na krisinen tumen odolenge save si andral? A odolenge save si avrijal ka krisinel o Devel. Thaj frden korkore e džungale maškar tumende. Krisinela pe li nekoj tumendar, isindoj e dukhavni pe avreste, te krisinela pe ke nahakajutne a na ke sumnale? Na džanena li kaj e sumnale ka krisinen e themese? A ako tumen krisinen e themese, zar sijen bilaćhe anglakrisipastar e tikne kotorendar? Na džanena li kaj e phakalenge ka krisina, a kaj li ane šeja akale themese? A tumen kana isi tumen krisipa baš šejenge akale themese, len baše krisara odolen save ane Khanđiri na semninena niso. Po ladžavipe tumenge vakerav. Sar nane maškar tumende ni jekh džando savo ka šaj te anglakrisinel maškar e phralja ple? Aj o phral e phraleja krisinel pe, thaj odova ke napaćavutne! Thaj odova si tumenge eke pherdine po ladžavipe so isi tumen ćingara maškar tumende. Aj tumen keren bihakajipe thaj anen belava, thaj odova e phraljenge! Ja na džanen kaj e bihakajutne na ka len o Thagaripe e Devlesoro? Ma xoxavđon: ni e rumutne, ni e idolokamljutne, ni e anglaćumidutne, ni e vasteserumutne, ni e buljaša, ni e bižaja, ni e ćora, ni e mate, ni e phukavutne, ni e otimčija, na ka len o Thagaripe e Devlesoro. Thaj asavke sena nesave; aj thovđen tumen thaj sumnalisajlen thaj čaćavdilen anavesa e Devljutneseresa e Isus Hristoseresa thaj e Đesa amare Devlesereja. Sa si mange mukljune, aj sa nane ko šukaripe; sa si mange mukljune, aj na dava kaj niso te thagarel mancar. O xabe si e vođese thaj o vođi e xabese, aj o Devel vi o jekto vi o dujto ka ćhinavel. A o trupo si nane rumumase aj e Devljutnese, thaj o Devljutno e trupose. A o Devel thaj o Devljutne dživdisarinđa, thaj amen ka dživdisarel pla zoraja. Na džanena li kaj si e trupora tumare e vasta thaj e pre e Hristosere? Mangav li, akana, te lav e vasta thaj pre e Hristosere thaj katar lende te kerav vasta thaj pre e rumutnake? Nisar! Ja na džanen, kaj ko e rumutnasa phandela pe jekh si trupo olasa? Kaj si phendino: Ka oven duj džene jekh trupo. A ko phandela pe e Devljutnesa, jekh si đi Olesa. Našen katar o rumupe. Sakoj bezex savo o manuš kerel avrijal o trupo si, a savo rumikanel ple trupose kerel doš. Ja na džanena kaj si o trupo tumaro hramo e Sumnale Đesoro savo si ane tumende, save isitumen katar o Devel thaj nasijen tumare? Kaj sen ćinde kuć. Glorisinen, akana, e Devle tumare trupoja thaj tumare đesa, kaj si e Devlesere. A baše odova so mange hramonđen: šukar si e manušese kaj te na dolel pe e džuvljate. Aj bašo rumipe sako nek ovel le pli romni, thaj sakoj nek ovel la plo rom. O Rom nek mothovel e romnjake kamuno kamipe, ađahar thaj e romni e romese. E romni nane devljutnini kotar plo trupo, aj o rom; ađahar thaj o rom nane devljutnuno kotar plo trupo, aj e romni. Na ćhinaven tumen jekh avrestar, semo po lafikeripe thaj odova aso nesavo vakti, te bi dinđona postipnase thaj ruđipnase, pa palem te arakhen tumen, kaj tumen o beng na zumavel tumare nainkeripnaja. Aj akava vakerav sar gndipe, a na sar ćhinadipe. Kaj mangava te sa e manuša ovena sar vi me, aj sako isile korkoruno dinipe kotar o Devel; akava adžahar, okova adžehar. A e biprandomenge thaj e phivljenge phenav: šukar si lenge te aćhoven sar thaj me so sem. Te naštine te inćerena pe, nek prandona pe thaj dendenape; kaj si pošukar te prandona pe thaj dendenape na li te thabljona pe. A e prandomenge thaj e dindenge ćhinavav, na me aj o Devljutno, kaj e romni kotar o rom te na ulavdol pe; Te li eke thaj ulavđa pe, nek aćhovel bidindi, ja nek baraštinel pe e romeja; thaj o rom te na ačavel e romnja. A e averenge vakerav me, a na o Devljutno: Te nesavo phral isile romni napaćavutni thaj oj mangela te dživdinel leja, ma te ačavela. Thaj te nesavi romni isila rom napaćavutno thaj ov mangela te dživdinel laja, ma te ačavel le. Kaj o napaćavutno rom sumnalipe e romnjaja, thaj e romni napaćavutni sumnalipe e romeja; averčhane o ćhave tumare bi ovena bikhosle, a akana si sumnale. Te li e napaćavutne ulavena pe, nek ulavena pe; o phral ja e phen ane asavko suro nane robija phandle; kaj po šalom amen vičinđa o Devel. Kaj so džane, romnije, šaj ka ikale e rome? Ja so džane, roma, šaj ka ikale e romnja? Semo sar o Devel sakonese ulavel, sako sar le o Devljutno vičinđa, ađahar nek dživdinel. Thaj ađahar ćhinavav pe sa Khanđirja. Da li si ko vičime sar sunetimo? Ma te kerel pe sar bisunetimo? Da li si ko vičime sar bisunetimo? Ma te sunetinela pe. O sunetipe nane niso, thaj o bisunetipe nane niso, aj ićeripe o ćhinavdipe e Devlesoro. Sako nek aćhol ane odova vičipe ane savo si vičimo. Sijan li vičime sar robo? Ma te grižinetu, aj vi te šajine te ove mukljuno, po šukar te trpine. Kaj savo si sar robo vičime ano Devljutno, mukljutno si Devljutnesoro; ađahar thaj savo si vičime sar mukljutno, robo si e Hristosoro. Ćinde sijen kuć; ma oven robija e manušenge. Sako, phraljalen, an soste si vičimo an odova nek aćhol anglal o Devel. A bašo ćhija nanema ćhinavdipe e Devljutnesoro, aj dava phurederipe, sar okova savo arakhlja dindipe kotar o Devljutno kaj si paćavuno. Gndinav, akana, kaj si odova šukar baše akanutne bilaćhipa, kaj si šukar e manušese adžahar te ovel. Aj li phandljan tut baš e romni? Ma rode kaj te phravetu. Aj li phravđan tut kotar e romni? Ma rode romnja. *Te li thaj prandan tut, na kerđan bezex; thaj e ćhaj te dindili, na kerđa bezex. Aj asavke ka oven len bibaxtalipe truposo, a me bi te arakhav tumen. A akava phenava, phralaljen, kaj aćhilo ari vakti; akanatar thaj odola save isilen romnja te oven sar kaj nanolen, thaj save rovena sar te na roven, thaj save lošajvon sar te na lošajvon, thaj save ćinena sar kaj niso nanolen, thaj save akava them trubujisaren sar te na trubujisaren le; kaj nakhela o dikhipe akale themesoro. A me mangava te oven tumen bigrižakoro. Ko si biprandome grižinela pe baše Devljutnesoro, sar ka kerel po kamipe e Devljutnese; A ko si prandome grižinela pe baše akalethemeso, sar ka kerel po kamipe e romnjake. Ulavela pe thaj e romni kotar e ćhaj. Savi si bidindi grižinela pe baše Devljutnesoro, sar ka kerel po kamipe e Devljutnese, te ovel sumnali thaj trupoja thaj e đesa; a savi si dindi grižinela pe baše akalethemeso, sar ka kerel po kamipe e romese. A akava vakerava bašo tumaro korkoruno theripno, na tumenge te ćhivav flinka, aj baše bahunomujipe thaj trajuno kandipe e Devljutnese, ano saćedipe. Te li eke džiko gndinela kaj si džungale baše lesere ćhajake te ovel bidindi, thaj te ađahar valjani te ovel, nek kerel so mangela, na kerel doš, nek dela. A savo si bićhinadino ano vilo, thaj nane lese trubune, a isile thagaripe upral plo kamipe, thaj akava ćhinada ano plo vilo, te ićerel pla džuvlja, šukar kerel. Ađahar thaj odova savo lela pla džuvlja šukar kerela; aj savo na lela pošukar kerela. E romni si phandli kanuneja baš o vakti dži si lakoro rom dživdo; te li lakoro rom merel, mukljuni si baše kaste mangela te delpe, semo ano Devljutno. Aj si popherdini te aćhili ađahar, pale mlo gndipe; a gndiv kaj thaj man isima o Đi e Devlesoro. A kotar e idolengere viktime pendžardo si amenge kaj sarijen isiamen džanipe. Džanipe šuvljari, a o kamipe vazdela. Te li džiko gndini kaj neso džanel, panda niso na dodžanđa sar so valjani te džanel. A te džiko ćumidela e Devle, odole o Devel pendžarđa. So si eke phandipe e xapesoro e idolese viktimengo, džana kaj o idoli nane niso ano them, thaj nane nijekh aver Devel semo jekh. Kaj vi thaj isi semo vičime devela, fije po badali fije pe phuv, sar so si but devela thaj but devljutna, aj amen isiamen semo jekh Devel e Dad, kolestar si sa thaj baš kolese injam amen, thaj jekhe Devljutne e Isus Hristo, andar kaste si sa thaj amen andar leste. Aj sarijen nanelen odova pendžaripe; kaj nesave, sikle adetija pe idolija, dži akana hana sar idolesiri viktima, thaj lengoro mincope, avune bizoralo, meljarela pes. A o xabe amen na ćhivela anglal o Devel; kaj ni laja te na haljam, ni xasarasa te na haljam. A arakhen tumen kaj sar akava tumaro muklipe te na ovel peravdipe e bizoralenge. Kaj tut, kole isi tut džanipe, dikhela džiko kaj beše baš e astala ane idolesko hramo, na li o mincipe lesoro, odolese so si bizoralo, ka zorarel te hal e idolesere viktime? Thaj bašo klo džanipe perela o bizoralo phral, baš kaste o Hristos mulo. A ađahar, kerindoj bezex kotar e phrala thaj dukhavindoj lengoro bizoralo mincope, kotar o Hristo keren bezex. Odolese, te o xabe peravela e phrale mle, ni ka hav mas dži o bimeripe, te na peravav e phrale mle. Nasijum li apostolo? Nasijum li mukljuno? Sar na dikhljum e Isuso Hristo, e Devljutne amare? Najsen li tumen kotor mlo ano Devljutno? Averenge te nasijum apostoli, aj tumenge sijum, kaj tumen sijen štambilji mle apostolipnaso ano Devljutno. Odova si mlo arakhavdipe anglal odola save krisinena man. Sar najamen hakaj te has thaj te pija? Sar najamen hakaj e phenja e romnja amencar te legara, sar thaj e avera apostolija, thaj e phralja e Devljutnesere, thaj o Kifa? Ja semo me thaj o Varnava nane amen hakaj akava te kera? Ko ikana marela pe kotar plo arliđipe? Ko sijinela e drakhalina thaj na hala kotar o bijanipe lesoro? Ja ko arakhela e bakren thaj kotar o thud e bakrengo na hala? Sar akava vakerava po manušikano? Ja na vakerela akava thaj o Kanuni? Kaj si ane Mojsejeso kanuni hramome: Ma phande o muj e guruveso savo agorinela o điv. Grižinela pe li odova o Devel baš e guruve? Ja vakerela akana baš e amende? Kaj baš e amende si hramome: kaj savo orinel, valjani ane adžikeripe te orinel, thaj save ćhinena điv ano adžikeripe kaj ka len pe plo adžikeripe. Te amen tumenđe sijinđam odova so si ođine, sar si but te amen kotar tumende ćhinaja odova so si trupuno? Te e avera haminen pe tumare hakajesa, sar li na bi amen? Aj amen na hamina amen akale hakajesa, aj sa akara te na ćera nesave azba e Hristosere evangeliumose. Na džanena li kaj odola save kerena e sumnali kandipni kotar o sumnalipe parvarena pe, thaj save e viktimutnese kandena e viktimutneja ulavena? Ađahar thaj o Devljutno ćhinavda kaj odola save o jevangelium vakeren katar o jevangelium te dživdinen. A me kotar odova niso na koristindem. Thaj na hramonđum akava kaj mange ađahar te ovel; kaj ka ma mange šukar bi ovela te merav aj kaj džiko mli ašaruni te ruminel. Kaj te vakerdem o evangeliumo, nane mange ašarni, kaj mange thaj valjani te kerav; thaj pharipe si maje te na vakerdem o evangeliumo. Kaj te akava kerava katar mlo kamipe, pokindi isima; te eke bi mlo kamipe, e kandini mange si paćavuni. Savi si mange, akana, e počindi? Kaj mothovindoj bipoćinipnaso sikavav o evangelium e Hristoso, kaj te na koristinav mle hakajesa ano evangelium. Kaj avune muklino kotar sarijende, sarijenge man kerdem roboja, kaj len so majbut pašarav. Thaj uljum e Judejcenge sar Judejco, kaj e Judejcen te pašarav; odolenge save si telal o kanuni sar telal o kanuni, te pašarav odolen save si telal o kanuni; Odolenge save si bi kanuneso uljum sar bi kanuneso, palem najsem e Devlese bi kanuneso, aj sem ano kanuni e Hristoso, te pašarav odolen save si bi kanuneso. E bizoralenge uljum sar bizoralo, kaj e bizoralen te pašarav; sarijenge sinjumle sa, kaj sar šaj nesaven te ikalav. A akava kerava baš o evangelium, te ovav lesoro khatanutno. Na džanena li kaj odola so prastana pe prastimasko than, prastana sare, a jekh lela e davutni? Ađahar prastan te len la. A sako savo marela pe kotar sa inćarela pe, odola eke te len ćhorjardo khuvdino, a amen bićhorjardo. Me, akana, ađahar prastava, na sar po bipaćavutne; ađahar marama, na sar odova save marela e balval; Aj ićhardinava o trupo mlo thaj peravava le, kaj vakerindoj averenge te na ovav korkoro frdime. A na mangava te na džanen, phraljalen, kaj o dada amare sare telal o badali sine, thaj sare andar o derav nakhle, thaj sare ano Mojsije bolile pe ane nuvera thaj derav; Thaj sare jekhuno xabe đesino xale; Thaj sare jekhuno pibe đesino pile; kaj pijena kotar đesune uće bara savi džala palo lende, a o ućo bar sinele o Hristos. Aj but đene kotar lende na sinele pe Devlesoro kamipe, kaj sinele mudarde ane drmina. A akava sinele misala amenđe, kaj te na manga džungalipe sar so on mangle. Ni ma te oven idoloperavne, sar nesave kotar lende, sar so si hramome: Bešlo o seloro te xal thaj te pijel, thaj uštino te khelel. Ni te ruminen amen, sar so nesave kotar lende ruminđepe, thaj pele on ano jekh dive biš thaj trin milje. Ni te zumava e Hristo, sar so nesave kotar lende zumavde, thaj kotar e sapa mudardile. Ni te mrminen sar so nesave kotar lende mrminde, thaj mudardile kotar e mudarutne. A sa akava lenđe kerdilo pe baš misalese, a hraminđape baše sikavipe amenđe, pe save alo o agoripe e bimeripnaso. Odolese savo gndinela kaj terđol nek arakhelpe te na perel. Aver zumavipe tumen na arakhlja semo e manušesoro; paćavino si o Devel savo tumen na ka mekel kaj te zumaven tumen akana aj so šaj, aj ka kerel e zumavipnaja thaj agor, kaj šaj te akharen. Odolese, ćumidine mle, našen kotar o idoloperavnipe. Sar e džandenđe vakerav; krisinen tumen so phenav. E taxtaj baxtaripnasi savi baxtaraja nane li khatani ratesi e Hristosiri? O Maro savo phagaja nane li khatani truposiri e Hristosiri? Kaj jekh si maro, jekh sam trupo butdžene, kaj savore kotar jekh maro xasa. Dikhen e Izrailje po trupo: save xana viktime nane li khatanarja e viktimatnengo? So, akana, te phenav? Kaj si o idoli neso? Ja kaj si e idolesi viktima neso? Na, aj kaj odova so e nadžangledevlesere viktinen, e bengenđe viktinen, a na e Devlese; a me na mangava kaj tumen te oven khatanarja e bengencar. Našti te pijen e taxtaj e Devljutnesiri thaj e taxtaj e bengesiri; našti te oven ane trpeza e Devljutnesiri thaj ane trpeza e bengesiri. Sar te xoljara e Devljutne? Sijam li pozurale kotar leste? Sa mange si mukljune, aj sa nane ko šukar; sa mange si mukljune, aj sa na vazdela. Nikoj ma te rodel so si lesoro, aj sako odova so si e avereso. Sa so biknela pe po trgo xan, niso ma phućen baš tumaro mincope; Kaj si e Devljutnesiri phuv thaj sa so si pe late. Ako li tumen nesavo kotar e bipaćamne vičinela, thaj mangen te džan, xan sa so tumenđe anela pe, niso te na phućljarindoj bašo mincope. Ako li tumenđe nesavo phenela: Akaja si e idolesiri viktima, ma xan baše odova savo tumen džangljarda thaj bašo mincope; kaj si Devljutnesri phuv thaj sa so si pe late. Aj na vakerava bašo mincope klo, aj avereso. Kaj sose mlo muklipe te krisinel o mincope e avresoro? Ako me ašarindoj xav, sose man te akošen baš odolese so me ašarisarav? Te, akana, xana, te li pijena, te li so aver ćerena, sa pe glorija e Devlesiri ćeren. Ma oven po peravipe ni e Judejcenge, ni e Jelinenge, ni e Devlesere Khanđirjake. Sar so thaj me ane sa sarijenđe tumenđe ćerava po kamipe, na rodindoj o šukaripe mlo aj butengoro, te inkalen pe. Dikhen tumen pe mande, sar thaj me po Hristo. Ašarav tumen eke, phraljalen, so sa mlo ićerena ane godi, thaj ićerena o mothovdipe sar so tumenđe mothodem. Aj mangava te džanen kaj si sakone romese o šero o Hristos, a o rom si šero e romnjaće, a o Devel si šero e Hristose. Sako rom savo ućharde šereja ruđinel pe e Devlese ja profetinela, ladžarela o šero plo. Thaj sakoj romni savi nangešeresiri ruđinela pe e Devlese ja profetinela, ladžarela o šero plo; kaj si jekh jekhune sar thaj ćhinde balengiri. Kaj e romni te na ućharđa pe, nek thaj ćhinel pe bala; te li si ladžavipe e romnjake te ćhinel pe bala ja te randel pe, nek ućharela pe. Aj o rom na valjani te ućharel plo šero, kaj si tasvir thaj glorija e Devlesiri; a e romni si glorija e romesiri. Kaj nane o rom kotar e romni, aj e romni kotar o rom, kaj o rom nane ćerdo baše romni, aj e romni bašo rom. Odolese e romnja valjani te ovela o thagaripe ko šero baše phakale. Palem, ano Devljutno ni si o rom bi romnjakoro ni e romni bi romesoro. Kaj sar so si e romni kotar o rom, ađahar si thaj o rom andar e romni a sa si kotar o Devel. Korkore ane tumende krisinen: aj li si šukar kaj e romni nangešeresiri e Devlese te ruđinela pe? Sar tumen thaj korkori natura na sikavela kaj si e romese ladžavo te isile bare bala, a e romnjake si glorija te isila bare bala? Kaj lake si e bala dinde po than e ućharipnaso. Te li džiko gndinela kaj te ćhingarela pe, amen asavko adeti nane amen, ni e Khanđirja e Devlesere. A kava ćhinavdinoj na ašarinava tumen, kaj na ćedena tumen po laćhipe aj po džungalipe. Kaj anglal o sa, kana ćedena tumen ane Khanđiri, šunava kaj isi ulavdipe maškar tumende, thaj neso odolestar paćav. Kaj valjani thaj ulavdipa te ovel maškar tumende, te sikaven pe save si bićhinadine maškar tumende. Kana, eke, ćedena tumen ko jekh than, na xala pe raćako xabe e Devljutnesoro; Kaj sakoj plo raćako xabe anglal e avera xala, ta jekh bokharela a o dujto maćhovela. Sar nanetumen ćhera te xan thaj te pijen? Ja peravena e Khanđiri e Devlesiri thaj ladžarena odolen save nanolen? So tumenge te phenav? Mangava li tumen odolese te ašarinav? Na ašarinav. Kaj me leljum kotar o Devljutno so tumenge thaj dinđum, kaj o Devljutno Isus odoja rat kana sinele dindino, lelja o maro, thaj ašarindoj phaglja thaj phenda: Len, xan, akava si o trupo mlo, savo baš tumenge phagela pe; akava ćeren ane mlo liparipe. Jekhune ađahar thaj e taxtaj, po raćipe, vakerindoj: Akaja si taxtaj Nevo Xapesovli ano mlo rat; akava ćeren, kana god pijen, ane mlo liparipe. Kaj kana god xana akava maro thaj e taxtaj akaja pijena, o meripe e Devljutnesoro džangljaren, džikaj na avel. Ađahar savo xal akava maro ja pijel e taxtaj e Devljutnesi napaćivine, ka ovel došalo e trupose thaj ratese e Devljutneserese. Aj o manuš nek phućljarel pe, thaj ađahar kotar o maro nek xal thaj kotar e taxtaj nek pijel. Kaj savo napaćivine xala thaj pijela, kris peske xal thaj pijel, na ulavindoj o trupo e Devljutnesoro. Odolese si maškar tumende butdžene bizorale thaj nasvale, thaj butdžene merena. Kaj te bi korkore amen krisina, na bi ovaja krisime. A kana amenđe krisinela o Devljutno, korinela amen, te na ova krisime e themeja. Odolese, phraljalen mle, kana ćedena tumen te xan, adžikeren jekh avere. Te si li nekoj bokhalo, nek xal ćhere, kaj po krisipe te na ćeden tumen. A o aver ka laćharav kana ka avav. A kotar e ođikane dinipa, phraljalen, na mangava te na džanen. Džanen kaj kana sena nadžangledevlesere dželjen bikrlune e idolenge, sar tumen ingarena. Odolese tumenđe dava po džanipe, kaj nikoj ko Đesa Devleseresa vakerela na phenel: Anatema po Isuso! Thaj nikoj našti te phenel: O Isus si Devljutno, semo Đesa Sumnalesa. Savetane si e dinipa, aj o Đi si jekhuno. Thaj savetane si e sevipna, aj o Devljutno si jekhuno. Thaj savetane si ćeripna, aj jekhuno si o Devel savo ćerela sa ane sarijende. No sakonese delape ćeripna e Đeso po laćhipe. Kaj jekhese delape andar o Đi o lafi siklipnaso; a averese o lafi džanipnaso po jekhuno Đi; A e avrese o paćape jekhune Đesa; a e dujtonese dinipa e sastaripnaso e jekhune Đesa; A e avrese ćeripe prašukaripnaso, a e dujtonese anglamothovipe, a avrese ulavdipe e đengoro, a e dujtonese ulavdine ćhibija, a avrese mothovdipe e ćhibijengo. A sa akava ćerela jekh thaj jekhuno Đi, ulavindoj sakonese ulavdine sar mangel. Kaj sar so si o trupo jekh thaj isile but kotora, a sa e kotora jekhuno trupo, thaj te si butune, jekh si trupo, ađahar thaj o Hristos. Kaj vi jekhe Đesa sare amen boldamen ano jekh trupo, sinele li Judejcija, ja Jelinija, ja robija, ja mukline; thaj sare sam jekhe Đesa parvarde. Kaj thaj o trupo nane jekh kotor aj bute. Te phenđa o pro: Poso nasijum vast, nasijum kotar o trupo; sar eke nane kotar o trupo? Thaj te phenđa o kan: Poso nasijum jakh, nasijum kotar o trupo; sar eke nane kotar o trupo? Te bi sa o trupo ovela jakh, kaj si teg o ašunipe? Te bi sa ovela ašunipe, kaj si o sungajipe? A akana, o Devel ćhuta e kotora ano trupo, sako pojekhuno kotar lende sar manglja. A te bi sa ovena jekh kotor, kaj si o trupo? Akana eke, bute si kotora, a jekh trupo. A e jakh naštil te phenel e vastese: Na valjane maj; ja palem o šero e prenge: Na valjanena maj. Aj, so pobut, save kotora e truposere ćerena pe kaj si bizorale, prekalvaljanipe si; Thaj save amenđe ćerena pe pohari paćivune po trupo, lenđe daja pobari paćiv; Thaj bidikhle amare kotora isilen baro dićhipe, džikaj odole dićhipenđe odova na valjani. Aj o Devel ađahar laćharda o trupo dindoj e bizorale kotorese pobari paćiv, kaj te na ovel ulavdipe ano trupo aj te e kotora barabarine grižinena pe jekh baš avrese. Thaj te mudarđola jekh kotor, leja mudarđona sa e kotora; a te li jekh kotor šundipela, leja lošalena pe sa e kotora. A tumen sijen trupo e Hristoso, thaj kotora ulavdine. Thaj akalen ćhuta o Devel ane Khanđiri: anglune e apostolen, dujto e profetonen, trito e sikavnen, napal e prašukarćerutnen, napal e dinipa sastaripnase, ažutipnase, vastaripnase, savetane ćhibija. Kaj li si sare apostolija? Kal li si sare profetija? Kaj li si sare sikavne? Kaj li si sare prašukarćerutne? Isilen li sarijen dinipa sastaripnase? Vakerena li sare o ćhibija? Da li sare mothovena? A ćeren baše pobare dinipa. Thaj ka mothovav tumenđe najvazdino drom. Ako e ćhibija manušengere thaj e phakalengere vakerav, a kamlipe nanema, teg sem sar erzo savo cingrisinel, ja o kimval savo zvečil. Thaj te isima dinipe kotar anglomothovdipe thaj džanav sa o garavipe thaj sa o džanipe, thaj te isima sa o paćape kaj thaj e plaine te cidav, a kamlipe nanema, niso sam. Thaj te ulavdem sa o barvalipe mlo, thaj te dav o trupo mlo kaj te thabljol, a kamlipe nanema, niso maje na labharela. O kamlipe but crdela, bahtardini si, o kamlipe na korikanel, o kamlipe na barikanel pe, na šuvljari pe, na kerela so na aćhola, na rodela plo, na holjarela pe, na gindinela katar o džungalipe. Na lošalela pe e bihakajipnase, a lošalela pe e čaćipnase, sa legari, sa paćala, sahese adžikerela pe, sa crdela. O kamlipe nisar na ćhinavdol, dži o anglalmothovdipe ka našalđol, o ćhibija ka aćhoven, o džanipe ka aćhavel. Kaj kotorune džana, thaj kotorune anglalmothova; A kana ka avel o pherdino, tegani ka aćhavel so si kotorune. Kana sema ćhavoro, sar ćhavoro vakerava, sar ćhavoro mincinava, sar ćhavoro gindinava; a kana uljem manuš frdinđum so si ćhavorikano. Kaj akana dikhaja sar ano dikhlo, ane garavde lafija, a tegani mamuj ano mamujipe; akana džanava kotorune, a tegani ka pendžarav sar so sijum pendžardo. A akana aćhola o paćape, o adžićeripe, o kamlipe, akala trin; aj kotar lende najbaro si o kamlipe. Ićeren tumen e kamlipastar, thaj phurederinen tumen bašo đesere dinipa, a ulavdine te anglalmothoven. Kaj savo vakerela e ćhib, na vakerela e manušenge aj e Devlese; kaj nikoj na haljovel, poso ov đesa vakerela o garavdipa. A savo anglalmothovel vakerel e manušenge bašo duvaripe thaj zoraripe thaj kovljaripe. Kaj savo vakerela e ćhib pe vazdela, a savo anglalmothovel e Khanđiri vazdela. A mangava bi kaj sare te vakeren o ćhibija, a ulavdune te anglalmothoven; kaj si pobaro odova savo anglalmothovel aj odova savo vakerela o ćhibija, semo te thaj mothovela, kaj e Khanđiri te vazdela pe. A akana, phraljalen, te aljum ke tumende vakerindoj o ćhibija, so tumenge ka labavav te tumenge te na vakerdem ja ano phućardipe, ja ano penđaripe, ja ano anglalmothovdipe, ja ano sikavipe? Thaj e biođesere šeja save dena krlo, aj si bašalni ja gusle, te na dinđe haljovune krle, sar ka haljovel pe so bašalela pe ja guslinela? Kaj, te e truba dela nahaljovuno krlo, ko ka gatinel pe bašo maripe? Ađahar thaj tumen, te phenden ćhibijasa nahaljovuno lafi, sar ka džanela pe so vakerena? Kaj ka vakeren ane balval. Ma kozom te si po them vrste krlengore, aj nijekh kotar lende nane bi semnipaso. Te, akana, na džanava o semnipe e krleso, ka ovav avruno odolese savo vakerel, thaj odova savo vakerel ka ovel mange avruno. Ađahar thaj tumen, avune kaj sen bućarne e đesenge dinipengo, phurideren tumen te barvaljon ane odola save si bašo vazdipe e Khanđirjakoro. Odolese, savo vakerel e ćhib, nek ruđinela pe e Devlese thaj te mothovel. Kaj te odola ćhibaja te ruđinape e Devlese, mlo đi ruđinel pe, a e godi mli si bi bijanipaso. So valjani, akana? Ka ruđinav ma e Devlese đesa; a ka ruđinav ma thaj gođaja; ka ašarinav e Devle đesa, a ka ašarinav thaj gođaja. Kaj te bahtarinđan đesa, sar okova savo astarela o than e save paćavutneso ka phenel amin pe klo bahtaripe, kana na džanela so vakere? Kaj tu šukar bahtarineja, aj o aver na vazdela pe. Bahtarinava mle Devlese so vakerava o ćhibija pobuter kotar sa tumendar. Aj ane Khanđiri kamava te phenav pandž lafija gođasa mlasa, kaj thaj e averen te sikavav, nali miljune lafija ćhibijasa. Phraljalen, ma oven ćhavore gođaja, aj džungalipnaja ćhavorinen tumen, a gođaja oven akanutne. Ano Kanuni si hramome: E avere ćhibijenca thaj e avere voštenca ka vakerav akale selorese, thaj ni ađahar ni ka kanden man, vakerela o Devljutno. Ađahar si o ćhibija na semno e paćapnenge, aj napaćamnenge, a o anglalmothovdipe na e napaćamnenge, aj e paćamnenge. Te, eke, kedela pe sa e Khanđiri ko jekh than, ta sare vakerena o ćhibija, a đerdinena e bisikavde ja e napaćamne, na li ka phenen kaj diljarđovena? A te sare anglalmothovena, thaj đerdini nesavo napaćamno ja nasikavdo, ovela ukorimo sarijendar thaj krisimo sarijendar, thaj ađahar o garavdipe lesere vilestar ovena phućarde; thaj tegani ka perel natele e mujea thaj ka perel ko kočija e Devlese, mothovindoj kaj si emčaće o Devel tumencar. So, akana, phraljalen? Kana ćedena tumen sakoj tumendar isile psalam, isile siklipe, isile ćhib, isile phućardipe, isile mothovdipe; sa nek ovel bašo vazdipe. Te nesavo vakerela e ćhib, teg nek oven po duj džene, ja pobuter trin džene, thaj odova redoja, a jekh nek mothovel. Te li nane mothovutno, nek trajini ani Khanđiri, a nek vakerel korkoro pese thaj e Devlese. A e profetija duj ja trin nek vakeren, a e avera nek anglakrisinen. Te li phućarela pe e averese savo bešela, o angluno nek trajinel. Kaj šaj anglaltemothoven sare, jekh po jekh, kaj sare te sikljoven, thaj sare te kovljaren pe. Thaj e đe anglalmothovdipasere peravena pe e profetonenge. Kaj o Devel nane Devel biredosoro, aj šalomnipaso. Sar pe sa e sumnale Khanđirja, e romnja tumare ane Khanđirja te trajinen; kaj lenge nane muklime te vakeren, aj kaj te kanden, sar so thaj o Kanuni vakerel. Ako li mangle so te sikljoven, nek phućen ćhere ple romen; kaj si bilaćhe e romnjake te vakerel ani Khanđiri. Da li kotar tumende o lafi e Devlesoro iklilo? Ja semo dži tumende alo? Ako ko ićerela kaj si profeto ja ođino, nek haljovela so tumenge hramonav, kaj si akava e Devljutnesere ćhinavdipa. Te li ko na mangela te džanel, ma te džanel. Ađahar, mle phraljalen, bućaren te anglalmothoven, thaj e ćhibija te vakeren ma te ćhinaven. A sa nek ovel bahtalomujesoro thaj laćhardo. Aj tumenge liparav, phraljalen, o evangelium savo tumenge vakerđum, savo thaj leljen, ane savo thaj terđoven, andar savo thaj inkalena tumen, te ićerđen ađahar sar tumenge vakerđum, semo te nakamen te paćajen. Kaj tumenge najanglal dinđum so thaj leljum, kaj o Hristos mulo baš e bezaha amare po Lil, thaj kaj sa pharume, thaj kaj uštino o trito dive, po Lil, thaj kaj mothovdilo e Kifase, napal e Dešudujenge; Napal ov mothovđape jekhanatar pobut kotar o panšel phralja, katar save si butdžene thaj akana dživde, a nesave mule. Napal mothovđape e Jakovese, napal sa e apostolenge; A palo sarijende, sar nesave naanutnese, mothovđape thaj maje. Kaj sem me najcikno kotar o apostolja, savo najsem paćivuno te vičinama apostoli, odolese so prastanđum e Khanđiri e Devlesiri. No e Devlesere dindipnaja injum so injum, thaj o dindipe lesoro savo si ana mande na aćhilo čućo, aj grižinđum pe pobut kotar lendar sarijendar, aj na me, aj o dindipe e Devlesoro savo si mancar. Sine, eke ja, ja sine on, ađahar vakeraja, thaj ađahar paćajen. A te o Hristos mothovela pe kaj uštino andar e mule, sar nesave maškar tumende vakerena kaj nane dživdinisaripe e mulengo? A te nane dživdinisaripe e mulengo, odova ni o Hristos na uštino. A te o Hristos na uštino, napal si čućo o mothovipe amaro, pa čućo si thaj o paćape amaro. A mothovaja amen thaj hohamne sadikhutne e Devlesere so mothovaja opipe e Devlestar te dživdinisarel e Hristo, save na dživdinisarinđa, te, eke, e mule na uštena. Kaj te e mule na uštena, odova ni o Hristos na uštino. A te o Hristos na uštino, nanepaćamno o paćape tumaro; pana sijen ane bezaha tumare. Teg thaj odola save mule ano Hristo, propele. Thaj te semo ane akava dživdipe adžikera ano Hristo, najbibahtale sijam kotar e sa manuša. No hemčaće o Hristos uštino andar e mule, ta ćerdilo angluno odolendar save mule. Kaj poso si andar o manuš o meripe, andar o manuš si thaj o dživdinisaripe e mulengo. Kaj sar so ano Adam sare merena, ađahar si thaj ano Hristo sare ka dživdinisaren. No sako ane plo redo: angluno o Hristos, palem, kotar lesoro avipe, odola save si e Hristosere; Napal agor, kana dela o Thagaripe e Devlese thaj e Dadese, kana ćhinavela sako šerutnipe thaj sako thagaripe thaj e zor. Kaj ov valjani te thagarinel dži kote na pašljarela sa e dušmanjen telal o pre ple. Paluno dušmani ka ćhinavela pe – o meripe. Kaj sa teljarđa telal o pre lesere. A kana phenela kaj si lese sa teljardo, jakhenca dikhime, semo Odole savo lese teljarđa sa. A kana lese sa teljarđa, napal vi korkoro o Ćhavo ka teljarđol Odolese savo lese sa teljarđa, te ovel Devel sa ano sa. Averčhane, so ka ćeren odola save bolinena pe baš e mulenge; te e mule nisar na dživdinisarinena? Sose thaj bolena pe baš e mulenge? Sose thaj amen ćhivamen ano reziko sako časo? Sako dive merava, ađahar amen, phraljalen, tumare ašaripa, save isima ano Hristo Isus o Devljutno amaro. Kaj te si po manuš mardema e divo dživdinutnancar ano Efes, savo si mange o laćhipe? Ako o mule na uštena – te xas thaj te pija, kaj tajsa ka mera! Ma xoxaven tumen: e džungale vakeripa ruminena o šukare adetija. Aven ana tumende sar so valjani, thaj ma bezehaljen; kaj nesave na pendžarena e Devle; po ladžavipe tumenge vakerav. Aj ka phenel džiko: Sar ka ušten o mule? Thaj ane savo trupo ka avel? Bigođakoreja, odova so tu sijine na ka dživdinel te na mulo. Thaj so sijineja, na sijine trupo savo ka ovel, aj nangi kućin, ja đivesoro ja nesavo aver. A o Devel lese dela trupo savo mangela, thaj sakona kućinake lakoro trupo. Nane sako trupo jekhuno trupo, aj si aver trupo e manušesoro, a aver trupo si e dživdinutnako, a aver e maćhesoro, a aver e čirikljakoro. Thaj isi trupija e badalesere thaj trupija e phuvljakere; aj si aver glorija e badalengiri a aver e phuvljengiri. Aver si glorija e khamesiri, a aver glorija e ćhonesiri, thaj aver glorija e ćerenjengoro, kaj e ćereni đi e ćereni ulavela pe ane glorija. Ađahar thaj o dživdinisaripe e mulengo: sijinela pe ano ćhordaripe, uštela pe ano bićhordaripe; Sijinela pe ano bipaćivalipe, uštela pe ane glorija; sijinela pe ano bizoralipe, uštela pe ano zoralipe; Sijinela pe trupo ođepnaso, uštela trupo ođisuno. Isi trupo ođepnaso thaj si trupo ođisuno. Ađahar si thaj hramome: O angluno manuš o Adam ćerdilo si đe dživdo, a o paluno Adam đi savo dživdisarel. Aj nane angluno ođisuno, aj si ođesuno, napal si ođisuno. Angluno manuš si kotar e phuv, phuvljalo; o dujto manuš si Devljutno e badalestar. Savo si o phuvljalo, asavke si o phuvljale; thaj savo si e badalesoro, asavke si thaj e badalesere. Thaj sar so legaraja tasvir e phuvljakoro, ađahar ka legara thaj tasvir e badalesiri. A akava phenava, phraljalen, kaj o trupo thaj o rat našti te len o Thagaripe e Devlesoro, ni o ćhordardipe našti te lel o bićhordardipe. Eke tumenge phenava o garavdipe: Sare na ka mera, aj sare ka ova averčhane, ane jekhdrom, ano momenti e jakhako, paše paluni truba; kaj ka trubinel, thaj o mule ka dživdinisarinen bićhordarde, thaj amen ka ova averčhane. Kaj valjani akava ćhordardino te urjavela pe ano bićhordardipe, thaj akava merutno te urjavela pe ano bimerutno. A kana akava ćhordardo urjavela pe ano bićhordardipe, thaj akava merutno urjavela pe ano bimerutno, tegani ka pherđol odova lafi so si hramome: O vidžaipe xal o meripe. Kaj si tuće, meripe, o otrovo? Kaj si tuće, pakao, o peravdipe? A o otrovo si e meripnase bezeh, a e zor si e bezehese kanuni. A e Devlese nais savo amenge dija o peravdipe andar o Devljutno amaro Isuso Hristo. Odolese, phraljalen mle o kamle, oven zorale, zorardine, anglalphiren bićhinavdine ano ćerdipe e Devljutnesoro, džanglindoj kaj e buti tumari nane frdime ano Devljutno. A so si phandine e tikore dindipase baše sumnale, sar so laćhardem ko Khanđirja e galatijengere, ađahar ćeren thaj tumen. Sako angluno dive e kurkesko, nek sakoj tumendar ačaj ke peste ćedindoj kobor šaj, te na oven o ćedinipa tegani kana avav. A kana ka avav, odolen saven alosaren ka bićhalav e lilencar ano Jerusalim te legaren tumaro tikoro dindipe. A te arakljape šukar kaj thaj me te džav, ka džan mancar. A tumende ka avav kana nakhav e Makedonija, kaj ka nakhav andar e Makedonija; A ke tumende, šaj ka aćhovav ja ka nakhavav o jevend, kaj tumen man te teljaren kuri džav. Kaj na mangava tumen te dikhav akana ano nakhlipe, aj adžikerav kaj nesavo vakti te aćhovav ke tumende, te muklja o Devljutno. A ano Efes ka aćhovav dži e Pindatori; Kaj mange phravdile o bare udara baše buti, thaj opipeutne si but. A te alo o Timotej, dikhen te ovel tumende bi darako; kaj ov ćerela ćerdipna e Devljutnesere sar thaj me. Odolese nikoj te na dikhel le teljardinoj. Prohodinen le šalompnaja te avel ke mande, kaj adžikerav le e phraljencar. A so si phandune e phralea e Apolea, but le ruđinđum te avel ke tumende e phraljencar; thaj sarjekh na sine kamipe kaj akana te avel, aj ka avel kana ka ovel šaipe. Oven džangavde, terđoven ano paćape, muršikane ićertumen, zorale oven. Sa te ovel tumenđe ano kamlipe. Ruđinav tumen eke, phraljalen, džanen bašo kher e Stefanesoro kaj si anglunoro andar e Ahaja, thaj kaj pes sumnalinde kandipase e sumnalenđe; Kaj thaj tumen te teljarđon asavkenđe, thaj sakonese savo ažutinela thaj bućarela. A lošalivav e Stefanosere avipnase thaj e Fortunatese thaj e Ahajikase, kaj maje on pherde tumaro najstalipe; Kaj šalominde o đi mlo thaj tumaro. Bićhalen tumenge sastipe o Khanđirja e azijengere. Bićhalen tumenge sastipe but ano Devljutno o Akila thaj o Priskila pumara ćherutna khanđirja. Bićhalen tumenge sastipe sa o phralja. Bićhaldo sastipe si mle vasteja, e Pavlesereja. Te džiko na ćumidela e Devljutne Isuso Hristo, nek si anatemo. Maranata. Dindipe amare Devljutnesoro e Isus Hristosoro tumencar. Kamlipe mlo sarijencar tumencar ano Hristo Isuso. Amin. _____ Aramejengo vakeripe: „O Devljutno avela” ja „Devljutnea ava”. O Pavle, apostoli e Isus Histoso po kamipe e Devlesoro, thaj o phral o Timotej, e Devlesere Khanđirjaće savi si ano Korint, sa e sumnalencar save si pe sa ane Ahija. Dindipe tumenge thaj šalom kotar o Devel, Dade amareso, thaj o Devljutno Isus Hristo. Baxtardo Devel thaj Dad e Devljutneso amareso e Isus Hristoso, Dad dinipaso thaj Devel sakone zorale lafesoro, savo amen zoralel ano sako amaro pharipe te bi amen šaj te zoralipna okolen save si ane sako pharipe, zoralipnaja savaja amen korkore zoralel o Devel; Kaj sar so si o mudaripe e Hristosoro pherdo an amende, ađahar si andar o Hristo pherdo thaj o zoralipe amaro. Te li munčinamen, baše tumaro zoralipe thaj ikaldipe, savo resela pe legaripnaja okole jekhune mudaripnaja save thaj amen trpisara; te li amen zorarđova, bašo tumaro si zoralipe thaj ikaldipe; Thaj o adžićeripe si amaro paćavino baše tumenge, džanglindoj kaj sar so sijen khatanutnara e mudaripnase ađahar sijen thaj e zoralipnase. Kaj namanga, phraljalen, te na džanen kotar o pharipe amaro savo amenđe ćerdilo ane Azija, kaj but sinjamle pharipna, prekal e zor, ađahar kaj sinjamle ano dujgođavipe thaj bašo dživdipe; Ta korkore ane amende o krisipe po meripe dživdisardam, te na bi paćaja ane amende aj ano Devel savo vazdela e mulen, savo amen kotar asavko meripe ikalđa, thaj ikalela, an saveste adžikera kaj ka amen thaj pale ka ikalel, uzo ažutipe thaj tumare ruđutna baš amenge, kaj kotar but džene ovela vazdimi baš amenge barvalo dindipe e Devlese, baše amaro dindipnasoro dinipe. Kaj si akava amaro naisipe, mothojpe mincoso amareso, kaj ano aćarunipe thaj čaćaripe e Devlesoro, na po džanipe e trupesoro, aj po dindipe e Devlesoro dživdinđam ano them, a ulavdine maškar tumende. Kaj tumenge aver na hramina aj so drabaren thaj so haljoven, a adžikerava kaj thaj dži o agor ka haljoven, sar so amen an nesave thaj haljovđen, kaj sam amen tumaro naisipe, sar thaj tumen amaro, ano dive Devljutneso e Isuseso. Thaj an akava paćape mangljum te avav majanglal tumende, kaj o dujto dindipe te ovel tumen; Thaj pala tumende te džav ane Makedonija, thaj palem andar e Makedonija te avav tumende, thaj tumen te prohodinen man ane Judeja. Manglindoj, eke, akava sar loćegindine ćerđum? Ja akava so ćhinadem, po trupo ćhinadivav, te ovel ke mande thaj va va, thaj na na? Aj si o Devel paćavino, kaj o lafi amaro tumenge na ulo va thaj na. Kaj o Ćhavo e Devlesoro o Isus Hristo, save amen tumenge vaćerđam, me thaj o Siluan thaj o Timotej, na ulo va thaj na, aj ane Leste ulo va. Kaj kobor si dinde lafija e Devlestar, ane Leste si va, thaj ane Leste si amin, e Devlese ko šalomipe andar amende. A o Devel si odova savo čaćavel amen tumencar ano Hristo, thaj savo amen pomaklja, savo amen thaj štambiljinđa, thaj dinđa kotor e Đesoro ane vile amare. A me akharav e Devle baš e sadikhutnese pe mlo ođi, kaj te arakhel tumen ni avav maj ano Korint. Na sar te devljutnina upral o paćape tumaro, aj semo ažutne tumare lošalipnase; kaj ano paćape terđoven zorale. A akava ćhinadem ane mande kaj tumenge pale te na avav ano dukhavipe. Kaj, ako tumen me dukhavav, ko si odova savo man lošarel, ako na odova save me dukhavav? Thaj akava tumenge čaće hramonđum, kaj kana ka avav na ovava dukhavdo kotar odola katar save bi valjani te lošarav pe, paćavindoj an sa tumende, kaj si o lošalipe mlo lošalipe savore tumengoro. Kaj kotar o but dukhavdipa thaj vilesere dukhavipna hramonđum tumenge bute asvencar, na kaj te dukhaven tumen aj te penđaren o baro kamlipe savo isima mamuj tumende. Te si li ko kaj dukhavđa, na dukhavđa man, aj kotorune – te na nakhavav – sa amen. Asavkese si pherdo akava prastavipe kotar but džene; Ađahar kaj si, averćhane, po šukar te jertinen thaj te kovljaren, sar odova na bi ovela peravdo kotar o but baro dukhavdipe. Odolese tumen ruđinava, čaćaven o kamlipe premalo leste. Kaj tumenge odolese thaj hramonđum, te bi penđarava o zumavdipe tumaro, sijen li ane sa kandine. A kase so jertinena, jertinav thaj me; kaj thaj me te kase so jertinđum, jertinđum baše tumende anglal o muj e Isus Hristosoro, kaj amen xoxavipnasa te na peravel o beng, kaj amenge lesere buća nane bipenđarde. A kana avilem ano Troado bašo evangelium e Hristosoro, thaj kaj mange phravdile o udara ano Devljutno. Nasine man šalom ano mlo đi na arakhandoj e Tito e phrale mle, aj jertisarindoj lestar, ikliljum ane Makedonija. A nais e Devlese savo amenge sajekh dela biperavipe ano Hristo Isuso, thaj andar amende mothovela e sung ple penđaripnaso pe sako than; Kaj amen sam e Hristosoro šalomipe e Devlese maškar odola save ikalena pe thaj maškar odola save perena: Jekhenđe o sung meripnasoro bašo meripe, a e averenge sung dživdipnasoro bašo dživdipe. A baše akava ko si zoralutno? Kaj amen nasijam sar but okola save trguinena lafeja e Devlesereja, aj andar o putardipe, sar kotar o Devel, anglal o Devel, ano Hristo vaćera. Širdipenaja li palem amen te mothovdija? Ja si amenge valjani sar nesavenge bićhatalutne bićhalutna baše tumenge ja anglabićhalutna tumendar? Tumen sijen amari bićhalutni hramomi ane vile amare sava džanen thaj drabaren sa e manuša, mothovindoj kaj sijen bićhalutni e Hristosiri, andar amaro kandipe hramomi, na tintaja, aj Đesa e dživde Devleja, na pe baresere ploče, aj pe truposere ploče e vilesere. A asavko paćape isiamen ano Devel andar o Hristo, na kaj sam šajutne korkore amendar so te gindina, kaj si amaro šajipe e Devlestar, savo amen thaj ćerđa šajutne te ova kandine e Neve Sovljake, na grafemengo aj Đeso; kaj e grafema mudarela, a o Đi dživdinela. Te li e kandini meripnasiri xarndini ko bar e grafemencar sinele ane glorija, ađahar kaj vi e ćhave e Izrailjesere na šajinđe te dikhen ano muj e Mojsijesoro kotar e glorija lesere mujeso savi nakhela, sar li ni ka e kandini e Đesiri ovela but majbut ane glorija? Kaj kana si e kandini e krisosiri glorija, but majbut barvarela ane glorija e kandini e hakajipnasiri. Kaj thaj ni glorisajlo odova so si glorisime odola suresa bašo akaja butbari glorija. Kaj kana si glorisime odova so aćhavela, but ka majbut ka ovel ane glorija akava so aćhola. Isindoj, eke, asavko adžićeripe bare tromalipnaja arakhavamen, a na sar so o Mojsije ćhivela ućharipe ko muj plo, te na bi šaj e ćhave e Izrailjesere te dikhen o agoripe odolesoro so aćhola. No korjardile o gindipa lengere; kaj dži o avdivesutno dive odova jekhuno ućharipe ano drabaripe e Purane Sovljakoro aćhola biphućardo, kaj odova ano Hristo ćhinavela pe; Aj dži avdive, kana drabarela pe o Mojsije, terđola o ućharutno ko vilo lengoro; A kana bi avena e Devljutnese, bi ćhinavela pe o ućharutno. A o Đi (Sumnalo) si o Devljutno; a kote si o Đi e Devljutnesoro odori si o muklipe. Sare amen eke save phućarde mujeja mothovaja e glorija e Devljutnesiri, arlisajvaja pe ano jekhuno muj, andar e glorija ane glorija, sar kotar o Đi e Devljutnesoro. Odolese isindoj akava kandipe, sar so sinjamle maznome, na dosadinipe amenđe, aj ćhinavđam o lađutne garavde ćerdipna, na phirindoj ano bižajipe, ni pak irindoj o lafi e Devlesoro, aj mothojpnasa e čaćipaso anglabićhala amen sakone manušesere mincopase anglal o Devel. Te li si thaj ućhardo o evangeliumo amaro, ućhardo si odolenge save perena; Ano lende o Devel akale themesoro korjarđa e godi e bipaćamnengiri, lenge te na dikhelape o rošipe e evangeliumoso gloripe e Hristoso, savo si ikona e Devlesiri e bidikhlesiri. Kaj na vakeraja amen, aj e Hristo Isuse, e Devljutne, a amen sar kandine tumare bašo Isuso. Kaj o Devel savo phenđa kaj andar o raćipe strefinel o rošipe, Ov strefinela ane vile amare bašo rošaripa e džandipasoro e glorija e Devlesiri ano muj e Isus Hristosoro. A akava barvalipe isiamen ane phuvljakere vasora, kaj o butbaro zoralipe ovela kotar o Devel a na kotar amende. Sahesa sinjam uštadine, aj na spidime; hulavdime, aj na xasarde; Prastandine, aj nasijam aćhavde, peravde, aj na mudarde; Sajekh legarindoj po trupo o meripe e Devljutneso e Isuseso, kaj vi o dživdipe e Isuseso po trupo amaro mothovelape. Kaj amen o dživde sajekh dajamen ko meripe bašo Isus, kaj vi o dživdipe e Isusesoro te mothojpe ane amaro mulikano trupo. Ađahar kaj o meripe ćerela anamende, a o dživdipe ana tumende. Isindoj pak o jekhuno đi e paćapesoro sar so si hramome: Paćajem, odolese vakerdem; vi amen paća, odolese thaj vakera, džanglindoj kaj ka Odova savo ka dživdisarel e Devljutne Isuse, thaj amen ka dživdisarel andar o Isuso, thaj kaj anglal ka ćhivela pe tumencar. Kaj si sa baše tumende, kaj o dindipe butisardo andar butende butbarvarela dindipnaja ki glorija e Devlese. Baše odova amen na xasara e zor, aj vi te amaro avrino manuš thaj ćhorjarđol, pale o andruno nevljardol andar o dive ano dive. Kaj amari nakhlimasiri tikuri belava gatinel amenge but baro thaj binapherdo bimeripaso barvalipe e glorijako, amenge, save na dikhaja pe akava so dikhela pe, aj pe odova so na dikhela pe; kaj si akava so dikhela pe xarnevakteso, a odova so na dikhela pe, bimerutno. Kaj džana, ako amaro phuvljakoro ćher, truposoro šatori, peravela pe, isiamen baro ćher e Devlestar, ćher navastejaćerdo, bimerutno ko badalija. Kaj pala odova thaj manglindoj but kaj te urjava amen ano amaro badalesoro ćher, ađahar kaj thaj vi urjavde, na nange arakhamen. Kaj avine ane akava šatori, dišinaja pharikane odolese so namanga te uljavamendar, aj vadže te urjavamen, te bi o dživdipe nakhavela odova so si merutno. A okova savo amen čaće bašo akalese ćerđa, si o Devel, savo amenge thaj dinđa kotor e Đesoro. Odolese sajekh paća thaj džana kaj džikote bešaja ano trupo, durardiljam kotar o Devljutno; Kaj paćapnaja phira a na dikhipnaja; Thaj ovaja pozorale thaj pobut kamaja te dža andar o trupo thaj te thanara pes ko Devljutno. Odolese vi kamljine ćeraja, aj li te beša akate, aj li te dža, te ova Lese ćaljardine. Kaj amenge sarijenge valjani te sikavamen ko kris e Hristosoro, te lel sako odova so ano trupo ćerđa, aj li šukar ja našukar. Džanglindoj, eke, e dar e Devljutnesi čaćava e manušen, a e Devlese sinjam pendžarde, a adžikerava kaj sam pendžarde thaj tumare mincopenge. Kaj na anglabićhala pale amen tumenge aj tumen daja motivo kaj amencar te ćeren baripe, te bi ovela tumen so te irinen po phućipe odolenge save ašarinen pe odoleja so si ko muj, a na so si ko vilo. Kaj, te sinjam avral peste e Devlese sinjam; te sinjam šandune, tumenge sinjam. Kaj amen o kamlipe e Hristoso lelamen pa ađahar gindina: kaj ako jekh baše sarijenge merela, ta sare mule. Thaj Ov baše sarijenge mulo, kaj odola save dživdinena na dživdinena maj pese, aj odolese savo baše lenge mulo, thaj dživdinisajlo. Odolese amen akanatar nikas na džana po trupo; a te thaj pendžarđam e Hristo po trupo no akana le maj na pendžara. Odolese, te si ko ano Hristo, nevo si ćerdipe, o purano nakhlo, dikh, sa nevo ulo. A sa si e Devlestar, savo mirosarđa amen peja andar o Isus Hristo, thaj savo amenge dinđa kandipe po mirosardipe. Kaj o Devel sinele ano Hristo savo mirosarđa o them peja, na saćedindoj e bezeha lengere, thaj ćhivindoj ana amende o lafi e miropnasoro. Po than e Hristoso, eke, ruđina, sar kaj o Devel vičinela andar amende: Ruđina ano anav e Hristosoro – mirosav tumen e Devleja. Kaj Le, savo na džanđa bašo bezeh, ćerđa le bezehesa baše amende, kaj amen te ova hakajipe e Devlesoro ano Leste. A ćerindoj Leja, ruđinaja tumen te na len andodilipe o dindipe e Devlesoro; Kaj vakerela: Ano vakti laćho kandljum tut, thaj ano dive e ikalionaso ažutinđum tut. Eke akana si najlaćho vakti, eke akana si o dive e ikalipnasoro! Nisar ni ane soste na dindoj peravipe, kaj e kandini te na akošel pe, aj ane sa mothovamen sar kandine e Devlesere: ano baro inđaripe, ane bilaćhipa, ane ćororipa, ane tanđipa; Ane dukhavipa, ane phandipa, ane uštipa, ane ćeripa, ane džangavdipa, ane postipa, ano khoslipe, ano džanipe, ano baroićeripe, ano dindipe, ano Đi Sumnalo, ano kamlipe naphravdino, ane lafija čaćipasere, ane zor e Devlesiri, maripnasoro e hakajipasoro laćhe thaj džungale rigasa, ane glorija thaj ladžavipe, ano mahripe thaj ašaripe, sar xoxamne thaj čaćutne, sar bidžangle thaj pendžarde, sar odola save merena a eke dživdinaja, sar pedepsime aj na mudarde, sar dukhavdine a sajekh lošale, sar ćorore a buten barvalindoj, sar odola saven niso nanelen a sa isilen. E muja amare phravdile mamuj tumende, O Korinćanija, o vilo amaro ulo buljardo. Tumenge nane tanđipe ana amende, aj tumenge si tanđipe ane vile tumare; A bašo jekhuno dinipe kotar tumende, sar e ćhavorenge vakerav, oven buljarde vilesere thaj tumen. Ma te ćhiven tumen e bipaćamnencar ane jekhuno jarmo; kaj so isile o hakajipe e bikanunipnasa; ja savo khatanipe isile o rošipe e raćipnaja? A savo haljovipe o Hristos e Velijarosa? Ja savo kotor isile o paćamno e bipaćamneja? Thaj savo si haljovipe o hramo e Devlesoro e idolencar? Kaj tumen sijen o hramo e dživde Devlesororo, sar so phenđa o Devel: Ka thanarđovav ane lende, thaj ka dživdinav ane lende, thaj ka ovav lengoro Devel, thaj on ka oven mlo seloro. Odolese ikljoven andar lengere maškaripa thaj ulavđon tumen, vakeri o Devljutno, thaj ma te dolen tumen aso bikhoslo thaj me tumen ka lav, thaj ka ovav tumenge dad, thaj tumen ka oven mle ćhave thaj ćhija, vakeri o Devljutno o Saićerutno. Isinindoj, eke, asavke dinde lafija, o ćumudnineja, te khosa amen kotar sako bikhoslipe e trupeso thaj e đeso, ćerindoj e sumnali ani dar e Devlesiri. Len amen; nikas na dukhavđam, nikas na zijaninđam, nikas na globinđam. Na vakerava bašo krisipe, kaj angleder phendem kaj sijen ane vile amare, kaj te bi khatane meraja thaj khatane dživdinaja. But paćava ana tumende, but baripe ćerava tumencar, prepherdo sem kovljardipe, barvarava lošalipnaja paše sa o bilaćhipa amare. Kaj thaj kana aljam ane Makedonija, nisavo sojba nasinele e trupo amare, aj ane sa sinjamle ane bilaćhipa: avrijal o mariba, andral o daravipa. Aj o Devel savo šandinel e teljarđen, šandinđa amen e Titosere avipnaja; A na semo lesere avipnaja, aj vi šandipaja savaja ov šandinđa baše tumende, phenindoj amenge tumaro manglipe, tumare rovavnipa, tumare bućarnipa baše mange, ađahar kaj pana pobut lošalisajlem. Kaj ako tumen thaj dukhavđum e bićhalutnaja, na jertina ma, ako thaj vi jertisaljum; kaj dikhava kaj adaja bićhalutni, ako thaj za hari, dukhavđa tumen. Akana lošalivav ma, na so dukhavđen tumen, aj so dukhavđen tumen po jertipe; kaj dukhavđentumen po Devel, kaj ni ana soste na ovena zijanime kotar amendar. Kaj o dukhavdipe savo si po Devel anela jertipe bašo ikaldipe, baše saveste na jertinena pe; a o dukhavdipe akale themesoro anela meripe. Kaj dikh, baš odova so tumen po Devel dukhavdiljen, savo grižipe ćerđa ana tumende, pa čaćavdipe, pa bićaljardipe, pa dar, pa manglipe, pa bućarnipe, pa khuvdipe! Ano sa mothovđen tumen khosle ane akava stvaro. Ako tumenge, eke, thaj hramonđum, odova na baše okova savo banđarda, ni baše odova savese si bange ćerdo, aj te mothovel pe o phuravipe tumaro maškar tumende savo isitumen baše amenge anglal o Devel. Odolese kovljardiljam. A uzo amaro kovljardipe pana pobut lošalisajlam e Titosere lošalipnase, kaj tumen sare šandinđen o đi lesoro. Kaj ako me sem lese neso baše tumenge ašarisajlem, na ladžandiljum; aj sar si sa čaćipe so vaćerđam tumenge, ađahar thaj e ašarutni amari anglal o Tito si čaćutni. Thaj o vilo si lesoro pana popherdo kamlipe mamuj tumende kana perel lese ane godi o kandipe sarijengoro tumaro sar le daraja thaj izdrajipnaja leljen. Lošalivav pe, so ane sa tromav te banđarama pe tumende. Mothovaja pak tumenge, phraljalen, kotar o dindipe e Devlesoro savi dindi ane Khanđirja e Makedonijake, kaj si ane butune zumavdipa andar e bilaćhipa butune lošalipa lengere, thaj pharo čororipe lengoro, butisajlo ano barvalipe lengere putardeđesengoro; Mothovava kaj po šajipe thaj prekal o šajipe laćhekamipnaja dinde, bute ruđipnaja ruđinde amen te la o dindipe thaj o khatanipe ano kandipe e sumnalenge, thaj na semo kobor adžikeram, aj on pes majangle dininde e Devljutnese thaj amenge po kamipe e Devlesoro, ađahar kaj amen ruđinđam e Tito, kaj sar so angle ćerđa, ađahar thaj te agorinel ke tumende thaj akava dindipe. Aj sar so ane sa sijen barvale: ano paćape, thaj ane lafija, thaj ano džanipe, thaj ane sako grižipe thaj ano kamlipe tumaro mamuj amende, te barvaljoven thaj ane akava dindipe. Na vakerava akava sar čhinavdipe, aj kaj andar o bućaripe averengoro phućharava o putardipe tumare kamlipasoro. Kaj džanena o dindipe e Devljutneso amare Isus Hristoso, kaj o barvalo avuno, baše tumende čorolilo, kaj tumen lesere čororipnaja barvaljoven. Thaj phurederipe dava ane akava, kaj akava therinela tumenge, save poćinđen na semo te ćeren, aj thaj mangena odova pana kotar o nakhlo berš. A akana džiagorinen odova thaj po ćerdipe, kaj sar so ine šukar kamipe kaj mangen, ađahar te ćeren kotar odova so isitumen. Kaj te isi nekas šukar kamipe, kamlo si pe odova so isile, a na pe odova so nanole. Kaj na e averenge te ovel loćharipe, a tumenge belava, aj jekhinipe, ano akanutno vakti tumaro butunipe te ovel baše lengoro najstalipe, kaj thaj lengoro butunipe te ovel baše tumaro najstalipe; te ovel jekhinipe. Sar so si hramome: Ko but ćedinđa, lese na prečordilo; thaj ko ari ćedinđa, lese sinele taman. A nais e Devlese, savo dinđa asavko grižipe baše tumenge ano vilo e Titosoro, te lel e ruđutni, ta avune but bućarno, te džal ke tumende kamline. A bićhalđam leja thaj e phrale save ašarinena pe sa e Khanđirja bašo vakeripe e evangeliumosoro. Thaj na semo odova, aj si thaj čhinavdo kotar e Khanđirja te džal amencar pe akava laćhoćeripe savese amen kandaja ane glorija korkore Devljutnese thaj pe amaro manglipe; Arakhavindoj odolestar kaj amen ko te na krisinel baše amaro vastaripe asavke prebare dindipnacar, kaj grižinape bašo šukar na semo anglal o Devljutno aj vi anglal thaj e manuša. A bićhalđam lencar thaj e phrale amare, save but droma penđarđam ane but šeja kaj si bućarno, a akana pale pobut bućarno, baše baro paćajipe ane tumende. So si phandine e Titostar, ov si mlo amal thaj pašebućarno maškar tumende, a o phralja amare, on si bićhalutne e Khanđirjengere, glorija e Hristosiri. Mothoven lenge, eke anglal o muja e Khanđirjengere, o mothovdipe tumare kamlipasoro thaj amare ašaripna baše tumenge. Kaj baše asavko kandipe e sumnalenge na valjani tumenge te hraminav; Kaj džanav tumaro šukar kamlipe, baše kaste ćerav baripe tumencar anglal e Makedoncija, poso o Ahaja gatinđape pana kotar o nakhlo berš, a tumaro bućarnipe vazdela buten. A e phraljen bićhaldem kaj amaro ašaripe baše tumende ane akava šej te na ovel andodilipe, aj te oven gatime, sar so vakerdem, kaj te, ale mancar e Makedoncija thaj arakhen tumen bigatime, na ladžardija amen, te na phena tumen, bašo akava ašaripe. Ađahar arakhljum, kaj valjani te ruđina e phraljen, kaj najanglal te džan ke tumende thaj te gatinen angleder dindo lafi tumare bahtaripnastar, kaj ov te ovel gatime sar bahtaripe, a na sar bižajipe. A akava phenava: Ko bižajine sijinel, bižajine thaj ka ćhinel, a ko e bahtaripnacar sijinel, e bahtaripnacar thaj ka ćhinel. Sakoj sar ćhinavela ano vilo, na dukhasa ja zoraja; kaj o Devel ćumidela odole kova kamljune dela. A o Devel si kaderi tumen te barvarel sakone dindipnaja, kaj ane sa sarjekh isindoj dostoindoj kotar sa, barvajon ane sako šukar ćerdipe. Sar so si hramome: na štedindoj, dinđa e čororenge; e hakaj Lesiri aćhola dži o bimeripe. A Odova savo dela kućina e sijutnese thaj maro bašo xabe, dela thaj butinela e kućina tumare, thaj dela te barjon e bijandipa tumare hakajipnase; Barvalindoj ane sa baše sako putardoođipe savi andar amende anela ašaripe e Devlese. Kaj ćerdipe akala sevipnako na pherela semo o najstalipe e sumnalenge, aj thaj džangavela buten po but baro ašaripe e Devlese. Andar o sikavipe akale sevipnako on ašarinena e Devle baše tumaro kandipe mothojpaso e evangeliumoso e Hristosoro thaj bašo putardoođipe ano khatanutnipe olencar thaj sarijencar, thaj ane ruđutna pumare baše tumenge on zorale mangena tumen bašo butbarvalipe e dindipaso e Devlesoro pe tumende. A nais e Devlese pe lesoro namothovdino dinipe. A korkoro me, o Pavle, ruđinava tumen bašo šukarođipe thaj laćhipe e Hristosoro, me savo sem peravno kana sem ke tumende, a tromalo mamuj tumende kana sem najstalo; Ruđinav eke, kana ka ovav ke tumende, te na ovel mange valjanipe te ovav ađahar mukljuno sar so gindinava kaj tromav opipe nesavendar save gindinena baše amenge kaj po trupo kaj dživdina. Kaj dživdindoj ano trupo, na maramen po trupo; Kaj banduko amare maripnasoro nane e truposoro aj zorale e Devleja bašo peravdipe o bare duvarja, peravindoj e gindipa. Thaj sako baripe, savo uštela opipe e Devlesere penđaripnastar, thaj peravindoj sako mincope po kandipe e Hristose, ta sam gatime te pedepsina sako bikandipe kana pherela pe tumaro kandipe. Tumen dikhen po avralipe. Te si ko paćavino ana peste kaj si e Hristosoro, nek gindinel ana peste va, sar so si ov e Hristosoro, ađahar sam thaj amen e Hristosere. Kaj te bi khanći majbut ašarinape amare thagaripnaja savo amenge dinđa o Devljutno bašo duvarzidipe, a na baše tumaro rumipe, na ka ladžara pe, te na mothovama sar kaj tumen daravava e bićhalutnencar. Kaj si lesere bićhalutna, phenela, phare thaj zorale, a kana si e trupoja odothe bizoralo si, thaj o lafi lesoro si nisavo. Nek asavko gndinela akava: save sam lafea ane bićhalutna kana sam najstale, asavke sam thaj ćerdipnaja kana sem odothe. Kaj na troma amen te đenamen ja te vortosavamen nesavenca save korkore pes ašarinen; aj on kana korkore pes pesa merinenape, thaj korkore pes pesa barazinen, bihaljovne si. A amen na ka ašarinape prekali mera, aj pali mera e regulakoro savi mera amenge o Devel ulavela, te džiresa thaj dži tumende. Kaj amen na buljaramen prekali mera, sar te na džiresaja dži tumende, aj thaj dži tumende džiresaja e evangeliumoja e Hristosereja; Na ašarinape prekali mera ane avresere pharipa, aj isi amen adžikeripe kaj ka, kana barjol o paćape tumaro, tumencar ka barjara pe regula amari barvaline. Kaj thaj ane durune agora tumendar vakera o evangelium, thaj te na ašarinape odoleja so si pe avresiri regula ćerdi. A savo ašarinela pe, e Devljutneja nek ašarinela pe! Kaj nane trubuno odova savo korkoro ašarinela pes, aj save o Devljutno ašarinela. O kaj te bi hari nakhavena o bigođavipe mlo! No thaj nakhavena ma. Kaj bućarava baše tumenge e Devlesere bućaripnasa, kaj tumen phandlem e romese jekhunese, kaj e ćhija khoslja anava e Hristose. Aj darava kaj sar so e Eva xoxavđa o sap ple bidžanipnaja, kaj ađahar thaj e gindipa tumare na iranenpe kotar o laćhoođipe savo si ano Hristo. Kaj te nekoj avela thaj vakerela avre Isuse, save amen na vakerđam, ja aver đi lena savo na leljen, ja aver evangeliumo savo na leljen – tumen odova šukar ingaren! A me gndinava kaj ni ane soste nasijum potikno katar e but bare apostolija. Kaj te sem thaj nasikavdo ane lafija, aj najsem ano džanipe, aj ane sa mothovdiljam tumenge thaj sarijenge. Ja bezeh ćerdem so teljardem man kaj tumen te vazden tumen, so tumenge bipoćinipnaso vaćerđum e Devlesoro evangelium? Kotar e aver Khanđirja leljum, lindoj e poćindi bašo kandipe tumenge, ta avindoj ke tumende thaj avutne ano nanipe, na dosadindem nikase; Kaj mlo nanipe pherde o phralja so ale andar e Makedonija; thaj ane sa arakhljum man thaj ka arakhav te na ovav tumenge ko pharipe. Sar so si o čaćipe e Hristosoro ana mande, ađahar akava naisipe na ka lel pe mandar ane agora e Ahajose. Sose? Odolese li so tumen na ćumudinav? O Devel džanel! A so kerav thaj ka kerav, te cidav o motivo odolenge save roden motivo, te bi ane odova solea naisinena pe, arakhena pe sar thaj amen. Kaj si asavke xoxamne apostolija, bidžandine bućarne, save ćerenape kaj si apostolija e Hristosere. Thaj nisavo čudipe; kaj korkoro o beng ćerelape ane phakalo e rošipnasoro. Nane, eke, nisavo baro ako thaj e kandine lesere ćerenape kaj si kandine e hakajipnase, savenge o agoripe ka ovel pe ćerdipna lengere. Pale phenava, ma nikoj man te na dikhelma sar bigođakoro; aćhune, thaj sar bigođakoro len man, kaj thaj me diso hari te naisinama. A so vakerav, na vakerav po Devljutno, aj sar ano bigođipe, naisindoj pe asavko ćhand. Avutne kaj but džene naisinena pe po trupo, thaj me ka naisinape, kaj lošale inđarena e bigođaćeren, poso sijen džandine; Kaj inđarena te tumen neko robinel, te tumen neko xal, te lel tumendar, te šuvljola, te tumen po muj marela. Po ladžavipe vakerava, sar te amen uljam bizorale. No pe so ko zorarela pe, po bigođipe vakerava, thaj me zoravape. Aj li si Jevreja? Thaj me sem. Aj li si Judejcija? Thaj me sem. Aj li si kućin e Avraamosiri? Thaj me sem. Aj li si kandine e Hristosere? Sar bigođakoro vakerava, me sem pana pobuter: pobuter bućardiljum, prekal e mera o maripe legarđum, but droma sema ano phandlipe, but droma ane meripnaso riziko; Kotar e Judejcija leljem pandž droma po saranda najhari jekh khuvdipe, trin droma sinjumle mardo ranikaja, jekhvar barandino, trin berophađipna nakhavđum, e rat thaj o dive nakhavđum pe deravesoro putardipe; Butivar dromardem, sema ano riziko ko lenja, ano riziko kotar e ćora, ano riziko kotar mlo njamo, ano riziko kotar e nađangledevleserendar, ano riziko ano foro, ano riziko ane drmina, ano riziko po derav, ano riziko maškar e xoxamne phralja; Ano pharardipe thaj crdipe, butivar ano bisovipe, ano bokhalipe thaj trošalipe, butivar ano postinipe, ano jevend thaj nangipe; Paše sa so aćhilo, sakodivesoro spidipe e manušengoro pe mande, griža baše sa e Khanđirja. Ko bizorarjol, a te thaj me te na bizorarjov? Ko dukhavđola, a me te na thabljovav. Ako valjani te naisinama, mle bizoralipnaja ka naisinama. O Devel thaj o Dad amare Devljutnesoro e Isus Hristosoro, savo si bahtardo bimeripe, džanela kaj na xoxavav. Ano Damask arlutno e thagareso e Areteso arakhindoj o foro Damask manglindoj man te dolel, thaj mekle man andar o džami ane krošca prekal o duvari ta našlem andar lesere vasta. Na labhinel mange te naisinav ma, kaj ka avav ko dikhiba thaj ke Devljutnesere phućardipa. Džanav e manuše ano Hristo savo angle dešuštar berša – aj li ano trupo, na džanav, aj li avrijal o trupo, na džanav, o Devel džanel – sinele legardo dži o trito badali. Thaj džanav kaj odova manuš – aj li ano trupo, aj li avrijal o trupo, na džanav, o Devel džanel – Sinele legardo ano raj thaj šunđa navakerdine lafija save e manušese nane mukljune te vakerel. Asavkea ka ašarav man, a korkoro mancar na ka ašarav man, semo mle bizoralipnaja. Kaj kana kama thaj mangava te ašarinape, na bi ovava bigođako, kaj bi o čaćipe phenava; aj pa ićerama, te na bi ko gndinela bašo mange pobut kotar odova so dikhela ana mande, ja šunela mandar. Thaj te na bi povazdama baše but phućardipa, dinđape maje karo ano trupo, o phakalo e bengesoro, man te džungarel, kaj te na povazdama. Baše leste trindroma e Devljutne ruđinđum, te cidelpe kotar mande; Thaj phenđa maje: Mamaj si tuke o dindipe mlo; kaj e zor mli ano bizoralipe mothovela pe agorikani. Odolese majođune ka ašaravma mle bizoralipnaja, kaj te avel ana mande e zor e Hristosiri. Odolese sem laćhe kamipnaso ane bizoralipa, ane prasapna, ane bilaćhipa, ane prastipa, ane tangipa baš e Hristose; kaj kana sem bizoralo pale sem zoralo. Uljum bigođakoro ašarindoj pes! Tumen kerden man. Kaj valjanđa tumen man te ašarinen, poso ni ane soste nasijem potikno kotar e butbare apostolija aj te sem niso. Kaj e semne e apostolengere ćerde si maškar tumende ane sako legaripe, ane semne thaj prašukaripa thaj zoralipa. Kaj so si odova ane soste sijen potikne kotar aver Khanđirja, semo so tumenge me korkoro na phararđum? Jertinen mange akava bihakajipe. Ake, laćhardo sem po trito drom tumenge te avav, thaj na ka ovav ko pharipe; kaj na rodava tumaro aj tumen. Kaj nane o ćhavore uđiljune te anen barvalipe e bijandutnenge aj e bijandutne e ćhavorenge. A me najsig ka hasarav thaj ka hasarav man pobuter baše ođi tumari, aj kaj te tumen me pobut ćumidav, a tumen man pohari ćumiden. Aj nek ovel, me tumenge nasijum po pharipe, aj avindoj bižaj, leljum tumen xoxajipnaja. Aj li tumen so ćhinadem prekalo nekaste kotar odola saven bićhaldem ke tumende? Ruđinđum e Tito, thaj leja bićhalđum e phrale; aj li tumen o Tit so ćhinavđa? Sar na phirdam jekhune đesa? Sar na jekhune prencar. Gndinena li palem kaj te arakhape anglal tumende? Anglal o Devel ano Hristo vakera; a sa si, ćumudljalen, baše tumaro duvardipe. Kaj darava te tumen, kana ka avav, ni ka arakhav save mangav, thaj me ka arakhadivav tumenge save na mangena man; te sar na avena čingara, korikanipa, xoljina, bimeklipa, peripa, šušuripa, baripna, biredipa; Kaj palem kana ka avav na teljarel o Devel mlo ke tumende, te na rovav pala butende save angle ćerde bezeha thaj ni jertisajle bašo melalipe thaj rumipe thaj namorali so ćerde. Akava o trito drom avava ke tumende; pe muja duj ja trin mothovdutnenđe zorarđola pe sako lafi. Anglal phendem thaj anglal vakerava, kana sema ke tumende o dujto drom, thaj akana kana nasijum ke tumende, hraminav odolenge save angle ćerde bezeha thaj sarijenge averenge, kaj te aljum palem, na ka arakhavav, kaj roden te zumaven e Hristo savo ana mande vakerel, savo baše tumenge nane bizoralo, aj si butzoralo maškar tumende. Kaj te thaj inzardo sinele po bizoralipe, aj dživdinela pe zor e Devlesiri; kaj sam thaj amen bizorale ano Leste, aj ka dživdina Leja e Devlesere zoraja baše tumenge. Korkore tumen phućljaren, sijen li ano paćape, korkore tumen zumaven. Ja na pendžaren tumen kaj si o Isus Hristos ane tumende? Semo te an nesoste nasijen bilaćhe. A adžikerav kaj ka pendžaren kaj amen nasijam bilaćhe. A ruđinape e Devlese kaj tumen te na ćeren nisave džungalipa, na kaj amen šukar te mothovamen, aj kaj tumen šukar te ćeren, a amen sar bilaćhe te ova. Kaj niso našti opipe o čaćipe, aj bašo čaćipe. Kaj lošalivaja kana sem amen bizorale, a tumen zorale; baše odova thaj ruđinape e Devlese, baše tumaro pherdunipe. Baš odova, najstalo tumenge hraminav akava, kaj kana ka ovav lipeutno na ka ćerav ostro, po kriso savo mange dinđa o Devljutno bašo ćerdipe a na bašo peravdipe. Najpalal, phraljalen, lošalen tumen, oven laćhardine, kovljardon, jekhune gndinen, šalom te ovel tumen, thaj o Devel khamnipasoro thaj šalomnipasoro ka ovel tumencar. Sastipe bićhalen jek avrese sumnale ćumudipnaja. Sastipe bićhalena tumenge sa o sumnale. Dindipe e Devljutneso e Isuso Hristoso thaj kamlipe e Devleso e Dadeso thaj khatanipe e Sumnale Đeso sarijencar tumencar. Amin. O Pavle, apostoli na kotar e manuša ni prekal o manuš, aj andar o Isus Hristo thaj Devel o Dad savo le dživdininđa andar o mule, thaj sa e phralja save si mancar, e Khanđirjenge e Galatijakere: Dindipe tumenge thaj šalom kotar o Devel o Dad thaj amare Devljutneso o Isus Hristoso, savo dinđa pes bašo bezeha amare te inkalel amen kotar akanutno džungaleso bimeripe, po kamipe e Devlesoro thaj amare Dadesoro, savese glorija ane bimeripasere bimeripa. Amin. Čudina ma kaj kotar Odova savo vičinđa tumen e Hristosere dindipnaja, ađahar sigate irinena tumen ko aver evangelium, savo nane aver, semo so tumen nesave hulavinen thaj mangena te irinen o evangelium e Hristosoro. Aj te tumenge thaj amen ja o phakalo e badalestar vakerela o evangelium averćhane aj so tumenge vakerđam, anatema te ovel! Sar so eke phenđam, thaj akana pale phenava: te tumenge nesavo vakerela o evangelium avećhane aj so leljen, anatema te ovel! Sar me akana mangava kaj e manušen te lav ja e Devle? Ja rodava e manušenge te laćharav? Kaj kana bi pana e manušenge laćharava, na bi ovava kandino e Hristosoro. A dava tumenge po džanipe, phraljalen, kaj o evangelium savo me mothovdinđum, nane kotar o manuš; Ni les me leljum kotar o manuš, a ni sikliljum, aj phućaripnaja e Isus Hristosereja. Kaj šunđen mlo dživdipe maškar o Judeja, kaj but tradijem e Khanđiri e Devlesiri thaj derminđum la, thaj anglalđeljum ano Judejipe pobut kotar e but mle beršengere ano njamo mlo, avune but bućarno baše mle dadengere dindinipa. A kana bahtarela o Devel, savo man alonđa kotar o vođi mla dajakoro thaj vičinđa pla dindipnaja, te mothovel ple Ćhave ana mande, le te mothovdijav maškar e nadžangledevlesere, odova časo na phućljum e trupora thaj o rata, ni na ikliljum ano Jerusalim odolenge save sinele apostolija angleder mande, aj dželem ane Arabija, thaj pale irinđum ano Damask. A napal, palo e trin berša, ikliljum ano Jerusalim te dikhav e Petre, thaj aćhilem ke leste dešupandž dive. A avere kotar e apostolija na dikhljum, semo E Jakove phrale e Devljutnesere. A tumenge so hraminav, eke o Devel mange si dikhutno kaj na xoxavav. Napal aljum ane agora e Sirijake thaj Kilikijake. A sinjumle korkoro bipenđardo e Hristosere Khanđirjenge ane Judeja, aj semo ašundesa kaj odova, savo amen nekana tradinđa, akana vakerela o paćape savo nekana peravđa, thaj glorisinena e Devle baše mande. A napal, palo dešuštar berša, pale ikliljum ano Jerusalim e Varnavaja, lindoj mancar thaj e Tito; A ikliljum po phućardipe, thaj mothovdem lenge o evangelium savo vakerav e nadžangledevleserenge, ulavdine eke mothovdem e dićhutnenge, kaj sar na prastava ja na prastandiljum anodilipe; Aj ni o Tito, savo sinele mancar, thaj sinele o Jelin, na sinele trubusardo te sunetinel pe; Thaj odova baše soavine xoxamne phralja so đerdininde te phukaven o muklipe amaro, savo isiamen ano Hristo Isuso, kaj amen te phanden; Akalenge ni bašo časo na dindiljam ano peravdipe, kaj o čaćipe e evangeliumosoro aćhola ke tumende. A baše odolenge save dikhavinde kaj si neso, ma ko on nekana sinele, na hajinava niso, kaj o Devel na dikhela ko si ko; kaj on save si dikhavdine dićhutne mange niso na dinđe, numa mamuj, kana dikhle kaj si mange paćavdo o evangelium baše bisunetime, sar e Petrese baše sunetime, kaj odova savo ažutinela e Petrese ano apostolipe maškar e sunetime ažutinela thaj mange maškar e nadžangledevleserenge, thaj pendžarindoj o dindinipe savo si mange dindo, o Jakov thaj o Kifa thaj o Jovan, save si dikhutne kaj si inćarutne, dinđe maje thaj e Varnavase laćhi rig e khatanipnasi, kaj amen te dža e nadžangledevleserenge, a on e sunetimnenge; Semo te setinamen e ćororenge, so vi phurardiljem kaj ađahar te ćerav. A kana alo o Petar ane Antiohija, mamuipendem lese ano muj, kaj sinele bašo krisipe. Kaj poangle so ale nesave e Jakovestar, xalesa e nadžangledevleserencar; a kana avininde tanđona pe thaj ulavđona, darandoj odlendar save si kotar sunetime. Thaj kerena dujmuja leja thaj e avera Judejcija, ađahar kaj thaj o Varnava aćhilo pe lengoro dujmujipe. Aj kana dikhljum kaj na džana vorto e evangeliumosere čačipnase, phenđum e Petrese anglo sarijende: Kana tu savo sijan Judejco dživdineja nađangledevlikane a na judejikane, sose tradea e nadžangledevleseren te dživdinen judejikane? Amen save sinjam pe natura Judejcija, a na bezehale andar e nadžangledevlesere, ta džanglindoj kaj o manuš na čaćavdol pes e kanunesere ćerdipnaja aj paćapnaja e Isus Hristosoro, thaj amen paćajam ano Hristo Isuso, te čaćavdija e Hristosere paćapnaja a na e kanunesere ćerdipnaja, kaj e kanunesere ćerdipnaja nijekh trupo na ka čaćavdol pe. Te li amen, save roda te čaćavdija ano Hristo, arakhavdiljam thaj korkore bezehale, aj li si tegani o Hristos kandino e bezehese? Devla arakh! Kaj te pale zidinava odova so peravđum, mothovava pe kaj sem uštivutno e kanunesoro. Kaj me e kanuneja e kanunese muljum, kaj e Devlese te dživdinav. E Hristoja inzardema; A dživdinava – na maj me, aj dživdinela ana mande o Hristos; a so akana dživdinava ano trupo, dživdinava paćapnaja ane Ćhavo e Devlesororo, savo kamlja man thaj dinđa pes baše mande. Na frdava o dindipe e Devlesoro; kaj te o hakajipe andar o kanuni ovela, tegani o Hristos đabate mulo. O bihaljovne Galatija, ko tumen madžijinđa te na peravđoven e čaćipnase, tumen savenge si anglal e jakha o Isus Hristo tasvirime inzardo maškar tumende? Akava semo mangava tumendar te džanav, aj li o Đi leljen andar o ćerdipna e kanunesere ja andar o vakeripe e paćapapnasoro? Sar sen edobor bihaljovne? Širdipendoj Đesa, akana trupoja agorinena? Sar edobor mudardiljen andodilipe? Kana bi ovela semo andodilipe! Odova, eke, savo dela tumen o Đi thaj ćerela ćhudipa maškar tumende, ćerela li odova bašo ćerdipna e kanunesere ja bašo ašunipe e paćapesoro? Sar so o Avraam paćaja e Devlese thaj saćidinisajlo lese ano hakajipe. Haljoven, eke, kaj si on ćhave e Avraamesere save si katar o paćape. A o Lil angladikhindoj kaj o Devel čaćavel e nadžangledevleseren paćapnaja, anglal mothovđa e Avraamese: Ane tute ka bahtardon sa e nadžangledevlesere. Ađahar on save si katar o paćape, bahtarenape e paćamne Avraameja. Kaj save si god katar o ćerdipe e kanunesoro telal o baro bibahtalipe si, kaj si hramome: Baro bibahtalo sako savo na aćhola ane sa so si hramome ano Lil e kanunesoro kaj odova te ćerel. A kaj kanuneja nikoj na čaćavdol anglal o Devel, haljovine si; kaj: O hakajutno kotar o paćape ka dživdinel. A o kanuni nane kotar o paćape, aj o manuš savo ćerela o čhinavdipe, ka dživdinel andar lende. O Hristos amen ćinđa kotar o armandindipe e kanuneso ulindoj baš amenge armandindipe, kaj si hramome: Armandindo sako savo si umblavdo ko kaš; Kaj pe butedevlengere ovela o bahtaripe e Avraamesoro ano Hristo Isuso, te la o dindo lafi e Đesoro andar o paćape. Phraljalen, sar manuš vakerava, nisavo ćerdino xapesovljakoro e manušesoro na frdela ni lese so dela. E Avraamese eke thaj lesere kućinake phende sesa dinde lafija; na phenel: thaj kućinenge, sar baše butenge, aj sar bašo jekhese: Thaj kle kućinake, savi si o Hristos. Akava eke phenava: Kanuni, savo ćerdilo palo štaršel thaj trijanda berša, na phagela e xapesovli savo si kotar o Devel angleder ćerdino baše Hristose, kaj te na ćhinaven pe o dinde lafja. Kaj te si o aćhavdo barvalipe kotar o kanuni, napal eke nane kotar e dinde lafija, a e Avraamese e dinde lafijencar dinđa o Devel. So ka, akana, o kanuni? Bašo bezeh dindilo pe, džikote na avela e kućin kase si dindi e dinde lafija, thaj ćerdo si prekalo phakale, e maškarutnesere vasteja. Maškarutne eke nane kote si jekh; a o Devel si jekh. Aj li si, eke, o kanuni dušmani e Devlesere dinde lafijendar? Nisar! Kaj te si dindo o kanuni savo šaj te dživdinisarel, hemčaće bi kotar o kanuni ovela hakajipe; Aj o lil phandlja sa telal o bezeh te bi o dinde lafija denape andar o paćape e Isus Hristosoro odolenge save paćana. A anglal o avipe e paćapeso sinjamle telal o kanuni arakhavdine thaj phandle bašo paćape sava sinela te phućarel pe. Ađahar amenge o kanuni ulo sikavutno bašo Hristo, te bi e paćapnaja čačavdona; A kana avela e paćapni, na nasijam telal o sikavutno. Kaj sijen sare ćhave e Devlesere paćapnaja ano Hristo Isuso. Kaj save god ano Hristo bolavđen tumen, ano Hristo hurjavđen tumen. Nane maj Judejco ni Jelino, nane maj robo ni mukljutno, nane maj muršikano ni džuvlikano, kaj sen tumen sare jekh (manuš) ano Hristo Isuso. A kana sen tumen e Hristosere, napal sen kućin e Avraamesiri thaj kustikutne pe dinde lafija. Aj phenava, bašo o vakti dži kaj si o kustikutno ćhavoro khanći na ulavel pes kotar o robo, thaj ako si devljutnuno kotar sa. Aj si telal e bararutne thaj vastarutne dži o ćhinavdo dive savo o dad ćhinavđa. Ađahar thaj amen, kana sama ćhavore, sama astardine e themesere stihijencar; A kana avilo pherdipe e vakteso, bićhalđa o Devel ple Ćhave, savo bijandilo kotar e džuvli, savo sinele telal o kanuni, te ćinel odolen save si telal o kanuni, te la o ćindoćhavipe. A poso sen ćhave, bićhalđa o Devel o Đi ple Ćhavesoro ane vile tumare, savo vičini: Ava, Dade! Ađahar nasijan maj robo, aj ćhavo; te li san ćhavo, thaj kustikutno sijan e Devlesoro andar o Hristo. Aj teg na džanglindoj e Devle, roboinđen e devlenge save odola pe natura naine. A akana penđarindoj e Devle, ja polaćhe, anglune penđarde kotar o Devel, sar pale irinen tumen ko bizorale thaj ćorore stihije, savenge pale andaronevo mangena te robojinen? Dikhena ko dive thaj ćhona, thaj vaktija thaj berša! Darava baše tumenge, kaj te na andodilipe trudisajlem uzale tumende. Oven sar me, kaj sem thaj me sar tumen, phraljalen, ruđinav tumen; niso mange na ćerđen dukhajmase. A džanena kaj tumenge bašo bizoralo trupo vakerdem o evangeliumo angluno drom, thaj o zumavipe mlo ko trupo mlese na teljarđen ni na ćhungarđen, aj leljen ma sar e Devlesere phakale, sar e Hriste Isuse. Sar li eke sinele teg tumaro bahtarokovlipe? Kaj tumenge mothovava te bi tumen, kana bi ovela šajčine, inkalena e jakha tumare thaj dena len mange. Odolese li tumenge uljum dušmani, so tumenge o čaćipe vakerava? On na bućarena šukar tumenđe, aj mangena te ulaven tumen, kaj lenge te bućaren. A šukar si te bućaren sajekh ano šukaripe, thaj na semo kana sem me ke tumende. Ćhavoralen mle, saven palem pharipnaja bijanava, džikaj o Hristos na formirinelpe ane tumende! Mangava bi eke akana te ovav ke tumende, thaj te arlinav o krlo mlo, kaj sem ano dujgindipe baše tumende. Phenen mange, tumen save mangena telal o kanuni te oven, sar na ašunena o kanuni? Kaj si hramome kaj o Avraam duj ćhave sinele, jekhe kotar e robkinja a jekhe kotar e mukljuni. Aj odova kotar e robkinja, po trupo bijandilo: a akava kotar e mukljuni, pe dinde lafija. A odova si phendino avere manajipnasa: kaj si odola duj xape sovlja, jekh kotar e plain Sinaj, savo bijanela bašo roboipe, a odova si e Agara. Kaj e Agara si plain Sinaj ane Arabija, thaj avela sar avdisutne Jerusalimose, a ov robuinela ple ćhavorencar; A o upruno Jerusalim mukljuno si, thaj daj si sarijenge amenge. Kaj si hramome: Lošalisavin tut, bibijandutnije savi na bijane, vičin thaj de vika, tu savi nane tut munke e bijanipnasere; kaj e aćhavdi isila but majbut ćhavore, aj odoja savi isila rom. A amen sinjam, phraljalen, po Isako ćhavore e dinde lafijenge. No sar so tegani odova so si po trupo bijando prastavi e bijande po đi, ađahar thaj akana. Aj so o Lil vaćeri? Ikal e robinka thaj e ćhave lakere; kaj o ćhavo e robinkakoro na ka kustikutninel e ćhaveja e mukljutnakereja. Ađahar, phraljalen, nasijam ćhavore e robinkakere aj e mukljutnakere. Terđoven, eke, ano muklipe saveja amen o Hristos mukljarđa, thaj ma dena tumen palem ano jarmo e roboipnasoro te astarđon. Ake me, o Pavle, phenava tumenge kaj te sunetisajlen, o Hristos tumenge niso na ka therdinel. A mothovava palem sakone manušese savo sunetinela pe kaj si kamuno sa o kanuni te ćerel. Ulavđen tumen katar o Hristo, tumen save pes e kanuneja čaćaven, thaj katar o dindipe propeljen; Kaj amen Đesa, kotar o paćape, adžićeraja o adžaćaripe e hakajipnaso. Kaj ano Hristo Isuso ni so mol o sunetipe ni o nasunetipe, aj o paćape savo andar o kamlipe ćerela. Prastandiljen šukar! Ko tumen aćhavel kaj te na teljarentumen e čaćipnase? Odova bimuklipe nane kotar Odova savo tumen vičini. Hari maja ušljarela sa o xumer. Me dandov ma pe tumende ano Devljutno kaj niso aver na ka gndinen; a odova savo tumen hulavinel ka inđarel krisipe, ma ko te ovel. A me, phraljalen, te pana kotar o sunetipe vakerava, sose man teg prastavena? Eke, ćhinavela pe o peravdipe e trušulesoro. O, te bi vi ćhindona odola save tumen hulavinen! Kaj sen tumen, phraljalen, ko muklipe vičime; semo na muklipe bašo ćeripe po kamlipe e trupose, aj kaj andar o kamlipe te kanden jekh avrenđe. Kaj pe sa o Kanuni pherela pe ano jekh lafi, ane kava: Ćumudin e majpašutne kle sar tut korkore. Aj te jekh avre dandarena thaj xana, dikhen kaj maškarpeste te na mudaren tumen. Phenav eke: po Đi phiren, thaj lubikanipe e trupesoro na ka ćeren. Kaj o trupo mangela opipe e Đesoro, a o Đi opipe e trupeso; a akava opipinela jekh averese, te ćeren odova so na bi mangena. A te sen eke Đesa legarde, nasijen telal o kanuni. A penđarde si o ćerdipna e truposere, save si: anglaćumudipe, rumipe, bikhoslipe, biladžipe, idolokamipe, drabaripe, dušmanlukija, ćingara, džungalipa, bari xoli, bimuklipa, biulavdipa, jeresipa, korikanipe, mudaripe, matipe, mukljardipa, thaj miazune akalenge bašo save tumenge anglal phenava, sar so vi angleder vakerđum, kaj odola save ađahar neso ćerena na ka nalen o Thagaripe e Devlesoro. A o bijanipe e Đesoro si: kamlipe, lošalipe, šalomipe, baroingaripe, bahtaripe, šukaripe, paćape, krotkipe, inćardipe. Bašo asavke nane kanuni. A save si e Hristosere, inzarde o trupo zorale haćaripnasa thaj e manglipanca. Ako Đesa dživdinaja, po Đi thaj te phira. Ma te ova korkorebarikane, akharindoj po iklipe jekh avre, bićaljarde pe jekh avreste. Phraljalen, ako thaj perela o manuš ano nesavo bezeh, tumen e ođikane laćharen asavke đesa e laćheođipnasa, arakhavindoj tut kaj thaj tu na ove zumavdo. Legaren e pharipa jekh e avrese, thaj ađahar pheren o kanuni e Hristosoro. Kaj ako ko gindinela kaj si diso, a nane niso, xoxavela korkoro pes. A sako mek phućel plo ćerdipe, thaj tegani korkoro ana peste ka ovele ašaripe a na ane avereste; Kaj sakoj plo pharipe ka legarel. A savo sikljovela o lafija, mek ulavel sa o šukaripa odoleja savo le sikavel. Ma xoxaven tumen, o Devel na del te xoxavel pe; kaj so o manuš sijinel odova thaj ka ćhinel. Kaj savo sijinel ano trupo plo, katar o trupo ka ćhinel ćirnipe, a ko sijinel ano đi, katar o Đi ka ćhinel dživdipe bimerutno. A šukaripe te ćerelpe amenge te na dosadinel, kaj ka ane amaro vakti ka ćhina te na xasara o zoralipa. Odolese, eke, džikote isi amen vakti, te ćera šukaripe sarijenđe, a majbut amarenge po paćape. Dikhen sar tumenge bare grafemencar hramosarđum mle vasteja! Save mangena ta te dikhen pes po trupo, von tumen mangena te sunetinen tumen, semo te na oven prastavde bašo trušul e Hristosoro. Kaj ni korkore o sunetime na ićerena o kanuni, aj mangena kaj tumen te sunetinen tumen te bi tumare trupoja ašarinena pe. A me, Devla arak, kaj diso avreja te ašarinape semo e Devljutnesere trušuleja amare Isus Hristosereja, savesa mange inzardinđape o them thaj me e themese. Kaj ano Hristo Isuso ni o sunetipe so ažutinel ni o bisunetipe, aj nevo šej. Thaj save god ka dživdinen pe akaja regula, šalom pe lende thaj dindipe, thaj po Izrailj e Devlesoro. Avune kaj mange nikoj te na ćerel pharipa, kaj me e dukha e Devljutnesere e Isusesere ko trupo mlo legarav. Bahtaripe amare Devljutnesoro e Isus Hristosoro e đesa tumaresa, phraljalen. Amin. O Pavle, apostoli e Isus Hristosoro po kamipe e Devlesoro, e sumnalenge save si ano Efes, thaj e paćavnenge ano Hristo Isuso: Bahtaripe tumenge thaj šalom kotar o Devel o Dad amaro thaj Devljutneso e Isus Hristoso. Bahtardo o Devel thaj o Dad amare Devljutneso e Isus Hristoso, savo amen bahtarda ano Hristo sakone bahtaripnaja đesesa po badali, sar so amen thaj alonđa ane Leste angleder o ćerdipe e themeso te ova sumnale thaj birumime anglo Leste, ano kamlipe, anglalindoj amen pese ko leibe andar o Isus Hristo, po laćho ođipe ple kamipaso, po ašaripe ple šalomipaso dindipe, saveja bahtarđamen ano Ćumudino, ane kaste isiamen ikaldipe lesere rateja, jertipe e bezehengo po barvalipe lesere dindipnaja. Sava barvalipnaja ćhorđa an amende ane sako bižajipe thaj džanipe, mothovindoj amenge ple garavdipasoro kamipe, pe plo šukaripe savo anglal bićhalđa ane Leste, bašo ćeripa e vahtesere pheripnase, kaj sa te phandel pe ano Hristo, odova so si po badali thaj so si pe phuv, ane Leste, ane savo thaj uljam kustikutne anglal bićhalde mamuj e irada Odolesi savo sa ćerel po phurederipe ple kamipaso, te ova po ašaripe lesere šalomnipase, amen save anglal paćajam ano Hristo, an saveste thaj tumen, ašunindoj o lafi e čaćipnaso, o evangelium tumare ikalipnaso, thaj paćavindoj ane Leste, sena štambilime dindelafeja e Đesa Sumnalesa, savo si zalgo amare kustipnaso, bašo ćedinipe e therdipnaso, po ašaripe lesere šalomnipase. Odolese thaj me, ašundoj baše tumare paćapnase ano Devljutno Isuso thaj kamlipe mamuj sarijenge e sumnalenge, na aćhovava te bahtarav tumenge liparindoj tumen ane mle ruđutna: Kaj tumenge o Devel amare Devljutneso e Isus Hristoso, Dad gloripnaso, dinđa o Đi bižajipnaso thaj phućaripnaso te pendžaren le, thaj majrošisarde jakha tumare vilesere te bi džanena ane soste si o adžikeripe lesere akharipnaso, thaj savo si barvalipe o šalomipe lesere kustikipaso ane sumnale, thaj savo si bimerimo baripe lesere zorako pe amende save paća po ćeripe lesere zorale zoralipnase, savo ćerđa ano Hristo dživdisarindoj le andar e mule, thaj thanarđa pese pe laćhi rig po badali, upral sarsavo šerutnipe, thaj thagaripe, thaj zor, thaj devljutnipe, thaj upral sarsavo anav so šaj te akharel pe, na semo an akava bimeripe, aj thaj ano avino; Thaj sa telaćerđa telal e pre lesere, thaj Le ćhuta upral o sa bašo šero e Khanđirjakoro, savo si o trupo lesoro, pherdipe Odolesoro savo sa pherela ane sa. Thaj tumen save sena mule bašo ćerdo ćerdipe thaj bezeha tumare, ane save nekana phirđen po đi akale themeso, po knezo savo thagarel ano ajri, po đi savo akana deluini ane ćhave e opipeipasere, maškar save thaj amen savore dživdinđam nekana pe mangipa amare trupesoro, ćerindoj kamipe e trupeso thaj gindipa, thaj sema pe natura ćhavore bare xoljinaće sar vi e aver; A o Devel, savo si barvalo ane dindipa, bašo baro kamlipe plo savaja amen kamlja, thaj amen, save injamle mule bašo bezeha, dživdininđa e Hristoja – dindipnaja sinjen ikalde – Thaj Leja khatane dživdininđa thaj khatane sijinđa po badali ano Hristo Isuso, te mothovel ane bimeripa save avena but baro barvalipe ple dindipasere laćhipnaja mamuj amende ano Hristo Isuso. Kaj dindipnaja sijen ikalde andar o paćape; thaj odova nane tumendar, dindipe si e Devlesoro; Na kotar e ćerdipna, te na bi ko ašarinela pes. Kaj sinjam lesoro ćeripe, ćerde ano Hristo Isuso baše šukar ćerdipna, save o Devel anglal gatinđa kaj ane lende te phira. Odolese ićeren ane godi kaj tumen, save nekana po trupo nađangledevlesere so injen, akhardine nasunetipe kotar odola save akhardona trupeso sunetipe vastesa ćerdino, kaj injenle ane odova vakti bi Hristoso, cidimo kotar o khatanipe e Izrailjesoro thaj nađande ane xape sovlja dinde lafonengo, adžikeripe nanindoj, thaj bi e Devlesoro po them. A akana ano Hristo Isuso, tumen save nekana injenle dur, uljen paše e Hristosere rateja. Kaj Ov si šalom amaro, savo thaj e jekhen thaj e dujtonen phandlja ano jekh thaj peravđa o ulavipe savo ulavela, odova si dušmanluko, ćhinavindoj trupeja pleja o kanuni lesere ćhinavdipenca thaj propisonencar, kaj solduj ćerđa ana korkoro peste ano jekh nevo manuš, ćerindoj šalom; Thaj te šalominel e Devleja thaj e jekhen thaj e dujtonen ano jekh trupo trušuleja, mudarindoj o dušmanluko upro leste. Thaj Ov avindoj džangljarda o šalom tumenge save sijen dur thaj odolenge save si paše. Kaj andar Leste isiamen thaj e jekhune thaj e dujta pašipe premalo o Dad ano jekh Đi. Ađahar, eke, nasijen maj avrune ni avune, aj sen khatanedizutne e sumnalencar thaj ćherutne e Devlesere, duvarime po temeli e apostolengo thaj e profetonengo, kaj si x'nzuno bar korkoro o Isus Hristos, pe savo sa o ćerdipe, laćhe phandino, barjola ano hramo sumnalo ano Devljutno. Ane saveste thaj tumen khatane duvarinena aso kher e Devlesoro ano Đi. Baše odova me sem, o Pavle, phandutno e Isus Hristoso baše tumenge e nadžangledevleserenge. Te eke ašunden bašo trinipe e dindipaso e Devlesoro savi si maje dindi baše tumenge, kaj maje po phućardipe mothovđol e garavdini, sar so angleder hramonđum xarne, kotar drabarindoj šaj te haljoven mlo penđaripe e Hristosere garavdinako, savi ane aver generacije na sine mothovdini e manušengere ćhavenge, sar akana Đesa phućardilo lesere sumnale apostolenge thaj e profetonenge: Kaj si e nadžangledevlesere khatanekustikutne thaj khatanetruputne thaj krisarutne lesere dindelafonenge ano Hristo Isuso andar o evangelium, savese uljum kandino po dinipe e Devlesere dindipase, savi dindi maje po ćeripe lesere zorako. Maje, e najciknese kotar e sa sumnale, dindilo pe akava dindipe te mothovav maškar e nadžangledevlesere birodino barvalipe e Hristosoro, thaj kaj te rošalinav sarijenge ane soste si o trinipe e garavdinako kotar o bimeripe garavdine ano Devel, savo ćerđa sa andar o Isus Hristo, kaj andar e Khanđiri akana te mothovel pe e šeruretnenge thaj e thagarutnenge ko badali butpobaro džandipe e Devlesoro, palo bimeripaso ćhinavdipe savi kerda ano Hristo Isuso amaro Devljutno, ane savo isiamen muklipe thaj pašipe ano kamipe andar o paćape an Leste. Odolese tumen ruđinava te na bizorjavjon bašo mle belave bašo tumenge, save si tumari glorija. Baše odova teljarđovava mle kočija anglal o Dad amare Devljutnesoro e Isus Hristosoro, kolestar sako njamo ko badali thaj ki phuv isile plo anav, kaj tumenge po barvalipe ple šalomipastar te del zor, te zorardon Đesa leseresa ano andruno manuš, kaj o Hristo paćapnaja te thanardol ane vile tumare, kaj te darhime thaj temeljime ano kamlipe, šajine te haljoven sarijencar e sumnalencar so si o buhlipe thaj o lunđipe, thaj o xoripe thaj ućipe, thaj te pendžaren o kamlipe e Hristosoro savi nakhavela o gođipe, te bi pherđona sakona pheripnaja e Devlesereja. A Odolese savo šaj panda thaj pobuter majbut te ćerel katar odova so amen roda ja gndina, pe zor savi ćerela ana mende, lese nek ovel glorija ane Khanđiri ano Hristo Isuso andar e sa generacije ano bimeripasoro bimeripe. Amin. Ruđinav tumen, eke, me phandlo ano Devljutno, te arakhavđon paćivale akharipasoro pe savo sijen vičime, sa sako teljardipe thaj krotkipe, e baretrpimnaja, trpindoj jek avre ano kamlipe, phurederindoj te arakhen o jekhipe e Đesoro phandino e šalomnipaja: Jekh trupo, jekh Đi, sar so sijen vičime ani jekh adžikerutni tumare vičipnasoro; Jekh Devljutno, jekh paćape, jekh bolipe, jekh Devel thaj Dad sarijengoro, savo si upral sarijende, andar e sa, thaj ana amende sarijende. A sakonese kotar amende dinđape dindipe pali mera o dinipe e Hristosoro. Odolese phenela: Iklindoj po ućipe lelja o astaripe thaj dinđa e dinipa e manušenge. A odova „inklilo” so si, semo kaj anglune thaj huljel ane najtelune thana e phuvljakere? Odova savo huljel odova si jekhuno savo thaj inklilo majbut sarijendar e badalendar te pherel sa. Thaj Ov dinđa jekhen sar apostolija, a e averen sar profetija, jekhen sar evangelistija, a e averen sar čobanja thaj sikavne, bašo laćhardipe e sumnalengoro ane kandipasere ćerdipna, bašo duvaripe e Hristosere trupose; Džikote na resaja sa ano jekhipe e paćapeso thaj penđaripe e Devlesere Ćhaveso, ano manuš pherdino, ani mera e baripnasoro e Hristosere pheripnase; Te na ova maj tikne ćhavore, saven kunadel thaj ingarel sako balval sikljobasiri, manušesere xoxavipnasa, thaj bižajipnasa bašo andipe ano dujgođipe; Aj te ova čaćikane ano kamlipe kaj ano sa te barjova ane Odova savo si šero – o Hristos. Kotar savo si sa o trupo, ćerdino thaj phandino ažutipnaja sa e kokalengo, ađahar kaj jekh avere te ažutinel pali mera pojekhune dženese, ćerela kaj o trupo te barjol po ćeripe korkoro pes ano kamlipe. Akava, eke, vakerava thaj mothovava ano Devljutno kaj maj na dživdinena sar so dživdinena thaj e avera e nadžangledevlesere ano čućogođipe plo, tunjarićume gndipa, durarde kotar o dživdipe e Devlesoro bašo bidžandipe savo si ano lende, bašo barardipe lengere vilesoro. On tupavindoj angladinđe pes e mekljardipnase ta ćerena sako melalipe e pohlepnaja. A tumen ađahar na pendžarđen e Hristo, te li le šunđen thaj ano Leste sikavde sijen, sar so thaj o čaćipe ano Isuso, kaj tumen te frden o angleder načino e dživdipasoro e purane manušeso, savo preperela ane xoxavne mangipa, a te obnovinen tumen đesa tumara gođaja, thaj huraven tumen ano nevo manuš, ćerdino po Devel ano hakajutnipe thaj sumnalipe e čaćipnasoro. Odolese frdindoj o xoxajipe, vakeren o čaćipe sako sa plo najpašutno; kaj sam kotora e truposere jekh avrese. Xoljajvon aj na te keren doš; o kham te na nakhel ane xoli tumari; Ni te na den than e bengese. O ćor te na maj te ćorel, aj pošukar nek phurederinel pe te ćerel ple vastencar odova so si šukar te bi ovelale te del odolese kolese valjani. Nisavo džungalo lafi te na ikljol andar e muja tumare, aj semo šukar bašo ćeripe odolesoro so valjani, te anel dindipe odolenđe save ašunen. Thaj ma dukhaven e Sumnale Đe e Devlesere, kolesa sijen štambilime bašo dive e inkalipnasoro. Sako ćerkipe thaj xoljaripe thaj xoli thaj vika thaj akošipe e sakone džungalipnaja, nek oven dur tumendar. A oven maškar tumende kovle, dindipasere, jertindoj jekh averese, sar so thaj o Devel ano Hristo jertinđa tumenđe. Dikljoven tumen, eke, ko Devel sar ćhavore kamle. Thaj dživdinen ano kamlipe sar so thaj o Hristos amen ćumudinđa thaj dinđa pes amenđe sar dinipe thaj viktima e Devlese pe laćhi sung. A o rumupe thaj sako melalipe thaj lokholipe te na ni vakerel maškar tumende, sar so thaj aćhola e sumnalenđe; Ni ladžaripnasere ni diline lafija ja pherjasa, so god si bilaćhe, aj najangle ašaripe. Kaj džanen akava, kaj nijekh rumutno, ja melalo, ja lokhovdo, savo si idoloperavno, nanole kuštikutnipe ano Thagaripe e Hristosoro thaj e Devlesoro. Nikoj tumen te na xoxavel čuće lafijencar; kaj baše odova avela xoli e Devlesiri pe ćhave opipeipasere. Ma oven, eke, lengere khatane. Kaj nekana sinjenle tunjariko, a akana sijen rošipe ano Devljutno: ićeren tumen sar ćhavore e rošipasere; Kaj bijanipe e Đesoro si ane sako šukaripe thaj hakajutnipe thaj čaćipe. Rodinen so si ugodime e Devljutnese. Thaj ma len khatanipe ane bibijanutne ćerdipna e tunjarikosere, aj len pana te phućaren. Kaj si ladžavo thaj te vaćeripe odolestar so on garavdine ćerena. A sa so phućarel pe e rošipnaja thaj mothovel pe; kaj sa so si mothovdino ikljola ko rošipe. Odolese phenela: Ušti tu savo soveja thaj dživdinisar andar e mule, thaj ka strefinel tut o Hristos. Akana, arakhen tumen šukar sar dživdinena, na sar bigođaver, aj sar gođaver, arakhindoj ko vakti, kaj si o dive džungale. Baše odova ma oven bihaljovne, aj haljoven so si o kamipe e Devljutnesoro. Thaj ma te mačoven tumen moljaja, ane soste si o melaloćumudipe, aj pheren tumen Đesa, vakerindoj maškaro tumende ane psalme thaj himne thaj đilja đesere, đilabindoj thaj pređilabindoj e Devljutnese ano klo vilo; Ašarindoj sajekh bašo sa e Devlese thaj Dadese ano anav amare Devljutnesoro e Isus Hristosoro, peravindoj jek avrese ani dar e Devlesiri. Romnjalen, peraven tumen tumare romenđe sar e Devljutnese. Kaj o rom si šero e romnjake sar so si thaj o Hristo šero e Khanđirjaće, thaj Ov si ikalutno e trupesoro. No sar so e khanđiri peravela pe e Hristose, ađahar thaj o romnja ano sa pumare romenđe. Romalen, kamen tumare romnjen sar so thaj o Hristos kamlja e Khanđiri thaj pes dinđa baše lake, kaj te sumnarela, khosljarindoj ola bolipnaja ano pani e lafeja, te ćhivel ola angla peste, šalomime Khanđiri, savi nanela mel thaj bore, ja so odolese miazune, aj te ovel sumnali thaj paćivali. Ađahar si udžilime thaj e roma te kamen ple romnjen sar pumare trupora; kaj savo kamela pla romnja, korkoro pes kamela. Kaj nikoj nisar na ritinena pe plo trupo, aj le parvarela thaj inćarela, sar thaj o Devljutno e Khanđiri. Kaj sem kotora lesere trupose, kotar o mas lesoro, thaj kotar e kokala lesere. Baše odova ka mekel o manuš e dade ple thaj daja thaj ka lepinel pes e romnjake plake, thaj ka oven o duj jekh trupo. Garavdipe si akava baro, a me vakerava kotar o Hristo thaj kotar e Khanđiri. Ađahar thaj tumen, sako te kamel ađahar pla romnja sar thaj pes korkoro; a e romni te daral ple romestar. Ćhavoralen, ašunen tumare bijanden ano Devljutno, kaj si akava hakajune. Paćival e dade kle thaj e daja; akava si angluno čhinavdipe e dinde lafeja: Te ovel će šukar, thaj kaj but berša te dživdine ki phuv. Thaj tumen dadalen, ma xoljaren e ćhavoren tumaren, aj vazden len ano barjaripe thaj džanipe e Devljutnesoro. Robonalen, oven kandine tumare devljutnenge po trupo, sar e Hristose, daraja thaj bara daraja, ano aćaripe tumare vilesoro, na kerindoj semo načaćune sar kaj te ugodinen e manušenđe, aj sar kandine e Hristosere, ćerindoj kamipe e Devlesoro vilestar, kandindoj kamlekamnipnaja sar e Devljutnese, a na sar e manušenđe, džanindoj kaj sakoj ako so šukar ćerela, odova ka lel e Devljutnestar, aj si robo ja mukljutno. Thaj tumen devljutnonalen, ćeren odova jekhune lenđe, bizo daravdipe, džanindoj kaj si thaj lengoro thaj tumaro Devljutno ko badalija, a Ov na dikhel ko si ko. A poangle mle praljalen, zoravđon ano Devljutno, thaj ane zorali zor lesiri. Hurjaven tumen ano sabandukipe e Devlesoro, kaj bi šajine te ićeren tumen opipe e bengesere bižajipnastar. Kaj na maramen opipe e ratesoro thaj trupesoro, aj opipe e šerutnipasere, thaj thagaripnasere, thaj devljutnesoro tunjarikosoro akale themeso, opipe e džungale đesa telal o badali. Odolese len sa o bandukipe e Devlesoro, te bi te šajine te ušten ano džungalo dive, thaj inćardindoj baše sa, te ićeren tumen. Terđoven, akana, paćarindoj tumare bedrija e čaćipnaja thaj hurjavindoj ano arakhavutno e hakajipnaso, thaj hurjavindoj o pre ano gatipe bašo evangeliumosoro šalomipe; A upral o sa len o štit e paćapnesoro, savestar ka šaj te aćhaven sa e jagale strele e bipaćivalesere; Thaj e kaciga ikaldipnasiri len, thaj o mač e Đesesoro, savo si o lafi e Devlesoro. Thaj sakona ruđipnaja thaj ruđutnunaja ruđinen tumen ano Đi ano sako vakti, thaj uzo odova, džangavđon sakona trajipnaja thaj ruđipnaja baše sa e sumnale, thaj baše maje, te delpe maje o lafi kana phravava o muj mlo, kaj tromale te mothovav o garavdipe e evangeliumosoro, baše savese kandava ane sinđirja, kaj lestar te vakerav tromaline, sar so sem kamino te vakerav. A kaj te bi thaj tumen džanena sar sem me thaj so ćerava, sa tumenđe ka mothovel o Tihik, ćumudino phral thaj paćavino kandutno ano Devljutno, save akana baše odova thaj bićhalđum ke tumende, te džanen sar sam thaj te kovljarel e vile tumare. Šalom e phraljenđe thaj kamlipe e paćapnaja kotar o Devel o Dad thaj o Devljutno Isuso Hristo! Dindipe sarijencar save sajekh ćumudinena e Devljutne amare e Isuso Hristo. Amin. O Pavle thaj o Timotej, kandine e Isus Hristosere, sarijenđe e sumnalenđe ano Isuso Hristo save si ano Filipo, e episkonencar thaj đakonencar: Dindipe tumenge thaj šalom kotar o Devel Dad amaro thaj Devljutno o Isus Hristo. Ašarinav mle Devlese kana god dav ma godi tumenđe, sajekh ane sakoj ruđutni mli lošalipnaja ruđinape baše sa tumenge, so tumen uljen khatanićarja ano evangeliumo, kotar o angluno dive ta dži akana; Paćavdo ane odova, kaj ka Odova savo počinđa o šukar ćerdipe ane tumende ka agorinel le sa dži o dive e Isus Hristosoro. Sar so si thaj hakaj kaj me akava bašo sa tumenge gndinav; kaj tumen isima ano vilo, thaj ane sinđirja mle, thaj ano arakhavdipe thaj čačavdipe e evangeliumosoro, sa tumen save sen mle khatanićarja ano dindipe. Kaj o Devel si mange jaćhencadikhutno, kobor zorale mangava pala sarijende tumende ano kamlipe e Isus Hristosoro; Thaj baše odova ruđinape e Devlese kaj o kamlipe tumaro sa majbut thaj majbut barvarđola ano penđaripe thaj sako kamlipe, te moldinen so si najšukar, te oven khosle thaj biperavde ko dive e Hristosoro, pherde bijanune hakajese andar o Isuso Hristo, ki glorija thaj o ašaripe e Devlesoro. Mangav eke te džanen, phraljalen, kaj odova so sinele mancar semo anđa ko anglalšukaripe e evangeliumose, ađahar kaj sa e thagareso kris thaj sa e avera džanen kaj sem ane sinđirja bašo Hristo. Thaj but phralja ano Devljutno, zorarde e sinđirencar mlencar, pana majbut tromalisajle kaj bi darakoro te vakeren o lafi e Devlesoro. Jekhune, hemčaće, andar o korikanipe thaj čingaripe mothovena e Hristo, a e avera kotar o laćho kamipe; Ađahar kaj jekhune andar o injati mothovena e Hristo e bikhosle iradaja, gndindoj kaj ka anen dukhavipe mle sinđirenđe. A e avera andar o kamlipe, džanglindoj kaj sem akate bašo arakhavdipe e evangeliumosoro. So napal? Sasa sar lese kamle, phandune ja čaćikane, o Hristos mothovela pe; thaj odolese lošalape, a thaj ka lošala ma; Kaj džanav kaj akava ka irinel pe ko mlo inkaldipe pe tumari ruđutni thaj ažutipe e Đesoro e Isus Hristosoro, sar so paćavune adžikerava thaj paćava kaj ni ane soste na ka ladžav, aj kaj ka o Hristos sar sajekh thaj akana ple tromalipnaja ka barjovel ano trupo mlo, ja dživdipnaja ja meripnaja. Kaj si mange o dživdipe Hristos thaj o meripe si šukar leipe. Aj te si o dživdinipe ano trupo bijanimno bašo mlo ćerdipe, tegani na džanav so te alosarav. A lela man solduj: isima manglipe te merav thaj e Hristosa te ovav, so si but pošukar; Aj te aćholape ano trupo majtrubune si baše tumende. Thaj akava paćavine džanava, kaj ka aćhovav thaj ka bešav sarijencar tumencar bašo tumaro anglipe thaj lošalipe e paćapesoro, te bi e ašaruni tumari ano Hristo Isuso butinela pe prekalo mande kana tumenđe palem ka avav. Semo dživdinen paćivale e Hristosere evangeliumose, kaj tumen kana ka avav dikhava, ja tumenđe te na aljum, te šunav baše tumenđe kaj terđona ano jekhuno đi, jekhođune marindoj bašo paćape e evangeliumosoro, thaj ni ana soste te na daran e opipeutnestar; odova si lenge semno peripnasoro a tumenge inkaldipe, thaj odova kotar o Devel. Kaj si tumenge dindino aso Hristo, na semo te paćan ano Leste, aj thaj te meren baše Leste. Isindoj odova jekhuno maribe savo ke mande dikhljen thaj akana šunena kotar mande. Ako, akana, isitumen nesavo loćharipe ano Hristo, ako li tatipe e kamnipaso, ako li khatanipe e Đesoro, ako li haćaripe thaj dukhavdipe, prepheren mlo lošalipe, kaj jekhune te gindinen, kaj jekhuno kamlipe te oveltumen, jekhođune, jekhgindine: Niso te na ćeren kotar injati, ni baše čući glorija, aj šandipnaja keren jekh e avre pobare kotar peste. Ma phurederinen tumen sako bašo plo, aj sako thaj bašo odova so si e averengo. Odolese nek ovel ana tumende jekhuni gind savi si thaj ano Hristo Isuso, savo avune ano dikhipe e Devlesoro, na dikhlja bašo baro leipe odova so si jekhuno e Devleja, aj pes teljarđa leindoj dikhipe e kandinesoro, ulo jekhuno e manušenge, thaj dikhipnaja arakhlja pe sar manuš; Teljarđa vi pes thaj sinele kandino dži o meripe, thaj odova dži o meripe ko trušul, odolese thaj Les o Devel uće vazdinđa, thaj dinđa lese o Anav savo si upral sako anav. Kaj ka ano Anav e Isusesoro teljarel pe sarsavi kustik so si ko badali thaj ki phuv thaj telal e phuv; Thaj kaj sakoj ćhib te mothoj kaj si o Isus Hristo Devljutno ki glorija e Devlese e Dadese. Ađahar, mle ćumudinalen, sar so injenle sajekh kandine, na semo ano mlo ateripe, aj but majbut akana ano najstalipe mlo, zidinen o inkaldipe tumaro daraja thaj izdaripnaja. Kaj o Devel si odova savo ćerela ana tumende thaj te mangen thaj te ćeren pe lesoro kovlo kamipe. Sa ćeren bi mrmipnasoro thaj dujgođipnasoro, te oven bidošaće thaj paćavine, ćhavore e Devlesere paćivale maškar o njamo bilaćhesoro thaj rumipnesoro, ane savo strefinena sar e roša ane vasiona, ićerindoj o lafi e dživdipasoro pe mli ašaruni baš o dive e Hristosoro, manđe te na ovel andodilipe o prastape, ni e munka andodilipe. Aj te vi pašljardiljum pe viktima thaj kandipe tumare paćapeso, lošalape, thaj sarijencar tumencar lošalape. Jekhune ađahar thaj tumen lošavon, thaj oven lošale mancar. A adjikerava ano Devljutno Isuso, kaj ka tumenđe sigate bićhalav e Timoteje, kaj vi me te lošajvav džanglindoj sar sijen tumen. Kaj nane man nikoj ađahar njamose ođe savo bi baš edobor čaće grižinelape baše tumenđe. Kaj sare rodena plo, a na odova so si e Hristo Isusesoro. A lesoro mothovdino paćape džanen, kaj si sar ćhavoro e dadese mancar kandlja e evangeliumose. Adžikerava, akana, kaj le ka bićhalav sigo sar dikhava so ka ovel mancar. A paćava ano Devljutno kaj ka thaj korkoro sigate avava. Gndinđum eke bašo prekaltrubune te bićhalav ke tumende e Epafrodite, phrale thaj kupaćerutne thaj amalmarutne mle, a save tumen bićhalđen te arakhel pe maje bašo mle trubuipa. Kaj zorale but manglja bašo sarijende tumende, thaj sine lese dukhavdine so šunđen kaj nasvalilo. Thaj hemčaće sinele nasvalo but paše ko meripe, aj les o Devel maznonđa, thaj na semo les, aj vi man, kaj maje te na avel o dukhavdipe ko dukhavdipe. Odolese les sigo bićhalđum kaj te lošalen tumen kana les palem dikhena, a me te ovav pohari dukhavdino. Len les, akana, ano Devljutno pherde lošalipnaja, thaj asavken paćivalisaren, kaj bašo ćerdipe e Hristosoro thodilo dži o meripe, na hajindoj bašo plo dživdipe, te pherel odova ane soste na resljen tumen man te kandinen. A poangle, mle phraljalen, lošalen tumen ano Devljutno. Kaj mange nane pharo te hraminav tumenđe jekh jekhune, a tumenđe si zorardipe. Arakhen tumen e džuklendar, arakhen tumen e džungale bućarnendar, arakhen tumen e „telalxarnajrutnendar”! Kaj e sunetime, odola sem amen, save Đesa e Devlesereja kanda thaj ašarisavaja e Hristo Isuseja, a na ićeramen ano trupo, aj thaj me ka ma šajiv te ićerama ano trupo. Te nekoj aver gndinela kaj šaj te ićerelpe ano trupo, me pana pobuter: Sunetime sem ano ovtoto dive, kotar o bijanuno sem e Izrailjesoro, e Venijaminesere njamose, Judejco kotar o Judejcija, po kanuni Farisejo, po bućaripe tradutno e khanđirako, pe kanunesoro hakajipe semas bidošako. Aj sa so mange sinele šužo leipe, gndinđum bašo lošnipe bašo Hristo. No so majbut, me thaj gndinava sa bašo lošnipe mamuj butlaćho džanglipe e Hristo Isusesoro, mlo Devljutno, bašo savo me sa mekljum, thaj gndinava sa bašo šelja, te bi e Hristo lava. Thaj te arakhav man ano Leste na mle hakajipnaja savo si kotar o kanuni, aj odoleja savo si po paćape ano Hristo, hakajipnaja kotar o Devel pe fundo e paćapesoro; Te penđarav Les thaj e zor lesiri dživdinisarutnesiri thaj kotor ane lesoro mudaripe, laćharindoj aso lesoro meripe, te bi sar resava ano dživdinisaripe e mulengoro. Na sar kaj odova eke resljum ja eke laćhardiljem, aj siđarava na bi li odova resava, sar so man reslja o Hristos Isuso. Phraljalen, me baše mange na gindinava panda kaj odova resljum; jekh eke ćerava: so si pala mande bistrava, a siđarava pala odova so si anglal mande, thaj prastava mamuj o resipe baši padakhutni e badalesere Devlesiri akharipni ano Hristo Isuso. Amen, akana, save sem idealune, ađahar te gomdina; ako li so averćhane gndinena, thaj akava tumenđe o Devel ka phućarel. Aćhune, odova so resljam, odola regulata te ićeramen thaj jekhune te gindina. Dikholjoven tumen pe mande, phraljalen, thaj dikhen pe odola save ađahar dživdinena sar so amen isitumen bašo misalipe. Kaj bute, bašo save tumenge but droma vakerđum, a akana thaj rovindoj vakerava, ićerena pe sar dušmanja e Hristosere trušulese; Lengoro agor si o meripe, lengoro devel si o vođi, thaj e glorija ano ladžavipe lengoro, on gndinena odova so si e phuvljakoro. Andegova, amaro dživdipe si ko badali, kotar adžikeraja thaj e Inkalutne Devljutne e Isuse Hristo. Savo ka paruvinel amaro teljardino trupo, ađahar te ovel laćhardino trupo sar e glorija lesiri, pe zor savaja Ov šaj sa te ćerel thaj pese te telalćerel. Odolese, phraljalen mle o ćumidle thaj najmangle, lošalipe mlo thaj khuvdinoro mlo, ađahar terđoven ano Devljutno, ćumidle! E Evodija ruđinava, thaj e Sintihija ruđinava, kaj jekhune te gndinena ano Devljutno. Va, ruđinava thaj tut, kupaćerutneja paćavineja, ažutisar lenđe save ćerđe manca ano mothovdipe e evangeliumosoro khatane thaj e Klimentoja thaj e avere telalažutnenca mlencar, kasere anava si ane pustik e dživdipasiri. Lošalen tumen ano sarsavo vakti ano Devljutno, thaj palem phenava: lošalen tumen! O dindipe tumaro nek ovel pinđardo sa e manušenđe. O Devljutno si paše. Ma grižinen tumen ni baše soste, aj ane sa e ruđutnaja thaj e ruđipaja e ašardipnaja mothoven e Devlese e mangipa tumare. Thaj o šalom e Devlesoro, savo nakhavela sako godi, ka arakhel o vile tumare thaj e gndipa tumare ano Hristo Isuso. A poangle, phraljalen, so god si čaćuno, so god si paćavino, so god si hakajuno, so god si khoslo, so god si paćivalo e kamlipase, so god si po laćho krlo, fije savo paćivalipe, fije so ašarinaja e paćivalipnase, odova gndinen; So thaj sikliljen, thaj leljen thaj ašunđen thaj dikhljen pe mande, odova ćeren, thaj o Devel e šalomnipaso ka ovel tumencar. A lošalisajlem but ano Devljutno so majpalal palem dijen tumen godi te phurederinen tumen baše mande, sar so thaj phurederisajlen, aj nasine tumen kradanat. Vakerava odova na bašo najstalipe, kaj me sikliljum te ovav ćaljardo odoleja so isima. Džanava thaj te teljardovav, džanav thaj te barvajovav; ano sa thaj saheste sikliljum; thaj ćalo te ovav thaj bokhalo, thaj te barvajovav thaj te ćororovav. Sa šaj ano Hristo savo dela mange zor. Eke, laćhe ćerđen so leljen lipe ane mle belava. A džanena thaj tumen, Filipljanija, kaj ano širdipe e mothovipeso e evangeliumosoro, kana iklilem andar e Makedonija, ni jekh mange Khanđiri na lija lipe ano dindipe thaj lipe semo tumen jekhune; Kaj mange thaj ano Solun bićhalđen angluno thaj o dujto drom baše mlo trubuipe. Na sar kaj rodava dindipe, aj rodav bijanuno savo butisarel pes po labhipe tumaro. A me lijem sa thaj isiman butune. Ćajljardino sem lindoj kotar o Epafrodito so mange bićhalđen, gudli sung, viktima ćaljardimasiri, šuži e Devlese. A o Devel mlo ka pherel sako trubuipe tumaro palo barvalipe plo ane glorija, ano Hristo Isuso. A e Devlese thaj Dadese amarese glorija ane bimeripasoro bimeripe. Amin. Bićhalen sastipe sakone sumnalese ano Hristo Isuso. Bićhalen tumenđe sastipe o phralja kola si mancar. Bićhalen tumenđe sastipe sa e sumnale, a uladune odola andar e thagaresoro kher. Dindipe amare Devljutnesoro e Isus Hristosoro sarijencar tumencar. Amin. O Pavle, po kamipe e Devlesoro apostolo e Isus Hristoso, thaj o phral o Timotej, sumnalenge thaj paćapne phraljenđe ano Hristo Isuso save si ano Koloso: Dindipe tumenđe thaj šalom kotar o Devel o Dad amaro thaj Devljutno o Isus Hristo. Ašarinape sajekh e Devlese thaj e Dadese e Devljutnese amarese e Isus Hristose kana ruđinamen baše tumende, poso šunđam bašo tumaro paćape ano Hristo Isuso thaj bašo kamlipe savo isitumen premalo sarijende e sumnalenđe. Bašo ađikeripe savo si tumenđe gatime ko badali, kotar savo angleder šunđen ano čaćikano lafi e evangeliumosoro. Savo si ana tumende thaj ano sa o them, thaj bijanune si thaj barjola sar vi ana tumende, kotar odova dive sar ašunđen thaj penđarden o dindipe e Devlesoro ano čaćipe. Sar so vi sikliljen kotar o Epafraso, čumudime amare kupaćerutnestar, savo si baše tumenđe paćavino kandino e Hristosoro, savo amenđe thaj mothovđa kotar tumaro kamlipe ano Đi. Baše odova thaj amen, kotar odova dive sar šunđam, na aćhovaja te ruđinape e Devlese baše tumenđe thaj rodaja kaj te pherđon džanipe lesere kamipaja ane sako bižaipe thaj haljovipe ođikano, kaj te arakhen tumen paćivale e Devljutnese ćerindoj lese ano sa, thaj te oven bijanune ane sako laćho ćerdipna, thaj te barjon ano penđaripe e Devlesoro, zoralindoj sakone zoralipnaja, pe zor leser gloripnaja, bašo sako bićhinadipe thaj lungonakhavipe e lošalipnaja, ašarindoj e Devlese thaj e Dadese savo amen gatinđa bašo kotor ano kustikutnipe e sumnalengoro ano rošipe; Savo amen inkalđa kotar o thagaripa e raćipasoro thaj nakhavđa ano Thagaripe e Ćhavesoro ple kamlipasoro, ane savo isiamen ćedinipe, jertipe e bezehengoro; Savo si ikona e Devlesiri e bidikhutnesiri, Anglunobijando anglal sako šeja, kaj Lesa sinele ćerdino sa, so si ko badali thaj so si ki phuv, so si dikhutno thaj so si bidikhutno, si li sumnalesiri bešalutni ja devljutne, ja šorutne ja thagarutne: sa si Lesa thaj bašo Leste ćerdo. Thaj Ov si angla o sa, thaj sa ano leste si. Thaj Ov si šero e trupose, e Khanđirjaće, savo si širdipe, Anglunobijando andar e mule, kaj ano sa Ov te ovel angluno. Kaj (o Dad) kamlja kaj ane Leste te arakhavđol sa o pheripe. Thaj kaj andar Leste te šandipenel sarijen pesa, ćerindoj šalom lesere rateja ko trušul, (baraštindoj) andar Leste thaj odova so si ki phuv thaj odova so si ko badali. Thaj tumen save nekana sena avrune thaj gođaja dušmanja ane džungale ćerdipna, akana tumen šandipenđa meripnaja lesere manušese trupoja kaj tumen te inkalel anglal o sumnale, paćivale thaj bidošale, ako semo aćhovena ano paćape temeljime thaj sipeune, thaj na ulavindoj kotar e adžikeruni e evangeliumosiri, save ašunđen, savo si mothovdino sa e šeja telal o badali, savese me, o Pavle, uljum kandino. Akana lošalinape ano mle mudardipa baše tumende, thaj ano mlo trupo pherava so naćhola e Hristosere munkenđe, bašo trupo lesoro, koja si e Khanđiri, savake me uljum kandino po trinipe e Devlesoro savo mange dindilo baše tumenge, kaj ano pherdinipe te mothovav o lafi e Devlesoro, garavdini garadini kotar o bimeripe thaj generacije, savi akana mothovdili lesere sumnalenge; Lenđe o Devel manglja te mothovel kobor si o barvalipe glorijako garavdinako akalako maškar o nadžangledevlesere, savi si o Hristos ane tumende, adžikeruni glorija; Save amen mothovaja te haljovel sako manuš thaj sikavindoj sakone manuše sakone bižajipase, kaj te bi mothovaja sakone manuše te ovel prepherdino ano Hristo Isuso. Baše akava phurederinama, marindoj pe, pe lesiri zor savi ana mande zorale ćerela. Mangav, akana, te džanen kobor maripe isiman baše tumenge thaj baše odolenđe ano Laodikija thaj ano Jerapolji, thaj bašo sa save na dikhle o muj mlo ano trupo, kaj te loćardon e vile lengere, te khetaninen pe ano kamlipe thaj ane sako barvalipe pherde haljovipe bašo penđaripe e Devlesere garavdinako thaj e Dadesi thaj e Hristosi, ane savo si garavdine sa o barvalipa e xorune haljovipase thaj e džanipase. A akava vakerava, kaj tumen nesavo te na xoxavel crdinipasere lafijencar. Kaj ako sem trupoja thaj najstalo, aj e đesa sem tumencar, lošalindoj pe thaj dikhindoj tumaro rendo thaj zorardipe tumare paćapeso ano Hristo. Sar, akana, leljen e Hristo Isuso e Devljutne, ađahar ano Leste thaj dživdinen, darhinime thaj duvarime ano Leste, thaj zorarde ano paćape sar so sen sikavde, barvarindoj ane late ašaripnaja. Arakhen kaj tumen nikoj te na xoxavel filozofijasa thaj čuće xoxajipnaja, po mothodipe e manušesoro, po džanipe e themeso, a na po Hristo. Kaj ano Leste terđola sa o pheripa e truposere Devljutnipase, thaj tumen sijen pherdine ano Leste, savo si šero sakone šerutnipase thaj thagaripase; Ano Leste tumen thaj o sunetime sinjenle sunetipasa navastesaćerdime, frdindoj o trupo e bezehutnipaso e Hristosere sunetipnaja, poso Lesa paruvisajlen bolipnaja, ano Leste sen thaj dživdinine andar o paćape ane zor e Devlesiri savi les dživdininđa andar o mule. Thaj tumen save sinjena mule ane bezeha thaj ano nasunetipe tumare truposoro, dživdininđa tumen Lesa, jertinindoj amenđe sa o bezeha; Khosla o kamuno lil savo amen ple čhinadipencar krisinena thaj sinele opipe amendar, thaj durarđa la thaj kovindala ko trušul; Lindoj o bandukipe e šerutnengoro thaj e thagarutnengoro, čalavđa olen putarune, peravindoj pe leste. Kaj tumen, akana, nikoj te na krisinel bašo xabe thaj pibe, ja bašo savo baro dive, ja bašo ternipase, ja bašo savatonenge, so si ućhalin odolesiri kaj ka avel, a o trupo si e Hristosoro. Nikoj tumen te na xoxavel pumare teljaripnaja thaj kandipnaja e phakalenge, mekljindoj ane odova so na dikhlja, thaj andodilipe phućindoj ple truposere gođaja, a na ićerindoj e šerese andar savo si sa o trupo kojnakonenđe e ažutipnaja thaj phandipe phandune te barjol e Devlesere baripnaja. Ako, akana, muljen e Hristoja bašo zorale aravdipa e themesere, sose inćaren tumen pe čhinadipa sar te kaj dživdinena ano them? – Ma dirin, ma le ano muj, ma te pipine! – Po čhinavdipe thaj džanipe e manušengoro; a odova sa perela trubuipnaja. Akava si semo po dikhipe bižaipe ano korkoruno kandipe thaj teljardipe thaj munčipe e trupesoro, a nane kotar khajekh manaipe bašo čaljardipe e trupesoro. Te sijen, akana, dživdininde e Hristoja, roden odova so si upre kote o Hristos bešela pe daxni rig e Devlesiri. Gndinen odolestar so si upre, a na so si ki phuv. Kaj muljen thaj tumaro si dživdipe garavdo e Hristoja ano Devel. A kana mothovel pes o Hristos, o dživdipe amaro, tegani thaj tumen Lesa ka mothovdon ane glorija. Mudaren, akana, e kotora e truposere tumare save si ki phuv: rumipe, bikhoslipe, zuralo haćaripe, džungalo po xadžvalipe thaj bokhaloođipe, so si viktimeteljarutno, bašo savo avela e bari xoli e Devlesiri pe ćhave e opipeutnenge, ane save thaj tumen nekana phirđen, kana dživdinđen ano lende. A akana frden thaj tumen odova sa: bari xoli, xolipe, ćeripe džungalipe, mahripe, ladžipase lafija andar e muja tumare. Ma xoxaven jekh avre, kaj huljađen e purane manuše lesere ćerdipnencar, thaj hurjavden tumen ano nevo, savo nevljarel pes bašo džangljaripe, premalo muj Odolesoro savo les ćerđa, kote nane o Jelino ni o Judejco, o sunetipe ni nasunetipe, o divutno ni Skito, robo ni mukljutno, aj si sa thaj ane sa o Hristos. Hurjaven tumen, akana, sar alosarutne e Devlesere, sumnale thaj ćumudine, ano dindisaripe, šukaripe, šalomnogođipe, kovlipe, lungoinđaripe, inđarindoj jekh avre, thaj jertisarindoj jekh averese te ko isile davijuni pe kaste; sar so o Hristos jertinđa tumenđe, ađahar thaj tumen. A upral kotar sa odova hurjaven tumen ano kamlipe, savo si phanduno pherdipasoro. Thaj o đalom e Devlesoro nek thagarel ane vile tumare, pe savo sijen thaj vičime ano jekh trupo, thaj oven ašarutne. O lafi e Hristoso nek dživdinel ana tumende barvale, ane sako bižajipe sikljoven thaj keren tumen haljovne: psalmencar thaj čirikljane điljencar, thaj ođikane điljencar, ano dindipe đilabindoj e Devljutnese ane vile tumare. Thaj sa so god ćerena lafeja ja ćerdipnaja, sa ćeren ano anav e Devljutnesoro e Isus Hristosoro, ašarindoj e Devlese e Dadese andar Leste. Romnjalen, kandinen tumare romenđe, sar so miazinela ano Devljutno. Romalen, ćumudinen e romnjen tumaren thaj ma xoljaven pe lende. Čhavoralen, kanden e bijanden tumaren ano sa, kaj si akava laćhe e Devljutnese. Dadalen, ma xoljaren e čhavoren tumaren, te na peren e đesa. Robonalen, oven kandine ano sa tumare devljutnenđe po trupo, na ćerindoj semo bipherdune sar kaj e manušenđe laćharena, aj ano jekhćhanipe e vileso, darandoj e Devlestar. Thaj sa so god ćerena, kotar o vilo ćeren, sar e Devljutnese, a na sar e manušenđe, džanglindoj kaj kotar o Devljutno ka len sar padakhutni o kustikutnipe, kaj e Devljutne Isusese kandena. A savo ćerela bihakajipe, ka lel so ćerđa doš, thaj na dikhela pe ko si ko. Devljutnalen, hakajipe thaj jekhisaripe mothoven e robonenge, džanglindoj kaj thaj tumen isitumen Devljutno ko badali. Ane ruđutni oven trajune; oven džangavde ane late ašarisarindoj, ruđindoj jekhune thaj amenge, kaj amenge o Devel te phravel o udar e lafengoro, te mothova e garavdini Hristosiri, baše savi sem thaj phandino, te mothovav la sar so valjani te vakerav. Bižajune oven premalo odola save si avrial, therindoj o vakti. O lafi tumaro te ovel sajekh ano dindipe, loneja lonđardi, te džanen sar valjani sakonese te irinen. Bašo mandar ka mothovel tumenđe sa o Tihik, ćumudino phral thaj paćavino kandutno thaj kupaćerutno ano Devljutno, save bićhaldem ke tumende baše odova jekhuno, te džanel sar sen tumen, thaj te loćharel e vile tumare, e Onisimoja, paćavine thaj ćumudine phraleja, savo si kotar tumendar. On ka mothoven tumenge sa sar si akate. Bićhalel tumenđe sastipe o Aristarh, savo si robo mancar, thaj o Marko, phraleso ćhavo e Varnavineso, bašo savese leljen čhinadipe, te avilo ke tumende, len les – thaj o Isuso, vičime Just, save si andar o sunetipe: on si jekhune mle kupaćerutne bašo Thagaripe e Devlesoro savo sinele maje loćharipa. Bićhalel tumenđe sastipe o Epafras, savo si kotar tumende, kandino e Isus Hristoso; ov jekhune phurederinela pe bašo tumende ane ruđutna te oven pherdune thaj pherde sakone Devlesere kamipaja. Kaj me mothovava baše leste kaj isile baro bućaripe baše tumende thaj bašo odolenđe save si ane Laodikija thaj baš odola ano Jerapolji. Bićhalel tumenđe sastipe o Luka, sastarutno ćumudime, thaj o Dimas. Bićhalen sastipe e phraljenđe ane Laodikija, thaj e Nimfane thaj e ćherutni khanđiri lesiri. Thaj kana ka akaja bićhalutni drabarela pe ke tumende, dikhen kaj te drabarela pe thaj ane Laodikijesiri Khanđiri, a odoja andar e Laodikija kaj thaj tumen te drabaren. Thaj phenen e Arhipese: dikh e sevipeni savi leljan ano Devljutno, kaj te pherola. Bićhalipe sastipe mle vasteja, e Pavlesereja. Ćhiven tumenge sama mle sinđirjendar. Dindipe tumencar! Amin. O Pavle thaj o Silvan thaj o Timotej e Khanđirjaće e Solunskonake savi si ano Devel o Dad thaj o Devljutno Isuso Hristo: Dindipe tumenge thaj šalom kotar o Devel o Dad amaro thaj o Devljutno Isuso Hristo. Ašarinape e Devlese sajekh baše sa tumenđe liparindoj tumen ane ruđutna mle, dindoj godi bićhinadine tumare ćerdipnasere paćapese, thaj bijanuno kamlipe, thaj sipeune adžikerinakoro ano Devljutno amaro Isuso Hristo anglal o Devel thaj o Dad amaro, džanglindoj, phraljalen ćumudime e Devlestar, kaj sijen alosarde. Kaj o evangeliumo amaro na mothovdilo pe tumenđe semo lafencar, aj vi ane zor thaj ano Đi Sumnalo, e pherde paćavipnaja, sar so džanen save sinjamle maškar tumende baše tumen. Thaj tumen dikhljentumen pe amende thaj po Devljutno, lindoj o lafi ane bari belava e lošalipnaja e Đeso Sumnalesoro, ađahar kaj uljen misal sarijenđe e paćavutnenge ane Makedonija thaj ane Ahaja. Kaj kotar tumendar ašundilo o lafi e Devljutnesoro na semo ane Makedonija thaj ane Ahaja, aj vi ane sakoj than buljardilo o paćape tumaro ano Devel, ađahar kaj amenge nane trubuine so te vakera. Kaj on korkore mothovena amendar sar amen tumen adžikerden, thaj sar kotar e idolja irinđen e Devlese, te kanden e dživde Devlese thaj e čaćunese, thaj te adžikeren e Ćhave lesere e badalestar, save vazdinđa andar e mule, e Isuso, savo amen inkalda kotar e bari xoli savi avela. Kaj thaj korkore, pharaljalen, džanen kaj o avipe amaro ke tumende na sinele andodilipe; Aj, poso majangle mudardiljam thaj teljardine sinjam ane Filipija, sar so džanen, amen zorardiljam ano amaro Devel te tumenđe mothovaja o evangeliumo e Devlesoro uzo baro maripe. Kaj amaro mothovipe nane kotar o došalipe, ni kotar o melalipe, ni ano bižajipe, aj sar so amen o Devel čačavđa kaj sem kabilime kaj amenge te dindol o evangeliumo, ađahar vakeraja, a na sar odola save laćharena e manušenge, aj e Devlese savo khuvela e vile amare. Kaj, sar so džanen, nikana na sikavdiljam bašo ašaripe, ni bašo bićaljardipe – o Devel si sadikhutno; Na rodindoj glorija e manušendar, ni kotar tumendar ni averendar. Šajisardam tumenđe te ova ko pharipe sar e Hristosere apostolija; maškarodova, sinjamle kovle maškaro tumende sar e dinutni čući kana barjarela ple ćhavoren. Ađahar dukhadam pala tumende, kaj sema gati te da tumenđe na semo o evangeliumo e Devlesoro aj thaj e ođe amare, odolese so amenđe sijen kamljune. Kaj tumen, phraljalen, inćarena ane godi o ćerdipe amaro thaj e munka; kaj dive thaj raći ćerindoj te na ka ma te ova ko pharipe nikase tumendar, mothovđam tumenđe o evangeliumo e Devlesoro. Tumen thaj o Devel si sadikhutne sar sumnale thaj hakajune thaj paćivaline arakhavdiljam anglal tumende save paćana. Sar so džanen sar sakone jekhune tumendar, sar o dad ple čhavoren, daja tumen sovel thaj zoralinaja thaj mothovaja, te arakhen tumen paćivale e Devlese, savo tumen vičinđa ano plo Thagaripe thaj e glorija. Baše odova thaj amen bićhinadune ašarisajvaja e Devlese, so lindoj o lafi e Devlesoro savi kotar amendar šunđen, leljen la na sar lafi e manušesoro, aj – so hemčaće thaj si – sar lafi e Devlesoro, savi thaj ćerela ana tumende e paćavisarune. Kaj tumen, phraljalen uljen miazune e Devlesere Khanđirjenđe save si ane Judeja ano Hristo Isuso, odolese so thaj tumen munkinden kotar tumare selore jekhune so thaj on kotar o Judejcija, save mudarđe thaj e Devljutne Isuso thaj plen profetonen, thaj amen prastavde Devlese na laćharde, thaj opipeutne si sa e manušenđe, nameklindoj amen te vakera e nadžangledevleserenđe te bi inkalenape; thaj andar odova sajekh te pheren e mera pumare bezehendar, aj len ano agor reslja e bari xoli. A amen, phraljalen, ulavindoj tumendar bašo nesavo vakti, mujeja a na vileja, pana majbut bare manglipasa inćardiljam te dikha e muja tumare. Odolese mangljam te ava ke tumende – bar me o Pavle nekobor droma – thaj aćhavđa amen o satana. Kaj ko si amaro adžikeripe ja lošalipe ja khuvdino ašaripaso? Sar nasijen odova thaj tumen anglal o Devljutno amaro o Isus Hristo kotar lesoro avipe? Kaj tumen sijen amari glorija thaj o lošalipe. Odolese, na šajindoj maj te inćarel, arakhljam bašo laćhipe te aćhova korkore ane Atina, ta bićhalđam e Timoteje, e phrale amare thaj kandino e Devlesoro thaj kupaćerutne amare ano evangeliumo e Hristosoro, tumen te zorarel thaj tumen te vazdel ano paćape tumaro, kaj nikoj te na xasarel pe ane akala bilaćhipa; kaj korkore džanen kaj adava amenđe anglalterđola. Kaj kana sama pana ke tumende, amen phenđam tumenđe anglal kaj ka ovel amen bilaćhipa, thaj sar so džanen odova thaj ulo. Baše odova thaj me, na šajindoj maj te inćerav, bićhalđum te džanav kotar o paćape tumaro, kaj tumen sar na zumavđa o zumavutno, ta kaj amari munka te ovel andodilipe. A akana, kana amenđe o Timotej alo tumendar, thaj anđa amenđe šukar nevipa kotar tumaro paćavipe thaj o kamlipe, thaj kaj amendar sajekh kamljune denatumen godi, manglindoj te dikhen amen, sar thaj amen tumen. Odolese tumencar kovljardilam, phraljalen, tumare paćapnaja ane sa amaro bilaćhipe thaj ćororipe. Kaj akana sem dživde, kana tumen zorale terđovena ano Devljutno. Kaj savo ašaripe šaj te mothova e Devlese baše tumende, bašo sa o lošalipa savesa lošalinape baše tumende anglal o Devel amaro? Raći thaj dive majtatine ruđinape e Devlese te dikha e muja tumare thaj te phera odova so naćhola tumare paćapnase. A korkoro o Devel thaj o Dad amaro thaj o Devljutno amaro o Isus Hristo te bićhalel o drom amaro ke tumende. A tumen o Devljutno nek barvarel thaj te phreperel kamlipnaja jekhune premalo e averune thaj premalo sarijende, savi si thaj amari premalo tumende. Kaj te zorarđon e vile tumare paćivale ano sumnalipe anglal o Devel thaj o Dad amaro kotar o avipe amare Devljutnesoro e Isus Hristosoro sa e sumnalencar leserencar. Amin. A poangle, phraljalen, ruđina tumen thaj phurederina ano Devljutno Isuso, kaj sar so leljen amendar: sar tumen valjani te arakhen tumen thaj e Devlese te laćharen, kaj pana pobut te anglalinen. Kaj džanen save tumenđe sikavipa dinđam andar o Devljutno Isuso. Kaj si akava kamipe e Devlesoro: o sumnalipe tumaro, te arakhen tumen kotar o rumipe, thaj sako tumendar te džanel te ićeri plo trupo ano sumnalipe thaj ano paćivalipe, a na ano zoralo mangipasoro haćaripe, sar thaj o nadžangledevlesere save na pendžarena e Devle; Thaj kaj nikoj te na nakhavel thaj te na globinel ple phrale ane sa odova, kaj si o Devljutno irisarutno baše sa odova, sar so tumenđe thaj anglal vakerđam thaj mothovđam. Kaj amen na vičinđa o Devel ano bikhoslipe, aj ano sumnalipe. Savo, akana, frdela, na frdela e manuše aj e Devle, savo thaj dinđa ple Sumnale Đe tumenđe. A kotar o phraloćumudipe na valjani tumenđe te hraminel pe, kaj sen korkore e Devlestar sikavde te ćumudinen tumen maškar peste, kaj tumen odova thaj ćerena premalo sa e phralja pe sa e Makedonija. Aj ruđina tumen, phraljalen, kaj pana pobut te ćeren, thaj kaj tate te phurederinen tumen te dživdinen šalomno, thaj te dikhen tumare buća, thaj te ćeren tumare korkorune vastencar, sar tumenđe so čhinavđam; Kaj te arakhavdon paćivale premalo odola so si avrijal, thaj kaj tumenđe niso te na valjani. Na manga eke, phraljalen, kaj tumenđe te na ovel bipenđardo so si odolencar save si mule, te ne bi tumen dukhavđona sar okola save nane len adžikeruna. Aj te paćajam kaj o Isus mulo thaj dživdinisajlo, ađahar thaj ka vi o Devel odolen save si mule ano Isuso ka anelen Leja. Kaj tumenđe akava mothovaja e Devljutnesere lafeja kaj amen save ovaja dživde kotar o avipe e Devljutnesoro, na ka resa odolen save kola si mule. Kaj korkoro o Devel e čhinavdipnaja, e arhangelosere krleja thaj e Devlesere trubaja, ka huljel kotar o badali, thaj majanglal o mule ano Hristo ka dživdinisaren; A napal amen e dživde save aćhovaja ka ova khatane lencar vazdime ane nuvere ano reslipe e Devljutnese ano ajri, thaj ađahar sajekh e Devljutneja ka ova. Ađahar kovljaren jekh averen akale lafijencar. A e vaktonendar thaj ćhinade divesendar, phraljalen, na valjani tumenđe te hraminel pe; Kaj tumen korkore šukar džanen kaj ka o Dive e Devljutneso ka avel sar ćor ane raći. Kaj kana vaćerena: Šalom si thaj arakhavdipe, tegani ka avel pe lende biadžikerune o mudaripe, sar e dukh pe khamni romni, thaj na ka našel. Aj tumen, phraljalen, nasijen ano raćipe, kaj tumen odova Dive te arakhel sar ćor. Kaj sen tumen sare ćhave e rošipasere thaj ćhave divesere; nasijam e raćakere ni e tunjarikakere. Odolese ma te sova, sar thaj e avera, aj te ova džangavde thaj te ova bimate. Kaj save sovena, raćate sovena, thaj save maćovena raćate maćovena. A amen save sam ćhave e divesere te ova bimate thaj hurjavde ano oklopo e paćapesoro thaj e kamlipasoro thaj e kacigaja e adžikerune inkaldipase. Kaj amen o Devel na čhinavđa baše bari xoli, aj te la o inkaldipe andar o Devljutno amaro o Isuso Hristo, savo mulo baše amende te bi amen, ja te ova džangavde ja te sova, khatane lesa te dživdina. Odolese kovljardon udžiljune, thaj vazden jekh avre, sar so thaj ćerena. Ruđina tumen eke, phraljalen, den ašaripe odolenđe save ćerena buti maškar tumende, thaj tumare anglathodinutnenđe ano Devljutno, thaj odolenđe save tumen sikavena, thaj len te paćivalen but majbut kamlipnaja baše lengere ćerdipna. Dživdinen ano šalomipe maškar tumende. Ruđina tumen eke, phraljalen, phurederinen e birendonen, kovljaren e hariođutnen, den inćardipe e bizoralen, oven bareođesere premalo sarijende. Dikhen kaj nikoj te na irinel kase džungalipe bašo džungalipe; aj sajekh džan palo šukaripe, thaj maškar tumende thaj premalo sarijende. Lošalen tumen sajekh, ruđinen tumen bi ćhinavdipasoro, pe sa ašarinen; kaj si akava o kamipe e Devlesoro baše tumende ano Hristo Isuso. O Đi ma aćhaven, o profetipe ma peraven. Sa phućljaren, e šukaripnastar ićeren tumen. Kotar o džungalipe ane sako dikhipe duraren tumen. A korkoro o Devel e šalomnipaso te sumnarel tumen pherdine, thaj celo tumaro đi thaj ođi thaj o trupo kaj te arakhel pe bi o rumipe bašo avipe amare Devljutnesoro e Isus Hristoso. Paćavno si Odova savo tumen vičini, savo kaj odova thaj ćerela. Phraljalen, ruđinen tumen baše amende. Bićhalen sastipe sa e phraljenđe e sumnale ćumudipnaja. Dava sovel tumen e Devljutneja te drabarel pe akaja bićhalutni sa e sumnale phraljenđe. Dindipe amare Devljutnesoro e Isus Hristosoro tumencar! Amin. O Pavle thaj o Silvan thaj o Timotej e Solunesere Khanđirjaće ano Devel o Dad amaro thaj o Devljutno Isuso Hristo: Dindipe tumenđe thaj šalom kotar o Devel o Dad amaro thaj o Devljutno Isuso Hristo. Kamutne sam ane sako vakti te ašarisava e Devlese baše tumenđe, phraljalen, sar so miazil, odolese so but barjola o paćape tumaro thaj butisarela pe o kamlipe sakoneso kotar tumende, jekheso premalo avreste. Ađahar kaj amen korkore te ašarisavape tumenđe pe Khanđirja e Devlesere, tumare trajipnaja thaj paćaipnaja ane sa tumare prastavdipa thaj o belave save ićerena. Odova si semno e hakajutne kriseso e Devlesoro, kaj te oven terdisime e Devlesere Thagaripnastar, baše savese thaj mudarđona, poso si hakajune ano Devel te irinel e munka odolenđe save tumen munčinena, a tumenđe e mudardenđe šalom amencar kana ka mothovel pe kotar o badali o Devljutno Isuso ple zorale phakalencar, ane jag rapali, savo ka krisinel odolen save na pendžarena e Devle thaj na teljarđona pe e evangeliumose amare Devljutnesoro e Isus Hristosoro. Asavke ka oven krisime po biagoruno meripe kotar o muj e Devljutnesoro thaj kotar e glorija lesere zorakoro. Kana avela ane odova Dive kaj te glorisinipe ane ple sumnale thaj mothovela pe šukarno ane sa e paćivale, kaj paćajen ane amaro dikhipnasoro vakeripe. Odolese thaj ruđinape sajekh baše tumende, kaj te tumen o Devel amaro ćerela paćivuno vičipnaso thaj te pherel sako kovli irada e laćhipasi thaj o ćerdipna e paćapeso ane zor, te glorisinelpe o anav amare Devljutnesoro e Isus Hristosoro ane tumende thaj tumen ane leste po dindipe amare Devlesoro thaj e Devljutnesoro e Isus Hristosoro. Aj tumen ruđina, phraljalen, ano dikhipe e avipnasoro amare Devljutnesoro e Isus Hristosoro thaj amaro ćidipe ano Leste. Ma den tumen loke te xasaren tumen e gođaja, ni te daran, ni đesa, ni lafeja, ni bićhalutnaja – ano dikhipe amaraja – sar kaj eke ulo o Dive e Hristosoro. Kaj tumen nikoj te na xoxavel ni pe savo ćhand; kaj na ka avel dži majangle na avela o avriperavdipe thaj na mothovela pe o manuš e bikanuneso, ćhavo mudardo. Savo opipeisavol pe thaj barjarel upral o sa so vičini pe Devel ja sumnali, ađahar kaj pe korkoro ka bešel ano hramo e Devlesoro sar Devel, phenindoj baše peste kaj si Devel. Sar na ićerena ane godi kaj tumenđe akava vakerđum pana kana sinjumle ke tumende? Thaj akana džanena so les ićeri te na mothovel pe dži ano plo vakti. Kaj o garajipe e bikanuneso eke ćerela, semo te durjarel pe odova savo akana aćhavela. Thaj tegani ka mothovel pe o bikananutno, kas ka o Devljutno Isus Hristo mudari đesa ple mujesa thaj ka xasarel ple lipeimasere sikavipnaja; Odolesoro si avipe po ćeripe e sataneso e sakona zoraja thaj semnencar thaj aćarale xoxajipnaja, thaj sakone xoxajipnaja e bihakajipnase maškar odola save perena, odolese so na lelje o kamlipe e čaćipasoro te bi inkalena pe. Thaj odolese lenđe o Devel ka bićhalel zor e xoxajipnasiri, te paćan o xoxajipa; Te oven krisime sare save na paćaje e čaćipnase, aj kamljinde o bihakajipe. A amen sem kamune sajekh te ašarinape e Devlese baše tumende, phraljalen, ćumudime kotar o Devljutno, so tumen o Devel alonđa kotar o širdipe bašo inkaldipe ano sumnalipe e Đesoro thaj paćape e čaćipnasoro, pe savo tumen vičinđa andar o evangeliumo amaro, te len e glorija amare Devljutnesiri e Isus Hristosiri. Ađahar akana, phraljalen, terđoven zorale thaj ićeren o vakeripa, savencar sijen sikavde, ja amare lafeja, ja e bićhalutnaja. A korkoro o Devljutno amaro o Isuso Hristo, thaj o Devel thaj o Dad amaro, savo amen kamlja thaj dinđa kovljaripe bimerutno thaj šuži adžikerutni ano dindipe, mek kovljarel e vile tumare thaj te zorarel tumen ano sako lafi thaj šukaresoro ćerdipe. Majpalal, phraljalen, ruđinen tumen baše amende, kaj o lafi e Devljutneso sigo te buhljol thaj te glorisini pe sar thaj ke tumende; Thaj te inkalape kotar e bilaćhe thaj džungale manuša, kaj na mangena sare o paćape. Aj paćavino si o Devljutno; Ov tumen ka zorarel thaj arakhel kotar o bižajutno. A dandinape ano Devljutno baše tumende, te ćeren thaj kaj ka ćeren odova so tumenđe čhinavaja. A o Devljutno mek opravini e vile tumare po kamlipe e Devlesoro thaj po trpipe e Hristosoro. Ćhinavaja eke tumenge, phraljalen, ano anav amare Devljutnesoro e Isus Hristosoro, te durjaron kotar sako phral savo dživdinela birendone, a na po mothovdipe savo leljen amendar. Kaj korkore džanen sar valjanena te dikhentumen pe amende, kaj na dživdinđam birendine maškar tumende, ni pak badavake na xaljam ane nekaste maro, aj pharipnaja thaj munkaja, ćerindoj buti dive thaj raći, te na bi ovaja ko pharipe nekase tumendar; Na sar te na ovel amen o thagaripe, aj kaj amen te da tumenđe bašo misal, te bi dikhljardona pe amende. Kaj kana sinjamle ke tumende, akava tumenge ćhinavdam: Ako nesavo na mangela te ćerel buti, ma vi te xal. Kaj ašuna kaj nesave maškar tumende dživdinena birendone, na ćerena niso, a ane sa haminena pe. Odolese asavkenđe ćhinavaja thaj ruđina len ano Devljutno amaro Isuso Hristo kaj šalomime te keren buti a plo maro te han. A tumenge, phraljalen, te na ovel phare šukaripe te ćeren. Ako li ko na šunela o lafija amare ane akaja bićhalutni, odole semninen, thaj ma amalinen tumen leja, te bi ladžala; Aj le ma dikhen sar dušmano, aj haljovinen le sar phrale. A korkoro o Devljutno e šalomnipaso mek tumenge del šalom sajekh thaj ane sako situacia. O Devljutno sarijencar tumencar! Bićhalava sastipe mle vasteja e Pavlesereja, so si semno ane sako bićhalutni, ađahar hraminava: Dindipe amare Devljutnesoro e Isus Hristosoro sarijencar tumencar. Amin. O Pavle, apostoli e Isus Hristosoro po ćhinavdipe e Devlesoro, amare Inkaldipneso thaj Devljutneso e Isus Hristoso, amara adžikerutnake, e Timotejese, čaćine ćhavese po paćape, bahtaripe, dindipe, šalom e Devlestar amare Dadestar thaj o Hristo Isuso amaro Devljutno. Sar so tut ruđinđum džapeindoj ane Makedonija, te aćhove ano Efes thaj te čhinave nesavenđe te na sikljon averćhane, ni te len pes paramizencar thaj biagorune bijanutnencar, save pobut legarena ko čingara na li po kandipe e Devlese ano paćape. A reslipe e čhinavdipaso si kamlipe kotar khoslo vilo thaj mincope laćho thaj paćape e nadujmujengoro, kotar save nesave durile thaj irinđe ano čućo vakeripe, manglindoj te oven sikamne e kanunese a na haljovena ni so vakerena ni so đanena. A džana kaj si o kanuni laćho te ole ko čaćine trubuisarela. Džanglindoj odova kaj o kanuni naj ćerdo e hakajutnese, aj bašo bikanutnenđe thaj nakandutnenđe, bipaćavutnenđe thaj bezehalenđe, napaćamnenge thaj melalenge, dadenđe mudarutnenge thaj dejenđe mudarutnenge, ratvalenđe, rumutnenđe, buljašenđe, manušećorutnenđe, xoxamnenđe, bangexapesovljenđe, thaj te si so aver opipeune saste džanipase. Premalo evangeliumo e glorijako e bahtale Devle, savo si mange dindino. Thaj ašarinape e Hristo Isusese amare Devljutnese savo mange dija zor, so bašo paćavunese leljama, thodindoj po kandipe. Man, savo angleder sema džungalutno thaj tradino thaj namekljutno, aj sema maznome, kaj odova andar o bidžanglipe ćerdem, ano bipaćajipe; Aj pana majbut butisajlo o baxtaripe amare Devljutneso e paćapnaja thaj kamlipnaja ano Hristo Isuso. Čaćino si o lafi thaj sakone lipeso paćivuno kaj o Hristo Isuso avela ano them te inkalel e bezehutnen kotar save sem angluno me. Aj baše odova sema maznome te bi o Isuso Hristo mothola pe mande anglune sa o lungotrpipe, bašo misal odolenđe save ka paćan ano leste bašo bimeripasko dživdipe. A e bimeripnasere Thagarese, binakhljutnese, bidikhljutnese, jekhunese bare gođovaresere Devlese, paćiv thaj glorija ano bimeripasoro bimeripe. Amin. Akava tuće čhinavdipe dava, ćhaveja Timotej, phandine angleder profetipnastar kotar tu kaj pe lende te mare tut laćho maripe, isindoj paćape thaj laćho gođipe, save nesave frdinde trpinđe peripe e beroso e paćapeso; Maškar save si o Imenej thaj Aleksandar, saven dijem e satanase, te sikljoven te na mahrinen. Ruđinav, akana, anglal o sa te kerel pe ruđipna, ruđipe, mangipa, baxtaripe baše sa e manuša, bašo thagara thaj baše sa save si ano thagaripe, kaj polokho thaj šalomno dživdipe te dživdina ane sako pherdopaćape thaj paćivalipe. Kaj si akava laćhe thaj kamle anglal o Inkalutno amaro Devel, savo mangela kaj sa e manuša te inkalenpe thaj te aven ano penđaripe e čaćipeso. Kaj jekh si Devel, thaj jekh maškarutno maškar o Devel thaj o manuša, manuš Hristos Isuso, savo pes dinđa ano ćinipe baše sarijenđe, mothovdipe ane semnome vaktija, bašo save sem me thodino vakerutno thaj apostoli – čaćipe vakerava ano Hristo, na xoxavava – sikamno e nađangledevleserengoro ano paćape thaj čaćipe. Mangava, akana, kaj o roma te ruđinen pe ko sako than, vazdindoj e sumnale vasta bi e xolinako thaj dujegndipasoro. Jekhune ađahar, thaj o romnja ane ličime šeja, ladžaja thaj paćivalipnaja te laćharen pe, na khuvdunanca, ni sumnakajesa, ni klejenca, ni kuć fostanjencar, aj laćhe ćerdipnancar, sar so miazinela e romnjenge save mangle te kamlisarenpe e devleserepaćivalipase. E romni nek sikljol ano šalom sakone peravnipnaja; Aj e romnjake ni mekava te ovel sikamno, ni te thagarel e romeja, aj te ovel šalomni. Kaj si o Adam ćerdo angluno, a napal e Eva; Thaj o Adam ni xoxavdilo, a e romni xoxavdili, pa ćerdili bipaćamni; Aj ka inkalel pe bijandipnaja e ćhavoren, te aćhile ano paćape thaj kamlipe thaj ano sumnalipe e paćavalipnaja. Čaćino si o lafi: ako ko episkope mangela, laćho ćerdipe mangela. Aj o episkopo valjani te ovel bi manevako, jekh romnjakoro rom, haljovuno, gođaver, paćivalo, điađikerutno, kadari te sikavel; Na matoro, na mudarutno, na zelenaši, aj laćheđeso, šalomkamuno, na lovengokamuno; Savo ple ćhereja laćhe vastarela, isile kandine ćhavore sakone ašaripnaja; A ako nesavo na džanela ple ćhereja te vastarinel, sar ka šaj te phurederinel pe baše Devlesiri Khanđiri? Na nevotrušulimo, te na bi baripnela pe thaj perela ano krisipe e bengese. A valjani te ovel le thaj laćho dikhipnasoro vakeripe kotar odola save si avrijal, te na bi perela ano lađipe thaj xoxavipe e bengesoro. Ađahar thaj e đakonija valjani te oven paćivale, na dujemujengere, na save but mol pijen, na savo but mangel pese, save isile garavdini paćapesi ane khoslo gndipe. A thaj akala majanglal te kontrolinenpe, pa tegani te kanden, poso si bi manavakere. Ađahar thaj e romnja valjani te oven ašaripne, te na phukaven, haljovine, paćivane ano sa. E đakonija te oven roma jekhe romnjaće, save laćhe vastarena e čhavorencar thaj ple ćherencar. Kaj save laćhe kandle, resena pese laćhi skala thaj baro tromalipe ano paćape ano Hristo Isuso. Akava tuće hraminav ađikerindoj kaj ka sigate avava ke tute; Ako li zabitisajlem, te džane sar valjani te arakhetu ano kher e Devlesoro, koja si Khanđiri e dživde Devlesiri, direko thaj tvrđava e čaćipasiri. Thaj hemčaće bari si garavdini e pherde paćapesiri: O Devel mothovdilo ano trupo, čačavda pe ano Đi, sikavdilo e phakalenđe, vakerđa pe e nađangledevleserenđe, paćajepe ano them, vazdisalo ane glorija. A o Đi haljovine vakerela kaj ka ane palune vaktija ka crden pes nesave kotar o paćape ašundoj e đen e xoxajipnasere thaj o džanipe e bengesere, ano dujmujipe e xoxamnengo, kolesoro si mincope phabardino, save čhinavena te prandon pes, thaj rodena aćhavdipe kotar o xape save o Devel ćerđa kaj te ašaripasa lena len o paćavne thaj odola save penđarde o čaćipe. Kaj si sako ćerdipe e Devlesoro laćho thaj niso nane bašo frdipe kana lela pe ašaripnaja. Kaj sumnarela pe e Devlesere lafeja thaj e ruđutnaja. Akava phurederindoj o phralja, ka ove laćho kandino e Isus Hristoso, barjardo e paćapnesere lafonencar thaj laćhe džanipnaja savo thaj leljan. A e melalendar thaj e babengere paramićendar citut lendar thaj ćer buti ano pherdo paćape. Kaj e trupeso ćeripe bašo hari si labhino, a o pherdo paćape si labhino ano sa, poso ola isila lafidindipe akale dživdipasoro thaj e avutnesoro. Akava si čaćino lafi thaj paćivalo sakone leipnase; Kaj baše odova thaj ćeraja thaj ova ladžarde, kaj adžikerape ano dživdo Devel, savo si inkalutno sa e manušenge, ulavdine o paćavutne. Akava ćhinavdisar thaj sikljov. Nikoj te na teljarel klo ternipe, aj ov misal e paćavnenge ane lafija, ano dživdipe, ano kamlipe, ano ođi, ano paćape, ano khoslipe. Džikote na avava arakh po drabaripe, kovljaripe thaj sikljope. Ma aćhav o ašaruno dindipe ana tute savo tuće si dindo andar o anglalmothovdipe ćhivipnaja o vasta e phurederutnesere pe tute. Akava sikljov, ane akava terđov, kaj o anglipe klo sikavel pe ano sa. Arak pe tute thaj po džanipe, trajin ane odova; kaj ćerindoj akava, ka inkale thaj tut thaj odolen save šunena tut. E phure ma te mahrine, aj le phurederisar sar dade; e ternen sar phraljen; E phuranjen sar dajen; e ternjen sar phenjen, ano sako khoslipe. E phivljen paćivalisar, save si čaće phivlja. Ako li savi phivli isila ćhavore ja unukija, mek sikljona majangle plo ćher te paćivalen, thaj o dugo te irinen e bijandenge; kaj akava si šukar thaj kamime anglal o Devel. A hakaj phivli thaj korkorutni adžikerela pe ano Devel thaj nakhavel pes ane ruđutna thaj ruđipena raći thaj dive. A odoja savi mekljape ano čajljardipe, dživdi si muli. Thaj akava te ćhinave, te oven bi manavako. Ako li ko plendar a uladine e ćherutnendar na gndinela, vazdinđa pe vas e paćapestar thaj pođungalo si e bipaćavutnestar. Kaj te na hraminel pe maškar e phivlja poterni kotar e šovardeš berša, savi sinele romni jekhe romesiri, mothovdini ane šukar ćerdipna, te e ćhavoren barjarđa, te ašuđaruni sinele, ako e sumnalengere pre thovđa, ako e bibaxtalenđe ažutinđa, ako đeli palo sako šukar ćerdipe. A e terne phivljen ma le, kaj kana len o zoralo haćaripe ulavela kotar o Hristo, mangena te dendonv odola perena e krisipase so angluno dindo lafi frdinde. A uzo odova sikljona thaj e bibućaće, phirindoj andar o ćhera; thaj na semo e bibućaće, aj si thaj ćhibalja thaj đanglekamime, pa vakeren so na valjani. Mangava, akana, kaj o terne phivlja te dendon, ćhavoren te bijanen, o ćher te ćherinen, thaj nisavo motivo te na den e opipeutnese bašo rupuzipe. Kaj nesave eke irinđe palo satana. Ako savo paćavino ja paćavuni isila phivlja, nek phurederinel pes lendar, te na pharardol e Khanđiri, te bi oj šajine te phurederinel pe e čaćune phivljendar. E rašaja save si laćhe phurederutne paćivune si dujđutune paćivalipeso, ulavdine odola save ćerena ano mothovdipe thaj siklipe. Kaj o Lil vakerela: E guruvese savo ćhinel điv ma te phande o muj, thaj: o Bućarno si paćivalo ple poćindako. Opipe e rašajendar ma le davije, semo po fundo duj ja trin jaćhencadikhutne. Odolen save ćeren doš mahrisar anglal sarijende, kaj thaj o avera te ovel len dar. Dava tut sovel anglal o Devel thaj o Devljutno Isuso Hristo thaj e alosarde phakale kaj akava te ićere bi dujegođengoro, thaj te na kere niso po korkoro haćaripe. Ma ćhuv te vasta ni pe kaste sigo, ni ma te le leipe ane avresre bezeha. Arak tut khoslo. Maj ma te pije semo pani, aj pij po hari mol, baše klo želuco thaj klo butivareso nasvalipe. E bezeha nesave manušengoro si putarune thaj anglalilen e krisese, a ke nesave si mothovđon pale odova. Ađahar si thaj o šukar ćerdipna dikhutne; a vi te thaj naj, na šajin te garaven pe. Odola save si robija telal o pharipe nek ple devljutnen vardisaren paćivale sakone paćivalipase, te ne bi džungarena ko anav e Devlesoro thaj ko siklipe. A saven isilen paćavne bašo devljutne, ma te oven premalo lende nahajutne odolese so si phralja, aj nek lenđe pana pošukar kandena, kaj si odola save lena lengoro laćhoćeripe, paćavine thaj kamle. Akava sikljov thaj phurederin. Te nesavo averćhane sikljola thaj na ićeri pe ko saste lafija amare Devljutnesere e Isus Hristosere thaj sikljojba kotar o pherdo paćape, barikanisajlo te niso na džanindoj, aj namborome si kotar o phućipa thaj ćingaripa, kotar soste ikljola haćaripe bićaljardipaso, ćingara, džungaripa, bižajune gndipa, čuće gođaveripa e manušengere rumime gođengere thaj lindine e čaćipastar, save gndinen kaj si o pherdo paćape hajing e theripasoro. Citut asavkendar. A o pherdo paćape si baro theripe kana sem čajljarde odolesa so isiamen. Kaj niso na anđam ano them; haljovine si kaj niso našti ni te legara. A kana isi amen xabe thaj hurjavdipe, te ova akaleja čajljarde. A save mangena te barvajon, perena ano zumavdipe thaj xoxajipe, thaj ane bute dile thaj xasaripase manglipa, save bucinena e manušen ano xasaripe thaj mudaripe. Kaj si e darhin sa e đungalipastar o kamipe e lovengo, saveste nesave dindoj pes rigosajle kotar o paćape thaj ande pe peste munke butune. A tu, o manušeja e Devlesoro, naš kotar odova, a dža palo hakajipe, pherdo paćape, paćavipe, kamlisipe, trpipe thaj krotkoripe. Mar tut laćhe ćerdipne paćipnaja, dole tut bašo bimeripnaso dživdipe ane savo san vičime, thaj mothovđan laćho mothovdipe anglal e bute jaćhencadikhutne. Ćhinava tuke anglal o Devel savo pe sa dživdipe dela thaj anglal o Hristo Isuso savo jaćhencadikhinđa anglal o Ponti Pilato laćho mothovdipe: Te ićere o čhinavdipe khoslo thaj bidošakoro dži o sikavipe amare Devljutnesoro e Isus Hristosoro, savo ano plo vakti pes ka mothovel o baxtardino thaj jekhuno Thagarutno, Thagar e thagarengoro thaj Devljutno e devljutnengoro, ov savo jekhuno isile bimeripe thaj dživdinela ano bipašeutno rošipe, Kas nikoj e manušendar na dikhlja ni šaj te dikhel; Lese paćiv thaj zor bimerutni. Amin. E barvalenđe akale themeso ćhinav kaj te na but barjaren pe, ni te dandoven pe ano barvalipe naarakhadipnaso, aj ano Devel e dživdipaso, savo amenđe dela sa butune po trubujipe; Mek laćhe ćerena, mek barvajon ane laćhe ćerdipna, nek oven dindune, amalikane, gatindoj pese laćho temelji bašo avutnipe, te len bimeripnaso dživdipe. O Timoteja, arak tuće o dindo šej, durindoj e melale thaj čuće vakerimatendar thaj poloćipendar xoxamne akhardine džanipestar, savese pak nesave inćardepe thaj pele kotar o paćape. Dindipe tuja. Amin. O Pavle, apostoli e Hristo Isusoso po kamipe e Devlesoro, premalo dindo lafi e dživdipasoro ano Hristo Isuso, e Timotejese, ćumudine ćhavese: Baxtaripe, dindipe, šalom kotar o Devel o Dad thaj o Hristo Isuso Devljutno amaro. Ašarinape e Devlese, savese kandava kotar e anglapapuja ano khoslo gndipe, so tute bićhinadine dama godi ane mle ruđutna dive thaj rat; Dindoj godi ke asva kle, mangava te dikhav tut ta lošipnaja te pherđovav. Ane godi si mange e nadujemujengo paćape klo, savo majanglal thanardilo ane kli baba e Loida thaj daj kli e Evnikija, a paćavino sem kaj si thaj ane tute. Andar odova motivo liparav tuće te rapedisare o baxtaruno dindipe e Devlesoro savo si ana tute andar o ćhuvipe mle vastengoro. Kaj amenge o Devel na dinđa đi daravipnaso, aj zorako thaj kamlipasoro thaj sorobižajipnasoro. Ma ladža, akana, e mudaripastar amare Devljutnestar, ni mandar robo lesoro, aj ov mange mancar mudardino ano evangeliumo pe zor e Devlesiri, savo amen inkalda thaj akharđa sumnale akhardipasa, na pe ćerdipna amare, aj pe plo kamipe thaj dindipe dindo amenge ano Hristo Isuso anglal e bimerutnesere vaktijende, a akana mothodino mothodipaja amare Inkalutnesoro e Isus Hristoso, savo peravđa o meripe thaj strefinđa o dživdipe thaj naćhordipe e evangeliumoja, baše save sem me ćhuto mothodutno thaj apostoli thaj sikamno e nađangledevleserenge. Andar odova motivo akava thaj mudarđovava, aj na lađava; kaj džanav Kase paćajem, thaj paćav kaj si Ov kadari te arakhel o šej mlo baše odova dive. Sar misal saste džanipasoro te ovel tut odova so ašundan mandar ano paćape thaj kamlipe ano Hristo Isuso. Laćho amaneti arakh e Đesa Sumnalesa, savo dživdinela ana amende. Odova džane kaj ulavdile mandar sare odola ane Azija, maškar save si o Figel thaj o Ermogen. O Devljutno nek del dindipe e Onisiforesere ćherese, kaj man but droma zorarda, thaj e sinđirendar mlendar na ladžandilo, aj avindoj ano Rim pana majgrižune man rodinđa thaj arakhlja. Mek lese del o Devljutno te arakhel dindipe ko Devljutno ane odova dive. A kobor mange ano Efes kandinđa, tu najšukar džane. Bašo Hristo trubul sa te nakhavelpe. Tu, akana, ćhaveja mleja, zorardov ano dindipe savo si ano Hristo Isuso; Thaj so ašundan kotar mande anglal e but jaćhencadikhutne, odova de e paćavne manušenge, save ka oven džande thaj e averen te sikaven. Tu, ake, dukhav tut sar laćho urumno e Isus Hristosoro. Nijekh urumno na khuvela ane buća e aćarutne dživdipase, te bi pherela o kamipe e urumneanglisarutnese. Ako ko thaj marela pe, na lela o khuvdino te na marela pe pe regula. Phuvljakorobućarno savo ćerela valjani angluno te xal kotar o bijanipa. Haljov so vakerava; a o Devljutno nek tuke dela bižajipe ano sa. Ićer ane godi e Isuso Hristo e dživdinisarutne andar e mule, kotar e kućin e Davidesiri, po mlo evangeliumo, baše save dukhavav ma dži e korkore sinđirja sar džungaloćerutno, aj o lafi e Devlesoro na dela pe te phandel pe. Odolese inđarava sa bašo alosarde, kaj thaj on te len o inkaldipe savo si ano Hristo Isuso e bimeripnasere glorijasa. Čaćimasoro si o lafi: te Lesa muljam, Lesa thaj ka dživdina; Te trpinđam, Lesa thaj ka thagara; te li duriljam, thaj Ov amendar ka durjol; Te li nasijam paćavne, Ov aćhola paćavno, kaj našti korkoro pestar te durjol. Akava ćhuv sama, dindoj sovel len anglal o Devljutno kaj te na xanpe, so nane ni kotar nisavo theripe aj po peripe odolenđe save ašunena. Phurederisav kaj te mothove tut šukar anglal o Devel, bućarno savo nane les sostar te ladžal thaj savo vorto vastarela e čaćipnasere lafeja. A e melale čuće vakerimatendar cide tut; kaj asavke pana pobut ka anglalisaren ano nadevelipe. Thaj o lafi lengoro sar dživdi dukh ka xal trujal peste, maškaro save si o Imenej thaj o Filit, save cidisajle kotar o čaćipe, vakerindoj kaj o dživdisaripe eke sinele, thaj peravena o paćape nesavengo. Aj zorale terđola o temelji e Devleso, isinindoj akava štambilji: Penđari o Devljutno odolen save si lesere, thaj: Nek cidel pes kotar o bihakajipe sako savo vičini o anav e Devljutnesoro. A ano baro ćher nane semo sumnakajune thaj rupune vasija, aj vi kaštune thaj phuvljakere, thaj e jekhune si bašo paćiv a e aver bašo teluno trubuipe. Te, akana, ko khosela pes kotar akala, ka ovel vaso bašo paćiv sumnardo thaj labhalo e ćherutnese, gatime bašo sako šukar ćerdipe. Naš kotar e ternipasere manglipa, a ićertut pe hakaj, paćape, kamlipe, šalomipe sarijencar save vičinena e Devljutne kotar o khoslo vilo. A dile thaj nadžangle phućipendar cide tut, džanglindoj kaj bijanena ćingara; O kandino eke e Devljutnesoro na valjani te čingarel pe, aj te ovel poloćino premalo sarijende, sikavutno, nadžungalo, savo kovlipnaja mahrinela odolen save opipeinenpe te bi lenge sar o Devel dela jertipe bašo džanipe e čaćipnasoro, thaj te inkalenpe andar e bengesiri astarutni savo len dživde astarđa te ćeren o kamipe lesoro. Aj akava džan kaj ka ano palune dive ka oven phare vaktija. Kaj o manuša ka oven korkorećumudime, lovengećumudime, korkoreašarutne, barikane, mahrutne, nakandutne e bijandenđe, nabaxtarune, nađangledevlese, bihaćarutne, nabarašutne, xoxamnedavijutne, nainćarutne, nakovljutne, nalaćhećumidutne, avralćhivutne, silejđije, phućardine, pobut gudlećumudine kotar develćumudime, save silen dikhipe pe pherdo paćape, a lesere zoratar cidinđepe. Thaj cide tu akalendar. Kaj si kotar akala odola save ćhivena pe ano khera thaj crdinen e džuvljen save si ladavde bezehenca thaj legavne savetane manglipnaja, save si sajekh sikavde, thaj nisar na šaj te aven dži o džanipe e čaćipnasoro. Sar so o Janija thaj o Javrija opipeisajle e Mojsijese, ađahar thaj akala opipeisavon e čaćipnase, manuša e rumime gođakere, bipaćavine ano paćape. Aj na ka šaj maj te anglinen; kaj lengoro bigođipe ka ovel jakhenca dikhuno sarijenđe, sar so ćerdilo thaj e okolencar. A tu aviljan palo mlo džanipe, e dživdipase, orijentipase, paćapase, lunđemunćimase, kamlipase, trajipnase, prastavipnase, mudaripnase save mange ule ane Antiohija, ane Ikonija, ane Listra. Save prastavipna inđardem thaj kotar sa inkalda man o Devljutno! A thaj sare save mangena te dživdinen pherdo paćape ano Hristo Isuso ka oven prastavdine. A e džungale manuša thaj o xoxamne ka anglalinen kotar o džungalipe ta naupre, xoxavindoj thaj xoxavindoj pes. Aj tu terđov ane odova so siklijan thaj so paćavdilan, džanglindoj kastar siklijan, thaj so andar o čhavoripe džane e Rašajengere dokumentija save šaj te bižajinen tut bašo inkaldipe andar o paćape ano Hristo Isuso. Sa si o Lil devlejapherdo, thaj therino bašo sićipe, bašo mahripe, bašo laćhardipe, bašo edukipe ano hakajipe, te ovel pherdino e Devlesoro manuš, gatime bašo sako laćho ćerdipe. Me tut, akana, dava sovel anglal o Devel thaj amaro Devljutno o Isuso Hristo, savo ka krisinel e dživdenđe thaj e mulenđe ple mothovipnaja thaj ple Thagaripnaja: Mothov o lafi, ćer ano vakti thaj bivakti, mahrin, darav, kovljar, sakone trajipnaja thaj sikavipnaja. Kaj ka avel o vakti kana e saste džanipa ni ka inđaren, aj ka pe ple manglipa ka ćedel pese sikamnen kaj olen te araven ko kana; Thaj ka irinen e kana kotar o čaćipe, a ka irinen pes e paramićenđe. A tu ov inćarutno ano sa, trpin o džungalipe, ćer o ćerdipe e evangelistoso, o kandipe klo pher. Kaj me eke pašljardivav pe viktima, thaj o vakti mle džavipnasoro alo. Laćho maripe marđum, o prastipe agorinđum, o paćape ićerđum. Akana man adžikerel o khuvdino e hakajeso, savo mange ane odova Dive ka del o Devljutno, hakajutno Krisari; aj na semo mange, aj sarijenđe save kamlipnaja adžikerena o Avipe lesoro. Phurederisav mange te ave sigate. Kaj man o Dimas meklja, kamlindoj akanutno šelberšipe, thaj đelo ano Solun; Kriskent ano Galatij, o Tit ane Dalmacija; o Luka si korkoro ke mande. E Marko le thaj ane les tuja, kaj manđe si asavko valjani baše e kandini. A e Tihiko bićhalđum ano Efes. Kana ka ave, ane mange o mantili kaj mekljum ane Troada ko Karpo, thaj e pustika, ulavdune odola kotar o pergamento. O Aleksandar o kovači but mange džungalipa ćerđa. Mek lese o Devljutno poćinela pe ćerdipna lesere. Lestar thaj tu arakh tut; kaj but opipeinđape amare lafonenge. Paše ke mlo angluno arakhavdipe nikoj na aćhilo mancar, aj man sare aćhavde. Ma lenđe te đenel pe! Aj o Devljutno sinele mancar thaj zorarda man, kaj andar mande te buhljol o vakeripe thaj te ašunen sare e nadžangledevlese; thaj sema inkaldo andar o muj e lavongoro. Thaj ka inkalel man o Devljutno kotar sako džungale ćerdipna thaj ka inkalel bašo Thagaripe plo e badaleso; Lese glorija ane bimeripasoro bimeripe. Amin. Bićhal sastipe e Priskilese thaj e Akilese, thaj e Onisiforoso kher. O Erast aćhilo ano Korint, a e Trofimo meklem ano Milit nasvalo. Phurederin tut te ave anglal o jevend. Bićhalel tuke sastipe o Evul, thaj o Pud, thaj o Lin, thaj o Klaudija, thaj sa o phralja. O Devljutno Isus Hristo nek ovel e đesa klesa. Dindipe tumencar. Amin. O Pavle kandino e Devlesoro thaj apostoli e Isus Hristoso po paćape e Devlesere alosardengo thaj penđaripe e čaćipnaso pherdo paćapnasoro, bašo adžikeripe e bimeripnasere dživdipnase savo angle e biagorune vaktija dinđa o lafi o Devel savo na xoxavela, a mothovđa ane čhinavdine vaktija o lafi plo mothovdipnaja, kova si maje dindino po čhinavdipe e Inkalutneso amare Devleso. E Titose, čaćune ćhavese po khatano paćape: Bahtaripe, dindipe, šalom, kotar o Devel o Dad thaj o Devljutno Isuso Hristo, Inkalutno amaro. Odolese mukljum tut ko Krit te laćhare so si bilaćhardino, thaj te thanare pe sa foronende šerutnen, sar so tuke me ćhinavđum: Te si ko bi manavako, jekhe romnjakoro rom, thaj isile čhavore paćavinde, savenđe na vakerena kaj si mukljardine ja nakandine. Kaj o episkopo sar Devlesoro ćhervastarutno valjani te ovel bi manavako, na korkoro-khamuno, na baro xoljarno, na matoro, na mudarutno, na kamatari; Aj ašuđarutno, laćhekamutno, gođaver, hakajuno, pherdo paćavino, inćardutno; Savo zorale ićerela pe e čaćune lafeste aćhune pe odova sikavipe, kaj bi ovela kabuluno thaj te sikavela ano sasto džanipe thaj te ukorini odolen save opipena pe. Kaj isi but nakandine, čućelafonengere thaj xoxamne, ulavdine save si andar o sunetime, savenđe valjani e muja te phandljon, save cela ćhera ruminena sikavindoj so na valjani, bašo napaćivalo therdipe. Phenđa nesavo kotar lendar, lengo korkoro profeto: Krićani, sajekh xoxamne, džungale divutna, xadžvale bibućarne. Sadikhutno vakeribe si akava čaćuno. Te na šunen e judejengere paramića, ni o čhinavdipa e manušengere save teljarena o čaćipe. E khoslenge sa si khoslo, a e bikhoslenge thaj bipaćamnenge niso nane khoslo, aj si bikhoslo thaj lengiri godi thaj o gindipe. Vakerena kaj džanen e Devle, a e ćerdipnaja lestar durarđona; kaj si melale thaj bikandine thaj bikaderime bašo ma save laćhe ćerdipna. A tu vaker so miazinela pe sasto sikljovipe. E purane te oven haljovne, aćarune, džande, saste ano paćape, ano kamlipe, ano trpipe. E puranja geja te ićeren pe sar miazinela e sumnalenge; te na mahrinen, kaj but te na robinen e moljaće, te sikljon e laćhipnase, te haljovisaren e ternje romnjen: te kamen e romen, te kamen e čhavoren, te oven vakerdime, khosle, ćherurotne, laćhe, kandine ple romenđe, te ne bi akušela pe ko lafi e Devlesoro. Ađahar thaj e ternen phurederin te oven paćivale. Ano sa mothov tut bašo dikhipe ane laćhe ćerdipna: ano sikljope sar valjani, paćivalipe, khoslipe, lafi sasto, bidošakoro, te ladžardol o opipeutno ten a ovele niso džungale te phenel baše amende. E robija te oven kandine ple devljutnenđe, te oven lenge laćhe ano sa, te na vakeren opipne, te na ćoren, aj te mothoven pherdino paćape ano sa, te bi o džanipe amare Inkalutnesoro e Devlesoro laćharena ano sa. Kaj mothovdilo o dindipe e Devlesoro inkaldipe sa e manušenđe, savo amen sikavela te meka o bidevljutnipe thaj e phuvljakere zorale manglipastar, thaj te dživdina haljovine, čaćine thaj pherdine paćape ane akanutno šelberšipe, adžikerindoj kovli adžikerutni thaj sikavdipe e glorijako e bare e Devlesere thaj e Inkalutne amare e Isus Hristo, savo dinđa pes baše amende te bi amen ćinela kotar sako bikanunipe, thaj te khosel bašo peste seloro alosardo savo bućarela ane laćhe ćerdipna. Akava vaker thaj phurederin thaj mahrin e pherde thagaripnaja; nikoj te na teljarel tut. Lipar lenge te oven telalćerdine thaj kandine e šerutnunenge thaj e thagarutnenge, gatime bašo sako laćho ćerdipe; Nikas te na akošen, te na keren čingara, te oven gudle, te mothoven laćhoođipe premalo sa o manuša. Kaj thaj amen sinjamle nekana nahaljovne, bitelalćerdine, xoxavime, robindoj savetane manglipnase thaj čajljardipnase, nakhavindoj o dživdipe ano džungalipe thaj korikanipa, melale, mrzindoj jekh avre. A kana mothovđa pe o laćhipe thaj manušesoćumudipe e Devle, amare Inkalutnesoro, na bašo ćerdipna hakajutna save amen ćerđam, aj pe sako dindipe inkalda amen banjaja neve bijandipnaso thaj nevljardipnaja e Đesa Sumnalesa, save ćhorda pe amende butune andar o Isus Hristo Inkalutno amaro, te bi, čačavdine lesere dindipnaja, ovaja kustikutne e bimeripnasere dživdipnase sar so adžikeraja. Čaćuno si akava lafi, thaj mangava odova te čačavdine, sar bi odola save paćaje e Devlese phurederina te anglalinen ane laćhe ćerdipna. Akava si e manušenge laćhe thaj therune. A diline phućipendar thaj njamonendar thaj poloćipendar thaj ćingarendar e kanunestar durov tu; kaj si odova bitherduno thaj čućo. Manuše jeretiko po angluno thaj dujtuno phurederipe durov tu, džanglindoj kaj asavko rumisajlo, thaj kerela bezeh; korkoro pes krisinđa. Kana ka bićhalav ke tute e Artemo ja e Tihiko, phurederin tut te ave ke mande ano Nikopolj, kaj čhinavđum kaj odothe te jevendinav. O Kanunutno Zinoso thaj e Apoloso bućarnune gatisar, te na najstalipen ni ane soste. Aj thaj amare nek sikljon te anglaninen ane laćhe ćerdipna kaj goda si trubune, te na oven bi bijanipnaso. Bićhalen tuke sastipe sare save si mancar. Bićhalav sastipe sarijenđe save amen ćumudinen ano paćape. Dindipe sarijencar tumencar. Amin. O Pavle, phandino e Hristo Isusoso, thaj o phral Timotej, e Filimonose ćumudinose thaj kupaćerutnese amarese, thaj e kamle Apfijaće, thaj e Arhipose, marutnese amarese, thaj kla ćherutna khanđirjaće: Dindipe tumenđe thaj šalom kotar o Devel o Dad amaro thaj Devljutno Isuso Hristo. Ašarinape e Devlese mlese sajekh liparindoj tut ane mle ruđutna, kaj šunava bašo kamlipe klo thaj o paćape savo isi tut premalo Devljutno Isuso thaj premalomsarijende e sumnalende, kaj o khatanipe e paćapeso klo ovela ćeruno ano penđaripe sakone laćhipnasoro savo isi ano Hristo Isuso. O kamlipe eke klo ćerela amenđe baro lošalipe thaj zoralipe, kaj tu, phrala, o vile e sumnalengere šalominđan. Baše odova, ako pak isima pherdo muklipe ano Hristo te čhinavav tuće so valjani te ćere, bašo kamlipe kamljune ruđinava tut, me korkoro, o Pavle phuro, a akana thaj phandino e Isus Hristosoro, ruđinav tut bašo ćhavoro mlo e Onisimose, save bijandem ane verige mle; Nekana tuće bitrubune, a akana vi tuće thaj maje trubune. Bićhalđum tuke les napalal; A tu les, odova čaće o vilo mlo, lole. Me le mangljum te ićerav ke mande, kaj mange ko than klo kandel ane verige bašo evangeliumose. Aj bi klo džanipe na manglem niso te ćerav, kaj klo laćhoćeripe ne bi ovela zoraja aj laćhekhamipnaja. Kaj šaj odolese thaj ulavdilo tuja bašo xarne te les le bašo bimeripe, na maj sar robo, aj majbut kotar o robo, phrale ćumudine, ulavdune maje, a kobor majbut tuke, thaj po trupo thaj ano Devljutno. Te sem tuće, akana, khatanutnari ano paćape, le les sar man. Te ćerda tuće ane soste doš, ja kamuno aćhilo, odova maje saćidin. Me, o Pavle, hramonđum mle vasteja, me ka poćinav; te na phenav tuće kaj thaj korkoro pes mange kamea. Va, phrala, lošar ma ano Devljutno; šalomin o vilo mlo ano Devljutno. Dandinoj ano klo kandipe, hramonđum tuće, džanglindoj kaj ka ćere majbut semo so phenava. A jekhune gatisar manđe laćho adžikeripe, kaj adžikerava kaj ka tumare ruđipenca ovav tumenđe dindino. Bićhalel tuće sastipe o Epafraso savo si mancar phandino ano Hristo Isuso, o Marko, o Aristarho, o Dimas, o Luka, kupaćerutne mle. Dindipe e Devljutneso amareso e Isus Hristoso e đesa tumaresa. Amin. O Devel savo andar o dumutanipe but droma thaj savetane ćhandenca vakerđa e dadenđe prekalo Profeto, ane akala palune dive vakerđa amenđe prekal o Ćhavo, save ćhuta kustikutnesa kotar sa, andar savo si thaj o šeleberšipa ćerđa; Ov savo si strefipe e glorijako thaj dićhipe Lesere ćeripnaso thaj kova ićerela sa e zorale lafeja pleja, poso korkoro agorinđa o khoslipe amare bezehengo, bešlo pe daxni rig e Barikanipnaso ko ućipe, thaj edobor mothovdilo pobaro kotar e phakale kobor si glorisime Anav kustikinđa feri von. Kaj kase kotar o phakale ikana phenđa: Ćhavo mlo sijan Tu, me tut avdive bijanđum? Thaj palem: Me lese ka ovav o Dad, a ov maje o Ćhavo. Thaj palem, kana anglinđa Anglunebijande ane vasiona, vakerela: Thaj nek lese teljardona sa o phakale e Devlesere. A bašo phakale vakerela: Savo ćerela ple phakalen đenca thaj ple kandinen rapesere jagako. Bašo Ćhavo eke: E sumnalesri bešalutni si kli, Devla, aso bimeripasoro bimeripe; e rovli e hakajipasiri si rovli kle Thagaripasoro. Kamljinđan o hakajipe thaj ritonđan o bikanunipe; bašo odova maznonđum tut, Devla, o Devel klo lošalipne uljesa pobut aj kle amalen. Thaj palem: Tu, Devljutneja, ano širdipe fundonđan e phuv, thaj o badalija si ćerdipna kotar kle vasta; On ka nakhen, a tu aćhoveja, thaj sa ka puranđol sar o šeja, thaj ka banđare len sar o fostani, thaj ka parunen pes, a tu san sajekh jekhuno, thaj o berša kle na ka nakhen. A kase kotar o phakale ikana phenđa: Beš mange kotar e daxni rig džikote na pašljarav e dušmanjen klen bašo telunipe kle prenđe? Naj li sa odola đe bašo kandipe, save bićhalena pe te kanden odolenđe save ka kustikutnen o inkaldipe? Baše odova valjani but te arakha amen pe odova so šunđam, te na irinamen. Kaj te si o lafi phendino prekalo phakalo čačavdilo, thaj sako phagipe thaj nakandipe lelja theruni pedepsi, sar amen ka našalala te na hajinđam bašo asavko baro inkaldipe, savo lelja te vakerel o Devljutno, a čačavde les maškar amende odola save šunde, so thaj o Devel mothovđa semnencar thaj prašukaripencar, savetane zorale ćerdipnencar thaj dindipnaja o Đi Sumnalo pe plo kamipe. Kaj o Devel na telalćerđa e phakalenđe odova them savo avela, kotar savo vakera. Nesavo eke neso mothovđa vakerindoj: So si o manuš leste te detu gođi, ja ćhavo e manušesoro te dikhljare le? Ćerđan le xarnevaktine pocikne kotar o phakalo, gloripnaja thaj paćipnaja laćhardan les khuvdinesa, thaj ćhutan le upral kle vastengere ćerdipna; Sa teljarđan len telal o pre lesere. Thaj poso lese teljarđan sa, niso lese na mekljan biteljardino. Aj akana pana na dikhaja kaj lese si sa teljardino. A xarnevaktine pocikne kotar o phakale dikhaja e Isuso, bašo mudaripe sa dži o meripe, laćhardo khuvdine gloripnaja thaj paćipnaja, te bi po dindipe e Devlesoro haćarela o meripe baše sarijende. Kaj si laćhe e Devlese, bašo Savese si sa thaj andar Savo si sa, Savo anđa bute ćhaven ane glorija, kaj Čikatutne lengere inkalutne ćerela pherdino andar o mudaripe. Kaj thaj Odova savo sumnarela thaj odola save sumnarena pe sare si kotar jekh, odolese na ladžala len te vičini phraljalen, vakerindoj: Ka mothovav o Anav klo mle phraljenđe, maškar o ćedipe điljaja ka barjarav tut. Thaj palem: Me ka dandov man ane Leste. Thaj palem: Eke me thaj e ćhavore saven mange dinđa o Devel. A poso odola ćhavore isilen khatanipe ano rat thaj o mas, thaj Ov lelja majpašuno ćerdipe ane odova, kaj meripnaja te mudarel odole save isile zor meripnasoro, odova va e benge, thaj te ikalel odolen save andar e dar kotar o meripe soro dživdipe sinele došale bašo plo robojipe. Kaj, hemčaće na phandinilo e phakalenđe, aj phandinilo e Avramosere kućinake. Baše odova valjanđa kaj ano sa te ovel miazuno e phraljenđe, te bi ovela dindino thaj paćavino anglunorašaj ane sevipni e Devlese, sar bi khosela o bezeha e selorese. Kaj poso si thaj korkoro mudardilo avine zumavdo, odolese šaj te ažutinel odolenđe save ovena zumavde. Odolese, phraljalen sumnalalen, khatanićara akharipase e badalesoro, penđaren e Bićhalutne thaj e Anglunerašaje amare paćapeso savo mothova, e Isus Hristo. Savo si paćavino Odolese savo les ćhuta, sar thaj o Mojsije ane sa lesere ćherese, kaj akava paćavilo pobare glorijatar e Mojsijestar, sar so pobari paćiv kotar o ćher isile odova savo les ćerđa. Kaj si sako ćher duvarime kotar neko, a odova savo sa ćerđa si o Devel. O Mojsije eke sinele paćavino ane sa lesere ćherese sar kandino, bašo mothovdipe odoleso so sinele te phenel pe, džikaj si o Hristos sar Ćhavo upral o ćher lesoro; a lesoro ćher sem amen, te zoralo paćape thaj adžikeripe savesa ašarape dži o agor zorardine ićeramen. Odolese, sar phenela o Đi Sumnalo: Avdive, te o krlo lesoro šunena, ma te oven bimekljutne vile tumare sar kradanatune čerćipaso ano dive e zumavipnaso ane drmina, kote man zumavđe e dada tumare, phućena man a dikhle mle ćerdipna saranda berša. Odolese xolajlem pe generacija odoja, thaj phenđum: sajekh phirena vileja, a korkore na penđarđe e droma mle; Odolese xaljem sovli ane bari xoli mli kaj na ka đerdinen ano pašlipe mlo. Arakhen, phraljalen, te na ovel ane džikaste kotar tumende džungalo vilo napaćaipnaso, crdindoj kotar o Devel e dživdipnasoro; Aj zoraren jekh avre sako dive, džikote odova „avdije” trainel, kaj khajek tumendar na ovela zoralevileso xoxajipnaja e bezeheso. Kaj uljam khatanićarja e Hristosere, semo te širdipeno paćape dži o agor zorale ićeraja. Džikaj pana vakerela pe: Avdive, te o krlo lesoro šunena, ma te oven zoralne e vile tumare, sar kradanatune čerćipnaso. A save si odola so šunđe thaj čerćile? Sar na sare save inklile andar o Egipat legamne e Mojsijesa? A pe save Ov holjanđa saranda berša? Na li pe odola save ćerde doša, savengere kokala aćhile ane drmina? Savenđe li xalja sovli kaj na ka đerdinen ano pašlipe lesoro, te na odolenđe save sinele nakandine? Thaj dikha kaj naštine te đerdinen bašo napaćajipe. Daraja, akana, kaj nekoj tumendar, džikaj pana mol o dindo lafi bašo đerdipe ano pašlipe lesoro, na gndinela kaj si aćhilo palal. Kaj thaj amenđe si mothovdino o lošalo nevipe sar thaj odolenđe; aj lenđe na sine kotar o therdipe o lafi savo šunđe, poso odola save ašunđe na linele paćapnaja. A amen save paćajam đerdinaja ano pašlipe, sar so phenđa: Odolese xalem sovli ane bari xoli mli kaj on na ka đerdinen ano pašlip mlo, premte e ćerdipna e Devlesere sinele agordinde kotar o ćerdipe e themesoro. Kaj phenđa nekote bašo o eftato dive ađahar: Thaj beštino o Devel ano dive eftato kotar sa e ćerdipna ple. A akate palem: Na ka đerdini ano pašlipe mlo. Pa poso nesave isilen te đerdinen ane leste, a odola savenđe si majangle mothodo lošalo nevipe na đerdinde bašo nakandipe, odova palem čhinada jekh đive, „Avdive”, vakerindoj prekal o David, palo edobor vakti, sar so phenđa: Avdive, te o krlo lesoro šunđen, ma te oven zoraleskorcune e vile tumare. Kaj te len o Isus Navin legarela ano pašlipe, na bi pale odova vakerela pe kotar nesavo aver dive. Karing odolese, e Devlesere selorese tek anglalavela o pašlipe. Kaj ko đerdinđa ane leskoro bešlipe thaj korkoro pašlilo kotar ple ćerdipna, sar thaj o Devel kotar ple. Te phurederinape, akana, te đerdina ane odova pašlipe, te na bi ko perela po jekhuno misal e nakandipnasoro. Kaj si o lafi e Devlesoro dživdo thaj therdino, majostro kotar sako dujćhindino mačo, thaj rinelape sa dži o ulavdipe e ođeso thaj đeso, kunjakonengo thaj mezoso, thaj krisinela o irade thaj o gindipa e vilesere. Than nane šeja garavdine anglal o leste, aj si sa užardino thaj phućardo anglal e jakha Odolesere kaste ka phućlija. Isindoj, akana, bare Anglunerašaje, savo nakhino o badalja, e Isuse Ćhave e Devlesoro, valjani te ićeramen zorale e paćavipnaso sav mothovaja. Kaj naneamen anglunorašaj savo na bi šaj te mudarela pe amare bizoralipenđe, aj Anglunorašaj savo si ane sa zumavdo sar thah amen, aj bi bezehengo. Odolese te ava paše tromaline e dindipne astalese, te la o dindipe thaj te arakha o baxtalipe bašo ažutipe ano trubuno vakti. Kaj sako anglunorašaj savo lela pe maškar o manuša, ćhivela pe bašo e manušenđe po kandipe e Devlese, te pašljarel o dindipa thaj o viktime bašo bezeha, savo šaj te haćarel odolencar save si ano biđanglipe thaj xoxavdipe; kaj si thaj korkoro telalćerdino e bizoralipnase, thaj baše odova si kamuno, sar baš e selorese, ađahar thaj baše korkoro pese te pašljarel o viktime bašo bezeha. Thaj nikoj korkoro pese na lela odova paćiv, aj vičimo kotar o Devel, sar thaj o Aron. Ađahar thaj o Hristos na dinđa korkoro pese glorija te ovel anglunorašaj, aj Odova savo lese phenđa: O Ćhavo mlo sijan tu me tut avdive bijanđum. Sar so thaj pe aver than phenela: Tu sijan Rašaj bimerutno po čino e Melhisedekosoro. Ov ano dive ple phuvjakere dživdipnase zorale mangipnaja thaj asvencar pašjarđa e ruđutna thaj e ruđipa Odolese savo šajinđa kaj le te inkalel kotar o meripe, thaj sinele ašundo bašo kandipe ple pherde paćapnesoro. Thaj ako sinele Ćhavo, prekal o mudaripe siklilo pe e kandipnase, thaj mothovdindoj pe pherdutno, ulo sarijeđe save si lese kandine motivo e bimerutne inkaldipnasoro, phendino kotar o Devel Anglunorašaj, po čino e Melhisedikosoro. Kotar odova bi ovela amen te vakera but, aj phare si te haljovel pe, kaj tumen uljen nahajutne bašo ašundipe. Kaj tumen save bi palo berša valjani te oven sikamne, palem valjani te sikljoven e anglune fundone Devlesere lafenge; thaj asavke uljen kaj tumenđe valjani thud, a na zoralo xabe. Kaj savo god parvarela pe thudeja, bisikavdo si ano džanipe e hakajutnipaso, kaj si čhavoro. A o zoralo xabe si bašo e pherdine, kasere si ašunipa siklipnaja džanglino bašo ulavdipe thaj e laćhipnaso thaj e džungalipnaso. Odolese, meklindoj e širdipikano džanipe kotar o Hristo, te siđara karing o pherdipe; thaj ma pale te ćhiva o temelji e jertipnaso kotar e mule ćerdipna, thaj paćape ano Devel, thaj džanipe kotar o bolipene, thaj kotar o pašljaripe e vastengoro, thaj kotar dživdinisaripe e mulengoro, thaj kotar o bimerutno kriso. Thaj akava ka ćera, te o Devel meklja. Kaj naj šajune odolen save si jekhare sumnalime, thaj haćarde o dindipe e badalesoro, thaj ule khatanićarja e Đeso Sumnalesoro, thaj haćarde o laćho lafi e Devlesoro, thaj e zor e avine bimeripnasoro, pa kana si peradvile, palem te iranen pe po jertipe, poso on ple rigatar palem kovinena thaj džungarena e Ćhave e Devlesere. Kaj e phuv savi pijela o bršin so but puti pe late perela, thaj savi bijanela o ćarja therune odolenđe bašo save thaj ćerela pe, lela bahtaripe kotar o Devel; A savi bijanela kanre thaj divo ćar, nane šukar thaj nane dur kotar o bibaxtalipe, thaj lakoro si agor: ane jag! Aj so si tumencar phandine, ćumudninalen, aj kaj ađahar vakeraja, čačavdine sinjam kaj e buća terđovena pošukar thaj kaj legarena aso inkaldipe. Kaj o Devel nane nahakajutno pa te bistrel o ćerdipna tumare thaj ćeripe e kamlipaso savo mothovđen bašo Anav lesoro, sevapeindoj thaj kandindoj e sumnalenge. A mangaja kaj sakoj kotar tumende te mothovela odova jekhuno grižipe bašo ćeripe e adžikerunakoro sa dži o agor. Te na oven bibućarne, aj te ićeren odolen save paćapnaja thaj trajipnaja kustikutnen o dinde lafija. Kaj kana o Devel dinđa o lafija e Avraamose, naneindoj ni ana kaste pobaro te xal sovel, xalja sovel korkoro peja, vakerindoj: Hemčaće tut barvale ka baxtarav thaj pherdine ka butisarav. Thaj ađahar o Avraam trpime adžikerindoj adžikerđa o dindo lafi. Kaj o manuša xana sovel pobare pestar, thaj sakone lengere ćingaripnase agorisaripe si xape sovli sar mothovipe. Odolese thaj o Devel, manglindoj kaj e kustikutnenđe e dinde lafija so majpaćavine mothovela o naparuvipe ple čhinavdipenako, te kandela pe xapesovljaja, te bi ane duj zorale buća, ane save si našajune kaj o Devel te xoxavel, ovel amen zorale lafja amen save naštinjam te ićera men e adžikerutnate savi si anglal amende; La isi amen sar krligo e ođeso, zoralo thaj paćavuno, savi đerdini andral palal e perdava, kaj sar anglasemno baše amende đerdini o Isus, ćerindoj Anglunorašaj bimerutno po čino e Melhisedekosoro. Kaj odova Melhisedek, thagar e Salimskoro, rašaj e Devlesoro e ućipeso, savo reslja e Avraame kana irinđa pe palo peradipe e thagarengoro, thaj baxtarda le; Kase o Avraam dinđa thaj dešipne kotar sa, ov si po manaipe ple anaveso majangle si thagar hakajipnaso, a napal si thaj thagar e Salimosko, odova va, thagar šalomnipaso, bi dadeso bi dajako, bi njamosoro, ni lesere diven isilen širdipe ni lesoro dživdipe isile agoripe, a sar miazuno e Devlesere Ćhavese aćola rašaj bi ćhinadipnasoro. No dikhen kobor si baro akava, kase si thaj korkoro patrijarho o Avraam dija dešipne kotar o alome ćedipe. Thaj džikaj o ćhave e Levijevese lindoj o rašajipe isilen čhinavdipe te len po kanuni dešipne kotar o seloro, goda va kotar e phrala ple, iako thaj iklistile andar e kolin e Avraamosere, dži odova akava savo nane kotar lengoro njamo, lija o dešipne kotar o Avraam, thaj les, savo sinele dindo lafi, baxtarđa, a avral si sako poloćipe kaj o baro te baxtarel potikne. Thaj ađahar akate o dešipna lena meripnasere manuša, a odori odova bašo savo mothovela pe kaj dživdini. Thaj šaj bi te phenel pe, kaj o Levije savo lela dešipne, dinđa dešipne andar o Avraamo, poso ov pana sinele ane kolina e dadese kana les reslja o Melhisedek. Te si, akana, o pherdipe sinele reslo andar e levijesoro rašajipe, kaj si o seloro lesa andino telal o Kanuni, sose sinele pana trubuno te vakerelpe kaj ka mothovđol o dujto Rašaj po čino e Melhisedekoso, a na po čino e Aronoso? Aj kana paruvinela pe o rašajipe, musaj te paruvinel pe thaj o Kanuno. Kaj Odova bašo savese akava phenela pe andar aver si njamo, kotar savo nikoj na alo paše e viktimutnese. Kaj si dikhinutne, kaj o Devljutno amaro inklilo andar o njamo e Judejeso, baše savese o Mojsije niso na phenđa kotar o rašajipe. Thaj pana si podikhinutne, kana po miazipe e Melhisedekoso ikljola aver Rašaj, savo na alo po kanuni e truposere čhinavdipnaso, aj pe zor e dživdipaso e namudaripaso. Kaj o Lil mothovel: Tu sijan Rašaj sajekh po čino e Melhisedekosoro. Čhinavel pes, akana, o anglaluno čhinavdipe bašo lakoro bizoralipe thaj natheripe – Kaj o Kanuni niso na anda đi o pherdipe, a anela pe polaćhi adžukertuni andar savi avaja po paše e Devlese. Ane kobor na sinele bi xapesovljakoro, kaj odola bi xapesovljako ule rašaja, a Akava e xapesovljaja Okolese savo lese vakerela: Xalja sovli o Devljutno thaj na ka perel pišmani: Tu sijan Rašaj sajekh po čino e Melhisedekosoro – baše odova o Isus ulo garanto e polaćhe Xapesovljakoro. Thaj odola rašaja sinele but, kaj len o meripe aćhavela te aćhoven, a Akava, poso aćhela sajekh, isile binakhlino rašajipe. Odolese thaj šaj pherdine thaj bašo sajekh te inkalel odolen save andar leste avena e Devlese, poso sajekh dživdinela pa šaj te maškarinel bašo lende. Kaj asavko amenđe Anglunorašaj valjani: sumnalo, nadžungalo, khoslo, ulavdino kotar e bezehale thaj poućo kotar o badalija; Save nanele trubuipe, sar odola anglunerašaja, kaj sako dive te pašljarel viktime, majangle baše ple bezeha, a napal thaj bašo e selorengere, kaj Ov akava ćerđa jekhare bašo sajekh pašljarindoj korkoro pes. Kaj o Kanuni ćhivela bašo anglunerašajen manušen save isilen bizoralipe, a o lafi e xapesovljako palo Kanuni, ćhivela e Ćhave bimeripnasere pherdine. A kotar akava so vaćerđam šeruno si: Amen isiamen asavko Anglunorašaj, savo bešlo pe daxni rig e Ućipasere sumnale bešalutnake ko badali, rašajunokandutno e Sumnalako thaj čaćune skinijako, sava thanarđa o Devljutno, a na o manuš. Kaj sako anglunorašaj thanarđola te pašljarel thaj o dindipe thaj o viktime; odolese si trubune kaj vi Akava te ovel le so te pašljarel. Kaj te bi ovela ki phuv, na bi ni ovela rašaj, avine kaj isi rašaja save pašljarena o dindipa po Kanuni. Save kandena e tasviraće thaj e ućhaljinaće e badalesere čaćipnase, sar so sinele phendino e Mojsijese kana valjanđa te ćerel e skinija: Dikh, phenđa, te ćere sa po misal savo si tuće sikavdo ke plaina. A akana Akava lelja asavko ućipnaso kandipe kobor si maškarutno polaćhe Xapesovljakoro, savo si pe polaćhe dinde lafija fundimo. Kaj o angluno kanuni ked bi ovela bi manavako, na bi rodela pe than e dujtonese. Kaj mahrindoj len vakerela: Ake avena o dive, vakerela o Devljutno, thaj ka kerav e Izrailjesere kherea thaj e Judejesere kherea nevi Xapesovljakiri, na asavki xapesovljakiri savi ćerđum lengere dadencar ano dive kana len leljum vastestar te ikalav len andar e phuv e Egipatesiri; kaj on na aćhile ano mlo xapesovljakoro, thaj me ni hajinđum bašo lende, vakerela o Devljutno. Kaj akava si Xapesovli savo ka xalpesovel e Izrailjesere kherese palo akala dive, vakerela o Devljutno: Ka ćhivav e kanunija mle ane gndipa lengere thaj ka hraminav len pe vile lengere, thaj ka ovav lenge Devel, thaj on ka oven mlo seloro. Thaj nikoj na ka sikavel e majpašutne ple, thaj nikoj e phrale ple, vakerindoj: Penđar e Devljutne; kaj man sare ka penđaren, kotar o tikoro dži o baro. Kaj ka ovav dindino lengere bihakajenge, thaj maj na ka vakerav lengere bezehendar thaj e bikanunipna lengere. A kana phenela o nevo Xapesovlesiri, o angluno ćerđa puranesa; a odova so puranđola thaj phurjola, paše si te xasajvol. Sinela, hemčaće, thaj e angluni skinija regule bašo devlesokandipe, a thaj e Sumnalipni e phuvljakiri. Kaj sinele laćhardo angluno kotor e skinijako, ano leste memeljari thaj astalja thaj thovdine mare, thaj odova vičini pe Sumnalipni. A palo e aver perdava o kotor e skinijako, vičimo Sumnalipni upral e sumnalipna, sava sinela sumnali kandinuli, thaj mohto ućhardo pe sa e riga sumnakajesa, ane savo sinele sumnakajuno ćaro e manaja, thaj luluđinali rovli e Aronovesi, thaj o ploče e Xapesovljakere, a upral leste e heruvimija e glorijakere, save strefinena e užipasoro than; sostar akana na valjani te vakera sarigune. A poso akava sinele ađahar laćhardino, đerdinena o rašaja sajekh ano angluno kotor e skinijako te ćeren o kandipe e Devlesoro; A ano dujto jekhare ano berš semo anglunorašaj, na bi rateso, savo pašljarela baše peste thaj bašo seloresere bezehenđe andar o bidžanipe. Akaleja o Đi Sumnalo sikavela kaj pana nane phravdo o drom ane Sumnalipni, džikaj god e angluni skinija terđola; Savi si gindini tasvir bašo akanutno vakti, kana pašljarenape thaj o dindipa thaj o viktime save našti te laćharen o gindipe odolesoro savo kandela, a ćhinadine si semo bašo xabe thaj pibe thaj savetane thovdipa thaj truposere ritualja dži o vakti e nevljardipnaso. Aj kana alo o Hristos, Anglunorašaj e avine laćharipnase, andar pobari thaj popherdini skinija, navastesaćerdini, odova na kotar akava ćerdipe, na rateja e buzneso ni e guruveso, aj ple rateja đerdinđa jekhare bašo sajekh ane Sumnalipni ćerindoj bimerutno inkaldipe. Kaj te o rat e buznesongoro thaj e guruvengoro thaj o praho kotar e gurumnjori, savaja kana prskinen pe e bikhosle sumnarela len te oven trupune khosle, kobor li maj ka o rat e Hristosoro, savo Đesa bimerutnesa pašljarela pes paćivalo e Devlese, ka khosel o gindipe tumaro kotar e mule ćerdipna, te bi kandena e dživde thaj čaćine Devlese. Thaj odolese si Ov maškarutno e Neve Xapesovljakoro, kaj palo lesoro meripe bašo inkaldipe kotar o nakhlipe ane angluni xapesovli, o vičime lena o dindo lafi e bimerutne kustikutnipestar. Ta kote si xapesovli musaj te ovel thaj o meripe e xapesovljakoro, kaj si e xapesovli pherdomoldino tek palo meripe, poso nisar ni mol džikaj si o xapesovljakoro ano dživdipe. Kaj ni o angluno xapesovljakoro na ćerdilo bi ratesoro. Ađahar, kana o Mojsije mothovđa sa o čhinavdipa ple Kanunesere sa e selorese, tegani lelja o rat kotar e guruva thaj buznora, panjeja thaj lole pošomaja thaj isopoja, ta prskinđa thaj e pustik thaj sa e selore, vakerindoj: Akava si rat e xapesovljakoro savo tumenđe čhinavđa o Devel. A ađahar thaj e skinija thaj sa e vasija devlesekandine prskinđa rateja. Thaj pe akava Krisi sa khosela pe rateja thaj bizo ćhoripnasoro rat na ovela jertipe. Valjanđa, akana, kaj e tasvira e badalese šejengo ađahar te khosen pe, a e korkore badalese šeja polaćhe viktimencar kotar akala. Kaj o Hristos na đerdinđa ane vastesaćerdi Sumnalipni, savi si anglalmisal e čaćipnase, aj ane semo Badali, kaj akana te sikavel pes anglal o muj e Devlesoro baše amende; Ni na đerdini but droma te pašljarel korkoro pes, sar so o anglunorašaj đerdini ane Sumnalipni sako berš avresere rateja; Averćhande bi Ov musaj but droma te mudarđol poćindoj kotar o ćerdipe e themeso; a akana po agoripe e šeleberšengoro, mothovela pes jekhare bašo sajekh kaj pla viktimasa ta te mudarel o bezeh. Thaj sar so e manušenđe anglalaćhola jekhdrom te meren, a pale odova o kris e Devlesoro, ađahar thaj o Hristos jekhdrom pašljarđa pes pe viktima te lel o bezeha butengere. A aver drom ka mothovđol na bašo bezeh aj bašo inkaldipe odolengoro save le adžikerena. Kaj o Kanuni isipeindoj semo ućhalin e avine laćhipengo, a na semo o muj e šejengo, našti nisar jekhe thaj jekhune viktimencar, save pašljarena pes sajekh sako berš, te pheren odolen save avena anglal. Averćhande, sar odola ne bi aćhavena pe te pašljaren pes, poso odola save kandena ne bi maj haćarena pe bezehale, avine jekhare bašo sajekh khoslime? Maškarodova, odola viktime sako berš dengođate ko bezeha. Kaj nane šajune kaj o rat e guruvengoro thaj buznengoro thovela o bezeha. Odolese dindoj ano them vakerela: E viktima thaj o dindipe na mangljan, aj mange o si trupo gatinđan. E saphabarutna thaj o viktime bašo bezeha na sinele tuće laćhe; Tegani phenđum: Ake aljum, sar so si ano širdipe e Pustikako hramome baše mange, te ćerav o kamipe klo, Devla. Vakerindoj angleder, kaj e viktima thaj o dindipa thaj e saphabarutna thaj e viktime bašo bezeha na mangljan ni na sinele tuće laćhe, odola save si po kanuni pašljarđona; Pale odova phenđa: Ake džava te ćerav o kamipe klo, Devla. Ćhinaj o angluno te ćhivel o dujto. Odole kamipnaja sem sumnarine pašljarindoj o trupo e Isus Hristosoro jekhare bašo sajekh. Thaj sako rašaj terđola sakodive kandindoj thaj but droma pašljarindoj jekhune viktime save nisar našti te xasaren o bezeha; A Ov, pašljarindoj jekhe viktima bašo bezeha, bimeripnaste bešlo pe daxni rig e Devlesiri, adžikerindoj poangle džikaj na pašljarđona o dušmanja lesere bašo telalalipe lesere prenđe. Kaj Ov jekhe dindipnaja ćerđa pherdine sa e vaktenđe odolen save sumnarena pe. A mothovela amenđe thaj o Đi Sumnalo; kaj poso anglal vaćerđa: Akava si Xapesovli savo lenđe ka mekav amaneti pale odola dive, vakerela o Devljutno, dindoj mle kanunija ane vile lengere, thaj ane gndipa lengere ka hramonav len, phenela: Thaj e bezeha lengere thaj e bikanunija lengere eke na ka vakerav. A kote si jertipe e bezehenđe, odothe nane više dindinipe bašo lenge. Sipeindoj akana, phraljalen, o muklipe bašo đerdipe ane Sumnalipni e Isusesere rateja, dromeja neveja thaj dživdineja, savo amenđe Ov phravđa e perdavaja, odova va ple trupoja, thaj bare Rašajesa upral o ćher e Devlesoro, te ava paše e čaćine vileja, ano pherdo paćape, vilencar khosle kotar o džungalo gođipe thaj trupoja thovdino khosle panjeja, te ićeramen zorale ano mothovdipe e adžikertunako bi dujegođencar, kaj si paćavuno Odova savo dinđa o lafi; Thaj te phurederinape jekh e avrestar ano ćeripe ko kamlipe thaj laćhe ćerdipna. Ma te aćhova palal kotar e ćidipa amare, sar so nesaven isilen adeti, aj jek avre te zorarja, thaj baše odova pobut kobor dikhena kaj paše avela o Dive odova. Kaj ako amen ćeraja bezeha iradine thaj palo lindoj pendaripnasoro čaćipe, odothe maj nane viktime bašo bezeha, aj semo daravutno adžikeripe e kriseso thaj bari xoli e jagaki savi ka nakhavel ano muj e opipeutnen. Kana nekoj ritinela o Kanuni e Mojsejesoro, po mothovdipe duje ja trine jaćhencar dikhutnengo, isi te merel bi dindipnasoro; Gndinen kobor ka akana phari globa ka lel odova savo uštavel e Ćhave e Devlesere, thaj o rat e Xapesovljako savaja si sumnardo bašo nasumnali te ićerel, thaj e Đe dindipaso dukhavela? Kaj džana Odole savo phenđa: Mlo si iripe, me ka irinav, vakerela o Devljutno. Thaj palem: o Devljutno ka krisinel ple selorese. Baro si daravipe te pere ane vasta e dživde Devlese. A dena tumen godi e anglune divenge, ane save, tek strefisime, legarđen bute bare mudaripa, mothovdine, pe jekh rig, mahripnase thaj džungalipnase, a pe aver rig, ulindoj kupamudarutne odolenge kola odova jekhune džidživdinena. Kaj vi e verigenđe mlenge haćarena, thaj lošalipnaja legarena o linipe tumare barvalipnasoro, džanglindoj kaj tumen isitumen polaćho thaj binakhlino barvalipe ko badalija. Ma xasaren, akana, o paćape tumaro, savo anela bari padakhutni. Kaj tumenđe si o trpipe trubuno, kaj poso agorinena o kamipe e Devlesoro lena odova so si dindino lafi. Kaj pana hari, but hari, pa ka avel Odova savo valjani te avel thaj na ka aćhol palal. A o hakajutno kotar o paćape ka dživdinel; te li cidinđa pe, na ka avel po kamipe mle ođese. Amen, maškarodova, na sijam kotar odola save cidinena pe po peripe, aj kotar odola save paćana o inkaldipe e đesoro. A o paćape si fundo kotar o sa so adžikeraja, čačavdipe e šejengo e nadikhlengoro. Kaj ane late o purane lelje laćho mothovdipe. Paćapesa džanaja kaj o thema si ćerdine e Devlesere lafeja, ađahar kaj o dikhitutno ulo andar o bidikhutno. Paćapesa pašljarđa o Avelj e Devlese polaćhi viktima e Kainostar; lasa sinele mothovdino kaj si hakajutno, kana korkoro o Devel lelja e dindinipa lesere; andar late vov thaj palo meripe pana vakerela. Paćapesa o Enoh sinele vazdino te na dikhel o meripe; thaj maj na arakhavdilo, kaj le o Devel lelja, poso angleder e lesoro vazdipe sinele lese čačavdino kaj kamipninđa e Devlese. A bi e paćapeso nane šajune te kamnisare e Devlese; kaj odova savo avela paše e Devlese, valjani te paćal kaj o Devel si thaj kaj Ov padakhutnini odolen save les rodena. Paćapesa o Noj sinele kotar o Devel džangljardino kotar odova so pana na dikhela pe, thaj andar e devljutnesi dar ćerđa moxto bašo inkaldipe ple ćheresoro; odolesa ov krisinđa sa o them, thaj ulo kustikutno e hakajipnasoro po paćape. Paćapesa o Avraam kandlja kana sinele vičimo te đal ane phuv savi sinele te lel ano kustikutnipe, thaj đelo na džanglindoj kaj džala. Paćapesa thanardilo ov ane phuv e dinde lafeso sar ane averesi, thaj ane šatora bešena e Isakoja thaj e Jakoveja, kupakustikutnenca e jekhune dindine lafesoro. Kaj adžićerđe o Foro savo isile temelja, savese si vazdino thaj ćerutno o Devel. Paćapesa thaj korkori Sara lelja e zor te khamninel, thaj inatese e phuripne xorjaće oj bijanđa; kaj paćaja Odolese savo odova dinđa o lafi. Odolese thaj bijandile nevebijande kotar jekh, thaj odova e butpurane manušestar, butipnaja sar čerenja e badalesere thaj sar pošik biđindi ki phuv e deravesiri. Ano paćape mule sare akala na adžikerindoj o pherdipe e dinde lafesoro, aj len dikhle andaroduripe, thaj bićhalđe sastipe, thaj aćhile pe odova kaj si rigune thaj nakahljutne ki phuv. Kaj odola save ađahar vakerena mothovena kaj rodena e Kherutni. Thaj kaj gindinđe pe odoja andar savi iklile, ka ma ovel len vakti te irinen pe; Aj akana mangena polaćhi, odova va e badalesiri. Paćapesa pašljarđa o Avraam e Isako kana si zumavdo, thaj e jekhore pašljarđa odova savo lelja o dindo lafi, savese sinele phendino: Ano Isako tuće ka vičinel pe e kućin, kaj haljovinđa kaj si o Devel kadari thaj andar e mule te dživdinisarel; odolese les thaj lelja sar gindini tasvir. Paćapesa ane odova so ka avel baxtarđa o Isak e Jakove thaj e Isavo. Paćapesa o Jakov merindoj baxtarđa sakone ćhave e Josifesere, thaj teljarđa pes prekal o ućipe ple rovljakoro. Paćapesa o Josif ko meripe liparela kotar o iklipe e Izrailjesere ćhavengo, thaj čhinavđa baše e kokala ple. Paćapesa e Mojseje, poso bijandilo, garavđe le trin ćhon e bijande lesere, kaj dikhle kaj si o čhavoro prašukar, thaj na darandile e thagaresere čhinadipastar. Paćapesa o Mojsej, kana barilo, ćhudinđa kaj te vičinel pe ćhavo e Faraonosere ćhijako; Thaj pobut kamela te mudarđol e Devlesere seloreja aj te ovel le xarnevaktino gudljaripe e bezehesoro, dikhinindoj ane savo pelo bašo Hristo sar pobaro barvalipe kotar egipatesoro barvalipe, kaj dikhela pe ki padakhutni. Paćapesa ov meklja o Egipat, na darandoj e bare thagaresere xoljinatar, kaj zorale ićerdape e Nadikhljutnestar, sar kaj dikhela le. Paćapesa ćerđa e pasha thaj prskipe e rateja, kaj odova savo mudarđa e anglunebijanden te na azbavinela len. Paćapesa nakhle o Lolo derav sar ko šućipe; a kana odova manglinde o Egipćanja, taslile pe. Paćapesa pele o duvarja e jerihonesere, kana trujal lende phiravdilo efta dive. Paćapesa e Rava lubnini na mudardili e bipaćamnencar, kaj lelja e phukavnen šalomesa. Thaj so pana te phenav? Kaj mange na bi avelaman vakti kana bi terđovava te mothovav kotar o Gedeono, Varako, Samsono, Jeftaj, David, Samuilo thaj kotar o aver profetija, save paćapesa peravđe o thagaripna, ćerđe hakajipe, lelje o dinde lafija, phandle o muja e lavonengere, aćhavđe e zor e jagakiri, našle kotar ostruni e mačosi, kotar o bizorale ule zorale, sinele zorale ano maripe, peravđe e averengeren askeren; Nesave romnja lelje ple mulen dživdisaripnaja; a e aver eke sinele munkencar mudarde na manglindoj ko muklipe, te bi lena polaćho dživdinosaripe; A e avera zumavde o prasape thaj o šibipa, ta pana o verige thaj o phandlipa; Barencar mudarde, anglaxarndine, munčime, kotar o mačo mule; phirdinđe ane gunje e morćhakere thaj e buznjengere morćhake ano ćororipe, ane bilaćhipa, ane dukhavipa; Odola savendar o them na sinele dićhutno, phirdinđe pe dermine thaj pe plaine thaj pe barengere xoripa thaj pe xara e phuvljengere. Thaj sare akala, mothovdine ano paćape, na lelje o dindo lafi; Odolese so o Devel neso polaćhe anglaldikhlja baše amende, te na bi on bi amaro resena o pherdinipe. Odolese thaj amen, isindoj trujal amende edobor nuvera e jaćhencadikhutne, frdaja sako ladavipe thaj bezeh savo amen lokhe durjarela, thaj trpipnaja te siđara ano baro kotor savo amenge anglalterđola, dikhindoj po Isuso, Čekatutne thaj Pherdutne e paćapeso, savo po than e anglalavine lese lošalipnasoro angladukhavđa o trušul, na hajindoj bašo lađavipe, thaj bešlo pe daxni rig e Sumnale Devlesere bešalutnake. Gndinen, akana, pe Leste, savo kotar e bezahutne inđarda asavko opipe turlus peste, te na malaksinen thaj te na xasaren e ođe tumare. Pana na opipeisajlen dži o rat marindoj turlus e bezehengo, thaj bisterđen o phurederipe savo tumenđe vakerela sar e ćhavenge: Ćhaveja mleja, ma mek o dinipe e vika e Devljutnesiri, ni ma te pere kana ov tuće dela vika. Kaj kas ćumidela o Devljutno odolese thaj dela vika; thaj marela sakone ćhave save lela. Ako legarena o dinipe e vikako, o Devel ćerela tumencar sar e ćhavencar. Kaj savo si odova ćhavo pe savo o dad na dela vika? Te li sijen bi dinipe e vikako, save si sare zumavde, tegani sijen kopilja a na ćhave. Poangle, kana amen amare truposere dada dinde vika, amen olen kandljam. Sar na ka pobut kandaja e Dadesere đengonenge thaj te dživdina? Kaj on amenđe dije vika bašo hari dive premalo plo haljovipe, a Ov po theripe amaro, te ova khatanićarja lesere sumnalipnaso. Kaj sako dinipe vika, džikaj trajinela, na ćerela pes kaj si lošalipe, ja dukhavdipe, aj napal dela šalomno bijanutno e hakajipnaso odolenge save si andar leste sikavdine. Odolese laćharen e peravde vasta thaj e bizorale koča, thaj ortonen e dromora baše tumare pre, kaj odova so si langalo na džungarela pe, aj opipune, te sastarel pe. Phurederinen te ovel tumen šalom sarijencar thaj sumnalipe, bi saveso nikoj na ka dikhel e Devljutne; Arakhavindoj kaj ko te na aćhola bi o dindipe e Devlesoro; te na bi nesavi darhin ćerkipnasi barjola thaj kerela bigloripe, thaj odoleja buten ćerkninena; Kaj ko te na ovel lubno ja poganime, sar o Isav, savo bašo jekhe xapese bićinda plo anglunobijandipe. Kaj džanena kaj si ov thaj popalal, kana manglja te kustikutnel o baxtaripe, frdimo sinele, kaj na arakhlja o jertipe, vi te les asvencar rodinđa. Kaj na aljen paše e plainaće e azbavinake, thaj e jagake e rapedunake, thaj e raćipnase thaj e tunjarikose thaj e bare balvaljake, thaj e trubakere zvukose, thaj e krlesere lafonenge, baše savo on so les ašunđe ruđinena kaj lenge maj te na vakerela pe; Kaj naštine te legaren o čhinavdipe: Ako thaj o divo džuvdinutno azbavinela pe odola plainate, ka ovel barencar frdimi. A o dikhipe adahar daramno sinele, kaj o Mojsej phenđa: Daravdino sem thaj izdarav, aj aljen paše e Sionakere Plainake thaj e Forose e dživde Devleserese, e Jerusalimese e badalutnese, thaj mirijade phakalenge, festuine ćidipnase thaj e Khanđirjakere anglunebijandenđe, hramondine ko badali, thaj e Devlese e Krisarese sarijengerende, thaj e đenđe pherdine hakajutnenđe, thaj e Isusese, Maškarutnese e Neve Xapesovljakoro, thaj rateso e khosipnaso, savi polaćhe vakerela aj e Aveljevesiri. Dikhen te na frden Odole savo vakerela. Kasoro krlo tegani izdrarda e phuv, a akana dela o lafi vakerindoj: Pana jekhare me ka izdrarav na semo e phuv aj thaj o badali. A akava „pana jekhare” mothovela paruvipe odolesoro so čhinavela pe, sar ćerdino, te bi aćhola odova so na čhinavela pe. Odolese, lindoj o Thagaripe o zorardino, te ovel amen dindipe thaj lesa te kanda laćhe e Devlese e paćivalipnaja thaj e daraja. Kaj o Devel amaro si jag savo phabarela. O Phraloćumudipe nek aćhovel. Laćho adžikeripe e gostonengoro ma bistren, kaj andar o laćho adžikeripe e gostonengoro nesave thaj na džanglindoj lelje e phakalen. Den tumen godi e robonende sar kaj da olencar sinjen verigime, thaj odolende save dukhavde đungalipnaja, kaj sen thaj korkore ano trupo. O romnipe nek ovel ano sa paćivalo thaj o pato e romnipeso khoslo; a e lubnunenge thaj e polubnunenge ka krisinela o Devel. Ma oven but kamutne e lovenđe, oven čaljarde odoleja so isitumen, kaj si Ov phenđa: Na ka mekav tut ni kotar tute te cidape. Ađahar kaj šaj zorale te vakera: O Devljutno si mlo ažutno, thaj na ka darav; so mange šaj te kerel o manuš? Den tumen godi ke tumare šerutne, save tumenđe mothovđe o lafi e Devlesoro; dikhindoj po agoripe lengere dživdipaso, dikhen tumen po paćape lengoro. O Isuso Hristo si jekhuno erati thaj avdive thaj ane bimeripa. Ma den tumen te xoxavdon savetane thaj averengere sikavipnendar, kaj si laćhe te zorara o vilo dindipnaja a na xapencar, kotar save na sinelen theripe odola save ane lende čaljardile. Amen isiamen viktimutno kotar savo nanolen hakaja te xan odola save kandena e skinijaće. Kaj e trupora odole dživdinutnengo, savengo rat bašo bezeha pašljarela o anglunorašaj ane sumnali, phabarena pe avrijal o than e bešipnaso. Odolese thaj o Isus, te bi sumnarela o seloro ple rateja, mudardilo avrijal o foro. Akana, te ikljova ke Leste avrijal o than e bešipnaso, o prasape lesoro inđarindoj. Kaj akate nane amen sajekhtuno foro, kaj rodaja odova savo ka avel. Andar Leste, akana, bićhinadine te pašljara e Devlese e viktima e ašaripnasi, odova va, bijanutno e voštengo save vakerena o Anav lesoro. A o laćhokeripe thaj o khatanipe ma bistren; kaj asavke viktimencar ćerela pe po kamipe e Devlese. Kanden e šerutnen tumaren thaj teljarđon lenge, kaj on si džangade upral e đe tumare, poso ka phućljon baše lende, te bi odova lošalipnaja ćerena a na honđipnaja, kaj tumenđe akava na bi ovela kotar o theripe. Ruđinen tumen e Devlese baše amenđe. Kaj sam paćavine kaj isiamen laćho gindipe, manglindoj kaj ane sa laćhe te arakhadija. A ruđinava te ćeren akava pana pobut, te bi tumenđe so poangle irinipe. A o Devel e šalomnipaso, savo vazdela andar e mule e bare Čobano e bakrengoro, rateja o bimerutno Xapesovljakoro, amaro Devljutno o Isuso Hristo, nek tumen pherela ane sako laćho ćerdipe, te agorinen o kamipe lesoro, ćerindoj ane tumende odova so si lese polaćhe, andar o Isuso Hristo, savese glorija ane bimeripasoro bimeripe. Amin. Ruđinav tumen eke, phraljalen, len akava lafi zoralipnaso, kaj tumenđe xarne thaj hramonđum. Te džanen kaj o phral amaro o Timotej si muklino, savesa tumen, sigate te avilo, ka dikhav. Bićhalen sastipe sa e šerutnenđe tumarenđe thaj sa e sumnalenđe. Bićhalen tumenđe sastipe e phralja andar e Italija. Dindipe sarijencar tumencar. Amin. O Jakov, kandino e Devleso thaj e Devljutneso e Isuso Hristoso, bićhalela sastipe e dešuduje njamonenđe ćhordarde po them. Sako lošalipe te ovel tumen, mle phraljalen, kana perena ane savetane zumavdipa, džanglindoj kaj zumavdipe tumare paćapeso ćerela trpipe; A trpipe nek laćharel o ćerdipe, te oven idealine thaj pherdine bi nisavo najstalipe. Ako li kase kotar tumende falinela bidžandipe, nek rodel kotar o Devel savo sarijenđe dela jekhenutne thaj bi ćingarako, thaj ka del pe lese. Aj nek rodena paćapesa, na sungavindoj niso; kaj savo sungal ov si sar deravesko talasi so les e balval vazdela thaj boldela. Kaj asavko manuš ma te gindini kaj ka lel so kotar o Devel. Dujeđengo manuš, najstalo si ane sa droma ple. A o teljardino phral nek ašarinel pe ple ućipesa; A o barvalo ple teljardipnaja, kaj ka nakhel sar e luludi e ćarjakiri. Kaj tatarđa o kham žegaja, thaj šućarđa e ćar, thaj e luluđin lakiri peli, thaj o prašukaripe e mujeso lakoro prepelo; ađahar ka vi o barvalo pe droma ple ka šućarel. Baxtardino si o manuš savo inđarela o zumavdipe, kaj kana ka ovel zumavdo ka lel o khuvdino e dživdipaso, savo o Devljutno dinđa o lafi odolenđe save les ćumudinena. Nijekh kana si zumavdo te na vakerel: o Devel man zumavela; kaj o Devel si nalino bašo zumavipe e džungalipnaja, thaj Ov na zumavela nikas, aj sakone zumavela e korkoruni mangli, savi les akharela thaj xoxavela. Tegani e mangli kamindoj bijanela o bezeh, a o bezeh ćerdo bijanela meripe. Ma xoxavdon, o mle kamle phraljalen. Sako dindipe laćho thaj sako dindinipe pherdino upral si, huljela kotar o Dad e rošipnaso, ane savo nane arlisaripa ni ućhalin e paruvipnasi. Kaj amen kamle kamipasa bijanđa lafesa e čaćipaso, te ova sar anglune kotar lesere ćeripa. Odolese, khamle mle phraljalen, nek ovel sako manuš siguno te šunel a poloćino te vakerel thaj poloćino te xoljanel pe; Kaj e xoli e manušesiri na ćerela hakajipe e Devlesoro. Odolese frden sako bikhoslipe thaj aćhipe e džungalipnaso, thaj laćhekovlipasa len o sejime lafi savo šaj te inkalel e ođe tumare. Oven eke ćerutne e lafijengere, a na semo ašunutne, xoxavindoj korkore pes. Kaj ako ko šunela o lafi a na ćerela, ov si miazuno e manušese savo dikhela po muj ple trupesoro ane ajna; Kaj dikhlja pe, thaj đelo, thaj sigate bisterđa savo sinele. Aj ko inklela ano pherdino kanuni e muklipnaso thaj aćhola ane leste, thaj na ovela bistarutno ašunutno aj ćerutno e ćerdipnaso, odova ka ovel anglabaxtalo ano ćeripe plo. Ako ko kotar tumende gndinela kaj si pherdino paćape, a na inćarela pli ćhib, aj xoxavela plo vilo, leskoro pherdino paćape si andodilipe. Pherdo paćape khoslo thaj paćivalo anglal o Devel thaj o Dad si akava: te dikhljaren pe e ćorore thaj e phivlja ano bibaxtalipe lengoro, thaj te arakhe tut e bimeljardipnastar kotar o them. Phraljalen mle, na dikhindoj ko si ko, nek ovel tumen paćape ane amaro Devljutno e glorijako e Isus Hristoso. Kaj te alo po ćedipe tumaro o manuš e sumnakaje angrustinaja thaj ane rošalo fostani, a avela thaj o ćororo ane ćororo fostani, thaj dikhena pe odova ane rošalo fostani, thaj phenena lese: Tu beš akate laćhe, a e ćororese: Tu terđov okote, ja beš akate potele paše mle pre; Sar odoleja na ćerđen ulavdipe ane tumende thaj uljen krisara e džungale gindipencar? Ašunen, o mle kamle phraljalen, na alonđa li o Devel e ćororen akale themeso te oven barvale e paćapnaja, thaj kustikutne e Thagaripnaso savo dinđa o lafi odolenđe save Les ćumudinena? A tumen teljarđen e ćorore. Nane li o barvale odola save tumen uštavena thaj sar on tumen na cidena pe krisa? Na akošena li on po laćho Anav saveja sijen akhardine? No, ako tumen o kanuni e thagareso agorisarena po Lil: Ćumudin e popašutne kle sar korkore tut, laćhe ćerena; Ako li dikhena ko si ko, bezeh ćerena, thaj o kanuni tumen ćingarela sar phađatutnen. Kaj savo celo kanuni ićerela a ćerela bezeh ano jekh, došalo si bašo sa. Kaj Odova savo phenđa: Ma ćer anglaćumudipe! Phenđa thaj: Ma mudar! Ako, akana, na ćereja anglaćumudipe a mudarđan, uljan phađanutno e kanunesoro. Ađahar vakeren thaj ađahar keren sar odola save e kanuneja e muklipnasereja ka oven krisime; Kaj odolese ka ovel kriso bi dindipnaso savo na kerela dindipe; a o dindipe glorisinela o peravdipe upral o kriso. Savo si theripe, mle phraljalen, ako ko phenđa kaj isile paćape a ćerdipna nanele? Zar les šaj o paćape te inkalel? Ako li o phral ja e phen nange ovena, thaj nane len ane sarsavodivesutno xabe, thaj phenđa lenđe khajekh kotar tumende: Džan gloripnaja, taćoven, thaj čajljardon, a na dena lenge so si valjani bašo trupo, savo si theripe? Ađahar thaj o paćape, te nane la ćerdipna, muli si korkori pe peste. No nekoj ka phenel: Tu isitu paćape, a man isima ćerdipna. Mothov mange o paćape klo bizo ćerdipna kle, a me tuće ka mothovav o paćape mlo andar e ćerdipna mle. Tu paća kaj si jekh Devel; laćhe kereja; thaj o benga paćana, thaj izdrana. Aj mange li te džane, o manušeja e sa paćamneja, kaj si o paćape bi ćerdipnasoro mulo? O Avraam, o dad amaro, na čačavela li pes ćerdipnaja kana pašljarđa e Isako ple ćhave ko viktimutno? Dikhea li sar o paćape khatanećerđa lesere ćerdipnencar, thaj andar o ćerdipna pherdinilo o paćape? Thaj pherdilo pe o Lil savo vakerela: O Avraam paćaja e Devlese, thaj leljape lese ano hakajipe, thaj amal e Devlesoro vičinđa pe. Dikhena li, akana, kaj ćerdipnaja čačavela pe o manuš, a na semo paćapnaja? A miazine thaj e Rava lubnini na čačavdape li ćerdipnencar kana lelja e phukavnen, thaj ikalđa len avere dromeja? Kaj sar so si o trupo bi đeso mulo, ađahar si thaj o paćape bi e ćerdipnasoro mulo. Phraljalen mle, ma oven bute sikamne, džanglindoj kaj ka amen pobut ka ova krisime, kaj sare but keraja bezeh. Ako nekoj ane lafija na kerela bezeh odova si pherdino manuš, zoralo si te ićerel thaj sa o trupo. Dikh, e grastenđe ćhivaja e uzde ano muj kaj amenđe te kanden, thaj sa o trupo lengoro boldaja. Eke thaj o barke, vi te si bare thaj e zorale len balvalja prastavena, boldena pe tikne kormiloja odori kuri mangela odova savo vastarela. Ađahar si thaj e ćhib tikno kotor, a ašarinela pe kaj si bari. Dikh, tiknori jag, sar bare šeja phabarđa! Thaj e ćhib si jag, them bihakajipnaso. Ađahar vi e ćhib arakhela pe maškar amare kotora, meljarindoj sa o trupo, thaj phabarindoj o phiripe amare dživdipnaso, thaj phabarindoj kotar o pakao. Kaj sako njamo e divo dživdinutnengo thaj e čiriklengo, thaj reptilengo thaj maćhengo, kovljardola pe thaj kovljardilo e njamose e manušeserese, a e ćhib nikoj kotar e manuša našti te kovljarel; odova našandino džungalipe, pherdo drab e meripnasoro. Lasa baxtaraja e Devle thaj e Dade, thaj lasa arman daja e manušen ćerdine pe forma e Devlesiri. Andar e jekhune muja ikljola o baxtaripe thaj arman. Nane laćhe, phraljalen mle, kaj akava ađahar šaj te ovel. Sar šaj andar e jekhuni xajing te đal gudlo thaj ćerko? Šaj li, phraljalen mle, e sumućin masline te bijanel ja e moljakere drakhalina e sumućina? Ađahar nijekh xajing na dela londo thaj gudlo pani. Ko si maškar tumende barođando thaj haljovino? Nek mothovela kotar o laćho arakhavdipe ple ćerdipna ano barođando kovlipe. Te li isitumen ćerko korikanipe thaj ćingaripe ane vile tumare, ma ašarinen tumen thaj ma xoxaven opipe e čaćipnasoro. Akava nane odova barodžanipe so huljela upral aj phuvljakoro, ašunipnasi, džungale đengiri. Kaj kote si o korikanipe thaj o ćingara, odothe si o bijekhipe thaj sako džungalo šej. A o barodžanipe savo si upral, anglune si khoslo, napal glorimo, kovlo, kandino, pherdo dindipe thaj laćhe bijanipa, hakajutno, thaj nadujmujengoro. A bijanutno e hakajipnaso ane glorija sijinela pe odolenge save glorija ćerena. Kotar o maripena thaj o maripa maškar tumende? Na odothar li, kotar o gudlino manglipe tumaro, save marena pe ane tumare kotora? Mangena thaj nane tumen; mudarena thaj bičaljardinena, thaj na šaj te len; marena tumen thaj lena lipe, thaj nanetumen, kaj na rodena. Rodena, thaj na lena, kaj bange rodena, kaj pe čaljardipa tumare harđinena. Anglaćumuditne thaj e anglaćumuditna, na džanena li kaj si o amalipe premalo them si dušmanluko premalo Devel? Kaj savo mangela e themese amal te ovel, dušmano e Devlesoro ovela. Ja gindinena kaj o Lil andodilipe vakerela: Korikanipnaja zorale mangela palo đi, save ćhuta ana amende? A dela pobaro dindipe; odolese phenela: O Devel opipeil pe e barikanenđe, a e šalomnenge dela dindipe. Peraven tumen, akana, e Devlese, a opipeisavon tumen e bengese, thaj ka našel tumendar. Paše aven e Devlese, thaj Ov ka avel paše ke tumende. Igaren thaj dukhaven thaj roven: o asape tumaro nek anglaovela ano rovipe, thaj o lošalipe ano dukhavipe. Teljarđon anglal o Devljutno, thaj ka vazdel tumen. Ma phukaven jekh e avre, phraljalen; kaj ko phukavela e phrale ja krisinela e phrale ple phukavela o kanuni thaj krisinela o kanuni, a o kanuni te krisinđan, nasijan agorutno e kanunesoro aj krisari. Jekh si Kanunidinutno thaj Krisari, savo šaj te inkalel thaj xasarel. Ašunen akana tumen save vakerena: Avdive ja tajsa ka dža ane akava ja okova foro, thaj ka beša odothe jekh berš, thaj ka trgovina thaj ka therina; Tumen save na džanena so ka ovel tajsa. Kaj so si o dživdipe tumaro? Ov si e para, savi bašo haricake mothovela pe, a napal thaj nananetani. Pothan te vakerena: Te o Devljutno mangela, thaj dživde ova, ka kera akava ja okova. A akana ašarinen tumen tumare telalćhutipnaja. Sako asavko ašaripe si džungalipe. Odova, akana, savo džanela laćhipe te kerel a na kerela, bezeh lese si. Phiren akana barvalalen, roven thaj dobođinen bašo belave tumare save avena. O barvalipe tumaro ćirnilo, a e šeja tumare xaljelen e cikne paparugora; O sumnakaj tumaro thaj o rup ruđininđa, thaj o ruđinipe lengoro ka ovel mothovdipe opipe tumende, thaj ka xal e trupora tumare, sar jag. Gramadinđen o barvalipe ane palune dive. Dikh, o krle e poćindi bućarnengi save ćhinde e aindža tumare, save lenđe ćhinavden; thaj e krle e ćhinutnenđe ale dži o kana e Devljutnese e Savaotese. Gudljarđen tumen ki phuv, thaj dživdinđen čhordarine; parvarden e vile tumare, sar ko dive e ćhinipnasoro. Krisinđen, mudarđen e hakajutne, thaj ov tumenđe na opipeisajlo pe. Trpinen, akana, phraljalen mle, dži o avipe e Devljutnesoro. Dikh, e phuvljako bućarno adžikerela o kamlomoldino bijando e phuvljakoro, ažućarine les ažućarindoj džikaj na lela o bršin o detharino thaj palalaćhino. Oven, akana, thaj tumen ažućarutne, zoraren e vile tumare, kaj o avipe e Devljutnesoro paše alo. Ma dobođinen jekh pe avreste, phraljalen, te na oven krisime: dikh, o Krisari terđola anglal o udara. Bašo paćivalipe e mudaripnaso thaj lunđetrpipnaso, phraljalen mle, len e profetonen save vakerena ano anav e Devljutnesoro. Eke, amen vičinaja pokovljardime odolen save anglatrpinđe. A angle sa, mle phraljalen, ma xan sovel ni badaleja ni phuvljaja, ni avera nesava xapesovljaja; nek tumaro va ovela va, a na, na; te na peren telal o krisipe. Đungarelape li ko maškar tumende? Nek ruđinel pe e Devlese. Te si ko lošalo? Nek đilabel e Devlese. Nasvalo li si ko maškar tumende? Nek vičinel e prezbiteren e khanđirjakere, thaj nek ruđinena pe upral leste, makhlindoj les uljesa ano anav e Devljutnesoro. Thaj e ruđutni e paćapesi ka inkalel e nasvale, thaj ka vazdel le o Devljutno; thaj te bezeha ćerda, ka jertinen pe lese. Mothoven eke jekh e avrenđe e bezeha, thaj ruđinen tumen e Devlese jekh bašo e averenđe, te sasljon. But si zorali e putardi ruđutni e hakajutnesiri. O Ilija sinele manuš jekhuno sar thaj amen, thaj ruđutnaja ruđisajlo e Devlese te na ovel bršin, thaj na čalavđa o bršin ki phuv bašo trin berš thaj šov ćhon. Thaj palem ruđinđa pe, thaj o badali dinđa o bršin, thaj e phuv ikalđa plo bijando. Phraljalen, ako ko tumendar našalđola kotar o drom e čaćipnaso, ta les nekoj iranela, nek džanel kaj odova savo iranela e bezehutne kotar o drom lesere xoxamneso, ka inkalel o ođi kotar o meripe, thaj ka ućharel bute bezeha. O Petar, apostoli e Isus Hristoso, e alosardenge save rigonen ano čhordaripe pe Ponta, Galatija, Kapadokija, Azija thaj Vitinija; Po anglaldžanipe e Devle e Dade, sumnaripasa e Đeso bašo kandipe thaj prskipe rateja e Isus Hristoso: Dindipe thaj o šalom tumenđe te but bijanđol. Baxtardino o Devel thaj o Dad e Devljutneso amareso e Isus Hristoso, savo amen po baro dindipe plo anglabijanđa baše dživdi adžikerutni dživdinipnaja e Isus Hristo andar e mule, baše ačhavdimasoro barvalipe thaj naperavdino thaj nameljardino thaj našućardino, savo si arakhavdo ko badali baše tumenge, e Devlesere Zoraja arakhavde andar o paćape ko ikaldipe, gatime te phućarel pe ano paluno vakti; Ano leste lošalen tumen, vi te sen akana hari, te valjanđa, dukhavdine savetane zumavdipenđe, kaj o lačhipe tumare paćapeso, majkučipe katar o sumnakaj o peravdino, no jagaja phućljardino, arakhelpe po naisipe thaj paćiv thaj glorija, kana mothovel pe o Isus Hristos; Save na dikhindoj ćumidena, thaj Le akana na dikhindoj no paćavindoj, lošalena tumen lošalipnaja namothovdinoj thaj šundidindoj, lindoj o agor ple paćapeso: ikalindoj e đengo. Katar savo ikaldipe phućle thaj rodinde o profetija, save angladikhline katar tumende o dindino dindipe; Phućindoj an savo thaj savo vakti mothovđa o Đi e Hristosoro savo sine ano lende, anglal mothovindoj baše Hristosoro mudaripe thaj baše glorija pale odova. Lenge phućarda pe kaj na pese, aj tumenđe kandiđa ane odova so tumenđe akana mothodilo prekal odola save tumenđe vakerena o evangelium e Đesa Sumnalesa bićhaldino katar o badali, ane so o phakale mangena te dikhena. Odolese kustikuindoj e kukija tumare haljovipase, oven ičerime, pherdime adžikeren o dindipe savi tumenđe ka anel pe phućaripnaja e Isus Hristoja. Sar ćhavore kandipnasere ma crden palo angle manglipa andar o vakti tumare bidžanipnasoro, aj po Sumnalo savo tumen akharđa, oven thaj korkore sumnale ane sa tumaro dživdipe. Kaj si hramome: Oven sumnale, kaj sem me sumnalo. Thaj te akharđen Dadesa odole savo, na dikhindoj ko si ko, krisinel sakonese po ćerdipe, nakhaven ane dar o vakti tumare dživdipastar, džanglindoj kaj e peravdine rupeja ja sumnakaja na ćedinđen andar tumaro mangljuno dživdipa, katar e dada tumare bućarne, aj paćivale rateja e Hristosereja, sar Bakro paćivalo thaj šandino, anglaldikhutno pale anglo ćerdo e themeso, a mothovdino ane palune vaktija baše tumende, kola andar leste paćan ano Devel savo le vazdinđa andar e mule, thaj dinđa lese glorija, ađahar kaj tumaro paćape thaj adžikeripe ovela ano Devel. E đe tumare khosindoj e Đesa ano kandipe e čaćipaso baše phralengo ćumudipe nadujmujutno, katar o khoslo vilo ćumiden jekh e averen čaćimo, anglabijandine na katar e kućina ćirne aj bićirne, lafeja e dživde Devlesereja savo aćhola sajekh. Kaj si sako trupo sar e ćar, thaj sako glorija e manušesiri sar luludi e ćarjakiri: šućola e ćar, thaj e luludi lakiri perel; Aj o lafi e Devljutneso aćhola sajekh. A odova si godo lafi savo si tumenge vakerdape. Ćhudindoj, akana, sako džungalipe thaj sako bižajipe thaj dujmujipe, thaj korikanipe thaj sa e phukavipa, jagale mangen haljovine thaj čaćune thuda, sar e nevebijande ćhavore, kaj lestar te barjon bašo ikaldipe, te ake zumavđen kaj si kovlo o Devljutno. Pašeavindoj Leste, e Barese dživdese, kotar o manuša frdimo, aj kotar o Devel alome, kamlemoldime. Thaj tumen korkore sar dživde bara zidinen tumen ano ćher e đesoro, rašajipe sumnalo, te bi pašljarena viktime đesune, kovlešukarutne e Devlese, andar o Isus Hristo. Kaj si terđola ano Lil: Ake pašljarava ano Siono Bar agorxnzuno, alome, kamlomoldimo; thaj ko ane leste paćal na ka ladžarel pe. Tumenge si, akana, save paćan e paćiv; a odolenđe save opipeisavon, o bar savo frdinde e zidarja ov ćerdilo šero katar e xnz, thaj ulo Bar perimnaso thaj Baro bar e dukhavipnaso; Save pak thaj perena lestar opipeindoj e lafese, pe so si thaj semnome. A tumen sen njamo alome, thagaresko rašajipe, seloro sumnalo, seloro theruno, te mothoven e laćhi rig Godolesiri savo tumen vičinđa andar o raćipe po naćaruno rošalipe plo; Savo nekana na sinena seloro, a akana sen seloro e Devlesoro; kola na sinena maznome, a akana sen maznome. Ćumidutnalen, ruđinav tumen sar dromarutnen thaj avrutnen, te arakhen tumen katar e truposere manglipendar, save marenpe pe ođe. Arakhentumen šukar maškar e nađangledevlesere, te bi baš odova bašo so tumen den arman sar džungalećerutne, dikhindoj tumare šukar ćerdipna, ašarinena e Devle ano dive e dikhljaripaso. Oven, akana, kandine sakone manušesere rendose, bašo Devljutno: ako e thagarese, sar e develjutnese; Ako li e šerutnenđe, sar lesere bićhalutnenđe bašo krisipe e džungalećerutnenđe, a bašo ašaripe godolenđe save šukar ćerena. Kaj si ađahar o kamipe e Devleso kaj šukar so ćerelape aćhavena o bidžanipe e bigođakere manušenge; Sar mukljune, a na sar odola save therinen o muklipe bašo garavdipe e džungalipaso, aj sar kandine e Devlesere. Sakone paćivalinen, o phralipe ćumiden, e Devlestar daran, e thagare paćivalinen. Kandinalen, oven kandine sakona daraja e develjutnenđe, na semo e šukarenge thaj e kovlenge aj vi e bilaćhenđe. Kaj odova si dindipe, te nekoj legari o dukhavdipe po mincope bašo Devel, mudarindoj nahakajune. Kaj savo si o ašaripe te ćerđen bezeh pa pedepsime, akharena? Aj te šukar ćerena pa akharena o mudaripa, odova si laćhe anglal o Devel. Kaj sen pe odova thaj vičime, kaj thaj o Hristos mudardilo baše tumenđe, meklindoj tumenđe misal te džan lesere dromencar; Ov bezeh na ćerđa, ni na arakhljape o xoxavipe ano muj lesoro; Ov dukhavdino, na iranđa dukhavdipnaja; merindoj na irinđa, aj meklja Odolese savo hakajune krisinel. Ov e bezeha amare korkoro inkalđa ko trupo plo ko kaš, kaj bašo bezeha te mera, thaj bašo hakajipe te dživdina, kaj lesere dukhavipnencar sastardiljen. Kaj sena sar xasarde bakre, aj akana irinđen tumen e Čobanese thaj e Episkopese tumare đengo. Jekhune ađahar thaj tumen, romnjalen, oven kandine tumare romenđe, kaj ako nesavo na paćana e lafija, napal dživdipnaja e romnjengoro thaj bi e lafijengoro ovena crdine, kana dikhen tumaro ćhavorikano dživdipe e daraja. Tumaro laćharipe te na ovel avrijal: ano khuvdipe e balengoro thaj ano laćharipe e sumnakajesa ja ano uravdipe e fostanjengoro; Aj ano garavdino manušesoro vilo, ano naperavdipa e laćheođesoro thaj šandune đeso, so si anglal o Devel kamlomoldino. Kaj ađahar nekana laćharena pes thaj e sumnale romnja save paćana ano Devel thaj peravenape pumare romenđe. Sar so e Sara sinele kandini e Avraamese, vičindoj le develjutneja; lakere ćhija uljen, ćerindoj šukar, thaj na darana kotar nisavo darajipe. Ađahar thaj tumen romalen, dživdinen tumare romnjencar po gođipe, mothovindoj lenđe paćiv sar bizorale džuvlidžuvljakere vasose, sar thaj kupakustikutnenca e dindipnasere dživdipase, te na oven aćhavutne e ruđutna tumare. A majpalal oven sare jekhođutne, dukhavutne, phraljaćumudime, dindipeutne, putarutne; Ma irinen o džungalipe bašo džungalipe, ni dukhavdipe bašo dukhavdipe; aj opipune, baxtaren, džanglindoj kaj sen pe odova vičime te kustikutninen o baxtaripe. Kaj savo mangela te ćumidel o dživdipe thaj te dikhel šuže dive, nek inćaren e ćhib pli kotar o džungalipe, thaj e vošta lesere te na vakeren xoxajipa. Nek durjola kotar o džungalipe thaj nek ćerel šukaripe; nek rodel šalom thaj nek ičerelpe pe leste. Kaj e jakha e Devljutnesere irinde si pe hakajutne, thaj e kana lesere pe ruđutni lengiri; a o muj e Devljutnesoro opipe pe odolenge save ćerena džungalipe. Thaj ko šaj tumenđe te ćerel džungalipe te sijen bućarne e šukaripnase? Aj vi te mudardiljen bašo hakajipe, kovljardine sijen. A olengere daratar ma daran, ni ma trašan; No e Devljutne Devle sumnaren ane vile tumare, sajekh gatime kovljaripnaja thaj daraja po irisaripe sakonese savo rodela kotar tumendar irisaripe tumare adžičeripnasoro, isindoj šukar mincope, kaj ane odova baše soste tumen phukavena sar džungalećherutnen ladžana odola save mahrinena tumaro šukar ićeripe ano Hristo. Kaj si pošukar, te manglja o kamipe e Devlesoro, te mudarđon šukaripe kerindoj, nali džungalipe kerindoj. Odolese thaj o Hristos jekhdrom bašo bezeha amare mudardilo, hakajutno bašo e bihakajutnenđe, kaj te anelamen uzalo Devel, mudardo e trupeja, a dživdisarindoj đesa; Saveja thaj hulilo thaj vakerđa e đenge ano phandlipe. Akala nekana sinele nakandine kana len adžikerena e Devlesere lungomučipe ane dive e Nojesere, kana ćerđa pe o moxto, ane savo hari, odova va, ofto đe ikaldepe panjesa, savi thaj amen akana inkalela bolipnaja sar pherdipnaja e phuranemoso, na sar thovdipe e truposere melalipnaja, aj dindolafi e Devlese laćhe mincopase dživdisaripnaja e Isus Hristosereja, savo, džapeindoj ko badali, pe daxni si rig e Devlesiri, thaj teljalćerdine si lese o phakale thaj o čhinavdine thaj o zoripe. Kana, akana, O Hristos mudardilo amenđe e trupoja, thaj tumen odole gindipnaja bandukinen, kaj ko mudarđola e trupoja, aćhavđa akana te kerel bezeha, kaj aćhavino vakti e dživdipnaso ano trupo na dživdinela maj pe manglipa e manušesere, aj po kamipe e Devlesoro. Kaj si dosta e nakhline vaktestar e dživdipnaso nakhavđen ćerindoj o kamipe e nadžangledevleserendar džikaj dinđena tumen e rumnipase, nakhavdine manglipase, mataripnase, xadžvalipnase, pijimnase thaj bidevljune peravipnase. Odolese ćudinenpe kaj tumen na prastana lencar ane jekhuno tasavdipe e bilađimaso, thaj mahrinen pe tumende. On ka den iripe po phućipe Odolese savo si gatime te krisinel e dživdenge thaj e mulenge. Odolese si thaj e mulenge vakerdino o evangelium, te len o kris ko manuš trupoja, a te dživdinen po Devel ođesa. A pe sa si o agor pašilo. Oven, akana, sapaćivale thaj haljovne ane ruđutna. A anglal pe sa te ovel tumen trajuno kamlipe maškar tumende; kaj o kamlipe ućharela bute bezeha. Oven ađikerutne maškar tumende bizo mrmipe; Sakoj sar so lelja o baxtarino dinipe, leja kanden jekh avrenge, sar laćhe vastarutne savetane Devlesere dindipnase. Ako nesavo vakerel, nek vakerel sar o lafija e Devlesere; ako nesavo kandela, nek kandel sar pe zor savi o Devel dela; kaj ane sa te ašarinelpe o Devel andar o Isuso Hristo, savese si e glorija thaj e zor ane bimeripnasoro bimeripe. Amin. Ćumidutnalen, ma ćudinen tumen e jagake savi tumenge ovela bašo zumavipe tumaro, sar kaj tumenge neso biaćarune kerelpe, aj lošalen tumen so ovena ano mudaripe e Hristosere, te bi tumen thaj ano phućardipe lesere glorijake lošanena thaj vestinena. Ako tumen akošena bašo Anav e Hristosoro, kovljarde sijen, kaj o Đi e Devlesoro, Đi e glorijakoro thaj zorakoro ovela upral tumende; on, akana, mahrinen pe leste, a tumen le ašarinena. Semo kaj nikoj tumendar te na perelmudardo sar mudarutno ja ćor ja đungaloćherutno, ja sar odova savo hamilpe ane avresere buća. No ako li sar kristijano, ma te lađal, aj nek glorisinel e Devle bašo odova leipe. Kaj si o vakti te širdipelpe o kris kotar o kher e Devlesoro; ako li majangle širdipelpe amendar, savo li pak eke ka ovel o agor odolenđe so opipeinempe e Devlesere evangeliumose? Thaj ako o hakajutno pharipnaja ikalelpe, o bidevljutno thaj o bezehutno kaj kaj mothovelpe? Odolese thaj odola save peren mudarde po kamipe e Devlesoro, nek lese sar paćavine Ćherutnese, mekena e ođe ple ano laćhoćeripe. E rašajen save si maškar tumende ruđisarav, me savo sem rašaj thaj sadićhutno e Hristosere mudaripnastar, thaj khataneutno ane glorija savi ka phućarelpe: Arakhen o stado e Devlesoro, savo si tumenge dindino, thaj upraldikhen len, na zoraja, aj laćhekhamipnaja, thaj po Devel, na bašo bipaćivalo therdipe, aj vilestar; Ni sar te devljutnisaren kustikutnipnaja e Devlesereja; aj oven dikhipe e stadose; Thaj kana ka mothovđol o Ućo Pastiri, ka len luluđengo khuvdino e glorijako savo na šućola. Ađahar thaj tumen e terne kanden e barederutnenge, a sare kandindoj jekh e avrenge, len ane angali o šalom e gođako, kaj o Devel e barikanenge opipelpe a e šalomnenge dela baxtaripe. Teljarđon, akana, telal o zoralo vast e Devlesoro, kaj tumen te vazdel kana ka avel o vakti. Sa tumare griže pašljaren pe Leste, kaj Ov phurederinelpe tumenge. Oven haljovne thaj ma soven, kaj o turlusutno tumaro, o beng, sar o lavo riknindoj phirela thaj rodela kas te xal. Lese opipentumen čhinavdine paćapnaja, džanglindoj kaj asavke ista mudaripna ćerenape tumare phralipnase po them. A o Devel sakonakere dindipnase, savo tumen vičinđa ane pli bimerutni glorija ano Hristo Isuso, Nek tumen Ov, poso hari mudarđona, laćharela, čačavela, zorjarela, temeljisarela; Lese glorija thaj zor ane bimeripnasoro bimeripe. Amin. Palo Siluano, e paćavne phralese, sar so gindisarav, hramosarđum tumenđe akava hari, te phurederisarav thaj mothovav kaj si odova čaćino dindipe e Devlesoro, ane savi tumen terđona. Kerel tumenge sastipe e Khanđiri ane Vavilona, alosardi sar thaj tumen, thaj o Marko ćhavo mlo. Keren sastipe jekh averenge kamlipnasere ćumudipnaja. Šalom tumenge sarijenge save sijen ano Hristo Isuso. Amin. O Simon Petar, kandino thaj apostoli e Isus Hristosoro, odolenge so lelje amencar jekhuno kamlomoldo paćape ano hakaj amare Devlesoro thaj e Ikaldesoro e Isus Hristosoro: Dindipe thaj šalom tumenđe te butisarelpe penđaripnaja e Devle thaj e Isuse amare Devljutne. Poso amenđe lesiri devlesiri zor dinđa sa so valjani aso dživdipe thaj devlikanipe, penđaripnaja Odole savo amen vičinđa glorijasa thaj laćhipnasa. Andar save si amenđe dindine kamlemolde thaj anglalbare dindipa kaj andar lende te oven hostijune e devlesere naturake, našindoj e truposere mangipastar ano them. Thaj akana pe akava ćhiven sa o bućarnipe ta mothoven ano paćape tumaro e laćhe riga, a ane laćhe riga o džanipe, a ano džanipe inćardipe, a ano inćardipe nakhavdipe, a ano nakhavdipe o devlikanipe, a ano devlikanipe o ćumudipe phralesoro, a ano ćumudipe e phralesoro o kamlipe. Kaj kana akava sa isitumen thaj butisarelpe ana tumende odova tumen na ka ćerel bibućarnesa thaj bibijandunesa bašo penđaripe e Devljutnesoro amare Isus Hristoro. Kaj ko akava nanele kororo si, harnedikhimasoro, bistarindoj plo khosipe katar e purane bezeha. Odolese, phraljalen grižinen tumen pana pobut kaj tumaro akharipe thaj o alope čačaven, kaj ćerindoj akava na ka keren bezeh nikana; Kaj tumenđe akana ađahar barvale ka delpe o đerdipe ano bimerutno Thagaripe e Devljutnesoro thaj e Ikalutnesoro amaresoro e Isus Hristosoro. Odolese na ka ćhinavav kaj tumenđe odolestar sajekh te vakerav, thaj ako džanena thaj čačavde sijen ane akava čaćipe; Kaj gindinava kaj si hakaj, đikaj sijem ane akava trupo kaj tumen sikavindoj te džangavav, džanglindoj kaj sigate ka mekav o trupo mlo, sar so mange thaj mothovda o Devljutno Amaro o Isus Hristo. A ka kerav kaj palo mlo đaipe tumen sajekh te dentumen godi akaleste. Kaj tumenđe ni mothovđam e zor thaj o avipe e Devljutnesoro amareso e Isus Hristosoro džapeindoj gindisarde paramićende, aj korkore sama jaćhenca dikhutne lesere baripnestar. Kaj ov lelja katar o Devel o Dad sumnipe thaj glorija kana lese avilo akava krlo katar e baripnesiri glorija: Akava si Ćhavo mlo ćumidino, savo si pe mlo kamipe. Thaj akava krlo ašundam amen sar hulilo e badalestar, đikaj sinjamle Leja pe plain sumnali. Thaj isi amen majpaćamno anglaldindo lafi, thaj šukar ćerena so arakhena pe late sar po rošutno savo rošinel ano raćutno than, đikote o Dive nabijanđola thaj e Danica na bijanđola ane vile tumare. Thaj akava majangle te đanen kaj nijekh anglaldindo lafi e Lilesko na ovela pe pesko mothovdipe. Kaj nisar o anglaldindo lafi na ulo e manušesere kamipnastar, aj sikavde e Đesa Sumnalesa vakerena e sumnale Devlesere manuša. A sinele vi thaj xoxamne profetija ano seloro, sar so thaj maškar tumende ka oven xoxamne sikamne, save ka ćhiven bange sikljojba mudarutne, thaj ka durardon e Devljutnestar savo olen ćedinđa thaj ka anen pese sigutno mudaripe. Thaj but džene ka džan pale lengere melalipa, bašo save ka akošipe o Drom e čaćipnaso. Thaj ane lokegođakoro ka therdininen tumen xoxamne lafonencar; lengoro kris dumutane na aćhola palal, thaj o mudaripe lengoro na dreminela. Aj kana o Devel na arakhlja e phakalen save ćerde bezeha, aj len frdinđa ane sinđirja e raćakere jagake, thaj dinđa te arakhenpe bašo kris; Thaj na arakhlja o purano them, aj arakhlja e vaćerutne hakajake e Noje, thaj efta dženen leja, thaj anđa o tasavdipe po them bidevlikano; Thaj e dizija e Sodoma thaj e Gomora krisinđa po properipe thaj ano praxo ćerđa, laćharindoj len bašo sikadipe e avune bidevlengerenge; Thaj ikalđa e hakajutne Loto save ladžarde o bidevlikane e melale dživdipnaja; Ta đikaj dživdinđa akava hakajutno maškar lende, dićhindoj thaj ašundoj o bikanune ćerdipna oto dive ano dive, mučinđa o hakajuno đi plo; Džanel o Devljutno e devlikanen te ikalel kotar o zumavipe, a e bihakajutnen te arakhel bašo kaznipe ane krisoso dive; A najangle odolen save džana palo trupo ano bikhoslo zoralo manglipe, thaj teljaren o devljutnipe e Devlesoro; bidarutne, korkorekamine, thaj na tresinen mahrindoj pe glorija, đikaj o phakale, save si pobare zoraja thaj zoralipnaja, na ikalena opipe lende anglal o Devljutno e mahrime krisosoro. A on, sar bigođakere dživdinutna, pe natura ćerde bašo dolipe thaj harđipe, mahrindoj pe odova so na penđarena, ano rumipe plo ka properen, thaj ka len poćindi e bihakajimnasi. On smotrinena bašo gudlipe sarsavo divesutno dživdisaripe; e biladžamne thaj e bilaćhe, save gudljarenape ple xoxavematenca, xapeindoj tumencar: E jakha si lengere pherde anglaćumidipe thaj bićhinavdino bezeh, crdinen e bičačavdine đesen, isilen vilo sikavdino ano bigindipe. Ćhave dinde armanjendar! Meklindoj o čaćo drom, našaldile, thaj pođinde dromeja e Valaamo Vosorovese savo kamlja e poćindi e bihakajipnasi, aj sinele pokorime bašo plo bikanunipe: bihaljovino vaćeripe e dživdinutnakoro vaćerđa krleja e manušesereja thaj aćhavđa o bigođipe e anglalafesoro. On si xajinga bipanjesere; nuvere e balvaljaja prastavdine, bašo lende arakhelape raćipe e raćipnaso sajekh. Kaj vakerindoj šuvlikane thaj mangle lafija xoxaven pe truposere manglipa thaj rumipe odolengo save čaće našle katar odola so dživdinen ano xoxavipe, dindoj lafi lenđe muklipe a korkore si robija e rumnipase; kaj kastar si ko viđaime odolese thaj robuinel. Kaj ako odola save našena katar o bikhoslipe e themeso penđaripnaja e Devljutne thaj e Ikalde e Isus Hristo, pale ano lende khuvdona thaj ovena peravdine, ovela lenge majpalal majđungale katar o angluno. Kaj polaćhe ka ma ovel lenge te na penđarena o Drom e hakajipnaso, nali kana le penđarde so irinđepe katar lenđe dindo sumnalo čhinavdipe. Lenđe ćerdilope odova so phenela o čaćuno xarno vaćeripe: O đućel irinelpe pe plo ćhadipe, thaj: O Balo nanđilo ta ane ćik valjanipe. Ake, ćumidinalen, hramosarav tumenđe eke e dujto bićhalutni; ane lende dindipnasa godi džangavav tumari uži godi, te den tumen godi ke lafija save angle phende e sumnale profetija, thaj o čhinavdipe tumare apostonegere kotar o Devljutno thaj Ikalutno, đanglindoj anglal akava kaj ano palune dive ka aven muj so marena save ka dživdinen pe ple korkorune manglipa, thaj ka vaćeren: So si e dinde lafenca lesere avipnasko? Kaj otkana e dada mule sa terđola ađahar katar o širdipe e ćerdipnasoro. Kaj on aradune xasarena andar o dikhipe kaj o badalija sinele dumutan, thaj kaj si e phuv andar o pani thaj katar o pani ćerdi e Devlesere lafeja, kaj kolestar adalesoro them, panjesa tasavdo, propelo. A akanautne badalija thaj e phuv ačhavde si lesere lafeja baše jag thaj arakhenpe bašo Dive e krisoso thaj mudaripe e bidevlese manušenge. Aj akava jekh ma te angladikhen, ćumidinalen, kaj si jekh dive anglal o Devljutno sar milja berša, thaj milja berša sar jekh dive. Na aćhola palal o Devljutno e dinde lafencar, sar so nesave gindinena kaj aćhola palal; aj amen but trpinela, kaj na mangela kaj iko te properel aj kaj sare te jertinenpe. A ka avel o Dive e Devljutnesoro sar ćor raćate, ane savo o badalija bara buka ka nakhel, a o stihije loljarde ka ćhordardon thaj e phuv thaj e ćerdipna so si pe late ka thabljon. Ta kana sa Akava ka ćhordardol, save valjani te oven tumen ano sumnalo thagaripe thaj devlikanipe, ađikerindoj thaj manglindoj kaj posigate te ovel o avipe e Devlesere Divese, katar savo o badalija jagaja thare ka ćhordardona thaj e stihije loljarde ka bilavđon. Neve eke badalija thaj nevi phuv po dindo lafi Lesoro ađikera, kote o hakajipe dživdinela. Odolese, ćumidnalen, ađikerindoj akava ćeren kaj te arakhavđon anglo Leste khosle thaj paćivale ano šalomipe. Thaj lungoinđaripe amare Devljutneso ićeren bašo ikaldipe, sar so tumenđe thaj o ćumidime amaro phral o Pavle po dindoj lese džanipe hramonđa, sar so vaćarela akalestar thaj ane sa ple Bićhalutna, ane save si nesave thana phare haljovime, save e bisikavde thaj bićhinavdine irinena, sar thaj e aver Lila, pe plo korkoruno properipe. A tumen, akana, ćumidnalen, đanglindoj angleder, arakhen tumen kaj xoxajipnaja e bikanutnengoro na ovena legarde lencar, thaj na perena katar tumaro dandipe, aj barjon ano dindipe thaj ano penđaripe amare Devljutnesoro thaj Ikaldo e Isus Hristoso. Lese glorija thaj akana thaj ano bimerutno Dive. Amin. So sinele katar o anglunipe, so šunđam, so dikhljam amare jaćhencar, so dikhininđam thaj o vasta amare opipinde, katar o Logos (Lafija) e dživdipnasere: Thaj o dživdipe mothovdilo, thaj dikhljam, thaj jakhencardikhljam, thaj mothova tumenđe o Dživdipe bimerutno, savo sinele ano Dad thaj mothovdilo amenđe; So dikhljam thaj šunđam mothovaja tumenđe kaj thaj tumen amencar te ovel tumen khatanipe, a amari khetani si e Dadeja thaj lesere Ćhaveja e Isus Hristoja. Thaj akava tumenđe hramosaraja kaj o lošalipe amaro ovela pherdino. Thaj akava si o dinde lafija save šunđam lestar thaj mothovaja tumenđe, kaj si o Devel roš, thaj raćipe ane leste nane nisave. Te phenđam kaj isiamen khatanipe leja thaj ano raćipe phira, xoxava thaj na vaćera o čaćipe. Te li ani roš phira, sar so si Ov korkoro ano rošipe, isiamen khatanipe jekhe e avrencar, thaj o rat e Isus Hristosoro, lesere Ćhaveso, khosela amen katar sako bezeh. Te phenđam kaj bezeha nane amen, amen xoxava, thaj čaćipe nane ane amende. Te mothovđam e bezeha amare, paćavino si thaj hakajuno te jertisarel amenđe e bezeha, thaj khosela amen katar sako bihakajipe. Te phenđam kaj na ćerđam doša, ćera le xoxavime thaj o lafi lesoro nane ane amende. Mle ćhavoralen, akava hramosarav tumenđe kaj te na ćeren doša; thaj ako nekoj ćerela doš, isi amen Bićhalutno koro Dad, o Isus Hristo o Hakajutno. A ov si viktima baraštipnaso bašo bezeha amare, thaj na semo bašo amare nego thaj sa e themesere. Thaj pe odova džana kaj ole penđarđam, ako o ćinavdipa lesere ićerđam. Okova savo vaćeri: Pendžarđum ole, a lesere čhinadipa na ićerel, xoxavipe si, thaj ano leste čaćipe nane; A savo ićerel o lafi lesoro, hemčaće si ano leste o kamlipe e Devlesoro reslja o pherdipe; pe odova džana kaj ano leste sijam. Odova savo vaćarela kaj ano leste dživdini, udžilime si kaj sar so Ov dživdinđa thaj korkoro ađahar te dživdinel. Phraljalen, na hramosarav tumenđe čhinadipe nevo, aj čhinadipe purano savo sinele tumen katar o anglunipe. Čhinadipe purano si o lafi savo ašunden katar o širdipe. Pale tumenđe hramosarav čhinadipe nevo, odova so si čaćuno ano leste thaj ane tumende: kaj o raćipe nakhela thaj o rošipe čaćipnaso eke strefinela. Okova savo vakerela kaj si ano rošipe, a mrzinela ple phrale, ano raćipe si sa đi akana. Okova savo ćumidela ple phrale, ano rošalipe dživdinela, thaj bar ane leste nane; A savo mrzinela ple phrale, ano raćipe si, thaj ano raćipe phirela, thaj na džanela kuri đala, kaj lese o raćipe korjarela o jaćha. Hramosarav tumenđe, čhavoralen, kaj si tumenđe jertime e bezeha bašo o Anav lesoro. Hramosarav tumenđe, dadalen, kaj penđarden Odole savo si katar o anglunipe. Hramosarav, tumenđe ternenđe, kaj peravđen e benge. Hramosardem tumenđe, čhavoralen, kaj penđarđen e Dade. Hramosardem tumenđe, dadalen, kaj penđarđen Odole savo si katar o anglunipe. Hramosardem tumenđe, ternalen, kaj sijen zorale thaj o lafi e Devlesoro ane tumende dživdinela thaj peravđen e benge. Ma ćumiden e theme ni so si ano them. Kaj sa so si ano them: e truposoro si mangipe, thaj mangipe e jakhengoro, thaj barikanipe e dživdipasoro, nane kotar o Dad, aj si kotar o them. Thaj o them nakhela thaj o mangipe lesoro; a odova savo ćerela o kamipe e Devlesoro aćhola aso bimeripe. Čhavalen, paluno si o časo, thaj sar so ašunđen kaj o Antihristo avela, thaj akana mothodepe bute antihristija; odothar džana kaj si paluno časo. Kotar amendar iklile, aj na sinele kotar amendar; kaj te oven kotar amendar, aj bi aćhovena amencar; aj te mothovenpe kaj naj sare amendar. A tumen isitumen Makhlipe kotar o Sumnalo thaj đanena sa. Ni hramosardem tumenđe odolese kaj na džanena o čaćipe, aj kaj đanena, thaj kaj nisavo xoxajipe nane kotar o čaćipe. Ko si xoxamno te na odova kova čhudela kaj o Isus si čaće o Hristos. Odova si o antihristo, savo durjarela e Dade thaj e Ćhave. Sako savo durjarela e Ćhave, ni Dad nanole; a savo priznainela e Ćhave, isile thaj Dad. Tumen, akana, so ašunđen kotar o anglunipe, odova ana tumende nek aćhol; ako ane tumende aćhola odova so kotar o anglunipe ašunđen, thaj tumen ka aćhoven ano Ćhavo thaj ano Dad. A akava si dinde lafija save amenđe Ov dinđa, dživdipe bimerutno. Akava tumenđe hramosardem kotar odola save tumen xoxavena. A tumen, o Makhlipe savo leljen kotar Leste, ana tumende aćhola, thaj na valjani kaj tumen nikoj te sikavel; aj sar tumen odova jekhuno Makhlipe sikavela oto sa, thaj čaćuno si thaj nane xoxajipe, thaj sar so tumen sikavđa, aćhoven ano leste. Thaj akana, čhavoralen, aćhoven ano leste kaj kana ka mothovelpe isiamen rošipe, thaj te na lađa anglo leste katar o Avipe lesoro. Ako džanen kaj si Ov hakajutno, džanen kaj si sako savo ćerela hakaj lestar si bijando. Dikhen kozom amenđe kamlipe dinđa o Dad, kaj ćhave e Devlesere te vičinamen thaj ova; odolese amen o them na penđarela, kaj ole na penđarđa. Čumidninalen, akana sinjam ćhave e Devlesere, thaj pana na phućardilo so ka ova; a džana kaj kana ka phućardol, ka ova miazune Lese, kaj ka dikha le sar so čaće. Thaj sakoj savo akava ađikeripe isile ano leste, čistinela pes, sar Ov so si khoslo. Sako savo ćerela bezeh thaj bikanunipe ćerel; a o bezeh čaće si bikanunipe. Thaj džanen kaj Ov mothovdilo kaj e bezeha amare te lel; thaj bezeha ane leste nane. Sako kova ane leste dživdini na ćerela doš; sako savo ćerela doš na dikhlja le ni le penđarđa. Ćhavoralen, nikoj tumen te na xoxavel; savo ćerel hakaj hakajuno si, sar so si Ov hakajutno; Odova savo ćerela bezeh kotar o beng si, kaj o beng ćerela doš katar o anglunipe. Baše odolese mothovđape o Ćhavo e Devlesoro te peravel e ćerdipna e bengesere. Sako savo si bijando kotar o Devel na ćerela bezeh, kaj e kućin Lesiri aćhola ane leste, thaj našti te ćerel doš, kaj si kotar o Devel bijando. Pe akava penđarđona e ćhave e Devlesere thaj e ćhave e bengesere: Sako savo na ćerela hakaj nane kotar o Devel, ni odova savo na kamela ple phrale. Kaj akava si bićhalipe, savo ašunden kotar o anglunipe, te ćumida jekhe avre. Na sar so o Kain sinele kotar o beng thaj ćhinda ple phrale. A baše soste le ćhinda? Kaj e ćerdipna lesere sinele džungale, a e phralesere si hakajutne. Ma ćudinen tumen, mle phraljalen, ako tumen o them mrzinela. Amen džana kaj nakhljam andar o meripe ano dživdipe, kaj ćumida e phraljen; kaj ko na ćumidela e phrale aćhola ano meripe. Sako savo mrzinela ple phrale si manušmudarutno; a džanen kaj nijekh manušmudarutno nanole bimeripasko dživdipe savo aćhola ano leste. Pe odova penđardam o kamlipe so Ov baše amenge o dživdipe plo pašljarda; thaj amen sam udžilime te pašljara o dživdipe bašo phralja. A kas isile barvalipe akale themeso, thaj dikhela e phrale ple ano bilaćhipe, thaj phandela o vilo plo lestar, sar tegani o kamlipe e Devlesoro dživdini ano leste? Mle čhavoralen, ma te ćumidina lafeja ni ćhibijaja, aj ćerdipnaja thaj čaćipnaja. Thaj pe odova đana kaj sam kotar o čaćipe, thaj ka šalomina anglo leste o vile amare: Kaj ako amen krisinela o vilo, o Devel si pobaro kotar o vilo amaro thaj džanela sa. Čumidninalen, ako amen o vilo amaro na krisinela, tromalipe isiamen anglo Devel; Thaj sa so rodaja, la kotar lestar, kaj o čhinadipe lesoro ićeraja thaj ćera so si laćhe lese. A akava si o čhinavdipe lesoro: te paća ano anav lesere Ćhavesoro e Isus Hristoso, thaj te ćumida jekh e avre sar so amenđe dinđa o čhinavdipe. Thaj odova savo ićerela o čhinavdipe lesoro ano leste dživdini, thaj Ov ano leste. Čumidninalen, ma paćan sakone đesese, aj phućljaren e đesen aj li si katar o Devel; kaj si bute xoxamne profetija iklile ano them. Pe akava penđarena o Đi e Devlesoro: Sako đi savo aćhola pe odova kaj o Isus Hristo ano trupo avilo, katar o Devel si; A sako đi savo na aćhola pe odova kaj o Isus Hristo ano trupo avilo, nane katar o Devel; thaj odova si đi e Antihristoso, savese šunđen kaj avela, thaj akana si eke ano them. Tumen sijen katar o Devel, čhavoralen, thaj peravđen len, kaj si pobaro Odova savo si ane tumende aj savo li si ano them. On si katar o them, odolese vaćerena katar o them, thaj o them len šunela. Amen sam kotar o Devel; savo penđarela e Devle šunela amen, savo nane kotar o Devel na šunela amen. Pe akava penđara e đe e čaćipnaso thaj đe e xoxajpnaso. Čumidninalen, te ćumida jekhe avren; kaj si o kamlipe kotar o Devel, thaj sako savo ćumidel kotar o Devel si bijando, thaj penđarela e Devle. Savo na ćumidela ni penđarda e Devle; kaj o Devel si kamlipe. Ane odova mothovdilo o kamlipe e Devlesoro premalo amende kaj o Devel e Ćhave ple Jekhunebijandine bićhalđa ano them te dživdina Leja. Ane odova si o kamlipe, na kaj amen kamljam e Devle, aj kaj Ov kamlja amen, thaj bićhalđa ple Ćhave, sar viktima baraštipnaso bašo bezeha amare. Čumidninalen, kana ađahar o Devel kamlja amen, thaj amen sam udžilime te ćumida jekhe avren. E Devle nikoj nisar na dikhlja: ako ćumida jekhe avren, o Devel ane amende dživdini, thaj o kamipe si lesoro pherdino ane amende. Pe akava džana kaj ane Leste dživdina, thaj Ov ane amende, so amenđe dinđa katar o Đi plo. Thaj amen dikhljam thaj vakeraja kaj o Dad bićhalđa e Ćhave – Ikalutne e themesoro. Savo aćhilo pe odova kaj si o Isus Ćhavo e Devlesoro, o Devel ane leste dživdinela thaj ov ano Devel. Tha amen penđardam thaj paćajam o kamlipe savo o Devel isile premalo amende. O Devel si kamlipe, thaj savo dživdinela ano kamlipe, ano Devel dživdinela thaj o Devel ane leste. Odoleja o kamlipe mothovdilo pherdino ane amende, kaj te ovela amen tromalipe po Dive e kriseso; kaj sar so si Ov, thaj amen sam ane akava them. Ano kamlipe nane dar, aj o pherdino kamlipe prastavi e dar avrijal; kaj si ane dar munčipe, a ko darala, na pherdilo ano kamlipe. Amen ćumida le, kaj Ov angluno kamlja amen. Ako ko phenda: Ćumidav e Devle, a mrzinela e phrale ple, xoxajipe si; kaj savo na ćumidela e phrale ple save dikhela, sar šaj te ćumidel e Devle, save na dikhlja? Thaj akava čhinavdipe isiamen kotar lestar: Savo ćumidela e Devle, te ćumidel thaj e phrale ple. Sako savo paćal kaj o Isus si Hristos, kotar o Devel si bijando; thaj sako savo ćumidela e bijandine ćumidela thaj e bijande kotar leste. Pe odova džana kaj ćumida e ćhaven e Devleseren kana e Devle ćumida thaj o čhinadipe lesere ićera. Kaj akava si o kamlipe e Devlesoro – kaj o čhinadipe lesoro te ićera; a o čhinavdipe lesere nane phare. Kaj sa so si bijando katar o Devel peravela o them; thaj akava si peravipe savi peravđa o them – o paćape amaro. Ko si odova savo peravela o them đi okova savo paćal kaj o Isus si Ćhavo e Devlesoro? Ov si odova so alo panjeja thaj rateja, o Isus Hristos; na semo panjeja, aj panjeja thaj rateja; thaj o Ođi si odova savo dikhovakeri, kaj o Ođi si čaćipe. Kaj si trin so dikhovakerena po badali: o Dad, o Logos (Lafi), thaj o Sumnalo Ođi; thaj akala trin si jekh. Thaj trin si so dikhovakerena ki phuv: ođi, thaj pani, thaj rat; thaj akala trin si jekhune. Te leljam o dikhovakeripe e manušesoro, o dikhovakeripe si e Devlesoro pobaro; kaj akava si dikhovakeripe e Devlesoro savo dikhovakerinđa kotar plo Ćhavo. Savo paćal ano Ćhavo e Devlesoro isile dikhovakeripe ana peste; savo na paćal e Devlese ćerđa le xoxajipnaja, kaj na paćaja e dikhovakeripnase savesa o Devel dikhovakerđa kotar plo Ćhavo. Thaj akava si dikhovakeribe kaj amenđe o Devel dinđa o dživdipe bimerutno; thaj akava dživdipe si ano Ćhavo lesoro. Okova savo isile Ćhavo isile dživdipe; kas nane Ćhavo e Devlesoro nanele dživdipe. Akava hramosardem tumenđe save paćana ano anav e Devlesere Ćhaveso, te džanen kaj isi tumen dživdipe bimerutno thaj te paćan ano anav e Devlesere Ćhaveso. Thaj akava si tromalipe savo isi amen premalo leste kaj amen te ašunela ako so ruđinaja po kamipe lesoro. Thaj kana džana kaj amen ašunela sa so ruđinaja, džana kaj isi amen rodindo so rodinđam lestar. Ako nekoj dikhela e phrale ple kaj ćerela doš bezehosa na po meripe, nek ruđinelpe, thaj ka del lese dživdipe; odolenđe save ćerena doš na po meripe. Sarsavo bihakajipe si bezeh a isi bezeh na po meripe. Džana kaj sako bijando kotar o Devel na ćerela doš, aj savo si bijando kotar o Devel arakhela pes, thaj o beng le na azbosarel. Džana kaj sam kotar o Devel, thaj kaj o them celo ano džungalipe pašljola. A džana kaj o Ćhavo e Devlesoro alo thaj dinđa amenđe godi te penđara e Čaćutne; thaj sijam ano Čaćuvitno, ano Ćhavo lesoro o Isus Hristo. Ov si čaćino Devel thaj dživdipe bimerutno. Čhavoralen, arakhen tumen kotar e idolja! Amin. O šerutno e alosarde rajake thaj lakere ćhavenge, saven me kamava ano čaćipe, thaj na semo me, aj thaj sare save penđarde o čaćipe, bašo čaćipe savo aćhola ane amende thaj amencar ka ovel đi o bimeripe: Te ovel tumencar o bahtaripe, dindipe, šalom kotar o Devel o Dad thaj kotar o Devljutno Isus Hristo, Ćhavo e Dadeso, ano čaćipe thaj kamlipe. Lošalindem pe but kaj arakhlem nesaven kotar e ćhave kle kaj phirena ano čaćipe, sar so leljam o čhinadipe kotar o Dad. A akana, ruđinav tut, rajlije, na sar kaj tuće nevo čhinadipe hramosarav, aj sava sineamen katar o anglunipe te ćumida jekh e avren. A akava si kamlipe: te phira pe čhinadipna lesere. Akava si čhinadipe, sar ašunden katar o anglunipe, kaj pe leste te phiren. Kaj bute xoxamne iklile ano them, save na aćhoven pe odova kaj o Isus Hristo avilo ano trupo; asavko si xoxamno thaj o antihristo. Arakhen tumen, te na našala odova so ćerdam, aj te la pherdi poćindi. Sako savo nakhela thaj na aćhovela ano sikljojbe e Hristosoro, odole nane Devel; a savo aćhovela ano sikljojbe e Hristosoro, ole isi thaj Dad thaj Ćhavo. Ako nekoj avela tumende thaj akava sikavipe na anela, ma te len le ano kher thaj ma te delen sastipe. Kaj ko sastarelape leja lel lipe ane lesere džungale ćeripna. Sinele bi man pana but tumenđe te hramonav, aj na mangljum ko lil thaj tintasa, aj ađikerava kaj ka avav tumende, thaj mujale tumenđe te vaćerav, kaj o lošalipe amaro te ovel pherdino. Bićhalen tumenđe sastipe o ćhave kle penjakere e alosardinakere. Amin. Šerutne Gajose e ćumuditnose, save me hemčaće ćumidava. Ćumuditneja, ruđinape kaj ano sa šukar te anglalisare, thaj sasto te ove, sar so tuće šukar anglisarel o ođi. Kaj lošalisajlem but kana avile e phralja dikhovakerindoj kotar o čaćipe klo, sar tu ano čaćipe dživdineja. Kotar odova nanema pobaro lošalipe aj te ašunav sar mle ćhave dživdinena ano čaćipe. Ćumuditneja, paćavutne kere sa so kereja bašo phralja thaj bašo avutne, save dikhovakerinde klo kamlipe anglal e Khanđiri; thaj šukar ka kere ako len laćhardan ko drom sar so valjani anglo Devel. Kaj bašo o Anav lesoro iklile, na lindoj niso kotar e biđangledevlesere. Amen sem, akana, udžilime te la asavken, te ova ažutarime e Čaćipase. Hramonđum e Khanđirjake; aj o Diotref, savo mangela te ovel angluno maškar amende, na lela amen. Odolese, te aljum, ka mothovav lesere ćeripna save ćerela, akošavipna amen džungale lafencar; thaj nane lese odova ari, aj korkore phraljen na lela, thaj ćhinavela odolenge save bi mangena te lel len, thaj prastavi len andar e Khanđiri. Ćumuditnea, ma dikh tut po džungalipe, aj po šukar. Savo šukar ćerela kotar o Devel si, a savo džungalipe ćerela na dikhlja e Devle. Kotar o Dimitrije dikhovakerinde sare, thaj korkoro čaćipe; a thaj amen dikhovakeraja; thaj džanen kaj si o dikhovakeripe amaro čaćino. But isima te hramonav, aj na mangava tintasa thaj peroja te hramonav tuće; Aj ađikerav kaj sigate ka dikhav tut thaj mujale ka vaćera. Šalom tuće! Bićhalen tuće sastipe e amala. Bićhal sastipe e amalenđe ko anava. Amin. O Judo, kandino e Isus Hristoso, o phral e Jakovljeveso, e akhardutnenđe, e sumnalenđe e Devleja e Dadeja thaj arakhavdine e Isus Hristoja: Dindipe thaj šalom thaj o kamlipe te butisavol tumenđe. Čumudninalen, phurederindoj pe sako ćhand tumenđe te hramonav kotar o sabuhljuno ikaldipe, sinelema valjanipe tumenđe te hramonav ruđindoj te maren tumen bašo paćape jekhdrom dindini e sumnalenđe. Kaj đerdinde nesave manuša dumutane anglal hramonde bašo akava krisipe, e bidevlesere save o dindipe e Devlesoro amaresoro irinena ano rumipe, thaj durarđona jekhune Episkopestar thaj amare Devljutnestar e Isus Hristostar. A mangava te dav tumen gođate, so tumen sajekh džanen, kaj o Devljutno ikalindoj o seloro andar e phuv e egipatesiri, xasarda napalal odolen save na paćaje; Thaj e phakalen save na ićerde plo paćivalipe, aj mekle plo thanesobešipe, ačavda e krisose e bare Divese ane sinđirja bimerutne telal o raćipe, sar so o Sodom thaj o Gomor, thaj e dizija trujal lende save sinele pe lende miazuno ćhand dindile lubnipase thaj lijepe pale aver trupo, terđona sar misal, ćerdine krisutne bimeripnasere jagake. Miazune, eke, thaj akala sunale ratvarena o trupo thaj meljarena o Devljutnipe e (Devlesoro), a pe glorija akošena. A o Mihailo Arhanđel, kana xala pes e bengeja vakerela kotar e Mojsijesoro trupo, na krisisalo te ćhinavel e džungardeso kriso, aj phenda: O Devljutno neka ukorini tut! A akala akošena pe odova so na džanen; a so pe natura sar e bihaljovne dživdinutna džanen, ane odova preperena. Pharipe lenđe, kaj e Kainosere dromeja džele thaj ano xoxavipe e Valaamose poćinimako pele, thaj e Korejevasere uštibnaja xasardile thaj poangle. On si lađipe pe tumaro kamlipasoro raćakoro xabe, xapeindoj tumencar bi lađakoro, pes ćarindoj; bipanjesere badalija, save e balvalja pudena len; e kašta tomnaće, bibijandine, dujdrom mule, thaj andar e darhina inkalde; E holjarime morijaske vazdine save spuminen pes pumare lađipnaja; o phiravne čerenja, bašo save o raćipe e tunjarikosoro arakhelpe bašo bimeripe. Aj thaj bašo e akava vakerda o profeto Enoh, eftato kotar o Adam, vakerindoj: Dikh, džala o Devljutno e milja miljancar ple sumnalencar, te ćerel kris upral sarijende, thaj te ukorini sa e biedevleseren bašo sa lengere bidevlesere ćeripna savenca bidevlipe ćerde, thaj baše sa bimanušne lafija save e bidevlesere bezehalutne vakerde opipe Lestar. Akala si mrmale, bićaljarde, save phirena pe pumare mangipa, thaj e muja lengere vakerena šuvljarde lafija, thaj bašo dobipe ašarena e manušenge. A tumen, čumudinalen dentumen godi ke lafija save eke phende e apostolija amare Devljutnesere e Isus Hristosere, kaj tumenge vakerde kaj ano paluno vakti ka mothovenpe okola so muj marena save ka phiren pe ple bidevlesere manglipa. Akala si odola save ćerena ulavdipe, ašunde si thaj Ođi nanelen. A tumen, ćumudinalen vazden tumen tumare najrošutne paćapnaja, ruđindoj ano Ođi Sumnalo, ićeren tumen ano kamlipe e Devlesoro, ađikerindoj o dindipe amare Devljutnesoro e Isus Hristosoro bašo bimeripnasoro dživdipe. Thaj krisimnaja jekhunenđe oven dindine, a e averen ane dar ikalen ikaljindoj len andar e jag, a e tritonen ukorinen e daraja, ritindoj thaj o fostani meljardo kotar o trupo. A Odolese savo tumen šaj te arakhel e bidindevikatar thaj te ćhivel tumen angal e glorija ple paćivalipnaja ano lošalipe, jekhune anglagođavere Devlese, amare Ikaldutnese, andar o Isus Hristo, amare Devljutnese, glorija thaj barikanipe, zoralipe thaj thagaripe anglal o sa bimeripe thaj akana, thaj ane sa bimeripa! Amin. Phućardipe e Isus Hristosoro, savo lese dinđa o Devel, te mothovel ple kandinenge so ka ovel sigate; thaj mothovđa le bićhalindoj le prekal o phakalo plo ple kandinese e Jovanese, savo dikhovakerinda o lafi e Devlesoro thaj o dikhovakeripe e Isus Hristosoro, sa so dikhlja. Baxtalo si odova savo drabarel thaj odola save ašunena e lafija anglalmothopnasere, thaj arakhena odova so si hramome ano leste, kaj o vakti si paše. E Jovanestar ko efta Khanđirja save si ane Azija: Dindipe tumenđe thaj šalom e Devlestar, Savo si thaj Savo sinele thaj Savo avela; thaj kotar efta ođendar, save si anglal o astali lesoro; Thaj kotar o Isus Hristo, savo si Sadikhutno paćivalo, Anglunobijando andar e mule, thaj Devljutnari upral e phuvljengere thagara. Odolese savo amen ćumidela thaj thovđa amen kotar e bezeha amare ple rateja, thaj ćerda amen thagaripnasa, rašajencar e Devlese thaj ple Dadese, lese glorija thaj zor ane bimeripnasoro bimeripe. Amin. Ake, Ov avela e badalencar, thaj ka dikhel le sako jakh, thaj odola save le posavde; thaj ka roven bašo leste sa e phuvljengere njamura. Va! Amin. Me sem Alfa thaj Omega, vakerel o Devljutno Devel, Savo si thaj Savo sinele thaj Savo avela, Saićerutno. Me, o Jovan, o phral tumaro thaj khatanutno ano bilaćhipe thaj thagaripe thaj trpipe ano Isus Hristo, injumle ki šuki phuv vičime Patmos bašo lafi e Devlesoro thaj samothovdipe bašo Isus Hristo. Injumle ano Ođi ano dive e Devljutnesoro, šunđum krlo pala mande zoralo sar e truba, savo vakerelape: So dikheja hramosar ane pustik, thaj bićhal ko efta Khanđirja: ano Efes, thaj ane Smirna, thaj ano Pergam, thaj ano Tijatir, thaj ano Sard, thaj ane Filadelfija, thaj ane Laodikija. Thaj irisaljem odori te dikhav o krlo savo vakerela mancar, thaj irisarindoj dikhljum efta sumnakajune memeljara, thaj maškaral ane efta memeljara Nekas savo ličini ko Ćhavo e manušesoro, urjavdo ano baro fostani, thaj kustikome ko kolin sumnakune kustikaja. A o šero lesoro thaj e bala sinele parne sar e parni pošom, sar o iv, thaj e jakha lesere sar o jagalo e jagakoro; Thaj o pre lesere sar e strefuno bakeri kana angarisavol pe ano šporeto; thaj o krlo lesoro sar bašipe e bare panjengoro. Thaj sinele le ane plo daxno vas efta čerenja, thaj andar o muj lesoro inklela ostro mačo pe solduj riga, thaj o muj lesoro sinele sar o kham so strefinela ane pli zor. Thaj kana le dikhljum, peljum ke pre lesere sar mulo, thaj Ov pašljarda o daxno vas plo upre mande, vakerindoj: Ma dara, me sem o Angluno thaj o Paluno. Thaj Dživdo; thaj injumle mulo thaj ake dživdo sem ane bimeripasere bimeripa, thaj isi man e nahtara katar o meripe thaj katar o pakao. Hramosar, eke, so dikhljan, thaj so si thaj so ka ovel palo akava: O garavdipe e efta čerenjengoro save dikhljan ki daxnori mli, thaj efta memeljara sumnakaje. Efta čerenja si o phakale e efta Khanđirjengere, a efta memeljara si efta Khanđirja. E phakalesere Khanđirjake ano Efes hramosar: Ađahar vakerela Odova savo ikerela efta čerenja ane daxnori pli, thaj savo phirela maškaral e efta sumnakajune memeljara; Džanav o ćerdipna kle, thaj e buti kli, thaj o trpipe klo, thaj kaj našti te inđare e đungalen, thaj upraldikhljardan odolen save vaćarena pese kaj si apostolija a nane, thaj arakhljan kaj si xoxamne. Thaj trpipe isi tut, thaj mučisajlan bašo Anav mlo, thaj na cidinđan tut. No isima holi pe tute, so okova angluno kamlipe klo aćhavđan. De tut godi, akana, kotar peljan, thaj jertin tut, thaj odola anglune ćerdipna ćer; te na li, ka avav tuće sigate, thaj ka duravav o memeljari klo katar o than lesoro te na jertisajlan. Aj akava isi tut kaj ritosare o ćerdipna e Nikolaitesere, save thaj me ritov. Kas isi kan nek šunela so o Ođi vakerela e Khanđirjenđe. Odolese ko peravela ka dav le te xal kotar o kaš e dživdipnasoro savo si ano rajo mle Devlesoro. Thaj e phakalesere Khanđirjake ane Smirna hramosar: Ađahar vakerela o Angluno thaj o Paluno, savo sinele mulo thaj dživdinisajlo: Džanav e ćerdipna kle, thaj o bilaćhipe thaj o ćororipe – aj sijan barvalo – thaj mahripe odolengoro save vakerena kaj si Judejcija a nane, aj sinagoga e satanesiri. Ma dara nihari kotar odova so isi te trpine. Dikh, o beng nesaven tumendar ka frdel ano phandlipe, te bi tumen zumavela, thaj ka ovel tumen bilaćhipe deš dive. Ov paćavino dži o korkoro meripe thaj ka dav tut khuvdino dživdipnaso. Kas isi kan nek šunel so o Ođi vakerela e Khanđirjenđe. Odolese savo peravela ni ka ćerel đungale o dujto meripe. Thaj e phakalesere Khanđirjake ano Pergam hramosar: Ađahar vakeri Odova savo isile mačo ostro pe solduj riga: Džanav e ćerdipna kle, thaj kaj beše, odothe kote si o than e sataneskoro; thaj ikereja o Anav mlo, thaj ni mekljan o paćape mlo ni ane odola dive ane save o Antipa, paćivalo sadikhutno mlo, mudardilo ke tumende, kote o satana bešel. Aj hari si maje bange pe tute, kaj isi tut odothe save ićerenape po sikavipe e Valameso, savo sikavda e Valako te frdel peravipe maškar o ćhave e Izrailjesere te xan viktime e idolesere thaj te ljubnisaren. Jekhune ađahar isi thaj tut odola save ićerenape o sikljojba e Nikolaitesoro. Jertin tu, akana; te li na, ka avav tuće sigate, thaj ka marav ma lenca mačoja mle mujea. Kas isi kan nek šunel so o Ođi vaćeri e Khanđirjenđe. Odolese savo peravela ka dav te xal kotar e mana garavdi, thaj ka dav le o bar parno, thaj ko bar nevo Anav hramosardo, savo nikoj na džanela semo okolestar savo lela le. Thaj e phakalesere Khanđirjake ane Tijatira hramosar: Ađahar vaćeri o Ćhavo e Devlesoro, kaseri si jakha sar o jagalo e jagakiri, a o pre sar e strefuni xarkuma: Džanav e ćerdipna kle, thaj o kamlipe, thaj o paćape thaj o kandipe, thaj o trpipe klo, thaj akanutne ćerdipna kle si pođenutne kotar angleder. Aj hari si mange holi pe tute kaj mekea e džuvljaće e Jezaveljaće, savi phenela pese kaj si profetica, te sikavel thaj te crdel e kandinen mlen te ljubnisaren thaj te xan viktime e idolengere. Thaj dinđum la vakti te jertilpe, aj voj na mangela te jertilpe kotar o ljubnipe plo. Ake frdav la po buljardo than nasvalipnaso, a odolen save ćerena anglaćumidipe olaja ano bilaćhipe baro, te na jertisajle katar e ćerdipna lakere, thaj e ćhaven lakeren ka xasarav meripnaja; thaj ka penđaren sa e Khanđirja kaj sem me savo lačharel e bubrezi thaj o vile, thaj ka dav sakonese tumendar pe ćerdipna tumare. A vakerava tumenđe e aćhutnenđe e Tijatirconenge, save na ićerena o sikavipe akava, save na penđarena e xoripe e satanesere, sar so vakerena; na ka mekav upral tumende aver ladavipe, aj okova savo isitumen ićeren đikote ni avav. Thaj odolese savo peravela thaj ićerela o ćerdipna mle đi o agor, ka dav o thagaripe upral e biđangledevleserenge; Thaj ka thagaren upral lende sastrunale rovljaja, thaj on ka phađon sar vasore e pirjarengere; Sar thaj me kaj leljum kotar o Dad mlo; thaj ka dav lese e sabalesiri čereni. Kas isi kan nek šunel so o Ođi vaćeri e Khanđirjenđe. Thaj e phakalesere Khanđirjake ane Sarda hramosar: Ađahar vaćeri Odova so isile efta ođe e Devlesere thaj efta čerenja: Džanav kle ćerdipna, isi tut anav kaj sijan dživdo, a mulo sijan. Džangavđov thaj ma sov, ta čačav aćhuno so si gotime te merel, kaj na arakhljum kle ćerdipna kaj si pherdine anglal o Devel mlo. Ićer ane godi, eke, sar leljan thaj šunđan, ićer odova thaj jertin tu. Te li na sijan džangavdo, ka avav tuće sar ćor, thaj na ka džane ane savo časo ka avav pe tute. Aj isi tut thaj ano Sardo nekobor len, save na meljarde e fostanja ple, thaj ka phiren mancar ane parne, kaj si paćivale. Ađahar odova savo ka peravel ka ovel hurjavdo ane fostanja parne, thaj na ka khosav o anav lesoro andar e Pustik e dživdipnasiri, thaj ka lav pe mande o anav lesoro anglal o Dad mlo thaj anglal o phakale lesere. Kas isi kan nek šunel so o Ođi vaćeri e Khanđirjenđe. Thaj e phakalesere Khanđirjake ane Filadelfija hramosar: Ađahar vaćeri o Sumnalo, o Čaćuno, savo isile o nahtari e Davidesoro, savo phravela thaj nikoj na ka phandel, thaj savo phandela thaj nikoj na ka phravel. Džanav e ćerdipna kle; eke, phravdem e udara anglal tute save nikoj našti te phandel; kaj hari zor isi tut, a ićerđan mlo lafi, thaj na durandiljan mle Anavestar. Ake dava tute andar e sinagoga e satanesiri okolen save vakerena baše peste kaj si Judejcija a nane, aj xoxaven; ake, ka ćerav kaj on te aven thaj te teljon anglal o pre kle, thaj te džanen kaj me tut ćumidav. Odolese so ićerđan mlo ćhinavdipe katar o trpipe, thaj me tut ka arakhav kotar o časo e zumavipnaso savo ka avel pe sa e vasionako them te zumavel odolen save dživdinena ki phuv. Avava sigate; ićer so isi tu, kaj nikoj te na lel o khuvdino klo. Okole savo peravela ka ćerav direkosa ano hramo mle Devlesoro, thaj maj nane te ikljol avrial; thaj ka hramonav pe leste o Anav mle Devlesoro, thaj o anav e forosoro mle Devlesoro, neve Jerusalimo, savo huljela katar o badali mle Devlestar, thaj nevo Anav mlo. Kas isi kan nek šunel so o Ođi vaćeri e Khanđirjenđe. Thaj e phakalesere Khanđirjake ane Laodikija hramosar: Ađahar vaćeri Amin, O Sadikhutno paćivalo thaj čaćuno, Širdipeutno ćeripnasoro e Devlesoro: Džanav o ćerdipna kle, kaj nasijan ni šudro ni tato. O, te ove šudro ja tato! Ađahar, poso sijan tatoro, thaj na sijan ni šudro ni tato, ka ćhungarav tut andar o muj mlo. Kaj vakerea: Barvalo sem, thaj barvalijem, thaj niso na valjani maj; a na đane kaj sijan bibaxtalo, thaj dobođino, thaj ćororo, thaj kororo, thaj nango. Sikavava tut te ćine mandar sumnakaj jagasa jagalo, te barvaljove; thaj parne fostanja, te hurjave tut, ta te na sikavđol o lađavipe kle nangipasoro; thaj melemi te makhe o jakha kle, te dikhe. Me odolen save ćumidava mahrinava thaj laćharava; odolese ćer, thaj jertin tu. Ake terđovava anglo udar thaj khuvava; ako ko šunela o krlo mlo thaj phravela o udar, ka đerdinav ke leste thaj ka xav raćako xabe leja, thaj ov mancar. Odolese savo peravela ka dav te bešel mancar pe sumnali bešaldi mli, sar thaj me so peravđum thaj bešlem mle Dadeja pe sumnali bešaldi lesiri. Kas isi kan nek šunel so o Ođi vakerela e Khanđirjenđe. Napal dikhljum: thaj dikh, o udara phravde ko badali, thaj šunđum odova jekhuno krlo kaj vakeri mancar sar truba thaj phenela: Ukli akari, thaj ka mothovav tuće so isi te ovel pale akava. Thaj sigo sema ano Ođi; thaj dikh, e sumnalesiri bešalutni terđola ko badali, thaj pe sumnalesiri bešalutni bešela Điko, po dićhipe miazuno e barese jaspin thaj sard; thaj trujal e sumnalesere bešalutnake sinele duga po dikhipe sar smaragd. Thaj trujal e sumnalesere bešalutnake sinele bišu štar sumnale bešalutne, thaj pe sumnale bešalutna dikhljum bišu štaren phurederutnen kaj bešen, urjavde ane parne fostanja, thaj e sumnale khuvdinencar pe pumare šere. Thaj kotar e sumnale bešalutna ikljovena strefina thaj o krle thaj o grmavine; thaj efta jagakere memelja thabljona anglal e sumnalesiri bešalutni, a odola si efta ođe e Devlesere. Thaj anglal e sumnalesiri bešalutni sar derav đamesoro, miazuno e kristalese; thaj maškaral e sumnale bešalutnakoro thaj trujal e sumnale bešalutnakoro štar đivde ćeripna, pherde jakha anglal thaj palal. Thaj angluno ćeripe sinele miazuno e lavese, thaj o dujto ćeripe miazuno e guruvorese, thaj o trito ćeripe sinele le muj sar o manuš, thaj o štarto ćeripe sinele miazuno e orlose ano furjalipe. Thaj sakoj kotar e štar dživde ćeripna sinelen po šov phaka, trujal thaj andral pherde jakha, thaj dive thaj rat na šalominde vakerindoj: Sumnalo, Sumnalo, Sumnalo o Devljutno Devel Saićerutno, Savo sinele thaj Savo si thaj Savo avela. Thaj kana e dživde ćeripna dinde glorija thaj paćiv thaj naisipe Odolese savo bešela pe sumnalesiri bešalutni, Savo dživdinela ano bimeripasoro bimeripe, pele o bišu štar phurederutne anglal Odova so bešela pe sumnalesiri bešalutni, thaj telile Odolese so dživdinela ano bimeripasoro bimeripe, thaj pašljarde e khuvdine ple anglal e sumnalesere bešalutnake vakerindoj: Paćivalo sijan, Devljutneja thaj Devleja amareja, te le e glorija tha e paćiv thaj e zor, kaj Tu ćerđan sa, thaj kla kamipnaja sa sikavdilo thaj ćerdilo. Thaj dikhljum ane daxnori Odole savo bešela pe sumnalesiri bešalutni e pustik hramomi andral thaj avrijal, štambiljimi e efta štambiljencar. Thaj dikhljum e phakale zorale kaj mothovela bare krleja: Ko si paćivalo te phravel e pustik thaj te phagel o štambilja lakere. Thaj nikoj naštine ni ko badali, ni ki phuv, ni telal e phuv te phravel e pustik, a ni te dikhel ane late. Thaj me runđum but kaj na arakhljape nikoj paćivalo te phravel e pustik, a ni te dikhel ane late. Thaj jekh kotar o phurederutne phenda mange: Ma rov, ake, peravđa o Lavo savo si andar o njamo e Judejengo, Inkljutno e Davidesoro, thaj ka phravel e pustik thaj ka phagerela o efta štambilja lakere. Thaj dikhljum maškaral e sumnalesere bešalutnake thaj štar dživde ćeripna, maškar o phurederutne, o Bakroro kote terđola sar ćhindo, thaj sinele le efta šinga thaj efta jakha, a odola si efta ođe e Devlesere save bićhalenape pe sa e phuv. Thaj alo thaj lelja e pustik andar e daxnori Odolestar savo bešela pe sumnalesiri bešalutni. Thaj kana lelja e pustik, štar dživde ćeripna thaj bišu štar phurederutne pele anglal o Bakroro; sakone sinele gusle, thaj sumnakaje taxtaja pherde tamjano, a odola si ruđutna e sumnalenge. Thaj đilabde đili nevi, vakerindoj: Paćivalo sijan te le e pustik, thaj te phrave e štambilja lakere; kaj sijanle ćhindo thaj kle rateja ćedinđan e Devlese amen andar sakova njamo thaj ćhibija thaj selore thaj njamo. Thaj ćerdan len e Devlese amarese thagarencar thaj rašajencar thaj ka thagarinen ki phuv. Thaj dikhljum thaj šunđum o krlo butengoro e phakalengoro trujal e sumnalesiri bešalutni thaj e dživde ćeripna thaj e phurederutne, thaj sinele o đindo lengoro mirijade mirijadengoro thaj milja miljenđe. Vakerindoj but bare krleja: Paćivalo si o Bakroro savo si ćhindo, te lel e zor thaj o barvalipe thaj baro gođaveripe thaj paćiv thaj e glorija thaj o baxtaripe. Thaj šunđum kote sako ćeripe so si ko badali thaj ki phuv thaj telal e phuv thaj so si ko derav, thaj sa so si ano lende, vakerel: Odolese so bešela pe sumnalesiri bešalutni, thaj e Bakrorese, baxtaripe thaj paćiv thaj glorija thaj zor ane bimeripasere bimeripa! Thaj o štar dživde ćeripna phende: Amin. Thaj o phurederutne pele thaj telile. Thaj dikhljum kaj o Bakroro phravđa jekh kotar e efta štambilja, thaj šunđum jekh kotar e štar dživde ćeripna kaj vakerela sar krlo e grmavinakoro: Ava thaj dikh! Thaj dikhljum, thaj dikh, o gras parno, thaj okova so bešela pe leste sine le čhudini; thaj dindilo lese o khuvdino, thaj mothovdilo peravindoj, thaj te peravel. Thaj kana phravđa o dujto štambilji, šunđum o dujto dživdo ćeripna kaj vakerela: Ava! Thaj iklilo o gras lologalbenalo, thaj okolese so bešela pe leste dinđa pe te lel o šalom e phuvljatar ta kaj e manuša maškarpeste te ćhinenpe, thaj dinđa pe lese o mačo baro. Thaj kana phravđa o trito štambilji, šunđum e tritone dživde ćeripne kaj vakerela: Ava thaj dikh! Thaj dikhljum, thaj dikh, o gras kalo, thaj okova so bešela pe leste sine le kantari ano plo vast. Thaj šunđum sar krlo maškar e štar dživde ćeripna kaj vakerela: Kantari điv dinarese, thaj trin kantarja ječmoske e dinarese, a o ulje thaj e mol ma te ćhinave. Thaj kana phravđa o štarto štambilji, ašundem o krlo e štartone dživde ćeripne kaj vakerela: Ava thaj dikh! Thaj dikhljum, thaj dikh, o gras praxale bojakoro, thaj o ikljutno pe leste kasoro anav si Meripe, thaj o pakao džala palo leste; thaj dindilo pe lese o thagaripe upral e phuvljakoro štartunipe, te mudarel mačoa thaj bokhalipnaja thaj meripnaja thaj dživdine phuvljaćerencar. Thaj kana phravđa o pandžto štambilji, dikhljum telal o viktimutno ćhinde ođi bašo lafi e Devlesoro thaj bašo sadikhipe e Bakroresoro save sinelen. Thaj vičinde bare krleja vakerindoj: Džiko te, Devljutneja Sumnaleja thaj Čaćutneja, ka durare te krisine thaj te ikale o rat amaro pe odola so dživdinena ki phuv? Thaj sakonese kotar lende dindilope fostano parno, thaj vakerdino si lenge te ađićeren pana hari vakti, džiko te na pherđola thaj o džendo lengere paše amalendar thaj lengere phraljendar, save isi te oven mudarde sar thaj on. Thaj dikhljum, kana phravđa o šovto štambilji, ulo baro phuvljakoro tresipe, thaj o kham ulo kalo sar gono kotar o ostro bal e buznjako, thaj o masek sa ulo sar o rat; Thaj o čerenja e badalesere pele ki phuv, sar so e sumućin frdela ple kućina kana dela kuna e bari balval; Thaj o badali cidinđape sar o lil kotar e pustik kana banđola, thaj sakoj plain thaj e šuki phuv miškosajle katar e ple thana. Thaj e thagara e phuvljakere thaj e baredera thaj e vojvoda thaj e barvale thaj e zorale thaj sako robo thaj o mukljutno garavde pe ane pećine thaj uće bara e plainakere; Thaj vakerena e plainenđe thaj e uće barenđe: Peren upral amende thaj garaven amen kotar o muj Odolesoro so bešela pe sumnali bešalutni thaj kotar bari xoli e Bakroresiri, kaj alo o baro Dive lesere bare xoljakoro, thaj ko šaj te aćhol? Thaj napal dikhljum štaren phakalen kote terđona pe štar x'nza e phuvljakere, thaj ićerena štar balvalja e phuvljakere, te na phudel e balval ki phuv, ni ko derav, a ni pe nisavo kaš thaj dikhljum e avere phakale kaj vazdelpe kotar o istok e khameso, save sinele štambilji e dživde Devlesoro, thaj dija vika zorale krleja e štare phakalenđe savenđe sinele dindo te rumisaren e phuv thaj o derav, vakerindoj: Ma rumisaren e phuvlja, ni e derava, ni e kašta, džikaj na ćhiva o štambilji amare Devlesere kandinenge pe ćekata lengere. Thaj šunđum o đendo hramosarde e štambiljesa: šel thaj saranda thaj štar milje odolengoro e štambiljesa kotar e sa njamura e Izrailjesere ćhavenđe: Andar o njamo e Judinosoro dešuduj milje štambiljesa; andar o njamo e Ruvimesoro dešuduj milje; andar o njamo e Gadovesoro dešuduj milje; Andar o njamo e Asirovesoro dešuduj milje; andar o njamo e Neftalimosoro dešuduj milje; andar o njamo e Manasijesoro dešuduj milje; Andar o njamo e Simeunesoro dešuduj milje; andar o njamo e Levijevesoro dešuduj milje; andar o njamo e Isaharovesoro dešuduj milje; Andar o njamo e Zavulonovesoro dešuduj milje; andar o njamo e Josifovesoro dešuduj milje; andar o njamo e Venijaminesoro dešuduj milje odolengoro e štambiljesa. Napal dikhljum, thaj dikh, bute seloren save našti nikoj te đenel, kotar sako njamo thaj bijandino thaj seloro thaj ćhibija, terđona anglal e sumnali bešalutni thaj anglal o Bakroro, urjavde ane fostanja parne, thaj palme ane vasta lengere; Thaj dena vika zorale krleja, vakerindoj: Ikaldipe si ano Devel amaro savo bešela pe sumnali bešalutni, thaj ano Bakroro. Thaj sa e phakale terđovena trujal e sumnali bešalutni thaj o phurederutne thaj štar dživde ćeripna, thaj pele natele mujesa anglal e sumnali bešalutni, thaj telile e Devlese, vakerindoj: Amin! Baxtaripe thaj glorija thaj baro đanipe thaj naisipe thaj paćiv thaj zoralipe thaj zor e Devlese amarese ane bimeripasoro bimeripe. Amin! Thaj irisarda jekh kotar o phurederutne, vakerindoj mange: Akala urjavde ane parne fostanja, ko si, thaj kotar ale? Thaj phendem lese: Devljutneja mleja, tu džane. Thaj phenda mange: Akala si odola save ale andar o bilaćhipe baro, thaj thovde e fostanja ple thaj parnjardo len ano rat e Bakroresoro. Odolese si anglal e sumnali bešalutni e Devlesiri, thaj kanden lese dive thaj rat ano hramo lesoro; thaj Odova savo bešela pe sumnali bešalutni ka dživdinel ano lende. Na ka maj bokhaljona, a ni na ka pečon panjese; thaj ni na ka pekelen o kham, a ni nisavo tatipe. Kaj o Bakroro, savo si maškaral e sumnale bešalutnako, ka ćarjar len thaj ka legarel len pe xajinga e dživdipasere panjenge; thaj ka khosel o Devel sako asvi katar e jakha lengere. Thaj kana putarda o eftato štambilji, ćerdilo š'tipe po badali trujal o ekvaš časo. Thaj dikhljum efta phakalen save terđovena anglal o Devel, thaj dindilope lenge efta trube. Thaj o aver phakalo alo, thaj terdino anglal o viktimutno ićerindoj e sumnakajesi kandilutni, thaj sinele lese dindo but tamjano te aćhavel e ruđutnencar sa e sumnalenge po sumnakajuno viktimutno anglal e sumnali bešalutni. Thaj uštilo o čuro katar o tamjano e sumnalesere ruđutnencar andar e vasta e phakalesere anglal o Devel. Thaj lelja o phakalo e kandilutni thaj pherđala jagaja katar o viktimutno thaj frdinđala ki phuv. Thaj ule e grmavine thaj bašipe thaj strefipe e jagengo thaj phuvljakoro tresipe. Thaj o efta phakale saven sinelen efta trube, gatisajle te phuden. Thaj o angluno phudinđa, thaj uli kukudi thaj jag, hamime rateja thaj odova sine frdime ki phuv, thaj tritunipe e phuvljakoro thabilo, thaj tritunipe e kaštengoro thabilo, thaj sa e vunato ćar thabili. Thaj o dujto phakalo phudinđa, thaj sar e bari plain jagaja thabili sinele frdime ano derav; thaj tritunipe e deravesoro ulo rat, thaj mudardilo tritunipe e dživde ćeripnengoro ano derav thaj tritunipe e barkengoro peravdilo. Thaj o trito phakalo phudinđa, thaj peli kotar o badali e čereni bari, savi thabljola sar umlal, thaj peli ko tritunipe e lenjenge thaj pe xajinga e panjengere. A o anav e čerenjako sinele Pelen. Thaj tritunipe e panjesoro ulo pelen, thaj but manuša mule kotar e panja, kaj ule čerke. Thaj o štarto phakalo phudinđa, thaj khuvdo sinele tritunitno e khamesoro thaj tritunitno e masekeso thaj tritunitno e čerenjengoro, ađahar kaj raćatilo lengoro tritunipe, thaj kaj o tritunipe e divesoro na rošinel, ađahar thaj o raća. Thaj dikhljum thaj šunđum jekhe barephakengo kaj ural maškar o badali thaj vakerela zorale krleja: Ava, ava, ava odolenđe save dživdinena ki phuv kotar e avera krle e trubakere odole trine phakalenđe save tek ka phuden. Thaj o pandžto phakalo phudinđa, thaj dikhljum e čereni kaj peli kotar o badali ki phuv thaj dindilo pe laće o nahtari kotar o xoripe e biagoresoro, thaj phravđa o xoripe e biagoresoro, thaj iklilo o ćuro andar o xoripe sar čuro e loljarde kubakoro thaj raćatilo o kham thaj o ajri katar o ćuro andar o xoripe e biagoresoro. A andar o ćuro iklile e xututne ki phuv thaj dindilo pe lenge o zoralipe sar so isilen zoralipe e skorpijen ki phuv. Thaj vakerdino lenđe si, kaj te na globin e phuvljakere ćarjaće, a ni nisave zelenipnase, a ni nisave kaštese, aj semo e manušenge save nanolen o štambilji e Devlesoro pe lengere ćekata. Thaj dindilo pe lenge na te mudaren len, aj te munčinen len pandž masekija; thaj o munčipe lengoro sinele sar munčipe kotar e skorpija kana xala e manuše. Thaj ane odola dive ka roden o manuša meripe, thaj na ka arakhen la; thaj ka mangen te meren, thaj o meripe katar lende ka našel. A o dikhipe e xututnengo sinele miazuno sar o grasta gatime bašo maripe, thaj ko šere lengere sinele sar nesave khuvdine miazune e sumnakajese, thaj o muja lengere sar muja e manušengere; Thaj sinelen bala sar bala e džuvljakere, thaj e danda lengere sinele sar danda e lavengere; Thaj sinelen sastrune šeja sar sastresko arakhaduno thaj sastrune šeja, thaj o bašipe lengere phakengo sinele sar šunipe bute grastengere vorda kana prastana ano maripe. Thaj sinelen porika miazune e skorpijenđe, thaj posavutna, thaj ane ple porika zor te keren lošipe e manušenge pandž masekija. Olen sinelen thagar upral lende phakalo kotar xoripe e biagoresoro, kasoro anav si ko judengoro Avadon, a po grekikano Apolion. Jekh džungalipe nakhlo, ake avena pana duj džungalipa pale akava. Thaj o šovto phakalo phudinđa, thaj šunđum jekh krlo kotar e štar sumnakajune šinga e viktimutnesoro savo si anglal o Devel, kaj vakerel e šovtone phakalese savo sinele e truba: Phrav e štaren phakalen save si phandle ki bari len Eufrat. Thaj sinele phravde o štar phakale gatime aso časo, thaj dive, thaj masek, thaj berš, te mudaren o tritunipe e manušengoro. Thaj o đindo e urumnengoro pe grasta sinele dušel milionja; thaj šunđum lengoro đindo. Thaj ađahar dikhljum ano dikhipe e grasten thaj odolen kaj bešena pe lende, saven sinelen sastrune šeja jagale, modra thaj sumporale; thaj o šere grastengere sinele sar šere e lavonengere, thaj andar e muja lengere ikljola jag thaj ćuro thaj sumpori. Kotar akala trin džungalipa mudardilo trinunipe e manušengoro, kotar e jag thaj kotar o ćuro thaj kotar o sumpori so ikljola andar o muja lengere. Kaj o zor e grastesiri si ane lengere muja thaj ane lengere porika, a lengere porika miazune si e sapenđe, isilen šere thaj lencar kerena lošipe. A e aver manuša save na mudardile kotar akala džungalipa, ni jertisajle kotar e ćeripna ple vastengere, te na teljardon e džungale ođenđe, ni e sumnakajune idolenđe thaj e srmaćenenge thaj e staćunenge thaj e barešerenge thaj e kašteserenge, save našti ni te dikhen, ni te šunen, ni te phiren; Thaj ni jertisajle baše ple mudaripa, ni baše ple drabaripa, ni bašo plo lubnipe, ni bašo plo ćoripe. Thaj dikhljum e avere phakale zorale kote huljela e badalestar, savo sinele hurjavdo ano oblako, thaj e bojali kustik sinele pe lesoro šero, thaj o muj lesoro sinele sar o kham, thaj e pre lesere sar direkore jagale; Thaj ov ićerela ano vast plo e pustikori phravdi, thaj terdino ple daxne preja ko derav a e čućeja ki phuv; Thaj dija vika bare krleja sar so del vika o lavo. Thaj kana ov dija vika, vakerdinde e efta grmavine ple krlencar. A kana vakerdinde e efta grmavine, mangljum te hramonav, aj šunđum o krlo kotar o badali savo vakerel: Štambiljin odova so vakerde o efta grmavine, thaj odova ma hramosar. Thaj o phakalo save dikhljum kaj terđola ko derav thaj ki phuv, vazdinđa plo daxno vast mamuj o badali, thaj xala sovlji Odoleja savo dživdinel ane bimeripasere bimeripa, Savo ćerda o badali thaj so si pe leste, thaj e phuv thaj so si pe late, thaj o derav thaj so si ane leste, kaj vaktija nane maj te ovel; Aj ano dive krloja e eftatone phakalese, kana ka phudel, tegani ka dindol agor e garavdini Devlesiri, sar so mothovda ple kandinenge e profetonenge. Thaj o krlo savo šunđum e badalestar, palem vakerda mancar thaj phenđa: Dža, le e pustikori phravdi ano vast e phakalesoro savo terđola ko derav thaj ki phuv. Thaj dželjum e phakalese thaj phendem lese te del man e pustikori. Thaj phenda mange: Lela thaj xal ola; thaj ka čerćarel tuće e por, aj ano muj klo ka ovel gudli sar o avđin. Thaj leljum e pustikori andar o vast e phakalesoro, thaj xalem la; thaj sinele ano muj mlo gudli sar o avđin, a kana xalem la, uli ćerki e por mli. Thaj phende mange: Valjani pale te profetine anglal o selore thaj njamura thaj ćhibija thaj thagara butune. Thaj dija man trska miazuni e rovljoraće, vakerindoj: „Ušti thaj merisarin o hramo e Devleso thaj o viktimutno, thaj odolen save teljona ano leste; A e avruni avlin e hramosiri muk thaj ole ma te merisare, kaj si dindo e biđangle devleserenge, thaj on ka uštaven o sumnalo foro saranu duj ćhona. Thaj ka dav duje sadikhutnenge mlenge thaj ka profetinen milja thaj dušel thaj šovardeš dive, urjavde ano gone.” Akala si duj masline thaj duj memeljutna so terđona anglal o Devljutno e phuvljakoro. Thaj ako lenge ko kerela bihakajipe, e jag ikljola andar e muja lengere thaj xala e dušmanjen lengeren; thaj ko lenge bi mangela te kerel bihakajipe, ov musaj ađahar te mudardol. Akalen isilen o thagaripe te phanden o badali, te na perel o bršin ki phuv ano dive lengere profetipnase; thaji silen o thagaripe upral e panja te len anglaćeren ano rat, thaj te khuven e phuv sakona munkaja kana god ka mangen. Thaj kana ka agorinen o sadićhipe plo, o divo so ikljola andar e xor e biagoresoro ka kerel maripe lencar, thaj ka peravela len, thaj ka mudarela len. Thaj e trupora lengere ka mekel ko trgo e bare foreso, savo ođikane vičinipe Sodom thaj Egipat, kote thaj o Devljutno lengoro sinele kovime. Thaj o manuša andar o seloro thaj bijanipna thaj ćhibija thaj njamija ka dikhen e trupora lengere trin thepaš dive, thaj na ka meken kaj e trupora lengere te pašljardon ano limori. Thaj o thanutne e phuvljakere ka lošajvon baše lende thaj ka pherđon lengere vile thaj dindipa ka bićhalen jekh e averenđe, kaj akala duj profetija munčinde e thanutnen e phuvljakere. A palo trin thepaš dive đerdinđa ane lende o ođi e dživdipaso kotar o Devel, thaj terdine pumenđe ko pre, thaj e dar bari lelja odolen save olen dikhena. Thaj ašunde zuralo krlo katar o badali, savo lenge vakeri: Ikljon akari! Thaj iklile ko badali pe nuvera, thaj dikhle len o dušmanja lengere. Thaj ane odova časo sinele baro tresipe e phuvljakoro, thaj pelo o dešutno kotor e foroso, thaj mudardile kotar o tresipe e phuvljakoro efta milje anava e manušengere, a e avera darandile thaj dinde glorija e badalesere Devlese. O džungalipe dujto nakhlo; ake džungalipe o trito avela sigate. Thaj o eftato phakalo phudinđa, thaj ule bare krle ko badali save vakerena: Ulo o thagaripe e themesoro Thagaripe e Devljutnesoro amaresoro thaj e Hristoso lesoro, thaj ka thagarinela ane bimeripasere bimeripa. Thaj biš thaj štar phurederutne, save bešena pe pumare sumnale bešalutne anglal o Devel, pele pe muja ple thaj telile e Devlese, vakerindoj: Naisinaja tuke, Devljutneja Devla Sainćarutneja, Savo sijan, thaj Savo sijana, thaj Savo aveja, kaj leljan e zor kli bari, thaj thagarinđan tut; Thaj e biđangledevlesere xoljande, thaj ali e xoli kli thaj o vakti e mulenge te krisinelpe, thaj te delpe e poćindi kle kandinenge, e profetonenge thaj e sumnalenge thaj odolenge save darana kle Anavestar, e tiknenđe thaj e barenđe, thaj te mudarenpe odola save ruminena e phuv. Thaj phravdilo o hramo e Devlesoro ko badali, thaj mothovdilo o moxto e xapesovljakoro e Devljutnesoro ano hramo lesoro; thaj sinele jagale strefipa, thaj krle, thaj grmavine, thaj phuvljako tresipe, thaj kukudi bari. Thaj semno baro mothodilo ko badali: E romni urjavdi ano kham, thaj o masek telal o pre lakere, thaj ko šero lakoro o khuvdino kotar o dešuduj čerenja. Thaj oj sinele khamni, thaj dela vika kotar e dukha munčindoj pe te bijani. Thaj mothovdilo o dujto semno ko badali, thaj dikh, bari loli aždaja kola sinela efta šere thaj deš šinga; thaj ko šere lakere efta krune; Thaj e pori lakiri crdela o tritunipe e badalesere čerenjendar, thaj frdela len ki phuv. Thaj e aždaja aćhili anglal e romni savi valjani te bijani, ta kana ka bijanel te xal e čhavore lakere. Thaj bijanđa murše Čhavore, savo ka thagarel sa e seloren sastrunala rovljaja; thaj o Čhavoro lakoro sine lindo ko Devel thaj lesere sumnale bešalutnake. A e romni naštini ane drmina kote sinela than gatisardo e Devlestar, kaj odothe te parvarenla milja thaj dušel thaj šovardeš dive. Thaj ulo maripe ko badali; O Mihail thaj lesere phakale leje te marenpe e aždajaja, thaj mardape e aždaja thaj e phakale lakere; Thaj sinele peravde, a ni lenge maj na arakhavdilo than ko badali. Thaj frdime sine e aždaja bari, e purani sapni, savi vičinela pe beng thaj satana, savi crdela sa e vasiona, thaj frdime sine ki phuv, thaj olaja frdime sine e phakale lakere; Thaj šunđum krlo baro ko badali savo vakerela: Akana ulo ikaldipe thaj o zor thaj o Thagaripe amare Devlesoro thaj o thagaripe lesere Hristosoro, kaj si frdime o perutno amare phralengoro, savo len peravela anglal o Devel amaro dive thaj rat. Thaj on le peravdole rateja e Bakroresereja thaj ple sadikhipnasere lafeja, thaj na hajinđe pumare dživdipnase dži o meripe. Odolese lošalen tumen badalen, thaj tumen kola dživdinena pe lende! Pharipe e phuvljakere thanutnenge thaj e deravesere, kaj huljilo ke tumende o beng ane xoli bari, džanglindoj kaj hari vakti isile. Thaj kana dikhlja e aždaja kaj sine frdime ki phuv, lelja te prastavel e romnja savi bijanda e murše Čhave. Thaj e romnjaće sinele dinde duj phaka e bare orlosere te uralel ane drmina po than plo, kote ka parvardol o vakti thaj vaktija thaj ekvaš o vakti, dur kotar e sapni. A e sapni muklja pala e romni andar o muj plo o pani sar len, kaj e len te inđarela. Thaj e phuv ažutinđa e romnnjaće, thaj phravđa e phuv o muj plo thaj nakhavda e len savi muklja e aždaja andar o muj plo. Thaj xolajli e aždaja pe romni thaj dželi te marelpe e aćhutnencar andar e kućina lakere, save ikerena o čhinavdipa e Devlesere thaj isilen o sadikhipe e Isus Hristosoro. Thaj terdinjum ki pošik e deravesiri, thaj dikhljum e divo dživdinutna kote ikljola andar o derav, savi sinela deš šinga thaj efta šere, thaj ko šinga lakere deš krune, thaj ko šere lakere o Anava e mahripnasere. Thaj e divo dživdinutna sava dikhljum sinela miazuno sar o ris, thaj e pre lekere sar ane mečka, thaj o muj lakoro sar o muj e lavesoro. Thaj dija laće e aždaja pli zor thaj e bešalutni pli thaj o thagaripe baro. Thaj dikhljum jekh kotar e šere lakere sar ko meripe ćhindi, thaj lakiri meripnasiri dukhavni uli sastipini. Thaj telile e divo dživdinutnaće vakerindoj: Ko si sar e divo dživdinutni? Ko šaj lasa te marelpe? Thaj dindi laće sinela o muj savo vakerela barikane anava thaj mahripe, thaj dinđa pe laće o thagaripe te džungakerel saranda thaj duj ćhona. Thaj phravđa o muj plo bašo mahripe ko Devel, te mahrinel o Anav lesoro, thaj o ćher lesoro, thaj odolen save bešena ko badali. Thaj dindilo pe laće te marelpe e sumnalencar thaj len te peravel; thaj dindo laće o thagaripe upral sako bijanutno thaj selorutno thaj ćhibijanutno thaj njamonanutno. Thaj telile laće sare odola save dživdinena ki phuv, kasoro anav naj hramome ane Pustik e dživdipasiri e ćhinde Bakroresiri katar o ćerdipe e themeso. Ako kas isi kan nek šunel. Ko ano robipe lagari, ano robipe ka džal; ko mačesa mudari, valjani thaj ov mačesa te ovel mudardo. Akate si trpipe thaj o paćape e sumnalengoro. Thaj dikhljum e dujtone divo dživdinutna kote ikljola andar e phuv, thaj sinela ola duj šinga sar ano bakroro, thaj vakerela sar e aždaja. Thaj sa o thagaripe e anglune divo dživdinutnaće ćerena anglo late; thaj ćerda kaj e phuv thaj odola kaj dživdinena pe late teljardon e anglune divo dživdinutnaće, kasiri meripnasiri dukhavni sastili. Thaj ćerela semne bare, ta ćerda kaj thaj e jag te huljel kotar o badali ki phuv anglal e manuša. Thaj xoxavela odolen save dživdinena ki phuv prašukaripenca, save laće sine dinde te kerel anglal e divo dživdinutni, vakerindoj odolenđe save dživdinena ki phuv te ćeren o muj e divo dživdinutnakoro, sava sinela dukhavni kotar o mačo thaj aćhili dživdi. Thaj sinela lake dindo kaj e divo dživdinaće mujese te del ođi, kaj o muj e divo dživdinutnakoro thaj vakerela thaj kerela te oven mudarde odola save ni teljona e divo dživdinutnake mujese. Thaj kerda sa, e tiknen thaj e baren, e barvalen thaj e ćororen, e mukljutnen thaj e robonen, te den lenđe belego pe daxno vast lengoro ja ko čekat lengoro, kaj nikoj našti ni ćinel ni bićinel, semo ko isile belego, o anav e divo dživdinutnako ja o đindo lakere anaveso. Akate si o džanipe. Kas isi godi nek sakedel o đendo e divo dživdinutnako; kaj si o đendo e manušesoro, thaj o đendo lakoro si šov šel šovardeš thaj šov. Thaj dikhljum, thaj dikh o Bakroro savo terđolape pe plain Sion thaj Leja šel thaj saranda thaj štar milje, saven sinelen o Anav lesoro thaj o Anav lesere Dadeso hramome ko čekata lengere. Thaj šunđum krlo e badalestar sar krlo e bute panjengoro, thaj sar krlo zorale grmavinako; thaj krlo savo šunđum sinele sar guslipe e guslareso ane ple gusle. Thaj džilabena nevi đilib anglal o bešalutno thaj anglal e štar dživde džene thaj anglal e phurederutne; thaj nikoj naštine te sikljol akaja džilib semo odola šel thaj saranda thaj štar milje save si ćinde e phuvljatar. Akala si odola save ni ratvardile e romnjencar, kaj si devutne; akala si odola save džana palo Bakroro sar kaj džala; akala si ćinde maškar e manuša sar anglune e Devlese thaj e Bakrorese; Thaj ane lengere muja ni arakhljape xoxajipe, kaj si bi manevako. Thaj dikhljem e dujtone phakale savo ural maškar o badali, save sinele bimerutno Evangeliumo te mothovel odolenge save dživdinena ki phuv thaj sakone njamose thaj bijanutnese thaj ćhibijake thaj selorese. Thaj vakerela zorale krleja: Daran e Devlestar, thaj den lese glorija, kaj avilo o časo lesere kriseso; thaj teljon Odolese savo ćerda o badali thaj e phuv thaj o derav thaj e xajinga e panjesere. Thaj o dujto phakalo džala palo leste vakerindoj: Pelo, pelo o Vavilono baro, savo zorale moljaja kotar plo lubnipe mačarda sa e seloren. Thaj o trito phakalo džala palo lende vakerindoj grmavinakere krleja: Sar ko teljola e divo dživdinutnaće thaj lakere mose, thaj lela belego ko čekat plo ja po vast plo, thaj ov ka pijel kotar e mol e Devlesere bara xoljatar, savi si nahamime čhordini ane taxtaj lesere bara xoljatar, thaj ka ovel munčime ane jag thaj sumpori anglal e sumnale phakale thaj anglal o Bakroro. Thaj o ćuro lesere munčipnastar ka uštel ano bimeripasoro bimeripe; thaj na ka ovel le bešipe dive thaj rat odola save teljona e divo dživdinutnaće thaj lakere mose, thaj ko godi lela belego lakere anavestar. Akate si munčipe e sumnalengoro, save ićerena o čhinavdipe e Devlesoro thaj o paćape e Isusesoro. Thaj šunđum o krlo e badalestar savo mange vakerela: Hramosar: Baxtarde o mule kola od akana merena ano Devljutno! Va, vakerela o Ođi, mek aćhaven kotar e buti pumari, a e ćeripna lengere ka džan palo lende. Thaj dikhljum, thaj dikh o nuveri parno, thaj ko nuveri bešela Nesavo miazuno e Ćhavese e manušeserese, savo sinele ko šero plo khuvdino sumnalo, a ano vast plo luno ostro. Thaj o dujto phakalo iklistilo andar o hramo vikadindoj zorale krleja Okolese so bešela ko nuveri: Zorale ćhin kle luneja thaj ćhin o điv, kaj avilo o vakti te ćhinelpe o điv, kaj o điv ki phuv šućilo. Thaj Okova so bešela ko nuveri frdinđa o luno plo ki phuv, thaj ćhindo sine o điv ki phuv. Thaj o dujto phakalo inklilo andar o hramo so si ko badali, thaj ole sinele luno ostro. Thaj o dujto phakalo inklilo andar o oltari, savo sinele o thagaripe upral e jag, thaj dija vika zorale krleja okolese savo sinele o luno ostro: Zorale ćhin kle luneja e ostroneja, thaj ćhin e drakh e phuvljakere drakhalinendar; kaj pećile o krangore lesere. Thaj frdinđa o phakalo o luno plo ki phuv, thaj ćedinđa o drakhalina e phuvljakere, thaj ćhuta ane bari kaca e Devlesere xoljaće. Thaj uštadili e kaca avral o foro, thaj inklilo o rat andar e kaca sa dži e uzde e grastenđe ano buhlipe kotar e milja thaj šov šel stadijuma. Thaj dikhljum o dujto semno ko badali, baro thaj prašukaruno: efta phakalen save sinelen efta palune džungalipa, kaj ane lende agorisajli e xoli e Devlesiri. Thaj dikhljum sar đamako derav hamime jagasa, thaj odolen save peravena e divo dživdinutna thaj o muj lakoro thaj o đendo lakere anavengo, kote terđovena ko derav đamalo isindoj o gusle e Devlesere. Thaj đilabena e đilib e Mojsijesiri, kanduno e Devlesoro, thaj đilib e Bakroresiri, vakerindoj: Bare si thaj prašukarne e ćeripna kle, Devljutneja Devla Sainćarutneja; hakajune si thaj čaćimnasere e droma kle, Thagara e seloresesre! Ko na ka daral, Devljutneja, thaj te glorisini o Anav klo? Kaj tu sijan jekhuno Sumnalo; kaj sa e selore ka aven thaj te teljon anglal tute; kaj e krisija kle mothovdile. Thaj palo akava dikhljum, phravdilo o hramo e skinijako e sadhićipnasoro ko badali, thaj iklistile o efta phakale andar o hramo, save sinelen efta džungalipa, save sinele huravde ano užo thaj rošalo poxtano thaj kustikome prekal o kolin kustikencar sumnakalencar; Thaj jekh kotar e štar dživde džene dinđa e efta phakalenđe efta taxtaja sumnakale pherde xolinipe e Devlesoro savo dživdinela ane bimeripasoro bimeripe. Thaj pherdilo o hramo ćuro kotar e glorija e Devlesiri thaj kotar e zor lesiri; thaj nikoj naštine te đerdini ano hramo džikaj na dinđape agor e efta džungalipa e eftatore phakalengoro. Thaj šunđum baro krlo andar o hramo kaj vakerela e efta phakalenge: Džan thaj ćhoren o efta taxtaja e xoli e Devlesiri ki phuv. Thaj dželo o angluno phakalo, thaj ćhorđa e taxtaj pli ki phuv; thaj ćerdile dukha džungale thaj xoljame pe manuša save isilen o belego e divo dživdinutnakoro thaj save teljarenape lakere mose. Thaj o dujto phakalo ćhorđa e taxtaj pli ko derav, thaj odova ulo rat sar kotar o mudardo, thaj sa dživdo mulo ano derav. Thaj o trito phakalo ćhorđa e taxtaj pli ko lenja thaj pe xajinga e panjesere; thaj ćerdilo rat. Thaj šunđum e phakale e panjengoro savo vakerela: Hakajuno san Tu, Savo san thaj Savo sana, thaj Sumnalo, kaj akava krisinđan; Kaj ćhorde o rat e sumnalengoro thaj e profetonengoro, thaj o rat lenge dijan te pijen, kaj therdisarde. Thaj šunđum o viktimutno kaj vakerela: Hemčaće, Devljutneja Devla Sainćarutneja, čaćune thaj hakajune si e krisura kle. Thaj o štarto ćhorđa e taxtaj pli ko kham, thaj dindilo lese sa te tharel e manušen jagaja. Thaj thabljona o manuša kotar baro tatipe, thaj akošle o Anav e Devlesoro save isile o thagaripe upral o munke akala, thaj na jertisajle te den lese glorija. Thaj o pandžto ćhorđa e taxtaj pli ki bešutni e divo dživdinutnaći; thaj o thagaripe lakoro ćerdilo raćutno, thaj dandarena e ćhibija ple kotar o dukha, thaj akošena e Devle e badalesere kotar o dukha thaj ple ratvaripa, thaj na jertisajle bašo ćeripna ple. Thaj o šovto ćhorđa e taxtaj pli ki bari len Eufrat; thaj šućilo o pani lakoro, kaj te gatisavolpe o drom e thagarengoro kotar o istoko khamalo. Thaj dikhljum kaj andar o muj e aždajako thaj andar o muj e divo dživdinutnako thaj andar o muj e xoxamne profetosoro ikljona trin bikhosle ođe sar žambe; Kaj akala si ođe e bengesere save ćerena bilaćhe ćerdipa, thaj džana e thagarenđe e sa vasionaće te ćeden len po maripe bašo Dive odova baro e Devlesoro e Sainćarutnesoro. Ake avava sar ćor; šukaripe odolese savo si džangavdo thaj savo arakhela o fostanja ple, te na phirel nango thaj te na dikhen o lađavipe lesoro. Thaj ćedinđa len ko than, savo judikane vičinipe Armagedon. Thaj o eftato ćorđa e taxtaj pli ko ajri, thaj inklilo o krlo baro andar o hramo e badalesoro kotar e sumnalesiri bešalutni, vakerindoj: Agorisaj vov! Thaj ćerdile e strefina thaj grmavine thaj krle, thaj sinele baro tresipe e phuvljakoro; asavko tresipe e phuvljakoro thaj asavko baro savo na ulo katarkana si o manuša ki phuv. Thaj o foro baro ulavdilo pe ko trin kotora, thaj o forore e nađangledevleserenge pele; thaj o Vavilono baro sinele mothovdo anglal o Devel te delpe lese taxtaj mol kotar o zoralipe lesere xoljinake. Thaj sarsavi šuki phuv našaldili, thaj e plajina na arakhavdile. Thaj kukudi bari sar talanto peli kotar o badali upro manuša, thaj akošena o manuša upro Devel bašo džungalipe kotar e kukudi, kaj si baro džungalipe lesoro. Thaj alo jekh kotar o efta phakale save sinele efta taxtaja, thaj vakerela manca thaj phenda mange: Phir te sikavavće o krisipe e lubninakoro savi bešela ko but panja, savasa lubnisarde e thagara e phuvljakere, thaj e thanutne e phuvljakere matile e moljaja kotar lakoro lubinipe. Thaj legarđa man ano Ođi ane drmina. Thaj dikhljum e romnja kaj bešela pe loli divo dživdinutni savi si pherdi anava akošimpnasere thaj sinela efta šere thaj deš šinga. Thaj e romni sinele urjavdi ano porfiri thaj skerleto thaj laćhardi sumnakajesa thaj kamle barencar thaj miriklencar, thaj sinela taxtaj sumnakajuni ano vast plo, pherdo melalipe thaj bikhoslipe kotar lakoro lubnipe. Thaj ko čekat lakoro hramimo anav, garavdipe: o Vavilon baro, daj lubnini thaj melalipe e phuvljengoro. Thaj dikhljum e romnja kaj mačola kotar o rat e sumnalengoro thaj kotar o rat e Isusesere sadićhutnenge. Thaj dikhindoj la, biašuđarindema bare biašuđaripnaja. Thaj phenđa mange o phakalo: Sose biašuđare? Me ka mothovav će o garavdipe e romnjakoro thaj e divo dživdinutnako so legarla thaj isila efta šere thaj deš šinga. E divo dživdinutna sava dikhljan la sinele thaj nanetali, thaj ka inkljol andar o xoripe e biagoresoro thaj ka džal ano peripe; thaj ka biašuđarenpe odola thanutne e phuvljakere savengere anava nane hramome ane Pustik e dživdipnasiri kotar o ćerdisaripe e themesoro, dikhindoj e divo dživdinutna, savi sinele thaj nanetali, thaj ka mothovđol. Akate si e godi savi isila džanipe. Efta šere, odola si o efta plaina pe save e romni bešela; Thaj si o efta thagara: pandž on pele, thaj jekh oja, a o dujto pana ni alo, thaj kana ka avel hari valjani te aćhol. Thaj e divo dživdinutni savi sinele thaj nanetali, oj si thaj ovtoto, thaj kotar e eftatore si, thaj ano peripe džala. Thaj o deš šinga save dikhlja, odola si o deš thagara save o thagaripe pana na lelje, aj pa sar thagara ka len o thagaripe ko jekh časo e divo dživdinutnaja. Akalen jekh gindipe isilen, thaj pli zor thaj o thagaripe dena e divo dživdinutnake. Akala e Bakroreja ka marenpe thaj o Bakroro len ka vidžainel, kaj si Devljutno upral e devljutne thaj Thagar upral e thagara; thaj okola save si Leja, vičime thaj alosarde thaj paćavine. Thaj phenđa mange: O panja save dikhljan, kote bešela e lubni, odova si o selore thaj o gramade, o njamora thaj o ćhibija. Thaj o deš šinga so dikhljan, thaj divo dživdinutni, on ka ritinen e lubnja, thaj ka čućaren la thaj užarenla, thaj o mas lakoro ka xan, thaj ka tharenla jagaja. Kaj o Devel dinđa ane vile lengere te ćeren o kamipe lesoro, thaj te ćeren jekh kamipe, thaj te den o thagaripe plo e divo dživdinutnake, džikaj na agorinelape o lafija e Devlesere. Thaj e romni sava dikhljan, si foro baro, savo isile thagaripe upral e thagara e phuvljakere. Thaj palo akava dikhljum e avere phakale kaj uljela e badalestar, kole sinele thagaripe baro; thaj e phuv strefisarela kotar e glorija lesori. Thaj dija vika zorale krleja, vakerindoj: Pelo, pelo o Vavilono baro, thaj ćerdilo thaneso bešipe e bengenđe thaj phandlipe sakone bikhosle ođese, thaj phandlipe sa e čiriklenge e bikhoslenge thaj ritonenge; kaj pe lakere zoralja lubnikake moljakoro pile sa e selore; Thaj e thagara e phuvljakere lubnisarena laja thaj e trgovcija e phuvljakere barvalile kotar o zoralo haćaripe lakoro. Thaj šunđum o krlo aver e badalestar savo vakerel: Ikljoven andar late, o seloro mlo, te na len lipe ane bezeha lakere, thaj te na arakhen tumen e džungalipa lakere. Kaj e bezeha lakere resle dži o badali, thaj o Devel dinđa godi lakere bihakajipnase. Irinen lake sar so oj tumenđe so irinđa, thaj dujune barjaren laće dujđutune palo ćeripna lakere; ane taxtaj savi oj pherđa, pheren lake duj drom edobor. Kozom oj pes glorisinđa thaj gudljaćerđa pe, edobor lake den munke thaj dukhajipa; kaj ano vilo plo vakerela: Bešava sar thagarni, thaj phivli nasijum, thaj dukhavipa na ka dikhav. Odolese ano jekh dive ka avel o džungalipe lakoro: o meripe thaj dukhavipe thaj e bokh, thaj ka ovel thari jagaja; kaj si zoralo o Devljutno Devel savo laće krisinel. Thaj ka roven thaj dobođinen palo late o thagara e phuvljakere save lubnisarde thaj dostisajle olaja kana ka dikhen o ćuro kotar e jag lakiri, terdindoj dural baši dar kotar o munčipe lakoro, thaj vakerindoj: Avaj, avaj, forona bareja Vavilono, forona zoraleja, sar ano jekh časo alo o kris klo! Thaj e trgovcija e phuvljakere ka roven thaj ka dobođisaren palo late, kaj lengere ladavdipa nikoj više na ćinela; O ladavipa e sumnakajesa thaj srmaće thaj kamle barese thaj miriklenđe thaj poxtana thaj porfire thaj svile thaj skerlet, thaj sako sunguno kaš thaj savetane vasija kotar e elefantura thaj savetane vasija kotar o majkuć kaš, bronza thaj sastren thaj mermeri, thaj cimeti thaj balsamo thaj tamjano thaj sung thaj livana, thaj mol thaj ulja, thaj parno varo thaj điv, thaj guruva thaj bakre, thaj grasta thaj vorda, thaj trupora thaj ođe e manušengere. Thaj frute save mangela o ođi klo durile tutar, thaj sa čićeno thaj strefuno đelo tutar, thaj nisar nakašti te arakhe le. E trgovcija akale šejengo, save barvardile latar, ka terđon dural baši dar kotar o munčipe lakoro rovindoj thaj dobođindoj, thaj vakerindoj: Avaj, avaj, forona bareja, urjavde ane svila thaj porfira thaj skerleto thaj laćharde sumnakajesa thaj kamle barencar thaj miriklencar, kaj ano jekh časo peravdilo edobor barvalipe! Thaj sare o kormilarja e barkengere, thaj sare save varekatar berisaren, thaj e barkarja, thaj odola save ćeren po derav, terdine dural, thaj dena vika dićhindoj o ćuro kotar e jag lakiri, vakerindoj: Savo foro sinele sar akava baro foro? Thaj ćhorde e praxoja pumare šere, thaj dije vika rovindoj thaj dobođindoj vakerindoj: Avaj, avaj forona bareja, ane savo barvardile lesere barvalipnaja sare save isilen barke ko derav, kaj ano jekh časo šućarde! Lošalen upral leste, o badali, thaj e sumnalutne, thaj e apostolija thaj e profetija, kaj anđa o Devel o kris tumaro upral leste. Thaj jekh phakalo lelja o bar baro sar e panisavesoro, thaj frdinđa ano derav, vakerindoj: Ađahar vikaja ka ovel frdimo o Vavilono foro baro, thaj na ka više arakhelpe; Thaj o krlo e guslarengoro thaj e đilabnengoro thaj bašalutnengoro thaj e trubaćengoro na ka šunđol više ane tute; thaj nisavo phirno ni kotar savo zanato na ka arakhelpe više ane tute, thaj vika e baresiri e panesavesiri na ka šunđol ana tute; Thaj o rošalipe e lampakoro na ka više mothovđol ane tute, thaj o krlo e prandutneso thaj e borjakoro na ka više šunđol ane tute; kaj e trgovcija kle sinele barutne e phuvljakere, thaj kotar kle mađije xoxavde sinele sa o selore, thaj ano leste arakhljape o rat e profetonengoro thaj e sumnalengoro thaj sa e ćhindengoro ki phuv. Thaj pale akava šunđum sar krlo zoralo e seloreso butuno ko badali kaj vakerela: Aliluja! Inkaldipe thaj glorija thaj paćiv thaj zor e Devlese amarese; Kaj si čaćune thaj hakajune e krisa lesere, so krisisarda e lubnina e bara, savi ruminđa e phuv pla lubnipaja, thaj irinđa o rat ple kandinengoro kotar o vast lakoro. Thaj pale phende: Aliluja! Thaj o ćuro lakoro vazdela pe ano bimeripasere bimeripa. Thaj pele o biš thaj štar phurederutne, thaj o štar dživde džene, thaj telile e Devlese savo bešela pe sumnalesiri bešalutni, vakerindoj: Amin! Aliluja! Thaj kotar e sumnalesiri bešalutni iklilo o krlo savo vakerela: Ašarinen e Devle amare sa e kandine lesere, thaj save lestar darana, o tikore thaj o bare. Thaj šunđum sar krlo bute seloresoro, thaj sar krlo bute panjengoro, thaj sar krlo zorale grmavinengoro, kaj vakerena: Aliluja! Kaj thagarisajlo o Devljutno Devel Sainćarutno. Lošalisajvamen thaj vestisajvamen thaj te da glorija Lese, kaj alo o bijav e Bakroresoro thaj e romni lesiri gatisajli. Thaj dindo si lake te urjavelpe ane parni svila thaj khosli, kaj e svila mothovela o hakajune ćeripna e sumnalengere. Thaj phenda maje: Hramosar, baxtarde si odola save si vičime ko bijavesoro raćako xape e Bakroresoro. Thaj phenda maje: Akala si čaćine lafija e Devlesere. Thaj peljum anglal e pre lesere te teljardovav lese. Thaj phenda mange: Arakh, ma! Me sem kandino sar thaj tu thaj sar o phralja kle saven isilen dikhipnasoro vakeripe e Isusesoro; E Devlese teljov – kaj si dikhipnasoro vakeripe e Isusesoro o ođi e profetosoro. Thaj dikhljum o badali phravdo, thaj dikh, o gras parno, thaj Odova savo bešela pe leste vičini pe Paćavino thaj Čaćuno, thaj po hakajipe krisinela thaj marelpe; A o jakha si lesere sar o plameno e jagakoro, thaj ko šero lesoro krune butune, thaj isile Anav hramimo, savo nikoj na džanela dži Ov korkoro; Thaj urjavdo si ano fostani lolo kotar o rat, thaj o Anav lesoro vičini pe: Logos (Anav) Devlesoro. Thaj o karnale e badalesere džana palo Leste ko grasta parne, urjavde ani svila parni thaj khosli. Thaj andar o muj lesoro ikljola o mačo ostro pe solduj riga, kaj lesa te peravel e nađangledevleseren; thaj Ov len ka ćarjarel sastrune rovljaja, thaj Ov uštavela e kaca moljaja e Devlesere xoljama xoljaja e Sainćarutnesereja. Thaj isile ko fostani thaj ko kolin lesoro o Anav hramimo: Thagar e thagarengoro thaj Devljutno e devljutnengoro. Thaj dikhljum jekhe phakale kote terđola ko kham thaj dija vika bare krleja, vakerindoj sa e čiriklenđe save uranena maškar o badali: Aven thaj ćeden tumen ko baro raćako xabe e Devlesoro. Te xan mas kotar e thagara, thaj mas kotar o vojvode, thaj mas kotar o zorale, thaj mas kotar o grasta thaj odolendar save bešena pe lende, thaj mas kotar o sa mukljutne thaj o robija, thaj kotar o tikore thaj o bare. Thaj dikhljum e divo dživdinutna thaj e thagaren e phuvljakere thaj karnalen lengeren ćedime te marenpe Odoleja so bešela ko gras thaj lesere karnalencar. Thaj sinele dolime e divo dživdinutni, thaj olaja o xoxamno profeto savo ćerda džungale ćeripna anglo late, savenca xoxavda odolen so lelje o belego e divo dživdinutnako, thaj save teljona lakere mujese; soduj dživde sinele frdime ane xajing jagali, savi thabljola sumporeja. A o aćhutne sinele mudarde mačesa savo iklistilo andar o muj Odolesoro so bešela ko gras; thaj sa o čiriklja čajljardile kotar o mas lengoro. Thaj dikhljum e phakale kaj uljela e badalestar, savo sinele o naxtari kotar o xoripe e biagoresoro thaj sinđiri baro ano vast plo. Thaj astarđa e aždaja, e purane sapinka, savi sa o beng thaj o satana, thaj phandljala ko milja berša, thaj frdinđala ano xoripe e biagoresoro, thaj phandljala thaj štambiljisarđala upral late, kaj maj te na xoxavel e seloren, džikaj na pherđola o milja berša; pale odova valjani te ovel mukljardi ko xarno vakti. Thaj dikhljum e sumnalesiri bešalutni thaj beštine pe lende, thaj dindilo pe lenđe o kris; thaj ođe o ćhinde bašo dikhipnasoro vakeripe e Isusesoro thaj bašo lafi e Devlesoro, save na telile e divo dživdinutnaće thaj lakere mujese, thaj na lelje o belego ko čekatija ple thaj po vast plo; thaj dživdinisajle thaj thagarde e Hristoja milja berša. A o avera mule na dživdisajle džikaj na agorisajlo o milja berša. Akava si angluno dživdisaripe. Baxtardo si thaj sumnalo odova savo isile ćeripna ano angluno dživdisaripe; upral lende aver meripe nanole thagaripe, aj ka oven rašaja e Devlese thaj e Hristose, thaj ka thagarinen Leja milja berša. Thaj kana ka pherdon e milja berša ka ovel muklo o satana andar o phandlipe plo, thaj ka ikljol te xoxavel e seloren so si pe štar agora e phuvljakere, kotar o Gog thaj o Magog, te ćedel len bašo maripe, kasoro dženipe si sar e pošik e deravesiri. Thaj iklile po buhlipe e phuvljakoro, thaj trujalisarde o ćher e sumnalengoro, thaj o kamlo foro; thaj hulili e jag e badalestar kotar o Devel, thaj xalja len. Thaj o beng savo len xoxavela sinele frdimo ane xajing jagali thaj sumporuni, kote si thaj e divo dživdinutni thaj o xoxamno profeto; thaj ka oven munčime dive thaj rat ane bimeripasere bimeripa. Thaj dikhljum bari, parni sumnalesiri bešalutni thaj Odole so bešela pe late, katar savesoro muj naštini e phuv thaj o badali, thaj than lenđe na arakhavdilo. Thaj dikhljum e mulen, baren thaj tikoren, kote terđovena anglal e sumnalesiri bešalutni, thaj e pustika phravdile, thaj e dujto pustik phravdili, koja si Pustik e dživdipasiri; thaj sinele krisime o mule pe ćeripna ple sar so si hramome ane pustika. Thaj o derav dinđa e mulen save si ano leste, thaj o meripe thaj o pakao dinđe e mulen save sinele ano lende, thaj sinele krisime sako palo ple ćeripna. Thaj o meripe thaj o pakao sinele frdime ane xajing jagali. Akava meripe si o dujto meripe. Thaj ko na arakhljape hramome ane Pustik e dživdipasiri frdime sinele ane xajing jagali. Thaj dikhljum o badali nevo thaj e phuv nevi; kaj o angluno badali thaj e angluni phuv nakhle, thaj derav nane maj. Thaj dikhljum O Sumnalo foro, Jerusalim nevo, kaj huljela e badalestar kotar o Devel, gatisardo sar bori laćhardi ple romese. Thaj šunđum krlo baro e badalestar savo vakerel: Ake e Skinija e Devlesiri maškar e manuša, thaj Ov ka bešel lencar, thaj on ka oven seloro lesoro, thaj korkoro o Devel ka ovel olencar; Thaj o Devel ka khosel sakoj asvin andar o jakha lengere, thaj meripe na ka ovel maj, ni dukhajipe ni dobođipe, ni dukha na ka ovel maj; kaj o angluno nakhino. Thaj phenđa Odova so bešela pe sumnalesiri bešalutni: Ake sa kerava neveja. Thaj phenda mange: Hramosar, kaj si akala lafija paćivale thaj čaćine. Thaj phenda mange: Agorisav! Me sem e Alfa thaj e Omega, Anglunipe thaj Agorisaripe. Me e trošalese ka dav ano dindipe kotar e xajing pani e dživdipasoro. Savo vidžainel ka kuštikinel sa akava, thaj ka ovav lese Devel, thaj ov ka ovel mlo ćhavo. A e daravnenđe thaj e bipaćamnenđe thaj e bikhoslenđe thaj e mudarutnenđe thaj e lubninenđe thaj e drabarenđe thaj e idoloteljutnenđe thaj sa e xoxajmatenđe, lenđe si o kotor ane xajing savi thabljola jagaja thaj sumporeja, so si o dujto meripe. Thaj alo jekh kotar o efta phakale, save sinele efta taxtaja pherde e efta palune džungalipa, thaj phenda mange vakerindoj: Phir te mothovavće e Borja, e Romnja e Bakroresera. Thaj legarđama ano Ođi pe plain bari thaj ući, thaj mothovđa mange o Foro, o sumnalo Jerusalim, savo huljela e badalestar kotar o Devel, thaj save isile glorija e Devlesiri, thaj rošalipe lesoro sinele miazuno e kamle barese, sar bar o jaspis savo strefinela sar kristali; Thaj sinele duvari baro thaj ućo, thaj sinele dešuduj udara, thaj ko udara dešuduj phakale; thaj o anava upralhramome, a odola si o anava e dešuduj njamonengoro e Izrailjesere ćhavengoro. Kotar o istoko trin udara, thaj kotar o severi trin udara, thaj kotar o jugo trin udara, thaj kotar o zapado trin udara. Thaj o duvari e Forosoro sinele le dešuduj temelja, thaj pe lende dešuduj anava Dešuduj apostolija e Bakroresere. A odova so vakerela mancar sinele o metari, e trska sumnakani, te meril o Foro thaj o udara lesere, thaj o duvari lesoro. Thaj o Foro pašljola štarxnzune, thaj o lunđipe si lesoro kozom thaj o buhlipe. Thaj merisarda o Foro trskaja, pe dešuduj milje stadija: o lunđipe thaj o buhlipe thaj o ućipe jekhuni si. Thaj merisarda o duvari lesoro ko šel thaj saranda thaj štar kunja, po mera e manušesiri, savi si thaj e phakalesiri. Thaj sinele o materiali e duvareso lesoro jaspis, a o Foro sumnakaj khoslo, miazuno sar đami khoslo. Thaj o temeljija e duvaresere Forose sinele laćharde sakone kamle bareja: o angluno temelji jaspiso, o dujto sapfiro, o trito halkidono, o štarto smaragdo, o Pandžto sardonikso, o šovto sardo, o eftato hrisolito, o ovtoto virilo, o enjato topazo, o dešto hrisopraso, o dešujekto jakinto, o dešudujto ametisto. Thaj dešuduj udara dešuduj mirikle, sako udar sinele kotar jekh miriklo. Thaj o trgo e Forosoro sinele sumnakaj khoslo sar dikhinutno đami. A o hramo na dikhljum ano leste, kaj o hramo si lesoro o Devljutno Devel Sainćarutno, thaj o Bakroro. Thaj o Foro na trubujinela o kham ni o masek te rošinena lese, kaj le e glorija e Devlesiri rošinela, thaj o rošipe si lesoro o Bakroro. Thaj o selore ka phiren ano rošipe lesoro, thaj o thagara e phuvljakere ka anen glorija thaj o paćiv plo ano leste; Thaj o udara lesere na ka phandljon diveste, kaj raća odothe na ka ovel. Thaj ka anen e glorija thaj o paćiv e seloresoro ano leste. Thaj na ka đerdini ano leste niso bikhoslo, ni savo ćerela skrbope thaj xoxavipe, aj semo o hramome ane Bakroresiri Pustik e dživdipasiri. Thaj mothovđa mange len e panjesiri e dživdipasiri, bistro sar o kristali, savi ikljola kotar e sumnalesiri bešalutni e Devlesiri thaj e Bakroresiri. Maškar o trgo lesoro thaj kotar e sovduj riga e lenjakere o Kaš dživdipasoro, savo bijanela dešuduj bijanipa dindoj sakoj ćhon plo bijanipe, thaj e patrina e Kaštestar sinele bašo sastaripe e seloresoro. Thaj maj nane te ovel nisavo armandindipe; thaj e sumnalesiri bešalutni e Devlesiri thaj e Bakroresiri ka ovel ano leste, thaj e kandine lesere ka kanden Le. Thaj ka dikhen o muj Lesoro, thaj o Anav lesoro ka ovel ko čekatija lengere. Thaj e raća maj nane te oven, thaj ni ka valjani o memelja, ni rošipe e khamesoro, kaj len ka strefisarel o Devljutno Devel, thaj ka thagarinen ane bimeripasere bimeripa. Thaj phenda mange: Akala lafija si paćamne thaj čaćune, thaj o Devljutno Devel e sumnale profetonengoro bićhalda e phakale ple te mothovel ple kandinenđe so ka ovel sigate. Thaj ake avava sigate. Baxtardo si savo ićerela o lafija e profetimase akala pustikakoro. Thaj me, o Jovan, šunđum thaj dikhljum akava. Thaj kana šunđum thaj dikhljum, telindoj peljum anglal o pre e phakalese savo mange akava sikavđa. Thaj phenda mange: Arakh, ma! Thaj me sem kandino sar thaj tu thaj sar o phralja kle e profetija thaj okola save ićerena o lafija akala pustikakere. E Devlese teljov. Thaj phenda mange: Ma štambiljin o lafija e profetimase akala pustikakere, kaj si o vakti paše. Ko ćerela bihakajipe nek pana ćerela bihakajipe, thaj o bikhoslo nek pana meljarelpe; a ko si hakajuno nek pana ćerela hakajipe, thaj ko si sumnalo nek pana sumnarelpe. Ake avava sigate, thaj e poćindi mli manca, te dav sakonese pe ćeripna lesere. Me sem e Alfa thaj Omega, o Angluno thaj o Paluno, Širdipe thaj Agorisaripe. Baxtarde si save kerena o ćhinavdipa lesere, te oven len hakaj ko Kaš e dživdipasoro, thaj te đerdinen ko kapije ano Foro. Avrijal si o džukle thaj e drabara thaj e lubnara thaj e ratvarutne thaj e idoloteljutne thaj sako savo kamela thaj ćerela o xoxavipe. Me, o Isus, bićhalđum e phakale mle tumenđe te mothoj akava ano Khanđirja. Me sem kustikutno e njamoso thaj Bijanutno e Davidesoro, strefuni Čereni e Danica. Thaj o Ođi thaj e Bori vakerena: Ava! Thaj kova šunela nek phenel: Ava! Thaj ko si trošalo nek avel, thaj ko mangela nek lel o pani e dživdipasoro po dindipe. Me mothovava sakonese savo šunela o lafija e profetimase akala pustikakoro: ako ko pherela akalese, o Devel pe leste ka ćhivel munke hramome ane akaja pustik; Thaj ako ko lela kotar o lafija e pustikakere akale profetipestar, o Devel ka lel lesoro kotor kotar o Kaš e dživdipasoro, thaj kotar o Foro sumnalo, so si hramome ane pustik akaja. Vakerela Odova savo sadikhlja akava: Va, ka avav sigate. Amin, va ava, Devljutneja Isuse! Dindipe amare Devljutnesoro e Isus Hristosoro sarijencar e sumnalencar. Amin.