यीशु मसीह केर पुरखामन केर नाँव जेमन राजा दाऊद केर संतान रहैं, आउर राजा दाऊद अब्राहम केर संतान रहे, इ लेखे अहे: अब्राहम केर बेटा इसहाक, इसहाक केर बेटा याकूब आउर याकूब केर बेटा यहूदा आउर उकर भाईमन रहैं। यहूदा केर बेटा फिरिस आउर जेरह रहैं, आउर उ मनक आयो केर नाँव तामार रहे। फिरिस केर बेटा हिस्रोन रहे, आउर हिस्रोन केर बेटा एराम रहे। एराम केर बेटा अम्मीनादाब आउर अम्मीनादाब केर बेटा नहशोन आउर नहशोन केर बेटा सलमोन रहे। सलमोन केर बेटा बोअज रहे, आउर उकर आयो केर नाँव राहाब रहे, बोअज केर बेटा ओबेद रहे आउर उकर आयो केर नाँव रूत रहे, आउर ओबेद केर बेटा यिशै रहे। आउर यिशै केर बेटा दाऊद राजा रहे। आउर दाऊद केर बेटा सुलैमान उ जनाना से जनमलक जे पहिले उरिय्याह केर जनाना रहे। सुलैमान केर बेटा रहबाम रहे आउर रहबाम केर बेटा अबिय्याह रहे आउर अबिय्याह केर बेटा आसा रहे, आसा केर बेटा यहोशाफात रहे, यहोशाफात केर बेटा योराम रहे आउर योराम केर बेटा उज्जिय्याह रहे। उज्जिय्याह केर बेटा योताम रहे, योताम केर बेटा आहाज रहे आउर आहाज केर बेटा हिजकिय्याह रहे। हिजकिय्याह केर बेटा मनश्शिह रहे। मनश्शिह केर बेटा आमोन रहे आउर आमोन केर बेटा योशिय्याह रहे। आउर योशिय्याह केर पोता यकुन्याह आउर उकर भाईमन रहैं, इ मनक जनम इसराइली आदमीमन के बंदी बनाय के बेबीलोन देस लेई जाएक से आगे होई रहे। आउर बेबीलोन देस में बंदी बनाय के लेई जाएक केर बेरा से लेई के यीशु केर जनम तक उकर पुरखा मनक नाँव इ लेखे अहे, यकुन्याह केर बेटा शालतियेल रहे, शालतियेल केर बेटा जरुब्बाबिल रहे, जरुब्बाबिल केर बेटा अबीहूद रहे, अबीहूद केर बेटा इल्याकीम रहे आउर इल्याकीम केर बेटा अजोर रहे। अजोर केर बेटा सदोक रहे आउर सदोक केर बेटा अखीम रहे आउर अखीम केर बेटा एलीहूद रहे। एलीहूद केर बेटा इलियाजार रहे आउर इलियाजार केर बेटा मत्तान रहे आउर मत्तान केर बेटा याकूब रहे। आउर याकूब केर बेटा यूसुफ रहे, जे मरियम केर पति रहे, आउर मरियम से यीशु जनमलक, जे मसीह कहायला। इ लेखे अब्राहम से राजा दाऊद तक चौदह पीढ़ी होलक आउर राजा दाऊद से बेबीलोन में बंदी होई के पोंहचाल जाएक तक चौदह पीढ़ी आउर बंदी होई के बेबीलोन देस में पोंहचाल बेरा से मसीह तक चौदह पीढ़ी होलक। अब यीशु मसीह केर जनम होवेक से आगे इ लेखे होलक, उकर आयो मरियम केर मंगनी यूसुफ नाँव केर आदमी संगे होई रहे, मगर उ मनक बिहा होवेक से आगे हें मरियम पवितर आत्मा केर शक्ति से गर्भवती होलक। उकर मंगेतर यूसुफ धरमी आदमी रहे आउर उके बदनाम करेक नी चाहत रहे, से लगिन उ चुपचाप से मंगनी के तोइर देवेक केर बिचार करलक। जब उ इकर बारे में सोचते हें रहे कि परमेश्‍वर केर दूत उके सपना में दिस्तार देई के कहेक लगलक, “हे यूसुफ! राजा दाऊद केर बंश, तोंय अपन मंगेतर मरियम के बिहा काइर के अपन ठिना लानेक से ना डराव, काले कि जे उकर गर्भ में अहे, उ पवितर आत्मा केर शक्ति से अहे। उ बेटा जनम देवी आउर तोंय उकर नाँव यीशु रखबे, काले कि उ अपन आदमीमन के उ मनक पाप से बचाई।” इ सोउब इकर लगिन होलक कि जे बचन प्रभु यशायाह परमेश्‍वर केर संदेश के बताएक वाला केर मुँह से कइह रहे, उ पूरा होवोक: “देखा, एगो कुँवारी गर्भवती होवी आउर एगो बेटा के जनम देवी आउर उकर नाँव इम्मानुएल रखल जाई” जेकर मतलब इ हेके “परमेश्‍वर हमर संगे अहे।” यूसुफ नींद से जागेक केर पाछे परमेश्‍वर केर दूत केर आगया मोताबिक अपन मंगेतर मरियम के बिहा काइर के अपन ठिना लेई आलक। आउर जब तक मरियम बेटा के नी जनम देलक तब तक यूसुफ उकर संगे नी सुतलक आउर उ बेटा केर नाँव यीशु रखलक। जब राजा हेरोदेस यहूदिया परदेस में राइज करत रहे, उ बेरा इ परदेस केर बैतलेहम नगर में यीशु केर जनम होलक, तब पूरब देस से गेयानी आदमीमन यरुशलेम शहर में आय के पूछेक लगलैं, “उ बालक छउवा कहाँ अहे, जे यहूदी मनक राजा बनेक लगिन जनइम हे? काले कि हमरे पूरब में उकर जनम केर बारे में बताएक वाला तइरगन देइख ही आउर हमरे उकर भक्ति करेक आय ही।” इ गोइठ सुइन के राजा हेरोदेस आउर उकर संगे यरुशलेम शहर केर ढेइर आदमीमन परेशान होई गेलैं। तब राजा हेरोदेस सोउब यहूदी मुध पुरोहितमन आउर मूसा केर नियम के सिखाएक वालामन के एक संगे बोलाय के उमन से पूछलक, “मसीह केर जनम केर बारे में पवितर किताब में का लिखल अहे? उकर जनम कहाँ होवेक चाही?” उमन उकर से कहलैं, “उकर जनम यहूदिया परदेस केर बैतलेहम नगर में होवेक चाही, काले कि मीका परमेश्‍वर केर संदेश के बताएक वाला बटले इ लिखल जाय हे, ‘हे यहूदिया परदेस केर बैतलेहम नगर केर आदमीमन, तोहरेमन जे यहूदा परदेस में अहा, तोहरेमन यहूदा केर अधिकारीमन में से केकरो से छोट नखा, काले कि तोहर में से एगो आदमी आवी आउर उ राजा बनी, जे मोर इसराइली आदमीमन केर चरवाही करी।’” तब राजा हेरोदेस जनम होवल बालक छउवा केर उमर के जानेक लगिन गेयानी आदमीमन के चुपचाप से बोलाय के पूछलक, “तइरगन ठीक कोन बेरा देखाई देई रहे।” आउर राजा उमन के इ कइह के बैतलेहम नगर भेजलक, “जाय के उ छउवा केर बारे में ठीक-ठीक पता करा आउर जब उ मिल जाई तो मोर ठिना आय के जे कोनों तोहरेमन देखबा सेके मोके बताबा ताकि मोंय हों जाय के उकर भक्ति करमूँ।” जब उमन उ घर में पोंहइच के भीतरे गेलैं तो उ छउवा के उकर आयो मरियम केर संगे देखलैं आउर ठेहुना टेइक के उकर भक्ति करलैं। तब उमन अपन-अपन थैला खोइल के उके सोना, लोहबान आउर गंधरस के भेंट चढ़ालैं। इकर पाछे उमन सपना में परमेश्‍वर बटले इ चितौनी पालैं कि राजा हेरोदेस ठिना फिन ना जबा। सेले उमन इ गोइठ के राजा के बेगर बताले दोसर डहर से होई के अपन देस चाइल गेलैं। गेयानी आदमी मनक चाइल जाएक केर पाछे, परमेश्‍वर केर दूत सपना में यूसुफ के देखाई देलक आउर कहलक, “उठ, उ छउवा के आउर उकर आयो के लेई के मिसर देस भाइग जा। जब तक मोंय तोर से नी कहमूँ तब तक हुवाँय रहबे, काले कि राजा हेरोदेस इ छउवा के खोइज के मरुवाएक वाला अहे।” उ राइते के उठलक आउर ओहे राइत के छउवा आउर उकर आयो के लेई के मिसर देस जाएक लगिन निकइल गेलक। उ राजा हेरोदेस केर मोरेक तक हुवाँय रहलक। जेकर से जे बचन प्रभु अपन संदेश के बताएक वाला होशे केर मुँह से कइह रहे, उ पूरा होई जाओक, “मोंय अपन बेटा के मिसर देस से बोलालों।” जब राजा हेरोदेस इ जाइन गेलक कि गेयानी आदमीमन मोके धोखा देलैं, तो उ मुरुक जोर खिसालक। तब सिपाहीमन के भेइज के गेयानी आदमी मनक ठीक-ठीक बताल बेरा केर मोताबिक बैतलेहम नगर आउर उकर आसे-पासे केर गाँव केर सोउब छोंड़ा छउवामन के जे दूई बरिस केर आउर उकर से छोट रहैं, मरुवाय देलक। इ लेखे पवितर किताब में जे बचन के यिर्मयाह परमेश्‍वर केर संदेश के बताएक वाला कइह रहे, उ पूरा होलक, “रामाह नगर में काँदेक आउर गगाएक सुनालक, राहेल नाँव केर एगो जनाना अपन छउवामन लगिन काँदत रहे, आउर चुप होवेक नी चाहत रहे, काले कि उमन मोइर गेलैं।” यूसुफ, मरियम आउर बालक यीशु एखन तक मिसर देस में हें रहैं। राजा हेरोदेस केर मोरेक केर पाछे परमेश्‍वर केर दूत यूसुफ के सपना में कहलक, “उठ, छउवा आउर उकर आयो के लेई के इसराइल देस चाइल जा, काले कि जेमन छउवा के माइर मोराएक चाहत रहैं, उमन मोइर गेलैं।” यूसुफ उठलक, आउर छउवा आउर उकर आयो के संगे लेई के मिसर देस के छोइड़ के इसराइल देस में आलक। लेकिन जब उ सुनलक कि अरखिलाउस अपन आबा राजा हेरोदेस केर जगा यहूदिया परदेस में राइज कराथे, तो हूवाँ जाएक से डरालक। उ राइत के सपना में परमेश्‍वर से चितौनी पाय के गलील परदेस चाइल गेलक। आउर उ हूवाँ नासरत नगर में रहेक लगलक। इ लेखे जे बचन परमेश्‍वर केर संदेश के बताएक वालामन केर बटले यीशु केर बारे में बताल जाय रहे उ पूरा होलक: “उ नासरी कहाल जाई।” थोरेक साल केर पाछे यूहन्ना बपतिस्मा जल संस्कार देवेक वाला आय के यहूदिया परदेस केर सुनसान ठाँव में इ परचार करेक लगलक: “पाप करेक छोइड़ देवा आउर परमेश्‍वर उपरे बिसवास करा, काले कि स्वरग राइज भीरे आय जाय हे।” इ ओहे हेके जेकर बारे में यशायाह परमेश्‍वर केर संदेश के बताएक वाला चरचा काइर हे, “सुनसान ठाँव में एगो हकाएक वाला केर शबद सुनाथे कि प्रभु केर उपरे बिसवास करेक लगिन आउर उकर से मिलेक लगिन अपन मन के तेयार करा।” इ यूहन्ना ऊँट केर रोवाँ केर बनाल एगो साधारण लुगा पिंधल आउर अपन डाँड़ा में चमड़ा केर कसना बाँधल रहत रहे, आउर उ फेनगा आउर बनमाउद केर रस खात रहे। यूहन्ना केर परचार सुइन के यरुशलेम शहर, यहूदिया परदेस केर कायनों गाँव से आउर यरदन नदी केर आसे-पासे केर ढेइर ठाँवमन से आदमीमन निकइल के यूहन्ना ठिना आलैं। आउर अपन-अपन पापमन के माइन के यरदन नदी में उकर से बपतिस्मा जल संस्कार लेलैं। जब उ ढेइर फरीसी दल केर आदमीमन आउर सदूकी दल केर आदमीमन के बपतिस्मा जल संस्कार लेवेक लगिन अपन ठिना आवेक देखलक, तो उमन से कहलक, “हे जहरीला साँप नियर दुष्ट आदमीमन! तोहरेमन के केहर चेतालक कि आवेक वाला परमेश्‍वर केर सजा से भागा? से लगिन बेस काम काइर के देखावा कि तोहरेमन सचमुच में पाप करेक छोइड़ देई हा। आउर अपन मन में इ ना सोचा कि हमरे सजा से बाइच जाब काले कि हमरे अब्राहम केर संतान हेकी, मोंय तोहरेमन से कहाथों कि परमेश्‍वर इ पखनामन से हों अब्राहम लगिन संतान जनमाएक पारेला। जेमन पाप करेक नी छोड़ैना उ मनक न्याय करेक लगिन परमेश्‍वर एखन तेयार अहे, उमन के परमेश्‍वर नरक केर सजा देवी। मोंय तो पानी से तोहरेमन के पाप करेक छोड़ेक केर बपतिस्मा जल संस्कार देवोना, मगर जे मोर पाछे आवेक वाला अहे, उ मोर से शक्तिशाली अहे, मोंय उकर जूता उठाएक केर लाएक हों नखों। उ तोहरेमन के पवितर आत्मा आउर आइग से बपतिस्मा देवी। उ न्याय करेक लगिन तेयार अहे, जे नियर किसान अनाज के सफा करेक वाला सूप से भूसी के अलग करेला, ओहे नियर उ भला आउर बुरा आदमीमन के एक दोसर से अलग करी। उ भला आदमीमन के जतनाय के रखी, जइसन कि किसान खरियान से गोहोम के भंडार में रखेला आउर भूसी के आइग में पोड़ायला, उ बुरा आदमीमन के आइग में पोड़ाई, जे कहियो नी बुतेला।” जब यूहन्ना आदमीमन के उपदेस आउर बपतिस्मा जल संस्कार देवत रहे, उ बेरा यीशु गलील परदेस से यरदन नदी केर किनारे यूहन्ना ठिना उकर से बपतिस्मा जल संस्कार लेवेक आलक। मगर यूहन्ना इ कइह के उके रोकेक लगलक, “मोके तो तोर हाँथ से बपतिस्मा जल संस्कार लेवेक केर जरुरत अहे, आउर तोंय मोर ठिना आय हिस?” यीशु उके इ जबाब देलक, “एखन तो एइसनेहें होवेक दे, काले कि हमरे के एहे लेखे से परमेश्‍वर केर सोउब इच्छा के पूरा करेक उचित अहे।” तब यूहन्ना उकर गोइठ के माइन लेलक। आउर यीशु बपतिस्मा जल संस्कार लेई के तुरते पानी में से उपरे आलक, आउर उकर लगिन स्वरग खुइल गेलक, आउर उ परमेश्‍वर केर आत्मा के पेरवाँ केर रूप में उतरते आउर अपन उपरे आते देखलक। आउर स्वरग से परमेश्‍वर केर इ आवाज सुनालक, “इ मोर दुलार बेटा हेके, जेकर से मोंय ढेइर खुश अहों।” इकर पाछे पवितर आत्मा यीशु के सुनसान ठाँव में लेई गेलक ताकि शैतान उके परखोक। उ चालीस दिन आउर चालीस राइत बेगर खाले रहलक, आखरी में उके भूख लगलक। तब शैतान भीरे आय के उकर से कहलक, “अगर तोंय परमेश्‍वर केर बेटा हेकिस, तो इ पखना के कइह दे कि रोटी बाइन जाओक ताकि तोंय उके खाएक पारबे।” यीशु उके जबाब देलक, “पवितर किताब में लिखल अहे, ‘आदमी सिरिफ रोटी से हें जिंदा नी रही, मगर परमेश्‍वर केर कहल सोउब बचन के माइन के उ जिंदा रही।’ ” तब शैतान उके पवितर शहर यरुशलेम में लेई गेलक आउर यहूदी मनक मंदिर केर सोउब से ऊँचा ठाँव में ठड़ुवालक। आउर उकर से कहलक, “अगर तोंय सच में परमेश्‍वर केर बेटा हेकिस, तो इ गोइठ के साबित करेक लगिन खुद के हिंयाँ से हेंठे गिराय दे, काले कि पवितर किताब में लिखल अहे, ‘परमेश्‍वर तोके बचाएक लगिन अपन स्वरगदूतमन के आगया देवी, आउर उमन तोके हाँथों-हाँथ झोईक लेबैं, कहीं एइसन ना होवोक कि तोर गोड़मन में पखना से चोट लगी।’ ” यीशु उकर से कहलक, “पवितर किताब में एहो लिखल अहे, ‘तोंय अपन प्रभु परमेश्‍वर के इ कइह के ना परखबे कि उ अपन करार के पूरा करेला कि निहीं।’ ” फिन शैतान उके एगो ढेइर ऊँचा पहार उपरे लेई गेलक आउर गोटा दुनिया केर राइज आउर उकर धन-दौलत देखाय के यीशु से कहलक, “अगर तोंय ठेहुना टेइक के मोर भक्ति करबे, तो मोंय इ सोउब कुछ के तोके देई देमूँ।” तब यीशु उकर से कहलक, “हे शैतान मोर से दूर होई जा, काले कि पवितर किताब में लिखल अहे, ‘तोंय प्रभु अपन परमेश्‍वर केर भक्ति कर, आउर सिरिफ उकरे सेवा कर’ ” तब शैतान यीशु ठिना से चाइल गेलक आउर स्वरगदूतमन आय के उकर सेवा करेक लगलैं। जब यीशु इ सुनलक कि राजा हेरोदेस यूहन्ना के धरुवाय के जेहेल में भितरुवाय देलक, तो उ यहूदिया परदेस के छोइड़ के गलील परदेस केर नासरत नगर में घूइर आलक। फिन उ नासरत नगर के छोइड़ के कफरनहूम नगर में रहेक लगलक, जे झील केर किनारे रहे आउर हूवाँ जबूलून आउर नपताली गोतर केर आदमीमन रहत रहैं। इ इकर लगिन होलक कि परमेश्‍वर केर संदेश के बताएक वाला यशायाह केर कहल इ गोइठ पूरा होवोक: “जे आदमीमन जबूलून आउर नपताली गोतर केर अधिकार वाला परदेस में अहैं, जे गलील झील जाएक केर डहर में आउर यरदन नदी केर पूरब बटे अहे, इ गलील परदेस केर एइसन ठाँव हेके, जहाँ दोसर जाइतमन रहैना। इ आदमीमन पाप रुपी अंधार में रहत रहैं, इमन पापमन केर सजा से बचेक केर डहर देखलैं, आउर जे आदमीमन अंधार केर परदेस में आत्मा से मोरल रहैं, उमन के जिंदगी पावेक केर डहर दिसलक।” उ बेरा से यीशु परचार करेक आउर इ कहेक शुरु करलक, “पाप करेक छोइड़ देवा आउर परमेश्‍वर उपरे बिसवास करा, काले कि स्वरग राइज भीरे आय जाय हे।” एक दिन यीशु गलील झील केर किनारे हिंठते-हिंठते दूई झन भाईमन के देखलक, एगो सिमोन रहे जे पतरस कहायला आउर उकर छोट भाई अन्द्रियास रहे। इमन झील में जाल फेकत रहैं काले कि उमन मछुवा रहैं। यीशु उमन से कहलक, “मोर पिछे होई लेवा आउर मोर चेला बाइन जावा। आइज तक तोहरेमन मछरी धारत रहा, मगर अब मोंय तोहरेमन के सिखामूँ कि आदमीमन के मोर ठिना बिसवास में कइसन लानेक अहे।” उमन तुरते जालमन आउर मछरी धारेक केर काम के छोइड़ के यीशु केर चेला बनेक लगिन उकर संगे चाइल गेलैं। आउर यीशु हूवाँ से थोरेक दूर आगे गेलक, तो दूई झन भाईमन के एगो याकूब आउर उकर छोट भाई यूहन्ना के अपन आबा जबदी केर संगे डोंगा उपरे अपन जालमन के सरियाते देखलक तब यीशु उमन के हों बोलालक। उमन तुरते डोंगा आउर अपन आबा के छोइड़ के यीशु केर चेला बनेक लगिन उकर संगे चाइल गेलैं। आउर यीशु गोटा गलील परदेस में घुइम-घुइम के यहूदी मनक प्रार्थना घरमन में उपदेस देते आउर राइज केर शुभ समाचार परचार करते आउर आदमीमन केर हर रकम केर बेमारी आउर कमजोरी के दूर करते रहलक। आउर उकर इ खबर गोटा सीरिया परदेस में फाइल गेलक। आदमीमन सोउब बेमरियामन के जेमन कायनों रकम केर बेमारीमन आउर दुःखमन में जकड़ल रहैं आउर जेमन में भूतमन रहैं, आउर मिरगी गिरेक वालामन आउर लकवा मारल आदमीमन के उकर ठिना लानलैं आउर यीशु उमन के ठीक करलक। गलील परदेस आउर दस नगर केर परदेस दिकापुलिस, यरुशलेम शहर, यहूदिया परदेस से आउर यरदन नदी केर पार से भीड़ केर भीड़ आदमीमन उकर पिछे होई गेलैं। यीशु इ भीड़ के देइख के पहार केर ढलाउन में जाय के बाइठ गेलक आउर उकर चेलामन उकर ठिना आलैं। आउर उ इ कहते उमन के शिक्षा देवेक लगलक, “धाइन हेकैं उमन, जेमन अपन मन में जानैना कि उमन के अपन जिंदगी में परमेश्‍वर केर जरुरत अहे, ओहेमन स्वरग राइज में जाबैं। धाइन हेकैं उमन, जेमन शोक मनाएना, परमेश्‍वर उमन के दिलासा देवी। धाइन हेकैं उमन, जेमन नरम दिल केर अहैं, काले कि धरती ओहे मनक होवी। धाइन हेकैं उमन, जेमन परमेश्‍वर केर इच्छा के पूरा करेक ले भूखल आउर पियासल अहैं, काले कि उमन अघुवाल जबैं। धाइन हेकैं उमन, जेमन दोसर मनक उपरे दयालु अहैं, परमेश्‍वर उ मनक उपरे दया करी। धाइन हेकैं उमन, जे मनक हृदय सफा अहे, उमन परमेश्‍वर के देखबैं। धाइन हेकैं उमन, जेमन मेल-मिलाप करुवायना, उमन परमेश्‍वर केर संतान कहाबैं। धाइन हेकैं उमन, जेमन परमेश्‍वर केर इच्छा के पूरा करेक केर खातिर सताल जायना, स्वरग राइज ओहेमन केर हेके। धाइन अहा तोहरेमन, जब आदमीमन मोर पिछे चलेक केर खातिर तोहरेमन केर निंदा करबैं, आउर सताबैं आउर झूठ बोइल-बोइल के तोहरेमन केर बिरोध में सोउब रकम केर बुरा गोइठ कहबैं। तब खुशी मनाबा आउर रिझबा, काले कि तोहरेमन के स्वरग में बड़का इनाम भेटाई। तोहरेमन से ढेइर समय पहिले हों उमन परमेश्‍वर केर संदेश के बताएक वालामन के एहे लेखे सताय रहैं। तोहरेमन धरती में आदमीमन लगिन नोन नियर अहा, जइसन अगर नोन केर नोनछर सिराय जाई, तो उके दोबारा कोनों चीज से नोनछर बनाएक नी पराई, उ कोनों काम में नी आवी, उके बाहरे फेकल जाई आउर आदमी मनक गोड़ तरे रौंदाय जाई। तोहरेमन दुनिया में आदमीमन लगिन दीया नियर अहा, जे लेखे पहार उपरे बसल नगर नी लुकी। सेहे लेखे आदमीमन दीया बाइर के पइला केर हेंठे नी रखैना, मगर उके चौखट में रखैना, तब उकर से घर केर सोउब आदमीमन लगिन इंजोत पोंहचेला। ओहे लेखे तोहरेमन केर ब्यवहार आदमीमन केर सामने चमकोक जेकर से उमन तोहरेमन केर भला काममन के देइख के तोहरेमन केर आबा केर, जे स्वरग में अहे, बड़ाई करोक। तोहरेमन इ ना सोचा कि मोंय मूसा केर नियम या परमेश्‍वर केर संदेश के बताएक वालामन केर किताब के मेटाएक ले आय हों, मेटाएक निहीं, मगर पूरा करेक लगिन आय हों। काले कि मोंय तोहरे से सच कहाथों, आकाश आउर धरती मिट जाई तो मिट जाई, मगर मूसा केर नियम में जे गोइठ लिखल अहे, उ जब तक पूरा नी होवी, तब तक उकर में से एको मात्रा या एको बिंदु हों नी मिटी। से लगिन जे केऊ इ नियम केर छोट से छोट आगयामन में से कोनों एगो के नी मानेला आउर एइसनेहें दोसर आदमीमन के हों सिखायला, तो उके स्वरग राइज में छोट समझल जाई। मगर जे उ नियममन के मानेला आउर दोसर आदमीमन के हों सिखायला, ओहे स्वरग केर राइज में महान कहाई। मोंय तोहरेमन से कहाथों कि अगर तोहरेमन परमेश्‍वर केर आगया के मूसा केर नियम के सिखाएक वालामन आउर फरीसी दल केर आदमीमन से बाइढ़ के नी मानबा, तो स्वरग राइज में कहियो ढूकेक नी पारबा। तोहरेमन मूसा केर आगया के सुइन चुइक हा कि परमेश्‍वर हमर पुरखामन के बताय रहे, ‘केखो हत्या ना करबा, आउर अगर केऊ केखो हत्या करी तो उ कछैरी में सजा पावेक केर लाएक होवी।’ मगर मोंय तोहरेमन से इ कहाथों, अगर केऊ अपन भाई उपरे खीस रखी, तो उ कछैरी में सजा पावेक केर लायक होवी। आउर जे केऊ अपन भाई के नलायक कही, ओहो महासभा में सजा पावेक केर लायक होवी आउर जे केऊ अपन भाई के कही, ‘हे मूरख’ तो ओहो नरक केर आइग में सजा पावेक केर लायक होवी। से लगिन अगर तोंय अपन भेंट मंदिर केर बेदी में लानबे, आउर हूवाँ तोंय याइद करबे कि मोर भाई मोर से नराज अहे, तो अपन भेंट ओहे बेदी ठिना छोइड़ दे। आउर जाय के अपन भाई से मेल-मिलाप काइर ले, तब आय के अपन भेंट चढ़ाव। जब तक तोंय अपन बैरी केर संगे डहर में अहिस, उकर से झटपट मेल-मिलाप काइर ले, कहीं एइसन ना होवोक कि बैरी तोके हाकिम के जिम्मा देवी, आउर हाकिम तोके सिपाही के जिम्मा देवी आउर तोंय जेहेल घर में साजल जाबे। मोंय तोर से सच कहाथों कि जब तक तोंय उकर कौड़ी-कौड़ी नी भाइर देबे तब तक तोंय हूवाँ से छुटेक नी पारबे। तोहरेमन मूसा केर आगया के सुइन चुइक हा, ‘ब्यभिचार ना करबा।’ मगर मोंय तोहरेमन से सच कहाथों, जे केऊ बुरा नजइर से केऊ जनाना के देखलक, तो उ अपन मन में उकर से ब्यभिचार काइर चुकलक। अगर तोर भतखाइया आँइख तोके पाप करुवायला तो उके निकलाय के फेइक दे, तोर लगिन एहे ठीक अहे कि तोर अंगमन में से एगो नाश होई जाओक आउर तोर गोटा काया नरक केर आइग में सजाएक से बाइच जाओक। आउर अगर तोर भतखाइया हाँथ तोके पाप करुवायला, तो उके काइट के फेइक दे, काले कि तोर लगिन एहे ठीक अहे कि तोर अंगमन में से एगो नाश होई जाओक आउर तोर गोटा काया नरक केर आइग में सजाएक से बाइच जाओक। एहो कहल जाय रहे, जे केऊ अपन जनाना के छोड़ेक चाहेला तो उके लिखित पत्र देवोक। मगर मोंय तोहरेमन से कहाथों कि जे केऊ अपन जनाना के ब्यभिचार केर सिवाय कोनों आउर कारण से लिखित पत्र देई के छोइड़ देवेला तो उ अपन जनाना के ब्यभिचार करुवायला। आउर जे केऊ आदमी उ छोड़ल जनाना से बिहा करेला, तो उ आदमी हों ब्यभिचार करेला। फिन तोहरेमन एहो सुइन चुइक हा कि परमेश्‍वर हमर पुरखामन के बताय रहे कि झूठा किरिया ना खाबा, मगर प्रभु केर आगे खावल किरिया के पूरा करबा। मगर मोंय तोहरे से कहाथों कि कहियो किरिया ना खाबा, ना तो स्वरग केर, काले कि उ परमेश्‍वर केर बइठेक वाला सिंहासन हेके। ना भूंई केर, काले कि उ उकर गोड़ मड़ाएक केर चौकी हेके, ना यरुशलेम शहर केर, काले कि उ महाराजा केर नगर हेके। तोहरेमन अपन मूँड़ केर हों किरिया ना खाबा, काले कि तोहरेमन उकर गोटेक केंस के हों चरका चाहे करिया करेक नी पाराला। मगर तोहरेमन केर गोइठ, हाँ में हाँ या निहीं में निहीं रहोक, काले कि जे कोनों इकर से बगरा होवेला उ शैतान बटले होवेला। तोहरेमन सुइन चुइक हा, मूसा केर नियम कहेला, आँइख केर बदला आँइख, आउर दाँत केर बदला दाँत लेबा। मगर मोंय तोहरेमन से इ कहाथों, बुरा आदमी केर बदला ना लेबा, मगर जे तोहर भतखाइया गाल में चटका मारी उकर बटे दोसर गाल हों फेइर देबा। आउर अगर केऊ तोहर उपरे कछैरी में नालिस काइर के तोहर झुला लेगेग चाही, तो उके गमछा के हों लेगेग देबा। आउर अगर केऊ सिपाही तोहरे के जबरजस्ती डहर में एक कोस लेई जाई तो उकर संगे दूई कोस चाइल जबा। जे केऊ तोहर से माँगी, उके देबा, आउर जे तोहर से पंइचा लेवेक चाही, सेकर से अन्ते ना मुँहराबा। तोहरेमन सुइन चुइक हा, मूसा केर नियम कहेला कि अपन पड़ोसी से प्रेम करबे आउर अपन बैरी से बैर। मगर मोंय तोहरेमन से इ कहाथों कि अपन बैरीमन के प्रेम करा आउर जेमन तोहरेमन के सतायना सेमन लगिन प्रार्थना करा। इकर से तोहरेमन अपन स्वरगीय आबा केर संतान बाइन जबा, काले कि उ भला आउर बुरा दुयो आदमीमन लगिन अपन बेइर उगायला, आउर धरमी आउर अधरमी दुयो आदमीमन लगिन पानी बरसायला। अगर तोहरेमन, जेमन तोहरेमन से प्रेम करैना ओहेमन से भइर प्रेम करबा, तो परमेश्‍वर तोहरेमन के कोनों इनाम नी देवी। काले कि मालगुजारी लेवेक वालामन हों एइसनेहें करैना। अगर तोहरेमन सिरिफ अपन भाईमन के हें जोहार कराला, तो कोन सा बड़का काम कराला? दोसर जाइतमन हों तो एइसनेहें करैना। से लगिन तोहरेमन एइसन काम काइर के देखावा कि तोहरेमन सोउब से प्रेम कराला, जइसन तोहर स्वरगीय आबा सोउब से प्रेम करेला।” यीशु फिन आगे कहलक, सावधान रहा! तोहरेमन आदमीमन के देखाएक लगिन भला काममन के ना करबा, निहीं तो तोहर स्वरगीय आबा तोहरेमन के कोनों इनाम नी देवी। से लगिन जब तोहरेमन गरीब आदमीमन के दान देबा तो डंका ना पिटबा, जइसन कि आदमीमन से माइन पावेक लगिन ढोंगी आदमीमन यहूदी मनक प्रार्थना घरमन में आउर गलीमन में करैना, मोंय तोहरेमन से सच कहाथों, एइसन आदमीमन एहे जुग में अपन इनाम पाय लेलैं। मगर जब तोहरेमन गरीब आदमीमन के दान देबा तो केऊ दोसर आदमी ना जानोक कि तोंय केखो दान देई हिस। होले तोर दान देवेक केर काम लुकल रही तब तोर आबा जे लूइक के दान देवेक के हों देखेला, तोहरेमन के इनाम देवी। तोहरेमन आदमीमन के देखाएक लगिन प्रार्थना ना करबा, जइसन कि ढोंगी आदमीमन करैना, उमन के आदमीमन के देखाएक लगिन यहूदी मनक प्रार्थना घरमन में आउर चौकमन में ठड़ाय के प्रार्थना करेक बेस लगेला। मोंय तोहरेमन के सच कहाथों कि उमन एहे जुग में अपन इनाम पाय लेलैं। मगर जब तोहरेमन प्रार्थना करबा तो कोठरी में जबा आउर दुरा ढाँइप के परमेश्‍वर तोहर आबा से जे नी दिसेला प्रार्थना करबा, तब तोहर परमेश्‍वर आबा जे लूइक के प्रार्थना करेक के देखेला तोहरेमन के इनाम देवी। तोहरेमन प्रार्थना करेक बेरा दोसर जाइतमन लेखे प्रार्थना के घरी-घरी ना दोहराबा काले कि उमन सोचैना कि एइसन घरी-घरी कहेक से उ मनक प्रार्थना सुनल जाई। तोहरेमन उमन लेखे ना बनबा काले कि तोहर परमेश्‍वर आबा तोहर माँगेक से पहिलेहें जानेला कि तोहरेमन के का-का जरुरत अहे। से लगिन तोहरेमन इ लेखे प्रार्थना करबा: हे परमेश्‍वर हमरे केर आबा, तोंय जे स्वरग में अहिस। तोर नाँव पवितर मानल जाओक। तोर राइज आवोक, तोर इच्छा जइसन स्वरग राइज में पूरा होवेला, तइसनेहें दुनिया में हों पूरा होवोक। हमरे के रोज दिन ओतनेहें रोटी दे, जेतना हमरे के उ दिन लगिन जरुरत अहे। आउर हमरे केर पापमन के क्षमा कर, जइसन हमरे हों जेमन हमर बिरोध में पाप काइर हैं उमन के क्षमा काइर ही। आउर हमरे के परीक्षा में ना लान, मगर शैतान केर बहकाएक से बचाव, काले कि राइज आउर पराक्रम आउर महिमा सोउब बेरा तोर हें हेके। आमीन। अगर तोहरेमन आदमीमन केर पाप के क्षमा करबा तो परमेश्‍वर तोहरे केर आबा जे स्वरग में रहेला तोहरे केर पाप के हों क्षमा करी। आउर अगर तोहरेमन आदमीमन केर पाप के क्षमा नी करबा तो परमेश्‍वर तोहरे केर आबा हों तोहरे केर पाप के क्षमा नी करी। जब तोहरेमन उपास करबा, तो ढोंगी आदमीमन नियर तोहर चेहरा के उदास ना करबा काले कि उमन अपन चेहरा के उदास काइर के आदमीमन के देखाएक खोजैना कि हमरे उपास कराथी। मोंय तोहरेमन से सच कहाथों कि उमन अपन इनाम एहे जुग में पाय लेलैं। मगर जब तोहरेमन उपास करबा तो अपन मूँड़ में तेल लगाबा आउर मुँह धोबा। होले आदमीमन तोहर उपास के ना जानोक मगर परमेश्‍वर तोहर आबा जे नी दिसेला उके देखोक, इ लेखे तोहर आबा जे लूइक के उपास करेक के देखेला, तोहरेमन के इनाम देवी। दुनिया में अपन लगिन धन जमा ना करा, जहाँ घून खायना आउर चिती लगेला, आउर चोरमन घर केर भीत के टोका काइर के चोराय लेवैना। लेकिन तोहरेमन भला काम काइर के स्वरग में अपन लगिन धन जमा करा, हूवाँ ना तो घून खायना आउर ना चिती लगेला, आउर ना तो चोरमन घर केर भीत के टोका काइर के चोरायना। काले कि जहाँ तोहर धन अहे, हुवाँय तोहर मन हों सोउब बेरा लगल रही। तोहर आँइख काया लगिन दीया नियर अहे। अगर तोहर आँइख बेस अहे, तो तोहर गोटा काया हों इंजोत रही। अगर तोहर आँइख बुरा होवी, तो तोहर गोटा काया हों अंधार होवी। से लगिन अगर तोहरे सोचबा कि तोहर दिमाग इंजोत अहे, लेकिन हकीकत में अंधार अहे तो उ अंधार ढेइर बाइढ़ जाय हे। केऊवे आदमी एके बेरा में दूई गो मालिक केर सेवा करेक नी पारी। उ चाहे तो एगो से बैर आउर दोसर से प्रेम करी, चाहे एगो के माइन करी आउर दोसर के तुच्छ करी। एहे नियर तोहरेमन एके बेरा में परमेश्‍वर आउर धन दुयो केर सेवा नी करेक पारबा। “से लगिन मोंय तोहरेमन से कहाथों कि इ दुनिया में अपन जीउ लगिन इ चिंता ना करबा कि हमरे का खाब, आउर का पियब, आउर ना अपन काया लगिन कि का पिंधब। का जीउ खाएक केर चीजमन से आउर काया पिंधेक केर लुगा से बाइढ़ के नखे? आकाश केर चरईमन के देखा, उमन ना तो बुनैना, ना काटैना आउर ना रसवा में ठुरायना, सेकरो में परमेश्‍वर तोहर स्वरगीय आबा उमन के खियायला। तोहरेमन तो जरूर हें उ चरईमन से हों बगरा किमती अहा। तोहर में से केऊ हों चिंता काइर के अपन उमर के एक घड़ी ले हों बढ़ाएक नी पारी। आउर तोहरेमन लुगा लगिन काले चिंता कराला? जंगली सोसन केर फूलमन के धेयान से देखा, उमन कइसन बढ़ैना, उमन ना तो मेहनइत करैना, ना लुगा बनायना। सेकरो में मोंय तोहरेमन से कहाथों, राजा सुलैमान हों, अपन सोउब शोभा में उमन में से केकरो जइसन लुगा पिंधल नी रहे। से लगिन अगर परमेश्‍वर डाँड़ केर घास के जे आइज अहे आउर काइल आइग में साजल जाई, उके एइसन लुगा पिंधायला, तो तोहरेमन के हों उ जरूर पिंधाई, तोहर बिसवास काले एतना थोर अहे? से लगिन तोहरेमन चिंता ना करा कि हमरे का खाब, का पियब आउर का पिंधब? इ सोउब चीजमन केर खोजार तो उमन करैना, जेमन परमेश्‍वर के नी जानैना। लेकिन तोहरेमन के इ सोउब चीजमन चाही, सेके तोहर स्वरगीय आबा परमेश्‍वर जानेला। सोउब से पहिले तोहरेमन परमेश्‍वर केर राइज आउर उकर इच्छा लेखे धारमिक जिंदगी जियेक सिखा तो इ सोउब चीज हों तोहरेमन के भेटाय जाई। से लगिन काइल केर बारे में चिंता ना करा, काले कि काइल अपन चिंता खुद हें काइर लेवी। आइज लगिन आइज हें केर दुःख ढेइर अहे।” यीशु फिन आगे कहलक, “दोष ना लगावा, ताकि परमेश्‍वर तोहरे उपरे हों दोष ना लगाओक। काले कि जे लेखे तोहरेमन दोसर मनक उपरे दोष लगावला, ओहे लेखे परमेश्‍वर हों तोहर उपरे दोष लगाई आउर जे लेखे दोसरमन से ब्यवहार कराला, ठीक ओहे लेखे परमेश्‍वर हों तोहर संगे ब्यवहार करी। तोंय काले अपन बिसवासी भाई केर छोटका-छोटका गलतीमन के देखिसला, जबकि तोंय खुद तोर जिंदगी केर बड़का-बड़का गलतीमन के नी देखिसला। जब तोर में हें बड़का पाप अहे तो तोके खुद से कम पाप वाला आदमी केर मदइत करेक केर कोशिश नी करेक चाही। हे ढोंगी पहिले तोंय खुद केर बड़का गलतीमन के सुधराय ले, फिन तोंय अपन बिसवासी भाई केर छोटका-छोटका गलतीमन के देइख के उके सुधराएक में मदइत करबे। जेमन परमेश्‍वर केर संदेश के नी सुनेक चाहैना, उमन के ना सुनाबा। एइसन आदमीमन के परमेश्‍वर केर संदेश सुनाएक कुकूरमन केर आगे पवितर चीज के फेकेक जइसन चाहे सुवइरमन केर आगे मोती के फेकेक जइसन अहे, उमन सिरिफ उके गोड़ से रवाइंद देबैं आउर पलाइट के तोहर उपरे हमला करबैं। तोहरेमन के जे चाही उके परमेश्‍वर से माँगा उ तोहरेमन के देवी, जेके तोहरेमन खोजबा, उ तोहरेमन के भेटाई, ठोकठोकाबा, तो तोहर लगिन दुरा खोलल जाई। काले कि जे केऊ माँगेला, उके मिलेला आउर जे खोजेला उके भेटायला आउर जे दुरा ठोकठोकायला, उकर लगिन दुरा खोलल जायला। तोहरेमन में से कोन एइसन आदमी हेके, अगर अपन बेटा उकर से रोटी माँगेला तो उ अपन बेटा के पखना देवेला? या मछरी माँगेला, तो उके साँप देवेला? जब तोहरेमन खुद बुरा होई के, अपन छउवामन के बेस चीजमन के देवेक जानाला, तो तोहर स्वरगीय आबा अपन माँगेक वालामन के बेस चीजमन के काले नी देवी? से लगिन तोहरेमन दोसरमन से अपन लगिन जइसन ब्यवहार चाहाला, तइसनेहें तोहरेमन हों दोसरमन संगे ब्यवहार करा, काले कि मूसा केर नियम आउर परमेश्‍वर केर संदेश के बताएक वालामन केर शिक्षा केर अर्थ एहे हेके। तोहरेमन नान दुरा से परमेश्‍वर केर राइज में ढूकेक केर कोशिश करा, काले कि जे फाटक चाकर अहे आउर जे डहर में हिंठेक सहज अहे, उ बिनाश बटे लेई जायला आउर ढेइर आदमीमन एहे डहर से ढुकैना। जे दुरा नान आउर जे डहर में हिंठेक कठिन अहे उ जुग-जुग केर जिंदगी बटे लेई जायला, आउर थोरेक आदमीमन इ दुरा आउर डहर से ढुकैना आउर जुग-जुग केर जिंदगी के पावैना। झूठा संदेश देवेक वालामन से सावधान रहबा, उमन भेड़ीमन केर भेष धाइर के तोहर ठिना आवैना, मगर हकीकत में उमन नोकसान पोंहचाएक वाला भेड़ियामन नियर रहैना। तोहरेमन उ मनक काम के देइख के उमन के चीन्ह लेबा। का आदमीमन झूँड़ से अंगूर, या काँटा झूँड़ से अंजीर फार तोरैना? एहे नियर हरेक बेस आदमी बेस काम करेला आउर बुरा आदमी बुरा काम करेला। बेस आदमी बुरा काम नी करी आउर बुरा आदमी बेस काम नी करी। जे आदमी बेस काम नी करेला, उके परमेश्‍वर छाँइट लेई आउर नरक केर आइग में साइज देवी। से लगिन तोहरेमन उमन केर काममन के देइख के उमन के चीन्ह लेबा। जे आदमीमन मोके, हे प्रभु! हे प्रभु! कइह के हकायना, उमन में से सोउब आदमीमन स्वरग राइज में जाएक नी पारबैं, मगर ओहे आदमीमन जाबैं जेमन मोर स्वरगीय आबा केर इच्छा लेखे जिंदगी बितायना। जे दिन न्याय होवी, उ दिन ढेइर आदमीमन मोर से कहबैं, ‘हे प्रभु, हे प्रभु, का हमरे तोर नाँव से भविष्यवाणी नी करली? तोर नाँव से भूतमन के नी निकलाली आउर तोर नाँव से ढेइर चमत्कार केर काम नी करली?’ सेखन मोंय उमन से सोझे कइह देमूँ कि ‘मोंय तोहरेमन के कहियो नी जानलों कि तोहरेमन मोर हेका। हे बुरा काम करेक वाला आदमीमन, मोर ठिना से चाइल जावा।’ जे आदमी मोर इ गोइठमन के सुइन के उकर मोताबिक चलेला, से उ बुद्धिमान आदमी नियर अहे, जे अपन घर केर नेव चट्टाइन उपरे खोदलक। आउर जब पानी आलक, बाढ़ आलक आउर आँधी चललक आउर उ घर से बजड़ालक, मगर उ घर नी धाँसलक, काले कि उ घर केर नेव चट्टाइन उपरे रहे। मगर जे आदमी मोर इ गोइठमन के सुनेला आउर उकर मोताबिक नी चलेला, से उ मूरख आदमी नियर अहे, जे अपन घर बालू में बनालक। आउर जब पानी आलक, बाढ़ आलक, आउर आँधी चललक आउर उ घर से बजड़ालक तो उ घर धाँइस के बरबाद होई गेलक।” जब यीशु इ गोइठमन के कइह सिरालक, तो हूवाँ जेतना आदमीमन उकर उपदेस के सुनलैं सोउबमन ताजुब होई गेलैं। काले कि यीशु उमन के मूसा केर नियम के सिखाएक वालामन नियर निहीं मगर इ लेखे सिखात रहे कि उके सिखाएक केर अधिकार अहे। जब यीशु, उ पहार से उतइर के हेंठे आलक, तो एगो बड़का भीड़ उकर पिछे होई गेलक। आउर एगो कोढ़ बेमरिया आदमी यीशु ठिना आय के उके प्रणाम करलक आउर कहलक, “हे प्रभु, मोके ठीक काइर दे काले कि मोंय जानोना, अगर तोंय चाहबे तो मोके ठीक करेक पारबे।” यीशु अपन हाँथ बढ़ाय के उके छुलक आउर कहलक, “हाँ, मोंय चाहोना कि तोंय ठीक होई जा।” उ तुरते कोढ़ बेमारी से ठीक होई गेलक। यीशु उकर से कहलक, “देख, केकरो से ना कहबे कि मोंय तोके ठीक काइर हों, मगर जाय के खुद के यहूदी पुरोहित के देखाव कि तोंय ठीक होई जाय हिस आउर उ भेंट के चढ़ाबे जेकर बारे में मूसा अपन नियम में लीख हे, ताकि तोके यहूदी रीति केर मोताबिक शुद्ध मानल जाई आउर आदमीमन लगिन सबूत होवी।” आउर जब यीशु कफरनहूम नगर में आलक तो सौ सिपाही मनक एगो रोमी अधिकारी उकर ठिना आय के उकर से बिनती काइर के कहलक, “हे प्रभु, मोर धांगर लकवा केर बेमारी से घर में पड़ल अहे, जे हिलेक-डुलेक नी पाराथे।” यीशु उकर से कहलक, “मोंय तोर घर में आय के उके ठीक करमूँ।” रोमी अधिकारी जबाब देलक, “हे प्रभु मोंय इ लायक नखों कि तोंय मोर घर में आबे, मगर तोंय मुँह से भइर कइह दे, तो मोर धांगर ठीक होई जाई। काले कि मोंय हों दोसर अधिकारी मनक हेंठे काम करेक वाला आदमी हेकों आउर मोर हेंठे हों सिपाहीमन काम करैना। जब मोंय एगो से कहोना, ‘जा!’ तो उ जायला, आउर दोसर से कहोना, ‘आव!’ तो उ आवेला आउर अपन धांगर से कहोना, ‘इ काम के कर!’ तो उ करेला।” यीशु उकर एइसन गोइठ सुइन के ताजुब होई गेलक, आउर उ अपन पाछे अवाइया भीड़ से कहलक, “मोंय तोहर से सच कहाथों, ‘मोंय इसराइल देस में एको गो एइसन आदमी नी पालों, जे इ परजाइत आदमी नियर मोर उपरे पोक्ता बिसवास करेला।’ आउर मोंय तोहरेमन से कहाथों कि दुनिया केर चाइरो कोना से दोसर जाइत केर ढेइर बगरा आदमीमन अब्राहम, इसहाक आउर याकूब केर संगे बाइठ के स्वरग राइज में खुशी मनाबैं। मगर ढेइर इसराइली आदमीमन, जेमन लगिन स्वरग राइज तेयार करल जाहे, बाहरे अंधार में फेइक देवल जबैं, जहाँ काँदेक आउर दाँत केटरेक होवी।” तब यीशु सौ फौज मनक रोमी अधिकारी से कहलक, “जा! जइसन तोंय बिसवास काइर हिस, तइसनेहें तोर लगिन होई जाओक।” आउर उकर धांगर ओहे बेरा बेस होई गेलक। इकर पाछे यीशु पतरस केर घर में आलक आउर उ पतरस केर साइस के जार से डिसना में सुतल देखलक। यीशु उकर हाँथ के छुलक आउर उकर जार उतइर गेलक आउर उ उइठ के उ मनक सेवा-सुसइर करेक लगलक। जब यहूदी मनक आराम केर दिन बीत गेलक आउर साँझ होई गेलक, तब आदमीमन यीशु ठिना भूत धारल ढेइर आदमीमन के लानलैं। आउर यीशु भूतमन के अपन बचन से निकलाय देलक आउर सोउब बेमरिया आदमीमन के ठीक करलक। इ लेखे यशायाह परमेश्‍वर केर संदेश के बताएक वाला केर कहल इ गोइठ पूरा होलक, “उ खुद हमर कमजोरीमन के लेई गेलक आउर हमर बेमारीमन के उठाय लेलक।” यीशु जब अपन चाइरो बटे आदमी मनक एगो बड़का भीड़ के देखलक तो अपन चेलामन से कहलक, “आवा हमरे झील केर उ पाखी जाब।” आउर जइसनेहें उमन जाएक लगिन तेयार होवत रहैं, एगो मूसा केर नियम के सिखाएक वाला आदमी आय के उकर से कहलक, “हे गुरु, मोंय तोर चेला बनेक लगिन जहाँ-जहाँ तोंय जाबे, हूवाँ तोर पिछे-पिछे जामूँ।” यीशु उकर से कहलक, “सियार मनक रहेक लगिन माड़ा आउर आकाश केर चरईमन लगिन खोंता होवेला, मगर मोंय आदमी केर बेटा लगिन दुनिया में मूँड़ रखेक केर हों ठाँव नखे।” एगो आउर चेला उकर से कहलक, “हे प्रभु, मोके आगे अपन घर जाएक दे, जब मोर आबा मोइर जाई आउर उके मोंय गाइड़ लेमूँ, तब आय के तोर चेला बनमूँ।” यीशु उकर से कहलक, “तोंय मोर चेला बनेक लगिन मोर संगे आव, दुनिया में जे आदमीमन आत्मा में मोरल अहैं, उमन के अपन मुरदामन के गाड़ेक दे।” जब यीशु डोंगा उपरे चढ़लक तो उकर चेलामन उकर संगे चाइल गेलैं। थोरेक देरी पाछे झील में एगो बड़का आँधी तूफान उठलक, आउर पानी केर लहरा से डोंगा ढँपाय जात रहे आउर डुबत रहे, मगर यीशु डोंगा में निंदात रहे। तब चेलामन उकर ठिना आय के उके जगाय के कहलैं, “हे प्रभु, हमरे के बचाव, हमरे पानी में डुबाथी।” यीशु उमन से कहलक, “हे थोर बिसवास करइयामन, काले डराथा? तोहरेमन के बिसवास नखे कि मोंय तोहरेमन के बचाएक पारमूँ।” तब यीशु उइठ के आँधी आउर पानी के डाँटलक आउर सोउब स्थिर होई गेलक। इ घटना के देइख के चेलामन ताजुब काइर के कहेक लगलैं, “इ कइसन आदमी हेके कि आँधी आउर पानी हों उकर आगया के मानैना।” जब यीशु आउर उकर चेलामन गलील झील केर उ पाखी गिरासेनी मनक परदेस में पोहोंचलैं, तो दूई गो भूत धारल आदमीमन मसना से निकइल के यीशु ठिना आलैं। उ दुयो एतना बिरझल रहैं कि उ डहर से होई के केऊ हों आदमी आवा-जाही करेक नी पारत रहे। उमन चिल्लाय के कहलैं, “हे परमेश्‍वर केर बेटा, तोर से हमरे केर का काम अहे? का तोंय समय से पहिले हमरे के दुःख देवेक आय हिस?” उमन से थोरेक दूर सुवइर मनक एगो बड़का गोंहड़ा चरत रहे। भूतमन इ कइह के यीशु से बिनती करलैं कि, “अगर तोंय हमरे के निकलाएक चाहिसला, तो सुवइरमन केर गोंहड़ा में भेइज दे।” यीशु उमन से कहलक, “जावा” उमन निकइल के सुवइरमन केर भीतरे ढूइक गेलैं आउर देखते-देखते समूचा गोंहड़ा केर सोउब सुवइर हेंठे तेज ढलाउन में कूदते पानी में डूइब मोरलैं। आउर सुवइर चरवाहामन हूवाँ से भाइग के नगर में गेलैं आउर इ सोउब गोइठमन के आदमीमन के बतालैं, आउर जेमन में भूतमन रहैं उकर हाल के हों कइह सुनालैं। तब समूचा नगर केर आदमीमन यीशु से भेंट करेक लगिन निकइल के आलैं। उमन यीशु के आउर उ दुयो आदमीमन के देइख के यीशु से बिनती काइर के कहेक लगलैं, “हमर सिमान से बाहरे निकइल जा।” फिन यीशु डोंगा में बाइठ गेलक आउर झील के पार काइर के अपन नगर कफरनहूम घूइर आलक। जइसनेहें उ हूवाँ पोहोंचलक तो थोरेक आदमीमन एगो लकवा मारल आदमी के पटिया में सुताय के उकर ठिना लानलैं। यीशु इ जानलक कि उ आदमीमन मोर उपरे बिसवास करैना कि मोंय ठीक करेक पारोना, उ लकवा मारल आदमी से कहलक, “हे बेटा ढाढ़स बाँध, मोंय तोर पाप के क्षमा करोना।” तब मूसा केर नियम के सिखाएक वाला थोरेक आदमीमन अपन मन में सोचलैं, “इ तो परमेश्‍वर केर निंदा करेला।” यीशु उ मनक मन केर गोइठ के जाइन के उमन से कहलक, “तोहरेमन अपन-अपन मन में एइसन बुरा-बिचार काले कराथा? मोर लगिन इ कहेक का सहज अहे कि तोर पाप क्षमा होलक या इ कहेक कि उठ आउर चल फिर? मगर इ लगिन कि तोहरेमन जाइन लेवा कि मोंय आदमी केर बेटा के दुनिया में पाप क्षमा करेक केर अधिकार अहे।” तब यीशु लकवा मारल आदमी से कहलक, “उठ, अपन पटिया के उठाव आउर अपन घर चाइल जा।” उ उइठ के अपन घर चाइल गेलक। इ घटना के देइख के आदमीमन डराय गेलैं आउर परमेश्‍वर केर महिमा करेक लगलैं, जे आदमीमन के एइसन अधिकार देई हे। जइसनेहें यीशु हूवाँ से आगे गेलक तो उ मत्ती नाँव केर एगो आदमी के जेकर दोसर नाँव लेवी रहे मालगुजारी लेवेक केर ठाँव में बइठल देखलक आउर उकर से कहलक, “मोर पिछे होई ले आउर मोर चेला बाइन जा।” मत्ती उठलक आउर मालगुजारी लेवेक केर ठाँव के छोइड़ के यीशु केर संगे होई गेलक। जब यीशु घर में खाएक लगिन बइठलक तो ढेइर मालगुजारी लेवेक वालामन आउर दोसर आदमीमन जेमन पापी जानल जात रहैं, आय के यीशु आउर उकर चेलामन संगे खाएक बइठलैं। इ देइख के फरीसी दल केर आदमीमन यीशु केर चेलामन से कहलैं, “तोहरेमन केर गुरु मालगुजारी लेवेक वालामन आउर पापीमन केर संगे काले खायला?” जब यीशु इ गोइठ के सुनलक तब उमन से कहलक, “भला चंगा आदमीमन लगिन बाइध केर दरकार नखे, मगर बेमरियामन लगिन दरकार अहे। से लगिन तोहरेमन जाय के सीख लेवा कि इकर का मतलब हेके। मोंय अपन लगिन बलिदान नी चाहोना मगर इ चाहोना कि तोहरेमन दोसर मनक उपरे दया करा। काले कि मोंय उ आदमीमन के पाप करेक से छोड़वाएक लगिन बोलाएक नी आय हों जेमन खुद के धरमी बुझैना, मगर मोंय उमन के पाप करेक से छोड़वाएक लगिन बोलाएक आय हों जेमन जानैना कि हमरे पापी अही।” एक दिन यूहन्ना बपतिस्मा जल संस्कार देवेक वाला केर चेलामन यीशु ठिना आय के पूछलैं, “हमरे आउर फरीसी दल केर आदमीमन एतना उपास करिला मगर तोर चेलामन काले उपास नी करैना?” यीशु उमन के जबाब देलक, “जब तक दूल्हा बारातीमन केर संगे रहेला तो बारातीमन दुःख नी मनायना, काले कि उमन खुश रहैना। ओहे लेखे जब तक मोंय अपन चेलामन केर संगे अहों तो उमन कइसन दुःख मनाबैं, उमन नी मनाबैं काले कि उमन मोर संगे खुश अहैं, मगर उ दिनमन आवी जब मोके चेलामन से जुदा काइर देवल जाई, तब उमन उपास करबैं। आदमीमन नवाँ लुगा केर टुकरा के पुरना लुगा संगे नी टसैना। नी तो धोवल जाएक से नवाँ टुकरा सिकुइड़ जाई आउर पुरना लुगा के आउर फाइर देवी, तब पुरना लुगा केर टोका ढेइर बड़का होई जाई। आउर नवाँ अंगूर केर रस के पुरना चमड़ा केर थैला में नी भरैना, काले कि एइसन करेक से अंगूर केर रस से फेन उठी आउर पुरना चमड़ा केर थैला फाइट जाई आउर अंगूर केर रस बोहाय जाई आउर उ चमड़ा केर थैला हों नाश होई जाई, से लगिन नवाँ अंगूर केर रस के नवाँ चमड़ा केर थैला में भरैना आउर उ दुयो बचल रहेला।” यीशु हूवाँ केर आदमीमन से इ गोइठ कहते हें रहे कि एगो यहूदी मनक प्रार्थना घर केर सरदार आय के उके प्रणाम करलक आउर कहलक, “मोर बेटी एखन-एखन मोइर हे, मगर तोंय जाय के अपन हाँथ के उकर उपरे राइख देबे, तो उ जिंदा होई जाई।” यीशु उइठ के अपन चेलामन के लेई के उकर संगे जाएक लगलक। उ बेरा एगो जनाना जेकर बारह बरिस से लोहू बहेक केर बेमारी रहे, यीशु केर पिछे से आय के उकर लुगा केर आँचरा के छुई देलक। काले कि उ अपन मन हें मन कहत रहे, “अगर मोंय उकर लुगा के हें छुई लेमूँ तो ठीक होई जामूँ।” यीशु पिछे मुइड़ के देखलक आउर कहलक, “बेटी ढाढ़स बाँध, तोर बिसवास तोके ठीक काइर हे।” आउर उ जनाना ओहे बेरा ठीक होई गेलक। जब यीशु यहूदी मनक प्रार्थना घर केर सरदार केर घर में पोहोंचलक तो उ बाँसुरी बजाइयामन आउर भीड़ के गूल गंजाइर करते देखलक, तब उमन के कहलक, “बाहरे निकइल जावा, छोंड़ी नी मोइर हे मगर निंदाथे।” यीशु केर इ गोइठ सुइन के उमन हँसी उड़ाएक लगलैं। मगर जब भीड़ केर आदमीमन के बाहरे निकलाल गेलक, तब यीशु घर भीतरे जाय के छोंड़ी केर हाँथ धारलक, आउर उ जी गेलक। आउर इ गोइठ केर चरचा उ समूचा परदेस में फाइल गेलक। जब यीशु हूवाँ से आगे बढ़लक, तो दूई गो अंधरा आदमीमन उकर पिछे इ कइह के हकाते चाइल आवत रहैं, “हे राजा दाऊद केर संतान, हमर उपरे दया कर।” जब यीशु घर में पोहोंचलक, तो उ अंधरामन उकर ठिना आलैं, आउर यीशु उमन से कहलक, “का तोहरेमन के बिसवास अहे, कि मोंय तोहरेमन के ठीक करेक पारमूँ?” उमन उके जबाब देलैं, “हाँ प्रभु।” तब यीशु उ मनक आँइख के छुई के कहलक, “तोहरे मनक बिसवास केर मोताबिक तोहरे लगिन होवोक।” आउर उ दुयो देखेक लगलैं, यीशु उमन के चेताय के कहलक, “सावधान, केखो ना बताबा कि मोंय तोहरेमन के ठीक काइर हों।” मगर उ दुयो निकइल के समूचा परदेस में इ गोइठ के फैलाय देलैं। जे बेरा यीशु आउर उकर चेलामन बाहरे जात रहैं, से बेरा आदमीमन एगो कोका आदमी के उकर ठिना लानलैं, जेकर में भूत रहे। यीशु उकर में से भूत के निकलाय देलक आउर उ कोका आदमी गोठियाएक लगलक। इ देइख के भीड़ केर आदमीमन ताजुब होई के कहेक लगलैं, “हमरे इसराइल देस में इकर से आगे एइसन कहियो नी देइख रही।” मगर फरीसी दल केर आदमीमन कहलैं, “इ तो भूतमन केर सरदार केर मदइत से भूतमन के निकलायला।” यीशु आउर उकर चेलामन गलील परदेस केर कायनों नगर आउर गाँवमन में घुमत रहैं आउर यीशु यहूदी मनक प्रार्थना घरमन में उपदेस देते रहलक आउर परमेश्‍वर केर राइज केर शुभ समाचार परचार करते आउर हर रकम केर बेमारी आउर कमजोरीमन के दूर करते रहलक। जब यीशु भीड़ के देखलक तो उ आदमीमन उपरे सोगालक, काले कि उमन ठिना उ मनक ठीक से अगुवाई करेक लगिन केऊ हों नी रहे, उमन ठीक उइसनेहें रहैं जइसन बेगर चरवाहा केर भेड़ीमन रहैना, उमन परेशान आउर बेड़ाल रहैं। तब उ अपन चेलामन से कहलक, “जइसन खेतमन में अन्न पाइक जाय हे, मगर कटइयामन थोर अहैं। तइसनेहें ढेइर आदमीमन परमेश्‍वर केर संदेश के सुइन के बिसवास करेक ले तेयार अहैं। मगर उमन के परमेश्‍वर केर राइज केर बारे में बताएक लगिन आदमीमन थोर अहैं। से लगिन प्रभु जे खेत केर मालिक हेके उकर से प्रार्थना करा कि उ अपन खेती के काटेक लगिन अपन संदेश के बताएक वालामन के भेजोक।” फिन यीशु अपन बारहों झन खास चेलामन के अपन ठिना बोलाय के उमन के भूतमन के निकलाएक केर आउर सोउब रकम केर बेमारीमन आउर कमजोरीमन के दूर करेक केर अधिकार देलक। आउर इ बारह खास चेलामन केर नाँव इ हेके: पहिला सिमोन, जे पतरस कहायला आउर उकर छोट भाई अन्द्रियास, जबदी केर बेटा याकूब आउर याकूब केर छोट भाई यूहन्ना, फिलिप्पुस, बरतुल्मै, थोमा आउर मालगुजारी लेवेक वाला मत्ती, हलफई केर बेटा याकूब, तद्दै। दोसर सिमोन जे क्रांतिकारी दल केर सदस्य रहे आउर यहूदा इस्करियोती जे करियोत गाँव केर रहेक वाला रहे, जे पाछे यीशु के धरुवाय देलक। इ बारह खास चेलामन के यीशु इ आगया देई के भेजलक, “परजाइत आदमीमन आउर सामरी आदमीमन केर कोनों नगर में ना जबा। मगर इसराइली घराना में से जेमन परमेश्‍वर से दूर होई जाय हैं, उमन केर माझे जावा। आउर जाते-जाते इ परचार करते जावा, ‘स्वरग राइज भीरे आय जाय हे।’ आउर तोहरेमन बेमरियामन के ठीक करा, मोरलमन के जियावा, कोढ़ीमन के शुद्ध करा, भूतमन के निकलावा। तोहरेमन बेगर दाम देले पाय हा, तो तोहरेमन हों बेगर दाम लेले देवा। डहर हिंठेक बेरा में अपन लगिन लुगा खूट में ना तो सोना, ना रुपा आउर ना तांबा केर सिक्का रखबा। तोहरेमन अपन डहर लगिन ना झोला, ना लाठी लेगबा, सिरिफ पिंधल जूता आउर पिंधल लुगा छोइड़ के आउर कोनोवें ना लेगबा, काले कि कमिया के उकर खाएक मिलेक चाही। जे कोनों नगर चाहे गाँव में जबा, तो पता लगाबा कि केहर तोहरे केर स्वागत करेक लायक अहे। जब उ आदमी तोहरेमन के अपन घर में रहेक लगिन नेवता देवी, तो जब तक उ गाँव चाहे नगर में रहबा, उकरे गोतिया बाइन के रहबा। आउर घर में ढूकते हें आशीष देई के कहबा, ‘इ घर में परमेश्‍वर केर शांति होवोक।’ अगर उ घर केर आदमीमन तोहर स्वागत करबैं तो तोहर देवल शांति उ मनक उपरे बनल रही, मगर उमन लायक नी होबैं तो तोहर देवल शांति तोहर ठिना घूइर आवी। आउर जे केऊ तोहर स्वागत नी करी, आउर तोहर गोइठमन के नी सुनी, उ घर चाहे उ नगर से निकलेक बेरा अपन तरवा केर धूर के झाइर देबा। मोंय तोहरेमन से सच कहाथों कि न्याय केर दिन उ नगर केर आदमी मनक सजा सदोम आउर अमोरा नगर केर आदमी मनक सजा से हों बगरा होवी। देखा, मोंय तोहरेमन के भेड़ीमन नियर उमन केर माझे भेजाथों, जेमन हड़हामन नियर खतरनाक अहैं। से लगिन तोहरेमन साँपमन नियर चतूर आउर पेरवाँमन नियर सीधा बना। मगर आदमीमन से सावधान रहबा, काले कि आदमीमन तोहरेमन के बंदी बनाय के महासभामन में जिम्मा देबैं, आउर तोहरेमन के यहूदी मनक प्रार्थना घरमन में कोड़रा से मारबैं। तोहरेमन मोर चेला हेका, सेकर चलते तोहरेमन के अधिकारी आउर राजा मनक आगे ठड़ुवाल जाएक लगिन मजबूर कराल जाई, होले उमन तोहरे उपरे दोष लगाबैं, जेकर चलते तोहरेमन राजामन के आउर परजाइत आदमीमन के मोर बारे में शुभ समाचार सुनाएक पारबा। जब तोहरेमन धराल जबा आउर तोहरेमन उपरे मुकद्दमा चली तो आगे से इ चिंता ना करबा कि तोहरेमन के हूवाँ कइसन आउर का कहेक अहे, जे कुछ हूवाँ कहेक होवी सेहे बेरा परमेश्‍वर तोहरेमन के बताई। काले कि कहेक वाला तोहरेमन ना लगा, मगर तोहरे केर आबा परमेश्‍वर केर पवितर आत्मा तोहरे केर मुँह में से होई के उमन से गोठियाई। उ बेरा जे आदमीमन मोर उपरे बिसवास नी करैना, उमन अपनेहें भाईमन के जे मोर उपरे बिसवास करैना धरुवाय के मरुवाय देबैं। आउर आबामन हों अपन बेटामन संगे एइसनेहें करबैं आउर छउवा पुतामन हों अपन आयो-आबा केर बिरोध में उठबैं आउर उमन के मरुवाबैं। तोहरेमन मोर उपरे बिसवास कराला से लगिन आदमीमन तोहरेमन से नफरत करबैं, मगर जे आदमीमन दुःख तकलीफ केर आखरी बेरा तक मोर उपरे भरसा करबैं आउर हार नी मानबैं उमन के परमेश्‍वर बचाय लेई। जब उमन तोहरेमन के एक नगर में सताबैं तो दूसरा नगर में भाइग जबा। मोंय तोहरेमन से सच कहाथों, तोहरेमन इसराइल देस केर सोउब नगरमन में घुइम के हों नी सिराबा कि मोंय आदमी केर बेटा फिन घूइर आमूँ। चेला अपन गुरु से बाड़ नी होवेला, आउर ना धांगर अपन मालिक से बाड़ होवेला। चेला के गुरु जइसन बनेक आउर धांगर केर मालिक जइसन बाइन जाएक हें ढेइर अहे, जब उमन मोंय घर केर मालिक के शैतान कहलैं, तो मोर घर केर आदमीमन से काले बुरा ब्यवहार नी करबैं। से लगिन उ बिरोधी आदमीमन से ना डराबा, परमेश्‍वर हर उ गोइठमन के जे पहिले से ढाँपल अहे खोइल देवी, आउर सोउब भेद केर गोइठमन के जेके आदमीमन अब तक नी जानैना दिस्तार करी। जे गोइठ के मोंय तोहरेमन से अंधार में कहाथों, उके इंजोत में कहबा आउर जे कुछ मोंय तोहरेमन के कान में धीरे से सुनालों, उके तोहरेमन खुइल के सोउब केर सामने परचार करबा। तोहरेमन उमन से ना डरावा, जेमन काया के तो माइर मोराएक पारबैं, मगर आत्मा के मोराएक नी पारबैं, तोहरेमन उकरे से डरावा, जे आत्मा आउर काया दुयो के नरक में नाश करेक पारेला। तोहरेमन जानाला कि दूई गो गेरवाँ चरई केर थोरको दाम नखे, सेकरो में तोहर आबा केर इच्छा केर बिना उमन में से गोटको भूंई में नी गिरेला। परमेश्‍वर तोहर सोउब चीज केर धेयान रखेला, हिंयाँ तक कि तोहर मूँड़ केर सोउब केंस के हों गिन के राइख हे। से लगिन तोहरेमन ना डरावा, काले कि तोहरेमन परमेश्‍वर लगिन ढेइर गेरवाँ चरईमन से हों बगरा किमती अहा। जे केऊ मोके आदमीमन केर सामने माइन लेवी कि उ मोर चेला हेके, तो मोंय हों अपन स्वरगीय आबा केर सामने उके अपन चेला माइन लेमूँ। मगर जे केऊ मोके आदमीमन केर सामने इंकार करी, तो मोंय हों अपन स्वरगीय आबा केर सामने उके अपन चेला मानेक से इंकार करमूँ। तोहरेमन इ ना सोचा कि मोंय धरती में एक दोसर से मिलवाएक लगिन आय हों, मोंय मिलवाएक निहीं, मगर लड़ाई करुवाएक आय हों। मोंय, मोर उपरे बिसवास करेक वालामन के, मोर उपरे बिसवास नी करेक वालामन से अलग कराएक लगिन आय हों, मोंय बेटा के उकर आबा से, बेटी के उकर आयो से, आउर पूतउ के उकर साइस से अलग काइर देमूँ। मोर उपरे बिसवास नी करेक वालामन, अपनेहें घर में बिसवास करेक वालामन केर दुश्मन होबैं। जे आदमी अपन आयो चाहे आबा के मोर से बगरा प्रेम करेला, उ मोर चेला बनेक केर लायक नखे आउर जे आदमी अपन बेटा या बेटी के मोर से बगरा प्रेम करेला, ओहो मोर चेला बनेक केर लायक नखे। मगर जे मोर खातिर दुःख उठाएक आउर मोइर जाएक ले हों तेयार रही ओहे मोर चेला बनेक केर लायक होवी। जे आदमी अपन जीउ के बचायला, उ जुग-जुग केर जिंदगी के गवाँय देवी, मगर जे मोर खातिर अपन जीउ के गवाँय देवी, उ आदमी जुग-जुग केर जिंदगी के पावी। जे तोहरेमन के मोर चेला जाइन के स्वागत करेला, उ मोर स्वागत करेला, आउर जे मोर स्वागत करेला, उ मोर भेजेक वाला केर स्वागत करेला। जे आदमी परमेश्‍वर केर संदेश के बताएक वाला के परमेश्‍वर केर संदेश बताएक वाला जाइन के उकर स्वागत करी, उके परमेश्‍वर ओहे इनाम देवी जे इनाम अपन संदेश बताएक वाला के देवी। आउर जे केऊ धरमी आदमी के धरमी जाइन के उकर स्वागत करी, उके परमेश्‍वर हों ओहे इनाम देवी, जे इनाम धरमी आदमी के देवी। जे केऊ इ छोट आदमीमन में से एको झन के मोर चेला जाइन के सिरिफ एक गिलास ठंढा पानी पियाई, तो मोंय तोहरेमन से सच कहाथों, परमेश्‍वर उ आदमी केर जरूर भला करी।” यीशु अपन बारह खास चेलामन के आगया देवेक केर पाछे, हूवाँ से उ मनक नगरमन में उपदेस देवेक आउर परचार करेक ले चाइल गेलक। जब यूहन्ना बपतिस्मा जल संस्कार देवेक वाला जेहेल घर में मसीह केर काममन केर समाचार सुनलक, तो उ अपन चेलामन के इ पूछेक लगिन भेजलक, “का तोंय हें आवेक वाला मसीह हेकिस, जेके परमेश्‍वर हमरे के बचाएक ले भेजेक केर करार काइर हे: या हमरे दोसर केर आसरा देखब?” यीशु जबाब देलक, “जे कोनों गोइठ तोहरेमन सुनाथा आउर काममन के देखाथा, उ सोउब के जाय के यूहन्ना के बताय देवा, कि अंधरामन देखेक पारैना आउर लंगड़ामन हिंठेक पारैना, कोढ़ बेमरियामन के ठीक कराल जायला, आउर बहिरामन सुनेक पारैना, मोरलमन के जियाल जायला आउर गरीबमन के शुभ समाचार सुनाल जायला। आउर धाइन अहैं उ आदमीमन, जेमन मोर उपरे बिसवास करेक नी छोड़ैना।” जब यूहन्ना बपतिस्मा जल संस्कार देवेक वाला केर चेलामन हूवाँ से चाइल गेलैं, तो यीशु यूहन्ना केर बारे में आदमीमन से पूछेक लगलक, “तोहरेमन सुनसान ठाँव में का देखेक जाय रहा? का धुका से हिलते सोंटा के? फिन तोहरेमन का देखेक जाय रहा? का बढ़ियाँ लुगा पिंधल आदमी के? देखा, जेमन बढ़ियाँ लुगा पिंधैना, उमन राजमहल में रहैना। तो फिन का देखेक जाय रहा? का तोहरेमन केऊ परमेश्‍वर केर संदेश के बताएक वाला के देखेक जाय रहा? हाँ, मोंय तोहरेमन के कहाथों, यूहन्ना बपतिस्मा जल संस्कार देवेक वाला परमेश्‍वर केर संदेश के बताएक वाला से हों बाड़ हेके। इ ओहे हेके, जेकर बारे में पवितर किताब में लिखल अहे कि ‘देख, मोंय अपन संदेश के बताएक वाला के तोर आगे भेजाथों, जे आदमीमन के तोर उपरे बिसवास करेक लगिन तेयार करी, ताकि उमन तोर से मिलेक पारोक।’ मोंय तोहरेमन से सच कहाथों, आइज तक दुनिया में जे केऊ हों जनम लेई हैं, उमन में से यूहन्ना बपतिस्मा जल संस्कार देवेक वाला से केऊ बाड़ नी होलैं, मगर जे स्वरग राइज में छोट से हों छोट अहे, उ उकर से बाड़ अहे। यूहन्ना बपतिस्मा जल संस्कार देवेक वाला से लेई के एखन तक स्वरग राइज आगे बढ़ाथे, आउर बलवान आदमीमन इके नाश करेक केर कोशिश कराथैं। परमेश्‍वर केर संदेश के बताएक वालामन केर किताब आउर मूसा केर नियम में यूहन्ना बपतिस्मा जल संस्कार देवेक वाला केर आवेक तक परमेश्‍वर केर राइज केर बारे भविष्यवाणी करल गेलक। अगर तोहरेमन मोर गोइठ के मानेक चाहाला तो सुना, जे परमेश्‍वर केर संदेश के बताएक वाला एलिय्याह आवेक वाला रहे, उ एहे यूहन्ना बपतिस्मा जल संस्कार देवेक वाला हेके। जे केऊ मोर इ गोइठ के धेयान से सुनाथा, उमन से मोंय कहाथों कि इकर बारे में समझेक केर कोशिश करा। मोंय इ समय केर आदमीमन केर जोड़ी केकर से करमूँ? उमन उ छउवामन नियर अहैं, जेमन बाजारमन में बइठल दोसरमन के दोष लगाय के कहैना: कि हमरे तोहर लगिन खुशी केर गीत गाली सेकरो में तोहरेमन नी नाचला, आउर हमरे मरण केर गीत गाली सेकरो में तोहरेमन दुःखी नी होला। यूहन्ना बपतिस्मा जल संस्कार देवेक वाला तो घरी-घरी उपास करलक आउर दारू नी पीलक सेकरो में कहैना, ‘उकर में भूत अहे।’ मगर मोंय आदमी केर बेटा खाते पिते आवाथों, सेकरो में उमन कहैना कि ‘देखा, पेटू आउर पियंक्कड़ आदमी, मालगुजारी लेवेक वालामन आउर पापी आदमीमन केर संग हेके।’ मगर आदमी केर उकर काममन से पता चलेला कि उ भला या बुरा आदमी हेके।” यीशु जे नगरमन में ढेइर चमत्कार केर काम काइर रहे, सेकरो में हूवाँ केर आदमीमन पाप करेक नी छोइड़ रहैं, से लगिन उमन के दोष लगाय के कहेक लगलक, “हाय खुराजीन नगर केर आदमीमन! हाय बैतसैदा गाँव केर आदमीमन! जे चमत्कार केर काम तोहर माझे करल गेलक, अगर उ काममन के सूर आउर सैदा नगर केर आदमीमन केर माझे करल जातक, तो हूवाँ केर आदमीमन टाट लुगा ओइढ़ के, आउर अपन काया में राख के मखाय लेतैं, इ देखाएक लगिन कि उमन पाप करेक छोइड़ देलैं। मोंय तोहरेमन से कहाथों कि न्याय केर दिन परमेश्‍वर सूर आउर सैदा नगर केर आदमीमन के तो सजा देवी, मगर तोहरेमन केर सजा उ मनक सजा से हों कहीं बगरा होवी। हे कफरनहूम नगर केर आदमीमन, तोहरेमन सोचाला कि हमरे स्वरग राइज तक उठाल जाब, एइसन नी होवी, तोहरेमन तो नरक में फेइक देवल जबा। काले कि जे चमत्कार केर काम तोहर माझे करल जाय हे, अगर उ काममन के सदोम नगर में करल जाय रहतक, तो उ नगर आइज तक बनल रहतक। मगर मोंय तोहरेमन से कहाथों कि न्याय केर दिन परमेश्‍वर सदोम नगर केर आदमीमन के तो सजा देवी, मगर तोहरेमन केर सजा उ मनक सजा से हों कहीं बगरा होवी।” ओहे बेरा यीशु कहलक, “हे परमेश्‍वर आबा, आकाश आउर धरती केर प्रभु, मोंय तोर धन्यबाद करोना कि इ गोइठमन के गेयानीमन आउर समझदार आदमीमन से लुकाय के रखले, आउर उ आदमी मनक उपरे दिस्तार काइर हिस, जेमन छउवामन नियर बचन के सुइन के उकर में बिसवास करैना। हाँ, हे परमेश्‍वर आबा, काले कि तोके एहे बेस लगलक। मोर आबा परमेश्‍वर मोके सोउब कुछ केर उपरे अधिकार देई हे, सिरिफ परमेश्‍वर आबा हें बेटा के जानेला, आउर बेटा हें परमेश्‍वर आबा के जानेला, आउर बेटा जे आदमी के चाहेला उकर उपरे उके दिस्तार करेला। हे सोउब मेहनइत करेक वाला आउर बोझा से जँताल आदमीमन, मोर ठिना आवा, मोंय तोहरेमन के आराम देमूँ। मोर पाछे होई लेवा आउर मोर से सिखा, काले कि मोंय मन से सीधा आउर हृदय से नरम अहों, इ लेखे तोहरेमन अपन मन में आराम पाबा। काले कि मोर पाछे चलेक आउर मोर शिक्षा के मानेक सहज अहे।” एक बेर यीशु आउर उकर चेलामन यहूदी मनक आराम केर दिन अन्न केर खेतमन में से होई के जात रहैं, आउर उकर चेलामन के भूख लगलक तो उमन बाइल के तोइर-तोइर के खाएक लगलैं। तब फरीसी दल केर आदमीमन इ देइख के यीशु से कहलैं, “देख तोर चेलामन उ काम कराथैं, जे मूसा केर नियम केर मोताबिक यहूदी मनक आराम केर दिन करेक उचित नखे।” यीशु उमन के जबाब देलक, “का तोहरेमन पवितर किताब में नी पइढ़ हा कि राजा दाऊद आउर उकर संगमन के भूख लगलक तो राजा दाऊद का करलक? उ कइसन परमेश्‍वर केर तंबू में गेलक आउर उ रोटीमन के खालक आउर अपन संगमन के हों देलक, जेके पुरोहित परमेश्‍वर के भेंट में चढ़ाय रहे। तोहरेमन जानाला कि मूसा केर नियम का कहेला, उके सिरिफ पुरोहितमन हें खाएक पारैना। तोहरेमन मूसा केर नियम में एहो पइढ़ हा कि पुरोहित यहूदी मनक आराम केर दिन हों नियम तोइर के मंदिर में काम करेला, फिन भी उ निरदोष गिनायला। मगर मोंय तोहरेमन से कहाथों, मोंय उ हेकों, जे यहूदी मनक मंदिर से हों बाड़ अहों। अगर तोहरेमन पवितर किताब केर लिखल इ शबद केर अर्थ जानता कि ‘मोंय चाहोना कि तोहरेमन मोर लगिन बलिदान ना चढ़ावा मगर दोसरमन केर उपरे दया करा,’ तो तोहरेमन मोर चेलामन केर उपरे दोष नी लगाता। मोंय आदमी केर बेटा यहूदी मनक आराम केर दिन केर हों मालिक हेकों।” हूवाँ से चाइल के यीशु यहूदी मनक प्रार्थना घर में आलक। हूवाँ एगो आदमी रहे जेकर हाँथ सूइख जाय रहे आउर उमन यीशु केर उपरे दोष लगाएक लगिन उकर से पूछलैं, “का यहूदी मनक आराम केर दिन बेमरियामन के ठीक करेक मूसा केर नियम केर मोताबिक उचित अहे?” यीशु उमन से कहलक, “तोहर में से एइसन केहर अहे, जेकर एके गो भेड़ी होवी, आउर उ आराम केर दिन गढ़हा में गिर जाई, तो का उके धाइर के नी निकलाई? आदमी केर दाम तो भेड़ी से हों बगरा अहे, से लगिन यहूदी मनक आराम केर दिन हों मूसा केर नियम केर मोताबिक भलाई करेक उचित अहे।” तब यीशु उ आदमी से कहलक, “अपन हाँथ के बढ़ाव।” तब उ अपन हाँथ के बढ़ालक, आउर उकर सुखल हाँथ दोसर हाँथ नियर बेस होई गेलक। इ देइख के फरीसी दल केर आदमीमन बाहरे जाय के उकर बिरोध में सलहा करलैं कि यीशु के का लेखे माइर मोराब। यीशु उ मनक इ गोइठ के जाइन के हूवाँ से चाइल गेलक आउर ढेइर आदमीमन उकर पाछे होई गेलैं, आउर यीशु सोउब बेमरियामन के ठीक करलक। आउर यीशु उमन के चेताय के कहलक, “आदमीमन के ना बतावा कि मोंय केहर हेकों।” इ लेखे यशायाह परमेश्‍वर केर संदेश के बताएक वाला केर कहल इ गोइठ पूरा होलक: “देखा, इ मोर चुनल दुलार बेटा हेके, इकर से मोंय मुरुक खुश अहों, मोंय अपन आत्मा उके देमूँ आउर उ परजाइत आदमीमन के पापमन से छुटकारा पावेक केर शुभ समाचार सुनाई। उ झगरा नी करी, जोर से नी चिल्लाई आउर आदमीमन केर माझे उ घमंड से भाइर के परचार नी करी। उ टुटल सोंटा नियर कमजोर आदमीमन केर नोकसान नी करी आउर जे केऊ कोनों समस्या से घेराल अहैं, उमन बुझते दीया नियर अहैं, जेमन के उ नी बुताई जब तक उ न्याय के नी जीत लेवी। आउर सोउब देस केर आदमीमन उकर उपरे आसरा रखबैं।” तब आदमीमन यीशु ठिना एगो अंधरा आउर कोका आदमी के लानलैं, जेकर में भूत रहे, आउर यीशु उके ठीक करलक, आउर उ गोठियाएक आउर देखेक लगलक। इ देइख के सोउब आदमीमन ताजुब होई के कहेक लगलैं, “का एहे राजा दाऊद केर संतान तो ना लगे?” मगर फरीसी दल केर आदमीमन इ सुइन के कहलैं, “इ तो भूतमन केर सरदार बालजबूल केर मदइत से भूतमन के निकलायला।” यीशु उ मनक मन केर गोइठ के जाइन के उमन से कहलक, “अगर एक राइज केर आदमीमन एक दोसर से लड़ते रहबैं, तो उ राइज उजइर जाई, एहे लेखे जे नगर या घर केर आदमीमन एक दोसर से लड़ते रहबैं, तो उ नगर या घर सोउब दिन लगिन बनल नी रही। आउर अगर शैतान हें शैतान के निकलाई, तो उ अपनेहें बिरोधी होई जाई तो फिन उकर राइज कइसन बनल रही? भला, अगर मोंय भूतमन केर सरदार बालजबूल केर मदइत से भूतमन के निकलावना, तो तोहर चेलामन केकर मदइत से निकलायना? से लगिन ओहेमन तोहर फैसला करबैं। आउर अगर मोंय परमेश्‍वर केर आत्मा केर मदइत से भूतमन के निकलावना, तो परमेश्‍वर केर राइज तोहर भीरे आय पोंहइच हे। जइसन केऊ आदमी, केऊ बलवान आदमी केर घर में ढूइक के उकर माल के लुटेक नी पारी, उ पहिले बलवान आदमी के बाइंध लेई तब उकर घर के लुटेक पारी। जेमन इ बिसवास नी करैना कि मोंय पवितर आत्मा केर मदइत से भूतमन के निकलावना, उमन मोर बिरोध में अहैं। आउर जेमन दोसर आदमीमन के मोर चेला बनेक से मना करैना, ओहोमन दोसर आदमीमन के परमेश्‍वर से दूर करैना। से लगिन मोंय तोहर से कहाथों कि आदमी केर सोउब रकम केर पाप आउर निंदा जे उमन परमेश्‍वर केर बिरोध में करैना क्षमा करल जाई, मगर पवितर आत्मा केर निंदा क्षमा नी करल जाई। जे केऊ मोंय आदमी केर बेटा केर बिरोध में कोनों गोइठ कही, उकर इ गुन्हा क्षमा करल जाई। मगर केऊ पवितर आत्मा केर बिरोध में कोनों कही, तो उकर गुन्हा, ना तो इ दुनिया में आउर ना परमेश्‍वर केर राइज में क्षमा करल जाई। अगर गाँछ के बेस कहबा, तो उकर फार के हों बेस कहा, या गाँछ के निकम्मा कहबा, तो उकर फार के हों निकम्मा कहा, काले कि गाँछ अपन फार से हें चिन्हाय जायला। एहे लेखे तोहरे फैसला करा कि जे काम मोंय करोना उ बेस अहे कि निहीं। हे जहरीला साँप नियर दुष्ट आदमीमन तोहरेमन बुरा होई के कइसन बेस गोइठ कहेक पारबा? काले कि जे गोइठमन मन में भरल अहे, ओहे मुँह से निकलेला। बेस आदमी अपन मन केर बेस भंडार से बेस गोइठमन के निकलायला आउर बुरा आदमी अपन मन केर बुरा भंडार से बुरा गोइठमन के निकलायला। आउर मोंय तोहर से कहाथों कि न्याय केर दिन आदमीमन के अपन मुँह से कहल सोउब बेकार गोइठ केर हिसाब देवेक होवी। काले कि जब परमेश्‍वर न्याय करी तो हरेक आदमी के अपन मुँह से कहल गोइठ केर मोताबिक उके बेकसूर चाहे दोषीदार ठहराई।” से लगिन थोरेक मूसा केर नियम के सिखाएक वालामन आउर फरीसी दल केर आदमीमन यीशु से कहलैं, “हे गुरु, हमरे तोर से एगो चिन्हा देखेक चाहाथी। इ साबित करेक लगिन कि परमेश्‍वर तोके अपन अधिकार देई हे।” यीशु उमन के जबाब देलक, “इ जुग केर बुरा आउर ब्यभिचारी आदमीमन चिन्हा देखेक खोजैना, मगर योना परमेश्‍वर केर संदेश के बताएक वाला केर चिन्हा के छोइड़ कोनों आउर चिन्हा उमन के नी देवल जाई। जइसन योना तीन दिन आउर तीन राइत बड़का मछरी केर पेट में रहलक, तइसनेहें मोंय आदमी केर बेटा हों तीन दिन आउर तीन राइत भूंई केर भीतरे रहमूँ। नीनवे नगर केर आदमीमन न्याय केर दिन तोहर संगे उइठ के तोहरेमन के दोषी ठहराबैं, काले कि उमन तो योना केर परचार के सुइन के पाप करेक छोइड़ देलैं, हिंयाँ तो मोंय योना से हों बाड़ अहों, मगर मोर परचार के सुइन के हों तोहरेमन पाप करेक नी छोड़ाथा। दक्खिन केर रानी न्याय केर दिन तोहर संगे उइठ के तोहरेमन के दोषी ठहराई, काले कि उ सुलैमान केर गेयान सुनेक लगिन ढेइर दूर से आलक, आउर हिंयाँ तो मोंय राजा सुलैमान से हों बाड़ आउर बुद्धिमान अहों, मगर मोर परचार के सुइन के हों तोहरेमन पाप करेक नी छोड़ाथा। जब भूत आदमी में से निकइल जायला, तो सुखल ठाँवमन में आराम खोजेला, मगर नी पावेला। तब उ खुद से कहेला, मोंय ओहे आदमी में घूइर जामूँ, जेकर से मोंय निकइल के आय रहों आउर उ घूइर के उ आदमी केर जिंदगी के झड़ाल-पोंछाल, सजाल संवराल आउर खाली देखेला। तब उ जाय के अपन से हों आउर बगरा बुरा सात गो भूतमन के अपन संगे लेई आवेला, आउर उमन उ आदमी में ढूइक के उकर में डेरा करैना, आउर उ आदमी केर पाछे केर दुःख आगे केर दुःख से हों बगरा बुरा होई जायला, इ जुग केर बुरा आदमीमन केर दुःख हों एहे आदमी केर नियर होवी।” जब यीशु भीड़ केर आदमीमन से गोठियाते रहे, तब उकर आयो आउर उकर छोट भाईमन आय के बाहरे ठड़ाल रहैं, आउर उमन यीशु से गोठियाएक चाहत रहैं। तब केऊ आदमी यीशु से कहलक, “देख तोर आयो आउर तोर भाईमन बाहरे ठड़ाल अहैं, आउर तोर से गोठियाएक चाहाथैं।” इ सुइन के यीशु कहेक वाला के जबाब देलक, “केहर हेके मोर आयो? आउर केमन हेकैं मोर भाई?” आउर अपन चेलामन बटे अपन हाँथ बढ़ाय के कहलक, “देखा, मोर आयो आउर मोर भाई इमन हेकैं। काले कि जे केऊ मोर स्वरगीय आबा केर इच्छा केर मोताबिक चलेला, ओहे मोर भाई, बहिन आउर आयो हेके।” ओहे दिन यीशु घर से निकइल के झील केर किनारे जाय के उपदेस देवेक लगिन बाइठ गेलक। आउर उकर ठिना एइसन भीड़ जमा होलक कि उके डोंगा में बइठेक पड़लक, आउर समूचा भीड़ केर आदमीमन यीशु बटे मुँहराय के झील किनारे में ठड़ाल रहलैं। आउर यीशु उमन के उदाहरन देई के ढेइर गोइठमन के बताते कहलक, “सुना, एगो किसान बिहीन बुनेक लगिन निकललक। बुनेक बेरा थोरेक बिहीन डहर केर किनारे गिरलक आउर चरईमन आय के उके खाय देलैं। आउर थोरेक बिहीन रुगड़ी भूंई उपरे गिरलक, हूवाँ माटी ढेइर कम रहे, सेले जल्दी ओंकइर आलक। मगर जब बेइर उगलक तो उकर गरमी से उ मुरझाय गेलक आउर जाइर नी धारेक केर चलते सूइख गेलक। आउर थोरेक बिहीन काँटा झूँड़ में गिरलक आउर काँटा झूँड़ बाइढ़ के उके दबाय देलक। मगर थोरेक बिहीन उपजाऊ भूंई उपरे गिरलक आउर फारलक, केऊ सौ गुणा, केऊ साठ गुणा, केऊ तीस गुणा। जे केऊ मोर इ गोइठ के धेयान से सुनाथा, उमन से मोंय कहाथों, इकर बारे में समझेक केर कोशिश करा।” जब यीशु अपन उपदेस देवेक सिरालक तब उकर थोरेक चेलामन उकर ठिना आय के उकर से पूछलैं, “तोंय आदमीमन के उदाहरन से काले बताइसला?” यीशु जबाब देलक, “तोहरेमन के तो स्वरग राइज केर भेदमन के जानेक केर समझ देवल जाय हे, मगर उ आदमीमन के निहीं। काले कि जेके समझेक केर इच्छा अहे, उके परमेश्‍वर आउर समझ देई आउर उकर ठिना ढेइर समझ होई जाई। मगर जे समझेक केर इच्छा नी रखेला कि मोंय का सिखावना, तो उकर ठिना जे समझ अहे, उखो परमेश्‍वर उकर से लेई लेवी। मोंय उमन के उदाहरन में इ लगिन बतावना कि देइख के हों उमन के कोनों नी सुझेला आउर सुइन के हों अनसुना काइर देवैना आउर इकर अर्थ के नी बुझैना। उमन केर बारे में यशायाह परमेश्‍वर केर संदेश के बताएक वाला केर कहल गोइठ पूरा होवेला, ‘तोहरेमन कान से तो सुनबा, मगर नी बुझबा आउर आँइख से तो देखबा, मगर तोहरेमन के कोनों नी सूझी।’ काले कि इ आदमीमन केर मन थेथर होई जाय हे, आउर इमन अपन कान के बहिरा काइर देई हैं, आउर अपन आँइख के मूइंद लेई हैं, कहीं एइसन ना होवोक कि इमन देइख के आउर सुइन के अपन मन में समइझ जबैं, आउर मोर बटे घूइर आबैं आउर मोंय उमन के ठीक काइर देमूँ। मगर धाइन अहे तोहर आँइख जे देखेला आउर तोहर कान जे सुनेला। काले कि मोंय तोहर से सच कहाथों, जे गोइठमन के तोहरेमन देखाथा आउर सुनाथा, उ गोइठमन के ढेइर परमेश्‍वर केर संदेश के बताएक वालामन आउर परमेश्‍वर केर आदमीमन देखेक आउर सुनेक चाहलैं, मगर उमन देखेक आउर सुनेक नी पारलैं। अब तोहरेमन बिहीन बुनेक वाला केर उदाहरन केर अर्थ के सुना। जे केऊ परमेश्‍वर केर राइज केर बचन के सुइन के नी बुझेला, उ आदमी डहर किनारे केर भूंई नियर अहे, उके जे कोनों बचन बताल जाय रहे, शैतान आय के उकर मन से बचन के निकलाय देवेला आउर उ बुझेक नी पारेला। आउर जे आदमी बचन सुइन के तुरते रिझे-रिझे अपनाय लेवेला, उ आदमी रुगड़ी भूंई नियर अहे। मगर उ बचन के अपन मन में भीतरे तक बसेक नी देवेला, उ थोरेक दिन लगिन रहेला। आउर जब बचन केर चलते उकर उपरे बिपइत या ससइत आवेला, तो उ तुरते परमेश्‍वर केर बचन उपरे बिसवास करेक छोइड़ देवेला। एहे लेखे काँटा झूँड़ से भरल भूंई उ आदमी नियर अहे जेकर उपरे बिहीन गिरलक, उ बचन के सुनेला मगर दुनिया केर चिंता-फिकिर, आउर धन केर मोह-माया उकर मन में भाइर जायला आउर बचन के दबाय देवेला आउर बेगर फार केर जिंदगी जियेला। एहे लेखे उपजाऊ भूंई नियर उ आदमी अहे, जेकर उपरे बिहीन गिरलक, उ बचन के सुइन के बुझेला आउर अपन जिंदगी में बढ़ियाँ फार लानेला, जे लेखे बेस बिहीन फार लानेला, केऊ सौ गुणा, केऊ साठ गुणा, आउर केऊ तीस गुणा।” यीशु उमन के एगो आउर उदाहरन बतालक: “स्वरग राइज उ किसान जइसन अहे, जे अपन खेत में बेस बिहीन बुनलक। मगर जब आदमीमन राइत के निंदात रहैं, तो उकर दुश्मन आय के बेस बिहीन केर माझे जंगली बिहीन के बुइन के चाइल गेलक। जब बेस बिहीन ओंकरलक आउर बाइढ़ के बाइल लगलक, तो जंगली घास हों उकर संगे दिसलक। इके देइख के खेत मालिक केर धांगरमन आय के उकर से कहलैं, ‘हे मालिक, तोंय तो अपन खेत में बेस बिहीन बुइन रहिस। फिन जंगली घास कहाँ से आलक?’ मालिक उमन से कहलक, ‘इ केऊ दुश्मन केर काम हेके।’ धांगरमन उकर से कहलैं, ‘का तोंय चाहिसला कि हमरे जंगली घास के उखराय देब?’ उ कहलक, ‘ना उखरावा, जंगली घास के उखराएक बेरा तोहरेमन कहीं गोहोम के हों ना उखराय देबा। कटनी तक दुयो के संगे बढ़ेक देवा, आउर कटनी केर बेरा मोंय कटइयामन के कहमूँ, पहिले जंगली घास केर बुदा के काइट के पोड़ाएक लगिन उकर गठरी बाइंध लेवा आउर उकर पाछे गोहोम के मोर कोठा में जमा करा।’ ” यीशु उमन के आउर एगो उदाहरन बतालक, “स्वरग राइज राई केर एगो माँजी नियर अहे, जेके केऊ आदमी लेई के अपन खेत में बुइन देलक। राई केर बिहीन तो सोउब से छोट होवेला, मगर जब बुनल जायला तो उ ओंकइर के सोउब बुदामन में से बड़का होई जायला। आउर एइसन गाँछ बाइन जायला कि आकाश केर चरईमन उकर डाइरमन में खोंता बनाय के रहैना।” यीशु उमन के आउर एगो उदाहरन बतालक, “स्वरग केर राइज खमीर जइसन अहे, जेके एगो जनाना लेई के उके बीस किलो आटा में मिलाय के गुइंध देलक। आउर थोरेक देरी में सोउब गूंधल आटा फूइल के खमीर बाइन गेलक।” यीशु उदाहरन से इ सोउब गोइठमन के आदमीमन के बतालक, आउर बेगर उदाहरन केर उ कोनोवें नी बतात रहे। जेकर से परमेश्‍वर केर संदेश के बताएक वाला केर कहल इ गोइठ पूरा होवोक, “मोंय उदाहरन बताएक लगिन अपन मुँह खोलमूँ, मोंय उ गोइठमन के जे दुनिया केर शुरु से लुकल अहे, दिस्तार करमूँ।” तब यीशु भीड़ के छोइड़ के घर में आलक, आउर उकर चेलामन उकर ठिना आय के पूछलैं, “खेत केर जंगली बिहीन केर उदाहरन हमरे के समझाय दे।” यीशु उमन के जबाब देलक, “बेस बिहीन बुनेक वाला किसान मोंय आदमी केर बेटा हेकों। खेत दुनिया हेके, बेस बिहीन परमेश्‍वर केर राइज केर आदमीमन हेकैं। आउर जंगली बिहीन शैतान केर आदमीमन हेकैं। जे दुश्मन जंगली बिहीन बुनलक उ शैतान हेके, कटनी दुनिया केर अंत हेके, आउर काटेक वालामन परमेश्‍वर केर दूतमन हेकैं। जइसन जंगली माँजी केर बुदा के ठुराय के पोड़ाल जायला तइसनेहें दुनिया केर अंत में होवी। मोंय आदमी केर बेटा अपन स्वरगदूतमन के भेजमूँ आउर उमन मोर राइज केर आदमीमन में से जेमन पाप करैना आउर उमन के जे दोसरमन के पाप करुवायना ठुराबैं। आउर स्वरगदूतमन उमन के आइग केर धधकते गढ़हा में साजबैं, हूवाँ सोउब दिन काँदेक आउर दाँत केटरेक होवी। उ बेरा धरमी आदमीमन अपन आबा केर राइज में बेइर नियर चमकबैं। जे केऊ मोर इ गोइठ के धेयान से सुनाथा, उमन से मोंय कहाथों कि इकर बारे में समझेक केर कोशिश करा। स्वरग केर राइज खेत में लुकल किमती खजाना जइसन अहे, जेके केऊ आदमी पाय के उके फिन से लुकाय देलक, ताकि उ केखो ना मिलोक, उ आदमी खुशी से जाय के अपन सोउब कुछ के बेइच के उ खेत के कीन लेलक। फिन स्वरग केर राइज एगो बेपारी नियर अहे, जे बेस मोतीमन केर खोज में रहे। जब उके किमती मोती मिललक, तो उ जाय के अपन सोउब कुछ बेइच देलक आउर उके कीन लेलक।” फिन यीशु कहलक, “स्वरग केर राइज मछरी बझाएक वाला जाल नियर अहे, जेके समुदर में फेकल गेलक आउर सोउब रकम केर मछरीमन बाइझ गेलैं। आउर जब जाल भाइर गेलक, तो मछुवामन उके किनारे बटे खींच के लानलैं, आउर बाइठ के बेस-बेस के तो बासनमन में ठुरालैं आउर बेकार मछरीमन के फेइक देलैं। दुनिया केर अंत में एइसनेहें होवी, परमेश्‍वर केर दूतमन आय के पापी आदमीमन के धरमी आदमीमन से जुदा करबैं। आउर उमन के आइग केर धधकते गढ़हा में साजबैं, हूवाँ सोउब दिन काँदेक आउर दाँत केटरेक होवी।” यीशु अपन चेलामन से पूछलक, “का तोहरेमन इ सोउब गोइठमन के बुझला?” उमन उके जबाब देलैं, “हाँ।” यीशु उमन से कहलक, “से लगिन मूसा केर नियम के सिखाएक वाला हरेक आदमी जे स्वरग राइज केर शिक्षा पाय हे, उ आदमी एगो एइसन घर मालिक जइसन अहे, जे अपन भंडार से नवाँ आउर पुरना चीजमन के निकलायला।” जब यीशु इ सोउब उदाहरन के कइह सिरालक, तो हूवाँ से चाइल गेलक। आउर अपन नगर नासरत में आय के हूवाँ केर यहूदी मनक प्रार्थना घर में उपदेस देवेक लगलक। आदमीमन उकर उपदेस सुइन के ताजुब होई के कहेक लगलैं, “इके इ गेयान आउर चमत्कार केर काम करेक केर शक्ति कहाँ से मिललक?” आउर उमन इ कइह के उकर अपमान करलैं, इ तो सिरिफ एगो बढ़ाई आउर मरियम केर बेटा हेके आउर इ तो याकूब, यूसुफ, सिमोन आउर यहूदा केर बाड़ भाई हेके, आउर इकर सोउब छोट बहिनमन हों तो हमर माझे रहैना, फिन इके इ सोउब गेयान कहाँ से मिललक? इ लेखे उमन यीशु के स्वीकार नी करलैं, मगर यीशु उमन से कहलक, “परमेश्‍वर केर संदेश के बताएक वाला अपन नगर आउर अपन घर के छोइड़ के सोउब जगा आदर पावेला।” आउर यीशु हूवाँ उ मनक अबिसवास केर चलते ढेइर चमत्कार केर काम नी करलक। उ समय इसराइल देस केर एक चौथाई भाग गलील परदेस केर राजा हेरोदेस यीशु केर चमत्कार काममन केर बारे में सुनलक। तो उ अपन राजदरबार केर अधिकारीमन से कहलक, “इ यूहन्ना बपतिस्मा जल संस्कार देवेक वाला हेके, उ मोरलमन में से जी उइठ हे, से लगिन उकर से चमत्कार केर काम होवाथे।” राजा हेरोदेस अपन भाई फिलिप्पुस केर जनाना हेरोदियास केर चलते, यूहन्ना बपतिस्मा जल संस्कार देवेक वाला के धरुवालक आउर उके हँथकड़ी लगुवाय के जेहेल घर में भितरुवाय देई रहे। काले कि यूहन्ना उकर से कइह रहे, “तोर भाई एखन जीते अहे, से लगिन तोके मूसा केर नियम केर मोताबिक अपन भाई केर जनाना के रखेक उचित नखे।” एहे खातिर राजा हेरोदेस यूहन्ना के माइर मोराएक चाहत रहे, मगर आदमीमन से डरात रहे, काले कि उमन उके परमेश्‍वर केर संदेश के बताएक वाला मानत रहैं। जब राजा हेरोदेस केर जनम दिन आलक, तो उ अपन जनम दिन में एगो भोज रखलक, इ मोका में हेरोदियास केर बेटी नाइच के राजा हेरोदेस के खुश करलक। से लगिन राजा हेरोदेस किरिया खाय के कहलक, “जे कोनों तोंय माँगबे, मोंय तोके देमूँ।” उकर आयो हेरोदियास आगे हें अपन बेटी के सिखाय देई रहे। से लगिन उ कहलक, “यूहन्ना बपतिस्मा जल संस्कार देवेक वाला केर मूँड़ थरिया में मोर लगिन हिंयाँ मंगुवाय दे।” इ सुइन के राजा उदास होई गेलक, मगर अपन किरिया खावल आउर संगे बइठल गोतियामन केर चलते चाइह के हों मना करेक नी पारलक, आउर देई देवेक केर आगया देलक। आउर राजा जेहेल घर में आदमीमन के भेइज के यूहन्ना केर मूँड़ के कटुवाय देलक। आउर उकर मूँड़ के थरिया में लाइन के बेटी हर के देवल गेलक आउर उ उके अपन आयो ठिना लेई के देई देलक। जब यूहन्ना केर चेलामन इ घटना के सुनलैं, तो उमन आय के उकर लाश के लेई के गाइड़ देलैं आउर यीशु के इ घटना केर खबर देलैं। यीशु जब इ खबर के सुनलक, तो हूवाँ से डोंगा उपरे चाइढ़ के सुनसान ठाँव में चाइल गेलक। जब आदमीमन के पता चललक तो उमन नगर-नगर से निकइल के पैदल हें उकर पिछे चाइल गेलैं। डोंगा से उतइर के यीशु एगो बड़का भीड़ के देखलक आउर उ आदमीमन उपरे सोगालक आउर उमन केर माझे जेमन बेमरिया रहैं उमन के ठीक करलक। जब साँझ होलक, तो यीशु केर चेलामन उकर ठिना आय के कहलैं, “इ सुनसान ठाँव हेके आउर देरी होवाथे, से लगिन अब तोंय इ आदमीमन के बिदा काइर दे ताकि उमन बस्तीमन में जाय के अपन लगिन कोनों खाएक ले कीन लेबैं।” यीशु उमन से कहलक, “उ मनक जाएक जरुरी नखे! तोहरेमन हें इमन के खाएक लगिन देवा।” उमन उकर से कहलैं, “हिंयाँ हमर ठिना पाँच गो रोटी आउर दूई गो मछरी के छोइड़ आउर कोनों नखे।” यीशु कहलक, “उ सोउब के हिंयाँ मोर ठिना लेई आना।” तब उ आदमीमन के घास उपरे बइठेक कहलक, आउर पाँच गो रोटी आउर दूई गो मछरी के लेलक आउर स्वरग बटे देइख के परमेश्‍वर के धन्यबाद देलक आउर रोटीमन के टुकइर-टुकइर के चेलामन के देलक, आउर चेलामन आदमीमन के पोरसाय देलैं। आउर जब सोउब आदमीमन खाय के अघाय गेलैं, तब चेलामन बचल रोटीमन के जेके यीशु टुकइर रहे, बारह डाली भाइर के उठालैं। हूवाँ खाएक वाला जनानामन आउर छउवामन के छोइड़ के पाँच हजार मरदानामन रहैं। इकर पाछे यीशु तुरते अपन चेलामन के जोर देई के कहलक कि उमन अपन डोंगा में चाइढ़ जाओक आउर उकर से आगे गलील झील केर उ पाखी चाइल जाओक, तब तक उ रूइक के आदमीमन के बिदा करी। यीशु आदमीमन के बिदा काइर के प्रार्थना करेक लगिन अलगे पहार उपरे चाइढ़ गेलक आउर साँझ के उ हूवाँ एकले रहे। आउर उ बेरा डोंगा गलील झील केर माझे पानी केर लहरा से डगमगात रहे, काले कि धुका आगे बटले आवत रहे। आउर यीशु बिहान के अंधारे अंधार झील उपरे हिंठते उमन ठिना आलक। चेलामन उके झील में पानी उपरे हिंठते देइख के घबराय गेलैं, आउर कहेक लगलैं, “इ भूत हेके,” आउर डरे जोर से चिल्लाएक लगलैं। यीशु तुरते उमन से कहलक, “ढाढ़स बाँधा! मोंय हेकों, ना डरावा।” पतरस उके जबाब देलक, “हे प्रभु, अगर तोंय हें हेकिस, तो मोके पानी उपरे हींठ के अपन ठिना आवेक केर आगया दे।” उ कहलक, “आय जा!” तब पतरस डोंगा से उतइर के पानी उपरे हिंठते-हिंठते यीशु बटे जाएक लगलक। मगर उ धुका आउर लहरा के देइख के डराय गेलक, आउर जब डुबेक लगलक तो चिल्लाय के कहलक, “हे प्रभु, मोके बचाव।” यीशु तुरते हाँथ लम्बाय के उके धारलक, आउर उकर से कहलक, “हे थोर बिसवासी! तोंय काले शंका करले?” जब उमन डोंगा उपरे चाइढ़ गेलैं, तो धुका रूइक गेलक। इ देइख के जे चेलामन डोंगा उपरे रहैं, ठेहुना टेइक के उकर भक्ति काइर के कहलैं, “सचमुच तोंय परमेश्‍वर केर बेटा हेकिस।” जब यीशु आउर उकर चेलामन गलील झील के पार काइर के गनेसरत शहर में पोहोंचलैं। तब हूवाँ केर आदमीमन उके चिन्हलैं आउर आसे-पासे केर गोटा इलाका में कइह भेजलैं कि यीशु आय हे, आउर आदमीमन सोउब बेमरियामन के उकर ठिना लानलैं। आउर यीशु से बिनती करेक लगलैं कि उ बेमरिया आदमीमन के अपन लुगा केर आँचरा के हें छुवेक देवोक, आउर जेतना बेमरिया आदमीमन उकर लुगा के छुलैं, उमन सोउब ठीक होई गेलैं। तब यरुशलेम शहर से थोरेक फरीसी दल केर आदमीमन आउर मूसा केर नियम के सिखाएक वालामन यीशु ठिना आय के उकर से पूछेक लगलैं, “तोर चेलामन पुरखा मनक नेग-दस्तूर के काले नी मानैना आउर बेगर हाँथ धोले रोटी खायना?” यीशु उमन के जबाब देलक, “तोहरेमन हों अपन नेग-दस्तूर के बनाय रखेक लगिन काले परमेश्‍वर केर आगया के अनदेखा काइर देवाला? काले कि परमेश्‍वर कइह हे, ‘अपन आबा आउर अपन आयो केर आदर करबा, आउर जे केऊ अपन आबा चाहे आयो के बुरा कही, उके मौत केर सजा देवल जाओक।’ मगर तोहरेमन इ मानाला कि अगर केऊ अपन आबा चाहे आयो से कही, ‘अब मोंय तोर कोनों मदइत करेक नी पारमूँ काले कि जे कोनों मोंय तोके देवेक वाला रहों उके परमेश्‍वर केर लगिन चढ़ाय देलों।’ तो उके अपन आयो-आबा केर आदर करेक केर जरुरत नखे, इ लेखे तोहरेमन अपन पुरखा मनक बनाल नेग-दस्तूर के मानेक लगिन परमेश्‍वर केर बचन के टाइल देवाला। हे ढोंगीमन, यशायाह परमेश्‍वर केर संदेश के बताएक वाला तोहर बारे में इ ठीक हें कइह हे, ‘इमन मोर बारे में अपन मुँह से तो ढेइर बेस-बेस गोठियायना, मगर सचमुच में मोर से प्रेम नी करैना। आउर बेकार में मोर भक्ति करैना, काले कि इमन आदमी मनक बनाल नियम के एइसन सिखायना जइसन कि इ परमेश्‍वर केर आगया हेके।’ ” आउर यीशु आदमीमन के अपन ठिना बोलाय के उमन से कहलक, “तोहरेमन सोउब मोर गोइठ के सुना, आउर बुझा। जे मुँह में जायला, उ आदमी के अशुद्ध नी करेला, मगर जे मुँह से निकलेला, ओहे आदमी के अशुद्ध करेला।” तब चेलामन आय के उकर से कहलैं, “का तोंय जानिसला कि तोर इ कहल गोइठ से फरीसी दल केर आदमीमन के बुरा लगलक?” यीशु जबाब देलक, “उ फरीसी आदमीमन एइसन बुदामन नियर अहैं, जेमन के मोर स्वरगीय आबा नी रोइप हे, उ सोउबमन के आबा परमेश्‍वर उखराय देवी। उमन के जाएक देवा, उमन अंधरामन के डहर देखाएक वाला अंधरामन हेकैं आउर अंधरा, अगर अंधरा के डहर देखाई, तो दुयो गढ़हा में गिर जबैं।” इ सुइन के, पतरस उकर से कहलक, “इ उदाहरन केर मतलब हमरे के बताय दे।” यीशु उमन से कहलक, “का तोहरेमन हों एखन तक अनबुझ अहा? का तोहरेमन नी जानाला जे कोनों हमरे मुँह से खाइला उ पेट में जायला आउर दिसा बटले निकइल जायला? मगर जे बुरा गोइठ आदमी केर मुँह से निकलेला, उ आदमी केर मन से निकलेला, आउर ओहे आदमी के अशुद्ध करेला। काले कि बुरा बिचार, हत्या, दोसर जनाना केर संग संबंध बनाएक, ब्यभिचार, चोरी, झूठा गवाही आउर निंदा आदमी केर मन से हें निकलेला। एहेमन हेके जे आदमीमन के अशुद्ध करेला, मगर बेगर हाँथ धोले खाएक आदमी के अशुद्ध नी करेला।” इकर पाछे यीशु आउर उकर चेलामन गलील परदेस से निकइल के, सूर आउर सैदा नगर बटे चाइल गेलैं। आउर उ शहर से एगो कनानी जाइत केर जनाना निकललक, आउर चिल्लाय के कहेक लगलक, “हे प्रभु! राजा दाऊद केर संतान, मोर उपरे दया कर! मोर बेटी के भूत धाइर हे आउर ढेइर सताथे।” मगर यीशु उके कोनों जबाब नी देलक, उकर चेलामन उकर ठिना आय के उकर से बिनती करलैं, “इके बिदा कर, काले कि उ हमर पिछे चिल्लाते आवाथे।” यीशु उमन के जबाब देलक, “मोंय सिरिफ इसराइली घराना केर हेराल आदमीमन ठिना भेजल जाय हों।” मगर एतने में उ जनाना यीशु ठिना आलक आउर उके प्रणाम काइर के कहलक, “हे प्रभु मोर मदइत कर।” यीशु जबाब देलक, “छउवा मनक लगिन पोरसल रोटी के लेई के कुकूरमन केर आगे फेइक देवेक बेस ना लगे।” उ जनाना कहलक, “सच कहले प्रभु, मगर कुकूरमन हों तो मालिक मनक टेबुल से गिरल जूठा-कठा के खायना।” उकर गोइठ सुइन के यीशु उके जबाब देलक, “हे जनाना, तोर बिसवास बाड़ अहे। जइसन तोंय चाहिसला, तोर लगिन उइसनेहें होवोक।” आउर उकर बेटी ओहे बेरा ठीक होई गेलक। यीशु हूवाँ से गलील झील केर भीरे आलक, आउर एगो पहार केर ढलाउन में जाय के बाइठ गेलक। आउर भीड़ केर भीड़ आदमीमन उकर ठिना आलैं आउर उमन अपन संगे लंगड़ामन, अंधरामन, कोकामन, ठुठामन आउर ढेइर आउरो बेमरियामन के लेई के आलैं, आउर यीशु केर गोड़ तरे राइख देलैं, आउर यीशु उमन के ठीक करलक। जब आदमीमन देखलैं कि कोकामन बतियाथैं, ठुठामन ठीक होवाथैं, लंगड़ामन हिंठाथैं आउर अंधरामन देखेक लगाथैं, तो ताजुब होलैं आउर उमन इसराइल केर परमेश्‍वर केर बड़ाई करलैं। यीशु अपन चेलामन के बोलाय के कहलक, “मोके इ भीड़ केर आदमीमन उपरे दया आवाथे, काले कि उमन तीन दिन से लगातार मोर संगे अहैं आउर उमन ठिना कोनों खाएक ले नखे आउर मोंय उमन के भूखे बिदा करेक नी चाहोना, अगर मोंय इमन के भूखे घर भेइज देमूँ तो डहर में थाइक के बेहोस होई जबैं।” चेलामन यीशु के जबाब देलैं, “हमरे के इ सुनसान ठाँव में कहाँ से एतना रोटी मिली कि हमरे एतना बड़का भीड़ केर आदमीमन के खियाब?” यीशु चेलामन से पूछलक, “तोहर ठिना काय गो रोटी अहे?” उमन जबाब देलैं, “सात गो रोटी आउर थोरेक छोटका मछरीमन हों।” तब यीशु सोउब आदमीमन के भूंई उपरे बइठेक ले आगया देलक। आउर यीशु सातों रोटीमन आउर मछरीमन के लेई के परमेश्‍वर के धन्यबाद देलक आउर टुकइर के अपन चेलामन के देते गेलक आउर चेलामन आदमीमन के देते गेलैं। आउर सोउब आदमीमन खाय के अघाय गेलैं, आउर इकर पाछे चेलामन यीशु केर टुकराल बचल रोटीमन के सात डाली भाइर के उठालैं। हूवाँ खाएक वाला जनाना आउर छउवामन के छोइड़ के चाइर हजार मरदानामन रहैं। तब यीशु भीड़ केर आदमीमन के बिदा काइर के डोंगा उपरे चाइढ़ गेलक, आउर मगदान परदेस केर सिमान में चाइल आलक। हूवाँ फरीसी दल केर आदमीमन आउर सदूकी दल केर आदमीमन यीशु ठिना आलैं आउर उमन उके परखेक लगिन कि इ अधिकार उके परमेश्‍वर बटले मिल हे कि निहीं, उकर से कहलैं, “हमरे के स्वरग केर कोनों चिन्हा देखाव।” यीशु उमन के जबाब देलक, “साँझ के तोहरेमन जब आकाश के लाल देखाला तो तोहरेमन कहाला कि मौसम बेस रही। आउर बिहान के जब आकाश के लाल आउर धुंधरा देखाला तो कहाला कि आइज आँधी आवी। तोहरेमन आकाश केर लक्षण देइख के भेद बताएक पाराला, मगर समय केर चिन्हामन के देइख के भेद बताएक नी पाराला। इ जुग केर बुरा आउर ब्यभिचारी आदमीमन चिन्हा देखेक खोजैना मगर योना परमेश्‍वर केर संदेश के बताएक वाला केर चिन्हा के छोइड़ आउर कोनों चिन्हा उमन के नी देवल जाई।” आउर यीशु उमन के छोइड़ के चाइल गेलक। जब यीशु आउर उकर चेलामन गलील झील केर दोसर पाखी पोहोंचलैं, तब चेलामन के पता होलक कि उमन अपन संगे रोटी लानेक भुलाय जाय हैं। से लगिन जब यीशु उमन से कहलक, “देखा, फरीसी दल आउर सदूकी दल केर आदमीमन केर खमीर से सावधान रहबा।” तो उमन आपस में बिचार काइर के कहेक लगलैं, “हमरे रोटी नी लाइन ही, से लगिन यीशु एइसन कहाथे।” यीशु उ मनक बिचार के जाइन के कहलक, “हे थोर बिसवास करेक वाला आदमीमन, तोहरेमन आपस में काले बिचार कराथा कि हमरे ठिना रोटी नखे? का तोहरेमन एखन तक हों मोर बारे में नी बुइझ हा? का तोहरेमन के पाँच हजार आदमीमन आउर पाँच गो रोटी केर याइद नखे, आउर का एहो याइद नखे कि तोहरेमन खँड़ाल टुकरामन के, जे बाइच जाय रहे, उके काय डाली उठाय रहा? आउर का एहो याइद नखे कि चाइर हजार आदमीमन के सात गो रोटी से खियाय रहों, हूवाँ तोहरेमन बचल टुकरामन के काय डाली उठाय रहा? तोहरेमन इके काले नी बुइझ हा? मोंय तोहर से रोटी केर बारे में नी कहाथों, मोंय फरीसी दल आउर सदूकी दल केर आदमीमन केर खमीर से सावधान रहेक कहाथों।” तब उमन बुइझ गेलैं कि यीशु रोटी केर खमीर के निहीं मगर फरीसी दल आउर सदूकी दल केर आदमीमन केर झूठा शिक्षा से सावधान रहेक ले कइह रहे। जब यीशु आउर उकर चेलामन कैसरिया फिलिप्पी शहर केर भीरे पोहोंचलैं, तो यीशु अपन चेलामन से पूछलक, “मोंय आदमी केर बेटा के आदमीमन का कहैना?” उमन जबाब देलैं, “थोरेक आदमीमन तो यूहन्ना बपतिस्मा जल संस्कार देवेक वाला कहैना आउर थोरेक आदमीमन एलिय्याह आउर थोरेक आदमीमन यिर्मयाह परमेश्‍वर केर संदेश के बताएक वाला या परमेश्‍वर केर संदेश बताएक वालामन में से एगो हेके कहैना।” यीशु उमन से कहलक, “मगर तोहरेमन मोके का कहाला?” सिमोन पतरस जबाब देलक, “तोंय जिंदा परमेश्‍वर केर बेटा मसीह हेकिस।” यीशु उके जबाब देलक, “हे सिमोन योना केर बेटा, तोंय धाइन हेकिस, काले कि इ गोइठ केऊ आदमी बटले नी आय हे, मगर मोर आबा जे स्वरग में अहे, इ गोइठ के तोर उपरे दिस्तार काइर हे। आउर मोंय हों तोर से कहाथों कि तोर नाँव पतरस हेके, जेकर मतलब हेके चट्टाइन आउर मोंय इ चट्टाइन उपरे अपन कलीसिया बनामूँ आउर मरणलोक केर शक्ति इ कलीसिया के हराएक नी पारी। मोंय तोके स्वरग राइज केर चाभीमन के जिम्मा देमूँ। जे कोनों धरती में तोर बटले जमा करल जाई, उ स्वरग में हों जमा होवी आउर जे कोनों तोर बटले धरती में खुली, उ स्वरग में हों खोलल जाई।” तब यीशु चेलामन के चेताय के कहलक, “केकरो से ना कहबा! कि मोंय मसीह हेकों।” इ बेरा से यीशु अपन चेलामन के बताएक शुरु करलक, “मोके यरुशलेम शहर जाएक आउर हूवाँ धरम केर अगुवामन, यहूदी मुध पुरोहितमन आउर मूसा केर नियम के सिखाएक वालामन केर हाँथ से दुःख उठाएक आउर माइर मोराल जाएक, आउर तीसरा दिन फिन जी उठेक जरुरी अहे।” इ गोइठ सुइन के पतरस उके अलगे लेई जाय के झिड़ाइक के कहलक, “हे प्रभु, परमेश्‍वर ना करोक, तोर उपरे एइसन कहियो नी होवी।” यीशु पिछे मुँहराय के पतरस से कहलक, “हे शैतान! मोर आगे से दूर होई जा: तोंय मोके आबा परमेश्‍वर केर इच्छा के पूरा करेक से रोकाथिस, काले कि तोंय परमेश्‍वर केर नियर निहीं मगर आदमीमन नियर सोचिसला।” तब यीशु अपन चेलामन से कहलक, “जे केऊ मोर चेला बनेक चाहैना, उमन अपन दुनियादारी केर मोह माया के छोइड़ देवोक आउर मोर लगिन क्रूस उठाएक आउर मोइर जाएक ले हों तेयार रहोक। आउर मोर पिछे होई लेवोक। काले कि जे केऊ अपन जीउ के बचाएक चाही, उ जुग-जुग केर जिंदगी के गवाँय देवी, मगर जे केऊ मोर लगिन अपन जीउ के गवाँय देवी, उ जुग-जुग केर जिंदगी के पावी। अगर एगो आदमी दुनिया केर सोउब कुछ पाय लेई, मगर परमेश्‍वर केर संगे जुग-जुग लगिन जिंदगी बिताएक केर मोका के गवाँय देवी तो उके का फायदा होवी? का उ परमेश्‍वर के रुपया देई के अपन जुग-जुग केर जिंदगी के किनेक पारी? निहीं। मोंय आदमी केर बेटा अपन स्वरगदूतमन केर संगे अपन आबा केर तेज चमक में आमूँ, आउर उ बेरा मोंय हरेक झन के उकर काममन केर मोताबिक इनाम देमूँ। मोंय तोहर से सच कहाथों, तोहर में से थोरेक आदमीमन जे हिंयाँ ठड़ाल अहैं, एइसन अहैं कि जब तक मोंय आदमी केर बेटा के अपन राइज में शासन करते नी देइख लेबैं तब तक नी मोरबैं।” छाव दिन केर पाछे यीशु अपन चेला पतरस, याकूब आउर याकूब केर छोट भाई यूहन्ना के अपन संगे एगो सुनसान ऊँचा पहार उपरे लेई गेलक। हूवाँ उ मनक आगे यीशु केर रूप बदइल गेलक आउर उकर मुँह बेइर लेखे चमकेक लगलक आउर उकर लुगा इंजोत लेखे चरका होई गेलक। आउर अचका उमन परमेश्‍वर केर संदेश के देवेक वाला मूसा आउर एलिय्याह के उकर संगे गोठियाते देखलैं। से लगिन पतरस यीशु से कहलक, “हे प्रभु, हमर लगिन हिंयाँ रहेक कतइ बेस हेके। अगर तोंय चाहबे होले हिंयाँ तीन गो झोपड़ी बनामूँ, एगो तोर लगिन, एगो मूसा लगिन आउर एगो एलिय्याह केर लगिन।” उ कहते हें रहे कि एगो चमकीला बदरी उमन के ढाँइप देलक, आउर उ बदरी में से इ शबद सुनालक, “इ मोर दुलार बेटा हेके, जेकर से मोंय खुश अहों, इकर गोइठ के सुना।” चेलामन इ गोइठ सुइन के हुमकुरिया गिर गेलैं आउर ढेइर डराय गेलैं। यीशु भीरे आय के उमन के छुई के कहलक, “उठा, ना डरावा।” तब उमन अपन नजइर उठाय के देखलैं तो हूवाँ यीशु के छोइड़ के आउर केखो नी देखलैं। पहार से उतरेक बेरा यीशु उमन के इ आगया देलक, “जब तक मोंय आदमी केर बेटा मोरलमन में से नी जी उठमूँ, तब तक जे कोनों तोहरेमन देइख हा उके केखो ना बताबा।” तब चेलामन उकर से पूछलैं, “फिन मूसा केर नियम के सिखाएक वालामन काले कहैना कि मसीह केर आवेक से आगे एलिय्याह केर आवेक जरुरी अहे?” यीशु जबाब देलक, “इ गोइठ सच अहे कि परमेश्‍वर मसीह केर आवेक से पहिले एलिय्याह के भेजेक केर करार काइर रहे, ताकि उ आदमी मनक मन के तेयार करी। मगर मोंय तोहर से कहाथों कि एलिय्याह आय चुकलक आउर आदमीमन उके नी चिन्हलैं आउर जइसन चाहलैं तइसनेहें उकर संगे ढेइर बुरा बरताव करलैं। एहे लेखे से मोंय आदमी केर बेटा हों उ मनक हाँथ से दुःख उठामूँ।” तब चेलामन बुझलैं कि उ हमर से यूहन्ना बपतिस्मा जल संस्कार देवेक वाला केर बारे में कहाथे। जब यीशु आउर उकर तीनों चेलामन भीड़ ठिना पोहोंचलैं, तो एगो आदमी उकर ठिना आलक, आउर उकर आगे ठेहुना टेइक के कहलक, “हे प्रभु, मोर बेटा केर उपरे दया कर, उ मिरगी गिरेला, आउर ढेइर दुःख उठायला, उ कखनों आइग में, तो कखनों पानी में घरी-घरी गिर जायला। मोंय तोर चेलामन ठिना उके लाइन रहों, मगर उमन ठीक करेक नी पारलैं।” यीशु जबाब देलक, “हे अबिसवासी आउर ढींठ आदमीमन, मोंय कतइ दिन तक तोहरेमन केर संगे रहमूँ? आउर कतइ दिन तक तोहरेमन के सहमूँ? उ छोंड़ा के मोर ठिना लाना।” तब यीशु भूत के डाँटलक, आउर भूत उकर में से निकइल गेलक, आउर छोंड़ा ओहे बेरा ठीक होई गेलक। पाछे चेलामन अलगे यीशु ठिना आय के पूछलैं, “हमरे उ भूत के काले निकलाएक नी पारली।” यीशु उमन से कहलक, “तोहर में बिसवास केर घटी अहे, से लगिन निकलाएक नी पारला। मोंय तोहरे से सच कहाथों, अगर तोहरे केर बिसवास राई केर माँजी बराबइर हों होवी, तो इ पहार से कहबा कि हिंयाँ से सरइक के हूवाँ चाइल जा, तो उ चाइल जाई आउर तोहरेमन लगिन सोउब कुछ पूरा होवी।” मगर एइसन भूत बेगर प्रार्थना आउर उपास केर नी निकलेला । जब यीशु आउर उकर चेलामन गलील परदेस में रहैं, तो यीशु उमन से कहलक, “मोंय आदमी केर बेटा आदमी मनक हाँथ में धरुवाल जामूँ। आउर उमन मोके माइर मोराबैं, आउर मोंय तीसरा दिन जी उठमूँ।” इ गोइठ सुइन के उकर चेलामन ढेइर उदास होलैं। जब उमन कफरनहूम नगर में पोहोंचलैं, तो यहूदी मनक मंदिर केर मालगुजारी लेवेक वालामन पतरस ठिना आय के पूछलैं, “का तोहर गुरु यहूदी मनक मंदिर केर मालगुजारी नी देवेला?” पतरस कहलक, “देवेला।” जब उ घर में आलक, तो यीशु उकर पूछेक से पहिले उकर से कहलक, “हे सिमोन तोंय का सोचिसला? दुनिया केर राजा महसूल या मालगुजारी केमन से लेवेला? देस केर आदमीमन से या परदेस केर आदमीमन से?” पतरस उकर से कहलक, “परदेस केर आदमीमन से।” यीशु उकर से कहलक, “तब तो देस केर आदमीमन के मालगुजारी देवेक नखे। मगर उमन खिसाय ना जाओक, से लगिन तोंय झील किनारे जाय के बंसी फेक, जे मछरी आगे बाझी, उकर मुँह खोलबे, उकर में एगो चाँदी केर सिक्का मिली, उके लेई के मोर आउर अपन लगिन मालगुजारी उमन के देई देबे।” थोरेक देरी केर पाछे चेलामन यीशु ठिना आय के उकर से पूछलैं, “स्वरग राइज में सोउब से बाड़ केहर हेके?” तब यीशु एगो छउवा के अपन भीरे बोलाय के चेला मनक माझे ठड़ुवालक। आउर कहलक, “मोंय तोहरे से सच कहाथों, अगर तोहरेमन पाप करेक नी छोड़बा आउर छउवामन नियर नरम नी बनबा, तो स्वरग राइज जाएक नी पारबा। जे केऊ खुद के इ छउवा नियर नरम बनाई, उ स्वरग राइज में बाड़ होवी। आउर जे केऊ मोर नाँव से एगो एइसन छउवा केर स्वागत करेला। उ मोर स्वागत करेला। अगर केऊ छउवा जइसन आदमी जे मोर उपरे बिसवास करेला आउर केऊ दोसर आदमी उके इ बिसवास करेक से भटकायला, उकर लगिन भला होतक कि उकर घेंचा में एगो बड़का पखना केर जाँता बाँधल जातक आउर उके डुबेक लगिन समुदर में फेइक देवल जातक। दुनिया में बिसवास से भटकाएक वाला आदमीमन जरूर हें होबैं, मगर हाय! उ मनक उपरे जेमन मोर उपरे बिसवास करेक वालामन के भटकायना। अगर तोर हाँथ चाहे तोर गोड़ तोके पाप करुवायला, तो उके काइट के फेइक दे, ठुठा या लंगड़ा होई के हों स्वरग में जाएक तोर लगिन ठीक अहे, मगर दुयो हाँथ चाहे दुयो गोड़ रहते जुग-जुग बारेक वाला आइग में साजल जाएक ठीक नखे। आउर अगर तोर आँइख तोके पाप करुवायला, तो उके निकलाय के फेइक दे। काना होई के हों स्वरग में जाएक तोर लगिन ठीक अहे, मगर दुयो आँइख केर रहते नरक में साजल जाएक ठीक नखे। देखा, तोहरेमन इ छोटमन में से केखो तुच्छ ना मानबा, काले कि मोंय तोहर से कहाथों, स्वरग में उ मनक दूतमन मोर स्वरगीय आबा केर भीरे सोउब बेरा रहैना। काले कि मोंय आदमी केर बेटा हेराल आदमीमन के बचाएक लगिन आय हों। तोहर का बिचार अहे? अगर केऊ आदमी केर सौ गो भेड़ीमन अहैं, आउर उमन में से एगो हेराय जाई, तो का उ निनानबे के पहार किनारे अपन संगी चरवाहामन ठिना छोइड़ के उ हेराल भेड़ी के खोजेक नी जाई? आउर अगर जाय के उके पाय लेवी, तो मोंय तोहरेमन से सच कहाथों कि उ, निनानबे भेड़ीमन लगिन जे नी हेराय रहैं, एतना खुशी नी मनाई, जेतना कि इ हेराल भेड़ी लगिन मनाई। एइसनेहें तोहर आबा जे स्वरग में अहे, उ चाहेला कि इ छोटमन में से एको गो नाश ना होवोक। अगर तोर बिसवासी भाई तोर बिरोध में गुन्हा करेला, तो जाय के उके एकले में उकर गुन्हा के बताव आउर समझाव, अगर उ तोर गोइठ के माइन जाई आउर गुन्हा करेक छोइड़ देई, तो तोंय अपन भाई के पाय लेले। आउर अगर उ तोर गोइठ के नी मानी, तो आउर एक दूई झन आदमीमन के अपन संगे लेई जा कि उकर गुन्हा साबित होई जाओक। काले कि मूसा केर नियम केर मोताबिक कोनों गुन्हा के दूई चाहे उकर से बगरा गवाहमन केर सामने साबित होवेक चाही। अगर उ ओहो मनक गोइठ के नी मानी, तो कलीसिया के बताय दे, अगर उ कलीसिया केर गोइठ के हों नी मानी, तो तोंय उकर संगे ओहे लेखे ब्यवहार कर जइसन अबिसवासी आउर मालगुजारी लेवेक वालामन संगे करिसला। मोंय तोहरेमन से सच कहाथों कि जे कोनों धरती में तोहर बटले जमा करल जाई, उ स्वरग में हों जमा होवी आउर जे कोनों तोहर बटले धरती में खुली, उ स्वरग में हों खोलल जाई। फिन मोंय तोहर से कहाथों, अगर तोहर में से दूई झन आदमीमन एक मन होई के दुनिया में कोनोवें माँगबैं, तो मोर आबा जे स्वरग में अहे, उमन के जरूर हें देई। काले कि उ कहेला, जहाँ दूई चाहे तीन झन आदमीमन मोर नाँव से जमा होवैना, हूवाँ मोंय उ मनक माझे में रहोना।” तब पतरस भीरे आय के यीशु से पूछलक, “हे प्रभु, अगर मोर भाई मोर बिरोध में गुन्हा करते रही, तो मोंय उके काय बेर क्षमा करमूँ, का सात बेर तक?” यीशु उकर से कहलक, “मोंय तोर से इ नी कहाथों कि सात बेर उके क्षमा करबे, मगर सात बेर केर सत्तर गुणा तक उके क्षमा काइर देबे। एहे लेखे परमेश्‍वर केर राइज इ कहानी नियर अहे: एगो राजा अपन धांगरमन से हिसाब-किताब लेवेक केर बिचार करलक। जब उ हिसाब लेवेक लगलक, तो एगो धांगर के जे दस हजार सोना केर सिक्का धारत रहे, उकर ठिना लानल गेलक। मगर करजा चुकाएक लगिन उकर ठिना कोनोवें नी रहे, से लगिन राजा आगया देलक कि इके, इकर जनाना के, इकर छउवा-पुतामन के आउर जे कोनोवें इकर ठिना अहे, सोउब के बेइच के इकर करजा के भाइर देवल जाओक। इ सुइन के उ धांगर राजा केर गोड़ तरे ठेहुनाय के अरजी करेक लगलक, ‘हे मालिक, धीरज धर, मोंय सोउब कुछ चुकाय देमूँ।’ तब राजा सोगाय के उके छोइड़ देलक, आउर उकर पूरा करजा के माफ काइर देलक। मगर उ धांगर जेकर करजा के राजा माफ काइर रहे बाहरे निकललक तो उकर संगी धांगरमन में से एक झन उके मिललक। जे उकर एक सौ चाँदी केर सिक्का धारत रहे, उ उके धाइर लेलक आउर उकर घेंचा चीप के कहलक, ‘जे कोनों तोंय धारिसला उके भाइर दे।’ इ सुइन के उकर संगी धांगर उकर गोड़ तरे ठेहुनाय के उकर से बिनती करेक लगलक कि ‘धीरज धर, मोंय सोउब करजा चुकाय देमूँ।’ मगर उ नी मानलक, आउर जाय के उके तब तक लगिन जेहेल घर में साइज देलक, जब तक कि उ पूरा करजा नी चुकाय देई। इ सोउब देइख के उकर दोसर संगी धांगरमन ढेइर उदास होलैं, आउर जाय के अपन राजा के सोउब गोइठ के बताय देलैं। तब राजा उ धांगर के जेकर करजा के माफ काइर रहे, बोलाय के कहलक, ‘हे दुष्ट धांगर, जब तोंय मोर से अरजी करले, तो मोंय तोर सोउब करजा के माफ काइर देलों। जे लेखे मोंय तोर उपरे दया काइर के तोर करजा माफ काइर रहों, सेहे लेखे तोके हों अपन संगी धांगर उपरे दया काइर के माफ करेक रहे।’ आउर राजा खिसाय के उके तब तक लगिन जेहेल में भितरुवाय देलक, जब तक कि उ सोउब करजा के चुकाय नी देई। एहे लेखे अगर तोहर में से केऊ अपन भाई के मन से क्षमा नी करी, तो मोर आबा जे स्वरग में अहे, ओहो तोहरेमन के क्षमा नी करी।” जब यीशु इ गोइठमन के कइह सिरालक, तब उ गलील परदेस से चाइल गेलक, आउर यरदन नदी केर दोसर पाखी यहूदिया परदेस में आलक। आउर आदमी मनक बड़का भीड़ उकर पिछे होई गेलक आउर यीशु हूवाँ उमन केर बेमारी के ठीक करलक। हूवाँ थोरेक फरीसी दल केर आदमीमन उके परखेक लगिन उकर ठिना आलैं आउर पूछेक लगलैं, “का मूसा केर नियम केर मोताबिक इ उचित अहे कि मरदाना कोनोवें कारण से अपन जनाना के छोइड़ देवोक?” उ जबाब देलक, “का तोहरेमन पवितर किताब में नी पइढ़ हा कि परमेश्‍वर दुनिया केर शुरु से उमन के नर आउर नारी बनालक आउर परमेश्‍वर कहलक, ‘इ लगिन मरदाना अपन आयो-आबा से जुदा होई के अपन जनाना केर संगे रही आउर उमन दुयो एक तन होबैं?’ से लगिन उमन दूई गो आदमी नियर निहीं मगर एगो आदमी नियर रहबैं। एहे लगिन जब परमेश्‍वर उ दुयो के जोइड़ हे, तो केऊ आदमी उमन के जुदा करेक केर कोशिश ना करोक।” इ सुइन के फरीसी आदमीमन यीशु से पूछलैं, “फिन मूसा काले इ आगया देई हे कि लिखित पत्र देई के केऊ अपन जनाना के छोइड़ देवोक?” यीशु उमन से कहलक, “काले कि तोहरेमन कठोर होई के परमेश्‍वर केर आगया के नी मानाला, से लगिन तोहरेमन के मूसा अपन-अपन जनाना के छोइड़ देवेक केर आगया देलक, मगर शुरु से एइसन नी रहे। आउर मोंय तोहरेमन से कहाथों, जे आदमी ब्यभिचार के छोइड़ आउर कोनों कारण से अपन जनाना के छोइड़ के दोसर से बिहा करेला तो उ ब्यभिचार करेला, आउर जे केऊ आदमी उ छोड़ल जनाना से बिहा करेला, तो उ आदमी हों ब्यभिचार करेला।” चेलामन उकर से कहलैं, “अगर मरदाना केर जनाना संगे एइसन संबंध अहे, तो बिहा नी करेक हें बेस हेके।” यीशु उमन से कहलक, “सोउब आदमी इ बचन के अपनाएक नी पारैना, ओहेमन भइर पारैना जेमन के परमेश्‍वर बटले इकर बराकइत देवल जाय हे। काले कि थोरेक आदमीमन आयो केर कोख से हें नपुंसक जनइम हैं आउर थोरेक आदमीमन के आदमीमन नपुंसक बनालैं। आउर थोरेक आदमीमन स्वरग राइज लगिन खुद के नपुंसक बनाय हैं, जे इ बचन के बुझेक पारेला, उ बुइझ लेवोक।” उ बेरा आदमीमन छउवामन के यीशु ठिना इ सोइच के लानलैं कि यीशु उ मनक उपरे हाँथ राइख के प्रार्थना करोक, मगर चेलामन उमन के डाँटलैं। यीशु कहलक, “छउवामन के मोर ठिना आवेक देवा, उमन के मना ना करा। काले कि जे आदमीमन इ छउवामन नियर बिसवास लायक आउर नरम अहैं, ओहेमन परमेश्‍वर केर राइज में रहबैं।” आउर यीशु छउवामन उपरे हाँथ राइख के आशीर्वाद देलक, आउर हूवाँ से चाइल गेलक। हूवाँ से जाएक बेरा एगो आदमी यीशु ठिना आलक आउर उकर से पूछलक, “हे गुरु, जुग-जुग केर जिंदगी पावेक लगिन मोंय कोन सा बेस काम करमूँ?” यीशु उकर से कहलक, “तोंय मोर से बेस काम केर बारे में काले पुछिसला? बेस तो एके झन अहे आउर उ परमेश्‍वर हेके, अगर तोंय जुग-जुग केर जिंदगी के पावेक चाहिसला तो उकर आगयामन के मानते रहबे।” उ यीशु से पूछलक, “कोन सा आगयामन?” यीशु कहलक, “केखो हत्या नी करेक, ब्यभिचार नी करेक, चोरी नी करेक, झूठा गवाही नी देवेक, अपन आयो-आबा केर आदर करेक, आउर अपन पड़ोसी से अपन नियर प्रेम करेक।” उ जवान यीशु से कहलक, “मोंय तो इ सोउब के मानते आवाथों, अब मोर में का घटी अहे?” यीशु उकर से कहलक, “अगर तोंय सिद्ध होवेक चाहिसला, तो जा, अपन ठिना जे कुछ अहे, सोउब के बेइच के गरीबमन के देई देबे, तब तोके स्वरग में धन मिली। इकर पाछे मोर चेला बाइन जा।” मगर उ जवान इ गोइठ सुइन के उदास होई के चाइल गेलक, काले कि उ ढेइर धनी रहे। तब यीशु अपन चेलामन के कहलक, “मोंय तोहरे से सच कहाथों कि धनी आदमी के स्वरग राइज में ढूकेक कठिन अहे। मोंय फिन तोहरे से कहाथों, जे लेखे ऊँट के सूई केर टोका में ढूइक के निकलेक कठिन अहे, उकर से हों बगरा धनवान आदमी के परमेश्‍वर केर राइज में ढूकेक कठिन अहे।” इ गोइठ सुइन के चेलामन ढेइर ताजुब होई के कहलैं, “तो फिन केहर बचेक पारी?” यीशु उमन बटे देइख के कहलक, “आदमीमन से तो इ नी होवेक पराई, मगर परमेश्‍वर से सोउब कुछ होवेक परायला।” इ गोइठ सुइन के पतरस यीशु से कहलक, “देख, हमरे तो सोउब कुछ छोइड़ के तोर पिछे होई लेई ही आउर तोर चेला बाइन जाय ही: हमरे के का भेटाई?” यीशु उमन से कहलक, “मोंय तोहर से सच कहाथों कि नवाँ जुग में जब मोंय आदमी केर बेटा अपन महिमा केर सिंहासन में बइठमूँ, तो तोहरेमन जे मोर पिछे होई लेई हा, बारह गो सिंहासन में बाइठ के इसराइल केर बारहों गोतरमन केर न्याय करबा। आउर जे केऊ अपन घर, भाईमन, बहिनमन, आबामन, आयोमन, छउवामन या खेतमन के मोर चेला बनेक लगिन छोइड़ देई हे, उके सौ गुणा भेटाई: आउर उ जुग-जुग केर जिंदगी केर हकदार होवी। मगर इ बेरा दुनिया में ढेइर आदमीमन जेमन खुद के बड़का बुझैना, उमन परमेश्‍वर केर नजइर में छोट होई जबैं। आउर जेमन इ बेरा दुनिया में छोट समझल जायना, उमन परमेश्‍वर केर नजइर में बड़का होई जबैं।” यीशु आगे कहलक, “स्वरग केर राइज उ खेत मालिक नियर अहे, जे अपन अंगूर केर बारी में काम करेक लगिन कमियामन के बोलाएक बाड़ बिहाने घर से निकललक। उ कमियामन संगे दिन भइर केर मजूरी एगो चाँदी केर सिक्का ठहराय के उमन के कमाएक लगिन अंगूर केर बारी में भेजलक। लगभग नौ बजे उ बाहरे निकललक तो चौकमन में थोरेक आउर कमियामन के बेकार ठड़ाल देइख के उमन से कहलक, ‘तोहरेमन हों मोर अंगूर केर बारी में जावा आउर काम करा, जे उचित मजूरी बनी, मोंय तोहरेमन के देमूँ।’ उमन कमाएक लगिन चाइल गेलैं। फिन उ लगभग बारह बजे आउर तीन बजे हों बाहरे निकइल के एइसनेहें करलक। साँझ के लगभग पाँच बजे हों फिन उ निकइल के आउरो कमियामन के ठड़ाल पालक, आउर उमन से कहलक, ‘तोहरेमन काले हिंयाँ दिन भइर बेकार ठड़ाल रहला?’ उमन उकर से कहलैं, ‘इ लगिन कि हमरे के केऊ हों काम नी देलैं।’ मालिक उमन से कहलक, ‘तोहरेमन हों मोर अंगूर केर बारी में जावा आउर काम करा।’ साँझ के अंगूर केर बारी केर मालिक अपन मुनसी से कहलक, ‘कमियामन के बोलाव आउर पाछे आवल कमियामन से लेई के आगे आवल कमियामन तक, सोउब के मजूरी देई दे।’ उमन आलैं, जेमन साँझ के लगभग घंटा भइर कमाय रहैं, उमन के हों दिन भइर केर मजूरी एक-एक गो चाँदी केर सिक्का देलक। जेमन सोउब से आगे आय रहैं, उमन इ सोचलैं कि हमरे के बगरा मजूरी मिली, मगर ओहोमन के एक-एक गो चाँदी केर सिक्का हें देलक। जब उमन के मजूरी मिललक तो उमन मालिक केर उपरे कुड़कुड़ाय के कहेक लगलैं, ‘इ पाछे आवलमन तो एके घंटा काम करलैं, मगर तोंय उमन के हमर बराबइर मजूरी देले, जबकि हमरे दिन भइर खटली आउर राउद सहली?’ मालिक उमन में से एगो के जबाब देलक, ‘हे संगी, मोंय तोर से कोनों बैमानी नी काइर हों, का हमरे दिन भइर केर मजूरी एगो चाँदी केर सिक्का नी ठहराय रही? जे मजूरी तोर हेके, उठाय के अपन घर चाइल जा, मोर इच्छा अहे कि जेतना मजूरी तोके देलों, ओतनेहें पाछे आवलमन के हों देमूँ। इ उचित अहे कि मोंय अपन सम्पति के जइसन चाहमूँ तइसनेहें खरचा करमूँ। का तोंय मोर दयालु होवेक केर चलते मोर से हिसिंगा करिसला?’ एहे लेखे से जे आदमीमन इ बेरा दुनिया में छोट बुझल जायना, उमन परमेश्‍वर केर नजइर में बड़का होई जबैं आउर जे आदमीमन खुद के दुनिया में बड़का बुझैना, उमन परमेश्‍वर केर नजइर में छोट होई जबैं।” जब यीशु यरुशलेम शहर जात रहे, तब अपन खास चेलामन के अलगे लेई गेलक, आउर डहर में उमन के बताएक लगलक, “देखा, हमरे यरुशलेम शहर जाथी, मोंय आदमी केर बेटा यहूदी मुध पुरोहितमन आउर मूसा केर नियम के सिखाएक वालामन केर हाँथे धरुवाल जामूँ, आउर उमन मोके माइर मोराएक केर लायक ठहराबैं, आउर परजाइतमन केर हाँथे जिम्मा देबैं ताकि उमन मोर मजाक उड़ाबैं, मोके कोड़रा मारबैं, आउर क्रूस उपरे चढ़ाबैं मगर मोंय तीसरा दिन फिन जी उठमूँ।” सेहे बेरा जबदी केर जनाना हूवाँ आय के अपन दुयो बेटा के यीशु केर भीरे लेगलक आउर ठेहुनाय के उके प्रणाम काइर के उकर से कोनों माँगेक लगलक। यीशु उकर से पूछलक, “तोंय का चाहिसला?” उ यीशु के जबाब देलक, “इ कइह दे कि मोर इ दुयो बेटा तोर राइज में एगो तोर भतखाइया बटे आउर एगो लेंगा बटे बइठोक।” यीशु उकर बेटामन से कहलक, “तोहरेमन नी जानाला कि का माँगाथा? जे दुःख मोंय सहेक ले जाथों, का तोहरेमन उके सहेक पारबा?” उमन यीशु के जबाब देलैं “हाँ हमरे सहेक पारब।” यीशु उमन से कहलक, “ठीक अहे जे दुःख मोंय सहेक ले जाथों, उके तोहरेमन सहबा, मगर अपन भतखाइया बटे आउर लेंगा बटे केखो बइठाएक केर अधिकार मोके नखे, आबा जेमन के चुइन हे, ओहेमन लगिन उ ठाँव के तेयार काइर हे।” इ सुइन के दसो चेलामन उ दुयो भाई केर उपरे खिसाय गेलैं। तब यीशु सोउब चेलामन के अपन ठिना बोलालक आउर उमन से कहलक, “तोहरेमन जानाला कि इ दुनिया में जे आदमीमन राजा समझल जायना, उमन अपन अधिकार के अपन से हेंठे केर आदमीमन के दबाएक लगिन काम में लानैना। उ मनक अगुवामन जबरजस्ती अपन गोइठ के आदमीमन के मनुवायना। मगर तोहरेमन के उमन नियर नी होवेक चाही, जे केऊ तोहरेमन में से बाड़ बनेक चाहेला, उ तोहरेमन केर सेवक बनोक। आउर जे तोहरेमन में से मालिक बनेक चाहेला, उ तोहर धांगर बनोक। काले कि मोंय आदमी केर बेटा इकर लगिन नी आय हों कि मोर एगो महान राजा लेखे सेवा-सुसइर कराल जाई। मगर इकर लगिन आय हों कि मोंय खुद दोसर मनक सेवा-सुसइर करमूँ आउर ढेइर मनक पापमन से छुटकारा लगिन अपन जान देई देमूँ।” जब यीशु आउर उकर चेलामन यरीहो शहर से निकलत रहैं, तो एगो बड़का भीड़ यीशु केर पिछे होई गेलक। आउर दूई गो अंधरा आदमीमन सड़क केर किनारे बइठल रहैं, जब उमन इ सुनलैं कि यीशु जाथे तो हकाय के कहेक लगलैं, “हे प्रभु, राजा दाऊद केर संतान, हमर उपरे दया कर।” आदमीमन चुप रहेक लगिन उमन के डाँटलैं, मगर उमन आउर हें जोर से चिल्लाय के कहेक लगलैं, “हे प्रभु, राजा दाऊद केर संतान, हमर उपरे दया कर।” तब यीशु ठड़ालक आउर उ अंधरा आदमीमन के बोलाय के कहलक, “तोहरेमन का चाहाला कि मोंय तोहर लगिन करमूँ?” उमन यीशु के जबाब देलैं, “हे प्रभु, हमरे चाहिला कि हमरे देखेक पारब।” यीशु उ मनक उपरे सोगालक आउर उ मनक आँइख के छुलक। आउर उमन तुरते देखेक लगलैं, आउर उकर पिछे होई गेलैं। जब यीशु आउर उकर चेलामन यरुशलेम शहर केर भीरे पोहोंचलैं, तो उमन बैतफगे गाँव ठिना आलैं, इ गाँव जैतून पहार केर भीरे रहे, यीशु अपन दूई गो चेलामन के इ कइह के अपन से आगे भेजलक, “अपन आगे केर गाँव में जावा, हूवाँ पोहोंचते हें एगो गधी केर छउवा आउर उकर माय तोहरेमन के बाँधल मिली। उ दुयो के खोइल के मोर ठिना लेई आनबा।” अगर केऊ तोहरेमन से कोनों कही, तो उके कहबा कि यीशु हमर प्रभु के इकर दरकार अहे, तब उ आदमी तुरते गधी आउर उकर छउवा के देई देवी। इ इकर लगिन होलक कि जे बचन परमेश्‍वर केर संदेश के बताएक वाला केर बटले कहल जाय रहे, उ पूरा होवोक: “यरुशलेम शहर केर रहेक वाला आदमीमन से कह, ‘देखा, तोहर राजा तोहर ठिना आवाथे। उ नरम अहे, उ गधा उपरे बइठल अहे, एतना तक कि गधी केर छउवा उपरे।’ ” चेलामन जाय के जइसन यीशु उमन से कइह रहे, तइसनेहें करलैं। आउर उमन गधी केर छउवा आउर उकर माय के लेई आनलैं आउर गधी छउवा केर गतर उपरे गमछा के डिसाय देलैं, आउर यीशु उकर गतर में बाइठ गेलक। जइसनेहें यीशु यरुशलेम बटे जाएक लगलक तो ढेइर आदमीमन उके एगो राजा नियर माइन देवेक लगिन उकर आगे सड़क केर उपरे अपन-अपन गमछामन के डिसाय देलैं। आउरोमन गाँछमन केर हरियार डाइर काइट के सड़क केर उपरे डिसाय देलैं। यीशु केर आगे-आगे आउर उकर पिछे-पिछे जेतना आदमीमन जात रहैं, सोउब जोर-जोर से इ नारा लगात रहैं, “राजा दाऊद केर संतान केर स्तुति होवोक, धाइन अहे उ जे प्रभु केर नाँव से आवेला, स्वरग में स्तुति होवोक।” जब यीशु यरुशलेम शहर में ढूकलक, तो गोटा शहर में हलचल मइच गेलक आउर शहर केर आदमीमन पूछेक लगलैं, “इ केहर हेके?” भीड़ केर आदमीमन जबाब देलैं, “इ परमेश्‍वर केर संदेश के बताएक वाला गलील परदेस केर नासरत नगर केर यीशु हेके।” इकर पाछे यीशु परमेश्‍वर केर मंदिर में गेलक आउर हूवाँ जेमन बलिदान चढ़ाएक वाला जानवरमन केर किना-बेचा करत रहैं, सोउब के बाहरे निकलाय देलक। आउर पइसा बदलेक वाला आउर बलिदान चढ़ाएक वाला पेरवाँ बेचाइया मनक चौकीमन के उलटाय देलक। आउर यीशु उमन से कहलक, “पवितर किताब में लिखल अहे, ‘मोर घर प्रार्थना केर घर कहाई’, मगर तोहरेमन इके डाकू मनक अड्डा बनाथा।” आउर मंदिर में अंधरामन आउर लंगड़ामन यीशु ठिना आलैं, आउर यीशु उमन के ठीक करलक। मगर जब यहूदी मुध पुरोहितमन आउर मूसा केर नियम के सिखाएक वालामन यीशु केर इ ताजुब काममन के आउर छउवामन के मंदिर में “राजा दाऊद केर संतान केर स्तुति होवोक,” कहते देखलैं, तो खिसाय गेलैं। उमन यीशु से कहलैं, “का तोंय सुनाथिस कि इमन का कहाथैं?” यीशु उमन के जबाब देलक, “हाँ, सुनाथों, का तोहरेमन पवितर किताब में इ कहियो नी पढ़ला कि ‘छउवामन आउर दूध पिया छउवामन केर मुँह से तोंय अपन जय जयकार करुवाले?’ ” तब यीशु उमन के छोइड़ के नगर केर बाहरे बैतनिय्याह गाँव गेलक, आउर हूवाँ राइत बितालक। दोसर दिन बिहाने यरुशलेम शहर बटे घुरेक बेरा यीशु के भूख लगलक। यीशु सड़क केर किनारे अंजीर केर एगो गाँछ देइख के उकर भीरे गेलक, मगर पतइमन के छोइड़ उकर में आउर कोनोवें नी पालक, से लगिन यीशु उ गाँछ से कहलक, “अब से फिन तोर में कहियो फार ना फरोक।” आउर ओहे बेरा अंजीर केर गाँछ सूइख गेलक। इ देइख के चेलामन ताजुब होई गेलैं आउर पूछलैं, “इ अंजीर केर गाँछ कइसन तुरते सूइख गेलक?” यीशु उमन के जबाब देलक, “मोंय तोहरे से सच कहाथों, अगर तोहरेमन बिसवास करबा, आउर शंका नी करबा, तो ना सिरिफ इ करबा, जे इ अंजीर केर गाँछ से करल जाय हे, मगर इ पहार से हों कहबा कि उखइर के समुदर में जाय गिर, तो तोहर लगिन ओहे होई जाई। आउर जे कोनों तोहरेमन बिसवास काइर के प्रार्थना में माँगबा, तो परमेश्‍वर उ सोउब के देई।” जब यीशु यहूदी मनक मंदिर में पोंहइच के आदमीमन के उपदेस देवत रहे, तब यहूदी मुध पुरोहितमन आउर धरम केर अगुवामन उकर ठिना आय के पूछलैं, “तोंय इ काम कोन अधिकार से करिसला? आउर तोके इ अधिकार केहर देई हे?” यीशु उमन के जबाब देलक, “मोंय हों तोहरेमन से एगो गोइठ पूछाथों, अगर मोके बताबा, तो मोंय हों तोहरेमन के बतामूँ कि इ काम कोन अधिकार से करोना। यूहन्ना के बपतिस्मा जल संस्कार देवेक केर अधिकार केकर बटे से मिल रहे? परमेश्‍वर बटे से या आदमीमन बटे से?” तब उमन आपस में बिचार करेक लगलैं, “अगर हमरे कहब, ‘यूहन्ना के बपतिस्मा जल संस्कार देवेक केर अधिकार परमेश्‍वर बटे से मिल रहे,’ तो उ हमरे से कही, ‘तो फिन तोहरेमन काले यूहन्ना केर गवाही केर उपरे बिसवास नी करला?’ आउर अगर हमरे कहब, ‘यूहन्ना के इ अधिकार आदमीमन बटे से मिल रहे,’ तो आदमीमन हमर बिरोध में खड़ा होई जबैं, काले कि उमन यूहन्ना के परमेश्‍वर केर संदेश के बताएक वाला मानैना।” से लगिन उमन यीशु के जबाब देलैं, “हमरे नी जानिला कि यूहन्ना के बपतिस्मा जल संस्कार देवेक केर अधिकार केहर देई रहे।” यीशु उमन के जबाब देलक, “मोंय हों तोहरेमन के नी बतामूँ, इ काम कोन अधिकार से करोना।” तब यीशु कहलक, “तोहरेमन इ उदाहरन से का बुझाला? गोटेक आदमी केर दूई झन बेटा रहैं, उ बाड़ बेटा ठिना जाय के कहलक, ‘बेटा! जा, आइज तोंय अंगूर केर बारी में काम कर।’ उ अपन आबा के जबाब देलक, ‘मोंय नी जामूँ,’ मगर पाछे पसताय के अंगूर केर बारी में कमाएक लगिन चाइल गेलक। फिन उ आदमी अपन छोट बेटा ठिना हों जाय के एइसनेहें कहलक, छोट बेटा जबाब देलक, ‘ठीक अहे आबा! मोंय जाथों,’ मगर नी गेलक। इ दुयो झन में से केहर आबा केर इच्छा के पूरा करलक?” उमन कहलैं, “बाड़ बेटा” यीशु उमन से कहलक, “मोंय तोहरेमन से सच कहाथों कि मालगुजारी लेवाइयामन आउर बेश्यामन तोहर से आगे परमेश्‍वर केर राइज में ढूकबैं। काले कि यूहन्ना बपतिस्मा जल संस्कार देवेक वाला धरमी जिंदगी जियेक केर डहर बताएक लगिन तोहर ठिना आलक, आउर तोहरेमन उकर उपरे बिसवास नी करला, मगर मालगुजारी लेवाइयामन आउर बेश्यामन उकर उपरे बिसवास काइर के पाप करेक छोइड़ देलैं। तोहरेमन इ सोउब के देखला, फिन भी पाछे पसताप काइर के उकर उपरे बिसवास नी करला।” फिन यीशु कहलक एगो आउर उदाहरन सुना, “एगो घर मालिक रहे, जे खेत में अंगूर केर खेती करलक, उ उकर चाइरो बटे पखना केर घेरा लगालक आउर अंगूर केर रस के निकलाएक आउर जमा करेक लगिन गढ़हा कोड़लक आउर खेती केर देख-रेख करेक ले आदमी मनक रहेक लगिन मचान बनाय के उकर ठिका किसानमन के देई के परदेस चाइल गेलक। जब फार काटेक केर बेरा आलक, तो खेत केर मालिक अपन धांगरमन के अंगूर फार केर बाँटा लेई आनेक लगिन किसानमन ठिना भेजलक। मगर किसानमन उकर धांगरमन के धाइर के केखो पिटलैं, केखो माइर मोरालैं आउर केखो पखना से मारलैं। फिन खेत केर मालिक आगे से बगरा आउर धांगरमन के भेजलक, आउर किसानमन ओहोमन से एइसनेहें करलैं। आखरी में खेत केर मालिक अपन बेटा के उ मनक ठिना इ सोइच के भेजलक कि उमन मोर बेटा केर आदर करबैं। मगर किसानमन मालिक केर बेटा के देइख के आपस में कहलैं, ‘इ तो बपौती हकदार हेके, आवा, इके माइर मोराब आउर उकर बपौती सम्पति के लेई लेब।’ आउर उमन उके धारलैं आउर अंगूर केर बारी से बाहरे निकलाय के माइर मोरालैं। अब तोहरेमन केर का बिचार अहे कि जब अंगूर केर बारी केर मालिक आवी, तो उ किसानमन केर संगे का करी?” उमन यीशु के जबाब देलैं, “मालिक, उ दुष्ट आदमीमन के बुरा रीति से नाश करी आउर अंगूर केर बारी केर ठिका दोसर किसानमन के देवी, जेमन समय से उके फार केर बाँटा देबैं।” यीशु उमन से कहलक, “का तोहरेमन कहियो पवितर किताब में इ नी पढ़ला कि जे पखना के राज मिस्त्रीमन बेकार जाइन के फेइक देई रहैं, ओहे कोना केर नेव केर पखना बाइन गेलक? इ प्रभु केर काम हेके, आउर हमर नजइर में अदभुत अहे। से लगिन मोंय तोहरेमन से कहाथों कि परमेश्‍वर केर राइज तोहर से लेई लेवल जाई आउर उके एइसन जाइतमन के देवल जाई, जे उकर लगिन बेस काम करी। जे आदमी इ पखना उपरे गिरी, उ चकनाचूर होई जाई आउर जेकर उपरे इ पखना गिरी, उके पीस देवी।” इ उदाहरन के यहूदी मुध पुरोहितमन आउर फरीसी दल केर आदमीमन सुइन के बुइझ गेलैं कि उ हमरे केर बारे में कहाथे। आउर उमन उके धारेक चाहलैं, मगर आदमीमन से डराय गेलैं काले कि उमन यीशु के परमेश्‍वर केर संदेश के बताएक वाला मानत रहैं। यीशु उमन से फिन उदाहरन में कहेक लगलक। “स्वरग केर राइज एगो राजा नियर अहे, जे अपन बेटा केर बिहा भोज रखलक। राजा, बिहा केर भोज में नेवताल आदमीमन के बोलाएक लगिन अपन धांगरमन के भेजलक, मगर उमन आवेक नी चाहलैं। उ फिन आउर धांगरमन के इ कइह के भेजलक, ‘नेवताल आदमीमन से कहबा कि देखा, मोर पोसल जानवरमन भोज लगिन काटल जाहैं, आउर मोंय अपन भोज तेयार काइर लेई हों, सोउब कुछ तेयार अहे, बिहा केर भोज में आवा।’ मगर नेवताल आदमीमन अनदेखा काइर के केऊ अपन खेत में तो केऊ अपन बेपार करेक लगिन चाइल गेलैं। आउर जे आदमीमन बाइच रहैं, उमन राजा केर धांगरमन के धाइर के बेइज्जत करलैं आउर माइर मोरालैं। जब राजा इके सुनलक तो उ खिसाय गेलक आउर अपन फौज भेइज के उ हत्यारामन के नाश करलक, आउर उ मनक नगर के पोड़ाय देलक। तब राजा अपन धांगरमन से कहलक, ‘बिहा केर भोज तो तेयार अहे, मगर जेमन के नेवताल जाय रहे, उमन इकर लाएक नी होलैं। से लगिन तोहरेमन चौराहामन में जावा आउर जेतना आदमीमन भेटाबैं, सोउब के बिहा केर भोज में बोलाय लानबा।’ धांगरमन सड़कमन में गेलैं आउर जेतना आदमीमन भेटालैं, चाहे बुरा चाहे भला, सोउब के जमा काइर के लेई आनलैं आउर बिहा केर घर नेवताल आदमीमन से भाइर गेलक। जब राजा नेवताल आदमीमन के देखेक लगिन भीतरे आलक तो उकर नजइर एगो एइसन आदमी उपरे गेलक, जे बिहा में पिंधेक लगिन देवल लुगा के नी पिंध रहे। राजा उकर से पूछलक, ‘हे संगी, तोंय बिहा में पिंधेक लगिन देवल लुगा के बेगर पिंधले काले हिंयाँ आय गेले?’ उकर ठिना इकर कोनों जबाब नी रहे। तब राजा धांगरमन से कहलक, ‘इकर हाँथ-गोड़ बाइंध के बाहरे अंधार में फेइक देवा, हूवाँ काँदेक आउर दाँत केटरेक होवी।’ काले कि बोलालमन तो ढेइर अहैं, मगर चुनलमन थोर अहैं।” उ बेरा फरीसी दल केर आदमीमन हूवाँ से चाइल गेलैं आउर आपस में बिचार करलैं कि यीशु के का लेखे उकरेहें गोइठमन में फँसाब। से लगिन उमन अपन चेलामन के हेरोदेस राजा केर साथ देवेक वालामन केर संगे यीशु ठिना इ कइह के भेजलैं कि “हे गुरु, हमरे जानिला कि तोंय सोउब बेरा सच गोइठ के बताइसला आउर परमेश्‍वर केर डहर केर गोइठमन के सच्चाई से बताइसला। तोंय इ परवाह नी करिसला कि दोसरमन तोर गोइठ केर बारे में का सोचैना। तोंय सोउब केर संगे एके लेखे ब्यवहार करिसला। अब तोंय हमरे के इ बताव कि महाराजा के मालगुजारी देवेक मूसा केर नियम केर मोताबिक उचित अहे कि निहीं?” यीशु उ मनक दुष्ट बिचार के जाइन के कहलक, “हे ढोंगीमन, मोके काले गलत गोइठ कहुवाय के फँसाएक केर कोशिश कराथा? मालगुजारी केर सिक्का मोके देखावा।” तब उमन यीशु ठिना एगो चाँदी केर सिक्का लेई आनलैं। यीशु उमन से पूछलक, “मोके बतावा कि इ चाँदी केर सिक्का उपरे केकर फोटो आउर नाँव अहे?” उमन यीशु से कहलैं, “महाराजा केर।” तब यीशु उमन से कहलक, “जे महाराजा केर हेके, उके महाराजा के आउर जे परमेश्‍वर केर हेके, उके परमेश्‍वर के देवा।” इ गोइठ के सुइन के उमन ताजुब होई गेलैं आउर उके छोइड़ के चाइल गेलैं। ओहे दिन सदूकी दल केर आदमीमन जेमन मोरलमन केर जी उठेक के नी मानैना, यीशु ठिना आय के उकर से सवाल पूछलैं, “हे गुरु! मूसा कइह रहे कि अगर केऊ बेगर संतान केर मोइर जाई तो उकर भाई उकर बिधवा से बिहा काइर के उकर लगिन संतान जनमाओक। एहे लेखे हमर हिंयाँ एगो परिवार में सात भाई रहैं, पहिला भाई बिहा काइर के बेगर संतान केर मोइर गेलक आउर अपन जनाना के अपन भाई लगिन छोइड़ देलक। एहे लेखे दूसरा आउर तीसरा भाईमन हों करलैं आउर सातों भाईमन तक एहे लेखे होलक। सोउब केर पाछे उ जनाना हों मोइर गेलक। अब तोंय हमरे के इ बताव कि उ जनाना केर बिहा तो सातों भाईमन से होई रहे, से जी उठेक केर पाछे उ केकर जनाना होवी?” यीशु उमन के जबाब देलक, “तोहरेमन पवितर किताब के नी बुझाला, जे मोरेक केर पाछे आदमीमन के जिंदा रहेक केर बारे में बतायला। तोहरेमन एहो नी बुझाला कि परमेश्‍वर ठिना मोरल आदमीमन के फिन से जिंदा करेक केर शक्ति अहे, से लगिन तोहरेमन भूल में अहा। काले कि जब उमन मोरल में से जी उठबैं, तो उमन में सादी-बिहा नी होवी, मगर स्वरग में परमेश्‍वर केर दूतमन नियर रहबैं। मोरलमन केर जी उठेक केर बारे में का तोहरेमन इ बचन नी पढ़ला, जे परमेश्‍वर तोहरेमन से कहलक: ‘मोंय अब्राहम केर परमेश्‍वर, इसहाक केर परमेश्‍वर आउर याकूब केर परमेश्‍वर हेकों?’ उ मोरलमन केर निहीं, मगर जिंदा आदमीमन केर परमेश्‍वर हेके।” आदमीमन उकर उपदेस सुइन के ताजुब होलैं। फरीसी दल केर आदमीमन जब इ गोइठ के सुनलैं कि यीशु सदूकी दल केर आदमी मनक मुँह के बंद काइर देलक, तो उमन जमा होई गेलैं। आउर उमन में से एगो मूसा केर नियम के सिखाएक वाला यीशु के परखेक लगिन उकर से पूछलक, “हे गुरु, मूसा केर नियम में से सोउब से बाड़ आगया कोन हेके?” यीशु उके जबाब देलक, “तोंय परमेश्‍वर अपन प्रभु से अपन पूरा मन, अपन पूरा प्राण आउर अपन पूरा बुद्धि से प्रेम करबे। बाड़ आउर मुध आगया तो एहे हेके। आउर एहे लेखे इ दूसरा हों हेके कि तोंय अपन पड़ोसी से अपन नियर प्रेम करबे। एहे दूई गो आगया मूसा केर नियम आउर परमेश्‍वर केर संदेश के बताएक वाला मनक निचोड़ हेके।” हूवाँ जमा होवल फरीसी दल केर आदमीमन से यीशु एगो सवाल पूछलक, “मसीह केर बारे में तोहरेमन का सोचाला? उ केकर बंश हेके?” उमन यीशु के जबाब देलैं, “राजा दाऊद केर।” यीशु उमन से पूछलक, “तो राजा दाऊद आत्मा केर अगुवाई से उके प्रभु काले कहेला? दाऊद कहलक, ‘प्रभु, मोर प्रभु से कहलक, मोर भतखाइया बटे बाइठ, जब तक कि मोंय तोर बैरीमन के तोर गोड़ हेंठे नी काइर देमूँ।’ भला, जब पवितर किताब केर उ ठाँव में राजा दाऊद खुद हें मसीह के मोर प्रभु कहेला तो फिन उ सिरिफ राजा दाऊद केर बंश कइसन होवी? इकर मतलब अहे कि मसीह जरूर राजा दाऊद से ढेइर बाड़ होवी।” उकर जबाब में केऊ हों कोनों गोइठ कहेक नी पारलैं, मगर उ दिन से केखो फिन यीशु से कोनों पूछेक केर साहस नी होलक। तब यीशु भीड़ से आउर अपन चेलामन से कहलक, “मूसा केर नियम के सिखाएक वालामन आउर फरीसी दल केर आदमीमन के मूसा केर नियम के बखाइन करेक आउर दोसरमन के सिखाएक केर अधिकार अहे। से लगिन उमन तोहरेमन से जे कोनों कहबैं, उके करते आउर मानते रहबा, मगर उ मनक जइसन काम ना करबा, काले कि उमन सिखाएक तो सिखायना मगर खुद उकर लेखे नी चलैना। उमन धरम केर एइसन नियम बनायना, जेके आदमीमन के मानेक कठिन अहे, उमन दोसरमन के इ नियम के जबरजस्ती मनुवायना मगर खुद हें इ नियम के नी मानैना। उमन अपन सोउब काम आदमीमन के देखाएक लगिन करैना: उमन पवितर किताब केर बचन के चाकर पट्टीमन में लीख के अपन घेंचा आउर बाँइह में बाँधैना आउर अपन लुगामन केर झलइर के लम्बा बनायना। उमन के भोजमन में मुध-मुध ठाँव आउर यहूदी मनक प्रार्थना घर में मुध-मुध कुरसी, आउर बाजारमन में आदमी मनक मुँह से माइन केर संगे जोहार सुनेक आउर आदमीमन में गुरु कहाएक बेस लगेला। मगर तोहरेमन गुरु ना कहाबा, काले कि तोहर एके गो गुरु अहे: आउर तोहरेमन सोउब भाई-बहिन नियर अहा। आउर दुनिया में केखो अपन आबा ना कहबा, काले कि तोहर एके गो आबा अहे, जे स्वरग में अहे। आउर तोहरेमन मालिक हों ना कहाबा, काले कि तोहर एके गो मालिक अहे जे मसीह हेके। जे तोहर में से सोउब से बाड़ हेके, उ तोहर सेवक बनोक। जे केऊ खुद के बाड़ मानी, उके छोट मानल जाई आउर जे केऊ खुद के छोट मानी, उके बाड़ मानल जाई। हे ढोंगी मूसा केर नियम के सिखाएक वाला आउर फरीसी दल केर आदमीमन, तोहर उपरे हाय! तोहरेमन आदमीमन केर लगिन स्वरग राइज केर दुरा के बंद काइर देवाला, तोहरेमन खुद हें उकर में नी ढूकाला आउर जेमन ढूकेक खोजैना ओहोमन के ढूकेक नी देवाला। हे ढोंगी मूसा केर नियम के सिखाएक वाला आउर फरीसी आदमीमन, तोहर उपरे हाय! तोहरेमन बिधवा जनाना मनक घर के धोखा से लुइट लेवाला आउर खुद के धरमी देखाएक लगिन ढेइर देरी तक प्रार्थना करते रहाला, से लगिन तोहरेमन के बगरा सजा भेटाई। हे ढोंगी मूसा केर नियम के सिखाएक वाला आउर फरीसी दल केर आदमीमन, तोहर उपरे हाय! तोहरेमन एगो आदमी के अपन चेला बनाएक लगिन दूर-दूर तक जावाला, आउर जब उ तोहर सिखाल गोइठमन में बिसवास करेला, तो उके तोहरेमन अपन से हों दूई गुणा बगरा नरक केर सजा भोगेक केर लाएक बनाय देवाला। हे अंधरा अगुवामन, तोहरे उपरे हाय! तोहरेमन आदमीमन के सिखाला कि अगर केऊ यहूदी मनक मंदिर केर किरिया खाई तो इकर कोनों मोल नी होवी, मगर केऊ यहूदी मनक मंदिर केर सोना केर किरिया खाई तो उकर से उ बंधाय जाई हे मूरख आउर अंधरा आदमीमन, कोन बाड़ हेके, सोना या यहूदी मनक मंदिर, जेकर से सोना पवितर होवेला? तोहरेमन एहो सिखाला कि अगर केऊ बेदी केर किरिया खाई तो इकर कोनों मोल नी होवी, मगर केऊ बेदी उपरे चढ़ाल भेंट केर किरिया खाई तो उ उकर से बंधाय जाई। हे अंधरामन, कोन बाड़ हेके, भेंट केर चीज या बेदी: जेकर से भेंट केर चीज पवितर होवेला? से लगिन जे बेदी केर किरिया खायला, उ बेदी आउर उकर उपरे रखल चीजमन केर हों किरिया खायला। आउर जे यहूदी मनक मंदिर केर किरिया खायला, उ उकर आउर उकर में रहेक वाला परमेश्‍वर केर हों किरिया खायला। आउर जे स्वरग केर किरिया खायला, उ परमेश्‍वर केर सिंहासन केर आउर उकर उपरे बइठेक वाला केर हों किरिया खायला। हे ढोंगी मूसा केर नियम के सिखाएक वाला आउर फरीसी दल केर आदमीमन, तोहर उपरे हाय! तोहरेमन फुदना, सोंप आउर जीरा केर दसवाँ हिस्सा तो देवाला, मगर तोहरेमन मूसा केर नियम केर मुध गोइठमन के: न्याय, दया, आउर बिसवास के छोइड़ देई हा, तोहर लगिन एहे ठीक रहे कि इमन के हों करते रहता, आउर दसवाँ हिस्सा के हों देवेक नी छोड़ता। हे अंधरा अगुवामन, तोहरेमन एइसन छोटका नियममन के तो मानाला जेकर कोनों मोल नखे, जइसन कि पियेक बेरा पानी से मच्‍छी के छाइन के निकलाय देवाला, मगर परमेश्‍वर केर मुध आगयामन के टाइल देवाला जे ऊँट के लिलेक नियर अहे। हे ढोंगी मूसा केर नियम के सिखाएक वाला आउर फरीसी दल केर आदमीमन, तोहर उपरे हाय! तोहरेमन एइसन डुभनी आउर थरियामन नियर अहा, जे बाहरे से तो सफा मगर भीतरे से गंदा अहे। ठीक एइसनेहें तोहरेमन हों बाहरे से दोसर आदमी के बेस आदमीमन नियर देखाला मगर तोहरेमन केर मन में लोभ आउर स्वार्थ भरल अहे। हे अंधरा फरीसी दल केर आदमीमन, आगे डुभनी आउर थरियामन के भीतरे से माँजा, जेकर से उ बाहरे से हों सफा होई जाओक। मतलब लोभी आउर स्वार्थी बनेक छोइड़ देवा तब जे सही अहे उके करेक पारबा। हे ढोंगी मूसा केर नियम के सिखाएक वालामन आउर फरीसी दल केर आदमीमन, तोहर उपरे हाय! तोहरेमन चूना पोतल कबरमन जइसन अहा, जे बाहरे से तो बेस दिसेला, मगर भीतरे मुरदा मनक हड्डीमन आउर सोउब रकम केर अशुद्ध भरल अहे। एहे लेखे तोहरेमन हों बाहरे से आदमीमन के धरमी दिसाला मगर भीतरे से तोहरेमन कपट आउर अधरम से भरल अहा। हे ढोंगी मूसा केर नियम के सिखाएक वाला आउर फरीसी दल केर आदमीमन, तोहर उपरे हाय! तोहर पुरखामन जेमन परमेश्‍वर केर संदेश के बताएक वालामन के माइर मोराय रहैं, उ मनक कबर के बनावाला आउर धरमी आदमीमन के माइन देवेक लगिन उ मनक कबर के संवरावाला। आउर कहाला कि ‘अगर हमरे अपन बाप-दादामन केर दिन में रहती तो परमेश्‍वर केर संदेश के बताएक वालामन के लोहू बहाय के मोराएक में उ मनक साथ नी देती।’ इ लेखे तोहरेमन खुद हें अपन बिरोध में गवाही देवाला कि तोहरेमन उ मनक संतान हेका, जेमन परमेश्‍वर केर संदेश के बताएक वालामन के माइर मोराय रहैं। से लगिन अब तोहरेमन अपन बाप-दादामन जे काम के शुरु काइर रहैं, सेके पूरा काइर देवा। हे जहरीला करैत साँप नियर दुष्ट आदमीमन, तोहरेमन नरक केर सजा से नी बचबा। से लगिन देखा, मोंय अपन संदेश के बताएक वालामन, गेयानीमन आउर मूसा केर नियम के सिखाएक वालामन के तोहर ठिना भेजाथों, आउर तोहरेमन उमन में से कायनों झन के माइर मोराबा आउर कायनों झन के क्रूस उपरे चढ़ाबा, आउर कायनों झन के अपन प्रार्थना घर में कोड़रा से मारबा, आउर एक नगर से दोसर नगर में कुदाते पिछा करबा। जेकर से धरमी हाबील से लेई के बिरिक्याह केर बेटा जकरयाह तक, जेके तोहरेमन यहूदी मनक मंदिर आउर बेदी केर माझे में लोहू बहाय के मोराय देई रहा, जेतना धरमी आदमीमन केर लोहू दुनिया में बोहाल जाय हे, उ सोउब तोहर मूँड़ उपरे पड़ी। मोंय तोहर से सच कहाथों, इ सोउब माइर मोराएक केर सजा इ समय केर आदमीमन उपरे आवी। हे यरुशलेम शहर केर आदमीमन! हे यरुशलेम शहर केर आदमीमन! तोहरेमन जे परमेश्‍वर केर संदेश के बताएक वालामन के माइर मोराला, आउर तोहर ठिना मोर भेजल संदेश बताएक वालामन के पखना से माइर मोराला, कायनों बेर मोंय चाहलों कि तोहर छउवामन के जइसन मुर्गी अपन चेंगनामन के अपन डेना से ढाँपेला, तइसनेहें जमा काइर लेमूँ, मगर तोहरेमन नी चाहला। देखा, अब तोहर मंदिर तोहर लगिन उजराल छोइड़ देवल जाई। काले कि मोंय तोहर से कहाथों कि अब से तोहरेमन मोके तब तक नी देखबा जब तक तोहरेमन इ नी कहबा: ‘धाइन हेके उ, जे प्रभु केर नाँव से आवेला।’ ” जब यीशु यहूदी मनक मंदिर से निकइल के जात रहे, तो उकर चेलामन उके मंदिर केर बनावट के देखाएक लगिन उकर ठिना आलैं। यीशु उमन से कहलक, “तोहरेमन जे इ सोउब के देखाथा, मोंय तोहरेमन के सच कहाथों, दुश्मनमन एको गो पखना के अपन ठाँव में नी छोड़बैं, उ सोउब के गिराय देबैं।” इकर पाछे यीशु आउर उकर चेलामन जैतून पहार उपरे चाइल गेलैं, हूवाँ यीशु एकले बाइठ रहे, तो चेलामन उकर ठिना आय के पूछलैं, “हमरे के बताव कि इ सोउब गोइठ कहिया पूरा होवी? तोर आवेक आउर दुनिया केर आखरी होवेक केर का चिन्हा होवी?” यीशु उमन के जबाब देलक, “सावधान रहा, तोहरेमन के केऊ ना बहकाय देवोक। काले कि ढेइर आदमीमन एइसन होबैं, जे मोर नाँव से आय के कहबैं, ‘मोंय मसीह हेकों।’ आउर ढेइर आदमीमन के बहकाय देबैं। तोहरेमन लड़ाईमन आउर लड़ाई मनक गोइठमन के सुनबा तो ना घबराबा, काले कि इ मनक होवेक जरुरी अहे, मगर उ बेरा दुनिया केर अंत नी होवी। काले कि एक जाइत केर आदमीमन दोसर जाइत केर उपरे हमला करबैं आउर एक देस केर आदमीमन दोसर देस केर आदमीमन से लड़बैं आउर जगा-जगा अकाल होवी आउर भूंईडोल होवी। इ सोउब घटना भयानक दुःखमन केर शुरुवात हें होवी। से बेरा आदमीमन तोहरेमन के धरुवाय के ढेइर दुःख देबैं आउर माइर मोराबैं, तोहरेमन मोर उपरे बिसवास कराला से लगिन सोउब जाइत केर आदमीमन तोहरेमन से नफरत करबैं। तब ढेइर आदमीमन जेमन मोर उपरे बिसवास करैना, बिसवास करेक छोइड़ देबैं आउर एक दोसर के धरुवाबैं आउर एक दोसर से बैर करबैं। आउर ढेइर झूठा आदमीमन परमेश्‍वर केर संदेश के बताएक वाला बाइन के आबैं आउर ढेइर आदमीमन के बहकाय देबैं। आउर अधरम केर बढ़ेक से ढेइर आदमीमन एक दोसर से प्रेम करेक छोइड़ देबैं। मगर जे आदमीमन दुःख तकलीफ केर आखरी बेरा तक मोर उपरे भरसा करबैं आउर हार नी मानबैं उमन बाइच जबैं। आउर परमेश्‍वर केर राइज केर शुभ समाचार गोटा दुनिया में परचार करल जाई, ताकि सोउब जाइत केर आदमीमन के यीशु के ग्रहण करेक केर मोका मिली, तब इकर पाछे दुनिया केर अंत होई जाई। पढ़ेक वालामन बुइझ लेओक, जेखन तोहरे उ उजराएक वाला घिनघिना चीज के जेकर बारे में परमेश्‍वर केर संदेश के बताएक वाला दानिय्येल कइह रहे, जहाँ उके उचित नखे हूवाँ मतलब मंदिर में ठड़ाल देखबा। तब जेमन यहूदिया परदेस में अहैं, उमन खुद के बचाएक लगिन पहार उपरे भाइग जाओक। अगर केऊ अपन घर केर छाइन उपरे अहे, उ घर में कोनों बसूत के लेगेक ना ढूकोक। आउर जे खेत में अहे, उ अपन लुगा लेगेक लगिन घर ना घुरोक। उ दिनमन में उ जनानामन लगिन जे भारी गतर में होबैं आउर जेमन अपन छउवामन के दूध पियाते होबैं, भयानक समय होवी काले कि उमन के भागेक ले ढेइर कठिन होवी! से लगिन प्रार्थना करते रहा कि इ जाड़ केर दिन चाहे आराम केर दिन में ना होवोक, जेकर से तोहरेमन के इ दिनमन में भागेक ना पड़ोक। काले कि उ दिनमन में एइसन दुःख तकलीफ होवी कि परमेश्‍वर केर बनाल दुनिया में शुरु से एखन तक नी होई हे आउर ना कहियो होवी। मगर परमेश्‍वर अपन चुनलमन केर खातिर उ दुःख-तकलीफ केर दिनमन के घटाय देई, अगर उ दिनमन के नी घटातक, तो केऊ हों नी बचतैं। उ बेरा अगर केऊ तोहरेमन से कही कि देखा, ‘मसीह हिंयाँ अहे!’ चाहे ‘हूवाँ अहे’ तो बिसवास ना करबा। काले कि झूठा मसीह आउर झूठा परमेश्‍वर केर संदेश बताएक वालामन उइठ खड़ा होबैं उमन बड़का-बड़का चिन्हा आउर चमत्कार केर काममन के देखाबैं आउर होई सके तो उमन चुनलमन के हों बहकाय देबैं। देखा, मोंय आगे हें तोहरेमन के इ सोउब गोइठमन के बताय देई हों। से लगिन अगर उमन तोहरेमन से कहबैं, ‘देखा, उ सुनसान ठाँव में अहे,’ तो बाहरे ना निकइल जबा, चाहे ‘देखा, उ कोठरी में अहे,’ तो बिसवास ना करबा। काले कि जइसन बिजली पूरब से निकइल के पच्छिम तक चमकेला, तइसनेहें मोंय आदमी केर बेटा केर हों आवेक होवी। जइसन गिद्धमन केर जमा होवेक से पता चलेला कि हूवाँ लाश अहे, तइसनेहें इ सोउब घटना से पता चाइल जाई कि आदमी केर बेटा केर हों आवेक भीरे पोंहइच जाय हे। जब इ दुःख तकलीफ केर बेरा बीत जाई। तब बेइर अंधार होई जाई आउर चाँद इंजोत नी देवी। आउर आकाश से तइरगनमन गिरेक लगबैं: आउर आकाश केर शक्तिमन के हिलाल जाई तब मोंय आदमी केर बेटा केर चिन्हा आकाश में दिसी, आउर दुनिया केर सोउब आदमीमन शोक करबैं, आउर मोंय आदमी केर बेटा के बड़का शक्ति आउर तेज चमक केर संगे आकाश केर बदरी में आते देखबैं। आउर मोंय अपन दूतमन के जोर से तुरही बजाते भेजमूँ, आउर उमन आकाश केर इ छोर से उ छोर तक, चाइरो दिशा से मोर चुनल आदमीमन के जमा करबैं। अंजीर केर गाँछ से सिखा, जब उकर डाइर नरम होई जायला आउर उकर में नवाँ पतइ नोगजेला तो तोहरेमन जाइन लेवाला कि गरमी मौसम भीरे आय जाहे। एहे लेखे जब तोहरेमन इ गोइठमन के पूरा होते देखबा तो जाइन लेवा कि मोंय आदमी केर बेटा आवेक वाला अहों, मोंय देरी नी करमूँ मगर जल्दी हें आमूँ। मोंय तोहरेमन से सच कहाथों कि जब तक इ सोउब गोइठमन पूरा नी होई लेई, तब तक इ पीढ़ी केर आदमीमन नी मोरबैं। आकाश आउर धरती नाश होई जाई, मगर मोर कहल सोउब गोइठ सोउब दिन लगिन बनल रही। इ सोउब गोइठ कहिया आउर कोन बेरा पूरा होवी इकर बारे में केऊ हों नी जानैना, ना स्वरग केर दूतमन आउर ना मोंय परमेश्‍वर केर बेटा। मगर उ दिन आउर उ बेरा केर बारे में आबा हें जानेला। जइसन हमर पुरखा नूह केर परिया में होई रहे, तइसनेहें मोंय आदमी केर बेटा केर आवेक बेरा हों होवी। बाइढ़-पानी आवेक से पहिले दिनमन से लेई के नूह केर पानी जहाज उपरे चढ़ेक दिन तक, आदमीमन खाते-पिते आउर सादी-बिहा करते रहैं। बाइढ़ पानी आवेक से आगे उमन के कोनोवें पता नी रहे कि बाइढ़ पानी आय के हमरे के बोहाय के लेई जाई, तइसनेहें मोंय आदमी केर बेटा केर आवेक हों होवी। उ बेरा दूई झन खेत में होबैं, उमन में से एगो के लेई लेवल जाई आउर दूसरा के छोइड़ देवल जाई। दूई झन जनानामन जाँता पीसते रहबैं, उमन में से एगो के लेई लेवल जाई, आउर दूसरा के छोइड़ देवल जाई। से लगिन जागते रहा, काले कि तोहरेमन नी जानाला कि तोहरे केर प्रभु कोन दिन आवी। मगर इके जाइन लेवा कि अगर घर केर मालिक जानतक कि चोर राइत केर कोन पहर आवी, तो उ जागते रहतक आउर अपन घर में ढूकेक नी देतक। से लगिन तोहरेमन हों सोउब बेरा तेयार रहा, काले कि जे बेरा तोहरेमन सोइच नी रहबा, ओहे बेरा मोंय आदमी केर बेटा आय जामूँ। एगो बिसवास लाएक आउर बुद्धिमान धांगर उ हेके, जेके मालिक अपन घर केर आउरो धांगरमन के देख-रेख करेक आउर उमन के समय से खाएक देवेक केर जिम्मा देवेला आउर उ परदेस चाइल जायला। धाइन अहे उ धांगर, जेके उकर मालिक आय के उके एइसनेहें करते पावी। मोंय तोहरेमन से सच कहाथों, मालिक उके अपन सोउब सम्पति केर जिम्मा देवी। मगर, अगर उ धांगर दुष्ट अहे आउर अपन मन में इ सोचेक लगी कि मोर मालिक केर आवेक में देरी अहे। आउर अपन संगी धांगरमन के पिटेक लगी आउर मतवारमन केर संगे खाई-पियी। तो मालिक एइसन दिन आवी, जे दिन धांगर उकर घूइर आवेक केर आसरा नी देखेला आउर एइसन बेरा जेके उ नी जानेला। तब मालिक उके भारी सजा देवी। इ लेखे उकर अंत नरक में ओहे नियर होवी जे लेखे ढोंगीमन केर होवेला। हूवाँ काँदेक आउर दाँत केटरेक होवी।” यीशु आगे कहलक, “जब मोंय आदमी केर बेटा घूइर आमूँ, तब स्वरग केर राइज उ दस कुँवारीमन केर जइसन होवी, जेमन अपन-अपन दीया लेई के दूल्हा से भेंट करेक लगिन उकर बिहा में जाएक ले निकललैं। उमन में से पाँच झन मूरख आउर पाँच झन समझदार रहैं। मूरख कुँवारीमन अपन दीयामन के तो लेलैं, मगर अपन संगे अलग से आउर तेल नी लेलैं। मगर समझदार कुँवारीमन अपन दीयामन केर संगे-संगे अपन कुप्पी में तेल हों बगरा भाइर लेलैं। जब दूल्हा केर आवेक में देरी होलक, तो उमन सोउब झूपेक लगलैं आउर निंदाय गेलैं। आधा राइत के अचका ढोल बाजा बजेक केर आवाज सुनाएक लगलक आउर आदमीमन कहेक लगलैं, ‘देखा, दूल्हा आवाथे, उकर से भेंट करेक लगिन चला।’ तब सोउब कुँवारीमन उइठ के अपन-अपन दीया के बारेक लगलैं। आउर मूरख कुँवारीमन समझदार कुँवारीमन से कहलैं, ‘अपन तेल में से थोरेक हमरे के हों देवा, काले कि हमरेमन केर दीया बुइत जाथे।’ मगर समझदार कुँवारीमन जबाब देलैं, ‘शायद इ तेल हमर आउर तोहर लगिन पूरा नी होवी, भला होवी कि तोहरेमन तेल बेचेक वालामन ठिना जाय के अपन लगिन कीन लेवा।’ उमन तेल किनेक ले जाते रहैं, तो दूल्हा आय पोहोंचलक, आउर जे तेयार रहैं, उमन उकर संगे बिहा केर घर में चाइल गेलैं आउर दुरा बंद करल गेलक। इकर पाछे उ पाँच मूरख कुँवारीमन हों आलैं आउर काइंद के दूल्हा से कहेक लगलैं, ‘हे मालिक, हे मालिक, हमर लगिन दुरा के खोइल दे।’ उ जबाब देलक, ‘मोंय तोहरेमन से सच कहाथों, मोंय तोहरेमन के नी जानोना।’ से लगिन जागते रहा, काले कि तोहरेमन ना तो उ दिन के जानाला आउर ना उ बेरा के। जब मोंय फिन से घूइर आमूँ, तो स्वरग राइज इ लेखे होवी, जइसन एगो आदमी जे परदेस जाएक बेरा अपन घर के छोइड़ जायला, आउर जाएक से आगे अपन धांगरमन के बोलाय के अपन सम्पति के उमन के जिम्मा देवेला। उ एगो के पाँच गो सोना केर सिक्का, दूसरा के दूई गो, आउर तीसरा के एगो सोना केर सिक्का देलक, मतलब हरेक झन के उकर लियाकत केर मोताबिक देलक, आउर इकर पाछे उ परदेस चाइल गेलक। तब जेके पाँच गो सोना केर सिक्का मिल रहे, उ तुरते जाय के उकर से लेन-देन करलक आउर पाँच गो सोना केर सिक्का आउर कमालक। एहे लेखे जेके दूई गो सोना केर सिक्का मिल रहे, ओहो आउर दूई गो सोना केर सिक्का कमालक। मगर जेके एगो सोना केर सिक्का मिल रहे, उ जाय के भूंई के कोइड़ के अपन मालिक केर रुपया के हूवाँ लुकाय देलक। ढेइर दिन केर पाछे उ धांगरमन केर मालिक घूइर के उमन से हिसाब लेवेक लगलक। जेके पाँच गो सोना केर सिक्का मिल रहे, उ आउर पाँच गो सोना केर सिक्का लाइन के कहलक, ‘हे मालिक! तोंय मोके पाँच गो सोना केर सिक्का देई रहिस, देख, मोंय पाँच गो सोना केर सिक्का आउर कमाय हों।’ उकर मालिक उकर से कहलक, ‘धाइन हे बेस आउर बिसवास लाएक धांगर, तोंय थोरेक धन के संभराएक में बिसवास लाएक रहले, मोंय तोके ढेइर चीजमन केर अधिकारी बनामूँ। अपन मालिक केर खुशी में भागीदार हो।’ आउर जेके दूई गो सोना केर सिक्का मिल रहे, ओहो आय के कहलक, ‘हे मालिक! तोंय मोके दूई गो सोना केर सिक्का देई रहिस, देख, मोंय दूई गो सोना केर सिक्का आउर कमालों।’ उकर मालिक उकर से कहलक, ‘धाइन हे बेस आउर बिसवास लाएक धांगर, तोंय थोरेक धन के संभराएक में बिसवास लाएक रहले, मोंय तोके ढेइर चीजमन केर अधिकारी बनामूँ। अपन मालिक केर खुशी में भागीदार हो।’ तब जेके एगो सोना केर सिक्का मिल रहे, उ आय के कहलक, ‘हे मालिक! मोंय तोके जानत रहों, तोंय कठोर आदमी हेकिस: तोंय एगो एइसन आदमी नियर अहिस, जे बिहीन नी बुनेला मगर अन्न काटेक केर आसरा रखेला, आउर जहाँ अन्न नी छितरायला हूवाँ से जमा करेक खोजेला। से लगिन मोंय डराय गेलों आउर जाय के तोर सोना केर सिक्का के भूंई कोइड़ के माटी में लुकाय देलों। देख, जे तोर हेके, उ इ हेके।’ उकर मालिक उके जबाब देलक, ‘हे दुष्ट आउर कोढ़िया धांगर! जब तोंय इ जानत रहिस कि जहाँ मोंय बिहीन नी बुनोना हूवाँ से काटेक केर आसरा रखोना, आउर जहाँ मोंय नी छिटोना हूवाँ से जमा करेक खोजोना। तो तोके चाही रहे कि मोर रुपया महाजन के देई देते, तब मोंय आय के अपन धन सूद समेत लेई लेतों। से लगिन उ सोना केर सिक्का के उकर से लेई लेवा आउर जेकर ठिना दस गो सोना केर सिक्का अहे, उके देई देवा। काले कि जेकर ठिना अहे उके आउर देवल जाई, मगर जेकर ठिना नखे, उकर से ओहो जे उकर ठिना अहे, लेई लेवल जाई। इ नालायक धांगर के बाहरे अंधार में फेइक देवा, जहाँ काँदेक आउर दाँत केटरेक होवी।’ जब मोंय आदमी केर बेटा अपन महिमा में आमूँ आउर मोर संगे सोउब स्वरगदूतमन आबैं। तब मोंय सोउब केर न्याय करेक लगिन महिमा रुपी सिंहासन में बइठमूँ। से बेरा सोउब देस केर आदमीमन मोर सामने जमा करल जाबैं। आउर जइसन चरवाहा भेड़ीमन के छगरीमन से जुदा काइर देवेला, तइसनेहें मोंय हों उ सोउब धरमी आदमीमन के पापी आदमीमन से जुदा काइर देमूँ। आउर भेड़ीमन के मतलब धरमी आदमीमन के अपन भतखाइया बटे आउर छगरीमन के मतलब अधरमी आदमीमन के लेंगा बटे ठड़ुवामूँ। तब मोंय राजा अपन भतखाइया बटे केर आदमीमन से कहमूँ, ‘हे मोर आबा केर धाइन आदमीमन, आवा, स्वरग राइज केर अधिकारी बाइन जावा, जे दुनिया केर शुरु से तोहर लगिन तेयार करल अहे। काले कि जब मोंय भूखल रहों, तो तोहरेमन मोके खाएक ले देला। जब मोंय पियासल रहों, तो तोहरेमन मोके पानी पियाला। जब मोंय परदेसी रहों, तो तोहरेमन मोके अपन घर में बोलाला। जब मोंय नंगा रहों, तो तोहरेमन मोके पिंधेक लगिन लुगा देला। जब मोंय बेमार रहों, तो तोहरेमन मोर देखभाल करला। जब मोंय जेहेल घर में रहों, तो तोहरेमन मोर से भेटाएक लगिन आला।’ तब धरमी आदमीमन उके जबाब देबैं, ‘हे प्रभु, हमरे कखन तोके भूखा देखली आउर खियाली? या पियासल देखली, आउर पियाली? हमरे कखन तोके परदेसी देखली आउर अपन घर में बोलाली या नंगा देखली आउर लुगा पिंधेक लगिन देली? हमरे कखन तोके बेमार चाहे जेहेल घर में देखली आउर तोर से भेटाएक आली?’ तब मोंय राजा उमन के जबाब देमूँ, ‘मोंय तोहर से सच कहाथों कि तोहरेमन जे मोर इ छोट से छोट चेलामन में से केऊ एगो केर संगे एइसन करला, तो तोहरेमन मोर हें संगे करला।’ तब मोंय राजा लेंगा बटे केर आदमीमन से कहमूँ, ‘हे सरपाल आदमीमन, मोर सामने से दूर होई जावा आउर उ जुग-जुग बारेक वाला आइग में चाइल जावा, जेके शैतान आउर उकर दूतमन लगिन तेयार करल जाय हे। काले कि जब मोंय भूखल रहों, तो तोहरेमन मोके खाएक लगिन नी देला। जब मोंय पियासल रहों, तो तोहरेमन मोके पानी नी पियाला। जब मोंय परदेसी रहों, तो तोहरेमन मोके अपन घर में नी बोलाला। जब मोंय नंगा रहों, तो तोहरेमन मोके पिंधेक लगिन लुगा नी देला। जब मोंय बेमार आउर जेहेल घर में रहों, तो तोहरेमन मोर देखभाल नी करला।’ तब उमन जबाब देबैं, ‘हे प्रभु, हमरे तोके कखन भूखल, चाहे पियासल, चाहे परदेसी, चाहे नंगा, चाहे बेमार, चाहे जेहेल घर में देखली, आउर तोर सेवा नी करली?’ तब मोंय राजा उमन के जबाब देमूँ, ‘मोंय तोहर से सच कहाथों कि तोहरेमन जे इ मोर चेलामन में से केकरो एक केर संगे नी करला, उ मोर संगे नी करला।’ आउर लेंगा बटे केर आदमीमन जुग-जुग केर दंड भोगबैं मगर धरमी आदमीमन जुग-जुग केर जिंदगी पाबैं।” जब यीशु इ सोउब गोइठमन के कइह सिरालक, तब अपन चेलामन से कहलक, “तोहरेमन जानाला कि दूई दिन केर पाछे यहूदी मनक फसह परब अहे, आउर मोंय आदमी केर बेटा क्रूस उपरे चढ़ाल जाएक लगिन धरुवाय देवल जामूँ।” तब यहूदी मुध पुरोहितमन आउर परजा मनक धरम केर अगुवामन काइफा नाँव केर यहूदी महापुरोहित केर महल केर अंगना में जमा होलैं, आउर आपस में सलहा करलैं कि यीशु के छल से धरुवाय के माइर मोराब। मगर उमन एक दोसर से कहत रहैं, “हमरे के फसह परब केर समय एइसन नी करेक चाही, कहीं आदमीमन में हुड़दंग ना मइच जाओक।” उ बेरा यीशु बैतनिय्याह गाँव में सिमोन नाँव केर एगो आदमी केर घर में रहे, जेके यीशु कोढ़ बेमारी से ठीक काइर रहे। जब यीशु खाएक लगिन बाइठ रहे, ओहे बेरा एगो जनाना संगमरमर केर पखना से बनाल एगो सीसी में महंगा सेंट भाइर के लानलक। उ शुद्ध जटामांसी तेल से बनाल रहे, उ जनाना यीशु ठिना आय के उकर मूँड़ उपरे सेंट के उझइल देलक। इ देइख के उकर चेलामन झुंझलाय के कहेक लगलैं, “इ सेंट के काले सत्यानाश करल गेलक? इ तो बेस दाम में बेचाय जातक आउर इकर पइसा के गरीब आदमीमन के देवल जातक।” इ जाइन के यीशु उमन से कहलक, “जनाना के काले सताथा? उ मोर लगिन बेस हें काम काइर हे। गरीब आदमीमन तो तोहरेमन केर संगे सोउब दिन रहबैं, मगर मोंय तोहरेमन केर संगे सोउब दिन नी रहमूँ। उ मोर काया में जे इ सेंट लगाय हे, उ मोर दफनाएक जाएक ले तेयार काइर हे। मोंय तोहरेमन से सच कहाथों, समूचा दुनिया में जहाँव-कहाँ शुभ समाचार केर परचार करल जाई, हूवाँ उकर इ काम केर चरचा हों उकर याइद में करल जाई।” तब यहूदा जे इस्करियोत गाँव केर रहेक वाला आउर बारह खास चेलामन में से एगो रहे, यहूदी मुध पुरोहितमन ठिना जाय के कहलक, “अगर मोंय यीशु के तोहरे केर हाँथ में धरुवाय देमूँ तो मोके का देबा?” उमन उके तीस गो चाँदी केर सिक्का तवइल के देलैं। आउर उ ओहे बेरा से यीशु के धरुवाएक केर मोका खोजेक लगलक। यहूदी मनक बिन खमीर रोटी केर परब आवेक वाला रहे। यीशु केर चेलामन उकर ठिना आय के पूछेक लगलैं, “तोंय कोन ठाँव के चाहिसला कि हमरे हूवाँ जाय के तोर लगिन फसह परब केर भोज खाएक केर तेयारी करब?” यीशु कहलक, “नगर में फलना आदमी ठिना जाय के उकर से कहबा, ‘गुरु कहाथे कि मोर समय भीरे अहे, मोंय अपन चेलामन केर संगे तोर हिंयाँ फसह परब मनामूँ।’” यीशु जइसन कइह रहे, तइसनेहें चेलामन फसह परब केर भोज तेयार करलैं। जब साँझ होलक तो यीशु अपन बारहों खास चेलामन केर संगे खाएक लगिन बइठलक। जब उमन खात रहैं तो यीशु कहलक, “मोंय तोहरेमन से सच कहाथों कि तोहरेमन में से एक झन मोके धरुवाई।” इ गोइठ सुइन के उमन ढेइर उदास होलैं, आउर हरेक झन यीशु से पूछेक लगलैं, “हे गुरु का उ मोंय हेकों?” यीशु जबाब देलक, “जे मोर संगे एके डुभा में रोटी डुबाय के खाथे, ओहे मोके धरुवाई। काले कि मोंय आदमी केर बेटा लगिन तो जइसन मोर बारे में पवितर किताब में लिखल अहे, ओहे लेखे होवी। मगर उ आदमी जे मोके धोखा देई के धरुवाय देवी, उकर लगिन हाय! उकर ले एहे बेस होतक कि उकर जनम हें नी होतक।” तब उकर धरुवाएक वाला यहूदा कहलक, “हे गुरु, का उ मोंय हेकों?” यीशु उकर से कहलक, “हाँ, उ तोहें हेकिस।” जब उमन खात रहैं तो यीशु रोटी लेलक, आउर आशीष माँइग के टुकरालक आउर चेलामन के देई के कहलक, “लेवा, खावा, इ मोर काया हेके।” फिन उ अंगूर केर रस भरल कटोरा लेई के परमेश्‍वर के धन्यबाद देलक आउर इ कहते अपन चेलामन के देलक, “तोहरेमन सोउब इकर में से पिया, काले कि इ अंगूर केर रस मोर करार केर उ लोहू हेके, जे ढेइर आदमी मनक पापमन केर क्षमा लगिन बहाल जायला। मोंय तोहर से कहाथों, ‘आइज केर पाछे अंगूर केर रस मोंय उ बेरा तक नी पीमूँ, जब तक कि मोंय अपन आबा केर राइज में तोहर संगे नवाँ अंगूर केर रस के नी पी लेमूँ।’” तब यीशु आउर उकर चेलामन फसह परब केर गीत गालैं आउर उकर पाछे उमन यरुशलेम शहर से बाहरे जैतून पहार उपरे चाइल गेलैं। जब उमन पहार बटे जात रहैं तब यीशु उमन से कहलक, “तोहरेमन सोउब आइज हें राइत मोके छोइड़ के चाइल जबा, काले कि पवितर किताब में मोर बारे में लिखल अहे, ‘मोंय उ आदमी के मोरामूँ जे मोर आदमीमन केर चरवाहा नियर देखभाल करेला, जेकर से उ आदमीमन भेड़ीमन नियर तितिर-बितिर होई जबैं।’। मगर मोंय मोइर के जी उठेक केर पाछे तोहरेमन से आगे गलील परदेस में जामूँ आउर हूवाँ मिलमूँ।” इ गोइठ सुइन के पतरस यीशु से कहलक, “चाहे सोउब चेलामन तोके छोइड़ देबैं तो छोइड़ देबैं, मगर मोंय तोके कहियो नी छोड़मूँ।” यीशु उकर से कहलक, “मोंय तोर से सच कहाथों कि आइज हें एहे राइत के मुरगा बोलेक से आगे तोंय तीन बेर मोर से मुकइर जाबे कि तोंय मोके नी जानिसला।” पतरस उकर से कहलक, “अगर मोके तोर संगे मोरेक हों होवी, फिन भी मोंय नी कहमूँ कि मोंय तोके नी जानोना।” आउर एइसन हें सोउब चेलामन हों कहलैं। जाते-जाते यीशु आउर उकर चेलामन गतसमनी नाँव केर एगो बगाइचा में पोहोंचलैं। तब यीशु अपन चेलामन से कहलक, “जब तक मोंय हूवाँ से प्रार्थना काइर के नी आमूँ, तब तक तोहरेमन एहे ठिना बइठल रहा।” यीशु अपन संगे पतरस के आउर जबदी केर दुयो बेटा याकूब आउर उकर छोट भाई यूहन्ना के बगाइचा में थोरेक दूर लेई गेलक, हूवाँ उ ढेइर दुःखी आउर बेचाइन होवेक लगलक। तब यीशु उमन से कहलक, “मोर मन ढेइर दुःखी अहे, एइसन लगाथे कि मोंय मोरेक वाला अहों, तोहरेमन हिंयाँ रुका आउर जागते रहा।” फिन यीशु थोरेक दूर आगे गेलक आउर ठेहुना टेइक के परमेश्‍वर से प्रार्थना करेक लगलक, “हे मोर आबा, अगर तोर योजना में इ होवेक पराई, तो मोर उपरे आवेक वाला इ दुःख से मोके बचाय ले, फिन भी जइसन मोंय चाहोना तइसन ना कर, मगर जे तोंय चाहिसला ओहे कर।” जब यीशु चेलामन ठिना घूइर आलक तो उमन के निंदाते पालक, आउर पतरस से कहलक, “का तोंय मोर संगे एको घड़ी जागेक नी पारिसला?” “तोहरेमन सोउब जागते रहा आउर प्रार्थना करते रहा, जेकर से तोहरे के शैतान बहकाएक ना पारोक। जे मोंय चाहोना उके तोहरेमन करेक तो चाहाला मगर तोहरे केर काया में उके पूरा करेक केर ताकत नखे।” फिन उ दूसरी बेर जाय के इ प्रार्थना करलक, “हे मोर आबा, अगर इ दुःख के उठाएक मोर लगिन जरुरी अहे, तो तोर हें इच्छा पूरा होवोक।” यीशु फिन घूइर के आलक आउर उमन के फिन निंदाते पालक, काले कि उ मनक आँइख नींद से भरल रहे। यीशु उमन के छोइड़ के फिन चाइल गेलक आउर ओहे गोइठ फिन दोहराय के, तीसरी बेर प्रार्थना करलक। जब यीशु तीसरी बेर उमन ठिना आलक, तो उ तीनों चेलामन से कहलक, “एखन तक निंदाते अहा आउर आराम कराथा? बस! ढेइर होलक, उ बेरा आय जाय हे। देखा! मोंय आदमी केर बेटा, पापीमन केर हाँथे धरुवाल जाथों। उठा, चला देखा, मोके धरुवाएक वाला भीरे आय पोंहइच हे।” यीशु इ कहते हें रहे कि यहूदा जे बारहों चेलामन में से एगो रहे, आय पोहोंचलक, उकर संगे एगो बड़का भीड़ हों रहे, जेके यहूदी मुध पुरोहितमन आउर आदमी मनक धरम केर अगुवामन भेइज रहैं, उ मनक हाँथ में तलवाइर आउर लाठीमन रहे। उके धरुवाएक वाला यहूदा उमन के आगे हें बताय देई रहे कि जेके मोंय चुमा करमूँ ओहे यीशु हेके, उके धाइर के लेई जबा। जइसनेहें यहूदा हूवाँ पोहोंचलक उ तुरते यीशु ठिना आय के कहलक, “हे गुरु, जोहार!” आउर उके चुमा करलक। यीशु उकर से कहलक, “हे संगी, जे काम लगिन तोंय आय हिस, उके काइर ले।” तब उमन भीरे आय के यीशु के धारलैं आउर उकर हाँथ के बाइंध देलैं। यीशु केर संगमन में से एगो अपन हाँथ से छोट तलवाइर खींच के यहूदी महापुरोहित केर धांगर उपरे चलाय के उकर कान के काइट देलक। तब यीशु उकर से कहलक, “अपन तलवाइर म्यान में राइख ले, काले कि जेमन तलवाइर चलायना, उमन के तलवाइर से नाश करल जाई। का तोंय नी जानिसला कि मोंय अपन आबा से मदइत माँगेक पारोना आउर उ मोर लगिन फौज केर बारह गो दल से हों बगरा स्वरगदूतमन के भेजेक पारी? अगर मोंय एइसन करमूँ तो पवितर किताब में लिखल गोइठ कइसन पूरा होवी, जेकर होवेक जरुरी अहे?” ओहे बेरा यीशु भीड़ से कहलक, “का तोहरेमन डाकू समइझ के मोके धारेक लगिन तलवाइर आउर लाठीमन लेई के आय हा? मोंय रोज दिन यहूदी मनक मंदिर केर अंगना में बाइठ के उपदेस देवत रहों, से बेरा तोहरेमन मोके नी धारला? मगर एखन जे कुछ होवाथे, उ इकर लगिन कि परमेश्‍वर केर संदेश के बताएक वालामन केर लिखल बचन पूरा होवोक।” तब सोउब चेलामन उके छोइड़ के भाइग गेलैं। आउर यीशु के धरुवाएक वालामन उके काइफा नाँव केर यहूदी महापुरोहित ठिना लेई गेलैं, जहाँ मूसा केर नियम के सिखाएक वाला आउर धरम केर अगुवामन जमा होई रहैं। पतरस थोरेक दूरी बनाय के यीशु केर पिछे-पिछे यहूदी महापुरोहित केर अंगना तक गेलक आउर हूवाँ अंत देखेक लगिन मंदिर केर पहरादारमन केर संगे बाइठ गेलक। यहूदी मुध पुरोहितमन आउर यहूदी अगुवा मनक महासभा यीशु के माइर मोराएक लगिन उकर बिरोध में झूठा गवाही केर खोज में रहैं। ढेइर आदमीमन यीशु केर बिरोध में झूठा गवाही तो देवत रहैं, मगर उके मौत केर सजा देवेक लायक उ मनक कोनों गवाही नी मिललक। आखरी में दूई झन आदमीमन आलैं, आउर कहलैं, “इ कइह हे कि मोंय परमेश्‍वर केर मंदिर के धँसाएक पारोना, आउर उके तीन दिन में बनाएक पारोना।” तब यहूदी महापुरोहित ठड़ाय के उकर से पूछलक, “इमन तोर बिरोध में जे गवाही देवाथैं, का तोंय इकर से खुद के बचाएक लगिन कोनों कहेक चाहिसला?” मगर यीशु चुप रहलक। तब यहूदी महापुरोहित यीशु से पूछलक, “मोंय तोके जिंदा परमेश्‍वर केर किरिया खाय के कहाथों कि अगर तोंय परमेश्‍वर केर बेटा मसीह हेकिस, तो मोर से कइह दे।” यीशु उके जबाब देलक, “तोंय खुद हें कइह देले, अब मोंय तोर से एहो कहाथों कि अब से तोहरेमन मोंय आदमी केर बेटा के सर्वशक्तिमान परमेश्‍वर केर भतखाइया बटे बइठल आउर आकाश केर बदरीमन में आते देखबा।” तब यहूदी महापुरोहित अपन लुगा फाइर के कहलक, “इ परमेश्‍वर केर निंदा काइर हे, अब हमरे के आउर गवाह मनक दरकार नखे। तोहरेमन एखन खुद इके परमेश्‍वर केर निंदा करते सुनला! इकर संगे हमरे का करब? तोहरेमन केर का बिचार अहे?” उमन जबाब देलैं, “इ मोराय जाएक केर लायक अहे।” तब उमन उकर मुँह उपरे थूकलैं आउर उके घूँसा मारलैं, आउरो आदमीमन थप्पड़ माइर के कहलैं, “अगर तोंय मसीह हेकिस तो हमरे के भविष्यवाणी काइर के बताव कि तोके केहर माइर हे?” जब पतरस बाहरे अंगना में बइठल रहे: हूवाँ एगो धांगरिन उकर ठिना आय के कहलक, “तोंय हों तो गलील परदेस केर रहेक वाला यीशु केर संगे रहिस।” उ सोउब केर आगे मुकइर के जबाब देलक, “मोंय नी जानोना तोंय का कहाथिस।” इकर पाछे पतरस बाहरे दुरा बटे चाइल गेलक। मगर एगो दोसर धांगरिन उके देखलक आउर हूवाँ जेमन रहैं, उमन से कहलक, “एहो तो नासरत नगर केर रहेक वाला यीशु केर संगे रहे।” पतरस किरिया खाय के फिन मुकइर गेलक आउर जबाब देलक, “मोंय उ आदमी के नी जानोना।” थोरेक देरी केर पाछे जेमन हूवाँ ठड़ाल रहैं, उमन पतरस ठिना आय के उकर से कहलैं, “सचमुच तोंय हों उमन में से एगो हेकिस, काले कि तोर बोली से पता चलाथे कि तोंय गलील परदेस केर हेकिस।” तब पतरस यीशु के कोसेक लगलक आउर किरिया खाय के कहलक, “मोंय उ आदमी के नी जानोना।” आउर ठीक ओहे बेरा तुरते मुरगा बोइल देलक। तब पतरस के यीशु केर कहल गोइठ याइद आलक कि “मुरगा केर बोलेक से आगे तोंय तीन बेर मोर से मुकइर जबे।” आउर उ बाहरे जाय के फफाइख-फफाइख के काँदेक लगलक। बिहाने-बिहान सोउब यहूदी मुध पुरोहितमन आउर यहूदी धरम केर अगुवामन यीशु के माइर मोराएक केर सलहा करलैं। आउर उमन यीशु के बाँधलैं आउर उके पिलातुस ठिना लेई गेलैं, जे यहूदिया परदेस केर रोमी सरकार में राजपाल रहे। जब यीशु के धरुवाएक वाला यहूदा जाइन गेलक कि उ दोषी ठहराल जाय हे, तो उ पसतालक आउर उ तीस गो चाँदी केर सिक्का के यहूदी मुध पुरोहितमन आउर धरम केर अगुवामन ठिना घुराय लानलक। आउर कहलक, “मोंय निरदोष आदमी के मरुवाएक लगिन धरुवाय के पाप काइर हों।” उमन उकर से कहलैं, “इकर से हमरे के कोनों मतलब नखे, उकर लगिन तोहें जिम्मेदार हेकिस।” तब यहूदा उ सिक्कामन के यहूदी मनक मंदिर केर अंगना में फेइक के चाइल गेलक आउर बाहरे जाय के फाँसी होई गेलक। यहूदी मुध पुरोहितमन उ सिक्कामन के लेई के कहलैं, “हमर नियम केर मोताबिक इके मंदिर केर भंडार में रखेक उचित ना लगे, काले कि इ लोहू बहाय के मोराएक लगिन देवल दाम हेके।” तब उमन सलहा करलैं आउर उ सिक्कामन से परदेसी आदमीमन के गाड़ेक लगिन कुम्हार केर खेत के कीन लेलैं। एहे खातिर उ खेत आइज तक लोहू केर खेत केर नाँव से जानल जायला। इ लेखे यिर्मयाह परमेश्‍वर केर संदेश के बताएक वाला केर कहल इ बचन पूरा होलक: “उमन चाँदी केर तीस गो सिक्का लेलैं, ओहे दाम इसराइल केर संतानमन उकर लगिन ठहराय रहैं, आउर जइसन प्रभु मोके आगया देई रहे तइसनेहें उमन इ सिक्का से कुम्हार केर खेत के कीन लेलैं।” जब यीशु राजपाल केर आगे ठड़ाय रहे तो राजपाल उकर से पूछलक, “का तोंय यहूदीमन केर राजा हेकिस?” यीशु उके जबाब देलक, “तोंय खुद हें कहाथिस।” यहूदी मुध पुरोहितमन आउर यहूदी धरम केर अगुवामन यीशु केर उपरे दोष लगात रहैं, मगर यीशु उ मनक कोनों सवाल केर जबाब नी देलक। सेकर लगिन पिलातुस यीशु से कहलक, “का तोंय नी सुनाथिस कि इमन तोर उपरे केतना दोष लगाथैं?” मगर यीशु उके कोनोवें सवाल केर जबाब नी देलक, इ देइख के राजपाल ढेइर ताजुब होलक। आउर राजपाल केर इ रीति रहे कि उ यहूदी मनक फसह परब में हर साल आदमीमन लगिन एगो कैदी के जेके उमन चाहत रहैं, छोइड़ देवत रहे। उ समय बरअब्बा नाँव केर एगो नामी कैदी जेहेल घर में रहे। जब आदमीमन जमा होलैं तो राजपाल पिलातुस उमन से कहलक, “तोहरेमन केके चाहाथा कि मोंय तोहर लगिन छोइड़ देमूँ? बरअब्बा के या यीशु के, जे मसीह कहायला?” काले कि पिलातुस जानत रहे कि उमन यीशु के हिसिंगा से धरुवाय हैं। जब उ फैसला करेक केर कुरसी में बइठल रहे तो उकर जनाना उके कइह भेजलक, “तोंय उ बेकसूर आदमी केर गलत फैसला ना करबे, काले कि मोंय आइज सपना में उकर खातिर ढेइर दुःख उठाय हों।” एहे बेरा यहूदी मुध पुरोहितमन आउर धरम केर अगुवामन आदमीमन के बहकालैं कि उमन बरअब्बा के छोड़ेक लगिन आउर यीशु लगिन मौत केर सजा केर माँग करोक। राजपाल पिलातुस उमन से फिन पूछलक, “तोहरेमन का चाहाथा? इ दुयो में से केके तोहरे लगिन छोइड़ देमूँ?” उमन कहलैं, “बरअब्बा के।” पिलातुस उमन से पूछलक, “तो फिन यीशु के जे मसीह कहायला, उकर संगे मोंय का करमूँ?” सोउब आदमीमन उकर से कहलैं, “उ क्रूस उपरे चढ़ाल जाओक।” राजपाल पिलातुस पूछलक, “काले उ का बुराई काइर हे?” मगर उमन आउर हें चिल्लाय-चिल्लाय के कहेक लगलैं, “उ क्रूस उपरे चढ़ाल जाओक।” जब पिलातुस देखलक कि यीशु के बचाएक लगिन कोनों नी बनाथे, मगर इकर उल्टा गूल-गंजाइर बढ़ते जाथे, तो उ पानी मंगाय के भीड़ केर आगे हाँथ धोई के कहलक, “मोंय इ धरमी आदमी केर लोहू से निरदोष अहों, तोहरेमन हें इकर जिम्मेदार हेका।” सोउब आदमीमन जबाब देलैं, “हाँ इके लोहू बहाय के मोराएक केर दोष हमर आउर हमर छउवा पुता मनक उपरे होवोक।” तब पिलातुस उ मनक लगिन बरअब्बा के छोइड़ देलक, आउर यीशु के कोड़रा मरुवाय के क्रूस उपरे चढ़ाल जाएक लगिन सिपाहीमन के जिम्मा देई देलक। इकर पाछे यीशु के राजपाल पिलातुस केर सिपाहीमन महल भीतरे लेई गेलैं, आउर हूवाँ सोउब रोमी सिपाहीमन के चाइरो बटे जमा करलैं। आउर उमन यीशु केर लुगा खोइल के उके लाल रंग केर लुगा पिंधालैं। आउर काँटा वाला डाइर से एगो मुकुट बनाय के उकर मूँड़ में पिंधालैं आउर उकर भतखाइया हाँथ में एगो सोंटा धरुवाय देलैं। आउर उकर आगे ठेहुना टेइक के इ कहते उकर मजाक उड़ाएक लगलैं, “हे यहूदीमन केर राजा, जोहार।” आउर उकर उपरे थूकलैं आउर उकर हाँथ से सोंटा लेई के उकर मूँड़ में मारेक लगलैं। इ लेखे यीशु केर मजाक उड़ाएक केर पाछे उमन लाल रंग केर लुगा के खोइल के उकरे लुगा के पिंधालैं आउर यीशु के क्रूस उपरे चढ़ाएक लगिन शहर से बाहरे लेई गेलैं। जब उमन यीशु के शहर से बाहरे लेई जात रहैं तो सिमोन नाँव केर एगो आदमी मिललक, जे कुरेन शहर केर रहेक वाला रहे। उमन उके जबरजस्ती यीशु केर क्रूस के उठाय के लेई जाएक लगिन धारलैं। उमन उ ठाँव में पोहोंचलैं, जे गुलगुता कहायला, जेकर मतलब खोपड़ी केर ठाँव हेके। हूवाँ उमन यीशु के पित्त मिलाल अंगूर केर रस पियेक लगिन देलैं, यीशु उके चाखलक मगर पियेक नी चाहलक। तब सिपाहीमन क्रूस उपरे उकर हाँथ गोड़ के काँटी से ठोइक के चढ़ाय देलैं। इकर पाछे उमन यीशु केर लुगामन के बाँटेक लगिन चिट्ठी साजलैं आउर आपस में उकर लुगामन के बाँइट लेलैं। आउर उमन हूवाँ बाइठ के उकर पहरा देवेक लगलैं। उमन एगो तख्ता में यीशु केर दोष पत्र लीख के उकर मूँड़ उपरे टाइंग देलैं, जेकर में लिखल रहे: “इ यहूदीमन केर राजा यीशु हेके।” आउर उमन यीशु केर संगे दूई झन डाकूमन के एगो के भतखाइया आउर एगो के लेंगा बटे क्रूस उपरे चढ़ालैं। आउर डहर में आवेक-जाएक वालामन मूँड़ हिलाय-हिलाय के उकर निंदा करत रहैं, आउर इ कहत रहैं, “हे, यहूदी मनक मंदिर के गिराएक वाला आउर तीसरा दिन में बनाएक वाला, अगर तोंय परमेश्‍वर केर बेटा हेकिस तो खुद के बचाव आउर क्रूस से उतइर के आव।” एहे लेखे यहूदी मुध पुरोहितमन, मूसा केर नियम के सिखाएक वालामन आउर यहूदी धरम केर अगुवामन हों सोउब मजाक काइर के कहत रहैं, “इ दोसरमन के बचालक, मगर खुद के बचाएक नी पारी। इ तो इसराइल केर राजा हेके। अब क्रूस से उतइर के आवी, तब तो हमरे उकर उपरे बिसवास करब। उ परमेश्‍वर केर उपरे भरसा राइख हे, अगर उ इके चाहेला तो अब इके छोड़ाय लेवोक काले कि इ कइह रहे, ‘मोंय परमेश्‍वर केर बेटा हेकों।’ ” एहे लेखे डाकूमन हों जे यीशु केर संगे क्रूस उपरे चढ़ाल जाय रहैं, ओहोमन उकर निंदा करत रहैं। दिन केर बारह बजे से लेई के तीन बजे तक गोटा धरती अंधार होई गेलक। लगभग तीन बजे यीशु जोर से चिल्लाय के कहलक, “एली, एली लमा शबकतनी?” मतलब “हे मोर परमेश्‍वर, हे मोर परमेश्‍वर, तोंय मोके काले छोइड़ देले?” जे आदमीमन हूवाँ ठड़ाल रहैं, उमन में से थोरेक आदमीमन इ सुइन के कहलैं, “उ तो एलिय्याह के हकाथे।” उमन में से एक झन तुरते कूइद के पाइनसोखा लेई के उके अमल रस में डुबालक आउर सोंटा में चुभाय के यीशु के पियेक लगिन देलक। थोरेक आदमीमन कहलैं, “रहेक देवा, देखब एलिय्याह उके बचाएक लगिन आवेला कि निहीं।” तब यीशु फिन जोर से चिल्लाय के प्राण छोइड़ देलक। आउर उ मोटा परदा जे यहूदी मनक मंदिर में लगाल रहे, उपरे से हेंठे तक फाइट के दूई टुकरा होई गेलक। आउर धरती हिल गेलक आउर चट्टाइनमन फारा होई गेलक। आउर कबरमन खुइल गेलक आउर ढेइर पवितर आदमीमन जेमन मोइर जाय रहैं जी उठलैं। उमन यीशु केर जी उठेक केर पाछे कबरमन में से निकइल के पवितर शहर यरुशलेम में गेलैं, आउर ढेइर आदमीमन के देखाई देलैं। तब सूबेदार जे सौ सिपाही मनक अधिकारी रहे आउर उकर संगे जेमन यीशु केर पहरा देवत रहैं, भूंईडोल आउर जे कोनों होई रहे, उके देइख के खूब डराय गेलैं आउर कहलैं, “सचमुच, इ परमेश्‍वर केर बेटा रहे।” हूवाँ ढेइर बगरा जनानामन जे गलील परदेस से यीशु केर सेवा करते उकर संगे आय रहैं, उमन हों दूर से इके देखत रहैं। उमन में मगदला गाँव केर मरियम, याकूब आउर योसेस केर आयो मरियम आउर जबदी केर बेटामन केर आयो रहैं। तेयारी केर दिन हें साँझ होवेक से आगे अरिमतियाह गाँव केर एगो धनी आदमी आलक। उकर नाँव यूसुफ रहे, जे खुद हें यीशु केर चेला रहे। उ पिलातुस ठिना जाय के यीशु केर लाश माँगलक आउर पिलातुस लाश के उके देई देवेक केर आगया देलक। यूसुफ लाश के उतराय के उके एगो मलमल केर कफन लुगा में लपटलक। आउर उके नवाँ कबर में रखलक, जेके उ अपन लगिन चट्टाइन में खुदवाय रहे, आउर कबर केर दुरा के बंद करेक लगिन एगो बड़का गोल चेपटा पखना के लुढ़काय के चाइल गेलक। आउर मगदला गाँव केर मरियम आउर याकूब आउर योसेस केर आयो मरियम हूवाँ कबर केर आगे बइठल रहैं। अगला दिन आराम केर दिन रहे, यहूदी मुध पुरोहितमन आउर फरीसी दल केर आदमीमन पिलातुस ठिना जमा होई के कहलैं, “हे महाराज, हमरे के याइद अहे कि उ भरमाएक वाला अपन जीते जी कइह रहे, ‘मोंय मोरेक केर पाछे तीसरा दिन फिन जी उठमूँ।’ से लगिन सिपाहीमन के आगया दे कि तीसरा दिन तक कबर केर पहरा करल जाओक, अगर तोंय एइसन नी करबे तो उकर चेलामन आय के उके चोराय के लेई जाबैं आउर आदमीमन से कहबैं, ‘उ मोरलमन में से जी उइठ हे।’ तब पाछे केर धोखा आगे केर धोखा से हों बुरा होवी।” पिलातुस उमन से कहलक, “ठीक अहे, तोहरेमन थोरेक पहरादारमन के लेई के जावा, जेतना तोहर से बनी ओतना रखवाली करुवावा।” उमन सिपाहीमन के अपन संगे लेई के गेलैं, आउर कबर केर दुरा में सील माइर के उके बंद काइर देलैं आउर थोरेक सिपाहीमन के पहरादारी करेक लगिन हूवाँ छोइड़ देलैं, ताकि केऊ दुरा केर पखना के अपन ठाँव से ना हटाओक। यहूदी मनक आराम केर दिन केर पाछे हफ्ता केर शुरु दिन बड़ बिहाने मगदला गाँव केर मरियम आउर दोसर मरियम कबर के देखेक आलैं। ओहे बेरा अचका एगो बड़का भूंईडोल होलक आउर प्रभु केर एगो दूत स्वरग से उतरलक आउर कबर ठिना आय के दुरा केर पखना के लुढ़काय देलक, आउर उकर उपरे बाइठ गेलक। उकर रूप बिजली जइसन आउर उकर लुगा बरफ नियर चरका रहे। उके देइख के पहरादारमन डरे थरथराय गेलैं आउर मोरलमन नियर होई गेलैं। प्रभु केर दूत जनानामन से कहलक, “तोहरेमन ना डरावा! मोंय जानोना कि तोहरेमन यीशु के जे क्रूस उपरे चढ़ाल जाय रहे, खोजाथा। उ हिंयाँ नखे, उ जी उइठ हे। जइसन कि उ कइह रहे। आवा, इ ठाँव के देखा, जहाँ प्रभु रखल जाय रहे, आउर जल्दी जाय के उकर चेलामन से कहबा, ‘उ मोरलमन में से जी उइठ हे, उ तोहरेमन से आगे गलील परदेस जाई, हूवाँ उके देखेक पारबा’ देखा, मोंय तोहरेमन के कइह देलों।” उमन ताजुब होलैं आउर खुशी-खुशी कबर ठिना से जल्दी हें यीशु केर चेलामन के खबर देवेक लगिन कूदते चाइल गेलैं। डहर में यीशु अचका उ जनानामन से भेटालक आउर कहलक, “जोहार” आउर उमन उकर भीरे आय के आउर ठेहुना टेइक के उकर भक्ति करलैं। तब यीशु उमन से कहलक, “ना डरावा, जाय के मोर चेलामन से कइह देबा कि उमन गलील परदेस चाइल जाओक, हुवाँय उमन मोके देखबैं।” जब जनानामन चेलामन के इ खबर बताएक जात रहैं, तब थोरेक पहरादारमन हों नगर में आय के पूरा हाल के यहूदी मुध पुरोहितमन के बतालैं। तब उमन धरम केर अगुवामन केर संगे जमा होई के सलहा करलैं आउर सिपाहीमन के ढेइर चाँदी देई के कहलैं, “तोहरेमन इ कहबा कि राइत के जब हमरे निंदात रही, तो उकर चेलामन आय के उके चोराय के लेई गेलैं। अगर इ गोइठ राजपाल के पता चली तो हमरे उकर से गोठियाब, तोहरेमन के चिंता करेक केर जरुरत नखे।” उमन रुपया लेई लेलैं आउर जइसन सिखाल जाय रहैं, तइसनेहें करलैं। इ गोइठ फाइल गेलक आउर आइज तक यहूदीमन में एहे चलते आवाथे। तब यीशु केर गारह चेलामन गलील परदेस में उ पहार उपरे गेलैं, जहाँ जाएक लगिन यीशु उमन के बताय रहे। आउर चेलामन उके देइख के उकर भक्ति करलैं, मगर केऊ-केऊ के शंका होलक कि उ जिंदा होई जाहे। यीशु उमन ठिना आय के कहलक, “स्वरग आउर धरती केर समूचा अधिकार मोके देवल जाय हे। से लगिन तोहरेमन जाय के सोउब जाइत केर आदमीमन के चेला बनावा आउर उमन के एगो चिन्हा केर रूप में आबा, आउर बेटा, आउर पवितर आत्मा केर नाँव से बपतिस्मा जल संस्कार देवा, आउर उमन के सोउब गोइठमन के जे मोंय तोहरेमन के आगया देई हों, मानेक लगिन सिखावा: आउर देखा, मोंय दुनिया केर अंत तक सोउब बेरा तोहरेमन केर संगे अहों।” इ किताब में परमेश्‍वर केर बेटा, यीशु मसीह केर बारे में शुभ समाचार लिखल अहे। जे संदेश पोंहचाएक वाला केर बारे में यशायाह लीख हे, उ यूहन्ना रहे। उ आलक आउर अपन सेवा यरदन नदी केर भीरे सुनसान ठाँव में शुरु करलक। जेमन यूहन्ना ठिना आवत रहैं उमन के यूहन्ना इ बतात रहे, “पाप करेक छोइड़ देवा आउर बपतिस्मा जल संस्कार लेवा, तब परमेश्‍वर तोहरेमन केर पापमन के क्षमा करी।” यहूदिया परदेस केर कायनों गाँव से, आउर यरुशलेम शहर से ढेइर आदमीमन निकइल के यूहन्ना केर उपदेस सुनेक लगिन उकर ठिना आलैं, आउर सुइन के अपन पापमन के मानलैं। तब यूहन्ना उमन के यरदन नदी में बपतिस्मा जल संस्कार देलक। यूहन्ना ऊँट केर रोवाँ केर बनाल एगो साधारण लुगा पिंधत रहे, आउर अपन डाँड़ा में चमड़ा केर कसना बाँधल रहत रहे। उ फेनगा आउर बनमाउद केर रस खात रहे। उ इ परचार करत रहे, “मोर पाछे एगो आदमी जल्दी आवेक वाला अहे, जे मोर से शक्तिशाली अहे। मोंय तो उकर धांगर केर लाएक हों नखों कि निहइर के उकर जूतामन केर बाँधल डोरा के खोलेक पारमूँ। मोंय तो तोहरेमन के सिरिफ पानी से बपतिस्मा जल संस्कार देई हों, लेकिन उ तोहरेमन के पवितर आत्मा से बपतिस्मा देवी।” जब यूहन्ना आदमीमन के उपदेस आउर बपतिस्मा जल संस्कार देवत रहे, उ बेरा यीशु गलील परदेस केर नासरत नगर से उकर ठिना आलक, आउर यरदन नदी में यूहन्ना से बपतिस्मा जल संस्कार लेलक। आउर जब उ पानी से निकइल के उपरे आलक, तो तुरते स्वरग के खुलते आउर पवितर आत्मा के पेरवाँ केर रूप में अपन उपरे उतरते देखलक। तब स्वरग से परमेश्‍वर केर आवाज आलक, “तोंय मोर दुलार बेटा हेकिस। तोर से मोंय ढेइर खुश अहों।” इकर पाछे पवितर आत्मा तुरते उके सुनसान ठाँव बटे भेजलक। सुनसान ठाँव में यीशु चालीस दिन तक रहलक, हूवाँ सिरिफ बान केर जानवरमन रहत रहैं। शैतान उके चालीस दिन तक परखलक; मगर स्वरगदूतमन उकर सेवा करते रहलैं। थोरेक दिन केर पाछे राजा हेरोदेस यूहन्ना के धरुवाय के जेहेल में भितरुवाय देलक। तब यीशु गलील परदेस में घूइर आलक, आउर आदमीमन के परमेश्‍वर केर राइज केर शुभ समाचार बताएक लगलक। आउर कहलक, “परमेश्‍वर केर ठहराल समय पूरा होई जाय हे, आउर परमेश्‍वर केर राइज भीरे पोंहइच जाय हे, पाप करेक छोइड़ देवा आउर शुभ समाचार केर उपरे बिसवास करा।” एक दिन यीशु गलील झील केर किनारे-किनारे जात रहे, उ बेरा यीशु सिमोन आउर उकर छोट भाई अन्द्रियास के देखलक। उमन मछुवा रहैं आउर मछरी धारेक ले झील में जाल फेकत रहैं। यीशु उमन से कहलक, “मोर पिछे होई लेवा आउर मोर चेला बाइन जावा। आइज तक तोहरेमन मछरी धारत रहा, मगर अब मोंय तोहरेमन के सिखामूँ कि आदमीमन के मोर ठिना बिसवास में कइसन लानेक अहे।” उमन तुरते जालमन आउर मछरी धारेक केर काम के छोइड़ के, यीशु केर चेला बनेक लगिन उकर संगे चाइल गेलैं। आउर यीशु हूवाँ से थोरेक दूर आगे गेलक तो जबदी केर बेटा याकूब, आउर उकर छोट भाई यूहन्ना के देखलक। उ दुयो अपन आबा केर संगे मछरी धारेक लगिन डोंगा उपरे जाल के सरियात रहैं। यीशु तुरते दुयो भाई के अपन ठिना बोलालक आउर उमन से कहलक, “मोर संगे आवा आउर मोर चेला बाइन जावा।” उ दुयो अपन आबा जबदी के कमियामन केर संगे डोंगा उपरे छोइड़ के यीशु केर चेला बनेक लगिन उकर संगे चाइल गेलैं। यीशु आउर उकर चेलामन कफरनहूम नगर में आलैं, तब जइसनेहें यहूदी मनक आराम केर दिन आलक, यीशु यहूदी मनक प्रार्थना घर में गेलक आउर उपदेस देवेक लगलक। आदमीमन उकर उपदेस के सुइन के ताजुब होई गेलैं, काले कि यीशु उमन के मूसा केर नियम के सिखाएक वालामन नियर निहीं, मगर इ लेखे सिखात रहे कि उके सिखाएक केर अधिकार अहे। जेखन यीशु उपदेस देवत रहे, से बेरा यहूदी मनक प्रार्थना घर में एगो आदमी बइठल रहे, जेके भूत धाइर रहे। उ आदमी चिल्लाय के कहलक, “हे नासरत नगर केर रहेक वाला यीशु, तोंय हमरे से का चाहिसला? का तोंय हमरे के नाश करेक आय हिस? मोंय तोके जानोना कि तोंय केहर हेकिस? तोंय परमेश्‍वर केर पवितर आदमी हेकिस, तोंय परमेश्‍वर बटले आय हिस।” यीशु भूत के घुड़इक के कहलक, “चुप रह; आउर उ आदमी में से निकइल जा।” तब भूत उके आँइठ के आउर जोर से चिल्लाय के उकर में से निकइल गेलक। तब जेतना आदमीमन यहूदी मनक प्रार्थना घर में रहैं, सोउबमन ताजुब होई के एक दोसर से पूछेक लगलैं, “इ कोन लेखे केर उपदेस हेके? उ अधिकार केर साथ नवाँ उपदेस देवेला। उ भूतमन के हों आगया देवेला आउर उमन उकर आगया के मानैना।” इकर पाछे उ आदमीमन यीशु केर बारे में ढेइर आदमीमन के बतालैं, आउर जल्दी हें उकर नाँव गलील परदेस केर दूर-दूर केर गाँवमन में फाइल गेलक। यीशु अपन चेलामन केर संगे यहूदी मनक प्रार्थना घर से बाहरे निकइल के, तुरते याकूब आउर यूहन्ना केर संगे सिमोन आउर अन्द्रियास केर घर आलक। उ बेरा सिमोन केर साइस जार से कुंहरत रहे आउर डिसना में सुतल रहे। जइसनेहें यीशु हूवाँ पोहोंचलक, उमन उके बतालैं कि सिमोन केर साइस के जार धाइर हे। तब यीशु सिमोन केर साइस ठिना जाय के उकर हाँथ धाइर के उके उठालक, आउर उकर जार उतइर गेलक आउर उकर साइस उमन केर सेवा सुसइर करेक लगलक। जब यहूदी मनक आराम केर दिन बीत गेलक आउर बेइर डूइब गेलक, तो आदमीमन सोउब बेमरियामन के आउर भूत धारल आदमीमन के उकर ठिना लानलैं। आउर आदमी मनक भीड़ दुरा केर बाहरे जमा होई गेलक। आउर जेमन बरने-बरन केर बेमारी से दुःखी रहैं उमन के यीशु ठीक करलक, उ भूत धारल ढेइर आदमीमन के हों छुटकारा देलक। मगर भूतमन के कोनों कहेक नी देलक, काले कि भूतमन जानत रहैं कि उ परमेश्‍वर केर बेटा हेके। बिहान के बेइर उगेक केर ढेइर आगे यीशु उइठ के एगो सुनसान ठाँव में गेलक, आउर प्रार्थना करेक लगलक। जब सिमोन आउर उकर संगमन के पता चललक कि यीशु हिंयाँ नखे, तो उमन यीशु के खोजेक गेलैं। जब उ मिललक, तो उकर से कहेक लगलैं, “ढेइर आदमीमन तोके खोजाथैं।” यीशु उमन से कहलक, “आवा, हमरे आसे-पासे केर गाँवमन में जाब कि मोंय हूवाँ केर आदमीमन के हों परमेश्‍वर केर संदेश के सुनामूँ। काले कि दुनिया में आवेक केर मोर एहे इरादा हेके।” तब यीशु गोटा गलील परदेस केर ढेइर नगरमन में गेलक, आउर हूवाँ केर यहूदी मनक प्रार्थना घर में जाय-जाय के परचार करलक आउर भूतमन के हों निकलालक। एक दिन एगो आदमी यीशु ठिना आलक। उ आदमी केर कोढ़ बेमारी रहे, यीशु केर आगे ठेहुनाय के बिनती करलक, “मोके ठीक काइर दे, काले कि मोंय जानोना कि अगर तोंय चाहबे तो मोके ठीक करेक पारबे।” यीशु उकर उपरे तरइस के हाँथ बढ़ालक आउर उके छुई के कहलक, “मोंय तोके ठीक करेक चाहोना, ठीक होई जा।” आउर उ तुरते कोढ़ बेमारी से पूरा-पुरी ठीक होई गेलक। उ आदमी हूवाँ से चाइल गेलक। मगर बाहरे जाय के इ गोइठ के ढेइर आदमीमन के बतालक, “यीशु मोके ठीक काइर हे।” इ लगिन यीशु नगर में फिन खुल्लम-खुल्ला नी जाएक पारलक। मगर उ नगर से बाहरे सुनसान ठाँव में रहलक, आउर चाइरो बटे से आदमीमन उकर ठिना आते रहलैं। थोरेक दिन केर पाछे यीशु फिन कफरनहूम नगर में घूइर आलक। हूवाँ केर आदमीमन के पता होलक कि यीशु घर में अहे। तब एतना आदमीमन जमा होलैं कि दुरा ठिना हों ठाँव नी मिललक, आउर यीशु उमन के परमेश्‍वर केर बचन सुनात रहे। आउर आदमीमन एगो लकवा मारल आदमी के चाइर झन आदमीमन से उठवाय के यीशु ठिना लेई लानलैं। मगर उमन भीड़ केर चलते यीशु ठिना नी पोंहचेक पारलैं, से लगिन उमन उ घर केर छाइन केर थोरेक खपरा के उजराय के बड़का टोका काइर देलैं, जेकर हेंठे यीशु रहे, आउर जब उके टोका करलैं, तब उ टोका से उ पटिया के जेकर में लकवा मारल आदमी सुतल रहे, यीशु केर आगे उतराय देलैं। जब यीशु इ जानलक कि उ आदमीमन मोर उपरे बिसवास करैना कि मोंय ठीक करेक पारोना, उ लकवा मारल आदमी से कहलक, “हे बेटा, मोंय तोर पाप के क्षमा करोना।” हूवाँ मूसा केर नियम के सिखाएक वाला थोरेक आदमीमन बाइठ रहैं, आउर जे गोइठ यीशु कइह रहे उकर बारे में अपन-अपन मन में बिचार करेक लगलैं, “इ आदमी के एइसन गोइठ नी कहेक चाही, एइसन गोइठ से परमेश्‍वर केर निंदा होवेला काले कि परमेश्‍वर के छोइड़ के आउर केऊ पाप क्षमा करेक नी पारबैं।” यीशु तुरते अपन आत्मा में जाइन गेलक कि उमन मोर गोइठ केर बारे में अपन-अपन मन में का बिचार कराथैं, आउर उमन से कहलक, “तोहरेमन अपन-अपन मन में इ बिचार काले कराथा? मोर लगिन इ कहेक का सहज अहे कि तोर पाप क्षमा होलक, या उके इ कहेक कि उठ अपन पटिया के उठाय के चल फिर? मगर मोंय चाहोना कि तोहरेमन इ गोइठ के जाइन लेवा कि मोंय आदमी केर बेटा धरती में पाप क्षमा करेक केर हों अधिकार रखोना।” तब यीशु उ लकवा मारल आदमी से कहलक, “मोंय तोर से कहाथों, उठ! अपन पटिया के उठाय के अपन घर चाइल जा।” तुरते उ आदमी उठलक, आउर अपन पटिया के उठाय के सोउब केर देखते-देखते हूवाँ से बाहरे निकइल के चाइल गेलक। इ घटना के देइख के सोउब आदमीमन चकित होई गेलैं, आउर परमेश्‍वर केर बड़ाई काइर के कहेक लगलैं, “हमरेमन एइसन कहियो नी देइख रही।” यीशु एक बेर फिन निकइल के गलील केर झील किनारे गेलक। आउर हूवाँ ढेइर आदमीमन उकर ठिना आलैं, आउर उ आदमीमन के परमेश्‍वर केर बचन से उपदेस देवेक लगलक। उपदेस देवेक केर पाछे जब यीशु जात रहे, तब हलफई केर बेटा लेवी नाँव केर एगो आदमी के देखलक, जेकर दोसर नाँव मत्ती रहे। उ अपन मालगुजारी लेवेक केर ठाँव में बइठल रहे। यीशु उकर से कहलक, “मोर पिछे होई ले आउर मोर चेला बाइन जा।” लेवी उठलक आउर उ ठाँव के छोइड़ के यीशु केर संगे चाइल गेलक। थोरेक दिन केर पाछे यीशु आउर उकर चेलामन लेवी केर घर में खाएक लगिन बाइठ रहैं। आउर ढेइर मालगुजारी लेवेक वालामन आउर दोसर आदमीमन हों हूवाँ रहैं जेमन पापी जानल जात रहैं। उमन हों यीशु केर गोइठ के मानत रहैं आउर ओहोमन उमन संगे खात रहैं। इ लेखे से ढेइर आदमीमन रहैं जेमन यीशु केर संगे हर ठाँव में जात रहैं। मूसा केर नियम के सिखाएक वालामन जे फरीसी दल केर आदमीमन में से रहैं, इ देइख के कि उ तो पापीमन आउर मालगुजारी लेवेक वालामन केर संगे खाथे। उमन यीशु केर चेलामन से कहलैं, “उ तो मालगुजारी लेवेक वालामन आउर पापीमन केर संगे खायला-पियेला।” जब यीशु इ सुनलक तब उमन से कहलक, “भला-चंगा आदमीमन के बाइध केर दरकार नखे, मगर बेमरियामन के अहे। मोंय उमन के पाप करेक से छोड़वाय के बोलाएक नी आय हों, जेमन खुद के धरमी बुझैना, मगर मोंय उमन के पाप करेक से छोड़वाय के बोलाएक आय हों, जेमन जानैना कि हमरे पापी अही।” एक दिन यूहन्ना बपतिस्मा जल संस्कार देवेक वाला केर चेलामन आउर फरीसी दल केर आदमीमन उपास करत रहैं, मगर यीशु केर चेलामन नी करत रहैं। ओहे दिन थोरेक आदमीमन यीशु ठिना आलैं आउर पूछलैं, “यूहन्ना केर चेलामन आउर फरीसी आदमीमन उपास करैना, मगर तोर चेलामन उपास काले नी करैना?” यीशु उमन के जबाब देलक, “जब तक मोंय अपन चेलामन केर संगे अहों, उमन उपास कइसन करबैं? उमन नी करबैं काले कि उमन खुश अहैं, ठीक ओहे लेखे जइसन दूल्हा जब तक अपन संगमन केर संगे रही, उमन उपास नी करबैं। मगर उ दिनमन आवी कि दूल्हा उमन से अलग कराल जाई, उ बेरा उमन उपास करबैं। आदमीमन नवाँ लुगा केर टुकरा के पुरना लुगा संगे नी टसैना। निहीं तो धोवल जाएक से नवाँ टुकरा सिकुइड़ जाई, आउर पुरना लुगा के आउर फाइर देवी, तब पुरना लुगा केर टोका ढेइर बड़का होई जाई। एहे लेखे नवाँ अंगूर केर रस के पुरना चमड़ा केर थैला में केऊ नी रखैना, रखेक से अंगूर केर रस से फेन उठी आउर पुरना चमड़ा केर थैला नी फैलेक केर चलते फाइट जाई। इ लेखे अंगूर केर रस आउर चमड़ा केर थैला दुयो बरबाद होई जाई। इ लगिन अंगूर केर नवाँ रस के नवाँ चमड़ा केर थैला में रखैना।” एक बेर यहूदी मनक आराम केर दिन में यीशु आउर उकर चेलामन अन्न केर खेतमन में से होई के जात रहैं, तब उकर चेलामन हिंठते-हिंठते बाइलमन के तोइर के खाएक लगलैं। तब थोरेक फरीसी दल केर आदमीमन यीशु से कहलैं, “देख, तोर चेलामन जे काम यहूदी मनक आराम केर दिन कराथैं, उ मूसा केर नियम केर बिरोध हेके, तोके उमन के एइसन काम करेक से रोकेक चाही।” आउर यीशु उमन के कहलक, “परमेश्‍वर यहूदी मनक आराम केर दिन के आदमीमन लगिन बनाय हे, ना कि आदमीमन के आराम केर दिन लगिन बनाय हे। से लगिन मोंय आदमी केर बेटा यहूदी मनक आराम केर दिन केर हों मालिक हेकों।” फिन यीशु यहूदी मनक प्रार्थना घर में गेलक आउर हूवाँ एगो आदमी रहे, जेकर हाँथ सूइख जाय रहे। आउर फरीसी आदमीमन यीशु केर उपरे दोष लगाएक लगिन मोका खोजत रहैं कि यीशु यहूदी मनक आराम केर दिन में हाँथ सुखल आदमी के बेस करेला कि निहीं। यीशु हाँथ सुखल आदमी से कहलक, “सोउब आदमीमन केर माझे ठड़ाव।” आउर यीशु फरीसी आदमीमन से कहलक, “का यहूदी मनक आराम केर दिन मूसा केर नियम केर मोताबिक भला करेक ठीक अहे या बुरा करेक, जीउ के बचाएक ठीक अहे या मोराएक?” मगर उमन कोनों जबाब नी देलैं। यीशु चाइरो बटे देखलक आउर उ मनक ढींठ के देइख के उदास होई गेलक, तब यीशु उमन के खिसे देइख के हाँथ सुखल आदमी के कहलक, “अपन हाँथ के बढ़ाव” उ बढ़ालक, आउर तुरते उकर हाँथ ठीक होई गेलक। तब फरीसी दल केर आदमीमन बाहरे निकइल के तुरते हेरोदेस राजा केर साथ देवेक वालामन केर संगे, यीशु केर बिरोध में सलहा करेक लगलैं कि उके का लेखे माइर मोराब। आउर यीशु अपन चेलामन से कहलक, “मोर बइठेक लगिन एगो छोटका डोंगा लेई लाना होले आदमीमन मोके ना ढेकलोक।” ओहे दिन यीशु ढेइर आदमीमन के ठीक काइर रहे। से लगिन बेमरिया आदमीमन उके छुवेक ले ढेकला-ढेकली होवत रहैं ताकि उमन ठीक होई जाओक। जखनोहों भूत धारल आदमीमन यीशु के देखत रहैं, उके आदर देवेक लगिन उकर आगे गिरत रहैं आउर चिल्लाय के कहत रहैं, “तोंय परमेश्‍वर केर बेटा हेकिस।” यीशु भूतमन के कड़ा चेतावनी देते कहलक, “आदमीमन के ना बतावा कि मोंय केहर हेकों।” उकर पाछे यीशु पहार उपरे चाइढ़ गेलक आउर जेमन के अपन चेला बनाएक ले पतियात रहे, उमन के अपन ठिना बोलालक, आउर उमन भीड़ में से निकइल के उकर ठिना आलैं। तब यीशु उमन में से बारह गो आदमीमन के चुनलक आउर उमन के खास चेला कहलक। यीशु एइसन इ लगिन करलक कि उमन उकर संगे-संगे रहबैं, आउर उ, बचन केर परचार करेक लगिन उमन के भेजेक पारी। आउर उमन भूतमन के निकलाएक केर अधिकार रखबैं। इ बारह खास चेलामन इमन हेकैं: सिमोन जेकर नाँव उ पतरस रखलक। आउर जबदी केर बेटा याकूब, आउर याकूब केर छोटका भाई यूहन्ना, जेकर नाँव उ बूअनरगिस रखलक, जेकर माने गरजन केर बेटा हेके। सिमोन केर छोटका भाई अन्द्रियास, आउर फिलिप्पुस, बरतुल्मै, मत्ती, थोमा, हलफई केर बेटा याकूब, तद्दै, आउर दोसर सिमोन, जे उ क्रांतिकारी दल केर सदस्य रहे, जे रोमी सरकार केर बिरोध में रहे। आउर यहूदा इस्करियोती जे करियोत गाँव केर रहेक वाला रहे, जे पाछे यीशु के धरुवइयो देलक। इकर पाछे यीशु आउर उकर चेलामन एगो घर में गेलैं, आउर हूवाँ एतना आदमीमन जमा होई गेलैं कि यीशु आउर उकर चेलामन के खाएक केर हों समय नी मिललक। जेखन यीशु केर परिवार वालामन इकर बारे में सुनलैं, तो उमन अपन संगे यीशु के घर लेगेक लगिन हूवाँ आलैं। काले कि उमन कहत रहैं कि उकर दिमाग ठीक नखे। आउर जे मूसा केर नियम के सिखाएक वालामन यरुशलेम शहर से आय रहैं, उमन कहत रहैं, “यीशु में शैतान अहे, आउर उ, भूतमन केर सरदार केर मदइत से भूतमन के निकलायला।” यीशु उमन के अपन ठिना बोलालक आउर उदाहरन देई के कहेक लगलक, “का शैतान अपनेहें भूतमन के आदमीमन से बाहरे निकलेक लगिन मजबूर करी? निहीं, एकदम निहीं। अगर एक राइज केर आदमीमन एक दोसर से लड़ते रहबैं, तो उमन केर राइज बगरा समय तक नी टिकी। एहे लेखे कोनों घर केर आदमीमन एक दोसर से लड़ते रहबैं, तो उ घर सोउब दिन लगिन कइसन बनल रही? आउर अगर शैतान अपनेहें बिरोधी बाइन के अपन बिरोध में काम करी, तो उकर हिंयाँ अनबन होई जाई आउर उ टिकेक नी पारी, मगर उ तो नाश होई जाई।” “केऊ आदमी कोनों बलवान आदमीमन केर घर में ढूइक के उकर चीज के लुटेक नी पारी, जब तक कि उ आगे बलवान आदमी के बाइंध नी लेवी, इकर पाछे हें उकर घर के लुटेक पारी।” “मोंय तोहरेमन से सच कहाथों कि आदमीमन केर सोउब रकम केर पाप आउर निंदा, जेके उमन परमेश्‍वर केर बिरोध में करैना, क्षमा करल जाई। मगर जे केऊ पवितर आत्मा केर बिरोध में निंदा करेला, उकर पाप कहियो क्षमा नी करल जाई: मगर परमेश्‍वर उके सोउब दिन लगिन दोषी ठहराई।” काले कि उमन इ कहत रहैं कि उकर में भूत अहे। जब यीशु केर आयो आउर उकर छोट भाईमन हूवाँ पोहोंचलैं। तो उमन घर केर बाहरे हें ठड़ाल रहलैं आउर यीशु के बोलाएक लगिन कइह भेजलैं। काले कि यीशु केर चाइरो बटे ढेइर आदमीमन बइठल रहैं, आउर उ आदमीमन यीशु से कहलैं, “देख, तोर आयो आउर तोर छोट भाईमन बाहरे तोके खोजाथैं।” यीशु उ आदमीमन से पूछलक, “मोर आयो आउर मोर भाईमन केमन हेकैं?” तब यीशु अपन चाइरो बटे बइठल आदमीमन बटे देइख के कहलक, “देखा, मोर आयो आउर मोर भाईमन एहेमन हेकैं। काले कि जे केऊ परमेश्‍वर केर इच्छा केर मोताबिक चलेला, ओहे मोर भाई, बहिन, आउर आयो हेके।” यीशु फिन गलील झील केर किनारे उपदेस देवेक लगलक, आउर उकर ठिना एतना बगरा भीड़ जमा होई गेलक कि उके झील में एगो डोंगा में चाइढ़ के बइठेक पड़लक, आउर भीड़ केर सोउब आदमीमन यीशु बटे मुँहराय के झील केर किनारे भूंई में ठड़ाय रहलैं। यीशु उमन के उदाहरन देई के ढेइर हें गोइठमन के सिखाएक लगलक, आउर उमन से कहलक, “सुना, एगो किसान बिहीन बुनेक लगिन निकललक। आउर बुनते-बुनते थोरेक बिहीन डहर केर किनारे गिरलक, आउर चरईमन आय के उके खाय देलैं। आउर थोरेक बिहीन रुगड़ी भूंई केर उपरे गिरलक, हूवाँ माटी ढेइर कम रहे सेले जल्दी ओंकइर आलक। आउर जब बेइर उगलक तो उकर गरमी से उ मुरझाय गेलक, आउर जाइर नी धारेक केर चलते सूइख गेलक। आउर थोरेक बिहीन काँटा झूँड़ में गिरलक आउर काँटा झूँड़ बाइढ़ के उके दबाय देलक, आउर उ नी फारलक। लेकिन थोरेक बिहीन उपजाऊ भूंई उपरे गिरलक, आउर उ ओंकइर के फूललक-फारलक, आउर केऊ तीस गुणा, केऊ साठ गुणा, आउर केऊ सौ गुणा फार लानलक।” आउर यीशु कहलक, “जे केऊ मोर इ गोइठ के धेयान से सुनाथा, उमन इकर बारे में समझेक केर कोशिश करा।” जब यीशु एकले रहे, तो उकर संगमन आउर उकर बारहों झन खास चेलामन, यीशु ठिना आय के इ उदाहरन केर बारे में पूछलैं। यीशु उमन के जबाब देलक, “तोहरेमन के तो परमेश्‍वर केर राइज केर भेद के जानेक केर समझ देवल जाय हे, मगर उमन के जेमन मोर उपरे बिसवास नी करैना सोउब गोइठमन के उदाहरन से बताल जायला। जइसन पवितर किताब में लिखल अहे, ‘उमन देखेक तो पारबैं मगर उमन के कोनों ना सुझोक, सुनेक तो पारबैं मगर कोनों ना बुझोक, कहीं एइसन ना होवोक कि उमन मोर बटे घुरबैं, आउर उमन के क्षमा करल जाई।’ ” सेकर पाछे यीशु उमन से कहलक, “का तोहरेमन इ उदाहरन के नी बुझेक पारला? तो फिन आउर उदाहरन केर अर्थ कइसन बुझबा, जेके मोंय बताएक वाला अहों?” तब यीशु कहलक, “इ उदाहरन केर अर्थ इ हेके, बिहीन बुनेक वाला आदमी उ हेके, जे परमेश्‍वर केर बचन के परचार करेला। थोरेक आदमीमन उ डहर किनारे केर भूंई नियर अहैं, जेकर उपरे बिहीन गिरलक, उमन परमेश्‍वर केर बचन के तो सुनैना, मगर शैतान तुरते आय के उ मनक मन से बचन के मेटाय देवेला, जे बचन के उमन सुइन रहैना। एहे लेखे थोरेक आदमीमन उ रुगड़ी भूंई नियर अहैं जेकर उपरे बिहीन गिरलक, उमन बचन के सुइन के तुरते रिझे-रिझे अपनाय लेवैना। मगर उमन बचन के अपन मन में भीतरे तक बसेक नी देवैना, सेले उमन थोरे हें दिनमन लगिन रहैना। इकर पाछे जब बचन केर चलते उ मनक उपरे बिपइत या ससइत आवेला, तो उमन तुरते परमेश्‍वर केर बचन उपरे बिसवास करेक छोइड़ देवैना। एहे लेखे थोरेक आदमीमन उ भूंई नियर अहैं जहाँ काँटा झूँड़ अहे, जेकर उपरे बिहीन गिरलक, उमन बचन के तो सुनैना। मगर दुनिया केर चिंता-फिकिर, आउर धन केर मोह-माया, आउर चीज-बसूत केर लोभ, उ मनक मन में भाइर जायला आउर बचन के दबाय देवेला, आउर उमन बेगर फार केर जिंदगी जियैना। आउर एहे लेखे थोरेक आदमीमन उ उपजाऊ भूंई नियर अहैं, जेकर में बिहीन बुनल गेलक, उमन बचन सुइन के उके अपनाय लेवैना आउर अपन जिंदगी में बढ़ियाँ फार लानैना, केऊ तीस गुणा, केऊ साठ गुणा, आउर केऊ सौ गुणा।” यीशु उमन से आगे कहलक, “आदमीमन दीया के बाइर के पइला से नी ढपैना चाहे खटिया केर हेंठे नी रखैना, उके चौखट में रखैना, होले उकर इंजोत सोउब के दिसोक। एहे लेखे परमेश्‍वर हर उ गोइठमन के दिस्तार करी, जेके आदमीमन अब तक नी जानैना। आउर उ सोउब भेद केर गोइठमन के दिस्तार करी, जे अब तक लुकल अहे। अगर केऊ मोर इ गोइठ के धेयान से सुनाथा, उमन इकर बारे में समझेक केर कोशिश करा।” उकर पाछे यीशु उमन से कहलक, “जे कुछ तोहरेमन सुनाथा, धेयान से सुना। जेतना बगरा तोहरेमन धेयान से सुनबा, ओतनेहें बगरा समझ तोहरेमन के देवल जाई, बल्कि तोहरेमन आउर हें बगरा समझबा। काले कि जेके समझेक केर इच्छा अहे, परमेश्‍वर उके आउर समझ देई, मगर जे समझेक केर इच्छा नी रखेला कि मोंय का सिखाथों, तो उकर ठिना जे समझ अहे, परमेश्‍वर उखो उकर से लेई लेवी।” फिन यीशु उमन से कहलक, “परमेश्‍वर केर राइज उ किसान जइसन अहे, जे खेत में बिहीन बुनेला। आउर बुइन के उके छोइड़ देवेला आउर बे फिकिर होई के अपन काम करते रहेला आउर बिहीन एइसन ओंकइर के बढ़ेला, जेके उ नी जानेला कि इ एइसन कइसन होवाथे। जमीन तो खुद से फसल उपजायला आगे नोगजा, तब बाइल, आउर उकर पाछे बाइलमन में पोठ माँजी। आखरी में जब कटनी केर समय आवेला आउर फसल पाइक जायला, तब किसान आय के हसुँवा से इके काइट लेवेला।” फिन यीशु कहलक, “मोंय तोहरेमन के एगो आउर उदाहरन बताथों, इ देखाएक लगिन कि परमेश्‍वर केर राइज कइसन अहे। उ राई केर माँजी लेखे अहे, आउर भूंई केर सोउब बिहीनमन में से छोट अहे। मगर जब बुनल जायला, तो उ ओंकइर के सोउब बुदामन में से बड़का होई जायला, आउर उकर में एइसन बड़का-बड़का डाइरमन निकलेला कि आकाश केर चरईमन उकर में खोंता बनाय के रहेक पारैना।” यीशु एहे नियर ढेइर उदाहरन देई-देई के उमन केर बुझेक केर मोताबिक बचन सुनात रहे। यीशु आदमीमन के परमेश्‍वर केर राइज केर बारे में बताएक लगिन सोउब बेरा उदाहरन देई के बतात रहे, मगर अलगे अपन चेलामन के सोउब गोइठमन केर अर्थ बतात रहे। ओहे दिन जब साँझ होलक, तो यीशु चेलामन से कहलक, “आवा, हमरे गलील झील केर उ पाखी जाब।” आउर भीड़ के ओहे ठिना छोइड़ के चेलामन यीशु के जइसन रहे, तइसनेहें अपन संगे डोंगा में तुरते लेई गेलैं, आउर उ मनक संगे आउर हों डोंगा रहे। जब उमन झील के पार करत रहैं, तब एगो जोरदार आँधी-धुका आलक, आउर पानी केर लहरा एतना उठलक कि उ डोंगा से टकरात रहे आउर डोंगा पानी से भाइर जात रहे। यीशु डोंगा केर पिछे बटे मुड़सिरवा लगाय के निंदात रहे, तब चेलामन उके जगाय के उकर से कहलैं, “हे गुरु, हमरे डुबेक वाला अही, का तोके इकर फिकिर नखे?” तब यीशु उइठ के आँधी-धुका के डाँटलक आउर लहरा से कहलक, “स्थिर रह, थइम जा,” आउर आँधी-धुका थइम गेलक आउर सोउब कुछ स्थिर होई गेलक। यीशु चेलामन के देइख के कहलक, “तोहरेमन काले डराला? का तोहरेमन के एखन तक हों बिसवास नखे?” इ घटना के देइख के उमन आउर हें बगरा डराय गेलैं आउर एक-दोसर से कहलैं, “इ केहर हेके? आँधी-धुका आउर पानी केर लहरा हों इकर आगया के मानैना।” यीशु आउर उकर चेलामन गलील झील केर उ पाखी गिरासेनी परदेस में पोहोंचलैं। आउर जब यीशु डोंगा से उतरलक तो एगो आदमी जेकर में भूत रहे मसना से निकइल के उकर ठिना आलक। उ आदमी मसनामन में हें रहत रहे। आउर केऊ हों आदमीमन उके सिकड़ से हों नी बाँधेक पारत रहैं। काले कि उ कायनों बेर बेरी आउर सिकड़ से बाँधल जाय रहे, मगर उ सिकड़मन के टुटाय देलक, आउर बेरीमन के हों टुकरा-टुकरा काइर देई रहे, उके केऊ हों काबू में रखेक नी पारत रहैं। उ लगातार दिन राइत मसना आउर पहारमन में चिल्लाते रहत रहे आउर खुद के हें पखना से घाव करत रहे। उ यीशु के दूर से देखलक आउर कूइद के उकर ठिना आलक आउर ठेहुना टेइक के उके प्रणाम करलक। आउर जोर से चिल्लाय के कहलक, “हे यीशु, परमप्रधान परमेश्‍वर केर बेटा, मोके तोर से का काम अहे? मोंय तोर से परमेश्‍वर केर नाँव से बिनती कराथों कि मोके ना सताव।” उ आदमी एइसन इ लगिन कहलक काले कि यीशु उके आगे हें कइह देई रहे, “हे भूत, इ आदमी में से निकइल जा।” यीशु भूत से पूछलक, “तोर का नाँव हेके?” उ यीशु से कहलक, “मोर नाँव ‘फौज’ हेके, काले कि हमरे ढेइर अही।” आउर भूत यीशु से ढेइर बिनती करलक, “हमरे के इ परदेस से बाहरे ना भेज।” हूवाँ पहार केर उपरे सुवइरमन केर गोंहड़ा चरत रहे। आउर भूतमन उकर से बिनती काइर के कहलैं, “कि हमरे के सुवइरमन में भेइज दे, कि हमरे उ मनक भीतरे जाब।” यीशु उमन के आगया देलक आउर भूतमन निकइल के सुवइरमन केर भीतरे ढूइक गेलैं आउर गोंहड़ा जे करीब दूई हजार सुवइरमन केर रहे, पहार से हेंठे तेज ढलाउन में कूदते गलील झील में जाय डुबलैं, आउर सुवइर चरवाहामन नगर आउर गाँव में भाइग के जे कुछ होई रहे इ खबर के आदमीमन के सुनालैं, आउर उमन उके देखेक लगिन हूवाँ आलैं। उमन यीशु ठिना आय के उके जेकर में भूतमन रहैं, लुगा पिंधल आउर पूरा होस में बइठल देइख के डराय गेलैं। आउर जेमन इ घटना के देइख रहैं, उमन आदमीमन के बतालैं कि भूत धारल आदमी आउर सुवइरमन संगे का-का होई हे। तब गिरासेनी परदेस केर आदमीमन यीशु से बिनती काइर के कहेक लगलैं, “हमर सिमान से चाइल जा।” जब यीशु जाएक ले डोंगा में चढ़ेक लगलक, तो उ आदमी जेकर में भूतमन रहैं यीशु से बिनती करेक लगलक, “मोखों तोर चेलामन नियर अपन संगे रहेक दे।” मगर यीशु उकर इ बिनती के नी मानलक, आउर उकर से कहलक, “अपन आदमीमन ठिना अपन घर चाइल जा आउर उमन के बताव कि तोर उपरे दया काइर के प्रभु तोर लगिन कइसन बड़का काम काइर हे।” उ आदमी अपन घर गेलक आउर दस नगर केर परदेस दिकापुलिस केर आसे-पासे केर इलाका में जाय के आदमीमन के बताएक लगलक कि यीशु उकर लगिन कइसन बड़का काम काइर हे, इ सोउब गोइठ के सुइन के सोउबमन ताजुब करेक लगलैं। एक बेर फिन यीशु डोंगा से गलील झील केर दोसर पाखी घूइर आलक, जब उ किनारे हें ठड़ाल रहे कि आदमीमन केर एगो बड़का भीड़ उकर ठिना जमा होई गेलक। तब यहूदी मनक प्रार्थना घर केर एगो सरदार आलक, उकर नाँव याईर रहे। उ यीशु के देखते हें उकर गोड़ तरे निहइर के प्रणाम करलक। आउर इ कइह के ढेइर बिनती करेक लगलक, “मोर छोट बेटी मोरेक वाला अहे, तोंय मोर घर आव आउर उकर उपरे हाँथ रख कि उ ठीक होई जाओक आउर जीते रहोक।” तब यीशु उकर संगे गेलक, आउर आदमीमन केर बड़का भीड़ हों उकर पिछे-पिछे चाइल जात रहे। भीड़ एतना रहे कि आदमीमन ढेकला-ढेकली होवत रहैं। हूवाँ भीड़ में एगो जनाना रहे, जेके बारह बरिस से लोहू बहेक केर बेमारी रहे। उ कायनों झन बाइधमन से दवाई बिरो करुवाय के ढेइर दुःख उठाय रहे, आउर अपन सोउब कुछ खरचा काइर के हों बेमारी से ठीक नी होई रहे, मगर उल्टा आउर हें उकर बेमारी बाइढ़ जाय रहे। उ जनाना यीशु केर काममन केर बारे में सुइन रहे, भीड़ में से उकर पिछे से आलक आउर यीशु केर लुगा के छुई देलक। काले कि उ जनाना अपन मन हें मन कहत रहे, “अगर मोंय उकर लुगा के हें छुई लेमूँ तो मोंय ठीक होई जामूँ।” आउर तुरते उकर लोहू बहेक केर बेमारी ठीक होई गेलक, आउर उ अपन गतर में एइसन महसूस करलक कि उ बेमारी से ठीक होई जाय हे। यीशु तुरते जाइन गेलक कि उकर में से ठीक करेक केर शक्ति निकइल हे, आउर भीड़ के चाइरो बटे देइख के कहलक, “मोर लुगा के केहर छुई हे?” उकर चेलामन यीशु से कहलैं, “तोंय देखाथिस कि भीड़ केर आदमीमन तोर पिछे ढेकला-ढेकली होवाथैं आउर तोंय पुछिसला कि केहर मोके छुलक?” मगर यीशु जे उके छुई रहे उके खोजेक लगिन चाइरो बटे देखते रहलक। तब उ जनाना इ जाइन के कि मोर कइसन भलाई होई हे, डराते आउर थरथराते आलक आउर यीशु केर गोड़ तरे निहइर के प्रणाम करलक आउर सोउब गोइठ के सच-सच बताय देलक। यीशु उकर से कहलक, “बेटी, तोर बिसवास तोके ठीक काइर हे। शांति से चाइल जा, अब इ बेमारी तोर उपरे फिन नी आवी।” यीशु इ कहते हें रहे, कि यहूदी मनक प्रार्थना घर केर सरदार याईर केर घर से आदमीमन आय के सरदार से कहलैं, “तोर बेटी तो मोइर जाय हे, अब गुरु के तकलीफ देवेक केर जरुरत नखे।” यीशु उमन केर गोइठ के सुनलक आउर अनसुना काइर के यहूदी मनक प्रार्थना घर केर सरदार से कहलक, “ना डराव, सिरिफ बिसवास कर।” यीशु पतरस, याकूब आउर याकूब केर छोट भाई यूहन्ना के छोइड़, आउर केखो अपन संगे आवेक नी देलक। जब उमन यहूदी मनक प्रार्थना घर केर सरदार केर घर में पोहोंचलैं, तो यीशु आदमीमन के ढेइर काँदते आउर गूल-गंजाइर करते देखलक। तब भीतरे जाय के उ आदमीमन से कहलक, “तोहरेमन काले गूल-गंजाइर कराथा आउर काँदाथा? छोंड़ी नी मोइर हे, मगर उ निंदाथे।” इ गोइठ सुइन के उमन यीशु उपरे हँसेक लगलैं, मगर यीशु सोउब के बाहरे निकलाय देलक आउर छोंड़ी केर आयो-आबा आउर अपन संगमन के लेई के भीतरे गेलक, जहाँ छोंड़ी रहे। आउर छोंड़ी केर हाँथ धाइर के उकर से कहलक, “तलीता कूमी” जेकर माने इ हेके, “हे छोंड़ी, मोंय तोर से कहाथों, उठ।” आउर उ तुरते उइठ के चलेक-फिरेक लगलक। उ बारह बरिस केर रहे। आउर जे आदमीमन इ घटना के देखलैं, ताजुब होई गेलैं। तब यीशु कड़ाई से छोंड़ी केर आयो-आबा के चेताय के कहलक कि इ गोइठ केर बारे केऊ ना जानेक पारोक। आउर कहलक, “इके कोनों खाएक ले देई देवा।” यीशु कफरनहूम नगर से निकइल के अपन नगर नासरत में आलक आउर उकर चेलामन हों उकर पिछे गेलैं। हूवाँ उ आराम केर दिन यहूदी मनक प्रार्थना घर में उपदेस देवेक लगलक, आउर ढेइर आदमीमन उकर उपदेस के सुइन के, ताजुब होई के कहेक लगलैं, “इके इ गेयान केर गोइठ कहाँ से मिललक? इ कोन रकम केर गेयान हेके जे इके देवल जाय हे? कइसन शक्ति केर काम इकर हाँथ से होवेला? का इ बढ़इ ना लगे जेकर आयो केर नाँव मरियम हेके? आउर याकूब, योसेस, यहूदा, आउर सिमोन इकर भाईमन ना लगैं? का उकर बहिनमन हमरे केर माझे नी रहैना?” इ नियर उमन यीशु केर बारे में ठोकर खालैं। यीशु उमन से कहलक, “परमेश्‍वर केर संदेश के बताएक वाला अपन देस, अपन कुटुम्बमन आउर अपन घर के छोइड़ सोउब ठिना आदर पावेला।” उमन यीशु उपरे बिसवास नी करलैं, सेले यीशु हूवाँ ढेइर चमत्कार केर काम नी करलक। सिरिफ थोरेक बेमरियामन केर उपरे हाँथ राइख के उमन के ठीक करलक। यीशु उमन केर अबिसवास के देइख के ताजुब करलक। इकर पाछे यीशु चाइरो बटे केर गाँवमन में जाय-जाय के उपदेस देते रहलक। थोरेक समय केर पाछे यीशु बारहों झन खास चेलामन के बोलालक आउर उमन के भूतमन के निकलाएक केर अधिकार देलक। तब यीशु उमन के दूई-दूई झन काइर के दोसर-दोसर गाँव में भेजेक लगलक। यीशु उमन के आगया देलक, “तोहरेमन अपन डहर लगिन लाठी छोइड़ के कोनोवें ना लेगबा, ना रोटी, ना झोला, आउर ना हें लुगा खूट में पैसा। जूता पिंधबा आउर पिंधल लुगा छोइड़ के आउर कोनों लुगा ना लेगबा।” आउर यीशु उमन से कहलक, “अगर कोनों गाँव में केऊ तोहरेमन के अपन घर में रहेक लगिन नेवता देवी, तो जब तक उ गाँव में रहबा, तब तक उकर गोतिया बाइन के रहबा। अगर कोनों गाँव में आदमीमन तोहरेमन के अपन घर में नी आवेक देबैं आउर तोहरेमन केर गोइठ के नी सुनबैं, तो हूवाँ से निकलेक बेरा अपन तरवा केर धूर के झाइर रखबा। उमन के इ चेतावनी देवेक लगिन कि परमेश्‍वर बटले मिलेक वाला सजा लगिन अब उमन खुद जिम्मेदार होबैं।” आउर उमन हूवाँ से चाइल गेलैं। आउर इ परचार करलैं, “पाप करेक छोइड़ देवा।” आउर उमन ढेइर हें भूतमन के निकलालैं, आउर ढेइर बेमरियामन केर उपरे जैतून तेल लगाय के उमन के ठीक करलैं। राजा हेरोदेस हों यीशु केर काममन केर बारे में सुनलक, काले कि ढेइर आदमीमन यीशु केर बारे में जानत रहैं आउर उकर बारे में गोठियात रहैं उकर नाँव फाइल जाय रहे, आउर आदमीमन कहत रहैं कि यूहन्ना बपतिस्मा जल संस्कार देवेक वाला मोरलमन में से जी उइठ हे, सेले उकर से इ चमत्कार केर काम होवाथे। आउरोमन कहलैं, “इ परमेश्‍वर केर संदेश के बताएक वाला एलिय्याह हेके, मगर आउर आदमीमन कहलैं, परमेश्‍वर केर संदेश के बताएक वाला या परमेश्‍वर केर संदेश के बताएक वालामन में से केऊ एगो नियर अहे।” मगर राजा हेरोदेस इ सुइन के कहलक, “जे यूहन्ना केर मूँड़ मोंय कटुवाय रहों, ओहे जी उइठ हे।” काले कि राजा हेरोदेस अपनेहें भाई फिलिप्पुस केर जनाना हेरोदियास के राइख रहे, हेरोदियास केर खातिर सिपाहीमन के भेइज के यूहन्ना के धरुवाय के जेहेल घर में साइज देई रहे। काले कि यूहन्ना राजा हेरोदेस से कइह रहे, “अपन भाई केर जनाना के तोके रखेक मूसा केर नियम केर मोताबिक उचित नखे। काले कि उ एखन जीते अहे।” से लगिन हेरोदियास यूहन्ना से खीस रखत रहे आउर उके माइर मोराएक खोजत रहे, मगर एइसन नी होएक पारलक। काले कि राजा हेरोदेस यूहन्ना के धरमी आउर पवितर आदमी जाइन के उकर से डरात रहे, आउर उके बचाय के रखत रहे, राजा हेरोदेस उकर उपदेस सुइन के ढेइर घबरात रहे, मगर खुशी से सुनत रहे। थोरेक दिन केर पाछे राजा हेरोदेस अपन जनम दिन मनालक। राजा बाड़ अधिकारीमन के, फौज केर सोउब से खास अगुवामन के आउर गलील परदेस केर अगुवामन के भोज में बोलालक। इ भोज में हेरोदियास के यूहन्ना के मरुवाएक केर एगो बढ़ियाँ मोका मिललक। उ मोका में हेरोदियास केर बेटी भीतरे आलक आउर नाइच के राजा हेरोदेस के आउर उकर संगे बइठल आदमीमन के खुश काइर देलक, तब राजा बेटी हर से कहलक, “तोंय जे चाहबे मोर से माँग मोंय तोके देमूँ।” आउर हेरोदेस किरिया खालक आउर उकर से करार काइर के कहलक, “मोंय अपन आधा राइज तक जे कोनों तोंय मोर से माँगबे मोंय तोके देमूँ।” उ बाहरे जाय के अपन आयो से पूछलक, “मोंय का माँगमूँ?” आयो हर कहलक, “यूहन्ना बपतिस्मा जल संस्कार देवेक वाला केर मूँड़।” उ तुरते भीतरे राजा ठिना आलक आउर उकर से कहलक, “मोंय चाहाथों, कि तोंय एखनेहें यूहन्ना बपतिस्मा जल संस्कार देवेक वाला केर मूँड़ एगो थरिया में मोर ले मंगुवाय दे।” राजा ढेइर उदास होलक, मगर अपन खावल किरिया आउर संगे बइठल गोतियामन केर चलते मना करेक नी चाहलक। आउर राजा तुरते एगो सिपाही के आगया देई के जेहेल घर में भेजलक कि उकर मूँड़ के काइट लानोक। उ सिपाही जेहेल घर में जाय के यूहन्ना केर मूँड़ काटलक, आउर एगो थरिया में राइख के लानलक आउर बेटी हर के देलक, आउर बेटी हर आयो हर के देलक। जब यूहन्ना केर चेलामन के इ घटना केर बारे में पता चललक, तो उमन आय के उकर लाश के लेई गेलैं आउर उके कबर में राइख देलैं। जे खास चेलामन के यीशु भेइज रहे, उमन जब घूइर आय के यीशु केर चाइरो बटे जमा होलैं, तब जे-जे काम उमन काइर रहैं आउर आदमीमन के जे सिखाय रहैं, उ सोउब के यीशु के बतालैं। यीशु चेलामन से कहलक, “आवा हमरे एगो एइसन ठाँव में जाब जहाँ हमरे एकले रहेक पारब आउर तनिक देरी आराम हों करेक पारब।” काले कि ढेइर आदमीमन आवत-जात रहैं आउर उमन के भात खाएक केर हों मोका नी भेटात रहे। सेले उमन डोंगा में चाइढ़ के सुनसान ठाँव में अलगे चाइल गेलैं। मगर ढेइर आदमीमन उमन के जाते देखलैं आउर जाइन गेलैं कि उमन कहाँ जाथैं। सेले आदमीमन जमा होई के उ ठाँव बटे पैदल हें आसे-पासे केर गाँवमन से होई के गेलैं आउर यीशु आउर उकर चेलामन केर हूवाँ पोंहचेक से आगे हें पोंहइच गेलैं। यीशु डोंगा से उतरलक आउर एगो बड़का भीड़ के देखलक। यीशु उमन उपरे सोगालक, काले कि उमन ठिना उ मनक ठीक से अगुवाई करेक लगिन केऊ नी रहे, उमन ठीक उइसनेहें रहैं जइसन बेगर चरवाहा केर भेड़ीमन रहैना। आउर यीशु उमन के ढेइर हें गोइठमन के सिखाएक लगलक। जब साँझ होई गेलक, तो यीशु केर चेलामन यीशु ठिना आय के कहेक लगलैं, “इ सुनसान ठाँव हेके, आउर ढेइर साँझ होई गेलक। अब इ आदमीमन के बिदा कर कि चाइरो बटे केर गाँवमन आउर टोलीमन में जाय के अपन लगिन कोनों खाएक ले कीन लेबैं।” यीशु उमन के जबाब देलक, “तोहरेहेमन उमन के खाएक लगिन देवा।” उमन यीशु से पूछलैं, “का हमरे दूई सौ चाँदी केर सिक्का केर रोटी कीन लेब, आउर उमन के खियाब?” यीशु उमन से कहलक, “जाय के देखा तोहरेमन ठिना काय गो रोटी अहे?” उमन पता लगाय के कहलैं, “पाँच गो रोटी आउर दूई गो मछरी।” यीशु उमन के आगया देलक, “सोउब के हरियार घास केर उपरे पंत्ति-पंत्ति में बइठावा।” आउर आदमीमन सौ-सौ आउर पचास-पचास काइर के पंत्ति-पंत्ति में बाइठ गेलैं। तब यीशु उ पाँच गो रोटीमन आउर दूई गो मछरीमन के लेलक आउर स्वरग बटे देइख के परमेश्‍वर के धन्यबाद देलक आउर रोटीमन के टुकइर-टुकइर के चेलामन के देते गेलक कि उमन आदमीमन के पोरसाते जाबैं, आउर उमन दूई गो मछरीमन के हों सोउब केर लगिन बाँइट देलैं। आउर सोउबमन खाय के अघाय गेलैं। इकर पाछे चेलामन यीशु केर टुकराल रोटीमन आउर मछरीमन के जे बाइच जाय रहे जमा करलैं आउर उकर से बारह गो डाली भाइर गेलक। इ लेखे हिंयाँ रोटी खाएक वाला मरदानामन केर गिनती पाँच हजार रहे। इमन केर अलावा जनानामन आउर छउवामन हों रहैं, जे हिंयाँ रोटी खाय रहैं। इकर पाछे यीशु तुरते अपन चेलामन के जोर देई के कहलक कि उमन अपन डोंगा में चाइढ़ जाओक आउर उकर से आगे गलील झील केर दोसर पाखी बैतसैदा गाँव चाइल जाओक। तब तक उ रूइक के आदमीमन के बिदा करी। आउर यीशु आदमीमन के बिदा काइर के पहार उपरे प्रार्थना करेक चाइल गेलक। जब साँझ होलक, तो डोंगा गलील झील केर माझे में रहे आउर यीशु एकले भूंई में रहे। जब यीशु देखलक कि उमन बड़ा मुश्किल से डोंगा के खेवाथैं, काले कि धुका उ मनक उल्टा मारत रहे। यीशु बिहान के अंधारे अंधार गलील झील केर पानी उपरे चाइल के उमन ठिना आलक, आउर उमन से आगे निकइल जाएक खोजत रहे। मगर जब उमन यीशु के पानी उपरे हिंठते देखलैं तो उमन के लगलक कि उ भूत हेके आउर चिल्लाएक शुरु काइर देलैं। काले कि सोउब यीशु के देइख के घबराय जाय रहैं। मगर यीशु तुरते उमन से कहलक, “धीरज धरा, मोंय यीशु हेकों, ना डरावा।” तब यीशु उमन ठिना आय के डोंगा में चढ़लक आउर धुका रूइक गेलक। इ देइख के चेलामन भकुवाय गेलैं। जबकि चेलामन बितल दिन में देइख रहैं कि यीशु रोटी केर संगे का काइर रहे, मगर उमन एखन तक हों यीशु के बुझेक नी पाइर रहैं कि यीशु सचमुच में केहर हेके। उमन केर दिल एखन तक हों बिसवास करेक लगिन मजबूत नी रहे। जब उमन गलील झील के पार काइर के गनेसरत शहर में पोहोंचलैं, आउर झील किनारे डोंगा के खुइट देलैं। आउर जइसनेहें उमन डोंगा से उतरलैं आदमीमन तुरते यीशु के चिन्हलैं। आउर आसे-पासे केर सोउब इलाका में झट सुन गेलैं, आउर बेमरियामन के पटियामन में सुताय के जहाँव कहाँ यीशु केर पता चलत रहे उकर ठिना लानत रहैं। आउर जहाँव कहाँ यीशु गाँव, टोला या नगरमन में जात रहे, आदमीमन बेमरियामन के चौकमन में लाइन राइख के उकर से बिनती करत रहैं कि उमन के अपन लुगा केर आँचरा के भइर छुवेक देवोक। आउर जेतनामन उके छुलैं सोउब ठीक होलैं। एक दिन फरीसी दल केर आदमीमन आउर मूसा केर नियम के सिखाएक वाला कायनों झन यरुशलेम शहर से आय के यीशु ठिना जमा होलैं। आउर उमन यीशु केर चेलामन के बेगर हाँथ धोले रोटी खाते देखलैं। काले कि सोउब यहूदी आउर खास काइर के फरीसी दल केर आदमीमन पुरखा मनक नेग-दस्तूर केर मोताबिक चलैना, उमन जब तक नेग-दस्तूर केर मोताबिक हाँथ नी धोवाय लेवैना तब तक भात नी खायना। बाजार से आय के हों जब तक नेग-दस्तूर मोताबिक हाँथ नी धोवाय लेवैना तब तक नी खायना आउर ढेइर नेग-दस्तूर इमन लगिन बनाल जाय हे, जेके इमन के मानेक होवेला। खास तरीका से डुभनी, लोटामन आउर तांबामन केर बासन के धोवेक-माँजेक। से लगिन फरीसी दल केर आदमीमन आउर मूसा केर नियम के सिखाएक वालामन यीशु से पूछलैं, “तोर चेलामन पुरखा मनक नेग-दस्तूर के काले नी मानैना, आउर बेगर हाँथ धोले खायना?” यीशु उमन के जबाब देलक, “तोहरे ढोंगीमन केर बारे में यशायाह परमेश्‍वर केर संदेश के बताएक वाला ठीक हें पवितर किताब में भविष्यवाणी काइर हे। जइसन लिखल अहे, ‘इमन मोर बारे में अपन मुँह से ढेइर बेस-बेस गोठियायना, मगर सचमुच में मोर से प्रेम नी करैना। आउर बेकार में मोर भक्ति करैना, काले कि इमन आदमी मनक बनाल नियम के एइसन सिखायना जइसन कि इ परमेश्‍वर केर आगया हेके।’ तोहरेमन परमेश्‍वर केर आगया के ठुकराय के आदमी मनक बनाल नेग-दस्तूर के मानाला।” यीशु उमन से कहलक, “तोहरेमन अपन नेग-दस्तूर के बनाय रखेक लगिन परमेश्‍वर केर आगया के अनदेखा काइर देवाला! हमर पुरखा मूसा तोहरेमन के इ आगया परमेश्‍वर बटले देई रहे कि अपन आयो-आबा केर आदर करा आउर जे अपन आयो चाहे आबा केर बारे में बुरा कही, सेके जरूर मौत केर सजा देवल जाओक।” मगर तोहरेमन इ मानाला कि अगर केऊ अपन आबा चाहे आयो से कही, “अब मोंय तोर कोनों मदइत करेक नी पारमूँ काले कि जेके मोंय तोके देवेक वाला रहों, उके परमेश्‍वर के देवेक ले किरिया खाय हों। सेले इ भेंट सिरिफ परमेश्‍वर केर लगिन हेके।” आउर तब से तोहरेमन उ आदमी के अपन आयो-आबा केर मदइत करेक नी देवाला। इ लेखे तोहरेमन अपन पुरखा मनक बनाल नेग-दस्तूर के मानेक लगिन परमेश्‍वर केर आगया के टाइल देवाला, आउर एइसनेहें तोहरेमन ढेइर बुरा काममन के करते रहाला। फिन यीशु आदमीमन के अपन ठिना बोलाय के उमन से कहलक, “तोहरेमन सोउब मोर गोइठ के सुना, आउर बुझा। एइसन तो कोनों चीज नखे जे बाहरे से आदमी केर भीतरे जाय के उके अशुद्ध करेला। मगर जे चीजमन आदमी केर भीतरे से निकलेला, ओहे उके अशुद्ध करेला। जे केऊ मोर इ गोइठ के धेयान से सुनाथा, इकर बारे में समझेक केर कोशिश करा।” जब यीशु भीड़ के छोइड़ के घर गेलक, तो उकर चेलामन यीशु से इ उदाहरन केर अर्थ पूछलैं। यीशु उमन से कहलक, “का तोहरेमन एतना अनबुझ हेका? का तोहरेमन इ नी बुझाला कि जे कोनों हमरे खाइला, उ हमरे के परमेश्‍वर केर आगे अशुद्ध नी करेला? काले कि उ हमर मन में निहीं, मगर पेट में जायला आउर दिसा बटले निकइल जायला।” इ कइह के यीशु सोउब खाएक चीजमन के शुद्ध बतालक। फिन यीशु कहलक, “जे आदमी में से निकलेला, ओहे उके अशुद्ध करेला। काले कि भीतरे से मतलब आदमी केर मन से बुरा-बुरा बिचार, ब्यभिचार। चोरी, हत्या, दोसर जनाना केर संग संबंध बनाएक, लोभ, दुष्टता, छल, लुचपन, बुरा नजइर, निंदा, घमंड आउर मूरखता निकलेला। इ सोउब बुरा बिचार जे मन से निकलेला आउर आदमी के अशुद्ध करेला।” इकर पाछे यीशु आउर उकर चेलामन गलील परदेस से निकइल के सूर आउर सैदा नगर केर आसे-पासे केर इलाका में गेलैं, हूवाँ यीशु एगो घर में गेलक आउर चाहत रहे कि केऊ ना जानोक कि उ हूवाँ ठहइर हे, मगर आदमीमन के तुरते पता लइग गेलक कि यीशु उ घर में अहे। आउर तुरते एगो जनाना यीशु केर बारे में सुइन के यीशु ठिना आय के उकर गोड़ तरे निहइर के प्रणाम करलक, जेकर छोट बेटी केर उपरे भूत रहे। इ जनाना यहूदी नी रहे। उकर जनम सीरिया परदेस केर सुरूफ‍िनीकी नगर में होई रहे। उ यीशु से बिनती करलक, “मोर बेटी केर उपरे से भूत के निकलाय दे।” यीशु उकर से कहलक, “आगे मोके अपन आदमीमन केर, मतलब यहूदीमन केर मदइत करेक दे, काले कि छउवा मनक लगिन पोरसल रोटी के लेई के कुकूरमन केर आगे फेइक देवेक बेस ना लगे।” उ जनाना बुइझ गेलक कि यीशु परजाइत आदमीमन के कुकूर आउर यहूदी आदमीमन के अपन छउवा कहाथे, सेले उ यीशु के जबाब देलक, “सच कहले प्रभु! मगर कुकूरमन हों तो टेबुल केर हेंठे छउवा मनक गिराल रोटी केर टुकरा-टुकरी के खाय लेवैना।” तब यीशु उकर से कहलक, “तोंय बिसवास से जबाब देई हिस, तोर बिसवास केर खातिर भूत तोर बेटी में से निकइल जाय हे। सेले तोंय अब अपन घर चाइल जा।” आउर उ अपन घर में आय के देखलक कि बेटी खटिया उपरे पड़ल अहे आउर भूत निकइल जाय हे। इकर पाछे यीशु आउर उकर चेलामन सूर नगर केर आसे पासे केर इलाका के छोइड़ के सैदा नगर से होई के आउर दस नगरमन केर परदेस दिकापुलिस सिमान के पार काइर के गलील झील केर किनारे पोहोंचलैं। हूवाँ आदमीमन एगो आदमी के यीशु ठिना लानलैं। जे बहिरा आउर गोठियाएक में हकलात हों रहे, उमन यीशु से बिनती करलैं, “तोंय अपन हाँथ के उकर उपरे राइख दे कि उ ठीक होई जाओक।” तब यीशु उके भीड़ से अलगे लेगलक, आउर अपन अंगुर के उकर कान में साजलक, इकर पाछे अपन अंगुर में थूइक के उकर से उ आदमी केर जीभ के छुलक। आउर स्वरग बटे देइख के लम्बा साँस लेलक आउर उकर से कहलक, “इप्फत्तह!” माने “खुइल जा।” तुरते उ आदमी सुनेक लगलक, उकर जीभ केर लार सूत हों खुइल गेलक, आउर उ सफा-सफा गोठियाएक लगलक। तब यीशु उमन के चेताय के कहलक, “इकर बारे में केखो ना बताबा कि मोंय का काइर हों।” मगर जेतना उ चेतालक ओतनेहें उमन इ खबर के आदमीमन के बताएक लगलैं। आउर उमन ढेइर हें ताजुब होई के कहेक लगलैं, उ जे कुछ काइर हे, बेस हें काइर हे। हिंयाँ तक कि उ बहिरामन के सुनेक केर आउर कोकामन के बोलेक केर शक्ति देवेला। थोरेक दिन केर पाछे फिन आदमीमन यीशु केर उपदेस सुनेक लगिन उकर ठिना आलैं आउर उकर चाइरो बटे जमा होई गेलैं, उमन ठिना खाएक लगिन कोनोवें नी रहे, तब यीशु अपन चेलामन के अपन ठिना बोलाय के कहलक, “मोके इ आदमीमन केर उपरे दया आवाथे, काले कि इमन तीन दिन से लगातार मोर संगे अहैं, आउर अब उमन ठिना कोनों खाएक ले नखे। इमन में से केऊ-केऊ दूर से आय हैं, अगर मोंय इमन के भूखे घर भेइज देमूँ, तो डहर में थाइक के बेहोस होई जबैं।” उकर चेलामन यीशु के जबाब देलैं, “इ सुनसान ठाँव में इ आदमीमन के खियाएक लगिन एतना रोटी केऊ कहाँ से लानी कि इमन खाय के अघाय जबैं?” यीशु चेलामन से पूछलक, “तोहरेमन ठिना केतना रोटी अहे?” चेलामन जबाब देलैं, “सात गो।” तब यीशु आदमीमन के भूंई उपरे बैठेक केर आगया देलक आउर उमन बाइठ गेलैं। इकर पाछे यीशु सातों रोटीमन के लेलक आउर धन्यबाद देई के टुकरालक आउर आदमीमन के बाँटेक लगिन अपन चेलामन के देते गेलक, आउर चेलामन आदमीमन के बाँटते गेलैं। चेलामन ठिना थोरेक छोट मछरी हों रहे आउर यीशु धन्यबाद देई के उखो आदमीमन केर आगे पोरसेक ले कहलक। उमन खाय के अघाय गेलैं आउर इकर पाछे चेलामन यीशु केर टुकराल रोटीमन आउर मछरीमन के जे बाइच जाय रहे जमा करलैं आउर उकर से सात गो डाली भाइर गेलक। हूवाँ लगभग चाइर हजार आदमीमन रहैं आउर यीशु उमन के बिदा करलक। इकर पाछे यीशु तुरते अपन चेलामन केर संगे डोंगा में चाइढ़ के दलमनूता परदेस चाइल गेलक। हूवाँ फरीसी दल केर आदमीमन यीशु ठिना आय के उकर से बहस करेक लगलैं, उमन यीशु के फँसाएक चाहत रहैं, सेले उकर से एगो स्वरग केर चिन्हा देखाएक लगिन कहलैं। इ साबित करेक लगिन कि परमेश्‍वर उके अपन अधिकार देई हे। यीशु उ मनक अबिसवास के देइख के अपन आत्मा में दुःखी होई के कहलक, “आइज-काइल केर आदमीमन काले चमत्कार केर चिन्हा खोजैना? मोंय तोहरेमन के सच कहाथों कि इ समय केर आदमीमन के कोनों चमत्कार केर चिन्हा नी देवल जाई।” आउर यीशु फरीसी आदमीमन के छोइड़ के अपन चेलामन संगे डोंगा में चाइढ़ के गलील झील केर दोसर पाखी चाइल गेलक। यीशु केर चेलामन अपन संगे रोटी लानेक भुलाय जाय रहैं, आउर डोंगा में उमन ठिना एके गो रोटी रहे। आउर यीशु अपन चेलामन के चेताय के कहलक, “फरीसी दल केर आदमीमन केर खमीर आउर राजा हेरोदेस केर खमीर से बचेक लगिन तोहरेमन सावधान रहबा।” उमन आपस में बिचार काइर के कहेक लगलैं, कि यीशु एइसन इ लगिन कहाथे काले कि हमरे रोटी नी लाइन ही। यीशु इ जाइन के उमन से कहलक, “तोहरेमन काले आपस में इ बिचार कराथा कि हमरे ठिना रोटी नखे? का तोहरेमन अपन दिल के एतना कठोर बनाय लेई हा? का तोहरेमन एखन तक हों मोर बारे में सच्चाई के नी बुझेक पाराथा? का तोहरेमन केर आँइख अंधरा आउर तोहरेमन केर कान बहिरा अहे? आउर का तोहरेमन के याइद नखे। कि मोंय पाँच हजार आदमीमन के सिरिफ पाँच गो रोटीमन से खियालों, तोहरेमन हूवाँ खँड़ाल टुकरामन के जे बाइच जाय रहे उके काय डाली भाइर के उठाय रहा?” उमन यीशु से कहलैं, “बारह डाली।” यीशु उमन के फिन पूछलक, “आउर जब चाइर हजार आदमीमन लगिन सात गो रोटीमन रहे तो तोहरेमन बचल टुकरामन के काय गो डाली में उठाय रहा?” उमन उके जबाब देलैं, “सात डाली।” यीशु उमन से कहलक, “का तोहरेमन एखन तक हों नी बुइझ हा कि मोंय केहर हेकों?” तब यीशु आउर उकर चेलामन बैतसैदा गाँव पोहोंचलैं, आउर आदमीमन एगो अंधरा के उकर ठिना लानलैं आउर यीशु से बिनती करलैं कि उ उके छुवोक ताकि उ ठीक होई जाओक। यीशु उ अंधरा केर हाँथ धाइर के उके गाँव से बाहरे लेई गेलक, आउर उकर आँइख में अपन थूक पानी लगाय के उकर उपरे हाँथ रखलक, आउर उकर से पूछलक, “का तोंय कोनों देखाथिस?” उ आँइख उठाय के कहलक, “हाँ! मोंय आदमीमन के देखेक पाराथों, मगर उमन के सफा-सफा देखेक नी पाराथों। उमन मोके गाँछ नियर हिंठते दिसाथैं।” तब यीशु फिन दोबारा उकर आँइख उपरे हाँथ रखलक आउर उ धेयान से देखलक आउर बेस होई गेलक, आउर सोउब के सफा-सफा देखेक लगलक। इकर पाछे यीशु उके इ कइह के अपन घर भेइज देलक, “हिंयाँ का होई रहे इके बताएक ले फिन गाँव में ना आबे।” फिन यीशु आउर उकर चेलामन बैतसैदा गाँव के छोइड़ देलैं, उमन कैसरिया आउर फिलिप्पी शहर भीरे केर गाँवमन में चाइल गेलैं। डहर में यीशु अपन चेलामन से पूछलक, “आदमीमन मोके का कहैना?” उमन जबाब देलैं, “यूहन्ना बपतिस्मा जल संस्कार देवेक वाला, लेकिन केऊ-केऊ एलिय्याह परमेश्‍वर केर संदेश के बताएक वाला आउर केऊ-केऊ परमेश्‍वर केर संदेश के बताएक वालामन में से एगो हेके कहैना।” फिन यीशु उमन से पूछलक, “मगर तोहरेमन मोके का कहाला?” पतरस जबाब देलक, “तोंय मसीह हेकिस।” तब यीशु उमन के चेताय के कहलक, “मोर बारे में इके केकरो से ना कहबा।” यीशु अपन चेलामन के सिखाएक शुरु करलक, “मोंय आदमी केर बेटा लगिन जरुरी अहे कि मोंय ढेइर दुःख उठामूँ आउर धरम केर अगुवामन, यहूदी मुध पुरोहितमन आउर मूसा केर नियम के सिखाएक वालामन मोके ठुकराबैं आउर माइर मोराय देबैं। मगर मोंय तीसरा दिन फिन जी उठमूँ।” यीशु इ गोइठ उमन से सफा-सफा कइह देलक। मगर पतरस नी चाहत रहे कि यीशु माइर मोराल जाओक, सेले उ यीशु के अलगे लेई जाय के झिड़केक लगलक। मगर यीशु पिछे मुँहराय के अपन चेलामन बटे देखलक आउर फिन पतरस के झिड़ाइक के कहलक, “हे शैतान, मोर आगे से दूर होई जा, काले कि तोंय परमेश्‍वर नियर निहीं, मगर आदमीमन नियर सोचिसला।” यीशु भीड़ के अपन चेलामन समेत भीरे बोलाय के कहलक, “जे केऊ मोर चेला बनेक चाहैना, उमन अपन दुनियादारी केर मोह माया के छोइड़ देवोक आउर मोर लगिन क्रूस उठाएक आउर मोइर जाएक ले हों तेयार रहोक। आउर मोर पिछे होई लेवोक। काले कि जे केऊ अपन जीउ के बचाएक चाही, उ जुग-जुग केर जिंदगी के गवाँय देवी। मगर जे केऊ मोर आउर शुभ समाचार लगिन अपन जीउ के गवाँई, उ जुग-जुग केर जिंदगी के पावी। अगर एगो आदमी दुनिया केर सोउब कुछ के पाय लेई मगर परमेश्‍वर केर संगे जुग-जुग लगिन जिंदगी बिताएक केर मोका के गवाँय देवी तो उके का फायदा होवी? का केऊ आदमी परमेश्‍वर के रुपया देई के अपन जुग-जुग केर जिंदगी के किनेक पारी? निहीं। जे केऊ इ ब्यभिचारी आउर पापी जाइत केर माझे मोर से आउर मोर बचन केर मोताबिक चलेक से लजाई, तो मोंय आदमी केर बेटा हों जब अपन आबा केर तेज चमक सहित पवितर स्वरगदूतमन केर संगे आमूँ तब उकर से लजामूँ।” फिन यीशु भीड़ आउर अपन चेलामन से कहलक, “मोंय तोहरेमन से सच कहाथों कि तोहरेमन में से थोरेक आदमीमन जे हिंयाँ ठड़ाल अहैं, उमन परमेश्‍वर केर राइज के शक्ति केर संगे आवेक केर महसूस काइर लेबैं, उकर पाछे हें मोरबैं।” छाव दिन केर पाछे यीशु अपन चेला पतरस, याकूब आउर यूहन्ना के अपन संगे सुनसान पहार केर उपरे लेई गेलक। हूवाँ उमन केर आगे यीशु केर रूप बदइल गेलक। आउर उकर लुगा एइसन चरका होई गेलक आउर चमकेक लगलक कि दुनिया केर केऊ धोबी हों उके धोई के ओतना चरका करेक नी पारी। तब उमन के परमेश्‍वर केर संदेश बताएक वाला मूसा आउर एलिय्याह दिसलैं आउर उ दुयो यीशु केर संगे गोठियात रहैं। पतरस यीशु से कहलक, “हे गुरु, हमर लगिन हिंयाँ रहेक कतइ बेस हेके, सेले हमरे तीन गो झोपड़ी बनाब, एगो तोर लगिन, एगो मूसा लगिन आउर एगो एलिय्याह लगिन।” पतरस एइसन इ लगिन कहलक काले कि उ आउर दुयो चेलामन ढेइर डराय जाय रहैं आउर नी जानत रहैं कि का कहेक आउर का करेक अहे। तब एगो बदरी आलक आउर उमन के ढाँइप देलक, उ बदरी में से उमन परमेश्‍वर के इ कहते सुनलैं, “इ मोर दुलार बेटा हेके, इकर गोइठ के सुना।” तब उमन अचका चाइरो बटे देखलैं तो यीशु के छोइड़ अपन संगे आउर केखो नी देखलैं। पहार से उतरेक बेरा यीशु उमन के आगया देलक कि जब तक मोंय आदमी केर बेटा मोरलमन में से जी नी उठमूँ, तब तक जे कुछ तोहरेमन देइख हा उके केखो ना बताबा। उमन इ गोइठ के याइद रखलैं आउर ढेइर दिन तक केखो नी बतालैं। मगर आपस में बिचार करेक लगलैं, “मोरलमन में से जी उठेक केर का मतलब हेके?” फिन चेलामन यीशु से पूछलैं, “मूसा केर नियम के सिखाएक वालामन काले कहैना कि मसीह केर आवेक से आगे एलिय्याह केर आवेक जरुरी अहे?” जब यीशु आउर उकर तीनों चेलामन दोसर चेलामन ठिना आलैं, तो उमन देखलैं कि ढेइर आदमीमन उ मनक चाइरो बटे जमा होई जाय हैं आउर मूसा केर नियम के सिखाएक वालामन उमन केर संगे बहस कराथैं। आउर जइसनेहें आदमीमन यीशु के देखलैं सोउब ताजुब करेक लगलैं, उमन कूइद के यीशु ठिना आलैं आउर उके जोहार करलैं। यीशु पूछलक, “तोहरेमन का केर बारे में इमन से बहस कराथा?” भीड़ में से एगो आदमी यीशु के जबाब देलक, “हे गुरु, मोंय अपन बेटा के तोर ठिना लाइन हों, उकर में एगो भूत अहे, जे उके कोका बनाय देई हे आउर उ गोठियाएक नी पारेला।” जहाँव कहीं इ भूत मोर बेटा के धारेला, ओहे ठिना उके पटइक देवेला आउर उकर मुँह से फेन निकलेला आउर उ दाँत केटरेला आउर अकइड़ जायला। मोंय तोर चेलामन से उके निकलाएक ले कहलों, मगर उमन उके निकलाएक नी पारलैं। इ सुइन के यीशु जबाब देलक, “हे अबिसवासी आदमीमन, मोंय कब तक तोहरेमन केर संगे रहमूँ? आउर कब तक तोहरेमन केर सहमूँ? उ छोंड़ा के मोर ठिना लाना।” तब उमन उके यीशु ठिना लानलैं। यीशु के देखते हें भूत तुरते उ छोंड़ा के आँइठलक आउर छोंड़ा भूंई में गिरलक आउर मुँह से फेन निकलाते लोटेक लगलक। यीशु छोंड़ा केर आबा से पूछलक, “इकर इ दशा कहिया से अहे?” उ कहलक, “छोटपन से। भूत इके नाश करेक लगिन कखनों आइग में आउर कखनों पानी में गिरालक। अगर तोंय कोनों करेक पारिसला, तो हमरे केर उपरे तरस खाय के हमरे केर मदइत कर।” यीशु उकर से कहलक, “अगर तोंय करेक पारिसला, इ का गोइठ हेके? तोके शंका नी होवेक चाही कि मोंय एइसन करेक पारोना अगर केऊ आदमी मोर उपरे बिसवास करेला तो उकर लगिन सोउब कुछ होवेक पारी।” छोंड़ा केर आबा तुरते गिड़गिड़ाय के कहलक, “हे प्रभु! मोंय बिसवास करोना, मोके आउर ढेइर बगरा बिसवास करेक ले मोर मदइत कर।” जब यीशु देखलक कि ढेइर आदमीमन उके देखेक लगिन कूइद के भीड़ लगाथैं, तो उ भूत के इ कइह के डाँटलक, “हे भूत, तोंय जे इ छोंड़ा के कोका आउर बहिरा बनाय देई हिस, मोंय तोके आगया देवाथों, उकर में से बाहरे निकइल जा, आउर उकर में कहियो ना ढूकबे।” तब भूत चिल्लाय के आउर उ छोंड़ा के ढेइर आँइठ के निकइल गेलक, आउर छोंड़ा मोरल जइसन होई गेलक, सेले ढेइरमन कहेक लगलैं, “इ मोइर जाय हे।” मगर यीशु उकर हाँथ धाइर के उके उठालक, उ बेस होई के ठड़ाय गेलक। पाछे जब यीशु अपन चेलामन केर संगे घर में एकले रहे, तब चेलामन उकर से पूछलैं, “हमरे उ भूत के काले निकलाएक नी पारली?” यीशु उमन के जबाब देलक, “इ लेखे केर भूत सिरिफ प्रार्थना से हें आदमीमन में से बाहरे निकलेला।” फिन यीशु आउर उकर चेलामन हूवाँ से चाइल गेलैं, आउर उमन गलील परदेस से होई के जात रहैं। यीशु नी चाहत रहे कि केखो पता चलोक। काले कि यीशु अपन चेलामन केर संगे बगरा समय बिताय के उमन के सिखाएक चाहत रहे। यीशु उमन से कहत रहे, “मोंय आदमी केर बेटा आदमी मनक हाँथ में धरुवाल जामूँ, आउर उमन मोके माइर मोराबैं, आउर मोंय मोरेक केर पाछे तीसरा दिन जी उठमूँ।” मगर इ गोइठ इमन केर समझ में नी आलक, आउर उमन यीशु से पूछेक से डरात रहैं। फिन यीशु आउर उकर चेलामन कफरनहूम नगर में अपन घर आलैं, आउर घर में आय के यीशु उमन के पूछलक, “डहर में तोहरेमन का केर बारे में गोठियात रहा?” उमन चुप रहलैं, काले कि डहर में उमन इ बारे में गोठियात रहैं कि हमर में से बड़का केहर हेके? तब यीशु बाइठ गेलक आउर बारहों झन चेलामन के अपन भीरे बोलाय के उमन से कहलक, “अगर केऊ आदमी बाड़ बनेक चाहेला तो खुद के सोउब से छोट समझोक आउर सोउब केर सेवक बनोक।” आउर यीशु एगो छउवा के लेई के उ मनक आगे ठड़ुवालक, आउर उके गले लगाय लेलक आउर चेलामन से कहलक, “जे केऊ मोर नाँव से एइसन छउवामन में से केऊ एगो केर स्वागत करेला आउर उकर मदइत करेला, उ मोर स्वागत करेला आउर जे मोर स्वागत करेला, उ सच में परमेश्‍वर केर स्वागत करेला, जे मोके भेइज हे।” तब यूहन्ना यीशु से कहलक, “हे गुरु, हमरे एगो आदमी के तोर नाँव से भूतमन के निकलाते देखली आउर हमरे उके एइसन करेक से मना करली। काले कि उ हमर नियर तोर चेला नी बाइन हे।” यीशु कहलक, “उके मना ना करा, काले कि केऊ हों जे मोर नाँव से चमत्कार केर काम करेला, उ जल्दी से नी बदली आउर मोर बारे में बुरा नी कही। काले कि जे हमर बिरोध में नखे, उ हमर बटे अहे। जे केऊ एक गिलास पानी तोहरेमन के इ लगिन पियाई कि तोहरेमन मसीह केर चेलामन हेका, तो मोंय तोहरेमन से सच कहाथों कि परमेश्‍वर उ आदमी केर जरूर भला करी।” यीशु एहो कहलक, “अगर केऊ छउवा जइसन आदमी के जे मोर उपरे बिसवास करेला आउर केऊ दोसर आदमी उके इ बिसवास करेक से भटकायला, उकर लगिन भला होवी कि उकर घेंचा में एगो बड़का पखना केर जाँता बाँधल जाओक आउर उके डुबेक लगिन समुदर में फेइक देवल जाओक। अगर तोर हाँथ तोके पाप करुवायला, तो उके काइट दे, ठुठा होई के हों स्वरग में जाएक तोर लगिन ठीक अहे, मगर दुयो हाँथ केर रहते नरक में जाएक ठीक नखे, जहाँ केर आइग कहियो नी बुतेला। काले कि हूवाँ केर आइग नी बुतेला आउर कीड़ा हों नी मोरेला। आउर अगर तोर गोड़ तोके पाप करुवायला, तो उके काइट दे, काले कि लंगड़ा होई के हों स्वरग में जाएक तोर लगिन ठीक अहे, मगर दुयो गोड़ केर रहते नरक में जाएक ठीक नखे। काले कि हूवाँ केर आइग नी बुतेला आउर कीड़ा हों नी मोरेला। आउर एहे लेखे अगर तोर आँइख तोके पाप करुवायला तो उके निकलाय दे। काना होई के हों परमेश्‍वर केर राइज में जाएक तोर लगिन ठीक अहे, मगर दुयो आँइख केर रहते नरक में जाएक ठीक नखे। काले कि हूवाँ केर आइग नी बुतेला आउर कीड़ा हों नी मोरेला। जइसन बलिदान के नोन से शुद्ध करल जायला, तइसनेहें हरेक झन के दुःख केर आइग से शुद्ध करल जाई। नोन बेस अहे, मगर नोन केर नोनछर चाइल जाई, तो उके दोबारा नोनछर नी बनाएक पराई। तोहरेमन अपन में नोन केर गुण के बनाय के रखा आउर एक दोसर केर संगे मेल-जोल से रहा।” यीशु कफरनहूम नगर से निकइल के यहूदिया परदेस केर सिमान में यरदन नदी केर दोसर पाखी आलक। एक बेर फिन आदमी मनक भीड़ उकर ठिना जमा होई गेलक आउर उ अपन रीति केर मोताबिक उमन के परमेश्‍वर केर बचन सिखाएक लगलक। जब उ सिखात रहे तब थोरेक फरीसी दल केर आदमीमन परखेक लगिन उकर ठिना आलैं। उमन यीशु से पूछलैं, “का मूसा केर नियम केर मोताबिक इ उचित अहे कि आदमी अपन जनाना के छोइड़ देई?” यीशु उमन के जबाब देलक, “मूसा तोहरेमन के अपन जनाना के छोड़ेक केर बारे में का आगया देई हे?” उमन कहलैं, “मूसा केर नियम इ बतायला कि एगो आदमी अपन जनाना के लिखित देई के छोड़ेक पारी।” यीशु उमन से कहलक, “काले कि तोहरेमन कठोर होई के परमेश्‍वर केर आगया के नी मानाला, से लगिन मूसा तोहरेमन ले इ आगया के लीख हे। मगर दुनिया केर शुरु से परमेश्‍वर नर आउर नारी काइर के उमन के बनाय हे। इ लगिन परमेश्‍वर कहलक कि जब एगो मरदाना जनाना से बिहा करेला तो उमन दुयो अपन आयो-आबा से जुदा होई के एके संगे रहोक। अब उमन दुयो एके गो काया नियर होई गेलैं, से लगिन उमन दूई गो आदमी नियर निहीं मगर एगो आदमी नियर रहबैं। एहे लगिन जब परमेश्‍वर उ दुयो के जोइड़ हे, तो केऊ आदमी उमन के जुदा करेक केर कोशिश ना करोक।” जब उमन घर घूइर आलैं तो चेलामन यीशु से इकर बारे में पूछलैं। यीशु उमन के जबाब देलक, “परमेश्‍वर चाहेला कि जब-तक दुयो जीते रहबैं तब-तक दुयो एक दोसर से जुदा ना होवोक। जे केऊ अपन जनाना के छोइड़ के दोसर से बिहा करेला तो उ आदमी, उ पहली केर बिरोध में ब्यभिचार करेला। एहे लेखे अगर जनाना हों अपन आदमी के छोइड़ के दोसर से बिहा करेला, तो ओहो ब्यभिचार करेला।” एक दिन थोरेक आदमीमन अपन छउवामन के यीशु ठिना लानेक लगलैं कि यीशु उ मनक उपरे हाँथ राइख के आशीष देवोक। मगर चेलामन उमन के डाँटलैं। यीशु इ देइख के खिसाय के उमन से कहलक, “छउवामन के मोर ठिना आवेक देवा, उमन के मना ना करा, काले कि जे आदमीमन इ छउवामन नियर बिसवास लायक आउर नरम अहैं, ओहेमन परमेश्‍वर केर राइज में रहबैं। मोंय तोहरेमन के सच कहाथों कि जे केऊ परमेश्‍वर केर राइज के छउवामन नियर ग्रहण नी करी, उ उकर राइज में कहियो ढूकेक नी पारी।” आउर यीशु छउवामन के गले लगालक आउर उमन उपरे हाँथ राइख के उमन के आशीष देलक। जइसनेहें यीशु अपन चेलामन केर संगे जाएक शुरु करलक तइसनेहें एगो जवान आदमी उकर ठिना कूदते आलक। उ यीशु केर आगे ठेहुना टेइक के पूछलक, “हे बेस गुरु, जुग-जुग केर जिंदगी केर हकदार होवेक लगिन मोंय का काम करमूँ?” यीशु उकर से कहलक, “तोंय मोके बेस काले कहाथिस? सिरिफ परमेश्‍वर हें बेस अहे। तोंय परमेश्‍वर केर आगयामन के तो जानिसला: हत्या नी करेक, ब्यभिचार नी करेक, चोरी नी करेक, झूठा गवाही नी देवेक, केखो धोखा नी देवेक, अपन आयो-आबा केर आदर करेक।” उ यीशु से कहलक, “हे गुरु, इ सोउब आगयामन के तो मोंय छोटपन से मानते आवाथों।” यीशु उके धेयान से देखलक आउर उकर दिल में प्रेम भाइर गेलक। आउर उकर से कहलक, “तोर में एखनोहों एगो गोइठ केर कमी अहे। जा! जे कुछ तोर ठिना अहे, उके बेइच के गरीबमन के देई दे। तब तोके स्वरग में धन मिली। इकर पाछे मोर चेला बाइन जा।” उ आदमी यीशु केर इ गोइठ के सुनलक तो उकर चेहरा उतइर गेलक। काले कि उ ढेइर धनी रहे आउर उ जवान आदमी शोक करते चाइल गेलक। यीशु चाइरो बटे देइख के अपन चेलामन से कहलक, “धनी आदमीमन के परमेश्‍वर केर राइज में ढूकेक ढेइर कठिन अहे।” चेलामन उकर इ गोइठमन से ढेइर ताजुब होलैं। (काले कि उमन मानत रहैं कि परमेश्‍वर धनी आदमीमन केर उपरे दयालु अहे, इ लगिन अगर उमन स्वरग राइज में नी ढूकेक पारबैं तो आउर केऊ हों नी ढूकेक पारबैं।) मगर यीशु उमन के सिखालक, “हे भाईमन, जे आदमीमन धन केर उपरे भरसा रखैना, उमन लगिन परमेश्‍वर केर राइज में ढूकेक ढेइर कठिन अहे। जे लेखे ऊँट के सूई केर टोका में ढूइक के निकलेक कठिन अहे, उकर से हों बगरा धनवान आदमी के परमेश्‍वर केर राइज में ढूकेक कठिन अहे।” जब चेलामन इके सुनलैं तो आउर हें ताजुब होई के एक-दोसर से कहेक लगलैं, “तो फिन केहर बचेक पारी?” यीशु उमन बटे देइख के कहलक, “आदमीमन से तो इ नी होवेक पराई, मगर परमेश्‍वर से होवेक पराई। काले कि परमेश्‍वर से सोउब कुछ होवेक परायला।” पतरस उकर से कहेक लगलक, “देख, हमरे सोउब कुछ छोइड़ के तोर पिछे होई लेई ही आउर तोर चेला बाइन जाय ही।” यीशु चेलामन से कहलक, “मोंय तोहरेमन से सच कहाथों कि जे केऊ हों मोर चेला बनेक लगिन आउर शुभ समाचार बताएक लगिन अपन घर, भाईमन, बहिनमन, आयो-आबा, छउवामन या खेतमन के छोइड़ देई हे। उ जरूर एहे जुग में सताव केर संगे इनाम केर रूप में घरमन, भाई-बहिनमन, आयोमन, छउवा-पुतामन आउर खेतमन सौ गुणा पावी। आउर आवेक वाला दिन में परमेश्‍वर उके जुग-जुग केर जिंदगी देई। मगर इ बेरा दुनिया में ढेइर आदमीमन जेमन खुद के बड़का बुझैना, उमन परमेश्‍वर केर नजइर में छोट होई जबैं। आउर जेमन इ बेरा दुनिया में छोट समझल जायना, उमन परमेश्‍वर केर नजइर में बड़का होई जबैं।” थोरेक दिन केर पाछे उमन यरुशलेम शहर बटे जात रहैं आउर यीशु उ मनक आगे-आगे जात रहे। आउर उकर चेलामन ताजुब करत रहैं कि यीशु उ ठिना जाथे, जहाँ ढेइर आदमीमन उकर बिरोध काइर रहैं। आउर जेमन उकर संगे जात रहैं उमन के इ गोइठ केर डार रहे कि यरुशलेम शहर में का होवी। एक बेर फिन यीशु अपन बारहों चेलामन के एक बटे लेई के गेलक आउर उ गोइठमन के बताएक लगलक जे उकर उपरे होवेक वाला रहे। यीशु कहलक, “देखा, हमरे यरुशलेम शहर जाथी, मोंय आदमी केर बेटा यहूदी मुध पुरोहितमन आउर मूसा केर नियम के सिखाएक वालामन केर हाँथे धरुवाल जामूँ, उमन मोके मोराएक केर लायक ठहराबैं, आउर परजाइत आदमीमन केर हाँथे जिम्मा देबैं। आउर उमन मोर मजाक उड़ाबैं, आउर मोर उपरे थूकबैं, मोके कोड़रा से मारबैं, आउर मोके जान से मोराबैं, आउर मोंय तीसरा दिन फिन जी उठमूँ।” तब जबदी केर बेटा याकूब आउर यूहन्ना यीशु ठिना आय के कहलैं, “हे गुरु, हमरे चाहाथी कि जे कुछ हमरे तोर से माँगब, उखे तोंय हमर लगिन करबे।” यीशु उमन से पूछलक, “तोहरेमन का चाहाथा कि मोंय तोहरेमन लगिन करमूँ?” उमन उकर से कहलैं, “जब तोंय अपन महिमा में राइज करेक शुरु करबे तो हमरे के हों तोर संगे राइज करेक देबे। हमर में से एगो तोर भतखाइया बटे आउर एगो तोर लेंगा बटे बइठेक चाहाथी।” यीशु उमन से कहलक, “तोहरेमन नी जानाला कि का माँगाथा? जे दुःख मोंय सहेक ले जाथों, का तोहरेमन उके सहेक पारबा? आउर जे लेखे दुःख उठाय के मोंय मोरेक जाथों, का तोहरेमन उसन मोरेक पारबा?” उमन उके जबाब देलैं, “हमरे से होवेक पराई।” यीशु उमन से कहलक, “ठीक अहे, जे दुःख मोंय सहेक ले जाथों, उके तोहरेमन सहबा आउर जे लेखे केर दुःख उठाय के मोंय मोरेक जाथों, से लेखे केर दुःख उठाय के मोरेक पारबा। मगर परमेश्‍वर जेके चुइन हे उकरे लगिन उ ठाँव के तेयार काइर हे, उके छोइड़ आउर केखो अपन भतखाइया आउर लेंगा बइठाएक केर अधिकार मोके नखे।” इ सुइन के दसो चेलामन याकूब आउर यूहन्ना से नराज होई गेलैं। तब यीशु सोउब के अपन ठिना बोलालक आउर उमन से कहलक, “तोहरेमन जानाला कि इ दुनिया में जे आदमीमन राजा समझल जायना, उमन अपन अधिकार के अपन से हेंठे केर आदमीमन के दबाएक लगिन काम में लानैना। उ मनक अगुवामन जबरजस्ती अपन गोइठ के आदमीमन के मनुवायना। मगर तोहरेमन के उमन नियर नी होवेक चाही, सेले जे केऊ तोहरेमन में से बाड़ बनेक चाहेला, उ तोहरेमन केर सेवक बनोक। आउर जे केऊ तोहरेमन में से मालिक बनेक चाहेला, उ सोउब केर धांगर बनोक। काले कि मोंय आदमी केर बेटा इकर लगिन नी आय हों कि मोर एगो महान राजा लेखे सेवा-सुसइर करल जाई। मगर इकर लगिन आय हों कि मोंय खुद दोसर मनक सेवा-सुसइर करमूँ आउर ढेइर आदमीमन केर पापमन से छुटकारा लगिन अपन जान देई देमूँ।” यरुशलेम शहर बटे जाएक बेरा यीशु आउर उकर चेलामन यरीहो शहर में आलैं। जइसनेहें यीशु आउर उकर चेलामन आउर एगो बड़का भीड़ यरीहो शहर से निकलत रहे, ओहे बेरा तिमाई केर बेटा बरतिमाई जे कि अंधरा रहे सड़क केर किनारे बाइठ के भीख माँगत रहे। जब उ आदमीमन से इ सुनलक कि नासरत नगर केर रहेक वाला यीशु एहे डहर से जाथे तो हकाय-हकाय के कहेक लगलक, “हे यीशु! राजा दाऊद केर संतान! मोर उपरे दया कर।” ढेइर आदमीमन उके डाँटलैं कि चुप रहोक। मगर उ आउर हें जोर से हकाय के कहेक लगलक, “हे राजा दाऊद केर संतान! मोर उपरे दया कर।” जब यीशु उ अंधरा आदमी केर हकाएक के सुनलक तो रूइक गेलक आउर आसे-पासे केर आदमीमन से कहलक, “उके मोर ठिना लाना।” आउर आदमीमन उ अंधरा आदमी ठिना जाय के उकर से कहलैं, “उठ, धीरज धर, यीशु तोके बोलाथे।” उ आदमी अपन गमछा के फेइक के तुरते उछइल के ठड़ालक आउर यीशु ठिना आय गेलक। यीशु उ अंधरा आदमी से पूछलक, “तोंय का चाहाथिस कि मोंय तोर लगिन करमूँ?” उ जबाब देलक, “हे गुरु, मोंय देखेक चाहाथों।” यीशु उकर से कहलक, “चाइल जा, मोंय तोके ठीक काइर हों काले कि तोंय मोर उपरे बिसवास काइर हिस।” आउर उ तुरते देखेक लगलक, आउर डहर में यीशु केर संगे चलेक लगलक। जब यीशु आउर उकर चेलामन यरुशलेम शहर केर भीरे बैतफगे आउर बैतनिय्याह गाँव ठिना पोहोंचलैं। इ गाँव जैतून पहार केर भीरे रहे। तब यीशु अपन दूई गो चेलामन के इ कइह के अपन से आगे भेजलक, “अपन आगे केर गाँव में जावा, हूवाँ पोहोंचते हें एगो गधी केर छउवा तोहरेमन के बाँधल मिली, जेकर में कहियो केऊ नी बाइठ हैं, तोहरेमन उके खोइल के लेई आनबा। अगर केऊ तोहरेमन से पूछी, इ का कराथा? तो उके कहबा कि यीशु हमर प्रभु के इकर जरुरत अहे, उ जल्दी हें इके हिंयाँ घुराय देई।” चेलामन उ गाँव में गेलैं आउर गधी केर छउवा के सड़क किनारे केर एगो घर केर बाहरे दुरा ठिना बाँधल पालैं आउर उमन उके खोलेक लगलैं। हूवाँ थोरेक आदमीमन ठड़ाय रहैं, उमन चेलामन से पूछलैं, “इ का कराथा, गधी केर छउवा के काले खोलाथा?” चेलामन जइसन यीशु कइह रहे तइसनेहें उमन से कइह देलैं। तब उमन चेलामन के जाएक देलैं। चेलामन उ गधी केर छउवा के यीशु ठिना लानलैं आउर अपन गमछा के गधी छउवा केर गतर उपरे डिसाय देलैं। तब यीशु उकर उपरे बाइठ गेलक आउर यरुशलेम शहर बटे जाएक लगलक। जइसनेहें यीशु यरुशलेम शहर बटे जाएक लगलक तो ढेइर आदमीमन उके एगो राजा नियर माइन देवेक लगिन उकर आगे सड़क केर उपरे अपन-अपन गमछामन के डिसाय देलैं। आउरोमन खेतमन में से हरियार डाइर काइट-काइट के डिसाय देलैं। यीशु केर आगे-आगे आउर उकर पिछे-पिछे जेतना आदमीमन जात रहैं, सोउब जोर-जोर से इ नारा लगात रहैं, “परमेश्‍वर केर स्तुति होवोक, धाइन अहे उ जे प्रभु केर नाँव से आवेला। हमर पुरखा राजा दाऊद केर जइसन एगो राजा परमेश्‍वर केर दया केर संगे राइज करेक आवाथे, धाइन अहे! परमेश्‍वर केर स्तुति होवोक, जे स्वरग में अहे।” यीशु यरुशलेम शहर में ढूकलक आउर भीड़ केर संगे यहूदी मनक मंदिर केर अंगना में हों गेलक, आउर चाइरो बटे घुइम के देखलक कि हूवाँ का होवाथे। फिन उ अपन बारहों चेलामन केर संगे राइत बिताएक लगिन बैतनिय्याह गाँव आलक काले कि ढेइर साँझ होई जाय रहे। दोसर दिन जब यीशु अपन चेलामन संगे बैतनिय्याह गाँव से निकललक तो उके भूख लगलक। आउर यीशु दूर से हें एगो हरियार अंजीर केर गाँछ के देखलक आउर उकर भीरे इ सोइच के गेलक कि थोरको फार भेटाई, मगर पतइमन के छोइड़ कोनोवें नी पालक काले कि फार लागेक केर बेरा नी रहे। इ लगिन यीशु गाँछ से कहलक, “अब से तोर में कहियो फार ना फरोक।” आउर उकर चेलामन इ गोइठ के सुनत रहैं। इकर पाछे यीशु आउर उकर चेलामन यरुशलेम शहर में आलैं आउर उमन यहूदी मनक मंदिर केर अंगना में गेलैं। हूवाँ यीशु बलिदान चढ़ाएक वाला जानवरमन केर किना-बेचा करइयामन के बाहरे निकलाएक लगलक। उ पइसा बदलेक वाला चौकी आउर बलिदान चढ़ाएक वाला पेरवाँ बेचाइया मनक चौकीमन के उलटाय देलक। यहूदी मनक मंदिर में से होई के केखो चीज-बसूत लेई के आवेक-जाएक नी देलक। यीशु आदमीमन के उपदेस देते कहलक, “पवितर किताब में इ लिखल अहे, ‘मोर घर सोउब देस केर आदमीमन लगिन प्रार्थना केर घर कहाई।’ मगर तोहरेमन इके डाकू मनक अड्डा बनाय देई हा।” जब यहूदी मुध पुरोहितमन आउर मूसा केर नियम के सिखाएक वालामन इ सुनलैं कि यीशु का कइह हे आउर काइर हे, तो उमन उके माइर मोराएक केर मोका खोजेक लगलैं। मगर उमन यीशु से डरात रहैं, काले कि भीड़ केर आदमीमन उकर उपदेस से ताजुब होवत रहैं। जब साँझ होलक तो यीशु आउर उकर चेलामन राइत बिताएक लगिन शहर छोइड़ के बैतनिय्याह गाँव में चाइल गेलैं। फिन बिहाने जब यीशु आउर उकर चेलामन यरुशलेम शहर बटे घुरत रहैं तब उमन उ अंजीर केर गाँछ के देखलैं, जेके यीशु सरपाय रहे। उ गाँछ पूरा जाइर तक सूइख जाय रहे। पतरस के उ गोइठ याइद आलक, आउर उ यीशु से कहलक, “हे गुरु, देख, इ अंजीर केर गाँछ जेके तोंय सरपाय रहिस पूरा सूइख जाय हे।” यीशु उके जबाब देलक, “परमेश्‍वर केर उपरे बिसवास कर। मोंय तोर से सच कहाथों कि जे केऊ इ पहार से इ कही कि तोंय उखइर के समुदर में जाय गिर, आउर अपन मन में शंका नी करी, मगर इ बिसवास करी कि जे मोंय कहाथों उ पूरा होवी, तो परमेश्‍वर उकर लगिन ओहे करी। से लगिन मोंय तोहरेमन से कहाथों कि जे कुछ तोहरेमन परमेश्‍वर से प्रार्थना काइर के माँगबा, तो बिसवास काइर लेबा कि मिल जाहे, आउर परमेश्‍वर तोहरेमन के दे देई। जब तोहरेमन ठड़ाय के प्रार्थना कराला, तो अगर तोहरेमन केर मन में केकरो से कोनों मनमुटाव अहे, तो उके क्षमा करबा, इकर लगिन कि परमेश्‍वर तोहरेमन केर आबा जे स्वरग में रहेला तोहरेमन केर पाप के हों क्षमा करी। आउर अगर तोहरेमन क्षमा नी करबा, तो परमेश्‍वर तोहरेमन केर आबा जे स्वरग में अहे, तोहरेमन केर पाप के हों क्षमा नी करी।” यीशु आउर उकर चेलामन फिन एक बेर यरुशलेम शहर में आलैं। जब यीशु यहूदी मनक मंदिर केर अंगना में घुमत रहे, तो यहूदी मुध पुरोहितमन आउर मूसा केर नियम के सिखाएक वालामन आउर धरम केर अगुवामन उकर ठिना आलैं। उमन यीशु से पूछलैं, “तोंय इ काम कोन अधिकार से करिसला? इ अधिकार तोके केहर देई हे कि तोंय इ काम करिसला?” यीशु उमन के जबाब देलक, “मोंय हों तोहरेमन से एगो गोइठ पूछाथों, अगर तोहरेमन मोके जबाब देबा तो मोंय हों तोहरेमन के बतामूँ कि इ काम कोन अधिकार से करोना। का यूहन्ना के बपतिस्मा जल संस्कार देवेक केर अधिकार परमेश्‍वर बटे से मिल रहे या आदमीमन बटे से मिल रहे? मोके जबाब देवा।” तब उमन आपस में बिचार करेक लगलैं, “अगर हमरे कहब, ‘यूहन्ना के बपतिस्मा जल संस्कार देवेक केर अधिकार परमेश्‍वर बटे से मिल रहे।’ तो उ कही, ‘तोहरेमन काले यूहन्ना केर संदेश केर उपरे बिसवास नी करला?’ मगर हमरे एहो कहेक नी पारब, ‘यूहन्ना के इ अधिकार आदमीमन बटे से मिल रहे।’ अगर हमरे एइसन कहब तो आदमीमन हमर बिरोध में खड़ा होई जबैं।” काले कि ढेइर आदमीमन बिसवास करत रहैं कि सचमुच में यूहन्ना परमेश्‍वर केर संदेश के बताएक वाला रहे। से लगिन उमन यीशु के जबाब देलैं, “हमरे नी जानिला कि यूहन्ना के बपतिस्मा जल संस्कार देवेक केर अधिकार केहर देई रहे।” यीशु उमन से कहलक, “मोंय हों तोहरेमन के नी बतामूँ, इ काम कोन अधिकार से करोना।” यीशु उमन के फिन उदाहरन देई के सिखाएक लगलक, “एगो आदमी अपन खेत में अंगूर केर खेती करलक। उ उकर चाइरो बटे घेरा लगालक आउर अंगूर केर रस के निकलाएक आउर जमा करेक लगिन गढ़हा कोड़लक, आउर खेती केर देख-रेख करेक लगिन मचान बनाय के उकर ठिका किसानमन के देई के परदेस चाइल गेलक। जब फार के काटेक केर बेरा आलक तो खेत केर मालिक अपन एगो धांगर के भेजलक कि किसानमन से अंगूर फार केर बाँटा लेई आनोक। मगर किसानमन उ धांगर के धाइर के पिटलैं आउर छुछा हाँथ घुराय देलैं। फिन खेत केर मालिक एगो आउर धांगर के किसानमन ठिना भेजलक, उमन उकर मूँड़ के माइर के फुटाय देलैं आउर उकर संगे बुरा ब्यवहार करलैं। फिन खेत केर मालिक आउर एगो धांगर के भेजलक आउर उमन उके मोराय देलैं: एहे लेखे खेत केर मालिक एकेक गो धांगर के भेजते गेलक, मगर किसानमन उमन में से कायनों झन के पिटलैं आउर कायनों झन के मोरालैं। अब एगो बाइच रहे, जे उकर बेटा रहे, उके खेत केर मालिक बगरा दुलार करत रहे, आखरी में उखो उमन ठिना इ सोइच के भेजलक, ‘उमन मोर बेटा केर आदर करबैं।’ मगर उ किसानमन मालिक केर बेटा के आते देइख के आपस में कहलैं, ‘एहे तो बपौती हकदार हेके। आवा, हमरे इके माइर मोराब, तब सम्पति हमरे केर होई जाई।’ आउर उमन उके धाइर के माइर मोरालैं आउर उकर लाश के अंगूर केर खेत केर बाहरे फेइक देलैं। अब तोहरेमन केर का बिचार अहे कि अंगूर केर खेत केर मालिक उ किसानमन केर संगे का करी? मालिक आय के उ किसानमन के माइर मोराई आउर अंगूर केर बारी केर जिम्मा दोसरमन के दे देई। का तोहरेमन पवितर किताब में इ बचन के नी पइढ़ हा कि मसीह केर जोड़ी एगो खास पखना से करल जाय हे? जेकर में लिखल अहे, ‘जे पखना के राज मिस्त्रीमन बेकार जाइन के फेइक देई रहैं, ओहे कोना केर नेव बाइन गेलक। इ सोउब परमेश्‍वर बटे से होलक, आउर इ हमर लगिन ढेइर ताजुब केर गोइठ हेके।’” तब यहूदी अगुवामन बुइझ गेलैं कि यीशु उ मनक बिरोध में इ उदाहरन के बताय हे, सेले उमन उके धारेक चाहत रहैं मगर आदमी मनक डार से उके छोइड़ के हूवाँ से चाइल गेलैं। हूवाँ से जाएक केर पाछे यहूदी धरम केर अगुवामन यीशु के अपन गोइठमन केर जाल में फँसाएक लगिन फरीसी दल केर आदमीमन आउर हेरोदेस राजा केर साथ देवेक वाला थोरेक आदमीमन के उकर ठिना भेजलैं। आउर उमन उकर ठिना आय के कहलैं, “हे गुरु, हमरे जानिला कि तोंय सोउब बेरा सच गोइठ के बताइसला आउर तोंय इ परवाह नी करिसला कि दोसरमन तोर गोइठ केर बारे में का सोचैना। तोंय सोउब केर संगे एके लेखे ब्यवहार करिसला आउर परमेश्‍वर केर डहर केर गोइठमन के सच्चाई से बताइसला।” अब तोंय हमरे के इ बताव, “महाराजा के मालगुजारी देवेक मूसा केर नियम केर मोताबिक उचित अहे, कि निहीं? का हमरे उके मालगुजारी देवब कि निहीं?” यीशु उ मनक सवाल पूछेक केर इरादा में कपट अहे उके जाइन गेलक आउर उमन से कहलक, “तोहरेमन मोके काले गलत गोइठ कहुवाय के फँसाएक केर कोशिश कराथा? एगो चाँदी केर सिक्का के मोर ठिना लाना कि मोंय देखमूँ।” उमन लेई लानलैं, आउर यीशु उमन से कहलक, “मोके बतावा कि इ चाँदी केर सिक्का उपरे केकर फोटो आउर नाँव अहे?” उमन कहलैं, “महाराजा केर।” यीशु उमन से कहलक, “जे महाराजा केर हेके उके महाराजा के देवा आउर जे परमेश्‍वर केर हेके उके परमेश्‍वर के देवा।” उकर इ गोइठ के सुइन के उमन उकर उपरे ढेइर ताजुब करेक लगलैं। इकर पाछे थोरेक सदूकी दल केर आदमीमन यीशु ठिना आलैं। उमन मोरलमन केर जी उठेक के नी मानैना, यीशु से सवाल पूछलैं, “हे गुरु, मूसा हमर लगिन पवितर किताब में लीख हे कि अगर केकरो भाई बेगर संतान जनमाले मोइर जाई, आउर उकर जनाना रइह जाई, तो उकर भाई उकर जनाना के बिहा काइर लेवोक आउर अपन भाई लगिन उकर से संतान जनमाओक। एहे लेखे एगो परिवार में सात भाई रहैं। पहिला भाई बिहा काइर के बेगर संतान हें मोइर गेलक। तब दूसरा भाई उ जनाना के बिहा करलक आउर ओहो बेगर संतान केर मोइर गेलक, तइसनेहें तीसरा हों करलक। एहे लेखे बचल सोउब भाईमन हों उ जनाना से बिहा करलैं। आउर बेगर संतान हें सातों भाईमन मोइर गेलैं। सोउब केर पाछे उ जनाना हों मोइर गेलक। अब तोंय इ बताव कि उ जनाना केर बिहा तो सातों भाईमन से होई रहे, से जी उठेक केर पाछे उ केकर जनाना होवी?” यीशु उमन से कहलक, “तोहरेमन पवितर किताब के नी बुझाला, जे मोरेक केर पाछे आदमीमन के जिंदा रहेक केर बारे में बतायला, तोहरेमन एहो नी बुझाला कि परमेश्‍वर ठिना मोरल आदमीमन के फिन से जिंदा करेक केर शक्ति अहे। से लगिन तोहरेमन भूल में अहा। काले कि जब उमन मोरल में से जी उठबैं, तो उमन में सादी-बिहा नी होवी, मगर स्वरग में परमेश्‍वर केर दूतमन नियर रहबैं। मोरल में से जी उठेक केर बारे में तोहरेमन मूसा केर किताब में झूँड़ केर कहानी के पइढ़ हा। अब्राहम, इसहाक आउर याकूब केर मोरेक केर ढेइर दिन पाछे हों परमेश्‍वर मूसा से कहलक, ‘मोंय अब्राहम, इसहाक आउर याकूब केर परमेश्‍वर हेकों।’ इ लेखे परमेश्‍वर केर आदमीमन मोइर के हों जिंदा अहैं, काले कि परमेश्‍वर मोरलमन केर निहीं मगर जिंदा आदमीमन केर परमेश्‍वर हेके। तोहरेमन इ बिसवास नी काइर के ढेइर भूल में अहा।” यीशु आउर सदूकी मनक गोइठ के मूसा केर नियम के सिखाएक वालामन में से एगो सुनत रहे, उ इ जाइन के कि यीशु उमन के ठीक जबाब देई हे, यीशु से पूछलक, “परमेश्‍वर जेतना हों आगया देई हे उमन में से सोउब से मुध आगया कोन हेके?” यीशु उके जबाब देलक, “सोउब आगया में से इ मुध आगया हेके, ‘हे इसराइल देस केर आदमीमन सुना, प्रभु परमेश्‍वर जेकर हमरे आराधना करिला सिरिफ ओहे परमेश्‍वर हेके, आउर तोंय अपन प्रभु परमेश्‍वर से अपन पूरा मन, पूरा प्राण आउर पूरा बुद्धि, आउर अपन पूरा शक्ति से प्रेम करबे।’ आउर दूसरा इ हेके, ‘तोंय अपन पड़ोसी से अपन नियर प्रेम करबे।’ इ दुयो आगया से बड़का आउर कोनों आगया नखे।” मूसा केर नियम के सिखाएक वालामन उकर से कहलैं, “हे गुरु, ढेइर बढ़ियाँ! तोंय सच कहले, काले कि परमेश्‍वर एके गो अहे, उके छोइड़ के आउर केऊ दूसरा परमेश्‍वर नखे। आउर उकर से पूरा मन, पूरा बुद्धि, पूरा प्राण आउर पूरा शक्ति केर संगे प्रेम करेक आउर पड़ोसी से अपन नियर प्रेम करेक, सोउब लेखे केर बलिदानमन से जेके हमरे परमेश्‍वर लगिन चढ़ाइला, बाइढ़ के अहे।” जब यीशु देखलक कि उ समझदारी से जबाब देई हे, तो उकर से कहलक, “तोंय परमेश्‍वर केर राइज में ढूकेक केर भीरे अहिस” आउर केखो फिन उकर से कोनों पूछेक केर साहस नी होलक। उकर पाछे यीशु यहूदी मनक मंदिर में गेलक आउर उपदेस देते आदमीमन से सवाल पूछलक, “मूसा केर नियम के सिखाएक वालामन काले कहैना कि मसीह दाऊद राजा केर बंश हेके? इकर का मतलब हेके? हिंयाँ तक कि राजा दाऊद खुद हें पवितर आत्मा केर चलाएक से कहलक, ‘परमेश्‍वर मोर प्रभु से कहलक, “तोंय मोर सिंहासन केर भतखाइया बटे बाइठ, जब तक कि मोंय तोर बैरीमन के हराय के पूरा-पुरी तोर गोड़ हेंठे नी काइर देमूँ।”’ काले कि पवितर किताब केर उ ठाँव में राजा दाऊद खुद हें मसीह के मोर प्रभु कइह के हकायला, तो फिन उ सिरिफ राजा दाऊद केर बंश कइसन होवी?” आउर भीड़ केर सोउब आदमीमन यीशु केर इ उपदेस के रिझे-रिझे सुनत रहैं। यीशु आदमीमन के उपदेस देते आगे कहलक, “मूसा केर नियम के सिखाएक वालामन से सावधान रहा, उमन इ देखाएक लगिन कि उमन ढेइर खास हेकैं, चौक-चौराहा में लम्बा आउर महंगा लुगा पिंध के फिरेक आउर बाजारमन में आदमी मनक मुँह से माइन केर संगे जोहार सुनेक पसिंद करैना! यहूदी मनक प्रार्थना घरमन में आउर भोजमन में मुध-मुध ठाँव में बइठेक खोजैना। उमन बिधवामन के धोखा देई के उ मनक घर आउर धन-सम्पति के कब्जा काइर लेवैना आउर उमन के देखाएक लगिन ढेइर देरी तक प्रार्थना करते रहैना। एइसन आदमीमन के परमेश्‍वर कड़ा सजा देवी।” उपदेस देवेक केर पाछे यीशु यहूदी मनक मंदिर केर भंडार केर आगे बाइठ गेलक आउर देखेक लगलक कि आदमीमन भंडार में कइसन दान देवैना, ढेइर धनी आदमीमन आलैं आउर ढेइर-ढेइर दान देलैं। एहे बेरा एगो गरीब बिधवा आय के दूई गो तांबा केर सिक्का के देलक, जेकर दाम ढेइर कम रहे। इके देइख के यीशु अपन चेलामन के अपन ठिना बोलाय के उमन से कहलक, “मोंय तोहरेमन से सच कहाथों कि यहूदी मनक मंदिर केर भंडार में दान देवेक वालामन में से इ गरीब बिधवा सोउब से बगरा दान देई हे। काले कि सोउब आदमीमन अपन धन केर बढ़ती में से दान देई हैं, मगर इ गरीब बिधवा अपन घटी में से जे कोनोवें उकर ठिना रहे सोउब के दान में देई देलक।” जब यीशु आउर उकर चेलामन यहूदी मनक मंदिर से निकलत रहैं, तो उकर चेलामन में से एगो उकर से कहलक, “हे गुरु, देख केतना बेस महल अहे, इ बड़का-बड़का पखना से बाइन हे।” यीशु उकर से कहलक, “तोंय जे इ बेस महल आउर बड़का-बड़का पखना देखाथिस, मोंय तोके बताथों, दुश्मनमन एको गो पखना के अपन ठाँव में नी छोड़बैं। उ सोउब के गिराय देबैं।” उकर पाछे यीशु आउर उकर चेलामन जैतून पहार केर उपरे चाइल गेलैं। हूवाँ यीशु यहूदी मनक मंदिर केर आगे ढलाउन में बाइठ गेलक। जब पतरस, याकूब, यूहन्ना आउर अन्द्रियास यीशु के एकले देखलैं तो उमन उकर ठिना आय के पूछलैं, “हमरे के बताव कि इ सोउब गोइठ कहिया पूरा होवी? आउर जब इ सोउब गोइठ पूरा होवेक वाला रही, तो उ बेरा केर का चिन्हा होवी?” तब यीशु उमन से कहेक लगलक, “चौकस रहा, तोहरेमन के केऊ ना बहकाय देवोक। ढेइर आदमीमन मोर नाँव से आबैं आउर कहबैं, ‘मोंय मसीह हेकों!’ आउर ढेइर आदमीमन के बहकाय देबैं। आउर जब तोहरेमन लड़ाईमन आउर लड़ाईमन केर गोइठमन के सुनबा तो ना घबराबा, काले कि इमन केर होवेक जरुरी अहे, मगर उ समय दुनिया केर अंत नी होवी। काले कि एक जाइत केर आदमीमन दोसर जाइत केर उपरे हमला करबैं आउर एक देस केर आदमीमन दोसर देस केर आदमीमन से लड़बैं आउर जहाँ-तहाँ भूंईडोल होवी आउर अकाल होवी, इ सोउब घटना भयानक दुःखमन केर शुरुवात हें में होवी। मगर तोहरेमन खुद चौकस रहबा, आदमीमन तोहरेमन के बंदी बनाय के महासभामन में जिम्मा देबैं आउर तोहरेमन के यहूदी मनक प्रार्थना घरमन में पिटबैं, काले कि तोहरेमन मोर चेला हेका। तोहरेमन के अधिकारी आउर राजामन केर आगे ठड़ुवाल जाएक ले मजबूर कराल जाई, ताकि उमन तोहरेमन केर न्याय करबैं, जेकर चलते तोहरेमन उमन के मोर बारे में शुभ समाचार सुनाएक पारबा। लेकिन दुनिया केर अंत होवेक से आगे इ जरुरी अहे कि दुनिया केर सोउब देस केर आदमीमन के शुभ समाचार सुनाल जाओक। जब तोहरेमन बंदी बनाल जबा आउर तोहरेमन केर उपरे मुकद्दमा चली, तो आगे से इ चिंता ना करबा कि तोहरेमन के हूवाँ का कहेक अहे, जे कुछ हूवाँ कहेक होवी सेहे बेरा परमेश्‍वर तोहरेमन के बताई। काले कि कहेक वाला तोहरेमन ना लगा, मगर पवितर आत्मा तोहरेमन में से होई के उमन से गोठियाई। आउर उ बेरा जे आदमीमन मोर उपरे बिसवास नी करैना, उमन अपनेहें भाईमन के जे मोर उपरे बिसवास करैना धरुवाय के मरुवाय देबैं। आयो-आबामन हों अपन छउवा पुतामन संगे एइसनेहें करबैं आउर छउवा-पुतामन हों अपन आयो-आबा केर बिरोध में उठबैं आउर उमन के मरुवाबैं। तोहरेमन मोर उपरे बिसवास कराला से लगिन आदमीमन तोहरेमन से नफरत करबैं, मगर जे आदमीमन दुःख तकलीफ केर आखरी बेरा तक मोर उपरे भरसा करबैं आउर हार नी मानबैं, उमन के परमेश्‍वर बचाय लेवी। पढ़ेक वालामन समझोक कि मोंय का लिखेक वाला अहों: उ दिनमन में तोहरेमन एगो उजराएक वाला बुरा आदमी के यरुशलेम मंदिर में ठड़ाल देखबा जहाँ ठड़ाएक उके उचित नखे। उ मंदिर में ढूइक के मंदिर के अपवितर करी, उकर खातिर आदमीमन मंदिर जाएक छोइड़ देबैं। तब जे यहूदिया परदेस में अहैं, उमन खुद के बचाएक ले पहार केर उपरे भाइग जाओक। अगर केऊ अपन घर केर छाइन उपरे अहे, उ अपन घर में कोनों बसूत के लेगेक ले ना ढूकोक। आउर जे खेत में अहे, उ अपन लुगा लेगेक लगिन घर ना घुरोक। उ दिनमन में उ जनानामन लगिन जे भारी गतर में होबैं आउर जेमन अपन छउवामन के दूध पियाते होबैं, भयानक समय होवी काले कि उमन के भागेक ले ढेइर कठिन होवी। आउर प्रार्थना करते रहा कि इ जाड़ केर दिन में ना होवोक। काले कि उ दिनमन में एइसन दुःख तकलीफ होवी कि परमेश्‍वर केर बनाल दुनिया में शुरु से एखन तक नी होई हे आउर ना कहियो होवी। परमेश्‍वर अपन चुनलमन केर खातिर उ दुःख-तकलीफ केर दिनमन के घटाय देई हे। अगर उ दिनमन के नी घटातक, तो केऊ हों नी बचतैं, उ बेरा अगर केऊ तोहरेमन से कही, ‘देखा, मसीह हिंयाँ अहे!’ चाहे, ‘देखा, हूवाँ अहे!’ तो बिसवास ना करबा, काले कि झूठा मसीह आउर झूठा परमेश्‍वर केर संदेश के बताएक वालामन उइठ खड़ा होबैं, उमन चिन्हा आउर चमत्कार केर काममन के देखाबैं आउर होई सके तो उमन चुनलमन के हों बहकाय देबैं। देखा, तोहरेमन चौकस रहबा, काले कि इ घटनामन केर होवेक से आगे हें मोंय तोहरेमन के इ गोइठमन केर बारे में बताय देई हों। जब इ दुःख तकलीफ केर बेरा बीत जाई, तब ‘बेइर अंधार होई जाई आउर चाँद इंजोत नी देवी। आउर आकाश से तइरगनमन गिरेक लगबैं, आउर आकाश केर शक्तिमन के हिलाल जाई।’ तब मोंय आदमी केर बेटा के आदमीमन बड़का शक्ति आउर महिमा केर तेज चमक केर संग बदरीमन में आते देखबैं। उ बेरा मोंय आदमी केर बेटा अपन दूतमन के भेजमूँ आउर उमन धरती केर इ छोर से आकाश केर उ छोर तक चाइरो दिशा से मोर चुनल आदमीमन के जमा करबैं। अंजीर केर गाँछ से सिखा, जब उकर डाइर नरम होई जायला आउर उकर में नवाँ पतइ नोगजेला, तो तोहरेमन जाइन लेवाला कि गरमी मौसम भीरे आय जाहे। एहे लेखे जब तोहरेमन इ गोइठमन के पूरा होते देखबा, तो जाइन लेबा कि मोंय आदमी केर बेटा आवेक वाला अहों, मोंय देरी नी करमूँ मगर जल्दी हें आमूँ। मोंय तोहरेमन से सच कहाथों, इ जुग केर थोरेक आदमीमन एइसन अहैं कि जब तक इ सोउब गोइठ पूरा नी होई लेई, तब तक उमन नी मोरबैं। आकाश आउर धरती नाश होई जाई, मगर मोर कहल सोउब गोइठ सोउब दिन लगिन बनल रही। इ सोउब गोइठ कहिया आउर कोन बेरा पूरा होवी इकर बारे में केऊ हों नी जानैना, ना स्वरग केर दूतमन आउर ना मोंय परमेश्‍वर केर बेटा। मगर उ दिन आउर उ बेरा केर बारे में आबा हें जानेला। देखा, जागते रहा आउर प्रार्थना करते रहा, काले कि तोहरेमन नी जानाला कि इ बुरा दिन कहिया आवी। मोर धरती के छोड़ेक आउर घूइर आवेक केर तरीका इ लेखे अहे, जइसन एगो आदमी जे परदेस जाएक बेरा अपन घर के छोइड़ जायला, आउर जाएक से आगे अपन धांगरमन के काम बतायला आउर घर केर पहरादार के उकर घूइर आवेक तक जागते रहेक केर आगया देवेला। सेले जागते रहा, काले कि तोहरेमन नी जानाला कि मोंय घर केर मालिक कोन बेरा आमूँ, साँझ के या आधा राइत के, या मुरगा बोलेक बेरा या बिहान बेरा। एइसन ना होवोक कि मोंय अचका आय जामूँ आउर तोहरेमन के सुतल पामूँ। जे गोइठ मोंय तोहरेमन के कहाथों ओहे गोइठ मोंय सोउब से कहाथों, मोर घूइर आवेक तक तेयार रहा।” दूई दिन केर पाछे यहूदी मनक फसह परब आउर बिन खमीर रोटी केर परब आवेक वाला रहे आउर यहूदी मुध पुरोहितमन आउर मूसा केर नियम के सिखाएक वालामन इ ताक में रहैं कि कइसन यीशु के धोखा से धाइर के माइर मोराब। मगर उमन एक दोसर से कहत रहैं, “हमरे के फसह परब केर दिन एइसन नी करेक चाही, एइसन ना होवोक कि आदमीमन हुड़दंग मचाओक।” उ बेरा यीशु बैतनिय्याह गाँव में सिमोन नाँव केर एगो आदमी केर घर में खाएक बाइठ रहे, जेके यीशु कोढ़ बेमारी से ठीक काइर रहे। ओहे बेरा एगो जनाना संगमरमर केर पखना से बनाल एगो सीसी में महंगा सेंट के भाइर के लानलक, उ शुद्ध जटामांसी तेल से बनाल रहे। उ जनाना सीसी के फुटाय के यीशु केर मूँड़ उपरे उझइल देलक। मगर थोरेक आदमीमन अपन मन में झुंझलाय के कहेक लगलैं, “इ सेंट के काले सत्यानाश करल गेलक? इ सेंट तो तीन सौ चाँदी केर सिक्का से बगरा दाम में बेचाय जातक आउर इकर पैसा के गरीब आदमीमन के देवल जातक।” आउर उमन उ जनाना के झिड़केक लगलैं। यीशु कहलक, “उके ना डाँटा, उके काले सताथा? उ मोर लगिन बेस हें काम काइर हे। गरीब आदमीमन तो तोहरेमन केर संगे सोउब दिन रहबैं। तोहरेमन उ मनक मदइत कोनोवें दिन करेक पारबा, मगर मोंय तोहरेमन केर संगे सोउब दिन नी रहमूँ। इ जनाना से जे कुछ होवेक परात रहे, उ काममन में से सोउब से बेस काम काइर हे, उ मोर काया में तेल माइख के मोके दफनाएक जाएक ले तेयार काइर हे। मोंय तोहरेमन से सच कहाथों, समूचा दुनिया में जहाँव-कहाँ शुभ समाचार केर परचार करल जाई, हूवाँ उकर इ काम केर चरचा हों उकर याइद में करल जाई।” तब यहूदा जे इस्करियोत गाँव केर रहेक वाला आउर बारह खास चेलामन में से एगो रहे, यहूदी मुध पुरोहितमन ठिना गेलक आउर बतालक कि उ यीशु के धरुवाएक में उ मनक मदइत करी। उमन इ गोइठ के सुइन के ढेइर खुश होलैं आउर इ काम लगिन उके ढेइर रुपया देवेक केर करार करलैं। उ चेला यीशु के धोखा से धरुवाएक केर मोका खोजेक लगलक। बिन खमीर रोटी केर परब केर पहिला दिन, जेकर में उमन फसह परब केर भोज केर बलिदान करत रहैं, ओहे दिन उकर चेलामन यीशु से पूछलैं, “तोंय कोन ठाँव के चाहिसला कि हमरे हूवाँ जाय के तोर लगिन फसह खाएक केर तेयारी करब?” यीशु अपन चेलामन में से दूई झन के इ कइह के भेजलक, “यरुशलेम शहर में जावा, हूवाँ एगो आदमी तोहरेमन के गगरी में पानी लेई के जाते मिली, उकर पिछे-पिछे जबा। आउर उ जे घर में जाई, उ घर केर मालिक से कहबा, ‘हमर गुरु पूछाथे कि उ कोठरी कहाँ अहे? जहाँ मोंय अपन चेलामन संगे फसह परब केर भोज खामूँ।’ घर केर मालिक तोहरेमन के घर केर उपरे तल्ला केर एगो सजाल कोठरी देखाई, हूवाँ हमर लगिन फसह परब केर भोज तेयार करबा।” तब दुयो चेलामन हूवाँ से चाइल गेलैं। उमन यरुशलेम शहर में पोंहइच के सोउब कुछ ओहे लेखे पालैं जइसन यीशु कइह रहे। उमन हूवाँ फसह परब केर भोज तेयार करलैं। साँझ होलक तो यीशु अपन बारहों खास चेलामन केर संगे उ घर में आलक। जब उमन खाएक बाइठ रहैं, तो यीशु उमन से कहलक, “मोंय तोहरेमन से सच कहाथों कि तोहरेमन में से एगो जे मोर संगे फसह केर भोज खाथे, मोके धरुवाई।” जब उमन इ गोइठ के सुनलैं, तो उमन उदास होई गेलैं आउर एक-एक काइर के उकर से पूछेक लगलैं, “का उ मोंय हेकों?” यीशु उमन के जबाब देलक, “उ बारहों चेलामन में से एगो हेके आउर उ मोर संगे एके डुभा में रोटी डुबाथे। काले कि मोंय आदमी केर बेटा लगिन तो जइसन मोर बारे में पवितर किताब में लिखल अहे, ओहे लेखे होवी। मगर उ आदमी के जे मोके धोखा देई के धरुवाय देवी, उकर लगिन हाय! उकर ले एहे बेस होतक कि उकर जनम हें नी होतक।” जब उमन खाते हें रहैं, तो यीशु रोटी लेलक आउर आशीष माँइग के टुकरालक आउर उमन के देई के कहलक, “लेवा, इ मोर काया हेके।” फिन यीशु अंगूर केर रस भरल कटोरा लेई के परमेश्‍वर के धन्यबाद देलक आउर अपन चेलामन के देलक आउर सोउबमन उकर में से पिलैं। तब यीशु उमन से कहलक, “इ अंगूर केर रस मोर करार केर उ लोहू हेके, जेके ढेइर आदमीमन लगिन बलिदान केर रूप में बहाल जाई।” मोंय तोहरेमन से सच कहाथों कि आइज केर पाछे जब तक मोंय परमेश्‍वर केर राइज में अंगूर केर रस के नवाँ रीति से नी पी लेमूँ, तब तक मोंय अंगूर केर रस नी पीमूँ। तब यीशु आउर उकर चेलामन फसह परब केर गीत गालैं, उकर पाछे उमन यरुशलेम शहर से बाहरे जैतून केर पहार उपरे चाइल गेलैं। जब उमन पहार बटे जात रहैं तो यीशु उमन से कहलक, “तोहरेमन सोउब मोके छोइड़ के चाइल जबा, काले कि पवितर किताब में मोर बारे में लिखल अहे, ‘मोंय उ आदमी के मोरामूँ, जे मोर आदमीमन के चरवाहा नियर देखभाल करेला आउर उ आदमीमन भेड़ीमन नियर तितिर-बितिर होई जबैं।’ मगर मोंय मोइर के जी उठेक केर पाछे तोहरेमन से आगे गलील परदेस में जामूँ आउर हूवाँ मिलमूँ।” तब पतरस यीशु से कहलक, “चाहे सोउब चेलामन तोके छोइड़ देबैं तो छोइड़ देबैं, मगर मोंय तोके नी छोड़मूँ।” यीशु उकर से कहलक, “मोंय तोर से सच कहाथों कि आइज हें, एहे राइत के मुरगा केर दूई बेर बोलेक से आगे तोंय तीन बेर मोर से मुकइर जाबे कि तोंय मोके नी जानिसला।” मगर पतरस आउर हें जोर देई के कहलक, “अगर मोके तोर संगे मोरेक हों होवी फिन भी मोंय नी कहमूँ कि मोंय तोके नी जानोना। एहे लेखे आउरो चेलामन कहलैं।” जाते-जाते यीशु आउर उकर चेलामन गतसमनी नाँव केर एगो बगाइचा में पोहोंचलैं। तब यीशु अपन चेलामन से कहलक, “जब तक मोंय प्रार्थना काइर के नी आमूँ तब तक तोहरेमन हिंयाँय बइठल रहा।” आउर यीशु पतरस, याकूब आउर यूहन्ना के बगाइचा में थोरेक दूर अपन संगे लेई गेलक। यीशु ढेइर दुःखी आउर बेचाइन होवेक लगलक। आउर तीनों से कहेक लगलक, “मोर मन ढेइर दुःखी अहे, एइसन लगाथे कि मोंय मोरेक वाला अहों, तोहरेमन हिंयाँ रुका आउर जागते रहा।” यीशु थोरेक दूर आगे गेलक आउर भूंई में ठेहुना टेइक के परमेश्‍वर से प्रार्थना करेक लगलक, “हे आबा, हे पिता, अगर तोर योजना में इ होवेक पराई, तो मोके इ दुःख से बचाय ले, जे मोर उपरे आवेक वाला अहे। तोर से सोउब कुछ होवेक परायला, इ दुःख के मोर उपरे ना आवेक दे, फिन भी जइसन मोंय चाहोना तइसन ना कर, मगर जे तोंय चाहिसला ओहे कर।” जब यीशु उमन ठिना घूइर आलक, तो उमन के निंदाते पालक, तब उ पतरस से कहलक, “हे सिमोन, का तोंय एक घड़ी हों नी जागेक पारिसला? तोहरेमन सोउब जागते रहा आउर प्रार्थना करते रहा, जेकर से तोहरे के शैतान बहकाएक ना पारोक। जे मोंय चाहोना उके तोहरेमन करेक तो चाहाला मगर तोहरे केर काया में उके पूरा करेक केर शक्ति नखे।” यीशु उमन के छोइड़ के फिन प्रार्थना करेक चाइल गेलक, आउर ओहे गोइठमन के दोहराय के प्रार्थना करलक। यीशु फिन घूइर के आलक आउर उमन के निंदाते पालक, काले कि उ मनक आँइख नींद से भरल रहे आउर उमन नी जानत रहैं कि उके का जबाब देब। जब उ तीसरी बेर उमन ठिना आलक, तो उ तीनों से कहलक, “एखन तक निंदाते अहा आउर आराम कराथा? बस! ढेइर होलक, उ बेरा आय जाय हे। देखा! मोंय आदमी केर बेटा, पापीमन केर हाँथे धरुवाल जाथों। उठा, चला देखा, मोके धरुवाएक वाला भीरे आय पोंहइच हे।” यीशु इ कहते हें रहे कि यहूदा जे बारहों चेलामन में से एगो रहे, आय पोहोंचलक। उकर संगे एगो बड़का भीड़ हों रहे, उमन केर हाँथ में तलवाइर आउर लाठीमन रहे। उमन के यहूदी मुध पुरोहितमन, मूसा केर नियम के सिखाएक वालामन आउर धरम केर अगुवामन भेइज रहैं। उके धरुवाएक वाला यहूदा उमन के आगे हें बताय देई रहे कि जेके मोंय चुमा करमूँ ओहे यीशु हेके, उके सकत से धाइर के लेई जबा। जइसनेहें यहूदा हूवाँ पोहोंचलक, उ यीशु ठिना तुरते आलक आउर उकर से कहलक, “हे गुरु!” आउर यीशु के चुमा करलक। तब उमन यीशु के धाइर के उकर हाँथ के बाइंध देलैं। हूवाँ ठड़ाल उकर चेलामन में से एगो अपन छोट तलवाइर खींच के यहूदी महापुरोहित केर धांगर केर उपरे चलालक आउर उकर कान के काइट देलक। यीशु उमन से कहलक, “का तोहरेमन मोके डाकू समझाथा? जे मोके धारेक लगिन तलवाइरमन आउर लाठीमन लेई के आय हा? मोंय तो रोज दिन तोहरेमन केर संगे रहत रहों आउर तोहरेमन के यहूदी मनक मंदिर केर अंगना में परमेश्‍वर केर बचन केर उपदेस देवत रहों, से बेरा तोहरेमन मोके नी धारला, मगर एखन जे कुछ होवाथे उ इकर लगिन कि पवितर किताब में लिखल गोइठ पूरा होवोक।” तब सोउब चेलामन यीशु के छोइड़ के भाइग गेलैं। ओहे बेरा एगो जवान मलमल केर चादर ओइढ़ के यीशु केर पिछे जात रहे आउर आदमीमन उके धारेक चाहलैं, मगर उ जवान अपन चादर के छोइड़ के खाली गतर भाइग गेलक। उमन यीशु के यहूदी महापुरोहित ठिना लेई गेलैं। हूवाँ सोउब यहूदी मुध पुरोहितमन, धरम केर अगुवामन आउर मूसा केर नियम के सिखाएक वालामन जमा होई रहैं। पतरस यीशु केर पिछे थोरेक दूरी बनाय के उकर पिछे-पिछे यहूदी महापुरोहित केर घर केर अंगना तक गेलक आउर हूवाँ मंदिर केर पहरादारमन केर संगे बाइठ के आइग तापेक लगलक। यहूदी मुध पुरोहितमन आउर यहूदी अगुवा मनक महासभा यीशु के माइर मोराएक लगिन उकर बिरोध में गवाही देवेक वाला आदमी केर खोज में रहैं, मगर उमन के नी मिललक। काले कि ढेइर आदमीमन यीशु केर बिरोध में झूठा गवाही तो देवत रहैं, मगर उ मनक गवाही एक जइसन नी रहे। तब थोरेक आदमीमन उइठ के यीशु केर उपरे झूठा गवाही देवेक लगलैं, “हमरे इ आदमी के एइसन कहते सुइन ही, ‘मोंय हाँथ केर बनाल यहूदी मनक मंदिर के गिराय देमूँ आउर तीसरा दिन में दोसर मंदिर बनामूँ, जे हाँथ केर बनाल नी रही।’” मगर उ मनक इ गवाही हों एक जइसन नी निकललक। तब यहूदी महापुरोहित माझे में ठड़ाय के यीशु से पूछलक, “इमन तोर बिरोध में जे गवाही देवाथैं, का तोंय इकर से खुद के बचाएक लगिन कोनों कहेक चाहिसला?” मगर यीशु चुप रहलक आउर कोनों जबाब नी देलक। तब यहूदी महापुरोहित उकर से फिन पूछलक, “का तोंय परम-परमेश्‍वर केर बेटा मसीह हेकिस?” यीशु कहलक, “हाँ! मोंय हेकों। तोहरेमन मोंय आदमी केर बेटा के सर्वशक्तिमान परमेश्‍वर केर भतखाइया बटे बइठल आउर आकाश से बदरीमन में आते देखबा।” तब यहूदी महापुरोहित अपन लुगा फाइर के कहलक, “अब हमरे के आउर गवाह मनक दरकार नखे। अब तोहरेमन खुद इके परमेश्‍वर केर निंदा करते सुनला, इकर संगे हमरे का करब? तोहरेमन केर का बिचार अहे?” उमन सोउब कहलैं, “इ मोराय जाएक केर लायक अहे।” तब थोरेक आदमीमन यीशु केर उपरे थुकेक लगलैं, आउर उकर आँइख में पट्टी बाइंध के उके घूँसा मारेक लगलैं आउर यीशु के पूछेक लगलैं, “हमरे के बताव तोके केहर माइर हे” आउर महापुरोहित केर पहरादारमन हों उके लेई के थप्पड़ मारलैं। जब पतरस हेंठे अंगना में रहे, तो यहूदी महापुरोहित केर एगो धांगरिन हूवाँ आलक। आउर पतरस के आइग तपाते देइख के उकर उपरे टकटकी लगाय के देखलक आउर कहेक लगलक, “तोंय हों तो नासरत नगर केर रहेक वाला यीशु केर संगे रहिस।” उ मुकइर के कहलक, “मोंय इके नी जानोना आउर मोर समइझ में नी आवाथे कि तोंय इकर बारे में का कहाथिस।” फिन उ बाहरे दुरा बटे चाइल गेलक आउर मुरगा बोइल देलक। एक बेर उ धांगरिन फिन पतरस के देखलक, तो आसे-पासे जेमन ठड़ाय रहैं उमन से कहेक लगलक, “एहो आदमी यीशु केर संगमन में से एगो हेके।” मगर पतरस फिन मुकइर गेलक। थोरेक देरी केर पाछे हूवाँ ठड़ाल आदमीमन पतरस से कहलैं, “जरूर तोंय यीशु केर संगमन में से एगो हेकिस, काले कि तोंय गलील परदेस केर हेकिस।” तब पतरस यीशु के कोसेक लगलक आउर किरिया खाय के कहलक, “तोहरेमन जे आदमी केर बारे में गोठियाथा, उके मोंय नहिंये जानोना।” ओहे बेरा दूसरी बेर मुरगा बोइल देलक आउर पतरस के उ गोइठ याइद आलक। जे गोइठ के यीशु उकर से कइह रहे कि मुरगा केर दूई बेर बोलेक से आगे तोंय तीन बेर मोर से मुकइर जबे, पतरस इ गोइठ के सोइच के फफाइख-फफाइख के काँदेक लगलक। बिहान होते हें यहूदी मुध पुरोहितमन, धरम केर अगुवामन आउर मूसा केर नियम के सिखाएक वालामन बल्कि यहूदी अगुवा मनक महासभा केर सोउब आदमीमन सलहा करलैं कि यीशु के कइसन दोषी ठहराब। इकर पाछे उमन यीशु के बंधुवालैं आउर उके राजपाल पिलातुस ठिना लेई गेलैं। तब पिलातुस यीशु से पूछलक, “का तोंय यहूदी मनक राजा हेकिस?” यीशु उके जबाब देलक, “तोंय खुद हें कहाथिस।” तब यहूदी मुध पुरोहितमन उकर उपरे ढेइर गोइठमन में दोष लगात रहैं। से लगिन पिलातुस यीशु से फिन पूछलक, “देख, इ आदमीमन तोर उपरे ढेइर बुरा-बुरा गोइठमन केर दोष लगाथैं, का तोंय खुद के बचाएक ले कोनों जबाब नी देबे?” मगर यीशु कोनोवें जबाब नी देलक, इके देइख के पिलातुस ढेइर ताजुब होलक। यहूदी मनक फसह परब केर मोका में हर साल राजपाल यहूदी आदमीमन केर माँग केर मोताबिक एगो कैदी के छोइड़ देवत रहे। उ बेरा बरअब्बा नाँव केर एगो कैदी रहे, जे रोमी सरकार केर बिरोध में लड़ाई करेक वालामन केर संगे जेहेल में रहे, इमन लड़ाई में हत्या केर दोषी रहैं। भीड़ केर आदमीमन पिलातुस से बिनती करेक लगलैं, “जइसन तोंय हर साल फसह परब केर मोका में हमरे लगिन एगो कैदी के छोड़ते आय हिस, तइसनेहें हमरे लगिन कर।” पिलातुस उमन के पूछलक, “का तोहरेमन चाहाथा कि मोंय तोहरेमन लगिन यहूदीमन केर राजा के छोइड़ देमूँ?” काले कि पिलातुस जानत रहे कि यहूदी मुध पुरोहितमन उके हिसिंगा से धरुवाय हैं। मगर यहूदी मुध पुरोहितमन भीड़ के उसकालैं कि उमन अपन लगिन यीशु केर बदली बरअब्बा के हें छोड़ेक केर माँग करोक। इ सुइन के पिलातुस उमन से फिन पूछलक, “जेके तोहरेमन यहूदीमन केर राजा कहाथा, उके मोंय का करमूँ?” आदमीमन फिन जोर से कहलैं, “उके क्रूस उपरे चढ़ाय दे।” पिलातुस उमन से पूछलक, “काले, इ का बुराई काइर हे?” मगर उमन आउर हें जोर से चिल्लाय के कहलैं, “उके क्रूस उपरे चढ़ाय दे।” तब पिलातुस भीड़ के खुश करेक केर इच्छा से बरअब्बा के उमन लगिन छोइड़ देलक आउर यीशु के कोड़रा मरुवाय के क्रूस उपरे चढ़ाएक लगिन रोमी सिपाहीमन के जिम्मा देई देलक। तब सिपाहीमन यीशु के राजपाल केर महल केर भीतरे अंगना में लेई गेलैं। जे राजभवन कहल जायला आउर हूवाँ सोउब रोमी सिपाहीमन के जमा करलैं। आउर उमन यीशु केर मजाक उड़ाएक लगिन राजा नियर एगो बैगनी लुगा पिंधालैं आउर काँटा वाला डाइर से एगो मुकुट बनाय के उकर मूँड़ में पिंधाय देलैं। आउर इ कइह के यीशु के जोहार करेक लगलैं, “हे यहूदी मनक राजा, जोहार!” आउर उमन उकर मूँड़ में सोंटा से मारलैं आउर उकर उपरे थूकलैं आउर ठेहुना टेइक के उके प्रणाम करते रहलैं। इ लेखे यीशु केर मजाक उड़ाएक केर पाछे उमन बैगनी लुगा के खोइल के उकरे लुगा के पिंधालैं। फिन उके क्रूस उपरे चढ़ाएक लगिन शहर से बाहरे लेई गेलैं। जब उमन यीशु के शहर से बाहरे लेई जात रहैं, तब सिकंदर आउर रूफुस केर आबा सिमोन के धारलैं। उ कुरेन शहर केर रहेक वाला रहे, आउर गाँव से यरुशलेम शहर आवत रहे। उमन उके यीशु केर क्रूस उठाय के लेई जाएक लगिन जबरजस्ती करलैं। आउर उमन यीशु के गुलगुता में लेई लानलैं जेकर मतलब “खोपड़ी केर ठाँव” हेके। आउर उके पित्त मिलाल अंगूर केर रस पियेक ले देलैं, मगर यीशु नी पीलक। तब उमन क्रूस उपरे उकर हाँथ गोड़ के काँटी से ठोइक के चढ़ाय देलैं, आउर उमन उकर लुगामन के बाँटेक लगिन चिट्ठी साजलैं कि केके का लुगा भेटाई, तब उमन लुगा के बाँइट लेलैं। जब उमन यीशु के क्रूस उपरे चढ़ालैं, उ बेरा बिहान केर नौ बाइज रहे। आउर उमन एगो तख्ता में यीशु केर दोष पत्र लीख के उकर मूँड़ केर उपरे लगाय देलैं, उकर में लिखल रहे “यहूदीमन केर राजा।” आउर उमन यीशु केर संगे दूई झन डाकूमन के एगो के भतखाइया आउर एगो के लेंगा बटे क्रूस उपरे चढ़ालैं। इ लेखे से पवितर किताब में लिखल इ गोइठ पूरा होई गेलक, “उ अपराधीमन केर संगे गिनल गेलक।” आउर डहर में जाएक वालामन मूँड़ हिलाय-हिलाय के इ कइह के यीशु केर निंदा करत रहैं, “बाह! यहूदी मनक मंदिर के गिराएक वाला आउर तीसरा दिन में बनाएक वाला! क्रूस उपरे से उतइर के खुद के बचाय ले।” एहे नियर से यहूदी मुध पुरोहितमन हों मूसा केर नियम के सिखाएक वालामन केर संगे मिल के यीशु केर मजाक उड़ाय के कहत रहैं, “इ दोसरमन के तो बचालक मगर खुद के नी बचाएक पारलक। इसराइल देस केर राजा जे अपने के मसीह कहेला, अब क्रूस से उतइर के आवोक, तब हमरे इ देइख के उकर उपरे बिसवास करब।” आउर जेमन यीशु केर संगे क्रूस उपरे चढ़ाल जाय रहैं, ओहोमन यीशु केर निंदा करत रहैं। आउर दिन केर बारह बजे से लेई के तीन बजे तक गोटा धरती में अंधार होई गेलक। तीन बजे यीशु जोर से चिल्लाय के कहलक, “इलोई! इलोई! लमा शबकतनी?” जेकर मतलब इ हेके, “हे मोर परमेश्‍वर! हे मोर परमेश्‍वर! तोंय मोके काले छोइड़ देले?” जे आदमीमन भीरे ठड़ाल रहैं, उमन में से थोरेक आदमीमन इ सुइन के कहलैं, “देखा! इ एलिय्याह के हकाथे।” आउर एक झन कूइद के पाइनसोखा के अमल रस में डुबालक आउर सोंटा में चुभाय के उके पियेक ले देलक आउर कहलक, “रहेक देवा! देखब, एलिय्याह इके क्रूस से उतराएक लगिन आवेला कि निहीं।” तब यीशु जोर से चिल्लाय के प्राण छोइड़ देलक। आउर उ मोटा परदा जे यहूदी मनक मंदिर में लगाल रहे, उपरे से हेंठे तक फाइट के दूई टुकरा होई गेलक। हूवाँ एगो सूबेदार ठड़ाय रहे, जे सौ सिपाही मनक अधिकारी रहे। यीशु के एइसन चिल्लाय के प्राण छोड़ते देइख के कहलक, “सचमुच इ आदमी, परमेश्‍वर केर बेटा रहे।” थोरेक जनानामन हों दूर ठड़ाय के इ सोउब के देखत रहैं, उमन में मगदला गाँव केर मरियम, छोट याकूब आउर योसेस केर आयो मरियम आउर सलोमी रहैं। जब यीशु गलील परदेस में रहे तो इ तीनों उकर संगे-संगे रहत रहैं आउर उकर सेवा सुसइर करत रहैं, आउर हों ढेइर जनानामन रहैं, जे यीशु केर संगे यरुशलेम शहर में आय रहैं। जे दिन यीशु के क्रूस उपरे चढ़ाल गेलक उ दिन यहूदी मनक तेयारी केर दिन रहे, उ दिन केर साँझ होवेक केर पाछे अगला दिन आराम केर दिन शुरु होवेक वाला रहे, सेले तेयारी केर दिन हें साँझ होवेक से आगे अरिमतियाह गाँव केर रहेक वाला यूसुफ आलक, जे यहूदी महासभा केर मुध आदमी रहे आउर खुद हें परमेश्‍वर केर राइज केर आसरा देखत रहे, उ साहस काइर के पिलातुस ठिना गेलक आउर यीशु केर लाश के माँगलक। जब पिलातुस यूसुफ से यीशु केर मोरेक केर बारे में सुनलक तो ढेइर ताजुब होलक कि यीशु एतना जल्दी मोइर गेलक आउर सिपाही मनक अधिकारी के बोलाय के पूछलक, “का सचमुच में यीशु केर मोरल थोरेक देरी होई हे?” जब सिपाही मनक अधिकारी से पूरा हाल जाइन गेलक, तो यूसुफ के यीशु केर लाश के लेगेक केर मंजूरी देलक। तब यूसुफ एगो मलमल केर कफन लुगा कीनलक, उ यीशु केर लाश के उतराय के कफन लुगा से लपाइट के लेई गेलक, आउर चट्टाइन में खोदल कबर में राइख देलक, आउर कबर केर दुरा के बंद करेक लगिन एगो बड़का गोल चेपटा पखना के लुढ़काय देलक। इ सोउब के मगदला गाँव केर मरियम आउर याकूब आउर योसेस केर आयो मरियम देखत रहैं कि यीशु केर लाश कहाँ रखल जाय हे। जब यहूदी मनक आराम केर दिन बीत गेलक, तो मगदला गाँव केर मरियम, याकूब केर आयो मरियम आउर सलोमी बेस महकेक वाला चीजमन के यहूदी रीति केर मोताबिक यीशु केर काया उपरे लगाएक लगिन कीन लानलैं। उमन हफ्ता केर शुरु दिन बाड़ बिहाने कबर बटे गेलैं आउर बेइर निकलते हूवाँ पोंहइच गेलैं। आउर एक दोसर से कहत रहैं, “केहर हमरे लगिन कबर केर दुरा से पखना के लुढ़काई?” मगर जब उमन कबर बटे नजइर लगालैं, तो उमन देखलैं कि कबर केर दुरा से पखना लुढ़काल अहे! उ ढेइर हें बाड़ रहे। जब उमन कबर ठिना पोहोंचलैं आउर कबर केर भीतरे गेलैं तो एगो जवान आदमी के चमकीला चरका लुगा पिंधल भतखाइया बटे बइठल देखलैं, आउर ढेइर हैरान होलैं। उ आदमी उमन से कहलक, “हैरान ना होवा, तोहरेमन नासरत नगर केर रहेक वाला यीशु के खोजाथा, जे क्रूस उपरे चढ़ाल जाय रहे, उ जी उइठ हे। उ हिंयाँ नखे। देखा, एहे उ ठाँव हेके, जहाँ उमन उके राइख रहैं। मगर अब तोहरेमन जावा, पतरस आउर यीशु केर आउरो चेलामन के इ संदेश के बतावा, ‘यीशु तोहरेमन से आगे गलील परदेस जाई। हूवाँ तोहरेमन उके देखबा, जइसन कि उ तोहरेमन के आगे हें बताय देई रहे।’” इ सुनेक केर पाछे उमन कबर से बाहरे निकललैं आउर हूवाँ से भाइग गेलैं, काले कि उमन एतना डराय जाय रहैं कि उमन थरथराएक लगलैं आउर उमन केकरो से कोनों नी कहलैं, काले कि डरात रहैं। हफ्ता केर पहिला दिन बिहान होते हें यीशु जी उइठ के सोउब से आगे मगदला गाँव केर मरियम के देखाई देलक। यीशु उकर में से सात गो भूतमन के निकलाय रहे। उ यीशु केर चेलामन ठिना गेलक आउर उमन के बतालक कि कबर ठिना का होई रहे। उमन यीशु लगिन शोक मनात रहैं आउर काँदत रहैं। मगर उमन इ सुनलैं कि यीशु जी उइठ हे आउर इ उके देइख हे तो बिसवास नी करलैं। ओहे दिन यीशु केर दूई गो चेलामन यरुशलेम शहर से अपन घर जात रहैं। जे आसे-पासे हें रहे, उमन के यीशु देखाई देलक। मगर उमन उके तुरते चिन्हेक नी पारलैं, काले कि उकर रूप बदइल जाय रहे। मगर जब उमन के पता चललक कि उ यीशु रहे, तो उमन आउरो चेलामन के बताएक लगिन यरुशलेम शहर घूइर आलैं आउर उमन के बतालैं। मगर चेलामन उ मनक गोइठ उपरे हों बिसवास नी करलैं। इकर पाछे यीशु अपन गारहों चेलामन के जे खाएक बाइठ रहैं, देखाई देलक। उ मनक कठोर मन के देइख के उमन के डाँटलक, काले कि जे आदमीमन उके जी उठेक केर पाछे देइख रहैं, उमन केर गोइठ उपरे चेलामन बिसवास नी काइर रहैं। तब यीशु उमन से कहलक, “तोहरेमन समूचा दुनिया में जावा आउर सोउब आदमीमन के इ शुभ समाचार के सुनावा। जे हों इ शुभ समाचार उपरे बिसवास करी आउर बपतिस्मा जल संस्कार लेवी, परमेश्‍वर उके उकर पाप केर सजा से बचाई, मगर जे बिसवास नी करी उके परमेश्‍वर सजा देई। जे आदमीमन मोर उपरे बिसवास करबैं उमन के इ चमत्कार चिन्हा देखाएक केर अधिकार परमेश्‍वर बटले देवल जाई उमन मोर नाँव लेई के भूतमन के निकलाबैं, उमन नवाँ-नवाँ भाषा बोलबैं, अगर उमन के साँपमन हों चाइब देबैं तो उ मनक बिष से उमन के कोनों नोकसान नी होवी, उमन के जहर हों पियाय देबैं फिन भी उमन नी मोरबैं, उमन बेमरियामन केर उपरे हाँथ रखबैं, आउर उमन ठीक होई जबैं।” जब यीशु अपन चेलामन के इ सोउब गोइठमन के बतालक तब परमेश्‍वर उके स्वरग में उठाय लेलक आउर उ परमेश्‍वर केर संगे राइज करेक लगिन उकर भतखाइया बटे आदर केर साथ बाइठ गेलक। आउर यीशु केर चेलामन सोउब ठाँव में जाय-जाय के आदमीमन केर माझे इ शुभ समाचार केर परचार करलैं, आउर प्रभु यीशु उमन के काम करेक केर शक्ति देलक आउर उ मनक चमत्कार केर काम इ साबित करते गेलक कि उ मनक संदेश सच हेके। आमीन। ढेइर आदमीमन उ गोइठमन के जे हमरे माझे बीत रहे, धेयान से लिखेक केर कोशिश करलैं। उमन ठीक ओहे लिखलैं, जेके उ आदमीमन बटले हमरे के बताल जाय रहे, जेमन यीशु केर सेवकाई के शुरुवात से देइख रहैं आउर पाछे बचन केर सेवक बाइन गेलैं। से लगिन हे श्रीमान थियुफिलुस, मोंय इ गोइठमन केर बारे में ठीक-ठीक जाँच पड़ताल करलों, आउर मोके बेस लगलक। से लगिन इ गोइठमन के तोर लगिन शुरु से आखरी तक जइसन होई रहे तइसनेहें लिखाथों। ताकि तोके हर उ गोइठमन केर पूरा सच्चाई पता होवोक, जे आदमीमन बटले तोके सिखाल जाय हे। यहूदिया परदेस केर राजा हेरोदेस केर परिया में जकरयाह नाँव केर एगो यहूदी पुरोहित रहे। जे अबिय्याह नाँव से बनाल पुरोहित मनक दल केर सदस्य रहे, उ आउर उकर जनाना दुयो हारून पुरोहित केर बंश केर रहैं, उकर जनाना केर नाँव इलिशिबा रहे। उमन दुयो परमेश्‍वर केर नजइर में धरमी रहैं, आउर प्रभु केर सोउब आगयामन आउर नियममन के माइन के उके खुश काइर रहैं। मगर उमन केर एको गो संतान नी रहैं, काले कि इलिशिबा बाँझ रहे, आउर उमन दुयो बूढ़ा होई जाय रहैं। एक बेर जकरयाह यरुशलेम शहर केर यहूदीमन केर मंदिर में परमेश्‍वर केर सामने पुरोहित केर काम करत रहे, काले कि उ हफ्ता पुरोहित केर काम केर पारी उकर दल केर रहे। से लगिन जब उमन पुरोहितमन केर रिवाज केर मोताबिक चिट्ठी साजलैं, तो प्रभु केर मंदिर में धूप जलाएक लगिन उकर नाँव निकललक। आउर धूप जलाएक केर बेरा आदमीमन केर सोउब मंडली बाहरे मंदिर केर अंगना में प्रार्थना करत रहैं। ओहे बेरा प्रभु केर एगो स्वरगदूत धूप बेदी केर भतखाइया बटे ठड़ाल जकरयाह के दिसलक। आउर जकरयाह उके देइख के घबरालक आउर मूरखे डरालक। मगर स्वरगदूत उकर से कहलक, “हे जकरयाह, ना डराबे, काले कि परमेश्‍वर तोर प्रार्थना सुइन लेई हे आउर तोर जनाना इलिशिबा तोर लगिन एगो बेटा के जनम देवी, आउर तोंय उकर नाँव यूहन्ना रखबे। आउर तोके आनंद आउर खुशी होवी आउर उकर जनमेक से ढेइर आदमीमन खुशी मनाबैं। काले कि उ प्रभु केर नजइर में महान होवी आउर कोनों रकम केर नशापान नी करी। आउर अपन आयो केर पेट से हें पवितर आत्मा से भाइर जाई। आउर इसराइली आदमीमन में से ढेइर आदमीमन के प्रभु परमेश्‍वर बटे घुराय लानी। यूहन्ना एगो एइसन आदमी होवी, जे परमेश्‍वर केर संदेश के बताएक वाला एलिय्याह नियर आत्मा आउर शक्ति में होई के प्रभु केर आगे-आगे चली। उ प्रभु केर डहर तेयार करी आउर आबामन केर मन के छउवा-पुतामन बटे घुराई देई। उ आगया नी मानेक वालामन के परमेश्‍वर केर गेयान के मानेक सिखाई आउर परमेश्‍वर लगिन एगो बेस परजा तेयार करी।” जकरयाह स्वरगदूत से पूछलक, “इ मोंय कइसन पतियामूँ? काले कि मोंय तो बूढ़ा अहों, आउर मोर जनाना हों बुढ़िया होई जाय हे।” स्वरगदूत उके जबाब देलक, “मोंय जिब्राईल स्वरगदूत हेकों, जे परमेश्‍वर केर भीरे ठड़ाय रहोना। आउर परमेश्‍वर मोके तोर से गोठियाएक आउर तोके इ शुभ समाचार सुनाएक लगिन भेइज हे। देख, तोंय मोर इ गोइठ उपरे बिसवास नी करले, से लगिन जे दिन तक इ गोइठ पूरा नी होवी, उ दिन तक तोंय चुप रहबे आउर गोठियाएक नी पारबे।” आउर जेमन मंदिर केर अंगना में जकरयाह केर आसरा देखत रहैं, उमन आउर ताजुब होई के कहेक लगलैं, “उ मंदिर में एतना देरी काले कराथे?” जब उ बाहरे आलक, तो उ आदमीमन से गोठियाएक नी पारलक, से लगिन उमन जाइन गेलैं कि उ मंदिर में कोनों दर्शन पाय हे, आउर उ आदमीमन से इशारा करते रहलक, मुँह से कोनों कहेक नी पारलक। जब मंदिर में उकर सेवा करेक केर दिन पूरा होलक, तो उ यरुशलेम शहर से अपन घर चाइल गेलक। थोरेक दिन केर पाछे उकर जनाना इलिशिबा गर्भवती होलक, आउर पाँच महिना तक खुद के दोसर मनक नजइर से इ कइह के लुकाय रखलक, “परमेश्‍वर आदमीमन केर माझे मोर बाँझ केर लज्जा के दूर करेक लगिन इ उमर में मोर उपरे दया काइर हे।” जब एलिशिबा छाव महिना केर गर्भवती रहे, तब परमेश्‍वर बटे से जिब्राईल स्वरगदूत गलील परदेस केर नासरत नगर में एगो कुँवारी ठिना भेजल गेलक। जेकर मंगनी राजा दाऊद केर बंश यूसुफ नाँव केर एगो आदमी से होई रहे। उ कुँवारी केर नाँव मरियम रहे। स्वरगदूत उकर ठिना भीतरे आय के कहलक, “मरियम तोके मोर जोहार, तोर उपरे परमेश्‍वर केर ढेइर दया होई हे, उ तोर संगे अहे।” मरियम उकर कहल गोइठ के सुइन के ढेइर घबराय गेलक आउर सोचेक लगलक कि इ लेखे केर जोहार केर का मतलब हेके? स्वरगदूत उकर से कहलक, “हे मरियम, ना डराव, काले कि परमेश्‍वर तोर उपरे दया काइर हे। देख, तोंय गर्भवती होबे, आउर एगो बेटा के जनम देबे, तोंय उकर नाँव यीशु रखबे। उ महान होवी आउर परमप्रधान केर बेटा कहाई, आउर प्रभु परमेश्‍वर उकर पुरखा राजा दाऊद केर सिंहासन उके देवी। आउर उ याकूब केर बंश उपरे जुग-जुग राइज करी आउर उकर राइज केर अंत नी होवी।” मरियम स्वरगदूत से कहलक, “इ का लेखे होवी? मोर तो एखन बिहाय नी होई हे।” स्वरगदूत उके जबाब देलक, “पवितर आत्मा तोर उपरे उतरी, आउर परमप्रधान केर शक्ति तोर उपरे छाँई करी। से लगिन तोर से जे बेटा जनमी, उ पवितर होवी आउर परमेश्‍वर केर बेटा कहाई। देख, तोर रिश्तेदार इलिशिबा केर हों बुढ़िया समय में बेटा होवेक वाला अहे, उ जे बाँझ कहात रहे अब छठवाँ महिना होवाथे। परमेश्‍वर सोउब कुछ करेक पारेला।” मरियम कहलक, “देख, मोंय प्रभु केर दासी हेकों, जइसन तोंय कहले तइसनेहें मोर संगे होवोक।” तब स्वरगदूत उकर ठिना से चाइल गेलक। थोरेक दिन केर पाछे मरियम उइठ के जल्दी हें यहूदिया परदेस केर एगो पहार केर गाँव में गेलक। उ जकरयाह केर घर में जाय के इलिशिबा के जोहार करलक। जइसनेहें इलिशिबा मरियम केर जोहार के सुनलक, तइसनेहें छउवा उकर पेट में उछललक, आउर इलिशिबा पवितर आत्मा से भाइर गेलक। आउर इलिशिबा जोर से कहलक, “तोंय सोउब जनानामन में से धाइन अहिस, आउर तोर से जनम लेवेक वाला छउवा धाइन होवी। मोंय तोके हिंयाँ देइख के ढेइर खुश अहों, काले कि मोर प्रभु केर आयो मोर से मिलेक लगिन आय हे। जइसनेहें मोंय तोर जोहार कहेक केर शबद के सुनलों तइसनेहें छउवा मोर पेट में खुशी से उछललक। धाइन हेकिस तोंय, काले कि तोंय इ बिसवास काइर हिस कि प्रभु तोर से जे कुछ कइह हे, उ उके पूरा करी।” तब मरियम कहलक, “मोंय दिल से प्रभु केर बड़ाई करोना आउर मोर आत्मा मोर छुटकारा देवाइया परमेश्‍वर से खुश अहे। काले कि उ, मोंय उकर नरम दासी उपरे दया काइर हे, से लगिन देखा, अब से सोउब जुग केर आदमीमन मोके धाइन कहबैं। काले कि शक्तिमान परमेश्‍वर जेकर नाँव पवितर अहे, मोर लगिन बड़का-बड़का काम काइर हे। आउर जे आदमीमन उकर से डरायना, उमन केर उपरे उकर दया पीढ़ी से पीढ़ी तक बनल रहेला। उ अपन शक्तिशाली हाँथ से बड़का-बड़का काम काइर हे, आउर जेमन खुद के बड़का बुझैना उमन के तितिर-बितिर काइर देई हे। उ राजामन केर राइज करेक केर अधिकार के लेई लेलक, आउर नरम आदमीमन के उपरे उठालक। उ भूखाल आदमीमन के बेस-बेस चीजमन के खियाय के अघुवाय देलक, आउर धनी आदमीमन के छुछे हाँथ निकलाय देलक। उ हमर पुरखामन से करल करार के याइद करलक, आउर अपन सेवक इसराइल केर मदइत करेक लगिन आय हे। जइसन उ हमर बाप-दादामन से करार काइर रहे कि अब्राहम आउर उकर बंश केर उपरे उकर दया सोउब बेरा बनल रही।” मरियम लगभग तीन महिना इलिशिबा संगे रइह के अपन घर घूइर गेलक। जब इलिशिबा केर जनम देवेक केर समय पूरा होलक, आउर उ बेटा जनमालक। तब उकर पड़ोसीमन आउर रिश्तेदारमन इ सुइन के कि प्रभु उकर उपरे बड़का दया काइर हे, उकर संगे खुशी होलैं। आउर एइसन होलक कि आठवाँ दिन उमन बेटा केर खतना करेक आलैं आउर उकर नाँव उकर आबा केर नाँव में जकरयाह रखेक लगलैं। मगर उकर आयो इलिशिबा जबाब देलक, “निहीं, उकर नाँव यूहन्ना रखल जाओक।” उमन उकर से कहलैं, “तोर रिश्तेदारमन में तो केकरो इ नाँव नखे!” तब उमन उकर आबा से इशारा काइर के पूछलैं, “तोंय छउवा केर का नाँव रखेक चाहिसला?” उ लिखेक केर पट्टी माँइग के लीख देलक, “उकर नाँव यूहन्ना हेके।” आउर सोउब आदमीमन ताजुब करलैं। तब जकरयाह केर मुँह आउर जीभ तुरते खुइल गेलक आउर उ बोलेक आउर परमेश्‍वर केर गुणगान करेक लगलक। आउर उकर आसे-पासे केर सोउब रहेक वाला आदमीमन डराय गेलैं आउर इ सोउब गोइठमन केर चरचा यहूदिया परदेस केर पहार केर ढेइर गाँवमन में फाइल गेलक। आउर सुनेक वाला सोउब आदमीमन ताजुब काइर के कहलैं, “इ छउवा बाइढ़ के कइसन होवी काले कि प्रभु केर हाँथ उकर संगे अहे?” आउर उकर आबा जकरयाह पवितर आत्मा से भाइर गेलक आउर भविष्यवाणी करेक लगलक: इसराइली आदमीमन केर परमेश्‍वर प्रभु केर महिमा होवोक, काले कि उ अपन आदमीमन केर माझे आलक आउर उमन के छोड़ालक। आउर अपन सेवक राजा दाऊद केर घराना में हमर छुटकारा लगिन एगो बलवान के भेइज हे, जइसन कि उ अपन पवितर परमेश्‍वर केर संदेश के बताएक वालामन बटले ढेइर आगे हें करार काइर रहे, उ हमरे के हमर बैरीमन से आउर उ मनक सोउब शक्ति से छुटकारा देवी, जेमन हमरे से घिनायना, आउर हमर बाप-दादामन केर उपरे दया काइर के अपन पवितर करार के याइद करी। आउर उ हमर पुरखा अब्राहम से इ किरिया खाय रहे, कि उ हमरे के हमर बैरीमन से बचाई। ताकि हमरे उकर सामने पवितर, धरमी आउर निडर होई के जिंदगी भइर उकर सेवा करते रहब। आउर हे मोर छउवा, तोंय परमप्रधान परमेश्‍वर केर संदेश के बताएक वाला कहाबे, “काले कि तोंय प्रभु केर डहर तेयार करेक लगिन उकर आगे-आगे चलबे। आउर प्रभु केर आदमीमन के छुटकारा केर बारे में बताबे, जेकर से उमन के अपन पापमन से क्षमा मिलेला। इ हमर परमेश्‍वर केर बड़का दया से होवी, जइसन बेइर इंजोत देवेक लगिन चमकेला, तइसनेहें मसीह हों हमर लगिन स्वरग से आवी, ताकि उ पाप में जिंदगी बिताएक वाला आउर जुग-जुग केर मौत केर खतरा में पड़ल आदमीमन के डहर देखाओक आउर हमर कदम के शांति केर डहर में आगे लेगोक।” आउर बालक यूहन्ना बढ़ेक लगलक आउर आत्मा में मजबूत होते गेलक, आउर उ इसराइली आदमीमन केर माझे उपदेस देवेक केर दिन तक सुनसान ठाँव में रहलक। उ दिनमन रोमी महाराजा औगुस्तुस अपन राइज केर आदमीमन केर गिनती करेक केर आगया देलक। इ पहिला गिनती उ बेरा होलक, जब कुइनिरियुस सीरिया परदेस केर राजपाल रहे। आउर उकर राइज केर सोउब आदमीमन नाँव लिखायक लगिन अपन-अपन नगर में गेलैं। जहाँ से उ मनक पुरखामन रहैं। यूसुफ हों जे राजा दाऊद केर घराना आउर बंश केर रहे, से लगिन गलील परदेस केर नासरत नगर से यहूदिया परदेस में राजा दाऊद केर नगर बैतलेहम में गेलक। जेकर से उ अपन गर्भवती पत्नी मरियम केर संगे नाँव लिखवाओक। आउर उ इलाका में थोरेक चरवाहामन रहैं, जेमन राइत के मैदान में डेरा काइर के अपन झूँड़ केर पहरा देवत रहैं। अचका प्रभु केर एगो दूत उ मनक भीरे आय के ठड़ालक, आउर प्रभु केर तेज रोशनी उ मनक चाइरो बटे चमइक गेलक, आउर उमन मूरखे डराय गेलैं। मगर स्वरगदूत उमन से कहलक, “ना डरावा, देखा, मोंय तोहरेमन के बड़का खुशी केर शुभ समाचार सुनाथों, जे सोउब आदमीमन लगिन होवी। आइज राजा दाऊद केर नगर बैतलेहम में तोहरेमन लगिन एगो छुटकारा देवाइया जनइम हे, आउर एहे मसीह प्रभु हेके। तोहरेमन के इ चिन्हा से पता चाइल जाई कि उ छउवा के हेके, तोहरेमन उके लुगा में लेपटल आउर डाड़का में सुताल पाबा।” तब अचका उ स्वरगदूत केर संगे स्वरगदूत मनक एक दल परमेश्‍वर केर गुणगान करते आउर इ कहते दिसलैं, “स्वरग में परमेश्‍वर केर महिमा होवोक आउर धरती में उ आदमीमन के शांति मिलोक, जेमन से उ खुश अहे।” जब स्वरगदूतमन चरवाहामन ठिना से स्वरग चाइल गेलैं, तब चरवाहामन एक दूसरा से कहलैं, “आवा, हमरे बैतलेहम नगर जाय के इ शुभ समाचार केर बारे में, जेके प्रभु हमरे के बताय हे, देखब।” आउर उमन तुरते चाइल गेलैं आउर हूवाँ पोंहइच के मरियम, यूसुफ आउर डाड़का में उ बालक-छउवा के सुताल देखलैं। उके देखेक केर पाछे इ बालक-छउवा केर बारे में जे गोइठ स्वरगदूत उमन के बताय रहे, सेके आदमीमन के बताएक लगलैं। आउर उ मनक गोइठ सुइन के सोउब सुनेक वाला आदमीमन ताजुब होई गेलैं। मगर मरियम इ सोउब गोइठमन के अपन मन में राइख के सोचते रहलक। आउर जइसन स्वरगदूत चरवाहामन के बताय रहे, तइसनेहें उमन सोउब कुछ देखलैं आउर सुनलैं, से लगिन उमन परमेश्‍वर केर महिमा आउर गुणगान करते हूवाँ से घूइर गेलैं। यहूदी मनक नियम केर मोताबिक यीशु केर जनम केर आठवाँ दिन उकर खतना करेक केर समय आलक तो उकर नाँव यीशु रखल गेलक। इ नाँव के स्वरगदूत मरियम के गर्भवती होवेक से आगे हें बताय देई रहे। जब मूसा केर नियम केर मोताबिक मरियम आउर यूसुफ केर शुद्ध होवेक केर दिन पूरा होलक, तब उमन यीशु के यरुशलेम शहर केर यहूदी मनक मंदिर में, प्रभु केर हाँथ में जिम्मा देवेक लगिन लेई गेलैं। जइसन कि परमेश्‍वर केर नियम में लिखल अहे, “हरेक पहिलौठा बेटा प्रभु केर लगिन देवल जाओक।” आउर प्रभु केर नियम केर मोताबिक, “एक जोड़ा पाँड़की चाहे दूई गो पेरवाँ छउवा लाइन के बलिदान करोक।” उ बेरा यरुशलेम शहर में सिमोन नाँव केर एगो धरमी आउर भक्त आदमी रहे। उ मसीह केर आवेक केर आसरा देखत रहे कि उ आय के इसराइली आदमीमन के शांति देवी, आउर पवितर आत्मा उकर संगे रहे। उके पवितर आत्मा बटले बताल जाय रहे कि जब तक तोंय प्रभु केर मसीह के नी देइख लेबे, तब तक नी मोरबे। उ दिन पवितर आत्मा केर अगुवाई से उ मंदिर में आलक, जब बालक यीशु केर आयो-आबा मूसा केर नियम केर मोताबिक, रीति के पूरा करेक लगिन यीशु के मंदिर भीतरे लानलैं। तब सिमोन बालक यीशु के अपन कोरा में लेलक, आउर परमेश्‍वर के धन्यबाद देई के कहलक, “हे परमप्रधान प्रभु, अब तोंय अपन दास के अपन बचन केर मोताबिक शांति से मोरेक दे, काले कि अब मोंय छुटकारा देवाइया के देइख लेई हों। जेके तोंय दुनिया केर सोउब आदमीमन केर छुटकारा लगिन भेइज हिस। उ परजाइत आदमीमन लगिन परमेश्‍वर के दिस्तार करेक वाला इंजोत हेके। आउर तोर नीज परजा इसराइली आदमीमन लगिन महिमा होवोक।” यीशु केर आयो-आबा उकर बारे में इ गोइठमन के सुइन के ताजुब होई गेलैं। तब सिमोन उके आशीष देई के उकर आयो मरियम से कहलक, “देख, इ बालक एगो एइसन चिन्हा केर रूप में भेजल जाय हे, जेकर आदमीमन बिरोध करबैं, से लगिन इ इसराइल देस में ढेइर आदमीमन केर नाश होवेक, आउर छुटकारा पावेक केर कारण होवी। आउर एगो भयानक दुःख, एगो तलवाइर नियर तोर प्राण के आर-पार बेइध देवी। इकर से ढेइर आदमी मनक दिल केर बिचार पता चाइल जाई।” हन्नाह नाँव केर एगो परमेश्‍वर केर संदेश के बताएक वाली रहे, जे अशेर बंश केर फनूएल केर बेटी रहे। उ ढेइर बुढ़िया होई जाय रहे, आउर बिहा होवेक केर पाछे सात साल तक अपन आदमी केर संगे रहेक पाइर रहे। आउर उ चौरासी साल केर बिधवा रहे। उ बगरा समय मंदिर में हें बितात रहे, आउर उपास आउर प्रार्थना काइर के दिन-राइत परमेश्‍वर केर भक्ति करत रहे। उ बिधवा ओहे बेरा हूवाँ आय के परमेश्‍वर के धन्यबाद देवेक लगलक, आउर यरुशलेम शहर केर आदमीमन जे छुटकारा लगिन मसीह केर आसरा देखत रहैं, उमन के यीशु केर बारे में बताएक लगलक। जब मरियम आउर यूसुफ प्रभु केर नियम केर मोताबिक सोउब रीति के पूरा करलैं, तब उमन गलील परदेस केर अपन नगर नासरत में फिन घूइर आलैं। आउर बालक यीशु बढ़ते गेलक। आउर आत्मा में मजबूत आउर बुद्धि से भरपूर होते गेलक। आउर परमेश्‍वर केर दया उकर उपरे रहे। यीशु केर आयो-आबा हर साल फसह परब मनाएक लगिन यरुशलेम शहर जात रहैं। जब यीशु बारह साल केर होलक, तब उमन रीति केर मोताबिक परब मनाएक लगिन यरुशलेम शहर गेलैं। जब फसह परब केर दिन पूरा होलक तो उकर आयो-आबा अपन घर घुरेक लगलैं, मगर बालक यीशु यरुशलेम शहर में हें रइह गेलक, आउर इके उकर आयो-आबामन नी जानत रहैं। उमन इ सोइच के कि यीशु खोड़हा में हें दोसर आदमीमन केर संगे आवाथे। से लगिन जब एक दिन केर सफर पूरा होई गेलक, तब उमन उके अपन रिश्तेदारमन आउर जान चिन्हारमन में खोजेक लगलैं। मगर जब उ कहीं नी मिललक तो खोजते-खोजते यरुशलेम शहर में फिन घूइर गेलैं। आउर तीन दिन केर पाछे उमन यीशु के यहूदी मनक मंदिर में, धरमगुरुमन केर माझे बइठल आउर उमन केर संगे सवाल-जबाब करते देखलैं। आउर सुनेक वाला सोउब आदमीमन उकर बुद्धि, आउर जबाबमन से ताजुब करत रहैं। उकर आयो-आबा उके देइख के ताजुब होलैं, तब मरियम उकर से कहलक, “हे बेटा, तोंय हमरे से काले एइसन ब्यवहार करले? देख, तोर आबा आउर मोंय चिंता करत रही आउर तोके खोजत रही।” यीशु उमन से कहलक, “तोहरेमन मोके काले खोजाथा? का इ नी जानाला कि मोके अपन आबा केर घर में होवेक जरुरी अहे?” मगर यीशु केर कहल इ गोइठ के उमन नी बुझलैं। तब यीशु अपन आयो-आबा केर संगे नासरत नगर में घूइर आलक, आउर उमन केर अधीन में रहलक, आउर उकर आयो इ सोउब गोइठ के अपन मन में रखलक। आउर यीशु बुद्धि में, डील-डौल में, आउर परमेश्‍वर आउर आदमीमन केर दया में बढ़ते गेलक। रोमी महाराजा तिबिरियुस केर राइज केर पन्द्रहवाँ साल में, पुन्तियुस पिलातुस यहूदिया परदेस केर राजपाल रहे। राजा हेरोदेस गलील परदेस केर, उकर भाई फिलिप्पुस इतूरैया आउर त्रखोनीतिस परदेस केर, आउर लिसानियास अबिलेने परदेस केर एक-एक चौथाई भाग केर राजा रहैं। जब हन्ना आउर काइफा यहूदी महापुरोहित रहैं, तब उ बेरा परमेश्‍वर केर बचन सुनसान ठाँव में जकरयाह केर बेटा यूहन्ना ठिना पोहोंचलक। आउर यूहन्ना बपतिस्मा जल संस्कार देवेक वाला यरदन नदी केर आसे-पासे केर सोउब इलाका में, आदमीमन केर माझे जाय के इ परचार करेक लगलक कि पाप करेक छोइड़ देवा आउर बपतिस्मा जल संस्कार लेवा, तब परमेश्‍वर तोहर पाप के क्षमा करी। जइसन यशायाह परमेश्‍वर केर संदेश के बताएक वाला केर किताब में लिखल अहे, “सुनसान ठाँव में एगो हकाएक वाला केर शबद सुनाथे कि ‘प्रभु केर उपरे बिसवास करेक लगिन आउर उकर से मिलेक लगिन अपन मन के तेयार करा। हर एक घाटी भाइर देवल जाई, आउर हर एक पहार आउर टीलहा नीचा करल जाई, आउर जे डहर टेढ़ा अहे उके सोझ करल जाई, आउर जे डहर उबड़-खाबड़ अहे उके बराबइर करल जाई। आउर सोउब आदमीमन परमेश्‍वर केर भेजल छुटकारा देवेक वाला के देखबैं।’ ” जे आदमीमन यूहन्ना से बपतिस्मा जल संस्कार लेवेक लगिन उकर ठिना आवत रहैं, उमन से यूहन्ना कहत रहे, “हे जहरीला साँप नियर दुष्ट आदमीमन! तोहरेमन के केहर चेतालक कि आवेक वाला परमेश्‍वर केर सजा से भागा। से लगिन बेस काम काइर के देखावा कि तोहरेमन सचमुच में पाप करेक छोइड़ देई हा, आउर अपन-अपन मन में इ ना सोचा कि हमरे सजा से बाइच जाब काले कि हमरे अब्राहम केर संतान हेकी। मोंय तोहरेमन से कहाथों कि परमेश्‍वर इ पखनामन से हों अब्राहम लगिन संतान जनमाएक पारेला। जेमन पाप करेक नी छोड़ैना उ मनक न्याय करेक लगिन परमेश्‍वर एखन तेयार अहे, उमन के परमेश्‍वर नरक केर सजा देवी।” तब आदमीमन उकर से पूछलैं, “तो हमरे परमेश्‍वर केर सजा से बचेक लगिन का करब?” यूहन्ना बपतिस्मा जल संस्कार देवेक वाला उमन के जबाब देलक, “जेकर ठिना दूई गो झुला अहे, उ एगो के उके देई देवोक, जेकर ठिना नखे आउर जेकर ठिना खाएक अहे ओहो एइसनेहें करोक।” आउर मालगुजारी लेवेक वाला आदमीमन हों बपतिस्मा जल संस्कार लेवेक आलैं आउर उकर से पूछलैं, “हे गुरु! परमेश्‍वर केर सजा से बचेक लगिन हमरे के का करेक चाही?” यूहन्ना उमन से कहलक, “जेतना मालगुजारी अधिकारीमन बटले तोहर लगिन ठहराल जाय हे, उकर से बगरा ना लेबा।” आउर सिपाहीमन हों उकर से इ पूछलैं, “हमरे के का करेक चाही?” यूहन्ना उमन से कहलक, “केखो डराय धमकाय के चाहे झूठा दोष लगाय के उकर से घूस ना लेबा आउर अपन तनखा से खुश रहा।” जब सोउब आदमीमन मसीह केर जल्दी आवेक केर आसरा लगाय रहैं, तब उमन सोउब अपन-अपन मन में यूहन्ना केर बारे में बिचार करत रहैं कि का एहे तो मसीह ना लगे। तब यूहन्ना उ सोउब आदमीमन से कहलक, “मोंय तो तोहरेमन के पानी से बपतिस्मा जल संस्कार देवोना, मगर उ आवेक वाला अहे, जे मोर से शक्तिशाली अहे, मोंय तो उकर जूता केर बाँधल के खोलेक लायक हों नखों, उ तोहरेमन के पवितर आत्मा आउर आइग से बपतिस्मा देवी। उ न्याय करेक लगिन आवेक वाला अहे, उ धरती केर आदमी मनक सच्चाई से न्याय करी, उ धरमी आदमीमन के स्वरग में लेगी आउर पापी आदमीमन के नरक केर आइग में साइज देवी।” इ लेखे यूहन्ना ढेइर हें शिक्षा देई-देई के आदमीमन के शुभ समाचार सुनाते रहलक। मगर इसराइल देस केर एक चौथाई भाग गलील परदेस केर राजा हेरोदेस, अपनेहें भाई फिलिप्पुस जे एखन जीते रहे, उकर जनाना हेरोदियास के बिहा काइर रहे, आउर उकर सोउब बुरा काममन केर बारे में यूहन्ना उके डाँइट रहे। से लगिन यूहन्ना के जेहेल घर में साइज के, राजा हेरोदेस उ सोउब बुरा काममन से हों आउर बड़का बुरा काम करलक। मगर यूहन्ना केर जेहेल घर में सजाल जाएक केर आगे, जब सोउब आदमीमन बपतिस्मा जल संस्कार लेलैं, तो यीशु हों बपतिस्मा जल संस्कार लेलक, आउर जइसनेहें उ प्रार्थना करत रहे, तब स्वरग खुइल गेलक। आउर पवितर आत्मा पेरवाँ केर रूप में उकर उपरे उतरलक, आउर स्वरग से इ आवाज आलक, “तोंय मोर दुलार बेटा हेकिस, मोंय तोर से ढेइर खुश अहों।” जब यीशु अपन सेवा काम करेक शुरु करलक, तब उकर उमर लगभग तीस बरिस केर रहे। आउर सोउब आदमीमन एहे समझत रहैं कि इ यूसुफ केर बेटा हेके। आउर यूसुफ इली केर बेटा रहे। आउर इली मत्तात केर, आउर मत्तात लेवी केर, आउर लेवी मलकी केर, आउर मलकी यन्ना केर, आउर यन्ना यूसुफ केर। आउर यूसुफ मत्तित्याह केर, आउर मत्तित्याह आमोस केर, आउर आमोस नहूम केर, आउर नहूम असल्याह केर, आउर असल्याह नोगाह केर। आउर नोगाह मात केर, आउर मात मत्तित्याह केर, आउर मत्तित्याह शिमी केर, आउर शिमी योसेख केर, आउर योसेख योदाह केर। आउर योदाह यूहन्ना केर, आउर यूहन्ना रेसा केर, आउर रेसा जरुब्बाबिल केर, आउर जरुब्बाबिल शालतियेल केर, आउर शालतियेल नेरी केर। आउर नेरी मलकी केर, आउर मलकी अद्दी केर, आउर अद्दी कोसाम केर, आउर कोसाम इलमोदाम केर, आउर इलमोदाम एर केर। आउर एर यहोशुअ केर, आउर यहोशुअ इलाजार केर, आउर इलाजार योरीम केर, आउर योरीम मत्तात केर, आउर मत्तात लेवी केर। आउर लेवी सिमोन केर, आउर सिमोन यहूदाह केर, आउर यहूदाह यूसुफ केर, आउर यूसुफ योनान केर, आउर योनान इलयाकीम केर। आउर इलयाकीम मलेआह केर, आउर मलेआह मिन्नाह केर, आउर मिन्नाह मत्तता केर, आउर मत्तता नातान केर, आउर नातान दाऊद केर। आउर दाऊद यिशै केर, आउर यिशै ओबेद केर, आउर ओबेद बोअज केर, आउर बोअज सलमोन केर, आउर सलमोन नहशोन केर। आउर नहशोन अम्मीनादाब केर, आउर अम्मीनादाब अरनी केर, आउर अरनी हिस्रोन केर, आउर हिस्रोन फिरिस केर, आउर फिरिस यहूदा केर। आउर यहूदा याकूब केर, आउर याकूब इसहाक केर, आउर इसहाक अब्राहम केर, आउर अब्राहम तिरह केर, आउर तिरह नाहोर केर। आउर नाहोर सरुक केर, आउर सरुक रऊ केर, आउर रऊ फिलिग केर, आउर फिलिग एबिर केर, आउर एबिर शिलह केर। आउर शिलह केनान केर, आउर केनान अरफात केर, आउर अरफात शेम केर, आउर शेम नूह केर, आउर नूह लिमिक केर। आउर लिमिक मथूशिलाह केर, आउर मथूशिलाह हनोक केर, आउर हनोक यिरिद केर, आउर यिरिद महललेल केर, आउर महललेल केनान केर। आउर केनान एनोश केर, आउर एनोश शेत केर, आउर शेत आदम केर आउर आदम परमेश्‍वर केर बेटा रहे। यीशु पवितर आत्मा से भरल, यरदन नदी से घुरलक, आउर चालीस दिन तक पवितर आत्मा केर सिखाएक से सुनसान ठाँव में घुमत रहलक। आउर हूवाँ शैतान उके चालीस दिन तक परखते रहलक। इ दिनमन में उ कोनोवें नी खालक आउर जब उ दिन पूरा होलक, तो उके भूख लगलक। तब शैतान उकर से कहलक, “अगर तोंय परमेश्‍वर केर बेटा हेकिस, तो इ पखना के कइह दे कि रोटी बाइन जाओक, ताकि तोंय उके खाएक पारबे।” मगर यीशु उके जबाब देलक, “पवितर किताब में लिखल अहे, ‘आदमी सिरिफ रोटी से हें जिंदा नी रहेला।’ ” तब शैतान उके ऊँचा ठाँव में लेई गेलक आउर तुरते दुनिया केर सोउब राइज के देखालक। आउर यीशु से कहलक, “मोंय इकर सोउब अधिकार आउर धन-दौलत तोके देमूँ, काले कि इ सोउब मोके देवल जाय हे, आउर जेके मोंय चाहोना, उके हें देई देवोना। से लगिन अगर तोंय ठेहुना टेइक के मोर भक्ति करबे, तो इ सोउब तोर होई जाई।” यीशु उके जबाब देलक, “पवितर किताब में लिखल अहे, ‘तोंय प्रभु अपन परमेश्‍वर केर भक्ति कर आउर सिरिफ उकरे सेवा कर।’ ” तब शैतान यीशु के यरुशलेम शहर में लेई गेलक आउर यहूदी मनक मंदिर केर सोउब से ऊँचा ठाँव में ठड़ुवालक, आउर उकर से कहलक, “अगर तोंय सच में परमेश्‍वर केर बेटा हेकिस, तो इ गोइठ के साबित करेक लगिन खुद के हिंयाँ से हेंठे गिराय दे। काले कि पवितर किताब में लिखल अहे, ‘परमेश्‍वर अपन स्वरगदूतमन के आगया देवी, आउर उमन तोके बचाय लेबैं। उमन तोके हाँथों हाँथ झोईक लेबैं, कहीं एइसन ना होवोक कि तोर गोड़मन में पखना से चोट लगी।’” यीशु उके जबाब देलक, “पवितर किताब में एहो कहल जाय हे, ‘तोंय अपन प्रभु परमेश्‍वर के ना परखबे।’” इ लेखे शैतान सोउब रकम से परखेक केर पाछे, थोरेक समय लगिन यीशु ठिना से चाइल गेलक। फिन यीशु पवितर आत्मा केर शक्ति से भाइर के गलील परदेस में घूइर आलक, आउर इ गोइठ आसे-पासे केर सोउब इलाका में फाइल गेलक। आउर यीशु यहूदी मनक प्रार्थना घरमन में उपदेस देते रहलक, आउर सोउब आदमीमन उकर बड़ाई करत रहैं। जब यीशु हूवाँ से घूइर के नासरत नगर में आलक, जहाँ उ पोइस बाइढ़ रहे, हूवाँ अपन रीति केर मोताबिक यहूदी मनक आराम केर दिन में, यहूदी मनक प्रार्थना घर में जाय के पवितर किताब से पढ़ेक लगिन ठड़ालक। उके पढ़ेक लगिन यशायाह परमेश्‍वर केर संदेश के बताएक वाला केर किताब के देवल गेलक, आउर यीशु उ किताब के खोइल के उ जगा के निकलालक, जहाँ इ लिखल रहे, “प्रभु केर आत्मा मोर उपरे अहे, काले कि उ मोके इकर लगिन भेइज हे कि मोंय गरीब आदमीमन के शुभ समाचार सुनामूँ, बंधुवामन के छोड़ामूँ, अंधरामन केर आँइख खोलमूँ आउर दबल-कुचल आदमीमन के आजाद करमूँ, आउर इ कइह के परचार करमूँ कि परमेश्‍वर बटे से उ समय आय हे कि उ अपन आदमीमन के छोड़ाई।” आउर यीशु पवितर किताब के बंद काइर के सेवक के देई देलक आउर बाइठ गेलक। आउर यहूदी मनक प्रार्थना घर केर सोउब आदमीमन टकटकी लगाय के उके देखेक लगलैं। तब यीशु उमन से कहलक, “आइज हें इ पवितर किताब में लिखल गोइठ तोहर सुनते हें पूरा होलक।” आउर सोउब आदमीमन यीशु केर बड़ाई करलैं। उमन दया से भरल गोइठ उकर मुँह से सुइन के ताजुब होलैं, आउर कहेक लगलैं, “का इ यूसुफ केर बेटा ना लगे?” यीशु उमन से कहलक, “तोहरेमन जरूर हें मोके इ खभनइत सुनाबा, ‘हे बाइध पहिले तोंय अपन इलाज कर! जे चमत्कार केर काम तोंय कफरनहूम नगर में काइर हिस, हमरे उके तोर बारे में सुइन ही, उके हिंयाँ अपन नगर में हों कर।’ ” फिन यीशु कहलक, “मोंय तोहर से सच कहाथों, केऊ हों परमेश्‍वर केर संदेश के बताएक वाला अपन नगर में माइन-मर्यादा नी पावेला। मोंय तोहर से सच कहाथों कि परमेश्‍वर केर संदेश देवेक वाला एलिय्याह केर दिनमन में जब आकाश बंद रहे, आउर साढ़े तीन साल तक पानी नी आलक, आउर सोउब देस में बड़का अकाल होई गेलक, तो उ बेरा इसराइल देस में ढेइर बिधवामन रहैं। फिन भी परमेश्‍वर केर संदेश के बताएक वाला एलिय्याह के उमन में से केकरो ठिना नी भेजल गेलक, मगर सिरिफ सैदा परदेस केर सारफत नगर में रहेक वाला एगो दोसर जाइत केर बिधवा जनाना ठिना भेजल गेलक। आउर परमेश्‍वर केर संदेश के बताएक वाला इलीशा केर समय में इसराइल देस में ढेइर आदमीमन केर कोढ़ बेमारी रहे, फिन भी उमन में से केखो ठीक नी करल गेलक, सिरिफ सीरिया देस केर रहेक वाला एगो नामान नाँव केर परजाइत आदमी के ठीक करल गेलक।” इ गोइठ के सुनते हें यहूदी मनक प्रार्थना घर में जेतना आदमीमन रहैं सोउब खिसाय गेलैं। आउर उमन उइठ गेलैं आउर यीशु के नगर से बाहरे निकलालैं, आउर जे पहार उपरे उ मनक नगर बसल रहे, उकर चुन्दलू में लेई गेलैं, आउर उमन उके हूवाँ से हेंठे गिराएक खोजत रहैं ताकि उ मोइर जाओक। मगर यीशु उ मनक माझे से निकइल के चाइल गेलक। यीशु फिन गलील परदेस केर कफरनहूम नगर में आलक, आउर उ यहूदी मनक आराम केर दिन आदमीमन के उपदेस देवत रहे। उमन उकर उपदेस के सुइन के ताजुब होई गेलैं, काले कि यीशु इ लेखे सिखात रहे कि उके सिखाएक केर अधिकार अहे। यहूदी मनक प्रार्थना घर में एगो आदमी रहे, जेकर में भूत रहे। उ जोर से चिल्लालक, “हे नासरत नगर केर रहेक वाला यीशु, तोंय हमरे से का चाहिसला? का तोंय हमरे के नाश करेक आय हिस? मोंय तोके जानोना तोंय केहर हेकिस? तोंय परमेश्‍वर केर पवितर आदमी हेकिस, तोंय परमेश्‍वर बटले आय हिस।” यीशु उके घुड़इक के कहलक, “चुप रह, आउर उ आदमी में से निकइल जा!” तब भूत उके माझे में पटइक के, बेगर नोकसान पोंहचाले उकर में से निकइल गेलक। तब जेतना आदमीमन यहूदी मनक प्रार्थना घर में रहैं, सोउबमन ताजुब होलैं आउर एक दोसर से कहेक लगलैं, “इ कइसन बचन हेके? काले कि उ अधिकार आउर शक्ति केर साथ भूतमन के आगया देवेला, आउर उमन उकर आगया के माइन के निकइल जायना।” इकर पाछे, उ आदमीमन यीशु केर बारे में ढेइर आदमीमन के बतालैं, इ लेखे चाइरो बटे हर ठाँव में इ गोइठ फाइल गेलक। यीशु यहूदी मनक प्रार्थना घर से उइठ के सिमोन केर घर गेलक, आउर सिमोन केर साइस के जार धाइर रहे, आउर उमन उकर लगिन यीशु से बिनती करलैं कि उके ठीक काइर देवोक। यीशु उकर ठिना ठड़ाय के जार के डाँटलक आउर जार उकर से उतइर गेलक, आउर सिमोन केर साइस तुरते उइठ के, उ मनक सेवा-सुसइर करेक लगलक। जब यहूदी मनक आराम केर दिन बीत गेलक आउर बेइर डूइब गेलक। तब जेकर-जेकर हिंयाँ बरने-बरन केर बेमरिया आदमीमन रहैं, उमन के आदमीमन यीशु ठिना लेई लानलैं, आउर यीशु एक-एक झन केर उपरे हाँथ राइख के उमन के ठीक करलक। आउर भूतमन हों चिल्लाते आउर इ कहते उमन में से निकइल गेलैं, “तोंय परमेश्‍वर केर बेटा हेकिस।” मगर यीशु उमन के डाँटत रहे, आउर कोनों कहेक नी देवत रहे, काले कि उमन जानत रहैं कि इ मसीह हेके। जब बिहान होई गेलक तो यीशु निकइल के एगो सुनसान ठाँव में गेलक आउर भीड़ केर भीड़ आदमीमन यीशु के खोजते-खोजते उकर ठिना आलैं। आउर उमन यीशु से बिनती काइर के कहेक लगलैं कि हमरे के छोइड़ के ना जा। मगर यीशु उमन से कहलक, “मोके आउर नगरमन में हों परमेश्‍वर केर राइज केर शुभ समाचार सुनाएक जरुरी अहे, काले कि मोंय इकरे लगिन भेजल जाय हों।” आउर यीशु गलील परदेस केर यहूदी मनक प्रार्थना घरमन में परचार करते रहलक। एक दिन यीशु गनेसरत झील केर किनारे ठड़ाल रहे। आउर आदमीमन परमेश्‍वर केर बचन सुनेक लगिन उकर उपरे गिर जात रहैं। उ बेरा यीशु झील केर किनारे दूई गो डोंगा देखलक, आउर मछुवामन उकर से उतइर के अपन जाल के धोवत रहैं। यीशु दुयो में से एगो डोंगा उपरे जे सिमोन केर रहे, चाइढ़ गेलक आउर सिमोन से कहलक, “डोंगा के किनारे से थोरेक दूर लेई चल।” इकर पाछे उ डोंगा में बाइठ गेलक आउर डोंगा से आदमीमन के उपदेस देवेक लगलक। उपदेस देवेक केर पाछे उ सिमोन से कहलक, “डोंगा के बगरा गढ़हा पानी बटे लेई चल, आउर मछरीमन के बझाएक लगिन अपन जाल फेक।” सिमोन उके जबाब देलक, “हे गुरु, हमरे राइत भइर मेहनइत करली आउर गोटको मछरी नी मारली। मगर, अगर तोंय एइसन कहाथिस तो मोंय जाल के फेकमूँ।” जब सिमोन आउर उकर संगमन जाल फेकलैं तो एतना बगरा मछरी बाइझ गेलैं कि उ मनक जाल फटेक नियर होई गेलक। से लगिन उमन अपन संगमन के जेमन दोसर डोंगा में रहैं, मदइत करेक लगिन इशारा काइर के बोलालैं। उमन आलैं आउर दुयो डोंगा में एतना मछरी भाइर लेलैं कि डोंगा डुबेक लगलक। इ देइख के सिमोन पतरस यीशु केर गोड़ में गिर के कहलक, “हे प्रभु, मोर ठिना से चाइल जा, काले कि मोंय पापी आदमी हेकों।” काले कि एतना मछरीमन केर बाझेक से उके आउर उकर संगमन के ढेइर ताजुब होलक। आउर एइसनेहें जबदी केर बेटा याकूब आउर यूहन्ना हों, जेमन सिमोन केर संगमन रहैं, इ देइख के ताजुब होलैं। तब यीशु सिमोन से कहलक, “ना डराव, अब से तोंय आदमीमन के मोर ठिना बिसवास में लानबे।” आउर उमन डोंगामन के किनारे लेई आनलैं, आउर मछरी धारेक केर काम के छोइड़ के यीशु केर चेला बनेक लगिन उकर संगे चाइल गेलैं। एक बेर यीशु एगो नगर में रहे, तब उकर ठिना एगो आदमी आलक, जेके कोढ़ बेमारी होई रहे। उ यीशु के देइख के उकर आगे ठेहुनाय के बिनती करलक, “हे प्रभु, मोके ठीक काइर दे, काले कि मोंय जानोना, अगर तोंय चाहबे तो मोके ठीक करेक पारबे।” यीशु हाँथ बढ़ाय के उके छुलक आउर कहलक, “मोंय चाहोना कि तोंय ठीक होई जा।” आउर उ कोढ़ बेमारी से तुरते ठीक होई गेलक। तब यीशु उके चेताय के कहलक, “केकरो से ना कहबे कि मोंय तोके ठीक काइर हों, मगर जाय के खुद के यहूदी पुरोहित के देखाव कि तोंय ठीक होई जाय हिस, आउर शुद्ध होवेक केर बारे में जे कोनों मूसा अपन नियम में लीख हे उ सोउब भेंट के चढ़ाव, ताकि उमन लगिन सबूत होवोक।” मगर यीशु केर बारे में खबर आउर हें बगरा फैलते गेलक, आउर भीड़ केर भीड़ आदमीमन उकर उपदेस सुनेक लगिन, आउर अपन बेमारीमन से ठीक होवेक लगिन उकर ठिना आवेक लगलैं। मगर यीशु सुनसान ठाँव में अलगे जाय के प्रार्थना करते रहत रहे। एक दिन यीशु आदमीमन के सिखात रहे, से बेरा हूवाँ मूसा केर नियम के सिखाएक वाला आउर फरीसी दल केर आदमीमन बइठल रहैं, जेमन गलील आउर यहूदिया परदेस केर हर एक गाँव से, आउर यरुशलेम शहर से आय रहैं। बेमरियामन के ठीक करेक लगिन प्रभु केर शक्ति यीशु केर संगे रहे। से बेरा थोरेक आदमीमन एगो लकवा मारल आदमी के पटिया में सुताय के बोइह लानलैं, आउर उमन उके भीतरे लेगेक आउर यीशु केर आगे रखेक केर उपाय करत रहैं। आउर जब भीड़ केर चलते उके भीतरे नी लेगेक पारलैं, तो उमन छाइन उपरे चाइढ़ के थोरेक खपरा के उजराय के टोका काइर देलैं, आउर पटिया समेत उ लकवा मारल आदमी के भीड़ में यीशु केर आगे उतराय देलैं। यीशु इ जानलक कि उ आदमीमन मोर उपरे बिसवास करैना कि मोंय ठीक करेक पारोना, उ लकवा मारल आदमी से कहलक, “हे आदमी, मोंय तोर पाप के क्षमा करोना।” तब मूसा केर नियम के सिखाएक वालामन आउर फरीसी दल केर आदमीमन आपस में बिचार करेक लगलैं, “इ केहर हेके, जे एइसन गोइठ कइह के परमेश्‍वर केर निंदा करेला? परमेश्‍वर के छोइड़ के आउर केऊ पाप क्षमा करेक नी पारबैं?” यीशु उ मनक मन केर गोइठ के जाइन के उमन से कहलक, “तोहरेमन अपन मन में का बिचार कराथा? मोर लगिन इ कहेक का सहज अहे? कि ‘तोर पाप क्षमा होलक,’ या उके इ कहेक कि ‘उठ आउर अपन पटिया के उठाय के चल फिर’ मगर इकर लगिन कि तोहरेमन जाइन लेवा कि मोंय आदमी केर बेटा के दुनिया में पाप क्षमा करेक केर हों अधिकार अहे।” तब यीशु लकवा मारल आदमी से कहलक, “मोंय तोर से कहाथों, उठ आउर अपन पटिया के उठाय के अपन घर चाइल जा।” उ तुरते उ मनक आगे से उठलक, आउर जे पटिया में सुतल रहे उके उठाय के परमेश्‍वर केर बड़ाई करते अपन घर चाइल गेलक। तब सोउब आदमीमन ताजुब होलैं आउर परमेश्‍वर केर बड़ाई करेक लगलैं, आउर डराय के कहेक लगलैं, “आइज हमरे ताजुब काम देखली।” इकर पाछे यीशु बाहरे गेलक, आउर एगो लेवी नाँव केर मालगुजारी लेवेक वाला आदमी के जेकर दोसर नाँव मत्ती रहे, मालगुजारी लेवेक केर ठाँव में बइठल देखलक, आउर उकर से कहलक, “मोर पिछे होई ले आउर मोर चेला बाइन जा।” तब लेवी सोउब कुछ छोइड़ के उठलक आउर यीशु केर संगे होई गेलक। लेवी अपन घर में यीशु लगिन एगो बड़का भोज रखलक, आउर हूवाँ मालगुजारी लेवेक वालामन आउर दोसर आदमी मनक एगो बड़का भीड़ यीशु केर संगे खाएक बाइठ रहैं। इ देइख के फरीसी दल केर आदमीमन आउर मूसा केर नियम के सिखाएक वालामन कुड़कुड़ायक लगलैं, आउर यीशु केर चेलामन से कहलैं, “तोहरेमन मालगुजारी लेवेक वाला आउर पापी आदमीमन केर संगे काले खाथा-पियाथा?” यीशु उमन के जबाब देलक, “भला चंगा आदमीमन लगिन बाइध केर दरकार नखे, मगर बेमरियामन लगिन दरकार अहे। मोंय उमन के पाप करेक से छोड़वाएक लगिन बोलाएक नी आय हों, जेमन खुद के धरमी बुझैना, मगर मोंय उमन के पाप करेक से छोड़वाएक लगिन बोलाएक आय हों, जेमन जानैना कि हमरे पापी अही।” थोरेक आदमीमन यीशु से कहलैं, “यूहन्ना बपतिस्मा जल संस्कार देवेक वाला केर चेलामन तो बराबइर उपास रखैना, आउर प्रार्थना करते रहैना, आउर फरीसी दल केर आदमीमन केर चेलामन हों एइसनेहें करैना, मगर तोर चेलामन काले खायना-पियैना।” यीशु उमन के जबाब देलक, “जब तक मोंय अपन चेलामन केर संगे अहों, उमन उपास नी करबैं काले कि उमन खुश अहैं, एहे लेखे बारातीमन जब तक दूल्हा उ मनक संगे रही, उमन उपास नी करबैं। मगर उ दिन आवी कि दूल्हा के उमन से अलग कराल जाई, से बेरा उमन उपास करबैं।” यीशु आउर एगो उदाहरन उमन के बतालक, “केऊ आदमी नवाँ लुगा में से फाइर के उ टुकरा के पुरना लुगा में नी टासेला, नहीं तो धोवल जाएक से नवाँ लुगा केर टुकरा सिकुइड़ जाई, आउर पुरना लुगा के आउर फाइर देई। आउर उ टुकरा पुरना लुगा में मेल हों नी खाई। आउर केऊ नवाँ अंगूर केर रस के पुरना चमड़ा केर थैला में नी भरैना, काले कि एइसन करेक से अंगूर केर रस से फेन उठी आउर पुरना चमड़ा केर थैला के नी फैलेक केर चलते फाइर देवी, आउर अंगूर केर रस बोहाय जाई, आउर चमड़ा केर थैला हों नाश होई जाई। से लगिन नवाँ अंगूर केर रस के नवाँ चमड़ा केर थैला में भरेक चाही। केऊ आदमी पुरना अंगूर केर रस के पी के नवाँ अंगूर केर रस के नी चाहेला, उ कहेला कि पुरना हें बेस अहे।” फिन यहूदी मनक आराम केर दिन यीशु अन्न केर खेतमन में से होई के जात रहे, आउर उकर चेलामन बाइलमन के तोइर-तोइर के, आउर हाँथ से मीस-मीस के खाते जात रहैं। तब फरीसी दल केर आदमीमन में से थोरेक आदमीमन उमन से कहेक लगलैं, “यहूदी मनक आराम केर दिन काम करेक मूसा केर नियम केर मोताबिक उचित नखे, फिन भी तोहरेमन इ काम काले कराथा?” यीशु उमन के जबाब देलक, “का तोहरेमन पवितर किताब में इ नी पइढ़ हा कि राजा दाऊद, जब उ आउर उकर संगमन के भूख लगलक तो का करलक? दाऊद कइसन परमेश्‍वर केर तंबू में गेलक, आउर उ रोटीमन के लेई के खालक आउर अपन संगमन के हों देलक, जेके पुरोहित के छोइड़ आउर केखो खाएक उचित नी रहे।” आउर यीशु उमन से कहलक, “मोंय आदमी केर बेटा यहूदी मनक आराम केर दिन केर हों मालिक हेकों।” एक बेर यीशु फिन यहूदी मनक दोसर आराम केर दिन में, यहूदी मनक प्रार्थना घर में जाय के उपदेस देवत रहे, हूवाँ एगो आदमी रहे, जेकर भतखाइया हाँथ सुखल रहे। आउर मूसा केर नियम के सिखाएक वालामन, आउर फरीसी दल केर आदमीमन यीशु केर उपरे दोष लगाएक लगिन मोका पावेक केर ताक में रहैं कि यीशु यहूदी मनक आराम केर दिन में बेमरियामन के ठीक करेला कि निहीं। मगर यीशु उ मनक बिचार के जानत रहे, से लगिन हाँथ सुखल आदमी से कहलक, “उठ सोउब केर माझे ठड़ाव।” उ उइठ के ठड़ालक। यीशु उमन से कहलक, “मोंय तोहरेमन से इ पूछाथों कि यहूदी मनक आराम केर दिन मूसा केर नियम केर मोताबिक का करेक उचित अहे, भला करेक या बुरा करेक, जान के बचाएक या नाश करेक?” आउर यीशु चाइरो बटे उ सोउब आदमीमन के देइख के उ हाँथ सुखल आदमी से कहलक, “अपन हाँथ के बढ़ाव।” उ अपन हाँथ के बढ़ालक आउर उकर हाँथ ठीक होई गेलक। मगर फरीसी आदमीमन, आउर मूसा केर नियम के सिखाएक वालामन मुरुक खिसाय के एक दोसर से सलहा करेक लगलैं कि हमरे यीशु केर संगे का करब? आउर उ दिनमन में यीशु प्रार्थना करेक लगिन पहार उपरे गेलक, आउर परमेश्‍वर से प्रार्थना करेक में राइत भइर बिताय देलक। जब बिहान होलक तो उ अपन चेलामन के बोलाय के उमन में से बारह झन के चुइन लेलक, आउर उमन के खास चेला कहलक। आउर बारह खास चेलामन इमन हेकैं: सिमोन जेकर नाँव उ पतरस रखलक, आउर उकर छोटका भाई अन्द्रियास, याकूब आउर याकूब केर छोटका भाई यूहन्ना, फिलिप्पुस आउर बरतुल्मै। मत्ती, थोमा आउर हलफई केर बेटा याकूब, आउर दोसर सिमोन जे क्रांतिकारी दल केर सदस्य रहे, जे जेलोतेस कहायला। आउर याकूब केर बेटा यहूदा, आउर यहूदा इस्करियोती जे करियोत गाँव केर रहे, जे पाछे यीशु के धरुवाएक वाला बनलक। तब यीशु अपन खास चेलामन केर संगे पहार से उतइर के चातर ठाँव में ठड़ालक। हूवाँ उकर ढेइर चेलामन रहैं, आउर आदमी मनक एगो बड़का भीड़ हों रहे, उमन यहूदिया परदेस, यरुशलेम शहर, सूर आउर सैदा नगर केर समुदर केर किनारे से आय रहैं। उमन यीशु केर उपदेस सुनेक आउर अपन बेमारीमन से ठीक होवेक लगिन उकर ठिना आय रहैं। हूवाँ यीशु भूतमन से सताल आदमीमन के हों ठीक करत रहे। आउर सोउब आदमीमन यीशु के छुवेक चाहत रहैं, काले कि उकर में से शक्ति निकइल के सोउब के ठीक काइर देवत रहे। तब यीशु अपन चेलामन बटे देइख के कहलक, “धाइन अहा तोहरेमन, काले कि अपन जिंदगी में परमेश्‍वर केर जरुरत के जानाला, तोहरेमन परमेश्‍वर केर राइज में जबा। धाइन अहा तोहरेमन जे एखन भूखल अहा, काले कि तोहरेमन अघुवाल जबा, धाइन अहा तोहरेमन जे एखन काँदाथा, काले कि पाछे हाँसबा। धाइन अहा तोहरेमन, जब मोंय आदमी केर बेटा केर खातिर आदमीमन तोहरेमन से बैर करबैं, आउर तोहरेमन के निकलाय देबैं, आउर तोहरेमन केर निंदा करबैं, आउर तोहरे केर नाँव के बुरा जाइन के काइट देबैं। उ दिनमन में खुशी से नाचबा, काले कि तोहरेमन के स्वरग में बड़का इनाम भेटाई। उमन केर बाप-दादामन हों परमेश्‍वर केर संदेश के बताएक वालामन केर संगे एइसनेहें करत रहैं। मगर हाय, तोहरेमन जे धनी अहा, तोहरेमन अपन सुख-चाइन पहिलेहें पाय चुइक हा। हाय, जेमन एखन अघाल अहा, काले कि पाछे भूखे होबा। हाय, जेमन एखन हँसाथा, काले कि पाछे शोक करबा आउर काँदबा। हाय, जब सोउब आदमी तोहर बड़ाई करबैं, काले कि उ मनक बाप-दादामन हों झूठा संदेश देवेक वालामन केर एइसनेहें बड़ाई करत रहैं। मगर मोंय तोहरे सुनेक वालामन से कहाथों कि अपन दुश्मनमन से प्रेम करा, जेमन तोहरे से बैर करैना उमन केर भला करा। जेमन तोहरेमन के सराप देवैना, उमन के आशीष देवा, जेमन तोहरेमन केर अपमान करैना, उमन लगिन प्रार्थना करा। जे तोर एक गाल में चटका मारी उकर बटे दोसर गाल हों फेइर दे। आउर जे तोर गामछा के लुइट लेवी, उके झुला लेगेग से हों ना रोकबे। जे केऊ तोर से माँगी, उके देबे, आउर जे केऊ तोर से तोर कोनोवें चीज के लेई लेवी, उके घुराएक ले ना कहबे। आउर तोहरेमन दोसरमन से अपन लगिन जइसन ब्यवहार चाहाला, तइसनेहें तोहरेमन हों दोसरमन संगे ब्यवहार करा। अगर तोहरेमन जेमन तोहर से प्रेम करैना ओहेमन से भइर प्रेम करबा, तो परमेश्‍वर तोहर बड़ाई काले करी? काले कि पापी आदमीमन हों अपन से प्रेम करेक वालामन से प्रेम करैना। आउर अगर तोहरेमन सिरिफ अपन भलाई करेक वालामन केर संगे भलाई करबा, तो परमेश्‍वर तोहर बड़ाई काले करी? काले कि पापी आदमीमन हों एइसनेहें करैना। आउर अगर तोहरेमन ओहे आदमीमन के सिरिफ उधरा देबा, जेमन से उधरा घुराएक केर आसरा रखाला तो परमेश्‍वर तोहर बड़ाई काले करी? काले कि पापी आदमीमन हों पूरा-पुरी देवल उधरा के फिन पावेक लगिन पापीमन के उधरा देवैना। मगर तोहरेमन अपन दुश्मनमन से प्रेम करा आउर उ मनक भलाई करा। आउर फिन पावेक केर आसरा राइख के उधरा ना देबा। तब तोहर इनाम महान होवी आउर तोहरेमन परमप्रधान केर संतान बाइन जबा, काले कि परमेश्‍वर बुरा आदमीमन केर आउर जेमन परमेश्‍वर के धन्यबाद नी देवैना, उ मनक उपरे हों दया करेला। से लगिन जइसन तोहर आबा दयालु अहे, तइसनेहें तोहरेमन हों दयालु बना। केखो दोष ना लगावा तो परमेश्‍वर हों तोहरे उपरे दोष नी लगाई। केखो दोषी ना ठहरावा तो परमेश्‍वर हों तोहरेमन के दोषी नी ठहराई, क्षमा करा तो परमेश्‍वर तोहरेमन के हों क्षमा करी। देबा होले, तोहरेमन के हों देवल जाई। आदमीमन पूरा नाप दबाय-दबाय के आउर हिलाय-हिलाय के गिरत ले तोहरेमन केर कोरा में साजबैं। काले कि जे नाप से तोहरेमन नापाला, उकरे से तोहरे लगिन हों नापल जाई।” फिन यीशु उमन के एगो उदाहरन बतालक, “का अंधरा, अंधरा के डहर बताएक पारी? का दुयो गढ़हा में नी गिरबैं? चेला अपन गुरु से बाड़ नी होवेला, मगर जे केऊ पूरा शिक्षा पावेला, उ अपन गुरु केर नियर बाइन जायला। तोंय काले अपन बिसवासी भाई केर जिंदगी केर छोटका-छोटका गलतीमन के देखिसला, जबकि तोंय खुद तोर जिंदगी केर बड़का-बड़का गलतीमन के नी देखिसला? आउर जब तोंय खुद केर बड़का पाप के नी देखिसला, तो तोके खुद से कम पाप वाला आदमी केर मदइत करेक केर कोशिश नी करेक चाही। हे ढोंगी, पहिले तोंय खुद केर बड़का गलतीमन के सुधराय ले, फिन तोंय अपन बिसवासी भाई केर छोटका-छोटका गलतीमन के, बेस लेखे देइख के उके सुधराएक में मदइत करेक पारबे। केऊ हों बेस आदमी बुरा काम नी करी, आउर ना तो केऊ बुरा आदमी बेस काम करी। हरेक आदमी अपन काम से चिन्हाय जायला। काले कि आदमीमन काँटा झूँड़मन से अंजीर फार नी तोरैना, आउर ना झड़बेरी से अंगूर फार। भला आदमी अपन मन केर बेस भंडार से बेस गोइठमन के निकलायला, आउर बुरा आदमी अपन मन केर बुरा भंडार से बुरा गोइठमन के निकलायला, काले कि जे गोइठमन मन में भरल अहे, ओहे उकर मुँह से निकलेला। जब तोहरेमन मोर कहेक केर मोताबिक नी चलाला, तो काले मोके ‘हे प्रभु, हे प्रभु,’ कहाला? जे केऊ मोर ठिना आवेला, आउर मोर गोइठमन के सुइन के उकर मोताबिक चलेला, मोंय तोहरेमन के बताथों कि उ केकर नियर अहे, उ एइसन आदमी नियर अहे, जे घर बनाएक बेरा भूंई गढ़हा कोइड़ के चट्टाइन उपरे नेव देलक। आउर जब बाढ़ आलक तो पानी केर धार उ घर में बजड़ालक, मगर उके धँसाएक नी पारलक, काले कि उ मजबूत बनाल रहे। मगर जे मोर गोइठ सुइन के उकर मोताबिक नी चलेला, से उ आदमी नियर अहे, जे भूंई केर उपरे बिना नेव केर घर बनालक। जब उकर उपरे पानी केर धार बजड़ालक, तो उ तुरते धाँइस गेलक आउर बरबाद होई गेलक।” यीशु आदमीमन के अपन सोउब गोइठ सुनाएक केर पाछे कफरनहूम नगर में आलक। हूवाँ केऊ सौ सिपाही मनक रोमी अधिकारी केर एगो धांगर जे उकर दुलारा रहे, बेमार से मोरेक नियर रहे। उ यीशु केर बारे में सुइन के यहूदी मनक थोरेक धरम केर अगुवामन के यीशु ठिना इ बिनती करेक लगिन भेजलक कि उ आय के मोर धांगर के ठीक करोक। उमन यीशु ठिना आय के उकर से बिनती काइर के कहेक लगलैं, “सौ फौज केर रोमी अधिकारी सच में तोर दया केर लायक अहे, तोंय उकर लगिन एइसनेहें कर। काले कि उ हमर जाइत से प्रेम करेला आउर ओहे हमर प्रार्थना घर के बनाय हे।” यीशु उ मनक संगे-संगे गेलक, मगर जब उ घर केर भीरे हें रहे तब रोमी अधिकारी उकर ठिना इ कइह के संगमन के भेजलक, “हे प्रभु, दुःख ना उठाव, काले कि मोंय एइसन लायक नखों कि तोंय मोर घर में आबे। एहे खातिर मोंय खुद के इ लायक हों नी समझलों कि तोर ठिना आमूँ, मगर तोंय सिरिफ मुँह से कइह दे, तो मोर धांगर ठीक होई जाई। मोंय हों दोसर अधिकारी मनक हेंठे काम करेक वाला आदमी हेकों आउर मोर हेंठे हों सिपाहीमन काम करैना। जब मोंय एगो के कहोना, ‘जा,’ तो उ जायला, आउर दोसर से कहोना, ‘आव,’ तो उ आवेला। आउर अपन केऊ धांगर से कहोना, ‘इ काम के कर,’ तो उ करेला।” यीशु उकर एइसन गोइठ सुइन के ताजुब होई गेलक, आउर अपन पाछे अवाइया भीड़ बटे मुँहराय के कहलक, “मोंय तोहर से कहाथों कि इसराइल देस में एको गो एइसन आदमी नी पालों, जे इ परजाइत आदमी नियर मोर उपरे पोक्ता बिसवास करेला।” आउर रोमी अधिकारी बटले भेजल उकर संगमन हों घर घूइर के उ धांगर के ठीक पालैं। इ घटना केर थोरेक देरी केर पाछे यीशु आउर उकर चेलामन नाईन नाँव केर एगो नगर में जात रहैं आउर उमन केर संगे आदमी मनक एगो बड़का भीड़ हों जात रहे। जब उमन उ नगर केर फाटक ठिना पोहोंचलैं, तो आदमीमन एगो मुरदा के गाड़ेक लगिन बोइह के बाहरे लेई जात रहैं। उ अपन बिधवा आयो केर एकलौता बेटा रहे। आउर नगर केर ढेइर आदमीमन उकर आयो संगे जात रहैं। उकर आयो के देइख के प्रभु के उकर उपरे दया आय गेलक, आउर उकर से कहलक, “ना काँद।” तब यीशु भीरे आय के सरहा के छुलक, आउर सरहा बोहाइयामन रूइक गेलैं। यीशु कहलक, “हे जवान, मोंय तोर से कहाथों उठ!” तब उ मुरदा उइठ के बइठलक, आउर गोठियाएक लगलक। आउर यीशु उके उकर आयो के जिम्मा देई देलक। इ घटना के देइख के सोउब आदमीमन डराय गेलैं, आउर उमन इ कहते परमेश्‍वर केर बड़ाई करेक लगलैं, “हमर माझे एगो बड़का परमेश्‍वर केर संदेश के बताएक वाला आय हे आउर परमेश्‍वर अपन आदमीमन केर मदइत करेक लगिन दया काइर हे।” आउर यीशु केर बारे में इ गोइठ गोटा यहूदिया परदेस आउर आसे-पासे केर सोउब इलाका में फाइल गेलक। जब यूहन्ना बपतिस्मा जल संस्कार देवेक वाला केर चेलामन यूहन्ना के इ सोउब गोइठ के बतालैं। तब यूहन्ना अपन चेलामन में से दूई झन के बोलाय के प्रभु ठिना इ पूछेक लगिन भेजलक, “का तोंय हें आवेक वाला मसीह हेकिस, जेके परमेश्‍वर हमरे के बचाएक ले भेजेक केर करार काइर हे, या हमरे दोसर केर आसरा देखब?” उकर दुयो चेलामन यीशु ठिना आय के कहलैं, “यूहन्ना बपतिस्मा जल संस्कार देवेक वाला हमरे के तोर ठिना इ पूछेक लगिन भेइज हे, ‘का तोंय हें आवेक वाला मसीह हेकिस, जेके परमेश्‍वर हमरे के बचाएक ले भेजेक केर करार काइर हे, या हमरे दोसर केर आसरा देखब?’ ” ओहे बेरा यीशु ढेइर बेमरियामन, दुःखीमन आउर भूत धारल आदमीमन के छोड़ालक आउर ढेइर अंधरा आदमी मनक नजइर के खोइल देलक। आउर यीशु यूहन्ना केर चेलामन से कहलक, “जे काममन के तोहरेमन देखला आउर जे गोइठमन के सुइन हा, जाय के यूहन्ना के बताय देवा कि अंधरामन देखेक पारैना, लंगड़ामन हिंठेक पारैना, कोढ़ बेमरियामन के ठीक कराल जायला, आउर बहिरामन सुनेक पारैना, मुरदामन के जियाल जायला, आउर गरीब के शुभ समाचार सुनाल जायला। धाइन अहे उ जे मोर गोइठमन केर बारे में बिसवास करेक नी छोड़ेला।” जब यूहन्ना परमेश्‍वर केर संदेश के बताएक वाला केर भेजल चेलामन हूवाँ से चाइल गेलैं, तो यीशु यूहन्ना केर बारे में आदमीमन से पूछेक लगलक, “तोहरेमन सुनसान ठाँव में का देखेक जाय रहा? का धुका से हिलते सोंटा के? तो फिन तोहरेमन का देखेक जाय रहा? का बढ़ियाँ लुगा पिंधल आदमी के? देखा, जेमन बढ़ियाँ लुगा पिंधैना आउर सुख-चाइन से रहैना, उमन राजमहलमन में रहैना। तो फिन का देखेक जाय रहा? का तोहरेमन केऊ परमेश्‍वर केर संदेश के बताएक वाला के देखेक जाय रहा? हाँ, मोंय तोहर से कहाथों कि तोहरेमन परमेश्‍वर केर संदेश के बताएक वाला से हों बड़का के देखेक जाय रहा। इ ओहे हेके, जेकर बारे में पवितर किताब में लिखल अहे कि ‘देख, मोंय अपन संदेश के बताएक वाला के तोर आगे-आगे भेजाथों, जे आदमीमन के मोर उपरे बिसवास करेक लगिन तेयार करी।’ मोंय तोहरेमन से कहाथों, आइज तक दुनिया में जे केऊ हों जनम लेई हैं, उमन में से यूहन्ना बपतिस्मा जल संस्कार देवेक वाला से केऊ बाड़ नी होलैं, मगर जे स्वरग राइज में छोट से हों छोट अहे, उ उकर से बाड़ अहे।” जब उमन यीशु केर कहल इ गोइठमन के सुनलैं तो, सोउब आदमीमन आउर हिंयाँ तक कि मालगुजारी लेवेक वालामन हों कहलैं कि परमेश्‍वर धरमी अहे आउर यूहन्ना केर बपतिस्मा जल संस्कार लेई के परमेश्‍वर के सच्चा माइन लेलैं। मगर फरीसी दल केर आदमीमन आउर मूसा केर नियम के सिखाएक वालामन यूहन्ना से बपतिस्मा जल संस्कार नी लेई के परमेश्‍वर केर इच्छा के अपन जिंदगी में पूरा होवेक नी देलैं। यीशु आउर आगे कहलक, “अब मोंय इ समय केर आदमीमन केर जोड़ी केकर से करमूँ कि उमन केकर जइसन अहैं? उमन उ छउवामन नियर अहैं जे बाजारमन में बाइठ के एक दोसर के दोष लगाय के कहैना, ‘हमरे तोहर लगिन खुशी केर गीत गाली सेकरो में तोहरेमन नी नाचला, हमरे मरण केर गीत गाली सेकरो में तोहरेमन नी काँदला!’ काले कि यूहन्ना बपतिस्मा जल संस्कार देवेक वाला घरी-घरी उपास करलक आउर दारू नी पीलक, सेकरो में तोहरेमन कहाला, ‘उकर में भूत अहे।’ मगर मोंय आदमी केर बेटा खाते पिते आवाथों, सेकरो में तोहरेमन कहाला, ‘देखा, पेटू आउर पियंक्कड़ आदमी, मालगुजारी लेवेक वालामन आउर पापी आदमीमन केर संग हेके।’ मगर परमेश्‍वर केर गेयान के उ सोउबमन केर बटले सच्चा देखाल जाय हे जेमन इके ग्रहण करैना।” फिन एगो फरीसी दल केर आदमी यीशु के अपन संगे खाएक लगिन नेवता देलक। यीशु उ फरीसी आदमी केर घर में जाय के खाएक लगिन बइठलक। उ नगर केर एगो पापी जनाना इ जाइन के कि यीशु हिंयाँ फरीसी दल केर आदमी केर घर में खाएक बाइठ हे, तो उ जनाना संगमरमर केर पखना से बनाल एगो सीसी में महंगा सेंट भाइर के लानलक। आउर यीशु केर गोड़ ठिना पिछे ठड़ाय के काँदेक लगलक। आउर निहइर के अपन लोर पानी से यीशु केर गोड़ के धोई के अपन मूँड़ केर केंसमन से पोछेक लगलक। आउर यीशु केर गोड़ के घरी-घरी चूइम के उकर में सेंट लगात रहे। इके देइख के उ फरीसी दल केर आदमी जे यीशु के बोलाय रहे, अपन मन में सोचेक लगलक, “अगर इ सच में परमेश्‍वर केर संदेश के बताएक वाला होतक तो जरूर जाइन जातक कि जे जनाना उके छुवाथे, उ के हेके आउर कइसन अहे, काले कि उ तो पापी जनाना हेके।” यीशु उकर मन केर बिचार के जाइन के कहलक, “हे सिमोन, मोके तोर से कोनों कहेक अहे।” सिमोन कहलक, “हे गुरु, कह।” तब यीशु इ उदाहरन बताएक शुरु करलक, “केऊ महाजन केर दूई झन कर्जदार रहैं, एगो पाँच सौ आउर दूसरा पचास गो चाँदी केर सिक्का धारत रहैं। मगर उ दुयो झन ठिना करजा चुकाएक लगिन कोनों नी रहे, से लगिन महाजन दुयो झन केर करजा के माफ काइर देलक। अब तोंय बताव, उ दुयो झन में से केहर महाजन से बगरा प्रेम करी?” सिमोन जबाब देलक, “मोर बुझेक में तो जेकर बगरा करजा माफ होलक, उ बगरा प्रेम करी।” यीशु उकर से कहलक, “तोंय ठीक जबाब देई हिस।” आउर यीशु उ जनाना बटे मुँहराय के सिमोन से कहलक, “का तोंय इ जनाना के देखले कि इ का काम काइर हे? मोंय तोर घर में आय हों, मगर तोंय हमर रिवाज केर मोताबिक मोके गोड़ धोवाएक लगिन पानी नी देले, मगर इ जनाना मोर गोड़ के अपन लोर पानी से धोलक आउर अपन केंस से पोछलक। तोंय मोके चुमा नी करले, मगर जब से मोंय आय हों तब से इ मोर गोड़ के चुमा करेक नी छोड़लक। तोंय मोर मूँड़ में तेल नी माखले, मगर इ मोर गोड़ में सेंट माइख हे। से लगिन मोंय तोर से कहाथों, इकर जे ढेइर बगरा पाप रहे, क्षमा होई गेलक, इकर लगिन इ ढेइर प्रेम करलक। मगर जेकर थोरेक पाप क्षमा होई हे, उ थोरे हें प्रेम करेला।” आउर यीशु उ जनाना से कहलक, “तोर पाप क्षमा होई गेलक।” तब जे आदमीमन यीशु केर संगे खाएक बाइठ रहैं, उमन अपन-अपन मन में सोचेक लगलैं, “इ केहर हेके, जे पापमन के हों क्षमा करेला, जेके सिरिफ परमेश्‍वर करेक पारेला?” मगर यीशु जनाना से कहलक, “परमेश्‍वर तोके बचाय लेई हे, काले कि तोंय मोर उपरे बिसवास काइर हिस, शांति से चाइल जा।” इकर पाछे यीशु नगर-नगर आउर गाँव-गाँव में परचार करेक, आउर परमेश्‍वर केर राइज केर शुभ समाचार के घुइम-घुइम के सुनाएक लगलक। आउर उकर बारह खास चेलामन उकर संगे रहैं। आउर थोरेक जनानामन हों यीशु केर संगे रहैं, जेमन के यीशु भूतमन से आउर बेमारीमन से ठीक काइर रहे। आउर उ जनानामन इमन हेकैं: मगदला गाँव केर मरियम जे मगदलीनी कहल जात रहे, उकर में से सात गो भूतमन के निकलाय रहे। आउर राजा हेरोदेस केर भंडारी खोजा केर जनाना योअन्ना रहे, आउर सूसन्ना आउर ढेइर हें जनानामन रहैं। इमन अपन धन-सम्पति से यीशु आउर उकर खास चेलामन केर सेवा-सुसइर करत रहैं। आदमीमन नगर-नगर से यीशु ठिना चाइल आवत रहैं, आउर जब आदमी मनक बड़का भीड़ जमा होलक, तब यीशु उदाहरन देई के बताएक लगलक, “सुना, एगो किसान बिहीन बुनेक निकललक, बुनेक बेरा थोरेक बिहीन डहर केर किनारे गिरलक आउर रौंदाय गेलक, आउर आकाश केर चरईमन उके खाय देलैं। आउर थोरेक बिहीन रुगड़ी भूंई उपरे गिरलक, हूवाँ माटी ढेइर कम रहे, से लगिन जल्दी ओंकरलक। मगर नमी नी भेटाएक केर चलते सूइख गेलक। आउर थोरेक बिहीन काँटा झूँड़ केर माझे गिरलक, आउर काँटा झूँड़ संगे-संगे बाइढ़ के उके दबाय देलक। आउर थोरेक बिहीन बेस भूंई उपरे गिरलक आउर ओंकइर के सौ गुणा फार लानलक।” इ कइह के यीशु जोर से कहलक, “जे केऊ मोर इ गोइठ के धेयान से सुनाथा, उमन से मोंय कहाथों, इकर बारे में समझेक केर कोशिश करा।” जब यीशु अपन उपदेस देई के सिरालक तब चेलामन उकर से पूछलैं कि इ उदाहरन केर अर्थ का हेके? यीशु जबाब देलक, “तोहरेमन के तो परमेश्‍वर केर राइज केर भेदमन के जानेक केर समझ देवल जाय हे। मगर आउर आदमीमन के उदाहरन में सुनाल जायला, जेकर से कि उमन देखेक तो पारबैं मगर उमन के कोनों ना सुझोक, सुनेक तो पारबैं मगर कोनों ना बुझोक। उदाहरन केर अर्थ इ हेके, बिहीन तो परमेश्‍वर केर बचन हेके। डहर किनारे केर भूंई नियर उ आदमीमन अहैं, जेमन बचन के सुनलैं, मगर शैतान आय के उ मनक मन में से सुनल बचन के मेटाय देवेला, कहीं एइसन ना होवोक कि उमन बिसवास काइर के बाइच जाबैं। रुगड़ी भूंई नियर उ आदमीमन अहैं, जेमन बचन के सुनैना आउर रिझे-रिझे अपनाय लेवैना, मगर अपन मन में भीतरे तक बचन के नी बसाएक केर चलते उमन थोरेक दिन लगिन बिसवास करैना, आउर बचन केर चलते जब उ मनक उपरे बिपइत या ससइत आवेला तो उमन भटइक जायना। आउर थोरेक आदमीमन उ भूंई नियर अहैं, जहाँ काँटा झूँड़ अहे जेकर उपरे बिहीन गिरलक, उमन बचन के तो सुनैना मगर उमन आगे जाय के चिंता फिकिर, धन आउर जिंदगी केर भोग-बिलास में फाँइस जायना, आउर बचन से उमन के कोनों फायदा नी भेटायला। मगर थोरेक आदमीमन उ उपजाऊ भूंई नियर अहैं, जेमन बचन सुइन के भला आउर ईमानदार मन में जोगाय के रखैना आउर स्थिर रइह के फार लानैना। केऊ आदमी दीया के बाइर के बासन से नी ढाँपेला, आउर ना खटिया केर हेंठे रखेला, मगर चौखट केर उपरे रखेला कि भीतरे अवाइया आदमीमन के उकर से इंजोत दिसोक। परमेश्‍वर सोउब गोइठमन के जे आगे से लुकल रहे दिस्तार करी, आउर सोउब भेद केर गोइठमन के जेके आदमीमन अब तक नी जानैना, सोउब केर सामने सफा-सफा उजागर करी। इकर लगिन जे गोइठ मोंय तोहरेमन के कहाथों उके धेयान से सुना, काले कि जेके समझेक केर इच्छा अहे परमेश्‍वर उके आउर समझ देई। मगर जे समझेक केर इच्छा नी रखेला कि मोंय का सिखाथों, तो उकर ठिना जे समझ अहे, उखो परमेश्‍वर उकर से लेई लेवी।” यीशु केर आयो आउर उकर छोट भाईमन उकर से भेंट करेक लगिन आलैं, मगर भीड़ केर चलते उकर ठिना पोंहचेक नी पारलैं। तब भीड़ में से केऊ आदमी यीशु से कहलक, “तोर आयो आउर तोर छोट भाईमन बाहरे ठड़ाल तोर से मिलेक चाहाथैं।” यीशु उकर जबाब में उमन से कहलक, “मोर आयो आउर मोर भाई इमन हेकैं, जेमन परमेश्‍वर केर बचन के सुनैना आउर मानैना।” फिन एक दिन यीशु अपन चेलामन से कहलक, “आवा, हमरे झील केर उ पाखी जाब।” आउर उमन उ पाखी जाएक लगिन डोंगा में बाइठ गेलैं। मगर जब डोंगा चलत रहे, तब यीशु निंदाय गेलक आउर ओहे बेरा झील में आँधी-धुका आलक, आउर डोंगा पानी से भाइर जात रहे, उमन मुसीबत में पाइड़ जाय रहैं। तब उमन यीशु ठिना आय के उके जगाय के कहलैं, “मालिक! मालिक! हमरे नाश होई जाथी।” यीशु उइठ के आँधी के आउर पानी केर लहरा के डाँटलक, आउर उ रूइक गेलक आउर स्थिर होई गेलक। इकर पाछे यीशु अपन चेलामन से कहलक, “तोहरे केर बिसवास कहाँ रहे?” मगर उमन डराय गेलैं आउर ताजुब होई के एक-दोसर से कहेक लगलैं, “इ के हेके? जे आँधी आउर पानी के हों आगया देवेला आउर उमन उकर आगया के मानैना।” उमन गलील झील के पार काइर के गिरासेनी आदमी मनक परदेस में पोहोंचलैं, जे झील केर भीरे अहे। जब यीशु झील केर किनारे उतरलक, तो उ नगर केर एगो आदमी उके भेटालक, जेकर में भूतमन रहैं, उ ढेइर दिन से ना तो लुगा पिंधत रहे आउर ना घर में रहत रहे, उ मसनामन में रहत रहे। उ आदमी यीशु के देइख के चिल्लालक, आउर उकर आगे गिर के जोर से कहलक, “हे परमप्रधान परमेश्‍वर केर बेटा यीशु, मोके तोर से का काम अहे! मोंय तोर से बिनती कराथों, मोके दुःख ना दे।” काले कि यीशु भूत के उ आदमी में से निकइल जाएक केर आगया देई रहे, उ भूत आदमी केर उपरे घरी-घरी हमला करत रहे, आउर आदमीमन सिकड़ आउर बेरीमन से उके बाँधत रहैं, मगर उ बाँधल के हों तोइर देवत रहे, आउर भूत उके सुनसान ठाँव बटे लेई जात रहे। यीशु भूत से पूछलक, “तोर का नाँव हेके?” उ कहलक, “मोर नाँव फौज हेके।” काले कि उ आदमी में ढेइर भूतमन रहैं। आउर उमन यीशु से बिनती करलैं कि हमरे के बेथाह गढ़हा में जाएक केर आगया ना दे। हूवाँ पहार उपरे सुवइर मनक एगो बड़का गोंहड़ा चरत रहे, भूतमन यीशु से बिनती करलैं कि हमरे के सुवइरमन में ढूकेक दे। यीशु उमन के जाएक देलक। तब भूतमन उ आदमी में से निकइल के सुवइरमन केर भीतरे ढूइक गेलैं, आउर उ गोंहड़ा केर सोउब सुवइर पहार से हेंठे ढलाउन में कूदते गलील झील में डूइब मोरलैं। सुवइर चरवाहामन इ सोउब घटना के देइख के, हूवाँ से भाइग के नगर आउर गाँवमन में गेलैं, आउर आदमीमन के इकर बारे में बतालैं। आउर आदमीमन जे कुछ होई रहे इके देखेक लगिन यीशु ठिना आलैं, आउर उ आदमी के जेकर में से भूतमन निकइल रहैं, लुगा पिंधल आउर पूरा होस में यीशु केर गोड़ तरे बइठल पाय के डराय गेलैं। जेमन इ सोउब घटना के अपन आँइख से देइख रहैं, उमन दोसर आदमीमन के बतालैं कि का लेखे भूत धारल आदमी ठीक होई हे। तब गिरासेनी परदेस आउर आसे-पासे केर सोउब आदमीमन यीशु से बिनती करलैं कि हमर हिंयाँ से चाइल जा, काले कि उमन ढेइर डराय जाय रहैं। से लगिन यीशु डोंगा उपरे चाइढ़ के घूइर गेलक। आउर जे आदमी से भूतमन निकइल रहैं, उ यीशु से बिनती करेक लगलक, “मोखों तोर चेलामन नियर अपन संगे रहेक दे।” मगर यीशु उके इ कइह के बिदा करलक, “अपन घर घूइर जा आउर आदमीमन के बताव कि परमेश्‍वर तोर लगिन कइसन बड़का-बड़का काम काइर हे।” उ जाय के गोटा नगर में परचार करेक लगलक कि यीशु मोर लगिन कइसन बड़का-बड़का काम करलक। जब यीशु गलील झील के पार काइर के इ पाखी घूइर आलक, तो हूवाँ केर आदमीमन उकर स्वागत करलैं, काले कि सोउब आदमीमन उकर आसरा देखत रहैं। उ बेरा यहूदी मनक प्रार्थना घर केर एगो सरदार आलक, उकर नाँव याईर रहे। उ यीशु केर गोड़ तरे निहइर के यीशु से बिनती करेक लगलक कि मोर घर चल, काले कि उकर बारह बरिस केर एकला बेटी रहे, जे मोरेक नियर रहे। जब यीशु उकर घर जात रहे, तब आदमीमन भीड़ केर चलते ढेकला-ढेकली होवत रहैं। आउर ओहे बेरा एगो जनाना जेकर बारह बरिस से लोहू बहेक केर बेमारी रहे, जे अपन बेमारी से ठीक होवेक लगिन अपन सोउब धन सम्पति के बाइधमन केर पिछे खरचा काइर के सिराय देलक, सेकरो में उ जनाना केकरो हाँथ से ठीक होवेक नी पारलक। पिछे से आय के यीशु केर लुगा केर आँचरा के छुई देलक, आउर तुरते उकर लोहू बहेक केर बेमारी ठीक होई गेलक। तब यीशु तुरते जाइन गेलक आउर कहलक, “मोके के छुलक?” जब भीड़ केर सोउब आदमीमन मुकरेक लगलैं, तो पतरस आउर उकर संगमन कहलैं, “हे गुरु, तोर पिछे तो भीड़ केर आदमीमन ढेकला-ढेकली होवाथैं, आउर तोर उपरे गिर जाथैं।” मगर यीशु कहलक, “केऊ मोके छुई हे, काले कि मोंय जाइन जाय हों कि मोर में से ठीक करेक केर शक्ति निकइल हे।” जब जनाना देखलक कि मोंय लुकेक नी पारमूँ, तब उ थरथराते यीशु ठिना आलक, आउर उकर गोड़ तरे निहइर के प्रणाम करलक, आउर सोउब आदमीमन केर सामने बतालक कि मोंय का लगिन उके छुलों, आउर कइसन तुरते ठीक होई गेलों। यीशु उकर से कहलक, “बेटी तोर बिसवास तोके ठीक काइर हे, शांति से चाइल जा।” यीशु इ कहते हें रहे कि केऊ यहूदी मनक प्रार्थना घर केर सरदार, याईर केर घर से आय के कहलक, “तोर बेटी मोइर जाहे। अब गुरु के आउर तकलीफ ना दे।” यीशु उ आदमी केर गोइठ के सुइन के प्रार्थना घर केर सरदार से कहलक, “ना डराव, सिरिफ बिसवास रख, तोर बेटी बाइच जाई।” जब यीशु उ घर में आलक, तो उ अपन संगे पतरस, यूहन्ना, याकूब, आउर छोंड़ी केर आयो-आबा के छोइड़ के आउर केखो भीतरे आवेक नी देलक। आउर सोउब आदमीमन उकर लगिन काँदत रहैं, मगर यीशु कहलक, “ना काँदा, छोंड़ी नी मोइर हे, मगर निंदाथे।” उमन इ जाइन के कि बेटी मोइर जाय हे, यीशु केर मजाक करेक लगलैं। मगर यीशु उकर हाँथ के धाइर के जोर से कहलक, “हे छोंड़ी उठ!” तब उकर जीउ घूइर आलक आउर उ तुरते उठलक, फिन यीशु उमन के आगया देलक कि इके कोनों खाएक लगिन देई देवा। उकर आयो-आबामन ताजुब होलैं, मगर यीशु उमन के आगया देलक कि इ जे कुछ होई हे, केखो ना बताबा। यीशु फिन बारह खास चेलामन के एक संगे बोलाय के, उमन के सोउब रकम केर भूतमन के निकलाएक, आउर बेमारीमन के दूर करेक केर शक्ति आउर अधिकार देलक। आउर उमन के परमेश्‍वर केर राइज केर परचार करेक, आउर बेमरियामन के ठीक करेक लगिन भेजलक। जाएक से आगे यीशु उमन से कहलक, “तोहरेमन डहर लगिन कोनोवें ना लेगबा, ना लाठी, ना झोला, ना रोटी, ना रुपया, आउर ना बदलेक लगिन झुला लेगबा। अगर कोनों गाँव में केऊ तोहरेमन के अपन घर में रहेक लगिन नेवता देवी, तो जब तक उ गाँव में रहबा उकरे घरे गोतिया बाइन के रहबा। अगर कोनों गाँव केर आदमीमन तोहर स्वागत नी करबैं, तो उ गाँव से निकलेक बेरा अपन तरवा केर धूर के झाइर रखबा, उमन के इ चेतावनी देवेक लगिन कि परमेश्‍वर बटले मिलेक वाला सजा लगिन अब उमन खुद जिम्मेदार होबैं।” आउर उमन निकइल के गाँव-गाँव में शुभ समाचार सुनाते, आउर हर ठाँव में आदमीमन के ठीक करते फिरलैं। जब इसराइल देस केर एक चौथाई भाग गलील परदेस केर राजा हेरोदेस अंतिपास, यीशु आउर उकर चेला मनक काममन केर बारे में सुनलक, तो उ घबराय गेलक, काले कि आदमीमन कहत रहैं कि इ यूहन्ना बपतिस्मा जल संस्कार देवेक वाला फिन से जी उइठ हे। आउर थोरेक आदमीमन कहत रहैं कि इ परमेश्‍वर केर संदेश के बताएक वाला एलिय्याह दिस्तार होई हे, आउर थोरेक आदमीमन कहत रहैं कि इ पुरना जबाना केर परमेश्‍वर केर संदेश के बताएक वालामन में से, केऊ फिन से जी उइठ हे। मगर राजा हेरोदेस कहलक, “मोंय यूहन्ना केर तो मूँड़ कटुवाय देई रहों। फिन इ के हेके, जेकर बारे में मोंय एइसन गोइठमन सुनाथों?” आउर राजा उके देखेक खोजलक। यीशु जे अपन खास चेलामन के भेइज रहे, उमन घूइर आय के अपन-अपन काममन के जे उमन काइर रहैं, सोउब के यीशु के बतालैं, तब यीशु उमन के अलगे काइर के बैतसैदा गाँव में लेई गेलक। मगर आदमीमन जाइन गेलैं कि उ कहाँ जाथे, आउर उकर पिछे उमन हों हूवाँ पोंहइच गेलैं। यीशु खुशी से उमन से भेंट करलक, आउर परमेश्‍वर केर राइज केर बारे में बताएक लगलक, जेमन बेमार रहैं, ओहोमन के यीशु ठीक करलक। जब साँझ होवेक लगलक, तो बारहों खास चेलामन यीशु ठिना आय के उकर से कहलैं, “हमरे हिंयाँ सुनसान ठाँव में अही, से लगिन अब आदमीमन के बिदा कर कि उमन चाइरो बटे गाँव आउर बस्तीमन में जाय के, अपन रहेक आउर खाएक केर जोगाड़ करोक।” यीशु उमन से कहलक, “तोहरेमन हें उमन के खाएक लगिन देवा।” उमन जबाब देलैं, “हमरे ठिना तो सिरिफ पाँच गो रोटी आउर दूई गो मछरी अहे। का तोंय चाहिसला कि इ सोउब आदमीमन के खियाएक लगिन हमरे कोनों कीन लानब?” उमन लगभग पाँच हजार आदमीमन रहैं। तब उ अपन चेलामन से कहलक, “उमन के पचास-पचास काइर के पांति-पांति बइठाय देवा।” चेलामन एइसनेहें काइर के सोउब के बइठाय देलैं। तब यीशु पाँच गो रोटी आउर दूई गो मछरी लेई के स्वरग बटे देइख के रोटी लगिन परमेश्‍वर के धन्यबाद देलक। आउर उके टुकइर-टुकइर के आदमीमन के पोरसेक लगिन चेलामन के देते गेलक। आउर सोउब आदमीमन खाय के अघाय गेलैं, खाएक केर पाछे चेलामन यीशु केर टुकराल बचल रोटीमन के बारह डाली भाइर के उठालैं। जब यीशु एकले प्रार्थना करत रहे, आउर चेलामन उकर संगे रहैं, तो यीशु उमन से पूछलक, “आदमीमन मोके का कहैना?” उमन जबाब देलैं, “केऊ-केऊ आदमीमन यूहन्ना बपतिस्मा जल संस्कार देवेक वाला कहैना, आउर थोरेक आदमीमन परमेश्‍वर केर संदेश के बताएक वाला एलिय्याह कहैना, आउर केऊ-केऊ आदमीमन पुरना जुग केर परमेश्‍वर केर संदेश के बताएक वालामन में से केऊ जी उइठ हे, कहैना।” यीशु उमन से पूछलक, “मगर तोहरेमन मोके का कहाला?” पतरस जबाब देलक, “हमरे तोके परमेश्‍वर बटले भेजल मसीह हेकिस कहिला।” तब यीशु उमन के चेताय के कहलक, “केकरो से ना कहबा कि मोंय मसीह हेकों।” फिन यीशु अपन चेलामन से कहलक, “मोंय आदमी केर बेटा लगिन जरुरी अहे कि मोंय ढेइर दुःख उठामूँ, आउर धरम केर अगुवामन, यहूदी मुध पुरोहितमन, आउर मूसा केर नियम के सिखाएक वालामन, मोके ठुकराय देबैं आउर माइर मोराय देबैं, मगर मोंय तीसरा दिन फिन जी उठमूँ।” यीशु सोउब से कहलक, “जे केऊ मोर चेला बनेक चाहैना, उमन अपन दुनियादारी केर मोह माया के छोइड़ देवोक, आउर रोज दिन मोर लगिन दुःख उठाएक आउर मोइर जाएक ले हों तेयार रहोक। आउर मोर पिछे होई लेवोक। काले कि जे केऊ अपन जीउ के बचाएक चाही, उ, उके गवाँय देवी, मगर जे केऊ मोर लगिन अपन जीउ के गवाँय देवी, उ, जुग-जुग केर जिंदगी के पावी। अगर एगो आदमी दुनिया केर सोउब कुछ के पाय लेवी, मगर परमेश्‍वर केर संगे जुग-जुग लगिन जिंदगी बिताएक केर मोका के गवाँय देवी, तो उके का फायदा होवी? जे केऊ मोर से आउर मोर जुग-जुग केर बचन केर मोताबिक चलेक से लजाई, तो मोंय आदमी केर बेटा हों, जब अपन, आउर आबा केर, आउर पवितर स्वरगदूतमन केर तेज चमक सहित आमूँ, तो उकर से लजामूँ। मोंय तोहर से सच कहाथों, तोहर में से थोरेक आदमीमन जे हिंयाँ ठड़ाल अहैं, एइसन अहैं कि जब तक परमेश्‍वर केर राइज के नी देइख लेबैं, तब तक नी मोरबैं।” इ गोइठमन केर आठ दिन पाछे यीशु, पतरस, याकूब, आउर याकूब केर छोट भाई यूहन्ना के अपन संगे लेई के प्रार्थना करेक लगिन पहार उपरे गेलक। जब उ प्रार्थना करते हें रहे, तो उकर चेहरा केर रूप बदइल गेलक, आउर उकर लुगा चरका होई के चमकेक लगलक। आउर अचका चेलामन परमेश्‍वर केर संदेश के बताएक वाला मूसा आउर एलिय्याह के, यीशु संगे गोठियाते देखलैं। उमन तेज चमक से भरल दिसलैं, आउर यीशु केर मौत केर बारे में गोठियात रहैं, जे यरुशलेम शहर में होवेक वाला रहे। पतरस आउर उकर संगमन नींद में मातल रहैं, मगर जब उमन निजड़ा होई गेलैं, तो यीशु केर चाइरो बटे तेज रोशनी के चमकते आउर उकर संगे दूई गो आदमी के ठड़ाल देखलैं। जब मूसा आउर एलिय्याह दुयो यीशु से बिदा होवत रहैं, तो पतरस यीशु से कहलक, “हे गुरु, हमर लगिन हिंयाँ रहेक कतइ बेस अहे, से लगिन हमरे तीन गो झोपड़ी बनाब, एगो तोर लगिन, एगो मूसा लगिन, आउर एगो एलिय्याह लगिन।” उके खुद पता नी रहे कि इ जे कहाथे, उकर का मतलब हेके। पतरस इ कहते हें रहे कि एगो बदरी आय के उमन के ढाँइप देलक, आउर जब उमन उ बदरी से घेराएक लगलैं, तो डराय गेलैं। आउर उ बदरी से इ शबद सुनालक, “इ मोर बेटा आउर मोर चुनल हेके, इकर गोइठ के सुना।” इ शबद सिराते हें मूसा आउर एलिय्याह दुयो बदरी से ढाँपाय गेलैं, आउर यीशु एकले रइह गेलक। चेलामन इकर बारे में चुपे रहलैं, आउर जे कुछ देइख रहैं, उकर बारे में उ दिनमन में केखो नी बतालैं। दूसरा दिन एइसन होलक कि यीशु जब अपन तीनों चेलामन संगे पहार से उतरलक, तो एगो बड़का भीड़ यीशु से आय मिललक। तब भीड़ में से एगो आदमी चिल्लाय के कहलक, “हे गुरु, मोंय तोर से बिनती कराथों, मोर एकलौता बेटा केर उपरे दया कर। मोर बेटा के एगो भूत धारेला, आउर उ एकाएक जोर से चिल्लायला। भूत उके एइसन आँइठेला कि उकर मुँह से फेन निकलेला, आउर उके ढेइर सतायला, आउर मुश्किल से छोड़ेला। आउर मोंय तोर चेलामन से बिनती करलों कि उमन उ भूत के निकलाय देवोक, मगर उमन नी निकलाएक पारलैं।” यीशु जबाब देलक, “हे अबिसवासी आउर ढींठ आदमीमन, मोंय कतइ दिन तक तोहरेमन केर संगे रहमूँ आउर तोहरेमन के सहमूँ? अपन बेटा के मोर हिंयाँ लान।” जब उ अपन बेटा के लानत रहे, तो भूत उके पटइक के आँइठलक, मगर यीशु भूत के डाँटलक आउर छोंड़ा के ठीक काइर के उकर आबा के जिम्मा देई देलक। तब सोउब आदमीमन परमेश्‍वर केर महाशक्ति से ताजुब होई गेलैं। जब सोउब आदमीमन यीशु केर काममन के देइख के ताजुब करत रहैं, तो उ अपन चेलामन से कहलक, “जे गोइठमन के मोंय तोहरेमन के कहाथों, उके धेयान से सुना आउर याइद रखा, काले कि मोंय आदमी केर बेटा आदमी मनक हाँथ में धराएक वाला अहों।” मगर उमन इ गोइठ केर मतलब के नी बुझलैं, इकर मतलब उमन से लुकल रहलक, आउर उमन इ गोइठ केर बारे में यीशु के पूछेक से डरात रहैं। फिन चेलामन में इ बहस होवेक लगलक, “हमर में से बड़का के हेके?” मगर यीशु उ मनक मन केर बिचार के जाइन गेलक, आउर एगो छउवा के लेई के अपन ठिना ठड़ुवालक। आउर उमन से कहलक, “जे केऊ मोर नाँव से एइसन छउवा केर स्वागत करेला, उ मोर स्वागत करेला। आउर जे केऊ मोर स्वागत करेला, उ सच में मोके भेजेक वाला परमेश्‍वर केर स्वागत करेला, काले कि जे तोहर में से सोउब से छोट हेके, ओहे बड़का हेके।” तब यूहन्ना कहलक, “हे मालिक! हमरे एगो आदमी के तोर नाँव से भूतमन के निकलाते देखली, आउर हमरे उके मना करली, काले कि उ हमर नियर तोर चेला नी बाइन हे।” यीशु उकर से कहलक, “उके मना ना करा, काले कि जे तोहरे केर बिरोध में नखे, उ तोहरे बटे अहे।” जब यीशु के उपरे उठाय जाएक केर दिन भीरे आलक, तो उ यरुशलेम शहर जाएक लगिन ठाइन लेलक। तब परमेश्‍वर केर संदेश के बताएक वालामन के अपन से आगे, सामरी आदमीमन केर एगो गाँव में भेजलक कि उमन यीशु लगिन ठाँव तेयार करोक। मगर हूवाँ केर आदमीमन यीशु केर स्वागत नी करलैं, काले कि यीशु यरुशलेम शहर जात रहे। इ देइख के उकर चेला याकूब आउर यूहन्ना कहलैं, “हे प्रभु, का तोंय चाहिसला कि हमरे उमन के भसम करेक लगिन स्वरग से आइग गिरेक केर आगया देब?” मगर उ पिछे मुँहराय के उमन के डाँइट के कहलक, “तोहरेमन नी जानाला कि तोहरेमन कोन आत्मा केर हेका। मोंय आदमी केर बेटा आदमीमन केर जीउ के नाश करेक निहीं, मगर बचाएक लगिन आय हों।” आउर उमन दोसर गाँव में चाइल गेलैं। जब उमन डहर में जात रहैं, तो एगो आदमी यीशु से कहलक, “मोंय तोर चेला बनेक लगिन जहाँ-जहाँ तोंय जाबे, हूवाँ तोर पिछे-पिछे जामूँ।” यीशु उकर से कहलक, “सियार मनक रहेक लगिन माड़ा आउर आकाश केर चरईमन लगिन खोंता होवेला, मगर मोंय आदमी केर बेटा लगिन दुनिया में मूँड़ रखेक केर हों ठाँव नखे।” यीशु आउर एक झन से कहलक, “मोर पिछे होई ले आउर मोर चेला बाइन जा।” मगर उ कहलक, “हे प्रभु, मोके आगे अपन घर जाएक दे, जब मोर आबा मोइर जाई आउर उके गाइड़ लेमूँ, तब आय के तोर चेला बनमूँ।” यीशु उकर से कहलक, “दुनिया में जे आदमीमन आत्मा में मोरल अहैं, उमन के अपन मुरदामन के गाड़ेक दे, मगर तोंय जाय के परमेश्‍वर केर राइज केर बारे में परचार कर।” आउर एगो आदमी आय के कहलक, “हे प्रभु, मोंय तोर पिछे होई जामूँ, मगर आगे मोके अपन घर केर आदमीमन से बिदा होवेक दे।” यीशु उकर से कहलक, “जे केऊ अपन हाँथ हार उपरे राइख के पिछे देखेला, उ परमेश्‍वर केर राइज केर लाएक नखे।” इ गोइठमन केर पाछे प्रभु यीशु बहत्तर झन आउर चेलामन के चुइन के, जे-जे नगर आउर गाँव में उ जाएक वाला रहे, हूवाँ उमन के दूई-दूई काइर के अपन से आगे भेजलक। आउर यीशु अपन चेलामन से कहलक, “जइसन खेतमन में अन्न पाइक जाय हे, मगर कटइयामन थोर अहैं। तइसनेहें ढेइर आदमीमन परमेश्‍वर केर संदेश के सुइन के बिसवास करेक ले तेयार अहैं। मगर उमन के परमेश्‍वर केर राइज केर बारे में बताएक लगिन आदमीमन थोर अहैं। से लगिन परमेश्‍वर से प्रार्थना करा कि उ अपन संदेश के बताएक वालामन के भेजोक। जावा, मोंय तोहरेमन के भेड़ीमन नियर उमन केर माझे भेजाथों, जेमन हड़हामन नियर खतरनाक अहैं। तोहरेमन डहर लगिन ना पैसा, ना झोला, ना जूता लेगबा, आउर ना डहर में केखो जोहार करबा। जे कोनों घर में जबा, सोउब से पहिले कहबा कि ‘इ घर में परमेश्‍वर केर शांति होवोक।’ अगर हूवाँ केऊ आदमी तोहर स्वागत करी, तो तोहर देवल शांति, उकर उपरे बनल रही, मगर हूवाँ केऊ हों लायक नी होवी, तो तोहर देवल शांति, तोहर ठिना घूइर आवी। आउर ओहे घर में रहबा, घर-घर ना बुलबा। जे कुछ उमन तोहरेमन के खाएक लगिन देबैं, उखे खाबा-पीबा, काले कि कमिया के अपन मजूरी मिलेक चाही। अगर तोहरेमन कोनों नगर में जबा, आउर हूवाँ केर आदमीमन तोहर स्वागत करबैं, तो जे कोनों खाएक लगिन देबैं, उखे खाबा। हूवाँ केर बेमरियामन के ठीक करबा आउर उमन से कहबा, ‘परमेश्‍वर केर राइज तोहरेमन केर भीरे आय पोंहइच हे।’ मगर जे कोनों नगर में तोहरेमन जबा, आउर हूवाँ केर आदमीमन तोहर स्वागत नी करबैं, तो उ मनक गली-कोचा में जाय के कहबा, ‘तोहरेमन केर नगर केर धूर हों, जे हमर तरवा में लाइग हे, हमरे तोहरेमन केर सामने उके झाइर देवाथी। फिन भी तोहरेमन इ जाइन लेवा कि परमेश्‍वर केर राइज तोहरेमन केर भीरे आय पोंहइच हे।’ मोंय तोहरेमन से कहाथों कि न्याय केर दिन उ नगर केर आदमी मनक सजा, सदोम नगर केर आदमी मनक सजा से हों बगरा होवी। हाय, खुराजीन नगर केर आदमीमन, हाय बैतसैदा गाँव केर आदमीमन, जे चमत्कार केर काम तोहर माझे करल गेलक, अगर उ काममन के सूर आउर सैदा नगर केर आदमीमन केर माझे करल जातक, तो हूवाँ केर आदमीमन टाट लुगा ओइढ़ के अपन काया में राख के मखाय लेतैं, इ देखाएक लगिन कि उमन पाप करेक छोइड़ देलैं। न्याय केर दिन परमेश्‍वर सूर आउर सैदा नगर केर आदमीमन के तो सजा देवी, मगर तोहरेमन केर सजा उ मनक सजा से हों कहीं बगरा होवी। हे कफरनहूम नगर केर आदमीमन, तोहरेमन सोचाला कि हमरे स्वरग राइज तक उठाल जाब? एइसन नी होवी, तोहरेमन तो मरणलोक में फेइक देवल जबा। जे तोहरे केर संदेश के सुनेला, उ मोर के सुनेला, आउर जे तोहरेमन के ठुकरायला, उ मोके ठुकरायला, आउर जे मोके ठुकरायला, उ परमेश्‍वर के ठुकरायला, जे मोके भेइज हे।” उ बहत्तर झन चेलामन रिझे-रिझे घूइर आलैं आउर यीशु के बताएक लगलैं, “हे प्रभु, भूतमन हों हमर गोइठ के मानलैं, जब हमरे तोर नाँव से उमन के आगया देली।” यीशु उमन से कहलक, “जब भूतमन तोहर आगया मानलैं, तो मोंय शैतान के अचका बिजली नियर स्वरग से हेंठे गिरते देखलों। देखा, मोंय तोहरेमन के साँपमन आउर बिच्छूमन के रौंदेक केर, आउर शैतान जे तोहर दुश्मन हेके, उकर सोउब शक्ति केर उपरे अधिकार देई हों, आउर कोनोवें चीज से तोहर कोनों नोकसान नी होवी। फिन भी तोहरेमन ना रिझबा कि भूतमन तोहर अधिकार में अहैं, मगर इ गोइठ लगिन रिझे होवा कि तोहर नाँव स्वरग में लिखल जाय हे।” ओहे बेरा यीशु पवितर आत्मा में होई के खुशी से भाइर गेलक, आउर कहलक, “हे परमेश्‍वर आबा, आकाश आउर धरती केर प्रभु, मोंय तोर धन्यबाद करोना कि इ गोइठमन के गेयानीमन, आउर समझदार आदमीमन से लुकाय के रखले। आउर उ आदमी मनक उपरे दिस्तार काइर हिस, जेमन छउवामन नियर बचन के सुइन के उकर में बिसवास करैना। हाँ, हे परमेश्‍वर आबा, काले कि तोके एहे बेस लगलक। मोर परमेश्‍वर आबा मोके सोउब कुछ केर अधिकार देई हे, बेटा के हेके, केऊ नी जानैना, सिरिफ परमेश्‍वर आबा जानेला, आउर परमेश्‍वर आबा के हेके, इखो केऊ नी जानैना, सिरिफ बेटा हें जानेला, आउर बेटा जे आदमी के चाहेला, उकर उपरे उके दिस्तार करेला।” आउर यीशु चेलामन बटे उलइट के एकले में उमन से कहलक, “धाइन अहे तोहर आँइख जे तोहर देखल गोइठमन के देखेला। काले कि मोंय तोहर से कहाथों, जे गोइठमन के तोहरेमन देखाथा आउर सुनाथा, उ गोइठमन के परमेश्‍वर केर संदेश के बताएक वाला ढेइर आदमीमन, आउर राजामन देखेक आउर सुनेक चाहलैं, मगर उमन देखेक आउर सुनेक नी पारलैं।” एक दिन यीशु आदमीमन के उपदेस देवत रहे, ओहे बेरा एगो मूसा केर नियम के सिखाएक वाला उठलक, आउर यीशु के परखेक लगिन उकर से पूछलक “हे गुरु, जुग-जुग केर जिंदगी केर हकदार होवेक लगिन मोंय का करमूँ?” यीशु उकर से कहलक, “मूसा केर नियम में का लिखल अहे? तोंय उकर से का बुझिसला?” उ जबाब देलक, “तोंय अपन प्रभु परमेश्‍वर से अपन पूरा मन, अपन पूरा प्राण, अपन पूरा शक्ति, आउर अपन पूरा बुद्धि से प्रेम करबे, आउर अपन पड़ोसी से अपन नियर प्रेम करबे।” यीशु उकर से कहलक, “तोंय ठीक जबाब देले, एहे करबे तो तोंय जुग-जुग लगिन जिंदा रहबे।” मगर उ खुद के धरमी ठहराएक केर इच्छा से यीशु से पूछलक, “तो मोर पड़ोसी के हेके?” यीशु उके जबाब देवेक लगिन एगो कहानी सुनालक, “एगो आदमी यरुशलेम शहर से यरीहो शहर जात रहे कि डाकूमन उके छेइक के, उकर लुगा आउर सोउब चीजमन के जे उकर ठिना रहे लुइट लेलैं, आउर मार-पीट काइर के अधमोरा छोइड़ के चाइल गेलैं। फिन एइसन होलक कि ओहे डहर से एगो यहूदी पुरोहित जात रहे, उ उके देखलक, मगर बेगर मदइत करले चाइल गेलक। एहे लेखे एगो लेवी केर खानदान जे मंदिर में काम करत रहे, ओहे डहर से आलक, ओहो उके देइख के बेगर मदइत करले चाइल गेलक। मगर सामरी परदेस केर एगो सामरी आदमी ओहे डहर से आलक, आउर उके देइख के उकर उपरे दया करलक। उ उकर ठिना आय के उकर घावमन में जैतून तेल आउर अंगूर केर रस लगालक। फिन उकर घावमन में पट्टी बाँधलक, आउर उके अपन गधा में चढ़ाय के धरमशाला में लेई गेलक। आउर हूवाँ उकर सेवा-सुसइर करलक। दूसरा दिन उ दूई गो चाँदी केर सिक्का निकलाय के धरमशाला केर मालिक के देलक आउर उकर से कहलक, ‘तोंय इकर सेवा-सुसइर करबे, अगर थोरेक खरचा आउर लगी, तो उके मोंय घूइर के तोके देई देमूँ।’ अब तोर बिचार में जेकर उपरे डाकूमन हमला काइर रहैं, उकर पड़ोसी उ तीनों झन में से के होलक?” उ कहलक, “ओहे आदमी जे उकर उपरे दया करलक।” यीशु उकर से कहलक, “जा, तोंय हों एइसनेहें करबे।” फिन जब यीशु आउर उकर चेलामन जात रहैं, तो यीशु एगो गाँव में गेलक, आउर हूवाँ मारथा नाँव केर एगो जनाना उके अपन घर में बोलाय के उकर स्वागत करलक। उकर एगो बहिन रहे, जेकर नाँव मरियम रहे, उ प्रभु केर गोड़ तरे बाइठ के उकर बचन सुनत रहे। मगर मारथा सेवा-सुसइर केर काम करेक में फँसल रहे, उ यीशु ठिना आय के कहेक लगलक, “हे प्रभु, का तोके कोनोवें फिकिर नखे? मोर बहिन मोके सोउब काम करेक लगिन एकले हें छोइड़ देई हे। तोंय उके मोर मदइत करेक लगिन कह।” प्रभु यीशु उके जबाब देलक, “मारथा, हे मारथा, तोंय ढेइर गोइठमन केर बारे में चिंता करिसला, आउर घबराइसला। मगर एके गो गोइठ अहे, जे चिंता करेक केर लायक अहे, आउर मरियम इके खोइज लेई हे, आउर इके उकर से केऊ लुटेक नी पारबैं।” एक बेर यीशु कोनों ठाँव में प्रार्थना करत रहे, आउर जब उ प्रार्थना काइर के सिरालक, तो अपन चेलामन में से एगो उकर से कहलक, “हे प्रभु, जइसन यूहन्ना अपन चेलामन के प्रार्थना करेक सिखालक, तइसनेहें हमरे के हों तोंय सिखाय दे।” यीशु उमन से कहलक, “जब तोहरेमन प्रार्थना करबा, तो इ लेखे करबा: ‘हे हमरे केर आबा परमेश्‍वर, तोर नाँव पवितर मानल जाओक, तोर राइज आवोक। हमरे के रोज दिन ओतनेहें रोटी दे, जेतना हमरे के जरुरत अहे। आउर हमरे केर पापमन के क्षमा कर, काले कि हमरे हों जेमन हमर बिरोध में पाप करैना, उमन के क्षमा करिला, आउर हमरे के परीक्षा में ना लान।’ ” यीशु उमन से कहलक, “माइन लेवा कि तोहर में से एगो आधा राइत के अपन संग ठिना जाय के कही, ‘हे संगी, मोके तीन गो रोटी पंइचा दे, काले कि मोर एगो संगी डहर हिंठते मोर ठिना आय हे, आउर उके खियाएक लगिन मोर ठिना कोनों नखे।’ आउर उ घर भीतरे से जबाब देवी, ‘मोके तकलीफ ना दे, एखन तो दुरा ढाँपल अहे, आउर मोर छउवा-पुता मोर संगे डिसना में अहैं, से लगिन मोंय उइठ के तोके देवेक नी पारमूँ।’ मोंय तोहर से कहाथों, उ संग केर नाता से भले ही उइठ के नी देवी, मगर उकर लाज छोइड़ के माँगेक केर खातिर, उ उइठ के उके जेतना जरुरी अहे ओतना देवी। आउर मोंय तोहर से कहाथों, तोहरेमन के जे चाही उके परमेश्‍वर से माँगा, उ तोहरेमन के देवी, जेके तोहरेमन खोजबा, उ तोहरेमन के भेटाई, ठोकठोकाबा, तो तोहर लगिन दुरा खोलल जाई। काले कि जे केऊ माँगेला, उके मिलेला आउर जे खोजेला, उके भेटायला, आउर जे दुरा ठोकठोकायला, उकर लगिन दुरा खोलल जायला। तोहरेमन में से कोन एइसन आबा हेके, अगर उकर बेटा उकर से रोटी माँगेला, तो उ अपन बेटा के पखना देवेला? या मछरी माँगेला, तो मछरी केर बदला में साँप देवेला? चाहे अंडा माँगेला, तो उके बिच्छू देवेला? जब तोहरेमन खुद बुरा होई के अपन छउवामन के बेस चीजमन के देवेक जानाला, तो तोहर स्वरगीय आबा अपन माँगेक वालामन के पवितर आत्मा काले नी देवी।” फिन यीशु एगो आदमी से भूत के निकलालक, जे आदमी के कोका काइर देई रहे। जब भूत निकइल गेलक तो कोका आदमी गोठियाएक लगलक, आउर इ देइख के आदमीमन ताजुब होई गेलैं। मगर उमन में से थोरेक आदमीमन कहलैं, “इ तो भूतमन केर सरदार बालजबूल केर मदइत से भूतमन के निकलायला।” आउर थोरेक आदमीमन यीशु के फँसाएक लगिन उकर से स्वरग केर एगो चिन्हा माँगलैं। इ साबित करेक लगिन कि परमेश्‍वर उके अपन अधिकार देई हे। मगर यीशु उ मनक मन केर गोइठ के जाइन के उमन से कहलक, “जे-जे राइज केर आदमीमन एक दोसर से लड़ते रहैना, उ राइज बरबाद होई जायला, एहे लेखे जे घर केर आदमीमन एक दोसर से लड़ते रहैना, उ घर नाश होई जायला। अगर शैतान अपनेहें बिरोधी होई जाई, तो उकर राइज कइसन बनल रही? काले कि तोहरेमन मोर बारे में तो कहाला कि मोंय भूतमन केर सरदार, बलजबूल केर मदइत से भूतमन के निकलावना। भला अगर मोंय भूतमन केर सरदार बालजबूल केर मदइत से भूतमन के निकलावना, तो तोहर चेलामन केकर मदइत से निकलायना? से लगिन ओहेमन तोहर फैसला करबैं। अगर मोंय परमेश्‍वर केर शक्ति से भूतमन के निकलावना, तो परमेश्‍वर केर राइज तोहर भीरे आय पोंहइच हे। जब बलवान आदमी हँथियार धाइर के अपन घर केर पहरादारी करेला, तो उकर सम्पति बचल रहेला। मगर जब केऊ उकर से आउर बगरा बलवान आदमी उकर उपरे हमला काइर के उके जीत लेवेला, आउर उकर हँथियारमन के जेकर उपरे उकर भरसा रहेला उके लुइट लेवेला, आउर उकर सम्पति लुइट के बाँइट देवेला। जे मोर संग नखे उ मोर बिरोध में अहे, आउर जे मोर संग आदमीमन के जमा करेक लगिन काम नी करेला, उ छितरायला।” “जब भूत आदमी में से निकइल जायला, तो सुखल ठाँवमन में आराम खोजेला, मगर नी पावेला। तब उ खुद से कहेला, ‘मोंय ओहे आदमी में घूइर जामूँ, जेकर से मोंय निकइल के आय रहों।’ आउर उ घूइर के उ आदमी केर जिंदगी के झड़ाल-पोंछाल आउर सजाल-संवराल देखेला। तब उ जाय के अपन से हों आउर बगरा बुरा सात गो भूतमन के अपन संगे लेई आवेला, आउर उमन उ आदमी में ढूइक के उकर में डेरा करैना। आउर उ आदमी केर पाछे केर दुःख, आगे केर दुःख से हों बगरा बुरा होई जायला।” जब यीशु इ गोइठमन के कहते हें रहे कि भीड़ में से एगो जनाना जोर से कहलक, “धाइन अहे उ जनाना, जे तोके जनम देलक आउर तोके अपन दूध पियालक।” यीशु कहलक, “हाँ, मगर उमन बगरा धाइन अहैं, जेमन परमेश्‍वर केर बचन के सुनैना, आउर उकर मोताबिक चलैना।” जब आदमी मनक बड़का भीड़ जमा होवत रहे तो यीशु कहेक लगलक, “इ जुग केर आदमीमन बुरा अहैं, उमन चिन्हा देखेक खोजैना, मगर योना परमेश्‍वर केर संदेश के बताएक वाला केर चिन्हा के छोइड़, आउर कोनों चिन्हा उमन के नी देवल जाई। जइसन योना नीनवे नगर केर आदमीमन लगिन एगो चिन्हा बनलक, तइसनेहें मोंय आदमी केर बेटा हों इ युग केर आदमीमन लगिन चिन्हा बनमूँ। दक्खिन केर रानी न्याय केर दिन तोहर संगे उइठ के तोहरेमन के दोषी ठहराई, काले कि उ सुलैमान केर गेयान सुनेक लगिन ढेइर दूर से आलक, आउर हिंयाँ तो मोंय राजा सुलैमान से हों बाड़, आउर बुद्धिमान अहों, मगर मोर परचार के सुइन के हों तोहरेमन पाप करेक नी छोड़ाथा। नीनवे नगर केर आदमीमन न्याय केर दिन तोहर संगे ठड़ाय के तोहरेमन के दोषी ठहराबैं, काले कि उमन तो योना केर परचार के सुइन के पाप करेक छोइड़ देलैं, हिंयाँ तो मोंय योना से हों बाड़ अहों, मगर मोर परचार के सुइन के हों तोहरेमन पाप करेक नी छोड़ाथा। केऊ आदमी दीया बाइर के लुकेक ठाँव में चाहे पइला केर हेंठे नी रखेला, मगर उके चौखट में रखेला, ताकि भीतरे अवाइया आदमीमन के इंजोत दिसोक। तोहर आँइख तोहरेमन केर काया लगिन दीया नियर अहे, अगर तोहर आँइख बेस अहे, तो तोहर गोटा काया हों इंजोत रही, मगर जब उ बुरा अहे, तो तोहर काया हों अंधार में रही। से लगिन इ गोइठ केर धेयान रखबा कि जे इंजोत तोहर भीतरे अहे उ अंधार ना होवोक। अगर तोहर गोटा काया इंजोत में अहे, आउर उकर कोनों भाग अंधार में नखे, तो तोहर काया सोउब दिन एइसनेहें इंजोत होवी, जइसन दीया अपन चमक से तोहरेमन के इंजोत देवेला।” जब यीशु गोठियाते रहे, तो केऊ फरीसी दल केर आदमी उके अपन घर में खाएक लगिन नेवता देलक, आउर यीशु उकर घर में गेलक आउर खाएक बइठलक। तब फरीसी दल केर आदमी इ देइख के ताजुब करलक कि यीशु पुरखा मनक नेग-दस्तूर केर मोताबिक खाएक से आगे हाँथ नी धोलक। यीशु उ आदमी से कहलक, “तोहरे फरीसी दल केर आदमीमन डुभनी आउर थरियामन के बाहरे से माँजाला, सेहे नियर तोहरे हों खुद के बाहरे से दोसरमन के बेस आदमीमन नियर देखावाला, मगर तोहरेमन केर भीतरे लोभ आउर दुष्ट बिचार भरल अहे। हे निरबुद्धिया आदमीमन, परमेश्‍वर बाहरे आउर भीतरे दुयो हिस्सा के बनाय हे। से लगिन तोहरेमन गरीब आदमीमन के दान देई के, अपन मन के सफा करा, आउर देखा, सोउब कुछ तोहर लगिन ठीक होई जाई। मगर हे फरीसी दल केर आदमीमन, तोहर उपरे हाय! तोहरेमन फुदना, जीरा, आउर सोउब रकम केर साग-पात केर दसवाँ हिस्सा तो देवाला, मगर न्याय के आउर परमेश्‍वर केर प्रेम के छोइड़ देवाला। तोहर लगिन एहे ठीक रहे कि इमन के हों करते रहता, आउर दसवाँ हिस्सा के हों देवेक नी छोड़ता। हे फरीसी दल केर आदमीमन, तोहर उपरे हाय! तोहरेमन यहूदी मनक प्रार्थना घरमन में मुध-मुध कुरसी में बइठेक, आउर बाजारमन में आदमी मनक मुँह से माइन केर संगे जोहार सुनेक चाहाला। हाय तोहर उपरे! काले कि तोहरेमन नी दिसेक वाला कबरमन नियर अहा, आउर उकर उपरे आदमीमन अनजान होई के आवा-जाही करैना।” तब एगो मूसा केर नियम के सिखाएक वाला यीशु से कहलक, “हे गुरु, इ गोइठमन के कइह के तोंय हमर हों निंदा कराथिस।” यीशु कहलक, “हे मूसा केर नियम के सिखाएक वालामन, तोहर उपरे हों हाय! तोहरेमन धरम केर एइसन नियममन के बनाय के, आदमीमन के मानेक कहाला, जेके मानेक कठिन होवेला, मगर तोहरेमन खुद हें उ नियममन के नी मानाला। हाय तोहर उपरे! तोहरेमन उ परमेश्‍वर केर संदेश के बताएक वालामन के, माइन देवेक लगिन उ मनक कबरमन के बनावाला, जेमन के तोहर पुरखामन हें माइर मोराय रहैं। इ लेखे तोहरेमन खुद गवाह हेका, तोहरेमन इ गोइठ से राजी अहा कि तोहर पुरखामन परमेश्‍वर केर संदेश के बताएक वालामन के माइर मोरालैं, आउर तोहरेमन उ मनक कबरमन के बनावाला। से लगिन परमेश्‍वर केर बुद्धि हों कइह हे, ‘मोंय उमन ठिना परमेश्‍वर केर संदेश के बताएक वालामन के, आउर यीशु मसीह बटले चुनल खास चेलामन के भेजमूँ: आउर उमन, उमन में से कायनों झन के माइर मोराबैं, आउर कायनों झन के सताबैं।’ से लगिन दुनिया केर सिरजन से जेतना परमेश्‍वर केर संदेश के बताएक वालामन के लोहू बहाय के मोराल जाहे, सोउब आदमीमन केर लोहू केर हिसाब, इ युग केर आदमीमन से लेवल जाई। हाबील के माइर मोराएक से लेई के, जकरयाह के माइर मोराएक तक, जे बेदी आउर यहूदी मनक मंदिर केर माझे में लोहू बहाय के मोराल जाय रहैं। मोंय तोहर से सच कहाथों, उ मनक लोहू केर हिसाब एहे समय केर आदमीमन से लेवल जाई। हाय तोहरे मूसा केर नियम के सिखाएक वालामन! तोहरेमन स्वरग राइज में ढूकेक केर गेयान तो लेई लेला, मगर तोहरेमन खुद स्वरग राइज में नी ढूकला, आउर जेमन ढूकेक खोजलैं ओहोमन के ढूकेक से रोइक देला।” जब यीशु उ घर से निकललक, तो मूसा केर नियम के सिखाएक वाला, आउर फरीसी दल केर आदमीमन उकर पिछे पाइड़ गेलैं, आउर ढेइर हें गोइठमन केर बारे में उकर से सवाल पूछलैं। उमन इ ताक में रहैं कि यीशु के कोनों बुरा गोइठ कहुवाय के उके धारब। एतनेहें में हजारो आदमी मनक भीड़ जमा होई गेलक, हिंयाँ तक कि आदमीमन ढेकला-ढेकली होवेक लगलैं, तब यीशु सोउब से आगे अपन चेलामन से कहेक लगलक, “फरीसी दल केर आदमी मनक कपट से सावधान रहबा। परमेश्‍वर हर उ गोइठमन के जे पहिले से ढाँपल अहे खोइल देवी, आउर सोउब भेद केर गोइठमन के जेके आदमीमन अब तक नी जानैना दिस्तार करी। से लगिन जे कोनों तोहरेमन अंधार में कइह हा, उके इंजोत में सुनाल जाई, आउर जे कोनों तोहरेमन कोठरीमन में कान में धीरे से कइह हा, उके खुइल के सोउब केर सामने घर केर छत से परचार करल जाई। मगर हे मोर संगमन, मोंय तोहरेमन से कहाथों कि तोहरेमन उमन से ना डरावा, जेमन सिरिफ काया के मोराएक पारबैं, मगर उकर पिछे आउर बगरा कोनों करेक नी पारबैं। मोंय तोहरेमन के चेताथों कि तोहरेमन के केकर से डराएक चाही, जेके मोराएक केर पाछे नरक में साजेक केर अधिकार अहे, उकरे से डरावा। हाँ, मोंय तोहरेमन से कहाथों, सिरिफ उकरे से डरावा। तोहरेमन जानाला कि पाँच गो गेरवाँ चरई केर दाम थोरको नखे, सेकरो में परमेश्‍वर उमन में से गोटको के नी भुलायला। परमेश्‍वर तोहर सोउब चीज केर धेयान रखेला, हिंयाँ तक कि तोहर मूँड़ केर सोउब केंस के हों गिन के राइख हे। से लगिन तोहरेमन ना डरावा, काले कि तोहरेमन परमेश्‍वर लगिन ढेइर गेरवाँ चरईमन से हों बगरा किमती अहा। मोंय तोहर से कहाथों, जे केऊ मोके आदमीमन केर सामने माइन लेवी कि उ मोर चेला हेके, तो मोंय आदमी केर बेटा हों परमेश्‍वर केर स्वरगदूत मनक सामने, उके अपन चेला माइन लेमूँ। मगर आदमीमन केर सामने जे मोके इंकार करी, तो मोंय हों परमेश्‍वर केर स्वरगदूत मनक सामने उके अपन चेला मानेक से इंकार करमूँ। जे केऊ मोंय आदमी केर बेटा केर बिरोध में कोनों गोइठ कही, उकर इ गुन्हा क्षमा करल जाई, मगर जे पवितर आत्मा केर निंदा करी, उकर गुन्हा क्षमा नी करल जाई। जब आदमीमन तोहरेमन के बंदी बनाय के यहूदी मनक प्रार्थना घरमन में, आउर राजामन, आउर अधिकारीमन केर आगे लेई जाबैं, तो आगे से इ चिंता ना करबा कि तोहरेमन के हूवाँ का कहेक अहे, चाहे का जबाब देवेक अहे। जे कोनों कहेक होवी पवितर आत्मा ओहे बेरा तोहरेमन के सिखाय देवी।” फिन भीड़ में से एगो आदमी यीशु से कहलक, “हे गुरु, मोर भाई से कइह दे कि उ हमर आबा केर सम्पति में से मोर हिस्सा के देई देवोक।” यीशु उकर से कहलक, “हे संगी, केहर मोके तोहर हाकिम चाहे तोहर सम्पति के बाँटेक लगिन ठहराय हे?” तब यीशु उमन से कहलक, “सावधान रहा, आउर सोउब रकम केर लोभ से खुद के बचाय के रखा। काले कि ढेइर सम्पति से केखो सच्चा जिंदगी नी मिलेला।” फिन यीशु उमन के एगो उदाहरन बतालक, “एगो धनवान आदमी केर खेत में ढेइर उपज होलक। तब उ सोचेक लगलक, ‘मोंय अब का करमूँ? मोर ठिना तो अपन सोउब उपज के रखेक लगिन बड़का ठाँव नखे।’ तब उ कहलक, ‘मोके पता अहे कि का करेक चाही। मोंय अपन कोठा घर के धँसाय के उकर से बड़का बनामूँ, आउर हूवाँ अपन सोउब उपज आउर सम्पति के रखमूँ। इकर पाछे मोंय खुद से कहमूँ कि अब मोर ठिना ढेइर सम्पति अहे, इ मोर ढेइर साल लगिन होई जाई, से लगिन अब मोंय आराम से खामूँ-पीमूँ आउर माउज करमूँ।’ मगर परमेश्‍वर उकर से कहलक, ‘हे मूरख, एहे राइत तोंय मोइर जाबे। तब जे कोनों तोंय अपन लगिन जमा काइर हिस, उके केहर लेगी?’ एइसनेहें उ आदमी केर संगे हों होवी, जे अपन लगिन सम्पति जमा करेला, मगर परमेश्‍वर केर सेवा करेक लगिन अपन लियाकत आउर सम्पति के खरचा नी करेला, उ परमेश्‍वर केर नजइर में गरीब अहे।” फिन यीशु अपन चेलामन से कहलक, “से लगिन मोंय तोहरेमन से कहाथों, इ दुनिया में अपन जीउ केर चिंता ना करबा कि हमरे का खाब, आउर ना अपन काया लगिन कि हमरे का पिंधब। काले कि तोहर जीउ खाएक केर चीजमन से, आउर तोहर काया पिंधेक केर लुगा से, बगरा दामी अहे। तोहरेमन कौवामन के देखा, उमन ना तो बुनैना आउर ना काटैना, ना उ मनक भंडार घर आउर ना रसवा होवेला, सेकरो में परमेश्‍वर उमन के पोसेला। तोहर दाम तो चरईमन से बगरा अहे। तोहर में से केऊ हों चिंता काइर के अपन उमर के एक घड़ी ले हों बढ़ाएक नी पारी? से लगिन जब तोहरेमन छोटका काम के हों करेक नी पाराला, तो जिंदगी में आउर चीजमन केर बारे में काले चिंता कराला? जंगली सोसन केर फूलमन के धेयान से देखा। उमन कइसन बढ़ैना, उमन ना मेहनइत करैना, ना लुगा बनायना। सेकरो में मोंय तोहरेमन से कहाथों, राजा सुलैमान हों, अपन सोउब शोभा में उमन में से केकरो जइसन लुगा पिंधल नी रहे। से लगिन अगर परमेश्‍वर डाँड़ केर घास के, जे आइज अहे आउर काइल आइग में साजल जाई, उके एइसन लुगा पिंधायला, तो तोहरेमन के हों उ जरूर पिंधाई, तोहर बिसवास काले एतना कम अहे। आउर तोहरेमन इकर धेयान में ना रहबा कि हमरे का खाब, आउर का पियब, आउर ना हें इकर चिंता करबा। काले कि जेमन परमेश्‍वर के नी जानैना, उमन इ सोउब चीजमन केर खोजार में रहैना। मगर तोहरेमन के इ सोउब चीजमन के चाही, सेके तोहर परमेश्‍वर आबा जानेला। से लगिन तोहरेमन परमेश्‍वर केर राइज केर खोजार में रहा, तो इ सोउब चीजमन हों तोहरेमन के भेटाय जाई। तोहरेमन भेड़ीमन केर एगो छोटका झूँड़ नियर अहा, से लगिन कोनोवें गोइठ से ना डरावा। काले कि तोहर आबा परमेश्‍वर केर इच्छा अहे कि उ तोहरेमन के राइज देवी। अपन सम्पति बेइच के गरीब आदमीमन के दान काइर देवा। आउर भला काम काइर के अपन लगिन स्वरग में धन जमा करा जे कहियो नी घटेला। उके ना तो घून खायना आउर ना तो चोरमन चोरायना। काले कि जहाँ तोहर धन अहे, हुवाँय तोहर मन हों सोउब बेरा लगल रही। तोहरेमन सेवा करेक लगिन डाँड़ा बाइंध के, आउर दीया बाइर के तेयार रहा, आउर मोर घूइर आवेक केर आसरा देखते रहा। आउर तोहरेमन उ धांगरमन केर नियर बना, जेमन बिहा केर भोज से अपन मालिक केर घुरेक केर आसरा देखत रहैना, ताकि जब उ आय के दुरा ठोकठोकाई, तो उमन तुरते उकर लगिन खोइल देबैं। धाइन अहैं उ धांगरमन, जेमन के मालिक अपन घूइर आवेक केर आसरा करते पावेला। मोंय तोहर से सच कहाथों कि उ धांगर नियर तेयार होई के, उमन के खाएक लगिन बइठाई, आउर भीरे आय के उ मनक सेवा करी। आउर धाइन अहैं उ धांगरमन, जेमन के मालिक आधा राइत के चाहे बिहान के हों ओहे लेखे जागल पावेला। मगर तोहरेमन इ जाइन लेवा कि अगर घर केर मालिक जानतक कि चोर कोन बेरा आवी, तो उ जागते रहतक, आउर अपन घर में ढूकेक नी देतक। से लगिन तोहरेमन हों सोउब बेरा तेयार रहा, काले कि जे बेरा तोहरेमन सोइच नी रहबा, ओहे बेरा मोंय आदमी केर बेटा घूइर आमूँ।” तब पतरस यीशु से पूछलक, “हे प्रभु, इ उदाहरन के का तोंय हमर लगिन कहाथिस या सोउब केर लगिन कहाथिस?” प्रभु जबाब देलक, “एक बिसवास लाएक आउर बुद्धिमान भंडारी उ हेके, जेके मालिक अपन घर केर धांगरमन के संभराएक, आउर उमन के समय से खाएक देवेक केर जिम्मेदारी देवेला। धाइन अहे उ धांगर, जेके उकर मालिक आय के उके एइसनेहें करते पावी। मोंय तोहरेमन से सच कहाथों, मालिक उके अपन सोउब सम्पति केर जिम्मा देवी। मगर उ धांगर अगर सोचेक लगी कि मोर मालिक केर आवेक में देरी अहे, आउर उ दोसर धांगर-धांगरिनमन के मारेक-पिटेक लगी, आउर खाएक-पियेक, आउर मतवारी करेक में लाइग जाई। तो मालिक एइसन दिन आवी, जे दिन धांगर उकर घूइर आवेक केर आसरा नी देखेला, आउर एइसन बेरा जेके उ नी जानेला। तब मालिक उके भारी सजा देवी। इ लेखे उकर अंत नरक में ओहे लेखे होवी, जे लेखे अबिसवासी आदमीमन केर होवेला। आउर उ धांगर जे अपन मालिक केर इच्छा के जाइन के हों, खुद के तेयार नी करलक, आउर अपन मालिक केर इच्छा केर मोताबिक काम नी करलक, उ मुरुक माउर खाई। मगर जे धांगर अपन मालिक केर इच्छा के नी जाइन के, उकर बिरोध काम करी, उ थोरहें माउर खाई। से लगिन जेके बगरा देवल जाय हे, उकर से बगरा माँगल जाई, आउर जेके ढेइर जिम्मा देवल जाय हे, उकर से ढेइर माँगल जाई।” “मोंय दुनिया में आइग लगाएक आय हों, आउर मोंय केतना चाहाथों कि इ एखनेहें सुलइग जातक! मोके जल्दी हें भयानक दुःख उठाएक अहे, जब तक मोंय दुःख नी उठामूँ, तब तक मोंय ढेइर बेचाइन में रहमूँ। तोहरेमन इ ना सोचा कि मोंय धरती में एक दोसर से मिलवाएक लगिन आय हों। मोंय तोहर से कहाथों, निहीं, मगर मोंय अलग करुवाएक आय हों। काले कि एखन से अगर कोनों घर में पाँच झन आदमीमन अहैं, तो उमन आपस में बाँटल रहबैं, तीन झन जे मोर उपरे बिसवास नी करैना, उमन दूई झन केर जे मोर उपरे बिसवास करैना, बिरोध करबैं। आबा बेटा केर, आउर बेटा आबा केर बिरोध करी, आयो बेटी केर, आउर बेटी आयो केर, साइस पूतउ केर, आउर पूतउ साइस केर बिरोध करी।” यीशु भीड़ केर आदमीमन से कहलक, “जब तोहरेमन बदरी के पच्छिम दिशा से उठते देखाला, तो तुरते कहाला कि पानी आवी, आउर एइसनेहें होवेला। आउर जब हवा के दक्खिन दिशा से चलते देखाला, तो कहाला कि लू चली, आउर एइसनेहें होवेला। हे ढोंगी आदमीमन तोहरेमन धरती आउर आकाश केर रंग-रूप के देइख के, भेद बताएक पाराला, मगर इ युग केर चिन्हामन के देइख के, काले भेद बताएक नी जानाला? तोहरेमन अपन लगिन खुद हें सलहा काले नी कराला कि का उचित हेके? जब तोहरेमन अपन बैरी केर संगे हाकिम ठिना जाथा, तो डहर में हें उकर से मेल-मिलाप करेक केर कोशिश करा, कहीं एइसन ना होवोक कि बैरी तोहरेमन के हाकिम के जिम्मा दे देवी, आउर हाकिम तोहरेमन के सिपाही केर हाँथ में जिम्मा देवी, आउर सिपाही तोहरेमन के जेहेल घर में साइज देवी। मोंय तोहरे से कहाथों कि जब तक तोहरेमन उकर कौड़ी-कौड़ी नी भाइर देबा, तब-तक तोहरेमन हूवाँ से छुटेक नी पारबा।” ओहे बेरा हूवाँ बइठल थोरेक आदमीमन यीशु के बताएक लगलैं कि रोमी राजपाल पिलातुस, गलील परदेस केर थोरेक आदमीमन केर लोहू बहाय के मोराय देई रहे, जब उमन मंदिर में बलिदान चढ़ात रहैं। यीशु उमन से कहलक, “का तोहरेमन जानाला कि गलील परदेस केर इ आदमीमन, गलील परदेस केर आउर आदमीमन से बगरा पापी रहैं कि उ मनक उपरे एइसन बिपाइत आलक? मोंय तोहर से कहाथों, निहीं! मगर, अगर तोहरेमन पाप करेक नी छोड़बा, तो तोहरेमन हों सोउब एहे नियर नाश होबा। चाहे तोहरेमन उ अठारह झन आदमी केर बारे में का कहबा, जे मनक उपरे शीलोह केर गुम्मट गिरलक, आउर उमन दइब के मोइर गेलैं, का उमन यरुशलेम शहर में रहेक वाला सोउब आदमीमन से बगरा पापी रहैं? मोंय तोहर से कहाथों कि निहीं, अगर तोहरेमन पाप करेक नी छोड़बा, तो तोहरेमन हों सोउब एहे नियर नाश होबा।” फिन यीशु इ उदाहरन के हों सुनालक, “एगो आदमी केर अंगूर केर बारी में एगो अंजीर केर गाँछ रहे। उ आदमी हर साल अंजीर केर गाँछ में फार खोजेक आलक, मगर एको गो नी पालक। तब उ बारी केर रखवाला से कहलक, ‘देख, मोंय तीन साल से इ अंजीर केर गाँछ में फार खोजेक आवाथों, मगर मोके एको गो फार नी भेटालक, से लगिन इके काइट दे, इ बेस भूंई के बरबाद कराथे।’ मगर रखवाला उके जबाब देलक, ‘हे मालिक, इके इ साल रहेक दे, मोंय इकर चाइरो बटे गढ़हा कोइड़ के माइद देमूँ। अगर इ अगला साल से फरी तो ठीक अहे, आउर नी फरी तो इके काइट देबे।’” एक बेर यहूदी मनक आराम केर दिन में, यीशु एगो यहूदी मनक प्रार्थना घर में उपदेस देवत रहे। हूवाँ एगो जनाना रहे, जेकर में एगो भूत रहे, जे उके अठारह साल से बिकलांग बनाय देई रहे, आउर उ कुबड़ी होई जाय रहे, आउर सीधा होवेक नी पारत रहे। यीशु उके देइख के अपन ठिना बोलालक आउर उकर से कहलक, “हे बहिन, तोंय अपन रोग से ठीक होई गेले।” तब यीशु उकर उपरे हाँथ रखलक, आउर उ तुरते सीधा होई गेलक, आउर परमेश्‍वर केर बड़ाई करेक लगलक। यीशु यहूदी मनक आराम केर दिन में उके ठीक काइर रहे, से लगिन यहूदी मनक प्रार्थना घर केर सरदार खिसे झुंझलाय के आदमीमन से कहेक लगलक, “काम करेक लगिन छाव दिन अहे, ओहे दिनमन में तोहरेमन आय के ठीक होवा, मगर यहूदी मनक आराम केर दिन में ना आवा।” इ सुइन के प्रभु यीशु जबाब देलक, “हे ढोंगी आदमीमन, का तोहरेमन यहूदी मनक आराम केर दिन में, अपन गारू चाहे गधा के गोहर घर से खोइल के पानी पियेक नी लेगाला? शैतान इ जनाना के जे अब्राहम केर संतान हेके, अठारह साल से बाइंध के राइख रहे, तो का इके यहूदी मनक आराम केर दिन में ठीक होवेक नी रहे?” जब यीशु इ गोइठमन के कहलक, तो उकर बिरोधी आदमीमन सोउब लजाय गेलैं, मगर भीड़ केर आदमीमन उकर महान काममन के देइख के खुश होलैं। फिन उ कहलक, “परमेश्‍वर केर राइज केकर जइसन अहे? आउर मोंय उकर जोड़ी केकर से करमूँ? उ राई केर एगो माँजी नियर अहे, जेके केऊ आदमी लेई के अपन बारी में बुनलक, आउर उ बाइढ़ के सोउब बुदामन में से बड़का गाँछ बाइन गेलक, आउर आकाश केर चरईमन उकर डाइरमन में खोंता बनाय के रहलैं।” यीशु फिन कहलक, “मोंय परमेश्‍वर केर राइज केर जोड़ी केकर से करमूँ? उ खमीर केर जइसन अहे, जेके केऊ जनाना लेई के बीस किलो आटा में मिलाय के गुइंध देलक, आउर थोरेक देरी में सोउब गूंधल आटा फूइल के खमीर बाइन गेलक।” यीशु अपन चेलामन केर संगे नगर-नगर आउर गाँव-गाँव में उपदेस देते यरुशलेम शहर बटे जात रहे। आउर एगो आदमी उकर से पूछलक, “हे प्रभु, का परमेश्‍वर थोरहें आदमीमन के जुग-जुग केर सजा से बचाई?” यीशु उमन से कहलक, “तोहरेमन परमेश्‍वर केर राइज में नान दुरा से ढूकेक केर कोशिश करा, काले कि मोंय तोहर से कहाथों कि ढेइर आदमीमन ढूकेक केर कोशिश करबैं मगर नी पारबैं। जब परमेश्‍वर, जे घर केर मालिक हेके, उइठ के दुरा के बंद काइर रही, आउर तोहरेमन बाहरे ठड़ाय के दुरा ठोकठोकाय के, आउर बिनती काइर के कहेक लगबा, ‘हे प्रभु, हमर लगिन खोइल दे,’ आउर उ जबाब देवी, ‘मोंय तोहरेमन के नी जानोना, तोहरेमन कहाँ केर हेका?’ तब तोहरेमन कहेक लगबा, ‘हमरे तोर संगे खाली-पिली आउर तोंय हमर गलीमन में उपदेस देले।’ मगर उ तोहर से कही, ‘मोंय तोहर से कहाथों, मोंय तोहरेमन के नी जानोना, तोहरेमन कहाँ से आय हा। हे बुरा काम करेक वाला आदमीमन, तोहरेमन सोउब मोर ठिना से दूर होई जावा।’ हूवाँ काँदेक आउर दाँत केटरेक होवी, जब तोहरेमन अब्राहम, इसहाक, याकूब, आउर परमेश्‍वर केर संदेश के बताएक वालामन के परमेश्‍वर केर राइज में बइठल देखबा, मगर खुद के बाहरे निकलाल पाबा। तब तोहरेमन हूवाँ काँदबा आउर दाँत केटरबा। आउर दुनिया केर चाइरो कोना से दोसर जाइत केर आदमीमन आय के परमेश्‍वर केर राइज केर भोज में बइठबैं। आउर देखा, एहे लेखे से जे आदमीमन इ बेरा दुनिया में छोट बुझल जायना, उमन परमेश्‍वर केर नजइर में बड़का होई जबैं, आउर थोरेक आदमीमन जे खुद के दुनिया में बड़का बुझैना, उमन परमेश्‍वर केर नजइर में छोट होई जबैं।” ओहे बेरा थोरेक फरीसी दल केर आदमीमन आय के उकर से कहलैं, “हिंयाँ से निकइल के चाइल जा, काले कि राजा हेरोदेस तोके माइर मोराएक खोजाथे।” यीशु उमन से कहलक, “जाय के उ लोमड़ी नियर चतूर आदमी से कइह देवा कि आइज आउर काइल मोंय भूतमन के निकलाथों आउर बेमरिया आदमीमन के ठीक कराथों आउर तीसरा दिन मोंय अपन काम के पूरा काइर लेमूँ। सेकरो में आइज, काइल आउर परसू मोके चलेक जरुरी अहे, काले कि एगो परमेश्‍वर केर संदेश के बताएक वाला सिरिफ यरुशलेम शहर में हें मोराल जाई। हे यरुशलेम शहर केर आदमीमन! हे यरुशलेम शहर केर आदमीमन! तोहरेमन जे परमेश्‍वर केर संदेश के बताएक वालामन के माइर मोराला, आउर तोहर ठिना मोर भेजल संदेश बताएक वालामन के पखना से माइर मोराला। कायनों बेर मोंय चाहलों कि तोहर छउवामन के जइसन मुर्गी अपन चेंगनामन के अपन डेना से ढाँपेला, तइसनेहें जमा काइर लेमूँ, मगर तोहरेमन नी चाहला। देखा, अब तोहरेमन केर मंदिर तोहर लगिन उजराल छोइड़ देवल जाई, आउर मोंय तोहर से कहाथों, अब से तोहरेमन मोके तब तक नी देखबा जब तक तोहरेमन इ नी कहबा, ‘धाइन हेके उ, जे प्रभु केर नाँव से आवेला।’ ” यहूदी मनक आराम केर दिन में यीशु फरीसी दल केर आदमी मनक एगो सरदार केर घर में रोटी खाएक गेलक, आउर उमन हूवाँ यीशु के धेयान से देखत रहैं कि उकर में कोनों गलती खोजब। हूवाँ एगो आदमी रहे, जेके फूला बेमारी रहे। यीशु मूसा केर नियम के सिखाएक वालामन आउर फरीसी दल केर आदमीमन से पूछलक, “यहूदी मनक आराम केर दिन बेमरिया आदमीमन के ठीक करेक हमर नियम केर मोताबिक उचित अहे, कि निहीं?” मगर उमन चुपचाप रहैं। तब यीशु उकर हाँथ धाइर के उके ठीक करलक आउर उके भेइज देलक। आउर इकर पाछे उमन से कहलक, “अगर तोहर गधा चाहे गारू आराम केर दिन कुआँ में गिर जाई, तो का तोहरेमन उके तुरते बाहरे नी निकलाबा?” उमन इ गोइठमन केर कोनों जबाब नी देवेक पारलैं। जब यीशु बइठेक लगिन नेवताल आदमीमन के मुध-मुध ठाँव चुनते देखलक तो एगो उदाहरन उमन के सुनालक, “जब केऊ तोके बिहा केर भोज में बोलाई तो हूवाँ मुध ठाँव में ना बइठबे, कहीं एइसन ना होवोक कि उ तोर से हों केऊ बड़का आदमी के नेवता देई होवी। आउर जे तोहरेमन दुयो के नेवता देई हे, उ आय के तोर से कही, ‘तोंय इ ठाँव के इ आदमी के देई दे।’ तब तोके लजाय के सोउब से पिछे केर ठाँव में बइठेक होवी। से लगिन जब तोके नेवता मिली, तो सोउब से पिछे केर ठाँव में जाय के बइठबे, जेकर से नेवता देवेक वाला तोर ठिना आय के कही, ‘हे संगी, आगे आय के बाइठ।’ इ लेखे सोउब नेवताल आदमीमन केर आगे तोर इज्जत होवी। काले कि जे केऊ खुद के बाड़ मानी, उके छोट मानल जाई आउर जे केऊ खुद के छोट मानी, उके बाड़ मानल जाई।” फिन उ अपन नेवता देवाइया फरीसी आदमी से हों कहलक, “जब तोंय दूई पहर केर चाहे राइत केर भोज देबे, तो अपन संगीमन, भाईमन, रिश्तेदारमन आउर धनी पड़ोसीमन के ना बोलाबे। कहीं एइसन ना होवोक कि उमन हों तोके नेवता देई के तोर बदला चुकाय देबैं। मगर तोंय गरीब, टुंडा, लंगड़ा आउर अंधरा आदमीमन के बोलाय के उमन के भोज देबे। तब तोंय धाइन होबे, काले कि बदला चुकाएक लगिन उ मनक ठिना कोनों नी होवेला, आउर जब धरमी आदमीमन फिन से जी उठबैं, तब परमेश्‍वर तोके इनाम देवी।” यीशु केर संगे खाएक बइठल आदमीमन में से एगो इ गोइठ सुइन के उकर से कहलक, “धाइन अहे उ जे परमेश्‍वर केर राइज केर भोज में शामिल होवी।” यीशु उकर से कहलक, “केऊ आदमी एगो बड़का भोज रखलक आउर इ भोज में ढेइर आदमीमन के नेवता देलक। जब खाएक तेयार होई गेलक, तो उ अपन धांगर से नेवताल आदमीमन ठिना इ कइह के भेजलक, ‘आवा, अब खाएक केर सोउब चीज तेयार होई जाहे।’ मगर सोउब आदमीमन बहना करेक लगलैं, पहिला आदमी धांगर से कहलक, ‘मोंय खेत कीन हों, आउर उके देखेक जाएक जरुरी अहे, से लगिन मोंय जाएक नी पाराथों, तोंय अपन मालिक से कइह दे कि उ मोके माफ काइर देवोक।’ दूसरा आदमी कहलक, ‘मोंय पाँच जोड़ा गारू कीन हों, आउर उमन के परखेक लगिन नारेक जाथों। मोंय जाएक नी पारमूँ, से लगिन तोंय अपन मालिक से कइह दे कि उ मोके माफ काइर देवोक।’ आउर एक झन कहलक, ‘मोंय एखन-एखन बिहा काइर हों, से लगिन आवेक नी पारमूँ।’ जब उ धांगर घूइर के अपन मालिक के इ गोइठमन के बतालक, तब घर केर मालिक खिसाय के अपन धांगर से कहलक, ‘तोंय तुरते नगर केर चौराहा आउर गलीमन में जाय के गरीब, टुंडा, लंगड़ा आउर अंधरा आदमीमन के हिंयाँ लेई आव।’ धांगर जाय के तइसनेहें आदमीमन के बतालक, फिन घूइर आय के मालिक से कहलक, ‘हे मालिक, जइसन तोंय कइह रहिस, तइसनेहें मोंय करलों, मगर भोज घर में आउर हें ठाँव बचल अहे।’ मालिक धांगर से कहलक, ‘सड़कमन आउर बारीमन बटे जा आउर आदमीमन के जबरजस्ती बोलाय लान, जेकर से मोर घर भाइर जाओक। मोंय तोर से कहाथों कि जेमन आगे नेवताल जाय रहैं उमन में से केऊ मोर भोज के नी चाखी।’ ” यीशु केर संगे-संगे एगो बड़का भीड़ जात रहे, यीशु उमन बटे पिछे मुँहराय के उमन से कहलक, “अगर केऊ मोर ठिना आवी आउर अपन आयो-आबा, भाई-बहिन, छउवा-पुता, अपन जनाना आउर अपन जीउ के मोर से बगरा प्रेम करेला, तो उ मोर चेला बनेक नी पारी। आउर जे केऊ मोर खातिर दुःख उठाएक आउर मोइर जाएक ले तेयार नी रही, ओहो मोर चेला बनेक नी पारी। तोहर में से एइसन केहर अहे, जे महल बनाएक चाही, आउर आगे बाइठ के उकर खरचा के नी जोड़ी कि पूरा करेक लगिन उकर ठिना ओतना पइसा अहे कि नखे? अगर उ एइसन नी करी तो कहीं नेव उठाएक केर पाछे उके पूरा करेक नी पारी आउर आदमीमन उके देइख के उकर मजाक इ कइह के करेक लगबैं, ‘इ आदमी बनाएक तो शुरु करलक, मगर पूरा करेक नी पारलक।’ चाहे कोन एइसन राजा अहे, जे दोसर राजा से लड़ाई करेक जाई, आउर आगे बाइठ के इ बिचार नी करी कि जे राजा बीस हजार पलटन केर संगे मोर से लड़ाई करेक आवी, तो का मोंय दस हजार पलटन लेई के उकर संगे लड़ेक पारमूँ? अगर उ नी पारी तो उके जब तक दूसरा राजा दूर अहे अपन राजदूतमन के भेइज के उकर से सलहा करेक चाही। एहे नियर तोहर में से जे केऊ अपन सोउब कुछ के नी छोड़ी, तो उ मोर चेला बनेक नी पारी। नोन तो बेस अहे, मगर नोन केर नोनछर सिराई जाई, तो उके दोबारा कोनोवें चीज से नोनछर बनाएक नी पराई। उ ना तो भूंई केर काम में आउर ना माइद केर काम में आवी। उके आदमीमन बाहरे फेइक देबैं। जे केऊ मोर इ गोइठ के धेयान से सुनाथा, उमन से मोंय कहाथों, इकर बारे में समझेक केर कोशिश करा।” यीशु केर उपदेस सुनेक लगिन मालगुजारी लेवेक वाला सोउब आदमीमन आउर पापी आदमीमन आवत रहैं। इ देइख के फरीसी दल केर आदमीमन आउर मूसा केर नियम के सिखाएक वालामन कुड़कुड़ाय के कहेक लगलैं, “इ तो पापी आदमीमन केर स्वागत करेला आउर उमन केर संगे खायला-पियेला।” तब यीशु उमन के इ उदाहरन बतालक, “अगर तोहर में से केकरो ठिना सौ गो भेड़ीमन अहैं, आउर उमन में से एगो हेराय जाई, तो उ जरूर निनानबे के पहार किनारे अपन संगी चरवाहामन ठिना छोइड़ के, उ हेराल भेड़ी के सुनसान ठाँव में तब-तक खोजते रही जब तक कि उ नी मिल जाई। आउर जब मिल जायला, तो उ खुशी से उके अपन खाँध में उठाय लेवेला। आउर अपन घर आय के संगमन आउर पड़ोसीमन के जमा काइर के कहेला, ‘मोर संगे खुशी मनावा, काले कि मोर हेराल भेड़ी मोके मिल जाय हे।’ मोंय तोहरेमन से कहाथों कि एहे नियर केऊ एगो पापी आदमी केर पाप करेक छोड़ेक से उकर लगिन स्वरग में एतइ खुशी मनाल जायला जेतना उ निनानबे धरमी आदमीमन लगिन नी मनाल जायला, जेमन के पाप करेक से छोड़ेक केर जरुरत नखे। या केऊ जनाना ठिना दस गो चाँदी केर सिक्का होवी, आउर उकर में से एगो हेराय जाई तो उ दीया बाइर के आउर घर के बढ़ाइर के तब-तक खोजते रही जब तक कि उ नी मिल जाई। आउर जब उके उ हेराल सिक्का मिल जायला तो उ अपन संगमन आउर पड़ोसीमन के जमा काइर के कहेला, ‘मोर संगे खुशी मनावा, काले कि मोर हेराल सिक्का मोके मिल जाय हे।’ मोंय तोहरेमन से कहाथों कि एहे नियर पसताय के पाप करेक छोड़ेक वाला एगो पापी आदमी लगिन हों स्वरग में परमेश्‍वर केर दूतमन केर सामने खुशी मनाल जायला।” यीशु फिन एगो उदाहरन बतालक, “एगो आदमी केर दूई झन बेटा रहैं। छोटका बेटा अपन आबा से कहलक, ‘हे आबा, तोर सम्पति में से जे हिस्सा मोर होवी, मोके देई दे।’ से लगिन उ दुयो बेटा के अपन सम्पति बाँइट देलक। थोरहें दिन केर पाछे छोटका बेटा अपन सोउब सम्पति के लेई के परदेस चाइल गेलक आउर हूवाँ माउज-मस्ती केर काम में अपन सोउब सम्पति के उड़ाय देलक। आउर जइसनेहें उ सोउब कुछ सिराय देलक, तइसनेहें उ देस में भारी अकाल पड़लक, आउर उकर ठिना खाएक ले कोनों नी रहे। से लगिन उ, हूवाँ केर एगो आदमी ठिना काम माँगेक गेलक, जे उके अपन खेतमन में सुवइर चराएक केर काम देलक। उ एतना भूखल रहे कि जे चारा के सुवइरमन खात रहैं, उखे खाय के पेट भरेक लगिन तरसत रहे, मगर उके केऊ हों कोनों खाएक लगिन नी देवत रहैं। जब उके होस आलक, तब उ सोचेक लगलक, ‘मोर आबा केर सोउब कमियामन के खोराकी से हों बगरा मजूरी मिलेला, आउर उमन बचाय लेवैना, मगर मोंय हिंयाँ भूखे मोराथों। अब मोंय उइठ के अपन आबा ठिना जामूँ आउर उकर से कहमूँ कि आबा, मोंय परमेश्‍वर केर बिरोध में आउर तोर बिरोध में पाप काइर हों। अब मोंय तोर बेटा कहाएक केर लाएक नखों, तोंय मोके अपन एगो धांगर नियर राइख ले। ’ तब उ परदेस के छोइड़ के अपन आबा ठिना घूइर जाएक लगिन निकइल गेलक। घर पोंहचेक से आगे हें उकर आबा दूर हें से उके देखलक आउर उकर उपरे दया आलक। आउर उ कूइद के अपन बेटा ठिना गेलक आउर पोटाइर के ढेइर चूमलक। बेटा अपन आबा से कहलक, ‘हे आबा, मोंय परमेश्‍वर केर बिरोध में आउर तोर बिरोध में पाप काइर हों, अब मोंय तोर बेटा कहाएक केर लायक नखों।’ मगर आबा अपन धांगरमन से कहलक, ‘झट सुन बेस से बेस लुगा लाइन के इके पिंधावा, आउर इकर हाँथ में अंगठी आउर गोड़ में जूता पिंधावा। आउर पोसल जानवर लाइन के काटा ताकि हमरे खाब आउर खुशी मनाब। काले कि मोर इ बेटा मोइर जाय रहे, फिन जी गेलक, हेराय जाय रहे, अब मिल गेलक।’ आउर उमन खुशी मनायक लगलैं। मगर इ सोउब होवेक बेरा उकर बाड़ बेटा खेत में काम करत रहे। जब उ घूइर के घर केर हेदना पोहोंचलक, तो गावेक बजाएक आउर नाचेक केर आवाज सुनलक। आउर उ एगो धांगर के बोलाय के पूछलक, ‘इ सोउब का होवाथे?’ धांगर उकर से कहलक, ‘तोर भाई घर घूइर आय हे, आउर तोर आबा उके दोबारा भला-चंगा पाय हे, से लगिन तोर आबा बड़का भोज राइख हे।’ इ सुइन के उ जोर से खिसालक आउर घर भीतरे जाएक नी खोजलक। तब उकर आबा बाहरे आय के उके मनायक लगलक। मगर उ अपन आबा के जबाब देलक, ‘देख, मोंय एतइ साल से एगो धांगर नियर तोर सेवा कराथों, आउर तोर आगया सोउब दिन मानलों सेकरो में तोंय मोके अपन संगमन केर संगे खुशी मनाएक लगिन एगो छगरी केर पठरू तक नी देले। मगर जब तोर इ बेटा घूइर आलक, जे तोर सम्पति के बेश्या मनक पिछे उड़ाय देलक, सेकर लगिन तोंय बड़का भोज राइख हिस।’ आबा अपन बेटा से कहलक, ‘हे मोर बेटा, तोंय सोउब बेरा मोर संगे अहिस आउर जे कोनों मोर हेके, उ सोउब तोर हें हेके। मगर एखन खुशी मनाएक आउर रिझेक चाही काले कि इ तोर भाई मोरल जइसन रहे फिन जी गेलक, हेराय जाय रहे, अब मिल गेलक।’ ” यीशु अपन चेलामन के फिन एगो कहानी बतालक, “एगो धनी आदमी केर एगो भंडारी रहे, आदमीमन उकर ठिना नालिस करलैं कि तोर भंडारी तोर सम्पति के बरबाद कराथे। से लगिन धनी आदमी भंडारी के बोलाय के कहलक, ‘मोंय तोर बारे में का गोइठ सुनाथों? तोंय मोर पइसा से का काइर हिस, इकर हिसाब दे, काले कि अब से आगे तोंय मोर भंडारी केर काम नी करबे।’ तब भंडारी अपन मन में सोचेक लगलक, ‘अब मोंय का करमूँ? मोर मालिक मोके भंडारी केर काम से निकलाय देवाथे, मोर काया में माटी कोड़ेक केर ताकत नखे आउर मोके भीख माँगेक हों लाज लगेला। अब मोंय जाइन गेलों कि मोके का करेक चाही ताकि जब मोंय भंडारी केर काम से निकलाल जामूँ तो आदमीमन मोर मदइत करबैं।’ आउर उ अपन मालिक केर कर्जदारमन के एक-एक के बोलालक आउर पहिला से पूछलक, ‘तोर ठिना मोर मालिक केर केतना करजा अहे?’ उ जबाब देलक, ‘सौ मन जैतून तेल।’ तब भंडारी उकर से कहलक, ‘तोंय दोसर नवाँ खाता बही ले आउर उकर में तुरते पचास लीख दे।’ फिन दूसरा से पूछलक, ‘तोर ठिना मोर मालिक केर केतना करजा अहे?’ उ जबाब देलक, ‘सौ मन गोहोम।’ तब भंडारी उकर से हों कहलक, ‘अपन नवाँ खाता बही लेई के उकर में अस्सी मन लीख दे।’ मालिक उ अधरमी भंडारी केर बड़ाई करलक, काले कि उ होशियारी से काम काइर हे। एहे नियर इ दुनिया केर आदमीमन अपन जइसन आदमीमन केर संगे लेन-देन करेक में इंजोत केर आदमीमन से बगरा चतूर अहैं। से लगिन मोंय तोहर से कहाथों कि दुनिया केर धन-दौलत से अपन लगिन संग बनाय लेवा, जेकर से मोरेक केर पाछे जब धन-दौलत सिराई जाई तो उमन जुग-जुग ले रहेक लगिन घर में तोहर स्वागत करबैं। जे छोट से छोट गोइठमन में ईमानदार अहे, उ बाड़ से बाड़ गोइठमन में हों ईमानदार होवेला। आउर जे छोट से छोट गोइठमन में बैमान अहे, उ बाड़ से बाड़ गोइठमन में हों बैमान होवेला। से लगिन जब तोहरेमन दुनिया केर धन में ईमानदार नी रहला तो स्वरग केर धन के केहर तोहरेमन के देई! आउर जब तोहरेमन दोसर केर धन में ईमानदार नी रहला तो तोहरेमन के तोहर अपन धन के केहर देवी? केऊवे धांगर एके बेरा में दूई गो मालिक केर सेवा करेक नी पारी। उ चाहे तो एगो से बैर आउर दोसर से प्रेम करी, चाहे एगो के माइन करी आउर दोसर के तुच्छ करी। एहे नियर तोहरेमन एके बेरा में परमेश्‍वर आउर धन दुयो केर सेवा नी करेक पारबा।” फरीसी दल केर आदमीमन जेमन धन-दौलत केर लोभी रहैना। इ सोउब गोइठमन के सुइन के यीशु केर मजाक उड़ाएक लगलैं। यीशु उमन से कहलक, “तोहरेमन आदमीमन केर सामने खुद के धरमी आदमी नियर देखाला मगर परमेश्‍वर तोहरेमन केर मन के जानेला, काले कि जे गोइठ आदमीमन केर नजइर में किमती अहे, उ परमेश्‍वर केर नजइर में घिनघिना अहे। तोहरेमन के डहर देखाएक लगिन मूसा केर नियम आउर परमेश्‍वर केर संदेश के बताएक वालामन यूहन्ना जल संस्कार देवेक वाला तक हें रहैं। इकर पाछे से अब परमेश्‍वर केर राइज केर शुभ समाचार परचार करल जाथे, आउर सोउब केऊ उकर में ढूकेक केर कोशिश कराथैं। आकाश आउर धरती मिट जाई तो मिट जाई, मगर मूसा केर नियम में जे गोइठ लिखल अहे, बेगर पूरा होले एगो बिंदु हों नी मिटी। जे केऊ आदमी अपन जनाना के छोइड़ के दोसर से बिहा करेला, उ ब्यभिचार करेला, आउर जे आदमी एइसन छोड़ल जनाना से बिहा करेला, उ आदमी हों ब्यभिचार करेला। ” यीशु आउर आगे कहलक, “एगो धनी आदमी रहे, जे महंगा आउर मलमल लुगा पिंधल रहत रहे आउर रोज दिन सुख-चाइन आउर धूम-धाम से रहत रहे। आउर लाजर नाँव केर एगो गरीब आउर घावाहा आदमी रहे, उके आदमीमन रोज दिन उकर घर केर फाटक ठिना छोइड़ देवत रहैं। आउर उ धनी आदमी केर टेबुल से गिरल जूठा के खाय के अपन भूख मेटाएक ले तरसत रहे आउर कुकूरमन हों आय के उकर घाव के चाटत रहैं। आउर एक दिन एइसन होलक कि उ गरीब आदमी मोइर गेलक, आउर स्वरगदूतमन उके लेई के अब्राहम ठिना आदर केर साथ बइठाय देलैं, थोरेक दिन केर पाछे उ धनी आदमी हों मोइर गेलक। आउर नरक में अनइत दुःख सहते जब उ उपरे देखलक तो दूर हें से अब्राहम के आउर उकर ठिना लाजर के बइठल देखलक। आउर उ हकाय के कहलक, ‘हे आबा अब्राहम, मोर उपरे दया काइर दे। आउर लाजर के मोर लगिन भेइज दे, ताकि उ अपन अंगुर केर उपरी छोर के पानी में डुबाय के मोर जीभ में चुवाय के ठंढा करी, काले कि मोंय इ आइग केर भट्ठी में तड़पाथों।’ मगर अब्राहम कहलक, ‘हे बेटा, याइद कर कि तोके अपन जिंदगी में सुख हें सुख मिललक, मगर लाजर के दुःख हें दुःख मिललक। अब इके हिंयाँ शांति मिलाथे आउर तोंय तड़पाथिस। अब इ सोउब गोइठमन के छोइड़ दे, काले कि हमर आउर तोर माझे एगो बड़का गढ़हा बनाल जाय हे, से लगिन अगर केऊ हिंयाँ से उ पाखी तोर ठिना जाएक खोजी, तो उ जाएक नी पारी आउर ना केऊ हूवाँ से इ पाखी हमर ठिना आवेक पारी।’ धनी आदमी कहलक, ‘हे आबा अब्राहम, मोंय तोर से बिनती कराथों कि लाजर के मोर आबा केर घर भेइज दे। काले कि मोर पाँच भाई अहैं। आउर मोंय चाहोना कि लाजर जाय के इ सोउब गोइठमन के उमन के बताई ताकि उमन के इ दुःख केर ठाँव में आवेक ना होवोक।’ मगर अब्राहम उके जबाब देलक, ‘उमन ठिना तो मूसा केर नियम आउर परमेश्‍वर केर संदेश के बताएक वालामन केर किताबमन अहे, उमन के ओहे किताबमन केर सुनेक चाही आउर उकर मोताबिक चलेक चाही।’ धनी आदमी कहलक, ‘हे आबा अब्राहम, उमन नी सुनैना! मगर मोरलमन में से केऊ उमन ठिना जाय के बताई तो उमन उकर सुनबैं आउर पसताय के पाप करेक छोइड़ देबैं।’ अब्राहम उकर से कहलक, ‘जब उमन मूसा केर नियम के आउर परमेश्‍वर केर संदेश के बताएक वालामन केर आगया के नी मानैना तो मोरलमन में से केऊ जी हों उठी तो उकर गोइठमन केर बिसवास नी करबैं।’ ” यीशु फिन अपन चेलामन से कहलक, “दुनिया में आदमीमन बिसवास से जरूर भटकाबैं, मगर हाय, उ आदमी उपरे जे मोर उपरे बिसवास करेक वाला आदमीमन के भटकायला। अगर केऊ छउवा जइसन आदमी में से एको झन के मोर उपरे बिसवास करेक से बहकायला, उकर लगिन भला होतक कि उकर घेंचा में एगो बड़का पखना केर जाँता बाँधल जातक आउर उके डुबेक लगिन समुदर में फेइक देवल जातक। से लगिन सावधान रहा कि तोहरेमन का कराला, अगर तोहर बिसवासी भाई गुन्हा करेला, तो उके मना करेक लगिन समझावा, आउर अगर उ अपन गलती माइन लेई तो उके क्षमा काइर देबा। अगर दिन भइर में उ सात बेर तोहर बिरोध गुन्हा करी आउर सातों बेर तोहर ठिना आय के कही, ‘मोर से गलती होलक, मोके क्षमा काइर दे।’ तो तोहरेमन उके क्षमा करते जबा।” तब खास चेलामन प्रभु यीशु से कहलैं, “तोर उपरे आउर हें मजबूत से बिसवास करेक लगिन हमर मदइत कर।” प्रभु यीशु कहलक, “अगर तोहरेमन केर बिसवास राई केर माँजी बराबइर हों होतक, तो इ तूत केर गाँछ से कहता, ‘जाइर से उखइर के समुदर में चाइल जा।’ तो उ तोहरे केर आगया के माइन लेतक। तोहर में से एइसन मालिक के हेके, जेकर धांगर हार जोइत के चाहे भेड़ीमन के चराय के खेत से घर घूइर आवी, आउर उकर से कही, ‘तुरते आव आउर खाएक लगिन बाइठ?’ निहीं, मगर उ कही, ‘मोर खाएक लगिन तेयार कर आउर जब तक मोंय नी खामूँ-पीमूँ तब तक मोर सेवा करेक लगिन तेयार रह। इकर पाछे तोंय हों खाय-पी लेबे।’ का उ अपन धांगर के उ काम के करेक लगिन धन्यबाद देवी, जे काम के मालिक उके करेक लगिन कइह रहे? निहीं। एहे नियर से जब तोहरेमन सोउब कुछ काइर लेई हा, जे तोहरेमन के करेक लगिन कहल जाय रहे, तो तोहरेमन के इ कहेक चाही, ‘हमरे नलायक धांगर हेकी, काले कि जेके हमरे के करेक चाही रहे, सिरिफ उके भइर काइर ही।’ ” जब यीशु आउर उकर चेलामन यरुशलेम शहर जाएक डहर में सामरिया परदेस आउर गलील परदेस केर सिमान से होई के जात रहैं। आउर जइसनेहें उमन एगो गाँव में ढूकेक वाला रहैं, तइसनेहें उमन के दस झन कोढ़ बेमरियामन भेटालैं। आउर उमन दूर हें ठड़ाय के जोर से कहलैं, “हे यीशु, हे मालिक, हमर उपरे दया कर।” यीशु उमन के देइख के कहलक, “तोहरेमन यरुशलेम मंदिर में जावा आउर खुद के अपन पुरोहितमन के जाँच करेक देबा, इ देखेक लगिन कि तोहरेमन ठीक होई जाय हा।” आउर उमन जाते-जाते डहर में हें ठीक होई गेलैं। तब उमन में से एक झन इ देइख के कि उ ठीक होई जाय हे, जोर से परमेश्‍वर केर बड़ाई करते यीशु ठिना घूइर आलक। आउर यीशु केर गोड़ तरे निहइर के उके धन्यबाद देवेक लगलक। इ सामरी आदमी रहे। से लगिन यीशु कहलक, “का दसो झन ठीक नी होलैं तो फिन उ नौ झन कहाँ अहैं? का इ परदेसी आदमी के छोइड़ के आउर केखो नी सूझलक कि घूइर के परमेश्‍वर केर बड़ाई करतैं?” तब यीशु उकर से कहलक, “उइठ के चाइल जा, तोंय बिसवास करले से लगिन ठीक होई जाहिस।” एक बेर फरीसी दल केर आदमीमन यीशु से पूछलैं, “परमेश्‍वर केर राइज कहिया आवी?” तो यीशु उमन के जबाब देलक, “परमेश्‍वर केर राइज एइसन आवाथे कि तोहरेमन अपन आँइख से देखेक नी पारबा। आउर आदमीमन इ नी कहबैं, ‘देखा, हिंयाँ अहे, चाहे हूवाँ अहे।’ काले कि परमेश्‍वर केर राइज तोहर माझे में अहे।” फिन यीशु अपन चेलामन से कहलक, “एइसन समय आवाथे कि तोहरेमन उ दिन के देखेक खोजबा, जब मोंय आदमी केर बेटा घूइर आमूँ, मगर इ संभव नी होवी, काले कि मोर आवेक केर बेरा तब तक नी पोंहइच रही। आदमीमन तोहरेमन से कहबैं, ‘देखा, मसीह हूवाँ अहे,’ चाहे ‘देखा, मसीह हिंयाँ अहे।’ मगर तोहरेमन हुने ना जबा आउर ना उ मनक पिछे चलबा। काले कि जइसन बिजली आकाश केर एक छोर से निकइल के दोसर छोर तक चमकेला, तइसनेहें मोंय आदमी केर बेटा हों अपन दिन में दिस्तार होमूँ। मगर आगे मोके इ जुग केर आदमीमन बटले ठुकराल जाएक आउर दुःख उठाएक जरुरी अहे। जइसन हमर पुरखा नूह केर परिया में होई रहे, तइसनेहें मोंय आदमी केर बेटा केर परिया में हों होवी। जे दिन तक नूह जहाज उपरे नी चढ़लक, उ दिन तक आदमीमन खाते-पिते रहैं, आउर उमन में सादी-बिहा होते रहे, तब बाइढ़-पानी आलक आउर सोउबमन के डुबाय के बरबाद काइर देलक। एहे नियर हमर पुरखा लूत जब सदोम शहर में रहे, से परिया हों होई रहे, आदमीमन खाते-पिते, किना-बेचा करते, गाँछ रोपते आउर घर बनाते रहैं। मगर जे दिन लूत सदोम शहर से निकललक, उ दिन आइग आउर गंधक आकाश से बरसलक आउर सोउब आदमीमन के जे शहर में रहैं, बरबाद काइर देलक। एहे नियर जे दिन आदमीमन मोर आवेक केर बारे में नी सोइच रहबैं, सेहे दिन मोंय आदमी केर बेटा हों फिन से वापस घूइर आमूँ। उ दिन अगर केऊ अपन घर केर छाइन उपरे अहे, उ उतइर के कोनों चीजमन के लेगेक ले घर भीतरे ना ढूकोक आउर जे खेत में अहे ओहो घर ना घुरोक। तोहरेमन याइद करा कि लूत केर जनाना संगे का होई रहे। जे केऊ अपन जीउ के बचाएक चाही, उ जुग-जुग केर जिंदगी के गवाँय देवी, आउर जे केऊ मोर लगिन अपन जीउ के गवाँय देवी, उ जुग-जुग केर जिंदगी के पावी। मोंय तोहर से कहाथों, उ राइत दूई झन आदमी एक खटिया में होबैं, उमन में से एक झन के लेई लेवल जाई, आउर दूसरा के छोइड़ देवल जाई। दूई झन जनानामन एके संगे जाँता पीसते रहबैं, उमन में से एगो के लेई लेवल जाई, आउर दूसरा के छोइड़ देवल जाई। एइसनेहें दूई झन आदमीमन खेत में काम करते रहबैं, आउर उमन में से एक झन के लेई लेवल जाई आउर दूसरा के छोइड़ देवल जाई।” इ गोइठ सुइन के उमन यीशु से पूछलैं, “हे प्रभु, इ सोउब घटना कहाँ होवी?” यीशु उमन से कहलक, “जइसन कि गिद्धमन हुवाँय जमा होबैं जहाँ लाशमन होवी तइसनेहें सोउबमन इ जाइन जाबैं कि इ गोइठ कहाँ होवाथे।” यीशु अपन चेलामन के इ बताएक लगिन कि उमन के सोउब बेरा प्रार्थना करेक चाही आउर अपन धीरज के नी छोड़ेक चाही, इ उदाहरन बतालक। “एगो नगर में एगो न्याय करेक वाला हाकिम रहत रहे, उ ना तो परमेश्‍वर से डरात रहे आउर ना कोनों आदमी केर परवाह करत रहे। आउर ओहे नगर में एगो बिधवा हों रहत रहे। उ उकर ठिना घरी-घरी-आय के कहत रहे, ‘मोर न्याय काइर के मोके बैरी से बचाव।’ उ ढेइर दिन तक उकर गोइठ के नी मानलक मगर आखरी में अपन मन में बिचार करलक, ‘मोंय ना तो परमेश्‍वर से डरावना आउर ना कोनों आदमी केर परवाह करोना। सेकरो में इ बिधवा आय-आय के मोके परेशान कराथे, से लगिन अब मोंय उकर न्याय करमूँ, ताकि उ मोर ठिना नी आवी आउर मोंय परेशान नी होमूँ।’ ” इकर पाछे प्रभु यीशु चेलामन से कहलक, “सुना, इ अधरमी हाकिम का कहलक? इकर बारे में धेयान से सोचा। परमेश्‍वर हों अपन चुनल आदमीमन लगिन जेमन दिन-राइत उके गोहराते रहैना, उ मनक मदइत करेक में देरी नी करी। मोंय तोहर से कहाथों, उ तुरते उ मनक न्याय करी। मगर जब मोंय आदमी केर बेटा घूइर आमूँ, तो का मोके धरती में मोर उपरे भरसा करेक वाला आदमीमन मिलबैं?” यीशु उ आदमीमन के जे अपन बारे में सोचत रहैं कि हमरे धरमी अही, आउर दोसरमन के तुच्छ जानत रहैं। इ उदाहरन कहलक, “दूई गो आदमी यहूदी मनक मंदिर में प्रार्थना करेक लगिन गेलैं, एगो फरीसी दल केर आदमी रहे आउर दूसरा मालगुजारी लेवेक वाला रहे। फरीसी दल केर आदमी ठड़ाय के अपन मन में इ नियर प्रार्थना करेक लगलक, ‘हे परमेश्‍वर, मोंय तोके धन्यबाद देवाथों कि मोंय दोसर आदमीमन लेखे लोभी, अन्यायी आउर ब्यभिचारी नखों आउर ना मालगुजारी लेवेक वाला नियर अहों। मोंय हफ्ता में दूई दिन उपास करोना आउर अपन सोउब कमाई केर दसवाँ हिस्सा हों तोके देवोना।’ मगर मालगुजारी लेवेक वाला आदमी थोरेक दूर में ठड़ाय रहे। उके स्वरग बटे देखेक केर साहस हों नी होलक, उ दुःखी होई के अपन छाती पीट-पीट के कहत रहे, ‘हे परमेश्‍वर, मोंय एगो पापी आदमी हेकों। मोर उपरे दया कर आउर मोके क्षमा काइर दे।’” यीशु कहलक, “मोंय तोहरेमन से कहाथों कि उ फरीसी आदमी निहीं, मगर एहे मालगुजारी लेवेक वाला परमेश्‍वर केर आगे धरमी ठहराल जाय के अपन घर घूइर गेलक। काले कि जे केऊ खुद के बाड़ मानी, उके छोट मानल जाई, आउर जे केऊ खुद के छोट मानी, उके बाड़ मानल जाई।” उ बेरा आदमीमन अपन छउवामन के हों उकर ठिना लानेक लगलैं कि यीशु उ मनक उपरे हाँथ राइख के आशीष देवोक, मगर चेलामन इ देइख के उमन के डाँटलैं। यीशु छउवामन के अपन ठिना बोलाय के कहलक, “छउवामन के मोर ठिना आवेक देवा, उमन के मना ना करा, काले कि जे आदमीमन इ छउवामन नियर बिसवास लायक आउर नरम अहैं, ओहेमन परमेश्‍वर केर राइज में रहबैं। मोंय तोहरे से सच कहाथों कि जे केऊ परमेश्‍वर केर राइज के छउवा नियर ग्रहण नी करी, उ उकर में कहियो ढूकेक नी पारी।” फिन एगो सरदार यीशु से पूछलक, “हे बेस गुरु, जुग-जुग केर जिंदगी केर हकदार होवेक लगिन मोंय का करमूँ?” यीशु उकर से कहलक, “तोंय मोके बेस काले कहाथिस? केऊ बेस नखे, सिरिफ परमेश्‍वर हें बेस अहे। तोंय आगयामन के तो जानिसला, ‘ब्यभिचार नी करेक, हत्या नी करेक, चोरी नी करेक, झूठा गवाही नी देवेक आउर अपन आयो-आबा केर आदर करेक।’ ” उ कहलक, “मोंय तो इ सोउब के छोटपन से हें मानते आवाथों।” इ गोइठ सुइन के यीशु उकर से कहलक, “तोर में एखन हों एगो गोइठ केर घटी अहे। अपन सोउब कुछ बेइच के गरीबमन के बाँइट दे, अगर तोंय एइसनेहें करबे तो स्वरग में धन मिली, इ काममन के काइर के मोर पिछे होई ले आउर मोर चेला बाइन जा।” उ जवान इ सुइन के ढेइर उदास होलक, काले कि उ ढेइर धनी रहे। यीशु उकर उदास चेहरा के देखलक आउर कहलक, “धनी आदमीमन के परमेश्‍वर केर राइज में ढूकेक ढेइर कठिन अहे। जे लेखे ऊँट के सूई केर टोका में ढूइक के निकलेक कठिन अहे, उकर से हों बगरा धनवान आदमी के परमेश्‍वर केर राइज में ढूकेक कठिन अहे।” तब सुनेक वाला आदमीमन कहलैं, “तो फिन केहर बचेक पारी?” यीशु उमन से कहलक, “जे आदमी से नी होवेक परायला, उ परमेश्‍वर से परायला।” पतरस कहलक, “देख, हमरे तो घर दुरा छोइड़ के तोर पिछे होई लेई ही आउर तोर चेला बाइन जाय ही।” यीशु उमन से कहलक, “मोंय तोहर से सच कहाथों, जे केऊ परमेश्‍वर केर राइज लगिन अपन घर, जनाना, भाई, आयो-आबा, छउवा-पुतामन के छोइड़ देई हे। उ जरूर हें एहे जुग में काय गुणा बगरा इनाम पावी आउर आवेक वाला दिन में परमेश्‍वर उके जुग-जुग केर जिंदगी देवी।” फिन यीशु बारहों खास चेलामन के अलगे लेई जाय के उमन से कहलक, “देखा, हमरे यरुशलेम शहर जाथी, आउर जेतना गोइठमन मोंय आदमी केर बेटा केर बारे में परमेश्‍वर केर संदेश के बताएक वालामन केर किताब में लिखल जाय हे, उ सोउब पूरा होवेक वाला अहे। काले कि लिखल अहे मोंय परजाइतमन केर हाँथे जिम्मा देवल जामूँ, आउर उमन मोर मजाक उड़ाबैं, मोर अपमान करबैं, आउर मोर उपरे थूकबैं। आउर मोके कोड़रा से मारबैं, आउर मोराय देबैं, मगर मोंय तीसरा दिन फिन जी उठमूँ।” लेकिन उकर चेलामन इ गोइठमन में से कोनों गोइठ केर मतलब नी बुझलैं आउर इ गोइठमन केर अर्थ उमन से लुकल हें रहलक। उमन बुझेक नी पारलैं कि उ का केर बारे में बताथे। जब यीशु आउर उकर चेलामन यरीहो शहर केर भीरे पोहोंचलैं, तो हूवाँ एगो अंधरा आदमी सड़क केर किनारे बाइठ के भीख माँगत रहे। उ अंधरा आदमी भीड़ केर आदमी मनक हिंठेक केर आवाज सुइन के पूछेक लगलक, “इ का होवाथे?” आदमीमन उके बतालैं, “नासरत नगर केर रहेक वाला यीशु जाथे।” तब उ हकाय के कहलक, “हे यीशु राजा दाऊद केर संतान, मोर उपरे दया कर।” जे आदमीमन आगे जात रहैं, उमन उके डाँटेक लगलैं कि चुप रहोक। मगर उ आउर हें जोर से चिल्लाय के कहेक लगलक, “हे राजा दाऊद केर संतान, मोर उपरे दया कर।” यीशु इ सुइन के ठड़ाय गेलक आउर उके अपन ठिना लानेक केर आगया देलक। जब उ अंधरा भीरे आलक, तो यीशु उकर से पूछलक, “तोंय का चाहाथिस कि मोंय तोर लगिन करमूँ?” उ जबाब देलक, “हें प्रभु मोंय देखेक चाहाथों।” यीशु उकर से कहलक, “देखेक लग, तोंय बिसवास करले, से लगिन ठीक होले।” आउर उ तुरते देखेक लगलक, आउर परमेश्‍वर केर बड़ाई करते उकर पिछे होई गेलक, आउर सोउब आदमीमन इके देइख के परमेश्‍वर केर बड़ाई करलैं। यीशु आउर उकर चेलामन यरीहो शहर से होई के आगे जात रहैं। हूवाँ जक्कई नाँव केर एगो धनी आदमी रहे, जे मालगुजारी लेवेक वालामन केर सोउब से बाड़ अधिकारी रहे। उ यीशु के देखेक खोजत रहे कि उ कइसन अहे। मगर उ नटरा रहे, से लगिन भीड़ में उके देखेक नी पारत रहे। उ यीशु के देखेक लगिन आगे कूइद के एगो डुम्बाइर केर गाँछ में चाइढ़ गेलक, काले कि यीशु ओहे डहर से जाएक वाला रहे। जब यीशु उ ठाँव में पोहोंचलक, तब उ उपरे देइख के उकर से कहलक, “हे जक्कई, झट उतइर के आव, काले कि आइज मोके तोर घर में रहेक जरुरी अहे।” उ तुरते गाँछ से हेंठे उतरलक आउर यीशु के अपन घर लेई गेलक आउर खुशी से उकर स्वागत करलक। इ देइख के सोउब आदमीमन कुड़कुड़ाय के कहेक लगलैं, “उ तो एगो पापी आदमी केर घरे गोतिया बाइन के जाय हे।” जक्कई ठड़ाय के प्रभु यीशु से कहलक, “हे प्रभु, देख, मोंय अपन आधा सम्पति के गरीब आदमीमन के दान काइर देमूँ आउर अगर मोंय केकरो से अन्याय काइर के बगरा मालगुजारी लेई हों, तो उके चाइर गुणा घुराय देमूँ।” तब यीशु उकर से कहलक, “आइज तोंय आउर तोर परिवार में छुटकारा आय हे, इ लगिन कि तोंय हों अब्राहम केर एगो बेटा हेकिस। काले कि मोंय आदमी केर बेटा हेराल आदमीमन के खोजेक आउर उमन के बचाएक लगिन आय हों।” जब उमन इ गोइठमन के सुनत रहैं, तब यीशु उमन के एगो उदाहरन बतालक, इ लगिन कि उ यरुशलेम शहर केर भीरे रहे, आउर आदमीमन के एइसन बुझालक कि परमेश्‍वर केर राइज एखन आवेक वाला अहे। “मोर धरती छोड़ेक आउर घूइर आवेक केर तरीका इ लेखे अहे, एगो धनी आदमी राजगद्दी पाय के फिन घूइर आवेक केर बिचार से परदेस चाइल गेलक। जाएक से आगे उ अपन धांगरमन में से दस झन के बोलालक आउर उमन के एक-एक गो सोना केर सिक्का देई के कहलक, ‘मोर घूइर आवेक तक इकर से लेन-देन करा।’ मगर उकर नगर केर बसिंदामन उकर से बैर रखत रहैं, से लगिन उमन उकर पिछे खबर देवेक वालामन से कइह भेजलैं, ‘हमरे नी चाहिला कि इ हमर उपरे राइज करी।’ जब उ राजगद्दी पाय के घूइर आलक, तो उ अपन धांगरमन के जेमन के रुपया देई रहे, अपन ठिना बोलालक आउर इ जानेक चाहलक कि उमन लेन-देन से का-का कमाय हैं। तब पहिला धांगर आय के कहलक, ‘हे मालिक तोर सिक्का से दस आउर सोना केर सिक्का कमाय हों।’ इ सुइन के मालिक उकर से कहलक, ‘धाइन अहिस हे मोर बेस धांगर, तोंय ढेइर हें थोर में बिसवास लायक निकलले, से लगिन तोंय दस गो नगर केर उपरे अधिकार रख।’ दूसरा हों आय के कहलक, ‘हे मालिक, मोंय तोर सोना केर सिक्का से पाँच आउर सोना केर सिक्का कमाय हों।’ उ उकर से हों कहलक, ‘तोंय हों पाँच गो नगर केर उपरे शासन कर।’ आउर तीसरा हों आय के कहलक, ‘हे मालिक, देख, तोर सोना केर सिक्का इ हेके, जेके मोंय गमछा में बाइंध के राइख रहों। मोंय तोर से डरात रहों, काले कि तोंय कठोर आदमी हेकिस। जेके तोंय नी राइख हिस उके उठाय लेविसला आउर जेके तोंय नी बुइन हिस, उके काटिसला।’ मालिक उकर से कहलक, ‘हे दुष्ट धांगर, मोंय तोर हें गोइठ से तोके दोषी ठहराथों। तोंय मोके जानत रहिस कि मोंय कठोर आदमी हेकों, जे मोंय नी राइख हों उके उठाय लेवोना, आउर जे मोंय नी बुइन हों, उके काटोना। तो तोंय मोर रुपया के महाजन ठिना काले नी राइख देले, ताकि मोंय आय के सूद समेत लेई लेतों?’ आउर जे आदमीमन भीरे ठड़ाय रहैं, मालिक उमन से कहलक, ‘उ सोना केर सिक्का के उकर से लेई लेवा आउर जेकर ठिना दस गो सोना केर सिक्का अहे, उके देई देवा।’ उमन उकर से कहलैं, ‘हे मालिक, उकर ठिना तो दस गो सोना केर सिक्का अहे।’ मालिक कहलक, ‘मोंय तोहर से कहाथों, जेमन, उमन ठिना जे कोनों अहे उकर में बिसवास लायक अहैं, उमन के आउर बगरा देवल जाई, मगर जेमन बिसवास लायक नखैं, उमन से उ चीजमन के हों, जे कोनों उमन ठिना अहे, लेई लेवल जाई। मगर मोर उ बैरीमन के जे नी चाहत रहैं कि मोंय उ मनक राजा बनमूँ, उमन के हिंयाँ लाइन के मोर आगे माइर देवा।’ ” इ गोइठमन कइह के यीशु अपन चेलामन केर संगे यरुशलेम शहर बटे उ मनक आगे-आगे जाएक लगलक। जब यीशु आउर उकर चेलामन जैतून पहार केर भीरे बैतफगे आउर बैतनिय्याह गाँव ठिना पोहोंचलैं, तो उ अपन चेलामन में से दूई गो के इ कइह के अपन से आगे भेजलक, “अपन आगे केर गाँव में जावा, हूवाँ पोहोंचते हें एगो गधी केर छउवा बाँधल मिली, जेकर में कहियो केऊ नी बाइठ हैं, तोहरेमन उके खोइल के लेई आनबा। आउर अगर केऊ तोहरेमन से पूछी, ‘तोहरे इके काले खोलाथा?’ तो उके कइह देबा, ‘यीशु हमर प्रभु के इकर दरकार अहे।’” जेमन भेजल जाय रहैं, उमन जाय के जइसन यीशु उमन से कइह रहे तइसनेहें पालैं। जेखन उमन गधी केर छउवा के खोलत रहैं, तो उकर मालिकमन उमन से पूछलैं, “इ छउवा के काले खोलाथा?” उमन कहलैं, “यीशु हमर प्रभु के इकर दरकार अहे।” उमन गधी केर छउवा के यीशु ठिना लेई आनलैं आउर उकर उपरे अपन गमछा के डिसाय के यीशु के उकर उपरे बइठाय देलैं। जब यीशु जात रहे, तो उमन यीशु के एगो राजा नियर माइन देवेक लगिन उकर आगे सड़क केर उपरे अपन गमछामन के डिसाते जात रहैं। यीशु आगे बढ़ते गेलक आउर उ ठाँव में पोहोंचलक, जहाँ से सड़क जैतून पहार केर हेंठे जात रहे, हूवाँ सोउब चेला मनक दल खुशी से उ सोउब चमत्कार केर काममन लगिन जेके उमन देइख रहैं, जोर से परमेश्‍वर केर बड़ाई करेक लगलैं, “धाइन अहे उ राजा, जे प्रभु केर नाँव से आवेला, स्वरग में शांति आउर सोउब से ऊँचा स्वरग में महिमा हो।” तब भीड़ में से थोरेक फरीसी दल केर आदमीमन यीशु से कहेक लगलैं, “हे गुरु, अपन चेलामन के डाँट ताकि उमन चुप रहोक।” मगर यीशु जबाब देलक, “मोंय तोहर से कहाथों, अगर इमन चुप रहबैं, तो पखनामन चिल्लाएक शुरु काइर देबैं।” जब यीशु यरुशलेम शहर केर भीरे आलक तो शहर के देइख के उकर लगिन काँदलक। आउर कहलक, “तोर लगिन कतइ बेस होतक कि तोंय, हाँ तोंय हें, आइज केर दिन बुइझ पाते कि का गोइठमन से तोके शांति मिली, मगर एखन तक इ गोइठमन तोर आँइख से लुकल अहे। काले कि तोर उपरे उ दिन आवी, जब तोर दुश्मनमन तोके चाइरो बटे से घेइर लेबैं आउर तोर निकलेक केर डहर के बंद काइर देबैं। आउर तोके आउर तोर छउवामन के माइर मोराय देबैं, आउर तोर घरमन केर एगो पखना उपरे दोसर पखना के रहेक नी देबैं, काले कि तोंय उ मोका के नी चिन्हले जब परमेश्‍वर तोर उपरे दया काइर रहे।” तब यीशु यहूदी मनक मंदिर में जाय के बेचाइयामन के इ कहते बाहरे निकलाएक लगलक, “लिखल अहे, ‘मोर घर प्रार्थना केर घर होवी।’ मगर तोहरेमन इके डाकू मनक अड्डा बनाय देई हा।” यीशु रोज दिन यहूदी मनक मंदिर में उपदेस देवत रहे, आउर यहूदी मुध पुरोहितमन, मूसा केर नियम के सिखाएक वालामन आउर आदमी मनक मुखियामन उके नाश करेक लगिन मोका केर ताक में रहत रहैं। मगर उमन के कोनों उपाय नी सूझत रहे कि उके कइसन करब काले कि सोउब आदमीमन खूब धेयान से उकर उपदेस के सुनत रहैं। एक दिन यीशु यहूदी मनक मंदिर में आदमीमन के उपदेस देवत रहे आउर शुभ समाचार सुनात रहे, सेहे बेरा धरम केर अगुवामन केर संगे यहूदी मुध पुरोहितमन आउर मूसा केर नियम के सिखाएक वालामन यीशु ठिना आय के ठड़ाय गेलैं। आउर उमन यीशु से पूछेक लगलैं, “हमरे के बताव, तोंय इ काममन के कोन अधिकार से करिसला, आउर उ केहर हेके, जे तोके इ अधिकार देई हे?” यीशु उमन के जबाब देलक, “मोंय हों तोहरेमन से एगो गोइठ पूछाथों, मोके बतावा, यूहन्ना के बपतिस्मा जल संस्कार देवेक केर अधिकार परमेश्‍वर बटे से मिल रहे या आदमीमन बटे से मिल रहे?” तब उमन आपस में कहेक लगलैं, “अगर हमरे कहब, ‘यूहन्ना केर बपतिस्मा जल संस्कार देवेक केर अधिकार परमेश्‍वर बटे से मिल रहे,’ तो उ हमरे से कही, ‘तो फिन तोहरेमन काले उकर गवाही केर उपरे बिसवास नी करला?’ आउर हमरे एहो कहेक नी पारब, ‘यूहन्ना के इ अधिकार आदमीमन बटे से मिल रहे,’ अगर एइसन कहब तो सोउब आदमीमन हमरे के पखना से मारबैं, काले कि उमन सचमुच जानैना कि यूहन्ना परमेश्‍वर केर संदेश के बताएक वाला रहे।” तब उमन यीशु के जबाब देलैं, “हमरे नी जानिला कि यूहन्ना के बपतिस्मा जल संस्कार देवेक केर अधिकार केहर देई रहे।” यीशु उमन से कहलक, “तो मोंय हों तोहरेमन के नी बतामूँ, इ काम कोन अधिकार से करोना।” तब यीशु आदमीमन के इ उदाहरन बताएक लगलक, “एगो आदमी अंगूर केर खेती करलक, आउर उकर ठिका किसानमन के देई के ढेइर दिन लगिन परदेस चाइल गेलक। जब फार काटेक केर बेरा आलक तो खेत केर मालिक किसानमन ठिना अपन एगो धांगर के भेजलक, कि उमन अंगूर फार केर बाँटा उके देबैं। मगर किसानमन उके पीट के छुछा हाँथ घुराय देलैं। फिन खेत केर मालिक एगो आउर धांगर के भेजलक, आउर उमन उखो पिटलैं आउर उकर से बुरा ब्यवहार काइर के छुछा हाँथ घुराय देलैं। फिन मालिक तीसरा बेर एगो आउर धांगर के भेजलक, आउर उमन उके हों माइर के लोहू-लुहान काइर के निकलाय देलैं। तब खेत केर मालिक कहलक, ‘मोंय का करमूँ? मोंय अपन दुलार बेटा के भेजमूँ, उमीद अहे उमन उकर आदर करबैं।’ जब किसानमन मालिक केर बेटा के देखलैं, तो आपस में सलहा करेक लगलैं, ‘एहे तो बपौती हकदार हेके। आवा, हमरे इके माइर मोराब ताकि इकर बपौती सम्पति हमरे केर होई जाई।’ आउर उमन उके अंगूर केर खेत से बाहरे निकलाय के मोराय देलैं। अब तोहरेमन केर का बिचार अहे कि अंगूर खेत केर मालिक उ मनक संगे का करी? उ आय के उ किसानमन के नाश करी, आउर अंगूर केर बारी केर जिम्मा दोसर आदमीमन के देवी।” इ सुइन के उमन कहलैं, “परमेश्‍वर एइसन ना करोक।” मगर यीशु उमन के धेयान से देखलक आउर उमन से कहलक, “पवितर किताब में लिखल इ गोइठ केर का अर्थ हेके, ‘जे पखना के राज मिस्त्रीमन बेकार जाइन के फेइक देई रहैं, ओहे कोना केर नेव केर पखना बाइन गेलक?’ जे केऊ इ पखना उपरे गिरी, उ चकनाचूर होई जाई आउर जेकर उपरे इ पखना गिरी, उके पीस देवी।” ओहे बेरा मूसा केर नियम के सिखाएक वालामन आउर यहूदी मुध पुरोहितमन उके धारेक चाहलैं, काले कि उमन बुइझ गेलैं कि उ हमरे केर उपरे इ उदाहरन कइह हे, मगर उमन आदमीमन से डरालैं। फिन भी उमन यीशु के फँसाएक केर ताक में रहत रहैं। उमन यीशु केर भेद लेवेक लगिन अपन आदमीमन के भेजलैं कि उमन धरमी केर भेष बनाय के यीशु के कोनों ना कोनों गोइठ में फँसाओक, जेकर से उमन उके राजपाल केर हाँथे आउर उकर अधिकार में जिम्मा देवेक पारोक। उमन यीशु से इ पूछलैं, “हे गुरु, हमरे जानिला कि तोंय सोउब बेरा सच गोइठ के बताइसला आउर सिखाइसला हों, तोंय सोउब केर संगे एक लेखे ब्यवहार करिसला आउर परमेश्‍वर केर डहर केर गोइठमन के सच्चाई से बताइसला। अब तोंय हमरे के इ बताव कि महाराजा के मालगुजारी देवेक मूसा केर नियम केर मोताबिक उचित अहे कि निहीं?” यीशु उ मनक चलाँकी के जाइन के उमन से कहलक, “एगो चाँदी केर सिक्का मोके देखावा। इकर उपरे केकर मूर्ति आउर नाँव अहे?” उमन जबाब देलैं, “महाराजा केर।” यीशु उमन से कहलक, “जे महाराजा केर हेके, उके महाराजा के देवा आउर जे परमेश्‍वर केर हेके, उके परमेश्‍वर के देवा।” इ लेखे उमन आदमी मनक आगे इ गोइठ में उके धारेक नी पारलैं, मगर यीशु केर जबाब से ताजुब होई के चुप रइह गेलैं। इकर पाछे थोरेक सदूकी दल केर आदमीमन यीशु ठिना आलैं। उमन मोरलमन केर जी उठेक के नी मानैना, यीशु से सवाल पूछलैं, “हे गुरु, मूसा हमर लगिन नियम बनाय हे कि अगर केकरो भाई अपन जनाना केर रहते बेगर संतान केर मोइर जाई, तो उकर भाई उकर बिधवा से बिहा काइर के अपन भाई लगिन संतान जनमाओक। एगो परिवार में सात भाई रहैं। बड़का भाई बिहा काइर के बेगर संतान केर मोइर गेलक। फिन दूसरा भाई उकर जनाना से बिहा करलक, आउर तीसरा भाई हों उ जनाना के बिहा काइर लेलक। एहे लेखे सातों भाईमन उ जनाना से बिहा करलैं आउर बेगर संतान केर मोइर गेलैं। सोउब केर पाछे उ जनाना हों मोइर गेलक। अब तोंय इ बताव कि उ जनाना केर बिहा तो सातों भाईमन से होई रहे, से जी उठेक केर पाछे उ केकर जनाना होवी?” यीशु उमन के जबाब देलक, “इ युग केर आदमीमन में तो बिहा-सादी होवेला। मगर जे आदमीमन उ जुग में जाएक लाएक होबैं आउर मोरलमन में से जी उठबैं, तो उमन में बिहा-सादी नी होवी। उमन फिन कहियो नी मोरबैं, काले कि उमन स्वरग में परमेश्‍वर केर दूतमन नियर रहबैं आउर मोरलमन में से जी उठेक केर चलते उमन परमेश्‍वर केर संतान हों बाइन जबैं। मगर इ गोइठ के कि मोरलमन जरूर जी उठैना, मूसा हों पोड़ते झूँड़ केर कहानी में इकर इशारा काइर हे, जहाँ उ प्रभु के ‘अब्राहम, इसहाक आउर याकूब केर परमेश्‍वर’ कहेला। परमेश्‍वर तो मोरलमन केर निहीं मगर जिंदा आदमीमन केर परमेश्‍वर हेके, काले कि उकर लगिन उकर सोउब आदमीमन जिंदा अहैं।” इ गोइठ सुइन के मूसा केर नियम के सिखाएक वालामन में से थोरेक आदमीमन कहलैं, “हे गुरु, तोंय बेस कहले।” इकर पाछे उमन के फिन यीशु से कोनों आउर सवाल पूछेक केर साहस नी होलक। फिन यीशु उमन से पूछलक, “मसीह के राजा दाऊद केर बंश काले कहैना? राजा दाऊद खुद हें भजन संहिता केर किताब में कहेला, ‘प्रभु मोर प्रभु से कहलक, “तोंय मोर सिंहासन केर भतखाइया बटे बाइठ, जब तक कि मोंय तोर बैरीमन के तोर गोड़ में नी गिराय देमूँ।”’ पवितर किताब केर उ ठाँव में राजा दाऊद खुद हें मसीह के मोर प्रभु कहेला तो फिन उ सिरिफ राजा दाऊद केर बंश कइसन होवी?” जब सोउब आदमीमन सुनत रहैं, तो यीशु अपन चेलामन से कहलक, “मूसा केर नियम के सिखाएक वालामन से सावधान रहा, उमन इ देखाएक लगिन कि उमन ढेइर खास हेकैं, चौक-चौराहा में लम्बा आउर महंगा लुगा पिंध के फिरेक आउर बाजारमन में आदमी मनक मुँह से माइन केर संगे जोहार सुनेक पसिंद करैना! उमन के यहूदी मनक प्रार्थना घरमन में आउर भोजमन में मुध ठाँव में बइठेक बेस लगेला। उमन बिधवामन के धोखा देई के उ मनक घर आउर धन सम्पति के कब्जा काइर लेवैना आउर उमन के देखाएक लगिन ढेइर देरी तक प्रार्थना करते रहैना। एइसन आदमीमन के परमेश्‍वर कठोर सजा देई।” फिन यीशु अपन नजइर उठाय के देखलक कि धनी आदमीमन मंदिर केर भंडार में अपन-अपन दान देवाथैं। आउर उ एगो गरीब बिधवा के हों उकर में दूई गो तांबा केर सिक्का देते देखलक। तब यीशु कहलक, “मोंय तोहरेमन के सच कहाथों कि यहूदी मनक मंदिर केर भंडार में दान देवेक वालामन में से इ गरीब बिधवा सोउब से बगरा दान देई हे। काले कि सोउब आदमीमन अपन धन केर बढ़ती में से दान देई हैं, मगर इ गरीब बिधवा अपन घटी में से जे कोनोवें उकर ठिना रहे सोउब के दान में देई देलक।” जब थोरेक आदमीमन यहूदी मनक मंदिर केर बारे में कहत रहैं कि उ कइसन सुन्दर पखनामन आउर भेंट केर चीजमन से संवराल जाहे, तो उ कहलक, “उ दिनमन आवी, जे दिनमन में तोहरेमन जे इ सोउब के देखाथा, उमन में से हिंयाँ एको गो पखना के दुश्मनमन अपन ठाँव में नी छोड़बैं, सोउब के गिराय देबैं।” उमन उकर से पूछलैं, “हें गुरु, हमरे के बताव कि इ सोउब गोइठ कहिया पूरा होवी? आउर जब इ सोउब गोइठ पूरा होवेक वाला रही, तो उ बेरा केर का चिन्हा होवी?” यीशु जबाब देलक, “सावधान रहा, बहइक ना जबा, काले कि ढेइर आदमीमन मोर नाँव से आय के कहबैं, ‘मोंय मसीह हेकों!’ आउर इ हों कहबैं, ‘समय भीरे आय पोंहइच हें।’ तोहरेमन उ मनक पिछे ना चाइल जबा। आउर जब तोहरेमन लड़ाई आउर मार-पीट केर गोइठमन के सुनबा, तो ना घबराबा। काले कि पहिले इ मनक होवेक जरुरी अहे, मगर उ बेरा तुरते दुनिया केर अंत नी होवी।” तब यीशु उमन से कहलक, “एक जाइत केर आदमीमन दोसर जाइत केर आदमीमन उपरे हमला करबैं आउर एक देस केर आदमीमन दोसर देस केर आदमीमन से लड़बैं। आउर बड़का-बड़का भूंईडोल होवी आउर जगा-जगा अकाल आउर महामारी होवी आउर आकाश में भयानक डराएक वाला आउर बड़का-बड़का चिन्हा दिस्तार होवी। मगर इ सोउब गोइठमन से आगे तोहरेमन मोर चेला हेका, से लगिन उमन तोहरेमन के धारबैं आउर सताबैं, आउर यहूदी मनक प्रार्थना घर में जिम्मा देबैं, आउर जेहेल घर में सजुवाबैं, आउर तोहरेमन के राजामन आउर अधिकारी मनक आगे ठड़ुवाल जाएक ले मजबूर करबैं। मगर इ सोउब होवेक से तोहरेमन के उमन के मोर बारे में शुभ समाचार सुनाएक केर मोका मिल जाई। से लगिन तोहरेमन अपन-अपन मन में ठाइन लेबा कि हमरे आगे से जबाब देवेक केर चिंता नी करब। काले कि मोंय तोहरेमन के एइसन बोल आउर बुद्धि देमूँ कि सोउब बिरोधी आदमीमन तोहरे केर सामना करेक चाहे गोइठ काटेक नी पारबैं। तोहरे केर आयो-आबा, भाईमन, रिश्तेदारमन आउर संगमन जे मोर उपरे बिसवास नी करैना, तोहरेमन के धरुवाबैं, हिंयाँ तक कि तोहरे में से कायनों झन के माइर मोराबैं। आउर तोहरेमन मोर उपरे बिसवास कराला से लगिन ढेइर आदमीमन तोहरेमन से नफरत करबैं। मगर तोहरे केर कोनों नोकसान नी होवी। तोहरेमन दुःख तकलीफ केर आखरी बेरा तक मोर उपरे भरसा कराला आउर हार नी मानाला। से लगिन अपन जीउ के बचाय लेबा। जब तोहरेमन यरुशलेम शहर के सिपाहीमन से घेराल देखबा, तो जाइन लेबा कि उके जल्दी हें नाश करल जाई। तब जे यहूदिया परदेस में अहैं, उमन खुद के बचाएक ले पहारमन केर उपरे भाइग जाओक। आउर जे यरुशलेम शहर केर भीतरे होबैं, उमन बाहरे निकइल जाओक। आउर जे गाँवमन में होबैं, उमन उ नगर में ना जाओक। काले कि इ सजा देवेक केर एइसन दिन होवी, जेकर से पवितर किताब में लिखल सोउब गोइठमन पूरा होई जाई। उ दिनमन में उ जनानामन लगिन जे भारी गतर में होबैं आउर अपन छउवामन के दूध पियाते होबैं, भयानक समय होवी, उमन के भागेक लगिन ढेइर कठिन होवी! काले कि देस में बड़का दुःख आउर इ आदमी मनक उपरे भारी बिपइत आवी। उमन तलवाइर केर धार से मोराल जबैं, आउर ढेइर आदमीमन के बंधुवा बनाय के सोउब देस में लेगल जाई। जब तक परजाइतमन केर देस केर समय पूरा नी होवी, तब तक यरुशलेम शहर उ देस केर आदमीमन से रौंदाय जाई। बेइर, चाँद आउर तइरगनमन में चिन्हा दिस्तार होवी, समुदर केर गरजेक आउर लहरामन केर हिलकोरा से दुनिया केर सोउब देस केर आदमीमन घबराय जबैं आउर उ मनक उपरे भयानक बिपइत आवी। दुनिया में आवेक वाला बिपइत केर आशंका से आदमीमन केर जीउ में जीउ नी रही, काले कि आकाश केर शक्तिमन हिलाल जाई। तब उमन मोंय आदमी केर बेटा के शक्ति आउर बड़का तेज चमक केर संगे बदरी में आते देखबैं। जब इ गोइठमन होवेक लगी, तो तोहरेमन सोझ ठड़ाय के अपन मूँड़ के उपरे उठाबा, काले कि तोहर छुटकारा होवेक केर बेरा भीरे अहे।” यीशु उमन के एगो आउर उदाहरन बतालक, “अंजीर केर गाँछ आउर दोसर गाँछमन के देखा। जब उमन में नोगजा निकलेला, तो तोहरेमन देइख के खुद हें जाइन लेवाला कि गरमी केर दिन भीरे आय जाहे। एहे लेखे जब तोहरेमन इ गोइठमन के पूरा होते देखबा, तब जाइन लेबा कि परमेश्‍वर केर राइज भीरे अहे। मोंय तोहरेमन से सच कहाथों कि जब तक इ सोउब गोइठमन पूरा नी होई लेई, तब तक इ पीढ़ी केर आदमीमन नी मोरबैं। आकाश आउर धरती नाश होई जाई, मगर मोर कहल सोउब गोइठ सोउब दिन लगिन बनल रही। से लगिन तोहरेमन सावधान रहा, कहीं एइसन ना होवोक कि तोहरेमन माउज-मस्ती, नशापान आउर इ दुनिया केर चिंतामन से सुस्त होई जबा आउर उ दिन अचका एगो फंदा नियर तोहर उपरे आय जाई। काले कि उ दिन गोटा दुनिया में रहेक वाला सोउब आदमी मनक उपरे एहे नियर आवी। से लगिन जागते रहा आउर सोउब बेरा प्रार्थना करते रहा, जेकर से तोहरेमन इ सोउब आवेक वाला बिपइतमन से बचेक आउर मोंय आदमी केर बेटा केर सामने ठड़ाएक केर लायक बनेक पारबा।” यीशु दिन में यहूदी मनक मंदिर में उपदेस देवत रहे, मगर राइत के शहर केर बाहरे जाय के जैतून नाँव केर पहार में राइत बितात रहे। आउर बिहाने से हें सोउब आदमीमन उकर उपदेस सुनेक लगिन यहूदी मनक मंदिर में उकर ठिना आवत रहैं। बिन खमीर केर परब, जेके फसह परब कहैना, भीरे रहे। मूसा केर नियम के सिखाएक वाला आउर यहूदी मुध पुरोहितमन यीशु के माइर मोराएक केर उपाय खोजत रहैं, मगर उमन आदमीमन से डरात रहैं। से बेरा शैतान यहूदा में ढूइक गेलक। जे इस्करियोत गाँव केर रहेक वाला आउर यीशु केर बारह चेलामन में से एगो रहे। उ यहूदी मुध पुरोहितमन आउर यहूदी मनक मंदिर केर पहरादारमन केर मुखियामन ठिना जाय के उ मनक संगे गोइठ-बात करलक कि उके का लेखे उ मनक हाँथ में धरुवाई। उमन ढेइर खुश होलैं, आउर उके रुपया देवेक केर करार करलैं। उ माइन लेलक आउर आदमी मनक भीड़ ना रहोक से बेरा में यीशु के उ मनक हाँथे धरुवाएक केर मोका खोजेक लगलक। बिन खमीर रोटी केर परब केर दिन आलक, जेकर में फसह परब केर भोज केर मेमना बलिदान करेक जरुरी रहे। से लगिन यीशु पतरस आउर यूहन्ना के इ कइह के भेजलक, “तोहरेमन जाय के हमर खाएक लगिन फसह परब केर भोज तेयार करा।” उमन यीशु से पूछलैं, “तोंय कोन ठाँव के चाहिसला कि हमरे हूवाँ जाय के तोर लगिन फसह खाएक केर तेयारी करब?” यीशु उमन से कहलक, “देखा शहर में ढूकते हें एगो आदमी पानी केर गगरी बोहल तोहरेमन के मिली, जे घर में उ जाई, तोहरेमन उकर पिछे चाइल जबा? आउर उ घर केर मालिक से कहबा, ‘हमर गुरु तोर से इ पूइछ हे कि उ तेयार करल कोठरी कहाँ अहे, जहाँ मोंय अपन चेला मनक संगे फसह परब केर भोज खामूँ।’ घर केर मालिक तोहरेमन के घर केर उपरे तल्ला केर एगो सजाल बड़का कोठरी देखाई, हूवाँ हमर लगिन फसह परब केर भोज खाएक ले तेयार करबा।” दुयो चेलामन हूवाँ से चाइल गेलैं। उमन यरुशलेम शहर में पोंहइच के सोउब कुछ ओहे लेखे पालैं जइसन यीशु कइह रहे। उमन फसह परब केर भोज तेयार करलैं। जब खाएक केर बेरा पोहोंचलक, तो यीशु अपन बारहों खास चेलामन केर संगे खाएक बइठलक। आउर उ अपन बारहों चेलामन से कहलक, “मोके ढेइर इच्छा रहे कि दुःख उठाएक आउर मोराल जाएक से आगे इ फसह परब केर भोज तोहर संगे खामूँ। काले कि मोंय तोहरेमन से कहाथों कि इ फसह परब केर भोज दोबारा तब तक नी खामूँ जब तक कि इ परमेश्‍वर केर राइज में पूरा नी होई जाई।” तब उ अंगूर केर रस भरल कटोरा लेई के परमेश्‍वर के धन्यबाद देलक आउर कहलक, “इके लेवा आउर आपस में बाँइट के पी लेवा। काले कि मोंय तोहरेमन से कहाथों आइज से लेई के उ दिन तक अंगूर केर रस फिन नी पीमूँ जब तक कि परमेश्‍वर केर राइज नी आय जाई।” यीशु फिन रोटी लेलक आउर परमेश्‍वर के धन्यबाद देई के टुकरालक, आउर अपन चेलामन के इ कहते देलक, “इ रोटी मोर काया हेके, जे तोहरे लगिन देवल जात हे। मोर याइद में एहे करते रहबा।” एहे लेखे उ बियारी पाछे अंगूर केर रस भरल कटोरा हों इ कहते देलक, “इ कटोरा मोर लोहू से ठहराल नवाँ करार हेके, जे तोहर पापमन केर क्षमा लगिन बहाल जाथे। मगर देखा, मोके धरुवाएक वाला केर हाँथ मोर संगे टेबुल उपरे अहे। काले कि मोंय आदमी केर बेटा तो जइसन मोर बारे में पवितर किताब में लिखल अहे, ओहे लेखे मोर लगिन होवी। मगर उ आदमी के जे मोके धोखा देई के धरुवाय देवी, उकर लगिन हाय!” तब उमन एक दोसर से पूछेक लगलैं, “हमर में से केहर हेके, जे इ काम के करी?” चेलामन में इ गोइठ लगिन हों बहस होलक कि उमन में से केके सोउब से बड़का मानेक चाही। यीशु उमन से कहलक, “तोहरेमन जानाला कि इ दुनिया में जे आदमीमन राजा समझल जायना उमन अपन अधिकार के अपन से हेंठे केर आदमीमन के दबाएक लगिन काम में लानैना। आउर उकर अधिकारीमन भलाई कराइया कहायना। मगर तोहरेमन उमन नियर ना होबा। जे तोहरेमन में से बाड़ बनेक चाहेला, उ खुद के छोट समझोक आउर जे मालिक हेके, उ सेवक नियर बनोक। आखिर में बाड़ के हेके, उ जे खाएक लगिन टेबुल में बाइठ हे या उ जे पोरसेला? ओहे जे खाएक नी बाइठ हे? मगर मोंय तोहर माझे सेवक नियर अहों। तोहरेमन उ हेका, जे मोर परीक्षामन में लगातार मोर संगे रहा। जइसन मोर आबा मोर लगिन एगो राइज ठहराय हे, तइसनेहें मोंय हों तोहर लगिन राइज ठहराथों, ताकि तोहरेमन मोर राइज में मोर टेबुल में खाबा-पीबा आउर बारह गो सिंहासन में बाइठ के इसराइल केर बारहों गोतरमन केर न्याय करबा।” यीशु आगे कहलक, “सिमोन, हे सिमोन, देख, शैतान तोहर परीक्षा करेक लगिन परमेश्‍वर से इजाजत माँइग लेई हे, बेस आदमीमन के बुरा आदमीमन से अलग करेक लगिन, जइसन एगो किसान गोहोम के भूसा से अलग करेला। मगर मोंय तोर लगिन प्रार्थना काइर हों कि तोंय मोर उपरे बिसवास करेक नी छोड़बे आउर जब तोंय बिसवास में मजबूत होई जाबे तब अपन भाईमन के हों मोर उपरे बिसवास करेक लगिन स्थिर करबे।” पतरस यीशु से कहलक, “हे प्रभु, मोंय तोर संगे जेहेल घर जाएक आउर मोरेक लगिन हों तेयार अहों।” मगर यीशु कहलक, “हे पतरस, मोंय तोर से कहाथों कि आइज मुरगा बोलेक से आगे तोंय तीन बेर मोर से मुकइर जाबे कि तोंय मोके नी जानिसला।” यीशु अपन चेलामन से कहलक, “जब मोंय तोहरेमन के शुभ समाचार परचार करेक लगिन बेगर पैसा-थइली, झोला आउर जूता केर भेइज रहों, तब का तोहरेमन के कोनों चीज केर घटी होई रहे?” उमन जबाब देलैं, “निहीं, कोनोवें चीज केर घटी नी होई रहे।” यीशु उमन से कहलक, “मगर अब आदमीमन हमर बिरोध में अहैं, से लगिन जेकर ठिना पैसा-थइली अहे, उ उके लेवोक आउर एहे लेखे झोला हों लेवोक। आउर जेकर ठिना तलवाइर नखे, उ अपन बाहरी लुगा बेइच के एगो कीन लेवोक। काले कि मोंय तोहरेमन से कहाथों कि पवितर किताब में लिखल इ गोइठ मोर में पूरा होवेक जरुरी अहे, ‘उ अपराधीमन में गिनल गेलक।’ आउर जे कोनों मोर बारे में लिखल अहे, उ जरूर पूरा होवी।” उमन कहलैं, “हें प्रभु देख, हिंयाँ दूई गो तलवाइर अहे।” यीशु उमन से कहलक, “ढेइर अहे।” इकर पाछे यीशु बाहरे निकइल के अपन आदत केर मोताबिक जैतून पहार उपरे गेलक, आउर चेलामन हों उकर संगे गेलैं। यीशु हूवाँ पोंहइच के उमन से कहलक, “प्रार्थना करते रहा, जेकर से तोहरेमन के शैतान बहकाएक ना पारोक।” आउर उ खुद उमन से अलगे ढेला फेकेक केर दूर ओतना गेलक, आउर ठेहुना टेइक के प्रार्थना करेक लगलक, “हे आबा परमेश्‍वर, अगर तोंय चाहबे तो मोर उपरे आवेक वाला इ दुःख से मोके बचाय ले, फिन भी जइसन मोंय चाहोना तइसन ना कर, मगर जे तोंय चाहिसला ओहे कर।” सेहे बेरा स्वरग से एगो दूत दिस्तार होलक आउर उके शक्ति देवेक लगलक। यीशु प्राण निकलेक नियर दरद में आउर हें जीउ जतन से प्रार्थना करते रहलक आउर उकर पसीना लोहू केर बड़का-बड़का टीपा नियर भूंई उपरे गिरत रहे। यीशु प्रार्थना से उठलक आउर अपन चेलामन ठिना आलक। यीशु उमन के दुःख केर चलते निंदाल पालक। आउर उमन से कहलक, “तोहरेमन काले निंदाथा? उठा आउर प्रार्थना करा, जेकर से तोहरेमन के शैतान बहकाएक ना पारोक।” यीशु इ कहते हें रहे कि एगो भीड़ आय पोहोंचलक। आउर उ बारहों चेलामन में से एक झन जेकर नाँव यहूदा रहे, भीड़ केर आगे-आगे आवत रहे, उ यीशु के चुमा करेक लगिन उकर ठिना आलक। यीशु उकर से कहलक, “हे यहूदा, का तोंय चुमा काइर के मोंय आदमी केर बेटा के धरुवाथिस?” यीशु केर चेलामन जब देखलैं कि का होवेक वाला अहे, तो उकर से कहलैं, “हें प्रभु, का हमरे तलवाइर चलाब?” आउर उमन में से एक झन यहूदी महापुरोहित केर धांगर उपरे तलवाइर चलालक आउर उकर भतखाइया कान के काइट देलक। मगर यीशु कहलक, “रहेक देवा, अब ओतने करा।” आउर उकर कान छुई के उके ठीक करलक। तब यीशु यहूदी मुध पुरोहितमन, यहूदी मनक मंदिर केर पहरादारमन केर सरदारमन आउर धरम केर अगुवामन से जेमन उके धारेक ले आय रहैं, कहलक, “का तोहरेमन मोके डाकू समइझ के धारेक लगिन तलवाइरमन आउर लाठीमन लेई के आय हा? जब मोंय रोज दिन यहूदी मनक मंदिर केर अंगना में तोहरे केर संगे रहों, से बेरा तोहरेमन मोके नी धारला, मगर इ बेरा तोहरे केर हेके आउर इकर में अंधार केर अधिकार अहे। से लगिन तोहरेमन मोके धारेक पाराथा।” फिन उमन यीशु के धाइर के यहूदी महापुरोहित केर घर में लानलैं आउर पतरस यीशु केर पिछे थोरेक दूरी बनाय के उकर पिछे-पिछे यहूदी महापुरोहित केर अंगना तक गेलक। आउर जब उमन अंगना केर माझे आइग सुलगाय के चाइरो आरा बइठलैं, तो पतरस हों उ मनक संगे बाइठ गेलक। तब एगो धांगरिन उके आइग केर इंजोत में बइठल देखलक आउर उके टकटकाय के देइख के कहेक लगलक, “एहो आदमी तो यीशु केर संगे रहे।” मगर पतरस मुकइर के कहलक, “हे बहिन, मोंय उ आदमी के नी जानोना।” थोरेक देरी केर पाछे एगो दोसर आदमी पतरस के देइख के कहलक, “तोंय हों तो ओहे आदमीमन में से एगो हेकिस।” पतरस जबाब देलक, “हे भाई, मोंय ना लगों।” फिन घंटा भइर पाछे एगो आउर आदमी जोर देई के कहेक लगलक, “जरूर हें इ उकरे संगे रहे, काले कि एहो तो गलील परदेस केर हेके।” मगर पतरस फिन कहलक, “हे भाई, मोंय नी जानाथों कि तोंय का कहाथिस?” उ कहते हें रहे कि तुरते मुरगा बोइल देलक। यीशु पिछे मुँहराय के पतरस बटे देखलक। तब पतरस के यीशु केर उ गोइठ याइद आलक, जे उ कइह रहे, “आइज मुरगा बोलेक से आगे तोंय तीन बेर मोर से मुकइर जबे।” आउर उ बाहरे निकइल के फफाइख-फफाइख के काँदेक लगलक। जे सिपाहीमन यीशु केर पहरा देवत रहैं, उमन उकर मजाक काइर के उके मारेक-पिटेक लगलैं। आउर उकर आँइख में पट्टी बाइंध के उकर से पूछेक लगलैं, “भविष्यवाणी काइर के हमरे के बताव कि तोके केहर माइर हे।” एहे लेखे उमन ढेइर हें निंदा केर गोइठमन के उकर बिरोध में कहलैं। बिहान होते हें यहूदी मुध पुरोहितमन, मूसा केर नियम के सिखाएक वालामन आउर यहूदी धरम केर अगुवामन जमा होलैं, आउर उमन यीशु के अपन महासभा में लाइन के पूछलैं, “अगर तोंय मसीह हेकिस, तो हमरे के बताय दे!” यीशु उमन से कहलक, “अगर मोंय तोहरेमन के बतामूँ तो बिसवास नी करबा। आउर अगर मोंय सवाल पूछमूँ तो तोहरेमन जबाब नी देबा। मगर अब से मोंय आदमी केर बेटा सर्वशक्तिमान परमेश्‍वर केर भतखाइया आरा बइठल रहमूँ।” इ गोइठ सुइन के सोउबमन कहलैं, “तो का तोंय परमेश्‍वर केर बेटा हेकिस?” यीशु उमन से कहलक, “तोहरेमन खुद हें कहाथा कि मोंय हेकों।” तब उमन कहलैं, “अब हमरे के गवाही केर दरकार नखे, काले कि हमरे खुद हें उकर मुँह से परमेश्‍वर केर निंदा करते सुइन लेई ही।” तब सभा केर सोउब आदमीमन उइठ गेलैं आउर यीशु के राजपाल पिलातुस ठिना लेई गेलैं। आउर उमन इ कइह के उकर उपरे दोष लगाएक लगलैं, “हमरे उके हमर आदमीमन के बहकाते आउर महाराजा के मालगुजारी देवेक से मना करते आउर खुद के मसीह, आउर राजा कहते सुइन ही।” राजपाल पिलातुस उकर से पूछलक, “का तोंय यहूदीमन केर राजा हेकिस?” यीशु उके जबाब देलक, “तोंय खुद हें कहाथिस।” तब पिलातुस यहूदी मुध पुरोहितमन आउर सोउब आदमीमन से कहलक, “मोंय इ आदमी में कोनों दोष नी पालों।” मगर उमन आउर हें जोर देई के कहेक लगलैं, “इ गलील परदेस से लेई के हिंयाँ तक गोटा यहूदिया परदेस में अपन उपदेस देई-देई के आदमीमन के दंगा करेक लगिन भड़कायला।” इ सुइन के पिलातुस पूछलक, “का इ आदमी गलील परदेस केर रहेक वाला हेके?” आउर इ जाइन के कि यीशु गलील परदेस केर राजा हेरोदेस केर अधिकार छेतर केर हेके, उ यीशु के राजा हेरोदेस ठिना भेइज देलक। राजा हेरोदेस हों उ दिनमन में यरुशलेम शहर में रहे। राजा हेरोदेस यीशु के देइख के ढेइर खुश होलक, उ ढेइर दिन से उके देखेक खोजत रहे, काले कि उ उकर बारे में सुइन रहे। आउर यीशु के कोनों चमत्कार केर काम करते देखेक केर आसरा करत रहे। उ यीशु से ढेइर हें गोइठमन पूछते रहलक, मगर उ उके कोनोवें जबाब नी देलक। यहूदी मुध पुरोहितमन आउर मूसा केर नियम के सिखाएक वालामन हूवाँ ठड़ाय रहैं, उमन पूरा तन-मन से यीशु उपरे दोष लगाते रहलैं। तब राजा हेरोदेस अपन सिपाहीमन केर संगे उकर मजाक काइर के बेइज्जत करलक आउर भड़किला लुगा पिंधाय के उके पिलातुस ठिना घुराय देलक। ओहे दिन से राजा हेरोदेस आउर राजपाल पिलातुस में दोस्ती होई गेलक। इकर से पहिले उमन एक-दोसर केर बैरी रहैं। ओहे दिन राजपाल पिलातुस यहूदी मुध पुरोहितमन, सरदारमन आउर आदमीमन के एक संगे बोलाय के उमन से कहलक, “तोहरेमन इ आदमी के मोर ठिना इ दोष लगाय के लाइन हा कि इ आदमीमन के दंगा करेक लगिन बहकात रहे। मोंय तोहर सामने इकर जाँच करलों, मगर तोहर कोनों गोइठ में इके दोषी नी पालों। राजा हेरोदेस हों इके दोषी नी पालक, काले कि उ इके मोर ठिना घुराय देलक। तोहरेमन देखाथा कि इ आदमी मौत केर सजा केर लाएक कोनों गुन्हा नी काइर हे। से लगिन मोंय इके कोड़रा मरुवाय के छोइड़ देमूँ।” राजपाल पिलातुस हर बरिस यहूदी मनक फसह परब केर मोका में एगो कैदी के यहूदीमन लगिन छोइड़ देवत रहे। तब उमन सोउब एक संगे चिल्लाय उठलैं, “उके मौत केर सजा दे आउर हमरे लगिन बरअब्बा के छोइड़ दे।” बरअब्बा रोमी सरकार केर बिरोध में नगर में लड़ाई काइर रहे आउर केखो मोराय देई रहे, सेकर चलते जेहेल घर में साजल जाय रहे। मगर राजपाल पिलातुस यीशु के छोड़ेक चाहत रहे, से लगिन आदमीमन से अरजी करलक। मगर उमन चिल्लाय के कहते रहलैं, “इके क्रूस उपरे चढ़ाव, इके क्रूस उपरे चढ़ाव।” राजपाल पिलातुस तीसरा बेर फिन उमन से कहलक, “काले, इ आदमी कोन सा बुराई काइर हे? मोंय इकर में मौत केर सजा लायक कोनों दोष नी पालों। से लगिन मोंय इके कोड़रा मरुवाय के छोइड़ देमूँ।” मगर उमन चिल्लाय-चिल्लाय के राजपाल पिलातुस केर पिछे पाइड़ गेलैं कि इके क्रूस उपरे चढ़ाव, आखिर में पिलातुस उ मनक माँग केर मोताबिक करेक लगिन तेयार होई गेलक। से लगिन पिलातुस आगया देलक कि उ मनक माँग केर मोताबिक करल जाओक। राजपाल पिलातुस उ आदमी के तो छोइड़ देलक, जे बलवा आउर माइर-मोराएक केर चलते जेहेल घर में साजल जाय रहे, जेके उमन छोड़ेक केर माँग करत रहैं, मगर यीशु के आदमी मनक इच्छा केर मोताबिक उमन के जिम्मा देई देलक। जब उमन यीशु के लेई जात रहैं, तो उमन सिमोन नाँव केर एगो आदमी के धारलैं, जे कुरेन शहर केर रहेक वाला रहे, उ गाँव से यरुशलेम शहर आवत रहे, उमन उके धाइर के उकर उपरे क्रूस के लाइद देलैं कि क्रूस के बोइह के यीशु केर पिछे-पिछे लेई जाई। आदमी मनक बड़का भीड़ हों उकर पिछे-पिछे जात रहे आउर उमन में जनानामन हों रहैं, जे उकर लगिन छाती पीट-पीट के काँदत रहैं। यीशु उ मनक बटे मुँहराय के कहलक, “हे यरुशलेम शहर केर बेटीमन, मोर लगिन ना काँदा, मगर अपन आउर अपन छउवा-पुतामन लगिन काँदा। काले कि उ दुःख केर दिन आवाथे, जब आदमीमन कहबैं, धाइन हेकैं उमन जेमन बाँझ अहैं, आउर कहियो छउवामन के जनम नी देलैं आउर ना दूध पियालैं। उ बेरा आदमीमन पहारमन से कहेक लगबैं ‘हमर उपरे गिरा,’ आउर टोंगरीमन से कहबैं, ‘हमरे के ढाँइप लेवा।’ अगर केऊ धरमी आदमी केर संगे इ लेखे होवेला, तो उ सोचोक कि उ आदमीमन केर संगे का होवी, जेमन इ सजा के पावेक केर लाएक अहैं।” उमन दूई झन अपराधी के हों यीशु केर संगे मौत केर सजा देवेक लगिन लेई जात रहैं। जब उमन उ ठाँव जेके खोपड़ी कहैना पोहोंचलैं तो हूवाँ यीशु के आउर उ दुयो अपराधीमन के क्रूस उपरे चढ़ालैं, एगो के यीशु केर भतखाइया बटे आउर दूसरा के लेंगा बटे चढ़ालैं। तब यीशु कहलक, “हे आबा इमन के क्षमा कर, काले कि इमन नी जानैना कि का कराथैं?” इकर पाछे उमन यीशु केर लुगामन के बाँटेक लगिन चिट्ठी साजलैं कि केके का लुगा भेटाई, तब उमन लुगा के बाँइट लेलैं। आदमीमन ठड़ाय के इ सोउब कुछ के देखत रहैं, आउर सरदारमन हों मजाक काइर-काइर के कहत रहैं, “इ दोसरमन के बचालक, अगर इ परमेश्‍वर केर मसीह आउर उकर चुनल हेके, तो खुद के बचाय लेवोक।” सिपाहीमन हों उकर मजाक करलैं आउर उकर भीरे आय के अमल रस के देते कहलैं, “अगर तोंय यहूदीमन केर राजा हेकिस, तो खुद के बचाय ले।” यीशु केर क्रूस उपरे एगो दोष पत्र हों टांगल रहे, जेकर में लिखल रहे, “इ यहूदीमन केर राजा हेके।” क्रूस उपरे टांगल अपराधीमन में से एगो यीशु केर निंदा करेक लगलक, “का तोंय मसीह ना लगिस? तो फिन खुद के आउर हमरे के बचाव!” मगर दूसरा अपराधी उके डाँइट के कहलक, “का तोंय परमेश्‍वर से हों नी डराइसला? तोंय हों तो ओहे सजा पावाथिस। हमर सजा तो न्याय केर मोताबिक हेके, काले कि हमरे अपन करनी केर फल पावाथी, मगर इ कोनों अपराध नी काइर हे।” इकर पाछे उ कहलक, “हे यीशु जब तोंय राजा बाइन के राइज करेक आबे, तो मोके याइद करबे।” यीशु उकर से कहलक, “मोंय तोर से सच कहाथों आइज हें तोंय मोर संगे स्वरग लोक में होबे।” लगभग बारह बजे से लेई के तीन बजे तक गोटा धरती में अंधार होई गेलक। आउर बेइर केर इंजोत चाइल गेलक आउर उ मोटा परदा जे यहूदी मनक मंदिर में लगाल रहे, उपरे से हेंठे तक फाइट के दूई टुकरा होई गेलक। यीशु जोर से हकाय के कहलक, “हे आबा, मोंय अपन आत्मा के तोर हाँथ में जिम्मा देवाथों।” इ कइह के अपन प्राण छोइड़ देलक। इ सोउब घटना के सूबेदार, जे सौ सिपाही मनक अधिकारी रहे, देइख के परमेश्‍वर केर बड़ाई करलक आउर कहलक, “जरूर हें इ आदमी धरमी रहे।” ढेइर आदमीमन इके देखेक लगिन जमा होई रहैं, उमन सोउब इ घटना के देइख के दुःख से छाती पीटते अपन घर घूइर गेलैं। यीशु केर सोउब जान-चिन्हार आदमीमन थोरेक दूर में ठड़ाय रहैं, उमन में जनानामन हों रहैं जे गलील परदेस से उकर संगे आय रहैं, उमन इ सोउब घटना के देखत रहैं। हूवाँ यूसुफ नाँव केर एगो सज्जन आदमी रहे, जे धरमी आउर धरम महासभा केर सदस्य हों रहे। उ सभा केर बिचार आउर इकर काममन से खुश नी रहे। उ यहूदीमन केर गाँव अरिमतियाह केर रहेक वाला रहे आउर परमेश्‍वर केर राइज केर आसरा देखत रहे। उ पिलातुस ठिना जाय के यीशु केर लाश के माँइग लेलक। आउर उ लाश के क्रूस से हेंठे उतरालक आउर उके मलमल केर एगो कफन लुगा में लपाइट के चट्टाइन में खोदल एगो कबर में रखलक। जेकर में कहियो केखो नी रखल जाय रहे। इ दिन तेयारी केर दिन रहे, आउर दूसरा दिन यहूदी मनक आराम केर दिन शुरु होवेक वाला रहे। जे जनानामन यीशु केर संगे गलील परदेस से आय रहैं, उमन यूसुफ केर पिछे-पिछे जाय के उ कबर के देखलैं, आउर एहो कि उकर लाश का लेखे रखल जाय हे। आउर उमन घूइर के बेस बसाएक चीजमन के आउर सेंट तेयार करलैं, आउर यहूदी मनक आराम केर दिन तो उमन मूसा केर नियम केर मोताबिक आराम करलैं। मगर हफ्ता केर शुरु दिन बड़ बिहाने उ बेस महकेक वाला चीजमन के जेके उ जनानामन तेयार काइर रहैं, लेई के कबर ठिना आलैं। उमन पखना के कबर केर दुरा से लुढ़काल पालैं। उमन जब कबर केर भीतरे गेलैं तो प्रभु यीशु केर लाश के नी पालैं। उमन इ सोउब देइख के ताजुब होवत रहैं, सेहे बेरा दूई गो मरदानामन चमचमाते लुगा पिंधल उ मनक ठिना आय के ठड़ालैं। उमन डरे मूँड़ के झुकाय के भूंई के देखेक लगलैं, तब उ दुयो स्वरग दूतमन उमन से कहलैं, “जे जिंदा अहे, उके तोहरेमन मोरलमन केर माझे काले खोजाथा? उ हिंयाँ नखे, मगर जी उइठ हे। उ गलील परदेस में रहते तोहरेमन से कइह रहे, उके याइद करा। उ कइह रहे, ‘मोंय आदमी केर बेटा के पापीमन केर हाँथे धरुवाल जाएक, आउर क्रूस उपरे चढ़ाल जाएक आउर तीसरा दिन फिन जी उठेक जरुरी अहे।’” तब जनानामन के यीशु केर कहल गोइठ याइद आलक। आउर उमन कबर से घूइर के यीशु केर गारहों खास चेलामन के आउर दोसर सोउब चेलामन के इ सोउब गोइठमन के बतालैं। जेमन इ गोइठमन के खास चेलामन के बतालैं, उमन मगदला गाँव केर मरियम, योअन्ना आउर याकूब केर आयो मरियम आउर उ मनक संगे दोसर जनानामन हों रहैं। मगर यीशु केर चेलामन के उ मनक गोइठ कहानी नियर लगलक आउर उ मनक गोइठ के बिसवास नी करलैं। फिन भी पतरस उठलक आउर कूइद के कबर ठिना गेलक, आउर निहइर के कबर केर भीतरे देखलक, हूवाँ लुगा छोइड़ आउर कोनों नी रहे। पतरस इ घटना से ताजुब करते अपन घर घूइर गेलक। ओहे दिन यीशु केर चेलामन में से दूई झन इम्माऊस नाँव केर एगो गाँव जात रहैं, जे यरुशलेम शहर से लगभग गारह किलोमीटर दूर रहे। इमन जे कुछ होई रहे इकर बारे में गोठियाते जात रहैं। जब इ दुयो गोठियाते आउर एक-दोसर से पूछा-पूछी करते जात रहैं, सेहे बेरा यीशु आय के उ मनक संगे चलेक लगलक। मगर परमेश्‍वर उ मनक नजइर के एइसन काइर देई रहे कि उमन यीशु के चिन्हेक नी पारलैं। यीशु उमन से पूछलक, “डहर हिंठते तोहरेमन केकर बारे में गोठियाथा?” उमन उदास होई के ठड़ाय गेलैं। तब उमन में से एगो जेकर नाँव क्लियुपास रहे, कहलक, “का यरुशलेम शहर में तोंय हें एइसन परदेसी हेकिस, जे इ नी जानिसला कि इ दिनमन में हूवाँ का-का होई हे?” यीशु उमन से पूछलक, “का होई हे?” उमन उकर से कहलैं, “इ गोइठ नासरत नगर केर रहेक वाला यीशु केर बारे में हेके। उ परमेश्‍वर आउर सोउब आदमीमन केर नजइर में चमत्कार केर काम करेक वाला आउर शक्तिशाली परमेश्‍वर केर संदेश के बताएक वाला रहे। आउर हमर यहूदी मुध पुरोहितमन आउर सरदारमन उके धरुवालैं आउर उके मौत केर सजा देवाय के क्रूस उपरे चढ़ालैं। मगर हमरे आसरा काइर रही कि ओहे रोमी सरकार केर गुलामी से इसराइली आदमीमन के छुटकारा देवी। इ सोउब गोइठमन केर अलावा इ घटना केर होवल तीसरा दिन हेके। अब हमर में से थोरेक जनानामन जे बिहान के कबर ठिना जाय रहैं, हमरे के ताजुब में डाइल देई हैं। उमन हूवाँ यीशु केर लाश के नी पालैं आउर इ कहते आलैं कि हमरे स्वरगदूतमन केर दर्शन पाय ही, जेमन हमरे के बतालैं कि यीशु जिंदा अहे। उ जनाना मनक गोइठ सुइन के हमर संगमन में से कायनों झन कबर ठिना गेलैं आउर जइसन जनानामन बताय रहैं, तइसनेहें पालैं, मगर उमन यीशु के नी देखलैं।” तब यीशु दुयो चेलामन से कहलक, “हे निरबुद्धियामन, जे कुछ परमेश्‍वर केर संदेश के बताएक वालामन पवितर किताब में लीख हैं, उकर उपरे बिसवास करेक में तोहरेमन के ढेइर कठिन लगेला। इ जरुरी रहे कि मसीह इ दुःख उठाओक आउर फिन अपन महिमा में ढूकोक।” तब यीशु उमन के पवितर किताब में मूसा केर नियम से शुरु काइर के सोउब परमेश्‍वर केर संदेश के बताएक वालामन बटले अपन बारे लिखल गोइठमन के समझाय देलक। एतनेहें में उमन उ गाँव ठिना पोंहइच गेलैं, जहाँ उमन जात रहैं। आउर यीशु एइसन देखालक कि उ आगे जाएक खोजाथे। मगर उमन इ कइह के उके रोकलैं “साँझ होई जाथे आउर बेरा हों ढेइर बीत जाहे, से लगिन तोंय हमर संगे रइह जा।” तब यीशु उ मनक संगे रहेक लगिन भीतरे गेलक। जब यीशु उ मनक संगे खाएक बइठलक तो उ रोटी लेई के परमेश्‍वर के धन्यबाद देलक आउर उके टुकइर के उमन के देवेक लगलक। तब उ मनक आँइख खुइल गेलक आउर उमन यीशु के चीन्ह लेलैं, मगर यीशु उ मनक नजइर से लूइक गेलक। उमन एक-दोसर से कहलैं, “जब उ डहर में हमर से गोठियात रहे आउर पवितर किताब केर मतलब हमरे के समझात रहे, तो का हमर मन में उमीद नी जाइग रहे?” उमन ओहे बेरा उठलैं आउर यरुशलेम शहर घूइर गेलैं। हूवाँ उमन उ गारहों खास चेलामन आउर उ मनक संगमन के जमा होवल पालैं। उमन इ कहत रहैं, “प्रभु सचमुच में जी उइठ हे आउर सिमोन के देखाई देई हे।” तब दुयो चेलामन हों डहर केर गोइठमन के उमन के बतालैं आउर जब यीशु रोटी टुकरत रहे, तो उमन कइसन चिन्हलैं। जब उमन इ सोउब गोइठमन के गोठियाते रहैं, तब यीशु खुद हें उ मनक माझे आय के ठड़ाय गेलक आउर उमन से कहलक, “तोहरेमन के शांति मिलोक।” मगर उमन घबराय गेलैं आउर डराय के सोचेक लगलैं कि हमरे कोनों मोरल आदमी केर छाँई के देखाथी। यीशु उमन से कहलक, “तोहरेमन एइसन काले घबराथा? आउर तोहरेमन मन में शंका काले कराथा? मोर हाँथ आउर गोड़ के देखा, मोंय ओहे हेकों। मोके छुई के देखा, काले कि भूत केर हाड़-माँस नी होवेला जइसन मोर में देखाथा।” इ कइह के यीशु उमन के अपन हाँथ आउर गोड़ के देखालक। सेकरो में जब चेलामन के खुशी केर मारे इ बिसवास नी होवत रहे कि यीशु जिंदा अहे आउर उमन ताजुब करत रहैं, तब यीशु उमन से पूछलक, “का तोहर ठिना कोनों खाएक लगिन अहे?” उमन उके भूरठाल मछरी केर टुकरा देलैं। यीशु उके लेई के उ मनक सामने खालक। फिन यीशु उमन से कहलक, “इ गोइठमन के मोंय तोहर संगे रहेक बेरा हें तोहरेमन के बताय रहों कि मोर बारे में जेतना गोइठमन मूसा केर नियम, परमेश्‍वर केर संदेश के बताएक वालामन आउर भजन संहिता केर किताबमन में लिखल अहे, उ सोउब पूरा होवेक जरुरी अहे।” तब यीशु पवितर किताब केर गोइठमन के बुझेक लगिन उ मनक बुद्धि के खोइल देलक आउर उमन से कहलक, “पवितर किताब में इ लिखल अहे कि मसीह दुःख उठाई आउर तीसरा दिन मोरलमन में से फिन जी उठी। आउर यरुशलेम शहर से लेई के सोउब जाइत केर आदमीमन में, पसताप काइर के पापमन के छोड़ेक केर आउर पापमन केर क्षमा केर परचार उकरे नाँव से करल जाई। तोहरेमन इ सोउब गोइठमन केर गवाह हेका। देखा, मोंय तोहर उपरे पवितर आत्मा के भेजमूँ, जेकर करार मोर आबा परमेश्‍वर काइर हे। से लगिन जब तक तोहरेमन के स्वरग से शक्ति नी मिली तब तक एहे शहर में उकर आसरा देखते रहा।” तब यीशु उमन के शहर से बाहरे बैतनिय्याह गाँव तक लेई गेलक, आउर अपन हाँथ उठाय के उमन के आशीष देलक। आशीष देते-देते उ उमन से जुदा होई गेलक आउर स्वरग में उठाय लेवल गेलक। चेलामन यीशु केर आराधना करलैं आउर रिझे-रिझे यरुशलेम शहर घूइर गेलैं। आउर उमन लगातार यहूदी मनक मंदिर में जमा होई के परमेश्‍वर केर बड़ाई करते रहलैं। दुनिया केर सिरजन से आगे बचन रहे, आउर बचन परमेश्‍वर केर संगे रहे, आउर बचन परमेश्‍वर रहे। एहे बचन शुरु से परमेश्‍वर केर संगे रहे। परमेश्‍वर सोउब कुछ उकरे से सिरजालक आउर जे कुछ सिरइज हे, उकर में से कोनोवें चीज उकर बिना नी सिरइज हे। बचन जिंदगी केर सोता हेके आउर ओहे सोउब आदमीमन के इंजोत देवेक वाला हेके। आउर उ इंजोत अंधार में चमकेला आउर अंधार उके बुताएक नी पारलक। परमेश्‍वर एगो आदमी के भेजलक, जेकर नाँव यूहन्ना रहे। उ इंजोत केर बारे में बताएक आलक, ताकि सोउब आदमीमन इंजोत केर बारे में बताल उकर गोइठ के बिसवास करोक। उ खुद तो इंजोत नी रहे, मगर उ इंजोत केर बारे में बताएक आय रहे। जे सच्चा इंजोत हेके आउर सोउब आदमीमन के इंजोत करेला, दुनिया में आवेक वाला रहे। उ दुनिया में रहे आउर दुनिया उकरे से सिरजलक मगर दुनिया केर आदमीमन उके नी चिन्हलैं। उ अपन आदमीमन ठिना आलक आउर उकर अपन आदमीमन हें उके ठुकराय देलैं। मगर जेतना आदमीमन उके अपनालैं आउर उकर उपरे बिसवास करलैं, उ सोउबमन के परमेश्‍वर केर संतान बनेक केर अधिकार देलक। उमन ना तो आयो-आबा से, ना आदमी केर इच्छा से आउर ना आदमी केर संतान पावेक केर इच्छा से जनइम हैं, मगर उमन परमेश्‍वर से जनइम हैं। आउर बचन एगो आदमी बनलक आउर उ आदमी किरपा आउर सच्चाई से भाइर के हमर माझे रहलक। आउर हमरे उकर एइसन महिमा देखली, जइसन परमेश्‍वर आबा केर बटे से आवल एकलौता बेटा केर महिमा। यूहन्ना आदमीमन के हकाय-हकाय के उकर बारे में गवाही देई के कहलक, “इ ओहे हेके, जेकर बारे में मोंय कइह रहों कि जे मोर पाछे आवेक वाला अहे उ मोर से महान अहे, काले कि उ मोर से पहिले मौजूद रहे।” काले कि उकर भरपूरी में से हमरे आशीष उपरे आशीष पाली। परमेश्‍वर केर नियम मूसा बटले देवल जाय रहे, मगर परमेश्‍वर अपन किरपा आउर सच्चाई के यीशु मसीह बटले हमरे तक पोंहचालक। परमेश्‍वर के केऊ कहियो नी देइख हैं मगर एकलौता बेटा जे खुद परमेश्‍वर हेके, जे आबा केर कोरा में अहे, ओहे उके हमर उपरे दिस्तार काइर हे। यूहन्ना केर गवाही इ हेके कि जब यहूदी धरम केर अगुवामन यरुशलेम शहर से पुरोहितमन के आउर मंदिर में काम करेक वाला लेवी केर खानदान केर आदमीमन के यूहन्ना बपतिस्मा जल संस्कार देवेक वाला ठिना इ पूछेक लगिन भेजलैं, “तोंय के हेकिस?” तो यूहन्ना उमन के सोझे कइह देलक, “मोंय मसीह ना लगों।” तब उमन उकर से पूछलैं, “तो फिन तोंय के हेकिस? का तोंय परमेश्‍वर केर संदेश के बताएक वाला एलिय्याह हेकिस?” यूहन्ना कहलक, “मोंय परमेश्‍वर केर संदेश के बताएक वाला एलिय्याह ना लगों।” तब उमन फिन पूछलैं, “तो का तोंय परमेश्‍वर केर संदेश के बताएक वाला उ हेकिस, जे आवेक वाला रहे?” यूहन्ना जबाब देलक, “निहीं।” तब उमन फिन उकर से पूछलैं, “फिन तोंय के हेकिस? जेमन तोर से पूछेक लगिन हमरे के भेइज हैं, उमन के हमरे का जबाब देब? तोंय अपन बारे में का कहिसला?” यूहन्ना जबाब देलक, “जइसन परमेश्‍वर केर संदेश के बताएक वाला यशायाह कइह हे, ‘मोंय सुनसान ठाँव में एगो हकाएक वाला केर शबद हेकों कि तोहरेमन प्रभु से मिलेक लगिन अपन मन के तेयार करा।’” इमन के फरीसी दल केर आदमीमन भेइज रहैं। उमन यूहन्ना से इ सवाल पूछलैं, “अगर तोंय ना तो मसीह हेकिस आउर ना एलिय्याह, आउर ना आवेक वाला परमेश्‍वर केर संदेश के बताएक वाला हेकिस, तो फिन बपतिस्मा जल संस्कार काले देविसला?” यूहन्ना उमन के जबाब देलक, “मोंय तो पानी में बपतिस्मा जल संस्कार देवोना, मगर तोहरेमन केर माझे एगो आदमी ठड़ाल अहे, जेके तोहरेमन नी जानाला। मतलब जे मोर पाछे आवेक वाला अहे, मोंय तो उकर जूता केर बाँधल डोरा के खोलेक केर लाएक हों नखों।” इ गोइठमन यरदन नदी केर पार बैतनिय्याह गाँव में होलक, जहाँ यूहन्ना बपतिस्मा जल संस्कार देवत रहे। दूसरा दिन यूहन्ना यीशु के अपन बटे आते देइख के कहलक, “देखा, इ परमेश्‍वर केर मेमना हेके, जे खुद के बलिदान काइर के दुनिया केर पाप के उठाय लेवी। इ ओहे हेके, जेकर बारे में मोंय कइह रहों कि मोर पाछे एगो आदमी आवेक वाला अहे, उ मोर से महान अहे, काले कि उ मोर से पहिले मौजूद रहे। मोंय हों उके नी चिन्हत रहों कि उ मसीह हेके, से लगिन इसराइली आदमीमन के इ बताएक लगिन कि उ के हेके, मोंय पानी में बपतिस्मा जल संस्कार देते आलों।” आउर यूहन्ना इ गवाही देलक, “मोंय पवितर आत्मा के पेरवाँ केर रूप में आकाश से उतरते देइख हों, आउर उ यीशु केर उपरे रूइक गेलक। मोंय हों उके नी चिन्हत रहों कि उ मसीह हेके, मगर जे मोके पानी में बपतिस्मा जल संस्कार देवेक लगिन भेजलक, ओहे मोर से कहलक, ‘जेकर उपरे तोंय पवितर आत्मा के उतरते आउर उकर में रुकते देखबे, ओहे पवितर आत्मा से बपतिस्मा देवेक वाला हेके।’ मोंय खुद देखलों आउर तोहरेमन से सच कहाथों कि एहे परमेश्‍वर केर बेटा हेके।” दूसरा दिन फिन यूहन्ना अपन दूई गो चेलामन केर संगे ठड़ाय रहे। उ यीशु के जाते देइख के कहलक, “देखा, एहे परमेश्‍वर केर मेमना हेके।” जब उ दुयो चेलामन यीशु केर बारे में इ गोइठ के सुनलैं तो उमन यीशु केर पिछे जाएक लगलैं। यीशु पिछे उलइट के उमन के अपन पिछे आवेक देखलक तो उमन से कहलक, “तोहरेमन का चाहाला?” उमन उकर से कहलैं, “हे गुरु, तोंय कहाँ रहिसला?” यीशु उमन से कहलक, “आवा आउर देइख लेवा।” उमन उकर संगे जाय के देखलैं कि उ कहाँ रहेला। इ समय साँझ केर लगभग चाइर बाइज रहे। आउर उ दिन उमन यीशु केर संगे रहलैं। जे चेलामन यूहन्ना केर गोइठ सुइन के यीशु केर संगे आय रहैं, उमन में से एगो सिमोन पतरस केर भाई अन्द्रियास रहे। उ पहिले अपन सगा भाई सिमोन से मिललक आउर उके बतालक, “हमरे के ख्रिस्त मतलब मसीह मिल जाय हे।” आउर उ सिमोन के यीशु ठिना लेई गेलक। यीशु उके धेयान से देइख के कहलक, “तोंय यूहन्ना केर बेटा सिमोन हेकिस, तोंय कैफा मतलब पतरस नाँव से जानल जाबे।” दूसरा दिन यीशु गलील परदेस केर इलाका में जाएक केर ठाइन लेलक। हूवाँ उकर भेंट फिलिप्पुस से होलक आउर यीशु उकर से कहलक, “मोर पिछे होई ले आउर मोर चेला बाइन जा।” फिलिप्पुस हों अन्द्रियास आउर पतरस केर नगर बैतसैदा गाँव केर रहेक वाला रहे। फिलिप्पुस नतनएल से भेंट करलक आउर उके बतालक, “हमरे के उ आदमी मिल गेलक जेकर बारे में मूसा केर नियम में लिखल अहे आउर परमेश्‍वर केर संदेश के बताएक वालामन हों लीख हैं। उ नासरत नगर केर यूसुफ केर बेटा यीशु हेके।” नतनएल उकर से कहलक, “का नासरत नगर से हों कोनों बेस चीज निकलेक पारेला?” फिलिप्पुस उकर से कहलक, “आव हमरे खुद हें देइख लेब।” यीशु नतनएल के अपन बटे आवेक देइख के उकर बारे में कहलक, “देखा, इ एगो सच्चा इसराइली आदमी हेके, इ एकदम ईमानदार अहे।” नतनएल यीशु से कहलक, “तोंय मोके का लेखे जानिसला?” यीशु उके जबाब देलक, “फिलिप्पुस तोके बोलाएक जाय रहे, सेकर से पहिले मोंय तोके अंजीर केर गाँछ हेंठे देइख रहों।” तब नतनएल उके जबाब देलक, “हे गुरु, तोंय परमेश्‍वर केर बेटा हेकिस आउर इसराइल देस केर राजा हेकिस।” यीशु उके जबाब देलक, “मोंय तोर से कहलों कि तोके अंजीर केर गाँछ हेंठे देइख रहों, का तोंय सेहे लगिन बिसवास करिसला? तोंय इकर से बड़का-बड़का काम देखबे।” फिन यीशु उकर से एहो कहलक, “मोंय तोहरेमन से सच-सच कहाथों कि तोहरेमन स्वरग के खोलल आउर परमेश्‍वर केर स्वरगदूतमन के मोंय आदमी केर बेटा केर उपरे उतरते आउर मोर से फिन स्वरग जाते देखबा।” फिन तीसरा दिन गलील परदेस केर काना नगर में गोटेक बिहा रहे, आउर यीशु केर आयो हों हूवाँ रहे। यीशु आउर उकर चेलामन हों उ बिहा में नेवताल जाय रहैं। जब अंगूर केर रस सिराय गेलक तो यीशु केर आयो उकर से कहलक, “उमन ठिना अंगूर केर रस सिराय गेलक।” यीशु जबाब देलक, “हे महिला, तोंय मोके काले बताथिस? मसीह केर रूप में चिन्हाय जाएक लगिन मोर समय एखन नी आय हे।” यीशु केर आयो धांगरमन के कहलक, “उ तोहरेमन से जे कोनों कही, उके हें करबा।” यहूदी धरम केर नियम मोताबिक हाँथ धोवेक केर रिवाज रहे, एइसन करेक लगिन उमन हूवाँ पखना केर छाव गो गगरी राइख रहैं, जेकर में लगभग सौ-सौ लीटर पानी समात रहे। यीशु धांगरमन से कहलक, “गगरीमन में पानी भाइर देवा।” उमन गगरीमन में छल-छलुवा पानी भाइर देलैं। यीशु उमन से कहलक, “अब निकलाय के भोज केर प्रधान ठिना लेई जावा।” तब उमन उकर ठिना लेई गेलैं। जब भोज केर प्रधान उ पानी के चखलक, जे अंगूर केर रस बाइन जाय रहे, आउर उ नी जानत रहे कि अंगूर केर रस कहाँ से आय हे। मगर जे धांगरमन पानी निकलाय रहैं, उमन जानत रहैं। से लगिन भोज केर प्रधान दूल्हा के बोलाय के उकर से कहलक, “सोउब आदमीमन आगे बेस अंगूर केर रस देवैना, आउर जब आदमीमन पी के माइत जायना तब फीका के देवैना। मगर तोंय बेस अंगूर केर रस के एखन तक रखले अहिस।” यीशु अपन इ पहिला चमत्कार केर काम गलील परदेस केर काना नगर में देखालक। इ लेखे अपन महिमा के दिस्तार करलक आउर उकर चेलामन उकर उपरे बिसवास करलैं। इकर पाछे यीशु अपन आयो, अपन भाईमन आउर अपन चेलामन केर संगे कफरनहूम नगर चाइल गेलक आउर थोरेक दिन हूवाँ रहलक। यहूदी मनक फसह परब भीरे रहे। से लगिन यीशु यरुशलेम शहर गेलक। आउर उ यहूदी मनक मंदिर में गारू, भेड़ीमन आउर पेरवाँ बेचेक वालामन के आउर पइसा बदलेक वालामन के चौकीमन में बइठल देखलक। आउर डोरा केर कोड़रा बनाय के भेड़ीमन आउर गारूमन सहित सोउब आदमीमन के यहूदी मनक मंदिर से बाहरे निकलाय देलक, आउर पइसा बदलेक वाला मनक पइसा के छितराय देलक, आउर उ मनक चौकीमन के उलटाय देलक। आउर पेरवाँ बेचाइयामन से कहलक, “इमन के हिंयाँ से लेई जावा। मोर आबा परमेश्‍वर केर घर के बाजार ना बनावा।” तब यीशु केर चेलामन के याइद आलक कि पवितर किताब में लिखल अहे, “तोर घर केर धुन मोर भीतरे आइग नियर बरेला।” से लगिन यहूदी धरम केर अगुवामन यीशु से कहलैं, “तोंय हमरे के कोन सा चमत्कार केर चिन्हा देखाएक पारबे, जेकर से हमरे जानब कि तोके एइसन करेक केर अधिकार अहे?” यीशु उमन के जबाब देलक, “तोहरेमन इ मंदिर के धँसाय देवा, आउर मोंय इके तीन दिन में बनाय के पूरा काइर देमूँ।” यहूदी धरम केर अगुवामन कहलैं, “हमरे केर इ मंदिर के बनेक में छेयालीस बरिस लाइग हे, आउर का तोंय इके तीन दिन में बनाय के पूरा काइर देबे?” मगर यीशु जे मंदिर केर बारे में कइह रहे, उ उकर काया रहे। से लगिन जब उ मोरलमन में से फिन जी उठलक तो उकर चेलामन के याइद आलक कि यीशु एइसन कइह रहे आउर उमन पवितर किताब आउर उकर कहल गोइठ उपरे बिसवास करलैं। जब यीशु यहूदी मनक फसह परब केर दिन में यरुशलेम शहर में रहे, तब ढेइर आदमीमन उकर चमत्कार केर चिन्हामन के देइख के उकर उपरे बिसवास करलैं। मगर यीशु उमन केर उपरे बिसवास नी करलक कि उमन उकर उपरे भरसा करैना, काले कि उ आदमीमन केर स्वभाव के जानत रहे। आउर आदमीमन केर बारे में जानेक लगिन उके केकरो जरुरत नी रहे, काले कि उ खुद हें जानत रहे कि उ मनक दिल में का अहे? नीकुदेमुस नाँव केर एगो आदमी रहे, जे यहूदी मनक धरम केर अगुवा रहे, आउर उ फरीसी दल केर आदमी रहे। उ राइत के यीशु ठिना आय के उकर से कहलक, “हे गुरु, मोंय जानोना कि तोके परमेश्‍वर हमरे के सिखाएक लगिन भेइज हे। काले कि केऊ इ चमत्कार केर काममन के जे तोंय करिसला बेगर परमेश्‍वर केर मदइत से नी करेक पारी।” यीशु उके जबाब देलक, “मोंय तोर से सच-सच कहाथों, अगर केऊ नवाँ सिरा से नी जनमी तो उ परमेश्‍वर केर राइज के देखेक नी पारी।” नीकुदेमुस उकर से पूछलक, “एगो आदमी जब बूढ़ा होई जाई तो उ कइसन जनम लेवेक पारी? का उ अपन आयो केर गर्भ में दूसरी बेर ढूइक के जनम लेवेक पारी?” यीशु उके जबाब देलक, “मोंय तोर से सच-सच कहाथों, जब तक केऊ आदमी पानी आउर पवितर आत्मा से नी जनमी तो उ परमेश्‍वर केर राइज में जाएक नी पारी। काले कि काया सिरिफ काया केर जिंदगी के जनम देवेक पारेला, मगर पवितर आत्मा स्वरग से नवाँ जिंदगी देवेला। ताजुब ना कर कि मोंय तोर से इ कहलों, ‘तोके नवाँ सिरा से जनम लेवेक जरुरी अहे।’ धुका जने चाहेला तने चलेला आउर तोंय उकर शबद सुनिसला, मगर नी जानिसला कि उ कहाँ से आवेला आउर कोन बटे जायला। जे केऊ पवितर आत्मा से जनइम हे, उकर संगे एइसनेहें होवेला।” नीकुदेमुस उकर से पूछलक, “इ कइसन होवेक पराई?” इ सुइन के यीशु उके जबाब देलक, “तोंय इसराइली आदमीमन केर महान गुरु हेकिस। तोके इ गोइठमन के बुझेक चाही। मोंय तोर से सच-सच कहाथों कि हमरे जेके जानिला, उखे बताइला आउर हमरे जेके देइख ही उकरे गवाही देवीला, मगर तोहरेमन मोंय जे कहाथों, उकर उपरे बिसवास नी कराला। जब मोंय तोके दुनिया में होवेक वाला गोइठमन के बतालों आउर तोंय उकर उपरे बिसवास नी करिसला, अगर मोंय तोके स्वरग केर गोइठमन के बतामूँ तो फिन कइसन बिसवास करबे? केऊ आदमी स्वरग में नी जाय हें, मगर सिरिफ मोंय आदमी केर बेटा स्वरग से धरती में आय हों। जे लेखे मूसा सुनसान ठाँव में पीतल केर साँप के उपरे उठाय रहे, ओहे लेखे मोंय आदमी केर बेटा केर हों उपरे उठाल जाएक जरुरी अहे। ताकि जे केऊ मोर उपरे बिसवास करी उ जुग-जुग केर जिंदगी पावी। काले कि परमेश्‍वर दुनिया केर आदमीमन से एइसन प्रेम करलक कि उ अपन एकलौता बेटा के देई देलक, ताकि जे केऊ उकर उपरे बिसवास करी, उ नाश नी होवी मगर जुग-जुग केर जिंदगी पावी। काले कि परमेश्‍वर अपन बेटा के दुनिया में आदमीमन के नाश करेक लगिन निहीं मगर उमन के बचाएक लगिन भेइज हे। जे उकर बेटा उपरे बिसवास करेला, उके दंड नी देवल जायला, मगर जे उकर बेटा उपरे बिसवास नी करेला, उ दोषी ठहइर चुइक हे, काले कि उ परमेश्‍वर केर एकलौता बेटा केर नाँव उपरे बिसवास नी करलक। आउर दोषी ठहराएक केर कारण एहे हेके कि इंजोत दुनिया में आय हे, मगर आदमीमन अंधार के इंजोत से बगरा पसिंद करलैं काले कि उमन केर काम बुरा रहे। काले कि जे केऊ बुराई काम करेला, उ इंजोत से बैर रखेला, आउर इंजोत केर भीरे नी आवेला, एइसन ना होवोक कि उकर काममन केर उपरे दोष लगाल जाई। मगर जे सच्चाई उपरे चलेला, उ इंजोत केर पासे आवेला, जेकर से इ दिस्तार होवोक कि उकर काम परमेश्‍वर बटले करल जाय हे।” इकर पाछे यीशु अपन चेलामन केर संगे यहूदिया परदेस केर गाँवमन में आलक। यीशु हूवाँ अपन चेलामन केर संगे रइह के बपतिस्मा जल संस्कार देवेक लगलक। यूहन्ना हों शालेम नगर केर भीरे ऐनोन गाँव में जे सामरिया केर इलाका में अहे, बपतिस्मा जल संस्कार देवत रहे। काले कि हूवाँ ढेइर पानी रहे। आदमीमन हूवाँ आय के बपतिस्मा जल संस्कार लेवत रहैं। काले कि यूहन्ना उ समय तक जेहेल घर में नी साजल जाय रहे। हूवाँ यूहन्ना केर चेलामन केर केऊ यहूदी आदमी केर संगे शुध्दिकरण केर बारे में बक-झक होलक। यूहन्ना केर चेलामन उकर ठिना आय के उकर से कहलैं, “हे गुरु, देख, जे आदमी यरदन नदी केर उ पखारी तोर संगे रहे, आउर जेकर बारे में तोंय हमरे के बताय रहिस, उ बपतिस्मा जल संस्कार देवाथे, आउर सोउब आदमीमन उकर ठिना जाएक लाइग हैं।” यूहन्ना जबाब देलक, “जब तक आदमी के स्वरग से नी देवल जाई तब तक उ कोनों पावेक नी पारी। तोहरेमन तो खुद हें मोके इ कहते सुइन हा कि ‘मोंय मसीह ना लगों, मगर मोंय उकर से आगे भेजल जाय हों।’ दूल्हा, दुलहिन से बिहा करेला मगर दूल्हा केर संग, जे उकर ठिना ठड़ाल रहेला, उ दूल्हा केर गोइठ सुइन के ढेइर खुश होवेला। ओहे लेखे मोर दिल हों खुशी से भाइर जाय हे। आउर अब उ खुशी पूरा होई जाय हे। इ जरुरी अहे कि उ बढ़ते जाओक आउर मोंय घटते जामूँ।” जे स्वरग से आवेला, उ सोउब से बेस अहे। जे धरती से आवेला उ धरती केर हेके, आउर धरती केर हें गोइठमन के कहेला। जे स्वरग से आवेला, उ सोउब केर उपरे अहे। उ जे कोनों देइख हे आउर सुइन हे, उखे बतायला, आउर थोरहें आदमीमन उकर संदेश के सुनैना आउर मानैना। जे आदमी उकर संदेश के माइन लेलक, उ इ गोइठ केर सबूत देई चुकलक कि परमेश्‍वर सच्चा हेके। परमेश्‍वर जे आदमी के भेइज हे, उ आदमी परमेश्‍वर केर हें गोइठ के बतायला, काले कि परमेश्‍वर पवितर आत्मा के नाइप-नाइप के नी देवेला, मगर उ भरपूरी से देवेला। आबा परमेश्‍वर अपन बेटा से प्रेम करेला आउर उ उकर हाँथ में सोउब चीजमन के देई दे हे। जे परमेश्‍वर केर बेटा उपरे बिसवास करेला, उ जुग-जुग केर जिंदगी पाय हे, मगर जे परमेश्‍वर केर बेटा उपरे बिसवास नी करेला, उके जुग-जुग केर जिंदगी नी मिली, मगर परमेश्‍वर केर खीस उकर उपरे बनल रहेला। यीशु के पता चललक कि फरीसी दल केर आदमीमन के इ खबर मिल हे कि यीशु यूहन्ना से बगरा आदमीमन के चेला बनाथे, आउर बपतिस्मा जल संस्कार देवाथे। जबकि यीशु खुद बपतिस्मा जल संस्कार नी देवत रहे, मगर उकर चेलामन आदमीमन के बपतिस्मा जल संस्कार देवत रहैं। तब उ यहूदिया परदेस के छोइड़ के अपन चेलामन केर संगे फिन गलील परदेस घूइर आलक। आउर उके सामरिया परदेस से होई के जाएक जरुरी रहे। उ सामरिया परदेस केर सूखार नाँव केर एगो नगर में पोहोंचलक। इ नगर उ खेत केर भीरे रहे, जेके याकूब अपन बेटा यूसुफ के देई रहे। हूवाँ याकूब केर कोड़ल कुआँ हों अहे। यीशु डहर हिंठेक में थाइक जाय रहे, से लगिन कुआँ ठिना एइसनेहें बाइठ गेलक, इ लगभग दूई पहर केर बेरा रहे। एतनेहें में एगो सामरिया परदेस केर सामरी जनाना पानी भरेक आलक। यीशु उकर से कहलक, “मोके पानी पियाव।” उ बेरा यीशु एकले रहे काले कि उकर चेलामन नगर में अपन खाएक लगिन कोनों किनेक जाय रहैं। यहूदी आदमीमन सामरी आदमीमन से कोनों संबंध नी रखैना। से लगिन उ सामरी जनाना यीशु से कहलक, “तोंय यहूदी होई के हों मोंय सामरी जनाना से पियेक लगिन पानी काले माँगाथिस?” यीशु उके जबाब देलक, “अगर तोंय जानते कि परमेश्‍वर तोके का देवेक चाहाथे, आउर एहो जानते कि तोर से के पानी माँगाथे, तो तोंय मोर से इके माँगते आउर मोंय तोके जिंदगी देवेक वाला पानी देतो।” उ जनाना यीशु से कहलक, “हे प्रभु, तोर ठिना पानी भरेक लगिन कोनोवें नखे आउर कुआँ ढेइर गढ़हा अहे, तो फिन तोके इ जिंदगी केर पानी कहाँ से मिली? का तोंय हमर पुरखा याकूब से हों महान हेकिस? उ हमरे के इ कुआँ देलक। उ खुद आउर उकर संतान आउर उ मनक जानवरमन हों इ कुआँ केर पानी पियत रहैं।” यीशु उके जबाब देलक, “जे केऊ इ पानी के पियी उके फिन पियास लगी। मगर जे केऊ मोर देवल पानी के पियी, उके कहियो पियास नी लगी। जे पानी मोंय उके देमूँ, उ उकर में पानी केर सोता बाइन जाई आउर इ सोता से पानी निकलते रही, जे उके जुग-जुग केर जिंदगी देवी।” इ गोइठ सुइन के उ जनाना यीशु से कहलक, “हे प्रभु, मोके उ पानी दे, जेकर से मोके फिन पियास नी लगी आउर ना पानी भरेक लगिन एतना दूर आवेक होवी।” यीशु उकर से कहलक, “जा, अपन पति के हिंयाँ बोलाय लान।” उ जनाना यीशु के जबाब देलक, “मोंय बेगर पति केर अहों।” यीशु उकर से कहलक, “तोंय ठीक कहले, ‘मोंय बेगर पति केर अहों।’ काले कि तोंय पाँच गो पति बनाय चुइक हिस, आउर जेकर ठिना तोंय एखन अहिस ओहो तोर पति ना लगे। इ तोंय सच कइह हिस।” उ जनाना यीशु से कहलक, “हे प्रभु, मोंय जाइन गेलों कि तोंय परमेश्‍वर केर संदेश के बताएक वाला हेकिस। मोर सामरी पुरखामन एहे पहार उपरे परमेश्‍वर केर भक्ति करत रहैं, आउर तोहरे यहूदीमन कहाला कि यरुशलेम शहर हें उ ठाँव हेके, जहाँ भक्ति करेक चाही।” यीशु उकर से कहलक, “हे नारी, मोर गोइठ उपरे बिसवास कर। उ समय आवाथे, जब तोहरेमन ना तो इ पहार उपरे आबा परमेश्‍वर केर भक्ति करेक पारबा ना यरुशलेम शहर में। तोहरे सामरी आदमीमन जेके नी जानाला, उकर भक्ति कराला, मगर हमरे यहूदीमन जेके जानिला उकर भक्ति करिला, काले कि छुटकारा यहूदीमन में से अहे। मगर उ समय आवाथे, आउर आइये जाहे जब सच्चा भक्तमन आत्मा आउर सच्चाई से आबा परमेश्‍वर केर भक्ति करबैं, काले कि आबा परमेश्‍वर एइसनेहें भक्ति करइयामन के खोजेला। परमेश्‍वर आत्मा हेके, से लगिन इ जरुरी अहे कि उकर भक्ति करइयामन आत्मा आउर सच्चाई से उकर भक्ति करोक।” जनाना यीशु से कहलक, “मोंय जानोना कि मसीह, जे परमेश्‍वर केर अभिषेक करल आदमी कहायला, आवेक वाला अहे, जब उ आवी तो हमरे के सोउब गोइठमन के बताय देवी।” यीशु उकर से कहलक, “मोंय जे तोर से गोठियाथों, ओहे हेकों।” ओहे बेरा उकर चेलामन आय गेलैं आउर यीशु के एगो जनाना केर संगे गोठियाते देइख के ताजुब करेक लगलैं, फिन भी केऊ इ नी पूछलैं कि तोके का चाही या तोंय इ जनाना केर संगे काले गोठियाथिस? तब उ जनाना अपन गगरी के हुवाँय छोइड़ देलक आउर नगर में जाय के आदमीमन के बताएक लगलक, “आवा, एगो आदमी के देखा, जे मोके उ सोउब के बताय देलक जे मोंय काइर हों। कहीं ओहे तो मसीह ना लगे?” तब उमन नगर से निकइल के यीशु के देखेक लगिन उकर ठिना आवेक लगलैं। एतने में उकर चेलामन यीशु से बिनती करेक लगलैं, “हे गुरु, कोनों खाय ले।” मगर यीशु उमन से कहलक, “मोर ठिना खाएक लगिन एइसन चीज अहे, जेकर बारे में तोहरेमन नी जानाला।” तब चेलामन आपस में कहलैं, “का केऊ हमर जाएक केर पाछे उकर लगिन कोनों खाएक ले लाइन हे?” यीशु उमन से कहलक, “जे मोके भेइज हे उकर इच्छा के मानेक आउर उकर काम के पूरा करेक, जेकर जिम्मा उ मोके देई हे, एहे मोर खाएक हेके। का तोहरेमन नी कहाला कि अब कटनी होवेक में चाइर महिना बचल अहे? मगर मोंय तोहरेमन से कहाथों, अपन आँइख खोइल के आवेक वाला आदमीमन के देखा, उमन खेत केर फसल नियर अहैं, जेमन कटनी लगिन तेयार अहैं, आदमीमन आगे हें से उमन के संगे लानाथैं आउर उमन जुग-जुग केर जिंदगी पाबैं। काटेक वालामन आगे हें से काम कराथैं आउर अपन मजूरी पावाथैं, आउर उ इ हेके, उमन उ आदमीमन के जमा कराथैं, जेमन जुग-जुग केर जिंदगी पाबैं, जेकर से बुनेक वाला आउर काटेक वाला दुयो मिल के खुशी मनाबैं। काले कि इकर उपरे इ कहावत ठीक बइठेला, ‘बुनाइया केऊ आउर हेके आउर कटइया केऊ आउर हेके।’ मोंय तोहरेमन के उ खेत काटेक लगिन भेजलों, जेकर में तोहरेमन मेहनइत नी करला, दोसरमन मेहनइत करलैं आउर तोहरेमन के उ मनक मेहनइत केर मजूरी मिल गेलक।” आउर उ जनाना नगर केर ढेइर सामरी आदमीमन के इ बताय रहे, “उ मोके मोर बारे में सोउब कुछ जे मोंय काइर हों बताय देई हे।” इ गोइठ केर चलते उ नगर केर ढेइर सामरी आदमीमन यीशु केर उपरे बिसवास करलैं। से लगिन जब उमन यीशु ठिना आलैं, तो उकर से बिनती करेक लगलैं, “तोंय हमर हिंयाँ रह।” यीशु हूवाँ दूई दिन तक रहलक। आउर ढेइर आउरो आदमीमन उकर उपदेस सुइन के उकर उपरे बिसवास करलैं। आउर उ जनाना से कहलैं, “अब हमरे सिरिफ तोर कहेक से भइर बिसवास नी करिला। हमरे खुद हें उकर से सुइन लेई ही आउर हमरे जाइन गेली कि एहे सचमुच में दुनिया केर आदमीमन केर छुटकारा देवाइया हेके।” दूई दिन बितेक केर पाछे यीशु हूवाँ से गलील परदेस चाइल गेलक। काले कि यीशु खुद हें बताय रहे कि परमेश्‍वर केर संदेश के बताएक वाला अपन देस में माइन नी पावेला। जब उ गलील परदेस में पोहोंचलक, तो हूवाँ केर आदमीमन यीशु केर स्वागत करलैं, काले कि यीशु फसह परब केर दिनमन में यरुशलेम शहर में जे काममन के काइर रहे, उ सोउब के हूवाँ केर आदमीमन देइख रहैं, उमन हों परब में हूवाँ जाय रहैं। इकर पाछे यीशु फिन गलील परदेस केर काना नगर में आलक, जहाँ उ पानी के अंगूर केर रस बनाय रहे। हूवाँ राजा केर एगो अधिकारी रहे, जेकर बेटा कफरनहूम नगर में बेमार रहे। जब उ अधिकारी सुनलक कि यीशु यहूदिया परदेस से गलील परदेस में आय हे, तब उ उकर ठिना आलक आउर यीशु से बिनती करेक लगलक कि उ जाय के उकर बेटा के ठीक काइर देवोक, काले कि उ मोरेक वाला रहे। यीशु उकर से कहलक, “जब तक तोहरेमन चिन्हा आउर चमत्कार केर काम नी देखबा तब तक तोहरेमन बिसवास नी करबा।” राजा केर अधिकारी उकर से कहलक, “हे प्रभु, इकर से पहले कि मोर छउवा मोइर जाई, मोर संगे चल।” यीशु उकर से कहलक, “जा, तोर बेटा जिंदा रही।” उ अधिकारी यीशु केर कहल गोइठ उपरे बिसवास करलक आउर घर चाइल गेलक। उ अधिकारी डहर में हें रहे कि उकर धांगरमन मिललैं आउर उकर से कहलैं, “तोर छउवा जिंदा अहे।” अधिकारी उमन से पूछलक, “उ कोन बेरा से बेस होवेक लइग रहे?” उमन उकर से कहलैं, “काइल दूई पहर के उकर जार उतइर गेलक।” तब छउवा केर आबा जाइन गेलक कि यीशु ठीक ओहे बेरा उकर से कइह रहे, “तोर बेटा जिंदा रही।” आउर उ, आउर उकर परिवार में रहेक वाला सोउब आदमीमन बिसवास करलैं। इ यीशु केर दूसरा चमत्कार केर काम रहे, जे उ यहूदिया परदेस से घूइर के गलील परदेस में करलक। इकर थोरेक समय पाछे यीशु यहूदी मनक एगो परब केर मोका में यरुशलेम शहर गेलक। यरुशलेम शहर में भेड़-फाटक ठिना एगो बड़का हाउदा अहे, जे इब्रानी भाषा में बैतहसदा कहायला आउर उकर पाँच गो छपरी अहे। इ हाउदा में ढेइर बेमरिया आदमीमन अंधरा, लंगड़ा आउर एक अंगिया बेमरियामन पानी केर हिलेक केर आसरा देखते रहत रहैं। काले कि बेरा-बेरा में परमेश्‍वर केर स्वरगदूत हाउदा में उतइर के पानी के हिलात रहे। पानी केर हिलते हें जे केऊ पानी में आगे उतरत रहे उ आदमी ठीक होई जात रहे चाहे उकर कोनों बेमारी रहोक। हूवाँ एगो आदमी रहे, जे अड़तीस साल से बेमार रहे। यीशु उके देइख के जाइन गेलक कि उ ढेइर दिन से इ दशा में पड़ल अहे, उकर से पूछलक, “का तोंय ठीक होवेक चाहिसला?” उ बेमरिया आदमी उके जबाब देलक, “हे प्रभु, मोर केऊ आदमी नखे, जे पानी केर हिलते हें मोके हाउदा में उतराई। मोर पोंहचेक से आगे हें उकर में केऊ दूसरा आदमी उतइर जायला।” यीशु उकर से कहलक, “उठ, अपन पटिया के उठाय के चल फिर।” उ आदमी तुरते ठीक होई गेलक, आउर अपन पटिया के उठाय के चलेक फिरेक लगलक, जे दिन इ सोउब होलक, उ यहूदी मनक आराम केर दिन रहे। से लगिन यहूदी धरम केर अगुवामन ठीक होवल आदमी से कहलैं, “आइज तो मूसा केर नियम केर मोताबिक यहूदी मनक आराम केर दिन हेके। पटिया उठाएक तोर लगिन उचित नखे।” उ आदमी उमन के जबाब देलक, “जे मोके ठीक करलक, ओहे मोर से कहलक, ‘अपन पटिया उठाय के चल फिर।’ ” उमन उकर से पूछलैं, “उ कोन आदमी हेके, जे तोर से कहलक, ‘अपन पटिया उठाय के चल फिर?’” मगर जे आदमी ठीक होई रहे, उ नी जानत रहे कि उ के हेके, काले कि हूवाँ ढेइर भीड़ रहे से लगिन यीशु हूवाँ से चाइल जाय रहे। थोरेक देरी केर पाछे यीशु के उ यहूदी मनक मंदिर केर अंगना में मिललक, तब यीशु उकर से कहलक, “देख, तोंय तो ठीक होई जाहिस। फिन पाप ना करबे, कहीं एइसन ना होवोक कि इकरो से आउर भारी बिपाइत तोर उपरे आय जाई।” उ आदमी जाय के यहूदी धरम केर अगुवामन के बताय देलक कि जे मोके ठीक काइर हे, उ यीशु हेके। यीशु यहूदी मनक आराम केर दिन एइसन काम करेला, से लगिन उमन यीशु के सताएक लगलैं। यीशु उमन के जबाब देलक, “मोर आबा परमेश्‍वर एखन तक काम करते अहे, से लगिन मोंय हों लगातार काम करोना।” यीशु केर इ गोइठ से यहूदी धरम केर अगुवामन उके माइर मोराएक केर आउर हें कोशिश करेक लगलैं, काले कि उ ना सिरिफ यहूदी मनक आराम केर दिन केर नियम के तोराथे, मगर परमेश्‍वर के अपन आबा कइह के खुद के परमेश्‍वर केर बराबइर ठहराथे। यीशु यहूदी धरम केर अगुवामन से कहलक, “मोंय तोहरेमन से सच-सच कहाथों, बेटा, मतलब मोंय अपन से कोनों करेक नी पारोना, सिरिफ ओहे करेक पारोना जे काममन के मोंय आबा परमेश्‍वर के करते देखोना, काले कि जइसन मोर आबा परमेश्‍वर करेला ठीक तइसनेहें मोंय हों करोना। काले कि मोर आबा परमेश्‍वर मोर से, मतलब बेटा से प्रेम करेला आउर जे-जे काम उ खुद करेला, उके मोके देखायला। उ मोके आउर हें महान काममन के देखाई, जेमन के देइख के तोहरेमन ताजुब होई जबा। काले कि जइसन आबा परमेश्‍वर मोरलमन के फिन से जिंदगी देवेला, तइसनेहें मोंय बेटा हों जेमन के चाहोना उमन के जिंदगी देवोना। आबा परमेश्‍वर केकरो न्याय नी करेला, उ न्याय करेक केर पूरा अधिकार मोके देई दे हे, से लगिन जे लेखे आदमीमन आबा परमेश्‍वर के माइन देवैना, तइसनेहें मोके हों माइन देवोक। जे मोके माइन नी देवेला, उ आबा परमेश्‍वर के हों माइन नी देवेला, जे मोके भेइज हे। मोंय तोहर से सच कहाथों, जे मोर बचन के सुनेला आउर सुइन के मोर भेजेक वाला केर उपरे बिसवास करेला, उके जुग-जुग केर जिंदगी मिल हे, उके सजा नी देवल जाई, मगर उ जुग-जुग ले मोरेक से बाइच के नवाँ जिंदगी पाय चुइक हे। मोंय तोहर से सच-सच कहाथों, उ समय आवाथे, आउर आइये जाहे, जेकर में मोरलमन मोंय परमेश्‍वर केर बेटा केर आवाज के सुनबैं, आउर जेमन सुनबैं उमन सोउब दिन जिबैं। काले कि जे लेखे आबा परमेश्‍वर खुद में जिंदगी रखेला, ओहे लेखे उ मोके हों खुद में जिंदगी रखेक केर अधिकार देई हे, हिंयाँ तक कि मोंय बेटा के, आबा परमेश्‍वर सोउब आदमी मनक न्याय करेक केर अधिकार देई हे, काले कि मोंय आदमी केर बेटा हेकों। इकर से ताजुब ना होवा, काले कि उ समय आवाथे, जेतना आदमीमन कबरमन में अहैं, मोर आवाज सुइन के जिंदा होबैं आउर कबर से निकलबैं। जेमन भलाई केर काम काइर हैं उमन जुग-जुग केर जिंदगी पावेक लगिन जी उठबैं आउर जेमन बुराई केर काम काइर हैं उमन सजा पावेक लगिन जी उठबैं। मोंय खुद से कोनों करेक नी पारोना, आबा परमेश्‍वर जइसन मोर से कहेला, तइसनेहें मोंय आदमी मनक न्याय करोना, आउर मोर न्याय सच्चा हेके, काले कि मोंय अपन इच्छा के पूरा करेक निहीं, मगर अपन भेजेक वाला केर इच्छा के पूरा करेक चाहोना। अगर मोंय खुद हें अपन बारे में गवाही देमूँ, तो मोर गवाही सच्चा नी होवी। एक झन आउर अहे जे मोर आबा परमेश्‍वर हेके, उ मोर बारे में गवाही देवेला, आउर मोंय जानोना कि मोर बारे में जे गवाही देवेला उ सच्चा अहे। तोहरेमन यूहन्ना बपतिस्मा जल संस्कार देवेक वाला से पूछवाला आउर उ सच्चाई केर बारे में गवाही देई हे। मगर मोंय अपन बारे में आदमी मनक मुँह से गवाही सुनेक नी चाहोना, सेकरो में मोंय तोहरेमन के उ गवाही केर बारे में बताय हों, जेके यूहन्ना बपतिस्मा जल संस्कार देवेक वाला देई रहे ताकि तोहरेमन बाइच जबा। यूहन्ना बरते आउर चमकते दीया नियर रहे आउर उकर इंजोत में थोरेक देरी खुशी मनाएक तोहरेमन के बेस लगलक। मगर मोर ठिना जे गवाही अहे, उ यूहन्ना केर गवाही से हों महान अहे। उ काम जेके आबा परमेश्‍वर मोके पूरा करेक लगिन देई हे, ओहे काम मोंय कराथों, आउर ओहे काम मोर बारे में इ गवाही देवेला कि आबा परमेश्‍वर मोके भेइज हे। आउर आबा परमेश्‍वर हों जे मोके भेइज हे, मोर बारे में गवाही देई हे। तोहरेमन ना तो उकर आवाज कहियो सुइन हा, आउर ना उकर रूप देइख हा। आउर उकर संदेश के तोहरेमन अपन मन में स्थिर नी रखाला काले कि तोहरेमन मोर उपरे बिसवास नी कराला, जेके परमेश्‍वर भेइज हे। तोहरेमन इ समइझ के पवितर किताब के पाढ़ाला कि उकर में जुग-जुग केर जिंदगी में ढूकेक केर डहर मिली। ओहे पवितर किताब मोर बारे में गवाही देवेला। फिन भी तोहरेमन जुग-जुग केर जिंदगी पावेक लगिन मोर ठिना आवेक नी चाहाला। मोंय आदमीमन से माइन पावेक केर आसरा नी करोना। मगर मोंय तोहरेमन के जानोना कि तोहरेमन अपन मन में परमेश्‍वर से प्रेम नी कराला। मोंय अपन आबा परमेश्‍वर केर अधिकार केर संगे आय हों, फिन भी तोहरेमन मोर संदेश के नी सुनाला। मगर केऊ आदमी अपनेहें अधिकार से आवी तो तोहरेमन उकर संदेश के माइन लेबा। तोहरेमन मोर उपरे बिसवास नी करबा काले कि तोहरेमन एक दोसर से माइन चाहाला। आउर तोहरेमन उ माइन के पावेक केर कोशिश नी कराला जे सिरिफ आबा परमेश्‍वर बटे से मिलेला। तोहरेमन इ ना बुझबा कि मोंय आबा परमेश्‍वर केर सामने तोहर उपरे दोष लगामूँ, मूसा जेकर उपरे तोहरेमन अपन आसरा राइख हा, ओहे तोहरेमन केर उपरे दोष लगाई। अगर तोहरेमन मूसा केर उपरे बिसवास करता, तो मोर उपरे हों बिसवास करता, काले कि उ मोर बारे में लीख हे। मगर तोहरेमन उकर लिखल गोइठमन केर उपरे बिसवास नी कराला, तो मोर गोइठमन केर उपरे कइसन बिसवास करबा? तोहरेमन पक्का बिसवास नी करबा।” इकर पाछे यीशु गलील झील मतलब तिबिरियास झील केर उ पखारी चाइल गेलक। आउर ढेइर आदमीमन उकर पिछे-पिछे जात रहैं काले कि उमन यीशु जे चमत्कार काम बेमरियामन के ठीक करेक में देखाय रहे उके उमन देइख रहैं। यीशु पहार उपरे चढ़लक आउर हूवाँ अपन चेलामन केर संगे बाइठ गेलक। यहूदी मनक फसह परब भीरे रहे। यीशु अपन आँइख उठाय के एगो बड़का भीड़ के अपन बटे आते देखलक। तब फिलिप्पुस से कहलक, “हमरे इमन के खियाएक लगिन कहाँ से रोटी कीन लानब?” यीशु उके परखेक लगिन इ गोइठ के कइह रहे। उ तो खुद जानत रहे कि उ का करी। फिलिप्पुस उके जबाब देलक, “दूई सौ चाँदी केर सिक्का से हों अगर रोटी किनल जाई, फिन भी इमन के खाएक लगिन थोरे-थोरे हों पूरा नी होवी।” उकर चेलामन में से एगो सिमोन पतरस केर भाई अन्द्रियास यीशु से कहलक, “हिंयाँ एगो छोंड़ा ठिना पाँच गो रोटी आउर दूई गो मछरी अहे, मगर उ एतना आदमीमन लगिन का होवी?” यीशु कहलक, “आदमीमन के बइठाय देवा।” उ ठाँव में ढेइर घास रहे। आदमीमन बाइठ गेलैं आउर इ आदमीमन में से सिरिफ मरदानामन भइर लगभग पाँच हजार रहैं। तब यीशु रोटीमन के लेई के परमेश्‍वर के धन्यबाद देलक आउर बइठल आदमीमन के बाँइट देलक। आउर एहे लेखे मछरीमन के हों जेतना उमन चाहत रहैं बाँइट देलक। जब आदमीमन खाय के अघाय गेलैं तब यीशु अपन चेलामन से कहलक, “बचल टुकरा रोटीमन के जमा काइर लेवा, जेकर से कोनों बरबाद ना होवोक।” से लगिन उमन बचल टुकरामन के जमा करलैं आउर उ टुकरामन से बारह डाली भाइर गेलक। जे आदमीमन केर खाएक पाछे पाँच गो रोटीमन से बाइच जाय रहे। आदमीमन यीशु केर इ चमत्कार केर काम के देइख के कहलैं, “इ जरूर परमेश्‍वर केर संदेश के बताएक वाला हेके, जे दुनिया में आवेक वाला रहे।” जब यीशु इ देखलक कि आदमीमन उके राजा बनाएक लगिन धारेक चाहैना, तो उ एकले हें फिन पहार उपरे चाइल गेलक। फिन जब साँझ होलक, तो उकर चेलामन झील केर किनारे आलैं। आउर उमन डोंगा में चाइढ़ के झील केर उ पखारी कफरनहूम नगर बटे जाएक ले झील के पार करत रहैं। आउर अंधार होई जाय रहे, आउर यीशु एखन तक उ मनक ठिना नी आय रहे। ओहे बेरा झील में आँधी धुका केर चलते तेज लहरा उठेक लगलक। उमन डोंगा के चलाते-चलाते लगभग पाँच-छाव किलोमीटर निकइल गेलैं। जब उमन यीशु के झील केर उपरे हिंठते डोंगा बटे आते देखलैं तो उमन डराय गेलैं। मगर यीशु उमन से कहलक, “मोंय हेकों, ना डरावा।” उमन यीशु के डोंगा उपरे झट सुन चढ़ाय लेलैं आउर डोंगा तुरते उ पखारी पोंहइच गेलक जहाँ उमन जात रहैं। जे आदमीमन झील केर एहे पखारी रइह जाय रहैं, उमन उ दिन देइख रहैं कि हूवाँ सिरिफ एके गो डोंगा रहे आउर यीशु अपन चेलामन केर संगे उ डोंगा में नी चाइढ़ रहे, उकर चेलामन भइर हूवाँ से निकइल रहैं। तब तिबिरियास नगर बटे से थोरेक डोंगा उ ठाँव केर भीरे आलक, जहाँ उमन प्रभु केर धन्यबाद करेक केर पाछे रोटी खाय रहैं। जब भीड़ केर आदमीमन देखलैं कि हिंयाँ ना तो यीशु अहे आउर ना उकर चेलामन। तब उमन हों डोंगा उपरे चाइढ़ के यीशु के खोजते-खोजते कफरनहूम नगर पोहोंचलैं। उमन झील के पार करलैं आउर यीशु के हूवाँ पाय के उकर से कहलैं, “हे गुरु, तोंय हिंयाँ कखन आले?” यीशु उमन के जबाब देलक, “मोंय तोहरेमन से सच-सच कहाथों कि तोहरेमन मोके इ लगिन नी खोजाथा कि तोहरेमन चमत्कार केर काम के देखला, मगर इ लगिन खोजाथा कि तोहरेमन पेट भाइर रोटी खाय हा। नाश होवेक वाला भोजन लगिन मेहनइत ना करा, मगर उ भोजन लगिन मेहनइत करा, जे जुग-जुग केर जिंदगी तक बनल रहेला, जेके मोंय आदमी केर बेटा तोहरेमन के देमूँ, काले कि मोके आबा परमेश्‍वर एइसन करेक केर अधिकार देई हे।” आदमीमन यीशु से पूछलैं, “परमेश्‍वर केर काम करेक लगिन हमरे का करब?” यीशु उमन के जबाब देलक, “परमेश्‍वर केर काम इ हेके कि जेके उ भेइज हे, उकर उपरे तोहरेमन बिसवास करा।” तब उमन यीशु से कहलैं, “फिन तोंय हमरे के कोन सा चिन्हा देखाएक पारबे, जेकर से हमरे उ चिन्हा के देइख के तोर उपरे बिसवास करब? तोंय कोन सा काम देखाइसला? हमर पुरखामन सुनसान ठाँव में मन्ना खाय रहैं, जइसन कि पवितर किताब में लिखल अहे, ‘उ खाएक लगिन उमन के स्वरग से रोटी देलक।’ ” यीशु उमन से कहलक, “मोंय तोहरेमन से सच-सच कहाथों कि मूसा तोहरेमन के स्वरग से रोटी नी देई रहे, मगर मोर आबा परमेश्‍वर स्वरग से तोहरेमन के सच्चा रोटी देवेला। काले कि परमेश्‍वर केर रोटी तो ओहे हेके, जे स्वरग से उतइर के दुनिया केर आदमीमन के जुग-जुग केर जिंदगी देवेला।” तब उमन यीशु से कहलैं, “हे प्रभु, तोंय हमरे के इ रोटी सोउब दिन देते रह।” यीशु उमन से कहलक, “जिंदगी केर रोटी मोंय हेकों। जे मोर ठिना आवी, उ कहियो भूखे नी होवी आउर जे मोर उपरे बिसवास करी, उ कहियो पियासा नी होवी। मोंय तोहरेमन के पहिलेहें कइह देई रहों कि तोहरेमन मोके देइख हा, फिन भी बिसवास नी कराला। आबा परमेश्‍वर जेमन के मोके जिम्मा देवेला, उमन मोर ठिना आबैं आउर जेमन मोर ठिना आबैं, उमन के मोंय मोर ठिना सोउब दिन लगिन रखमूँ। काले कि मोंय अपन इच्छा के पूरा करेक लगिन निहीं, मगर मोके भेजेक वाला परमेश्‍वर केर इच्छा के पूरा करेक लगिन स्वरग से उतइर हों। आउर मोर आबा परमेश्‍वर जे मोके भेइज हे उकर इच्छा इ हेके कि जेमन के उ मोके देई हे, उमन में से केखो मोंय नाश होवेक नी देमूँ, मगर आखरी दिन उमन के मोरलमन में से फिन जिंदा काइर देमूँ। काले कि मोर आबा परमेश्‍वर केर इच्छा इ हेके कि जे केऊ बेटा के, मतलब मोके देइख के मोर उपरे बिसवास करी, उके जुग-जुग केर जिंदगी मिली आउर मोंय उके आखरी दिन फिन जिंदा करमूँ।” यीशु कइह रहे, “मोंय उ रोटी हेकों, जे स्वरग से उतइर के आय हों।” से लगिन यहूदी आदमीमन उकर उपरे कुड़कुड़ाएक लगलैं। आउर उमन कहलैं, “इ आदमी यूसुफ केर बेटा यीशु हेके, आउर हमरे इकर आयो आबा के हों जानिला। फिन इ कइसन कहाथे कि मोंय स्वरग से उतइर हों?” यीशु उमन के जबाब देलक, “आपस में ना कुड़कुड़ावा। केऊ मोर ठिना अपन से आवेक नी पारी, जब तक कि उके मोर आबा, जे मोके भेइज हे, उके खींच नी लानी, आउर मोंय उके आखरी दिन फिन जिंदा काइर देमूँ। परमेश्‍वर केर संदेश के बताएक वालामन केर किताब में इ लिखल अहे, ‘उमन सोउब परमेश्‍वर से शिक्षा पाबैं।’ हर आदमी जे आबा परमेश्‍वर केर सुनेला आउर उकर से सीखेला, उ मोर ठिना आवेला। इकर मतलब इ ना लगे कि केऊ आबा परमेश्‍वर के देइख हे। मगर मोंय हें एकले अहों जे परमेश्‍वर आबा के देइख हों, काले कि मोंय परमेश्‍वर आबा बटले आय हों। मोंय तोहरेमन के सच-सच कहाथों कि जे केऊ बिसवास करेला, जुग-जुग केर जिंदगी उकरे हेके। जिंदगी केर रोटी मोंय हेकों। तोहरेमन केर पुरखामन सुनसान ठाँव में मन्ना खालैं, आउर उमन मोइर गेलैं। मोंय जे रोटी केर बारे में कहाथों उ स्वरग से उतरेला आउर उके जे खायला उ नी मोरेला। स्वरग से उतरल उ जिंदा रोटी मोंय हेकों। अगर केऊ इ रोटी में से खाई, तो उ सोउब दिन जिंदा रही। आउर जे रोटी मोंय देमूँ, उ मोर काया हेके, इके मोंय दुनिया केर आदमीमन के जिंदगी पावेक लगिन बलिदान काइर देमूँ।” इ गोइठ सुइन के यहूदी आदमीमन इ कइह के आपस में बक-झक करेक लगलैं, “इ आदमी कइसन हमरे के अपन माँस खाएक लगिन देवेक पारी?” यीशु उमन से कहलक, “मोंय तोहरेमन से सच-सच कहाथों, जब-तक तोहरेमन मोंय आदमी केर बेटा केर माँस के नी खाबा, आउर मोर लोहू के नी पीबा, तब-तक तोहरेमन जुग-जुग केर जिंदगी के नी पाबा। जे मोर माँस के खायला, आउर मोर लोहू के पियेला, जुग-जुग केर जिंदगी उकरे हेके, आउर आखरी दिन मोंय उके फिन जिंदा काइर देमूँ। काले कि खाएक लगिन मोर माँस सच्चा भोजन हेके आउर मोर लोहू सच्चा पियेक केर चीज हेके। जे मोर माँस के खायला आउर मोर लोहू के पियेला, उ मोर में बनल रहेला, आउर मोंय उकर में बनल रहोना। जे लेखे जिंदा आबा परमेश्‍वर मोके भेइज हे आउर मोके आबा से जिंदगी मिलेला, ओहे लेखे जे मोके खायला, उके मोर से जिंदगी मिली। एहे उ रोटी हेके जे स्वरग से उतइर हे। इ उ रोटी नियर नखे, जे रोटी के हमर पुरखामन खाय रहैं, आउर पाछे उमन तो मोइर गेलैं। मगर जे केऊ इ रोटी के खाई, उ सोउब दिन जिंदा रही।” यीशु इ गोइठमन के कफरनहूम नगर केर एगो यहूदी मनक प्रार्थना घर में उपदेस देवेक बेरा कहलक। इ सुइन के उकर चेलामन में से ढेइरमन कहलैं, “इ तो कठोर शिक्षा हेके। इके केहर मानेक पारी?” यीशु अपन मन में इ जाइन गेलक कि चेलामन मोर गोइठ सुइन के कुड़कुड़ाथैं, तो उमन से पूछलक, “का मोर इ गोइठ तोहरेमन के मोर उपरे बिसवास करेक से रोकाथे? जब तोहरेमन मोंय आदमी केर बेटा के स्वरग जाते देखबा जहाँ उ आगे रहे, तो तोहरेमन का कहबा? आत्मा हें जिंदगी देवेला, काया से कोनों फायदा नखे। मोंय तोहरेमन के जे गोइठ के बतालों, उ आत्मा आउर जिंदगी हेके। फिन भी तोहरेमन में से केतना झन एइसन अहैं, जेमन मोर उपरे बिसवास नी करैना।” यीशु तो आगे हें से इ जानत रहे कि केमन उकर उपरे बिसवास नी करैना आउर के उके धोखा देवी। यीशु उमन से कहलक, “से लगिन मोंय तोहरेमन से कइह रहों कि जब तक केखो आबा परमेश्‍वर बटले इ बरदान ना देवल जाय, तब तक उ मोर ठिना आवेक नी पारी।” इ गोइठ सुइन के ढेइर चेलामन पिछे घूइर गेलैं आउर उमन उकर साथ छोइड़ देलैं। से लगिन यीशु उ बारहों झन से कहलक, “का तोहरेमन हों चाइल जाएक चाहाथा?” सिमोन पतरस उके जबाब देलक, “हे प्रभु, हमरे केकर ठिना जाब? जुग-जुग केर जिंदगी केर गोइठमन तो तोरे ठिना अहे। आउर हमरे बिसवास करिला आउर जानिला कि परमेश्‍वर केर पवितर आदमी तोंय हें हेकिस।” यीशु उमन के जबाब देलक, “का मोंय तोहरे बारहों झन के नी चुइन हों? फिन भी तोहर में से एगो शैतान केर कब्जा में अहे।” इ गोइठ यीशु सिमोन इस्करियोती केर बेटा यहूदा केर बारे में कहलक, काले कि ओहे यीशु के धोखा देवेक वाला रहे आउर उ बारहों झन में से एगो रहे। इ गोइठमन होवेक केर पाछे यीशु गलील परदेस में फिरेक लगलक। उ यहूदिया परदेस में फिरेक नी चाहत रहे, काले कि यहूदी धरम केर अगुवामन उके माइर मोराएक खोजत रहैं। आउर यहूदी मनक झोपड़ी केर परब भीरे रहे। से लगिन उकर भाईमन यीशु से कहलैं, “इ परदेस छोइड़ के यहूदिया परदेस चाइल जा, काले कि तोंय जे महान काममन के करिसला, उ काममन के तोर चेलामन हों देखोक। काले कि जे आदमी नाँव कमाएक चाहेला, उ लूइक के काम नी करेला। जब तोंय एइसन काम करिसला तो खुद के दुनिया केर आदमीमन केर सामने दिस्तार कर।” काले कि उकर भाईमन हों उकर उपरे बिसवास नी करत रहैं। तब यीशु उमन से कहलक, “एखन मोर समय नी आय हे, मगर तोहर लगिन सोउब समय ठीक अहे। दुनिया केर आदमीमन तोहरेमन से दुश्मनी नी करबैं, मगर मोर से करबैं, काले कि मोंय उमन केर बिरोध में इ गवाही देवोना कि उ मनक काममन बुरा अहे। इ परब मनाएक लगिन तोहरेमन जावा। मोंय एखन इ परब मनाएक लगिन नी जामूँ काले कि मोर समय पूरा नी होई हे।” यीशु उमन से इ गोइठमन कइह के गलील परदेस में हें रइह गेलक। जब उकर भाईमन परब मनाएक लगिन चाइल गेलैं, तब पाछे यीशु हों बेगर दिस्तार देले हूवाँ गेलक। हूवाँ यहूदी धरम केर अगुवामन यीशु के खोजत रहैं, आउर आदमीमन से पूछत रहैं, “यीशु कहाँ अहे?” आदमीमन में यीशु केर बारे में कानाफूसी होवत रहे। थोरेक आदमीमन कहत रहैं, “उ भला आदमी हेके।” आउर थोरेक आदमीमन कहत रहैं, “निहीं, उ आदमीमन के भरमाथे।” फिन भी आदमीमन यीशु केर बारे में खोइल के नी गोठियात रहैं, काले कि उमन यहूदी धरम केर अगुवामन से डरात रहैं। जब परब केर आधा दिन बीत गेलक, तब यीशु यहूदी मनक मंदिर में गेलक आउर आदमीमन के उपदेस देवेक लगलक। यहूदी धरम केर अगुवामन ताजुब होई गेलैं आउर कहेक लगलैं, “इ पवितर किताब केर शिक्षा कहियो नी पाय हे, फिन इके इ गेयान कहाँ से मिललक?” यीशु उमन के जबाब देलक, “इ मोर अपन उपदेस ना लगे, मगर परमेश्‍वर केर हेके, जेके मोर ले भेइज हे। अगर केऊ उकर इच्छा केर मोताबिक चलेक लगिन ठाइन लेई तो उ जाइन जाई कि मोर उपदेस परमेश्‍वर बटे से आवेला या मोंय खुद अपन बटे से देवोना। जे अपन बटे से कहेला, उ अपन लगिन बड़ाई चाहेला, मगर जे अपन भेजेक वाला केर बड़ाई चाहेला, ओहे सच्चा हेके, आउर उकर में कोनों झूठ नखे। का मूसा तोहर लगिन नियम नी बनाहे? फिन भी तोहर में से केऊ नियम केर मोताबिक नी चलेला। तोहरेमन मोके माइर मोराएक केर ताक में काले रहाला?” आदमीमन जबाब देलैं, “तोर में भूत अहे, केहर तोके माइर मोराएक केर ताक में रहेला?” यीशु उमन के जबाब देलक, “मोंय एगो चमत्कार केर काम करलों आउर तोहरेमन सोउब ताजुब होवाथा। सुना, मूसा तोहरेमन के खतना कराएक केर नियम देई हे, मगर उ मूसा से निहीं पुरखामन से हें चलते आवाथे आउर तोहरेमन यहूदी मनक आराम केर दिन हों आदमी मनक खतना कराला। अगर तोहरेमन यहूदी मनक आराम केर दिन आदमीमन केर खतना इ लगिन कराला कि मूसा केर नियम ना टाइल जाओक, तो तोहरेमन मोर उपरे इ गोइठ लगिन काले खिसाथा कि मोंय यहूदी मनक आराम दिन एगो आदमी के ठीक करलों। मुँह देइख के न्याय ना करबा, मगर ठीक-ठीक न्याय करबा।” तब केतना यरुशलेम शहर केर रहेक वाला आदमीमन कहेक लगलैं, “का इ ओहे तो ना लगे, जेके हमर धरम केर अगुवामन माइर मोराएक केर ताक में अहैं? देखा तो, इ कइसन खुल्लम-खुल्ला गोठियाथे आउर उमन इके कोनों नी कहाथैं। का धरम केर अगुवामन सचमुच माइन लेलैं कि इ मसीह हेके? फिन भी हमरे जानिला कि इ कहाँ केर हेके, मगर जब मसीह दिस्तार होवी तो केखो पता नी होवी कि उ कहाँ केर हेके।” तब यीशु यहूदी मनक मंदिर में उपदेस देते जोर से कहलक, “तोहरेमन मोके जानाला आउर एहो जानाला कि मोंय कहाँ से आय हों। मोंय अपन इच्छा से नी आय हों। जे मोके भेइज हे उ सच्चा हेके आउर तोहरेमन उके नी जानाला। मगर मोंय उके जानोना, काले कि मोंय उकर ठिना से आय हों, आउर ओहे मोके भेइज हे।” इ सुइन के धरम केर अगुवामन उके धारेक चाहलैं, मगर केऊ उके धारेक नी पारलैं, काले कि एखन उकर समय नी होई रहे। फिन भी भीड़ केर ढेइर आदमीमन उकर उपरे बिसवास करलैं। आउर कहेक लगलैं, “जब मसीह आवी, तो का उ इकर से हों बगरा चमत्कार केर काममन के देखाई जे इ देखालक?” फरीसी आदमीमन यीशु केर बारे में आदमीमन के इ लेखे गोठियाते सुनलैं। से लगिन यहूदी मुध पुरोहितमन आउर फरीसी दल केर आदमीमन यीशु के धारेक लगिन मन्दिर केर पहरादारमन के भेजलैं। तब यीशु कहलक, “अब मोंय थोरहें समय तक तोहर संगे रहमूँ। इकर पाछे मोंय अपन भेजेक वाला ठिना घूइर जामूँ। तोहरेमन मोके खोजबा, मगर मोंय तोहरेमन के नी मिलमूँ। आउर जहाँ मोंय रहमूँ, हूवाँ तोहरेमन आवेक नी पारबा।” यहूदी धरम केर अगुवामन आपस में कहलैं, “इ कहाँ जाई, जे हमरे इके खोजेक नी पारब? का इ उ यहूदी आदमीमन ठिना जाई, जेमन यूनान देस में जने-तने रहैना आउर इ उमन के हों उपदेस देवी? इ गोइठ केर का मतलब हेके, ‘तोहरेमन मोके खोजबा आउर मोंय तोहरेमन के नी मिलमूँ। आउर जहाँ मोंय रहमूँ, हूवाँ तोहरेमन आवेक नी पारबा।’ ” यहूदी मनक झोपड़ी परब केर आखरी दिन, जे खास दिन हेके, यीशु ठड़ाय के जोर से कहलक, “अगर केऊ पियासा अहे, तो उ मोर ठिना आवोक आउर पियोक। जे मोर उपरे बिसवास करी, उ अपन पियास के बुझाई। जइसन पवितर किताब में लिखल अहे, ‘उकर हृदय में से जिंदगी देवेक वाला पानी केर नदीमन बइह निकली।’ ” यीशु इ गोइठ पवितर आत्मा केर बारे में कहलक, इ पवितर आत्मा उ आदमीमन के मिलेक वाला रहे, जेमन उकर उपरे बिसवास करबैं। अब तक पवितर आत्मा नी उतइर रहे, काले कि परमेश्‍वर यीशु केर महिमा के एखन तक दिस्तार नी काइर रहे। इ गोइठ सुइन के भीड़ केर थोरेक आदमीमन कहलैं, “सचमुच में एहे उ परमेश्‍वर केर संदेश के बताएक वाला हेके, जेकर आवेक केर आसरा हमरे देखाथी।” आउर थोरेक आदमीमन कहलैं, “इ मसीह हेके।” मगर थोरेक आदमीमन कहलैं, “काले? का मसीह गलील परदेस से आवी? पवितर किताब में लिखल अहे कि मसीह राजा दाऊद केर बंश से आउर बैतलेहम नगर से आवी जहाँ राजा दाऊद रहत रहे।” इ लेखे यीशु केर बारे में आदमीमन में अनबन होई गेलक। थोरेक आदमीमन यीशु के धारेक चाहत रहैं, मगर केऊ उके धारेक नी पारलैं। जब मन्दिर केर पहरादारमन, यहूदी मुध पुरोहितमन आउर फरीसी दल केर आदमीमन ठिना आलैं, तब फरीसी आदमीमन पहरादारमन से पूछलैं, “तोहरेमन उके काले नी लानला?” पहरादारमन जबाब देलैं, “जइसन इ आदमी कहेला, तइसन केऊ आदमी नी कहलैं।” इ सुइन के फरीसी दल केर आदमीमन उमन से कहलैं, “का तोहरेमन के हों उ डहर से भटकाय देई हे? का हमर अधिकारीमन चाहे फरीसी दल केर आदमीमन में से केऊ हों उकर उपरे बिसवास काइर हैं? मगर इ आदमीमन केर गोइठ दोसर हेके। इमन जे मूसा केर नियम के नी जानैना, परमेश्‍वर बटले श्रापित अहैं।” नीकुदेमुस जे उ फरीसी आदमीमन में से एगो रहे, एक बेर आगे राइत के यीशु से मिलेक लगिन उकर ठिना आय रहे। उमन से कहलक, “का हमर नियम केऊ आदमी के, जब तक आगे उकर गोइठ के नी सुइन लेवी आउर इ ना पता लगाय लेवी कि उ का काइर हे, उके दोषीदार ठहराएला?” उमन उके जबाब देलैं, “का तोंय हों गलील परदेस केर हेकिस? पवितर किताब में खोज, तब तोंय जानबे कि गलील परदेस से केऊ परमेश्‍वर केर संदेश के बताएक वाला नी दिस्तार होवी।” इकर पाछे सोउबमन अपन-अपन घर चाइल गेलैं। इकर पाछे सोउब घर चाइल गेलैं, मगर यीशु अपन चेलामन केर संगे जैतून पहार उपरे गेलक। आउर अगला दिन बिहाने-बिहान उ फिन यहूदी मनक मंदिर में आलक। आउर ढेइर आदमीमन उकर ठिना आलैं आउर उ बाइठ के उमन के उपदेस देवेक लगलक। ओहे बेरा मूसा केर नियम के सिखाएक वाला आउर फरीसी दल केर आदमीमन एगो जनाना के लानलैं, जे ब्यभिचार केर काम में धराल जाय रहे। उके आदमीमन केर माझे ठड़ुवाय के यीशु से कहलैं, “हे गुरु, इ जनाना ब्यभिचार काम में धराय हें। मूसा अपन नियम में हमरे के एइसन जनानामन के पखना से माइर मोराएक केर आगया देई हे, तोंय इ जनाना केर बारे में का कहिसला?” उमन यीशु के परखेक लगिन एइसन कहलैं, जेकर से उमन के उकर उपरे दोष लगाएक केर मोका मिल जाओक। मगर यीशु निहइर के अंगुर से भूंई उपरे लिखेक लगलक। उमन यीशु से घरी-घरी पूछते रहलैं, तब उ मूँड़ उठाय के उमन से कहलक, “तोहर में से जे कहियो कोनों पाप नी काइर हे, ओहे आगे इ जनाना के पखना मारी।” इ कइह के फिन उ निहइर के भूंई उपरे अंगुर से लिखेक लगलक। इ गोइठ सुनेक केर पाछे उमन इ जाइन के कि हमरे सोउब पापी अही बाड़मन से लेई के छोटमन तक सोउब एक-एक काइर के हूवाँ से चाइल गेलैं। सिरिफ यीशु आउर उ जनाना जे उकर आगे ठड़ुवाल जाय रहे बाइच गेलैं। यीशु ठड़ाय के उकर से पूछलक, “हे बहिन, उमन कहाँ गेलैं? का केऊ तोके सजा नी देलैं?” उ जबाब देलक, “हे प्रभु, केऊ सजा नी देलैं।” यीशु कहलक, “मोंय हों तोके सजा नी देमूँ। जा, अब से फिन तोंय पाप ना करबे।” यीशु फिन आदमीमन से कहलक, “दुनिया केर दीया मोंय हेकों। जे मोर पिछे होई लेवी, आउर मोर चेला बनी, उ अंधार में नी चली, मगर जिंदगी केर इंजोत पावी।” फरीसी दल केर आदमीमन उकर से कहलैं, “तोंय अपन बारे में खुद गवाही देविसला, से लगिन तोर गवाही सच नखे।” यीशु उमन के जबाब देलक, “अगर मोंय अपन गवाही खुद देवोना, फिन भी मोर गवाही सच्चा अहे, काले कि मोंय जानोना कि मोंय कहाँ से आय हों आउर कहाँ जामूँ, मगर तोहरेमन नी जानाला कि मोंय कहाँ से आय हों आउर कहाँ जाथों। तोहरेमन आदमी मनक रीति केर मोताबिक न्याय कराला। मोंय केकरो न्याय नी करोना। आउर अगर मोंय न्याय हों करमूँ, तो मोर न्याय सही होवी, काले कि मोंय आउर मोर आबा परमेश्‍वर जे मोके भेइज हे, दुयो संगे अही। आउर मूसा केर नियम में हों लिखल अहे कि दूई झन केर गवाही सच्चा मानल जायला। एक तो मोंय खुद अपन बारे में गवाही देवोना आउर दूसरा, मोर आबा परमेश्‍वर जे मोके भेइज हे, मोर बारे में गवाही देवेला।” उमन उकर से पूछलैं, “तोर आबा कहाँ अहे?” यीशु जबाब देलक, “तोहरेमन ना तो मोके जानाला, आउर ना मोर आबा परमेश्‍वर के जानाला। अगर तोहरेमन मोके जानता, तो मोर आबा परमेश्‍वर के हों जाइन जाता।” यीशु इ गोइठमन के यहूदी मनक मंदिर केर अंगना में दान पेटी केर भीरे उपदेस देते कहलक। केऊ उके नी धारलैं काले कि उकर दुःख उठाएक आउर मोरेक केर समय एखन तक नी आय रहे। यीशु उमन से फिन कहलक, “मोंय जाथों, आउर तोहरेमन मोके खोजबा, आउर तोहरेमन बेगर पाप क्षमा पाले मोइर जबा। से लगिन मोंय जहाँ जाथों, हूवाँ तोहरेमन आवेक नी पारबा।” इ गोइठ सुइन के यहूदी धरम केर अगुवामन कहलैं, “का इ आत्महत्या तो नी करी? इ तो कहाथे, ‘मोंय जहाँ जाथों, हूवाँ तोहरेमन आवेक नी पारबा।’ ” यीशु उमन से कहलक, “तोहरेमन हिंयाँ इ दुनिया में जनम लेई हा, मगर मोंय स्वरग से आय हों। तोहरेमन इ दुनिया केर हेका मगर मोंय इ दुनिया केर ना लगों। से लगिन मोंय तोहरेमन से कहलों कि तोहरेमन बेगर पाप क्षमा पाले मोरबा, अगर तोहरेमन मोर उपरे बिसवास नी करबा कि मोंय ओहे हेकों, तो तोहरेमन बेगर पाप क्षमा पाले मोइर जबा।” यहूदी धरम केर अगुवामन पूछलैं, “तोंय के हेकिस?” यीशु उमन के जबाब देलक, “जब से मोंय उपदेस देवेक शुरु काइर हों, तब से तोहरेमन के बताते आवाथों कि मोंय ओहे हेकों। मोके तोहर न्याय करेक लगिन ढेइर कुछ कहेक अहे, मगर जे मोके भेइज हे, उ सच्चा हेके आउर उकर से जे कुछ मोंय सुइन हों, उखे दुनिया केर आदमीमन के बतावना।” मगर यहूदी धरम केर अगुवामन नी बुझलैं कि यीशु उमन से आबा परमेश्‍वर केर बारे में कहाथे। से लगिन यीशु उमन से कहलक, “जब तोहरेमन मोंय आदमी केर बेटा के क्रूस उपरे चढ़ाबा, तब तोहरेमन इ जाइन जबा कि मोंय ओहे हेकों। आउर मोंय अपन बटे से कोनों नी करोना। जइसन मोर आबा मोके सिखाय हे, तइसनेहें इ गोइठमन के कहोना। जे मोके भेइज हे, उ मोर संगे अहे। उ मोके एकले नी छोइड़ हे, काले कि मोंय ओहे काम करोना, जेकर से उ खुश होवेला।” ढेइर आदमीमन यीशु केर इ गोइठमन के सुनलैं आउर उकर उपरे बिसवास करलैं। जे यहूदी आदमीमन उकर उपरे बिसवास करलैं, उमन से यीशु कहलक, “अगर तोहरेमन मोर बचन में बनल रहबा, तो सचमुच मोर चेला ठहरबा। आउर तोहरेमन सच्चाई के जानबा आउर सच्चाई तोहरेमन के आजाद करी।” उमन उके जबाब देलैं, “हमरे तो अब्राहम केर संतान हेकी आउर कहियो केकरो गुलाम नी रही। फिन तोंय कइसन कहाथिस कि तोहरेमन आजाद होई जबा?” यीशु उमन के जबाब देलक, “मोंय तोहरेमन से सच-सच कहाथों कि जे केऊ पाप करेला, उ पाप केर गुलाम हेके। आउर गुलाम सोउब बेरा घर में नी रहेला, बेटा सोउब बेरा घर में रहेला। से लगिन अगर मोंय परमेश्‍वर केर बेटा तोहरेमन के आजाद करमूँ, तो सचमुच तोहरेमन आजाद होई जबा। मोंय जानोना कि तोहरेमन अब्राहम केर संतान हेका, फिन भी तोहरेमन मोके माइर मोराएक केर ताक में रहाला, काले कि तोहरेमन मोर शिक्षा के नी मानाला। मोंय अपन आबा परमेश्‍वर केर हिंयाँ जे कुछ देइख हों उखे तोहरेमन के बतावना आउर तोहरेमन अपन आबा से जे कुछ सुइन हा, उखे कराला।” उमन उके जबाब देलैं, “हमर पुरखा तो अब्राहम हेके।” यीशु उमन से कहलक, “अगर तोहरेमन अब्राहम केर संतान होता, तो अब्राहम नियर काम करता। मगर अब तोहरेमन मोके माइर मोराएक चाहाला, काले कि मोंय उ सच्चाई केर बचन के बताय हों जेके मोंय परमेश्‍वर से सुइन हों, अब्राहम तो एइसन काम नी काइर रहे। तोहरेमन अपन आबा केर नियर काम कराथा।” उमन यीशु से कहलैं, “हमरे ब्यभिचार से नी जनइम ही, हमर एके गो आबा अहे आउर उ परमेश्‍वर हेके।” यीशु उमन से कहलक, “अगर परमेश्‍वर तोहर आबा होतक, तो तोहरेमन मोर से प्रेम करता, काले कि मोंय परमेश्‍वर बटे से आय हों। मोंय अपन मरजी से नी आय हों, मोके ओहे भेइज हे। तोहरेमन मोर गोइठ के काले नी बुझाला? इकर कारण इ हेके कि तोहरेमन मोर गोइठमन के मानेक नी चाहाला। तोहर आबा शैतान हेके आउर तोहरेमन उकर इच्छा के हें पूरा करेक चाहाला। उ तो शुरु से हें हत्यारा अहे। आउर उके सच्चाई से कोनों लेना-देना नखे, काले कि सच्चाई उकर में हइये नखे। जब उ झूठ बोलेला, तो अपन स्वभाव केर मोताबिक बोलेला, काले कि उ झूठा हेके आउर झूठ केर आबा हेके। मगर मोंय सच कहोना, से लगिन तोहरेमन मोर उपरे बिसवास नी कराला। तोहर में से केहर मोर उपरे पाप करेक केर दोष लगाएक पारी? आउर अगर मोंय सच कहोना, तो तोहरेमन मोर उपरे काले बिसवास नी कराला? जे केऊ परमेश्‍वर से नाता जोड़ेला, उ परमेश्‍वर केर गोइठमन के सुनेला मगर तोहरेमन केर परमेश्‍वर से कोनों नाता नखे, से लगिन परमेश्‍वर केर गोइठमन के नी सुनाला।” इ गोइठ सुइन के यहूदी धरम केर अगुवामन यीशु से पूछलैं, “का हमर इ कहेक ठीक नखे कि तोंय सामरी आदमी हेकिस, आउर तोर में भूत अहे?” यीशु जबाब देलक, “मोर में भूत नखे। मगर मोंय अपन आबा केर आदर करोना, आउर तोहरेमन मोर निरादर कराला। मोंय अपन आदर नी चाहोना, मगर एगो अहे जे चाहेला कि मोके सम्मान करल जाओक आउर उ ओहे हेके, जे न्याय करेला। मोंय तोहरेमन से सच-सच कहाथों कि अगर केऊ आदमी मोर बचन सुइन के उके मानी तो उ कहियो नी मोरी।” यहूदी धरम केर अगुवामन उकर से कहलैं, “अब हमरे जाइन गेली कि तोर में भूत अहे। अब्राहम मोइर गेलक, आउर परमेश्‍वर केर संदेश के बताएक वालामन हों मोइर गेलैं। आउर तोंय कहिसला, ‘अगर केऊ मोर बचन के सुइन के उके मानी तो उ कहियो नी मोरी।’ हमर पुरखा अब्राहम तो मोइर गेलक। का तोंय उकर से हों महान अहिस? आउर परमेश्‍वर केर संदेश के बताएक वालामन हों मोइर गेलैं। तोंय खुद के का बुझिसला?” यीशु जबाब देलक, “अगर मोंय खुद अपन बड़ाई करमूँ, तो उकर कोनों मोल नी होवी, मगर जे मोर बड़ाई करेला, उ मोर आबा हेके, आउर तोहरेमन उके कहाला कि उ हमर परमेश्‍वर हेके। तोहरेमन तो उके नी जानाला, मगर मोंय उके जानोना। अगर मोंय कहतो कि उके नी जानोना तो मोंय तोहर नियर झूठा बाइन जतो। मगर मोंय उके जानोना आउर उकर आगया के मानोना। तोहर पुरखा अब्राहम मोर दिन देखेक केर आसरा में ढेइर खुश रहे आउर उ देखलक आउर ढेइर खुश होलक।” यहूदी धरम केर अगुवामन उकर से कहलैं, “एखन तोंय पचास साल केर हों नखिस, आउर तोंय अब्राहम के देइख लेले?” यीशु उमन के जबाब देलक, “मोंय तोहरेमन से सच-सच कहाथों कि अब्राहम केर जनम लेवेक केर आगे से हें मोंय अहों।” तब उमन यीशु के मारेक लगिन पखना उठालैं, मगर उ लूइक के यहूदी मनक मंदिर से निकइल गेलक। जब यीशु अपन चेलामन केर संगे जात रहे तो उ डहर में एगो आदमी के देखलक, जे जनम से अंधरा रहे। उकर चेलामन उकर से पूछलैं, “हे गुरु, के पाप काइर रहे कि इ अंधरा जनमलक, इ आदमी या इकर आयो आबा?” यीशु जबाब देलक, “ना तो इ आदमी पाप काइर रहे, ना इकर आयो-आबा। मगर इ आदमी अंधरा इ लगिन जनइम हे कि इकर में परमेश्‍वर केर काम दिसोक। जे मोके भेइज हे, उकर काम के हमरे के दिने-दिन में जल्दी हें पूरा करेक अहे। उ राइत आवाथे, जेकर में केऊ आदमी काम करेक नी पारबैं। जब तक मोंय दुनिया में अहों, तब तक दुनिया केर इंजोत हेकों।” इ कइह के यीशु भूंई उपरे थूकलक आउर उ थूक से माटी केर लेप बनालक, आउर उ लेप के अंधरा केर आँइख में लगाय देलक। आउर उकर से कहलक, “जा शीलोह केर हाउदा में धोई ले।” शीलोह केर मतलब हेके “भेजल”। उ आदमी जाय के धोवालक आउर देखते घूइर आलक। तब पड़ोसीमन आउर उ आदमीमन जेमन आगे उके भीख माँगते देइख रहैं, कहेक लगलैं, “का इ ओहे ना लगे, जे बाइठ के भीख माँगत रहे?” थोरेक आदमीमन कहलैं, “हाँ, इ ओहे हेके।” आउर थोरेक आदमीमन कहलैं, “निहीं, उकर नियर हें केऊ आउर हेके।” उ आदमी कहलक, “मोंय ओहे हेकों।” तब उमन उकर से पूछेक लगलैं, “तोर आँइख केर नजइर कइसन खुइल गेलक?” उ आदमी जबाब देलक, “यीशु नाँव केर एगो आदमी माटी केर लेप बनालक आउर उके मोर आँइख केर उपरे लगाय के मोर से कहलक, ‘शीलोह केर हाउदा में जाय के धोई ले।’ मोंय गेलों आउर धोवालो, धोवाएक केर पाछे मोंय देखेक लगलों।” उमन उकर से पूछलैं, “उ आदमी कहाँ अहे?” उ आदमी जबाब देलक, “मोंय नी जानोना।” आदमीमन उके जे आगे अंधरा रहे फरीसी दल केर आदमीमन ठिना लेई गेलैं। काले कि जे दिन यीशु माटी केर लेप बनाय के उकर आँइख केर नजइर खोइल रहे, उ दिन यहूदी मनक आराम केर दिन रहे। फरीसी दल केर आदमीमन हों उकर से पूछलैं, “तोर आँइख केर नजइर का लेखे खुइल गेलक?” उ आदमी उमन से कहलक, “उ मोर आँइख उपरे माटी केर लेप लगालक, फिन मोंय धोवालो, आउर अब मोंय देखेक पाराथों।” से लगिन थोरेक फरीसी दल केर आदमीमन कहलैं, “उ आदमी परमेश्‍वर केर हिंयाँ से नी आय हे, काले कि उ यहूदी मनक आराम केर दिन केर नियम के हों नी मानेला।” आउर थोरेक आदमीमन कहलैं, “पापी आदमी इ लेखे चमत्कार केर चिन्हा कइसन देखाएक पारी?” इ लेखे उमन में अनबन होई गेलक। उमन फिन उ अंधरा आदमी से पूछलैं, “जे आदमी तोके देखेक केर नजइर देलक, उकर बारे में तोंय का कहिसला?” उ जबाब देलक, “उ परमेश्‍वर केर संदेश के बताएक वाला हेके।” मगर यहूदी धरम केर अगुवामन के बिसवास नी होवत रहे कि उ अंधरा रहे। से लगिन उमन उकर आयो-आबा के बोलालैं। आउर उमन से पूछलैं, “का इ तोहर बेटा हेके, जेकर बारे में तोहरेमन कहाला कि इ जनम से अंधरा रहे? तो फिन अब इ कइसन देखेक पाराथे?” उकर आयो-आबा जबाब देलैं, “हमरे जानिला कि इ हमर बेटा हेके आउर इ जनम से अंधरा रहे। मगर हमरे इ नी जानिला कि अब इ कइसन देखेक पाराथे। आउर हमरे इ हों नी जानिला कि के इकर आँइख केर नजइर के ठीक करलक। इ सेयाना अहे, इकरे से पूइछ लेवा। उ अपन बारे में खुद हें बताय देवी।” उकर आयो-आबामन एइसन जबाब इ लगिन देलैं कि उमन यहूदी धरम केर अगुवामन से डरात रहैं। काले कि यहूदी धरम केर अगुवामन फैसला काइर रहैं कि अगर केऊ यीशु के मसीह मानी तो उ प्रार्थना घर से निकलाल जाई। से लगिन उकर आयो-आबा कहलैं, “उ सेयाना अहे, उकरे से पूइछ लेवा।” फरीसी आदमीमन उके, जे आगे अंधरा रहे, फिन बोलालैं आउर उकर से पूछलैं, “सच बताय के परमेश्‍वर केर स्तुति कर। हमरे जानिला कि उ पापी आदमी हेके।” उ जबाब देलक, “उ आदमी पापी हेके या निहीं, सेके मोंय नी जानोना। मोंय सिरिफ एगो गोइठ जानोना कि मोंय अंधरा रहों आउर अब देखेक पाराथों।” उमन उकर से फिन पूछलैं, “उ तोर संगे का करलक? उ तोर आँइख केर नजइर के का लेखे ठीक करलक?” उ आदमी उमन से कहलक, “मोंय तो तोहरेमन के बताय देई हों, मगर तोहरेमन नी सुनला, आउर अब काले फिन सुनेक चाहाला? का तोहरेमन हों उकर चेला बनेक चाहाला?” तब उमन उके बुरा-भला कहलैं, “तोंय हें उकर चेला हेकिस, हमरे तो मूसा केर चेला हेकी। हमरे जानिला कि परमेश्‍वर मूसा से गोठियाहे, मगर उ आदमी केर बारे में हमरे नी जानिला कि उ कहाँ से आय हे।” उ आदमी उमन के जबाब देलक, “एहे तो ताजुब केर गोइठ हेके। उ मोर आँइख केर नजइर के ठीक करलक आउर तोहरेमन एहो नी जानाला कि उ कहाँ से आय हे। हमरे जानिला कि परमेश्‍वर पापी आदमीमन केर बिनती नी सुनेला, मगर, अगर केऊ परमेश्‍वर केर भक्त हेके, आउर उकर इच्छा के पूरा करेला तो परमेश्‍वर उकर बिनती के सुनेला। जब से दुनिया केर सिरजन होई हे, तब से इ कहियो सुनेक में नी आलक कि केऊ जनम से अंधरा आदमी केर आँइख केर नजइर के ठीक काइर हे। इ आदमी परमेश्‍वर बटे से आय हे, से लगिन इ सोउब चमत्कार केर काम करेक पारेला।” उमन उकर से कहलैं, “तोंय तो बिलकुल पाप में जनइम हिस, तोंय हमरे के का सिखाइसला?” आउर उमन उके आराधना घर से बाहरे निकलाय देलैं। यीशु सुनलक कि फरीसी आदमीमन उके बाहरे निकलाय देई हैं, से लगिन जब उकर से भेंट होलक तो उ आदमी से पूछलक, “का तोंय परमेश्‍वर केर बेटा उपरे बिसवास करिसला?” उ जबाब देलक, “हे गुरु, मोके बताव कि इ परमेश्‍वर केर बेटा के हेके, जेकर से मोंय उकर उपरे बिसवास करमूँ?” यीशु उकर से कहलक, “इ, परमेश्‍वर केर बेटा मोंय हेकों, तोंय मोके आगे हें देइख हिस आउर एखन तोर संगे गोठियाथों।” उ आदमी कहलक, “हे प्रभु, मोंय तोर उपरे बिसवास करोना।” आउर यीशु केर भक्ति करलक। तब यीशु कहलक, “मोंय इ दुनिया में न्याय करेक लगिन आय हों, ताकि जेमन अंधरा अहैं उमन देखेक पारोक आउर जेमन देखेक पारैना उमन अंधरा होई जाओक।” जे फरीसी दल केर आदमीमन उकर संगे रहैं, उमन इ गोइठ सुइन के यीशु से पूछलैं, “का तोंय कहाथिस कि हमरे हों अंधरा अही?” यीशु उमन से कहलक, “अगर तोहरेमन अंधरा होता तो तोहरेमन पापी नी गिनाता, मगर अब कहाथा कि हमरे देखिला, से लगिन तोहर पाप क्षमा नी करल जाई।” यीशु कहलक, “मोंय तोहर से सच-सच कहाथों कि जे केऊ भेड़ी गोहर में दुरा से नी ढूकेला, मगर दोसर बटे से चाइढ़ के ढूकेला, उ चोर आउर डाकू हेके। मगर जे दुरा से होई के भीतरे ढूकेला, उ भेड़ीमन केर चरवाहा हेके। आउर उकर लगिन चौकीदार दुरा खोइल देवेला आउर भेड़ीमन उकर आवाज के चिन्हैना आउर उ अपन भेड़ीमन के नाँव लेई-लेई के बोलायला आउर बाहरे लेई जायला। अपन सोउब भेड़ीमन के बाहरे निकलाय देवेक केर पाछे उ चरवाहा उमन केर आगे-आगे जायला आउर भेड़ीमन उकर पिछे-पिछे आवैना, काले कि उमन उकर आवाज के चिन्हैना। उमन बे चिन्हार आदमी केर पिछे नी जाबैं, मगर उकर से दूर भागबैं, काले कि उमन दोसर मनक आवाज के नी चिन्हैना।” यीशु आदमीमन के इ उदाहरन बतालक, मगर उमन नी बुझलैं कि इ गोइठमन केर का मतलब हेके। से लगिन यीशु उमन से फिन कहलक, “मोंय तोहरेमन से सच-सच कहाथों कि भेड़ीमन केर दुरा मोंय हेकों। जे आदमीमन मोर से आगे आलैं, उमन सोउब चोर आउर डाकू रहैं, मगर मोर भेड़ीमन उमन केर आवाज के नी सुनलैं। दुरा मोंय हें हेकों। अगर केऊ मोर से होई के भीतरे ढुकी उ छुटकारा पावी आउर भीतरे बाहरे आवा-जाही करी आउर खाएक लगिन चारा पावी। चोर सिरिफ भेड़ीमन के चोराएक, मोराएक आउर नाश करेक लगिन आवेला। मगर मोंय इ लगिन आय हों कि उमन जिंदगी पावोक आउर भरपूरी से पावोक। बेस चरवाहा मोंय हेकों, बेस चरवाहा अपन भेड़ीमन लगिन अपन जीउ के बलिदान काइर देवेला। मगर मजूरी में रखल धांगर, जे ना चरवाहा हेके आउर ना भेड़ीमन केर मालिक हेके, उ हाड़हा के आते देइख के भेड़ीमन के छोइड़ के भाइग जायला। आउर हाड़हा उ मनक झूँड़ में हमला काइर के उमन के तितिर-बितिर काइर देवेला। मजूरी में रखल धांगर इ लगिन भाइग जायला कि उ सिरिफ पइसा लगिन काम करेला आउर उके भेड़ीमन केर कोनों चिंता नखे। बेस चरवाहा मोंय हेकों। जे लेखे आबा मोके जानेला आउर मोंय आबा के जानोना। एहे लेखे मोंय अपन भेड़ीमन के जानोना आउर मोर भेड़ीमन मोके जानैना, आउर मोंय अपन भेड़ीमन लगिन अपन जीउ के बलिदान काइर देवोना। मोर आउर हों भेड़ीमन अहैं, जे इ भेड़ी गोहर केर ना लगैं मोके ओहोमन के लानेक जरुरी अहे। उमन मोर आवाज के चिन्हबैं। तब एके गो झूँड़ आउर एके गो चरवाहा होवी। मोर आबा परमेश्‍वर मोर से प्रेम करेला काले कि मोंय अपन जीउ के अपन इच्छा से बलिदान काइर देवोना ताकि मोंय फिन से जिंदा होई जामूँ। केऊ मोर जीउ के मोर से लुटेक नी पारी, मोंय अपन मरजी से मोर जीउ के बलिदान करोना। मोके अपन जीउ के बलिदान करेक आउर उके फिन से पावेक केर अधिकार अहे। मोके अपन आबा परमेश्‍वर बटे से इ आगया मिल हे।” यीशु केर इ गोइठमन केर खातिर यहूदी धरम केर अगुवामन में फिन अनबन होई गेलक। उमन में से ढेइर आदमीमन कहेक लगलैं, “उकर में भूत अहे। उ पगला हेके, तोहरेमन उकर गोइठ के काले सुनाला?” थोरेक आदमीमन कहत रहैं, “इ गोइठमन भूत धारल आदमी केर ना लगे। का भूत अंधरामन केर आँइख केर नजइर के ठीक करेक पारी?” उ दिनमन में यरुशलेम शहर में यहूदी मनक मंदिर केर स्थापना परब मनाल जात रहे। आउर जाड़ केर दिन रहे। आउर यीशु यहूदी मनक मंदिर में सुलैमान केर बरामदा में घुमत रहे। तब यहूदी धरम केर अगुवामन उकर ठिना आलैं आउर उके घेइर के उकर से पूछलैं, “तोंय हमरेमन के ढेइर दिन से दुबिधा में राइख हिस। अब हमरे के सफा-सफा बताय दे, का तोंय मसीह हेकिस?” यीशु उमन के जबाब देलक, “मोंय तोहरेमन के बताय देलों आउर तोहरेमन मोर उपरे बिसवास हें नी कराला। जे काम मोंय अपन आबा परमेश्‍वर केर अधिकार से करोना, ओहे काममन मोर बारे में गवाही देवैना। मगर तोहरेमन मोर उपरे बिसवास नी कराला काले कि तोहरेमन मोर भेड़ीमन में से ना लगा। जइसन भेड़ीमन अपन असली चरवाहा केर आवाज के चिन्हैना, तइसनेहें मोर आदमीमन मोर गोइठमन उपरे धेयान देवैना। मोंय उमन के जानोना आउर उमन मोर चेला बाइन जाय हैं। मोंय उमन के जुग-जुग केर जिंदगी देवोना। उमन कहियो नी मोरबैं आउर उमन के मोर से केऊ लुटेक नी पारी। मोर आबा परमेश्‍वर जे आदमीमन के मोके जिम्मा देई हे, उ सोउब से महान अहे, आउर उमन के मोर आबा परमेश्‍वर केर हाँथ से केऊ लुटेक नी पारी। मोंय आउर आबा परमेश्‍वर एके हेकी।” इ गोइठ सुइन के यहूदी धरम केर अगुवामन फिन यीशु के माइर मोराएक लगिन पखना उठालैं। से लगिन यीशु उमन से कहलक, “मोंय अपन आबा बटे से तोहर सामने ढेइर भला काम काइर हों, उमन में से कोन काम लगिन तोहरेमन मोके पखना से माइर मोराएक चाहाथा?” यहूदी धरम केर अगुवामन उके जबाब देलैं, “भला काम लगिन हमरे तोके पखना से नी माराथी, मगर तोंय आदमी होई के खुद के परमेश्‍वर बताय के परमेश्‍वर केर निंदा कराथिस, से लगिन हमरे तोके पखना से माइर मोराएक चाहाथी।” यीशु उमन के जबाब देलक, “पवितर किताब में लिखल अहे कि परमेश्‍वर अपन आदमीमन केर अगुवामन से कहेला, ‘तोहरेमन ईश्‍वर हेका।’ जेमन ठिना परमेश्‍वर केर बचन पोहोंचलक, अगर उमन के पवितर किताब में ईश्‍वर कहल जाहे, तो इ गोइठ सच हेके। जब मोंय कहोना, ‘मोंय परमेश्‍वर केर बेटा हेकों,’ तो तोहरेमन काले कहाला, ‘तोंय ईश्‍वर केर निंदा करिसला।’ मोंय ओहे हेकों, जेके आबा परमेश्‍वर अलग करलक आउर दुनिया में भेइज हे। अगर मोंय अपन आबा परमेश्‍वर केर काम के नी करोना, तो तोहरेमन मोर उपरे बिसवास ना करा। मगर, अगर मोंय उ काममन के करोना, तो मोर उपरे बिसवास ना हों करा, मगर काममन केर उपरे बिसवास करा, तब तोहरेमन जानबा कि आबा परमेश्‍वर मोर में रहेला आउर मोंय आबा परमेश्‍वर में रहोना।” इ गोइठ सुइन के उमन फिन यीशु के धारेक लगिन कोशिश करलैं, मगर यीशु उमन से दूर चाइल गेलक। फिन यीशु यरदन नदी केर उ पखारी घूइर गेलक, जहाँ यूहन्ना आगे बपतिस्मा जल संस्कार देवत रहे, आउर हुवाँय रहलक। आउर ढेइर आदमीमन यीशु ठिना आय के कहत रहैं, “यूहन्ना जल संस्कार देवेक वाला तो कोनों चमत्कार केर चिन्हा नी देखालक, मगर जे कुछ उ इकर बारे में बताय रहे, उ सोउब सच निकललक।” आउर हूवाँ ढेइर आदमीमन यीशु उपरे बिसवास करलैं। बैतनिय्याह गाँव केर रहेक वाला एगो आदमी रहे, जे बेमार रहे। उकर नाँव लाजर रहे आउर उकर बहिनमन केर नाँव मरियम आउर मारथा रहे। इ ओहे मरियम रहे, जे पाछे प्रभु केर स्वागत सेंट माइख के करलक आउर उकर गोड़ के अपन केंस से पोछलक, इकरे भाई लाजर बेमार रहे। उ दुयो बहिनमन यीशु के इ कइह के खबर भेजलैं, “हे प्रभु, जेके तोंय प्रेम करिसला, उ बेमार अहे।” यीशु इ खबर सुइन के कहलक, “इ बेमारी मौत लगिन निहीं, मगर परमेश्‍वर केर महिमा लगिन हेके। इकर से मोंय परमेश्‍वर केर बेटा केर महिमा होवी।” यीशु मारथा, मरियम आउर उ मनक भाई लाजर तीनों से प्रेम करत रहे। मगर यीशु इ खबर सुनलक कि लाजर बेमार अहे तो उ जहाँ रहे हूवाँ आउर दूई दिन रूइक गेलक। दूई दिन केर पाछे यीशु अपन चेलामन से कहलक, “आवा हमरे फिन यहूदिया परदेस जाब।” चेलामन उकर से कहलैं, “हे गुरु, थोरहें दिन आगे यहूदी आदमीमन केर अगुवामन तोके पखना से माइर मोराएक चाहत रहैं, फिन भी तोंय हूवाँ जाएक खोजिसला?” यीशु उमन के जबाब देलक, “दिन केर इंजोत बारह घंटा रहेला, जेमन दिन में हिंठैना उमन नी ठेसायना, काले कि उमन इ दुनिया केर इंजोत के देखैना। मगर जेमन राइत के हिंठैना, उमन ठेसायना काले कि राइत में इंजोत नी रहेला।” एतना कहेक केर पाछे यीशु फिन उमन से कहलक, “हमर संगी लाजर निंदाय जाय हे, मगर मोंय उके जगाएक जाथों।” तब चेलामन उकर से कहलैं, “हे प्रभु, अगर उ निंदाथे, तो उ ठीक होई जाई।” यीशु तो उकर मौत केर बारे में कइह रहे, मगर उकर चेलामन बुझलैं कि उ नींद में सुतेक केर बारे में कहाथे। से लगिन यीशु उमन के सोझे कइह देलक, “लाजर मोइर जाय हे। आउर मोंय खुश अहों कि हूवाँ नी रहों, जेकर से तोहरेमन लगिन इ भलाई होवी कि तोहरेमन मोर उपरे बिसवास करेक पारबा, मगर एखन आवा, हमरे उकर ठिना जाब।” तब थोमा, जे दिदुमुस कहात रहे, अपन संगी चेलामन से कहलक, “आवा, हमरे हों उकर संगे मोरेक ले जाब।” बैतनिय्याह गाँव पोंहइच के यीशु के पता चललक कि लाजर के चाइर दिन आगे हें कबर में दफनाय देवल जाहे। बैतनिय्याह गाँव यरुशलेम शहर केर भीरे लगभग तीन किलोमीटर दूर रहे। से लगिन यहूदी आदमीमन मारथा आउर मरियम ठिना उ मनक भाई केर मौत में ढाढ़स देवेक लगिन आय रहैं। जइसनेहें मारथा यीशु केर आवेक केर खबर सुनलक तइसनेहें उकर से भेंट करेक लगिन गेलक। मगर मरियम घरे में बइठल रहलक। मारथा यीशु से कहलक, “हे प्रभु, अगर तोंय हिंयाँ रहते, तो मोर भाई नी मोरतक। आउर एखनोहों मोंय जानोना कि जे कुछ तोंय परमेश्‍वर से माँगबे, परमेश्‍वर तोके ओहे देवी।” यीशु उकर से कहलक, “तोर भाई फिन से जी उठी।” मारथा उकर से कहलक, “मोंय जानोना कि आखरी दिन जब सोउब मोरल आदमीमन जी उठबैं, तब मोर भाई हों फिन जी उठी।” यीशु उकर से कहलक, “मोरलमन के जिंदा करेक वाला आउर जिंदगी देवेक वाला मोंय हें हेकों। जे मोर उपरे बिसवास करेला उ अगर मोइर हों जाई फिन भी जिंदा रही। आउर जे मोर उपरे बिसवास काइर के जिंदगी जियेला, उ कहियो नी मोरी। का तोंय इ गोइठ उपरे बिसवास करिसला?” मारथा उकर से कहलक, “हाँ, हे प्रभु! मोंय बिसवास करोना कि परमेश्‍वर केर बेटा मसीह, जे दुनिया में आवेक वाला रहे, उ तोहें हेकिस।” एतना कइह के मारथा हूवाँ से घूइर गेलक आउर अपन बहिन मरियम के चुपे से बोलाय के कहलक, “गुरु एहे ठिना अहे, आउर तोके बोलाथे।” मरियम इ सुनते हें तुरते उइठ के यीशु ठिना आलक। यीशु एखनोहों गाँव में नी पोंहइच रहे, मगर ओहे ठाँव में रहे, जहाँ मारथा उकर से भेंट काइर रहे। तब जे यहूदी आदमीमन उकर संगे घर में रहैं, आउर उके शांति देवत रहैं, उमन देखलैं कि मरियम तुरते उठलक आउर बाहरे जाथे तो उमन बुझलैं कि मरियम काँदेक लगिन कबर ठिना जाथे। आउर उमन हों उकर पिछे-पिछे गेलैं। जब मरियम यीशु ठिना पोहोंचलक तो उके देखते हें उकर गोड़ में गिर के कहलक, “हे प्रभु, अगर तोंय हिंयाँ रहते तो मोर भाई नी मोरतक।” जब यीशु मरियम आउर उकर संगे आवल यहूदी आदमीमन के काँदते देखलक तो परेशान आउर दुःखी होई गेलक, आउर कहलक, “तोहरेमन उकर लाश के कहाँ दफनाय हा?” उमन उकर से कहलैं, “हे प्रभु, आव आउर देइख ले।” यीशु काँदेक लगलक। उके देइख के यहूदी आदमीमन कहेक लगलैं, “देखा इ उकर से केतना प्रेम करत रहे।” मगर उमन में थोरेक आदमीमन कहलैं, “इ तो अंधरा मनक आँइख केर नजइर के खोललक, तो का इ लाजर के मोरेक से बचाएक नी पारतक?” यीशु अपन मन में ढेइर दुःखी होई के कबर ठिना आलक। उ कबर एगो गुफा रहे, जेकर दुरा एगो पखना से ढाँपल रहे। यीशु कहलक, “पखना के छों करा।” मोरल लाजर केर बहिन मारथा यीशु से कहेक लगलक, “हे प्रभु, अब तो उ बसाथे काले कि उके मोरल चाइर दिन होई गेलक।” यीशु उके जबाब देलक, “का मोंय तोर से नी कइह रहों कि अगर तोंय मोर उपरे बिसवास करबे, तो परमेश्‍वर केर महिमा के देखबे?” तब उमन उ पखना के हटालैं। यीशु उपरे देइख के कहलक, “हे आबा परमेश्‍वर, मोंय तोके धन्यबाद देवोना, तोंय मोर प्रार्थना के सुइन लेई हिस। आउर मोंय जानत रहों कि तोंय सोउब बेरा मोर प्रार्थना के सुनिसला। मगर मोंय आसे-पासे ठड़ाल आदमीमन केर चलते एइसन कहलों, जेकर से उमन बिसवास करबैं कि तोंय मोके भेइज हिस।” इ कइह के यीशु जोर से हकालक, “हे लाजर, बाहरे निकइल आव।” मोरल लाजर जी उइठ के बाहरे निकइल आलक। उकर हाँथ आउर गोड़ लुगा केर पट्टी से बाँधल रहे आउर उकर मुँह गामछा से लेपटाल रहे। यीशु आदमीमन से कहलक, “इकर पट्टी के खोइल देवा आउर इके जाएक देवा।” जे यहूदी आदमीमन मरियम से मिलेक आय रहैं, उमन यीशु केर इ काम के देखलैं आउर उमन में से ढेइर आदमीमन यीशु केर उपरे बिसवास करलैं। मगर उमन में से थोरेक आदमीमन फरीसी दल केर आदमीमन ठिना गेलैं आउर यीशु केर काममन केर बारे में उमन के बतालैं। से लगिन यहूदी मुध पुरोहितमन आउर फरीसी दल केर आदमीमन, यहूदी अगुवामन केर महासभा केर आदमीमन के बोलाय के कहलैं, “हमरे के का करेक चाही? इ आदमी तो ढेइर चमत्कार केर चिन्हामन के देखाथे। अगर हमरे इके एइसनेहें छोइड़ देब, तो सोउब आदमीमन मसीह केर रूप में उकर उपरे बिसवास करेक लगबैं आउर रोम देस केर रहेक वाला आदमीमन आय के हमर मंदिर आउर हमर देस से हमर अधिकार के लेई लेबैं।” तब महासभा केर आदमीमन में से एगो काइफा नाँव केर आदमी रहे, जे उ साल केर यहूदी महापुरोहित रहे, उमन से कहलक, “तोहरेमन कोनोवें नी जानाला, आउर ना बुझाला। तोहर भलाई इकरे में अहे कि हमर सोउब आदमीमन लगिन सिरिफ एके गो आदमी मोरोक आउर सोउब इसराइली आदमीमन नाश होवेक से बाइच जाओक।” इ गोइठ उ अपन से नी कहलक, “मगर उ साल केर यहूदी महापुरोहित केर रूप में भविष्यवाणी करलक कि यीशु यहूदी आदमीमन लगिन मोरी।” आउर यीशु ओहेमन लगिन सिरिफ नी मोरी, मगर उ परमेश्‍वर केर आउरो संतानमन लगिन मोरी, जेमन छितराल अहैं ताकि उमन के जमा करोक। ओहे दिन से यहूदी धरम केर अगुवामन यीशु के माइर मोराएक केर योजना बनाएक लगलैं। से लगिन यीशु उ समय से यहूदिया परदेस में खुलेआम आवा-जाही करेक छोइड़ देलक। आउर हूवाँ से उ इफ्राईम नाँव केर एगो नगर में चाइल गेलक, जे सुनसान ठाँव केर भीरे रहे। आउर यीशु अपन चेलामन संगे हुवाँय रहेक लगलक। यहूदी आदमी मनक फसह परब भीरे पोंहइच जाय रहे, से लगिन ढेइर आदमीमन परब से आगे अपन रीति केर मोताबिक खुद के शुद्ध करेक लगिन देहाइत से यरुशलेम शहर आलैं। उमन यीशु के खोजत रहैं आउर यहूदी मनक मंदिर केर अंगना में ठड़ाय के आपस में यीशु केर बारे में गोठियात रहैं, “तोहर का बिचार अहे, का उ परब में नी आवी?” आउर यहूदी मुध पुरोहितमन आउर फरीसी दल केर आदमीमन इ आगया देई रहैं कि अगर केऊ हों आदमी के पता होई जाई कि यीशु कहाँ अहे, तो उ इकर खबर उमन के देवोक, ताकि उमन उके धारेक पारोक। फिन यीशु यहूदी मनक फसह परब से छाव दिन आगे बैतनिय्याह गाँव में आलक, जहाँ उ लाजर के मोरलमन में से जियाय रहे। हूवाँ आदमीमन यीशु के माइन देवेक लगिन भोज रखलैं। आउर मारथा खाएक लगिन पोरसात रहे। आउर लाजर उ आदमीमन में से एगो रहे, जे यीशु केर संगे खाएक बाइठ रहे। तब मरियम एगो सीसी में लगभग आधा लीटर ढेइर दाम केर सेंट लानलक, जे असली जटामांसी तेल से बनाल जाय रहे। मरियम उके यीशु केर गोड़ उपरे माखलक आउर अपन केंस से उकर गोड़ के पोछलक। आउर पूरा घर सेंट केर बेस गंध से भाइर गेलक। मगर यीशु केर चेलामन में से एगो चेला यहूदा, जे इस्करियोत गाँव केर रहेक वाला रहे, जे पाछे यीशु के धरुवइयो देलक, उ कहेक लगलक, “इ सेंट तो तीन सौ चाँदी केर सिक्का में बेचाय जातक आउर इ सिक्का के गरीब आदमीमन के देवल जातक, इके काले बरबाद करल गेलक?” यहूदा इ गोइठ इ लगिन नी कइह रहे कि उके गरीब आदमीमन केर चिंता रहे, मगर इ लगिन कइह रहे कि उ चोर रहे। आउर उकर ठिना उ मनक पइसा केर थैला रहत रहे आउर थैला में जे कुछ साजल जात रहे, उ उके निकलाय लेवत रहे। यीशु कहलक, “इके छोइड़ देवा। इ समय से आगे हें मोर गड़ाएक जाएक केर तेयारी लगिन इ काम के कराथे। काले कि गरीब आदमीमन तो सोउब बेरा तोहरेमन संगे रहबैं, मगर मोंय सोउब बेरा तोहरेमन संगे नी रहमूँ।” जब यहूदिया परदेस केर ढेइर आदमीमन के पता चललक कि यीशु हूवाँ अहे, तो उमन हूवाँ आलैं। उमन सिरिफ यीशु के हें निहीं मगर लाजर के हों देखेक आय रहैं, जेके यीशु मुरदा से जियाय रहे। तब यहूदी मुध पुरोहितमन लाजर के हों माइर मोराएक केर सलहा करलैं। काले कि उकर चलते ढेइर आदमीमन यहूदी अगुवामन से अलग होई गेलैं, आउर उमन यीशु केर उपरे बिसवास करेक लगलैं। दूसरा दिन ढेइर आदमीमन जे परब में आय रहैं, इ सुइन के कि यीशु यरुशलेम शहर में आवाथे। तो उमन खिजूर केर डाइर लेई के उकर स्वागत करेक लगिन निकललैं। आउर उमन इ नारा लगात रहैं, “परमेश्‍वर केर स्तुति होवोक, धाइन अहे उ, जे प्रभु केर नाँव से आवेला! धाइन अहे इसराइल केर राजा।” जइसनेहें उ यरुशलेम शहर केर भीरे पोहोंचलक, उके एगो गधी केर छउवा मिललक, आउर यीशु उकर उपरे बाइठ गेलक। जइसन पवितर किताब में लिखल अहे, तइसनेहें होलक, “यरुशलेम शहर केर रहेक वाला आदमीमन, ना डरावा, देखा, तोहर राजा गधी केर छउवा उपरे बाइठ के तोहर ठिना आवाथे।” यीशु केर चेलामन इ गोइठमन के आगे नी बुइझ रहैं, मगर जब यीशु केर महिमा दिस्तार होलक तो उमन के याइद आलक कि जे कुछ यीशु केर संगे होलक, उ ठीक तइसनेहें होलक जइसन पवितर किताब में उकर बारे में लिखल रहे। जब यीशु लाजर के कबर से बाहरे बोलाय के मुरदा से जियालक। उ बेरा जे आदमीमन उकर संगे रहैं, उमन उ घटना केर बारे में आदमीमन के बताएक लगलैं। एहे लगिन ढेइर आदमीमन यीशु से भेंट करेक लगिन आलैं, काले कि यीशु उ चमत्कार काम देखाय रहे। इ सोउब देइख के फरीसी दल केर आदमीमन एक दोसर से कहलैं, “देखाथा, तोहरेमन कोनों करेक नी पाराथा। दुनिया केर ढेइर आदमीमन उकर पिछे जाथैं।” हूवाँ थोरेक यूनानी आदमीमन रहैं, जे फसह परब में भक्ति करेक लगिन यरुशलेम शहर में आय रहैं। उमन गलील परदेस केर बैतसैदा गाँव केर रहेक वाला फिलिप्पुस ठिना आय के उकर से बिनती करलैं, “हुजूर, हमरे यीशु से भेंट करेक चाहिला।” फिलिप्पुस आय के अन्द्रियास के बतालक, तब अन्द्रियास आउर फिलिप्पुस दुयो इ गोइठ के यीशु के बतालैं। यीशु उमन से कहलक, “मोंय आदमी केर बेटा केर महिमा होवेक केर बेरा आय जाहे। मोंय तोहरेमन से सच कहाथों कि जब तक गोहोम केर दाना भूंई में गिर के मोइर नी जायला, तब तक उ एकले दाना रहेला मगर जब मोइर जायला, तो ढेइर दाना होवेला। जे अपन जीउ के प्रेम करेला, उ उके गवाँय देवेला, आउर जे इ दुनिया में अपन जीउ के प्रेम नी करेला; उ उके जुग-जुग केर जिंदगी लगिन बचाय लेवेला। अगर केऊ मोर सेवा करेक चाहेला तो मोर पिछे होई लेवोक आउर मोर चेला बाइन जाओक। तब जहाँ मोंय अहों, हूवाँ मोर सेवक हों रही। अगर केऊ मोर सेवा करी तो आबा परमेश्‍वर हों उकर माइन करी। अब मोर जीउ अकबकाथे। से लगिन अब मोंय का कहमूँ? ‘हे आबा परमेश्‍वर, मोके इ दुःख केर बेरा से बचाव?’ मगर निहीं, काले कि मोंय इ दुनिया में दुःख उठाएक लगिन हें आय हों। हे आबा परमेश्‍वर, अपन नाँव केर महिमा कर।” ओहे बेरा स्वरग से इ आवाज सुनालक, “मोंय अपन नाँव केर महिमा काइर हों, आउर उकर महिमा फिन करमूँ।” तब जेतनामन ठड़ाय के सुनत रहैं, उमन कहलैं कि बदरी गरजलक। थोरेक आदमीमन कहलैं, “एगो स्वरगदूत उकर से कोनों कहलक।” से लगिन यीशु जबाब देलक, “इ गोइठ तोहरेमन केर फायदा लगिन कहल जाहे मोर लगिन निहीं। अब दुनिया केर आदमीमन केर न्याय करेक लगिन परमेश्‍वर केर समय आय जाहे, दुनिया में राइज करेक वाला शैतान केर शक्ति के नाश काइर के उके निकलाय देवल जाई। आउर जब मोंय धरती से क्रूस उपरे चढ़ाल जामूँ, तो सोउब आदमीमन के अपन बटे लानमूँ।” एइसन कइह के यीशु बतालक कि उ कइसन मौत से मोरेक वाला अहे। आदमीमन उके जबाब देलैं, “मूसा केर नियम में लिखल अहे कि मसीह सोउब दिन जिंदा रही। फिन तोंय काले कहाथिस कि आदमी केर बेटा के क्रूस उपरे चढ़ाल जाएक जरुरी अहे? इ आदमी केर बेटा के हेके?” यीशु उमन से कहलक, “ इंजोत अब थोरे हें देरी तोहर माझे रही, जब तक इंजोत तोहर संगे अहे तोहरेमन आगे बढ़ते रहा कहीं एइसन ना होवोक कि अंधार आय के तोहरेमन के घेइर लेवी, जे अंधार में हिंठेला उ नी जानेला कि उ कोन बटे जाथे। जब तक इंजोत तोहर संगे अहे, इंजोत उपरे बिसवास करा, जेकर से तोहरेमन इंजोत केर संतान बनेक पारबा।” यीशु इ कइह के हूवाँ से चाइल गेलक आउर उमन से खुद के लुकाय रखलक। यीशु उ मनक सामने ढेइर हें चमत्कार केर चिन्हा देखालक फिन भी उमन उकर उपरे बिसवास नी करलैं। एइसन इ लगिन होलक, ताकि यशायाह परमेश्‍वर केर संदेश के बताएक वाला केर कहल इ बचन पूरा होई जाओक, “हे प्रभु, हमर शुभ संदेश केर उपरे केऊ बिसवास नी करलैं, आउर केऊ नी बुझलैं कि इ तोर शक्ति रहे।” उमन इ लगिन बिसवास करेक नी पारलैं, काले कि यशायाह परमेश्‍वर केर संदेश के बताएक वाला एहो कइह रहे, “परमेश्‍वर उ मनक आँइख के अंधरा काइर देलक, ताकि उमन ना देखोक, आउर उ मनक दिमाग के बंद काइर देलक, ताकि उमन ना बुझोक, कहीं एइसन ना होवोक कि उमन देइख के आउर बुइझ के मोर बटे घूइर आबैं आउर मोंय उमन के ठीक काइर देमूँ।” यशायाह इ गोइठमन के इ लगिन बतालक कि समय से आगे यीशु केर महिमा देइख रहे, आउर उकर बारे कइह रहे। फिन भी अगुवामन में से ढेइरमन यीशु केर उपरे बिसवास करलैं, मगर फरीसी दल केर आदमीमन केर डार से कि उमन के यहूदी मनक प्रार्थना घर से निकलाय देबैं, अपन बिसवास के खोइल के नी बतालैं। काले कि उमन के परमेश्‍वर केर बड़ाई से बगरा आदमीमन केर बड़ाई बेस लगत रहे। यीशु भीड़ केर आदमीमन के हकाय के कहलक, “जे मोर उपरे बिसवास करेला, उ मोर उपरे निहीं मगर जे मोके भेइज हे, उकर उपरे बिसवास करेला। आउर जे मोके देखेला, उ मोके निहीं मगर मोर भेजेक वाला के देखेला। मोंय इंजोत बाइन के दुनिया में आय हों, ताकि जे केऊ मोर उपरे बिसवास करी, उ अंधार में ना रहोक। अगर केऊ मोर गोइठमन के सुइन के उके नी मानेला, तो मोंय उके दोषीदार नी ठहरावना काले कि मोंय दुनिया केर आदमीमन के दोषी ठहराएक लगिन नी आय हों, मगर उमन के बचाएक लगिन आय हों। जे मोके तुच्छ जानेला आउर मोर गोइठमन के मानेक से मना करेला, उकर न्याय करेक लगिन एक झन अहे, जे बचन मोंय कइह हों, ओहे आखरी दिन उके दोषीदार ठहराई। काले कि मोंय इ गोइठ खुद अपन बटे से नी कइह हों, मगर आबा परमेश्‍वर जे मोके भेइज हे, ओहे मोके आगया देई हे कि का-का कहमूँ? आउर का-का बोलमूँ? आउर मोंय जानोना कि उकर आगया जुग-जुग केर जिंदगी पावेक लगिन अगुवाई करेला। से लगिन मोंय तोहरेमन के ओहे बतावना, जेके आबा परमेश्‍वर मोर से कहेला।” यहूदी मनक फसह परब से आगे हें यीशु जाइन गेलक कि उकर लगिन इ दुनिया के छोइड़ के अपन आबा परमेश्‍वर ठिना घूइर जाएक केर बेरा आय पोंहइच हे। से लगिन अपन आदमीमन से, जे इ दुनिया में रहैं, जेमन से उ प्रेम करत रहे आखरी समय तक प्रेम करलक। यीशु राइत के अपन चेलामन केर संगे खात रहे। शैतान आगे से हें यीशु के धोखा देवेक लगिन सिमोन केर बेटा यहूदा के उसकाय रहे, जे इस्करियोत गाँव केर रहे। यीशु इ जानत रहे कि आबा परमेश्‍वर सोउब कुछ उकर हाँथ में देई दे हे आउर एहो जानत रहे कि उ परमेश्‍वर ठिना से आय हे आउर परमेश्‍वर ठिना जाथे। से लगिन उ खाएक से उइठ गेलक। आउर अपन बाहरी लुगा के उतराय के अपन डाँड़ा में गमछा के बाँधलक। उकर पाछे उ परात में पानी भाइर के अपन चेलामन केर गोड़ के धोवेक लगलक आउर डाँड़ा में बाँधल गमछा से पोछेक लगलक। जब यीशु सिमोन पतरस ठिना आलक, तब पतरस उकर से कहलक, “हे प्रभु, का तोंय मोर गोड़ धोबे?” यीशु उके जबाब देलक, “तोंय एखन इकर मतलब नी बुझबे कि मोंय का कराथों, इके तोंय पाछे बुझबे।” पतरस उकर से कहलक, “मोंय तोके अपन गोड़ धोवेक कहियो नी देमूँ।” इ सुइन के यीशु उकर से कहलक, “अगर मोंय तोके नी धोमूँ, तो मोर संगे तोर कोनों नाता नी रही।” तब सिमोन पतरस उकर से कहलक, “हे प्रभु, तब तो तोंय मोर गोड़ भइर के निहीं मगर हाँथ आउर मूँड़ के हों धोई दे।” यीशु उकर से कहलक, “जे आदमी नहाय चुइक हे, उके सिरिफ अपन गोड़ धोवेक केर जरुरी अहे, उकर पूरा काया सफा अहे। तोहरेमन सोउब सफा अहा, मगर एगो सफा नखे।” यीशु इ जानत रहे कि के उके धरुवाई। से लगिन उ कहलक, “मगर एगो सफा नखे।” जब यीशु उ मनक गोड़ धोई सिरालक तब उ अपन बाहरी लुगा पिंध के फिन बाइठ गेलक। आउर अपन चेलामन से कहेक लगलक, “का तोहरेमन बुझला कि मोंय तोहर संगे का करलों? तोहरेमन मोके गुरु आउर प्रभु कहाला, आउर ठीक हें कहाला, काले कि मोंय तोहर गुरु आउर प्रभु हेकों। अगर मोंय तोहर प्रभु आउर गुरु होई के तोहर गोड़ धोई हों तो तोहरेमन के हों एक दोसर केर गोड़ धोवेक चाही। काले कि मोंय तोहरेमन के उदाहरन देखाय हों, जइसन मोंय तोहर संगे काइर हों, तइसनेहें तोहरेमन हों करते रहबा। मोंय तोहरेमन से सच-सच कहाथों, धांगर अपन मालिक से बाड़ नी होवेला आउर ना भेजल वाला अपन भेजेक वाला से बाड़ होवेला। तोहरेमन तो इ गोइठमन के जानाला, से लगिन इ सोउब के करते रहा ताकि तोहरेमन धाइन होई जबा। मोंय तोहरे सोउब केर बारे में इ नी कहाथों। मोंय जानोना कि मोंय कोन आदमीमन के चुइन हों, मगर इ गोइठ इ लगिन होवाथे कि पवितर किताब में लिखल इ बचन पूरा होई जाओक, ‘जे मोर संगे खालक, ओहे मोर बिरोध में उठलक।’ अब मोंय तोहरेमन के इ घटना होवेक से आगे इ बताथों, जेकर से जब इ घटना होवी तब तोहरेमन बिसवास करबा कि मोंय ओहे हेकों। मोंय तोहरेमन से सच कहाथों कि जे मोर भेजल आदमीमन केर स्वागत करेला, उ मोर स्वागत करेला। आउर जे मोर स्वागत करेला, उ मोर भेजेक वाला परमेश्‍वर केर स्वागत करेला।” इ गोइठमन कहेक केर पाछे यीशु आत्मा में बेचाइन होवेक लगलक आउर अपन चेलामन के बतालक, “मोंय तोहरेमन से सच-सच कहाथों, तोहरेमन में से एगो मोके धरुवाई।” चेलामन शंका काइर के एक दोसर के देखेक लगलैं कि उ केकर बारे में कहाथे। यीशु केर एगो चेला जेकर से उ प्रेम करत रहे, यीशु ठिना बाइठ रहे। तब सिमोन पतरस उकर से इशारा काइर के कहलक, “पूछ तो, उ केकर बारे में कहाथे।” तब उ चेला यीशु बटे झुइक के पूछलक, “हे प्रभु उ के हेके?” यीशु उके जबाब देलक, “मोंय जेके इ रोटी केर टुकरा के तरी में डुबाय के देमूँ, ओहे हेके।” आउर उ रोटी केर टुकरा के तरी में डुबाय के सिमोन केर बेटा यहूदा के देलक, जे इस्करियोत गाँव केर रहेक वाला रहे। आउर जइसनेहें यहूदा रोटी केर टुकरा खालक शैतान उकर में ढूइक गेलक। तब यीशु उकर से कहलक, “तोके जे करेक अहे उके तुरते कर।” खाएक बइठेक वालामन केऊ नी बुझलैं कि यीशु उकर से इ गोइठ काले कहलक। यहूदा ठिना पइसा केर थैला रहत रहे, से लगिन थोरेक चेलामन बुझलैं कि यीशु उकर से इ कहलक, “हमरे के परब लगिन जे कुछ चाही, उके कीन ले,” या “गरीब आदमीमन के थोरेक दान देई दे।” रोटी केर टुकरा खाएक केर पाछे यहूदा तुरते बाहरे चाइल गेलक। आउर इ राइत केर बेरा रहे। यहूदा केर चाइल जाएक केर पाछे यीशु कहलक, “अब मोंय आदमी केर बेटा केर महिमा होलक, आउर इकर से परमेश्‍वर केर हों महिमा उकर में होलक। आउर परमेश्‍वर हों अपन में उकर महिमा करी, आउर उ उके तुरते करी। हे मोर दुलारामन, मोंय आउर थोरेक देरी तोहर संगे अहों। तोहरेमन मोके खोजबा आउर जइसन मोंय यहूदी धरम केर अगुवामन के कइह हों, तइसनेहें तोहरेमन से हों कहाथों कि जहाँ मोंय जाथों, हूवाँ तोहरेमन आवेक नी पारबा। मोंय तोहरेमन के एगो नवाँ आगया देवाथों, ‘तोहरेमन एक दोसर से प्रेम करा।’ जइसन मोंय तोहरेमन से प्रेम करोना, ओहे लेखे तोहरेमन हों एक-दोसर से प्रेम करा। अगर तोहरेमन एक-दोसर से प्रेम करबा, तो उकरे से सोउब आदमीमन जाइन जाबैं कि तोहरेमन मोर चेलामन हेका।” सिमोन पतरस यीशु से कहलक, “हे प्रभु, तोंय कहाँ जाथिस?” यीशु उके जबाब देलक, “जहाँ मोंय जाथों, हूवाँ तोंय एखन मोर पिछे आवेक नी पारबे, मगर पाछे तोंय मोर पिछे आबे।” पतरस उकर से कहलक, “हे प्रभु एखन मोंय तोर पिछे काले आवेक नी पारमूँ? मोंय तो तोर लगिन अपन जान के हों देई देमूँ।” यीशु उके जबाब देलक, “तोंय मोर लगिन अपन जान के देबे? मोंय तोर से सच-सच कहाथों कि मुरगा बोलेक से आगे तोंय तीन बेर मोके चिन्हेक से मुकाइर जाबे।” यीशु आगे कहलक, “तोहरेमन ना अकबकाबा, परमेश्‍वर केर उपरे बिसवास करा आउर मोर उपरे हों बिसवास करा। मोर आबा परमेश्‍वर केर घर में रहेक लगिन ढेइर ठाँव अहे, अगर एइसन नी होतक तो मोंय तोहरेमन के बताय देतो, काले कि मोंय तोहर लगिन ठाँव तेयार करेक जाथों। आउर ठाँव तेयार करेक केर पाछे मोंय फिन आमूँ आउर तोहरेमन के अपन संगे रहेक लगिन लेई जामूँ, ताकि जहाँ मोंय रहमूँ हूवाँ तोहरेमन हों रहबा। मोंय जे ठाँव जाथों, तोहरेमन हूवाँ केर डहर जानाला।” थोमा उकर से कहलक, “हे प्रभु, हमरे नी जानिला कि तोंय कहाँ जाथिस, तो हूवाँ केर डहर के कइसन जानब?” यीशु उकर से कहलक, “डहर आउर सच्चाई आउर जिंदगी मोंय हें हेकों, बिना मोर से होई के केऊ आबा परमेश्‍वर ठिना पोंहचेक नी पारी। अगर तोहरेमन मोके जानता, तो मोर आबा परमेश्‍वर के हों जानता। आउर अब से तोहरेमन उके जानाला, आउर तोहरेमन उके देखबो काइर हा।” फिलिप्पुस उकर से कहलक, “हे प्रभु, हमरे के आबा परमेश्‍वर के देखाय दे। एतना हें हमर लगिन ढेइर अहे।” यीशु उकर से कहलक, “हे फिलिप्पुस, मोंय एतना दिन से तोहर संगे अहों, फिन भी तोंय मोके नी जानिसला? जे मोके देइख हे, उ आबा परमेश्‍वर के हों देइख हे। फिन तोंय काले कहिसला कि आबा परमेश्‍वर के हमरे के देखाय दे। का तोंय बिसवास नी करिसला कि मोंय आबा में अहों आउर आबा परमेश्‍वर मोर में अहे? मोंय जे शिक्षा तोहरेमन के देवाथों, उ मोर अपन शिक्षा ना लगे। मगर आबा परमेश्‍वर मोर में रइह के अपन काममन के करेला। मोर इ गोइठ केर उपरे बिसवास करा कि मोंय आबा परमेश्‍वर में अहों आउर आबा परमेश्‍वर मोर में अहे, निहीं तो जे चमत्कार केर काममन के मोंय काइर हों, उकर खातिर मोर उपरे बिसवास करा। मोंय तोहरेमन से सच-सच कहाथों कि जे मोर उपरे बिसवास करेला, उ आदमी उ काममन के करी, जेके मोंय करोना। बल्कि उ इ काममन से हों बाड़ काममन के करी, काले कि मोंय आबा परमेश्‍वर ठिना जाथों। आउर जे कोनों तोहरेमन मोर नाँव से माँगबा, उके मोंय पूरा करमूँ, जेकर से बेटा बटले आबा परमेश्‍वर केर महिमा होवोक। अगर तोहरेमन मोर नाँव लेई के मोर से कोनों माँगबा, तो मोंय उके पूरा करमूँ। अगर तोहरेमन मोर से प्रेम कराला तो मोर आगयामन के मानबा। मोंय आबा परमेश्‍वर से प्रार्थना करमूँ कि उ तोहर मदइत करेक लगिन एगो दूसरा मदइत करेक वाला के भेजोक, जे सोउब बेरा तोहर संगे रही। उ पवितर आत्मा हेके, जे परमेश्‍वर केर बारे में सच्चाई के देखायला, जेके दुनिया केर आदमीमन मानेक नी पारैना, काले कि उमन उके ना तो देखैना आउर ना जानैना। तोहरेमन उके जानाला, काले कि उ तोहर संगे रहेला, आउर उ तोहर में रही। मोंय तोहरेमन के अनाथ नी छोड़मूँ, मोंय तोहर ठिना फिन घूइर आमूँ। मोंय थोरहें देरी आउर रहमूँ, फिन दुनिया केर आदमीमन मोके नी देखबैं, मगर तोहरेमन मोके देखबा, काले कि मोंय जिंदा अहों, से लगिन तोहरेमन हों जिंदा रहबा। जब मोंय फिन से जिंदा होई के घूइर आमूँ तब तोहरेमन जाइन जबा कि मोंय अपन आबा परमेश्‍वर में अहों आउर तोहरेमन मोर में अहा, आउर मोंय तोहरेमन में अहों। जेमन मोर आगया के जानैना आउर उके मानैना, ओहेमन मोर से प्रेम करैना, आउर जेमन मोर से प्रेम करैना, उमन से मोर आबा परमेश्‍वर प्रेम करी, आउर मोंय हों उमन से प्रेम करमूँ, आउर उ मनक उपरे खुद के दिस्तार करमूँ।” दोसर यहूदा जे इस्करियोत गाँव केर नी रहे, यीशु से कहलक, “हे प्रभु, तोंय हमर उपरे खुद के दिस्तार करबे आउर दुनिया केर आदमीमन उपरे निहीं, इकर का कारण हेके?” यीशु उके जबाब देलक, “मोंय खुद के एइसन आदमीमन उपरे दिस्तार करोना, जेमन मोर से प्रेम करैना आउर मोर बचन के मानैना। उमन से मोर आबा परमेश्‍वर हों प्रेम करी, आउर हमरे उमन ठिना आवब आउर उमन संगे रहब। जेमन मोर से प्रेम नी करैना, उमन मोर बचन के नी मानैना, आउर जे बचन तोहरेमन सुनाला, उ मोर ना लगे, उ मोर आबा परमेश्‍वर केर हेके, जे मोके भेइज हे। इ गोइठमन के मोंय तोहर संगे रहते हें तोहर से कइह हों। मगर मदइत करेक वाला मतलब पवितर आत्मा, जेके आबा परमेश्‍वर मोर अधिकार के देई के भेजी, उ तोहरेमन के सोउब गोइठमन के सिखाई, आउर जे कुछ मोंय तोहरेमन से कइह हों, उ सोउब के तोहरेमन के याइद करवाई। मोंय तोहरेमन के शांति देई के जाथों, अपन शांति तोहरे के देवाथों, इ उ शांति ना लगे जेके दुनिया देवेला, तोहर जीउ ना घबराओक आउर ना डराओक। तोहरेमन मोके इ कहते सुनला, ‘मोंय जाथों आउर फिन तोहर ठिना घूइर आमूँ।’ अगर तोहरेमन मोर से प्रेम करता तो इ गोइठ से खुश होता कि मोंय आबा परमेश्‍वर ठिना जाथों, काले कि आबा परमेश्‍वर मोर से महान अहे। इ सोउब होवेक से आगे हें तोहरेमन के इ गोइठमन के बताय देलों, जेकर से जब इ गोइठ पूरा होई जाई, तो तोहरेमन मोर उपरे बिसवास करबा। मोर ठिना तोहर संगे गोठियाएक लगिन ढेइर समय नी बाइच हे, काले कि इ दुनिया केर सरदार शैतान आवाथे। मोर उपरे उकर कोनों अधिकार नखे। मगर इ जरुरी अहे कि दुनिया केर आदमीमन जाइन जाओक कि मोंय आबा परमेश्‍वर से प्रेम करोना। आउर आबा परमेश्‍वर मोके जइसन आगया देई हे, तइसनेहें मोंय करोना। चला उठा, हमरे हिंयाँ से जाब।” यीशु कहलक, “मोंय असली अंगूर केर बुदा नियर अहों, आउर मोर आबा परमेश्‍वर किसान नियर अहे। जे लरंग मोर में जुड़ल अहे, आउर उ नी फारेला, तो उके मोर आबा परमेश्‍वर काइट देवेला, आउर जे लरंग फारेला, उके आबा परमेश्‍वर छाँटेला ताकि उ लरंग ढेइर फारोक। तोहरेमन तो उ बचन केर चलते जे मोंय तोहरेमन के बताय देई हों, शुद्ध अहा। तोहरेमन मोर में बनल रहा आउर मोंय तोहर में बनल रहमूँ। जे लेखे लरंग अगर अंगूर केर बुदा में बनल नी रही, तो खुद से फारेक नी पारी, तइसनेहें तोहरेमन हों अगर मोर में बनल नी रहबा, तो कोनोवें करेक नी पारबा। मोंय अंगूर केर बुदा नियर अहों, तोहरेमन उकर लरंग नियर अहा, जे लेखे लरंग अंगूर केर बुदा में जुड़ल रहेला, तब उ फारेला, सेहे नियर जे मोर में बनल रहेला आउर मोंय उकर में बनल रहोना, तो उ बगरा फरेला, काले कि मोर से अलग होई के तोहरेमन कोनोवें करेक नी पारबा। अगर जे आदमी मोर में बनल नी रहेला, तो उके नी फारेक वाला लरंग नियर काइट के फेइक देवल जायला, आउर उ सूइख जायला, आउर आदमीमन उके ठुराय के पोड़ाय देवैना। अगर तोहरेमन मोर में बनल रहबा, आउर मोर बचन तोहर में बनल रही, तो तोहरेमन के जे चाही उके माँगबा, तो मोंय तोहर लगिन उके देमूँ। मोर आबा परमेश्‍वर केर महिमा इकरे से होवेला कि तोहरेमन ढेइर फार लाना, तब तोहरेमन मोर चेला कहाबा। जे नियर आबा परमेश्‍वर मोर से प्रेम काइर हे, सेहे नियर मोंय हों तोहरेमन से प्रेम काइर हों, मोर प्रेम में बनल रहा। अगर तोहरेमन मोर आगयामन के मानबा, तो मोर प्रेम में बनल रहबा, जइसन मोंय अपन आबा परमेश्‍वर केर आगयामन के मानोना, आउर उकर प्रेम में बनल रहोना। मोंय तोहरेमन से इ गोइठमन के इ लगिन कइह हों कि जे खुशी मोर में अहे ओहे खुशी तोहर में बनल रहोक, ताकि तोहर खुशी पूरा होई जाओक। मोर आगया इ हेके, ‘जइसन मोंय तोहरेमन से प्रेम काइर हों, तइसनेहें तोहरेमन हों एक-दोसर से प्रेम करा।’ सोउब से बड़का प्रेम जे तोहरे अपन संगीमन केर लगिन देखाएक पाराला, उ इ हेके कि उमन लगिन जान के देवेक। इकर से बड़का प्रेम आउर कोनों नखे। जे आगया मोंय तोहरेमन के देवाथों, अगर तोहरेमन उ सोउब के मानबा तो तोहरेमन मोर संगी हेका। अब से मोंय तोहरेमन के धांगर नी कहमूँ। धांगर नी जानेला कि उकर मालिक का करेला। से लगिन मोंय तोहरेमन के संगी कइह हों, काले कि मोंय जे गोइठमन के अपन आबा परमेश्‍वर से सुनलों, उ सोउब के तोहरेमन के बताय देई हों। तोहरेमन मोके नी चुनला मगर मोंय तोहरेमन के चुनलों आउर ठहरालों। ताकि तोहरेमन दुनिया केर आदमीमन ठिना जाय के फार लानबा आउर तोहर फार बनल रहोक, काले कि तोहरेमन मोर चेला हेका से लगिन तोहरेमन के जे कोनों चाही, उके मोर नाँव लेई के मोर आबा परमेश्‍वर से माँगबा, तो उ तोहरेमन के देई देवी। मोंय तोहरेमन के इ आगयामन के इ लगिन देवाथों कि तोहरेमन एक-दोसर से प्रेम करा। अगर दुनिया केर आदमीमन तोहरेमन से बैर करैना, तो तोहरेमन इ गोइठ के याइद करा कि उमन तोहरेमन से आगे मोर से बैर करलैं। अगर तोहरेमन दुनिया केर आदमीमन नियर होता, तो दुनिया केर आदमीमन अपन जाइन के मन से प्रेम करतैं, मगर तोहरेमन दुनिया केर आदमीमन से नाता नी रखाला। काले कि मोंय तोहरेमन के दुनिया केर आदमीमन में से चुइन लेई हों। एहे लगिन दुनिया केर आदमीमन तोहरेमन से बैर करैना। जे गोइठ मोंय तोहरेमन के बताय रहों, उके याइद करा। धांगर अपन मालिक से बाड़ नी होवेला, अगर उमन मोके, जे मालिक हेकों सतालैं, तो तोहरेमन के हों सताबैं। अगर उमन मोर बचन के माइन हैं, तो तोहर बचन के हों मानबैं। तोहरेमन मोर चेला हेका से लगिन उमन इ सोउब कुछ तोहर संगे करबैं, काले कि उमन मोके भेजेक वाला परमेश्‍वर के नी जानैना। अगर मोंय नी आतों आउर उमन के बचन के नी बतातों, तो उमन पापी नी गिनातैं मगर अब उमन ठिना अपन पाप केर लगिन कोनों बहना नखे। जे मोर से बैर करेला, उ मोर आबा परमेश्‍वर से हों बैर करेला। अगर मोंय उमन केर माझे उ चमत्कार केर काममन के नी करतो, जे काममन के आउर केऊ हों नी काइर हैं, तो उमन पापी नी गिनातैं। मगर अब तो उमन इ काममन के देखलैं, फिन भी मोर से आउर मोर आबा परमेश्‍वर से बैर काइर हैं। मगर एइसन इ लगिन होलक कि मूसा केर नियम में लिखल इ बचन पूरा होई जाओक, ‘उमन बे मतलब केर मोर से बैर करलैं।’ मगर मोंय आबा परमेश्‍वर बटे से तोहर लगिन एगो मदइत करेक वाला के भेजमूँ, उ सच्चाई केर आत्मा हेके, जे आबा परमेश्‍वर बटे से आवेला आउर जे सच्चाई हेके, उखे दिस्तार करेला। उ तोहरेमन के मोर बारे में बताई। आउर तोहरेमन दुनिया केर आदमीमन के मोर बारे में बताबा, काले कि तोहरेमन शुरु से मोर संगे अहा।” यीशु कहलक, “मोंय तोहरेमन के इ गोइठमन के इ लगिन कहलों कि जब दुनिया तोहरे से बैर करी, तब तोहरेमन मोर उपरे बिसवास करेक ना छोड़बा। उमन तोहरेमन के यहूदी मनक प्रार्थना घरमन में से निकलाय देबैं, हिंयाँ तक कि उ समय आवाथे, जब तोहरेमन के मोराएक वालामन इ बुझबैं कि उमन परमेश्‍वर केर सेवा कराथैं। उमन एइसन इ लगिन करबैं काले कि उमन ना तो आबा परमेश्‍वर के जाइन हैं आउर ना मोके जाइन हैं। मगर इ गोइठमन के मोंय इ लगिन तोहरेमन से कहलों कि जब उमन केर समय आवी, तो तोहरेमन के याइद आय जाओक कि मोंय तोहरेमन के उकर बारे में आगे हें बताय देई रहों। आउर जब तोहरेमन शुरु में मोर चेला बनला तब इ गोइठमन के इ लगिन नी बतालों, काले कि मोंय तोहर संगे रहों। मगर अब मोंय अपन भेजेक वाला ठिना जाथों, आउर तोहर में से केऊ मोके इ नी पूछाथा कि तोंय कहाँ जाथिस? मोंय तोहरेमन के इ गोइठमन के बताय देलों, से लगिन तोहरेमन ढेइर उदास अहा। फिन भी मोंय तोहरेमन से सच कहाथों कि मोर जाएक तोहर लगिन बेस हेके, काले कि अगर मोंय नी जामूँ, तो उ मदइत करेक वाला तोहर ठिना नी आवी, आउर अगर मोंय जामूँ तो उके तोहर ठिना भेइज देमूँ। जब उ आवी तो दुनिया केर आदमीमन के पाप आउर धरमी बनेक आउर परमेश्‍वर केर न्याय केर बारे में सच्चाई के बताई। पाप केर बारे में इ बताई कि उमन मोर उपरे बिसवास नी करैना। आउर धरमी बनेक केर बारे में इ बताई कि मोंय आबा परमेश्‍वर ठिना जाथों। आउर तोहरेमन मोके फिन देखबा, न्याय केर बारे में इ बताई कि दुनिया केर सरदार शैतान दोषी ठहराल जाय हे। मोंय तोहरेमन के आउर हें ढेइर गोइठमन के बताएक चाहाथों, मगर एखन तोहरेमन उके सहेक नी पारबा। मगर जब उ सच्चाई केर आत्मा आवी, तो उ परमेश्‍वर केर बारे में जे भी सच्चाई अहे, उके बुझेक में तोहरेमन केर मदइत करी। काले कि उ अपन बटे से नी कही, मगर जे कुछ परमेश्‍वर बटे से सुनी उखे कही, आउर तोहरेमन के आवेक वाला गोइठमन केर बारे में बताई। उके मोर बटे से जे कुछ मिल हे, उखे तोहरेमन के बताई, जेकर से मोर महिमा होवी। जे कुछ आबा परमेश्‍वर केर हेके, उ सोउब मोर हेके। से लगिन मोंय कहलों कि उके मोर बटे से जे कुछ मिल हे, उखे तोहरेमन के बताई। थोरेक देरी पाछे तोहरेमन मोके नी देखबा आउर थोरेक देरी पाछे तोहरेमन मोके फिन देखबा।” इ सुइन के यीशु केर थोरेक चेलामन आपस में कहलैं, “उ हमरे से जे कहाथे, ‘थोरेक देरी पाछे तोहरेमन मोके नी देखबा, आउर थोरेक देरी पाछे तोहरेमन मोके फिन देखबा।’ आउर ‘काले कि मोंय आबा परमेश्‍वर ठिना जाथों।’ इकर का मतलब हेके?” उमन एक दोसर से पूछते रहलैं, “उ जे ‘थोरेक देरी’ कहाथे, इकर का मतलब हेके? हमरे उकर गोइठ के बुझेक नी पाराथी।” यीशु इ जानत रहे कि उमन मोर से इ गोइठमन केर मतलब पूछेक चाहाथैं, उमन से कहलक, “का तोहरेमन आपस में मोर इ गोइठ केर बारे में पूछा-पूछी कराथा कि थोरेक देरी पाछे तोहरेमन मोके नी देखबा आउर थोरेक देरी पाछे तोहरेमन मोके फिन देखबा? मोंय तोहरेमन से सच-सच कहाथों कि मोर मोरेक केर पाछे तोहरेमन काँदबा आउर दुःख मनाबा, मगर दुनिया केर आदमीमन खुशी मनाबैं। मोर मोरेक से तोहरेमन दुःखी होबा मगर जब मोंय फिन से जी उठमूँ, तो तोहर दुःख खुशी में बदइल जाई। जब जनाना केर छउवा जनमाएक केर बेरा होई जायला, तो उके ढेइर बथेला, काले कि उकर दुःख उठाएक केर बेरा पोंहइच रहेला, मगर छउवा जनमाएक केर पाछे उ अपन बथा के भुलाय देवेला आउर खुशी होवेला काले कि दुनिया में एगो आदमी केर जनम होई हे। एहे लेखे तोहरेमन एखन दुःख में अहा, मगर मोंय तोहरेमन के फिन देखमूँ, आउर तोहरेमन खुश होई जबा। आउर तोहर इ खुशी के केऊ लुटेक नी पारी। जे दिन तोहरेमन मोके फिन देखबा, उ दिन मोर से कोनों सवाल नी पूछबा। मोंय तोहर से सच-सच कहाथों, तोहरेमन मोर चेला हेका, से लगिन जे कोनों तोहरेमन के चाही, तो उके मोर नाँव लेई के मोर आबा परमेश्‍वर से माँगबा। तो उ तोहरेमन के देई देवी। अब तक तोहरेमन मोर चेला होई के हों मोर नाँव लेई के मोर आबा परमेश्‍वर से कोनों नी माँइग हा, माँगा, तब तोहरेमन के भेटाई। जेकर से तोहर खुशी पूरा होई जाई। मोंय इ गोइठमन के उदाहरन में कइह हों मगर अब उ समय आवाथे कि मोंय उदाहरन में कोनोवें नी कहमूँ, मगर सोझे आबा परमेश्‍वर केर बारे में बतामूँ। तोहरेमन मोर चेला हेका, से लगिन उ दिन तोहरेमन के जे चाही, उके मोर नाँव लेई के मोर आबा परमेश्‍वर से माँगबा। आउर मोके तोहर लगिन अपन आबा परमेश्‍वर से प्रार्थना करेक केर जरुरत नी होवी। मोर आबा परमेश्‍वर तो खुद हें तोहरेमन से प्रेम करेला, काले कि तोहरेमन मोर से प्रेम कराला, आउर तोहरेमन एहो बिसवास काइर हा कि मोंय आबा परमेश्‍वर केर बटे से आय हों। मोंय आबा परमेश्‍वर केर बटे से इ दुनिया में आय हों। आउर अब मोंय फिन इ दुनिया के छोइड़ के आबा परमेश्‍वर ठिना जाथों।” यीशु केर चेलामन उकर से कहलैं, “देख, अब तो तोंय परमेश्‍वर केर गोइठमन के उदाहरन में नी बताथिस, मगर सोझे बताथिस। अब हमरे जाइन गेली कि तोंय सोउब कुछ जानिसला, आउर तोर गोइठमन के बुझेक लगिन केखो तोर से सवाल पूछेक केर जरुरत नी होवी। से लगिन हमरे बिसवास करिला कि तोंय परमेश्‍वर बटे से आय हिस।” इ सुइन के यीशु उमन से कहलक, “का तोहरेमन अब बिसवास कराला? देखा, उ बेरा आवाथे, आउर आइये जाहे, जब तोहरेमन सोउब तितिर-बितिर होई के अपन-अपन घर घूइर जबा, आउर मोके एकले छोइड़ देबा। फिन भी मोंय एकले नखों काले कि मोर आबा परमेश्‍वर मोर संगे अहे। मोंय तोहरेमन के इ गोइठमन के आगे हें बताय देलों, ताकि तोहरेमन के शांति मिलोक। दुनिया में तोहरेमन के दुःख सहेक होवी, मगर ढाढ़स बाँधा, मोंय दुनिया केर सरदार शैतान के हराय देई हों।” यीशु अपन चेलामन से इ गोइठमन के कहेक केर पाछे स्वरग बटे देइख के कहलक, “हे आबा परमेश्‍वर, उ बेरा आय जाहे कि तोंय मोर महिमा कर, जे तोर अपन बेटा हेकों, जेकर से मोंय तोर बेटा हों तोर महिमा करमूँ। काले कि तोंय मोके जे तोर बेटा हेकों, सोउब आदमीमन केर उपरे अधिकार देले, जेकर से मोंय सोउब आदमीमन के जेमन के तोंय मोके जिम्मा देई हिस, जुग-जुग केर जिंदगी देमूँ। आउर जुग-जुग केर जिंदगी इ हेके कि उमन तोके जे एके गो सच्चा परमेश्‍वर हेकिस आउर मोंय यीशु मसीह के, जेके तोंय भेइज हिस, जानोक। जे काम तोंय मोके करेक ले देई रहिस, उके मोंय पूरा काइर के दुनिया में तोर महिमा काइर हों। आउर अब, हे आबा परमेश्‍वर, तोंय अपन संगे मोर महिमा उ महिमा से कर, जे दुनिया केर सिरजन होवेक से आगे मोर, तोर संगे रहे। तोंय जे आदमीमन के दुनिया केर आदमीमन में से चुइन के मोके देले। उमन के मोंय बतालों कि तोंय के हेकिस, उमन तोर रहैं आउर तोंय उमन के मोके देले आउर उमन तोर बचन के माइन लेई हैं। अब उमन जाइन जाय हैं कि जे कुछ तोंय मोके देई हिस, सोउब तोर बटे से अहे। काले कि जे बचन तोंय मोके देई हिस, ओहे बचन मोंय उमन के बतालों आउर उमन बचन केर उपरे बिसवास करलैं। आउर सचमुच जाइन गेलैं कि मोंय तोर बटे से आय हों आउर एहो बिसवास काइर लेई हैं कि तोंय हें मोके भेइज हिस। मोंय उमन लगिन प्रार्थना नी कराथों, जेमन दुनिया से नाता रखैना मगर उमन लगिन प्रार्थना कराथों, जेमन के तोंय मोके देई हिस, काले कि उमन तोर हेकैं। आउर जेमन मोर हेकैं, उमन सोउब तोर हेकैं, आउर जेमन तोर हेकैं, उमन सोउब मोर हेकैं। आउर उमन से मोर महिमा दिस्तार होई हे। मोंय अब दुनिया में नी रहमूँ, मोंय तोर ठिना आवाथों मगर मोर चेलामन दुनिया में रहबैं। हे पवितर आबा परमेश्‍वर, तोंय उ नाँव केर शक्ति से जेके तोंय मोके देई हिस, उमन केर रक्षा कर। जेकर से उमन हों हमर लेखे एक होबैं। जब मोंय उमन केर संगे रहों, तो मोंय तोर उ नाँव केर शक्ति से जेके तोंय मोके देई हिस, उमन केर रक्षा करलों, मोंय उमन केर देख-रेख करलों। जेकर नाश होवेक पक्का रहे, उके छोइड़ के उमन में से केऊ नाश नी होलैं। जेकर से पवितर किताब में लिखल गोइठ पूरा होवोक। मगर अब मोंय तोर ठिना आवाथों, आउर इ गोइठमन के दुनिया में रहते कहाथों। जेकर से उ मनक मन मोर खुशी से भाइर जाओक। मोंय तोर बचन के उमन के बताय देई हों, आउर दुनिया केर आदमीमन उमन से घिरना करलैं। काले कि जइसन मोर दुनिया से कोनों नाता नखे, तइसनेहें उमन केर हों दुनिया से कोनों नाता नखे। मोंय तोर से इ प्रार्थना नी कराथों कि तोंय उमन के दुनिया से उठाय ले, मगर मोंय इ लगिन प्रार्थना कराथों कि तोंय उमन के उ दुष्ट शैतान से बचाय के रखबे। जइसन कि मोर दुनिया से कोनों नाता नखे, तइसनेहें उमन केर हों दुनिया से कोनों नाता नखे। तोर बचन सच्चा हेके। से लगिन तोंय सच्चाई केर बचन से उमन के पवितर बनाव। जे लेखे तोंय मोके दुनिया केर आदमीमन केर माझे भेइज हिस, ओहे लेखे मोंय हों उमन के दुनिया केर आदमीमन केर माझे भेइज हों। आउर उमन केर फायदा लगिन मोंय खुद के पवितर कराथों, जेकर से उमन हों सच्चाई केर बचन से पवितर करल जाओक। मोंय सिरिफ अपन चेलामन लगिन प्रार्थना नी कराथों, मगर उमन लगिन हों जेमन इमन केर देवल बचन के सुइन के मोर उपरे बिसवास करबैं, कि उमन सोउब एक होई जाओक। हे आबा परमेश्‍वर, जइसन तोंय मोर में अहिस, आउर मोंय तोर में अहों, तइसनेहें उमन हों हमर में होई जाओक। जेकर से इ दुनिया केर आदमीमन इ बिसवास करोक कि तोंय हें मोके भेइज हिस। तोंय जे महिमा मोके देले, ओहे महिमा के मोंय उमन के देई हों, ताकि उमन हों हमर नियर एक होबैं। तोंय मोर में आउर मोंय उमन में, जेकर से उमन पूरा-पुरी एक होई जाओक, आउर दुनिया केर आदमीमन जाइन लेवोक कि तोंय हें मोके भेइज हिस, आउर जे लेखे तोंय मोर से प्रेम करले, ओहे लेखे तोंय उमन से हों प्रेम करले। हे आबा परमेश्‍वर, मोंय चाहाथों कि जेमन के तोंय मोके देई हिस, उमन जहाँ मोंय अहों हूवाँ मोर संगे रहोक, जेकर से उमन मोर महिमा के देखेक पारोक, जेके तोंय मोके देई हिस, काले कि तोंय दुनिया केर सिरजेक से आगे मोर से प्रेम काइर हिस। हे धरमी आबा परमेश्‍वर, दुनिया केर आदमीमन तोके नी जानलैं, मगर मोंय तोके जानलों, आउर मोर चेलामन हों जानलैं कि तोंय हें मोके भेइज हिस। आउर मोंय उमन के बतालों कि तोंय के हेकिस आउर बताते रहमूँ, जेकर से जे प्रेम मोके देई हिस ओहे प्रेम उमन में बनल रहोक आउर मोंय हों उमन में बनल रहमूँ।” बिनती करेक केर पाछे यीशु अपन चेलामन केर संगे किद्रोन नाँव केर घाटी केर उ पखारी गेलक, हूवाँ एगो बगाइचा रहे, जेकर में उ आउर उकर चेलामन गेलैं। यीशु के धरुवाएक वाला इस्करियोत गाँव केर यहूदा हों उ ठाँव के जानत रहे, काले कि यीशु अपन चेलामन केर संगे बराबइर हूवाँ जात रहे। तब यहूदा पलटनमन के आउर यहूदी मुध पुरोहितमन आउर फरीसी दल केर आदमीमन बटले भेजल सिपाहीमन के लेई के हूवाँ आलक। उ मनक हाँथ में दीया, मशाल आउर हँथियारमन रहे। जब यीशु उ सोउब गोइठमन के जे उकर संगे होवेक वाला रहे, जाइन के बाहरे निकललक, आउर उमन से पूछेक लगलक, “तोहरेमन केके खोजाथा?” उमन उके जबाब देलैं, “नासरत नगर केर रहेक वाला यीशु नासरी के खोजाथी।” यीशु उमन से कहलक, “मोंय हें हेकों।” आउर यीशु के धरुवाएक वाला यहूदा हों उमन संगे ठड़ाल रहे। जब यीशु उमन से इ कहलक, “मोंय हें हेकों,” तो उमन पाछे हइट के भूंई उपरे गिर गेलैं। यीशु उमन से फिन पूछलक, “तोहरेमन केके खोजाथा?” उमन कहलैं, “नासरत नगर केर रहेक वाला यीशु नासरी के खोजाथी।” यीशु उमन के जबाब देलक, “मोंय तो तोहरेमन से कइह चुकलों कि मोंय हें हेकों, अगर तोहरेमन मोके खोजाथा तो इ आदमीमन के जाएक देवा।” एइसन इ लगिन होलक कि यीशु जे आगे कइह रहे उ पूरा होई जाओक, “जे आदमीमन के तोंय मोके जिम्मा देले, मोंय उमन में से एको गो के नाश होवेक नी देलों।” सिमोन पतरस ठिना एगो तलवाइर रहे, उ तलवाइर खींचलक आउर यहूदी महापुरोहित केर धांगर उपरे चलाय के, उकर भतखाइया कान के काइट देलक। उ धांगर केर नाँव मलखुस रहे। यीशु पतरस से कहलक, “अपन तलवाइर के अपन म्यान में रख। जे दुःख के आबा परमेश्‍वर मोके उठाएक ले देई हे, का मोंय उके नी उठामूँ?” तब पलटनमन आउर उ मनक सूबेदारमन आउर यहूदी अगुवा मनक सिपाहीमन यीशु के धाइर के बाइंध लेलैं। आउर उमन उके आगे हन्ना ठिना लेई गेलैं, काले कि हन्ना उ साल केर यहूदी महापुरोहित काइफा केर ससुर रहे। इ ओहे काइफा रहे, जे यहूदी धरम केर अगुवामन के सलहा देई रहे कि सोउब आदमीमन लगिन एगो आदमी केर मोरेक बेस अहे। सिमोन पतरस आउर एगो दोसर चेला यीशु केर पिछे-पिछे गेलैं। इ चेला यहूदी महापुरोहित केर जान-चिन्हार रहे, उ यीशु केर संगे महापुरोहित केर अंगना में गेलक। मगर पतरस बाहरे दुरा ठिना ठड़ाल रहलक। से लगिन उ दोसर चेला जे यहूदी महापुरोहित केर जान-चिन्हार रहे, फिन बाहरे निकललक आउर उ जनाना से जे दुरा केर पहरा करत रहे कइह के, पतरस के भीतरे लेई आलक। उ जनाना जे दुरा केर पहरा करत रहे, पतरस से कहलक, “का तोहों इ आदमी केर चेला तो ना लगिस?” पतरस उके जबाब देलक, “निहीं, मोंय ना लगों।” जाड़ केर खातिर धांगर आउर सिपाहीमन कुइला बाइर रहैं आउर ठड़ाय के आइग सेकात रहैं। पतरस हों उमन केर संगे आइग सेकात रहे। यहूदी महापुरोहित यीशु से उकर चेलामन आउर उकर बचन केर बारे में पूछलक। यीशु उके जबाब देलक, “मोंय दुनिया केर सोउब आदमीमन केर माझे खोइल के गोठियालों, मोंय सोउब बेरा यहूदी मनक प्रार्थना घर आउर मंदिर में जहाँ सोउब यहूदी धरम केर अगुवामन जमा होवत रहैं, उपदेस देलों। मोंय लूइक के कोनों नी कहलों। तोंय मोर से इ सवाल काले पूछाथिस? जेमन मोर बचन के सुइन हैं उमन से पूछ कि मोंय उमन से का कहलों। उमन जानैना कि मोंय का कइह हों।” इ सुइन के भीरे ठड़ाल मंदिर केर पहरादारमन में से एगो यीशु के थप्पड़ माइर के कहलक, “तोंय यहूदी महापुरोहित के इ लेखे जबाब देविसला?” यीशु उके जबाब देलक, “अगर मोंय कोनों बुरा कइह हों तो उ बुरा का हेके, हिंयाँ सोउब केर सामने बताव, आउर अगर ठीक कइह हों, तो मोके काले मारले?” तब हन्ना यीशु के बाँधले-बाँधल यहूदी महापुरोहित काइफा ठिना भेइज देलक। सिमोन पतरस उ बेरा ठड़ाय के आइग सेकात रहे। थोरेक आदमीमन उकर से कहलैं, “का तोंय हों उकर चेलामन में से तो ना लगिस?” पतरस मुकइर के कहलक, “निहीं, मोंय ना लगों।” यहूदी महापुरोहित केर एगो धांगर उ आदमी केर रिश्तेदार रहे, जेकर कान के पतरस काइट देई रहे। उ पतरस से कहलक, “का मोंय तोके उकर संगे बगाइचा में नी देइख रहों?” पतरस फिन मुकइर गेलक आउर तुरते मुरगा बोइल देलक। तब उमन यीशु के काइफा ठिना से रोमी राजपाल पिलातुस केर महल में लेई गेलैं। अब बिहान होई जाय रहे, मगर यहूदी धरम केर अगुवामन इ सोइच के महल केर भीतरे नी गेलैं कि उमन गैर यहूदीमन से छुवाय के अशुद्ध होई जाबैं, काले कि उमन के फसह परब केर भोज खाएक रहे। से लगिन राजपाल पिलातुस उमन ठिना बाहरे निकइल के आलक आउर उमन से कहलक, “तोहरेमन इ आदमी केर उपरे कोन गोइठ लगिन दोष लगाथा?” उमन उके जबाब देलैं, “अगर इ गलत काम नी करतक तो हमरे इके तोर हाँथ में जिम्मा नी देती।” राजपाल पिलातुस उमन से कहलक, “तोहरेमन इके लेई जावा आउर अपन नियम केर मोताबिक इकर न्याय करा।” यहूदी धरम केर अगुवामन उकर से कहलैं, “हमरे के केखो मौत केर सजा देवेक केर अधिकार नखे।” एइसन इ लगिन होलक कि यीशु केर उ कहल गोइठ पूरा होई जाओक, जे उ इशारा देते कइह रहे कि उ कइसन मौत से मोरी। तब पिलातुस फिन महल भीतरे गेलक आउर यीशु के बोलाय के उकर से पूछलक, “का तोंय यहूदीमन केर राजा हेकिस?” यीशु उके जबाब देलक, “का तोंय इ गोइठ अपन बटे से कहाथिस या दोसरमन मोर बारे में तोर से इ गोइठ कइह हैं?” पिलातुस जबाब देलक, “का मोंय यहूदी हेकों? तोरे जाइत केर आदमीमन आउर यहूदी मुध पुरोहितमन तोके मोर हाँथ में जिम्मा देई हैं, तोंय का काइर हिस?” यीशु जबाब देलक, “मोर राइज इ दुनिया केर ना लगे। अगर मोर राइज इ दुनिया केर होतक तो मोर चेलामन मोके यहूदी धरम केर अगुवामन केर हाँथ में जिम्मा देवेक केर बिरोध में लड़तैं, मगर अब मोर राइज हिंयाँ केर ना लगे।” पिलातुस यीशु से कहलक, “तो का तोंय राजा हेकिस?” यीशु उके जबाब देलक, “तोंय खुद हें कहाथिस कि मोंय राजा हेकों। मोर दुनिया में जनम लेवेक केर कारण एहे हेके कि मोंय आदमीमन के सच्चाई केर बारे में सिखामूँ, सच्चाई के मानेक वाला सोउब आदमीमन मोर गोइठ के सुनैना।” पिलातुस उकर से कहलक, “सच्चाई का हेके?” आउर इ कइह के उ फिन बाहरे निकइल गेलक आउर यहूदी धरम केर अगुवामन ठिना आय के कहलक, “मोंय उकर में कोनों दोष नी पावाथों। मगर तोहरे केर एगो नियम अहे कि मोंय हर साल फसह परब केर मोका में तोहरे लगिन एगो कैदी के छोइड़ देवोना। का तोहरेमन चाहाला कि मोंय तोहरे लगिन यहूदीमन केर राजा के छोइड़ देमूँ?” तब उमन फिन चिल्लाय के कहलैं, “इके निहीं, मगर हमरे लगिन बरअब्बा के छोइड़ दे।” आउर बरअब्बा बलवा करेक वाला एगो बिद्रोही रहे। तब राजपाल पिलातुस यीशु के लेई जाएक आउर उके कोड़रा मारेक केर हुकूम देलक। आउर सिपाहीमन काँटा वाला डाइर से एगो मुकुट बनाय के उकर मूँड़ में पिंधालैं आउर उके एगो राजा नियर राजसी बैगनी रंग केर लुगा पिंधालैं। फिन उकर ठिना आय के कहेक लगलैं, “हे यहूदीमन केर राजा, प्रणाम!” आउर उमन यीशु के थप्पड़ हों मारलैं। राजपाल पिलातुस फिन महल से बाहरे निकइल के आदमीमन से कहलक, “देखा, मोंय उके तोहर सामने बाहरे लानाथों, जेकर से तोहरेमन जाइन लेवा कि मोंय उकर में कोनों दोष नी पालों।” तब उमन यीशु के काँटा केर मुकुट आउर राजा नियर बैगनी रंग केर लुगा पिंधले बाहरे लानलैं। राजपाल पिलातुस आदमीमन से कहलक, “देखा, इ आदमी के।” तब यहूदी मुध पुरोहितमन आउर मंदिर केर पहरादारमन उके देखते हें, चिल्लाय के कहलैं, “इके क्रूस उपरे चढ़ाव, क्रूस उपरे।” पिलातुस उमन से कहलक, “इके तोहरेमन हें लेई जावा आउर क्रूस उपरे चढ़ावा। मोंय तो इकर में कोनों दोष नी पालों।” यहूदी धरम केर अगुवामन उके जबाब देलैं, “हमर हों एगो नियम अहे आउर उ नियम केर मोताबिक इ मौत केर सजा पावेक लाएक अहे, काले कि इ खुद के परमेश्‍वर केर बेटा बतायला।” पिलातुस इ सुइन के आउर हें डराय गेलक। उ फिन महल केर भीतरे गेलक आउर यीशु से पूछलक, “तोंय कहाँ केर हेकिस?” मगर यीशु उके कोनोवें जबाब नी देलक। पिलातुस यीशु से कहलक, “तोंय मोर से काले कोनों नी कहाथिस? का तोंय इ नी जानिसला कि तोके छोड़ेक केर अधिकार हों मोके अहे आउर तोके क्रूस उपरे चढ़ाएक केर हों अधिकार मोके अहे।” यीशु उके जबाब देलक, “अगर तोके परमेश्‍वर बटे से अधिकार नी देवल जातक, तो मोर उपरे तोर कोनों अधिकार नी होतक। इ लगिन जे मोके तोर हाँथ में जिम्मा देई हे उकर पाप बगरा अहे।” यीशु केर जबाब सुइन के राजपाल पिलातुस उके छोड़ेक केर आउर हें कोशिश करेक लगलक। मगर यहूदी धरम केर अगुवामन आउर भीड़ केर आदमीमन चिल्लाय-चिल्लाय के कहलैं, “अगर तोंय इके छोइड़ देबे तो तोंय महाराजा केर भलाई करेक वाला ना लगिस। जे केऊ हों खुद के राजा कहेला, उ महाराजा केर बिरोध करेला।” इ गोइठ सुइन के राजपाल पिलातुस यीशु के बाहरे लानेक केर आगया देलक। आउर उ पखना केर चबूतरा में जे इब्रानी भाषा में गब्ब्ता कहायला, जहाँ फैसला करेक केर कुरसी रहे, उकर में बाइठ गेलक। इ यहूदी मनक फसह परब केर हफ्ता रहे आउर तेयारी केर दिन रहे। आउर लगभग दूई पहर केर बेरा रहे, पिलातुस यहूदी आदमीमन से कहलक, “देखा, इ हेके तोहरेमन केर राजा।” मगर उमन चिल्लाएक लगलैं, “इके लेई जा! इके लेई जा! इके क्रूस उपरे चढ़ाव।” पिलातुस उमन से कहलक, “का मोंय तोहरेमन केर राजा के क्रूस उपरे चढ़ामूँ?” यहूदी मुध पुरोहितमन जबाब देलैं, “रोमी महाराजा के छोइड़ के हमर केऊ आउर राजा नखे।” तब पिलातुस यीशु के क्रूस उपरे चढ़ाएक लगिन उमन के जिम्मा देई देलक। तब पलटनमन यीशु के अपन कब्जा में लेई लेलैं। आउर उमन उके अपन क्रूस खुद उठवालैं आउर यरुशलेम शहर से बाहरे खोपड़ी नाँव केर एगो ठाँव में लेई गेलैं, जेके इब्रानी भाषा में गुलगुता कहैना। हूवाँ उमन यीशु के आउर उकर संगे आउर दूई झन आदमीमन के क्रूस उपरे चढ़ालैं, एगो के यीशु केर भतखाइया आरा आउर एगो के लेंगा आरा आउर माझे में यीशु के। आउर राजपाल पिलातुस एगो दोष चिट्ठी हों लिखवाय के क्रूस उपरे लगाय देलक। उकर में इ लेखे लिखल रहे, “नासरत नगर केर रहेक वाला यीशु, यहूदीमन केर राजा।” इ दोष चिट्ठी के ढेइर यहूदी आदमीमन पढ़लैं, काले कि उ ठाँव जहाँ यीशु क्रूस उपरे चढ़ाल जाय रहे, यरुशलेम शहर केर भीरे हें रहे आउर दोष चिट्ठी इब्रानी, लतीनी आउर यूनानी भाषा में लिखल रहे। तब यहूदी मुध पुरोहितमन राजपाल पिलातुस से कहलैं, “तोंय यहूदीमन केर राजा ना लीख। मगर इ लीख, ‘इ कइह रहे कि मोंय यहूदीमन केर राजा हेकों।’ ” पिलातुस उमन के जबाब देलक, “मोंय जे लीख देलों, से लीख देलों, अब इके नी बदलमूँ।” यीशु के क्रूस उपरे चढ़ाएक केर पाछे पलटनमन उकर लुगा के लेई के चाइर टुकरा करलैं, आउर चाइरो पलटनमन एक-एक टुकरा लेई गेलैं। आउर उकर बाहरी लुगा के हों लेई गेलैं, उ बाहरी लुगा सियाल नी रहे मगर उपरे से हेंठे तक बिनल रहे। से लगिन पलटनमन एक दोसर से कहलैं, “हमरे इके नी चिरब, मगर इकर लगिन चिट्ठी साजब कि उ केके मिली।” एइसन इ लगिन होलक कि पवितर किताब में लिखल इ गोइठ पूरा होई जाओक, “उमन मोर लुगा के आपस में बाँइट लेलैं आउर मोर लुगा उपरे चिट्ठी साजलैं।” आउर पलटनमन एइसनेहें करलैं। यीशु केर क्रूस ठिना उकर आयो, उकर आयो केर बहिन, क्लोपास केर जनाना मरियम आउर मगदला गाँव केर मरियम ठड़ाय रहैं। यीशु अपन आयो के आउर उकर ठिना ठड़ाल एगो चेला के जेकर से उ प्रेम करत रहे, देखलक तो अपन आयो से कहलक, “हे महिला, देख, इ तोर बेटा हेके।” इकर पाछे यीशु उ चेला से कहलक, “देख, इ तोर आयो हेके।” आउर ओहे बेरा से उ चेला मरियम के अपन घर में लेई गेलक आउर परिवार केर हिस्सा बनालक। इकर पाछे यीशु इ जाइन के कि अपन सोउब काम काइर सिरालक, पवितर किताब में लिखल गोइठ पूरा करेक केर मकसद से कहलक, “मोंय पियासा अहों।” हूवाँ अमल रस से भरल एगो बासन रहे, उमन एगो पाइनसोखा के अमल रस में डुबालैं आउर जुफे गाँछ केर सोंटा में चुभाय के यीशु केर मुँह में सटाय देलैं। यीशु अमल रस के चाइख के कहलक, “सोउब काम पूरा होलक।” आउर मूँड़ झुकाय के प्राण देई देलक। अब इ तेयारी केर दिन रहे। आउर अगला दिन यहूदी मनक आराम केर दिन आउर फसह परब दुयो रहे। इ यहूदी आदमीमन लगिन एगो खास दिन रहे। यहूदी धरम केर अगुवामन नी चाहत रहैं कि इ दिन लाश क्रूस उपरे रहोक। से लगिन उमन राजपाल पिलातुस से कहलैं कि उ दुयो आदमी मनक टांग तुरवाय दे ताकि उमन जल्दी मोइर जाओक आउर उ मनक लाश के हेंठे उतराल जाओक। से लगिन पलटनमन आय के यीशु केर संगे क्रूस उपरे चढ़ाल पहिला आदमी केर टांग तोइर देलैं, फिन दूसरा केर हों। जब उमन यीशु ठिना आय के देखलैं कि उ मोइर चुइक हे, तो उकर टांग नी तोरलैं। मगर पलटनमन में से एगो बरछा से पंजरा के बेधलक आउर उकर में से तुरते लोहू आउर पानी निकललक। जे आदमी इ सोउब घटना के देखलक, ओहे इकर गवाही देई हे, ताकि तोहरेमन हों यीशु केर उपरे बिसवास करेक पारबा। आउर उकर गवाही सच हेके, आउर उ जानेला कि उ सच कहाथे। एइसन इ लगिन होलक कि पवितर किताब में लिखल इ गोइठ पूरा होई जाओक, “उकर एको गो हड्डी नी टुटाल जाई।” फिन पवितर किताब केर एगो आउर ठाँव में इ लिखल अहे, “जेके उमन बेइध हैं, उकर उपरे ओहोमन केर नजइर होवी।” इ गोइठमन केर पाछे अरिमतियाह गाँव केर यूसुफ, जे यीशु केर चेला रहे, मगर यहूदी धरम केर अगुवामन केर डार से इ गोइठ के लुकाय रखत रहे। उ राजपाल पिलातुस से अरजी काइर के कहलक, “मोंय यीशु केर लाश के लेई जामूँ?” पिलातुस उकर अरजी के सुनलक, आउर उ आय के यीशु केर लाश के लेई गेलक। नीकुदेमुस हों जे आगे राइत केर बेरा यीशु से मिलेक आय रहे। ओहो लगभग तैंतीस किलो धमधमी महकेक वाला आउर एलवा मिलाल वाला गंधरस के लानलक। तब उमन यीशु केर लाश के लेलैं आउर यहूदीमन केर गाड़ेक केर रीति केर मोताबिक उकर में उ धमधमी महकेक वाला गंधरस आउर एलवा के माखलैं आउर उके मलमल केर कफन लुगा से लपाइट देलैं। जहाँ यीशु के क्रूस उपरे चढ़ाल जाय रहे, उकर भीरे एगो बगाइचा रहे आउर उ बगाइचा में एगो नवाँ कबर पखना में खोदल रहे, उकर में कहियो केखो नी राइख रहैं। से लगिन उमन यीशु केर लाश के हुवाँय राइख देलैं। काले कि इ दिन यहूदी मनक तेयारी केर दिन रहे, आउर कबर हों भीरे रहे। हफ्ता केर शुरु दिन मगदला गाँव केर मरियम बड़ बिहाने अंधारे-अंधार कबर ठिना आलक। उ कबर केर दुरा से पखना के लुढ़काल देखलक। इ देइख के उ कूइद के सिमोन पतरस आउर उ दूसरा चेला ठिना गेलक जेकर से यीशु प्रेम करत रहे, मरियम उमन से कहलक, “उमन प्रभु केर लाश के कबर से निकलाय के लेई गेलैं, आउर हमरे नी जानिला कि उके कहाँ राइख हैं।” तब पतरस आउर उ दूसरा चेला निकइल के कबर बटे कूदलैं। उमन दुयो संगे-संगे कूदलैं, मगर दोसर चेला पतरस के अगुवाय के कबर ठिना आगे पोहोंचलक। उ निहइर के कफन लुगा के पड़ल देखलक, मगर उ कबर भीतरे नी गेलक। तब सिमोन पतरस उकर पाछे-पाछे पोहोंचलक आउर कबर केर भीतरे गेलक आउर कफन लुगा के पड़ल देखलक। आउर जे गमछा यीशु केर चेहरा में लेपटाल रहे उ कफन लुगा केर संगे नी रहे मगर अलगे एक ठाँव में लेपटाल रखल रहे। तब उ दोसर चेला हों जे कबर ठिना आगे पोंहइच रहे, भीतरे गेलक आउर देइख के बिसवास करलक कि यीशु मोरलमन में से फिन जी उइठ हे। पवितर किताब में यीशु केर बारे में लिखल जाय रहे कि उ मोरेक केर पाछे फिन से जी उठी, मगर उमन इके एखन तक नी बुइझ रहैं। इकर पाछे दुयो चेलामन अपन-अपन घर घूइर गेलैं। मगर मरियम कबर ठिना हें बाहरे ठड़ाय के काँदते रहे आउर काँदते-काँदते कबर बटे झुइक के, जहाँ यीशु केर लाश रखल रहे, दूई गो स्वरगदूतमन के चरका लुगा पिंधल एगो के मूँड़ बटे आउर दूसरा के गोड़ बटे बइठल देखलक। स्वरग दूतमन उकर से कहलैं, “हे महिला, तोंय काले काँदाथिस?” मरियम उमन के जबाब देलक, “उमन मोर प्रभु केर लाश के उठाय के लेई गेलैं आउर मोंय नी जानोना कि उके कहाँ राइख हैं।” इ कहेक केर पाछे मरियम पिछे बटे मुड़लक आउर यीशु के ठड़ाल देखलक, मगर उके चिन्हेक नी पारलक कि इ यीशु हेके। यीशु उकर से कहलक, “हे महिला, तोंय काले काँदाथिस? तोंय केके खोजाथिस?” मरियम उके माली समइझ के कहलक, “हे महराज, अगर तोंय उकर लाश के उठाय के लेई जाहिस तो मोके बताय दे कि उके कहाँ राइख हिस आउर मोंय उके लेई जामूँ।” यीशु उकर से कहलक, “मरियम!” तब मरियम पिछे मुइड़ के उकर से इब्रानी भाषा में कहलक, “रब्बूनी!” मतलब “हे गुरु”। यीशु उकर से कहलक, “मोके धाइर के ना रोक काले कि मोंय एखन तक आबा परमेश्‍वर ठिना स्वरग नी जाय हों। मगर तोंय मोर चेलामन ठिना जा, आउर उमन से इ कहबे कि मोंय अपन आबा, आउर तोहर आबा, आउर अपन परमेश्‍वर आउर तोहर परमेश्‍वर ठिना स्वरग जाथों।” मगदला गाँव केर मरियम जाय के चेलामन के बतालक, “मोंय प्रभु के देखलों आउर उ मोर से इ गोइठमन के बतालक।” ओहे दिन जे हफ्ता केर पहिला दिन रहे, साँझ केर बेरा चेलामन यहूदी धरम केर अगुवा मनक डार से एगो कोठरी में दुरा के बंद काइर के जमा होई रहैं। यीशु उ मनक माझे आय के ठड़ाय गेलक आउर उमन से कहलक, “तोहरेमन के शांति मिलोक।” आउर इ कइह के यीशु अपन हाँथ आउर पंजरा केर घाव के उमन के देखालक। तब प्रभु के देइख के चेलामन खुश होलैं। यीशु उमन से फिन कहलक, “तोहरेमन के शांति मिलोक! जे लेखे आबा परमेश्‍वर मोके दुनिया में आदमीमन केर माझे भेइज हे, सेहे लेखे मोंय हों तोहरेमन के दुनिया केर आदमीमन केर माझे भेजाथों।” इ कइह के यीशु उ मनक उपरे साँस के फूकलक आउर उमन से कहलक, “पवितर आत्मा के लेवा। तोहरेमन जे आदमीमन केर पाप के क्षमा करबा, उमन केर पाप क्षमा करल जाय हे, आउर जे आदमीमन केर पाप के क्षमा नी करबा, उमन अपन पाप में बंधाल रहबैं।” मगर जब यीशु आय रहे, उ बेरा बारहों चेलामन में से एगो चेला थोमा, जे दिदुमुस कहात रहे, उमन केर संगे नी रहे। जब चेलामन थोमा के बतालैं, “हमरे प्रभु के देइख ही।” तब थोमा उमन के जबाब देलक, “जब तक मोंय उकर हाँथ में काँटी ठोकल केर टोका के नी देइख लेमूँ, आउर उ टोका में अपन अंगुर आउर उकर पंजरा में अपन हाँथ साइज के नी देखमूँ, तब तक मोंय इ बिसवास नी करमूँ कि उ मोरलमन में से फिन जी उइठ हे।” आठ दिन केर पाछे यीशु केर चेलामन फिन घर केर भीतरे जमा होई रहैं, आउर थोमा हों उ मनक संगे रहे। आउर दुरा बंद रहे, फिन यीशु आय के उ मनक माझे ठड़ाय के कहलक, “तोहरेमन के शांति मिलोक।” तब यीशु थोमा से कहलक, “अपन अंगुर से छुई के मोर हाँथ के देख आउर अपन हाँथ के मोर पंजरा में साज आउर शंका ना कर, मगर बिसवास कर कि मोंय जिंदा अहों।” इ सुइन के थोमा जबाब देलक, “हे मोर प्रभु, हे मोर परमेश्‍वर।” यीशु थोमा से कहलक, “तोंय तो मोके देइख के बिसवास काइर हिस। मगर धाइन अहैं उमन जेमन मोके बे देखले मोर उपरे बिसवास करलैं।” यीशु अपन चेलामन केर सामने आउर ढेइर चमत्कार केर चिन्हामन के देखालक, जे इ किताब में नी लिखल जाय हे। मगर इमन के इ लगिन लिखल जाय हे कि तोहरेमन उकर उपरे बिसवास करबा कि यीशु हें परमेश्‍वर केर बेटा मसीह हेके, आउर उकर उपरे बिसवास काइर के जुग-जुग केर जिंदगी के पावा। इ गोइठमन केर पाछे यीशु खुद के तिबिरियास झील केर किनारे चेलामन केर माझे इ लेखे दिस्तार करलक। सिमोन पतरस, थोमा, जे दिदुमुस कहात रहे, आउर नतनएल जे गलील परदेस केर काना नगर केर रहे, आउर जबदी केर दुयो बेटा, आउर यीशु केर आउर दूई झन दोसर चेलामन जमा रहैं। सिमोन पतरस उमन से कहलक, “मोंय मछरी धारेक जाथों।” उमन उकर से कहलैं, “हमरे हों तोर संगे जाब।” उमन निकइल के गेलैं आउर डोंगा उपरे चढ़लैं, मगर उ राइत उमन गोटको मछरी धारेक नी पारलैं। अगला दिन बिहाने-बिहान यीशु झील केर किनारे ठड़ालक, मगर चेलामन उके नी चिन्हेक पारलैं कि उ यीशु हेके। तब यीशु उमन से कहलक, “हे छउवामन, का तोहरेमन ठिना कोनों खाएक ले अहे?” उमन जबाब देलैं, “कोनों नखे।” यीशु उमन से कहलक, “डोंगा केर भतखाइया आरा जाल फेकबा तो तोहरेमन के मिली।” तब उमन जाल फेकलैं आउर एतना मछरीमन फाँइस गेलैं कि उमन जाल के खींचेक नी पारत रहैं। तब उ चेला जेकर से यीशु प्रेम करत रहे, पतरस से कहलक, “इ तो प्रभु हेके।” जब सिमोन पतरस इ सुनलक कि इ प्रभु हेके, तो उ अपन उ लुगा के डाँड़ा में पिंध लेलक, जेके उ काम करेक बेरा उतराय रहे। आउर यीशु से मिलेक लगिन झट सुन झील में कूइद गेलक। दोसर चेलामन मछरीमन से भरल जाल खींचते डोंगा से किनारे आलैं। उमन किनारे से बगरा दूर नी रहैं, लगभग सौ मीटर केर दूर में रहैं। जब उमन किनारे में उतरलैं, तो कुइला केर आइग उपरे रखल मछरी आउर रोटी देखलैं। यीशु उमन से कहलक, “तोहरेमन एखन जे मछरीमन के धाइर हा, उमन में से थोरेक के लाना।” सिमोन पतरस डोंगा उपरे चाइढ़ के जाल के किनारे खींच लानलक। उकर में एक सौ तिरपन बड़का-बड़का मछरी रहैं आउर एतना मछरी होवेक से हों जाल नी फटलक। यीशु उमन से कहलक, “आवा, आउर खावा।” चेलामन में से केखो इ पूछेक केर साहस नी होलक, “तोंय के हेकिस?” काले कि उमन जानत रहैं कि उ प्रभु हेके। यीशु आगे बाइढ़ के रोटी लेलक आउर उके उमन के देलक। आउर एहे लेखे मछरी के हों देलक। इ लेखे मोरलमन में से जी उठेक केर पाछे यीशु तीसरा बेर चेलामन के देखाई देलक। खाएक केर पाछे यीशु सिमोन पतरस से पूछलक, “हे सिमोन, यूहन्ना केर बेटा, का तोंय इमन से बाइढ़ के मोर से प्रेम करिसला?” उ यीशु के जबाब देलक, “हाँ प्रभु, तोंय तो जानिसला कि मोंय तोर से प्रेम करोना।” यीशु उकर से कहलक, “मोर पिछे चलेक वालामन केर एइसन देखभाल कर कि उमन मेमना छउवामन हेकैं।” यीशु दूसरी बेर फिन उकर से पूछलक, “हे सिमोन यूहन्ना केर बेटा, का तोंय मोर से प्रेम करिसला?” उ यीशु के जबाब देलक, “हाँ प्रभु, तोंय जानिसला कि मोंय तोर से प्रेम करोना।” यीशु उकर से कहलक, “मोर भेड़ीमन केर रखवाली कर।” यीशु तीसरी बेर उकर से पूछलक, “हे सिमोन, यूहन्ना केर बेटा, का तोंय मोर से प्रेम करिसला?” पतरस उदास होलक, काले कि यीशु उके तीसरी बेर इ पूछलक, “का तोंय मोर से प्रेम करिसला?” उ यीशु के जबाब देलक, “हे प्रभु, तोंय तो सोउब कुछ जानिसला। तोंय जानिसला कि मोंय तोर से प्रेम करोना।” यीशु उकर से कहलक, “मोर भेड़ीमन के चराव। मोंय तोर से सच-सच कहाथों, जब तोंय जवान रहिस, तो तोंय खुद तेयार होई के जहाँ चाहत रहिस, हूवाँ घुमत रहिस। मगर जब तोंय बूढ़ा होई जाबे, तब तोंय अपन हाँथ के लम्बाबे, आउर दोसर आदमी तोके तेयार काइर के जहाँ तोंय जाएक नी चाहबे, हूवाँ लेई जाई।” यीशु एइसन इ बताएक लगिन कहलक कि पतरस कइसन मौत से मोरी आउर परमेश्‍वर केर महिमा करी। यीशु आखरी में पतरस से कहलक, “मोर पिछे होई ले आउर मोर चेला बाइन जा।” पतरस पिछे मुइड़ के उ चेला के पिछे-पिछे आते देखलक, जेकर से यीशु प्रेम करत रहे, आउर जे खाएक बेरा उकर छाती बटे झुइक के पूइछ रहे, “हे प्रभु, तोके धरुवाएक वाला के हेके?” उके देइख के पतरस यीशु से पूछलक, “हे प्रभु, इकर संगे का होवी?” यीशु उके जबाब देलक, “अगर मोंय चाहमूँ कि उ मोर आवेक तक जिंदा रहोक, तो इकर से तोके का? तोंय मोर पिछे होई ले, आउर मोर चेला बाइन जा।” इ गोइठ भाईमन में फाइल गेलक कि उ चेला नी मोरी। मगर यीशु इ नी कइह रहे कि इ नी मोरी। मगर उ इ कइह रहे कि “अगर मोंय चाहमूँ कि इ मोर आवेक तक जिंदा रहोक, तो इकर से तोके का?” इ ओहे चेला हेके, जे इ गोइठमन केर बारे में बताथे आउर जे इ गोइठमन के लीख हे। आउर हमरे जानिला कि उकर गवाही सच हेके। यीशु आउर हें ढेइर काममन के करलक। अगर हमरे उमन के एक-एक काइर के लिखते जाती तो मोके लगेला कि जे किताब लिखल जातक उके सम्भराएक लगिन गोटा दुनिया में ठाँव नी होतक। हे दुलारा थियुफिलुस, मोंय अपन पहिला किताब में उ सोउब गोइठमन केर बारे में लीख हों, जेके यीशु शुरु से लेई के स्वरग में उठाल जाएक तक करते आउर सिखाते रहे। जे दिन उ परमेश्‍वर बटले स्वरग में उठाय लेवल गेलक, उकर से पहिले उ अपन खास चेलामन के, जेके उ खुद चुइन रहे, पवितर आत्मा केर मदइत से आगया देलक। उ दुःख उठाएक आउर मोरेक केर पाछे ढेइर पक्का सबूतमन से खुद के उ मनक माझे जिंदा देखालक। आउर चालीस दिन तक उ चेलामन के देखाई देते रहलक, आउर परमेश्‍वर केर राइज केर बारे में बताते रहलक। एक बेर यीशु अपन खास चेलामन केर संगे रहे तब उमन के आगया देलक। “यरुशलेम शहर के ना छोड़बा, मगर उ दान केर आसरा देखते रहबा, जेके मोर आबा तोहरेमन के देवेक केर करार काइर हे, जेकर बारे में तोहरे मोर से सुइन चुइक हा। काले कि यूहन्ना तो पानी में बपतिस्मा जल संस्कार देई हे मगर थोरेक दिनमन केर पाछे परमेश्‍वर तोहरे के पवितर आत्मा से बपतिस्मा संस्कार देवी।” जब यीशु केर खास चेलामन दोबारा उकर से मिललैं तो उमन उकर से पूछलैं, “हे प्रभु, का तोंय अब रोमी शासन के हराय के इसराइल देस केर शासन के फिन से खड़ा करेक आउर सोउब केर उपरे राजा नियर राइज करेक केर योजना बनाथिस?” यीशु उमन के जबाब देलक, “उ समयमन या घटनामन कहिया होवी, इके ठहराएक केर अधिकार सिरिफ मोर आबा ठिना अहे, इके जानेक केर जरुरत तोहरेमन के नखे। मगर जब पवितर आत्मा तोहर उपरे आवी तब तोहरेमन शक्ति पाबा, आउर यरुशलेम शहर आउर गोटा यहूदिया आउर सामरिया परदेस में, आउर धरती केर आखरी छोर तक सोउब आदमीमन के मोर बारे में गवाही देबा।” इ सोउब कहेक केर पाछे परमेश्‍वर यीशु के उ मनक देखते-देखते स्वरग में उठाय लेलक आउर बदरी केर चलते उमन उके आउर देखेक नी पारलैं। उकर जाएक बेरा जब उमन आकाश बटे देखत रहैं, तब अचका दूई झन आदमीमन चरका लुगा पिंधल उमन ठिना आय के ठड़ाय गेलैं। आउर उमन से कहलैं, “हे गलील परदेस केर आदमीमन, तोहरे काले ठड़ाय के आकाश बटे देखाथा? एहे यीशु, जेके परमेश्‍वर तोहर ठिना से स्वरग में उठाय लेलक, ठीक एहे लेखे दोबारा आवी, जे लेखे तोहरे उके स्वरग में जाते देखला।” जब स्वरग दूतमन चाइल गेलैं तब खास चेलामन जैतून नाँव केर पहार से यरुशलेम शहर घूइर आलैं, जे लगभग एक किलोमीटर दूर रहे। शहर में पोंहइच के उमन घर केर उपरे कोठरी में गेलैं, जहाँ उमन रूइक रहैं। हूवाँ पतरस, यूहन्ना, याकूब, अन्द्रियास, फिलिप्पुस, थोमा बरतुल्मै, मत्ती आउर हलफई केर बेटा याकूब, सिमोन जेलोतेस आउर याकूब केर बेटा यहूदा रहे। इमन अक्सर इ ठाँव में जमा होवत रहैं। हिंयाँ थोरेक जनानामन आउर यीशु केर आयो मरियम आउर उकर भाईमन केर संगे एक मन होई के प्रार्थना करत रहैं। ओहे दिनमन में जब लगभग एक सौ बीस बिसवासी भाई-बहिनमन जमा होई रहैं, तब पतरस उमन केर माझे ठड़ाय के कहेक लगलक, “हे भाईमन, पवितर आत्मा ढेइर समय पहिले राजा दाऊद केर मुँह से यहूदा केर बारे में बताय रहे, जे कि यीशु के धारेक वाला आदमीमन केर अगुवा बाइन गेलक। इ होवेक जरुरी रहे ताकि यहूदा केर बारे में पवितर किताब में लिखल गोइठ पूरा होवोक। काले कि उ तो हमर में से एगो रहे, आउर सेवकाई केर काम में शामिल रहे। जइसन कि तोहरे जानाला, उके यीशु के धरुवाएक लगिन यहूदी अगुवामन पइसा देई रहैं। जब उके समझ आलक कि मोंय गलती काइर हों तो उ पइसा के यहूदी अगुवामन के घुराय देलक, आउर खुद फाँसी लगाय होलक आउर उकर काया भूंई में गिरलक आउर पेट फाइट गेलक आउर सोउब पोटामन निकइल गेलक। से लगिन यहूदी अगुवामन इ पइसा से एगो खेत कीन लेलैं। इ गोइठ के यरुशलेम शहर केर रहेक वाला सोउब आदमीमन जाइन गेलैं। से लगिन उमन उ खेत केर नाँव अपन भाषा में ‘हकलदमा’ मतलब ‘लोहू केर खेत’ रखलैं। राजा दाऊद भजन संहिता केर किताब में लीख हे, ‘उकर घर उजइर जाओक आउर उकर में केऊ ना बसोक,’ आउर राजा दाऊद दोसर ठिना एहो कइह हे, ‘उकर पद केऊ दूसरा लेई लेवोक।’ से लगिन इ जरुरी अहे कि एगो एइसन आदमी के चुनल जाओक जे यीशु मसीह केर सोउब समय केर काम केर गवाह हेके। मतलब यीशु मसीह के यूहन्ना से बपतिस्मा जल संस्कार लेवेक से लेई के, उके स्वरग में उठाय लेवल जाएक तक इ आदमी हमरे केर संगे प्रभु यीशु केर जी उठेक केर गवाह बनोक।” तब उमन दूई झन आदमीमन के ठड़ुवालैं, एगो यूसुफ के जे बर-सबा कहायला। जेकर दोसर नाँव यूस्तुस हेके, दूसरा मत्तियाह के। तब उमन इ कइह के प्रार्थना करलैं, “हे प्रभु, तोंय जे सोउब केर मन के जानिसला, इ दिस्तार कर कि इ दुयो में से तोंय केके चुइन हिस, कि उ इ सेवा केर काम आउर चुनल खास चेलामन केर खाली ठाँव के लेई लेवोक। जेके यहूदा छोइड़ के मोइर गेलक आउर अपन ठहराल ठाँव में चाइल गेलक।” तब उमन उ दुयो केर नाँव से चिट्ठी साजलैं, आउर चिट्ठी मत्तियाह केर नाँव से निकललक। इ लेखे उ गारह खास चेलामन केर संगे गिनल गेलक। यहूदी मनक पिन्तेकुस्त केर परब केर दिन सोउब चेलामन एक ठाँव में जमा होई रहैं। अचका आकाश से बड़का आँधी जइसन सनसनाहट केर आवाज सुनालक आउर पूरा घर जहाँ उमन बइठल रहैं, गुइंज गेलक। तब उमन केर सामने एइसन आइग दिस्तार होलक जे जीभ नियर रहे। आउर उ अलग होई के उमन में से हरेक झन में आय के ठहइर गेलक। आउर उमन सोउब पवितर आत्मा से भाइर गेलैं, आउर पवितर आत्मा, जइसन उमन के बोलेक केर बरदान देलक तइसन उमन दोसर-दोसर भाषा में गोठियाएक लगलैं। उ बेरा परमेश्‍वर केर भय मानेक वाला कायनों यहूदी आदमीमन रहैं, जे दुनिया केर सोउब देस से पिन्तेकुस्त केर परब मनाएक लगिन आय रहैं। आउर यरुशलेम शहर में रहत रहैं। जब हवा नियर आवाज सुनालक तो हूवाँ भीड़ जमा होई गेलक आउर आदमीमन घबराय गेलैं, काले कि सोउब के एहे सुनात रहे कि इमन मोर भाषा में गोठियाथैं। आउर उमन सोउब चकित आउर ताजुब होई के एक-दोसर से पूछेक लगलैं, “का इमन सोउब गलील परदेस केर रहेक वाला ना लगैं? तो इ का होवाथे, जे हमर में से हरेक झन इमन के हमर अपन-अपन भाषा में गोठियाते सुनाथी? हमर में से थोरेक आदमी पारथी, मेदी, एलामी, मेसोपोटामिया, यहूदिया परदेस आउर कप्पदुकिया आउर पुन्तुस आउर आसिया परदेस से अही। आउर फ्रूगिया आउर पंफूलिया परदेस आउर मिसर देस आउर कुरेन शहर केर भीरे लीबिया देस केर थोरेक भाग केर हों अही, इ सोउब देसमन केर रहेक वालामन आउर रोम देस से आवेक वाला परदेसी आदमीमन, मतलब यहूदी आउर यहूदी धरम के मानेक वाला, क्रेते टापू केर रहेक वाला आउर अरब देस केर आदमीमन हमरे सोउब अपन-अपन भाषा में इमन के परमेश्‍वर केर बड़का-बड़का काममन केर बारे में गोठियाते सुनाथी।” आउर उमन सोउब ताजुब होलैं, आउर घबराय के एक दोसर से पूछेक लगलैं, “इ का होवाथे?” मगर दोसर आदमीमन मजाक काइर के कहेक लगलैं, “इमन तो थोरेक बगरा हें पी हैं आउर नशा में अहैं।” तब पतरस उ गारह खास चुनल चेलामन केर संगे ठड़ालक आउर जोर से कहेक लगलक, “हे यहूदिया परदेस केर आउर यरुशलेम शहर केर रहेक वाला सोउब आदमीमन, मोर गोइठ के धेयान से सुना आउर जाइन लेवा। जइसन कि तोहरे बुझाथा, इमन नशा में अहैं, मगर निहीं, इमन नशा में नखैं, काले कि एखन तो बिहान केर नौ बाइज हे। मगर इ उ गोइठ हेके, जेके योएल परमेश्‍वर केर संदेश के बताएक वाला केर बटले कहल जाय रहे, ‘परमेश्‍वर कहेला अंत केर दिनमन में एइसन होवी कि मोंय अपन आत्मा सोउब आदमीमन के देमूँ आउर तोहर बेटामन आउर बेटीमन भविष्यवाणी करबैं आउर तोहर जवानमन दर्शन देखबैं, आउर तोहर बुजुर्ग आदमीमन सपना देखबैं। उ दिनमन में मोंय अपन सेवक आउर सेविकामन के अपन आत्मा देमूँ आउर उमन भविष्यवाणी करबैं। आउर मोंय उपरे आकाश में ताजुब काम आउर हेंठे धरती में चिन्हा, मतलब लोहू, आइग आउर धुंगिया केर बदरी देखामूँ। प्रभु केर दिन आवेक से पहिले बेइर अंधार आउर चाँद लोहू होई जाई। उ दिन महान आउर तेज चमक केर दिन होवी। आउर जे केऊ प्रभु केर नाँव से प्रार्थना करी, उ बाइच जाई।’ हे इसराइली आदमीमन, मोर गोइठमन के धेयान से सुना। नासरत नगर केर रहेक वाला यीशु एगो एइसन आदमी रहे, जेके परमेश्‍वर बटले तोहर सामने साबित करल जाय रहे, उ चमत्कार आउर ताजुब केर काममन आउर चिन्हामन से जेके परमेश्‍वर उकर से करलक, तोहरे खुद जानाला कि इ सच हेके। ओहे यीशु के, जे परमेश्‍वर केर ठहराल योजना आउर पहिले केर गेयान केर मोताबिक धरुवाल गेलक आउर तोहरे उके दुष्ट आदमीमन केर मदइत से काँटी ठुकवाय के क्रूस उपरे चढ़ुवाय के माइर मोराला। फिन भी परमेश्‍वर उके मोरेक केर पाछे फिन से जिंदा काइर देलक काले कि उकर लगिन मौत केर वश में रहेक अनहोना रहे। काले कि राजा दाऊद यीशु केर बारे में कहेला, ‘मोंय प्रभु के सोउब बेरा अपन सामने देखोना काले कि उ मोर भतखाइया बटे अहे, जेकर से मोंय उ आदमीमन से नी डरावना जेमन मोके नोकसान पोंहचाएक खोजैना। एहे लगिन मोंय खुशी से भाइर जाय हों, आउर मोंय खुशी से प्रभु केर महिमा करोना, मोर काया हों आसरा में बनल रही। काले कि तोंय मोके मरणलोक में रहेक नी देबे, आउर ना अपन पवितर आदमी केर लाश के सड़ेक देबे। तोंय मोके अपन जिंदगी केर डहर बताय हिस, तोंय मोके अपन ठिना राइख के खुशी से भाइर देबे।’ हे भाईमन, मोंय अपन पुरखा राजा दाऊद केर बारे में तोहर से साहस केर साथ कहेक पारोना कि उ मोइर गेलक आउर गड़ाल हों गेलक आउर उकर कबर आइज तक हमर हिंयाँ मौजूद अहे। राजा दाऊद परमेश्‍वर केर संदेश के बताएक वाला रहे। उ जानत रहे कि परमेश्‍वर किरिया खाय के उकर से इ करार काइर हे कि राइज करेक केर कुरसी में मोंय तोर बंश में से एगो आदमी के बइठामूँ। से लगिन उ यीशु मसीह केर फिन से जी उठेक केर बारे में आगे हें जाइन के कहलक कि तोंय उके मरणलोक में रहेक नी देले, आउर ना उकर लाश के सड़ेक देले। परमेश्‍वर एहे यीशु के फिन से जियालक। हमरे सोउब इ गोइठ केर गवाह हेकी। अब उ स्वरग में परमेश्‍वर केर भतखाइया आरा सोउब से ऊँचा पद पाय के बइठल अहे, आउर आबा परमेश्‍वर जइसन उ करार काइर रहे तइसनेहें यीशु के पवितर आत्मा देलक आउर उ पवितर आत्मा के हमरे के देलक, जइसन आइज तोहरे देखाथा आउर सुनाथा। काले कि राजा दाऊद तो स्वरग नी गेलक, मगर उ खुद कहेला, ‘प्रभु परमेश्‍वर मोर प्रभु से कहलक, मोर भतखाइया आरा बाइठ, जब तक कि मोंय तोर बैरीमन के तोर अधिकार में नी काइर देमूँ।’ से लगिन इसराइल देस केर सोउब आदमीमन इ गोइठ के पक्का जाइन लेवा कि परमेश्‍वर एहे यीशु के, जेके तोहरे क्रूस उपरे चढ़ाला, प्रभु आउर मसीह दुयो ठहराय हे।” जब आदमीमन इ सुनलैं तब उमन खुद के ढेइर दोषी महसूस करलैं आउर उमन पतरस आउर बचल खास चेलामन से पूछेक लगलैं, “हे भाईमन, हमरे का करब?” पतरस उमन के जबाब देलक, “पाप करेक छोइड़ देवा, तोहर में से हर एक झन अपन-अपन पापमन केर क्षमा लगिन यीशु मसीह केर नाँव से बपतिस्मा जल संस्कार लेवा, तब तोहरे पवितर आत्मा केर दान पाबा। काले कि इ करार तोहर आउर तोहरेमन केर संतानमन लगिन अहे, आउर उ सोउब दूर-दूर केर आदमीमन लगिन हों अहे, जेमन के प्रभु हमर परमेश्‍वर अपन ठिना बोलाथे।” पतरस ढेइर गोइठमन से गवाही देई-देई के आउर इ कइह के उमन से बिनती करलक कि इ पीढ़ी केर दुष्ट आदमीमन से खुद के बचाय के रखा। जेमन पतरस केर गोइठ उपरे बिसवास करलैं, उमन बपतिस्मा जल संस्कार लेलैं। आउर ओहे दिन लगभग तीन हजार आदमीमन बिसवासीमन केर दल में मिल गेलैं। उमन खास चेलामन से शिक्षा पावेक, आउर संगति रखेक आउर प्रभु भोज में मेसा होवेक में लगल रहैं आउर उमन एके संगे खात रहैं आउर प्रार्थना करेक में लीन रहैं। आउर यरुशलेम शहर केर सोउब आदमीमन डराय गेलैं आउर ताजुब करेक लगलैं, काले कि खास चेलामन बटले ढेइर हें चमत्कार काममन आउर चिन्हा दिस्तार होवत रहे। आउर सोउब बिसवास करेक वालामन एक संगे रहत रहैं, आउर उ मनक सोउब चीज साझा में रहे। आउर उमन अपन-अपन सम्पति आउर सामान बेइच-बेइच के जइसन जेकर जरुरी होवत रहे बाँइट देवत रहैं। आउर उमन रोज दिन एक मन होई के यहूदी मनक मंदिर केर अंगना में जमा होवत रहैं, आउर घर-घर प्रभु भोज में शामिल होवत रहैं आउर खुशी आउर सीधा मन से एके संगे भात खात रहैं। आउर परमेश्‍वर केर महिमा करत रहैं, आउर सोउब आदमीमन उमन से खुश रहैं, आउर जेमन छुटकारा पावत रहैं, उमन के प्रभु रोज दिन उमन में मिलाय देवत रहे। पतरस आउर यूहन्ना दूई पहर केर तीन बजे प्रार्थना केर समय में यहूदी मनक मंदिर में प्रार्थना करेक जात रहैं। आउर आदमीमन एगो जनम से लंगड़ा आदमी के रोज दिन यहूदी मनक मंदिर केर फाटक ठिना जे सुन्दर कहायला लाइन के बइठाय देवत रहैं, ताकि उ मंदिर में जाएक वाला आदमीमन से भीख माँगोक। जब उ पतरस आउर यूहन्ना के यहूदी मनक मंदिर में जाते देखलक, तो उमन से भीख माँगलक। पतरस आउर यूहन्ना उके धेयान से देखलैं आउर पतरस उकर से कहलक, “हमर बटे देख।” तब उ कोनों पावेक केर आसरा में उमन बटे ताकेक लगलक। पतरस उकर से कहलक, “चाँदी आउर सोना तो मोर ठिना नखे, मगर जे मोर ठिना अहे, उखे तोके देवाथों। यीशु मसीह नासरी केर नाँव से उठ आउर चल फिर।” आउर पतरस उकर भतखाइया हाँथ के धाइर के उके उठालक, आउर तुरते उकर गोड़ आउर ठेहुनामन में ताकत आय गेलक। आउर उ उछइल के ठड़ाय गेलक, आउर चलेक फिरेक लगलक आउर उछइल-उछइल के परमेश्‍वर केर महिमा करते उमन केर संगे यहूदी मनक मंदिर में गेलक। सोउब आदमीमन उके चलते फिरते आउर परमेश्‍वर केर महिमा करते देखलैं। आउर उके चीन्ह लेलैं कि इ ओहे लंगड़ा भिखारी हेके, जे यहूदी मनक मंदिर केर सुन्दर नाँव केर फाटक में बाइठ के भीख माँगत रहे आउर उ घटना से जे उकर संगे होई रहे, उमन ढेइर अचरज आउर ताजुब होई गेलैं। जब उ पतरस आउर यूहन्ना केर संगे हें रहे, तब सोउब आदमीमन ढेइर ताजुब करते उ ठाँव में जे राजा सुलैमान केर बरामदा कहात रहे, कूइद आलैं। इ देइख के पतरस आदमीमन से कहलक, “हे इसराइली आदमीमन, तोहरे इ आदमी के काले इ लेखे देखाथा, आउर तोहरे हमरे बटे काले टकटकाय के देखाथा कि हमरे हें अपन शक्ति या भक्ति से इके चलेक-फिरेक लायक बनाय देली। अब्राहम, इसहाक आउर याकूब केर परमेश्‍वर, हमर बाप दादामन केर परमेश्‍वर, अपन सेवक यीशु केर महिमा करलक, मगर तोहरे उके मरुवाएक लगिन यहूदी अगुवामन केर हाँथ में जिम्मा देला, आउर जब राजपाल पिलातुस उके छोइड़ देवेक केर बिचार करलक, तब तोहरे उकर सामने उके ठुकराय देला। तोहरे यीशु के ठुकराय देला, जे पवितर आउर धरमी रहे आउर बिनती करला कि एगो हत्यारा के तोहर लगिन छोइड़ देवल जाओक। आउर तोहरे उके जे आदमीमन के जुग-जुग केर जिंदगी देवेला माइर मोराला, जेके परमेश्‍वर मुरदा में से फिन जियालक, आउर इ गोइठ केर हमरे गवाह हेकी। आउर यीशु मसीह केर नाँव में बिसवास करेक केर चलते इ आदमी के जेके तोहरे जानाला आउर एखन खुद देखाथा, ताकत देवल जाय हे। एहे बिसवास केर चलते इ आदमी भला चंगा होई हे। अब हे भाईमन, मोंय जानोना कि तोहरे आउर तोहर अगुवामन यीशु के अनजान से माइर मोराला, काले कि तोहरे के पता नी रहे कि उ मसीह हेके। मगर परमेश्‍वर इ गोइठमन के अपन सोउब संदेश के बताएक वालामन केर बटले आगे हें बताय देई रहे कि उकर मसीह दुःख उठाई आउर मोराल जाई। आउर उ इ लेखे इके सच काइर के देखालक। से लगिन पाप करेक छोइड़ देवा आउर परमेश्‍वर बटे घूइर आवा ताकि तोहर पाप क्षमा करल जाई, तब परमेश्‍वर बटे से आत्मिक ताजगी केर बेरा आवी। आउर उ यीशु के भेजी, जे मसीह हेके, जेके उ तोहर लगिन पहिले से हें चुइन हे। यीशु के स्वरग में उ समय तक रहेक जरुरी अहे जब तक परमेश्‍वर उ सोउब चीजमन के नवाँ नी बनाय देई जेमन के उ बनाय हे। जेकर बारे में ढेइर समय पहिले से हें परमेश्‍वर अपन पवितर संदेश के बताएक वाला आदमीमन केर मुँह से बताय देई रहे। जइसन कि मूसा परमेश्‍वर केर संदेश के बताएक वाला कइह रहे, ‘प्रभु परमेश्‍वर तोहर भाईमन में से तोहर लगिन मोर जइसन एगो परमेश्‍वर केर संदेश के बताएक वाला के भेजी, उ जे कुछ तोहरे से कही उकर गोइठ के सुनबा आउर उकर मोताबिक चलबा। मगर जे आदमी उ परमेश्‍वर केर संदेश के बताएक वाला केर गोइठ के नी सुनी, उके परमेश्‍वर केर नीज आदमीमन में से नाश करल जाई।’ आउर परमेश्‍वर केर संदेश के बताएक वाला शमूएल से लेई के उकर पाछे केर जेतना परमेश्‍वर केर संदेश के बताएक वालामन अपन संदेश में एहे गोइठ के कइह हैं। तोहरे सोउब परमेश्‍वर केर संदेश के बताएक वालामन केर संतान आउर उ करार केर भागीदार हेका, जेके परमेश्‍वर तोहर बाप दादामन से काइर हें, जब उ अब्राहम से कहलक, ‘तोर बंश से दुनिया केर सोउब आदमीमन आशीष पाबैं।’ परमेश्‍वर अपन सेवक के मोरलमन में से फिन जिंदा काइर के सोउब से पहिले तोहर ठिना भेजलक, ताकि तोहर में से हरेक झन के अपन जिंदगी केर बुरा काममन के छोड़ेक में मदइत करोक आउर आशीष देवोक।” पतरस आउर यूहन्ना आदमीमन से इ कहते हें रहैं कि यहूदी पुरोहितमन, यहूदी मनक मंदिर केर सरदार आउर सदूकी दल केर आदमीमन उ मनक ठिना आय पोहोंचलैं। उमन ढेइर नराज रहैं, काले कि पतरस आउर यूहन्ना आदमीमन के सिखात रहैं कि जे आदमीमन मोइर जाय हैं परमेश्‍वर उमन के फिन से जिंदा काइर देवी जइसन कि उ यीशु के मोरलमन में से फिन से जिंदा काइर देलक। तब उमन पतरस आउर यूहन्ना के धाइर के राइत भइर लगिन जेहेल घर में साइज देलैं, काले कि साँझ होई जाय रहे। मगर संदेश के सुनेक वालामन में से ढेइर आदमीमन यीशु केर उपरे बिसवास करलैं, आउर हूवाँ बिसवास करेक वाला मरदानामन केर गिनती लगभग पाँच हजार तक पोंहइच गेलक। अगला दिन उमन केर सरदारमन, धरम केर अगुवामन आउर मूसा केर नियम के सिखाएक वालामन यरुशलेम शहर केर एगो ठाँव में जमा होलैं। उ सभा में यहूदी महापुरोहित हन्ना, काइफा, यूहन्ना, सिकंदर आउर दोसर सोउबमन हों जेमन महापुरोहित केर घराना केर रहैं, सोउबमन यरुशलेम में जमा होलैं। आउर उमन पतरस आउर यूहन्ना के माझे में ठड़ुवाय के उमन से पूछेक लगलैं, “इ आदमी के ठीक करेक लगिन तोहरेमन के शक्ति आउर अधिकार केहर देलक?” तब पतरस पवितर आत्मा से भाइर गेलक आउर उमन के जबाब देलक, “हे आदमीमन केर सरदारमन आउर धरम केर अगुवामन, हमरे इ कमजोर आदमी केर भलाई काइर ही, आउर आइज हमरे से उकर बारे में पूछ-ताछ करल जाथे कि उ कइसन ठीक होलक। तो तोहरेमन आउर सोउब इसराइली आदमीमन जाइन लेवा कि इ यीशु मसीह नासरी केर नाँव से करल जाय हे, जेके तोहरे क्रूस उपरे चढ़ाय रहा। मगर परमेश्‍वर उके मोरलमन में से फिन जियालक। आइज ओहे यीशु केर नाँव से इ आदमी तोहर सामने भला चंगा ठड़ाय हे। यीशु मसीह ओहे पखना हेके, जेके राज मिस्त्रीमन बेकार जाइन के फेइक देई रहैं, ओहे कोना केर नेव केर पखना बाइन गेलक। यीशु केर अलावा आउर केऊ दोसर से छुटकारा नी मिली, काले कि गोटा दुनिया में आदमीमन केर माझे, कोनों दोसर नाँव नी देवल जाय हे, जेकर से हमरे के छुटकारा मिली।” पतरस आउर यूहन्ना केर साहस देइख के आउर इ जाइन के कि इमन अनपढ़ आउर साधारण आदमी हेकैं, उमन ताजुब होई गेलैं, फिन उमन के चीन्ह लेलैं कि इमन तो यीशु केर संगे रइह चुइक हैं। आउर उ आदमी के जे ठीक होई रहे, पतरस आउर यूहन्ना केर संगे ठड़ाल देइख के, यहूदी सभा केर अगुवामन उ मनक बिरोध में कोनों कहेक नी पारलैं। मगर उमन के यहूदी अगुवा मनक महासभा केर बाहरे जाएक केर हुकूम देलैं, आउर उमन आपस में बिचार करेक लगलैं, “हमरे इ आदमीमन केर संगे का करब? काले कि यरुशलेम शहर केर रहेक वाला सोउब आदमीमन के इ पता होई गेलक कि इमन महान चमत्कार केर चिन्हा देखाय हैं आउर हमरे इके इनकार करेक नी पारब। मगर आदमीमन में इ समाचार आउर बगरा ना फैलोक, से लगिन हमरे इमन के कड़ा चेतावनी देब कि अब से तोहरे यीशु केर नाँव से केखो कोनों ना कहबा।” तब उमन पतरस आउर यूहन्ना के भीतरे बोलाय के आगया देलैं कि यीशु केर नाँव से आदमीमन के कोनोवें ना कहबा आउर ना सिखाबा। मगर पतरस आउर यूहन्ना उमन के जबाब देलैं, “तोहरे हें खुद फैसला करा कि परमेश्‍वर केर नजइर में का उचित अहे, हमरे परमेश्‍वर केर आगया के मानब या तोहर आगया के मानब? इ तो हमरे से नी होवी कि हमरे जेके देइख ही आउर सुइन ही, उकर बारे में हमरे आदमीमन के नी बताब।” तब उमन पतरस आउर यूहन्ना के फिन धमकाय के छोइड़ देलैं, उमन के कोनों नी सूझत रहे कि कोन तरीका से उमन के सजा देवल जाई, काले कि सोउब आदमीमन इ घटना केर चलते परमेश्‍वर केर महिमा करत रहैं। काले कि जे आदमी चमत्कारी रूप से ठीक होई रहे, उ चालीस बरिस से उपरे केर रहे। पतरस आउर यूहन्ना छूइट के अपन संगमन ठिना घूइर आलैं, आउर जे कुछ यहूदी मुध पुरोहितमन आउर धरम केर अगुवामन उमन से कइह रहैं, उ सोउब के बतालैं। इ सुइन के उमन एक मन होई के जोर से परमेश्‍वर से प्रार्थना करलैं, “हे मालिक, तोंय हें आकाश आउर धरती आउर समुदर आउर जे कुछ उमन में अहे, सोउब के बनाय हिस। तोंय पवितर आत्मा से अपन सेवक हमर पुरखा राजा दाऊद केर मुँह से कहले, ‘दोसर जाइतमन हुड़दंग काले मचालैं? आउर देस-देस केर आदमीमन काले जाल बुनलैं? प्रभु आउर उकर मसीह केर बिरोध में दुनिया केर राजा ठड़ालैं, आउर अधिकारीमन एक संगे जमा होई गेलैं।’ इ एक सच्चाई हेके कि इ नगर में राजा हेरोदेस आउर पुन्तियुस पिलातुस दुयो हें इसराइली आदमीमन आउर परजाइत आदमीमन केर संगे मिल के तोर अभिषेक करल पवितर सेवक यीशु केर बिरोध में एक जुट होई गेलैं। उमन ओहे करलैं जेके तोर शक्ति आउर इच्छा आगे हें ठहराय देई रहे कि ओहे होवोक। अब, हे प्रभु, उ मनक धमकीमन के सुन आउर अपन सेवकमन के इ बरदान दे कि उमन साहस से तोर बचन के सुनाएक पारोक। आउर चंगा करेक लगिन तोंय अपन हाँथ के बढ़ाव ताकि तोर पवितर सेवक यीशु केर नाँव से चिन्हा आउर चमत्कार केर काम करल जाओक।” उ मनक इ प्रार्थना सिरात हें उ घर जेकर में उमन जमा रहैं हिल गेलक आउर सोउबमन पवितर आत्मा से भाइर गेलैं आउर उमन परमेश्‍वर केर बचन साहस से सुनाएक लगलैं। आउर चेला मनक इ दल में सोउबमन एक मन आउर एक प्राण रहैं। हिंयाँ तक कि केऊ हों अपन सम्पति के अपन नी कहात रहैं, जे कुछ उ मनक ठिना रहे, उकर में सोउब केर साझा रहे। आउर खास चेलामन समूचा शक्ति से प्रभु यीशु केर फिन से जी उठेक केर गवाही देवत रहैं आउर उ सोउब केर उपरे परमेश्‍वर केर बड़का किरपा रहे। उमन में से केऊ हों गरीब नी रहैं, काले कि जेमन ठिना खेत चाहे घर रहे, उमन उके बेइच-बेइच के उकर से मिलल पइसा के लाइन के खास चेलामन के देई देवत रहैं। आउर खास चेलामन जेके जइसन जरुरत होवत रहे, ओइसनेहें बाँइट देवत रहैं। यूसुफ नाँव केर एगो आदमी रहे, जे लेवी केर खानदान केर रहे, उकर जनम साइप्रस टापू में होई रहे। खास चेलामन उकर नाँव बरनाबास रखलैं (जेकर मतलब बिसवास में बनल रहेक लगिन उसकाएक वाला हेके)। उकर ठिना थोरेक जमीन रहे, जेके उ बेइच देलक आउर उकर से पावल पइसा के लाइन के खास चेलामन के देई देलक। हनन्याह नाँव केर एगो आदमी रहे, उ अपन जनाना सफीरा केर संगे बिचार काइर के अपन सम्पति में से थोरेक हिस्सा के बेइच देलक। आउर उकर दाम में से थोरेक के अपन ठिना राइख देलक, आउर इ गोइठ के उकर जनाना हों जानत रहे, आउर उकर एक हिस्सा के लाइन के खास चेलामन के देई देलक। पतरस उकर से कहलक, “हे हनन्याह! शैतान काले तोर मन में पवितर आत्मा से झूठ बोलेक केर बिचार के भाइर हे, आउर तोंय अपन बेचल सम्पति केर दाम केर एक हिस्सा के अपन लगिन राइख लेले? का बेचल जाएक से आगे उ तोर सम्पति नी रहे आउर बेचल पाछे हों उकर पइसा तोर अधिकार में नी रहे? तोर मन में इ बुरा काम करेक केर बिचार कइसन आलक? तोंय आदमीमन से निहीं, मगर परमेश्‍वर से झूठ कहले।” हनन्याह इ गोइठमन के सुनते हें भूंई में गिर के मोइर गेलक आउर जेतनामन इ घटना के सुनलैं सोउबमन डराय गेलैं। तब थोरेक जवानमन भीतरे आय के उकर लाश के कफन लुगा से लपटालैं आउर बाहरे लेई जाय के गाइड़ देलैं। लगभग तीन घंटा केर पाछे उकर जनाना भीतरे आलक आउर उके अपन पति केर मौत केर बारे में कोनों पता नी रहे। तब पतरस उकर से पूछलक, “का तोहरे उ सम्पति के एतने में बेइच रहा?” उ जबाब देलक, “हाँ, एतनेहें में बेइच रही।” पतरस उकर से कहलक, “इ का गोइठ हेके कि तोहरे दुयो झन प्रभु केर आत्मा केर परीक्षा लगिन एक मत होई गेला? देख, जे आदमीमन तोर पति के गाड़ेक लगिन जाय रहैं उमन दुरा ठिना आय जाहैं, आउर अब तोके हों बाहरे लेई जाबैं।” तब उ तुरते भूंई में गिरलक, आउर मोइर गेलक, आउर जवानमन भीतरे आय के उके मोरल पालैं, आउर उके बाहरे लेई के उकर पति ठिना गाइड़ देलैं। आउर सोउब कलीसिया केर बिसवासीमन आउर जेतना आदमीमन इ घटना केर बारे में सुनलैं सोउबमन डराय गेलैं। खास चेलामन से ढेइर चिन्हा आउर चमत्कार केर काम आदमीमन केर माझे होवत रहे आउर मसीह केर सोउब बिसवासीमन एक मन होई के राजा सुलैमान केर बरामदा में जमा होवत रहैं। मगर जेमन अब तक यीशु केर उपरे बिसवास नी काइर रहैं, उमन में से केखो उ मनक दल में मिलेक केर साहस नी होवत रहे, फिन भी आदमीमन उ मनक बड़ाई करत रहैं। प्रभु में बिसवास करेक वाला मनक गिनती बढ़ते गेलक। आउर जनानामन आउर मरदानामन केर एगो बड़का बिसवासी दल बाइन गेलक। जे कुछ खास चेलामन करत रहैं उकर चलते आदमीमन बेमरियामन के सड़कमन में लाइन के खटियामन आउर पटियामन में सुताय देवत रहैं, ताकि जब पतरस हुने से जाई, तो उकर छाँई हें उमन में से केकरो उपरे पाइड़ जाओक आउर उ ठीक होई जाओक। आउर यरुशलेम शहर केर आसे-पासे केर नगरमन से हों ढेइर आदमी बेमरियामन के आउर भूतमन से सताल आदमीमन के लानत रहैं, आउर उ सोउबमन ठीक होई जात रहैं। इ सोउब देइख के यहूदी महापुरोहित आउर उकर सोउब संगमन, मतलब सदूकी दल केर आदमीमन खास चेलामन से हिसिंगा करेक लगलैं। से लगिन उमन खास चेलामन के बंदी बनाय के जेहेल घर में साइज देलैं। मगर राइत के प्रभु केर एगो स्वरगदूत जेहेल घर केर दुरा खोइल के उमन के बाहरे लाइन के कहलक, “जावा, यहूदी मनक मंदिर में ठड़ाय के इ नवाँ जिंदगी केर बारे में आदमीमन के बतावा।” खास चेलामन बिहान होते हें यहूदी मनक मंदिर में जाय के जइसन उमन के बताल जाय रहे उपदेस देवेक लगलैं। मगर यहूदी महापुरोहित आउर उकर संगमन आय के यहूदी अगुवा मनक महासभा केर सदस्यमन के आउर इसराइली मनक धरम केर सोउब अगुवामन के जमा करलैं आउर खास चेलामन के लानेक लगिन मन्दिर केर पहरादारमन के जेहेल घर में भेजलैं। मगर मन्दिर केर पहरादारमन हूवाँ पोंहइच के खास चेलामन के जेहेल घर में नी पालैं, आउर घूइर के उमन के इ खबर देलैं, “हमरे हूवाँ जाय के देखली कि जेहेल घर केर दुरा में बढ़ियाँ से ताला लागल अहे आउर हूवाँ पहरादारमन हों ठड़ाल रहैं, मगर जब हमरे दुरा खोलली तो भीतरे केऊ हों नी मिललैं।” इ खबर सुइन के यहूदी मनक मंदिर केर पहरादारमन केर सरदार आउर यहूदी मुध पुरोहितमन चिंता में पाइड़ गेलैं कि इ घटना केर का परिणाम होवी। एतनेहें में केऊ आदमी आय के उमन के इ खबर देलक, “जेमन के तोहरे जेहेल घर में बंद काइर के राइख रहा, उमन यहूदी मनक मंदिर में ठड़ाय के आदमीमन के उपदेस देवाथैं।” जब उमन इ खबर सुनलैं तब यहूदी मनक मंदिर केर पहरादारमन केर सरदार, पहरादारमन केर संगे हूवाँ जाय के खास चेलामन के महासभा में लेई आलक। मगर उमन के जबरजस्ती नी लानलैं, काले कि उमन आदमीमन से डरात रहैं कि उमन हमरे के पखना से माइर-माइर के मोराय देबैं। उमन यीशु केर खास चेलामन के लाइन के यहूदी मनक महासभा में ठड़ुवाय देलैं तब यहूदी महापुरोहित उमन से पूछलक, “हमरे तोहरे के चेताय के आगया देई रही कि तोहरेमन यीशु केर नाँव से उपदेस ना देबा। फिन भी तोहरेमन गोटा यरुशलेम शहर के अपन उपदेस से भाइर देई हा, आउर तोहरे इ आदमी के लोहू बहाय के मोराएक केर दोष जबरजस्ती हमरे केर उपरे लगाएक चाहाला।” तब पतरस आउर आउरो खास चेलामन इकर जबाब देलैं, “आदमीमन केर आगया से बाइढ़ के परमेश्‍वर केर आगया के मानेक हें हमर फर्ज हेके। हमर बाप दादामन केर परमेश्‍वर यीशु के मोरलमन में से फिन जिंदा काइर देलक, जेके तोहरे क्रूस उपरे लटकाय के माइर मोराय रहा। परमेश्‍वर उखे प्रभु आउर छुटकारा देवाइया ठहराय के अपन भतखाइया आरा बइठाय के उके ऊँचा पद देलक, ताकि उ इसराइली आदमीमन के पाप काम के छोड़ेक केर शक्ति आउर पापमन के क्षमा देवोक। आउर हमरे इ गोइठमन केर गवाह हेकी, आउर पवितर आत्मा हों गवाह हेके, जेके परमेश्‍वर उ आदमीमन के देई हे, जेमन उकर आगया के मानैना।” जब महासभा केर सदस्यमन इ गोइठमन के सुनलैं तो उमन खिसे तिलमिलाय गेलैं, आउर खास चेलामन के माइर मोराएक चाहत रहैं। मगर गमलीएल नाँव केर एगो फरीसी दल केर आदमी जे मूसा केर नियम के सिखाएक वाला रहे, उकर सोउब आदमीमन आदर करत रहैं, महासभा में ठड़ाय के खास चेलामन के थोरेक देरी लगिन बाहरे लेई जाएक केर आगया देलक। आउर यहूदी अगुवा मनक महासभा केर सदस्यमन से कहलक, “हे इसराइली भाईमन, तोहरे सावधानी से बिचार करा कि इ आदमीमन केर संगे का करेक चाहाथा। काले कि थोरेक दिन पहिले थियूदास हों इ दावा करत रहे कि मोंय हों महान आदमी हेकों। आउर लगभग चाइर सौ आदमीमन उकर चेला बाइन गेलैं, मगर उ माइर मोराल गेलक, आउर उके मानेक वाला सोउब आदमीमन तितिर-बितिर होई गेलैं आउर उ मनक नामो-निशान मिट गेलक। उकर पाछे आदमी मनक गिनती करेक केर दिनमन में गलील परदेस केर रहेक वाला यहूदा आलक। उ ढेइर आदमीमन के बहकाय के अपन बटे मिलाय लेलक। ओहो माइर मोराल गेलक आउर उके मानेक वाला सोउब आदमीमन हों तितिर-बितिर होई गेलैं। से लगिन अब मोंय तोहर से कहाथों कि इ आदमीमन के छोइड़ देवा आउर इमन से दूर हें रहा। अगर इ योजना या काम आदमीमन बटे से अहे तो इ अपने आप मिट जाई। आउर अगर परमेश्‍वर केर बटे से अहे, तो तोहरे इके कहियो मेटाएक नी पारबा, कहीं एइसन ना होवोक कि तोहरे परमेश्‍वर से लड़ेक वाला बाइन जबा।” तब महासभा केर सदस्यमन उकर गोइठ के माइन लेलैं। उमन खास चेलामन के बोलाय के कोड़रा मरुवालैं, आउर उमन के इ आगया देलैं कि अब से यीशु केर नाँव में कोनों ना कहोक आउर उमन के छोइड़ देलैं। खास चेलामन महासभा से इ कइह के खुशी मनाते चाइल गेलैं कि हमरे यीशु केर चलते बेइज्जत होवेक केर लायक तो बनली। आउर खास चेलामन रोज दिन यहूदी मनक मंदिर में आउर घर-घर जाय के उपदेस देते आउर शुभ समाचार सुनाते रहलैं कि यीशु हें मसीह हेके। उ दिनमन में जब चेलामन गिनती में बढ़ेक लगलैं, तब यूनानी भाषा गोठियाएक वाला यहूदी बिसवासीमन इब्रानी भाषा गोठियाएक वाला यहूदी बिसवासीमन केर बिरोध में इ शिकाइत करलैं कि रोज-दिन केर खाएक बाँटेक में उ मनक बिधवा जनानामन केर धेयान नी देवल जाथे। तब बारहों खास चेलामन यरुशलेम शहर केर सोउब बिसवासी चेलामन के बोलाय के कहलैं, “हमरे लगिन इ उचित ना लगे कि हमरे परमेश्‍वर केर बचन के सुनाएक छोइड़ के खियाएक-पियाएक केर सेवा में लगल रहब। से लगिन, हे बिसवासी भाईमन, अपन में से सात झन मरदानामन के चुइन लेवा जेमन पवितर आत्मा आउर बुद्धि से भरल अहैं आउर उमन के सोउबमन जानैना। हमरेमन इ काम केर जिम्मेदारी उमन के देब। आउर हमरे प्रार्थना में आउर बचन केर परचार आउर शिक्षा देवेक केर सेवा में लगल रहब।” इ गोइठ सोउब बिसवासी चेलामन के बेस लगलक आउर उमन स्तिफनुस नाँव केर एगो आदमी के जे बिसवास आउर पवितर आत्मा से भरल रहे, आउर फिलिप्पुस, पुरखुरुस, निकानोर, तीमोन, परमिनास आउर अन्ताकिया गाँव केर नीकुलाउस के जे हाल में यहूदी बिसवासी बाइन रहे, चुइन लेलैं। आउर इमन के खास चेलामन केर आगे लानलैं आउर खास चेलामन इमन लगिन प्रार्थना काइर के इमन के काम करेक केर जिम्मेदारी देलैं। आउर परमेश्‍वर केर बचन फैलते गेलक आउर यरुशलेम शहर में चेलामन केर गिनती बढ़ते गेलक आउर कायनों झन यहूदी पुरोहितमन हों यीशु मसीह केर उपरे बिसवास केर इ संदेश के मानलैं। स्तिफनुस, जे उ सातों चुनल मरदानामन में से एगो रहे, परमेश्‍वर केर किरपा आउर शक्ति से भाइर के आदमीमन के बड़का-बड़का चमत्कार काम आउर चिन्हा देखात रहे। मगर थोरेक आदमीमन स्तिफनुस केर बिरोध करेक लगलैं। इमन यहूदी मनक प्रार्थना घर केर उ सदस्यमन रहैं, जेमन के आजाद आदमी कहल जात रहे, इमन कुरेन आउर सिकंदरिया शहरमन केर आउर किलिकिया आउर आसिया परदेस केर रहैं इमन स्तिफनुस से बहस करेक लगलैं। मगर स्तिफनुस केर गोइठमन केर कोनों जबाब देवेक नी पारलैं काले कि पवितर आत्मा उके ढेइर बुद्धिमानी से बोलेक में मदइत करत रहे। तब उमन थोरेक आदमीमन के स्तिफनुस केर बारे में झूठ कहेक लगिन बहकालैं, “हमरे स्तिफनुस के मूसा आउर परमेश्‍वर केर निंदा करते सुइन ही।” इ लेखे उमन आदमीमन के, धरम केर अगुवामन के आउर मूसा केर नियम के सिखाएक वालामन के भड़कालैं आउर उमन आय के स्तिफनुस के धारलैं आउर उके महासभा केर सामने लेई आनलैं। हूवाँ उमन झूठा गवाहमन के ठड़ुवालैं, जेमन स्तिफनुस केर उपरे इ दोष लगालैं, “इ आदमी सोउब बेरा इ पवितर मन्दिर आउर मूसा केर नियम केर निंदा करेला। काले कि हमरे इके इ कहते सुइन ही कि यीशु नासरी इ मंदिर के गिराई देई आउर उ सोउब नियममन के बदइल देई, जेके मूसा हमरे के देई हे।” धरम महासभा केर सोउब सदस्यमन धेयान से स्तिफनुस बटे देखत रहैं आउर उकर चेहरा स्वरगदूत केर चेहरा नियर चमकत रहे। यहूदी महापुरोहित स्तिफनुस से पूछलक, “का इ दोष सही हेके?” उ जबाब देलक, “हे भाईमन आउर आबामन! मोर गोइठ के सुना। हमर पुरखा अब्राहम हारान नगर में आय के बसेक से पहिले जब उ मेसोपोटामिया परदेस में रहत रहे, उ बेरा महिमा से भरल परमेश्‍वर उके देखाई देलक। आउर उकर से कहलक, ‘तोंय अपन देस आउर अपन कुटुम्बमन के छोइड़ के उ देस में चाइल जा, जेके मोंय तोके देखामूँ।’ से लगिन उ कसदीमन केर देस के छोइड़ के हारान नगर में जाय के बाइस गेलक। जब उकर आबा मोइर गेलक तब परमेश्‍वर उके हूवाँ से लाइन के इ देस में मतलब इसराइल देस में बसालक, जेकर में आइज हमरे बाइस ही। उ समय इ देस में परमेश्‍वर उके अधिकार केर रूप में गोड़ रखेक केर ठाँव तक नी देलक, मगर उ अब्राहम से करार करलक कि मोंय इ देस के तोर आउर तोर पाछे तोर बंश केर अधिकार में काइर देमूँ, मगर उ समय अब्राहम केर संतान हों नी रहैं। आउर परमेश्‍वर अब्राहम से एहो कहलक, ‘तोर बंश पराया देस में परदेसी नियर रहबैं। आउर हूवाँ केर आदमीमन उमन के अपन धांगर बनाय के रखबैं आउर चाइर सौ बरिस तक उ मनक संगे बुरा ब्यवहार करबैं।’ परमेश्‍वर फिन कहलक, ‘जे देस केर आदमीमन उमन के सताबैं, उ देस केर आदमीमन के मोंय सजा देमूँ। इकर पाछे उमन उ देस से निकइल जाबैं आउर इ देस में आय के एहे ठाँव में मोर भक्ति करबैं।’ परमेश्‍वर अब्राहम केर संगे करार करलक आउर उकर से कहलक कि उ अपन घर केर सोउब मरदानामन केर करार केर चिन्हा केर रूप में खतना करुवाओक। एक बरिस पाछे जब इसहाक केर जनम होलक तो आठवाँ दिन उकर खतना करलक, आउर इसहाक से याकूब आउर याकूब से बारह गोतर जनमलैं। आउर याकूब केर बेटामन अपन भाई यूसुफ के जलन से मिसर देस जाएक वालामन ठिना बेइच देलैं, मगर परमेश्‍वर उकर संगे रहे। परमेश्‍वर यूसुफ के सोउब दुःखमन से छोड़ाय के मिसर देस केर राजा फिरौन केर नजइर में दया आउर बुद्धि देलक, आउर राजा फिरौन उके मिसर देस केर आउर अपन पूरा राजमहल केर अधिकारी बनाय देलक। जब यूसुफ मिसर देस केर अधिकारी रहे, तब पूरा मिसर देस आउर कनान देस में अकाल होलक, जेकर से हर ठाँव में दुःख आउर तकलीफ झेलेक पड़लक आउर हमर पुरखामन के हों खाएक लगिन अन्न नी मिलत रहे। मगर जब याकूब के इ पता होलक कि मिसर देस में अन्न अहे, तो उ हमर बाप-दादामन के अन्न कीन लानेक लगिन हूवाँ पहिले बेर भेजलक। उमन हूवाँ यूसुफ से मिललैं आउर अन्न कीनलैं, मगर उमन उके नी चिन्हलैं। दूसरा बेर जब उमन अन्न किनेक लगिन हूवाँ गेलैं, तो यूसुफ खुद के अपन भाईमन केर उपरे दिस्तार काइर देलक, आउर राजा फिरौन के यूसुफ केर घराना पता होलक। तब यूसुफ अपन आबा याकूब के आउर अपन सोउब कुटुम्बमन के, जे पचहत्तर झन रहैं, मिसर देस आवेक लगिन खबर भेजलक। तब याकूब मिसर देस में गेलक, आउर पाछे हूवाँ उ आउर हमर पुरखामन मोइर गेलैं। उमन याकूब आउर उकर बेटा मनक हाड़मन के हमरे केर देस कनान में लेई आनलैं, आउर उमन याकूब केर हाड़ के उ कबर में गाड़लैं जेके अब्राहम दाम केर रूप में चाँदी देई के कीन रहे। आउर याकूब केर बेटा मनक हाड़ के शकेम शहर केर उ खेत में गाड़लैं, जेके याकूब हामोर केर बेटामन से कीन रहे। परमेश्‍वर अब्राहम से जे करार काइर रहे, जब उकर पूरा होवेक केर बेरा भीरे आलक, तब हमर आदमीमन केर गिनती मिसर देस में ढेइर बगरा बाइढ़ गेलक। से बेरा मिसर देस में दोसर राजा रहे, जे यूसुफ केर बारे में कोनों नी जानत रहे। उ हमर पुरखामन केर संगे चलाँकी से बुरा ब्यवहार करलक, हिंयाँ तक कि हमर पुरखामन के अपन नवाँ जनमल छउवामन के बाहरे नदी में फेइक देवेक लगिन मजबूर करलक ताकि एको गो छउवा जिंदा ना रहोक। एहे समय में मूसा केर जनम होलक, जे परमेश्‍वर केर नजइर में ढेइरे सुन्दर रहे। आउर तीन महिना तक उकर आयो-आबा उके लुकाय के पालन पोषण करलैं। मगर जब उके आउर लुकाएक नी पारलैं तो उके घर केर बाहरे राइख देलैं आउर राजा फिरौन केर बेटी नदी किनारे से निकलाय के उके गोद लेई लेलक आउर अपन बेटा नियर पोसलक। आउर मूसा के मिसरीमन केर सोउब शिक्षा पढ़ाल गेलक, उ गोइठ-बात आउर काम करेक में शक्तिशाली रहे। जब मूसा चालीस बरिस केर होलक, तो उकर मन में अपन इसराइली भाईमन से भेंट करेक केर बिचार आलक। हूवाँ उ मिसर देस केर आदमी के इसराइली आदमी केर उपरे अन्याय करते देइख के उके बचालक आउर मिसरी आदमी के मोराय के उकर बदला लेलक। मूसा केर बिचार इ रहे कि मोर भाईमन बुइझ जाबैं कि परमेश्‍वर मोर हाँथ से उमन के गुलामी से छुटकारा देवी, मगर उमन एइसन नी बुझलैं। दूसरा दिन मूसा दूई झन इसराइली आदमीमन के लड़ते देखलक, उ इ कइह के उमन में सलहा कराएक केर कोशिश करलक, ‘हे भाईमन! तोहरे तो दुयो भाई-भाई हेका, तोहरे आपस में काले लड़ाथा?’ मगर जे आदमी अपन इसराइली भाई से लड़त रहे, उ मूसा के ढेकइल देलक आउर उकर से कहलक, ‘के तोके हमर उपरे राजा आउर फैसला करेक वाला हाकिम ठहराय हे? काइल जे लेखे तोंय मिसरी आदमी के माइर मोराले, का ओहे लेखे मोके हों माइर मोराएक चाहाथिस?’ इ गोइठ सुइन के मूसा डराय गेलक आउर हूवाँ से भाइग गेलक। आउर मिदियान देस में परदेसी बाइन के रहेक लगलक। हूवाँ उकर दूई झन बेटा जनमलैं। मिदियान देस में जब मूसा केर पूरा चालीस बरिस बीत गेलक, तो परमेश्‍वर उके सीनै पहार केर सुनसान ठाँव में बरते झूँड़ में एगो स्वरगदूत नियर दिस्तार देलक। जब मूसा बरते झूँड़ के देखलक जे भसम नी होवत रहे तो उ ताजुब होई गेलक, आउर जब देखेक लगिन भीरे गेलक तो उके प्रभु केर इ आवाज सुनालक, ‘मोंय तोर पुरखा मनक मतलब अब्राहम, इसहाक आउर याकूब केर परमेश्‍वर हेकों।’ मूसा डरे थरथराय गेलक, उके फिन देखेक केर साहस नी होलक। तब परमेश्‍वर उकर से कहलक, ‘अपन गोड़ केर जूता खोइल ले, काले कि जे ठाँव में तोंय ठड़ाय हिस, उ पवितर ठाँव हेके। मोंय सचमुच अपन आदमीमन केर दुरदशा के जे मिसर देस में अहैं, देइख हों, आउर उ मनक चिखेक आउर काँदेक के सुइन हों, से लगिन उमन के छोड़ाएक आय हों। अब आव, मोंय तोखे मिसर देस में भेजमूँ।’ इ ओहे मूसा हेके, जेके इसराइली आदमीमन इ कइह के ठुकराय देई रहैं, ‘तोके के हमर उपरे राजा आउर फैसला करेक वाला हाकिम ठहराय हे?’ उखे परमेश्‍वर स्वरगदूत बटले राजा आउर छोड़ाएक वाला ठहराय के उ मनक ठिना भेजलक। ओहे आदमी इसराइली आदमीमन के मिसर देस में लाल समुदर आउर सुनसान परदेस में चालीस बरिस तक चमत्कार काम आउर चिन्हा देखाय-देखाय के हूवाँ से सुनसान ठाँव में बाहरे निकलाय लानलक। इ ओहे मूसा हेके, जे इसराइली आदमीमन से कहलक, ‘परमेश्‍वर तोहर भाईमन में से तोहर लगिन मोर जइसन एगो परमेश्‍वर केर संदेश के बताएक वाला खड़ा करी।’ एहे मूसा सुनसान ठाँव में हमर पुरखामन केर माझे एगो अगुवा केर रूप में रहे। परमेश्‍वर एगो स्वरगदूत के भेजलक जे सीनै पहार उपरे उकर संगे गोठियाय रहे। उखे परमेश्‍वर जीवन देवेक वाला बचन बतालक आउर उके हमरे तक पोंहचालक। मगर हमर बाप-दादामन उकर गोइठ मानेक नी चाहलैं आउर मूसा के ठुकराय देलैं। उमन मिसर देस घुरेक चाहत रहैं। आउर उमन मूसा केर भाई हारून से कहलैं, ‘हमरे लगिन एगो एइसन देवता बनाव, जे मिसर देस घुरेक लगिन हमरे केर आगे-आगे चली, काले कि इ मूसा जे हमरे के मिसर देस से निकलाय लानलक, उकर का होलक, हमरे नी जानिला?’ उ दिनमन में उमन एगो बछरु केर मूर्ति बनाय के उकर आगे बलिदान चढ़ालैं आउर अपन हाँथ केर बनाल मूर्ति लगिन खुशी मनालैं। से लगिन परमेश्‍वर उमन बटे से मुँह मुइड़ लेलक आउर उमन के आकाश केर बेइर, चाँद आउर तइरगनमन के अपन देवता केर रूप में भक्ति करेक लगिन छोइड़ देलक। जइसन परमेश्‍वर केर संदेश के बताएक वालामन केर किताब में लिखल अहे, ‘हे इसराइल केर घराना केर आदमीमन, का तोहरे सुनसान ठाँव में चालीस बरिस तक जानवर केर बलिदान आउर अन्नबलि मोके चढ़ाला? निहीं! तोहरे तो उ तंबू के बोइह के घुमाय फिरला, जेकर में तोहर देवता मोलेक केर मूर्ति आउर तोहर देवता रिफान केर तइरगन केर मूर्ति रहे, मतलब उ मूर्तिमन के जेके तोहरे पूजा करेक लगिन बनाय रहा। से लगिन मोंय तोहरे के बेबीलोन देस केर बाहरे लेई जाय के बसामूँ।’ सुनसान ठाँव में हमर बाप-दादामन केर ठिना गवाही केर तंबू रहे, परमेश्‍वर मूसा के इकर बारे में इ आगया देई रहे, ‘तोंय जे साइज देइख हिस, ओहे लेखे उके बनाव।’ ढेइर समय पाछे ओहे तंबू अगला पीढ़ी केर बाप दादामन के मिललक आउर उमन उके यहोशू केर अगुवाई में इ देस में लेई आनलैं। उ समय इ देस परजाइतमन केर अधिकार में रहे, मगर परमेश्‍वर उमन के हमर बाप दादामन केर सामने से निकलाय देलक, आउर उ तंबू राजा दाऊद केर समय तक रहलक। राजा दाऊद केर उपरे परमेश्‍वर केर दया रहे, से लगिन उ बिनती करलक कि याकूब केर परमेश्‍वर लगिन एगो घर बनाओक। मगर राजा दाऊद केर बेटा सुलैमान उकर लगिन मंदिर बनुवालक। मगर परमप्रधान परमेश्‍वर हाँथ केर बनाल मंदिर में नी रहेला, जइसन कि परमेश्‍वर केर संदेश के बताएक वाला कइह हे, ‘परमेश्‍वर कहेला, स्वरग मोर सिंहासन आउर धरती मोर गोड़ रखेक केर पिढ़ा हेके। मोर लगिन तोहरे कोन रकम केर मंदिर बनाबा आउर मोर आराम केर ठाँव कहाँ होवी? का इ सोउब चीजमन मोर हाँथ केर बनाल ना लगे?’ हे मन केर ढींठ आदमीमन, तोहरे उकर गोइठ के मानेक आउर सुनेक से ठुकराय देवाला। तोहरे सोउब बेरा हें पवितर आत्मा केर बिरोध कराला, जइसन तोहर बाप दादामन करत रहैं। परमेश्‍वर केर संदेश के बताएक वालामन में से केके तोहर बाप दादामन नी सतालैं? उमन उ परमेश्‍वर केर संदेश के बताएक वालामन के माइर मोरालैं, जेमन धरमी आदमी मतलब मसीह केर आवेक केर भविष्यवाणी काइर रहैं आउर अब तोहरे हों जब यीशु आलक तो उके धरुवाय के मरुवाय देला। तोहरे ओहेमन हेका, जेमन के स्वरगदूतमन बटे से मूसा केर नियम देवल गेलक, मगर उकर पालन नी करला।” जब यहूदी अगुवा मनक महासभा केर आदमीमन स्तिफनुस केर इ गोइठमन के सुनलैं तो उमन खिसे रंजाय गेलैं आउर उकर उपरे दाँत केटरेक लगलैं। मगर उ पवितर आत्मा से भाइर के स्वरग बटे देखलक आउर उ परमेश्‍वर केर तेज रोशनी के आउर यीशु के परमेश्‍वर केर भतखाइया आरा ठड़ाल देखलक। आउर उमन से कहलक, “देखा, मोंय स्वरग के खुलल आउर आदमी केर बेटा के परमेश्‍वर केर भतखाइया आरा ठड़ाल देखाथों।” इ गोइठ के सुनते हें उमन जोर से चिल्लाय के अपन कान के बंद काइर लेलैं। आउर एके संगे स्तिफनुस केर उपरे झपटलैं। आउर उमन स्तिफनुस के धाइर के यरुशलेम शहर केर बाहरे खींचते लेई गेलैं आउर हूवाँ उके पखना से माइर मोरालैं, इ बेरा स्तिफनुस केर उपरे दोष लगाएक वाला आदमीमन अपन उपरी लुगा के खोइल के शाऊल नाँव केर एगो जवान केर गोड़ ठिना राइख देई रहैं। जब उमन स्तिफनुस के पखना से मारत रहैं तब उ इ कइह के प्रार्थना करत रहे, “हे प्रभु यीशु, मोर आत्मा के लेई ले।” फिन ठेहुना टेइक के जोर से कहलक, “हे प्रभु, उ मनक इ पाप के क्षमा काइर दे।” आउर इ कइह के मोइर गेलक। स्तिफनुस के माइर मोराएक में शाऊल हों पूरा-पुरी राजी रहे। ओहे दिन से यरुशलेम शहर में कलीसिया केर आदमीमन उपरे ढेइर सताव शुरु होई गेलक। आउर यीशु केर खास चेलामन के छोइड़ के सोउब बिसवासी आदमीमन यहूदिया आउर सामरिया परदेस में तितिर-बितिर होई गेलैं। थोरेक भक्त आदमीमन स्तिफनुस केर लाश के कबर में गाइड़ देलैं आउर उकर लगिन ढेइर दुःख मनालैं। शाऊल उ समय कलीसिया केर आदमीमन के सतात रहे। उ घर-घर ढूइक के बिसवासी मरदानामन आउर जनानामन के घिसराय-घिसराय के जेहेल घर में साइज देवत रहे। मगर जे बिसवासी आदमीमन तितिर-बितिर होई जाय रहैं, उमन घुइम-घुइम के शुभ समाचार केर परचार करत रहैं। फिलिप्पुस सामरिया परदेस केर एगो शहर में जाय के आदमीमन के मसीह केर शुभ समाचार परचार करेक लगलक। जे गोइठमन के फिलिप्पुस आदमीमन के बतालक, उके सुइन के आउर जे चमत्कार काम केर चिन्हामन के उ देखात रहे, उके देइख के उमन एक मन होई के उकर गोइठमन केर उपरे धेयान देवेक लगलैं। काले कि जब फिलिप्पुस आदेश देलक तब ढेइर आदमीमन में से भूतमन जोर से चिल्लाते निकइल गेलैं, आउर ढेइर लकवा मरल आउर लंगड़ा आदमीमन हों ठीक होई गेलैं। आउर उ शहर केर आदमीमन ढेइर खुश होलैं। उ शहर में फिलिप्पुस केर आवेक से आगे सिमोन नाँव केर एगो आदमी रहत रहे, जे थोरेक समय से जादू-टोना काइर के सामरिया परदेस केर आदमीमन के चकित काइर देवत रहे आउर खुद के एगो महान आदमी बतात रहे। आउर छोट-बाड़ सोउब आदमीमन उकर गोइठ के माइन के कहत रहैं, “इ आदमी परमेश्‍वर केर उ शक्ति हेके, जे महान कहायला।” उ ढेइर दिनमन से अपन जादू से आदमीमन के चकित काइर के राइख रहे, से लगिन उमन उके ढेइर मानत रहैं। मगर जब आदमीमन फिलिप्पुस से परमेश्‍वर केर राइज आउर यीशु मसीह केर नाँव केर शुभ समाचार सुनलैं तो उकर उपरे बिसवास करलैं, आउर सोउब मरदाना आउर जनानामन बपतिस्मा जल संस्कार लेलैं। सिमोन खुद हें फिलिप्पुस केर संदेश उपरे बिसवास करलक आउर बपतिस्मा जल संस्कार लेई के फिलिप्पुस केर संगे चेला बाइन के रहेक लगलक। उ चिन्हा आउर बड़का-बड़का चमत्कार केर काम देइख के ताजुब होवत रहे। जब यरुशलेम शहर में रहेक वाला यीशु केर खास चेलामन इ सुनलैं कि सामरिया परदेस केर आदमीमन परमेश्‍वर केर बचन के माइन लेई हैं तो उमन पतरस आउर यूहन्ना के उमन ठिना भेजलैं। उमन हूवाँ जाय के उमन लगिन इ प्रार्थना करलैं कि उमन पवितर आत्मा पाओक। काले कि अब तक उमन में से केकरो उपरे पवितर आत्मा नी भेजल जाय रहे, उमन सिरिफ प्रभु यीशु मसीह केर नाँव में बपतिस्मा जल संस्कार लेई रहैं। पतरस आउर यूहन्ना उ मनक उपरे हाँथ राइख के प्रार्थना करलैं आउर उमन के पवितर आत्मा मिल गेलक। जब सिमोन देखलक कि खास चेलामन केर हाँथ रखेक से पवितर आत्मा मिलेला, तो उ मनक ठिना रुपया लाइन के कहलक, “मोके हों इ अधिकार देवा कि मोंय जेकर उपरे हाँथ रखमूँ उके पवितर आत्मा मिल जाओक।” मगर पतरस उकर से कहलक, “तोर रुपया तोर संगे नाश होवोक, काले कि तोंय परमेश्‍वर केर दान के रुपयामन से किनेक केर बिचार करले। इ सेवकाई में तोर ना हिस्सा अहे आउर ना कोनों अधिकार अहे, काले कि तोर मन परमेश्‍वर केर आगे सच्चा नखे। तोंय अपन इ पाप करेक छोइड़ दे आउर प्रभु से प्रार्थना कर कि उ तोर बुरा बिचार के क्षमा काइर देई। तोंय अपन इ बुरा काममन के छोइड़ दे, काले कि मोंय देखाथों तोंय जलन आउर अधरम केर बंधन में अहिस।” सिमोन जबाब देलक, “तोहरेमन हें मोर लगिन प्रभु से प्रार्थना करा, जेकर से जे गोइठमन तोंय कहले, उमन में से एको गो मोर उपरे ना बितोक।” पतरस आउर यूहन्ना गवाही देई के आउर प्रभु केर बचन सुनाय के यरुशलेम शहर घूइर आलैं। आउर घुरेक बेरा सामरी आदमीमन केर ढेइर गाँवमन में शुभ समाचार सुनाते गेलैं। फिन प्रभु केर एगो स्वरगदूत फिलिप्पुस से कहलक, “उठ आउर दक्खिन बटे उ डहर में जा, जे यरुशलेम शहर से गाजा शहर लेई जायला।” इ डहर सुनसान अहे। उ उइठ के चाइल गेलक। उ समय अचका एगो आदमी से मिललक, जे खोजा रहे आउर उ इथियोपिया देस केर रानी कन्दाके केर मंत्री आउर खजांची रहे, उ भक्ति करेक लगिन यरुशलेम शहर आय रहे। आउर उ रथ में बाइठ के अपन देस घुरत रहे, आउर यशायाह परमेश्‍वर केर संदेश के बताएक वाला केर किताब के जोर-जोर से पढ़ते जात रहे। तब पवितर आत्मा फिलिप्पुस से कहलक, “भीरे जाय के इ रथ केर संगे-संगे चल।” फिलिप्पुस कूइद के खोजा ठिना पोहोंचलक आउर उके यशायाह परमेश्‍वर केर संदेश के बताएक वाला केर किताब पढ़ते सुनलक, आउर उकर से पूछलक, “तोंय जेके पढ़ाथिस, का उके समझिसला?” उ जबाब देलक, “जब तक केऊ मोके नी समझाई तो मोंय कइसन समझमूँ?” आउर खोजा फिलिप्पुस से रथ में चाइढ़ के अपन ठिना बइठेक लगिन बिनती करलक, तब फिलिप्पुस रथ में चाइढ़ के उकर संगे बाइठ गेलक। पवितर किताब केर जे पाठ के उ पढ़त रहे, उ इ रहे कि उ भेड़ी नियर मोराय जाएक लगिन पोंहचाल गेलक, आउर जइसन मेमना अपन ऊन कतरेक वालामन केर आगे चुपचाप रहेला, तइसनेहें जब आदमीमन उके दुःख देलैं, तब ओहो अपन मुँह नी खोललक। उकर अपमान करल गेलक आउर उके न्याय नी मिललक। आउर केऊ उकर बंश केर बारे में बताएक नी पारबैं, काले कि इकर से आगे कि धरती में उकर केऊ बंश होतैं, आदमीमन उके माइर मोरालैं। खोजा फिलिप्पुस से पूछलक, “मोंय तोर से बिनती कराथों कि मोके बताव परमेश्‍वर केर संदेश के बताएक वाला केकर बारे में इ कहाथे, अपन बारे या केऊ दोसर केर बारे में कहाथे?” तब फिलिप्पुस उके बताएक लगलक, आउर पवितर किताब केर ओहे पाठ से शुरु काइर के उके यीशु मसीह केर शुभ समाचार बतालक, खोजा इ गोइठ के समइझ गेलक आउर यीशु केर उपरे बिसवास करलक। डहर में चलते-चलते उमन एगो पोखरा ठिना पोहोंचलैं। आउर पोखरा के देइख के खोजा फिलिप्पुस से कहलक, “देख, हिंयाँ पानी अहे, अब मोके बपतिस्मा जल संस्कार लेवेक में का रुकावट अहे?” फिलिप्पुस उके जबाब देलक, “अगर तोंय पूरा मन से बिसवास करिसला तो कोनों रुकावट नखे।” उ जबाब देलक, “मोंय बिसवास करोना कि यीशु मसीह हें परमेश्‍वर केर बेटा हेके।” तब खोजा रथ के ठड़ाएक केर हुकूम देलक। तब दुयो पोखरा में ढूकलैं आउर फिलिप्पुस खोजा के बपतिस्मा जल संस्कार देलक। जब उमन पोखरा से निकइल के बाहरे आलैं, तो प्रभु केर आत्मा फिलिप्पुस के उठाय के लेई गेलक। आउर खोजा उके फिन नी देखलक। आउर खोजा इ कइह के कि परमेश्‍वर मोके बचाय लेलक, खुशी मनाते अपन देस घूइर गेलक। आउर फिलिप्पुस खुद के अशदोद शहर में पालक, आउर जब तक उ कैसरिया शहर में नी पोहोंचलक, तब तक नगर-नगर शुभ समाचार सुनाते गेलक। इ समय शाऊल प्रभु यीशु केर चेलामन के धमकाएक आउर मोराएक केर धुन में रहे, उ यहूदी महापुरोहित ठिना गेलक। आउर उकर से दमिश्क नगर केर यहूदी मनक प्रार्थना घरमन केर नाँव चिट्ठी माँगलक, जेकर में उके इ अधिकार देवल गेलक कि अगर हूवाँ प्रभु यीशु केर डहर में चलेक वाला मरदानामन चाहे जनानामन मिलबैं, तो उ उमन के बाइंध के यरुशलेम शहर लेई आवी। मगर चलते-चलते जब शाऊल आउर उकर संगमन दमिश्क नगर केर भीरे पोहोंचलैं तो अचका आकाश से उकर चाइरो बटे इंजोत चमकलक। आउर उ भूंई उपरे गिर गेलक आउर इ आवाज सुनलक, “हे शाऊल, हे शाऊल, तोंय मोके काले सताथिस?” शाऊल पूछलक, “हे प्रभु, तोंय के हेकिस?” उ जबाब देलक, “मोंय यीशु हेकों, जेके तोंय सताथिस। मगर अब उठ आउर नगर में जा। हूवाँ तोके बताय देवल जाई कि तोके का करेक अहे।” जे आदमीमन उकर संगे रहैं, उमन चुपचाप ठड़ाय गेलैं काले कि आवाज तो सुनत रहैं, मगर केखो कोनों नी दिसत रहे। तब शाऊल भूंई से उठलक, मगर जब उ आँइख खोललक तो उ कोनों देखेक नी पारलक। से लगिन उकर संगमन उकर हाँथ धाइर के दमिश्क नगर लेई गेलैं। आउर उ तीन दिन तक देखेक नी पारलक, आउर कोनों नी खालक, ना पीलक। दमिश्क नगर में हनन्याह नाँव केर एगो चेला रहत रहे। प्रभु यीशु उके दर्शन देई के कहलक, “हे हनन्याह!” उ जबाब देलक, “हाँ प्रभु।” तब प्रभु यीशु उकर से कहलक, “तुरते उइठ के सीधा नाँव केर गली में जा, आउर यहूदा केर घर में शाऊल नाँव केर एगो तरसुस नगर केर रहेक वाला आदमी केर पता लगाव। काले कि इ बेरा उ प्रार्थना कराथे। उ दर्शन में देइख हे कि हनन्याह नाँव केर एगो आदमी उकर ठिना आय के उकर उपरे हाँथ रखलक कि उ फिन से देखेक पारोक।” मगर हनन्याह जबाब देलक, “हे प्रभु, मोंय इ आदमी केर बारे में ढेइर आदमीमन से सुइन हों कि इ यरुशलेम शहर में तोर पवितर आदमीमन केर उपरे बड़का-बड़का बुराई काइर हे। आउर हिंयाँ हों इके यहूदी मुध पुरोहितमन केर बटे से इ अधिकार मिल हे कि जे आदमीमन तोर उपरे बिसवास करैना, उमन के बाइंध के यरुशलेम शहर लेई जाओक।” मगर प्रभु यीशु उकर से कहलक, “तोंय चाइल जा। उ मोर चुनल आदमी हेके। उ परजाइत आदमीमन, राजामन, आउर इसराइली आदमीमन केर माझे मोर बारे में परचार करी। आउर मोंय उके बतामूँ कि आदमीमन के मोर बारे में बताएक केर चलते उके कइसन-कइसन दुःख उठाएक होवी।” तब हनन्याह उइठ के उ घर में आलक, जहाँ शाऊल रहे आउर उकर उपरे हाँथ राइख के कहलक, “हे भाई शाऊल, प्रभु यीशु, जे तोके डहर में दर्शन देई रहे, ओहे मोके भेइज हे, ताकि तोंय फिन से देखेक पारबे आउर तोंय पवितर आत्मा से भाइर जाबे।” आउर तुरते उकर आँइख से छिलका जइसन गिरलक, आउर उ फिन से देखेक लगलक आउर उइठ के बपतिस्मा जल संस्कार लेलक। उ खाय के ताकत पालक। आउर थोरेक दिन तक दमिश्क नगर केर चेलामन केर संगे हें रहे। आउर उ तुरते हूवाँ केर यहूदी मनक प्रार्थना घरमन में जाय के यीशु केर बारे में परचार करेक लगलक कि यीशु हें परमेश्‍वर केर बेटा हेके। आउर सुनेक वाला सोउब आदमीमन ताजुब होई के कहेक लगलैं, “का इ उ आदमी ना लगे जे यरुशलेम शहर में यीशु मसीह केर बिसवासीमन के नाश करत रहे? आउर हिंयाँ हों बिसवासी आदमीमन के बाइंध के यहूदी मुध पुरोहितमन ठिना लेई जाएक लगिन हें आय हे।” मगर शाऊल आउर हें शक्ति पाय के परचार करते गेलक। आउर इ गोइठ केर सबूत देई-देई के कि यीशु हें मसीह हेके, दमिश्क नगर में रहेक वाला यहूदी आदमीमन केर मुँह बंद करते रहलक। जब शाऊल केर दमिश्क नगर में रइह के परचार करते ढेइर दिन बीत गेलक, तो यहूदी आदमीमन मिल के उके माइर मोराएक केर योजना बनालैं। मगर उ मनक योजना केर बारे में शाऊल के पता होई गेलक। उमन उके माइर मोराएक लगिन राइत दिन नगर केर दुरामन ठिना पहरा देवत रहैं। मगर उकर चेलामन उके राइत के पखना केर ऊँचा घेरा में लेई गेलैं, जे नगर केर चाइरो बटे रहे। आउर उके एगो डलिया में बइठालैं आउर डोरा से बाइंध के घेरा उपरे से हेंठे उतराय देलैं। जब शाऊल यरुशलेम शहर में पोहोंचलक तो उ यीशु मसीह केर चेलामन केर संगे मिल जाएक केर कोशिश करलक, मगर उमन सोउब उकर से डरात रहैं, काले कि उमन के बिसवास नी होवत रहे कि उ हों यीशु केर चेला बाइन जाय हे। मगर बरनाबास शाऊल के अपन संगे यीशु केर खास चेलामन ठिना लेई के उमन के बतालक कि इ दमिश्क नगर जाएक केर डहर में कइसन प्रभु यीशु के देखलक, आउर प्रभु यीशु इकर से गोठियालक। फिन बरनाबास उमन के एहो बतालक कि दमिश्क नगर में इ कइसन साहस से यीशु केर बारे में परचार करलक। यीशु केर खास चेलामन बरनाबास केर गोइठ उपरे बिसवास करलैं, से लगिन शाऊल उमन केर संगे यरुशलेम शहर केर हर ठाँव में आवेक-जाएक लगलक आउर निडर होई के यीशु केर बारे में परचार करेक लगलक। शाऊल यूनानी भाषा गोठियाएक वाला यहूदी आदमीमन से बात-चीत आउर बहस करत रहे, मगर उमन उके माइर मोराएक केर कोशिश करत रहैं। जब बिसवासी भाईमन के इकर बारे में पता चललक तो उके कैसरिया शहर में लेई गेलैं, आउर हूवाँ से तरसुस नगर भेइज देलैं, जहाँ उकर घर रहे। अब समूचा यहूदिया परदेस, गलील परदेस, आउर सामरिया परदेस में कलीसिया केर आदमीमन के चैन मिललक, आउर उ मनक बिसवास मजबूत होते गेलक, काले कि उमन प्रभु केर डार में जिंदगी बितात रहैं, उमन पवितर आत्मा केर मदइत से शांति पालैं आउर बिसवासीमन केर गिनती बढ़ते गेलक। पतरस सोउब परदेस में चाइरो बटे घूमते गेलक आउर एक दिन उ पवितर आदमीमन ठिना हों पोहोंचलक, जे लुद्दा नगर में रहत रहैं। हूवाँ उके एनियास नाँव केर लकवा मरल एगो आदमी मिललक, जे आठ बरिस से खटिया उपरे पड़ल रहे। पतरस उकर से कहलक, “हे एनियास! यीशु मसीह तोके ठीक कराथे, उठ, अपन डिसना के खुद ठीक कर।” आउर उ तुरते उइठ के ठड़ाय गेलक। आउर लुद्दा आउर शारोन नगर में रहेक वाला ढेइर आदमीमन उकर ठीक होवेक के देइख के प्रभु यीशु केर उपरे बिसवास करलैं। याफा नगर में तबिता नाँव केर एगो बिसवासी जनाना चेला रहत रहे, यूनानी भाषा में उकर नाँव दोरकास रहे। उ ढेइर बेस-बेस काम आउर गरीब आदमीमन केर मदइत करत रहे। जब पतरस लुद्दा नगर में रहे, ओहे दिनमन में उ बेमार होई के मोइर गेलक आउर उमन उके नहुवाय के उपरे केर कोठरी में सुताय देलैं। लुद्दा नगर याफा नगर केर भीरे रहे। जब चेलामन सुनलैं कि पतरस हूवाँ अहे, तो उमन दूई झन आदमीमन के भेइज के उकर से बिनती करलैं कि तोंय तुरते हमर ठिना आय जा। पतरस उइठ के उमन संगे चाइल गेलक। आउर जब पोंहइच गेलक, तो उमन उके उपरे केर कोठरी में लेई गेलैं, आउर हूवाँ सोउब बिधवामन उकर चाइरो बटे ठड़ाय के काँदत रहैं। उमन पतरस के झुला आउर लुगा देखाएक लगलैं, जेके दोरकास उमन संगे रइह के, उमन केर लगिन बनाय रहे। पतरस सोउब के बाहरे काइर देलक, आउर ठेहुना टेइक के प्रार्थना करलक। आउर लाश बटे देइख के कहलक, “हे तबिता, उठ!” तब उ अपन आँइख खोइल देलक आउर पतरस के देइख के उइठ के बाइठ गेलक। पतरस हाँथ बढ़ाय के उके उठालक आउर बिसवासी आउर बिधवा आदमीमन के देखालक कि तबिता जिंदा आउर भला चंगा अहे। इ गोइठ समूचा याफा नगर में फाइल गेलक आउर ढेइर आदमीमन प्रभु यीशु केर उपरे बिसवास करलैं। पतरस याफा नगर में सिमोन नाँव केर एगो आदमी ठिना जे चमड़ा केर धंधा करत रहे, ढेइर दिन तक रहलक। कैसरिया शहर में कुरनेलियुस नाँव केर एगो आदमी रहे, उ फौजमन केर दल में एगो रोमी सूबेदार रहे। जेके आदमीमन इटली देस केर फौजी दल कहत रहैं। उ परमेश्‍वर केर उपरे बिसवास करेक वाला आदमी रहे, उ आउर उकर परिवार केर सोउब आदमीमन परमेश्‍वर से डरात रहैं। उ गरीब यहूदी आदमीमन के ढेइर दान देवत रहे आउर परमेश्‍वर से बराबइर प्रार्थना करत रहे। एक दिन दूई पहर केर लगभग तीन बजे उ दर्शन में सफा-सफा देखलक कि परमेश्‍वर केर एगो दूत मोर ठिना भीतरे आय के कहेक लगलक, “हे कुरनेलियुस!” कुरनेलियुस स्वरगदूत के धेयान से देखलक आउर डराय के उकर से कहलक, “हे प्रभु! का हेके” स्वरगदूत उके जबाब देलक, “तोर प्रार्थना आउर तोर देवल दान परमेश्‍वर केर सामने पोंहइच हे, आउर उ तोके याइद काइर हे। अब तोंय आदमीमन के याफा नगर भेइज के सिमोन के, जे पतरस कहायला, बुलवाय ले। इ बेरा उ सिमोन नाँव केर एगो चमड़ा केर धंधा करेक वाला ठिना गोतिया अहे। उकर घर समुदर केर किनारे अहे।” जब उ स्वरगदूत, जे उकर से गोठियात रहे चाइल गेलक, तो उ दूई झन धांगरमन के, आउर उकर सेवा करेक लगिन ठहराल एगो सिपाही के बोलालक, जे परमेश्‍वर केर उपरे बिसवास करेक वाला रहे। आउर उमन के सोउब गोइठ समझाय के याफा नगर भेजलक। दूसरा दिन उमन हिंठते-हिंठते लगभग दूई पहर केर बेरा नगर केर भीरे पोहोंचलैं। ओहे बेरा पतरस घर केर छत उपरे प्रार्थना करेक गेलक। हूवाँ उके भूख लगलक, आउर कोनों खाएक चाहत रहे। मगर जब उमन खाएक तेयार करते हें रहैं कि पतरस बेहोस होई गेलक आउर दर्शन देखलक। उ देखलक कि स्वरग खुइल गेलक आउर एगो बासन बड़का चादर नियर चाइरो कोना से झूलते धरती बटे उतराथे। उकर में धरती केर सोउब रकम केर चाइर गोड़वा आउर रेंगेक वाला जानवरमन आउर आकाश केर चरईमन रहैं। उमन केर बारे में मूसा केर नियम कहेला कि उमन अशुद्ध आउर अपवितर अहैं। आउर उमन के यहूदी आदमीमन के खाएक नी चाही। तब उके इ आवाज सुनालक, “हे पतरस उठ, इमन के मार आउर खा।” मगर पतरस कहलक, “निहीं प्रभु, एकदम निहीं, काले कि मोंय कहियो कोनों अपवितर या अशुद्ध चीज के नी खाय हों।” उके फिन दूसरी बेर आवाज सुनालक, “जे चीजमन के परमेश्‍वर शुद्ध काइर हे, उमन के तोंय अशुद्ध ना समझ।” तीन बेर एइसनेहें होलक, तब इकर पाछे तुरते उ बासन के स्वरग में उठाय लेवल गेलक। पतरस एखन एहे दुबिधा में रहे कि इ दर्शन केर का अर्थ हेके, एतनेहें में कुरनेलियुस केर भेजल आदमीमन पता लगाते सिमोन केर दुरा ठिना आय के ठड़ाय गेलैं। आउर हकाय के पूछेक लगलैं, “का सिमोन, जे पतरस कहायला, एहे घर में गोतिया अहे?” पतरस एखन हों ओहे दर्शन केर बारे में सोचते रहे कि पवितर आत्मा उकर से कहलक, “सुन, तीन झन आदमीमन तोके खोजते हिंयाँ आय हैं। उइठ के हेंठे जा, भले हें उमन यहूदी ना लगैं, फिन भी तोंय बे फिकिर होई के उमन केर संगे चाइल जा, काले कि मोंय खुद उमन के भेइज हों।” तब पतरस हेंठे जाय के उ आदमीमन से कहलक, “तोहरे जेके खोजाथा, मोंय ओहे हेकों। हिंयाँ आवेक केर तोहर का कारण अहे।” उमन इ जबाब देलैं, “हमरे के सूबेदार कुरनेलियुस तोर ठिना भेइज हे। उ परमेश्‍वर केर उपरे बिसवास करेक वाला आउर उकर डार मानेक वाला हेके, आउर सोउब यहूदी मनक समाज में इज्जतदार अहे। उके पवितर स्वरगदूत बटले इ आगया मिल हे कि उ तोके बोलाय के अपन परिवार केर सोउब आदमीमन केर संगे तोर से बचन सुनोक।” तब पतरस उमन के भीतरे बोलाय के उ मनक खातिरदारी करलक। आउर दूसरा दिन उ मनक संगे चाइल गेलक। याफा नगर केर थोरेक बिसवासी भाईमन हों उकर संगे चाइल गेलैं। आउर अगला दिन उमन कैसरिया शहर में पोहोंचलैं। सूबेदार कुरनेलियुस अपन कुटुम्बमन आउर अपन जिगरी संगमन के बोलाय के उमन केर आसरा देखत रहे। जब पतरस भीतरे जाएक वाला हें रहे कि कुरनेलियुस उकर से भेंट करलक, आउर उकर गोड़ तरे ठेहुना टेइक के उकर भक्ति करलक। मगर पतरस उके उठाय के कहलक, “ठड़ाव, मोंय हों तो आदमी हेकों।” पतरस उकर संगे गोठियाते घर केर भीतरे गेलक। हूवाँ ढेइर आदमीमन के जमा होवल देइख के उमन से कहलक, “तोहरे जानाला कि परजाइत आदमीमन केर संगति करेक या उ मनक घर में जाएक हमरे यहूदी आदमीमन लगिन नियम केर बिरोध हेके। मगर परमेश्‍वर मोके बताय हे कि केऊ आदमी के अपवितर या अशुद्ध नी कहमूँ। एहे लगिन जब तोंय मोके बोलाले तो बेगर कोनों कहले चाइल आलों। अब मोंय जानेक चाहाथों कि तोंय मोके का काम लगिन बोलाहिस।” कुरनेलियुस उके जबाब देलक, “चाइर दिन आगे एहे बेरा मोंय अपन घर में तीन बजे केर प्रार्थना करत रहों कि एगो आदमी चमकीला लुगा पिंधल मोर आगे आय के ठड़ालक। आउर कहेक लगलक, ‘हे कुरनेलियुस! तोर प्रार्थना आउर तोर देवल दान परमेश्‍वर ठिना पोंहइच जाय हे, परमेश्‍वर तोके याइद काइर हे। से लगिन तोंय केखो याफा नगर भेइज के सिमोन के जे पतरस कहायला, बोलाव। उ समुदर केर किनारे सिमोन नाँव केर एगो आदमी केर घर में जे चमड़ा केर धंधा करेला गोतिया अहे।’ तब मोंय तोके बोलाएक लगिन तुरते अपन आदमीमन के तोर ठिना भेजलों, आउर तोंय हिंयाँ आय के भला करले। प्रभु तोके जे-जे आगया देई हे, उके सुनेक लगिन हमरे सोउब परमेश्‍वर केर सामने जमा होई ही।” तब पतरस कहेक शुरु करलक, “अब मोंय बेस लेखे जाइन गेलों कि परमेश्‍वर केकरो संगे भेद-भाव नी करेला। आदमी कोनोवें जाइत केर रहोक, अगर उ परमेश्‍वर से डरायला आउर धरम केर काम करेला तो परमेश्‍वर केर दया उकर उपरे बनल रहेला। परमेश्‍वर हमरे ठिना, मतलब इसराइलीमन ठिना अपन बचन के भेजलक। आउर इ शुभ समाचार सुनालक कि यीशु मसीह उपरे बिसवास करेक से परमेश्‍वर केर संगे सही रिश्ता बनाल जाएक परायला। एहे यीशु सोउब केर प्रभु हेके। तोहरे उ सोउब गोइठमन केर बारे में जानाला, जे गलील परदेस से शुरु होई के गोटा यहूदिया परदेस में यीशु करलक। इ सोउब गोइठमन यूहन्ना केर बपतिस्मा जल संस्कार केर परचार केर पाछे होलक। परमेश्‍वर ओहे यीशु के जे नासरत नगर केर रहेक वाला रहे, पवितर आत्मा आउर शक्ति से अभिषेक करलक आउर उ चाइरो बटे घुइम-घुइम के आदमीमन केर भलाई करते रहलक, आउर शैतान केर सताल आदमीमन के ठीक करते रहलक, काले कि परमेश्‍वर उकर संगे रहे। हमरे सोउब उ काममन केर गवाह हेकी, जे काम उ यहूदिया परदेस में आउर यरुशलेम शहर में करलक। ओहे यीशु के आदमीमन क्रूस में लटकाय के माइर मोरालैं। मगर परमेश्‍वर उके तीसरा दिन मोरलमन में से फिन जियालक, आउर आदमीमन केर माझे दिस्तार हों करलक। सोउब आदमीमन उके नी देखलैं मगर उ गवाहमन देखलैं, जेमन के परमेश्‍वर आगे हें से चुइन लेई रहे, आउर उ गवाहमन हमरे हेकी। मोरलमन में से फिन जी उठेक केर पाछे हमरे उकर संगे खाली-पिली। आउर उ हमरे के आगया देलक कि सोउब ठाँव में जाय के आदमीमन में परचार करा आउर इ गोइठ केर सच्चाई से गवाही देबा कि यीशु ओहे हेके, जेके परमेश्‍वर जिंदा आउर मोरल आदमीमन केर फैसला करेक वाला हाकिम ठहराय हे। ओहे यीशु केर बारे में परमेश्‍वर केर संदेश के बताएक वाला सोउब आदमीमन गवाही देवैना कि जे केऊ यीशु केर उपरे बिसवास करी, उके उकर नाँव से पापमन केर क्षमा मिली।” पतरस इ गोइठमन के कहते हें रहे कि बचन सुनेक वाला सोउब आदमीमन में पवितर आत्मा उतइर आलक। आउर पतरस केर संगे आवल यहूदी बिसवासीमन इ देइख के ताजुब होलैं कि परजाइत आदमीमन के हों पवितर आत्मा केर दान देवल जाय हे। काले कि यहूदी बिसवासीमन उमन के दोसर-दोसर भाषा में कहते आउर परमेश्‍वर केर बड़ाई करते सुनत रहैं। तब पतरस कहलक, “इ आदमीमन हमरे नियर परमेश्‍वर बटले पवितर आत्मा पाय हैं, तो का केऊ इमन के पानी से बपतिस्मा जल संस्कार लेवेक से मना करेक पारी?” आउर पतरस उमन के आगया देलक कि उमन यीशु मसीह केर नाँव में बपतिस्मा जल संस्कार लेवोक। इकर पाछे उमन पतरस से थोरेक दिन अपन संगे रहेक लगिन बिनती करलैं, आउर पतरस उमन संगे रइह गेलक। यहूदिया परदेस में खास चेलामन आउर बिसवासी भाई-बहिनमन के इ पता चललक कि परजाइत आदमीमन हों परमेश्‍वर केर बचन के माइन लेई हैं। जब पतरस यरुशलेम शहर में आलक तो यहूदी बिसवासीमन उकर से बहस करेक लगलैं आउर कहलैं, “तोंय परजाइत मनक घर काले गेले आउर उमन केर संगे खाले?” तब पतरस उमन के शुरु से सचमुच में जे कोनों होलक सोउब गोइठमन के एकेक काइर के कइह सुनालक, “मोंय याफा नगर में प्रार्थना करत रहों, से बेरा बेहोस होई गेलों आउर दर्शन देखलों कि एगो बासन बड़का चादर नियर चाइरो कोना से झूलते स्वरग से उतइर के मोर ठिना आलक। मोंय उकर उपरे धेयान से देखलों तो उकर में धरती केर सोउब चाइर गोड़वा आउर जंगली जानवरमन, रेंगेक वाला जीव आउर आकाश केर चरईमन रहैं। आउर इ आवाज सुनलों, ‘हे पतरस उठ, इमन के मार आउर खा।’ मोंय कहलों, ‘निहीं प्रभु, निहीं, काले कि मोंय कहियो कोनों अपवितर या अशुद्ध चीज मुँह में नी साइज हों।’ दूसरी बेर स्वरग से इ आवाज सुनालक, ‘जे चीजमन के परमेश्‍वर शुद्ध काइर हे, उके अशुद्ध ना कह।’ तीन बेर एइसनेहें होलक, तब इकर पाछे सोउब कुछ फिन स्वरग में उपरे उठाय लेवल गेलक। ठीक ओहे बेरा कैसरिया शहर से मोर ठिना भेजल तीन झन आदमीमन जे घर में मोंय रहों, उ ठिना आय के ठड़ाय गेलैं। तब पवितर आत्मा मोके आगया देलक कि मोंय बे फिकिर होई के उमन केर संगे चाइल जामूँ, मोर संगे इ छाव भाईमन हों हूवाँ जाय रहैं आउर हमरे उ आदमी केर घर में गेली। उ हमरे के बतालक कि एगो स्वरगदूत के अपन घर में ठड़ाल देखलक, जे उकर से कहलक, ‘याफा नगर में आदमीमन के भेज आउर सिमोन के जे पतरस कहायला, बोलाय ले। उ जे उपदेस देवी उकर से तोंय आउर तोर घराना केर सोउब आदमीमन छुटकारा पाबैं।’ जब मोंय उपदेस देवेक शुरु करते रहों कि पवितर आत्मा उ मनक उपरे ओहे लेखे उतरलक, जे लेखे शुरु में हमर उपरे उतइर रहे। तब मोके प्रभु यीशु केर उ गोइठ याइद आलक, जे उ कइह रहे, ‘यूहन्ना तो पानी से बपतिस्मा जल संस्कार देलक मगर तोहरे पवितर आत्मा से बपतिस्मा पाबा।’ से लगिन प्रभु यीशु मसीह में बिसवास करेक से परमेश्‍वर उमन के हों ओहे दान देलक, जे दान हमरे के प्रभु यीशु मसीह केर उपरे बिसवास करेक से मिल रहे, तो मोंय के रहों जे परमेश्‍वर केर काम के रोकतो?” इ गोइठ सुइन के यहूदी बिसवासीमन चुप होई गेलैं आउर उमन इ कहते परमेश्‍वर केर बड़ाई करेक लगलैं, “परमेश्‍वर परजाइत आदमीमन के हों जुग-जुग केर जिंदगी लगिन अपन पाप काममन के छोड़ेक आउर यीशु मसीह केर उपरे बिसवास करेक केर मोका देई हे।” स्तिफनुस केर मोराय जाएक केर पाछे, जे बिसवासीमन यरुशलेम शहर के छोइड़ देई रहैं, उमन फिरते-फिरते फीनीके परदेस, साइप्रस टापू आउर सीरिया परदेस अंताकिया शहर तक पोंहइच गेलैं। उमन यहूदी आदमीमन के छोइड़ आउर केखो परमेश्‍वर केर बचन नी सुनात रहैं। मगर उमन में से थोरेक बिसवासी आदमीमन साइप्रस आउर कुरेन शहर केर रहेक वाला रहैं। जब उमन अंताकिया शहर पोहोंचलैं तब उमन यूनानी भाषा गोठियाएक वालामन के हों प्रभु यीशु केर शुभ समाचार सुनाएक लगलैं। आउर प्रभु केर शक्ति उ मनक उपरे रहे, आउर ढेइर आदमीमन उमन केर संदेश उपरे बिसवास काइर के प्रभु यीशु केर उपरे बिसवास करेक शुरु करलैं। जब इ खबर यरुशलेम शहर केर कलीसिया केर आदमीमन सुनलैं, तो उमन बरनाबास के अंताकिया शहर भेजलैं। जब बरनाबास हूवाँ पोहोंचलक तो उ परमेश्‍वर केर किरपा देइख के ढेइर खुश होलक। आउर उ सोउबमन के तन-मन केर साथ प्रभु यीशु में बनल रहेक लगिन उपदेस देलक। बरनाबास भला आदमी रहे। उ पवितर आत्मा आउर बिसवास से भरल रहे। इ लेखे ढेइर आदमीमन प्रभु यीशु में बिसवास काइर के कलीसिया में मेसा होलैं। इकर पाछे बरनाबास शाऊल के खोजेक लगिन अन्ताकिया शहर के छोइड़ के तरसुस नगर चाइल गेलक। जब उ शाऊल से मिललक तो उके अंताकिया शहर लेई आलक। उमन दुयो पूरा एक बरिस तक हूवाँ केर कलीसिया केर संगे रहलैं आउर ढेइर आदमीमन के प्रभु यीशु केर बारे में उपदेस देते रहलैं। यीशु केर चेलामन सोउब से पहिले अंताकिया शहर में हें मसीही कहालैं। ओहे दिनमन में थोरेक बिसवासीमन जे परमेश्‍वर केर संदेश के बताएक वाला रहैं, यरुशलेम शहर से अंताकिया शहर में आलैं। उमन में से अगबुस नाँव केर एगो परमेश्‍वर केर संदेश के बताएक वाला रहे, उ ठड़ालक आउर पवितर आत्मा केर अगुवाई से बतालक कि गोटा धरती में भारी अकाल होवेक वाला अहे। इ अकाल महाराजा क्लौदियुस केर परिया में होलक। तब चेलामन बिचार करलैं कि यहूदिया परदेस में रहेक वाला बिसवासी भाई-बहिनमन केर मदइत लगिन अपन-अपन पाया केर मोताबिक कोनों भेजोक। आउर उमन एइसनेहें करलैं आउर बरनाबास आउर शाऊल केर हाँथ में कलीसिया केर अगुवामन ठिना दान केर रकम के भेजलैं। उ समय राजा हेरोदेस कलीसिया केर थोरेक बिसवासी आदमीमन के सताएक लगिन उमन के बंदी बनाय लेलक। उ यीशु केर खास चेला यूहन्ना केर भाई याकूब के तलवाइर से मरुवाय देलक। जब उ देखलक कि उकर एइसन करेक से यहूदीमन खुश होवैना, तो उ पतरस के हों धाइर लेलक। इ बिन खमीर रोटी केर परब केर मोका रहे। आउर धारेक केर पाछे राजा हेरोदेस पतरस के जेहेल घर में भितरुवाय देलक। आउर पहरा करेक लगिन चाइर पारी में चाइर-चाइर झन सिपाहीमन के रखलक। इ बिचार से कि यहूदी मनक फसह परब केर पाछे पतरस के दोषी ठहराएक लगिन आदमीमन केर सामने लानोक। जेहेल घर में पतरस के कायनों दिन तक रखल जाय रहे, मगर कलीसिया केर आदमीमन उकर लगिन एक मन होई के परमेश्‍वर से प्रार्थना करत रहैं। जब राजा हेरोदेस उकर उपरे दोष लगाएक लगिन उके आदमीमन केर सामने लानेक वाला रहे, उकर से एक राइत आगे पतरस दूई गो सिकड़ से बाँधल, दूई झन सिपाहीमन केर माझे निंदात रहे आउर दुरा केर सामने हों पहरादारमन जेहेल घर केर पहरा करत रहैं। अचका प्रभु केर एगो स्वरगदूत पतरस केर भीरे आय के ठड़ालक आउर पूरा कोठरी में इंजोत होई गेलक। आउर पतरस के थपथपाय के जगालक आउर कहलक, “जल्दी उठ!” आउर उकर हाँथ से सिकड़ तुरते खुइल के गिर गेलक। तब स्वरगदूत उकर से कहलक, “अपन डाँड़ा के बाँध आउर जूता पिंध ले।” पतरस एइसनेहें करलक। स्वरगदूत फिन उकर से कहलक, “लुगा पिंध के मोर पिछे चाइल आव।” पतरस उकर पिछे-पिछे जेहेल घर से बाहरे निकइल गेलक, मगर उ इ नी जानत रहे कि जे कुछ स्वरगदूत कराथे, उ सच हेके। उ सोचलक कि मोंय दर्शन देखाथों। उमन पहिला आउर दूसरा पहरा के पार काइर के उ लोहा केर फाटक तक पोहोंचलैं, जहाँ से डहर शहर बटे जायला। उमन लगिन फाटक अपन से खुइल गेलक आउर उमन बाहरे निकइल गेलैं। जब उमन गली पार करलैं तब स्वरगदूत अचका पतरस के छोइड़ के चाइल गेलक। तब पतरस होस में आय के कहलक, “अब मोंय सच जाइन गेलों कि प्रभु अपन स्वरगदूत भेइज के मोके राजा हेरोदेस केर हाँथ से छोड़ाय लेलक आउर यहूदी अगुवामन केर सोउब आसरा के तोइर देलक।” आउर इ जाइन के कि परमेश्‍वर उके बचाय लेई हे। पतरस, उ यूहन्ना जे मरकुस कहायला उकर आयो मरियम केर घर आलक। हूवाँ ढेइर बिसवासी आदमीमन जमा होई के उकर लगिन प्रार्थना करत रहैं। जब उ दुरा केर खिड़की ठोकठोकालक, तो रुदे नाँव केर एगो धांगरिन देखेक लगिन आलक कि उ के हेके। उ पतरस केर आवाज के चीन्ह लेलक आउर खुशी केर मारे दुरा के बेगर खोलले भीतरे जाय के बतालक कि पतरस दुरा ठिना ठड़ाय हे। उमन उकर से कहलैं, “तोंय पगली हेकिस।” मगर उ जोर देई के कहलक कि इ पतरस हें हेके, तब उमन कहलैं, “उ पतरस केर स्वरगदूत होवी।” मगर पतरस दुरा के ठोकठोकाते रहलक। जब उमन दुरा के खोललैं तो पतरस के देइख के ताजुब होई गेलैं। पतरस हाँथ से उमन के चुप रहेक केर इशारा करलक आउर उमन के बतालक कि प्रभु परमेश्‍वर का लेखे उके जेहेल घर से बाहरे निकलाय के लाइन हे। फिन पतरस कहलक, “याकूब आउर बिसवासी भाई-बहिनमन के खबर देई देवा कि मोंय जेहेल घर से बाहरे आय जाय हों।” तब पतरस हूवाँ से निकइल के दोसर ठाँव चाइल गेलक। अगला दिन बिहान के जेहेल घर केर सिपाहीमन में खलबली मइच गेलक कि पतरस का होलक। जब राजा हेरोदेस पतरस के खोजेक केर आगया देलक आउर जब उकर कहीं पता नी चललक, तो पहरादारमन से सवाल पूछलक, जब उमन उके जबाब देवेक नी पारलैं तो उमन के मौत केर सजा देवेक केर आगया देलक। आउर खुद थोरेक समय लगिन यहूदिया परदेस के छोइड़ के कैसरिया शहर में जाय के रहेक लगलक। राजा हेरोदेस सूर आउर सैदा नगर केर आदमीमन से ढेइर खिसाय रहे। से लगिन उ दुयो शहर केर आदमीमन राजा हेरोदेस से मिलेक लगिन एगो दल बनाय के उकर ठिना आलैं। सोउब से आगे उमन बलास्तुस से मदइत माँगलैं, उ राजा केर निजी सहायक रहे। तब उमन मेल-मिलाप केर गोइठ लेई के राजा ठिना आलैं। काले कि उमन अपन खाएक लगिन अन्न राजा केर परदेस से पूरा करत रहैं। जे दिन राजा हेरोदेस उ दुयो शहर केर आदमीमन से मिलेक वाला रहे, उ दिन राजसी लुगा पिंध के फैसला करेक केर कुरसी में बइठलक आउर उमन के भाषण देवेक लगलक। आउर आदमीमन जोर से चिल्लालैं, “इ तो आदमी केर निहीं देवता केर शबद हेके।” ओहे बेरा प्रभु केर एगो स्वरगदूत तुरते उके मारलक, काले कि उ परमेश्‍वर केर महिमा नी काइर रहे। आउर राजा हेरोदेस केर काया में कीड़ा पाइड़ गेलैं आउर उ मोइर गेलक। मगर परमेश्‍वर केर बचन फैलते गेलक आउर बिसवासी आदमीमन केर गिनती हों बढ़ते गेलक। बरनाबास आउर शाऊल यहूदिया परदेस केर यरुशलेम शहर में यहूदी बिसवासीमन केर मदइत करेक केर पाछे हूवाँ से अन्ताकिया शहर घूइर आलैं। उमन अपन संगे यूहन्ना के जे मरकुस कहायला लेई आलैं। अंताकिया शहर केर कलीसिया में परमेश्‍वर केर संदेश के बताएक वाला आउर उपदेस देवेक वाला ढेइर आदमीमन रहैं, उमन में बरनाबास, सिमोन, जेकर दूसरा नाँव नीगर रहे आउर कुरेन शहर केर रहेक वाला लूकियुस, आउर मनाहेम जे चौथाई देस केर राजा हेरोदेस केर संगे-संगे बाइढ़ रहे आउर शाऊल। जब इमन उपास काइर के प्रभु केर भक्ति करत रहैं, तो पवितर आत्मा उमन से कहलक, “मोर उ काम लगिन बरनाबास आउर शाऊल के अलग करा, जेकर लगिन मोंय उमन के बोलाय हों।” तब उमन उपास प्रार्थना काइर के बरनाबास आउर शाऊल केर उपरे हाँथ रखलैं आउर उमन के परमेश्‍वर केर काम करेक लगिन भेजलैं। इ लेखे बरनाबास आउर शाऊल पवितर आत्मा केर चलाएक से अन्ताकिया शहर से सिलूकिया टापू केर नगर तक चाइल गेलैं आउर हूवाँ से जहाज उपरे चाइढ़ के साइप्रस टापू गेलैं। आउर सलमीस नगर में पोंहइच के परमेश्‍वर केर बचन के यहूदी मनक प्रार्थना घरमन में सुनालैं। यूहन्ना जेकर दूसरा नाँव मरकुस रहे, उमन केर संगे रइह के उ मनक मदइत करत रहे। इकर पाछे उमन गोटा टापू में एक नगर से दूसरा नगर होते पाफुस नगर तक पोहोंचलैं, हूवाँ बार-यीशु नाँव केर एगो यहूदी ओझा आउर परमेश्‍वर केर झूठा संदेश के बताएक वाला मिललक। उ राजपाल सिरिगयुस पौलुस केर संगे रहत रहे। राजपाल सिरिगयुस बुद्धिमान आदमी रहे। उ बरनाबास आउर पौलुस के अपन ठिना बोलाय के परमेश्‍वर केर बचन सुनेक चाहत रहे। मगर बार-यीशु जेकर दूसरा नाँव इलिमास रहे जेकर अर्थ ओझा हेके, उमन केर बिरोध करलक आउर राजपाल के यीशु केर उपरे बिसवास करेक से रोकेक चाहलक। तब शाऊल जेके पौलुस नाँव से हों जानल जात रहे, पवितर आत्मा से भाइर के उके टकटकी लगाय के देखलक आउर कहलक, “हे सोउब कपटी आउर सोउब चतुराई से भरल शैतान केर संतान! तोंय हरेक भला गोइठमन केर दुश्मन हेकिस, का तोंय प्रभु केर सोझ डहरमन के टेढ़ा करेक नी छोड़बे? अब देख, प्रभु तोके सजा देवेक वाला अहे, आउर तोंय थोरेक समय तक अंधरा रहबे आउर बेइर केर इंजोत के नी देखेक पारबे।” ओहे बेरा उकर आँइख केर सामने धुंधरा आउर अंधार होई गेलक आउर उ हिने-हुने छुवेक लगलक, जेकर से केऊ उकर हाँथ धाइर के लेई चलोक। इ घटना के देइख के राजपाल यीशु केर उपरे बिसवास करलक आउर उ प्रभु केर उपदेस से ताजुब रहे। पौलुस आउर उकर संगमन पाफुस नगर से समुदरी जहाज चाइढ़ के पंफूलिया परदेस केर पिरगा नगर में पोहोंचलैं। यूहन्ना जे मरकुस कहायला उमन के हुवाँय छोइड़ के यरुशलेम शहर घूइर गेलक। आउर पिरगा नगर से होई के उमन पिसिदिया परदेस केर अंताकिया शहर में पोहोंचलैं आउर उमन आराम केर दिन यहूदी मनक प्रार्थना घर में जाय के बाइठ गेलैं। मूसा केर नियम आउर परमेश्‍वर केर संदेश के बताएक वालामन केर किताब के पइढ़ सिराएक केर पाछे यहूदी मनक प्रार्थना घर केर सरदारमन उमन ठिना इ कइह भेजलैं, “हे भाईमन, अगर आदमीमन के उपदेस देवेक लगिन तोहर मन में कोनों आउर बचन अहे तो तोहरे हिंयाँ सुनावा।” तब पौलुस ठड़ाय के आउर उमन के शांत करेक लगिन हाँथ से इशारा काइर के कहलक, “हे इसराइली भाईमन आउर परमेश्‍वर से डराएक वाला परजाइत आदमीमन, सुना। इसराइली आदमीमन केर परमेश्‍वर हमर बाप दादामन के चुनलक। आउर जब उमन मिसर देस में परदेसी होई के रहत रहैं, तो उमन के ढेइर बढ़ालक आउर अपन बलवान हाँथ से उमन के मिसर देस केर गुलामी से निकलाय लानलक। उमन घरी-घरी उकर आगया के तोरलैं मगर परमेश्‍वर चालीस बरिस तक सुनसान ठाँव में उमन केर ब्यवहार के सहते रहलक। इकर पाछे परमेश्‍वर कनान देस में सात जाइतमन के नाश काइर के उ मनक देस के इमन केर अधिकार में देई देलक। इ सोउब होवेक में लगभग चाइर सौ पचास बरिस लगलक। इकर पाछे परमेश्‍वर अपन संदेश के बताएक वाला शमूएल केर आवेक तक उमन लगिन न्याय करेक वाला आदमीमन के ठहराते रहलक। शमूएल केर अगुवा रहते हें उमन अपन लगिन एगो राजा केर माँग करलैं आउर परमेश्‍वर उमन लगिन बिन्यामीन केर बंश से कीश केर बेटा शाऊल के राजा ठहरालक। उ चालीस बरिस तक उ मनक उपरे राइज करलक। फिन परमेश्‍वर शाऊल के राजा केर पद से हटाय के दाऊद के उ मनक राजा बनालक आउर उकर बारे में इ गवाही देलक, ‘मोके मोर मन केर मोताबिक एगो आदमी यिशै केर बेटा दाऊद मिल जाय हे, ओहे मोर सोउब इच्छा के पूरा करी।’ परमेश्‍वर अपन करार केर मोताबिक एहे राजा दाऊद केर बंश में इसराइल केर आदमीमन लगिन एगो छुटकारा देवाइया यीशु के भेजलक। जेकर आवेक से पहिले यूहन्ना इसराइल देस केर सोउब आदमीमन के बतात रहे, ‘पाप करेक छोइड़ देवा आउर बपतिस्मा जल संस्कार लेवा, तब परमेश्‍वर तोहर पापमन के क्षमा करी।’ जब यूहन्ना अपन ठहराल सेवा केर काम के पूरा करेक वाला रहे, तो उ कहलक, ‘तोहरे मोके जे बुझाथा, उ मोंय ना लगों। मगर देखा, जे मोर पाछे आवेक वाला अहे, उ मोर से महान अहे, मोंय तो उकर गोड़ केर जूता के खोलेक केर लाएक हों नखों।’ हे मोर इसराइली भाईमन, तोहरे जे अब्राहम केर संतान हेका आउर परमेश्‍वर केर डार मानाला, परमेश्‍वर तोहर ठिना यीशु केर बारे में इ छुटकारा केर संदेश भेइज हे। यरुशलेम शहर केर रहेक वाला आदमीमन आउर उ मनक सरदारमन मसीह यीशु के नी चिन्हलैं, आउर उमन परमेश्‍वर केर संदेश के बताएक वालामन केर गोइठमन के हों नी बुझलैं, जेके उमन यहूदी मनक आराम केर दिन पढ़ैना। से लगिन उमन मसीह यीशु के दोषी ठहरालैं। इ लेखे उमन परमेश्‍वर केर संदेश के बताएक वालामन केर गोइठ के पूरा करलैं। उमन उके मौत केर सजा देवेक केर लायक उकर में कोनों दोष नी पालैं, फिन भी उमन राजपाल पिलातुस से उके मौत केर सजा देवेक केर माँग करलैं। आउर जब उमन उकर बारे में पवितर किताब में लिखल सोउब गोइठमन के पूरा करलैं, तो उके क्रूस से उतराय के कबर में रखलैं। मगर परमेश्‍वर उके तीसरा दिन मोरलमन में से फिन जियालक। आउर यीशु मसीह ढेइर दिन तक अपन उ चेलामन के देखाई देते रहलक, जेमन उकर संगे गलील परदेस से यरुशलेम शहर आय रहैं। अब ओहेमन आदमीमन केर सामने उकर गवाह हेकैं। हमरे तोहरे के उ शुभ समाचार के सुनाइला, जेकर बारे में परमेश्‍वर हमर बाप दादामन से करार काइर रहे। ओहे करार के परमेश्‍वर यीशु के मोरलमन में से फिन जियाय के उ मनक संतानमन लगिन मतलब हमर लगिन पूरा करलक। जइसन कि दूसरा भजन संहिता में परमेश्‍वर मसीह केर बारे में कइह हे, ‘तोंय मोर बेटा हेकिस, आइज मोंय तोके जनमाय हों।’ परमेश्‍वर इ लेखे यीशु मसीह के मोरलमन में से फिन जियाएक केर बारे में कि उ कहियो नी सड़ी, इ गोइठ केर सबूत में परमेश्‍वर इ कइह रहे, ‘मोंय तोके पवितर आउर अटल आशीष देमूँ, जेकर करार मोंय राजा दाऊद से काइर रहों।’ से लगिन राजा दाऊद एगो आउर भजन में इ कइह हे, ‘तोंय अपन पवितर आदमी के कबर में सड़ेक नी देबे।’ काले कि राजा दाऊद तो परमेश्‍वर केर इच्छा केर मोताबिक अपन समय में उकर सेवा पूरा काइर के मोइर गेलक आउर अपन बाप दादामन में मिल गेलक आउर उकर काया सइड़ हों गेलक। इकर से हमरे जानिला कि दाऊद इ भजन में अपन बारे में नी गोठियाथे। मगर परमेश्‍वर यीशु मसीह केर बारे में गोठियाथे, जेके उ मोरलमन में से फिन जियालक, तो उ नी सड़लक। से लगिन, हे भाईमन, तोहरे इ जाइन लेवा कि एहे यीशु मसीह बटले तोहरे के इ पापमन केर क्षमा केर सुसमाचार देवल जायला। आउर जे गोइठमन से तोहरे मूसा केर नियम से निरदोष बनेक नी पारला, ओहे सोउब गोइठ में हरेक बिसवास करेक वाला आदमी यीशु मसीह बटले निरदोष बनेला। से लगिन सावधान रहा, कहीं एइसन ना होवोक कि परमेश्‍वर केर संदेश के बताएक वालामन केर इ गोइठ तोहर उपरे लागू ना होई जाओक, ‘हे निंदा करेक वाला आदमीमन, देखा आउर ताजुब होवा, आउर मोइर मिट जावा, काले कि मोंय तोहर सामने इ काम करेक वाला अहों, जेकर बारे में अगर केऊ हों तोहरे के बतातक, तो तोहरे उकर उपरे कहियो बिसवास नी करता।’ ” जब पौलुस आउर बरनाबास प्रार्थना घर से बाहरे निकलत रहैं, तो आदमीमन उमन से बिनती करलैं कि अगला यहूदी मनक आराम केर दिन इकरे बारे में आगे आउर बताल जाओक। जब सभा उइठ गेलक तो यहूदी आदमीमन आउर यहूदी मत में आवल भक्तमन में से ढेइर आदमीमन पौलुस आउर बरनाबास केर पिछे होई गेलैं, आउर पौलुस आउर बरनाबास उमन के समझालैं कि परमेश्‍वर केर किरपा में बनल रहा। अगला आराम केर दिन नगर केर करीब-करीब सोउब आदमीमन परमेश्‍वर केर बचन सुनेक लगिन जमा होलैं। मगर यहूदी अगुवामन भीड़ के देइख के हिसिंगा से भाइर गेलैं आउर निंदा करते पौलुस केर गोइठमन केर बिरोध में कहेक लगलैं। तब पौलुस आउर बरनाबास निडर होई के कहलैं, “जरुरी रहे कि परमेश्‍वर केर बचन पहिले तोहरे के सुनाल जातक: मगर तोहरे सुनेक नी चाहाला आउर खुद के जुग-जुग केर जिंदगी के पावेक लाएक नी बनाथा। से लगिन हमरे परजाइत आदमीमन केर बटे जाथी। काले कि प्रभु हमरे के इ आगया देई हे, ‘मोंय तोहरे के परजाइत आदमीमन लगिन इंजोत बनाय हों, तोहरे के दुनिया केर हर ठाँव में आदमीमन ठिना जाय के उमन के बताएक अहे कि परमेश्‍वर उमन के कइसन छुटकारा देवेक चाहाथे।’ ” इ सुइन के परजाइत आदमीमन खुश होलैं, आउर परमेश्‍वर केर बचन केर बड़ाई करेक लगलैं। जेतना आदमीमन के जुग-जुग केर जिंदगी लगिन ठहराल जाय रहे, उमन बिसवास करलैं। आउर प्रभु केर बचन पूरा परदेस में फैलेक लगलक। मगर यहूदी अगुवामन इज्जतदार आउर भक्त जनानामन के आउर नगर केर ऊँचा ओहदा में बइठल आदमीमन के उसकालैं आउर पौलुस आउर बरनाबास केर बिरोध में हुड़दंग करुवाय के उमन के अपन सिमान से बाहरे निकलाय देलैं। तब पौलुस आउर बरनाबास उ मनक सामने अपन तरवा केर धूर के झाइर देलैं, उमन के इ देखाएक लगिन कि परमेश्‍वर से मिलेक वाला सजा लगिन उमन खुद जिम्मेदार हेकैं। इकर पाछे उमन इकुनियुम शहर चाइल गेलैं। आउर अन्ताकिया शहर में चेलामन खुशी आउर पवितर आत्मा से भरते गेलैं। इकुनियुम शहर में पौलुस आउर बरनाबास यहूदी मनक प्रार्थना घर में गेलैं, आउर हूवाँ उ मनक बचन सुनाएक एतना असरदार रहे कि हूवाँ केर यहूदी आदमीमन आउर यूनानी भाषा गोठियाएक वाला आदमीमन दुयो में से ढेइर आदमीमन बिसवास करलैं। मगर जे यहूदी आदमीमन बिसवास नी काइर रहैं, उमन परजाइत आदमीमन के उसकालैं आउर उ मनक मन में बिसवासी भाई-बहिनमन केर बिरोध में जहर भाइर देलैं। पौलुस आउर बरनाबास ढेइर दिन तक हूवाँ रहलैं आउर प्रभु केर उपरे भरसा काइर के बेगर डराले साहस से बचन केर परचार करते रहलैं। आउर प्रभु हों उमन बटले करल चिन्हा आउर चमत्कार केर काम से साबित करलक कि अपन किरपा केर संदेश सच हेके। मगर शहर केर आदमीमन अनबन होई के दूई भाग में बाँइट गेलैं। जेकर से उमन में से थोरेक आदमीमन यहूदी आदमीमन बटे आउर थोरेक आदमीमन खास चेलामन बटे होई गेलैं। परजाइत आदमीमन आउर यहूदी आदमीमन अपन अगुवामन से मिल के खास चेलामन केर संगे बुरा ब्यवहार करेक आउर उमन के पखना से मारेक केर कोशिश करलैं। उमन इ गोइठ के जाइन गेलैं, आउर लुकाउनिया परदेस केर लुस्त्रा आउर दिरबे नगरमन में आउर आस-पास केर छोटका नगरमन में भाइग गेलैं। आउर हूवाँ हों प्रभु यीशु केर शुभ समाचार सुनाएक लगलैं। लुस्त्रा नगर में एगो आदमी बइठल रहे, जे जनम से हें लंगड़ा रहे आउर कहियो चलेक-फिरेक नी पाइर रहे। उ पौलुस केर उपदेस सुनत रहे। पौलुस उके धेयान से देखत रहे कि उकर में ठीक होई जाएक केर लायक बिसवास अहे। उके देइख के जोर से कहलक, “अपन गोड़ केर ताकत से सोझ ठड़ाव।” ओहे बेरा उ आदमी उछइल के ठड़ाय गेलक आउर चलेक-फिरेक लगलक। जब आदमीमन पौलुस केर करल इ काम के देखलैं तो लुकाउनिया भाषा में जोर से चिल्लाय के कहलैं, “देवता मनवा केर रूप बाइन के हमर ठिना आय हे।” आउर उमन बरनाबास केर नाँव यूनानी देवता ज्यूस आउर पौलुस केर हिरमेस देवता रखलैं, काले कि उ मुध संदेश देवेक वाला रहे। नगर केर बाहरे देवता ज्यूस केर मंदिर रहे। हूवाँ केर पूजारी फूल केर माला आउर साँड़ के लेई के फाटक ठिना आय पोहोंचलक। उ आदमीमन केर संगे बलिदान चढ़ाएक चाहत रहे। जब खास चेला बरनाबास आउर पौलुस इके सुनलैं तो उमन अपन लुगा फाइर के भीड़ बटे कूइद के गेलैं आउर जोर से चिल्लाय के कहेक लगलैं, “हे आदमीमन, तोहरे इ का कराथा? हमरे हों तो तोहरेमन नियर सुख-दुःख उठाएक वाला आदमी हेकी, हमरे तोहरेमन लगिन इ शुभ समाचार लाइन ही कि तोहरे इ बेकार रीति-रिवाज के छोइड़ के जिंदा परमेश्‍वर बटे अपन मन के लगावा, जे आकाश आउर धरती आउर समुदर आउर जे कुछ उमन में अहे, सोउब के बनाय हे। उ पहिले केर समय में सोउब जाइत केर आदमीमन के अपन-अपन डहर में चलेक देलक। हलांकि तोहरे उ परमेश्‍वर के तो नी जानाला फिन भी उ भलाई करते रहलक आउर उ आदमीमन के इ देखाते रहलक कि उ ओहे हेके जे तोहर लगिन आकाश से पानी बरसायला आउर ठहराल मौसम में अन्न उपजायला, उ अन्न देई के तोहर आदमीमन के खुशी से भाइर देवेला।” इ कइह के बरनाबास आउर पौलुस आदमीमन के अपन लगिन बलिदान चढ़ाएक से ढेइर मुश्किल से रोकलैं। मगर अंताकिया आउर इकुनियुम शहर से थोरेक यहूदी आदमीमन आय के हूवाँ केर आदमीमन के अपन बटे काइर लेलैं। उमन पौलुस के पखना से मारलैं आउर मोरल समइझ के उके नगर केर बाहरे घिसराय के लेई गेलैं। मगर जब चेलामन उकर चाइरो बटे आय के ठड़ालैं, तो उ उठलक आउर नगर में गेलक। दूसरा दिन उ बरनाबास केर संगे दिरबे नगर चाइल गेलक। पौलुस आउर बरनाबास उ नगर केर आदमीमन के शुभ समाचार सुनाय के ढेइर चेला बनालैं। इकर पाछे उमन लुस्त्रा नगर आउर इकुनियुम शहर होई के अंताकिया शहर में घूइर आलैं। उमन हरेक नगर में चेलामन के मजबूत आउर बिसवास में स्थिर रहेक लगिन इ उपदेस देवत रहैं कि हमरे के ढेइर दुःख साइह के स्वरग राइज में जाएक होवी। पौलुस आउर बरनाबास हरेक कलीसिया में कलीसिया केर अगुवा चुनलैं आउर उपास प्रार्थना काइर के उमन के प्रभु यीशु केर हाँथ में जिम्मा देलैं, जेकर उपरे उमन बिसवास काइर रहैं। आउर उमन पिसिदिया परदेस से होई के पंफूलिया परदेस पोहोंचलैं, आउर पंफूलिया परदेस केर पिरगा नगर में प्रभु केर शुभ समाचार सुनाएक केर पाछे अत्तलिया शहर में आलैं। आउर हूवाँ से पानी जहाज में चाइढ़ के अंताकिया शहर घूइर आलैं, अंताकिया शहर केर हें बिसवासीमन उमन के चुइन के परचार करेक लगिन दोसर ठाँव में भेइज रहैं। उमन पौलुस आउर बरनाबास के परमेश्‍वर केर किरपा में सोंइप देई रहैं, अब उमन उ काम के पूरा काइर लेई रहैं। हूवाँ पोंहइच के उमन कलीसिया केर आदमीमन के जमा करलैं आउर बतालैं कि परमेश्‍वर हमर संगे होई के कइसन बड़का-बड़का काम काइर हे! आउर उ कइसन परजाइत आदमीमन लगिन यीशु मसीह केर उपरे बिसवास करेक लगिन दुरा खोइल देई हे। पौलुस आउर बरनाबास चेलामन केर संगे ढेइर दिन तक हूवाँ रहलैं। थोरेक यहूदी बिसवासी आदमीमन यहूदिया परदेस से अन्ताकिया शहर में आलैं आउर बिसवासी भाईमन के सिखाएक लगलैं, “अगर मूसा केर देवल नियम केर मोताबिक तोहर खतना नी होवी तो तोहरे के छुटकारा नी मिली।” इकर बारे में पौलुस आउर बरनाबास केर उमन से ढेइर झगरा आउर बक झक होलक, तो इ फैसला होलक कि पौलुस आउर बरनाबास अन्ताकिया शहर केर थोरेक आदमीमन केर संगे यरुशलेम शहर जाबैं आउर इ सवाल उपरे खास चेलामन आउर कलीसिया केर अगुवामन से सलहा करबैं। अन्ताकिया शहर केर कलीसिया उ मनक डहर खरचा लगिन थोरेक पइसा आउर खाएक केर इंतजाम काइर के उमन के बिदा करलैं, आउर उमन फीनीके आउर सामरिया परदेस से होई के हूवाँ केर बिसवासी भाई-बहिनमन के बतालैं कि परजाइत आदमीमन का लेखे शुभ समाचार सुइन के मसीह में बिसवासी बनाथैं, इ सुइन के सोउब चेलामन खुश होलैं। जब उमन यरुशलेम शहर में पोहोंचलैं तो हूवाँ केर बिसवासीमन आउर खास चेलामन आउर कलीसिया केर अगुवामन उमन से खुशी से मिललैं। शाऊल आउर बरनाबास उमन के बतालैं कि परमेश्‍वर उमन केर संगे होई के कइसन-कइसन काम काइर हे। मगर फरीसी दल केर आदमीमन में से जेमन बिसवास काइर रहैं, उमन में से थोरेक आदमीमन उइठ के कहलैं, “परजाइत बिसवासी आदमीमन के खतना आउर मूसा केर नियम के मानेक केर आगया देवेक चाही।” तब यीशु केर खास चेलामन आउर कलीसिया केर अगुवामन इ गोइठ केर बारे में बिचार करेक लगिन जमा होलैं। उमन में ढेइर बहस होवेक केर पाछे पतरस ठड़ाय के उमन से कहलक, “हे भाईमन, तोहरे जानाला कि परमेश्‍वर ढेइर दिन पहिलेहें तोहर में से मोके चुइन लेलक ताकि मोर मुँह से परजाइत आदमीमन शुभ समाचार केर बचन सुइन के बिसवास करोक। मन के जाँचेक वाला परमेश्‍वर उमन के हों हमर नियर पवितर आत्मा देई के इ साबित करलक कि उमन हों परमेश्‍वर बटले चुनल आदमी हेकैं। आउर उमन केर बिसवास करेक से उ मनक मन के शुद्ध काइर के हमर में आउर उमन में कोनों फरक नी करलक। तो अब तोहरे परमेश्‍वर के काले परखाला आउर यहूदी नियम आउर रीति रिवाज के इ परजाइत बिसवासीमन के काले मनुवावाला, जेके हमर बाप-दादामन हों मानेक नी पाइर रहैं आउर ना हमरे मानेक पारब? हाँ, हमरे केर बिसवास तो इ अहे कि प्रभु यीशु केर किरपा से हमरे जे लेखे छुटकारा पाय ही, ओहे लेखे से उमन हों छुटकारा पाबैं।” तब जमा होवल सोउब आदमीमन बरनाबास आउर पौलुस केर गोइठ के चुपचाप सुनेक लगलैं कि परमेश्‍वर उमन से परजाइत आदमीमन में कइसन बड़का-बड़का चिन्हा आउर चमत्कार केर काम देखालक। जब बरनाबास आउर पौलुस चुप होलैं तो याकूब कहेक लगलक, “हे भाईमन, मोर गोइठ के सुना। सिमोन पतरस बतालक कि परमेश्‍वर पहिले परजाइत आदमीमन केर उपरे दया करलक आउर उमन में से थोरेक आदमीमन के अपन आदमी बनाएक लगिन चुनलक। परजाइत आदमीमन केर इ बदलाव उ गोइठ केर बारे में बतायला जेकर बारे में परमेश्‍वर केर संदेश के बताएक वालामन ढेइर पहिले पवितर किताब में लीख रहैं। जइसन कि लिखल अहे, ‘इकर पाछे मोंय फिन आय के राजा दाऊद केर राइज के जेके उकर दुश्मनमन नाश काइर देई रहैं, उके फिन से खड़ा करमूँ, जेकर से बचल आदमीमन, मतलब सोउब जाइत केर आदमीमन के जेमन के मोंय अपन लगिन चुइन हो, उमन प्रभु केर खोजार में लगल रहोक। इ गोइठमन के ओहे प्रभु कइह हे, जेकर बारे में दुनिया केर सिरजन से समाचार देते आय हे।’ से लगिन मोर बिचार इ हेके कि परजाइत आदमीमन में से जे आदमीमन परमेश्‍वर केर बटे आवैना, हमरे उमन के यहूदी नियम आउर रीति-रिवाज के मानेक लगिन जोर नी करब। मगर हमरे उमन के चिट्ठी लीख के भेजब कि उमन मूर्तिमन लगिन चढ़ाल अशुद्ध चीजमन के आउर ब्यभिचार आउर घेंचा चीप के मोराल जीवमन केर माँस आउर लोहू के ना खाओक। काले कि बितल समय से नगर-नगर में मूसा केर नियम केर परचार करेक वालामन परचार करते आय हैं आउर इ नियम के हर आराम केर दिन यहूदी मनक प्रार्थना घर में पढ़ल जायला।” तब यरुशलेम शहर में सोउब बिसवासीमन आउर यीशु केर चुनल खास चेलामन आउर कलीसिया केर अगुवामन के इ गोइठ बेस लगलक आउर इ बिचार करलैं कि अपन में से थोरेक आदमीमन के चुइन के पौलुस आउर बरनाबास केर संगे अंताकिया शहर भेजब। उमन यहूदा के जे बरसब्बा कहायला, आउर सीलास के चुनलैं, उमन बिसवासी भाईमन में मुध आदमी रहैं। आउर चिट्ठी में इ लीख के उ मनक हाँथ में भेजलैं, “अंताकिया शहर, सीरिया आउर किलिकिया परदेस केर रहेक वाला परजाइत बिसवासी भाई-बहिनमन तोहरेमन के खास चेलामन आउर कलीसिया केर अगुवामन बटले जोहार! हमरे सुइन ही कि हमर हिंयाँ से थोरेक बिसवासी भाईमन हूवाँ जाय के तोहरे के अपन गोइठमन से घबराय देलैं, आउर तोहर मन के दुबिधा में काइर देई हैं, मगर हमरे उमन के इ आगया नी देई रही। से लगिन हमरे सोउब केर बिचार से थोरेक बिसवासी भाईमन के चुइन के तोहर हिंयाँ भेजेक केर फैसला करली आउर इ चुनल बिसवासी भाईमन के अपन दुलारा बरनाबास आउर पौलुस केर संगे तोहर ठिना भेजली। इमन एइसन बिसवासी भाईमन हेकैं, जेमन अपन जान के हमर प्रभु यीशु मसीह लगिन खतरा में डाइल देई हैं। आउर हमरे यहूदा आउर सीलास के तोहर हिंयाँ भेइज ही, जेमन अपन मुँह से हों इ गोइठमन के तोहरेमन के बताय देबैं। पवितर आत्मा के आउर हमरे के ठीक बुझालक कि इ जरुरी गोइठमन के छोइड़ के तोहरे के आउर बोझा नी देवब, तोहरेमन मूर्तिमन लगिन बलि चढ़ाल चीजमन के आउर लोहू के आउर घेंचा चीप के मोराल माँस के ना खाबा आउर ब्यभिचार से दूर रहबा, अगर तोहरे खुद के इ गोइठमन से बचाय के रखबा तो तोहर भला होवी। आगे शुभ।” फिन उमन बिदा होई के अंताकिया शहर में पोहोंचलैं, आउर सभा के जमा काइर के उ चिट्ठी के उमन के देई देलैं। उमन उ चिट्ठी के पइढ़ के उ उपदेस केर गोइठ से मुरुक खुश होलैं। आउर यहूदा आउर सीलास जे खुद हें परमेश्‍वर केर संदेश के बताएक वाला रहैं, ढेइर गोइठमन से भाईमन के उपदेस देई के उमन के बिसवास में स्थिर करलैं। यहूदा आउर सीलास थोरेक दिन हूवाँ रहलैं आउर इकर पाछे उमन अपन भेजेक वालामन ठिना जाएक लगिन हूवाँ केर भाईमन से शांति से बिदा होलैं। मगर सीलास हूवाँ रहेक केर फैसला करलक आउर यहूदा एकले यरुशलेम शहर घूइर गेलक। पौलुस आउर बरनाबास अंताकिया शहर में रइह गेलैं: आउर ढेइर आउरो आदमीमन केर संगे प्रभु यीशु केर बचन केर उपदेस करते आउर शुभ समाचार सुनाते रहलैं। थोरेक दिन केर पाछे पौलुस बरनाबास से कहलक, “जे-जे नगरमन में हमरे प्रभु केर बचन सुनाय रही। आव, हूवाँ जाय के देखब कि अपन बिसवासी भाईमन कइसन अहैं।” बरनाबास यूहन्ना के हों जे मरकुस कहायला अपन संगे लेगेक चाहत रहे। मगर पौलुस के उके अपन संगे लेई जाएक सही नी लगलक, काले कि उ आदमी पंफूलिया परदेस में उमन के छोइड़ देई रहे आउर उ मनक काम में साथ नी देई रहे। इकर बारे में दुयो झन में एतना बहस होलक कि उमन एक-दूसरा से अलग होई गेलैं। आउर बरनाबास, मरकुस के लेई के पानी जहाज में साइप्रस टापू चाइल गेलक। मगर पौलुस सीलास के चुनलक। आउर बिसवासी भाईमन उके परमेश्‍वर केर किरपा में जिम्मा देई देलैं आउर उ हूवाँ से चाइल गेलक। फिन उ सीरिया आउर किलिकिया परदेस में गेलक आउर हूवाँ केर कलीसिया केर बिसवासी भाईमन के मजबूत करते हूवाँ से निकइल गेलक। पौलुस फिन दिरबे नगर आउर लुस्त्रा नगर में हों गेलक, आउर हूवाँ तीमुथियुस नाँव केर एगो चेला रहे, जेकर आयो यहूदी रहे आउर आबा यूनान देस केर रहेक वाला रहे। उकर लुस्त्रा नगर आउर इकुनियुम शहर केर बिसवासी भाईमन में बेस नाँव रहे। पौलुस तीमुथियुस के अपन संगे लेगेक चाहत रहे। से लगिन पौलुस उकर खतना करलक काले कि हूवाँ केर यहूदी आदमीमन इ जानत रहैं कि उकर आबा यूनान देस केर रहेक वाला हेके। पौलुस आउर उकर संगमन नगर-नगर जाय के हूवाँ केर बिसवासी भाईमन के उ आगयामन के जिम्मा देवत रहैं, जेके यरुशलेम शहर केर खास चेलामन आउर कलीसिया केर अगुवामन ठहराय रहैं। इ लेखे कलीसिया केर आदमीमन बिसवास में स्थिर होते गेलैं आउर गिनती में रोज दिन बढ़ते गेलैं। पवितर आत्मा उमन के आसिया परदेस में बचन सुनाएक से मना करलक, से लगिन पौलुस आउर उकर संगमन सीलास आउर तीमुथियुस फ्रूगिया आउर गलातिया परदेसमन में से होई के आगे चाइल गेलैं। जब उमन मूसिया परदेस केर सिमान में पोहोंचलैं तो उमन बितूनिया परदेस में जाएक केर कोशिश करलैं, मगर यीशु केर आत्मा उमन के जाएक नी देलक। से लगिन उमन मूसिया परदेस के पार काइर के त्रोआस नगर में आलैं। हूवाँ पौलुस राइत के एगो दर्शन देखलक कि मकिदुनिया परदेस केर रहेक वाला एगो आदमी उकर सामने ठड़ाय के इ बिनती कराथे, “तोंय समुदर पार काइर के मकिदुनिया परदेस में आव आउर हमर मदइत कर।” इ दर्शन देइख के हमरे तुरते मकिदुनिया परदेस जाएक चाहली, इ समइझ के कि परमेश्‍वर हमरे के उमन के शुभ समाचार सुनाएक लगिन बोलाय हे। से लगिन त्रोआस नगर से जहाज खोइल के हमरे सीधा सुमात्राके टापू आउर दूसरा दिन नियापुलिस शहर में आली। हूवाँ से हमरे फिलिप्पी शहर में पोहोंचली। जे मकिदुनिया परदेस केर मुध शहर, आउर रोमी बस्ती हेके। आउर हमरे थोरेक दिन तक उ शहर में रहली। यहूदी मनक आराम केर दिन हमरे इ समइझ के शहर केर दुरा केर बाहरे नदी केर किनारे गेली कि हूवाँ यहूदी आदमीमन केर प्रार्थना करेक केर ठाँव होवी आउर बाइठ के हूवाँ जमा होवल जनानामन से गोठियाएक लगली। उ जनानामन में से थुआतीरा नगर केर रहेक वाला एगो लुदिया नाँव केर जनाना रहे। उ किमती बैगनी लुगा केर बेपार करेक वाला आउर परमेश्‍वर केर भक्त रहे। उ हमर गोइठ सुनत रहे। प्रभु उकर मन के खोललक ताकि उ पौलुस केर गोइठमन के धेयान से सुनोक। जब उ आउर उकर परिवार केर सोउब आदमीमन बपतिस्मा जल संस्कार लेलैं तब उ हमरे से इ बिनती करलक, “अगर तोहरे सचमुच में मोके प्रभु केर उपरे बिसवास करेक वाला जानाला, तो तोहरे आय के मोर घर में रहा।” आउर उ हमरे के मनाय के लेई गेलक। एक दिन हमरे प्रार्थना घर जात रही तो हमरे के एगो धांगरिन मिललक, जेकर में एगो एइसन भूत रहे जेकर मदइत से उ भविष्य बतात रहे आउर उ भविष्य बताय-बताय के अपन मालिक केर लगिन ढेइर कमाय लानत रहे। उ पौलुस आउर हमरे केर पिछे आय के चिल्लाएक लगलक, “इ आदमीमन परमप्रधान परमेश्‍वर केर दास हेकैं, जेमन बतायना कि तोहरे कइसन छुटकारा पाबा।” उ ढेइर दिन तक एइसनेहें करते रहलक, आखरी में पौलुस परेशान होई गेलक, आउर पिछे मुँहराय के उ भूत से कहलक, “मोंय तोके यीशु मसीह केर नाँव से हुकूम देवोना कि तोंय इकर में से निकइल जा!” आउर उ ओहे बेरा निकइल गेलक। जब उकर मालिकमन देखलैं कि उ मनक कमाई केर आसरा चाइल गेलक, तो पौलुस आउर सीलास के धाइर के चौक में मुखियामन ठिना खींच के लेई गेलैं। आउर उमन के दंड देवेक वाला अधिकारीमन ठिना लेई गेलैं आउर उमन से कहलैं, “इ यहूदी आदमीमन हमर शहर में अशांति फैलाथैं। आउर एइसन रीति बताथैं, जेके अपनाएक चाहे उके मानेक हमरे रोम देस केर रहेक वाला आदमी लगिन ठीक नखे।” तब भीड़ केर आदमीमन हों पौलुस आउर सीलास केर बिरोध में जमा होई गेलैं, आउर दंड देवेक वाला अधिकारीमन उ मनक लुगा के फाइर के उतराय देलैं आउर उमन के बेंत मारेक केर आगया देलैं। उमन पौलुस आउर सीलास के बेंत से ढेइर मारलैं आउर उमन के जेहेल घर में साइज देलैं। आउर दरोगा के आगया देलैं कि सावधानी से उमन केर रखवाली करोक। उ एइसन हुकूम पाय के उमन के भीतरे केर कोठरी में रखलक आउर उ मनक गोड़ में काठ केर ठाकू पिंधाय देलक। लगभग आधा राइत के पौलुस आउर सीलास प्रार्थना करत रहैं आउर परमेश्‍वर केर भजन गावत रहैं, आउर संगी कैदीमन उ मनक भजन के सुनत रहैं। एतने में अचका बड़का भूंईडोल होलक, हिंयाँ तक कि जेहेल घर केर नेव हिल गेलक। तुरते सोउब दुरा खुइल गेलक आउर सोउब केर बंधन खुइल गेलक। दरोगा जाइग गेलक आउर जेहेल घर केर दुरा के खुलल देइख के समझलक कि कैदीमन भाइग गेलैं। से लगिन उ तलवाइर खींच के खुद के माइर मोराएक चाहलक। मगर पौलुस जोर से चिल्लाय के कहलक, “खुद के कोनों नोकसान ना पोंहचाव, काले कि हमरे सोउब हिंयाँय अही।” तब दरोगा दीया मंगुवाय के भीतरे कूइद के गेलक आउर थरथराते पौलुस आउर सीलास केर आगे गिरलक। आउर उमन के बाहरे लाइन के कहलक, “हे सज्जन आदमीमन, छुटकारा पावेक लगिन मोंय का करमूँ?” उमन कहलैं, “तोंय प्रभु यीशु मसीह केर उपरे बिसवास कर तो तोंय आउर तोर परिवार छुटकारा पावी।” आउर उमन उके आउर उकर घर केर सोउब आदमीमन के प्रभु केर बचन सुनालैं। दरोगा राइत के ओहे बेरा पौलुस आउर सीलास के लेई जाय के उ मनक घाव के धोलक। इकर पाछे तुरते उकर परिवार केर सोउब आदमीमन बपतिस्मा जल संस्कार लेलैं। तब दरोगा उमन के अपन घर में लेई जाय के उमन के खियालक आउर अपन परिवार केर साथ में खुशी मनालक, काले कि उ परमेश्‍वर केर उपरे बिसवास करलक। अगला दिन दंड देवेक वाला अधिकारीमन सिपाहीमन से कइह भेजलैं कि उ आदमीमन के छोइड़ देवा। दरोगा पौलुस के इ खबर बतालक, “दंड देवेक वाला अधिकारीमन तोहरे के छोइड़ देवेक केर हुकूम भेइज हैं, से लगिन अब शांति से हिंयाँ से बिदा होई के चाइल जावा।” मगर पौलुस उकर से कहलक, “हमरे रोम देस केर रहेक वाला आदमी हेकी। फिन भी हमरे के बेगर दोषी ठहराले आदमीमन केर सामने मारलैं, आउर जेहेल घर में साजलैं। अब उमन हमरे के चुपे से निकलाय देवाथैं। एइसन नी होवी, मगर उमन खुद आय के हमरे के बाहरे लेई जाओक।” सिपाहीमन इ गोइठमन के दंड देवेक वाला अधिकारीमन के बतालैं। उमन इ सुइन के कि पौलुस आउर सीलास रोम देस केर रहेक वाला आदमी हेकैं, डराय गेलैं। तब उमन खुद आय के पौलुस आउर सीलास से माफी माँगलैं आउर उमन के जेहेल घर से बाहरे लेई जाय के बिनती करलैं कि उमन नगर छोइड़ के चाइल जाओक। पौलुस आउर सीलास जेहेल घर से निकइल के लुदिया केर घर गेलैं। हूवाँ बिसवासी भाईमन से भेंट करलैं आउर उमन के हिम्मत देई के हूवाँ से चाइल गेलैं। पौलुस आउर सीलास फिन अम्फिपुलिस आउर अपुल्लोनिया नगर से होई के थिस्सलुनीके शहर में आलैं, जहाँ यहूदी मनक प्रार्थना घर रहे। पौलुस अपन रीति केर मोताबिक हूवाँ उमन ठिना गेलक, आउर तीन हफ्ता तक हरेक आराम केर दिन पवितर किताब से उमन केर संगे बहस करलक। आउर सबूत केर साथ समझात रहे कि मसीह के दुःख उठाएक आउर मोरलमन में से फिन जी उठेक जरुरी रहे। पौलुस एहो कहलक, “एहे यीशु जेकर बारे में मोंय तोहरे के सुनावना, मसीह हेके।” उमन में से थोरेक यहूदी आदमीमन पौलुस आउर सीलास केर इ गोइठ से राजी होलैं, इमन केर अलावा परमेश्‍वर केर डार-भय मानेक वाला ढेइर यूनानी आदमीमन आउर ढेइर इज्जतदार जनानामन हों बिसवास करलैं। मगर यहूदी आदमीमन हिसिंगा करेक लगलैं आउर उमन थोरेक बजारु गुंडामन केर मदइत से भीड़ लगाय के नगर में दंगा करेक लगलैं। उमन पौलुस आउर सीलास के आदमीमन केर सामने लानेक केर बिचार से यासोन केर घर में हमला करलैं। जब उमन पौलुस आउर सीलास के नी पालैं तो यासोन आउर थोरेक बिसवासी भाईमन के नगर केर अधिकारीमन ठिना खींच लानलैं आउर चिल्लाय-चिल्लाय के कहेक लगलैं, “इ आदमीमन दुनिया केर हर ठाँव में परेशान काइर देई हैं, अब हिंयाँ हों आय जाय हैं। आउर यासोन इमन के अपन घर में रहेक लगिन ठाँव देई हे। इ सोउब आदमीमन महाराजा केर कानून केर बिरोध करैना आउर इ कहैना कि यीशु राजा हेके।” इ सुइन के भीड़ केर आदमीमन आउर नगर केर अधिकारीमन घबराय गेलैं। उमन यासोन आउर चेलामन के घूस लेई के छोइड़ देलैं। बिसवासी भाईमन तुरते राइत के पौलुस आउर सीलास के बिरीया नगर में भेइज देलैं। हूवाँ पोंहइच के उमन यहूदी मनक प्रार्थना घर गेलैं। इ नगर केर यहूदी आदमीमन थिस्सलुनीके शहर केर यहूदी आदमीमन से भला रहैं। उमन बड़का लालसा से प्रभु केर बचन के सुनत रहैं आउर रोज दिन पवितर किताब के पइढ़ के खोजत रहैं कि इ बचन सच में पवितर किताब में अहे कि निहीं। इकर चलते इ होलक कि ढेइर आदमीमन बिसवासी बाइन गेलैं। इमन केर अलावा प्रसिद्ध यूनानी जनानामन आउर ढेइर मरदानामन हों बिसवास करलैं। मगर जब थिस्सलुनीके शहर केर यहूदीमन जाइन गेलैं कि पौलुस बिरीया नगर में हों परमेश्‍वर केर बचन परचार कराथे, तो उमन हूवाँ हों आय के दंगा करेक आउर आदमीमन के भड़काएक शुरु करलैं। तब बिसवासी भाईमन तुरते पौलुस के समुदर केर किनारे भेइज देलैं, मगर सीलास आउर तीमुथियुस हुवाँय रइह गेलैं। पौलुस के पोंहचाएक वालामन उके एथेंस शहर पोंहचाय देलैं आउर पौलुस केर इ हुकूम पाय के बिरीया नगर घुरलैं कि सीलास आउर तीमुथियुस जेतना जल्दी होई सके मोर ठिना आय जाबैं। जब पौलुस एथेंस शहर में सीलास आउर तीमुथियुस केर आवेक केर आसरा देखत रहे, तो उ शहर में देवी-देवतामन केर मूर्तिमन के देइख के आत्मा में ढेइर दुःखी होलक। से लगिन उ यहूदी मनक प्रार्थना घर में यहूदी आदमीमन से आउर परमेश्‍वर केर डार-भय मानेक वाला यूनानी आदमीमन से आउर रोज दिन चौराहा में आवेक-जाएक वाला आदमीमन से बहस करत रहे। हूवाँ थोरेक इपिकूरी आउर स्तोईकी से जानल जाएक वाला सिखाएक वालामन से उकर भेंट होलक आउर उमन से बहस करेक लगलक। उमन में से थोरेक सिखाएक वालामन कहलैं, “इ बकवास करेक वाला आदमी हमरे से का कहेक चाहाथे?” मगर दोसर आदमीमन कहलैं, “इ बिदेसी देवतामन केर परचार मालूम होवेला।” काले कि पौलुस यीशु केर आउर उकर फिन से जी उठेक केर शुभ समाचार सुनात रहे। तब उमन पौलुस के अपन संगे अरियुपगुस नाँव केर सभा में लेई गेलैं आउर उकर से पूछलैं, “का हमरे जानेक पारिला कि तोंय इ कोन नवाँ शिक्षा देवाथिस? काले कि तोंय ताजुब गोइठमन के हमरे के सुनाइसला, से लगिन हमरे जानेक चाहिला कि इकर मतलब का हेके।” काले कि एथेंस शहर केर रहेक वाला आदमीमन आउर हूवाँ रहेक वाला परदेसी आदमीमन नवाँ-नवाँ गोइठमन के सुनाएक आउर सुनेक केर सिवाय आउर कोनों काम में समय नी बितात रहैं। तब पौलुस अरियुपगुस सभा केर माझे में ठड़ाय के इ कहेक लगलक, “हे एथेंस शहर केर रहेक वाला भला आदमीमन! तोहर बारे में मोंय मानोना कि तोहरे हर गोइठ में देवतामन केर बड़का मानेक वाला हेका। काले कि जब मोंय घुमत रहों तो तोहर पूजा करेक केर चीजमन में से एगो एइसन बेदी हों देखलों, जेकर में लिखल रहे, ‘अनजान ईश्‍वर केर लगिन।’ तोहरे जेके बेगर जानले पूजा कराला, मोंय तोहरे के उकरे समाचार के सुनावना। जे परमेश्‍वर दुनिया आउर उकर में जे कुछ अहे, उ सोउब चीजमन के बनालक। उ आकाश आउर धरती केर मालिक हेके, उ हाँथ केर बनाल मंदिरमन में नी रहेला। उके कोनों चीज केर जरुरत नखे आउर ना केऊ आदमी केर सेवा केर जरुरत अहे, काले कि ओहे सोउब के जिंदगी, साँस आउर जरुरत केर सोउब चीजमन के देवेक वाला हेके। उ एके गो पुरूष से सोउब आदमी जाइत के दुनिया में रहेक लगिन बनाय हे, आउर उमन केर ठहराल समय आउर रहेक केर सीमानमन के बाइंध हे। परमेश्‍वर एइसन इ लगिन करलक ताकि आदमीमन परमेश्‍वर के खोजोक आउर खोजते-खोजते उके पाय जाओक, फिन भी उ हमर में से केकरो से दूर नखे। काले कि उकरे में हमरे जिंदा रहिला, आउर चलिला फिरिला आउर स्थिर रहिला। जइसन तोहरे केर थोरेक दोहा लिखेक वालामन हों कइह हैं, ‘हमरे हों उकरे बंश हेकी।’  से लगिन परमेश्‍वर केर संतान होई के हमरे के इ समझेक नी चाही कि ईश्‍वर, सोना या रुपा या पखना केर नियर अहे, जे आदमी केर कारीगरी आउर सोच से बनाल जाय हे। अब तक तो परमेश्‍वर आदमीमन केर नी जानेक केर चलते इके अनदेखा करते आय हे, मगर अब उकर आगया इ हेके कि हर ठाँव केर सोउब आदमीमन पाप करेक छोइड़ देवोक। काले कि परमेश्‍वर एक दिन ठहराय हे, जेकर में उ अपन ठहराल आदमी से दुनिया केर आदमी मनक न्याय करी। आउर परमेश्‍वर उ ठहराल आदमी के मोरलमन में से फिन जियाय के इ गोइठ केर सबूत देई दे हे।” मोरलमन केर फिन से जी उठेक केर गोइठ सुइन के थोरेक आदमीमन तो मजाक करेक लगलैं, मगर थोरेक आदमीमन कहलैं, “इ गोइठ केर बारे में हमरे तोर से फिन कहियो सुनब।” उ बेरा पौलुस उमन केर माझे से निकइल के चाइल गेलक। फिन भी थोरेक आदमीमन उकर संगे मिल गेलैं, आउर प्रभु यीशु केर उपरे बिसवास करलैं। जेमन में दियुनुसियुस जे अरियुपगुस सभा केर सदस्य रहे, आउर दमरिस नाँव केर एगो जनाना रहे आउर उमन केर संगे आउर हें आदमीमन रहैं। इकर पाछे पौलुस एथेंस शहर के छोइड़ के कुरिन्थुस शहर में आलक। हूवाँ अक्विला नाँव केर एगो यहूदी आदमी से उकर भेंट होलक, जेकर जनम पुन्तुस परदेस में होई रहे। उ अपन जनाना प्रिस्किल्ला केर संगे थोरेक समय पहिले इटली शहर से आय रहे, काले कि महाराजा क्लौदियुस सोउब यहूदी आदमीमन के रोम देस से निकइल जाएक केर हुकूम देई रहे। पौलुस उमन से भेंट करेक गेलक। पौलुस आउर अक्विला दुयो केर काम एक हें रहे, तंबू बनाएक केर काम। से लगिन पौलुस उमन केर संगे रइह के काम करेक लगलक। पौलुस हर आराम केर दिन में यहूदी मनक प्रार्थना घर में बचन केर परचार करत रहे आउर बहस काइर के यहूदी आदमीमन आउर यूनानी आदमीमन के समझाय के उ मनक शंका के दूर करत रहे, ताकि उमन यीशु मसीह केर उपरे बिसवास करोक। जब सीलास आउर तीमुथियुस मकिदुनिया परदेस से आलैं, तो पौलुस तंबू बनाएक केर काम छोइड़ के बचन सुनाएक में अपन पूरा समय देवेक लगलक आउर यहूदीमन के इ गवाही देते रहलक कि यीशु हें मसीह हेके। मगर जब यहूदी आदमीमन पौलुस केर बिरोध आउर निंदा करेक लगलैं, तो उ इ देखाएक लगिन कि परमेश्‍वर उमन से खुश नखे, अपन लुगा केर धूर झाइर के उमन से इ कहलक, “परमेश्‍वर केर संदेश के नी मानेक केर चलते तोहरे खुद हें परमेश्‍वर बटे से मिलेक वाला सजा लगिन जिम्मेदार हेका! मोंय निरदोष हेकों। अब से मोंय परजाइत आदमीमन ठिना जामूँ आउर परमेश्‍वर केर बचन केर परचार करमूँ।” पौलुस यहूदी मनक प्रार्थना घर से निकइल के तीतुस यूस्तुस नाँव केर एगो परजाइत आदमी जे परमेश्‍वर केर भय मानेक वाला आउर उकर आराधना करेक वाला रहे, उकर घर में आलक, जेकर घर प्रार्थना घर केर भीरे रहे। यहूदी मनक प्रार्थना घर केर सरदार क्रिस्पुस अपन परिवार केर सोउब आदमीमन केर संगे प्रभु केर उपरे बिसवास करलक। आउर कुरिन्थुस शहर केर रहेक वाला ढेइर आदमीमन हों पौलुस केर गोइठ सुइन के उकर उपरे बिसवास करलैं आउर बपतिस्मा जल संस्कार लेलैं। प्रभु एक राइत के दर्शन देई के पौलुस से कहलक, “ना डराव, मगर बचन केर परचार करते जा, आउर चुप ना रहबे, मोंय तोर संगे अहों आउर केऊ हों तोर उपरे हमला काइर के तोके नोकसान पोंहचाएक नी पारी, काले कि इ शहर में ढेइर आदमीमन मोर उपरे बिसवास करबैं।” से लगिन पौलुस हूवाँ डेढ़ बरिस तक रहलक आउर आदमीमन के परमेश्‍वर केर बचन सिखाते रहलक। जब गल्लियो अखया परदेस केर राजपाल रहे, तो यहूदी आदमीमन एक होई के पौलुस केर बिरोध में आय गेलैं, आउर उके फैसला करेक केर कुरसी केर सामने लाइन के उकर उपरे इ दोष लगालैं, “इ आदमी परमेश्‍वर केर भक्ति करेक इ लेखे सिखायला जे मूसा केर नियम केर उल्टा अहे।” जब पौलुस खुद के बचाएक लगिन कहेक वाला रहे, तब राजपाल गल्लियो यहूदीमन से कहलक, “हे यहूदी आदमीमन! अगर तोहरे मोर सामने कोनों रकम केर अन्याय या अपराध केर मामला के लानता तो मोंय जरूर तोहर गोइठ के सुनतो। मगर इ बहस शबदमन, नाँवमन आउर तोहर नियम केर बारे में हेके, से लगिन तोहरे हें इकर फैसला करा। मोंय एइसन गोइठमन केर फैसला करेक नी चाहोना।” आउर राजपाल गल्लियो हुकूम देलक कि उमन उके फैसला करेक केर कुरसी ठिना से बाहरे निकलाय देवोक। तब सोउब आदमीमन यहूदी मनक प्रार्थना घर केर सरदार सोस्थिनेस के धाइर के फैसला करेक केर कुरसी ठिना हें पिटलैं। मगर राजपाल गल्लियो इकर उपरे कोनों धेयान नी देलक। पौलुस ढेइर दिन तक कुरिन्थुस शहर में रहलक। इकर पाछे बिसवासी भाईमन से बिदा होई के पानी जहाज से सीरिया परदेस चाइल गेलक, उकर संगे प्रिस्किल्ला आउर अक्विला हों रहैं। सीरिया परदेस पोंहचेक से पहिले उ किंखिरया टापू में मूँड़ मुड़वालक, काले कि उ मन्नत माँइग रहे। पौलुस इफिसुस शहर में पोंहइच के प्रिस्किल्ला आउर अक्विला के हूवाँ छोइड़ देलक आउर खुद यहूदी मनक प्रार्थना घर में जाय के यहूदीमन से बहस करेक लगलक। आदमीमन पौलुस से बिनती करलैं, “तोंय हमर संगे आउर थोरेक दिन रह।” मगर पौलुस नी मानलक। आउर इ कइह के उमन से बिदा होलक, “अगर परमेश्‍वर चाही तो मोंय तोहर ठिना फिन आमूँ।” तब उ इफिसुस शहर छोइड़ के पानी जहाज से आगे चाइल गेलक। आउर उ कैसरिया बंदररगाह में उतइर के यरुशलेम शहर गेलक आउर हूवाँ केर कलीसिया केर बिसवासीमन से भेंट काइर के अंताकिया शहर में आलक। पौलुस थोरेक दिन अन्ताकिया शहर में बिताय के हूवाँ से बिदा होलक आउर फ्रूगिया आउर गलातिया परदेस से होई के एक शहर से दोसर शहर घूमते सोउब चेलामन के स्थिर करते रहलक। उ समय अपुल्लोस नाँव केर एगो यहूदी आदमी जेकर जनम सिकंदरिया शहर में होई रहे, इफिसुस शहर में आलक। उ बिद्वान पुरूष रहे आउर पवितर किताब के बेस लेखे जानत रहे। उ प्रभु केर डहर केर शिक्षा पाय रहे। उ पूरा मन लगाय के यीशु केर बारे में आदमीमन के ठीक-ठीक सुनात रहे, आउर सिखात रहे, मगर उ सिरिफ यूहन्ना केर बपतिस्मा जल संस्कार केर गोइठ के जानत रहे। उ यहूदी मनक प्रार्थना घर में निडर होई के कहेक लगलक। जब प्रिस्किल्ला आउर अक्विला उकर उपदेस के सुनलैं, तो अपुल्लोस के अपन घर में लेई गेलैं आउर बेस लेखे परमेश्‍वर केर डहर केर शिक्षा के उके बतालैं। जब अपुल्लोस समुदर पार अखया परदेस जाएक केर ठाइन लेलक तो बिसवासी भाईमन उके ढाढ़स देलैं आउर अखया परदेस केर चेलामन के चिट्ठी लीख के बिनती करलैं कि उमन उकर स्वागत करोक। से लगिन जब अपुल्लोस अखया परदेस में पोहोंचलक तो उ नवाँ बिसवासीमन के जेमन प्रभु केर किरपा केर चलते बिसवासी बाइन रहैं, बिसवास में बढ़ेक लगिन ढेइर मदइत करलक। उ सोउब केर सामने यहूदी आदमीमन के चुप काइर देलक आउर पवितर किताब केर मोताबिक साबित करलक कि यीशु हें मसीह हेके। जब अपुल्लोस कुरिन्थुस शहर में रहे। पौलुस भीतरे केर सोउब परदेस से होई के इफिसुस शहर में आलक। हूवाँ थोरेक चेलामन मिललैं। पौलुस उमन से पूछलक, “का तोहरे बिसवास करेक बेरा पवितर आत्मा के पाय हा?” उमन उके जबाब देलैं, “निहीं, हमरे तो पवितर आत्मा का हेके, इकर बारे में कोनों नी सुइन ही।” तब पौलुस उमन से कहलक, “तो फिन तोहरे केकर बपतिस्मा जल संस्कार लेला?” उमन कहलैं, “यूहन्ना केर बपतिस्मा जल संस्कार।” पौलुस कहलक, “यूहन्ना उ आदमीमन के बपतिस्मा जल संस्कार देलक, जेमन पाप करेक छोइड़ देलैं आउर परमेश्‍वर बटे आय गेलैं। मगर यूहन्ना आदमीमन से कहलक कि यीशु केर उपरे बिसवास करा, उ मोर पाछे आवेक वाला अहे, आउर उ मसीह हेके।” इ सुइन के उमन प्रभु यीशु केर नाँव में बपतिस्मा जल संस्कार लेलैं। जब पौलुस उ मनक उपरे हाँथ रखलक तो पवितर आत्मा उमन केर उपरे उतरलक आउर उमन अलग-अलग भाषा बोलेक आउर भविष्यवाणी करेक लगलैं। इमन सोउब लगभग बारह झन मरदानामन रहैं। पौलुस तीन महिना तक यहूदी मनक प्रार्थना घर में जाते रहलक। उ निडर होई के परमेश्‍वर केर राइज केर बारे में बहस करत रहे आउर यहूदी आदमीमन के समझात रहे। मगर उमन में से थोरेक आदमीमन ढींठ होई के उकर गोइठ उपरे बिसवास नी करलैं आउर आदमीमन केर सामने इ डहर के बुरा कहेक लगलैं। से लगिन पौलुस उमन से नाता तोइर देलक आउर अपन चेलामन के हूवाँ से हटाय लेलक। उ रोज दिन तुरन्नुस स्कूल में परमेश्‍वर केर राइज केर बारे में शिक्षा देवत रहे। दूई बरिस तक एहे होते रहलक। इ लेखे आसिया परदेस में रहेक वाला यहूदी आदमीमन चाहे यूनानी आदमीमन सोउबमन प्रभु केर बचन के सुनलैं। आउर परमेश्‍वर पौलुस केर हाँथ से अपन शक्ति केर चमत्कार काम देखात रहे। हिंयाँ तक कि उकर गतर से छूवाल रूमाल आउर गमछा के बेमरियामन केर उपरे राइख देवत रहैं, तो उ मनक बेमारीमन दूर होई जात रहे, आउर भूतमन उमन में से निकइल जात रहैं। थोरेक यहूदी आदमीमन हों जे घुइम-घुइम के झाड़-फूक करत रहैं, भूत धारल आदमीमन से प्रभु यीशु केर नाँव में इ कइह के भूतमन के निकलात रहैं, “मोंय यीशु केर नाँव में जेकर परचार पौलुस करेला, तोके बाहरे आवेक केर हुकूम देवोना।” यहूदी मुध पुरोहित स्किवा केर सात गो बेटा रहैं, इमन हों एइसनेहें झाड़-फूक करत रहैं। मगर एक दिन भूत उमन के जबाब देलक, “यीशु के मोंय जानोना आउर पौलुस के हों चिन्होना, मगर तोहरे के हेका?” आउर उ आदमी जेकर में भूत रहे, उ मनक उपरे झपइट के उमन के अपन कब्जा में काइर लेलक आउर एइसन पिटाई करलक कि उमन नंगा आउर चोट खाय के उ घर से निकइल के भागलैं। इ घटना केर बारे में इफिसुस शहर केर रहेक वाला सोउब यहूदी आउर यूनानी आदमीमन हों जाइन गेलैं, आउर उमन डराय गेलैं आउर प्रभु यीशु केर नाँव केर बड़ाई करलैं। आउर जेमन बिसवास काइर रहैं, उमन में से ढेइर आदमीमन सोउब केर सामने अपन-अपन बुरा काममन के माइन लेलैं। आउर जादू करेक वाला ढेइर आदमीमन हों अपन-अपन किताबमन के जमा काइर के सोउब केर सामने पोड़ाय देलैं। जब उ मनक दाम जोड़ल गेलक, तो पता चललक कि उ मनक दाम पचास हजार चाँदी केर सिक्का केर बराबइर रहे। इ लेखे प्रभु केर बचन शक्ति से फैलते गेलक आउर मजबूत होते गेलक। इ घटना होवेक केर पाछे पौलुस मकिदुनिया परदेस आउर अखया परदेस से होई के यरुशलेम शहर जाएक केर फैसला करलक। उ कहलक, “हूवाँ पोंहचेक केर पाछे मोके रोम देस के हों देखेक जरुरी अहे।” से लगिन अपन सेवा करेक वालामन में से तीमुथियुस आउर इरास्तुस के अपन से आगे मकिदुनिया परदेस भेइज देलक आउर खुद थोरेक दिन आसिया परदेस में रहलक। एहे दिनमन में हूवाँ यीशु मसीह केर डहर के लेई के भारी खलबली मइच गेलक। काले कि देमेत्रियुस नाँव केर एगो आदमी जे चाँदी केर कारीगर रहे, उ कारीगरमन से देवी अरतिमिस केर मंदिर में मूर्ति बनुवात रहे, जेकर से कारीगरमन केर ढेइर कमाई होवत रहे। देमेत्रियुस इ कारीगरमन के आउर एहे लेखे केर काम करेक वाला दोसर कारीगरमन के हों जमा काइर के उमन से कहलक, “हे भाईमन, तोहरे जानाला कि इ काम से हमरे केर केतना कमाई होवेला। मगर तोहरे देखाथा आउर सुनाथा कि उ पौलुस सिरिफ इफिसुस शहर में हें निहीं, मगर आसिया परदेस केर सोउब गाँवमन में ढेइर आदमीमन के समझाय-बुझाय के बहकाय देलक कि हाँथ केर बनाल मूर्ति ईश्‍वर ना लगे। इकर से इ शंका होई गेलक कि ना सिरिफ हमर इ धंधा केर इज्जत चाइल जाई, मगर इ महान देवी अरतिमिस केर मंदिर केर महत्व हों चाइल जाई। जेकर पूजा गोटा आसिया परदेस में आउर दुनिया भइर में करल जायला।” इ सुइन के सोउब कारीगरमन खिसाय गेलैं आउर चिल्लाय-चिल्लाय के कहेक लगलैं, “इफिसुस शहर केर रहेक वाला आदमीमन केर देवी अरतिमिस महान अहे।” आउर शहर केर ढेइर आदमीमन चिल्लाएक केर आवाज सुइन के भीड़ में मेसा होई गेलैं आउर गोटा शहर में खलबली मइच गेलक। उमन एक जुट होई के गयुस आउर अरिस्तर्खुस के जे मकिदुनिया परदेस केर रहेक वाला आउर पौलुस केर संगी रहैं, घिसराय के लेई गेलैं आउर सोउब मिल के नाटक घर बटे कूइद गेलैं। पौलुस हों नाटक घर केर भीतरे जाय के आदमीमन से गोठियाएक चाहत रहे, मगर चेलामन उके जाएक नी देलैं। आसिया परदेस केर थोरेक अधिकारीमन हों जे उकर संग रहैं, उकर ठिना खबर भेइज के बिनती करलैं कि नाटक घर केर भीतरे जाय के अपन जान केर खतरा मोल ना लेबे। नाटक घर केर भीतरे सोउब आदमीमन चिल्लात रहैं, केऊ कुछ चिल्लात रहे तो केऊ आउर कुछ। सोउब कुछ गड़बड़ रहे आउर ढेइर आदमीमन तो एहो नी जानत रहैं कि उमन का लगिन जमा होई हैं। भीड़ में से थोरेक आदमीमन बुझलैं कि इ सिकंदर नाँव केर आदमी केर चलते होवाथे, काले कि थोरेक यहूदी आदमीमन उके भीड़ केर सामने ढेकइल के आगे काइर देई रहैं। सिकंदर हाँथ से इशारा काइर के आदमीमन के चुप रहेक लगिन कहलक, ताकि उ आदमीमन के समझाएक पारोक कि हिंयाँ का होवाथे। मगर जब उमन जाइन गेलैं कि उ यहूदी हेके तो सोउब आदमीमन एक आवाज में लगभग दूई घंटा तक चिल्लाते रहलैं कि “इफिसुस शहर केर रहेक वाला आदमीमन केर देवी अरतिमिस महान अहे।” शहर केर मंत्री आदमीमन के शांत काइर के कहलक, “हे इफिसुस शहर केर रहेक वाला आदमीमन, कोन आदमी नी जानेला कि इफिसुस शहर केर आदमीमन महान देवी अरतिमिस केर मंदिर केर देख-भाल कराथैं आउर उ मनक पवितर मूर्ति आकाश से गिर रहे। अब जबकि इ गोइठमन बिलकुल सच हेके तो उचित अहे कि तोहरे चुप रहा आउर बेगर सोच बिचार काइर के कोनों ना करा। तोहरे जे आदमीमन के धाइर के हिंयाँ लाइन हा, उमन ना तो मंदिर के लुटेक वाला हेकैं, आउर ना हमर देवी केर निंदा करेक वाला हेकैं। से लगिन अगर देमेत्रियुस आउर उकर संगी कारीगरमन केर केकरो से कोनों शिकाइत अहे, तो उकर लगिन कछैरी अहे, आउर हाकिम हों अहैं। हूवाँ उमन एक दोसर केर उपरे दोष लगाएक पारबैं। आउर अगर तोहरे केर इकर अलावा कोनों आउर माँग अहे, तो शहर केर सभा में उकर बारे में फैसला करल जाई। मोके डार अहे कि जब राजपाल इ दंगा केर बारे में सुनी तो कही कि हमरे रोमी सरकार केर बिरोध में दंगा करेक केर कोशिश कराथी, काले कि इ दंगा करेक केर कोनों कारण नखे, आउर हमरे इ भीड़ केर जमा होवेक केर कोनों जबाब देवेक नी पारब।” इ कइह के उ सभा के बिदा करलक। जब शहर में दंगा शांत होई गेलक तो पौलुस चेलामन के बुलवाय के उमन के उत्साहित करलक आउर उमन से बिदा होई के मकिदुनिया परदेस चाइल गेलक। उ सोउब परदेस में से होई के हूवाँ केर बिसवासीमन के उपदेस देई-देई के उ मनक हिम्मत के बढ़ाते गेलक आउर यूनान परदेस में आलक। हूवाँ तीन महिना बिताएक केर पाछे पानी जहाज से सीरिया परदेस जाएक वाला रहे। मगर जब उ सुनलक कि थोरेक यहूदी अगुवामन उके जहाज में मोराएक केर सलहा कराथैं, तो उ मकिदुनिया परदेस से होई के घूइर जाएक केर फैसला करलक। बिरीया नगर केर रहेक वाला पुरूष केर बेटा सोपत्रुस, थिस्सलुनीके शहर केर रहेक वाला अरिस्तर्खुस आउर सिकुंदुस, दिरबे नगर केर गयुस आउर लुस्त्रा नगर केर तीमुथियुस आउर आसिया परदेस केर तुखिकुस आउर त्रुफिमुस, इमन सोउब पौलुस केर संगे जात रहैं। मगर इ सोउब संगे जावाइयामन हमर से आगे चाइल गेलैं आउर त्रोआस नगर में पोंहइच के हमर इन्तजार करत रहैं। मगर हमरे दुयो पैदल फिलिप्पी शहर चाइल गेली आउर हमरे बिन खमीर रोटी केर परब पाछे फिलिप्पी शहर से पानी जहाज में चाइढ़ के पाँच दिन में त्रोआस नगर में उ मनक ठिना पोहोंचली, आउर हूवाँ सात दिन तक रहली। हफ्ता केर पहिला दिन हमरे प्रभु भोज लगिन जमा होली, काले कि पौलुस अगला दिन जाएक वाला रहे, से लगिन पौलुस आधा राइत तक बिसवासी भाईमन के उपदेस देते रहलक। हमरे जे कोठरी में जमा होई रही, हूवाँ ढेइर दीया बरत रहे। हूवाँ यूतुखुश नाँव केर एगो जवान खिड़की केर चौखट में बइठल नींद में झुपत रहे। जब पौलुस ढेइर देरी तक उपदेस देते रहलक, तो उ नींद केर झटका से तीसरी मंजिल से हेंठे गिर गेलक, तब थोरेक आदमीमन हेंठे कूइद के गेलैं आउर उके उठालैं, तो उ मोइर जाय रहे। पौलुस हेंठे उतइर के उकर ठिना गेलक, आउर उकर से लिपइट के गले लगाय के कहलक, “ना घबराबा, काले कि उ एखनोहों जिंदा अहे।” पौलुस दोबारा उपरे जाय के प्रभु भोज खालक। आउर उ एतना देरी तक उमन से गोठियाते रहलक कि बिहान होई गेलक। फिन उ हूवाँ से चाइल गेलक। आउर उमन उ जवान के जिंदा लेई आनलैं। इकर से आदमीमन के ढेइर शांति मिललक। हमरे पानी जहाज में चाइढ़ के अस्सुस नगर बटे आगे बाइढ़ गेली, जहाँ से हमरे के पौलुस के जहाज में लेई के आगे बढ़ेक रहे। पौलुस हूवाँ पैदल पोंहइच रहे, काले कि उ इ योजना के आगे हें ठहराय रहे। जब पौलुस अस्सुस नगर में हमरे से मिललक तो हमरे उके पानी जहाज में चढ़ाय के मितुलेने नगर में आली। आउर हूवाँ से जहाज खोइल के हमरे दूसरा दिन खियुस नगर केर भीरे से होई के सामुस नगर पोहोंचली, आउर उकर अगला दिन मिलेतुस नगर में आली। पौलुस इफिसुस शहर में जहाज से नी उतरेक केर फैसला करलक, काले कि उ आसिया परदेस में आउर बगरा समय बिताएक नी चाहत रहे। काले कि उ जल्दी में रहे आउर पिन्तेकुस्त परब केर मोका में यरुशलेम शहर में रहेक चाहत रहे। जब हमरे मिलेतुस नगर में पोहोंचली तो पौलुस इफिसुस शहर केर कलीसिया केर अगुवामन ठिना खबर भेइज के उमन के अपन ठिना बोलालक। जब उमन उकर ठिना आलैं तो पौलुस उमन से कहलक, “तोहरे जानाला कि आसिया परदेस में मोर आवेक केर पहिला दिन से हें मोर ब्यवहार तोहर संगे का लेखे रहलक। आउर का लेखे मोंय आँसू बहाय-बहाय के खुद के नरम बनाय के उ सोउब बिपत्तिमन में प्रभु केर सेवा करते रहलों, जे यहूदी अगुवामन केर जाल फंदा केर खातिर मोर उपरे आय रहे। आउर जे-जे गोइठमन तोहर फायदा केर रहे, उमन के बताएक में मोंय नी हिचकिचालों, आउर आदमीमन केर सामने आउर घर-घर जाय के उकर बारे में शिक्षा देवेक से पिछे नी हटलो। मगर यहूदी आदमीमन आउर यूनानी आदमीमन केर सामने गवाही देते रहलों कि उमन पाप काम करेक छोइड़ के परमेश्‍वर बटे घुरोक आउर हमरे केर प्रभु यीशु मसीह केर उपरे बिसवास करोक। अब, मोंय पवितर आत्मा केर चलाएक से मजबूर होई के यरुशलेम शहर जाथों, मोंय नी जानोना कि हूवाँ मोर उपरे का-का बीती, मोंय तो सिरिफ एतना जानोना कि हर नगर में पवितर आत्मा मोके चेताते जाथे कि जेहेल घर आउर दुःख मोर लगिन रखल अहे। मगर मोके अपन प्राण से कोनों मोह-माया नखे, मोंय तो सिरिफ उ सेवकाई के पूरा करेक चाहाथों, जेके प्रभु यीशु मसीह मोके जिम्मा देई हे, मतलब परमेश्‍वर केर किरपा केर शुभ समाचार के सच्चाई से परचार करमूँ। मोंय तोहर माझे परमेश्‍वर केर राइज केर परचार करते फिरलों। अब मोंय जानोना कि तोहरे मोके फिन कहियो देखेक नी पारबा। से लगिन मोंय आइज केर दिन तोहरे से गवाही देई के कहाथों कि तोहर में से केऊ यीशु केर उपरे बिसवास करल बिना मोइर जाई, तो इकर जिम्मेदार मोंय ना लगों। काले कि मोंय तोहरे के उ सोउब कुछ के बतालों, जेके परमेश्‍वर तोहरे के जनुवाएक चाहेला। मोंय कोनों के नी लुकालों। से लगिन तोहरे खुद केर आउर उ दल केर रखवाली करा जेकर लगिन पवितर आत्मा तोहरे के अगुवा चुइन हे, ताकि तोहरे परमेश्‍वर केर कलीसिया केर देखभाल करबा, जेके उ अपन बेटा केर लोहू देई के कीन लेई हे। मोंय जानोना कि मोर जाएक केर पाछे झूठा शिक्षा देवेक वाला आदमीमन आबैं आउर बिसवासी आदमीमन के ढेइर नोकसान पोंहचाबैं। उमन एइसन होबैं जइसन फाइर खाएक वाला भेड़ियामन, जे भेड़ीमन के फाइर खायना। हिंयाँ तक कि तोहर अपन बिसवासी दल से हें एइसन आदमीमन निकलबैं, जेमन चेलामन के अपन बटे मिलाएक लगिन उल्टा-पुल्टा शिक्षा देबैं। से लगिन इके याइद करते रहा आउर सावधान रहा कि तीन बरिस तक दिन-राइत आँसू बहाय-बहाय के तोहर में से हरेक झन के चेताते रहलों। अब मोंय तोहरे के परमेश्‍वर केर आउर उकर किरपा केर बचन केर देख-रेख में जिम्मा देवाथों, जे तोहर बिसवास के मजबूत करी। आउर परमेश्‍वर तोहरे के उ बपौती अधिकार देवी, जेके देवेक केर करार उ सोउब आदमीमन से काइर हे, जेमन उकर से पवितर करल जाय हैं। मोंय कहियो केकरो चाँदी, सोना या लुगा केर लोभ नी करलों। तोहरे खुद हें जानाला कि मोंय अपन आउर अपन संगमन केर जरुरत के पूरा करेक लगिन अपन एहे हाँथ से काम करलों। मोंय तोहरे के सोउब कुछ काइर के देखालों कि का लेखे मेहनइत काइर के कमजोर आदमीमन के संभराएक चाही। तोहरे के प्रभु यीशु केर गोइठमन के याइद रखेक जरुरी अहे, उ खुद कइह हे, ‘लेवेक से देवेक धाइन अहे।’ ” एतना कइह के पौलुस ठेहुना टेइक के उमन केर संगे प्रार्थना करलक। तब सोउब चेलामन मुरुक काँदेक लगलैं आउर पौलुस केर घेंचा में लिपइट के उके चूमेक लगलैं। उमन केर दुःखी होवेक केर बाड़ कारण इ रहे कि पौलुस उमन से कइह रहे कि तोहरे मोके फिन कहियो देखेक नी पारबा। इकर पाछे उमन उके पानी जहाज तक छोड़ेक आलैं। हमरे उमन से बिदा लेई के पानी जहाज में बइठली आउर सोझ डहर से कोस टापू में आली आउर दूसरा दिन रुदुस टापू में आली आउर हूवाँ से पतरा टापू में चाइल गेली। हूवाँ हमरे के एगो पानी जहाज मिललक, जे फीनीके परदेस जाएक वाला रहे। से लगिन हमरे उकर में चाइढ़ गेली आउर हूवाँ से चाइल गेली। हमरे के लेंगा आरा साइप्रस टापू देखाई देलक। हमरे उके छोइड़ के सीरिया परदेस बटे बढ़ते गेली आउर सूर नगर में उतरली, काले कि हूवाँ जहाज से सामान उतराएक रहे। हमरे हूवाँ चेलामन केर पता लगाली आउर उमन केर संगे सात दिन तक रहली। पवितर आत्मा केर अगुवाई से उमन घरी-घरी पौलुस से यरुशलेम शहर नी जाएक केर बिनती करते रहलैं। सात दिन केर पाछे जब हमरे केर हूवाँ से जाएक केर समय आलक तो उमन सोउब परिवार केर संगे हमरे के बिदा करेक लगिन नगर केर सिमान तक आलैं। हमरे समुदर केर किनारे ठेहुना टेइक के प्रार्थना करली। आउर हमरे उमन से बिदा लेई के पानी जहाज में चढ़ली आउर उमन अपन-अपन घर घूइर गेलैं। हमरे सूर नगर से पतुलिमयिस नगर में पोहोंचली आउर हूवाँ बिसवासी भाईमन से भेंट करली आउर उमन केर संगे एक दिन रहली। आउर अगला दिन हमरे हूवाँ से चाइल के कैसरिया शहर में आली। हूवाँ हमरे शुभ समाचार परचार करेक वाला फिलिप्पुस केर घर गेली आउर उकर हिंयाँ रहली। फिलिप्पुस उ सात आदमीमन में से एगो रहे, जेमन के यरुशलेम शहर में यीशु केर चुनल खास चेलामन बिधवा जनानामन केर देख-भाल करेक लगिन चुइन रहैं। फिलिप्पुस केर चाइर गो कुँवारी बेटीमन रहैं, जेमन भविष्यवाणी करत रहैं। जब हमरे के हूवाँ रहते काय दिन होई गेलक तो अगबुस नाँव केर एगो परमेश्‍वर केर संदेश के बताएक वाला यहूदिया परदेस से हमर ठिना आलक। उ हमर ठिना आय के पौलुस केर कसना के लेलक आउर उकर से अपन हाँथ-गोड़ के बाइंध के कहलक, “पवितर आत्मा इ कहेला, ‘जे आदमी केर इ कसना हेके, उके यरुशलेम शहर में यहूदी आदमीमन एहे लेखे बाँधबैं आउर उके दोसर जाइतमन केर हाँथ में जिम्मा देबैं।’ ” इ गोइठ सुइन के हमरे आउर हूवाँ केर आदमीमन पौलुस से बिनती करली कि यरुशलेम शहर ना जाओक। मगर पौलुस उमन के जबाब देलक, “तोहरे इ का कहाथा? तोहरे काइंद-काइंद के मोके काले दुःख देवाथा? मोंय तो प्रभु यीशु केर नाँव लगिन यरुशलेम शहर में ना सिरिफ बाँधल जाएक लगिन मगर मोरेक लगिन हों तेयार अहों।” जब उ हमर गोइठ मानेक लगिन तेयार नी होलक तो हमरे इ कइह के चुप होई गेली कि प्रभु केर इच्छा पूरा होवोक। थोरेक दिन केर पाछे हमरे तेयारी केर संगे यरुशलेम शहर चाइल गेली। कैसरिया शहर केर थोरेक चेलामन हों हमर संगे आलैं आउर रहेक लगिन हमरे के मनासोन नाँव केर एगो आदमी केर घर लेई गेलैं, जे साइप्रस नगर केर रहेक वाला रहे, आउर उ सोउब से पहिले केर चेलामन में से एगो रहे। जब हमरे यरुशलेम शहर में पोहोंचली तो हूवाँ केर बिसवासी भाईमन खुशी से हमर संगे मिललैं। अगला दिन पौलुस हमरे के लेई के याकूब ठिना गेलक, जहाँ कलीसिया केर अगुवामन सोउब जमा होई रहैं। पौलुस उमन के जोहार करलक आउर जे काम परमेश्‍वर उकर सेवकाई केर जरिया से परजाइत आदमीमन में काइर रहे, सोउब के एक-एक काइर के उमन के बतालक। उमन इ सुइन के परमेश्‍वर केर महिमा करलैं आउर फिन पौलुस से कहलैं, “हे भाई, तोंय जानिसला कि हजारो यहूदी आदमीमन बिसवास काइर लेई हैं आउर उमन सोउब मूसा केर नियम के ढेइर बिसवास से मानैना। यहूदी बिसवासी आदमीमन के तोर बारे में बताल जाय हे कि तोंय परजाइत आदमीमन केर माझे रहेक वाला यहूदी आदमीमन के मूसा केर नियम के मानेक छोइड़ देवेक केर बारे में सिखाइसला, आउर कहिसला कि उमन ना अपन छउवामन केर खतना करोक आउर ना यहूदी रीति-रिवाज के मानोक। अब तोंय बताव हमरे का करब? उमन के जरूर पता चाइल जाई कि तोंय हिंयाँ आय जाय हिस। से लगिन जे हमरे तोर से कहाथी, उके कर। हमर ठिना चाइर झन आदमी अहैं, उमन के उ गाछल के पूरा करेक अहे, जेके उमन परमेश्‍वर केर सामने माइन हैं। तोंय उमन केर संगे जा आउर खुद के आउर उमन के शुद्ध करेक केर नियम के पूरा कर, तोंय उमन केर मुंडन केर खरचा उठाव। तब सोउब के इ पता होई जाई कि जे कुछ भी तोर बारे में उमन के बताल जाय हे, उ झूठा हेके आउर तोंय खुद मूसा केर नियम के मानिसला आउर उकर मोताबिक चलिसला। मगर जहाँ तक परजाइत बिसवासी आदमीमन केर सवाल अहे, हमरे चिट्ठी लीख के अपन फैसला भेइज देई ही कि उमन मूर्तिमन लगिन बलि चढ़ाल माँस के, आउर लोहू के आउर घेंचा चीप के मोराल जानवरमन केर माँस के ना खाओक आउर ब्यभिचार ना करोक।” तब पौलुस उ आदमीमन के लेई गेलक आउर दूसरा दिन उमन केर संगे खुद के शुद्ध करेक केर पाछे उ यहूदी मनक मंदिर में गेलक आउर इ बताय देलक कि उ मनक शुद्ध होवेक केर दिन आउर उमन में से हरेक लगिन भेंट चढ़ाल जाएक केर दिन कहिया पूरा होवी। जब उ सात दिन पूरा होवेक वाला रहे तो आसिया परदेस केर यहूदी आदमीमन पौलुस के यहूदी मनक मंदिर में देइख के भीड़ केर आदमीमन के उसकालैं। उमन पौलुस के धाइर लेलैं आउर चिल्लाय के इ कहेक लगलैं, “हे इसराइली आदमीमन, हमर मदइत करा, इ ओहे आदमी हेके, जे सोउब ठाँव में मूसा केर नियम केर, हमर जाइत केर, आउर यहूदी मनक इ मंदिर केर बिरोध में सोउब आदमीमन के शिक्षा देवेला, इकर अलावा यूनान देस केर आदमीमन के मंदिर में लाइन के इ पवितर ठाँव के अपवितर काइर देई हे।” उमन एइसन इ लगिन कहलैं काले कि उमन आगे हें इफिसुस शहर केर रहेक वाला त्रुफिमुस के पौलुस केर संगे नगर में देइख रहैं, आउर समझत रहैं कि पौलुस उके अपन संगे यहूदी मनक मंदिर में लेई आय हे। तब गोटा नगर में खलबली मइच गेलक, आउर आदमीमन चाइरो बटे से कूइद के जमा होलैं। उमन पौलुस के धाइर के मंदिर केर बाहरे खींच लानलैं आउर यहूदी मनक मंदिर केर दुरा के तुरते बंद काइर देलैं। उमन पौलुस के माइर मोराएक केर योजना बनात रहैं कि रोमी पलटन केर मालिक के खबर मिललक कि गोटा यरुशलेम शहर में खलबली मइच हे। तब उ तुरते पलटनमन आउर सूबेदारमन के लेई के भीड़ बटे कूइद आलक। जब आदमीमन पलटन केर सरदार के आउर पलटनमन के देखलैं तो उमन पौलुस के मारेक-पिटेक बंद काइर देलैं। तब पलटनमन केर सरदार भीरे आय के पौलुस के धाइर लेलक आउर उके दूई गो सिकड़ से बाँधेक केर हुकूम देलक। तब उ आदमीमन से पूछेक लगलक, “इ के हेके आउर इ का काइर हे?” मगर भीड़ में से केऊ कुछ चिल्लात रहैं तो केऊ आउर कुछ। शोर गूल केर चलते उ सच्चाई के नी जानेक पारलक, से लगिन उ पौलुस के किला में लेई जाएक केर हुकूम देलक। जब पौलुस सीढ़ी में पोहोंचलक, तो भीड़ केर दबाव केर चलते पलटनमन के पौलुस के उठाय के लेई जाएक होलक। आदमीमन केर भीड़ इ चिल्लाते उकर पिछे आवत रहे, “उके माइर मोरावा।” जब उमन पौलुस के किला भीतरे लेई जात रहैं, तो उ पलटन केर सरदार से कहलक, “का मोंय तोर से कोनों कहेक पारमूँ?” उ जबाब देलक, “का तोंय यूनानी भाषा जानिसला? का तोंय मिसरी मनक देस केर उ ना लगिस, जे थोरेक दिन पहिले सरकार केर बिरोध बिद्रोह काइर के चाइर हजार आतंकीमन के सुनसान ठाँव में लेई जाय रहे?” पौलुस कहलक, “मोंय यहूदी आदमी हेकों आउर किलिकिया परदेस केर नामी नगर तरसुस केर रहेक वाला हेकों। मोंय तोर से बिनती कराथों कि मोके आदमीमन से गोठियाएक केर आगया दे।” जब पलटनमन केर सरदार उके आगया देलक तो पौलुस सीढ़ी में ठड़ाय के आदमीमन के चुप रहेक लगिन हाँथ से इशारा करलक। जब सोउब चुप होई गेलैं तो पौलुस इब्रानी भाषा में कहेक लगलक, पौलुस कहलक, “हे भाईमन आउर आबामन, अब मोंय अपन बचाव में कोनों कहेक चाहाथों, उके सुना।” जब उमन पौलुस के इब्रानी भाषा में कहते सुनलैं तो उमन आउर हें चुप होई गेलैं। तब पौलुस उमन से इ कहेक शुरु करलक, “मोंय तो यहूदी आदमी हेकों, मोर जनम किलिकिया परदेस केर तरसुस नगर में होई रहे, मगर मोंय एहे शहर यरुशलेम में पोइस-बाइढ़ हों। मोर शिक्षा-दीक्षा मूसा केर नियम केर मोताबिक गमलीएल महोदय केर देख-रेख में होलक। आइज परमेश्‍वर केर लगिन जइसन तोहरे धुन लगाय हा, तइसनेहें मोंय हों लगाय रहों। मोंय यीशु मसीह केर डहर में चलेक वाला आदमीमन के जान लेवेक तक सतात रहों, मरदाना आउर जनाना दुयो के बाइंध-बाइंध के जेहेल घर में साइज देवत रहों। यहूदी महापुरोहित आउर महासभा केर सोउब यहूदी धरम केर अगुवामन इ गोइठ केर गवाह हेकैं, ओहेमन से मोंय अधिकार केर चिट्ठी लेई के दमिश्क नगर जात रहों, ताकि हूवाँ केर बिसवासी भाईमन के बाइंध के यरुशलेम शहर लेई आमूँ आउर सजा देवामूँ। जब मोंय चलते-चलते लगभग दूई पहर के दमिश्क नगर केर भीरे पोहोंचलों तो अचका आकाश से एक तेज इंजोत मोर चाइरो बटे चमकलक। आउर मोंय भूंई उपरे गिर गेलों आउर इ आवाज सुनलों, ‘हे शाऊल, हे शाऊल, तोंय मोके काले सताथिस?’ मोंय जबाब देलों, ‘हे प्रभु तोंय के हेकिस?’ उ मोर से कहलक, ‘मोंय नासरत नगर केर रहेक वाला यीशु हेकों, जेके तोंय सताथिस।’ जे मोर संगे रहैं उमन इंजोत के देखलैं, आउर उकर आवाज के हों सुनत रहैं, मगर उमन बुझेक नी पारलैं कि आवाज मोर से का कहलक। तब मोंय पूछलों, ‘हे प्रभु! मोंय का करमूँ?’ प्रभु मोके जबाब देलक, ‘उठ आउर दमिश्क नगर में जा, आउर जे भी काम तोर करेक लगिन ठहराल जाय हे, उ सोउब तोके हूवाँ बताय देवल जाई।’ मोंय तेज रोशनी केर चलते कोनों देखेक नी पारत रहों, से लगिन मोंय अपन संगमन केर हाँथ धाइर के दमिश्क नगर आलों। हूवाँ हनन्याह नाँव केर एगो आदमी रहे, जे मूसा केर नियम केर मोताबिक चलेक वाला एगो भक्त आदमी रहे, आउर हूवाँ केर रहेक वाला यहूदी आदमीमन में उकर बेस नाँव रहे। उ मोर ठिना आलक आउर ठड़ाय के मोर से कहलक, ‘हे भाई शाऊल फिन से देखेक लग।’ ओहे बेरा मोर आँइख खुइल गेलक आउर मोंय उके देखलों। तब उ मोर से कहलक, ‘हमर बाप दादामन केर परमेश्‍वर तोके इ लगिन चुइन हे कि तोंय उकर इच्छा के जानबे आउर उ धरमी यीशु के देखबे आउर उकर आवाज के सुनबे। काले कि तोके परमेश्‍वर बटे से सोउब आदमीमन केर सामने उ गोइठमन केर गवाही देवेक अहे, जेके तोंय देखले आउर सुइन हिस। अब काले देरी कराथिस? उठ, अपन पापमन केर क्षमा पावेक लगिन यीशु उपरे बिसवास काइर के बपतिस्मा जल संस्कार ले।’ जब मोंय यरुशलेम शहर में घुरलों आउर यहूदी मनक मंदिर में प्रार्थना करत रहों, तो मोंय एगो दर्शन देखलों। आउर प्रभु यीशु दर्शन में मोर से इ कहाथे, ‘तोंय यरुशलेम शहर से जल्दी निकइल जा, काले कि उमन मोर बारे में तोर गवाही के नी मानबैं।’ मोंय कहलों, ‘हे प्रभु, उमन तो खुद जानैना कि मोंय तोर उपरे बिसवास करेक वाला आदमीमन के यहूदी मनक प्रार्थना घर में पिटवात रहों आउर जेहेल घर में भितरात रहों। आउर जब तोर गवाही देवेक वाला स्तिफनुस केर लोहू बहाय के उके माइर मोराल जात रहे, तो मोंय हों उके मोराएक में राजी रहों आउर हूवाँ ठड़ाल रहों, एतना हें निहीं, जेमन उके माइर मोरात रहैं, उ मनक लुगा केर रखवाली हों मोंय करत रहों।’ आउर प्रभु यीशु मोर से कहलक, ‘चाइल जा, काले कि मोंय तोके सोउब जाइत केर आदमीमन ठिना दूर-दूर तक भेजमूँ।’” हिंयाँ तक तो उमन पौलुस केर इ गोइठ के धेयान से सुनते रहलैं, मगर अब उमन जोर से चिल्लाय के कहेक लगलैं, “एइसन आदमी के माइर मोरावा। इकर जिंदा रहेक बेस नखे।” जब उमन चिल्लाएक आउर अपन उपरी लुगा के फेकेक आउर आकाश में धूर उड़ाएक लगलैं, तो पलटन केर सूबेदार कहलक, “इके किला में लेई जावा आउर कोड़रा माइर के जाँच करा कि आदमीमन का लगिन इकर बिरोध में एइसन चिल्लाथैं।” जब पलटनमन उके कोड़रा मारेक लगिन सिकड़ से बाँधत रहैं तो पौलुस भीरे ठड़ाल सूबेदार से पूछलक, “का तोके कानून केर मोताबिक एइसन आदमी के जे रोम देस केर रहेक वाला हेके आउर उकर दोष हों साबित नी होई हे, कोड़रा मारेक उचित अहे?” इ सुइन के सूबेदार पलटनमन केर सरदार ठिना जाय के उके बतालक, “तोंय इ का कराथिस?” इ तो रोमी आदमी हेके। तब पलटन केर सरदार पौलुस ठिना आय के उकर से पूछलक, “मोके बताव, का तोंय रोम देस केर रहेक वाला रोमी हेकिस?” पौलुस उके जबाब देलक, “हाँ।” इ सुइन के पलटन केर सरदार कहलक, “मोंय रोमी बनेक केर पद ढेइर रुपया देई के पाय हों।” पौलुस जबाब देलक, “मोंय तो जनमे से रोमी आदमी हेकों।” तब जे आदमीमन पौलुस के जाँचेक वाला रहैं, उमन तुरते उकर ठिना से हाइट गेलैं आउर पलटन केर सरदार हों जे पौलुस के सिकड़ से बंधुवाय रहे, इ जाइन के कि पौलुस रोम देस केर रहेक वाला रोमी हेके, डराय गेलक। अगला दिन सूबेदार पौलुस केर बारे में ठीक-ठीक जानेक केर इच्छा से कि यहूदी आदमीमन उकर उपरे का केर दोष लगाथैं, सिकड़ के खोइल देलक आउर यहूदी मुध पुरोहितमन के आउर धरम महासभा केर सोउब आदमीमन के जमा होवेक केर हुकूम देलक, आउर पौलुस के लाइन के उ मनक सामने ठड़ुवाय देलक। पौलुस धरम महासभा केर आदमीमन बटे धेयान से देइख के कहलक, “हे भाईमन, मोंय आइज तक परमेश्‍वर लगिन बुद्धिमानी से जिंदगी बिताय हों।” इ सुइन के यहूदी महापुरोहित हनन्याह, पौलुस केर भीरे ठड़ाल आदमीमन के पौलुस केर मुँह में थप्पड़ मारेक केर हुकूम देलक। तब पौलुस उकर से कहलक, “हे पाखंडी, परमेश्‍वर तोके हें मारी। तोंय हिंयाँ मूसा केर नियम केर मोताबिक मोर न्याय करेक लगिन बाइठ हिस, फिन भी तोंय मूसा केर नियम केर बिरोध मोके मारेक केर हुकूम देइसला?” जे आदमीमन पौलुस केर भीरे ठड़ाल रहैं उमन पौलुस से कहलैं, “तोके परमेश्‍वर केर यहूदी महापुरोहित केर अपमान करेक केर साहस कइसन होलक?” पौलुस जबाब देलक, “हे भाईमन, मोंय नी जानत रहों कि इ यहूदी महापुरोहित हेके। काले कि पवितर किताब में लिखल अहे, ‘अपन परजा केर अगुवा के बुरा शबद ना कहबे।’” पौलुस इ जानत रहे कि धरम महासभा में आदमीमन दूई दल अहैं, सदूकी दल केर आदमीमन आउर फरीसी दल केर आदमीमन। से लगिन उ जोर से कहलक, “हे भाईमन, मोंय फरीसी आउर फरीसी आदमीमन केर संतान हेकों। मोर आसरा अहे कि परमेश्‍वर मोरल आदमीमन के फिन से जिंदा करी। मोर इ बिसवास केर चलते मोर उपरे फैसला होवाथे।” जइसनेहें पौलुस एइसन कहलक, फरीसी दल आउर सदूकी दल केर आदमीमन में झगरा होवेक लगलक आउर महासभा में फूट होई गेलक। काले कि सदूकी दल केर आदमी मनक इ बिसवास अहे कि आदमीमन मोइर के फिन जिंदा नी होबैं, ना स्वरगदूतमन अहैं आउर ना आत्मा अहे, मगर फरीसी दल केर आदमीमन इ सोउब में बिसवास करैना। इ लेखे मुरुक शोर-गूल होवेक लगलक, तब थोरेक फरीसी दल केर आदमीमन जे मूसा केर नियम के सिखाएक वाला रहैं, ठड़ाय गेलैं आउर इ कइह के बिरोध करलैं, “हमरे इ आदमी केर उपरे कोनों दोष नी पावाथी। अगर केऊ आत्मा चाहे स्वरगदूत उकर से कोनों कइह हे, तो फिन का?” जब झगरा ढेइर बाइढ़ गेलक तो पलटन केर सरदार के डार होलक कि कहीं इमन पौलुस के टुकरा-टुकरा ना काइर देबैं, से लगिन उ पलटनमन के हुकूम देलक कि पौलुस के सभा केर माझे से निकलाय के किला में लेई जाओक। ओहे राइत के प्रभु यीशु पौलुस ठिना ठड़ाय के उकर से कहलक, “हे पौलुस ढाढ़स बाँध, जइसन तोंय यरुशलेम शहर में मोर बारे में गवाही देले, तइसनेहें तोके रोम देस में हों गवाही देवेक होवी।” बिहाने थोरेक यहूदी आदमीमन मिल के पौलुस केर बिरोध में जाल फंदा बुनलैं आउर किरिया खालैं कि जब तक हमरे पौलुस के नी माइर मोराब, तब तक हमरे कोनों नी खाब ना पियब। इ जाल-फंदा बुनेक वाला आदमीमन चालीस झन से बगरा रहैं। उमन यहूदी मुध पुरोहितमन आउर धरम केर अगुवामन ठिना जाय के कहलैं, “हमरे किरिया खाय ही कि जब तक हमरे पौलुस के नी माइर मोराब, तब तक कोनों नी खाब आउर ना पियब। से लगिन अब धरम महासभा केर आदमीमन से मिल के पलटन केर सरदार के खबर भेजा कि तोहरे पौलुस केर मामला के ठीक-ठीक जाँच करेक चाहाला, उ पौलुस के तोहर ठिना भेइज देवोक। उकर हिंयाँ पोंहचेक से पहिलेहें हमरे उके माइर मोराएक केर तेयारी काइर ही।” मगर पौलुस केर भगिना इ माइर मोराएक केर बारे में सुनलक। आउर किला में जाय के पौलुस के इकर बारे में खबर देलक। पौलुस सौ फौजमन केर एगो अधिकारी के अपन ठिना बोलाय के कहलक, “इ जवान के पलटन केर सरदार ठिना लेई जा, इ उकर से कोनों कहेक चाहाथे।” उ जवान के पलटन केर सरदार ठिना लेई जाय के कहलक, “पौलुस बंधुवा मोके बोलाय के मोर से बिनती करलक कि मोंय इ जवान के तोर ठिना लानमूँ, काले कि इ तोर से कोनों कहेक चाहाथे।” पलटन केर सरदार उकर हाँथ धाइर के अलगे लेई जाय के उकर से पूछलक, “तोंय मोर से का कहेक चाहाथिस?” उ कहलक, “यहूदी धरम केर अगुवामन जाल फंदा बुइन हैं कि उमन तोर से इ बिनती करबैं कि उमन पौलुस केर मामला के ठीक से जाँच करेक चाहाथैं, से लगिन तोंय काइल पौलुस के यहूदी अगुवा मनक महासभा में लानबे। मगर तोंय उ मनक इ बिनती के ना मानबे, काले कि उमन में से चालीस झन से बगरा आदमीमन पौलुस के मोराएक केर ताक में अहैं, उमन किरिया खाय हैं कि जब तक हमरे पौलुस के नी माइर मोराब, तब तक कोनों नी खाब-पियब। आउर उमन अब तेयार अहैं, आउर तोर हाँ कहेक केर आसरा देखाथैं।” पलटन केर सरदार पौलुस केर भगिना के इ आगया देलक, “केखो इ ना बताबे कि तोंय मोके इ गोइठ के बताहिस।” आउर उ जवान के बिदा करलक। पलटनमन केर सरदार दूई झन सूबेदारमन के बोलाय के कहलक, “आइज राइत नौ बजे तक कैसरिया शहर जाएक लगिन दूई सौ पलटनमन, सत्तर घोड़सवारी, आउर दूई सौ बरछा धराइया पलटनमन के तेयार रखा। आउर पौलुस लगिन हों घोड़ा तेयार रखा, जेकर से उमन पौलुस के राजपाल फेलिक्स ठिना सही सलामत पोंहचाय देवोक।” उ इ लेखे चिट्ठी हों लिखलक, “महाप्रतापी राजपाल फेलिक्स के क्लौदियुस लूसियास केर बटे से जोहार। इ आदमी के यहूदी आदमीमन धाइर लेई रहैं आउर इके माइर मोराएक चाहत रहैं, मगर मोंय अपन पलटनमन केर संगे हूवाँ पोंहइच के इके छोड़ाय लेलों, काले कि मोके पता चललक कि इ आदमी रोम देस केर रहेक वाला हेके। मोंय जानेक चाहत रहों कि उमन इकर उपरे का लगिन दोष लगाथैं, से लगिन मोंय इके उ मनक धरम महासभा में लेई गेलों। हूवाँ मोके पता चललक कि उमन अपन यहूदी नियम केर बारे में इकर उपरे दोष लगाथैं, मगर इकर उपरे माइर मोराएक जाएक या जेहेल घर में साजल जाएक केर लायक कोनों दोष नखे। जब मोके खबर मिललक कि उमन इ आदमी के मोराएक केर ताक में लगल अहैं, तो मोंय तुरते इके तोर ठिना भेइज देलों। आउर इकर उपरे दोष लगाएक वालामन के हों हुकूम देलों कि उमन तोर सामने इकर उपरे दोष लगाओक।” हुकूम केर मोताबिक पलटनमन पौलुस के यरुशलेम शहर से लेई के राइते के अन्तिपत्रिस शहर में पोंहचाय देलैं। दूसरा दिन उमन घोड़सवारीमन के पौलुस केर संगे कैसरिया शहर जाएक लगिन छोइड़ के पैदल पलटनमन यरुशलेम शहर में घूइर आलैं। घोड़सवारीमन कैसरिया शहर पोंहइच के राजपाल के चिट्ठी देलैं आउर पौलुस के उकर सामने ठड़ुवालैं। राजपाल चिट्ठी पइढ़ के पौलुस से पूछलक, “तोंय कोन परदेस केर हेकिस?” आउर इ जाइन गेलक कि पौलुस किलिकिया परदेस केर हेके, तो उकर से कहलक, “जब तोर उपरे दोष लगाएक वालामन आबैं तब तोर सुनवाई होवी।” आउर पौलुस के राजा हेरोदेस केर राजमहल में रखेक केर हुकूम देलक। पाँच दिन केर पाछे हनन्याह यहूदी महापुरोहित आउर थोरेक धरम केर अगुवामन के आउर तिरतुल्लुस नाँव केर एगो वकील के अपन संगे लेई के कैसरिया शहर आलक, उमन राजपाल केर सामने पौलुस केर बिरोध में दोष लगालैं। तब पौलुस के बोलाल गेलक आउर वकील तिरतुल्लुस राजपाल केर सामने इ कहते पौलुस केर उपरे दोष लगाएक शुरु करलक, “हे महामहिम फेलिक्स, हमरे तोर चलते लम्बा समय से शांति से जिंदगी बिताते आवाथी। तोर बुद्धि से करल प्रबंध केर चलते हमर जाइत केर ढेइर बुराईमन दूर होवाथे आउर ढेइर सुधार होते जाथे। इके हमरे सोउब जगा आउर सोउब लेखे से धन्यबाद केर संगे मानिला। मोंय तोर से बगरा समय लेवेक नी चाहोना। मोंय तोर से बिनती कराथों कि तोंय हमर एक दूई गो गोइठमन के सुइन ले। इ आदमी हमर लगिन सचमुच में फैलेक वाला रोग नियर अहे, जे दुनिया भइर केर यहूदी आदमीमन में झगरा करुवायला आउर इ एगो दल केर अगुवा हों हेके, जेके नासरी पंथ कहल जायला। इ यहूदी मनक मंदिर के अपवितर करेक केर कोशिश करत रहे, से लगिन हमरे इके धारली। हमरे तो इके अपन नियम केर मोताबिक सजा देवेक चाहत रही मगर पलटनमन केर सरदार लूसियास आय के इके जबरजस्ती हमर हाँथ से लुइट के लेई लेलक, आउर इकर उपरे दोष लगाएक वालामन के तोर सामने आवेक केर हुकूम देलक। तोंय खुद इकर से पूइछ के सोउब गोइठमन केर सच्चाई के जाइन लेबे।” यहूदी धरम केर अगुवामन हों तिरतुल्लुस केर साथ देई के कहलैं, “इ गोइठमन सच हेके।” राजपाल फेलिक्स पौलुस के कहेक लगिन इशारा करलक, तो पौलुस जबाब देवेक लगलक, “मोंय इ जाइन के खुशी से अपन बचाव लगिन जबाब देवाथों कि तोंय ढेइर बरिस से इ परदेस केर आदमीमन केर फैसला करते आवाथिस। तोंय खुद हें इ गोइठ केर पता लगाएक पारिसला कि जब से मोंय यरुशलेम शहर में भक्ति करेक लगिन मंदिर में आय हों, मोर बारह दिन से बगरा नी होई हे। आउर उमन मोके ना तो मंदिर में आउर ना यहूदी मनक प्रार्थना घरमन में आउर ना नगरमन में केकरो से बहस करते या आदमीमन के उसकाते देखलैं। जे गोइठमन केर बारे में इमन मोर उपरे दोष लगाथैं, इमन तोके उकर कोनों सबूत देवेक नी पारबैं। मोंय तोर सामने माइन लेवाथों कि मोंय यीशु मसीह केर चेला बाइन के अपन पुरखामन केर परमेश्‍वर केर भक्ति करोना, आउर जे गोइठमन मूसा केर नियम आउर परमेश्‍वर केर संदेश के बताएक वालामन केर किताबमन में लिखल अहे, उ सोउब में बिसवास करोना। जेके यहूदी अगुवामन बुरा डहर कहैना। जइसन उमन आसरा करैना कि परमेश्‍वर धरमी आउर अधरमी दुयो रकम केर आदमी के मोरलमन में से फिन जिंदा करी, तइसनेहें मोंय हों आसरा करोना। से लगिन मोंय परमेश्‍वर आउर आदमीमन केर नजइर में सोउब बेरा बिवेक से निरदोष बनल रहेक केर खुद हें कोशिश करोना। यरुशलेम शहर से ढेइर बरिस तक दूर रहेक केर पाछे मोंय गरीब आदमीमन के दान पोंहचाएक आउर परमेश्‍वर के भेंट चढ़ाएक लगिन यरुशलेम शहर आय रहों। ओहे बेरा इमन यहूदी मनक मंदिर में मोके शुद्ध होवेक केर नियम के पूरा करते देखलैं, हूवाँ ना तो आदमीमन केर भीड़ रहे आउर ना कोनों रकम केर शोर-गूल होवत रहे। हाँ, आसिया परदेस केर थोरेक यहूदी आदमीमन रहैं, आउर जे कुछ होलक उके उमन देखलैं। अगर मोंय कोनों गलती काइर रहों, तो उमन के मोर उपरे दोष लगाएक लगिन हिंयाँ तोर सामने आवेक चाही रहे। निहीं तो इमन खुद हें बताबैं कि जब मोंय यहूदी अगुवा मनक महासभा केर सामने ठड़ाल रहों, तो इमन मोर में का दोष पालैं? सिरिफ एगो दोष इमन मोर उपरे लगाएक पारबैं, उ इ हेके, जब मोंय अंगना में उमन केर सामने ठड़ाय के जोर से इ कइह रहों, ‘मोरलमन केर फिन से जी उठेक केर बारे में आइज तोहर सामने मोर फैसला होवाथे।’ ” राजपाल फेलिक्स जे यीशु मसीह केर डहर केर गोइठमन के ठीक-ठीक जानत रहे, उ फैसला के इ कइह के टाइल देलक, “जब पलटन केर सरदार लूसियास आवी, तो तोहर गोइठ केर फैसला करमूँ।” आउर सूबेदार के हुकूम देलक कि पौलुस के थोरेक छूट देई के उकर रखवाली करबे आउर उकर संगमन में से केखो उकर सेवा करेक से ना रोकबे। थोरेक दिन केर पाछे राजपाल फेलिक्स अपन जनाना द्रुसिल्ला केर संगे कैसरिया नगर आलक, उ यहूदिनी रहे। फेलिक्स पौलुस के बुलवाय के यीशु मसीह केर उपरे बिसवास करेक केर बारे में उकर से गोइठ सुनलक। जब पौलुस जे परमेश्‍वर केर सामने सही अहे, उके करेक आउर अपन इच्छा के काबू में करेक आउर परमेश्‍वर बटले आवेक वाला फैसला केर बारे में बताएक शुरु करलक, तो फेलिक्स डराय गेलक आउर उके जबाब देलक, “एखन तोंय जा। जब मोके समय मिली तो तोके फिन बुलवाय लेमूँ।” जेहेल घर से छुटकारा देवेक केर बदली में राजपाल फेलिक्स के पौलुस से कुछ रुपया घूस में पावेक केर आसरा रहे, से लगिन उ पौलुस के घरी-घरी बोलाय के उकर से गोठियात रहे। मगर जब दूई बरिस बीत गेलक, तो पुरकियुस फेस्तुस फेलिक्स केर ठाँव में राजपाल बाइन गेलक आउर फेलिक्स यहूदी आदमीमन के खुश करेक केर इच्छा से पौलुस के जेहेल घर में हें बंधुवा छोइड़ देलक। तीन दिन केर पाछे फेस्तुस राजपाल केर रूप में यहूदिया परदेस में आलक, फिन उ कैसरिया शहर से यरुशलेम शहर गेलक। हूवाँ यहूदी मुध पुरोहितमन, आउर यहूदी अगुवामन उकर सामने पौलुस केर उपरे दोष लगालैं। आउर उमन फेस्तुस से बिनती करलैं कि उ पौलुस के यरुशलेम शहर में बुलवाओक, काले कि उमन डहर में हें पौलुस के माइर मोराएक केर ताक में लगल रहैं। मगर फेस्तुस उमन के जबाब देलक, “पौलुस कैसरिया शहर में पहरा में अहे, आउर मोंय खुद जल्दी हें हूवाँ जाएक वाला अहों। से लगिन तोहरे केर थोरेक अगुवामन मोर संगे हूवाँ जाओक। अगर पौलुस कोनों गलती काम काइर हे, तो उमन उकर उपरे दोष लगाओक।” फेस्तुस यरुशलेम शहर में उमन केर माझे लगभग आठ दस दिन रइह के कैसरिया शहर घूइर गेलक। आउर दूसरा दिन फैसला करेक केर कुरसी में बाइठ के पौलुस के लानेक केर हुकूम देलक। जब पौलुस हूवाँ आलक, तो यरुशलेम शहर से आवल यहूदी अगुवामन उके घेइर लेलैं, उमन ठड़ाय के पौलुस केर उपरे ढेइर दोष लगाएक लगलैं, जेमन केर सबूत उमन खुद देवेक नी पारलैं। पौलुस अपन बचाव में जबाब देलक, “मोंय ना तो यहूदी मनक नियम केर बिरोध में कोनों गुन्हा काइर हों आउर ना यहूदी मनक मंदिर केर, आउर ना महाराजा केर बिरोध में कोनों गुन्हा काइर हों।” फिन भी फेस्तुस यहूदी अगुवामन के खुश करेक केर इच्छा से पौलुस से पूछलक, “का तोंय चाहिसला कि इ सोउब गोइठमन केर बारे में तोर फैसला यरुशलेम शहर में मोर सामने करल जाओक?” पौलुस उके जबाब देलक, “मोंय तोर सामने, रोमी महाराजा केर फैसला करेक केर कुरसी केर सामने ठड़ाय हों। एहे उ ठाँव हेके जहाँ मोर फैसला होवेक चाही। तोंय बेस लेखे जानिसला कि मोंय यहूदीमन केर बिरोध में कोनों गुन्हा नी काइर हों। अगर मोंय मोराय जाएक केर लाएक कोनों गुन्हा काइर हों, तो मोंय मोरेक लगिन तेयार अहों। मगर, अगर इ यहूदी अगुवामन बटले मोर उपरे लगाल दोष में कोनों सच्चाई नखे, तो केखो इ अधिकार नखे कि उ मोके इमन केर हाँथ में जिम्मा देवी। मोर बिनती अहे कि मोर फैसला खुद महाराजा से करल जाओक।” तब फेस्तुस मंत्रीमन केर सभा से सलहा करेक केर पाछे इ जबाब देलक, “ठीक अहे, तोंय महाराजा से तोर फैसला करुवाएक केर बिनती काइर हिस, तो तोके महाराजा ठिना हें भेजल जाई।” थोरेक दिन बितेक केर पाछे राजा अग्रिप्पा आउर उकर बहिन बिरनीके राजपाल फेस्तुस से भेंट करेक लगिन कैसरिया शहर आलैं। उमन हूवाँ ढेइर दिन तक रहलैं। राजपाल फेस्तुस पौलुस केर बारे में राजा के बतालक, “एगो आदमी अहे, जेके फेलिक्स जेहेल घर में हें बंधुवा छोइड़ देई हे। जब मोंय यरुशलेम शहर जाय रहों, तो यहूदी मुध पुरोहितमन आउर यहूदी धरम केर अगुवामन उकर बिरोध में मोके खबर देलैं आउर बिनती करलैं कि उकर उपरे दंड केर हुकूम देवल जाओक। मगर मोंय उमन के जबाब देलों, ‘रोम देस केर रहेक वाला आदमी केर इ नियम नखे कि जब तक दोषी आदमी आउर दोष लगाएक वालामन केर आमने-सामने सवाल-जबाब नी करल जाई आउर दोषी के अपन बचाव में कोनों कहेक केर मोका नी देवल जाई तब तक उके दंड देवेक सही नखे।’ से लगिन यहूदी अगुवामन मोर संगे कैसरिया शहर आलैं आउर मोंय कोनों देरी नी करलों। दूसरा हें दिन फैसला करेक केर कुरसी में बाइठ के उके कछैरी में लानेक केर हुकूम देलों। जब दोष लगाएक वालामन ठड़ालैं, तो उमन एइसन बुरा गोइठमन केर दोष नी लगालैं, जइसन मोंय समझत रहों। उमन केर माझे सिरिफ अपन धरम के लेई के आउर यीशु नाँव केर एगो आदमी केर बारे में बक-झक रहे, जे मोइर जाय हे, मगर पौलुस दावा करेला कि उ जिंदा अहे। मोके पता नी रहे कि इ गोइठमन केर जाँच-पड़ताल कइसन करमूँ? से लगिन मोंय पौलुस से पूछलों, ‘का तोंय चाहिसला कि इ सोउब गोइठमन केर बारे में तोर फैसला यरुशलेम शहर में मोर सामने करल जाओक।’ मगर जब पौलुस इ बिनती करलक कि महाराजा केर फैसला तक मोके पहरादारी में रखल जाओक। से लगिन मोंय हुकूम देलों कि जब तक मोंय उके महाराजा ठिना नी भेजमूँ, उकर पहरादारी करल जाओक।” राजा अग्रिप्पा फेस्तुस से कहलक, “मोंय हों उ आदमी केर गोइठ के सुनेक चाहोना।” फेस्तुस कहलक, “तोंय काइल सुइन लेबे।” दूसरा दिन राजा अग्रिप्पा अपन बहिन बिरनीके केर संगे बड़का धूम-धाम से सभा घर में आलक। उकर संगे पलटन केर सरदारमन आउर नगर केर बाड़ आदमीमन रहैं। राजपाल फेस्तुस केर हुकूम केर मोताबिक पौलुस के हूवाँ लानल गेलक। राजपाल फेस्तुस कहलक, “हे राजा अग्रिप्पा आउर सोउब आदमीमन, जे हिंयाँ हमर संगे अहैं! तोहरे इ आदमी के देखा, जेकर बारे में सोउब यहूदी आदमीमन यरुशलेम शहर में आउर हिंयाँ हों चिल्लाय-चिल्लाय के मोर से बिनती करलैं कि इकर जिंदा रहेक बेस नखे। मगर मोंय अपन जाँच में इकर उपरे एइसन कोनों दोष नी पालों, जेकर लगिन इके मौत केर सजा देवल जाई। जब इ खुद हें बिनती करलक कि उकर फैसला महाराजा से करल जाओक तो मोंय उके रोम देस भेजेक केर फैसला करलों। मगर उकर बारे में कोनों गोइठ नी पालों जेके मोंय महाराजा केर सेवा में लिखमूँ, एहे कारण अहे कि मोंय इके तोहर सामने खास काइर के, हे राजा अग्रिप्पा, तोर सामने लाइन हों। जेकर से सोउब जाँच पूरा होवेक केर पाछे मोके महाराजा केर सेवा में लिखेक लगिन कोनों सबूत मिल जाओक। काले कि उकर उपरे जे दोष लगाल अहे, उके बेगर बताले उके भेजेक मोके बेस नी लगलक।” राजा अग्रिप्पा पौलुस से कहलक, “तोके अपन बारे में कहेक केर आगया अहे।” तब पौलुस हाँथ उठाय के अपन बचाव में जबाब देवेक लगलक, “हे राजा अग्रिप्पा, यहूदी अगुवामन जेतना गोइठमन केर उपरे दोष लगाय हैं, आइज तोर सामने उ मनक जबाब देवेक में मोंय खुद के धाइन समझोना। खास रूप से इ लगिन कि तोंय यहूदीमन केर सोउब नियममन के आउर समस्यामन के जानिसला। से लगिन मोंय तोर से बिनती कराथों कि मोर गोइठमन के धीरज धाइर के सुनबे। मोंय छोटपन से अपन जाइतमन केर माझे आउर यरुशलेम शहर में हें जिंदगी बिताय हों। से लगिन सोउब यहूदी आदमीमन जानैना कि मोर चाइल-चलन कइसन अहे। उमन मोके ढेइर समय से जानैना, अगर उमन चाहबैं तो इ गोइठ केर गवाही देवेक पारबैं कि मोंय एगो फरीसी दल केर आदमी केर रूप में हें जिंदगी बितालों, जे हमर धरम केर सोउब से कड़ा नियम वाला डहर हेके। आइज मोंय हिंयाँ तोहर सामने दोषी केर रूप में ठड़ाल अहों, इकर एहे कारण अहे कि मोंय परमेश्‍वर बटले हमर पुरखामन के देवल करार केर आसरा करोना। इ ओहे करार हेके, जेकर पूरा होवेक केर आसरा में हमर बारहों गोतर केर आदमीमन दिन राइत पूरा सच्चाई केर साथ परमेश्‍वर केर भक्ति करते आवाथैं। हे राजा, एहे आसरा केर चलते यहूदी अगुवामन मोर उपरे दोष लगाथैं।” तब पौलुस सुनेक वाला सोउब यहूदी आदमीमन से कहलक, “तोहरे के इ गोइठ काले बिसवास नी लगेला कि परमेश्‍वर मोरलमन के फिन से जिंदा करी? मोंय हों खुद मानत रहों कि नासरत नगर केर रहेक वाला यीशु केर नाँव केर बिरोध करेक लगिन जे कोनों करेक पड़ी, उके करेक चाही। यरुशलेम शहर में मोंय ठीक एइसनेहें करलों, मोंय यहूदी मुध पुरोहितमन से अधिकार चिट्ठी पाय के ढेइर पवितर आदमीमन के जेहेल घर में साजलों आउर जब उमन के मौत केर सजा देवल जात रहे, तो मोंय हों उमन के मरुवाएक में अपन मंजूरी देवत रहों। मोंय उमन के सोउब यहूदी मनक प्रार्थना घरमन में जाय के घरी-घरी सजा देवाय के यीशु केर निंदा करुवात रहों। हिंयाँ तक कि खीस केर मारे मोंय एइसन पगला होई गेलों कि दोसर नगरमन में हों जाय के सतात रहों। एहे मकसद से मोंय एक बेर यहूदी मुध पुरोहितमन से अधिकार चिट्ठी लेई के दमिश्क नगर जात रहों। तब दूई पहर केर बेरा जब मोंय डहर में हें रहों कि हे राजा, स्वरग से एगो इंजोत के उतरते देखलों, जे बेइर केर इंजोत से हों तेज रहे आउर उ मोर आउर मोर संगे चलेक वालामन केर चाइरो बटे चमकत रहे। हमरे सोउब भूंई उपरे गिर गेली आउर इब्रानी भाषा में एगो आवाज सुनली। केऊ मोर से कहत रहे, ‘हे शाऊल, हे शाऊल, तोंय मोके काले सताथिस? तोंय मोके चोट पोंहचाएक केर कोशिश काइर के खुद के चोट पोंहचाथिस।’ मोंय पूछलों, ‘हे प्रभु! तोंय के हेकिस?’ प्रभु जबाब देलक, ‘मोंय यीशु हेकों, जेके तोंय सताथिस। मगर तोंय अब उठ, अपन गोड़ में ठड़ाव, मोंय तोके इ लगिन दर्शन देई हों कि तोके अपन सेवक आउर गवाह बनामूँ। जेके तोंय मोर बारे में देइख हिस आउर पाछे जे कुछ दर्शन देखबे, उकरो बारे में गवाही देबे। आउर मोंय तोके इसराइल केर आदमीमन से आउर परजाइत आदमीमन से बचामूँ, जेमन ठिना अब मोंय तोके भेजाथों। मोंय तोके उ मनक आँइख खोलेक लगिन, उमन के अंधार से इंजोत में लानेक लगिन, मतलब शैतान केर अधिकार से छोड़ाय के परमेश्‍वर बटे लानेक लगिन उमन ठिना भेजाथों। जेकर से उमन मोर उपरे बिसवास काइर के अपन पापमन केर क्षमा पाओक आउर पवितर करल आदमीमन केर माझे अपन ठाँव के पाओक।’ इ लगिन हे राजा अग्रिप्पा, मोंय उ स्वरगीय दर्शन केर गोइठ मानलों। मोंय पहिले दमिश्क नगर केर फिन यरुशलेम शहर केर रहेक वाला आदमीमन के आउर उकर पाछे यहूदिया परदेस केर रहेक वाला सोउब आदमीमन के आउर परजाइत आदमीमन के समझाते रहलों कि पाप करेक छोइड़ देवा आउर परमेश्‍वर बटे आय जावा आउर बेस काम काइर के इके साबित काइर के देखावा कि तोहरे पाप करेक छोइड़ देई हा। एहे कारण हेके कि जब मोंय यहूदी मनक मंदिर में रहों, तो यहूदी अगुवामन मोके धारलैं आउर माइर मोराएक चाहलैं। मगर मोंय परमेश्‍वर केर मदइत से आइज तक जिंदा अहों, जेकर से आइज तोहरे केर आउर छोट बाड़ सोउब केर सामने सच्चाई केर गवाही देवाथों। जे गोइठमन केर बारे में मूसा आउर परमेश्‍वर केर संदेश के बताएक वालामन भविष्यवाणी काइर रहैं, उ गोइठमन के छोइड़ आउर कोनों गोइठ नी कहोना। इ कि मसीह दुःख उठाई आउर ओहे सोउब से पहिले मोरलमन में से जी उइठ के हमर आदमीमन में आउर परजाइत आदमीमन में इंजोत केर परचार करी।” जब पौलुस अपन बचाव में इ कहते हें रहे कि फेस्तुस जोर से कहलक, “हे पौलुस, तोंय पगला हेकिस। तोर ढेइर गेयान तोके पगला बनाय देवाथे।” मगर पौलुस कहलक, “महामहिम फेस्तुस, मोंय पगला ना लगों, मगर सच्चाई के आउर बुद्धि केर गोइठमन कहाथों। राजा के इ गोइठमन केर बारे में पता अहे, से लगिन मोंय बिसवास केर साथ इ गोइठमन के उकर सामने कहाथों, मोके पक्का बिसवास अहे कि इ गोइठमन उकर लगिन नवाँ नखे काले कि इ घटना छिप के नी होई हे। हे राजा अग्रिप्पा, का तोंय परमेश्‍वर केर संदेश के बताएक वालामन केर बिसवास करिसला? हाँ, मोंय जानोना कि तोंय बिसवास करिसला।” अब राजा अग्रिप्पा पौलुस से कहलक, “का तोंय थोरे हें समझाएक से मोके मसीही बनाएक चाहिसला?” पौलुस जबाब देलक, “थोरे में या ढेइर में, परमेश्‍वर से मोर एहे प्रार्थना अहे कि ना सिरिफ तोंय मगर जेतना आदमीमन आइज मोर गोइठ के सुनाथैं सोउबमन इ बंधनमन के छोइड़ के मोर नियर बाइन जाओक।” तब राजा अग्रिप्पा, राजपाल आउर बिरनीके आउर उमन केर संगे बइठेक वाला सोउब आदमीमन उइठ के ठड़ाय गेलैं आउर चाइल गेलैं। आउर कछैरी से निकलेक बेरा आपस में कहेक लगलैं, “इ आदमी मौत केर सजा पावेक केर लायक या जेहेल घर में रहेक केर लायक कोनों गुन्हा नी काइर हे।” राजा अग्रिप्पा फेस्तुस से कहलक, “अगर इ आदमी इ बिनती नी काइर रहतक कि महाराजा उकर फैसला करोक, तो इके छोइड़ देवल जातक।” जब राजपाल फेस्तुस बटले इ ठहराल गेलक कि हमरे पानी जहाज से रोम देस केर इटली शहर जाब, तो उ पौलुस के आउर थोरेक आउरो बंधुवामन के हों यूलियुस नाँव केर एगो सूबेदार केर हाँथ में जिम्मा देई देलक, यूलियुस, महाराजा औगुस्तुस दल केर पलटन रहे। हमरे अद्रमुत्तियुम शहर केर एगो जहाज में चाइढ़ के हूवाँ से निकइल गेली, जे आसिया परदेस केर किनारे केर नगरमन में जाएक वाला रहे। हमर संगे मकिदुनिया परदेस केर थिस्सलुनीके शहर केर रहेक वाला अरिस्तर्खुस नाँव केर एगो बिसवासी रहे। अगला दिन हमरे सैदा नगर में पोहोंचली। हिंयाँ यूलियुस पौलुस केर उपरे दया काइर के उके अपन संगमन केर हिंयाँ जाएक आउर उमन से जरुरी चीजमन के लेई आवेक केर आगया देई देलक। हूवाँ से हमरे जहाज खोइल के साइप्रस टापू केर किनारे-किनारे होई के गेली, काले कि धुका उल्टा बहत रहे। इकर पाछे हमरे किलिकिया आउर पंफूलिया परदेस केर भीरे समुदर से होई के लूसिया परदेस केर मूरा शहर में पोहोंचली। हूवाँ सूबेदार के सिकंदरिया शहर केर एगो जहाज मिललक, जे इटली शहर जाएक वाला रहे, से लगिन उ हमरे के ओहे जहाज में बइठय देलक। हमरे ढेइर दिन तक धीरे-धीरे चाइल के मुश्किल से कनिदुस नगर पोहोंचली। अब धुका हमरे के आगे बढ़ेक नी देवत रहे, से लगिन हमरे सलमोने नगर केर सामने से होई के क्रेते टापू केर किनारे-किनारे गेली। आउर मुश्किल से चाइल के शुभलंगरबारी नाँव केर ठाँव में पोहोंचली, जहाँ से लसया नगर भीरे रहे। ढेइर दिन बीत गेलक, उपास केर दिन हों बीत जाय रहे आउर एहे समय में समुदर हों खतरनाक होई जायला, से लगिन पौलुस उमन के सलहा देलक, “हे सज्जन आदमीमन! मोके एइसन लगाथे कि इ यात्रा हमर लगिन नोकसान करेक वाला हेके, जेकर चलते पानी जहाज आउर सामान हें निहीं, मगर हमर जान केर हों नोकसान होवी।” मगर सूबेदार पौलुस केर गोइठ से बगरा जहाज केर मालिक आउर माँझी केर गोइठ के धेयान देलक। उ जहाज घाट जाड़ बिताएक लगिन बेस नी रहे, से लगिन ढेइर आदमीमन केर बिचार रहे कि हूवाँ से चाइल जाब। उमन के कोनों लेखे जहाज घाट फीनिक्स नगर पोंहचेक आउर हूवाँ जाड़ केर मौसम बिताएक केर आसरा रहे। फीनिक्स नगर क्रेते टापू केर जहाज घाट हेके, जे दक्खिन-पच्छिम आउर उत्तर पच्छिम बटे खुला अहे। जब थोरे-थोरे दक्खिन हवा बहेक लगलक, तो उमन सोचलैं कि योजना केर मोताबिक हमरे फीनिक्स नगर पोंहइच जाब, से लगिन उमन क्रेते टापू केर किनारे-किनारे जहाज के चलाएक लगलैं। मगर थोरेक देरी में हें जमीन बटले एगो खतरनाक आँधी आवेक लगलक, जे यूरकुलीन कहायला। जहाज इ आँधी केर चपेट में आय गेलक, आउर उ इकर तेज धुका केर सामना करेक नी पारलक, से लगिन हमरे जहाज के एहे धुका केर बहाव में छोइड़ देली, आउर धुका केर संगे बहते चाइल गेली। तब कौदा नाँव केर एगो छोटका टापू बटे धुका केर बहाव में बहते-बहते हमरे मुश्किल से जिंदगी के बचाएक वाला डोंगी के जहाज से बाँधेक पारली। जहाज केर माँझीमन जिंदगी के बचाएक वाला डोंगी के उपरे खींच के ठीक करलैं आउर जहाज के पेंदी से लेई के उपरे तक डोरा से काइस के बाइंध देलैं। सुरतिस खाड़ी केर बालू में फाँइस जाएक केर डार से लंगर के थोरेक हेंठे उतराय के जहाज के धुका केर बहाव में बहेक लगिन छोइड़ देलैं। आउर अगला दिन तेज लहरा आउर खतरनाक आँधी केर मार केर चलते उमन जहाज में लादल सामान के फेकेक लगलैं। आउर तीसरा दिन उमन अपनेहें हाँथ से जहाज केर भारी साज-सामान हों फेइक देलैं। जब ढेइर दिन तक ना तो बेइर देखाई देलक आउर ना तइरगन आउर आँधी तेज से बहते रहलक, तो हमर बचेक केर आसरा हों सिराय जात रहे। ढेइर समय से भूखे रहेक केर पाछे पौलुस उ मनक माझे ठड़ाय के कहलक, “हे भाईमन, ठीक तो एहे रहे कि तोहरे मोर गोइठ के माइन लेता आउर क्रेते टापू से जहाज के नी खोलता, जेकर से तोहरे के इ नोकसान उठाएक नी होतक। फिन भी मोंय तोहरे से बिनती कराथों कि ढाढ़स बाँधा, तोहर में से केकरो जान केर नोकसान नी होवी, सिरिफ जहाज नाश होवी, काले कि परमेश्‍वर जेकर मोंय सेवक हेकों, आउर जेकर भक्ति करोना, उकर स्वरगदूत आइज राइत मोर ठिना आय के कहलक, ‘हे पौलुस, ना डराव, तोके महाराजा केर सामने ठड़ाएक जरुरी अहे, आउर परमेश्‍वर तोके आउर सोउब के जे तोर संगे जाथैं जिंदगी दान देई हे।’ से लगिन हे भाईमन, ढाढ़स बाँधा। मोके परमेश्‍वर केर उपरे बिसवास अहे कि जइसन मोर से कहल जाय हे, तइसनेहें होवी। हमरे जरूर कोनों टापू में पोंहइच जाब।” जब आँधी आवल चौदह राइत होलक, आउर हमरे अब तक भूमध्य समुदर में हिने-हुने बहते रही, लगभग आधा राइत के माँझीमन के अनुमान होलक कि हमरे कोनों जमीन में पोंहचाथी। जब उमन पानी केर गहराई नापलैं, तो उमन सैंतीस मीटर गहरा पालैं आउर थोरेक आगे बाइढ़ के नापलैं तो सताईस मीटर गहरा पालैं। तब उमन के डार होलक कि कही हमरे चट्टाइनमन से ना टकराय जाब, से लगिन उमन जहाज केर पिछला भाग से चाइर गो लंगर गिराय देलैं, आउर बिहान होवेक केर आसरा देखते रहलैं। मगर माँझीमन जहाज से भागेक चाहत रहैं, से लगिन उमन जहाज केर अगला हिस्सा से लंगर गिराएक केर बहना जिंदगी बचाएक वाला डोंगी के समुदर में उतराय देलैं। तब पौलुस सूबेदार आउर पलटनमन से कहलक, “अगर इमन जहाज में नी रहबैं तो तोहरे बचेक नी पारबा।” तब पलटनमन डोरा काइट के डोंगी के समुदर में छोइड़ देलैं। जब बिहान होवेक ले रहे, तो पौलुस सोउब के अपन संगे खाएक लगिन बिनती करलक, “तोहरे चिंता करते-करते आइज चौदह दिन तक भूखे रहला आउर कोनों नी खला। से लगिन मोंय तोहरे से बिनती कराथों कि कोनों खाय लेवा, तोहरे केर जिंदा रहेक लगिन इ जरुरी अहे। तोहर में से केकरो मूँड़ केर एको गो केंस नाश नी होवी।” पौलुस इ कइह के रोटी लेलक आउर सोउब केर सामने परमेश्‍वर के धन्यबाद देलक आउर उ तोइर के खाएक लगलक। इकर से सोउब केर उमीद जागलक आउर उमन हों खाएक लगलैं। पानी जहाज में हमरे सोउब मिल के दूई सौ छेहत्तर आदमी रही। जब सोउबमन खाय के अघाय गेलैं, तो गोहोम के समुदर में फेइक के जहाज के हल्का करलैं। जब बिहान होलक, तो उमन उ ठाँव के चिन्हेक नी पारलैं, मगर एगो खाड़ी देखलैं जेकर किनारा रेतीला रहे। उमन बिचार करलैं कि अगर होवेक पराई तो एहे किनारे में जहाज के लगाय देब। तब उमन लंगर के खोइल के उके समुदर में छोइड़ देलैं, आउर पाल केर डोरामन के ढीला काइर देलैं आउर समुदर केर किनारे जाएक लगिन सामने केर पाल के खोइल देलैं। मगर दूई गो समुदर केर मिलान ठाँव में जहाज बालू में फाँइस गेलक आउर उकर अगला भाग तो स्थिर होई गेलक आउर हटेक नी पारलक, मगर पिछला भाग लहरा केर मार से टुटेक लगलक। तब पलटनमन केर इ बिचार होलक कि कहीं बंधुवामन पंवइर के भाइग ना जाओक, से लगिन इमन के माइर मोराएक चाही। मगर सूबेदार पौलुस के बचाएक केर इच्छा से उमन केर बिचार के पूरा होवेक नी देलक आउर उमन के हुकूम देलक कि जेमन पंउरेक जानैना, उमन कूइद के पहिले किनारे निकइल जाओक। आउर बचल आदमीमन पटरामन से चाहे जहाज केर दोसर चीजमन केर सहारा लेई के जमीन में पोंहइच जाओक। इ लेखे सोउबमन समुदर केर किनारे बाइच के निकइल गेलैं। जब हमरे ठीक-ठाक किनारे पोंहइच गेली, तब हमरे जानली कि इ टापू केर नाँव माल्टा हेके। हूवाँ केर रहेक वाला आदमीमन हमर उपरे ढेइर दया करलैं। पानी गिरत रहे आउर जाड़ लगत रहे, से लगिन उमन आइग सुलगाय के हमरे सोउब केर स्वागत करलैं। जब पौलुस काठी केर गठरी जमा काइर के आइग में रखत रहे, तो एगो साँप आँच पाय के उकर से निकललक आउर उकर हाँथ में मेढ़ाय गेलक। टापू केर आदमीमन साँप के उकर हाँथ में मेढ़ाल देइख के आपस में कहलैं, सचमुच इ आदमी हत्यारा हेके। इ समुदर से तो बाइच गेलक मगर हमर देवी न्याय इके जिंदा रहेक नी देलक। तब पौलुस साँप के आइग में झटइक देलक, आउर उकर कोनों नोकसान नी होलक। मगर उमन इकर आसरा में रहैं कि उकर काया फूइल जाई या अचका गिर के मोइर जाई, मगर ढेइर देरी तक आसरा देखेक केर पाछे पौलुस कोनों नी होलक, तो उ मनक बिचार बदइल गेलक आउर कहेक लगलैं, “इ तो केऊ देवता हेके।” उ ठाँव केर भीरे हें टापू केर मुखिया पुबलियुस केर जमीन रहे। उ हमरे के अपन घर लेई जाय के तीन दिन तक संगी नियर हमर सेवा करलक। पुबलियुस केर आबा के जार आउर सूल झाड़ा होवत रहे, से लगिन पौलुस उकर ठिना कोठरी में जाय के प्रार्थना करलक आउर उकर उपरे हाँथ राइख के उके ठीक करलक। जेकर से उ टापू केर आउरो बेमरियामन आलैं, आउर उमन के ठीक करल गेलक। से लगिन उमन सोउब रकम से हमर ढेइर माइन करलैं। जब हमरे हूवाँ से जाएक लगली, तो जे कुछ हमरे के जरुरी रहे, उ सोउब कुछ के उमन जहाज में राइख देलैं। तीन महिना पाछे हमरे सिकंदरिया शहर जाएक वाला एगो जहाज में चाइढ़ गेली, जे जाड़ केर चलते एहे टापू में रूइक रहे। इ जहाज केर अगला भाग में जुड़वाँ देवता केर चिन्हा रहे, जेके यूनानी भाषा में दियुसकूरी कहल जायला। हमरे सुरकूसा जहाज घाट में लंगर डाइल के तीन दिन हूवाँ रहली। हूवाँ से आगे बाइढ़ के हमरे रेगियुम नगर में पोहोंचली, अगला दिन दखनी हवा चलेक लगलक, हमरे फिन आगे बढ़ली आउर उकर अगला दिन पुतियुली शहर में पोहोंचली। हूवाँ हमरे के बिसवासी भाईमन मिललैं, आउर उमन हमरे के अपन घर में रूकेक लगिन बिनती करलैं। हूवाँ हमरे सात दिन रहली। हूवाँ रहेक केर पाछे हमरे भूंई डहर से रोम देस जाएक लगिन निकइल गेली। रोम देस केर थोरेक बिसवासी भाईमन हमर आवेक केर खबर सुइन के हमरे से मिलेक आउर हमरे के रोम देस लेई जाएक लगिन अप्पियुस नगर केर बाजार आउर तीन सराय तक आलैं। उमन के देइख के पौलुस परमेश्‍वर के धन्यबाद देलक आउर ढाढ़स बाँधलक। जब हमरे रोम देस पोहोंचली, तो पौलुस के एगो पलटन केर संगे जे उकर पहरा देवत रहे, जहाँ चाही, हूवाँ रहेक केर आगया मिल गेलक। तीन दिन केर पाछे पौलुस यहूदी अगुवामन केर एक सभा बोलालक। जब उमन जमा होलैं तो पौलुस उमन से कहलक, “हे भाईमन, मोंय ना तो अपन आदमीमन केर बिरोध में गुन्हा काइर हों आउर ना हमर पुरखामन केर नियम केर बिरोध में गुन्हा काइर हों, फिन भी मोके यरुशलेम शहर में बंधुवा बनाय के रोम देस केर सरकार केर हाँथ में जिम्मा देवल गेलक। मोर जाँच करेक केर पाछे उमन मोके छोइड़ देवेक लगिन तेयार रहैं, काले कि उमन मोर में मौत केर सजा लाएक कोनों दोष नी पालैं। मगर जब हूवाँ केर यहूदी अगुवामन इकर बिरोध करेक लगलैं, तो मोके मजबूर होई के महाराजा से माँग करेक होलक कि हिंयाँ रोम में मोर फैसला होवोक, इ निहीं कि मोके अपनेहें आदमीमन केर उपरे दोष लगाएक रहे। मोंय तोहरे से मिलेक केर आगया इ लगिन लेई हों कि मोंय तोहरे से इकर बारे में गोठियामूँ। काले कि इसराइल केर आसरा लगिन जे कि मसीह हेके, मोंय इ सिकड़ से जकड़ल अहों।” यहूदी अगुवामन उकर से कहलैं, “हमरे के तोर बारे में यहूदिया परदेस से कोनों चिट्ठी नी मिल हे आउर ना बिसवासी भाईमन में से केऊ आय के तोर बारे में खबर देई हैं या तोर बुराई के बताय हैं। मगर इ डहर केर बारे में तोर से हें तोर बिचार के सुनेक चाहिला, काले कि हमरे जानिला कि सोउब ठाँव में इ डहर केर बिरोध होवाथे।” तब यहूदी अगुवामन पौलुस केर संगे एक दिन ठहरालैं, आउर उ दिन ढेइर आदमीमन उकर हिंयाँ जमा होलैं। बिहान से लेई के साँझ तक पौलुस सच्चाई से परमेश्‍वर केर राइज केर बारे में शिक्षा देते रहलक। उ मूसा केर नियम आउर परमेश्‍वर केर संदेश के बताएक वालामन केर किताबमन में लिखल बचनमन से यीशु मसीह केर बारे में उमन के समझाएक केर कोशिश करते रहलक। उमन में से थोरेक यहूदी अगुवामन तो पौलुस केर गोइठ सुइन के उकर उपरे बिसवास करलैं मगर थोरेक यहूदी अगुवामन बिसवास नी करलैं। जब उ मनक बिचार आपस में नी मिललक तो उमन हूवाँ से जाएक लगलैं, तब पौलुस उमन से इ गोइठ कहलक, “पवितर आत्मा परमेश्‍वर केर संदेश के बताएक वाला यशायाह केर मुँह से तोहर पुरखामन से ठीक हें कइह हे, ‘तोहरे सुनते तो रहबा, मगर नी समझबा, आउर देखते तो रहबा, मगर नी चिन्हबा, काले कि इ आदमीमन केर मन कठोर होई जाय हे, इमन सुइन के हों अनसुना काइर देवैना आउर देइख के हों अनदेखा काइर देवैना, कहीं एइसन ना होवोक कि इमन देइख के चीन्ह लेबैं आउर सुइन के अपन मन में समइझ जबैं आउर मोर बटे घूइर आबैं आउर मोंय उमन के ठीक काइर देमूँ।’ से लगिन तोहरे के इ जानेक उचित अहे कि परमेश्‍वर केर इ छुटकारा केर संदेश परजाइत आदमीमन केर लगिन भेजल जाय हे। आउर उमन इके जरूर सुनबैं।” पौलुस केर इ गोइठ सुइन के यहूदी अगुवामन आपस में बहस करते हूवाँ से चाइल गेलैं। पौलुस पूरा दूई बरिस तक अपन भाड़ा केर घर में रहलक। आउर उ अपन से भेंट करेक आवल आदमीमन केर पूरा दिल से स्वागत करत रहे, उ साहस केर साथ बिना रोक टोक केर परमेश्‍वर केर राइज केर परचार करते आउर प्रभु यीशु मसीह केर बारे में शिक्षा देते रहलक। पौलुस बटले जे यीशु मसीह केर दास हेके, आउर यीशु मसीह केर खास चेला बनेक लगिन परमेश्‍वर बटले चुनल जाय हे, आउर परमेश्‍वर केर उ शुभ समाचार के सुनाएक लगिन अलग करल जाय हे। जे शुभ समाचार केर बारे में परमेश्‍वर पहिलेहें से अपन संदेश के बताएक वालामन बटले पवितर किताब में बताय हे। इ शुभ समाचार उकर बेटा हमर प्रभु यीशु मसीह केर बारे में अहे, जे काया केर हिसाब से तो दाऊद केर बंश से जनमलक। आउर पवितर आत्मा केर हिसाब से मोरलमन में से शक्ति केर साथ जी उठेक केर चलते परमेश्‍वर केर बेटा गिनालक। उकरे लेई के मोके किरपा, आउर यीशु केर चुनल खास चेला बाइन के उकर सेवा करेक केर मोका परमेश्‍वर बटले देवल जाय हे, ताकि उकर नाँव केर चलते सोउब जाइतमन यीशु मसीह उपरे बिसवास काइर के उकर आगया मानोक। ओहेमन में से तोहरेमन हों जेमन रोम देस में रहाला, यीशु मसीह केर चेला बनेक लगिन बोलाल जाय हा। तोहरे सोउबमन केर नाँव में मोंय चिट्ठी लिखाथों जेमन रोम देस में रहाला आउर परमेश्‍वर तोहरे के प्रेम करेला, आउर तोहरे के अपन पवितर आदमी बनेक लगिन बोलाय हे। हमर आबा परमेश्‍वर आउर प्रभु यीशु मसीह बटले तोहरे के किरपा आउर शांति मिलते रहोक। पहिले मोंय तोहरे सोउबमन केर लगिन यीशु मसीह केर द्वारा अपन परमेश्‍वर के धन्यबाद देवोना, काले कि ढेइर ठाँवमन में यीशु मसीह उपरे तोहर बिसवास केर बारे में चरचा होवाथे। परमेश्‍वर जेकर सेवा मोंय अपन पूरा दिल से उकर बेटा केर बारे में आदमीमन के शुभ समाचार सुनाय के करोना, ओहे मोर गवाह हेके कि मोंय तोहरेमन के कइसन अपन प्रार्थना में लगातार याइद करोना। आउर लगातार अपन प्रार्थनामन में अरजी करोना कि परमेश्‍वर केर इच्छा से मोके कोनोवें लेखे आखरी में तोहर ठिना आवेक केर मोका मिलोक। काले कि मोके तोहरेमन से मिलेक केर ढेइर इच्छा अहे, ताकि मोंय तोहरेमन के कोनों आत्मिक आशीष देमूँ, जेकर से तोहरेमन बिसवास में स्थिर होई जबा। मोर कहेक केर मतलब इ हेके कि जब मोंय तोहरे ठिना आमूँ, तब तोहरे मोर बिसवास के देइख के मजबूत होई जबा आउर मोंय तोहरे केर बिसवास के देइख के मजबूत होई जामूँ। आउर हे बिसवासी भाईमन, मोंय चाहोना तोहरेमन जाइन लेवा कि मोंय घरी-घरी तोहर ठिना आवेक चाहलों, ताकि जइसन मोंय परजाइत आदमीमन के चेला बनालो, तइसनेहें तोहरेमन में हों बनामूँ, मगर एखन तक रोकल गेलों। मोंय यूनानी आउर परजाइत आदमीमन, आउर सभ्य आउर असभ्य आदमीमन के शुभ समाचार सुनाएक लगिन कर्जदार अहों। से लगिन मोंय तोहरेमन के हों जे रोम देस में रहाला शुभ समाचार सुनाएक ले ढेइर इच्छुक अहों। काले कि मोंय मसीह केर बारे में शुभ समाचार सुनाएक से नी लजावना, इ लगिन कि उ हरेक बिसवास करइयामन लगिन, पहिले तो यहूदी फिन यूनानीमन लगिन छुटकारा पावेक ले परमेश्‍वर केर शक्ति हेके। काले कि शुभ समाचार में बिसवास करेक से परमेश्‍वर हमरे के अपन देखेक में पूरा-पुरी धरमी बनायला। जइसन कि पवितर किताब में लिखल अहे, “उ आदमी जे बिसवास करेक केर चलते परमेश्‍वर केर देखेक में धरमी बाइन हे, उ जिंदा रही।” परमेश्‍वर केर खीस तो उ आदमीमन उपरे स्वरग से आवेला, जेमन सोउब रकम केर बुराई आउर अधरम केर काम करैना, आउर इ काममन से आदमीमन के सच्चाई के जानेक से रोकैना। इ लगिन कि परमेश्‍वर केर बारे में जानेक केर गेयान उ मनक मन में अहे, काले कि परमेश्‍वर उमन के बताय देई हे। काले कि परमेश्‍वर केर अनदेखा गुण, मतलब सनातन शक्ति, आउर परमेश्‍वर अहे इकर सबूत दुनिया केर सिरजन केर समय से उकर काममन से दिसेला, हिंयाँ तक कि उमन कोनों बहना बनाएक नी पारैना। इ लगिन कि परमेश्‍वर के जाइन के हों उमन परमेश्‍वर केर लाएक उके आदर आउर धन्यबाद नी देलैं, मगर फालतू सोच-बिचार करेक लगलैं, हिंयाँ तक कि उमन एइसन सोचेक लगलैं जइसन सोचेक नी चाही। उमन खुद के बुद्धिमान माइन के निरबुद्धि बाइन गेलैं। आउर कहियो नी मोरेक वाला परमेश्‍वर केर महिमा के नाश होवेक वाला आदमी, आउर चरईमन, आउर चाइर गोड़वा जानवरमन, आउर रेंगेक वाला जीव-जंतुमन केर मूर्तिमन केर बराबइर में बदइल देलैं। इ लगिन परमेश्‍वर उमन के उ मनक मन केर बुरा इच्छामन केर मोताबिक अशुद्ध काम करेक लगिन छोइड़ देलक कि उमन आपस में बुरा काममन से अपन कायामन के अपवितर करोक। काले कि उमन परमेश्‍वर केर बारे में सच्चाई उपरे बिसवास करेक के ठुकराय के, जे झूठ हेके उके अपनाय लेलैं, आउर सिरजाल चीजमन केर सेवा-पूजा करलैं, ना कि सिरजाएक वाला केर, जेकर महिमा जुगजुग होते रहोक। आमीन। से लगिन परमेश्‍वर उमन के निरलज काम करेक केर इच्छामन में छोइड़ देलक, हिंयाँ तक कि उमन केर जनानामन हों स्वाभाविक रिश्ता बनाएक छोइड़ के, जनाना जनानामन से जे स्वभाव केर बिरोध में अहे, रिश्ता बनाएक लगलैं। तइसनेहें मरदानामन हों जनानामन केर संगे स्वाभाविक रिश्ता बनाएक छोइड़ के आपस में वासना से भाइर गेलैं, आउर मरदाना मरदानामन से रिश्ता बनाय के निरलज काम करेक लगलैं, आउर अपन उपरे खुद हें दंड के लानलैं, जेकर उमन लायक रहैं। आउर जब उमन परमेश्‍वर के अपनाएक बेकार समझलैं तो परमेश्‍वर हों उ सोउब अनुचित काममन के करेक लगिन उमन के उ मनक निकम्मा मन केर वश में छोइड़ देलक। से लगिन उमन सोउब रकम केर पाप, बुराई, स्वार्थी आउर घिरना से भाइर गेलैं। आउर उमन हिसिंगा, आउर हत्या, आउर झगरा, आउर झूठ, आउर एक दोसर लगिन बुरा सोच से हों भरल अहैं, आउर चुगली करेक वाला, आउर उमन एक दोसर के बदनाम करेक वाला, परमेश्‍वर से घिरना करेक वाला, अहंकारी, घमंडी, आउर डींग मारेक वाला हेकैं, उमन बुरा काम करेक केर योजना बनायना आउर अपन आयो आबा केर आगया के नी मानैना। उमन मूरख हेकैं आउर अपन करार के पूरा नी करैना, आउर केकरो उपरे दया-माया हों नी करैना। उमन तो परमेश्‍वर केर नियम के जानैना कि एइसन-एइसन काम करेक वालामन मौत केर सजा केर लाएक अहैं, फिन भी ना सिरिफ खुद हें एइसन काम करैना बल्कि करेक वालामन से हों खुश होवैना। तोहरेमन एइसन सोचाला कि हमरे एइसन आदमीमन उपरे दोष लगाएक पारिला, मगर तोहरे जे दोसरमन उपरे दोष लगावला, तोहरे के दोष लगाएक केर कोनों अधिकार नखे। काले कि जे गोइठ में तोहरे दोसरमन उपरे दोष लगावला ओहे गोइठ में खुद के दोषी ठहरावला, इ लगिन कि तोहरे जे काम केर दोष लगावला खुद हें उ काम के कराला। आउर हमरे जानिला कि परमेश्‍वर अपन न्याय करेक बेरा हर केऊ आदमी के जे एइसन काम करेला दंड देवी। आउर तोहरे जेमन एइसन-एइसन काम करइयामन उपरे दोष लगावला, आउर खुद ओहे काम कराला, का इ बुझाला कि तोहरे परमेश्‍वर केर दंड से बाइच जबा? का तोहरे परमेश्‍वर केर दया, आउर सहन करेक, आउर धीरज रुपी धन के तुच्छ जानाला? आउर का, इ नी बुझाला कि परमेश्‍वर केर दया तोहरेमन के पाप करेक के छोड़ेक ले सिखायला? मगर तोहरे हठ कराला आउर पाप करेक के छोड़ेक नी चाहाला, सेकर चलते उ दिन जब परमेश्‍वर अपन खीस के देखाई, जेकर में उ सच्चा न्याय करी, तो तोहरे के ढेइर दंड देवी। उ हर एक के उ मनक काम केर मोताबिक बदला देवी। परमेश्‍वर उमन के जेमन बेस काम में स्थिर रइह के महिमा, आउर आदर, आउर नाश नी होवेक वाला जिंदगी केर खोजार में अहैं, उमन के उ जुग-जुग केर जिंदगी देवी। मगर जेमन अपनेहें फायदा केर लगिन सोचैना, आउर सच्चाई के नी मानैना, बल्कि बुराई करेक खोजैना उमन उपरे परमेश्‍वर अपन खीस आउर परकोप के देखाई। आउर बिपत्ति, आउर संकट हरेक आदमी केर प्राण उपरे जे बुरा करेला आवी, पहिले यहूदी उपरे फिन उकर उपरे जे यहूदी ना लगे। मगर महिमा आउर आदर आउर शांति हरेक झन के मिली, जे भला करेला, पहिले यहूदी के फिन उके जे यहूदी ना लगे। काले कि परमेश्‍वर सोउबमन से एक समान ब्यवहार करेला। इ लगिन कि जेमन बेगर मूसा केर नियम पाले पाप करलैं, उमन के मूसा केर नियम केर बिना दंड मिली। आउर जेमन मूसा केर नियम पाय के पाप काइर हैं, उमन के मूसा केर नियम केर मोताबिक दंड मिली। काले कि परमेश्‍वर केर नजइर में मूसा केर नियम के सुनेक वालामन धरमी निहीं, मगर मूसा केर नियम केर मोताबिक चलेक वालामन धरमी ठहराल जाबैं। फिन जब परजाइत आदमीमन जेमन ठिना मूसा केर नियम नखे, स्वभाव से हें मूसा केर नियम में चलैना, तो उमन ठिना मूसा केर नियम नी होवेक से हों उमन इ साबित करैना कि उमन केर मन में मूसा केर नियम अहे। उमन इ देखायना कि परमेश्‍वर बटले मूसा के देवल नियम उ मनक हिरदय में लिखल अहे। उ मनक बिवेक हों गवाही देवेला, आउर उ मनक बिचार कखनों उमन के दोषी ठहरायला तो कखनों उमन के निरदोष ठहरायला। इ उ दिन दिस्तार होवी जे दिन परमेश्‍वर मोर शुभ समाचार केर मोताबिक यीशु मसीह केर द्वारा आदमीमन केर लुकल गोइठमन केर न्याय करी। अगर तोहरेमन खुद हें यहूदी कहावला आउर मूसा केर नियम उपरे भरसा कराला, आउर तोहरे परमेश्‍वर केर बारे में घमंड कराला कि हमरे परमेश्‍वर केर खास आदमी हेकी। आउर तोहरे परमेश्‍वर केर इच्छा जानाला आउर मूसा केर नियम केर शिक्षा पाय के भला-बुरा गोइठमन के चिन्हेक पाराला। आउर तोहरे अपन उपरे भरसा कराला कि हमरे अंधरामन के डहर देखाएक वाला हेकी आउर जेमन अंधार में पड़ल अहैं उमन लगिन इंजोत नियर अही। तोहरेमन सोचाला कि हमरे मूरखमन के सिखाएक वाला आउर छउवामन के उपदेस देवेक वाला हेकी। तोहरेमन के पक्का भरसा अहे कि गेयान आउर सच्चाई केर नमूना जे मूसा केर नियम में अहे, उ हमरे के मिल हे। मगर तोहरे जे दोसरमन के सिखावला, खुद के काले नी सिखावला? तोहरे जे चोरी नी करेक केर उपदेस देवाला, खुद हें काले चोरी कराला? आउर तोहरे जेमन दोसरमन के सिखावला कि ब्यभिचार ना करबा, तो तोहरे खुद हें ब्यभिचार काले कराला? तोहरे मूर्तिमन से घिरना कराला, मगर तोहरे खुद हें यहूदी मनक मंदिरमन के लुटाला। तोहरे मूसा केर नियम के जानेक केर बारे में घमंड तो कराला, मगर उके नी माइन के परमेश्‍वर केर अनादर कराला। काले कि तोहरे यहूदीमन केर बुरा काममन केर चलते, परजाइत आदमीमन परमेश्‍वर केर नाँव केर निंदा कराथैं। से लगिन पवितर किताब में लिखल अहे, तोहरे के खतना करल जाएक केर फायदा तब हें अहे जब तोहरे मूसा केर नियम के मानबा। मगर, अगर तोहरेमन मूसा केर नियम जे कहेला उके नी मानाला, तो तोहरे खतना करल यहूदीमन ओहेमन नियर अहा जइसन परजाइतमन अहैं, जे मनक खतना नी होई हे। से लगिन अगर केऊ बेगर खतना करल आदमी मूसा केर नियम केर रीतिमन के मानी, तो परमेश्‍वर एइसन आदमी के ओहे आदमी नियर देखेला जेकर खतना होई हे। आउर जे आदमी काया में खतना नी करवाहे मगर उ मूसा केर नियम के पूरा करेला, तो उ तोहरे के दोषी ठहराई, काले कि तोहरे ठिना मूसा केर नियम लिखल अहे फिन भी खतना करुवाय के मूसा केर नियम के पूरा नी कराला। तोहरे यहूदी जाइत में जनम लेई के हों सच्चा यहूदी ना लगा आउर तोहरे केर काया में खतना करवाल हों सच्चा खतना ना लगे। एगो सच्चा यहूदी ओहे हेके जेकर मन परमेश्‍वर केर साथ सच्चा अहे, आउर सच्चा खतना सिरिफ मूसा केर नियम के मानेक ना लगे, बल्कि इ हिरदय के बदलेक (मन केर खतना) हेके। जे पवितर आत्मा से होवेला, एइसन आदमी, आदमीमन से निहीं बल्कि परमेश्‍वर से आदर पावेला। से लगिन केऊ कही, अगर खतना करवाल से हों यहूदीमन के परमेश्‍वर ग्रहण नी करी, तो परजाइत से यहूदी बनेक कोनों फायदा नखे, मगर हाँ, यहूदी बनेक से ढेइर फायदा अहे, सोउब से खास बात तो इ अहे कि परमेश्‍वर केर बचन उमन के सोंपल गेलक। अगर थोरेक यहूदीमन बिसवास लायक नी रहलैं, तो इकर से का होलक? का इकर मतलब परमेश्‍वर अपन करारमन के उमन लगिन पूरा करेक ले बिसवास लायक नखे? निहीं! बिलकुल निहीं! परमेश्‍वर हमेशा सच बतायला जइसन पवितर किताब में परमेश्‍वर केर बारे लिखल अहे, “तोर बचन तोके धरमी ठहरायला आउर जब तोंय न्याय करिसला तब तोंय जीत जाइसला।” इ लगिन अगर हमरे केर बुरा काम परमेश्‍वर केर धारमिकता के देखायला, तो हमरे का कहब? का परमेश्‍वर जब हमरे के खिसायला आउर दंड देवेला तो गलती करेला? (इके तो मोंय आदमी केर रीति केर मोताबिक कहोना) निहीं! बिलकुल निहीं! अगर परमेश्‍वर यहूदीमन केर न्याय ठीक से नी करी तो दुनिया केर आदमीमन केर न्याय कइसन करी? केऊ एइसन कहेक पारेला, परमेश्‍वर कइसन मोर न्याय करी आउर कइसन मोके एगो पापी नियर दंड देवी, अगर मोर झूठा होवेक उकर सच्चाई के आउर उकर महिमा के बगरा देखायला? थोरेक आदमीमन हमरे उपरे दोष लगाते कहैना कि हमरे इ सिखाइला, “आवा हमरे बुराई करब ताकि हमरे केर भलाई होवोक” जेमन हमरे केर बारे में एइसन कहैना उमन दंड पावेक केर लायक अहैं। तो का होलक? का हमरे परजाइत आदमीमन से बेस अही? बिलकुल निहीं, काले कि हमरे यहूदीमन आउर परजाइत आदमीमन दुयो उपरे दोष लगाय चुइक ही कि उमन सोउब पाप केर शक्ति केर वश में अहैं। जइसन कि पवितर किताब में लिखल अहे, “केऊ परमेश्‍वर केर देखेक में धरमी नखे, एक झन हों निहीं। केऊ एको झन हों समझदार नखे जे इ बुझेक पारी कि का ठीक हेके, केऊ हों परमेश्‍वर के जानेक नी चाहैना। सोउब परमेश्‍वर से दूर भटइक गेलैं, आउर सोउब नालायक बाइन गेलैं, केऊ भलाई करेक वाला निहीं, एको झन निहीं। उमन गंदा गोठियायना जेमन खुला मसना केर बसाएक नियर बसायना, उ मनक जीभ में झूठ भरल अहे, उ मनक गोइठ साँप केर बिष नियर अहे, जे आदमी केर प्राण के लेई लेवेला। आउर उ मनक बोली में श्राप आउर कड़ुवाहट भरल अहे। उमन आदमीमन के माइर मोराएक ले कुदैना। जहाँव कहों उमन जायना हूवाँ बिपत्ति आउर बिनाश के लानैना। उमन बेगर लड़ाई झगरा केर शांति से कइसन रहेक अहे उके नी जानैना। उमन ठिना परमेश्‍वर केर कोनों डार नखे।” हमरे जानिला कि मूसा केर नियम जे कोनों कहेला तो उहेमन से कहेला, जेमन मूसा केर नियम केर वश में अहैं, ताकि केऊ नियम के तोइर के बहना बनाएक नी पारी, आउर गोटा दुनिया केर आदमीमन परमेश्‍वर केर दंड पावेक लाएक होबैं। इ लगिन कि मूसा केर नियम के पूरा करेक से केऊ आदमी परमेश्‍वर केर सामने धरमी नी ठहरी, काले कि मूसा केर नियम हमरे के बतायला कि हमरे पापी अही। मगर अब बेगर मूसा केर नियम के पूरा करले हें, परमेश्‍वर हमरे के धरमी ठहरायला, जेकर बारे में मूसा केर नियम आउर परमेश्‍वर केर संदेश के बताएक वालामन केर किताब में लिखल अहे। मतलब परमेश्‍वर हमरे के तब धरमी ठहरायला जब हमरे यीशु मसीह उपरे बिसवास करिला, चाहे हमरे यहूदी हेकी चाहे परजाइत हेकी, इकर कोनों भेद-भाव नखे। इ लगिन कि सोउब पाप काइर हैं आउर परमेश्‍वर केर महिमा से दूर अहैं। मगर परमेश्‍वर अपन किरपा से हमरे के हमर पापमन केर दंड से छुटकारा यीशु मसीह केर जरिया से देलक, आउर परमेश्‍वर हमरे के हमर बेगर कोनों काम करले धरमी ठहरालक। हमरे धरमी ठहरेक केर बारे में कोनों घमंड करेक नी पारिला, ना हें मूसा केर नियम के पूरा करेक से आउर ना हें कोनों दोसर नियम से, बल्कि इ यीशु मसीह उपरे बिसवास करेक से होई हे। इ लगिन हमरे इ बुइझ गेली कि आदमी मूसा केर नियम के पूरा करेक से निहीं, मगर यीशु मसीह उपरे बिसवास करेक से धरमी ठहरेला। का परमेश्‍वर सिरिफ यहूदीमन केर हेके? का परजाइत आदमीमन केर ना लगे? हाँ परजाइत आदमीमन केर हों हेके। काले कि एके गो परमेश्‍वर अहे, जे खतना करेक वालामन के हों बिसवास करेक से आउर खतना नी करेक वालामन के हों बिसवास करेक से धरमी ठहरायला। तो का हमरे मूसा केर नियम के बिसवास करेक केर चलते बेकार ठहराइला? निहीं! बिलकुल निहीं! काले कि जब हमरे बिसवास करिला, तो हमरे इ देखाइला कि हमरे बुइझ गेली कि परमेश्‍वर का लगिन मूसा केर नियम के देई हे। तो हमरे यहूदी केर रूप में हमर पुरखा अब्राहम केर बारे में का कहब? का कारण रहे जेकर से उ धरमी ठहरलक? काले कि अगर अब्राहम भला काममन से धरमी ठहराल जायला, तो उके घमंड करेक केर मोका होतक, मगर उ परमेश्‍वर ठिना घमंड करेक नी पारेला। पवितर किताब में का लिखल अहे? इ कि परमेश्‍वर जे कइह हे उकर उपरे अब्राहम बिसवास करलक आउर इकर चलते परमेश्‍वर उके धरमी ठहरालक। काम करइयामन के मजूरी देवेक दान निहीं मगर उ मनक हक समझल जायला। मगर जे आदमी धरमी ठहरेक लगिन काम नी करेला, बल्कि पापी आदमी के धरमी ठहराएक वाला उपरे बिसवास करेला, उकर बिसवास उके धरमी ठहरायला। एहे लेखे दाऊद हों पवितर किताब में लीख हे, धाइन हेकैं उमन, जे आदमीमन के परमेश्‍वर बेगर काम करले धरमी ठहराएला, “धाइन हेकैं उमन, जेमन केर अधरम क्षमा होलक, आउर जेमन केर पाप ढाँपल गेलक। धाइन अहे उ आदमी जेकर पाप केर परमेश्‍वर हिसाब नी लेवेला।” तो इ धाइन कहेक, का खतना करल वालामन हें लगिन हेके, या बेगर खतना करल वालामन लगिन हों? हमरे कहते आवाथी कि परमेश्‍वर जे कइह हे उकर उपरे अब्राहम बिसवास करलक आउर इकर चलते परमेश्‍वर उके धरमी ठहरालक। जब उ धरमी ठहराल गेलक तो खतना करल दशा में निहीं, मगर बेगर खतना करल दशा में गिनल गेलक। अब्राहम एखनोहों तक अपन खतना नी काइर रहे, तब हों परमेश्‍वर उके पहिलेहें ग्रहण करलक आउर धरमी ठहरालक। खतना करेक केर चिन्हा धरमी ठहराएक केर छाप (मोहर) हेके, इ लगिन अब्राहम उ मनक आत्मिक आबा हेके जेमन खतना नी करुवाय हैं मगर बिसवास काइर हैं। आउर उमन बिसवास करेक केर चलते धरमी ठहराल गेलैं। आउर अब्राहम खतना करलमन केर पुरखा बनोक जेमन ना सिरिफ खतना करुवाय हैं, मगर हमर पुरखा अब्राहम नियर बिसवास करैना, जे बिसवास उ खतना करेक से पहिलेहें काइर रहे। परमेश्‍वर अब्राहम आउर उकर बंशमन से इ करार काइर रहे कि उमन के दुनिया केर उपरे अधिकार देवी, इ करार, इ लगिन नी देवल जाय रहे कि अब्राहम मूसा केर नियम के पूरा काइर रहे। मगर परमेश्‍वर उपरे बिसवास करेक केर चलते उ धरमी ठहराल गेलक। अगर अब्राहम आउर उकर बंशमन के दुनिया केर अधिकारी होवेक केर करार मूसा केर नियम के पूरा करेक केर चलते देवल जाय हे, तब तो बिसवास करेक बेकार आउर करार से कोनों फायदा नखे। जब केऊ मूसा केर नियम के पूरा पुरी नी मानैना तो परमेश्‍वर उमन के दंड देवेला, आउर जहाँ मूसा केर नियम नखे हूवाँ उके तोरेक हों नी होवेला। करार परमेश्‍वर उपरे बिसवास में टिकल अहे, परमेश्‍वर अपन करार केर आसरा अपन किरपा से देवेला। इ करार ना सिरिफ अब्राहम केर बंशमन लगिन अहे जेमन मूसा केर नियम के मानैना, मगर जेमन अब्राहम केर नियर परमेश्‍वर उपरे बिसवास करैना उमन सोउब अब्राहम केर बंश हेकैं। उ हमरे सोउब केर पुरखा हेके। जइसन पवितर किताब में लिखल अहे कि मोंय तोके सोउब जाइतमन केर पुरखा ठहराय हों, अब्राहम उ परमेश्‍वर में बिसवास करलक, जे मोरलमन के जियायला आउर जे चीजमन हइये नखे उमन केर नाँव एइसन लेवेला कि उ चीजमन अहे। आउर ना अबिसवासी होई के परमेश्‍वर केर करार उपरे शंका करलक, मगर बिसवास में मजबूत होई के परमेश्‍वर केर महिमा करलक। आउर पक्का जानलक कि जे गोइठ केर परमेश्‍वर करार काइर हे, उके उ पूरा करेक ले हों शक्तिशाली अहे। एहे बिसवास केर चलते अब्राहम धरमी ठहराल गेलक। आउर इ बचन कि बिसवास उके धरमी ठहरालक, ना सिरिफ उकरे लगिन लिखल गेलक। बल्कि हमरे लगिन हों जेमन के परमेश्‍वर धरमी ठहरायला, मतलब हमरे जेमन उकर उपरे बिसवास करिला, जे हमर प्रभु यीशु के मोरलमन में से जियालक। यीशु हमरे केर पापमन केर चलते मोरेक लगिन धरुवाल हों गेलक, आउर परमेश्‍वर उके हमरे के धरमी ठहराएक लगिन जियाय हों देलक। से लगिन जब हमरे बिसवास से धरमी ठहरली, तो जे कोनों प्रभु यीशु मसीह हमर लगिन काइर हे, उकर चलते परमेश्‍वर केर संगे हमर मेल-मिलाप होई गेलक। जेकर से बिसवास करेक केर चलते, यीशु मसीह हमरे के उ किरपा केर नीचे लाइन हे जहाँ हमरे एखन खड़ा अही, आउर हमरे पूरा आसरा आउर आनंद से परमेश्‍वर केर महिमा के बाँटते आगे देखाथी। सिरिफ एहे निहीं बल्कि हमरे दुःख में हों आनंद करब, एहे जाइन के कि दुःख से धीरज मिलेला, आउर परमेश्‍वर हमरे के ग्रहण करेला काले कि हमरे धीरज धारेक सीख ही, आउर इ लगिन कि परमेश्‍वर हमरे के ग्रहण करेला, से लगिन हमरे के आसरा अहे। आउर आसरा से लाज नी होवेला, काले कि पवितर आत्मा जेके परमेश्‍वर हमरे के देई हे उकर से परमेश्‍वर केर प्रेम हमर मन में भाइर जाय हे। काले कि जब हमरे कमजोर हें रही, तो मसीह परमेश्‍वर केर ठीक ठहराल समय में पापीमन लगिन प्राण देलक। इ ढेइर कठिन अहे कि केऊ आदमी, केऊ धरमी आदमी लगिन अपन प्राण के देवी, का इ होवेक परायला कि केऊ सचमुच में बेस आदमी लगिन अपन प्राण के देवेक ले तेयार होवी। मगर परमेश्‍वर हमर उपरे अपन प्रेम केर भलाई इ रीति से दिस्तार करेला कि जब हमरे पापी हें रही तब मसीह हमर लगिन अपन प्राण देलक। तो हमरे के अब परमेश्‍वर धरमी ठहराय हे काले कि मसीह हमरे केर लगिन अपन प्राण देलक आउर अपन लोहू के हमरे केर पाप क्षमा लगिन बहालक। तो मसीह हमरे के परमेश्‍वर केर खीस से जरूर हें बचाई। काले कि जब हमरे परमेश्‍वर केर दुश्मन रही तब उकर बेटा केर माउत केर चलते परमेश्‍वर हमरे से मेल करलक, फिन मेल होई जाएक से मसीह केर जिंदगी केर चलते हमरे के काले नी बचाई? आउर सिरिफ एहे निहीं, मगर अब तो हमरे केर प्रभु यीशु मसीह केर चलते परमेश्‍वर से हमरे केर मेल होई गेलक, से लगिन हमरे परमेश्‍वर में खुश अही। इ लगिन जइसन एक आदमी केर चलते पाप दुनिया में आलक, आउर पाप केर चलते माउत आलक काले कि आदम पाप करलक आउर मोइर गेलक, आउर इ नियर माउत सोउब आदमीमन में आलक, काले कि आदम में होई के सोउब आदमीमन पाप करलैं। मूसा केर नियम के देवल जाएक से पहिलेहें आदमीमन पाप करलैं, मगर उ, पाप नी गिनल गेलक काले कि तब तक आगया के तोरेक लगिन कोनों नियम नी रहे। फिन भी आदम से लेई के मूसा तक सोउब आदमीमन पाप करलैं आउर मोइर गेलैं, हिंयाँ तक कि माउत उमन उपरे हों आलक, जेमन आदम नियर आगया तोइर के पाप नी काइर रहैं। आदम केर पाप सोउब आदमीमन में आय गेलक, ठीक जइसन मसीह जे पाछे से आलक आउर सोउब आदमीमन केर पाप से छुटकारा देवेक लगिन प्राण देलक। मगर परमेश्‍वर केर किरपा आउर धरमी ठहराएक केर दान, एक हें आदमी मतलब यीशु मसीह बटले जेके उ हमरेमन लगिन देई हे, कहीं बगरा किमती अहे आउर ढेइर आदमीमन इके पालैं। आउर जइसन एक आदमी केर पाप करेक केर जे फल होलक, तइसनेहें दान केर दशा नी होलक, काले कि एक आदमी केर पाप केर चलते दंड देवेक केर फैसला होलक, मगर ढेइर पापमन केर चलते एइसन बरदान सिराजलक, कि आदमीमन धरमी ठहरलैं। काले कि जब एक आदमी केर पाप केर चलते माउत सोउब आदमीमन में आलक, तो जेमन किरपा आउर धरमी बनेक केर बरदान भरपूरी से पावैना उमन एक आदमी, मतलब यीशु मसीह से जरूर हें जुग-जुग केर जिंदगी पाबैं आउर उकर संगे राइज करबैं काले कि उमन यीशु मसीह उपरे भरसा काइर हैं। इ लगिन जइसन एक पाप सोउब आदमीमन लगिन दंड देवेक केर कारण होलक, तइसनेहें एक धरम केर काम हों सोउब आदमीमन लगिन जिंदगी पावेक ले धरमी बनेक केर कारण होलक। काले कि जइसन एक आदमी केर आगया नी मानेक से ढेइर आदमीमन पापी ठहरलैं, तइसनेहें एक आदमी केर आगया मानेक से ढेइर आदमीमन धरमी ठहरबैं। आउर मूसा केर नियम इ लगिन देवल गेलक, ताकि सोउब आदमीमन देखेक पारबैं कि उमन कइसन पापी रहैं। मगर जब आदमीमन ढेइर पाप करलैं, हूवाँ किरपा जेके परमेश्‍वर देखालक उकर से हों बगरा होलक। जइसन एक आदमी केर पाप केर चलते माउत सोउब आदमीमन में फाइल गेलक, तइसनेहें हमर प्रभु यीशु मसीह केर चलते परमेश्‍वर केर किरपा हों हमरे के धरमी ठहरालक आउर जुग-जुग केर जिंदगी देवेला। तो हमरे का कहब? परमेश्‍वर हमरे केर पाप के अपन किरपा से क्षमा करेला, से लगिन हमरे के एइसन नी सोचेक चाही कि चला पाप करते रहब कि किरपा ढेइर होवोक? निहीं बिलकुल निहीं! हमरे जब पाप केर लगिन मोइर गेली तो फिन आगे हमरे के पाप करते रहेक नखे। हमरे जानिला कि जेतनामन हमरे मसीह यीशु केर बपतिस्मा जल संस्कार लेली, तो उकर संगे मोइर गेली। से लगिन जब हमरे बपतिस्मा जल संस्कार लेली तो उकर संगे मोइर गेली आउर उकर संगे दफनाल हों गेली, ताकि जइसन मसीह आबा परमेश्‍वर केर महिमा केर शक्ति से मोरलमन में से जियाल गेलक, तइसनेहें हमरे हों नवाँ जिंदगी जियब। काले कि अगर हमरे उकर माउत केर बराबइर में उकर संगे जुइट जाय ही, तो उकर जी उठेक केर बराबइर में हों जुइट जाब। काले कि हमरे जानिला कि हमर पुरना पापी स्वभाव यीशु मसीह केर संगे क्रूस उपरे चढ़ाल गेलक, ताकि हमर काया केर पापी स्वभाव नाश होई जाई आउर हमरे पाप केर गुलाम में नी रहब। काले कि जब हमरे मसीह केर संगे मोइर गेली, तो हमरे पाप केर शक्ति से आजाद होई गेली। अगर हमरे मसीह केर संगे मोइर गेली, तो हमर इ बिसवास अहे कि उकर संगे जियब हों। काले कि हमरे इ जानिला, मसीह मोरलमन में से जी उइठ हे आउर अब माउत केर उकर उपरे कोनों अधिकार नखे। काले कि मसीह जब मोइर गेलक, तो पाप केर शक्ति के सोउब दिन लगिन नाश करेक ले एक हें बेर मोइर गेलक, मगर अब जे उ जिंदा अहे तो परमेश्‍वर के आदर देवेक लगिन जिंदा अहे। एइसनेहें तोहरेमन हों खुद के पाप केर शक्ति लगिन मोरल समझा, मगर परमेश्‍वर केर लगिन मसीह यीशु में जिंदा समझा। इ लगिन पाप तोहर मोरल काया में राइज ना करोक, ताकि तोहरेमन पाप केर इच्छा के पूरा नी करबा। आउर अपन काया केर अंगमन के बुरा काममन के करेक लगिन ना सोंपा, मगर मोरलमन में से जी उठल जाइन के खुद केर जिंदगी के परमेश्‍वर के सोंइप देवा, आउर अपन काया केर अंगमन के भला काममन के करेक लगिन परमेश्‍वर के सोंइप देवा। तब तोहर उपरे पाप केर शक्ति नी होवी, काले कि तोहरेमन मूसा केर नियम केर अधीन निहीं बल्कि परमेश्‍वर केर किरपा केर अधीन अहा। इ लगिन कि हमरे मूसा केर नियम केर अधीन निहीं बल्कि परमेश्‍वर केर किरपा केर अधीन अही हमरे के पाप बिलकुल करेक नखे। तोहरेमन जानाला कि जब तोहरे खुद के केकरो धांगर बनेक लगिन देई देवाला, तो उ आदमी तोहरे केर मालिक बाइन जायला आउर तोहरे के ओहे करेक होवेला जेके उ करेक कहेला, तोहरे पाप केर गुलाम बाइन जाएक पाराला जे तोहरे के माउत बटे लेगेला, चाहे तोहरे परमेश्‍वर के चुनेक पाराला जे तोहरे के धरमी जिंदगी जियेक लगिन अगुवाई करेला। पहिले तोहरे तो पाप केर गुलाम रहा, मगर अब उ उपदेस के मानेक वाला होई गेला जेके तोहरे लगिन देवल गेलक, इकर लगिन मोंय परमेश्‍वर के धन्यबाद देवोना। परमेश्‍वर तोहरे के पाप केर शक्ति से छोड़ालक आउर अब सही काममन के करेक लगिन तोहरे उकर धांगर बाइन गेला। मोंय रोज दिन केर जिंदगी से जुड़ल एगो उदाहरन बताथों, जइसन तोहरेमन काया केर अंगमन के अशुद्ध आउर बुरा काममन के करेक लगिन सोंइप रहा, तइसनेहें अब अपन काया केर अंगमन के पवितर आउर धरमी जिंदगी जियेक लगिन सोंइप देवा। जब तोहरेमन पाप केर धांगर रहा, तो तोहरे भला काम करेक नी पारत रहा। तोहरे बुरा काममन के करला, आउर एखन अब तोहरे उ काममन से लजावला, तो तोहरे का पाला? उ काममन सिरिफ माउत के लानेला। मगर अब पाप से आजाद होई के आउर परमेश्‍वर केर धांगर बाइन के, तोहरेमन उ काममन के करा जे पवितर जिंदगी जियेक लगिन अगुवाई करेला, जेकर फल जुग-जुग केर जिंदगी हेके। काले कि पाप केर फल तो माउत हेके, मगर परमेश्‍वर जे बरदान हमरे के देवेला, उ हमर प्रभु मसीह यीशु में जुग-जुग केर जिंदगी हेके। हे बिसवासी भाईमन, तोहरेमन जानाला (मोंय मूसा केर नियम के जानेक वालामन से कहोना) कि जब तक आदमी जिंदा रहेला, तब तक उकर उपरे मूसा केर नियम केर अधिकार रहेला। तइसनेहें हे मोर बिसवासी भाईमन, जब तोहरेमन हों मसीह केर संगे मोइर गेला, तब मूसा केर नियम केर अधिकार से हों छूइट गेला। अब तोहरे मसीह केर होई गेला जे मोरलमन में से जी उठलक, ताकि तोहरेमन परमेश्‍वर लगिन फल लानेक वाला जिंदगी जिबा। काले कि जब हमरे पापी स्वभाव केर अधिकार से चलाल जात रही, तो पाप केर इच्छामन हमरे केर भीतरे काम करत रहे, आउर इ पापी इच्छामन माउत के लानेक लगिन हमरे केर काया में काम करत रहे। मगर हमरे मूसा केर नियम में जे लिखल अहे, उकर लगिन मोइर गेली, जे एक बेर हमरे के गुलाम बनाय के राइख रहे, अब हमरे उकर से एइसन छूइट गेली कि अब परमेश्‍वर केर सेवा हमरे उकर आत्मा केर आगया माइन के पुरना तरीका से निहीं, जेकर में लिखल नियम के पालन करेक पड़त रहे, बल्कि नवाँ तरीका से करेक पारिला। तो हमरे का कहब? का मूसा केर नियम पाप हेके? निहीं बिलकुल निहीं! बल्कि मूसा केर नियम से हें मोंय पाप का हेके सेके जानलों। लोभ करेक पाप हेके सेके मोंय इकरे से जानलों, काले कि मूसा केर नियम में लिखल अहे, “तोहरे लोभ ना करबा,” निहीं तो लोभ करेक पाप हेके सेके मोंय नी जानतों। मगर मूसा केर नियम केर द्वारा पाप के मोर में सोउब रकम केर लोभ सिरजाएक केर मोका मिल गेलक, काले कि मूसा केर नियम केर बिना पाप मोरल अहे। मोंय तो पहिले पाप के जानते हें नी रहों मगर जब मोंय मूसा केर नियम के जानलों, तो मोर में पाप करेक केर इच्छा होवेक लगलक आउर मोंय परमेश्‍वर से दूर होई गेलों। आउर ओहे आगया जे जिंदगी लगिन रहे, मोर लगिन माउत केर कारण बनलक। काले कि मूसा केर नियम केर द्वारा पाप मोका पाय के मोके बहकाय देलक आउर उकरे चलते मोके मोराइयो देलक। इ नियर हमरे देखिला कि मूसा केर नियम पवितर अहे, आउर उकर आगया हों पवितर, धरमी आउर भला अहे। तो का मूसा केर नियम जे बेस रहे, मोर लगिन माउत केर कारण होलक? निहीं! बिलकुल निहीं! मगर पाप जे मूसा केर नियम के जे बेस रहे उकर द्वारा मोर लगिन माउत के लेई आनलक। इ नियर पाप साबित करलक कि सचमुच में पाप का हेके आउर आगया से पता चललक कि पाप सोउब रकम से बुरा अहे। हमरे जानिला कि मूसा केर नियम तो आत्मिक अहे, मगर मोंय काया में अहों आउर पाप केर गुलाम अहों। आउर जे मोंय करोना, उके नी जानोना, काले जे बेस काम मोंय करेक चाहोना उके नी करोना, इकर बदली उ काम के करोना जेके मोंय घिरना करोना। आउर अगर, जे मोंय नी चाहोना ओहे बुरा काम के करोना, तो मोंय माइन लेवोना कि मूसा केर नियम भला अहे। तो एइसन दशा में उ बुरा काम के करेक वाला मोंय निहीं, बल्कि पाप हेके, जे मोर में बसल अहे। काले कि मोंय जानोना कि मोर पापी स्वभाव में कोनों बेस चीज नी बसेला, भला काम करेक केर इच्छा तो मोर में अहे, मगर उके करेक मोर से नी होवेला। काले कि जे बेस काम के करेक केर मोंय इच्छा करोना, उके तो नी करेक पारोना, मगर जे बुरा काम के करेक केर इच्छा मोंय नी करोना, उखे करते रहोना। से लगिन, अगर मोंय ओहे काम के करोना जेकर इच्छा नी करोना तो उकर करेक वाला मोंय ना लगों, मगर पाप हेके जे मोर में बसल अहे। इ लेखे मोंय इ नियम के पाओना कि जब भलाई करेक केर इच्छा करोना, तो बुरा काम के हें करोना। काले कि मोंय पूरा मन से तो परमेश्‍वर केर नियम से खुश रहोना। मगर मोके अपन काया केर अंगमन में दोसर रकम केर नियम दिसेला, जे उ नियम से लड़ेला, जेके मोर मन परमेश्‍वर केर नियम मानेला, आउर उ शक्ति मोके पाप केर गुलाम बनायला जे एखनो तक मोर काया केर अंगमन में अहे। मोंय कइसन अभागा आदमी हेकों! मोके इ माउत केर काया से केहर छुड़ाई? मोंय परमेश्‍वर के धन्यबाद देवोना काले कि ओहे मोके यीशु मसीह हमर प्रभु केर द्वारा छुटकारा देवी। मोंय अपन मन से तो परमेश्‍वर केर नियम के मानेक चाहोना, मगर मोंय एखनो तक पाप केर गुलाम में अहों काले कि मोर मन में बुरा इच्छा अहे। से लगिन अब जेमन मसीह यीशु में अहैं, उमन के परमेश्‍वर दंड नी देवी। (काले कि उमन काया केर मोताबिक निहीं बल्कि आत्मा केर मोताबिक चलैना।) पवितर आत्मा तोहरेमन के जिंदगी देवी, जे जिंदगी मसीह यीशु बटले आवेला आउर उ तोहरे के पाप आउर माउत से आजाद करी। काले कि जे काम के मूसा केर नियम हमरे केर पापी स्वभाव केर चलते कमजोर होई के नी करेक पारलक, उके परमेश्‍वर करलक मतलब अपनेहें बेटा के हमरे नियर पापी बनाय के, आउर हमरे केर पापमन लगिन बलिदान होवेक ले भेइज के पापी काया केर बराबइर में, आउर पाप केर बलिदान होवेक लगिन भेइज के, परमेश्‍वर मसीह केर काया में पाप केर दंड देलक। इ लगिन कि मूसा केर नियम केर माँग हमरे में जे पापी स्वभाव केर मोताबिक निहीं बल्कि पवितर आत्मा केर मोताबिक चलिला, पूरा करल जाओक। काले कि जेमन पापी स्वभाव केर कब्जा में अहैं उमन पाप काममन केर बारे में सोचैना, मगर जेमन पवितर आत्मा केर कब्जा में अहैं उमन आत्मा के खुश करेक केर बारे में सोचैना। इ लगिन अपन मन केर उपरे पापी स्वभाव के कब्जा करेक देवेक माउत के लानेला, मगर अपन मन केर उपरे आत्मा के कब्जा करेक देवेक जिंदगी आउर शांति के लानेला। काले कि पापी स्वभाव केर कब्जा में रहेक परमेश्‍वर केर दुश्मन बनेक हेके, काले कि पापी स्वभाव ना परमेश्‍वर केर नियम केर अधीन अहे आउर ना कहियो होवी। आउर जेमन पापी स्वभाव केर कब्जा में अहैं, उमन परमेश्‍वर के खुश करेक नी पारबैं। मगर जब पवितर आत्मा तोहर में बसेला, तो तोहरेमन पापी स्वभाव केर कब्जा में नखा, मगर आत्मा केर कब्जा में अहा। अगर केकरो में मसीह केर आत्मा नखे तो उ उकर आदमी ना लगे। अगर मसीह तोहर में अहे तो पाप केर चलते काया मोरल होते हुए हों, धरमी ठहराल जाएक केर चलते तोहर आत्मा जिंदा अहे। आउर अगर पवितर आत्मा जे यीशु के मोरलमन में से जियालक तोहर में बसल अहे, तो जे मसीह के मोरलमन में से जियालक, उ तोहर नाश होवेक वाला कायामन के हों अपन आत्मा केर द्वारा जे तोहर में बसल अहे जियाई। तो हे बिसवासी भाईमन, हमरे के उ नियर चलेक अहे जइसन परमेश्‍वर केर आत्मा कहेला, आउर उ नियर चलेक नखे जइसन पापी स्वभाव चाहेला। काले कि अगर तोहरेमन काया केर स्वभाव केर मोताबिक चलबा, तो परमेश्‍वर से अलग होई जबा, अगर पवितर आत्मा केर शक्ति से काया केर स्वभाव केर इच्छा के रोकबा, तो परमेश्‍वर में बनल रहबा। जेतना आदमीमन परमेश्‍वर केर आत्मा केर चलाल में चलैना, ओहेमन परमेश्‍वर केर संतान हेकैं। तोहरेमन के गुलामी केर आत्मा नी मिल हे कि फिन तोहरे परमेश्‍वर से डराबा, मगर पवितर आत्मा तोहरे के परमेश्‍वर केर संतान बनायला, जेकर से हमरे हे आबा कइह के हकाइला। पवितर आत्मा खुद हें हमर आत्मा केर संगे गवाही देवेला कि हमरे परमेश्‍वर केर संतान हेकी। आउर अगर संतान हेकी, तो हकदार हों हेकी बल्कि परमेश्‍वर केर हकदार आउर मसीह केर संगी हकदार हेकी, जब एखन हमरे उकर संगे दुःख उठाथी तो उकर संगे महिमा हों पावब। मोंय पक्का जानोना कि जे दुःख आउर तकलीफ एखन हमरे उठाथी, उ हमरे उपरे आवेक वाला महिमा केर सामने कोनोवें नखे। काले कि परमेश्‍वर केर सिरजाल चीजमन आसरा भरल नजइर से परमेश्‍वर केर सच्चा संतानमन के दिस्तार होवेक केर डहर देखाथैं। काले कि परमेश्‍वर केर बनाल सोउब कुछ केर कीमत सिराय गेलक, आउर इ सोउब कुछ इ लगिन नी होलक कि उ चीजमन एइसन चाहत रहैं, मगर परमेश्‍वर एइसन होवेक देलक। मगर एखनोहों आसरा अहे आउर परमेश्‍वर केर सिरजाल चीजमन उ दिन के देखाथैं, जब उमन परमेश्‍वर केर संतानमन से, माउत आउर नाश होवेक से छूइट के महिमा से भरल आजादी केर संगे मिलबैं। हमरे जानिला कि सोउब सिरजाल चीजमन बथा से कुंहराथैं, जइसन एगो जनाना छउवा जनम देवेक बेरा बथा से कुंहरेला। आउर सिरिफ सिरजाल चीजमन भइर नी कुंहराथैं, मगर हमरेमन हों जेमन आवेक वाला महिमा केर सवाद के चखेक लगिन पवितर आत्मा के परमेश्‍वर केर पहिला चीज केर रूप में पाय ही खुद हें कुंहराथी, मगर अब हमरे परमेश्‍वर केर आसरा देखाथी कि उ हमरे के अपन नीज संतान केर रूप में अपनाय लेवोक, इ सोउब तब होवी जब परमेश्‍वर हमरे केर इ कायामन के नवाँ काया बनाय के छुटकारा काइर देवी। एहे नियर जब हमरे परमेश्‍वर उपरे भरसा करेक में ढेइर कमजोर रहिला तब पवितर आत्मा हमर मदइत करेला, काले कि हमरे नी जानिला कि प्रार्थना का नियर करेक चाही, मगर पवितर आत्मा खुद हें कुंहइक-कुंहइक के जेके बताएक नी पराई, हमर लगिन प्रार्थना करेला। आउर परमेश्‍वर जानेला कि पवितर आत्मा का कहाथे, काले कि उ पवितर आदमीमन लगिन परमेश्‍वर केर इच्छा केर मोताबिक प्रार्थना करेला। आउर हमरे जानिला कि जेमन परमेश्‍वर से प्रेम करैना, उमन लगिन सोउब गोइठमन मिल के भलाई के हें लानेला, मतलब ओहेमन लगिन जेमन उकर इच्छा केर मोताबिक चुनल जाय हैं। काले कि जेमन के उ पहिले से चुइन लेई हे, उमन केर लगिन पहिले से फैसला हों काइर लेई हे कि उमन उकर बेटा नियर बाइन जाबैं, ताकि उकर बेटा ढेइर भाईमन में पहिलौठा बनोक। फिन जेमन केर लगिन उ पहिले से फैसला काइर हे, उमन के बोलालक हों, आउर जेमन के बोलालक उमन के धरमी हों बनालक, आउर जेमन के धरमी बनालक उमन के महिमा हों देई हे। इ सोउब के देखते हुए हमरे इ कहेक पारिला कि अगर परमेश्‍वर हमर बटे अहे, तो केऊ हमरे के हरुवाएक नी पारबैं। परमेश्‍वर अपन नीज बेटा के हों नी बचालक, मगर उके हमरे सोउब केर खातिर दुश्मनमन के जिम्मा देई देलक, तो परमेश्‍वर उ सोउब कुछ के हों हमरे के देवी, जेके देवेक केर करार काइर हे। केऊ परमेश्‍वर केर भीरे हमरे के दोष लगाएक नी पारबैं, काले कि परमेश्‍वर हमरे के धरमी बनाय हे। आउर केऊ हमरे के दंड देवेक नी पारी, काले कि यीशु मसीह हमर लगिन मोरलक आउर फिन मोरलमन में से जी उइठ के परमेश्‍वर केर भतखाइया आरा बाइठ हे, आउर हमर लगिन प्रार्थना हों कराथे। कोनोवें चीज हमरे के मसीह केर प्रेम से अलग करेक नी पारी। ना सताव, ना संकट, ना हुड़दंग, ना अकाल, ना गरीबी, ना खतरा, या तलवाइर। जइसन लिखल अहे, “परमेश्‍वर केर खातिर हमरे के रोज दिन आदमीमन माइर मोराएक केर धमकी देवाएना, आउर हमरे से एइसन ब्यवहार करैना जइसन बलि करेक वाला भेड़ी के बलि करेक लगिन लेगैना” मगर इ सोउब बुरा चीजमन में हमरे उकर चलते जे हमर से प्रेम काइर हे पूरा जीत पाय ही। काले कि मोंय पक्का जानोना कि कोनोवें चीज हमरे के परमेश्‍वर केर प्रेम से अलग करेक नी पारी। ना माउत, ना जिंदगी, ना स्वरगदूत, ना अधिकारी, ना आइज केर डार, ना काइल केर चिंता, आउर ना ही नरक केर शक्ति हमरे के परमेश्‍वर केर प्रेम से अलग करेक पारी, आउर ना उपरे आकाश केर शक्ति चाहे नीचे धरती केर शक्ति, सचमुच में परमेश्‍वर केर सिरजाल चीजमन में से कोनोवें चीजमन हमरे के परमेश्‍वर केर प्रेम से, जे हमरे के प्रभु यीशु मसीह बटले मिल हे, अलग करेक नी पारी। उमन इसराइली आदमी हेकैं जइसन मोंय, उमन परमेश्‍वर केर बालपोस बढ़ाल संतान बनेक लगिन चुनल जाय हैं, आउर महिमा आउर करार आउर मूसा केर नियम पाय हैं, आउर भक्ति आउर करारमन ओहेमन केर हेके। अब्राहम, इसहाक आउर याकूब उ मनक पुरखामन हेकैं, आउर मसीह खुद काया केर हिसाब से इसराइली रहे, सोउब केर उपरे राइज करेक वाला परमेश्‍वर केर महिमा जुग-जुग होते रहोक। आमीन। मगर मोंय इ नी कहाथों कि परमेश्‍वर अपन करार के पूरा करेक नी पारलक, काले कि सोउब इसराइल केर बंशमन सच्चा इसराइली ना लगैं। आउर अब्राहम केर बंश होवेक केर चलते उमन अब्राहम केर सच्चा संतान नी बनैना, मगर जइसन पवितर किताब में लिखल अहे “इसहाक से हें तोर बंश कहाई।” मतलब काया से जनमल संतान परमेश्‍वर केर संतान निहीं, मगर सिरिफ करार केर संतानमन अब्राहम केर संतान गिनल जायना। काले कि करार केर बचन इ हेके, “अगला साल एहे बेरा मोंय दोबारा आमूँ, आउर सारा केर एगो बेटा होवी।” आउर सिरिफ एहे निहीं, मगर रिबका केर जुड़वाँ बेटामन केर हों आबा ओहे हमर पुरखा इसहाक रहे। जइसन पवितर किताब में लिखल अहे, “मोंय याकूब से प्रेम करलों, मगर एसाव से प्रेम नी करलों।” तो हमरे का कहब? का परमेश्‍वर केखो चुनेला तो उके चुनेक में अन्यायी अहे? निहीं! बिलकुल निहीं! काले कि परमेश्‍वर मूसा से कहेला, “मोंय जेकर उपरे दया करेक चाहोना उकर उपरे दया करमूँ, आउर जेकर उपरे किरपा करेक चाहोना उकर उपरे किरपा करमूँ।” परमेश्‍वर उके चुनेला जेकर में उ अपन दया देखाएक चाहेला, उकर चुनेक इकर में टिकल नखे कि आदमीमन का चाहैना या का करेक खोजैना। पवितर किताब में लिखल अहे परमेश्‍वर मिसर केर राजा फिरौन से कहलक, “मोंय तोके एहे लगिन राजा बनाय हों कि तोर में अपन शक्ति देखामूँ, आउर मोर नाँव केर परचार गोटा दुनिया उपरे होवोक।” सेले उ जेकर उपरे चाहेला, उकर उपरे दया करेला, आउर जेके चाहेला, उके कठोर बनाय देवेला। तब थोरेक आदमीमन मोर से कहबैं, “अगर एइसन अहे, तो परमेश्‍वर काले कहेला हमरे बुरा अही, परमेश्‍वर केर इच्छा केर बिरोध के करेक पारेला?” हे संगी, तोंय केहर हेकिस, जे परमेश्‍वर से सवाल पुछिसला? जे चीज के बनाल जाय हे, का उ बनाएक वाला से कहेक पारी कि तोंय मोके काले बनाले? का कुम्हार के माटी केर उपरे अधिकार नखे कि उ एके गो लोंधा में से, एगो बासन के खास काम लगिन, आउर दूसरा के साधारण काम लगिन बनाई? तो इकर में कोन सा ताजुब केर बात अहे? परमेश्‍वर अपन खीस के आउर अपन शक्ति के, उ सोउबमन के देखाएक चाहेला जेमन नाश होवेक केर लाएक अहैं। मगर उ धीरज से उमन के सहलक। आउर दया पावल आदमीमन उपरे जेमन के परमेश्‍वर अपन महिमा केर लगिन पहिलेहें से तेयार काइर हे, अपन ढेइर महिमा के देखाई। मतलब हमरे उपरे जेमन के उ ना सिरिफ यहूदीमन में से, बल्कि परजाइत आदमीमन में से हों चुनलक। जइसन कि परमेश्‍वर परजाइतमन केर बारे में अपन संदेश के बताएक वाला होशे केर किताब में हों इ कहेला, “जेमन मोर परजा नी रहैं, उमन के मोंय अपन परजा कहमूँ, आउर जेमन मोर दुलारा नी रहैं उमन के अपन दुलारा कहमूँ। आउर ढेइर ठाँवमन में परमेश्‍वर कइह हे कि तोहरे मोर आदमी ना लगा, ओहे ठाँवमन में परमेश्‍वर उमन के हकाय के कही तोहरेमन मोर संतान हेका।” आउर परमेश्‍वर केर संदेश के बताएक वाला यशायाह इसराइलीमन केर बारे में हकाय के कहेला, “चाहे इसराइली आदमीमन केर गिनती समुदर किनारे केर बालू नियर ढेइर अहे, फिन भी उमन थोरहें बाचबैं। काले कि प्रभु अपन बचन के पूरा काइर के दुनिया केर सोउब आदमीमन केर तुरते सच्चाई से न्याय करी आउर धरम से सिद्ध करी। जइसन परमेश्‍वर केर संदेश के बताएक वाला यशायाह पहिलेहें कइह रहे कि अगर स्वरग केर सेनामन केर प्रभु हमरेमन के बंश बनेक केर हक नी देतक, तो हमरे सदोम आउर अमोरा नगरमन केर आदमीमन नियर होई जाती, जेमन के परमेश्‍वर पूरा-पुरी नाश काइर देलक।” तो हमरे का कहब? इ कि परजाइत आदमीमन खुद के परमेश्‍वर केर भीरे धरमी बनाएक केर कोशिश नी करत रहैं, मगर उमन अपन बिसवास से परमेश्‍वर बटले धरमी बनाल गेलैं। मगर इसराइली आदमीमन मूसा केर नियम के माइन के परमेश्‍वर केर देखेक में धरमी बनेक केर कोशिश करत रहैं, उमन धरमी बनेक नी पारलैं। एइसन कइसन होवी? काले कि उमन बिसवास से निहीं, मगर भला काममन से धरमी बनेक केर कोशिश करत रहैं, उमन मसीह केर इनकार करलैं, जे ओहे पखना नियर अहे जेकर से आदमीमन ठोकर खायना। जइसन पवितर किताब में लिखल अहे, “देखा मोंय यरुशलेम शहर में एगो एइसन पखना रखाथों जे आदमीमन के जाएक आउर रोकेक केर कारण होवी, एइसन पखना जेकर से आदमीमन ठेसाय के गिरबैं, आउर जे उकर उपरे बिसवास करी उ कहियो लाजिम नी होवी।” हे मोर बिसवासी भाईमन, मोर इ इच्छा अहे कि मोर अपन आदमी इसराइलीमन छुटकारा पाओक, इकर लगिन मोंय परमेश्‍वर से प्रार्थना करोना। मोंय उमन केर गवाही देवोना कि उमन के परमेश्‍वर लगिन जोश तो अहे, मगर परमेश्‍वर केर कइसन सेवा करेक अहे सेके नी जानैना। काले कि उमन परमेश्‍वर केर धरमी बनाएक के नी बुइझ के, अपन तरीका से धरमी बनेक केर कोशिश करैना, आउर परमेश्‍वर केर धरमी बनाएक केर नियम के नी मानैना। काले कि यीशु मसीह पहिलेहें मूसा केर नियम केर मकसद के जे लगिन उ देवल जाय हे, पूरा काइर देलक, से लगिन उ सोउब आदमीमन जेमन यीशु मसीह उपरे बिसवास करैना, परमेश्‍वर उमन के धरमी बनायला। मूसा अपन नियम केर किताब में उमन केर बारे में लीख हे कि जेमन उकर नियम के माइन के परमेश्‍वर केर देखेक में धरमी बनेक खोजैना, उमन उकरे से जिंदा रहबैं। मगर जे धरमी बनेक बिसवास से अहे, उकर बारे में पवितर किताब में लिखल अहे, “तोंय खुद से ना कहबे, केहर उपरे स्वरग में चढ़ी मसीह के हेंठे लानेक ले?” या अपन मन में इ ना कहबे, “केहर मरणलोक में नीचे उतरी मसीह के मुरदा में से जियाय के उपरे लानेक ले?” मगर मूसा जे इ कहेला, उ एइसन अहे, “तोंय इ संदेश के अपन मुँह से कइह के मानेक आउर अपन मन में ग्रहण करेक पारिसला।” इ संदेश कहेला तोके परमेश्‍वर उपरे भरसा करेक चाही। अगर तोंय अपन मुँह से यीशु के प्रभु जाइन के आदमीमन केर भीरे कबूल करबे आउर अपन मन में बिसवास करबे कि परमेश्‍वर उके मोरलमन में से जियालक, तो तोके परमेश्‍वर पक्का छुटकारा देवी। काले कि धरमी बनेक लगिन मन से बिसवास करल जायला, आउर छुटकारा पावेक लगिन मुँह से कबुलल जायला। मगर इकर से पहिले कि आदमीमन उकर से मदइत माँगबैं, उमन के प्रभु उपरे बिसवास करेक होवी, आउर इकर से पहिले कि उमन प्रभु उपरे बिसवास करबैं, उमन के प्रभु केर बारे में सुनेक होवी, आउर आदमीमन प्रभु केर बारे में सुनबैं, इकर लगिन केखो प्रभु केर बारे में उकर उपरे बिसवास करेक लगिन बताएक होवी। आउर इकर से पहिले कि केऊ प्रभु केर बारे में केखो बताई, उके भेजल जाएक जरुरी अहे। एहे लगिन पवितर किताब में लिखल अहे, “उमन केर गोड़ कतइ सुंदर अहे जेमन शुभ समाचार सुनायना!” मगर सोउब आदमीमन उ शुभ समाचार उपरे बिसवास नी करलैं। जइसन कि यशायाह परमेश्‍वर केर संदेश के बताएक वाला कहेला, “हे प्रभु, हमरे केर संदेश उपरे केऊ बिसवास नी करलैं।” बिसवास तब आवेला जब तोहरे संदेश के सुनाला, आउर संदेश मसीह केर बचन हेके। मगर मोंय कहोना, इसराइलीमन जरूर हें यीशु मसीह केर संदेश के सुइन हैं, काले कि पवितर किताब में लिखल अहे, “उकर संदेश आउर बचन धरती केर सोउब आदमीमन ठिना आउर सोउब ठाँव में पोंहचाल गेलक।” फिन मोंय कहोना, इ सच अहे कि इसराइली आदमीमन यीशु मसीह केर बारे में संदेश के बुइझ गेलैं, पहिले तो प्रभु मूसा केर द्वारा कहलक, “हे इसराइलीमन, जब तोहरे परजाइत आदमीमन उपरे मोर प्रेम के देखबा, तो तोहरे के हिसिंगा होवी। मोंय तोहरे के मूरख परजाइत आदमीमन केर द्वारा खिसवामूँ।” फिन यशायाह परमेश्‍वर केर संदेश के बताएक वाला ढेइर साहस केर संगे बतायला कि प्रभु कहेला, “जे आदमीमन मोके नी खोजत रहैं, उमन मोके पाय गेलैं, आउर मोंय उमन के मिललों जेमन मोके पूछबो नी करत रहैं।” मगर इसराइली आदमीमन केर बारे में परमेश्‍वर अपन संदेश के बताएक वाला यशायाह केर द्वारा कहेला, “मोंय दिन भइर एगो आगया नी मानेक वाला आउर बक-झक करेक वाला परजा बटे अपन हाँथ पसराय के रहलों, ताकि उमन के अपन बटे बोलामूँ।” इ लगिन मोंय पुछोना, का परमेश्‍वर अपन परजा के छोइड़ देलक? निहीं! बिलकुल निहीं! मोंय हों तो इसराइली हेकों, अब्राहम केर बंश आउर बिन्यामीन केर गोतर में से हेकों। परमेश्‍वर अपन उ परजा के नी छोइड़ हे जेके उ आगे हें से चुइन हे, तोहरेमन जानाला कि पवितर किताब में परमेश्‍वर केर संदेश के बताएक वाला एलिय्याह केर बारे का लिखल अहे, उ इसराइली आदमीमन केर बारे में परमेश्‍वर ठिना शिकाइत करेला आउर उमन उपरे दोष लगाय के कहेला, “हे प्रभु, उमन तोर संदेश के बताएक वालामन के माइर मोरालैं, आउर तोर बेदीमन के धाँइस देलैं आउर मोंय हें एकले आदमी बाइच हों जे तोर पिछे चलाथों, आउर उमन मोके हों मोराएक लगिन खोजाथैं।” मगर परमेश्‍वर एलिय्याह के जबाब देलक, “मोंय अपन लगिन सात हजार आदमीमन के बचाय के राइख हों, जेमन झूठा ईश्‍वर बाल देवता केर आराधना नी करैना।” परमेश्‍वर केर किरपा से इसराइलीमन केर एगो छोटका झूँड़ बचल अहे जेमन के परमेश्‍वर अपन सच्चा आदमीमन केर रूप में चुइन हे। इ परमेश्‍वर केर चुनेक, उकर किरपा से होलक ना कि भला काम करेक से, अगर भला काम करेक से होतक तो परमेश्‍वर केर किरपा नी रहतक। से लगिन एइसन होलक, जबकि इसराइलीमन धरमी बनेक केर कोशिश करलैं मगर बनेक नी पारलैं, मगर परमेश्‍वर जेमन के चुइन लेलक उमन धरमी बाइन गेलैं, दोसरमन के ढींठ बनाय देवल गेलक आउर उमन परमेश्‍वर केर गोइठ के सुनेक से ठुकराय देलैं। जइसन कि पवितर किताब में एलिय्याह परमेश्‍वर केर संदेश के बताएक वाला केर बटले लिखल अहे, परमेश्‍वर उमन केर मन के आइज केर दिन तक एइसन भोथरा काइर देई हे कि उमन ना बुझोक, आउर आँइख के एइसन अंधरा काइर देई हे कि ना देखोक, आउर कान के एइसन बहिरा काइर देई हे कि ना सुनोक। आउर राजा दाऊद कहेला, जब उमन भोजमन में रहैना तो तुरते फाँइस जायना जइसन चरई जाल में फाँइस जायला आउर जानवर गढ़हा में गिर जायला, ताकि उमन दंड पाबैं। उ मनक आँइख अंधरा होई जाओक ताकि उमन देखेक नी पारबैं, आउर सोउब बेरा अपन मुसीबतमन में टेढ़ा होई जाबैं। तो मोंय पुछोना, “का इसराइलीमन एइसन ठोकर खाय के गिरलैं कि कहियो उठेक नी पारबैं?” निहीं! बिलकुल निहीं! मगर उमन केर अबिसवास केर चलते परजाइत आदमीमन के छुटकारा मिललक, ताकि इसराइली आदमीमन के हिसिंगा होवोक। से लगिन अगर इसराइलीमन केर बिसवास नी करेक से दुनिया केर परजाइत आदमीमन लगिन भला होलक, तो इसराइली आदमीमन केर परमेश्‍वर बटे घुरेक सचमुच में परजाइत आदमीमन केर लगिन ढेइर बगरा आशीष पोंहचाएक वाला होवी। मोंय तोहरे परजाइत आदमीमन से इ गोइठमन के कहोना, जबकि मोंय परजाइत आदमीमन लगिन यीशु केर चुनल खास चेला हेकों, इकर लगिन मोंय अपन सेवा केर घमंड करोना। ताकि कोनों नियर मोंय अपन इसराइली आदमीमन में हिसिंगा करुवाय के उमन में से कायनों झन के बचाय लेमूँ। काले कि जब इसराइलीमन के छोइड़ देवल जाएक दुनिया केर आदमीमन केर परमेश्‍वर से मेल-जोल होवेक केर कारण होलक, तो जब इसराइलीमन यीशु के मसीह केर रूप में ग्रहण करबैं, तब उमन लगिन एइसन होवी जइसन कि उमन मोरलमन में से जी उठलैं। मोंय इसराइलीमन केर बारे में एगो उदाहरन बताथों, हमरे इसराइलीमन केर रीति अहे, जब हमरे रोटी पकाएक ले आटा सानिला तो एक मुट्ठी आटा परमेश्‍वर के देवेक लगिन अलग राखिला। जब एक मुट्ठी आटा परमेश्‍वर केर होई जायला, तो इकर मतलब पूरा सानल आटा हों परमेश्‍वर केर होई जायला। एहे नियर गाँछ केर उदाहरन अहे, अगर जाइर परमेश्‍वर केर हेके तो डाइरमन हों परमेश्‍वर केर हेके। इसराइली आदमीमन बेस जैतून गाँछ केर डाइरमन नियर आउर अब्राहम केर बंश हेकैं, इसहाक आउर याकूब गाँछ केर जाइरमन नियर हेकैं। जे नियर जंगली जैतून गाँछ केर डाइर के बेस जैतून गाँछ केर डाइर में कलम काइर के साटल जाएक से बेस जैतून केर डाइर बनेक केर फायदा मिलेला, ओहे नियर परजाइत आदमीमन के हों इसराइलीमन के मिलेक वाला फायदा मिलेला। तो डाइरमन उपरे घमंड ना करबा जे काइट के फेकल जायला, आउर अगर तोहरे घमंड करबा, तो जाइन लेवा कि तोहरे जाइर के निहीं मगर जाइर तोहरे के संभरायला। फिन तोहरे कहबा, परमेश्‍वर हमरे के चाहेला, काले कि उ थोरेक इसराइलीमन के छोइड़ देलक, ताकि तोहरे उ मनक ठाँव के लेवेक पारबा। इ ठीक अहे, उमन तो अबिसवास केर चलते बेस जैतून केर गाँछ से टुटाल गेलैं, मगर तोहरेमन बिसवास से बनल रहाला, इ लगिन घमंडी ना होवा मगर परमेश्‍वर से डरावा। काले कि जब परमेश्‍वर असली डाइरमन के हों काइट के फेइक देलक, तो तोहरे के हों काइट के फेइक देवी। इ लगिन परमेश्‍वर केर किरपा आउर कड़ाई के धेयान से देखा! जेमन गिर गेलैं उमन उपरे उ कड़ाई करलक, मगर तोहरे उपरे किरपा करलक, अगर तोहरे उकर किरपा में लगातार बनल नी रहबा तो तोहरे हों काइट देवल जबा। आउर अगर इसराइलीमन हों घुरबैं आउर बिसवास करबैं, तो बेस जैतून गाँछ केर डाइर में परमेश्‍वर बटले साटल जाबैं। काले कि जंगली जैतून गाँछ केर डाइर के बेस डाइर में साटल जाएक नी होवेला। आउर तोहरे जेमन इसराइली ना लगा, उ नियर अहा जइसन जंगली जैतून केर डाइर में से काइट के बेस जैतून गाँछ केर डाइर में जोड़ल जाय हा, तो इसराइलीमन उ डाइर नियर हेकैं जेमन बेस जैतून गाँछ में से बाइढ़ हैं, तो उमन अपन गाँछ में पक्का फिन से काले नी जोड़ल जाबैं। हे बिसवासी भाईमन, मोंय चाहोना कि तोहरेमन इ भेद के बुझा, ताकि तोहरे खुद में घमंड ना करबा, थोरेक इसराइलीमन कठोर मन वाला अहैं, इ कठोर बनल रहेक तब तक रही, जब तक कि परजाइत आदमीमन केर मसीह में बिसवास करेक केर गिनती पूरा नी होवी। इकर पाछे सोउब इसराइलीमन छुटकारा पाबैं, जइसन कि पवितर किताब में लिखल अहे, बचाएक वाला यरुशलेम शहर में आवी आउर अभक्ति के याकूब केर बंशमन से दूर करी। आउर उमन केर संगे मोर एहे करार होवी, जबकि मोंय उ मनक पापमन के क्षमा काइर देमूँ। इसराइलीमन शुभ समाचार उपरे बिसवास नी करेक चलते परमेश्‍वर केर बैरी हेकैं, मगर परमेश्‍वर उमन के अपन लगिन चुइन लेई हे से लगिन उमन से प्रेम करलक, आउर सेहे लगिन परमेश्‍वर उ मनक पुरखामन से करार काइर हे। काले कि परमेश्‍वर कहियो अपन बरदानमन से, आउर बोलाएक से पिछे नी मुढ़ेला। अहा! परमेश्‍वर केर धन आउर बुद्धि आउर गेयान कइसन गंभीर अहे! उकर बिचार के केऊ बखाइन करेक नी पारैना आउर उकर डहर के केऊ समझेक नी पारैना! “प्रभु केर बुद्धि के केहर जानलक? चाहे उकर मंत्री केहर होलक? चाहे केहर पहिले उके कोनों देई हे जेकर बदला उके देवल जाई?” काले कि सोउब कुछ उकरे बटे से आवेला, ओहे सोउब कुछ के बनाय हे, आउर उकरे लगिन सोउब कुछ अहे, उकरे महिमा जुग-जुग होते रहोक आमीन। इ लगिन हे बिसवासी भाईमन, परमेश्‍वर हमरे के अपन महान दया के देखाय हे, से लगिन मोंय तोहरेमन से बिनती करोना कि अपन जिंदगी के जिंदा आउर पवितर, आउर परमेश्‍वर के पसिंद लायक बलिदान केर रूप में, परमेश्‍वर लगिन चढ़ाय देवा, एहे परमेश्‍वर केर भक्ति करेक केर सही तरीका हेके। आउर इ दुनिया केर आदमीमन नियर ना बना, मगर तोहरे केर मन केर पूरा बदइल जाएक से तोहर चाइल-चलन हों बदलते जाओक, ताकि तोहरेमन परमेश्‍वर केर भला, आउर भावती, आउर सिद्ध इच्छा के अनुभव से जानते रहा। मोंय उ किरपा केर चलते जे मोके मिल हे तोहर में से हरेक झन से कहोना, तोहरे के जइसन समझेक चाही उकर से बाइढ़ के केऊ हों खुद के ना समझबा, मगर जइसन परमेश्‍वर हरेक के बिसवास केर मात्रा बाँइट देई हे तइसनेहें बेस बुद्धि केर संगे खुद के समझबा। काले कि जइसन हमरे केर एगो काया में ढेइर अंगमन अहैं, आउर सोउब अंगमन केर एके नियर काम नखे। तइसनेहें हमरे जे ढेइर अही, मसीह में बिसवास करेक केर चलते मसीह केर काया केर अंगमन हेकी, आउर हमरे सोउब एक दोसर से जुड़ल अही। आउर जबकि उ किरपा केर मोताबिक जे हमरे के देवल जाय हे, हमरे के परमेश्‍वर बटले अलग-अलग बरदान मिल हे। तो जेके भविष्यवाणी करेक केर बरदान मिल हे, उ बिसवास केर मात्रा केर मोताबिक भविष्यवाणी करोक। अगर केखो दोसरमन केर सेवा करेक केर बरदान मिल हे, तो उ दोसरमन केर सेवा में लगल रहोक, अगर केखो सिखाएक केर बरदान मिल हे, तो उ सिखाएक में लगल रहोक। आउर केखो बिसवास में बढ़ाएक केर बरदान मिल हे, तो उ दोसरमन के बिसवास में बढ़ाएक केर काम में लगल रहोक, केखो दान देवेक केर बरदान मिल हे, तो उ खुला मन से गरीबमन के दान देवोक, जेके अगुवाई करेक केर बरदान मिल हे, तो उ पूरा तन-मन से अगुवाई करोक, आउर केखो दया करेक केर बरदान मिल हे, तो उ खुशी से दया करोक। दोसरमन के देखाएक ले प्रेम ना करा, बुराई से घिरना करा, लगातार भलाई करते रहा। एक दोसर से अपन परिवार केर आदमी नियर प्रेम करा, बाइढ़ चाइढ़ के एक दोसर के आदर करा। खूब मेहनइत करा आउर कोढ़िया ना होवा, अपन मन में जोश से भरल रहा, प्रभु केर सेवा मन लगाय के करा। जे आसरा तोहरे ठिना अहे, उकर में खुश रहा, बिपइत में धीरज धरा, रोज दिन प्रार्थना में लगल रहा। पवितर आदमीमन के जे कोनों जरुरत होवी, उकर में उमन केर मदइत करा, परदेसीमन केर सेवा करेक लगिन अपन घर केर दुरा के खोइल देवा। अपन सताएक वालामन के आशीष देवा, सराप ना देवा। खुशी मनाएक वालामन केर संगे खुशी मनावा आउर काँदेक वालामन केर संगे काँदा। सोउब केर संगे एके नियर ब्यवहार करा, घमंडी ना होवा, मगर गरीब दुःखीमन केर संगे संगति रखा, अपन नजइर में बुद्धिमान ना होवा। बुराई केर बदली केकरो से बुराई ना करा, जे गोइठमन सोउब आदमीमन लगिन भला अहे, ओहे गोइठमन के गोठियावा। जहाँ तक होवेक पराई तोहरेमन सोउब आदमीमन संगे मेल-मिलाप से रहा। हे दुलार भाई बहिनमन बदला ना लेवा, मगर परमेश्‍वर के दंड देवेक केर मोका देवा, काले कि पवितर किताब में लिखल अहे प्रभु कहेला, “बदला लेवेक मोर काम हेके।” मगर, “अगर तोर बैरी भूखल अहे, तो उके भात खियावा, अगर पियासल अहे, तो उके पानी पियावा, काले कि एइसन करेक से तोहरे उकर मूँड़ उपरे आइग केर अंगोर के रखबा।” बुराई से ना हारा मगर भलाई से बुराई के जीत लेवा। हरेक आदमी सरकारी अधिकारीमन केर अधीन रहोक, काले कि सोउब अधिकार परमेश्‍वर बटे से मिलेला आउर जे अधिकारीमन अहैं, उमन परमेश्‍वर बटले हें ठहराल जाय हैं। इकर लगिन जे केऊ आदमी उमन केर आगयामन के नी मानेला, जेमन के राइज करेक केर अधिकार मिल हे, तो उ आदमी परमेश्‍वर केर नियम केर बिरोध करेला, आउर नियम केर बिरोध करेक वालामन दंड पाबैं। अगर केऊ भला करेला तो उके सरकार से डराएक केर जरुरत नखे। मगर, अगर उ बुरा करेला तो उके डराएक चाही, अगर तोहरे सरकार केर अधिकारीमन से डराएक नी चाहाला, तो बेस काम करा आउर उमन तोहरे के बेस कहबैं। काले कि सरकारी अधिकारीमन तोहर मदइत करेक लगिन परमेश्‍वर केर सेवक हेकैं। मगर तोहरे बुराई करबा तो डरावा, काले कि अधिकारीमन ठिना तोहरे के दंड देवेक केर अधिकार अहे, उमन परमेश्‍वर केर सेवकमन हेकैं कि जेमन बुरा करैना, उमन के दंड देबैं। तोहरे के उमन केर अधीन रहेक अहे, ना सिरिफ दंड से बचेक ले, मगर मन के शुद्ध रखेक लगिन हों। इ लगिन मालगुजारी हों देवा, काले कि उमन परमेश्‍वर केर सेवक हेकैं, आउर अपन काम के पूरा करेक लगिन सोउब बेरा लगल रहैना। इ लगिन हरेक झन के जे देवेक उचित अहे उके देवा, जेके मालगुजारी चाही उके मालगुजारी देवा, जेके महसूल चाही उके महसूल देवा, जेकर से डराएक चाही उकर से डरावा, जेकर आदर करेक चाही उकर आदर करा। एक दोसर से प्रेम करेक के छोइड़ के आउर कोनों गोइठ में केकरो कर्जदार ना होबा, काले कि जे दोसर से प्रेम करेला, ओहे मूसा केर नियम के पूरा काइर हे। काले कि मूसा केर नियम में ढेइर आगयामन अहे, “ब्यभिचार नी करेक, हत्या नी करेक, चोरी नी करेक, लोभ नी करेक,” आउर इमन के छोइड़ आउर कोनोवें आगया होवी तो सोउब केर निचोड़ इ आगया हेके “अपन पड़ोसी से अपन नियर प्रेम करा।” प्रेम पड़ोसी केर कोनों बुराई नी करेला, इ लगिन प्रेम करेक मूसा केर नियम के पूरा करेक हेके। तोहरे सोउब लगातार एक दोसर से प्रेम करा, काले कि परमेश्‍वर बटले हमरे के इ बुरा दुनिया से छुटकारा देवेक केर बेरा भीरे पोंहइच जाय हे, जब हमरे मसीह उपरे बिसवास काइर रही, उ बेरा केर बिचार से एखन बेरा आउरे भीरे पोंहइच जाय हे, इके बुझा, तोहरे के नींद से जागेक अहे। इ बुरा दुनिया में हमर रहेक केर बेरा लगभग सिराय जाय हे। जइसन कि राइत ढेइर बीत जाय हे आउर दिन होवेक वाला अहे, आउर मसीह केर घूइर आवेक केर बेरा भीरे पोंहइच जाय हे। से लगिन हमरे के अंधार केर काममन के छोइड़ देवेक अहे, आउर हमरे के ओहे काममन के करेक अहे, जे बुरा काममन के करेक से रोकेला, जइसन सिपाही अपन हँथियार के इंजोत में धारण काइर के रहेला। आउर जइसन आदमीमन अंधार में निहीं मगर इंजोत में रहैना, तइसनेहें आवा हमरे हों बेस ब्यवहार करब, ना कि लीला-क्रीड़ा आउर पियंक्‍कड़पन में, ना ब्यभिचार आउर लुचा काममन में, आउर ना झगरा आउर डाह में जिंदगी बिताब। बल्कि आवा हमरे हँथियार केर रूप में प्रभु यीशु मसीह के पिंध लेवब, आउर पापी स्वभाव केर इच्छामन के पूरा करेक केर कोशिश नी करब। जे बिसवास में कमजोर अहे, उके अपन संगति में लेई लेवा, मगर खाएक पियेक केर चीज उपरे उकर से बक-झक ना करा कि उके का खाएक चाही आउर का नी खाएक चाही। काले कि एक झन के बिसवास अहे कि सोउब कुछ खाएक उचित अहे, मगर जे बिसवास में कमजोर अहे, उ साग-सब्जी हें खायला। एक झन माँस खायला आउर एक झन साग सब्जी खायला, माँस खाएक वाला, साग सब्जी खाएक वाला के तुच्छ ना करोक, आउर साग सब्जी खाएक वाला, माँस खाएक वाला केर उपरे दोष ना लगाओक, काले कि परमेश्‍वर दुइयो के ग्रहण करेला। तोंय केहर हेकिस जे दोसर केर सेवक उपरे दोष लगाइसला? उ आदमी परमेश्‍वर केर सेवक हेके। उकर जितेक या हारेक उकर मालिक उपरे हें टिकल अहे, बल्कि उ जीतये जाई, काले कि प्रभु उके जितवाएक पारेला। केऊ तो एक दिन के दोसर दिन से बाइढ़ के मानेला, आउर केऊ सोउब दिन के एक बराबइर मानेला। हर एक झन अपन मन में हें ठाइन लेवोक। जे केऊ कोनों दिन के मानेला, तो उ एइसन इ लगिन करेला, काले कि उ प्रभु के आदर देवेक चाहेला। आउर जे केऊ माँस खायला, उ प्रभु लगिन खायला काले कि उ परमेश्‍वर के धन्यबाद देवेला, आउर जे माँस नी खायला, उ प्रभु लगिन नी खायला आउर परमेश्‍वर के धन्यबाद देवेला। काले कि हमरे सोउब प्रभु केर हेकी। से लगिन हमरे के सिरिफ अपन ले नी जियेक चाही, आउर अगर हमर में से केऊ मोरेला, तो उ सिरिफ अपन लगिन नी मोरेला। अगर हमरे जिंदा अही तो प्रभु केर लगिन जिंदा अही, आउर अगर मोरिला तो प्रभु केर लगिन मोरिला, से हमरे जियब चाहे मोरब हमरे प्रभुवे केर हेकी। मसीह एहे लगिन मोरलक आउर जी हों उठलक, ताकि उ मोरलमन आउर जिंदामन दुइयो केर प्रभु कहाओक। तो तोंय काले अपन बिसवासी भाई उपरे दोष लगाइसला? चाहे तोंय काले अपन भाई के तुच्छ जानिसला? हमरेमन में से सोउब केऊ के परमेश्‍वर केर फैसला करेक केर कुरसी केर सामने ठड़ा होवेक होवी। काले कि पवितर किताब में लिखल अहे कि प्रभु कहेला, “मोंय खुद अपन जिंदगी केर किरिया खावना, हरेक झन मोर सामने ठेहुना टेकबैं, आउर हरेक झन अपन मुँह से परमेश्‍वर के माइन लेबैं।” तो फिन, हमर में से हरेक झन के अपन-अपन काम केर हिसाब परमेश्‍वर के देवेक होवी। से लगिन अब से आगे हमरे एक दोसर उपरे दोष नी लगाब, मगर तोहरेमन इ ठाइन लेवा कि दोसर बिसवासी के पाप करवाएक वाला नी बनब। मोंय जानोना, आउर प्रभु यीशु में मोके पक्का बिसवास अहे कि कोनों खाएक केर चीज अशुद्ध नखे, मगर जे उके अशुद्ध समझेला उकर लगिन अशुद्ध अहे। अगर तोर बिसवासी भाई तोर खाएक केर चलते दुःखी होवेला, तो तोंय तोर बिसवासी भाई से प्रेम नी करिसला, अगर तोर खाएक केर चलते तोर भाई परमेश्‍वर केर आगया मानेक छोइड़ देवेला, तो तोंय उ खाएक केर चीज के ना खाबे, काले कि मसीह तोर बिसवासी भाई केर लगिन हों अपन जान के देई हे। से लगिन, जे तोंय कराथिस उ अगर बेस हेके, मगर केऊ दोसर उके बुरा मानेला तब तोंय उके ना करबे। काले कि परमेश्‍वर केर राइज में खाएक आउर पियेक खास ना लगे, मगर परमेश्‍वर केर देखेक में धरमी बनेक, आउर मेल-मिलाप आउर उ खुशी जे पवितर आत्मा से मिलेला, ओहे खास हेके। जे केऊ इ नियर मसीह केर सेवा करेला, परमेश्‍वर उकर से खुश होवेला, आउर दोसर आदमीमन इके पसिंद करैना। इ लगिन हमरे के उ गोइठमन में मन लगाएक अहे, जेकर से मेल-मिलाप आउर एक दोसर केर सुधार होवी। तोहरे जे खावाला उकर चलते परमेश्‍वर केर काम के ना बिगड़ावा। सोउब खाएक केर चीज शुद्ध तो अहे, मगर उ चीज के खाएक तब बुरा अहे, जब उके खाएक से दोसर आदमीमन के ठेस लगेला। भला तो इ अहे कि तोंय ना माँस खाबे आउर ना दारू पिबे, आउर ना कोनों एइसन काम करबे, जेकर से तोर भाई के ठेस लगी। इ सोउब चीजमन केर बारे में तोर जे बिसवास अहे, उ परमेश्‍वर आउर तोर बीच केर गोइठ हेके। धाइन हेके उ, जे उ गोइठ में जेके उ ठीक बुझेला, खुद के दोषी नी ठहरायला। मगर जे, कोनों चीज के खाएक में शंका करेला, आउर उके खायला तो उ पाप करेला, काले कि उ अपन बिसवास केर मोताबिक नी चलेला, आउर जे कोनों बिसवास से नी होवेला उ पाप हेके। अगर हमरे केर बिसवास मजबूत अहे तो जेमन केर बिसवास कमजोर अहे, उमन केर मदइत करेक चाही, ना कि खुद के खुश करेक चाही। हमरेमन में से हरेक झन के अपन बिसवासी भाई-बहिन केर भलाई करेक चाही, जेकर से उमन खुश होबैं आउर बिसवास में हों मजबूत होबैं। काले कि मसीह खुद के खुश नी करलक, मगर जइसन पवितर किताब में लिखल अहे, “तोर निंदा करेक वालामन मोर निंदा करलैं।” जेतना गोइठमन पहिले से पवितर किताब में लिखल अहे, उमन हमरे हें केर शिक्षा लगिन लिखल जाय हे, ताकि हमरे धीरज आउर बिसवास में मजबूत होवब, जेके हमरे पवितर किताब से पाविला, ताकि हमरे ठिना आसरा रही। मोंय प्रार्थना करोना कि धीरज आउर बिसवास में बढ़ाएक वाला परमेश्‍वर तोहरेमन के एक दोसर संगे शांति से रहेक में मदइत करोक, जइसन तोहरे यीशु मसीह केर पिछे चलाला। ताकि तोहरेमन सोउब एक संगे परमेश्‍वर केर, जे हमरे केर प्रभु मसीह यीशु केर आबा हेके, उकर महिमा करबा। इ लगिन एक दोसर के ग्रहण करा, जइसन कि मसीह तोहरे के ग्रहण करलक, इके इ लगिन करा ताकि आदमीमन परमेश्‍वर केर महिमा करबैं। इ लगिन मोंय तोहरेमन के कहोना कि जे करार परमेश्‍वर हमर पुरखामन से काइर रहे, उ करार के पूरा करेक लगिन मसीह यहूदीमन केर सेवक बनलक। जेकर से उ इ देखाएक पारोक कि परमेश्‍वर बिसवास लायक अहे। आउर परजाइत आदमीमन हों परमेश्‍वर केर दया केर चलते उकर बड़ाई करोक, जइसन कि भजन के लिखेक वाला लीख हे, “मोंय परजाइत आदमीमन में तोर धन्यबाद करमूँ, आउर तोर नाँव केर भजन गामूँ।” फिन दोसर ठाँव में इ लिखल अहे, “हे परजाइत आदमीमन, परमेश्‍वर केर परजामन केर संगे खुशी मनावा।” आउर फिन पवितर किताब में लिखल अहे, “हे परजाइत आदमीमन, प्रभु केर बड़ाई करा, आउर हे राइज-राइज केर सोउब आदमीमन, उकर गुणगान करा।” फिन यशायाह परमेश्‍वर केर संदेश के बताएक वाला पवितर किताब में लीख हे, “यिशै केर बंश में से एगो आदमी आवी, आउर परजाइत आदमीमन केर उपरे उ राइज करी, आउर परजाइत आदमीमन उकर उपरे आसरा करबैं।” मोंय प्रार्थना करोना कि परमेश्‍वर जे आसरा करेक केर सोता हेके, तोहरेमन के बिसवास करेक में सोउब रकम केर खुशी, आनंद आउर शांति से भरपूर करोक कि पवितर आत्मा केर शक्ति से तोहर आसरा बढ़ते जाओक। हे मोर बिसवासी भाईमन, मोंय खुद हें तोहर बारे में पक्का जानोना कि तोहरेमन हों खुद हें भलाई से भरल अहा आउर पूरा-पुरी जानाला कि तोहरे के का करेक अहे, आउर तोहरे एक दोसर के सिखाएक पाराला। यीशु मसीह से मोर रिश्ता अहे, इकरे चलते मोंय परमेश्‍वर केर सेवा करेक केर घमंड करेक पारोना। आउर मोंय इ कहेक केर साहस करोना, काले कि यीशु मसीह मोर द्वारा काम करलक, जेकर से परजाइत आदमीमन परमेश्‍वर केर पिछे चलेक वाला बनलैं, उमन परमेश्‍वर उपरे भरसा करलैं जब उमन मोर गोइठमन के सुनलैं आउर मोर काममन के देखलैं। मोके पवितर आत्मा बटले शक्ति देवल गेलक जेकर से मोंय शक्तिशाली चिन्हामन आउर चमत्कार काममन के करलों। से लगिन मोंय यरुशलेम शहर से लेई के इल्‍लुरिकुम परदेस केर आसे-पासे जहाँव कहों रहलों, मोंय सोउब आदमीमन के यीशु मसीह केर बारे में शुभ समाचार केर परचार करलों। मगर मोर मन केर जोश इ अहे कि शुभ समाचार केर परचार ओहे ठाँवमन में होवोक, जहाँ मसीह यीशु केर बारे में आदमीमन एखन तक नी सुइन हैं, ताकि मोंय परमेश्‍वर केर काम के उ ठाँवमन में नी करमूँ जहाँ केऊ दोसर आदमी पहिलेहें शुरु काइर हे, जइसन कि एगो आदमी दोसर आदमी केर कोड़ल नेव में घर नी बनायला। मगर जइसन पवितर किताब में लिखल अहे तइसनेहें मोंय करेक चाहोना, “जेमन के उकर शुभ समाचार केर बारे में कहियो बताल नी जाय हे ओहेमन देखबैं, आउर जेमन उकर बारे में कहियो नी सुइन हैं ओहेमन बुझबैं।” एहे लगिन मोंय तोहर ठिना आवेक से घरी-घरी रुकल रहलों। मगर अब मोंय इ परदेसमन में, जहाँ यीशु मसीह केर बारे में नी सुइन रहैं, उमन के शुभ समाचार परचार करेक केर काम के पूरा काइर देलों। से लगिन जब मोंय स्पेन देस जामूँ तो तोहर ठिना होते हुए जामूँ, काले कि मोके आसरा अहे कि उ यात्रा में तोहरे से भेंट होवी, आउर जब तोहरे केर संगति से मोर मन भाइर जाई, तो तोहरेमन मोके थोरेक दूर आगे पोंहचाय देबा। मगर एखन तो मोंय पवितर आदमीमन के दान देवेक लगिन यरुशलेम शहर जाथों। काले कि मकिदुनिया आउर अखया परदेस केर आदमीमन अपन इच्छा से इ भला काम करेक केर फैसला करलैं कि जे परमेश्‍वर केर आदमीमन यरुशलेम शहर में अहैं आउर गरीब अहैं, उमन के थोरेक पैसा देवब। उमन इ काम खुशी से काइर हैं, उमन यरुशलेम शहर में रहेक वालामन केर कर्जदार हों हेकैं, काले कि यरुशलेम शहर केर बिसवासीमन, परजाइत आदमीमन के परमेश्‍वर केर बेस चीजमन के बाँइट हैं, से लगिन परजाइत आदमीमन के हों इ उचित अहे कि यरुशलेम शहर केर बिसवासीमन के दुनिया केर बेस चीजमन के बाँटोक। से लगिन पहिले मोंय यरुशलेम शहर जाथों कि इ मदइत करेक लगिन जमा करल पैसा के जिम्मा देई देमूँ। इकर पाछे मोंय रोम देस में तोहरे से भेंट काइर के स्पेन देस चाइल जामूँ। आउर मोंय जानोना कि जब मोंय तोहर ठिना आमूँ, तो मोर आवेक केर चलते मसीह तोहरे के भरपूर आशीष देवी। आउर हे बिसवासी भाईमन, मोंय प्रभु यीशु मसीह केर नाँव में तोहरे से बिनती करोना कि परमेश्‍वर से मोर लगिन प्रार्थना काइर के, मोर कठिन मेहनइत में शामिल होवा। इ सोउब तोहरे इ लगिन करा, काले कि तोहरे मोर से प्रेम कराला, जे प्रेम पवितर आत्मा बटले तोहरे के देवल जाय हे। ताकि मोंय यहूदिया परदेस केर अबिसवासीमन से बाइच के रहमूँ, आउर यरुशलेम शहर में परमेश्‍वर केर पवितर आदमीमन, जे मदइत केर पैसा मोंय उमन लगिन लेगमूँ उके लेई के खुश होबैं। आउर मोंय परमेश्‍वर केर इच्छा से तोहर ठिना खुशी से आय के तोहर संगे आराम पामूँ। मोंय प्रार्थना करोना कि परमेश्‍वर जे शांति देवेला, तोहरे सोउबमन केर संगे रहोक। आमीन। मोंय तोहरेमन से चाहोना कि हमरे केर बिसवासी बहिन फीबे केर आदर करा, जे किंखिरया केर कलीसिया केर सेविका हेके। आउर प्रभु में उकर स्वागत करा, जइसन कि परमेश्‍वर केर आदमीमन के एक दोसर केर स्वागत करेक चाही। आउर कोनों गोइठ में उके तोहर मदइत चाही तो उकर मदइत करा, काले कि उ ढेइर आदमीमन केर मदइत काइर हे, आउर मोर हों मदइत काइर हे। प्रिस्किल्ला बहिन आउर अक्विला भाई के, जेमन मसीह यीशु में मोर संगे काम करेक वाला हेकैं, जोहार। उमन मोर प्राण के बचाएक लगिन अपन प्राण केर खतरा मोल लेई रहैं, आउर सिरिफ मोंय हें निहीं, बल्कि परजाइत आदमीमन केर सोउब कलीसिया केर बिसवासीमन हों उमन के धन्यबाद देवैना। आउर उ कलीसिया केर बिसवासीमन के हों जोहार, जेमन उ मनक घर में जमा होवैना। मोर दुलार भाई इपैनितुस के जोहार, जे आसिया परदेस केर, यीशु मसीह में बिसवास करेक वाला पहिला आदमी हेके। आउर मरियम के जे तोहर लगिन ढेइर मेहनइत करलक, जोहार। भाई अंद्रुनीकुस आउर बहिन यूनियास के जोहार, जेमन मोर अपन जाइत इसराइली हेकैं, आउर मोर संगे जेहेल जाय रहैं, उमन के यीशु केर चुनल खास चेलामन बढ़ियाँ से जानैना, आउर उमन मोर से पहिले मसीह केर चेला बाइन रहैं। भाई अम्पलियातुस के जोहार, जे प्रभु में मोर दुलारा हेके। भाई उरबानुस के जोहार, जे मसीह में हमरे केर संगे काम करेक वाला हेके, आउर मोर दुलारा भाई इस्तखुस के हों जोहार। भाई अपिल्लेस के जोहार, जे मसीह में सच्चा निकललक, आउर भाई अरिस्तुबुलुस केर घराना के हों जोहार। मोर अपन इसराइली जाइत, भाई हेरोदियोन के जोहार, भाई नरकिस्सुस केर परिवार केर आदमीमन के जोहार, जेमन प्रभु में अहैं। त्रूफेना आउर त्रूफोसा, दुइयो बिसवासी बहिनमन के जोहार, जेमन प्रभु में मेहनइत करैना। दुलारी बहिन पिरसिस के जोहार, जे प्रभु में ढेइर मेहनइत काइर हे। भाई रूफुस के, जे प्रभु केर खास काम करेक लगिन चुनल जाय हे, आउर उकर आयो के जे मोर हों आयो हेके जोहार। भाई असुंक्रितुस आउर फिलगोन आउर हिरमेस आउर पत्रुबास आउर हिरमास आउर उ मनक संगी भाईमन के जोहार। भाई फिलुलुगुस आउर युलिया आउर निर्युस आउर उकर बहिन उलुम्पास आउर उमन संगे रहाइया सोउब पवितर आदमीमन के जोहार। आपस में एक दोसर के मसीह केर प्रेम से जोहार करा, तोहरेमन के मसीह केर सोउब कलीसियामन केर बिसवासीमन बटले जोहार। अब हे बिसवासी भाईमन, मोंय तोहरेमन से बिनती करोना कि जेमन एक दोसर से झगरा लाडै़ना, आउर जेमन एइसन काम करैना जेकर से बिसवासीमन ठोकर खायना, उमन के जाइन लेवा आउर उमन से दूर रहा। काले कि एइसन आदमीमन हमर प्रभु मसीह केर निहीं, मगर अपन फायदा लगिन सेवा करैना, आउर उमन मिठा-मिठा गोइठमन से सीधा-सादा आदमीमन के बहकाय देवैना। तोहरेमन परमेश्‍वर केर आगयाकारी हेका, इके सोउब केऊ जानैना, से लगिन मोंय तोहर बारे में खुशी मनावना, मगर मोंय इ चाहोना कि तोहरेमन भलाई का हेके इके जानेक लगिन बुद्धिमान होवा, मगर बुराई लगिन निरदोष बनल रहा। शांति केर परमेश्‍वर शैतान के जल्दी हें नाश काइर देवी आउर तोहरे केर अधीन काइर देवी। हमर प्रभु यीशु मसीह केर किरपा तोहरे उपरे बनल रहोक। मोर संगे काम करेक वाला तीमुथियुस, आउर मोर अपन इसराइली जाइत, भाई लूकियुस आउर यासोन आउर सोसिपत्रुस तोहरेमन के जोहार कहैना। मोंय तिरतियुस हों जे इ चिट्ठी के पौलुस बटले लिखाथों, प्रभु केर बिसवासी केर रूप में तोहरेमन के जोहार करोना। भाई गयुस केर जोहार, जेकर संगे मोंय रहोना, कलीसिया केर सोउब बिसवासीमन इकरे घर में जमा होवैना। इरास्तुस जे इ नगर केर खजांची हेके आउर भाई क्वारतुस तोहरे के जोहार कहेला। मोंय प्रार्थना करोना कि हमर प्रभु यीशु मसीह केर किरपा तोहरे सोउब केर उपरे बनल रहोक। अब परमेश्‍वर केर स्तुति होवोक, जे तोहरेमन के बिसवास में मजबूत बनाएक पारेला, उ शुभ समाचार केर द्वारा आउर यीशु मसीह केर संदेश केर द्वारा जेके मोंय आदमीमन के बतावना। इ मसीह केर बारे में संदेश भेद केर गोइठ हेके, जे शुरु से लुकल रहे मगर अब दिस्तार होलक। इ भेद केर गोइठमन परमेश्‍वर केर संदेश के बताएक वालामन केर पवितर किताब में लिखल जाएक से आउर जुग-जुग रहेक वाला परमेश्‍वर केर आगया से सोउब जाइत केर आदमीमन के पता चललक, ताकि उमन बिसवास करबैं आउर मानबैं। एके गो बुद्धिमान परमेश्‍वर केर महिमा यीशु मसीह केर द्वारा जुग-जुग होते रहोक। आमीन। इ चिट्ठी के मोंय पौलुस लिखाथों, मोंय परमेश्‍वर केर इच्छा से यीशु मसीह केर चुनल खास चेला बनेक लगिन बोलाल जाय हों, मोंय हिंयाँ हमर संगी बिसवासी भाई सोस्थिनेस केर संगे अहों जे मोर मदइत कराथे। इ चिट्ठी के हमरे परमेश्‍वर केर उ कलीसिया केर नाँव में लिखाथी, जे कुरिन्थुस शहर में अहे, जहाँ केर बिसवासीमन के परमेश्‍वर यीशु मसीह केर द्वारा अपन आदमी केर रूप में अलग काइर हे आउर अपन पवितर आदमी बनेक लगिन बोलाय हे, जे नियर कि परमेश्‍वर उ सोउबमन के चुइन हे, जेमन सोउब ठाँव में हमर प्रभु यीशु मसीह केर सेवा करैना, काले कि उ हमरे सोउब केर प्रभु हेके। मोंय प्रार्थना करोना कि परमेश्‍वर हमर आबा आउर प्रभु यीशु मसीह तोहरे उपरे किरपा करोक आउर शांति देवोक। मोंय तोहर बारे में अपन परमेश्‍वर के सोउब बेरा धन्यबाद देवोना, काले कि यीशु मसीह में एक होवेक केर चलते परमेश्‍वर अपन किरपा से तोहरेमन के ढेइर आशीषमन के देई हे। यीशु मसीह में एक होवेक केर चलते परमेश्‍वर तोहरेमन के जे कोनों जरुरत अहे, सोउब कुछ भरपूरी से देई हे। उ दोसरमन के अपन संदेश के बताएक लगिन तोहरेमन के पवितर आत्मा केर सोउब रकम केर बरदानमन के आउर अपन बचन केर बारे में गेयान के देई हे। जेकर से परमेश्‍वर तोहरेमन में इ साबित काइर हे कि यीशु मसीह केर बारे में जे संदेश अहे उ सच्चा हेके। इकर चलते एखन जब तोहरेमन हमर प्रभु यीशु मसीह के इ धरती में घूइर आवेक केर आसरा देखाथा, तो तोहरे ठिना सोउब आत्मिक बरदान अहे, जेकर तोहरेमन के जरुरत अहे। परमेश्‍वर तोहरेमन के आखरी तक बिसवास में मजबूत हों करी, ताकि तोहरेमन उ दिन तक निरदोष रहबा, जब हमर प्रभु यीशु मसीह इ धरती में फिन से घूइर आवी। परमेश्‍वर सच्चा अहे, जे तोहरेमन के अपन बेटा हमर प्रभु यीशु मसीह केर संगति में बोलाय हे। हे बिसवासी भाईमन, मोंय हमर प्रभु यीशु मसीह केर अधिकार से तोहरेमन से हाँथ जोइर के अरजी करोना कि तोहरे सोउब एक दोसर केर गोइठ के माना, आउर तोहर माझे फूट ना होवोक मगर एक हें मन आउर एक हें बिचार काइर के मिल के रहा। काले कि हे मोर बिसवासी भाईमन, खलोय केर परिवार केर आदमीमन, मोके तोहर बारे में बताय हैं कि तोहरेमन में झगरा होवाथे। मोर कहेक केर मतलब इ हेके कि तोहर में से केऊ तो खुद के “पौलुस केर,” केऊ “अपुल्लोस केर,” केऊ “पतरस केर,” आउर केऊ “मसीह केर” कहेला। “जे तोहरेमन कराथा इ ठीक नखे,” का तोहरेमन लगिन इ ठीक अहे कि मसीह के एइसन बाँइट देबा? का मोंय पौलुस तोहरे केर पाप केर दाम चुकाएक लगिन क्रूस उपरे जान देई हों? या का तोहरे मोर चेला बनेक लगिन बपतिस्मा जल संस्कार लेई हा? मोंय परमेश्‍वर के धन्यबाद देवोना कि क्रिस्पुस आउर गयुस के छोइड़ आउर केखो बपतिस्मा जल संस्कार नी देई हों। कहीं केऊ एइसन ना कहोक कि मोके तोर चेला बनेक लगिन बपतिस्मा जल संस्कार मिल हे। अरे हाँ, एखन मोंय याइद करलों, मोंय स्तिफनास केर परिवार के हों बपतिस्मा जल संस्कार देई हों, इमन के छोइड़ मोंय नी जानोना कि केखो आउर बपतिस्मा जल संस्कार देई हों। काले कि मसीह मोके बपतिस्मा जल संस्कार देवेक लगिन निहीं, बल्कि शुभ समाचार सुनाएक लगिन भेइज हे, आउर जब मोंय शुभ समाचार परचार करलों, तो परचार करेक में अपन हुनर केर इस्तेमाल नी करलों, निहीं तो आदमीमन मोर हुनर केर चलते मोर उपरे बिसवास करतैं, आउर क्रूस उपरे यीशु मसीह केर माउत केर शक्ति के नी जानतैं। काले कि जे आदमीमन दंड पावेक लगिन परमेश्‍वर से अलग होई जाय हैं, उमन सोचैना कि क्रूस उपरे यीशु मसीह केर माउत बेकार अहे, मगर हमरेमन लगिन जेमन उ संदेश उपरे बिसवास काइर ही, इ परमेश्‍वर केर शक्ति से आदमीमन के बचाएक लगिन परमेश्‍वर केर डहर हेके। काले कि पवितर किताब में लिखल अहे परमेश्‍वर कहेला, “मोंय देखामूँ कि आदमीमन केर बिचारमन जेके दुनिया केर आदमीमन सोचैना कि गेयान हेके, उ सचमुच में बेकार आउर मूरख बिचारमन हेके, मोंय साबित करमूँ कि उमन सचमुच में गेयानवान ना लगैं।” तो हमरे गेयानवान आदमीमन केर बारे में का कहब? हमरे यहूदी नियम केर जानकार आदमीमन केर बारे में का कहब? हमरे इ दुनिया केर आदमीमन केर बारे में का कहब जेमन गोठियाएक में चलाँक अहैं? परमेश्‍वर उ सोउबमन के मूरख बनाय देई हे आउर उमन केर गेयान के बेकार काइर देई हे। काले कि परमेश्‍वर अपन गेयान से पहिलेहें देइख हे कि दुनिया केर आदमीमन उके अपन गेयान से कहियो नी जानबैं, परमेश्‍वर बिसवास करेक वालामन के बचाएक लगिन हमर शुभ समाचार परचार के इस्तेमाल करलक, जबकि थोरेक आदमीमन इके बेकार गोइठ मतलब मूरख आदमी केर गोइठ समझैना। इ शुभ समाचार केर गोइठ यहूदीमन लगिन मूरख आदमी केर गोइठ नियर लगेला, काले कि उमन इके सच्चा साबित करेक लगिन स्वरग से चमत्कार केर चिन्हा देखेक चाहैना, आउर यूनानी आदमीमन हों गेयान के खोजैना। मगर हमरे तो परचार करिला कि यीशु मसीह हमरे के पापमन से छोड़ाएक लगिन क्रूस उपरे अपन जान देलक, जे यहूदीमन केर भीरे ठोकर केर कारण, आउर परजाइत आदमीमन केर भीरे मूरख आदमी केर गोइठ हेके। मगर जेमन के परमेश्‍वर अपन आदमी बनेक लगिन बोलाय हे, यहूदीमन, चाहे यूनानी आदमीमन, उमन केर भीरे एहे मसीह परमेश्‍वर केर शक्ति आउर परमेश्‍वर केर गेयान हेके। काले कि परमेश्‍वर केर मूरख योजना में, गेयानवान आदमी केर योजना से बगरा गेयान अहे, आउर परमेश्‍वर केर कमजोरी में, ताकतवर आदमी केर ताकत से बगरा ताकत अहे। हे बिसवासी भाईमन, जब परमेश्‍वर तोहरे के यीशु मसीह केर पिछे चलेक लगिन बोलाय रहे, तब तोहरे केर दशा कइसन रहे सेके सोचा। आदमीमन केर बिचार से तोहर में से ढेइरमन गेयानवान नी रहा, आउर ना ढेइरमन अगुवा रहा, आउर तोहर में से ढेइरमन केर पुरखामन खास नी रहैं। मगर परमेश्‍वर गेयानवानमन के लाजिम खियाएक लगिन दुनिया केर अगेयानीमन के चुइन लेई हे, आउर परमेश्‍वर शक्तिशालीमन के लाजिम खियाएक लगिन दुनिया केर देखेक में कमजोरमन के चुइन लेई हे। आउर परमेश्‍वर दुनिया केर नीचमन के, तुच्छमन के, आउर जेमन कोनोवें ना लगैं सेमन के चुइन लेई हे, ताकि जेमन अपने के खास समझैना उमन के बेकार ठहराओक। परमेश्‍वर एइसन करलक ताकि केऊ आदमी परमेश्‍वर केर भीरे घमंड करेक नी पारबैं। मगर परमेश्‍वर तोहरे के यीशु मसीह में एक काइर हे, जेकर से उ हमरे के अपन गेयान देई हे। आउर परमेश्‍वर हमरे के अपन देखेक में धरमी हों बनायला, यीशु मसीह केर चलते हमरे पवितर बनाल जाय ही आउर यीशु मसीह हमरे के पाप से छुटकारा देई हे। काले कि मसीह हमरे केर सोउब कुछ हेके, से लगिन जइसन पवितर किताब में लिखल अहे तइसनेहें करा, परमेश्‍वर हमर लगिन जे काम काइर हे उकरे उपरे घमंड करा। हे बिसवासी भाईमन, जब मोंय तोहरे के परमेश्‍वर केर बारे में संदेश के सुनालों, तो मोंय ढेइर पढ़ल-लिखल नियर नी गोठियालों आउर ना हें अपन गेयान के देखालों। काले कि मोंय इ ठाइन लेई रहों कि तोहर माझे सिरिफ यीशु मसीह केर बारे में आउर क्रूस उपरे उकर माउत केर बारे में हें गोठियामूँ। आउर मोंय अपन कमजोरी आउर डार केर संगे, आउर ढेइर थरथराते तोहर संगे रहलों। आउर मोर सिखाएक आउर मोर परचार में चतूर आउर लुभवाएक वाला गोइठमन नी रहे, मगर पवितर आत्मा तोहरे के शक्तिशाली रीति से देखालक कि जे संदेश मोंय तोहरे के बताय हों उ सच्चा हेके। इ लगिन कि तोहर बिसवास आदमीमन केर गेयान उपरे निहीं, मगर परमेश्‍वर केर शक्ति उपरे टिकल रहोक। फिन भी जब मोंय बिसवास में मजबूत बिसवासीमन ठिना रहोना, तो गेयान केर गोइठमन के गोठियावना, मगर इ दुनिया केर आदमीमन केर गेयान आउर इ दुनिया केर हाकिममन केर गेयान निहीं, जेमन नाश होवेक वाला अहैं। मगर जे गेयान केर गोइठमन के हमरे गोठियाइला उ परमेश्‍वर केर लुकल गेयान हेके, इके एखन तक केऊ नी बुझलैं। इकर से पहिले कि परमेश्‍वर धरती के बनालक, उ पहिलेहें फैसला काइर चुइक रहे कि उकर गेयान से हमरे के महिमा मिली। परमेश्‍वर केर इ योजना के दुनिया केर हाकिममन में से केऊ नी बुझलैं, काले कि अगर बुझतैं तो महिमा से भरल प्रभु के क्रूस उपरे नी चढ़ातैं। जइसन कि पवितर किताब में लिखल अहे, “जे कहियो आँइख से दिस्तार नी देलक, आउर जेके केऊ कहियो नी सुनलैं आउर केऊ कहियो नी बुझलैं, ओहे बेस चीजमन के परमेश्‍वर अपन से प्रेम करइयामन लगिन तेयार काइर हे।” परमेश्‍वर इ गोइठमन के, हमरे यीशु मसीह केर चुनल खास चेलामन उपरे अपन पवितर आत्मा बटले दिस्तार काइर हे, काले कि पवितर आत्मा लगिन कोनोवें गोइठमन लुकल नखे, उ सोउब कुछ के जाँचेला हिंयाँ तक कि परमेश्‍वर केर मनसा के हों जाँचेला, जेके आदमीमन एखन तक नी जानैना। केऊ आदमी अपन मन में का सोचेला उके दोसर आदमी नी जानेक पारी सिरिफ सोचेक वाला हें जानेला, तइसनेहें परमेश्‍वर केर बिचार के केऊ नी जानेला सिरिफ परमेश्‍वर केर आत्मा जानेला। इ दुनिया केर दोसर आदमीमन का सोचैना उके हमरे नी बुझिला, मगर परमेश्‍वर हमरे के अपन आत्मा देई हे जेकर से हमरे उ गोइठमन के जानेक पारब, जेके परमेश्‍वर हमरे के देई हे। से लगिन हमरे इ गोइठमन के दोसर आदमीमन के बताइला, मगर आदमीमन केर सिखाल गेयान केर गोइठमन नियर निहीं, मगर परमेश्‍वर केर आत्मा केर सिखाल गोइठमन के परमेश्‍वर केर आत्मा से मिलाय-मिलाय के बताइला। मगर काया केर मोताबिक जियेक वाला आदमी परमेश्‍वर केर आत्मा केर सच्चाई के ग्रहण नी करेला, काले कि उकर नजइर में इ सोउब बेकार गोइठमन हेके। उ इ गोइठमन के नी बुझेक पारी, काले कि इ गोइठमन के सिरिफ ओहेमन बुझेक पारबैं, जेमन में परमेश्‍वर केर आत्मा रहेला। जे आदमी परमेश्‍वर केर आत्मा के पाय हे ओहे उ सोउब गोइठमन के बुझेला, जेके परमेश्‍वर केर आत्मा सिखायला, मगर जे आदमी ठिना परमेश्‍वर केर आत्मा नखे, उ, जेकर ठिना परमेश्‍वर केर आत्मा अहे, उकर बिचारमन के बुझेक नी पारी। इ सच हेके काले कि पवितर किताब में लिखल अहे, “जे परमेश्‍वर केर मन में अहे उके केऊ नी जानैना, आउर केऊ उके सिखाएक नी पारैना।” मगर हमरे बिसवासीमन बुझिला कि मसीह केर मन में का अहे। हे बिसवासी भाईमन, जब मोंय तोहरेमन केर संगे रहों तब गहरा शिक्षा के सिखाएक नी पारलों, जइसन कि मोके आत्मिक आदमीमन के सिखाएक रहे। मगर मोंय एइसन गोठियालों जइसन कि तोहरे इ दुनिया केर हेका आउर मसीह में नवाँ बिसवासी हेका। उ बेरा मोंय तोहरेमन के परमेश्‍वर केर संदेश में से शुरुवात केर शिक्षा के सिखालों, जइसन एगो आदमी छउवा के पियेक लगिन दूध देवेला। मोंय परमेश्‍वर केर बचन से गहरा सच्चाईमन के नी सिखालों जे ठोस आहार नियर अहे, काले कि तोहरेमन इकर ले तेयार नी रहा। काले कि तोहरेमन एखन तक पाप से भरल इच्छामन केर चलाएक से चलाला, इ लगिन कि जब तोहरेमन में हिसिंगा आउर झगरा अहे, तो का इ सबूत ना लगे कि तोहरेमन पाप से भरल इच्छामन केर चलाएक से चलाला? का तोहरेमन इ दुनिया केर आदमीमन नियर नी चलाला? काले कि जब एगो कहेला, “मोंय पौलुस केर हेकों,” आउर दूसरा, “मोंय अपुल्लोस केर हेकों,” तो का तोहरेमन इ दुनिया केर आदमीमन नियर नी चलाला? अपुल्लोस के हेके? आउर पौलुस के हेके? उमन सिरिफ परमेश्‍वर केर सेवक हेकैं, जेमन केर द्वारा तोहरेमन मसीह में बिसवास करला, हमर में से हरेक झन उ काम के करली जेके प्रभु हमरे के करेक लगिन देई रहे। अगर मोंय तोहरे के एगो बारी से जोड़ी करमूँ, तो मोंय गाँछ रोपलों, अपुल्लोस पटालक, मगर परमेश्‍वर बढ़ालक। से लगिन जे रोपेला आउर जे पटायला उमन खास ना लगैं, मगर परमेश्‍वर जे बढ़ाएक वाला अहे ओहे खास हेके। मोंय तोहरे के शुभ समाचार परचार करलों आउर परमेश्‍वर केर बचन के सिखाएक शुरु करलों, आउर अपुल्लोस तोहरे के लगातार सिखाते रहलक, मगर हमरे दुयो केर एके मकसद अहे, आउर हमरे अपनेहें मेहनइत केर मोताबिक परमेश्‍वर से अपनेहें मजूरी पावब। काले कि हमरे परमेश्‍वर केर संगे काम करेक वाला हेकी, आउर तोहरेमन एगो खेत नियर अहा जे परमेश्‍वर केर हेके। जे काम परमेश्‍वर मोके करेक लगिन देई हे उके मोंय बुद्धिमानी से करलों, मोंय तोहरे केर शहर में शुभ समाचार केर परचार करलों, आउर पहिले तोहर में से आदमीमन के यीशु उपरे बिसवास करेक में मदइत करलों। इकर पाछे जे काम के मोंय करलों उके दोसर सेवकमन आगे बढ़ालैं, मगर हमर में से हरेक सेवक के धेयान से बिचार करेक चाही कि परमेश्‍वर केर काम कइसन करेक अहे। छुटकारा पावेक लगिन केऊ तोहरे के नवाँ डहर केर बारे में ना सिखाओके, काले कि छुटकारा पावेक लगिन एके गो डहर अहे जेकर बारे में मोंय तोहरे के पहिलेहें बताय देई हों, परमेश्‍वर हमरे के यीशु मसीह केर द्वारा छुटकारा देवेला। अगर मसीह केर सेवकमन उ शिक्षा के सिखायना जेके परमेश्‍वर उमन के देई हे, तब उमन उ राज मिस्त्रीमन नियर अहैं, जेमन नेव में बेस किसिम केर चीजमन के देई के घर बनायना, जइसन कि सोना, चाँदी आउर किमती पखनामन। मगर, अगर उमन झूठा शिक्षा के सिखायना, तब उमन एइसन राज मिस्त्रीमन नियर अहैं, जेमन कमजोर चीजमन के नेव में देवैना, जइसन कि काठ, सुखल घास आउर पोरा। मगर न्याय केर दिन जब मसीह फिन से घूइर आवी, तब आइग हरेक झन केर काम केर गुण के देखाई, अगर केकरो काम केर कोनों कीमत अहे तो आइग उके देखाई, अगर केकरो काम नी पोड़ी तो उ मजूरी पावी। मगर जब केकरो काम केर बारे में मसीह कही कि उकर काम बेस नखे, तो उ सेवक मसीह से कोनों इनाम नी पावी, फिन भी उ जुग-जुग केर जिंदगी के नी गवाँई, जेके परमेश्‍वर उके देई हे। तोहरेमन पक्का जानाला कि तोहरे खुद परमेश्‍वर केर मंदिर हेका, आउर परमेश्‍वर केर आत्मा तोहर में बास करेला। तोहरेमन जे कि परमेश्‍वर केर मंदिर नियर अहा, अगर केऊ तोहरेमन केर माझे आपस में फूट करुवायला, तो परमेश्‍वर उके कड़ा सजा देवी। खुद के धोखा ना देवा, अगर तोहर में से केऊ इ दुनिया केर आदमीमन केर देखेक में खुद के गेयानी समझेला, तो उके खुद इ दुनिया केर आदमीमन केर देखेक में मूरख बनेक चाही, ताकि उ परमेश्‍वर केर देखेक में सचमुच गेयानी बनेक पारी। काले कि इ दुनिया केर आदमीमन जे गोइठमन के गेयान समझैना, परमेश्‍वर केर भीरे मूरखता हेके, जइसन पवितर किताब में लिखल अहे, “थोरेक आदमीमन सोचैना कि हमरे गेयानी अही, मगर परमेश्‍वर उमन के हरुवाएक लगिन अपन गेयान केर इस्तेमाल करेला।” आउर पवितर किताब में फिन लिखल अहे, “प्रभु गेयानीमन केर सोच बिचारमन के जानेला कि उ बेकार हेके।” आउर तोहरे मसीह केर अधीन अहा, आउर मसीह परमेश्‍वर केर अधीन अहे। हमरेमन के मसीह केर शुभ समाचार केर सच्चाई आउर परमेश्‍वर केर भेदमन के खोइल के बताएक लगिन जिम्मा सोंपल जाय हे, जे लुकल अहे। आउर जेके इ काम करेक केर जिम्मा देवल जाय हे, उके इ काम के करेक लगिन बिसवास लायक होवेक चाही। मगर मोंय इ गोइठ केर परवाह नी करोना कि तोहरेमन चाहे केऊ न्यायी मोके परखी, मगर मोंय खुद हें अपने के नी परखोना। काले कि मोर बिवेक मोके कोनों गोइठ में दोषी नी ठहरायला, मगर इकर से मोंय निरदोष नी ठहरोना, काले कि मोर न्याय करेक वाला प्रभु हेके। से लगिन जब तक प्रभु घूइर नी आवी केकरो न्याय ना करा, ओहे तो आदमीमन केर लुकल बिचारमन के सफा-सफा बताय देवी जेके केऊ नी जानैना, प्रभु आदमीमन केर मकसद के खोइल देवी, जे उमन केर हिरदय में अहे, तब परमेश्‍वर बटले हरेक झन केर बड़ाई होवी। हे बिसवासी भाईमन, मोंय अपुल्लोस आउर खुद केर बारे में बताय हों, ताकि तोहरेमन हमरे के एगो नमूना केर रूप में बुझबा, आउर इकर मतलब हों बुझबा जे कहेला, “पवितर किताब में जे लिखल अहे उकर से बाहरे ना जावा।” इ बेस ना लगे, अगर तोहरेमन एगो केर आदर कराला आउर दोसर केर निरादर। केऊ तोहरे के दोसर से बगरा खास नी बनाय हे, काले कि उ सोउब कुछ जे तोहरे ठिना अहे, परमेश्‍वर बटले देवल जाय हे, से लगिन तोहरेमन के घमंड करेक केर अधिकार नखे। तोहरे के एइसन लगेला कि तोहरे ठिना सोउब कुछ अहे जेकर तोहरे के आत्मिक रीति से जरुरत अहे। तोहरे सोचाला कि तोहरेमन ठिना सोउब खास बरदानमन पहिलेहें से अहे, जेके पवितर आत्मा आदमीमन के देवेला, तोहरे सोचाला कि तोहरेमन पहिलेहें राजा नियर हमरे केर बिना राइज करेक शुरु काइर देई हा। मोंय खुश होतों अगर तोहरे सचमुच में राजा नियर राइज करेक शुरु काइर रहता, ताकि हमरे हों तोहर संगे राइज करती। मोके एइसन लगेला कि परमेश्‍वर हमरे चुनल खास चेलामन के माउत केर सजा पावल आदमीमन नियर सोउब केर पिछे खड़ा काइर हे, काले कि हमरे दुनिया आउर स्वरगदूतमन आउर आदमीमन लगिन एगो तमाशा बाइन जाय ही। आदमीमन हमरे के मूरख समझैना काले कि हमरे मसीह केर परचार करिला, मगर तोहरेमन भूल से एइसन समझाला कि तोहरे गेयानी मसीहीमन हेका। आदमीमन हमरे के समझैना कि हमरे कमजोर अही, मगर तोहरेमन खुद के बलवान समझाला। आदमीमन तोहरे केर आदर करैना मगर हमरे केर अपमान करैना। हमरे आइज तक भूखल-पियासल आउर पुरना फटल लुगा के पिंधते आही, हमरे घूँसा खाइला आउर हमरे केर रहेक लगिन घर नखे। हमरे अपनेहें हाँथमन से काम काइर के मेहनइत करिला। आदमीमन हमरे के बुरा कहैना मगर हमरे उमन के आशीष देवीला, उमन हमरे के सतायना मगर हमरे सहिला। उमन हमरे के बदनाम करैना, मगर हमरे उमन से नरम से गोठियाइला, एखनोहों तक आदमीमन हमरे के इ दुनिया केर कूड़ा कचरा आउर बेकार समझैना। मोंय तोहरेमन के लजुवाएक लगिन इ गोइठमन के नी लिखोना, मगर मोर मकसद तोहरेमन के नियम केर पालन करुवाएक अहे, काले कि तोहरेमन मोर छउवामन नियर अहा जेमन से मोंय सचमुच में प्रेम करोना। काले कि अगर तोहरेमन केर, मसीह केर पिछे चलेक में अगुवाई करेक वालामन हजारो होबैं, फिन भी मोंय एकले तोहरे केर आबा नियर अहों, काले कि मोंय हें उ पहिला आदमी हेकों जे तोहरेमन लगिन शुभ समाचार के लानलों, जेकर से तोहरेमन मसीह यीशु में बिसवास करला। से लगिन मोंय तोहर से बिनती करोना कि मोर जइसन चाल चला। इ लगिन मोंय तीमुथियुस के जे प्रभु में मोर दुलार आउर बिसवास लाएक बेटा हेके, तोहरे ठिना भेइज हों, उ तोहरेमन के यीशु मसीह में मोर ब्यवहार के याइद करवाई, जेके मोंय हर जगा आउर हरेक कलीसिया में उपदेस देवोना। तोहर में से थोरेक आदमीमन एइसन सोचैना कि मोंय तोहरे ठिना नी आमूँ, से लगिन उमन घमंडी बाइन गेलैं। मगर प्रभु केर इच्छा होवी तो मोंय तोहर ठिना जल्दी हें आमूँ, आउर ना सिरिफ उ घमंडीमन कइसन गोठियायना सेके मगर उमन केर शक्ति के हों जाइन लेमूँ। काले कि परमेश्‍वर केर राइज गोइठमन में निहीं, मगर शक्ति में अहे। जब मोंय तोहरे ठिना पोहोंचमूँ, तो तोहरे का चाहाला कि मोंय करमूँ? अगर तोहरे एखनो तक बुरा डहर में चलेक नी छोइड़ हा, तो मोंय तोहरे के ढेइर गरियामूँ, मगर, अगर तोहरेमन बुरा डहर में चलेक छोइड़ देई हा तो मोंय तोहरे से प्रेम आउर नरम भाव से ब्यवहार करमूँ। मोंय आदमीमन से तोहर बारे में भयानक गोइठमन के बताते सुइन हों, जे तोहरे केर माझे होवाथे कि कलीसिया में तोहर में से थोरेक आदमीमन ब्यभिचार करैना, बल्कि एइसन ब्यभिचार जइसन अबिसवासीमन हों नी करैना कि एगो आदमी अपन सौतेली आयो से ब्यभिचार करेला। तोहरेमन के इकर बारे में दुःख आउर शोक से भाइर जाएक चाही आउर उ आदमी के जे एइसन काम करलक उके कलीसिया से निकलाय देवेक चाही, मगर तोहरेमन घमंड कराला। जबकि मोंय तोहरे से दूर अहों, फिन भी इ एइसन अहे जइसन कि हूवाँ मोंय तोहरे से भेंट कराथों आउर जे उ काम काइर हे उकर उपरे न्याय के लानाथों। तोहरे के इ करेक केर जरुरत अहे, बिसवासी केर रूप में एक संग जमा होवा, इ जानते हुए कि तोहरे ठिना सचमुच हमर प्रभु यीशु मसीह केर अधिकार अहे, आउर इ एइसन अहे कि मोंय हों अपन मन में हूवाँ अहों, आउर प्रभु यीशु मसीह केर शक्ति केर द्वारा जे आदमी एइसन पापी ब्यवहार करेला, उके कलीसिया से निकलाय देवा आउर शैतान केर हाँथ में सोंइप देवा। ताकि उ अपन पाप करेक छोइड़ देवी, अगर उ आदमी पाप करेक छोइड़ देवेला, तो उ सचमुच में उ दिन बाइच जाई जब प्रभु फैसला करी। तोहरेमन के घमंड करेक नी चाही, का तोहरे नी जानाला कि थोरे सुन खमीर पूरा गूंधल आटा के खमीर बनाय देवेला। उ पापी आदमी के कहलक कि उ तोहरे केर झूँड़ केर हिस्सा नी होवेक पारी, तब तोहरे बिसवासीमन केर एगो एइसन झूँड़ होवी जेमन नवाँ आउर शुद्ध रिश्ता आउर बेगर पाप केर असर से, एक दोसर से मिलल रहबैं, काले कि परमेश्‍वर पहिलेहें तोहरे केर पाप के क्षमा काइर हे, आउर तोहरे के पवितर बनाय हे। तोहरे के शुद्ध रीति से जिंदगी जियेक अहे, काले कि मसीह बलिदान केर रूप में हमरे के पापमन से आजाद करेक लगिन मोइर हे। इ हमरे के उ मेमना केर याइद करुवायला जेके इसराइलीमन ढेइर पहिले फसह परब केर दिन मिसर में बलि काइर रहैं। से लगिन मोंय कहोना, हमरे के हमेशा परमेश्‍वर केर पवितर आदमी नियर ब्यवहार करेक चाही। हमरे के बुरा रीति से नी जियेक चाही जइसन हमरे पहिले जीयत रही, हमरे मसीह में बिसवास करिला, से लगिन हमरे के दुष्ट आउर बुरा काममन के छोड़ेक चाही जेमन के हमरे करत रही। हमरे के परमेश्‍वर केर आगयामन के मानेक अहे ना कि बुरा काममन के करेक अहे, इकरे चलते हमरे के हमेशा सावधान आउर बिसवास लायक रहेक अहे। मोंय मोर अपन पहिले केर चिट्ठी में तोहरेमन के लीख हों कि ब्यभिचारीमन केर संगति ना करबा। इ निहीं कि तोहरेमन बिलकुल इ दुनिया केर ब्यभिचारीमन, या लोभीमन, या दोसर के ठाकेक वालामन, या मूर्ति पूजा करेक वालामन से संगति ना करबा, काले कि एइसन करेक से तो तोहरेमन के इ दुनिया के छोइड़ देवेक पड़तक। मोर कहेक इ हेके कि अगर केऊ खुद के एगो बिसवासी कहेला आउर ब्यभिचार, लोभ आउर मूर्ति पूजा करेला, आउर मतवारी करेक वाला आउर ठाकेक वाला हों हेके तो उकर से संगति ना करबा, बल्कि एइसन आदमी से बाइठ के खाबो ना करबा। काले कि जेमन बिसवासी ना लगैं उमन के दोषी ठहराएक हमरे केर जिम्मेदारी ना लगे, मगर जेमन हमरे केर कलीसिया केर हिस्सा हेकैं उमन के हमरे के जरूर चेताएक अहे। कलीसिया से बाहरे केर आदमी केर फैसला परमेश्‍वर करेला, मगर जइसन कि पवितर किताब में लिखल अहे, बुरा काम करेक वाला आदमी के कलीसिया में संगति करेक ना देवा। अगर तोहर में से केकरो केऊ दोसर बिसवासी से झगरा होवी, तो तोहरे के फैसला करेक लगिन अबिसवासीमन ठिना नी जाएक चाही, तोहरे के अपन झगरा केर फैसला करेक लगिन कलीसिया केर दोसर बिसवासीमन से पूछेक चाही। तोहरेमन पक्का जानाला कि आवेक वाला समय में पवितर आदमीमन दुनिया केर आदमीमन केर फैसला करबैं, इ लगिन जब तोहरे दुनिया केर आदमीमन केर फैसला करेक पाराला, तो तोहरेमन अपन छोटका-छोटका झगरामन केर हों फैसला करेक केर लाएक अहा। तोहरेमन जानाला कि आवेक वाला समय में हमरे स्वरग दूतमन केर फैसला करब, तो हमरे इ जिंदगी केर छोटका-छोटका झगरामन केर फैसला जरूर हें करेक पारब। अगर तोहरेमन में एइसन झगरा होई जाई, तो तोहरे के फैसला करेक लगिन ओइसन आदमीमन ठिना नी जाएक चाही जेमन कलीसिया में आदर केर लाएक नखैं। तोहरेमन के लाज होवेक चाही, तोहरे में कम से कम एगो एइसन बुद्धिमान आदमी तो पक्का होवी, जे बिसवासीमन केर माझे केर झगरा के फैसला करेक पारी। मगर तोहर में से एगो भाई फैसला लगिन दोसर भाई उपरे कछैरी में केस करेला, ओहो अबिसवासीमन केर सामने। जब तोहर में से एगो बिसवासी दोसर बिसवासी के फैसला लगिन कछैरी में लेगेला, तो तोहरे एक दोसर केर संगे बिसवासी जिंदगी जियेक से हाइर गेला, तोहरे लगिन इ भला होतक कि अगर केऊ बिसवासी तोहर बुराई करेला तो उके करेक देवा। अगर केऊ बिसवासी धोखा देई के तोहर चीजमन के लेई लेवेला तो उके लेवेक देवा। मगर तोहरेमन तो अन्याय कराला आउर हानि पोंहचाला, ओहो बिसवासी भाईमन के। तोहरेमन पक्का जानाला कि अन्यायी आदमीमन परमेश्‍वर केर राइज में जाएक नी पारबैं, धोखा ना खावा, ना बेश्या ठिना जाएक वाला आदमी, ना मूर्ति पूजा करेक वाला, ना दोसर केर जनाना संगे रिश्ता बनाएक वाला, ना लुच्चा, ना दोसर केर मरद संगे रिश्ता बनाएक वाला, ना चोर, ना लोभी, ना मतवार, ना गरियाएक वाला, ना धोखाबाज आदमी परमेश्‍वर केर राइज केर हकदार होवी। आउर तोहर में से थोरेक आदमीमन पहिले एइसनेहें रहैं, मगर अब तोहरेमन केर पापमन धोवाय गेलक, आउर अब तोहरे परमेश्‍वर लगिन अलग होई गेला, तोहरे परमेश्‍वर केर देखेक में धरमी ठहराल गेला काले कि प्रभु यीशु मसीह आउर परमेश्‍वर केर आत्मा तोहर लगिन एइसन काइर हे। तोहर में से केऊ कहेक पारेला, सोउब चीजमन के करेक केर मोके अनुमति मिल हे काले कि मोंय मसीह केर हेकों, मगर सोउब चीजमन फायदा केर ना लगे, सोउब चीजमन के करेक केर मोके अनुमति मिल हे, मगर मोंय नी चाहोना कि कोनों चीज मोर उपरे कब्जा करोक। तोहर में से केऊ कहेक पारेला, खाएक केर चीजमन हमरे केर कायामन लगिन अहे, आउर कायामन खाएक केर चीजमन लगिन, इ ठीक अहे मगर परमेश्‍वर आवेक वाला समय में कायामन के आउर खाएक केर चीजमन के दुइयो के नाश करी। काया ब्यभिचार लगिन निहीं, बल्कि हमरे केर काया प्रभु केर सेवा करेक लगिन प्रभु केर हेके। इकर अलावा, हमरे केर काया खास अहे, काले कि जइसन परमेश्‍वर अपन शक्ति केर इस्तेमाल काइर के प्रभु यीशु के मोरलमन में से जियाय हे, तइसनेहें उ हमरे के हों मोरलमन में से जियाई। तोहरेमन पक्का जानाला कि तोहर काया मसीह केर अंग हेके, तो का एगो आदमी अपन काया के लेई के, जे मसीह केर हेके बेश्या से संगति करी? निहीं बिलकुल निहीं। तोहरेमन के जानेक चाही कि जे केऊ बेश्या से संगति करेला, तो उ बेश्या संगे एगो काया होई जायला। काले कि पवितर किताब में लिखल अहे, “उमन दुयो एगो काया होबैं।” आउर जे केऊ प्रभु केर संगे संगति में रहेला, तो उकर आत्मा आउर प्रभु केर आत्मा एक होई जायला। ब्यभिचार से बिलकुल अलग रहा। जेतना आउर पाप आदमी करेला, उ काया केर बाहरे अहे, मगर ब्यभिचार करेक वाला अपनेहें काया केर बिरोध में पाप करेला। तोहरेमन पक्का जानाला कि तोहर काया पवितर आत्मा केर मंदिर हेके, आउर पवितर आत्मा जे तोहरे के परमेश्‍वर बटले मिल हे, उ तोहर में बसल अहे, आउर तोहरे परमेश्‍वर केर हेका। परमेश्‍वर तोहरे के दाम देई के कीन लेई हे, से लगिन अपन काया से परमेश्‍वर केर महिमा करा। अब मोंय तोहरे केर चिट्ठी में लीख के पुछल सवालमन केर जबाब देमूँ, “का सादी नी करेक हमरेमन लगिन बेस हेके?” मगर हमरेमन के ब्यभिचार केर पाप में गिरेक केर परीक्षा में पड़ेक ढेइर सहज अहे, से लगिन हरेक मरद के सादी करेक आउर अपन जनाना लगिन बिसवास लायक बनल रहेक अहे, आउर हरेक जनाना के हों सादी करेक आउर अपन पति लगिन बिसवास लायक बनल रहेक अहे। पति अपन जनाना केर हक के पूरा करोक, आउर तइसनेहें जनाना हों अपन पति केर। जनाना के अपन काया उपरे अधिकार नखे मगर उकर पति के अधिकार अहे, तइसनेहें पति के हों अपन काया उपरे अधिकार नखे मगर उकर जनाना के अहे। तोहरेमन एक दोसर से अलग ना रहा, मगर सिरिफ थोरेक समय ले प्रार्थना करेक लगिन एक दोसर केर मरजी से अलग रहबा, इकर पाछे फिन एके संगे रहबा जइसन पति आउर पत्नी के रहेक चाही, ताकि शैतान तोहरे के ब्यभिचार में गिराएक लगिन परीक्षा ना करोक, निहीं तो तोहरेमन खुद के काबू करेक नी पारबा। मगर मोंय जे इ कहोना उ अनुमति हेके ना कि आगया। मोंय इ चाहोना कि जइसन मोंय पौलुस सादी नी काइर हों, तइसनेहें सोउब आदमीमन हों रहोक, मगर हरेक झन के परमेश्‍वर बटले अलग-अलग बरदान मिल हे, परमेश्‍वर केखो सादी करेक केर बरदान देई हे, तो केखो एकले रहेक केर बरदान देई हे। अब मोंय बेगर सादी करलमन आउर बिधवामन केर बारे में कहोना कि उमन लगिन बेगर सादी करले रहेक बेस हेके जइसन मोंय अहों। मगर, अगर उमन खुद के काबू करेक नी पारबैं तो सादी करोक, काले कि शांत नी होवेक वाला इच्छामन में जिंदगी बिताएक से सादी करेक भला अहे। जेमन केर सादी होई जाय हे, उमन के मोंय निहीं बल्कि प्रभु यीशु आगया देवेला कि जनाना अपन पति के ना छोड़ोक। (आउर अगर छोइड़ हों देवी तो बेगर दोसर सादी करले रहोक, या फिन अपन पति से मेल काइर लेवोक)। आउर ना पति अपन जनाना के छोड़ोक। अब इ प्रभु केर आगया ना लगे मगर मोंय तोहरे दोसर बिसवासीमन से कहाथों, जेमन अबिसवासीमन से सादी काइर हा, अगर केऊ बिसवासी भाई केर जनाना बिसवास नी करेला, मगर अपन पति केर संगे रहेक चाहेला, तो पति उके ना छोड़ोक। आउर जे जनाना केर पति बिसवास नी करेला आउर अपन जनाना केर संगे रहेक चाहेला, तो उ जनाना अपन पति के ना छोड़ोक। काले कि अगर तोंय एगो मसीही जनाना गैर मसीही पति संगे अहिस, तो तोर पति तोंय मसीही जनाना केर चलते परमेश्‍वर केर हेके। आउर अगर तोंय एगो मसीही पति एगो गैर मसीही जनाना केर संगे अहिस, तो तोर जनाना तोंय मसीही पति केर चलते परमेश्‍वर केर हेके। अगर एइसन नी होतक तो तोर छउवा पुतामन परमेश्‍वर केर नी कहातैं, मगर अब तोर छउवा पुतामन हों परमेश्‍वर केर हेकैं। अगर अबिसवासी पति चाहे पत्नी, बिसवासी पति चाहे पत्नी से अलग होवेक चाहेला, तो उमन के अलग होवेक देवा। जब एइसन होवेला तो, बिसवासी अपन सादी केर बंधन से आजाद अहे। मगर, अगर संभव होवी तो अपन अबिसवासी पति चाहे पत्नी से, सादी केर रिश्ता में बाँधल रहोक। काले कि परमेश्‍वर हमरे के एक दोसर संगे शांति से जिंदगी जियेक लगिन बोलाय हे। हे जनानामन इके जरूर याइद करा कि तोहरे केर चलते तोहर पतिमन केर जिंदगी बचेक परायला, आउर तोहरे पतिमन हों इके जरूर याइद करा कि तोहरे केर चलते तोहर जनानामन केर जिंदगी बचेक परायला। जे मोंय कइह हों उकर निचोड़ इ हेके: हरेक झन ओहे दशा में बनल रहोक जे दशा में उके परमेश्‍वर बटले बोलाल जाय रहे, आउर उ प्रभु से जे बरदान पाय हे उकरे मोताबिक जिंदगी बिताओक, मोंय सोउब कलीसियामन लगिन एहे नियम ठहराय हों। उदाहरन केर रूप में जब एगो यहूदी प्रभु यीशु में बिसवास करेला, तो उके यहूदी बनल रहेक के छोड़ेक नखे। सेहे लेखे एगो आदमी जे यहूदी ना लगे, प्रभु यीशु उपरे बिसवास करेला तो उके यहूदी बनेक लगिन खतना कराएक केर जरुरत नखे। चाहे एगो आदमी खतना करुवाहे या निहीं, इकर से कोनों फरक नखे, मगर परमेश्‍वर केर आगयामन के मानेक हें सोउब कुछ हेके। हरेक झन जे दशा में बोलाल जाय हे ओहे दशा में रहोक। अगर तोंय धांगर केर दशा में बोलाल जाय हिस, तो तोके इकर बारे में बुरा सोचेक नखे, मगर, अगर तोंय आजाद होवेक केर मोका पाविसला तो आजाद होई जा। काले कि जे धांगर केर दशा में प्रभु ठिना बोलाल जाय हे, उ आजाद आदमी नियर अहे काले कि उके प्रभु यीशु उकर पापमन से आजाद काइर हे। आउर जे आजाद करल दशा में बोलाल जाय हे, उ मसीह केर दास बनोक। परमेश्‍वर तोहरेमन के दाम देई के कीन लेई हे, आदमीमन केर धांगर ना बना मगर परमेश्‍वर केर धांगर बना। हे बिसवासी भाईमन, जे केऊ जइसन दशा में बोलाल जाय हे, उ ओहे दशा में परमेश्‍वर केर संगे रहोक। डिंड़ा कन्यामन केर बारे में प्रभु केर कोनों आगया मोके नी मिललक, मगर प्रभु अपन दया से मोके बुद्धि देई हे जे बिसवास लायक अहे, जेकर से मोंय सलहा देवोना। कठिनाईमन केर चलते, जे बिसवासीमन केर जिंदगी में आइज काइल सोउब ठिना होवाथे, मोंय तोहरेमन लगिन भला सोचाथों कि जेमन सादी नी काइर हैं उमन सादी ना करोक। अगर तोर जनाना अहे तो उकर से बनल रह, आउर अगर जनाना नखे तो सादी ना कर। मगर तोंय सादी हों करबे तो पाप ना लगे, आउर अगर डिंड़ा कन्या सादी करेला तो कोनों पाप ना लगे, मगर एइसनमन के काया केर दुःख होवी आउर मोंय बचाएक चाहोना। हे बिसवासी भाईमन, मोंय इ कहोना कि यीशु मसीह केर दोबारा घूइर आवेक से पहिले अब बगरा समय बचल नखे, सेकर चलते तोहर ठिना तोर जनाना अहे चाहे नखे ढेइर चिंता ना करा, मगर परमेश्‍वर केर सेवा करेक केर बारे में सोचते रहा। आउर जेमन काँदाला, चाहे जेमन खुश अहा, चाहे जेमन दुनिया केर चीजमन के अपन करेक लगिन किनाला, इ सोउब गोइठमन केर बारे में बगरा चिंता नी करेक चाही, काले कि इ सोउब तोहरे के परमेश्‍वर केर सेवा करेक से दूर लेई जाई। आउर इ दुनिया में जे कोनों चीजमन हमरे ठिना अहे, हमरे के उ चीजमन के ढेइर खास नी समझेक चाही, काले कि इ दुनिया केर सोउब चीजमन ढेइर दिन तक नी रही। मोंय इ चाहोना कि तोहरेमन इ जिंदगी केर इच्छामन केर बारे में चिंता ना करबा। जे आदमी सादी नी काइर हे उ प्रभु केर सेवा कइसन करेक अहे उकर चिंता करेला। मगर सादी करल आदमी इ दुनिया केर गोइठमन केर चिंता करेला कि अपन जनाना के कइसन खुश रखी। सादी करल आदमी केर मन में दूई गो बिचार रहेला, अपन जनाना के खुश करेक केर बिचार आउर प्रभु के हों खुश करेक केर बिचार। जे सादी नी काइर हे उ आदमी सिरिफ प्रभु केर सेवा करेक केर चिंता करेला। ओहे नियर बेगर सादी करल जनाना हों प्रभु केर सेवा करेक केर चिंता करेला कि काया आउर आत्मा दुयो में पवितर रहोक, मगर सादी करल जनाना दुनिया केर चिंता करेला कि अपन पति के कइसन खुश रखी। इ गोइठ के मोंय तोहरेमन केर भलाई लगिन कहोना, ना कि तोहरेमन के फँसाएक लगिन, बल्कि इ लगिन कि जइसन शोभेला तइसनेहें करल जाओक, तोहरेमन एक मन होई के प्रभु केर सेवा में लगल रहा। अगर तोहर में से केऊ अपन बेटी के डिंड़ाय छोइड़ हे, आउर अब उ सोचेला कि मोंय बेटी केर हक के माराथों, उकर सादी होवेक चाही तो उकर सादी काइर देवोक, उ अपन बेटी केर सादी करुवाय के कोनों पाप नी कराथे। मगर, अगर इ आदमी अपन मन में पक्का फैसला काइर लेई हे कि अपन बेटी के डिंड़ाय छोड़मूँ, तब उके अधिकार अहे कि जइसन फैसला उ काइर हे तइसनेहें करोक, उ परमेश्‍वर केर देखेक में भला कराथे। से लगिन जे अपन डिंड़ा कन्या केर सादी काइर देवेला उ बेस करेला, आउर जे सादी नी काइर देवेला उ आउर हें बेस करेला। जब तक केऊ जनाना केर पति जिंदा रहेला, तब तक उ उकर हें संगे रहोक, मगर जब उकर पति मोइर जाई, तो उ, प्रभु में जे बिसवास करेला उकर से सादी करेक पारेला। मगर, अगर उ जइसन अहे तइसनेहें रहेक चाही, तो मोर बिचार में आउर हें धाइन अहे, आउर मोंय समझोना कि इ सलहा मोंय परमेश्‍वर केर आत्मा बटले देवाथों। तोहरे अपन चिट्ठी में मूर्तिमन लगिन बलि चढ़ाल चीजमन केर बारे में पूइछ हा, हमरे सोउब इकर बारे में जानिला, मगर गेयान हमरे के खुद केर उपरे घमंडी बनायला, जबकि प्रेम हमरे के एक दोसर केर मदइत करेक वाला बनायला। अगर केऊ खुद के समझेला कि मोंय ढेइर जानोना, तो उ एखन तक जइसन जानेक चाही तइसन नी जानेला। मगर, अगर केऊ परमेश्‍वर से प्रेम करेला तो परमेश्‍वर उके चिन्हेला। मोंय मूर्तिमन लगिन बलि चढ़ाल चीजमन के खाएक केर बारे में पुछल सवाल केर जबाब देवेक चाहोना, हमरे जानिला कि मूर्तिमन सच्चा ईश्‍वरमन ना लगैं, आउर दुनिया में सिरिफ एके गो सच्चा परमेश्‍वर अहे। जबकि आकाश आउर धरती में ढेइर अहैं जेमन के आदमीमन ईश्‍वर कहैना, (जइसन कि ढेइर ईश्‍वर आउर ढेइर प्रभु अहैं)। फिन भी हमरेमन लगिन एके गो परमेश्‍वर अहे, मतलब आबा जेकर बटले सोउब चीजमन अहे, आउर हमरे उकरे लगिन अही, आउर एके गो प्रभु अहे, मतलब यीशु मसीह जेकर द्वारा सोउब चीजमन होलक, आउर हमरे हों उकरे द्वारा अही। हर केऊ इ गोइठमन के नी जानेला। काले कि केतनामन इ बिसवास केर साथ बाइढ़ हैं कि मूर्ति में जिंदगी अहे, से लगिन जब उमन मूर्तिमन लगिन बलि चढ़ाल चीजमन के खायना, तो अपन कमजोर सोच केर चलते परेशान होवैना। मगर खाएक केर चीज हमरे के परमेश्‍वर केर भीरे नी पोंहचाई, अगर हमरे नी खाब, तो हमर कोनों नोकसान नखे, आउर अगर खाब, तो कोनों फायदा नखे। मगर सावधान रहा, एइसन ना होवोक कि तोहर इ आजादी बिसवास में कमजोरमन लगिन कहीं पाप करेक केर कारण ना बाइन जाओक। काले कि तोहरेमन जानाला कि इ मूर्तिमन असली ईश्‍वरमन ना लगैं, से लगिन तोहरे मूर्तिमन केर मंदिर में खाएक पाराला। मगर केऊ तोहरे के हूवाँ खाते देइख लेवी जे बिसवास में कमजोर अहे, आउर मूर्तिमन लगिन बलि चढ़ाल माँस के खाएक केर साहस करी, जबकि उ सोचेला एइसन करेक बुरा हेके। इ नियर तोर गेयान केर चलते उ बिसवासी भाई जे बिसवास में कमजोर अहे जेकर लगिन मसीह जान देलक, परमेश्‍वर से अलग होई जाई। आउर जब तोहरे दोसर बिसवासी भाईमन केर बिरोध में उमन के एइसन काम करेक लगिन उसकाय के पाप कराला, जेके उमन बुरा मानैना, तो तोहरेमन मसीह केर बिरोध में पाप कराला। से लगिन, अगर मूर्तिमन के चढ़ाल चीजमन के खाएक दोसर बिसवासी भाईमन लगिन बिसवास में कमजोर होवेक केर कारण बनेला, तो मोंय ओइसन चीजमन के कहियो कोनों रीति से नी खामूँ, ताकि मोंय दोसर बिसवासी भाईमन केर बिसवास के कमजोर करेक वाला नी बनमूँ। जे कोनों मोंय करेक चाहोना उके करेक लगिन मोंय आजाद अहों। मोंय यीशु केर चुनल खास चेला हेकों, मोंय यीशु के देइख हों जे हमरे केर प्रभु हेके, प्रभु केर लगिन मोर काम केर बदली तोहरेमन फार हेका। अगर मोंय दोसरमन लगिन यीशु केर चुनल खास चेला ना लगों, फिन भी तोहर लगिन तो हेकों, काले कि मोंय उ हेकों जे तोहरेमन लगिन शुभ संदेश के लानलों, प्रभु यीशु में तोहर बिसवास पक्का बतायला कि मोंय यीशु केर चुनल खास चेला हेकों। जेमन मोके एगो यीशु केर चुनल खास चेला केर रूप में, मोर अधिकार उपरे सवाल पूछैना, उमन लगिन एहे मोर जबाब हेके। का मोंय पौलुस आउर बरनाबास के पइसा-कौड़ी से मदइत पावेक केर अधिकार नखे? जब यीशु केर दोसर खास चेलामन, आउर यीशु केर भाईमन आउर पतरस अपन-अपन जनानामन के, सेवा करेक लगिन संगे लेई के जायना, तो हमरे के हों अपन-अपन जनानामन के संगे लेई जाएक केर अधिकार अहे। मोके आउर बरनाबास के हों पइसा-कौड़ी से मदइत पावेक केर अधिकार अहे, जइसन यीशु केर दोसर खास चेलामन के अहे, आउर हमरे के अपन रोजी-रोटी लगिन कमाएक केर जरुरत नखे। केऊवे फौजी कहियो अपन तनखा खुद देई के फौज केर काम नी करेला, आउर केऊवे आदमी थोरको अंगूर बेगर खाले बारी में अंगूर नी रोपेला, केऊ भेड़ीमन केर दूध बेगर पिले, भेड़ीमन केर चरवाही नी करेला। मोंय इ गोइठमन के सिरिफ आदमीमन केर बिचार केर मोताबिक नी कहोना, मगर मूसा केर नियम हों एहे कहेला। काले कि मूसा केर नियम में इ लिखल अहे, “दाँवरी करते समय गारू केर मुँह के ना बाँधबा।” का परमेश्‍वर गारूमन केर सिरिफ चिंता करेला? निहीं। खास काइर के हमर लगिन हें लिखल जाय हे, हाँ हमर लगिन हें लिखल जाय हे, काले कि खेत जोतेक वाला कोनों आसरा से हें जोतेला, आउर दाँवरी करेक वाला हों कुछ हिस्सा पावेक केर आसरा से दाँवरी करेला। हमरे आत्मिक बिहीन तोहर माझे बुइन ही, से लगिन इ आसरा करेक ढेइर बगरा नखे कि हमरे तोहरेमन से दुनिया केर चीजमन के पावब। जब दोसरमन जेमन तोहरेमन केर माझे शुभ समाचार परचार करलैं उमन के अधिकार अहे, तो बरनाबास आउर मोके हों ओहे अधिकार अहे बल्कि उमन से बगरा अहे। हलांकि हमर में से केऊ हों इ गोइठ उपरे जोर नी देली कि तोहरे हमरेमन के उ चीजमन के देवा, जेके तोहरे से पावेक केर अधिकार हमरे के अहे। मगर इकर बदली हमरे सोउब कुछ सहिला कि हमर बटले केखो, मसीह केर बारे में शुभ समाचार उपरे बिसवास करेक से रुकावाट ना होवोक। का तोहरेमन नी जानाला कि जेमन यहूदी मनक मंदिर में सेवा करैना, उमन केर रोजी-रोटी मंदिर में से चलेला, आउर जेमन बेदी में बलिदान चढ़ायना उमन ओहे चढ़ाल चीजमन में से अपन हिस्सा लेवैना। एहे नियर प्रभु हों ठहराय हे कि जेमन आदमीमन के शुभ समाचार सुनायना, उमन केर रोजी-रोटी शुभ समाचार सुनेक वालामन बटले चलोक। मगर इ अधिकारमन में से मोंय एको गो के इस्तेमाल नी करलों। आउर मोर लगिन एइसन करल जाओक कइह के इ गोइठमन के मोंय नी लीख हों, काले कि इकर से तो मोइर जाएक हें भला अहे कि केऊ मोर इ घमंड करेक के बेकार ठहराई। अगर मोंय शुभ समाचार सुनावना तो इकर में मोके घमंड करेक केर कोनों कारण नखे, काले कि इके तो करेक लगिन मोके जिम्मा सोंपल जाय हे, आउर अगर मोंय शुभ समाचार नी सुनामूँ तो मोर उपरे हाय। अगर मोंय इ काम के अपन इच्छा से करतो, तो मोके इनाम मिलतक, आउर अगर मोके इ काम के करेक केर इच्छा नखे, फिन भी मोके इ काम के करेक लगिन जिम्मा सोंपल जाय हे। तो मोके कोन सा इनाम मिली? मोंय तो मसीह केर शुभ समाचार के मुफत में सुनावना, जबकि मोके अपन रोजी-रोटी केर लगिन शुभ समाचार सुनाएक से कोनों पावेक केर अधिकार रहे, मगर उके मोंय काम में नी लानोना। इकर मतलब मोंय आदमीमन केर आगया मानेक लगिन गुलाम नखों कि उमन मोके तनखा देवैना, फिन भी मोंय सोउब केर धांगर बनलों ताकि मोंय उमन के मसीह ठिना लेई लानमूँ। से लगिन जब मोंय यहूदीमन केर संगे अहों तो मोंय यहूदीमन नियर रहलों, ताकि उमन के हों मसीह ठिना लेई लानमूँ। आउर जब मोंय उमन केर संगे रहलों, जेमन मूसा केर नियम के मानैना, तो मोंय हों नियम केर अधीन रहलों, जबकि मोके मूसा केर नियम के पालन करेक केर जरुरत नखे, मोंय एइसन इ लगिन करलों ताकि जेमन मूसा केर नियम केर अधीन अहैं, उमन के मसीह ठिना लेई लानमूँ। एहे नियर जब मोंय परजाइतमन केर संगे काम करोना, तो मोंय परजाइतमन नियर रहलों, जेमन परमेश्‍वर केर नियम के नी मानैना, ताकि उमन के मसीह लगिन जितेक पारमूँ। हालाँकि मोंय परमेश्‍वर केर नियम से आजाद नखों। जब मोंय उमन केर संगे रहलों जेमन बिसवास में कमजोर अहैं, तो मोंय ओहेमन नियर ब्यवहार करलों, ताकि मोंय उमन के मसीह केर पिछे चलेक में मदइत करेक पारमूँ। मोंय सोउब आदमीमन लगिन सोउब नियर बनलों, ताकि मोंय कोनों नी कोनों नियर कायनों झन केर छुटकारा करुवाएक पारमूँ। आउर मोंय सोउब कुछ मसीह केर बारे में शुभ समाचार के परचार करेक लगिन करोना, ताकि मोंय हों शुभ समाचार केर फायदा में से हिस्सा पामूँ। का तोहरे नी जानाला कि दौड़ में तो सोभे शामिल होवैना, मगर इनाम एके झन के मिलेला, तोहरेमन एइसन दौड़ा कि इनाम जितबा। आउर हरेक पहलवान अपन काया केर सोउब रकम केर इच्छामन के रोकेला, उ तो एगो मुरझाएक वाला मुकुट के पावेक लगिन इ सोउब के करेला। मगर हमरे तो उ मुकुट के पावेक लगिन मेहनइत करिला जे मुरझाएक वाला नखे। इकरे चलते मोंय निशाना के देइख के कुदोना, जइसन कि एगो पहलवान अपन मुटका के हवा में नी चलायला मगर अपन बिरोधी केर काया में चलायला, सेहे लेखे मोंय अपन मसीही जिंदगी के एगो खास मकसद से जियोना। मोंय अपन काया के काबू में रखोना ताकि इकर बुरा इच्छामन के पूरा नी करमूँ, कहीं एइसन ना होवोक कि मोंय दोसरमन के शुभ समाचार परचार काइर के खुद हें इनाम पावेक से छूइट जामूँ। हे बिसवासी भाईमन, मोंय चाहोना तोहरेमन इ गोइठमन के याइद करा कि ढेइर समय पहिले हमर पुरखामन केर संगे बान माझे का होई रहे। परमेश्‍वर एगो बदरी के भेइज के उ सोउबमन केर अगुवाई करलक, जे उमन केर संगे आगे-आगे गेलक, आउर परमेश्‍वर उ सोउबमन के लाल समुदर केर पानी माझे चलुवाय के आउर बचाय लानलक जइसन कि सुखल भूंई में चलैना। आउर चिन्हा केर रूप में माइन लेवा कि उमन सोउब बदरी केर नीचे आउर समुदर में बपतिस्मा जल संस्कार लेलैं, इ एगो चिन्हा रहे कि उमन मूसा केर चेला रहैं। आउर उमन सोउब उ रोटी के खालैं जेके परमेश्‍वर स्वरग से उमन के देई रहे। आउर उमन सोउब उ पानी के पिलैं, जेके परमेश्‍वर उमन के चट्टाइन में से देई रहे। आउर जे उमन के चट्टाइन में से पानी देई रहे, उ उमन केर संगे-संगे गेलक, उ मसीह हेके। मगर परमेश्‍वर उमन में से ढेइरमन से खुश नी होलक, इ लगिन उमन सुनसान ठाँव में मोइर गेलैं। इ गोइठमन हमर लगिन चेतावनी ठहरलक कि जइसन उमन लोभ करलैं, तइसनेहें हमरे के बुरा चीजमन केर लोभ करेक नी चाही। आउर ना तोहरेमन मूर्ति पूजा करा, जइसन कि उमन में से ढेइरमन करलैं, जइसन कि पवितर किताब में लिखल अहे, “आदमीमन खाएक-पियेक लगिन बइठलैं, आउर उइठ के नाचेक-डेगेक लगलैं।” आउर ना हमरे के ब्यभिचार करेक चाही, जइसन उमन में से ढेइरमन करलैं, आउर एक दिन में तईस हजार आदमीमन मोइर गेलैं। आउर ना हमरे के मसीह के परखेक चाही, जइसन उमन में से ढेइरमन परखलैं, आउर साँपमन केर द्वारा नाश करल गेलैं। आउर ना तोहरेमन कुड़कुड़ावा, जइसन उमन में से ढेइरमन कुड़कुड़ालैं, आउर स्वरग दूतमन केर द्वारा जेमन के परमेश्‍वर नाश करेक लगिन भेइज रहे, नाश करल गेलैं। मगर इ सोउब गोइठमन जे उमन उपरे पड़लक, चेतावनी नियर रहे, आउर इ हमर चेतावनी लगिन पवितर किताब में लिखल जाय हे, जे दुनिया केर आखरी समय में रहिला। इ लगिन जे समझेला कि मोंय अपन बिसवास में ठीक अहों, उ सावधान रहोक, ताकि कहीं ओहे पापमन में गिर ना जाओक। तोहरेमन कोनों एइसन परीक्षा में नी पाइड़ हा, जे आदमी केर सहेक से बाहर अहे। आउर परमेश्‍वर बिसवास लायक अहे, उ तोहरेमन के सहेक से बाहर परीक्षा में पड़ेक नी देवी, बल्कि परीक्षा से बचेक में मदइत करी। इकर चलते हे मोर दुलार बिसवासी भाई बहिनमन, मूर्ति पूजा करेक से बाइच के रहबा। मोंय बुद्धिमान जाइन के तोहरेमन से कहोना, जे मोंय हिंयाँ कहोना उकर बारे में तोहरेमन सोचा कि उ सचमुच ठीक अहे कि निहीं। जब हमरे प्रभु भोज में (अंगूर केर रस) के कटोरा में से पियिला, आउर जेकर लगिन हमरे परमेश्‍वर के धन्यबाद देवीला, तो हमरे सचमुच में मसीह केर लोहू में हिस्सेदार होविला, आउर जब हमरे रोटी के टुकरिला आउर उके खाइला, तो हमरे सचमुच में मसीह केर काया में हिस्सेदार होविला। काले कि एके गो रोटी अहे जे मसीह हेके, जबकि हमरे ढेइर अही, तो हमरे एके गो काया बाइन जाइला काले कि हमरे सोउब ओहे एके गो रोटी के खाइला। जब सोउब इसराइली आदमीमन परमेश्‍वर के चढ़ाल चीजमन के खायना, तो उमन परमेश्‍वर केर आराधना में शामिल होवैना। एहे नियर जे आदमीमन मूर्तिमन लगिन बलिदान चढ़ाल चीजमन के खायना, तो उमन उ मूर्तिमन केर पूजा में शामिल होवैना। मोंय इ नी कहाथों कि मूर्ति लगिन बलि चढ़ाल केर कोनों कीमत अहे आउर मूर्ति कोनों खास चीज हेके, जे मोंय कहेक चाहाथों उ इ हेके कि परजाइतमन जे बलिदान चढ़ायना, तो उमन परमेश्‍वर लगिन निहीं, मगर भूतमन लगिन बलिदान चढ़ायना, आउर मोंय नी चाहोना कि तोहरेमन भूतमन केर हिस्सेदार होवा। तोहरेमन लगिन इ ठीक नखे कि भूतमन लगिन चढ़ाल चीजमन के खाएक आउर पियेक में शामिल होबा, आउर साथ ही साथ प्रभु केर भोज में हों शामिल होबा, जे हमरे के प्रभु केर माउत के याइद करुवायला। अगर तोहरे एइसन कराला, तो परमेश्‍वर तोहरेमन से पक्का खिसाय जाई, इके याइद करा कि तोहरेमन परमेश्‍वर से बगरा शक्तिशाली नखा। हमरे सोउब कुछ करेक लगिन आजाद तो अही, मगर हमरे लगिन सोउब कुछ बेस ना लगे। हमरे सोउब कुछ करेक लगिन आजाद तो अही, मगर सोउब कुछ हमरे के परमेश्‍वर उपरे बिसवास में मजबूत नी करेला। केऊ अपनेहें भलाई के ना चाहबा, मगर दोसरमन केर हों भलाई चाहबा। तोहरेमन कोनोवें माँस जे बजार में बेचायला उके खाएक पारबा, मूर्तिमन लगिन चढ़ाल हेके कि निहीं सेके ना पूछबा, तब तोहरे केर बिवेक परेशान नी होवी। तोहरे सोउब के खाएक पाराला काले कि पवितर किताब में लिखल अहे “धरती आउर जे कोनों उकर में अहे सोउब कुछ प्रभु केर हेके।” अगर अबिसवासीमन में से केऊ तोहरेमन के नेवता देवी आउर तोहरेमन जाएक चाहबा, तो जे कोनों तोहर सामने रखल जाई उखे खाबा, आउर मूर्तिमन लगिन चढ़ाल हेके कि निहीं सेके ना पूछबा, तब तोहरे केर बिवेक परेशान नी होवी। अगर मोंय मूर्तिमन लगिन चढ़ाल चीजमन के धन्यबाद देई के खावना, तो जेकर लगिन मोंय धन्यबाद देवोना उकर चलते मोर उपरे काले दोष लगाल जायला? मोंय तोहरेमन से कहोना कि चाहे खावा, चाहे पिया, चाहे जे कोनों करा सोउब कुछ परमेश्‍वर केर महिमा लगिन करा। तोहरेमन ना यूनानी आदमीमन केर लगिन, ना यहूदीमन केर लगिन आउर ना परमेश्‍वर केर कलीसिया लगिन ठोकर केर कारण बना। जइसन कि मोंय हों सोउब गोइठमन में सोउब केऊ के खुश रखेक केर कोशिश करोना, आउर अपन भलाई करेक केर कोशिश नी करोना, मगर बगरा से बगरा आदमीमन केर भलाई चाहोना ताकि उमन बाइच जबैं। जइसन मोंय मसीह केर नियर चाल चलोना, तइसनेहें तोहरेमन हों मोर नियर चाल चला। हे बिसवासी भाईमन, मोंय तोहरे केर बड़ाई करोना, काले कि तोहरेमन मोके सोउब बेरा याइद करते रहाला, आउर जे शिक्षामन मोंय तोहरेमन के देई हों उके सावधानी से पालन कराथा। मगर एगो गोइठ अहे, मोंय चाहोना कि तोहरेमन इके जाइन लेवा, हरेक मरदाना केर मूँड़ मसीह हेके आउर एक जनाना केर मूँड़ उकर पति हेके, आउर मसीह केर मूँड़ परमेश्‍वर हेके। जे मरदाना मूँड़ ढाँइप के कलीसिया में प्रार्थना या परमेश्‍वर केर संदेश के परचार करेला, उ मसीह केर अपमान करेला जे मूँड़ हेके। मगर जे जनाना कलीसिया में बेगर मूँड़ ढँपाले प्रार्थना या परमेश्‍वर केर संदेश के परचार करेला, उ अपन पति केर अपमान करेला जे उकर मूँड़ हेके, एइसन जनाना आउर मुंडली करल जनाना केर माझे जे कि अपमान केर चिन्हा हेके, कोनों फरक नखे। अगर जनाना ओढ़नी नी ओढ़ाई, तो केंस हों कटाय लेवोक, अगर जनाना लगिन केंस कटाएक या मुंडाएक लाज केर गोइठ हेके, तो ओढ़नी ओढ़ोक। हाँ, मरदाना के अपन मूँड़ ढाँपेक उचित नखे, काले कि उ परमेश्‍वर केर महिमा हेके, जे परमेश्‍वर केर अपन रूप में बनाल जाय हे, मगर जनाना अपन पति केर महिमा हेके। काले कि पहिला मरदाना (आदम) जनाना से नी आलक, मगर पहिला जनाना (हव्वा) मरदाना से आय हे। आउर परमेश्‍वर पहिला मरदाना के, जनाना केर मदइत करेक लगिन नी सिरजालक, बल्कि जनाना के मरदाना केर मदइत करेक लगिन सिरजाय हे। एहे लगिन जनाना के अधीन रहेक केर चिन्हा केर रूप में ओढ़नी ओढ़ेक जरुरी अहे, काले कि स्वरगदूतमन हों हमरे के देखैना। फिन भी प्रभु में जनाना केर बिना मरदाना कोनोवें ना लगे, आउर मरदाना केर बिना जनाना हों कोनोवें ना लगे। जबकि परमेश्‍वर पहिला जनाना के पहिला मरदाना से सिरजालक, मगर अब जनानामन हें मरदानामन के जनम देवैना, मगर सोउब चीजमन परमेश्‍वर बटले अहैं। मोंय तोहरेमन से चाहोना कि तोहरे खुद हें बिचार करा, का जनाना के कलीसिया में बेगर मूँड़ ढँपाले परमेश्‍वर से प्रार्थना करेक उचित अहे? स्वाभाविक रीति से हों तोहरेमन जानाला कि अगर मरदाना लम्बा केंस रखी, तो इ उकर लगिन अपमान हेके। मगर जनाना लम्बा केंस रखी तो उकर लगिन शोभा हेके, केंस उके ओढ़नी लगिन देवल जाय हे। मगर, अगर केऊ सोचेला कि जे मोंय कहाथों उ गलत हेके, तो इ जानोक कि ना हमरे केर आउर ना परमेश्‍वर केर कलीसियामन में इके छोइड़ आउर कोनों नियम अहे। उ आगयामन केर बारे में जेके मोंय तोहरे के कहेक जाथों, मोंय तोहरे केर बड़ाई नी करोना, इ लगिन कि तोहर जमा होएक से भलाई निहीं, मगर हानि होवेला। काले कि पहिले तो मोंय इ सुनोना कि जब तोहरेमन आराधना करेक लगिन कलीसिया में जमा होवाला, तो तोहर में फूट होवेला आउर मोंय बिसवास करोना इ गोइठ में कुछ सच अहे। मगर सचमुच में तोहरे केर माझे फूट होवेक चाही, ताकि जेमन परमेश्‍वर केर हेकैं, उमन केर पता चाइल जाई। जब तोहरेमन एक जगा हमर प्रभु यीशु मसीह केर माउत के याइद करेक लगिन जमा होवाला, तो तोहरे केर ब्यवहार उ आदमीमन नियर नी दिसेला, जेमन प्रभु भोज खाएक लगिन जमा होई हैं। काले कि हरेक झन दोसरमन के बेगर बाँटले अपन भोज के पहिलेहें खाय लेवेला, इकर चलते केऊ-केऊ तो भूखे रइह जायना, जबकि दोसरमन माइत जायना। तोहरे केर अपन घर अहे जहाँ तोहरे अपन इच्छा केर मोताबिक खाएक पियेक पाराला। मगर तोहरे स्वार्थी ब्यवहार कराला आउर परमेश्‍वर केर कलीसिया के तुच्छ समझाला, आउर गरीब आदमीमन केर अपमान कराला। इकर बारे में मोंय तोहरे के का कहमूँ? का तोहरे अपन ब्यवहार लगिन मोर से बड़ाई सुनेक चाहाला? मोंय एइसन ब्यवहार करेक केर बदली में बिलकुल तोहरे केर बड़ाई नी करमूँ। जे शिक्षा मोंय तोहरे के देलों, इ ओहे शिक्षा हेके जेके मोंय प्रभु से पाय रहों, जे राइत प्रभु यीशु धरुवाल गेलक, उ रोटी लेलक, आउर धन्यबाद देई के उके टुकरालक आउर कहलक, इ रोटी मोर काया हेके, जे तोहरे केर छुटकारा लगिन बलि करल जाई, जब तोहरे जमा होबा तो मोर माउत केर याइदगारी में इके करते रहबा। एहे नियर जब उमन खाय चुकलैं, तब यीशु अंगूर केर रस भरल एगो कटोरा लेलक, आउर कहलक, “इ कटोरा मोर लोहू में नवाँ करार हेके, जब कभी तोहरे इके पीबा तो मोर याइदगारी में इके करते रहबा।” काले कि तोहरेमन जब कभी इ रोटी के खावाला, आउर इ कटोरा में से अंगूर केर रस के पियाला, तो प्रभु केर माउत के जब तक उ नी आवी परचार कराला। इ लगिन जे केऊ अनुचित रीति से प्रभु केर रोटी के खाई चाहे उकर कटोरा में से अंगूर केर रस के पियी, उ प्रभु केर काया आउर लोहू केर बिरोध में पापी ठहरी। इ लगिन आदमी खुद के अपन बिचार ठीक अहे कि निहीं सेके जाँइच लेवोक, आउर एहे नियर इ रोटी में से खाओक, आउर इ कटोरा में से अंगूर केर रस के पियोक। अगर केऊ प्रभु केर काया केर संगे अपन संबंध के बेगर बुझले, इ रोटी में से खायला आउर कटोरा में से पियेला, तो इ खाएक आउर पियेक से अपन उपरे दंड के लानेला। इकरे चलते तोहर में से ढेइरमन कमजोर आउर रोगी अहैं, आउर ढेइरमन मोइर हों गेलैं, काले कि इ परमेश्‍वर केर दंड हेके। अगर हमरे पहिले खुद केर ब्यवहार के जाँचती, तो प्रभु हमरे के दंड नी देतक। मगर प्रभु हमरे के इ नियर दंड देवेला, तो उ हमरे के सुधरायला, ताकि हमरे न्याय केर दिन दुनिया केर दोसर आदमीमन नियर दंड नी पावब। इ लगिन हे मोर बिसवासी भाईमन, जब तोहरेमन प्रभु भोज खाएक लगिन जमा होवाला, तो एक दोसर लगिन ठहरबा, ताकि तोहरेमन सोउब एक संगे खाएक पारबा। अगर केऊ भूखे अहे, तो अपन घर में खाय लेवोक, जेकर से जब तोहरे एक जगा जमा होबा तो उचित तरीका से ब्यवहार करबा, आउर परमेश्‍वर तोहरे के दंड नी देवी। आउर दोसर गोइठमन केर बारे में जेके तोहरेमन लीख हा, जब मोंय आमूँ तो बताय देमूँ। हे बिसवासी भाईमन, मोंय तोहरे केर पुछल सवाल केर जबाब देवाथों जे पवितर आत्मा केर बरदानमन केर बारे में अहे, मोंय तोहरे से चाहोना कि इकर बारे में ठीक से समझा। तोहरेमन जानाला कि जब तोहरे परमेश्‍वर के नी जानत रहा, तब तोहरे के केऊ दोसर आदमी उ मूर्तिमन केर पूजा करेक लगिन चलात रहे, जे मूर्तिमन बोलेक नी पारेला। इ लगिन मोंय तोहरेमन से चाहोना कि तोहरे इके समझा, जे केऊ परमेश्‍वर केर आत्मा केर अगुवाई से बोलेला, उ नी कहेला कि यीशु सरापित अहे, सिरिफ पवितर आत्मा हें केखो इ कहेक ले मदइत करेला, “यीशु ही प्रभु हेके।” परमेश्‍वर हमरे के उकर काम करेक लगिन अलग-अलग रकम केर बरदानमन के देवेला, मगर उ सोउब बरदानमन के एक हें आत्मा, मतलब पवितर आत्मा देवेला। परमेश्‍वर हमरे के काम करेक लगिन अलग-अलग रकम केर सेवा देवेला, मगर हमरे एक हें प्रभु केर सेवा करिला। हमरे केर जिंदगी में परमेश्‍वर अलग-अलग तरीका से काम करेला, मगर इ ओहे परमेश्‍वर हेके जे हमरे केर जरिया से काम करेला। परमेश्‍वर हरेक आदमी के आत्मा हाजिर अहे, इकर कोनों नी कोनों सबूत देवेला, ताकि सोउब बिसवासीमन केर मदइत करल जाओक। परमेश्‍वर केर आत्मा एक आदमी के बुद्धि से भरल संदेश के बोलेक केर बरदान देवेला, आउर ओहे आत्मा दोसर आदमी के गेयान से भरल संदेश के बोलेक केर बरदान देवेला। आउर ओहे आत्मा एक आदमी के मसीह में ढेइर बगरा बिसवास करेक केर बरदान देवेला, आउर दोसर आदमी के चंगा करेक केर बरदान हों देवेला। ओहे आत्मा एक आदमी के चमत्कार काम करेक केर बरदान देवेला, तो दोसर आदमी के ओहे आत्मा परमेश्‍वर केर संदेश के असरदार तरीका से बोलेक केर बरदान देवेला, आउर दोसर आदमी के आत्मामन के परखेक केर बरदान देवेला। एक आदमी के ओहे आत्मा दोसर-दोसर भाषा में गोठियाएक केर बरदान देवेला जे भाषा के पढ़ल नी जायला, आउर दोसर आदमी के ओहे आत्मा इ भाषामन केर मतलब बताएक केर बरदान देवेला। मगर इ सिरिफ परमेश्‍वर केर आत्मा हेके, जे इ सोउब बरदानमन केर सोता हेके, आउर ओहे हरेक झन के जइसन चाहेला तइसन बाँइट देवेला। काले कि जे नियर काया तो एक अहे, आउर उकर अंगमन ढेइर अहैं, मगर उ एक काया केर सोउब अंगमन ढेइर होवेक से हों सोउब मिल के एके गो काया हेके, एहे नियर मसीह आउर ओहोमन अहैं जेमन उकर उपरे बिसवास करैना। काले कि हमरे सोउब चाहे यहूदी हेकी, चाहे यूनानी, चाहे धांगर, चाहे आजाद अही, हमरे एक हें आत्मा केर द्वारा एक काया होवेक लगिन बपतिस्मा जल संस्कार लेई ही, आउर हमरे सोउब एक हें आत्मा पाय ही। इ लगिन कि हमरे केर कायामन में एके गो अंग नखे, मगर ढेइर अहे। माइन लेवा अगर एगो गोड़ कही कि मोंय हाँथ ना लगों, से लगिन मोंय काया केर ना लगों, तो का उकर एइसन कहेक से उ काया केर अंग ना लगे? आउर अगर कान कही कि मोंय आँइख ना लगों, से लगिन मोंय काया केर ना लगों, तो का उकर एइसन कहेक से उ काया केर ना लगे? अगर गोटा काया आँइख हें रहतक तो सुनेक कहाँ होतक? आउर अगर गोटा काया कान रहतक, तो सूँघेक कहाँ होतक? मगर सचमुच परमेश्‍वर काया केर अंगमन के अपन इच्छा केर मोताबिक सही ठाँवमन में राइख हे। अगर सिरिफ एके गो अंग होतक, तो काया कैसे कहातक? से लगिन जबकि काया केर ढेइर अंगमन अहैं, फिन भी एके गो काया अहे। आँइख हाँथ से नी कहेक पारेला कि मोके तोर दरकार नखे, आउर ना मूँड़ गोड़ से कहेक पारेला, कि मोके तोर दरकार नखे। मगर काया केर उ अंगमन जे दोसर अंगमन से कमजोर दिसेला, ढेइर हें जरुरी अहे। ताकि काया में अनबन ना होवोक, मगर काया केर सोउब अंगमन एक दोसर अंग केर बराबइर धेयान रखोक। आउर अगर हमर काया केर एगो अंग बेमार अहे, तब सोउब काया के बथेला, अगर हमर काया केर एगो अंग केर बड़ाई होवेला, तब गोटा काया खुश होवेला। एहे नियर तोहरेमन सोउब मिल के मसीह केर काया हेका, आउर तोहर में से हरेक उकर काया केर अंग केर रूप में उकर हेका। आउर परमेश्‍वर इ कलीसिया में हमरे के करेक लगिन अलग-अलग काम देई हे, पहिला खास चेलामन, दूसरा परमेश्‍वर केर संदेश के बताएक वालामन, तीसरा उपदेस देवेक वालामन, फिन चमत्कार केर काम करेक वालामन, फिन चंगा करेक वालामन, आउर भलाई करेक वालामन, आउर अगुवाई करेक वालामन, आउर पवितर आत्मा से दोसर-दोसर भाषा बोलेक वालामन। का सोउब खास चेला हेकैं? निहीं! का सोउब परमेश्‍वर केर संदेश के बताएक वालामन हेकैं? निहीं! का सोउब उपदेस देवेक वालामन हेकैं? निहीं! का सोउब चमत्कार केर काम करेक वालामन हेकैं? निहीं! का सोउब के चंगा करेक केर बरदान मिल हे? निहीं! का सोउब दोसर-दोसर रकम केर भाषा बोलैना? निहीं! का सोउब दोसर-दोसर रकम केर भाषा केर मतलब बताएक वाला हेकैं? निहीं! तोहरेमन पवितर आत्मा केर सोउब से बाड़ बरदानमन केर लालसा करा। मगर मोंय तोहरेमन के सोउब से बेस चीजमन केर बारे में बतामूँ। अगर मोंय आदमीमन आउर स्वरगदूतमन केर भाषामन के गोठियामूँ, आउर दोसरमन के प्रेम नी करमूँ, तो मोर गोइठ जोर से बाजेक वाला घंटा नियर या झुनझुनी झाँझ केर आवाज नियर कोनों मतलब नी होवी। आउर अगर मोंय परमेश्‍वर केर संदेश के परचार करमूँ, आउर सोउब भेदमन आउर सोउब रकम केर गेयान के समझमूँ, आउर मोर ठिना परमेश्‍वर उपरे एतना मजबूत बिसवास अहे कि मोंय पहारमन के हों हटाएक पारमूँ, मगर प्रेम नी करमूँ, तो बिलकुल मोर कोनों कीमत नखे। आउर अगर मोंय अपन पूरा सम्पति के गरीबमन के खियाएक लगिन देई देमूँ, या हिंयाँ तक कि मोंय अपन काया के जलाय लगिन देई देमूँ, आउर प्रेम नी करमूँ, तो मोर लगिन कोनोवें फायदा नखे। जेमन प्रेम करैना उमन सहेक वाला होवैना, आउर उमन दया करैना, उमन हिसिंगा नी करैना, उमन अपन बारे में बड़ाई नी करैना, आउर घमंड नी करैना। प्रेम करेक वालामन अनुचित ब्यवहार नी करैना, आउर उमन स्वार्थी नी होवैना, उमन तुरते नी खिसायना, आउर अपन बिरोध में करल काम के याइद नी करैना। जब आदमीमन बुरा काममन के करैना, तब उमन खुश नी होवैना, मगर जब आदमीमन सच्चा आउर भला काममन के करैना, तब उमन खुश होवैना। प्रेम करेक वाला आदमीमन सोउब गोइठमन के साइह लेवैना, उमन हर स्थिति में परमेश्‍वर उपरे बिसवास करेक नी छोड़ैना, आउर उमन बिसवास केर संगे परमेश्‍वर उपरे आसरा करैना, उमन दुःख तकलीफ के हों साइह के स्थिर बनल रहैना। उ समय आवी जब आदमीमन परमेश्‍वर केर बचन के आउर परचार नी करबैं आउर दोसर-दोसर भाषा में हों नी गोठियाबैं, आउर परमेश्‍वर केर बारे में गहरा गेयान केर जरुरत आगे नी होवी, मगर प्रेम जुग-जुग लगिन बनल रही। जब मोंय एगो छउवा रहों, तब मोर बिचार आउर तर्क छउवामन नियर रहे, मगर जब हमरे बाइढ़ गेली, तो छउवामन केर नियर बिचार के छोइड़ देली। एखन तो हमरे के सोउब गोइठमन एइसन लगेला, जइसन कि हमरे एगो आयना में धुंधरा-धुंधरा देखिला सिरिफ आवेक वाला दिनमन में हमरे सचमुच में सोउब कुछ के समझेक पारब, काले कि हमरे परमेश्‍वर के आमने सामने देखब। एखन मोर गेयान अधूरा अहे, सिरिफ आवेक वाला दिनमन में, मोंय उके सचमुच में जानमूँ, जइसन परमेश्‍वर हों मोके जानेला। तो हमर परमेश्‍वर में बिसवास आउर आसरा, आउर हमर परमेश्‍वर लगिन प्रेम आउर हमर संगी बिसवासीमन लगिन प्रेम, इ तीनों सोउब दिन ले बनल रही, मगर इमन में से सोउब से बढ़ियाँ प्रेम हेके।। एक दोसर के प्रेम करेक ले खूब कोशिश करा, आउर आत्मा केर बरदानमन के पावेक केर लालसा करा, खास काइर के परमेश्‍वर केर संदेश के बताएक केर कोशिश करा। काले कि जे अनजान भाषा में गोठियायला उ आदमीमन से निहीं, मगर परमेश्‍वर से गोठियायला, इ लगिन उके केऊ नी बुझैना, काले कि उ भेद केर गोइठमन के पवितर आत्मा केर शक्ति से कहेला। मगर जे परमेश्‍वर केर संदेश के परचार करेला, उ बिसवासीमन के बिसवास में मजबूत करेक लगिन मदइत करेला, आउर शांति पावेक ले उसकायला। जे दोसर भाषा में गोठियायला, उ सिरिफ अपन बिसवास के मजबूत करेला, मगर जे परमेश्‍वर केर संदेश के परचार करेला, उ कलीसिया केर सोउब बिसवासीमन केर बिसवास के मजबूत करेला। मोंय चाहोना कि तोहरेमन सोउब अनजान भाषामन में गोठियावा, मगर इकर से बगरा इ चाहोना कि परमेश्‍वर केर संदेश के परचार करा, काले कि अगर अनजान भाषा में गोठियाएक वाला कलीसिया केर बिसवासीमन केर बिसवास के मजबूत करेक लगिन उल्था नी करी, तो परमेश्‍वर केर संदेश के परचार करेक वाला उकर से बाइढ़ के अहे। इ लगिन हे बिसवासी भाईमन, अगर मोंय तोहर ठिना आय के अनजान भाषा में गोठियामूँ, तो मोर से तोहरे के का फायदा होवी? मगर मोंय तोहरे ठिना भेद के खोलेक वाला गोइठ, चाहे खास गेयान केर गोइठ, चाहे परमेश्‍वर केर संदेश के बताएक वाला, चाहे शिक्षा केर गोइठमन के गोठियामूँ, तो तोहरे के फायदा होवी। एहे नियर, जब तोहरे बाँसुरी चाहे बीना बजावाला, आउर राग केर आवाज में कोनों अंतर नी होवी, तो केऊ नी जानबैं कि कोन राग में बाजाथे। आउर लड़ाई में अगर तुरही केर आवाज सफा-सफा नी सुनाई, तो फौजमन लड़ाई लगिन तेयारी नी करबैं। एइसनेहें तोहरे हों अगर सफा-सफा नी गोठियाबा, जेके आदमीमन समझेक पारैना, तो इ हवा में गोठियाएक नियर कहाई। दुनिया में ढेइर रकम केर भाषामन अहे, मगर सोउब रकम केर भाषामन केर मतलब अहे। मगर, अगर हमरे दोसर मनक गोठियाएक भाषा के नी बुझब, तो उमन हमरे केर लगिन परदेसी कहाबैं आउर हमरे उमन लगिन परदेसी कहाब। काले कि तोहरेमन पवितर आत्मा केर खास बरदानमन के पावेक लगिन ललायित अहा, तो उ बरदानमन केर लालसा करा जेकर से कलीसिया केर बिसवासीमन केर बिसवास मजबूत होवी। इ लगिन जे अनजान भाषा में गोठियायला, तो उ प्रार्थना करोक कि उकर मतलब हों बताएक पारोक। सेले अगर मोंय अनजान भाषा में प्रार्थना करोना, तो मोर आत्मा प्रार्थना करेला, मगर मोर बुद्धि काम नी करेला, काले कि इके मोंय समझेक नी पारोना। इकर लगिन मोंय पवितर आत्मा केर अगुवाई में हों प्रार्थना करेक चाहोना, मगर मोंय एहो चाहोना कि जे मोंय प्रार्थना करोना, उके दोसरमन हों समझोक। आउर जब मोंय गाओना तो चाहोना कि पवितर आत्मा केर अगुवाई से गामूँ, मगर इ हों जरुरी अहे कि जे मोंय गाओना, उ दोसरमन के समझ में आओक। माइन लेवा कि जब तोहरे अपन आत्मा से परमेश्‍वर केर आराधना कराला, आउर थोरेक साधारण आदमीमन तोहर आराधना सभा में आबैं, आउर तोहरे केर धन्यबाद देवेक केर पाछे, उमन कइसन जानबैं कि कखन आमीन कहेक अहे? तोर परमेश्‍वर के धन्यबाद देवेक तो ढेइर बेस अहे, मगर इ दोसरमन के बिसवास में मजबूत करेक ले मदइत नी करी। मोंय अपन परमेश्‍वर के धन्यबाद देओना कि मोंय तोहरे सोउबमन से बगरा अनजान भाषा में गोठियावना। मगर इकर बावजूद, जब बिसवासीमन कलीसिया में एक जगा जमा रहैना, तो मोंय अनजान भाषा में नी गोठियावना, मोर लगिन इ बेस अहे कि मोंय हूवाँ दोसरमन केर समझेक वाला पाँच हें गो शबदमन के गोठियामूँ, ना कि हजारो शबदमन के जे समझ में नी आवेला। हे बिसवासी भाईमन, तोहरेमन गोइठमन के समझेक में छउवा ना बना, बुराई केर गोइठ गोठियाएक में तो बालक छउवा नियर बना, मगर इ नियर केर गोइठमन के समझेक में सेयाना बना। मूसा केर नियम में लिखल अहे कि प्रभु कहेला, मोंय अनजान भाषा गोठियाएक वालामन केर द्वारा, आउर दोसर देस केर आदमीमन केर द्वारा अपन आदमीमन से गोठियामूँ, फिन भी उमन मोर नी सुनबैं। इ लगिन अगर हमर में से केऊ अनजान भाषामन में गोठियायला, तो हमर शबद उमन लगिन प्रभु केर शक्ति केर चिन्हा हेके जेमन प्रभु में बिसवास नी करैना। आउर परमेश्‍वर केर संदेश के परचार करेक, अबिसवासीमन लगिन निहीं मगर बिसवासीमन लगिन चिन्हा हेके। से अगर कलीसिया केर बिसवासीमन एक जगा जमा होबैं, आउर सोउब अनजान भाषामन में गोठियाबैं, आउर साधारण आदमीमन भीतरे आय जाबैं, तो उमन पक्का सोचबैं कि तोहरेमन पगला हेका। मगर, अगर सोउब परमेश्‍वर केर संदेश के परचार करेक लगबैं, आउर केऊ अबिसवासी या साधारण आदमी भीतरे आय जाई, तो उ अपने के पापी महसूस करी, आउर तोहरे केर परचार उके दोषी ठहराय देवी। आउर परमेश्‍वर केर संदेश उके उकर लुकल पाप से स्वीकार करुवाय देवी, आउर उ पाप करेक छोइड़ के परमेश्‍वर केर भक्ति करी, आउर माइन लेवी कि सचमुच परमेश्‍वर तोहर माझे अहे। हे बिसवासी भाईमन, सुना कइसन होवेक चाही? जब तोहरेमन आराधना करेक ले जमा होवाला, तो तोहर में से केऊ तो गीत गावेला, तो केऊ बचन केर परचार करेला। केऊ प्रभु बटले मिलल भेद केर गोइठमन के बतायला, केऊ अनजान भाषा में गोठियायला, आउर केऊ अनजान भाषा केर उल्था करेला। इ सोउब कुछ के तोहरेमन इ लगिन करा जेकर से बिसवासीमन केर बिसवास मजबूत होवोक, आउर उकर उल्था करेक वाला एक झन जरूर होवेक चाही। अगर केऊ अनजान भाषा में गोठियायला, तो सिरिफ दूई या तीन झन के गोठियाएक चाही, आउर एक बेर में एके झन के गोठियाएक चाही। मगर, अगर उल्था करेक वाला कलीसिया में नखे, तो अनजान भाषा में गोठियाएक वाला के शांत रहेक चाही आउर अपन मन-मन में परमेश्‍वर से गोठियाएक चाही। आउर परमेश्‍वर केर संदेश के बताएक वालामन में से दूई या तीन झन गोठियाओक, आउर बचलमन उमन केर संदेश के परखोक। मगर, अगर केऊ दोसर आदमी जे आराधना सभा में बाइठ हे आउर उके परमेश्‍वर केर संदेश मिललक, तो पहिला चुप होई जाओक आउर उ दोसर आदमी गोठियाओक। तोहर में से हरेक झन परमेश्‍वर केर संदेश के परचार करेक पाराला, मगर एकेक झन पारी-पारी से, ताकि सोउब केऊ सिखबैं आउर मजबूत होबैं। एगो परमेश्‍वर केर संदेश के बताएक वाला खुद के काबू करेला कि का गोठियाएक अहे आउर का गोठियाएक नखे। काले कि परमेश्‍वर गड़बड़ी केर निहीं, मगर मेल मिलाप आउर शांति केर परमेश्‍वर हेके। इ उ नियम हेके जेके सोउब कलीसियामन में परमेश्‍वर केर आदमीमन मानैना। जनानामन कलीसिया केर सभा में बहस ना करोक, काले कि उमन के कलीसिया में गोठियाएक केर आगया नखे, मगर अधीन रहेक केर आगया अहे, जइसन कि मूसा केर नियम में लिखल हों अहे। अगर उमन पुछल सवाल केर बारे में कोनों सिखेक चाहैना, तो उमन सभा में ना पुछोक, मगर अपन घर में जाय के अपन पति से पुछोक, काले कि जनाना के कलीसिया में गोठियाएक लाज केर गोइठ हेके। परमेश्‍वर केर बचन तोहर में से नी सिरइज हे, तोहरेमन सिरिफ एकले ना लगा, जेमन ठिना परमेश्‍वर केर बचन पोंहइच हे। अगर केऊ खुद के परमेश्‍वर केर संदेश के परचार करेक वाला या पवितर आत्मा बटले बरदान पावल आदमी समझी, तो इ जाइन लेओक, कि जे गोइठमन के मोंय तोहरेमन ले लिखाथों, उमन प्रभु केर आगयामन हेके। मगर, अगर केऊ बिसवास नी करी तो ना करेक देवा। से लगिन हे बिसवासी भाईमन, परमेश्‍वर केर बचन के परचार करेक केर धुन में रहा, आउर अनजान भाषा में गोठियाएक से मना ना करा। मगर सोउब कुछ जे तोहरेमन कलीसिया में कराला नियम से आउर पारी-पारी से करल जाओक। हे बिसवासी भाईमन, मोंय तोहरेमन के ओहे शुभ समाचार के याइद करवावना जेके पहिले सुनाय चुइक हों, जेके तोहरेमन बिसवास हों काइर रहा आउर जेकर में तोहरेमन एखन तक स्थिर हों बनल अहा। उकरे से परमेश्‍वर तोहरे के बचायला, अगर तोहरेमन उ शुभ समाचार उपरे लगातार बिसवास करते रहबा, जे मोंय तोहरेमन के सुनाय रहों, निहीं तो तोहर बिसवास करेक बेकार होलक। एहे लगिन मोंय तोहरे के सोउब से खास संदेश के सुनालों, जेके मोंय प्रभु यीशु मसीह से पाय रहों, उ संदेश इ हेके, पवितर किताब केर बचन केर मोताबिक यीशु मसीह हमरे केर पापमन केर खातिर मोइर गेलक, आउर गाड़ल गेलक, आउर पवितर किताब केर मोताबिक तीसरा दिन जी हों उठलक। आउर पतरस आउर उकर पाछे बारहों चेलामन उके देखलैं। फिन पाँच सौ से बगरा बिसवासी भाईमन एके संगे देखलैं, जेमन में से ढेइरमन एखन तक मौजूद अहैं मगर केतना झन मोइर गेलैं। फिन याकूब हों देखलक तब सोउब यीशु केर चुनल खास चेलामन देखलैं। आउर सोउब केर पाछे उ मोके हों दिस्तार देलक, उ बेरा मोंय अचका प्रभु यीशु केर चुनल खास चेला बनलों, जबकि इकर कोनों उमीद नी रहे, उ छउवा नियर जेकर जनम, जनमेक केर दिन से पहिलेहें होई हे। काले कि मोंय यीशु केर चुनल खास चेलामन में सोउब से छोट हेकों, बल्कि चेला कहाएक केर लायक हों नखों, काले कि मोंय परमेश्‍वर केर कलीसिया केर बिसवासीमन के सताय रहों। मगर मोंय जे कुछ भी अहों परमेश्‍वर केर किरपा से अहों, आउर उकर किरपा मोर उपरे ढेइर बड़का काम करलक, आउर मोंय यीशु केर चुनल दोसर खास चेलामन से बाइढ़ के मेहनइत हों करलों। फिन भी इ मोर बटले निहीं, मगर परमेश्‍वर केर किरपा से होलक जे मोर उपरे रहे। इ लगिन चाहे मोंय, चाहे उमन, हमरे सोउब ओहे मसीह केर संदेश के परचार करिला, आउर इकरे उपरे तोहरेमन बिसवास हों करला। अब मोंय तोहरे से इ पुछोना, काले कि हमरे सोउब तोहरे के इ परचार काइर ही कि मसीह मोरलमन में से जी उठलक, तो तोहर में से केखो इ नी कहेक चाही कि परमेश्‍वर बिसवासीमन के मोरल पाछे नी जियाई! अगर मोरलमन के जी उठेक हें नखे, तो मसीह हों नी जी उइठ हे। आउर अगर मसीह मोरल में से नी जी उइठ हे, तो जे संदेश के हमरे परचार करिला, आउर उकर उपरे तोहरे बिसवास कराला सोउब कुछ बेकार अहे। अगर मुरदामन नी जी उठैना, तो हमरे इ कइह के परमेश्‍वर केर बारे में झूठ बोइल ही कि परमेश्‍वर मसीह के फिन से जिंदा काइर देई हे, जबकि उ नी जी उइठ हे। फिन मोंय कहोना, अगर कोनोवें मुरदा नी जी उठी, तो मसीह हों नी जी उइठ हे। आउर अगर मसीह नी जी उइठ हे, तो तोहर बिसवास करेक बेकार अहे, आउर तोहरेमन एखन तक अपन पापमन में जिंदगी के जियाथा। बल्कि जेमन मसीह उपरे बिसवास काइर के मोइर हैं, उमन हों सोउब दिन लगिन परमेश्‍वर से अलग होई गेलैं। अगर मसीह से हमरे सिरिफ एहे जिंदगी भइर ले आसरा करिला, तो हमरे इ दुनिया में सोउब आदमीमन से बगरा अभागा हेकी। मगर सचमुच में परमेश्‍वर मसीह के मोरलमन में से जियाय हे, आउर जेमन मोइर जाय हैं उमन में मसीह पहिला आदमी हेके जे जी उइठ हे। मगर हरेक झन अपन-अपन पारी केर मोताबिक जी उठबैं, सोउब से पहिले मसीह जी उठलक, फिन जब मसीह घूइर आवी तब उ सोउब आदमीमन फिन से जी उठबैं, जेमन केर रिश्ता यीशु मसीह केर संगे गहरा अहे। इकर पाछे मसीह सोउब शक्ति आउर ताकतमन के नाश काइर देवी, आउर दुनिया केर अंत आय जाई, आउर मसीह राइज के परमेश्‍वर आबा केर हाँथ में सोंइप देवी। काले कि जब तक परमेश्‍वर अपन बैरीमन के पूरा-पुरी हरुवाय नी देवी, तब तक मसीह के राइज करेक जरुरी अहे। सोउब से आखरी बैरी जे सत्यानाश करल जाई उ माउत हेके। पवितर किताब में भजन के लिखेक वाला लीख हे कि परमेश्‍वर सोउब कुछ के मसीह केर अधिकार केर नीचे काइर देवी, तो इ साफ अहे कि परमेश्‍वर जे मसीह के अधिकार देई हे, उ खुद अधिकार केर नीचे नखे। जब सोउब चीजमन (मसीह) बेटा केर अधिकार में अहे, तो बेटा हों खुद के परमेश्‍वर केर अधिकार केर नीचे सोंइप देवी, मतलब परमेश्‍वर, जे सोउब कुछ के मसीह केर अधिकार में काइर देई हे, ताकि सोउब जगा आउर सोउब कुछ में परमेश्‍वर सोउब से उपरे रहोक। अगर मोरलमन फिन से जिंदा नी होबैं, तो थोरेक आदमीमन मोरल आदमीमन केर बदली में बपतिस्मा जल संस्कार लेवैना, इ रीति केर का फायदा होवी? आउर हमरे लगिन हों, अगर मुरदामन नी जी उठैना, तो खुद के खतरा में रखेक मूरखता हेके। हे बिसवासी भाईमन, जइसन इ पक्का अहे कि मोंय तोहरे उपरे घमंड करोना, काले कि तोहरेमन हमर प्रभु यीशु मसीह केर संगे एक अहा, आउर एहो पक्का अहे कि मोंय रोज दिन माउत केर खतरा में जिंदगी बिताथों। मोंय इफिसुस शहर में भारी कठिनाई में से होई के गुजरलों, काले कि जेमन मोर बिरोध करैना उमन भयानक जानवरमन नियर अहैं। आदमीमन केर बिचार केर मोताबिक मोके उ कठिनाईमन से का मिललक? बिलकुल कोनोवें निहीं। से लगिन अगर इ सच अहे कि मुरदामन फिन से नी जी उठबैं, तो आदमीमन केर कहल नियर चलेक भला होवी, जइसन कि उमन कहैना, “आवा खाब-पियब काले कि अगर काइल मोइर जाब तो सोउब कुछ सिराय जाई।” जे केऊ एइसन कहैना उमन से धोखा ना खावा, “बुरा संगति अच्छा चरितर के बिगड़ाय देवेला।” होस में आवा, अच्छा जिंदगी के अपनावा, जइसन कि तोहरे के होवेक चाही। पाप करेक छोइड़ देवा, काले कि तोहर में से थोरेक आदमीमन एइसन अहैं, जेमन परमेश्‍वर केर बारे में कोनों नी जानैना। एइसन मोंय इ लगिन कहाथों ताकि तोहरेमन के लाज होवोक। अब तोहर में से केऊ कही कि कैसे परमेश्‍वर मुरदामन के जियाई, आउर कइसन काया केर संगे जी उठबैं? हे निरबुद्धियामन! जे कोनों तोहरे बुनाला उ जब तक आँउख होई के मोइर नी जायला, तब तक नी जियेला। आउर जहाँ तक तोहरे जे बुनाला, उ बुनल बिहीन ओंकइर के बुदा बाइन जायला, तोहरेमन उ बढ़ल बुदा के तो नी बुइन रहा। सिरिफ बिहीन के बुइन रहा, चाहे गोहोम केर बिहीन हो चाहे कोनों आउर केर बिहीन। आउर बुनल पाछे परमेश्‍वर अपन इच्छा केर मोताबिक उके बढ़ायला, हरेक बिहीन जइसन उकर बुदा होवेला तइसनेहें बढ़ेला। सोउब केर काया एके नियर नखे, आदमीमन केर काया अलगे अहे, जानवरमन केर काया अलगे अहे, एहे नियर चरईमन केर आउर मछरीमन केर काया हों अलगे अहे। आउर जे नियर धरती केर चीजमन अलग-अलग अहे, सेहे नियर आकाश केर चीज बेइर, चाँद आउर तइरगनमन हों अलग-अलग अहे। आकाश केर चीजमन केर शोभा अलगे अहे, तो धरती केर चीजमन केर शोभा हों अलगे अहे। बेइर केर शोभा अलग अहे, चाँद केर शोभा हों अलग अहे, (काले कि एक तइरगन से दोसर तइरगन केर शोभा में फरक अहे)। एहे नियर मुरदामन केर फिन से जी उठेक हों अहे। जे काया के दफनाय देवैना उ काया साइड़ जायला, मगर जे काया जी उठेला उ कहियो नी सड़ी। जब हमरे केर काया मोइर जायला तो उ भद्दा आउर कमजोर रहेला, मगर जब उ जी जायला तो सुंदर आउर शक्तिशाली रहेला। एगो आदमी केर काया जे दफनाल जायला, उ सिरिफ इ दुनिया केर जिंदगी लगिन अहे, मगर जब परमेश्‍वर उके फिन से जिंदा करेला, तो उ स्वरग केर जिंदगी केर लायक होवेला, अगर एक किसिम केर काया सिरिफ इ दुनिया में रहेक लगिन अहे, तो एगो स्वरग में रहेक लायक काया हों अहे। एइसनेहें पवितर किताब में हों लिखल अहे कि पहिला आदमी, मतलब आदम, जिंदा प्राणी बनलक आउर आखरी आदम, मतलब मसीह जुग-जुग केर जिंदगी देवेक वाला आत्मा बनलक। हमरे ठिना पहिले इ दुनिया केर काया होवेक चाही, फिन स्वरगीय काया देवल जायला। पहिला आदमी धरती से मतलब माटी से बनल रहे, दूसरा आदमी मसीह, जे दूसरा आदम हेके स्वरग से आलक। जे आदमीमन इ धरती केर हेकैं, उमन धरती केर पहिला आदमी आदम नियर अहैं, मगर जे आदमीमन स्वरग केर हेकैं, उमन स्वरग केर आदमी मसीह नियर अहैं। हमरे सोउब केर ठिना आदम केर रूप अहे जे माटी से बनाल जाय रहे, एहे नियर एक दिन हमरे ठिना मसीह केर रूप होवी, जे स्वरग से आय हे। हे बिसवासी भाईमन, इ धरती केर हमर काया माँस आउर लोहू से बनाल जाय हे, हमरे इ कायामन केर संगे जे मोरेक वाला हेके, परमेश्‍वर केर राइज स्वरग में रहेक नी पारब, काले कि हूवाँ मोरेक नखे। काले कि हमरे केर इ काया आसानी से मोइर जायला आउर साइड़ जायला, सेले इके उ काया में बदइल जाएक जरुरी अहे, जे कहियो नी मोरेला आउर ना सड़ेला। आउर जब एइसन होवी, तब पवितर किताब में लिखल परमेश्‍वर केर बचन पूरा होवी, जे कहेला, “माउत पूरा-पुरी हाइर जाई, आउर आगे फिन माउत नी रही। हे माउत तोर जीत अब कहाँ अहे? हे माउत तोर बिष अब कहाँ अहे?” माउत केर बिष पाप हेके, आउर पाप केर शक्ति मूसा केर नियम हेके। मगर परमेश्‍वर केर धन्यबाद होवोक, काले कि हमर प्रभु यीशु मसीह केर उ काम केर चलते, जेके उ हमर लगिन काइर हे, हमरे के मोरेक से डराएक केर जरुरत नखे, काले कि उ हमरे केर पाप के उठाय लेलक। से लगिन हे मोर दुलार बिसवासी भाईमन, बिसवास में स्थिर बनल रहा आउर झूठा शिक्षामन केर चलते प्रभु से दूर ना होवा, आउर प्रभु केर काम में हमेशा बढ़ते जावा, काले कि तोहरे इ जानाला कि जे कोनों तोहरे प्रभु लगिन कराथा, उ बेकार नी होवी मगर उकर इनाम मिली। अब यरुशलेम शहर केर परमेश्‍वर केर आदमीमन लगिन रुपया चंदा करल जाएक केर बारे में पुछल सवाल केर बारे में, जइसन आगया मोंय गलातिया केर कलीसियामन केर बिसवासीमन के देलों, तइसनेहें तोहरेमन हों करा। हरेक एतवार तोहरे में से हरेक झन अपन आमदनी केर मोताबिक थोरको रुपया जमा करबा, ताकि मोर आवेक से चंदा करेक ना पड़ोक। आउर जब मोंय आमूँ, तो जेमन के तोहरेमन रुपया के यरुशलेम शहर लेगेक लगिन बिसवास लायक समझाला उमन के भेइज देमूँ, आउर मोंय उमन केर संगे एगो चिट्ठी हों भेइज देमूँ ताकि उमन हूवाँ केर बिसवासीमन से अपन परिचय करुवाबैं। आउर अगर मोर जाएक हों उचित होवी, तो उमन मोर संगे जाबैं। मगर मोंय पिन्तेकुस्त परब तक इफिसुस शहर में रहमूँ। काले कि हिंयाँ प्रभु केर सेवा करेक लगिन मोर ठिना एगो बढ़ियाँ मोका अहे, जबकि ढेइर आदमीमन मोर बिरोध में अहैं। अगर तीमुथियुस कुरिन्थुस शहर में आय जाई, तो उकर से आदर केर साथ ब्यवहार करबा, काले कि उ मोर नियर प्रभु केर काम करेला। से लगिन केऊ उके तुच्छ ना समझबा, मगर उके शांति से उकर डहर खरचा देई के मोर ठिना भेइज देबा, काले कि मोंय उकर आसरा देखाथों कि उ बिसवासी भाईमन केर संगे आओक। आउर बिसवासी भाई अपुल्लोस से मोंय ढेइर बिनती काइर हों कि उ तोहर ठिना दोसर बिसवासीमन केर संगे जाओक, मगर उके इ समय जाएक केर कोनोवें इच्छा नी होलक, मगर जब उके आवेक केर ठीक मोका मिली, तब आय जाई। जागते रहा, बिसवास में स्थिर रहा, साहसी आदमी नियर रहा, आउर बिसवास में मजबूत होवा। सोउब कुछ प्रेम से करा। हे बिसवासी भाईमन, तोहरेमन स्तिफनास केर परिवार के जानाला कि उमन अखया परदेस केर पहिला बिसवासी हेकैं, आउर परमेश्‍वर केर आदमीमन केर सेवा करेक लगिन तेयार रहैना। से लगिन मोंय तोहरेमन से बिनती करोना कि एइसनमन केर अगुवाई में चलबा, बल्कि उ सोउबमन केर अगुवाई में हों चलबा जेमन कड़ा मेहनइत करैना आउर भक्ति से सेवा करैना। आउर मोंय स्तिफनास, आउर फुरतूनातुस आउर अखइकुस केर आवेक से खुश अहों, काले कि उमन तोहर घटी के पूरा काइर हैं। आउर उमन मोर मन के चैन देई हैं, ठीक तइसनेहें जब उमन घूइर आबैं तो तोहरे केर मन के हों चैन देबैं, इ लगिन एइसनमन केर आदर करबा। आसिया परदेस केर कलीसियामन केर बिसवासीमन बटले तोहरेमन के जोहार, अक्विला आउर उकर जनाना प्रिस्किल्ला आउर उ मनक घर में जमा होवेक वाला कलीसिया केर बिसवासीमन बटले हों तोहरेमन के प्रभु में ढेइर जोहार। सोउब बिसवासी भाईमन तोहरेमन के जोहार कइह हैं, मसीह केर प्रेम से आपस में एक दोसर के जोहार करा। मोंय पौलुस अपनेहें हाँथ से इ चिट्ठी में तोहरेमन लगिन जोहार लिखाथों, अगर केऊ प्रभु से प्रेम नी करी तो उ सरापित होवोक। हे हमरे केर प्रभु, आव! प्रभु यीशु मसीह केर किरपा तोहर उपरे बनल रहोक। तोहरे जेमन यीशु मसीह में बनल अहा, मोर प्रेम हों तोहरे सोउबमन में बनल रहोक। आमीन। इ चिट्ठी मोंय पौलुस आउर बिसवासी भाई तीमुथियुस बटले हेके, मोंय परमेश्‍वर केर इच्छा से मसीह यीशु केर चुनल खास चेला हेकों, इ चिट्ठी अखया परदेस में रहेक वाला परमेश्‍वर केर आदमीमन केर नाँव में आउर उ कलीसिया केर नाँव में लिखल जाय हे, जे कुरिन्थुस शहर में अहे। मोंय प्रार्थना करोना कि हमरे केर आबा परमेश्‍वर आउर प्रभु यीशु मसीह तोहरेमन उपरे किरपा करोक आउर शांति देवोक। हमरे केर प्रभु यीशु मसीह आउर आबा परमेश्‍वर केर धन्यबाद होवोक, जे दया करेक वाला आबा आउर सोउब रकम केर दुःख में दिलासा देवेक वाला परमेश्‍वर हेके। उ हमरे केर सोउब मुसीबतमन में दिलासा देवेला, ताकि हमरे हों उ दिलासा से जेके परमेश्‍वर हमरे के देवेला, दोसरमन के दिलासा देवेक पारब, जेमन कोनों रकम केर मुसीबतमन में अहैं। काले कि जेतना बगरा हमरे मसीह केर दुःखमन में भागी होविला, ओतनेहें बगरा हमरे के दिलासा हों मिलेला। अगर हमरे दुःख पाविला, तो इ तोहर शांति आउर छुटकारा लगिन हेके, आउर अगर हमरे शांति पाविला, तो इ तोहर शांति लगिन हेके, जेकर असर से तोहरेमन धीरज केर साथ उ दुःख तकलीफमन के साइह लेवाला, जेके हमरे हों सहिला। तोहरे केर बारे में हमरे के पक्का आसरा अहे, काले कि हमरे जानिला कि जे नियर तोहरेमन हमरे केर दुःखमन में शामिल अहा, ओहे नियर हमरे केर शांति में हों शामिल होबा। हे बिसवासी भाईमन, मोंय चाहोना कि तोहरेमन उ दुःखमन के जाना, जे आसिया परदेस में हमरे केर उपरे होई रहे, हमरे एइसन भरी बोझ से दइब जाय रही जे हमरे केर सहेक शक्ति से बाहरे रहे, हिंयाँ तक हमरे सोइच रही कि अब हमरे नी जियब, बल्कि माइर मोराय देवल जाब। ताकि हमरे अपन उपरे भरसा नी करब, बल्कि परमेश्‍वर उपरे भरसा करब जे मोरलमन के जियायला। ओहे हमरे के माउत केर बड़का संकट से बचालक, आउर हमरे आसरा करिला कि उ आगे हों बचाते रही। जइसन कि तोहरेमन प्रार्थना करेक केर द्वारा हमर मदइत कराला, ताकि जे आशीषमन ढेइर आदमीमन केर जरिया से हमरे के मिललक, उकर हें जरिया से ढेइर आदमीमन हमर बटले परमेश्‍वर के धन्यबाद देबैं। हमरे के इ गोइठ उपरे घमंड अहे कि हमरे केर बिवेक बिसवास दिवायला कि हमरे आदमीमन केर साथ, आउर खास काइर के तोहरे केर साथ, जे ब्यवहार काइर ही उ दुनिया केर गेयान केर मोताबिक निहीं, बल्कि उ सच्चाई आउर ईमानदारी केर मोताबिक रहे, जे परमेश्‍वर केर किरपा केर बरदान हेके। हमरे तोहरेमन के सिरिफ ओहे लिखिला जेके तोहरेमन पइढ़ के बुझेक पाराला, मगर फिन भी तोहरे हमरे के आधा हें बुझाला, मोंय आसरा करोना कि तोहरेमन हमरे के पूरा-पुरी समइझ जबा, ताकि तोहरे हमरे उपरे ओहे नियर घमंड करबा जइसन हमरे हों तोहरे उपरे उ बेरा घमंड करब, जब प्रभु यीशु दोबारा घूइर आवी। जइसन तोहरे में से केतना झन माइन लेई हैं कि हमरे केर चलते तोहरे घमंड कराला, तइसनेहें हमरे हों तोहरेमन केर चलते प्रभु यीशु केर घूइर आवेक दिन घमंड करब। मोके पक्का भरसा रहे कि सोउब से पहिले तोहरे से भेंट करेक केर हमर योजना के तोहरे जानत रहा, मोंय तोहरे से दोबारा मिल के दुगुना आशीष देवेक चाहत रहों। मोर योजना रहे कि मोंय तोहरे ठिना से होई के मकिदुनिया परदेस जामूँ, आउर फिन मकिदुनिया परदेस से तोहरे ठिना घूइर आमूँ, आउर मोंय आसरा करोना कि तोहरेमन मोके यहूदिया परदेस जाएक लगिन मोर डहर खरचा देई देबा। जब मोंय एइसन फैसला करलों तो सोइच समइझ के करलों, मोंय दुनिया केर आदमीमन नियर करेक नी चाहत रहों, जेमन हाँ हों कहैना फिन पाछे से निहीं हों कहैना। परमेश्‍वर जानेला कि जे कोनों हमरे तोहरे से कइह ही, उ सोउब सच्चा हेके। काले कि परमेश्‍वर केर बेटा यीशु मसीह केर परचार, हमरे, मतलब मोंय पौलुस, सीलास आउर तीमुथियुस केर जरिया से तोहर माझे होलक, उकर में कभी हाँ, आउर कभी निहीं, दुइयो नी रहे, मगर उकर में हाँ, आउर हाँ हें रहे। काले कि परमेश्‍वर केर जेतना करारमन अहे उ सोउब मसीह में हाँ केर साथ पूरा होलक, आउर से लगिन हमरे यीशु मसीह केर द्वारा से परमेश्‍वर केर महिमा लगिन आमीन कहिला। परमेश्‍वर मोर इ सच्चाई केर गवाह हेके कि मोंय दोबारा कुरिन्थुस शहर में इ लगिन नी आलों, ताकि तोहरे के परेशानी ना होवोक। इ निहीं कि हमरे बिसवास केर बारे में तोहरेमन उपरे हक जमाएक चाहिला, मगर तोहर खुशी में साथ देवेक चाहिला, काले कि तोहरेमन बिसवास से हें स्थिर रहाला। मोंय अपन मन में एहे ठाइन लेई रहों कि फिन दोबारा तोहरे ठिना आय के तोहरे के दुःख नी देमूँ। काले कि अगर मोंय तोहरेमन के दुःख देमूँ, तो तोहरे के छोइड़ आउर केऊ नी बाइच हैं जेमन मोके खुश करबैं। मोंय इ चिट्ठी के तोहरेमन के इ लगिन लिखलो कि मोर आवेक से एइसन ना होवोक कि जेमन से मोके खुशी मिलेक चाही, उमन से मोंय उदास होमूँ, काले कि मोके तोहरे सोउबमन उपरे इ गोइठ केर भरसा अहे कि जे खुशी मोके अहे, ओहे खुशी तोहरे सोउबमन केर हों अहे। इ चिट्ठी के मोंय भारी दुःख तकलीफ आउर अपन मन केर कष्ट से, काइंद-काइंद के तोहरेमन के लीख रहों, इ लगिन निहीं कि तोहरेमन दुःखी होबा, मगर इ लगिन कि तोहरेमन मोर उ बड़का प्रेम के जाइन लेवा, जे तोहरे से अहे। आउर अगर केऊ आदमी मोके दुःख देई हे तो ना सिरिफ मोके देई हे, बल्कि उकर से बगरा तोहरे सोउब के देई हे, (उकर संगे ढेइर कड़ाई नी करमूँ), एइसन आदमी लगिन इ दंड जेके बिसवासीमन में से ढेइरमन देई हैं, ढेइर अहे। इ लगिन इकर से भला इ अहे कि उकर पाप के क्षमा करा आउर दिलासा देवा, ना होवोक कि एइसन आदमी ढेइर दुःख में डूइब जाई। इ लगिन मोंय तोहरे से बिनती करोना, उके बतावा कि तोहरे सचमुच में उकर से प्रेम कराला। काले कि मोंय इ लगिन हों लीख रहों कि तोहरेमन के परइख लेमूँ कि तोहरे मोर सोउब गोइठमन के मानेक लगिन तेयार अहा कि निहीं। अगर तोहरेमन केखो जे तोहरे केर बिरोध में कोनों पाप काइर हे उके क्षमा कराला, तो मोंय हों क्षमा करोना, जब, जे कोनों क्षमा करेक केर जरुरत होवेला उके मोंय क्षमा करोना, तो मोंय तोहरे केर फायदा लगिन मसीह केर अधिकार केर साथ करोना। शैतान के हमरे से कोनों फायदा उठाएक ना देवा, काले कि हमरे जानिला कि उ हमेशा हमरे के पाप में गिराएक लगिन लगल रहेला। आउर जब मोंय मसीह केर शुभ समाचार सुनाएक ले त्रोआस नगर में आलों, तब प्रभु मोके शुभ समाचार सुनाएक लगिन बढ़ियाँ मोका देलक। तो मोंय अपन बिसवासी भाई तीतुस के नी पाय के मन में ढेइर बेचैन होई गेलों, से लगिन मोंय उमन से बिदा होई के मकिदुनिया परदेस चाइल गेलों। परमेश्‍वर केर धन्यबाद होवोक, काले कि हमरे मसीह केर संगे एक होई जाय ही, सेकर चलते उ हमरे के हमेशा अपन संगे अगुवाई करेला, आउर जीत देवेला। आउर परमेश्‍वर हमरे केर जरिया से मसीह केर गेयान केर सुगंध के सोउब जगा फैलायला। काले कि हमरे परमेश्‍वर लगिन मसीह केर द्वारा जलाल धूप नियर हेकी, आउर संदेश जे हमरे केर द्वारा परचार करल जायला, उ सुगंध नियर हेके, जे छुटकारा पावल आउर छुटकारा नी पावल सोउब आदमीमन में फाइल जायला। थोरेक आदमीमन लगिन तो मोरेक केर खातिर माउत केर सुगंध, आउर थोरेक आदमीमन लगिन तो जिंदगी केर खातिर जिंदगी केर सुगंध केर रूप में फाइल जायला। इ काम के करेक केर लायक बिलकुल केऊ नखैं। काले कि हमरे उ ढेइरमन केर जइसन नखी, जेमन परमेश्‍वर केर बचन के रुपया लगिन परचार करैना, मगर हमरे हमेशा परमेश्‍वर केर भीरे मसीह केर द्वारा ईमानदारी से गोठियाइला। का हमरे फिन अपन बड़ाई करेक लगली? या हमरे के आउरमन केर नियर सिफारिस केर चिट्ठीमन तोहरे ठिना लानेक या तोहरे से लेवेक अहे? तोहरे खुद हें एगो चिट्ठी नियर हेका जे हमरे केर हिरदय में लिखल अहे, ओहे हमरे केर सिफारिस हेके, तोहर माझे हमर काम केर चलते तोहरे केर बदलाल जिंदगी एगो चिट्ठी नियर हेके, जेके सोउब आदमीमन पढ़ैना आउर जानैना। इ गोइठ सफा अहे कि तोहरे केर बदलाल जिंदगी एगो चिट्ठी हेके, जेके मसीह हमरे केर सेवा केर बदली में लीख हे, जे सियाही से निहीं, मगर परमेश्‍वर केर आत्मा से लिखल जाय हे। हमरे एइसन इ लगिन कहिला, काले कि मसीह केर चलते परमेश्‍वर उपरे हमरे केर पक्का भरसा अहे। हमरे इ नी कहिला कि कोनों करेक लगिन हमरे खुद लायक अही, मगर परमेश्‍वर हमरे के लायक बनायला। जे हमरे के नवाँ करार केर सेवक बनेक केर लायक बनालक, मूसा केर लिखल नियम केर निहीं बल्कि पवितर आत्मा केर, काले कि मूसा केर लिखल नियम के पूरा नी करले दंड मिलेला, मगर पवितर आत्मा जुग-जुग केर जिंदगी देवेला। काले कि जब दोषी ठहराएक वाला करार तेज चमक से भरल रहे, तो इ पक्का अहे कि नवाँ करार जे आदमीमन के धरमी ठहरायला, उ आउर हें बगरा तेज चमक से भरल होवी। अब पुरना करार केर चमक नवाँ करार केर चलते चमकदार नी दिसेला। काले कि जब मूसा केर नियम के तेज चमक केर साथ देवल गेलक, जे थोरहें दिन लगिन रहे, तो नवाँ करार केर चमक आउर हें बगरा तेज होवी, काले कि इ सोउब दिन लगिन रही। से लगिन एइसन आसरा राइख के हमरे साहस केर साथ गोठियाइला। हमरे मूसा नियर निहीं, जे अपन मुँह के परदा से ढाँइप रहे, ताकि इसराइलीमन उ निझेक वाला आउर मेटेक वाला तेज चमक के ना देखोक। मगर उ मनक मन कठोर होई गेलक, काले कि आइज तक पुरना नियम के पढ़ेक बेरा उ मनक हिरदय में ओहे परदा ढाँपल रहेला, उ परदा सिरिफ मसीह में बिसवास करेक से उइठ जायला। आइज तक जब कहियो मूसा केर नियम केर किताब के पढ़ल जायला, तो उ मनक हिरदय में परदा ढाँपल रहेला। मगर जब कभी उमन अपन हिरदय से प्रभु यीशु में बिसवास करबैं, तब उ परदा उइठ जाई। प्रभु तो आत्मा हेके आउर जहाँव कहों प्रभु केर आत्मा रहेला हूवाँ मूसा केर नियम से आजादी मिलेला। जब हमरे सोउब केर चेहरा से परदा उइठ जायला, तो उ चेहरा से प्रभु केर चमक चमकेला, जइसन कि आयना में दिसेला, तब परमेश्‍वर हमरे के चमकदार से चमकदार महिमा में बदलते जायला, इ प्रभु केर काम हेके जे पवितर आत्मा हेके। इ लगिन जब हमरे उपरे परमेश्‍वर केर एइसन दया होलक कि हमरे के परमेश्‍वर केर संदेश के परचार करेक केर सेवा मिललक, तो हमरे हिम्मत नी हारिला। मगर हमरे लाज केर लुकल काममन के नी करिला, आउर हमरे चलाँकी से नी चलिला, ना हें परमेश्‍वर केर बचन में मिलावट करिला, मगर हमरे परमेश्‍वर केर भीरे सिरिफ सच्चाई के सिखाइला, आउर हरेक आदमी पक्का जाइन गेलक कि हमरे भरसा करेक केर लायक अही। अगर जे शुभ समाचार के हमरे परचार करिला उके आदमीमन नी बुझैना, तो नाश होवेक वालामन हें नी बुझैना। आउर उ अबिसवासीमन नी बुझैना, जे मनक बुद्धि के इ दुनिया केर ईश्‍वर शैतान अंधरा काइर देई हे, ताकि उमन मसीह केर महिमा केर बारे में आवेक वाला शुभ समाचार केर इंजोत के देखेक नी पारबैं, जे परमेश्‍वर कइसन अहे इके देखायला। काले कि हमरे खुद के निहीं, मगर यीशु मसीह के परचार करिला कि यीशु मसीह प्रभु हेके, आउर अपन बारे में इ कहिला कि हमरे यीशु केर चलते तोहर सेवक हेकी। इ लगिन कि परमेश्‍वर कहलक, “अंधार में से इंजोत चमकोक,” आउर ओहे परमेश्‍वर हमरे के हमर हिरदय में दीया नियर समझ के देलक, ताकि हमरे परमेश्‍वर केर महिमा के देखेक पारली, जे यीशु मसीह में दिसेला। अब हमरे ठिना इ चमकेक वाला दीया हमर हिरदय में अहे, मगर हमरे खुद एगो फुटेक वाला माटी केर बासन नियर अही, जहाँ इ बड़का धन रखल अहे, इ अनइत शक्ति हमरे बटले निहीं बल्कि परमेश्‍वर बटले हेके। हमरे सोउब बटले दुःख भोगिला, मगर संकट में नी पड़िला, हमरे के कोनों उपाय नी सुझेला, मगर निराश नी होविला। हमरे के आदमीमन सतायना, मगर परमेश्‍वर हमरे के नी छोड़ेला, माइर के गिराय तो देवैना, मगर परमेश्‍वर नाश होवेक से बचाय लेवेला। हमरे के आदमीमन सोउब बेरा लगातार माइर मोराएक केर धमकी देवैना, जइसन यीशु के मोरालैं, ताकि यीशु केर जिंदगी हमरे केर काया में दिसोक। काले कि हमरे जीते जी सोउब बेरा यीशु केर चलते माउत केर हाँथ में सोंपल जाइला, ताकि यीशु केर जिंदगी हों हमरे केर नाश होवेक वाला काया में दिसोक। से, इकर मतलब इ होलक कि हमरे लगातार माउत केर खतरा में पड़िला, मगर इकर बदली में तोहरे जुग-जुग केर जिंदगी पावाला। से लगिन हमरे लगातार परचार करिला काले कि हमरे में ओहे नियर बिसवास अहे, जइसन पवितर किताब में लिखल अहे, “मोंय परमेश्‍वर में बिसवास करलों, से लगिन मोंय गोठियालों।” काले कि हमरे जानिला कि जे प्रभु यीशु के मोरल में से जियालक, ओहे हमरे के हों यीशु में भागी जाइन के जियाई, आउर तोहर संगे हमरे के हों अपन सामने खड़ा करेक ले लानी। काले कि इ सोउब दुःखमन, जेके हमरे सहली तोहर फायदा लगिन हेके, ताकि परमेश्‍वर केर किरपा बगरा से बगरा आदमीमन के मालूम होई जाओक कि परमेश्‍वर केतना दयालु अहे, आउर ढेइर आदमीमन परमेश्‍वर केर आदर आउर महिमा करोक। इ लगिन हमरे हिम्मत नी हारिला, जबकि हमरे केर काया धीरे-धीरे मोइर जायला, फिन भी हमरे केर आत्मा रोज दिन नवाँ होते जायला। काले कि हमरे केर इ बेरा केर मुसीबतमन थोरहें अहे आउर बगरा दिन तक नी रही। काले कि उ मुसीबतमन केर बदली में जुग-जुग केर महिमा मिली, जे हमरे केर सोचेक से कहीं बाइढ़ के अहे। से लगिन हमरे उ मुसीबतमन उपरे धेयान नी देवीला, जेके हमरे एखन देखाथी, बल्कि हमरे उ चीजमन उपरे धेयान देवाथी, जेके एखन तक हमरे नी देइख ही, काले कि उ मुसीबतमन जेके हमरे देखाथी, तुरते मेइट जाई, मगर जे खुशी मिलेक वाला अहे, उ जुग-जुग लगिन रही। काले कि हमरे जानिला कि जब हमर दूई दिन केर काया, जे धरती में अहे, नाश होई जाई, तो हमरे के परमेश्‍वर बटले स्वरग में एगो एइसन घर मिली, जे हाँथ केर बनाल घर ना लगे मगर सोउब दिन लगिन स्वरग में बनल अहे। इकर में तो हमरे कुंहरिला आउर तरसिला कि हमरे अपन स्वरगीय काया के नवाँ लुगा नियर पिंध लेवब। जब हमरे स्वरगीय काया के पावब, तब नंगा नी रहब। हमरे इ धरती केर काया में रहते हुए बोझ से दाइब के कुंहरते रहिला, काले कि हमरे इ धरती केर काया के छोड़ेक नी चाहिला, मगर परमेश्‍वर से एहो चाहिला कि हमरे के स्वरगीय काया देवोक, ताकि हमरे के इ पुरना काया केर बदली में, जे मोइर जाई एगो नवाँ काया मिली आउर जुग-जुग लगिन रही। आउर जे हमरे के इ नवाँ काया लगिन तेयार काइर हे, उ, ओहे परमेश्‍वर हेके जे हमरे के बेयाना केर रूप में पवितर आत्मा हों देई हे। से लगिन हमरे सोउब बेरा निसचिंत रहिला, आउर जानिला कि जब तक हमरे काया में अही, तब तक अपन घर जाएक नी पारब जहाँ प्रभु रहेला। काले कि हमरे परमेश्‍वर के देइख के निहीं, मगर बिसवास से चलिला। इ लगिन हमरे निसचिंत रहिला आउर जब हमरे मोरब तो काया से अलग होई के, प्रभु केर संगे अपन घर में रहेक आउर हें बेस समझिला। इ लगिन हमर मन केर इ खुशी अहे कि चाहे हमरे उकर संगे स्वरग में रहब, चाहे हिंयाँ धरती में रहब, मगर उके खुश करते रहब। इ जरुरी अहे कि हमरे सोउब केर हाल मसीह केर फैसला करेक केर कुरसी केर सामने खुइल जाओक, ताकि हरेक आदमी अपन-अपन भला-बुरा काममन केर बदला, जे उ, काया केर जिंदगी में काइर हे, पाओक। से लगिन प्रभु केर डार-भय माइन के हमरे आदमीमन के समझाइला कि उमन सच्चाई उपरे बिसवास करोक, परमेश्‍वर हमरे के पूरा-पुरी जानेला आउर मोंय इ आसरा करोना कि तोहरे हों अपन आत्मा में हमरे के जानाला। फिन भी हमरे अपन बड़ाई तोहर सामने नी करिला, बल्कि हमरे अपन बारे में तोहरे के घमंड करेक केर मोका देवीला कि तोहरेमन उमन के जबाब देवेक पारबा, जेमन मन केर सच्चाई उपरे निहीं, मगर देखावटी गोइठमन में घमंड करैना। अगर केऊ हमरे के कही कि पगला हेकी, तो परमेश्‍वर लगिन पगला हेकी, आउर अगर दोसरमन कहबैं कि हमरे केर दिमाग ठीक अहे, तो तोहर लगिन अहे। काले कि मसीह केर प्रेम हमरे के मजबूर काइर देवेला, इ लगिन कि हमरे पक्का जानिला कि जब एक आदमी सोउब आदमीमन लगिन मोइर गेलक, तो सोउब मोइर गेलैं। आउर मसीह इकर चलते सोउब केर लगिन मोरलक कि जेमन जिंदा अहैं, उमन अब आगे खुद के खुश करेक लगिन ना जिओक, मगर उमन के मसीह केर लगिन जियेक चाही, जे उमन लगिन मोरलक आउर फिन जी उठलक। इ लगिन अब से हमरे केकरो फैसला काया केर मोताबिक नी करब, जबकि हमरे मसीह केर फैसला हों काया केर मोताबिक काइर रही, मगर अब एइसन नी करब। अगर केकरो रिश्ता मसीह केर संगे अहे, तो उ नवाँ सिरजन हेके, पुरना पापी स्वभाव दूर होई गेलक, देखा, नवाँ जिंदगी केर शुरुवात होई गेलक। इ सोउब परमेश्‍वर बटले होलक, जे मसीह के भेइज के अपन आउर हमर माझे मेल-मिलाप काइर लेलक, आउर मेल-मिलाप करुवाएक केर सेवा हमरे के सोंइप देई हे। मतलब परमेश्‍वर मसीह केर द्वारा करल सोउब काममन केर जरिया से दुनिया केर आदमीमन लगिन अपन संगे मेल-मिलाप करेक केर डहर बनालक, आउर आदमीमन केर पापमन केर दोष उमन उपरे नी लगालक, आउर मेल-मिलाप करुवाएक केर बचन हमरे के सोंइप देई हे। से लगिन हमरे मसीह केर राइज केर संदेश देवेक वाला हेकी, जइसन कि परमेश्‍वर हमर जरिया से अपन संदेश के स्वीकार करेक लगिन, आदमीमन के कहाथे कि परमेश्‍वर केर संगे मेल-मिलाप काइर लेवा। मसीह, जे पाप से अनजान रहे, उखे परमेश्‍वर हमर लगिन पाप ठहरालक, ताकि हमरे उकर नजइर में धरमी बनेक पारब, काले कि मसीह हमरे केर पापमन केर दंड के अपन उपरे उठाय लेलक। आउर हमरे जे परमेश्‍वर संगे काम करेक वाला हेकी, तोहरे से अरजी करिला कि उकर किरपा जे तोहर उपरे होई हे, उके बेकार ना जाएक देवा। काले कि पवितर किताब में परमेश्‍वर कहेला, “मोंय अपन सही समय में तोहरे केर प्रार्थना के सुइन लेलों, आउर छुटकारा देवेक केर दिन मोंय तोहरे केर मदइत करलों।” सुना, एखन उ खुशी केर समय हेके, सुना, एखन उ छुटकारा पावेक केर दिन हेके। परमेश्‍वर संगे काम करेक वाला केर रूप में, हमरे कोनों गोइठ में ठोकर खाएक केर कोनोवें मोका नी देवीला, ताकि हमरे केर सेवा उपरे केऊ कोनों रकम केर दोष ना लगाओक। मगर हमरे सोउब रकम से, इ देखाइला कि हमरे परमेश्‍वर केर सच्चा सेवा करेक वाला हेकी, आउर धीरज से कष्टमन के, गरीबी के, संकट के सहिला आउर कोड़रा खाएक से, जेहेल जाएक से, हुड़दंग से, मेहनइत करेक से, नींद अकाम करेक से, भूखे रहेक से, पवितर जिंदगी बिताएक से, गेयान से, धीरज धारेक से, किरपा करेक से, पवितर आत्मा केर अगुवाई में चलेक से, सच्चा प्रेम करेक से, सच गोइठ गोठियाएक से, परमेश्‍वर केर शक्ति से दुःख उठाइला, आउर धारमिकता से, जे हमरे ठिना हँथियार केर रूप में हमला करेक लगिन आउर खुद के बचाएक लगिन अहे, आदमीमन केर बड़ाई करेक आउर तुच्छ जानेक से, हमरे के बुरा आदमी या बेस आदमी कहेक से, हमरे के भरमाएक वाला कहैना, फिन भी हमरे सच्चा हेकी। थोरेक आदमीमन हमरे के अनजान आदमी समझैना, फिन भी थोरेक आदमीमन हमरे के नामी कहैना, मोरेक वालामन नियर अही, फिन भी जिंदा अही, माउर खाएक वालामन नियर अही, मगर जान से माइर मोराल नी जाइला। हमरे ढेइर दुःख उठाइला, मगर सोउब बेरा खुशी मनाइला, हमरे खुद तो गरीब अही, मगर ढेइर आदमीमन के आत्मिक रीति से धनी बनाय देवीला, एइसन अही जइसन हमरे ठिना कोनों नखे, फिन भी हमरे ठिना सोउब कुछ अहे। हे कुरिन्थुस शहर केर बिसवासीमन, हमरे खुइल के तोहरे से गोठियाय ही, हमरे केर हिरदय में तोहरे बाइस जाय हा। तोहरेमन लगिन हमरे अपन प्रेम में कमी नी काइर ही, मगर तोहरेमन हमरेमन के प्रेम करेक में कमी काइर हा। तोहरेमन के मोंय अपन छउवा जाइन के तोहर से कहोना कि तोहरेमन हों इकर बदला में अपन हिरदय में हमरे के बसाय लेवा। तोहरेमन अबिसवासीमन नियर नखा, से लगिन उमन लेखे ना होवा, काले कि हमरे जे भलाई काम करिला उके दुष्ट आदमीमन केर संगे मिल के नी करेक चाही, दीया आउर अंधार एक संगे नी मिलेक पारी, आउर मसीह केर शैतान संगे कोनों लगाव नखे, या जे आदमीमन मसीह उपरे बिसवास करैना, उमन अबिसवासीमन से बिलकुल अलग अहैं। आउर परमेश्‍वर केर मंदिर केर रिश्ता मूर्तिमन से नखे, काले कि हमरे तो जिंदा परमेश्‍वर केर मंदिर हेकी, जइसन पवितर किताब में परमेश्‍वर कइह हे, “मोंय इ आदमीमन केर संगे रहमूँ आउर उमन केर संगे चलमूँ-फिरमूँ, मोंय उमन केर परमेश्‍वर होमूँ, आउर उमन मोर आदमी होबैं।” इ लगिन पवितर किताब में प्रभु हमरे से कहेला, “उ आदमीमन केर माझे से निकला, जेमन परमेश्‍वर केर पिछे नी चलैना, आउर अशुद्ध काममन से दूर रहा, तो मोंय तोहरेमन के ग्रहण करमूँ। आउर मोंय तोहर आबा नियर होमूँ, आउर तोहरेमन मोर बेटा आउर बेटीमन नियर होबा, इ सर्वशक्तिमान प्रभु परमेश्‍वर केर बचन हेके।” से लगिन हे दुलार बिसवासी भाईमन, जबकि हमरे के इ करारमन मिल हे, तो आवा, हमरे सोउब रकम केर दुष्ट काममन के करेक छोइड़ देवब, आउर परमेश्‍वर केर आदर करते हुए पूरा-पुरी पवितर जिंदगी जियेक केर कोशिश करब। तोहरे, हमरे के अपन हिरदय में बसाय लेवा, हमरे ना केकरो से अन्याय करली, ना केखो बिगड़ाली, आउर ना केखो ठकली। मोंय तोहरेमन के दोषी ठहराएक लगिन इ नी कहोना, काले कि मोंय पहिलेहें कइह चुइक हों कि तोहरेमन के हमरे अपन हिरदय में एइसन बसाय लेई ही कि चाहे कोनोवें होई जाओक, हमरे तोहरेमन से प्रेम करते रहब। मोंय तोहरेमन से ढेइर हिम्मत केर साथ कहाथों, मोके तोहरेमन उपरे घमंड अहे, आउर मोंय शांति से भाइर जाय हों। अपन सोउब कष्टमन में हों मोंय ढेइर खुश रहोना। काले कि जब हमरे मकिदुनिया परदेस में आली, तब हों हमरे के आराम नी मिललक, मगर हमरे के चाइरो बटे से परेशानी होवत रहे, बाहरे चाइरो बटे लड़ाईमन रहे, आउर हमरे केर हिरदय में डार रहे। फिन भी दुःखी आदमीमन के शांति देवेक वाला परमेश्‍वर, तीतुस केर आवेक से हमरे के शांति देलक। आउर ना सिरिफ उकर आवेक से मगर उकर उ शांति से हों, जे तीतुस के तोहर बटले मिल रहे, उ हमरे के बतालक कि तोहरे मोके केतना देखेक चाहाला, आउर जे कोनों तोहरेमन करला उकर बारे में तोहरे के दुःख अहे, आउर तोहरे कइसन मोर बारे में चिंता कराला। मोंय इ चिट्ठी तोहरे के लीख के नी पसतावना, जबकि तोहरे इ चिट्ठी से दुःखी होला, पहिले जब मोंय देखलों कि थोरेक समय ले तोहरे दुःखी होला, तो मोंय पसतात रहों, मगर एखन मोंय खुश अहों। अब मोंय खुश अहों मगर इ लगिन निहीं कि तोहरेमन के दुःख पोहोंचलक, मगर इ लगिन कि तोहरेमन उ दुःख केर चलते पाप करेक छोइड़ देला, काले कि तोहर दुःख परमेश्‍वर केर इच्छा केर मोताबिक रहे कि हमर बटले तोहरेमन के कोनों गोइठ में नुकसान ना पोंहचोक। काले कि परमेश्‍वर केर इच्छा केर मोताबिक दुःख, पाप करेक छोड़वाय देवेला, जेकर नतीजा से छुटकारा मिलेला, आउर फिन उके पसताएक नी पड़ेला। मगर दुनिया केर दुःख जुग-जुग लगिन माउत बटे लेगेला। से लगिन धेयान देवा, परमेश्‍वर बटले आवल दुःख तोहरेमन में का-का बदलाव के लानलक, जोश से भरल लालसा, अपन बचाव लगिन सफाई देवेक केर इच्छा, अन्याय केर परती खीस, संकट केर परती सावधानी, मोर से भेंट करेक केर खूब इच्छा, सेवा करेक लगिन जोश, आउर पापी के दंड देवेक लगिन एइसन धुन, जेकर चलते तोहरे इ साबित काइर देला कि सोउब कुछ के ठीक करेक में तोहरे कोनों कसर नी छोइड़ हा। फिन मोंय जे चिट्ठी में कठोर गोइठमन के तोहर लगिन लीख रहों, उके ना तो अन्याय करेक वालामन केर चलते, आउर ना तो जेमन केर अन्याय होवेला उकर चलते लीख रहों, मगर इ लगिन लीख रहों कि तोहरे केर जोश, जे हमरे लगिन अहे उ परमेश्‍वर केर सामने दिसोक। इ सोउब केर चलते हमरे के जोश मिललक, आउर हमरे केर इ जोश केर साथ तीतुस केर खुशी केर चलते आउर हें खुश होली, काले कि उकर जीव तोहरे केर चलते हरियार होई जाय हे। काले कि अगर मोंय उकर सामने तोहर बारे में कोनों घमंड काइर हों, तो नी लजालों, मगर जइसन हमरे तोहरेमन से सोउब गोइठमन के सच-सच कइह देई रही, तइसनेहें हमर घमंड करेक तीतुस केर सामने हों सच निकललक। आउर जब उके याइद आवेला कि तोहरे सोउबमन आगयाकारी अहा, आउर कइसन तोहरे डराते आउर थरथराते उकर से भेंट करला, तो तोहर खातिर उकर प्रेम आउर हें बाइढ़ जायला। मोंय खुश अहों काले कि तोहर हर गोइठ में मोके पूरा भरसा अहे। अब हे बिसवासी भाईमन, हमरे तोहरेमन के परमेश्‍वर केर उ किरपा केर शुभ समाचार देवीला, जे मकिदुनिया परदेस केर कलीसियामन उपरे होई हे। जब उमन ढेइर दुःखमन से परखल गेलैं, तो उमन ढेइर खुश होलैं आउर भारी गरीबी में उमन खुला दिल से दोसर बिसवासीमन के मदइत करलैं। आउर उमन केर बारे में मोंय इ गवाही देवोना कि उमन अपन लियाकत भइर, बल्कि लियाकत से हों बाइढ़ के अपन इच्छा से देलैं। आउर इ दान में आउर यरुशलेम शहर केर पवितर आदमीमन केर सेवा में भागी होवेक केर मोका लगिन हमरे से घरी-घरी ढेइर बिनती करलैं। आउर जइसन हमरे आसरा काइर रही, तइसन बिलकुल निहीं, बल्कि उमन पहिले खुद के परमेश्‍वर लगिन देई देलैं, आउर इकर पाछे हमरे लगिन हों देई देलैं, जइसन परमेश्‍वर केर इच्छा रहे कि उमन ओइसनेहें करोक। इ लगिन हमरे तीतुस के समझाली कि जइसन उ पहिले शुरु काइर रहे, तइसनेहें तोहर माझे में इ दान केर काम के हों पूरा काइर लेवोक। से लगिन जइसन हर गोइठ में, मतलब बिसवास, बचन परचार करेक केर हैसियत, गेयान आउर सोउब रकम केर कोशिश, आउर उ प्रेम में जे हमरे से रखाला, बढ़ते जावाला, तइसनेहें गरीब बिसवासीमन लगिन दान देवेक केर काम में हों बढ़ते जावा। मोंय आगया तो नी देवाथों, मगर दोसरमन केर जोश से तोहर प्रेम केर सच्चाई के परखेक लगिन कहाथों। तोहरेमन हमर प्रभु यीशु मसीह केर किरपा के जानाला कि उ धनी होई के हों तोहरे लगिन गरीब बाइन गेलक, ताकि उकर गरीब बाइन जाएक से तोहरेमन धनी बाइन जबा। काले कि अगर तोहरे ठिना दोसरमन के दान देवेक केर मन अहे, तो दान उकर मोताबिक ग्रहण हों होवेला जे उकर ठिना अहे। मोंय इ नी चाहोना कि दोसरमन केर जिंदगी के खुश करेक केर चलते, तोहरेमन अपन जिंदगी में दुःख उठाबा। मगर एखन तोहरे ठिना भरपूर अहे, आउर तोहरेमन उमन केर मदइत करेक पाराला। पाछे जब तोहरे केर जरुरत होवी, आउर उमन ठिना भरपूर रही तो उमन तोहरे केर मदइत करबैं, इ नियर सोउबमन केर जरुरत पूरा करल जाओक। जइसन पवितर किताब में लिखल अहे, जे ढेइर जमा करलक उकर कोनों बगरा नी होलक, आउर जे थोर जमा करलक उकर कोनों घटी नी होलक। आउर परमेश्‍वर केर धन्यबाद होवोक, जे तोहर लगिन ओहे जोश तीतुस केर मन में भाइर देई हे। जब हमरे उके तोहरे ठिना जाएक कहली, तो उ हमरे केर अरजी के माइन लेलक, बल्कि उ ढेइर खुश होई के अपन इच्छा से तोहरे ठिना जाय हे। आउर हमरे उकर संगे दोसर बिसवासी भाई के भेइज ही, जेकर नाँव शुभ समाचार के फैलाएक में सोउब कलीसिया केर बिसवासीमन में फाइल जाय हे। आउर एतना हें निहीं, मगर उ भाई, कलीसिया केर बिसवासीमन बटले ठहराल हों गेलक कि इ दान केर काम लगिन हमरे संगे जाओक। आउर हमरे इ सेवा, इ देखाएक लगिन करिला कि प्रभु केर महिमा होवोक आउर हमरे यरुशलेम केर बिसवासीमन केर मदइत करेक लगिन इच्छुक अही। हमरे उ बिसवासी भाई के तीतुस संगे इ लगिन भेजली, ताकि इ भेंट देवेक केर काम जेके हमरे करिला, केऊ हमरे उपरे दोष लगाएक ना पारोक। काले कि जे गोइठमन सिरिफ प्रभु केर भीरे हें निहीं, मगर आदमीमन केर भीरे हों भला अहे, ओहे काममन के हमरे करेक ले धेयान देवीला। आउर हमरे उ दुइयो झन केर संगे, एगो आउर बिसवासी भाई के भेइज ही, जेके हमरे कायनों बेर परइख के ढेइर गोइठमन में जोशीला पाय ही, मगर अब तोहरेमन उपरे उके पूरा भरसा अहे, इकर चलते उ आउर हें ढेइर जोशीला अहे। अगर केऊ तीतुस केर बारे में पूछी, तो उ मोर संगी आउर तोहर लगिन मोर संगे काम करेक वाला हेके, आउर अगर हमर भाईमन केर बारे में पूछी, तो उमन कलीसिया बटले भेजल हेकैं आउर मसीह केर आदर करेक वाला हेकैं। इ लगिन अपन प्रेम आउर हमर उ घमंड जे तोहर बारे में अहे, कलीसियामन केर सामने उमन के सिद्ध काइर के दिखावा। अब यरुशलेम शहर केर बिसवासीमन के दान देवेक केर सेवा केर बारे में, मोके तोहरेमन के लिखेक जरुरी नखे। काले कि मोंय तोहरे केर देवेक केर इच्छा के जानोना, जेकर चलते मोंय तोहर बारे में मकिदुनिया परदेस केर बिसवासीमन केर सामने घमंड करोना कि तोहरे अखया परदेस केर आदमीमन एक बरिस से दोसरमन के मदइत करेक लगिन तेयार होई हा, आउर तोहरे केर जोश आउर ढेइर आदमीमन के हों उसकाय हे। अब मोंय तीतुस आउर दूई झन दोसर बिसवासी भाईमन के भेजाथों, ताकि यरुशलेम शहर केर बिसवासीमन के तोहरे केर दान देवेक केर बारे में हमरे केर घमंड करेक बेकार ना होवोक, मगर जइसन मोंय कहलों तइसनेहें तोहरेमन यरुशलेम शहर केर बिसवासीमन के दान देवेक लगिन तेयार रहा। एइसन ना होवोक कि अगर केऊ बिसवासी मकिदुनिया परदेस से मोर संगे आवी, आउर तोहरेमन के दान देवेक लगिन तेयार नी पावी, तो तोहरे के लाजिम होवेक पड़ी, मगर हमरे के तोहरे से बगरा लाजिम होवेक पड़ी। इ लगिन मोंय बिसवासी भाईमन से इ बिनती करेक जरुरी समझलों कि उमन पहिले से तोहरे ठिना जाओक, आउर तोहरेमन केर दान जे दया भाव से देवाला, जेकर बारे में पहिले से बचन देवल जाय रहे, तेयार करोक कि इ दबाव से निहीं मगर दया भाव से देवेक नियर होवोक। गोइठ तो इ अहे कि जे थोर बुनेला उ थोरहें काटी आउर जे ढेइर बुनेला, उ ढेइर काटी। हरेक आदमी जइसन मन में दान देवेक केर फैसला करेला तइसनेहें दान देओक, ना कुड़कुड़ाय के आउर ना दबाव से देओक, काले कि परमेश्‍वर खुशी से देवेक वालामन से प्रेम करेला। आउर परमेश्‍वर तोहरे के तोहर जरुरत से बगरा आशीष देवेक पारेला, ताकि तोहरे ठिना हर समय सोउब कुछ रही, जेकर तोहरे के जरुरत अहे, आउर दोसरमन के बाँटेक लगिन ढेइर बचल हों रही। जइसन पवितर किताब में लिखल अहे, “परमेश्‍वर दया से जरुरतमंद आदमीमन के देवेला, आउर उकर इ काम जुग-जुग लगिन बनल रही।” परमेश्‍वर हमेशा किसान के बुनेक लगिन बिहीन देवेला आउर खाएक लगिन आहार हों देवेला। ठीक एहे नियर, परमेश्‍वर एइसन करेला कि तोहर ठिना सोउब कुछ भरपूर होवोक, ताकि तोहरेमन उमन केर मदइत बाइढ़-चाइढ़ के करेक पारबा, जेमन के जरुरत अहे। आउर तोहरेमन सोउब रकम से आशीष से भरपूर होबा, आउर तोहरे खुला दिल से हर समय देवेक लाएक होबा, आउर जब जरुरतमंद आदमीमन तोहरे केर खुला दिल से देवल दान के लेबैं, तो उमन परमेश्‍वर के धन्यबाद देबैं। काले कि दोसरमन के दान देवेक से, ना सिरिफ बिसवासीमन केर घटीमन पूरा होवेला, मगर बिसवासीमन बटले परमेश्‍वर के ढेइर धन्यबाद देवल जायला। काले कि दोसरमन के मदइत करेक लगिन खुला दिल से देवल दान, इ सबूत देवेला कि तोहरे अपन करार के पूरा काइर हा, आउर ढेइर आदमीमन परमेश्‍वर केर महिमा करैना, काले कि तोहरेमन मसीह केर शुभ समाचार सच्चा हेके, इके माइन लेई हा, आउर इकर पालन कराथा आउर सोउब बिसवासीमन केर मदइत करेक लगिन दान देवाला, खास काइर के गरीबमन के। उमन तोहर लगिन प्रार्थना करैना आउर तोहरे के प्रेम करैना, काले कि उमन जानैना कि परमेश्‍वर तोहरे उपरे महान किरपा काइर हे। परमेश्‍वर के उकर बेटा केर दान लगिन जे बखाइन से बाहरे अहे, धन्यबाद होवोक। थोरेक आदमीमन कहैना कि जब मोंय तोहर संगे रहोना तो नरम रहोना, मगर जब तोहर से दूर रहोना तो साहस करोना, से लगिन मोंय पौलुस तोहरे से अरजी करोना कि यीशु मसीह केर धीरज आउर नरम जिंदगी केर चलते मोंय उकर नमूना केर पालन करोना। मोंय इ बिनती करोना कि जब मोंय हूवाँ आमूँ तो मोके उमन केर परती, जेमन इ सोचैना कि हमरे केर जिंदगी इ दुनिया केर आदमीमन नियर अहे, कठोर ब्यवहार करेक पड़ी, जेकर उमन मोर से आसरा करैना। काले कि हमरे इ दुनिया में रहिला मगर इ दुनिया केर आदमीमन नियर नी लड़िला। हमरे केर लड़ाई केर हँथियार इ दुनिया केर आदमीमन केर हँथियार नियर नखे, मगर गढ़मन के गिराय देवेक लगिन परमेश्‍वर बटले शक्तिशाली अहे। से लगिन हमरे मन केर बिचारमन के आउर हरेक घमंड केर गोइठ के, जे परमेश्‍वर केर इच्छा केर बिरोध में उठेला, उके रोकिला आउर हर एक बिचारमन के काबू काइर के मसीह केर आगयाकारी बनाय देवीला। आउर तेयार रहिला कि जब तोहरे पूरा-पुरी मसीह केर आगयाकारी बिसवासी बाइन जबा, तब हरेक रकम केर आगया नी मानेक वाला आदमी के परमेश्‍वर दंड देवी। तोहरेमन बाहरी चीजमन के देखाला, अगर केखो अपन उपरे इ भरसा अहे कि मोंय मसीह केर हेकों, तो उ एहो जाइन लेवोक कि जइसन उ मसीह केर हेके, तइसनेहें हमरे हों मसीह केर हेकी। काले कि अगर मोंय उ अधिकार केर बारे में आउर हें घमंड करमूँ, जेके प्रभु तोहरे केर बिसवास के घटाएक लगिन निहीं मगर बढ़ाएक लगिन हमरे के देई हे, तो लाजिम नी होमूँ। तोहरेमन इ ना सोचबा कि मोंय अपन चिट्ठी से तोहरे के डरुवाएक चाहोना। काले कि तोहर में से थोरेक आदमीमन कहैना कि उकर चिट्ठीमन तो, कठोर आउर शक्तिशाली अहे, मगर जब उ हमरे केर सामने रहेला, तो उकर काया कमजोर दिसेला आउर उकर गोइठ में कोनों असर नी बुझायला। जेमन एइसन कहैना उमन इ जाइन लेओक कि जइसन हमरे चिट्ठीमन में लिखिला, तइसनेहें तोहरे केर सामने काम हों करिला। काले कि हमरे के इ साहस नखे कि हमरे खुद के उमन में से गिनब या जोड़ी करब, जेमन अपन बड़ाई खुद करैना आउर आपस में खुद के नाइप जोइख के एक दोसर से जोड़ी करैना, आउर मूरख बनैना। हमरे तो जे काम परमेश्‍वर हमरे के करेक लगिन देई हे उकर से बगरा घमंड कहियो नी करब, मगर ओतनेहें तक करब जेतना परमेश्‍वर हमर लगिन ठहराय देई हें, आउर उकर में तोहरेमन हों शामिल होई जाय हा, आउर उकरे मोताबिक घमंड हों करब। काले कि हमरे अपन सीमा से बाहरे खुद के बढ़ाएक नी चाहिला, जइसन कि तोहरेमन तक नी पोंहचेक केर दशा में होतक, बल्कि हमरे पहिला आदमीमन हेकी, जेमन तोहरे के मसीह केर शुभ समाचार के बताएक लगिन गोटा कुरिन्थुस शहर में सफर काइर ही। हमरे सीमा से बाहरे दोसरमन केर मेहनइत उपरे घमंड नी करिला, मगर हमरे के आसरा अहे कि जइसन-जइसन तोहर बिसवास बढ़ते जाई तइसन-तइसन हमरे अपन सीमा केर मोताबिक तोहरे केर माझे आउर बड़का काम करेक पारब। कि हमरे तोहरे केर सिमान से आगे बाइढ़ के दूर-दूर ठाँव में शुभ समाचार सुनाब, इ निहीं कि हमरे दोसरमन केर काममन केर उपरे घमंड करब, जहाँ परमेश्‍वर हमरे के नी भेइज हे। मगर जइसन पवितर किताब में लिखल अहे, जे घमंड करेला उ प्रभु उपरे घमंड करोक। काले कि जे अपन बड़ाई करेला उ निहीं, मगर जेकर बड़ाई प्रभु करेला, उ प्रभु केर देखेक में बेस अहे। तोहरेमन उमन के ग्रहण कराला जेमन अपन खुद केर गुण गावैना, से लगिन मोंय आसरा करोना कि अगर मोंय हों थोरेसन मूरख नियर काम करमूँ, तो तोहरेमन साइह लेबा। काले कि मोंय तोहरे केर बारे में चिंता करोना, जइसन परमेश्‍वर करेला, से लगिन तोहरेमन के मोंय, तोहरे केर एके गो पति मसीह केर हाँथ में पवितर डिंड़ा कन्या नियर सोंइप देवेक केर करार काइर हों। मगर मोंय डरावना कि जइसन शैतान साँप केर रूप में अपन चलाँकी से पहिला जनाना हव्वा के बहकालक, तइसनेहें तोहरे केर मन के हों उ सिधाई आउर पवितरता से मसीह के जे आदर देवेक चाही, उकर से कहीं दूर ना काइर देओक। जब कभी केऊ तोहरे ठिना आय के, केऊ दोसर यीशु केर परचार करेला जेकर परचार हमरे नी काइर ही, चाहे कोनों दोसर आत्मा के पावाला जेके पहिले नी पाय रहा, चाहे तोहरेमन कोनों दोसर शुभ समाचार के सुनला जेके पहिले नी सुइन रहा, तो तोहरे तुरते उके ग्रहण काइर लेवाला जे कि गलत है। मोंय कोनों गोइठ में उमन से कम नखों, जेमन खुद के यीशु केर चुनल खास चेलामन में से सोउब से बाड़ समझैना। मोंय बोलेक में चतूर नखों, मगर मोर ठिना मसीह केर बारे में आउर शुभ समाचार केर बारे में गेयान अहे, बल्कि मोंय अपन सिखाएक केर सोउब गोइठमन में अपन गेयान के देखाय हों। मोंय खुद के छोट बनाय देलों जेकर से तोहरे के परमेश्‍वर केर शुभ समाचार के मुफत में सुनामूँ, ताकि तोहरे आदर पाबा, का मोंय एइसन काइर के कोनों पाप करलों? मोंय दोसर कलीसियामन से दान लेलों, ताकि तोहरे केर सेवा करमूँ, तोहरे के इ नी कहेक चाही कि एइसन करेक गलत हेके। आउर जब मोंय तोहर संगे रहों, आउर मोके रुपया केर घटी होलक तो मोंय केखो बोझा नी देलों, काले कि बिसवासी भाईमन मकिदुनिया परदेस से आय के मोर घटी के पूरा करलैं, आउर मोंय कोनों गोइठ में तोहरे उपरे बोझा नी बनलों आउर आवेक वाला दिन में हों नी बनमूँ। अगर मसीह केर सच्चाई मोर में पक्का अहे, तो अखया परदेस में केऊ मोके इ घमंड से रोकेक नी पारी। मोंय तोहरे केर रुपया के काले नी लेलों? का मोंय एइसन इ लगिन करलों कि मोंय तोहर से प्रेम नी करोना? परमेश्‍वर जानेला कि मोंय तोहरे से प्रेम करोना। ताकि मोंय यीशु केर झूठा चेलामन के हमरे केर बराबरी होवेक से रोकेक पारमूँ। उमन सचमुच में इ दावा करेक केर मोका खोजैना कि उमन केर इ घमंड करेक सच अहे कि उमन हमरे केर बराबइर अहैं। काले कि एइसन आदमीमन यीशु केर चुनल खास चेला ना लगैं, उमन छल से काम करेक वालामन आउर मसीह केर चुनल खास चेलामन केर रूप धारेक वालामन हेकैं। आउर इ कोनों ताजुब केर गोइठ ना लगे, काले कि शैतान खुद हें चमकेक वाला स्वरगदूत केर रूप धारण करेला। से लगिन अगर उकर सेवकमन हों, धरमी बनाएक वाला केर सेवकमन नियर रूप धरबैं, तो कोनों बड़का गोइठ ना लगे, मगर उ मनक अंत उमन केर काममन केर मोताबिक होवी। मोंय फिन कहोना, केऊ मोके मूरख ना समझोक, निहीं तो मूरख हें समइझ के मोर साइह लेवा, ताकि थोरेसन मोंय हों घमंड करेक पारमूँ। इकर बारे में जे कोनों मोंय कहोना, उ प्रभु केर आगया केर मोताबिक निहीं मगर मूरखमन नियर कहोना। जबकि ढेइर आदमीमन इ दुनिया केर मोताबिक घमंड करैना, तो मोंय हों घमंड करमूँ। तोहरेमन तो समझदार होई के हों मूरखमन केर ब्यवहार के खुशी से साइह लेवाला। काले कि जब तोहरेमन के केऊ धांगर बनाय लेवेला, या तोहरे ठिना जे कोनों अहे उ सोउब के ले लेवेला या धोखा देवेला, या खुद के बाड़ बनायला, या तोहर गाल में थप्पड़ मारेला, तो तोहरेमन साइह लेवाला। से लगिन का तोहरे सोचाला कि मोके लाज होवेक चाही, काले कि मोंय एइसन नी काइर हों? मगर जे केऊ कोनों गोइठ में घमंड करेला: मोंय मूरखमन नियर कहोना, तो मोंय हों घमंड करोना। का उमन हें इब्रानी आदमी हेकैं? मोंय हों हेकों, का उमन हें इसराइली आदमी हेकैं? मोंय हों हेकों, का उमन हें अब्राहम केर बंश हेकैं? मोंय हों हेकों। का उमन हें मसीह केर सेवक हेकैं? मोंय पगला नियर कहोना, मोंय उमन से बाइढ़ के हेकों! मोंय उमन से बगरा मेहनइत काइर हों, उमन से बगरा जेहेल खाइट हों, अनगिनइत बेर माउर खाय हों, अक्सर मोर प्राण संकट में पाइड़ हे। पाँच बेर मोंय यहूदी अगुवामन केर हाँथ से उन्तालीस-उन्तालीस कोड़रा खाय हों तीन बेर मोके बेंत से मारल गेलक, एक बेर पखना से मारल गेलों, तीन बेर जहाज जेकर उपरे मोंय चाइढ़ रहों, टूइट गेलक, एक राइत दिन मोंय समुदर में काटलो। मोंय घरी-घरी यात्रामन में; नदीमन केर खतरामन में; डाकूमन केर खतरामन में, अपन जाइत वालामन से खतरामन में, परजाइत आदमीमन से खतरामन में, नगरमन केर खतरामन में जंगलमन केर खतरामन में, समुदर केर खतरामन में, झूठा भाईमन केर माझे खतरामन में। मेहनइत आउर दुःख में, घरी-घरी जागते रहेक में, भूख-पियास में, घरी-घरी उपास करेक में, जाड़ में, लुगा केर घटी में। आउर-आउर गोइठमन के छोइड़ के जेकर बखाइन मोंय नी करोना सोउब कलीसियामन केर चिंता रोज दिन मोके दबायला। जब केऊ कमजोर होवेला तो मोंय हों कमजोर होओना। जब केऊ हों पाप में फाँइस जायला, तो उकर उपरे मोंय खिसाय जावना। अगर घमंड करेक जरुरी अहे, तो मोंय अपन कमजोरी केर गोइठमन केर उपरे करमूँ। प्रभु यीशु केर परमेश्‍वर आउर आबा जे सोउब बेरा धाइन अहे, जानेला कि मोंय झूठ नी कहोना। दमिश्क नगर में अरितास राजा केर बटे से जे हाकिम रहे, उ मोके धारेक ले दमिश्कीमन केर नगर में पहरा बइठाय रहे। मगर मोंय टोकरी में खिड़की से होई के भीत उपरे से उतराल गेलों, आउर उकर हाँथ से बाइच निकललो। घमंड करेक तो मोर लगिन ठीक नखे फिन भी करेक पड़ेला, इ लगिन मोंय प्रभु केर देवल दर्शनमन केर आउर भेदमन केर चरचा करमूँ। मोंय मसीह में एगो आदमी के जानोना, जे चौदह बरिस पहिले, मोके पता नखे कि उ अपन काया सहित या सिरिफ अपन आत्मा में, परमेश्‍वर जानेला, इ आदमी सोउब से ऊँचा स्वरग तक उठाय लेवल गेलक। मोंय फिन कहोना, मोके पता नखे एइसन सचमुच में होलक, या इ दर्शन रहे, परमेश्‍वर हें जानेला। उ स्वरग लोक में उठाय लेवल गेलक आउर एइसन गोइठमन के सुनलक, जेकर बारे में केखो, दोसर आदमीमन के बताएक केर अधिकार नखे। एइसन आदमी उपरे तो मोंय घमंड करमूँ, मगर अपन उपरे अपन कमजोरीमन के छोइड़, अपन बारे में घमंड नी करमूँ। काले कि अगर मोंय घमंड करेक हों चाहमूँ तो मूरख नी बनमूँ, काले कि सच कहमूँ, मगर मोंय एइसन घमंड करेक से खुद के रोकोना, एइसन ना होवोक कि जइसन केऊ मोके देखेला, या मोर से सुनेला उकर से बाइढ़ के मोके समझोक। मोंय परमेश्‍वर केर अदभुत गोइठमन केर चलते जेके उ मोके देखाय हे, घमंड से ना भाइर जामूँ, से लगिन मोर काया में एगो काँटा जोबल जाय हे, मतलब शैतान केर एगो दूत मोके घूँसा मारेक लगिन ताकल अहे, ताकि मोंय फूइल ना जामूँ। इकर बारे में मोंय प्रभु से तीन बेर बिनती करलों, कि मोर से इ दूर होई जाओक। आउर प्रभु मोर से कहलक, “मोर किरपा तोर लगिन काफी अहे, काले कि मोर शक्ति कमजोरी में सिद्ध होवेला।” इ लगिन मोंय ढेइर खुशी से अपन कमजोरीमन उपरे घमंड करमूँ कि मसीह केर शक्ति मोर उपरे छाँई करते रहोक, इकर खातिर मोंय मसीह लगिन कमजोरीमन में आउर निंदामन में, आउर गरीबीमन में, आउर हुड़दंगमन में, आउर संकटमन में, खुश अहों, काले कि जेखन मोंय कमजोर होओना, तखनेहें मोंय मसीह केर शक्ति से बलवान होवोना। मोंय मूरख तो बनलों, मगर तोहरेहेमन मोके एइसन बनेक लगिन जबरजस्ती करला, तोहरेमन के तो मोर बड़ाई करेक चाही रहे, काले कि अगर मोर कीमत कोनोवें नखे, फिन भी बाड़ से बाड़ यीशु केर चुनल खास चेलामन में से कोनों गोइठ में कम नखों। यीशु केर चुनल खास चेला केर लक्षण हों तोहर माझे सोउब रकम केर धीरज सहित चिन्हामन, आउर चमत्कार केर काममन, आउर शक्ति केर काममन से देखाल गेलक। एक काम अहे जेके मोंय तोहरेमन केर साथ नी करलों, मगर दोसर कलीसियामन केर बिसवासीमन से करलों, मोंय सिरिफ रुपया केर भार तोहरे उपरे नी देलों, जेकर मोके जरुरत रहे, तोहरे केर इ सोचेक गलत अहे कि मोंय एइसन काइर के तोहर बिरोध में गलती काइर हों। देखा, मोंय तीसरा बेर तोहर ठिना आवेक ले तेयार अहों, आउर मोंय तोहरे से कोनों नी माँगमूँ। काले कि मोंय तोहर सम्पति के निहीं बल्कि तोहरेहेमन के चाहोना, काले कि छउवा-पुतामन के आयो-आबामन लगिन धन ठुराएक नी चाही, मगर आयो-आबामन के छउवा-पुता लगिन। जे कोनों मोर ठिना अहे, उके तोहरेमन के देई के मोंय ढेइर खुश होमूँ, आउर मोंय तोहरे के परमेश्‍वर केर पिछे चलेक ले मदइत करेक लगिन खुद के हों देई देमूँ, मोंय तोहरेमन से ढेइर प्रेम करोना, मगर एइसन दिसेला कि तोहरेमन मोर से ढेइर थोर प्रेम कराला। तोहरेमन मनाला कि मोंय तोहरे के बोझ नी देलों, मगर थोरेक बिसवासीमन सोचैना कि मोंय चतूर अहों आउर धोखा देई के तोहरे के फँसाय लेलों। हे दुलार भाईमन, तोहरेमन एखन तक एहे बुझत होबा कि हमरे तोहर सामने अपन बचाव कराथी, हमरे तो परमेश्‍वर के हाजिर जाइन के मसीह में कहिला, आउर सोउब गोइठमन के तोहर उन्नति लगिन कहिला। काले कि मोके डार अहे, कहीं एइसन ना होवोक कि मोंय आय के जइसन चाहोना, तइसन तोहरेमन के नी पामूँ, आउर तोहरेमन हों मोके जइसन चाहाला तइसन नी पाबा, जेकर से तोहर माझे झगरा, हिसिंगा, डाह, खीस, स्वार्थ, चुगली, घमंड, आउर बखेड़ा ना होवोक। कहीं एइसन ना होवोक कि जब मोंय फिन से तोहरे ठिना घूइर आमूँ, तो मोर परमेश्‍वर मोके अपमान करी। आउर मोके ढेइरमन लगिन शोक करेक पड़ी, जेमन पहिले पाप काइर रहैं, आउर गंदा काम, ब्यभिचार आउर लाज केर काम से मन नी फिरालैं। जब मसीह तोहरे के सुधरायला तो उ कमजोर नखे, मगर तोहर माझे अपन शक्ति के देखायला। उ कमजोरी केर चलते क्रूस उपरे चढ़ाल तो गेलक, फिन भी परमेश्‍वर केर शक्ति से जिंदा अहे, हमरे हों कमजोर अही जइसन मसीह रहे, मगर तोहरे महसूस करबा कि हमरे परमेश्‍वर केर शक्ति से मसीह केर संगे जिंदा अही। खुद के परखा कि तोहरे बिसवास में अहा कि निहीं, का तोहरेमन अपन बारे में इ नी जानाला कि यीशु मसीह तोहर में अहे? निहीं तो तोहरेमन निकम्मा अहा। मगर मोर आसरा अहे कि तोहरेमन जाइन लेबा कि हमरे निकम्मा ना लगी। हमरे अपन परमेश्‍वर से इ प्रार्थना करिला कि तोहरेमन कोनों बुराई ना करबा, इ लगिन निहीं कि हमरे परीक्षा से पार होई के खुद के तोहरे से बेस देखाएक चाहिला, बल्कि हमरे चाहिला कि तोहरे सही काम के जाना आउर उके करा, भले हमरे के लगेला कि हमरे हाइर जाय ही, मगर हमरे चाहिला कि तोहरे जीत जावा। काले कि हमरे सच केर बिरोध में कोनों करेक नी पारब, मगर सच केर हें साथ देवेक पारब। जब हमरे कमजोर अही आउर तोहरेमन बिसवास में मजबूत अहा, तो हमरे खुशी होविला, आउर एहो प्रार्थना करिला कि तोहरेमन बिसवास में सिद्ध होई जावा। इ लगिन जब मोंय तोहर ठिना आवेक से पहिले इ गोइठमन के तोहरे के लिखाथों, तो मोके उ अधिकार केर मोताबिक जेके प्रभु देई हे, कड़ाई से कोनों करेक ना पड़ोक। काले कि मोके इ अधिकार तोहरे के बिगड़ाएक लगिन निहीं, मगर बनाएक लगिन देई हे। हे बिसवासी भाईमन, खुश रहा, सिद्ध बनते जावा, मोर सलहा के सुना, एक मन रहा, मेल-जोल से रहा, आउर प्रेम आउर शांति केर देवाइया परमेश्‍वर तोहर संगे रही। मसीह केर प्रेम से एक दोसर के जोहार करा। सोउब पवितर आदमीमन तोहरेमन के जोहार करैना। प्रभु यीशु मसीह केर किरपा, आउर पवितर आत्मा केर मेल-मिलाप आउर परमेश्‍वर केर प्रेम तोहरे सोउब केर संगे होते रहोक। मोंय पौलुस जे यीशु केर चुनल खास चेला हेकों आउर इ चिट्ठी के लिखाथों। मोंय केऊ आदमी चाहे आदमीमन केर दल से चुनल नी जाय हों, मगर मोंय हमर प्रभु यीशु मसीह आउर आबा परमेश्‍वर बटले चुनल जाय हों, जे यीशु के मुरदा में से जियालक। मोंय इ चिट्ठी के गलातिया परदेस केर कलीसियामन केर बिसवासी भाईमन केर नाँव में लिखाथों। मोंय प्रार्थना करोना कि हमर आबा परमेश्‍वर आउर प्रभु यीशु मसीह तोहरेमन उपरे किरपा करोक आउर शांति देओक। हमर आबा परमेश्‍वर केर इच्छा केर मोताबिक मसीह यीशु खुद के हमरे केर पापमन केर क्षमा लगिन बलिदान काइर देलक। ताकि हमरे इ दुनिया केर आदमीमन केर बुरा असर से बचल रहब। मोंय प्रार्थना करोना कि परमेश्‍वर केर स्तुति जुग-जुग होते रहोक। आमीन। मोंय ताजुब होई गेलों कि जे परमेश्‍वर तोहरेमन के मसीह केर किरपा से बोलालक, उके तोहरेमन एतना जल्दी छोइड़ के दोसर शिक्षा के मानेक लगला। सिरिफ एके गो शिक्षा अहे, मगर गोइठ एइसन अहे कि थोरेक आदमीमन तोहरे केर मन के भटकाएक आउर मसीह केर शिक्षा के बिगड़ाएक खोजैना। मगर, अगर हमरे में से केऊ चाहे स्वरग केर दूत हों, उ शिक्षा के छोइड़ के जेके हमरे तोहरेमन के सुनाय ही, केऊ आउर दोसर शिक्षा केर बारे में तोहरेमन के सुनाई, तो परमेश्‍वर उके जुग-जुग लगिन दंड देवी। जइसन हमरे पहिले कइह चुइक ही, तइसनेहें मोंय अब फिन कहोना कि उ शिक्षा के छोइड़ जेके तोहरेमन बिसवास काइर हा, अगर केऊ आउर दोसर शिक्षा केर बारे में सुनायला, तो परमेश्‍वर उके जुग-जुग लगिन दंड देवी। इ गोइठ पक्का अहे कि मोंय आदमीमन के खुश करेक निहीं मगर परमेश्‍वर के खुश करेक चाहोना। अगर मोंय अब तक आदमीमन के हें खुश करते रहतो, तो मसीह केर सेवक नी बनतो। हे बिसवासी भाईमन मोंय तोहरेमन के बताय देवाथों कि जे शुभ समाचार मोंय सुनाय हों, उ आदमीमन केर लिखल ना लगे। काले कि इके मोंय हमर पुरखामन से नी सीख हों, आउर ना ही केऊ धरम केर अगुवामन मोके सिखाय हैं। मगर यीशु मसीह मोके इ शुभ समाचार के देखाय हे। तोहरेमन सुइन हा कि कइसन मोंय यहूदीमन केर नियम के मानत रहों, आउर परमेश्‍वर केर कलीसिया केर बिसवासीमन के ढेइर हें सतात रहों आउर नाश करेक केर कोशिश करत रहों। मोंय अपन समय में, अपन जोड़ी यहूदीमन से ढेइर आगे रहों, आउर हमर पुरखामन केर शिक्षामन के सिखेक आउर मानेक लगिन ढेइर मेहनइत करत रहों। आउर ना जेमन मोर से पहिले से यीशु केर चुनल खास चेला अहैं उमन से मिलेक यरुशलेम शहर आलों। मगर तुरते अरब देस चाइल गेलों, फिन हूवाँ से दमिश्क नगर घूइर आलों। फिन तीन बरिस केर पाछे मोंय यीशु केर चुनल खास चेला पतरस से भेंट करेक लगिन यरुशलेम शहर गेलों, आउर उकर ठिना पन्द्रह दिन तक रहलों। मगर प्रभु में भाई याकूब के छोइड़ यीशु केर चुनल खास चेलामन में से आउर केकरो से नी भेटालों। परमेश्‍वर जानेला कि जे गोइठमन मोंय तोहरेमन के लिखाथों, उ बिलकुल सच हेके। इकर पाछे मोंय यरुशलेम शहर के छोइड़ सीरिया आउर किलिकिया परदेसमन में आलों। मगर यहूदिया परदेस केर कलीसियामन केर मसीही बिसवासीमन मोके तो कहियो नी देइख रहैं। मगर घरी-घरी एहे सुनत रहैं कि एक समय जे हमरे के सतात रहे, अब ओहे बिसवास केर शुभ समाचार केर परचार करेला। जबकि पहिले आदमीमन के मसीह में बिसवास करेक से रोकेक केर कोशिश करत रहे। से लगिन उमन परमेश्‍वर केर महिमा करैना, काले कि परमेश्‍वर मोके बिसवासीमन के सताएक वाला से बदइल के यीशु मसीह केर पिछे चलेक वाला बनाय देलक। चौदह बरिस केर पाछे मोंय बरनाबास केर संगे फिन यरुशलेम शहर गेलों, आउर तीतुस के हों संगे लेई गेलों। मोंय हूवाँ इ लगिन गेलों काले कि परमेश्‍वर मोके जाएक कइह रहे। जब मोंय हूवाँ गेलों, तो हूवाँ केर बढ़ियाँ समझल जाएक वाला अगुवामन से अलगे मिललों आउर उ शुभ समाचार केर बारे में बतालों, जेके मोंय परजाइत आदमीमन केर माझे परचार काइर रहों। ताकि जे मोंय बितल समय में काइर हों, चाहे जे मोंय आवेक वाला समय में करमूँ उ बेकार ना होवोक। फिन यरुशलेम शहर केर कलीसिया केर अगुवामन मोर शिक्षा में आउर कोनों नी जोड़लैं। उ अगुवामन कइसन अहैं इकर से मोके कोनों फरक नखे, काले कि परमेश्‍वर केकरो फैसला उकर बाहरी चीज के देइख के नी करेला। मगर अगुवामन देखलैं कि जइसन यहूदीमन लगिन शुभ समाचार परचार केर काम पतरस के सोंपल जाय हे, तइसनेहें परजाइतमन लगिन मोके शुभ समाचार परचार केर काम सोंपल जाय हे। काले कि जे परमेश्‍वर पतरस के यहूदीमन केर माझे यीशु केर चुनल खास चेला बनेक लगिन ठहरालक, ओहे परमेश्‍वर मोके परजाइत आदमीमन केर माझे यीशु केर चुनल खास चेला बनेक लगिन ठहराय हे। आउर जेमन कलीसिया केर खूँटा समझल जायना, मतलब याकूब, पतरस (कैफा) आउर यूहन्ना, उमन परमेश्‍वर केर किरपा केर उ बरदान के जे मोके मिल हे जाइन गेलैं। उमन मोके आउर बरनाबास के अपन संगे काम करेक वाला समइझ के खुशी से अपन भतखाइया हाँथ के हिलालैं। उमन इकर लगिन सहमत होलैं कि हमरे परजाइत आदमीमन ठिना जाब आउर उमन यहूदीमन ठिना। उमन हमरे से सिरिफ इ बिनती करलैं कि हमरे गरीबमन केर मदइत करब, आउर इ ओहे काम हेके जेके मोंय करेक चाहत रहों। एक दिन जब पतरस अंताकिया शहर में आलक, तो मोंय आदमीमन केर सामने उकर बिरोध करलों, काले कि उ सही काम नी करत रहे। पतरस उ बिसवासीमन केर संगे खात-पियत रहे जेमन परजाइत रहैं, मगर जब याकूब बटले भेजल थोरेक बिसवासीमन यरुशलेम शहर में आलैं, तो परजाइत बिसवासीमन केर संगे मेल-जोल रखेक आउर खाएक पियेक छोइड़ देलक। काले कि उ खतना केर रीति के मनुवाएक वाला यहूदी बिसवासीमन से डरात रहे। आउर उकर संगे अंताकिया शहर केर थोरेक यहूदी बिसवासीमन हों छल-कपट करलैं। हिंयाँ तक कि बरनाबास हों परजाइत बिसवासीमन केर संगे मेल-जोल रखेक छोइड़ देलक। जब मोंय देखलों कि जे ब्यवहार उमन करत रहैं उ शुभ समाचार केर सच्चा शिक्षा केर बिरोध में रहे, तो मोंय आदमीमन केर सामने पतरस से कहलों, “तोंय एगो यहूदी होई के हों परजाइतमन केर रीति रिवाजमन के मानिसला आउर यहूदीमन केर रीति रिवाजमन के नी मानिसला, तो तोंय परजाइत आदमीमन के हमरे यहूदीमन केर रीति रिवाज के काले मनुवाएक चाहिसला?” हमरे तो जनम से यहूदी हेकी, आउर पापी कहाएक वाला परजाइत आदमीमन में से ना लगी। हमरे यहूदी बिसवासीमन जानिला कि मूसा केर नियम के माइन के केऊ हों आदमी परमेश्‍वर केर देखेक में धरमी नी बनेला। से लगिन हमरे यीशु मसीह उपरे बिसवास करली, काले कि हमरे मूसा केर नियम के माइन के निहीं मगर सिरिफ यीशु मसीह उपरे बिसवास काइर के धरमी बनब। इ लगिन कि मूसा केर नियम के माइन के केऊ हों धरमी बनेक नी पारेला। थोरेक यहूदीमन सोचैना कि हमरे पाप काइर ही, काले कि हमरे मूसा केर नियम के मानेक छोइड़ के, धरमी बनेक लगिन यीशु मसीह उपरे भरसा करिला। तो का इकर मतलब इ हेके कि मसीह हमरे के पाप करुवायला? बिलकुल निहीं! मगर, अगर मोंय इ गोइठ के फिन से मानमूँ कि एक आदमी मूसा केर नियम के मानेक से धरमी ठहराल जायला, तो मोंय सचमुच में पाप करमूँ। इ एइसन अहे जइसन कि मोंय मूसा केर नियम लगिन मोइर गेलों, से लगिन मूसा केर नियम से अब मोंय नी चलोना, ताकि मोंय परमेश्‍वर केर सेवा करेक लगिन जिंदा रहेक पारमूँ। इ एइसन अहे जइसन मोंय मसीह केर संगे क्रूस उपरे मोइर गेलों, आउर अब मोंय जिंदा नी रहलों, बल्कि मसीह मोर में जिंदा अहे। आउर मोंय काया में अब जे जिंदा अहों, तो सिरिफ उ बिसवास से जिंदा अहों, जे परमेश्‍वर केर बेटा उपरे अहे, जे मोर से प्रेम करलक, आउर मोर लगिन खुद के देई देलक। मोंय इ गोइठ के इनकार करेक नी पारमूँ कि परमेश्‍वर हमरे केर परती अपन किरपा केर चलते हमरे के बचालक, काले कि अगर मूसा केर नियम के मानेक से केऊ आदमी धरमी बनतक, तो मसीह के मोरेक नी पड़तक। हे गलील परदेस केर रहेक वाला बिसवासीमन तोहरे केर दिमाग नखे, के तोहरे के भटकाय देलक? तोहरे केर तो आँइख केर सामने देखाएक नियर यीशु मसीह क्रूस उपरे देखाल गेलक। मोंय तोहरेमन से सिरिफ इ जानेक चाहोना कि तोहरेमन पवितर आत्मा के मूसा केर नियम के माइन के या बिसवास केर समाचार से पाला? का तोहरेमन एइसन भटइक गेला कि पवितर आत्मा केर रीति से शुरु काइर के अब काया केर रीति से आखरी करबा? बिसवासी बनेक केर पाछे तोहरेमन ढेइर दुःख उठाला, मोंय समझोना कि इ दुःख बेकार नी रहे। जे तोहरेमन के पवितर आत्मा दान देवेला आउर तोहर में चमत्कार केर काम करेला, उ का, मूसा केर नियम के पूरा करेक से या शुभ समाचार उपरे बिसवास करेक से एइसन करेला? अब्राहम तो परमेश्‍वर उपरे बिसवास करलक, जेकर से उ धरमी गिनालक। तो तोहरे इ जाइन लेवा कि जेमन बिसवास करेक वाला हेकैं, उमन हें अब्राहम केर संतान हेकैं। आउर पवितर किताब में ढेइर पहिले इ लिखल अहे कि परमेश्‍वर परजाइत आदमीमन के बिसवास से धरमी ठहराई, पहिलेहें से अब्राहम के इ शुभ समाचार सुनाय देलक कि तोर में सोउब जाइतमन आशीष पाबैं। से लगिन जेमन उ नियर परमेश्‍वर उपरे बिसवास करैना जइसन अब्राहम करलक, उ बिसवासीमन अब्राहम केर संगे आशीष पाबैं। से लगिन जेतना आदमीमन मूसा केर नियम के मानेक उपरे भरसा करैना, उमन परमेश्‍वर केर सराप से दबल अहैं, काले कि पवितर किताब में लिखल अहे, “जे केऊ मूसा केर नियम केर किताब में लिखल सोउब गोइठमन के करेक में स्थिर नी रहेला, उकर उपरे सराप अहे।” मगर इ गोइठ सच हेके कि मूसा केर नियम के मानेक से परमेश्‍वर ठिना केऊ धरमी नी ठहरेला। काले कि बिसवास करेक केर चलते परमेश्‍वर केर देखेक में जे धरमी बाइन हे उ जिंदा रही। मगर मूसा केर नियम केर बिसवास से कोनों रिश्ता नखे, काले कि जे उके मानी, उ उकरे से जिंदा रही। मसीह जे हमर लगिन सरपाल गेलक, हमरे के कीन के मूसा केर नियम केर सराप से छुटकारा देलक। काले कि पवितर किताब में लिखल अहे, जे केऊ क्रूस उपरे लटकाल जायला उ सरपाल जायला। एइसन इ लगिन होलक कि अब्राहम केर आशीष मसीह यीशु में परजाइत आदमीमन तक पोंहचोक। आउर हमरे बिसवास केर चलते उ आत्मा के पावब जेकर करार होई हे। हे बिसवासी भाईमन, जब दूई झन आदमीमन करार करैना आउर उके लिखित केर साथ पक्का करैना, तो केऊ आदमी उ करार के तोरेक नी पारी आउर ना उकर में कोनों जोड़ेक पारी। एहे नियर करारमन, अब्राहम के आउर उकर बंश के देवल गेलक, पवितर किताब में इ लिखल नखे कि उकर बंशमन के, जइसन कि ढेइरमन केर बारे में कहल अहे, मगर एगो केर बारे में कहल अहे, “तोर बंश के” आउर उ मसीह हेके। जे मोंय तोहरे के बताएक चाहोना उ इ हेके: जे करार के परमेश्‍वर पहिले से पक्का काइर रहे, उके मूसा केर नियम चाइर सौ तीस बरिस केर पाछे आय के तोड़ेक नी पारलक कि करार बेकार होवोक। अगर परमेश्‍वर मूसा केर नियम के मानेक केर बदली में आशीष के देई हे, तब तो उ करार के किनारे काइर देतक, मगर परमेश्‍वर अब्राहम के अपन किरपा से आशीष देई हे, काले कि उके देवेक केर करार काइर हे। तो फिन मूसा केर नियम से का फायदा होलक? मूसा केर नियम तो आदमीमन के इ देखाएक लगिन देवल गेलक कि सचमुच में पाप का हेके, इ तो मसीह केर आवेक तक ले देवल जाय रहे जे अब्राहम केर बंश हेके, आउर जेकर बारे में करार करल जाय रहे, परमेश्‍वर अपन नियम के स्वरगदूतमन केर जरिया से मूसा के देई रहे, जे परमेश्‍वर आउर आदमीमन केर माझे एक दोसर के मिलाएक वाला बनलक। एगो मिलाएक वाला केर जरुरत तब होवेला जब दूई गो आदमी केर माझे करार होवेला, मगर परमेश्‍वर जे एके गो अहे, अपन करार के अब्राहम के देवेक लगिन केऊ मिलाएक वाला के माझे में नी लानलक। तो का मूसा केर नियम परमेश्‍वर केर करारमन केर बिरोध में अहे? निहीं बिलकुल निहीं? अगर मूसा केर नियम हमरे के परमेश्‍वर केर देखेक में धरमी ठहरातक, तब तो उके मानेक से जुग-जुग केर जिंदगी हों मिलतक। मगर पवितर किताब में लिखल अहे कि इ दुनिया केर सोउब आदमीमन पाप से बंधाल अहैं, ताकि जेमन यीशु मसीह उपरे बिसवास करैना, उमन के परमेश्‍वर उ दान के देवी जेके देवेक केर करार काइर हे। मगर यीशु मसीह केर आवेक से पहिले हमरे यहूदीमन मूसा केर नियम से बंधाल रही आउर इकर से हमरे केर रखवाली होवत रहे, तब परमेश्‍वर हमरे के देखालक कि एक आदमी मूसा केर नियम केर बंधन से यीशु मसीह उपरे बिसवास काइर के आजाद होवेक पारेला। मूसा केर नियम हमरे के यीशु मसीह केर आवेक तक हमर अगुवाई आउर देख-भाल करेक लगिन देवल जाय रहे। ताकि हमरे यीशु मसीह उपरे बिसवास काइर के परमेश्‍वर केर भीरे धरमी बनेक पारब। मगर अब मसीह आय चुकलक आउर हमरे उकर उपरे बिसवास करिला, तो अब हमरे के मूसा केर नियम केर जरुरत नखे। जब तोहरे यीशु मसीह केर नाँव से बपतिस्मा जल संस्कार लेला, तो तोहरे मसीह केर नवाँ जिंदगी के पिंध लेला, जइसन एगो आदमी नवाँ लुगा के पिंध लेवेला, से लगिन जब तोहरे सोउब यीशु मसीह उपरे बिसवास करला तो परमेश्‍वर केर संतान बाइन गेला। आउर तोहर में से जेतना झन मसीह में बपतिस्मा जल संस्कार लेई हैं, उमन मसीह केर स्वभाव के पिंध लेई हैं। अब ना केऊ यहूदी रहलक आउर ना यूनानी, ना केऊ गुलाम, ना आजाद, ना केऊ नर आउर ना नारी, काले कि तोहरेमन सोउब मसीह यीशु में एक हेका। जब तोहरेमन मसीह केर संगे एक जुट होई जाय हा, तो अब्राहम केर परिवार केर होई गेला आउर करार करल परमेश्‍वर केर आशीषमन केर हिस्सेदार बनला। मोंय इकर बखाइन करमूँ कि एगो धनी आदमी केर एगो बेटा अहे, मगर जब तक उ छउवा हें अहे, उकर आउर धांगर में कोनों फरक नखे, जबकि बेटा अपन आबा केर सोउब सम्पति केर हकदार होवी। मगर जब तक उकर उमर बाड़ नी होई जायला, तब तक उ देख-रेख करेक वालामन केर अधिकार केर अधीन में रहेला। ठीक ओहे नियर हमरे हों परमेश्‍वर के जानेक से पहिले, इ दुनिया केर रीति रिवाज केर गुलाम बाइन के रही। मगर जब सही समय आलक, तो परमेश्‍वर अपन बेटा के इ दुनिया में भेजलक जे एगो जनाना से जनमलक, उ एगो यहूदी केर रूप में जनमलक आउर मूसा केर नियम के मानलक। ताकि उ, जेमन मूसा केर नियम केर वश में अहैं उमन के छुटकारा देओक, आउर उमन परमेश्‍वर केर बालपोस बेटा बाइन जाओक। काले कि हमरे उकर बेटा हेकी, से लगिन परमेश्‍वर अपन बेटा केर आत्मा के हमरे केर हिरदय में भेइज हे, जे आत्मा परमेश्‍वर के “हे आबा, हे बाप” कइह के हकायला। से लगिन अब तोहरे धांगर ना लगा, मगर परमेश्‍वर केर बेटा हेका। आउर जब परमेश्‍वर केर बेटा हेका तो उ सोउब चीजमन के पाबा, जेके देवेक केर करार परमेश्‍वर अपन छउवामन से काइर हे। जब तोहरेमन परमेश्‍वर के नी जानत रहा तब तोहरे उकर सेवा करत रहा, जे सचमुच में ईश्‍वर ना लगे। अब तोहरेमन केर रिश्ता परमेश्‍वर से होलक, बल्कि परमेश्‍वर खुद हें तोहरेमन से रिश्ता बनालक, तो तोहरे उ बेकार शिक्षामन केर गुलाम फिन से दोबारा काले बनेक चाहाला जे पुरखा से आवाथे? तोहरेमन कुछ खास समयमन, दिनमन, महिनामन, आउर सालमन के मनाला। मोंय तोहरे केर बारे में चिंता करोना कि तोहरे लगिन जे मेहनइत मोंय काइर हों, उ कहीं बेकार ना होई जाओक। हे बिसवासी भाईमन, मोंय तोहरेमन से बिनती करोना, तोहरेमन मूसा केर नियम से मोर नियर आजाद होई जावा। काले कि मोंय हों तोहरे परजाइतमन नियर मूसा केर नियम से आजाद होई गेलों। तोहरेमन के याइद होवी कि मोंय अपन काया केर कमजोरी केर चलते पहिले तोहरेमन के शुभ समाचार सुनालों। मोर बेमारी केर चलते तोहरेमन के ढेइर कष्ट होलक, फिन भी तोहरेमन मोके तुच्छ नी समझला आउर मोके निकलाय नी देला, मगर तोहरेमन मोर एइसन स्वागत करला जइसन परमेश्‍वर केर स्वरगदूत चाहे यीशु मसीह आतक होले करता। से बेरा तोहरेमन ढेइर खुश रहा, मगर तोहरे केर उ खुशी अब कहाँ गेलक? मोंय पक्का जानोना कि तोहरेमन मोर लगिन सोउब कुछ देई देता, हिंयाँ तक अपन आँइख के हों निकलाय के देई देता। तो का तोहरेमन से सच बोलेक केर चलते मोंय तोहर बैरी बाइन गेलों। उमन तोहरेमन के अपन बटे मिलाएक तो चाहैना, मगर भटकाएक लगिन, उमन केर इच्छा तो इ अहे कि तोहरेमन मोर से जुदा होई जावा, आउर उमन केर चेला बाइन जावा। हमेशा बेस मकसद से जोश में रहेक तो बेस हेके, मगर सिरिफ ओहे बेरा भइर निहीं, जब मोंय तोहरे केर माझे हाजिर रहोना। हे मोर दुलार छउवामन, जइसन जनानामन छउवा के जनम देवेक बेरा बथा के सहैना, तइसनेहें जब तक तोहरे मसीह नियर नी बाइन जबा, तब तक फिन एक बेर मोंय तोहरे लगिन मेहनइत काइर के बथा के सहाथों। मोंय चाहोना कि एखन तोहरे ठिना रहतों आउर तोहरे से मिठा-मिठा गोइठ गोठियातो, काले कि मोके समझ में नी आवाथे कि मोंय तोहरे के का कहमूँ। तोहरे से मोंय एगो सवाल पूछेक चाहोना जेमन मूसा केर नियम केर अधीन में रहेक चाहाला, का तोहरे सचमुच में मूसा केर नियम का कहेला सेके समझाला? पवितर किताब में इ लिखल अहे कि अब्राहम केर दूई गो बेटा रहैं, उमन में से एगो हाजिरा से जनइम रहे, जे धांगरिन रहे, आउर एगो सारा से जे अब्राहम केर जनाना रहे। धांगरिन केर संतान जेकर जनम आदमी केर इच्छा से एगो साधारण छउवा नियर होलक, मगर अब्राहम केर जनाना से जे संतान केर जनम होलक उ परमेश्‍वर केर करार केर मोताबिक होलक जे अब्राहम के देवल जाय रहे। इ दूई गो जनानामन परमेश्‍वर केर दूई गो करार केर चिन्हा हेकैं। जे करार के परमेश्‍वर सीनै पहार उपरे अपन आदमीमन लगिन काइर रहे, उ हाजिरा नियर अहे। आइज केर यरुशलेम शहर केर आदमीमन गुलाम अहैं, काले कि उमन यहूदी नियम के मानैना। उमन हाजिरा नियर गुलाम अहैं, जे उ करार के देखायला, जेके अरब देस केर सीनै पहार उपरे देवल गेलक। मगर स्वरगीय यरुशलेम अब्राहम केर जनाना सारा हेके, आउर उकर संतानमन आजाद अहैं, आउर उ हमरे केर आयो हेके। काले कि पवितर किताब में लिखल अहे, “हे बाँझ जनाना, तोंय जे कहियो छउवा जनम नी दे हिस आउर ना कहियो छउवा जनम देवेक केर बथा साइह हिस, आनंद मनाव आउर मुँह खोइल के खुशी से चिलाव,” काले कि बाँझ जनाना जेके आदमीमन चिढ़वायना, उकर संतानमन उ जनाना से जे बाँझ नी रहे बगरा होबैं। हे बिसवासी भाईमन, जइसन अब्राहम केर बेटा इसहाक जे परमेश्‍वर केर करार केर मोताबिक जनइम हे, तइसनेहें हमरे हों परमेश्‍वर केर करार केर मोताबिक उकर संतान बाइन गेली। मगर अब तोहरे उमन से जेमन मूसा केर नियम के तोहरे के मनुवाएक खोजैना सताल जावाला, ठीक ओहे नियर जइसन इशमाइल, जे आदमी केर इच्छा से जनइम रहे, इसहाक के सतालक जे आत्मा केर शक्ति से जनइम रहे। मगर पवितर किताब में का लिखल अहे? “धांगरिन आउर उकर बेटा के निकलाय दे, काले कि धांगरिन हाजिरा केर बेटा के आबा केर कोनों सम्पति नी मिलेक चाही, इ सोउब सम्पति सारा केर बेटा के मिलेक चाही, जे धांगरिन ना लगे बल्कि आजाद अहे।” से लगिन हे बिसवासी भाईमन, जे मोंय कहेक चाहोना उकर निचोड़ इ हेके कि हमरे धांगरिन जनाना केर संतान ना लगी, जेके मूसा केर नियम के मानेक पड़ेला, मगर आजाद जनाना केर संतान हेकी जेमन के परमेश्‍वर हमर बिसवास केर चलते अपनायला। मसीह हमरे के आजाद काइर हे ताकि हमरे मूसा केर नियम के मानेक से आजाद रहब। से लगिन अपन आजादी में बनल रहा आउर मूसा केर नियम के मानेक लगिन फिन से खुद के गुलाम ना बनावा। मोंय पौलुस तोहरेमन के जे बताथों उके सुना, परमेश्‍वर केर देखेक में धरमी ठहराल जाएक लगिन अगर फिन से खतना करुवाबा, तो मसीह तोहरेमन लगिन जे कुछ काइर हे उकर से तोहरे के कोनों फायदा नी होवी। मोंय इ गोइठ फिन से कहोना कि हरेक झन जे खतना करुवायला, उके मूसा केर समूचा नियम के मानेक चाही। तोहरेमन जे मूसा केर नियम से धरमी ठहरेक चाहाला, तोहरे मसीह केर संगे अपन रिश्ता के तोइर देई हा आउर परमेश्‍वर केर किरपा के ठोकराय देई हा। मगर परमेश्‍वर केर आत्मा हमरे के धरमी ठहराएक लगिन उमीद केर संगे आसरा करेला, जेके देवेक केर करार परमेश्‍वर हमरे से काइर रहे, काले कि हमरे उकर उपरे बिसवास करिला। अगर तोहरे मसीह यीशु केर चेलामन हेका तो इकर से कोनों फरक नी पड़ेला कि तोहरे केर खतना होई हे या निहीं। मगर खास गोइठ इ हेके कि हमरे मसीह उपरे बिसवास करिला, आउर परमेश्‍वर आउर दोसर आदमीमन से प्रेम करिला। तोहरेमन मसीह केर संगे अपन रिश्ता में बढ़ियाँ से उन्नति करत रहा, अब केहर तोहरेमन के रोइक देलक कि मसीह केर बारे में सच्चाई के नी मानाला। एइसन शिक्षा परमेश्‍वर बटले नी आवेला, जे तोहरे के अपन संतान बनेक लगिन चुइन हे। एइसन शिक्षा जे सच्चा ना लगे इ नियर फैलाथे, जइसन कि इ कहावत में कहल जाय हे: थोरे सुन खमीर समूचा गूंधल आटा के खमीर बनाय देवेला। मोंय परमेश्‍वर उपरे बिसवास करोना कि तोहरेमन दोसर आदमीमन केर गोइठमन के स्वीकार नी करबा। मगर जे तोहरे के भटकायला, उ चाहे केऊ काले नी होवी परमेश्‍वर बटले दंड पावी। हे बिसवासी भाईमन, मोंय परचार करोना कि खतना करुवाएक जरुरी नखे, इकरे चलते मोंय यहूदीमन बटले सताल जाथों, अगर मोंय क्रूस उपरे मसीह केर माउत केर बारे में परचार करेक केर बदली खतना करुवाएक केर परचार करतो, तो यहूदीमन लगिन कोनों अपमान नी होतक। भला होतक कि जेमन तोहरे के भटकायना, उमन खुद के हिजड़ा बनाय लेतैं। हे बिसवासी भाईमन, तोहरेमन के परमेश्‍वर बटले आजाद होवेक लगिन चुनल जाय हे। अब तोहरे के मूसा केर नियम के मानेक केर जरुरत नखे। मगर इ आजादी तोहरे केर अपन काया केर इच्छामन के पूरा करेक केर मोका ना बाइन जाओक, से लगिन प्रेम से एक दोसर केर सेवा करा। काले कि समूचा मूसा केर नियम केर निचोड़ इ एक हें आगया में पावल जायला, “तोंय अपन पड़ोसी से अपन नियर प्रेम कर।” मगर, अगर तोहरेमन जानवरमन नियर एक दोसर के चाबाला आउर चिराला, तो तोहरे के सावधान रहेक चाही कि कहीं तोहरे एक दोसर के नाश ना काइर देबा। मगर मोंय तोहरे से कहोना कि तोहरे पवितर आत्मा केर अगुवाई केर मोताबिक चलेक केर कोशिश करा। तब तोहरे उ बुरा काममन के नी करबा, जेके तोहरे केर पापी स्वभाव करेक चाहेला। काले कि हमरे केर काया केर इच्छामन पवितर आत्मा केर बिरोध में अहे, आउर एहे नियर पवितर आत्मा काया केर इच्छामन केर बिरोध में काम करुवायला, आउर इ दुइयो शक्ति लगातार एक दोसर से लड़ते रहेला, इ लगिन कि जे बेस काममन के तोहरे करेक चाहाला उके करेक पारबा। आउर तोहरेमन पवितर आत्मा केर अगुवाई केर मोताबिक चलबा, तो मूसा केर नियम के मानेक केर कोशिश नी करबा। तोहरेमन सोउब जानाला कि काया केर इच्छामन का-का हेके, मतलब ब्यभिचार, गंदा काम, लुच्चा काम, मूर्ति पूजा, जादू-टोना, बैर, झगरा, हिसिंगा, खीस, बिरोध, अनबन, एक दोसर से जलन, डाह, मतवारी, रीझ-रंग आउर एहे नियर आउर रकम-रकम केर बुरा काम अहे, मोंय तोहरेमन के चेतावनी देवाथों जइसन आगे हों देई चुइक हों कि एइसन-एइसन काम करेक वालामन परमेश्‍वर केर राइज केर हकदार नी होबैं। मगर उ गुणमन जे पवितर आत्मा से सिरजेला, इमन हेकैं: प्रेम, आनंद, शांति, धीरज, किरपा, भलाई, बिसवास लायक होवेक, नरम भाव आउर संयम, एइसन ब्यवहारमन के रोकेक लगिन कोनों नियम नखे। आउर जेमन छुटकारा देवेक वाला यीशु मसीह से जुड़ल अहैं, उमन अपन काया के उकर इच्छामन आउर लालसामन केर समेत क्रूस उपरे चढ़ाय देई हैं। काले कि पवितर आत्मा हमरे के नवाँ जिंदगी देई हे, से लगिन आवा, हमरे अपन जिंदगी केर सोउब काममन के पवितर आत्मा केर अगुवाई केर मोताबिक करब। हमरे के घमंड नी करेक चाही, हमरे के एक दोसर से परेशान नी होवेक चाही आउर एक दोसर से हिसिंगा नी करेक चाही। हे बिसवासी भाईमन, अगर केऊ आदमी कोनों पाप में धराय हों जाई, तो तोहरेमन जे पवितर आत्मा केर अगुवाई में चलाला, नरम भाव से उके धरम केर डहर में चलेक लगिन मदइत करा। आउर सावधान रहबा ताकि तोहरे खुद पाप करेक लगिन भटकाय देवल ना जबा। हमर में से जेमन दुःखमन में अहैं, तो हमरे के उमन केर मदइत करेक चाही, एहे नियर हमरे मसीह केर नियम के मानिला। अगर केऊ अपने के समझेला कि मोंय खास आदमी हेकों, जबकि उ खास आदमी ना लगे, तो खुद के उ धोखा देवाथे। हरेक झन अपन खुद केर काममन के जाँइच लेवोक, अगर उ बेस काम काइर हे तो उ अपन काम केर बारे में घमंड करेक पारेला। मगर उके अपन काम केर बराबरी दोसरमन केर काम से नी करेक चाही। काले कि हमर में से हरेक आदमी के अपन खुद केर काममन केर जिम्मेदारी उठाएक चाही। जे बचन केर शिक्षा पावेला, उके जे कोनों उकर ठिना अहे, उकर में सिखाएक वालामन के हों भागी करेक चाही। खुद के धोखा ना देवा, केऊ कहियो परमेश्‍वर के मूरख बनाएक नी पारी, काले कि जे जइसन काम करी उके ओइसनेहें फल मिली। अगर केऊ आदमी अपन काया केर इच्छामन के पूरा करेला, तो उके जुग-जुग केर दंड मिली। आउर अगर केऊ पवितर आत्मा केर इच्छामन के पूरा करेला, तो उके जुग-जुग केर जिंदगी मिली। हमरे के भला काम करेक में निराश नी होवेक चाही, काले कि अगर हमरे हार नी मानब, तो परमेश्‍वर केर अपन समय में हमरे के इनाम मिली। इ लगिन जहाँ तक हमरे के मोका मिलेला, हमरे के सोउब आदमीमन केर भलाई करेक अहे, खास काइर के बिसवासी भाईमन केर। देखा, मोंय कइसन बड़े-बड़े अक्षरमन में तोहरेमन के अपन हाँथ से लीख हों। जेमन यहूदीमन के खुश करेक चाहैना, उमन तोहरे केर खतना करुवाएक लगिन कहैना, उमन एइसन इ लगिन करैना, ताकि उमन के इ बताएक केर चलते कि सिरिफ मसीह केर क्रूस उपरे भरसा करेक चाही, सताल ना जाओक। काले कि खतना करुवाल यहूदीमन खुद तो मूसा केर सोउब नियम के नी मानैना, मगर तोहरे केर खतना करुवाएक इ लगिन चाहैना, ताकि उमन दोसर यहूदीमन ठिना घमंड से इ बताएक पारबैं कि तोहरे केर खतना उमन केर चलते होई हे। मगर मोंय क्रूस उपरे चढ़ाल हमर प्रभु यीशु मसीह के छोइड़ आउर कोनों गोइठ में घमंड करेक नी चाहोना। काले कि उकर माउत केर चलते, जे कोनों चीज इ दुनिया केर आदमीमन लगिन किमती अहे, मोर लगिन उकर कोनों कीमत नखे। आउर दुनिया केर आदमीमन केर बिचार से मोर हों कोनों कीमत नखे। काले कि खतना करुवाएक से चाहे नी करुवाएक से कोनों फरक नी पड़ेला, मगर परमेश्‍वर पवितर आत्मा केर शक्ति से तोहरे के एगो नवाँ आदमी बनाय हे, एहे खास गोइठ हेके। जेमन इ नियम के मानैना, उमन उपरे आउर परमेश्‍वर केर इसराइल उपरे दया आउर शांति बनल रहोक। केऊ मोके आउर दुःख ना देवोक, काले कि मोर काया में जे दाग अहे, उ इ साबित करेला कि मोंय यीशु केर सेवक हेकों। हे बिसवासी भाईमन, हमर प्रभु यीशु मसीह केर किरपा तोहर आत्मा केर संगे रहोक। आमीन। इ चिट्ठी के मोंय पौलुस जे परमेश्‍वर केर इच्छा से यीशु मसीह केर चुनल खास चेला हेकों, उ पवितर आउर मसीह यीशु में बिसवासी आदमीमन केर नाँव में लिखाथों। जेमन इफिसुस शहर में अहैं। मोंय प्रार्थना करोना कि हमर आबा परमेश्‍वर आउर प्रभु यीशु मसीह केर बटले तोहरेमन के किरपा आउर शांति मिलते रहोक। हमर प्रभु यीशु मसीह केर आबा परमेश्‍वर केर धन्यबाद होवोक कि उ मसीह केर द्वारा हमरे के स्वरग केर सोउब रकम केर आत्मिक आशीषमन के देई हे। खास काइर के परमेश्‍वर हमरे के यीशु मसीह में एक होवेक केर चलते दुनिया केर सिरजन से पहिले चुइन लेई हे। ताकि हमरे उकर सामने पवितर आउर निरदोष रहब। काले कि परमेश्‍वर हमरे के प्रेम करलक आउर अपन इच्छा आउर भला मकसद केर मोताबिक, हमरे के अपन लगिन पहिले से ठहरालक कि हमरे यीशु मसीह केर बटले उकर बाल-पोस बेटा बनब। से लगिन हमरे समझ से बाहर उकर किरपा केर लगिन उकर बड़ाई करिला, काले कि हमरे के उ किरपा उकर एकलौता दुलार बेटा यीशु मसीह बटले मुफत में मिल हे। हमरे के परमेश्‍वर केर ढेइर किरपा से यीशु मसीह केर लोहू बहाएक केर चलते छुटकारा मिल हे, मतलब पापमन केर क्षमा मिल हे। इ सोउब परमेश्‍वर केर पूरा समझ आउर बुद्धिमानी से हमरे के भरपूरी से मिल हे। आउर जे कोनों यीशु मसीह हमर लगिन करलक, उकर से परमेश्‍वर अपन लुकल योजना के हमरे के देखालक। आउर उकर योजना इ हेके कि ठीक समय में परमेश्‍वर सोउब चीजमन के, जे स्वरग में अहे आउर जे धरती में अहे, यीशु मसीह केर अधिकार में काइर देवी। ओहे यीशु केर चलते जेकर से हमरे जुड़ल अही, बपौती अधिकार पावेक नियर हमरे परमेश्‍वर से अधिकार के पाली, जेकर लगिन उ अपन योजना केर मोताबिक पहिलेहें से हमरे के चुइन रहे। हमरे यहूदीमन पहिला आदमी हेकी जेमन मसीह उपरे आसरा करली, आउर चुनल गेली ताकि हमरे परमेश्‍वर केर महिमा लगिन उकर बड़ाई करब। आउर जब तोहरे हों छुटकारा केर शुभ समाचार के सुनला आउर यीशु मसीह उपरे बिसवास करला, तो परमेश्‍वर तोहरे के पवितर आत्मा के देलक। जेके उ अपन आदमीमन के देवेक केर करार काइर रहे। पवितर आत्मा तोहरे उपरे एगो छाप नियर अहे जे इ बतायला कि तोहरे परमेश्‍वर केर हेका। पवितर आत्मा छुटकारा पावल आदमीमन लगिन जमा करल धन नियर अहे, जे पक्का भरसा दिवायला कि परमेश्‍वर उ सोउब चीजमन के देवी जेके देवेक केर करार काइर हे, आउर जेके उ अपन आदमीमन लगिन कीन लेई हे। ताकि उकर महिमा लगिन उकर बड़ाई होवोक। इ सोउब केर चलते जे परमेश्‍वर काइर हे, जब से मोंय प्रभु यीशु उपरे तोहर बिसवास के आउर पवितर आदमीमन केर लगिन तोहर प्रेम के सुइन हों। मोंय लगातार तोहर लगिन परमेश्‍वर के धन्यबाद देवोना। आउर अपन प्रार्थनामन में तोहरे के याइद करोना। मोंय प्रार्थना करोना कि हमर प्रभु यीशु मसीह केर आबा परमेश्‍वर जे महिमा से भरल अहे, तोहरेमन के आत्मिक बुद्धि आउर समझ देवी जेकर से तोहरे उके आउर बढ़ियाँ से जानेक पारबा। मोंय एहो प्रार्थना करोना कि परमेश्‍वर तोहरे केर दिमाग के खोइल देवोक, ताकि उकर बोलाएक में जे आसरा अहे उके आउर उकर महिमा से भरल आशीषमन के, जे सोउब पवितर आदमीमन लगिन अहे, जानेक पारबा। मोंय चाहोना कि तोहरे उ महान आउर सोउब कुछ करेक वाला शक्ति केर बारे में जाना जे परमेश्‍वर ठिना हमरेमन लगिन अहे, जेमन उकर उपरे बिसवास करिला। जे शक्ति के परमेश्‍वर मसीह में देखालक, जब उ उके मोरलमन में से जियाय के स्वरग में अपन भतखाइया आरा बइठालक। हूवाँ उकर नाँव सोउब रकम केर प्रधानता आउर अधिकार, आउर शक्ति, आउर प्रभुता केर उपरे, आउर हरेक नाँव केर उपरे, जे ना सिरिफ इ दुनिया में मगर आवेक वाला दुनिया में हों लेवल जाई। परमेश्‍वर सोउब चीजमन के मसीह केर शक्ति केर हेंठे काइर देलक, आउर उके सोउब चीजमन केर उपरे अधिकारी ठहराय के कलीसिया के देई देलक। जे कलीसिया मसीह केर काया हेके, जेके उकरे से पूरा आउर भरपूर बनाल जाय हे, जे सोउब ठिना सोउब कुछ के भाइर देवेला। तोहरेमन ठिना पहिले परमेश्‍वर केर नवाँ जिंदगी नी रहे, तोहरे तो अपन बुरा काममन आउर पापमन केर चलते मोरल आदमीमन नियर रहा। उ बेरा तोहरेमन इ दुनिया केर आदमी मनक रीति-रिवाज केर मोताबिक चलत रहा, जेमन परमेश्‍वर के नी जानैना। आउर तोहरेमन शैतान केर आगया के मानत रहा जे भूतमन केर उपरे आकाश में राइज करेला। जे एखनोहों उ आदमीमन के अपन कब्जा में करेक केर कोशिश कराथे, जेमन परमेश्‍वर केर आगया के नी मानैना। हमरे हों ओहेमन नियर ब्यवहार करत रही आउर हमर पापी स्वभाव केर इच्छामन के पूरा करत रही, आउर बाकी सोउब आदमीमन नियर बुरा रही आउर परमेश्‍वर केर दंड के पावेक लायक रही। परमेश्‍वर हमरे के मसीह यीशु केर संगे जियाय के स्वरग में उकर संगे राइज करेक लायक बनालक। परमेश्‍वर एइसन करलक जेकर से उ आवेक वाला दिन में दुनिया केर आदमीमन के इ देखाएक पारी कि उकर किरपा केतना बड़का अहे। जे किरपा के उ हमरे लगिन जेमन यीशु मसीह में एक होई जाय ही, सोउब कुछ काइर के देखालक। जब तोहरे बिसवास करला तब परमेश्‍वर तोहरे के अपन किरपा से बचाय लेलक। तोहरे खुद से नी बचता, इ तो परमेश्‍वर केर दान हेके। इ छुटकारा तोहरे केर खुद से करल कोनोवें भला काममन से नी मिल हे कि तोहरे घमंड करबा। काले कि हमरे परमेश्‍वर केर बनाल हेकी, उ हमरे के यीशु मसीह में उकर भला काममन के करेक लगिन बनाय हे, जे काममन के करेक लगिन परमेश्‍वर हमरे के पहिले से तेयार काइर हे। तोहरे याइद करा कि तोहरेमन परजाइत आदमीमन केर रूप में जनइम हा। (आउर जेमन काया में हाँथ केर करल खतना से खतना वाला कहायना, उमन तोहरेमन के बेगर खतना वाला कहैना)। तोहरेमन उ बेरा मसीह के नी जानत रहा आउर इसराइली, मतलब परमेश्‍वर केर चुनल आदमीमन केर रूप में उमन में शामिल नी रहा। आउर तोहरे उ बेस चीजमन के पावेक केर हों भागीदार नी रहा, जेके परमेश्‍वर इसराइलीमन के देवेक केर करार काइर रहे। तोहरे के इ दुनिया में कोनों आसरा नी रहे आउर तोहरे बेगर ईश्‍वर केर रहत रहा। एक समय रहे जब तोहरेमन परमेश्‍वर से दूर रहा मगर अब तो मसीह यीशु केर संगे एक होवेक केर चलते जे दूर रहा, परमेश्‍वर उ लोहू से जेके यीशु मसीह तोहर लगिन बहाय हे तोहरे के अपन ठिना लेई आनलक। यीशु मसीह खुद हमरे केर माझे शांति के लानलक, बितल समय में इ एइसन रहे जइसन कि एगो परदा इसराइली आदमीमन के आउर परजाइत आदमीमन के अलग काइर देई रहे। उमन एक दोसर से घिरना करत रहैं। मगर अब यीशु मसीह उ परदा के हटाय देलक आउर सोउब के एके में मिलाय देलक। आउर अपन माउत से उ मूसा केर नियम केर सोउब रीति रिवाज के मेटाय देलक, ताकि उ इसराइली आदमीमन आउर परजाइत आदमीमन केर माझे मेल काइर के एगो नवाँ झूँड़ बनाएक पारोक। क्रूस उपरे अपन माउत से यीशु मसीह बैर भाव के नाश काइर के, इकर से दुयो के एक काया बनाय के परमेश्‍वर से मेल करुवाय देलक। आउर यीशु मसीह आय के तोहरे परजाइतमन जे दूर रहा, आउर इसराइलीमन जे भीरे रहैं, दुयो के शांति केर शुभ समाचार सुनालक। काले कि मसीह केर चलते हमरे सोउब एक हें आत्मा से आबा परमेश्‍वर ठिना पोंहचेक पारिला। इ लगिन अब तोहरे परजाइतमन परदेसी आउर पराया ना लगा। मगर पवितर आदमीमन केर संगी देसी आउर परमेश्‍वर केर परिवार केर होई गेला। आउर यीशु केर चुनल खास चेलामन आउर परमेश्‍वर केर संदेश के बताएक वालामन केर नेव उपरे एगो घर नियर बनाल जाय हा, जेकर कोना केर पखना मसीह यीशु खुद हें हेके। ओहे समूचा घर के एगो पवितर मंदिर नियर मजबूती से टिकाय के रखेला। जेकर में तोहरे परजाइत बिसवासीमन हों यीशु मसीह केर संगे एक जुट होई के पवितर आत्मा केर शक्ति से परमेश्‍वर केर रहेक ठाँव होवेक लगिन एक संगे बनाल जवाला। से लगिन मोंय पौलुस तोहरे परजाइत आदमीमन लगिन मसीह यीशु केर काम करेक केर चलते जेहेल घर में बंदी अहों। तोहरे जरूर सुइन हा परमेश्‍वर अपन किरपा से तोहरेमन के शुभ समाचार सुनाएक केर जिम्मेदारी मोके देई हे। मतलब परमेश्‍वर केर लुकल योजना जे ढेइर पहिले लुकल रहे, मगर परमेश्‍वर मोके देखालक। मोंय पहिलेहें इकर बारे में थोरे-थोरे लीख चुइक हों। जब तोहरेमन चिट्ठी के पढ़बा तो यीशु मसीह केर बारे में लुकल योजना के जेके मोंय सफा-सफा समइझ गेलों, तोहरे हों समइझ जबा। इ लुकल योजना के पहिले पीढ़ी केर आदमीमन के नी बताल जाय रहे, मगर अब पवितर आत्मा बटले यीशु मसीह केर चुनल पवितर खास चेलामन के आउर परमेश्‍वर केर संदेश के बताएक वालामन के बताय देवल जाय हे। मतलब परमेश्‍वर केर योजना इ हेके कि यीशु मसीह में जुड़ल जाएक केर चलते परजाइत आदमीमन हों ओहे आशीष के पाबैं, जेके यहूदीमन लगिन देवल जाय हे। अब उमन एके काया मतलब कलीसिया केर अंग होई गेलैं। आउर परमेश्‍वर केर करार जेके यहूदीमन लगिन देवल जाय रहे, उकरो हकदार होई गेलैं। आउर मोंय परमेश्‍वर केर मुफत दान से जे उकर किरपा आउर शक्ति से देवल जाय हे, उकर शुभ समाचार परचार करेक केर सेवक बनलों। जबकि मोंय परमेश्‍वर केर आदमीमन में से सोउब से छोट अहों, फिन भी मोर उपरे परमेश्‍वर केर किरपा होलक कि मोंय परजाइत आदमीमन के मसीह केर शुभ समाचार सुनामूँ। आउर सोउब आदमीमन केर माझे परमेश्‍वर केर लुकल योजना के बखाइन करमूँ, जेके दुनिया केर सोउब चीजमन केर सिरजाएक वाला शुरु से लुकाय के राइख हे। अब उकर मकसद एहे अहे कि कलीसिया केर द्वारा, परमेश्‍वर केर सोउब रकम केर गेयान, उ प्रधानमन आउर अधिकारीमन उपरे, जेमन स्वरगीय ठाँवमन में अहैं दिस्तार करल जाओक। इ योजना के परमेश्‍वर दुनिया केर सिरजन से पहिले हें बनाय रहे। जेके उ हमर प्रभु यीशु मसीह केर द्वारा पूरा करलक। हमर यीशु मसीह में बिसवास करेक केर चलते आउर बिसवास में उकर संगे एक होवेक केर चलते, अब हमरे साहस से आउर पूरा भरसा केर साथ परमेश्‍वर केर हेदना आवेक पारिला। इ लगिन मोंय बिनती करोना कि तोहर लगिन जे दुःख मोंय सहाथों उकर चलते निराश ना होबा, काले कि इकर से तोहरे केर फायदा होवी। मोंय तोहर लगिन आबा परमेश्‍वर से प्रार्थना करोना, जे सोउब बिसवासीमन केर परिवार केर आबा हेके, जेमन स्वरग में आउर धरती उपरे अहैं। मोंय प्रार्थना करोना कि उ अपन महिमा से भरल धन केर मोताबिक तोहरेमन के इ दान देवोक कि तोहरेमन उकर आत्मा से अपन भीतरे शक्ति पाय के बलवान होई जबा। आउर बिसवास से मसीह तोहर भीतरे डेरा करोक जइसन कि तोहरेमन उकर में भरसा कराला, मोंय प्रार्थना करोना कि परमेश्‍वर लगिन आउर दोसरमन लगिन तोहर प्रेम तोहरे के मजबूत बनाओक आउर भटकेक से बचाओक। आउर तोहरे सोउब परमेश्‍वर केर आदमीमन केर संगे इ जानेक पारबा कि यीशु मसीह हमरे के कतइ बगरा प्रेम करेला, उ हमरे के सीमा से बाइढ़ के प्रेम करेला। मोंय प्रार्थना करोना कि मसीह हमरे से कइसन प्रेम करेला इके तोहरे जानेक पारबा जे आदमी केर समझ से बाहरे अहे, ताकि तोहरे केर स्वभाव परमेश्‍वर केर स्वभाव नियर बाइन जाओक। अब परमेश्‍वर जे एइसन शक्तिशाली अहे कि हमरे केर माँगेक या बिचार करेक से बगरा काम करेक पारेला, उकर शक्ति केर मोताबिक जे हमरे केर भीतरे काम करेला। उकर महिमा कलीसिया में, आउर मसीह यीशु में पीढ़ी से पीढ़ी तक जुग-जुग होते रहोक। आमीन। मोंय प्रभु यीशु केर सेवा करोना से लगिन जेहेल में अहों। मोंय तोहरेमन से बिनती करोना कि परमेश्‍वर तोहरेमन के जइसन जिंदगी बिताएक ले बोलाय हे तइसनेहें जिंदगी बितावा। मतलब पूरा नरम भाव से छोट बाइन के प्रेम से दोसरमन केर गलती के साइह लेवा। आउर मेल मिलाप के बनाय के रखा, जेके पवितर आत्मा तोहरे के एक दोसर से शांति केर संगे रहेक से देवेला, जे हमरे के आपस में एक दोसर से मिल के रहेक में मदइत करेला। हमरे सोउब एके गो काया में जुड़ल अही, (मतलब कलीसिया में) आउर हमरे सोउब के एके गो आत्मा मिल हे। जब तोहरेमन परमेश्‍वर केर आदमी बनेक लगिन चुनल गेला, तब तोहरे के जे आसरा मिल हे ओहे आसरा हमरेमन के हों मिल हे। हमरे सोउब केर एके गो प्रभु अहे, जेकर उपरे हमरे सोउब बिसवास करिला। हमरे सोउब के यीशु मसीह केर नाँव से बपतिस्मा जल संस्कार देवल जाय हे। आउर हमरे सोउब एके गो परमेश्‍वर केर आराधना करिला, जे सोउब केर आबा हेके, जे हमरे सोउब केर उपरे राइज करेला। आउर हमरे सोउब में होई के काम करेला, आउर सोउब में रहेला। मसीह हमर में से हरेक झन के उकर काम करेक लगिन अलग-अलग खास खूबी देई हे। मसीह केर बारे में पवितर किताब में लिखल अहे, “उ उपरे ऊँचा में चढ़लक आउर अपन संगे उ दुश्मनमन के लेई गेलक, जेमन के उ हरुवाय रहे, आउर आदमीमन के दान देलक।” (पवितर किताब में लिखल, उ उपरे ऊँचा में चढ़लक इकर का मतलब हेके, सिरिफ एहे कि उ धरती केर सोउब से नीचे गढ़हामन में हों उतइर रहे। मसीह जे नीचे उतइर रहे, उ ओहे आदमी हेके जे आकाश से हों उपरे चाइढ़ गेलक, ताकि उ गोटा दुनिया के भाइर देवोक)। आउर यीशु मसीह थोरेक आदमीमन के अपन चुनल खास चेला ठहराय के, आउर थोरेक के परमेश्‍वर केर संदेश के बताएक वाला, थोरेक के शुभ समाचार सुनाएक वाला, थोरेक के चरवाहा, आउर थोरेक के उपदेस देवेक वाला ठहराय के देई देलक। उ आदमीमन के इ सोउब बरदानमन के इ लगिन देलक, ताकि उमन परमेश्‍वर केर आदमीमन के परमेश्‍वर केर लगिन काम करेक ले तेयार करबैं। आउर मसीह केर काया, मतलब, कलीसिया मजबूत होवेक पारोक। आउर कलीसिया तब तक मजबूत होते रही जब तक कि हमरे सोउब बिसवास में, आउर परमेश्‍वर केर बेटा केर बारे में हमर समझ एक बराबइर नी होई जाई। आउर हमरे पक्का बिसवासी बाइन के पूरा पुरी मसीह नियर नी बाइन जाब, जे कि सिद्ध अहे। ताकि आगे हमरे छउवामन नियर नी रहब, आउर ना उ डोंगा नियर, जे पानी केर लहरा से हिने-हुने उछलत रहेला आउर हवा से कखनों इ दिशा, तो कखनों उ दिशा घूमते रहेला। हमरे के धोखेबाज आदमीमन केर झूठा शिक्षामन से, जे सच्चा नियर लगेला बहकेक नखे। बल्कि प्रेम से सच्चा गोठियाय के हमरे के सोउब रकम से पक्का होवेक चाही, ताकि मसीह नियर बनेक पारब जे कि मूँड़ हेके। हमरे सोउब जे मसीह उपरे बिसवास करिला, उकर काया केर अंगमन नियर अही। जे नियर एगो आदमी केर काया उकर समूचा जोड़मन से एके संगे जुड़ल रहेला, आउर जब काया केर हरेक अंग ठीक से काम करेला तो काया बढ़ेला आउर मजबूत होवेला, ओहे नियर जब हमर में से हरेक झन उ काम के करेला जेके करेक ले मसीह हमरे के देई हे, तो हमरे मजबूत आउर पक्का बाइन जाइला। इ लगिन मोंय उ अधिकार केर साथ जेके प्रभु मोके देई हे, तोहरे के इ बतावना कि अबिसवासीमन नियर ब्यवहार ना करा, जेमन बेकार गोइठमन केर चिंता करैना। काले कि उमन सुनेक नी खोजैना, आउर उमन आगया नी मानेक वाला हेकैं, से लगिन बुझेक नी पारैना, उमन उ नवाँ जिंदगी से दूर अहैं जेके परमेश्‍वर देवेला। उमन के लाज नी लगेला से लगिन लुचा काम के करेक ले अपन जिंदगी के देई दे हैं। उमन सोउब रकम केर बुरा काम के करते रहैना, आउर आउरे बगरा करेक खोजैना। मगर तोहरेमन मसीह केर एइसन शिक्षा नी पाय हा जब तोहरे मसीह केर बारे में सिखला। बल्कि जे कोनों तोहरेमन यीशु मसीह केर बारे में सुइन हा, आउर जे कोनों तोहर सिखाएक वालामन तोहरे के सिखाय हैं, ओहे मसीह केर सच्चा संदेश हेके। से लगिन तोहरेमन पिछला चाइल-चलन आउर पुरना पापी स्वभाव के छोइड़ देवा, जे तोहरे के बुरा इच्छामन में फँसाय के धोखा देलक आउर तोहर जिंदगी के बरबाद काइर देलक। बल्कि पवितर आत्मा के तोहर बिचार आउर ब्यवहार के नवाँ करेक देवा। आउर नवाँ स्वभाव के अपनाय लेवा, जेके परमेश्‍वर सचमुच में धरमी आउर पवितर बनेक लगिन सिरजाय हे। से लगिन झूठ बोलेक छोइड़ के हरेक झन अपन संगी बिसवासी से सच बोलबा, काले कि हमरे सोउब एके गो काया केर अंग हेकी। अगर तोहरेमन खिसाय जबा तो अपन खीस के पाप करेक ले आगे बढ़ेक ना देबा, मगर राइत के डिसना में जाएक से पहिले तोहर खीस के मेटाय देबा। आउर तोहरे शैतान के लुभवाएक ले मोका ना देबा। चोरी करेक वाला फिन चोरी ना करोक, बल्कि उके अपन हाँथ से ईमानदारी से काम करेक चाही, ताकि गरीबमन के देवेक ले उकर ठिना भरपूर चीजमन रहोक। कोनों गंदा गोइठ तोहर मुँह से ना निकलोक, बल्कि ओहे गोइठ निकलोक जे आदमीमन केर लगिन जरुरी अहे, आउर जे उमन के बिसवास में बढ़ेक लगिन मदइत करेला। तब जे कोनों तोहरे कहबा उ सुनेक वालामन केर भला करी। आउर परमेश्‍वर केर पवितर आत्मा के अपन काममन से दुःख ना देवा, जे तोहरे के इ बतायला कि परमेश्‍वर तोहरे के छुटकारा देई हे। जे तोहर उपरे एगो छाप नियर अहे। सोउब रकम केर कड़ुवा गोइठ, झमेला, खीस, लड़ाई-झगरा, निंदा आउर सोउब रकम केर डाह के दूर काइर देवा। आउर एक दोसर उपरे किरपा आउर दयालु होवा, आउर जइसन परमेश्‍वर मसीह में होई के तोहर गुन्हा के क्षमा करलक, तइसनेहें तोहरेमन हों एक दोसर केर गुन्हा के क्षमा काइर देवा। तोहरे परमेश्‍वर केर दुलार छउवामन हेका, से लगिन तोहर स्वभाव परमेश्‍वर केर जइसन होवोक। मसीह केर पिछा करते दोसरमन लगिन प्रेम से भरल जिंदगी जिया, जे तोहर से प्रेम करलक आउर तोहर पापमन के उठाएक लगिन खुद के बलिदान काइर देलक। उकर से परमेश्‍वर खुश रहे, काले कि उ बलिदान उकर लगिन महकेक वाला सेंट नियर रहे। जइसन पवितर आदमीमन लगिन उचित अहे, तइसनेहें तोहर में ब्यभिचार, आउर कोनों रकम केर अशुद्ध काम, या लोभ केर चरचा तक ना होवोक। आउर ना तोहर में बेसरम केर गोइठ, ना बेकार गोइठ-बात, आउर ना गंदा हँसी मजाक होवोक, काले कि इ गोइठमन तोहर लगिन नी शोभेला, मगर तोहरे के परमेश्‍वर के धन्यबाद देवेक चाही। काले कि तोहरेमन अच्छा से जानाला कि केऊ ब्यभिचारी आदमी, या अशुद्ध आदमी, या लोभी आदमी जे मूर्ति पूजा करेक केर बराबइर अहे, उ मसीह आउर परमेश्‍वर केर राइज में हिस्सेदार नी होवी। केऊ तोहरेमन के इ कइह के धोखा ना देवोक कि परमेश्‍वर उमन के दंड नी देवी, जेमन एइसन पाप करैना। काले कि एहे काममन के करेक केर चलते परमेश्‍वर केर खीस आगया नी मानेक वालामन उपरे भड़केला। से लगिन एइसन पाप काममन के करेक वालामन केर साथ ना देबा। तोहरेमन तो पहिले शैतान केर कब्जा में रहा, मगर अब परमेश्‍वर केर होई गेला, से लगिन अब परमेश्‍वर केर संतानमन नियर चला। (काले कि परमेश्‍वर केर संतानमन केर काम सोउब रकम केर भलाई करेक, आउर धरमी बनेक, आउर सच्चाई केर डहर में चलेक हेके)। आउर इके जानेक केर कोशिश करा कि प्रभु के कोन चीज खुश करेला? आउर शैतान केर बेकार काममन में शामिल ना होवा, बल्कि आदमीमन के बतावा कि इ काममन बुरा हेके। काले कि अबिसवासी मनक लुकल काममन केर चरचा करेक हों लाज केर गोइठ हेके। मगर जब दुष्ट आदमीमन तोहर अच्छा ब्यवहार के देखैना तो उ मनक बुरा ब्यवहार उमन के दिसेक लगेला, जेकर नतीजा इ होवेला कि उमन अपन बुरा काममन के छोइड़ देवैना आउर तोहर जइसन बेस आदमी बाइन जायना। इ लगिन कहल जाय हे, “हे निंदाएक वालामन जाइग जावा, आउर मुरदा में से जी उठा, तो मसीह तोहर उपरे अपन इंजोत के चमकाई।” इ लगिन सावधानी से देखते रहा कि कइसन जिंदगी जियाथा, निरबुद्धियामन नियर निहीं मगर बुध्दिमानमन नियर चला। हरेक मोका केर इस्तेमाल जे तोहर ठिना अहे, भला काम करेक में करा, काले कि इ मोका बुरा दिनमन में तोहरे के मिल हे। इ जानेक केर कोशिश करा कि प्रभु तोहर से का करुवाएक चाहेला आउर बुद्धिमान बना। आउर दारू पी के मतवारी ना करा, इकर से आदमीमन निरलज ब्यवहार करैना, मगर पवितर आत्मा से भरते जावा। आउर आपस में आराधना आउर महिमागान आउर आत्मिक गीत गाते रहा, आउर अपन-अपन मन में प्रभु केर सामने गाते आउर बजाते रहा। आउर जे कोनों हमर प्रभु यीशु मसीह हमर लगिन काइर हे उकर चलते सोउब बेरा परमेश्‍वर आबा के सोउब गोइठ में धन्यबाद देते रहा। आउर मसीह केर भक्ति करेक केर चलते एक दोसर केर अधीन में रहा। हे जनानामन, अपन-अपन पति केर अधीन में एइसन रहा, जइसन तोहरे प्रभु केर अधीन में रहाला। काले कि पति जनाना केर मूँड़ हेके जइसन कि मसीह कलीसिया केर मूँड़ हेके, आउर मसीह कलीसिया केर छुटकारा देवाइया हेके, आउर कलीसिया मसीह केर काया हेके। जइसन कलीसिया मसीह केर अधीन में अहे, तइसनेहें जनानामन के हों हर गोइठ में अपन-अपन पति केर अधीन में रहेक चाही। हे पतिमन, अपन-अपन जनाना से प्रेम करा, जइसन कि मसीह हों कलीसिया से प्रेम काइर के उके शुद्ध करेक ले खुद के उकर लगिन देई देलक। ताकि उ बिसवासीमन के पाप से शुद्ध काइर के, जे शुभ समाचार बचन से होवेला, आउर चिन्हा केर रूप में उमन के पानी में नहाएक से पवितर बनाओक। उ अपन कलीसिया केर सोउब आदमीमन लगिन मोइर गेलक, ताकि उमन के सिद्ध बनाएक पारोक, आउर सोउब के अपन हेदना लानेक पारोक, जेमन में कोनों दोष या पाप या आउर कोनों रकम केर बुराई नी होवी, बल्कि उमन पूरा पुरी पवितर आउर निरदोष होबैं। एहे लेखे पति अपन-अपन जनाना से अपन काया केर बराबइर प्रेम करोक, जे अपन जनाना से प्रेम करेला, उ खुद से प्रेम करेला। काले कि केऊ हों कहियो अपन काया से खीस नी रखेला मगर उकर देखभाल करेला, जइसन मसीह कलीसिया केर देखभाल करेला। काले कि हमरे मसीह केर काया केर अंग हेकी। जइसन पवितर किताब में लिखल अहे, “मरदाना अपन आयो आबा के छोइड़ के अपन जनाना से मिलल रही, आउर उमन दुयो एगो आदमी नियर रहबैं।” इ एगो किमती आउर गहरा शिक्षा हेके जेके हमरे हिंयाँ समझेक पारिला, मोंय इकर जोड़ी मसीह आउर उकर उपरे बिसवास करेक वालामन से करोना। मगर इ तोहर उपरे हों लागू होवेला, तोहर में से हरेक झन अपन जनाना से अपन नियर प्रेम रखोक, आउर जनाना हों अपन पति केर आदर करोक। आउर हे आयो आबामन अपन छउवामन के ना खिज-खिजवावा, मगर प्रभु केर डहर में चलेक केर शिक्षा, आउर उपदेस देते उ मनक लालन-पालन करा। हे धांगरमन, जेमन दुनिया में तोहर मालिक हेकैं, उ मनक ईमानदारी आउर सच्चाई केर साथ आदर आउर सम्मान करा, जइसन मसीह केर आदर आउर सम्मान कराला। इ सोउब सिरिफ देखावा या उमन के खुश करेक ले भइर निहीं, बल्कि मसीह केर दासमन नियर काम करा जेमन अपन पूरा मन से ओहे करैना जे परमेश्‍वर चाहेला। तोहरे खुशी से अपन सेवा काम के करते रहा, इ समइझ के कि तोहरे आदमीमन केर निहीं मगर परमेश्‍वर केर सेवा कराला। काले कि तोहरेमन जानाला, जे केऊ जइसन बेस काम करी, तइसनेहें प्रभु से इनाम पावी, चाहे उ गुलाम अहे, चाहे आजाद। एहे नियर हे मालिकमन, तोहरेमन के हों अपन धांगरमन के धमकी देवेक नी चाही, बल्कि उमन से ओहे नियर ब्यवहार करेक चाही, जइसन मोंय उमन के तोहरे से ब्यवहार करेक कइह हों, काले कि तोहरे दुयो केर मालिक स्वरग में अहे आउर उ केकरो से भेद-भाव नी करेला। तोहरेमन लगिन मोर आखरी गोइठ इ हेके, प्रभु केर शक्ति से आत्मा में मजबूत होवा। परमेश्‍वर केर सोउब हँथियार के धाइर लेवा, ताकि तोहरेमन शैतान केर चाल-बाजी से लाइड़ के जितेक पारबा। काले कि हमरे लोहू आउर माँस से बनल आदमीमन से नी लड़ाथी, मगर मुखियामन से आउर अधिकारीमन से, आउर अनदिस्तार शक्तिमन से जेमन उ आदमीमन उपरे राइज करैना, जेमन एखनो तक इ दुनिया केर अंधार में अहैं, आउर उ दुष्ट आत्मामन से जेमन फौजमन नियर आकाश में अहैं। इ लगिन परमेश्‍वर केर सोउब हँथियार के धाइर के तेयार रहा, ताकि जब बुरा दिन आवी तो जे कोनों करेक पराई उके करल पाछे तोहरेमन मजबूती से स्थिर रहेक पारबा। से लगिन परमेश्‍वर केर सच्चाई केर मोताबिक जिंदगी जिया, इ उ नियर अहे जइसन एगो फौजी लड़ेक ले अपन डाँड़ा के कसना से सकतायला, आउर धरमी आदमी नियर ब्यवहार करा, एइसन करेक शैतान केर तीर से बचेक ले छाती में झिलम पिंधेक नियर अहे। आउर शुभ समाचार उपरे भरसा करा जेकर में तोहरे के परमेश्‍वर केर शांति मिल हे, ताकि तोहरे मजबूती से खड़ा रहेक लगिन तेयार रहबा, इ उ नियर अहे जइसन एगो फौजी जूता पिंध के लड़ेक लगिन तेयार होवेला। आउर उ सोउब केर साथ परमेश्‍वर में बिसवास करा, इ अपने आप के रक्षा करेक लगिन एगो ढाल के धाइर रहेक नियर अहे, ताकि तोहरे दुष्ट शैतान केर तीर के रोकेक पारबा जे आइग नियर अहे। आउर परमेश्‍वर जे छुटकारा देई हे उके बिसवास से धाइर रहा, इ उ टोपी नियर अहे जेके एगो फौजी अपन मूँड़ के बचाएक लगिन पिंधेला, आउर परमेश्‍वर केर बचन के लेई लेवा जे एगो तलवाइर नियर अहे जेके पवितर आत्मा देवेला। आउर जइसन पवितर आत्मा तोहरे के अगुवाई करेला, सोउब बेरा प्रार्थना आउर बिनती करते रहा, आउर सोउब पवितर आदमीमन लगिन लगातार बिनती करेक ले जागते रहा। तोहरे मोर लगिन हों प्रार्थना करा जेकर से गोठियाएक बेरा मोके एइसन गोइठ देवल जाओक कि मोंय निडर होई के शुभ समाचार केर भेद के बताएक पारमूँ। इकरे लगिन मोंय बेरी से बाँधल राजदूत नियर सेवा कराथों। आउर एहो लगिन प्रार्थना करा कि मोंय जइसन मोके परचार करेक चाही, ओइसनेहें निडर होई के शुभ समाचार परचार करेक पारमूँ। तुखिकुस जे दुलार भाई आउर प्रभु में बिसवास लाएक सेवक हेके तोहरेमन के सोउब गोइठमन के बताय देवी, ताकि तोहरेमन हों इके जाइन जावा कि मोंय का कराथों। उके मोंय तोहर ठिना इ लगिन भेइज हों कि तोहरेमन हमर दशा के जाना, आउर उ तोहरेमन केर मन के उत्साहित करोक। मोंय हमर आबा परमेश्‍वर आउर प्रभु यीशु मसीह से प्रार्थना करोना कि तोहरे बिसवासी भाईमन के शांति मिलोक, आउर तोहरे एक दोसर से प्रेम करा आउर मसीह उपरे बिसवास में बनल रहा। जेमन हमर प्रभु यीशु मसीह से सच्चा प्रेम करैना, उ सोउबमन केर उपरे किरपा होते रहोक। इ चिट्ठी यीशु मसीह केर दास मोंय पौलुस आउर तीमुथियुस बटले हेके। मोंय इ चिट्ठी फिलिप्पी शहर में रहेक वाला परमेश्‍वर केर सोउब पवितर आदमीमन, अगुवामन आउर सेवकमन केर नाँव में लिखाथों, जेमन मसीह यीशु केर हेकैं। हमर आबा परमेश्‍वर आउर प्रभु यीशु मसीह केर किरपा आउर शांति तोहरेमन के मिलते रहोक। मोंय जब-जब तोहरेमन के याइद करोना, तब-तब अपन परमेश्‍वर के धन्यबाद देवोना। आउर अपन प्रार्थना में खुशी से तोहरे सोउब केर लगिन सोउब बेरा बिनती करोना। काले कि तोहरेमन आदमीमन के यीशु मसीह केर बारे में शुभ समाचार बताएक में मोर मदइत काइर हा। इ काम के तोहरे जे दिन यीशु मसीह केर बारे में शुभ समाचार उपरे बिसवास करला सेहे दिन से कराथा, आउर एखन तक करते आवाथा। आउर मोके इ गोइठ केर भरसा अहे कि परमेश्‍वर जे तोहर में बेस काम शुरु काइर हे, ओहे उके यीशु मसीह केर घूइर आवेक दिन तक पूरा करी। तोहर लगिन मोर इ बिचार सही हेके काले कि मोंय तोहरेमन से ढेइर प्रेम करोना, काले कि जब मोंय जेहेल घर में अहों, चाहे शुभ समाचार केर रक्षा कराथों आउर इके साबित कराथों, तो तोहरे मोर इ किरपा में शामिल होई जावाला जेके परमेश्‍वर मोर उपरे काइर हे। इकर बारे में परमेश्‍वर मोर गवाह हेके कि मोंय मसीह यीशु केर जइसन प्रेम काइर के तोहरे सोउबमन के देखेक लगिन तरसाथों। आउर मोंय इ प्रार्थना करोना कि एक दोसर लगिन तोहर प्रेम, गेयान आउर सोउब रकम केर भितरी समझ सहित बढ़ते हें जाओक। ताकि तोहरेमन इ चुनाव करेक केर लायक बाइन जबा कि कोन रकम केर काम करेक उचित अहे, ताकि मसीह केर दोबारा घूइर आवेक दिन तक पवितर आउर निरदोष बनल रहबा, आउर ठोकर नी खाबा। आउर उ धरमी बनेक केर फार मतलब बेस गुणमन से जे यीशु मसीह देवेक पारेला, भरपूर होते जबा, जेकर से परमेश्‍वर केर महिमा आउर स्तुति होते रहोक। हे भाईमन, मोंय चाहोना कि तोहरेमन इ जाइन लेवा कि मोर उपरे जे बीत हे, उकर से शुभ समाचार के हें फैलेक में मदइत मिल हे। हिंयाँ तक कि रोमी महाराजा केर राइज में समूचा पलटन आउर बचल सोउब आदमीमन में इ साबित होई जाय हे कि मोंय मसीह केर सेवक होवेक केर चलते जेहेल में अहों। आउर मोर जेहेल में रहेक केर चलते ढेइर बिसवासी भाई बहिनमन के पोक्ता बिसवास होलक। उमन प्रभु में भरसा राइख के पहिले से एतना बगरा साहसी बाइन गेलैं कि बेगर कोनों डार केर परमेश्‍वर केर बचन के सुनाएक लगलैं। थोरेक आदमीमन तो हमरे से हिसिंगा आउर झगरा केर चलते मसीह केर परचार करैना मगर थोरेक आदमीमन भला बिचार से परचार करैना। जेमन भला बिचार से परचार करैना, उमन मोर से प्रेम करेक केर चलते करैना, काले कि उमन जानैना कि मोंय शुभ समाचार केर रक्षा करेक केर चलते जेहेल में अहों। आउर थोरेक आदमीमन तो सीधा मन से निहीं मगर हमरेमन से हिसिंगा करेक केर चलते मसीह केर परचार करैना, इ सोइच के कि एइसन करेक से जेहेल में मोर दुःख आउर बगरा बढ़ोक। तो का होलक? हिसिंगा से चाहे भला बिचार से, मसीह केर शुभ समाचार केर परचार तो होवाथे, आउर मोंय इकर से खुश अहों, आउर खुश हें रहमूँ। मोंय जानोना कि तोहर प्रार्थनामन केर चलते, आउर यीशु मसीह बटले आवेक वाला पवितर आत्मा केर मदइत से मोंय छुटकारा पाय जामूँ। मोर दिल केर इच्छा आउर आसरा इ हेके कि मोंय कोनोवें गोइठ में नी लजामूँ, मगर मोके मसीह केर बारे में बोलेक केर हिम्मत होवोक, जइसन मोंय आगे हों काइर रहों। चाहे मोंय जिंदा रहमूँ चाहे मोइर जामूँ, मोर पूरा जिंदगी से मसीह केर बड़ाई सोउब बेरा करते रहमूँ। काले कि अगर मोंय जिंदा रहमूँ तो मसीह लगिन रहमूँ, आउर अगर मोइर जामूँ तो इ मोर लगिन आउर हें भला होवी काले कि मोंय मसीह केर संगे रहमूँ। मगर, अगर काया में जिंदा रहेक हें मसीह केर काम करेक लगिन फायदा अहे, तो मोंय नी जानोना कि कोन के चुनमूँ। मोंय दुयो केर माझे असमंजस में अहों; जीव तो चाहेला कि मोइर के मसीह ठिना जाय के रहमूँ, काले कि इ ढेइर हें बेस हेके। मगर काया में रइह के तोहरे केर मदइत करेक लगिन आउर हें जरुरी अहे। इ लगिन मोके इकर पूरा भरसा अहे, आउर मोंय जानोना कि मोंय जिंदा रहमूँ, आउर तोहरेमन केर संगे रहमूँ, जेकर से तोहरेमन बिसवास में मजबूत आउर खुश रहबा। ताकि जब मोंय फिन से तोहरे केर संगे रहेक लगिन आमूँ तो तोहरेमन मोर चलते मसीह यीशु केर बारे में आउर हें बगरा घमंड करेक पारबा। तोहरे सिरिफ एतना करा कि तोहर चाइल-चलन मसीह केर शुभ समाचार केर लायक होवोक। चाहे मोंय आय के तोहरेमन के देखमूँ, चाहे नी हों आमूँ, तो तोहरे केर बारे में एहे सुनमूँ कि तोहरेमन एक हें मन होई के स्थिर अहा, आउर एक संग मिल के शुभ समाचार में बिसवास लगिन मेहनइत करते रहाला। आउर कोनों गोइठ में बिरोधीमन से नी डराला। तोहरे केर साहस उमन लगिन नाश होवेक केर चिन्हा हेके, मगर तोहर लगिन इ परमेश्‍वर बटे से छुटकारा केर चिन्हा हेके। इ सोउब दया मसीह केर चलते तोहर उपरे होलक कि तोहरे ना सिरिफ उकर उपरे बिसवास करा, मगर उकर लगिन दुःख हों उठावा। तोहरेमन के हों ओइसनेहें दुःख उठाएक अहे जइसन तोहरेमन मोके दुःख उठाते देइख रहा, जब मोंय तोहर संगे फिलिप्पी शहर में रहों, आउर एखन हों जे दुःख मोके जेहेल में होवाथे उके सुनाथा। अगर मसीह में तोहरेमन उत्साहित अहा, आउर उकर प्रेम से आराम पाय हा। अगर तोहरेमन पवितर आत्मा केर संगे जुड़ल अहा, आउर अगर मसीह तोहरेमन लगिन दया आउर माया से भरल अहे। तो मोर इ खुशी के पूरा करा कि एक हें मन होई के रहा आउर एक हें जइसन प्रेम करा, एक हें बिचार आउर मनसा रखा। स्वार्थ आउर झूठा बड़ाई लगिन कोनों ना करा मगर नरम भाव से एक दोसर के अपन से बगरा बेस समझा। हरेक झन अपनेहें भलाई केर निहीं मगर दोसरमन केर हों भलाई केर चिंता करा। जइसन मसीह यीशु केर स्वभाव रहे। तइसनेहें तोहर हों स्वभाव होवोक। मसीह परमेश्‍वर केर रूप में होई के हों परमेश्‍वर केर बराबइर होवेक के अपन अधिकार में करेक नी चाहलक। मगर अपन सोउब कुछ के छोइड़ देलक, आउर धांगर केर रूप धाइर लेलक, आउर आदमी केर बराबइर में होई गेलक। आउर आदमी केर रूप में दिस्तार होई के खुद के नरम बनाय देलक, आउर परमेश्‍वर केर हिंयाँ तक आगयाकारी रहलक कि मौत, हाँ, क्रूस केर मौत के हों साइह लेलक। इ लगिन परमेश्‍वर उके सोउब से ऊँचा पद देलक, आउर उके उ नाँव देलक जे सोउब नाँवमन से बाड़ हेके। ताकि उके आदर देवेक लगिन जेमन स्वरग में आउर धरती में आउर जेमन धरती केर हेंठे अहैं; उमन सोउब यीशु केर नाँव से ठेहुना टेकोक। आउर परमेश्‍वर आबा केर महिमा लगिन सोउब मनवा जाइत माइन लेवोक कि यीशु मसीह हें प्रभु हेके। से लगिन हे मोर दुलारामन, जब मोंय तोहर संगे रहों तब तोहरेमन सोउब बेरा परमेश्‍वर केर आगया के मानते आय हा। तइसनेहें अब मोंय तोहरे से दूर अहों, तो इ आउर हें बगरा जरुरी अहे कि एखन हों उकर आगया के माना। आउर अपन-अपन छुटकारा के पूरा करेक लगिन डराते आउर थरथराते कोशिश करते रहा। काले कि परमेश्‍वर तोहरे में काम कराथे, आउर इच्छा आउर शक्ति देवाथे कि तोहरेमन ओहे काम करबा जेकर से परमेश्‍वर खुश होवेला। सोउब काम बेगर कुड़कुड़ाले आउर बेगर बक झक केर करा। होले तोहरेमन टेढ़ा आउर बिगड़ल आदमीमन से भरल दुनिया में परमेश्‍वर केर सिद्ध संतानमन नियर साफ सुथरा आउर निरदोष जिंदगी बिताबा। जेमन केर माझे तोहरे जुग-जुग केर जिंदगी केर बचन के लेई के दुनिया में दीया नियर बरते दिसाला। ताकि मोंय मसीह केर फिन से घूइर आवेक केर दिन इ गोइठ लगिन घमंड करमूँ कि मोर दौड़-धूप आउर मोर मेहनइत बेकार नी होलक। जब मोंय तोहरेमन के शुभ समाचार सुनालों, तो तोहरेमन प्रभु यीशु उपरे बिसवास करला आउर उकर सेवा लगिन अपने आप के बलिदान काइर देला। से लगिन अगर मोके शुभ समाचार सुनाएक खातिर माइर मोराय हों देवल जाय फिन भी मोंय खुश अहों आउर तोहर संगे खुश रहमूँ। तइसनेहें तोहरेमन हों खुश होवा, आउर मोर संगे खुशी मनावा। मोके प्रभु यीशु में आसरा अहे कि मोंय तीमुथियुस के तोहर ठिना तुरते भेजमूँ, होले तोहर दशा सुइन के मोंय खुश होमूँ। काले कि मोर ठिना एइसन स्वभाव केर आउर केऊ दोसर आदमी नखैं, जेमन तोहर भलाई लगिन सच्चा मन से चिंता करैना। काले कि सोउबमन अपन फायदा केर खोजार में रहैना, ना कि यीशु मसीह केर। मगर तोहरे तीमुथियुस के तो जानाला कि उकर चरितर अच्छा अहे, जइसन बेटा आबा केर संगे करेला, तइसनेहें उ शुभ समाचार के फैलाएक में मोर संगे मेहनइत काइर हे। से लगिन मोके आसरा अहे कि जइसनेहें मोके मोर दशा केर बारे मालूम होवी, तइसनेहें मोंय उके तुरते भेइज देमूँ। आउर मोके प्रभु में भरसा अहे कि मोंय खुद हें जल्दी आमूँ। मगर मोंय इपफ्रुदीतुस के तोहर ठिना भेजेक जरुरी समझलों जे मोर भाई, आउर संगे-संगे काम करेक वाला, आउर शुभ समाचार केर परचार काम में मोर संगे एगो पलटन नियर काम करेक वाला, आउर मोर जरुरत में मदइत करेक लगिन तोहरे बटले भेजल दूत हेके। उके तोहरेमन से मिलेक लगिन ढेइर इच्छा कराथे, इ लगिन उ अकबकाले रहत रहे काले कि तोहरेमन उकर बेमारी केर हाल सुइन रहा। आउर जरूर उ बेमार तो होई जाय रहे, हिंयाँ तक कि मोरेक जइसन रहे, मगर परमेश्‍वर उकर उपरे दया काइर के चंगा करलक आउर उकरे उपरे भइर दया नी करलक, मगर मोर उपरे हों करलक कि मोके आउर बगरा दुःख ना होवोक। इ लगिन मोंय उके भेजेक केर आउर हें कोशिश करलों कि तोहरेमन उकर से फिन भेंट काइर के खुश होई जबा, आउर मोर हों चिंता घइट जाओक। इ लगिन प्रभु में तोहरेमन उके ढेइर खुशी केर संगे स्वागत करबा, आउर उके आउर उकर जइसन आदमीमन केर आदर करते रहबा। काले कि उ मसीह केर काम लगिन अपन जान केर खतरा उठाय के मौत केर भीरे पोंहइच जाय रहे, ताकि मोर सेवा केर काम में जे मदइत तोहरे दूर रहेक केर चलते नी करेक पारत रहा, उके उ पूरा करोक। से लगिन हे मोर बिसवासी भाईमन, प्रभु में खुश रहा। ओहे गोइठमन तोहरेमन के घरी-घरी लिखेक में मोके तो कोनों तकलीफ नी होवेला, काले कि इ गोइठमन तोहरे के झूठा शिक्षामन से बचेक में मदइत करी। उ बुरा आदमीमन से सावधान रहा जेमन कुकूरमन नियर अहैं, आउर उ आदमीमन से हों सावधान रहा, जेमन कहैना कि तोहरेमन के बचेक लगिन खतना करवाएक जरुरी अहे। काले कि असली खतना वाला तो हमरे हें हेकी, जे परमेश्‍वर केर आत्मा केर अगुवाई से भक्ति करिला आउर मसीह यीशु उपरे घमंड करिला, आउर अपन खुद केर काया से करल काम केर उपरे भरसा नी करिला। जबकि मोर ठिना तो काया केर काममन उपरे हों भरसा रखेक केर बढ़ियाँ कारण अहे, अगर केखो काया केर काममन उपरे भरसा रखेक केर बिचार होवी, तो मोंय उकर से हों बाइढ़ के रखेक पारोना। जइसन परमेश्‍वर आगया देई रहे, मोर जनम केर आठवाँ दिन मोर खतना होलक, मोंय जनम से इसराइली हेकों, आउर बिन्यामीन केर गोतर केर हेकों। मोर आयो आबा इब्रानी रहैं, से लगिन मोंय हों इब्रानी हेकों। एगो फरीसी दल केर आदमी केर रूप में मोंय मूसा केर नियम के कड़ाई से माइन हों। उत्साह केर बारे में अगर कहबा तो कलीसिया के सताएक वाला, आउर यहूदी नियममन के मानेक में एगो धरमी आदमी रहों, काले कि मोंय सोउब मूसा केर नियममन के माइन हों। मगर जे-जे गोइठमन मोर फायदा केर रहे ओहेमन के मोंय मसीह केर चलते हानि समइझ लेई हों। काले कि यीशु मसीह के जानेक बाकी सोउब चीजमन से किमती अहे, से लगिन मोंय सोउब चीजमन के बेकार समझोना। जेकर चलते मोंय सोउब चीजमन के छोइड़ देलों, आउर उमन के कचरा समझोना, जेकर से मोंय मसीह के जानमूँ। आउर उकर में जुड़ल रहमूँ; मसीह में इ लेखे जुड़ल जाएक मोर अपन धरम केर काम से निहीं जे मूसा केर नियम के मानेक केर उपरे टिकल अहे, मगर इ उ नियर धरमी बनेक से होई हे जे सिरिफ मसीह में बिसवास करेक से परमेश्‍वर मोके देवेला। ताकि मोंय मसीह के आउर बढ़ियाँ से जाइन लेमूँ, आउर उकर मोरलमन में से जी उठेक केर शक्ति के महसूस करमूँ, आउर मौत में उकर लेखे बाइन के उकर दुःखमन में भागीदार होई जामूँ। जेकर से मोंय हों फिन से मौत से जिंदा करल जामूँ। मोंय इ दावा नी कराथों कि इ सोउब चीजमन के पहिलेहें पाय लेई हों, या सिद्ध होई चुइक हों मगर मोंय कोशिश करते आगे बढ़ते जाथों कि मोके उ मिल जाओक, जेकर लगिन यीशु मसीह मोके चुइन हे। हे भाईमन मोंय एक काम कराथों कि जे गोइठ पहिले होई चुकलक उके भुलाय के जे गोइठ पाछे पूरा होवेक वाला है उकर में भागी होवेक लगिन मेहनइत करते आगे बढ़ते जाथों। मोंय निशाना बटे कूदते जाथों, ताकि उ इनाम के पामूँ, जेके देवेक लगिन परमेश्‍वर मोके स्वरग बोलाय हे आउर जेकर लगिन मसीह यीशु अपन जान के देई हे। से लगिन हमर में से जेतनामन बिसवास में मजबूत अहैं, एहे बिचार रखबैं, आउर अगर कोनों गोइठ में तोहर आउर हें बिचार होवी तो परमेश्‍वर उके तोहरेमन लगिन खोइल देवी। आउर हमरे के उ सच्चाई केर उपरे चलेक अहे जेके परमेश्‍वर पहिलेहें से हमरे के बताय हे। हे भाईमन, तोहरेमन सोउब मिल के मोर जइसन चाइल चला, आउर उमन के हों धेयान से देखबा, जेमन मोर जइसन चाइल चलैना। काले कि ढेइरमन एइसन चाइल चलैना, जेकर से उमन क्रूस उपरे मसीह केर मौत से घिरना करैना। उ मनक चरचा मोंय तोहर से घरी-घरी काइर हों, आउर एखन हों काइंद-काइंद के कहोना। उ मनक अंत बिनाश हेके, काया केर जरुरत हें उ मनक ईश्‍वर हेके, उमन अपन लाज केर काममन उपरे घमंड करैना, आउर दुनिया केर चीजमन उपरे सोचते रहैना। मगर हमरे केर अपन देस स्वरग में अहे, आउर हमरे एगो छुटकारा देवाइया प्रभु यीशु मसीह के स्वरग से घूइर आवेक केर आसरा देखाथी। उ अपन शक्ति केर उ असर केर मोताबिक जेकर से उ सोउब चीजमन के अपन कब्जा में करेक पारेला, हमर कमजोर आउर दुनिया केर काया केर रूप बदइल के अपन महिमा से भरल काया नियर बनाय देवी। इ लगिन हे मोर बिसवासी भाईमन, मोंय तोहरे से ढेइर प्रेम करोना आउर तोहरे से भेंट करेक केर आसरा कराथों तोहरेमन मोर खुशी आउर मुकुट हेका। हे दुलारा भाईमन, प्रभु उपरे बिसवास में स्थिर रहा। मोंय यूओदिया आउर सुन्तुखे दुइयो बहिन से बिनती कराथों कि तोहरे मेल-मिलाप से रहा। आउर हे मोर संगे सच्चाई से काम करेक वाला सुन्तुखे, मोंय तोर से हों बिनती करोना कि तोंय उ जनानामन केर मेल-मिलाप से रहेक लगिन मदइत कर। काले कि उमन मोर संगे शुभ समाचार के फैलाएक में क्लेमेंस आउर मोर संगे काम करेक वाला आउरोमन समेत मेहनइत काइर हैं जे मनक नाँव जिंदगी केर किताब में लिखल अहे। प्रभु में सोउब बेरा खुश रहा। मोंय फिन कहोना, खुश रहा। तोहरे केर नरम स्वभाव के सोउब आदमीमन जाइन जाओक, प्रभु जल्दी हें स्वरग से घूइर आवाथे। कोनोवें गोइठ केर चिंता ना करा, मगर हरेक दशा में तोहर अरजी, प्रार्थना आउर बिनती केर द्वारा धन्यबाद केर संगे परमेश्‍वर केर सामने हाजिर करल जाओक। तब परमेश्‍वर केर शांति, जे आदमीमन केर समझ से बिलकुल बाहरे अहे, तोहर हिरदय आउर तोहर बिचारमन के मसीह यीशु में जोगाय के रखी। से लगिन हे संगी बिसवासी भाईमन, जे गोइठमन सच हेके, आउर जे गोइठमन आदर केर लायक हेके, आउर जे गोइठमन उचित हेके, आउर जे गोइठमन पवितर हेके, आउर जे गोइठमन दोसरमन के सुहायला, आउर जे गोइठमन मन के शोभेला, जे गोइठमन बढ़ियाँ हेके आउर जेके दोसरमन बेस पतियायना ओहे गोइठमन में तोहरे धेयान लगावा। तोहरेमन उ शिक्षामन केर पालन करते रहा, जेके मोर से सीख हा, आउर उ आगयामन के, जेके तोहरे मोर से सुइन हा आउर पाय हा, आउर उ उदाहरनमन के, जेके मोंय अपन गोइठ आउर काममन में तोहरे के देखाय हों, तब शांति केर परमेश्‍वर तोहरेमन केर संगे रही। मोंय प्रभु में ढेइर खुश अहों कि अब एतना दिनमन केर पाछे तोहरेमन केर चिंता मोर लगिन रुपया भेजेक से फिन जाइग उइठ हे। जरूर तोहरेमन के शुरु में हें इकर बिचार रहे मगर तोहरेमन के मोका नी मिललक। इ निहीं कि मोंय अपन घटी केर चलते इ कहाथों, काले कि मोंय इ सीख हों कि जे दशा में अहों, उकरे में संतोष करमूँ। मोंय गरीबी आउर भरपूरी दुइयो में रहेक सीख लेई हों, हर हालत में आउर हरेक गोइठ केर बारे में मोंय संतोष रहेक सीख हों, चाहे मोर लगिन भाइर पेट रहोक चाहे मोंय भूखे रहमूँ, चाहे बगरा रहोक या थोर, मोके जिंदगी केर उतार-चढ़ाव केर पूरा अनुभव अहे। यीशु मसीह, जे मोके शक्ति देवेला, उकर द्वारा मोंय सोउब कुछ करेक पारोना। फिन भी तोहरेमन भला करला कि मोर दुःख में मोके रुपया देई के मोर साथ देला। हे फिलिप्पी शहर केर आदमीमन, तोहरेमन खुद हें जानाला कि शुभ समाचार परचार केर शुरु में जब मोंय मकिदुनिया परदेस से चाइल गेलों तब तोहरेमन के छोइड़ आउर कोनों कलीसिया लेवेक-देवेक केर बारे में मोर मदइत नी करलक। एहे लेखे जब मोंय थिस्सलुनीके शहर में रहों, तब हों तोहरेमन मोर जरुरत के पूरा करेक लगिन दूई बेर रुपया भेइज के मदइत करला। मोंय एइसन इ लगिन नी कहाथों कि मोंय रुपया चाहोना, मगर मोंय चाहोना कि इ तोहर भला काम में गिनल जाओक जेके तोहरे पहिले से कराथा, आउर इकर लगिन परमेश्‍वर तोहरे के इनाम देवी। मोर ठिना सोउब कुछ अहे, आउर भरपूर अहे, जे रुपया तोहरेमन इपफ्रुदीतुस केर हाँथ से भेइज रहा उके पाय के मोंय अघाय जाय हों। मोर लगिन तोहर भेंट एइसन सुगंध आउर ग्रहण करेक लाएक बलिदान नियर हेके, जेके पुरोहित, परमेश्‍वर लगिन चढ़ायला, आउर परमेश्‍वर उके ग्रहण करेला आउर खुश होवेला। आउर मोर परमेश्‍वर हों अपन उ धन केर मोताबिक जे महिमा सहित यीशु मसीह में अहे, तोहर हरेक घटी के पूरा करी। हमर आबा परमेश्‍वर केर महिमा जुग-जुग होते रहोक। आमीन। यीशु मसीह में सोउब पवितर आदमीमन के मोर जोहार कहबा। जे बिसवासी भाईमन मोर संगे अहैं तोहरेमन के जोहार कहैना। सोउब पवितर आदमीमन, खास काइर के जे बिसवासीमन महाराजा केर महल में अहैं, तोहरेमन के जोहार कहैना। हमर प्रभु यीशु मसीह केर किरपा तोहरेमन केर संगे रहोक। इ चिट्ठी मोंय पौलुस आउर हमरे केर भाई तीमुथियुस बटले हेके। मोंय परमेश्‍वर केर इच्छा से यीशु मसीह केर चुनल खास चेला हेकों। मोंय इ चिट्ठी मसीह केर पवितर आदमीमन के आउर बिसवास लायक भाईमन के लिखाथों, जेमन कुलुस्से शहर में रहैना। हमर आबा परमेश्‍वर बटले तोहरेमन के किरपा आउर शांति मिलते रहोक। जब हमरे तोहर लगिन प्रार्थना करिला, तब हमरे अपन प्रभु यीशु मसीह केर आबा मतलब परमेश्‍वर केर धन्यबाद करिला। काले कि हमरे सुइन ही कि मसीह यीशु उपरे तोहर बिसवास अहे, आउर सोउब पवितर आदमीमन से प्रेम कराला। तोहर इ बिसवास आउर प्रेम उ आसरा हेके, जे तोहरेमन लगिन स्वरग में रखल अहे। जेकर चरचा तोहरे उ शुभ समाचार केर सच्चा बचन में पहिलेहें से सुइन चुइक हा। जे शुभ समाचार तोहर ठिना पोंहइच हे, आउर जइसन गोटा दुनिया भइर में फाइल जाथे, आउर ढेइर आदमीमन बिसवासी बाइन जाथैं, आउर तोहरे उके सुनला आउर उ सच्चा संदेश के पूरा पुरी बुइझ गेला कि परमेश्‍वर केतना किरपा से भरल अहे, आउर बिलकुल एहे गोइठ तोहर माझे में उ बेरा से होवाथे जब तोहरे पहिली बेर संदेश सुइन रहा। ओहे शिक्षा तोहरेमन हमर संगे काम करेक वाला दुलार इपफ्रास से सीख हा, जे हमर लगिन मसीह केर बिसवास लाइक सेवक हेके। ओहे हमरे के उ प्रेम केर बारे में हों बतालक जेके पवितर आत्मा तोहरे के परमेश्‍वर केर आदमीमन केर परती देई हे। एहे लगिन हमरे हों जे दिन से इ सुइन ही, तोहर लगिन लगातार प्रार्थना आउर बिनती कराथी कि परमेश्‍वर केर आत्मा तोहरेमन के गेयान आउर समझ देवोक ताकि तोहरे उकर इच्छा के पूरा पुरी बुझेक पारबा। आउर तोहरे एइसन जिंदगी जियेक पारबा जइसन प्रभु चाहेला, आउर तोहर चाइल-चलन प्रभु केर आदमीमन केर चाइल-चलन नियर होवोक ताकि तोहरेमन सोउब रकम से प्रभु के खुश करबा, आउर तोहरे लगातार सोउब रकम केर अच्छा काम करते रहबा। आउर परमेश्‍वर के जानेक में लगातार बढ़ते जबा। मोंय प्रार्थना करोना कि परमेश्‍वर अपन महिमा से भरल शक्ति से तोहरेमन के ढेइर मजबूत करोक ताकि तोहरे धीरज आउर आनंद से अपन दुःखमन के सहेक पारबा। आउर आबा परमेश्‍वर के धन्यबाद देते रहा, जे तोहरे के उ बपौती अधिकार में भागी होवेक केर लायक बनाय हे, जेके उ स्वरग केर राइज में अपन आदमीमन के देवेक लगिन तेयार काइर हे। परमेश्‍वर हमरे के शैतान केर कब्जा से छोड़ाय के अपन दुलार बेटा केर राइज में ढूकालक। जेकर में हमरे के उकर लोहू से छुटकारा मतलब पापमन केर क्षमा मिलेला। केऊ हों परमेश्‍वर के देखेक नी पारैना, मगर जब उकर बेटा मनवा बनलक, तो उ परमेश्‍वर के आदमीमन केर माझे दिस्तार काइर देलक, उकरे ठिना परमेश्‍वर केर बनाल सोउब कुछ केर उपरे पूरा अधिकार अहे। काले कि इ ओहे रहे जे सोउब कुछ के सिरजेक लगिन परमेश्‍वर केर संगे काम करलक। उकरे में समूचा चीजमन केर सिरजन होलक, स्वरग केर, चाहे धरती केर, देखल, चाहे बेगर देखल, सिंहासन होवोक चाहे राइज चलाइयामन, मालिकमन होवोक चाहे अधिकारमन, समूचा चीजमन उकरे बटले आउर उखे आदर देवेक लगिन सिरजाल जाय हे। आउर कोनोवें सिरजाल जाएक से पहिले मसीह मौजूद रहे, आउर सोउब चीजमन उकरे में स्थिर रहेला। ओहे कलीसिया केर अगुवाई ओइसनेहें करेला, जइसन एगो आदमी केर मूँड़ उकर काया के चलायला। ओहे शुरु हेके, आउर मोरलमन में से जी उठेक वालामन में हों पहिला हेके कि सोउब गोइठमन में ओहे मुध ठहरोक। काले कि परमेश्‍वर आबा केर खुशी इकरे में अहे कि परमेश्‍वर केर समूचा स्वभाव मसीह में मौजूद अहे। आउर उकर क्रूस उपरे बहाल लोहू केर द्वारा सोउब चीजमन केर, चाहे धरती केर हो, चाहे स्वरग केर हो, अपन संगे मेल जोल काइर लेलक। तोहरेमन जे पहिले परमेश्‍वर से दूर रहा, आउर अपन बुरा काममन केर चलते उकर दुश्मन रहा। परमेश्‍वर अब अपन बेटा यीशु मसीह के मनवा बनाय के, आउर उके क्रूस उपरे बलिदान काइर के तोहरेमन केर अपन संगे मेल जोल काइर लेलक, ताकि तोहरे के अपन ठिना पवितर, बेदाग आउर निरदोष बनाय के हाजिर करी। अगर तोहरेमन केर बिसवास यीशु मसीह उपरे पोक्ता बनल रही, उ घर केर जइसन जे एगो मजबूत नेव केर उपरे खड़ा रहेला, आउर उ आसरा के नी छोड़बा जे शुभ समाचार उपरे बिसवास करेक से तोहरे के मिल हे, जेकर परचार आकाश केर हेंठे गोटा दुनिया में सोउब मनवा केर माझे करल जाय हे, आउर मोंय पौलुस ओहे शुभ समाचार केर परचार करोना। अब मोंय उ दुःखमन केर चलते खुशी मनावना जे तोहर लगिन सहोना, मोंय लगातार अपन काया में पीड़ामन के सहोना जइसन मसीह अपन काया में जे कलीसिया हेके पीड़ा सहलक। मतलब मोंय हों अपन काया में दुःख साइह के कलीसिया केर लगिन पूरा काइर देवोना। परमेश्‍वर तोहरेमन के अपन संदेश के पूरा-पुरी समझाएक लगिन मोके ठहराय हे, सेहे लगिन मोंय कलीसिया केर सेवक बाइन हों। मतलब उ लुकल गोइठ के जे ढेइर समय से आउर उ पुरखामन से जेमन गुजइर गेलैं लुकल रहे, परमेश्‍वर अब उके अपन पवितर आदमीमन उपरे दिस्तार काइर हे। काले कि परमेश्‍वर चाहत रहे कि उकर आदमीमन इ जाइन लेवोक कि मसीह केर धन आउर महिमा तोहरे परजाइत आदमीमन लगिन हों अहे। आउर उ भेद इ हेके कि मसीह जे महिमा केर आसरा हेके तोहरे में रहेला। हमरे मसीह केर बारे में परचार काइर के हर आदमी के चेतावनी देवीला, आउर उ समूचा गेयान सहित जेके परमेश्‍वर हमरे के देई हे, सोउब आदमीमन के शिक्षा देवीला। ताकि हमरे इ पक्का करेक पारब कि जब उमन परमेश्‍वर केर भीरे खड़ा होबैं, तो हर केऊ मसीह में एगो मजबूत बिसवासी होवी। एहे लगिन मोंय उकर उ महाशक्ति केर मोताबिक, जे मोर में शक्ति केर संगे काम करेला मेहनइत करोना, आउर एइसन करेक लगिन मोंय कठिन मेहनइत हों करोना। मोंय चाहोना कि तोहरेमन जाइन लेवा, कि मोंय तोहरे आउर उमन लगिन जेमन लौदीकिया शहर में अहैं, आउर उ सोउबमन केर लगिन जेमन से मोंय नी भेटाय हों कइसन मेहनइत करोना। आउर मोंय तोहरे सोउब के बिसवास में मजबूत करेक चाहोना जेकर से तोहरे प्रेम में एक संगे जोड़ल जबा आउर सच्चाई केर भरपूर समझ में धनवान बाइन जबा आउर परमेश्‍वर आबा केर लुकल गोइठ के जे मसीह हेके जाइन जबा। उ ओहे हेके जे परमेश्‍वर केर बुद्धि आउर गेयान के जनुवायला, जे उ खजाना केर धन नियर अहे जे लुकल अहे। इके मोंय इ लगिन कहोना कि केऊ आदमी तोहरेमन के अपन झूठा शिक्षामन में बिसवास करेक लगिन राजी ना करवाय लेवोक। काले कि अगर मोंय तोहरेमन से दूर अहों, फिन भी मोंय एइसन अहों जइसन तोहर संगे हें अहों, आउर नियम मोताबिक तोहर चाइल-चलन, आउर मसीह उपरे पोक्ता बिसवास के देइख के खुश अहों। इ लगिन जइसन तोहरेमन मसीह यीशु के प्रभु माइन के ग्रहण काइर लेई हा, तइसनेहें लगातार उकर पिछे चलते रहा। आउर उकरे में मजबूत होते आउर बढ़ते जावा, आउर जइसन तोहरेमन के सिखाल जाय हे तइसनेहें बिसवास में पोक्ता होते जावा, आउर लगातार परमेश्‍वर के धन्यबाद देते रहा। चौकस रहा कि केऊ तोहरेमन के उ गोइठमन से जेकर कोनों कीमत नखे आउर जे बेकार अहे, ना बहकाय लेवोक, जे दुनिया केर रीति-रिवाज केर मोताबिक आदमीमन केर देवल शिक्षा तो हेके, मगर मसीह केर मोताबिक निहीं। इ लगिन तोहरे धोखा ना खावा, काले कि मसीह केर काया में परमेश्‍वर केर समूचा भरपूरी बास करेला। आउर तोहरेमन उकरे में भरपूर होई जाय हा जे समूचा शक्ति आउर अधिकार केर प्रधान हेके। जब तोहरे उकर में बिसवास करला तो तोहर खतना आदमीमन से निहीं मगर मसीह बटले करल जाय हे, जेकर से तोहर पापी स्वभाव के काइट के दूर करल जायला। आउर जब तोहरे बपतिस्मा जल संस्कार लेला तो मसीह केर संगे गड़ाल गेला, आउर उकरे संगे परमेश्‍वर केर शक्ति उपरे बिसवास काइर के, जे मसीह के मोरलमन में से जियालक, जी हों उठला। आउर परमेश्‍वर तोहरेमन के हों, जे अपन गुन्हामन आउर पापी स्वभाव केर चलते आत्मा में मोरल रहा, उकर संगे जियालक, आउर हमर सोउब पापमन के क्षमा करलक। उ हमरे के दोषी ठहराएक वाला लिखल कागजात के रद्द काइर देलक, जे मूसा केर नियम केर चलते हमर बिरोध में लिखल रहे, आउर उके क्रूस उपरे काँटी से ठोइक के सामने से हटाय देलक। आउर परमेश्‍वर समूचा शक्ति आउर अधिकार के रद्द काइर देलक आउर क्रूस केर बिजय-जुलूस में उमन के दुनिया केर नजइर में नीचा देखालक। से लगिन खाएक पियेक या परब या नवाँ चाँद या यहूदी मनक आराम केर दिन केर बारे में केखो तोहर फैसला करेक ना देबा। इ सोउब नियम तो सिरिफ एगो छाँई नियर अहे, मगर असली तो मसीह हें हेके। केऊ हों आदमी जे नरम बनेक केर देखावा करेला आउर स्वरगदूतमन केर पूजा करेक में लीन रहेला, तोहरे के तोहर इनाम से दूर करेक ना पारोक, एइसन आदमी अपन देखल झूठा ईश्‍वरीय दर्शनमन केर बखाइन बिस्तार से करेला आउर इ दुनिया केर बुद्धि केर चलते घमंड से फूइल जायला। आउर इ लेखे उ मसीह से जुड़ल रहेक नी पारेला, जे समूचा काया केर मूँड़ हेके। जे लेखे मूँड़ समूचा काया के चलायला ओहे लेखे मसीह अपन सोउब आदमीमन के चलायला ताकि उमन एके संगे रहबैं। जे लेखे काया केर सोउब जोड़मन आउर साँस लेवेक वाला अंगमन काया में जुड़ल रहेला आउर परमेश्‍वर बटले बढ़ते जायला। जबकि तोहरेमन केर पापी स्वभाव मसीह केर संगे मोइर जाय हे, से लगिन अब तोहरे के इ दुनिया केर नियम के मानेक केर जरुरत नखे। फिन भी तोहरे काले एखन हों इ नियममन के मानाला जइसन कि एखन हों तोहरे के दुनिया चलायला कि “इके ना छुवा, उके ना चखा, इके ब्यवहार में ना लाना।” इ सोउब नियममन कोनों काम केर नखे, काले कि इ आदमीमन केर बनाल नियममन हेके। इ नियममन में अपन सुबिधा केर मोताबिक बनाल भक्ति करेक केर तरीका, नरम बनेक केर देखावा आउर काया के दुःख देवेक केर भाव जरूर दिसेला, मगर सचमुच में इ नियम आदमीमन के उ मनक बुरा इच्छामन के काबू करेक में मदइत नी करेला। जइसन परमेश्‍वर मसीह के मोरल में से फिन जिंदा करलक, तइसनेहें तोहरे हों मसीह केर संगे जियाल गेला, तो उ चीजमन केर इच्छा करा जे स्वरग में परमेश्‍वर ठिना तोहर लगिन अहे, जहाँ मसीह परमेश्‍वर केर भतखाइया आरा सोउब से इज्जतदार ठाँव में बाइठ हे। इ लगिन दुनिया केर चीजमन में निहीं मगर स्वरग केर चीजमन में धेयान देते रहा। काले कि तोहरेमन तो पाप केर स्वभाव लगिन मोइर गेला, आउर अब तोहर नवाँ जिंदगी मसीह केर संगे परमेश्‍वर में लुकल अहे। मसीह जे हमरे के नवाँ जिंदगी देवेला, जब दोबारा इ धरती में घूइर आवी, तब तोहरेमन हों उकर संगे आबा आउर उकर महिमा में शामिल होबा। इ लगिन तोहरे उ बुरा काममन के करेक छोइड़ देवा जे तोहरे केर पापी स्वभाव में जुड़ल अहे। जे इ धरती में अहे मतलब ब्यभिचार, अशुद्ध काम, बुरा बिचार, बुरा लालसा आउर लोभ जे मूर्ति पूजा केर बराबइर अहे। आदमीमन एहे बुरा काममन के करैना, इ लगिन परमेश्‍वर जरूर हें उमन के कड़ा सजा देवी। आउर एक समय तोहरे हों एहे बुरा काममन केर मोताबिक अपन जिंदगी के बितात रहा, तो तोहरे हों एहेमन केर मोताबिक चलत रहा। मगर अब तोहरेमन हों इ सोउब के, मतलब खीस, झुंझलाहट, बैर भाव, निंदा आउर दोसरमन से गंदा भाषा बोलेक, इ सोउब बुरा काममन के छोइड़ देवा। आउर एक दोसर से झूठ ना बोलबा काले कि तोहरेमन अपन पुरना पापी स्वभाव के आउर सोउब बुरा काममन के छोइड़ देई हा। आउर अब तोहरे नवाँ स्वभाव के अपनाय लेई हा, इकर सिरजाएक वाला परमेश्‍वर इके आउर बगरा अपन स्वभाव में बदलते जाथे, ताकि तोहरे उके बेस लेखे जानेक पारबा। इ नवाँ जिंदगी पाय के अब तोहरे में ना तो यूनानी, ना यहूदी, ना खतना, ना बेगर खतना, ना देसी, ना बिदेसी, ना गुलाम आउर ना आजाद केर भेद अहे, मगर मसीह हें एकले सोउब कुछ हेके आउर सोउब में अहे। इ लगिन जबकि परमेश्‍वर तोहरे के अपन पवितर आदमी बनेक लगिन चुइन हे आउर तोहरे से प्रेम करेला, तो तोहरे करुणा करेक वाला, भलाई करेक वाला, दीन बनेक वाला, नरम बनेक आउर सहेक केर शक्ति धारण करा। आउर अगर केखो कोनों दोष देवेक केर कोनों कारण अहे, तो एक दोसर केर साइह लेवा, आउर एक दोसर केर गुन्हा के क्षमा करा, जइसन प्रभु तोहर गुन्हा के क्षमा करलक तइसनेहें तोहरेमन हों करा। सोउब से खास काम जेके तोहरे के करेक चाही, उ इ हेके कि एक दोसर से प्रेम करा। एइसन काइर के तोहरे समूचा रीति से एक मन होई जावा। आउर मसीह जे शांति देवेला उके तोहर दिल में राइज करेक देवा काले कि तोहरे सोउब एक हें काया केर अंग हेका, से लगिन तोहरे के एक दोसर केर संगे शांति से रहेक लगिन बोलाल जाय हे, आउर तोहरे धन्यबादी बनल रहा। मसीह केर बचन के अपन मन में भरपूरी से बसेक देवा। आउर सिद्ध गेयान सहित एक दोसर के सिखाते आउर चेताते रहा। आउर अपन-अपन मन में धन्यबाद देते परमेश्‍वर लगिन आराधना आउर स्तुति गान आउर आत्मिक गीत गाते रहा। आउर तोहरे जे कोनोवें कहबा या करबा उ सोउब प्रभु यीशु केर नाँव से करबा, आउर उकर बटले परमेश्‍वर आबा के धन्यबाद देबा। हे जनानामन, जइसन प्रभु में उचित अहे, तइसनेहें अपन-अपन पति केर अधीन रहबा। हे पतिमन, अपन-अपन जनाना से प्रेम करबा, आउर उमन से कठोर ब्यवहार ना करबा। हे छउवामन, सोउब गोइठमन में अपन-अपन आयो-आबा केर आगया के मानबा। काले कि प्रभु इकर से खुश होवेला। हे आयो आबामन, अपन-अपन छउवामन के घरी-घरी डाँइट के ना खिज-खिजवावा एइसन ना होवोक कि उमन केर दिल टूइट जाई। हे सेवकमन, जे इ दुनिया में तोहर मालिक हेकैं, सोउब गोइठमन में उमन केर आगया केर पालन करबा। आदमीमन के खुश करेक वालामन केर लेखे देखाएक लगिन निहीं, मगर मन केर सिधाई से आउर प्रभु केर भय माइन के करबा। आउर जे कोनों तोहरेमन कराला, तन मन से करा इ बुइझ के कि आदमीमन लगिन निहीं मगर प्रभु लगिन कराला। तोहरे जानाला कि तोहरे के इकर बदला में प्रभु इनाम केर रूप में बपौती अधिकार देवी। इ लगिन कि तोहरेमन मालिक मतलब मसीह केर सेवक हेका। काले कि जे बुरा करेला, उ अपन बुराई केर बदली में दंड पावी। परमेश्‍वर केकरो भेद-भाव नी करेला। हे मालिकमन, अपन-अपन गुलाममन केर संगे न्याय आउर ठीक-ठीक ब्यवहार करा, इ समइझ के कि स्वरग में तोहर हों एगो मालिक अहे। लगातार प्रार्थना करते हुए सचेत रहा। आउर परमेश्‍वर के धन्यबाद देते रहा। आउर इकर संगे हें संगे हमर लगिन हों प्रार्थना करते रहा कि परमेश्‍वर हमर लगिन बचन परचार करेक ले एइसन दुरा खोइल देवोक कि हमरे मसीह केर उ भेद केर बखाइन करेक पारब, जेकर चलते मोंय एखन जेहेल में अहों। आउर प्रार्थना करा कि मोंय मसीह केर बारे सही आउर खुला रीति से परचार करेक पारमूँ। अबिसवासीमन केर संगे बुद्धिमानी से बरताव करा। हरेक मोका के किमती जाइन के उके ठीक से इस्तेमाल करा। तोहर बोली हमेशा नरम आउर सुनेक में अच्छा होवोक, ताकि तोहरे हर आदमीमन के अपन बिसवास केर बारे में ठीक ढंग से जबाब देवेक पारबा। भाई तुखिकुस जे एगो बिसवास लायक सेवक हेके आउर प्रभु केर सेवा में मोर संगे काम करेक वाला हेके। उ तोहरे के मोर बारे में सोउब गोइठमन के बताय देवी। मोंय उके तोहर ठिना इ लगिन भेइज हों कि तोहरेमन के हमर दशा मालूम होई जाओक आउर उ तोहरे केर बिसवास के मजबूत करोक। उकर संगे मोंय उनेसिमुस के हों भेइज हों। उ बिसवास लायक आउर दुलारा भाई हेके आउर उ तोहर शहर केर हें हेके। इ दुयो तोहरे के हिंयाँ केर सोउब गोइठमन के बताय देबैं। अरिस्तर्खुस जे मोर संगे जेहेल में अहे, आउर बरनाबास केर रिश्तेदार मरकुस बटले तोहरेमन के जोहार। मरकुस केर बारे में तोहरे के आगे हें बताल जाय रहे कि अगर उ तोहर ठिना आवी, तो उकर बेस लेखे स्वागत करबा। यीशु जेके आदमीमन यूस्तुस नाँव से बोलायना, तोहरेमन के जोहार कहेला। यहूदी बिश्वासीमन में से सिरिफ एहे परमेश्‍वर केर राइज केर लगिन मोर संगे काम करेक वाला आउर मोर शांति केर कारण हेके। इपफ्रास जे तोहर शहर केर हेके आउर मसीह यीशु केर सेवक हेके, तोहरे के जोहार कहेला। उ सोउब बेरा तोहर लगिन प्रार्थना करते रहेला ताकि तोहरेमन सिद्ध होई के पूरा बिसवास केर संगे परमेश्‍वर केर इच्छा में स्थिर रहा। मोंय उकर गवाह हेकों कि उ तोहर लगिन आउर लौदीकिया शहर आउर हियरापुलिस शहर केर आदमीमन लगिन लगातार प्रार्थना करते रहेला। हमरेमन केर दुलारा बाइध लूका आउर भाई देमास तोहरेमन के जोहार कहैना। लौदीकिया शहर केर बिसवासी भाई-बहिनमन के आउर बहिन नुमफास आउर उकर घर में चलेक वाला कलीसिया के मोर बटले जोहार कहोना। जब इ चिट्ठी तोहर हिंयाँ पइढ़ लेवल जाई तो एइसन करबा कि इ चिट्ठी लौदीकिया शहर केर कलीसिया में हों पढ़ाल जाओक। आउर उ चिट्ठी जे लौदीकिया शहर केर कलीसिया से आवी उके तोहरेमन हों पढ़बा। फिन अरखिप्पुस से कहबा कि जे सेवा प्रभु में तोके जिम्मा देवल जाय हे, उके सावधानी केर संगे पूरा करबे। मोंय पौलुस अपनेहें हाँथ से इ चिट्ठी में तोहरेमन के जोहार लिखाथों। मोंय जेहेल में अहों, मोके प्रार्थना में याइद रखबा। मोंय प्रार्थना करोना कि परमेश्‍वर केर किरपा तोहरेमन केर उपरे होते रहोक। आमीन। इ चिट्ठी मोंय पौलुस आउर सीलास आउर तीमुथियुस बटले हेके। जेके हमरे थिस्सलुनीके शहर केर कलीसिया केर बिसवासीमन केर नाँव में लीख ही, जेमन आबा परमेश्‍वर आउर प्रभु यीशु मसीह में जुड़ल अहैं। मोंय प्रार्थना करोना कि परमेश्‍वर तोहरेमन उपरे किरपा करोक आउर तोहरे के शांति देवोक। हमरेमन अपन प्रार्थनामन में तोहरेमन के याइद करिला आउर सोउब बेरा तोहरे केर बारे में परमेश्‍वर के धन्यबाद देवीला। आउर जब हमरे अपन परमेश्‍वर से प्रार्थना करिला, तो तोहरे केर उ काम के जेके बिसवास से कराला, आउर दोसरमन केर परती प्रेम देखाएक लगिन कठिन मेहनइत कराला, आउर यीशु मसीह केर घूइर आवेक केर आसरा से दुःख में तोहरेमन केर धीरज के लगातार याइद करिला। हे परमेश्‍वर केर दुलारा भाईमन, हमरे जानिला कि परमेश्‍वर तोहरे के अपन आदमी बनेक लगिन चुइन हे। काले कि हमरे यीशु मसीह केर बारे में शुभ समाचार, तोहर ठिना बोली भइर से निहीं मगर पवितर आत्मा केर शक्ति से आउर बड़का भरसा केर संगे पोंहचाली। तोहरे जानाला कि जब हमरे तोहरे केर संग रही, तो तोहर भलाई केर लगिन कइसन जिंदगी बिताय रही। तोहरेमन उपरे भारी दुःख रहे फिन भी तोहरे उ संदेश केर स्वागत करला जे पवितर आत्मा बटले देवल जाय रहे। आउर तोहरे हमर आउर प्रभु केर नियर चाल चलेक लगला। हिंयाँ तक कि मकिदुनिया परदेस आउर अखया परदेस केर सोउब बिसवासीमन लगिन तोहरेमन नमूना बनला। काले कि तोहर हिंयाँ से ना सिरिफ मकिदुनिया परदेस आउर अखया परदेसमन में प्रभु केर बचन सुनाल गेलक, मगर तोहर बिसवास केर चरचा जे परमेश्‍वर उपरे अहे, हर जगा एइसन फाइल जाय हे कि हमरे के तोहरे केर बिसवास केर बारे में दोसरमन के कोनों बताएक केर जरुरत नखे। काले कि उमन खुद हें दोसरमन के बतायना कि जब हमरे तोहर ठिना आली तो तोहरेमन कइसन हमरे केर स्वागत करला। आउर तोहरे कइसन मूर्तिमन से दूर होई के परमेश्‍वर बटे घुरला, ताकि जिंदा आउर सच्चा परमेश्‍वर केर सेवा करबा। आउर उकर बेटा के स्वरग से दोबारा घूइर आवेक केर आसरा देखते रहबा जेके परमेश्‍वर मुरदा में से जियालक, मतलब यीशु के जे परमेश्‍वर केर आवेक वाला दंड से हमरे के बचायला। हे भाईमन, तोहरेमन खुद हें जानाला कि हमरे केर तोहर ठिना आवेक बेकार नी होलक। मगर तोहरेमन जानाला कि हमरे पहिले फिलिप्पी शहर में दु:ख उठाली आउर हुड़दंग सहली, आउर परमेश्‍वर हमरे के एइसन साहस देलक कि हमरे परमेश्‍वर केर शुभ समाचार के हिंयाँ थिस्सलुनीके शहर में हों भारी बिरोधमन केर होते हुए हों तोहरेमन के सुनाली। काले कि हमरे केर उपदेस ना तो भरमाएक वाला हेके आउर ना चाइल-चलन केर अशुद्ध इरादा से हेके आउर ना हें इकर में छल-कपट अहे। मगर परमेश्‍वर हमरे के लायक समइझ के शुभ समाचार सोंइप हे। से लगिन हमरे आदमीमन के निहीं, बल्कि हमरे केर हृदय के परखेक वाला परमेश्‍वर के खुश करेक लगिन उपदेस देवीला। तोहरेमन जानाला कि हमरे कहियो हों तोहरे के खुश करेक लगिन तोहरे केर बारे में बेस गोइठमन के नी कइह ही, आउर परमेश्‍वर हों गवाही देवेला कि हमरे एइसन नी रही। हमरे आदमीमन से आदर पावेक नी चाहत रही, आउर ना तोहरे से आउर ना ही केऊ दोसर से। जबकि मसीह केर खास चेला होवेक केर नाते तोहरे से मदइत पावेक केर हमरे के अधिकार रहे। मगर जे लेखे आयो अपन छउवामन केर पालन-पोषण करेला, तइसनेहें हमरे हों तोहर माझे रइह के तोहरे केर धेयान राइख ही। हमरे तोहरे के ढेइर प्रेम करिला से लगिन हमरे तोहरे के परमेश्‍वर केर शुभ समाचार भइर नी सुनाली मगर अपन प्राण हों तोहरेमन के देवेक लगिन तेयार रही, इ लगिन कि तोहरेमन हमर दुलारा होई जाय रहा। हे भाईमन, तोहरेमन हमर मेहनइत आउर दुःख के याइद कराला, कि हमरे इ लगिन राइत दिन काम धंधा करते तोहरेमन में परमेश्‍वर केर शुभ समाचार परचार करली, ताकि तोहर में से केकरो उपरे भार ना होवोक। तोहरेमन खुद हें गवाह हेका आउर परमेश्‍वर हों गवाह हेके कि तोहरे सोउब बिसवासीमन केर माझे हमरे केर स्वभाव कइसन सच्चा, धरमी, आउर निरदोष रहे। तोहरेमन जानाला कि जइसन आबा अपन छउवामन केर संगे ब्यवहार करेला, तइसनेहें हमरे हों तोहर में से हरेक झन के उपदेस देते, उसकाते आउर समझाते रही। कि तोहर चाइल-चलन परमेश्‍वर केर इच्छा केर मोताबिक होवोक, जे तोहरेमन के अपन राइज आउर महिमा में बोलायला। इ लगिन हमरे हों परमेश्‍वर केर धन्यबाद लगातार करिला कि जब तोहरे उ संदेश के सुनला, जेके हमरे तोहर माझे परचार करली, तो तोहरे उके परमेश्‍वर केर बचन समइझ के ग्रहण करला आउर उ संदेश परमेश्‍वर बटले हें रहे। आउर अब तोहरेमन मसीह उपरे बिसवास कराला परमेश्‍वर केर इ संदेश तोहरे में काम कराथे। इ लगिन हे भाईमन, तोहरे ओइसनेहें सताव सहला जइसन परमेश्‍वर केर कलीसिया केर बिसवासीमन सहलैं जेमन यहूदिया परदेस में आउर यीशु मसीह में मिलल अहैं। तोहरेमन अपन आदमीमन से दुःख सहला आउर उमन अपन आदमीमन से मतलब यहूदी आदमीमन से दुःख सहलैं। जेमन प्रभु यीशु के आउर परमेश्‍वर केर संदेश के बताएक वालामन के माइर मोरालैं, आउर हमरे के हों सतालैं। उमन परमेश्‍वर के नराज करैना आउर सोउब आदमीमन केर बिरोध करैना। आउर उमन परजाइत आदमीमन से उमन केर छुटकारा लगिन गोठियाएक से हमरे के मना करैना, आउर जब तक परमेश्‍वर उ उमन के सजा नी देवी तब तक उमन पाप उपरे पाप कमाते जायना, आखरी में परमेश्‍वर उमन के भयानक सजा देवी। से लगिन हे भाईमन जब हमरे थोरेक देरी लगिन मन में निहीं मगर काया में तोहर से अलग होई जाय रही, तो हमरे हमेशा तोहर बारे में सोचत रही आउर तोहरे के देखेक लगिन ढेइर कोशिश करली। इ लगिन हमरे मतलब मोंय पौलुस एक बेर निहीं मगर घरी-घरी तोहर ठिना आवेक चाहलों, मगर शैतान हमरे के रोइक के रखलक। भला हमरे केर आसरा, या खुशी या बड़ाई केर मुकुट केमन हेकैं? का हमर प्रभु यीशु केर सामने उकर घूइर आवेक केर बेरा तोहरेमन हें नी होबा? हमर बड़ाई आउर खुशी तोहरेमन हें हेका। इ लगिन जब हमरे के तोहरे से दूर रहेक बरदास नी होलक, तो हमरे इ बिचार करली कि एथेंस शहर में एकले रइह जाब। आउर हमरे तीमुथियुस के जे मसीह केर शुभ समाचार में हमर भाई आउर परमेश्‍वर केर सेवक हेके तोहर ठिना भेजली, ताकि उ तोहरेमन के मसीह में पोक्ता बिसवास करेक लगिन सहायता करोक, आउर बिसवास में बनल रहेक लगिन तोहरे के समझाओक। ताकि केऊ इ दुःखमन केर चलते बिसवास के छोइड़ ना देवोक, काले कि तोहरेमन खुद जानाला कि हमरे के दुःख उठाएक पड़ी। हमरे पहिलेहें जब तोहरे ठिना रही तो तोहरेमन के कहत रही कि हमरे उपरे सताव आवी, आउर एइसनेहें होलक जेके तोहरेमन हों जानाला। इ लगिन जब मोर से तोहरेमन केर बिसवास केर हाल जानल बिना रहल नी गेलक, तो मोंय तोहरे केर बिसवास केर हाल जानेक लगिन तीमुथियुस के भेजलों, काले कि मोंय डरात रहों कहीं एइसन ना होवोक कि परीक्षा करेक वाला शैतान तोहरे के फँसाय तो नी लेई हे, आउर हमर मेहनइत बेकार तो नी होई गेलक। मगर एखन तीमुथियुस जे तोहर ठिना से हमर हिंयाँ आय हे, तोहरे केर बिसवास आउर प्रेम केर बारे में शुभ समाचार सुनालक। आउर इ गोइठ के हों सुनालक कि तोहरेमन सोउब बेरा प्रेम केर संगे हमरे के याइद कराला, आउर हमरे के देखेक केर इच्छा रखाला, जइसन हमरे हों तोहरेमन के देखेक चाहिला। हे बिसवासी भाईमन, हमरे केर सोउब दुःख आउर सताव में हों, हमरेमन तोहर बारे में तीमुथियुस से सुइन के शांति पाली कि तोहरे यीशु मसीह उपरे बिसवास में मजबूत अहा। प्रभु यीशु में तोहर स्थिर रहेक केर संदेश के सुनेक हमर लगिन नवाँ जिंदगी पावेक केर बराबइर अहे। आउर जे खुशी हमरे के तोहर चलते अपन परमेश्‍वर केर सामने अहे, उकर बदला तोहर बारे में हमरे परमेश्‍वर के का नियर भरपूर धन्यबाद देवब? हमरे लगातार राइत दिन प्रार्थना करते रहिला कि दोबारा तोहरे के देखेक पारब आउर प्रभु यीशु मसीह उपरे बिसवास करेक में तोहर मदइत करब। हमरे प्रार्थना करिला कि हमर आबा परमेश्‍वर आउर हमर प्रभु यीशु मसीह तोहर ठिना आवेक लगिन हमरे केर अगुवाई करोक। हमरे एहो प्रार्थना करिला कि प्रभु यीशु एक दोसर से प्रेम करेक में तोहर मदइत करोक, आउर तोहर प्रेम बढ़ते जाओक जइसन हमर प्रेम हों तोहर लगिन पहिले से अहे। ताकि परमेश्‍वर तोहर मन के एइसन मजबूत करोक कि जब हमर प्रभु यीशु अपन पवितर आदमीमन केर संगे घूइर आवी, तो उमन हमर परमेश्‍वर आउर आबा केर सामने पवितर आउर निरदोष ठहरोक। हे भाईमन, हमरे प्रभु यीशु केर नाँव में तोहर से बिनती करिला कि तोहरेमन इ नियर जिंदगी बितावा जे परमेश्‍वर के खुश करेला, जइसन हमरे तोहरे के सिखाय ही। तोहरे पहिले से हें इ नियर जिंदगी बिताथा, आउर हमरे तोहरे के एइसन करेक लगिन आउर हें बगरा उसकाइला। काले कि तोहरेमन जानाला कि जे आगया हमरे तोहरे के देई ही, उ प्रभु यीशु बटले आय हे। काले कि परमेश्‍वर केर इच्छा इ हेके कि तोहरेमन पवितर बना, मतलब ब्यभिचार ना करबा। तोहर में से हरेक झन अपन काया उपरे कब्जा करेक सिखा, आउर अपन जनाना केर संगे पवितर आउर आदर केर संगे रहा। आउर इ काम काया केर लालसा से करेक नखे, आउर ना उ जाइतमन नियर जेमन परमेश्‍वर के नी जानैना। एइसन काइर के तोहरे के अपन बिसवासी भाईमन केर बिरोध में पाप नी करेक चाही आउर ना हें कोनों गलत फायदा उठाएक चाही, काले कि इ सोउब गोइठमन केर बारे में प्रभु पलटा लेवेला, जइसन कि हमरे पहिलेहें तोहरेमन के सफा-सफा कइह के कठोर चेतावनी देई रही। काले कि परमेश्‍वर हमरे के अशुद्ध जिंदगी जियेक लगिन निहीं, मगर पवितर जिंदगी जियेक लगिन बोलाय हे। इ लगिन जे इ नियममन केर मोताबिक जियेक से इनकार करेला, उ आदमी के निहीं मगर परमेश्‍वर के इनकार करेला, जे अपन पवितर आत्मा के तोहरेमन के देवेला। मगर संगी बिसवासी भाईमन से प्रेम केर बारे में इ जरुरी नखे कि मोंय तोहर ठिना कोनों लिखमूँ, काले कि आपस में प्रेम रखेक तोहरेमन खुद हें परमेश्‍वर से सीख हा। आउर गोटा मकिदुनिया परदेस केर सोउब बिसवासी भाईमन से एइसनेहें प्रेम करबो कराला। मगर हे भाईमन, हमरे तोहरेमन के समझाइला कि प्रेम में आउर हें बढ़ते जावा। आउर जइसन हमरे तोहरेमन के आगया देई ही, तइसनेहें शांति से रहा आउर दोसरमन केर काम में दखल ना देवा आउर अपन-अपन हाँथ से कमाएक केर कोशिश करा। ताकि अबिसवासीमन देखबैं कि तोहरे हर दिन कइसन ब्यवहार कराला, आउर तोहर आदर करबैं आउर तोहरेमन में कोनों चीज केर घटी ना होवोक। हे भाईमन, हमरे चाहिला कि तोहरेमन उ बिसवासीमन केर बारे में जेमन मोइर जाय हैं, जाइन लेवा कि उ मनक संगे का होवी, एइसन ना होवोक कि तोहरे के दोसरमन नियर शोक करेक पड़ी, जेमन के मोरल पाछे फिन से जियेक केर आसरा नखे। अगर हमरे बिसवास करिला कि यीशु मोरलक, आउर जी हों उठलक, तो तइसनेहें परमेश्‍वर उमन के हों, जेमन यीशु में बिसवास काइर के मोइर जाय हैं, यीशु केर संगे वापस लानी। काले कि हमरे प्रभु यीशु केर बचन केर मोताबिक तोहरेमन से इ कहिला कि जेमन बिसवास में मोइर जाय हैं, उमन पहिले प्रभु से मिलेक पारबैं। उकर पाछे हमरेमन जे जिंदा अही आउर प्रभु यीशु केर आवेक तक बचल रहब, तो प्रभु केर संगे भेंट करेक पारब। काले कि प्रभु यीशु खुद हें स्वरग से उतरी उ समय आदमीमन यीशु के ऊँचा आवाज से आदेश देते सुनबैं, आउर प्रधान दूत जोर से बोली, आउर परमेश्‍वर केर तुरही फूँकल जाई, आउर जेमन मसीह में बिसवास काइर के मोइर हैं, उमन पहिले जी उठबैं। तब हमरे जेमन जिंदा आउर बचल रहब उमन केर संगे आकाश में प्रभु से मिलेक लगिन बदरी उपरे उठाय लेवल जाब, आउर इ नियर हमरे सोउब दिन लगिन प्रभु केर संगे रहब। इ गोइठमन से एक दोसर के उसकाते रहा। मगर हे भाईमन, इकर दरकार नखे कि यीशु केर दोबारा घूइर आवेक समय केर बारे में तोहरेमन के कोनों लिखल जाओक। काले कि तोहरेमन खुद ठीक जानाला कि जइसन चोर राइत के अचका आवेला, तइसनेहें प्रभु यीशु हों अचका आवेक वाला अहे। जब आदमीमन कहबैं कि सोउब कुछ ठीक अहे, आउर कोनों डार नखे, तो उ मनक उपरे अचका बिनाश आवी आउर उमन उ बड़का दुःख से नी बाचबैं। जे लेखे गर्भवती जनाना उपरे जनम देवेक केर दुःख अचका शुरु होवेला। मगर हे भाईमन, तोहरेमन पापमन में जिंदगी नी जियाथा कि जब प्रभु यीशु दोबारा घूइर आवी, तो उ दिन तोहरेमन उपरे चोर नियर आय जाई कि तोहरे तेयार नी रहबा। काले कि तोहरेमन सोउब दीया केर आउर दिन केर संतान हेका जे इंजोत हेके, हमरे ना राइत केर आउर ना अंधार केर संतान हेकी। इ लगिन हमरे के दोसरमन नियर निंदाते नी रहेक चाही मगर जागते आउर सावधान रहेक चाही। काले कि जेमन निंदायना उमन राइत हें के निंदायना, आउर जेमन मतवारी करैना उमन राइत हें के मतवारी करैना। मगर हमरे जे दिन केर हेकी, बिसवास आउर प्रेम केर झिलम पिंध लेवब, जे हमरे के ओइसनेहें बचायला जइसन झिलम एगो फौजी के दुश्मन केर हमला से बचायला, आउर इ आसरा देवेला कि हमरे सोउब दिन केर दंड से बाइच जाय ही, एहो उ टोपी नियर अहे जे बचायला। परमेश्‍वर हमरे के इ लगिन नी चुइन हे कि अपन खीस में हमरे के दंड देवी, मगर हमरे अपन प्रभु यीशु मसीह बटले छुटकारा पावेक लगिन चुनल जाय ही। प्रभु यीशु मसीह हमर लगिन इ खातिर मोरलक कि हमरे चाहे जिंदा रहब, चाहे मोइर जाब, जखन उ घूइर आवी हमरे सोउब दिन लगिन उकर संगे रहेक पारब। इ लगिन एक दोसर के दिलासा देवा, आउर परमेश्‍वर उपरे आउर बगरा बिसवास करेक लगिन एक दोसर केर मदइत करा जइसन कि तोहरे कारबो कराला। आउर हे भाईमन, हमरे तोहर से बिनती करिला कि जेमन तोहर में मेहनइत करैना, आउर प्रभु में तोहर अगुवा हेकैं, आउर तोहरेमन के शिक्षा देवैना, उमन केर इज्जत करा। आउर जे कोनों उमन तोहर लगिन करैना, उकर चलते उमन केर ढेइर आदर करा आउर उमन के ढेइर प्रेम करा आउर आपस में मेल जोल से रहा। आउर हे भाईमन, हमरे तोहरेमन से अरजी करिला कि जेमन आलसी अहैं उमन के चेतावनी देवा, आउर उमन के उसकावा जेमन डरपोक अहैं, कमजोरमन केर सहायता करा, आउर सोउब कर लगिन सहेक वाला बना। इ धेयान रहोक कि केकरो से बुराई केर बदला बुराई ना करा, मगर सोउब बेरा भलाई करेक ले तेयार रहा, आपस में आउर सोउब से हों भलाई केर हें कोशिश करा। सोउब बेरा खुशी से रहा। सोउब बेरा प्रार्थना करेक में लगल रहा। हरेक स्थिति में परमेश्‍वर के धन्यबाद देवा काले कि तोहर लगिन मसीह यीशु में परमेश्‍वर केर एहे इच्छा अहे। पवितर आत्मा केर काम के ना रोका। परमेश्‍वर बटले आदमीमन के बताल भविष्यवाणीमन के ना ठुकरावा। सोउब गोइठमन के परखा कि उ परमेश्‍वर बटले हेके कि निहीं, बेस संदेशमन के ग्रहण करा आउर उके पालन करा। सोउब रकम केर बुराई से बचल रहा। परमेश्‍वर जे शांति देवेला खुद हें तोहरे के सोउब रकम से पवितर करोक, आउर तोहर आत्मा, प्राण आउर काया के हमर प्रभु यीशु मसीह केर दोबारा घूइर आवेक तक पूरा-पूरा निरदोष आउर जोगाय के रखोक। इ लगिन कि उ तोहरे के पवितर बनेक ले बोलायला, तो उ तोहरे के पवितर बनेक लायक हों बनाई। हे भाईमन, हमर लगिन प्रार्थना करा। सोउब बिसवासी भाईमन के प्रेम से जोहार करा। मोंय तोहरेमन के प्रभु केर आगया देवोना कि इ चिट्ठी सोउब भाईमन के पइढ़ के सुनाल जाओक। हमर प्रभु यीशु मसीह केर किरपा तोहर उपरे होते रहोक। इ चिट्ठी मोंय पौलुस, सीलास आउर तीमुथियुस बटले हेके। जेके थिस्सलुनीके शहर केर कलीसिया केर बिसवासीमन लगिन लिखल जाय हे, जेमन हमर आबा परमेश्‍वर आउर प्रभु यीशु मसीह में जुड़ल अहैं। हमरे प्रार्थना करिला कि हमर आबा परमेश्‍वर आउर प्रभु यीशु मसीह तोहरे के किरपा आउर शांति देवोक। हे भाईमन, तोहर बारे में हमरे के लगातार परमेश्‍वर के धन्यबाद देवेक चाही, एइसन करेक हमरे लगिन उचित अहे, इ लगिन कि तोहरे प्रभु यीशु मसीह में ढेइर बिसवास कराला, आउर एक दोसर केर लगिन तोहर प्रेम ढेइर बगरा बढ़ते जाथे। इ लगिन हमरे परमेश्‍वर केर कलीसिया केर बिसवासीमन में तोहर बारे में घमंड करिला, हलांकि तोहरेमन कष्टमन आउर सतावमन से होई के गुजराथा, फिन भी तोहरे धीरज से सहते रहाला आउर यीशु मसीह में बिसवास कराला। तोहरे दुःख उठाथा आउर एहे तोहरे के परमेश्‍वर केर राइज में ढूकेक केर लायक बनाथे। इ उ गोइठ केर सबूत हेके कि परमेश्‍वर धारमिकता से न्याय करी। काले कि परमेश्‍वर हमेशा धारमिकता से न्याय करेला, आउर उ उसन आदमीमन के दुःख देवी जेमन तोहरे के दुःख पोंहचाय हैं। आउर तोहरेमन जे दुःख पावाला, परमेश्‍वर तोहरे के चैन देवी आउर हमरे के हों देवी, इ सोउब तब होवी जब प्रभु यीशु अपन स्वरगदूतमन केर संगे, धधकते आइग केर माझे स्वरग से दिस्तार होवी। आउर जेमन परमेश्‍वर के नी चिन्हैना, आउर हमर प्रभु यीशु केर बारे में शुभ समाचार के नी मानैना उमन के दंड देवी। उमन जुग-जुग लगिन प्रभु से अलग होई जबैं आउर उकर तेज चमक केर शक्ति में भागीदार नी होबैं। प्रभु यीशु उमन के जुग-जुग लगिन बिनाश केर दंड देवी। इ गोइठ उ दिन होवी जब यीशु अपन आदमीमन केर बटले महिमा पावेक आउर सोउब बिसवास करइयामन बटले आदर पावेक लगिन घूइर आवी, उ बेरा तोहरे हों उमन में शामिल रहबा काले कि तोहरेमन हमर गवाही में बिसवास करला। इ लगिन हमरे लगातार तोहरे ले प्रार्थना हों करिला, ताकि परमेश्‍वर तोहरेमन के उके करेक केर लाएक बनाओक, जेके करेक लगिन उ तोहरे के बोलाय हे, आउर उ अपन शक्ति से तोहर हर भला इच्छा के पूरा करोक आउर हर उ काम के सफल करोक, जे तोहरे केर बिसवास केर बदली में अहे। हमरे परमेश्‍वर केर किरपा केर चलते इ प्रार्थना करिला कि आदमीमन तोहरे केर चलते हमर प्रभु यीशु मसीह केर नाँव केर महिमा करोक आउर तोहरे हों आदर पाबा काले कि तोहरेमन उकर में जुड़ल अहा। हे भाईमन, हमरे के अपन प्रभु यीशु मसीह केर घूइर आवेक आउर उ बेरा केर बारे में तोहर से कोनों कहेक अहे, जब हमरे एक संग उकर से मिलब। तोहरेमन अचका कोनों भविष्यवाणी या उपदेस सुइन के या कोनों चिट्ठी पइढ़ के, जेमन के हमरे बटले लिखल जाय हे समझल जायला, अपन बिवेक के हेराय ना देबा, जेमन में बताल जाय हे कि प्रभु केर दिन आय चुइक हे, तोहरे अपन मन में ना घबरावा। प्रभु केर आवेक केर बारे में इ सोउब गलत गोइठमन में बिसवास ना करा, जेकर बारे में आदमीमन तोहरेमन के बताथैं। काले कि प्रभु यीशु केर घूइर आवेक से पहिले एइसन समय आवी कि ढेइर आदमीमन परमेश्‍वर केर बिरोध में हुड़दंग मचाबैं, आउर अधरमी आदमी मतलब बिनाश केर बेटा हों दिस्तार होवी। जे परमेश्‍वर केर बिरोध करी आउर आउरो सोउब चीजमन केर हों बिरोध करी, जेकर आदमीमन भक्ति करैना, आउर उ अपने आप के सोउब से ऊँचा उठाई, हिंयाँ तक कि उ परमेश्‍वर केर मंदिर में बाइठ के खुद के ईश्‍वर बताई। इ गोइठमन के तोहरे के जरूर हें याइद होवी कि मोंय तोहर संगे रहों, तो तोहरे के अक्सर बतात रहों। आउर तोहरे जानाला कि कोन चीज उके रोइक के राइख हे, काले कि उ ओहे बेरा दिस्तार होवी जखन उकर समय आवी। अधरम केर भेद तो एखन हों काम करते जाथे, मगर एखन एगो रोकेक वाला अहे, आउर जब तक उ दूर नी होई जाई, उ रोकल रही। इकर पाछे उ अधरमी मरद दिस्तार होवी, मगर पाछे से जब प्रभु यीशु आवी, तो अपन मुँह केर फूक से उके माइर मोराई, आउर अपन आवेक केर तेज चमक से भसम करी। उ अधरमी मरद ठिना शैतान केर शक्ति होवी, उ सोउब रकम केर झूठा चमत्कार, चिन्हा आउर अदभुत काम करी जेकर से आदमीमन सोचेक लगबैं कि इ काम परमेश्‍वर कराथे। उ सोउब रकम केर बुराई काम करी आउर उमन के धोखा देवी, जेमन परमेश्‍वर बटले नाश करल जबैं। उमन सच्चाई उपरे बिसवास करेक से इनकार करैना जे उमन के बचाएक पारेला। आउर इकरे चलते परमेश्‍वर उमन केर माझे एगो एइसन भटकाय देवेक वाला शक्ति के भेजी कि उमन झूठ उपरे हें बिसवास करबैं। आउर परमेश्‍वर उ सोउब आदमीमन के दोषी ठहराई, जेमन सच्चा संदेश उपरे बिसवास नी करैना, मगर अधरम से प्रेम करैना। हे प्रभु केर दुलारा भाईमन, इ उचित अहे कि हमरे लगातार तोहर लगिन परमेश्‍वर के धन्यबाद देवब। काले कि उ दुनिया केर सिरजन से पहिले तोहरे के चुइन लेई हे ताकि तोहरे के बचाएक पारोक। उ पवितर आत्मा केर काममन से जे तोहरे के शुद्ध करेला, आउर यीशु मसीह केर बारे में सच्चा संदेश उपरे तोहर बिसवास करेक केर चलते तोहरे के बचायला। जेकर लगिन परमेश्‍वर हमर बताल शुभ समाचार केर द्वारा तोहरे के बचाएक लगिन बोलालक, ताकि तोहरेमन हमर प्रभु यीशु मसीह केर महिमा में भागीदार होवेक पारबा। से लगिन हे भाईमन, स्थिर रहा, आउर जे-जे गोइठमन केर शिक्षा हमरे तोहरेमन के आमने-सामने, चाहे चिट्ठी से देई ही उकर में बिसवास करते रहा। हमरे हमर प्रभु यीशु मसीह से आउर हमर आबा परमेश्‍वर से प्रार्थना करिला, जे हमरे से प्रेम करेला, आउर अपन किरपा से जुग-जुग केर शांति आउर सोउब से बेस आसरा देई हे। उ तोहरे केर मन में साहस देवोक आउर जे बेस काम हेके उके लगातार करते रहेक लगिन तोहरेमन के बचन में मजबूत करोक। हे भाईमन, आखरी गोइठ इ हेके कि हमर लगिन प्रार्थना करते रहा ताकि हमरे जल्दी हें सोउब ठाँव में प्रभु यीशु मसीह केर संदेश के फैलाएक पारब, आउर आदमीमन इकर उपरे ओइसनेहें बिसवास करोक जइसन तोहरे काइर रहा। एहो प्रार्थना करा कि परमेश्‍वर हमरे के दुष्ट आउर बुरा आदमीमन केर नोकसान से बचाओक, काले कि ढेइर आदमीमन प्रभु यीशु केर बारे में संदेश के सुनैना मगर उकर में बिसवास नी करैना। मगर प्रभु बिसवास करेक केर लायक अहे, उ तोहरेमन के बिसवास में पोक्ता करी आउर दुष्ट शैतान से बचाय के रखी। आउर हमरे के प्रभु में तोहर उपरे भरसा अहे कि तोहरे के जे कोनों करेक लगिन हमरे आगया देवीला, उमन के तोहरेमन मानाला, आउर मानते हों रहबा। हमरे प्रार्थना करिला, प्रभु यीशु तोहरे के समझेक लायक बनाओक कि परमेश्‍वर तोहरे के कतइ प्रेम करेला, आउर सताव केर बेरा ओइसनेहें सहबा जइसन यीशु मसीह सहलक। हे भाईमन, हमरे अपन प्रभु यीशु मसीह केर उ अधिकार से जेके हमरे के देई हे तोहरेमन के आगया देवीला, एइसन केऊवे बिसवासी भाई-बहिन से जुदा रहा जेमन आलसी अहैं, आउर उ आगयामन के नी मानैना जेमन के हमरे तोहरेमन के सिखाय ही। काले कि तोहरेमन खुद हें बढ़ियाँ से जानाला कि तोहरे के ओहे नियर जिंदगी जियेक चाही जे नियर हमरे जियिला, काले कि हमरे तोहरे केर संगे रइह के काम करेक में आलसी नी करली। हमरे केकरो रोटी मुफत में नी खाली, मगर कष्ट आउर मेहनइत से राइत दिन काम धंधा करत रही, जेकर से हमरे के अपन जरुरतमन के पूरा करेक लगिन केकरो उपरे भरसा करेक नी पड़लक। हमरे कड़ा मेहनइत इ लगिन नी करली कि हमरे के तोहर से अपन खाएक माँगेक केर अधिकार नखे, मगर इ लगिन करली कि हमरे खुद के तोहर माझे एगो नमूना देखाब, ताकि तोहरेमन हमरे जइसन चाइल चलबा। जब हमरे तोहर संगे रही तब तोहरे के आगया देई रही, अगर केऊ कोनों काम करेक नी चाहेला, तो उके कोनों खाएक ले ना देवल जाओक। हमरे सुनिला कि तोहर में से थोरेक आदमीमन आलसी अहैं, आउर कोनों काम नी करैना, मगर दोसरमन केर काम के बिगड़ायना। एइसनमन के हमरे उ अधिकार से जेके प्रभु यीशु मसीह हमरे के देई हे आगया देवीला आउर समझाइला कि चुपचाप काम काइर के अपनेहें कमाई केर रोटी खावा। आउर तोहरे हे भाईमन, भलाई करेक में हिम्मत ना हारा। अगर केऊ हमर इ चिट्ठी केर संदेश के नी मानी, तो पता लगावा कि उ केहर हेके, आउर उकर से जुदाय रहा, ताकि उके लाज लगोक। फिन भी उकर संगे दुश्मनमन नियर ब्यवहार ना करा, मगर अपन भाई-बहिन समइझ के चेतावनी देवा। मोंय प्रार्थना करोना कि प्रभु, जे शांति केर सोता हेके सोउब नियर से तोहरे के लगातार शांति देते रहोक आउर तोहरे सोउबमन केर संग सोउब बेरा रहोक। मोंय पौलुस अपन हाँथ से जोहार लिखोना, मोंय अपन सोउब चिट्ठीमन केर आखरी में एहे नियर लिखोना ताकि सोउबमन के पता चाइल जाओक कि इ चिट्ठी मोर बटले लिखल जाय हे। मोंय प्रार्थना करोना हमर प्रभु यीशु मसीह केर किरपा तोहरे सोउबमन केर उपरे होते रहोक। इ चिट्ठी मोंय पौलुस बटले हेके। मोंय हमरे केर छुटकारा देवाइया परमेश्‍वर आउर यीशु मसीह जेकर में हमरे आसरा करिला, उकर अधिकार से यीशु मसीह केर एगो चुनल खास चेला हेकों। मोंय इ चिट्ठी, हे तीमुथियुस तोके लिखाथों, तोंय मोर अपन बेटा नियर अहिस, काले कि तोंय हों यीशु मसीह में बिसवास करिसला। मोंय प्रार्थना करोना कि आबा परमेश्‍वर आउर हमर प्रभु यीशु मसीह बटले तोके किरपा, दया आउर शांति मिलते रहोक। तोहरे के इ आगया देवेक केर मोर मकसद इ हेके कि तोहरे एक दोसर के सच्चा मन, शुद्ध बिवेक आउर पूरा बिसवास से प्रेम करा। झूठा सिखाएक वालामन इ सोउब चीजमन के छोइड़ देई हैं, आउर सिरिफ बेकार चीजमन केर बारे में गोठियायना। आउर उमन मूसा केर नियम के सिखाएक वाला तो बनेक चाहैना, मगर जे गोइठमन के उमन सिखायना आउर ढेइर जोर देई के सिखायना, उके उमन खुद हें नी बुझैना। हमरे जानिला कि मूसा केर नियम अच्छा अहे, अगर उके ओहे नियर लागू करल जातक जे नियर उके लागू करेक अहे। इ जाइन के कि मूसा केर नियम धरमी आदमीमन लगिन निहीं मगर अधरमीमन आउर अत्याचारीमन, भक्तिहीनमन आउर पापीमन, अपवितरमन आउर अशुद्ध आदमीमन, आयो-आबा के मोराएक वालामन आउर हत्यारामन, ब्यभिचारीमन, मरद-मरद केर संग ब्यभिचार करइयामन, आदमीमन के चोराय के गुलाम केर रूप में बेचाइयामन, झूठ बोलेक वालामन, आउर सच बोलेक केर किरिया खाय के हों झूठ बोलेक वालामन लगिन, आउर इकर अलावा, सही शिक्षा जे काम के करेक ले सिखायला, उके करेक से मना करेक वालामन लगिन हों ठहराल जाय हे। इ शिक्षा उ शुभ समाचार केर उपरे टिकल अहे, जे उ महिमा केर बारे में बतायला, जे धाइन परमेश्‍वर से जुड़ल अहे, जेके सुनाएक लगिन मोके जिम्मा देवल जाय हे। मोंय अपन प्रभु यीशु मसीह के जे मोके शक्ति देई हे, धन्यबाद देवोना कि उ मोखे बिसवास लाएक समइझ के अपन सेवा करेक लगिन ठहरालक। मोंय तो बिसवासी बनेक से पहिले मसीह केर बारे में निंदा करेक वाला, आउर बिसवासीमन के सताएक वाला, आउर उमन केर नोकसान करेक वाला रहों, फिन भी परमेश्‍वर केर दया मोर उपरे होलक, काले कि इ काम मोंय अनजाने में करत रहों आउर यीशु मसीह उपरे बिसवास नी करत रहों। मगर हमर प्रभु केर किरपा, बिसवास आउर प्रेम केर संगे भरपूरी से मोर उपरे होलक, काले कि मोंय मसीह यीशु केर संगे एकजूट अहों। इ गोइठ सच आउर सोउब रकम से मानेक केर लाएक अहे कि मसीह यीशु हमरे पापीमन के बचाएक लगिन दुनिया में आलक, जेमन में से सोउब से बगरा पापी मोंय हेकों। मगर यीशु मसीह मोर उपरे दया करलक आउर मोर सोउब से बगरा पापमन के क्षमा काइर के, इ देखाएक चाहेला कि उ केतना सहनशील अहे। ताकि उमन लगिन मोंय एगो नमूना बनमूँ, जेमन पाछे से जुग-जुग केर जिंदगी पावेक लगिन उकर उपरे बिसवास करबैं। अब जुग-जुग केर राजा जे सोउब दिन लगिन जिंदा अहे, जेके केऊ नी देइख हैं, जे एके गो सच्चा परमेश्‍वर हेके, उकर आदर आउर महिमा जुग-जुग होते रहोक। आमीन। हे बेटा तीमुथियुस, मोंय तोके उ गोइठमन के याइद करेक ले कहाथों, जे पहिले भविष्यवाणीमन में तोर बारे में कहल जाय रहे, मोंय तोके इ आगया सोपाथों कि तोंय उमन केर मोताबिक झूठा सिखाएक वालामन केर बिरोध में लड़ाई के लड़ते रह। आउर तोके मसीह उपरे बिसवास में बनल रहेक चाही आउर तोर में एगो शुद्ध बिवेक होवेक चाही। थोरेक आदमीमन उ शुद्ध बिवेक के छोइड़ देलैं जेकर नतीजा इ होलक कि अब उमन बिसवास में नखैं। ओहेमन में से हुमिनयुस आउर सिकंदर हेकैं, जेमन के मोंय कलीसिया से बाहरे निकलाय देलों आउर शैतान के सोंइप देलों कि उमन परमेश्‍वर केर निंदा करेक ना सिखाओक। अब मोंय सोउब से बाइढ़ के इ अरजी करोना कि बिनती, आउर प्रार्थना, आउर अरजी, आउर धन्यबाद, सोउब आदमीमन केर लगिन करल जाओक। राजामन लगिन आउर उ सोउब आदमीमन केर लगिन प्रार्थना करा जेमन सरकारी अधिकारी हेकैं, ताकि उमन हमरे के शांति आउर चैन से रहेक में सहायता करोक, आउर हमरे परमेश्‍वर केर आराधना करेक पारब आउर दोसरमन से उचित ब्यवहार करब। एइसन प्रार्थना करेक ठीक अहे आउर हमर छुटकारा देवाइया परमेश्‍वर इके ग्रहण करेला। उ चाहेला कि सोउब आदमीमन बाइच जाओक आउर सच्चाई के बढ़ियाँ से जाइन जाओक। काले कि सिरिफ एके गो परमेश्‍वर अहे, आउर परमेश्‍वर आउर आदमीमन केर माझे हों एके गो आदमी अहे, मतलब यीशु मसीह, जे आदमीमन के परमेश्‍वर से मिलाएक पारेला। जे सोउब आदमीमन के छुटकारा देवेक केर दाम केर रूप में खुद के बलिदान काइर देलक। उकर बलिदान केर द्वारा परमेश्‍वर ठीक समय में गवाही देलक, ताकि जेमन बचेक चाहैना उ सोउबमन बाइच जाओक। मोंय सच कहाथों, झूठ नी कहाथों, परमेश्‍वर मोके शुभ समाचार केर परचारक, आउर अपन खास चेला बनेक लगिन चुइन हे। उ मोके परजाइत आदमीमन के बिसवास आउर सच्चाई केर बारे में सिखाएक लगिन हों चुइन हे। मोंय चाहोना कि सोउब जगा सभामन में मरदानामन परमेश्‍वर लगिन अपन दुइयो हाँथ के उठाय के बेगर खीस आउर बेगर बक-झक केर प्रार्थना करोक। ओहे नियर मोंय चाहोना कि बिसवासी जनानामन के हों, उचित तरीका से लुगा पिंधेक चाही, जे कि सभ्य आउर स्वीकार लायक होवोक, आउर बाल के एइसन गूँथोक कि जेके देखेक ले दोसरमन आकर्षित ना होवोक, आउर ना ही दोसरमन के देखाएक लगिन सोना आउर मोतीमन आउर ना महंगा लुगा पिंधोक। मगर उमन के दोसरमन लगिन भला काम काइर के खुद के सुन्दर बनाएक चाही, काले कि परमेश्‍वर केर नजइर में भक्ति करेक वाला जनानामन के एहे उचित अहे। जब केऊ, बिसवासीमन के सिखात रहबैं, तब सोउब जनानामन के चुपचाप आउर अधीन रइह के सुनेक आउर सिखेक चाही। मोंय कहोना, जनानामन पुरूष उपरे अधिकार ना चलाओक आउर ना उपदेस देवोक मगर चुपचाप रहोक। मोंय एइसन इ लगिन कहाथों काले कि परमेश्‍वर आदम के पहिले बनालक, उकर पाछे हव्वा के बनालक। आउर आदम शैतान से बहकाल नी गेलक, मगर जनाना हव्वा के शैतान बहकालक आउर उ पापी होलक। फिन भी छउवा जनम देवेक केर चलते जनानामन बाइच जाबैं, अगर उमन यीशु मसीह में बिसवास रखबैं, दोसरमन से प्रेम करबैं आउर शुद्ध आउर संयम सहित जिंदगी बिताबैं, तो परमेश्‍वर उमन के बचाय लेवी। आउर इ गोइठ सच हेके कि जे अगुवा बनेक चाहेला, उ भला काम केर इच्छा रखेला। से लगिन अगुवा के निरदोष, आउर सिरिफ एके गो जनाना केर पति, संयम से रहेक वाला, आउर जे कोनों उ करेला उकर में खुद कब्जा करेक वाला, सभ्य, अपन घर में गोतियामन केर खातिरदारी करेक वाला, आउर सिखाएक में होशियार होवेक चाही। उ पियंक्कड़ आउर मार पीट करेक वाला आउर लड़ाई झगरा करेक वाला आउर धन केर लोभ करेक वाला नी होवेक चाही, मगर नरम स्वभाव वाला होवेक चाही। उके अपन परिवार केर लगिन अच्छा इंतिजाम करेक वाला, आउर अपन छउवा पुतामन के सिखाएक वाला होवेक चाही, ताकि उमन सोउब गोइठ में आदर केर साथ उकर आगया मानोक। जब केऊ आदमी अपनेहें परिवार केर लगिन अच्छा इंतिजाम करेक नी पारी, तो उ परमेश्‍वर केर कलीसिया केर देखभाल कइसन करी? फिन उ आदमी नवाँ बिसवासी नी होवेक चाही, कहीं एइसन ना होवोक कि उ घमंडी बाइन जाई, आउर परमेश्‍वर उके ओहे नियर दंड देवी जइसन शैतान के घमंडी होवेक केर चलते दंड देलक। आउर उकर बारे में कलीसिया से बाहरे केर आदमीमन के हों कहेक चाही कि उ ठीक आदमी हेके, ताकि उकर बदनामी ना होवोक आउर उ शैतान केर जाल में ना फँसोक। कलीसिया केर सेवकमन के हों एइसन आदमी होवेक चाही, जेकर आदमीमन आदर करैना, उके ईमानदार होवेक चाही, उके पियंक्कड़ आउर अपन फायदा केर लगिन कोनोवें काम करेक वाला नी होवेक चाही। मगर उके शुद्ध बिवेक से इ बिसवास करेक चाही कि परमेश्‍वर उके जे शिक्षामन के देई हे उ सच हेके। जब कलीसिया में सेवकमन के चुनल जायला, तब पहिले उमन के परखेक चाही, अगर उमन में कोनों दोष नखे, तब सेवक केर काम करेक लगिन चुनल जाएक चाही। एहे नियर कलीसिया में सेवकमन केर जनानामन के हों, आदर केर लायक होवेक चाही, दोसरमन केर निंदा करेक वाला नी होवेक चाही, उके शांत आउर सोउब गोइठमन में बिसवास लायक होवेक चाही। सेवक के एके गो जनाना केर पति होवेक चाही, आउर अपन छउवा पुतामन के ठीक से सिखाएक वाला आउर अपन घर केर अच्छा इंतिजाम करेक वाला हों होवेक चाही। काले कि जे सेवक केर काम अच्छा से करेक पारैना, उमन अपन लगिन दोसरमन से अच्छा आदर पावैना। आउर उमन यीशु मसीह उपरे अपन बिसवास केर बारे में साहस केर साथ बोलेक पारैना। मोंय तोर ठिना जल्दी आवेक केर आसरा करते हुए हों इ गोइठमन के तोके इ लगिन लिखाथों कि अगर मोर आवेक में देरी होवी, तो तोंय जाइन ले कि परमेश्‍वर केर परिवार केर दोसर सदस्यमन केर संगे कइसन ब्यवहार करेक चाही। इ परिवार उ सोउबमन से मिल के बाइन हे जेमन यीशु मसीह उपरे बिसवास करैना, आउर जेके कलीसिया कहैना। इ बिसवासीमन सच्चा शिक्षामन के स्थिर रखेक में मदइत करैना, जइसन नेव आउर पाया मिल के घर के मजबूत रखेक में मदइत करेला। आउर इकर में शंका नखे कि परमेश्‍वर जे शिक्षामन के खोइल देई हे, उ पूरा पुरी सच्चा अहे। मतलब, उ जे आदमी केर रूप में दिस्तार होलक, आउर उके पवितर आत्मा बटले परमेश्‍वर केर बेटा केर रूप में साबित करल गेलक, स्वरगदूतमन उके देखलैं, चेलामन दुनिया केर सोउब देस में उकर बारे में आदमीमन के खुश खबरी सुनालैं, दुनिया भइर केर आदमीमन उकर उपरे बिसवास करलैं, आउर परमेश्‍वर उके उपरे स्वरग में उठाय लेलक। मगर पवितर आत्मा खुइल के बतायला कि आखरी दिनमन में थोरेक आदमीमन यीशु मसीह केर सच्चा शिक्षामन उपरे बिसवास करेक छोइड़ देबैं, उमन अशुद्ध आत्मामन केर शिक्षामन के मानबैं, जे उमन के भटकायला आउर उमन उ झूठा शिक्षामन उपरे बिसवास करबैं जे दुष्ट आत्मामन बटले आवेला। कपट से भरल आउर झूठा ओहेमन हेकैं जेमन झूठा शिक्षामन के सिखायना, उमन केर बिवेक जे सही गलत के नी बतायला, मोइर जाय हे, जइसन कि एगो गरम लोहा उके दाइग देई हे। उमन बिहा करेक से आउर खाएक केर थोरेक चीजमन के खाएक से मना करबैं, मगर परमेश्‍वर सोउब खाएक केर चीजमन के बिसवासीमन लगिन बनाय हे, जेके धन्यबाद केर प्रार्थना काइर के खाएक पारैना। काले कि परमेश्‍वर केर सिरजाल हरेक चीजमन बेस हेके, हमरे कोनोवें खाएक केर चीजमन के परमेश्‍वर के धन्यबाद देई के खाएक पारिला। सोउब चीजमन परमेश्‍वर केर बचन आउर प्रार्थना केर द्वारा शुद्ध होई जायला। अगर तोंय सोउब बिसवासी भाईमन के लगातार इ गोइठमन के याइद करवाते रहबे, जेकर पालन काइर के तोंय बिसवास में मजबूत होई हिस, तो तोंय मसीह केर एगो अच्छा सेवक बनबे। अशुद्ध आउर झूठा कहानीमन में अपन समय के ना गवाँव, मगर परमेश्‍वर के आदर देवेक वाला जिंदगी जी के, खुद के लगातार सिखाते रह। काले कि काया केर साधना से थोरके फायदा होवेला, मगर परमेश्‍वर केर भक्ति से सोउब गोइठमन लगिन फायदा होवेला, काले कि इकर से एखन इ जिंदगी में आउर पाछे आवेक वाला जिंदगी में हों इनाम केर करार करल जाय हे। आउर इ गोइठ सच आउर सोउब रकम से मानेक केर लाएक अहे। से लगिन हमरे इ जिंदगी के पावेक लगिन कठिन मेहनइत करिला, काले कि हमरे जिंदा परमेश्‍वर उपरे आसरा करिला जे सोउब आदमीमन केर छुटकारा देवाइया हेके, खास काइर के उमन के जेमन उकर उपरे बिसवास करैना। बिसवासीमन के इ गोइठमन के सिखाव, ताकि उमन इकर पालन करोक। केखो तोर जवानी केर जिंदगी के घिरना करेक केर मोका ना मिलोक, मगर तोंय अपन बोली में, ब्यवहार में, दोसरमन से प्रेम करेक में, यीशु मसीह उपरे बिसवास करेक में, आउर पवितर जिंदगी जियेक में बिसवासीमन लगिन नमूना बाइन जा। जब तक मोंय नी पोहोंचमूँ, तब तक तोंय पवितर किताब के बिसवासीमन लगिन जोर से पढ़ेक में, आउर उपदेस देवेक में आउर सिखाएक आउर समझाएक में लगल रह। उ गोइठ के याइद रख, जब कलीसिया केर अगुवामन तोर उपरे अपन हाँथ राइख रहैं, आउर परमेश्‍वर अपन बरदान के उमन से भविष्यवाणी करवाय के तोके देई रहे। उ बरदान के सावधानी से इस्तेमाल कर आउर उकरे में धेयान लगाय रह, ताकि तोंय अपन बिसवास में बढ़ाथिस इके सोउब आदमीमन देखेक पारोक। इकर बारे में सावधान रह कि तोंय कइसन रहिसला आउर का सिखाइसला, काले कि अगर एइसन करते रहबे, तो तोंय अपन आउर अपन सुनइयामन लगिन हों बचेक केर कारण होबे। केऊ बूढ़ा आदमी के बेइज्जत करेक नियर ना गरियाव, मगर उके अपन आबा नियर समइझ के सलहा दे, आउर जेमन तोर से छोट अहैं उमन के भाई समइझ के सलहा दे। बुढ़िया जनानामन के अपन आयो समइझ के, आउर जवान जनानामन के जेमन तोर से छोट अहैं शुद्ध मन से बहिन समइझ के सलहा दे। उ बिधवामन केर आदर कर जेमन ठिना उमन केर अपन जरुरतमन के पूरा करेक लगिन, आउर उमन केर देख रेख करेक लगिन केऊ नखैं। आउर अगर केऊ बिधवा केर छउवा-पुतामन चाहे नाती-पुतीमन अहैं, तो पहिले उके अपने हे परिवार केर लगिन काम करेक चाही, जइसन एगो बिसवासी के करेक उचित अहे, आउर अपन आयो-आबामन केर देख-रेख करेक चाही, इ सोउब परमेश्‍वर के सुहायला। जे बिधवामन केर सचमुच में केऊ देख रेख करेक वाला नखैं उमन परमेश्‍वर हें उपरे आसरा रखैना, आउर राइत-दिन प्रार्थना बिनती काइर के, परमेश्‍वर से हें अपन ले मदइत माँगैना। मगर उ बिधवामन जेमन अपन पूरा समय भोग बिलास में बिताय देवैना, उमन जिंदा रहते हों एगो मोरल आदमी नियर अहैं। बिसवासीमन के इ गोइठमन केर हों आगया देते रह, ताकि केऊ उमन उपरे कोनों दोष ना लगाओक। अगर केऊ अपन रिश्तेदारमन केर मदइत नी करी आउर खास काइर के अपन परिवार केर जरुरत के पूरा नी करी, तो उ बिसवास से भटइक जाय हे, आउर अबिसवासी से हों बुरा बाइन जाय हे। ओहे बिधवा केर नाँव लिखल जाओक, जेकर उमर साठ बरिस से उपरे होई हे, आउर एक हें पति केर जनाना रइह हे। आउर उकर नाँव भला काम करेक वाला केर रूप में जानल जायला, जे छउवा पुतामन केर ठीक से पालन-पोषण काइर हे, गोतियामन केर सेवा काइर हे, आउर परेशानी में पड़ल आदमी मनक मदइत काइर हे, आउर सोउब रकम केर भला काम के करेक में मन लगाएक वाला हेके। उ बिधवामन केर नाँव ना लिखबे, जेमन केर उमर साठ बरिस से कम अहे, काले कि जब मसीह केर बिरोध में उमन केर काया केर इच्छा बाइढ़ जायला तो उमन बिहा करेक चाहैना। आउर अपन बिहा नी करेक केर पहिला करार के तोइर के दोषीदार बाइन जायना, आउर बिसवास से भटइक जायना। आउर इकर अलावा उमन घर-घर घुइम के कोढ़िया सीख जायना, आउर कोढ़िया भइर निहीं, मगर बकर-बकर काइर के दोसर मनक चुगली करैना आउर उ मनक काम के बिगड़ायना। उमन एइसन गोइठ के गोठियायना जेके नी गोठियाएक चाही। इ लगिन मोंय सलहा देवेक चाहोना कि जवान बिधवामन बिहा करोक, आउर परिवार बसाय के अपन घर-दुरा के संभराओक, ताकि केऊ दुश्मन के बदनाम करेक केर मोका ना मिलोक। काले कि थोरेक जवान बिधवामन पहिलेहें से परमेश्‍वर केर आगया मानेक छोइड़ देई हैं आउर शैतान केर पिछे चलाथैं। अगर केऊ बिसवासी बहिन केर परिवार में बिधवामन अहैं तो उमन केर देख रेख करेक केर जिम्मा कलीसिया केर बिसवासीमन के नी सोंपेक चाही। तब कलीसिया केर बिसवासीमन उ बिधवामन केर मदइत करबैं, जेमन केर मदइत कराइया केऊ नखैं। जे कलीसिया केर अगुवामन अपन काम के ठीक से करैना, उमन के उचित आदर आउर भरपूर तनखा पावेक केर लायक समझेक चाही, खास काइर के उमन के जेमन परमेश्‍वर केर बचन के परचार करेक आउर सिखाएक में कठिन मेहनइत करैना। काले कि पवितर किताब केर दोसर ठाँव में लिखल अहे, दाँवरी खेदेक वाला गारू केर मुँह के ना बाँधबे, काले कि कमाएक वाला के खाएक केर हों हक अहे। केऊ कलीसिया केर अगुवा उपरे कोनों दोष लगाल जायला तो उके ना सुनबे जब तक कि दूई या तीन झन ओहे दोष के नी लगाबैं। जेमन पाप करैना, तोके उमन के सोउब बिसवासीमन केर सामने डाँटेक चाही, ताकि दोसर बिसवासीमन पाप करेक से डराबैं। परमेश्‍वर आउर यीशु मसीह आउर चुनल स्वरगदूतमन के हाजिर जाइन के मोंय तोके आगया देवोना कि तोंय इ गोइठमन के बढ़ियाँ से मान, आउर कोनों काम के भेद भाव से ना कर। जब तक केऊ अपने आप के मसीह केर बिसवास लायक सेवक साबित नी करी, तब तक तोंय उकर उपरे हाँथ राइख के उके सेवक ना ठहराबे। अगर तोंय एइसन करबे तो उ मनक पापमन केर भागीदार तोंय होबे, से लगिन खुद के पवितर बनाय के रख। अब से सिरिफ पानी भइर के पियेक वाला ना रह, मगर अपन पेट केर ठीक से हजम होवेक लगिन आउर घरी-घरी बेमार होवेक से बचेक लगिन, थोरे-थोरे अंगूर केर रस हों पी। मोंय तोर से कहोना सेवकमन के चुनेक लगिन जल्दी ना करबे, काले कि थोरेक आदमीमन खुलेआम पाप करैना, हिंयाँ तक कि न्याय होवेक से पहिलेहें उमन बिसवासीमन केर सामने दोषी होई जायना। लेकिन थोरेक आदमीमन केर पाप ढेइर समय तक नी जानल जायला। ओइसनेहें थोरेक आदमीमन केर भला काम दोसर बिसवासीमन के खुल्लम खुल्ला दिसेला। आउर अगर उ एक बेर में खुल्लम खुल्ला नी दिसेला फिन भी दिसिये जाई। जेतना धांगरमन गुलामी में अहैं, उमन के सोउब रकम से अपन-अपन मालिक केर आदर करेक चाही, ताकि दोसरमन परमेश्‍वर केर आउर हमर उपदेस केर निंदा ना करोक। आउर जेमन केर मालिकमन बिसवासी हेकैं, उमन के बिसवासी भाई होवेक केर चलते उचित आदर मिलोक, बल्कि उमन केर काम आउर बढ़ियाँ से करेक चाही, काले कि काम करवाएक वाला बिसवासी भाई हेके जे उमन के प्रेम करेला। इ गोइठमन के पालन करेक लगिन समझाते रह। अगर केऊ झूठा शिक्षा देवेला, आउर उ सही शिक्षामन से सहमत नी होवेला जे परमेश्‍वर के आदर देवेला, आउर जेके हमर प्रभु यीशु मसीह देई रहे। तो उ आदमी घमंडी होई गेलक, आउर कोनों नी समझेला। एइसन आदमी बेकार गोइठमन आउर शबदमन केर बारे में बक-झक आउर झगरा करेक केर इच्छा रखेला, जेकर से जलन, झगरा, आउर परमेश्‍वर केर निंदा, आउर उकर सच्चाई केर बारे में शंका होवेला, आउर उमन केर माझे में बेकार झगरा शुरु होवेला, जेमन केर बुद्धि बिगइड़ जाय हे आउर उमन सच्चाई से भटइक जाय हैं, जेमन समझैना कि परमेश्‍वर केर बारे में सिखाएक रुपया कमाएक केर जरिया हेके। मगर हमरे अपन जिंदगी के परमेश्‍वर के खुश करेक नियर जियिला आउर जे कोनों हमरे ठिना अहे उकरे में संतोष करिला। काले कि जब हमरे जनम लेली तब दुनिया में कोनों लाइन के नी आली, आउर ना मोरेक बेरा कोनों लेई के जाएक पारब। अगर हमर ठिना खाएक आउर पिंधेक ले अहे, तो इकरे में संतोष करेक चाही। मगर जेमन धनी होवेक चाहैना उमन सोउब रकम केर पाप करेक लगिन सहजे धोखा खाय जायना, आउर एगो शिकार नियर शिकारी केर फँसरी में फाँइस जायना। उमन एइसन चीजमन के करेक खोजैना जे बेकार आउर नोकसान करेक वाला हेके, जे उमन के बरबाद आउर नाश काइर देवी। धन केर लोभ सोउब रकम केर बुराईमन केर जाइर हेके, थोरेक आदमीमन एहे धन के पावेक केर कोशिश करते धीरे-धीरे मसीह केर शिक्षामन केर उपरे बिसवास करेक छोइड़ देलैं आउर उमन बरने-बरन केर दुःख से पीड़ित अहैं, एगो एइसन आदमी नियर जे खुद के एगो हँथियार से बेइध लेई हे। मगर हे तीमुथियुस, तोंय परमेश्‍वर केर सेवा करेक वाला आदमी हेकिस, तोंय इ सोउब चीजमन के करेक से बचबे आउर धरमी बाइन के, भक्ति, बिसवास, प्रेम, धीरज आउर नरम भाव से आदमीमन केर संगे रह। लड़ाई में एगो बेस पलटन नियर जे हार नी मानेला, तोके हों परमेश्‍वर केर उपरे भरसा करेक आउर उकर आगयामन के मानेक नी छोड़ेक चाही, तोंय उ जुग-जुग केर जिंदगी के मजबूती से धाइर ले जेकर लगिन तोंय बोलाल जाय हिस, आउर तोंय ढेइर गवाहमन केर सामने मजबूती से कइह रहिस कि मसीह केर उपरे भरसा करिसला। मोंय परमेश्‍वर के गवाह बनाय के, जे सोउब के जिंदगी देवेला आउर साथ में मसीह यीशु के हों गवाह बनाय के जे मजबूती से सच कहलक जब उके पुन्तियुस पिलातुस केर सामने मुकद्दमा लगिन लानल गेलक, तोके इ आगया देवोना कि तोंय उ सोउब कुछ के कर जेके पूरा करेक लगिन परमेश्‍वर तोके आगया देई हे, ताकि केऊ हों प्रभु यीशु मसीह केर धरती में घूइर आवेक तक, तोर उपरे कोनों गलत करेक केर दोष ना लगाएक पारोक। परमेश्‍वर जे सोउब से धाइन आउर एकले मालिक आउर राजामन केर राजा, आउर प्रभुमन केर प्रभु हेके, ओहे मसीह के ठीक समय में दिस्तार करी। सिरिफ ओहे एकला अहे जे सोउब दिन लगिन जिंदा अहे, उ एतना चमकदार इंजोत में रहेला कि केऊ हों उकर भीरे पोंहचेक नी पारी, उके ना तो केऊ आदमी देइख हे आउर ना कहियो देखेक पारी। उके आदर मिलोक आउर उकर शक्ति जुग-जुग रहोक। आमीन। इ दुनिया केर धनी आदमीमन के आगया दे कि उमन घमंडी ना बनोक आउर जल्दी सिराएक वाला धन उपरे आसरा ना राइख के परमेश्‍वर उपरे आसरा रखोक, जे हमर सोउब जरुरत केर चीजमन के भरपूर देवेला। उमन के बेस काम करेक लगिन कह, आउर ढेइर बगरा भलाई करेक लगिन, आउर दयालु बनेक लगिन कह, आउर दोसर आदमीमन के जे कोनों बेस चीजमन केर जरुरत अहे, उ चीजमन के देवेक लगिन तेयार रहोक। एइसन काइर के उमन अपन बेस काममन के अपन लगिन एगो खजाना नियर जोड़बैं, जे आवेक वाला दिन में स्वरग में उमन लगिन एगो मजबूत नेव नियर होवी, आउर उमन सच्चा जिंदगी के पाबैं, जे सोउब दिन लगिन होवी। हे तीमुथियुस, पक्का काइर ले कि तोंय ओहे करिसला जेके परमेश्‍वर तोके जिम्मा देई हे, तोंय एइसन गोइठमन आउर शिक्षामन से दूर रह जे परमेश्‍वर केर सच्चा शिक्षा केर बिरोध करेला, जेके उमन गलत तरीका से गेयान कहैना। थोरेक आदमीमन इ झूठा गेयान के माइन के मसीह केर सच्चा शिक्षा केर उपरे बिसवास नी करैना। मोंय प्रार्थना करोना कि परमेश्‍वर केर किरपा तोहरे सोउबमन केर उपरे बनल रहोक। इ चिट्ठी मोंय पौलुस बटले हेके। परमेश्‍वर मोके इ लगिन चुइन हे कि मोंय यीशु मसीह केर खास चेला बनमूँ, ताकि मोंय उ संदेश केर परचार करेक पारमूँ कि परमेश्‍वर जुग-जुग केर जिंदगी देवेक केर करार काइर हे, जे मसीह यीशु उपरे बिसवास करेक से मिलेला। हे तीमुथियुस, मोंय तोर नाँव से इ चिट्ठी के लिखाथों, तोंय मोर लगिन एगो दुलार बेटा नियर अहिस। मोंय प्रार्थना करोना कि आबा परमेश्‍वर आउर हमर प्रभु यीशु मसीह तोर उपरे किरपा आउर दया करते रहोक, आउर शांति देते रहोक। मोंय परमेश्‍वर के धन्यबाद देवोना, जेकर मोंय आउर मोर पुरखामन शुद्ध बिवेक से सेवा काइर ही। जखनोहों मोंय प्रार्थना करोना तो मोंय तोर नाँव केर चरचा करेक हमेशा याइद रखोना। मोके याइद अहे कि तोंय कतइ काइंद रहिस जब हमरे एक दोसर से जुदा होली, मोंय तोर काँदेक के याइद काइर के राइत दिन तोर से भेंट करेक केर इच्छा रखोना कि खुशी से भाइर जामूँ। मोके तोर उ सच्चा बिसवास केर खेयाल आवेला, जे पहिले तोर नानी लोइस, आउर तोर आयो यूनीके में रहे, आउर मोके पूरा भरसा अहे कि उ बिसवास तोर में हों अहे। एहे चलते मोंय तोके याइद दिवावना कि तोंय परमेश्‍वर केर उ बरदान के, जे मोर हाँथ रखेक से तोके मिल हे चमकाय दे। काले कि परमेश्‍वर हमरे के डरपोक नी बनाय हे, बल्कि उकर आत्मा हमरे केर मन के मजबूत बनायला। जेकर से हमरे के दोसरमन से प्रेम करेक लगिन आउर खुद के काबू में रखेक लगिन मदइत मिलेला। इ लगिन दोसरमन के हमर यीशु मसीह केर बारे में बताएक से ना लजाबे, आउर ना हें तोके इ गोइठ से लजाएक चाही कि मोंय उकर सेवा करेक केर चलते जेहेल में अहों। बल्कि तोके उ शक्ति केर इस्तेमाल करेक चाही जे शक्ति के परमेश्‍वर तोके देवेला, आउर शुभ समाचार सुनाएक केर खातिर मोंय जे दुःख सहाथों उकर में तोंय मोर साथ दे। जे हमरे के बचालक आउर पवितर जिंदगी जियेक लगिन बोलालक, उ हमरे के हमर बेस काममन केर चलते निहीं। मगर अपन योजना केर मोताबिक यीशु मसीह के हमर लगिन दुनिया में मोरेक ले भेजेक केर चलते हमर उपरे किरपा करलक। अब हमर छुटकारा देवाइया यीशु मसीह आय जाहे आउर हमरे के अपन किरपा देखाय हे। उ माउत केर शक्ति के नाश काइर देलक, आउर शुभ समाचार केर शक्ति से जुग-जुग केर जिंदगी पावेक लगिन डहर देखालक। इ शुभ समाचार केर लगिन परमेश्‍वर मोके एगो परचार करेक वाला, सिखाएक वाला, आउर एगो खास चेला केर रूप में चुइन हे। इ एहे खातिर होई हे जेकर से मोंय हिंयाँ जेहेल में हों दुःख उठाथों, आउर नी लजावना, काले कि मोंय मसीह के जानोना जेकर उपरे मोंय बिसवास काइर हों, आउर मोके पूरा भरसा अहे कि यीशु मसीह उ दिन तक, जब तक उ घूइर के नी आवी, जे कोनों उ मोके देई हे उकर रखवाली करी। से लगिन उ सच्चा शिक्षा के याइद रख, जेके तोंय मोर से सुइन हिस, आउर इ सोउब तोंय बिसवास आउर प्रेम से काइर के नमूना बान, काले कि तोंय यीशु मसीह केर संगे जुड़ल अहिस। आउर उ सच्चाई केर रखवाली कर जे पवितर आत्मा केर शक्ति से तोके जिम्मा देवल जाय हे, आउर जे हमर में बसल अहे। तोंय जानिसला कि आसिया परदेस में रहेक वाला कायनों बिसवासीमन मोके छोइड़ देलैं, जेमन में फूगिलुस आउर हिरमुगिनेस हेकैं। उनेसिफुरुस केर घराना उपरे प्रभु दया करोक, काले कि उ मोर से भेंट करेक लगिन आलक आउर कायनों बेर मोर मदइत करलक। आउर जेहेल में हों आय के मोर से भेंट करेक से नी लजालक। मगर जब उ रोम देस में आलक, तो मेहनइत से मोके खोजलक आउर मोर से भेंट करलक। न्याय केर दिन प्रभु उनेसिफुरुस केर उपरे अपन महान दया देखाओक। तोंय बढ़ियाँ से जानिसला कि उ इफिसुस शहर में मोर कतइ मदइत काइर हे। इ लगिन हे मोर बेटा तीमुथियुस, तोंय उ किरपा से जे यीशु मसीह में अहे, बलवान होई जा। आउर जे गोइठमन के ढेइर आदमीमन केर सामने यीशु मसीह केर बारे में संदेश के सिखाएक बेरा तोंय मोर से सुइन हिस, उमन के बिसवासी आदमीमन के सोंइप दे, जेमन दोसरमन के हों सिखाएक केर लाएक होबैं। यीशु मसीह केर एगो बेस फौजी नियर मोर संगे दुःख सह। जब एगो फौजी जे फौज में काम करेला, एके समय में दुनिया केर दोसर काममन के नी करेला, काले कि उ अपन अधिकारी के खुश करेक चाहेला। फिन जब केऊ कोनों खेल-कूद में भाग लेवेला, तो उ तब तक इनाम जितेक नी पारी, जब तक कि उ नियम केर मोताबिक नी खेली। जे किसान मेहनइत करेला, फसल केर हिस्सा पहिले उके मिलेक चाही। जे मोंय सिखावना उकर उपरे तोंय धेयान दे, आउर प्रभु तोके सोउब गोइठमन केर बारे में समझेक लगिन मदइत करी। तोंय लगातार यीशु मसीह केर बारे में सोचते रह। जे राजा दाऊद केर बंश हेके, आउर परमेश्‍वर उके मोरलमन में से जियालक, इ ओहे शुभ समाचार हेके जेके मोंय आदमीमन केर माझे परचार करोना। जेकर चलते मोंय एगो पापी नियर जेहेल में दुःख सहाथों, काले कि मोंय शुभ समाचार केर परचार करोना, मगर केऊ आदमी परमेश्‍वर केर बचन के परचार करेक से रोकेक नी पारी। जेमन के परमेश्‍वर चुइन हे, मोंय उमन केर फायदा लगिन सोउब रकम केर दुःख सहोना। ताकि उमन हों यीशु मसीह उपरे बिसवास करोक आउर छुटकारा पाओक, आउर उ महिमा के पाओक जे जुग-जुग लगिन अहे। इ गोइठ सच हेके कि अगर हमरे उकर संगे मोइर जाय ही, तो उकर संगे जियब हों। अगर हमरे धीरज से उकर लगिन दुःख सहते रहब, तो उकर संगे राजा नियर राइज हों करब, मगर हमरे उके जानेक से इंकार काइर देवब, तो उ हों हमरे के कइह देवी कि मोंय तोहरे के नी जानोना। अगर हमरे मसीह केर लगिन बिसवास लायक हों नखी, फिन भी उ हमरे केर लगिन बिसवास लाएक बनल रहेला, काले कि उ खुद अपन बिरोधी नी होवी। इ गोइठमन केर बारे में बिसवासीमन के घरी-घरी सिखाव, जेके मोंय तोके सिखाय हों। आउर परमेश्‍वर के एगो गवाह नियर माइन के उमन के चेताय दे कि उमन शबदमन केर अर्थमन उपरे बक-झक ना करोक। जेकर से कोनों फायदा नी होवेला, बल्कि सूनाइयामन बिगइड़ जायना। कड़ा मेहनइत कर ताकि तोंय खुद के परमेश्‍वर केर सामने एइसन आदमी नियर देखाएक पारबे, जेके उ ग्रहण करेला। तोंय एगो एइसन काम करेक वाला बाइन जा, जे बढ़ियाँ से काम करेला। ताकि तोके अपन काम केर चलते लजाएक नी पड़ी, आउर तोंय सच्चा संदेश के ठीक रीति से सिखाते रहबे। मगर बेकार गोइठमन के ना सुन, जेकर से परमेश्‍वर के कोनों आदर नी मिलेला। बल्कि एइसन गोइठमन आदमीमन के परमेश्‍वर से आउर बगरा दूर लेई जायला। एइसन गोइठमन के बताएक वालामन केर गोइठ फाइल जायला, आउर जेमन उमन केर गोइठमन के सुनैना उमन केर बिसवास नाश होई जायला। हुमिनयुस आउर फिलेतुस ओहेमन में से हेकैं। उमन सच्चाई केर उपरे बिसवास करेक छोइड़ देलैं। उमन कहैना, परमेश्‍वर पहिलेहें से मोरल बिसवासीमन के जुग-जुग केर जिंदगी देवेक लगिन उठाय लेई हे। इकर नतीजा इ होलक कि उमन थोरेक बिसवासीमन के मसीह केर शिक्षा उपरे बिसवास करेक से रोइक देलैं। फिन भी परमेश्‍वर केर आदमीमन एगो नेव नियर अहैं, जे नी हिलेला। उ नेव उपरे इ लिखल रहेला, “प्रभु जानेला कि उकर आदमीमन केमन हेकैं” आउर एहो जानेला “जे केऊ परमेश्‍वर केर आराधना करेला उके बुराई करेक नी चाही।” बाड़ घर में सोना चाँदी केर एकला निहीं, मगर काठ आउर माटी केर बासन हों रहेला, सोना चाँदी केर बासन आदर केर साथ इस्तेमाल होवेला। आउर काठ आउर माटी केर बासन निरादर केर साथ इस्तेमाल होवेला। से लगिन अगर केऊ खुद के उ सोउब से जे मइला अहे सफा करी, तो उ आदर केर बासन नियर पवितर गिनाई, जेके खास मोका में इस्तेमाल करल जायला। आउर उ अपन मालिक केर काम में आवेक लायक बाइन जाई, आउर हरेक बेस काम के करेक लगिन तेयार होवी। जवानी केर बुरा लालसामन से बाइच के रह, आउर जेमन शुद्ध मन से प्रभु केर आराधना करैना, उमन संगे धरम, आउर बिसवास, आउर प्रेम, आउर मेल-मिलाप केर पिछा कर। बे मतलब केर आउर उटपटांग बक-झक से दूर रह, काले कि तोंय जानिसला, उमन से झगरा होवेला। आउर प्रभु केर सेवक के झगरा करेक वाला नी होवेक चाही, मगर सोउब केर संगे नरम आउर सिखाएक में होशियार आउर बिरोध करेक वालामन के सहेक वाला होवेक चाही। आउर बिरोधीमन के हों नरम होई के समझाओक, काले कि एहो होवेक परायला, परमेश्‍वर उमन के पाप के छोड़ेक आउर मसीह केर सच्चाई के जानेक में मदइत करी। आउर इकर से उमन होस में आय जाबैं, आउर शैतान केर कब्जा से बचेक पारबैं। जे उमन के धोखा से अपन इच्छा पूरा करवाएक लगिन कब्जा काइर हे। हे तीमुथियुस, मोंय चाहोना कि तोंय इके जाइन ले, यीशु मसीह केर घूइर आवेक से पहिले आखरी दिनमन में कठिन समय आवी। काले कि आदमीमन सिरिफ अपनेहें चिंता करबैं, धन केर लोभी होबैं, बड़े-बड़े गोइठ गोठियाबैं, घमंडी होबैं, दोसर मनक निंदा करबैं, आयो-आबा केर आगया नी मानबैं, उमन मदइत करेक वालामन के हों धन्यबाद नी देबैं, आउर अपवितर होबैं, दोसरमन उपरे दया नी करबैं, दोसरमन के क्षमा नी करबैं, अपन इच्छामन के काबू करेक नी पारबैं, कठोर मन वाला होबैं, आउर बेस गोइठमन से घिरना करबैं। जेमन, उमन उपरे भरसा करैना ओहोमन के इनकार काइर देबैं, लापरवाह होबैं, खुद के दोसरमन से बेस सोचबैं, आउर उमन परमेश्‍वर के निहीं, बल्कि भोग बिलास केर हें खोजार करबैं। उमन खुद एइसन देखाबैं जइसन कि परमेश्‍वर केर सेवा करैना, मगर उकर शक्ति के नी मानबैं, जे उमन केर जिंदगी के बदलेक पारेला, तोंय एइसन आदमीमन से दूर रहबे। एहेमन में से थोरेक आदमीमन दोसर मनक घर में जायना आउर मूरख जनानामन के अपन कब्जा में काइर लेवैना। जेमन पापमन से दबल आउर सोउब रकम केर बुरा इच्छामन केर कब्जा में अहैं। इ जनानामन लगातार नवाँ चीजमन के सीखते तो रहैना, मगर मसीह केर बारे में सच्चा शिक्षामन के कहियो बुझेक नी पारैना। झूठा सिखाएक वालामन मसीह केर सच्चा संदेश के परचार करेक से रोकेक केर कोशिश करैना, जइसन यन्नेस आउर यम्ब्रेस मूसा केर बिरोध काइर रहैं। उमन केर बुद्धि भ्रष्ट होई जाय हे, आउर उमन मसीह उपरे बिसवास नी करैना। मगर उमन ढेइर लम्बा समय तक आदमीमन के धोखा देवेक नी पारबैं। काले कि जइसन आदमीमन यन्नेस आउर यम्ब्रेस के चीन्ह लेलैं कि उमन मूरख रहैं, तइसनेहें एहोमन के सोउबमन चीन्ह लेबैं कि इमन मूरख हेकैं। मगर हे तीमुथियुस, तोंय मोर उपदेस, चाइल चलन, आउर मोर योजना, मोंय कइसन बिसवास करोना, मोंय मुसीबतमन के कइसन सहलों, आदमीमन के कइसन प्रेम काइर हों, आउर दुःखमन में कइसन धीरज धाइर हों, इ सोउब गोइठमन के तोंय जानिसला। तोंय उ भयानक दुःखमन केर बारे में हों जानिसला जे अंताकिया शहर, इकुनियुम आउर लुस्त्रा नगर केर आदमीमन बटले मोर उपरे पाइड़ रहे। आउर कइसन मोंय हूवाँ सताव के सहलों, मगर प्रभु मोके उ सोउब से छोड़ाय लेलक। मगर जेतना आदमीमन मसीह यीशु में भक्ति केर संगे जिंदगी बिताएक चाहैना उमन सोउब सताल जाबैं। मगर दुष्ट आउर बहकाएक वालामन धोखा देते आउर धोखा खाते, बिगड़ते चाइल जाबैं। हे तीमुथियुस, जे कोनों हमरे तोके सिखाय ही उकरे मोताबिक चलते रह, जेकर में तोंय पोक्ता बिसवास काइर हिस। आउर इके याइद रख कि इ गोइठमन के तोंय केकर से सीख हिस। जब तोंय एगो छोटका छउवा रहिस, सेहे बेरा से पवितर किताब केर गोइठमन के तोंय सीख हिस। जे तोके इ बुझेक में मदइत करेला कि जब तोंय यीशु मसीह उपरे बिसवास करिसला तो परमेश्‍वर तोके बचायला। पवितर किताब केर हरेक बचन, जेके परमेश्‍वर उमन केर दिमाग में साजलक जेमन उके लिखलैं, आउर इ आदमीमन के सिखाएक लगिन, आउर जेमन गलती करैना उमन के डाँटेक लगिन, आदमीमन केर दोष के सुधराएक लगिन आउर सही जिंदगी जियेक लगिन फायदा पोंहचाएक वाला हेके। ताकि इके पालन काइर के परमेश्‍वर केर आदमी हर रकम से बेस काम करेक लगिन तेयार रहोक। जब यीशु मसीह एगो राजा नियर राइज करेक लगिन आवी, तब उ जेमन जिंदा अहैं आउर जेमन मोइर जाय हैं, सोउब आदमीमन केर न्याय करी। से लगिन मोंय आबा परमेश्‍वर आउर मसीह यीशु के गवाह माइन के तोर से बिनती करोना कि तोंय परमेश्‍वर केर संदेश के परचार कर आउर जब आदमीमन परमेश्‍वर केर संदेश के सुनेक चाहैना, आउर जब सुनेक नी चाहैना सोउब समय तेयार रह, आदमीमन का गलती काइर हैं उके तोंय बताव आउर उ मनक पापमन केर खातिर उमन के डाँट। मगर उमन के उसकाव हों आउर धीरज से सिखाव। काले कि एइसन समय आवी कि आदमीमन खरा उपदेस के सुनेक नी खोजबैं, मगर उमन अपन मन केर इच्छा मोताबिक चलबैं आउर ढेइर सिखाएक वालामन के खोइज लेबैं। जेमन ओहे गोइठमन के बताबैं जेके उमन सुनेक खोजैना। उमन सच्चाई केर संदेश के नी सुनबैं, मगर झूठा कहानीमन के सुनबैं जेके आदमीमन बनाय हैं। मगर तोंय सोउब समय खुद के काबू में रख, चाहे तोके कोनोवें दुःख उठाएक काले नी पड़ी, सोउब दुःखमन के सह आउर शुभ समाचार केर परचार लगिन कड़ा मेहनइत कर। एगो परमेश्‍वर केर दास नियर उ सोउब काममन के कर जेके करेक ले परमेश्‍वर तोके जिम्मा सोंइप हे। मोंय तोके इ आगयामन के देवाथों काले कि परमेश्‍वर केर लगिन मोर जिंदगी आउर काम सिराएक वाला अहे, आउर मोंय जानोना कि मोंय जल्दी हें मोरेक वाला अहों। मोंय यीशु मसीह केर सेवा करेक में कड़ा मेहनइत काइर हों, जेके करेक लगिन यीशु मसीह मोके देई रहे, मोंय आखरी समय तक बिसवास में बनल अहों। प्रभु मोर लगिन स्वरग में इनाम राइख हे, काले कि मोंय धारमिकता केर जिंदगी जी के उके खुश काइर हों, इ इनाम के हमर प्रभु यीशु मसीह जब उ घूइर आवी तब मोके देवी, जे धरमी आउर फैसला करेक वाला हाकिम हेके। आउर ना सिरिफ मोके भइर इनाम देवी, मगर उ सोउबमन के हों देवी जेमन उकर घूइर आवेक केर बे सबरी से आसरा देखाथैं। तोंय मोर ठिना जल्दी आवेक केर कोशिश कर। काले कि देमास इ दुनिया केर चीजमन से प्रेम काइर के मोके छोइड़ देलक, आउर थिस्सलुनीके शहर चाइल गेलक, आउर भाई क्रेसकेंस गलातिया परदेस आउर तीतुस दलमतिया परदेस चाइल गेलक। सिरिफ लूका मोर संगे अहे, जब तोंय आबे तो अपन संगे मरकुस के लेते आबे, उ हिंयाँ मोर काम में मदइत करेक लायक अहे, काले कि सेवा लगिन उ मोर ढेइर काम केर हेके। तुखिकुस के मोंय इफिसुस शहर भेइज हों। जब तोंय हिंयाँ आबे, तो उ कोट के लेते आबे जेके मोंय त्रोआस नगर में करपुस केर घरे छोइड़ आय हों, आउर उ मोढ़ल किताब के हों लेते आबे जे भेड़ी चमड़ा से बनल अहे। सिकंदर ठठेरा मोर से ढेइर बुराई काइर हे, प्रभु उके उकर बुराई काममन केर मोताबिक बदला देवी। तोंय हों उकर से ढेइर सावधान रह, काले कि उ यीशु मसीह केर बारे हमर शिक्षामन केर ढेइर हें बिरोध काइर हे। जब पहिली बेर मोके हाकिम केर सामने रोम देस में, जे आदमीमन मोर उपरे दोष लगाय रहैं उकर जबाब देवेक लगिन ठड़ाएक रहे, तब केऊ हों मोर साथ नी देलैं, बल्कि सोउब मोके छोइड़ देलैं। मोंय प्रार्थना करोना कि परमेश्‍वर उमन के मोर से दूर होवेक केर पाप के क्षमा करोक। मोंय यीशु मसीह केर बारे में संदेश के परजाइत आदमीमन के सफा-सफा बताएक पारलों, ताकि उमन शुभ समाचार के सुनोक, मगर प्रभु मोर मदइतगार रहलक, आउर मोके शक्ति देलक ताकि मोर द्वारा पूरा-पूरा परचार होवोक, आउर सोउब जाइत केर आदमीमन सुइन लेवोक, मोंय तो बाघ केर मुँह से बचेक नियर माउत से छोड़ाल गेलों। आउर प्रभु मोके हरेक बुरा काम से छुड़ाई, आउर अपन स्वरग राइज में छुटकारा काइर के पोंहचाई। उकरे महिमा जुग-जुग होते रहोक आमीन। प्रिस्किल्ला भाई आउर अक्विला बहिन के आउर उनेसिफुरुस केर घराना के जोहार। इरास्तुस कुरिन्थुस शहर में रइह गेलक आउर त्रुफिमुस के मोंय मिलेतुस नगर में बेमार छोइड़ हों। जाड़ से पहिले चाइल आवेक केर कोशिश कर, युबूलुस आउर पूदेंस, आउर लिनुस आउर क्लोदिया, आउर सोउब भाईमन केर तोके जोहार। प्रभु मोर आत्मा केर संग रहोक तोहरेमन उपरे किरपा होते रहोक। इ चिट्ठी मोंय पौलुस बटले हेके, मोंय परमेश्‍वर केर दास आउर यीशु मसीह केर चुनल खास चेला हेकों। मोके परमेश्‍वर केर चुनल आदमीमन केर बिसवास के मजबूत करेक आउर यीशु मसीह केर सच्चा शिक्षामन के जानेक में मदइत करेक लगिन ठहराल जाय हे, ताकि उमन एइसन जिंदगी जिओक जे परमेश्‍वर के खुश करेला। जेकर से उमन परमेश्‍वर केर संगे जुग-जुग रहेक लगिन आसरा करैना, काले कि परमेश्‍वर जे कहियो झूठ नी बोलेला दुनिया के सिरजाएक से पहिले करार काइर रहे कि उकर आदमीमन जुग-जुग लगिन जीते रहबैं। आउर अब बिलकुल ठीक समय में परमेश्‍वर इ शुभ समाचार के हमरे केर सामने दिस्तार करलक, आउर हमरे इकर परचार सोउब कर ठिना करिला। इ काम करेक केर जिम्मेदारी हमरे केर छुटकारा देवाइया परमेश्‍वर, आगया देई के मोके सोंइप हे। मोंय इ चिट्ठी, हे तीतुस तोके लिखाथों, तोंय मोर अपन बेटा नियर अहिस काले कि तोंय हों यीशु मसीह में बिसवास करिसला। मोंय प्रार्थना करोना कि आबा परमेश्‍वर आउर छुटकारा देवाइया यीशु मसीह बटले तोके किरपा आउर शांति मिलते रहोक। मोंय इ लगिन तोके क्रेते टापू में छोइड़ के आय रहों, ताकि तोंय हूवाँ केर कलीसियामन में उ समस्यामन के ठीक करबे, जेके ठीक करेक लगिन मोर ठिना समय नी रहे। आउर क्रेते टापू केर हर शहर में कलीसिया केर अगुवामन के चुइन के ठहराय देबे। ओइसनेहे जइसन मोंय तोके आगया देई हों एगो सेवक के निरदोष आउर सिरिफ एके गो जनाना केर पति होवेक चाही, जेकर छउवामन बिसवासी होवोक, आउर जेकर में लुच्चा आउर मनमानी होवेक केर दोष नखे। काले कि अगुवा के परमेश्‍वर केर काम सोंपल जाएक केर चलते निरदोष होवेक चाही, उके ना घमंडी, ना तुरते खिसाएक वाला, ना पियंक्कड़, ना मार पीट करेक वाला, आउर ना ही रुपया केर लालची होवेक चाही। मगर उके गोतियामन से प्रेम करेक वाला आउर सेवा सत्कार करेक वाला, भलाई करेक केर इच्छा रखेक वाला, संयम से रहेक वाला, गलती केर पक्ष नी लेवेक वाला, पवितर आउर काया केर अंगमन के काबू में रखेक वाला होवेक चाही। आउर उके मसीह केर बारे में बिसवास लाएक संदेश उपरे पोक्ता बिसवास करेक चाही जेके हमरे सिखाय ही। ताकि उ दोसरमन के सही शिक्षा केर पालन करेक ले उसकायक पारी, आउर जेमन सही शिक्षा केर बिरोध करैना उ उमन के गलत ठहराएक पारी। मोंय एइसन इ लगिन कहाथों, काले कि ढेइर आदमीमन सही शिक्षा केर बिरोध में ठड़ाय हैं, जेमन बेकार गोइठमन के सिखायना आउर दोसरमन के धोखा देवैना। खास काइर के उ यहूदीमन एइसन करैना जेमन बिसवासी बाइन हैं। उमन इ चाहैना कि सोउब बिसवासीमन यहूदी नियम केर मोताबिक खतना करवाओक। इमन के सिखाएक केर आगया ना दे, काले कि जब इमन उ गोइठमन के सिखायना जेके नी सिखाएक चाही, तब उमन पूरा परिवार केर आदमी मन केर बिसवास के मेटाय देवैना। उमन एइसन रुपया कमाएक लगिन करैना। क्रेते टापू केर रहेक वाला एगो आदमी जेके बुद्धिमान मानत रहैं, उ कहलक, “क्रेते टापू केर आदमीमन झूठ बोलैना। उमन जंगली जानवर नियर ब्यवहार करैना। उमन कोढ़िया आउर पेटू अहैं।” उ मनक बारे इ गोइठ सच हेके, इ लगिन उमन के कड़ाई से चितौनी देते रह, ताकि उमन यीशु मसीह केर बारे में सच्चा शिक्षामन उपरे बिसवास करबैं। आउर उमन यहूदीमन केर झूठा कथा कहानीमन आउर उ आदमीमन केर आगयामन उपरे मन ना लगाओक, जेकर से कोनों फायदा नखे, बल्कि उ आदमीमन के यीशु मसीह केर सच्चा संदेश उपरे बिसवास करेक से भटकाय देवेला। जेमन केर मन-दिल शुद्ध अहे उमन लगिन सोउब चीज शुद्ध हेके, मगर जेमन बुरा अहैं आउर यीशु मसीह उपरे बिसवासी नी करैना उमन कोनोवें करैना उ शुद्ध नखे, काले कि उमन केर मन-दिल बिलकुल बुरा अहे। झूठा सिखाएक वलामन कहैना, हमरे परमेश्‍वर के जानिला, मगर उ मनक काम सफा-सफा बतायला कि उमन परमेश्‍वर के नी जानैना। काले कि उमन घिनघिना आउर आगया नी मानेक वाला हेकैं, आउर कोनों बेस काम केर लाएक नखैं। मगर हे तीतुस, तोर लगिन इ ठीक हेके कि बिसवासीमन के तोंय सिरिफ ओहे सिखाव, जे यीशु मसीह केर बारे में सच्चा शिक्षा हेके। मतलब बूढ़ा आदमी के संयम आउर एइसन समझदारी से ब्यवहार करेक चाही, ताकि आदमीमन उकर आदर करबैं। आउर उके परमेश्‍वर उपरे पक्का बिसवास करेक चाही, आउर दोसरमन के सच्चाई से प्रेम करेक आउर दुःखमन में धीरज धारेक चाही। एहे लेखे बुढ़िया जनानामन के उ जनानामन नियर ब्यवहार करेक चाही जेमन परमेश्‍वर केर लगिन भक्ति केर जिंदगी जियैना। उमन दोसरमन केर निंदा करेक वाला आउर पियंक्कड़ ना होवोक, मगर उमन के दोसरमन के बेस जिंदगी जियेक केर तरीका सिखाएक चाही। ताकि उमन एगो बेस नमूना देखाबैं आउर जवान जनानामन के सलहा देवेक केर लायक होबैं, ताकि जवान जनानामन अपन पतिमन आउर छउवामन से प्रेम रखोक। आउर संयम, अपन पति केर परती ईमानदार, घर के बेस से चलाएक वाला, दोसरमन के दया करेक वाला आउर अपन-अपन पति केर आदर करेक वाला होवोक, ताकि केऊ परमेश्‍वर केर संदेश केर बारे में निंदा करेक ना पारोक। एइसनेहें जवान मरदानामन के हों समझाव, कि संयम आउर समझदारी से काम करोक। तोके सोउब गोइठमन में एगो नमूना नियर बेस काम काइर के दोसरमन के देखाएक चाही, ताकि दोसरमन हों उके करबैं। जब तोंय सिखाबे तो सही नीयत आउर आदर पावेक लायक सिखाबे आउर सच्चाई के एइसन सिखाव जेकर बुराई करेक नी पराई, ताकि तोर दुश्मन के बिरोध में कहेक केर कोनों मोका ना मिलोक आउर उ लाजिम होई जाओक। कलीसिया में धांगरमन के समझाव कि उमन अपन-अपन मालिक केर आगया मानोक, आउर सोउब गोइठमन में उमन अपन मालिक के खुश करेक केर कोशिश करोक आउर उलटाय के जबाब ना देवोक। उमन मालिक केर कोनों चीजमन केर चोरी ना करोक, मगर सोउब रकम से पूरा ईमानदार रहोक। ताकि आदमीमन उ मनक बेस ब्यवहार के धेयान देबैं। आउर उ मनक बेस काम आदमीमन के हमरे केर छुटकारा देवाइया परमेश्‍वर केर बारे में संदेश सुनेक केर जरिया बनोक। काले कि परमेश्‍वर हरेक आदमीमन लगिन छुटकारा पावेक केर डहर देखाय के, इ बताय देई हे कि उ केतना किरपा करेक वाला हेके। आउर अपन किरपा से परमेश्‍वर हमरे के सिखायला कि हमरे ओइसन ब्यवहार करेक छोइड़ देवब जे उके खुश नी करेला। आउर जे चीजमन केर इच्छा अबिसवासीमन करैना उकर इच्छा हमरे नी करब, आउर जबकि हमरे एखन इ दुनिया में हें अही, तो बुद्धिमानी आउर भक्ति केर संग इ नियर काम करब जे परमेश्‍वर के खुश करेला। आउर हमरे उ आसरा मतलब हमरे केर महान परमेश्‍वर आउर छुटकारा देवाइया यीशु मसीह के तेज चमक केर संगे दोबारा घूइर आवेक केर इंतजार कराथी। जे खुद के हमर लगिन बलिदान काइर देलक, आउर हमरे के सोउब रकम केर अधरम से छुटकारा देलक आउर शुद्ध काइर के हमरे के अपन लगिन खास आदमी बनाय लेलक, जे भला काम करेक लगिन पूरा पुरी तेयार रहोक। से लगिन हे तीतुस, मोंय चाहोना कि तोंय क्रेते टापू केर बिसवासीमन के इ गोइठमन के सिखाव, जेमन के मोंय तोके सिखाय हों आउर उके करेक लगिन उसकाव। जहाँ जरुरत होवी हूवाँ उमन के सुधराव, तोके एइसन करेक केर पूरा अधिकार अहे। जे कोनों तोंय सिखाइसला उके केऊ अनदेखा ना करोक। बिसवासीमन के याइद दिवाव कि उमन हाकिममन आउर अधिकारीमन केर आदर करोक, आउर उमन केर आगया के मानोक, आउर दोसरमन लगिन बेस काम के करोक। केखो बदनाम ना करोक आउर ना केकरो से झगरा लड़ोक, मगर किरपा करेक वाला स्वभाव से रहोक, आउर सोउब आदमीमन केर संगे नरम बाइन के रहोक। काले कि हमरे हों बिसवासी बनेक से पहिले निरबुद्धि, आउर आगया नी मानेक वाला, आउर भ्रम में पड़ल रही, आउर लगातार रकम-रकम केर बुरा काममन के करत रही, आउर सुख बिलास केर काममन के करेक में बंधाल रही, आउर हमरे अपन समय के दुष्ट काममन के करेक में बितात रही, आउर दोसरमन से हिसिंगा-डाह करेक में जिंदगी के बितात रही, दोसरमन हमरे से नफरत करत रहैं आउर हमरे एक दोसर संगे नफरत करत रही। मगर फिन भी हमर छुटकारा देवाइया परमेश्‍वर हमरे उपरे अपन दया आउर प्रेम देखालक। आउर हमरे के हमर पाप केर दंड से बचालक, आउर इ धरम केर काममन केर चलते निहीं, जे हमरे खुद करली, मगर अपन दया केर चलते हमरे उपरे किरपा करलक, आउर परमेश्‍वर हमरे के अपन पवितर आत्मा देई के बचालक, जे हमरे केर पापमन के धोई देलक आउर नवाँ जिंदगी आउर नवाँ स्वभाव देलक। परमेश्‍वर हमरे के मुफत में पवितर आत्मा के देई हे, ताकि उ शक्ति केर साथ हमर में काम करी, काले कि यीशु मसीह हमर पापमन लगिन मोइर हे आउर हमरे केर छुटकारा देवाइया बाइन जाय हे। परमेश्‍वर एइसन काइर के अपन किरपा से हमरे के धरमी ठहरालक, आउर हमरे उकर संतान बाइन गेली, से लगिन हमरे जुग-जुग ले उकर संग रहेक केर आसरा करिला। इ गोइठ सच हेके आउर मोंय चाहोना कि तोंय इ गोइठमन केर बारे में बिसवासीमन के पोक्ता से सिखाबे, इ लगिन कि जेमन परमेश्‍वर उपरे बिसवास काइर हैं, उमन भला काममन के करते रहेक में धेयान देवोक, इ गोइठमन बेस आउर आदमीमन लगिन फायदा केर हेके। मगर तोंय बे मतलब केर उटपटांग बक झक, पुरखामन केर बंशावली, बिरोध आउर झगरामन से दूर रह, जे मूसा केर नियम केर बारे में अहे, काले कि उमन बेकार आउर कोनों फायदा केर ना लगे। अगर केऊ कलीसिया के तोरेक वाला अहे, तो उके कम से कम दूई बेर चेताव कि उ एइसन ना करोक, फिन भी अगर उ एइसनेहें करते रहेला तो उकर से अलगे होई जा। इ जाइन के कि एइसन आदमी जाइन बुइझ के बुरा डहर में चलेला आउर पाप करेला। उकर बुरा काममन हें बतायला कि उ दोषी अहे। मोंय अरतिमास चाहे तुखिकुस के तोर ठिना क्रेते टापू भेजमूँ, जब उ पोंहची तो तोंय मोर ठिना नीकुपुलिस नगर आवेक केर कोशिश करबे, काले कि मोंय जाड़ केर महिना हुवाँय बिताएक केर बिचार काइर हों। जब वकील जेकर नाँव जेनास हेके, आउर एगो दोसर आदमी जेकर नाँव अपुल्लोस हेके, अपन डहर हिंठबैं तो तोंय जेतना उमन केर मदइत करेक पारिसला ओतना मदइत करबे। आउर जे कोनों उ मनक डहर खरचा लगिन जरुरत अहे, उ सोउब के उमन ले देबे, ताकि उमन के डहर में कोनों चीज केर घटी ना होवोक। तोंय सिरिफ बिसवासीमन केर धेयान के अपन बटे करेक लगिन ना सिखाव, मगर उमन के भला काम करेक लगिन कड़ा मेहनइत करेक हों सिखाव। ताकि जे आदमीमन केर जरुरत अहे उमन केर जरुरत के पूरा करल जाओक, इ चीज बिसवासीमन के एगो मकसद केर साथ जियेक में मदइत करी। सोउब बिसवासीमन जेमन हिंयाँ मोर संगे अहैं, तोहरे के जोहार कहैना, आउर जे हमर संगी बिसवासीमन क्रेते टापू में अहैं आउर हमर से प्रेम करैना, उमन के हों जोहार, मोंय प्रार्थना करोना कि परमेश्‍वर तोहरे सोउब केर उपरे किरपा करोक। इ चिट्ठी मोंय पौलुस आउर भाई तीमुथियुस बटले हेके। मोंय जेहेल में बंद अहों काले कि मोंय यीशु मसीह केर शुभ समाचार केर परचार करोना। इ चिट्ठी के हमर दुलारा संगी आउर संगे काम करेक वाला फिलेमोन के लिखाथों। आउर उ कलीसिया केर बिसवासीमन के हों, जेमन फिलेमोन केर घर में जमा होवैना। मोंय इ चिट्ठी के हमर बिसवासी बहिन अफफिया आउर एगो बीर फौजी नियर प्रभु केर सेवा करेक वाला हमर बिसवासी भाई अरखिप्पुस के हों लिखाथों। मोंय प्रार्थना करोना कि हमर आबा परमेश्‍वर आउर प्रभु यीशु मसीह बटले तोहरेमन के किरपा आउर शांति मिलते रहोक। मोंय जखनोहों तोर लगिन प्रार्थना करोना, हमेशा तोर लगिन परमेश्‍वर के धन्यबाद देवोना। काले कि मोंय प्रभु यीशु केर उपरे तोर बिसवास आउर सोउब पवितर आदमीमन केर लगिन तोर प्रेम केर बारे में सुनते रहोना। मोंय इ प्रार्थना करोना कि बिसवासीमन केर संगे तोर इ संगति बढ़ते जाओक, ताकि तोंय उ सोउब बेस चीजमन के पूरा-पुरी समझेक पारबे, जेके परमेश्‍वर हमरे के देई हे आउर इकर चलते आदमीमन मसीह केर महिमा करबैं। काले कि हे भाई, दोसरमन लगिन तोर इ प्रेम के देइख के मोके ढेइर खुशी आउर शांति मिललक। इ लगिन कि तोर चलते पवितर आदमीमन केर मन हरा-भरा होई जाय हे। हे फिलेमोन, मोंय तोके एगो काम करेक ले कहाथों, हलांकि मसीह केर खास चेला होवेक के नाते मोंय तोके अधिकार केर साथ आगया देवेक पारोना। फिन भी मोंय बूढ़ा पौलुस के जे अब मसीह यीशु केर शुभ समाचार सुनाएक केर खातिर जेहेल में बंद अहों, मोके इ आउर हें बेस लगलक कि मोंय तोर से प्रेम से बिनती करमूँ। मोंय उनेसिमुस केर लगिन तोर से बिनती करोना जे मोर बेटा नियर अहे। जब मोंय जेहेल में बंद रहों तब उ मसीह में मोर बेटा बाइन गेलक। एक समय रहे जब उ तोर कोनों काम केर नी रहे, मगर अब तोर आउर मोर दुयो झन केर बड़का काम केर हेके। उखे मोंय तोर ठिना वापस भेजाथों, जेके मोंय पूरा दिल से प्रेम करोना। जब मोंय शुभ समाचार परचार करेक केर चलते जेहेल में बंद अहों, तो उके मोर मदइत करेक लगिन एहे ठिना रखेक चाहत रहों। ताकि उ तोर बदली में हिंयाँ मोर मदइत करेक पारोक। मगर जब तक तोंय राजी नखिस तब तक मोंय एइसन करेक नी चाहोना। जेकर से तोंय इ उपकार केर काम लचारी से निहीं मगर अपन इच्छा से करबे। होई सके उनेसिमुस एहे चलते थोरेक समय लगिन तोर ठिना से दूर रहे, ताकि उ मसीह में बिसवास करेक पारोक आउर बदला में तोंय उके हमेशा लगिन पाय लेबे। तोंय उके सिरिफ अपन धांगर ना समझबे, मगर उ एगो धांगर से बाइढ़ के अहे। मोंय उके ढेइर प्रेम करोना, मगर तोके उकर से आउर हें बगरा प्रेम करेक चाही। मतलब अपन धांगर केर रूप में आउर मसीह में भाई केर रूप में हों। अगर तोंय मोके अपन सहभागी समझिसला तो जब उनेसिमुस तोर ठिना घूइर आवी तो उके ओहे लेखे अपनाबे जइसन तोंय मोके अपनाबे। आउर अगर उ तोर कोनों हानि काइर हे, या उ कोनों चीज के लेई के तोर कर्जदार अहे, तो उके तोंय मोर नाँव में लीख ले। मोंय पौलुस अपन हाँथ से लिखोना कि मोंय खुद हें तोर करजा चुकाय देमूँ। हलांकि मोके, तोके याइद दिवाएक केर जरुरत नखे कि तोंय हों अपन नवाँ आत्मिक जिंदगी लगिन मोर कर्जदार अहिस। हे भाई इ फायदा मोके प्रभु में तोर बटे से मिलोक, मसीह में मोर जीव के हरा-भरा काइर दे। मोंय तोर आगयाकारी होवेक केर भरसा काइर के तोके लिखाथों आउर इ जानोना कि जे कोनों मोंय कइह हों, तोंय उकर से कहीं बाइढ़ के करबे। एगो गोइठ आउर अहे कि मोर लगिन रहेक केर ठाँव तेयार करबे। मोके आसरा अहे कि परमेश्‍वर तोर प्रार्थनामन केर जबाब देवी आउर मोंय आय के तोके देखेक पारमूँ। इपफ्रास जे मसीह यीशु केर शुभ समाचार परचार करेक केर खातिर मोर संगे जेहेल में बंद अहे, उ तोके जोहार कहेला। आउर मरकुस आउर अरिस्तर्खुस आउर देमास आउर लूका जेमन मोर संगे प्रभु केर काम करैना इमन बटले हों तोके जोहार। मोंय प्रार्थना करोना कि प्रभु यीशु मसीह केर किरपा तोर उपरे बनल रहोक। आमीन। पुरखा समय में परमेश्‍वर बाप दादामन से कायनों बेर अलग-अलग तरीका से अपन संदेश के बताएक वालामन केर जरिया से गोठियाय के, इ आखरी दिनमन में परमेश्‍वर हमरे संगे अपन बेटा केर जरिया से गोठियालक, आउर उकरे जरिया से परमेश्‍वर समूचा दुनिया के सिरजालक, से लगिन परमेश्‍वर इ फैसला काइर हे कि आखरी में सोउब कुछ उकरे अधीन में रहोक। बेटा, परमेश्‍वर केर महिमा केर इंजोत हेके, उकर में हमरे इ देखेक पारिला कि परमेश्‍वर कइसन अहे, उ अपन शक्तिशाली बचनमन से सोउब चीजमन के जे बनाल जाय हे, स्थिर रहेक लगिन मदइत करेला, उ आदमीमन के उमन केर पापमन से शुद्ध काइर के, महिमा से भरल स्वरग में परमेश्‍वर केर भतखाइया आरा बइठल अहे। उकर पद स्वरग दूतमन से ऊँचा होलक, काले कि जे नाँव उके बपौती हकदार केर रूप में मिल हे, उ नाँव स्वरगदूतमन केर नाँव से कायनों गुणा बाड़ अहे। काले कि पवितर किताब में केऊ नी लीख हैं कि परमेश्‍वर अपन कोनों स्वरगदूत से एइसन कइह हे, “तोंय मोर बेटा हेकिस, आइज मोंय तोके अपन बेटा केर रूप में दिस्तार काइर हों,” आउर फिन उ कोनों स्वरगदूत से एइसन नी कहलक, “मोंय उकर आबा बनमूँ, आउर उ मोर बेटा बाइन जाई।” आउर इकर से पहिले कि परमेश्‍वर अपन पहिलौठा बेटा के दुनिया में भेजलक, उ कहेला, “परमेश्‍वर केर सोउब स्वरगदूतमन उकर आराधना करबैं।” आउर उ स्वरगदूतमन केर बारे में इ कहेला, “परमेश्‍वर अपन स्वरगदूतमन के धुका नियर आउर अपन सेवकमन के धधकते आइग नियर बनायला।” मगर बेटा केर बारे में कहेला, “हे परमेश्‍वर, तोर राइज जुगजुग लगिन बनल रही, तोंय अपन राइज में न्याय से राइज करबे। तोंय भला काम करेक से प्रेम आउर बुरा काम करेक से घिरना करिसला, मोंय तोर परमेश्‍वर तोके चुइन हों आउर जेमन तोर से जुड़ल अहैं, उ सोउबमन से तोके बगरा आदर आउर खुशी देई हों।” आउर पवितर किताब में हों लिखल अहे, “हे प्रभु, शुरु में तोंय दुनिया के सिरजाय हिस, आउर सोउब कुछ के जे आकाश में अहे। उमन तो नाश होई जबैं मगर तोंय सोउब दिन लगिन बनल रहबे, आउर उमन सोउब लुगा नियर पुरना होई जबैं। आउर तोंय उमन के चादर नियर मोइढ़ देबे, जे नियर आदमीमन पिंधल लुगा के बदलैना, ओहे नियर तोंय एखन केर जुग के नवाँ जुग में बदइल देबे, मगर तोंय सोउब दिन लगिन एक जइसनेहें रहबे, आउर तोर जिंदगी केर कहियो अंत नी होवी।” परमेश्‍वर अपन कोनों स्वरगदूतमन के कहियो नी कहलक कि तोंय मोर भतखाइया आरा बाइठ, जब तक कि मोंय तोर बैरीमन के पूरा-पुरी तोर अधीन नी काइर देमूँ। स्वरगदूतमन का करैना? उमन तो परमेश्‍वर केर सेवा करते रहैना, उमन के परमेश्‍वर छुटकारा पावेक वाला आदमीमन केर हों, सेवा करेक लगिन भेजेला। से लगिन हमरे के जे सिखाल जाय रहे, उकर पालन करेक लगिन बगरा सावधान होवेक केर जरुरत अहे, तब हमरे सच्चाई केर डहर से नी भटकब। काले कि मूसा केर नियम जेके परमेश्‍वर स्वरगदूतमन केर जरिया से देई रहे सच्चा साबित होलक, आउर जे आदमीमन उ नियम के नी मानलैं परमेश्‍वर उमन के दंड देलक। अगर हमरेमन एइसन बड़का छुटकारा के ठुकराय देवब, तो हमरे कैसे बचेक पारब। इ छुटकारा केर हकवा सोउब से पहिले प्रभु यीशु करलक, आउर फिन जेमन प्रभु यीशु से सुनलैं, उमन उ मनक संदेश के हमरेमन लगिन सच्चा साबित करलैं। आउर इकर अलावा परमेश्‍वर हों अपन इच्छा केर मोताबिक चिन्हामन आउर चमत्कार, आउर अचरज केर काममन, आउर सोउब रकम केर शक्ति केर काममन, आउर पवितर आत्मा केर बरदानमन के बाँटेक से इकर सबूत देते रहलक। परमेश्‍वर उ आवेक वाला दुनिया के जेकर बारे में हमरे गोठियाथी, स्वरगदूतमन केर अधीन नी करलक मगर यीशु केर अधीन काइर देलक। पवितर किताब में कोनों ठिना इ गवाही देवल अहे कि आदमीमन का हेकैं कि तोंय हे परमेश्‍वर उमन उपरे नजइर करबे, या उमन केर चिंता करबे? उमन आदमी से बगरा आउर कोनों ना लगैं। तोंय उके स्वरगदूतमन से थोरहें समय लगिन कम बनाले, आउर तोंय उके एगो राजा नियर महिमा आउर आदर देई हिस। तोंय सोउब चीजमन केर उपरे उके अधिकार देई हिस, इ लगिन जबकि परमेश्‍वर सोउब कुछ के उकर अधिकार में काइर देई हे, तो एइसन कोनोवें नखे जे उकर अधिकार में नखे, मगर हमरे आइज तक सोउब कुछ उकर अधिकार में नी देखिला। मगर हमरे यीशु के जे स्वरगदूतमन से थोरहें कम करल जाय रहे, माउत केर दुःख उठाएक केर चलते महिमा आउर आदर केर मुकुट पिंधल देखिला, काले कि परमेश्‍वर केर किरपा से हरेक आदमीमन लगिन उ मोइर गेलक। परमेश्‍वर जेकर लगिन सोउब कुछ अहे, आउर जेकर जरिया से सोउब कुछ अहे, उ परमेश्‍वर के एहे बेस लगलक कि उ ढेइर आदमीमन के महिमा में पोंहचाओक, तो परमेश्‍वर छुटकारा देवाइया केर दुःख उठाएक केर द्वारा सिद्ध करोक कि इ उचित काम हेके। काले कि पवितर कराइया आउर जेमन पवितर करल जायना, सोउब एक हें आबा मतलब परमेश्‍वर केर संतान हेकैं, इकरे चलते यीशु उमन के भाई-बहिन कहेक से नी लजायला। मगर कहेला, “जे भला काम तोंय मोर लगिन काइर हिस, उके मोंय अपन आदमीमन के सुनामूँ, आउर सभा केर माझे में मोंय तोर भजन गामूँ।” उ फिन कहेला “मोंय उकर उपरे भरसा रखमूँ,” आउर उ फिन कहेला, “देख, मोंय उ भाई-बहिन केर संगे अहों जेके परमेश्‍वर मोके देई हे।” से लगिन जबकि परमेश्‍वर केर छउवामन माँस आउर लोहू से बाइन हैं, तो यीशु हों खुद हें उमन नियर माँस आउर लोहू केर आदमी बाइन गेलक, ताकि अपन माउत केर जरिया से उके, जेके माउत केर उपरे शक्ति मिल रहे, मतलब शैतान के नाश काइर देवोक। इ नियर प्रभु यीशु उमन के छोड़ालक जेमन माउत केर डार से अपन पूरा जिंदगी गुलाममन नियर बितात रहैं। काले कि प्रभु यीशु तो स्वरगदूतमन केर निहीं बल्कि अब्राहम केर बंश केर मदइत करेक लगिन चिंता करेला। इ लगिन कि उके आउर बिसवासी भाई-बहिनमन नियर बाइन जाएक बिलकुल हें जरुरी रहे, इ नियर उ परमेश्‍वर केर महापुरोहित बनलक जे कि दयालु आउर बिसवास लायक अहे, ताकि उकर बलि केर जरिया से आदमीमन के उमन केर पापमन से क्षमा मिलेक पारोक यीशु केर परीक्षा करल गेलक आउर उ खुद दुःख उठाय हे, से लगिन उ उमन केर हों मदइत करेक पारेला जेमन केर परीक्षा होवेला। हे मोर संगी बिसवासी भाईमन जेमन परमेश्‍वर केर हेका, तोहरेमन स्वरग में उकर से मिलेक लगिन बोलाल जाय हा, यीशु मसीह उपरे धेयान देवा जे हमर लगिन परमेश्‍वर केर शुभ समाचार केर दूत आउर महापुरोहित हेके। उ जिम्मेदारी से सोउब काममन के करलक, जेके करेक लगिन परमेश्‍वर उके ठहराय रहे। जइसन मूसा हों ईमानदारी से उ सोउब काम के पूरा करलक, जेके करेक लगिन परमेश्‍वर आगया देई रहे। ठीक जइसन एगो घर बनाएक वाला आदमी घर से बगरा आदर पावेला, तइसनेहें यीशु मसीह हों मूसा से बगरा आदर पावेक केर लायक अहे। सोउब घरमन के आदमीमन बनायना, मगर परमेश्‍वर सोउब कुछ के सिरजाय हे। मूसा तो परमेश्‍वर केर सोउब आदमीमन लगिन सेवक नियर बिसवास लायक रहलक, आउर उ सोउब गोइठमन के देखालक जेके परमेश्‍वर पाछे से करेक वाला रहे। मसीह एगो बेटा नियर परमेश्‍वर केर परिवार में बिसवास लायक अहे, अगर हमरे अपन साहस आउर उ आसरा में बिसवास के बनाय के राखिला, तो हमरे उकर परिवार हेकी। से लगिन जइसन कि पवितर किताब में पवितर आत्मा कहेला, “अगर आइज तोहरेमन उकर आवाज के सुनाथा, तो अपन मन के कठोर ना करा, जइसन कि तोहरे केर पुरखामन परीक्षा केर समय में सुनसान ठाँवमन में परमेश्‍वर केर बिरोध में बक-झक करलैं आउर सोउब मोइर गेलैं। हूवाँ तोहरे केर पुरखामन चालीस बरिस तक मोर महान काममन के देइख के हों मोर बिरोध करते मोके परइख रहैं। इकर चलते मोंय उ समय केर आदमीमन से खिसाल रहों, आउर कहलों, ‘इमन मोके ठोकराय देलैं, आउर जे मोंय उमन के आगया देई रहों उके मानेक से इनकार काइर देलैं।’ तब मोंय खिसाय के आउर किरिया खाय के कहलों, ‘जे देस में उमन के मोंय आराम देवेक वाला रहों, हूवाँ उमन ढूकेक नी पारबैं।’” हे बिसवासी भाईमन, सावधान रहा कि तोहरेमन में एइसन बुरा आउर अबिसवासी मन ना होवोक, जे जिंदा परमेश्‍वर केर पिछे चलेक से इनकार काइर देओक। बल्कि जखनोहों तोहरे सुनाला कि पवितर किताब कहेला, “आइज केर दिन तक,” तो तोहरे हर दिन एक दोसर के बेस जिंदगी जियेक लगिन उसकाते रहा, एइसन ना होवोक कि तोहर में से केऊ आदमी पाप केर धोखा में आय के कठोर होई जाओक। काले कि अगर हमरे आखरी तक मजबूती से अपन पहिले जइसन बिसवास में बनल रहब, तो हमरे मसीह केर संगे हिस्सेदार बाइन जाइला। जइसन कि पवितर किताब में लिखल अहे, “अगर आइज तोहरेमन उकर आवाज के सुनाथा, तो अपन मन के कठोर ना करा, जइसन कि तोहरे केर पुरखामन परीक्षा केर समय में काइर रहैं।” भला केमन परमेश्‍वर केर आवाज के सुइन के हों परमेश्‍वर से बक-झक करलैं? उ सोउब आदमीमन जेमन मूसा केर अगुवाई से मिसर देस से निकइल रहैं। आउर चालीस बरिस तक सचमुच में परमेश्‍वर उमन से खिसाल रहे जेमन पाप करलैं, आउर उमन सुनसान ठाँव में मोइर गेलैं। आउर परमेश्‍वर किरिया खाय के कहलक कि उमन उ देस में कहियो ढूकेक नी पारबैं, जेकर में मोंय उमन के आराम देतो, सचमुच में परमेश्‍वर इ सोउब गोइठमन के उमन केर बारे में कइह हे जेमन आगया नी मानलैं। इ नियर हमरे महसूस करिला कि उमन अबिसवास केर चलते ढूकेक नी पारलैं। इ लगिन जबकि परमेश्‍वर हमरे के आराम केर ठाँव में जाएक ले करार काइर हे, तो हमरे के ढेइर सावधान रहेक चाही, ताकि तोहर में से केऊ उ आराम केर ठाँव में जाएक केर मोका से छूइट ना जाओक। ठीक जइसन हमरे यीशु मसीह केर बारे में शुभ समाचार के सुनली, तइसनेहें इसराइली आदमीमन हों आराम केर ठाँव में जाएक केर बारे में शुभ समाचार के सुइन रहैं, मगर उमन बिसवास नी करलैं, से लगिन उ संदेश उमन ले बेकार होई गेलक। मगर हमरे, परमेश्‍वर जे कइह हे उकर उपरे बिसवास काइर ही, आराम केर ठाँव में जाएक पारब। जइसन दोसरमन लगिन पवितर किताब में परमेश्‍वर कइह हे कि मोंय अपन खीस में किरिया खालों कि उमन मोर आराम केर ठाँव में जाएक नी पारबैं। मगर हमरे जानिला कि जे आराम केर ठाँव एखन अहे, उ दुनिया केर सिरजन केर समय से अहे। काले कि परमेश्‍वर पवितर किताब में सातवाँ दिन केर बारे में इ नियर कइह हे, “परमेश्‍वर सातवाँ दिन अपन सोउब काममन के सिराय के आराम करलक।” हमरे एहो पढ़िला कि परमेश्‍वर कइह हे, “उमन मोर आराम केर ठाँव में जाएक नी पारबैं।” तो उ इसराइली आदमीमन, जेमन के सोउब से पहिले शुभ समाचार सुनाल गेलक, आगया नी मानेक केर चलते आराम केर ठाँव में जाएक नी पारलैं, मगर एखनोहों आदमीमन के परमेश्‍वर केर आराम केर ठाँव में जाएक लगिन मोका अहे। से लगिन परमेश्‍वर आराम केर ठाँव में जाएक लगिन दोसर समय के ठहरालक, आउर उ समय आइज हेके। ढेइर बरिस केर पाछे जब हमरे केर पुरखामन आगया नी मानलैं, तब परमेश्‍वर राजा दाऊद से इ कहुवालक जे पवितर किताब में पहिले से लिखल अहे, “अगर आइज तोहरेमन परमेश्‍वर केर आवाज के सुनाथा, तो उके मानेक से इनकार ना करा।” हमरे एहो जानिला कि परमेश्‍वर केर करार करल आराम केर ठाँव, कनान देस ना लगे जहाँ यहोशू हमरे केर पुरखामन के लेगलक। काले कि अगर आराम केर ठाँव कनान देस रहतक, तो परमेश्‍वर दोसर दिन केर बारे में नी कहतक। से लगिन परमेश्‍वर केर आदमीमन ले एखनोहों आराम केर ठाँव तेयार अहे, जहाँ उमन पूरा-पुरी आराम करबैं, उमन ओइसनेहें आराम करबैं जइसन परमेश्‍वर सातवाँ दिन आराम करलक। काले कि अगर एगो आदमी आराम केर ठाँव में जायला, तो उ अपन समूचा काममन के पूरा काइर के आराम करेला, ठीक जइसन परमेश्‍वर अपन समूचा काम के पूरा काइर के आराम करलक। से लगिन हमरे के उ आराम केर ठाँव में जाएक लगिन कड़ा मेहनइत करेक अहे, हमर में से केखो उमन नियर नी होवेक चाही, जेमन परमेश्‍वर केर आगया के मानेक से इनकार काइर देलैं, जब हमरे परमेश्‍वर केर आगयामन के मानब तब हें हमरे आराम केर ठाँव में जाएक पारब। परमेश्‍वर केर बचन तो जिंदा आउर काम करेक वाला हेके, उ दुइयो आरा धार करल तलवाइर से हों बगरा चोखा अहे। उ आत्मा आउर प्राण, आउर काया केर जोड़, आउर गुदा तक पोंहइच जायला, आउर हमरे केर हिरदय केर सोच आउर बिचार के परखेला। आउर परमेश्‍वर केर सिरजाल केऊवे आदमी उकर से लुकल नखैं, उकर भीरे सोउब चीज खुला आउर दिस्तार अहे। हमरे अपन जिंदगी में जे कुछ करिला, उ सोउब चीजमन केर हिसाब हमरे के परमेश्‍वर ठिना देवेक होवी। यीशु मसीह जे स्वरग तक जाय हे उ परमेश्‍वर केर बेटा हेके, आउर उ हमरे सोउब केर महापुरोहित हेके। से लगिन आवा हमरे बिसवास में मजबूत खड़ा रहब जेके हमरे सोउब केर सामने स्वीकार काइर ही। यीशु मसीह जे हमरे केर महापुरोहित हेके हमर सोउब कमजोरीमन के जानेला, शैतान उकर सोउब रकम से परीक्षा करलक जइसन हमरे के करेला, फिन भी उ कोनों पाप नी करलक। इ लगिन आवा, हमरे साहस काइर के परमेश्‍वर ठिना आवब जे किरपा से भरल अहे, ताकि परमेश्‍वर हमरे के अपन दया आउर किरपा के देखाई, आउर जब हमरे के मदइत केर जरुरत होवी तब उ हमर मदइत करी। परमेश्‍वर हरेक महापुरोहित के इसराइली आदमीमन में से चुनेला, उ आदमीमन केर भलाई लगिन परमेश्‍वर केर सेवा करेक ले ठहराल जायला, आउर उ भेंट आउर बलिदान चढ़ायला ताकि परमेश्‍वर आदमीमन केर पापमन के क्षमा करोक। महापुरोहित हों एगो आदमी जाइत होवेक केर चलते कमजोर अहे, से लगिन उ, ना समझमन आउर भटकलमन केर संगे नरम ब्यवहार करेक पारेला। आउर इ लगिन महापुरोहित के दोसर आदमीमन केर पापमन के दूर करेक लगिन आउर अपन पापमन के दूर करेक लगिन हों बलिदान चढ़ाएक जरुरी अहे। केऊ आदमी महापुरोहित बनेक केर जे आदर केर पद हेके, इके खुद से नी लेवेला, जइसन कि परमेश्‍वर हारून के पहिला महापुरोहित बनेक लगिन बोलालक आउर चुनलक, ठीक एहे नियर उ दोसर महा पुरोहितमन के हों बोलायला आउर चुनेला। एहे नियर मसीह हों महापुरोहित बनेक केर इ आदर केर पद के खुद से नी लेलक, बल्कि परमेश्‍वर मसीह के इ कइह के ठहरालक, जइसन आउर कोनोवें पुरोहित के नी कइह हे, पवितर किताब में भजन के लिखेक वाला का लीख हे, “तोंय मोर बेटा हेकिस, आइज मोंय तोके जनम देई हों।” दूसरा ठाँव में परमेश्‍वर फिन उके कहलक, “जइसन मलिकिसिदक एगो पुरोहित रहे, तइसनेहें तोंय सोउब दिन लगिन पुरोहित बनल रहबे।” यीशु इ दुनिया केर जिंदगी जियेक केर बेरा में जे उके माउत से बचाएक पारत रहे, जोर से हकाय-हकाय के, आउर काइंद-काइंद के उकर से प्रार्थना आउर बिनती करलक आउर आदर केर संगे समर्पण केर चलते उकर सुनल गेलक। आउर जबकि यीशु परमेश्‍वर केर बेटा रहे, फिन भी उ, दुःख उठाय के परमेश्‍वर केर आगया मानेक सिखलक। आउर सिद्ध बाइन के, अपन आगया मानेक वाला सोउब आदमीमन ले जुग-जुग लगिन छुटकारा देवेक वाला बाइन गेलक। आउर जइसन मलिकिसिदक एगो पुरोहित रहे तइसनेहें यीशु के परमेश्‍वर बटले महापुरोहित केर पद मिललक। इकर बारे में हमरे के आउर ढेइर गोइठमन के बताएक अहे, मगर उमन केर बारे में खोइल-खोइल के बखाइन करेक कठिन अहे, काले कि तोहरे परमेश्‍वर केर बचन के सिखेक में कोढ़िया बाइन गेला। अब तक तो तोहरे के सिखाएक वाला बाइन जाएक रहे, मगर तोहरे के तो एइसन आदमी केर जरुरत अहे, जे तोहरेमन के परमेश्‍वर केर बचन केर शुरुवाती गोइठमन के सिखाओक। तोहरे तो छउवामन नियर अहा जेमन के दूध चाही ठोस आहार निहीं। काले कि दूध पीयेकवाला छउवामन के तो धरमी बनेक केर बचन केर समझ नी होवेला, काले कि उमन छउवा हेकैं। ठोस आहार उमन लगिन अहे, जेमन बचन केर पालन काइर के बिसवास में मजबूत होई जाय हैं, आउर अनुभव से भला-बुरा के चिन्हेक पारैना। इ लगिन आवा मसीह केर बारे में जे हमरे के पहिले सिखाल जाय हे, उ शुरु केर शिक्षा केर गोइठमन के घरी-घरी दोहराएक छोइड़ देवब। हमरे सिद्ध बनेक केर शिक्षामन उपरे धेयान करब, अब हमरे माउत बटे लेगेग वाला पाप काम करेक के छोड़ेक, आउर परमेश्‍वर में बिसवास करेक, आउर बपतिस्मा जल संस्कार लेवेक, आउर बिसवासीमन उपरे हाँथ रखेक, आउर मोरलमन केर जी उठेक आउर जुग-जुग केर दंड केर शिक्षा रुपी नेव के फिन से नी रखब। आउर अगर परमेश्‍वर मोका देवी तो हमरे पक्का शिक्षा के सिखाते रहब। काले कि जेमन अपन बिसवास से दूर होई जायना, उमन दोबारा पाप करेक छोइड़ के वापस घुरेक नी पारबैं, उमन एक बेर परमेश्‍वर केर सच्चाई के जानलैं आउर स्वरग से बरदान के पालैं, आउर उमन दोसरमन से एके संगे पवितर आत्मा के हों पालैं, आउर उमन परमेश्‍वर केर बेस संदेश के महसूस काइर चुइक हैं, उमन एहो महसूस काइर चुइक हैं कि परमेश्‍वर एक दिन शक्ति केर साथ राइज करी, अगर उमन भटइक जाबैं तो उमन के फिन से वापस लानेक केर कोनों उपाय नखे, काले कि उमन परमेश्‍वर केर बेटा के फिन से क्रूस उपरे चढ़ायना आउर खुइल के उकर अपमान करैना, आउर दोसरमन केर सामने मसीह के नीचा देखायना। जे आदमीमन बेस शिक्षा के पावैना उमन उ बेस खेत नियर अहैं जेकर में खूब पानी बरसेला, आउर हूवाँ से किसान लगिन बेस अन्न उपजेला आउर उ परमेश्‍वर से आशीष पावेला। मगर, दोसर आदमीमन उ खेत नियर अहैं जेकर में काँटा झूँड़ आउर घास फूस बढ़ेला जे बेकार अहे, उमन में परमेश्‍वर केर सराप आवेक केर खतरा अहे आउर उमन आइग से भसम होई जबैं। मगर हे मोर दुलार संगीमन, तोहरे भला काम कराथा काले कि परमेश्‍वर तोहरे के छुटकारा देई चुइक हे, से लगिन इ चेतावनीमन तोहर बारे में ना लगे। फिन भी हमरे तोहर बारे में इकर से बेस चीजमन आउर छुटकारा से जुड़ल आशीषमन लगिन भरसा करिला। काले कि परमेश्‍वर भला अहे, उ तोहरे जे काम काइर हा, आउर दोसर बिसवासीमन केर मदइत काइर के परमेश्‍वर के प्रेम देखाय हा उके नी भुलाई। आउर तोहरे एखनो तक उमन केर मदइत करते अहा उखो याइद करी। जब परमेश्‍वर अब्राहम से करार करत रहे, तो किरिया खाएक ले अपन से बड़का केखो नी पालक, तब उ अपनेहें नाँव से किरिया खाय के कहलक, “मोंय तोके सचमुच में आशीष देमूँ आउर तोर बंशमन के अनगिनइत बढ़ाय देमूँ।” अब्राहम ढेइर समय तक धीरज धारल केर पाछे करार केर फल पालक। आदमीमन तो अपन से केऊ बाड़ केर नाँव से किरिया खायना, उमन में किरिया खाय के गोइठ के पक्का करल जायला आउर झगरा मेइट जायला। इ लगिन परमेश्‍वर हों किरिया खालक, इकर से परमेश्‍वर आदमीमन के सफा-सफा इ देखाएक चाहत रहे कि जेमन से करार करल जाय हे, उमन लगिन करार के पक्का पूरा करी। तो फिन हिंयाँ दूई गो गोइठ अहे, उकर करार आउर किरिया जे कहियो नी बदली, जेकर बारे में परमेश्‍वर कहियो झूठ नी बोलेला। इ लगिन हमरे जे परमेश्‍वर ठिना अपन रक्षा करेक ले आय ही आउर जे आसरा उ हमरे के देई हे, उके ढेइर हें उत्साह केर साथ धाइर ही। आउर इ आसरा हमर जीउ लगिन उ डोरा नियर अहे जेकर से डोंगा के खूटी में बाँधल जायला आउर डोंगा बिलकुल स्थिर रहेला, सेहे नियर आसरा हमर जिंदगी के स्थिर राखेला, आउर जेकर में हमरे आसरा राखिला उ यीशु हेके, जे पवितर तंबू में परदा केर पिछे महा पवितर ठाँव में भीतरे परमेश्‍वर तक पोहोंचलक। जहाँ यीशु जइसन मलिकिसिदक एगो पुरोहित रहे, तइसनेहें जुग-जुग लगिन महापुरोहित बाइन के हमरे लगिन हमर से पहिले स्वरग में गेलक। इकर उपरे धेयान देवा कि मलिकिसिदक कइसन महान रहे जेके पुरखा अब्राहम लड़ाई में दुश्मनमन से जीत के लेवल सोउब चीजमन केर दसवाँ हिस्सा देलक। मूसा केर नियम सिखायला कि जे आदमीमन लेवी केर बंश आउर पुरोहित हेकैं उमन के दोसर इसराइली भाईमन से, उमन ठिना जे कोनों अहे उकर दसवाँ हिस्सा लेवेक केर अधिकार अहे, काले कि उमन सोउब अब्राहम केर बंश हेकैं। मगर मलिकिसिदक जे लेवी केर बंश केर हों नी रहे अब्राहम से दसवाँ हिस्सा लेलक, आउर जबकि अब्राहम जेके परमेश्‍वर करार काइर रहे फिन भी उके मलिकिसिदक आशीष देलक। हमरे पक्का जानिला कि जे आशीष देवेला उ आशीष पावेक वाला से बाड़ होवेला। आउर पुरोहितमन जेमन लेवी केर डाइर केर हेकैं उमन दसवाँ हिस्सा लेवैना, आउर एक दिन मोइर जायना, मगर मलिकिसिदक जे अब्राहम से दसवाँ हिस्सा लेलक, उकर बारे में पवितर किताब बतायला उ कहियो नी मोरी। जब अब्राहम मलिकिसिदक के दसवाँ हिस्सा देलक, तब तक लेवी अब्राहम केर परिवार में जनम नी लेई रहे, मगर फिन भी अब्राहम केर बंश होवेक केर चलते हमरे एहो कहेक पारिला कि लेवी खुद दसवाँ हिस्सा देलक। काले कि जे बेरा मलिकिसिदक उकर पुरखा अब्राहम से भेंट करलक, से बेरा लेवी अपन पुरखा अब्राहम केर काया में रहे। आदमीमन के पुरोहितमन केर रीति केर मोताबिक मूसा केर नियम देवल गेलक, मगर उ नियम आदमीमन के सिद्ध बनाएक नी पारलक। से लगिन एगो दूसर पुरोहित आवेक केर जरुरत पड़लक, जे पुरोहित हारून नियर ना होवोक मगर मलिकिसिदक नियर होवोक। काले कि जब पुरोहित केर पद बदलल जायला, तो मूसा केर नियम के हों बदलेक जरुरी अहे। हमरे मसीह केर बारे में इ कहिला, जे दोसर गोतर केर हेके, जे गोतर में से कहियो केऊ पुरोहित नियर बेदी ठिना सेवा नी काइर हैं। इके सोउब केऊ जानैना कि हमर प्रभु यीशु यहूदा गोतर केर बंश में जनइम हे, आउर मूसा यहूदा गोतर केर बंश केर बारे में पुरोहित बनेक लगिन कोनों नी कइह हे, आउर ना यहूदा गोतर केर बंश में से कहियो केऊ पुरोहित बाइन हैं। जे गोइठमन केर बारे में मोंय गोठियाथों उ बिलकुल सफा अहे कि मूसा केर नियम बदइल जाय हे, काले कि पहिलेहें से एगो दोसर पुरोहित अहे, आउर उ मलिकिसिदक नियर अहे। यीशु काया केर मोताबिक लेवी गोतर में जनम लेई के पुरोहित नी बाइन हे, मगर नाश नी होवेक वाला शक्ति केर चलते उ पुरोहित बाइन हे। काले कि उकर बारे में परमेश्‍वर पवितर किताब में गवाही देई हे कि तोंय मलिकिसिदक केर रीति केर मोताबिक जुग-जुग लगिन पुरोहित हेकिस। अब मूसा केर नियम कमजोर आउर बेकार होवेक केर चलते बदलाय गेलक। (इ लगिन कि मूसा केर नियम कोनों गोइठ के सिद्ध करेक नी पारलक) आउर उकर ठाँव में हमरे ठिना यीशु मसीह में एइसन बेस आसरा अहे, जेकर से हमरे परमेश्‍वर ठिना पोंहचेक पारिला। आउर इकर अलावा परमेश्‍वर मसीह के करार काइर के पुरोहित ठहराय हे। (काले कि लेवी केर बंशमन तो परमेश्‍वर केर बेगर करार करले पुरोहित ठहराल जाय रहैं, मगर यीशु परमेश्‍वर बटले किरिया खाय के ठहराल जाय हे, जेकर बारे में पवितर किताब में कहल जाय हे कि मोंय परमेश्‍वर किरिया खाय हों, आउर मोंय अपन फैसला से नी पसतामूँ कि तोंय जुग-जुग पुरोहित बनल रहबे) से लगिन यीशु मसीह हें अहे, जे हमरे के एगो सोउब से बेस करार केर गारांटी देवेला। आउर यीशु केर पुरोहित बनेक से आउरे फायदा अहे, उमन तो पुरोहित पद में लगातार बनल रहेक नी पारलैं बल्कि उ मनक ठाँव में दोसर पुरोहित बनते आलैं, काले कि उमन सोउब मोरते गेलैं। मगर यीशु जुग-जुग लगिन रही, आउर केऊ उकर पुरोहित केर पद के नी लेबैं। इ लगिन जेमन यीशु केर जरिया परमेश्‍वर ठिना आवैना, यीशु उमन के पूरा-पूरा बचाएक पारेला, काले कि उ उमन लगिन बिनती करेक ले जुग-जुग जिंदा अहे। एइसनेहें महापुरोहित हमरे केर जरुरत के पूरा करेक पारेला, जे पवितर अहे, बेगर दोष केर अहे, आउर शुद्ध अहे, आउर पापीमन केर असर से दूर रहेला, आउर सोउब से उपरे स्वरग तक ऊँचा उठाल जाय हे। आउर उ महा पुरोहितमन नियर जेमन हारून केर बंशमन हेकैं, यीशु के दरकार नखे कि रोज दिन पहिले अपन पापमन आउर फिन आदमीमन केर पापमन लगिन बलिदान चढ़ाओक, काले कि यीशु खुद के बलिदान चढ़ाय के एक हें बेर में निपटाय देलक। काले कि मूसा केर नियम तो कमजोर आदमीमन के महापुरोहित ठहरायला, मगर मूसा केर नियम केर पाछे परमेश्‍वर करार काइर के अपन बेटा के सिद्ध महापुरोहित केर रूप में जुग-जुग लगिन चुइन हे। अब जे गोइठमन हमरे कहाथी उमन में से सोउब से बाड़ गोइठ इ हेके कि हमरे केर एइसन महापुरोहित अहे, जे स्वरग में महिमा से भरल परमेश्‍वर केर सिंहासन केर भतखाइया आरा बाइठ हे। आउर हमर महापुरोहित स्वरग में सोउब से पवितर ठाँव आउर परमेश्‍वर केर सच्चा तंबू में सेवा करेला, जेके केऊ आदमी निहीं, बल्कि प्रभु ठड़ा काइर हे। एगो महापुरोहित के, पापमन केर क्षमा लगिन भेंट आउर बलिदान चढ़ाएक ले ठहराल जायला, इकर चलते जरुरी अहे कि महापुरोहित यीशु ठिना हों चढ़ाएक लगिन कोनों होवोक। आउर अगर मसीह धरती में होतक तो कहियो पुरोहित नी बनतक, इ लगिन कि इ धरती में मूसा केर नियम केर मोताबिक पुरोहितमन तो अहैं जेमन भेंट चढ़ायना। इ धरती केर पुरोहितमन जे काम के करैना उ तो स्वरग केर सिरिफ एगो नकल आउर नमूना हेके, मगर जे स्वरग में अहे उकर नियर नखे, से लगिन जब मूसा परमेश्‍वर केर तंबू के बनाएक ले तेयार रहे, तो परमेश्‍वर उके इ चेतावनी देलक, “देख, जे नमूना तोके पहार उपरे देखाल जाय रहे, उकरे मोताबिक सोउब कुछ के बनाबे।” मगर जे महापुरोहित केर काम यीशु मसीह के देवल जाय हे, उ दोसर पुरोहितमन के देवल काम से बाइढ़ के अहे, काले कि उ जे करार के मिलाएक वाला हेके, उ पुरना करार से बेस अहे आउर बेस-बेस करारमन से टिकल अहे। काले कि अगर पहिला करार निरदोष होतक तो दोसर करार केर जरुरत नी होतक। मगर परमेश्‍वर अपन आदमीमन में गलती पालक तो कहलक, “प्रभु कहेला देखा, उ दिन आवाथे कि मोंय इसराइली आदमीमन से आउर यहूदा केर घराना केर आदमीमन से नवाँ करार करमूँ। इ करार उ नियर नी होवी जइसन कि मोंय उ मनक पुरखामन केर संगे उ बेरा काइर रहों, जब मोंय उमन केर हाँथ धाइर के मिसर देस से निकलाय के लानलों। काले कि प्रभु कहेला उमन मोर करार उपरे बनल नी रहलैं, आउर मोंय उमन के छोइड़ देलों। फिन प्रभु कहेला कि जे करार मोंय आवेक वाला दिन में इसराइली आदमीमन केर संगे करमूँ, उ इ हेके कि मोंय अपन नियम के उमन केर मन में याइद दिवामूँ, आउर उके उमन केर दिल में लिखमूँ, आउर मोंय उ मनक परमेश्‍वर होमूँ आउर उमन मोर आदमी होबैं। आउर हरेक अपन देसवासी के आउर अपन रिश्तेदार के इ शिक्षा नी देवी कि तोके प्रभु के जानेक अहे, काले कि छोट आदमी से लेई के बाड़ आदमी तक सोउब मोके जाइन जबैं कि मोंय परमेश्‍वर हेकों। काले कि मोंय उमन केर दुष्ट काम करेक केर बावजूद हों उमन के दया करमूँ, आउर उ मनक पापमन के फिन याइद नी करमूँ।” परमेश्‍वर इके नवाँ करार कहलक, से लगिन उ पहिला करार के पुरना कहलक, आउर कोनोवें चीजमन जे पुरना आउर खिहाय जायला उ मिट जायला। पुरना करार में हों भक्ति करेक केर नियम रहे आउर भक्ति करेक केर तंबू हों रहे, जे आदमीमन केर बनाल रहे। इ तंबू के जानवर केर चमड़ा से बनाल जाय रहे आउर माझे में परदा लगाय के दूई गो कोठरी बनाल रहे, पहिला कोठरी में दीया रखेक वाला एगो खूँटा रहे आउर उकर में सात गो दीया रहे, आउर टेबुल में परमेश्‍वर के भेंट चढ़ाल रोटी हों रहे, इ कोठरी पवितर ठाँव कहात रहे। आउर तंबू में परदा केर पिछे दूसरा कोठरी रहे जे महा पवितर ठाँव कहात रहे। इ कोठरी में धूप जलाएक वाला सोना केर बेदी रहे, आउर बाहरे भीतरे चाइरो बटे सोना केर लेप लगाल बकसा रहे, जेके करार केर बकसा कहल जात रहे। इकर भीतरे तीन चीज रहे, पहिला सोना केर एगो डिबा रहे जेकर में खास किसिम केर खाएक केर चीज रहे, जेके मन्ना कहल जात रहे, इकर में हारून केर लाठी हों रहे जेकर में पतइ नोगइज जाय रहे, आउर तीसरा चीज दूई गो पखना केर चेपटा पाटी रहे जेकर में परमेश्‍वर दस आगयामन के लीख रहे, आउर मूसा के देई रहे। बकसा केर उपरे दूई गो डेना पसराल रूप में बनल रहे आउर उ तेज रोशनी से चमकत रहे, जेके करूब कहल जात रहे, जे इ चिन्हा केर रूप में रहे कि परमेश्‍वर उ ठाँव में रहत रहे। उ मनक पसराल डेनामन बकसा केर उपरे ढाँइप रहत रहैं, आउर जेकर उपरे लोहू के छिड़काल जात रहे, ताकि आदमी मनक पाप क्षमा होई जाओक। एखन हमरे इ गोइठमन केर बारे में खोइल-खोइल के गोठियाएक नी पारब। इ नियर तंबू केर दुइयो कोठरी में चीजमन के तेयार काइर के रखल जाय रहे, आउर तंबू केर पहिला कोठरी में पुरोहितमन रोज दिन आराधना केर नियम के पूरा करेक लगिन जात रहैं। मगर भीतरे केर कोठरी जे महा पवितर ठाँव रहे, हूवाँ महापुरोहित साल में एके बेर जात रहे, आउर जब भी उ भीतरे जात रहे तो अपन संगे जानवर केर लोहू लेई के जात रहे, आउर लोहू के अपन आउर इसराइली आदमीमन केर पापमन केर क्षमा लगिन परमेश्‍वर के चढ़ात रहे, जे पापमन के उमन अनजाने में करत रहैं। इ आराधना केर नियम केर जरिया से पवितर आत्मा हमरे के एहे देखायला कि जब तक इ धरती में तंबू केर पहिला कोठरी में आराधना नियममन के मानल जाई, तब तक स्वरग में परमेश्‍वर ठिना महा पवितर ठाँव में पोंहचेक केर डहर नी खुली। इकर से तो इ पता चाइल गेलक कि जानवरमन केर बलिदान जेके परमेश्‍वर लगिन चढ़ाल जायला, उकर में बलिदान चढ़ाएक वाला आदमीमन केर मन आउर हिरदय के सिद्ध करेक केर शक्ति नखे। काले कि उ नियममन सिरिफ आदमीमन केर खाएक, पियेक आउर कायनों रकम केर नहाएक केर रीतिमन केर बारे में बतायला, जेकर से आदमीमन बाहरे से सफा होवैना। इ आराधना केर नियममन तब तक लगिन मानल जाई, जब तक परमेश्‍वर अपन नवाँ करार के शुरु नी काइर देवी। मगर जब मसीह महापुरोहित बाइन के आलक, तो नवाँ करार केर बेस-बेस चीजमन के देवेला, उ बड़का आउर सिद्ध तंबू में ढूकलक, जे आदमी केर बनाल ना लगे आउर ना इ धरती केर हेके। मसीह स्वरग केर महा पवितर ठाँव में एके बेर ढूकलक, उ अपन लगिन बकरा आउर बछरुमन केर लोहू के लेई के नी ढूकलक, मगर खुद के बलिदान काइर के अपनेहें लोहू के लेई के भीतरे ढूकलक, आउर उ हमरे के जुग-जुग लगिन पाप से छुटकारा करलक। जब मूसा केर नियम केर मोताबिक जे आदमीमन अपवितर होई जाय हैं, उमन परमेश्‍वर केर आराधना करेक केर लायक नखैं, फिन भी अगर उमन केर उपरे बकरा आउर साँढ़मन केर लोहू के, बलिदान करल बछरु केर राख केर साथ छिड़काल जायला, तो उमन के पवितर मानल जायला। तो सोचा, मसीह केर लोहू आउर केतना बगरा हमरे के उ काममन से शुद्ध करी, जेकर सजा माउत हेके, ताकि हमरे जिंदा परमेश्‍वर केर आराधना करेक पारब। काले कि मसीह खुद के परमेश्‍वर लगिन जुग-जुग केर आत्मा केर शक्ति से सिद्ध बलिदान केर रूप में हमरे केर पापमन केर खातिर चढ़ाय देलक। एहे खातिर मसीह नवाँ करार केर मिलाएक वाला हेके, ताकि जेमन के परमेश्‍वर बटले बोलाल जाय हे उमन जुग-जुग केर आशीषमन के पाओक, जेकर करार परमेश्‍वर काइर हे। एइसन इ लगिन करेक परायला, काले कि मसीह उमन के, उ पापमन केर दंड से छुटकारा देवेक लगिन प्राण देलक, जे पापमन के उमन पहिला करार केर समय में काइर रहैं। हमरे जानिला कि अगर केऊ आदमी अपन सम्पति के अपन मोरेक केर पाछे केकरो अधिकार में होवोक कइह के लिखेला, तो उकर लिखल मोताबिक पूरा होवेक लगिन इ जरुरी अहे कि उकर माउत होवोक। काले कि जब तक सम्पति केर मालिक जिंदा रही, तब तक उ लिखल केर कोनों कीमत नखे, उकर कीमत तब हें होवेला जब लिखेक वाला मोइर जायला। सेहे लगिन पहिला करार हों तब हें पक्का होवेला जब कोनों जानवर केर लोहू छिड़काल जायला। जब मूसा आदमीमन के नियम केर हरेक आगयामन के सुनाय चुकलक, तो उ बछरुमन आउर बकरामन केर लोहू के लेई के पानी में मिलालक, आउर उ लाल रंग केर ऊन के जूफा गाँछ केर लाठी में बाँधलक आउर उके लोहू में डुबाय के, लोहू के नियम केर किताब में आउर सोउब आदमीमन में छिड़काय देलक। आउर आदमीमन से कहलक कि इ लोहू करार के पक्का काइर देवेला, जेके मानेक केर आगया परमेश्‍वर देई हे। आउर एहे रीति से मूसा तंबू आउर आराधना करेक केर सोउब सामान उपरे लोहू के छिड़कालक। आउर नियम केर मोताबिक सोउब चीजमन के लोहू से शुद्ध करल जायला, बेगर लोहू बोहाले परमेश्‍वर आदमीमन केर पापमन के क्षमा नी करेक पारी। इ लगिन तंबू आउर आराधना केर चीजमन के जे स्वरग केर चीजमन केर नमूना हेके, शुद्ध करेक ले जानवर के बलिदान करेक जरुरी अहे, मगर स्वरग केर असली चीजमन के शुद्ध करेक लगिन जानवरमन केर लोहू से हों आउर बढ़ियाँ बलिदान केर जरुरत अहे। काले कि मसीह आदमी केर बनाल पवितर ठाँव में नी ढूकलक, जे सिरिफ सच्चा पवितर ठाँव केर नमूना हेके, मगर उ हमरे केर फायदा लगिन स्वरग में हें ढूकलक, ताकि हमर लगिन अब परमेश्‍वर केर सामने ठड़ाओक। आउर हरेक आदमी लगिन एक दिन मोरेक आउर उकर पाछे उकर फैसला होवेक ठहराल अहे। ठीक ओहे नियर मसीह हों सोउब आदमीमन केर पापमन के उठाय लेवेक लगिन एक बेर बलिदान होलक। जब उ फिन से आवी तब उ पाप केर लगिन बलिदान होवेक ले निहीं, मगर जे उकर आसरा देखेला उके छुटकारा देवेक लगिन आवी। मूसा केर नियम केर पुरना रीति असली चीजमन ना लगे, मगर आवेक वाला बेस चीजमन केर सिरिफ छाँई हेके, जेके मसीह हमरेमन लगिन पूरा काइर हे। से लगिन आदमीमन मूसा केर नियम केर अधीन रइह के एक हें किसिम केर बलिदान हर साल चढ़ायना, मगर इ बलिदानमन कहियो उमन के सिद्ध बनाएक नी पारी। अगर मूसा केर नियम उमन के सिद्ध बनातक तो बलिदान चढ़ाएक बंद होई जातक, आउर आराधना करेक वालामन सचमुच में अपन पापमन से शुद्ध होई जातैं, आउर उमन अपन मन में पाप केर दोष महसूस नी करतैं। मगर उमन के हर साल पापमन केर याइद होते रहेला। काले कि साँढ़मन आउर बकरामन केर लोहू पापमन के क्षमा करेक हें नी पारी। तब मसीह परमेश्‍वर से कहलक देख, मोंय आय जाय हों, पवितर किताब में मोर बारे में लिखल अहे ताकि हे परमेश्‍वर तोर इच्छा के पूरा करमूँ। मूसा केर नियम सिखायला कि भेंट आउर बलिदान पाप केर चलते चढ़ाल जायला, मगर यीशु मसीह काले कहेला कि परमेश्‍वर उमन के नी चाहेला। बेदी केर भीरे सेवा करेक वाला पुरोहित रोज दिन एक हें नियर बलिदान के दोहराय-दोहराय के चढ़ायला, जे कहियो पाप के दूर करेक नी पारी। मगर यीशु मसीह तो पापमन केर क्षमा लगिन सोउब समय ले एक हें बेर खुद के बलिदान काइर के चढ़ाय देलक आउर परमेश्‍वर केर भतखाइया आरा बाइठ गेलक। आउर पवितर आत्मा हों हमरे के एहे गवाही देवेला, काले कि उ पहिले कइह रहे, कि प्रभु कहेला जे करार मोंय उ दिनमन केर पाछे उमन से करमूँ, उ इ हेके कि मोंय अपन नियममन के उमन केर मन में याइद दिवामूँ आउर उमन केर हिरदय में लिखमूँ। फिन परमेश्‍वर इ कहेला कि मोंय उमन केर पापमन के आउर उमन केर गुन्हा केर काममन के फिन कहियो याइद नी करमूँ। आउर जब परमेश्‍वर हमरे केर पापमन के क्षमा काइर देलक, तो अब बलिदान चढ़ाएक केर कोनों जरुरत नखे। से लगिन हे बिसवासी भाईमन, यीशु मसीह हमरे लगिन लोहू बहाय के अपन जिंदगी के बलिदान काइर देलक, सेकर चलते हमरे हिम्मत केर साथ स्वरग में महा पवितर ठाँव में ढूकेक पारिला। बलिदान केर रूप में मोरेक केर चलते, मसीह परदा से होई के स्वरग केर पवितर ठाँव में ढूकलक, आउर नवाँ डहर बनालक जेकर से हमरे जिंदगी पावब। हमरे ठिना एगो एइसन महापुरोहित अहे, जे परमेश्‍वर केर घर केर सोउब आदमीमन उपरे राइज करेला। तो आवा हमरे अपन मन के शुद्ध काइर के आउर मसीह केर लोहू के हिरदय में छिड़काय के, आउर सफा पानी से अपन काया के धोई के, सच्चा मन आउर पूरा बिसवास केर संगे परमेश्‍वर ठिना आवब। अब आवा हमरे जे आसरा केर बारे में कबूल काइर ही, उके बेगर शंका करले पोक्ता से धाइर रहब, काले कि परमेश्‍वर जे करार काइर हे उके पूरा करेक लगिन सच्चा अहे। आवा हमरे एक दोसर के प्रेम करेक लगिन उसकाते रहब आउर भला काममन के करते रहब। आउर परमेश्‍वर केर आराधना करेक लगिन एक दोसर केर संगे जमा होवेक नी छोड़ब, जइसन कि केतना बिसवासीमन करैना, मगर हमरे के एक दूसरा के उसकाएक आउर चेताएक अहे, खास काइर के अब जबकि यीशु मसीह केर दोबारा घूइर आवेक केर बेरा भीरे पोंहचाथे। हमरे के उ चीजमन के करेक जरुरी अहे, काले कि सच्चाई केर शुभ समाचार के जानल केर पाछे, हमरे जाइन बुइझ के पाप करते रहब, तो हमरे केर पापमन के दूर करेक लगिन आउर कोनों बलिदान बचल नखे। मगर उमन लगिन परमेश्‍वर केर भयानक न्याय आउर हिदकल आइग, जे उकर बिरोधीमन के नाश काइर देवेला, बचल अहे। जबकि मूसा केर नियम के नी मानेक वाला केऊ आदमी केर बिरोध में, दूई या तीन झन गवाही देवैना, तो उके बेगर दया करले माइर मोराल जायला। अगर मूसा केर नियम केर मोताबिक एइसन दंड अहे, तो उ आदमी केर दंड आउरे बगरा होवी जे परमेश्‍वर केर बेटा के घिरना करेला, काले कि उ परमेश्‍वर केर बेटा केर आदर नी करलक आउर उके अपन गोड़ से रवाइंद देलक। उ मसीह केर लोहू के अशुद्ध मानलक, जे लोहू से परमेश्‍वर उके पवितर करेक लगिन नवाँ करार के शुरु काइर हे, आउर उ पवितर आत्मा केर हों अपमान करलक जेकर जरिया से उ किरपा पाय रहे। उमन ढेइर कठोर दंड पाबैं, काले कि परमेश्‍वर इ कइह हे, “बदला लेवेक मोर काम हेके, मोंय हें बदला देमूँ।” आउर फिन एहो कइह हे, “प्रभु अपन आदमीमन केर फैसला करी।” जिंदा परमेश्‍वर केर हाँथ से दंड पावेक ढेइर भयानक अहे। पिछला दिनमन के याइद करा जब तोहरे सच्चाई के जानला, तब तोहरे ढेइर पीड़ामन के साइह के कठिन दुःख उठाला आउर स्थिर रहला। तोहर में से थोरेकमन के आदमीमन केर भीरे अपमान करल गेलक आउर सताल गेलक, आउर तोहरे थोरेकमन अपन इच्छा से उमन केर संगे शामिल होला जेमन केर अपमान करल गेलक आउर सताल गेलक। तोहरेमन कैदीमन केर दुःख में हों दुःखी होला, आउर अपन सम्पति के हों खुशी से लुटेक देला, काले कि तोहरे जानाला कि तोहरे ठिना एखनो उ चीजमन अहे, जेके देवेक केर परमेश्‍वर करार काइर हे, उ चीजमन इ दुनिया केर सम्पति से बगरा बढ़ियाँ अहे आउर जुग-जुग लगिन अहे। से लगिन बिसवास करेक ना छोड़ा ताकि तोहरे परमेश्‍वर से बड़का इनाम के पाबा। तोहरे के लगातार बिसवास में धीरज से आसरा देखते रहेक चाही, तब तोहरे परमेश्‍वर केर इच्छा के पूरा करेक पारबा, आउर तोहरे उ सोउब के पाबा जेकर करार परमेश्‍वर तोहरे से काइर हे। काले कि पवितर किताब में लिखल अहे, “परमेश्‍वर कहेला, अब ढेइर थोर समय बाइच हे कि आवेक वाला आवी आउर देरी नी करी। आउर जे आदमी के मोंय धरमी बनाय हों उ बिसवास से जिंदा रही, मगर उ मोर उपरे बिसवास करेक छोइड़ देवी, तो मोंय सचमुच में उकर से खुश नी होमूँ।” मगर हमरे उमन में से ना लगी, जेमन परमेश्‍वर से पिछे घूइर जायना आउर नाश होई जायना, मगर हमरे उमन में से हेकी, जेमन बिसवास करैना आउर अपन जीउ के बचाय लेई हैं। बिसवास उ चीजमन केर आसरा करेक हेके कि हमरे के उ चीजमन पक्का मिल जाई, जेके पावेक केर हमरे भरसा करिला, आउर इ भरसा करेक कि जे चीजमन के हमरे देखेक नी पारिला, उ चीजमन सचमुच में अहे। हमरे केर पुरखामन केर बिसवास एहे नियर रहे, जेकर चलते परमेश्‍वर उमन से खुश होलक। बिसवास से हें हमरे जाइन जाइला कि गोटा दुनिया केर सिरजन परमेश्‍वर केर बचन से होई हे। जे चीजमन के हमरे देखिला उमन के बनाएक लगिन परमेश्‍वर उ चीजमन के इस्तेमाल करेला जेके हमरे नी देखिला। बिसवास से हें आदम केर बेटा हाबील अपन भाई कैन से बढ़ियाँ बलिदान परमेश्‍वर लगिन चढ़ालक, आउर उकर बलिदान केर जरिया से परमेश्‍वर उके जाँचलक कि हाबील धरमी आदमी हेके। काले कि परमेश्‍वर उकर बलिदान से खुश होलक, जबकि हाबील मोइर गेलक, फिन भी हमरे उकर से परमेश्‍वर उपरे भरसा करेक सिखीला। बिसवास हें से हनोक नाँव केर आदमी जिंदा स्वरग में उठाय लेवल गेलक, आउर माउत का हेके सेके नी जानलक। केऊ उके नी पालैं काले कि परमेश्‍वर उके उठाय लेई रहे, आउर उकर उठाल जाएक से पहिले उकर इ गवाही देवल जाय रहे कि उ परमेश्‍वर के खुश काइर हे। सिरिफ बिसवास काइर के हें परमेश्‍वर के खुश करल जायला, काले कि परमेश्‍वर ठिना आवेक वालामन के बिसवास करेक चाही कि उ अहे, आउर जेमन उके सच्चाई से खोजैना उमन के उ इनाम देवेला। बिसवास से हें नूह, जब परमेश्‍वर उके बाइढ़ पानी आवेक केर चेतावनी देलक, तो उ बाइढ़ पानी कहियो नी देइख रहे फिन भी आगया माइन के अपन परिवार के बचाएक लगिन जहाज बनालक। नूह केर बिसवास करेक से पहिले बाकी दुनिया केर आदमीमन जेमन बिसवास नी करलैं उमन दोषी ठहरलैं, आउर पानी में बोहाय के मोइर गेलैं, मगर नूह केर बारे में परमेश्‍वर कहलक कि उ धरमी रहे, काले कि उ परमेश्‍वर उपरे भरसा करलक। बिसवास से हें, जब अब्राहम के परमेश्‍वर एगो ठाँव में जाएक लगिन बोलालक, तो आगया माइन के एइसन ठाँव में जाएक ले निकइल गेलक, जेके परमेश्‍वर उके उकर नीज सम्पति केर रूप में देवेक वाला रहे। आउर उके कहाँ जाएक अहे, इकर पता हों नी रहे फिन भी उ जाएक लगिन निकइल गेलक। आउर उ बिसवास से हें, उ देस में जेकर बारे में परमेश्‍वर करार काइर रहे, परदेसी नियर तंबू में रहलक, उकर अलावा उकर बेटा इसहाक आउर नाती याकूब हों, जेमन से परमेश्‍वर उकरे नियर करार काइर रहे, तंबूमन में रहलैं। काले कि अब्राहम उ नगर में रहेक लगिन जे जुग-जुग ले बनल रही, आसरा देखत रहे, जेके सिरजाएक वाला आउर बनाएक वाला परमेश्‍वर हेके। बिसवास से सारा खुद बुढ़िया होई के हों गर्भवती होवेक केर शक्ति पालक, काले कि उके पक्का भरसा रहे कि परमेश्‍वर जे करार काइर हे उके पूरा करी। अब्राहम एतइ बूढ़ा रहे कि उ मोरेक वाला रहे, मगर उ आकाश केर तइरगनमन आउर समुदर किनारे केर बालू नियर अनगिनइत बंश जनमालक। इ सोउब आदमीमन जेमन परमेश्‍वर उपरे बिसवास काइर रहैं, परमेश्‍वर केर करार करल चीजमन के बेगर पाले मोइर गेलैं, मगर उमन दूर हें से अपन मन में देइख के खुश होलैं, आउर बुइझ गेलैं कि उमन इ धरती में परदेसी आउर बाहरी हेकैं। उमन एइसन गोइठ गोठियायना जेकर से पता चलेला कि उमन एइसन देस केर अधिकारी होवेक केर आसरा में अहैं, जे उमन केर अपन होवी। आउर उ देस जहाँ से उमन निकइल के आय रहैं, अगर उकर चिंता करतैं तो उमन घूइर जातैं। मगर उमन एगो बढ़ियाँ मतलब स्वरग देस केर आसरा में अहैं, से लगिन परमेश्‍वर उ मनक परमेश्‍वर कहाएक से खुश होवेला, काले कि उ उमन लगिन एगो नगर बनाय हे। परमेश्‍वर उपरे बिसवास करेक केर चलते इसहाक अपन दुइयो बेटा याकूब आउर एसाव के, आवेक वाला समय में उमन के मिलेक वाला आशीष केर बारे में गोठियाय के आशीष देलक। बिसवास करेक केर चलते याकूब मोरेक बेरा यूसुफ केर दुयो बेटामन में से एक-एक के आशीष देलक, आउर अपन लाठी केर सहारा लेई के आउर निहइर के परमेश्‍वर केर आराधना करलक। बिसवास से हें यूसुफ, जब उ मोरेक जइसन रहे, तो कहलक कि इसराइली आदमीमन मिसर देस के छोइड़ देबैं, आउर उ उमन के आगया देलक कि जब उमन मिसर देस से निकलबैं, तो उकर हड्डी के हों लेते जाबैं। बिसवास से हें मूसा केर आयो-आबा उकर जनम केर पाछे, तीन महिना तक उके लुकाय के रखलैं, काले कि उमन देखलैं कि उ साधारण छउवा ना लगे, आउर उमन मिसर देस केर राजा केर आगया से नी डरालैं। मिसर देस केर राजा फिरौन केर बेटी मूसा के पोइस बढ़ाय रहे, जब मूसा बाइढ़ गेलक, तो उ परमेश्‍वर उपरे बिसवास करेक केर चलते नी चाहलक कि आदमीमन उके रानी केर बेटा कहोक। उ पाप केर खुशी में थोरेक दिन सुख भोगेग केर बदली, परमेश्‍वर केर आदमीमन संगे दुःख भोगेग के बगरा पतियालक। आउर मसीह केर चलते बेइज्जत होवेक के मिसर देस केर भण्डार से बाड़ धन समझलक, काले कि उ अपन इनाम पावेक केर आसरा देखत रहे। बिसवास करेक केर चलते मूसा राजा केर खीस से नी डराय के मिसर देस के छोइड़ देलक, काले कि उ बुइझ जाय रहे, जइसन कि अनदिस्तार परमेश्‍वर के देइख रहे। बिसवास से हें उ इसराइली आदमीमन के फसह परब मनाएक केर, आउर दुरा केर चौखट में मेमना केर लोहू छिड़काएक केर आगया देलक। ताकि पहिलौठा बेटा के मारेक वाला दूत, इसराइलीमन केर जनमाल पहिलौठा बेटा के माइर ना देवोक। बिसवास करेक केर चलते इसराइली आदमीमन लाल समुदर के एइसन पार करलैं, जइसन सुखल भूंई उपरे चलैना, आउर जब मिसरी आदमीमन तइसनेहें पार करेक चाहलैं, तो सोउब डूइब मोरलैं, काले कि समुदर केर पानी उमन केर उपरे आलक आउर डुबाय देलक। बिसवास करेक से हें उमन यरीहो शहर के घेरा करल दिवाल के सात दिन तक घुमरलैं, तब दिवाल गिर गेलक। बिसवास से हें राहाब बेश्या परमेश्‍वर केर आगया नी मानेक वालामन केर संगे नाश नी होलक, उ इसराइली भेद लेवाइयामन केर स्वागत काइर रहे, जेमन चुपे-चुपे यरीहो नगर के देखेक आय रहैं। अब आउर बताएक केर मोके जरुरत नखे, काले कि मोर ठिना समय नखे कि मोंय गिदोन केर, बाराक केर, शिमशोन केर आउर यिफताह केर जेमन इसराइलीमन केर न्याय करेक वाला रहैं, आउर दाऊद राजा केर, आउर परमेश्‍वर केर संदेश के बताएक वालामन केर, आउर शमूएल केर बखाइन करमूँ। इमन बिसवास करेक केर चलते राइज जितलैं, धरमी बनेक केर काम करलैं, करार करल चीजमन के पालैं, बाघ उमन के नी खालक। आइग नी पोड़ालक, तलवाइर काटेक नी पारलक, उमन कमजोर रहैं मगर बलवान होई गेलैं, लड़ाई में बीर निकलैं, उमन दुश्मनमन केर फौजमन के कुदाय देलैं। थोरेक जनानामन अपन आदमीमन के जेमन के माइर मोराल जाय रहे फिन से जिंदा पालैं, आउर केतनामन तो माउर खाते-खाते मोइर गेलैं। उमन माउत से बचेक लगिन परमेश्‍वर उपरे बिसवास करेक नी छोड़लैं, ताकि उमन मोरल पाछे आउर बढ़ियाँ जिंदगी के पाबैं। थोरेक आदमीमन तो हँसी-मजाक में उड़ाल जाएक आउर कोड़रा खाएक बल्कि बाँधल जाएक, आउर जेहेल जाएक से परखल गेलैं। बिसवास करेक केर चलते थोरेक आदमीमन के पखना से माइर के मोराल गेलक, उमन के आरी से चीर के दूई फारा काइर देवल गेलक, तलवाइर से काइट के मोराल गेलक, उमन गरीब रहैं, उमन के दुःख देवल गेलक आउर उमन संगे बुरा ब्यवहार करल गेलक। उमन भेड़ीमन आउर छगरीमन केर चमड़ा के ओइढ़ के हिने-हुने भटइक फिरलैं। आउर बानमन, पहारमन, खोहमन, आउर दुनिया केर दरारमन में भटइक फिरलैं, इ भला आदमीमन केर लायक इ दुनिया नखे। इमन केर बिसवास केर चलते परमेश्‍वर इमन से ढेइर खुश अहे, फिन भी उमन परमेश्‍वर केर करार करल चीज के नी पाय हैं। काले कि परमेश्‍वर ठिना ना सिरिफ उमन लगिन, मगर हमर लगिन हों बढ़ियाँ योजना अहे, परमेश्‍वर उमन के हमरे केर संगे सिद्ध बनाएक चाहेला। से लगिन जबकि ढेइर आदमीमन केर जिंदगी से बिसवास केर गवाही मिल हे, जे एगो बड़का भीड़ नियर हमर चाइरो आरा अहे, तो आवा हमरे हरेक रोकेक वाला चीज, आउर फँसाएक वाला पाप के दूर काइर के, उ डहर में धीरज से चलब जेकर में हमरे के चलेक अहे। आउर बिसवास के सिरजाएक वाला आउर सिद्ध करेक वाला यीशु बटे धेयान लगाय रहब। जे उ खुशी केर लगिन, जे उके आवेक वाला दिन में मिलेक वाला रहे, लाज केर कोनों फिकिर नी काइर के क्रूस उपरे दुःख साइह के मोरलक आउर सिंहासन में परमेश्‍वर केर भतखाइया आरा बाइठ गेलक। इ लगिन उकर नमूना उपरे धेयान देवा जे पापीमन केर एइसन बिरोध इ लगिन सहलक कि तोहर मन निराश होई के हार ना माइन जाओक। तोहरेमन केर दुष्ट शक्ति से लड़ेक बेरा एइसन मुठभेड़ नी होई हे कि तोहरे केर लोहू बोइह हे। का तोहरे बिसवास में उसकाएक वाला परमेश्‍वर केर गोइठमन के, जेके तोहरे के उकर संतानमन नियर देवल जाय हे भुलाय गेला। जब प्रभु तोहरे के इ देखाई कि तोहरे गलती कराथा, तो उकर उपरे ढेइर धेयान देबा, आउर जब उ तोहरे के घुड़की तो हिम्मत ना छोइड़ देबा। काले कि प्रभु जेकर से प्रेम करेला उके ताड़ना हों देवेला, आउर जेके अपन संतान बनाय लेवेला, उके कोड़रा हों मारेला। तोहरेमन दुःख के आबा केर ताड़ना समइझ के साइह लेवा, परमेश्‍वर तोहरे के अपन संतान जाइन के तोहर संगे एइसन ब्यवहार करेला, कोन एइसन बाप हेके, जब उकर बेटा गलती करेला तो उके ताड़ना नी देवेला? अगर उ ताड़ना जेकर भागी सोउब होवैना, तोहरे केर नी होलक, तो तोहरेमन बेटा ना लगा, मगर ब्यभिचार केर संतान ठहरला। फिन जबकि हमर धरती केर आबा हों हमरे केर ताड़ना करत रहे आउर हमरे उकर आदर करली, तो हमरे के अपन स्वरग केर आबा केर आउर हें बगरा आदर करेक केर जरुरत अहे, ताकि हमरे जुग-जुग केर जिंदगी पावब। इ धरती केर हमर आबामन के, जइसन बेस बुझालक तइसन उमन थोरेक दिनमन लगिन ताड़ना करत रहैं, मगर परमेश्‍वर हमरे केर भलाई लगिन ताड़ना करेला, ताकि हमरे हों उकर नियर पवितर बाइन जाब। जे बेरा ताड़ना मिलेला, उ बेरा बेस नी लगेला बल्कि दुःख लगेला, मगर पाछे जेमन उकर से शिक्षा पावैना उमन के शांति मिलेला, काले कि उमन सही तरीका से जिंदगी जियेक शुरु करैना। से लगिन अपन ढीलंग हाँथ के उपरे उठावा आउर कमजोर ठेहुना के मजबूत करा। आउर हिने-हुने देखेक छोइड़ के तोहरे सीधा डहर हिंठा, जे यीशु केर भीरे पोहोंचायला, ताकि हमर में से जेमन आत्मिक जिंदगी में कमजोर अहैं, उमन भटइक ना जाओक बल्कि उमन केर बिसवास मजबूत होवोक। सोउब से मेल-जोल रखा आउर पवितर जिंदगी जियेक केर कोशिश करा, काले कि बेगर पवितर जिंदगी जिले केऊ परमेश्‍वर के देखेक नी पारबैं। आउर सावधान रहा, एइसन ना होवोक कि केऊ परमेश्‍वर केर किरपा से अलग होई जाओक, आउर तोहरे के दुःख देवेक वाला ना बाइन जाओक। काले कि एइसन आदमी ढेइर आदमीमन केर जिंदगी के नाश करेक पारेला। आउर ना केऊ ब्यभिचारी, या तोहर में से केऊ अब्राहम केर नाती एसाव नियर अधरमी ना होवोक, जे एक बेर केर खाएक केर बदली में, पहिलौठा होवेक केर अपन हक के बेइच देलक। तोहरेमन जानाला कि बेचल पाछे जब उ अपन आबा से आशीष पावेक खोजलक, तो उ आशीष पावेक केर लायक नी रहलक, आउर जबकि उ काइंद-काइंद के आशीष माँगलक, फिन भी उ जे पहिले काइर चुइक रहे, उके बदलेक लगिन कोनों करेक नी पारलक। तोहरेमन तो उ असली पहार ठिना नी आय हा, जहाँ धधकते आइग, बदरी केर करिया घटा, गुलगुल अंधार, आउर आँधी रहे, जइसन कि इसराइली आदमीमन सिनाई पहार ठिना देइख रहैं, जब परमेश्‍वर उमन के अपन नियम के देलक। आउर उमन तुरही केर बाजेक आउर परमेश्‍वर केर गोठियाएक केर आवाज के सुनलैं, तो उमन डराय गेलैं आउर मूसा से बिनती करलैं, अब हमरे परमेश्‍वर केर एइसन गोइठ के सुनेक नी पारब। उमन एइसन इ लगिन कहलैं कि परमेश्‍वर केर इ आगया के जेके उमन के सुनाल गेलक, “अगर कोनों जानवर हों पहार के छुवी, तो उके पखना से कूइच के मोराल जाओक।” इके सहेक नी पारलैं। हिंयाँ तक कि मूसा हों कहलक, “इ दर्शन एइसन डरडरा अहे कि मोंय ढेइर डरावना आउर थरथरावना हों।” मगर तोहरेमन सिय्योन पहार ठिना आय हा, जहाँ स्वरग केर यरुशलेम अहे, आउर जे जिंदा परमेश्‍वर केर नगर हेके, जहाँ लाखो स्वरगदूतमन खुशी मनायना। तोहरेमन परमेश्‍वर केर पहिलौठा संतानमन केर सभा आउर कलीसिया में आय हा, जेमन केर नाँव स्वरग में लिखल अहे, उमन स्वरग में धरमी केर आत्मा हेकैं, आउर अब उमन के सिद्ध बनाल जाय हे, तोहरेमन हों खुद परमेश्‍वर ठिना आय हा, जे सोउब कुछ केर फैसला करेक वाला हाकिम हेके। तोहरेमन यीशु ठिना आय हा, जे नवाँ करार में परमेश्‍वर से आदमीमन के मिलाएक लगिन बलिदान होलक आउर अपन लोहू से आदमीमन केर पाप के क्षमा करलक, यीशु केर लोहू हाबील केर लोहू नियर न्याय करेक केर माँग करेक वाला निहीं, बल्कि पाप क्षमा केर बारे में बतायला। सावधान रहा, आउर परमेश्‍वर जे तोहरे से गोठियाथे उके सुना, काले कि इसराइली आदमीमन जब मूसा उमन के चेतालक, तो उमन नी सुनलैं आउर परमेश्‍वर केर दंड के पालैं, तो इ हमरे लगिन आउर हें बगरा बुरा होवी, अगर हमरे स्वरग से परमेश्‍वर केर चेतावनी के सुनेक से इनकार काइर देवब। जब परमेश्‍वर सिनाई पहार से गोठियालक तो उकर शबद धरती के हिलाय देलक, मगर अब उ इ करार काइर हे, “मोंय एक बेर फिन ना सिरिफ धरती के मगर आकाश के हों हिलामूँ।” आउर इ गोइठ, “एक बेर फिन” इके देखायला कि जे चीजमन सिरजाल जाय हे, उ हिलाल जाई आउर हटाय देवल जाई, ताकि जे चीजमन हिलाल नी जाई उमन अटल बनल रही। जे राइज हमरे के मिल हे, उके केऊ हिलाएक नी पारबैं, से लगिन आवा हमरे परमेश्‍वर के धन्यबाद देवब, आउर भक्ति, आउर डार समेत, परमेश्‍वर केर एइसन आराधना करब जेकर से उ खुश होवेला। काले कि हमरे केर परमेश्‍वर भसम करेक वाला आइग नियर अहे। भाई-बहिन नियर एक दोसर से प्रेम करते रहा। गोतियामन केर सेवा-सुसइर करेक ना छोड़बा, काले कि एइसन काइर के केतना आदमीमन अनजाने में स्वरगदूतमन केर सेवा-सुसइर काइर हैं। कैदीमन केर साथ एइसन ब्यवहार करा कि उमन के एइसन महसूस होवोक, जइसन कि तोहरे हों कैद में अहा, आउर जेमन सताल जायना उमन केर संगे एइसन रहा, जइसन कि तोहरे हों अपन काया में उमन केर बथा के महसूस कराथा। बिहा केर आदर करा, आउर बिहाउ जनाना आउर मरद तोहरे एक दोसर लगिन बिसवास लायक बनल रहा, काले कि परमेश्‍वर ब्यभिचारीमन केर आउर दोसर जनानामन से रिश्ता बनाएक वालामन केर न्याय करी। तोहरे के धन केर लोभ नी करेक चाही, तोहरे ठिना जे कोनों अहे उकरे में संतोष रहा, काले कि परमेश्‍वर खुद कइह हे “मोंय तोके कहियो नी छोड़मूँ, आउर ना कहियो ठोकरामूँ।” इ लगिन हमरे निडर होई के कहिला कि प्रभु मोर मदइतगार हेके, मोंय नी डरामूँ, आदमीमन मोके का करेक पारबैं। जेमन तोहर अगुवा रहैं, आउर जेमन तोहरेमन के परमेश्‍वर केर बचन सुनाय हैं, उमन के याइद करा आउर उ मनक चाइल-चलन के धेयान से देखा कि उमन कइसन जिंदगी जिलैं आउर मोरलैं। आउर उमन केर बिसवास देइख के तोहरे हों उमन नियर परमेश्‍वर उपरे बिसवास करा। यीशु मसीह काइल आउर आइज आउर जुग-जुग लगिन एक जइसन अहे, उ कहियो नी बदलेला। से लगिन रकम-रकम केर आउर अजीब उपदेसमन से ना भरमाय देवल जबा, काले कि तोहरे केर मन लगिन इ भला होवी कि तोहरे परमेश्‍वर केर किरपा से मजबूत बनल रहा, ना कि खाएक केर नियममन के माइन के, जेके माइन के केकरो फायदा नी होलक। हमरे ठिना एक एइसन बेदी अहे, जेकर में से खाएक केर अधिकार तंबू में सेवा करेक वाला पुरोहित के नखे। पहिला करार केर मोताबिक हर साल जे जानवरमन केर लोहू के महापुरोहित पाप बलि केर लगिन, महा पवितर ठाँव में लेई जायला, उ जानवरमन केर काया तंबू केर बाहरे पोड़ाल जायला। इकरे चलते यीशु हों आदमीमन के अपनेहें लोहू से पवितर करेक लगिन यरुशलेम शहर केर बाहरे दुःख उठालक आउर प्राण देलक। से लगिन आवा, हमरे बलिदान चढ़ाएक केर यहूदी नियम के छोइड़ के यीशु उपरे बिसवास करब आउर उकर निंदा के अपन उपरे उठाब। आउर छावनी केर बाहरे निकइल जाब। काले कि हिंयाँ इ धरती में हमरे केर सोउब दिन लगिन रहेक केर घर नखे, बल्कि हमरे के मिलेक वाला एगो नवाँ घर केर खोज में हमरे अही। इ लगिन आवा, हमरे यीशु मसीह केर द्वारा अपन होंठ से लगातार परमेश्‍वर केर स्तुति करब, एहे हमरे केर उकर लगिन बलिदान हेके। मगर भलाई करेक आउर जे कोनों तोहर ठिना अहे, उके उमन के देवेक लगिन पिछे ना रहबा, जेमन के जरुरत अहे, एक दूसरा केर मदइत करेक ना भुलाबा, काले कि परमेश्‍वर एइसन बलिदानमन से खुश होवेला। अपन आत्मिक अगुवामन केर गोइठमन के माना आउर उमन जे कहैना उके करा, काले कि उमन तोहरे के धेयान से देखैना ताकि तोहरे भटइक ना जबा, आउर उमन के अपन सेवा केर बारे में परमेश्‍वर ठिना हिसाब देवेक पड़ी, आउर इ काम के उमन उदास होई के निहीं, बल्कि खुशी से करोक, काले कि उदास होई के करेक वालामन के कोनों फायदा नी होवी। हमरे लगिन प्रार्थना करते रहा, काले कि हमरे पक्का जानिला कि हमरे केर बिवेक शुद्ध अहे, आउर हमरे सोउब काममन में जेके हमरे करिला, परमेश्‍वर के आदर देवेक चाहिला। आउर प्रार्थना करेक लगिन मोंय तोहरेमन के आउर हें समझावना, ताकि मोंय तोहर ठिना तुरते फिन से आवेक पारमूँ। हे बिसवासी भाईमन, मोंय तोहरे से बिनती करोना कि इ संदेश के धीरज से सुना, जेके मोंय तोहरे के उसकाएक लगिन लीख हों। तोहरेमन इ जाइन लेवा कि तीमुथियुस हमर बिसवासी भाई जेहेल से छूइट जाय हे, आउर अगर उ जल्दी आय जाई तो मोंय उके संगे लेई के तोहर से भेंट करमूँ। अपन सोउब अगुवामन आउर सोउब परमेश्‍वर केर आदमीमन के जोहार करा। इटली शहर केर बिसवासीमन तोहरे के जोहार कहैना। तोहरे सोउबमन केर उपरे परमेश्‍वर केर किरपा होते रहोक। आमीन। इ चिट्ठी मोंय याकूब बटले हेके, मोंय परमेश्‍वर आउर प्रभु यीशु मसीह केर सेवक हेकों। इ चिट्ठी के मोंय उ बारह गोतरमन केर नाँव से लिखाथों, जेमन गोटा दुनिया में तितिर-बितिर होई के रहैना। मोर बटले तोहरेमन के जोहार। हे मोर भाईमन, जब तोहरेमन में रकम-रकम केर बिपइत आवी, तब तोहरे इके ढेइर खुशी केर गोइठ समझबा। काले कि तोहरेमन जानाला कि जब तोहर बिसवास परखल जायला, तो तोहर धीरज बढ़ते जायला। आउर धीरज के अपन पूरा काम करेक देवा कि तोहरेमन पोक्ता आउर सिद्ध होई जबा, आउर तोहर में कोनों गोइठ केर घटी ना रहोक। अगर तोहर में से केखो बुद्धि केर घटी अहे, तो परमेश्‍वर से प्रार्थना करा आउर उ तोहरे के बुद्धि देवी। उ बेगर दोष लगाले सोउब के खुला मन से देवेला। जब तोहरे परमेश्‍वर से माँगाला तो बिसवास से आउर बेगर शंका करले माँगा। काले कि जे शंका करेला उ समुदर केर लहरा लेखे बदलते रहेला, जे हवा से बहेला आउर उछलेला। एइसन आदमी इ ना समझोक कि मोके प्रभु से कोनों मिली। उ आदमी दूई गो बिचार वाला हेके, उ अपन गोइठमन में टिकल नी रहेला। उ बिसवासी भाई जे गरीब अहे उके खुश होवेक चाही, काले कि उ परमेश्‍वर केर लगिन खास हेके। जे धनी अहे उके हों खुश होवेक चाही कि परमेश्‍वर उके नरम काइर हे। काले कि धनी आदमी जंगली घास केर फूल नियर नाश होई जाई। बेइर उगते हें कड़कड़ राउद सेकेला आउर घास के सुखाय देवेला, आउर उकर फूल झाइर जायला, आउर उकर शोभा मिट जायला। ओहे लेखे धनवान हों अपन डहर में चलते-चलते धूर में मिल जाई। धाइन अहे उ आदमी, जे परीक्षा में स्थिर रहेला, काले कि उ खरा निकइल के जिंदगी केर उ मुकुट के पावी, जेकर करार प्रभु अपन प्रेम करइयामन से काइर हे। जब केऊ पाप करेक लगिन लोभायला, तो उ इ ना कहोक कि मोके परमेश्‍वर बटले लोभवाल जायला। काले कि ना तो बुरा गोइठमन से परमेश्‍वर के केऊ लोभवाएक पारेला, आउर ना परमेश्‍वर खुद केखो लोभवायला। मगर हरेक आदमी अपनेहें मन केर बुरा इच्छा से खिंचाय के आउर फाँइस के लोभाय जायला। फिन मन केर बुरा इच्छा गर्भवती होई के पाप के जनम देवेला आउर पाप जब बाइढ़ जायला, तो मौत के जनम देवेला। हे मोर दुलार भाईमन, धोखा ना खावा। काले कि हरेक बेस बरदान आउर हरेक बेस दान परमेश्‍वर केर बटे से हें मिलेला, जे आकाश में सूरज, चाँद, आउर तइरगनमन के बनाय हे। परमेश्‍वर हमेशा एक जइसन रहेला आउर उ छाँई नियर नी बदलेला। उ अपनेहें इच्छा से हमरे के सच्चाई केर बचन से अपन संतान बनाय हे, ताकि हमरे उकर सिरजाल चीजमन में से एक रकम केर पहिला फार नियर होवब। हे मोर दुलारा भाईमन, इ गोइठ के जाइन लेवा कि हरेक आदमी सुनेक लगिन आगे, आउर बोलेक में धीरज धारेक वाला, आउर खिसाएक में धीरे होवोक। काले कि जब केऊ आदमी खिसायला, तो उ धरमी बनेक केर जिंदगी बिताएक नी पारी जइसन परमेश्‍वर चाहेला। इ लगिन समूचा गंदा चाइल-चलन आउर समूचा बुराई के दूर काइर के, उ बचन के नरम बाइन के ग्रहण काइर लेवा, जे तोहर दिल में बुनल जाय हे आउर जे तोहर जीउ के बचाएक पारेला। मगर बचन में चलेक वाला बना, आउर सिरिफ सुनेक वाला भइर निहीं जे खुद के धोखा देवेला। काले कि जे केऊ सिरिफ बचन के सुनेक वाला हेके, आउर उकर में चलेक वाला निहीं, तो उ एइसन आदमी नियर अहे जे अपन खुद केर मुँह आयना में देखेला। आउर खुद के देखेक केर पाछे चाइल जायला आउर भुलाय जायला कि मोंय कइसन रहों। जे आदमी परमेश्‍वर केर सिद्ध बचन के धेयान से मनन करेला, जे कि आदमीमन के पाप से छुटकारा देवेला, उ आदमी अपन काम में इ लगिन आशीष पावी कि उ सुइन के नी भुलायला, मगर उकरे लेखे काम करेला। अगर केऊ खुद के परमेश्‍वर केर भक्त समझेला, आउर अपन जीभ के बुरा गोइठ गोठियाएक से नी रोकेला, तो उ खुद के धोखा देवेला आउर उकर भक्ति बेकार अहे। हमर आबा परमेश्‍वर केर नजइर में शुद्ध आउर सच्चा भक्ति इ हेके कि अनाथमन आउर बिधवामन केर दुःखमन में उ मनक खेयाल रखेक, आउर खुद के इ दुनिया केर बुरा काममन से बचाय के रखेक। हे मोर भाईमन, तोहरेमन हमर महिमा से भरल प्रभु यीशु मसीह केर चेलामन हेका से लगिन तोहर माझे भेद भाव ना होवोक। माइन लेवा तोहरे केर सभा में एगो आदमी सोना केर अंगठी आउर किमती लुगा पिंध के आवी, आउर एगो गरीब हों पुरना फटल लुगा पिंध के आवी। आउर तोहरेमन उ सुंदर लुगा पिंधल आदमी के बगरा आदर देई के कहबा, “तोंय हूवाँ खास ठाँव में बाइठ।” आउर उ गरीब से कहबा, “तोंय हिंयाँ ठड़ाय रह चाहे मोर गोड़ केर भीरे बाइठ।” तो का तोहरेमन आपस में भेद भाव नी करला, आउर बुरा बिचार से न्याय करेक वाला नी ठहरला? हे मोर भाईमन सुना, का परमेश्‍वर इ दुनिया केर गरीबमन के नी चुनलक कि उमन बिसवास में धनी आउर उ राइज केर अधिकारी होबैं, जेकर करार परमेश्‍वर उमन से काइर हे जेमन उकर से प्रेम करैना? मगर तोहरेमन उ गरीब केर अपमान कराला। का धनी आदमीमन तोहर उपरे अत्याचार नी करैना, आउर का उमन हें तोहरेमन के कछैरीमन में जबराई घिसराय-घिसराय के नी लेगैना? इमन ओहेमन हेकैं जेमन यीशु मसीह केर नाँव केर बिरोध में बुरा गोइठ गोठियायना, जे नाँव से तोहरे जुड़ल अहा। पवितर किताब में लिखल अहे, “तोहरे अपन पड़ोसी से अपन नियर प्रेम करा।” अगर तोहरे इकर मोताबिक इ खास आगया के पूरा कराला तो बेस हें कराला। अगर तोहरेमन भेद भाव कराला तो पाप कराला, आउर मूसा केर नियम तोहरेमन के अपराधी ठहरायला। काले कि जे केऊ समूचा मूसा केर नियम के मानेला, मगर एक हें गोइठ में चुइक जायला तो उ सोउब गोइठमन में दोषी ठहइर चुकलक। इ लगिन कि जे इ कहलक, “तोंय ब्यभिचार ना करबे।” ओहे एहो कहलक, “तोंय हत्या ना करबे” इ लगिन अगर तोहरेमन ब्यभिचार तो नी करला मगर केखो हत्या करला, तो मूसा केर नियम के तोरेक वाला गिनाला। तोहरेमन उ आदमीमन नियर बचन कहा आउर ब्यवहार करा, जे मनक न्याय उ नियम केर मोताबिक होवी जे उमन के आजाद करेला। काले कि जे दया नी करलक, उकर न्याय बेगर दया से होवी। मगर दया न्याय उपरे जीत जायला। हे मोर भाईमन, अगर केऊ कही कि मोंय प्रभु यीशु मसीह में बिसवास करोना आउर उ भला काम नी करी तो इकर से उके का फायदा? का एइसन बिसवास कहियो उके बचाएक पारी? अगर केऊ भाई या बहिन के लुगामन केर जरुरत अहे आउर उकर ठिना रोज दिन केर खाएक लगिन नखे, आउर तोहर में से केऊ उकर से कही, “शांति से जा परमेश्‍वर तोके आशीष देवोक, तोंय गरम रह आउर पेट भाइर के खा।” मगर जे चीजमन केर काया लगिन जरुरत अहे उ चीजमन के तोहरेमन नी देबा तो उके का फायदा? ओइसनेहें बिसवास हों अपन भला काममन केर संगे नी होवी, तो उ अपन स्वभाव में मोरल अहे। आउर केऊ एहो कहेक पारेला, “तोके बिसवास अहे, आउर मोंय भला काम करोना।” मगर मोंय तोके कहोना, “तोंय अपन बिसवास के मोके बेगर भला काम करले देखाव आउर मोंय अपन बिसवास अपन भला काम काइर के तोके देखामूँ।” तोके बिसवास अहे कि एके गो परमेश्‍वर अहे आउर तोंय बेस करिसला। भूतमन हों एइसनेहें बिसवास करैना आउर उमन थरथरायना। मगर हे निरबुद्धिया आदमी, का तोंय एहो नी जानिसला कि भला काममन केर बिना बिसवास बेकार अहे? का हमर पुरखा अब्राहम अपन काममन केर चलते धरमी नी ठहराल गेलक, जब उ अपन बेटा इसहाक के बेदी उपरे चढ़ालक? देखा, अब्राहम ना सिरिफ परमेश्‍वर उपरे बिसवास काइर रहे मगर उ, ओहो काममन के काइर रहे जे परमेश्‍वर करेक लगिन कइह रहे, आउर उकर बिसवास उकर काममन केर चलते सिद्ध होलक। आउर पवितर किताब केर इ बचन पूरा होलक, “अब्राहम परमेश्‍वर में बिसवास करलक आउर उकर बिसवास केर चलते परमेश्‍वर उके एगो धरमी आदमी केर रूप में मानलक।” आउर उ परमेश्‍वर केर संगी कहालक। इ लेखे तोहरेमन देइख लेला कि आदमी सिरिफ बिसवास से हें निहीं, मगर अपन काममन केर जरिया से हों धरमी गिनाल जायला। एहे लेखे राहाब बेश्या हों जब उ भेद लेवेक वालामन के अपन घर में रहेक लगिन ठाँव देलक आउर उमन के दुश्मनमन से बचाएक लगिन दोसर डहर से भेइज देलक, तो का उ अपन भला काममन केर चलते धरमी नी गिनाल गेलक? जइसन काया बेगर आत्मा केर मोरल अहे तइसनेहें बिसवास हों बेगर भला काममन केर मोरल अहे। हे मोर भाईमन, तोहर में से ढेइरमन परमेश्‍वर केर बचन के सिखाएक वाला ना बनबा, काले कि तोहरे जानाला कि हमरे सिखाएक वालामन केर आउर हें कड़ाई से फैसला करल जाई। हमरेमन से कायनों बेर गलती होई जायला। मगर जे केऊ बोलेक में गलती नी करेला ओहे सिद्ध आदमी हेके आउर उ खुद के पूरा काबू करेक पारेला। जब हमरे घोड़ामन के अपन काबू में करेक लगिन उमन केर मुँह में लगाम लगाइयला, तब हमरे उ मनक समूचा काया के अपन काबू में करेक पारिला। देखा, पानी जहाज हों चाहे केतना हों बाड़ होवेला आउर उके तेज धुका से चलाल जायला फिन भी एगो छोटेसन डांग से चलाएक वाला केर इच्छा केर मोताबिक घुमाल जायला। तइसनेहें जीभ हों एगो छोटेसन अंग हेके मगर उ बड़का-बड़का डींग मारेला। सोचा तो, एगो छोटेसन चिनगी से केतना बड़का बान में आइग लाइग जायला। जीभ हों एगो आइग नियर अहे। उ हमर काया केर छोटेसन अंग हेके, जेकर में दुनिया भइर केर बुराई अहे आउर उ आदमी केर पूरा काया उपरे दाग लगाय के उकर पूरा जिंदगी में आइग लगाय देवेला आउर खुद नरक केर आइग में पोड़ते रहेला। हर रकम केर जंगली जानवर, चरई, रेंगेक वाला जंतु आउर पानी में रहेक वाला जीव-जंतुमन तो आदमी जाइत केर काबू में होवेक पारैना आउर होई हों जाय हैं। मगर जीभ के आदमीमन में से केऊ हों अपन काबू में करेक नी पारैना, उ एगो एइसन बुरा अंग हेके, जे कहियो स्थिर नी रहेला। उ प्राण के नाश करेक वाला बिष से भरल अहे। एहे जीभ से हमरे प्रभु आउर आबा परमेश्‍वर केर स्तुति करिला आउर इकरे से आदमीमन के जेमन परमेश्‍वर केर रूप में सिरजाल जाय हैं सराप देवीला। एहे मुँह से हमरे धन्यबाद देवीला आउर एहे मुँह से सराप देवीला। हे मोर भाईमन, एइसन बिलकुल नी होवेक चाही। एके गो कुआँ से मिठा आउर खारा दुयो पानी नी निकलेला। हे मोर भाईमन, अंजीर केर गाँछ में जैतून चाहे अंगूर केर गाँछ में अंजीर नी फरेला, एहे नियर खारा कुआँ से मिठा पानी नी निकलेक पारेला। तोहरेमन में गेयानी आउर समझदार के हेके? अगर तोहर में से केऊ अहा, तो बेस जिंदगी जी के आउर नरम बाइन के जे तोहर गेयान से आवेला बेस काम काइर के देखावा। आउर अगर तोहरे अपन-अपन मन में ढेइर जलन रखेक वाला आउर मतलबी अहा तो इ घमंड ना करा कि गेयानी अहा। अगर एइसन कराला तो तोहरे सच के झूठ में बदइल देवाला। इ गेयान उ ना लगे, जे परमेश्‍वर बटले आवेला मगर इ दुनियादारी आउर काया आउर शैतान केर बटले अहे। काले कि जहाँ जलन आउर मतलबी स्वभाव होवेला हूवाँ अशांति आउर हर रकम केर बुरा गोइठ होवेला। मगर जे गेयान परमेश्‍वर बटले आवेला उ पहिले तो पवितर होवेला, फिन शांति के पतियाएक वाला, कोमल, सभ्य, दया से भरल, बेस फारमन से लादल आउर भेद-भाव आउर कपट नी करेक वाला होवेला। जेमन मेल-मिलाप करुवायना उमन शांति केर बिहीन बुनैना आउर धरमी होवेक केर अन्न काटबैं। तोहर माझे लड़ाईमन आउर झगरामन काले होवेला? इ उ स्वार्थी इच्छामन से आवेला जे तोहर अंगमन में लड़ते-भिड़ते रहेला। तोहरेमन जेकर लालसा कराला आउर उ तोहरे के नी मिलेला, तो तोहरेमन हत्या करेक ले तेयार होई जावाला। तोहरेमन उ चीजमन केर लोभ कराला जे दोसरमन ठिना अहे लेकिन तोहरे के कोनों नी मिलेला, सेहे लगिन तोहरे लाड़ाला आउर झगरा कराला। तोहरे के इ लगिन नी मिलेला काले कि तोहरे परमेश्‍वर से नी माँगाला। तोहरेमन माँगाला फिन भी तोहरे के नी मिलेला, काले कि तोहरे बुरा इच्छा से माँगाला, ताकि अपन मौज मस्ती में उड़ाय देबा। हे धोखा देवाइयामन, का तोहरेमन इ नी जानाला कि दुनिया से दोस्ती करेक परमेश्‍वर से बैर करेक हेके? एहे लेखे जे केऊ दुनिया से दोस्ती करेक चाहेला, उ खुद के परमेश्‍वर केर बैरी बनायला। का तोहरेमन इ सोचाथा कि पवितर किताब बेकार हें कहेला कि जे पवितर आत्मा के उ हमर भीतरे बसाय हे, उ सिरिफ एहे इच्छा रखेला कि हमरे सिरिफ उकरे आराधना करब? उ किरपा जे परमेश्‍वर हमरेमन के देवेला ढेइर शक्तिशाली अहे, एहे लगिन पवितर किताब में लिखल अहे, “परमेश्‍वर घमंडीमन से बिरोध करेला, मगर नरम आदमीमन केर उपरे किरपा करेला।” से लगिन तोहरेमन परमेश्‍वर केर अधीन होई जावा आउर शैतान केर सामना करा, तो उ तोहर ठिना से भाइग जाई। परमेश्‍वर केर भीरे आबा तो उ हों तोहर भीरे आवी। हे पापीमन, अपन जिंदगी के पापमन से दूर करा। हे दूई मन वाला आदमीमन, अपन हिरदय के पवितर करा। अपन पापमन लगिन दुःखी होवा आउर शोक करा आउर काँदा। तोहर हँसी शोक में आउर तोहर खुशी उदासी में बदइल जाओक। प्रभु केर सामने नरम बना तो उ तोहरेमन के ऊँचा उठाई। हे भाईमन, एक दोसर केर निंदा ना करा। जे अपन भाई केर निंदा करेला चाहे उकर उपरे दोष लगायला तो उ परमेश्‍वर केर नियम केर निंदा करेला। आउर उकर उपरे दोष लगायला। अगर तोहरेमन परमेश्‍वर केर नियम केर उपरे दोष लगावला तो तोहरेमन उ नियम केर उपरे चलेक वाला निहीं मगर नियम केर फैसला करेक वाला बनाला। नियम देवेक वाला आउर फैसला करेक वाला हाकिम तो सिरिफ परमेश्‍वर हें हेके, जेकर में बचाएक आउर नाश करेक केर शक्ति अहे। मगर तोहरेमन के हेका, जे अपन पड़ोसीमन केर उपरे दोष लगावला? तोहरेमन जे इ कहाला, “आइज चाहे काइल हमरे कोनों आउर नगर में जाय के हूवाँ एक बरिस बिताब, आउर बेपार काइर के रुपया कमाब।” मगर तोहरेमन इ नी जानाला कि काइल का होवी। सुइन तो लेवा, तोहरेमन केर जिंदगी कतइ हें दिन लगिन अहे? तोहरेमन केर जिंदगी तो कुहाँस नियर अहे, जे थोरेक देरी देखाई देवेला, फिन लूइक जायला। इकर उलटा तोहरेमन के इ कहेक चाही, “अगर प्रभु चाही तो हमरे जिंदा रहब आउर इ चाहे उ काम के करब।” मगर अब तोहरेमन अपन अहंकार से बनाल योजना उपरे घमंड कराला, एइसन सोउब घमंड बुरा होवेला। एहे लगिन जे केऊ भलाई करेक जानेला आउर नी करेला, उकर लगिन इ पाप हेके। हे धनी आदमीमन सुइन तो लेवा, तोहरेमन अपन आवेक वाला दुःखमन उपरे चिल्लाय-चिल्लाय के काँदा। तोहर धन नाश होई गेलक आउर तोहर लुगामन के कीड़ा खाय लेलैं। तोहर सोना-चाँदी में चिती लइग जाय हे। आउर उ चिती तोहरेमन केर बिरोध में गवाही देवी आउर तोहर काया के आइग नियर राख बनाय देवी। तोहरे आखरी दिनमन में धन जमा काइर हा। देखा, जे कमियामन तोहर खेत के काटलैं उ मनक उ मजूरी जेके तोहरेमन धोखा देई के राइख लेई हा, उ परमेश्‍वर ठिना तोहर बिरोध में चिल्लाथे। आउर उ कमियामन केर काँदेक, जेमन तोहर उपज के जमा करलैं, सेनामन केर प्रभु केर कान तक पोंहइच जाय हे। तोहरेमन दुनिया में मौज-मस्ती केर जिंदगी जियाला आउर ढेइरे सुख भोगाला। जइसन जानवर के काटल जाएक केर दिन लगिन मोटा-तगड़ा तेयार करल जायला, ओहे लेखे तोहरेमन दंड पावेक लगिन तेयार करल जाय हा। तोहरेमन धरमी आदमी के दोषीदार ठहराय के माइर मोराला आउर उ तोहर कोनों बिरोध नी करलक। सेहे लगिन हे भाईमन, प्रभु केर आवेक तक धीरज धारा। जइसन किसान धरती में किमती उपज केर आसरा करते पहिला आउर आखरी बरखा होवेक तक धीरज धारेला। ओहे लेखे तोहरेमन हों धीरज धारा, आउर आसरा ना छोड़ा काले कि प्रभु जल्दी आवाथे। हे भाईमन, एक दोसर उपरे दोष ना लगावा ताकि तोहरेमन उपरे हों दोष ना लगाल जाओक। देखा फैसला करेक वाला हाकिम दुरा ठिना ठड़ाल अहे। हे भाईमन, जे परमेश्‍वर केर संदेश के बताएक वालामन प्रभु केर नाँव से गोठियालैं उमन के दु:ख उठाएक आउर धीरज धारेक केर एगो नमूना समझा। देखा, हमरे धीरज धारेक वालामन के धाइन कहिला। तोहरेमन अय्यूब केर धीरज धारेक केर बारे में तो सुइन चुइक हा आउर प्रभु केर बटले उके जे इनाम मिललक उके हों जाइन लेई हा, जेकर से प्रभु केर ढेइर करुणा आउर दया दिसेला। मगर हे मोर भाईमन, सोउब से बेस गोइठ इ हेके कि किरिया ना खावा, ना स्वरग केर, ना धरती केर, ना कोनों आउर चीज केर, मगर तोहरेमन केर गोइठ हाँ में हाँ, आउर निहीं में निहीं रहोक, ताकि तोहरेमन परमेश्‍वर केर सजा केर लाएक नी होबा। अगर तोहर में केऊ दुःखी अहे तो उ प्रार्थना करोक। अगर केऊ खुश अहे तो उ स्तुति केर गीत गाओक। अगर तोहर में केऊ बेमार अहे तो कलीसिया केर अगुवामन के बुलाओक आउर उमन प्रभु केर नाँव से उकर उपरे तेल माइख के उकर लगिन प्रार्थना करोक। आउर बिसवास से करल प्रार्थना से रोगी चंगा होई जाई आउर प्रभु उके उठाय के ठड़ुवाई देवी। आउर अगर उ पाप हों काइर हे, तो पाप हों क्षमा होई जाई। से लगिन तोहरेमन आपस में एक दोसर केर सामने अपन-अपन पापमन के माइन लेवा आउर एक दोसर लगिन प्रार्थना करा, जेकर से तोहरे ठीक होई जबा। धरमी आदमी केर प्रार्थना केर असर से ढेइर कोनों होवेक पारेला। परमेश्‍वर केर संदेश के बताएक वाला एलिय्याह हों तो हमर नियर दु:ख-सुख भोगेक वाला आदमी रहे आउर उ गिड़गिड़ाय के प्रार्थना करलक कि पानी ना बरसोक, तो साढ़े तीन बरिस तक धरती में पानी नी बरसलक। फिन उ प्रार्थना करलक तो आकाश से पानी बरसलक आउर धरती अपन खेती उपजालक। हे मोर भाईमन, अगर तोहर में से केऊ बिसवासी सच्चाई केर डहर से भटइक जाई आउर केऊ दोसर उके सच्चाई केर डहर में घुराय लानी, तो तोके इ जाइन लेवेक चाही कि जे केऊ एगो भटकल पापी के सच्चाई केर डहर में घुराय लानेला, तो उ एगो जीउ के जुग-जुग केर मौत से बचाय लेवेला, आउर परमेश्‍वर उकर ढेइर पापमन के क्षमा काइर देवेला। मोंय पतरस जे यीशु मसीह केर चुनल खास चेला हेकों, इ चिट्ठी के उ परदेसीमन केर नाँव में लिखाथों, जेमन पुन्तुस, गलातिया, कप्पदुकिया, आसिया आउर बितूनिया परदेसमन में तितिर-बितिर होई के रहैना। आबा परमेश्‍वर ढेइर पहिलेहें से तोहरेमन के चुइन लेलक आउर पवितर आत्मा केर द्वारा पवितर करलक। परमेश्‍वर एइसन इ लगिन करलक कि तोहरे यीशु मसीह केर आगया मानबा आउर उकर लोहू से शुद्ध होई जबा। मोंय प्रार्थना करोना कि परमेश्‍वर तोहरे के भरपूरी से किरपा आउर शांति देओक। हमर प्रभु यीशु मसीह केर आबा आउर परमेश्‍वर केर धन्यबाद होवोक, जे अपन बड़का दया से आउर प्रभु यीशु मसीह केर मोरल में से जी उठेक केर द्वारा से हमरे के नवाँ जिंदगी देई हे, आउर जुग-जुग केर जिंदगी केर आसरा देई हे। हमरे उ जयजाद के पावेक केर आसरा कराथी, जेके परमेश्‍वर हमर लगिन तेयार काइर हे, जे चीजमन के केऊ कहियो नाश करेक नी पारी। आउर उ कहियो पुरना नी होवी, परमेश्‍वर उ चीजमन के स्वरग में हमरे लगिन राइख हे। आउर परमेश्‍वर अपन महान शक्ति से तोहरे के संभराय के राइख हे, काले कि तोहरे यीशु में भरसा कराला, उ तोहरे के मसीह केर घूइर आवेक दिन तक संभराय के राखी, तब तोहरेमन जानबा कि पाप आउर माउत से परमेश्‍वर तोहर पूरा पुरी छुटकारा काइर हे। तोहरे के इ सोउब गोइठमन केर बारे में खुश होवेक चाही, जबकि एखन थोरेक समय लगिन रकम-रकम केर दुःखमन से दुःखी अहा। इ दुःखमन केर मकसद इ देखाएक हेके कि तोहरे सचमुच में परमेश्‍वर उपरे भरसा कराला कि निहीं, यीशु मसीह में तोहर बिसवास सोना से हों बगरा किमती अहे। जइसन कि सोना के आइग से परखल आउर शुद्ध करल जायला, तइसनेहें अगर तोहरे केर बिसवास कठिन परीक्षामन केर बेरा मजबूत बनल रही, तब एइसन बिसवास से उ दिन जब यीशु मसीह दोबारा घूइर आवी, तो तोहर बगरा स्तुति आउर महिमा आउर आदर होवी। तोहरेमन यीशु के कहियो नी देइख हा फिन भी उकर से प्रेम कराला। एखन तोहरेमन उके नी देखाला मगर तोहरे उकर उपरे बिसवास कराला। से लगिन तोहरे खुशी आउर महिमा से मुरुक खुश अहा, जेकर बखाइन करेक नी पराई। काले कि परमेश्‍वर तोहरेमन के पापमन केर दंड से छुटकारा देई हे। आउर इ सोउब यीशु मसीह में तोहर बिसवास केर फल हेके। एहे छुटकारा केर बारे में, उ परमेश्‍वर केर संदेश के बताएक वालामन आउर बगरा जानेक चाहत रहैं, उमन पहिलेहें बताय देई रहैं कि परमेश्‍वर तोहर छुटकारा करेक केर कइसन किरपा करी। उमन इ गोइठमन के धेयान केर साथ खोज बिन आउर जाँच पड़ताल करलैं। मसीह केर आत्मा उमन में रहे, आउर उमन के बतात रहे कि मसीह कइसन दुःख उठाई आउर उके कइसन महिमा देवल जाई। इ लगिन उमन इ खोज-बीन करलैं कि मसीह केहर होवी आउर इ सोउब कहिया होवी। परमेश्‍वर अपन इ संदेश देवेक वालामन के बतालक कि इ संदेश उ मनक खुद लगिन निहीं बल्कि तोहर लगिन रहे। इ संदेश यीशु मसीह केर बारे में शुभ समाचार हेके जेके तोहरेमन एखन सुनला। परमेश्‍वर स्वरग से अपन पवितर आत्मा के भेजलक कि तोहरे के शुभ समाचार परचार करेक में आदमी मनक मदइत करोक। इ सोउब एतना अदभुत अहे कि स्वरगदूतमन हों लालसा से इ सोउब गोइठमन के होते देखत रहैं। इ लगिन अपन-अपन मन के तेयार करा, जइसन आदमीमन काम करेक ले तेयार होवेक लगिन अपन डाँड़ा के बंधायना। खुद के काबू में रखा आउर उ किरपा केर पूरा आसरा रखा, जेके यीशु मसीह के दोबारा आवेक से तोहरे के देवल जाई। आउर परमेश्‍वर केर आगया के माना जइसन कि बेस छउवामन अपन आबा केर आगया के मानैना। आउर उ बुरा काममन के ना करा जेके तोहरे उ बेरा करेक चाहत रहा, जब तोहरे परमेश्‍वर केर सच्चाई के नी जानत रहा। मगर जइसन तोहरे केर बोलेक वाला पवितर अहे, तइसनेहें तोहरे हों अपन सोउब चाइल-चलन में पवितर बना। काले कि पवितर किताब में लिखल अहे परमेश्‍वर कहेला, “तोहरे के पवितर बनेक चाही काले कि मोंय पवितर अहों।” जब तोहरे प्रार्थना कराला तो परमेश्‍वर के अपन आबा कहाला, मगर याइद रखा कि उ सोउब आदमीमन केर फैसला एक जइसन करेला, मतलब हरेक केर काम केर मोताबिक। से लगिन जबकि तोहरे इ धरती उपरे एगो परदेसी नियर रहाला, तो तोहरे के परमेश्‍वर लगिन ढेइर सम्मान देवेक चाही। इ दुनिया केर सिरजाल जाएक से पहिले, परमेश्‍वर पहिलेहें से ठहराय लेई रहे कि यीशु मसीह छोड़ाएक वाला होवी। मगर उ तोहर मदइत करेक लगिन इ आखरी दिनमन में धरती में आलक। यीशु मसीह जे हमर लगिन करलक उकर चलते तोहरे अब परमेश्‍वर उपरे आसरा कराला। उ ओहे हेके जे यीशु मसीह के मोरेक केर पाछे फिन जिंदा करलक आउर उके महिमा देलक। से लगिन तोहरे बिसवास कराला आउर परमेश्‍वर उपरे तोहर उमीद अब पक्का अहे। काले कि सच्चाई केर पालन करेक केर चलते तोहरे के तोहर पापमन से शुद्ध करल जाय हे, अब तोहरे एक दोसर से अपन भाई नियर तन-मन आउर पूरा दिल से प्रेम करते रहा। काले कि तोहरेमन के परमेश्‍वर बटले नवाँ जिंदगी मिल हे। तोहरे के जे जिंदगी मिल हे उ एइसन चीजमन से नी मिल हे कि उ नाश होवी बल्कि एइसन चीज से मिल हे जे जुग-जुग लगिन रही। मतलब परमेश्‍वर केर जिंदा आउर जुग-जुग केर बचन से मिल हे। पवितर किताब में लिखल अहे, “सोउब आदमीमन घास नियर अहैं, आउर उ मनक सुंदर दिसेक बान केर फूलमन नियर अहे। घास सूइख जाई आउर फूल झाइर जाई। मगर परमेश्‍वर केर बचन जुग-जुग लगिन स्थिर बनल रही।” इ बचन मसीह केर बारे में शुभ समाचार हेके जेके तोहर माझे परचार करल जाय रहे। इ लगिन सोउब रकम केर बुरा ब्यवहार करेक छोइड़ देवा। आउर दोसरमन के धोखा ना देवा, कपट ना करा, दोसरमन से हिसिंगा ना करा, दोसरमन केर बिरोध में बुरा गोइठ ना कहा। जइसन नवाँ जनमल छउवामन अपन आयो केर दूध पियेक लगिन लालसा करैना, तइसनेहें तोहरे के परमेश्‍वर केर बचन के सिखेक लगिन लालसा करेक चाही, ताकि तोहरे आत्मिक रूप से समझदार बाइन जबा। तब आखरी में परमेश्‍वर तोहरे के इ दुनिया केर सोउब बुरा चीजमन से पूरा-पुरी छुटकारा देवी। पवितर किताब में लिखल अहे कि तोहरेमन चाइख के जाइन लेई हा कि प्रभु भला अहे। जइसन कि पवितर किताब में परमेश्‍वर कहेला, “देखा! मोंय सिय्योन में केखो कोना केर पखना नियर रखाथों, जे नेव लगिन चुनल किमती पखना नियर अहे। आउर जे केऊ उकर उपरे बिसवास करी उ लाजिम नी होवी।” जेमन यीशु मसीह उपरे बिसवास करैना, उमन लगिन इ पखना ढेइर किमती अहे। मगर जे आदमीमन बिसवास नी करैना, उमन केर बारे में पवितर किताब में लिखल अहे, “जे पखना के राज मिस्त्रीमन बेकार ठहराय रहैं, ओहे पखना घर केर नेव केर सोउब से मुध पखना बाइन गेलक।” आउर फिन पवितर किताब में लिखल अहे, “इ पखना आदमीमन के भूंई में गिराएक वाला होवी। इ एगो एइसन चट्टाइन हेके, जे उमन के नीचे गिराय देवी।” उमन इ लगिन गिरबैं, काले कि उमन परमेश्‍वर केर संदेश के मानेक से ठुकराय देबैं, उमन केर संगे एइसन परमेश्‍वर केर योजना केर मोताबिक होवी। मगर तोहरेमन एइसन नखा, काले कि तोहरे परमेश्‍वर केर चुनल आदमी हेका, तोहरे परमेश्‍वर केर पुरोहित हेका जे राजा हेके, तोहरेमन एइसन आदमी हेका जेमन खुद के परमेश्‍वर केर सेवा लगिन सोंइप देई हा, आउर तोहरे परमेश्‍वर केर हेका, तोहरे के परमेश्‍वर अंधार में से चुइन के अपन इंजोत में लाइन हे, ताकि तोहरे उकर अदभुत काममन केर परचार करबा। पहिले तोहरेमन परमेश्‍वर केर आदमी नी रहा मगर अब उकर आदमी बाइन गेला, पहिले तोहरे परमेश्‍वर केर दया के नी जानत रहा, मगर अब जानाला, काले कि उ तोहर उपरे अपन दया के देखाय हे। हे दुलार भाईमन, तोहरे इ दुनिया में परदेसीमन आउर डहर चलुवामन नियर रहाथा। मोंय तोहर से बिनती करोना कि दुनिया केर उ सोउब बुरा इच्छामन से बचा, काले कि उ तोहर आत्मा केर बिरोध में लड़ते रहेला। परजाइत आदमीमन में तोहर चाइल-चलन भला होवोक, काले कि जे गोइठमन में उमन तोहरे के बुरा जाइन के बदनाम करैना, उमन तोहर भला काममन के देइख के, ओहे काममन केर चलते, न्याय केर दिन उमन परमेश्‍वर केर महिमा करोक। प्रभु चाहेला कि आदमीमन केर ठहराल हर एक सरकारी अधिकारीमन केर अधीन में रहा, आउर राजा केर हों, इ लगिन कि उ सोउब केर उपरे राइज करेला। आउर उकर ठहराल राजपालमन केर हों अधीन रहा, उमन इ लगिन भेजल जाय हैं कि जेमन बुरा करैना उमन के दंड देबैं आउर जेमन भला करैना उमन के आदर देबैं। काले कि परमेश्‍वर केर इ इच्छा अहे कि हमरे केर बेस ब्यवहार केर चलते जेमन परमेश्‍वर के नी जानैना, उमन आगे हमरे उपरे झूठा दोष लगाएक केर साहस ना करोक, काले कि इ साफ अहे कि उ मनक दोष लगाएक सच ना लगे। जे कोनों तोहरे करेक चाहाला, तोहरे के उके करेक से रोकेक वाला केऊ नखैं, काले कि खुद के आजाद जाना मगर अपन इ आजादी के बुराई लगिन आड़ ना बनावा, मगर खुद के परमेश्‍वर केर दास समइझ के चलबा। सोउब केर आदर करा, सोउब संगी बिसवासी भाई-बहिनमन से प्रेम रखा, परमेश्‍वर से डरावा, राजा केर माइन करा। तोहरे जेमन, केऊ बिसवासी केर घर में नोकर केर काम कराला, तोहरे के हमेशा अपन मालिक केर आदर करेक अहे, ना सिरिफ उमन केर जेमन दयालु आउर भला अहैं, मगर उमन केर हों आदर करा जेमन दुष्ट आउर बुरा अहैं। काले कि अगर हमरेमन परमेश्‍वर केर बारे में सोइच के बेगर कोनों गलती करले दुःख सहिला, तो इकर से परमेश्‍वर खुश होवेला। मगर, अगर तोहरेमन बुरा काइर के माउर खावाला आउर धीरज धाराला, तो इकर में तोहर कोनों बड़ाई केर बात नखे। मगर, अगर तोहरेमन भला काइर के दुःख सहाला आउर धीरज धाराला, तो परमेश्‍वर इकर से खुश होवेला। आउर तोहरेमन परमेश्‍वर बटले एहे लगिन चुनल जाय हा कि तोहरे भला काइर के हों उकर ले दुःख सहबा। मसीह हों तोहर लगिन दुःख उठाय के तोहरेमन के एगो नमूना देई के जाय हे, उ जे कोनों काइर हे तोहरे हों तइसनेहें करा। उ कहियो पाप नी करलक, आउर ना उ कहियो एको बेर अपन मुँह से झूठ बोललक। जब आदमीमन यीशु केर अपमान करलैं, मगर उ केकरो अपमान नी करलक। जब आदमीमन उके दुःख देलैं, तो उकर बदली में उ केखो दुःख देवेक केर कोशिश नी करलक, बल्कि चाहत रहे कि परमेश्‍वर उमन केर मदइत करोक, काले कि उ जानत रहे कि परमेश्‍वर हमेशा आदमीमन केर सच्चा न्याय करेला। जब मसीह क्रूस उपरे मोरलक, तो उ अपन काया में हमर पाप केर बदली में दंड के सहलक, उ एइसन इ लगिन करलक ताकि अब हमरे आगे पाप करेक छोइड़ के धरमी जिंदगी जियब, आउर उ अपन काया में माउर खाय के घवाहा होई गेलक जेकर से हमरे चंगा होई गेली। पहिले तोहरेमन हेराल भेड़ीमन नियर रहा, मगर अब तोहरेमन तोहर आत्मामन केर चरवाही आउर देखभाल करेक वाला अगुवा मसीह ठिना घूइर जाय हा। हे जनानामन, अपन-अपन पति केर अधीन में रहा जइसन प्रभु केर अधीन में रहाला, जेकर से अगर उमन में से केऊवे परमेश्‍वर केर बचन के नी मानैना, तो उमन तोहर बेगर कोनों कहले परमेश्‍वर केर परती तोहरे केर डार आउर पवितर चाइल-चलन के देइख के मसीह में बिसवास करबैं। आउर तोहर सिंगार देखाएक लगिन ना होवोक, मतलब तोहरेमन केर केंस गूँथेक एइसन होवोक कि दोसरमन देखेक लगिन आकर्षित ना होवोक, आउर ना ही दोसरमन के देखाएक लगिन सोना आउर मोतीमन आउर ना महंगा-महंगा लुगामन के पिंधा। तोहरे के खुद के एइसन गुणमन से सुंदर बनाएक चाही जे नी मेटेला, इ एगो नरम स्वभाव आउर शांत स्वभाव हेके, जे कि इ परमेश्‍वर लगिन ढेइर किमती अहे। पुरना समय केर जनानामन जे परमेश्‍वर उपरे बिसवास करत रहैं आउर उकर उपरे आसरा करत रहैं, उमन अपन-अपन पतिमन केर आगया माइन के खुद के सुंदर बनात रहैं। सारा केर उदाहरन लेवा, जे अपन पति अब्राहम केर आगया के मानत रहे, आउर उके मालिक कइह के हकात रहे मतलब इ कि अगर तोहरे दोसरमन केर संगे भलाई करबा आउर तोहर मन में कोनों रकम केर डार नी होवी तो तोहरे सारा केर बेटीमन ठहरबा। तइसनेहें हे पतिमन, समझदारी से अपन सादी-सुदा जिंदगी के बितावा, तोहरे के याइद रखेक चाही कि तोहर जनानामन तोहरे से कमजोर अहैं, से लगिन तोहरे के उमन केर आदर करेक चाही। काले कि तोहरे दुयो हें उ बरदान के साझा कराला जेके परमेश्‍वर अपन किरपा से तोहरे के देई हे, मतलब जुग-जुग जिंदगी केर बरदान। अगर तोहरे एइसन करबा, तो जब तोहरे परमेश्‍वर से प्रार्थना करबा, तो उ तोहर सुनी। आखरी में, मोंय तोहरे से इ कहेक चाहाथों कि तोहरे सोउब एकजूट रहा, आउर एक दोसर केर फिकिर करा, भाई-बहिन केर प्रेम नियर दोसरमन से प्रेम करा, दोसर मनक उपरे दया करा, एक दोसर केर संगे नरम बना। बुराई केर बदला बुराई ना करा आउर ना गाली केर बदला गाली देवा, मगर इकर उल्टा उमन के आशीष हें देवा। परमेश्‍वर तोहरे के इ लगिन बोलाय हे कि तोहरे दोसरमन के आशीष देवा अगर तोहरेमन एइसन कराला तो परमेश्‍वर हों तोहरे के आशीष देवी। काले कि पवितर किताब कहेला, “अगर केऊ अपन जिंदगी केर खुशी लेवेक चाहेला आउर बेस दिन चाहेला तो उके सावधान रहेक चाही कि उ बुरा गोइठमन के ना कहोक आउर उके एइसन गोइठमन के कहेक बंद काइर देवेक चाही जे सच नखे। उके पक्का हें उ करेक बंद काइर देवेक चाही जे बुरा अहे, इकर बदला उके ओहे करेक चाही जे ठीक अहे। दोसरमन केर संगे शांति से रहेक केर कोशिश करा। काले कि प्रभु केर नजइर उमन केर उपरे रहेला, जेमन ओहे करैना जे सही अहे। आउर उ सोउब बेरा उमन केर प्रार्थनामन के सुनेक लगिन तेयार अहे। मगर परमेश्‍वर उ आदमीमन केर बिरोध काम करेला जेमन बुराई करैना।” अगर तोहरेमन सोउब बेरा भला काम करेक केर कोशिश कराला, तो सच में केऊ हों तोहर बुराई करेक नी पारी। अगर तोहरेमन सही अहा आउर सही काम करेक केर खातिर दुःख हों सहाला, तो परमेश्‍वर तोहरे के आशीष देवी, तइसनेहें करा जइसन परमेश्‍वर केर संदेश के बताएक वाला यशायाह लीख रहे, “उ आदमीमन से ना डरावा, जेमन तोहरे के डरुवायना आउर इ गोइठ केर फिकिर ना करा कि आदमीमन का करेक पारैना।” मगर मसीह के प्रभु माइन के उकर आराधना करा, अगर केऊ उ आसरा केर बारे में पूछी जेके बिसवासी होवेक केर चलते हमरे सोउब आपस में साझा करिला, तो सोउब बेरा उके समझाएक लगिन तेयार रहा, मगर इके नरम आउर आदर से करबा। सोउब बेरा ओहे करा जे सही अहे, फिन अगर आदमीमन तोहर बिरोध में बुरा बोलैना, तो ओहेमन लाजिम होबैं, जब उमन मसीह केर संगे तोहर संबंध केर चलते तोहर बेस चाइल-चलन के देखबैं। कोनों-कोनों बेरा आबा परमेश्‍वर तोहर उपरे परेशानीमन आउर बाथा के आवेक देवेला जबकि तोहरेमन बेस काइर हा, मगर इ उ परेशानीमन आउर बाथा से बेस अहे जे तोहर बुरा काम करेक केर खातिर तोहर उपरे आवेला। मोंय इ कहोना काले कि मसीह हों हमरे केर पापमन केर खातिर दुःख सहलक आउर मोइर गेलक। उ बस एक बेर मोरलक उके दोबारा फिन से मोरेक केर जरुरत नखे, उ एगो धरमी आदमी रहे जे पापी आदमीमन लगिन मोरलक कि उ हमरे के आबा परमेश्‍वर में लेगेग पारोक, उमन उकर काया के तो माइर मोरालैं मगर परमेश्‍वर उके पवितर आत्मा केर शक्ति से फिन से जिंदा काइर देलक। तब उकर आत्मा जाय के उ आत्मामन में शुभ समाचार परचार करलक जेमन उ ठाँव में आबा परमेश्‍वर द्वारा बंदी बनाल जाय रहैं, जहाँ मोरलमन केर आत्मा रहे। इ उ मनक आत्मा रहे, जेमन ढेइर समय पहिले परमेश्‍वर केर आगया के तोइर रहैं, जब नूह अपन जहाज के बनात रहे तब परमेश्‍वर धीरज से इंतजार काइर के देखत रहे कि का उमन पाप करेक छोइड़ देबैं, मगर जब पानी दुनिया के नाश काइर देलक तब जहाज में ढूकेक वालामन सिरिफ आठ आदमीमन के बचाल जाय रहे। पुरना समय में उ मनक छुटकारा, अब हमर छुटकारा केर एगो उदाहरन हेके, जे पानी में हमरे बपतिस्मा जल संस्कार लेविला, उ हमरे केर काया से मइला के दूर नी करेला, मगर इ एगो चिन्हा हेके। हमरेमन आबा परमेश्‍वर से माफी माँइग ही, ताकि आगे हमरे केर मन परेशान ना रहोक। हमरे के माफ करल जाएक पराई काले कि यीशु मसीह मोरेक केर पाछे फिन से जी उइठ हे। आउर उ स्वरग में चाइल गेलक। अब उ हूवाँ परमेश्‍वर केर भतखाइया आरा खास ठाँव में अहे, आउर उ सोउब स्वरगदूतमन आउर सोउब अधिकारीमन आउर शक्तिमन उपरे राइज करेला। से लगिन जब मसीह काया में होई के दुःख सहलक तो तोहरेमन के हों दुःख सहेक लगिन ओहे स्वभाव से तेयार रहेक चाही जे स्वभाव उकर में रहे। काले कि अगर तोहरे मसीह लगिन दुःख सहेक ले तेयार अहा, तो तोहरे पाप नी करेक केर फैसला काइर लेई हा। ताकि आगे अपन बचल काया केर जिंदगी के आदमीमन केर लालसा केर मोताबिक नहीं, बल्कि परमेश्‍वर केर इच्छा केर मोताबिक बिताबा। बितल समय में तोहरेमन गैर बिसवासी आदमीमन नियर बुरा काम करेक में ढेइर समय बरबाद काइर देला। जइसन कि लुच्चा काम करेक केर चाह, ब्यभिचार, मतवारी करेक, रीझ-रंग, पियंक्कड़, आउर मूर्ति पूजा, जेकर से परमेश्‍वर घिरना करेला। मगर अब तोहरे अपन पुरना संगमन केर बुरा काम में साथ नी देवाला, से लगिन उमन ताजुब होवैना आउर तोहर बारे में बुरा बोलैना। मगर एक दिन उमन जरूर परमेश्‍वर केर सामने फैसला होवेक लगिन ठड़ाबैं आउर परमेश्‍वर उमन में से हर एक झन से उ मनक धरती में करल काममन केर बारे में पूछी। आउर जिंदा आउर मोरलमन केर फैसला करी। एहे लगिन मोरलमन के हों मसीह केर बारे में शुभ समाचार सुनाल गेलक, उमन केर काया के सोउब आदमीमन नियर मोरेक पड़लक, मगर अब उमन आत्मा में सोउब बेरा परमेश्‍वर केर संगे रहैना। सोउब गोइठमन केर अंत तुरते होवेक वाला अहे, से लगिन ठीक से सोचा आउर खुद के काबू में रखा, ताकि तोहरे प्रार्थना लगिन तेयार रहेक पारबा। आउर सोउब से बेस गोइठ इ हेके कि एक दोसर से गहरा प्रेम करा काले कि अगर तोहरेमन आदमीमन से प्रेम कराला, तो तोहरे सोउब बेरा कोनोवें पाप काम के माफ करेक लगिन तेयार रहबा, जे उमन काइर हैं। अपन घर में आदमीमन केर स्वागत करा आउर इके तोहरे बेगर कुड़कुड़ाले करा। हर एक आदमी के आबा परमेश्‍वर बटले बरदान मिल हे, आउर उ बरदान केर इस्तेमाल उके दोसर आदमीमन केर मदइत लगिन करेक चाही। उमन के अपन बरदानमन केर इस्तेमाल एगो बेस सेवक नियर ठीक ढंग से करेक चाही, जेके परमेश्‍वर अपन किरपा केर साथ देई हे। उदाहरन लगिन अगर तोहर ठिना परचार करेक केर बरदान अहे, तो तोहरे के परमेश्‍वर केर संदेश केर परचार करेक चाही, अगर तोहर ठिना दोसर आदमीमन केर मदइत करेक केर बरदान अहे, तो इके तोहरे उ शक्ति केर साथ करा जेके परमेश्‍वर तोहरे के देवेला, तब जे कुछ हों तोहरे करबा, उकर से यीशु मसीह केर द्वारा परमेश्‍वर केर महिमा होवी। सोउब महिमा आउर शक्ति युग-युग लगिन उकरे हेके। आमीन। हे बिसवासी भाईमन, उ दुःख देवेक वाला चीजमन केर बारे में ताजुब ना होवा जेकर खातिर तोहरेमन दुःख उठाथा, काले कि तोहरेमन मसीह केर हेका। मगर इ चीज इ देखाएक लगिन होवाथे कि का तोहरे सच में आबा परमेश्‍वर उपरे बिसवास कराला। से लगिन, इ ना सोचा कि तोहर संगे कुछ अजीब होवाथे। सिरिफ इकर बारे में खुश रहा, काले कि तोहरे के उ दुःखमन में एक हिस्सा मिल हे जे मसीह के मिल रहे। इकर चलते, जब मसीह सोउब आदमीमन उपरे अपन महिमा के दिस्तार करेक लगिन फिन से आवी, तो तोहर खुशी सच में बाड़ होवी। फिन अगर मसीह केर नाँव लगिन तोहर निंदा करल जायला, तो धाइन हेका, काले कि महिमा केर आत्मा, जे परमेश्‍वर केर आत्मा हेके, तोहर उपरे रहेला। तोहर में से केऊ आदमी हत्यारा चाहे चोर, चाहे बुरा काम करेक से चाहे दोसर मनक काम के रोकेक केर चलते दुःख ना पाओक। लेकिन अगर केखो मसीही होवेक केर चलते दुःख सहेक होवी, तो तोहरे इके लाजिम होवेक केर गोइठ ना समझा, मगर परमेश्‍वर केर महिमा करा कि तोहरे इ लगिन दुःख सहाथा कि तोहरेमन मसीह केर आदमीमन हेका। काले कि फैसला करेक केर बेरा आय जाय हे कि पहिले परमेश्‍वर केर आदमीमन केर फैसला करल जाओक, आउर जबकि उ पहिले हमरे बिसवासीमन केर फैसला करी, से लगिन उ भयानक चीजमन केर बारे में सोचा, जे उ आदमीमन केर संगे होवी जेमन उ शुभ समाचार के नी मानैना, जे उकर बटले आवेला। जइसन कि पवितर किताब कहेला, “अगर एक बेस आदमी केर बचाल जाएक एतना कठिन अहे, तो दुष्ट आउर पापी आदमी केर का होवी?” से लगिन जेमन उसन दुःख सहैना जइसन परमेश्‍वर चाहेला, उमन के परमेश्‍वर उपरे भरसा करेक चाही जे उमन के बनाय हे। परमेश्‍वर सोउब बेरा उ करेला जेके करेक केर करार उ काइर रहे, से लगिन जे बेस अहे उके करते रहा। थोरेक गोइठमन एइसन अहे जेके मोंय तोहरे जेमन हूवाँ केर कलीसिया केर अगुवामन हेका कहेक चाहोना, काले कि मोंय हों तोहरे जइसन कलीसिया केर अगुवा हेकों। मोंय खुद उ दुःखमन के देइख हों जे ढेइर समय पहिले मसीह साइह रहे, तो मोंय हों उकर महिमा में भागीदार होमूँ, जब उ फिन से इ दुनिया में घूइर आवी। मोंय तोहरे से बिनती करोना कि उ बिसवासीमन केर उ झूँड़ केर देखभाल करा, जे परमेश्‍वर केर हेके आउर जेके तोहरे के देखभाल करेक ले जिमा देवल जाय हे। खुशी से उमन केर देख-भाल करा, इ लगिन निहीं कि तोहरे मजबूर अहा। एहे परमेश्‍वर चाहेला कि तोहरे करा, इ काम नीच कमाई लगिन ना करा मगर परमेश्‍वर आउर आदमीमन केर सेवा करेक केर इच्छा से करा। आउर जे आदमीमन केर जिमेदारी परमेश्‍वर तोहरे के देई हे, उमन केर उपरे अधिकारीमन नियर अधिकार ना जताबा, मगर उमन लगिन एगो बेस उदाहरन बना। जब यीशु मसीह, जे कि हमरे केर मुध चरवाहा हेके, दोबारा फिन से घूइर आवी, तब तोहरे के एगो इनाम देवी जे कहियो अपन चमक के नी हेराई। हे जवान छोड़ा-छोंड़ीमन, एइसनेहें काइर के तोहरे के कलीसिया केर अगुवामन केर अधीन रहेक चाही, तोहरे सोउब के नरम भाव से एक-दोसर केर मदइत करेक चाही, काले कि आबा परमेश्‍वर केर बचन में लिखल अहे, “परमेश्‍वर घमंडी आदमीमन केर बिरोध करेला, मगर नरम आदमीमन उपरे किरपा करेला।” से लगिन, खुद के आबा परमेश्‍वर लगिन नरम करा जे रक्षा करेक में शक्तिशाली अहे, ताकि उ दिन तोहरे के एक बेस ठाँव में उठाई, जेके उ चुइन हे। परमेश्‍वर के अपन सोउब परेशानीमन आउर चिंतामन के बतावा काले कि उ तोहर फिकिर करेला। सोउब बेरा तेयार रहा आउर जागते रहा, काले कि शैतान, तोहर दुश्मन तोहर उपरे हमला करेक चाहेला कि तोहरे आबा परमेश्‍वर केर आगयामन के ना माना। उ गरजेक वाला सिंह नियर अहे, जे आगे-पिछे जाय के इ खोजेला कि उ केखो खाएक पारोक। तोहरे के अपन मजबूत बिसवास केर संगे उकर बिरोध करेक चाही, याइद रखा कि तोहरे केर मसीही भाई-बहिनमन जे पूरा दुनिया में रहाथैं, एहे लेखे केर दुःखमन के सहाथैं जइसन तोहरे सहाथा। परमेश्‍वर जे पूरा रीति से किरपा से भरल अहे, उ हमरे के यीशु मसीह केर संगे एक जूट होवेक केर खातिर, स्वरग में उकर जुग-जुग केर महिमा में साझादार होवेक लगिन बोलाय हे। तोहर थोरेक देरी लगिन दुःख सहेक केर पाछे, परमेश्‍वर तोहरे के बेस बनाय देवी ताकि तोहर में कोनों दोष ना रहोक आउर उ तोहर दिल के मजबूत करी आउर उकर उपरे तोहर भरसा के सचमुच में स्थिर बनाय देवी। उ माइन पावेक केर लायक अहे, काले कि उकर शक्ति केर कोनों आखरी नखे। आमीन। मोंय इ चिट्ठी थोरेक शबदमन में सीलास केर मदइत से लीख हों आउर तोहरे के भेइज हों। मोंय उके एक बिसवास लायक भाई केर रूप में मानोना। मोर इके लिखेक केर मकसद तोहरे के उसकाएक आउर बिसवास दिवाएक हेके कि जे कुछ हों तोहरे महसूस कराथा, उ सच में तोहर परती परमेश्‍वर केर किरपा केर हिस्सा हेके। इ किरपा में मजबूत बनल रहा। बेबीलोन शहर जे रोम देस में अहे, हूवाँ केर बिसवासीमन तोहरे के जोहार कहैना जेमन के आबा परमेश्‍वर चुइन हे जइसन मसीह तोहरे के चुइन हे। मरकुस, जे मोर लगिन एगो बेटा नियर अहे, उ हों तोहरे के जोहार कहेला। एक-दोसर के सच्चा प्रेम से जोहार करा, मोंय प्रार्थना करोना कि परमेश्‍वर हर उ आदमी के शांति देवोक, जे मसीह में अहे। मोंय सिमोन पतरस जे यीशु मसीह केर सेवक आउर चुनल खास चेला हेकों, इ चिट्ठी के उमन के लिखाथों, जेमन हमर परमेश्‍वर आउर छुटकारा देवाइया यीशु मसीह केर धरमी होवेक से हमर जइसन ढेइर किमती बिसवास पाय हैं। मोंय प्रार्थना करोना कि जइसन-जइसन तोहरे परमेश्‍वर आउर हमर प्रभु यीशु मसीह केर गेयान में बढ़ाला, तइसनेहें परमेश्‍वर केर किरपा आउर शांति तोहर में भरपूरी से बढ़ते जाओक। परमेश्‍वर अपन शक्ति से हमरे के उ सोउब कुछ के देई हे, जे हमरे के एइसन जिंदगी जियेक लगिन चाही जे परमेश्‍वर के खुश करेला। इ होवेक पराई काले कि हमरे परमेश्‍वर के जानिला आउर उ ओहे हेके, जे हमरे के अपन महिमा आउर भलाई से अपन आदमी होवेक लगिन बोलाय हे। इ सोउब से परमेश्‍वर हमरे के ढेइर महान आउर किमती बरदान देई हे जेकर करार उ काइर रहे। ताकि हमरे इ बरदानमन केर इस्तेमाल काइर के दुनिया केर उ बुरा लालसामन से बचेक पारब, जे आदमीमन के नाश करेला। जेकर से हमरे परमेश्‍वर केर स्वभाव केर भागीदार बनेक पारब। इ लगिन तोहरे सिरिफ मसीह उपरे बिसवास करेक वाला ना बना, मगर बेस चाइल-चलन चलेक वाला बना। तोहरे सिरिफ बेस चाइल-चलन चलेक वाला ना बना, मगर इखो जाना कि कइसन समझदारी केर संगे ब्यवहार करेक अहे। तोहरे सिरिफ समझदारी से ब्यवहार करेक वाला ना बना, मगर अपन उपरे काबू रखेक वाला हों बना। तोहरे सिरिफ अपन उपरे काबू रखेक वाला ना बना, मगर दुःखमन में धीरज रखेक वाला हों बना। तोहरे सिरिफ धीरज रखेक वाला हें ना बना, मगर एइसन जिंदगी जियेक वाला हों बना जे परमेश्‍वर के खुश करेला। तोहरे सिरिफ परमेश्‍वर के खुश करेक वाला ना बना, मगर तोहरे एक दोसर से अपन परिवार केर नियर प्रेम करेक वाला बना। तोहरे सिरिफ एक दोसर से अपन परिवार केर नियर प्रेम करेक वाला ना बना, मगर एक दोसर से प्रेम करेक वाला बना। काले कि अगर इ गोइठमन तोहर में बनल अहे आउर बढ़ते जाई, तो इ हमर प्रभु यीशु मसीह केर गेयान के पावेक से तोहरे के बेकार आउर हारेक नी देवी। आउर जेकर में इ गोइठमन नखे, उ अंधरा अहे। उ भुलाय गेलक कि परमेश्‍वर उकर उ पापमन के माफ काइर देई हे, जेके उ मसीह में बिसवास करेक से पहिले काइर रहे। इ खातिर, बिसवासी भाईमन खुद के आउर दोसर आदमीमन के इ देखाएक लगिन आउर हें बेस ब्यवहार करेक केर कोशिश करा कि परमेश्‍वर हकीकत में तोहरे के चुइन हे, आउर अपन होवेक लगिन बोलाय हे। अगर तोहरे एइसन करबा तो सच में तोहरे परमेश्‍वर से अलग नी होबा। आउर इ कि परमेश्‍वर उ राइज में ढेइर खुशी से तोहर स्वागत करी जहाँ यीशु मसीह अहे, जे हमर प्रभु आउर छुटकारा देवाइया हेके आउर उ सोउब दिन लगिन राजा केर रूप में राइज करी। हालाँकि तोहरेमन पहिले से हें इ गोइठमन के जानाला, आउर जे सच्चा शिक्षामन मसीह केर बारे में मिल हे उके मजबूती से धाइर रहा, जेके आदमीमन तोहरे के देई हैं, मोंय तोहरे के उमन केर बारे में लगातार याइद दिवाते रहमूँ। आउर मोंय इके अपन लगिन ठीक समझोना कि जब तक मोंय जिंदा अहों, तब-तक मोंय तोहरे के इ गोइठमन के याइद दिवाते रहमूँ। काले कि हमर प्रभु यीशु मसीह मोके साफ रीति से बताय देई हे कि मोंय जल्दी हें मोइर जामूँ। इ लगिन मोंय इ गोइठमन के तोहरे के बताएक लगिन एइसन कठिन मेहनइत कराथों ताकि मोर मोरेक केर पाछे सोउब बेरा इमन के याइद करेक पारबा। जब हमरे चुनल खास चेलामन तोहरे के हमर प्रभु यीशु मसीह केर शक्ति आउर उकर फिन से घूइर आवेक केर बारे में शुभ समाचार बताली, तो हमरे तोहरे के चतुराई से बनाल कहनी नी बतात रही, मगर हमरे मसीह केर महिमा अपन आँइख से देइख रही। हमरेमन हों जानिला कि मसीह केर बारे में परमेश्‍वर केर संदेश के बताएक वालामन जे बचन लीख रहैं, उ बचनमन फिर से उकर घूइर आवेक केर बारे में सफा-सफा बतायला। अगर तोहरे इ बचन में धेयान देबा, तो तोहरे बेस काम करबा, काले कि इ एगो दीया नियर अहे, जे अंधार ठाँव में चमकेला जब तक कि दिन नी निकलेला, आउर मसीह केर इंजोत तोहर दिल में चमकेला, जे नियर बड़ बिहान केर तइरगन दुनिया में इंजोत लानेला। मगर इ ढेइर जरुरी अहे कि तोहरे इ गोइठ के समझा कि पवितर किताब में परमेश्‍वर केर संदेश के बताएक वालामन केर जे बचन पढ़ाला, उ सिरिफ उमन केर खुद केर बिचार ना लगे। काले कि कोनोवें भविष्यवाणी कहियो आदमीमन बटले नी सिरइज हे, मगर पवितर आत्मा उमन के उ बचन के लिखेक लगिन उसकालक। जेके परमेश्‍वर चाहेला कि उमन लिखोक। जे लेखे ढेइर समय पहिले इसराइलीमन केर माझे परमेश्‍वर केर संदेश के बताएक वाला झूठा आदमीमन रहैं, ओहे लेखे तोहर माझे हों झूठा उपदेस देवेक वालामन होबैं, उमन झूठा गेयानमन के चुप हें से फैलाय देबैं, जे आदमीमन के मसीह में बिसवास करेक से रोइक देवी। उ झूठा गेयान के पढ़ाएक वालामन मसीह के अपन मालिक मानेक से हों मना काइर देबैं। जे उमन केर मालिक हेके आउर उमन के पाप केर शक्ति से छुटकारा देई हे। इ लेखे उमन खुद के नाश काइर देबैं। परमेश्‍वर केर ढेइर आदमीमन इ झूठा शिक्षा के बताएक वालामन केर बुरा काममन केर नकल करबैं, आउर जे कोनोवें उमन करबैं उकर चलते, आदमीमन परमेश्‍वर बटे लेई जाएक वाला डहर केर बारे में निंदा करबैं। इमन के पढ़ाएक वालामन लालची होबैं, आउर उमन बना-बनाल कहनीमन के सुनाय के तोहरे के धोखा देबैं ताकि तोहरे से पैसा कमाएक पारबैं। परमेश्‍वर ढेइर समय पहिलेहें फैसला काइर रहे कि उ उमन के दंड देवी आउर उ एइसन करेक लगिन तेयार अहे। उ पक्का उमन के नाश काइर देवी। तोहरेमन जानाला कि ढेइर समय पहिले आबा परमेश्‍वर इ स्वरग दूतमन के हों दंड देवेक से नी छोड़लक जब उमन पाप करलैं। मगर उमन के हेंठे नरक में भेइज देलक, जहाँ उमन के अंधार में सिकड़मन में बाइंध के राइख देलक, जबकि उमन फैसला होवेक केर दिन केर इन्तजार कराथैं, जब उमन के दंड मिली, जेकर उमन लायक हेकैं। तोहरे इके हों जानाला कि ढेइर समय पहिले नूह केर दिन में परमेश्‍वर दुनिया केर दुष्ट आदमीमन के नी छोड़लक, परमेश्‍वर ढेइर पानी बरसालक आउर उमन के डुबाय के नाश काइर देलक। मगर धरमी बनेक केर बारे परचार करेक वाला नूह सहित आठ आदमीमन के बचाय लेलक। आउर तोहरे एहो जानाला कि ढेइर समय पहिले परमेश्‍वर सदोम आउर अमोरा नगर में रहेक वाला आदमीमन के दंड देलक, काले कि उमन बुरा काम काइर रहैं। से लगिन उ, उमन के पूरा रीति से आइग में भसम काइर देलक आउर उमन राख होई गेलैं। उ एइसन काइर के इ देखालक कि उमन केर का होवी, जेमन उकर डार नी मानैना। मगर इकर से पहिले कि उ सदोम शहर के नाश करलक, परमेश्‍वर लूत के जे एगो धरमी आदमी रहे, उके शहर से निकलाय देलक आउर इ लेखे उके बचाय लेलक। लूत ढेइर दुःखी रहे, काले कि सदोम शहर केर आदमीमन कोनोवें नियम के नी मानत रहैं आउर लज्जा केर काम करत रहैं। लूत उ बुरा आदमीमन केर माझे रहत रहे आउर उ रोज दिन उमन केर बुरा काममन के देखत रहे, जेके उमन करत रहैं आउर उ बुरा गोइठमन के सुनत रहे जेके उमन गोठियात रहैं, आउर इ सोउब उके ढेइर परेशान करत रहे, काले कि उ एगो धरमी आदमी रहे। इ सोउब काम के जे आबा परमेश्‍वर बितल दिन में करलक, तो इकर से साफ पता चलेला कि परमेश्‍वर जानेला कि धरमी आदमी के का लेखे परीक्षा से निकलाई आउर दुष्ट आदमीमन के का लेखे फैसला होवेक केर दिन तक सजा देवेक लगिन रखी। खास काइर के परमेश्‍वर उ झूठा पढ़ाएक वाला आदमीमन के दंड देवी, जे अपन बुरा काममन केर लालसा केर मोताबिक काम करैना आउर जे अपन उपरे परमेश्‍वर केर अधिकार के नी मानैना। उमन ढींठ आउर घमंडी अहैं, उमन महिमा से भरल स्वरगदूतमन केर बारे में बुरा कहेक से हों नी डरायना। स्वरगदूतमन उमन से ढेइर शक्तिशाली अहैं, मगर जब परमेश्‍वर ठिना उमन केर दोष लगायना तो उमन हों उमन केर अपमान नी करैना। मगर इमन निरबुद्धिया जानवरमन नियर काम करैना, ठीक उइसनेहें करैना जइसन उमन केर काया चाहेला आउर जे इ लगिन जनम होवैना कि आदमीमन उमन के फँसाय के मोराएक पारोक। उमन उ चीजमन केर अपमान करैना जेकर बारे में उमन हकीकत में कोनोवें नी जानैना। परमेश्‍वर इमन के तइसनेहें हें नाश करी जइसन आदमीमन जानवरमन के मोरायना। उमन केर नाश होवेक उ नोकसान के फार हेके, जे उमन काइर हैं, उमन के दिन केर इंजोत में बुरा भोग-बिलास में पड़ल रहेक बेस लगेला। उमन तोहर माझे एगो दाग आउर धब्बा नियर अहैं, जे हर बेर तोहर लगिन बुरा रीति से मुँह के लुकाएक केर कारण बनैना, जब उमन तोहर संगे खाएक बइठैना। उमन हर एक जनाना केर संगे गलत संबंध रखेक चाहैना, जेके उमन देखैना। उमन पाप करेक केर मोका सोउब बेरा खोजते रहैना, उमन उ आदमीमन के धोखा देवैना जेमन मसीह में मजबूती से भरसा नी करैना, आउर उमन के पाप बटे लेई जायना। उमन केर बगरा से बगरा चीजमन के पावेक केर लालसा केर खातिर परमेश्‍वर उमन के दंड देवी। उमन भला काम करेक छोइड़ देई हैं आउर उमन ओहे लेखे केर बुरा काम करेक शुरु काइर देई हैं, जे कि बओर केर बेटा बिलाम ढेइर समय पहिले काइर रहे। उके गलत काम काइर के पइसा कमाएक बेस लगत रहे। मगर परमेश्‍वर बिलाम के उकर बुरा काममन लगिन उकर गधी केर द्वारा डाँट सुनालक, जबकि गधीमन नी बोलैना मगर उ गधी बिलाम से एगो आदमी नियर गोठियालक जब उ बिलाम के राजा से मिलेक लगिन लाइद के लेगत रहे, आउर उ बेरा उ परमेश्‍वर केर संदेश के बताएक वाला बिलाम के ना समझ केर काम करेक से रोइक लेलक। इ झूठा सिखाएक वालामन उ कुआँ केर सोता नियर बेकार अहैं, जे सूइख जाय हे आउर उ बदरी नियर बेकार अहैं, जे पानी बरसेक से पहिलेहें तेज हवा उके उड़ाय के लेई जायला। परमेश्‍वर उमन लगिन एगो एइसन ठाँव तेयार काइर हे जे पूरा अंधार अहे। जब उमन आदमीमन के गेयान देवैना, तो उमन बेकार आउर घमंड से भरल शबदमन केर इस्तेमाल करैना। उमन आदमीमन के बतायना कि उमन उ लज्जा केर काममन के करेक लगिन आजाद अहैं जेके उमन केर काया करेक चाहेला आउर उमन के फिर से पाप करेक लगिन भरमाय देवैना, जे एखन-एखन दुष्ट जिंदगी से बाइच के निकइल हैं। उमन आदमीमन से करार करैना कि जे कुछ भी उमन करेक चाहैना उके करेक लगिन आजाद अहैं, हालाँकि उमन खुद गुलाम नियर अहैं, काले कि जेके जे चीज केर आदत होई जायला, तो उ जेके करेला, उकर गुलाम बाइन जायला। जब आदमीमन प्रभु यीशु मसीह के अपन प्रभु आउर छुटकारा देवाइया माइन लेई रहैं, तब प्रभु उमन के इ दुनिया केर बुराई से बचाय लेई रहे। मगर अब एक बेर फिन उमन बुरा काममन में फाँइस जाय हैं आउर उ बुरा काम अब उमन के अपन वश में करेला, इ लगिन तब मसीह के नी मानेक से उमन केर दशा उ मनक बिसवासी बनेक से पहिले केर दशा से हों बुरा होई जाय हे। मोर कहेक केर मतलब इ हेके कि जेमन मसीह के जाइन के छोइड़ देवैना उमन के जेमन मसीह के कहियो हें नी अपनाय हैं उमन से बगरा दंड मिली। उमन लगिन एहे बेस होतक कि उमन कहियो इ नी जानतैं कि अपन जिंदगी के धरमी तरीका से चलाएक केर का मतलब होवेला। अब उमन जानैना कि ठीक का हेके, मगर उमन परमेश्‍वर केर उ आगयामन के मानेक छोइड़ देलैं, जेके हमरे उमन के देई रही। एइसन आदमीमन लगिन इ कहावत ठीक बइठेला कि कुकूर अपन उलटी के चाटेक लगिन फिन से घूइर के आवेला आउर धोवल सुवइर कादो में लोटेक लगिन फिन चाइल जायला। हे दुलार बिसवासी भाई-बहिनमन, अब मोंय तोहरेमन के दूसरा बेर चिट्ठी लिखाथों, इ दुयो चिट्ठी के इ लगिन लीख हों ताकि जे गोइठमन के तोहरे पहिले से जानाला, उके दोबारा याइद दिवाय के तोहरे केर मन में शुद्ध बिचारमन के जगाएक पारमूँ। मोंय एइसन इ लगिन कराथों, काले कि मोंय चाहोना कि तोहरे उ बचनमन के याइद रखा, जे परमेश्‍वर केर संदेश के बताएक वालामन ढेइर पहिले कइह रहैं, आउर हमर छुटकारा देवाइया आउर हमर प्रभु यीशु मसीह केर आगयामन के याइद रखा, जेके तोहरे के चुनल खास चेलामन सिखाय रहैं। सोउब से जरुरी गोइठ तोहरे के समझेक चाही कि मसीह केर घूइर आवेक से पहिले एइसन आदमीमन होबैं, जे तोहर मजाक उड़ाबैं, काले कि तोहरे बिसवास कराला कि मसीह फिन से घूइर आवी। उमन आदत से मजबूर होई के बुरा काममन के करबैं। आउर मजाक उड़ाते कहबैं, “का होलक प्रभु यीशु केर फिन से घूइर आवेक केर करार? उकर करार सच नखे, उ नी आवी। हमर पुरखामन तो मोइर गेलैं मगर सोउब कुछ तइसनेहें अहे जइसन दुनिया केर सिरजन केर शुरु में रहे।” उमन जाइन बुइझ के इ गोइठ के नजइर अंदाज करैना कि परमेश्‍वर केर बचन केर जरिया आकाश युग-युग से बनल अहे आउर धरती पानी में से बनलक आउर चाइरो बटे पानी हें पानी अहे। एहे पानी से परमेश्‍वर दुनिया के नाश काइर देलक जे उ बेरा मौजूद रहे। उ तेज बरसा भेजलक आउर इ धरती में बाइढ़ लाइन देलक आउर सोउब जिंदा जीव-जंतु के नाश काइर देलक। जे लेखे परमेश्‍वर दुनिया केर सिरजन होवेक केर आगया देई रहे, ओहे नियर उ आगया देई हे कि एखन केर आकाश आउर धरती तब-तक बनल रहोक जब-तक उ उमन के आइग से ना पोड़ाय देओक। उ, उमन के उ दिन तक रखाथे, जब उ सोउब आदमीमन केर फैसला करी आउर अधरमी आदमीमन के नाश काइर देवी। हे दुलार बिसवासी भाई-बहिनमन, इ गोइठ के जरूर याइद रखा कि प्रभु केर नजइर में एक दिन हजार साल केर नियर अहे आउर हजार साल एक दिन केर नियर अहे, उकर देखेक में दुइयो बराबइर अहे। थोरेक आदमीमन सोचैना कि प्रभु अपन घूइर आवेक केर करार के पूरा करेक में देरी कराथे, मगर एइसन नखे, उ तोहरेमन केर चलते धीरज धराथे। उ चाहेला कि केऊ हों नाश ना होवोक, मगर हर केऊ अपन मन के फिराओक आउर पाप काम करेक छोइड़ देओक आउर प्रभु ठिना आय जाओक। काले कि प्रभु पक्का घूइर आवी, उ अचका आय जाई जे नियर चोर अचका आवेला, उ बेरा आकाश में गरजेक केर आवाज सुनाई आउर आकाश लोप होई जाई। आकाश में सोउब कुछ, मतलब बेइर, चाँद आउर तइरगनमन पूरा रीति से जाइल जबैं। उ दिन परमेश्‍वर उ सोउब काममन के देखाई जेके आदमीमन काइर हैं, ताकि उमन केर फैसला करेक पारोक। इ पक्का अहे कि परमेश्‍वर इ लेखे सोउब चीजमन के नाश काइर देवी तो सोचा तोहरे के कइसन चाल चलेक चाही? तोहरे के पवितर चाइल-चलन आउर धरमी जिंदगी जियेक चाही जेकर से परमेश्‍वर खुश होवेला। जब तोहरे उ दिन केर इंतजार कराथा जे दिन परमेश्‍वर दुनिया केर सोउब आदमीमन केर फैसला करेक लगिन आवी, तो तोहरे अपन बटले एइसन काम करा कि उ दिन जल्दी आय जाओक। उ दिन केर आते हें आकाश आइग से पोइड़ के नाश होई जाई आउर उकर गरमी से आकाश केर सोउब चीज गइल जाई। मगर हमरे बिसवासी आदमीमन परमेश्‍वर केर करार केर मोताबिक एगो नवाँ आकाश आउर नवाँ धरती केर आसरा देखाथी, जहाँ सिरिफ धरमी आदमीमन रहैना। इ लगिन, हे दुलार बिसवासी भाई-बहिनमन, जबकि तोहरेमन इ गोइठमन केर होवेक केर आसरा देखाथा, तो एइसन जिंदगी जियेक लगिन सोउब लेखे से कोशिश करा, जे परमेश्‍वर के खुश करेला। आउर तोहरे शुद्ध, निरदोष आउर एक दोसर केर संगे शांति से रहा। आउर अगर हमर प्रभु अपन धीरज केर खातिर देरी कराथे तो इके तोहरे अपन छुटकारा पावेक केर एगो मोका केर रूप में समझा, जइसन हमर दुलारा भाई पौलुस हों तोहरे के उ गेयान केर मोताबिक लिखलक, जे परमेश्‍वर उके देई हे, ओहो तोहरे के ओहे गोइठ बतालक जेके मोंय अपन चिट्ठी में बताय हों। तइसनेहें उ अपन सोउब चिट्ठीमन में हों इ गोइठमन केर चरचा काइर हे, जेकर में केतना गोइठमन एइसन अहे, जेके समझेक कठिन अहे, आउर अनपढ़ आउर चंचल आदमीमन उकर अर्थमन के हों पवितर किताब केर आउर गोइठमन केर नियर खींच-ताइन के अपनेहें नाश केर कारण बनायना। इ लगिन हे दुलार बिसवासी भाई-बहिनमन, तोहरे पहिलेहें से इ गोइठमन के जाइन हा, से लगिन सावधान रहा, ताकि अधरमी आदमीमन केर बहकाएक में फाँइस के मसीह में अपन बिसवास के हेराय ना देवा। मगर हमर प्रभु आउर छुटकारा देवाइया यीशु मसीह केर किरपा आउर गेयान में बढ़ते जावा। उकरे महिमा एखन हों होवोक, आउर युग-युग होते रहोक। आमीन। हमरे एगो एइसन आदमी केर बारे में लिखाथी, जे जिंदगी केर बचन हेके। उ दुनिया केर सिरजन से पहिले से रहे, जेकर बारे में हमरे सुनली, आउर अपन आँइख से देखली, बल्कि जेके हमरे धेयान से देखली आउर हाँथ से छुली। इ आदमी जे जिंदगी देवेला, धरती में आलक आउर हमरे उके देखली आउर उकर गवाही देवीला आउर तोहरेमन के उ जुग-जुग केर जिंदगी केर बारे में बताइला, जे आबा परमेश्‍वर केर संगे रहे आउर हमर उपरे दिस्तार होलक। जे कोनों हमरे देखली आउर सुइन ही उकर शुभ समाचार तोहरेमन के हों देवीला, ताकि तोहरेमन हों हमर संगे सहभागी होवा। आउर हमर इ सहभागिता आबा केर संगे, आउर उकर बेटा यीशु मसीह केर संगे अहे। आउर इ गोइठमन के हमरे इ लगिन लिखिला कि तोहरेमन केर खुशी पूरा होई जाओक। जे शुभ समाचार हमरे उकर से सुनली, आउर तोहरेमन के सुनाइला, उ इ हेके: कि परमेश्‍वर इंजोत हेके आउर उकर में कोनोवें अंधार नखे। अगर हमरे कहब कि परमेश्‍वर केर संगे हमरे मिलल अही, आउर फिन बुरा काम करब तो हमरे झूठा हेकी आउर सच्चाई में नी चलिला। मगर, अगर जइसन परमेश्‍वर इंजोत में अहे, तइसनेहें हमरे हों इंजोत में चलब, तो उकर से मिलल रहिला आउर उकर बेटा यीशु मसीह केर किमती लोहू हमरे के सोउब पापमन से शुद्ध करेला। अगर हमरे कहब, कि हमर में कोनोवें पाप नखे, तो खुद के धोखा देवीला आउर हमर में सच्चाई नखे। अगर हमरे अपन पापमन के माइन लेवब, तो उ हमर पापमन के क्षमा करेक, आउर हमरे के सोउब अधरम से शुद्ध करेक में बिसवास लाएक आउर धरमी हेके। अगर हमरे कहब कि पाप नी काइर ही, तो हमरे परमेश्‍वर के झूठा ठहराइला, आउर उकर बचन हमरे में नखे। हे मोर छउवामन, मोंय इ गोइठ तोहरेमन के इ लगिन लिखाथों कि तोहरेमन पाप ना करा। अगर केऊ पाप करी तो आबा परमेश्‍वर ठिना हमर लगिन एगो मदइत करेक वाला अहे, जे हमरे केर पापमन के क्षमा करेक लगिन उकर से प्रार्थना करेला, मतलब उ यीशु मसीह हेके जे धरमी अहे। ओहे हमर पापमन केर मुक्ति लगिन खुद के बलिदान काइर देलक आउर सिरिफ हमरे केर पाप लगिन निहीं, मगर गोटा दुनिया केर आदमीमन केर पाप लगिन बलिदान काइर देलक। अगर हमरे परमेश्‍वर केर आगयामन के मानब तो उकरे से हमरे के पता चली कि हमरेमन उके जानिला। जे केऊ कहेला, “मोंय परमेश्‍वर के जानोना,” आउर उकर आगयामन के नी मानेला, तो उ झूठा हेके आउर परमेश्‍वर केर सच्चाई उकर में नखे। मगर जे केऊ परमेश्‍वर केर बचन केर मोताबिक चलेला, उकर में सचमुच परमेश्‍वर केर प्रेम सिद्ध होई हे। इकरे से हमरे जानिला कि हमरे उकर में बनल अही। अगर जे केऊ इ कहेला कि मोंय परमेश्‍वर में बनल रहोना, तो उके खुद ओइसनेहें रहेक चाही जइसन यीशु रहलक। हे दुलार भाई बहिनमन, मोंय तोहरेमन के कोनों नवाँ आगया नी लिखाथों, मगर ओहे पुरना आगया जे शुरु से तोहरेमन के मिल हें, इ पुरना आगया उ बचन हेके जेके तोहरेमन सुइन हा। मगर अब जे आगया मोंय लिखाथों उ नवाँ आगया हेके, काले कि इकर सच्चाई मसीह में दिस्तार देलक आउर तोहरेमन में हों दिस्तार देवेला, काले कि अंधार मेटते जायला आउर सच्चाई केर इंजोत एखन चमकेक लाइग हे। जे केऊ इ कहेला कि मोंय इंजोत में अहों आउर अपन बिश्वासी भाई से बैर रखेला, तो उ एखन तक अंधार में हें जियाथे। जे केऊ अपन बिश्वासी भाई से प्रेम करेला उ इंजोत में रहेला। उकर में एइसन कोनों नखे कि उ दोसर मनक पाप केर कारण बनी। मगर जे केऊ अपन भाई से बैर करेला, उ अंधार में अहे आउर अंधार में चलेला, आउर नी जानेला कि उ कहाँ जायला, काले कि अंधार उकर आँइख के अंधरा काइर देई हें। हे दुलार छउवामन, मोंय तोहरेमन के इ लगिन लिखाथों कि यीशु मसीह केर नाँव से तोहरेमन केर पाप क्षमा होलक। हे आबामन, मोंय तोहरेमन के इ लगिन लिखाथों काले कि तोहरेमन मसीह के जानाला जे शुरु से अहे। हे जवानमन, मोंय तोहरेमन के इ लगिन लिखाथों कि तोहरेमन उ शैतान उपरे जय पाय हा जे सोउब बुराई केर कारण हेके। हे दुलार छोंड़ामन, मोंय तोहरे के इ लगिन लिखाथों, काले कि तोहरे आबा परमेश्‍वर के जाइन जाय हा। हे आबामन, मोंय तोहरेमन के इ लगिन लिखाथों काले कि तोहरेमन मसीह के जानाला जे शुरु से अहे। हे जवानमन, मोंय तोहरेमन के इ लगिन लिखाथों कि तोहरेमन बलवान हेका आउर परमेश्‍वर केर बचन तोहर में बनल रहेला आउर तोहरेमन उ शैतान उपरे जय पाय हा जे सोउब बुराई केर कारण हेके। तोहरेमन ना तो दुनिया से आउर ना दुनिया केर चीजमन से प्रेम करा। अगर केऊ दुनिया से प्रेम करेला, तो उकर में आबा परमेश्‍वर केर प्रेम नखे। काले कि जे कोनों दुनिया में अहे मतलब काया केर लालसा आउर आँइख केर लालसा आउर धन सम्पति केर घमंड, उ आबा परमेश्‍वर बटले निहीं मगर दुनिया बटले हें हेके। दुनिया आउर उकर इच्छामन दुयो मेटते जायला, मगर जे परमेश्‍वर केर इच्छा केर मोताबिक चलेला, उ सोउब बेरा बनल रही। हे दुलार छउवामन, इ आखरी समय हेके आउर जइसन तोहरेमन सुइन हा कि मसीह केर बिरोधी आवेक वाला अहे, उकर मोताबिक एखन हों ढेइर मसीह केर बिरोध करेक वालामन उइठ ठड़ाय हैं। इकर से हमरे जानिला कि इ आखरी समय हेके। उ मसीह बिरोधीमन तो हमरेमन में से हें आय हैं, मगर उमन हमर अपन नी रहैं। अगर उमन हमरेमन केर होतैं तो हमरेमन केर संगे रहतैं। मगर उमन हमरेमन के छोइड़ के चाइल गेलैं, ताकि उमन इ देखाएक पारोक कि उमन हमर माझे केर ना लगैं। मगर तोहरेमन केर अभिषेक तो पवितर यीशु मसीह केर बटले होई हे, आउर तोहरेमन इ सच्चाई के जानाला। मोंय तोहरेमन के इ लगिन नी लिखाथों कि तोहरेमन सच्चाई के नी जानाला, मगर इ लगिन कि तोहरेमन उके जानाला, आउर एहो जानाला कि कोनोवें झूठा शिक्षा, उ सच्चाई से नी निकलेला, जे सच्चाई के परमेश्‍वर देखाय हे। झूठा के हेके? सिरिफ ओहे जे यीशु के मसीह मानेक से इनकार करेला आउर मसीह केर बिरोधी हों ओहे हेके, जे आबा परमेश्‍वर केर आउर उकर बेटा यीशु केर इंकार करेला। जे केऊ बेटा केर इंकार करेला उकर ठिना आबा परमेश्‍वर हों नखे। जे केऊ बेटा के माइन लेवेला उकर ठिना आबा परमेश्‍वर हों अहे। उ बचन के जेके तोहरेमन शुरु से सुइन हा जब तोहरे यीशु मसीह उपरे बिसवास करला, अगर उ तोहरेमन में बनल रही, तो तोहरेमन हों बेटा में आउर आबा परमेश्‍वर में बनल रहबा। आउर परमेश्‍वर हमरेमन से करार काइर हे कि उ हमरेमन के जुग-जुग केर जिंदगी देवी। मोंय तोहरेमन के इ गोइठमन के उमन केर बारे में लीख हों, जेमन झूठा शिक्षा देई के तोहरेमन के भटकाएक केर कोशिश करैना। आउर तोहर उ अभिषेक, जे यीशु मसीह बटले करल जाय हे, उ तोहरेमन में बनल रहेला। तोहरेमन के इकर दरकार नखे कि केऊ तोहरेमन के सिखाओक। मगर जइसन उ अभिषेक जे यीशु मसीह बटले करल जाय हे, तोहरेमन के सोउब गोइठमन के सिखायला, आउर इ सच्चा हेके आउर झूठा ना लगे आउर जइसन उ तोहरेमन के सिखाय हे, तइसनेहें तोहरेमन उकर में बनल रहाला। से लगिन हे दुलार छउवामन, मसीह में बनल रहा कि जेखन उ दिस्तार होवी, तो हमरेमन के साहस होवोक आउर हमरे उकर आवेक से उकर सामने लाजिम नी होवब। अगर तोहरेमन जानाला कि परमेश्‍वर धरमी हेके, तो एहो जानाला कि जे केऊ उ काम के करेला जे काम परमेश्‍वर केर नजइर में बेस हेके, तो उ परमेश्‍वर केर संतान हेके। सोचा तो आबा परमेश्‍वर हमरेमन से कइसन प्रेम काइर हे। हमरेमन परमेश्‍वर केर संतान कहाइला आउर हकीकत में हमरेमन हेकी। मगर जेमन इ दुनिया केर हेकैं उमन नी जानैना कि हमरेमन परमेश्‍वर केर संतान हेकी, काले कि उमन परमेश्‍वर के हों नी जानैना। हे दुलार भाई बहिनमन, अब हमरेमन परमेश्‍वर केर संतान हेकी आउर आवेक वाला दिनमन में हमरेमन कइसन होवब इ एखन तक दिस्तार नी होई हे। बस हमरेमन एतना हें जानिला कि जब मसीह देखाई देवी तो हमरेमन हों उकर नियर बाइन जाब, काले कि हमरेमन उके तइसनेहें देखब जइसन उ हकीकत में अहे। आउर जे केऊ मसीह उपरे इ आसरा रखेला उ खुद के तइसनेहें पवितर करेला जइसन उ पवितर अहे। जे केऊ पाप करेला उ परमेश्‍वर केर नियम केर बिरोध करेला। आउर इ नियम के नी मानेक हें पाप हेके। तोहरेमन जानाला कि यीशु मसीह दुनिया में इ लगिन आलक कि पापमन के मेटाय देवोक, आउर यीशु मसीह में कोनोवें पाप नखे। जे केऊ मसीह में बनल रहेला उ पाप करते नी रहेला। जे केऊ पाप करेला उ ना तो मसीह के देइख हे आउर ना उके जाइन हे। हे दुलार छउवामन, केकरो बहकाल में ना आबा। जे धरम केर काम करेला ओहे मसीह नियर धरमी हेके। जे केऊ पाप करते हें रहेला उ शैतान बटले हेके, काले कि शैतान शुरु हें से पाप करते आय हे। परमेश्‍वर केर बेटा इ लगिन आलक कि शैतान केर काममन के नाश करोक। जे केऊ परमेश्‍वर केर संतान हेके उ पाप करते नी रहेला, काले कि उकर में परमेश्‍वर केर स्वभाव अहे। आउर उ पाप करबे नी करी काले कि उ परमेश्‍वर से जनइम हे। इकरे से परमेश्‍वर केर संतान आउर शैतान केर संतान चिन्हाल जायना, जे केऊ उ काममन के नी करेला जे परमेश्‍वर केर देखेक में ठीक अहे, तो उ परमेश्‍वर केर संतान ना लगे आउर ओहो ना लगे जे अपन भाई से प्रेम नी करेला। जे समाचार तोहरेमन शुरु से सुनला उ इ हेके कि हमरेमन एक दोसर से प्रेम करब। आउर आदम केर बेटा कैन केर नियर नी बनब जे दुष्ट शैतान बटले रहे, आउर जे अपन भाई हाबील के माइर मोरालक। उ अपन भाई के का लगिन मोरालक? उ एइसन इ लगिन करलक काले कि उकर काम बुरा रहे आउर उकर भाई केर काम धरम केर रहे। हे भाईमन, अगर दुनिया केर आदमीमन तोहरेमन से बैर करैना तो ताजुब ना करबा। हमरेमन जानिला कि हमरे माउत से पार होई के जुग-जुग केर जिंदगी में पोंहइच ही, काले कि हमरेमन बिसवासी भाई-बहिनमन से प्रेम करिला। जेमन प्रेम नी करैना उमन माउत केर दशा में रहैना। जे केऊ अपन बिसवासी भाई-बहिनमन से बैर करेला, उ हत्यारा हेके आउर तोहरेमन जानाला कि केऊ हत्यारा ठिना जुग-जुग केर जिंदगी नखे। हमरेमन प्रेम के इकरे से जानली कि यीशु हमर लगिन अपन प्राण के देई देलक। एहे लगिन हमरेमन के हों अपन बिसवासी भाई-बहिनमन लगिन अपन प्राण के देवेक चाही। मगर जेकर ठिना दुनिया केर धन-सम्पति होवी आउर उ अपन भाई के तंगहाली में देइख के उकर उपरे दया नी करी, तो उकर में परमेश्‍वर केर प्रेम कइसन बनल रहेक पारी? हे दुलार छउवामन, हमरेमन बचन आउर गोइठमन से हें निहीं, मगर काममन आउर सच्चाई से हों प्रेम करब। जब हमरेमन दोसरमन से प्रेम करब तब हमरे जानब कि हमरेमन सच्चाई केर हेकी आउर अगर सचमुच में हमरे एक दोसर से प्रेम करिला तो हमरे चिंता नी करब, बल्कि हमरे परमेश्‍वर से प्रार्थना करब। काले कि परमेश्‍वर हमरेमन केर मन से बाड़ हेके आउर उ सोउब कुछ जानेला। हे दुलार भाईमन, अगर हमरेमन केर मन हमरे के दोष नी देवी तो हमरे के परमेश्‍वर केर सामने आवेक केर साहस होवेला। आउर जे कुछ हमरेमन परमेश्‍वर से माँगिला उ हमरे के देवेला, काले कि हमरेमन उकर आगयामन के मानिला आउर जे उके बेस लगेला ओहे करिला। आउर उकर आगया इ हेके कि हमरे उकर बेटा यीशु मसीह केर नाँव उपरे बिसवास करब आउर जइसन उ हमरे के आगया देई हे उकरे मोताबिक एक दोसर से प्रेम करब। आउर जे परमेश्‍वर केर आगयामन के मानेला उ परमेश्‍वर में आउर परमेश्‍वर उकर में बनल रहेला। आउर इकरे से हमरेमन जानिला कि उ हमर में बास करेला, काले कि उ हमरे के अपन आत्मा देई हे। हे दुलार भाईमन, हरेक आदमी उपरे बिसवास ना करा जेमन पवितर आत्मा बटले बोलेक केर दावा करैना। मगर उमन के परखा कि उमन परमेश्‍वर बटले हेकैं कि निहीं, काले कि ढेइर बगरा झूठा परमेश्‍वर केर संदेश के बताएक वाला आदमीमन इ दुनिया में फाइल जाय हैं। परमेश्‍वर केर आत्मा के तोहरेमन इ नियर चिन्हेक पारबा कि जे आत्मा इ माइन लेवेला कि यीशु मसीह काया में होई के आय हे, उ परमेश्‍वर बटले अहे। जे आत्मा प्रभु यीशु के नी मानेला उ परमेश्‍वर बटले ना लगे आउर ओहे तो मसीह केर बिरोधी आत्मा हेके, जेकर चरचा तोहरेमन सुइन चुइक हा कि उ अवाइया अहे आउर एखन हों इ दुनिया में अहे। हे दुलार छउवामन, तोहरेमन परमेश्‍वर केर हेका आउर तोहरेमन परमेश्‍वर केर संदेश के बताएक वाला झूठा आदमीमन के जीत लेई हा, आउर जे पवितर आत्मा तोहर में अहे उ शैतान से हों बाड़ अहे जे दुनिया में राइज करेला। उमन दुनिया केर हेकैं, से लगिन दुनिया केर गोइठमन के कहैना आउर इ दुनिया केर आदमीमन उ मनक गोइठ के सुनैना। हमरेमन परमेश्‍वर केर हेकी। जे परमेश्‍वर के जानेला, उ हमरेमन केर सुनेला, जे परमेश्‍वर के नी जानेला उ हमरेमन केर नी सुनेला। हमरेमन इ लेखे सच्चाई केर आत्मा आउर झूठा आत्मा के जाइन लेविला। हे मोर दुलार भाई-बहिनमन, हमरेमन एक दोसर से प्रेम करब, काले कि प्रेम परमेश्‍वर केर संतान हेके, आउर जे केऊ एक दोसर से प्रेम करेला, उ हों परमेश्‍वर केर संतान हेके आउर परमेश्‍वर के जानेला। मगर जे एक दोसर से प्रेम नी करेला उ परमेश्‍वर के नी जानेला, काले कि परमेश्‍वर प्रेम हेके। जे प्रेम परमेश्‍वर हमर से करेला, उ इकर से दिस्तार होलक कि परमेश्‍वर अपन एकलौता बेटा के इ दुनिया में भेजलक कि हमरेमन उकर जरिया से जुग-जुग केर जिंदगी के पावब। सच्चा प्रेम इकर में नखे कि हमरेमन परमेश्‍वर से प्रेम करली मगर इकर में अहे कि परमेश्‍वर हमरेमन से प्रेम करलक आउर हमरेमन केर पापमन से मुक्ति लगिन अपन बेटा के बलिदान होवेक लगिन भेजलक। हे दुलारा भाईमन, जब परमेश्‍वर हमरेमन से एइसन प्रेम करलक, तो हमरेमन के हों एक दोसर से प्रेम करेक चाही। परमेश्‍वर के कहियो केऊ नी देखलक, अगर हमरे एक दोसर से प्रेम करब, तो परमेश्‍वर हमर में बनल रही आउर उकर प्रेम हमर में सिद्ध होई जाय हे। इकरे से हमरे जानिला कि हमरे परमेश्‍वर में बनल रहिला आउर परमेश्‍वर हमरेमन में रहेला, काले कि उ अपन पवितर आत्मा हमरेमन के देई हे। हमरेमन बेटा के देइख ही आउर गवाही देवीला कि आबा परमेश्‍वर बेटा के इ दुनिया केर आदमीमन के पापमन से छुटकारा देवेक लगिन भेजलक। जे केऊ इ माइन लेवेला कि यीशु परमेश्‍वर केर बेटा हेके, परमेश्‍वर उकर में बनल रहेला आउर उ परमेश्‍वर में बनल रहेला। हमरेमन बेस लेखे जानिला आउर बिसवास हों करिला कि परमेश्‍वर हमरेमन से प्रेम करेला। परमेश्‍वर प्रेम हेके, आउर जे प्रेम में बनल रहेला उ परमेश्‍वर में बनल रहेला, आउर परमेश्‍वर उकर में बनल रहेला। इकरे से प्रेम हमरेमन में सिद्ध होलक कि हमरे के फैसला केर दिन साहस होवोक कि उ हमरे के सजा नी देवी, काले कि हमरेमन इ दुनिया में यीशु केर नियर जिंदगी जियिला। प्रेम में डार नी होवेला मगर सिद्ध प्रेम डार के दूर काइर देवेला, काले कि डार केर नाता सजा से होवेला आउर जे डरायला उ प्रेम में सिद्ध नी होई हे। हमरेमन इ लगिन प्रेम करिला कि पहिले परमेश्‍वर हमरे से प्रेम करलक। अगर केऊ कही कि मोंय परमेश्‍वर से प्रेम करोना आउर अपन संगी बिसवासी से बैर करी तो उ झूठा हेके। काले कि जे अपन संगी बिसवासी से जेके उ देइख हे प्रेम नी करेला, तो उ परमेश्‍वर से हों जेके उ नी देइख हे प्रेम करेक नी पारी। आउर उकर से हमरेमन के इ आगया मिल हे कि जे केऊ परमेश्‍वर से प्रेम करेला उके अपन संगी बिसवासी से हों प्रेम करेक चाही। जे केऊ इ बिसवास करेला कि यीशु हें मसीह हेके उ परमेश्‍वर केर संतान हेके। आउर जे केऊ आबा परमेश्‍वर से प्रेम करेला उ उकर संतानमन से हों प्रेम करेला। जब हमरेमन परमेश्‍वर से प्रेम करिला आउर उकर आगयामन के मानिला, तो जाइन जाइला कि हमरेमन परमेश्‍वर केर संतानमन से प्रेम करिला। परमेश्‍वर से प्रेम करेक केर मतलब इ हेके कि हमरेमन उकर आगयामन के मानब आउर उकर आगयामन के मानेक कठिन नखे। काले कि जे केऊ परमेश्‍वर केर संतान हेके, उ दुनिया के जीत लेवेला आउर उ जीत जेकर से दुनिया में जीत मिलेला उ हमरे केर बिसवास हेके। दुनिया में जीत पावेक वाला के हेके? सिरिफ उ जेकर इ बिसवास अहे कि यीशु हें परमेश्‍वर केर बेटा हेके। उ यीशु मसीह हें हेके जेके परमेश्‍वर इ दुनिया में भेजलक आउर उ पानी से बपतिस्मा जल संस्कार लेलक आउर फिन जब उकर मौत होलक, तो उकर लोहू बहाल गेलक। सिरिफ उ बपतिस्मा जल संस्कार लेवेक लगिन हें निहीं मगर क्रूस उपरे अपन लोहू बहाय के मोरेक लगिन हों आलक आउर जे यीशु केर बारे में गवाही देवेला उ पवितर आत्मा हेके। आउर पवितर आत्मा इ गवाही देवेला कि यीशु मसीह परमेश्‍वर केर बटले आलक काले कि पवितर आत्मा सोउब बेरा सच बोलेला। आउर गवाही देवेक वालामन तीन अहैं, पवितर आत्मा, पानी आउर लोहू आउर तीनों एक हें गोइठ में सहमत अहैं। जब हमरेमन आदमीमन केर गवाही माइन लेविला, तो परमेश्‍वर केर गवाही तो उकर से बाइढ़ के अहे, आउर परमेश्‍वर केर गवाही इ हेके कि उ अपन बेटा केर बारे में गवाही देई हे। जे परमेश्‍वर केर बेटा यीशु उपरे बिसवास करेला उ अपनेहें में गवाही रखेला। जे परमेश्‍वर केर उपरे बिसवास नी करलक, उ परमेश्‍वर के झूठा ठहरालक, काले कि उ परमेश्‍वर केर गवाही उपरे बिसवास नी करलक जेके परमेश्‍वर अपन बेटा केर बारे में देई हे। आउर उ गवाही इ हेके कि परमेश्‍वर हमरेमन के जुग-जुग केर जिंदगी देई हे, इ जिंदगी उकर बेटा यीशु में अहे। जेकर ठिना परमेश्‍वर केर बेटा अहे उकर ठिना जुग-जुग केर जिंदगी अहे आउर जेकर ठिना परमेश्‍वर केर बेटा यीशु नखे, उकर ठिना उ जिंदगी हों नखे। मोंय इ चिट्ठी तोहरेमन के इ लगिन लिखाथों कि तोहरेमन जे परमेश्‍वर केर बेटा यीशु मसीह केर नाँव में बिसवास कराला ठीक से जाना कि जुग-जुग केर जिंदगी तोहरे ठिना अहे। आउर हमरेमन के परमेश्‍वर केर भीरे जे साहस होवेला उ इ हेके कि अगर हमरेमन उकर इच्छा केर मोताबिक कोनों माँगिला तो उ हमरेमन केर सुनेला। जब हमरेमन जानिला कि जे कोनों हमरेमन परमेश्‍वर से माँगिला उ हमरेमन केर सुनेला, तो हमरेमन एहो जानिला कि जे कोनों हमरे उकर से माँगली उ हमरेमन के मिल जाय हे। अगर केऊ अपन संगी बिसवासी के एइसन पाप करते देखी जेकर नतीजा मौत ना लगे, तो उ परमेश्‍वर से उकर लगिन प्रार्थना करोक जे एइसन पाप काइर हे, जेकर नतीजा मौत ना लगे तो परमेश्‍वर उके जुग-जुग केर जिंदगी देवी। पाप एइसन हों होवेला जेकर नतीजा मौत हेके, इकर बारे में मोंय प्रार्थना करेक नी कहोना। सोउब रकम केर अधरम तो पाप हेके मगर एइसन हों पाप अहे, जेकर नतीजा मौत ना लगे। हमरेमन जानिला कि जे केऊ परमेश्‍वर केर संतान हेके उ पाप करते नी रहेला, मगर परमेश्‍वर केर बेटा यीशु उकर रक्षा करते रहेला आउर दुष्ट शैतान उके छुवेक हों नी पारेला। हमरेमन जानिला कि हमरे परमेश्‍वर बटले हेकी आउर समूचा दुनिया उ दुष्ट शैतान केर वश में पड़ल अहे। हमरेमन एहो जानिला कि परमेश्‍वर केर बेटा यीशु मसीह इ दुनिया में आय जाय हे आउर उ हमरेमन के समझ देई हे कि हमरे उ सच्चा परमेश्‍वर के चिन्हब, हमरेमन उकर में जे सच्चाई हेके मतलब उकर बेटा यीशु मसीह में रहिला। सच्चा परमेश्‍वर आउर जुग-जुग केर जिंदगी एहे हेके। हे छउवामन खुद के मूर्तिमन से बचाय के रखबा। इ चिट्ठी मोंय यूहन्ना बटले हेके जे कलीसिया केर अगुवा हेकों। मोंय इ चिट्ठी उ खास बहिन के आउर उकर छउवा-पुतामन के लिखाथों, जेमन के परमेश्‍वर चुइन के राइख हे। मोंय तोहरेमन से सच्चा प्रेम करोना, सिरिफ मोंय हें निहीं मगर ओहोमन प्रेम करैना जेमन सच्चाई के जानैना। हमरेमन तोहरेमन से उ सच्चाई केर चलते प्रेम करिला जे हमरे केर भीतरे रहेला आउर सोउब बेरा हमर संगे बनल रही। मोंय प्रार्थना करोना कि आबा परमेश्‍वर आउर उकर बेटा यीशु मसीह बटले किरपा, दया आउर शांति हमर संगे बनल रहोक, जे कि हमरे सच्चाई के जानिला आउर एक दोसर से प्रेम करिला। मोंय इ सुइन के ढेइर खुशी होलों कि तोर थोरेक छउवामन सच्चाई केर डहर में चलाथैं, जइसन कि हमरेमन के आबा परमेश्‍वर बटले आगया मिल हे। अब हे बहिन, मोंय तोर से बिनती करोना कि हमरेमन के एक दोसर से प्रेम करेक चाही, इ कोनों नवाँ आगया ना लगे मगर ओहे आगया हेके, जेके हमरेमन ओहे बेरा से जानाथी जब हमरे मसीह केर उपरे बिसवास करली। सच्चा प्रेम इ हेके कि हमरे परमेश्‍वर केर आगयामन केर मोताबिक चलब। इ ओहे आगया हेके, जेके तोहरेमन शुरु से सुइन हा आउर तोहरे के इकर में चलेक हों चाही। मोंय इके इ लगिन कहाथों काले कि ढेइर झूठा शिक्षा देवेक वालामन दुनिया में आय हैं, जे इ नी मानैना कि यीशु मसीह आदमी बाइन के आय हे। एइसन कहेक वालामन हें बहकाएक वाला आउर मसीह केर बिरोधी हेकैं। एहे लगिन तोहरेमन के सावधान रहेक चाही, ताकि उमन तोहरेमन के बहकाएक ना पारोक काले कि जेकर लगिन हमरेमन कठिन मेहनइत काइर ही उके गवाँय ना देबा, मगर तोहरेमन के उकर पूरा इनाम पावेक अहे। जे केऊ मसीह केर शिक्षा से भटइक जायला आउर उकर में बनल नी रहेला उकर ठिना परमेश्‍वर नखे। जे केऊ मसीह केर शिक्षा केर मोताबिक चलेला उकर ठिना आबा परमेश्‍वर आउर उकर बेटा यीशु दुयो अहैं। अगर केऊ तोहरेमन ठिना आवी आउर एहे शिक्षा नी देई तो उके ना तो घर में आवेक देबा आउर ना उके जोहार करा। काले कि जे केऊ एइसन आदमी के जोहार करेला उ आदमी हों उकर बुरा काममन में साझादार होवेला। मोके आउर हों ढेइर गोइठमन के तोहरेमन के लिखेक अहे, मगर मोंय उमन के कागज आउर सियाही से लिखेक नी चाहोना। काले कि मोके आसरा अहे कि मोंय तोहरेमन ठिना आमूँ आउर आमने सामने होई के गोठियामूँ, जेकर से हमरेमन केर खुशी पूरा होई जाओक। तोर बहिन केर छउवामन जेमन के परमेश्‍वर चुइन हे तोहरेमन के जोहार कहैना। इ चिट्ठी मोंय यूहन्ना बटले हेके जे कलीसिया केर अगुवा हेकों। मोंय इ चिट्ठी मोर दुलारा संगी गयुस केर नाँव से लिखाथों जेकर से मोंय सच्चा प्रेम करोना। हे दुलारा संगी, मोर इ प्रार्थना हेके कि जइसन तोंय आत्मिक उन्नति कराथिस तइसनेहें तोंय सोउब गोइठमन में उन्नति कर आउर भला चंगा रहबे। काले कि जब थोरेक बिसवासी भाईमन आय के हमरेमन के बतालैं कि तोंय परमेश्‍वर केर डहर में सच्चाई से चलिसला, तो मोंय ढेइर हें खुश होलों। मोके आउर कोनों गोइठ से एतना खुशी नी होतक जेतना इ सुइन के कि मोर छउवामन सच्चाई केर डहर में चलैना। हे मोर दुलारा संगी, तोंय हमरेमन केर बिसवासी भाईमन के ढेइर चीजमन से मदइत कराथिस, हिंयाँ तक कि उमन केर हों मदइत कराथिस जेमन के तोंय नी जानिसला। उमन हिंयाँ केर कलीसिया केर सामने तोर प्रेम केर गवाही देई हैं। अगर तोंय उमन के जेमन तोर ठिना आवैना, ओहे लेखे बिदा करबे जे लेखे परमेश्‍वर केर आदमीमन के करेक उचित अहे, तो तोंय बेस काम करबे। काले कि उमन अलग-अलग ठाँव में इ लगिन जाथैं, ताकि यीशु मसीह केर बारे में आदमीमन के बताएक पारोक, उमन अबिसवासीमन से कोनों मदइत नी लेवैना। से लगिन हमरेमन के एइसन आदमीमन केर मदइत करेक चाही, ताकि जब उमन सच्चाई केर घोषना करबैं तो हमरेमन हों उकर में उमन संगे साझादार बनेक पारब। मोंय आगे हों कलीसिया केर बिसवासीमन के इ चिट्ठी लीख रहों, मगर दियुत्रिफेस मोर गोइठमन के मानेक से मना करेला काले कि उ खुद कलीसिया केर अगुवा बनेक चाहेला। से लगिन जब मोंय आमूँ तो कलीसिया केर आदमीमन से गोठियामूँ कि उ का-का काम कराथे। उ हमरेमन केर उपरे बुरा-बुरा काम करेक केर दोष लगायला। एतना हें निहीं उ खुद बिसवासी भाईमन केर हों स्वागत नी करेला, मगर जेमन उमन केर स्वागत करेक चाहैना, उमन के हों मना करेला आउर हिंयाँ तक कि उ उमन के कलीसिया से बाहरे निकलाय देवेला। हे दुलारा संगी, उमन केर नकल ना करबे जेमन बुरा काम करैना, मगर उमन केर नियर चलबे जेमन भलाई केर काम करैना। जे भलाई करेला उ परमेश्‍वर केर संतान हेके मगर जे बुराई करेला उ परमेश्‍वर के नी जानेला। कलीसिया में सोउब केऊ कहैना कि देमेत्रियुस एगो बेस आदमी हेके काले कि उकर ब्यवहार परमेश्‍वर केर बचन केर मोताबिक अहे। आउर हमरेमन हों गवाही देवीला कि उ बेस आदमी हेके आउर तोंय जानिसला कि हमरेमन केर गवाही सच हेके। मोके आउर हें ढेइर गोइठमन के तोके लिखेक रहे, मगर मोंय सियाही आउर कलम से लिखेक नी चाहोना। मोके आसरा अहे कि मोंय तोर से जल्दी हें भेंट करमूँ तब हमरेमन आमने सामने गोठियाब। मोंय प्रार्थना करोना कि तोके शांति मिलते रहोक। हिंयाँ केर संगमन तोके जोहार कहैना। हूवाँ केर संगमन के नाँव लेई-लेई के जोहार कइह देबे। इ चिट्ठी मोंय यहूदा केर बटले हेके। मोंय यीशु मसीह केर एगो सेवक आउर याकूब केर छोट भाई हेकों। मोंय इ चिट्ठी तोहरेमन के लिखाथों जेके परमेश्‍वर अपन उपरे बिसवास करेक लगिन बोलाय हे। आबा परमेश्‍वर तोहरेमन से प्रेम करेला आउर तोहरे के यीशु मसीह में सही-सलामत राइख हे। मोंय प्रार्थना करोना कि दया आउर शांति आउर प्रेम तोहरेमन के भरपूर से मिलते रहोक। हे दुलार बिसवासी भाई-बहिनमन, हमरे जे छुटकारा में भागीदार अही, उकर बारे में मोंय ढेइर हें लालायित होई के लिखेक चाहत रहों, मगर अब मोके इ जरुरी लगाथे कि इ चिट्ठी केर जरिया से तोहरे के समझामूँ कि तोहरे उ बिसवास केर हिफाजत लगिन कोशिश करा, जेके परमेश्‍वर पवितर आदमीमन के सोउब दिन लगिन देई हे। काले कि थोरेक आदमीमन जे यीशु मसीह में बिसवास करेक केर देखावा करैना उमन तोहर माझे आय मिल हैं, उमन परमेश्‍वर के नी मानैना आउर गलत शिक्षा देवैना कि परमेश्‍वर अपन किरपा से हमरे केर पापमन के क्षमा काइर देवेला, एहे लगिन हमरे गलत काम में जिंदगी जियेक पारिला। उमन यीशु मसीह के इनकार करैना जे हमर एके गो मालिक आउर प्रभु हेके। ढेइर समय पहिले पवितर किताब में लिखल जाय रहे कि परमेश्‍वर एइसन आदमीमन के सजा देवी। मोंय तोहरे के याइद दिवाएक चाहोना हालाँकि इ गोइठ तोहरे के पहिले से हें पता अहे, परमेश्‍वर इसराइली आदमीमन के गुलामी से आजाद करालक आउर उमन के मिसर देस से बाहरे लेई आलक, मगर पाछे उ उमन के माइर मोरालक, काले कि उमन उकर उपरे बिसवास नी काइर रहैं। मोंय तोहरे के एहो याइद कराएक चाहोना कि परमेश्‍वर उ स्वरग दूतमन के कइसन दंड देलक जेमन अपन जिम्मेदारीमन के नी निभालैं आउर अपन पद के छोइड़ देलैं। परमेश्‍वर इ स्वरग दूतमन के अंधार ठाँव में सिकड़ से बाइंध के राइख हे, ताकि फैसला केर दिन उ मनक फैसला होवेक पारोक। तइसनेहें सदोम आउर अमोरा नगर आउर आसे-पासे केर शहर केर आदमीमन उ स्वरग दूतमन केर नियर हें ब्यभिचारी होई जाय रहैं आउर पराया काया केर पिछे लाइग जाय रहैं। परमेश्‍वर उ शहर केर आदमीमन के आइग से नाश काइर देई रहे। उमन केर संगे जे हों होलक उ झूठा पढ़ाएक वालामन लगिन एगो चेतावनी हेके कि उमन के हों जुग-जुग बारेक वाला आइग केर दंड मिली। ओहे लेखे बिसवास केर देखावा करेक वाला अधरमी आदमीमन इ दावा करैना कि परमेश्‍वर उमन के दर्शन में देखाय हे कि उमन अपन काया के गंदा काम काइर के अशुद्ध करेक पारैना। उमन परमेश्‍वर केर अधिकार के तुच्छ जानैना आउर स्वरग दूतमन केर बारे में बुरा भला कहैना। मगर हिंयाँ तक कि मुध स्वरगदूत मीकाईल हों एइसन नी करलक जइसन बिसवास केर देखावा करेक वालामन करैना। जेखन शैतान मीकाईल से इ गोइठ से विवाद करलक कि उमन में से केके मूसा केर लाश के दफनाएक केर अधिकार अहे, तो मीकाईल शैतान के बुरा-भला कइह के उकर उपरे दोष नी लगालक। उ सिरिफ एतना कहलक, “प्रभु तोके डाँटोक।” मगर इ आदमीमन जे गोइठमन के नी जानैना, उमन के बुरा भला कहैना, मगर जे गोइठमन के अनबुझ जानवरमन नियर स्वभाव से हें बुझैना, आउर इ पापी काममन के करेक केर चलते उमन खुद के नाश करैना। उमन केर उपरे हाय! उमन आदम केर बेटा कैन नियर चाल चलैना, जे अपन भाई के माइर मोराय रहे। रुपया केर लोभ केर खातिर उमन खुद उइसनेहें काम करैना जइसन बिलाम काइर रहे। उमन कोरह बंश केर आदमीमन नियर नाश होई जबैं, जेमन बिरोध काइर रहैं। जब इमन प्रभु केर प्रेम के याइद करते तोहर संगे तोहरे केर संगति में भोजन करैना, तो इमन उ खतरनाक चट्टाइनमन नियर होवैना जे समुदर केर हेंठे लुकल रहेला, जे तोहर डुबेक केर कारण बाइन सकेला। उमन उ चरवाहामन नियर अहैं जे सिरिफ अपनेहें केर चिंता करैना। उमन उ बदरीमन नियर अहैं, जे भूंई में बरसल बिना सिरिफ गरजेला। उमन ठंढा मौसम केर गाँछमन नियर होवैना जेमन केर दूई बेर माउत होवेला काले कि उमन कोनों फार नी देवैना आउर जाइर से उखइर जायना। जइसन समुदर केर खतरनाक लहरामन गंदा झाग बनायना, तइसनेहें इमन लज्जा वाला काम करैना। उमन थोरेक तइरगनमन नियर अहैं जे एक सोझ डहर में नी चलैना, उमन सही डहर नी देखायना। प्रभु उमन लगिन एगो ठाँव रखाथे जे पूरा रीति से अंधार अहे, जहाँ उमन के सोउब दिन लगिन रहेक पड़ी। हनोक हों जे आदम से सातवाँ पीढ़ी में जनइम रहे, इमन केर बारे में इ भविष्यवाणी काइर रहे, “देखा, प्रभु अपन लाखो पवितर स्वरगदूतमन केर संगे सोउब आदमीमन केर फैसला करेक लगिन आवाथे। ताकि आदमीमन जे बुरा काम काइर हैं आउर जेमन परमेश्‍वर केर बिरोध बुरा गोइठ कइह हैं, इ सोउब पापीमन के दंड देओक।” आदमीमन हमेशा परमेश्‍वर केर बिरोध बोलैना आउर दोसर आदमीमन में गलती खोजैना। उमन लगातार उ बुरा काममन के करैना जे उमन केर मन करेक चाहेला। उमन अपन बारे में घमंड करैना आउर अपन लाभ लगिन दोसर आदमीमन केर मुँह देखी बड़ाई करैना। मगर हे दुलार बिसवासी भाई-बहिनमन, तोहरेमन उ गोइठमन के याइद रखा, जे हमर प्रभु यीशु मसीह केर चुनल खास चेलामन पहिलेहें कइह चुइक हैं। उमन तोहरेमन से कहत रहैं, “आखरी समय में एइसन मजाक करेक वालामन आबैं, जे अपन अधरम केर वासनामन केर इच्छामन केर मोताबिक चाल चलबैं।” इ आदमीमन, उमन हेकैं, जेमन तोहर माझे फूट काइर देवैना। इमन अपन बुरा इच्छा केर मोताबिक चलैना आउर इमन में पवितर आत्मा नखे। मगर हे दुलार बिसवासी भाई-बहिनमन, तोहरेमन बगरा पवितर बिसवास में बढ़ोतरी लगिन एक दोसर केर मदइत करते रहा, आउर पवितर आत्मा केर अगुवाई में प्रार्थना करते रहा। परमेश्‍वर केर प्रेम में मजबूत बनल रहा, आउर जुग-जुग केर जिंदगी लगिन हमर प्रभु यीशु मसीह केर दया केर आसरा देखते रहा। उमन केर परती दयालु बना, जे नी जानैना कि केकर उपरे बिसवास करब। आउर दोसरमन के जुग-जुग लगिन आइग में पोड़ेक केर सजा से खींच के निकलावा। ढेइर आदमीमन एइसन अहैं जेमन केर उपरे जरूर दया करा, मगर ढेइर सावधानी केर साथ एइसन करा। हिंयाँ तक कि उमन केर लुगा से हों घिरना करा, जेकर में उमन अपन पाप काममन केर दाग लगाय देई हैं। सिरिफ परमेश्‍वर हें तोहरे के ठोकर खाएक से बचाएक पारेला आउर अपन महिमा केर भरपूरी केर सामने खुश आउर निरदोष काइर के ठडु़वाएक पारेला। ओहे हमरे के यीशु मसीह जे कुछ हमरे लगिन काइर हे, उकर जरिया से छुटकारा देई हे। ओहे एक मात्र परमेश्‍वर हेके, उकरे ठिना महिमा, गौरव, पराक्रम आउर अधिकार शुरु से अहे, आउर एखन हो होवोक आउर जुग-जुग होते रहोक। आमीन। इ प्रकाशितवाक्य यीशु मसीह केर बटले अहे, जेके परमेश्‍वर उकर उपरे इ लगिन दिस्तार काइर हे कि उ अपन सेवकमन के, उ गोइठमन के जे जरूर हें जल्दी होवेक वाला अहे, देखाओक। यीशु मसीह अपन स्वरगदूत के भेइज के उकर जरिया से, इ प्रकाशन के अपन सेवक यूहन्ना के बतालक। यूहन्ना उ सोउब गोइठमन के लिखलक जे उके देखाल जाय रहे, मतलब परमेश्‍वर केर बटले देवल बचन आउर उ सोउब कुछ, जेके यीशु मसीह कइह रहे। धाइन हेके उ, जे इ भविष्यवाणी केर बचन के पढ़ेला, आउर उमन, जेमन सुनैना आउर इकर में लिखल गोइठमन के मानैना, काले कि समय भीरे अहे। इ चिट्ठी मोंय यूहन्ना केर बटले हेके, जेके मोंय आसिया परदेस केर सातों कलीसिया केर आदमीमन के लिखाथों। मोंय प्रार्थना कराथों कि तोहरे सोउबमन के परमेश्‍वर बटले किरपा आउर शांति मिलते रहोक। उ जे अहे, आउर जे रहे, आउर जे आवेक वाला अहे, आउर उ सात आत्मामन बटले, जेमन उकर सिंहासन केर भीरे अहैं। आउर यीशु मसीह केर बटले, जे बिसवास लायक गवाह आउर मोरलमन में से फिन से जी उठेक वालामन में पहिलौठा, आउर धरती केर राजामन केर हों राजा हेके, तोहरे के किरपा आउर शांति मिलते रहोक। उ हमरे से प्रेम करेला, आउर उ अपन लोहू से हमरे के पापमन से छोड़ाय हे। आउर हमरे के एगो राइज, आउर अपन आबा परमेश्‍वर केर लगिन पुरोहित हों बनाय देलक, उकरे हें महिमा आउर शक्ति जुग-जुग बनल रहोक। आमीन। देखा, उ बदरीमन केर संगे आवेक वाला अहे, आउर हर एक आदमीमन उके देखबैं, बल्कि जेमन उके बरछा से बेइध रहैं, उमन हों उके देखबैं, आउर धरती केर सोउब आदमीमन बिलाप करबैं। हाँ, इ होवी। आमीन। प्रभु परमेश्‍वर इ कहेला, “मोंय हें अलफा आउर ओमेगा हेकों। मोंय हें उ हेकों, जे रहे, आउर जे अहे, आउर जे आवेक वाला अहे, आउर सर्वशक्तिमान अहे।” मोंय यूहन्ना जे तोहर संगी बिसवासी आउर मसीह केर लगिन दुःख सहेक में, आउर आबा परमेश्‍वर केर राइज में, आउर धीरज केर संगे उ दुःखमन के सहेक में तोहर संगी हेकों, जे उ आदमीमन उपरे आवेला जेमन केर रिश्ता उकर संगे अहे। मोके पतमुस टापू में कैदी बनाय के भेइज देवल जाय रहे। काले कि मोंय आबा परमेश्‍वर केर बचन के परचार काइर रहों आउर यीशु केर सच्चा संदेश के बताय रहों। आराधना करेक केर दिन मोंय पवितर आत्मा से भाइर गेलों, आउर मोंय अपन पिछे तुरही नियर ऊँचा आवाज सुनलों। उ कहत रहे, “जे कुछ तोंय देखाथिस उके किताब में लीख के सातों कलीसियामन ठिना भेइज दे, मतलब इफिसुस, स्मुरना, पिरगमुन, थुआतीरा, सरदीस, फिलदिलफिया आउर लौदीकिया शहर केर कलीसिया के भेइज दे।” तब मोंय उके, जे मोर से कहत रहे, देखेक लगिन पिछे मुड़लों आउर मुइड़ के मोंय सोना केर सात गो दीया रखेक केर खूँटा देखलों। आउर उ दीया रखेक केर खूँटामन केर माझे मोंय एगो आदमी के देखलों, जे आदमी केर बेटा नियर केऊ आदमी रहे। उ अपन पाँव तक लम्बा लुगा पिंधल रहे। उकर छाती में सोना केर कसना बाँधल रहे। उकर मूँड़ आउर केंस चरका रोवाँ मतलब बरफ नियर चरका रहे, आउर उकर आँइख हिदकल आइग नियर रहे। उकर गोड़ भट्ठी में धिपाय के चमकाल पीतल नियर रहे आउर उकर शबद ढेइर पानी केर धार केर आवाज नियर रहे। उ अपन भतखाइया हाँथ में सात गो तइरगन लेई रहे, आउर उकर मुँह से दुइयो आरा तेज धार वाला एगो तलवाइर निकलत रहे। उकर मुँह एइसन चमकत रहे, जइसन बेइर कलवा बेरा चमकेला। जब मोंय उके देखलों तो उकर पाँव में मुरदा नियर गिर गेलों। उ मोर उपरे अपन भतखाइया हाँथ राइख के कहलक, “ना डराव, मोंय शुरु आउर आखरी हेकों आउर जिंदा अहों। मोंय मोइर जाय रहों, आउर अब देख, मोंय जुग-जुग लगिन जिंदा अहों, आउर मरणलोक आउर अधोलोक केर कुंजी मोर हें ठिना अहे। से लगिन जे गोइठमन तोंय देइख हिस आउर जे गोइठमन होवाथे आउर जे गोइठमन इकर पाछे होवेक वाला अहे, उ सोउब के लीख ले। उ सात तइरगनमन केर भेद, जेमन के तोंय मोर भतखाइया हाँथ में देइख रहिस, आउर उ सात गो दीया रखेक केर खूँटा केर भेद: उ सात तइरगनमन सातों कलीसियामन केर दूत हेकैं, आउर उ सात दीया खूँटा सात कलीसियामन हेकैं।” उ मोके एहो कहलक, “इफिसुस शहर केर कलीसिया केर स्वरगदूत के इ संदेश लीख कि मोंय ओहे हेकों जे सात गो तइरगन अपन भतखाइया हाँथ में लेवल अहों आउर सोना केर सात गो दीया रखेक केर खूँटा केर माझे चलोना-फिरोना। मोंय तोके जे कहाथों उके सुन: मोंय तोर काम, मेहनइत आउर तोर धीरज के जानोना। मोंय एहो जानोना कि तोंय बुरा आदमीमन के देखेक नी पारिसला। जे खुद के खास चेला कहैना मगर उमन ना लगैं, उमन के तोंय परइख के झूठा पाले। तोंय धीरज धरिसला आउर मोर नाँव लगिन दुःख उठाते-उठाते नी थकिसला। मगर मोके तोर बिरोध में इ कहेक अहे कि तोंय अपन पहिला जइसन प्रेम छोइड़ देई हिस। से लगिन याइद कर कि तोंय कहाँ से गिर हिस, आउर तोंय पाप करेक छोइड़ दे आउर पहिले नियर काम कर। अगर तोंय पाप करेक नी छोड़बे, तो मोंय तोर ठिना आय के तोर दीया रखेक केर खूँटा के उकर ठाँव से हटाय देमूँ। मगर हाँ, तोर में इ गोइठ तो अहे कि तोंय निकोलास केर चेलामन केर काममन से घिरना करिसला, जेमन से मोंय हों घिरना करोना। जेमन केर कान अहे उमन धेयान से सुइन लेवा कि पवितर आत्मा कलीसिया केर आदमीमन से का कहेला। जे जीत जाई, उके मोंय उ जिंदगी केर गाँछ में से जे परमेश्‍वर केर स्वरग लोक में अहे, खाएक लगिन फार देमूँ। स्मुरना शहर केर कलीसिया केर स्वरगदूत के इ संदेश लीख: मोंय ओहे हेकों जे शुरु आउर आखरी हेकों। मोंय मोइर जाय रहों आउर अब मोंय सोउब दिन लगिन जिंदा अहों। मोंय तोर से जे कहाथों उके सुन, मोंय तोर दुःख आउर गरीबी के जानोना, मगर हकीकत में तोंय धनी अहिस। आउर जे आदमीमन खुद के यहूदी कहैना आउर ना लगैं, मगर शैतान केर सभा हेकैं, उमन केर निंदा के हों जानोना। जे दुःख तोके झेलेक होवी, उमन से ना डराव। काले कि देख, शैतान तोहर में से थोरेक आदमीमन के जेहेल घर में साजेक वाला अहे, ताकि तोहरेमन परखल जबा, आउर तोहरेमन के दस दिन तक दुःख उठाएक होवी। प्राण देवेक तक बिसवासी रहा, तो मोंय तोहरे के जिंदगी केर मुकुट देमूँ। जेमन केर कान अहे, उमन धेयान से सुइन लेवा कि पवितर आत्मा कलीसिया केर आदमीमन से का कहेला: जे जीत जाई, उके दूसरा मरण से कोनों हानि नी होवी। पिरगमुन शहर केर कलीसिया केर स्वरगदूत के इ लीख: मोंय ओहे हेकों जेकर ठिना दुइयो आरा तेज धार वाला तलवाइर अहे। मोंय तोके जे कहोना उके सुन: मोंय इ तो जानोना कि तोंय हूवाँ रहिसला जहाँ शैतान केर सिंहासन अहे, आउर तोंय मोर नाँव में स्थिर रहिसला। तोंय मोर उपरे बिसवास करेक से उ दिनमन में हों पिछे नी हटले, जेकर में मोर बिसवास लायक गवाह अन्तिपास, तोहर माझे उ ठाँव में मोराल गेलक जहाँ शैतान रहेला। मगर मोके तोर बिरोध में थोरेक गोइठमन के कहेक अहे, काले कि तोर हिंयाँ थोरेक आदमीमन एइसन अहैं, जे बिलाम केर शिक्षा के मानैना, जे बालाक के सिखालक कि उ इसराइली आदमीमन के बहकाओक, जेकर से उमन मूर्तिमन लगिन बलि चढ़ाल चीजमन के खाओक आउर ब्यभिचार करोक। तइसनेहें तोर हिंयाँ थोरेक आदमीमन एइसन अहैं, जे निकोलास केर चेलामन केर शिक्षा के मानैना। से लगिन पाप करेक छोइड़ दे, निहीं तो मोंय तोर ठिना जल्दी हें आय के, अपन मुँह केर तलवाइर से उमन केर संगे लाड़मूँ। जेमन केर कान अहे, उमन धेयान से सुइन लेवा कि पवितर आत्मा कलीसिया केर आदमीमन से का कहेला: जे जीत जाई, उके मोंय लुकल मन्ना में से देमूँ, आउर उके एगो चरका पखना हों देमूँ, आउर उ पखना में एगो नाँव लिखल होवी, जेके उके पावेक वालामन केर सिवाय आउर केऊ नी जानी। थुआतीरा नगर केर कलीसिया केर स्वरगदूत के इ संदेश लीख: मोंय परमेश्‍वर केर बेटा जेकर आँइख आइग केर अंगोर नियर अहे आउर जेकर पाँव बेस पीतल नियर अहे। मोंय तोर से जे कहाथों उके सुन: मोंय तोर काममन, तोर प्रेम आउर बिसवास आउर सेवा, आउर धीरज के जानोना, आउर एहो जानोना कि तोर पिछला काम पहिले केर काममन से बाइढ़ के अहे। मगर मोके तोर बिरोध में इ कहेक अहे कि तोंय उ जनाना इजेबेल के रहेक देविसला जे खुद के परमेश्‍वर केर संदेश बताएक वाला कहेला, आउर मोर सेवकमन के ब्यभिचार करेक आउर मूर्तिमन लगिन बलि चढ़ाल चीजमन के खाएक लगिन सिखाय के बहकायला। मोंय उके पाप करेक छोड़ेक केर मोका देलों, मगर उ अपन ब्यभिचार केर पाप के करेक से छोड़ेक नी चाहेला। देख मोंय उके रोग केर डिसना में सुताय देमूँ आउर जे उकर संगे ब्यभिचार करैना अगर उमन हों उकर जइसन पाप काममन के करेक नी छोड़बैं, तो उमन के मोंय बड़का दुःख देमूँ। मोंय उकर छउवामन के माइर मोरामूँ, तब सोउब कलीसियामन जाइन लेबैं कि हिरदय आउर मन के परखेक वाला मोंय हें हेकों, आउर मोंय तोहर में से हरेक झन से उकर काममन केर मोताबिक पलटा लेमूँ। मगर तोहरे थुआतीरा नगर केर बचल आदमीमन से जेतनामन इ शिक्षा के नी मानैना, आउर उ गोइठमन के जेके शैतान केर गहरा गोइठमन कहैना नी जानैना, उमन से मोंय इ कहोना कि मोंय तोहर उपरे आउर बोझ नी देमूँ। मगर हाँ, जे तोहर ठिना अहे उके मोर आवेक तक थाइम रहा। जे जीत जाई आउर आखरी तक मोर काममन केर मोताबिक करते रही, तो मोंय उके जाइत-जाइत केर आदमीमन उपरे अधिकार देमूँ। आउर उ राइज करेक वाला लोहा केर लाठी से उमन केर उपरे राइज करी, जे लेखे कुम्हार केर माटी केर बासन चकनाचूर होई जायला: मोंय हों एइसनेहें अधिकार अपन आबा से पाय हों। आउर मोंय उके बड़-बिहान केर तइरगन देमूँ। जेमन केर कान अहे, उमन सुइन लेवा कि पवितर आत्मा कलीसिया केर आदमीमन से का कहेला। सरदीस शहर केर कलीसिया केर स्वरगदूत के इ संदेश लीख: मोंय ओहे हेकों जेकर ठिना परमेश्‍वर केर सात गो आत्मा आउर सात गो तइरगन अहैं। मोंय तोके जे कहाथों उके सुन: मोंय तोर काममन के जानोना कि तोंय जिंदा तो कहाइसला, मगर मोरल अहिस। से लगिन सावधान होई जा, तोर भीतरे जे मोर उपरे थोरेक बिसवास बाइच हे उके मजबूत कर, ताकि इ पूरा रीति से ना सिराय जाओक। काले कि मोंय तोर कोनों काम के अपन परमेश्‍वर केर भीरे पूरा नी पालों। से लगिन याइद कर कि तोंय कइसन गेयान पाले आउर सुइन रहिस, आउर उकर में बनल रह, आउर पाप करेक छोइड़ दे। आउर अगर तोंय सावधान नी रहबे तो मोंय चोर नियर आय जामूँ आउर तोंय नी जानेक पारबे कि कोन घड़ी तोर ठिना आय जामूँ। मगर हाँ, सरदीस शहर में तोर हिंयाँ थोरेक एइसन आदमीमन अहैं, जेमन अपन-अपन लुगा के अशुद्ध नी करलैं, उमन चरका लुगा पिंधल मोर संगे घूमबैं, काले कि उमन इ लाएक अहैं। जे जीत जाई, उ एहे लेखे चरका लुगा पिंधी, आउर मोंय उकर नाँव जिंदगी केर किताब में से कोनों रीति से नी काटमूँ, मगर उकर नाँव अपन आबा आउर उकर स्वरग दूतमन केर सामने माइन लेमूँ। जेमन केर कान अहे, उमन धेयान से सुइन लेवा कि पवितर आत्मा कलीसिया केर आदमीमन से का कहेला। आउर फिलदिलफिया शहर केर कलीसिया केर स्वरगदूत के इ संदेश लीख: मोंय ओहे हेकों जे पवितर आउर सच्चा हेके, आउर जे दाऊद केर कुंजी रखेला। आउर मोर खोलल के केऊ बंद नी करेक पारी आउर बंद करल के केऊ खोलेक नी पारी। मोंय तोके जे कहाथों उके सुन: मोंय तोर काममन के जानोना, देख, मोंय तोर सामने एगो दुरा खोइल के राइख हों, जेके केऊ बंद करेक नी पारी, तोर शक्ति थोरेसन तो अहे, फिन भी तोंय मोर बचन केर पालन काइर हिस आउर मोर नाँव केर इंकार नी करले। देख, मोंय शैतान केर उ सभा केर आदमीमन के तोर वश में काइर देमूँ जे यहूदी बाइन बाइठ हैं, मगर ना लगैं, उमन झूठ कहैना, देख, मोंय एइसन करमूँ कि उमन आय के तोर पाँव में गिरबैं आउर इ जाइन लेबैं कि मोंय तोर से प्रेम करोना। काले कि तोंय मोर धीरजरूपी आगया केर पालन काइर हिस, से लगिन मोंय हों तोके परीक्षा केर उ बेरा बचाय रखमूँ, जे धरती में रहेक वाला आदमीमन के परखेक लगिन गोटा दुनिया में आवेक वाला अहे। मोंय जल्दी हें आवेक वाला अहों, जे गेयान तोर ठिना अहे, उकर में मजबूत बनल रह ताकि केऊ तोर मुकुट के लुटेक ना पारोक। जे जीत जाई, उके मोंय अपन परमेश्‍वर केर मंदिर में एगो खंभा बनामूँ आउर उ फिन कहियो बाहरे नी निकली, आउर मोंय अपन परमेश्‍वर केर नाँव आउर अपन परमेश्‍वर केर नगर मतलब नवाँ यरुशलेम केर नाँव, जे मोर परमेश्‍वर ठिना से स्वरग से उतरेक वाला अहे, आउर अपन नवाँ नाँव उकर में लिखमूँ। जेमन केर कान अहे, उमन धेयान से सुइन लेवा कि पवितर आत्मा कलीसिया केर आदमीमन से का कहेला। लौदीकिया शहर केर कलीसिया केर स्वरगदूत के इ संदेश लीख: मोंय ओहे हेकों जे आमीन आउर बिसवास लायक आउर सच्चा गवाह हेके। आउर परमेश्‍वर जे कोनों बनाय हे उकर निचोड़ हेके। मोंय तोके जे कहाथों उके सुन: मोंय तोर काममन के जानोना कि तोंय ना तो ठंढा हेकिस आउर ना गरम: भला होतक कि तोंय ठंढा या गरम होते। से, इ लगिन कि तोंय गुनगुना हेकिस, ना ठंढा अहिस आउर ना गरम, मोंय तोके अपन मुँह में से उलगेक वाला अहों। तोंय कहिसला कि मोंय धनी हेकों, आउर धनवान होई जाय हों आउर मोके कोनों चीज केर घटी नखे, आउर इ नी जानिसला कि तोंय अभागा, तुच्छ, गरीब, अंधरा आउर नंगा अहिस। से लगिन मोंय तोके सलहा देवोना कि आइग केर भट्ठी में धिपाय के शुद्ध करल सोना मोर से कीन ले कि तोंय धनी होई जाबे, आउर चरका लुगा लेई ले कि पिंध के तोके अपन नंगापन केर लज्जा ना होवोक, आउर अपन आँइखमन में लगाएक लगिन सुरमा ले कि तोंय देखेक पारबे। मोंय जे-जे आदमीमन से प्रेम रखोना, उ सोउब के डाँटोना आउर दंड हों देवोना, से लगिन उत्साहित हो, आउर पाप करेक छोइड़ दे। देख, मोंय दुरा में ठड़ाल ठोकठोकवना, अगर केऊ मोर शबद सुइन के दुरा खोली, तो मोंय उकर ठिना भीतरे आय के उकर संगे भोजन करमूँ, आउर उ मोर संगे। जे जीत जाई, मोंय उके अपन संगे अपन सिंहासन में बइठामूँ, जइसन मोंय हों जीत के अपन आबा केर संगे उकर सिंहासन में बाइठ गेलों। जेमन केर कान अहे, उमन धेयान से सुइन लेवा कि पवितर आत्मा कलीसिया केर आदमीमन से का कहेला।” मोर इ गोइठमन के देखेक केर पाछे मोंय स्वरग में एगो दुरा खुलल देखलों। आउर ओहे आवाज जेके मोंय पहिले सुइन रहों दोबारा सुनलों, जे एगो तुरही केर आवाज जइसन रहे। उ मोर से कहलक, “हिंयाँ उपरे आय जा आउर मोंय उ गोइठमन के तोके देखामूँ, जेमन केर इ गोइठमन केर पाछे पूरा होवेक जरुरी अहे।” आउर तुरते मोंय पवितर आत्मा से भाइर गेलों, आउर मोंय देखलों कि मोर सामने स्वरग में एगो सिंहासन अहे, आउर उ सिंहासन में केऊ बाइठ हे। जे उ सिंहासन में बाइठ हे, उकर चेहरा ढेइर किमती पखना नियर चमकाथे, जेके यशब आउर माणिक्य कहैना। उकर सिंहासन केर चाइरो बटे एगो बदरी केर धनुष अहे, जे चमकीला हरियार पखना केर गहना नियर चमकाथे। उ सिंहासन केर चाइरो बटे चोबीस गो सिंहासन अहे आउर उ सिंहासनमन में चोबीस मुखियामन चरका लुगा पिंध के बइठल अहैं, आउर उ मनक मूँड़ उपरे सोना केर मुकुट अहे। उ सिंहासन में से बिजली आउर गरजेक केर आवाज निकलाथे आउर सिंहासन केर भीरे आइग केर सात गो दीया बराथे, उमन परमेश्‍वर केर सात आत्मामन हेकैं। आउर उ सिंहासन केर भीरे काँच नियर आर-पार दिसेक वाला सफा समुदर नियर अहे। आउर सिंहासन केर माझे आउर सिंहासन केर चाइरो बटे चाइर गो जीव देखलों, जेमन केर आगे-पिछे आँइख हें आँइख अहे। आउर पहिला जीव सिंह नियर अहे, दूसरा जीव बछरु नियर अहे, तीसरा जीव केर मुँह आदमी केर नियर अहे, आउर चौथा जीव उड़ते उकाब नियर अहे। आउर चाइरो जीवमन केर छाव-छाव गो पाँइख अहे, आउर चाइरो बटे आउर भीतरे आँइख हें आँइख अहे आउर उमन राइत दिन बिना आराम लेवल इ कहते रहैना, “पवितर, पवितर, पवितर, प्रभु परमेश्‍वर सर्वशक्तिमान, जे रहे, आउर जे अहे आउर जे आवेक वाला अहे।” जब उ जीवमन, उकर जे सिंहासन में बाइठ हे आउर जे जुग-जुग जिंदा अहे, महिमा आउर आदर आउर धन्यबाद करबैं, तब चोबिसो मुखियामन सिंहासन में बइठेक वाला केर सामने गिरबैं आउर उकर जे जुग-जुग जिंदा अहे, भक्ति करबैं आउर उमन अपन-अपन मुकुट सिंहासन केर सामने इ कहते डाइल देबैं: “हे हमर प्रभु आउर परमेश्‍वर, तोंय हें महिमा आउर आदर आउर शक्ति केर लायक अहिस, काले कि तोंय हें सोउब चीजमन के सिरजाले आउर उमन तोर हें चाह से रहे, आउर सिरजाल गेलक।” आउर जे सिंहासन में बाइठ रहे, मोंय उकर भतखाइया हाँथ में एगो किताब देखलों, जे भीतरे आउर बाहरे लिखल रहे, आउर उके सात गो मोहर लगाय के बंद करल जाय रहे। फिन मोंय एगो बलवान स्वरगदूत के देखलों जे ऊँचा शबद से इ परचार करत रहे, “इ किताब के खोलेक आउर उकर मोहर के तोरेक केर लायक के अहे?” ना स्वरग में, ना धरती में, ना धरती केर हेंठे केऊ उ किताब के खोलेक या उकर उपरे नजइर करेक केर लायक निकललक। तब मोंय कुहंइक-कुहंइक के काँदेक लगलों, काले कि उ किताब के खोलेक या उकर उपरे नजइर करेक केर लायक केऊ नी मिललक। तब उ मुखियामन में से एगो मोर से कहलक, “ना काँद, देख, यहूदा केर गोतर केर उ सिंह, जे दाऊद केर बंश हेके, उ किताब के खोलेक आउर उकर सातों मोहर तोरेक लगिन जीत पाय हे।” तब मोंय उ सिंहासन आउर चाइरो जीवमन आउर उ मुखियामन केर माझे, एगो मेमना के ठड़ाल देखलों। उ बलि करल मेमना नियर रहे। उकर सात गो सींग आउर सात गो आँइख रहे, इ परमेश्‍वर केर सातों आत्मामन हेकैं, जे समूचा धरती में भेजल जाय हैं। उ आय के उकर भात खाइया हाँथ से जे सिंहासन में बाइठ रहे, उ किताब लेई लेलक। जब उ किताब लेई लेलक, तो उ चाइरो जीव आउर चोबिसो मुखियामन उ मेमना केर सामने गिर के प्रणाम करलैं आउर उमन में से हर एक केर हाँथ में बीना-बाजा आउर धूप से भरल सोना केर कटोरा रहे, जे पवितर आदमीमन केर प्रार्थनामन हेके। आउर उमन इ नवाँ गीत गावेक लगलैं: “तोंय इ किताब के लेवेक आउर इकर मोहर के खोलेक केर लायक अहिस, काले कि तोंय बलि होई के अपन लोहू से हरेक गोतर, भाषा, आदमीमन, आउर जाइत में से परमेश्‍वर केर लगिन आदमीमन के कीन लेई हिस। आउर उमन के हमर परमेश्‍वर लगिन तोंय एइसन आदमी बनाय देई हिस, जेमन केर उपरे उ राइज करेला आउर पुरोहित बनाले जे उकर सेवा करैना आउर उमन दुनिया में राइज करबैं।” आउर जब मोंय देखलों तो उ सिंहासन आउर उ जीवमन आउर उ मुखियामन केर चाइरो बटे ढेइर स्वरग दूतमन केर शबद सुनलों, जेमन केर हिसाब लाखो आउर करोड़ो केर रहे। उमन ऊँचा शबद से कहत रहैं, “धाइन अहे उ मेमना जेके माइर मोराल जाय रहे। उ महिमा केर लायक अहे। उकर अधिकार महान अहे। उकर गेयान गहरा अहे। उ ढेइर शक्तिशाली अहे। आउर उ ढेइर धनवान अहे। आवा, हमरे उकर आदर आउर महिमा करब।” फिन मोंय स्वरग में, आउर धरती में आउर धरती केर हेंठे आउर समुदर केर सोउब सिरजाल चीजमन के आउर सोउब कुछ के जे उकर में अहे, इ कहते सुनलों, “जे सिंहासन में बाइठ हे, उकर आउर मेमना केर धन्यबाद, आदर आउर महिमा आउर राइज जुग-जुग रहोक।” आउर चाइरो जीवमन आमीन कहलैं, आउर मुखियामन झुइक के माथा टेकलैं आउर भक्ति करलैं। फिन मोंय देखलों कि मेमना उ सात गो मोहरमन में से एगो के खोललक, सेहे बेरा उ चाइरो जीवमन में से एगो के मोंय बदरी घिड़केक जइसन ऊँचा आवाज में इ कहते सुनलों, “आव!” तब मोंय नजइर उठाय के देखलों, तो मोर आगे एगो चरका घोड़ा अहे, आउर उ घोड़ा में जे बाइठ हे उकर हाँथ में एगो धनुष अहे, उके एक मुकुट देवल गेलक आउर उ जय-जय करते निकललक कि आउर हें जीत पाओक। आउर जब मेमना दूसरा मोहर खोललक, तो मोंय दूसरा जीव के इ कहते सुनलों, “आव!” फिन एक आउर घोड़ा निकललक जे लाल रंग केर अहे, उकर में जे बाइठ हे उके इ अधिकार देवल गेलक कि धरती उपरे से शांति के उठाय लेवोक ताकि आदमीमन एक दोसर के माइर मोराओक आउर उके एक बड़का तलवाइर देवल गेलक। आउर जब मेमना तीसरा मोहर खोललक, तो मोंय तीसरा जीव के इ कहते सुनलों, “आव!” आउर मोंय नजइर उठाय के देखलों, तो मोर आँइख केर सामने एक करिया घोड़ा अहे, आउर उकर में जे बाइठ हे उकर हाँथ में एगो तराजू अहे। आउर मोंय चाइरो जीवमन केर माझे में से एगो आवाज के इ कहते सुनलों, “एक दिन केर मजूरी केर बदली में एक दिन खाएक केर गोहोम आउर एक दिन केर मजूरी केर बदली में तीन दिन खाएक केर जौ किनेक केर बराबइर होवी। मगर जैतून तेल आउर अंगूर केर रस केर भाव नी बदली।” आउर जब मेमना चौथा मोहर खोललक तो मोंय चौथा जीव केर आवाज इ कहते सुनलों, “आव!” आउर मोंय नजइर उठाय के देखलों, तो मोर आँइख केर सामने एक पीला रंग घोड़ा अहे आउर उकर में जे बाइठ हे, उकर नाँव माउत हेके: आउर मरणलोक उकर पिछे-पिछे अहे आउर उके धरती केर एक चौथाई हिस्सा में इ अधिकार देवल गेलक कि तलवाइर आउर अकाल आउर मरी आउर धरती केर जंगली जानवरमन केर द्वारा आदमीमन के माइर मोराओक। आउर जब मेमना पाँचवाँ मोहर खोललक तो मोंय बेदी केर हेंठे उ मनक प्राण के देखलों, जे परमेश्‍वर केर बचन केर परचार करेक केर खातिर आउर उ गवाही केर खातिर कि यीशु हमर प्रभु हेके, जे उमन देई रहैं, माइर मोराल जाय रहैं। आउर उमन जोर से आवाज देई के कहलैं, “हे मालिक, तोंय पवितर आउर सच्चा हेकिस। तोंय कब तक फैसला नी करबे? आउर धरती में रहेक वाला आदमीमन से हमर लोहू केर पलटा केखन तक नी लेबे?” आउर उमन में से हरेक के चरका लुगा देवल गेलक आउर उमन से कहल गेलक कि थोरेक देरी आउर धीरज धरा, जब तक कि तोहर संगी सेवकमन आउर भाई-बहिन केर हिसाब पूरा नी होई जाई, जे उमन केर नियर माइर मोराल जाएक अहैं। आउर जब मेमना छठवाँ मोहर खोललक, तो ओहे बेरा एक बड़का भूंईडोल आलक, आउर बेइर कम्बरा नियर करिया आउर पूरा चाँद लोहू नियर लाल होई गेलक। आउर आकाश केर तइरगनमन धरती में एइसन गिरलैं जइसन बड़का आँधी से हिल के अंजीर केर गाँछ में से कच्चा फार झरेला। आउर आकाश एइसन लोप होई गेलक, जइसन कागज मोढ़ेक से सिकुइड़ जायला आउर हरेक पहार आउर टापू, अपन-अपन ठाँव से हाइट गेलक। आउर धरती केर राजा आउर प्रधान आउर सरदार आउर धनवान आउर शक्तिशाली आदमीमन आउर हर एक सेवक आउर हर एक आजाद, पहारमन केर खोहमन में आउर चट्टाइनमन में जाय लुकलैं। आउर पहारमन आउर चट्टाइनमन से कहेक लगलैं, “हमर उपरे गिर जा आउर हमरे के उकर मुँह से जे सिंहासन में बाइठ हे आउर मेमना केर खीस से लुकाय लेवा। काले कि उकर खीस केर भयानक दिन आय पोंहइच हे, अब के उकर सामने ठहरेक पारी?” इकर पाछे मोंय धरती केर चाइरो कोना में चाइर गो स्वरगदूत के ठड़ाल देखलों, उमन चाइरो दिशा बटले आवेक वाला हवा के रोकत रहैं, ताकि धरती या समुदर या कोनों गाँछ उपरे हवा ना चलोक। फिन मोंय एक आउर स्वरगदूत के जिंदा परमेश्‍वर केर मोहर लेवल पूरब से उपरे बटे आते देखलों, उ चाइरो स्वरग दूतमन से जेमन के उ धरती आउर समुदर केर हानि करेक केर अधिकार देई रहे, ऊँचा आवाज से कहलक, “जब तक हमरे अपन परमेश्‍वर केर सेवकमन केर माथा में मोहर नी लगाय देब, तब तक धरती आउर समुदर आउर गाँछमन के हानि ना पोंहचाबा।” जेमन केर उपरे मोहर लगाल गेलक, मोंय उमन केर हिसाब सुनलों। उमन केर हिसाब एक लाख चौवालीस हजार रहे आउर उमन इसराइल केर बारह गोतर में से रहैं। स्वरग दूतमन हर एक गोतर में से बारह हजार आदमीमन उपरे मोहर लगालैं: यहूदा केर गोतर में से बारह हजार, रूबेन केर गोतर में से बारह हजार, गाद केर गोतर में से बारह हजार, अशेर केर गोतर में से बारह हजार, नपताली केर गोतर में से बारह हजार, मनश्शिह केर गोतर में से बारह हजार, शमौन केर गोतर में से बारह हजार, लेवी केर गोतर में से बारह हजार, इस्साकार केर गोतर में से बारह हजार, जबूलून केर गोतर में से बारह हजार, यूसुफ केर गोतर में से बारह हजार आउर बिन्यामीन केर गोतर में से बारह हजार आदमीमन केर उपरे मोहर लगालक। इकर पाछे मोंय देखलों कि मोर सामने एगो बड़का भीड़ ठड़ाल अहे, जेमन केर हिसाब केऊ करेक नी पारत रहैं। इ भीड़ में हरेक जाइत, हरेक गोतर, हरेक आदमीमन, आउर हरेक भाषा केर आदमीमन अहैं। उमन उ सिंहासन आउर उ मेमना केर सामने ठड़ाल अहैं। उमन चरका लुगा पिंधल अहैं आउर उमन अपन हाँथमन में खिजूर केर डाइर लेवल अहैं। उमन बड़का शबद से कहत रहैं, “छुटकारा लगिन हमर परमेश्‍वर केर, जे सिंहासन में बाइठ हे आउर मेमना केर जय-जयकार होवोक!” आउर सोउब स्वरगदूत, उ सिंहासन आउर मुखियामन आउर चाइरो जीवमन केर चाइरो बटे ठड़ाल अहैं, फिन उमन सिंहासन केर सामने झुइक के माथा टेकलैं आउर परमेश्‍वर केर आराधना करलैं। उमन कहलैं, “आमीन! हमर परमेश्‍वर केर स्तुति, महिमा, गेयान, धन्यबाद, आदर, अधिकार आउर शक्ति जुग-जुग बनल रहोक। आमीन।” एहे बेरा उ मुखियामन में से केऊ मोर से कहलक, “इ चरका लुगा पिंधल आदमीमन केमन हेकैं? आउर कहाँ से आय हैं?” मोंय उके जबाब देलों, “हे मालिक, तोंय हें जानिसला।” उ मोर से कहलक, “इमन उमन हेकैं, जे उ बड़का दुःख में से निकइल के आय हैं, इमन अपन-अपन लुगा के मेमना केर लोहू में धोई के चरका काइर हैं। एहे खातिर उमन परमेश्‍वर केर सिंहासन केर भीरे अहैं आउर उकर मंदिर में दिन राइत उकर सेवा करैना, आउर जे सिंहासन में बाइठ हे, उ उमन उपरे छाँई करी। उमन फिन भूखे आउर पियासा नी होबैं आउर ना उमन के राउद सेकी, आउर ना तपी। काले कि मेमना, जे सिंहासन केर माझे में अहे, उमन केर रखवाली करी आउर उमन के जीवन रुपी पानी केर सोता ठिना लेई जाई, आउर परमेश्‍वर उ मनक आँइख से सोउब आँसू के पोंइछ देवी।” जब मेमना सातवाँ मोहर खोललक तो स्वरग में आधा घंटा तक सनाटा छाय गेलक। तब मोंय उ सातों स्वरगदूतमन के देखलों, जे परमेश्‍वर केर सामने ठड़ाल रहैना, आउर उमन के सात गो तुरही देवल गेलक। फिन एक आउर स्वरगदूत धूप जलाएक लगिन सोना केर कटोरा लेई के आलक, आउर बेदी ठिना ठड़ाय गेलक। उकर ठिना सोना केर एगो धूपदानी रहे। आउर उके ढेइर धूप देवल गेलक कि सोउब पवितर आदमीमन केर प्रार्थनामन केर संगे सोना केर उ बेदी में, जे सिंहासन केर सामने अहे चढ़ाओक। तब स्वरगदूत केर हाँथ से धूप केर धुंगिया पवितर आदमीमन केर प्रार्थनामन केर संगे परमेश्‍वर केर भीरे पोंहइच गेलक। इकर पाछे स्वरगदूत धूपदानी लेई के उकर में बेदी केर आइग भरलक आउर धरती में उझइल देलक। जेकर से बदरी गरजेक, आउर शबद, आउर बिजलीमन चमकेक, आउर भूंईडोल आवेक लगलक। फिन उ सातों स्वरगदूत जेमन ठिना सात गो तुरही रहे, उमन अपन-अपन तुरही फुँकेक लगिन तेयार होलैं। जइसन हें पहला स्वरगदूत तुरही फुँकलक, तइसनेहें लोहू से मिलल बरफ आउर आइग दिसेक लगलक, आउर उमन के हेंठे धरती में उझलल गेलक। जेकर से धरती केर एक तिहाई हिस्सा पोइड़ के भसम होई गेलक आउर एक तिहाई गाँछमन पोइड़ के भसम होई गेलक आउर सोउब हरियार घास हों पोइड़ के भसम होई गेलक। फिन दूसरा स्वरगदूत तुरही फूकलक, तो आइग नियर बरते एगो बड़का पहार समुदर में साजल गेलक आउर समुदर केर एक तिहाई हिस्सा लोहू बाइन गेलक। आउर समुदर केर एक तिहाई जीवमन मोइर गेलैं आउर एक तिहाई जहाज नाश होई गेलक। फिन तीसरा स्वरगदूत तुरही फुँकलक। इकर से आकाश से मशाल नियर बरते एगो बड़का तइरगन गिरलक। उ तइरगन एक तिहाई नदीमन आउर पानी केर सोतामन में गिरलक। उ तइरगन केर नाँव “नागदौना” हेके आउर पानी केर एक तिहाई हिस्सा नागदौना नियर कड़ुवा होई गेलक, आउर ढेइर हें आदमीमन उ पानी केर कड़ुवा होई जाएक से, उ पानी के पी के मोइर गेलैं। फिन चौथा स्वरगदूत तुरही फुँकलक। इकर से बेइर केर एक तिहाई हिस्सा आउर चाँद केर एक तिहाई हिस्सा आउर तइरगनमन केर एक तिहाई हिस्सा में बिपइत आलक। जेकर से उमन केर एक तिहाई हिस्सा अंधार होई गेलक। आउर दिन केर एक तिहाई हिस्सा में इंजोत नी रहे, एहे लेखे एक तिहाई राइत हों अंधार में डूइब गेलक। जब मोंय फिन देखलों तो आकाश केर माझे में एगो उकाब चरई के उड़ते आउर जोर से इ कहते सुनलों, “उ तीन गो स्वरगदूतमन केर तुरही केर शबदमन केर खातिर जेमन केर फुँकेक एखन बचल अहे, धरती केर रहेक वालामन उपरे हाय! हाय! हाय!” जब पाँचवाँ स्वरगदूत तुरही फुँकलक तो मोंय आकाश से धरती उपरे एगो तइरगन के गिरते देखलों, आउर उके बेथाह गढ़हा केर कुंजी देवल गेलक। जब उ बेथाह गढ़हा के खोललक तब गढ़हा में से बड़का भट्ठी जइसन धुंगिया उठलक आउर उ गढ़हा केर धुंगिया से बेइर आउर आकाश अंधार होई गेलक। उ धुंगिया में से धरती में फेनगामन निकललैं आउर उमन के धरती केर बिच्छूमन नियर आदमीमन के बिंधेक केर ताकत देवल गेलक। आउर उमन से कहल गेलक कि ना धरती केर घास के, ना कोनों हरियार बुदा, ना कोनों गाँछ के हानि पोंहचाबा, सिरिफ उ आदमीमन के जे मनक माथा में परमेश्‍वर केर मोहर नी लाइग हे। आउर उमन के माइर मोराएक केर तो निहीं, मगर पाँच महिना तक उमन के दुःख देवेक केर अधिकार देवल गेलक: आउर उमन केर दुःख एइसन रहे, जइसन बिच्छू केर बिंधेक से आदमी के होवेला। उ दिनमन में आदमीमन माउत के ढूँढ़बैं मगर नी पाबैं आउर मोरेक केर लालसा करबैं आउर माउत उमन से भागी। उ फेनगामन केर रूप में लड़ाई लगिन तेयार करल घोड़ामन नियर रहे, एइसन लगत रहे कि उमन केर मूँड़ उपरे सोना केर मुकुट रहे। उमन केर मुँह आदमीमन केर मुँह नियर रहे। उमन केर केंस जनानामन केर केंस नियर आउर उमन केर दाँत सिंहमन केर दाँत नियर रहे। उमन केर कवच लोहा केर कवच नियर रहे। उमन केर पाँइख केर आवाज लड़ाई लगिन कूदते ढेइर रथमन आउर ढेइर घोड़ामन केर आवाज नियर रहे। उमन केर पूँइछ बिच्छूमन केर पूँइछ नियर रहे, उमन केर पूँइछ में पाँच महिना तक आदमीमन के दुःख पोंहचाएक केर शक्ति रहे। बेथाह गढ़हा केर दूत उमन केर राजा रहे, उकर नाँव इब्रानी भाषा में अबद्दोन आउर यूनानी भाषा में अपुल्लयोन हेके। पहला बिपइत बीत चुकलक, देखा, अब इकर पाछे दूई गो बिपइत आवेक वाला अहे। जब छठवाँ स्वरगदूत तुरही फुँकलक तो सोना केर बेदी जे परमेश्‍वर केर सामने अहे, उकर सींगमन में से मोंय एइसन आवाज सुनलों, जइसन कि केऊ, उ छठवाँ स्वरगदूत से जेकर ठिना तुरही रहे, कहाथे, “उ चाइरो स्वरग दूतमन के जे बड़का नदी फरात ठिना बाँधल अहैं, खोइल दे।” उ चाइरो दूतमन के खोइल देवल गेलक जे ओहे बेरा, आउर ओहे दिन, आउर महिना आउर बरिस लगिन आदमीमन केर एक तिहाई हिस्सा के माइर मोराएक ले तेयार करल जाय रहैं। उमन केर फौज मनक सवारीमन केर हिसाब बीस करोड़ रहे, मोंय उमन केर गिनती सुनलों। आउर मोके इ दर्शन में उ घोड़ामन आउर उ मनक उपरे सवार सेनामन इ लेखे दिसलैं, जेमन केर कवच आइग नियर लाल, धूम्रकांत आउर गंधक नियर पीला रहे, आउर उ घोड़ामन केर मूँड़ सिंहमन केर मूँड़ नियर रहे, आउर उमन केर मुँह से आइग, धुंगिया आउर गंधक निकलत रहे। इ तीनों बिपइत मतलब आइग, धुंगिया आउर गंधक से जे घोड़ामन केर मुँह से निकलत रहे, आदमीमन केर एक तिहाई हिस्सा के माइर मोराल गेलक। काले कि उ घोड़ामन केर शक्ति उमन केर मुँह आउर उमन केर पूँइछ में रहे, काले कि उमन केर पूँइछ साँपमन नियर रहे, आउर उ पूँइछमन केर मूँड़ हों रहे आउर ओहेमन से उमन दुःख पोहचात रहैं। आउर बचल आदमीमन जे उ बिपइतमन से नी मोइर रहैं अपन हाँथमन केर बुरा काममन के करेक नी छोड़लैं। उमन भूत-प्रेतमन आउर, सोना, चाँदी, पीतल, पखना आउर काठ केर बनाल मूर्तिमन केर पूजा करेक नी छोड़लैं, जेमन ना देखेक पारैना, ना सुनेक पारैना आउर ना हें चलेक पारैना। उमन अपन करल हत्यामन, जादू-टोना, ब्यभिचार आउर चोरी करेक से मन नी फिरालैं। फिन मोंय एगो आउर शक्तिशाली स्वरगदूत के बदरी से घेराल स्वरग से उतरते देखलों। उकर मूँड़ उपरे बदरी केर धनुष रहे। उकर मुँह बेइर नियर चमकत रहे आउर उकर गोड़ आइग केर खंभा नियर रहे। उकर हाँथ में एगो छोटका खोलल किताब रहे। उ अपन भतखाइया पाँव समुदर में आउर लेंगा पाँव धरती में रखलक। आउर एइसन जोर से चिल्लालक, जइसन सिंह गरजेला, आउर जब उ चिल्लालक तो गरजेक केर सात शबद सुनालक। जब सातों गरजेक केर शबद सुनाएक बंद होलक, तो मोंय लिखेक हें वाला रहों, मगर मोंय स्वरग से एक आवाज के इ कहते सुनलों, “जे गोइठमन के तोंय उ सात गरजेक वालामन से सुइन हिस, उके मन हें में रख, आउर ना लीख।” जे स्वरगदूत के मोंय समुदर आउर धरती में ठड़ाल देइख रहों, उ अपन भतखाइया हाँथ स्वरग बटे उठालक, आउर जे जुग-जुग जिंदा अहे, आउर जे स्वरग के आउर जे कुछ उकर में अहे, आउर धरती के आउर जे कुछ उकर में अहे, आउर समुदर के आउर जे कुछ उकर में अहे, उ सोउब के सिरजालक, उकरे किरिया खाय के कहलक, “अब तो आउर देरी नी होवी। उ बेरा जब सातवाँ स्वरगदूत तुरही फूँकी तो परमेश्‍वर केर लुकल योजना पूरा होई जाई, जेके उ अपन सेवकमन मतलब अपन संदेश के बताएक वालामन के बताय रहे।” आउर जे शबद के मोंय स्वरग से कहते सुइन रहों, उ फिन मोर संगे गोठियाएक लगलक, “जा, जे स्वरगदूत समुदर आउर धरती में ठड़ाल अहे, उकर हाँथ से उ खोलल किताब के लेई ले।” मोंय स्वरगदूत ठिना जाय के कहलों, “इ छोट किताब के मोके दे।” उ मोर से कहलक, “ले इके खाय ले। इ तोर पेट के कड़ुवा तो करी, मगर तोर मुँह में माउद रस नियर मिठा लगी।” मोंय उ छोट किताब के उ स्वरगदूत केर हाँथ से लेई के खाय देलों। उ मोर मुँह में माउद रस नियर मिठा तो लगलक, मगर जब मोंय उके खाय चुकलों, तो मोर पेट कड़ुवा होई गेलक। तब मोर से इ कहल गेलक, “तोके ढेइर आदमीमन आउर जाइतमन, भाषामन, आउर राजामन केर बारे में फिन भविष्यवाणी करेक होवी।” इकर पाछे फिन मोके नापेक लगिन एगो डांग देवल गेलक, आउर केऊ कहलक, “उठ, परमेश्‍वर केर मंदिर आउर बेदी के नाइप ले, आउर उकर में आराधना करेक वालामन केर गिनती कर। मगर मंदिर केर बाहरे केर अंगना के छोइड़ दे, उके ना नाप काले कि उके परजाइत आदमीमन के देवल जाय हे, आउर उमन पवितर नगर के बेयालिस महिना तक रौंदबैं। मोंय अपन दूई गो गवाहमन के इ अधिकार देमूँ कि एक हजार दूई सौ साठ दिन तक भविष्यवाणी करोक। उमन एक एइसन लुगा के पिंधल होबैं, जेके दुःख देखाएक लगिन पिंधल जायला।” इ दुयो गवाह जैतून केर दूई गो गाँछ आउर दूई गो दीया रखेक केर खूँटा हेकैं, जे धरती केर प्रभु केर भीरे ठड़ाल रहैना। अगर केऊ उमन के नोकसान पोहचाएक चाहैना, तो उमन केर मुँह से आइग निकइल के उमन केर बैरीमन के भसम करेला, आउर अगर केऊ उमन के नोकसान पोहचाएक चाही, तो उ जरूर एहे रीति से माइर मोराल जाई। उमन के अधिकार अहे कि आकाश के बंद करोक, ताकि उमन केर भविष्यवाणी केर दिन में पानी ना बरसोक। उमन के सोउब पानी उपरे अधिकार अहे कि उके लोहू बनाओक आउर जब-जब चाहबैं तब-तब धरती में हर रकम केर बिपइत के लानोक। जब उमन अपन गवाही देई चुकबैं, तो उ जानवर जे बेथाह गढ़हा में से निकली, उमन से लइड़ के उमन के जीत जाई आउर उमन के माइर मोराई। उमन केर लाश उ बड़का नगर केर चौक में पड़ल रही, जे चिन्हा केर रूप से सदोम आउर मिसर देस कहायला, जहाँ उमन केर प्रभु हों क्रूस उपरे चढ़ाल जाय रहे। आउर सोउब आदमीमन आउर गोतरमन आउर भाषामन आउर सोउब जाइत केर आदमीमन उमन केर लाश के साढ़े तीन दिन तक देखते रहबैं आउर उमन केर लाश के कबर में रखेक नी देबैं। आउर धरती केर रहेक वाला आदमीमन, उ दुयो गवाह केर मोरेक से रिझे होई के खुशी मनाबैं, आउर एक-दोसर ठिना भेंट भेजबैं, काले कि इ दुयो संदेश के बताएक वालामन धरती केर रहेक वालामन के सताए रहैं। मगर साढ़े तीन दिन केर पाछे परमेश्‍वर केर बटले जिंदगी केर साँस आलक, आउर उमन उइठ के ठड़ाय गेलैं। तब उमन के देखेक वालामन केर उपरे डार समाय गेलक। फिन उमन के स्वरग से एक बड़का शबद सुनाई देलक, “हिंयाँ उपरे आवा!” इके सुइन के उमन बैरीमन केर देखते-देखते बदरी में से होई के स्वरग में उठाय लेवल गेलैं। फिन ओहे बेरा एक बड़का भूंईडोल आलक, आउर नगर केर दसवाँ हिस्सा गिर गेलक। उ भूंईडोल से सात हजार आदमीमन मोइर गेलैं, आउर जे बचलैं उमन डराय गेलैं आउर स्वरग केर परमेश्‍वर केर महिमा करलैं। दूसरा बिपइत बीत गेलक, देखा, तीसरा बिपइत जल्दी आवेक वाला अहे। जब सातवाँ दूत तुरही फुँकलक, तो स्वरग में से जोर से रकम-रकम केर आवाज इ कहते सुनाई देलक, “दुनिया केर राइज हमर प्रभु केर आउर उकर मसीह केर होई गेलक आउर उ जुग-जुग राइज करी।” तब उ चोबिसो मुखियामन जे परमेश्‍वर केर सामने अपन-अपन सिंहासन में बाइठ रहैं, उमन निहइर के माथा टेकलैं आउर परमेश्‍वर केर आराधना करलैं। उमन कहलैं, “हे सर्वशक्तिमान प्रभु परमेश्‍वर, तोंय जे अहिस आउर जे पहिले रहिस, हमरे तोर धन्यबाद करिला कि तोंय अपन बड़का शक्ति के काम में लाइन के राइज काइर हिस। परजाइत आदमीमन तोर से खिसाल अहैं, काले कि बेरा आय पोंहइच हे कि तोंय अपन खीस के देखाबे, आउर उ बेरा हों आय पोंहइच हे कि मोरलमन केर फैसला करल जाओक, आउर तोर संदेश के बताएक वाला तोर सेवकमन आउर पवितर आदमीमन के आउर उ छोट बाड़मन के जे तोर नाँव से डरायना, इनाम देवल जाओक आउर धरती के बिगड़ाएक वालामन के नाश करल जाओक।” तब परमेश्‍वर केर जे मन्दिर स्वरग में अहे, उ खोलल गेलक, आउर उकर मन्दिर में उकर करार केर बक्सा दिसलक। आउर बिजलीमन, आवाजमन आउर बदरी केर गरजेक केर आवाज आउर भूंईडोल होलक आउर भारी ओला गिरलक। फिन आकाश में एगो बड़का चिन्हा दिस्तार देलक, मतलब एगो जनाना बेइर के ओइढ़ रहे। उकर पाँव केर हेंठे चाँद रहे आउर उकर मूँड़ उपरे बारह गो तइरगनमन केर मुकुट रहे। उ गर्भवती रहे, आउर उकर छउवा जनम देवेक केर समय आय पोंहइच गेलक, आउर उ जनम देवेक केर बथा केर चलते कुंहरत रहे। फिन एक आउर चिन्हा आकाश में दिस्तार देलक, एगो बड़का लाल अजगर रहे, जेकर सात मूँड़ आउर दस सींग रहे, आउर उकर मूँड़मन में सात राजमुकुट रहे। उकर पूँइछ आकाश केर एक तिहाई तइरगनमन के खींच के धरती में फेइक देलक। उ अजगर उ जनाना केर भीरे ठड़ालक, जे छउवा जनम देवेक केर बाथा में रहे ताकि छउवा केर जनमते हें उके लील जाओक। उ जनाना एगो बेटा के जनम देलक, जे राइज करेक वाला लोहा केर लाठी से सोउब जाइत केर आदमीमन उपरे राइज करेक ले रहे। उ छउवा के तुरते उठाय के परमेश्‍वर आउर उकर सिंहासन तक पोंहचाय देवल गेलक। आउर उ जनाना, उ सुनसान ठाँव में भाइग गेलक, जहाँ परमेश्‍वर बटले उकर लगिन एगो ठाँव तेयार करल जाय रहे कि हूवाँ उके एक हजार दूई सौ साठ दिन तक पोसल जाओक। फिन स्वरग में लड़ाई होलक। मीकाईल आउर उकर स्वरगदूतमन केर लड़ाई अजगर आउर उकर दूतमन से होलक। अजगर आउर उकर दूतमन उकर से लड़लैं। मगर उमन टिकेक नी पारलैं, से लगिन स्वरग में उमन लगिन फिन ठाँव नी रहलक। तब उ बड़का अजगर मतलब ओहे पुरना साँप, जे इबलीस आउर शैतान कहायला, आउर गोटा दुनिया केर आदमीमन के भरमाएक वाला हेके, उकर दूतमन केर संगे उके धरती में गिराय देवल गेलक। फिन मोंय स्वरग में से जोर से इ कहते सुनलों, “अब हमर परमेश्‍वर केर छुटकारा, शक्ति, राइज आउर उकर मसीह केर अधिकार दिस्तार होई हे, काले कि हमर भाईमन उपरे दोष लगाएक वाला, जे राइत दिन हमर परमेश्‍वर केर भीरे उ मनक उपरे दोष लगाते रहत रहे, गिराय देवल गेलक। आउर उमन मेमना केर लोहू केर खातिर आउर अपन गवाही केर बचन केर खातिर, उकर उपरे जीत पालैं, आउर उमन अपन प्राण केर मोह छोइड़ के माउत के अपनाय लेलैं। से लगिन, हे स्वरगमन आउर उकर में रहेक वाला आदमीमन, खुशी मनावा। मगर हे धरती आउर समुदर, तोहर उपरे हाय! काले कि शैतान तोहर ठिना पोंहइच जाय हे, उ खीस से भरल अहे, काले कि उके पता होई जाय हे कि उकर थोरहें समय आउर बचल अहे।” जब अजगर देखलक कि मोंय धरती में गिराय देवल जाय हों, तो उ जनाना के जे बेटा जनमाय रहे, सतालक। मगर उ जनाना के बड़का उकाब केर दूई गो पाँइख देवल गेलक ताकि उ साँप केर सामने से उइड़ के, उ सुनसान ठाँव में पोंहइच जाओक, जहाँ उके साढ़े तीन बरिस तक पोसल जाएक रहे। तब साँप उ जनाना केर पिछे अपन मुँह से नदी केर नियर पानी बहालक ताकि उके नदी केर पानी बोहाय के लेई जाओक। मगर धरती उ जनाना केर मदइत करलक। उ अपन मुँह खोइल के उ नदी के जे अजगर अपन मुँह से बहाय रहे, पी लेलक। तब अजगर जनाना उपरे ढेइर खिसाय गेलक, आउर उकर बचल छउवामन से जे परमेश्‍वर केर आगया के मानैना आउर यीशु केर बारे में देवल गवाही में स्थिर अहैं, लड़ेक लगिन गेलक। तब उ अजगर चाइल गेलक आउर समुदर केर किनारे जाय के ठड़ाय गेलक। तब मोंय समुदर में से खूंखार जानवर के निकलते देखलों। उकर दस गो सींग आउर सात गो मूँड़ रहे। उकर दसो सींगमन में एक-एक राजमुकुट रहे आउर उकर मूँड़मन उपरे परमेश्‍वर केर निंदा करेक वाला नाँव लिखल रहे। जे जानवर के मोंय देखलों, उ चीता नियर रहे आउर उकर गोड़ भालू केर गोड़ नियर आउर मुँह सिंह केर मुँह नियर रहे। आउर उ अजगर अपन शक्ति, अपन सिंहासन आउर बड़का अधिकार उके देई देलक। मोंय उकर एगो मूँड़ में एइसन भारी घाव लगल देखलों कि उ मोरेक वाला अहे। मगर उकर प्राण लेवेक जइसन घाव बेस होई गेलक आउर धरती केर समूचा आदमीमन ताजुब करते उ जानवर केर पिछे-पिछे चाइल गेलैं। उ आदमीमन अजगर केर पूजा करलैं, काले कि उ जानवर के अपन अधिकार देई दे रहे आउर उमन इ कहते उ जानवर केर हों पूजा करलैं, “इ जानवर केर नियर के अहे? के उकर से लड़ेक पारेला?” उ जानवर के घमंड से भरल गोइठ कहेक आउर परमेश्‍वर केर निंदा करेक केर अधिकार आउर बेयालिस महिना तक काम करेक केर अधिकार देवल गेलक। उ जानवर परमेश्‍वर आउर उकर नाँव आउर उकर रहेक वाला ठाँव मतलब स्वरग आउर उ सोउब केर जे स्वरग में रहैना निंदा करेक शुरु काइर देलक। आउर उ जानवर के एहो अधिकार देवल गेलक कि पवितर आदमीमन से लड़ोक आउर उ मनक उपरे जीत पाओक आउर उके हर एक गोतर, हर एक आदमीमन, हर एक भाषा आउर हर एक जाइत केर उपरे अधिकार देवल गेलक। धरती केर उपरे रहेक वाला सोउब आदमीमन राक्षस केर पूजा करेक लगलैं। सिरिफ ओहेमन उकर पूजा नी करलैं, जेमन केर नाँव दुनिया केर सिरजन होवेक से पहिलेहें से जिंदगी केर किताब में लिखल जाय रहे। इ जिंदगी केर किताब उ मेमना केर किताब हेके, जेके बलिदान केर रूप में माइर देवल जाय रहे। जेमन केर कान अहे उमन धेयान से सुइन लेवा। जेकर बंदी बनेक लिखल अहे, उके बंदी बनाल जाई, आउर जेमन लगिन इ ठहराल जाय हे कि उमन तलवाइर से मारल जाबैं। उमन लगिन इ पक्का अहे कि उमन तलवाइर से हें मोराल जाबैं। से लगिन परमेश्‍वर केर आदमीमन के इ सोउब गोइठमन में धीरज धारेक चाही, आउर परमेश्‍वर उपरे भरसा करेक चाही। फिन मोंय एगो आउर जानवर के धरती में से निकलते देखलों। उकर मेमना केर नियर दूई गो सींग रहे आउर उ अजगर केर नियर बोलत रहे। उ अजगर केर भीरे पहिला जानवर केर समूचा अधिकार के काम में लानत रहे, आउर धरती आउर उकर में रहेक वाला आदमीमन से उ पहिला जानवर केर जेकर प्राण लेवेक जइसन घाव बेस होई जाय रहे, पूजा करुवात रहे। उ बड़का-बड़का चमत्कार केर चिन्हा देखात रहे, हिंयाँ तक कि आदमीमन केर सामने स्वरग से धरती में आइग बरसाय देवत रहे। आउर उ चिन्हामन केर खातिर जेके उ जानवर केर सामने देखाएक केर अधिकार उके देवल जाय रहे, उ धरती केर रहेक वाला आदमीमन के बहकात रहे आउर उमन से इ कहत रहे कि जे जानवर के तलवाइर लाइग रहे, उ जी जाय हे, उकर मूर्ति बनावा। उके उ जानवर केर मूर्ति के जिंदा करेक केर शक्ति देवल गेलक, ताकि जानवर केर मूर्ति बोलेक लगोक आउर जेतना आदमीमन उ जानवर केर मूर्ति केर पूजा नी करबैं उमन के माइर मोराओक। आउर उ दूसरा जानवर छोट-बाड़, धनी-गरीब, आजाद या गुलाम सोउब केर भतखाइया हाँथ चाहे उ मनक माथा में एक-एक छाप लगाय देलक। ताकि जेकर उपरे उ जानवर केर छाप मतलब उकर नाँव चाहे उकर नाँव केर अंक नी होवी, उ लेन-देन करेक ना पारोक। गेयान इकरे में अहे: जेके बुद्धि होवी, उ इ जानवर केर अंक जोइड़ लेवोक, काले कि उ आदमी केर अंक हेके आउर उकर अंक छाव सौ छेयासठ हेके। उकर पाछे मोंय नजइर उठाय के देखलों, उ मेमना सिय्योन पहार उपरे ठड़ाल अहे। उकर संगे एक लाख चौवालीस हजार आदमीमन अहैं, जे मनक माथा में उकर आउर उकर आबा केर नाँव लिखल अहे। आउर स्वरग से मोके एगो एइसन आवाज सुनाई देलक, जे ढेइर उपरे से पानी गिरेक आउर बदरी केर जोर से गरजेक नियर रहे आउर जे आवाज मोंय सुनलों, उ एइसन रहे जइसन बीना बजाएक वालामन बीना बजायना। उमन सिंहासन केर सामने आउर चाइरो जीवमन आउर मुखियामन केर सामने, एक नवाँ गीत गावत रहैं। उ एक लाख चौवालीस हजार आदमीमन के छोइड़ जेमन के धरती में से कीन लेवल जाय रहे, केऊ आउर उ गीत के नी सिखेक पारत रहैं। इ उमन हेकैं, जे जनानामन केर संगे अशुद्ध नी होलैं, मगर कुँवारा हेकैं: इ उमन हें हेकैं जे जहाँ कही मेमना जायला, उकर पिछे चलैना। इमन तो परमेश्‍वर आउर मेमना लगिन पहिला फार होवेक ले आदमीमन से कीन लेवल जाय हैं। आउर उमन केर मुँह से कहियो झूठ नी निकइल रहे, उमन निरदोष अहैं। फिन मोंय एक आउर स्वरगदूत के आकाश केर माझे में उड़ते देखलों, जेकर ठिना धरती केर रहेक वाला आदमीमन केर हर एक जाइत, गोतर, भाषा आउर आदमीमन के सुनाएक लगिन जुग-जुग केर शुभ समाचार रहे। आउर उ जोर से कहलक, “परमेश्‍वर से डरावा आउर उकर महिमा करा। काले कि उकर फैसला करेक केर बेरा आय पोंहइच हे, आउर उकर आराधना करा, जे स्वरग आउर धरती आउर समुदर आउर पानी केर सोता सिरजालक।” फिन इकर पाछे एक आउर दूसरा स्वरगदूत इ कहते आलक, “नाश होई गेलक, उ महान देस बेबीलोन नाश होई गेलक, जे अपन ब्यभिचार केर कड़ुवा नशा सोउब जाइत केर आदमीमन के पियाय हे।” इकर पाछे एक आउर तीसरा स्वरगदूत जोर से इ कहते आलक, “जे केऊ उ जानवर आउर उ मूर्ति केर पूजा करी, आउर अपन माथा या अपन हाँथ में उकर छाप के लगाई, तो उके परमेश्‍वर केर परकोप केर मदिरा जे बेगर मिलावट केर उकर खीस केर कटोरा में उझलल जाय हे, पियी आउर उके पवितर स्वरगदूतमन केर भीरे आउर मेमना केर सामने आइग आउर गंधक केर बाथा देवल जाई। उकर बाथा केर धुंगिया जुग-जुग उठते रही, आउर जेमन उ जानवर आउर उ मूर्ति केर पूजा करैना, आउर जे उकर नाँव केर छाप लेवैना, उमन के राइत दिन चैन नी मिली।” अब पवितर आदमीमन केर धीरज इकरे में अहे, जे परमेश्‍वर केर आगयामन के मानैना आउर यीशु केर उपरे बिसवास रखैना। फिन मोंय स्वरग से इ आवाज के इ कहते सुनलों, “लीख: धाइन हेकैं उ मुरदामन, जे अब से प्रभु में बिसवास करते मोरायना।” पवितर आत्मा कहेला, “हाँ, काले कि उमन अपन सोउब मेहनइत से आराम पाबैं, आउर उमन केर काम उमन केर संगे होई लेवेला।” इकर पाछे मोंय नजइर उठाय के देखलों, एक चरका बदरी अहे आउर उ बदरी में आदमी केर बेटा नियर केऊ बाइठ हे, जेकर मूँड़ उपरे सोना केर मुकुट आउर हाँथ में चोखा हँसुआ रहे। फिन एक आउर स्वरगदूत परमेश्‍वर केर मंदिर में से निकइल के, उकर से जे बदरी उपरे बाइठ रहे, जोर से कहलक, “अपन हँसुआ चलाव आउर कटनी कर, काले कि कटनी केर बेरा आय पोंहइच हे आउर धरती केर खेती पाइक चुइक हे।” से लगिन जे बदरी में बाइठ रहे, उ धरती में अपन हँसुआ चलालक, आउर धरती केर कटनी पूरा होई गेलक। फिन एक आउर स्वरगदूत परमेश्‍वर केर मंदिर में से निकललक जे स्वरग में अहे, आउर उकर ठिना हों चोखा हँसुआ रहे। फिन एक आउर स्वरगदूत जेके आइग उपरे अधिकार रहे, बेदी में से निकललक, आउर उकर से जेकर ठिना चोखा हँसुआ रहे, जोर से कहलक, “अपन चोखा हँसुआ चलाय के धरती केर अंगूर केर गुच्छा काइट ले, काले कि उकर अंगूर पाइक चुइक हे।” तब उ स्वरगदूत धरती में अपन हँसुआ चलालक, आउर धरती केर अंगूर केर फार काइट के परमेश्‍वर केर परकोप केर बड़का रस-कुंड में उझइल देलक। आउर नगर केर बाहरे उ रस-कुंड में अंगूर रौंदाय गेलक आउर रस-कुंड में से एतना लोहू निकललक कि घोड़ामन केर लगाम तक पोहोंचलक, आउर सौ कोस तक बइह गेलक। मोंय स्वरग में एगो आउर महान आउर अदभुत चिन्हा देखलों। मोंय देखलों कि सात गो स्वरगदूतमन अहैं जेमन ठिना सातों आखरी बिपइतमन रहे। इ आखरी बिपइत रहे, काले कि इमन केर संगे परमेश्‍वर केर परकोप हों पूरा होई जाई। तब मोंय आइग मिलाल काँच नियर एगो समुदर देखलों, आउर जेमन उ जानवर उपरे, उकर मूर्ति उपरे, आउर उकर नाँव केर अंक उपरे जीत पाय रहैं, उमन के उ काँच केर समुदर भीरे परमेश्‍वर केर बीना बाजामन के लेई के ठड़ाल देखलों। आउर उमन परमेश्‍वर केर सेवक मूसा केर द्वारा मेमना केर बारे में गावल गीत गाय-गाय के कहत रहैं, “हे सर्वशक्तिमान प्रभु परमेश्‍वर, तोर काम महान आउर अदभुत अहे, हे जुग-जुग केर राजा, तोर चाल ठीक आउर सच्चा अहे। हे प्रभु, के तोर से नी डराई आउर तोर नाँव केर महिमा नी करी? काले कि सिरिफ तोंय हें पवितर अहिस। सोउब जाइत केर आदमीमन आय के तोर भीरे आराधना करबैं, काले कि तोर फैसला केर काम दिस्तार होई जाय हे।” इकर पाछे मोंय देखलों कि स्वरग में मंदिर खोलल गेलक, जे मिलाप वाला तंबू नियर अहे। आउर उ सातों स्वरगदूतमन जेमन ठिना सातों बिपइतमन रहे, मलमल केर शुद्ध आउर चमकदार लुगा पिंधल आउर छाती उपरे सोना केर पाटी बाँधल मंदिर से निकललैं। तब उ चाइरो जीवमन में से एगो, उ सातों स्वरगदूतमन के सात सोना केर कटोरा देलक, जे जुग-जुग जिंदा परमेश्‍वर केर परकोप से भरल रहे। आउर परमेश्‍वर केर तेज रोशनी आउर उकर शक्ति केर चलते मंदिर धुंगिया से भाइर गेलक आउर जब तक उ सातों स्वरगदूतमन केर सातों बिपइत सिराय नी गेलक, तब तक केऊ मंदिर में नी जाएक पारलैं। उकर पाछे मोंय मंदिर में केखो उ सातों स्वरगदूतमन से जोर से इ कहते सुनलों, “जावा, परमेश्‍वर केर परकोप केर सातों कटोरा के धरती केर आदमीमन उपरे उझइल देवा।” तब पहला स्वरगदूत जाय के अपन कटोरा के धरती केर आदमीमन उपरे उझइल देलक। तब उ आदमीमन केर जेमन केर उपरे जानवर केर छाप रहे, आउर जे उकर मूर्ति केर पूजा करत रहैं, एक रकम केर बुरा आउर बथुवाएक वाला फोड़ा निकललक। दूसरा स्वरगदूत अपन कटोरा समुदर में उझइल देलक आउर उ मोरल आदमी मनक लोहू नियर बाइन गेलक, आउर समुदर केर सोउब जीव मोइर गेलैं। तीसरा स्वरगदूत अपन कटोरा के नदीमन में आउर पानी केर सोतामन में उझइल देलक, आउर उमन लोहू बाइन गेलक। तब मोंय पानी उपरे अधिकार रखेक वाला स्वरगदूत के इ कहते सुनलों, “हे पवितर, जे अहे, आउर जे रहे, तोंय उचित फैसला करेक वाला हेकिस आउर तोंय इ फैसला करले। काले कि उमन पवितर आदमीमन आउर परमेश्‍वर केर संदेश के बताएक वालामन केर लोहू बहाय रहैं, आउर तोंय उमन के लोहू पियाले, काले कि उमन एहे लायक अहैं।” फिन मोंय बेदी से इ गोइठ सुनलों, “हाँ, हे सर्वशक्तिमान प्रभु परमेश्‍वर, तोर फैसला ठीक आउर सच्चा अहे।” चौथा स्वरगदूत अपन कटोरा बेइर उपरे उझइल देलक, आउर उके आदमीमन के आइग से झुलसाय देवेक केर अधिकार देवल गेलक। आउर आदमीमन ढेइर आँच से झुलइस गेलैं, आउर परमेश्‍वर केर नाँव केर जेके इ बिपइतमन उपरे अधिकार अहे, निंदा करलैं मगर पाप करेक नी छोड़लैं आउर परमेश्‍वर के हों महिमा नी देलैं। पाँचवाँ स्वरगदूत अपन कटोरा उ जानवर केर सिंहासन उपरे उझइल देलक आउर उकर राइज में अंधार होई गेलक आउर आदमीमन बाथा केर मारे अपन-अपन जीभ के चाबाएक लगलैं। आउर अपन बाथामन आउर फोड़ामन केर खातिर स्वरग केर परमेश्‍वर केर निंदा करलैं, मगर अपन-अपन पाप काम के करेक नी छोड़लैं। छठवाँ स्वरगदूत अपन कटोरा बड़का नदी फरात में उझइल देलक आउर उकर पानी सूइख गेलक, ताकि पूरब दिशा केर राजामन लगिन डहर तेयार होई जाओक। फिन मोंय उ अजगर केर मुँह से, आउर उ जानवर केर मुँह से, आउर झूठा संदेश के बताएक वाला आदमी केर मुँह से तीन अशुद्ध आत्मामन के बेंगमन केर रूप में निकलते देखलों। इमन चिन्हा देखाएक वाला भूतमन हेकैं, जे समूचा दुनिया केर राजामन ठिना निकइल के इ लगिन जायना कि उमन के सर्वशक्तिमान परमेश्‍वर केर उ महान दिन केर लड़ाई लगिन जमा करोक। आउर सातवाँ स्वरगदूत अपन कटोरा हवा में उझइल देलक, आउर परमेश्‍वर केर मंदिर केर सिंहासन से इ बड़का शबद सुनालक, “होई चुकलक!” तब तुरते बिजलीमन चमकलक, आउर गड़गड़ाहट आउर बदरी केर गरजेक सुनालक, आउर एगो एइसन बड़का भूंईडोल आलक कि जब से आदमी केर सिरजन धरती में होलक, तब से एइसन बड़का भूंईडोल कहियो नी होई रहे। आउर उ बड़का देस बेबीलोन केर तीन टुकरा होई गेलक, आउर जाइत-जाइत केर नगरमन धाँइस गेलक। परमेश्‍वर उ महान देस बेबीलोन के याइद करलक ताकि उ अपन खीस केर कड़ुवा नशा उके पियाओक। आउर सोउब टापू अपन ठाँव से हइट गेलक आउर पहारमन केर पता नी चललक। आकाश से आदमीमन केर उपरे मन-मन भइर केर बड़का ओला गिरलक, इ बिपइत ढेइर भारी रहे, आदमीमन इ बिपइत केर चलते परमेश्‍वर केर निंदा करलैं। इकर पाछे उ सात स्वरगदूतमन जेमन ठिना सात कटोरा रहे, उमन में से एक मोर ठिना आय के कहलक, “हिने आव, मोंय तोके उ बड़का बेश्या केर दंड के देखामूँ, जे कायनों नदीमन केर भीरे बसल महान शहर हेके। जेकर संगे धरती केर राजामन ब्यभिचार करलैं, आउर धरती केर रहेक वाला आदमीमन उकर ब्यभिचार केर नशा से माइत जाय रहैं।” तब पवितर आत्मा केर मदइत से स्वरगदूत मोके सुनसान ठाँव में लेई गेलक। हूवाँ मोंय लाल रंग केर जानवर, जेकर उपरे परमेश्‍वर केर निंदा से भरल शबदमन रहे, देखलों। उकर सात गो मूँड़ आउर दस गो सींग रहे, आउर उकर उपरे एगो जनाना बाइठ रहे। इ जनाना बैगनी आउर लाल रंग केर लुगा पिंधल रहे, आउर सोना आउर ढेइर किमती मणि आउर मोतीमन से सिंगराल रहे। आउर उकर हाँथ में एक सोना केर कटोरा रहे, जे घिनघिना चीजमन से आउर उकर ब्यभिचार केर अशुद्ध चीजमन से भरल रहे। उकर माथा उपरे एक नाँव लिखल रहे जेकर मतलब लुकल रहे। इ लेखे रहे, “महान देस बेबीलोन धरती केर बेश्यामन आउर घिनघिना चीजमन केर आयो।” मोंय उ जनाना के पवितर आदमीमन केर लोहू आउर यीशु केर गवाहमन केर लोहू पियेक से मातल देखलों। उके देइख के मोंय ताजुब होई गेलों। तब उ स्वरगदूत मोर से कहलक, “तोंय काले ताजुब होले? मोंय इ जनाना, आउर उ जानवर केर, जेकर उपरे उ चढ़ल अहे, आउर जेकर सात गो मूँड़ आउर दस गो सींग अहे, तोके भेद बतावना। जे जानवर तोंय देइख हिस, उ पहिले तो रहे, मगर अब नखे, मगर उ बेथाह गढ़हा से निकइल के आवी, सेहे बेरा उकर बिनाश होई जाई। आउर धरती केर रहेक वाला आदमीमन जेमन केर नाँव दुनिया केर सिरजेक बेरा से जिंदगी केर किताब में लिखल नखे, इ जानवर केर इ दशा देइख के कि पहिले रहे, आउर अब नखे आउर फिन आय जाई, ताजुब करबैं। इके समझेक लगिन बुद्धि केर जरुरी अहे। उ सातों मूँड़ सात गो पहार हेकैं, जे मनक उपरे उ जनाना बाइठ हे। आउर उमन सात राजामन हों हेकैं, पाँच तो होई चुकलैं, आउर एगो एखन अहे आउर एगो एखन तक नी आय हे। मगर जब आवी, तो थोरेक समय तक राइज करी। जे जानवर पहिले रहे, आउर अब नखे, उ खुद आठवाँ राजा हेके, मगर सचमुच में उ सातों राजामन में से एगो हेके, आउर उकर हों बिनाश होवेक वाला अहे। जे दस सींग तोंय देखले, उमन दस राजामन हेकैं, जेमन के एखन तक राइज नी मिल हे मगर उ जानवर केर संगे थोरेक समय लगिन राजामन केर नियर अधिकार पाबैं। इमन सोउब एक मत होबैं, उमन अपन-अपन शक्ति आउर अधिकार के उ जानवर के देबैं। इमन मेमना से लड़बैं, आउर मेमना उमन केर उपरे जीत जाई, काले कि उ प्रभुमन केर प्रभु आउर राजामन केर राजा हेके आउर जेमन बोलाल आउर चुनाल अहैं, आउर उकर परती बिसवास लायक अहैं, आउर उमन उकर संगे अहैं, उमन हों जीत जबैं।” फिन उ मोर से कहलक, “जे ढेइर पानी तोंय देखले, जेकर उपरे बेश्या बाइठ हे, उ पानी तो आदमीमन, भीड़, जाइतमन आउर भाषामन हेकैं। आउर जे दस सींग तोंय देखले, उमन आउर जानवर बेश्या से बैर करबैं। आउर उके लाचार आउर नंगा काइर देबैं आउर उकर माँस खाय जबैं, आउर उके आइग में पोड़ाय देबैं। काले कि परमेश्‍वर उमन केर मन के एक मत काइर देई हे, ताकि जब तक उकर बचन पूरा नी होई जाई, तब तक उमन शासन करेक केर अपन अधिकार के उ जानवर के सोंइप देवोक। आउर उ जनाना, जेके तोंय देइख हिस उ महान नगर हेके, जे धरती केर राजामन उपरे राइज करेला।” इकर पाछे मोंय एगो स्वरगदूत के स्वरग से उतरते देखलों, जेकर ठिना ढेइर शक्ति रहे आउर धरती उकर तेज रोशनी से चमइक गेलक। उ जोर से कहलक, “धाँइस गेलक, महान देस बेबीलोन धाँइस जाय हे! उ भूतमन केर डेरा आउर हर एक अशुद्ध आत्मामन केर अड्डा आउर हर एक अशुद्ध आउर घिनघिना चरई केर अड्डा बाइन गेलक। काले कि उकर ब्यभिचार केर कड़ुवा नशा से सोउब जाइत केर आदमीमन गिर गेलैं, आउर धरती केर राजामन उकर संगे ब्यभिचार काइर रहैं, आउर धरती केर बेपारीमन उकर भोग-बिलास केर भरपूरी केर खातिर धनवान होई रहैं।” फिन मोंय स्वरग से एगो आवाज सुनलों, “हे मोर आदमीमन, उकर में से निकइल के आवा ताकि तोहरेमन उकर पापमन में भागीदार ना होबा, आउर उकर बिपइतमन में से कोनों तोहर उपरे ना आय जाओक। काले कि उकर पाप ऊँचा आकाश तक पोंहइच जाय हे, आउर उकर बुरा काममन के परमेश्‍वर याइद कराथे। उ महान नगर जइसन तोहरेमन से करलक ठीक तइसनेहें तोहरेमन हों उकर से ब्यवहार करा, आउर उकर काम केर मोताबिक उके दूई गुणा बदला देवा। जे कटोरा में उ भाइर देई रहे ओहे कटोरा में उकर लगिन दूई गुणा भाइर देवा। जेतना उ अपन बड़ाई करलक आउर भोग-बिलास करलक, उतना उके बाथा आउर शोक देवा। काले कि उ अपन मन में कहेला, मोंय रानी बाइन बाइठ हों, मोंय बिधवा ना लगों आउर मोंय कहियो नी दुःखी होमूँ।” से लगिन एक हें दिन में उकर उपरे बिपइत आय जाई, मतलब माउत, दुःख आउर अकाल, आउर उ आइग में भसम होई जाई, काले कि फैसला करेक वाला प्रभु परमेश्‍वर शक्तिशाली अहे। उ उके दोषी ठहराय हे। धरती केर राजामन जेमन उकर संगे ब्यभिचार आउर भोग-बिलास करलैं, जब उकर पोड़ेक केर धुंगिया देखबैं तो उकर लगिन काँदबैं आउर बिलाप करबैं। उकर बाथा केर डार से दूर हें ठड़ाय के कहबैं, “हे महान देस, बेबीलोन! हे मजबूत नगर, हाय! हाय! तोके समय भाइर में हें दंड मिल जाय हे!” धरती केर बेपारीमन उकर लगिन काँदबैं आउर कलपबैं, काले कि अब केऊ उ मनक माल के नी किनी। मतलब सोना, चाँदी, रतन, मोती, मलमल, बैगनी, रेशमी, आउर लाल रंग केर लुगामन, आउर हर रकम केर बेस बसाएक वाला काठ, आउर हाथी दाँत केर हर रकम केर चीजमन, आउर ढेइर किमती काठ, पीतल, लोहा, आउर संगमरमर केर सोउब रकम केर बासन, आउर दालचीनी, मसाला, धूप, सेंट, लोबान, मदिरा, तेल, मैदा, गोहोम, गाय-गारु, भेड़ीमन, छगरीमन, घोड़ामन, रथ, आउर सेवक आउर आदमीमन केर जान। से लगिन बेपारीमन कहलैं, “हे महान नगर बेबीलोन तोंय जे फार केर आसरा करिसला, उ तोर से दूर चाइल गेलक। तोर ऐसो-आराम आउर उ सोउब चीजमन, जेमन से तोंय अपन काया के सिंगरात रहिस, तोर से दूर होई गेलक आउर अब उमन तोके फिन कहियो नी मिली।” इ चीजमन केर बेपारीमन जे बेबीलोन नगर से धनवान बाइन जाय रहैं, अब उकर बाथा केर डार से दूर हें ठड़ाय के काँदते आउर कलपते कहबैं, “हाय! हाय! इ महान नगर जे मलमल, बैगनी, आउर लाल रंग केर लुगा पिंधल रहे, आउर सोना, रतनमन आउर मोतीमन से सजाल रहे, एके घड़ी में हें उकर एइसन भारी धन नाश होई गेलक।” हर एक माँझी, आउर हर एक आदमीमन जे जहाज से कहाँव जाएक पारत रहैं, आउर मल्लाह आउर जेतना आदमीमन समुदर से रुपया कमात रहैं, सोउब उ नगर से दूर ठड़ाय रहलैं। आउर उकर पोड़ेक केर धुंगिया देइख के जोर से कहलैं, “इ महान नगर केर बराबरी के करेक पारी?” आउर अपन-अपन मूँड़मन उपरे धूर मखाय के काँदते बिलखते जोर-जोर से कहबैं, “हाय! हाय! इ महान नगर जेकर सम्पति से समुदर केर सोउब जहाज मालिकमन धनी होई जाय रहैं, एके घड़ी में नाश होई गेलक।” हे स्वरग आउर हे पवितर आदमीमन, आउर चुनल खास चेलामन आउर परमेश्‍वर केर संदेश के बताएक वाला आदमीमन खुशी मनावा, काले कि परमेश्‍वर फैसला काइर के उकर से तोहर पलटा लेई हे। फिन एगो बलवान स्वरगदूत बड़का जाँता केर पाटा केर नियर एगो पखना उठालक, आउर इ कइह के समुदर में फेइक देलक, “महान देस बेबीलोन एइसनेहें बड़का ताकत से गिराल जाई, आउर फिन कहियो उकर पता नी चली। आउर बीना बजाएक वालामन आउर गीतकारमन आउर बाँसुरी बजाएक वालामन, आउर तुरही फुँकेक वालामन केर आवाज फिन कहियो तोर में सुनाई नी देवी। आउर कोनों काम केर केऊ कारीगर हों फिन कहियो तोर में नी मिली आउर जाँता केर चलेक केर आवाज फिन कहियो तोर में नी सुनाई देवी। दीया केर इंजोत कहियो तोर में फिन नी चमकी आउर दूल्हा आउर दुलहिन केर आवाज कहियो तोर में फिन नी सुनाई देई, काले कि तोर बेपारीमन धरती केर खास आदमीमन रहैं, आउर तोर ओझा से सोउब जाइतमन भरमाल जाय रहैं। आउर परमेश्‍वर केर संदेश के बताएक वालामन आउर पवितर आदमीमन, आउर धरती में माइर मोराल सोउब आदमीमन केर लोहू महान नगर बेबीलोन में पावल गेलक।” जब बलवान स्वरगदूत कहेक बंद करलक, तब मोंय स्वरग में एगो बड़का भीड़ के ऊँचा आवाज में इ कहते सुनलों, “हाल्लेलूयाह! छुटकारा, आउर महिमा, आउर शक्ति हमर परमेश्‍वर हें केर हेके। काले कि उकर फैसला सच्चा आउर ठीक अहे। उ बड़का बेश्या केर जे अपन ब्यभिचार से धरती के भ्रष्ट करत रहे, फैसला करलक, आउर उकर से अपन सेवकमन केर लोहू केर पलटा लेई हे।” फिन दूसरा बेर उमन कहलैं, “हाल्लेलूयाह! आउर उकर पोड़ेक केर धुंगिया जुग-जुग उठते रही।” तब चोबिसो मुखियामन आउर चाइरो जीवमन सिंहासन में बइठल परमेश्‍वर केर सामने झुइक के माथा टेकलैं आउर उकर आराधना करते गावेक लगलैं, “आमीन! हाल्लेलूयाह” तब सिंहासन में से एक आवाज आलक, “हे हमर परमेश्‍वर से डराएक वाला सोउब सेवकमन, चाहे छोट चाहे बाड़ सोउब परमेश्‍वर केर स्तुति करा।” फिन मोंय बड़का भीड़ केर नियर आवाज सुनलों। उ आवाज ढेइर पानी केर नियर आउर बदरी केर गरजेक केर नियर रहे। उमन कहलैं, “हाल्लेलूयाह! उकर स्तुति होवोक, काले कि प्रभु हमर परमेश्‍वर सर्वशक्तिमान राइज करेला। आवा, हमरे रिझे होई के खुशी मनाब आउर उकर स्तुति करब, काले कि मेमना केर बिहा आय पोंहइच हे, आउर उकर दुलहिन खुद के तेयार काइर लेई हे। उके शुद्ध आउर चमकदार महीन मलमल केर लुगा पिंधेक केर अधिकार देवल गेलक।” उ चमकदार महीन मलमल केर मतलब पवितर आदमीमन केर धरम केर काम हेके। तब स्वरगदूत मोर से कहलक, “इके लीख: धाइन हेकैं उमन, जे मेमना केर बिहा केर भोज में बोलाल जाय हैं।” फिन उ मोर से कहलक, “इ बचन परमेश्‍वर केर सच्चा बचन हेके।” तब मोंय उकर पाँव केर भीरे निहइर के माथा टेकलो आउर उकर आराधना करलों। उ मोर से कहलक, “देख, एइसन ना कर, मोंय तोर आउर तोर भाईमन केर संगी दास हेकों, जे यीशु केर गवाही देवेक में स्थिर अहैं। परमेश्‍वर केर हें आराधना कर। काले कि यीशु केर गवाही भविष्यवाणी केर आत्मा हेके।” फिन मोंय देखलों कि स्वरग खोलल अहे, हूवाँ मोर सामने एगो चरका घोड़ा रहे आउर उकर उपरे एक झन चढ़ल रहे, जे बिसवास लायक आउर सच्चा कहायला। उ जे गोइठ परमेश्‍वर केर नजइर में सही है उकर मोताबिक परमेश्‍वर केर दुश्मनमन केर बिरोध फैसला करेला आउर लड़ाई करेला। उकर आँइख आइग नियर धधकेला आउर उकर मूँड़ उपरे ढेइर राजमुकुट अहे। आउर उकर उपरे एगो नाँव लिखल अहे, जेके उके छोइड़ आउर केऊ नी जानैना। उ एइसन लुगा पिंध रहे, जेके लोहू में डुबाल जाय रहे। उके नाँव देवल जाय रहे, “परमेश्‍वर केर बचन।” स्वरग केर सेनामन चरका आउर शुद्ध मलमल केर लुगा पिंध रहैं आउर चरका घोड़ा उपरे बाइठ के उकर पिछे-पिछे चलत रहैं। जाइत-जाइत केर आदमीमन के मारेक लगिन उकर मुँह से एक चोखा तलवाइर बाहरे निकलत रहे। उ राइज करेक वाला लोहा केर लाठी लेई के उमन उपरे राइज करी, आउर सर्वशक्तिमान परमेश्‍वर केर भयानक परकोप केर मदिरा केर कुंड में अंगूर केर रस रौंदी। उकर लुगा आउर जाँघ उपरे इ लिखल रहे: “राजामन केर राजा आउर प्रभुमन केर प्रभु।” फिन मोंय एगो स्वरगदूत के बेइर उपरे ठड़ाल देखलों। उ ऊँचा आकाश केर माझे में उड़ेक वाला सोउब चरईमन से ऊँचा आवाज से कहलक, “आवा, परमेश्‍वर केर बड़का भोज लगिन जमा होई जावा। जेकर से तोहरेमन राजामन केर माँस, सरदारमन केर माँस, ताकतवर आदमीमन केर माँस, घोड़ामन केर आउर उमन केर उपरे बइठल आदमीमन केर माँस, आउर आजाद चाहे गुलाम, छोट चाहे बाड़ सोउब आदमीमन केर माँस खावा।” फिन मोंय उ खूंखार जानवर आउर धरती केर राजामन आउर उमन केर सेनामन के देखलों, जेमन उ घोड़ा केर उपरे बइठल आउर उकर सेनामन से लड़ेक लगिन जमा होई रहैं। आउर उ जानवर आउर उकर संगे झूठा संदेश देवेक वाला धराय गेलक। इ झूठा संदेश देवेक वाला ओहे हेके, जे उ जानवर केर बटले चमत्कार केर चिन्हा देखात रहे आउर उ सोउब आदमीमन के बहकाय देई रहे, जेमन केर उपरे उ जानवर केर छाप रहे, आउर जेमन उकर मूर्ति केर पूजा करत रहैं। इ दुयो के जीते-जी आइग केर झील में जे गंधक से बरेला, साइज देलैं। आउर जे आदमीमन बाइच रहैं, उमन, घोड़ा उपरे बाइठ रहे, उकर तलवाइर से जे उकर मुँह से निकलत रहे, माइर मोराल गेलैं आउर सोउब चरई उ मनक माँस से अघाय गेलैं। इकर पाछे मोंय आकाश से एगो स्वरगदूत के स्वरग से उतरते देखलों। उकर हाँथ में बेथाह गढ़हा केर कुंजी आउर एगो बड़का सिकड़ रहे। उ अजगर के मतलब पुरना साँप के, जे इबलीस आउर शैतान हेके, धाइर के हजार बरिस केर लगिन बाइंध देलक। आउर उके बेथाह गढ़हा में साइज के बंद काइर देलक आउर उकर उपरे मोहर लगाय देलक, ताकि उ हजार बरिस केर पूरा होवेक तक जाइत-जाइत केर आदमीमन के फिन ना बहकाओक। हजार बरिस पूरा होवेक केर पाछे उके थोरेक देरी लगिन फिन खोलल जाएक हों जरुरी अहे। फिन मोंय थोरेक सिंहासन देखलों। उ मनक उपरे थोरेक आदमीमन बाइठ रहैं। आउर उमन के फैसला करेक केर अधिकार देवल गेलक। मोंय उमन केर आत्मामन के हों देखलों, जेमन केर मूँड़ यीशु केर गवाही देवेक आउर परमेश्‍वर केर बचन केर परचार केर खातिर काटल जाय रहे, आउर जेमन ना तो उ खूंखार जानवर केर, आउर ना उकर मूर्ति केर पूजा काइर रहैं, आउर ना उकर छाप अपन माथा आउर हाँथ उपरे लेई रहैं। उमन जिंदा होई के मसीह केर संगे हजार बरिस तक राइज करते रहलैं। आउर जब तक इ हजार बरिस पूरा नी होलक तब तक बचल मोरलमन नी जी उठलैं। इ तो पहिला जी उठेक हेके। धाइन आउर पवितर उ हेके, जे इ पहिला जी उठेक केर भागीदार हेके। एइसन आदमीमन उपरे दूसरा माउत केर कोनोवें अधिकार नखे, मगर उमन परमेश्‍वर आउर मसीह केर पुरोहित होबैं, आउर उकर संगे हजार बरिस तक राइज करबैं। फिन जब हजार बरिस पूरा होई जाई, तो शैतान के कैद से छोइड़ देवल जाई। तब उ, उ जाइत केर आदमीमन के जे धरती केर चाइरो बटे होबैं, मतलब गोग आउर मागोग के जेमन केर हिसाब समुदर केर बालू केर बराबइर होवी, बहकाय के लड़ाई केर लगिन जमा करेक ले निकली। आउर शैतान केर सेनामन समूचा धरती उपरे फाइल जबैं आउर उमन पवितर आदमीमन केर डेरा आउर दुलार नगर के घेइर लेबैं: मगर आइग स्वरग से उतइर के उमन के भसम काइर देई। आउर उमन के बहकाएक वाला शैतान आइग आउर गंधक केर उ झील में, जेकर में उ खूंखार जानवर आउर झूठा संदेश देवेक वाला आदमी हों होवी, साइज देवल जाई, आउर उमन जुग-जुग राइत दिन बाथा में तड़पते रहबैं। फिन मोंय एगो बड़का चरका सिंहासन आउर उके जे उकर उपरे बाइठ रहे, देखलों। उकर सामने से धरती आउर आकाश भाइग गेलैं, आउर उमन केर कहीं पता नी चललक। फिन मोंय छोट बाड़ सोउब मोरल आदमीमन के सिंहासन केर सामने ठड़ाल देखलों। किताबमन के खोलल गेलक। फिन एक आउर किताब खोलल गेलक, मतलब जिंदगी केर किताब। जइसन उ किताबमन में लिखल रहे, तइसनेहें उ मनक काममन केर मोताबिक मोरल आदमीमन केर फैसला करल गेलक। समुदर, उ मोरल आदमीमन के जे उकर में रहैं, देई देलक। माउत आउर मरणलोक हों जे उमन में रहैं देई देलक। उमन में से सोउब केर उमन केर काम केर मोताबिक फैसला करल गेलक। इकर पाछे माउत आउर मरणलोक आइग केर झील में साजल गेलैं। इ आइग केर झील तो दूसरा माउत हेके। आउर जेकर हों नाँव जिंदगी केर किताब में लिखल नी मिललक, उ आइग केर झील में साजल गेलक। फिन मोंय एक नवाँ आकाश आउर नवाँ धरती के देखलों। काले कि पहिला आकाश आउर पहिला धरती लोप होई जाय रहे, आउर समुदर हों अब नी रहलक। फिन मोंय पवितर नगर नवाँ यरुशलेम के स्वरग से परमेश्‍वर ठिना से उतरते देखलों। उ, उ दुलहिन केर नियर रहे, जे अपन पति केर लगिन सिंगार काइर रहेला। फिन मोंय सिंहासन में से केखो ऊँचा आवाज से इ कहते सुनलों, “देख, परमेश्‍वर केर डेरा आदमीमन केर माझे में अहे। उ, उमन केर संगे डेरा करी, आउर उमन उकर आदमी होबैं, आउर परमेश्‍वर खुद उमन केर संगे रही आउर उमन केर परमेश्‍वर होवी। उ, उमन केर आँइख से सोउब आँसू पोंइछ देई आउर इकर पाछे माउत नी रही, आउर ना दुःख, ना बिलाप, ना बाथा रही। काले कि पुरना गोइठमन बीत गेलक।” जे सिंहासन उपरे बाइठ रहे, उ कहलक, “देख, मोंय सोउब कुछ नवाँ काइर देवाथों।” फिन उ कहलक, “लीख ले, काले कि इ बचन बिसवास केर लायक आउर सच्चा हेके।” फिन उ मोर से कहलक, “इ गोइठमन पूरा होई जाय हे। मोंय अलफा आउर ओमिगा, शुरु आउर आखरी हेकों। मोंय पियासा के जीवन केर पानी केर सोता में से मुफत में पियामूँ। जे जीत जाई, ओहे इ चीजमन केर हकदार होवी। आउर मोंय उकर परमेश्‍वर होमूँ, आउर उ मोर बेटा होवी। मगर डरपोकमन, अबिसवासीमन, घिनघिना काम करेक वालामन, आउर हत्यारामन, ब्यभिचारीमन, ओझामन, मूर्ति पूजा करेक वालामन आउर सोउब झूठा आदमीमन केर हिस्सा उ झील में मिली, जे आइग आउर गंधक से बरते रहेला: इ दूसरा माउत हेके।” फिन जे सात स्वरगदूतमन ठिना सात आखरी बिपइतमन से भरल सात कटोरा रहे, उमन में से एक मोर ठिना आय के कहलक, “हिने आव, मोंय तोके दुलहिन मतलब मेमना केर पत्नी देखामूँ।” तब मोंय पवितर आत्मा से भाइर गेलों, आउर उ मोके एगो बड़का आउर ऊँचा पहार उपरे लेई गेलक, आउर पवितर नगर यरुशलेम के स्वरग से परमेश्‍वर केर ठिना से उतरते देखालक। परमेश्‍वर केर महिमा उकर में रहे, आउर उकर तेज रोशनी बिल्लौर केर जइसन मतलब यशब नाँव केर ढेइर किमती पखना नियर चमकत रहे आउर काँच नियर सफा रहे। आउर उ नगर केर घेरा ढेइर ऊँचा रहे, आउर उकर में बारह गो बड़का-बड़का फाटक रहे आउर हर एक फाटक में एक-एक स्वरगदूत ठड़ाय रहैं। आउर फाटकमन में इसराइलीमन केर बारह गोतरमन केर नाँव लिखल रहे। पूरब बटे तीन फाटक, उत्तर बटे तीन फाटक, दक्खिन बटे तीन फाटक आउर पच्छिम बटे तीन फाटक रहे। नगर केर घेरा केर बारह गो नेव रहे, आउर उ मनक उपरे मेमना केर बारह खास चेलामन केर नाँव लिखल रहे। उ स्वरगदूत जे मोर संगे गोठियात रहे, उकर ठिना नगर आउर नगर केर फाटकमन आउर उकर घेरा के नापेक लगिन एगो सोना केर गज रहे। आउर उ नगर चौकोर बसल रहे आउर उकर लम्बाई, चौड़ाई केर बराबइर रहे, आउर स्वरगदूत उ गज से नगर के नापलक, तो साढ़े सात सौ कोस केर निकललक: उकर लम्बाई आउर चौड़ाई आउर ऊँचाई बराबइर रहे। फिन स्वरगदूत नगर केर घेरा के नापलक। आदमीमन में परचलन नाप केर मोताबिक उ एक सौ चौवालीस हाँथ निकललक। नगर केर घेरा यशब रतन केर बनल रहे आउर नगर एइसन शुद्ध सोना केर रहे, जे सफा काँच केर नियर रहे। उ नगर केर नेव हर रकम केर ढेइर किमती पखनामन से संवराल रहे, पहिला नेव यशब केर रहे, दूसरा नीलमणि केर, तीसरा लालड़ी केर, आउर चौथा मरकत केर। पाँचवाँ गोमेदक केर, छठवाँ माणिक्य केर, सातवाँ पीतमणि केर, आठवाँ पेरोज केर, नौवाँ पुखराज केर, दसवाँ लहसनिए केर, ग्यारहवाँ धूम्रकांत केर आउर बारहवाँ याकूत केर रहे। बारहों फाटक, बारह मोतीमन केर रहे, एक-एक फाटक, एक-एक मोती केर बनाल रहे। आउर नगर केर सड़क सफा काँच नियर शुद्ध सोना केर रहे। मोंय उकर में कोनों मंदिर के नी देखलों, काले कि सर्वशक्तिमान प्रभु परमेश्‍वर आउर मेमना हें उकर मंदिर हेकैं। उ नगर में बेइर आउर चाँद केर इंजोत केर दरकार नखे, काले कि परमेश्‍वर केर तेज रोशनी से उकर में इंजोत होवाथे, आउर मेमना उकर दीया हेके। जाइत-जाइत केर आदमीमन उकर इंजोत में चलबैं-फिरबैं, आउर इ धरती केर राजामन अपन-अपन धन-दौलत के उकर में लानबैं। उकर फाटक दिन में कहियो बंद नी होवी, आउर हूवाँ कहियो राइत नी होवी। जाइत-जाइत केर आदमीमन इ नगर में हर रकम केर महिमा आउर आदर केर चीजमन के लानबैं। मगर उ नगर में कोनों अपवितर चीज या घिनघिना काम करेक वालामन या झूठा गोठियाएक वालामन कोनों रीति से ढूकेक नी पारबैं। मगर सिरिफ उ आदमीमन जे मनक नाँव मेमना केर जिंदगी केर किताब में लिखल अहे, ढूकेक पारबैं। तब स्वरगदूत मोके एगो नदी देखालक, जे जीवन केर पानी केर नदी रहे। उ नदी बिल्लौर मतलब साफ काँच केर नियर चमकत रहे। इ नदी परमेश्‍वर आउर मेमना केर सिंहासन से बहत रहे। उ नगर केर सड़क केर माझे-माझे बहत रहे। नदी केर इ पाखी आउर उ पाखी, जीवन केर गाँछ रहे। उकर में बारह रकम केर फार फरत रहे, आउर उ हर महिना फरत रहे, आउर उ गाँछ केर पत्तइ से जाइत-जाइत केर आदमीमन ठीक होई जात रहैं। हूवाँ कोनों रकम केर श्राप नी होवी। परमेश्‍वर आउर मेमना केर सिंहासन उ नगर में बनल रही। आउर उकर सेवकमन उकर आराधना करबैं। उमन उकर मुँह देखबैं आउर उकर नाँव उकर माथा उपरे लिखल होवी। हूवाँ कहियो राइत नी होवी आउर उमन के दीया आउर बेइर केर इंजोत केर दरकार नी होवी, काले कि प्रभु परमेश्‍वर उमन के इंजोत देई, आउर उमन जुग-जुग राइज करबैं। फिन उ मोर से कहलक, “इ गोइठमन बिसवास केर लायक आउर सच्चा हेके। प्रभु जे उकर संदेश के बताएक वालामन केर आत्मामन केर परमेश्‍वर हेके, अपन स्वरगदूत के इ लगिन भेजलक कि अपन सेवकमन के उ गोइठमन जेमन केर जल्दी पूरा होवेक जरुरी अहे, देखाओक।” यीशु कहलक, “देख, मोंय जल्दी आवेक वाला अहों! धाइन अहे उ, जे इ किताब केर भविष्यवाणी केर गोइठमन के मानेला।” मोंय ओहे यूहन्ना हेकों, जे इ गोइठमन के सुनत आउर देखत रहों। जब मोंय सुनलों आउर देखलों, तो जे स्वरगदूत मोके इ गोइठमन के देखात रहे, उकर आराधना करेक लगिन मोंय निहइर के उकर पाँव में माथा टेकलो। मगर उ मोर से कहलक, “देख, एइसन ना कर। काले कि मोंय तोर आउर परमेश्‍वर केर संदेश के बताएक वाला तोर भाईमन आउर उ आदमीमन केर जे इ किताब केर गोइठमन के मानैना, उ मनक संगी सेवक भाइर हेकों। तोंय परमेश्‍वर केर हें आराधना कर।” फिन उ मोर से कहलक, “इ किताब केर भविष्यवाणी केर गोइठमन के बंद ना कर, काले कि समय भीरे अहे। जे अन्याय करेला, उ अन्याय हें करते रहोक, जे मलिन अहे, उ मलिन बनल रहोक, जे धरमी अहे, उ धरमी बनल रहोक आउर जे पवितर अहे, उ पवितर बनल रहोक।” प्रभु यीशु कहलक, “देख, मोंय जल्दी आवेक वाला अहों, आउर हरेक झन केर काम केर मोताबिक बदला देवेक लगिन मोर ठिना इनाम अहे। मोंय अलफा आउर ओमिगा, पहला आउर आखरी, शुरु आउर आखरी हेकों। धाइन हेकैं उमन, जेमन अपन लुगा के मेमना केर लोहू से धोई लेवैना, काले कि उमन के जीवन केर गाँछ ठिना आवेक केर अधिकार मिली आउर उमन फाटकमन से होई के नगर में ढूकबैं। मगर अपवितरमन, ओझामन, ब्यभिचारीमन, हत्यारामन, मूर्ति पूजा करेक वालामन, हरेक झूठ के चाहेक वालामन आउर झूठ बनाएक वालामन बाहरे रहबैं। मोंय, यीशु अपन स्वरगदूत के इ लगिन भेजलों कि तोर आगे कलीसियामन केर बारे में इ गोइठमन केर गवाही देवोक। मोंय दाऊद केर जाइर आउर बंश हेकों आउर बिहान केर चमकत तइरगन हेकों।” आत्मा आउर दुलहिन दुइयो कहैना, “आव!” आउर सुनेक वालामन हों कहोक, “आव!” जे पियासा अहे, उ आवोक, आउर जे केऊ चाही, उ जीवन केर पानी मुफत में लेवोक। मोंय हर एक के जे इ किताब केर भविष्यवाणी केर गोइठमन के सुनेला, गवाही देवोना: अगर केऊ आदमी इ गोइठमन में कुछ बढ़ाई, तो परमेश्‍वर उ बिपइतमन के जे इ किताब में लिखल अहे, उकर उपरे बढ़ाई। अगर केऊ इ भविष्यवाणी केर किताब केर गोइठमन में से कुछ के निकलाय देई, तो परमेश्‍वर उ जीवन केर गाँछ आउर पवितर नगर में से जेकर चरचा इ किताब में अहे, उकर हिस्सा निकलाय देई। जे इ गोइठमन केर गवाही देवेला, उ इ कहेला, “हाँ, मोंय जल्दी आवेक वाला अहों।” आमीन। हे प्रभु यीशु आव! प्रभु यीशु केर किरपा पवितर आदमीमन केर संगे रहोक। आमीन।