Niki silsilah Deside Isa Almasih, keturunan Daud, keturunan Ibrahim. Jari, léman Ibrahim jangke Daud, selapuqne araq empat olas keturunan, dait léman Daud jangke jaman bangse Israel tetetéh ojok Babel, araq empat olas keturunan éndah, dait léman jaman bangse Israel tetetéh ojok Babel jangke Almasih tebijeang araq empat olas keturunan. Maraq niki riwayat kelahiran Deside Isa Almasih: Sewaktu Mariam, mamiq bini Deside Isa masih betunangan kance Yusup, ternyate Mariam sampun betian siq kuase Roh Suci sendéqman ie pade merariq. Séngaq Yusup tunangan Mariam nike, dengan saq tulus angenne dait ndéq mélé miaq Mariam ilaq léq julu dengan luwéq, ie beniat putus betunangan kance Mariam secare tedoq-tedoq. Sewaktu Yusup masih mikirang hal nike, Yusup ngimpi. Dalem impine nike, Yusup serioq sopoq malaékat Tuhan saq bemanik tipaq ie, “Yusup, keturunan Daud, ndaq takut bait Mariam jari seninende; séngaq kanak saq tepetianang siq Mariam nike asalne léman Roh Suci. Mariam gen bijeang kanak mame, terus kanak nike harus side aranin Isa, séngaq Ie saq gen nyelametang umat-Ne léman dose-dose ie pade.” Selapuqne nike telaksane adéqne genep napi saq temanikang siq Tuhan langan nabi-Ne, “Setetune, sopoq dedare genten gen betian dait bijeang sopoq kanak mame. Kanak nike gen tearanin Imanuel.” (Imanuel nike base Ibrani saq artine, “Allah araq bareng ite”.) Sesampun Yusup ures, ie ngelaksaneang napi saq temanikang siq malaékat Tuhan nike tipaq ie. Ie nikah kance Mariam. Laguq ndéq bareng mesaré kance Mariam jangke Mariam bijeang Kanak nike. Dait sesampun Kanak nike tebijeang, Yusup aranin Ie Isa. Sesampun Deside Isa tebijeang léq kote Betlehem léq negeri Yudea, léq jaman Raje Herodes, dateng dengan-dengan ahli ilmu bintang léman Timuq ojok Yerusalem. Ie pade beketuan léq embé-embé, “Léq mbé Ie, Almasih, raje dengan Yahudi saq baruq tebijeang nike? Tiang pade serioq bintang-Ne tiwoq léq sedi timuq, dait tiang pade dateng jari nyembah Ie.” Sewaktu Raje Herodes pirengang berite nike, ie tinjot gati, maraq nike éndah selapuq dengan léq Yerusalem. Make kumpulangne selapuq imam kepale dait ahli-ahli Taurat bangse Yahudi. Terus Raje Herodes beketuan léq ie pade, “Léq mbé Almasih gen tebijeang?” Jawab ie pade, “Léq kote Betlehem, léq negeri Yudea. Séngaq maraq niki araq tetulis siq sopoq nabi, ‘Hai Betlehem, léq negeri Yehuda, side ndéq saq paling kodéq léq antare ie pade saq mréntah Yehuda. Séngaq léman side gen dateng sopoq pemimpin saq gen mimpin umat Tiang Israel.’ ” Sesampun nerimaq penjelasan nike, Herodes secare tedoq-tedoq ngempoh ahli-ahli bintang léman Timuq nike, dait secare teliti gati Herodes beketuan léq ie pade, piran bintang nike mulai penggitan. Sesampun nike ie pade tepréntah siq Herodes ojok Betlehem, siq pesen niki, “Lumbar dait selidik pacu-pacu hal-hal mengenai Kanak nike. Lamun side pade sampun bedait kance Ie, sampéang hal nike tipaq tiang, adéq tiang éndah dateng nyembah Ie.” Ie pade tame ojok dalem balé nike dait serioqne Kanak nike kance Mariam, mamiq bini-Ne. Ie pade sujut nyembah Kanak nike, dait bukaq tangkaq dowéne, terus ngaturang léq Ie, emas, menyan dait mur. Allah peringet ie pade langan ngimpi adéq ie pade ndéq tulak ojok Herodes. Jari ie pade uléq ojok negerine liwat langan saq lain. Sesampun ahli-ahli bintang nike lumbar, malaékat Tuhan rauh ojok Yusup léq dalem impi. Malaékat nike bemanik, “Herodes beniat boyaq Kanak nike jari nyematéq Ie, keranaq nike becat ures, jauq Kanak nike dait mamiq bini-Ne beterus pelai ojok Mesir. Ndot léq taoq nike jangke Tiang dateng badaq side malik.” Yusup ures, dait kelem nike juaq ie jauq Kanak nike dait mamiq bini-Ne ngalih ojok Mesir. Ie pade ndot léq derike jangke Herodes ninggal. Siq care nike telaksane selapuq saq temanikang siq Tuhan langan nabi-Ne, “Tiang ngemanikang Bije Tiang léman Mesir.” Sewaktu Herodes wikan bahwe ie sampun teakalang siq ahli-ahli bintang léman negeri timuq nike, Herodes jari menggah gati. Beterus préntahangne nyematéq selapuq kanak-kanak mame saq beumur léq bawaq due taun saq araq léq Betlehem dait sekiterne. Hal nike sesuai keterangan saq ie terimaq léman ahli-ahli bintang, mengenai piran waktune bintang nike penggitan. Siq care nike telaksane napi saq sampun tesampéang siq Nabi Yeremia, “Léq Rama kedengahan suare tangisan, dait suare dengan ngerung éroq aséq. Rahel tangis bije-bijene; ie ndéq mélé tehibur séngaq bije-bijene sampun ndéq araq.” Sesampun Herodes ninggal, sewaktu Yusup masih araq léq Mesir, sopoq malaékat Tuhan rauh malik ojok Yusup léq dalem impi. Malaékat nike bemanik, “Dengan-dengan saq beniat nyematéq Kanak nike sampun ninggal. Keranaq nike ures, jauq Kanak nike dait mamiq bini-Ne tulak ojok Israel.” Beterus Yusup ures, dait jauqne Kanak nike kance mamiq bini-Ne tulak ojok wilayah Israel. Laguq sesampun tedengah siq Yusup bahwe Arkelaus, bije Herodes sampun jari raje léq negeri Yudea gentiq bapaqne, Yusup ndéq bani lumbar ojok derike. Sesampun teican petunjuk langan impi, ie lumbar ojok daérah Galilea. Léq derike ie ndot léq sopoq kote aranne Nazaret. Siq care nike telaksane napi saq tesampéang siq nabi-nabi mengenai Kanak nike: “Ie gen tesebut Dengan Nazaret.” Léq waktu nike rauh Yahya Pembaptis léq padang gurun léq Yudea dait mulai behotbah. “Pade tobat léman dose-dosende, séngaq Kerajaan Sorge sampun rapet!” Yahya niki saq temaksut siq Nabi Yesaya sewaktu ie nyampéang niki, “Araq dengan saq bekuih-kuih léq padang gurun, ‘Pade siepang langan umaq Tuhan; dait rateang langan umaq Ie.’ ” Yahya ngengadu jubah saq tepiaq léman bulu onte dait sabukne tepiaq léman léndong. Keloranne balang dait madulani gawah. Luwéq dengan dateng ojok Yahya, araq dengan-dengan saq dateng léman Yerusalem, léman selapuq daérah Yudea, dait léman selapuq daérah sekiter Kokoq Yordan. Ie pade ngaku dose-dosene, beterus ie pade tebaptis siq Yahya léq Kokoq Yordan. Luwéq éndah dengan Saduki dait Parisi dateng mélé tebaptis siq Yahya. Laguq sewaktu ie serioq dengan-dengan nike dateng, Yahya bebase léq ie pade, “Hai, side dengan jahat! Sai saq badaq bahwe side bau selamet léman hukuman Allah saq gen dateng? Nyatayang siq perbuatande bahwe side sampun betobat léman dose-dosende. Ndaq paran, bahwe side bau bebase dalem angende: Ibrahim nike bapaq tiang pade! Tiang badaq side: Léman batu-batu niki éndah Allah sanggup miaqang Ibrahim keturunan! Kandik sampun tesadangang jari ngerebaq lolo jangke akah-akahne. Sebilang lolo saq ndéq ngasilang buaq saq solah, gen terebaq dait tetetéh ojok dalem api. Tiang baptis side kadu aiq jari tande bahwe side sampun betobat léman dose-dosende. Laguq Ie saq gen rauh pungkuran léman tiang, gen baptis side kadu Roh Suci dait api. Kuase-Ne beléqan léman tiang. Jari jauq sepatu-Ne doang tiang ndéq patut. Léq gading-Ne araq kléong jari nampiq selapuq gandum-Ne jangke bersi; selapuq gandumne gen Ie kumpulang léq dalem lumbung, laguq selapuq gambasne gen Ie tunuq léq dalem api saq ndéq iniq pedaq.” Beterus Deside Isa rauh léman Galilea ojok Kokoq Yordan gen bedait kance Yahya jari tebaptis siq ie. Laguq Yahya berusahe nolaq napi saq Deside Isa kayunang. Yahya matur léq Deside Isa, “Tiang niki saq sepatutne tebaptis siq Pelungguh, mangkin malahan Pelungguh saq rauh ojok tiang.” Laguq jawab Deside Isa, “Alurang hal nike telaksane, séngaq siq care nike ite ngelaksaneang selapuq saq tekayunang siq Allah.” Beterus Yahya baptis Deside Isa. Sesampun tebaptis, Deside Isa sugul léman aiq kokoq nike. Selung-selung langit kebukaq, beterus Deside Isa cingakin Roh Allah turun ojok atas-Ne maraq ruen kedit dare. Beterus kedengahan suare léman sorge, “Niki Bije Tiang saq Tiang kasihin, Ie nyenengang Tiang.” Sesampun nike Deside Isa tebimbing siq Roh Allah ojok padang gurun jari tecobe siq Belis. Petang dase jelo petang dase kelem Deside Isa puase beterus Ie beridap seduk. Beterus Belis dateng dait matur, “Lamun Pelungguh Bije saq asalne léman Allah, cobaq préntahang batu-batu niki jari ruti.” Jawab Deside Isa, “Araq tetulis léq dalem Kitab Suci bahwe: Manusie ndéqne idup léman ruti doang, laguq éndah léman sebilang manik saq temanikang siq Allah.” Sesampun nike, Deside Isa tebimbing siq Belis ojok kote suci Yerusalem, terus toloqne Deside Isa léq atas buwung Gedéng Allah. Beterus Belis matur léq Deside Isa, “Lamun Pelungguh Bije saq asalne léman Allah, cobaq Pelungguh nimproh ojok bawaq. Séngaq araq tetulis léq dalem Kitab Suci bahwe, ‘Allah gen mréntahang malaékat-malaékat-Ne ngelindungin Pelungguh, ie pade gen sangklap Pelungguh siq imene, adéq cokor Pelungguh nénten kedantuk léq batu.’ ” Jawab Deside Isa, “Laguq léq dalem Kitab Suci tetulis éndah, ‘Ndaq side cobe Allah, Tuhan side!’ ” Beterus jauqne malik Deside Isa ojok atas sopoq gunung saq atas gati, dait petitoqangne tipaq Deside Isa selapuq kerajaan léq dunie dait selapuq kesugihanne. Belis nike matur léq Deside Isa, “Selapuqne niki gen tiang serahang tipaq Pelungguh lamun Pelungguh sujut nyembah tiang.” Jawab Deside Isa, “Nyedi hai Belis! Léq Kitab Suci araq tetulis: Pade sembah Allah, Tuhan side dait tipaq Ie doang side beribadah!” Ahirne Belis nike bilin Deside Isa, beterus malaékat-malaékat rauh ngelayanin Ie. Sewaktu Deside Isa mirengang kabar bahwe Yahya tetamaq ojok bui, Ie nyingkir ojok Galilea. Deside Isa lumbar léman Nazaret beterus meneng léq Kapernaum, léq sedin Danao Galilea léq daérah Zebulon dait Naptali. Séngaq Deside Isa ngelaksaneang hal nike, make telaksane napi saq tesampéang siq Nabi Yesaya: “Tanaq Zebulon dait tanaq Naptali, langan ojok segare, daérah itoqan Kokoq Yordan, Galilea, wilayahne bangse-bangse lain! Bangse saq endot léq dalem peteng, sampun serioq Terang saq menah tandur! Tipaq saq endot léq negeri saq tekudung siq peteng maut sampun tiwoq Terang!” Mulai léman waktu nike Deside Isa behotbah, “Pade tobat léman dose-dosende, séngaq Kerajaan Sorge sampun rapet!” Sewaktu Deside Isa bemargi léq sedin Danao Galilea, Ie cingakin due dengan besemetonan, Simon (saq tesebut éndah Petrus) dait adiqne aranne Andreas. Ie pade kenyeke bau empaq kadu jaring léq danao nike. Deside Isa bemanik léq ie pade, “Silaq turut Tiang, Tiang gen jariang side pade penjaring manusie.” Langsung ie pade bilin jaringne terus ngiring Deside Isa. Deside Isa terus bemargi, dait cingakin éndah due dengan besemetonan saq lain, aranne Yakub dait Yahya bije Zebedeus. Ie pade kenyeke ngeremaq jaringne kance amaqne léq dalem perau. Ie pade temanikang éndah siq Deside Isa, langsung ie pade bilin perau dait amaqne terus ngiring Deside Isa. Léq Galilea Deside Isa bemargi ojok selapuq wilayah negeri; Ie ngajahang léq balé-balé ibadah dait nyampéang Kabar Solah mengenai Kerajaan Allah. Deside Isa nyelahang dengan-dengan saq ngidap segale macem penyakit dait saq awakne cacat. Kabar mengenai Deside Isa nike nyebar léq selapuq daérah Siria, sehingge luwéq dengan dateng ojok Ie jauq dengan-dengan saq ngidap segale macem penyakit dait saq susah. Dengan-dengan saq tekuasein siq roh jahat, saq sakit mopok, dait saq képaq, selapuqne teselahang siq Deside Isa. Luwéq gati dengan saq ngiring Deside Isa léq waktu nike. Araq saq dateng léman Galilea dait léman Dekapolis, léman Yerusalem, léman Yudea, dait léman itoqan Kokoq Yordan. Sewaktu Deside Isa cingakin dengan luwéq nike, Ie taék ojok atas bukit. Sesampun Ie melinggih, pengiring-pengiring-Ne parek ojok Ie, beterus Ie mulai bebaos dait ngajah ie pade: “Bahagie dengan saq miskin léq arepan Allah; séngaq ie pade saq dowéang Kerajaan Sorge! Bahagie dengan saq sedih angenne; séngaq ie pade gen tehibur. Bahagie dengan saq lemah lembut; séngaq ie pade gen dowéang gumi! Bahagie dengan saq tetu-tetu melét ngelaksaneang kebenaran; séngaq ie pade gen tepuasang! Bahagie dengan saq murah até; séngaq ie pade gen nerimaq kemurahan! Bahagie dengan saq suci aténe; séngaq ie pade gen serioq Allah. Bahagie dengan saq jauq damé; séngaq ie pade gen tesebut bije-bije dowén Allah! Bahagie dengan saq teaniaye lantaran kebenaran, séngaq ie pade saq dowéang Kerajaan Sorge! Bahagie side pade, lamun lantaran Tiang side pade tecele dait teaniaye, dait tepitnah. Besukecite dait gembire, séngaq upaqde beléq léq sorge, séngaq maraq nike éndah sampun teaniaye nabi-nabi saq sendéqman side.” “Side pade sie dunie. Lamun sie jari tawah, napi bau ie tepaéqang malik? Ndéq araq manpaatne malik, ie gen tetetéh dait teicaq-icaq siq dengan. Side pade terang dunie. Kote saq araq léq atas bukit, ndéq bau teseboq. Ndéq araq dengan saq nyalaqang dilah, terus kudungne dilah nike siq tepaq. Malahan ie gen toloq dilah nike léq naé dilah, adéqne bau ngebéng cahaye tipaq sebilang dengan léq dalem balé. Maraq nike éndah cahayende harus besinar léq julu dengan, adéq ie pade serioq perbuatan-perbuatande saq solah, terus ie pade mulieang Bapa side léq sorge.” “Ndaq beranggepan bahwe Tiang dateng jari ngapus Hukum Taurat dait kitab nabi-nabi. Tiang dateng ndéqne jari ngapus hukum nike, laguq jari genepang hukum nike. Setetune Tiang badaq side! Sengonéq langit dait gumi masih araq, timaq sopoq hurup atao titik saq paling kodéq léq dalem hukum nike ndéq gen teapus lamun selapuqne ndéqman telaksane! Keranaq nike, sai-sai saq ngelanggar salaq sopoq léman préntah-préntah nike, timaq nike bagian saq paling kodéq, dait ngajah dengan lain ngelaksaneang saq maraq nike éndah, ie gen araq léq taoq saq paling bawaq léq dalem Kerajaan Sorge. Laguq sai-sai saq taat ngelaksaneang dait ngajahang selapuq préntah-préntah Hukum Taurat, ie gen araq léq taoq saq paling atas léq dalem Kerajaan Sorge. Make Tiang badaq side: Lamun idupde dalem beragame ndéqne solahan léman ahli-ahli Taurat atao dengan Parisi, setetune side ndéq bau tame léq dalem Kerajaan Sorge!” “Side sampun dengah manik saq tesampéang langan leluhurte: Ndaq nyematéq; sai-sai saq nyematéq harus tehukum. Laguq Tiang badaq side, sebilang dengan saq gedek léq semetonne harus tehukum; sai juaq saq bebase léq semetonne: Kapir! Harus teadilin léq julu Mahkamah Agame. Dait sai-sai saq bebase “Jahil”, harus tetetéh ojok dalem api nerake. Keranaq nike, lamun side kenyeke ngaturang persembahan léq atas méje taoq kurban, terus inget bahwe araq dengan saq sakit até léq side, side harus bilin juluq persembahande nike léq julu méje taoq kurban, terus lumbar bedamé kance dengan nike, terus tulak malik ngaturang persembahande nike. Seandéne araq dengan ngelaporang side ojok pengadilan, usaheang juluq bedamé kance ie sengonéq side masih bareng kance ie léq tengaq langan, adéq musuhde nike ndéq nyerahang side ojok hakim, saq gen nyerahang side ojok petugas, terus petugas nike gen tamaq side ojok dalem bui. Tiang badaq side: Setetune side ndéq gen sugul léman bui sendéqman side bayah utangde jangke lunas.” “Side pade nenaoq bahwe araq Manik Allah maraq niki: Ndaq bezinah. Laguq mangkin Tiang badaq side: Sai-sai saq serioq dengan nine siq napsu birahine, artine dengan nike sampun bezinah kance dengan nine nike léq dalem angenne. Lamun penentengde saq kanan jari penyebap side bedose, luit dait tetéh penenteng nike! Solahan side kélangan salaq sopoq bagian léman awakde ketimbang selapuq awakde tetetéh ojok api nerake. Lamun ime kanande jari penyebap side bedose, peleng dait tetéh ime nike! Solahan side kélangan imende setowéq ketimbang selapuq awakde tetamaq ojok api nerake.” “Araq éndah Manik Allah maraq niki: Sebilang dengan saq séang seninene harus ngebéng ie surat séang. Laguq mangkin Tiang badaq side: Sebilang dengan saq séang seninene kecuali lantaran zinah, ie jariang seninene bezinah; dait sai saq merariq kance dengan nine saq teséang nike, ie gawéq zinah.” “Side pade sampun nenaoq éndah bahwe léman jaman leluhurte sampun araq pengajahan saq maraq niki: Ndaq besumpah palsu, laguq tegel sumpahde léq arepan Tuhan. Laguq mangkin Tiang badaq side: Ndaq gati side besumpah demi langit, séngaq langit nike tahte Allah, atao demi gumi, séngaq gumi apah cokor-Ne; atao demi Yerusalem, séngaq nike kote Raje Agung. Ndaq éndah besumpah demi ulunde, séngaq side ndéq tao miaq bulunde jari putéq atao bideng timaq cume sopoq uwat bulu. Lamun enggih, badaq enggih, lamun ndéq badaq ndéq. Napi saq lebih léman nike asalne léman Belis.” “Side pade éndah sampun nenaoq bahwe araq pengajahan maraq niki: Penenteng gentiq penenteng, gigi gentiq gigi. Laguq mangkin Tiang badaq side: Ndaq bales dendem léq dengan saq sampun gawéq jahat léq side. Malahan, lamun dengan nempélék sangképde saq kanan, béng ie éndah nempélék sangképde saq kiri. Dait lamun dengan ngelaporang side ojok hakim séngaq melétang kelambinde, béng ie éndah jubahde. Dait sai juaq saq paksaq side lampaq jaoqne sopoq kilométer, lampaq kance ie due kilométer. Lamun araq dengan saq nunas léq side, béng ie. Dait ndaq nolaq dengan saq mélé nyinggaq léq side.” “Sampun éndah side pade nenaoq pengajahan maraq niki: Kasihin batur-baturde dait meriq léq musuh-musuhde. Laguq mangkin Tiang badaq side: Kasihin musuh-musuhde dait do'eang dengan saq nganiaye side pade, séngaq siq care nike side pade jari bije-bije Bapa side saq léq sorge, saq tiwoqang jelo tipaq dengan saq solah dait tipaq dengan saq jahat. Allah nurunang ujan tipaq dengan saq kenaq perbuatanne dait tipaq dengan saq jahat. Séngaq lamun side ngasihin dengan saq ngasihin side doang, napi saq gen jari upaqde? Tekan penagih pajek éndah ngelaksaneang hal maraq nike. Dait lamun side pade ngucapang salam cume tipaq batur-baturde doang, napi istiméwene? Dengan-dengan saq ndéq kenal Allah éndah ngelaksaneang hal nike! Keranaq nike side harus sempurne, pade maraq Bapa side léq sorge nike sempurne.” “Pade inget solah-solah, ndaq side ngelaksaneang ibadahde léq julun dengan siq maksut adéq teserioq siq ie pade. Lamun side pade maraq nike, side pade ndéq gen teican upaq siq Bapa side léq sorge. Jari, lamun side besedekah ojok dengan miskin, ndaq beléq-beléqang hal nike maraq saq tepiaq siq dengan munapik. Ie pade demen ngelaksaneang hal nike léq dalem balé ibadah dait léq rurung-rurung beléq adéqne teajum siq dengan. Pade inget, ie pade sampun nerimaq upaqne. Laguq lamun side pade ngebéng sedekah, béng secare tedoq-tedoq, adéq ndéq araq saq nenaoq. Alurang perbuatande nike ndéq tetaoq siq sai juaq, kecuali Bapa side saq léq sorge. Ie cingakin perbuatan side saq ndéq teserioq siq dengan, dait gen ngicanin upaq tipaq side pade.” “Lamun side pade bedo'e, ndaq bedo'e maraq dengan munapik. Ie pade demen bedo'e nganjeng léq balé ibadah dait léq perempatan adéqne teserioq siq dengan. Tiang badaq side, nike upaq saq sampun ie pade terimaq. Laguq lamun side pade bedo'e, tame ojok kamar dait impet lawangne, terus bedo'e tipaq Bapa side saq ndéq penggitan nike, make Bapa side saq cingakin perbuatande saq ndéq tetaoq siq dengan gen ngicanin upaq léq side. Lamun side pade bedo'e, ndaq bélo-bélo maraq dengan saq ndéq kenal Allah. Ie pade paran bahwe napi saq ie pade tunas nike gen tepirengang lantaran do'e ie pade saq bélo nike. Ndaq maraq ie pade. Bapa side sampun wikan napi saq side pade perluang, sendéqman side pade tunas. Jari, bedo'e maraq niki: ‘Bapa tiang pade saq araq léq sorge, tesuciang peséngan Deside. Rauhang Kerajaan Deside, jariang pekayunan Deside léq gumi maraq léq sorge. Léq jelo niki icanin tiang pade keloran saq tiang pade perluang. Ampunin tiang pade léman salaq tiang pade, maraq tiang pade sampun ngampunin dengan saq salaq tipaq tiang pade; dait sampunang gadingang tiang pade ojok dalem cobe, laguq bébasang tiang pade léman kuase saq jahat. [Séngaq Deside épén dowé Kerajaan dait kuase dait kemuliean jangke selaéq-laéqne. Amin.]’ Séngaq lamun side pade ngampunin dengan saq salaq léq side pade, make Bapa side léq sorge éndah gen ngampunin kesalaqande. Laguq lamun side pade ndéq ngampunin salaq dengan lain, Bapa side saq léq sorge éndah ndéq gen ngampunin kesalaqande.” “Lamun side pade puase, ndaq petitoqang ruende saq susah, maraq dengan munapik. Ie pade salin sebengne adéq selapuq dengan nenaoq bahwe ie pade puase. Pade inget, nike upaq saq ie pade sampun terimaq. Laguq lamun side pade puase, beseraup dait sisir bulunde, adéq ndéq araq saq nenaoq bahwe side pade puase, kecuali Bapa side saq ndéq penggitan nike doang. Ie cingakin perbuatande saq ndéq penggitan nike dait gen ngicanin upaq tipaq side pade.” “Ndaq ngumpulang harte umaq diriqde léq gumi; léq gumi temeréné dait karat gen nyenyédaq dait maling gen dateng paling harte nike. Laguq, kumpulang harte umaq diriqde léq sorge; léq sorge temeréné dait karat ndéq gen nyenyédaq dait maling ndéq dateng paling harte nike. Séngaq léq mbé hartende araq, léq derike éndah angende!” “Penenteng nike dilah léq awak. Lamun penentengde solah, selapuq awakde jari terang. Laguq lamun penentengde jahat, selapuq awakde jari peteng dedet. Jari lamun terang saq araq léq dalem diriqde nike peteng, berembé peteng dedetne peteng nike!” “Ndéq araq sopoq dengan juaq saq bau begawéan léq due majikan. Séngaq lamun maraq nike ie gen meriq léq saq sopoq dait ngasihin saq lain, atao ie gen setie léq saq sopoq dait ndéq gen merhatiang saq lain. Maraq nike éndah halne side pade; side pade ndéq bau begawéan tipaq Allah dait tipaq dowé bande éndah. Keranaq nike Tiang badaq side pade: Ndaq side pade kuatir mengenai idupde, napi saq gen side pade kelor atao inem, atao napi saq gen side pade kadu. Tekan idup nike pentingan léman keloran dait awak pentingan léman kelambi? Pade serioq kedit léq langit. Ie pade ndéq uwah sawur binéq, ndéq uwah mataq dait ndéq uwah éndah ngumpulang hasil taletanne léq dalem lumbung, laguq Bapa side saq léq sorge peliharaq ie pade. Tekan side pade jaoq beléqan ajine ketimbang kedit? Sai léq antare side pade siq kuatirne bau ngeromboq umurne timaqne sekediq? Kembéq side pade kuatir mengenai kelambinde? Perhatiang berembé kembang bakung saq tiwoq léq lendang. Kembang-kembang nike ndéq uwah begawéan dait ndéq uwah nyésék; laguq Tiang badaq side: Nabi Sulaiman timaq ie sugih gati, ndéq ngengadu kelambi saq solahne maraq kembang-kembang nike! Pupaq léq lendang tiwoq jelo niki dait lémaq tesedut jangke bis. Laguq Allah payas pupaq nike solah gati. Lebih-lebih side pade! Laguq side pade kurang percaye! Keranaq nike, ndaq side pade kuatir dait bebase, ‘Napi saq gen ite kelor?’ atao ‘Napi saq gen ite inem?’ atao ‘Napi saq gen ite kadu?’ Selapuq nike teboyaq siq bangse-bangse saq ndéq kenal kance Allah. Padahal napi saq side pade perluang léq dalem idupde, selapuqne nike sampun tewikanang siq Bapa side pade. Laguq boyaq juluq Kerajaan Allah dait kebenaranne, make selapuq saq lain éndah gen teromboqang tipaq side pade siq Allah. Keranaq nike, ndaq kuatir mengenai jelo saq lémaq. Séngaq jelo saq lémaq araq kesusahanne mésaq. Jari, kesusahan sejelo cukup jari sejelo.” “Ndaq side pade hakimin dengan lain, adéq side pade ndéq tehakimin siq Allah. Séngaq berembé entande hakimin dengan lain, maraq nike éndah Allah gen hakimin side pade. Ukuran saq side pade kadu léq dengan lain, nike éndah gen tekadu siq Allah léq side pade. Kembéq side pade pedasang bubuk kayuq léq dalem penenteng semetonde, padahal balok léq dalem penentengde, ndéq side pade perhatiang? Berembé side pade bau bebase léq semetonde, ‘Alurang tiang sugulang bubuk kayuq saq araq léq penentengde,’ padahal léq dalem penentengde mésaq araq balok? Hai dengan munapik! Sugulang juluq balok léman penentengde mésaq, baruq side bau pedas serioq dait bau nyugulang bubuk kayuq léman penenteng semetonde. Ndaq ngebéng barang saq suci tipaq acong, dait ndaq side saut mutiarende tipaq bawi, adéq ndaq ie icaq-icaq kadu naéne terus ie bebalik garang side.” “Pade tunas, make side pade gen nerimaq. Pade boyaq, make side pade gen mauq. Pade ketok lawang, make side pade gen tebukaqang lawang. Séngaq dengan saq nunas gen nerimaq; dengan saq boyaq gen mauq; dait dengan saq ngetok lawang, gen tebukaqang lawang. Léq antare side pade napi araq bapaq saq ngebéng batu léq bijene, lamun ie ngéndéng ruti? Atao ngebéng ulah lamun ie ngéndéng empaq? Jari, lamun side pade saq jahat, tao ngebéng saq bagus léq bije-bijende. Lebih-lebih Bapa side pade léq sorge! Ie lebihan malik gen ngicanin saq bagus tipaq sebilang dengan saq nunas léq Ie. Perlakuang dengan lain maraq side pade mélé teperlakuang siq ie pade. Nike intine selapuq Hukum Taurat dait kitab nabi-nabi.” “Silaq tame léman lawang saq supit, séngaq lawang dait langan saq nuju ojok nerake nike beléq dait gamber, dait luwéq dengan saq tame liwat derike. Laguq mule supit dait sengke lawang dait langan saq jauq dengan tipaq idup nike. Dait cume sekediq dengan saq ndait lawang dait langan nike.” “Onyaq-onyaq tipaq nabi-nabi palsu. Ie pade dateng tipaq side pade nyamar maraq dombe, laguq ie pade setetune maraq serigale saq buas. Side pade gen kenal ie pade léman hasil perbuatanne. Bebenes bedui ndéq nyugulang buaq anggur, dait pupaq bedui ndéq ngasilang buaq are. Léman lolo saq solah tehasilang buaq saq solah. Dait léman lolo saq ndéq solah tehasilang buaq saq ndéq solah. Lolo saq solah ndéq bau ngasilang buaq saq lengé, dait lolo saq ndéq solah ndéq bau ngasilang buaq saq solah. Sebilang lolo saq ndéq ngasilang buaq saq solah, terebaq dait tesedut. Maraq nike éndah halne nabi-nabi palsu. Side pade gen kenal ie pade léman hasil perbuatanne.” “Ndéqne sebilang dengan saq ngempoh Tiang, ‘Junjungan Saq Mulie, Junjungan Saq Mulie,’ saq gen tame ojok dalem Kerajaan Sorge, laguq cume dengan-dengan saq ngelaksaneang pekayunan Bapa Tiang léq sorge. Léq jelo kiamat, luwéq dengan gen bebase léq Tiang, ‘Junjungan Saq Mulie, Junjungan Saq Mulie, tekan siq peséngan Pelungguh tiang pade sampun benubuat, siq peséngan Pelungguh tiang pade sampun sediq roh-roh jahat dait siq peséngan Pelungguh éndah tiang pade ngaraqang luwéq muqjizat?’ Laguq Tiang gen jawab ie pade, ‘Tiang ndéq uwah kenal kance side pade. Nyedi léman taoq niki! Side pade saq gawéq jahat!’ ” “Dengan saq dengah manik Tiang niki dait ngelaksaneang hal nike, dengan nike pade maraq dengan bijaksane saq penganjeng baléne léq atas batu. Léq waktu turun ujan, dait aiq belabur dateng terus angin beléq timpe balé nike, balé nike ndéq ruk séngaq tepenganjeng léq atas batu. Dait dengan saq dengah manik Tiang niki laguq ie ndéq ngelaksaneang hal nike, dengan nike pade maraq dengan saq bodo, saq penganjeng baléne léq atas gerés. Léq waktu turun ujan, dait aiq belabur dateng terus angin beléq timpe balé nike, balé nike gen ruk dait luwéq gati sédene!” Ahirne Deside Isa selesé ngajahang, dait dengan-dengan saq araq léq derike takjub gati dengah pengajahan-Ne, séngaq Ie ngajah ie pade siq wibawe, ndéq maraq ahli-ahli Taurat ie pade. Deside Isa turun léman bukit, dait luwéq dengan ngiring Ie. Léq waktu nike, dateng sopoq dengan saq sakit kuste. Ie sujut léq arepan Deside Isa, dait matur, “Paq, lamun Pelungguh kayun, Pelungguh bau nyelahang tiang.” Deside Isa jamah dengan nike, dait bemanik, “Tiang mélé, mangkin side selah!” Langsung waktu nike éndah penyakit dengan nike telang. Beterus manik Deside Isa léq ie, “Inget, ndaq side tuturang hal nike léq sai-sai. Laguq silaq lumbar ojok imam, dait tunas ie pastiang bahwe side sampun selah. Sesampun nike, aturang kurban saq tepréntahang siq Musa, jari bukti léq dengan-dengan bahwe side tetu-tetu sampun selah!” Sewaktu Deside Isa tame ojok kote Kapernaum, sopoq prewire parek tipaq Deside Isa dait nunas tulung, “Paq,” atur prewire nike, “pelayan tiang sakit léq balé. Ie képaq dait tindoq léq petindoqanne dait menderite gati.” Manik Deside Isa, “Tiang gen dateng nyelahang ie.” Laguq prewire nike matur, “Paq, tiang nénten patut nerimaq Pelungguh léq balén tiang. Silaq Pelungguh manikang sopoq ucapan doang, laun pelayan tiang nike gen selah. Séngaq tiang éndah bedowé atasan dait tiang harus taat léq ie. Dait léq bawaq tiang éndah araq prajurit-prajurit saq harus taat léq préntah tiang. Lamun tiang suruq sopoq prajurit, ‘Lalo!’ ie pasti lalo. Dait lamun tiang suruq saq lain, ‘Dateng!’ ie pasti dateng; dait lamun tiang préntah pelayan tiang, ‘Laksaneang!’ pasti ie laksaneang.” Sesampun Deside Isa pirengang basen prewire nike, Deside Isa bengaq gati. Beterus Deside Isa bemanik léq dengan-dengan saq kenyeke ngiring Ie, “Tiang badaq side, iman sebeléq niki ndéq uwah Tiang ndait léq antare dengan Israel timaqne sopoq juaq! Tiang badaq side, luwéq dengan gen dateng léman Timuq dait Bat jari besukecite bareng-bareng kance Ibrahim, Ishak dait Yakub léq dalem Kerajaan Sorge. Padahal dengan-dengan Yahudi saq seharusne jari bije-bije Kerajaan gen tetetéh ojok taoq saq peteng dedet, léq derike ie pade gen nangis dait menderite.” Beterus manik Deside Isa léq prewire nike, “Silaq side uléq, napi saq side percaye nike gen telaksane.” Dait waktu nike éndah, pelayanne nike selah. Deside Isa lumbar ojok gedéng Petrus. Léq derike Deside Isa cingakin mentoaq nine Petrus kenyeke mesaré lantaran sakit telih panas leq petindoqane. Deside Isa negel imene, terus panasne telang. Beterus ie ures dait mulai ngelayanin Deside Isa. Léq waktu serep jelo, luwéq dengan saq tekuasein siq roh jahat tejauq ojok Deside Isa. Dait siq sopoq manik doang, Deside Isa sediq roh-roh jahat nike dait selapuq dengan saq sakit éndah teselahang. Selapuqne nike telaksaneang siq Deside Isa, dait siq care nike telaksane napi saq sampun tesampéang siq Nabi Yesaya, “Ie nanggung penderiteante, dait nyelahang penyakitte.” Araq luwéq gati dengan léq sekelining Deside Isa. Sewaktu Deside Isa cingakin ie pade selapuqne, Deside Isa ngemanikang pengiring-Ne belayar ojok itoqan danao. Beterus sopoq ahli Taurat parek ojok Deside Isa, dait matur, “Paq Guru, tiang mélé ngiring Pelungguh ojok mbé juaq Pelungguh lumbar!” Jawab Deside Isa, “Serigale bedowé loang, dait kedit bedowé kesebu, laguq Bije Manusie ndéq bedowé taoq begélaq.” Beterus sopoq pengiring-Ne saq lain éndah matur, “Junjungan Saq Mulie, ijinang tiang uléq juluq nguburang amaq tiang.” Laguq jawab Deside Isa, “Silaq turut Tiang, alurang dengan-dengan ninggal nguburang dengan-dengan ninggal ie pade.” Deside Isa taék ojok perau dait pengiring-pengiring-Ne milu ngiring Ie. Selung-selung dateng angin pusut saq beléq gati ojok danao nike, sehingge perau nike teampes siq umbak. Waktu nike Deside Isa kenyeke merem. Make pengiring-pengiring-Ne dateng ojok Deside Isa dait tangiang Ie. “Junjungan Saq Mulie! Tulung! Ite gen celake!” “Kembéq side pade takut?” manik Deside Isa. “Side pade kurang percaye léq Tiang!” Beterus Deside Isa ngadeg, dait semprak angin dait danao nike, make danao nike jari tenang gati. Pengiring-pengiring-Ne bengaq. Ie pade bebase sopoq kance saq lainne, “Dengan napi Deside Isa niki jangke angin dait umbak éndah taat léq Ie!” Sesampun Deside Isa rauh léq itoqan danao, léq daérah dengan Gadara, araq due dengan saq tekuasein siq roh jahat parek ojok Deside Isa. Ie pade bahaye gati sehingge ndéq araq dengan saq bani liwat léq derike. Ie pade sugul léman goe-goe léq kuburan dait bekuih, “Bije saq asalne léman Allah! Gen Pelungguh kumbéqang tiang niki? Napi Pelungguh gen siksaq tiang pade timaq ndéqman waktune?” Ndéq jaoq léman derike, araq luwéq gati bawi saq kenyeke boyaq kakenan. Roh-roh jahat nike tunas léq Deside Isa, “Lamun Pelungguh gen ngemanikang tiang pade sugul léman dengan niki, préntahang tiang pade tame ojok dalem bawi-bawi nike.” “Nyedi!” manik Deside Isa. Roh-roh jahat nike sugul léman kedue dengan nike, dait tame ojok bawi-bawi nike. Beterus bawi-bawi nike pelai dait nimproh léman sedin jurang ojok dalem danao, dait selapuq bawi nike maté ketelep. Penjage-penjage bawi nike pelai ojok kote, nuturang selapuq peristiwe nike dait napi saq sampun telaksane léq due dengan saq tekuasein siq roh jahat nike. Ahirne selapuq dengan léq kote nike lumbar ojok Deside Isa. Sanget siqne tunas siq ie pade adéq Deside Isa lumbar bilin daérah ie pade. Deside Isa taék ojok dalem perau, beterus mbelat danao tulak ojok kote asal-Ne. Léq derike araq dengan saq parek tipaq Deside Isa jauq sopoq dengan képaq saq tetindoqang léq tipah. Sewaktu Deside Isa cingakin iman dengan-dengan nike, Ie bemanik léq dengan képaq nike, “Teguqang angende, anak Tiang, dose-dosende sampun teampunin.” Ahli-ahli Taurat saq araq léq derike bebase dalem angenne, “Dengan niki menghine Allah!” Deside Isa wikan napi saq tepikirang siq dengan-dengan nike, jari Ie bemanik, “Kembéq pikirande jahat maraq nike? Mbé saq molahan ngucapang: ‘Dosende sampun teampunin’, atao ngucapang: ‘Ures dait lampaq?’ Laguq adéq side pade nenaoq bahwe léq dunie niki Bije Manusie bedowé kuase ngampunin dose.” Terus manik Deside Isa léq dengan képaq nike, “Ures, terus lampaq!” Dengan képaq nike ures, terus uléq ojok baléne. Sewaktu dengan-dengan nyaksiang peristiwe nike ie pade takut dait mulieang Allah. Séngaq Allah sampun ngicanin kuase saq beléq gati tipaq manusie. Beterus Deside Isa bilin taoq nike. Sewaktu bemargi, Ie cingakin sopoq penagih pajek aranne Matius, kenyeke tokol léq taoqne begawéan. Deside Isa bemanik léq ie, “Silaq turut Tiang!” Terus Matius nganjeng dait ngiring Deside Isa. Waktu Deside Isa kenyeke medaran léq gedéng Matius, dateng luwéq penagih pajek dait dengan-dengan bedose, milu medaran kance Deside Isa dait pengiring-pengiring-Ne. Araq dengan-dengan Parisi saq serioq hal nike. Dait ie pade beketuan léq pengiring-pengiring Deside Isa, “Kembéq gurunde bareng medaran kance penagih pajek dait dengan bedose?” Deside Isa pirengang napi saq teketuanang siq dengan Parisi nike, terus jawab Deside Isa, “Dengan saq séhat ndéq merluang tabib, cume dengan saq sakit doang. Silaq lumbar dait perajahin napi artine ayat Kitab Suci niki: ‘Tiang mélé belas kasihan, ndéqne kurban binatang’. Séngaq Tiang dateng ndéqne jari ngempoh dengan-dengan saq nganggep diriqne sampun kenaq, laguq dengan-dengan saq bedose.” Sesampun nike, pengiring-pengiring Yahya parek metakén tipaq Deside Isa, “Kembéq tiang pade dait dengan-dengan Parisi puase, laguq pengiring-pengiring Pelungguh nénten?” Jawab Deside Isa léq ie pade, “Segerah temué-temué léq gawé ngawinang aséq angenne lamun pengantén mame masih araq bareng ie pade? Pasti ndéq! Laguq gen dateng waktune pengantén mame nike gen tebait léman ie pade. Léq waktu nike baruq ie pade puase. Ndéq araq dengan nampel kelambi saq sampun lotoh kadu bakal saq masih baru. Séngaq bakal saq jari penampel nike gen keset, dait gen miaq sayan beléq roék kelambi nike. Maraq nike éndah ndéq araq dengan saq ngisiq anggur saq masih baru léq dalem kantong léndong saq sampun lebung. Séngaq kantong nike gen bedah dait séde, terus aiq anggur nike gen tumpah. Anggur saq masih baru harus teisiq léq dalem kantong saq baru éndah, adéq deduaqne tetep solah.” Léq waktu Deside Isa bebaos kance pengiring-pengiring Yahya, parek sopoq kepale balé ibadah. Ie sujut léq arepan Deside Isa terus matur, “Anak tiang saq nine baruq gati milinang. Laguq tunas Pelungguh rauh dait jamah ie, make ie gen idup malik.” Deside Isa ngadeg teiring siq pengiring-pengiring-Ne terus lumbar kance dengan nike. Waktu nike éndah Deside Isa nyereminang andang mudi dait cingakin dengan nine nike beterus bemanik, “Teguqang angende, anak Tiang, imande sampun miaq side selah!” Léq waktu nike éndah dengan nine nike selah. Beterus Deside Isa rauh léq gedéng kepale balé ibadah nike. Sewaktu Deside Isa cingakin dengan-dengan saq nabuh gending kematéan dait luwéq dengan uyut léq derike, Deside Isa bemanik léq ie pade, “Sugul side pade selapuq! Kanak niki ndéq milinang, ie cume tindoq.” Deside Isa tekeleléqang siq ie pade selapuq. Sesampun dengan-dengan nike sugul, Deside Isa tame ojok dalem kamar kanak nike, dait negel imene. Beterus langsung kanak nine nike ures. Kabar nike jari nyebar ojok selapuq daérah nike. Deside Isa lumbar léman taoq nike. Léq tengaq langan araq due dengan bute milu ngiring Deside Isa. Ie pade bekuih-kuih, “Keturunan Daud! Periakang tiang pade!” Sesampun Deside Isa tame ojok dalem gedéng, kedue dengan bute nike parek ojok Deside Isa. Deside Isa bemanik léq ie pade, “Napi side pade percaye bahwe Tiang bau nyelahang side pade?” “Percaye Junjungan Saq Mulie!” Jawab ie pade. Beterus Deside Isa jamah penenteng ie pade dait bemanik, “Lantaran imande, make telaksane napi saq side pade harepang.” Make ie pade tao nyerioq. Ie pade tepajar siq Deside Isa adéqne ndéq bebadaq léq sai-sai mengenai hal nike. Laguq ie pade lumbar dait nyiarang kabar mengenai Deside Isa ojok selapuq daérah nike. Baruq gati kedue dengan bute nike lumbar, sopoq dengan pakoq saq tekuasein siq roh jahat tejauq parek tipaq Deside Isa. Deside Isa sediq roh jahat nike dait léq waktu nike éndah dengan nike tao ngeraos malik. Dengan luwéq nike bengaq, dait bebase, “Ndéq uwah tiang pade serioq peristiwe saq maraq niki léq Israel!” Laguq dengan-dengan Parisi bebase, “Datune sétan saq ngebéng Ie kuase jari sediq sétan-sétan nike.” Beterus Deside Isa lumbar léman sopoq kote ojok kote saq lain dait léman sopoq kampung ojok kampung saq lain; Ie ngajahang léq balé-balé ibadah dait nyampéang Kabar Solah mengenai Kerajaan Sorge. Deside Isa nyelahang dengan-dengan saq ngidap segale macem penyakit dait saq awakne cacat. Sewaktu Deside Isa cingakin dengan luwéq nike, Ie jari periak léq ie pade, séngaq ie pade lelah dait ndéq araq saq perhatiang, maraq dombe saq ndéq bedowé pengarat. Beterus Deside Isa bemanik léq pengiring-pengiring-Ne, “Saq tepataq mule luwéq, laguq tukang pataqne cume sekediq. Keranaq nike tunas léq Épéne adéq Ie ngirim tukang pataq jari mataq.” Léq sopoq jelo, Deside Isa ngemanikang kedue olas pengiring-Ne bekumpul. Beterus Deside Isa ngicanin kuase tipaq ie pade jari sediq roh-roh jahat dait nyelahang segale macem penyakit dait segale macem awak saq cacat. Aran kedue olas rasul nike: Penembéq Simon (saq tesebut Petrus) dait Andreas semetonne, terus Yakub dait Yahya semetonne, ie pade bije-bije Zebedeus. Beterus Pilipus dait Bartolomeus, Tomas dait Matius penagih pajek nike, Yakub bije Alpeus, dait Tadeus; dait saq penutuq Simon dengan Zelot dait Yudas Iskariot saq behianat léq Deside Isa. Kedue olas rasul nike teutus siq Deside Isa, dait ie pade tepesen: “Ndaq lumbar ojok daérah dengan bangse-bangse lain atao ojok kote-kote dengan Samaria. Laguq lumbar ojok dengan-dengan Israel, terutame tipaq dengan-dengan saq sesat. Sampéang léq ie pade bahwe Kerajaan Sorge sampun rapet. Selahang dengan-dengan saq sakit; idupang dengan-dengan saq ninggal; selahang dengan-dengan saq sakit kuste, sediq sétan-sétan. Side pade sampun nerimaq selapuqne nike secare cume-cume. Jari, béng éndah secare cume-cume. Ndaq jauq képéng emas, képéng perak atao képéng tembage. Ndaq éndah jauq takaq sangu atao due lembar kelambi léq kelampande, atao sepatu atao jauq tunjang. Séngaq dengan saq begawéan berhak nerimaq upaqne. Lamun side pade tame ojok kote atao kampung, boyaq dengan saq mélé nerimaq side. Ndot kance ie jangke side pade berangkat malik. Sewaktu side pade tame ojok sopoq balé, ucapang salam tipaq ie pade. Lamun dengan-dengan léq balé nike nerimaq side pade, alurang salam side nike tetep léq ie pade. Laguq lamun ie pade ndéq mélé nerimaq side pade, bait malik salamde nike. Lamun araq balé atao kote saq ndéq mélé nerimaq side pade atao ndéq mélé dengah side pade, bilin taoq nike, dait kerapang kerepuk léman naénde. Tiang badaq side: Léq jelo Penghakiman dengan-dengan kote Sodom dait Gomora gen molahan teampunin siq Allah ketimbang dengan-dengan léq kote nike!” “Perhatiang niki: Tiang ngutus side pade maraq dombe ojok tengaq-tengaq serigale, keranaq nike side pade harus ceket maraq ulah dait tulus maraq kedit dare. Laguq tetep waspade léq selapuq dengan, séngaq araq saq gen nyerahang side pade ojok mahkamah agame, dait side pade gen tepecut léq balé-balé ibadah. Side pade gen tejauq ojok arepan penguase-penguase dait raje-raje séngaq side pade jari pengiring Tiang. Nike jari kesempatan side pade ngebéng kesaksian mengenai Tiang léq ie pade dait dengan-dengan saq ndéq kenal Allah. Laguq lamun side pade tejauq jari teadilin, ndaq kuatir mengenai napi saq harus side pade sampéang, atao berembé entane side pade harus ngeraos. Séngaq léq waktu nike éndah side pade gen tebadaq napi saq harus side pade sampeang. Séngaq saq bebaos léq waktu nike ndéqne side pade laguq Roh Bapa side saq araq léq dalem diriqde. Gen araq dengan saq nyerahang semetonne mésaq jari tematéq. Dait hal nike gen telaksane éndah antare bapaq kance bijene. Kanak-kanak gen ngelawan dengan toaqne dait nyerahang ie pade jari tematéq. Side pade gen temeriq siq selapuq dengan lantaran side pade jari pengiring Tiang. Laguq dengan saq setie jangke penutuqne, gen teselametang. Lamun side pade teaniaye léq sopoq kote, pelai ojok kote saq lain. Tiang badaq side pade: Sendéqman side pade tutuq datengin selapuq kote-kote Israel, Bije Manusie sampun rauh. Sopoq murit ndéqne beléqan léman gurune, atao sopoq hambe ndéqne beléqan léman majikanne. Lamun murit sampun jari maraq gurune, nike sampun cukup, dait sopoq hambe sampun pade maraq majikanne. Lamun kepale keluarge sampun tesebut Beelzebul, lebihan malik selapuq dengan saq araq léq baléne. Ie pade gen tesebut saq lengéan malik!” “Ndaq takut léq manusie. Ndéq araq saq teseboq, saq ndéq gen penggitan, dait ndéq araq saq terahasieang saq ndéq gen tebungkar. Napi saq Tiang sampéang tipaq side léq taoq saq peteng, harus side pade sampéang malik léq taoq saq menah. Dait napi saq tepéséqang léq kentokde, umumang hal nike beléq-beléq! Ndaq takut léq ie pade saq bau nyematéq awak, laguq ndéq bekuase nyematéq jiwe. Takut tipaq Allah saq bekuase binaseang awak dait jiwe léq dalem api nerake. Due kedit perit tejual ajine siq sopoq képéng saq paling kodéq. Timaqne maraq nike ndéq araq sopoq juaq saq geriq ojok tanaq lamun ndéq tekayunang siq Bapa léq sorge. Luwéqne bulu léq ulunde éndah sampun terékéng selapuqne siq Allah. Keranaq nike, ndaq takut! Side pade jaoq beléqan ajine tebanding kedit-kedit perit nike!” “Sai-sai saq ngakuq léq julun dengan luwéq bahwe ie pengiring Tiang, Tiang éndah gen ngakuq ie léq arepan Bapa Tiang léq sorge. Laguq sai-sai saq nilas léq julun dengan luwéq bahwe ie pengiring Tiang, Tiang éndah gen tilas ie léq arepan Bapa Tiang léq sorge.” “Ndaq paran bahwe Tiang jauq perdaméan ojok dunie niki. Tiang ndéq jauq perdaméan laguq perlawanan. Tiang dateng jari penyebap kanak mame ngelawan bapaqne, kanak nine ngelawan inaqne, dait menantu saq nine ngelawan mentoaqne saq nine. Anggote keluarge mésaq gen jari musuhne. Dengan saq beléqan kasihne tipaq amaqne atao inaqne ketimbang tipaq Tiang, ndéqne patut jari pengiring Tiang. Maraq nike éndah dengan saq ngasihin bijene saq nine atao bijene saq mame lebihan léman Tiang. Dengan saq ndéq mélé ngelémbah salibne dait ngiring Tiang ndéq patut jari pengiring Tiang. Dengan saq pertahenang nyawene, ie gen kélangan nyawene, laguq dengan saq kélangan nyawene lantaran setie léq Tiang, gen mauq idupne.” “Dengan saq nerimaq side pade, nerimaq Tiang éndah. Dait dengan saq nerimaq Tiang, nerimaq Ie saq ngutus Tiang. Dengan saq nerimaq nabi lantaran ie nabi, gen nerimaq upaq nabi. Dait sai saq nerimaq sopoq dengan saq solah lantaran ie solah gen nerimaq upaq saq solah. Sai-sai saq ngebéng nginem, timaq cume aiq nyet doang tipaq salaq sopoq léman dengan-dengan hine niki, lantaran ie pengiring Tiang, percaye bahwe ie pasti gen nerimaq upaqne!” Sesampun Deside Isa ngican petunjuk-petunjuk tipaq kedue olas pengiring-Ne, Ie bilin taoq nike. Ie lumbar ngajahang dait nyampéang Kabar Solah léq kote-kote saq rapet léman derike. Yahya Pembaptis saq waktu nike kenyeke araq léq bui pireng kabar mengenai karye Almasih. Beterus utusne pengiring-pengiringne lumbar metakén tipaq Deside Isa, “Napi Pelungguh dengan saq gen rauh menurut janji Allah, atao tiang pade harus ngantih dengan saq lainan?” Jawab Deside Isa, “Tulak tipaq Yahya dait badaq napi saq sampun side pade dengah dait serioq: Dengan bute tao nyerioq, dengan képaq tao lampaq, dengan kuste teselahang, dengan kedok tao dengah, dengan ninggal teidupang malik dait Kabar Solah léman Allah tesampéang ojok dengan-dengan miskin. Bahagie dengan saq ndéq ragu-ragu léq Tiang!” Sesampun utusan-utusan Yahya nike lumbar, Deside Isa mulai bebaos léq dengan luwéq mengenai Yahya, manik-Ne, “Side pade lumbar ojok padang gurun jari serioq napi? Teréng buloq saq tetiup siq angin? Atao side pade lumbar jari serioq napi? Dengan saq bekelambi solah? Dengan-dengan saq bekelambi solah ndot léq istane! Jari, kembéq side pade lumbar? Jari serioq nabi? Tetu, malahan ie lebih léman nabi. Séngaq Yahya nike saq temaksut léq dalem ayat Kitab Suci niki: ‘Serioq, Tiang suruq utusan Tiang, juluan léman Deside, ie gen nyiepang Deside langan.’ Tiang badaq side: Setetune léq antare ie pade saq tebijeang siq dengan nine ndéq uwah araq sopoq dengan saq beléqan léman Yahya Pembaptis, laguq saq paling kodéq léq dalem Kerajaan Sorge beléqan léman Yahya. Mulai léman Yahya dateng jangke mangkin niki, Kerajaan Sorge tetentang siq dengan-dengan saq berusahe nguasein siq care kekerasan. Jangke waktune Yahya nike dateng, selapuq Hukum Taurat dait kitab nabi-nabi benubuat mengenai hal-hal saq harus telaksane. Dait lamun side pade mélé percaye, Yahya nike Elia saq sampun tenubuatang kedatenganne. Sai bedowé kentok, harus ie dengahang! Siq napi harus Tiang bandingang dengan-dengan léq jaman niki? Ie pade maraq kanak-kanak saq tokol-tokol léq peken. Sopoq kelompoq bekuih tipaq kelompoq saq lain, ‘Tiang pade nyanyiang side pade lagu gembire, laguq side pade ndéq mélé ngigel! Tiang pade nyanyiang lagu sedih, dait side pade ndéq mélé nangis!’ Lantaran Yahya dateng – ie puase dait ndéq nginem anggur; dait dengan-dengan bebase, ‘ie tekuasein siq sétan.’ Mangkin Bije Manusie, rauh – Ie medaran dait nginem; beterus dengan-dengan bebase, ‘Serioq dengan nike! Melak, tukang bowos, batur penagih pajek dait batur dengan-dengan bedose.’ Laguq kebijaksanean Allah terbukti kenaq langan perbuatan-perbuatanne.” Beterus Deside Isa mulai ngewade kote-kote, timaq léq derike Ie paling luwéq miaq muqjizat. Séngaq dengan-dengan léq kote-kote nike ndéq mélé betobat léman dose-dose ie pade. “Celake side kote Korazim! Dait celake éndah side kote Betsaida! Seandéne muqjizat-muqjizat saq tepiaq léq taoqde nike sampun tepiaq léq Tirus dait Sidon, pasti dengan-dengan léq derike sampun ngonéq betobat léman dose-dosene dait ngengadu kelambi dukecite dait toloq awu-awu léq atas ulune. Tiang badaq side, léq jelo Penghakiman, dengan-dengan Tirus dait Sidon gen molahan teampunin siq Allah ketimbang side pade! Dait side, Kapernaum! Napi side gen teatasang jangke ojok langit? Ndéq! Malahan side gen tetetéh ojok dunie dengan maté! Séngaq seandéne muqjizat-muqjizat saq tepiaq léq tengaq-tengaq side sampun telaksane léq Sodom, Sodom nike masih araq jangke mangkin! Keranaq nike Tiang badaq side, léq jelo Penghakiman, dengan Sodom gen molahan teampunin siq Allah ketimbang side pade!” Léq waktu nike Deside Isa bedo'e, “Bapa, Tuhan saq nguasein langit dait gumi! Tiang besyukur tipaq Deside séngaq selapuqne nike Deside rahasieang léman dengan-dengan saq bijaksane dait bedowé ilmu. Laguq Deside nyatayang tipaq dengan-dengan saq biase-biase. Hal nike saq nyenengang Deside.” Beterus Deside Isa bemanik, “Selapuqne sampun teserahang léq Tiang siq Bapa. Ndéq araq sopoq dengan juaq saq kenal Bije, selain Bapa. Ndéq araq éndah saq kenal Bapa selain Bije, dait dengan-dengan tipaq sai Bije nike ngenalang Bapa. Silaq dateng ojok Tiang selapuqde saq lelah dait saq bedowé bandean berat; Tiang gen béng kelepasan tipaq side. Pade turut selapuq préntah Tiang, dait berajah léman Tiang. Séngaq Tiang niki lemah lembut dait rendah até, make jiwende gen mauq ketenangan. Séngaq préntah-préntah Tiang nike miaq seneng dait bandean Tiang nike éndah déang.” Léq sopoq jelo, waktu nike jelo Sabat, Deside Isa kance pengiring-pengiring-Ne bemargi léq lendang gandum. Sambil bemargi pengiring-pengiring-Ne pade bau gandum, terus kelorne séngaq ie pade lapah. Sewaktu dengan-dengan Parisi serioq hal nike, ie pade matur léq Deside Isa, “Cobaq serioq, pengiring-pengiring Pelungguh ngelanggar Hukum Taurat ite, ie pade ngelaksaneang hal saq ndéq kanggo telaksaneang léq jelo Sabat.” Jawab Deside Isa léq ie pade, “Napi side pade ndéq uwah bace mengenai napi saq telaksaneang siq Daud sewaktu ie dait dengan-dengan saq bareng kance ie lapah? Daud tame ojok dalem Gedéng Allah dait kelorang ruti saq sampun teaturang tipaq Allah. Padahal Daud atao dengan-dengan saq ngiring ie ndéq kanggo kelorang ruti nike, kecuali imam-imam. Atao napi ndéq uwah side pade bace léq dalem Kitab Suci Taurat bahwe sebilang jelo Sabat, imam-imam saq betugas léq Gedéng Allah ndéq tesalaqang timaq ie ngelanggar aturan jelo Sabat? Tiang badaq side: Setetune léq deriki araq saq beléqan léman Gedéng Allah. Léq dalem Kitab Suci araq tetulis: Tiang mélé belas kasihan, ndéqne kurban binatang. Lamun side tetu-tetu ngerti maksut Tiang niki, side pade pasti ndéq gen nyalahang dengan-dengan saq ndéq salaq. Séngaq, Bije Manusie nike Penguase jelo Sabat.” Beterus Deside Isa bilin taoq nike, dait lumbar ojok balé ibadah. Léq derike araq dengan saq imene maté setowéq. Araq dengan-dengan léq derike saq mélé boyaq-boyaq kesalaqan adéqne bau nyalahang Deside Isa. Ie pade metakén léq Deside Isa, “Kanggo napi nénten nyelahang dengan léq jelo Sabat?” Jawab Deside Isa, “Lamun araq léq antare side pade saq bedowé dombe, dait léq jelo Sabat dombe nike geriq ojok longkak saq dalem; napi épén dombe nike ndéq gen berusahe nyugulang dombe nike léman longkak nike? Nah, manusie beléqan ajine ketimbang dombe! Jari lamun maraq nike kanggo gawéq hal saq solah léq jelo Sabat!” Beterus Deside Isa bemanik léq dengan saq maté setowéq imene nike, “Ulurang imende.” Dengan nike ngulurang imene, beterus imene selah maraq saq setowéq. Laguq dengan-dengan Parisi bilin balé ibadah, terus ie pade mupakat gen nyematéq Deside Isa. Deside Isa wikan bahwe dengan-dengan Parisi nike bedowé niat jahat léq Ie. Jari Ie lumbar léman taoq nike, dait luwéq dengan ngiring Ie. Beterus Deside Isa nyelahang selapuq dengan saq sakit. Laguq Deside Isa balaq ie pade betutur mengenai Ie tipaq dengan lain. Siq care nike telaksane napi saq sampun temanikang siq Allah langan Nabi Yesaya, “Niki utusan Tiang saq Tiang piléq, Dengan saq Tiang kasihin dait saq nyenengang angen Tiang. Roh Tiang gen Tiang toloq léq Ie, keadilan Tiang gen Ie beriteang tipaq bangse-bangse. Ie ndéq gen betungkasan atao nyurak, atao pidato léq rurung-rurung beléq. Teréng buloq saq empak ndéq gen Ie polakang, dilah saq gen pedaq ndéq gen Ie pedaqang. Ie gen terus bejuang jangke keadilan telaksaneang; selapuq bangse gen beharep léq Ie.” Beterus araq dengan-dengan parek tipaq Deside Isa jauq dengan bute dait pakoq lantaran tekuasein siq sétan. Deside Isa nyelahang dengan nike sehingge ie tao nyerioq dait ngeraos malik. Selapuq dengan saq nyaksiang peristiwe nike jari bengaq, dait bebase, “Sang Ie niki keturunan Daud?” Sewaktu dengan-dengan Parisi pireng hal nike, terus ie pade nimbal, “Dengan niki cume tao sediq sétan lantaran Beelzebul, datune sétan saq sampun ngebéng Ie kuase nike.” Deside Isa wikan pikiran dengan-dengan Parisi nike, jari manik Deside Isa léq ie pade, “Lamun sopoq negare léq dalemne araq golongan-golongan saq saling bemusuhan, pasti negare nike ndéq bau tahen ngonéq. Dait sebilang kote atao keluarge saq saling bemusuhan sopoq kance saq lain, pasti ndéq gen tahen ngonéq. Maraq nike éndah léq dalem kerajaan Belis; lamun sopoq kelompoq sediq kelompoq saq lain, make kerajaan Belis nike sampun saling bemusuhan dait ndéq gen tahen ngonéq. Side pade bebase bahwe Tiang sediq sétan siq kuase Beelzebul. Lamun maraq nike siq kuase sai pengiring-pengiringde sediq roh jahat? Pengiring-pengiringde mésaq saq buktiang bahwe side pade salaq! Laguq setetune Tiang sediq sétan kadu kuase Roh Allah. Nike artine bahwe Kerajaan Allah sampun rauh léq side. Berembé dengan bau tame ojok dalem balé sopoq dengan saq kuat, jari ngerampas dowéne lamun ie ndéq juluan sékoq dengan saq kuat nike? Sesampun sékoqne, baruq ie bau ngerampas dowé dengan nike. Dengan saq ndéq bepihak léq Tiang, setetune ie ngelawan Tiang. Dait dengan saq ndéq nulung Tiang setetune ie sédaq karye Tiang! Keranaq nike Tiang badaq side pade: Lamun dengan gawéq dose atao menghine dengan lain, ie masih bau teampunin! Laguq lamun ie menghine Roh Allah, ie ndéq gen teampunin! Lamun dengan ngucapang sopoq hal ngelawan Bije Manusie, ie bau teampunin, laguq lamun ie menghine Roh Suci, ie ndéq gen teampunin, timaq mangkin atao éraq léq jaman saq mudian!” “Adéq temauq buaq saq solah, lolone harus solah. Lamun lolone ndéq solah buaqne éndah ndéq gen solah. Jari, solah atao ndéq lolone nike bau tetaoq léman buaqne. Side dengan jahat, berembé side bau ngucapang hal-hal saq solah lamun side jahat? Séngaq napi saq teucapang léq biwih tetentuang siq isi aténe! Hal-hal saq solah sugul léman dengan saq solah séngaq ie penoq siq hal-hal saq solah. Laguq hal-hal saq jahat sugul léman dengan saq jahat séngaq ie penoq siq hal-hal saq jahat. Laguq Tiang badaq side: Léq jelo Penghakiman éraq, sebilang dengan harus betanggung jawab léq ucapan-ucapanne saq ndéq araq manpaatne. Séngaq setetune, napi-napi saq sampun teucapang gen tekadu jari nentuang side salaq atao ndéq.” Beterus ahli-ahli Taurat dait dengan-dengan Parisi matur léq Deside Isa, “Paq Guru, tiang pade melét serioq sopoq tande léman Pelungguh.” Laguq jawab Deside Isa, “Jahat gati dait durhake dengan-dengan léq jaman niki! Side pade mélé serioq Tiang miaq tande? Tipaq side pade ndéq gen teicanin sopoq juaq tande kecuali tande Nabi Yunus. Séngaq pade maraq Nabi Yunus ndot léq dalem tian empaq saq beléq telu jelo telu kelem ngonéqne. Maraq nike éndah Bije Manusie gen ndot léq dalem tian gumi telu jelo telu kelem. Léq jelo Penghakiman, penduduk kote Niniwe gen teidupang bareng kance dengan-dengan jaman niki, dait nuduh ie pade. Séngaq dengan-dengan Niniwe nike betobat léman dose-dosene sesampun ie pade dengah hotbah Nabi Yunus. Laguq mangkin léq deriki setetune araq saq beléqan léman Nabi Yunus! Léq jelo Penghakiman, ratu léman negeri Lauq gen teidupang bareng kance dengan-dengan jaman niki, dait nuduh ie pade. Séngaq jari dengahang pengajahan Nabi Sulaiman saq bijaksane, ratu nike dateng léman poton gumi. Laguq mangkin léq deriki setetune araq saq beléqan léman Nabi Sulaiman!” “Lamun roh jahat sampun sugul léman manusie, roh nike begelining ojok taoq-taoq saq gero jari boyaq taoq mentelah, laguq ie ndéq mauq. Keranaq nike ie gen muni, ‘Tiang gen tulak ojok balé saq sampun tiang bilin.’ Waktu ie dateng léq derike, daitne balé nike sampun kosong, bersi dait teratur. Beterus ie lalo dait jauq pituq roh lain saq jahatan léman ie. Terus ie pade tame ojok dalem dengan nike dait ndot léq derike. Dait ahirne keadaan dengan nike jari lengéan léman saq mule. Hal saq maraq nike éndah gen telaksane tipaq dengan-dengan jahat jaman niki.” Léq waktu Deside Isa masih bebaos kance dengan luwéq nike, sanak-sanak kance mamiq bini Deside Isa dateng. Ie pade nganjeng léq luah sambil berusahe adéqne bau bebaos kance Deside Isa. Sopoq léq antare dengan luwéq nike matur léq Deside Isa, “Silaq cingakin mamiq bini dait sanak-sanak Pelungguh araq léq luah, ie pade gen bebaos kance Pelungguh.” Laguq jawab Deside Isa, “Sai mamiq bini Tiang? Sai sanak-sanak Tiang?” Beterus Deside Isa nijoqang pengiring-pengiring-Ne dait bemanik, “Niki inaq dait semeton Tiang. Dengan-dengan saq ngelaksaneang pekayunan Bapa Tiang saq léq sorge ie saq jari semeton mame dait semeton nine serte inaq Tiang.” Léq jelo nike éndah Deside Isa bilin balé nike, beterus melinggih léq sedin danao. Luwéq gati dengan saq bekumpul léq sekelining Deside Isa, keranaq nike Ie margi dait taék ojok sopoq perau, dait dengan luwéq nike nganjeng léq pesisi. Beterus Deside Isa mulai ngajahang luwéq hal léq dengan-dengan nike kadu perumpamean. Deside Isa bemanik, “Araq sopoq dengan lumbar sawur binéq Sewaktu dengan nike kenyeke sawur binéq nike, araq binéq saq geriq léq langan. Beterus dateng kedit ngaken binéq nike jangke bis. Araq éndah binéq saq geriq léq taoq saq bebatu-batu saq sekediq tanaqne. Binéq-binéq nike becat tiwoq séngaq tanaqne sekediq. Laguq sesampun panjeng jelo, suli-suli saq tiwoq nike mulai layu beterus gero dait maté séngaq ndéq berakah. Araq éndah binéq saq geriq léq tengaq bebenes beduwi. Bebenes nike sayan beléq dait gepit suli-suli nike jangke maté. Laguq araq éndah binéq saq geriq léq tanaq saq subur, terus bebuaq; araq saq satus, araq enem dase, dait araq éndah saq telung dase kali lipet luwéqne.” Sesampun nyeriteang perumpamean nike, Deside Isa bemanik, “Sai-sai bedowé kentok, harus ie dengahang!” Beterus pengiring-pengiring Deside Isa parek dait metakén léq Deside Isa, “Kembéq Pelungguh kadu perumpamean lamun Pelungguh bebaos kance dengan luwéq nike?” Jawab Deside Isa, “Side pade sampun teicanin paice jari nenaoq rahasie Kerajaan Sorge, laguq dengan-dengan nike ndéq. Séngaq dengan saq sampun bedowé gen teican luwéqan malik, dait ie gen bekelimpahan. Laguq dengan saq ndéq bedowé napi-napi, make napi juaq saq araq léq ie gen tebait. Nike alasan Tiang kadu perumpamean lamun Tiang ngajahang léq dengan luwéq, séngaq ie pade setetune nyerioq, laguq maraq dengan ndéq nyerioq; Ie pade dengah laguq maraq dengan ndéq dengah dait ndéq ngerti. Siq care nike make telaksane napi saq sampun tenubuatang siq Nabi Yesaya, ‘Allah bemanik: Side pade gen dengah laguq side pade ndéq ngerti; side pade gen serioq laguq ndéq paham. Séngaq pikiran dengan-dengan nike sampun kongol, kentok ie pade sampun kedok dait penenteng ie pade sampun tepedemang. Hal niki telaksane adéq penenteng ie pade ndaq nyerioq, kentok ie pade ndaq dedengah, pikiran ie pade ndaq ngerti, terus bebalik, sehingge Tiang nyelahang ie pade.’ ” “Laguq side pade bahagie,” manik Deside Isa léq pengiring-pengiring-Ne, “séngaq side pade tetu-tetu nyerioq dait dengah. Keranaq nike Tiang badaq side: Setetune luwéq nabi dait dengan saq taat léq Allah melét serioq napi saq side pade serioq mangkin, laguq ie pade ndéq serioq. Ie pade melét dengah napi saq side pade dengah mangkin, laguq ie pade ndéq dengah.” “Dengahang napi arti perumpamean penyawur binéq nike. Binéq saq geriq léq langan nike ibarat dengan-dengan saq dengah manik mengenai Kerajaan Sorge, laguq ie pade ndéq ngerti. Beterus Si Jahat nike dateng ngerampas napi saq sampun tesawur léq dalem até dengan-dengan nike. Binéq saq geriq léq tanaq saq luwéq batune, ibarat dengan-dengan saq dengah manik nike, dait langsung nerimaq siq senengne. Laguq manik nike ndéq berakah léq dalem até ie pade, sehingge ndéq tahen ngonéq. Sewaktu dateng penyusah atao penganiayean lantaran manik nike, ie pade langsung murtat. Binéq saq geriq léq tengaq bebenes beduwi ibarat dengan-dengan saq dengah manik nike, laguq kuatir mengenai idupne dait mélé idup méwah. Keranaq nike manik léman Allah tegepit léq dalem aténe sehingge ndéq iniq bebuaq. Dait binéq saq geriq léq tanaq saq subur ibarat dengan-dengan saq dengah dait paham léq manik nike. Ie pade bebuaq luwéq, araq saq satus, enem dase dait telung dase kali lipet hasilne.” Deside Isa nyampéang malik sopoq perumpamean léq dengan luwéq, manik-Ne, “Hal Kerajaan Sorge maraq perumpamean niki: Sopoq petani sawur binéq saq solah léq lendangne. Sewaktu selapuq dengan kenyeke mesaré, musuh petani nike dateng sawur binéq ré léq antare gandum nike, beterus ie lumbar. Sewaktu binéq-binéq nike tiwoq dait buaq-buaq mayangne mulai sugul, lolo-lolo ré nike éndah penggitan. Beterus buruh-buruh tani saq teupaq nike dateng ojok petani nike dait bebase, ‘Paq, tekan binéq solah saq pelungguh talet léq lendang niki? Berembé jangke lolo ré nike araq léq derike?’ Jawab petani nike, ‘Nike pegawéan musuh.’ Beterus buruh-buruh tani nike beketuan malik, ‘Napi pelungguh kayun tiang pade embot lolo ré nike?’ ‘Ndaq,’ jawab épén dowé lendang nike, ‘séngaq lamun lolo ré nike tembot laun gandumne milu kerembotan. Alurang deduaqne beléq bareng-bareng jangke dateng waktune tepataq. Laun tiang gen badaq dengan-dengan saq mataq nike: Kumpulang juluq lolo-lolo ré, taliq, dait sedut. Beterus kumpulang gandumne dait toloq léq dalem lumbung.’ ” Deside Isa nyampéang malik perumpamean léq dengan luwéq, manik-Ne, “Hal Kerajaan Sorge nike seumpame tolang sawi saq tebait siq dengan terus tesawur léq lendangne. Tolang sawi nike binéq saq paling kodéq. Laguq lamun ie sampun tiwoq, ie gen jari saq paling beléq léq antare taletan-taletan saq lain. Ie jari lolo, sehingge kedit-kedit dateng miaq kesebu léq pémpang-pémpangne.” Araq sopoq perumpamean lain saq tesampéang siq Deside Isa, léq dengan luwéq. “Hal Kerajaan Sorge keadaanne pade maraq ragi ruti saq tebait siq sopoq dengan nine, terus teadon kance petang dase liter tepung terigu, jangke mbal selapuqne!” Selapuqne teajahang siq Deside Isa léq dengan luwéq kadu perumpamean, dait ndéq araq sopoq juaq saq Ie ajahang tipaq ie pade ndéq kadu perumpamean. Siq care nike telaksane napi saq tesampéang siq nabi, “Tiang kadu perumpamean lamun ngeraos kance ie pade; Tiang gen nyampéang hal-hal saq teseboqang mulai léman dunie niki tecipteang.” Sesampun nike Deside Isa margi bilin dengan luwéq nike, terus tame ojok sopoq gedéng. Pengiring-pengiring-Ne parek beterus ie pade matur, “Tunas Pelungguh jelasang léq tiang pade napi arti perumpamean lolo ré léq antare gandum nike.” Beterus jawab Deside Isa, “Dengan saq sawur binéq saq solah nike, Bije Manusie. Lendang nike dunie niki. Binéq saq solah nike, bije-bije Kerajaan. Lolo ré nike, anak-anak Belis. Musuh saq sawur binéq lolo ré nike, Belis. Waktu mataq nike, ahir jaman, dait dengan-dengan saq mataq nike malaékat-malaékat. Pade maraq lolo-lolo ré tekumpulang terus tesedut léq dalem api, maraq nike éndah éraq léq ahir jaman. Bije Manusie gen ngutus malaékat-malaékat-Ne dait ie pade gen ngumpulang selapuq hal saq nyesatang dait selapuq dengan saq gawéq jahat, dait nyugulang ie pade léman dalem Kerajaan-Ne. Ie pade selapuq gen tetetéh ojok jangkih saq apine begelaur; léq derike ie pade gen nangis dait menderite. Léq waktu nike dengan-dengan saq soléh gen becahaye maraq sinar jelo dalem Kerajaan Bapa ie pade. Jari, sai bedowé kentok, harus ie dengahang!” “Hal Kerajaan Sorge pade maraq perumpamean niki: Araq harte karun léq dalem tanaq terus tedait siq dengan, laguq tetamaqang malik ojok dalem tanaq. Dengan nike cemoh gati beterus ie lumbar jual selapuq dowéne, terus ie tulak beli tanaq nike.” “Hal Kerajaan Sorge pade maraq perumpamean niki: Araq sopoq pedagang boyaq mutiare-mutiare saq mahel ajine. Sewaktu ie ndait sopoq mutiare saq luar biase solahne, ie becat lumbar dait jual selapuq dowéne, beterus beline mutiare saq sopoq nike.” “Hal Kerajaan Sorge pade maraq perumpamean jaring saq tepencar léq segare, beterus mauq empaq macem-macem ruene. Sesampun jaring nike penoq siq empaq, jaring nike teangkat ojok darat siq nelayan-nelayan nike. Beterus ie pade tokol dait kelinne empaq-empaq nike: Saq solah toloqne léq dalem keranjang terus saq ndéq solah tetéhne. Maraq nike éndah éraq léq ahir jaman, malaékat-malaékat gen lumbar kelin dengan-dengan jahat léman dengan-dengan saq taat ngelaksaneang pekayunan Allah. Beterus dengan-dengan jahat tetetéh ojok dalem jangkih saq araq apine, léq derike ie pade gen nangis dait menderite.” “Napi side pade ngerti selapuqne niki?” Deside Isa beketuan léq pengiring-pengiring-Ne. “Ngerti!” jawab pengiring-pengiring-Ne. Beterus manik Deside Isa tipaq ie pade, “Keranaq nike sebilang ahli Taurat saq nerimaq perajahan mengenai hal Kerajaan Sorge nike, pade maraq épén balé saq nyugulang barang-barang baru dait laéq léman tangkaq dowéne.” Sesampun Deside Isa selesé nyampéang perumpamean-perumpamean nike, Ie margi bilin taoq nike, beterus Ie tulak ojok kampung asal-Ne. Léq derike Ie ngajahang léq balé ibadah, dait dengan-dengan saq dengahang Ie bengaq gati terus ie pade bebase, “Léman mbé Ie mauq hikmat dait léman mbé Ie mauq kuase jari miaq muqjizat-muqjizat nike? Tekan Ie nike bije tukang kayuq? Tekan Mariam nike mamiq bini-Ne, dait sanak-sanak-Ne: Yakub, Yusup, Simon dait Yudas? Dait sanak-sanak-Ne saq nine araq ndot léq deriki éndah? Jari léman mbé Ie mauq selapuqne nike?” Make ie pade ndéq nerimaq Deside Isa. Beterus Deside Isa bemanik léq ie pade, “Sopoq nabi tehormatin léq mbé-mbé kecuali léq kampung asalne dait léq baléne mésaq.” Jari, Deside Isa nénten miaq luwéq muqjizat léq derike, séngaq ie pade ndéq percaye. Léq waktu nike, Herodes saq jari raje wilayah negeri Galilea pireng kabar mengenai Deside Isa. Beterus Herodes bebase léq pejabat-pejabatne, “Pasti niki Yahya Pembaptis saq sampun idup malik! Keranaq nike Ie bedowé kuase miaq keajaipan.” Séngaq sendéqman nike Herodes ngutus dengan jari bau Yahya dait sékoq ie terus tetamaqang ojok dalem bui. Hal nike telaksaneang siq Herodes lantaran Herodias sebiniqne Pilipus, sanakne mésaq. Séngaq Yahya sampun bebase maraq niki léq Herodes, “Nénten kanggo pelungguh merariq kance Herodias!” Setetune Herodes beniat nyematéq Yahya, laguq ie takut léq dengan-dengan, séngaq ie pade anggep Yahya nike nabi. Sewaktu Herodes ngerayeang gawé ulang taunne, bije Herodias saq nine ngigel léq julun temué-temué. Igelan kanak nike tetu-tetu nyenengang angen Herodes, sehingge Herodes bejanji kadu sumpah léq dedare nike, bahwe napi juaq saq ie tunas, gen teican tipaq ie. Lantaran tehasut siq inaqne, dedare nike bebase, “Tiang tunas ulune Yahya Pembaptis adéqne tejauq ojok tiang mangkin niki éndah kadu naré!” Sesampun tepirengang siq Herodes napi saq tetunas siq dedare nike, Herodes jari sedih gati. Laguq lantaran ie sampun besumpah léq julun selapuq temuéne, ie préntahang adéq petunasan dedare nike tekabulang. Herodes suruq dengan lumbar ojok bui jari penggal ulu Yahya. Beterus ulu Yahya nike tejauq tame tangkaq naré, dait serahangne léq dedare nike. Terus jauqne siq dedare nike ojok inaqne. Sesampun nike, pengiring-pengiring Yahya dateng bait jenazah Yahya dait nguburang ie. Beterus ie pade lumbar dait nyampéang léq Deside Isa mengenai hal nike. Sesampun Deside Isa pireng berite nike, Ie taék perau mésaq-mésaq dait bilin taoq nike, terus margi boyaq taoq saq sepi. Laguq sewaktu dengan-dengan dengah mengenai hal nike, ie pade bilin kote-kote ie pade dait nerutuk Deside Isa langan darat. Sewaktu Deside Isa turun léman perau dait cingakin dengan luwéq nike, Ie periak léq ie pade. Beterus Ie nyelahang dengan-dengan saq sakit léq antare ie pade. Léq waktu serep jelo, pengiring-pengiring Deside Isa parek dait matur, “Sampun serep jelo, dait taoq niki kesempil. Solahan Pelungguh manikang dengan-dengan nike lumbar, adéqne mauq beli keloran léq dése-dése.” Laguq manik Deside Isa léq ie pade, “Ndéq perlu dengan luwéq niki lumbar, side pade saq harus ngebéng ie pade bekelor.” “Tiang pade cume bedowé lime ruti dait due empaq!” basen pengiring-pengiring Deside Isa nike. “Jauq ojok deriki,” manik Deside Isa. Beterus manikang-Ne dengan luwéq nike tokol léq atas pupaq. Deside Isa bait lime ruti dait due empaq nike, beterus nengadah andang langit dait ngucap syukur tipaq Allah. Sesampun nike peleng-peleng-Ne ruti nike siq gading-Ne terus icanin-Ne léq pengiring-pengiring-Ne jari tebagi-bagiang léq dengan luwéq nike. Selapuqne bekelor jangke besuh, sesampun nike pengiring-pengiring Deside Isa ngumpulang salone, araq due olas bakaq penoq luwéqne. Saq ngelor léq waktu nike araq kire-kire lime iyu dengan mame, ndéqman terékéng dengan nine dait kanak-kanak. Sesampun nike, Deside Isa manikang pengiring-pengiring-Ne taék ojok perau dait juluan mbelat danao, léq waktu nike éndah Ie manikang dengan luwéq nike uléq. Sesampun dengan luwéq nike lumbar, Deside Isa taék nyendiri bedo'e ojok atas sopoq bukit. Waktu nike sampun peteng, Deside Isa tetep masih araq léq derike mésaq-mésaq. Léq waktu nike, perau saq taoqne taék pengiring-pengiring Deside Isa sampun jaoq léq tengaq-tengaq danao. Perau nike teampes-ampes siq umbak séngaq angin belawan andang kance perau nike. Kire-kire jam telu parek menah, Deside Isa rauh tipaq ie pade, bemargi léq atas aiq. Sewaktu pengiring-pengiring-Ne serioq Ie bemargi léq atas aiq, ie pade tinjot gati dait ie pade bekuih, “Nike hantu!” Séngaq ie pade takut gati. Laguq Deside Isa bemanik léq ie pade, “Tenang! Tiang niki Isa, ndaq takut!” Terus Petrus matur, “Junjungan Saq Mulie, lamun tetu nike Pelungguh, manikang tiang parek lampaq léq atas aiq.” “Silaq dateng,” jawab Deside Isa. Beterus Petrus turun léman perau, lampaq léq atas aiq dait parek ojok Deside Isa. Laguq sewaktu Petrus serioq berembé beléqne angin léq danao nike, ie takut terus mulai ketelep, dait ie bekuih, “Junjungan Saq Mulie, tulung tiang!” Deside Isa ngulurang gading-Ne dait negel ie terus bemanik, “Hai, side dengan saq kurang percaye, kembéq side bimbang?” Beterus deduaqne taék ojok perau nike, dait langsung angin nike jari tenang. Make selapuq pengiring-pengiring saq araq léq perau nike sujut nyembah Deside Isa. Ie pade matur, “Setetune Pelungguh Bije saq asalne léman Allah!” Sewaktu ie pade rauh léq itoqan danao, ie pade mendarat léq Genesaret. Dait sewaktu dengan-dengan léq derike serioq bahwe saq rauh nike Deside Isa, ie pade nyiarang kabar nike tipaq selapuq daérah sekiter kote nike. Beterus selapuq dengan sakit tejauq ojok arepan Deside Isa. Dait ie pade tunas léq Deside Isa adéq teijinang kintur jubah-Ne, timaq cume potone. Beterus selapuq saq kintur jubah Deside Isa nike jari selah. Sekelompoq dengan Parisi dait ahli-ahli Taurat léman Yerusalem parek ojok Deside Isa. Ie pade metakén léq Deside Isa, “Kembéq pengiring-pengiring Pelungguh ngelanggar adat istiadat pare leluhurte? Sewaktu ie pade bekelor, ie pade ndéq bisoq imene juluq menurut aturan!” Jawab Deside Isa, “Kembéq side pade éndah ngelanggar préntah Allah cume lantaran mélé turut adat istiadat leluhurde? Séngaq Allah bemanik, ‘Pade hormatin amaq dait inaqde,’ dait ‘Sai-sai saq nyumpaq amaqne atao inaqne harus tehukum maté.’ Laguq side pade ngajahang: Sai-sai saq bebase léq amaqne atao léq inaqne, ‘Napi saq seharusne tiang béng léq inaq dait amaq tiang, sampun tiang ngaturang tipaq Allah,’ make dengan nike ndéq malik tewajibang hormatin amaqne atao inaqne. Jari, lantaran adat istiadat leluhurde, side pade nyatayang Manik Allah ndéq berlaku. Side pade dengan munapik! Mule kenaq gati napi saq sampun tenubuatang siq Nabi Yesaya mengenai side pade, ‘Maraq niki manik Allah: Dengan-dengan nike cume nyembah Tiang siq ucapan-ucapan doang, laguq aténe jaoq léman Tiang. Percume ie pade nyembah Tiang, séngaq aturan manusie saq ie pade ajahang maraqne hal nike préntah Tiang.’ ” Beterus Deside Isa ngemanikang dengan-dengan nike, dait bemanik léq ie pade, “Dengahang niki adéq side pade ngerti! Ndéqne saq tame léq biwih saq miaq dengan nike najis; laguq saq sugul léman biwihne, hal nike saq najisang dengan.” Beterus pengiring-pengiring Deside Isa parek dait metakén léq Ie, “Napi Pelungguh wikan bahwe dengan-dengan Parisi nike tandruh sewaktu ie pade pireng Pelungguh bemanik maraq nike?” Jawab Deside Isa, “Sebilang taletan saq ndéq tetalet siq Bapa Tiang léq sorge gen tembot. Ndaq runguq dengan-dengan Parisi nike. Ie pade pemimpin-pemimpin saq bute; dait lamun dengan bute mimpin dengan bute, make deduaqne gen geriq ojok longkak.” Beterus Petrus matur, “Tunas Pelungguh jelasang arti perumpamean nike léq tiang pade!” Jawab Deside Isa léq ie pade, “Napi side pade ndéqman ngerti éndah? Napi side pade ndéq nenaoq bahwe napi saq tame ojok dalem biwih gen turun ojok dalem tian beterus gen sugul malik? Laguq saq sugul léman biwih asalne léman até; dait hal nike saq jari penyebap dengan jari najis. Séngaq léman até timbul pikiran-pikiran jahat, saq jari penyebab dengan nyematéq, bezinah, gawéq perbuatan saq cabul, memaling, ngebéng kesaksian palsu dait pitnah. Hal-hal nike saq miaq dengan jari najis, dait ndéqne lantaran bekelor siq ime saq ndéq tebisoq.” Beterus Deside Isa bilin taoq nike dait lumbar ojok daérah saq rapet léman kote Tirus dait Sidon. Sopoq dengan nine léman Kanaan saq ndot léq daérah nike parek ojok Deside Isa, sambil bekuih-kuih, “Junjungan Saq Mulie, Keturunan Daud, periakang tiang, séngaq anak tiang saq nine tekuasein siq roh jahat dait sengsare gati.” Deside Isa nénten bejawab napi-napi léq dengan nine nike. Beterus pengiring-pengiring-Ne parek dait tunas léq Deside Isa, “Manikang dengan nine nike lumbar. Ie cume bekuih-kuih doang léq mudinte.” Jawab Deside Isa, “Tiang teutus cume tipaq bangse Israel, terutame tipaq ie pade saq sesat.” Dengan nine nike parek terus sujut léq arepan Deside Isa dait matur, “Junjungan Saq Mulie, tulung tiang niki.” Jawab Deside Isa, “Ndéqne patut bait keloran kanak-kanak terus tesaut tipaq acong.” “Mule tetu, Junjungan Saq Mulie,” jawab dengan nine nike, “laguq acong éndah ngaken salo-salo saq geriq léman méje majikanne.” Beterus Deside Isa bemanik léq dengan nine nike, “Inaq, tetu-tetu beléq iman side! Alurang adéqne telaksane napi saq side harepang!” Léq waktu nike éndah, bije dengan nine nike selah. Deside Isa bilin taoq nike, dait bemargi léq sedin Danao Galilea, beterus Ie taék léq sopoq bukit dait melinggih léq derike. Luwéq dengan parek ojok Deside Isa jauq dengan-dengan saq démpang, saq bute, saq képaq, saq pakoq dait luwéq malik dengan sakit saq lain. Ie pade toloq dengan-dengan nike léq arepan Deside Isa, dait ie pade teselahang. Dengan luwéq saq araq léq derike bengaq gati, waktu ie pade serioq dengan pakoq tao ngeraos, dengan démpang jari selah, dengan képaq iniq lampaq dait dengan bute iniq nyerioq. Beterus ie pade mulieang Allah bangse Israel. Beterus Deside Isa ngemanikang pengiring-pengiring-Ne dait bemanik, “Tiang periak léq dengan luwéq niki. Sampun telu jelo ngonéqne ie pade turut Tiang, dait mangkin ie pade ndéq bedowé keloran. Tiang ndéq mélé suruq ie pade uléq dalem keadaan lapah, laun ie pade paleng léq tengaq langan.” Beterus pengiring-pengiring-Ne metakén léq Deside Isa, “Léq taoq saq kesempil niki léq mbé ite gen mauq keloran jari dengan saq luwéqne maraq niki?” “Araq pire ruti léq side pade?” Deside Isa beketuan léq ie pade. “Araq pituq,” jawab ie pade, “dait araq éndah empaq-empaq kodéq.” Make Deside Isa manikang dengan-dengan nike tokol léq tanaq. Beterus Deside Isa bait kepituq ruti dait empaq-empaq nike, dait ngucap syukur tipaq Allah. Sesampun nike Ie peleng-peleng ruti dait empaq nike siq gading-Ne, terus icanin-Ne tipaq pengiring-pengiring-Ne. Dait ie pade bagi-bagiang léq dengan luwéq nike. Selapuq dengan nike bekelor jangke besuh. Sesampun nike, pengiring-pengiring Deside Isa ngumpulang salo keloran nike. Selapuqne araq pituq bakaq penoq. Jumlah dengan mame saq milu bekelor waktu nike araq empat iyu dengan, ndéqman terékéng dengan nine dait kanak-kanak. Sesampun nike, Deside Isa ngemanikang dengan-dengan nike uléq. Ie mésaq taék perau terus lumbar ojok daérah Magadan. Araq dengan-dengan Parisi dait dengan Saduki parek ojok Deside Isa jari cobe Ie. Ie pade tunas adéq Deside Isa piaq tande ajaip léman sorge. Laguq jawab Deside Isa léq ie pade, [“Lamun kenyeke serep jelo, side pade bebase, ‘Cuace bagus, séngaq langitne béaq.’ Dait léq kelémaq, side pade bebase, ‘Jelo niki gen turun ujan, séngaq langitne béaq dait gulem.’ Nah, side pade tao ngeramal cuace léman serioq keadaan langit, padahal tande-tande jaman ndéq bau side pade ramal!”] “Jahat gati dait durhake dengan-dengan léq jaman niki! Side pade mélé serioq Tiang miaq tande? Tipaq side pade ndéq gen teicanin sopoq juaq tande kecuali tande Nabi Yunus.” Sesampun Deside Isa bemanik maraq nike, Ie margi bilin ie pade. Waktu pengiring-pengiring Deside Isa rauh léq itoqan danao, baruq ie pade nenaoq bahwe ie pade lupaq jauq ruti. Deside Isa bemanik léq ie pade, “Pade waspade léq ragi ruti dengan Parisi dait dengan Saduki.” Sewaktu ie pade dengah manik Deside Isa nike, pengiring-pengiring-Ne mulai bebase sopoq kance saq lain, “Deside Isa bemanik maraq nike séngaq ite ndéq jauq ruti.” Deside Isa wikan napi saq ie pade raosang, jari Ie bemanik, “Kembéq side pade ngeraosang mengenai ndéq bedowé ruti? Side pade kurang percaye! Napi side pade ndéqman ngerti? Napi side pade ndéq inget mengenai lime ruti saq Tiang peleng-peleng jari keloran lime iyu dengan nike? Pire bakaq salone saq side pade kumpulang? Dait berembé éndah mengenai pituq ruti umaq empat iyu dengan nike, pire bakaq salo keloran saq side pade kumpulang? Kembéq side pade jangke ndéq ngerti bahwe Tiang ndéq ngeraos kance side pade mengenai ruti? Pade onyaq-onyaq léq ragi ruti dengan-dengan Parisi dait dengan Saduki!” Ahirne pengiring-pengiring Deside Isa nike ngerti bahwe Ie peringet adéq ie pade onyaq-onyaq ndéqne léq ragi ruti saq tekadu jari miaq ruti, laguq léq pengajahan-pengajahan dengan-dengan Parisi dait Saduki. Deside Isa rauh léq daérah Kaisarea Pilipi. Léq derike Deside Isa beketuan léq pengiring-pengiring-Ne, “Menurut basen dengan, sai Bije Manusie nike?” Jawab pengiring-pengiring-Ne, “Araq saq bebase Yahya Pembaptis. Araq éndah saq bebase Elia, saq lain malik bebase Yeremia atao salaq sopoq léman pare nabi.” “Laguq menurut side pade, Tiang niki sai?” Deside Isa beketuan. Jawab Simon Petrus, “Pelungguh Almasih, Bije saq asalne léman Allah saq idup.” Manik Deside Isa léq Petrus, “Bahagie side, Simon bije Yunus! Séngaq ndéqne manusie saq badaq side hal nike, laguq Allah, Bapa Tiang saq léq sorge. Dait Tiang badaq side, bahwe side Petrus, batu saq tegéng. Dait léq atas batu niki Tiang gen anjengang jemaah Tiang, saq ndéq bau tekalahang; timaqne siq alam maut! Tiang gen béng side kunci Kerajaan Sorge. Dait napi saq side taliq léq gumi, gen tetaliq éndah léq sorge. Dait napi saq side lekaq léq dunie niki, gen telekaq éndah léq sorge.” Sesampun nike Deside Isa peringet pengiring-pengiring-Ne adéq ie pade ndéq bebadaq léq sai-sai bahwe Ie Almasih. Mulai léman waktu nike, Deside Isa nyatayang secare terus terang léq pengiring-pengiring-Ne, bahwe Ie harus lumbar ojok Yerusalem dait ngalamin luwéq penderitean léman pemimpin-pemimpin, imam-imam kepale dait ahli-ahli Taurat. Ie gen tematéq, laguq léq jelo saq ketelu Ie gen teidupang malik. Beterus Petrus ngantuq Deside Isa ojok lempéng dait peringet Ie, basene, “Junjungan Saq Mulie, semoge Allah jaoqang hal nike léman Pelungguh! Sampunang hal nike jangke telaksane léq Pelungguh!” Deside Isa cingakin andang Petrus dait bemanik, “Lalo léman té Belis! Side ngalang-ngalangin Tiang. Pikirande pikiran manusie; ndéqne pikiran Allah!” Beterus Deside Isa bemanik léq pengiring-pengiring-Ne, “Sebilang dengan saq mélé turut Tiang, ie harus ngelupaqang kepentinganne mésaq, ngelémbah salibne, dait tetep turut Tiang. Séngaq dengan saq mélé nyelametang nyawene, gen kélangan nyawene. Laguq dengan saq kélangan nyawene lantaran Tiang, dengan nike gen mauq idupne malik. Napi untungne léq sopoq dengan, lamun seantéro dunie niki jari dowéne, laguq ie kélangan nyawene? Napi araq saq bau tekadu siq dengan jari tukah nyawene? Ndéq ngonéq malik Bije Manusie, teiring siq malaékat-malaékat-Ne gen rauh léq dalem kemuliean Bapa-Ne. Léq waktu nike, Ie gen bales tipaq sebilang dengan menurut perbuatanne sopoq-sopoq. Tiang badaq side pade: Setetune léq antare side pade saq araq léq deriki, araq saq ndéq gen ninggal, sendéqman ie pade serioq Bije Manusie rauh jari Raje dalem Kerajaan-Ne.” Enem jelo sesampun nike, Deside Isa gadingang Petrus, Yakub dait Yahya semetonne Yakub, taék ojok sopoq gunung saq atas. Cume ie pade saq araq léq derike. Beterus Deside Isa begentiq rue léq julun ie pade. Penjarupan-Ne jari menah maraq sinar jelo dait kuace-Ne jari putéq becahaye. Selung-selung ie pade serioq Musa dait Elia léq derike kenyeke bebaos kance Deside Isa. Petrus matur léq Deside Isa, “Junjungan Saq Mulie, maiq gati ite léq deriki, lamun Pelungguh kayun, gen tiang penganjeng telu kémah léq deriki: Sopoq umaq Pelungguh, sopoqne umaq Musa dait sopoqne malik umaq Elia.” Léq waktu Petrus kenyeke matur, turun awan saq becahaye léq atas ie pade dait léman awan nike kedengahan suare saq ngeraos maraq niki, “Nikii Bije Tiang saq Tiang kasihin. Ie nyenengang Tiang. Pade dengahang Ie!” Sewaktu pengiring-pengiring Deside Isa dengah suare nike, ie pade takut gati jangke nyungkur ojok tanaq. Beterus Deside Isa rauh dait kintur ie pade sambil bemanik, “Pade ures, ndaq takut!” Sewaktu ie pade ures, ie pade ndéq serioq sai-sai kecuali Deside Isa. Waktu ie pade turun léman gunung nike, ie pade teperinget siq Deside Isa, “Ndaq tuturang sai juaq napi saq baruq side pade serioq nike, sendéqman dateng waktune Bije Manusie teidupang malik léman ninggal-Ne.” Beterus pengiring-pengiring Deside Isa metakén léq Ie, “Kembéq ahli-ahli Taurat bebase bahwe Elia gen dateng juluan?” Jawab Deside Isa, “Mule tetu Elia gen dateng dait ie gen siepang selapuqne. Laguq Tiang badaq side: Setetune Elia sampun dateng laguq dengan-dengan ndéq kenal ie. Elia saq dateng nike teperlakuang semélé angen ie pade. Dait maraq nike éndah ie pade gen perlakuang Bije Manusie.” Beterus pengiring-pengiring-Ne ngerti bahwe Deside Isa bebaos mengenai Yahya Pembaptis. Sewaktu Deside Isa dait ketelu pengiring-Ne tulak ojok dengan luwéq nike, sopoq dengan mame parek, sujut léq arepan Deside Isa, dait matur, “Junjungan Saq Mulie, periakang anak tiang. Ie sakit mopok, dait menderite gati sehingge ie rimpes geriq ojok dalem api dait rimpes éndah ojok dalem aiq. Tiang sampun jauq ie ojok pengiring-pengiring Pelungguh, laguq ie pade ndéq tao nyelahang ie.” Jawab Deside Isa, “Luar biase side pade niki! Side pade tetu-tetu dengan-dengan saq ndéq percaye dait sesat! Jangke piran Tiang harus araq kance side pade dait tetep sabar tipaq side pade? Jauq jauq kanak nike ojok deriki!” Sesampun kanak nike tejauq, Deside Isa préntahang sétan saq araq léq dalem kanak nike adéqne sugul. Dait sétan nike sugul, beterus kanak nike langsung selah. Sesampun nike, pengiring-pengiring Deside Isa secare husus parek dait metakén, “Kembéq tiang pade ndéq bau sediq sétan nike?” Jawab Deside Isa, “Séngaq side pade kurang percaye. Keranaq nike Tiang badaq side: Lamun side pade bedowé iman beléqne maraq tolang sawi, make side pade bau bebase léq gunung niki, ‘Ngalih ojok to!’ pasti gunung niki gen ngalih. Ndéq araq sopoq juaq saq ndéq bau side pade piaq! [ Laguq roh jahat saq maraq niki cume bau tesediq siq do'e dait puase doang.]” Sewaktu pengiring-pengiring Deside Isa bekumpul léq Galilea, Deside Isa bemanik tipaq pengiring-pengiring-Ne, “Bije Manusie gen teserahang tipaq kuase manusie. Ie gen tematéq. Laguq léq jelo saq ketelu, Ie gen teidupang.” Make pengiring-pengiring-Ne jari aséq gati. Sewaktu Deside Isa dait pengiring-pengiring-Ne rauh léq Kapernaum, penagih-penagih pajek Gedéng Allah dateng tipaq Petrus dait beketuan, “Gurunde bayah pajek Gedéng Allah atao ndéq?” Jawab Petrus, “Bayah!” Sewaktu Petrus uléq, ie teketuan juluan siq Deside Isa, “Simon, berembé menurut pendapet side? Sai saq harus bayah pajek tipaq raje-raje léq dunie niki? Rakyatne atao dengan pendateng?” “Dengan pendateng,” jawab Petrus. “Lamun maraq nike,” manik Deside Isa, “rakyat ndéq perlu bayah. Laguq ndaq ite singgung perasaan dengan-dengan nike. Jari, silaq lumbar mancing ojok danao. Bait empaq saq penembéq side bau. Léq dalem biwih empaq nike side gen ndait képéng logam saq cukup tekadu bayah pajekte kance due. Bait képéng nike dait bayah pajekte léq ie pade.” Léq waktu nike pengiring-pengiring Deside Isa parek dait metakén, “Sai saq paling beléq léq dalem Kerajaan Sorge?” Deside Isa ngemanikang sopoq kanak kodéq, dait penganjeng-Ne kanak nike léq julu ie pade. Terus Deside Isa bemanik, “Tiang badaq side pade! Setetune lamun side pade ndéq betobat dait jari maraq kanak kodéq niki, side pade ndéq gen tame dalem Kerajaan Sorge. Dengan saq ngerendahang diriqne dait jari maraq kanak kodéq niki, ie saq jari paling beléq léq dalem Kerajaan Sorge. Dait dengan saq nerimaq sopoq kanak maraq niki lantaran Tiang, artine nerimaq Tiang.” “Sai-sai saq jari penyebap salaq sopoq léman kanak-kanak kodéq saq percaye léq Tiang niki bedose, solahan lamun batu penggilingan tetaliq léq belongne terus ie tetelepang léq segare saq dalem. Celake gati dunie niki lantaran hal-hal saq jari penyebap dengan gawéq dose. Mule hal-hal saq maraq nike gen tetep araq, laguq celake gati dengan-dengan saq jari penyebapne! Lamun imende atao naénde miaq side bedose, araqan side peleng dait tetéh. Solahan side bedowé setowéq naé atao ime laguq side selamet idup bareng kance Allah, ketimbang side tetetéh ojok dalem api nerake lantong kedue ime dait naénde. Dait lamun penentengde miaq side bedose, luwit dait tetéh. Solahan side bute setowéq laguq idup bareng kance Allah, ketimbang side tetetéh ojok dalem api nerake lantong kedue penentengde.” “Pade inget! Ndaq menghine salaq sopoq léman kanak-kanak kodéq niki. Tiang badaq side, malaékat-malaékat ie pade tetep araq léq arepan Bapa Tiang léq sorge. [ Séngaq Bije Manusie rauh jari nyelametang dengan saq sesat!] Berembé pendapet side? Seandéne araq sopoq dengan saq bedowé satus dombe, terus sopoq léq antare dombe-dombe nike telang. Napi saq gen tepiaq siq dengan nike? Pasti ie gen bilin dombe-dombene saq siwaq pulu siwaq nike léq gunung dait lumbar boyaq saq telang nike. Tiang badaq side, setetune lamun ie ndait malik dombe nike, cemohne gen beléqan tipaq dombe saq sopoq nike ketimbang saq siwaq pulu siwaq lainne saq ndéq telang. Maraq nike éndah Bapa side saq léq sorge, nénten kayun salaq sopoq léman kanak-kanak niki telang.” “Lamun semetonde bedose léq side, dateng badaq ie dait jelasang napi kepelihanne. Laksaneang hal nike tedoq-tedoq antare side kance ie doang. Lamun ie turut naséhat side, artine side berhasil mauq semetonde malik. Laguq lamun ie ndéq mélé, dateng jauq sopoq atao due dengan malik. Séngaq araq tetulis léq dalem Kitab Suci, ‘Sekurang-kurangne due atao telu dengan saksi saq teperluang jari nyatayang kesalaqan sopoq dengan saq tetuduh.’ Laguq lamun ie ndéq mélé nerimaq naséhat dengan-dengan nike, sampéang hal nike tipaq jemaah. Dait ahirne, lamun ie ndéq nerimaq naséhat jemaah, anggep doang ie sebagé penagih pajek atao dengan saq ndéq kenal Allah.” Tiang badaq side: “Napi saq side pade taliq léq dunie niki, gen tetaliq éndah léq sorge. Dait napi saq side pade lekaq léq dunie niki, gen telekaq éndah léq sorge. Dait Tiang badaq side malik: Lamun léq antare side pade léq dunie niki araq due dengan sepakat mengenai napi juaq dait bedo'e, do'e nike gen tekabulang siq Bapa Tiang léq sorge. Séngaq léq mbé araq due atao telu dengan bekumpul lantaran Tiang, Tiang araq léq tengaq-tengaq ie pade.” Beterus Petrus parek ojok Deside Isa dait metakén, “Junjungan Saq Mulie, lamun semeton tiang bedose léq tiang, jangke pire kali tiang harus ngampunin ie? Napi jangke pituq kali?” Jawab Deside Isa, “Ndéq, ndéqne cume pituq kali, laguq jangke pituq pulu kali pituq kali! Séngaq hal Kerajaan Sorge seumpame maraq sopoq raje saq gen ngerékéng utang-utang hambe-hambene. Sewaktu ie mulai ngaraqang pemeriksaan, tejauq ojok ie sopoq hambe saq bedowé utang jangke bejute-jute, dait ie ndéq sanggup ngelunasin. Beterus raje nike ngican préntah adéq hambe nike tejual bareng seninene dait bijene, lantong selapuq dowéne jari bayah utangne. Hambe nike sujut léq arepan raje nike dait tunas, ‘Tuan raje, sabar juluq, tiang gen ngelunasang selapuq utang tiang.’ Raje nike periak léq ie, sehingge ie bébasang selapuq utangne. Sewaktu hambe nike sugul, ie bedait kance baturne pade pade jari hambe éndah saq berutang léq ie araq pire iyu luwéqne. Baune baturne nike, pekokne dait ie bebase, ‘Bayah selapuq utangde!’ Beterus baturne nike sujut ngéndéng tulung léq julune, ‘Sabar juluq batur, selapuqne pasti gen tiang bayah!’ Laguq hambe nike nolaq, sebalikne, ie tamaq baturne ojok dalem bui, jangke ie ngelunasang utangne. Sewaktu teserioq siq hambe-hambe saq lain napi saq sampun ie laksaneang léq baturne nike, ie pade aséq dait ngelaporang hal nike ojok raje. Beterus raje nike ngempoh hambe saq jahat nike dait bebase léq ie, ‘Hambe saq jahat! Selapuq utangde sampun tiang apus cume lantaran petunasande léq tiang. Seharusne side éndah periak léq baturde nike pade maraq tiang sampun periak léq side?’ Raje nike menggah gati. Hambe saq jahat nike tetamaq ojok dalem bui jangke ie ngelunasang selapuq utangne.” Ahirne Deside Isa nutuqang cerite-Ne siq manik niki, “Maraq nike éndah side pade sopoq-sopoq gen teperlakuang siq Bapa Tiang léq sorge, lamun side pade ndéq ihlas ngampunin baturde.” Sesampun Deside Isa tutuq manikang selapuq hal nike, Ie lumbar léman Galilea ojok daérah Yudea, léq itoqan Kokoq Yordan. Luwéq dengan ngiring Deside Isa, dait Ie nyelahang ie pade léq derike. Beterus dengan-dengan Parisi dateng jari boyaq kesalaqan adéqne bau nyalahang Deside Isa. Dengan-dengan nike metakén, “Napi kanggo dengan séang seninene lantaran alasan napi juaq?” Jawab Deside Isa, “Napi side pade ndéqman bace léq dalem Kitab Suci bahwe Allah cipteang manusie, léman penembéqne Allah jariang ie pade mame dait nine? Dait manik-Ne, ‘Keranaq nike dengan mame gen bilin inaq amaqne dait besopoq kance seninene, make deduaqne jari sopoq.’ Jari ie pade ndéqne due malik, laguq sopoq. Keranaq nike napi saq tepesopoq siq Allah, ndéq kanggo teséang siq manusie.” Beterus dengan-dengan Parisi metakén léq Deside Isa, “Lamun maraq nike kembéq Musa suruq dengan ngebéng surat séang léq seninene saq ie séang?” Jawab Deside Isa, “Musa ngijinang side pade séang seninende séngaq side pade sengke gati teajah. Laguq setetune ndéq maraq nike léq penembéqne. Tiang badaq side: Sai-sai saq séang seninene – padahal seninene nike ndéq nyeléwéng – beterus ie merariq malik kance dengan nine lain, artine dengan nike bezinah.” Make pengiring-pengiring-Ne matur léq Deside Isa, “Lamun maraq nike entan semame léq senine, bagusan ndaq merariq.” Jawab Deside Isa, “Ndéq selapuq dengan bau terimaq hal nike, cume dengan-dengan saq sampun tetentuang siq Allah. Séngaq araq dengan saq ndéq mauq merariq, lantaran ie pade mule tebijeang maraq nike. Araq éndah dengan saq ndéq iniq merariq lantaran tepiaq siq dengan lain. Dait araq éndah saq ndéq merariq, lantaran keméléqne mésaq demi Kerajaan Sorge. Sai saq bau ngerti, alurang ie ngerti.” Araq dengan-dengan jauq kanak-kanak kodéq ojok Deside Isa adéq Deside Isa toloq gading-Ne léq atas ie pade dait do'eang ie pade. Laguq pengiring-pengiring Deside Isa siliq dengan-dengan nike. Make Deside Isa bemanik léq pengiring-pengiring-Ne, “Alurang kanak-kanak nike dateng ojok Tiang! Ndaq balaq ie pade séngaq dengan-dengan maraq niki saq bedowé Kerajaan Sorge.” Beterus Deside Isa toloq gading-Ne léq atas kanak-kanak nike. Sesampun nike Deside Isa margi léman derike. Araq sopoq terune parek tipaq Deside Isa dait matur, “Paq Guru, perbuatan solah napi saq harus tiang piaq adéq tiang mauq idup sejati dait kekel?” Jawab Deside Isa, “Kembéq side beketuan léq Tiang mengenai napi saq solah? Cume araq Sopoq saq solah. Lamun side mélé idup, side harus taat léq préntah-préntah Allah.” “Préntah saq mbé nike?” basen dengan nike metakén. Jawab Deside Isa, “Ndaq nyematéq, ndaq bezinah, ndaq memaling dait ndaq jari saksi duste, pade hormatin amaq dait inaqde; dait kasihin sepadende manusie maraq side ngasihin diriqde mésaq.” “Selapuq préntah nike sampun tiang turut,” jawab terune nike. “Napi malik saq perlu?” Deside Isa bemanik léq terune nike, “Lamun side mélé jari sempurne, lumbar, jual selapuq dowénde. Béng képéngne tipaq dengan-dengan miskin, make side gen mauq harte léq sorge. Sesampun nike side dateng turut Tiang!” Sesampun dengah manik Deside Isa nike, terune nike lumbar siq susah angenne séngaq ie sugih gati. Beterus Deside Isa bemanik léq pengiring-pengiring-Ne, “Tiang badaq side, sengke gati dengan sugih tame ojok dalem Kerajaan Sorge. Dait niki éndah saq Tiang gen sampéang léq side: Molahan onte tame ojok dalem loang jarum, ketimbang dengan sugih tame ojok dalem Kerajaan Allah.” Sewaktu pengiring-pengiring-Ne dengah manik Deside Isa nike, ie pade bengaq. “Lamun maraq nike,” atur ie pade, “sai saq bau selamet?” Deside Isa merhatiang ie pade terus bemanik, “Bagi manusie hal nike mustahil! Laguq bagi Allah nénten araq sopoq juaq saq mustahil.” Beterus Petrus matur, “Pelungguh cingakin, tiang pade sampun bilin selapuq-lapuqne jari ngiring Pelungguh. Dait napi saq gen tiang pade terimaq?” Deside Isa bemanik léq ie pade, “Tiang badaq side: Setetune léq Dunie saq Baru, Bije Manusie gen melinggih léq atas tahte-Ne saq mulie. Léq waktu nike side pade pengiring-pengiring Tiang gen tokol léq atas due olas tahte jari hakimin kedue olas suku bangse Israel! Dait sebilang dengan saq sampun bilin balé, atao semeton mame atao nine, atao inaq amaqne, atao bije-bijene, atao kebon bangketne lantaran Tiang, dengan nike gen nerimaq satus kali lipet. Dait ie gen nerimaq éndah idup saq sejati dait kekel. Laguq luwéq dengan saq mangkin niki jari penembéq, gen jari saq penutuq dait luwéq saq mangkin niki jari penutuq gen jari saq penembéq.” “Kerajaan Sorge nike seumpame maraq niki: Araq sopoq dengan bedowé kebon anggur. Léq waktu kelémaq ie sugul boyaq dengan saq mélé begawéan léq kebon anggurne. Sesampun ie sepakat bayah buruh-buruh nike siq sopoq képéng perak sejelo, dengan nike suruq ie pade begawéan léq kebon anggurne. Jam siwaq kelémaq, épén dowé kebon nike sugul malik, dait serioqne dengan-dengan nganggur léq peken. Jari épén dowé kebon nike bebase léq dengan-dengan nike, ‘Silaq side pade begawéan léq kebon anggur tiang. Tiang gen bayah side pade siq upaq saq pantes.’ Dengan-dengan nike lumbar. Waktu jam due olas tengari dait jam telu kebian, épén dowé kebon nike sugul malik dait ngelaksaneang hal saq pade. Kire-kire jam lime kebian, ie sugul malik, dait serioqne masih araq dengan saq nganggur. Beterus épén dowé kebon nike beketuan léq ie pade, ‘Kembéq side pade nganjeng sejeloan léq deriki dait ndéq begawéan napi-napi?’ Jawab dengan-dengan nike, ‘Ndéq araq dengan saq mélé béng tiang pade pegawéan.’ ‘Lamun maraq nike,’ basen épén dowé kebon nike, ‘silaq side pade begawéan léq kebon anggur tiang.’ Léq waktu serep jelo, épén dowé kebon anggur nike bebase léq mandorne, ‘Empoh buruh-buruh nike, dait bayah gajine sopoq-sopoq, mulai léman buruh saq paling mudi begawéan jangke saq paling julu begawéan.’ Beterus dateng buruh-buruh saq begawéan mulai jam lime kebian. Sopoq-sopoq nerimaq upaq sopoq képéng perak. Beterus dateng éndah buruh-buruh saq begawéan léman kelémaq. Ie pade pikir gen nerimaq upaq saq lebihan. Laguq ie pade nerimaq upaq sopoq képéng perak éndah. Sewaktu ie pade nerimaq képéng nike, ie pade ngerumun léq épén dowé kebon nike: ‘Dengan saq dateng paling mudi nike begawéan cume sejam doang. Tiang pade begawéan sejeloan léq bawaq panas jelo, laguq Pelungguh bayah dengan-dengan nike pade maraq tiang!’ Épén dowé kebon anggur nike bebase léq salaq sopoq dengan léman buruh nike, ‘Semeton, tiang ndéq gawéq saq ndéq adil léq side. Tekan side setuju tebayah siq sopoq képéng perak sejelo? Mangkin silaq bait upaqde, beterus side lumbar. Tiang mule beniat ngebéng gaji léq dengan saq begawéan paling mudi nike siq upaq saq pade maraq saq tiang béng léq side. Napi tiang ndéq kanggo gawéq semélé angen tiang siq dowén tiang mésaq? Atao side talon até, séngaq tiang murah até?’ ” Beterus Deside Isa bemanik malik, “Maraq nike éndah dengan-dengan saq penutuq gen jari saq penembéq, dait dengan-dengan saq penembéq gen jari saq penutuq.” Sewaktu Deside Isa lumbar ojok Yerusalem, léq tengaq langan Ie ngemanikang kedue olas pengiring-Ne adéqne bekumpul bekelin léman dengan-dengan lain. Beterus Deside Isa bemanik léq ie pade, “Dengahang! Mangkin ite lumbar ojok Yerusalem. Léq derike Bije Manusie gen teserahang tipaq imam-imam kepale dait ahli-ahli Taurat. Terus Ie gen tehukum maté, sesampun nike Ie gen teserahang tipaq bangse-bangse saq ndéq kenal kance Allah, adéq Ie teoloq-oloq, dait tesiksaq, terus tepakuq léq kayuq salib. Laguq léq jelo saq ketelu, Ie gen teidupang malik.” Sesampun nike, senine Zebedeus dait bije-bijene parek tipaq Deside Isa. Léq arepan Deside Isa ie sujut tunas sopoq hal. Manik Deside Isa, “Napi mélénde inaq?” Jawab inaq nike, “Préntahang adéqne deduaq anak tiang niki éraq bau tokol léq kiri dait kanan Pelungguh, léq dalem Kerajaan Pelungguh.” “Side pade ndéq nenaoq napi saq side pade tunas,” manik Deside Isa léq ie pade. “Napi side pade sanggup nginem léman cawan penderitean saq harus Tiang inem?” “Sanggup!” jawab ie pade. Deside Isa bemanik, “Mule side pade gen nginem éndah léman cawan penderitean Tiang. Laguq mengenai sai saq gen tokol léq kanan atao kiri Tiang, nike ndéqne Tiang saq berhak nentuang. Hal nike tesadangang tipaq dengan saq sampun tetentuang siq Bapa Tiang.” Waktu kesepulu pengiring saq lain dengah hal nike, ie pade sili léq kedue dengan saq besemetonan nike. Keranaq nike, Deside Isa ngemanikang ie pade selapuq, dait bemanik, “Side pade nenaoq bahwe pemimpin-pemimpin bangse saq ndéq kenal kance Allah nindes rakyatne. Dait pembeléq-pembeléqne bedowé wewenang penoq tipaq ie pade. Laguq side pade ndéq kanggo maraq nike. Sebalikne, dengan saq mélé jari beléq léq antare side pade, ie harus jari pelayande. Dait dengan saq mélé jari saq penembéq léq antare side pade, ie harus jari hambende. Pade maraq Bije Manusie nike éndah; Ie rauh nénten jari telayanin, laguq jari ngelayanin, dait nyerahang nyawe-Ne jari tebusan tipaq dengan luwéq.” Sewaktu ie pade sugul léman kote Yeriko, luwéq dengan ngiring Deside Isa. Araq due dengan bute kenyeke tokol léq sedin rurung. Waktu ie pade dengah bahwe Deside Isa bemargi léq derike, ie pade bekuih, “Junjungan Saq Mulie, Keturunan Daud, periakang tiang pade!” Dengan luwéq saq araq léq derike peringet ie pade adéq ie pade tedoq. Laguq ie pade bekuih sayan keras, “Junjungan Saq Mulie, Keturunan Daud! Periakang tiang pade!” Beterus Deside Isa mentelah, dait ngemanikang kedue dengan bute nike. Ie bemanik, “Napi saq side pade melétang adéq Tiang piaq léq side pade?” Jawab kedue dengan bute nike, “Junjungan Saq Mulie, tiang pade melét tao nyerioq!” Deside Isa periak léq deduaqne, terus Ie jamah penenteng ie pade. Langsung waktu nike éndah ie pade tao nyerioq. Beterus ie pade ngiring Deside Isa. Sewaktu sampun rapet Yerusalem, Deside Isa dait pengiring-pengiring-Ne rauh léq Betpage léq Bukit Zaitun. Léq derike Deside Isa ngemanikang due pengiring-Ne lampaq bejulu dait bepesen: “Silaq lumbar ojok kampung saq araq léq julunde nike. Léq derike side pade gen ndait bagal dait anakne kenyeke tegeteng. Lekaq deduaqne terus jauq ojok deriki. Lamun araq dengan saq beketuan léq side, badaqang, ‘Junjungan Saq Mulie merluang bagal niki’, make dengan nike pasti gen ngalurang bagal nike tejauq.” Siq care nike telaksane napi saq tesampéang siq nabi, maraq niki, “Sampéang léq putri Sion: Sereminang, Rajende kenyeke rauh ojok side. Ie lemah lembut dait nunggang sopoq bagal, sopoq anak bagal saq masih odaq.” Beterus kedue pengiring-Ne nike lumbar dait ngelaksaneang napi saq temanikang siq Deside Isa tipaq ie pade. Ie pade jauq bagal nike lantong anakne, terus ie pade lamak bongkor bagal nike kadu jubahne. Beterus Deside Isa taék. Luwéq dengan léq derike kelat jubahne léq langan, dait dengan-dengan lain peleng pémpang-pémpang lolo terus jéjérne éndah léq tengaq langan. Dengan luwéq saq lampaq léq julu dait léq mudi Deside Isa pade bekuih-kuih, “Hosana tipaq Keturunan Daud! Teberkahin Ie saq rauh dalem peséngan Tuhan! Hosana léq taoq saq maheagung!” Beterus, sewaktu Deside Isa tame ojok kote Yerusalem, selapuq kote nike jari biur lantur. “Sai dengan niki?” basen dengan-dengan léq kote nike beketuan. “Ie Nabi Isa léman Nazaret, kote léq Galilea,” jawab dengan-dengan luwéq saq ngiring Deside Isa. Beterus Deside Isa tame ojok Gedéng Allah, dait sediq selapuq dengan saq kenyeke bedagang dait belanje léq derike. Balik belah-Ne selapuq méje-méje saq tekadu jari nukahang képéng, dait bangku-bangku saq tekadu bedagang kedit dare. Terus Deside Isa bemanik léq dengan-dengan nike, “Léq dalem Kitab Suci tetulis bahwe Allah bemanik, ‘Gedéng Tiang gen tesebut gedéng do'e.’ Laguq side pade jariang ie taoqne bekumpul dengan-dengan jahat!” Dengan-dengan bute dait dengan-dengan démpang parek tipaq Deside Isa léq Gedéng Allah, dait ie pade teselahang siq Deside Isa. Laguq sewaktu imam-imam kepale dait ahli-ahli Taurat serioq muqjizat-muqjizat saq tepiaq siq Deside Isa dait pirengang kanak-kanak saq bekuih-kuih léq dalem Gedéng Allah: “Hosana tipaq Keturunan Daud!” ie pade jari menggah gati. Ie pade matur léq Deside Isa, “Napi Pelungguh pireng saq ie pade ucapang nike?” “Enggih, Tiang dengah,” jawab Deside Isa. “Napi side pade ndéqman bace ayat Kitab Suci niki: ‘Léman biwih kanak-kanak, malahan bebéaq-bebéaq saq kenyeke nyusu, Tuhan sampun nyedieang puji-pujian’?” Sesampun nike Deside Isa bilin dengan-dengan nike, beterus margi ojok kote Betania dait mererepan léq derike. Léq jemaq kelémaqne, léq dalem pemargian-Ne tulak ojok kote, Deside Isa beridap seduk. Ie cingakin sopoq lolo are léq sedin rurung, terus laiq-Ne lolo are nike, laguq ndéq araq buaqne, kecuali daun-daunne doang. Terus Deside Isa bemanik léq lolo are nike, “Ndaq bebuaq malik jangke selaéq-laéqne!” Langsung lolo are nike gero. Sewaktu pengiring-pengiring Deside Isa serioq peristiwe nike, selapuqne bengaq gati. Ie pade metakén, “Kembéq lolo are nike selung-selung gero?” Manik Deside Isa, “Tiang badaq side, setetune lamun side pade percaye dait ndéq bimbang, side pade bau laksaneang napi saq sampun Tiang laksaneang léq lolo are niki. Dait ndéqne nike doang, malahan lamun side pade bebase tipaq gunung niki, ‘Kerungkahan dait ngalih ojok segare!’ Make hal nike gen telaksane. Dait napi juaq saq side pade tunas dalem do'e, side pade gen nerimaq ie asal side pade percaye.” Beterus Deside Isa tulak ojok Gedéng Allah, terus tame dait ngajahang léq derike. Sewaktu Ie kenyeke ngajahang, imam-imam kepale dait pemimpin-pemimpin Yahudi parek dait metakén léq Ie, “Atas dasar napi Pelungguh ngelaksaneang selapuqne nike? Sai saq aturin Pelungguh kuase nike?” Jawab Deside Isa, “Tiang éndah mélé beketuan léq side pade, dait lamun side pade bejawab, Tiang éndah gen badaq side siq kuase sai Tiang ngelaksaneang hal-hal nike. Siq kuase sai Yahya baptis dengan? Kuase Allah atao manusie?” Beterus imam-imam kepale dait pemimpin-pemimpin Yahudi nike mulai berunding léq antare ie pade. Ie pade bebase, “Lamun ite jawab, ‘Siq kuase Allah,’ Ie gen bemanik, ‘Lamun maraq nike kembéq side pade ndéq percaye léq Yahya?’ Laguq lamun ite bejawab, ‘Siq kuase manusie,’ ite takut léq dengan luwéq, séngaq selapuq dengan anggep Yahya nike nabi.” Jari, jawab ie pade, “Mindah tiang.” Beterus Deside Isa bemanik léq ie pade, “Lamun maraq nike, Tiang éndah ndéq gen badaq side siq kuase sai Tiang ngelaksaneang selapuqne niki.” “Mangkin berembé pendapet side mengenai hal niki?” manik Deside Isa selanjutne. “Araq sopoq bapaq bedowé due bije mame. Ie lumbar ojok bijene saq sengake dait bebase, ‘Nune, lalo begawéan ojok kebon anggur jelo niki.’ ‘Tiang ndéq mélé,’ jawab kanak nike. Laguq ndéq ngonéq ie berobah pikiran, terus ie lalo ojok kebon nike. Beterus bapaqne nike lumbar ojok bije saq kedue, dait bebase hal saq pade éndah. ‘Enggih, Bapaq,’ jawab bije saq kedue nike. Laguq ie ndéq lumbar. Nah, léq antare kedue bije nike, saq mbé ngelaksaneang keméléq bapaqne?” “Saq sengake,” jawab ie pade. Terus Deside Isa bemanik malik léq ie pade, “Tiang badaq side, setetune penagih-penagih pajek dait dengan-dengan nine pelacur gen juluan tame Kerajaan Allah ketimbang side pade. Séngaq Yahya nike rauh, jari nyatayang léq side pade care idup saq tekayunang siq Allah, dait side pade ndéq percaye léq pengajahanne; laguq penagih-penagih pajek dait dengan-dengan nine pelacur nike percaye léq Yahya. Laguq timaq side pade sampun serioq selapuqne nike, side pade ndéq mélé ngerobah pikirande dait ndéq percaye léq ie.” “Pade dengahang malik perumpamean saq sopoq niki,” manik Deside Isa. “Araq sopoq majikan bedowé kebon dait talet anggur léq kebon nike. Ie miaq lambah léq sekelining kebon nike, dait kaliq longkak jari taoqne peres anggur, terus ie penganjeng menare taoq dengan bejage. Sesampun nike séweangne kebon nike léq penyakap-penyakap, beterus ie berangkat ojok negeri lain. Waktu dateng musim padas buaq anggur, majikan nike ngutus pelayan-pelayanne tipaq penyakap-penyakap nike jari nerimaq bagianne. Laguq penyakap-penyakap kebon nike bau pelayan-pelayan saq teutus siq majikan nike: Saq sopoq tepadek, saq lain tematéq dait saq lain malik tepeléwas siq batu. Majikan kebon anggur nike ngutus malik pelayan-pelayan saq lain, luwéqan léman saq penembéq. Laguq ie pade éndah teperlakuang pade maraq saq juluan. Ahirne majikan kebon anggur nike ngutus bijene mésaq tipaq ie pade, pikirne, ‘Pasti anak tiang gen tehormatin.’ Laguq sewaktu penyakap-penyakap nike serioq bije majikanne nike, ie pade bebase sopoq kance saq lain, ‘Niki ie ahli warisne, silaq ite matéq ie, adéq ite saq mauq warisanne!’ Make bije majikanne nike tebau, dait sautne ojok luah, terus tematéq.” Deside Isa beketuan, “Lamun épén dowé kebon anggur nike tulak, gen ie kumbéqang penyakap-penyakapne nike?” Jawab ie pade, “Pasti ie gen matéq dengan-dengan jahat nike, terus séweangne kebon anggur nike tipaq dengan lain saq gen ngebéng ie hasil léq musim padas anggur.” Deside Isa bemanik léq ie pade, “Napi side pade ndéq uwah bace saq tetulis léq dalem Kitab Suci? ‘Batu saq tetetéh siq tukang bangunan sampun jari batu saq paling utame. Niki karye Tuhan; sopoq karye saq ajaip léq julunte!’ ” “Keranaq nike Tiang badaq side, bahwe Kerajaan Allah gen tebait léman side, dait gen teicanin tipaq sopoq bangse saq gen ngasilang buaq Kerajaan nike. [ Sai-sai saq geriq léq batu nike gen ancur; dait sai-sai saq tendet siq batu nike, ie gen remuk.]” Sewaktu imam-imam kepale dait dengan-dengan Parisi nike pirengang perumpamean Deside Isa nike, ie pade ngerti bahwe Deside Isa bebaos mengenai ie pade. Jari, ie pade berusahe bau Deside Isa. Laguq ie pade takut léq dengan luwéq, séngaq dengan-dengan nike anggep Deside Isa nabi. Deside Isa bemanik malik léq dengan luwéq kadu perumpamean, manik-Ne, “Kerajaan Sorge nike seumpame maraq niki: Sopoq raje ngaraqang gawé jari ngawinang bijene. Raje nike ngutus pelayan-pelayanne ngempoh dengan-dengan saq sampun tepesilaq ojok gawé nike, laguq dengan-dengan saq tepesilaq nike ndéq mélé dateng. Beterus raje nike ngutus malik pelayan-pelayan saq lain. Raje nike bebase léq pelayan-pelayanne, ‘Sampéang tipaq dengan-dengan saq tepesilaq nike: Pesajiq léq gawé nike sampun tesiepang. Sampi dait anak sampi tiang saq saq paling solah sampun tesembeléh. Selapuqne sampun tesiepang. Silaq side pade dateng ojok gawé ngawinang!’ Laguq temué-temué saq tepesilaq nike ndéq ngerunguq ie. Ie pade selapuq lumbar ojok taoqne begawéan – araq saq ojok lendangne, saq lainne lumbar ojok taoqne berusahe; dait saq lainne bau pelayan-pelayan nike, terus tempuk dait ie pade tematéq. Raje nike jari menggah gati. Beterus ie ngutus tentere-tenterene jari nyematéq tukang nyematéq pelayan-pelayanne nike, dait sedut kote ie pade. Sesampun nike raje ngempoh pelayan-pelayanne, terus bebase, ‘Gawé niki sampun tesiepang laguq dengan-dengan saq tepesilaq ndéq pantes. Lalo ojok rurung-rurung beléq, dait pesilaq dengan seluwéq-luwéqne dateng ojok gawé niki.’ Jari pelayan-pelayan nike lalo ojok rurung-rurung beléq, terus ngumpulang selapuq dengan saq daitne léq derike, saq soléh dait saq jahat. Make taoq gawé ngawinang nike jari penoq siq temué-temué. Beterus raje nike tame serioq temué-temuéne nike. Laguq araq serioqne sopoq temué saq ndéq ngengadu kelambi begawé. Beterus raje nike beketuan léq ie, ‘Semeton, berembé entande jangke bau tame ojok deriki, padahal side ndéq kadu kelambi begawé?’ Dengan nike ndéq tao bejawab. Beterus raje nike bebase léq pelayan-pelayanne, ‘Sékoq ime dait naén dengan niki, terus tetéh ie ojok luah léq taoq saq peteng dedet. Léq derike ie gen nangis dait menderite.’ ” Beterus maraq niki entan Deside Isa nutuqang perumpamean nike, “Mule luwéq dengan saq tempoh laguq sekediq saq tepiléq.” Beterus dengan-dengan Parisi lumbar dait berunding adéq ie pade mauq langan nyalahang Deside Isa siq care besoal jawab. Make ie pade ngutus pengiring-pengiring ie pade parek ojok Deside Isa bareng kance dengan-dengan golongan Herodes. Dengan-dengan nike matur léq Deside Isa, “Bapaq Guru, tiang pade nenaoq Pelungguh jujur. Pelungguh ngajahang secare terus terang mengenai langan saq kenaq tipaq Allah, dait nénten takut léq sai juaq. Séngaq Pelungguh nénten piléq kasih. Keranaq nike tunas Pelungguh ngendike léq tiang pade: Menurut aturan agamente, kanggo napi nénten bayah pajek léq Kaisar?” Deside Isa wikan maksut jahat dengan-dengan nike, make Ie bemanik léq ie pade, “Hai, dengan-dengan munapik! Kembéq side pade beniat boyaq-boyaq kesalaqan adéq bau nyalahang Tiang? Cobaq petitoqang léq Tiang sopoq képéng perak saq side pade kadu bayah pajek!” Beterus dengan-dengan nike ngaturin Deside Isa sopoq képéng perak. Deside Isa beketuan léq ie pade, “Gambar dait aran sai niki?” “Gambar dait aran Kaisar,” jawab ie pade. Make Deside Isa bemanik tipaq ie pade, “Lamun maraq nike serahang ojok Kaisar napi saq jari dowén Kaisar, dait tipaq Allah napi saq jari dowén Allah.” Waktu ie pade dengah penjelasan nike ie pade bengaq. Ahirne dengan-dengan nike lumbar bilin Deside Isa. Léq jelo nike éndah, araq dengan-dengan Saduki parek ojok Deside Isa. Ie pade golongan saq bedowé pendapet bahwe dengan ninggal ndéq gen idup malik. Ie pade metakén léq Deside Isa, “Bapaq Guru, Musa ngajahang maraq niki: Lamun araq dengan mame ninggal, dait ie ndéq bedowé bije, semetonne harus merariq kance bebalune adéq ie bau ngebéng keturunan tipaq dengan saq sampun ninggal nike. Laguq léq antare tiang pade araq pituq dengan besemetonan. Saq sengake merariq, terus ninggal ndéq bedowé bije, beterus bebalune tebait siq semetonne. Semetonne nike éndah ninggal ndéq bedowé bije. Maraq nike éndah léq semetonne saq ketelu dait seterusne jangke saq kepituq. Ahirne dengan nine nike éndah ninggal. Léq waktu dengan ninggal teidupang malik, sai semame dengan nine nike? Séngaq kepituq-pituqne sampun merariq kance ie.” Jawab Deside Isa, “Side keliru gati, séngaq side pade ndéq ngerti Kitab Suci dait kuase Allah. Séngaq éraq lamun dengan ninggal teidupang malik, ie pade ndéq gen merariq malik, laguq ie pade gen idup maraq malaékat léq sorge. Napi side pade ndéqman bace napi saq temanikang siq Allah mengenai dengan ninggal teidupang malik? Allah bemanik, ‘Tiang niki Allah Ibrahim, Allah Ishak dait Allah Yakub.’ Allah nike nénten Allah dengan ninggal, laguq Allah dengan saq idup!” Sewaktu dengan luwéq nike dengah penjelasan Deside Isa, ie pade takjub siq pengajahan-Ne. Sewaktu dengan-dengan Parisi pireng bahwe Deside Isa sampun miaq dengan-dengan Saduki ndéq tao bejawab malik, ie pade bekumpul. Salaq sopoq léq antarene, ahli Taurat, ie metakén léq Deside Isa jari boyaq kesalaqan-Ne: Ie bebase, “Paq Guru, préntah napi saq paling utame léq dalem Hukum Taurat?” Jawab Deside Isa, “Kasihin Allah, Tuhan side siq segenep aténde, dait siq segenep jiwende, dait siq segenep akal budinde. Nike préntah saq utame dait saq paling penting! Préntah kedue pade maraq saq utame nike: Kasihin sepadende manusie, maraq side ngasihin diriqde mésaq. Selapuq isi Hukum Taurat dait kitab nabi-nabi dasarne léq kedue préntah nike.” Sewaktu dengan-dengan Parisi masih bekumpul léq derike, Deside Isa beketuan léq ie pade, “Napi pendapet side pade mengenai Almasih? Ie keturunan sai?” “Keturunan Daud,” jawab ie pade. Deside Isa bemanik léq ie pade, “Lamun maraq nike, kembéq Roh Allah ngicanin Daud ilham jari nyebut Almasih nike ‘Junjungan Saq Mulie’? Séngaq Daud bebase, ‘Tuhan sampun bemanik léq Junjungan tiang: Melinggih léq sedi kanan Tiang, jangke Tiang piaq musuh-musuh Deside takluk léq Deside.’ Jari lamun Daud nike nyebut Almasih nike, ‘Junjungan Saq Mulie’, segerah Junjungan Saq Mulie nike keturunan Daud?” Ndéq araq sopoq dengan juaq saq tao jawab Deside Isa. Dait léman jelo nike ndéq araq dengan bani metakén napi-napi léq Deside Isa. Beterus Deside Isa bemanik léq dengan luwéq dait tipaq selapuq pengiring-Ne, “Ahli-ahli Taurat dait dengan-dengan Parisi teican kuase jari napsirang Hukum Taurat. Keranaq nike side pade harus taat dait ngelaksaneang selapuq hal saq ie pade ajahang léq side. Laguq ndaq side pade turut napi saq ie pade laksaneang, séngaq ie pade ngajahang laguq ie pade ndéq ngelaksaneang. Ie pade tuntut hal-hal saq sengke dait miaq aturan saq berat, laguq ndéq araq gati usahene tulung dengan ngelaksaneang selapuq hal nike. Selapuq saq ie pade laksaneang tujuanne cume adéqne teserioq siq dengan. Ie pade sediah ngengadu tali sembahyang saq gamber-gamber dait pebélo ombér-ombér jubahne! Ie pade seneng melinggih léq taoq saq paling tehormat léq taoq dengan-dengan begawé, dait melinggih léq kursi saq paling julu léq balé-balé ibadah. Ie pade demen tehormatin siq dengan léq peken-peken dait teempoh ‘Guru’. Laguq side pade, ndaq gati mélé tesebut ‘Guru’, séngaq side cume bedowé sopoq Guru dait side pade selapuq besemetonan. Dait ndaq side sebut sai juaq léq dunie niki siq sebutan, ‘Bapa’, séngaq Bapa side cume sopoq, Bapa saq léq sorge. Ndaq éndah side pade mélé tesebut ‘Pemimpin’, séngaq cume araq sopoq Pemimpinde, nike Almasih. Dengan saq paling beléq léq antare side pade, ie harus jari pelayande. Dait dengan saq nyombongang diriqne gen terendahang, dait dengan saq ngerendahang diriqne gen tetinggiang.” “Celake side pade ahli-ahli Taurat dait dengan-dengan Parisi! Side pade dengan-dengan munapik séngaq halangin dengan tame ojok Kerajaan Sorge. Side mésaq ndéq mélé tame Kerajaan Sorge, laguq dengan lain saq mélé side pade halangin. [ Celake side ahli-ahli Taurat dait dengan-dengan Parisi: Side pade dengan-dengan munapik. Side pade tipu bebalu-bebalu dait ngerampas baléne dait jari seboq kejahatande nike side pade bedo'e bélo-bélo. Keranaq nike side pade pasti gen nerimaq hukuman saq beratan!] Celake side ahli-ahli Taurat dait dengan-dengan Parisi! Side pade dengan-dengan munapik! Side pade lumbar jaoq-jaoq mbelat segare, dait jelajah daratan cume jari miaq sopoq dengan turut agamende. Dait sesampun dengan nike tame agamende, side pade jariang ie calon isi nerake, saq due kali jahatan léman side mésaq! Celake side pade pemimpin-pemimpin saq bute! Side pade ngajahang hal niki, ‘Lamun dengan besumpah demi Gedéng Allah, sumpah dengan nike ndéq sah; laguq lamun dengan besumpah demi emas léq dalem Gedéng Allah, dengan nike ndéq gen lepas léman sumpahne.’ Side pade dengan-dengan bodo dait bute! Mbé saq pentingan; emas atao Gedéng Allah saq jariang emas nike suci? Side pade éndah ngajahang maraq niki, ‘Lamun dengan besumpah demi méje taoq kurban, dengan nike ndéq tetuntut siq sumpahne; laguq lamun dengan besumpah demi persembahan léq atas méje taoq kurban nike, make ie gen tetuntut siq sumpahne nike.’ Hai side pade dengan-dengan bute! Mbé saq pentingan? Persembahanne atao méje taoq kurban saq miaq persembahan nike jari suci? Keranaq nike, lamun dengan besumpah demi méje taoq kurban, nike artine ie besumpah demi méje taoq kurban, dait demi selapuq persembahan saq araq léq atasne. Dait lamun dengan besumpah demi Gedéng Allah, nike artine ie besumpah demi Gedéng Allah nike, dait demi Allah saq meneng léq derike. Dait lamun dengan besumpah demi sorge, nike artine ie besumpah demi tahte Allah dait demi Allah saq betahte léq derike. Celake side pade ahli-ahli Taurat dait dengan-dengan Parisi! Side pade dengan-dengan munapik. Reragian misalne selasih, adas manis dait jinten éndah side aturang sepersepulune. Padahal hal-hal saq paling penting léq dalem Hukum Taurat, misalne: Keadilan, belas kasihan, dait kesetiean, nike ndéq side pade perhatiang. Padahal hal-hal nike saq harus side pade laksaneang, dait ndaq lupaqang hal saq lain-lain éndah. Side pade pemimpin-pemimpin saq bute! Kelikit léq dalem aiq inemde side pade saring, padahal onte side pade belet! Celake side pade ahli-ahli Taurat dait dengan-dengan Parisi! Side pade dengan-dengan munapik! Jembung-jembung dait piring-piringde side pade roas bersi-bersi léq bagian luahne, padahal bagian dalemne kotor gati siq hal-hal saq side pade mauq secare pakse dait serakah. Hai dengan Parisi saq bute! Bisoq juluq bersi-bersi bagian dalem jembung piringde, adéq bagian luahne éndah jari bersi! Celake side pade ahli-ahli Taurat dait dengan-dengan Parisi! Side pade dengan-dengan munapik! Side pade maraq kuburan saq tecét putéq; léq luahne penggitan solah, laguq léq dalemne penoq siq tolang dait selapuq saq berek. Maraq nike éndah halne side pade. Side pade solah léq julun dengan; laguq léq dalemne, penoq siq hal-hal saq munapik dait jahat.” “Celake side pade ahli-ahli Taurat dait dengan-dengan Parisi! Side pade dengan-dengan munapik! Side pade piaqang nabi-nabi makam saq solah, dait side pade payas tugu dengan-dengan soléh. Dait side pade bebase, ‘Lamun tiang pade araq léq jaman leluhur tiang pade laéq, tiang pade ndéq gen milu kance ie pade nyematéq nabi-nabi.’ Jari, side pade ngaku mésaq bahwe side pade keturunan dengan-dengan saq nyematéq nabi-nabi! Lamun maraq nike, terusang dait seleséang dose-dose saq sampun temulai siq leluhurde nike! Side pade jahat! Dait keturunan dengan jahat! Segerah side pade bau nyelametang diriq léman hukuman api nerake? Pade dengahang pacu-pacu: Tiang gen ngutus nabi-nabi tipaq side pade, dengan-dengan bijaksane dait guru-guru; terus separo léman dengan-dengan nike gen side pade matéq, dait separo saq lain gen side pade pakuq léq kayuq salib. Araq éndah saq gen side pade siksaq léq dalem balé-balé ibadah, dait gen side pade aniaye léman sopoq kote ojok kote saq lain. Keranaq nike side pade gen tehukum lantaran side pade nyematéq dengan-dengan saq ndéq salaq – temulai léman Habil saq ndéq salaq, jangke ninggalne Zakaria bije Berekia, saq side pade matéq léq antare Gedéng Allah dait méje taoq kurban. Tiang badaq side: Selapuqne nike gen tetanggung siq dengan-dengan jaman niki!” “Yerusalem, Yerusalem! Side matéq nabi-nabi. Utusan-utusan Allah side peléwas siq batu jangke ninggal. Sampun pire kali Tiang mélé ngumpulang selapuq pendudukde, maraq inen manuk saq kekep anak-anakne léq bawaq kelétékne, laguq side ndéq mélé! Pade serioq balénde gen tebilin dait jari sepi. Tiang badaq side: Mulai mangkin side ndéq gen serioq Tiang malik, jangke side bebase, ‘Teberkahin Ie saq rauh dalem peséngan Tuhan.’ ” Léq waktu Deside Isa sugul léman Gedéng Allah, pengiring-pengiring-Ne parek tipaq Ie, dait nijoqang bangunan-bangunan Gedéng Allah nike. Deside Isa bemanik léq ie pade, “Napi side pade serioq selapuqne nike? Tiang badaq side: Setetune ndéq araq sopoq juaq batu léq bangunan-bangunan nike saq masih beronjoq maraq béngan. Selapuqne gen terobohang.” Beterus Deside Isa lumbar ojok Bukit Zaitun, dait waktu Ie kenyeke melinggih, pengiring-pengiring-Ne secare husus parek tipaq Ie jari matur. Ie pade matur léq Deside Isa, “Silaq Pelungguh sampéang léq tiang pade piran selapuqne nike gen telaksane dait napi saq jari tande-tande kerauhan Pelungguh dait ahir jaman?” Jawab Deside Isa, “Pade waspade, ndaq side pade jangke tetipu. Séngaq luwéq dengan gen dateng kadu aran Tiang dait bebase, ‘Tiang niki Almasih!’ Ie pade gen miaq luwéq dengan jari sesat. Side pade gen dengah suare-suare perang dait berite-berite mengenai perang, laguq ndaq takut. Séngaq hal-hal nike harus telaksane, laguq hal nike ndéq berarti bahwe sampun wayene kiamat. Bangse saq sopoq gen perang ngelawan bangse saq lain, dait negare saq sopoq gen nyerbu negare saq lain. Léq mbé-mbé gen araq bahle kelapahan dait lindur. Selapuqne nike baruq awal penderitean sendéqman dateng jaman saq baru. Beterus side pade gen tebau dait teserahang jari tesiksaq dait tematéq. Seantéro dunie gen meriq léq side pade séngaq side pade jari pengiring Tiang. Léq waktu nike, luwéq dengan gen murtat, saling hianat dait saling meriqang sopoq kance saq lain. Luwéq gen dateng nabi-nabi palsu dait ie pade gen miaq dengan luwéq jari sesat. Kejahatan gen jari sayan luwéq jangke luwéq dengan engkah ngasihin Allah dait sepade manusie. Laguq dengan saq tahen jangke penutuqne, gen teselametang. Dait Kabar Solah mengenai Kerajaan Allah gen tekabarang ojok seantéro dunie, adéq selapuq dengan dengah hal nike. Sesampun nike baruq kiamat nike dateng.” “Side pade gen serioq berembé ‘Perbuatan najis saq miaq binase’, maraq saq tesampéang siq Nabi Daniel, nganjeng léq taoq saq suci (hal niki saq harus teperhatiang siq dengan saq mace). Léq waktu nike dengan-dengan saq araq léq Yudea harus pelai ojok pegunungan. Dengan saq araq léq atas atep balé, ndaq turun ojok dalem baléne bait napi juaq. Dengan saq kenyeke araq léq lendangne, ndaq tulak bait jubahne. Celake inaq-inaq saq kenyeke betian, atao inaq-inaq saq masih penyusuq bebéaqne léq waktu nike! Pade bedo'e adéq ndaq jangke side harus pelai léq musim telih atao léq jelo Sabat! Léq jelo-jelo saq luwéq sengsare nike, gen araq kesusahan beléq maraq saq ndéq uwah araq léman dunie tecipteang jangke mangkin niki, dait ndéq gen araq malik. Seandéne Allah nénten pesingket waktune; make ndéq araq sopoq dengan juaq saq selamet. Laguq lantaran dengan-dengan saq sampun tepiléq siq Allah nike, make Ie pesingket waktune. Léq waktu nike, lamun araq dengan badaq side, ‘Pade serioq, Almasih nike araq léq deriki!’ atao ‘Ie araq léq derike!’ – ndaq gati percaye léq dengan nike. Séngaq almasih-almasih palsu dait nabi-nabi palsu gen dateng. Ie pade gen miaq tande-tande saq luar biase dait macem-macem muqjizat jari nipu, lamun bau dengan-dengan saq sampun tepiléq siq Allah éndah. Jari, pade inget! Tiang sampun juluan badaq hal nike léq side pade sendéqman hal nike telaksane. Lamun dengan bebase léq side, ‘Serioq, Ie araq léq derike léq padang gurun!’ – ndaq side pade lumbar ojok derike. Atao lamun ie pade bebase, ‘Serioq, Ie araq léq dalem kamar niki!’ – ndaq percaye. Séngaq kerauhan Bije Manusie maraq cahaye kisap saq ngempor léman timuq jangke dateng bat. Léq mbé araq bangké, léq derike araq kedit saq girang ngaken bangké.” “Ndéq ngonéq sesampun mase kesusahan nike, sinar jelo gen jari peteng, dait bulan ndéq becahaye. Bintang-bintang gen geriq léman langit, dait selapuq kuase saq araq léq langit jari biur lantur. Sesampun nike, tande Bije Manusie gen penggitan léq langit. Léq waktu nike selapuq bangse léq gumi gen nangis éroq aséq. Ie pade serioq Bije Manusie rauh léq atas awan siq kuase dait kemuliean saq beléq. Terompét beléq gen tepuniqang, dait Bije Manusie gen ngutus malaékat-malaékat-Ne ngumpulang dengan-dengan saq sampun Ie piléq léman keempat penjuru gumi, dait léman poton langit saq sopoq jangke poton langit saq lain.” “Pade bait perajahan léman lolo are. Lamun pémpang-pémpangne ijo dait odaq, terus mulai besuli, side pade gen nenaoq bahwe musim panas sampun rapet. Maraq nike éndah lamun side pade serioq hal-hal nike telaksane, side pade nenaoq bahwe waktune sampun rapet gati. Tiang badaq side: Setetune hal-hal nike gen telaksane sendéqman dengan-dengan saq idup mangkin niki ninggal selapuqne. Langit dait gumi gen musnah, laguq manik Tiang gen kekel selaéq-laéqne.” “Ndéq araq saq nenaoq piran jelone dait jamne, malaékat-malaékat léq sorge nénten wikan, Bije saq asalne léman Allah éndah nénten wikan, cume Bapa doang saq wikan. Lamun Bije Manusie rauh éraq, keadaanne pade maraq jaman Nuh laéq. Léq jelo-jelo sendéqman belabur beléq nike, dengan-dengan bekelor, nginem dait merariq. Tetep maraq nike jangke waktune Nuh tame ojok dalem kapalne. Sewaktu ie pade selapuq tetimpe siq belabur nike, baruq ie pade sadar napi saq kenyeke ie pade alamin. Maraq nike éndah keadaanne éraq lamun Bije Manusie nike rauh. Léq waktu nike, lamun araq due dengan kenyeke begawéan léq lendang: Saq sopoqne gen tejauq dait saq sopoqne malik teadéqang. Lamun due dengan nine kenyeke nujaq gandum: Saq sopoqne gen tejauq, dait saq sopoqne malik gen teadéqang. Jari, pade siep sedie, séngaq side pade ndéq nenaoq piran Tuhande rauh. Ingetang hal niki! Lamun épén balé nenaoq jam pire léq waktu kemalem maling gen dateng, pasti ie ndéq gen mesaré adéq maling nike ndéq tame ojok baléne. Keranaq nike, side pade éndah harus tetep siep sedie. Séngaq Bije Manusie gen rauh léq waktu saq side pade ndéq badéq.” Deside Isa bemanik malik, “Lamun maraq nike, sai pelayan saq setie dait bijaksane, saq teangkat siq majikanne jari kepale tipaq pelayan-pelayan lain, adéq ie ngebéng ie pade bekelor léq waktune? Bahagie gati pelayan saq tedait kenyeke ngelaksaneang tugasne waktu majikanne tulak. Tiang badaq side: Setetune pelayan nike gen tesaduq siq majikanne jari jagaq selapuq dowéne. Laguq lamun pelayan nike jahat, ie gen bebase léq dalem angenne, ‘Majikan tiang masih ngonéq tulak,’ terus ie mulai ngempuk pelayan-pelayan saq lain, sesampun nike ie bekelor dait nginem kance dengan-dengan saq girang bowos. Beterus majikanne tulak léq jelo dait jam saq ndéq ie badéq. Make pelayan nike gen tesiksaq jangke maté siq majikanne, terus tetetéh ojok taoq dengan-dengan munapik. Ie pade gen nangis dait menderite léq derike.” “Hal Kerajaan Sorge, keadaanne maraq perumpamean niki: Sepulu dedare pengiring pengantén pade bait dilahne mésaq, beterus ie pade lumbar nyambut pengantén mame. Lime léq antare ie pade bodo, dait lime saq lainne bijaksane. Kelime dedare saq bodo nike jauq dilahne, laguq ndéq jauq cadangan minyak. Kelime dedare saq bijaksane jauq dilah dait cadangan minyak. Pengantén mame nike telat dateng, jari dedare-dedare nike ngantok terus ketindoqan. Tengaq kelem, baruq kedengahan suare dengan bekuih, ‘Pengantén mame dateng! Silaq sambut ie!’ Kesepulu dedare nike ures, terus ie pade penyalaq dilahne. Dedare-dedare saq bodo nike bebase léq dedare-dedare saq bijaksane, ‘Béng tiang pade sekediq minyakde, séngaq dilah tiang pade gen pedaq.’ ‘Ndéq bau!’ jawab dedare-dedare saq bijaksane nike, ‘séngaq laun tiang pade éndah kurangan minyak. Solahan side lumbar ojok dagang minyak dait beli léq derike.’ Beterus kelime dedare saq bodo nike lumbar beli minyak. Léq waktu ie pade lumbar beli minyak, pengantén mame nike dateng. Kelime dedare saq bijaksane nike tame ojok taoq gawé bareng kance pengantén mame nike, dait lawangne teimpet! Beterus dedare-dedare saq lainne nike dateng. Ie pade bekuih, ‘Paq! Paq! Tulung bukaqang tiang pade lawang.’ Laguq jawab pengantén mame nike, ‘Tiang ndéq kenal side pade!’ ” Make Deside Isa tutuqang perumpamean nike dait bemanik, “Keranaq nike pade siep sedie, séngaq side ndéq nenaoq piran jelo dait jamne.” “Hal Kerajaan Sorge nike maraq perumpamean niki: Araq sopoq majikan gen lumbar ojok negeri saq jaoq. Majikan nike ngempoh pelayan-pelayanne, terus ie pade tepercaye jagaq dowénne. Sebilang pelayan tebéng képéng siq majikanne menurut kemampuanne sopoq-sopoq. Pelayan saq sopoq béngne lime iyu képéng emas, sopoqne malik béngne due iyu képéng emas. Dait sopoqne malik béngne siyu képéng emas. Terus majikan nike berangkat. Pelayan saq nerimaq lime iyu képéng emas nike langsung lumbar bedagang, terus ie mauq bati lime iyu képéng emas malik. Maraq nike éndah pelayan saq nerimaq due iyu képéng emas nike, mauq bati due iyu képéng emas malik. Laguq pelayan saq nerimaq siyu képéng emas nike lumbar kaliq longkak léq tanaq, terus seboqne képéng majikanne léq derike. Ngonéq gati baruq majikanne tulak, dait mulai berékéngan kance pelayan-pelayanne. Pelayan saq nerimaq lime iyu képéng emas nike dateng, terus ie serahang sepulu iyu képéng emas, dait bebase, ‘Paq, pelungguh ngebéng tiang lime iyu képéng emas. Mangkin silaq sereminang, tiang mauq bati lime iyu malik.’ ‘Bagus,’ basen majikan nike, ‘side pelayan saq bagus dait setie. Séngaq side bau tepercaye léq hal saq sekediq, tiang gen percayeang hal saq luwéqan malik léq side. Silaq tame, milu beseneng-seneng kance tiang!’ Terus pelayan saq nerimaq due iyu képéng emas nike dateng, dait matur, ‘Bapaq ngebéng tiang due iyu képéng emas. Mangkin silaq sereminang, tiang mauq bati due iyu malik.’ ‘Bagus,’ basen majikan nike, ‘side pelayan saq bagus dait setie. Séngaq side bau tepercaye léq hal saq sekediq, make gen tiang percayeang léq side hal-hal saq luwéqan malik. Silaq tame, milu beseneng-seneng kance tiang!’ Beterus dateng éndah pelayan saq nerimaq siyu képéng emas nike, dait bebase, ‘Paq, tiang taoq pelungguh dengan saq kejem. Pelungguh mataq léq taoq saq nénten pelungguh sawur binéq, dait bait hasil léq taoq saq nénten pelungguh talet mésaq. Tiang takut, jari tiang lalo seboq képéng pelungguh léq dalem tanaq. Niki képéng pelungguh nike.’ ‘Side pelayan saq jahat dait mayus!’ basen majikan nike. ‘Tekan side nenaoq bahwe tiang mataq léq taoq saq ndéq uwah tiang sawur binéq, dait bait hasil léq taoq saq ndéq uwah tiang talet mésaq? Seharusne side serahang képéng tiang nike ojok dengan saq ngelampaqang képéng, adéq léq waktu tiang tulak, tiang bau bait malik képéng tiang nike bareng réntenne. Keranaq nike, bait képéng nike léman ie, terus béng pelayan saq bedowé sepulu iyu képéng emas nike. Séngaq sebilang dengan saq sampun bedowé gen teican luwéqan malik, dait ie gen bekelimpahan. Laguq dengan saq ndéq bedowé napi-napi, napi juaq saq araq léq ie gen tebait. Dait pelayan saq ndéq araq manpaatne nike, tetetéh ojok taoq saq peteng dedet léq luah. Léq derike ie gen nangis dait menderite!’ ” “Lamun Bije Manusie rauh dalem kemuliean-Ne teiring siq selapuq malaékat-Ne, Ie gen melinggih léq atas tahte-Ne saq mulie. Selapuq bangse gen tekumpulang léq arepan-Ne. Terus Ie gen kelin dengan-dengan nike jari due kelompoq, pade maraq pangarat saq kelin dombe kance bémbéq. Dait Ie gen toloq dombe-dombe léq sedi kanan-Ne, bémbéq-bémbéq léq sedi kiri-Ne. Beterus Raje nike gen bebase léq dengan-dengan saq léq sedi kanan-Ne, ‘Side pade saq teberkahin siq Bapa Tiang, silaq tame ojok Kerajaan saq sampun tesiepang umaq side léman dunie tecipteang. Séngaq waktu Tiang seduk, side pade béng Tiang bekelor, dait waktu Tiang bedak, side pade béng Tiang nginem. Sewaktu Tiang jari dengan pendateng, side pade béng Tiang nyodoq léq balénde. Sewaktu Tiang ndéq bekelambi, side pade béng Tiang kelambi. Sewaktu Tiang sakit, side pade ngerawat Tiang. Sewaktu Tiang tebui, side pade tulung Tiang.’ Beterus dengan-dengan soléh nike matur, ‘Junjungan Saq Mulie, piran tiang pade serioq Pelungguh seduk terus tiang pade aturin Pelungguh medaran? Atao tiang pade aturin nginem léq waktu Pelungguh bedak? Piran éndah tiang pade serioq Pelungguh jari dengan pendateng, terus tiang pade aturin Pelungguh nyodoq léq balén tiang pade? Piran Pelungguh nénten bekuace, terus tiang pade aturin Pelungguh kuace? Piran tiang pade serioq Pelungguh sungkan atao tebui, beterus tiang pade tulung Pelungguh?’ Raje nike gen bejawab, ‘Tiang badaq side: Setetune waktu side pade ngelaksaneang hal nike léq salaq sopoq sanak-sanak Tiang saq paling hine, artine side ngelaksaneang hal nike tipaq Tiang!’ Beterus Raje nike gen bebase léq dengan-dengan saq araq léq sedi kiri-Ne, ‘Lalo léman té, side pade dengan-dengan saq tekutuk! Pade tame ojok dalem api saq ndéq iniq pedaq saq sampun tesiepang umaq Belis dait malaékat-malaékatne! Séngaq sewaktu Tiang lapah, side pade ndéq béng Tiang bekelor; sewaktu Tiang bedak, side pade ndéq béng Tiang nginem. Sewaktu Tiang jari dengan pendateng, side pade ndéq béng Tiang nyodoq léq balénde. Sewaktu Tiang ndéq bekelambi, side pade ndéq béng Tiang kelambi. Sewaktu Tiang sakit dait tebui side pade ndéq ngerawat Tiang.’ Beterus ie pade gen bejawab, ‘Junjungan Saq Mulie, piran tiang pade serioq Pelungguh seduk, atao bedak, atao jari dengan pendateng, atao nénten bekuace atao sungkan dait tebui? Terus tiang pade nénten tulung Pelungguh?’ Raje nike gen bejawab, ‘Tiang badaq side: Léq waktu side pade ndéq mélé tulung salaq sopoq dengan saq paling hine niki, artine side pade ndéq mélé tulung Tiang.’ Make dengan-dengan nike gen tehukum siq hukuman saq kekel. Laguq dengan-dengan saq ngelaksaneang préntah Allah gen tame ojok dalem idup sejati dait kekel.” Sewaktu Deside Isa selesé ngajahang selapuq hal nike, Ie bemanik léq pengiring-pengiring-Ne, “Side pade nenaoq, bahwe karing due jelo Hari Raye Paskah, dait Bije Manusie gen teserahang jari tepakuq léq kayuq salib.” Waktu nike imam-imam kepale dait pemimpin-pemimpin Yahudi bekumpul léq istane Imam Agung Kayapas. Ie pade berunding jari bau Deside Isa secare tedoq-tedoq dait nyematéq Ie. Laguq ie pade bebase, “Ndaq laksaneang hal nike waktu dengan-dengan kenyeke ngerayeang Paskah, adéq rakyat ndéq jari biur lantur.” Sewaktu Deside Isa kenyeke léq Betania, léq gedéng Simon saq piranan sakit kuste, araq sopoq dengan nine parek tipaq Deside Isa, dait jauq sopoq botol pualam berisi minyak sengéh saq mahel. Léq waktu Deside Isa melinggih medaran, dengan nine nike noléngang minyak sengéh nike léq sirah Deside Isa. Pengiring-pengiring Deside Isa serioq hal nike, terus ie pade jari sili dait bebase, “Napi manpaatne minyak sengéh nike tesédaq-édaq?” “Minyak sengéh nike bau tejual siq aji saq mahel, terus képéngne bau tesedekahang tipaq dengan-dengan miskin!” Deside Isa wikan pikiran pengiring-pengiring-Ne, terus Ie bemanik, “Kembéq side pade piaq dengan nine niki susah? Ie ngelaksaneang hal saq solah tipaq Tiang. Dengan miskin tetep araq léq antare side pade, laguq Tiang niki ndéq seterusne araq bareng kance side pade. Ie minyakin Tiang siq minyak sengéh nike jari siepang pemakaman Tiang. Tiang badaq side: Setetune léq seantéro dunie, léq mbé juaq Kabar Solah léman Allah tesiarang, perbuatan dengan nine niki gen teceriteang éndah jari nginget ie.” Beterus salaq sopoq léman kedue olas pengiring-pengiring Deside Isa, saq aranne Yudas Iskariot, lumbar ojok imam-imam kepale. Yudas bebase léq imam-imam kepale nike, “Napi saq side pade gen icanin tiang lamun tiang serahang Deside Isa tipaq side pade?” Terus imam-imam kepale nike ngerékéng telung dase képéng perak, dait serahangne képéng nike léq Yudas. Mulai léman waktu nike Yudas berusahe boyaq kesempatan jari behianat léq Deside Isa. Léq jelo penembéq Perayaan Ruti Ndéq Beragi, pengiring-pengiring Deside Isa parek léq Ie, dait metakén, “Léq mbé Pelungguh kayun adéq tiang pade siepang Pelungguh keloran Paskah?” Jawab Deside Isa, “Pade lumbar ojok sopoq dengan léq kote, terus sampéang léq ie, ‘Manik Guru tiang, sampun waktune Tiang gen ngerayeang Paskah léq balénde bareng kance pengiring-pengiring Tiang.’ ” Pengiring-pengiring-Ne ngelaksaneang napi saq temanikang siq Deside Isa. Ie pade siepang keloran Paskah nike. Sesampun kekelem, Deside Isa dait kedue olas pengiring-Ne melinggih medaran keloran Paskah. Sewaktu ie pade kenyeke medaran, Deside Isa bemanik, “Tiang badaq side: Setetune salaq sopoq léq antare side pade gen behianat léq Tiang.” Sewaktu pengiring-pengiring Deside Isa dengah hal nike, ie pade jari aséq gati, beterus sopoq-sopoq mulai metakén léq Deside Isa, “Junjungan Saq Mulie, pasti ndéqne tiang saq temaksut nike?” Jawab Deside Isa, “Dengan saq bareng-bareng kance Tiang celep ruti léq dalem jembung, ie saq gen behianat léq Tiang. Mule Bije Manusie gen ninggal maraq saq tetulis léq Kitab Suci. Laguq celake gati dengan saq behianat léq Bije Manusie nike! Solahan dengan nike ndéq tebijeang!” Beterus Yudas saq behianat nike bejawab, “Pasti ndéqne tiang saq Guru maksut nike?” Jawab Deside Isa, “Maraq nike basende!” Sewaktu ie pade medaran, Deside Isa bait ruti, beterus ngucapang do'e syukur. Sesampun nike, peleng-peleng-Ne ruti nike siq gading-Ne terus teicanin tipaq pengiring-pengiring-Ne, dait bemanik, “Silaq bait, terus kelorang; niki ragen Tiang.” Sesampun nike, Deside Isa bait sopoq cawan saq berisi anggur. Ie ngucapang do'e syukur tipaq Allah, terus ngicanin cawan nike léq pengiring-pengiring-Ne, sambil bemanik, “Silaq selapuqde pade nginem léman cawan niki. Séngaq niki daraq Tiang saq ngesahang perjanjian Allah – daraq saq tetumpahang tipaq dengan luwéq adéq dose-dose ie pade teampunin siq Allah. Tiang éndah badaq side: Tiang ndéq gen nginem anggur niki malik jangke dateng waktune Tiang gen nginem anggur saq baru bareng kance side pade dalem Kerajaan Bapa Tiang.” Beterus ie pade nyanyiang lagu pujian. Sesampun nike ie pade lumbar ojok Bukit Zaitun. Beterus Deside Isa bemanik léq pengiring-pengiring-Ne, “Kelem niki éndah side pade gen pelai bilin Tiang. Séngaq léq Kitab Suci tetulis: Allah bemanik, ‘Tiang gen nyematéq pengarat nike, dait selapuq dombe-dombene gen bekelin sopoq kance saq lain.’ Laguq sesampun Tiang idup malik, Tiang gen senjuluq side pade ojok Galilea.” Petrus matur léq Deside Isa, “Timaq selapuqne bilin Pelungguh, tiang nénten!” Jawab Deside Isa léq Petrus, “Tiang badaq side: Setetune kelem niki éndah, sendéqman manuk ngungkung, side sampun telu kali nilas Tiang.” Laguq jawab Petrus, “Timaq tiang harus maté bareng kance Pelungguh, tiang nénten gen nilas Pelungguh!” Dait selapuq pengiring saq lain éndah matur maraq nike. Sesampun nike, Deside Isa lumbar kance pengiring-pengiring-Ne ojok sopoq taoq aranne Getsemani. Léq derike Deside Isa bemanik léq pengiring-pengiring-Ne, “Tokol léq deriki, waktu Tiang lalo bedo'e léq derike.” Beterus Deside Isa ténaq Petrus dait kedue bije Zebedeus lumbar bareng kance Ie. Deside Isa mulai beridap osah dait aséq. Deside Isa bemanik léq pengiring-pengiring-Ne nike, “Angen Tiang sedih gati, idapne maraq gen maté doang. Ndot léq deriki, dait bejage-jage bareng Tiang.” Sesampun nike Deside Isa margi jaoqan sekediq, terus Ie sujut léq tanaq dait bedo'e, “Bapa, lamun bau, bait cawan penderitean niki léman Tiang laguq sampunang menurut keméléq Tiang, laguq menurut pekayunan Bapa.” Sesampun nike, Deside Isa tulak ojok taoq ketelu pengiring-Ne terus ie pade tedait kenyeke tindoq. Deside Isa bemanik léq Petrus, “Cume sejam doang side pade ndéq sanggup bejage kance Tiang? Bejage-jage dait bedo'e, adéq side pade ndéq ngalamin cobe. Mule roh side mélé ngelaksaneang saq kenaq, laguq side pade ndéq sanggup séngaq awakde nike lemah.” Karing sekali Deside Isa lumbar bedo'e, manik-Ne, “Bapa, lamun cawan penderitean niki harus Tiang terimaq, menengang pekayunan Bapa saq telaksane.” Sesampun nike Deside Isa tulak, terus dait-Ne malik pengiring-pengiring-Ne masih tindoq, séngaq ie pade ngantok gati. Deside Isa lumbar bilin ie pade terus bedo'e saq ketelu kaline dait ngucapang do'e saq pade. Sesampun nike Deside Isa tulak malik tipaq pengiring-pengiring-Ne, dait bemanik, “Napi side pade masih tindoq dait mentelah? Silaq pade serioq, sampun wayene Bije Manusie teserahang ojok ime dengan-dengan bedose. Pade ures! Silaq ite lumbar! Pade serioq! Dengan saq behianat léq Tiang sampun dateng!” Sewaktu Deside Isa masih bebaos, Yudas, salaq sopoq léman kedue olas pengiring-Ne nike dateng. Bareng kance Yudas araq éndah dengan luwéq jauq kléwang dait gegitik. Ie pade tesuruq siq imam-imam kepale dait pemimpin-pemimpin Yahudi. Penghianat nike sampun badaq tande niki tipaq ie pade, “Dengan saq tiang siduk, Ie uwah denganne. Bau Ie!” Sesampun dateng léq taoq nike, Yudas, langsung ojok Deside Isa dait matur, “Salam Bapaq Guru!” Terus ie siduk Deside Isa. Jawab Deside Isa, “Semeton, napi maksutde dateng ojok deriki?” Beterus dengan luwéq nike maju dait bau Deside Isa. Salaq sopoq dengan léman dengan-dengan saq bareng Deside Isa serét kléwangne, terus ngerantek pelayan Imam Agung jangke pegat kentokne. Deside Isa bemanik léq pengiring-Ne nike, “Tamaqang kléwangde léq dalem sarungne. Séngaq sai juaq saq kadu kléwang gen ninggal siq kléwang. Side paran Tiang ndéq bau tunas tulung léq Bapa Tiang, adéq Ie gelis ngirim lebih léman due olas pasukan malaékat? Laguq lamun hal nike Tiang laksaneang, ndéq gen telaksane napi saq sampun tetulis léq dalem Kitab Suci bahwe mule harus telaksane hal maraq niki?” Beterus Deside Isa bemanik léq dengan luwéq nike, “Napi Tiang niki perampok, jangke side pade dateng jauq kléwang dait gegitik jari bau Tiang? Sebilang jelo Tiang ngajahang léq Gedéng Allah, dait side pade ndéq bau Tiang. Laguq mule seharusne maraq niki, adéqne telaksane napi saq tetulis siq nabi-nabi léq dalem Kitab Suci.” Sesampun nike, selapuq pengiring-pengiring-Ne pelai bilin Deside Isa. Dengan-dengan saq bau Deside Isa jauq Deside Isa ojok gedéng Imam Agung Kayapas. Léq derike ahli-ahli Taurat dait pemimpin-pemimpin Yahudi sampun bekumpul. Petrus ngiring Deside Isa léman jaoq jangke leléah gedéng Imam Agung. Dait sesampun tame ojok dalem, ie tokol bareng kance pengawal-pengawal. Petrus melét nenaoq berembé laun kejarianne selapuqne nike. Imam-imam kepale dait selapuq anggote Mahkamah Agame berusahe mauq kesaksian palsu adéq Deside Isa bau tehukum maté. Laguq ie pade ndéq mauq, timaq luwéq dengan saq maju jari saksi duste. Ahirne araq due dengan maju ojok julu. Ie pade bebase, “Dengan niki sampun bebaos bahwe, ‘Ie bau robohang Gedéng Allah, terus dalem telu jelo Ie sanggup penganjeng malik.’ ” Terus Imam Agung nike nganjeng dait bebase léq Deside Isa, “Pelungguh kayun jawab napi saq tetuduhang nike atao nénten?” Laguq Deside Isa tetep meneng. Imam Agung nike bebase malik léq Deside Isa, “Demi Allah saq idup, sampéang léq tiang pade napi tetu Pelungguh niki Almasih, Bije saq asalne léman Allah?” Jawab Deside Isa, “Maraq nike basen pelungguh. Laguq Tiang badaq side waktu niki side pade gen serioq Bije Manusie melinggih léq sedi kanan Allah saq Mahekuase, dait rauh léq atas awan léq langit!” Make Imam Agung nike ngeroék-roék kuacene, dait bebase, “Ie menghine Allah! Ndéq perlu saksi malik. Side pade dengah mésaq ucapan nike menghine Allah. Mangkin berembé pendapet side pade?” Jawab dengan-dengan nike, “Ie salaq, dait harus tehukum maté.” Terus ie pade nijuh penjarupan Deside Isa, dait jagur Ie. Araq éndah saq nempélék Ie, dait bebase, “Cobaq badaq tiang pade, hai Almasih! Sai saq ngempuk Side?” Petrus kenyeke tokol léq luah, léq leléah. Salaq sopoq pelayan nine dateng ngerapetin Petrus dait beketuan, “Tekan side éndah saq bareng kance Deside Isa dengan Galilea nike?” Laguq Petrus nilas léq julu selapuq dengan nike. “Tiang ndéq ngerti napi maksut side,” basen Petrus, terus Petrus lumbar ojok jebak. Pelayan nine saq lain éndah serioq Petrus, terus bebase léq dengan-dengan léq derike, “Onéq dengan niki araq bareng kance Deside Isa dengan Nazaret nike.” Laguq Petrus nilas malik dait besumpah, “Tiang tetu-tetu ndéq kenal dengan nike!” Ndéq ngonéq sesampun nike, dengan-dengan saq nganjeng léq derike dateng ngerapetin Petrus, dait bebase, “Pasti side salaq sopoq léman ie pade. Kentare gati agolde.” Beterus Petrus mulai besumpah-sumpah, dait bebase, “Tiang ndéq kenal Deside Isa nike!” Léq waktu nike éndah manuk ngungkung. Terus Petrus jari inget bahwe Deside Isa sampun manikang hal nike léq ie, “Sendéqman manuk ngungkung, side sampun telu kali nilas Tiang.” Beterus Petrus sugul dait nangis siq aséqne. Kelémaq gati, selapuq imam kepale dait pemimpin-pemimpin Yahudi sampun miaq keputusan jari nyematéq Deside Isa. Ie pade sékoq Deside Isa, terus jauq Ie dait nyerahang Ie ojok Pilatus, gubernur pemréntahan Roma. Sewaktu Yudas penghianat nike nenaoq bahwe Deside Isa sampun tekeneang hukuman maté, ie jari nyesel. Beterus Yudas lumbar nulakang képéng perak saq telung dase nike ojok imam-imam kepale dait pemimpin-pemimpin Yahudi. Basene, “Tiang bedose sampun behianat léq dengan saq ndéq salaq jangke Ie tehukum maté!” Laguq jawab imam-imam dait pemimpin-pemimpin Yahudi nike, “Tiang pade ndéq araq urusan malik léq hal nike? Nike urusan side!” Yudas timpoh képéng nike ojok dalem Gedéng Allah. Beterus ie lumbar gantung diriqne. Imam-imam kepale ngembuq képéng nike, dait bebase, “Képéng niki képéng daraq, menurut Hukum Taurat, ndéq patut tetamaq ojok dalem taoq persembahan léq Gedéng Allah.” Beterus sesampun ie pade sepakat, ie pade kadu képéng nike jari beli tanaq saq tesebut Tanaq Tukang Keméq. Tanaq nike tekadu jari kuburan dengan-dengan pendateng. Nike lantaranne jangke jelo niki tanaq nike tesebut “Tanaq Daraq”. Siq care nike telaksane napi saq sampun tesampéang siq Nabi Yeremia, “Ie pade nerimaq telung dase képéng perak, nike aji saq sampun tesepakatin siq bangse Israel jari bayah Ie. Dait képéng nike ie pade kadu jari beli Tanaq Tukang Keméq, maraq préntah Tuhan léq tiang.” Sewaktu Deside Isa léq arepan Pilatus, gubernur negeri nike, Pilatus metakén léq Deside Isa, “Napi tetu Pelungguh raje dengan Yahudi?” “Maraq nike basen pelungguh,” jawab Deside Isa. Laguq sewaktu imam-imam kepale dait pemimpin-pemimpin Yahudi ngajuang macem-macem tuduhan léq Deside Isa, Ie nénten jawab napi-napi. Keranaq nike Pilatus bebase léq Ie, “Napi Pelungguh nénten pirengang selapuq saq ie pade tuduhang tipaq Pelungguh nike?” Laguq Deside Isa nénten kayun bejawab, sehingge gubernur nike bengaq gati. Léq sebilang Perayaan Paskah, biasene gubernur bébasang sopoq tahenan saq tepiléq siq rakyat. Waktu nike, araq sopoq tahenan saq kesohor lantaran pegawéanne saq jahat, aranne Isa Barabas. Jari, sewaktu dengan luwéq sampun bekumpul, Pilatus beketuan léq ie pade, “Silaq side pade piléq, sai saq gen tiang bébasang: Isa Barabas atao Isa saq tesebut Almasih?” Hal nike tesampéang siq Pilatus séngaq ie wikan bahwe penguase-penguase Yahudi nike nyerahang Deside Isa léq ie lantaran ie pade talon até. Waktu Pilatus kenyeke melinggih léq ruang pengadilan, sebiniqanne suruq dengan nyampéang pesen niki léq Pilatus, “Ndaq side turut campur léq pelekare dengan saq ndéq salaq nike. Séngaq lantaran Ie, tiang mauq ngimpi lengé jelo niki.” Laguq imam-imam kepale dait pemimpin-pemimpin Yahudi nike terus ngasut dengan luwéq adéq Pilatus bébasang Barabas dait Deside Isa tehukum maté. Beterus Pilatus beketuan malik léq dengan-dengan nike, “Léman deduaqne nike, silaq side pade piléq, sai saq gen tiang bébasang?” “Barabas!” jawab ie pade. “Lamun maraq nike tiang kumbéqang Deside Isa saq tesebut Almasih?” basen Pilatus léq ie pade. “Pakuq Ie léq kayuq salib!” jawab ie pade selapuq. “Laguq pegawéan jahat napi saq sampun Ie piaq?” basen Pilatus. Laguq siq suare saq beléqan malik dengan-dengan nike nyurak, “Pakuq Ie léq kayuq salib!” Ahirne Pilatus sadar bahwe ie ndéq bau piaq napi-napi malik, malahan dengan-dengan nike mulai ngore. Jari ie bait aiq, terus léq julu dengan luwéq nike ie bisoq imene dait bebase, “Tiang ndéq tanggung jawab léq ninggalne dengan niki! Nike urusan side pade!” Jawab selapuq dengan luwéq nike, “Enggih, alurang tiang pade dait anak-anak tiang pade saq nanggung hukuman léq ninggal-Ne!” Beterus Pilatus bébasang Barabas, dait préntahangne dengan mecut Deside Isa. Terus nyerahang Ie adéqne tepakuq léq kayuq salib. Beterus prajurit-prajurit Pilatus jauq Deside Isa tame ojok istane gubernur, dait selapuq pasukan nike bekumpul ngiterin Ie. Ie pade lekaq kuace-Ne, terus kaduang Ie jubah bewarne lempok lomaq. Ie pade piaq sopoq mahkote léman pémpang-pémpang beduwi, dait kaduangne léq sirah Deside Isa. Beterus ie pade toloq sopoq tunjang léq gading kanan-Ne, terus sujut léq arepan-Ne dait ngoloq Ie. “Idup raje dengan Yahudi!” basen ie pade. Ie pade tijuh Deside Isa dait bait tunjang nike, terus empukangne léq sirah-Ne. Sesampun ngoloq-oloq Deside Isa, ie pade lekaq jubah lempok lomaq nike, terus kaduangne malik kuace-Ne mésaq. Beterus Ie tejauq ojok luah jari tepakuq léq kayuq salib. Léq tengaq langan, ie pade bedait kance dengan léman Kirene aranne Simon. Ie pade paksaq dengan nike ngelémbah kayuq salib Deside Isa. Beterus ie pade dateng léq sopoq taoq aranne Golgota, saq artine “Taoq Jerangkong”. Léq derike ie pade ngaturin Deside Isa nginem anggur saq sampun tecampur siq pepeduq, laguq sesampun Ie ngerasaq sekediq anggur nike, Ie nénten kayun nginem malik. Beterus ie pade pakuq Deside Isa léq kayuq salib dait bagi-bagiang kuace-Ne kadu undian. Sesampun nike, ie pade tokol jagaq Deside Isa léq derike. Léq atas sirah-Ne ie pade toloq tulisan mengenai tuduhan tipaq Ie: “Niki Isa, Raje Dengan Yahudi”. Bareng kance Deside Isa, ie pade éndah pakuq due perampok léq kayuq salib; sopoq léq sedi kanan, sopoq malik léq sedi kiri-Ne. Dengan-dengan saq liwat léq derike ngintek dait menghine Deside Isa. Basen ie pade, “Hai, Side saq mélé ngerobohang Gedéng Allah terus gen penganjeng dalem telu jelo! Lamun Side tetu-tetu Bije saq asalne léman Allah, cobaq turun léman kayuq salib nike dait selametang diriq-De!” Maraq nike éndah imam-imam kepale dait ahli-ahli Taurat kance pemimpin-pemimpin Yahudi ngoloq Deside Isa. Ie pade bebase, “Ie nyelametang dengan lain, laguq diriq-Ne mésaq ndéq bau Ie selametang! Lamun Ie raje Israel, cobaq mangkin Ie turun léman kayuq salib nike, baruq tiang pade mélé percaye léq Ie. Ie percaye léq Allah dait bebase bahwe Ie Bije saq asalne léman Allah. Nah, silaq ite serioq, napi Allah kayun nyelametang Ie mangkin.” Perampok-perampok saq bareng tepakuq léq kayuq salib nike éndah milu menghine Deside Isa maraq nike. Mulai jam due olas tengari, sengonéq telu jam, selapuq wilayah negeri nike jari peteng. Jam telu kebian, Deside Isa bekuih keras-keras, “Eli, Eli lama sabaktani?” saq artine, “Ya Allah Tiang, ya Allah Tiang, kembéq Deside menengang Tiang?” Pire dengan saq nganjeng léq derike, dengah suare nike dait bebase, “Ie ngempoh Elia!” Beterus salaq sopoq léq antare dengan-dengan nike becat-becat lumbar bait bunge karang terus celepne ojok dalem anggur saq pedis, beterus tancepne léq pucuk gegale dait jonjongne ojok cangkem Deside Isa. Laguq dengan-dengan saq lain bebase, “Antih seberaq, cobaq serioq napi Elia rauh nyelametang Ie!” Beterus Deside Isa bekuih malik keras-keras, terus nyerahang nyawe-Ne. Kelambu saq araq begantung léq dalem Gedéng Allah soék jari due léman atas jangke ojok bawaq. Gumi inggur dait gunung-gunung batu belaq. Kuburan-kuburan jari kebukaq dait luwéq dengan suci saq sampun ninggal teidupang malik. Ie pade sugul léman kuburan-kuburan sesampun Deside Isa idup léman ninggal-Ne dait ie pade tame ojok Yerusalem. Dait léq derike luwéq dengan serioq ie pade. Kepale pasukan bareng kance prajurit-prajurit saq kenyeke jagaq Deside Isa jari takut gati sewaktu serioq lindur dait selapuq hal saq telaksane nike. Ie pade bebase, “Tetu Ie niki Bije saq asalne léman Allah!” Léq derike araq éndah luwéq dengan nine saq kenyeke serioq hal nike léman jaoq. Ie pade sampun ngiring Deside Isa dait nulung Deside Isa mulai léman Galilea. Léq antare dengan-dengan nine nike, araq Mariam Magdalena, Mariam inaqne Yakub dait Yusup, dait inaqne bije-bije Zebedeus. Léq waktu serep jelo dateng dengan sugih léman Arimatea aranne Yusup, ie éndah pengiring Deside Isa. Yusup lumbar ojok Pilatus dait tunasne jenazah Deside Isa. Terus Pilatus préntah pengawalne adéqne nyerahang jenazah Deside Isa léq Yusup. Make Yusup bait jenazah nike, terus bungkusne siq kain lénen alus saq putéq bersi. Beterus Yusup toloq jenazah Deside Isa léq dalem makam dowéne mésaq, saq baruq tepiaq léq dalem sopoq bukit batu. Sesampun nike Yusup gelompongang sopoq batu beléq ojok lawang makam nike, terus ie lumbar. Mariam Magdalena dait Mariam saq lain ndot tokol andang makam nike. Jemaq kelémaqne, léq jelo Sabat, imam-imam kepale dait dengan-dengan Parisi lumbar bareng-bareng ngadep Pilatus dait matur, “Bapaq, tiang pade inget waktu penipu nike masih idup, Ie sampun bebase, ‘Sesampun telu jelo Tiang gen idup malik.’ Keranaq nike, utus dengan jagaq makam nike pacu-pacu jangke jelo saq ketelu, adéq pengiring-pengiring-Ne ndéq bau paling jenazah-Ne terus betutur léq dengan-dengan bahwe Deside Isa idup malik léman ninggal-Ne. Dait penipuan saq penutuq niki gen lengéan malik léman saq penembéq.” Basen Pilatus léq ie pade, “Niki tiang beng side pengawal-pengawal, silaq lumbar dait jagaq makam nike pacu-pacu.” Beterus ie pade lumbar ojok makam, dait ségelne batu pengimpet makam nike, terus suruqne pengawal bejage léq julune. Sesampun liwat jelo Sabat, léq jelo Ahad kelémaq aru, Mariam Magdalena dait Mariam saq lain lumbar ojok makam nike. Selung-selung araq lindur saq beléq gati. Sopoq malaékat Tuhan turun léman sorge alih batu pengimpet lawang makam nike dait melinggih léq atasne. Muen malaékat nike maraq kisap dait kelambine putéq gati. Tentere pengawal saq bejage léq derike jari takut gati jangke ie pade ngijik dait jari maraq dengan maté. Malaékat nike bebase léq dengan-dengan nine nike, “Ndaq takut! Tiang taoq side pade boyaq Deside Isa saq sampun tepakuq léq kayuq salib nike. Ie ndéq araq léq deriki. Ie sampun idup malik maraq saq sampun Ie manikang laéq. Silaq serioq taoq-Ne tesaréang. Mangkin, becat side pade lumbar, kabarang tipaq pengiring-pengiring-Ne, ‘Deside Isa sampun idup malik, dait Ie sampun senjuluq side pade lumbar ojok Galilea. Léq derike side pade gen serioq Ie!’ Ingetang napi saq sampun tiang sampéang léq side.” Sesampun nike, dengan-dengan nine nike becat-becat bilin makam nike. Siq perasaan takut awor seneng ie pade pelai ngabarang selapuq hal nike léq pengiring-pengiring Deside Isa. Selung-selung Deside Isa bedait kance ie pade, dait bemanik, “Salam umaq side pade!” Beterus ie pade ngerapetin Deside Isa terus kapong cokor-Ne dait sujut nyembah Ie. “Ndaq takut,” manik Deside Isa léq ie pade, “silaq side pade lumbar kabarang léq selapuq sanak Tiang adéqne lumbar ojok Galilea. Léq derike ie pade gen bedait kance Tiang.” Sewaktu dengan-dengan nine nike lumbar, araq pengawal-pengawal saq bejage léq makam nike lumbar ojok kote, dait ngelaporang peristiwe nike léq imam-imam kepale. Imam-imam kepale nike mupakat kance pemimpin-pemimpin Yahudi, terus ie pade ngebéng luwéq képéng léq pengawal-pengawal nike, dait bepesen, “Side pade harus badaqang bahwe pengiring-pengiring Deside Isa dateng léq tengaq kelem dait paling jenazah-Ne sewaktu side pade kenyeke tindoq. Dait lamun gubernur pireng hal nike, tiang pade gen badaq ie adéq side pade ndéq ndait masalah.” Jari, pengawal-pengawal nike bait képéng nike, terus ngelaksaneang maraq saq tepesen siq imam-imam nike. Nike lantaranne cerite niki nyebar léq antare dengan-dengan Yahudi jangke jelo niki. Kesolas pengiring Deside Isa nike lumbar ojok sopoq bukit léq Galilea sesuai kance manik Deside Isa tipaq ie pade. Sewaktu ie pade serioq Deside Isa léq derike, selapuqne sujut nyembah Ie, laguq araq léq antarene saq masih bimbang. Deside Isa ngerapetin ie pade, dait bemanik, “Selapuq kuase saq araq léq sorge dait léq gumi sampun teserahang léq Tiang. Keranaq nike, silaq side pade lumbar ojok selapuq bangse léq dunie, dait jariang ie pade pengiring-pengiring Tiang, dait baptis ie pade léq dalem peséngan Bapa dait Bije dait Roh Suci. Ajah ie pade taat léq selapuq saq Tiang préntahang tipaq side pade. Dait pade inget bahwe Tiang gen tetep bareng kance side pade jangke ahir jaman.” Niki awal Kabar Solah mengenai Deside Isa Almasih, Bije saq asalne léman Allah. Maraq saq tetulis siq Nabi Yesaya: “ ‘Serioq, Tiang ngirim utusan Tiang juluan léman Deside, ie gen nyiepang langan bagi Deside.’ Araq dengan saq bekuih-kuih léq padang gurun, ‘Pade siepang langan umaq Tuhan; dait rateang langan umaq Ie.’ ” Yahya dateng léq padang gurun dait nyampéang berite léman Allah. “Side pade harus tobat léman dose-dosende dait harus tebaptis, adéq Allah ngampunin side,” maraq nike basen Yahya. Selapuq dengan léman negeri Yudea dait kote Yerusalem lumbar dengahang hotbah Yahya. Ie pade ngaku dose-dose ie pade dait Yahya baptis ie pade léq Kokoq Yordan. Yahya ngengadu jubah saq tepiaq léman bulu onte, dait sabukne tepiaq léman léndong. Keloranne balang serte madulani gawah. Yahya nyampéang berite niki, “Sesampun tiang, gen rauh Dengan saq beléqan kuase-Ne léman tiang, nunduk gen lekaq tali sepatu-Ne doang tiang ndéq patut. Tiang baptis side kadu aiq, laguq Ie gen baptis side kadu Roh Suci.” Léq waktu nike, Deside Isa rauh léman Nazaret léq daérah Galilea, dait Ie tebaptis siq Yahya léq Kokoq Yordan. Waktu Deside Isa sugul léman aiq, Ie cingakin langit kebukaq, dait Roh Allah turun maraq ruen kedit dare ojok atas-Ne. Beterus kedengahan suare léman sorge: “Side Bije Tiang saq Tiang kasihin. Side nyenengang Tiang.” Langsung sesampun nike, Roh Allah gadingang Deside Isa ojok padang gurun. Petang dase jelo Deside Isa araq léq derike tecobe siq Belis. Léq derike araq éndah binatang-binatang gamang bareng kance Deside Isa, dait malaékat-malaékat ngelayanin Ie. Sesampun Yahya tebui, Deside Isa lumbar ojok Galilea, dait léq derike Ie nyampéang Kabar Solah léman Allah. Manik-Ne, “Kerajaan Allah sampun rapet. Pade tobat léman dose-dosende, dait pade percaye léq Kabar Solah saq léman Allah!” Sewaktu Deside Isa bemargi léq sedin Danao Galilea, Ie cingakin due nelayan aranne Simon dait Andreas adiqne. Ie pade kenyeke bau empaq kadu jaring léq danao nike. Deside Isa bemanik léq ie pade, “Silaq turut Tiang. Tiang gen jariang side pade penjaring manusie.” Langsung ie pade bilin jaringne terus ngiring Deside Isa. Deside Isa terus bemargi, dait cingakin éndah due dengan besemeton saq lain, Yakub dait Yahya, bije-bije Zebedeus. Ie pade kenyeke ngeremaq jaring léq dalem perau. Deside Isa langsung ngemanikang ie pade. Dait ie pade bilin amaqne léq dalem perau bareng kance buruh-buruhne. Terus ie pade lumbar ngiring Deside Isa. Deside Isa dait pengiring-pengiring-Ne rauh léq kote Kapernaum. Sesampun mulai jelo Sabat, Deside Isa tame ojok balé ibadah, dait mulai ngajahang. Dengan-dengan jari takjub dengahang pengajahan Deside Isa. Séngaq Ie ngajahang siq wibawe, nénten maraq ahli-ahli Taurat. Léq dalem balé ibadah nike araq sopoq dengan saq tekuasein siq roh jahat. Dengan nike nyurak: “Hai Deside Isa dengan Nazaret, napi saq gen Pelungguh piaq léq tiang pade? Napi Pelungguh rauh jari binaseang tiang pade? Tiang nenaoq sai setetune Pelungguh: Pelungguh saq Suci léman Allah!” Laguq Deside Isa semprak roh jahat nike, “Tedoq, sugul léman dengan niki!” Beterus dengan nike tegerik keras-keras siq roh jahat nike, terus sugul léman dengan nike sambil nyurak-nyurak. Selapuq dengan bengaq gati, sehingge ie pade ngeraos sopoq kance saq lain, “Napi niki? Sopoq pengajahan saq baru! Siq wibawe dait kuase, Ie mréntahang roh-roh jahat sugul, dait ie pade taat léq Ie!” Make berite mengenai Deside Isa becat gati nyebar ojok selapuq daérah Galilea. Deside Isa dait pengiring-pengiring-Ne bilin balé ibadah nike dait lumbar ojok gedéng Simon dait Andreas. Yakub dait Yahya éndah lumbar bareng ie pade. Mentoaq nine Simon kenyeke mesaré lantaran sakit telih panas. Jari sewaktu Deside Isa dait pengiring-pengiring-Ne tame ojok balé nike, Ie tepajar mengenai hal nike. Beterus Deside Isa lumbar ojok mentoaq nine Simon, dait negel imene, terus tulung ie ures. Sakit telih panasne telang, dait ie mulai ngelayanin ie pade. Léq waktu serep jelo, dengan-dengan jauq selapuq dengan saq sakit dait saq tekuasein siq sétan ojok Deside Isa. Selapuq penduduk kote nike bekeriwung léq julu balé nike. Beterus Deside Isa nyelahang luwéq dengan saq ngidap macem-macem penyakit, dait luwéq éndah sétan tesediq. Sétan-sétan nike ndéq teijinang ngeraos siq Deside Isa, séngaq ie pade nenaoq sai setetune Ie. Jemaq kelémaqne, sewaktu masih subuh, Deside Isa metangi terus bilin gedéng. Ie lumbar ojok taoq saq sepi léq luah kote, dait bedo'e léq derike. Laguq Simon dait batur-baturne lumbar boyaq Deside Isa. Dait sesampun ie pade bedait kance Deside Isa, ie pade matur, “Selapuq dengan kenyeke boyaq Pelungguh.” Laguq jawab Deside Isa, “Silaq ite terusang kelampante ojok kote-kote lain saq rapet léman deriki, adéq léq derike éndah Tiang nyampéang Kabar Solah, séngaq siq maksut nike Tiang dateng.” Beterus Deside Isa lumbar ojok mbé-mbé léq selapuq wilayah Galilea, dait nyampéang Kabar Solah léman Allah léq balé-balé ibadah dait sediq roh-roh jahat. Araq sopoq dengan saq sakit kuste parek ojok Deside Isa. Dengan nike sujut dait matur, “Lamun Pelungguh kayun, Pelungguh bau nyelahang tiang.” Make angen Deside Isa penoq siq belas kasihan léq dengan nike. Ie jamah dengan nike sambil bemanik, “Tiang mélé, mangkin side selah!” Langsung waktu nike éndah, penyakitne telang dait ie selah. Terus Deside Isa manikang dengan nike lumbar siq peringetan niki, “Inget, ndaq tuturang léq sai-sai, laguq lumbar ojok imam, dait tunas adéq ie pastiang bahwe side sampun selah. Beterus lumbar ngaturang kurban maraq saq tepréntahang Musa jari bukti tipaq dengan-dengan bahwe side tetu-tetu sampun selah.” Laguq dengan nike lumbar, dait tetep doang nyeriteang peristiwe nike léq mbé-mbé jangke Deside Isa nénten bau tame kote secare terang-terangan. Ie cume meneng léq luah kote léq taoq-taoq saq sepi. Laguq léman mbé-mbé dengan terus doang parek tipaq Ie. Pire jelo sesampun nike Deside Isa tulak ojok Kapernaum, make nyebar kabar bahwe Ie kenyeke léq gedéng. Beterus luwéq dengan dateng bekeriwung léq derike jangke ndéq araq taoq malik. Léq lawang éndah sampun penoq siq dengan. Beterus Deside Isa nyampéang Manik Allah tipaq ie pade. Sewaktu Ie kenyeke bebaos, empat dengan jauq sopoq dengan képaq tipaq Deside Isa. Laguq lantaran luwéq gati dengan, ie pade ndéq bau jauq ojok dékét Deside Isa. Make ie pade bungkar atep tepat léq atas taoq Deside Isa. Sesampun nike ie pade turunang dengan képaq nike bareng kance tipahne. Waktu Deside Isa cingakin beléq gati iman ie pade, Ie bemanik léq dengan képaq nike, “Anak Tiang, dose-dosende sampun teampunin.” Ahli-ahli Taurat saq kenyeke melinggih léq derike mulai beketuan léq dalem angenne, “Bani gati dengan niki bebase maraq nike! Ie menghine Allah. Sai saq bau ngampunin dose selain Allah?” Léq waktu nike éndah Deside Isa wikan pikiran ie pade. Terus Ie bemanik, “Kembéq side pade beketuan maraq nike léq dalem angende? Mbé saq molahan: ngucapang, ‘Dosende sampun teampunin’, atao ngucapang, ‘Ures, angkat tipahde dait lampaq’? Laguq adéq side pade nenaoq bahwe léq dunie niki Bije Manusie bedowé kuase ngampunin dose.” Beterus, Deside Isa bemanik léq dengan képaq nike, “Ures, angkat tipahde dait uléq!” Dengan képaq nike ures, langsung bait tipahne terus sugul tesaksiang siq ie pade selapuq. Dengan-dengan nike takjub, terus melieang Allah, ie pade bebase, “Ite ndéq uwah serioq peristiwe maraq niki!” Deside Isa tulak malik ojok sedin Danao Galilea. Luwéq dengan parek tipaq Ie, dait Deside Isa ngajah ie pade. Sewaktu Deside Isa bemargi léq derike, Ie cingakin sopoq penagih pajek, aranne Lewi bije Alpeus, kenyekene tokol léq taoqne begawéan. Deside Isa bemanik léq ie, “Silaq turut Tiang!” Terus Lewi nganjeng dait ngiring Deside Isa. Sewaktu Deside Isa kenyeke medaran léq gedéng Lewi, luwéq dateng penagih pajek dait dengan-dengan bedose, milu medaran bareng Deside Isa dait pengiring-pengiring-Ne. Séngaq luwéq léq antare ie pade saq ngiring Deside Isa. Araq ahli-ahli Taurat léman golongan Parisi serioq Deside Isa bareng medaran kance penagih-penagih pajek dait dengan-dengan bedose. Jari ie pade beketuan léq pengiring-pengiring Deside Isa, “Kembéq gurunde teiring medaran siq penagih-penagih pajek dait dengan-dengan bedose nike?” Deside Isa pirengang napi saq teketuanang siq ie pade, terus Deside Isa bejawab, “Dengan saq séhat ndéq merluang tabib, cume dengan saq sakit doang. Tiang dateng ndéqne jari ngempoh dengan-dengan saq nganggep diriqne sampun kenaq, laguq dengan-dengan saq bedose.” Léq sopoq waktu pengiring-pengiring Yahya dait dengan-dengan Parisi kenyeke puase. Terus araq dengan parek tipaq Deside Isa dait metakén, “Kembéq pengiring-pengiring Yahya dait pengiring-pengiring dengan Parisi puase, laguq pengiring-pengiring Pelungguh nénten?” Jawab Deside Isa léq ie pade, “Segerah temué-temué pade puase lamun pengantén mame masih araq bareng ie pade? Sengonéq pengantén mame masih araq bareng ie pade, pasti ie pade ndéq puase. Laguq gen dateng waktune pengantén mame nike tebait léman ie pade. Léq waktu nike baruq ie pade puase. Ndéq araq dengan saq nampel kelambi saq sampun lotoh kadu bakal saq masih baru. Séngaq bakal saq jari penampel nike gen keset dait ngeroékang kelambi nike sehingge gen miaq kelambi nike sayan beléq roékne. Maraq nike éndah ndéq araq dengan saq ngisiq aiq anggur saq baru léq dalem kantong léndong saq lebung. Séngaq aiq anggur saq baru nike gen miaq kantong nike bedah sehingge deduaqne tetetéh. Anggur saq baru harus teisiq léq dalem kantong saq baru éndah!” Léq sopoq jelo, waktu nike jelo Sabat, Deside Isa kance pengiring-pengiring-Ne bemargi léq lendang gandum. Sambil bemargi pengiring-pengiring-Ne pade bau gandum. Beterus dengan-dengan Parisi matur léq Deside Isa, “Kembéq pengiring-pengiring Pelungguh piaq hal saq ndéq kanggo telaksaneang léq jelo Sabat?” Beterus Deside Isa bemanik malik, “Jelo Sabat tepiaq umaq manusie; ndéqne manusie umaq jelo Sabat. Jari, Bije Manusie nike éndah Penguase jelo Sabat.” Deside Isa tulak malik ojok balé ibadah. Léq derike araq sopoq dengan saq imene maté setowéq. Léq derike araq dengan-dengan saq mélé boyaq kesalaqan Deside Isa adéqne bau ngelaporang Ie. Jari, ie pade terus merhatiang Deside Isa, napi Ie gen nyelahang dengan léq jelo Sabat. Deside Isa bemanik léq dengan saq imene maté setowéq nike, “Silaq nganjeng léq deriki, léq julu.” Beterus Deside Isa beketuan léq dengan-dengan saq araq léq derike, “Menurut agamente, napi saq kanggo ite laksaneang léq jelo Sabat? Laksaneang hal saq solah atao saq jahat? Nyelametang dengan atao nyematéq?” Ie pade tedoq doang. Siq menggah Deside Isa cingakin sekelining-Ne, laguq Deside Isa éndah sedih séngaq ie pade pagah gati. Beterus Ie bemanik léq dengan nike, “Ulurang imende.” Dengan nike ngulurang imene, dait imene selah. Make dengan-dengan Parisi bilin balé ibadah nike, terus nyerepek berunding kance pire dengan anggote golongan Herodes jari nyematéq Deside Isa. Beterus Deside Isa dait pengiring-pengiring-Ne nyingkir ojok Danao Galilea. Luwéq gati dengan léman Galilea saq lumbar ngiring Deside Isa. Luwéq éndah saq dateng léman Yudea, léman Yerusalem, léman daérah Idumea, dait léman daérah léq bagian timuq Kokoq Yordan, dait léman sekiter kote-kote léq Tirus dait Sidon. Ie pade selapuq parek ojok Deside Isa, séngaq ie pade dengah mengenai hal-hal saq sampun telaksaneang siq Deside Isa. Dengan-dengan nike luwéq gati, sehingge Deside Isa ngemanikang pengiring-pengiring-Ne siepang Ie perau, adéq Ie nénten tedesek siq dengan-dengan nike. Luwéq gati dengan teselahang siq Deside Isa, sehingge selapuq dengan sakit bedesek-desekan berusahe ngerapetin Deside Isa adéqne bau jamah Ie. Sewaktu serioq Deside Isa, roh-roh jahat nike terus doang sujut léq arepan-Ne dait bekuih, “Pelungguh Bije saq asalne léman Allah!” Laguq roh-roh jahat nike tebalaq siq Deside Isa badaqang sai setetune Ie. Beterus Deside Isa taék ojok sopoq bukit. Ie ngemanikang dengan-dengan saq Ie kayunang dait dengan-dengan nike parek. Deside Isa piléq due olas dengan léq antare ie pade, dait bemanik, “Tiang piléq side pade, adéq side pade turut Tiang, adéq Tiang utus side pade jari nyebarang Kabar Solah léman Allah, dait side pade gen mauq kuase jari sediq sétan.” Niki aran kedue olas dengan nike: Simon (saq Ie sebut éndah Petrus), Yakub dait Yahya semetonne, ie pade bije-bije Zebedeus (ie pade niki tearanin siq Deside Isa Boanerges, artine “Anak guntur”), Andreas, Pilipus, Bartolomeus, Matius, Tomas, Yakub bije Alpeus, Tadeus, Simon dengan Zelot, dait Yudas Iskariot saq behianat léq Deside Isa. Beterus Deside Isa tame ojok sopoq gedéng. Laguq dengan luwéq dateng malik bekumpul, jangke Deside Isa dait pengiring-pengiring-Ne ndéq araq waktu medaran. Sewaktu keluarge-Ne dengah hal nike, ie pade lumbar jari bait Deside Isa, séngaq dengan-dengan bebase, “Ie sampun jogang!” Ahli-ahli Taurat saq dateng léman Yerusalem nimbal, “Ie tekuasein siq Beelzebul, dait siq kuase léman datune sétan Ie sediq sétan-sétan nike.” Make Deside Isa ngemanikang dengan luwéq nike, dait bemanik kadu perumpamean-perumpamean léq ie pade. “Segerah Belis sediq Belis,” manik Deside Isa. “Lamun sopoq negare araq golongan-golongan saq saling bemusuhan negare nike ndéq gen kuat. Dait lamun dalem sopoq keluarge ndéq araq persatuan dait anggote-anggotene saling bemusuhan, keluarge nike gen ancur. Lamun Belis ngelawan diriqne mésaq dait saling bemusuhan, ie ndéq bau tahen ngonéq, dait pasti gen musnah. Ndéq araq sopoq dengan juaq saq bau tame ojok balé dengan saq kuat dait mélé ngerampas dowéne lamun ie ndéq juluan sékoq dengan saq kuat nike. Sesampun nike baruq ie bau ngerampas dowéne. Tiang badaq side: Setetune selapuq dose dait penghinean manusie gen teampunin, seluwéq napi juaq penghinean saq ie pade ucapang. Laguq lamun ie menghine Roh Suci, ie ndéq bau teampunin! Séngaq penghinean nike dose saq kekel!” ( Deside Isa bemanik maraq nike séngaq araq dengan saq bebase bahwe Ie tekuasein siq roh jahat.) Sesampun nike, mamiq bini dait sanak-sanak Deside Isa rauh. Ie pade nganjeng léq luah, dait suruqne dengan ngempoh Deside Isa. Waktu nike luwéq dengan kenyeke tokol léq sekelining Deside Isa. Ie pade matur léq Deside Isa, “Silaq cingakin, mamiq bini dait sanak-sanak Pelungguh araq léq luah. Ie pade boyaq Pelungguh.” Jawab Deside Isa, “Sai mamiq bini Tiang? Sai sanak-sanak Tiang?” Terus Deside Isa perhatiang dengan-dengan saq tokol léq sekelining-Ne terus bemanik, “Niki inaq dait semeton Tiang! Dengan saq ngelaksaneang pekayunan Allah, ie saq jari semeton mame dait semeton nine serte inaq Tiang!” Deside Isa mulai malik ngajahang léq sedin danao. Luwéq gati dengan bekumpul léq sekelining-Ne. Keranaq nike Ie lumbar melinggih léq dalem sopoq perau léq atas aiq, dait dengan luwéq nike nganjeng léq sedin danao. Beterus Deside Isa ngajahang luwéq hal tipaq ie pade kadu perumpamean. Maraq niki Deside Isa ngajah ie pade. “Pade dengahang! Araq sopoq dengan lumbar sawur binéq. Sewaktu ie kenyeke sawur binéq nike, araq binéq saq geriq léq langan. Beterus dateng kedit ngaken binéq nike jangke bis. Araq éndah saq geriq léq taoq saq bebatu-batu saq tanaqne sekediq. Binéq-binéq nike becat tiwoq séngaq tanaqne sekediq, laguq sesampun panjeng jelo, suli-suli nike mulai layu beterus gero dait maté séngaq ndéq berakah. Araq éndah binéq saq geriq léq tengaq bebenes beduwi. Bebenes nike sayan beléq, dait gepit suli-suli nike sehingge ndéq bebuaq. Laguq araq éndah binéq saq geriq léq tanaq saq subur. Binéq nike tiwoq, terus jari beléq dait bebuaq, araq saq telung dase, araq saq enem dase, dait araq saq satus kali lipet.” Sesampun nyeriteang perumpamean nike, Deside Isa bemanik, “Sai-sai bedowé kentok jari dedengah, harus ie dengahang!” Sewaktu Deside Isa kenyeke mésaq-mésaq, pire dengan saq sampun dengah perumpamean nike parek tipaq Ie bareng kance kedue olas pengiring-Ne. Ie pade tunas adéq Deside Isa ngartiang perumpamean nike. Make Deside Isa bemanik léq ie pade, “Side pade sampun teicanin jari nenaoq rahasie Kerajaan Allah. Laguq dengan-dengan luah teajah kadu perumpamean, adéq: ‘Timaq ie pade serioq laguq ndéq paham, timaq ie pade dengah laguq ie pade ndéq ngerti, adéq ie pade ndéq tobat dait Allah ngampunin ie pade.’ ” Beterus Deside Isa bemanik léq ie pade, “Lamun side pade ndéq ngerti perumpamean nike, berembé side pade bau ngerti perumpamean-perumpamean saq lain? Dengan saq sawur binéq nike dengan saq nyampéang Manik Allah. Binéq saq geriq léq langan ibarat dengan-dengan saq dengah Manik Allah. Sesampun dengah, dateng Belis dait bait napi saq sampun tesawur léq dalem até ie pade. Binéq saq geriq léq taoq saq bebatu-batu ibarat dengan-dengan saq dengah Manik Allah nike, dait langsung nerimaq siq seneng angenne. Laguq Manik Allah nike ndéq berakah léq até ie pade, sehingge ndéq tahen ngonéq. Sewaktu ie pade mauq penyusah atao penganiayean lantaran Manik Allah nike, ie pade langsung murtat. Binéq saq geriq léq tengaq bebenes saq beduwi nike ibarat dengan-dengan saq dengah Manik Allah nike, laguq kuatir mengenai idup ie pade dait melét idup méwah. Segale macem napsu tame ojok dalem até ie pade. Keranaq nike Manik Allah tegepit léq dalem aténe sehingge ndéq bebuaq. Dait binéq saq geriq léq tanaq saq subur ibarat dengan-dengan saq dengah Manik Allah nike, dait nerimaq, ie pade bebuaq luwéq, araq saq telung dase, araq saq enem dase dait araq saq satus kali lipet hasilne.” Selanjutne manik Deside Isa, “Dengan jauq dilah ndéqne jari tetoloq léq bawaq tepaq atao léq bawaq lasah, laguq adéq tetoloq léq atas naén dilah. Ndéq araq saq teseboq, saq ndéq gen penggitan; dait ndéq araq saq terahasieang saq ndéq gen tebungkar. Keranaq nike, lamun bedowé kentok, pade dengahang!” Beterus Deside Isa bemanik malik, “Perhatiang napi saq side pade dengah niki! Ukuran saq side pade kadu léq dengan lain, nike éndah gen tekadu siq Allah léq side pade -- malahan luwéqan malik. Séngaq dengan saq sampun bedowé, gen teican luwéqan malik; laguq dengan saq ndéq bedowé napi-napi, make napi juaq saq araq léq ie gen tebait.” Deside Isa ngelanjutang penuturan-Ne, “Maraq niki halne Kerajaan Allah nike, keadaanne bau teumpameang maraq dengan saq sawur binéq léq lendangne. Léq kekelem atao kenjelo, sewaktu ie tindoq atao ngase, binéq-binéq nike tiwoq dait sayan beléq. Laguq berembé entane binéq-binéq nike tiwoq dait jari sayan beléq dengan nike ndéq nenaoq. Tanaq nike mésaq saq nyugulang hasil: Penembéq pémpangne, beterus motékne, terus buaqne. Dait lamun gandum nike sampun toaq, dengan nike éndah saq penembéq ngawis séngaq sampun wayene tepataq.” Deside Isa beketuan, “Napi saq gen ite kadu bandingang Kerajaan Allah nike? Conto napi saq bau ite kadu jari jelasang ie? Kerajaan Allah setetune maraq perumpamean niki: Araq sopoq dengan bait sopoq tolang sawi, terus tesawur léq tanaq. Tolang sawi nike binéq saq paling kodéq léq dunie. Laguq lamun sampun tiwoq, ie jari saq paling beléq léq antare selapuq tetaletan. Pémpang-pémpangne benes gati bau taoq kedit-kedit miaq kesebu léq dalemne.” Maraq nike Deside Isa nyampéang Manik Allah kadu luwéq perumpamean, sesuai kance pengertian ie pade. Deside Isa kereng kadu perumpamean lamun Ie ngajah dengan-dengan nike. Laguq lamun Ie kance pengiring-pengiring-Ne doang, Deside Isa jelasang selapuqne tipaq ie pade. Léq kebian nike éndah, Deside Isa bemanik léq pengiring-pengiring-Ne, “Silaq ite belayar ojok itoqan danao.” Make Deside Isa taék ojok perau, dait pengiring-pengiring-Ne bilin dengan luwéq léq sedin danao, terus taék ojok perau saq pade. Perau-perau lain éndah araq léq derike. Beterus Deside Isa dait pengiring-pengiring-Ne mulai belayar. Ndéq ngonéq sesampun nike, dateng angin pusut. Umbak beléq mulai ngamuk dait tame ojok dalem sehingge perau nike gen penoq siq aiq. Léq waktu nike Deside Isa kenyeke merem léq bagian mudi perau nike. Pengiring-pengiring-Ne tangiang Deside Isa. Ie pade matur, “Paq Guru! Napi Pelungguh nénten peduli, lamun ite celake?” Deside Isa metangi, terus semprak-Ne angin nike dait bemanik léq danao nike, “Engkah, tenang!” Langsung angin nike telang dait danao nike jari tenang gati. Beterus Deside Isa bemanik léq pengiring-pengiring-Ne, “Kembéq side pade takut? Kembéq side pade ndéq percaye?” Make ie pade jari takut, dait bebase sopoq kance saq lainne, “Sai setetune dengan niki jangke angin dait umbak éndah taat léq Ie.” Beterus Deside Isa dait pengiring-pengiring-Ne rauh léq itoqan Danao Galilea, léq daérah dengan Gerasa. Waktu Deside Isa baruq turun léman perau, Ie tedatengin siq sopoq dengan mame saq sugul léman goe-goe kuburan. Dengan nike tekuasein siq roh jahat dait ndot léq kuburan-kuburan. Ie ndéq bau tetaliq malik; timaq kadu ranté. Ime dait naéne rimpes tetaliq, laguq tetep ranté-ranté nike tepegatang, dait besi léq naéne ie polakang. Ie kuat gati sehingge ndéq araq sopoq dengan juaq saq bau nahen ie. Kenjelo kekelem ie ngelamang léq kuburan dait léq bukit-bukit sambil nyurak-nyurak dait ngempuk awakne jangke bakat kadu batu. Sewaktu léman jaoq ie serioq Deside Isa rauh, ie pelai terus sujut léq arepan Deside Isa. Siq suare saq beléq ie bekuih, “Deside Isa, Bije saq asalne léman Allah Saq Maheagung! Gen Pelungguh kumbéqang tiang niki? Demi Allah tiang tunas, sampunang Pelungguh siksaq tiang!” ( Dengan nike matur maraq nike séngaq Deside Isa bemanik léq ie, “Roh jahat, sugul léman dengan niki!”) Beterus Deside Isa bemanik léq ie, “Sai arande?” Jawab dengan nike, “Aran tiang ‘Legiun’ -- séngaq tiang pade luwéq gati!” Sanget siq ie tunas adéq Deside Isa sampunang préntahang roh-roh jahat nike sugul léman daérah nike. Léq dékét taoq nike araq luwéq gati bawi kenyeke boyaq kakenan léq tembéréng bukit. Roh-roh jahat nike tunas léq Deside Isa, “Manikang tiang pade tame ojok dalem bawi-bawi nike.” Petunasan ie pade tekabulang siq Deside Isa. Jari, roh-roh jahat nike sugul léman dengan nike terus tame ojok dalem bawi-bawi nike. Selapuq bawi saq luwéq nike pelai, terus nimproh léman sedin jurang ojok dalem danao, terus ketelep -- selapuqne araq kire-kire due iyu luwéqne. Penjage-penjage bawi nike pelai, terus nuturang hal nike léq kote dait léq dése sekiterne. Beterus dengan-dengan sugul jari serioq napi saq sampun telaksane. Ie pade dateng ojok Deside Isa. Terus serioqne dengan saq tekuasein siq Legiun nike, kenyeke tokol léq derike. Ie sampun kadu kelambi, dait pikiranne éndah sampun waras. Make ie pade selapuq jari takut. Dengan-dengan saq sampun nyaksiang mésaq peristiwe mengenai dengan nike dait bawi-bawi nike nyeriteang napi saq sampun telaksane. Beterus sanget siqne tunas siq penduduk daérah nike adéq Deside Isa bilin daérah nike. Léq waktu Deside Isa taék ojok dalem perau, dengan saq sendéqmanne tekuasein siq sétan nike tunas léq Deside Isa, adéqne teijinang ngiring Ie. Laguq Deside Isa nénten setuju, manik-Ne, “Uléq dait ceriteang léq kadang jarinde napi saq sampun telaksaneang Tuhan tipaq side dait berembé solahne Ie léq side!” Jari dengan nike lumbar, dait mulai nyeriteang léq daérah Dekapolis selapuq saq sampun telaksaneang siq Deside Isa léq ie. Selapuq dengan bengaq dengah hal nike. Deside Isa tulak malik ojok itoqan danao. Léq sedin danao nike luwéq dengan dateng bekerimpun léq sekelining Deside Isa. Beterus parek sopoq dengan aranne Yairus, ie kepale balé ibadah léq kote nike. Sewaktu Yairus serioq Deside Isa, ie sujut léq arepan-Ne, dait sanget siqne tunas, “Bapaq, anak tiang saq nine sakit parah. Tunas Pelungguh rauh jari jamah ie adéq ie selah dait tetep idup!” Beterus Deside Isa lumbar teiring siq Yairus. Luwéq dengan ngiring Ie, dait bedesek-desekan léq dékét-Ne. Léq antarene araq éndah sopoq dengan nine saq sampun due olas taun sakit pendarahan. Ie sampun kereng gati teowat siq tabib-tabib, jangke bis selapuq dowéne, laguq ndéq araq gati manpaatne malahan sebalikne keadaanne sayan parah. Dengan nine nike sampun luwéq dengah mengenai Deside Isa. Make léq tengaq-tengaq dengan luwéq nike, ie rapetin Deside Isa léman mudi dait kintur jubah-Ne, séngaq ie pikir, “Asal tiang kintur jubah-Ne, tiang gen selah!” Dait langsung waktu nike éndah pendarahanne engkah. Ie beridap bahwe ie sampun selah. Léq waktu nike éndah Deside Isa wikan bahwe araq kekuatan saq sugul léman diriq-Ne. Beterus Ie cingakin andang dengan luwéq nike dait beketuan, “Sai saq kintur jubah Tiang?” Pengiring-pengiring-Ne bejawab, “Pelungguh cingakin araq luwéq dengan bedesek-desekan. Pelungguh masih beketuan sai saq kintur jubah Pelungguh?” Laguq Deside Isa terus doang cingakin léq sekelining-Ne jari boyaq dengan saq sampun gawéq hal nike. Dengan nine nike nenaoq napi saq sampun telaksane léq diriqne, siq rase takut dait leger ie sujut léq arepan Deside Isa, terus ie ngakuq selapuq hal nike. Beterus Deside Isa bemanik léq dengan nine nike, “Anak Tiang, imande sampun miaq side selah! Silaq Lumbar dalem damé, side tetu-tetu sampun selah!” Sewaktu Deside Isa masih bebaos, araq pelayan-pelayan dateng léman balé Yairus. “Bijende sampun ninggal,” basen ie pade tipaq Yairus. “Sampunang pelungguh nyusahang Bapaq Guru malik.” Laguq Deside Isa nénten peduli napi saq tesampéang siq dengan-dengan nike, terus Ie bemanik léq Yairus, “Ndaq takut, percaye doang!” Deside Isa tetep bemargi, laguq Ie nénten ngijinang sopoq dengan juaq ngiring Ie, kecuali Petrus, Yakub dait Yahya, semetonne Yakub. Sewaktu ie pade rauh léq balé Yairus, Deside Isa cingakin dengan-dengan pade uyut gati, pade nangis dait pade ngerung keras-keras dait pada éroq aséq. Beterus Deside Isa tame dait bemanik léq ie pade, “Kembéq uyut-uyut dait nangis? Kanak nike ndéq milinang, ie cume tindoq!” Ie pade ngeréréqang Deside Isa. Beterus Deside Isa manikang ie pade selapuq sugul, terus Ie jauq inaq amaq kanak nike dait ketelu pengiring-Ne tame ojok dalem kamar kanak nike. Deside Isa tegel ime kanak nike terus bemanik léq ie, “Talita kum,” saq artine, “Kanak nine, Tiang bemanik léq side: Ures!” Kanak nike langsung ures dait lampaq séngaq umur kanak nike sampun due olas taun. Selapuq saq nyaksiang peristiwe nike takjub gati! Laguq Deside Isa balaq ie pade ndaq gati nyeriteang hal nike tipaq sai-sai. Beterus manik-Ne, “Béng kanak nike bekelor.” Beterus Deside Isa berangkat léman derike dait rauh léq kampung asal-Ne, teiring siq pengiring-pengiring-Ne. Léq jelo Sabat Ie mulai ngajahang léq balé ibadah. Araq luwéq dengan léq derike. Waktu dengan-dengan nike dengah pengajahan Deside Isa, ie pade bengaq gati. Ie pade bebase, “Léman mbé dengan niki mauq selapuq nike? Hikmat macem napi saq araq léq Ie? Berembé Ie bau piaq muqjizat saq maraq nike? Tekan Ie niki tukang kayuq, bije Mariam, dait sanakne Yakub, Yoses, Yudas dait Simon? Sanak-sanak-Ne saq nine éndah araq ndot léq deriki.” Keranaq nike Deside Isa tetolaq siq ie pade. Beterus Deside Isa bemanik léq ie pade, “Sopoq nabi tehormatin léq mbé-mbé, kecuali léq kampung asalne, léq antare semeton, kadang jarine dait keluargene mésaq.” Léq taoq nike Deside Isa nénten bau piaq sopoq juaq muqjizat, kecuali nyelahang dengan-dengan sakit siq care noloq gading-Ne léq atas ie pade. Deside Isa bengaq séngaq ie pade ndéq percaye. Beterus Deside Isa lumbar ojok kampung-kampung léq sekiter nike, dait ngajahang. Ie ngemanikang kedue olas pengiring-Ne, terus ngutus ie pade due-due dait ngicanin kuase tipaq ie pade jari sediq roh-roh jahat. Ie ngicanin petunjuk niki tipaq ie pade, “Ndaq jauq napi-napi dalem kelampande, kecuali tunjang. Ndaq jauq keloran, atao takaq sangu atao képéng. Kadu sepatu, laguq ndaq jauq due kelambi.” Deside Isa éndah bemanik, “Lamun side pade tame ojok sopoq balé, ndot léq derike jangke side pade bilin taoq nike. Laguq lamun side pade dateng léq sopoq taoq, dait dengan-dengan léq derike ndéq mélé nerimaq dait dengahang side pade, bilin taoq nike. Dait kerapang kerepuk léman lampak naénde jari peringetan tipaq ie pade!” Beterus kedue olas pengiring Deside Isa nike lumbar. Ie pade lumbar nyampéang berite bahwe manusie harus tobat léman dose-dosene. Pengiring-pengiring Deside Isa nike sediq luwéq roh jahat, ngolésang minyak léq dengan sakit dait nyelahang ie pade. Berite-berite mengenai selapuq peristiwe nike dateng éndah tipaq Raje Herodes, lantaran peséngan Deside Isa sampun kesohor léq mbé-mbé. Araq dengan saq bebase, “Yahya Pembaptis sampun idup malik! Keranaq nike Ie bedowé kuase jari miaq keajaipan nike.” Laguq dengan-dengan lain bebase, “Ie Elia.” Araq éndah saq bebase, “Ie nabi maraq salaq sopoq nabi jaman laéq.” Sewaktu Herodes pireng hal nike, ie bebase, “Pasti niki Yahya Pembaptis saq piranan sampun tiang suruq penggal ulune. Mangkin ie sampun idup malik!” Séngaq sendéqman nike Herodes sampun préntahang dengan bau Yahya, dait sékoqne ie léq dalem bui. Herodes ngelaksaneang hal nike lantaran Herodias, sebiniqne Pilipus sanakne mésaq. Séngaq Herodes sampun nikah kance Herodias, dait mengenai hal nike Yahya sampun peringet Herodes maraq niki, “Nénten kanggo pelungguh merariq kance sebiniq sanakde nike!” Keranaq nike Herodias dendem léq Yahya dait beniat nyematéq Yahya, laguq ie ndéq bau ngelaksaneang hal nike. Séngaq Herodes sampun mréntahang dengan jagaq bagus-bagus keselametan Yahya léq bui, lantaran ie takut léq Yahya. Ie nenaoq bahwe Yahya nike dengan saq soléh dait suci saq teutus siq Allah. Dait mule lamun Yahya bebase, Herodes seneng éndah pirengang ie, timaq ie jari osah gati. Ahirne Herodias mauq kesempatan léq jelo ulang taun Herodes. Waktu nike Herodes ngaraqang gawé umaq selapuq pembeléq-pembeléq kerajaan, prewire-prewire, dait tokoh-tokoh masyarakat Galilea. Léq gawé nike, bije Herodias saq dedare ngigel, dait igelanne nike sanget nyenengang angen Herodes dait temué-temuéne. Make Herodes bebase léq dedare nike, “Tunas léq tiang napi juaq saq side melétang. Tiang gen béng side!” Beterus Herodes bejanji léq dedare nike kadu sumpah. Herodes bebase, “Napi juaq saq side tunas gen tiang béng, timaq separo léman kerajaan tiang.” Make dedare nike sugul dait beketuan léq inaqne, “Inaq, napi saq harus tiang tunas?” Jawab inaqne, “Tunas ulune Yahya Pembaptis.” Dedare nike becat tulak tipaq Herodes, dait bebase, “Tiang tunas ulu Yahya Pembaptis teican léq tiang mangkin niki éndah kadu naré!” Pirengang petunasan nike Herodes sedih gati. Laguq ie ndéq bau nolaq petunasan nike séngaq ie sampun besumpah léq julu temué-temuéne. Jari, ie langsung mréntahang sopoq pengawalne bait ulu Yahya Pembaptis. Make dengan nike lumbar ojok bui, terus penggalne ulu Yahya. Beterus ie jauq ulu nike kadu naré dait nyerahang tipaq dedare nike. Dait dedare nike éndah nyerahang tipaq inaqne. Sewaktu pengiring-pengiring Yahya dengah hal nike, ie pade lumbar bait jenazah Yahya, terus nguburang ie. Beterus rasul-rasul saq teutus siq Deside Isa nike tulak malik, dait bekumpul kance Deside Isa. Ie pade ngelaporang léq Deside Isa selapuq saq sampun ie pade laksaneang dait ajahang. Luwéq gati dengan saq dateng dait lumbar sehingge Deside Isa dait pengiring-pengiring-Ne nénten bedowé kesempatan medaran. Keranaq nike Deside Isa bemanik léq pengiring-pengiring-Ne, “Silaq ite lumbar ojok taoq saq sepi adéq ndéq araq dengan lain dait ite mauq mentelah seberaq.” Make ie pade lumbar kadu perau ojok taoq saq sepi. Laguq sewaktu ie pade bilin taoq nike, luwéq dengan serioq ie pade dait nenaoq ojok mbé ie pade lumbar. Beterus léman selapuq kote léq wilayah nike, dengan-dengan pelai langan darat senjuluq Deside Isa dait pengiring-pengiring-Ne. Sewaktu Deside Isa turun léman perau, Ie cingakin dengan luwéq. Make Deside Isa periak léq ie pade séngaq ie pade maraq dombe saq ndéq bedowé pengarat. Make Ie mulai ngajahang mengenai luwéq hal tipaq ie pade. Sewaktu serep jelo, pengiring-pengiring Deside Isa matur léq Ie, “Taoq niki kesempil dait sampun serep jelo. Solahan Pelungguh manikang dengan-dengan niki lumbar, adéq ie pade mauq beli keloran léq dése-dése dait kampung-kampung léq sekiter niki.” Laguq jawab Deside Isa, “Side pade saq harus ngebéng ie pade bekelor.” “Napi tiang pade harus lalo beli ruti siq aji satak képéng perak jari béng bekelor dengan-dengan niki?” Maraq nike atur pengiring-pengiring Deside Isa nike. Beterus Deside Isa beketuan, “Araq pire ruti léq side pade? Cobaq lumbar serioq.” Sesampun ie pade lumbar serioq, ie pade matur, “Araq lime ruti dait araq due empaq éndah.” Beterus Deside Isa ngemanikang selapuq dengan nike tokol bekelompoq-kelompoq léq pupaq saq ijo. Dengan-dengan nike tokol, araq saq satus dengan sekelompoq, dait araq éndah saq séket dengan sekelompoq. Beterus Deside Isa bait lime ruti dait due empaq nike, terus nengadah andang langit dait ngucap syukur tipaq Allah. Sesampun nike, Ie peleng-peleng ruti nike kadu gading-Ne terus icanin-Ne léq pengiring-pengiring-Ne jari tebagi-bagiang tipaq dengan luwéq nike. Dait due empaq nike tebagi-bagi éndah tipaq ie pade selapuq. Ie pade bekelor jangke besuh. Beterus salo keloran nike tekumpulang siq pengiring-pengiring Deside Isa -- selapuqne araq due olas bakaq penoq. Dengan-dengan mame saq ngelorang ruti nike luwéqne kire-kire lime iyu dengan. Sesampun nike, Deside Isa manikang pengiring-pengiring-Ne berangkat kadu perau senjuluq Ie ojok Betsaida léq itoqan danao. Léq waktu nike éndah Ie ngemanikang dengan luwéq nike uléq. Sesampun Deside Isa bekelin léman ie pade, Ie lumbar ojok bukit jari bedo'e. Sewaktu kekelem, perau pengiring-pengiring Deside Isa sampun araq léq tengaq-tengaq danao, léq waktu nike Deside Isa masih araq léq darat. Deside Isa cingakin ie pade sengke gati bedayung perau nike séngaq angin belawanan andang kance perau. Make kire-kire antare jam telu dait jam enem kelémaq, Deside Isa rauh tipaq ie pade bemargi léq atas aiq, dait Ie tetep bemargi maraqne gen liwatin ie pade. Waktu ie pade serioq Deside Isa bemargi léq atas aiq, Deside Isa teparan hantu siq ie pade, sehingge ie pade bekuih-kuih siq takutne, séngaq ie pade selapuq serioq Ie dait ie pade tinjot gati. Laguq Deside Isa langsung bemanik léq ie pade, “Tenang! Tiang niki Isa, ndaq takut!” Beterus Deside Isa taék ojok perau ie pade, langsung waktu nike éndah angin jari tenang. Selapuq pengiring-pengiring-Ne bengaq gati. Séngaq sesampun peristiwe ruti nike ie pade ndéqman éndah ngerti dait ie pade tetep keras até. Sesampun rauh léq itoqan danao, ie pade mendarat léq Genesaret. Waktu ie pade turun léman perau, dengan-dengan serioq bahwe saq rauh nike Deside Isa. Terus ie pade pelai ojok mbé-mbé léq selapuq wilayah nike. Dait mulai jauq dengan-dengan sakit léq atas tipah ojok Deside Isa. Lamun ie pade dengah bahwe Deside Isa araq léq sopoq taoq, ie pade jauq dengan-dengan sakit ojok derike. Léq mbé juaq Deside Isa rauh -- timaq léq kampung, léq kote atao léq dése -- léq derike dengan tetep dateng dait noloq dengan-dengan sakit léq peken-peken. Ie pade tunas adéq dengan-dengan sakit nike teijinang kintur jubah Deside Isa, timaq cume potone. Selapuq saq kintur poton jubah-Ne jari selah. Sekelompoq dengan Parisi dait pire ahli-ahli Taurat léman Yerusalem, parek ojok Deside Isa. Ie pade serioq pengiring-pengiring Deside Isa bekelor kadu ime saq ndéq bersi secare agame, ndéq bisoq imene juluq, menurut aturan agame. Dengan-dengan Parisi, maraq nike éndah selapuq dengan Yahudi, taat gati léq adat istiadat leluhur ie pade. Ie pade ndéq gen bekelor sendéqman bisoq ime maraq saq sampun tetentuang. Lamun uléq léman peken, ie pade éndah ndéq bekelor lamun ndéq persiq diriqne juluq. Luwéq warisan lain malik saq ie pade tegel, umpamene hal bisoq jembung, cérét dait pekakas-pekakas tembage. Keranaq nike dengan-dengan Parisi dait ahli-ahli Taurat nike metakén léq Deside Isa, “Kembéq pengiring-pengiring Pelungguh nénten idup menurut adat istiadat leluhurte, laguq bekelor kadu ime saq najis?” Jawab Deside Isa, “Side pade dengan-dengan munapik! Tepat gati napi saq tenubuatang siq Nabi Yesaya, mengenai side pade, ‘Maraq niki Manik Allah, Dengan-dengan nike nyembah Tiang cume siq ucapan doang, laguq aténe jaoq léman Tiang. Percume ie pade nyembah Tiang, séngaq aturan manusie ie pade ajahang, maraqne hal nike aturan Tiang!’ Préntah-préntah Allah side pade ndéq perhatiang, dait aturan-aturan manusie side pade tegel pacu-pacu.” Beterus Deside Isa bemanik malik, “Side pade ceket gati nolaq préntah Allah adéq side pade bau pertahenang ajahande mésaq. Musa sampun ngicanin préntah niki, ‘Pade hormatin amaq dait inaqde!’ dait ‘Sai-sai saq nyumpaq amaqne atao inaqne, harus tehukum maté.’ Laguq side pade ngajahang: Lamun dengan bebase léq amaqne atao léq inaqne, ‘Napi saq seharusne tiang béng léq inaq dait amaq tiang, sampun tiang aturang tipaq Allah,’ make side pade bébasang dengan nike léman kewajibanne nulung amaqne atau inaqne. Jari, lantaran adat istiadat leluhurde, side pade nyatayang Manik Allah ndéq berlaku. Dait masih luwéq hal-hal maraq niki saq side pade laksaneang.” Beterus Deside Isa ngemanikang malik dengan luwéq nike, dait bemanik léq ie pade, “Pade dengahang adéq side pade ngerti! Ndéq araq napi juaq léman luah saq tame ojok dalem dengan saq bau piaq dengan nike jari najis. Sebalikne saq sugul léman sopoq dengan, nike saq piaq ie najis. [ Lamun bedowé kentok jari dengah harus dengahang.]” Sewaktu Deside Isa bilin dengan luwéq nike, dait tame ojok gedéng, pengiring-pengiring-Ne metakén léq Ie mengenai maksut perumpamean nike. Make Deside Isa bemanik léq ie pade, “Napi side pade ndéqman ngerti éndah? Napi side pade ndéq iniq ngerti bahwe saq tame ojok dalem sopoq dengan ndéq bau piaq dengan nike najis? Séngaq saq tame nike ndéq liwat até, laguq liwat tian, beterus sugul malik.” Siq ucapan-ucapan nike Deside Isa nyatayang bahwe selapuq keloran halal. Beterus Deside Isa bemanik malik, “Saq sugul léman dengan, hal nike saq piaq ie najis. Séngaq léman dalem até dengan, timbul pikiran-pikiran jahat saq jari penyebap dengan gawéq perbuatan saq cabul, memaling, nyematéq, bezinah, nipu, pitnah, dait gawéq hal-hal saq jahat, serakah, licik, talon até, sombong dait sengke teajah. Selapuq saq jahat nike dateng léman dalem, dait hal nike saq piaq dengan najis.” Beterus Deside Isa bilin taoq nike, dait lumbar ojok daérah Tirus. Ie tame ojok sopoq gedéng dait nénten kayun tewikanang siq dengan bahwe Ie araq léq derike. Laguq Ie nénten bau ngerahasieang kerauhan-Ne. Malahan, sopoq inaq saq bije ninene tekuasein siq roh jahat, dengah mengenai Deside Isa. Ie parek ojok Deside Isa dait sujut léq arepan-Ne. Dengan nine nike dengan Yunani bangse Siro-Penisia. Ie tunas tipaq Deside Isa jari sediq roh jahat nike léman bijene. Deside Isa bemanik léq dengan nine nike, “Kanak-kanak harus tebéng bekelor juluan. Ndéqne patut bait keloran kanak-kanak terus tesaut tipaq acong.” “Mule tetu, Junjungan Saq Mulie,” jawab dengan nine nike, “acong-acong léq bawaq méje éndah ngaken salo-salo saq tegeriqang siq kanak-kanak!” Beterus Deside Isa bemanik léq ie, “Lantaran jawabande nike, silaq side uléq; roh jahat sampun sugul léman bijende!” Dengan nine nike uléq. Léq balé, daitne bijene kenyeke tindoq léq lasahne, dait sétan tetu-tetu sampun sugul léman kanak nike. Beterus Deside Isa bilin daérah Tirus, dait nerusang pemargian-Ne langan Sidon ojok Danao Galilea, léq tengaq-tengaq Dekapolis. Léq derike dengan-dengan jauq sopoq dengan kedok dait pakoq ojok Deside Isa. Ie pade tunas léq Deside Isa adéq Ie noloq gading-Ne léq atas dengan nike. Deside Isa gadingang dengan nike, pekelin ie léman dengan luwéq beterus noloq ranggot-Ne ojok dalem kedue kentok dengan nike, terus Deside Isa beludah, dait jamah élaq dengan nike. Sesampun nike, Deside Isa nengadah andang langit sambil bebangsel dait bemanik tipaq dengan nike, “Epata!” artine, “Kebukaqan!” Kentok dengan nike kebukaq dait élaqne jari lemes, dait ie mulai tao ngeraos. Beterus Deside Isa balaq ie pade selapuq adéq ndaq nyeriteang hal nike léq sai-sai. Laguq sayan tebalaq siq Deside Isa, ie pade sayan nyebarang ie. Dait selapuq dengan saq dengah hal nike bengaq gati. Ie pade bebase, “Selapuqne Ie laksaneang secare bagus! Malahan Ie piaq dengan kedok iniq dedengah dait dengan pakoq tao ngeraos!” Ndéq ngonéq sesampun nike, araq malik sekelompoq dengan luwéq dateng bekumpul. Séngaq ie pade ndéq bedowé keloran, Deside Isa ngemanikang pengiring-pengiring-Ne dait bemanik, “Tiang periak léq dengan luwéq niki. Sampun telu jelo ngonéqne ie pade turut Tiang, dait mangkin ie pade ndéq bedowé keloran. Lamun Tiang suruq ie pade uléq kenyeke lapah, ie pade gen paleng léq tengaq langan, séngaq araq léq antare ie pade saq dateng léman jaoq.” Jawab pengiring-pengiring Deside Isa, “Léq taoq saq kesempil niki, léq mbé dengan mauq keloran saq cukup jari selapuq dengan niki?” Deside Isa beketuan léq ie pade, “Araq pire ruti léq side pade?” “Pituq,” jawab ie pade. Make Deside Isa manikang dengan luwéq nike tokol léq tanaq. Terus Ie bait kepituq ruti nike dait ngucap syukur tipaq Allah. Sesampun nike, Deside Isa peleng-peleng ruti nike kadu gading-Ne dait icanin-Ne tipaq pengiring-pengiring-Ne jari tebagi-bagiang ojok dengan-dengan. Make pengiring-pengiring-Ne ngelaksaneang hal nike. Ie pade éndah bedowé pire empaq kodéq. Deside Isa bait empaq-empaq nike dait ngucap syukur tipaq Allah, terus ngemanikang pengiring-pengiring-Ne bagi-bagiang empaq-empaq nike éndah. dait Ie kance pengiring-pengiring-Ne langsung taék perau dait lumbar ojok daérah Dalmanuta. Dengan-dengan Parisi parek ojok Deside Isa, dait mulai besoal jawab kance Ie jari boyaq kesalaqan adéq ie pade bau nyalahang Deside Isa. Ie pade tunas Deside Isa piaq tande ajaip léman sorge. Deside Isa ngeluh léq dalem até-Ne terus bejawab, “Kembéq dengan-dengan jaman niki tunas Tiang piaq tande? Tiang badaq side, ie pade ndéq gen teican tande napi-napi!” Beterus Deside Isa bilin ie pade, dait taék ojok perau; beterus berangkat ojok itoqan danao nike. Pengiring-pengiring Deside Isa lupaq jauq ruti. Ie pade cume bedowé sopoq ruti léq perau. Deside Isa peringet ie pade, “Onyaq-onyaq siq ragi ruti dengan-dengan Parisi dait ragi Herodes.” Make pengiring-pengiring Deside Isa nike mulai ngeraosang hal nike. Ie pade bebase, “Ie bemanik maraq nike, séngaq ite ndéq bedowé ruti.” Deside Isa wikan napi saq ie pade raosang. Keranaq nike Ie beketuan léq ie pade, “Kembéq side pade ngeraosang mengenai ndéq bedowé ruti? Napi side pade ndéqman nenaoq dait ndéqman ngerti éndah? Napi pikirande sampun kongol gati? Side pade bedowé penenteng -- kembéq ndéq serioq? Side pade bedowé kentok -- kembéq ndéq dengah? Napi side pade ndéq inget malik, lime ruti nike saq Tiang peleng-peleng jari lime iyu dengan? Pire bakaq penoq salo keloran saq side pade kumpulang?” “Due olas bakaq,” jawab ie pade. Deside Isa beketuan malik, “Dait waktu Tiang peleng-peleng pituq ruti jari empat iyu dengan, pire bakaq salo keloran saq side pade kumpulang?” “Pituq,” jawab ie pade. “Nah, napi side pade ndéqman ngerti éndah?” manik Deside Isa malik. Ie pade rauh léq Betsaida. Léq derike sopoq dengan jauq dengan bute tipaq Deside Isa, dait tunas adéq Ie jamah dengan bute nike jari nyelahang ie. Beterus Deside Isa tegel ime dengan bute nike dait ie tedéndén siq Deside Isa ojok luah dése nike. Terus Deside Isa beludah léq penenteng dengan nike, dait noloq gading-Ne léq penenteng dengan bute nike, terus beketuan léq ie, “Napi araq saq side serioq?” Dengan nike serioq ojok julu, terus matur, “Enggih. Tiang serioq dengan lampaq-lampaq; laguq ie pade penggitan maraq lolo.” Deside Isa noloq malik gading-Ne léq penenteng dengan nike. Mangkin niki dengan nike tetu-tetu nyerioq. Penentengne selah dait ie pedas serioq selapuqne. Beterus Deside Isa bemanik léq ie, “Uléq, dait ndaq tame ojok kampung nike malik.” Deside Isa dait pengiring-pengiring-Ne lumbar ojok dése-dése léq sekiter Kaisarea Pilipi. Léq tengaq langan Deside Isa beketuan léq ie pade, “Menurut basen dengan, sai Tiang niki?” Jawab ie pade, “Araq saq bebase: Yahya Pembaptis. Araq éndah saq bebase Elia, saq lain malik bebase: salaq sopoq nabi.” “Laguq menurut side pade mésaq, Tiang niki sai?” Deside Isa beketuan. Jawab Petrus, “Pelungguh Almasih!” Beterus Deside Isa bemanik léq pengiring-pengiring-Ne, “Ndaq gati badaqang hal nike léq sai-sai.” Sesampun nike, Deside Isa mulai ngajah pengiring-pengiring-Ne bahwe Bije Manusie harus luwéq menderite, dait tetentang siq pemimpin-pemimpin, imam-imam kepale, dait ahli-ahli Taurat. Ie gen tematéq, laguq léq jelo saq ketelu Ie gen idup malik. Secare jelas gati Deside Isa nyeriteang hal nike tipaq pengiring-pengiring-Ne. Make Petrus ngantuq Deside Isa ojok lempéng dait peringet Ie. Laguq Deside Isa cingakin dait merhatiang pengiring-pengiring-Ne, terus menggah léq Petrus, “Lalo léman té, Belis! Pikirande pikiran manusie, ndéqne pikiran Allah!” Beterus Deside Isa ngemanikang dengan luwéq saq araq léq derike bareng kance pengiring-pengiring-Ne. Beterus Ie bemanik léq ie pade, “Sebilang dengan saq mélé turut Tiang, ie harus ngelupaqang kepentinganne mésaq, ngelémbah salibne, dait tetep turut Tiang. Séngaq dengan saq mélé nyelametang nyawene, gen kélangan nyawene. Laguq dengan saq kélangan nyawene lantaran Tiang dait demi Kabar Solah léman Allah, dengan nike gen nyelametang nyawene. Napi untungne léq sopoq dengan, lamun seantéro dunie niki jari dowéne, laguq ie kélangan nyawene? Napi araq saq bau tekadu siq dengan jari tukah nyawene? Lamun dengan ilaq ngakuq Tiang dait manik Tiang léq jaman durhake dait jahat niki, Bije Manusie éndah gen ilaq ngakuq dengan nike, léq waktu Ie rauh éraq dalem kemuliean Bapa-Ne, teiring malaékat-malaékat saq suci.” Deside Isa bemanik malik tipaq ie pade, “Tiang badaq side pade: Setetune léq antare side pade saq araq léq deriki araq saq ndéq gen ninggal, sendéqman serioq Kerajaan Allah rauh siq kuase!” Enem jelo sesampun nike, Deside Isa gadingang Petrus, Yakub dait Yahya, nyendiri ojok sopoq gunung saq atas. Beterus Deside Isa begentiq rue léq julun ie pade. Kuace-Ne jari putéq ngempor. Ndéq araq sopoq dengan tukang popoq léq dunie niki saq tao mopoq putéqne maraq nike. Beterus ketelu pengiring-Ne nike serioq Deside Isa kenyeke bebaos kance Elia dait Musa. Make Petrus matur tipaq Deside Isa, “Paq Guru, maiq gati ite léq deriki. Silaq tiang pade penganjeng telu kémah, sopoq umaq Pelungguh, sopoqne Musa dait sopoqne malik umaq Elia.” Setetune Petrus ndéq nenaoq napi saq harus ie ucapang, séngaq ie kance kedue baturne kenyeke takut gati. Beterus awan turun léq atas ie pade, dait léman awan nike kedengahan suare, “Niki Bije Tiang saq Tiang kasihin. Pade dengahang Ie!” Becat-becat ie pade serioq sekelining ie pade, dait ndéq araq malik serioq sai-sai léq derike bareng ie pade, kecuali Deside Isa. Sewaktu ie pade turun léman gunung nike, ie pade teperinget siq Deside Isa, “Ndaq tuturang léq sai juaq napi saq side pade serioq nike, sendéqman Bije Manusie idup malik léman ninggal-Ne.” Ie pade taat léq pesen nike, laguq léq antare ie pade mésaq mulai ngeraosang napi maksut Deside Isa, “Idup malik léman ninggal-Ne”. Make ie pade metakén léq Deside Isa, “Kembéq ahli-ahli Taurat bebase bahwe Elia harus rauh juluan?” Jawab Deside Isa, “Mule tetu Elia gen dateng juluan dait ie gen siepang selapuqne. Laguq berembé halne siq Bije Manusie? Kembéq léq dalem Kitab Suci tetulis bahwe Ie gen luwéq menderite dait tehine siq dengan? Laguq Tiang badaq side: Elia sampun dateng, dait dengan-dengan perlakuang ie semélé angen ie pade. Nike sesuai kance saq sampun tetulis dalem Kitab Suci mengenai diriqne.” Sewaktu Deside Isa dait ketelu pengiring-Ne sampun araq malik bareng pengiring-pengiring saq lainne, ie pade serioq luwéq dengan léq derike. Araq ahli-ahli Taurat kenyeke besoal jawab kance pengiring-pengiring Deside Isa. Sewaktu dengan-dengan nike serioq Deside Isa, ie pade kemomotan, terus pelai nyambut Ie. “Napi saq side pade masalahang kance ahli-ahli Taurat nike?” Deside Isa beketuan léq pengiring-pengiring-Ne. Jawab salaq sopoq léman dengan luwéq nike, “Bapaq Guru, tiang jauq anak tiang tipaq Pelungguh. Ie tekuasein siq roh jahat saq miaq ie jari pakoq. Lamun roh nike nyerang ie, awakne tetimpak-timpak ojok tanaq, biwihne bekowok, gigine bekeretek dait selapuq awakne jari kojor. Tiang tunas pengiring-pengiring Pelungguh sediq roh jahat nike, laguq ie pade ndéq tao.” Make Deside Isa bemanik tipaq ie pade, “Luar biase side pade niki! Side pade tetu-tetu dengan saq ndéq percaye. Jangke piran Tiang harus araq kance side pade dait sabar tipaq side pade? Jauq kanak nike ojok deriki!” Beterus ie pade jauq kanak nike ojok Deside Isa. Waktu roh jahat nike serioq Deside Isa, ie piaq awak kanak nike kojor-kojor sehingge kanak nike geriq begoloq-goloq léq tanaq. Biwihne bekowok. Terus Deside Isa beketuan léq amaq kanak nike, “Sampun pire ngonéq ie maraq niki?” “Léman ie masih kodéq!” jawab amaqne. “Rimpes gati roh jahat nike berusahe nyematéq ie siq care geriqang ie ojok dalem api atao ojok dalem aiq. Keranaq nike lamun Pelungguh bau nulung, tulung tiang pade dait periak léq tiang pade!” “Napi basende? Lamun Pelungguh bau?” jawab Deside Isa. “Ndéq araq saq mustahil umaq dengan saq percaye!” Langsung amaq kanak nike bejawab siq suare saq beléq, “Tiang percaye! Laguq iman tiang kurang. Tulung tiang adéq tiang lebih percaye malik!” Sewaktu Deside Isa cingakin dengan luwéq mulai dateng bekerimpun léq derike, Ie préntahang roh jahat nike. Manik-Ne, “Roh pakoq dait kedok, Tiang préntahang sugul léman kanak niki dait ndaq gati tame malik ojok dalemne.” Roh jahat nike nyurak, dait awak kanak nike kojor-kojor, beterus sugul léman kanak nike. Kanak nike penggitan maraq mayit sehingge selapuq dengan bebase, “Ie sampun milinang!” Laguq Deside Isa negel imene dait tulung ie ures. Beterus kanak nike ures. Sesampun Deside Isa léq gedéng, pengiring-pengiring-Ne secare husus parek dait metakén, “Kembéq tiang pade ndéq bau sediq roh jahat nike?” Jawab Deside Isa, “Roh jahat saq maraq niki cume bau tesediq siq do'e.” Deside Isa dait pengiring-pengiring-Ne bilin taoq nike, dait lanjutang pemargian-Ne langan Galilea. Ie nénten kayun araq dengan saq nenaoq hal nike; séngaq Ie kenyeke ngajah pengiring-pengiring-Ne. Deside Isa bemanik tipaq pengiring-pengiring-Ne, “Bije Manusie gen teserahang tipaq kuase manusie dait Ie gen tematéq, laguq léq jelo ketelu Ie gen idup malik!” Pengiring-pengiring Deside Isa ndéq ngerti napi arti manik Deside Isa nike, laguq ie pade takut nakénang hal nike léq Deside Isa. Deside Isa dait pengiring-pengiring-Ne rauh léq Kapernaum. Sesampun léq gedéng, Deside Isa beketuan léq pengiring-pengiring-Ne, “Napi saq side pade raosang léq tengaq langan onéq?” Ie pade ndéq bejawab, séngaq léq tengaq langan ie pade betungkasan mengenai sai saq paling beléq léq antare ie pade. Deside Isa melinggih, beterus ngemanikang kedue olas pengiring-Ne nike. Ie bemanik léq ie pade, “Dengan saq mélé jari saq penembéq, ie harus jari saq penutuq dait harus jari pelayan selapuq dengan.” Beterus Deside Isa bait sopoq kanak kodéq, dait penganjeng-Ne kanak nike léq julu ie pade selapuq. Deside Isa kapong kanak nike dait bemanik léq pengiring-pengiring-Ne, “Dengan saq nerimaq sopoq kanak maraq niki lantaran Tiang, artine nerimaq Tiang. Dait dengan saq nerimaq Tiang, ie ndéq nerimaq Tiang doang, laguq nerimaq éndah Ie saq ngutus Tiang.” Beterus Yahya matur léq Deside Isa, “Paq Guru, tiang pade serioq dengan sediq roh jahat siq peséngan Pelungguh. Terus tiang pade balaq ie séngaq ie ndéq léman kelompoq ite.” Laguq jawab Deside Isa, “Ndaq balaq ie, séngaq ndéq araq sopoq dengan juaq saq miaq keajaipan siq aran Tiang, léq waktu nike éndah ngucapang hal saq lengé tipaq Tiang. Séngaq dengan saq ndéq ngelawan ite, artine bepihak léq ite. Pade inget! Dengan saq ngebéng nginem tipaq side lantaran side pade pengiring Almasih, ie pasti gen nerimaq upaqne.” “Sai-sai saq jari penyebap salaq sopoq léman kanak-kanak kodéq saq percaye léq Tiang niki bedose, solahan lamun batu penggilingan tetaliq léq belongne, dait ie tetetéh ojok dalem segare. Lamun imende miaq side bedose, peleng ime nike! Solahan side ndéq bedowé ime setowéq laguq idup bareng kance Allah, ketimbang bedowé due ime, laguq tetetéh ojok api nerake saq kekel. [ Léq derike api ndéq iniq pedaq, dait ulet ndéq iniq maté.] Dait lamun naénde miaq side bedose, peleng naé nike. Solahan side ndéq bedowé naé setowéq laguq side idup bareng kance Allah, ketimbang bedowé due naé, laguq tetetéh ojok dalem api nerake. [ Léq derike api ndéq iniq pedaq dait ulet ndéq iniq maté.] Lamun penentengde miaq side bedose, luit penentengde! Solahan side tame Kerajaan Allah bedowé sopoq penenteng, ketimbang side dait kedue penentengde tetetéh ojok dalem api nerake. Léq derike api ndéq iniq pedaq dait ulet ndéq iniq maté. Sebilang dengan gen tesiaq siq api. Sie nike solah, laguq lamun jari tawah, napi bau tepaéqang malik? Jari, side pade harus jari maraq sie dait -- idup damé sopoq kance saq lain.” Beterus Deside Isa bilin taoq nike, dait lumbar ojok daérah Yudea dait daérah léq itoqan Kokoq Yordan. Dengan luwéq dateng malik bekerimpun léq sekelining Deside Isa. Dait maraq biase Deside Isa ngajah ie pade. Beterus araq dengan-dengan Parisi dateng éndah jari boyaq kesalaqan adéqne bau nyalahang Deside Isa, ie pade metakén, “Napi kanggo sopoq semame séang seninene?” Jawab Deside Isa, “Musa ngicanin préntah napi léq side pade?” “Musa ngijinang dengan séang seninene asal nulis surat séang bejulu,” jawab ie pade. “Musa nulis préntah nike séngaq side pade sengke gati teajah,” manik Deside Isa léq ie pade. “Laguq léq penembéqne, sewaktu Allah cipteang manusie, Allah bemanik bahwe ‘Allah jariang ie pade mame dait nine. Keranaq nike dengan mame gen bilin inaq amaqne dait besopoq kance seninene, make deduaqne jari sopoq.’ Jari ie pade ndéqne due malik, laguq sopoq. Keranaq nike, napi saq sampun tepesopoq siq Allah, ndéq kanggo teséang siq manusie!” Sesampun ie pade tame gedéng, pengiring-pengiring Deside Isa metakén léq Deside Isa mengenai hal nike. Deside Isa bemanik léq ie pade, “Sai-sai séang seninene, terus merariq malik kance dengan nine lain, dengan nike idup dalem perzinahan tipaq seninene saq penembéq nike. Maraq nike éndah dengan nine saq séang semamene terus merariq kance dengan mame saq lain, ie éndah bezinah.” Araq dengan-dengan jauq kanak-kanak kodék ojok Deside Isa adéq Ie jamah ie pade. Laguq pengiring-pengiring Deside Isa siliq dengan-dengan nike. Cingakin hal nike, Deside Isa menggah terus bemanik tipaq pengiring-pengiring-Ne, “Alurang kanak-kanak nike dateng ojok Tiang! Ndaq balaq ie pade, séngaq dengan-dengan saq maraq niki saq dowéang Kerajaan Allah. Tiang badaq side! Setetune sai-sai saq ndéq nerimaq Kerajaan Allah maraq sopoq kanak kodéq, ie ndéq gen tame ojok dalemne.” Sesampun bemanik maraq nike, Deside Isa kapong kanak-kanak nike, beterus noloq gading-Ne léq atas ie pade dait ngicanin ie pade berkah. Sewaktu Deside Isa ngelanjutang malik pemargian-Ne, araq dengan pelai tipaq Ie. Dengan nike sujut léq arepan Deside Isa dait metakén, “Paq Guru saq solah, napi saq harus tiang piaq adéq bau nerimaq idup sejati dait kekel?” Jawab Deside Isa, “Kembéq side paran Tiang solah? Ndéq araq saq solah kecuali Allah mésaq. Side sampun nenaoq préntah-préntah Allah, ‘Ndaq nyematéq; ndaq bezinah; ndaq memaling; ndaq jari saksi duste; ndaq nipu; pade hormatin amaq dait inaqde.’ ” “Bapaq Guru,” atur dengan nike, “selapuq préntah nike sampun tiang turut léman bajang.” Deside Isa perhatiang dengan nike siq penoq kasih terus bemanik, “Masih sopoq hal malik saq side perluang. Lumbar dait jual selapuq dowénde; sedekahang képéngne tipaq dengan-dengan miskin, dait side gen mauq harte léq sorge. Sesampun nike dateng turut Tiang.” Sesampun dengah manik Deside Isa maraq nike, dengan nike kecéwe, terus bilin taoq nike siq susah angenne, séngaq ie sugih gati. Beterus Deside Isa perhatiang pengiring-pengiring-Ne, dait bemanik léq ie pade, “Sengke gati dengan sugih tame Kerajaan Allah!” Pengiring-pengiring-Ne bengaq dengah manik Deside Isa nike. Laguq Deside Isa bemanik malik, “Bije-bije Tiang, mule sengke tame Kerajaan Allah! Molahan sopoq onte tame loang jarum ketimbang dengan sugih tame ojok dalem Kerajaan Allah.” Ucapan-ucapan Deside Isa nike miaq pengiring-pengiring-Ne bengaq sehingge ie pade beketuan sopoq kance saq lain, “Lamun maraq nike, sai saq bau selamet?” Deside Isa merhatiang ie pade, terus bemanik, “Bagi manusie nike mustahil, laguq nénten mustahil bagi Allah; selapuqne mungkin bagi Allah.” Beterus Petrus matur, “Tiang pade sampun bilin selapuq-lapuqne jari ngiring Pelungguh.” Manik Deside Isa, “Tiang badaq side: setetune sebilang dengan saq sampun bilin baléne, semeton nine atao mame, inaq amaqne, atao bije-bijene, atao kebon bangketne lantaran Tiang dait lantaran Kabar Solah léman Allah, dengan nike gen mauq luwéqan léq waktu mangkin niki. Ie gen mauq balé, semeton nine, semeton mame, inaq, bije dait kebon bangket satus kali luwéqan -- timaq tebarengin siq macem-macem siksaqan. Dait éraq léq jaman saq gen dateng, ie gen nerimaq idup saq sejati dait kekel. Laguq luwéq dengan saq mangkin niki jari penembéq gen Jari saq penutuq, dait luwéq saq mangkin niki jari penutuq gen jari saq penembéq.” Deside Isa dait pengiring-pengiring-Ne kenyeke dalem pemargian ojok Yerusalem. Deside Isa bemargi léq arep, dait selapuq pengiring-pengiring-Ne kuatir. Dait dengan-dengan saq turut ie pade léman mudi éndah merase takut. Beterus Deside Isa ngemanikang malik pengiring-pengiring-Ne secare husus dait nyampéang léq ie pade napi saq gen telaksane laun léq diriq-Ne. Manik Deside Isa, “Pade dengahang. Mangkin ite lumbar ojok Yerusalem. Léq derike Bije Manusie gen teserahang tipaq imam-imam kepale dait ahli-ahli Taurat. Ie gen tehukum maté, beterus teserahang tipaq bangse-bangse saq ndéq kenal kance Allah. Ie pade gen ngoloq-oloq Ie, nijuh Ie, nyiksaq Ie, dait nyematéq Ie. Laguq sesampun telu jelo, Ie gen idup malik.” Beterus Yakub dait Yahya, bije-bije Zebedeus parek tipaq Deside Isa, ie pade matur, “Bapaq Guru, araq sopoq hal saq tiang pade melét Pelungguh laksaneang léq tiang pade.” Manik Deside Isa, “Napi saq side pade mélé adéq Tiang piaq léq side?” Jawab ie pade, “Tiang pade melét tokol léq kiri dait kanan Pelungguh, lamun Pelungguh melinggih léq dalem kemuliean Pelungguh.” “Side pade ndéq nenaoq napi saq side pade tunas,” manik Deside Isa léq ie pade, “Napi side pade sanggup nginem cawan penderitean saq harus Tiang inem dait tebaptis kadu baptisan saq harus Tiang terimaq?” “Sanggup,” jawab ie pade. Beterus Deside Isa bemanik malik tipaq ie pade, “Mule, side pade gen nginem cawan penderitean saq harus Tiang inem dait tebaptis kadu baptisan saq harus Tiang terimaq. Laguq mengenai sai saq gen tokol léq kanan atao kiri Tiang, nike ndéqne Tiang saq berhak nentuang, séngaq taoq nike gen teicanin tipaq dengan-dengan saq tetentuang siq Allah jari tokol léq derike.” Sewaktu sepulu pengiring Deside Isa saq lainne dengah hal nike, ie pade sili léq Yakub dait Yahya. Laguq Deside Isa ngemanikang ie pade terus bemanik: “Side pade nenaoq, bahwe ie pade saq tesebut pemréntah bangse-bangse mréntah rakyatne kadu ime besi, dait pembeléq-pembeléqne ngelampaqang kuasene secare keras tipaq ie pade. Laguq side ndéq kanggo maraq nike! Sebalikne, dengan saq mélé jari beléq léq antare side pade, ie harus jari pelayande. Dait dengan saq mélé jari saq penembéq léq antare side pade, ie harus jari hambe tipaq selapuqne. Séngaq Bije Manusie éndah rauh nénten jari telayanin laguq Ie rauh jari ngelayanin, dait nyerahang nyawe-Ne jari tebusan tipaq dengan luwéq.” Ie pade rauh léq Yeriko. Waktu Deside Isa kance pengiring-pengiring-Ne dait dengan luwéq bilin kote nike, araq dengan bute kenyeke tokol nunas-nunas léq sedin rurung. Aranne Bartimeus, bije Timeus. Sewaktu ie dengah bahwe saq kenyeke liwat léq derike Deside Isa dengan Nazaret, ie bekuih, “Deside Isa, Keturunan Daud, periakang tiang!” Ie tesiliq siq dengan luwéq dait tesuruq tedoq. Laguq sayan keras ie bekuih, “Keturunan Daud periakang tiang!” Beterus Deside Isa mentelah terus bemanik, “Empoh ie.” Beterus ie pade ngempoh dengan bute nike. Ie pade bebase léq ie, “Tenang! Side temanikang siq Deside Isa, silaq ures!” Dengan bute nike langsung saut jubahne, terus becat-becat nganjeng dait lumbar ojok Deside Isa. Deside Isa beketuan léq dengan bute nike, “Napi saq side melétang adéq Tiang piaq léq side?” Jawab dengan bute nike, “Paq Guru, tiang melét tao nyerioq.” Beterus manik Deside Isa, “Silaq Lumbar! Imande sampun miaq side selah.” Langsung waktu nike éndah dengan nike tao nyerioq. Beterus ie ngiring Deside Isa léq pemargian-Ne. Sesampun rapet Yerusalem, ie pade rauh léq kote Betpage dait Betania léq tembéréng Bukit Zaitun. Deside Isa ngemanikang due pengiring-Ne lampaq bejulu siq pesen: “Silaq lumbar ojok kampung saq araq léq julunde nike. Waktu side pade tame kampung nike, side pade gen ndait sopoq bagal saq masih odaq kenyeke tegeteng, saq ndéq uwah tetunggang siq dengan. Lekaq getenganne terus jauq ojok deriki.” Dait lamun araq dengan beketuan léq side pade, “Kembéq side lekaq getengan bagal nike?” Badaqang bahwe, “Junjungan Saq Mulie merluang bagal nike dait Ie gen becat nulakang ojok deriki.” Kedue pengiring Deside Isa nike lumbar, terus daitne sopoq bagal saq masih odaq kenyeke tegeteng léq lawang sopoq balé léq sedin rurung. Beterus ie pade lekaq getengan bagal nike. Dengan-dengan saq nganjeng léq derike beketuan léq ie pade, “Napi maksutde lekaq getengan bagal nike?” Ie pade bejawab maraq saq sampun temanikang siq Deside Isa tipaq ie pade. Make dengan-dengan nike ngalurang ie pade jauq bagal nike. Sesampun dateng léq Deside Isa, bongkor bagal nike ie pade lamak siq jubah ie pade, beterus Deside Isa taék léq atasne. Luwéq dengan kelat jubah ie pade léq rurung, araq éndah saq noloq pémpang-pémpang lolo kayuq saq ie pade bait léman lendang. Dengan-dengan saq lampaq léq julu dait dengan-dengan saq nurut mudi, selapuqne bekuih-kuih, “Hosana! Teberkahin Ie saq rauh dalem peséngan Tuhan! Teberkahin kerajaan saq gen rauh -- Kerajaan Daud leluhurte! Hosana léq taoq saq maheagung!” Ahirne Deside Isa rauh léq Yerusalem, beterus tame ojok Gedéng Allah. Léq derike Ie perhatiang sekelining-Ne. Laguq lantaran gen serep jelo, Ie terus berangkat ojok Betania bareng kance kedue olas pengiring-Ne. Léq jemaqne, sewaktu ie pade kenyeke lampaq sugul léman Betania, Deside Isa beridap seduk. Léman jaoq Ie cingakin sopoq lolo are saq benes daunne. Jari Ie lumbar ojok lolo are nike sang araq buaqne. Laguq sesampun Ie rauh léq lolo nike, Ie nénten ndait napi-napi, kecuali daun-daun doang, séngaq waktu nike ndéqman musim buaq are. Beterus Deside Isa bemanik léq lolo are nike, “Mulai mangkin ndéq araq sopoq dengan juaq saq gen kelorang buaq léman side malik!” Pengiring-pengiring Deside Isa dengah ucapan nike. Beterus ie pade rauh léq Yerusalem, dait Deside Isa tame malik ojok Gedéng Allah. Léq derike Ie mulai sediq selapuq dengan saq kenyeke bedagang dait belanje léq derike. Ie balik belah méje-méje dengan saq tekadu taoq tukah képéng, dait bangku-bangku saq tekadu bedagang kedit dare. Dait Ie nénten ngijinang dengan jauq barang-barang liwat leléah Gedéng Allah. Beterus Deside Isa ngajahang dengan-dengan léq derike. Ie bemanik, “Léq dalem Kitab Suci tetulis maraq niki: Allah bemanik, ‘Gedéng Tiang gen tesebut gedéng do'e umaq selapuq bangse.’ Laguq side pade jariang ie taoqne bekumpul dengan-dengan jahat!” Imam-imam kepale dait ahli-ahli Taurat pireng ucapan nike. Beterus ie pade mulai boyaq care jari nyematéq Deside Isa. Ie pade takut léq Deside Isa, séngaq selapuq dengan takjub dengah pengajahan-Ne. Léq waktu serep jelo, Deside Isa dait pengiring-pengiring-Ne bilin kote nike. Lémaq kelémaqne, waktu Deside Isa dait pengiring-pengiring-Ne liwat léq lolo are nike, ie pade serioq lolo nike sampun maté jangke akah-akahne. Terus Petrus inget siq peristiwe sejelo sendéqmanne. Make Petrus matur léq Deside Isa, “Paq Guru, silaq cingakin! Lolo are saq Pelungguh kutuk nike sampun maté!” Jawab Deside Isa, “Percaye tipaq Allah. Tiang badaq side pade: Setetune sai juaq saq bebase tipaq gunung niki, ‘Kerungkahan dait ngalih ojok segare!’ make hal nike gen telaksane léq side pade; asal side pade percaye dait ndéq bimbang, bahwe napi saq side pade ucapang nike gen tetu-tetu telaksane. Keranaq nike Tiang badaq side pade: Napi juaq saq side pade tunas dalem do'e, pade percaye bahwe Allah sampun ngicanin side pade napi saq side pade tunas, make side pade gen nerimaq ie. Dait lamun side pade bedo'e, laguq aténde ndéq seneng léq sopoq dengan, ampunin dengan nike juluq, adéq Bapa side léq sorge éndah ngampunin dose-dosende.” [ Lamun side pade ndéq ngampunin dengan lain, Bapa side léq sorge éndah ndéq gen ngampunin dose-dosende.] Ie pade tulak malik ojok Yerusalem. Dait léq waktu Deside Isa bemargi léq leléah Gedéng Allah, imam-imam kepale, ahli-ahli Taurat dait pemimpin-pemimpin Yahudi parek tipaq Ie. Ie pade metakén, “Atas dasar napi Pelungguh ngelaksaneang selapuqne niki? Sai saq aturin Pelungguh kuase nike?” Jawab Deside Isa, “Tiang éndah mélé beketuan léq side pade. Silaq jawab dait Tiang gen badaq side pade siq kuase sai Tiang ngelaksaneang hal-hal niki. Yahya baptis dengan siq kuase sai? Kuase Allah atao manusie?” Beterus imam-imam kepale dait pemimpin-pemimpin Yahudi mulai berunding léq antare ie pade. Ie pade bebase, “Lamun ite jawab, ‘Siq kuase Allah,’ Ie gen bemanik, ‘Lamun maraq nike kembéq side pade ndéq percaye léq Yahya?’ Laguq segerah ite jawab, ‘Siq kuase manusie.’ ” Séngaq ie pade takut léq dengan luwéq, lantaran selapuq dengan anggep Yahya nabi. Jari, jawab ie pade, “Mindah tiang.” Beterus Deside Isa bemanik léq ie pade, “Lamun maraq nike Tiang éndah ndéq badaq side pade siq kuase sai Tiang ngelaksaneang selapuqne niki.” Beterus Deside Isa mulai bemanik kadu perumpamean léq imam-imam kepale dait ahli-ahli Taurat dait pemimpin-pemimpin Yahudi nike. Deside Isa bemanik, “Araq sopoq dengan saq nalet anggur léq kebonne. Terus ie miaq lambah léq sekelining kebon nike. Sesampun nike ie kaliq longkak jari taoqne peres anggur, terus ie penganjeng menare taoq dengan bejage. Sesampun nike séweangne kebon anggur nike léq penyakap-penyakap, beterus ie berangkat ojok negeri lain. Sewaktu sampun waktune musim buaq anggur, épén dowé kebon nike ngutus pelayanne tipaq penyakap-penyakap kebon nike, jari nerimaq bagianne. Laguq penyakap-penyakap nike bau pelayan nike. Beterus ie pade empuk pelayan nike, dait suruqne ie uléq ndéq jauq napi-napi. Épén dowé kebon nike ngutus malik pelayanne saq lain. Laguq penyakap-penyakap nike ngempuk ulu pelayan nike, terus suruqne nyedi sambil tesumpaq-senaq. Épén dowé kebon nike ngutus malik pelayanne saq lain. Laguq ie pade matéq pelayan nike. Dait maraq nike seterusne ie pade perlakuang luwéq pelayan saq lain éndah: araq saq tempuk dait araq éndah saq tematéq. Ahirne cume karing sopoq saq araq léq ie, bijene mésaq saq paling ie tunah. Jari ie ngutus bijene nike tipaq penyakap-penyakapne. Pikirne, ‘Pasti anak tiang gen tehormatin.’ Laguq penyakap-penyakap nike bebase sopoq kance saq lain, ‘Niki ie ahli warisne, silaq ite matéq ie, adéq ite mauq warisanne!’ Make ie pade bau ie terus tematéq. Mayitne ie pade tetéh ojok luah kebon nike.” Beterus Deside Isa beketuan, “Napi saq gen tepiaq siq épén dowé kebon nike? Pasti ie gen dateng dait nyematéq penyakap-penyakap nike, terus nyerahang kebon nike ojok penyakap-penyakap saq lain. Side pade pasti sampun bace ayat niki léq Kitab Suci, ‘Batu saq tetetéh siq tukang bangunan sampun jari batu saq paling utame. Niki karye Tuhan; sopoq karye saq ajaip léq julunte!’ ” Make pare pemimpin bangse Yahudi saq dengah perumpamean nike berusahe bau Deside Isa, séngaq ie pade nenaoq bahwe perumpamean nike tetujuang tipaq ie pade. Laguq ie pade takut léq dengan luwéq. Jari, ie pade lumbar bilin Deside Isa. Pire dengan Parisi dait anggote-anggote golongan Herodes tesuruq boyaq kesalaqan Deside Isa siq care besoal jawab adéqne bau nyalahang Deside Isa. Ie pade parek ojok Deside Isa dait matur, “Bapaq Guru, tiang pade nenaoq Pelungguh jujur dait nénten takut léq sai juaq. Pelungguh ngajahang secare terus terang mengenai langan saq kenaq tipaq Allah. Séngaq Pelungguh nénten piléq kasih. Silaq Pelungguh bemanik léq tiang pade, ‘Menurut aturan agamente, kanggo napi nénten bayah pajek léq kaisar? Napi pajek nike harus ite bayah atao nénten?’ ” Deside Isa wikan kemunapikan ie pade. Jawab-Ne, “Kembéq side pade boyaq-boyaq kesalaqan adéq bau nyalahang Tiang? Petitoqang léq Tiang sopoq képéng perak.” Make ie pade serahang léq Deside Isa sopoq képéng perak. Beterus Deside Isa beketuan, “Gambar dait aran sai niki?” “Kaisar,” jawab ie pade. “Nah, lamun maraq nike,” manik Deside Isa, “serahang ojok Kaisar napi saq jari dowén Kaisar, dait tipaq Allah napi saq jari dowén Allah.” Ie pade bengaq dengah jawaban-Ne. Pire dengan léman golongan Saduki parek ojok Deside Isa. (Ie pade golongan saq bedowé pendapet bahwe dengan ninggal ndéq gen idup malik.) Ie pade metakén léq Deside Isa: “Bapaq Guru, Musa nulis hukum niki tipaq ite: ‘Lamun sopoq dengan mame ninggal dait ie ndéq bedowé bije, make semetonne harus merariq kance bebalune adéq ie bau ngebéng keturunan tipaq dengan saq sampun ninggal nike.’ Sampun araq pituq dengan besemetonan. Saq sengake merariq, terus ninggal ndéq bedowé bije. Beterus saq kedue merariq kance bebalune, laguq ie éndah ninggal ndéq bedowé bije. Maraq nike éndah telaksane léq semetonne saq ketelu, dait seterusne jangke saq kepituq. Ahirne dengan nine nike éndah ninggal. Léq jelo dengan ninggal teidupang malik, sai semame dengan nine nike? Séngaq kepituq-pituqne sampun merariq kance ie!” Jawab Deside Isa, “Side pade keliru gati, lantaran side pade ndéq ngerti Kitab Suci dait kuase Allah. Séngaq lamun dengan-dengan ninggal teidupang malik, ie pade ndéq gen merariq malik, laguq ie pade gen idup maraq malaékat léq sorge. Dait mengenai dengan ninggal teidupang malik, napi side pade ndéq uwah bace léq dalem kitab Musa mengenai bebenes saq nyale nike? Léq dalem ayat-ayat nike tetulis bahwe Allah bemanik tipaq Musa, ‘Tiang Allahne Ibrahim, Allahne Ishak dait Allahne Yakub.’ Allah nike nénten Allah dengan ninggal, laguq Allah dengan saq idup. Side pade keliru gati!” Beterus dateng sopoq ahli Taurat saq pirengang bebaosan antare Deside Isa kance dengan-dengan léman golongan Saduki nike. Ahli Taurat nike serioq bahwe Deside Isa sampun jawab dengan-dengan nike secare bagus. Make ie metakén tipaq Deside Isa, “Préntah mbé saq paling utame léq antare selapuq préntah?” Jawab Deside Isa, “Préntah saq utame: ‘Pade dengahang, hai bangse Israel! Allah, Tuhante, Tuhan Saq Mahe Esa! Kasihin Allah, Tuhan side siq segenep aténde, dait siq segenep jiwende dait siq segenep akal budinde dait siq selapuq kekuatande.’ Préntah kedue: ‘Kasihin sepadende manusie, maraq side ngasihin diriqde mésaq.’ Ndéq araq malik préntah lain saq pentingan léman kedue préntah nike.” Beterus ahli Taurat nike matur léq Deside Isa, “Tepat gati, Bapaq Guru! Mule kenaq napi saq Pelungguh manikang: Tuhan nike Allah saq esa, dait nénten araq malik Allah saq lain. Dait manusie harus ngasihin Allah siq sepenoq angenne, dait siq selapuq akalne, dait siq selapuq kekuatanne. Dait ie éndah harus ngasihin sepade manusie maraq ie ngasihin diriqne mésaq. Nike jaoq solahan ketimbang ngaturang kurban tunuqan dait kurban-kurban saq lain tipaq Allah.” Deside Isa cingakin bahwe ahli Taurat nike sampun bejawab secare bagus gati. Dait Deside Isa bemanik léq ie, “Side ndéq jaoq léman Kerajaan Allah.” Sesampun nike, ndéq araq sopoq dengan juaq saq bani malik metakén léq Deside Isa. Léq waktu kenyeke ngajahang léq Gedéng Allah, Deside Isa beketuan, “Berembé ahli-ahli Taurat iniq bebase bahwe Almasih nike keturunan Daud? Padahal Daud mésaq -- lantaran teilhamin siq Roh Suci -- bebase, ‘Tuhan bemanik léq Junjungan tiang: Melinggih léq sedi kanan Tiang, jangke Tiang piaq musuh-musuh Deside takluk léq Deside.’ Jari, lamun Daud mésaq nyebut Almasih nike ‘Junjungan Saq Mulie’, segerah Ie keturunan Daud?” Dengan saq araq léq Gedéng Allah nike seneng dengahang pengajahan Deside Isa. Ie bemanik léq ie pade, “Onyaq-onyaq léq ahli-ahli Taurat. Ie pade demen lampaq-lampaq kadu jubah saq bélo dait demen tehormatin léq peken-peken. Ie pade seneng melinggih léq kursi saq paling julu léq balé-balé ibadah, dait seneng melinggih léq taoq saq paling tehormat léq taoq dengan-dengan begawé. Ie pade tipu bebalu-bebalu dait ngerampas baléne. Dait jari seboq pegawéanne saq jahat nike, ie pade bedo'e bélo-bélo. Pasti ie pade gen nerimaq hukuman saq beratan!” Sewaktu Deside Isa melinggih andang kotaq persembahan léq Gedéng Allah, Deside Isa perhatiang dengan-dengan namaq képéng ie pade ojok dalem kotaq nike. Luwéq dengan sugih tamaqang luwéq képéng. Beterus sopoq bebalu saq miskin dateng éndah tamaqang due képéng tembage, képéng récéh saq paling kodéq ajine. Make Deside Isa ngemanikang pengiring-pengiring-Ne, terus bemanik léq ie pade, “Tiang badaq side: Setetune bebalu niki namaqang ojok dalem kotaq nike luwéqan tebanding saq tetamaqang siq selapuq dengan-dengan lain. Séngaq ie pade selapuq ngebéng léman kelebihan dowéne. Laguq bebalu niki, timaq miskin gati, ie ngebéng selapuq saq araq léq ie -- saq ie perluang jari biaye idup.” Sewaktu Deside Isa sugul léman Gedéng Allah, salaq sopoq pengiring-pengiring-Ne matur, “Paq Guru, silaq Pelungguh cingakin bangunan-bangunan nike. Perhatiang batu-batune. Luar biase solahne!” Jawab Deside Isa, “Side serioq bangunan-bangunan saq beléq nike? Setetune ndéq araq sopoq juaq batu léq bangunan-bangunan nike saq masih beronjoq maraq béngan. Selapuqne gen terobohang.” Beterus Deside Isa lumbar ojok Bukit Zaitun, dait melinggih léq taoq saq berandangan kance Gedéng Allah. Beterus Petrus, Yakub, Yahya dait Andreas parek ojok Deside Isa jari matur secare husus léq Ie: “Silaq Pelungguh sampéang léq tiang pade, piran selapuqne nike gen telaksane? Dait napi saq jari tande-tandene lamun sampun dateng wayene?” Jawab Deside Isa, “Pade waspade. Ndaq jangke side pade tetipu. Luwéq dengan gen dateng kadu aran Tiang, dait bebase, ‘Tiang niki Ie!’ Ie pade gen miaq luwéq dengan jari sesat. Lamun side pade dengah suare-suare perang dait berite-berite mengenai perang, ndaq takut. Hal-hal nike harus telaksane, laguq nike ndéq berarti bahwe sampun wayene kiamat. Bangse saq sopoq gen perang ngelawan bangse saq lain, dait negare saq sopoq gen nyerang negare saq lain. Léq mbé-mbé gen araq lindur dait kelapahan. Laguq selapuqne nike baruq awalne doang, maraq sakit saq tealamin dengan nine saq gen nganak. Side pade harus onyaq-onyaq, séngaq side pade gen tebau dait teoros ojok Mahkamah Agame. Side pade gen tempuk léq balé-balé ibadah dait gen tejauq ojok pare penguase dait pare raje lantaran Tiang, sebagé kesaksian umaq ie pade. Laguq Kabar Solah léman Allah harus tekabarang juluq tipaq selapuq bangse. Dait lamun side pade tebau dait tejauq ojok pengadilan, ndaq kuatir mengenai napi saq harus side pade sampéang. Lamun sampun waktune ngeraos, sampéang doang napi saq tebadaq tipaq side pade léq waktu nike. Séngaq ucapan-ucapan saq side pade sampéang nike ndéqne ucapan-ucapande mésaq, laguq asalne léman Roh Suci. Dengan gen nyerahang semetonne mésaq jari tematéq. Dait hal nike gen telaksane éndah antare bapaq kance bijene. Kanak-kanak gen ngelawan dengan toaqne dait nyerahang ie pade jari tematéq. Side pade gen temeriq siq selapuq dengan lantaran side pade jari pengiring Tiang. Laguq dengan saq setie jangke penutuqne, gen teselametang.” “Side pade gen serioq ‘Perbuatan najis saq miaq binase’ nganjeng léq taoq saq tebalaq umaq ie. (Hal niki saq harus teperhatiang siq dengan saq mace.) Léq waktu nike dengan-dengan saq araq léq Yudea harus pelai ojok pegunungan. Dengan saq araq léq atas atep balé, ndaq turun dait tame ojok dalem balé jari bait napi juaq. Dengan saq kenyeke araq léq lendangne, ndaq tulak bait jubahne. Celake inaq-inaq saq kenyeke betian, atao inaq-inaq saq masih penyusuq bebéaqne léq waktu nike! Pade bedo'e adéq hal-hal nike ndaq telaksane léq musim telih. Léq jelo-jelo saq penoq siq sengsare nike, gen araq kesusahan saq ndéq uwah araq, léman Allah cipteang dunie jangke mangkin, dait ndéq gen araq malik. Seandéne Tuhan nénten pesingket waktune nike, make ndéq araq sopoq dengan juaq saq selamet. Laguq lantaran dengan-dengan saq sampun tepiléq siq Tuhan, make Ie pesingket waktune. Léq waktu nike, lamun araq dengan badaq side: ‘Pade serioq, Almasih nike araq léq deriki!’ atao ‘Pade serioq, Ie araq léq derike!’ -- ndaq gati percaye léq dengan nike. Séngaq almasih-almasih palsu dait nabi-nabi palsu gen dateng. Ie pade gen miaq tande-tande dait muqjizat-muqjizat jari nipu, dait lamun bau, dengan-dengan saq sampun tepiléq siq Tuhan éndah. Jari, pade waspade! Selapuqne nike sampun Tiang badaq side sendéqman hal nike telaksane.” “Sesampun mase kesusahan nike, sinar jelo gen jari peteng dait bulan ndéq becahaye. Bintang-bintang gen geriq léman langit dait selapuq kuase saq araq léq langit jari biur lantur. Léq waktu nike, Bije Manusie gen penggitan rauh léq dalem awan siq kuase dait kemuliean saq beléq. Ie gen ngutus malaékat-malaékat jari ngumpulang dengan-dengan saq sampun Ie piléq léman keempat penjuru gumi, léman poton gumi jangke dateng poton langit.” “Pade bait perajahan léman lolo are. Lamun pémpang-pémpangne ijo dait odaq, dait mulai besuli, side pade nenaoq bahwe musim panas sampun rapet. Maraq nike éndah lamun side pade serioq hal-hal nike telaksane, side pade nenaoq bahwe waktune sampun rapet gati. Tiang badaq side: Setetune hal-hal nike gen telaksane sendéqman dengan-dengan saq idup mangkin niki ninggal selapuqne. Langit dait gumi gen musnah laguq manik Tiang gen kekel selaéq-laéqne.” “Timaqne maraq nike ndéq araq sopoq dengan juaq saq nenaoq piran jelo atao piran jamne. Malaékat-malaékat léq sorge nénten wikan dait Bije éndah nénten wikan, cume Bapa doang saq wikan. Jari, side pade harus bejage-jage dait waspade, séngaq side pade ndéq nenaoq piran waktune. Keadaanne ibarat sopoq dengan saq bilin baléne, terus lumbar ojok taoq saq jaoq. Ie suruq pelayan-pelayanne ngurus baléne dait ngebéng tugas léq ie pade sopoq-sopoq. Léq penjage lawang, ie bepesen adéqne pacu-pacu bejage. Keranaq nike side pade harus bejage-jage, séngaq side pade ndéq nenaoq piran waktune épén balé nike gen tulak -- sang kebian atao sang tengaq kelem, sang subuh atao kelémaq. Lamun ie selung-selung dateng, ndaq jangke ie ndait side pade kenyeke tindoq. Napi saq Tiang sampéang léq side niki, Tiang sampéang éndah léq selapuq dengan: Pade bejage-jage!” Due jelo sendéqman Jelo Paskah dait Perayaan Ruti Ndéq Beragi. Imam-imam kepale dait ahli-ahli Taurat kenyeke boyaq langan jari bau Deside Isa secare tedoq-tedoq dait nyematéq Ie. Ie pade bebase, “Ndaq laksaneang hal nike waktu dengan-dengan kenyeke ngerayeang Paskah, adéq rakyat ndéq jari biur lantur.” Sewaktu Deside Isa araq léq Betania, léq gedéng Simon saq piranan sakit kuste, araq sopoq dengan nine parek tipaq Deside Isa. Ie jauq sopoq botol pualam berisi minyak sengéh saq mahel, tepiaq léman ramuan akah saq sengéh. Sewaktu Deside Isa kenyeke melinggih medaran, dengan nine nike belaqang botol nike dait tumpahangne minyak sengéh nike léq sirah Deside Isa. Pire dengan saq araq léq derike jari sili dait bebase sopoq kance saq lain, “Napi manpaatne minyak sengéh nike tesédaq-édaq? Minyak nike bau tejual siq aji lebih léman telu ratus képéng perak, dait képéngne tesedekahang tipaq dengan miskin!” Make ie pade sili léq dengan nine nike. Laguq Deside Isa bemanik, “Alurang ie! Kembéq side pade nyusahang ie? Ie ngelaksaneang hal saq solah tipaq Tiang. Dengan miskin tetep araq léq antare side pade. Sebilang waktu lamun side pade mélé, side pade bau nulung ie pade. Laguq Tiang ndéq seterusne araq bareng kance side pade. Dengan nine niki sampun ngelaksaneang napi saq bau ie laksaneang. Awak Tiang sampun ie minyakin sebagé persiepan jari pemakaman Tiang. Tiang badaq side: Setetune léq seantéro dunie, léq mbé juaq Kabar Solah léman Allah tesiarang, perbuatan dengan nine niki gen teceriteang éndah jari nginget ie.” Beterus Yudas Iskariot, salaq sopoq léman kedue olas pengiring Deside Isa, lumbar ojok imam-imam kepale siq maksut jari nyerahang Deside Isa tipaq ie pade. Ie pade seneng gati pireng maksut nike, dait bejanji gen ngebéng Yudas képéng. Sesampun nike Yudas mulai boyaq kesempatan jari behianat léq Deside Isa. Léq jelo penembéq Perayaan Ruti Ndéq Beragi -- léq waktu dengan sembeléh dombe Paskah -- pengiring-pengiring Deside Isa metakén léq Ie, “Junjungan Saq Mulie, léq mbé Pelungguh kayun adéq tiang pade siepang Pelungguh keloran Paskah?” Make Deside Isa ngemanikang due dengan léman ie pade, “Silaq lumbar ojok kote, léq derike araq sopoq dengan mame saq kenyeke jauq cérét berisi aiq gen bedait kance side pade. Turut ie ojok balé saq ie tamein, dait badaq épén balé nike, ‘Manik Guru tiang, léq mbé Ie dait pengiring-pengiring-Ne gen medaran keloran Paskah?’ Dengan nike gen petitoq side sopoq kamar beléq saq araq léq atas. Kamar nike sampun tesiepang lengkap kance perabotanne. Siepang ite selapuqne léq derike.” Terus kedue pengiring Deside Isa nike lumbar ojok kote. Léq derike ie pade ndait selapuqne tepat maraq saq temanikang siq Deside Isa. Beterus ie pade nyiepang keloran Paskah. Kelemne, Deside Isa rauh teiring kedue olas pengiring-Ne. Sewaktu ie pade kenyeke melinggih medaran, Deside Isa bemanik, “Tiang badaq side: Setetune salaq sopoq léq antare side pade, saq mangkin niki milu medaran kance Tiang, gen behianat léq Tiang.” Sesampun dengah hal nike pengiring-pengiring Deside Isa jari aséq gati. Terus sopoq-sopoq mulai metakén léq Deside Isa, “Junjungan Saq Mulie, pasti ndéqne tiang saq temaksut nike?” Jawab Deside Isa, “Ie salaq sopoq léman side pade saq due olas niki, saq medaran sepiring kance Tiang. Mule Bije Manusie gen ninggal maraq saq tetulis léq Kitab Suci. Laguq celake gati dengan saq behianat léq Bije Manusie nike! Solahan lamun dengan nike ndéq tebijeang!” Sewaktu Deside Isa dait pengiring-pengiring-Ne kenyeke medaran, Deside Isa bait ruti, terus ngucapang do'e syukur. Beterus Ie peleng-peleng ruti nike kadu gading-Ne, terus ngicanin tipaq pengiring-pengiring-Ne, sambil bemanik, “Silaq bait, niki ragen Tiang.” Sesampun nike Deside Isa bait sopoq cawan saq berisi anggur. Ie ngucapang do'e syukur tipaq Allah, terus ngicanin cawan nike léq pengiring-pengiring-Ne. Beterus ie pade selapuq nginem anggur nike. Sesampun nike, Deside Isa bemanik, “Niki daraq Tiang saq ngesahang perjanjian Allah, daraq saq tetumpahang tipaq dengan luwéq. Tiang badaq side, setetune Tiang ndéq gen nginem anggur niki malik, jangke dateng waktune Tiang nginem anggur saq baru bareng kance side pade léq Kerajaan Allah.” Beterus ie pade nyanyiang lagu pujian. Dait sesampun nike ie pade lumbar ojok Bukit Zaitun. Beterus Deside Isa bemanik léq ie pade, “Side selapuq gen pelai bilin Tiang. Séngaq dalem Kitab Suci tetulis, ‘Tiang gen nyematéq pengaratne, dait selapuq dombe-dombene gen bekelin sopoq kance saq lain.’ Laguq sesampun Tiang idup malik, Tiang gen senjuluq side pade ojok Galilea.” “Nénten,” jawab Petrus, “timaq ie pade selapuq bilin Pelungguh, tiang nénten.” Manik Deside Isa léq ie, “Tiang badaq side, setetune kelem niki éndah, sendéqman manuk ngungkung due kali, side sampun telu kali nilas Tiang.” Jawab Petrus secare teges, “Timaq tiang harus maté bareng kance Pelungguh, tiang nénten gen nilas Pelungguh!” Dait pengiring-pengiring saq lain éndah matur maraq nike. Ie pade rauh léq sopoq taoq aranne Getsemani, dait Deside Isa bemanik léq pengiring-pengiring-Ne, “Tokol léq deriki, sewaktu Tiang bedo'e.” Beterus Deside Isa ténaq Petrus, Yakub dait Yahya lumbar bareng kance Ie. Deside Isa takut gati dait osah. Deside Isa bemanik léq pengiring-pengiring-Ne nike, “Angen Tiang sedih gati, idapne maraq gen maté doang. Ndot léq deriki dait bejage-jage!” Deside Isa lumbar jaoqan sekediq, beterus sujut léq tanaq dait bedo'e. Léq dalem do'e-Ne, Ie tunas lamun bau Ie sampunang ngalamin waktu penderitean nike. Ie matur, “Bapa, ya Bapa, nénten araq sopoq hal saq mustahil bagi Deside. Jaoqang cawan penderitean niki léman Tiang. Laguq sampunang menurut keméléq Tiang, laguq pekayunan Bapa.” Sesampun nike, Deside Isa tulak dait-Ne pengiring-pengiring-Ne kenyeke tindoq. Ie bemanik léq Petrus, “Simon, napi side tindoq? Cume sejam doang, side ndéq sanggup bejage-jage?” Terus Deside Isa bemanik léq ie pade, “Bejage-jage, dait bedo'e, adéq side pade ndéq ngalamin cobe. Mule roh side mélé ngelaksaneang saq kenaq, laguq side pade ndéq sanggup séngaq awakde nike lemah.” Karing sekali Deside Isa lumbar bedo'e, ngucapang do'e saq pade. Sesampun nike Ie tulak malik tipaq pengiring-pengiring-Ne, dait-Ne ie pade masih tindoq, séngaq ie pade ngantok gati. Jari ie pade ndéq nenaoq napi saq harus ie pade sampéang tipaq Deside Isa. Sewaktu Deside Isa tulak tipaq ie pade saq ketelu kaline, Ie bemanik, “Napi side pade masih tindoq dait mentelah? Sampun cukup! Sampun waktune Bije Manusie teserahang ojok ime dengan-dengan bedose. Pade ures! Silaq ite lumbar. Serioq! Dengan saq behianat léq Tiang sampun dateng!” Sewaktu Deside Isa masih bebaos, Yudas salaq sopoq léman kedue olas pengiring-Ne nike dateng. Bareng kance ie dateng éndah serombongan dengan saq jauq kléwang dait gegitik. Ie pade tesuruq siq imam-imam kepale, ahli-ahli Taurat dait pemimpin-pemimpin Yahudi. Penghianat nike sendéqmanne sampun badaq tande niki tipaq ie pade, “Dengan saq tiang siduk, Ie uwah denganne. Bau dait onyaq-onyaq jauq Ie.” Léq waktu Yudas dateng, ie langsung ojok Deside Isa, dait matur, “Bapaq Guru!” terus ie siduk Deside Isa. Beterus dengan-dengan saq dateng bareng kance Yudas nike bau Deside Isa dait sékoq Ie. Laguq salaq sopoq dengan saq araq léq derike serét kléwangne, dait ngerantek pelayan Imam Agung jangke pegat kentokne. Beterus Deside Isa bemanik tipaq ie pade, “Napi Tiang niki perampok, jangke side pade dateng jauq kléwang dait gegitik jari bau Tiang? Sebilang jelo Tiang ngajahang léq Gedéng Allah léq julu side pade dait side pade ndéq bau Tiang. Laguq mule seharusne maraq nike adéqne telaksane napi saq tetulis dalem Kitab Suci.” Beterus selapuq pengiring-Ne pelai bilin Ie. Sopoq terune saq cume ngadu kéréng lénen jari ngilipang awakne, ngiring Deside Isa. Dengan-dengan mélé bau ie, laguq ie lekaq kéréngne nike terus pelai belondan. Deside Isa tejauq ojok gedéng Imam Agung. Léq derike selapuq imam kepale, pemimpin Yahudi dait ahli Taurat kenyeke bekumpul. Petrus ngiring Deside Isa léman jaoq jangke tame ojok dalem leléah gedéng Imam Agung. Léq derike ie tokol sambil mindu dékét api bareng kance pengawal-pengawal. Imam-imam kepale dait selapuq Mahkamah Agame berusahe boyaq bukti-bukti saq nyalahang Deside Isa adéqne bau mutusang hukuman maté tipaq Ie. Laguq ie pade ndéq mauq bukti. Luwéq saksi saq tempoh jari ngebéng kesaksian palsu tipaq Deside Isa, laguq kesaksianne betentangan sopoq kance saq lain. Beterus araq pire saksi nganjeng dait ngebéng kesaksian palsu niki mengenai Deside Isa, “Tiang pade dengah dengan niki bebase, ‘Tiang gen ngerobohang Gedéng Allah niki saq tepiaq siq manusie, terus dalem telu jelo, Tiang gen penganjeng saq lain saq ndéq tepiaq siq manusie.’ ” Laguq kesaksian dengan-dengan nike éndah betentangan sopoq kance saq lain. Beterus Imam Agung nganjeng léq julu ie pade selapuq dait metakén léq Deside Isa, “Pelungguh kayun jawab napi saq tetuduhang nike atao nénten?” Laguq Deside Isa meneng doang. Ie nénten bejawab same sekali. Beterus karing sekali Imam Agung nike metakén léq Ie, “Napi Pelungguh Almasih, Bije saq asalne léman Saq Maheagung nike?” Jawab Deside Isa, “Tiang niki Ie, dait selapuq side pade gen serioq Bije Manusie melinggih léq sedi kanan Allah Saq Mahekuase dait rauh dalem awan léman langit!” Sesampun nike Imam Agung ngeroék-roék kuacene, dait bebase, “Ndéq perlu saksi malik! Side pade sampun dengah mésaq ucapan-ucapan-Ne saq menghine Allah. Mangkin napi keputusande?” Ie pade selapuq mutusang Deside Isa patut tehukum maté. Beterus pire dengan mulai tijuh Deside Isa, dait ie pade tungkem penjarupan-Ne dait ngempuk Ie, terus bebase, “Cobaq badéq, sai saq ngempuk Side?” Pengawal-pengawal éndah milu ngempuk Deside Isa. Sewaktu Petrus masih araq léq leléah, salaq sopoq pelayan nine Imam Agung dateng ojok derike. Waktu ie serioq Petrus mindu léq dékét api, ie perhatiang pacu-pacu muen Petrus, dait bebase, “Ndéq napi side éndah bareng-bareng kance Deside Isa dengan Nazaret nike?” Laguq Petrus nilas. “Mindah tiang dait tiang ndéq ngerti napi maksut side,” basen Petrus léq pelayan nike. Beterus Petrus lumbar ojok jebak gedéng imam agung nike. [Léq waktu nike, manuk ngungkung.] Pelayan nine nike serioq Petrus malik, dait bebase éndah tipaq dengan-dengan léq derike, “Ie mule salaq sopoq léman ie pade!” Laguq Petrus nilas malik. Ndéq ngonéq sesampun nike, dengan-dengan léq derike bebase éndah tipaq Petrus, “Ndéq bau tetilas malik side mule salaq sopoq dengan léman ie pade, séngaq side léman Galilea!” Beterus Petrus mulai besumpah-sumpah, dait bebase, “Tiang ndéq kenal dengan saq side pade maksut nike!” Waktu nike éndah manuk ngungkung saq kedue kaline. Dait Petrus inget bahwe Deside Isa sampun bemanik léq ie, “Sendéqman manuk ngungkung due kali, side telu kali nilas Tiang.” Beterus Petrus nangis éroq aséq. Masih aru gati, selapuq Mahkamah Agame lantong imam-imam kepale, pemimpin-pemimpin dait ahli-ahli Taurat becat-becat berunding. Ie pade sékoq Deside Isa beterus jauq Ie dait nyerahang tipaq Pilatus. Pilatus metakén léq Deside Isa, “Napi tetu Pelungguh raje dengan Yahudi?” Jawab Deside Isa, “Maraq nike basen pelungguh.” Imam-imam kepale nyampéang luwéq tuduhan tipaq Deside Isa. Beterus Pilatus metakén malik léq Deside Isa, “Napi Pelungguh nénten kayun bejawab? Cobaq serioq luwéq gati tuduhan saq ie pade tuduhang tipaq Pelungguh!” Laguq Deside Isa nénten bejawab napi-napi malik, sehingge Pilatus bengaq. Léq sebilang Perayaan Paskah, biasene Pilatus bébasang sopoq tahenan menurut piléqan dengan luwéq. Léq dalem bui, léq antare pemberontak-pemberontak saq sampun nyematéq sewaktu kerusuhan, araq sopoq dengan aranne Barabas. Dengan luwéq bekumpul dait tunas léq Pilatus adéq ie bébasang sopoq tahenan maraq biasene. Pilatus beketuan léq ie pade, “Napi side pade mélé, tiang bébasang raje dengan Yahudi nike?” Séngaq Pilatus sadar bahwe imam-imam kepale nyerahang Deside Isa léq ie cume lantaran talon até. Laguq imam-imam kepale hasut dengan luwéq adéqne tunas Pilatus bébasang Barabas umaq ie pade. Beterus Pilatus bebase malik léq dengan luwéq nike, “Lamun maraq nike, tiang harus kumbéqang dengan saq side pade sebut raje dengan Yahudi nike?” Ie pade nyurak, “Pakuq Ie léq kayuq salib!” “Laguq pegawéan jahat napi saq sampun Ie piaq?” Pilatus beketuan. Laguq siq suare saq beléqan malik dengan-dengan nike bekuih, “Pakuq Ie léq kayuq salib!” Pilatus mélé nyenengang angen dengan luwéq nike, make ie bébasang Barabas umaq ie pade. Beterus ie préntahang dengan pecut Deside Isa, terus serahang-Ne jari tepakuq léq kayuq salib. Deside Isa tejauq siq prajurit-prajurit ojok ruang pengadilan léq istane gubernur. Beterus selapuq pasukan tempoh bekumpul. Terus ie pade kaduang Deside Isa jubah lempok lomaq dait miaq mahkote léman pémpang-pémpang beduwi, beterus kaduangne léq sirah Deside Isa. Sesampun nike, ie pade ngucapang salam tipaq Ie. “Idup raje dengan Yahudi!” basen ie pade. Ie pade empuk sirah Deside Isa kadu tunjang, terus ie pade tijuh Ie dait nyembah sujut léq arepan-Ne. Sesampun ngoloq-oloq Deside Isa, ie pade lekaq jubah lempok lomaq nike terus kaduangne malik kuace-Ne mésaq. Beterus Ie tejauq ojok luah jari tepakuq léq kayuq salib. Léq tengaq langan, ie pade paksaq sopoq dengan ngelémbah kayuq salib Deside Isa. Dengan nike baruq léman dése mélé tame ojok kote. (Aran dengan nike Simon, -- asalne léman Kirene -- amaqne Aleksander dait Rupus.) Deside Isa tejauq ojok sopoq taoq aranne Golgota saq artine “Taoq Jerangkong”. Léq derike ie pade mélé ngaturin Deside Isa anggur saq becampur mur, laguq Deside Isa nénten kayun nginem anggur nike. Beterus ie pade pakuq Deside Isa léq kayuq salib dait bagi-bagiang kuace-Ne kadu undian jari nentuang bagian sopoq-sopoq. Ie tepakuq léq kayuq salib jam siwaq kelémaq. Léq atas kayuq salib-Ne tepasang tulisan mengenai tuduhan tipaq Ie: “Raje Dengan Yahudi”. Bareng-bareng kance Deside Isa éndah, ie pade pakuq léq kayuq salib due perampok; sopoq léq sedi kanan dait sopoq malik léq sedi kiri-Ne. [ Siq care nike telaksane saq tetulis dalem Kitab Suci: “Ie tame itungan léq antare dengan-dengan jahat.”] Dengan-dengan saq liwat léq derike ngintek dait menghine Deside Isa, ie pade bebase, “Hai, Side saq mélé ngerobohang Gedéng Allah terus gen penganjeng dalem telu jelo. Cobaq turun léman kayuq salib nike dait selametang diriq-De!” Maraq nike éndah imam-imam kepale dait ahli-ahli Taurat ngoloq-oloq Deside Isa. Ie pade bebase sopoq kance saq lain, “Ie nyelametang dengan lain, laguq diriq-Ne mésaq ndéq bau Ie selametang! Lamun Ie Almasih, Raje Israel, cobaq mangkin Ie turun léman kayuq salib nike, adéq tiang pade serioq dait percaye léq Ie!” Dengan-dengan saq tepakuq léq kayuq salib bareng Deside Isa nike éndah menghine Deside Isa. Jam due olas, sengonéq telu jam selapuq wilayah negeri nike jari peteng. Dait jam telu kebian, Deside Isa bekuih keras-keras, “Eloi, Eloi, lama sabaktani?” artine, “Ya Allah Tiang, ya Allah Tiang, kembéq Deside menengang Tiang?” Pire dengan saq nganjeng léq derike, dengah suare nike dait bebase, “Cobaq dengah, Ie ngempoh Elia!” Salaq sopoq léman ie pade becat-becat lumbar bait bunge karang, terus celepne ojok dalem anggur saq pedis, beterus tancepne léq pucuk gegale, dait jonjongne ojok cangkem Deside Isa, sambil bebase, “Silaq ite serioq napi Elia rauh nurunang Ie léman kayuq salib nike.” Beterus Deside Isa bekuih keras-keras, dait nyerahang nyawe-Ne. Kelambu saq begantung léq dalem Gedéng Allah soék jari due léman atas jangke ojok bawaq. Kepale pasukan saq nganjeng léq julu kayuq salib nike, serioq berembé Deside Isa ninggal. Kepale pasukan nike bebase, “Mule tetu dengan niki Bije saq asalne léman Allah!” Léq derike araq éndah pire dengan nine saq kenyeke serioq selapuqne nike léman jaoq. Léq antarene araq Salome, Mariam Magdalena, dait Mariam inaqne Yakub saq bajang dait Yoses. Ie pade dengan-dengan nine saq ngiring dait nulung Deside Isa sewaktu Ie léq Galilea. Dait araq luwéq malik dengan-dengan nine lain léq derike saq sampun dateng ojok Yerusalem bareng-bareng kance Deside Isa. Pilatus bengaq pirengang bahwe Deside Isa sampun ninggal. Jari ie préntahang dengan ngempoh kepale pasukan dait beketuan léq ie napi Deside Isa sampun ninggal. Sesampun pirengang laporan prewire nike, Pilatus ngijinang Yusup bait jenazah Deside Isa. Beterus Yusup beli kain lénen alus saq putéq, dait sesampun nurunang jenazah Deside Isa, ie bungkus siq kain nike. Beterus ie toloq jenazah nike léq dalem sopoq makam saq tepiaq léq dalem bukit batu. Sesampun nike, ie gelompongang sopoq batu beléq jari ngimpet lawang makam nike. Léq waktu nike Mariam Magdalena dait Mariam inaqne Yoses merhatiang léq mbé Deside Isa tetoloq. Sewaktu jelo Sabat sampun liwat, Mariam Magdalena, Mariam inaqne Yakub, dait Salome lumbar beli ramuan-ramuan jari minyakin jenazah Deside Isa. Masih aru gati sewaktu baruq tiwoq jelo, léq jelo Ahad, ie pade lumbar ojok makam. Beterus ie pade tame ojok dalem makam nike. Léq dalemne léq sedi kanan, ie pade serioq sopoq dengan bajang saq ngengadu jubah putéq kenyeke melinggih, dait ie pade tinjot. Dengan bajang nike bebase, “Ndaq takut! Tiang taoq side pade boyaq Deside Isa dengan Nazaret saq sampun tepakuq léq kayuq salib nike. Ie ndéq araq léq deriki. Ie sampun idup! Silaq serioq, niki taoq Ie tesaréang siq ie pade. Mangkin silaq lumbar, kabarang tipaq pengiring-pengiring-Ne, dait Petrus éndah. Pade badaq, ‘Ie sampun senjuluq side pade lumbar ojok Galilea. Léq derike side pade gen serioq Ie, maraq saq sampun Ie manikang léq side.’ ” Beterus ie pade sugul léman makam nike terus pelai lantaran tinjot dait takut. Ie pade ndéq bebase napi-napi léq sai juaq lantaran takut. Secare singket ie pade nyampéang selapuq pesen nike tipaq Petrus dait batur-baturne. Sesampun nike Deside Isa mésaq siq perantarean pengiring-pengiring-Ne beriteang léman Timuq ojok Bat berite saq suci dait saq ndéq bau tebinaseang mengenai keselametan saq kekel nike. Sesampun Deside Isa idup léman ninggal, masih aru gati léq jelo ahad, penembéq gati Deside Isa nyatayang diriq tipaq Mariam Magdalena. Léman Mariam nike Deside Isa sampun nyugulang pituq roh jahat. Make Mariam Magdalena lumbar badaqang peristiwe nike tipaq dengan-dengan saq tetep ngiring Deside Isa, saq kenyeke bedukecite dait nangis. Laguq sewaktu ie pade dengah bahwe Deside Isa sampun idup dait bahwe Mariam sampun serioq Ie, ie pade ndéq percaye. Sesampun nike Ie nyatayang diriq siq rue saq lain tipaq due dengan léman ie pade, sewaktu deduaqne dalem kelampan ojok luah kote. Jari ie pade tulak dait badaq hal nike tipaq saq lain-lainne. Laguq ie pade ndéq percaye. Ahirne Deside Isa nyatayang diriq léq solas pengiring-Ne sewaktu ie pade kenyeke bekelor. Ie pade teperinget siq Deside Isa séngaq ie pade kurang iman dait pagah gati sehingge ndéq percaye léq dengan-dengan saq sampun serioq mésaq bahwe Deside Isa idup. Beterus Deside Isa bemanik léq ie pade, “Silaq lumbar ojok seantéro dunie dait beriteang Kabar Solah léman Allah tipaq selapuq mahluk. Dengan saq percaye dait tebaptis gen selamet, laguq dengan saq ndéq percaye gen tehukum. Sebagé bukti bahwe ie pade percaye, dengan-dengan nike gen sediq roh jahat kadu aran Tiang; ie pade gen ngeraos kadu macem-macem base saq ndéq ie pade kenal. Lamun ie pade negel ulah atao nginem racun, ie pade ndéq gen celake. Lamun ie pade noloq imene léq atas dengan-dengan saq sakit, dengan-dengan nike gen selah.” Sesampun Junjungan Saq Mulie Deside Isa bebaos kance ie pade, Ie kerangkatan ojok sorge. Léq derike Ie mréntah bareng kance Allah. Make pengiring-pengiring-Ne lumbar dait nyampéang Kabar Solah léman Allah ojok mbé-mbé. Dait Tuhan éndah bekarye bareng kance ie pade, dait tebuktiang siq tande-tande ajaip bahwe berite saq ie pade sampéang nike mule kenaq. Teopilus saq budiman, Luwéq dengan sampun berusahe nulis secare teratur peristiwe-peristiwe saq sampun telaksane léq tengaq-tengaq ite. Ie pade nulis sesuai maraq saq tesampéang tipaq ite siq dengan-dengan saq serioq mésaq peristiwe-peristiwe nike léman penembéq dait sesampun nike nyiarang kabarne. Sesampun tiang selidik secare teliti selapuqne nike léman penembéqne, tiang anggep solah jari nulis sopoq laporan saq teratur umaq side. Tiang ngelaksaneang nike, adéq side nenaoq bahwe napi saq sampun teajahang tipaq side mule kenaq. Sewaktu Herodes jari raje negeri Yudea, araq sopoq imam aranne Zakaria. Ie termasuk golongan imam-imam Abia. Sebiniqanne éndah asalne léman keturunan Harun, aranne Elisabet. Kehidupan senine-semame nike nyenengang Allah. Deduaqne taat léq selapuq préntah dait hukum-hukum Tuhan secare sempurne. Ie pade ndéq bedowé bije séngaq Elisabet bangkol dait deduaqne sampun lingsir. Léq sopoq jelo, sewaktu golongan Abia mauq giliran, Zakaria ngelaksaneang tugas sebagé imam léq arepan Allah. Siq undian, saq biasene telaksaneang siq imam-imam, Zakaria tetugasang tame ojok dalem Gedéng Allah dait tunuq menyan. Léq waktu upacare tunuq menyan telaksaneang, dengan luwéq bedo'e léq luah. Léq waktu nike malaékat Tuhan nyatayang diriq tipaq Zakaria. Malaékat nike nganjeng léq sedi kanan méje taoq tunuq menyan. Sewaktu Zakaria serioq malaékat nike, ie bingung dait takut. Laguq malaékat nike bebase, “Ndaq takut, Zakaria! Allah sampun pireng do'ende. Elisabet, seninende gen bijeang sopoq kanak mame. Side harus aranin ie Yahya. Side gen bahagie dait cemoh gati, dait luwéq dengan gen besukecite lamun kanak nike tebijeang! Ie gen jari dengan beléq léq arepan Tuhan, dait ie ndéq gen nginem anggur atao ineman keras. Ie gen tekuasein siq Roh Allah léman tepetianang siq inaqne. Luwéq dengan Israel gen ie bimbing tulak tipaq Allah, Tuhan ie pade. Siq roh dait kuase Elia ie gen jari utusan Tuhan. Ie gen daméang dengan toaq kance bijene, dait dengan saq ndéq taat gen ie pimpin tulak ojok pikiran saq kenaq. Siq care nike ie nyiepang sopoq umat saq patut bagi Tuhan.” “Berembé tiang nenaoq bahwe hal nike gen telaksane?” Zakaria metakén léq malaékat nike. “Tiang sampun toaq dait senine tiang éndah sampun toaq.” Jawab malaékat nike, “Tiang niki Jibril. Tiang ngelayanin Allah dait Ie saq ngutus tiang nyampéang kabar solah niki tipaq side. Napi saq tiang sampéang gen telaksane léq waktune. Laguq lantaran side ndéq percaye, side ndéq tao ngeraos; side gen pakoq jangke napi saq tiang sampéang nike telaksane.” Léq waktu nike, dengan-dengan tetep ngantih Zakaria. Ie pade bengaq kembéq ie ngonéq gati léq dalem Gedéng Allah. Dait léq waktu ie sugul, ie ndéq tao ngeraos kance ie pade. Ie tetep doang ngebéng isarat kadu imene, dait tetep pakoq. Make dengan-dengan éndah nenaoq bahwe Zakaria sampun serioq sopoq hal saq ajaip léq dalem Gedéng Allah. Sesampun tutuq mase tugasne léq Gedéng Allah, Zakaria uléq ojok gedéngne. Ndéq ngonéq sesampun nike, Elisabet seninene betian, terus ndéqne sugul-sugul léman lime bulan ngonéqne. Elisabet bebase, “Ahirne Tuhan nulung tiang dait ngapus kehinean tiang léq julun dengan.” Sewaktu Elisabet sampun betian enem bulan, Allah ngutus malaékat Jibril lumbar ojok Nazaret, sopoq kote léq daérah Galilea. Jibril teutus tipaq sopoq dedare genten, aranne Mariam. Mariam nike sampun betunangan kance sopoq dengan aranne Yusup, keturunan Raje Daud. Malaékat nike rauh tipaq Mariam dait bebase, “Salam, side saq teican paice! Tuhan bareng kance side!” Sewaktu dengah basen malaékat nike Mariam tinjot, sehingge beketuan-tuan dalem angenne napi arti salam nike. Make malaékat nike bebase léq ie, “Ndaq takut Mariam! Séngaq side sampun mauq paice léman Allah. Side gen betian dait bijeang sopoq kanak mame. Harus side aranin Isa. Ie gen jari agung dait tesebut Bije saq asalne léman Allah Saq Maheagung. Allah, Tuhante gen jariang Ie raje maraq Raje Daud, leluhur-Ne. Dait Ie gen mréntah jari raje léq keturunan Yakub selaéq-laéqne. Kerajaan-Ne ndéq gen tutuq.” “Laguq tiang masih dedare genten,” basen Mariam tipaq malaékat nike, “berembé hal nike bau telaksane?” Jawab malaékat nike, “Roh Suci gen rauh tipaq side, dait kuase Allah Saq Maheagung gen nguasein side. Keranaq nike bije saq gen tebijeang nike gen tesebut suci, Bije saq asalne léman Allah. Setetune Elisabet, sanakde nike sampun betian enem bulan, timaq ie sampun lingsir dait dengan paran ie bangkol. Séngaq bagi Allah nénten araq saq mustahil.” Beterus Mariam bebase, “Tiang niki pelayan Tuhan; menengang telaksane léq tiang maraq saq pelungguh sampéang.” Beterus malaékat nike lumbar bilin Mariam. Pire waktu sesampun nike, Mariam lumbar ojok sopoq kote léq Yudea léq daérah pegunungan. Ie lumbar ojok gedéng Zakaria, dait sewaktu ie tame, ie ngucapang salam tipaq Elisabet. Dait sewaktu Elisabet dengah salam Mariam, bebéaq saq léq dalem tianne nike berunjaq-runjaq. Make Elisabet tekuasein siq Roh Suci, terus bebase siq suare saq beléq, “Side saq paling teberkahin léq antare selapuq dengan nine! Teberkahin bebéaq saq gen side bijeang nike! Sai tiang niki sehingge mamiq bini Junjungan tiang Saq Mulie rauh tipaq tiang? Sewaktu tiang dengah salamde, bebéaq dalem tian tiang berunjaq-runjaq saking cemohne. Bahagie side, séngaq percaye bahwe napi saq temanikang siq Tuhan tipaq side gen telaksane!” Mariam bebase, “Atén tiang mulieang Tuhan, dait jiwen tiang besukecite séngaq Allah, Juruselamet tiang. Ie iling léq tiang, hambe-Ne saq hine! Mulai mangkin selapuq bangse bebase tiang bahagie. Séngaq Allah Saq Mahekuase ngelaksaneang hal-hal beléq léq tiang. Peséngan-Ne nike suci. Keturunan demi keturunan Ie ngicanin rahmat tipaq dengan saq takut léq Ie. Siq gading-Ne saq perkase Ie miaq buyar dengan saq sombong, dait oreang rencane ie pade. Raje-raje turunang-Ne léman tahte dait dengan hine teatasang kedudukanne. Dengan lapah tepuasang siq selapuq kebajikan, dengan sugih tesediq nénten teicanin jauq napi-napi. Ie nulung Israel, hambe-Ne, séngaq Ie iling léq rahmat-Ne, maraq saq Ie janjiqang tipaq leluhurte, tipaq Ibrahim dait keturunanne jangke selaéq-laéqne.” Kire-kire telu bulan ngonéqne Mariam ndot bareng Elisabet, baruq ie uléq ojok gedéngne. Sampun waktune Elisabet bebije. Ie bijeang sopoq kanak mame. Tetangge-tetanggene dait kadang jarine dengah bahwe Tuhan sampun nyatayang rahmat-Ne saq beléq gati léq Elisabet, ie pade éndah milu besukecite bareng kance ie. Sewaktu bebéaq nike beumur baluq jelo, ie pade dateng jari sunat kanak nike. Ie pade mélé ngaranin bebéaq nike Zakaria, maraq aran bapaqne, laguq Elisabet bebase, “Ndaq, ie harus tearanin Yahya!” “Ndéq sopoq dengan juaq léq antare keluargende bedowé aran maraq nike,” basen ie pade léq Elisabet. Beterus kadu isarat ie pade beketuan léq Zakaria aran napi saq mélé ie béng tipaq bebéaq nike. Zakaria tunas sopoq batu tulis, terus nulis, “Aranne Yahya.” Ie pade selapuq bengaq. Waktu nike éndah Zakaria tao ngeraos malik beterus ie mulieang Allah. Tetangge-tetanggene selapuq takut, dait kabar nike nyebar ojok selapuq wilayah pegunungan Yudea. Selapuq dengan saq dengah berite nike beketuan léq dalem angenne, “Jari napi bebéaq nike éraq?” Séngaq Tuhan araq bareng kance ie. Zakaria, bapaq bebéaq nike tekuasein siq Roh Suci, sehingge ie nyampéang pesen léman Tuhan. Ie bebase, “Silaq ite memuji Allah, Tuhan bangse Israel, séngaq Ie sampun rauh tipaq umat-Ne dait bébasang ie pade. Ie ngicanin ite penyelamet saq perkase, léman keturunan Daud, hambe-Ne. Jaman laéq, langan nabi-nabi-Ne saq suci, Ie sampun ngicanin janji-Ne jari nyelametang ite léman musuhte, dait léman kuase dengan-dengan saq meriq léq ite. Jari nyatayang rahmat-Ne tipaq leluhurte, janji-Ne saq suci nike gen Ie tepatin. tetep suci dait tejariang kenaq léq arepan-Ne seumur idupte. Side, anak tiang, gen tesebut nabi Allah Saq Maheagung, séngaq side teutus juluan léman Tuhan jari nyiepang Ie langan, dait jari ngebéng pengertian tipaq umat-Ne mengenai keselametan saq tedasarang pengampunan dose-dose ie pade, siq rahmat dait belas kasihan léman Allahte, Ie rauh jari nyelametang ite. Maraq jelo saq tiwoq léq kelémaq aru, maraq nike Ie ngicanin cahaye-Ne tipaq selapuq dengan saq idup léq dalem peteng dait ketakutan. Ie pimpin ite tipaq langan damé sejahtere.” Bije Zakaria nike sayan beléq dait sayan kuat rohne. Ie ndot léq padang gurun, jangke dateng waktune ie harus nyatayang diriqne tipaq bangse Israel. Léq waktu nike Kaisar Agustus mréntahang selapuq warge negare Kerajaan Roma daptarang diriqne jari tesensus. Niki sénsus saq penembéq telaksaneang sewaktu Kirenius jari gubernur negeri Siria. Keranaq nike selapuq dengan lumbar daptarang diriqne léq kotene mésaq. Yusup éndah berangkat léman Nazaret léq Galilea, ojok Betlehem léq Yudea, taoq Raje Daud tebijeang; séngaq Yusup keturunan Daud. Yusup daptarang diriqne kance Mariam tunanganne, saq kenyeke betian. Waktu ie pade léq Betlehem sampun wayene Mariam gen bebije. Ie bijeang sopoq kanak mame, bijene saq sengake. Kanak nike bungkusne kadu kain lampin, terus toloqne léq dalem palung berisi jami; séngaq ie pade ndéq mauq taoq mererepan. Léq kelem nike araq pengarat-pengarat saq kenyeke jagaq dombe-dombene léq lendang pupaq léq daérah nike. Selung-selung nganjeng malaékat Tuhan léq dékét ie pade, dait kemuliean Tuhan besinar menahin ie pade, dait ie pade takut gati. Laguq malaékat nike bebase, “Ndaq takut! Séngaq tiang dateng jauq kabar solah tipaq side pade -- berite saq nyenengang gati tipaq selapuq dengan. Jelo niki léq kote Daud sampun tebijeang Juruselamet, Almasih, Junjungan Saq Mulie. Niki tandene: Side pade gen ndait sopoq bebéaq tebungkus kadu kain lampin, dait tetindoqang léq dalem palung.” Selung-selung malaékat nike teiring siq luwéq malaékat lain saq memuji Allah. Ie pade bebase, “Kemuliean tipaq Allah léq taoq saq maheagung! Dait damé sejahtere léq gumi tipaq manusie saq nyenengang Allah!” Sesampun malaékat-malaékat nike bilin ie pade dait tulak ojok sorge, pengarat-pengarat nike bebase sopoq kance saq lainne, “Silaq ite ojok Betlehem dait serioq peristiwe saq telaksane nike, saq temanikang siq Tuhan tipaq ite.” Ie pade becat-becat lumbar, beterus daitne Mariam kance Yusup, dait bebéaq nike kenyeke tetindoqang léq dalem palung. Waktu pengarat-pengarat serioq bebéaq nike, ie pade nuturang napi saq tesampéang siq pare malaékat mengenai bebéaq nike. Dait selapuq dengan bengaq dengah cerite pengarat-pengarat nike. Laguq Mariam seboq selapuq hal nike léq dalem angenne dait tetep mikirang hal nike. Pengarat-pengarat nike tulak sambil memuji dait mulieang Allah, séngaq selapuq saq sampun ie pade dengah dait serioq, pade maraq saq sampun tesampéang siq malaékat tipaq ie pade. Sesampun beumur baluq jelo, bebéaq nike tesunat. Dait ie pade ngaranin Ie Isa, maraq saq tesampéang siq malaékat tipaq ie pade, sendéqman Ie tepetianang siq mamiq bini-Ne. Tipaq wayene Mariam dait Yusup ngelaksaneang adat penyucian menurut Hukum Taurat Musa. Jari ie pade jauq Kanak nike ojok Yerusalem jari teserahang tipaq Tuhan. Séngaq léq dalem Hukum Tuhan tetulis maraq niki, “Sebilang kanak mame saq sengake, harus tesuciang bagi Tuhan.” Ie pade éndah beniat ngaturang kurban sepacek kedit petuq atao due anak kedit dare, maraq saq tetentuang léq dalem Hukum Tuhan. Waktu nike léq Yerusalem araq sopoq dengan aranne Simeon. Ie dengan soléh dait taat léq Allah serte kenyeke ngantih penghiburan tipaq Israel. Roh Suci araq bareng kance ie, dait Roh Suci sampun nyampéang léq ie bahwe ie ndéq gen ninggal sendéqman serioq Almasih saq tejanjiqang siq Tuhan. Siq bimbingan Roh Suci, Simeon tame ojok Gedéng Allah. Léq waktu nike Yusup dait Mariam jauq tame Deside Isa, saq masih kodéq nike jari ngelaksaneang upacare saq tepréntahang siq Hukum Taurat. Make Simeon bait Kanak nike dait umbaq Ie, terus Simeon memuji Allah, “Mangkin Tuhan, menengang hambe Deside niki lumbar léq dalem damé sejahtere, sesuai manik Deside, séngaq siq penenteng tiang mésaq sampun tiang serioq keselametan saq léman Deside, nike keselametan saq sampun Deside siepang umaq selapuq bangse, nike terang saq nyatayang pekayunan Deside umaq bangse-bangse lain, dait jari kemuliean bagi umat Deside, Israel.” Yusup dait Mariam jari bengaq dengah napi saq teucapang siq Simeon mengenai Bije ie pade. Simeon ngucapang berkah léq ie pade, dait bebase léq Mariam, mamiq bini Kanak nike, “Kanak niki sampun tetentuang siq Allah jari binaseang atao jari nyelametang luwéq dengan Israel. Ie éndah gen jari tande saq nimbulang pertentangan, sehingge pikiran dait angen luwéq dengan jari nyate. Kesedihan gen nusuk aténde maraq kléwang saq merang.” Araq éndah sopoq nabi nine saq sampun lingsir gati, aranne Hana, bije Panuel léman suku Asyer. Sesampun pituq taun merariq, Hana jari bebalu, dait mangkin umurne baluq pulu empat taun. Sengonéq nike ie ndéq uwah bilin Gedéng Allah. Kenjelo-kekelem ie beribadah tipaq Allah léq derike dait bedo'e kance puase. Tepat waktu nike éndah ie dateng ojok derike, terus ngucapang syukur tipaq Tuhan dait bebaos mengenai Kanak nike tipaq selapuq dengan saq ngantih waktu pembébasan Yerusalem. Sesampun Yusup dait Mariam ngelaksaneang selapuq saq tewajibang Hukum Tuhan, ie pade uléq ojok Nazaret léq Galilea. Kanak nike sayan beléq dait kuat. Ie bijaksane gati dait rahmat Allah araq léq Ie. Sebilang taun mamiq bini dait mamiq laki Deside Isa lumbar ojok Yerusalem jari ngerayeang Jelo Paskah. Dait sewaktu Deside Isa beumur due olas taun, ie pade lumbar ojok perayaan nike maraq biasene. Sesampun perayaan nike inggas ie pade uléq, laguq Deside Isa, Bijene nike, masih ndot léq Yerusalem, ndéq tetaoq siq mamiq bini dait mamiq laki-Ne. Ie pade paran Deside Isa lumbar turut rombongan. Sesampun lampaq sejeloan, baruq ie pade boyaq Deside Isa léq antare selapuq keluarge dait selapuq saq ie pade kenal. Laguq ie pade ndéq ndait Ie, jari ie pade tulak ojok Yerusalem boyaq Deside Isa. Sesampun telu jelo boyaq Deside Isa, daitne Deside Isa araq léq Gedéng Allah kenyeke melinggih pirengang guru-guru agame dait metakén mengenai luwéq hal léq ie pade. Selapuq dengan saq dengahang Ie bengaq lantaran pengertian saq araq léq Ie dait jawaban-jawaban saq Ie sampéang. Mamiq bini dait mamiq laki-Ne éndah bengaq serioq Ie. Mamiq bini-Ne bebase léq Ie, “Nune, kembéq maraq niki entan-De léq tiang pade? Bapaq-De dait tiang kuatir boyaq Side!” Jawab Deside Isa, “Kembéq side pade boyaq Tiang? Napi side pade ndéq nenaoq Tiang harus araq léq dalem gedéng Bapa Tiang?” Laguq ie pade ndéq ngerti jawaban Deside Isa. Beterus Deside Isa mantuk bareng ie pade ojok Nazaret, dait Deside Isa taat léq ie pade. Selapuq hal nike seboqne léq dalem angenne siq Mariam. Deside Isa jari sayan beléq dait sayan bijaksane, serte sayan tekasihin siq Allah dait manusie. Léq taun kelime olas pemréntahan Kaisar Tiberius, Pontius Pilatus jari gubernur léq Yudea, dait Herodes mréntah léq Galilea, Pilipus semetonne Herodes mréntah léq wilayah Iturea dait léq Trakonitis, dait Lisanias mréntah léq Abilene. Saq jari imam-imam agung, Hanas dait Kayapas. Léq taun nike Allah bemanik tipaq Yahya, bije Zakaria léq padang gurun. Make Yahya lumbar ojok selapuq daérah Kokoq Yordan dait nyampéang berite léman Allah. Yahya behotbah, “Pade tobat léman dose-dosende, dait side harus tebaptis, adéq Allah ngampunin side.” Nike sesuai maraq saq tetulis léq dalem kitab Nabi Yesaya: “Araq dengan bekuih-kuih léq padang gurun, ‘Pade siepang langan umaq Tuhan, rateang langan umaq Ie. Sembilang tembéréng gen teuruk, sebilang gunung dait bukit terateang. Langan saq béngkok-béngkok gen telomboqang, dait langan saq lekok-lekok terateang. Dengan-dengan léq seantéro dunie gen serioq keselametan saq léman Allah!’ ” Luwéq dengan dateng ojok Yahya jari tebaptis. Yahya bebase léq ie pade, “Side dengan jahat! Sai saq badaq bahwe side bau selamet léman hukuman Allah saq gen dateng? Nyatayang siq perbuatande bahwe side sampun betobat léman dose-dosende! Ndaq bebase dalem angende bahwe Ibrahim nike bapaq tiang pade. Tiang badaq side: Léman batu-batu niki éndah Allah sanggup miaqang Ibrahim keturunan. Kandik sampun tesadangang jari ngerebaq lolo jangke akah-akahne. Sebilang lolo saq ndéq ngasilang buaq saq solah gen terebaq dait tetetéh ojok dalem api!” Dengan-dengan nike beketuan léq Yahya, “Jari, napi saq harus tiang pade piaq?” Jawab Yahya, “Dengan saq bedowé due kelambi, harus ngebéng sopoq tipaq dengan saq ndéq bedowé; dait dengan saq bedowé keloran, gawéq maraq nike éndah.” Penagih-penagih pajek éndah dateng ojok Yahya jari tebaptis. Ie pade beketuan, “Bapaq Guru, napi saq harus tiang pade piaq?” Jawab Yahya, “Ndaq nagih luwéqan léman napi saq sampun tetentuang.” Araq éndah prajurit saq beketuan, “Berembé léq tiang pade? Napi saq harus tiang pade piaq?” Jawab Yahya, “Ndaq peres sai juaq dait ndaq ngerampas képéng kadu tuduhan-tuduhan palsu. Cukupang diriqde siq gajinde!” Waktu nike, dengan-dengan mulai beketuan-tuan, napi Yahya nike Almasih saq ie pade antih. Keranaq nike Yahya bebase léq ie pade selapuq, “Tiang baptis side kadu aiq, laguq laun gen rauh Dengan saq beléqan kuasene léman tiang. Jari lekaq tali sepatu-Ne doang tiang ndéq patut. Ie gen baptis side kadu Roh Suci dait api. Léq gading-Ne araq kléong jari nampiq selapuq gandum jangke bersi. Selapuq gandumne gen tekumpulang léq dalem lumbung, laguq selapuq gambasne gen Ie tunuq léq api saq ndéq iniq pedaq!” Siq luwéq naséhat lain Yahya beriteang Kabar Solah tipaq dengan luwéq. Laguq Herodes, penguase Galilea, teperinget siq Yahya, lantaran Herodes merariq kance Herodias, sebiniq sanakne, dait mengenai selapuq kejahatan lain saq sampun ie piaq. Laguq Herodes malahan ngeromboq kejahatan-kejahatanne, ie tamaq Yahya ojok dalem bui. Sesampun selapuq dengan nike tebaptis, Deside Isa éndah tebaptis. Dait sewaktu Deside Isa kenyeke bedo'e, langit kebukaq, dait Roh Suci turun ojok atas-Ne maraq ruen kedit dare. Dait kedengahan suare léman langit, “Side Bije Tiang saq Tiang kasihin. Side nyenengang Tiang.” Léq waktu Deside Isa mulai karye-Ne, Ie beumur kire-kire telung dase taun. Menurut pendapet dengan, Ie bijene Yusup, Yusup bijene Eli, Eli bijene Matat, Matat bijene Lewi, Lewi bijene Malki, Malki bijene Yanai, Yanai bijene Yusup, Yusup bijene Matica, Matica bijene Amos, Amos bijene Nahum, Nahum bijene Hesli, Hesli bijene Nagai, Nagai bijene Maat, Maat bijene Matica, Matica bijene Simei, Simei bijene Yosek, Yosek bijene Yoda, Yoda bijene Yohanan, Yohanan bijene Resa, Resa bijene Zerubabel, Zerubabel bijene Sealtiel, Sealtiel bijene Neri, Neri bijene Malki, Malki bijene Adi, Adi bijene Kosam, Kosam bijene Elmadam, Elmadam bijene Er, Er bijene Yesua, Yesua bijene Eliezer, Eliezer bijene Yorim, Yorim bijene Matat, Matat bijene Lewi, Lewi bijene Simeon, Simeon bijene Yehuda, Yehuda bijene Yusup, Yusup bijene Yonam, Yonam bijene Elyakim, Elyakim bijene Melea, Melea bijene Mina, Mina bijene Matata, Matata bijene Natan, Natan bijene Daud, Daud bijene Isai, Isai bijene Obed, Obed bijene Boas, Boas bijene Salmon, Salmon bijene Nahason, Nahason bijene Aminadab, Aminadab bijene Admin, Admin bijene Arni, Arni bijene Hezron, Hezron bijene Perez, Perez bijene Yehuda, Yehuda bijene Yakub, Yakub bijene Ishak, Ishak bijene Ibrahim, Ibrahim bijene Terah, Terah bijene Nahor, Nahor bijene Serug, Serug bijene Rehu, Rehu bijene Peleg, Peleg bijene Eber, Eber bijene Salmon, Salmon bijene Kenan, Kenan bijene Arpaksad, Arpaksad bijene Sem, Sem bijene Nuh, Nuh bijene Lamek, Lamek bijene Metusalah, Metusalah bijene Henok, Henok bijene Yared, Yared bijene Mahalaleel, Mahalaleel bijene Kenan, Kenan bijene Enos, Enos bijene Set, Set bijene Adam, Adam manusie penembéq saq tecipteang siq Allah. Deside Isa tekuasein siq Roh Suci léq waktu Ie bilin Kokoq Yordan terus Ie tepimpin siq Roh Suci nike ojok padang gurun. Léq derike Deside Isa tecobe siq Belis petang dase jelo ngonéqne. Sengonéq nike, Ie nénten daharang napi-napi. Beterus Ie jari seduk. Belis matur léq Deside Isa, “Lamun Pelungguh Bije saq asalne léman Allah, manikang batu niki jari ruti.” Jawab Deside Isa, “Araq tetulis léq dalem Kitab Suci bahwe: ‘Manusie ndéqne cume idup léman ruti doang.’ ” Terus Belis jauq Deside Isa ojok taoq saq atas, dait araq sepengkejep doang Belis petitoqang Deside Isa selapuq kerajaan léq dunie. Beterus Belis matur tipaq Deside Isa, “Selapuq kekuasean dait kesugihan niki gen tiang aturin tipaq Pelungguh, séngaq selapuqne sampun teserahang ojok tiang dait tiang bau ngebéng léq sai juaq saq tiang mélé béng. Selapuqne nike gen jari dowén Pelungguh, lamun Pelungguh sujut nyembah tiang.” Jawab Deside Isa, “Léq dalem Kitab Suci araq tetulis, ‘Pade sembah Allah, Tuhan side dait tipaq Ie doang side beribadah.’ ” Beterus Belis jauq Deside Isa ojok Yerusalem dait toloq-Ne léq atas buwung Gedéng Allah. Belis matur léq Deside Isa, “Lamun Pelungguh Bije saq asalne léman Allah, cobaq Pelungguh nimproh léman deriki. Séngaq araq tetulis léq dalem Kitab Suci, ‘Allah gen mréntahang malaékat-malaékat-Ne jari jagaq Pelungguh.’ Dait éndah, ‘Malaékat-malaékat gen sangklap Pelungguh kadu ime ie pade, adéq cokor Pelungguh nénten kedantuk léq batu.’ ” Jawab Deside Isa, “Léq dalem Kitab Suci tetulis, ‘Ndaq Side cobe Allah, Tuhan side!’ ” Sesampun Belis engkah cobe Deside Isa kadu segale macem care, ie bilin Deside Isa dait ngantih waktu saq tepat. Siq kuase Roh Allah Deside Isa tulak ojok Galilea. Berite mengenai Deside Isa nyebar ojok selapuq daérah nike. Deside Isa ngajahang léq balé-balé ibadah, dait selapuq dengan muji Ie. Deside Isa lumbar éndah ojok Nazaret, taoq Ie tebeléqang. Léq jelo Sabat maraq biasene Ie lumbar ojok balé ibadah. Deside Isa nganjeng jari bace Kitab Suci, terus Ie teaturin kitab Nabi Yesaya. Deside Isa bukaq gulungan kitab nike, terus dait-Ne ayat niki, “Roh Tuhan araq léq Tiang, séngaq Allah sampun nyuciang dait ngesahang Tiang jari beriteang Kabar Solah tipaq dengan miskin. Allah ngutus Tiang jari ngumumang tipaq dengan tawanan bahwe ie pade gen tebébasang dait tipaq dengan bute bahwe ie pade gen tao nyerioq malik; jari bébasang dengan saq tejajah, jari beriteang taun rahmat Tuhan sampun rauh.” Deside Isa gulung malik kitab nike, dait tulakang-Ne ojok petugas, beterus melinggih. Selapuq dengan léq dalem balé ibadah nike perhatiang Ie. Terus Deside Isa mulai bebaos léq ie pade maraq niki, “Léq jelo niki, ayat-ayat Kitab Suci niki sampun telaksane sewaktu side pade dengahang ayat-ayat nike.” Selapuq saq Ie ucapang bagus gati, sehingge ie pade takjub dait muji Ie. Ie pade bebase, “Tekan Ie bije Yusup?” Make Deside Isa bemanik léq ie pade, “Pasti side pade gen kadu sesenggak niki léq Tiang, ‘Tabib, selahang diriq-De mésaq. Dait silaq piaq léq kampung asal Pelungguh mésaq keajaipan saq tiang pade dengah Pelungguh piaq léq Kapernaum!’ ” Deside Isa bemanik malik, “Tiang badaq side, setetune ndéq araq nabi saq tehormatin léq kampung asalne mésaq. Laguq dengahang: léq jaman Nabi Elia, sewaktu ndéq turun ujan telu taun enem bulan ngonéqne, araq musibah kelapahan léq selapuq negeri. Léq waktu nike luwéq bebalu léq Israel. Timaq maraq nike Allah nénten ngutus Nabi Elia lumbar ojok salaq sopoq bebalu-bebalu nike laguq cume tipaq sopoq bebalu léq Sarpat léq daérah Sidon. Maraq nike éndah léq jaman Nabi Elisa, araq luwéq dengan saq sakit kusta léq Israel, laguq dengan-dengan nike ndéq araq saq teselahang, kecuali Naaman dengan Siria nike.” Selapuq dengan léq balé ibadah nike sili gati sewaktu dengah hal nike. Ie pade nganjeng beterus tundungne Deside Isa ojok luah kote dait jauqne Deside Isa ojok tembéréng gunung, saq araq léq luah kote nike. Ie pade beniat jelek Deside Isa ojok dalem jurang. Laguq Deside Isa nerobos dengan luwéq nike, terus lumbar. Beterus Deside Isa lumbar ojok kote Kapernaum léq Galilea. Léq derike Deside Isa ngajahang dengan-dengan léq jelo Sabat. Ie pade takjub dengahang pengajahan Deside Isa, séngaq ucapan-ucapan-Ne penoq kuase. Léq dalem balé ibadah nike, araq sopoq dengan saq tekuasein siq roh jahat. Dengan nike bekuih-kuih siq suare saq keras, “Deside Isa, dengan Nazaret, napi saq gen Pelungguh piaq léq tiang pade? Napi Pelungguh rauh jari binaseang tiang pade? Tiang nenaoq sai setetune Pelungguh: Pelungguh Saq Suci léman Allah!” Laguq Deside Isa semprak roh jahat nike, “Tedoq sugul léman dengan niki!” Beterus roh jahat nike timpak dengan nike léq julu ie pade selapuq, terus sugul léman dengan nike dait ndéq nyakitin ie. Selapuq dengan bengaq, dait bebase sopoq kance saq lain, “Luar biase manik-Ne. Siq wibawe dait kuase, Ie mréntahang roh-roh jahat sugul, dait ie pade éndah sugul!” Make kabar mengenai Deside Isa nyebar léq selapuq wilayah nike. Deside Isa bilin balé ibadah nike, beterus lumbar ojok gedéng Simon. Mentoaq nine Simon kenyeke sakit telih panas, dait dengan-dengan tunas léq Deside Isa adéq nulung ie. Beterus Deside Isa nganjeng léq dékét mentoaq Simon nike, terus Ie bemanik siq suare saq beléq jari nyelahang penyakit telih panas nike. Penyakit nike telang, dait mentoaq Simon langsung ures dait ngelayanin ie pade. Sewaktu serep jelo, selapuq dengan pade jauq tipaq Deside Isa semeton-semetonne saq ngidap macem-macem penyakit. Deside Isa noloq gading-Ne léq atas ie pade sopoq-sopoq dait selahang ie pade. Roh-roh jahat éndah sugul léman luwéq dengan, sambil bekuih-kuih, “Pelungguh Bije saq asalne léman Allah!” Laguq Deside Isa semprak ie pade dait nénten ngijinang ie pade ngeraos, séngaq ie pade nenaoq bahwe Deside Isa nike Almasih. Sewaktu mulai tiwoq jelo, Deside Isa bilin kote nike beterus lumbar ojok sopoq taoq saq sepi. Dengan-dengan mulai boyaq Ie, terus waktu ie pade ndait Deside Isa, ie pade berusahe adéq Deside Isa sampunang bilin ie pade. Laguq Deside Isa bemanik, “Kabar Solah mengenai Kerajaan Allah harus Tiang sampéang éndah léq kote-kote lain, séngaq jari hal nike Allah ngutus Tiang ojok dunie.” Keranaq nike Deside Isa nyampéang Kabar Solah léman Allah léq selapuq balé-balé ibadah léq Yudea. Léq sopoq waktu, Deside Isa nganjeng léq sedin Danao Genesaret. Luwéq dengan bedesek-desekan jari dengahang Manik Allah. Deside Isa cingakin due perau léq sedin danao nike; nelayan-nelayanne sampun turun léman perau-perau nike dait ie pade kenyeke bisoq jaringne. Deside Isa taék ojok salaq sopoq perau, perau nike peraune Simon, beterus Ie manikang Simon dorong peraune nike jaoqan sekediq léman sedin danao. Deside Isa melinggih léq dalem perau nike dait mulai ngajahang dengan luwéq. Sesampun tutuq ngajahang, Deside Isa bemanik léq Simon, “Silaq dayung peraunde ojok taoq saq dalem, terus pencar jaringde jari bau empaq.” Simon matur, “Guru, sekeleman tiang pade lelah begawéan, laguq ndéq mauq napi-napi! Laguq lantaran Pelungguh saq manikang, tiang gen pencar jaring tiang malik.” Sesampun ie pade laksaneang hal nike, ie pade luwéq gati mauq empaq jangke jaring ie pade mulai roék. Keranaq nike ie pade ngéndéng tulung léq batur-batur ie pade saq araq léq perau saq lain. Batur-baturne nike pade dateng beterus ie pade bareng-bareng ngisiq kedue perau nike penoq siq empaq, jangke perau-perau nike jaqne ketelep. Waktu Simon serioq hal nike, ie sujut léq arepan Deside Isa terus matur, “Silaq bilin tiang, Junjungan Saq Mulie! Séngaq tiang dengan bedose!” Simon dait selapuq dengan saq bareng kance ie bengaq lantaran luwéq gati ie pade mauq empaq. Maraq nike éndah batur-baturne Simon, Yakub dait Yahya, bije-bije Zebedeus. Deside Isa bemanik léq Simon, “Ndaq takut! Mulai mangkin side gen jaring manusie.” Simon dait batur-baturne kedeng perau-perau nike ojok sedin danao, beterus bilin selapuqne, terus ngiring Deside Isa. Léq sopoq jelo, Deside Isa araq léq sopoq kote. Léq derike araq sopoq dengan mame saq awakne penoq siq penyakit kuste. Sewaktu ie serioq Deside Isa, ie sujut léq arepan-Ne sambil tunas, “Paq, lamun Pelungguh kayun, Pelungguh bau nyelahang tiang!” Deside Isa jamah dengan nike dait bemanik, “Tiang mélé, mangkin side selah!” Waktu nike éndah penyakitne telang. Beterus Deside Isa balaq dengan nike tuturang léq sai-sai, dait bemanik-Ne, “Silaq lumbar ojok imam, dait tunas ie pastiang bahwe side sampun selah. Beterus lumbar ngaturang kurban maraq saq tepréntahang Musa, jari bukti tipaq dengan-dengan bahwe side tetu-tetu sampun selah.” Laguq kabar mengenai Deside Isa sayan nyebar ojok mbé-mbé, dait luwéq dengan dateng jari dengahang Ie dait tunas adéq teselahang penyakit-penyakitne. Laguq Deside Isa lumbar jari bedo'e ojok taoq saq sepi. Léq sopoq jelo sewaktu Deside Isa kenyeke ngajahang, araq dengan-dengan Parisi dait ahli-ahli Taurat melinggih léq derike. Ie pade dateng léman Yerusalem, dait léman kote-kote léq Galilea dait Yudea. Kuase Tuhan araq léq Deside Isa sehingge Ie tao nyelahang dengan-dengan sakit. Léq waktu nike araq pire dengan dateng jauq sopoq dengan képaq saq tetindoqang léq atas tipah. Ie pade berusahe jauq dengan nike ojok dalem balé adéqne bau toloq ie léq arepan Deside Isa. Laguq lantaran luwéq gati dengan léq derike, ie pade ndéq bau jauq ie tame. Keranaq nike ie pade taékang dengan képaq nike ojok atas atep balé. Beterus ie pade bungkar atep, dait nurunang ie bareng-bareng kance tipahne léq arepan Deside Isa léq tengaq-tengaq dengan luwéq nike. Waktu Deside Isa cingakin beléq gati iman ie pade, Deside Isa bemanik léq dengan nike, “Semeton, dosende sampun teampunin.” Ahli-ahli Taurat dait dengan-dengan Parisi mulai beketuan léq dalem angenne, “Sai dengan niki? Ie menghine Allah? Sai saq bau ngampunin dose selain Allah?” Deside Isa wikan saq ie pade ketuanang. Jari Deside Isa bemanik, “Kembéq side pade beketuan-tuan maraq nike léq dalem angende? Mbé saq molahan, ngucapang, ‘Dosende sampun teampunin’, atao ngucapang, ‘Ures dait lampaq?’ Laguq adéq side pade nenaoq bahwe léq dunie niki Bije Manusie bekuase ngampunin dose.” Beterus Deside Isa bemanik léq dengan saq képaq nike, “Ures, angkat tipahde, dait uléq!” Dengan nike langsung ures léq julu ie pade selapuq, terus ngangkat tipahne dait uléq sambil mulieang Allah. Ie pade selapuq takjub gati terus mulieang Allah. Dait siq perasaan takut, ie pade bebase, “Ajaip gati peristiwe saq ite saksiang jelo niki!” Sesampun nike Deside Isa sugul dait cingakin sopoq dengan penagih pajek, aranne Lewi, kenyeke tokol léq taoqne begawéan. Deside Isa bemanik léq ie, “Silaq turut Tiang.” Beterus Lewi nganjeng dait bilin selapuqne, terus ngiring Deside Isa. Sesampun nike Lewi ngaraqang gawé léq gedéngne umaq Deside Isa. Luwéq penagih pajek dait dengan-dengan lain milu medaran bareng-bareng kance ie pade. Dengan-dengan Parisi dait ahli-ahli Taurat ndéq seneng, terus bebase léq pengiring-pengiring Deside Isa, “Kembéq side selapuq medaran dait nginem kance penagih pajek dait dengan-dengan bedose?” Jawab Deside Isa tipaq ie pade, “Dengan saq séhat ndéq merluang tabib; cume dengan saq sakit doang. Tiang dateng ndéqne jari ngempoh dengan-dengan saq nganggep diriqne sampun kenaq, laguq dengan-dengan saq bedose adéq ie pade betobat léman dose-dose ie pade.” Dengan-dengan Parisi nike matur éndah léq Deside Isa, “Pengiring Yahya dait pengiring dengan Parisi rimpes puase dait bedo'e. Laguq pengiring-pengiring Pelungguh bekelor dait nginem.” Jawab Deside Isa léq ie pade, “Segerah side pade suruq temué-temué pade puase léq gawé ngawinang lamun pengantén mame masih araq bareng-bareng kance ie pade? Pasti ndéq! Laguq gen dateng waktune pengantén mame nike tebait léman ie pade. Léq waktu nike baruq ie pade gen puase.” Beterus Deside Isa nyeriteang tipaq ie pade perumpamean niki, “Ndéq araq dengan saq nampel kelambi lotoh kadu bakal saq tebait léman kelambi saq masih baru. Séngaq lamun maraq nike entane, kelambi saq masih baru nike gen roék. Dait bakal saq tekadu nampel nike éndah ndéqne cocok kance kelambi saq lotoh. Maraq nike éndah ndéq araq dengan saq ngisiq aiq anggur saq baru léq dalem kantong léndong saq lebung, séngaq aiq anggur baru nike gen miaq kantong nike bedah. Make anggurne tumpah dait kantongne séde. Anggur saq baru harus teisiq léq dalem kantong saq baru éndah. Maraq nike éndah ndéq araq sopoq dengan juaq saq mélé nginem anggur baru sesampun nginem anggur saq let, séngaq basen ie pade, ‘Anggur saq let nike maiqan.’ ” Léq sopoq jelo, waktu nike jelo Sabat, Deside Isa kance pengiring-pengiring-Ne bemargi léq lendang gandum. Pengiring-pengiring-Ne pade bau gandum. Ie pade osok gandum nike kadu imene, terus ie pade kelorang. Dengan-dengan Parisi bebase, “Kembéq side pade piaq hal saq ndéq tekanggo telaksaneang léq jelo Sabat?” Jawab Deside Isa, “Napi side pade ndéq uwah bace napi saq telaksaneang Daud, sewaktu ie dait dengan-dengan saq ngiring ie lapah? Daud tame ojok dalem Gedéng Allah terus bait ruti saq sampun teaturang tipaq Allah, terus kelorangne dait béngne tipaq pengiring-pengiringne, padahal ruti nike ndéq kanggo tekelor kecuali siq imam-imam?” Terus Deside Isa bemanik, “Bije Manusie nike Penguase jelo Sabat!” Léq jelo Sabat saq lain, Deside Isa lumbar ojok balé ibadah terus ngajahang. Léq derike araq dengan saq ime kananne maté setowéq. Ahli-ahli Taurat dait dengan Parisi mélé boyaq kesalaqan Deside Isa adéqne bau ngelaporang Ie. Jari ie pade tetep merhatiang napi Ie gen nyelahang dengan léq jelo Sabat. Laguq Deside Isa wikan pikiran ie pade. Make Deside Isa bemanik léq dengan saq maté setowéq imene nike, “Silaq nganjeng léq deriki léq julu!” Dengan nike ures, terus nganjeng léq derike. Beterus Deside Isa beketuan léq dengan-dengan saq araq léq derike, “Mbé saq tekanggoang léq jelo Sabat, solah atao gawéq hal saq jahat, nyelametang nyawe dengan atao nyematéq dengan?” Deside Isa cingakin sekelining ie pade selapuq, terus bemanik tipaq dengan nike, “Ulurang imende.” Dengan nike ngulurang imene, terus imene jari selah. Laguq ahli-ahli Taurat dait dengan-dengan Parisi nike sili gati, terus ie pade berunding, napi saq gen ie pade bau laksaneang tipaq Deside Isa. Léq waktu nike Deside Isa taék ojok sopoq bukit jari bedo'e. Léq derike Ie bedo'e tipaq Allah sekeleman. Sesampun menah, Ie ngemanikang pengiring-pengiring-Ne, terus piléq due olas dengan léman ie pade, Deside Isa aranin due olas dengan nike rasul-rasul. Aran dengan-dengan nike: Simon (saq Ie sebut éndah Petrus), dait Andreas semetonne Simon; Yahya dait Yakub, Pilipus, Bartolomeus, Matius dait Tomas, Yakub bijene Alpeus, dait Simon (saq tesebut dengan Zelot), Yudas bijene Yakub dait Yudas Iskariot saq beterus jari penghianat. Beterus Deside Isa turun léman bukit nike teiring siq rasul-rasul nike, terus mentelah dait nganjeng léq sopoq taoq saq lendek. Léq derike araq éndah luwéq pengiring-pengiring-Ne saq lain dait luwéq dengan saq dateng léman selapuq wilayah Yudea, Yerusalem dait kote-kote Tirus dait Sidon saq léq sedin segare. Ie pade dateng jari dengahang Deside Isa, dait jari teselahang léman penyakit-penyakit ie pade. Ie pade saq tekuasein siq roh jahat dateng éndah dait teselahang. Selapuq dengan berusahe jamah Deside Isa, séngaq araq kuase saq sugul léman diriq-Ne saq nyelahang ie pade selapuq. Deside Isa perhatiang pengiring-pengiring-Ne terus bemanik, “Bahagie side pade dengan-dengan miskin, séngaq side pade saq dowéang Kerajaan Allah! Bahagie side pade saq lapah mangkin; side pade gen tepuasang! Bahagie side pade saq nangis mangkin; side pade gen keleléq! Bahagie side pade, lamun lantaran Bije Manusie side pade temeriq, tetolaq, tehine dait tepitnah! Nabi-nabi jaman laéq teperlakuang maraq nike éndah. Lamun hal nike telaksane, side pade harus terimaq secare ihlas, dait tetep besukecite, séngaq upaq side pade beléq léq sorge. Laguq celake side pade saq sugih mangkin niki; séngaq side pade sampun ngalamin kenikmatan! Celake side pade saq besuh mangkin niki; séngaq side pade gen kelapahan! Celake side pade saq keleléq mangkin niki; séngaq side pade gen aséq dait nangis! Celake side pade lamun selapuq dengan puji side pade; séngaq maraq nike éndah leluhur ie pade sampun perlakuang nabi-nabi palsu.” “Laguq tipaq side pade saq dengahang Tiang mangkin niki, Tiang sampéang pesen niki: Kasihin musuh-musuhde, dait laksaneang saq solah tipaq dengan saq meriq léq side. Berkahin dengan saq ngutuk side, dait do'eang dengan saq aniaye side. Lamun dengan nempélék sangképde saq sopoq, alurang ie nempélék sangképde saq sopoqne éndah. Lamun jubahde terampas, béng éndah kelambinde. Lamun araq dengan saq nunas léq side, béng ie; dait lamun dowénde terampas, ndaq lakoq ie malik. Perlakuang dengan lain maraq side pade melét teperlakuang siq ie pade. Lamun side pade ngasihin dengan-dengan saq ngasihin side pade, napi saq gen jari upaqde? Dengan bedose éndah ngasihin dengan-dengan saq ngasihin ie pade! Dait lamun side pade solah tipaq dengan-dengan saq solah léq side, napi upaqde? Dengan bedose éndah piaq maraq nike! Dait lamun side pade nyinggaqang képéng cume tipaq dengan-dengan saq bau nulakang, napi upaqde? Dengan bedose éndah nyinggaqang képéng tipaq dengan bedose, terus ie tagih malik! Seharusne ndéq maraq nike! Sebalikne side pade harus ngasihin musuhde dait solah léq ie pade. Side pade harus béng nyinggaq, dait ndaq harepang tetulakang malik. Lamun maraq nike, upaqde gen beléq dait side pade gen jari bije-bije dowén Allah Saq Maheagung. Séngaq Allah nike murah até léq dengan saq ndéq tao betampi asih, dait tipaq saq jahat éndah. Side pade harus murah até, pade maraq Bapa side murah até.” “Ndaq side pade hakimin dengan lain, make side pade ndéq gen tehakimin. Ndaq side pade hukum dengan lain, make side pade ndéq gen tehukum; ampunin dengan lain dait side pade gen teampunin. Pade béng tipaq dengan lain, dait side pade gen tebéng: Sopoq takahan saq solah, saq tepadetang, saq tegerik dait saq tumpah ojok luah gen tebéng tipaq side pade. Séngaq ukuran saq side pade kadu léq dengan lain, nike éndah gen tekadu siq Allah léq side pade.” Beterus Deside Isa nyampéang malik tipaq ie pade sopoq perumpamean: “Lamun dengan bute pimpin dengan bute saq lain, pasti deduaqne gen geriq ojok longkak. Sopoq murit ndéqne beléqan léman gurune, laguq murit saq sampun tamat gen jari pade maraq gurune. Kembéq side pade pedaseng bubuk kayuq léq dalem penenteng semetonde, padahal balok léq dalem penentengde, ndéq side pade perhatiang? Berembé side pade bau bebase léq semetonde, ‘Tunas, semeton, tiang sugulang bubuk kayuq léq penentengde nike,’ padahal dalem penentengde mésaq araq balok saq ndéq side pade serioq? Hai dengan munapik! Sugulang juluq balok saq araq léq penentengde mésaq, baruq side pade pedas serioq dait bau nyugulang bubuk kayuq léman penenteng semetonde.” “Lolo saq solah ndéqne mungkin ngasilang buaq saq ndéq solah. Maraq nike éndah lamun lolo nike ndéq solah, ndéqne mungkin ngasilang buaq saq solah. Sebilang lolo tetaoq léman buaqne. Bebenes saq beduwi ndéq ngasilang buaq are, dait pupaq saq beduwi ndéq ngasilang buaq anggur. Dengan saq solah nyugulang hal-hal saq solah séngaq aténe penoq siq hal-hal saq solah. Dengan saq jahat nyugulang hal-hal saq jahat séngaq aténe penoq siq hal-hal saq jahat. Séngaq napi saq teucapang siq biwih tetentuang siq isi aténe.” “Kembéq side pade ngempoh Tiang, ‘Junjungan Saq Mulie, Junjungan Saq Mulie,’ laguq ndéq ngelaksaneang napi saq Tiang manikang léq side? Kance sai bau ite padeang dengan saq dateng tipaq Tiang dait dengahang manik Tiang terus ie laksaneang manik nike? -- Tiang badaq side pade --. Ie pade maraq dengan saq kenyeke penganjeng balé, kaliqne dalem-dalem, terus miaq dasar balé nike kadu batu. Waktu araq belabur dait aiq kokoq dateng babar balé nike, balé nike ndéq iniq inggur, séngaq tepenganjeng léq atas dasar saq kuat. Laguq dengan saq dengah manik Tiang dait ndéq ie laksaneang, pade maraq dengan saq penganjeng balé ndéq kadu dasar. Waktu tebabar siq belabur, balé nike becat ruk; dait luwéq gati sédene!” Sesampun tutuq manikang hal-hal nike léq dengan luwéq, Deside Isa lumbar ojok Kapernaum. Léq derike araq prewire Roma saq bedowé pelayan saq ie tunah gati. Pelayan nike sakit parah dait gen milinang. Léq waktu prewire nike dengah mengenai Deside Isa, utusne pire pemimpin dengan Yahudi lumbar ojok Deside Isa jari tunas adéq Ie rauh dait nyelahang pelayanne. Sewaktu dateng léq Deside Isa, sanget siqne tunas siq dengan-dengan nike adéq Deside Isa kayun nulung prewire nike. Ie pade matur léq Deside Isa, “Prewire niki patut Pelungguh tulung, séngaq ie ngasihin bangsente dait sampun miaqang tiang pade balé ibadah.” Make Deside Isa lumbar bareng-bareng kance ie pade. Sendéqman Deside Isa rauh léq gedéng prewire nike, prewire nike ngutus batur-baturne jari matur tipaq Deside Isa, “Sampunang Pelungguh répot-répot, tiang nénten patut nerimaq Pelungguh léq balén tiang. Malahan tiang mésaq nénten patut ngadep Pelungguh. Silaq Pelungguh bemanik doang adéq pelayan tiang selah. Séngaq tiang éndah bedowé atasan dait tiang harus taat léq ie. Dait léq bawaq tiang éndah araq prajurit-prajurit saq harus taat léq préntah tiang. Lamun tiang suruq sopoq prajurit, ‘Lalo!’ ie pasti lalo. Dait lamun tiang suruq saq lain, ‘Dateng!’ ie pasti dateng; dait lamun tiang préntah pelayan tiang, ‘Laksaneang!’ pasti ie laksaneang.” Deside Isa bengaq pirengang hal nike. Deside Isa nyereminang andang dengan luwéq saq kenyeke ngiring Ie dait bemanik, “Tiang badaq side, iman sebeléq niki ndéq uwah Tiang ndait léq antare dengan Israel.” Sewaktu dengan-dengan saq teutus nike tulak ojok gedéng prewire nike, pelayan nike sampun selah. Ndéq ngonéq sesampun nike, Deside Isa lumbar ojok kote Nain. Pengiring-pengiring-Ne dait dengan luwéq pade milu ngiring Deside Isa. Sewaktu Deside Isa rauh léq dékét jebak kote, araq dengan-dengan saq kenyeke lémbah jenazah ojok luah kote. Saq milinang nike kanak mame, bijene bebalu, ie anak nunggal. Luwéq penduduk kote milu ngatong bebalu nike. Sewaktu Deside Isa, Junjungan Saq Mulie cingakin bebalu nike, Ie periak léq bebalu nike terus bemanik, “Inaq, ndaq nangis!” Beterus Deside Isa ngerapetin kurung batang jenazah nike dait tegelne. Make dengan-dengan saq ngelémbah kurung batang nike mentelah. Deside Isa bemanik, “Nune, Tiang bemanik léq side, silaq ures!” Terune saq sampun milinang nike ures, terus tokol dait mulai ngeraos. Make Deside Isa nyerahang ie ojok inaqne. Selapuq dengan jari takut dait mulieang Allah. Ie pade bebase, “Sopoq nabi saq beléq sampun rauh léq tengaq-tengaq ite! Allah sampun rauh jari nyelametang umat-Ne!” Kabar mengenai Deside Isa niki nyebar léq selapuq wilayah Yudea dait léq daérah sekiterne. Waktu Yahya mauq kabar léman pengiring-pengiringne mengenai selapuq peristiwe nike, ie ngempoh due pengiringne terus ngutus ie pade lumbar ojok Junjungan Saq Mulie Deside Isa jari metakén, “Napi Pelungguh dengan saq gen rauh menurut janji Allah, atao tiang pade harus ngantih dengan saq lainan?” Kedue pengiring Yahya nike lumbar ojok Deside Isa, dait matur, “Yahya Pembaptis ngutus tiang pade metakén léq Pelungguh, napi Pelungguh dengan saq gen rauh menurut janji Allah, atao tiang pade harus ngantih dengan saq lainan?” Waktu nike, Deside Isa nyelahang luwéq dengan, dait sediq roh jahat dait miaq luwéq dengan bute tao nyerioq. Jari jawab Deside Isa, “Tulak tipaq Yahya dait badaq napi saq side pade dengah dait serioq: dengan bute tao nyerioq, dengan képaq tao lampaq, dengan sakit kuste selah, dengan kedok tao dedengah, dengan ninggal teidupang malik, dait Kabar Solah léman Allah tesampéang tipaq dengan-dengan miskin. Bahagie dengan saq ndéq ragu-ragu léq Tiang.” Sesampun utusan-utusan Yahya nike lumbar, Deside Isa mulai bebaos léq dengan luwéq mengenai Yahya, manik-Ne, “Side pade lumbar ojok padang gurun jari serioq napi? Napi teréng buloq saq tetiup siq angin? Side pade lumbar jari serioq napi? Serioq dengan saq bekelambi solah? Dengan-dengan saq bekelambi maraq nike dait saq idup méwah ndot léq istane! Jari, side pade sugul serioq napi? Jari serioq nabi? Tetu, malahan ie lebih léman nabi. Séngaq Yahya nike saq temaksut dalem ayat Kitab Suci niki, ‘Serioq, Tiang suruq utusan Tiang, juluan léman Deside, ie gen nyiepang Deside langan.’ Tiang badaq side: Léq dunie niki ndéq uwah araq dengan saq beléqan léman Yahya Pembaptis. Laguq dengan saq paling kodéq léq dalem Kerajaan Allah, beléqan léman Yahya.” Selapuq dengan -- termasuk éndah penagih-penagih pajek -- dengah Deside Isa manikang hal nike. Ie pade ngakuq kebenaran Allah séngaq ie pade sampun tebaptis siq Yahya. Laguq dengan-dengan Parisi dait ahli-ahli Taurat ndéq mélé nerimaq rencane Allah tipaq ie pade. Ie pade ndéq mélé tebaptis siq Yahya. Beterus Deside Isa bebaos malik, manik-Ne, “Napi kance Tiang bandingang dengan-dengan jaman niki? Napi kancene bau tepadeang? Ie pade maraq kanak-kanak saq tokol léq peken; sekelompoq bekuih tipaq saq lain, ‘Tiang pade nyanyiang side pade lagu gembire, laguq side pade ndéq mélé ngigel! Tiang pade nyanyiang lagu sedih, laguq side pade ndéq nangis!’ Yahya Pembaptis dateng -- ie puase dait ndéq nginem anggur -- dait side pade bebase, ‘Ie tekuasein siq sétan!’ Bije Manusie rauh -- Ie medaran dait nginem -- terus side pade bebase, ‘Serioq dengan nike! Melak, girang bowos, batur penagih pajek, dait batur dengan bedose!’ Timaq maraq nike, hikmat Allah gen nyate mule kenaq léq dalem kehidupan dengan-dengan saq tepimpin siq hikmat nike.” Araq dengan Parisi, aranne Simon, pesilaq Deside Isa medaran. Deside Isa lumbar ojok gedéngne dait melinggih medaran. Léq kote nike araq éndah dengan nine saq idup dalem dose. Waktu ie dengah bahwe Deside Isa kenyeke medaran léq gedéng dengan Parisi nike, ie dateng jauq sopoq botol pualam berisi minyak sengéh. Ie nganjeng léq mudi Deside Isa dékét cokor-Ne dait nangis sambil basaqang cokor Deside Isa siq aiq penentengne. Beterus usapne cokor Deside Isa siq bulune jangke gero terus sidukne dait teminyakin siq minyak sengéh nike. Sewaktu dengan Parisi saq pesilaq Deside Isa serioq hal nike, ie bebase dalem angenne, “Seandéne Ie niki nabi, pasti Ie wikanang sai dengan nine saq kintur Ie, séngaq dengan nine nike dengan bedose!” Beterus Deside Isa bemanik léq Simon, “Simon, araq sopoq hal saq mélé Tiang sampéang léq side.” Atur Simon, “Silaq Pelungguh manikang.” Deside Isa bemanik, “Araq due dengan saq berutang léq dengan saq nyinggaqang képéng. Saq sopoq berutang lime ratus képéng perak, dait saq sopoqne malik séket képéng perak. Deduaqne ndéq bau ngelunasin utang nike, make ihlasangne utang ie pade. Nah, léq antare deduaqne sai saq beléqan kasihne tipaq dengan saq nyinggaqang képéng nike?” “Menurut tiang dengan saq paling luwéq teihlasang utangne!” jawab Simon. “Kenaq pendapet side,” jawab Deside Isa. Beterus Deside Isa cingakin andang dengan nine nike dait bemanik léq Simon, “Side serioq dengan nine niki? Tiang dateng ojok balénde, dait side ndéq sadangang aiq jari persiq naén Tiang; laguq dengan nine niki sampun persiq naén Tiang kadu aiq penentengne, dait usapne kadu bulune jangke gero. Side ndéq nyambut Tiang siq sidukan, laguq dengan nine niki ndéq engkah-engkahne nyiduk naén Tiang mulai léman Tiang dateng ojok deriki. Side ndéq minyakin ulun Tiang siq minyak, laguq dengan nine niki sampun minyakin naén Tiang siq minyak sengéh. Keranaq nike Tiang badaq side: Lantaran dosene saq luwéq sampun teampunin, make ie luwéq nyatayang kasihne. Laguq dengan saq teampunin sekediq, ie éndah gen sekediq nyatayang kasihne.” Beterus Deside Isa bemanik léq dengan nine nike, “Dose-dosende sampun teampunin.” Dengan-dengan lain saq tokol ngiring Deside Isa medaran mulai bebase sopoq kance saq lain, “Sai dengan niki jangke Ie bau ngampunin dose?” Laguq Deside Isa bemanik léq dengan nine nike, “Lantaran side percaye léq Tiang make side jari selah, silaq lumbar dalem damé!” Ndéq ngonéq sesampun nike, Deside Isa lumbar ojok kote-kote dait kampung-kampung jari beriteang Kabar Solah mengenai Kerajaan Allah. Due olas pengiring Deside Isa éndah milu ngiring Ie. Maraq nike éndah pire dengan nine saq sampun teselahang léman kuase roh jahat dait penyakit. Aran dengan-dengan nine nike, Mariam saq tesebut Magdalena (saq tebébasang léman pituq roh jahat); Yohana, seninene Kuza, pegawé istane Herodes; Susana, dait luwéq malik dengan nine lain. Siq biaye mésaq, ie pade nulung Deside Isa dait pengiring-pengiring-Ne. Dengan-dengan terus doang dateng tipaq Deside Isa léman kote-kote saq lain. Dait sesampun luwéq dengan pade bekumpul, Deside Isa nyeriteang ie pade perumpamean niki: “Araq sopoq dengan lumbar sawur binéq. Sewaktu ie sawur binéq nike, araq binéq saq geriq léq langan. Separo teicaq siq dengan dait saq lainne tekaken siq kedit. Araq éndah saq geriq léq taoq bebatu-batu. Léq waktu suli-suline sugul taletan nike layu séngaq tanaqne gero. Araq éndah binéq saq geriq léq tengaq bebenes beduwi. Bebenes beduwi nike tiwoq bareng binéq nike, dait gepitne jangke maté. Laguq araq éndah binéq saq geriq léq tanaq saq subur, terus tiwoq dait ngasilang buaq satus kali lipet.” Sesampun nyeriteang perumpamean nike, Deside Isa bemanik, “Sai-sai bedowé kentok jari dedengah, harus ie dengahang!” Pengiring-pengiring Deside Isa metakén léq Deside Isa mengenai arti perumpamean nike. Jawab Deside Isa, “Side pade sampun teicanin paice jari nenaoq rahasie Kerajaan Allah. Laguq dengan-dengan lain teajah kadu perumpamean, adéq timaq ie pade serioq, laguq ie pade ndéq perhatiang; dait ie pade dengah laguq ndéq ngerti.” “Niki arti perumpamean nike: Binéq nike Manik Allah. Binéq saq geriq léq langan, ibarat dengan-dengan saq dengah manik nike. Laguq Belis dateng dait ngerampas manik nike léman até ie pade, adéq ie pade ndaq percaye dait teselametang. Binéq saq geriq léq taoq saq bebatu-batu ibarat dengan saq sewaktu dengah manik nike, nerimaq siq seneng angenne. Laguq manik nike ndéq berakah léq até ie pade. Ie pade percaye seberaq doang, dait léq waktu dateng cobe, ie pade murtat. Binéq saq geriq léq tengaq bebenes beduwi ibarat dengan saq dengah manik nike, laguq kuatir mengenai idup ie pade; dait melét idup méwah dait seneng léq dalem dunie niki. Selapuqne nike saq gepit ie pade sehingge ndéq ngasilang buaq saq masak. Binéq saq geriq léq tanaq saq subur ibarat dengan saq dengah manik nike, terus simpenne léq dalem até saq solah dait jujur. Ie pade bau tahen jangke ngasilang buaq.” “Ndéq araq dengan saq nyaleang dilah terus kudungne kadu tepaq, atao toloqne léq bawaq lasah. Ie gen toloq dilah nike léq naén dilah, adéq dengan saq tame bau serioq menahne. Ndéq araq saq teseboq saq ndéq gen penggitan; dait ndéq araq saq terahasieang saq ndéq gen tebungkar dait tetaoq. Keranaq nike, perhatiang solah-solah berembé entane side pade dedengah. Séngaq dengan saq sampun bedowé, gen teican luwéqan malik; laguq dengan saq ndéq bedowé, sekediq saq masih araq léq ie gen tebait éndah.” Mamiq bini dait sanak-sanak Deside Isa rauh tipaq Deside Isa, laguq ie pade ndéq bau dateng tipaq Ie séngaq luwéq gati dengan. Beterus araq sopoq dengan saq matur léq Deside Isa, “Paq, mamiq bini dait sanak-sanak Pelungguh araq léq luah. Ie pade melét bedait kance Pelungguh.” Laguq Deside Isa bemanik léq ie pade, “Dengan-dengan saq dengah manik Allah dait ngelaksaneang ie, ie pade saq jari inaq dait semeton-semeton Tiang.” Léq sopoq jelo Deside Isa kance pengiring-pengiring-Ne taék ojok perau. “Silaq ite belayar ojok itoqan danao,” manik Deside Isa léq ie pade. Make ie pade berangkat. Sewaktu ie pade kenyeke belayar, Deside Isa ketindoqan. Selung-selung angin pusut nimpe danao nike. Aiq mulai tame ojok dalem perau, sehingge bahayeang ie pade selapuq. Pengiring-pengiring-Ne lumbar ojok Deside Isa dait tangiang Ie. Ie pade matur, “Paq Guru, Paq Guru, ite celake!” Deside Isa metangi terus semprak-Ne angin dait umbak saq kenyeke ngamuk nike. Angin dait umbak nike engkah terus danao jari tenang. Beterus Deside Isa bemanik léq pengiring-pengiring-Ne, “Kembéq side pade ndéq percaye léq Tiang?” Ie pade jari bengaq dait takut. Dait ie pade saling ketuan sopoq kance saq lain, “Sai setetune dengan niki, sehingge angin dait umbak taat léq préntah-Ne!” Deside Isa dait pengiring-pengiring-Ne terus belayar jangke ojok daérah dengan Gerasa léq itoqan Danao Galilea. Sewaktu Deside Isa turun ojok darat, Ie tedatengin sopoq dengan mame saq tekuasein siq sétan. Dengan nike léman kote. Sampun ngonéq ie ndéq bekelambi dait ndéq mélé ndot léq balé. Ie cume mélé ndot léq goe-goe taoq ngubur jenazah. Sewaktu serioq Deside Isa, ie nyurak terus sujut léq arepan Deside Isa dait bekuih, “Deside Isa, Bije saq asalne léman Allah Saq Maheagung! Gen Pelungguh kumbéqang tiang niki? Tiang tunas sampunang siksaq tiang!” Dengan nike matur maraq nike séngaq Deside Isa préntah sétan nike sugul léman ie. Sampun rimpes gati ie tekuasein siq roh jahat nike sehingge timaq ime dait naéne sampun tebécang kadu ranté dait ie tejagaq pacu-pacu, ie masih doang bau pegatang ranté nike terus tejauq siq roh jahat ojok taoq-taoq saq sepi. Deside Isa beketuan léq dengan nike, “Sai arande?” “Aran tiang ‘Legiun’,” jawab dengan nike -- séngaq araq luwéq sétan saq sampun tame ojok dalem diriqne. Sétan-sétan nike tunas léq Deside Isa adéq ie pade ndéq tesediq ojok dalem jurang maut. Dékét taoq nike araq luwéq gati bawi saq kenyeke boyaq kakenan léq tembéréng gunung. Sétan-sétan nike tunas léq Deside Isa adéq teijinang tame ojok dalem bawi-bawi nike. Petunasan ie pade tekabulang siq Deside Isa. Make sétan-sétan nike sugul léman dengan nike dait tame ojok dalem bawi-bawi nike. Beterus bawi-bawi nike pelai dait nimproh léman sedin jurang ojok dalem danao, beterus ketelep. Penjage-penjage bawi nike serioq napi saq sampun telaksane. Make ie pade pelai nuturang hal nike léq kote dait léq dése sekiterne. Beterus dengan-dengan sugul jari serioq napi saq telaksane. Ie pade dateng tipaq Deside Isa, dait léq derike ie pade ndait dengan saq sampun bébas léman sétan-sétan nike kenyeke tokol dékét cokor Deside Isa. Ie sampun bekelambi malik dait sampun waras pikiranne. Ie pade jari takut. Ie pade saq nyaksiang mésaq peristiwe nike nyeriteang tipaq dengan-dengan berembé dengan nike teselahang. Beterus selapuq penduduk daérah Gerasa nike tunas adéq Deside Isa bilin taoq nike, séngaq ie pade selapuq takut gati. Jari Deside Isa taék perau terus mantuk. Dengan saq sampun tebébasang léman sétan-sétan nike tunas léq Deside Isa adéq ie teijinang milu. Laguq Deside Isa suruq ie lumbar, manik-Ne, “Uléq dait ceriteang napi saq Allah sampun laksaneang léq side.” Make dengan nike lumbar nyeriteang ojok mbé-mbé léq selapuq kote, napi saq Deside Isa sampun laksaneang léq ie. Sewaktu Deside Isa tulak léman itoqan danao, Ie tesambut siq dengan luwéq, séngaq ie pade kenyeke ngantos Ie. Beterus dateng sopoq kepale balé ibadah aranne Yairus. Ie sujut léq arepan Deside Isa, dait sanget siqne tunas adéq Deside Isa rauh ojok gedéngne, séngaq sopoq-sopoqne bijene saq nine beumur due olas taun jaqne milinang. Sewaktu Deside Isa bemargi ojok gedéng Yairus, Ie tedesek-desek siq dengan luwéq. Araq sopoq dengan nine saq sampun due olas taun sakit pendarahan dait ndéq bau teselahang siq sai-sai. Dengan nine nike ngerapetin Deside Isa léman mudi, terus kintur poton jubah-Ne. Waktu nike éndah pendarahanne engkah. Deside Isa beketuan, “Sai saq kintur Tiang?” Selapuq dengan ndéq araq saq ngaku. Beterus Petrus matur, “Paq Guru, araq luwéq gati dengan léq sekelining Pelungguh; ie pade desek-desek Pelungguh!” Deside Isa bemanik, “Laguq araq dengan saq kintur Tiang. Tiang taoq nike, séngaq araq kuase saq sugul léman Tiang!” Dengan nine nike sadar bahwe perbuatanne sampun tewikanang, ie parek sambil ngijik terus sujut léq arepan Deside Isa. Ie nyeriteang léq julun selapuq dengan, kembéq ie kintur Deside Isa, dait berembe penyakitne langsung selah. Deside Isa bemanik léq ie, “Dénde, imande sampun miaq side selah, silaq lumbar dalem damé.” Léq waktu Deside Isa masih bebaos, sopoq pelayan dateng léman gedéng Yairus. Ie matur léq Yairus, “Bijende sampun ninggal. Sampunang pelungguh nyusahang Bapaq Guru malik.” Sewaktu Deside Isa pirengang hal nike, Ie bemanik léq Yairus, “Ndaq takut. Percaye doang, bijende gen selah.” Sesampun rauh léq gedéng Yairus, Deside Isa nénten ngijinang sopoq dengan tame kance Ie kecuali Petrus, Yahya, Yakub dait inaq amaq kanak nike doang. Selapuq dengan kenyeke nangis dait éroq aséq séngaq kanak nike milinang. Laguq Deside Isa bemanik, “Ndaq nangis. Kanak nike ndéq milinang, ie cume tindoq!” Ie pade ngeleléqang Deside Isa, séngaq ie pade nenaoq kanak nine nike sampun milinang. Beterus Deside Isa tegel ime kanak nike dait bemanik, “Dénde, silaq ures!” Nyawe kanak nike tulak ojok ie, dait waktu nike éndah ie ures. Sesampun nike, Deside Isa manikang ie pade ngebéng kanak nike bekelor. Dengan toaq kanak nike bengaq gati. Laguq Deside Isa balaq ie pade nyeriteang peristiwe nike tipaq sai-sai. Deside Isa ngemanikang kedue olas pengiring-Ne, terus ngicanin ie pade kuase jari sediq sétan-sétan dait nyelahang penyakit. Beterus Deside Isa ngutus ie pade lumbar nyelahang dengan sakit dait nyampéang kabar mengenai Kerajaan Allah. “Ndaq jauq napi-napi dalem kelampande,” manik Deside Isa léq ie pade. “Ndaq jauq tunjang, atao takaq sangu, ruti atao képéng, atao due kelambi. Léq mbé juaq side pade teterimaq, ndot léq derike jangke side pade bilin kote nike. Dait léq mbé side pade ndéq teterimaq, léq waktu side pade bilin kote nike, kerapang kerepuk léman lampak naénde jari peringetan tipaq ie pade.” Pengiring-pengiring Deside Isa berangkat, beterus lumbar ojok dése-dése jari nyampéang Kabar Solah nike dait nyelahang dengan sakit léq selapuq taoq. Sewaktu Herodes saq jari raje wilayah negeri Galilea, mirengang selapuq peristiwe nike, ie jari bingung. Séngaq araq saq bebase bahwe Yahya Pembaptis sampun idup malik. Araq éndah saq bebase bahwe Elia sampun muncul malik. Dengan lain éndah bebase bahwe sopoq nabi léman nabi-nabi jaman laéq idup malik. Herodes bebase, “Tiang sampun ngutus dengan penggal ulune Yahya. Laguq Dengan niki, sai setetune Ie? Luwéq tiang dengah mengenai Ie.” Beterus Herodes berusahe adéqne bau bedait kance Deside Isa. Rasul-rasul Deside Isa tulak dait nyeriteang tipaq Deside Isa selapuq saq sampun ie pade laksaneang. Terus Deside Isa ténaq ie pade lumbar ojok kote Betsaida sehingge cume ie pade kance Deside Isa léq derike. Laguq sewaktu dengan-dengan nenaoq hal nike, ie pade nerutuk Deside Isa. Ie pade tesambut siq Deside Isa, terus bebaos tipaq ie pade mengenai Kerajaan Allah. Dait Ie éndah nyelahang dengan sakit léq antare ie pade. Sewaktu serep jelo, kedue olas pengiring Deside Isa parek tipaq Deside Isa dait matur, “Taoq niki kesempil, solahan Pelungguh manikang dengan-dengan niki lumbar adéq ie pade bau boyaq keloran dait taoq madéq léq kampung-kampung dait dése-dése léq sekiter niki.” Laguq jawab Deside Isa, “Side pade saq harus ngebéng ie pade bekelor.” Pengiring-pengiring Deside Isa matur, “Tiang pade cume bedowé lime ruti dait due empaq. Segerah tiang pade harus lalo beliang selapuq dengan niki keloran?” (Araq kire-kire lime iyu dengan mame léq derike.) Deside Isa bemanik léq pengiring-pengiring-Ne, “Suruq dengan-dengan niki tokol bekelompoq, kire-kire séket dengan sekelompoq.” Pengiring-pengiring Deside Isa ngelaksaneang napi saq temanikang Deside Isa nike, terus ie pade suruq dengan luwéq nike tokol. Beterus Deside Isa bait lime ruti dait due empaq nike, terus nengadah andang langit dait ngucap syukur tipaq Allah. Sesampun nike Ie peleng-peleng ruti dait empaq nike kadu gading-Ne terus icanin-Ne léq pengiring-pengiring-Ne jari tebagi-bagiang tipaq dengan luwéq nike. Ie pade selapuq bekelor jangke besuh. Beterus pengiring-pengiring Deside Isa ngumpulang salone, ternyate araq due olas bakaq. Léq sopoq jelo, sewaktu Deside Isa kenyeke bedo'e mésaq-mésaq, pengiring-pengiring-Ne parek tipaq Ie. Deside Isa beketuan léq ie pade, “Menurut dengan luwéq, sai Tiang niki?” Jawab ie pade, “Araq saq bebase Yahya Pembaptis. Araq éndah saq bebase Elia, saq lain malik bebase salaq sopoq nabi jaman laéq saq sampun idup malik.” Deside Isa beketuan, “Laguq menurut side pade, sai Tiang niki?” Jawab Petrus, “Pelungguh Almasih saq tejanjiqang Allah.” Beterus Deside Isa bemanik léq pengiring-pengiring-Ne, “Ndaq gati badaqang hal nike léq sai-sai.” Deside Isa bemanik éndah, “Bije Manusie mule harus luwéq menderite dait tetentang siq pemimpin-pemimpin, imam-imam kepale, dait serte ahli-ahli Taurat. Ie gen tematéq, laguq léq jelo saq ketelu Ie gen teidupang malik.” Beterus Deside Isa bemanik léq selapuq dengan saq araq léq derike, “Sebilang dengan saq mélé turut Tiang, ie harus ngelupaqang kepentinganne mésaq, ngelémbah salibne sebilang jelo, dait tetep turut Tiang. Séngaq dengan saq mélé nyelametang nyawene, gen kélangan nyawene. Laguq dengan saq kélangan nyawene lantaran Tiang, dengan nike gen nyelametang nyawene. Napi untungne léq sopoq dengan, lamun seantéro dunie niki jari dowéne, laguq ie binaseang dait nyenyédaq idupne mésaq? Lamun dengan ilaq ngakuq Tiang dait manik Tiang, Bije Manusie éndah gen ilaq ngakuq dengan nike léq waktu Ie rauh éraq dalem kemuliean-Ne, dait dalem kemuliean Bapa dait malaékat-malaékat saq suci! Tiang badaq side: Setetune léq antare side pade léq deriki araq saq ndéq gen ninggal, sendéqman ie pade serioq Kerajaan Allah.” Kire-kire baluq jelo sesampun Deside Isa ngajahang hal nike, Ie gadingang Petrus, Yahya dait Yakub taék ojok atas gunung jari bedo'e. Sewaktu Deside Isa bedo'e léq derike, penjarupan-Ne berobah dait kuace-Ne jari putéq ngempor. Léq waktu nike Petrus dait kedue pengiring saq lain ketindoqan, laguq selung-selung ures dait serioq Deside Isa léq dalem kemuliean-Ne dait kedue dengan nike nganjeng dékét Deside Isa. Sewaktu Musa dait Elia gen bilin Deside Isa, Petrus matur tipaq Deside Isa, “Paq Guru, maiq gati ite léq deriki, mangkin tiang pade penganjeng telu kémah sopoq umaq Pelungguh, sopoqne umaq Musa dait sopoqne malik umaq Elia.” (Petrus matur maraq nike séngaq ndéq nenaoq napi saq ie ucapang.) Sewaktu Petrus masih ngeraos, awan turun keliningin ie pade sehingge ie pade takut. Beterus léman awan nike kedengahan suare, “Niki Bije Tiang saq Tiang piléq, pade dengahang Ie!” Sesampun suare nike telang, ie pade serioq Deside Isa mésaq-mésaq léq taoq nike. Pengiring-pengiring-Ne rahasieang hal nike dait ndéq betutur léq sai-sai mengenai peristiwe saq sampun ie pade serioq. Léq jemaqne Deside Isa dait ketelu pengiring-Ne turun léman gunung nike, dait dengan luwéq dateng ojok Deside Isa. Sopoq dengan mame léman tengaq-tengaq dengan luwéq nike bekuih, “Paq Guru, tulung cingakin anak tiang -- ie sopoq-sopoqne anak tiang! Lamun roh jahat nyerang ie, ie selung-selung nyurak dait awakne kojor-kojor jangke biwihne bekowok. Roh nike terus nyiksaq ie dait ndéq mélé sugul léman ie! Tiang sampun tunas pengiring-pengiring Pelungguh sediq roh nike, laguq ie pade ndéq tao.” Deside Isa bemanik, “Luar biase side pade niki! Side pade tetu-tetu dengan saq ndéq percaye dait sesat. Jangke piran Tiang harus tetep araq kance side pade, dait sabar tipaq side pade? Jauq anakde nike ojok deriki!” Léq waktu kanak nike lampaq ngerapetin Deside Isa, sétan nike timpak ie dait piaq awakne jari kojor-kojor. Laguq Deside Isa préntahang roh jahat nike sugul, terus kanak nike selah. Beterus kanak nike teserahang ojok amaqne. Selapuq dengan bengaq serioq kuase Allah saq luar biase beléqne. Léq waktu dengan-dengan masih bengaq serioq saq telaksaneang siq Deside Isa, Deside Isa bemanik tipaq pengiring-pengiring-Ne, “Perhatiang solah-solah dait ndaq lupaq ucapan-ucapan Tiang niki: Bije Manusie gen teserahang tipaq kuase manusie.” Laguq pengiring-pengiring Deside Isa ndéq ngerti napi maksut manik Deside Isa nike. Hal nike terahasieang tipaq ie pade adéq ie pade ndéq ngerti. Laguq ie pade takut metakén léq Deside Isa mengenai napi maksud manik-Ne nike. Pengiring-pengiring Deside Isa betungkasan mengenai sai saq paling beléq léq antare ie pade. Deside Isa wikan pikiran ie pade, keranaq nike Ie bait sopoq kanak kodéq, dait penganjeng-Ne kanak nike léq dékét-Ne. Terus Deside Isa bemanik léq pengiring-pengiring-Ne, “Dengan saq nerimaq kanak niki lantaran Tiang, artine nerimaq Tiang. Dait dengan saq nerimaq Tiang, nerimaq Ie saq ngutus Tiang. Séngaq dengan saq paling kodéq léq antare side pade, ie saq paling beléq!” Yahya matur, “Paq Guru, tiang pade serioq dengan sediq roh jahat siq peséngan Pelungguh, dait tiang pade balaq ie, séngaq ie ndéq léman kelompoq ite.” Laguq manik Deside Isa, “Ndaq balaq ie, séngaq dengan saq ndéq ngelawan side pade, artine bepihak léq side pade.” Sewaktu sampun rapet wayene Deside Isa teangkat ojok sorge, Deside Isa mutusang gen lumbar ojok Yerusalem. Beterus Deside Isa ngemanikang dengan lumbar senjuluq Ie. Dengan-dengan saq Ie manikang nike lumbar, terus tame ojok sopoq kampung léq Samaria jari nyiepang selapuq saq teperluang siq Deside Isa. Laguq dengan-dengan léq kampung nike ndéq mélé nerimaq Deside Isa, séngaq Deside Isa kenyeke bemargi ojok Yerusalem. Léq waktu kedue pengiring Deside Isa, Yakub dait Yahya nenaoq hal nike, ie pade matur, “Junjungan Saq Mulie, napi Pelungguh kayun, tiang pade tunas api turun léman langit jari binaseang dengan-dengan niki?” Deside Isa nyereminang andang ie pade, dait menggah léq ie pade. Sesampun nike ie pade lumbar ojok kampung saq lain. Léq waktu Deside Isa dait pengiring-pengiring-Ne nerusang pemargian, araq dengan saq matur léq Deside Isa, “Paq, tiang mélé ngiring Pelungguh ojok mbé juaq Pelungguh lumbar!” Jawab Deside Isa, “Serigale bedowé loang, dait kedit bedowé kesebu, laguq Bije Manusie ndéq bedowé taoq begélaq.” Terus Deside Isa bemanik léq dengan saq lain, “Silaq turut Tiang.” Laguq dengan nike matur, “Paq ijinang tiang uléq juluq nguburang amaq tiang.” Jawab Deside Isa, “Alurang dengan ninggal nguburang dengan ninggal. Laguq side, silaq lumbar dait beriteang Kerajaan Allah léq selapuq taoq.” Araq éndah dengan lain saq matur, “Paq, tiang mélé ngiring Pelungguh, laguq ijinang tiang uléq juluq bepamit léq keluarge tiang.” Deside Isa bemanik léq dengan nike, “Dengan saq siep nenggale, laguq ngéngat andang mudi, ndéqne patut bagi Kerajaan Allah.” Sesampun nike, Junjungan Saq Mulie Deside Isa piléq pituq pulu pengiring saq lain, terus ie pade teutus due-due siq Deside Isa jari senjuluq Ie ojok sebilang kote dait taoq saq gen Ie rauhin. Manik-Ne tipaq ie pade, “Saq tepataq mule luwéq, laguq tukang pataqne cume sekediq. Keranaq nike tunas léq Épéne adéq Ie ngirim tukang pataq jari mataq. Silaq pade lumbar! Tiang ngutus side pade maraq anak dombe ojok tengaq-tengaq serigale. Ndaq jauq dompét atao takaq sangu, atao sepatu. Ndaq mentelah jari ngucapang salam tipaq sai juaq léq tengaq kelampande. Lamun side pade tame ojok sopoq balé, ucapang juluq, ‘Moge-moge damé balé niki.’ Lamun léq derike araq saq patut nerimaq damé, make salamde nike gen tetep léq ie. Laguq lamun ndéq, salamde nike gen tulak tipaq side. Ndot léq sopoq balé doang. Terimaq napi saq tesajiang tipaq side, séngaq dengan saq begawéan berhak nerimaq upaqne. Ndaq ngalih-ngalih léman sopoq balé ojok balé saq lain. Lamun side pade dateng ojok sopoq kote dait léq derike side pade tesambut secare bagus, kelorang napi saq tesajiang tipaq side. Selahang dengan-dengan sakit léq kote nike, dait badaq dengan-dengan léq derike, ‘Kerajaan Allah sampun rapet léq side.’ Laguq lamun side pade dateng léq sopoq kote dait léq derike side pade ndéq teterimaq, sugul ojok rurung-rurung léq kote nike dait ucapang maraq niki, ‘Kerepuk kotende saq nekét léq naén tiang pade, tiang pade kerapang sebagé peringetan tipaq side. Laguq adéq side pade nenaoq Kerajaan Allah sampun rapet!’ Tiang badaq side: Léq jelo Kiamat, dengan-dengan kote Sodom dait Gomora gen molahan teampunin siq Allah ketimbang dengan-dengan léq kote nike!” “Celake side, kote Korazim! Dait celake side, kote Betsaida! Seandéne muqjizat-muqjizat saq tepiaq léq taoqde nike sampun tepiaq léq kote Tirus dait Sidon, pasti dengan-dengan léq derike sampun ngonéq betobat léman dose-dose ie pade, dait ngengadu kelambi dukecite serte noloq awu-awu léq atas ulu ie pade. Léq jelo Penghakiman, dengan-dengan Tirus dait Sidon gen molahan teampunin siq Allah ketimbang side pade! Dait side, Kapernaum! Napi side paran, side gen teatasang jangke dateng langit? Ndéq! Malahan side gen tetetéh ojok dunie dengan maté!” Beterus Deside Isa bemanik léq pengiring-pengiring-Ne, “Dengan saq dengahang side pade, artine ie dengahang Tiang. Dengan saq nolaq side pade, ie nolaq Tiang. Dait dengan saq nolaq Tiang, artine ie éndah nolaq Allah saq ngutus Tiang.” Waktu kepituq pulu pengiring nike tulak, angen ie pade cemoh gati. Terus ie pade matur, “Junjungan Saq Mulie, sétan-sétan éndah taat léq tiang pade lamun tiang pade préntah ie pade siq peséngan Pelungguh!” Jawab Deside Isa, “Tiang serioq Belis geriq léman langit maraq kisap. Setetune, side pade sampun Tiang béng kuase adéq side pade bau ngicaq ulah dait teledu serte kuase jari nahen selapuq kekuatan musuh, sehingge ndéq araq saq gen bahayeang side pade. Timaq maraq nike ndaq gembire lantaran sétan-sétan taat léq side. Laguq solahan side pade gembire séngaq arande tecatet léq sorge.” Léq waktu nike éndah, Deside Isa gembire séngaq tekuasein Roh Suci. Terus Ie bemanik, “Bapa, Tuhan saq nguasein langit dait gumi! Tiang ngucap syukur léq Deside séngaq selapuqne nike Deside rahasieang léq dengan-dengan saq pinter dait bijaksane, laguq Deside nyatayang tipaq dengan saq biase-biase. Nike saq nyenengang Bapa. Selapuq hal sampun teserahang siq Bapa tipaq Tiang. Ndéq araq sopoq dengan juaq saq kenal kance Bije, selain Bapa. Ndéq araq éndah saq kenal Bapa selain Bije; dait tipaq dengan-dengan saq Bije nike kayun nyatayang Bapa.” Beterus Deside Isa ngéngat andang pengiring-pengiring-Ne, dait bemanik tipaq ie pade secare husus, “Bahagie side pade séngaq sampun serioq saq side pade serioq mangkin niki. Tiang badaq side: Luwéq nabi dait raje melét serioq saq side pade serioq mangkin laguq ie pade ndéq serioq ie. Ie pade melét dengah saq side pade dengah mangkin niki, laguq ie pade ndéq dengah ie.” Léq sopoq waktu araq ahli Taurat nganjeng jari boyaq kesalaqan Deside Isa. Ie metakén, “Bapaq Guru, napi saq harus tiang laksaneang adéq bau nerimaq idup sejati dait kekel?” Jawab Deside Isa, “Napi saq tetulis léq Kitab Suci? Berembé pendapet side mengenai hal nike?” Jawab dengan nike, “ ‘Kasihin Allah, Tuhan side siq segenep aténde, dait siq segenep jiwende, dait siq selapuq kekuatande, dait siq segenep akal budinde,’ dait ‘Kasihin sepadende manusie maraq side ngasihin diriqde mésaq.’ ” “Jawabande nike kenaq,” manik Deside Isa. “Laksaneang nike, make side gen idup.” Laguq ahli Taurat nike mélé pekenaq diriqne mésaq. Make ie metakén léq Deside Isa, “Sai saq teparan pade-pade manusie maraq tiag?” Jawab Deside Isa, “Araq sopoq dengan mame turun léman Yerusalem ojok Yeriko. Léq tengaq kelampan ie teserang perampok, terampas selapuq dowé bandene, tempuk jangke lelah, terus tebilin nyelangkar léq rurung dalem keadaan bakat saq parah. Léq waktu nike araq éndah sopoq imam liwat léq rurung nike. Sewaktu ie serioq dengan nike, ie mirik lampaq langan itoqan rurung. Maraq nike éndah sopoq dengan Lewi saq lampaq léq derike; sewaktu ie serioq dengan nike, ie mirik lampaq langan itoqan rurung. Laguq sesampun nike sopoq dengan Samaria saq kenyeke bekelampan, liwat éndah léq derike. Sewaktu ie serioq dengan saq terampok nike, ie periak léq dengan nike. Ie rapetin dengan nike terus persiq bakat-bakatne siq anggur dait ngowatin kadu minyak, beterus bebetne bakat-bakat nike. Sesampun nike, taékangne dengan nike ojok bagalne mésaq, dait jauqne ojok taoq penginepan dait ngerawat ie. Léq jemaqne, ie ngebéng due képéng perak tipaq épén penginepan nike dait bebase, ‘Rawat ie, dait lamun araq biaye-biaye lain, gen tiang bayah laun lamun tiang tulak ojok deriki.’ ” Beterus Deside Isa nutuqang cerite nike dait beketuan niki, “Léman ketelu dengan nike, saq mbé side paran sepade manusie kance dengan saq terampok nike?” Ahli Taurat saq teketuan nike bejawab, “Dengan saq sampun nulung dengan nike.” Deside Isa bemanik, “Silaq lumbar dait laksaneang maraq nike éndah!” Beterus Deside Isa dait pengiring-pengiring-Ne ngelanjutang pemargian, beterus rauh léq sopoq dése. Léq derike araq dengan nine aranne Marta, pesilaq Deside Isa ojok baléne. Marta bedowé semeton nine aranne Mariam. Mariam niki tokol léq dékét Deside Isa dengahang pengajahan-pengajahan-Ne. Laguq Marta répot gati siq pegawéanne léq balé. Ie lumbar tipaq Deside Isa dait matur, “Junjungan Saq Mulie, kembéq Pelungguh nénten peduli tiang tealurang begawéan mésaq-mésaq siq Mariam? Manikang ie nulung tiang!” “Marta, Marta!” jawab Deside Isa. “Side kuatir dait répot mikirang luwéq hal; padahal saq penting cume sopoq. Mariam sampun piléq saq paling solah, saq ndéq gen tebait léman diriqne.” Léq sopoq jelo Deside Isa bedo'e léq sopoq taoq. Sesampun Ie inggas bedo'e, salaq sopoq léman pengiring-pengiring-Ne matur, “Junjungan Saq Mulie, tunas Pelungguh ajahang tiang pade bedo'e maraq Yahya ngajahang pengiring-pengiringne bedo'e.” Make Deside Isa bemanik léq ie pade, “Lamun side bedo'e, ucapang maraq niki, ‘Bapa, tesuciang peséngan Deside. Rauhang Kerajaan Deside. Icanin tiang pade sebilang jelo keloran saq tiang pade perluang, dait ampunin dose tiang pade, séngaq tiang pade éndah ngampunin dengan saq salaq tipaq tiang pade; dait sampunang gadingang tiang pade ojok dalem cobe.’ ” Beterus Deside Isa bemanik léq pengiring-pengiring-Ne, “Lamun araq sopoq dengan léq antare side pade lumbar ojok balén baturne léq tengaq kelem, dait bebase, ‘Semeton, béng tiang singgaq telu ruti, séngaq batur tiang saq kenyeke bekelampan, nyelaloq léq balén tiang dait tiang ndéq bedowé napi-napi jari béng ie ngelor.’ Seandéne batur saq side datengin nike bejawab maraq niki, léman dalem baléne, ‘Ndaq nyusahang tiang! Lawang sampun telenting tiang kance anak-anak tiang sampun tindoq. Tiang ndéq bau kawe ngebéng side ruti.’ Tiang badaq side, timaq side niki baturne, ie ndéq gen mélé ures dait ngebéng side napi-napi. Laguq lantaran ndéq araq ilaqde terus doang side ngéndéng léq ie, make ie gen ures éndah dait ngebéng side napi saq side perluang. Keranaq nike Tiang badaq side: Pade tunas, make side pade gen nerimaq. Pade boyaq, make side pade gen mauq. Pade ketok lawang, make side pade gen tebukaqang lawang. Séngaq dengan saq nunas gen nerimaq; dengan saq boyaq gen mauq; dait dengan saq ketok lawang, gen tebukaqang lawang. Léq antare side pade napi araq bapaq saq ngebéng ulah léq bijene, lamun ie ngéndéng empaq? Atao ngebéng teledu, lamun ie ngéndéng teloq? Jari, lamun side pade saq jahat, tao ngebéng saq bagus léq bije-bijende. Lebih-lebih Bapa side pade léq sorge! Ie lebihan malik gen ngicanin Roh Suci tipaq sebilang dengan saq nunas léq Ie!” Léq sopoq jelo, Deside Isa sediq sétan léman sopoq dengan pakoq. Sesampun sétan nike sugul, dengan nike mulai ngeraos. Luwéq dengan bengaq, laguq araq saq bebase, “Ie sediq sétan siq kuase Beelzebul, datune sétan nike.” Araq éndah dengan-dengan lain saq mélé boyaq kesalaqan Deside Isa, jari ie pade tunas Deside Isa piaq sopoq tande léman sorge. Laguq Deside Isa wikan maksut ie pade. Make Deside Isa bemanik léq ie pade, “Lamun sopoq negare léq dalemne araq golongan-golongan saq saling bemusuhan, pasti negare nike ndéq bau tahen ngonéq. Dait sebilang keluarge saq saling bemusuhan sopoq kance saq lain, pasti gen ancur. Maraq nike éndah léq dalem kerajaan Belis; lamun sopoq kelompoq besiaq kance kelompoq saq lain, kerajaan nike gen runtuh. Side pade bebase bahwe Tiang sediq sétan siq kuase Beelzebul. Lamun maraq nike, siq kuase sai pengiring-pengiringde sediq sétan nike? Pengiring-pengiring side mésaq saq buktiang bahwe side pade salaq! Laguq Tiang sediq sétan siq kuase Allah, dait setetune Kerajaan Allah sampun rauh tipaq side pade. Lamun sopoq dengan saq kuat, jagaq baléne mésaq kadu gegaman saq lengkap, selapuq dowéne gen selamet. Laguq lamun sopoq dengan saq kuatan nyerang dait ngalahang ie, make dengan saq kuatan nike gen ngerampas selapuq gegaman saq teandelang siq épén balé nike, terus bagi-bagiang selapuq barang-barangne. Dengan saq ndéq bepihak léq Tiang, setetune ie ngelawan Tiang. Dait dengan saq ndéq nulung Tiang setetune ie sédaq karye Tiang!” “Lamun roh jahat sugul léman sopoq dengan, roh nike begelining ojok taoq-taoq saq gero jari boyaq taoqne mentelah, laguq ie ndéq mauq. Keranaq nike ie gen muni, ‘Tiang gen tulak ojok balé saq sampun tiang bilin!’ Waktu ie tulak ojok derike, daitne balé nike sampun bersi dait teratur. Beterus ie lalo dait jauq pituq roh lain saq jahatan léman ie. Terus ie pade tame ojok dalem dengan nike dait ndot léq derike. Dait ahirne keadaan dengan nike jari lengéan léman saq mule.” Sesampun Deside Isa bemanik maraq nike, sopoq dengan nine saq araq léq antare dengan luwéq nike matur léq Deside Isa, “Bahagie gati dengan nine saq bijeang dait penyusuq Pelungguh!” Laguq jawab Deside Isa, “Bahagiean malik dengan saq dengahang dait ngelaksaneang Manik Allah!” Léq waktu dengan-dengan keriwung Deside Isa, Deside Isa bemanik malik, “Jahat gati dengan-dengan jaman niki. Ie pade tunas sopoq tande, laguq tipaq ie pade ndéq gen teican sopoq juaq tande, kecuali tande Nabi Yunus. Séngaq pade maraq Nabi Yunus jari tande dengan-dengan kote Niniwe, maraq nike éndah Bije Manusie gen jari tande léq dengan-dengan jaman niki. Léq jelo Penghakiman, ratu léman negeri Lauq gen teidupang bareng kance dengan-dengan jaman niki, dait nuduh ie pade. Séngaq, jari dengahang pengajahan Nabi Sulaiman saq bijaksane, ratu nike dateng léman poton gumi. Laguq léq deriki mangkin araq saq beléqan léman Nabi Sulaiman! Léq jelo Penghakiman, penduduk Niniwe gen teidupang bareng kance dengan-dengan jaman niki, dait penduduk Niniwe nike gen ngukum ie pade, séngaq dengan-dengan Niniwe nike betobat sesampun ie pade dengah Nabi Yunus hotbah. Laguq léq deriki mangkin araq saq beléqan léman Nabi Yunus!” “Ndéq araq dengan saq nyalaqang dilah terus ie seboq atao kudungne kadu tepaq. Ie gen noloq dilah nike léq naén dilah, adéq dengan saq tame bau serioq menahne. Penentengde nike dilah léq awak. Lamun penentengde solah, selapuq awakde jari terang. Laguq lamun penentengde jahat, selapuq awakde jari peteng dedet. Keranaq nike, onyaq-onyaq, ndaq jangke terang saq araq léq side nike jari peteng. Lamun selapuq awakde menah, dait ndéq araq bagian saq peteng, make selapuq awakde nike gen menah maraq tesinarin cahaye dilah.” Sesampun Deside Isa tutuq bebaos, sopoq dengan Parisi pesilaq Ie medaran léq baléne. Make Deside Isa lumbar medaran léq derike. Dengan Parisi nike bengaq serioq Deside Isa medaran séngaq nénten bisoq gading-Ne juluq menurut aturan agame. Keranaq nike Deside Isa, Junjungan Saq Mulie bemanik léq ie, “Mule side pade dengan-dengan Parisi biasene persiq jembung dait piring bagian luahne, laguq léq dalem diriqde mésaq penoq secare pakse dait serakah. Side pade bodo! Tekan Allah saq jariang bagian luah nike, Ie éndah sampun jariang bagian dalemne? Saq araq léq dalem piring jembungde nike, nike saq harus side pade béng ojok dengan-dengan miskin. Siq care nike, selapuqne gen jari bersi umaq side. Celake side pade, dengan-dengan Parisi! Hasil taletande maraq misal selasih dait inggu dait selapuq jenis sayuran, side pade aturin sepersepulune ojok Allah, laguq keadilan dait kasih tipaq Allah ndéq side pade perhatiang. Padahal nike saq seharusne side pade laksaneang dait ndaq lupaqang saq lain-lainne éndah. Celake side pade, dengan-dengan Parisi! Side pade seneng melinggih léq kursi saq paling julu léq balé-balé ibadah, dait seneng tehormatin léq peken-peken. Celake side pade! Side pade maraq kuburan saq ndéq ngadu tande, sehingge dengan lampaq léq atasne ndéq sadar bahwe ie pade lampaq léq atas kuburan.” Salaq sopoq ahli Taurat matur léq Deside Isa, “Paq Guru, siq ucapan-ucapan nike, Pelungguh menghine tiang pade éndah!” Jawab Deside Isa, “Celake side pade éndah, ahli-ahli Taurat! Side pade nuntut hal-hal saq sengke dait ngebéng aturan-aturan saq berat, laguq side pade sekediq juaq ndéq mélé nulung dengan ngelaksaneang hal nike. Celake side pade! Side pade piaq makam nabi-nabi, saq malahan tematéq siq leluhur side mésaq. Jari side pade mésaq ngakuq, bahwe side pade setuju napi saq sampun telaksaneang siq leluhurde; séngaq mule ie pade saq nyematéq nabi-nabi nike dait side pade saq piaq makamne. Keranaq nike Allah bemanik secare bijaksane, ‘Tiang gen ngutus tipaq ie pade nabi-nabi dait utusan-utusan Tiang; separo gen tematéq, dait separo gen teaniaye!’ Allah ngelaksaneang hal nike adéq dengan-dengan jaman niki tehukum lantaran ie pade nyematéq selapuq nabi-nabi léman mulai dunie niki tecipteang, mulai léman Habil tematéq jangke Zakaria tematéq, saq telaksane léq antare méje taoq kurban dait Gedéng Allah. Tiang badaq side: Dengan-dengan jaman niki pasti gen tehukum lantaran selapuqne nike. Celake side pade, ahli-ahli Taurat! Kunci jari lekaq lawang penenaoq tesimpen léq side pade, laguq side pade ndéq mélé tame ojok dalem jari boyaq penenaoq nike. Sebalikne side pade halang-halangin dengan-dengan saq berusahe tame ojok dalemne!” Sewaktu Deside Isa bilin taoq nike, ahli-ahli Taurat dait dengan-dengan Parisi sayan peringet Deside Isa secare keras. Ie pade mulai boyaq-boyaq hal léq Deside Isa adéq Ie kayun bebaos mengenai luwéq hal. Dait léq waktu nike ie pade perhatiang Deside Isa pacu-pacu jari boyaq-boyaq kesalaqan saq teucapang siq Deside Isa, adéq Ie tebau. Léq waktu beiyu-iyu dengan sampun bekeriwung dait bedesek-desekan, Deside Isa bemanik léq pengiring-pengiring-Ne, “Onyaq-onyaq léq ragi ruti dengan Parisi, maksut Tiang kemunapikan ie pade. Ndéq araq saq teseboq saq ndéq gen penggitan, dait ndéq araq saq terahasieang saq ndéq gen tebungkar. Saq side pade ucapang léq taoq saq peteng, gen kedengahan léq taoq saq menah; dait saq side pade péséq léq kentok dengan léq dalem kamar saq teimpet, gen teumumang beléq-beléq.” “Tiang badaq side, batur-batur Tiang! Ndaq takut léq ie pade saq bau nyematéq awak laguq sesampun nike ndéqne bau piaq napi-napi malik. Mangkin araqan Tiang badaq side léq sai side pade harus takut. Pade takut tipaq Allah! Séngaq sesampun nyematéq, Ie éndah bedowe kuase netéh ojok dalem api nerake! Tiang badaq side pacu-pacu, tipaq Allah doang side pade harus takut. Lime kedit perit tejual ajine due képéng saq paling kodéq. Timaq maraq nike ndéq araq sopoq juaq saq telupaqang siq Allah. Bulu léq ulunde éndah sampun terékéng selapuqne, keranaq nike ndaq takut; side pade jaoq beléqan ajine tebanding kedit-kedit perit nike.” “Tiang badaq side: Dengan saq ngakuq léq julun dengan luwéq bahwe ie pengiring Tiang, ie gen teakuq éndah siq Bije Manusie léq arepan malaékat-malaékat Allah. Laguq dengan saq nilas léq julun dengan luwéq bahwe ie pengiring Tiang, ie gen tetilas éndah siq Bije Manusie léq arepan malaékat-malaékat Allah. Lamun dengan ngucapang sopoq hal saq nentang Bije Manusie, ie bau teampunin; laguq lamun ie menghine Roh Suci, ie ndéq gen teampunin. Lamun side pade tejauq ojok balé-balé ibadah jari teadilin léq arepan pemréntah atao penguase, ndaq kuatir mengenai berembé side pade harus béle diriq atao mengenai napi saq harus side pade sampéang. Séngaq léq waktu nike éndah Roh Suci gen badaq side pade napi saq harus side pade sampéang.” Sopoq dengan léman tengaq-tengaq dengan luwéq nike matur léq Deside Isa, “Bapaq Guru, silaq Pelungguh manikang semeton tiang adéqne béng tiang separo harte warisan amaq tiang.” Jawab Deside Isa, “Semeton, sai saq ngangkat Tiang jari hakim atao tukang bagi warisan antare deduaq side pade?” Beterus léq selapuq dengan saq araq léq derike Deside Isa bemanik, “Onyaq-onyaq dait waspade, ndaq jangke side pade serakah. Séngaq idup manusie ndéq beharep léman kesugihanne, timaq dowéne belimpah-limpah.” Beterus Deside Isa nyeriteang perumpamean niki, “Araq sopoq dengan sugih. Ie bedowé tanaq saq belimpah-limpah hasilne. Dengan sugih nike mulai mikir dalem aténe, ‘Sampun ndéq araq malik taoq tiang jari nyimpen hasil tanaq tiang. Napi akal tiang mangkin?’ Beterus ie mikir malik, dait ie ngeraos mésaq, ‘Nah, tiang araq akal; gen tiang bungkar gudang-gudang tiang terus tiang penganjeng saq beléqan. Léq derike taoq tiang toloq selapuq gandum tiang dait barang-barang tiang saq lain. Beterus tiang gen muni léq diriq tiang mésaq: Side aget! Side sampun bedowé selapuq saq solah, dait ndéq gen bis jangke betaun-taun. Mangkin mentelah! Ngelor dait nginem, dait puasang idupde!’ Laguq Allah bemanik léq ie, ‘Hai dengan bodo! Kelem niki éndah side gen maté, terus sai saq gen mauq selapuq kesugihan saq sampun side kumpulang umaq diriqde nike?’ Maraq nike kejarianne sebilang dengan saq berusahe pesugih diriqne mésaq, laguq ndéq berusahe jari sugih menurut pekayunan Allah.” Beterus Deside Isa bemanik léq pengiring-pengiring-Ne, “Keranaq nike Tiang badaq side pade, ‘Ndaq side pade kuatir mengenai idupde, napi saq gen side pade kelor, atao napi saq gen side pade kadu.’ Séngaq idup nike pentingan léman keloran dait awak pentingan léman kelambi. Perhatiang kedit-kedit gagak! Ie pade ndéq uwah sawur binéq, ndéq éndah bedowé gudang atao lumbung. Laguq Allah peliharaq ie pade! Side pade jaoq beléqan ajine ketimbang kedit-kedit! Sai léq antare side pade siq kuatirne bau ngeromboq umurne timaqne sekediq? Jari, lamun side pade ndéq sanggup miaq sopoq hal timaq saq paling kodéq, kembéq side pade harus kuatir mengenai hal-hal lain? Perhatiang berembé kembang-kembang bakung tiwoq; kembang-kembang nike ndéq begawéan, ndéq éndah nyésék, laguq Tiang badaq side: Nabi Sulaiman timaq ie sugih gati, ndéq ngengadu kelambi saq solahne maraq kembang-kembang nike! Pupaq léq lendang tiwoq jelo niki dait lémaq bis tesedut. Laguq Allah payas pupaq nike solah gati. Lebih-lebih side pade, dengan-dengan saq kurang percaye! Jari, ndaq kuatir dait bingung mengenai napi saq side pade kelor dait inem. Selapuq nike teboyaq siq bangse-bangse léq dunie saq ndéq kenal kance Allah. Padahal napi saq side pade perluang léq dalem idupde, selapuqne nike sampun tewikanang siq Bapa side pade. Laguq boyaq Kerajaan Allah, make selapuq saq lain éndah gen teromboqang tipaq side pade siq Allah.” “Ndaq takut, side saq cume sekediq jumlahne! Séngaq Bapa side seneng ngicanin side Kerajaan-Ne nike. Jual dowénde dait sedekahang képéngne tipaq dengan miskin. Piaqang diriqde dompét saq ndéq iniq séde, nike harte saq tesimpen léq sorge. Harte nike ndéq iniq telang séngaq maling ndéq bau bait dait tembréné ndéq bau nyenyédaq. Séngaq léq mbé hartende araq, léq derike éndah angende!” “Bejage-jage léq selapuq hal. Side harus tetep siep kadu kelambi dait dilahde tetep tenyalaqang, pade maraq pelayan-pelayan saq kenyeke ngantih majikanne tulak léman gawé ngawinang. Lamun majikan nike tulak, dait ketok lawang, ie pade nyerepek bukaq lawang. Bahagie gati pelayan-pelayan saq tedait kenyeke ngantih léq waktu majikanne dateng. Tiang badaq side: Setetune majikan nike gen besiep-siep dait suruq pelayan-pelayan nike tokol, terus ie ngelayanin ie pade. Bahagie gati pelayan-pelayan nike lamun majikan nike ndait ie pade kenyeke siep ngantih, timaq ie dateng tengaq kelem atao subuh! Pade inget! Seandéne épén balé sampun nenaoq jam pire maling gen dateng, ie gen bejage adéq maling ndéq tame ojok dalem baléne. Keranaq nike, side pade éndah harus besiep-siep, séngaq Bije Manusie gen rauh léq waktu saq ndéq side pade badéq.” Petrus metakén, “Junjungan Saq Mulie, napi perumpamean nike Pelungguh tujuang tipaq tiang pade atao tipaq selapuq dengan?” Jawab Junjungan Saq Mulie, “Sai pelayan saq setie dait bijaksane sehingge teangkat siq majikanne jari kepale tipaq pelayan-pelayan lain, adéq ie béng ie pade bekelor lamun sampun wayene? Bahagie gati pelayan saq tedait kenyeke ngelaksaneang tugasne waktu majikanne tulak! Tiang badaq side: Setetune pelayan nike gen tesaduq siq majikanne jari jagaq selapuq dowéne. Laguq lamun pelayan nike jahat, ie gen bebase léq dalem angenne, ‘Majikan tiang masih ngonéq tulak,’ terus ie ngempuk selapuq pelayan dait bekelor dait nginem jangke bowos, beterus majikanne gen tulak léq jelo dait jam saq ndéq ie badéq. Make pelayan nike gen tesiksaq siq majikanne, dait tejariang senasip kance dengan-dengan saq ndéq setie. Pelayan saq nenaoq pekayunan majikanne, laguq ndéq besiep-siep dait ndéq ngelaksaneang pekayunan majikanne nike, gen tepecut keras-keras. Laguq pelayan saq ndéq nenaoq pekayunan majikanne, beterus ngelaksaneang hal saq salaq, sehingge harus tepecut sekediq doang. Séngaq dengan saq sampun teicanin luwéq, léman ie gen tetuntut luwéq éndah. Dait dengan saq sampun tepercayeang luwéq, léman ie gen tetuntut luwéq éndah.” “Tiang dateng jari nimbulang julat léq gumi niki. Solahan malik lamun apine sampun nyale! Tiang harus ngalamin sopoq baptisan, dait angen Tiang osah gati sendéqman hal nike telaksane. Napi side pade paran Tiang dateng jari jauq perdaméan ojok dunie? Ndéq, ndéqne perdaméan, laguq perlawanan. Mulai léman mangkin, keluarge saq luwéqne lime dengan gen bemusuhan, telu lawan due atao due lawan telu. Amaq gen ngelawan anakne saq mame, dait kanak mame gen ngelawan amaqne. Inaq gen ngelawan anakne saq nine, dait kanak nine gen ngelawan inaqne. Mentoaq nine gen ngelawan menantune saq nine dait menantu nine gen ngelawan mentoaqne saq nine.” Deside Isa bemanik éndah léq dengan luwéq, “Lamun side pade serioq awan taék léq bagian bat, langsung side pade bebase, ‘Gen ujan.’ Dait tetu-tetu ujan. Lamun side pade beridap angin dateng léman lauq, side pade bebase, ‘Gen panas.’ Dait tetu-tetu panas. Side pade dengan-dengan munapik! Side pade tao badéq cuace léman serioq keadaan langit dait gumi. Kembéq tande-tande jaman niki ndéq tao side pade tapsir?” “Kembéq side pade ndéq mutusang mésaq napi saq kenaq? Lamun araq dengan ngelaporang side pade ojok pengadilan, berusahe semampu side jari nyeleséang pelekare nike kance ie sewaktu side pade masih léq tengaq langan. Lamun ndéq, laun ie jauq side pade ojok hakim dait hakim nike gen nyerahang side pade ojok petugasne, dait dengan nike gen tamaqang side pade ojok dalem bui. Tiang badaq side: Side pade ndéq gen sugul léman bui sendéqman side bayah utangde jangke lunas!” Léq waktu nike éndah araq dengan saq nyampéang tipaq Deside Isa mengenai dengan-dengan Galilea saq tematéq siq Pilatus, sewaktu ie pade kenyeke ngaturang kurban tipaq Allah. Deside Isa jawab ie pade, “Napi lantaran maraq nike entan dengan-dengan Galilea nike tematéq maraq nike, side pade paran nike buktine ie pade beléqan dosene tebanding selapuq dengan Galilea saq lain? Tiang badaq side: Pasti Ndéq! Laguq lamun side ndéq betobat léman dose-dosende, side pade selapuq gen binase éndah, maraq ie pade. Berembé dengan saq baluq olas saq ninggal éndah sewaktu ie pade tetimpe siq menare léq Siloam? Side pade paran nike buktine ie pade beléqan dosene tebanding selapuq dengan-dengan lain saq ndot léq Yerusalem? Tiang badaq side: Pasti ndéq! Laguq lamun side pade ndéq betobat léman dose-dosende, side pade selapuq gen binase éndah maraq ie pade.” Sesampun nike Deside Isa nyeriteang perumpamean niki, “Araq dengan nalet sopoq lolo are léq kebon anggurne. Léq sopoq jelo, ie lumbar boyaq buaq lolo are nike, laguq sopoq-sopoq ndéq araq buaqne. Jari, ie bebase léq penyakapne, ‘Sampun telu taun tiang dateng boyaq buaq lolo are niki, laguq sopoq-sopoq ndéq araq buaqne. Silaq pade rebaq lolo nike! Ie cume nyembih sari kakenan léman tanaq!’ Laguq jawab penyakap nike, ‘Paq, alurang baé ie karing setaun. Tiang gen romboq tanaq léq sekiterne dait toloqang raboq. Sang iniq bebuaq taun mudi. Laguq lamun ndéq bebuaq, silaq pelungguh rebaq ie.’ ” Léq sopoq jelo, waktu nike jelo Sabat, Deside Isa ngajahang léq salaq sopoq balé ibadah. Léq derike araq sopoq dengan nine saq sampun baluq olas taun ngonéqne sakit, séngaq araq roh jahat léq dalem diriqne. Dengan nine nike bongkok dait tetu-tetu ndéq tao panjeng. Sewaktu Deside Isa cingakin dengan nine nike, Deside Isa bemanik léq ie, “Inaq, penyakitde sampun selah!” Beterus Deside Isa noloq gading-Ne léq atas dengan nine nike, dait waktu nike éndah ie panjeng, terus mulieang Allah. Kepale balé ibadah nike sili, séngaq Deside Isa nyelahang dengan léq jelo Sabat, keranaq nike ie bebase léq dengan-dengan, “Araq enem jelo jari begawéan, pade dateng léq jelo-jelo nike jari teselahang, ndaq léq jelo Sabat!” Junjungan Saq Mulie bemanik, “Side pade munapik! Léq jelo Sabat selapuq dengan ngelepas sampi atao bagalne léman barene, dait jauqne sugul terus tebéng nginem. Nah, léq deriki mangkin araq sopoq dengan nine keturunan Ibrahim, saq sampun baluq olas taun tekuasein siq Belis. Napi ndéq kanggo tebébasang léman kuase nike léq jelo Sabat?” Jawaban Deside Isa nike piaq musuh-musuh-Ne jari ilaq gati; laguq selapuq dengan-dengan saq lain seneng serioq selapuq muqjizat saq tepiaq siq Deside Isa. Deside Isa beketuan, “Mengenai Kerajaan Allah berembé keadaanne? Napi siq Tiang kadu bandingang ie? Keadaanne maraq perumpamean niki. Sopoq tolang sawi tebait siq dengan terus tesawur léq kebonne. Tolang sawi nike tiwoq terus jari lolo, dait kedit-kedit piaq kesebu léq pémpangne.” Deside Isa bemanik malik, “Kadu napi malik gen Tiang umpameang hal Kerajaan Allah? Keadaanne pade maraq ragi ruti saq tebait siq sopoq dengan nine terus teadon kance petang dase liter tepung terigu, jangke mbal selapuqne.” Dalem pemargian-Ne ojok Yerusalem, Deside Isa liwat langan kote-kote dait kampung sambil ngajahang. Beterus araq dengan metakén léq Deside Isa, “Paq, napi cume sekediq doang dengan saq gen teselametang?” Jawab Deside Isa, “Pade berusahe tame langan lawang saq supit. Tiang badaq side, luwéq dengan berusahe tame laguq ndéq bau. Sewaktu épén balé ures dait ngimpet lawangne, side pade nganjeng léq luah dait mulai ketok-ketok lawang sambil bebase, ‘Paq, bukaqang tiang lawang!’ Épén balé nike gen bejawab, ‘Tiang ndéq nenaoq side léman mbé!’ Side pade gen bejawab, ‘Tiang pade sampun bekelor dait nginem kance Pelungguh, dait Pelungguh éndah sampun ngajahang léq rurung-rurung saq araq léq kote tiang pade!’ Laguq épén balé nike gen bejawab malik, ‘Tiang ndéq nenaoq side pade léman mbé! Pade nyedi léman taoq niki, side pade saq gawéq jahat!’ Sewaktu side pade serioq Ibrahim, Ishak dait Yakub serte selapuq nabi besukecite léq dalem Kerajaan Allah, side pade gen nangis dait menderite, séngaq side pade tetundung ojok luah! Dengan-dengan gen dateng léman Timuq, Bat, léman Lauq dait Daye, dait gen besukecite léq dalem Kerajaan Allah. Setetune, araq dengan saq penutuq gen jari dengan penembéq, dait dengan saq penembéq gen jari saq penutuq.” Léq waktu nike éndah araq dengan-dengan Parisi parek ojok Deside Isa dait matur, “Sampunang Pelungguh meneng léq deriki, silaq Pelungguh lumbar ojok taoq saq lain, séngaq Herodes beniat nyematéq Pelungguh.” Jawab Deside Isa, “Silaq lumbar dait sampéang ojok dengan saq ndéq araq manpaatne nike, ‘Jelo niki dait jemaq Tiang gen sediq roh jahat dait nyelahang dengan sakit, laguq léq jelo ketelu, Tiang gen nutuqang karye Tiang.’ Timaqne maraq nike Tiang harus nerusang éndah kelampan Tiang, jelo niki, jemaq dait suléqne, séngaq sopoq nabi ndéq kanggo tematéq léq luah Yerusalem. Yerusalem, Yerusalem! Side matéq nabi-nabi! Utusan-utusan Allah side peléwas siq batu jangke ninggal! Sampun pire kali Tiang mélé ngumpulang selapuq pendudukde maraq inen manuk saq kekep anak-anakne léq bawaq kelétékne, laguq side ndéq mélé! Setetune balénde gen tebilin dait jari sepi. Laguq Tiang badaq side: Mulai mangkin side ndéq gen serioq Tiang malik, jangke side bebase, ‘Teberkahin Ie saq rauh dalem peséngan Tuhan.’ ” Léq sopoq jelo, waktu nike jelo Sabat, Deside Isa lumbar medaran léq gedéng salaq sopoq pemimpin dengan Parisi. Léq derike dengan-dengan merhatiang Deside Isa secare teliti. Terus araq sopoq dengan mame saq sakit kembaq aiq saq naé dait imene baq parek ojok Deside Isa. Beterus Deside Isa beketuan léq ahli-ahli Taurat dait dengan-dengan Parisi saq araq léq derike, “Menurut Hukum Taurat, kanggo atao ndéq ite selahang dengan sakit léq jelo Sabat?” Ahli-ahli Taurat dait dengan-dengan Parisi nike meneng doang. Terus Deside Isa ngemanikang dengan nike dait nyelahang ie, beterus suruq ie lumbar. Sesampun nike Deside Isa bemanik tipaq dengan-dengan, “Seandéne salaq sopoq léman side pade bedowé sopoq bije atao sopoq sampi saq geriq ojok dalem lingkoq léq jelo Sabat, napi ie ndéq gen nyerepek nyugulang bijene nike atao sampi nike léq jelo nike éndah?” Laguq ndéq sopoq dengan juaq bau jawab Deside Isa mengenai hal nike. Deside Isa cingakin araq temué-temué saq miléq taoq-taoq saq paling tehormat. Keranaq nike Deside Isa bemanik tipaq ie pade selapuq. “Lamun side pade tepesilaq ojok gawé ngawinang, ndaq tokol léq kursi kehormatan. Séngaq ndaq-ndaq araq dengan lain saq pentingan léman side sampun tepesilaq éndah, sehingge épén balé saq sampun pesilaq side pade, gen dateng tipaq side dait bebase, ‘Maap, taoq niki sampun tesadangang jari temué niki.’ Make siq ilaq side terpakse tokol léq taoq saq paling mudi. Keranaq nike lamun side pade tepesilaq, piléq taoq saq paling mudi, sang épén balé gen dateng dait bebase léq side, ‘Batur, silaq tokol léq taoq saq solahan.’ Siq care nike side tehormatin léq julun selapuq temué saq lain. Séngaq dengan saq nyombongang diriqne gen terendahang, dait dengan saq ngerendahang diriqne gen tetinggiang.” Beterus Deside Isa bemanik léq épén balé, “Lamun side ngaraqang gawé léq kenjelo atao kekelem, ndaq pesilaq batur atao semeton, atao kadang jari, atao tetangge side saq sugih. Séngaq laun ie pade gen pesilaq side éndah, dait siq care nike side nerimaq balesan perbuatande. Jari, lamun side ngaraqang gawé, pesilaq dengan miskin, dengan cacat, dengan képaq dait dengan bute. Side gen bahagie, séngaq dengan-dengan nike ndéq gen mauq bales kesolahande. Kesolahande gen tebales siq Allah léq waktu dengan-dengan saq soléh teidupang malik léman ninggal.” Léq waktu salaq sopoq temué saq bareng-bareng medaran léq derike dengah manik Deside Isa, ie bebase, “Bahagie gati dengan saq gen tejamu dalem Kerajaan Allah!” Laguq Deside Isa bemanik tipaq dengan nike, “Léq sopoq waktu araq sopoq dengan ngaraqang gawé saq beléq dait pesilaq luwéq dengan. Sewaktu gawé nike gen temulai, dengan nike suruq pelayanne lumbar ojok dengan saq tepesilaq dait bebase, ‘Silaq dateng, selapuqne sampun tesiepang!’ Laguq ie pade selapuq, sopoq-sopoq dengan mulai tunas maap. Saq penembéq bebase léq pelayan nike, ‘Tiang baruq gati beli lendang, dait tiang harus lalo periksaq ie. Tiang tunas maap.’ Saq lain bebase, ‘Tiang baruq beli lime pasang sampi, dait tiang harus lalo periksaq sampi-sampi nike. Maapang tiang.’ Saq lain malik bebase, ‘Tiang baruq gati merariq, keranaq nike tiang ndéq bau dateng.’ Pelayan nike uléq, dait nyampéang hal nike ojok majikanne. Majikan nike sili gati, dait bebase léq pelayanne, ‘Becat lalo ojok rurung-rurung dait pengorong-pengorong léq kote. Jauq ojok deriki dengan miskin, dengan cacat, dengan bute dait dengan képaq.’ Beterus pelayan nike bebase, ‘Paq, préntah pelungguh sampun tiang laksaneang, laguq masih luwéq taoq saq kosong.’ Beterus majikan nike bebase, ‘Lalo ojok rurung-rurung beléq dait pengorong-pengorong léq luah kote, dait paksaq dengan-dengan dateng, adéq balén tiang penoq. Tiang badaq side, ndéq sopoq dengan juaq léq antare temué-temué saq sampun tepesilaq nike gen nikmatin keloran saq tesadangan léq gawe tiang niki!’ ” Luwéq dengan milu ngiring Deside Isa. Deside Isa ngéngat andang ie pade dait bemanik, “Lamun dengan dateng tipaq Tiang, laguq lebih ngasihin inaqne, amaqne, seninene, anak-anakne, semeton-semetonne, malahan diriqne mésaq, ie ndéq bau jari pengiring Tiang. Dengan saq ndéq ngelémbah salibne, dait ngiring Tiang, ndéq bau jari pengiring Tiang. Lamun salq sopoq léman side pade mélé penganjeng sopoq menare, pasti ie gen tokol rékéng juluq biayene adéq ie nenaoq napi képéngne cukup jari nyeleséang menare nike atao ndéq. Séngaq lamun ternyate ie ndéq bau nyeleséang, padahal dasarne sampun tepiaq, make selapuq dengan saq serioq pegawéan nike gen ngeleléqang ie. Ie pade gen bebase, ‘Dengan niki penganjeng sopoq menare, laguq ndéq bau nyeleséang!’ Lamun sopoq raje saq bedowé sepulu iyu tentere mélé perang kance raje lain saq bedowé due pulu iyu tentere, pasti raje nike gen melinggih pertimbangang juluq napi ie sanggup ngelawan musuhne nike. Lamun ie nenaoq bahwe ie ndéq kuat, pasti sewaktu musuhne nike masih jaoq, ie gen ngirim utusanne jari tunas bedamé.” Ahirne Deside Isa bemanik, “Maraq nike éndah léq side pade. Ndéq sopoq dengan juaq léman side pade bau jari pengiring Tiang, lamun ie ndéq ngorbanang selapuq-lapuqne.” “Sie nike solah, laguq lamun jari tawah, napi bau tepaéqang malik? Ndéq araq manpaatne malik, timaq jari nyuburang tanaq atao jari raboq. Ie gen tetetéh siq dengan. Lamun bedowé kentok, dengahang!” Léq sopoq jelo, luwéq penagih pajek dait dengan-dengan saq bedose, dateng dengahang Deside Isa. Dengan-dengan Parisi dait ahli-ahli Taurat mulai ngerumun. Ie pade bebase, “Dengan niki nerimaq dengan-dengan saq bedose dait malahan bareng medaran kance ie pade!” Keranaq nike Deside Isa nyeriteang perumpamean niki léq ie pade, “Lamun salaq sopoq léman side pade bedowé satus dombe, terus ie kélangan sopoq -- napi saq gen ie piaq? Pasti ie gen bilin dombe saq siwaq pulu siwaq nike léq lendang pupaq, dait lumbar boyaq saq telang nike jangke kendaitan. Lamun ie ndait malik dombe nike, ie cemoh gati sehingge ponggoqne dombe nike, terus jauqne uléq. Beterus ie ngempoh batur-batur dait tetangge-tetanggene, dait bebase, ‘Silaq ite beseneng-seneng. Séngaq dombe tiang saq telang sampun tiang ndait malik!’ Tiang badaq side, maraq nike éndah léq sorge gen araq sukecite saq beléqan lantaran sopoq dengan bedose saq betobat, ketimbang siwaq pulu siwaq dengan saq sampun keruan kenaq dait ndéq perlu betobat.” “Atao lamun sopoq dengan nine bedowé sepulu képéng perak, terus telang sopoq -- napi saq gen ie piaq? Ie gen penyalaq dilah dait sapu baléne terus boyaq léq mbé-mbé jangke ie ndait képéng nike. Sewaktu ie ndait képéng nike, ie ngempoh batur-batur dait tetangge-tetanggene, terus bebase, ‘Tiang seneng gati sampun ndait malik képéng tiang saq telang. Silaq ite beseneng-seneng!’ Tiang badaq side, maraq nike éndah malaékat Allah gen gembire lamun araq sopoq dengan bedose betobat léman dose-dosene.” Deside Isa bemanik malik, “Araq sopoq amaq saq bedowé due bije mame. Saq sengari bebase tipaq amaqne, ‘Amaq, béng tiang dowé saq jari bagian tiang.’ Make amaqne bagi kesugihanne nike tipaq kedue bijene. Pire jelo sesampun nike bijene saq sengari nike jual bagianne nike terus lumbar ojok negeri saq jaoq. Léq derike ie ambur-amburang képéngne siq idup loyar dait beseneng-seneng. Sewaktu selapuq képéngne bis, léq negeri nike araq musibah kelapahan saq beléq, sehingge ie mulai melarat. Terus ie lumbar begawéan léq salaq sopoq penduduk léq derike. Dengan nike suruq ie ojok lendang jagaq bawine. Saking lapahne ie melét ngisiq tianne siq kakenan bawi-bawi nike laguq ndéq araq sopoq dengan juaq saq ngebéng ie kakenan bawi nike. Ahirne ie sadar dait bebase, ‘Dengan-dengan saq begawéan léq amaq tiang belimpah-limpah keloranne, dait tiang léq deriki maté kelapahan! Tiang gen tulak ojok amaq tiang, dait bebadaq léq ie: Amaq, tiang sampun bedose tipaq Allah dait léq side. Ndéq patut malik tiang tesebut bijende. Anggep tiang niki salaq sopoq pesuruqde.’ Terus ie lalo uléq ojok amaqne. Masih jaoq léman balé, ie sampun teserioq siq amaqne. Amaqne jari periak léq ie dait pelai sambut ie, terus kapongne dait sidukne bijene nike. ‘Amaq,’ basen bijene nike, ‘tiang sampun bedose tipaq Allah dait léq side. Tiang ndéq patut malik tesebut bijende.’ Laguq amaqne ngempoh pelayan-pelayanne, dait bebase, ‘Becat! Baitang kelambi saq paling solah, dait kaduang léq ie. Pasangang ali-ali léq ranggotne dait sepatu léq naéne. Sesampun nike bait anak sampi saq mokoh dait sembeléh. Ite gen roah dait besukecite. Séngaq bije tiang niki sampun milinang, mangkin idup malik; ie sampun telang laguq mangkin tedait malik.’ Terus ie pade mulai begawé. Léq waktu nike, bijene saq sengake araq léq lendang. Sewaktu ie uléq dait sampun rapet baléne, ie dengah suare gending dait igel-igelan. Ie ngempoh salaq sopoq pelayan-pelayanne, terus beketuan, ‘Araq napi niki léq balé?’ Jawab pelayan nike, ‘Adiqde sampun tulak! Dait amaqde sampun suruq dengan sembeléh anak sampi saq mokoh, séngaq bijene sampun tulak malik dalem keadaan selamet!’ Bije saq sengake nike gedek gati, jangke ie ndéq mélé tame balé. Beterus amaqne sugul dait ngodop ie adéqne tame. Laguq ie bebase léq amaqne, ‘Betaun-taun ngonéqne tiang begawéan maté-matéan umaq side. Tiang ndéq uwah ngelawan préntahde. Dait napi saq side béng léq tiang? Timaq sopoq bémbéq ndéq uwah tiang terimaq léman side jari begawé kance batur-batur tiang! Bijende nike sampun nyembih kesugihande kance pelacur-pelacur, laguq waktu ie tulak, side sembeléh anak sampi saq mokoh umaq ie!’ ‘Anak,’ jawab amaqne, ‘side tetep araq léq deriki bareng kance tiang. Selapuq saq tiang épéang éndah jari dowénde. Laguq ite harus roah dait beseneng-seneng, séngaq adiqde nike sampun milinang, laguq mangkin idup malik; ie sampun telang, laguq mangkin sampun tedait malik.’ ” Deside Isa bemanik léq pengiring-pengiring-Ne, “Araq sopoq dengan sugih bedowé sopoq bendahare jari ngurus selapuq kesugihanne. Dengan sugih nike dengah laporan bahwe bendaharene nike ngambur-amburang képéngne. Empohne bendahare nike dait bebase léq ie, ‘Napi niki laporan saq tiang dengah mengenai side? Mangkin, serahang léq tiang laporan saq lengkap mengenai tugasde ngurus kesugihan tiang. Side ndéq bau malik jari bendahare tiang.’ Jari bendahare nike mikir, ‘Napi saq harus tiang piaq mangkin? Majikan tiang mélé pengkah tiang. Nambah tiang ndéq tao, jari tukang mekir, tiang ilaq. Tiang araq akal adéq lamun tiang tepengkah, araq dengan saq mélé nerimaq tiang léq baléne!’ Terus bendahare nike ngempoh sebilang dengan saq berutang léq majikanne. Léq saq penembéq ie beketuan, ‘Pire utangde léq majikan tiang?’ Jawab dengan nike, ‘Satus gentong minyak zaitun.’ Bendahare nike bebase, ‘Niki surat utangde. Silaq tokol terus becat tulis utangde séket gentong.’ Beterus ie bebase léq dengan saq kedue, ‘Pire utangde?’ Jawab dengan nike, ‘Siyu karung gandum.’ Bendahare nike bebase léq ie, ‘Niki surat utangde, tulis baluq ratus.’ Make majikan nike puji bendahare saq ndéq jujur nike, lantaran entane saq ceket nike; séngaq bije-bije dunie niki ceketan ngatur urusanne mésaq ketimbang bije-bije terang. Tiang badaq side: Manpaatang kesugihan dunie niki jari mauq sahabat, adéq lamun kesugihan dunie niki sampun ndéq bau nulung malik, side pade gen teterimaq léq balé saq kekel. Dengan saq bau tesaduq léq hal-hal saq kodéq, bau éndah tesaduq léq hal-hal saq beléq. Laguq dengan saq ndéq bau tesaduq léq hal saq kodéq, ndéq bau éndah tesaduq léq hal saq beléq. Jari lamun dalem hal kesugihan dunie niki side sampun ndéq bau tesaduq malik, sai saq mélé percayeang tipaq side kesugihan saq sejati? Dait lamun side ndéq setie léq dowé dengan lain, sai saq gen mélé nyerahang léq side napi saq jari dowénde mésaq? Ndéq araq dengan saq tao begawéan léq due majikan; séngaq lamun maraq nike ie gen meriq léq saq sopoq dait ngasihin saq lain, atao ie gen setie léq saq sopoq dait ndéq gen merhatiang saq lain. Maraq nike éndah halne side pade; side pade ndéq bau begawéan tipaq Allah dait tipaq dowé bande éndah.” Dengan-dengan Parisi dengahang selapuq saq temanikang siq Deside Isa. Terus ie pade ngeréréqang Deside Isa, séngaq ie pade demen képéng. Laguq Deside Isa bemanik léq ie pade, “Side pekenaq diriqde léq julun dengan lain, laguq Allah wikan angende. Séngaq napi saq teagung-agungang siq manusie, temeriq siq Allah. Hukum Taurat dait kitab nabi-nabi, tetep tekadu jangke jaman Yahya. Léman waktu nike Kabar Solah mengenai Kerajaan Allah terus teberiteang. Dait luwéq dengan berebutan tame léq dalem Kerajaan Allah nike. Laguq molahan gumi dait langit musnah ketimbang sopoq hurup dalem Hukum Taurat tebatalang. Sai-sai saq séang seninene, terus merariq malik kance dengan nine lain, ie bezinah. Dait dengan saq merariq kance dengan saq teséang siq semamene nike, ie éndah bezinah.” “Araq dengan sugih. Kelambine mahel-mahel dait idupne méwah sebilang jelo. Dait araq dengan miskin aranne Lazarus, awakne penoq siq koréng, tindoq léq dékét lawang balén dengan sugih nike. Lazarus melét ngisiq tianne siq napi juaq saq geriq léman méje dengan sugih nike. Malahan acong dateng délat koréngne. Beterus dengan miskin nike ninggal terus jauqne siq malaékat ojok iwean Ibrahim. Dengan sugih nike éndah ninggal terus tekubur. Léq alam maut ie menderite gati. Dait sewaktu ie nongaq, léman jaoq serioqne Ibrahim dait Lazarus araq léq iweanne. ‘Bapaq Ibrahim!’ basen dengan sugih nike. ‘Periakang tiang! Suruq Lazarus tamaq ranggotne ojok dalem aiq terus dateng basaqang élaq tiang. Tiang sengsare gati léq dalem api niki!’ Laguq jawab Ibrahim, ‘Inget anak tiang: Sengonéq side idup, side sampun mauq selapuq hal saq solah-solah, laguq Lazarus mauq saq lengé-lengé. Mangkin Lazarus seneng léq deriki, laguq side sengsare. Selain nike, léq antare side kance tiang pade araq sopoq jurang saq dalem, adéq dengan léman deriki ndéq bau ojok derike dait dengan léq derike ndéq bau ojok deriki!’ Basen dengan sugih nike, ‘Lamun maraq nike, sanget siq tiang tunas adéq Pelungguh ngutus Lazarus ojok balé bapaq tiang. Araq lime semeton tiang léq derike. Suruq Lazarus peringet ie pade, adéq ndaq jangke ie pade éndah tame ojok taoq siksaqan niki.’ Jawab Ibrahim, ‘Dengan-dengan nike sampun bedowé Kitab Suci saq tesampéang langan Musa dait kitab nabi-nabi saq lainne! Alurang ie pade taat léq napi saq tetulis léq dalem kitab-kitab nike!’ Laguq dengan sugih nike bejawab, ‘Nike ndéq cukup, Bapaq Ibrahim. Laguq lamun araq dengan ninggal idup malik dait dateng léq ie pade, pasti ie pade gen tobat léman dose-dosene.’ Laguq jawab Ibrahim, ‘Lamun ie pade ndéq dengahang kesaksian Musa dait nabi-nabi, pasti ie pade éndah ndéq percaye, timaqne araq dengan ninggal idup malik.’ ” Deside Isa bemanik léq pengiring-pengiring-Ne, “Hal-hal saq jari penyebap dengan gawéq dose pasti gen araq. Laguq celake gati dengan saq jari penyebapne! Solahan lamun batu penggilingan tetaliq léq belongne terus ie tesaut ojok dalem segare ketimbang lantaran ie salaq sopoq léman dengan saq kodéq niki gawéq dose. Keranaq nike pade waspade! Lamun semetonde bedose, peringet ie. Lamun ie nyesel, ampunin ie. Lamun ie bedose léq side pituq kali sejelo, dait sebilang ie dateng ojok side dait bebase, ‘Tiang nyesel,’ ampunin ie.” Rasul-rasul matur léq Junjungan Saq Mulie Deside Isa, “Teguqang iman tiang pade.” Jawab Junjungan Saq Mulie, “Lamun side bedowé iman timaqne maraq beléq tolang sawi, side pade bau muni léq lolo are niki, ‘Kerembotan terus nancep léq segare,’ pasti lolo nike gen turut préntahde.” “Lamun léq antare side pade araq saq bedowé sopoq pelayan saq pegawéanne nenggale léq bangket atao ngarat dombe, lamun ie tulak, napi side gen bebase léq ie, ‘Silaq becat bekelor’? Pasti ndéq maraq nike! Malahan side gen bebase léq pelayan nike, ‘Sadangang keloran tiang. Kadu kelambi saq bersi dait antih tiang jangke tiang engkah bekelor dait nginem; sesampun nike side kanggo bekelor.’ Napi side gen ngucapang tampi asih léq ie séngaq ie sampun ngelaksaneang préntahde? Maraq nike éndah halne side pade, lamun side pade sampun ngelaksaneang napi saq tetugasang léq side pade, side pade harus bebase, ‘Tiang niki pelayan-pelayan saq ndéq araq manpaatne; tiang pade cume ngelaksaneang napi saq jari kewajiban tiang pade.’ ” Dalem pemargian-Ne ojok Yerusalem, Deside Isa liwatin daérah perbatesan Samaria dait Galilea. Waktu Ie tame léq sopoq kampung, Ie tedatengin siq sepulu dengan kuste. Dengan-dengan nike nganjeng léman jaoq sambil bekuih, “Deside Isa, Guru, periakang tiang pade!” Sewaktu Deside Isa cingakin dengan-dengan nike, Ie bemanik, “Silaq side lumbar, petitoqang diriqde léq imam-imam.” Sewaktu ie pade kenyeke lampaq, penyakitne telang. Waktu salaq sopoq léq antare dengan-dengan nike sadar bahwe ie sampun selah, ie tulak sambil mulieang Allah siq suare saq beléq. Terus léq arepan Deside Isa, ie sujut dait matur tampi asih. Dengan nike léman Samaria. Deside Isa bemanik, “Tekan araq sepulu dengan teselahang? Mbé saq siwaq dengan malik? Kembéq cume dengan pendateng niki saq tulak jari mulieang Allah?” Beterus Deside Isa bemanik léq dengan nike, “Silaq ures, terus side lumbar, lantaran side percaye make side jari selah.” Dengan-dengan Parisi metakén léq Deside Isa, piran Kerajaan Allah gen rauh. Jawab Deside Isa, “Kerajaan Allah nike nénten temulai siq tande-tande saq bau teserioq siq manusie, sehingge dengan bau bebase, ‘Silaq serioq, niki ie!’ atao ‘Léq derike taoqne!’ Séngaq setetune Kerajaan Allah sampun araq léq antare side pade.” Sesampun nike Deside Isa bemanik léq pengiring-pengiring-Ne, “Gen dateng waktune side pade melét serioq sopoq léman jelo-jelo Bije Manusie nike, laguq side pade ndéq mauq serioq ie. Dait dengan gen bebase léq side, ‘Serioq, Ie léq derike!’ atao ‘Serioq Ie léq deriki!’ Laguq ndaq side sugul turut dengan nike. Séngaq pade maraq kisap saq ngempor léman poton langit saq sopoq ojok poton langit saq lain, maraq nike éndah éraq jelo kerauhan Bije Manusie. Laguq Ie harus luwéq menderite dait tetolaq siq dengan léq jaman niki. Pade maraq saq telaksane léq jaman Nuh, maraq nike éndah halne éraq waktu Bije Manusie rauh. Dengan-dengan pade bekelor dait nginem serte merariq; maraq nike seterusne jangke dateng waktune Nuh tame ojok dalem kapal terus dateng belabur nimpe ie pade jangke selapuq dengan binase. Maraq léq jaman Lot éndah, dengan-dengan pade bekelor dait nginem, bedagang dait belanje, betaletan dait miaq balé. Laguq sewaktu Lot sugul léman Sodom, léq jelo nike api dait urirang turun léman langit binaseang selapuqne. Maraq nike keadaanne éraq léq waktu Bije Manusie nyatayang diriq-Ne. Léq jelo nike, dengan saq kenyeke araq léq atas atep baléne ndaq turun malik bait barang-barang léq dalem baléne. Maraq nike éndah dengan saq kenyeke araq léq lendangne, ndaq tulak ojok baléne. Ingetang, napi saq tealamin siq seninen Lot! Dengan saq berusahe nyelametang nyawene gen kélangan nyawene. Dait dengan saq kélangan nyawene lantaran Tiang, dengan nike gen nyelametang nyawene mésaq. Tiang badaq side: Léq kelem nike, due dengan saq kenyeke tindoq léq sopoq lasah, sopoq gen tejauq, terus saq sopoq malik gen teadéqang. Due dengan nine saq kenyeke giling gandum, sopoq gen tejauq dait sopoqne malik gen teadéqang. [ Due dengan kenyeke begawéan léq lendang, saq sopoq gen tejauq, dait sopoq malik teadéqang.]” Pengiring-pengiring Deside Isa metakén, “Junjungan Saq Mulie, léq mbé hal nike gen telaksane?” Jawab Deside Isa, “Léq mbé araq bangké, léq derike bekeriwung kedit saq girang ngaken bangké.” Sesampun nike Deside Isa nyeriteang sopoq perumpamean jari ngajah pengiring-pengiring-Ne adéq ie pade tetep bedo'e dait ndaq nyerah. Deside Isa bemanik, “Léq sopoq kote araq sopoq hakim saq ndéq takut tipaq Allah, dait ndéq peduli léq sai-sai. Léq kote nike araq éndah sopoq bebalu saq rimpes gati ojok hakim nike tunas adéq pelekarene tebéle, ‘Silaq béle pelekara tiang ngelawan dengan saq nuduh tiang,’ basen bebalu nike. Bégaq ngonéqne hakim nike ndéq mélé tulung bebalu nike. Laguq ahirne hakim nike mikir, ‘Timaq tiang ndéq takut léq Allah dait ndéq peduli léq sai-sai, laguq lantaran bebalu niki terus doang ganggu tiang, bagusan tiang béle pelekarene. Lamun ndéq, ie gen terus-terusan dateng dait nyusahang tiang.’ ” Beterus Junjungan Saq Mulie Deside Isa bemanik, “Perhatiang napi saq teucapang siq hakim saq ndéq adil nike! Napi Allah nénten gen béle pelekare dengan-dengan piléqan-Ne saq kenjelo kekelem tunas léq Ie? Napi Allah gen ngulur-ngulur waktu jari nulung ie pade? Tiang badaq side: Allah gelis gen béle pelekare ie pade! Laguq lamun Bije Manusie rauh, napi léq gumi niki masih araq tedait dengan saq bedowé iman?” Deside Isa nyeriteang éndah perumpamean niki saq Ie tujuang tipaq dengan saq girang ngeréméhang dengan lain, laguq yakin bahwe diriqne mésaq saq paling kenaq. Manik Deside Isa, “Araq due dengan lumbar bedo'e ojok Gedéng Allah. Saq sopoq dengan Parisi, saq lainne penagih pajek. Dengan Parisi nike nganjeng mésaq-mésaq dait bedo'e, ‘Ya Allah, tiang besyukur léq Deside, séngaq tiang ndéq maraq dengan lain, saq serakah, ndéq adil, atao bezinah. Tiang besyukur séngaq tiang ndéq maraq penagih pajek nike. Tiang puase due kali seminggu, dait tiang ngaturang sepersepulu léman selapuq pengasilan tiang.’ Laguq penagih pajek nike nganjeng jaoq-jaoq dait malahan ndéq bani nongaq andang langit. Sambilne empuk dadene, ie matur, ‘Ya Allah periakang tiang dengan bedose niki!’ ” “Tiang badaq side, waktune uléq ojok balé, penagih pajek nike saq tejariang kenaq siq Allah, dait ndéqne dengan Parisi nike. Séngaq dengan saq nyombongang diriqne gen terendahang, dait dengan saq ngerendahang diriqne gen tetinggiang.” Araq dengan-dengan jauq kanak-kanak kodéq ojok Deside Isa adéq ie pade tejamah dait teicanin berkah siq Deside Isa. Sewaktu pengiring-pengiring Deside Isa serioq nike, ie pade siliq dengan-dengan nike. Laguq Deside Isa ngemanikang kanak-kanak nike dait bemanik léq pengiring-pengiring-Ne, “Alurang kanak-kanak nike dateng ojok Tiang! Ndaq balaq ie pade, séngaq dengan maraq niki saq dowéang Kerajaan Allah. Tiang badaq side: Setetune dengan saq ndéq nerimaq Kerajaan Allah maraq sopoq kanak, ie ndéq gen bau tame léq dalemne.” Araq sopoq pemimpin Yahudi metakén léq Deside Isa, “Paq Guru saq solah, napi saq harus tiang piaq adéq tiang bau nerimaq idup sejati dait kekel?” Jawab Deside Isa, “Kembéq side paran Tiang solah? Ndéq araq saq solah kecuali Allah. Side sampun nenaoq préntah-préntah Allah: ‘Ndaq bezinah, ndaq nyematéq, ndaq memaling, ndaq jari saksi duste, dait pade hormatin amaq dait inaqde.’ ” “Selapuq préntah nike sampun tiang turut léman masih bajang,” atur dengan nike. Sesampun Deside sa pireng dengan nike bebase maraq nike, Ie bemanik léq dengan nike, “Masih araq sopoq hal saq harus side laksaneang: Jual selapuq dowénde, béng képéngne tipaq dengan-dengan miskin, dait side gen mauq harte léq sorge. Sesampun nike dateng turut Tiang.” Laguq sewaktu dengan nike dengah hal nike, ie jari sedih séngaq ie sugih gati. Deside Isa wikan dengan nike sedih angenne, keranaq nike Ie bemanik, “Sengke gati dengan sugih tame ojok dalem Kerajaan Allah! Molahan sopoq onte tame loang jarum, ketimbang sopoq dengan sugih tame ojok dalem Kerajaan Allah.” Dengan-dengan saq dengah Deside Isa bemanik maraq nike metakén, “Lamun maraq nike, sai saq bau selamet?” Jawab Deside Isa, “Napi saq ndéq mungkin bagi manusie, jari mungkin bagi Allah!” Terus Petrus matur, “Tiang pade sampun bilin selapuq saq tiang pade épéang jari ngiring Pelungguh.” Jawab Deside Isa, “Tiang badaq side, setetune sebilang dengan saq sampun bilin baléne, atao seninene, atao semetonne, atao inaq amaqne atao anak-anakne lantaran Kerajaan Allah, dengan nike gen tebales belipet-lipet léq waktu niki, dait léq jaman saq gen dateng, ie gen nerimaq idup sejati dait kekel.” Deside Isa ngumpulang kedue olas pengiring-Ne secare husus, terus bemanik, “Silaq mangkin ite lumbar ojok Yerusalem. Léq derike, selapuq saq tetulis siq nabi-nabi mengenai Bije Manusie gen telaksane. Ie gen teserahang tipaq bangse-bangse saq ndéq kenal kance Allah, saq gen ngoloq-oloq, menghine, dait nijuh Ie. Ie pade gen siksaq dait nyematéq Ie, laguq léq jelo ketelu, Ie gen idup malik.” Pengiring-pengiring Deside Isa nénten paham napi saq teucapang siq Deside Isa nike. Arti ucapan-ucapan-Ne nike terahasieang léman ie pade. Ndéqne pade taoq napi maksut Deside Isa. Sewaktu Deside Isa sampun rapet kote Yeriko, araq sopoq dengan bute kenyeke tokol nunas-nunas léq sedin rurung. Sewaktu ie dengah dengan luwéq nike liwat, ie beketuan, “Araq napi?” “Deside Isa dengan Nazaret nike, liwat,” basen ie pade léq ie. Make dengan bute nike bekuih, “Deside Isa, keturunan Daud! Periakang tiang!” Ie tesiliq siq dengan-dengan saq léq julu, dait suruq ie tedoq. Laguq sayan keras ie bekuih, “Bije Daud! Periakang tiang!” Deside Isa mentelah, terus ngemanikang dengan jauq dengan bute nike tipaq Ie. Sesampun ie dateng, Deside Isa beketuan, “Napi saq side melétang adéq Tiang piaq léq side?” “Junjungan Saq Mulie,” jawab dengan bute nike, “tiang melét tao nyerioq.” Terus Deside Isa bemanik, “Cobaq nyerioq! Imande sampun miaq side selah.” Waktu nike éndah ie tao nyerioq, terus ie ngiring Deside Isa sambil ngucap syukur tipaq Allah. Dengan luwéq saq serioq hal nike éndah mulieang Allah. Sewaktu Deside Isa tame kote Yeriko, Ie bemargi liwatin kote nike. Léq kote nike araq sopoq kepale penagih pajek saq sugih. Aranne Zakeus. Zakeus melét serioq sai Deside Isa nike, laguq lantaran luwéq gati dengan dait awakne céndéq, make ie ndéq mauq serioq Deside Isa. Jari, Zakeus pelai senjuluq dengan-dengan, terus ie taék léq sopoq lolo kayuq, adéqne mauq serioq Deside Isa saq karing semendaq gen liwat léq derike. Waktu Deside Isa rauh léq bawaq lolo kayuq nike, Deside Isa cingakin andang atas dait bemanik, “Zakeus, becat turun! Séngaq jelo niki Tiang harus madéq léq balénde.” Zakeus becat-becat turun dait sambut Deside Isa siq cemohne. Selapuq dengan saq serioq hal nike mulai ngerumun, ie pade bebase, “Ie madéq léq balén dengan bedose!” Sesampun léq baléne, Zakeus nganjeng dait matur léq Deside Isa, “Junjungan Saq Mulie, separo léman dowén tiang gen tiang béng ojok dengan miskin; dait napi-napi saq sampun tiang bait léman dengan secare ndéq jujur, gen tiang tulakang malik léq ie empat kali lipet!” Deside Isa bemanik léq Zakeus, “Léq jelo niki keselametan sampun rauh léq keluarge niki, séngaq ie éndah keturunan Ibrahim. Bije Manusie rauh jari boyaq dait nyelametang dengan saq sesat.” Léq waktu dengan-dengan masih dengahang Deside Isa bebaos, Deside Isa nyeriteang sopoq perumpamean. Séngaq, léq waktu nike Deside Isa kenyeke araq léq dékét Yerusalem, dait ie pade paran bahwe Kerajaan Allah gen becat penggitan. Deside Isa bemanik, “Araq sopoq dengan ménak lumbar ojok negeri saq jaoq gen telantik jari raje, beterus tulak. Sendéqman lumbar, ie ngempoh sepulu pelayanne, dait sebilang dengan béngne sopoq képéng emas terus bebase léq ie pade, ‘Kadu képéng niki bedagang jangke tiang tulak malik.’ Laguq rakyat léq negerine nike meriq léq ie. Jari, sesampun ie lumbar, ie pade ngirim utusan jari nyampéang, ‘Tiang pade ndéq mélé dengan niki jari raje tiang pade.’ Laguq ménak nike telantik jari raje, beterus tulak ojok negerine. Langsung ie ngempoh pelayan-pelayan saq sampun ie béng képéng nike jari nenaoq pire bati saq sampun ie pade mauq. Pelayan saq penembéq dateng dait matur, ‘Paq, sopoq képéng emas saq pelungguh icanin nike, sampun tiang jariang sepulu.’ ‘Bagus,’ basen raje nike. ‘Side pelayan saq bagus! Séngaq léq hal-hal saq kodéq side bau tesaduq, tiang gen jariang side penguase léq sepulu kote.’ Pelayan saq kedue dateng dait matur, ‘Paq, sopoq képéng emas saq pelungguh icanin nike, sampun tiang jariang lime.’ Raje nike bebase léq pelayan nike, ‘Side gen tiang jariang penguase léq lime kote.’ Pelayan saq lain dateng dait matur, ‘Paq, niki képéng pelungguh; tiang simpen léq dalem saputangan. Tiang takut léq pelungguh, séngaq pelungguh dengan saq keras. Pelungguh bait napi saq nénten jari dowén pelungguh, dait pelungguh bait hasil léq taoq saq nénten pelungguh talet mésaq.’ Raje nike bebase léq ie, ‘Side pelayan saq jahat! Sesuai ucapan-ucapande mésaq tiang gen hukum side. Side nenaoq tiang dengan saq keras: Tiang bait napi saq ndéq jari dowén tiang dait bait hasil léq taoq saq ndéq tiang talet mésaq. Lamun maraq nike kembéq side ndéq serahang képéng tiang nike ojok dengan saq ngelampaqang képéng adéq léq waktu tiang tulak bau tiang terimaq képéng nike bareng réntenne?’ Beterus raje nike bebase léq dengan-dengan saq nganjeng léq derike, ‘Bait képéng nike léman ie dait béng ojok pelayan saq bedowé sepulu képéng emas nike.’ Laguq dengan-dengan nike bejawab, ‘Paq, ie sampun bedowé sepulu.’ Jawab raje nike, ‘Tiang badaq side: sebilang dengan saq sampun bedowé, gen teican luwéqan malik. Laguq dengan saq ndéq bedowé napi-napi, napi saq araq léq ie gen tebait éndah léman ie. Laguq mangkin side jauq ojok deriki musuh-musuh tiang nike saq ndéq setuju tiang jari rajene. Matéq ie pade selapuq léq julun tiang!’ ” Sesampun Deside Isa manikang selapuqne nike Ie bemargi léq julun ie pade jari nerusang ojok Yerusalem. Sewaktu sampun rapet Betpage dait Betania léq Bukit Zaitun, Deside Isa ngemanikang due pengiring-Ne lampaq bejulu dait bepesen, “Silaq lumbar ojok kampung saq araq léq julunde nike: Lamun side pade tame léq derike, side pade gen serioq sopoq bagal saq masih odaq tegeteng. Bagal nike ndéq uwah tetunggang siq dengan. Lekaq getenganne terus jauq ojok deriki. Lamun araq dengan saq beketuan léq side, ‘Kembéq side pade lekaq getengan bagal nike?’ Badaqang bahwe, ‘Junjungan Saq Mulie merluang bagal nike.’ ” Kedue pengiring Deside Isa nike lumbar, terus daitne selapuqne tepat maraq saq temanikang siq Deside Isa. Sewaktu ie pade lekaq getengan bagal nike, épéne beketuan léq ie pade, “Kembéq side pade lekaq getengan bagal nike?” Jawab ie pade, “Junjungan Saq Mulie merluang bagal niki.” Beterus ie pade jauq bagal nike ojok Deside Isa. Bongkor bagal nike ie pade lamak siq jubah ie pade, dait tulungne Deside Isa taék léq atas bagal nike. Sewaktu Deside Isa liwat nunggang bagal nike, dengan-dengan kelat jubahne léq rurung. Sewaktu Deside Isa sampun rapet Yerusalem, léq langan saq nurunang léq Bukit Zaitun, selapuq pengiring-pengiring-Ne saq luwéq nike mulai memuji Allah dait ngucapang syukur tipaq Allah lantaran ie pade sampun nyaksiang muqjizat-muqjizat. Ie pade bekuih, “Teberkahin Raje saq rauh dalem peséngan Tuhan! Damé sejahtere léq sorge dait kemuliean léq taoq saq maheagung!” Dengan-dengan Parisi saq araq léq antare dengan luwéq nike matur léq Deside Isa, “Paq Guru, manikang pengiring-pengiring Pelungguh adéqne tedoq.” Jawab Deside Isa, “Tiang badaq side! Lamun ie pade tedoq, batu-batu nike gen nyurak.” Sewaktu Deside Isa sayan rapet kote Yerusalem dait cingakin kote nike, Ie besermin. Deside Isa bemanik, “Periak, bagus gati lamun jelo niki side nenaoq napi saq bau datengang perdaméan; laguq mangkin side ndéq bau serioq ie. Side gen ngalamin sopoq mase, bahwe musuh-musuhde gen piaq halangan-halangan léq sekeliningde, ie pade gen ngepung side dait desek side léman selapuq andang. Ie pade gen ngancurang side bareng selapuq pendudukde; dait ndéq gen araq sopoq batu saq masih beronjoq maraq béngan, séngaq side ndéq nenaoq waktu Allah rauh tipaq side!” Deside Isa tame ojok Gedéng Allah dait mulai sediq selapuq pedagang léq derike. Manik Deside Isa léq ie pade, “Léq dalem Kitab Suci tetulis Manik Allah maraq niki: ‘Gedéng Tiang gen jari gedéng taoq bedo'e.’ Laguq side pade jariang ie taoqne bekumpul dengan-dengan jahat!” Sebilang jelo Deside Isa ngajahang léq dalem Gedéng Allah. Imam-imam kepale dait ahli-ahli Taurat serte pemimpin-pemimpin Yahudi beniat nyematéq Deside Isa, laguq ie pade ndéq taoq, berembé harus ngelaksaneang hal nike, séngaq selapuq dengan terus doang dengahang Deside Isa dait seneng léq pengajahan-Ne. Léq sopoq jelo, Deside Isa kenyeke ngajahang dait nyampéang Kabar Solah léman Allah tipaq dengan-dengan saq araq léq dalem Gedéng Allah. Imam-imam kepale, ahli-ahli Taurat dait pemimpin-pemimpin Yahudi parek dait metakén léq Deside Isa, “Tunas Pelungguh sampéang léq tiang pade atas dasar napi Pelungguh ngelaksaneang selapuq hal niki? Sai saq aturin Pelungguh kuase nike?” Jawab Deside Isa, “Tiang éndah mélé beketuan. Tunas side pade badaq Tiang, Yahya baptis dengan siq kuase sai? Kuase Allah atao kuase manusie?” Beterus ie pade mulai berunding, dait bebase, “Lamun ite jawab siq kuase Allah, Ie gen bemanik, ‘Kembéq side pade ndéq percaye léq Yahya?’ Laguq lamun ite jawab, ‘Siq kuase manusie,’ selapuq dengan gen meléwas ite siq batu, séngaq ie pade percaye bahwe Yahya nike nabi.” Jari jawab ie pade, “Mindah tiang.” Terus Deside Isa bemanik léq ie pade, “Lamun maraq nike Tiang éndah ndéq gen badaq side pade siq kuase sai Tiang laksaneang selapuqne niki.” Deside Isa nyeriteang perumpamean niki léq dengan-dengan nike, “Araq sopoq dengan saq nalet anggur léq kebonne. Séweangne kebon anggur nike ojok penyakap-penyakap, terus ie lumbar ojok negeri lain, dait ndot ngonéq léq derike. Sewaktu dateng musim buaq anggur, épén dowé kebon nike ngutus pelayanne ojok penyakap-penyakapne nike jari nerimaq bagianne. Laguq penyakap-penyakap nike ngempuk pelayan nike dait suruqne ie pade uléq ndéq jauq napi-napi. Sesampun nike épén dowé kebon nike ngutus malik pelayanne saq lain; laguq pelayan nike éndah tempuk dait tehine terus suruqne uléq ndéq jauq napi-napi. Terus épén dowé kebon nike ngutus malik pelayan saq ketelu. Laguq pelayan nike éndah tempuk dait tetetéh ojok luah kebon anggur nike. Ahirne épén dowé kebon nike bebase, ‘Napi saq harus tiang piaq malik? Tiang gen ngutus anak tiang mésaq saq tiang tunah gati, pasti ie pade gen hormatin anak tiang!’ Laguq sewaktu penyakap-penyakap kebon nike serioq bije épén dowé kebon nike, ie pade berunding, ‘Niki ie ahli warisne, silaq ite matéq ie, adéq ite mauq warisanne.’ Make orosne ie sugul ojok luah kebon nike terus ie tematéq.” Beterus Deside Isa beketuan, “Lamun épén dowé kebon nike tulak, napi saq gen ie piaq tipaq penyakap-penyakap nike? Pasti ie gen dateng dait nyematéq penyakap-penyakap nike, beterus nyerahang kebon nike ojok penyakap-penyakap saq lain.” Dengah hal nike, ie pade matur léq Deside Isa, “Sampunang gati jangke maraq nike!” Deside Isa merhatiang ie pade, terus bemanik, “Lamun maraq nike napi artine ayat Kitab Suci niki? ‘Batu saq tetetéh siq tukang bangunan, sampun jari batu saq paling utame.’ Sai-sai saq geriq léq batu nike gen ancur, dait sai-sai saq tendet siq batu nike, ie gen remuk.” Ahli-ahli Taurat dait imam-imam kepale nenaoq bahwe perumpamean nike tetujuang tipaq ie pade siq Deside Isa. Keranaq nike ie pade mélé bau Deside Isa waktu nike éndah, laguq ie pade takut léq dengan luwéq. Jari ie pade boyaq kesempatan saq solah. Ie pade upaq dengan adéqne puraq-puraq jari dengan jujur, dait suruqne dengan-dengan nike boyaq-boyaq kesalaqan Deside Isa siq care besoal jawab, adéq ie pade bau serahang Deside Isa ojok gubernur. Beterus dengan-dengan saq teupaq nike matur léq Deside Isa, “Paq Guru, tiang pade nenaoq bahwe selapuq saq Pelungguh manikang dait ajahang nike kenaq. Tiang pade nenaoq éndah bahwe Pelungguh ngajahang secare terus-terang mengenai langan saq kenaq tipaq Allah, séngaq Pelungguh nénten piléq kasih. Keranaq nike, tunas Pelungguh sampéang léq tiang pade, menurut aturan agamente, kanggo napi nénten bayah pajek léq Kaisar?” Laguq Deside Isa wikan tipu muslihat ie pade. Keranaq nike Ie bemanik, “Cobaq petitoqang léq Tiang sopoq képéng perak. Gambar dait aran sai niki?” “Kaisar!” jawab ie pade. Make Deside Isa bemanik tipaq ie pade, “Lamun maraq nike, serahang ojok Kaisar, napi saq jari dowén kaisar, dait tipaq Allah napi saq jari dowén Allah.” Ternyate léq julun dengan luwéq nike ie pade ndéq iniq mauq sopoq juaq kesalaqan Deside Isa. Ie pade cume tedoq dait bengaq siq manik Deside Isa nike. Dengan-dengan léman golongan Saduki parek ojok Deside Isa. (Ie pade golongan saq bedowé pendapet bahwe dengan ninggal ndéq gen idup malik). Ie pade metakén léq Deside Isa, “Bapaq Guru, Musa nulis hukum niki tipaq ite: Lamun sopoq dengan mame ninggal dait ie ndéq bedowé bije, make semetonne harus merariq kance bebalune adéq ie bau ngebéng keturunan tipaq dengan saq sampun ninggal nike. Araq pituq dengan besemetonan. Saq sengake merariq, terus ninggal ndéq bedowé bije. Beterus saq kedue merariq kance bebalune, laguq ie éndah ninggal ndéq bedowé bije. Maraq nike éndah telaksane léq semetonne saq ketelu dait seterusne jangke saq kepituq. Ahirne dengan nine nike éndah ninggal. Léq jelo dengan ninggal teidupang malik, sai semame dengan nine nike? Séngaq kepituq-pituqne sampun merariq kance ie.” Jawab Deside Isa, “Dengan-dengan saq idup mangkin niki merariq, laguq dengan-dengan saq patut teidupang malik léman ninggal dait idup léq akhirat, ie pade merariq malik. Keadaan ie pade maraq malaékat, dait ndéq iniq ninggal. Ie pade nike bije-bije dowén Allah, séngaq ie pade sampun teidupang malik léman ninggalne. Musa mésaq secare jelas nyatayang bahwe dengan ninggal gen teidupang malik. Dalem tulisanne mengenai bebenes saq nyale, ie sebut Tuhan nike ‘Allahne Ibrahim, Allahne Ishak dait Allahne Yakub’. Allah nike nénten Allah dengan ninggal, laguq Allah dengan saq idup! Séngaq léq arepan Allah, selapuq dengan idup.” Ahli-ahli Taurat matur, “Jawaban Paq Guru solah gati.” Keranaq nike ie pade ndéq bani malik metakén napi-napi léq Deside Isa. Deside Isa beketuan léq ie pade, “Berembé dengan-dengan iniq paran bahwe Almasih nike keturunan Daud? Padahal Daud mésaq bebase léq dalem kitab Zabur, ‘Tuhan bemanik léq Junjungan Tiang: Melinggih léq sedi kanan Tiang, jangke Tiang piaq musuh-musuh Deside takluk léq Deside.’ Jari, lamun Daud nyebut Almasih nike ‘Junjungan Saq Mulie’, segerah Ie keturunan Daud?” Sewaktu dengan luwéq kenyeke dengahang Deside Isa bebaos, Ie bemanik léq pengiring-pengiring-Ne, “Onyaq-onyaq léq ahli-ahli Taurat. Ie pade seneng lampaq-lampaq kadu jubah saq bélo, dait seneng tehormatin léq peken-peken. Ie pade seneng melinggih léq kursi saq paling julu léq balé-balé ibadah dait seneng melinggih léq taoq saq paling tehormat léq taoq-taoq gawé. Ie pade nipu bebalu-bebalu dait ngerampas baléne. Dait jari seboq kejahatanne nike, ie pade bedo'e bélo-bélo! Pasti ie pade gen nerimaq hukuman saq beratan!” Léq Gedéng Allah, Deside Isa cingakin dengan-dengan sugih tamaq képéng ojok dalem kotaq persembahan. Ie cingakin éndah sopoq bebalu saq miskin gati, tamaq due képéng tembage. Beterus Deside Isa bemanik, “Tiang badaq side: Setetune bebalu niki namaqang luwéqan tebanding selapuq dengan saq lain. Séngaq ie pade selapuq ngebéng léman kelebihan dowéne. Laguq bebalu niki, timaq miskin gati, ie ngebéng selapuq saq araq léq ie, malahan saq ie perluang jari biaye idup.” Araq dengan-dengan saq ngeraos mengenai berembé solahne Gedéng Allah tepayas siq batu saq solah-solah dait siq barang-barang saq teaturang tipaq Allah. Beterus Deside Isa bemanik léq ie pade, “Laun araq waktune, selapuq saq side pade serioq niki gen terobohang; ndéq araq sopoq juaq batu léman bangunan-bangunan nike saq masih beronjoq maraq béngan!” Pengiring-pengiring Deside Isa metakén léq Deside Isa, “Bapaq Guru, piran selapuqne nike gen telaksane? Dait napi saq jari tandene bahwe sampun dateng wayene hal nike gen telaksane?” Deside Isa bemanik, “Pade waspade, ndaq jangke side pade tetipu. Luwéq dengan gen dateng kadu aran Tiang, dait bebase, ‘Tiang niki Ie!’ dait ‘Sampun wayene.’ Laguq ndaq side pade turut ie pade. Ndaq éndah takut lamun side pade dengah berite mengenai perang dait pemberontakan. Selapuqne nike harus telaksane juluq. Laguq nike ndéq berarti bahwe sampun wayene kiamat.” Beterus Deside Isa bebaos malik, “Bangse saq sopoq gen perang ngelawan bangse saq lain dait negare saq sopoq gen nyerbu negare saq lain. Léq mbé-mbé gen araq lindur saq beléq, kelapahan dait wabah penyakit. Gen araq hal-hal saq nakutang dait luar biase léq langit. Laguq sendéqman selapuqne telaksane, side pade gen tebau dait teaniaye. Side pade gen teadilin léq balé-balé ibadah dait tetamaq ojok dalem bui. Dait side pade gen teoros ojok arepan raje-raje dait penguase-penguase lantaran side pade pengiring Tiang. Nike kesempatande ngebéng kesaksian. Keranaq nike teguqang angende bahwe side pade ndéq gen kuatir mengenai napi saq harus side pade sampéang jari béle diriq. Tiang mésaq gen ngebéng side kemampuan ngeraos secare bijaksane, sehingge ndéq araq sopoq dengan juaq léman musuh-musuhde bau ngelawan atao nilas raosde. Side pade gen tehianat siq inaq amaqde, siq semeton-semetonde, siq kadang jarinde dait siq batur-baturde. Separo léman side pade gen tematéq siq ie pade. Side pade gen temeriq siq selapuq dengan lantaran side pade jari pengiring Tiang. Laguq timaq seuwat bulu saq araq léq ulunde ndéq gen telang. Lamun side pade tetep tahen dait sabar, side pade gen selamet.” “Lamun side pade serioq Yerusalem tekepung siq tentere, side pade gen nenaoq bahwe kote nike ndéq ngonéq malik gen temusnahang. Léq waktu nike dengan saq araq léq Yudea harus pelai ojok pegunungan. Ie pade saq araq léq dalem kote harus bilin kote, dait ie pade saq léq luah kote, ndaq tame ojok dalem kote. Séngaq jelo-jelo nike ‘Jelo-jelo Pembalesan’, adéq siq care nike telaksane napi saq sampun tetulis dalem Kitab Suci. Celake inaq-inaq saq kenyeke betian atao saq masih penyusuq bebéaqne léq waktu nike! Negeri niki gen ngalamin kesusahan saq beléq, dait murke tipaq bangse niki. Araq saq gen tematéq kadu kléwang, araq éndah saq gen tejauq jari tawanan ojok negeri-negeri dengan; dait bangse-bangse saq ndéq kenal kance Allah gen ngicaq-icaq Yerusalem jangke tutuq waktu saq sampun tetentuang Tuhan tipaq ie pade.” “Laun gen penggitan tande-tande léq jelo, bulan, dait bintang-bintang. Léq gumi bangse-bangse gen takut dait bingung hadepin suare angin dait suare umbak saq beléq. Manusie gen takut gati hadepin napi saq gen telaksane léq seantéro dunie niki, séngaq selapuq kuase saq araq léq langit jari biur lantur. Léq waktu nike Bije Manusie gen rauh léq dalem awan siq kuase dait kemuliean saq beléq. Lamun hal-hal nike mulai telaksane, pade ures dait petitoqang muende, séngaq ndéq ngonéq malik side pade gen teselametang.” Beterus Deside Isa nyeriteang tipaq ie pade perumpamean niki, manik-Ne, “Pade perhatiang lolo are dait selapuq lolo saq lain. Lamun pusuk-pusukne mulai penggitan, side pade nenaoq bahwe sampun rapet musim panas. Maraq nike éndah lamun side pade serioq hal-hal nike telaksane, side pade gen nenaoq bahwe Kerajaan Allah sampun rapet. Tiang badaq side: Setetune hal-hal nike gen telaksane sendéqman dengan-dengan saq idup mangkin niki ninggal selapuqne. Langit dait gumi gen musnah, laguq manik Tiang gen kekel selaéq-laéqne.” “Pade jagaq diriqde, ndaq jangke side pade répot gati siq beseneng-seneng jangke liwat bates dait nginem ineman keras, atao mikirang gati soal-soal idupde, sehingge side pade ndéq siep sewaktu jelo Tuhan nike selung-selung dateng. Séngaq Jelo nike gen dateng maraq perangkep tipaq selapuq dengan léq gumi niki. Pade bejage-jage dait tetep bedo'e adéq side pade luput léman selapuq hal saq gen telaksane dait side pade bau ngadep Bije Manusie.” Deside Isa ngajahang léq Gedéng Allah waktu kenjelo, dait kelemne Ie lumbar ojok Bukit Zaitun dait mererepan léq derike. Sebilang kelémaq selapuq dengan dateng ojok Gedéng Allah jari dengahang pengajahan Deside Isa. Perayaan Ruti Ndéq Beragi saq tesebut Paskah sampun rapet. Imam-imam kepale dait ahli-ahli Taurat kenyeke boyaq langan jari nyematéq Deside Isa secare tedoq-tedoq, séngaq ie pade takut léq dengan luwéq. Beterus Belis tamein Yudas saq tesebut éndah Iskariot, salaq sopoq léman kedue olas pengiring Deside Isa. Beterus Yudas lumbar dait berunding kance imam-imam kepale dait kepale-kepale pengawal Gedéng Allah mengenai berembé entane adéqne bau nyerahang Deside Isa tipaq ie pade. Ie pade seneng gati dait bejanji gen ngebéng képéng tipaq Yudas. Yudas éndah setuju, dait mulai boyaq kesempatan jari nyerahang Deside Isa tipaq ie pade ndéq tetaoq siq dengan luwéq. Jelo Perayaan Ruti Ndéq Beragi sampun dateng. Nike jelone dombe jari keloran Paskah tesembeléh. Make Deside Isa ngemanikang Petrus dait Yahya, “Lumbar sedieang ite keloran Paskah.” Ie pade metakén, “Léq mbé taoq saq Pelungguh kayunang adéq tiang pade siepang?” Jawab Deside Isa, “Léq waktu side pade tame ojok kote, side pade gen bedait kance sopoq dengan mame saq kenyeke jauq cérét berisi aiq. Turut ie ojok balé saq ie tamein, dait badaq épén balé nike: Guru bemanik, ‘Léq mbé taoq Tiang kance pengiring-pengiring Tiang ngelorang keloran Paskah?’ Dengan nike gen petitoq side sopoq kamar beléq saq araq léq atas lengkap kance perabotanne. Sidieang selapuqne léq derike.” Make Petrus dait Yahya lumbar, terus daitne selapuqne tepat maraq saq sampun temanikang siq Deside Isa. Ie pade sedieang keloran Paskah nike. Sewaktu sampun wayene ngelorang keloran Paskah nike, Deside Isa melinggih teiring pengiring-pengiring-Ne léq taoq perjamuan. Terus Ie bemanik léq ie pade, “Tiang melét gati ngelor keloran Paskah niki bareng kance side pade, sendéqman Tiang menderite! Tiang badaq side: Tiang ndéq gen ngelorang niki malik jangke arti perjamuan niki tenyatayang dalem Kerajaan Allah.” Sesampun nike, Deside Isa ngangkat cawan saq berisi anggur nike, terus ngucapang do'e syukur tipaq Allah, beterus bemanik, “Silaq bait niki, dait bagi-bagiang; Tiang badaq side: Mulai mangkin niki Tiang ndéq gen nginem anggur niki malik jangke Kerajaan Allah rauh.” Sesampun nike, Deside Isa bait ruti. Dait sesampun ngucapang do'e syukur, Ie peleng-peleng ruti nike kadu gading-Ne, terus ngicanin tipaq ie pade, dait bemanik, “Niki ragen Tiang saq teserahang umaq side pade. Laksaneang niki jari nginget Tiang.” Maraq nike éndah sesampun medaran, Ie ngicanin cawan saq berisi anggur tipaq ie pade dait bemanik, “Cawan niki perjanjian baru siq daraq Tiang, daraq saq tetumpahang tipaq side pade.” “Laguq serioq! Dengan saq behianat léq Tiang araq léq deriki bareng Tiang! Bije Manusie mule gen ninggal maraq saq sampun tetentuang Allah; laguq celake dengan saq behianat léq Ie!” Make ie pade mulai saling ketuan sopoq kance saq lain, sai léq antare ie pade saq gen ngelaksaneang hal nike. Léq antare pengiring-pengiring Deside Isa araq pegejuhan mengenai sai saq harus teanggep paling beléq léq antare ie pade. Deside Isa bemanik léq ie pade, “Raje-raje bangse-bangse saq ndéq kenal kance Allah perlakuang rakyatne semélé-mélé dait penguase-penguasene tesebut ‘Pelindung Rakyat’. Laguq side pade ndéq kanggo maraq nike. Sebalikne, dengan saq paling beléq léq antare side harus jari maraq saq paling kodéq, dait pemimpin-pemimpin harus jari maraq pelayan. Sai saq beléqan: Dengan saq tokol bekelor léq méje, atao dengan saq ngelayanin ie? Pasti dengan saq tokol nike. Laguq Tiang araq léq antare side pade jari pelayan. Side pade tetep bareng-bareng kance Tiang léq dalem selapuq cobe saq Tiang alamin. Tiang nentuang hak-hak Kerajaan tipaq side, pade maraq Bapa Tiang nentuang hak-hak Kerajaan tipaq Tiang, adéq éraq side bekelor dait nginem seméje kance Tiang léq dalem Kerajaan Tiang dait side gen tokol léq atas tahte jari hakimin kedue olas suku Israel.” “Simon, Simon, dengahang! Belis sampun tebéng ijin jari nguji side pade; maraq gandum tekelin léman léndongne sehingge saq solah tekelin léman saq lengé. Laguq Tiang sampun do'eang side, Simon, adéq imande ndéq luntur. Dait lamun side sampun tulak tipaq Tiang, side harus teguqang iman semeton-semetonde.” Jawab Petrus, “Junjungan Saq Mulie, tiang réde tame bui dait maté bareng-bareng kance Pelungguh!” Laguq Deside Isa bemanik, “Tiang badaq side, Petrus, sendéqman manuk ngungkung jelo niki, side telu kali nilas Tiang.” Sesampun nike Deside Isa bemanik tipaq ie pade, “Laéq sewaktu Tiang ngutus side pade dait ndéq ngijinang side pade jauq dompét, kantong atao sepatu, napi side pade kekurangan?” “Nénten!” jawab ie pade. Terus Deside Isa bemanik léq ie pade, “Laguq mangkin, sai bedowé dompét atao kantong, harus tejauq; dait sai ndéq bedowé kléwang, harus jual jubahne jari beli kléwang. Tiang badaq side, bahwe ayat Kitab Suci saq tetulis maraq niki, ‘Ie tame itungan léq antare dengan-dengan jahat,’ harus telaksane léq diriq Tiang. Séngaq napi saq tetulis léq dalem Kitab Suci mengenai Tiang kenyeke telaksane mangkin niki.” Pengiring-pengiring Deside Isa matur, “Junjungan Saq Mulie silaq cingakin, léq deriki araq due kléwang.” “Nike sampun cukup!” jawab Deside Isa. Deside Isa bilin kote dait maraq biasene lumbar ojok Bukit Zaitun, dait pengiring-pengiring-Ne lumbar éndah ngiring Ie. Sewaktu rauh léq derike, Ie bemanik léq ie pade, “Pade bedo'e adéq side pade ndéq ngalamin cobe.” Beterus Deside Isa lumbar jaoqan sekediq léman ie pade, kire-kire sejaoq peléwasan batu, terus sujut dait bedo'e, “Bapa, lamun bau, jaoqang léman Tiang cawan penderitean saq harus Tiang alamin niki. Laguq sampunang menurut keméléq Tiang, laguq menurut pekayunan Deside mésaq.” [ Sopoq malaékat rauh tipaq Deside Isa jari ngicanin Ie kekuatan. Deside Isa menderite gati secare batin sehingge Ie sayan pacu-pacu bedo'e. Daur-Ne maraq ruen daraq ngitik ojok tanaq.] Sesampun tutuq bedo'e, Deside Isa tulak malik ojok pengiring-pengiring-Ne. Dait-Ne pengiring-pengiring-Ne kenyeke tindoq séngaq sedih gati. Terus Ie bemanik léq ie pade, “Kembéq side pade tindoq? Pade ures dait bedo'e adéq side pade ndéq ngalamin cobe.” Léq waktu Deside Isa masih bebaos, dateng serombongan dengan. Ie pade tepimpin siq Yudas, salaq sopoq pengiring Deside Isa. Beterus Yudas ngerapetin Deside Isa jari siduk Ie. Laguq Deside Isa bemanik léq ie, “Yudas, napi siq sidukan nike side mélé behianat léq Bije Manusie?” Sewaktu pengiring-pengiring Deside Isa saq araq léq derike serioq napi saq gen telaksane, ie pade matur, “Junjungan Saq Mulie, tiang pade serang doang ie pade kadu kléwang!” Terus salaq sopoq dengan léman ie pade ngerantek pelayan Imam Agung kadu kléwang jangke pegat kentokne saq kanan. Laguq Deside Isa bemanik, “Engkahang!” Terus Ie jamah kentok dengan nike dait nyelahang ie. Beterus Deside Isa bemanik léq imam-imam kepale dait kepale-kepale pengawal Gedéng Allah, serte pemimpin-pemimpin Yahudi saq dateng ojok derike jari bau Ie, “Napi Tiang niki perampok, jangke side pade dateng jauq kléwang dait gegitik jari bau Tiang? Sebilang jelo Tiang araq bareng side pade léq Gedéng Allah, side pade ndéq bau Tiang. Laguq niki waktune side pade ngelaksaneang, léq waktu penguase saq nguasein peteng negel kekuasean.” Ie pade bau Deside Isa dait jauqne ojok gedéng Imam Agung. Petrus turut mudi léman jaoq. Léq tengaq-tengaq leléah gedéng nike, dengan sampun penyalaq api dait ie pade tokol keliningin api nike. Petrus éndah tokol léq antare ie pade. Salaq sopoq pelayan nine serioq Petrus tokol léq dékét api nike; ie perhatiang Petrus, beterus bebase, “Onéq dengan niki éndah araq bareng-bareng Deside Isa!” Laguq Petrus nilas. Ie bebase, “Tiang tetu-tetu ndéq kenal dengan nike!” Ndéq ngonéq sesampun nike, araq dengan lain serioq Petrus dait bebase, “Side éndah salaq sopoq léman ie pade!” Laguq Petrus bejawab, “Ndéq, ndéqne tiang!” Kire-kire sejam sesampun nike, araq dengan lain malik saq teges entane ngeraos, “Mule dengan niki pengiring Deside Isa, séngaq ie éndah dengan Galilea!” Laguq Petrus bejawab, “Tiang ndéq nenaoq, napi maksut side!” Waktu nike éndah, sewaktu Petrus masih ngeraos, manuk ngungkung. Deside Isa ngéngat andang Petrus. Beterus Petrus inget Junjungan Saq Mulie sampun bemanik léq ie, “Sendéqman manuk ngungkung jelo niki, side telu kali nilas Tiang.” Terus Petrus sugul léman derike dait nangis éroq aséq. Dengan-dengan saq kenyeke jagaq Deside Isa, pade ngoloq dait ngempuk Ie. Ie pade tungkem penjarupan-Ne dait beketuan léq Ie, “Cobaq badéq sai saq ngempuk Side?” Luwéq éndah raos ie pade jari menghine Deside Isa. Kelémaqne, pemimpin-pemimpin Yahudi, imam-imam kepale, dait ahli-ahli Taurat bekumpul, terus Deside Isa tejauq ojok arepan Mahkamah Agame ie pade. Ie pade bebase léq Deside Isa, “Badaq tiang pade, napi Side niki Almasih?” Jawab Deside Isa, “Lamun Tiang badaq side, side pade tetep ndéq gen percaye. Dait lamun Tiang beketuan léq side, side pade tetep ndéq gen bejawab. Laguq mulai mangkin, Bije Manusie gen melinggih léq sedi kanan Allah Saq Mahekuase.” Ie pade selapuq bebase, “Lamun maraq nike, Side niki Bije saq asalne léman Allah?” Jawab Deside Isa, “Maraq nike basen side pade.” Make ie pade bebase, “Ndéq perlu malik saksi! Ite sampun dengah léman cangkem-Ne mésaq!” Selapuq dengan saq araq léq sidang nike nganjeng, terus Deside Isa tejauq ngadep Pilatus. Léq derike ie pade mulai tuduh Deside Isa, basen ie pade, “Tiang pade ndait Dengan niki nyesatang rakyat. Ie balaq dengan bayah pajek léq Kaisar, séngaq Ie badaqang diriqne Almasih, sopoq Raje.” Terus Pilatus metakén léq Deside Isa, “Napi tetu Pelungguh raje dengan Yahudi?” Jawab Deside Isa, “Maraq nike basen Pelungguh.” Make Pilatus bebase léq imam-imam kepale dait dengan luwéq nike, “Tiang ndéq ndait sopoq juaq kesalaqan léq Dengan niki.” Laguq ie pade sayan maksaq dait bebase, “Siq pengajahan-Ne Ie hasut dengan léq selapuq Yudea; penembéqne léq Galilea dait mangkin sampun dateng deriki.” Sewaktu Pilatus pirengang hal nike, ie beketuan, “Napi Dengan niki dengan Galilea?” Dait sewaktu ie nenaoq bahwe Deside Isa asalne léman daérah kekuasean Herodes, Pilatus préntah dengan adéqne jauq Deside Isa ojok Herodes, saq waktu nike araq éndah léq Yerusalem. Herodes seneng gati waktu nyereminang Deside Isa, séngaq sampun ngonéq gati ie pireng mengenai Deside Isa, dait melét sereminang Deside Isa. Herodes beharep mauq nyaksiang Deside Isa piaq muqjizat. Keranaq nike Herodes beketuan luwéq hal léq Deside Isa, laguq Deside Isa nénten bejawab napi-napi. Imam-imam kepale dait ahli-ahli Taurat nganjeng dait nyampéang tuduhan-tuduhan saq berat tipaq Deside Isa. Make Herodes dait prajurit-prajuritne ngoloq-oloq dait menghine Deside Isa, terus kaduangne jubah kehormatan, dait jauq Ie tulak ojok Pilatus. Léq jelo nike éndah Herodes dait Pilatus, saq sendéqmanne bemusuhan jari besahabat. Pilatus ngumpulang imam-imam kepale, pemimpin-pemimpin dait rakyat, dait bebase léq ie pade, “Side pade jauq dengan niki ojok tiang dait paran Ie nyesatang dengan-dengan lain. Mangkin léq julu side pade sampun tiang periksaq Ie, dait selapuq kesalaqan saq side pade tuduhang tipaq Ie ndéq araq saq tiang ndait léq Ie. Maraq nike éndah pendapet Herodes, séngaq ie éndah sampun suruq dengan jauq Deside Isa nike tulak ojok tiang pade. Ndéq araq sopoq juaq kesalaqan-Ne saq miaq Ie patut tehukum maté. Keranaq nike, tiang gen pecut Ie dait bébasang Ie.” [ Sebilang perayaan Paskah, Pilatus bébasang sopoq tahenan tipaq rakyat.] Selapuq dengan saq bekumpul léq derike nyurak, “Matéq Ie! Bébasang Barabas tipaq tiang pade!” ( Barabas tebui lantaran miaq keributan léq dalem kote dait nyematéq dengan.) Pilatus kayun bébasang Deside Isa, keranaq nike ie bebase karing sekali tipaq dengan luwéq nike. Laguq ie pade nyurak, “Pakuq Ie léq kayuq salib! Pakuq Ie léq kayuq salib!” Terus saq ketelu kaline Pilatus bebase léq ie pade, “Laguq pegawéan jahat napi saq sampun Ie piaq? Tiang ndéq ndait sopoq kesalaqan léq Ie saq miaq Ie patut tehukum maté. Tiang gen pecut Ie, terus gen tiang bébasang Ie!” Laguq ie pade tetep nyurak sekuat-kuatne bahwe Deside Isa harus tepakuq léq kayuq salib. Dait ahirne surakan ie pade menang. Beterus Pilatus mutusang adéq tuntutan ie pade tekabulang, dait bébasangne dengan saq tebui lantaran pemberontakan dait nyematéq dengan pade maraq saq tetuntut siq ie pade. Terus Deside Isa teserahang tipaq ie pade jari teperlakuang semélé ie pade. Beterus Deside Isa tejauq siq ie pade. Léq tengaq kelampanne, ie pade bedait kance sopoq dengan aranne Simon, saq asalne léman Kirene, saq kenyeke tame kote. Ie pade paksaq Simon ngelémbah kayuq salib nike dait lampaq léq mudi Deside Isa. Luwéq dengan ngiring Deside Isa; léq antarene araq éndah dengan-dengan nine. Dengan-dengan nine nike ngerung dait tangisin Deside Isa. Laguq Deside Isa ngéngat andang ie pade dait bemanik, “Hai, putri-putri Yerusalem! Ndaq tangisin Tiang. Laguq tangisin diriqde mésaq dait bije-bijende. Séngaq gen dateng waktune dengan gen bebase, ‘Aget gati dengan-dengan nine saq ndéq uwah betian, saq ndéq uwah bedowé bije dait ndéq uwah penyusuq bebéaq!’ Léq waktu nike éndah dengan gen bebase tipaq gunung-gunung, ‘Silaq ndet tiang pade!’ Dait tipaq bukit-bukit, ‘Silaq tumput tiang pade!’ Séngaq lamun léq kayuq saq masih idup, dengan sampun piaq maraq niki, lebih-lebih saq gen ie pade piaq léq kayuq saq gero!” Araq éndah due dengan lain -- deduaqne dengan jahat -- saq ie pade jauq jari tehukum maté bareng kance Deside Isa. Ssesampun dateng léq taoq saq tearanin, “Jerangkong”, ie pade pakuq Deside Isa léq kayuq salib bareng-bareng kance due dengan jahat nike -- sopoq léq sedi kanan dait sopoqne malik léq sedi kiri-Ne. Beterus Deside Isa bedo'e, “Bapa, ampunin ie pade! Séngaq ie pade ndéq ngerti napi saq ie pade piaq.” Ie pade bagi kuace Deside Isa kadu undian. Dengan luwéq nganjeng léq derike sambil manto, léq waktu nike éndah pemimpin-pemimpin Yahudi ngoloq-oloq Deside Isa, dait bebase, “Ie sampun selametang dengan lain; dait mangkin alurang Ie selametang diriq-Ne mésaq. Tekan Ie Almasih, saq tepiléq siq Allah?” Prajurit-prajurit éndah ngoloq Deside Isa. Ie pade dateng dait ngebéng Deside Isa aiq anggur saq pedis dait bebase, “Lamun Side raje dengan Yahudi, selametang diriq-De.” Léq bagian atas kayuq salib Deside Isa, tetoloq tulisan: “Niki Raje Dengan Yahudi.” Salaq sopoq penjahat saq bareng tepakuq léq kayuq salib menghine Deside Isa. Ie bebase, “Tekan Side Almasih? Nah, selametang diriq-De dait tiang pade!” Laguq penjahat saq sopoqne malik peringet baturne nike, “Napi side ndéq takut léq Allah séngaq side éndah tehukum maté pade maraq Ie. Hukumante kance due mule setimpal kance perbuatante, laguq Ie niki, ndéq araq perbuatan-Ne saq salaq!” Terus ie bebase, “Deside Isa, iling léq tiang lamun Pelungguh rauh jari Raje!” Manik Deside Isa, “Tiang badaq side, setetune jelo niki éndah side gen bareng kance Tiang léq Pirdaus.” Kire-kire jam due olas tengari, ndéq araq sinar jelo, dait selapuq negeri nike jari peteng gati jangke jam telu kebian. Kelambu saq araq léq dalem Gedéng Allah, soék jari due. Beterus Deside Isa bekuih keras-keras, “Bapa! Léq gading Deside Tiang serahang nyawe Tiang!” Sesampun bemanik maraq nike, Ie nyerahang nyawe-Ne. Waktu kepale pasukan serioq hal nike, ie mulieang Allah. Terus ie bebase, “Setetune Deside Isa ndéq salaq!” Dengan luwéq saq dateng manto léq derike, serioq selapuq saq telaksane. Beterus selapuqne pade uléq dait nyesel gati angenne. Dait selapuq kenalan Deside Isa lantong dengan-dengan nine saq ngiring Ie léman Galilea, nganjeng léman jaoq dait serioq selapuqne nike. Yusup niki lumbar ngadep Pilatus dait tunas adéq jenazah Deside Isa teserahang léq ie. Terus ie turunang jenazah Deside Isa léman kayuq salib, dait bungkusne kadu kain lénen alus saq putéq. Sesampun nike, toloqne jenazah Deside Isa léq makam saq tepiaq léq dalem bukit batu -- makam nike ndéq uwah tekadu. Jelo nike jelo persiepan; séngaq jelo Sabat gen mulai. Dengan-dengan nine saq ngiring Deside Isa léman Galilea turut Yusup dait serioq makam nike. Ie pade serioq éndah berembé entan jenazah Deside Isa tetoloq léq dalem makam. Terus ie pade uléq dait siepang ramuan-ramuan dait minyak sengéh jari minyakin jenazah Deside Isa. Léq jelo Sabat, ie pade mentelah begawéan jari taat léq Hukum Taurat. Léq jelo Ahad, kelémaq aru gati, dengan-dengan nine nike lumbar ojok makam jauq ramuan-ramuan saq sampun ie pade siepang. Léq makam, ie pade ndait batu pengimpet lawang makam nike sampun tealih. Terus ie pade tame ojok dalem makam nike, laguq ndéq araq daitne jenazah Junjungan Saq Mulie Deside Isa léq derike. Sewaktu ie pade kenyeke nganjeng léq derike dait bingung mikirang hal nike, selung-selung araq due dengan kadu kelambi saq putéq ngempor dateng ngerapetin ie pade. Ie pade takut gati jangke ie pade nunduk, laguq kedue dengan nike bebase léq ie pade, “Kembéq side pade boyaq dengan saq idup léq taoq dengan ninggal? Ie ndéq araq léq deriki, Ie sampun idup malik! Ingetang napi saq Ie manikang léq side sewaktu Ie masih léq Galilea, bahwe, ‘Bije Manusie harus teserahang ojok ime dengan-dengan bedose, terus tepakuq léq kayuq salib, dait léq jelo saq ketelu Ie gen idup malik.’ ” Beterus dengan-dengan nine nike inget napi saq sampun temanikang siq Deside Isa. Sesampun tulak léman makam nike, ie pade tuturang selapuq peristiwe nike léq kesolas pengiring-pengiring Deside Isa dait selapuq pengiring saq lain. Dengan-dengan nine saq nyampéang selapuq hal nike tipaq rasul-rasul aranne: Mariam Magdalena, Yohana dait Mariam inaqne Yakub dait dengan-dengan nine lainne saq bareng kance ie pade. Laguq rasul-rasul nike paran dengan-dengan nine nike cume nyeriteang saq ndéq-ndéq. Ie pade ndéq percaye siq cerite dengan-dengan nine nike. Timaq maraq nike, Petrus ures dait pelai ojok makam. Waktu ie nidok ojok dalem makam, serioqne cume kain putéq léq derike. Petrus bengaq gati, terus uléq dait beketuan-tuan dalem angenne napi setetune saq sampun telaksane. Léq jelo nike éndah, due pengiring Deside Isa kenyeke bekelampan ojok sopoq dése aranne Emaus, kire-kire solas kilo jaoqne léman Yerusalem. Sambil lampaq ie pade ngeraosang selapuq peristiwe saq sampun telaksane nike. Sewaktu ie pade ngeraos dait saling tukah pikiran, Deside Isa rauh dait bareng lampaq kance ie pade. Ie pade serioq Deside Isa, laguq araq sopoq hal saq miaq ie pade ndéq tandaq Deside Isa. Beterus Deside Isa bemanik, “Napi saq side pade raosang léq tengaq kelampan niki?” Ie pade mentelah, dait muene sedih. Terus salaq sopoq léq antare ie pade aranne Kleopas, metakén léq Deside Isa, “Napi Side sopoq-sopoqne dengan pendateng léq Yerusalem, saq ndéq nenaoq peristiwe saq telaksane baruq-baruq niki?” “Peristiwe napi nike?” manik Deside Isa. “Peristiwe mengenai Deside Isa, dengan léman Nazaret nike,” jawab ie pade. “Ie nabi. Ucapan dait perbuatan-Ne penoq siq kuase léq arepan Allah, dait léq arepan selapuq bangse. Imam-imam kepale dait pemimpin-pemimpin bangsente nyerahang Ie jari tehukum maté, terus Ie tepakuq léq kayuq salib! Padahal tiang pade beharep Ie saq gen bébasang Israel! Dait jelo niki jelo saq ketelu léman peristiwe nike telaksane. Dait dengan-dengan nine léq antare tiang pade sampun piaq tiang pade tinjot: Kelémaq aru gati ie pade lumbar ojok makam, laguq ie pade ndéq ndait jenazah Deside Isa léq derike. Beterus ie pade tulak dait bebadaq léq tiang pade bahwe ie pade serioq malaékat, dait malaékat-malaékat nike bebase bahwe Deside Isa idup malik. Araq batur-batur tiang saq lumbar ojok makam, terus daitne napi saq teceriteang siq dengan-dengan nine nike mule tetu, laguq ie pade ndéq serioq Deside Isa.” Beterus Deside Isa bemanik léq ie pade, “Side pade mule bodo! Ngonéq gati side pade percaye napi saq sampun tesampéang siq nabi-nabi! Tekan Almasih harus ngalamin juluq penderitean nike, jari tame ojok dalem kemuliean-Ne?” Beterus Deside Isa jelasang léq ie pade napi saq tetulis léq dalem selapuq Kitab Suci mengenai diriq-Ne, mulai léman kitab Musa jangke kitab nabi-nabi. Sewaktu ie pade gen rauh léq dése saq ie pade laiq, Deside Isa maraqne gen bemargi terus, laguq ie pade segah Deside Isa dait matur, “Silaq mererepan léq deriki, mangkin sampun serep jelo, dait karing seberaq peteng.” Beterus Deside Isa tame dait mererepan léq taoq ie pade. Sewaktu Deside Isa melinggih medaran kance ie pade, Ie bait ruti, terus ngucapang syukur tipaq Allah, dait peleng-peleng-Ne ruti nike kadu gading-Ne, terus ngicanin ie pade. Beterus ie pade sadar bahwe nike Deside Isa. Laguq Deside Isa telang léman tengaq-tengaq ie pade. Ie pade bebase sopoq kance saq lain, “Onéq kan ite besemanget gati, sewaktu Ie bebaos kance ite léq tengaq kelampan, dait jelasang ite isi Kitab Suci?” Waktu nike éndah ie pade nganjeng terus tulak ojok Yerusalem. Léq derike daitne solas pengiring Deside Isa kenyeke bekumpul bareng saq lain. Ie pade saq araq léq Yerusalem nike bebase léq deduaqne, “Mule tetu Junjungan Saq Mulie sampun idup malik! Ie sampun nyatayang diriq-Ne léq Simon!” Beterus kedue pengiring Deside Isa saq baruq dateng nike nyeriteang pengalaman ie pade léq tengaq kelampanne, dait berembé entan ie pade nandaq Deside Isa waktu Ie peleng-peleng ruti. Léq waktu ie pade masih betutur, selung-selung Deside Isa araq léq tengaq-tengaq ie pade, dait ngucapang salam tipaq ie pade. Ie pade tinjot dait takut gati, séngaq ie pade paran serioq hantu. Laguq Deside Isa bemanik, “Kembéq side pade takut? Kembéq side pade jari bimbang? Serioq imen Tiang dait naén Tiang. Tiang niki Isa. Silaq demak dait perhatiang, séngaq hantu ndéq bedowé isi atao tolang maraq saq side pade serioq léq Tiang.” Sambil bemanik maraq nike Deside Isa petitoqang ie pade gading-Ne dait cokor-Ne. Dait sewaktu ie pade ndéqman percaye lantaran seneng gati dait bengaq, Deside Isa bemanik léq ie pade, “Napi léq deriki side pade bedowé keloran?” Ie pade aturin Deside Isa sepeleng empaq goréng. Deside Isa bait empaq nike, terus daharangne léq julu ie pade. Sesampun nike, Deside Isa bemanik malik léq ie pade, “Hal niki saq sampun Tiang sampéang léq side pade sewaktu Tiang masih bareng kance side pade: Bahwe selapuq hal saq tetulis mengenai Tiang léq dalem Kitab Taurat Musa, Kitab Nabi-nabi dait léq Kitab Zabur, harus telaksane.” Beterus Deside Isa bukaq pikiran ie pade, sehingge ie pade iniq ngerti maksut Kitab Suci. Deside Isa bemanik malik léq ie pade, “Léq dalem Kitab Suci tetulis bahwe Almasih harus menderite, dait idup malik léman tengaq-tengaq dengan ninggal léq jelo saq ketelu. Dait dalem peséngan Almasih nike éndah harus tekabarang tipaq selapuq bangse mengenai pertobatan dait pengampunan dose. Berite nike harus tekabarang mulai léman Yerusalem. Side pade jari saksi léman selapuq hal nike. Dait Tiang mésaq gen ngirimang side pade napi saq sampun tejanjiqang siq Bapa. Laguq side pade harus tetep ngantih léq kote niki jangke kuase léman Allah turun kuasein side pade.” Sesampun nike Deside Isa jauq ie pade ojok luah kote jangke rapet Betania. Léq derike Deside Isa ngangkat gading-Ne, terus ngicanin ie pade berkah. Sewaktu Deside Isa ngelaksaneang hal nike, Ie kerangkatan ojok sorge, terus bekelin kance ie pade. Ie pade sujut nyembah Deside Isa, terus tulak ojok Yerusalem siq angen saq seneng gati, dait ie pade tetep araq léq Gedéng Allah dait mulieang Allah. Léq penembéqne sendéqman dunie tecipteang, Manik nike sampun araq. Manik nike araq bareng Allah, dait Manik nike Allah. Léman penembéqne Ie araq bareng Allah. Selapuqne tejariang siq Ie, dait léman selapuq saq araq, ndéq araq sopoq juaq saq tejariang, lamun nénten siq Ie. Léq dalem-Ne araq idup, dait idup nike terang manusie. Terang nike besinar léq tengaq peteng, dait peteng nike ndéq bau nguasein terang nike. Rauh dengan saq teutus siq Allah, aranne Yahya. Ie rauh jari saksi mengenai terang nike, adéq langan ie selapuq dengan jari percaye. Ie ndéqne terang nike, laguq ie harus besaksi mengenai terang nike. Terang saq sejati, saq menahin selapuq manusie, kenyeke rauh ojok dunie. Ie araq léq dunie, malahan dunie tecipteang siq Ie, laguq dunie ndéq kenal kance Ie. Ie rauh ojok dowé-Ne mésaq laguq ie pade ndéq nerimaq Ie. Laguq tipaq dengan-dengan saq nerimaq Ie, Ie icanin dengan-dengan nike kuase jari bije-bije dowén Allah, ie pade saq percaye léq peséngan-Ne. Ie pade tebijeang ndéqne léman daraq atao keméléq manusie, ndéq éndah léman keméléq dengan mame, laguq léman Allah. Manik nike sampun jari manusie, beterus Ie araq léq antare ite, dait ite sampun serioq kemuliean-Ne, kemuliean saq teicanin tipaq Ie sebagé Bije Nunggal saq asalne léman Bapa, penoq rahmat dait kebenaran. Yahya rauh jari saksi-Ne, ie beriteang: “Niki Ie saq tiang maksut: Ie saq rauh mudian léman tiang beléqan léman tiang, séngaq Ie sampun araq sendéqman tiang araq.” Séngaq léman kesempurnean-Ne, ite selapuq sampun nerimaq rahmat demi rahmat. Hukum Taurat ite terimaq léman Musa. Laguq rahmat dait kebenaran rauh langan Deside Isa Almasih. Ndéq araq saq sampun serioq Allah, laguq Bije Nunggal saq asalne léman Bapa, saq araq léq iwean Bapa. Ie saq nyatayang Bapa tipaq ite. Niki kesaksian Yahya sewaktu pare penguase Yahudi léq Yerusalem suruq imam-imam dait dengan-dengan Lewi lumbar beketuan ojok Yahya, “Sai pelungguh niki?” Yahya ngaku secare terus-terang, “Tiang niki nénten Almasih.” “Lamun maraq nike, pelungguh sai?” Ie pade beketuan. “Napi pelungguh Elia?” “Nénten,” jawab Yahya. “Napi pelungguh nabi saq gen rauh?” “Nénten,” jawab Yahya. Ie pade bebase, “Lamun maraq nike, silaq badaq tiang pade sai pelungguh niki?” Adéq tiang pade bau nyampéang jawaban tipaq dengan-dengan saq ngutus tiang pade. Menurut pelungguh sai setetune pelungguh niki?” Jawab Yahya, “Tiang niki dengan saq bekuih-kuih léq padang gurun, ‘Rateang langan Tuhan.’ Maraq saq sampun tesampéang siq Nabi Yesaya.” Léq antare dengan-dengan saq teutus araq dengan Parisi, ie pade beketuan, “Lamun pelungguh nénten Almasih, nénten Elia, nénten éndah nabi saq gen rauh, kembéq pelungguh baptis dengan?” Jawab Yahya, “Tiang baptis dengan kadu aiq. Laguq léq tengaq-tengaq side pade araq Dengan saq nénten side pade kenal. Ie rauh mudian léman tiang, laguq jari lekaq tali sepatu-Ne doang tiang ndéq patut.” Selapuqne nike telaksane léq Betania, léq itoqan Kokoq Yordan taoq Yahya baptis dengan. Léq jelo jemaqne, Yahya serioq Deside Isa rauh tipaq ie. Terus Yahya bebase, “Pade serioq Anak Dombe Allah saq ngapus dose dunie. Ie saq tiang maksut sewaktu tiang nyampéang: Mudian léman tiang gen rauh sopoq dengan saq beléqan léman tiang, séngaq Ie sampun araq sendéqman tiang. Sendéqmanne, tiang ndéq nenaoq sai Ie nike. Laguq jari hal nike tiang dateng dait baptis dengan kadu aiq, adéq Ie tenyatayang tipaq bangse Israel.” Yahya éndah ngebéng kesaksian niki, “Tiang serioq Roh Allah turun léman langit maraq ruen kedit dare, beterus meneng léq atas-Ne. Léq waktu nike tiang ndéqman nenaoq sai Ie. Laguq Allah saq manikang tiang baptis dengan kadu aiq sampun bemanik léq tiang, ‘Lamun side serioq Roh Allah turun, beterus meneng léq atas sopoq dengan, Ie saq gen baptis dengan kadu Roh Suci.’ Tiang sampun serioq mésaq,” basen Yahya, “dait tiang ngebéng kesaksian bahwe Ie Bije saq asalne léman Allah.” Léq jelo jemaqne Yahya araq léq taoq nike malik kance due pengiringne. Sewaktu ie serioq Deside Isa bemargi, ie bebase, “Silaq pade serioq! Nike Anak Dombe Allah.” Kedue pengiring nike dengah basen Yahya, beterus lumbar ngiring Deside Isa. Deside Isa ngéngat andang mudi, dait cingakin ie pade kenyeke turut Ie. Deside Isa beketuan, “Napi saq side pade boyaq?” Jawab ie pade, “Rabi (artine: Guru), léq mbé Pelungguh meneng?” “Silaq serioq mésaq,” manik Deside Isa. Ie pade lumbar kance Deside Isa dait serioq léq mbé gedéng-Ne. Waktu nike jam empat kebian. Jelo nike ie pade ndot ngiring Deside Isa. Salaq sopoq léman kedue dengan saq sampun dengahang napi saq tesampéang Yahya, beterus lumbar ngiring Deside Isa, aranne Andreas, semetonne Simon Petrus. Becat-becat Andreas boyaq Simon, semetonne, dait bebase léq ie, “Tiang pade sampun bedait kance Mesias!” (Mesias pade artine kance Almasih.) Andreas ngatong Simon ojok Deside Isa. Deside Isa merhatiang Simon, terus bemanik, “Side Simon, bije Yahya. Side gen tearanin Kepas (artine: Petrus).” Léq jelo jemaqne Deside Isa mutusang gen lumbar ojok Galilea. Ie bedait kance Pilipus, dait bemanik léq ie, “Silaq turut Tiang!” Pilipus asalne léman Betsaida, taoqne ndot Andreas dait Petrus. Pilipus bedait kance Natanael dait bebase léq ie, “Tiang pade sampun ndait Dengan saq tesebut siq Musa léq dalem Kitab Suci Taurat, dait saq teberiteang siq nabi-nabi. Ie Deside Isa bije Yusup léman Nazaret.” Laguq jawab Natanael, “Segerah iniq hal saq solah dateng léman Nazaret?” “Silaq serioq mésaq!” basen Pilipus. Deside Isa cingakin Natanael dateng, terus bemanik mengenai ie, “Serioq niki dengan Israel sejati. Ndéq araq saq palsu léq ie.” Natanael metakén léq Deside Isa, “Berembé Pelungguh iniq wikanang tiang?” Jawab Deside Isa, “Sendéqman Pilipus ngempoh side, Tiang sampun serioq side léq bawaq lolo are nike.” “Bapaq Guru,” basen Natanael, “Pelungguh tetu-tetu Bije saq asalne léman Allah! Pelungguh Raje dengan Israel!” Deside Isa bemanik, “Side percaye, cume lantaran Tiang badaq bahwe Tiang sampun serioq side léq bawaq lolo are nike? Hal-hal saq jaoq beléqan léman nike gen side serioq!” Deside Isa bemanik éndah, “Tiang badaq side, side gen serioq langit kebukaq, dait malaékat-malaékat Allah turun-taék ojok Bije Manusie.” Due jelo sesampun nike araq gawé ngawinang léq kote Kana, léq Galilea, dait mamiq bini Deside Isa araq léq derike. Deside Isa kance pengiring-pengiring-Ne tepesilaq éndah léq gawé ngawinang nike. Sewaktu ie pade kurangan aiq anggur, mamiq bini-Ne bebase léq Deside Isa, “Aiq anggur ie pade sampun bis.” Jawab Deside Isa, “Inaq napi saq side kayunang léq Tiang? Ndéqman waktune Tiang nyatayang diriq.” Laguq mamiq bini Deside Isa bebase léq pelayan-pelayan, “Laksaneang napi saq Ie manikang léq side.” Léq derike araq enem gentong saq tesadangang jari bisoq naé menurut adat Yahudi. Gentong nike sopoq-sopoq isine kire-kire satus liter. Manik Deside Isa léq pelayan-pelayan nike, “Isiqang gentong-gentong nike.” Ie pade isiq gentong-gentong nike jangke penoq. Beterus Deside Isa bemanik léq ie pade, “Mangkin bait aiq nike sekediq dait atong ojok ketue saq ngatur gawé.” Ie pade jauq aiq nike ojok ketue. Terus ketue nike rasaq aiq saq sampun jari anggur nike. (Ie ndéq nenaoq léman mbé anggur nike, cume pelayan-pelayan saq ngisiq aiq doang saq nenaoq.) Beterus ketue nike ngerapetin pengantén mame, terus bebase léq ie, “Biasene dengan nyugulang anggur saq paling maiq juluan dait lamun selapuq temué sampun puas nginem baruq anggur saq biase. Laguq side nyimpen anggur saq paling solah jangke mangkin!” Nike keajaipan penembéq saq tepiaq siq Deside Isa. Ie ngelaksaneang nike léq Kana léq Galilea. Siq tande nike Ie nyatayang kemuliean-Ne. Make pengiring-pengiring-Ne percaye léq Ie. Sesampun nike Deside Isa lumbar ojok Kapernaum bareng-bareng kance mamiq bini-Ne, sanak-sanak-Ne dait pengiring-pengiring-Ne. Ie pade mererepan léq derike pire jelo ngonéqne. Sewaktu sampun rapet Hari Raye Paskah Yahudi, Deside Isa lumbar ojok Yerusalem. Léq Gedéng Allah léq Yerusalem, dait-Ne dengan-dengan saq jual sampi, dombe, kedit dare; dait éndah tukang tukah képéng tokol léq derike. Deside Isa piaq pecut léman tali, beterus siuh-Ne selapuq sampi dait dombe nike léman dalem Gedéng Allah. Balik-belah-Ne méje-méje saq tekadu taoq nukahang képéng jangke selapuq képéng ie pade begelanyatan. Beterus Deside Isa bemanik léq dagang kedit dare nike, “Jauq selapuqne niki. Ndaq jariang Gedéng Bapa Tiang taoq bedagang!” Beterus pengiring-pengiring-Ne inget bahwe araq tetulis, “Rase kasih Tiang léq Gedéng Deside, nguasein atén Tiang.” Pare penguase Yahudi nantang Deside Isa, basen ie pade, “Silaq miaq keajaipan jari tande léq tiang pade bahwe Pelungguh berhak ngelaksaneang maraq niki.” Jawab Deside Isa, “Runtuhang Gedéng Allah niki, dait dalem telu jelo Tiang bau penganjeng malik.” Terus ie pade bebase, “Teperluang waktu petang dase enem taun jari penganjeng Gedéng Allah niki, laguq Pelungguh gen penganjeng malik dalem telu jelo?” Laguq Gedéng Allah saq temaksut siq Deside Isa nike, rage-Ne mésaq. Beterus sesampun Deside Isa idup léman ninggal, pengiring-pengiring-Ne inget bahwe hal nike sampun Ie manikang. Make ie pade percaye napi saq tetulis léq Kitab Suci dait napi saq temanikang siq Deside Isa. Deside Isa araq léq Yerusalem sengonéq Perayaan Paskah, luwéq dengan percaye léq Ie lantaran keajaipan-keajaipan saq Ie piaq. Laguq Deside Isa mésaq nénten percayeang diriq-Ne léq ie pade, séngaq Ie kenal selapuq dengan. Ndéq perlu dengan ngebéng kesaksian tipaq Ie mengenai sai juaq, séngaq Ie mésaq wikan napi saq araq léq dalem angen manusie. Araq sopoq ahli Taurat léman golongan dengan Parisi aranne Nikodemus. Léq sopoq kelem ie parek ojok Deside Isa, dait matur, “Bapaq Guru, tiang pade nenaoq Pelungguh teutus siq Allah. Séngaq nénten araq sopoq dengan juaq saq bau miaq keajaipan maraq Pelungguh, lamun Allah nénten bareng ie.” Jawab Deside Isa, “Tiang badaq side: Setetune ndéq araq sopoq manusie saq bau serioq Kerajaan Allah lamun ie ndéq tebijeang malik.” Jawab Nikodemus tipaq Deside Isa, “Segerah dengan saq sampun toaq tebijeang malik? Napi ie iniq tame malik léq dalem tian inaqne beterus tebijeang malik?” Jawab Deside Isa, “Tiang badaq side, setetune lamun dengan ndéq tebijeang léman aiq dait léman Roh Allah, dengan nike ndéq gen bau tame Kerajaan Allah. Manusie secare jasmani tebijeang siq dengan toaqne, laguq secare rohani tebijeang léman Roh Allah. Ndaq bengaq lantaran Tiang badaq side: Side selapuq harus tebijeang malik. Angin lalo ojok mbé ie mélé; ite dengah suarene, laguq ndéq nenaoq léman mbé datengne dait ojok mbé aningne. Maraq nike éndah dengan saq tebijeang léman Roh Allah.” Nikodemus metakén, “Berembé nike iniq telaksane?” Jawab Deside Isa, “Side guru léq Israel; segerah side ndéq nenaoq hal-hal nike? Tiang badaq side: Setetune tiang pade nyampéang mengenai napi saq tiang pade taoq, dait tiang pade ngebéng kesaksian mengenai napi saq sampun tiang pade serioq; laguq side pade ndéq mélé nerimaq kesaksian tiang pade. Side pade ndéq percaye lamun Tiang nyeriteang side mengenai hal-hal léman dunie niki; berembé side pade bau percaye, lamun Tiang nyeriteang side hal-hal mengenai sorge? Ndéq araq sopoq dengan juaq saq sampun taék ojok sorge, kecuali Ie saq turun ojok dunie, nike Bije Manusie. Pade maraq Musa saq taékang ulah tembage léq sopoq kayuq léq padang gurun, maraq nike éndah Bije Manusie harus tetaékang, adéq selapuq dengan saq percaye léq Ie mauq idup sejati dait kekel. Séngaq beléq gati kasih Allah tipaq manusie léq dunie niki, jangke Ie ngicanin Bije-Ne saq nunggal, adéq sebilang dengan saq percaye léq Ie ndéqne binase, laguq mauq idup sejati dait kekel. Séngaq Allah ngutus Bije-Ne nénten jari hakimin dunie niki, laguq adéq langan Ie, dunie niki teselametang. Dengan saq percaye léq Ie ndéq gen tehukum. Laguq dengan saq ndéq percaye sampun tehukum siq Allah, séngaq ie ndéq percaye léq dalem peséngan Bije Nunggal saq asalne léman Allah. Hukuman nike: Cahaye nike sampun rauh ojok dunie, laguq manusie demenan peteng ketimbang menah, séngaq perbuatan-perbuatan ie pade jahat. Sebilang dengan saq gawéq jahat, meriq léq cahaye; ie ndéq mélé dateng léq cahaye nike, adéq perbuatanne saq jahat ndéq penggitan. Laguq dengan saq ngelaksaneang napi saq kenaq, dateng tipaq cahaye nike adéqne jari nyate bahwe napi saq ie laksaneang sesuai pekayunan Allah.” Sesampun nike Deside Isa dait pengiring-pengiring-Ne lumbar ojok Yudea. Léq derike Ie mererepan pire jelo ngonéqne teiring siq ie pade sambil baptis dengan saq betobat. Terus pengiring-pengiring Yahya mulai pade betungkasan kance dengan Yahudi mengenai aturan penyucian. Ie pade lumbar ojok Yahya, dait bebase, “Paq Guru, napi pelungguh masih iling léq dengan saq bareng kance pelungguh léq itoqan Kokoq Yordan nike saq piranan sampun pelungguh ceriteang tiang pade? Ie éndah baptis dengan, dait selapuq dengan lumbar ojok Ie!” Jawab Yahya, “Ndéq araq sopoq dengan juaq saq bau nerimaq napi-napi lamun ie nénten teicanin siq Allah. Side pade sampun dengah raos tiang, ‘Tiang ndéqne Mesias saq tesebut éndah Almasih. Tiang teutus senjuluq Ie.’ Pengantén nine nike épéne pengantén mame. Sahabat pengantén mame nike cume nganjeng léq dékétne dait dengahang, dait ie besukecite lamun dengah suare pengantén mame. Maraq nike éndah tiang. Mangkin tiang seneng gati. Ie harus sayan beléq, laguq tiang harus sayan kodéq.” Sai saq rauh léman atas ngelebihin selapuqne; sai saq asalne léman dunie, ie manusie warge dunie dait ngeraos mengenai hal-hal léq dunie. Sai saq rauh léman sorge ngelebihin selapuqne. Ie bebaos mengenai napi saq sampun Ie cingakin dait Ie pirengang, laguq ndéq araq sopoq dengan juaq saq percaye léq kesaksian-Ne. Dengan saq percaye léq kesaksian-Ne nike, ngakuq bahwe Allah kenaq. Séngaq dengan saq teutus siq Allah nyampéang Manik Allah, séngaq nénten araq tutuqne Allah ngicanin Roh-Ne. Bapa ngasihin Bije, dait sampun nyerahang selapuq kuase léq Ie. Dengan saq percaye léq Bije nike gen mauq idup sejati dait kekel. Laguq dengan saq ndéq taat léq Bije nike ndéqne mauq idup. Ie tehukum siq Allah selaéq-laéqne. Sewaktu Deside Isa wikan bahwe dengan-dengan Parisi sampun dengah, bahwe Ie luwéqan mauq pengiring dait baptis pengiring ketimbang Yahya, ( timaq Deside Isa mésaq nénten baptis dengan, laguq pengiring-pengiring-Ne doang,) Ie lumbar léman Yudea tulak malik ojok Galilea. Léq dalem pemargian-Ne nike, Ie harus liwatin daérah Samaria. Beterus Deside Isa rauh léq sopoq kote léq Samaria aranne Sikar, ndéqne jaoq léman tanaq saq laéq Yakub icanin tipaq Yusup, bijene. Léq derike araq lingkoq Yakub. Deside Isa lelah gati lantaran pemargian nike, keranaq nike Ie melinggih léq sedin lingkoq. Waktu nike kire-kire jam due olas tengari. Jawab dengan nine Samaria nike, “Bapaq dengan Yahudi, tiang dengan Samaria; kembéq Pelungguh tunas nginem léq tiang?” (Séngaq dengan-dengan Yahudi ndéq araq hubungan kance dengan Samaria.) Jawab Deside Isa, “Lamun side nenaoq paice Allah dait sai saq tunas aiq inem léq side, pasti side mésaq gen tunas aiq inem léq Ie, dait Ie gen béng side aiq idup.” Basen dengan nine nike, “Pelungguh nénten bedowé timbaq, dait lingkoq niki dalem gati. Léman mbé Pelungguh mauq aiq idup nike? Yakub, bapaq leluhur tiang pade, ngicanin tiang pade lingkoq niki. Dait ie mésaq bait aiq inemne léman deriki; maraq nike éndah bije-bijene lantong selapuq binatang saq ie anyam. Napi Pelungguh paran Pelungguh beléqan kance Yakub?” Deside Isa bemanik, “Dengan saq nginem aiq niki gen bedak malik, laguq dengan saq nginem aiq saq gen Tiang béng, ndéqne gen bedak malik selaéq-laéqne. Séngaq aiq saq gen Tiang béng nike gen jari pengembulan aiq léq dalem diriqne saq gen terus ngélék jangke dateng idup sejati dait kekel.” Basen dengan nine nike, “Bapaq, icanin tiang aiq nike, adéq tiang ndéq bedak malik; dait ndéq perlu tulak ojok deriki bait aiq.” “Silaq lumbar, empoh semamende, terus tulak malik ojok deriki,” manik Deside Isa. “Tiang ndéq bedowé semame,” basen dengan nine nike. “Mule kenaq basende,” manik Deside Isa. “Séngaq side sampun merariq lime kali, dait dengan mame saq idup bareng side mangkin ndéqne semamende.” “Taoq tiang mangkin bahwe Pelungguh niki nabi,” basen dengan nine nike. “Leluhur tiang pade nyembah Allah léq atas gunung niki, laguq bangse Pelungguh bebase bahwe cume léq Yerusalem doang taoq dengan nyembah Allah.” “Pade percaye,” manik Deside Isa léq ie, “sopoq waktu dengan gen nyembah Bapa, ndéqne léq gunung niki malik, dait ndéqne éndah léq Yerusalem. Side pade dengan Samaria nyembah saq ndéq side pade kenal, laguq tiang pade dengan Yahudi nyembah Ie saq tiang pade kenal, séngaq keselametan dateng léman dengan Yahudi. Laguq gen dateng waktune dait mangkin sampun dateng, bahwe penyembah-penyembah saq kenaq gen nyembah Bapa léq dalem roh dait kebenaran; séngaq Bapa kayunang penyembah-penyembah maraq nike. Allah nike Roh dait sai-sai nyembah Ie, harus nyembah Ie léq dalem roh dait kebenaran.” Dengan nine nike matur léq Deside Isa, “Tiang nenaoq bahwe Mesias (saq tesebut Almasih) gen rauh. Lamun Ie rauh, Ie gen nyampéang selapuq hal tipaq ite.” Manik Deside Isa léq ie, “Tiang niki Ie, saq mangkin kenyeke ngeraos kance side.” Léq waktu nike pengiring-pengiring Deside Isa tulak. Ie pade bengaq serioq Deside Isa bebaos kance dengan nine nike. Laguq ndéq araq sopoq dengan juaq léman ie pade saq beketuan léq dengan nine nike, “Napi keméléqde?” atao saq metakén léq Deside Isa, “Kembéq Pelungguh bebaos kance dengan nine nike?” Dengan nine nike bilin pendaiqne terus pelai ojok kote dait badaq dengan-dengan léq derike, “Silaq pade serioq, léq derike araq sopoq dengan saq badaq tiang selapuq hal saq sampun tiang piaq. Sang Ie Almasih?” Beterus dengan-dengan nike éndah bilin kote dait lumbar ojok Deside Isa. Léq waktu nike pengiring-pengiring-Ne pesilaq Deside Isa medaran. Ie pade matur, “Bapaq Guru, silaq medaran.” Laguq jawab Deside Isa, “Léq Tiang araq keloran saq side pade ndéq taoq.” Beterus pengiring-pengiring-Ne mulai saling ketuan, “Napi araq dengan atongang Ie keloran?” Beterus Deside Isa bemanik, “Keloran Tiang nike, ngelaksaneang pekayunan Ie saq ngutus Tiang, dait nutuqang karye saq teserahang ojok Tiang. Basen side pade, ‘Karing empat bulan musim mataq.’ Laguq Tiang badaq side: Silaq serioq lendang-lendang saq sampun kuning, siep tepataq! Dengan saq mataq sampun mulai nerimaq upaqne dait ngumpulang hasil jari idup sejati dait kekel. Jari, dengan saq nalet dait dengan saq mataq kanggo bareng beseneng-seneng. Sesenggak niki kenaq éndah, ‘Saq sopoq nalet, saq lain mataq.’ Tiang suruq side pade lumbar mataq léq taoq saq side pade ndéq uwah betaletan; dengan lain sampun begawéan léq derike, dait side pade nerimaq bati léman pegawéan ie pade.” Luwéq dengan Samaria léq kote nike percaye léq Deside Isa, lantaran raos dengan nine nike, “Ie badaq tiang selapuq hal saq sampun tiang piaq.” Sewaktu dengan-dengan Samaria bedait kance Deside Isa, sanget siq ie pade tunas adéq Deside Isa meneng kance ie pade. Jari Deside Isa meneng léq derike due jelo ngonéqne. Beterus sayan luwéq malik dengan saq percaye léq Deside Isa lantaran ie pade dengah mésaq pengajahan-Ne. Ie pade bebase léq dengan nine nike, “Tiang pade percaye mangkin, ndéqne lantaran napi saq side ucapang léq tiang pade, laguq lantaran tiang pade sampun dengah mésaq dait nenaoq bahwe Ie mule tetu Juruselamet dunie.” Sesampun due jelo léq Sikar, Deside Isa lumbar ojok Galilea. Deside Isa mésaq sampun bemanik, “Sopoq nabi ndéq tehormatin léq negerine mésaq.” Laguq sewaktu Ie rauh léq Galilea, dengan-dengan léq derike seneng nyambut Ie, séngaq ie pade araq léq Yerusalem sewaktu Hari Raye Paskah, dait sampun serioq selapuq saq telaksaneang siq Deside Isa. Beterus Deside Isa tulak ojok Kana léq Galilea, léq taoq nike Ie sampun miaq aiq jari anggur. Léq kote nike araq sopoq pegawé istane, bijene kenyeke sakit léq Kapernaum. Sewaktu ie dengah bahwe Deside Isa sampun rauh léq Galilea léman Yudea, ie lumbar ojok Deside Isa dait tunas adéq Deside Isa rauh ojok Kapernaum jari nyelahang bijene saq gen milinang. Manik Deside Isa léq pegawé istane nike, “Lamun side pade ndéq serioq keajaipan-keajaipan, side pade ndéq percaye.” “Junjungan Saq Mulie,” jawab pegawé istane nike, “tunas gelisan rauh sendéqman anak tiang milinang.” Manik Deside Isa léq ie, “Silaq lumbar, bijende selah!” Dengan nike percaye léq manik Deside Isa, terus ie lumbar. Léq tengaq langan, pelayan-pelayanne dateng tipaq ie jauq kabar, “Bije pelungguh sampun selah.” Beterus ie beketuan léq ie pade, “Jam pire kanak nike mulai selah?” Jawab ie pade, “Rubin, kire-kire jam sekéq tengari panasne telang.” Beterus bapaq kanak nike inget bahwe léq waktu nike Deside Isa bemanik léq ie, “Anakde selah.” Terus ie dait selapuq keluargene percaye léq Deside Isa. Nike keajaipan saq kedue saq tepiaq siq Deside Isa léq Galilea sesampun Ie rauh léman Yudea. Sesampun nike araq perayaan Yahudi, make Deside Isa lumbar ojok Yerusalem. Léq Yerusalem dékét Jebak Dombe araq sopoq telage, dalem base Ibrani tearanin Betesda. Léq derike araq lime sesangkok. Léq sesangkok-sesangkok nike luwéq dengan sakit tetindoqang, araq saq bute, araq saq démpang, dait araq éndah saq képaq. [Ie pade selapuq ngantih aiq telage nike beumbak-umbak. Séngaq sewaktu-waktu malaékat Tuhan turun ojok telage nike terus miaq aiqne jari beumbak-umbak. Dengan sakit saq penembéq tame léq dalem telage nike sewaktu aiqne beumbak-umbak, gen selah, napi juaq penyakitne.] Léq taoq nike araq sopoq dengan mame saq sampun telung dase baluq taun ngonéqne sakit. Deside Isa cingakin ie tindoq léq derike, dait wikanang-Ne bahwe ie ngonéq gati sakit; make Deside Isa bemanik léq ie, “Mélé side teselahang?” Dengan sakit nike bejawab, “Guru, nénten araq dengan saq tamaq tiang ojok dalem telage sewaktu aiqne beumbak-umbak. Baruq tiang mélé tame, sampun araq dengan lain saq juluan tame.” Beterus Deside Isa léq ie, “Silaq ures, angkat tipahde, terus lampaq.” Léq waktu nike éndah ie langsung selah. Ie ngangkat tipahne terus lampaq. Hal nike telaksane léq jelo Sabat. Keranaq nike penguase-penguase Yahudi bebase léq dengan saq baruq teselahang nike, “Jelo niki jelo Sabat. Ndéq kanggo side ngangkat tipahde.” Laguq jawab dengan nike, “Dengan saq nyelahang tiang, Ie saq suruq tiang ngangkat tipah tiang terus lampaq.” Ie pade beketuan, “Sai dengan nike saq suruq side ngangkat tipahde terus lampaq?” Laguq dengan saq sampun selah nike ndéq nenaoq sai dengan nike, séngaq Deside Isa sampun telang léq tengaq dengan luwéq nike. Beterus Deside Isa bedait kance dengan nike léq dalem Gedéng Allah, dait bemanik léq ie, “Mangkin side sampun selah, ndaq gawéq dose malik, adéq side ndéq ndait saq lengéan malik.” Beterus dengan nike lumbar, dait nyampéang ojok pare penguase Yahudi bahwe Deside Isa saq nyelahang ie. Dait nike lantaranne, ie pade mulai berusahe nganiaye Deside Isa séngaq Ie nyelahang dengan léq jelo Sabat. Laguq Deside Isa bemanik léq ie pade, “Bapa Tiang terus bekarye jangke mangkin, maraq nike éndah Tiang terus bekarye.” Nike penguase-penguase Yahudi jari sayan berusahe gen nyematéq Ie. Ie pade piaq maraq nike, ndéqne cume lantaran Deside Isa ngelanggar aturan agame mengenai jelo Sabat, laguq éndah lantaran Ie badaqang bahwe Allah nike Bapa-Ne; artine Ie padeang diriq-Ne kance Allah. Deside Isa jawab ie pade maraq niki, “Tiang badaq side, setetune Bije ndéqne tao ngelaksaneang napi-napi léman diriq-Ne mésaq. Ie cume ngelaksaneang napi saq Ie cingakin telaksaneang siq Bapa-Ne. Séngaq napi saq telaksaneang siq Bapa, nike éndah saq telaksaneang siq Bije. Séngaq Bapa ngasihin Bije-Ne dait nyatayang tipaq Bije nike selapuq saq Ie laksaneang mésaq. Malahan Bapa gen nyatayang tipaq Bije nike karye-karye saq beléqan malik, jangke side pade jari bengaq. Bapa nike nguresang dengan ninggal, dait ngidupang ie pade, maraq nike éndah Bije ngidupang sai saq Ie kayunang. Bapa mésaq nénten hakimin sai juaq. Selapuq kekuasean jari hakimin sai juaq sampun teserahang tipaq Bije. Bapa ngelaksaneang hal nike adéq selapuq dengan hormatin Bije maraq ie pade hormatin Bapa. Dengan saq ndéq hormatin Bije artine ie éndah ndéq hormatin Bapa saq ngutus Ie. Tiang badaq side: Setetune dengan saq dengah Tiang, dait percaye léq Bapa saq ngutus Tiang, ie gen mauq idup sejati dait kekel, dait ie ndéq gen tehukum; ie sampun ngalih léman ninggal ojok dalem idup. Tiang badaq side: Setetune gen dateng waktune -- malahan sampun dateng waktune -- dengan ninggal gen dengah suare Bije saq asalne léman Allah. Dait dengan saq dedengah gen idup. Pade maraq Bapa saq jari sumber idup, make Bapa jariang Bije nike éndah sumber idup. Bapa sampun ngicanin Bije-Ne kuase jari hakimin sai juaq, séngaq Ie Bije Manusie. Ndaq side pade bengaq dengah hal niki, séngaq gen dateng waktune bahwe selapuq dengan saq sampun ninggal dengah suare-Ne, dait ie pade saq gawéq solah gen sugul dait idup malik jari mauq idup saq kekel, laguq ie pade saq sampun gawéq jahat gen teidupang malik jari tehukum.” “Tiang ndéq tao ngelaksaneang napi-napi léman diriq Tiang mésaq, Tiang cume ngakimin sesuai napi saq Tiang dengah. Dait penghakiman Tiang adil, séngaq Tiang ndéq turut keméléq Tiang mésaq, laguq pekayunan Bapa saq ngutus Tiang. Lamun Tiang ngebéng kesaksian mengenai diriq Tiang mésaq, kesaksian nike ndéq bau tesaduq. Laguq araq dengan lain saq ngebéng kesaksian mengenai Tiang, dait Tiang nenaoq bahwe kesaksian-Ne nike kenaq. Side pade sampun ngirim utusan ojok Yahya, dait Yahya sampun ngebéng kesaksian mengenai kebenaran. Hal niki Tiang sampéang, ndéqne lantaran Tiang merluang saksi léman manusie, laguq adéq side pade teselametang. Yahya nike maraq dilah saq nyale dait becahaye. Semendaq doang side pade seneng nerimaq cahayene nike. Laguq kesaksian Tiang pentingan léman kesaksian Yahya. Napi saq mangkin Tiang laksaneang, niki karye saq tetugasang siq Bapa tipaq Tiang, jari bukti bahwe Bapa sampun ngutus Tiang. Dait Bapa saq ngutus Tiang éndah ngebéng kesaksian mengenai Tiang. Side pade ndéq uwah dengah manik-Ne atao serioq rue-Ne. Selapuq manik-Ne ndéq side pade simpen léq dalem aténde, séngaq side pade ndéq percaye léq Tiang saq Ie utus. Side pade berajah Kitab Suci séngaq side paran siq care nike side bedowé idup sejati dait kekel. Dait Kitab Suci éndah ngebéng kesaksian mengenai Tiang. Laguq side pade ndéq mélé dateng ojok Tiang adéq side pade mauq idup. Tiang ndéq boyaq pujian léman manusie. Tiang kenal side pade. Tiang nenaoq side pade ndéq ngasihin Allah dalem aténde. Tiang dateng dalem peséngan Bapa Tiang, laguq side pade ndéq nerimaq Tiang. Laguq lamun dengan lain saq dateng dalem pesénganne mésaq, side pade mélé nerimaq ie. Berembé side pade bau percaye, lamun side pade boyaq pujian léman sepade manusie, dait ndéq berusahe boyaq pujian léman Allah saq Esa? Ndaq paran Tiang gen tuduh side pade léq arepan Bapa. Malahan Musa saq side pade harepang, ie saq tuduh side pade. Seandéne side pade percaye léq Musa, side pade gen percaye léq Tiang, séngaq Musa saq nulis mengenai Tiang. Laguq lamun side pade ndéq percaye léq napi saq tetulis siq Musa, berembé side pade bau percaye léq napi saq Tiang sampéang?” Sesampun nike Deside Isa lumbar ojok itoqan Danao Galilea, saq tesebut éndah Danao Tiberias. Sesampun rauh léq derike, luwéq dengan ngiring Deside Isa, séngaq ie pade sampun serioq muqjizat-muqjizat saq tepiaq siq Deside Isa sewaktu Ie nyelahang dengan sakit. Deside Isa taék ojok atas gunung, terus melinggih léq derike teiring siq pengiring-pengiring-Ne. Léq waktu nike Hari Raye Paskah dengan Yahudi sampun rapet. Waktu Deside Isa cingakin léq sekelining-Ne, Ie cingakin dengan luwéq dateng tipaq Ie. Beterus manik Deside Isa léq Pilipus, “Léq mbé taoqte beli keloran, adéq selapuq dengan niki mauq ngelor?” ( Setetune Deside Isa sampun wikan napi saq harus Ie laksaneang, laguq Ie bemanik maraq nike jari nguji Pilipus.) Jawab Pilipus, “Ruti saq beraji satak képéng perak ndéqne cukup umaq dengan-dengan niki, timaq sebilang dengan cume mauq pade sekediq.” Salaq sopoq pengiring Deside Isa saq lain aranne Andreas, semeton Simon Petrus matur, “Léq deriki araq kanak mame bedowé lime ruti dait due empaq. Laguq napi artine léq dengan saq luwéqne maraq niki?” Manik Deside Isa, “Suruq dengan-dengan nike tokol.” Léq taoq nike luwéq pupaq, make dengan-dengan nike tokol léq pupaq -- selapuqne kire-kire lime iyu dengan mame. Beterus Deside Isa bait ruti nike, dait ngucap syukur tipaq Allah. Sesampun nike bagi-bagiang-Ne ruti nike ojok dengan luwéq. Terus Ie bagi empaq nike, dait ie pade ngelor jangke puas. Sesampun selapuqne bekelor jangke besuh, Deside Isa bemanik tipaq pengiring-pengiring-Ne, “Kumpulang salo keloran nike; ndaq jangke araq saq tetetéh.” Terus ie pade kumpulang due olas bakaq penoq salo keloran léman lime ruti saq tekelorang siq dengan luwéq nike. Sewaktu dengan luwéq serioq keajaipan saq tepiaq siq Deside Isa, ie pade bebase, “Mule tetu, niki Nabi saq gen rauh ojok dunie!” Deside Isa wikan ie pade mélé dateng jari paksaq Ie jari raje ie pade. Keranaq nike Deside Isa lumbar nyingkir ojok gunung mésaq-mésaq. Sesampun serep jelo, pengiring-pengiring Deside Isa turun ojok danao. Beterus ie pade taék perau mbelat danao nike lumbar ojok Kapernaum. Waktu nike sampun peteng laguq Deside Isa ndéqman éndah rauh tipaq ie pade, sedeng umbak léq danao mulai beléq séngaq keras angin. Sesampun belayar kire-kire lime atao enem kilométer, ie pade serioq Deside Isa rauh ojok perau bemargi léq atas aiq. Ie pade takut gati. Laguq manik Deside Isa léq ie pade, “Niki Tiang, ndaq takut!” Make seneng gati angen ie pade terus pesilaq Deside Isa taék ojok dalem perau. Dait waktu nike éndah perau ie pade dateng léq taoq saq ie pade laiq. Léq jelo jemaqne dengan luwéq saq masih ndot léq itoqan danao, sadar bahwe sendéqmanne cume araq sopoq perau léq derike. Ie pade nenaoq bahwe pengiring-pengiring Deside Isa sampun berangkat kadu perau nike, laguq Deside Isa nénten milu. Beterus perau-perau léman kote Tiberias dateng dait belabuh léq dékét taoq nike, taoq dengan luwéq ngelorang ruti sesampun Junjungan Saq Mulie ngucapang syukur. Sewaktu dengan luwéq nike serioq bahwe Deside Isa dait pengiring-pengiring-Ne ndéq araq léq derike, ie pade taék perau-perau nike dait lumbar ojok Kapernaum boyaq Deside Isa. Sewaktu dengan-dengan nike bedait kance Deside Isa léq itoqan danao, ie pade metakén léq Deside Isa, “Bapaq Guru, piran Pelungguh rauh léq deriki?” Jawab Deside Isa, “Tiang badaq side, setetune side pade boyaq Tiang ndéqne lantaran side pade sampun ngerti napi maksut keajaipan-keajaipan saq Tiang piaq, laguq lantaran side pade sampun bekelor jangke besuh. Ndaq begawéan jari mauq keloran saq iniq bis dait séde. Laguq side pade harus begawéan jari mauq keloran saq bau tahen jangke dateng idup sejati dait kekel, saq gen teicanin siq Bije Manusie, séngaq Ie sampun tesahang siq Allah Bapa.” Beterus ie pade metakén léq Deside Isa, “Napi saq harus tiang pade piaq adéq tiang pade ngelaksaneang karye saq tekayunang siq Allah?” Jawab Deside Isa, “Niki karye saq tekayunang siq Allah: Side pade harus percaye léq Ie saq teutus siq Allah.” Beterus ie pade matur, “Lamun maraq nike, bukti napi saq gen Pelungguh icanin adéq tiang pade serioq dait percaye léq Pelungguh? Napi saq Pelungguh gen laksaneang? Leluhur tiang pade ngelorang manna léq padang gurun, maraq tetulis léq Kitab Suci, ‘Allah ngicanin ie pade kelorang ruti léman sorge.’ ” Terus Deside Isa bemanik léq ie pade, “Tiang badaq side: Setetune ndéqne Musa, laguq Bapa Tiang saq ngicanin side ruti saq setetune léman sorge. Séngaq ruti saq teicanin siq Allah nike Ie saq turun léman sorge dait ngicanin idup tipaq manusie léq dunie.” Terus ie pade matur, “Junjungan Saq Mulie, tunas tetep icanin tiang pade ruti nike.” Manik Deside Isa léq ie pade, “Tiang niki ruti saq ngebéng idup, dengan saq dateng tipaq Tiang, ndéqne gen lapah malik. Dait dengan saq percaye léq Tiang ndéqne gen bedak malik.” “Laguq maraq saq sampun Tiang sampéang léq side: Timaq side pade sampun serioq Tiang, side pade ndéq percaye. Selapuq saq Bapa icanin tipaq Tiang gen dateng tipaq Tiang dait sai-sai saq dateng tipaq Tiang ndéq uwah Tiang tolaq. Séngaq Tiang turun léman sorge, ndéq jari ngelaksaneang keméléq Tiang mésaq, laguq pekayunan Ie saq ngutus Tiang. Dait niki pekayunan Ie saq ngutus Tiang: Adéq selapuq saq sampun Ie icanin tipaq Tiang, ndéq araq saq telang; laguq adéq Tiang idupang malik léq ahir jaman. Mule maraq niki pekayunan Bapa Tiang: Adéq selapuq saq serioq Bije dait percaye léq Ie, bedowé idup sejati dait kekel, dait Tiang idupang malik léq ahir jaman.” Dengan-dengan Yahudi mulai ngoméh léq Deside Isa, lantaran Ie bemanik: “Tiang ruti saq turun léman sorge.” Ie pade bebase, “Tekan Ie niki Isa, bije Yusup? Tiang pade kenal inaq amaq-Ne! Berembé Ie bau paran diriq-Ne, “Ie turun léman sorge?” Beterus Deside Isa bemanik léq ie pade, “Ndaq ngoméh! Ndéq araq sopoq dengan juaq saq bau dateng ojok Tiang, lamun Bapa saq ngutus Tiang, nénten gadingang ie tipaq Tiang; dait sai saq dateng, gen Tiang idupang léq ahir jaman. Léq dalem Kitab Nabi-nabi tetulis maraq niki: ‘Selapuq dengan gen teajah siq Allah.’ Jari, selapuq dengan saq dengahang Bapa dait berajah léman Ie, dateng ojok Tiang. Nike ndéqne berarti bahwe araq dengan saq sampun serioq Bapa. Cume Ie saq rauh léman Allah, sampun cingakin Bapa. Tiang badaq side: Setetune dengan saq percaye, bedowé idup sejati dait kekel. Tiang niki ruti saq ngebéng idup. Leluhurde kelorang manna léq padang gurun dait ie pade ninggal éndah. Laguq ndéqne maraq nike ruti saq turun léman sorge; dengan saq ngelorang ruti nike ndéqne gen ninggal. Tiang niki ruti saq turun léman sorge -- ruti saq ngebéng idup. Dengan saq ngelorang ruti niki gen idup selaéq-laéqne. Ruti saq gen Tiang béng jari kehidupan manusie léq dunie, nike ragen Tiang.” Dengahne manik Deside Isa maraq nike, dengan-dengan Yahudi betungkasan sopoq kance lainne, basen ie pade, “Berembé Dengan niki ngicanin ite rage-Ne jari tekelorang?” Beterus Deside Isa bemanik léq ie pade, “Tiang badaq side: Setetune lamun side pade ndéq ngelorang rage Bije Manusie dait nginem daraq-Ne, side pade ndéq bedowé idup léq dalem diriqde. Dengan saq ngelorang ragen Tiang dait nginem daraq Tiang bedowé idup sejati dait kekel, dait Tiang gen idupang ie léq ahir jaman. Séngaq ragen Tiang tetu-tetu keloran dait daraq Tiang tetu-tetu ineman. Dengan saq ngelorang ragen Tiang dait nginem daraq Tiang, ie araq léq dalem Tiang, dait Tiang araq léq dalem ie. Pade maraq Bapa saq idup ngutus Tiang, dait Tiang éndah idup léman Bapa, maraq nike éndah halne sai-sai saq kelorang ragen Tiang gen idup léman Tiang. Niki ruti saq sampun turun léman sorge: Ndéqne maraq ruti saq tekelorang siq leluhurde. Séngaq sesampun ie pade ngelorang ruti nike, ie pade ninggal éndah. Laguq dengan saq ngelorang ruti niki gen idup selaéq-laéqne.” Selapuqne nike temanikang siq Deside Isa sewaktu Ie ngajahang léq balé ibadah léq Kapernaum. Sesampun dengah manik Deside Isa nike, luwéq léq antare pengiring-pengiring-Ne matur, “Perajahan niki keras, sai saq sanggup dengahang perajahan niki?” Deside Isa wikan bahwe pengiring-pengiring-Ne ngerumun mengenai hal nike. Make Ie bemanik, “Napi perajahan nike miaq side bimbang? Berembé jarine éraq lamun side pade serioq Bije Manusie taék gen tulak ojok taoq-Ne semule? Roh saq ngicanin idup, awak manusie tetu-tetu ndéqne araq manpaatne. Perajahan-perajahan saq Tiang sampéang léq side nike roh dait idup. Laguq léq antare side pade araq saq ndéq percaye.” (Deside Isa sampun wikan léman penembéqne sai-sai saq ndéq mélé percaye, dait sai saq gen behianat léq Ie.) Terus Deside Isa bemanik malik, “Keranaq nike Tiang badaq side bahwe ndéq araq sopoq dengan juaq bau dateng ojok Tiang, lamun Bapa nénten ngicanin ie paice.” Mulai waktu nike luwéq pengiring-Ne ngundurang diriq, dait ndéq ngiring Ie malik. Beterus Deside Isa beketuan léq kedue olas pengiring-Ne, “Napi side pade éndah mélé bilin Tiang?” Simon Petrus matur léq Deside Isa, “Junjungan Saq Mulie, sai saq gen tiang pade laiq? Pelungguh doang saq bedowé idup sejati dait kekel. Tiang pade sampun percaye dait yakin bahwe Pelungguh Saq Suci léman Allah.” Jawab Deside Isa, “Tekan Tiang mésaq saq piléq side pade, saq due olas dengan niki? Laguq salaq sopoq léq antare side nike Belis!” Saq temaksut siq Deside Isa nike, Yudas bije Simon Iskariot. Séngaq timaq Yudas jari salaq sopoq léman kedue olas pengiring-Ne, ie gen behianat léq Deside Isa. Sesampun nike Deside Isa bemargi léq selapuq daérah Galilea. Ie nénten kayun ojok daérah Yudea, séngaq dengan-dengan Yahudi léq derike beniat nyematéq Ie. Waktu nike sampun rapet Hari Raye Pondok Daun. Sanak-sanak Deside Isa matur léq Deside Isa, “Silaq bilin taoq niki, terus lumbar ojok Yudea, adéq pengiring-pengiring Pelungguh bau serioq karye Pelungguh. Ndéq araq dengan saq gen seboq napi saq ie piaq, lamun ie mélé jari kesohor. Lamun Pelungguh ngelaksaneang hal-hal maraq nike, silaq Pelungguh nyatayang diriq tipaq dunie!” ( Séngaq sanak-sanak-Ne éndah nénten percaye léq Ie.) Beterus Deside Isa bemanik léq ie pade, “Mangkin ndéqman waktu Tiang, laguq bagi side pade tetep araq waktu. Dunie niki ndéqne mungkin meriq léq side pade. Laguq Tiang mule temeriq siq dunie, séngaq Tiang tetep ngebéng kesaksian mengenai dunie bahwe perbuatan-perbuatanne jahat. Silaq side pade lumbar ojok perayaan nike. Tiang ndéq gen lalo, séngaq mule ndéqman waktu Tiang.” Maraq nike manik Deside Isa léq sanak-sanak-Ne, beterus Ie meneng léq Galilea. Sesampun sanak-sanak-Ne lumbar ojok perayaan nike, meneng-meneng Deside Isa lumbar ndéq tetaoq siq dengan. Sengonéq perayaan nike, penguase-penguase Yahudi boyaq Deside Isa dait beketuan-tuan, “Léq mbé Ie?” Luwéq dengan mulai bepéséq-péséq ngeraosang Deside Isa. Araq saq bebase, “Ie dengan solah.” Araq éndah saq bebase, “Nénten! Ie nyesatang dengan luwéq.” Laguq ndéq araq sopoq dengan juaq saq bani bebase terang-terangan ngeraosang Ie, séngaq ie pade takut léq dengan-dengan Yahudi. Léq waktu perayaan nike kenyeke telaksaneang, Deside Isa tame ojok Gedéng Allah, terus mulai ngajahang. Dengan-dengan Yahudi bengaq gati, dait bebase, “Berembé dengan niki bedowé penenaoq maraq nike, padahal Ie ndéq uwah berajah?” Deside Isa bemanik, “Saq Tiang ajahang niki, ndéqne perajahan léman Tiang, laguq perajahan léman Ie saq ngutus Tiang. Dengan saq mélé turut pekayunan Allah gen nenaoq napi pengajahan Tiang asalne léman Allah atao léman Tiang mésaq. Dengan saq ngajahang perajahanne mésaq boyaq kehormatan jari diriqne mésaq. Laguq dengan saq boyaq kehormatan jari Ie saq ngutus ie, dengan nike kenaq, ndéq araq kesalaqan léq ie. Tekan Musa sampun nyampéang Hukum Taurat tipaq side. Laguq léq antare side pade ndéq araq saq mélé taat léq Hukum Taurat nike. Kembéq side pade mélé matéq Tiang?” Jawab dengan luwéq nike, “Side siq tekuasein siq sétan! Sai saq mélé matéq Side?” Jawab Deside Isa, “Cume sopoq muqjizat saq Tiang piaq, dait side pade bengaq. Musa ngicanin side pade aturan besunat -- timaq setetune sunat nike asalne ndéqne léman Musa, laguq léman bapaq-bapaq leluhur sendéqman Musa -- dait side pade sunat dengan léq jelo Sabat. Lamun hal nike side pade laksaneang adéq ndéq teparan ngelanggar aturan Musa mengenai sunat, kembéq side pade gedek léq Tiang lantaran nyelahang selapuq awak sopoq dengan léq jelo Sabat? Ndaq hakimin dengan siq napi saq penggitan, laguq pade hakimin secare adil.” Beterus pire dengan penduduk kote Yerusalem bebase, “Tekan Ie niki saq teboyaq-boyaq gen tematéq? Pade serioq, Ie bébas bebaos léq julun dengan luwéq, dait ndéq araq saq bebase napi-napi léq Ie! Sang penguase-penguasente sampun sadar bahwe Ie niki Almasih? Laguq lamun Almasih nike rauh, ndéq araq sopoq dengan juaq saq nenaoq léman mbé asal-Ne. Padahal ite nenaoq léman mbé asal-Ne.” Waktu Deside Isa kenyeke ngajahang léq dalem Gedéng Allah, Ie bemanik siq suare saq beléq, “Mule side pade nenaoq sai Tiang niki dait léman mbé asal Tiang. Tiang dateng ndéqne siq keméléq Tiang mésaq. Tiang teutus siq Ie saq kenaq saq ndéq side pade kenal. Tiang kenal kance Ie séngaq Tiang asalne léman Ie, dait Ie saq ngutus Tiang.” Léq waktu nike ie pade berusahe bau Deside Isa, laguq ndéq araq saq bani negel Ie, séngaq ndéqman waktune. Luwéq léq antare dengan-dengan nike mulai percaye léq Deside Isa, dait bebase, “Lamun Almasih nike rauh, napi Ie bau ngelaksaneang luwéqan keajaipan ketimbang Dengan niki?” Dengan-dengan Parisi dengah berembé dengan luwéq nike bepéséq-péséq raosang Deside Isa. Keranaq nike bareng-bareng kance imam-imam kepale, ie pade ngutus pire pengawal Gedéng Allah lumbar bau Deside Isa. Deside Isa bemanik, “Cume karing seberaq doang Tiang masih bareng kance side pade. Sesampun nike Tiang gen tulak ojok Ie saq ngutus Tiang. Side pade gen boyaq Tiang, laguq ndéq ndait Tiang; séngaq side pade ndéq bau dateng ojok taoq léq mbé Tiang araq.” Beterus dengan-dengan Yahudi nike bebase sopoq kance saq lainne, “Dengan niki gen lumbar ojok mbé, sehingge ite ndéq gen bau ndait Ie? Napi Ie gen lumbar ojok dengan-dengan Yahudi saq ndot léq perantoan léq antare dengan Yunani, dait ngajahang dengan Yunani? Napi maksut-Ne bebaos bahwe ite gen boyaq Ie laguq ite ndéq bau bedait kance Ie dait ite ndéq bau dateng léq mbé taoq-Ne araq?” Léq jelo penutuq perayaan nike, jelo saq paling penting, Deside Isa ngadeg beterus bemanik siq suare saq beléq, “Dengan saq bedak, harus dateng ojok Tiang dait nginem! Sai-sai saq percaye léq Tiang, maraq tetulis léq dalem Kitab Suci: ‘Léman dalem aténe gen ngélék élékan-élékan aiq idup.’ ” ( Deside Isa bemanik mengenai Roh Allah, saq gen teterimaq siq dengan-dengan saq percaye léq Ie. Séngaq waktu nike Roh Allah ndéqman teicanin; séngaq Deside Isa ndéqman temulieang.) Luwéq dengan dengahang napi saq tebaosang siq Deside Isa, dait léq antare ie pade araq saq bebase, “Dengan niki pasti Nabi saq gen rauh!” Saq lain bebase, “Ie niki Almasih!” Laguq araq éndah saq bebase, “Nénten, Almasih nénten rauh léman Galilea! Dalem Kitab Suci tetulis bahwe Almasih nike keturunan Daud dait gen rauh léman Betlehem, dése asalne Daud.” Ahirne dengan-dengan mulai betungkasan mengenai Deside Isa. Araq saq mélé bau Ie, laguq ndéq sopoq dengan juaq saq bani negel Ie. Sewaktu pengawal-pengawal Gedéng Allah saq teutus jari bau Deside Isa tulak malik, imam-imam kepale dait dengan-dengan Parisi beketuan léq ie pade, “Kembéq side ndéq jauq Ie ojok deriki?” Jawab pengawal-pengawal nike, “Ndéq uwah araq dengan saq bebaos maraq Ie!” “Napi side pade éndah tesesatang siq Ie?” basen dengan-dengan Parisi nike. “Napi araq penguase-penguasente atao dengan Parisi saq percaye léq Ie? Laguq dengan luwéq niki, ie pade ndéq ngerti Hukum Taurat, ie pade sampun tekutuk.” Salaq sopoq léq antare dengan Parisi nike, aranne Nikodemus saq sampun parek ojok Deside Isa. Nikodemus bebase tipaq dengan-dengan Parisi saq lain, “Menurut Hukum Taurat, sopoq dengan ndéq kanggo tehukum sendéqman pelekarene tedengah dait perbuatanne teperiksaq.” Jawab ie pade, “Napi side éndah léman Galilea? Silaq periksaq Kitab Suci dait side gen nenaoq bahwe ndéq araq nabi saq rauh léman Galilea!” [ Sesampun nike selapuq dengan uléq ojok baléne. Laguq Deside Isa lumbar ojok Bukit Zaitun. Jemaq kelémaqne Deside Isa lumbar malik ojok Gedéng Allah, dait luwéq dengan parek tipaq Ie. Deside Isa melinggih dait ngajah ie pade. Waktu nike ahli-ahli Taurat dait dengan-dengan Parisi parek tipaq Deside Isa jauq sopoq dengan nine saq kendaitan bezinah. Ie pade suruq dengan nine nike nganjeng léq tengaq-tengaq, beterus matur léq Deside Isa, “Bapaq Guru, dengan nine niki kendaitan kenyeke bezinah. Léq dalem Hukum Taurat araq aturan bahwe dengan nine maraq nike harus tepeléwas siq batu jangke maté. Mangkin berembé pendapet Pelungguh?” Ie pade metakén maraq nike jari boyaq kesalaqan Deside Isa, adéqne bau nyalahang Ie. Laguq Deside Isa nunduk doang dait nulis léq tanaq siq nyari-Ne. Sewaktu ie pade terus matur, Deside Isa ngangkat sirah-Ne dait bemanik léq ie pade, “Dengan saq ndéq bedowé dose léq antare side pade, alurang ie saq penembéq meléwasang batu tipaq dengan nine nike.” Sesampun nike Deside Isa nunduk malik dait nulis malik léq tanaq. Sesampun ie pade dengah manik Deside Isa nike, ie pade lumbar bilin taoq nike, sopoq-sopoq mulai léman saq paling toaq. Ahirne karing Deside Isa kance dengan nine nike doang saq masih tetep nganjeng léq derike. Beterus Deside Isa ngadeg dait bemanik tipaq ie, “Inaq, léq mbé ie pade? Ndéq araq saq mélé hukum side?” “Ndéq araq Junjungan Saq Mulie,” jawabne. Terus manik Deside Isa, “Tiang éndah ndéq gen hukum side. Mangkin silaq side lumbar! Ndaq piaq dose malik.”] Deside Isa bemanik malik léq dengan luwéq, manik-Ne, “Tiang niki terang dunie; sai-sai saq turut Tiang, ie ndéq gen lampaq léq dalem peteng, laguq ie gen bedowé cahaye kehidupan.” Dengan-dengan Parisi matur tipaq Deside Isa, “Mangkin Pelungguh icanin kesaksian mengenai diriq Pelungguh mésaq. Kesaksian Pelungguh nike nénten kenaq.” Jawab Deside Isa, “Timaq Tiang nyampéang kesaksian mengenai diriq Tiang, kesaksian Tiang nike kenaq; séngaq Tiang nenaoq léman mbé Tiang dateng, dait ojok mbé lain Tiang. Side pade ndéq nenaoq léman mbé Tiang dateng, dait ojok mbé lain Tiang. Side pade hakimin dengan kadu care manusie; Tiang ndéq hakimin sopoq dengan juaq. Laguq lamun Tiang hakimin dengan, keputusan Tiang nike adil, séngaq Tiang ndéq mésaq-mésaq; Bapa saq ngutus Tiang araq bareng Tiang. Léq dalem Hukum Taurat tetulis maraq niki: Kesaksian saq kenaq nike kesaksian léman due dengan. Saq nyampéang kesaksian mengenai Tiang, araq due -- Tiang, dait Bapa, saq ngutus Tiang.” “Bapa Pelungguh nike léq mbé?” basen ie pade. Jawab Deside Isa, “Side pade ndéq kenal kance Tiang dait Bapa Tiang. Seandéne side pade kenal kance Tiang, pasti side pade kenal kance Bapa Tiang éndah.” Selapuq nike temanikang siq Deside Isa sewaktu Ie ngajahang léq Gedéng Allah léq dékét kotaq-kotaq képéng persembahan. Laguq ndéq araq sopoq dengan juaq saq bau Deside Isa, séngaq mule ndéqman waktune. Deside Isa bemanik malik tipaq ie pade, “Tiang gen lalo, dait side pade gen boyaq Tiang, laguq side pade gen maté dalem dosende. Ojok taoq saq Tiang laiq nike side pade ndéq gen bau dateng.” Beterus dengan-dengan Yahudi nike bebase, “Sang Ie gen matéq diriq, séngaq Ie bemanik, ‘Ojok mbé lain Tiang, side pade ndéq bau dateng.’ ” Beterus Deside Isa bemanik tipaq ie pade, “Side pade dateng léman bawaq; laguq Tiang dateng léman atas. Side pade léman dunie; Tiang ndéq léman dunie. Keranaq nike Tiang badaq side pade, bahwe side pade gen maté dalem dose-dosende. Dait mule side pade gen maté dalem dose-dosende, lamun ndéq percaye bahwe ‘Tiang niki Ie’.” Ie pade metakén, “Sai Pelungguh setetune?” Jawab Deside Isa, “Napi manpaatne ngeraos malik kance side pade? Masih luwéq hal mengenai side pade saq gen Tiang sampéang dait Tiang hakimin. Laguq Ie saq ngutus Tiang bau tepercaye. Dait Tiang nyampéang ojok dunie napi saq Tiang dengah léman Ie.” Ie pade ndéq ngerti bahwe Ie kenyeke bebaos léq ie pade mengenai Bapa. Keranaq nike Deside Isa bemanik malik tipaq ie pade, “Éraq lamun side pade sampun agungang Bije Manusie, side pade gen nenaoq bahwe ‘Tiang niki Ie’, dait side pade éndah gen nenaoq bahwe ndéq araq sopoq juaq saq Tiang laksaneang léman diriq Tiang mésaq. Tiang cume nyampéang napi saq temanikang siq Bapa léq Tiang. Dait Ie saq ngutus Tiang araq bareng Tiang. Ie nénten menengang Tiang mésaq-mésaq, séngaq Tiang tetep ngelaksaneang napi saq nyenengang Ie.” Sesampun Deside Isa jelasang hal nike, luwéq dengan percaye léq Ie. Beterus Deside Isa bemanik léq dengan-dengan Yahudi saq sampun percaye léq Ie, “Lamun side pade tetep idup menurut manik Tiang, side pade tetu-tetu jari pengiring Tiang, make side pade gen nenaoq kebenaran, dait kebenaran nike gen bébasang side pade.” Ie pade matur léq Deside Isa, “Tiang pade niki keturunan Ibrahim, ndéq uwah tiang jari hambe sai-sai! Napi maksut Pelungguh bemanik, ‘Side pade gen tebébasang’?” Manik Deside Isa, “Tiang badaq side: Setetune dengan saq gawéq dose, ie jari hambe dose. Dait hambe nike ndéq bedowé taoq saq tetep léq dalem keluarge, laguq bije bedowé taoq selaéq-laéqne léq dalem keluarge. Keranaq nike lamun Bije bébasang side pade, make side gen tetu-tetu bébas. Mule Tiang nenaoq bahwe side pade keturunan Ibrahim. Laguq side pade mélé nyematéq Tiang, séngaq side pade ndéq mélé nerimaq manik Tiang. Napi saq Tiang serioq léq Bapa Tiang, nike saq Tiang sampéang. Laguq side pade miaq napi saq teajahang siq bapaqde léq side pade.” Jawab ie pade, “Bapaq tiang pade Ibrahim.” Jawab Deside Isa, “Lamun mule side pade tetu-tetu bije Ibrahim, pasti side pade ngelaksaneang napi saq telaksaneang siq Ibrahim. Tiang nyampéang léq side pade kebenaran saq Tiang dengah léman Allah, laguq side pade mélé nyematéq Tiang. Pegawéan saq maraq nike ndéqne tegawéq siq Ibrahim! Side pade laksaneang napi saq telaksaneang siq bapaqde mésaq.” Jawab ie pade, “Tiang pade ndéq anak-anak haram. Bapa tiang pade cume sopoq, nike Allah.” Beterus manik Deside Isa léq ie pade, “Seandéne Allah nike jari Bapa side pade make side pade pasti gen ngasihin Tiang, séngaq Tiang dateng léman Allah. Tiang ndéq dateng siq keméléq Tiang mésaq, laguq Ie saq ngutus Tiang. Kembéq side pade ndéq ngerti napi saq Tiang sampéang? Séngaq side pade ndéq tahen dengahang manik Tiang. Belis nike saq jari bapaqde, dait side pade mélé turut keméléq bapaqde. Léman penembéqne Belis nike tukang nyematéq. Ie ndéq uwah béle kebenaran, séngaq ndéq araq kebenaran léq dalem diriqne. Lamun ie beduste nike hal saq biase, séngaq mule nike sipatne. Ie mule penduste dait sumber segale macem duste. Laguq Tiang nyampéang kebenaran, dait nike lantaranne side pade ndéq percaye léq Tiang. Sai léq antare side selapuq saq bau buktiang bahwe Tiang bedose? Lamun Tiang nyampéang kebenaran, kembéq side ndéq percaye léq Tiang? Dengan saq asalne léman Allah, dengah Manik Allah. Side ndéq dengah séngaq asalde ndéq léman Allah.” Jawab dengan-dengan Yahudi nike léq Deside Isa, “Tekan kenaq atur tiang pade bahwe Pelungguh dengan Samaria saq tekuasein siq sétan?” Jawab Deside Isa, “Tiang ndéq tekuasein siq sétan. Tiang hormatin Bapa Tiang, laguq side pade hine Tiang. Tiang ndéq boyaq kehormatan jari diriq Tiang mésaq. Araq sopoq saq ngusaheang kehormatan Tiang, dait Ie saq gen hakimin manusie. Setetune kenaq manik Tiang niki, dengan saq turut manik Tiang, ie ndéq gen ngalamin maut selaéq-laéqne.” Beterus dengan-dengan Yahudi nike matur léq Deside Isa, “Mangkin tiang pade nenaoq bahwe Pelungguh mule tetu-tetu tekuasein siq sétan! Ibrahim mésaq sampun ninggal, maraq nike éndah selapuq nabi, laguq Pelungguh bemanik bahwe, ‘Selapuq dengan saq turut manik Pelungguh ndéq gen ngalamin maut selaéq-laéqne.’ Lamun Ibrahim mésaq sampun ninggal, dait nabi-nabi éndah selapuqne sampun ninggal, Pelungguh niki sai? Segerah Pelungguh beléqan léman bapaq tiang pade Ibrahim!” Jawab Deside Isa, “Lamun Tiang boyaq kehormatan jari diriq Tiang mésaq, kehormatan nike ndéq araq artine. Bapa Tiang saq mulieang Tiang. Side pade bebase bahwe Ie nike Allah side, padahal side pade ndéq kenal kance Ie, laguq Tiang kenal kance Ie. Dait lamun Tiang badaq bahwe Tiang ndéq kenal kance Ie, make Tiang penduste, pade maraq side pade. Laguq Tiang kenal kance Ie dait Tiang taat léq manik-Ne. Ibrahim, bapaqde tetu-tetu seneng gati bahwe ie sampun serioq jelo Tiang. Ie sampun serioq, dait ie besukecite!” Beterus dengan-dengan Yahudi matur léq Deside Isa, “Umur Pelungguh ndéqman araq séket taun, laguq Pelungguh sampun serioq Ibrahim?” Jawab Deside Isa, “Tiang badaq side, bahwe setetune sendéqman Ibrahim tebijeang, Tiang sampun araq.” Beterus dengan-dengan Yahudi nike bait batu gen meléwas Ie; laguq Deside Isa nyeboq, beterus Ie lumbar bilin Gedéng Allah. Sewaktu Deside Isa bemargi, Ie cingakin dengan bute léman tebijeang. Pengiring-pengiring Deside Isa metakén léq Deside Isa, “Bapaq Guru, kembéq dengan niki tebijeang bute? Napi lantaran ie mésaq bedose atao lantaran inaq amaqne bedose?” Jawab Deside Isa, “Ie bute ndéq lantaran dosene mésaq atao dengan toaqne, laguq adéq dengan bau serioq kuase Allah bekarye dalem diriqne. Kedung masih tengari, ite harus ngelaksaneang karye Allah saq ngutus Tiang. Kelem gen dateng, dait ndéq araq sopoq dengan juaq saq bau begawéan. Semasih Tiang léq dunie niki, Tiang niki cahaye dunie.” Sesampun bemanik maraq nike Deside Isa beludah ojok tanaq, dait ngaduk ludah-Ne nike kance tanaq. Beterus Ie ngolésang léq penenteng dengan nike, beterus bemanik léq ie, “Silaq lumbar persiq muende léq Telage Siloam.” (Siloam artine ‘Saq Teutus’.) Make dengan nike lumbar persiq muene. Sewaktu ie tulak, ie sampun tao nyerioq. Tetangge-tetanggene dait dengan-dengan saq sendéqmanne serioq ie mekir, selapuqne bebase, “Ndéq napi dengan niki saq biase tokol mekir?” Araq saq bebase, “Mule ie.” Laguq araq éndah saq bebase, “Ndéqne ie, ie cume berambis ruene maraq dengan nike.” Laguq dengan nike mésaq bebase, “Tiang uwah dengan bute nike.” “Berembé ceritene jangke side tao nyerioq?” basen ie pade léq dengan nike. Jawabne, “Dengan saq bepeséngan Deside Isa nike saq miaq reraok, terus ngolésang léq maten tiang dait bemanik, ‘Silaq lumbar persiq muende léq Telage Siloam.’ Beterus tiang lalo. Dait sewaktu tiang persiq muen tiang, tiang tao nyerioq.” Ie pade beketuan, “Léq mbé dengan nike?” Terus ie bejawab, “Mindah tiang.” Ie pade éndah beketuan léq dengan nike berembé ie tao nyerioq. Jawab dengan nike, “Ie ngolésang reraok léq maten tiang, beterus tiang persiq dait tiang tao nyerioq.” Pire dengan léq antare dengan-dengan Parisi nike bebase, “Ndéqne mungkin dengan saq ngelaksaneang niki asalne léman Allah, séngaq Ie ndéq hormatin jelo Sabat.” Laguq dengan lain bebase, “Ndéqne mungkin dengan bedose miaq keajaipan-keajaipan maraq niki?” Beterus araq béde pendapet antare ie pade. Make dengan-dengan Parisi nike beketuan malik léq dengan nike, “Napi pendapet side léq Ie saq miaq side jangke tao nyerioq?” “Ie nabi,” jawab dengan nike. Laguq pare pemimpin Yahudi nike ndéq mélé percaye bahwe dengan nike mule bute sendéqmanne dait mangkin tao nyerioq. Keranaq nike ie pade ngempoh dengan toaqne, dait beketuan, “Napi tetu ie anak side, saq side paran teanakang bute? Berembé ie tao nyerioq mangkin?” Jawab inaq amaq dengan nike, “Mule ie niki anak tiang pade; dait mule ie bute léman teanakang. Laguq berembé ie tao nyerioq mangkin, mindah tiang. Dait sai saq miaq ie tao nyerioq, nike éndah mindah tiang. Ketuanang doang léq ie, ie sampun beléq; ie tao jawab mésaq.” Inaq amaq dengan nike bebase maraq nike séngaq ie pade takut léq dengan-dengan Yahudi; séngaq ie pade sampun sepakat, bahwe dengan saq ngakuq Deside Isa nike Almasih, ndéqne kanggo malik tame balé ibadah. Keranaq nike inaq amaq dengan nike bebase, “Ie sampun beléq; ketuan doang léq ie.” Beterus ie pade ngempoh malik dengan saq sendéqmanne bute nike, dait bebase léq ie, “Sampéang saq kenaq léq arepan Allah! Tiang pade nenaoq dengan nike dengan bedose.” Jawab dengan nike, “Napi Ie bedose atao ndéq, mindah tiang. Laguq sopoq hal saq tiang taoq; laéq tiang bute, mangkin tiang nyerioq.” Beterus ie pade bebase malik léq dengan nike, “Ie kumbéqang side? Berembé entane Ie piaq side tao nyerioq.” Jawab dengan nike, “Sampun tiang ceriteang léq pelungguh, laguq pelungguh sami nénten kayun pirengang. Kembéq pelungguh sami kayun pirengang malik? Sang pelungguh sami kayun jari pengiring-pengiring-Ne éndah?” Beterus ie pade sumpaq ie dait bebase, “Side pengiring-Ne; tiang pade ndéq! Tiang pade pengiring Musa. Tiang pade nenaoq bahwe Allah sampun bemanik léq Musa. Laguq mengenai dengan nike, tiang pade ndéq nenaoq léman mbé asal-Ne.” Jawab dengan nike, “Segerah pelungguh sami nénten wikan léman mbé asal-Ne, padahal Ie sampun miaq tiang tao nyerioq. Ite nenaoq bahwe Allah nénten gen mirengang dengan bedose, laguq dengan saq soléh dait ngelaksaneang pekayunan-Ne. Léman penembéq dunie niki araq, ndéq uwah tedengah bahwe araq dengan miaq dengan saq teanakang bute tao nyerioq. Lamun dengan nike nénten léman Allah, Ie nénten gen bau ngelaksaneang napi-napi.” Jawab ie pade, “Napi? Side saq penoq dose léman teanakang, side mélé ngajah tiang pade?” Make mulai waktu nike ie tebalaq tame ojok balé ibadah. Deside Isa pireng bahwe ie pade sampun sediq dengan nike léman balé ibadah. Deside Isa boyaq dengan nike beterus bemanik léq ie, “Napi side percaye léq Bije Manusie?” Jawab dengan nike, “Sai Ie, Junjungan Saq Mulie? Tunas manikang adéq tiang percaye léq Ie.” “Side sampun serioq Ie,” jawab Deside Isa. “Ie saq mangkin niki kenyeke bebaos kance side.” “Tiang percaye, Junjungan Saq Mulie,” basen dengan nike, beterus sujut léq arepan Deside Isa. Manik Deside Isa, “Tiang dateng ojok dunie niki jari ngakimin; adéq dengan saq bute tao nyerioq, dait dengan saq tao nyerioq, jari bute.” Pire dengan Parisi saq araq léq derike dengah Deside Isa bemanik maraq nike, beterus ie pade metakén léq Ie, “Maksut Pelungguh tiang pade éndah bute?” Jawab Deside Isa, “Seandéne side pade bute, side pade ndéq bedose. Laguq lantaran side pade bebase, ‘Tiang pade nyerioq,’ nike artine side pade masih bedose.” “Tiang badaq side: Setetune dengan saq tame ojok baren dombe liwat lambah, dait ndéq liwat lawang, dengan nike maling dait perampok. Laguq dengan saq tame liwat lawang, ie pengarat dombe nike. Penjage bare bukaqang ie lawang, dait dombe-dombe turut suarene sewaktu ie ngempoh aranne sopoq-sopoq, dait ie pade tedéndén ojok luah. Sesampun dombe-dombe nike tejauq ojok luah, pengarat nike lampaq léq julu, dait dombe-dombe nike turut ie séngaq ie pade tandaq suarene. Dombe-dombe nike ndéqne mélé turut dengan lain, malahan gen pelai léman dengan nike, séngaq ndéqne tandaq suarene.” Deside Isa nyeriteang perumpamean nike, laguq ie pade ndéq ngerti napi maksut-Ne. Beterus Deside Isa bemanik karing sekali, “Tiang badaq side setetune Tiang niki lawang umaq dombe nike. Selapuq saq dateng sendéqman Tiang, nike maling dait perampok, dait dombe-dombe ndéq mélé dengahang suare ie pade. Tiang niki lawang. Sai-sai tame langan Tiang gen selamet; ie sugul tame dait mauq keloran. Maling dateng cume jari memaling, nyematéq dait jari nyenyédaq. Laguq Tiang dateng adéq manusie mauq idup -- idup belimpah-limpah. Tiang niki pengarat saq solah. Pengarat saq solah nyerahang nyawene umaq dombe-dombene. Dengan saq teupaq dait saq ndéq pengarat dait ndéqne éndah épén dowé dombe-dombe nike, gen pelai bilin dombe-dombe lamun ie serioq serigale dateng. Make dombe-dombe nike gen tecakrah dait tepiaq buyar siq serigale nike. Dengan saq teupaq nike pelai, séngaq ie begawéan jari boyaq upaq. Ie ndéq ngerunguq dombe-dombe nike. Masih araq dombe-dombe lain saq jari dowén Tiang éndah, laguq ndéq tame itungan dombe-dombe saq luwéq niki. Ie pade éndah harus Tiang jauq dait ie pade gen dengahang suare Tiang. Ie pade selapuq gen jari sopoq kumpulan siq sopoq pengarat. Bapa ngasihin Tiang lantaran Tiang nyerahang nyawe Tiang jari bait ie malik. Ndéq araq sopoq dengan juaq saq bau bait ie léman Tiang. Tiang nyerahang ie siq keméléq Tiang mésaq. Tiang bekuase nyerahang ie, dait bekuase bait ie malik. Nike tugas saq Tiang terimaq léman Bapa Tiang.” Lantaran Deside Isa bemanik maraq nike, dengan-dengan Yahudi mulai betungkasan. Luwéq saq bebase, “Ie tekuasein siq sétan! Ie jogang! Kembéq side pade dengah Ie?” Laguq araq éndah saq bebase, “Dengan saq tekuasein siq sétan ndéq ngeraos maraq nike! Napi bau sétan piaq dengan bute tao nyerioq?” Léq Yerusalem dengan-dengan kenyeke ngerayeang Hari Raye Peresmian Gedéng Allah. Waktu nike musim telih. Deside Isa kenyeke bemargi léq Sesangkok Sulaiman léq dalem Gedéng Allah, sewaktu dengan-dengan Yahudi dateng bekumpul léq sekelining Deside Isa. Ie pade matur, “Jangke piran Pelungguh alurang tiang pade bimbang? Manikang secare terus terang, lamun Pelungguh tetu-tetu Almasih.” Jawab Deside Isa, “Sampun Tiang badaq side, laguq side pade ndéq percaye. Karye-karye saq Tiang laksaneang dalem peséngan Bapa Tiang, nike ngebéng bukti mengenai Tiang. Side pade ndéq percaye séngaq side pade ndéq tame itungan dombe-dombe Tiang. Dombe-dombe Tiang dengahang suare Tiang. Tiang kenal ie pade, dait ie pade turut Tiang. Tiang ngebéng idup sejati dait kekel tipaq ie pade dait ie pade pasti ndéq gen binase selaéq-laéqne. Ndéq araq sopoq dengan juaq saq bau ngerampas ie pade léman imen Tiang. Bapa Tiang, saq sampun ngicanin ie pade léq Tiang, beléqan léman selapuqne. Dait ndéq sopoq dengan juaq bau ngerampas ie pade léman Bapa. Tiang dait Bapa sopoq.” Beterus dengan-dengan Yahudi bait malik batu jari meléwas Deside Isa. Laguq manik Deside Isa léq ie pade, “Side pade sampun serioq Tiang ngelaksaneang luwéq karye saq solah, saq tetugasang siq Bapa léq Tiang. Saq mbé léq antare karye nike saq jari penyebap side pade mélé meléwas Tiang?” Jawab dengan-dengan Yahudi nike, “Nénten lantaran karye-karye Pelungguh saq solah nike tiang pade mélé meléwas Pelungguh kadu batu, laguq lantaran Pelungguh menghine Allah. Pelungguh manusie biase, laguq padeang diriq kance Allah?” Beterus jawab Deside Isa, “Tekan araq tetulis léq dalem Kitab Suci Taurat, Allah bemanik, ‘Side pade déwe’? Jari, lamun ie pade tesebut déwe lantaran Manik Allah tesampéang tipaq ie pade -- padahal Kitab Suci ndéqne bau tebatalang --, napi masih side pade bebase tipaq Ie saq tesuciang dait teutus ojok dunie siq Bapa: Side menghine Allah! Séngaq Tiang sampun bemanik, Tiang Bije saq asalne léman Allah? Lamun Tiang ndéq ngelaksaneang karye-karye Bapa Tiang, ndaq percaye léq Tiang. Laguq lantaran Tiang ngelaksaneang hal nike, pade percaye léq napi saq Tiang laksaneang nike, timaq side pade ndéq mélé percaye léq Tiang. Adéq side pade nenaoq dait ngerti bahwe Bapa léq dalem Tiang, dait Tiang léq dalem Bapa.” Ie pade berusahe malik bau Deside Isa, laguq Deside Isa luput léman ie pade. Deside Isa tulak ojok itoqan Kokoq Yordan, léq taoq Yahya laéq baptis dengan, terus meneng léq derike. Luwéq dengan parek ojok Deside Isa. Ie pade matur, “Yahya nénten ngelaksaneang keajaipan-keajaipan, laguq selapuq saq ie sampéang mengenai dengan niki mule kenaq.” Beterus luwéq dengan léq derike percaye léq Deside Isa. Araq sopoq dengan aranne Lazarus ndot léq Betania bareng-bareng kance semetonne Mariam dait Marta. Mariam nike dengan nine saq noléngang minyak sengéh léq cokor Junjungan Saq Mulie, dait osokne siq bulune. Léq sopoq waktu Lazarus sakit. Deduaq semetonne suruq dengan nyampéang kabar niki tipaq Deside Isa, “Junjungan Saq Mulie, dengan saq Pelungguh kasihin nike kenyeke sakit.” Sewaktu Deside Isa pireng kabar nike, Ie bemanik, “Penyakit niki ndéq gen miaq ie ninggal. Niki telaksane adéq Allah temulieang dait siq care nike Bije saq asalne léman Allah éndah temulieang.” Deside Isa ngasihin Marta, Mariam dait Lazarus. Laguq waktu Deside Isa mauq berite bahwe Lazarus sakit, Ie sediah mererepan léq taoqne due jelo malik. Sesampun nike baruq Deside Isa bemanik léq pengiring-pengiring-Ne, “Silaq ite tulak ojok Yudea.” Jawab ie pade, “Bapaq Guru, baruq gati dengan-dengan Yahudi mélé meléwas Pelungguh kadu batu dait mangkin Pelungguh kayun tulak ojok derike?” Manik Deside Isa, “Tekan kenjelo ngonéqne due olas jam? Dengan saq lampaq léq waktu kenjelo, ndéq gen kedantuk séngaq ie serioq cahaye dunie niki. Laguq dengan saq lampaq léq kekelem kedantuk, séngaq ndéq araq cahaye léq ie.” Maraq nike manik Deside Isa. Beterus Ie bemanik malik, “Sahabatte Lazarus tindoq, laguq Tiang gen lalo nguresang ie.” Pengiring-pengiring Deside Isa matur, “Junjungan Saq Mulie, lamun Lazarus tindoq, laun ie gen selah.” Maksut Deside Isa nike bahwe Lazarus sampun ninggal. Laguq ie pade paran Deside Isa bemanik bahwe Lazarus tindoq biase. Keranaq nike Deside Isa bemanik secare terus-terang tipaq ie pade, “Lazarus sampun ninggal. Laguq Tiang seneng éndah séngaq Tiang ndéq araq léq derike, séngaq solahan umaq side pade adéq side pade iniq percaye. Mangkin silaq ite lumbar ojok Lazarus.” Tomas saq tesebut, “Didimus” bebase léq batur-baturne saq pade-pade pengiring Deside Isa, “Silaq ite milu, alur ite ninggal bareng Ie.” Sewaktu Deside Isa rauh léq taoq nike, Lazarus sampun empat jelo ngonéqne tekubur. Betania nike rapet léman Yerusalem, kire-kire telu kilométer jaoqne. Luwéq dengan Yahudi dateng ojok Marta dait Mariam jari hibur angen ie pade séngaq semetonne ninggal. Sewaktu Marta dengah bahwe Deside Isa rauh, ie sugul jari nyambut Deside Isa, laguq Mariam ndot léq balé. Marta matur léq Deside Isa, “Junjungan Saq Mulie, lamun waktu nike Pelungguh araq léq deriki, pasti semeton tiang ndéq milinang. Timaq maraq nike tiang nenaoq bahwe mangkin niki éndah Allah gen ngicanin napi juaq saq Pelungguh tunas léq Ie.” Manik Deside Isa tipaq Marta, “Semetonde gen idup malik.” Jawab Marta, “Tiang nenaoq Lazarus gen idup malik lamun dengan ninggal teidupang léq ahir jaman.” “Tiang saq ngebéng idup dait ngidupang dengan ninggal.” Manik Deside Isa tipaq Marta, “Dengan saq percaye léq Tiang gen idup, timaq ie sampun ninggal. Dait dengan idup saq percaye léq Tiang, ndéq gen binase selaéq-laéqne. Napi side percaye léq hal nike?” Jawab Marta, “Junjungan Saq Mulie, tiang percaye Pelungguh niki Almasih, Bije saq asalne léman Allah, saq gen rauh ojok dalem dunie niki.” Sesampun Marta bebase maraq nike, ie lumbar ngempoh Mariam, semetonne dait bepéséq léq ie, “Bapaq Guru araq léq deriki; Ie ketuanang side.” Dengah hal nike, Mariam becat-becat ures, terus lumbar ojok Deside Isa. Waktu nike, Deside Isa ndéqman tame ojok dése. Ie masih léq taoq Marta bedait kance Ie. Dengan-dengan Yahudi saq kenyeke hibur angen Mariam léq balé, serioq Mariam becat-becat ures dait sugul; terus ie pade lumbar turut ie, séngaq ie pade paran Mariam lumbar nangis ojok kubur. Sewaktu Mariam dateng léq taoq Deside Isa dait serioq Ie, Mariam sujut léq arepan-Ne dait matur, “Junjungan Saq Mulie, lamun Pelungguh araq léq deriki waktu nike, pasti semeton tiang ndéq milinang.” Sewaktu Deside Isa cingakin Mariam nangis, dait dengan-dengan Yahudi saq dateng bareng Mariam nike éndah nangis, Deside Isa sedih gati. Make Deside Isa beketuan tipaq ie pade, “Léq mbé side pade nguburang ie?” “Silaq Junjungan Saq Mulie cingakin,” jawab ie pade. Beterus Deside Isa besermin. Make dengan-dengan Yahudi nike bebase, “Serioq, beléq gati kasih-Ne léq Lazarus!” Laguq araq léq antare ie pade saq bebase, “Ie piaq dengan bute tao nyerioq, kembéq Ie ndéq bau segah adéq Lazarus ndéq milinang?” Deside Isa aséq malik, beterus lumbar ojok kubur. Kubur nike sopoq goe saq teimpet kadu batu beléq. “Alih batu nike,” manik Deside Isa. Jawab Marta semeton dengan saq ninggal nike, “Junjungan Saq Mulie, ie sampun empat jelo tekubur. Pasti sampun bais!” Deside Isa bemanik léq Marta, “Tekan sampun Tiang badaq side: Lamun side percaye, side gen serioq kemuliean Allah!” Make ie pade alih batu nike. Beterus Deside Isa nengadah andang langit dait bemanik, “Ya Bapa, Tiang ngucapang syukur tipaq Deside, séngaq Deside sampun mirengang Tiang. Tiang nenaoq bahwe Deside tetep mirengang Tiang, laguq Tiang matur maraq niki, lantaran dengan-dengan saq araq léq deriki; adéq ie pade percaye bahwe Deside saq ngutus Tiang.” Sesampun bemanik maraq nike, Deside Isa bemanik siq suare saq beléq, “Lazarus, sugul!” Make dengan saq sampun ninggal nike sugul. Ime dait naéne masih tebungkus siq kain putéq, dait muene masih tetutup siq kain penutup mue. Terus manik Deside Isa tipaq dengan-dengan léq derike, “Lekaq kain-kain nike adéq ie ndéq kelalah lampaq.” Luwéq dengan-dengan Yahudi saq dateng jangoq Mariam, percaye léq Deside Isa sesampun serioq peristiwe nike. Laguq pire dengan léq antare ie pade lumbar ojok dengan Parisi dait ngelaporang napi saq sampun telaksaneang siq Deside Isa. Keranaq nike dengan-dengan Parisi dait imam-imam kepale ngaraqang sangkep bareng Mahkamah Agame. Ie pade bebase, “Napi saq harus ite piaq? Dengan niki luwéq piaq keajaipan! Lamun ite tetep ngalurang Ie maraq niki selapuq dengan gen percaye léq Ie! Dait ahirne dengan-dengan Roma gen dateng dait ngancurang Gedéng Allah lantong selapuq bangsente!” Salaq sopoq léman ie pade saq aranne Kayapas, Imam Agung léq taun nike, bebase, “Side pade ndéq nenaoq napi-napi. Napi side pade ndéq sadar bahwe demi rakyat, solahan sopoq dengan ninggal ketimbang selapuq bangse ancur?” Setetune Kayapas bebase maraq nike, ndéq léman pikiranne mésaq. Laguq sebagé Imam Agung léq taun nike ie benubuat bahwe Deside Isa gen ninggal umaq bangse Yahudi. Dait ndéq umaq bangse Yahudi doang, laguq éndah jari ngumpulang dait pesopoq bije-bije dowén Allah saq sampun bepencar-pencar. Mulai jelo nike pare penguase Yahudi besekongkol jari nyematéq Deside Isa. Keranaq nike Deside Isa nénten nyatayang diriq-Ne léq julun dengan luwéq léq kalangan dengan Yahudi. Deside Isa bilin Yudea, beterus lumbar ojok kote saq aranne Epraim dékét padang gurun. Léq taoq nike Ie meneng bareng pengiring-pengiring-Ne. Waktu nike sampun rapet Hari Raye Paskah Yahudi. Luwéq dengan léman dése-dése sampun lumbar ojok Yerusalem jari ngelaksaneang upacare mersiq diriq sendéqman perayaan nike. Ie pade boyaq Deside Isa, dait sewaktu bekumpul léq Gedéng Allah, ie pade bebase sopoq kance saq lainne, “Berembé pendapet side? Sang Ie ndéq dateng léq perayaan niki.” Ie pade bebase maraq nike séngaq imam-imam kepale dait dengan-dengan Parisi sampun nyugulang préntah bahwe dengan saq nenaoq léq mbé Deside Isa araq, harus ngelaporang adéq Ie tebau. Enem jelo sendéqman Hari Raye Paskah, Deside Isa lumbar ojok Betania. Lazarus saq sampun teidupang siq Deside Isa léman tengaq-tengaq dengan ninggal, ndot léq taoq nike. Léq derike Deside Isa tejamu siq ie pade dait Marta éndah milu nulung ie pade. Lazarus dait temué-temué bareng melinggih medaran kance Deside Isa. Beterus dateng Mariam, jauq kire-kire setenge liter minyak sengéh narwastu saq mahel gati. Ie noléngang minyak nike léq cokor Deside Isa, dait osokne kadu bulune. Selapuq balé nike jari sengéh siq ambu minyak nike. Laguq Yudas Iskariot, salaq sopoq pengiring Deside Isa -- saq selanjutne behianat léq Ie -- bebase, “Kembéq minyak sengéh nike ndéq tejual doang siq aji telu ratus képéng perak, dait képéngne tesedekahang tipaq dengan miskin?” Yudas bebase maraq nike ndéqne lantaran ie merhatiang dengan miskin, laguq lantaran ie pemalingan. Ie kereng bait képéng kas saq tesimpen léq ie. Laguq Deside Isa bemanik, “Alurang dengan nine nike! Ie ngelaksaneang hal niki jari jelo pemakaman Tiang. Dengan miskin tetep araq léq antare side pade, laguq Tiang ndéq.” Luwéq dengan Yahudi dengah bahwe Deside Isa araq léq Betania, jari ie pade lumbar ojok derike. Ie pade lumbar ndéq cume lantaran Deside Isa, laguq éndah ie pade mélé serioq Lazarus saq sampun teidupang siq Deside Isa léman tengaq-tengaq dengan ninggal. Keranaq nike imam-imam kepale éndah mélé nyematéq Lazarus; séngaq ie jari penyebap luwéq dengan Yahudi bilin ie pade dait percaye léq Deside Isa. Léq jelo jemaqne, dengan luwéq saq sampun dateng jari ngerayeang Paskah dengah bahwe Deside Isa kenyeke dalem pemargian ojok Yerusalem. Ie pade bait daun-daun palem beterus lumbar nyambut Ie, sambil besurak-surakan, “Hosana! Teberkahin Ie saq rauh dalem peséngan Tuhan, Raje Israel!” Deside Isa ndait sopoq bagal saq masih odaq, terus Ie taék léq atasne. Make telaksane saq tetulis dalem Kitab Suci: “Ndaq takut, putri Sion! Pade serioq Rajende rauh, nunggang sopoq bagal saq masih odaq!” Waktu nike pengiring-pengiring Deside Isa ndéqman ngerti selapuqne nike. Laguq sesampun Deside Isa temulieang, baruq ie pade inget bahwe selapuq saq telaksane léq Deside Isa nike sampun tetulis léq Kitab Suci, maraq nike éndah selapuq hal saq sampun ie pade laksaneang tipaq Deside Isa. Dengan-dengan saq araq waktu Deside Isa ngemanikang Lazarus sugul léman kubur dait ngidupang ie léman ninggal, terus ngebéng kesaksian mengenai hal nike. Keranaq nike dengan luwéq nike lumbar ojok Deside Isa séngaq ie pade dengah bahwe Deside Isa saq miaq keajaipan nike. Make dengan-dengan Parisi bebase sopoq kance saq lainne, “Ite ndéq bau piaq napi-napi! Silaq serioq, seantéro dunie lumbar turut Ie!” Léq antare dengan-dengan saq lumbar ibadah ojok Yerusalem waktu perayaan nike araq éndah pire dengan Yunani. Ie pade dateng ojok Pilipus dait bebase, “Paq, lamun bau tiang pade melét bedait kance Deside Isa.” (Pilipus asalne léman Betsaida léq Galilea.) Beterus Pilipus lumbar nyampéang hal nike tipaq Andreas, deduaqne nyampéang tipaq Deside Isa. Deside Isa bemanik léq ie pade, “Sampun waktune Bije Manusie temulieang. Tiang badaq side: Setetune lamun setolang gandum ndéq tetalet léq dalem tanaq dait maté, ie gen tetep araq setolang. Laguq lamun tolang gandum nike maté, baruq ie bau ngasilang luwéq gandum. Dengan saq tunah nyawene gen kélangan nyawene. Laguq dengan saq meriq léq nyawene léq dunie niki, gen meliharaq ie jari idup sejati dait kekel. Dengan saq mélé ngelayanin Tiang harus turut Tiang, dait léq mbé Tiang araq léq derike éndah pelayan Tiang araq. Dengan saq ngelayanin Tiang gen tehormatin siq Bapa Tiang.” “Angen Tiang kuatir; napi saq harus Tiang ucapang mangkin? Napi Tiang harus ngucapang, ‘Bapa, selametang Tiang mulai mangkin?’ Laguq malahan Tiang dateng jari ngalamin penderitean niki. Bapa, mulieang peséngan Deside!” Make kedengahan suare léman langit, “Tiang sampun mulieang Ie, dait Tiang gen mulieang Ie malik.” Dengan luwéq saq araq léq derike dengah suare nike. Ie pade bebase, “Nike guntur!” Laguq araq éndah saq bebase, “Ndéq ie! Malaékat bebaos léq Ie!” Beterus Deside Isa bemanik léq ie pade, “Suare nike kedengahan, ndéq jari kepentingan Tiang, laguq jari kepentingan side. Mangkin sampun waktune dunie tehakimin; mangkin penguase dunie niki gen tetetéh ojok luah. Laguq Tiang niki, lamun Tiang tetaékang léman gumi, Tiang gen antuq selapuq dengan dateng ojok Tiang.” Deside Isa bemanik maraq nike jari nyatayang berembé entane Ie gen ninggal. Dengan luwéq nike bebase léq Ie, “Menurut Hukum Taurat tiang pade, Almasih gen idup selaéq-laéqne. Berembé Pelungguh bau bebaos bahwe Bije Manusie harus tetaékang léman gumi? Sai Bije Manusie nike?” Jawab Deside Isa, “Cume semendaq doang terang nike araq léq antare side pade. Jari, pade lampaq semasih terang nike araq, adéq peteng nike ndaq nguasein side pade. Dengan saq lampaq léq tengaq peteng ndéqne taoq ojok mbé aningne. Pade percaye léq terang nike, semasih terang nike araq léq side, adéq side pade jari bije-bije terang.” Sesampun bemanik maraq nike, Deside Isa lumbar nyeboq léman ie pade. Timaq sampun luwéq keajaipan saq tepiaq siq Deside Isa léq julu ie pade, ie pade ndéq percaye léq Deside Isa. Siq care nike telaksane napi saq tesampéang siq nabi Yesaya, “Tuhan, sai saq percaye léq berite tiang pade? Léq sai kuase Tuhan tenyatayang?” Keranaq nike ie pade ndéq iniq percaye, séngaq Yesaya sampun bebase éndah, “Ie sampun buteang penenteng dait miaq até ie pade jari pagah; adéq ie pade ndaq serioq siq penenteng, dait pikiran ie pade ngerti, terus betobat, sehingge Tiang nyelahang ie pade.” Yesaya bebase maraq nike séngaq ie sampun serioq kemuliean Deside Isa, dait bebase mengenai Ie. Timaq maraq nike, malahan luwéq dengan léq antare penguase Yahudi percaye léq Deside Isa. Laguq ie pade ndéq bani akuq nike secare terus terang, séngaq ie pade takut ndaq-ndaq dengan Parisi ndéq ngijinang ie pade tame balé ibadah. Ie pade demenan mauq pujian léman manusie ketimbang pujian léman Allah. Beterus Deside Isa bemanik siq suare saq beléq, “Dengan saq percaye léq Tiang, ndéq léq Tiang ie percaye, laguq léq Ie saq ngutus Tiang. Dait dengan saq serioq Tiang, serioq Ie saq ngutus Tiang. Tiang dateng ojok dunie jari terang, adéq selapuq dengan saq percaye léq Tiang ndaq ndot léq dalem peteng. Dengan saq dengahang pengajahan Tiang, laguq ndéq taat -- ndéqne Tiang saq hukum ie. Séngaq Tiang dateng ndéq jari hakimin dunie niki, laguq jari nyelametang ie. Dengan saq nolaq Tiang dait ndéq dengahang manik Tiang, sampun araq saq hakimin ie. Manik saq Tiang sampéang, nike saq gen hakimin ie léq ahir jaman. Séngaq Tiang ndéq bemanik léman keméléq Tiang mésaq; Bapa saq ngutus Tiang, Ie saq préntah Tiang napi saq harus Tiang ucapang dait Tiang sampéang. Dait Tiang nenaoq bahwe préntah-Ne nike ngicanin idup sejati dait kekel. Make Tiang nyampéang maraq saq teajahang Bapa léq Tiang.” Sejelo sendéqman Hari Raye Paskah, Deside Isa wikan bahwe sampun waktune Ie bilin dunie niki jari tulak tipaq Bapa-Ne. Ie ngasihin dengan-dengan saq jari dowé-Ne léq dunie, dait Ie tetep ngasihin ie pade jangke penutuq. Sewaktu Deside Isa dait pengiring-pengiring-Ne kenyeke medaran, Belis sampun tamaqang niat léq dalem até Yudas bije Simon Iskariot jari behianat léq Deside Isa. Deside Isa wikan bahwe Bapa sampun nyerahang selapuq kekuasean tipaq Ie. Ie wikan éndah bahwe Ie rauh léman Allah dait gen tulak tipaq Allah. Keranaq nike Ie ngadeg, lekaq jubah-Ne terus bebet-Ne kain lénen léq kéng-Ne. Sesampun nike, Ie isiq aiq ojok dalem tepaq, beterus mulai bisoq naén pengiring-pengiring-Ne dait lapne kadu kain lénen saq tebebet léq kéng-Ne nike. Sewaktu giliran naén Simon Petrus tebisoq, ie matur léq Deside Isa, “Junjungan Saq Mulie, Pelungguh gen bisoq naén tiang?” Jawab Deside Isa, “Mangkin side ndéq ngerti napi saq Tiang laksaneang niki, laguq éraq side gen ngerti.” Jawab Petrus léq Deside Isa, “Junjungan Saq Mulie, sampunang gati Junjungan Saq Mulie bisoq naén tiang!” Laguq jawab Deside Isa, “Lamun Tiang ndéq bisoq naénde, side ndéq mauq bagian bareng Tiang.” Simon Petrus matur, “Lamun maraq nike, Junjungan Saq Mulie, sampunang cume naén tiang laguq ime dait ulu tiang éndah!” Manik Deside Isa léq Petrus, “Dengan saq sampun mandiq, sampun bersi selapuqne Ie ndéq perlu tepersiq malik; kecuali naéne. Side pade sampun bersi, laguq ndéq selapuqne.” ( Deside Isa sampun wikan sai saq gen behianat léq Ie. Keranaq nike Ie bemanik, “Side pade sampun bersi, laguq ndéq selapuqne.”) Sesampun Deside Isa bisoq naén ie pade, Ie kadu malik jubah-Ne dait melinggih. Terus Deside Isa bemanik léq ie pade, “Napi side pade ngerti saq Tiang laksaneang léq side? Side pade ngempoh Tiang Guru dait Junjungan Saq Mulie. Dait mule maraq nike setetune. Lamun Tiang jari Junjungan Saq Mulie dait Gurunde sampun bisoq naén side, side pade wajib éndah saling bisoqang naé. Tiang ngebéng teladan niki léq side pade, adéq side pade laksaneang éndah napi saq sampun Tiang laksaneang léq side. Mule kenaq manik Tiang niki: Sopoq hambe ndéqne beléqan léman majikanne, dait sopoq utusan ndéqne beléqan léman saq ngutus ie. Lamun side pade sampun nenaoq selapuqne niki, side pade gen bahagie lamun ngelaksaneang hal nike. Napi saq Tiang sampéang niki ndéqne mengenai side pade selapuq. Tiang nenaoq sai-sai saq sampun Tiang piléq. Laguq napi saq tetulis dalem Kitab Suci, harus telaksane, ‘Dengan saq iring Tiang medaran, gen ngelawan Tiang.’ Hal nike mangkin Tiang sampéang léq side pade, sendéqman telaksane, adéq lamun laun hal nike telaksane, side pade gen percaye bahwe Tiang niki Ie. Setetune kenaq manik Tiang niki: Sai nerimaq dengan saq Tiang utus, ie nerimaq Tiang. Dait sai saq nerimaq Tiang, nerimaq Ie saq ngutus Tiang.” Sesampun Deside Isa bemanik maraq nike, Ie jari aséq gati. Beterus Ie bemanik, “Tiang badaq side, setetune salaq sopoq léq antare side pade gen behianat léq Tiang.” Pengiring-pengiring-Ne saling éngat sopoq kance saq lain dait jari bingung, séngaq ie pade ndéq nenaoq sai saq temaksut siq Deside Isa. Salaq sopoq pengiring saq tekasihin siq Deside Isa tokol léq dékét Deside Isa. Simon Petrus ngebéng isarat léq ie adéq ie metakén léq Deside Isa sai saq temaksut nike. Beterus pengiring Deside Isa nike ngerapetin Deside Isa, dait metakén, “Junjungan Saq Mulie, sai dengan nike?” Jawab Deside Isa, “Dengan saq Tiang béng ruti sesampun Tiang telep ruti nike ojok dalem jembung, ie dengan saq Tiang maksut.” Make Deside Isa bait sepeleng ruti, telepangne ojok dalem jembung; beterus icanin-Ne tipaq Yudas, bije Simon Iskariot. Sesampun Yudas nerimaq ruti nike, Belis tame ojok dalem aténe. Beterus Deside Isa bemanik léq ie, “Becat laksaneang napi saq mélé side laksaneang.” Ndéq araq sopoq dengan juaq léq antare ie pade saq tokol bekelor léq derike ngerti kembéq Deside Isa bemanik maraq nike léq Yudas. Araq saq paran bahwe Deside Isa manikang Yudas beli napi-napi saq teperluang léq perayaan nike, atao ngicanin képéng tipaq dengan miskin -- séngaq Yudas nike jari bendahare léq antare ie pade. Sesampun Yudas nerimaq ruti nike, ie langsung sugul. Waktu nike sampun peteng. Sesampun Yudas lumbar, Deside Isa bemanik, “Mangkin Bije Manusie temulieang dait Allah temulieang langan Ie. Lamun Allah temulieang langan Ie, Ie éndah gen temulieang siq Allah langan diriq-Ne. Malahan Allah gelis gen ngemulieang Ie. Bije-bije Tiang, Tiang ndéq gen ngonéq malik ndot kance side pade. Side pade gen boyaq Tiang, laguq maraq saq sampun Tiang badaq léq dengan-dengan Yahudi, maraq nike éndah Tiang badaq side pade; ojok taoq saq Tiang laiq, side pade ndéq bau dateng. Tiang ngebéng préntah baru léq side: Pade kasihin sopoq kance saq lain. Pade maraq Tiang ngasihin side pade, maraq nike éndah side pade harus saling kasihin. Lamun side pade saling kasihin, selapuq dengan gen nenaoq bahwe side pade pengiring-pengiring Tiang.” Simon Petrus metakén léq Deside Isa, “Junjungan Saq Mulie, Pelungguh gen lumbar ojok mbé?” Jawab Deside Isa, “Ojok mbé lain Tiang, side ndéq bau milu mangkin. Side gen turut Tiang éraq.” Petrus metakén malik, “Junjungan Saq Mulie, kembéq tiang nénten bau turut Pelungguh mangkin? Tiang réde maté demi Pelungguh!” Jawab Deside Isa, “Napi tetu side réde maté demi Tiang? Tiang badaq side pacu-pacu, laun sendéqman manuk ngungkung, side sampun telu kali tilas Tiang!” “Ndaq osah angende,” manik Deside Isa léq ie pade. “Pade percaye léq Allah dait pade percaye léq Tiang éndah. Léq gedéng Bapa Tiang araq luwéq taoq ndot. Tiang lalo ojok derike jari nyedieang side pade taoq. Tiang ndéq gen badaq side maraq nike, lamun ndéqne tetu maraq nike. Sesampun Tiang lalo nyedieang taoq umaq side pade, Tiang gen tulak dait tutut side pade, adéq léq mbé Tiang araq, léq derike éndah side pade araq. Ojok taoq saq Tiang laiq side pade nenaoq langanne.” Beterus Tomas matur léq Deside Isa, “Junjungan Saq Mulie, tiang pade ndéq nenaoq ojok mbé Pelungguh lumbar, berembé tiang pade nenaoq langanne?” Jawab Deside Isa, “Tiang niki langan dait kebenaran dait idup. Ndéq araq sopoq dengan juaq saq bau parek tipaq Bapa lamun ndéq langan Tiang. Lamun side pade kenal Tiang, pasti side pade gen kenal éndah Bapa Tiang. Mangkin side pade sampun kenal Ie, dait sampun serioq Ie!” Beterus Pilipus matur léq Deside Isa, “Junjungan Saq Mulie, nyatayang Bapa léq tiang pade, adéq tiang pade puas.” Laguq jawab Deside Isa, “Sampun bégaq ngonéqne Tiang bareng kance side pade, laguq ndéqman éndah side kenal Tiang, Pilipus? Dengan saq sampun serioq Tiang, sampun serioq Bapa, berembé side iniq bebase, ‘Silaq nyatayang Bapa léq tiang pade’? Pilipus! Napi side ndéq percaye, bahwe Tiang léq dalem Bapa, dait Bapa léq dalem Tiang? Napi saq Tiang sampéang léq side, ndéq Tiang sampéang léman diriq Tiang mésaq. Bapa saq tetep léq dalem Tiang, Ie saq ngelaksaneang selapuqne nike. Pade percaye léq Tiang, bahwe Tiang niki léq dalem Bapa, dait Bapa léq dalem Tiang, atao paling ndéq pade percaye léq napi saq sampun Tiang laksaneang. Tiang badaq side: Setetune dengan saq percaye léq Tiang, gen ngelaksaneang napi saq sampun Tiang laksaneang -- malahan ie gen ngelaksaneang saq beléqan malik -- séngaq Tiang lalo tipaq Bapa. Dait napi-napi saq side pade tunas kadu aran Tiang, gen Tiang laksaneang, adéq Bapa temulieang langan Bije. Napi-napi saq side pade tunas kadu aran Tiang, gen Tiang laksaneang.” “Lamun side pade ngasihin Tiang, side pade gen ngelaksaneang préntah-préntah Tiang. Tiang gen tunas léq Bapa, dait Ie gen ngicanin side Penulung lain, saq gen bareng side pade selaéq-laéqne. Ie nike Roh Kebenaran. Dunie ndéq iniq nerimaq Ie, séngaq dunie ndéqne serioq Ie dait ndéqne kenal Ie. Laguq side kenal Ie, séngaq Ie araq bareng side pade dait gen ndot kance side pade. Side pade ndéq gen Tiang bilin jari anak iwoq. Tiang gen tulak tipaq side. Karing semendaq dunie ndéq gen serioq Tiang malik. Laguq side pade gen serioq Tiang. Dait lantaran Tiang idup, side pade gen idup éndah. Lamun sampun dateng jelo nike, side pade gen nenaoq bahwe Tiang léq dalem Bapa, side pade léq dalem Tiang, dait Tiang éndah léq dalem side pade. Dengan saq taat léq préntah-préntah Tiang dait ngelaksaneang préntah-préntah nike, ie saq ngasihin Tiang. Bapa Tiang gen ngasihin dengan saq ngasihin Tiang, dait Tiang éndah gen ngasihin dengan nike, dait nyatayang diriq Tiang léq ie.” Yudas (saq ndéqne Iskariot) metakén léq Deside Isa, “Junjungan Saq Mulie, kembéq Pelungguh kayun nyatayang diriq tipaq tiang pade dait nénten tipaq dunie?” Jawab Deside Isa, “Dengan saq ngasihin Tiang, gen turut manik Tiang. Bapa Tiang gen ngasihin ie. Bapa dait Tiang gen rauh tipaq ie dait ndot bareng ie. Dengan saq ndéq ngasihin Tiang, ndéq turut manik Tiang. Manik saq side pade dengah nike, ndéq léman Tiang, laguq léman Bapa saq ngutus Tiang. Selapuqne nike Tiang sampéang léq side semasih Tiang araq bareng kance side pade. Laguq Roh Suci, Penulung saq gen teutus Bapa kadu aran Tiang, Ie saq gen ngajah side pade selapuqne dait ngingetang side pade léq napi saq sampun Tiang sampéang tipaq side pade. Damé sejahtere Tiang adéqang umaq side pade. Damé sejahtere Tiang, Tiang béng léq side pade, dait napi saq Tiang béng ndéq maraq saq tebéng siq dunie tipaq side. Ndaq osah dait takut. Side pade sampun dengahang Tiang bemanik, ‘Tiang gen lalo, laguq Tiang gen dateng malik ojok side.’ Lamun side pade ngasihin Tiang, side pade gen besukecite lantaran Tiang lalo tipaq Bapa, séngaq Bapa beléqan léman Tiang. Mangkin Tiang badaq hal nike léq side, sendéqman selapuqne telaksane, adéq lamun éraq hal nike telaksane, side pade gen percaye. Tiang ndéq gen badaq side padu luwéqan malik, séngaq sampun waktune penguase dunie niki dateng. Laguq ie ndéq bedowé kuase napi-napi léq diriq Tiang. Timaqne maraq nike, adéq dunie niki nenaoq bahwe Tiang ngasihin Bapa, make Tiang ngelaksaneang selapuq saq tepréntahang siq Bapa tipaq Tiang. Pade ures, silaq ite lumbar léman deriki.” Deside Isa bemanik malik, “Tiang lolo anggur saq sejati, dait Bapa Tiang nike penggarapne. Sebilang pémpang saq araq léq Tiang saq ndéq bebuaq, peleng-Ne dait sebilang pémpang saq bebuaq tekurangin daunne dait persiq-Ne adéq luwéqan malik buaqne. Side pade sampun bersi lantaran manik saq Tiang sampéang léq side pade. Tetep ndot léq dalem Tiang dait Tiang éndah tetep ndot léq dalem side pade. Pade maraq pémpang ndéqne iniq bebuaq léman diriqne mésaq, kecuali lamun ie tetep léq lolone. Maraq nike éndah halne side pade ndéq gen bebuaq, lamun side pade ndéq ndot léq dalem Tiang. Tiang niki lolo anggur, dait side pade pémpang-pémpangne. Dengan saq tetep ndot léq dalem Tiang, dait Tiang léq dalem ie, ie bebuaq luwéq; séngaq lamun ndéq léq dalem Tiang, side ndéq tao piaq napi-napi. Dengan saq ndéq tetep ndot léq dalem Tiang, gen tetetéh maraq pémpang, beterus jari gero. Pémpang-pémpang saq maraq nike gen tekumpulang dait tetetéh ojok dalem api, beterus tesedut. Lamun side pade ndot léq dalem Tiang dait manik Tiang ndot léq dalem side, pade tunas napi juaq saq side mélé, dait side gen nerimaq ie. Lamun side pade bebuaq luwéq, Bapa Tiang temulieang; dait siq care nike side tetu-tetu pengiring Tiang. Maraq Bapa ngasihin Tiang, maraq nike éndah Tiang ngasihin side pade, pade ndot léq dalem kasih Tiang nike. Lamun side pade turut préntah-préntah Tiang, side pade gen ndot léq dalem kasih Tiang, pade maraq Tiang sampun turut préntah-préntah Bapa Tiang dait ndot léq dalem kasih-Ne. Selapuqne niki Tiang sampéang tipaq side pade, adéq sukecite Tiang araq léq dalem aténde, dait sukecitende jari sempurne. Niki préntah Tiang: Pade kasihin sopoq kance saq lain, pade maraq Tiang ngasihin side pade. Ndéq araq kasih saq beléqan léman kasih sopoq dengan saq réde nyerahang nyawene umaq sahabat-sahabatne. Side pade sahabat-sahabat Tiang lamun side pade ngelaksaneang napi saq Tiang préntahang tipaq side pade. Side pade ndéq Tiang sebut hambe malik, séngaq hambe ndéq nenaoq napi saq tepiaq siq majikanne. Side pade Tiang sebut sahabat, séngaq selapuq saq Tiang dengah léman Bapa Tiang, sampun Tiang sampéang léq side pade. Ndéq side pade saq miléq Tiang. Laguq Tiang saq miléq side pade dait Tiang sampun netepang side pade lumbar dait ngasilang buaq dait buaqde nike ndéq iniq binase, adéq napi saq side tunas tipaq Bapa kadu aran Tiang, icanin-Ne tipaq side. Niki préntah Tiang léq side: Pade kasihin sopoq kance saq lain.” “Lamun dunie meriq léq side pade, pade inget bahwe Tiang sampun juluan temeriq siq dunie. Seandéne side pade léman dunie side pade gen tekasihin siq dunie jari dowéne. Laguq Tiang sampun piléq side pade léman dunie niki, jari side pade ndéqne malik dowén dunie. Keranaq nike dunie meriq léq side pade. Pade inget napi saq sampun Tiang sampéang léq side pade, ‘Hambe ndéqne beléqan léman majikanne.’ Lamun ie pade sampun nganiaye Tiang, make ie gen nganiaye side pade. Lamun ie pade turut manik Tiang, make ie pade éndah gen turut basen side pade. Laguq selapuqne nike gen ie pade laksaneang léq side pade lantaran aran Tiang, séngaq ie pade ndéq kenal Allah saq sampun ngutus Tiang. Seandéne Tiang ndéq dateng dait ndéq nyampéang léq ie pade, make ie pade ndéq bedose. Laguq mangkin ie pade ndéq bedowé alasan malik siq dose ie pade. Dengan saq meriq léq Tiang, ie éndah meriq léq Bapa Tiang. Seandéne Tiang ndéq ngelaksaneang karye léq tengaq-tengaq ie pade maraq saq ndéq uwah telaksaneang siq dengan lain, pasti ie pade ndéq bedose. Laguq mangkin timaq ie pade sampun serioq selapuqne nike, tetep doang ie pade meriq léq Tiang dait Bapa Tiang. Laguq manik saq sampun araq tetulis léq dalem Kitab Suci Taurat ie pade harus telaksane, ‘Ie pade ndéq bedowé alasan napi-napi ie meriq léq Tiang.’ Tiang gen ngutus tipaq side Penulung saq asalne léman Bapa, nike Roh Kebenaran saq dateng léman Bapa. Lamun Roh nike dateng, Ie gen besaksi mengenai Tiang. Dait side pade éndah harus besaksi mengenai Tiang, séngaq side pade sampun bareng kance Tiang léman penembéqne. Selapuqne nike Tiang sampéang léq side pade, adéq side pade ndéq murtat. Side pade gen tesugulang léman balé-balé ibadah. Dait gen dateng waktune bahwe dengan saq nyematéq side pade gen paran diriqne ngabdi léq Allah. Ie pade laksaneang hal nike léq side, séngaq ie pade ndéqman kenal Bapa dait Tiang. Laguq mangkin Tiang sampéang hal nike léq side, adéq éraq lamun hal nike telaksane, side pade inget bahwe sampun Tiang sampéang tipaq side pade.” “Hal niki ndéq Tiang sampéang léq side pade léman penembéqne, séngaq Tiang masih araq bareng kance side pade. Laguq mangkin Tiang gen lalo ojok Ie saq ngutus Tiang; dait ndéq sopoq dengan juaq léq antare side pade saq beketuan ojok mbé lain Tiang. Malahan mangkin side pade aséq, lantaran Tiang sampéang hal nike léq side pade. Laguq Tiang sampéang hal saq kenaq léq side pade: Solahan umaq side pade lamun Tiang lalo; séngaq lamun Tiang ndéq lalo, Penulung nike ndéq gen dateng ojok side pade. Laguq lamun Tiang lalo, Tiang gen ngutus Penulung nike ojok side pade. Lamun Penulung nike dateng, Ie gen nyatayang tipaq dunie mengenai dose, mengenai kebenaran, dait mengenai penghakiman. Mengenai dose, séngaq ie pade tetep ndéq percaye léq Tiang; mengenai kebenaran, séngaq Tiang lalo ojok Bapa dait side pade ndéq gen serioq Tiang malik; mengenai penghakiman, séngaq penguase dunie niki sampun tehukum. Luwéq malik saq mélé Tiang sampéang tipaq side, laguq mangkin niki side ndéqman sanggup nerimaq hal nike. Laguq lamun Roh nike dateng, nike Roh kebenaran, Ie gen bimbing side pade jari nenaoq selapuq saq kenaq; séngaq Ie ndéq gen bemanik léman diriq-Ne mésaq, laguq selapuq hal saq Ie pireng, nike saq gen Ie sampéang dait Ie gen beriteang tipaq side hal-hal saq gen dateng. Ie gen mulieang Tiang, séngaq napi saq Ie sampéang tipaq side pade Ie terimaq léman Tiang. Selapuq saq araq léq Bapa nike dowén Tiang. Keranaq nike, Tiang badaq bahwe napi saq tesampéang siq Roh tipaq side pade, Ie terimaq léman Tiang.” “Karing semendaq side pade ndéq gen serioq Tiang malik, dait karing semendaq éndah side pade gen serioq Tiang.” Pire dengan pengiring Deside Isa saling ketuan sopoq kance saq lainne, “Napi maksutne Ie bemanik léq ite: ‘Karing semendaq side pade ndéq gen serioq Tiang, dait karing semendaq éndah side pade gen serioq Tiang’? Napi éndah maksut-Ne bemanik, ‘Tiang gen parek ojok Bapa’?” Ie pade beketuan terus, “Napi artine, ‘semendaq’? Ite ndéq ngerti Ie bebaos mengenai napi!” Deside Isa wikan bahwe ie pade mélé metakén léq Ie, make Ie bemanik, “Baruq Tiang sampéang, ‘Karing semendaq doang side pade ndéq gen serioq Tiang, dait karing semendaq éndah side pade gen serioq Tiang.’ Napi nike saq jari persoalan léq antare side pade? Setetune Tiang badaq side, side pade gen nangis dait aséq, laguq dunie gen gembire. Side pade gen susah, laguq kesusahande nike gen berobah jari sukecite. Lamun sopoq dengan nine gen nganak, ie susah séngaq mule sampun wayene ie menderite. Laguq sesampun anakne sugul, ie lupaq léq penderiteanne lantaran cemohne bahwe sopoq manusie sampun teanakang ojok dalem dunie. Maraq nike éndah side pade: Mangkin side pade susah, laguq Tiang gen bedait malik kance side pade, make angende gen jari sukecite; dait ndéq araq sopoq dengan juaq saq bau bait sukecite nike léman aténde. Léq jelo nike, side pade ndéq gen beketuan napi-napi malik léq Tiang. Tiang badaq side: Setetune napi doang saq side pade tunas léq Bapa kadu aran Tiang, nike gen tekabulang siq Bapa. Jangke mangkin niki side pade ndéqman tunas napi-napi kadu aran Tiang. Pade tunas, make side pade gen nerimaq, adéq sukecitende jari sempurne.” “Selapuqne niki Tiang sampéang léq side pade kadu perumpamean. Laguq gen dateng waktune, Tiang ndéq gen kadu perumpamean malik, laguq gen nyampéang secare terus-terang léq side pade mengenai Bapa. Léq waktu nike side pade gen bedo'e tipaq Bapa kadu aran Tiang. Dait ndéq Tiang badaq side, bahwe Tiang gen tunasang side pade léq Bapa, séngaq Bapa mésaq ngasihin side pade. Ie ngasihin side pade lantaran side pade ngasihin Tiang, dait percaye bahwe Tiang dateng léman Allah. Mule Tiang asalne léman Bapa, dait sampun dateng ojok dalem dunie. Laguq mangkin Tiang bilin dunie jari tulak ojok Bapa.” Beterus pengiring-pengiring Deside Isa matur léq Deside Isa, “Mangkin niki Junjungan Saq Mulie bemanik secare terus-terang, nénten kadu perumpamean, dait tiang pade nenaoq bahwe Junjungan Saq Mulie wikan selapuqne. Nénten araq sopoq dengan juaq saq perlu ketuanang napi-napi tipaq Junjungan Saq Mulie. Keranaq nike tiang pade percaye bahwe Pelungguh rauh léman Allah.” Jawab Deside Isa tipaq ie pade, “Jari, napi side pade percaye mangkin? Inget! Waktune gen dateng, malahan sampun dateng, side pade gen bekelin sopoq kance saq lain. Side pade gen uléq ojok balénde mésaq dait bilin Tiang mésaq-mésaq. Laguq Tiang ndéq mésaq-mésaq séngaq Bapa araq bareng Tiang. Selapuqne niki Tiang sampéang adéq side pade mauq damé sejahtere léq dalem Tiang. Léq dunie niki side pade gen menderite. Laguq teguqang aténde! Tiang sampun ngalahang dunie!” Sesampun bemanik maraq nike, Deside Isa bedo'e andang langit, “Bapa, mangkin sampun dateng waktune. Mulieang Bije Deside adéq Bije Deside éndah mulieang Deside. Deside sampun ngicanin tipaq Bije Deside kuase tipaq selapuq umat manusie, adéq Ie ngicanin idup sejati dait kekel tipaq selapuq dengan saq Deside icanin tipaq Ie. Niki idup sejati dait kekel; bahwe dengan kenal kance Deside, jari sopoq-sopoqne Allah saq kenaq, dait kenal kance Deside Isa Almasih saq sampun Deside utus. Tiang sampun mulieang Deside léq gumi siq care nyeleséang karye saq Deside serahang tipaq Tiang jari Tiang laksaneang. Keranaq nike, Bapa, mangkin mulieang Tiang bareng-bareng kance Deside siq kemuliean saq sampun jari dowén Tiang dait dowén Deside sendéqman dunie niki tecipteang. Tiang sampun nyatayang peséngan Deside tipaq dengan-dengan léq dunie saq sampun Deside icanin tipaq Tiang. Ie pade nike jari dowén Deside, dait Deside sampun ngicanin ie pade tipaq Tiang dait ie pade sampun turut manik Deside. Mangkin ie pade nenaoq bahwe selapuq saq Deside icanin tipaq Tiang asalne léman Deside. Sampun Tiang sampéang tipaq ie pade manik saq Deside icanin tipaq Tiang; dait ie pade sampun nerimaq manik nike. Ie pade nenaoq bahwe Tiang tetu-tetu dateng léman Deside dait ie pade percaye bahwe Deside saq ngutus Tiang. Tiang do'eang ie pade. Tiang nénten do'eang dunie laguq jari dengan-dengan saq sampun Deside icanin tipaq Tiang, séngaq ie pade dowén Deside. Selapuq saq jari dowén Tiang, jari dowén Deside éndah. Dait selapuq dowén Deside jari dowén Tiang éndah. Tiang temulieang léq antare ie pade. Mangkin Tiang parek ojok Deside. Tiang nénten ndot malik léq dunie; laguq ie pade araq léq dunie. Bapa, saq suci! Jagaq ie pade siq kekuasean peséngan Deside, nike peséngan saq sampun Deside icanin tipaq Tiang -- adéq ie pade jari sopoq, pade maraq Deside kance Tiang éndah sopoq. Léq waktu Tiang masih bareng kance ie pade, Tiang sampun jagaq ie pade siq kuase peséngan Deside -- peséngan saq Deside icanin tipaq Tiang. Tiang sampun jagaq ie pade, dait nénten araq sopoq juaq léman ie pade saq binase; kecuali ie saq mule sampun tetentuang binase. Adéq siq care nike telaksane napi saq tetulis léq Kitab Suci. Mangkin Tiang parek ojok Deside. Selapuqne niki Tiang sampéang semasih Tiang araq léq dunie; adéqne penoq sukecite Tiang léq dalem ie pade. Tiang sampun sampéang léq ie pade selapuq manik Deside, dait dunie meriq léq ie pade, séngaq ie pade nénten dowén dunie, pade maraq Tiang éndah nénten dowén dunie. Tiang nénten tunas adéq Deside bait ie pade léman dunie niki, laguq Tiang tunas adéq Deside jagaq ie pade léman saq jahat. Pade maraq Tiang ndéqne léman dunie, ie pade éndah ndéqne léman dunie. Suciang ie pade dalem kebenaran; manik Deside nike kebenaran. Maraq Deside sampun ngutus Tiang ojok dunie, maraq nike éndah Tiang ngutus ie pade ojok dunie; dait Tiang suciang diriq Tiang umaq ie pade, adéq ie pade éndah tesuciang dalem kebenaran. Nénten ie pade doang saq Tiang do'eang, laguq Tiang éndah do'eang dengan-dengan saq percaye léq Tiang siq kesaksian ie pade niki; adéq ie pade selapuq jari sopoq, pade maraq Deside léq dalem Tiang, dait Tiang léq dalem Deside, adéq ie pade éndah léq dalem Ite, adéq dunie percaye, bahwe Deside saq sampun ngutus Tiang. Tiang sampun ngicanin ie pade kemuliean saq Deside icanin léq Tiang, adéq ie pade jari sopoq, pade maraq Ite éndah sopoq; Tiang léq dalem ie pade, dait Deside léq dalem Tiang; adéq ie pade sempurne jari sopoq, adéq dunie nenaoq bahwe Deside saq sampun ngutus Tiang, dait Deside ngasihin ie pade, pade maraq Deside ngasihin Tiang. Bapa, Tiang melét adéq léq mbé juaq Tiang araq, ie pade éndah araq bareng kance Tiang, ie pade saq sampun Deside icanin tipaq Tiang, adéq ie pade serioq kemuliean Tiang saq sampun Deside icanin tipaq Tiang, séngaq Deside sampun ngasihin Tiang sendéqman dunie tecipteang. Bapa saq adil! Mule dunie nénten kenal kance Deside, laguq Tiang kenal kance Deside; dait ie pade niki nenaoq, bahwe Deside saq sampun ngutus Tiang, dait Tiang sampun nyatayang peséngan Deside tipaq ie pade; dait Tiang gen laksaneang hal nike, adéq kasih Deside léq Tiang tetep léq dalem até ie pade dait Tiang léq dalem ie pade.” Sesampun Deside Isa bedo'e maraq nike, Ie kance pengiring-pengiring-Ne lumbar ojok itoqan Kokoq Kidron. Léq derike araq sopoq taman, dait Deside Isa kance pengiring-pengiring-Ne tame ojok taman nike. Taman nike sampun tetaoq siq Yudas saq behianat léq Deside Isa; séngaq Deside Isa kance pengiring-pengiring-Ne rimpes bekumpul léq derike. Make Yudas lumbar ojok taoq nike. Jauqne sepasukan tentere Romawi kance pengawal-pengawal Gedéng Allah saq tesuruq siq imam-imam kepale dait dengan-dengan Parisi. Ie pade jauq gegaman, dilah dait obor. Deside Isa wikan selapuq saq gen telaksane tipaq diriq-Ne. Jari Ie ngerapetin dengan-dengan nike, dait beketuan, “Sai saq side pade boyaq?” “Deside Isa, dengan Nazaret,” jawab ie pade. “Tiang niki Ie,” jawab Deside Isa. Yudas penghianat nganjeng kance ie pade léq derike. Sewaktu Deside Isa bemanik léq ie pade, “Tiang niki Ie,” ie pade selapuq surut mudi dait rebaq ojok tanaq. Deside Isa beketuan malik léq ie pade, “Sai saq side pade boyaq?” “Deside Isa dengan Nazaret,” jawab ie pade. “Sampun Tiang badaq side, Tiang niki Ie,” manik Deside Isa. “Dait lamun mule Tiang saq side pade boyaq, alurang dengan saq lain nike lumbar.” ( Siq manik-Ne nike, make telaksane napi saq sampun temanikang siq Deside Isa sendéqmanne: “Bapa, léman dengan-dengan saq Bapa icanin tipaq Tiang, nénten sopoq dengan juaq saq binase.”) Simon Petrus saq jauq kléwang, nyerét kléwangne terus ngerantek pelayan Imam Agung jangke pegat kentokne saq kanan. Aran pelayan nike Malkus. Beterus Deside Isa bemanik tipaq Petrus, “Tamaqang malik kléwangde ojok sarungne! Napi side paran Tiang ndéq gen nginem cawan penderitean saq teicanin siq Bapa tipaq Tiang?” Beterus prajurit-prajurit Romawi bareng komendanne dait pengawal-pengawal Yahudi bau dait sékoq Deside Isa. Penembéqne ie pade jauq Deside Isa ojok Hanas, mentoaqne Kayapas. Léq waktu nike Kayapas jari Imam Agung. Kayapas nike saq sampun ngebéng naséhat léq pare penguase Yahudi bahwe solahan sopoq dengan ninggal umaq selapuq bangse. Simon Petrus dait sopoq pengiring saq lain ngiring Deside Isa. Pengiring saq lain niki sampun kenal kance Imam Agung. Keranaq nike, ie tame bareng kance Deside Isa ojok leléah gedéng Imam Agung, laguq Petrus ngantih léq luah, léq jebak. Beterus pengiring saq lain nike sugul, dait ngeraos kance pelayan nine saq jagaq lawang, beterus jauqne Petrus tame ojok dalem. Pelayan nine saq jagaq lawang nike bebase léq Petrus, “Tekan side éndah salaq sopoq pengiring dengan nike?” “Ndéq,” jawab Petrus. Waktu nike kenyeke telih gati, jari pelayan-pelayan kance pengawal-pengawal penyalaq api kadu areng dait ie pade mindu léq derike. Petrus éndah lumbar ojok derike dait milu mindu léq api bareng ie pade. Imam Agung metakén léq Deside Isa mengenai pengiring-pengiring-Ne dait mengenai perajahan-Ne. Jawab Deside Isa, “Tiang tetep nyampéang secare terus terang léq julun dengan luwéq. Tiang tetep ngajahang léq balé-balé ibadah dait Gedéng Allah, taoq dengan Yahudi biasene bekumpul. Tiang ndéq uwah nyatayang napi-napi secare nyeboq-nyeboq. Jari, kembéq pelungguh beketuan léq Tiang? Silaq beketuan léq dengan-dengan saq sampun dengahang pengajahan Tiang. Pasti ie pade nenaoq napi saq Tiang ajahang.” Sewaktu Deside Isa bemanik maraq nike, salaq sopoq pengawal léq derike tempélék Deside Isa dait bebase, “Bani gati Side bebase maraq nike tipaq Imam Agung!” Jawab Deside Isa, “Lamun Tiang ngucapang hal saq salaq, nyatayang léq deriki napi kesalaqanne! Laguq lamun napi saq Tiang ucapang nike kenaq, kembéq side tempélék Tiang?” Beterus Hanas suruq dengan jauq Deside Isa saq sampun tesékoq nike ojok Imam Agung Kayapas. Simon Petrus masih nganjeng mindu léq derike. Dengan-dengan bebase léq ie, “Tekan side éndah salaq sopoq pengiring-Ne?” Laguq Petrus nilas, “Ndéq!” Sopoq pelayan Imam Agung, keluarge léman dengan saq kentokne terantek siq Petrus, bebase, “Tekan onéq tiang serioq side léq taman bareng kance Ie?” Beterus Petrus nilas malik, “Ndéq,” -- dait tepat léq waktu nike manuk ngungkung. Kelémaq gati ie pade jauq Deside Isa léman gedéng Kayapas ojok istane gubernur. Dengan-dengan Yahudi ndéq tame ojok dalem istane, adéq ie pade ndéq jari najis menurut aturan agame, séngaq ie pade mélé ngelorang keloran Paskah. Keranaq nike Pilatus sugul dait beketuan léq ie pade, “Napi tuduhan side pade tipaq dengan niki?” Jawab ie pade, “Lamun Ie ndéq salaq, tiang pade ndéq gen jauq Ie ojok pelungguh.” Beterus basen Pilatus léq ie pade, “Silaq bait dait adilin Ie menurut hukumde mésaq!” Laguq jawab dengan-dengan Yahudi nike, “Tiang pade ndéq kanggo nyematéq dengan.” ( Siq care nike, make telaksane napi saq sampun temanikang siq Deside Isa mengenai berembé entane Ie gen ninggal.) Pilatus tame malik ojok dalem istane, dait ngempoh Deside Isa, terus ie metakén, “Napi tetu Pelungguh raje dengan Yahudi?” Jawab Deside Isa, “Napi saq pelungguh ketuanang niki mule asalne léman pelungguh mésaq atao araq dengan lain saq badaq pelungguh mengenai Tiang?” Jawab Pilatus, “Napi tiang niki dengan Yahudi? Saq nyerahang Pelungguh ojok tiang niki bangse Pelungguh mésaq dait imam-imam kepale. Setetune napi saq Pelungguh sampun piaq?” Jawab Deside Isa, “Kerajaan Tiang ndéq léman dunie niki. Seandéne kerajaan Tiang léman dunie niki, pengiring-pengiring Tiang gen bejuang adéq Tiang ndéq teserahang ojok penguase Yahudi. Laguq mule kerajaan Tiang nike ndéq léman dunie niki!” Beterus Pilatus metakén léq Deside Isa, “Jari, Pelungguh niki Raje?” Jawab Deside Isa, “Pelungguh bebase bahwe Tiang niki Raje. Tiang tebijeang dait dateng ojok dunie niki siq sopoq maksut, ngebéng kesaksian mengenai kebenaran. Dengan saq asalne léman kebenaran nike ie gen dengahang Tiang.” Pilatus metakén malik léq Deside Isa, “Napi artine kebenaran nike?” Sesampun nike Pilatus sugul malik léman istane dait bebase léq dengan-dengan Yahudi, “Tiang ndéq ndait sopoq juaq kesalaqan léq Ie. Laguq menurut adat saq biase, tiang harus bébasang sopoq tahenan léq Hari Raye Paskah. Napi side pade mélé lamun tiang bébasang Raje dengan Yahudi nike tipaq side pade?” Ie pade bejawab nyurak-nyurak, “Sampunang Ie, laguq Barabas!” (Barabas nike tukang rampok.) Beterus Pilatus tame dait suruq dengan mecut Deside Isa. Prajurit-prajurit miaq sopoq mahkote léman pémpang-pémpang beduwi, terus kaduangne léq sirah Deside Isa. Sesampun nike ie pade kaduang Deside Isa jubah warne lempok lomaq, terus sambil maju ojok julu ie pade bebase, “Idup raje dengan Yahudi!” Beterus ie pade tempélék Deside Isa. Sesampun nike Pilatus sugul malik dait bebase tipaq dengan luwéq nike, “Pade serioq! Tiang jauq Ie sugul ojok side pade, adéq side pade nenaoq tiang ndéq ndait sopoq juaq kesalaqan léq Ie.” Make Deside Isa sugul dait kadu mahkote duwi dait jubah lempok lomaq. Pilatus bebase tipaq ie pade, “Serioq dengan niki.” Sewaktu imam-imam kepale dait pengawal-pengawal nike serioq Deside Isa, ie pade nyurak, “Pakuq Ie léq kayuq salib! Pakuq Ie léq kayuq salib!” Pilatus bebase tipaq ie pade, “Bait Ie, dait pakuq Ie léq kayuq salib, séngaq tiang ndéq ndait sopoq juaq kesalaqan léq Ie.” Jawab dengan-dengan Yahudi nike, “Tiang pade bedowé hukum dait menurut hukum nike Ie harus maté, séngaq Ie ngaku diriq-Ne Bije saq asalne léman Allah.” Sewaktu Pilatus pirengang ie pade bebase maraq nike, ie sayan takut malik. Beterus ie tame malik ojok dalem istane, dait sesampun Deside Isa tejauq tame, ie metakén léq Deside Isa, “Léman mbé asal Pelungguh?” Laguq Deside Isa nénten bejawab. Make Pilatus metakén malik, “Pelungguh nénten kayun bebaos kance tiang? Adéq Pelungguh wikan, tiang bedowé kuase bébasang Pelungguh, dait kuase jari pakuq Pelungguh léq kayuq salib!” Jawab Deside Isa, “Lamun Allah nénten ngicanin kuase nike tipaq pelungguh, pelungguh ndéq bedowé kuase napi-napi tipaq Tiang. Keranaq nike dengan saq nyerahang Tiang tipaq pelungguh, beléqan dosene léman pelungguh.” Sewaktu Pilatus pirengang hal nike, ie berusahe bébasang Deside Isa. Laguq dengan-dengan Yahudi nyurak-nyurak, “Lamun pelungguh bébasang Ie, pelungguh nénten sahabat Kaisar, dengan saq ngaku diriqne jari raje, ie ngelawan Kaisar!” Sewaktu Pilatus pirengang ucapan-ucapan nike, ie jauq Deside Isa ojok luah terus melinggih léq kursi pengadilan léq taoq saq aranne Litostrotos. (Léq dalem base Ibrani aranne Gabata.) Waktu nike gen jam due olas tengari, jelo sendéqman Hari Raye Paskah. Pilatus bebase tipaq dengan-dengan nike, “Niki raje side pade!” Ie pade nyurak-nyurak, “Matéq Ie! Matéq Ie! Pakuq Ie léq kayuq salib!” Pilatus beketuan malik, “Napi rajende harus tiang pakuq léq kayuq salib?” Jawab imam-imam kepale, “Cume Kaisar sopoq-sopoqne raje tiang pade!” Beterus Pilatus nyerahang Deside Isa tipaq ie pade jari tepakuq léq kayuq salib. Ie pade bait Deside Isa, terus jauq Ie lumbar. Deside Isa sugul sambil ngelémbah kayuq salib-Ne ojok taoq saq aranne “Taoq Jerangkong”. (Léq dalem base Ibrani tesebut, Golgota.) Léq derike Ie tepakuq léq kayuq salib. Bareng-bareng kance Ie araq éndah due dengan lain saq tepakuq léq kayuq salib; sopoq léq sedi kiri, sopoqne malik léq sedi kanan, dait Deside Isa léq tengaq-tengaq. Léq kayuq salib Deside Isa, Pilatus suruq dengan pasang tulisan niki: “Isa léman Nazaret, Raje Dengan Yahudi”. Luwéq dengan Yahudi bace tulisan nike, séngaq taoq Deside Isa tepakuq léq kayuq salib nike ndéqne jaoq léman kote. Tulisan nike kadu base Ibrani, Latin, dait Yunani. Imam-imam kepale matur léq Pilatus, “Sampunang tulis ‘Raje dengan Yahudi’, laguq tulis maraq niki, ‘Dengan niki bebase, Tiang Raje dengan Yahudi.’ ” Laguq jawab Pilatus, “Saq sampun tiang tulis, tetep tetulis.” Sesampun prajurit-prajurit nike pakuq Deside Isa léq kayuq salib, ie pade bait kuace-Ne. Kuace nike tebagi empat: Sebilang dengan mauq sopoq bagian. Ie pade bait éndah jubah-Ne. Jubah nike ndéq araq jaitanne -- tesésék léman atas jangke dateng bawaq. Prajurit-prajurit nike bebase sopoq kance saq lain, “Ndaq ite peleng-peleng jubah niki. Silaq ite piaq undian jari nentuang sai saq mauq jubah nike.” Siq care nike make telaksane napi saq tetulis dalem Kitab Suci: “Ie pade bagi-bagi kelambi Tiang, dait piaq undian jari mauq jubah Tiang.” Hal nike saq telaksaneang siq prajurit-prajurit nike. Léq dékét kayuq salib Deside Isa, nganjeng mamiq bini-Ne, sanak mamiq bini-Ne, aranne Mariam senine Klopas, dait Mariam Magdalena. Sewaktu Deside Isa cingakin mamiq bini-Ne dait pengiring-Ne saq Ie kasihin nganjeng léq derike, Ie bemanik léq mamiq bini-Ne, “Inaq, niki bijende.” Beterus Deside Isa bemanik tipaq pengiring-Ne nike, “Nike mamiq bini side.” Mulai waktu nike pengiring-Ne nike nerimaq mamiq bini Deside Isa meneng léq baléne. Deside Isa wikan bahwe mangkin selapuqne sampun selesé, dait napi saq tetulis dalem Kitab Suci adéq telaksane. Ie bemanik, “Tiang bedak.” Léq derike araq sopoq jembung penoq siq aiq anggur saq pedis. Beterus ie pade celep sopoq bunge karang léq aiq anggur nike, terus tancepne léq hisop dait jonjongne ojok cangkem Deside Isa. Sesampun Deside Isa inem anggur saq pedis nike, Ie bemanik, “Sampun selesé!” Beterus Ie nundukang sirah-Ne dait nyerahang nyawe-Ne. Pare penguase Yahudi ndéq mélé mayit dengan-dengan saq tepakuq léq kayuq salib nike tetep begantung léq kayuq salib léq jelo Sabat, séngaq jelo Sabat nike Hari Raye saq husus. Séngaq jelo sewaktu Deside Isa tepakuq léq kayuq salib nike tepat sejelo sendéqman jelo Sabat nike, dengan-dengan Yahudi tunas ijin léq Pilatus jari molakang naé dengan-dengan saq sampun tepakuq léq kayuq salib dait nurunang mayit-mayit nike léman kayuq salib. Make, prajurit-prajurit nike lumbar dait molakang juluan naé kedue dengan saq tepakuq léq kayuq salib bareng Deside Isa. Laguq sewaktu ie pade dateng léq arepan Deside Isa, ie pade serioq Deside Isa sampun ninggal. Make ie pade ndéq molakang cokor-Ne. Laguq salaq sopoq léman prajurit nike galah woteng Deside Isa kadu tumbak; dait waktu nike éndah sugul daraq dait aiq. Dengan saq serioq mésaq peristiwe nike, ie saq nyeriteang hal nike, adéq side pade éndah percaye. Dait kesaksianne nike kenaq, dait ie nenaoq bahwe nike kenaq. Hal nike telaksane adéqne genep napi saq tetulis dalem Kitab Suci, “Ndéq sopoq juaq tolang-Ne gen tepolakang.” Léq dalem Kitab Suci éndah tetulis: “Ie pade gen perhatiang Ie saq sampun ie pade galah.” Sesampun nike Yusup léman Arimatea tunas ijin léq Pilatus jari bait jenazah Deside Isa. (Yusup nike pengiring Deside Isa laguq secare nyeboq-nyeboq, séngaq ie takut léq penguase-penguase Yahudi.) Pilatus ngicanin ijin tipaq ie, jari ie lumbar bait jenazah Deside Isa. Nikodemus, saq piranan sampun parek tipaq Deside Isa léq kekelem, lumbar éndah bareng kance Yusup. Nikodemus jauq ramuan mur dait garu -- selapuqne kire-kire telung dase kilo luwéqne. Kedue dengan nike bait jenazah Deside Isa, terus bungkusne kadu kain lénen saq putéq bareng-bareng kance ramuan sengéh menurut adat penguburan dengan Yahudi. Léq taoq Deside Isa tepakuq léq kayuq salib araq sopoq taman. Léq dalem taman nike araq sopoq kuburan baru, saq ndéqman tekadu nguburang dengan. Lantaran kuburan nike rapet, dait jelo nike jelo persiepan sendéqman jelo Sabat, ie pade makamang Deside Isa léq derike. Léq jelo Ahad kelémaq, waktu masih peteng, Mariam Magdalena lumbar ojok makam. Ie serioq batu pengimpetne nike sampun tealih léman loang makam nike. Ie pelai boyaq Simon Petrus dait pengiring saq tekasihin siq Deside Isa, terus bebase léq ie pade, “Junjungan Saq Mulie sampun tebait léman makam, dait tiang ndéq nenaoq léq mbé Ie tetoloq.” Beterus Petrus dait pengiring saq lain nike lumbar ojok makam. Deduaqne pelai, laguq pengiring saq lain nike becatan léman Petrus, dait ie juluan dateng léq makam. Ie nidok ojok dalem makam dait serioqne kain putéq nike araq léq derike, laguq ie ndéq tame. Simon Petrus éndah dateng terutuk ie, dait tame ojok dalem makam nike. Ie serioq kain putéq araq léq derike, laguq kain saq tetaliq léq sirah Deside Isa ndéq araq léq dékétne laguq sampun belekut léq taoq saq lain. Beterus pengiring saq juluan dateng léq makam, tame éndah. Ie serioq dait percaye. ( Jangke léq waktu nike ie pade ndéqman ngerti napi saq tetulis léq dalem Kitab Suci bahwe Ie harus idup malik léman ninggal.) Sesampun nike kedue pengiring Deside Isa nike uléq ojok baléne. Mariam Magdalena nganjeng léq julu makam sambil nangis. Sewaktu ie kenyeke nangis, ie nidok ojok dalem makam, terus serioq due malaékat bekelambi putéq. Ie pade melinggih léq onos taoq Deside Isa tesaréang, saq sopoq léq bagian sirah, dait saq sopoqne malik léq bagian cokor. Malaékat-malaékat nike beketuan, “Kembéq side nangis, inaq?” Jawab Mariam, “Junjungan tiang Saq Mulie sampun tebait, dait tiang ndéq nenaoq léq mbé Ie tetoloq.” Sesampun bebase maraq nike, ie ngéngat andang mudi, dait serioq Deside Isa ngadeg léq derike. Laguq ie ndéq tandaq bahwe nike Deside Isa. Deside Isa bemanik léq ie, “Inaq, kembéq side nangis? Sai saq side boyaq?” Mariam paran nike tukang kebon, jari ie bebase, “Paq, lamun Side saq jauq Ie léman deriki, tulung badaq tiang léq mbé Side toloq Ie, adéq tiang bau bait Ie.” Deside Isa bemanik léq ie, “Mariam!” Mariam ngéngat andang Deside Isa, beterus matur kadu base Ibrani, “Rabuni!” (Saq artine, “Guru”.) “Ndaq demak Tiang,” manik Deside Isa léq ie, “séngaq Tiang ndéqman lalo ojok Bapa. Laguq silaq lumbar tipaq sanak-sanak Tiang, dait sampéang tipaq ie pade bahwe mangkin Tiang lalo ojok Bapa Tiang dait Bapa side éndah, Allah Tiang dait Allah side.” Terus Mariam lumbar nyampéang tipaq pengiring-pengiring Deside Isa bahwe ie sampun serioq Junjungan Saq Mulie, dait Junjungan Saq Mulie sampun manikang selapuqne nike léq ie. Léq jelo Ahad nike éndah, sesampun kekelem, pengiring-pengiring Deside Isa bekumpul léq sopoq balé saq lawang-lawangne telenting, séngaq ie pade takut léq dengan-dengan Yahudi. Selung-selung Deside Isa rauh dait ngadeg léq tengaq-tengaq ie pade, dait bemanik, “Damé sejahtere umaq side pade.” Sesampun bemanik maraq nike, Ie metitoqang gading dait woteng-Ne léq ie pade. Sewaktu ie pade serioq Junjungan Saq Mulie, ie pade cemoh gati. Beterus karing sekali Deside Isa bemanik léq ie pade, “Damé sejahtere umaq side pade! Maraq Bapa ngutus Tiang, maraq nike éndah Tiang ngutus side pade.” Beterus Ie niupang embok-Ne léq ie pade dait bemanik, “Terimaq niki Roh Suci. Lamun side pade ngampunin dose dengan, Allah éndah ngampunin dengan nike. Lamun side pade ndéq ngampunin dose dengan, Allah éndah ndéq ngampunin dengan nike.” Tomas (saq tesebut Didimus), salaq sopoq léman due olas pengiring Deside Isa, ndéq araq léq taoq nike waktu Deside Isa rauh. Make pengiring-pengiring Deside Isa saq lain bebase léq Tomas, “Tiang pade sampun serioq Junjungan Saq Mulie!” Laguq jawab Tomas, “Lamun tiang ndéqman serioq onos paku léq gading-Ne, dait ndéqman jujuq siq ranggot tiang ojok onos paku nike dait ndéqman noloq ime tiang léq woteng-Ne, make tiang ndéqman mélé percaye.” Baluq jelo sesampun nike pengiring-pengiring Deside Isa araq malik léq dalem balé nike dait Tomas bareng-bareng kance ie pade. Selapuq lawang telenting. Laguq Deside Isa rauh dait ngadeg léq tengaq-tengaq ie pade, terus bemanik, “Damé sejahtere umaq side pade.” Beterus Ie bemanik léq Tomas, “Toloq ranggotde léq deriki dait serioq imen Tiang, ulurang imende dait toloq léq woteng Tiang. Ndaq ragu-ragu malik, laguq percaye!” Tomas matur léq Deside Isa, “Ya, Tuhan tiang dait Allah tiang!” Beterus Deside Isa bemanik léq ie, “Lantaran side sampun serioq Tiang, make side percaye. Bahagie ie pade saq ndéq serioq, laguq percaye.” Masih luwéq malik keajaipan-keajaipan lain saq tepiaq siq Deside Isa léq julu pengiring-pengiring-Ne, laguq ndéq tetulis léq dalem kitab niki. Laguq selapuqne niki tetulis, adéq side pade percaye bahwe Deside Isa nike Mesias, Bije saq asalne léman Allah, dait adéq siq percaye, side pade nerimaq idup dalem peséngan-Ne. Sesampun nike karing sekali Deside Isa nyatayang diriq léq pengiring-pengiring-Ne léq Danao Tiberias. Maraq niki kejarianne: Léq sopoq jelo Simon Petrus, Tomas saq tesebut Didimus, Natanael léman Kana léq Galilea, bije-bije Zebedeus, dait due pengiring Deside Isa saq lainne, kenyeke bekumpul. Basen Simon Petrus léq ie pade, “Tiang mélé lalo bau empaq.” “Tiang pade milu,” basen ie pade léq Petrus. Beterus ie pade lumbar taék perau. Laguq sekeleman nike ie pade ndéq bau napi-napi. Sewaktu tiwoq jelo, Deside Isa ngadeg léq pesisi, laguq ie pade ndéq tandaq bahwe nike Deside Isa. Deside Isa bemanik léq ie pade, “Kanak-kanak, napi side pade bedowé empaq?” “Nénten,” jawab ie pade. Deside Isa bemanik léq ie pade, “Saut jaringde ojok sedi kanan perau, laun side pade gen mauq empaq.” Terus ie pade saut jaringne, laguq ie pade ndéq bau antuq malik lantaran luwéq gati empaq léq dalemne. Pengiring saq tekasihin siq Deside Isa bebadaq léq Petrus, “Nike Junjungan Saq Mulie!” Sewaktu Simon Petrus dengah bahwe nike Junjungan Saq Mulie, ie kadu kelambine, séngaq ie ndéq kadu kelambi, terus nimproh ojok aiq. Pengiring-pengiring saq lain dateng kadu perau, séngaq ie pade ndéq jaoq léman darat, cume kire-kire satus méter doang dait ie pade antuq jaringne saq penoq siq empaq nike. Sewaktu ie pade turun léman perau, ie pade serioq araq barak api areng léq derike dait empaq léq atasne kance ruti. Deside Isa bemanik léq ie pade, “Jauq ojok deriki pire empaq saq baruq side pade bau.” Simon Petrus taék ojok perau, terus antuq jaringne ojok darat. Jaring nike penoq siq empaq saq beléq-beléq: Selapuqne araq karobelah telu luwéqne. Dait timaq luwéqne maraq nike, jaringne ndéq soék. Deside Isa bemanik léq ie pade, “Silaq bekelor.” Ndéq araq sopoq dengan juaq léman pengiring-pengiring-Ne saq bani metakén, “Pelungguh sai?” Séngaq ie pade nenaoq bahwe Ie Junjungan Saq Mulie. Beterus Deside Isa ngerapetin ie pade dait bait ruti nike dait ngicanin ie pade, maraq nike éndah empaq nike. Niki ketelu kaline Deside Isa nyatayang diriq-Ne léq pengiring-pengiring-Ne sesampun Ie idup malik léman ninggal. Sesampun ie pade bekelor, Deside Isa bemanik léq Simon Petrus, “Simon bije Yahya, napi side lebih ngasihin Tiang lebihan léman ie pade?” “Nggih, Junjungan Saq Mulie,” jawab Petrus, “Pelungguh wikan tiang ngasihin Pelungguh.” Deside Isa bemanik léq ie, “Peliharaq dombe-dombe Tiang!” Saq kedue kaline Deside Isa bemanik léq ie, “Simon bije Yahya, napi side ngasihin Tiang?” “Nggih, Junjungan Saq Mulie,” jawab Petrus, “Pelungguh wikan tiang ngasihin Pelungguh.” Deside Isa bemanik léq ie, “Peliharaq dombe-dombe Tiang.” Saq ketelu kaline Deside Isa bemanik léq ie, “Simon bije Yahya, napi side ngasihin Tiang?” Petrus jari aséq séngaq Deside Isa bemanik léq ie jangke telu kali. Make Petrus bejawab malik, “Junjungan Saq Mulie, Pelungguh wikan selapuq-lapuqne. Pelungguh wikan tiang ngasihin Pelungguh!” Beterus manik Deside Isa léq ie, “Peliharaq dombe-dombe Tiang. Tiang badaq side: Setetune sewaktu side masih bajang, side taliq kéngde mésaq dait lampaq ojok mbé doang side mélé, laguq lamun side sampun toaq, side gen ngulurang imende dait dengan lain gen naliq side dait jauq side ojok taoq saq side ndéq mélé.” (Siq ucapan-ucapan nike, Deside Isa nyatayang berembé Petrus gen ninggal éraq jari mulieang Allah.) Sesampun nike Deside Isa bemanik léq Petrus, “Turut Tiang!” Sewaktu Petrus ngéngat, ie serioq bahwe pengiring saq tekasihin siq Deside Isa milu éndah. (Ie saq tokol dékét Deside Isa sewaktu medaran dait saq metakén léq Deside Isa, “Junjungan Saq Mulie, sai saq gen behianat léq Pelungguh?”) Sewaktu serioq ie, Petrus metakén léq Deside Isa, “Junjungan Saq Mulie, berembé léq dengan niki?” Jawab Deside Isa, “Seandéne Tiang mélé ie tetep idup jangke Tiang dateng, nike ndéqne urusande. Laguq side, turut Tiang!” Make nyebar kabar léq antare pengiring-pengiring Deside Isa bahwe pengiring nike ndéq gen ninggal. Padahal Deside Isa nénten bemanik bahwe pengiring nike ndéq gen ninggal, laguq: “Seandéne Tiang mélé ie tetep idup jangke Tiang dateng, nike ndéqne urusande.” Pengiring nike saq ngebéng kesaksian mengenai peristiwe-peristiwe niki. Ie éndah saq sampun nulis hal niki. Dait ite nenaoq bahwe napi saq tesampéang nike kenaq. Masih luwéq hal lain saq telaksaneang siq Deside Isa. Lamun selapuqne nike tetulis sopoq-sopoq, perasaq tiang ndéq araq taoq saq cukup léq seantéro gumi jari noloq selapuq kitab saq tetulis nike. Teopilus saq budiman, léq dalem kitab tiang saq penembéq sampun tiang jelasang selapuqne saq telaksaneang dait teajahang siq Deside Isa léman Ie mulai karye-Ne, jangke dateng jelone Ie teangkat ojok sorge. Sendéqman Ie taék ojok sorge, langan Roh Suci Ie ngicanin petunjuk-petunjuk tipaq rasul-rasul-Ne saq Ie piléq. Sesampun Ie ninggal, sengonéq petang dase jelo Ie rimpes nyatayang siq care saq nyate gati tipaq rasul-rasul nike bahwe Ie tetu-tetu idup. Ie pade serioq Deside Isa, dait Deside Isa bebaos kance ie pade mengenai Kerajaan Allah. Léq sopoq jelo sewaktu Deside Isa medaran bareng ie pade, Ie ngicanin préntah niki léq ie pade, “Ndaq lumbar léman Yerusalem. Antih léq derike jangke Bapa ngicanin napi saq sampun Ie janjiqang, saq laéq sampun Tiang badaq side. Séngaq Yahya baptis kadu aiq, laguq karing pire jelo malik side pade gen tebaptis kadu Roh Suci.” Sewaktu ie pade bekumpul bareng-bareng kance Deside Isa, ie pade metakén léq Deside Isa, “Junjungan Saq Mulie, napi mangkin Pelungguh gen piaq malik kerajaan umaq Israel?” Jawab Deside Isa, “Bapa Tiang mésaq saq nentuang jelo dait waktune. Hal nike ndéq perlu side pade taoq, séngaq nike kuase Bapa. Laguq side pade gen nerimaq kuase, sewaktu Roh Suci sampun rauh tipaq side. Dait side pade gen jari saksi-saksi Tiang léq Yerusalem, léq selapuq wilayah Yudea, léq Samaria, dait jangke dateng poton gumi.” Sesampun Deside Isa bemanik maraq nike, Ie kerangkatan ojok sorge léq julu ie pade, dait awan ilipang Ie léman penyerioqan ie pade. Waktu ie pade masih merhatiang andang langit, sewaktu Deside Isa kerangkatan, selung-selung due dengan bekelambi putéq nganjeng léq dékét ie pade, dait bebase tipaq ie pade, “Hai, dengan-dengan Galilea, kembéq side pade nganjeng doang léq derike serioq andang langit? Deside Isa, saq side pade serioq kerangkatan ojok sorge léq julu side pade, gen tulak malik siq care maraq nike éndah pade maraq saq side pade serioq.” Beterus rasul-rasul nike tulak ojok Yerusalem léman Bukit Zaitun. Bukit nike taoqne kire-kire sopoq kilométer jaoqne léman Yerusalem. Léq Yerusalem ie pade lumbar ojok balé taoq ie pade mererepan, beterus taék ojok kamar saq léq atas. Rasul-rasul nike, Petrus dait Yahya, Yakub dait Andreas, Pilipus dait Tomas, Bartolomeus dait Matius, Yakub bije Alpeus, Simon dengan Zelot dait Yudas bije Yakub; selapuqne tetep sopoq angen bekumpul jari bedo'e. Ie pade bedo'e bareng kance dengan-dengan nine lantong Mariam mamiq bini Deside Isa, dait bareng kance sanak-sanak Deside Isa. Léq sopoq jelo, sewaktu ie pade kenyeke bekumpul -- araq kire-kire satus due pulu dengan luwéqne -- Petrus nganjeng dait ngeraos. Ie bebase, “Semeton-semeton! Napi saq tetulis léq dalem Kitab Suci, nike harus telaksane. Laéq langan Daud, Roh Suci sampun benubuat mengenai Yudas, pemimpin dengan-dengan saq bau Deside Isa nike. Yudas nike salaq sopoq dengan léman ite, dait ie éndah sampun tepiléq jari milu begawéan bareng-bareng kance ite.” ( Yudas niki sampun mauq tanaq kuburanne léman upaq penghianatanne saq jahat. Ie geriq dait ninggal tianne bedah jangke sugul selapuq isin tianne. Selapuq dengan saq ndot léq Yerusalem nenaoq hal nike. Keranaq nike dalem base ie pade, tanaq nike ie pade aranin Akeldama, saq artine ‘Tanaq Daraq’.) “Séngaq léq dalem Kitab Suci Zabur araq tetulis maraq niki, ‘Alurang taoqne ndot jari sepi; ndaq sopoq dengan juaq saq ndot léq dalemne.’ Araq éndah tetulis maraq niki, ‘Alurang jabatanne tebait siq dengan lain.’ Beterus dengan-dengan saq araq léq derike ngusulang due dengan, Yusup saq tesebut éndah Barsabas (ie tesebut éndah Yustus), dait Matias. Sesampun nike kedue aran nike teundi, beterus léman undian nike sugul aran Matias. Make ie teangkat jari rasul adéqne turut bareng-bareng kance solas rasul saq lainne. Sewaktu sampun wayene jelo Pentakosta, selapuq dengan percaye bekumpul léq sopoq taoq. Selung-selung kedengahan suare léman langit maraq angin saq keras. Balé taoq dengan-dengan nike kenyeke melinggih selapuqne penoq siq suare nike. Beterus ie pade serioq élaq-élaq maraq nyale api lampaq ojok embé-embé, dait nyontoq tipaq ie pade sopoq-sopoq. Ie pade selapuq tepenoqin siq Roh Suci, dait mulai ngeraos kadu macem-macem base saq lain. Ie pade ngeraos maraq saq teicanin siq Roh nike tipaq ie pade jari teucapang. Léq waktu nike luwéq dengan Yahudi saq soléh, léman macem-macem negeri léq seantéro dunie, ndot léq Yerusalem. Sewaktu kedengahan suare nike, luwéq gati dengan-dengan bekerimpun. Ie pade selapuq bingung dengah dengan-dengan percaye nike ngeraos kadu base ie pade sopoq-sopoq. Ie pade bengaq dait takjub terus bebase, “Tekan dengan-dengan saq ngeraos niki selapuqne dengan-dengan Galilea? Segerah ite dengah ie pade ngeraos kadu base saq ite kadu léq negeri asalte? Ite dengan-dengan léman Partia, Media, Elam, léman Mesopotamia, Yudea dait Kapadokia; léman Pontus dait Asia, léman Prigia dait Pampilia, léman Mesir dait daérah-daérah Libia dékét Kirene; léq antare ite araq saq dateng léman Roma, araq dengan-dengan Yahudi dait araq éndah dengan bangse-bangse lain saq sampun tame agame Yahudi; araq éndah saq dateng léman Kreta dait Arab. Ite selapuq dengah ie pade ngeraos kadu basente sopoq-sopoq mengenai hal-hal saq ajaip saq telaksaneang siq Allah!” Ie pade selapuq bengaq dait takjub terus beketuan sopoq kance saq lain, “Napi artine niki?” Laguq araq éndah dengan-dengan saq nyindir. Basene, “Dengan-dengan nike kenyeke bowos siq anggur manis!” Beterus Petrus nganjeng bareng solas rasul saq lain, dait bebase tipaq dengan luwéq nike siq suare saq beléq, “Semeton-semeton, dengan-dengan Yahudi dait selapuq dengan saq ndot léq Yerusalem! Dengahang pacu-pacu, séngaq hal niki perlu tiang jelasang léq side. Dengan-dengan niki ndéqne bowos, maraq saq side pade paran; séngaq mangkin baruq jam siwaq kelémaq. Laguq mengenai hal niki Allah sampun bemanik langan Nabi Yoel: Allah bemanik, ‘Léq ahir jaman Tiang gen curahang Roh Tiang ojok selapuq dengan. Bije-bijende saq mame-mame dait bije-bijende saq nine gen benubuat. Terune-terunende gen serioq hal-hal ajaip saq Tiang petitoqang tipaq ie pade. Dengan-dengan toaqde gen mauq impi saq Tiang icanin tipaq ie pade. Tipaq pelayan-pelayan Tiang éndah -- saq mame-mame dait saq nine-nine --, gen Tiang curahang Roh Tiang léq jelo-jelo nike. Ie pade gen benubuat. Tiang gen miaq keajaipan-keajaipan léq atas, léq langit, dait hal-hal luar biase léq bawaq, léq gumi; daraq dait api, gumpelan pendet. Jelo gen jari peteng, bulan jari béaq maraq daraq sendéqman Jelo Tuhan, jelo saq beléq dait mulie nike rauh. Léq waktu nike, dengan saq bekuih tipaq Tuhan gen teselametang.’ Dengan-dengan Israel! Pade dengahang napi saq tiang sampéang niki: Deside Isa dengan Nazaret nike sampun tetentuang siq Allah umaq side. Nike nyate gati léq keajaipan-keajaipan dait hal-hal luar biase saq Allah laksaneang léq tengaq-tengaq side pade langan Deside Isa nike. Selapuqne nike side mésaq sampun nenaoq. Sesuai maksut dait rencane Allah mésaq, Ie mutusang jari nyerahang Deside Isa tipaq side pade. Dait sewaktu Deside Isa teserahang, side pade nyematéq Ie siq care ngalurang dengan-dengan jahat pakuq Ie léq kayuq salib. Laguq Allah ngidupang Ie malik léman tengaq-tengaq dengan-dengan ninggal. Ie tekalahang siq kematéan, laguq Allah ngelepasang Ie, séngaq ndéq mungkin Ie tetep tekuasein siq kematéan. Mengenai Deside Isa niki, Daud sampun bebase, ‘Tiang serioq Tuhan tetep léq julun tiang; Ie araq léq sedi kanan tiang, adéq tiang ndéq teguncang siq napi juaq. Keranaq nike angen tiang besukecita, biwih tiang ngucapang nyanyian; dait awak tiang niki gen ndot dalem pengharepan. Séngaq Deside nénten menengang jiwen tiang ndot dalem dunie dengan maté. Deside nénten menengang Dengan Suci Deside binase. Deside sampun nyatayang tipaq tiang langan saq nuju idup saq sejati. Sukecite tiang beléq gati, séngaq Deside araq bareng tiang.’ Semeton-semeton, ijinang tiang ngeraos secare terus terang mengenai Daud, bapaq leluhurte nike. Ie sampun ninggal dait sampun temakamang éndah; makamne masih araq léq tengaq-tengaqte jangke mangkin. Allah sampun bejanji tipaq Daud, siq sumpah, bahwe salaq sopoq dengan léman keturunanne gen teangkat siq Allah jari raje. Séngaq Daud wikanang janji nike dait lantaran ie éndah nabi, ie wikan éndah napi saq gen telaksaneang siq Allah. Jari ie sampun benubuat bahwe Almasih saq tejanjiqang siq Allah, gen idup malik léman ninggal. Daud bebase, ‘Ie nénten temenengang léq dalem dunie dengan-dengan maté; rage-Ne nénten gen ancur dait bis.’ Deside Isa niki saq teidupang malik léman ninggal siq Allah. Tiang pade selapuq sampun nyaksiang mésaq hal nike. Ie teangkat léq jabatan saq atas dait teicanin Roh Suci saq sampun tejanjiqang siq Bapa. Dait saq side pade dengah dait serioq mangkin niki, Roh nike saq Ie curahang tipaq tiang pade. Daud mésaq nénten taék ojok sorge, laguq Daud bebase, ‘Tuhan bemanik tipaq Junjungan tiang Saq Mulie: Melinggih léq sedi kanan Tiang, jangke Tiang miaq musuh-musuh Deside takluk léq Deside!’ Keranaq nike selapuq dengan Israel harus nenaoq pacu-pacu bahwe Deside Isa saq side pade pakuq léq kayuq salib nike, Ie éndah saq sampun tejanjiqang siq Allah jari Junjungan Saq Mulie dait Almasih!” Sewaktu dengan-dengan nike dengah hal nike, angen ie pade jari osah. Terus ie pade beketuan léq Petrus dait rasul-rasul saq lainne, “Semeton-semeton, napi saq harus tiang pade piaq?” Jawab Petrus, “Pade tobat léman dose-dosende. Dait side pade sopoq-sopoq harus tebaptis dalem peséngan Deside Isa Almasih, adéq dose-dosende teampunin. Make side pade gen nerimaq paice Roh Suci léman Allah. Séngaq saq tejanjiqang siq Allah, nike umaq side dait keturunande, dait umaq dengan-dengan saq araq léq taoq-taoq saq jaoq -- selapuq dengan saq temanikang siq Allah, Tuhante jari parek tipaq Ie.” Maraq nike Petrus jelasang léq ie pade. Dait siq luwéq ucapan lain malik ie ngebéng sopoq kesaksian dait ngebéng naséhat, dait basene: “Serahang diriqde adéq teselametang léman keturunan saq jahat niki.” Luwéq dengan percaye léq napi saq gen tesampéang siq Petrus, terus ie pade tebaptis. Make jumlah dengan percaye léq jelo nike beromboq malik telu iyu dengan. Ie pade pacu-pacu berajah léman rasul-rasul dait tetep bekumpul bareng-bareng. Ie pade bekelor bareng-bareng dait bedo'e bareng-bareng. Luwéq gati keajaipan saq tepiaq siq rasul-rasul nike sehingge selapuq dengan takjub dait takut. Dengan-dengan percaye nike selapuqne tetep besopoq dait napi saq ie pade épéang, ie pade kadu bareng-bareng. Ie pade jual barang-barang dait selapuq dowén ie pade, terus bagi-bagiang képéngne léq antare ie pade selapuqne menurut keperluanne sopoq-sopoq. Sebilang jelo ie pade tetep bekumpul léq Gedéng Allah. Ie pade bekelor bareng-bareng, siq angen saq gembire dait tulus até léq balé-balé ie pade. Ie pade tetep memuji-muji Allah dait tedemenang siq selapuq dengan. Sebilang jelo jumlah ie pade tetep beromboq séngaq Junjungan Saq Mulie ngicanin tipaq ie pade dengan-dengan saq teselametang. Léq sopoq jelo Petrus dait Yahya lumbar ojok Gedéng Allah jam telu kebian, nike wayene dengan gen mulai bedo'e. Léq derike, léq jebak saq tesebut, “Lawang Solah”, araq sopoq dengan mame saq képaq léman tebijeang. Sebilang jelo dengan nike tejauq ojok derike jari mekir léq dengan-dengan saq tame ojok Gedéng Allah. Sewaktu dengan nike serioq Petrus dait Yahya kenyeke tame ojok Gedéng Allah, ie nunas sedekah léq ie pade. Make Petrus dait Yahya perhatiang ie, beterus Petrus bebase, “Serioq andang tiang pade!” Beterus dengan nike merhatiang ie pade, siq harepan gen mauq sedekah léman ie pade. Laguq basen Petrus léq ie, “Tiang tetu-tetu ndéq bedowé képéng. Laguq napi saq araq léq tiang nike gen tiang béng léq side: Siq peséngan Deside Isa Almasih dengan Nazaret nike, silaq lampaq!” Terus Petrus tegel ime kanan dengan képaq nike dait tulung ie ures. Langsung naén dengan nike dait mate naéne jari kuat. Terus ie nyelontak nganjeng, dait mulai lampaq ketoq-ketéq. Beterus ie tame ojok Gedéng Allah, sambil lampaq dait nyelontak-lontak dait memuji Allah. Selapuq dengan serioq ie lampaq dait memuji-muji Allah. Terus ie pade sadar bahwe ie tukang mekir saq biase tokol léq “Lawang Solah” léq Gedéng Allah. Ie pade bengaq gati dait takjub serioq napi saq telaksane léq dengan nike. Dengan nike tetep doang turut Petrus dait Yahya. Dait sewaktu ie pade dateng léq sesangkok saq tesebut “Sesangkok Sulaiman”, selapuq dengan ngerimpun ie pade lantaran takjub. Sewaktu Petrus serioq dengan-dengan nike, ie bebase léq ie pade, “Hai dengan-dengan Israel, kembéq side pade bengaq léq hal niki? Kembéq side pade tetep merhatiang tiang pade? Napi side pade paran dengan niki tao lampaq lantaran tiang pade bedowé kuase, atao lantaran tiang pade taat tipaq Allah? Allahne Ibrahim, Ishak, Yakub, Allahne leluhurte, Allah nike sampun ngemulieang Hambe-Ne, Deside Isa. Deside Isa nike saq side pade serahang ojok penguase dait side pade lawan léq arepan Pilatus, sewaktu Pilatus gen bébasang Ie. Laguq side pade nentang Ie Saq Suci dait Kenaq dait nuntut adéq Pilatus bébasang sopoq dengan tukang nyematéq tipaq side pade. Side pade nyematéq Ie, padahal setetune Ie sumber idup tipaq selapuq dengan. Dait Allah sampun ngidupang Ie malik léman ninggal. Tiang pade sampun nyaksiang mésaq hal nike. Side pade sampun serioq dait nyaksiang napi saq telaksane léq dengan képaq niki. Ie sampun jari kuat dait séhat malik séngaq ie percaye dalem peséngan Deside Isa dait kuase-Ne. Lantaran percaye léq Deside Isa make dengan niki bau séhat malik léq julun side pade selapuq. Semeton-semeton senamian! Mangkin tiang nenaoq bahwe napi saq side pade dait pemimpin-pemimpinde laksaneang tipaq Deside Isa, nike side pade laksaneang séngaq side pade ndéq nenaoq napi saq side pade kenyeke laksaneang. Dait siq care nike telaksane éndah napi saq sampun temanikang siq Allah laéq langan selapuq nabi-nabi-Ne, bahwe Almasih saq tejanjiqang nike harus menderite. Keranaq nike, semeton-semeton senamian, pade tobat léman dose-dosende dait tulak tipaq Allah, adéq Allah ngapus dose-dose side pade, adéq Tuhan datengang waktu kelepasan, dait ngutus Deside Isa, saq léman penembéqne tetetepang tipaq side sebagé Almasih. Almasih harus meneng léq sorge jangke Allah nulakang selapuq-lapuqne, maraq saq temanikang siq Allah langan nabi-nabi saq suci léq jaman laéq. Nabi Musa sampun bebase, ‘Allah, Tuhande gen ngutus tipaq side sopoq nabi léman bangsende mésaq, maraq Ie ngutus tiang. Side harus dengah selapuq saq tesampéang siq nabi nike tipaq side. Dengan saq ndéq perhatiang napi saq tesampéang siq nabi nike, dengan nike gen tesingkirang léman dengan-dengan saq tehususang bagi Allah dait tebinaseang.’ Nabi-nabi saq sampun nyampéang berite léman Allah, mulai léman nabi Samuel, dait nabi-nabi lainne saq dateng mudian, selapuqne beriteang mengenai jaman niki. Janji-janji léman Allah saq tesampéang siq nabi-nabi, nike umaq side pade. Dalem perjanjian saq Allah piaq kance leluhurde, Allah bemanik tipaq Ibrahim maraq niki, ‘Léman keturunande Tiang gen ngebéng berkah tipaq selapuq bangse léq gumi.’ Perjanjian nike umaq side pade éndah. Jari, umaq side penembéqne Allah ngidupang Hambe-Ne dait ngutus Ie tipaq side, adéq Ie ngicanin side pade berkah siq care miaq side pade sopoq-sopoq bebalik léman selapuq kejahatan side pade.” Léq waktu Petrus dait Yahya masih bebaos kance dengan-dengan nike, imam-imam kepale dait kepale pengawal Gedéng Allah kance dengan-dengan Saduki dateng ojok Petrus dait Yahya. Ie pade menggah gati séngaq Petrus dait Yahya bebase léq dengan-dengan bahwe Deside Isa sampun idup malik léman ninggal. Dait nike buktiang bahwe dengan ninggal gen idup malik. Make ie pade bau kedue rasul nike beterus tamaqne ojok dalem bui. Dait lantaran sampun peteng, make Petrus dait Yahya tetahen léq derike jangke jemaqne. Laguq dengan-dengan saq sampun dengah pengajahan rasul-rasul nike, luwéq saq percaye. Make sayan luwéq jumlah ie pade, jangke kire-kire lime iyu dengan. Jemaqne tokoh-tokoh Mahkamah Agame, pemimpin-pemimpin Yahudi dait ahli-ahli Taurat bekumpul léq Yerusalem. Ie pade bedait kance Imam Agung Hanas, Kayapas, Yahya, Aleksander, dait selapuq saq termasuk keluarge Imam Agung nike. Petrus dait Yahya tejauq ngadep ie pade, terus ie pade beketuan, “Berembé entane side pade nyelahang dengan képaq nike? Kadu kekuatan napi atao kadu kekuasean léman sai side pade laksaneang nike?” Petrus, saq tekuasein siq Roh Suci, bejawab, “Bapaq-bapaq, pemimpin-pemimpin bangse dait pemimpin-pemimpin Yahudi! Tiang pade teadilin jelo niki lantaran ngelaksaneang hal saq kenaq jari nulung sopoq dengan képaq, dait lantaran Bapaq-bapaq mélé nenaoq berembé dengan nike teselahang. Nah, Bapaq-bapaq senamian harus nenaoq, selapuq bangse Israel éndah harus nenaoq bahwe dengan niki nganjeng mangkin niki siq awak saq séhat lantaran teselahang dalem peséngan Deside Isa, dengan Nazaret nike. Bapaq-bapaq sampun pakuq Deside Isa léq kayuq salib, laguq Allah sampun ngidupang Ie malik. Deside Isa niki saq temaksut siq ayat dalem Kitab Suci, ‘Batu saq tetetéh siq side tukang-tukang bangunan, sampun jari batu saq paling utame.’ Cume langan Deside Isa doang dengan teselametang. Séngaq léq seantéro dunie léq antare manusie ndéq araq sopoq dengan lain juaq saq mauq kekuasean léman Allah jari nyelametang ite.” Anggote-anggote Mahkamah nike bengaq serioq ketabahan Petrus dait Yahya, séngaq ie pade nenaoq bahwe kedue rasul nike dengan-dengan biase saq pendidikanne rendah. Beterus ie pade sadar bahwe kedue rasul nike dengan-dengan saq ngiring Deside Isa. Laguq ie pade ndéq bau ngucapang napi-napi, séngaq dengan saq sampun teselahang nike araq nganjeng léq derike léq julun ie pade bareng kance Petrus dait Yahya. Make ie pade suruq kedue rasul nike sugul léman ruang sidang, beterus ie pade berunding. Ie pade bebase, “Napi saq harus ite piaq tipaq dengan-dengan niki? Selapuq dengan saq ndot léq Yerusalem sampun nenaoq bahwe keajaipan saq luar biase niki, telaksaneang siq deduaqne. Ite ndéq bau tilas nike. Laguq adéq hal nike ndaq sayan nyebar léq antare dengan-dengan, silaq ite ancem ie pade adéq ndéq kanggo malik bebaos tipaq sopoq dengan juaq siq peséngan Deside Isa.” Make ie pade ngempoh kedue rasul nike tame malik, dait badaqang bahwe ie pade ndéq kanggo gati nyebut malik atao ngajahang siq peséngan Deside Isa. Laguq jawab Petrus dait Yahya, “Silaq pikir mésaq napi saq kenaq léq arepan Allah: turut préntah Bapaq-bapaq atao turut préntah Allah. Séngaq tiang pade ndéq tao engkah ngeraos mengenai napi saq sampun tiang pade serioq dait dengah mésaq.” Anggote-anggote Mahkamah nike ndéq mauq sopoq alasan jari ngukum Petrus dait Yahya. Jari ie pade ngancem kedue rasul nike, beterus deduaqne telepas, séngaq selapuq dengan mulieang Allah lantaran keajaipan nike. Dengan saq teselahang siq muqjizat nike sampun petang dase taun lebih umurne. Sesampun Petrus dait Yahya tebébasang, ie pade tulak ojok batur-batur ie pade dait nyeriteang selapuq saq tesampéang siq imam-imam kepale dait pemimpin-pemimpin Yahudi nike léq ie pade. Sesampun batur-batur ie pade dengahang hal nike, siq sopog angen ie pade bedo'e tipaq Allah. Ie pade matur, “Tuhan, Deside saq cipteang langit dait gumi, segare dait selapuq isine. Siq Roh Suci, Deside sampun bemanik langan leluhur tiang pade, Daud, nike hambe Deside; Deside bemanik, ‘Kembéq bangse-bangse sili; kembéq suku-suku bangse miaq rencane saq ndéq araq manpaatne? Raje-raje dunie besiep-siep gen perang, dait pare pemimpin besopoq ngelawan Tuhan dait ngelawan Almasih-Ne.’ Séngaq mule Herodes dait Pontius Pilatus sampun ngaraqang sangkep kance dengan bangse-bangse lain dait kance dengan-dengan Israel léq kote niki. Ie pade bedait jari ngelawan Deside Isa, Hambe Deside saq suci nike, saq sampun Deside sahang jari Almasih. Ie pade besopoq jari ngelaksaneang selapuq hal, saq Deside sampun tentuang bejulu bahwe nike gen telaksane. Dait Deside tentuang nike siq kekuasean dait pekayunan Deside mésaq. Mangkin, Tuhan, cingakin berembé ie pade ngancem tiang pade. Dait ijinang tiang pade, hambe-hambe Deside niki, nénten takut beriteang Manik Deside nike. Tunas adéq tiang pade bau nyelahang dengan sakit dait miaq keajaipan-keajaipan dait tande-tande siq peséngan Deside Isa, Hambe Deside saq suci nike.” Sesampun ie pade inggas bedo'e, taoq ie pade bekumpul nike inggur. Ie pade selapuq tekuasein siq Roh Suci, dait mulai bani ngeraos mengenai Manik Allah. Selapuq dengan saq percaye nike idup sopoq angen dait sopoq jiwe. Ndéq araq sopoq dengan juaq léman ie pade anggep bahwe napi saq ie épéang jari dowéne mésaq. Napi juaq saq araq léq ie pade, ie pade kadu bareng-bareng. Siq kuase saq beléq, rasul-rasul nike ngebéng kesaksian bahwe Junjungan Saq Mulie Deside Isa sampun idup malik. Make ie pade idup dalem rahmat saq belimpah-limpah. Dait ndéq araq sopoq dengan juaq léq antare ie pade saq kekurangan napi-napi. Séngaq ie pade saq bedowé tanaq atao balé, jual tanaq atao balé ie pade; beterus képéng léman hasil jual tanaq atao balé nike ie pade jauq dait ie pade serahang ojok rasul-rasul. Beterus képéng nike tebagi-bagiang tipaq sebilang dengan saq merluang. Laguq araq sopoq dengan mame aranne Ananias. Ie kance seninene aranne Sapira, jual éndah tanaq saq jari dowén ie pade. Képéng léman penjualan nike separone ie adéqang umaq diriqne mésaq dait saq lain ie serahang tipaq rasul-rasul. Ie ngelaksaneang nike tetaoq siq seninene. Make Petrus bebase léq ie, “Ananias, kembéq side alurang Belis nguasein aténde, jangke side bani beduste léq Roh Suci, secare tedoq-tedoq nahen separo képéng hasil jual tanaq nike umaq diriqde mésaq? Tanaq nike jari dowén side sendéqman side jual. Dait sesampun tanaq nike tejual, képéngne tetep jari dowénde éndah. Jari kembéq araq maksut dalem angende jari miaq saq maraq nike? Side ndéq beduste léq manusie, laguq Allah!” Sesampun Ananias dengah ucapan-ucapan nike, ie rebaq, beterus ninggal. Selapuq dengan saq dengahang peristiwe nike jari takut. Make dengan-dengan bajang dateng bungkus mayit Ananias, beterus jauqne sugul jari tekubur. Kire-kire telu jam sesampun nike, seninene tame. Ie ndéq nenaoq napi saq sampun telaksane. Basen Petrus léq ie, “Silaq badaq tiang, napi semené ajine tanaq saq tejual nike?” “Tetu, nike ajine,” jawab senine Ananias. Terus Petrus bebase léq ie, “Kembéq side kance semamende sepakat jari cobe Roh Tuhan? Dengahang! Dengan-dengan saq nguburang semamende sampun tulak. Ie pade éndah gen jauq side sugul.” Langsung waktu nike éndah senine Ananias rebaq dait ninggal léq julun Petrus. Dait sewaktu dengan-dengan bajang nike tame, daitne ie sampun ninggal. Beterus ie pade jauq mayitne sugul dait tekubur léq dékét semamene. Make selapuq dengan-dengan percaye nike dait dengan-dengan lainne, saq dengah mengenai peristiwe nike jari takut. Lantaran pelayanan rasul-rasul make luwéq keajaipan dait hal-hal saq luar biase telaksane léq antare masyarakat. Siq sopoq angen selapuq dengan percaye bekumpul léq Sesangkok Sulaiman léq Gedéng Allah. Dait dengan lain ndéq araq saq bani dateng bekumpul kance dengan-dengan percaye nike. Laguq dengan-dengan percaye nike tehormatin gati siq masyarakat. Dait sayan ngonéq sayan luwéq dengan-dengan saq percaye léq Junjungan Saq Mulie -- saq mame-mame dait saq nine. Malahan ie pade jauq dengan-dengan sakit tetoloq léq atas lasah atao tipah, terus tejauq ojok rurung, sendéq-ndéqne adéq ie pade bau kene siq lingonne Petrus lamun ie liwat léq derike. Luwéq gati dengan-dengan dateng léman kote-kote sekiter Yerusalem. Ie pade jauq dengan-dengan saq sakit dait saq tekuasein siq roh-roh jahat. Dait dengan-dengan nike teselahang selapuqne. Ahirne Imam Agung dait selapuq pengiring-pengiringne, golongan dengan-dengan Saduki, mulai ngelaksaneang niatne lantaran ie pade talon até. Rasul-rasul nike tebau, terus tetamaq ojok dalem bui kote. Laguq kelemne, sopoq malaékat Tuhan bukaq lawang-lawang bui, terus jauq rasul-rasul nike sugul. Malaékat nike bebase léq rasul-rasul nike, “Silaq lumbar ojok Gedéng Allah dait sampéang léq dengan-dengan mengenai idup saq baru niki.” Beterus rasul-rasul nike patiq pesen malaékat nike. Masih aru gati ie pade lumbar ojok Gedéng Allah, dait mulai ngajahang léq derike. Léq waktu nike Imam Agung dait pare pengiringne dateng, terus ngaraqang sidang mahkamah kance pare pemimpin Yahudi. Beterus ie pade ngutus dengan lumbar bait rasul-rasul nike léman bui adéqne tejauq ngadep ie pade. Laguq sewaktu dengan-dengan saq teutus nike dateng léq bui, ie pade ndéq ndait rasul-rasul nike léq derike. Jari ie pade tulak, terus ngelaporang hal nike léq mahkamah. Ie pade matur, “Sewaktu dateng bui, tiang pade ndait lawang bui nike telenting solah-solah, dait pengawal-pengawal kenyeke bejage léq lawang. Laguq waktu tiang pade bukaq lawang nike, tiang pade ndéq ndait sopoq dengan juaq léq dalemne.” Sewaktu prewire pengawal Gedéng Allah dait imam-imam kepale pireng laporan nike, ie pade bingung mengenai rasul-rasul nike, dait takut napi saq gen telaksane. Beterus dateng sopoq dengan mame jauq berite niki, “Pade dengahang! Dengan-dengan saq bapaq-bapaq tahen léq bui nike mangkin kenyekene ngajahang dengan luwéq léq Gedéng Allah!” Beterus prewire pengawal Gedéng Allah nike bareng kance pengawal-pengawalne lumbar bait rasul-rasul nike malik. Laguq ie pade ndéq kadu kekerasan, séngaq ie pade takut léq dengan luwéq; ndaq-ndaq laun ie pade tepeléwas kadu batu siq dengan luwéq nike. Rasul-rasul nike tejauq ngadep mahkamah. Beterus ie pade teperiksaq siq Imam Agung. Ie bebase, “Tiang pade secare teges sampun balaq side pade adéq ndaq ngajahang dengan kadu peséngan nike. Laguq mangkin silaq serioq napi saq side laksaneang! Side pade nyebarang pengajahande nike léq selapuq wilayah Yerusalem, dait malahan side pade mélé nuduh bahwe tiang pade saq jari penyebap Dengan nike ninggal.” Jawab Petrus dait rasul-rasul saq lain, “Tiang pade harus turut Allah dait ndéqne turut manusie. Deside Isa, saq side pade pakuq léq kayuq salib, sampun teidupang malik léman ninggal siq Allah leluhurte. Dait Allah sampun ngicanin Ie kedudukan dait kekuasean saq tinggi sebagé Pemimpin dait Juruselamet; adéq bangse Israel tebéng kesempatan jari betobat léman dose-dosene dait mauq pengampunan. Tiang pade saksi-saksi mengenai selapuqne nike -- tiang pade dait Roh Suci éndah saq teicanin siq Allah tipaq dengan-dengan saq turut préntah-Ne.” Sewaktu anggote-anggote Mahkamah Agame pirengang ucapan rasul nike, ie pade menggah gati, dait ie pade sepakat gen nyematéq rasul-rasul nike. Laguq léq antare anggote-anggote mahkamah nike araq sopoq dengan Parisi aranne Gamaliel. Ie ahli Taurat saq tehormatin gati siq selapuq dengan. Ie nganjeng terus suruqne dengan jauq sugul rasul-rasul nike semendaq. Beterus ie bebase léq Mahkamah Agame nike, “Side pade dengan-dengan Israel! Silaq pikir bagus-bagus napi saq side pade kayun laksaneang léq dengan-dengan niki. Séngaq laéq sampun araq Teudas, saq nganggep diriqne dengan hébat, jangke kire-kire samas dengan saq jari pengiringne. Laguq ie tematéq dait selapuq pengiringne ndéq keruan aningne, dait kegiatanne musnah. Sesampun nike, sewaktu araq sénsus, muncul éndah Yudas, dengan léman Galilea. Lantaran pengaruhne, luwéq éndah dengan saq saq jari pengiringne. Laguq ie éndah tematéq, dait selapuq pengiringne ndéq keruan aningne. Jari mangkin léman peristiwe niki, tiang béng naséhat: Sampunang laksaneang napi-napi tipaq dengan-dengan niki, alurang ie pade. Séngaq lamun pengajahan dait kegiatan ie pade asalne léman manusie, make pengajahan dait kegiatan nike gen musnah. Laguq lamun nike asalne léman Allah, side pade ndéq gen bau ngalahang ie pade. Malahan sang gen nyate bahwe side pade ngelawan Allah.” Naséhat Gamaliel nike teterimaq siq mahkamah. Make rasul-rasul nike tempoh, beterus tepecut dait tebalaq ngajahang malik mengenai Deside Isa. Sesampun nike, baruq ie pade tebébasang. Gembire gati angen rasul-rasul nike bilin Mahkamah Agame nike séngaq ie pade sampun teanggep patut siq Allah jari nerimaq hinean lantaran peséngan Deside Isa. Dait sebilang jelo léq Gedéng Allah dait léq balé-balé dengan, ie pade tetep ngajahang dait beriteang Kabar Solah mengenai Deside Isa, bahwe Ie Almasih. Pengiring-pengiring Deside Isa sayan ngonéq sayan luwéq. Léq waktu nike dengan-dengan Yahudi saq kadu base Yunani, jari ndéq demen léq dengan-dengan Yahudi asli. Saq kadu base Yunani nike bebase, “Dengan-dengan nine léq kalangan tiang pade saq sampun bebalu ndéq mauq bantuan keperluan sebilang jelo saq tebagi-bagiang tipaq dengan-dengan.” Keranaq nike, kedue olas rasul-rasul nike ngumpulang selapuq pengiring dait bebase léq ie pade, “Ndéqne bagus lamun tiang pade engkah nyampéang Manik Allah, lantaran ngurus masalah-masalah keloran. Jari, bagusan side pade piléq léq antare side pituq dengan saq kenaq perbuatanne dait tekuasein siq Roh Suci dait bijaksane, saq bau tiang pade tugasang ngurus masalah-masalah niki; séngaq tiang pade mélé bedo'e dait beriteang Manik Allah doang.” Usul nike teterimaq bagus siq selapuq jemaah, terus ie pade piléq Stepanus, sopoq dengan saq beriman dait penoq siq Roh Suci, dait Pilipus, Prokorus, Nikanor, Timon, Parmenas, dait Nikolaus, sopoq dengan penganut agame Yahudi léman Antiokia. Kepituq dengan nike teusulang ojok rasul-rasul, terus rasul-rasul nike bedo'e dait tunasang berkah Tuhan umaq ie pade. Siq care nike Manik Allah sayan nyebar dait pengiring-pengiring Deside Isa léq Yerusalem éndah sayan luwéq. Dait luwéq éndah imam-imam saq percaye léq Deside Isa. Stepanus sanget teberkahin siq Allah, sehingge ie miaq luwéq keajaipan dait hal-hal luar biase léq antare masyarakat. Laguq araq dengan-dengan saq nentang ie; ie pade anggote-anggote balé ibadah saq tesebut Balé Ibadah Dengan-dengan Bébas. Anggote-anggote balé ibadah nike dengan-dengan Yahudi léman Kirene dait Aleksandria. Ie pade kance dengan-dengan Yahudi léman Kilikia dait Asia bedebat kance Stepanus. Laguq ie pade ndéq sanggup ngelawan hikmatne dait Roh Allah saq bimbing ie bebaos. Keranaq nike ie hasut pire dengan adéqne mélé bebase, “Tiang pade dengah dengan nike menghine nabi Musa dait Allah!” Maraq nike entan ie pade hasut dengan-dengan, dait pemimpin-pemimpin Yahudi dait ahli-ahli Taurat. Terus ie pade lumbar bau Stepanus, dait jauqne ngadep Mahkamah Agame. Dait ie pade ajuang éndah saksi-saksi saq ngebéng keterangan-keterangan saq ndéq kenaq mengenai Stepanus. Saksi-saksi nike bebase, “Dengan niki terus-terusan menghine taoq saq suci niki dait menghine préntah-préntah Allah saq tesampéang siq nabi Musa. Sampun tiang pade dengah ie bebase, bahwe Deside Isa léman Nazaret nike gen ngeruntuhang taoq niki, terus ngerobah selapuq adat-istiadat saq teturunang siq Musa tipaq ite!” Selapuq dengan saq araq léq dalem sidang Mahkamah Agame nike merhatiang Stepanus. Ie pade serioq muen Stepanus ruene maraq muen malaékat. Imam Agung beketuan léq Stepanus, “Napi selapuq saq tesampéang siq dengan nike kenaq?” Jawab Stepanus, “Semeton-semeton dait bapaq-bapaq! Dengahang tiang! Sendéqman Ibrahim, leluhurte nike ngalih ojok Haran, sewaktu ie masih ndot léq Mesopotamia, Allah saq Mahemulie rauh tipaq ie dait bemanik, ‘Bilin negerinde dait selapuq kadang jarinde. Lumbar ojok negeri saq gen Tiang petitoqang léq side.’ Make Ibrahim bilin negeri Kasdim, terus ngalih ojok Haran. Sesampun bapaqne Ibrahim ninggal, Allah manikang Ibrahim ngalih malik ojok negeri niki, saq semeton-semeton dait bapaq-bapaq taoqin mangkin niki. Léq waktu nike ndéq araq separone léman negeri niki saq Allah icanin tipaq Ibrahim jari dowéne, timaqne sejengkak, ndéqne teicanin tipaq ie. Laguq Allah bejanji bahwe Ie gen ngicanin tipaq Ibrahim jari dowéne dait jari dowé keturunanne. Waktu nike Ibrahim ndéqman bedowé bije. Laguq niki saq temanikang Allah tipaq ie, ‘Keturunande gen ndot sebagé dengan pendateng léq negeri dengan lain. Dengan-dengan negeri nike gen jariang ie pade panjak dait perlakuang ie pade secare kejem samas taun ngonéqne. Laguq Tiang gen hukum bangse saq jariang ie pade panjakne, dait ie pade gen sugul léman negeri nike dait gen nyembah Tiang léq taoq niki.’ Beterus Allah ngicanin tipaq ie perjanjian sunat. Make sesampun Ishak, bije Ibrahim tebijeang, Ibrahim sunat ie sewaktu ie beumur baluq jelo. Beterus Ishak éndah sunat bijene, aranne Yakub. Dait Yakub éndah sunat kedue olas bijene, saq jari bapaq-bapaq leluhur bangse Yahudi. Bapaq-bapaq leluhurte nike talon até léq Yusup, sehingge ie pade sepakat jual Yusup jari hambe léq Mesir. Laguq Allah araq bareng-bareng kance ie, Allah bébasang ie léman selapuq kesusahanne dait ngicanin ie hikmat dait kebijaksanean sewaktu ie ngadep Piraun, raje Mesir, sehingge Piraun jariang ie gubernur negeri Mesir dait penguase istane Piraun. Terus araq bahle kelapahan saq beléq léq selapuq negeri Mesir dait Kanaan sehingge dengan menderite gati. Leluhurte ndéqne bau mauq keloran. Make sewaktu Yakub dengah araq gandum léq Mesir, ie suruq bije-bijene, leluhurte, lumbar ojok derike. Nike saq penembéq. Sewaktu ie pade lumbar saq kedue kaline, Yusup bebadaq tipaq semeton-semetonne nike bahwe ie setetune Yusup. Waktu nike baruq tewikanang siq raje Mesir mengenai keluarge Yusup. Beterus Yusup ngirim berite tipaq Yakub, bapaqne jari tunas ie kance selapuq keluargene ngalih ojok Mesir -- selapuqne araq pituq pulu lime dengan. Sesampun nike Yakub ngalih ojok Mesir dait léq derike ie kance selapuq leluhurte ninggal. Beterus jenazah ie pade tejauq tulak ojok Sikem dait temakamang léq makam saq sampun tebayah kadu képéng siq Ibrahim léman suku bangse Hemor léq Sikem. Sewaktu gen dateng waktune Allah nepatin janji-Ne tipaq Ibrahim, bangsente léq Mesir sampun sayan luwéq. Ahirne sopoq raje lain saq ndéq kenal Yusup, mréntah léq Mesir. Licik gati entan raje nike tipaq bangsente dait kejem léq leluhurte. Ie paksaq ie pade adéqne netéh bebéaq-bebéaq saq baruq teanakang, adéqne karé-aré dait maté. Léq waktu nike Musa tebijeang; ie bebéaq saq solah gati. Telu bulan ngonéqne ie tepeliharaq léq balé bapaqne, dait sesampun ie tetetéh, putri Piraun bait ie, beterus ie tepeliharaq maraq bijene mésaq. Selapuq ilmu bangse Mesir teajahang tipaq ie dait ie jari dengan saq bekuase gati dalem ucapan dait perbuatan. Waktu Musa beumur petang dase taun, ie beniat lumbar serioq keadaan bangsene dengan Israel. Beterus serioqne sopoq dengan léq antare bangse Israel teaniaye siq sopoq dengan Mesir; terus ie béle dengan saq teaniaye nike, dait matéq dengan Mesir nike. Musa paran bangsene gen ngerti bahwe Allah ngutus ie jari bébasang ie pade. Laguq ie pade ndéq ngerti. Jemaqne, ie serioq éndah due dengan Israel kenyeke besiaq, terus ie berusahe daméang ie pade. Basene, ‘Side pade niki besemeton kembéq side pade besiaq?’ Laguq dengan saq ngempuk baturne nike jelek Musa ojok sedi dait bebase, ‘Sai saq ngangkat side jari pemimpin dait hakim tiang pade? Napi side mélé matéq tiang éndah maraq side matéq dengan Mesir nike rubin?’ Waktu Musa pirengang napi saq teucapang siq dengan nike, ie pelai léman Mesir terus ndot léq negeri Midian. Léq derike ie mauq due bije. Petang dase taun sesampun nike sopoq malaékat rauh tipaq Musa léq padang gurun dékét Gunung Sinai. Malaékat nike rauh dalem api léq bebenes saq kenyeke nyale. Musa bengaq cingakin hal nike, make ie dateng ngerapetin taoq nike adéqne wikanang napi setetune nike. Terus pirengangne suare Tuhan bemanik, ‘Tiang Allah leluhurde, Tiang Allahne Ibrahim, Ishak dait Yakub.’ Musa jari ngijik siq takutne, terus ndéqne bani malik cingakin bebenes nike. Beterus Tuhan bemanik malik, ‘Lepas sandel saq side kadu nike, séngaq tanaq saq taoq side nganjeng nike tanaq saq suci. Tiang sampun serioq dait merhatiang paitne penderitean umat Tiang, léq Mesir. Tiang sampun dengah keluhan, dait Tiang gen turun bébasang ie pade. Mangkin, silaq! Tiang gen ngutus side tulak ojok Mesir.’ Musa niki ie saq ndéq teakuq siq bangse Israel dait saq tetolaq siq ucapan niki, ‘Sai saq ngangkat side jari pemimpin dait hakim tiang pade?’ Laguq malahan ie saq teutus siq Allah jari pemimpin dait penyelamat, langan malaékat saq rauh tipaq ie léq tengaq bebenes saq nyale nike. Musa nike saq mimpin bangse Israel sugul léman Mesir siq care piaq keajaipan-keajaipan dait hal-hal saq luar biase léq Mesir, léq Segare Béaq dait léq padang gurun petang dase taun ngonéqne. Musa niki éndah saq bebase léq bangse Israel bahwe, ‘Allah gen ngutus sopoq nabi maraq tiang niki tipaq side pade léman bangsende mésaq.’ Musa nike saq araq léq tengaq-tengaq bangse Israel léq padang gurun, jari perantare tipaq malaékat saq bemanik léq ie léq Gunung Sinai kance leluhurte. Ie saq nerimaq léman Allah manik saq idup jari tesampéang tipaq ite. Timaq maraq nike leluhurte nénten kayun taat léq ie. Ie pade nolaq Musa dait ie pade melét tulak ojok Mesir. Ie pade bebase léq Harun, ‘Piaqang tiang pade déwe-déwe, adéq déwe-déwe nike mimpin tiang pade. Séngaq tiang pade ndéq nenaoq malik napi saq nimpe Musa, saq pimpin tiang pade sugul léman Mesir!’ Terus léq waktu nike ie pade miaq sopoq tetato anak sampi, beterus ie pade ngaturang kurban tipaq tetato nike dait ngaraqang gawé jari nyembah barang saq ie pade piaq mésaq. Make Allah bilin ie pade dait menengang ie pade nyembah bintang-bintang léq langit. Nike pade maraq saq tetulis léq dalem kitab nabi-nabi. Maraq niki, ‘Hai dengan-dengan Israel! Ndéqne umaq Tiang side nyembeléh dait ngurbanang binatang sengonéq petang dase taun léq padang gurun. Kémah berhale Molok saq side jauq-jauq bareng-bareng kance tetato bintang berhalende, Repan; nike tetato saq side piaq jari tesembah. Keranaq nike Tiang gen tetéh side jangke dateng itoqan, léq negeri Babel.’ Kémah taoq Allah rauh tipaq manusie araq léq leluhurte léq padang gurun. Kémah nike tepiaq siq préntah léman Allah tipaq Musa dait menurut conto saq tepetitoqang siq Allah tipaq ie. Beterus kémah nike tejauq siq leluhurte sewaktu ie pade bareng kance Yusak lumbar ngerebut negeri niki léman kekuasean bangse-bangse saq tetundung siq Allah léq julun ie pade. Kémah nike araq léq derike jangke dateng jaman Daud. Daud nyenengang Allah, dait tunas léq Allah adéqne teijinang miaq sopoq gedéng umaq Allah saq tesembah siq Yakub nike. Laguq Nabi Sulaiman saq piaq gedéng umaq Allah. Laguq Allah saq Maheagung nénten meneng léq dalem gedéng saq tepiaq siq manusie; maraq saq tesampéang siq nabi, ‘Langit nike tahte Tiang, dait gumi lamak naén Tiang. Gedéng napi gen side piaqang Tiang? Léq mbé taoq Tiang mentelah? Maraq nike manik Tuhan. Tekan Tiang mésaq saq cipteang selapuqne?’ maraq nike Manik Allah. Hai dengan-dengan saq pagah, saq keras até dait kedok, side tetep nentang Roh Suci, pade maraq leluhurde, maraq nike éndah side. Napi araq nabi saq ndéq teaniaye siq leluhurde? Ie pade nyematéq utusan-utusan léman Allah saq laéq sampun nyampéang bahwe Dengan Kenaq léq arepan Allah nike gen rauh. Terus mangkin side pade matéq dait behianat léq Ie. Malaékat-malaékat sampun nyampéang Hukum Taurat tipaq side pade, laguq side pade ndéq mélé taat léq hukum nike!” Sesampun anggote-anggote Mahkamah Agame nike pirengang selapuqne saq tesampéang siq Stepanus nike, ie pade jari sakit angen dait gedek gati léq ie. Laguq Stepanus saq tekuasein siq Roh Suci, serioq andang langit. Ie serioq kemuliean Allah dait Deside Isa ngadeg léq sedi kanan Allah. Pade serioq basen Stepanus, “Tiang serioq sorge kebukaq dait Bije Manusie nganjeng léq sedi kanan Allah!” Anggote-anggote mahkamah nike nyumpel kentokne sambil nyurak-nyurak, terus beriuk nyerang Stepanus. Ie pade oros Stepanus sugul ojok luah kote, beterus peléwasne kadu batu. Saksi-saksi noloq jubah ie pade léq julun naén sopoq terune aranne Saulus. Sewaktu ie pade peléwas Stepanus, Stepanus bekuih, “Junjungan Saq Mulie Deside Isa, terimaq roh tiang!” Terus ie sujut dait bekuih siq suare saq beléq, “Junjungan Saq Mulie, sampunang dose niki tetanggungang tipaq ie pade!” Sesampun bebase maraq nike, ie ninggal. Dait Saulus éndah seneng Stepanus tematéq. Jelo nike éndah jemaah léq Yerusalem mulai teaniaye, sehingge ie pade selapuq, bepencar-pencar ojok selapuq daérah Yudea dait Samaria kecuali rasul-rasul. Dengan-dengan saq takut tipaq Allah nguburang Stepanus dait nangis éroq aséq. Laguq Saulus terus doang berusahe nganiaye jemaah. Ie lumbar léman balé saq sopoq ojok balé saq lainne, dait orosne sugul dengan-dengan beriman, terus tamaqne ojok dalem bui. Dengan-dengan percaye saq sampun bepencar nike beriteang Kabar Solah léman Allah nike ojok embé-embé. Pilipus lumbar ojok sopoq kote léq Samaria dait beriteang tipaq dengan-dengan léq derike mengenai Almasih saq tejanjiqang siq Allah. Waktu dengan-dengan dengah Pilipus bebaos dait ie pade serioq keajaipan-keajaipan saq ie piaq, luwéq léq antare ie pade saq perhatiang napi saq tesampéang siq Pilipus. Séngaq roh-roh jahat sampun sugul sambil nyurak-nyurak léman dengan luwéq saq tekuasein siq roh jahat. Dengan-dengan képaq dait démpang éndah luwéq saq teselahang. Make dengan-dengan léq kote nike cemoh gati. Léq kote nike araq sopoq dengan aranne Simon, saq léman laéq miaq dengan-dengan Samaria takjub siq ilmu séhérne. Ie ngaku diriqne bahwe ie dengan saq luar biase. Make selapuq dengan léq kote nike léman macem-macem golongan masyarakat sanget merhatiang ie. Ie pade bebase, “Dengan niki kuase léman Allah saq kesohor saq tesebut ‘Kuase Beléq’ nike.” Sampun ngonéq gati ie miaq ie pade takjub siq kekuatan séhérne, sehingge ie pade turut ie. Laguq Pilipus beriteang tipaq ie pade Kabar Solah mengenai Kerajaan Allah dait mengenai peséngan Deside Isa Almasih. Make ie pade percaye léq berite saq tesampéang siq Pilipus, terus ie pade tebaptis dengan-dengan mame dait dengan nine. Simon mésaq éndah percaye. Dait sesampun tebaptis, ie tetep turut Pilipus. Keajaipan-keajaipan saq telaksane miaq Simon jari bengaq. Rasul-rasul léq Yerusalem mirengang bahwe dengan-dengan Samaria sampun nerimaq Manik Allah. Keranaq nike ie pade ngutus Petrus dait Yahya ojok derike. Waktu Petrus dait Yahya nike dateng, ie pade do'eang dengan-dengan Samaria nike adéq ie pade mauq Roh Suci, séngaq léq waktu nike léq antare ie pade ndéqman araq sopoq dengan juaq saq nerimaq Roh Suci; ie pade baruq tebaptis dalem peséngan Junjungan Saq Mulie Deside Isa doang. Terus Petrus dait Yahya noloq ime ie pade léq atas dengan-dengan Samaria nike; make ie pade nerimaq Roh Suci. Simon serioq bahwe lantaran ime rasul-rasul tetoloq léq atas dengan-dengan nike, Roh Allah teicanin tipaq ie pade. Keranaq nike Simon jauq képéng tipaq Petrus dait Yahya, terus bebase, “Icanin éndah tipaq tiang kuase nike adéq lamun ime tiang tetoloq léq sai juaq, dengan nike gen nerimaq Roh Suci.” Laguq jawab Petrus, “Celake side dait képéngde! Side paran paice Allah bau tebeli siq képéng? Side ndéq bedowé bagian dalem pegawéan tiang pade, séngaq atén side ndéq lomboq léq arepan Allah. Jari, pade tobat léman kejahatande niki dait bedo'e tipaq Tuhan semoge Ie ngampunin niat aténde niki. Séngaq tiang taoq side penoq siq talon até dait dose léq dalem aténde.” Beterus Simon bebase, “Tulung tunasang tipaq Tuhan adéq ndéq sopoq juaq léman saq side pade ucapang nike telaksane léq tiang.” Sesampun ie pade nyampéang kesaksian dait beriteang manik Tuhan, Petrus dait Yahya tulak ojok Yerusalem. Dait léq dalem kelampan uléq, ie pade beriteang Kabar Solah nike léq luwéq kampung léq Samaria. Sopoq malaékat Tuhan bemanik léq Pilipus, “Silaq berangkat! Lumbar ojok lauq ojok langan saq hubungang Yerusalem dait Gaza.” Rurung nike sepi. Roh Allah bemanik léq Pilipus, “Lumbar rapetin keréte nike.” Beterus Pilipus lumbar ngerapetin keréte nike, terus dengahne dengan nike bace kitab Nabi Yesaya. Pilipus beketuan léq ie, “Napi pelungguh ngerti saq pelungguh bace nike?” Jawab dengan nike, “Berembé tiang iniq ngerti, lamun ndéq araq saq jelasang léq tiang?” Beterus ie ténaq Pilipus taék ojok keréte dait melinggih bareng kance ie. Niki ayat-ayat saq tebace nike. “Ie maraq dombe saq tegeroh jari tesembeléh, maraq anak dombe saq ndéq ngembéq, lamun bulune tegunting, maraq nike Ie ndéq ngucapang napi-napi. Ie tehine dait teperlakuang ndéq adil. Nyawe-Ne tembot léman gumi sehingge ndéq sopoq dengan juaq saq bau nyeriteang mengenai keturunan-Ne.” Pembeléq léman Etiopia nike bebase léq Pilipus, “Tunas badaq tiang sai saq temaksut siq nabi nike? Diriqne mésaq atao dengan lain?” Make Pilipus éndah mulai becerite; ie kadu ayat-ayat nike jari penembéqne nyampéang Kabar Solah mengenai Deside Isa tipaq pembeléq nike. Léq tengaq kelampan, ie pade dateng léq sopoq taoq saq araq aiq. Terus pembeléq nike bebase, “Serioq nike, araq aiq! Napi saq masih kurang malik jari baptis tiang?” [ Pilipus bebase, “Lamun pelungguh percaye sepenoq angen, pelungguh kanggo tebaptis.” Basen pembeléq Etiopia nike, “Tiang percaye Deside Isa Almasih Bije saq asalne léman Allah.”] Beterus ie suruq kerétene mentelah; dait deduaqne, Pilipus dait pembeléq nike, turun ojok dalem aiq terus Pilipus baptis pembeléq nike. Sewaktu ie pade sugul léman aiq, Roh Tuhan bait Pilipus léman derike. Pembeléq Etiopia nike ndéq serioq ie malik. Siq senengne pembeléq nike ngelanjutang kelampanne. Selung-selung Pilipus sampun araq léq Asdod. Dait sewaktu ie ngelanjutang kelampanne, ie beriteang Kabar Solah mengenai Deside Isa léq selapuq kote jangke ie dateng léq Kaisarea. Léq waktu nike Saulus terus doang beniat ngancem dait nyematéq pengiring-pengiring Junjungan Saq Mulie Deside Isa. Ie lumbar ojok Imam Agung, dait ie tunas surat kuase jari tejauq ojok balé-balé ibadah dengan Yahudi léq kote Damsyik, adéq lamun léq derike ie ndait dengan-dengan saq turut Langan saq tepetitoqang siq Junjungan Saq Mulie nike, ie bau dait jauq ie pade ojok Yerusalem. Léq tengaq kelampan ojok Damsyik, sewaktune sampun rapet léq kote nike, selung-selung araq sinar léman langit becahaye léq sekiter Saulus. Ie rebaq léq tanaq terus dengahne suare saq bemanik tipaq ie, “Saulus, Saulus! Kembéq side nganiaye Tiang?” “Sai Pelungguh, Tuan?” Saulus metakén. Jawab suare nike, “Tiang niki Isa, saq side aniaye. Laguq mangkin side ures dait tame ojok kote. Léq derike side gen tebadaq napi saq harus side laksaneang.” Dengan-dengan saq milu kance Saulus tinjot jangke ie pade kemomotan; séngaq ie pade dengah suare nike, laguq ndéqne serioq sopoq dengan juaq. Beterus Saulus nganjeng, dait bukaqne penentengne, laguq penentengne ndéqne bau serioq napi-napi malik. Make ie pade tegel ime Saulus dait déndénne tame ojok Damsyik. Telu jelo ngonéqne ie ndéq tao nyerioq dait sengonéq nike ie ndéq bekelor atao nginem. Léq Damsyik araq sopoq dengan pengiring Deside Isa aranne Ananias. Dalem sopoq penyerioqan, Junjungan Saq Mulie bemanik léq ie, “Ananias!” Jawab Ananias, “Niki tiang, Junjungan Saq Mulie.” Junjungan Saq Mulie bemanik, “Silaq berangkat mangkin. Lumbar ojok baléne Yudas léq langan saq aranne Langan Lomboq. Ketuanang léq derike dengan saq aranne Saulus saq asalne léman kote Tarsus. Dengan nike kenyeke bedo'e, dait léq dalem sopoq penyerioqan ie serioq sopoq dengan mame, aranne Ananias, dateng tipaq ie dait noloq imene léq atasne adéqne tao nyerioq malik.” Jawab Ananias, “Junjungan Saq Mulie, tiang sampun dengah luwéq dengan bebaos mengenai dengan nike, terutame mengenai penganiayean-penganiayean saq ie piaq tipaq dengan-dengan saq tehususang bagi Allah saq ndot léq Yerusalem. Dait mangkin ie sampun dateng ojok deriki siq wewenang penoq léman imam-imam kepale jari bau selapuq dengan saq percaye léq Deside.” Laguq Junjungan Saq Mulie bemanik léq Ananias, “Silaq lumbar doang! Séngaq Tiang sampun miléq ie jari ngelayanin Tiang, adéq ie ngabarang mengenai Tiang tipaq bangse-bangse lain dait tipaq raje-raje dait tipaq dengan-dengan Israel éndah. Dait Tiang mésaq gen nyatayang léq ie selapuq penderitean saq gen ie terimaq lantaran Tiang.” Make Ananias éndah lumbar ojok balé nike, dait toloq imene léq atas Saulus, terus bebase, “Semeton tiang Saulus, Junjungan Saq Mulie Deside Isa saq side serioq léq tengaq langan sewaktu side kenyeke ojok deriki, Ie saq manikang tiang dateng adéq side tao nyerioq malik, dait tekuasein siq Roh Suci.” Waktu nike éndah araq maraq ruen sisik empaq geriq léman penenteng Saulus, dait ie bau nyerioq malik. Make ie ures, terus tebaptis. Dait sesampun bekelor, ie jari kuat malik. Saulus ndot léq Damsyik kance pengiring-pengiring Deside Isa pire jelo ngonéqne. Ie langsung lumbar ojok balé-balé ibadah dait mulai beriteang bahwe Deside Isa nike Bije saq asalne léman Allah. Selapuq dengan bengaq dengah Saulus. Ie pade bebase, “Tekan ie saq léq Yerusalem sampun nyematéq selapuq dengan saq percaye léq Deside Isa? Tekan ie dateng ojok deriki siq maksut jari bau dait jauq ie pade tipaq imam-imam kepale?” Laguq Saulus sayan beléq pengaruhne. Bukti-bukti saq ie ajuang mengenai Deside Isa tetu-tetu piaq dengan takjub bahwe Deside Isa nike Almasih, jangke selapuq dengan Yahudi saq ndot léq Damsyik ndéq bau malik nentang ie. Sesampun liwat pire waktu ngonéqne, dengan-dengan Yahudi besepakat gen nyematéq Saulus. Laguq rencane ie pade tetaoq siq Saulus. Kenjelo kekelem dengan-dengan Yahudi nike ngantih léq jebak beléq kote jari nyematéq ie. Laguq léq sopoq kelem, pengiring-pengiring Saulus bait ie, terus nurunang ie léman tembok kote kadu sopoq keranjang. Saulus lumbar ojok Yerusalem, dait léq derike ie berusahe begabung kance pengiring-pengiring Deside Isa. Laguq dengan-dengan nike takut léq ie, séngaq ie pade ndéq percaye bahwe Saulus tetu-tetu sampun jari pengiring Deside Isa. Laguq Barnabas dateng tipaq Saulus, terus jauqne Saulus ojok rasul-rasul. Barnabas nyeriteang léq ie pade berembé Saulus serioq Junjungan Saq Mulie léq tengaq langan, dait berembé Junjungan Saq Mulie bemanik léq ie. Barnabas éndah nyeriteang mengenai berembé wanénne Saulus ngajahang léq Damsyik siq peséngan Deside Isa. Jari Saulus ndot bareng ie pade, dait siq bani gati hotbah léq selapuq wilayah Yerusalem siq peséngan Junjungan Saq Mulie. Ie éndah bebaos dait bedebat kance dengan-dengan Yahudi saq kadu base Yunani, laguq ie pade berusahe nyematéq Saulus. Waktu dengan-dengan percaye saq lainne nenaoq hal nike, ie pade jauq Saulus ojok Kaisarea, beterus kirimne ojok Tarsus. Sengonéq pire waktu, jemaah léq selapuq Yudea, Galilea, dait Samaria araq dalem keadaan tentrem. Tetulung siq Roh Suci dait takut léq Tuhan, jemaah-jemaah nike sayan kuat dait sayan luwéq. Léq waktu nike Petrus lampaq ngelining dait bejangoq ojok jemaah-jemaah. Léq dalem kelampanne nike ie jangoq dengan-dengan saq tehususang bagi Allah saq ndot léq Lida. Léq derike ie bedait kance sopoq dengan mame aranne Eneas, saq képaq dait ndéqne ures-ures léman petindoqanne baluq taun ngonéqne. Petrus bebase léq Eneas, “Eneas, Deside Isa Almasih nyelahang side. Silaq ures, periri petindoqande.” Waktu nike éndah Eneas ures. Selapuq penduduk léq Lida dait Saron serioq Eneas, terus ie pade selapuq percaye léq Tuhan. Léq Yope araq sopoq dengan nine pengiring Deside Isa aranne Tabita. (Léq dalem base Yunani, aranne Dorkas saq artine mayung.) Ie tetep doang laksaneang hal-hal saq solah dait tulung dengan-dengan miskin. Léq waktu nike ie sakit terus ninggal. Sesampun jenazahne tepandiqang, ie tetoloq léq kamar saq léq atas. Kote Yope ndéqne jaoq léman Lida. Jari sewaktu pengiring-pengiring Deside Isa léq kote Yope dengah bahwe Petrus araq léq Lida, ie pade ngutus due dengan lumbar ojok Petrus siq pesen niki, “Becat-becat dateng ojok deriki.” Petrus langsung ures dait turut ie pade. Sesampun dateng léq derike, ie tejauq ojok kamar saq léq atas. Selapuq bebalu léq derike keriwung Petrus sambil nangis dait petitoqangne léq ie kelambi-kelambi dait jubah-jubah saq tejaitang siq Dorkas waktu ie masih idup. Petrus suruq ie pade selapuq sugul, terus ie sujut dait bedo'e. Sesampun nike ie serioq andang jenazah Dorkas, dait bebase, “Tabita, ures!” Make Dorkas bukaq penentengne, dait waktu ie serioq Petrus, ie tokol. Beterus Petrus tegel imene dait tulung ie nganjeng. Sesampun nike Petrus ngempoh dengan-dengan percaye léq derike bareng kance bebalu-bebalu nike, terus serahangne Dorkas saq sampun idup nike léq ie pade. Kabar mengenai peristiwe nike nyebar ojok selapuq wilayah Yope, sehingge luwéq dengan percaye léq Junjungan Saq Mulie. Petrus ndot léq derike pire jelo malik léq balé sopoq tukang kulit aranne Simon. Léq Kaisarea araq sopoq dengan mame aranne Kornelius. Ie jari prewire “Tentere Italia.” Ie dengan saq takut léq Allah dait selapuq kadang jarine beribadah tipaq Allah. Ie luwéq nulung dengan-dengan Yahudi saq miskin, dait ie rajin bedo'e tipaq Allah. Léq sopoq jelo kire-kire jam telu kebian, pedas gati ie serioq léq dalem sopoq penyerioqan, sopoq malaékat Allah rauh dait ngemanikang ie, “Kornelius!” Siq rase takut Kornelius perhatiang malaékat nike terus bebase, “Araq napi Bapaq?” Jawab malaékat nike, “Selapuq do'e dait kemurahan aténde nike sampun teterimaq siq Allah dait Allah iling léq side. Mangkin suruq dengan lumbar ojok Yope ngempoh Simon saq aran lengkapne Simon Petrus. Ie kenyeke nyodoq léq balé sopoq tukang kulit aranne Simon, saq ndot léq sedin pesisi.” Sesampun malaékat saq bemanik léq Kornelius nike lumbar, Kornelius ngempoh due pelayanne dait sopoq pengawal saq soléh. Kornelius nyeriteang tipaq ie pade napi saq sampun telaksane, terus suruq ie pade lumbar ojok Yope. Jemaqne, sewaktu ie pade masih léq tengaq langan, dait gen dateng léq Yope, Petrus taék ojok atas balé jari bedo'e. Beterus ie lapah gati dait melét bekelor. Sewaktu keloran kenyeke tesedieang, ie mauq sopoq penyerioqan. Ie serioq langit kebukaq, dait selembar lakar saq gamber teulurang ojok gumi, begantung léq empat bucune. Léq dalemne araq segale macem binatang benaé empat, selapuq binatang saq ngumang dait kedit-kedit saq liah. Terus araq suare bemanik léq ie, “Petrus, ures! Silaq sembeléh dait kelorang!” Petrus bejawab, “Nénten, Tuhan! Nénten uwah tiang ngelorang napi-napi saq haram atao najis.” Laguq suare nike bemanik malik léq ie, “Napi saq sampun tenyatayang halal siq Allah, ndaq side anggep haram!” Hal nike telaksane terus jangke telu kali, beterus lakar nike kerangkatan ojok sorge. Petrus bingung mikirang napi arti penyerioqanne nike, sewaktu Petrus mikir-mikir, dengan-dengan saq tesuruq siq Kornelius boyaq balé Simon sampun araq léq julu lawang. Terus ie pade ngempoh dengan dait beketuan, “Napi léq deriki araq temué saq madéq, aranne Simon Petrus?” Dait sewaktu Petrus masih doang berusahe nenaoq arti penyerioqanne nike, Roh Allah bemanik léq ie, “Hai Petrus, araq telu dengan kenyeke boyaq side. Silaq aruan turun ojok bawaq, dait ndaq ragu-ragu milu bareng ie pade, séngaq Tiang saq ngutus ie pade.” Beterus Petrus turun ojok bawaq, dait bebase léq dengan-dengan nike, “Tiang niki saq side pade péte, araq keperluan napi side pade dateng?” Jawab ie pade, “Prewire Kornelius ngutus tiang pade ojok deriki. Ie dengan saq soléh dait takut léq Allah, dait tehormatin siq selapuq dengan Yahudi. Langan sopoq malaékat, Allah manikang ie pesilaq pelungguh rauh ojok gedéngne, adéq ie dengahang napi saq gen pelungguh sampéang léq ie.” Make Petrus suruq ie pade tame adéqne madéq léq derike. Jemaqne Petrus ures, dait lumbar bareng kance ie pade. Pire dengan semeton seiman léman Yope éndah milu. Sejelo sesampun nike ie pade dateng léq Kaisarea. Léq derike ie pade sampun teantih siq Kornelius kance kadang jarine dait selapuq sahabat-sahabat karibne saq sampun tepesilaq. Waktu Petrus dateng, Kornelius lumbar nyambut ie dait sujut léq julu Petrus. Laguq Petrus penganjeng ie, beterus bebase, “Silaq side ures, tiang éndah manusie biase.” Sambil ie bebaos kance Kornelius, Petrus tame ojok dalem balé. Léq derike ie serioq luwéq dengan sampun bekumpul. Terus ie bebase léq ie pade, “Side pade nenaoq bahwe dengan Yahudi tebalaq siq Hukum Taurat dateng bejangoq atao berubungan kance dengan bangse-bangse lain. Laguq Allah sampun nyatayang léq tiang bahwe tiang ndéq kanggo nganggep sai juaq najis atao haram. Keranaq nike waktu pelungguh pesilaq tiang dateng, tiang ndéq keberatan dateng. Jari, mangkin niki tiang melét nenaoq, kembéq pelungguh pesilaq tiang dateng.” Jawab Kornelius, “Empat jelo saq liwat, kire-kire léq waktu maraq niki, tiang kenyeke bedo'e léq balé jam telu kebian. Selung-selung sopoq dengan mame nganjeng léq julun tiang. Kelambi dengan nike putéq ngempor. Ie bemanik, ‘Kornelius, Allah sampun nerimaq do'ende dait iling léq kemurahan aténde. Jari mangkin utus dengan lumbar ojok Yope ngempoh dengan aranne Simon Petrus, ie kenyeke madéq léq balé sopoq tukang kulit aranne Simon; baléne léq sedin pesisi.’ Keranaq nike tiang aruan ngutus dengan lumbar pesilaq pelungguh. Dait pelungguh ihlas rauh ojok deriki. Mangkin tiang pade selapuq bekumpul léq deriki léq arepan Allah jari dengahang selapuq saq Allah manikang léq pelungguh umaq tiang pade.” Terus Petrus bebase, “Mangkin tiang tetu-tetu sadar bahwe Allah nénten béde-bédeang dengan. Dengan saq takut léq Allah dait ngelaksaneang saq kenaq, dengan nike teterimaq siq Allah, ndéq peduli ie léman bangse napi. Side pade sampun nenaoq isi berite saq Allah sampéang tipaq bangse Israel. Nike Kabar Solah dait damé sejahtere langan Deside Isa Almasih, Junjungan Saq Mulie tipaq selapuq dengan. Side pade nenaoq napi saq sampun telaksane léq selapuq wilayah Yudea, mulai léman Galilea, sesampun baptisan saq teanjurang siq Yahya. Side pade nenaoq bahwe Allah sampun nyuciang dait ngesahang Deside Isa dengan Nazaret nike siq Roh Suci dait kuase. Side pade nenaoq éndah bahwe Deside Isa nike lumbar ojok mbé-mbé jari ngelaksaneang saq solah; Ie nyelahang selapuq dengan saq tekuasein siq Belis, séngaq Allah araq bareng Ie. Tiang pade niki saksi-saksi saq sampun serioq mésaq selapuq hal saq Ie laksaneang léq wilayah Yudea dait léq Yerusalem. Timaq maraq nike ie pade pakuq léq kayuq salib dait nyematéq Ie. Laguq léq jelo saq ketelu Allah ngidupang Ie malik léman ninggal dait nyatayang Ie tipaq manusie; ndéqne tipaq selapuq dengan, laguq cume tipaq tiang pade saq sampun juluan tepiléq siq Allah jari saksi-saksi-Ne: Tiang pade bekelor dait nginem kance Ie sesampun Ie idup malik léman ninggal. Dait Ie ngutus tiang pade beriteang Kabar Solah tipaq dengan-dengan dait ngebéng kesaksian bahwe Ie saq teangkat siq Allah jari Hakim dengan-dengan saq masih idup dait dengan-dengan saq sampun ninggal. Mengenai Ie selapuq nabi ngebéng kesaksian, bahwe sai-sai percaye léq Ie, ie gen teampunin dosene langan peséngan-Ne.” Sewaktu Petrus masih bebaos, Roh Suci turun nguasein selapuq dengan saq dengah berite nike. Dengan-dengan Yahudi saq percaye léq Deside Isa dait turut Petrus léman Yope, selapuqne bengaq serioq Allah ngicanin éndah Roh Suci tipaq dengan bangse-bangse lain. Séngaq ie pade dengah dengan-dengan nike ngeraos kadu macem-macem base dait mulieang Allah. Terus Petrus bebase, “Silaq serioq, dengan-dengan niki sampun nerimaq Roh Suci pade maraq ite. Napi bau dengan halang-halangin ie pade tebaptis siq aiq?” Make Petrus suruq ie pade tebaptis siq peséngan Deside Isa Almasih. Sesampun nike ie pade tunas adéq Petrus ndot kance ie pade pire jelo ngonéqne. Rasul-rasul dait dengan-dengan saq percaye léq selapuq wilayah Yudea pirengang bahwe dengan bangse-bangse lain éndah sampun nerimaq Manik Allah. Beterus sewaktu Petrus lumbar ojok Yerusalem, dengan-dengan Yahudi saq sampun percaye nike, ngewade Petrus. Ie pade bebase, “Kembéq side lumbar ojok balé dengan-dengan saq ndéqman besunat? Malahan side éndah bekelor bareng kance ie pade!” Keranaq nike Petrus jelasang léq ie pade selapuq saq telaksane léman penembéqne. Petrus bebase, “Tiang kenyeke bedo'e léq kote Yope, beterus tiang serioq sopoq penyerioqan. Tiang serioq araq selembar lakar saq gamber teturunang léman langit, begantung léq keempat bucune, beterus ndot léq sedin tiang. Sewaktu tiang perhatiang léq dalemne, tiang serioq binatang-binatang benaé empat, binatang-binatang gamang, binatang saq ngumang dait kedit-kedit liah. Beterus tiang dengah suare saq bemanik tipaq tiang, ‘Silaq ures Petrus! Sembeléh nike dait kelorang!’ Laguq tiang bejawab, ‘Nénten Tuhan! Tiang nénten uwah ngelorang saq najis atao haram!’ Laguq suare nike bemanik malik léman langit, ‘Barang saq sampun tenyatayang halal siq Allah ndéq kanggo teparan haram.’ Tiang serioq hal nike jangke telu kali, terus selapuqne kerangkatan malik ojok sorge. Tepat waktu nike éndah telu dengan léman Kaisarea, saq teutus ojok tiang dateng léq balé taoq tiang madéq. Beterus Roh Allah manikang tiang ndaq ragu-ragu lumbar bareng ie pade. Semeton saq enem dengan niki éndah milu bareng tiang ojok Kaisarea, dait tiang pade selapuq tame ojok dalem baléne Kornelius. Beterus Kornelius nyeriteang léq tiang pade berembé ie serioq sopoq malaékat nganjeng léq baléne dait bemanik, ‘Suruq dengan lumbar ojok Yope ngempoh sopoq dengan mame aranne Simon Petrus. Ie gen nyampéang tipaq side berite saq gen nyelametang side dait selapuq dengan saq araq léq balénde.’ Beterus Petrus bebase malik,” dait léq waktu tiang mulai ngeraos, “Roh Suci turun ojok atas ie pade, pade maraq saq telaksane léq ite laéq waktu penembéqne. Beterus tiang inget, Junjungan Saq Mulie sampun bemanik, ‘Yahya baptis dengan kadu aiq, laguq side pade gen tebaptis kadu Roh Suci.’ Jari, lamun Allah éndah ngicanin ie pade paice pade maraq saq Ie icanin tipaq ite sewaktu ite baruq percaye léq Junjungan Saq Mulie Deside Isa Almasih. Segerah tiang bau segah Allah!” Sesampun pirengang hal nike, ie pade ndéq ngeraos malik. Beterus ie pade memuji Allah. Basen ie pade, “Lamun maraq nike dengan bangse-bangse lain éndah teicanin kesempatan siq Allah jari betobat dait nerimaq idup kekel.” Sesampun Stepanus tematéq, dengan-dengan saq percaye léq Deside Isa mulai teaniaye, sehingge ie pade bepencar-pencar ojok mbé-mbé. Araq saq pelai jangke dateng Penisia, dait araq éndah saq jangke dateng Siprus dait Antiokia. Laguq ie pade beriteang Kabar Solah tipaq dengan-dengan Yahudi doang. Laguq léq antare ie pade, saq asalne léman Siprus dait Kirene, araq éndah saq lumbar ojok Antiokia. Ie pade beriteang Kabar Solah mengenai Deside Isa, Junjungan Saq Mulie, tipaq dengan-dengan Yunani. Kuase Junjungan Saq Mulie araq léq ie pade sehingge luwéq dengan jari percaye dait nyerahang diriqne tipaq Junjungan Saq Mulie. Cerite-cerite mengenai peristiwe-peristiwe niki tedengah éndah jangke ojok jemaah léq Yerusalem. Make ie pade ngutus Barnabas ojok Antiokia. Dait sewaktu Barnabas dateng léq derike, dait serioq rahmat Allah tipaq dengan-dengan nike, ie gembire gati. Beterus ie tunas adéq ie pade pacu-pacu setie léq Junjungan Saq Mulie siq sepenoq angenne. Barnabas niki dengan saq solah dait tekuasein siq Roh Suci dait kuat imanne. Dait luwéq dengan dateng tipaq Junjungan Saq Mulie. Beterus Barnabas lumbar ojok Tarsus boyaq Saulus. Sesampun bedait kance Saulus, ie jauq Saulus ojok Antiokia dait setaun penoq ie pade bekumpul kance jemaah léq derike sambil ngajahang luwéq dengan. Léq Antiokia nike dengan-dengan saq percaye léq Deside Isa penembéqne tesebut dengan-dengan Nasrani. Léq mase nike araq pire nabi rauh léman Yerusalem ojok Antiokia. Léq antarene araq sopoq dengan aranne Agabus. Siq pimpinan Roh Allah ie benubuat bahwe léq seantéro dunie gen araq bahle kelapahan saq beléq. (Dait hal nike mule telaksane éndah léq waktu Kaisar Klaudius mréntah.) Make selapuq pengiring Deside Isa nike sepakat jari ngirim sumbangan tipaq semeton-semeton saq ndot léq Yudea; sopoq-sopoq ngirim menurut kemampuanne. Kesepakatan nike telaksaneang éndah, beterus Barnabas dait Saulus teutus jari ngatongang sumbangan nike ojok pemimpin-pemimpin jemaah. Léq waktu nike Raje Herodes mulai keras léq anggote-anggote jemaah. Siq préntahne, Yakub, semetonne Yahya tematéq kadu kléwang. Sewaktu Herodes serioq bahwe perbuatanne nike nyenengang angen dengan-dengan Yahudi, ie piaq malik maraq nike; ie suruq dengan bau Petrus éndah. Hal nike telaksane waktu Hari Raye Ruti Ndéq Beragi. Sesampun tebau, Petrus tetamaq ojok dalem bui. Empat regu tentere tetugasang jari jagaq Petrus léq derike -- sopoq-sopoq regu berisi empat tentere. Sesampun perayaan Paskah inggas, baruq Herodes gen ngadilin Petrus léq julun dengan luwéq. Jari Petrus tetahen léq bui; laguq jemaah do'eang ie pacu-pacu tipaq Allah. Léq kelem sendéqman Herodes jauq Petrus léq julun dengan luwéq, Petrus mesaré tetaliq kadu due ranté besi léq antare due tentere pengawal. Léq lawang bui, pengawal-pengawal lain éndah kenyeke jagaq bui. Selung-selung malaékat Tuhan nganjeng léq derike dait araq sopoq cahaye saq besinar léq dalem kamar bui nike. Malaékat nike dodoq Petrus jangke ie ngase. Beterus manik malaékat nike, “Hai, becat ures!” Waktu nike éndah ranté besi nike teriq léman ime Petrus. Sesampun nike malaékat nike bemanik, “Kadu kelambinde dait taliq sepatunde.” Make Petrus ngengadu kelambine dait naliq sepatune. Beterus malaékat nike bemanik malik, “Kadu jubahde, dait turut tiang.” Make Petrus milu bareng malaékat nike sugul léman bui. Laguq Petrus ndéq sadar bahwe napi saq kenyeke telaksaneang siq malaékat nike siq malaékat nike tetu-tetu telaksane. Petrus paran nike cume sopoq penyerioqan. Sesampun ie pade liwatin taoq penjagaan saq penembéq dait saq kedue, ie pade dateng léq lawang besi, saq nuju ojok kote. Lawang nike kebukaq mésaq, terus ie pade sugul dait lampaq langan sopoq pengorong. Selung-selung malaékat nike bilin Petrus. Sesampun nike Petrus baruq sadar léq napi saq sampun telaksane léq diriqne, terus ie bebase, “Mangkin tiang nenaoq bahwe Tuhan tetu-tetu sampun ngirim malaékat-Ne jari bébasang tiang léman kuase Herodes, dait léman selapuq hal saq gen telaksaneang siq bangse Yahudi tipaq tiang.” Sesampun ie sadar léq keadaan nike, Petrus lumbar ojok balé Mariam, inaqne Yahya saq tesebut éndah Markus. Léq derike luwéq dengan bekumpul dait kenyeke bedo'e. Petrus ngetok lawang jebak, terus sopoq dengan pelayan nine aranne Rode, dateng jari bukaq jebak. Langsung ie tandaq suare Petrus. Lantaran cemohne, ie becat-becat tame malik ndéqne bukaqang lawang juluq, terus badaqang léq dengan-dengan léq derike bahwe Petrus araq léq luah. “Side jogang!” basen ie pade. Laguq Rode pagah bebadaq bahwe nike tetu-tetu Petrus. Make ie pade bebase, “Nike malaékatne!” Laguq Petrus terus doang ngetok lawang. Make sewaktu ie pade bukaq lawang, dait serioqne Petrus, ie pade bengaq gati. Petrus ngebéng tande kadu imene adéq ie pade tenang, beterus ie nyeriteang berembé Tuhan sampun gadingang ie sugul léman bui. Sesampun nike ie bebase, “Sampéang hal niki tipaq Yakub dait semeton-semeton saq lain éndah.” Beterus Petrus bilin taoq nike dait lumbar ojok taoq saq lain. Jemaq kelémaqne araq keributan léq antare tentere pengawal. Ie pade bingung gati mikirang napi saq sampun telaksane tipaq Petrus. Terus Herodes mréntahang dengan boyaq Petrus, laguq ie pade ndéq iniq ndait ie. Jari Herodes mréntahang adéq pengawal-pengawal nike teketuan terus tematéq. Sesampun nike Herodes lumbar léman Yudea ojok Kaisarea dait ndot léq derike. Herodes menggah gati léq dengan-dengan Tirus dait Sidon. Keranaq nike ie pade bareng-bareng ngadep Herodes. Mule-mule ie pade kédéq Blastus, saq jari kepale istane Herodes, sehingge ie bepihak léq ie pade. Sesampun nike ie lumbar ngadep Herodes, terus tunas bedamé, séngaq negeri ie pade beharep sepenoqne léq keloran léman negeri Herodes. Léq sopoq jelo saq sampun tetentuang, Herodes kadu kuace kerajaanne, terus melinggih léq kursi kerajaan dait mulai pidato léq julu rakyat. Rakyat saq kenyeke dengahang pidato nike bekuih-kuih, “Niki suare Déwe, ndéqne suare manusie!” Léq waktu nike éndah malaékat Tuhan tamper Herodes, séngaq ie ndéq hormatin Allah. Herodes tekaken siq longe, terus ninggal. Make Manik Allah sayan nyebar dait sayan luwéq tedengah siq dengan. Sesampun Barnabas dait Saulus nutuqang tugasne, ie pade tulak léman Yerusalem dait jauqne Yahya saq tesebut éndah Markus, bareng kance ie pade. Léq dalem jemaah léq Antiokia araq nabi-nabi dait guru-guru, aranne Barnabas, Simeon saq tejulukin Niger, Lukius léman Kirene, Menahem saq tebeléqang bareng kance Raje Herodes, dait Saulus. Sewaktu ie pade beribadah tipaq Tuhan dait puase, Roh Suci bemanik léq ie pade, “Piléq Barnabas dait Saulus husus umaq Tiang, adéq ie pade ngelaksaneang tugas saq sampun Tiang tentuang tipaq ie pade.” Sesampun puase dait bedo'e, ie pade noloq imene léq atas Barnabas dait Saulus, terus ngutus ie pade. Lantaran teutus siq Roh Suci, Barnabas dait Saulus berangkat ojok Seleukia. Léman derike ie pade belayar ojok pulao Siprus. Sewaktu ie pade dateng léq Salamis, ie pade nyampéang Manik Allah léq balé-balé ibadah Yahudi. Yahya Markus tulung ie pade dalem kelampanne. Selapuq pulao nike ie pade jelajahin jangke dateng Papos. Léq derike ie pade bedait kance sopoq dengan Yahudi, aranne Baryesus. Ie tukang séhér saq ngaku diriqne nabi. Sergius Paulus, gubernur pulao nike batur tukang séhér nike. Gubernur nike dengan saq pinter dait bijaksane. Ie ngempoh Barnabas dait Saulus, séngaq ie melét pirengang Manik Allah. Laguq Barnabas dait Saulus tetentang siq Elimas tukang séhér nike, séngaq Elimas (nike aranne dalem base Yunani) berusahe adéq gubernur nike ndaq jangke percaye léq Deside Isa. Laguq Saulus -- saq tesebut éndah Paulus -- tekuasein siq Roh Suci, sehingge ie peler ahli séhér nike, terus bebase, “Hai, penipu beléq, anak durhake! Side musuh selapuq saq kenaq. Kembéq side pengéngoh Langan saq tepetitoqang siq Junjungan Saq Mulie nike? Mangkin serioq, Tuhan gen ngukum side! Pire jelo ngonéqne side ndéq gen bau serioq jelo.” Waktu nike éndah Elimas beridap araq awun-awun saq bideng nutup penentengne, sehingge ie lampaq beganggam-ganggam boyaq dengan jari déndén ie. Sewaktu Gubernur nike cingakin napi saq sampun telaksane, ie percaye léq Deside Isa; séngaq ie takjub gati léq ajahan mengenai Tuhan. Léman Papos, Paulus dait batur-baturne belayar ojok Perga léq Pampilia. Léq derike Yahya Markus bilin ie pade, beterus tulak ojok Yerusalem. Léman Perga ie pade ngelanjutang kelampan ojok Antiokia léq Pisidia, dait léq jelo Sabat ie pade lumbar terus melinggih léq dalem balé ibadah. Sesampun Hukum Taurat dait kitab nabi-nabi tebaceang, pemimpin-pemimpin balé ibadah nike suruq dengan beketuan léq Paulus dait batur-baturne, “Semeton-semeton, lamun side pade bedowé naséhat tipaq dengan-dengan niki, silaq sampéang naséhat nike.” Paulus nganjeng, terus ngebéng tande kadu imene, dait bebase, “Semeton-semeton tiang dengan-dengan Israel dait semeton-semeton saq takut léq Allah! Silaq dengahang tiang: Allah bangse Israel sampun miléq leluhurte, dait jariang bangse niki bangse saq beléq sewaktu ie pade ndot léq Mesir jari pendateng. Beterus siq kuase saq beléq Allah gadingang ie pade sugul léman Mesir. Allah sabar léq tingkah laku ie pade léq padang gurun petang dase taun ngonéqne. Pituq bangse Ie musnahang léq negeri Kanaan jari bagi-bagiang negeri nike tipaq bangse Israel adéq negeri nike jari dowén ie pade. Selapuqne nike telaksane empat ratus séket taun ngonéqne. Sesampun negeri Kanaan nike tebagi-bagi, Allah ngicanin ie pade hakim-hakim jangke jaman Nabi Samuel. Beterus ie pade tunas sopoq raje. Allah ngicanin ie pade Saul bije Kis léman suku bangse Benyamin jari raje ie pade petang dase taun ngonéqne. Sesampun Saul tesingkirang, Allah ngangkat Daud jari raje ie pade. Dait niki saq temanikang Allah mengenai Daud, ‘Sampun tiang ndait Daud bije Isai dengan saq nyenengang angen Tiang. Ie saq gen ngelaksaneang selapuq pekayunan Tiang.’ Léman keturunan Daud nike Allah nyedieang tipaq bangse Israel sopoq Juruselamet, sesuai kance janji-Ne. Nike Deside Isa. Sendéqman Deside Isa rauh, Yahya sampun nganjurang tipaq dengan-dengan Israel adéq ie pade betobat léman dose-dose ie pade dait tebaptis. Dait léq waktu Yahya gen nutuqang karyene, ie bebase tipaq dengan-dengan nike, ‘Sai tiang niki menurut side pade? Tiang ndéqne Dengan saq side pade antih. Inget, Dengan nike gen rauh sesampun tiang; jari ngelekaq tali sepatu-Ne doang tiang ndéq patut.’ Semeton-semeton keturunan Ibrahim, dait side pade selapuq saq lainne léq deriki saq takut léq Allah! Allah sampun ngirim tipaq ite berite keselametan nike; séngaq dengan-dengan saq ndot léq Yerusalem dait pemimpin-pemimpin ie pade ndéq kenal sai Deside Isa nike. Siq mutusang hukuman maté tipaq Deside Isa, ie pade genepang ucapan nabi-nabi saq tebaceang sebilang jelo Sabat. Timaq ie pade ndéq ndait sopoq hal léq Deside Isa saq patut tehukum siq hukuman maté, laguq ie pade tunas léq Pilatus adéq Ie tematéq. Dait sesampun ie pade tutuq ngelaksaneang selapuqne saq araq tetulis dalem Kitab Suci mengenai Deside Isa, ie pade turunang jenazah-Ne léman kayuq salib, terus ie pade makamang. Laguq Allah ngidupang Ie malik léman ninggal. Beterus sengonéq pire jelo Deside Isa rauh nyatayang diriq tipaq dengan-dengan saq ngiring Ie léman Galilea ojok Yerusalem. Mangkin niki ie pade nike saq jari saksi-saksi-Ne tipaq bangse Israel. Jari, mangkin niki tiang pade nyampéang Kabar Solah nike tipaq side: Napi saq Allah sampun janjiqang tipaq leluhurte, nike sampun Ie laksaneang tipaq ite siq care ngidupang Deside Isa malik léman ninggal. Séngaq léq dalem Kitab Suci Zabur saq kedue araq tetulis, ‘Deside Bije saq asalne léman Tiang, léq jelo niki Tiang angkat Deside jari Bije Tiang.’ Allah sampun ngidupang Ie malik léman ninggal. Mangkin Ie ndéq gen ngalamin ninggal malik léq dalem makam. Mengenai hal nike Allah bemanik, ‘Tiang gen ngicanin Deside janji suci saq pasti gen tetepatin, saq sampun Tiang janjiqang léq Daud.’ Keranaq nike léq Kitab Suci Zabur léq ayat saq lain tetulis, ‘Deside nénten gen menengang Dengan Suci Deside cingakin kebinasean.’ Daud sampun ninggal dait temakamang éndah bareng-bareng kance leluhurne, dait ie mule teserahang tipaq kebinasean. Laguq Deside Isa, saq teidupang siq Allah léman ninggal, nénten ngalamin kebinasean. Keranaq nike side pade harus perhatiang bagus-bagus, adéq ndaq jangke telaksane léq side pade napi saq tesampéang siq nabi-nabi niki. ‘Perhatiang bagus-bagus, hai side dengan-dengan saq girang menghine! Side gen bengaq, terus ninggal! Séngaq léq jaman niki Tiang kenyeke ngelaksaneang sopoq hal saq side mésaq ndéq gen percaye ie, timaq araq dengan saq jelasang tipaq side.’ ” Waktu Paulus dait Barnabas bilin balé ibadah nike, dengan-dengan léq balé ibadah nike tunas ie pade tulak malik léq jelo Sabat saq gen dateng, jari ngelanjutang penjelasan mengenai hal-hal nike. Sesampun inggas ibadah, luwéq dengan Yahudi dait dengan bangse-bangse lain saq tame agame Yahudi, turut Paulus dait Barnabas; kedue rasul nike ngajah ie pade dait béng naséhat adéq ie pade tetep idup léq dalem rahmat Allah. Léq jelo Sabat selanjutne, aroh-aroh selapuq dengan léq kote nike dateng dengahang Manik Allah. Waktu dengan-dengan Yahudi serioq dengan luwéq nike, ie pade talon até gati. Ie pade menghine Paulus dait nentang selapuq saq ie sampéang. Laguq Paulus dait Barnabas sayan bani doang bebaos terus terang. Ie pade bebase, “Manik Allah mule harus tesampéang tipaq side pade juluq. Laguq lantaran side pade ndéq mélé nerimaq ie, side pade sampun nentuang mésaq bahwe side pade ndéq patut nerimaq idup sejati dait kekel. Dait mangkin tiang pade bilin side pade dait lalo tipaq dengan bangse-bangse lain. Séngaq niki préntah Tuhan léq tiang pade; Tuhan bemanik, ‘Tiang sampun nentuang side jari terang tipaq bangse-bangse saq ndéq kenal kance Allah, adéq side datengang keselametan tipaq seantéro dunie.’ ” Sewaktu dengan bangse-bangse lain dengah hal nike, ie pade seneng gati, terus mulieang Manik Tuhan. Dait dengan-dengan saq sampun tetentuang siq Allah jari mauq idup sejati dait kekel éndah jari percaye. Manik Tuhan nike nyebar ojok mbé-mbé léq selapuq daérah nike. Laguq pembeléq-pembeléq kote nike dait dengan-dengan nine saq tehormatin, saq takut léq Allah, tehasut siq dengan-dengan Yahudi. Ie pade nimbulang permusuhan tipaq Paulus dait Barnabas, dait deduaqne tetundung léman daérah nike. Beterus, rasul-rasul nike kerapang kerepuk léq naén ie pade léq julun dengan-dengan nike jari peringetan, terus lumbar ojok Ikonium. Pengiring-pengiring léq Antiokia gembire gati dait tekuasein siq Roh Suci. Léq Ikonium Paulus dait Barnabas éndah lumbar ojok balé ibadah Yahudi, dait ngajahang sehingge luwéq dengan Yahudi dait dengan bangse-bangse lain jari percaye léq Deside Isa. Laguq dengan-dengan Yahudi saq ndéq mélé percaye, hasut dengan bangse-bangse lain, sehingge miaq ie pade gedek léq dengan-dengan saq percaye tipaq Deside Isa. Keranaq nike Paulus dait Barnabas ngonéq ndot léq derike. Dait ie pade bani gati bebaos mengenai Tuhan. Make Tuhan éndah neguqang berite saq ie pade sampéang mengenai rahmat-Ne, Ie ngicanin ie pade kuase jari ngelaksaneang keajaipan-keajaipan dait hal-hal saq luar biase. Laguq penduduk kote nike ndéq patuh sopoq kance saq lainne; araq saq bepihak léq dengan-dengan Yahudi dait araq saq bepihak léq rasul-rasul nike. Terus dengan-dengan Yahudi dait pemimpin-pemimpinne bareng-bareng kance dengan bangse-bangse lain besepakat jari nyiksaq dait meléwas rasul-rasul nike kadu batu. Laguq rasul-rasul nike sadar léq keadaan nike, terus nyingkir ojok Listra dait Derbe, kote-kote léq Likaonia, dait ojok daérah sekiterne. Léq derike ie pade ngabarang malik Kabar Solah nike. Léq Listra araq sopoq dengan mame saq naéne képaq léman ie tebijeang, sehingge ie ndéq uwah tao lampaq séngaq naéne ndéq kuat. Dengan nike tokol léq derike dengahang Paulus bebaos. Paulus serioq bahwe dengan nike percaye dait bau teselahang. Make Paulus merhatiang ie. Dait siq suare saq beléq Paulus bebase, “Silaq nganjeng saq solah!” Dengan nike nyelontak nganjeng terus lampaq. Waktu dengan luwéq serioq napi saq sampun telaksaneang siq Paulus, ie pade bekuih kadu base Likaonia, “Déwe-déwe sampun turun ojok dunie kadu awak manusie.” Terus Barnabas ie pade aranin Zeus, dait Paulus ie pade aranin Hermes, séngaq ie saq bebaos. Imam déwe Zeus, saq taoq ibadahne araq léq julu kote, dateng jauq sampi mame dait kembang-kembang ojok jebak beléq kote. Ie mélé milu kance dengan luwéq nike ngaturang kurban tipaq rasul-rasul nike. Waktu Barnabas dait Paulus pirengang napi saq gen telaksaneang siq dengan-dengan nike, ie pade ngeroék-roék kelambine sambil ie pade pelai ojok tengaq-tengaq dengan luwéq nike, beterus nyurak, “Hai, kembéq side pade ngelaksaneang hal niki? Tiang pade niki manusie éndah pade maraq side! Tiang pade dateng ojok deriki jari nyampéang Kabar Solah tipaq side, adéq side pade tetéh hal-hal saq ndéq araq manpaatne niki, dait bebalik tipaq Allah saq idup, saq jariang langit dait gumi, segare dait selapuq isine. Léq waktu saq laéq Allah menengang bangse-bangse idup menurut keméléq ie pade sopoq-sopoq. Laguq Allah nénten lupaq ngicanin bukti-bukti mengenai diriq-Ne siq ngelaksaneang saq bagus. Ie ngicanin side ujan léman langit dait hasil tanaq léq musimne. Ie ngicanin keloran léq side dait nyenengang angende.” Laguq siq ucapan-ucapan nike masih sengke éndah rasul-rasul nike segah dengan-dengan nike jauq kurban tipaq ie pade. Dengan-dengan Yahudi saq dateng ojok Listra léman Antiokia léq Pisidia dait léman Ikonium pengaruhin dengan luwéq nike sehingge dengan-dengan nike bepihak léq ie pade. Terus ie pade peléwas Paulus kadu batu, dait orosne ojok luah kote. Ie pade paran Paulus sampun ninggal, laguq waktu dengan-dengan saq percaye léq derike nganjeng léq sekeliningne, ie ures dait tame malik ojok kote. Jemaqne ie berangkat ojok Derbe bareng kance Barnabas. Léq Derbe Paulus dait Barnabas nyampéang Kabar Solah nike dait luwéq dengan jari percaye léq Deside Isa. Sesampun nike ie pade tulak ojok Listra, beterus ojok Ikonium, Antiokia léq Pisidia. Léq kote-kote nike ie pade neguqang angen pengiring-pengiring nike dait naséhat ie pade adéqne tetep léq dalem iman, dait bebase bahwe jari tame ojok dalem Kerajaan Allah ite harus ngalamin luwéq sengsare. Dait léq sebilang jemaah, Paulus dait Barnabas ngangkat pemimpin-pemimpin umaq jemaah-jemaah nike, terus siq do'e dait puase, ie pade nyerahang pemimpin-pemimpin nike ojok Tuhan saq ie pade percaye nike. Sesampun nike Paulus dait Barnabas ngelanjutang kelampan ie pade liwatin daérah Pisidia dait dateng léq Pampilia. Dait sesampun ie pade nyampéang Manik Allah léq Perga, ie pade lumbar ojok Atalia. Léman derike ie pade belayar tulak ojok Antiokia. Nike kote taoqne ie pade teserahang laéq tipaq rahmat Allah, adéq ie pade ngelaksaneang pegawéan saq mangkin sampun ie pade tutuqang. Sewaktu dateng léq Antiokia, ie pade ngumpulang dengan-dengan léman jemaah nike, terus nyeriteang selapuq saq sampun tekaryeang siq Allah langan ie pade. Ie pade nyeriteang éndah berembé Allah sampun bukaq langan adéq dengan bangse-bangse lain beriman dalem Deside Isa. Léq kote nike Paulus dait Barnabas ngonéq ndot kance dengan-dengan percaye. Pire dengan léman Yudea dateng ojok Antiokia dait ngajahang dengan-dengan percaye léq Antiokia nike bahwe lamun ie pade ndéq tesunat maraq aturan hukum Musa, ie pade ndéq bau teselametang. Paulus dait Barnabas nentang gati pengajahan dengan-dengan nike. Ahirne tetentuang adéqne Paulus kance Barnabas dait dengan lain léman Antiokia lumbar ojok Yerusalem jari musyawarahang hal nike kance rasul-rasul dait pemimpin-pemimpin léq Yerusalem. Jemaah léq Antiokia ngatong ie pade éntah luah kote, beterus ie pade lumbar langan Pinisia dait Samaria. Léq derike ie pade nyeriteang berembé dengan bangse-bangse lain sampun nyerahang diriqne tipaq Allah. Berite nike piaq dengan-dengan saq percaye léq derike seneng gati. Sewaktu ie pade dateng léq Yerusalem, ie pade tesambut siq jemaah, dait rasul-rasul dait pemimpin-pemimpin. Terus ie pade nyeriteang tipaq dengan-dengan nike mengenai selapuq saq sampun telaksaneang siq Allah langan ie pade. Laguq pire dengan léman golongan Parisi saq sampun percaye, nganjeng dait bebase, “Dengan bangse-bangse lain saq sampun percaye nike harus tesunat dait tewajibang turut aturan hukum Musa.” Terus rasul-rasul dait pemimpin-pemimpin bekumpul jari musyawarahang masalah nike. Ngonéq gati ie pade saling tukah pendapet. Ahirne Petrus nganjeng dait bebase, “Semeton-semeton, side pade sampun nenaoq bahwe pire waktu saq sampun liwat Allah miléq tiang léman antare side pade jari nyampéang Kabar Solah nike tipaq dengan bangse-bangse lain, adéq ie pade éndah dengah dait percaye. Dait Allah saq wikan angen manusie sampun nyatayang bahwe Allah nerimaq ie pade; Allah nyatayang hal nike siq care ngicanin tipaq ie pade Roh Suci, pade maraq saq sampun teicanin tipaq ite éndah. Allah nénten béde-bédeang ite kance ie pade. Allah nyuciang atén ie pade lantaran iman ie pade. Nah, kembéq side pade mélé ngelawan Allah mangkin siq ngebéng sopoq kewajiban saq berat léq pengiring-pengiring niki, padahal leluhurte dait ite mésaq éndah ndéq sanggup ngelaksaneang hal nike? Sebalikne, ite percaye dait teselametang langan rahmat Junjungante Saq Mulie Deside Isa, maraq nike juaq ie pade.” Make selapuq dengan saq bekumpul léq derike jari tedoq. Beterus ie pade dengahang Barnabas dait Paulus nyeriteang malik selapuq keajaipan dait hal-hal saq luar biase saq sampun telaksaneang siq Allah langan ie pade léq antare dengan bangse-bangse lain. Sesampun ie pade tutuq bebaos, Yakub bebase, “Semeton-semeton! Dengahang tiang. Simon baruq gati jelasang berembé Allah léq penembéqne nyatayang rahmat-Ne tipaq dengan bangse-bangse lain, siq maksut miléq léq antare ie pade dengan-dengan saq gen jari umat-Ne mésaq. Hal nike sesuai maraq saq sampun tenubuatang siq nabi-nabi. Séngaq araq tetulis maraq niki, ‘Sesampun nike Tiang gen dateng malik,’ manik Tuhan, ‘Tiang gen penganjeng malik gedéng Daud saq sampun roboh, dait meririq saq séde, dait Tiang gen penganjeng ie malik; adéq selapuq dengan saq masih araq nike boyaq Tuhan, bareng kance dengan bangse-bangse lain, saq sampun Tiang manikang jari dowén Tiang.’ Maraq nike manik Tuhan, saq sampun tetaoq léman penembéq.” “Jari menurut pendapet tiang,” basen Yakub, “Ite ndéq kanggo nyusahang bangse-bangse lain saq nyerahang diriqne tipaq Allah. Laguq ite harus nulis surat tipaq ie pade dait béng naséhat, adéq ie pade ndaq ngelorang keloran saq najis saq sampun teaturang tipaq berhale, atao ngelorang empaq binatang saq maté tepekok, atao ngelorang daraq. Dait éndah adéq ie pade jaoqang diriqne léman perbuatan-perbuatan saq cabul. Séngaq hukum Musa tebaceang léman jaman laéq sebilang jelo Sabat léq balé-balé ibadah, dait teberiteang léq selapuq kote.” Rasul-rasul dait pemimpin-pemimpin, bareng-bareng kance selapuq anggote jemaah nike mutusang jari miléq pire dengan léq antare ie pade saq gen teutus ojok Antiokia bareng kance Paulus dait Barnabas. Make ie pade piléq Silas dait Yudas saq tesebut éndah Barsabas. Kedue dengan nike tokoh masyarakat léq antare dengan-dengan percaye léq Yerusalem. Bareng kance utusan-utusan nike ie pade ngirim éndah surat saq tetulis maraq niki, “Tipaq selapuq semeton-semeton saq asalne léman bangse-bangse lain, saq ndot léq Antiokia, Siria dait Kilikia. Salam léman tiang pade, rasul-rasul dait pemimpin-pemimpin, semeton-semetonde. Tiang pade dengah araq pire dengan léman antare tiang pade saq sampun lumbar tipaq side pade, piaq kaco dait piaq side pade bingung siq pengajahan-pengajahan ie pade. Padahal tiang pade ndéq suruq ie pade ngelaksaneang hal nike. Keranaq nike tiang pade sampun berunding dait selapuqne setuju jari miléq pire dengan dait ngutus ie pade ojok side. Ie pade gen lumbar bareng kance Barnabas dait Paulus saq tiang pade kasihin. Kedue dengan niki dengan-dengan saq sampun taroqang nyawene, lantaran Junjungante Saq Mulie Deside Isa Almasih. Jari, tiang pade ngutus Yudas dait Silas tipaq side pade, ie pade éndah saq gen nyampéang mésaq secare langsung tipaq side berite saq tetulis dalem surat niki. Sampun araq keputusan Roh Suci -- dait tiang pade éndah setuju -- adéq side pade ndaq tebéng kewajiban-kewajiban saq beratan léman kewajiban-kewajiban saq perlu niki doang: Ndaq ngelorang keloran saq sampun teaturang tipaq berhale; ndaq kelorang daraq, ndaq kelorang empaq binatang saq maté tepekok, dait jaoqang idupde léman pegawéan saq cabul. Lamun side pade jaoqang diriq léman hal-hal nike, side pade sampun ngelaksaneang saq bagus. Éntah niki atur tiang pade. Salam!” Sesampun tunas pamit, dengan-dengan saq teutus nike berangkat ojok Antiokia. Léq derike ie pade ngumpulang selapuq anggote jemaah, terus ie pade sampéang surat nike. Sewaktu anggote-anggote jemaah nike bace surat nike, ie pade seneng gati lantaran isi surat nike saq ngibur angen ie pade. Yudas dait Silas, saq jari nabi éndah, ngonéq bebaos kance semeton-semeton saq percaye léq Antiokia nike jari ngebéng semanget dait teguqang angen ie pade. Sesampun Yudas dait Silas ndot léq derike pire jelo ngonéqne, dengan-dengan percaye léq Antiokia nike ngirim ie pade malik jari nyampéang salam tipaq dengan-dengan saq ngutus ie pade. [ Laguq Silas mutusang tetep ndot léq Antiokia.] Paulus dait Barnabas éndah ndot pire jelo ngonéqne léq Antiokia. Léq derike ie pade ngajahang dait ngabarang manik Tuhan bareng kance luwéq dengan lainne. Ndéqne ngonéq sesampun nike Paulus bebase léq Barnabas, “Silaq ite tulak jangoq semeton-semeton saq percaye léq Deside Isa saq araq léq sebilang kote, taoq ite sampun ngabarang Manik Tuhan; adéq ite serioq berembé keadaan ie pade.” Barnabas melét jauq Yahya saq tesebut Markus, laguq Paulus secare teges bebase bahwe ie ndéq setuju jauq Markus saq ndéq mélé begawéan bareng kance ie pade dait bilin ie pade léq Pampilia. Make Paulus dait Barnabas betungkasan sehingge ie pade bekelin: Barnabas jauq Markus dait belayar kance ie ojok Siprus. Paulus miléq Silas terus berangkat kance ie sesampun semeton-semeton saq léq Antiokia nike nyerahang ie pade tipaq rahmat Allah. Ie pade keliningin Siria dait Kilikia; léq derike ie pade neguqang iman jemaah-jemaah. Paulus ngelanjutang kelampanne ojok Derbe beterus ojok Listra. Léq derike araq sopoq dengan pengiring Deside Isa aranne Timotius. Inaqne dengan Yahudi saq sampun percaye léq Deside Isa; laguq bapaqne dengan Yunani. Léq antare dengan-dengan percaye saq ndot léq Listra dait léq Ikonium, Timotius tekenal jari dengan saq soléh. Paulus kayun adéq Timotius milu kance ie; keranaq nike Paulus nyunat Timotius. Ie ngelaksaneang hal nike, séngaq dengan-dengan Yahudi léq daérah derike nike selapuqne nenaoq bahwe bapaqne Timotius dengan Yunani. Léq sebilang kote saq ie pade datengin, ie pade nyampéang tipaq dengan-dengan percaye keputusan-keputusan saq sampun tetentuang siq rasul-rasul dait pemimpin-pemimpin léq Yerusalem. Ie pade naséhatin semeton-semeton saq sampun percaye nike adéqne taat léq aturan nike. Make jemaah-jemaah nike sayan teguq imanne, dait sebilang jelo sayan luwéq jumlahne. Roh Suci nénten ngijinang Paulus dait Silas nyebarang Manik Allah léq wilayah Asia. Jari ie pade ngelanjutang kelampanne ojok daérah Prigia dait Galatia. Sewaktu dateng léq perbatesan Misia, ie pade cobaq tame ojok daérah Bitinia, laguq Roh Deside Isa balaq ie ojok derike. Jari ie pade liwatin Misia dait langsung tipaq Troas. Kelemne, léq Troas, Paulus mauq sopoq penyerioqan. Dalem penyerioqanne nike Paulus serioq sopoq dengan Makedonia nganjeng léq julune dait ie tunas gati adéq Paulus lumbar ojok Makedonia jari tulung ie pade. Sesampun Paulus mauq penyerioqan nike, tiang pade langsung berejap gen lalo ojok Makedonia. Séngaq siq yakin tiang pade bait kesimpulan bahwe Allah manikang tiang pade ngabarang Kabar Solah nike tipaq dengan-dengan léq derike. Tiang pade bilin Troas dait belayar langsung ojok Samotrake, dait jemaqne ojok Neapolis. Léman derike tiang pade ojok Pilipi, kote saq utame léq bagian Makedonia. Pilipi niki kote perantoan dengan Roma. Léq derike tiang pade ndot cume pire jelo. Léq jelo Sabat tiang pade lumbar ojok sedi kokoq léq luah jebak beléq kote, séngaq tiang pade paran léq derike araq taoq ibadah dengan Yahudi. Terus tiang pade tokol dait ngeraos-ngeraos kance dengan-dengan nine saq bekumpul léq taoq nike. Sopoq dengan léq antare ie pade bedagang lakar lempok lomaq, aranne Lidia, asalne léman Tiatira. Ie ngasihin Allah, make Tuhan bukaq angenne adéq ie nerimaq napi saq Paulus ajahang tipaq ie. Lidia dait selapuq dengan saq araq léq baléne tebaptis. Sesampun tebaptis ie pesilaq tiang pade, ie bebase, “Lamun side pade merase bahwe tiang tetu-tetu sampun percaye léq Deside Isa, silaq mererepan léq balén tiang.” Terus ie tunas gati adéq tiang pade turut keméléqne. Léq sopoq jelo sewaktu tiang pade lumbar ojok taoq bedo'e, tiang pade bedait kance sopoq pelayan nine. Pelayan nine nike tekuasein siq roh jahat saq bau ngeramalang peristiwe-peristiwe saq gen dateng. Siq care ngeramalang nasib dengan, ie ngebéng keuntungan saq beléq umaq majikan-majikanne. Pelayan nine nike terus doang turut Paulus dait tiang pade sambil bekuih-kuih, “Dengan-dengan niki hambe-hambe Allah Saq Maheagung! Ie pade rauh gen nyampéang tipaq semeton senamian berembé entane side pade bau selamet!” Pire jelo ngonéqne dengan nine nike terus doang bekuih maraq nike, Paulus telang kesabaranne, sehingge ie ngéngat terus bebase léq roh nike, “Siq peséngan Deside Isa tiang préntahang side sugul léman dengan nine niki!” Waktu nike éndah roh nike sugul léman dengan nine nike. Sewaktu majikan-majikanne sadar bahwe kesempatan ie pade jari mauq képéng sampun telang, ie pade bau Paulus dait Silas, terus ngoros deduaqne ojok lapangan ngadep penguase Ie pade jauq Paulus dait Silas ojok pejabat-pejabat kote nike, terus bebase, “Dengan-dengan niki dengan Yahudi. Ie pade ngorayang léq kotente. Ie pade nganjurang dengan ngelaksaneang adat kebiasean saq betentangan kance hukum-hukumte, dengan-dengan Roma. Ite ndéq bau terimaq atao turut adat kebiasean nike!” Dengan luwéq éndah milu nyerang Paulus dait Silas; dait pejabat-pejabat kote ngantuq kelambi léman awak kedue rasul nike, terus suruq dengan mecut rasul-rasul nike. Sesampun ie pade tepecut keras-keras, ie pade tetamaq ojok dalem bui. Kepale bui tepréntahang jagaq ie pade pacu-pacu. Lantaran préntah nike, kepale bui nike tahen ie pade léq kamar bui saq paling dalem, dait naén ie pade tebelakbak. Kire-kire léq tengaq kelem, Paulus dait Silas kenyeke bedo'e dait nyanyiang lagu pujian tipaq Allah. Dengan-dengan saq tebui lainne éndah kenyeke dengahang ie pade benyanyi. Selung-selung araq lindur saq beléq gati jangke dasar bangunan bui nike éndah milu inggur. Selapuq lawang bui kebukaq dait ranté-ranté saq tekadu taliq selapuq dengan tahenan bui éndah jari lepas. Kepale bui nike tinjot dait ures. Waktu ie serioq lawang-lawang bui kebukaq, ie serét kléwangne gen matéq diriqne, séngaq ie paran dengan-dengan tahenan bui sampun pelai selapuqne. Laguq Paulus bekuih keras-keras, “Ndaq matéq diriqde! Tiang pade masih araq léq deriki!” Kepale bui nike tunas dilah terus pelai ojok dalem, dait siq ngijikne ie nyungkur léq julu Paulus dait Silas. Beterus ie jauq rasul-rasul nike sugul, dait bebase, “Bapaq-bapaq, napi saq harus tiang laksaneang adéq tiang teselametang?” Paulus dait Silas bejawab, “Percaye léq Junjungan Saq Mulie Deside Isa Almasih! Make side gen selamet -- side dait selapuq dengan saq araq léq balénde!” Terus Paulus dait Silas jelasang manik Tuhan tipaq kepale bui nike dait tipaq selapuq dengan saq araq léq baléne. Léq tengaq kelem nike éndah, kepale bui nike jauq ie pade beterus persiq bakat-bakat ie pade. Make ie dait selapuq dengan léq baléne langsung tebaptis. Beterus ie jauq Paulus dait Silas ojok baléne, dait ngaturin ie pade medaran. Ie dait selapuq keluargene seneng gati, séngaq mangkin ie pade percaye tipaq Allah. Jemaq kelémaqne, pejabat-pejabat kote nike ngutus petugas ojok bui jari nyampéang préntah adéq Paulus dait Silas telepas. Kepale bui nike nyampéang hal nike léq Paulus, ie bebase, “Bapaq-bapaq, pejabat-pejabat kote niki sampun nyugulang préntah jari bébasang side pade. Mangkin Bapaq-bapaq kanggo uléq. Silaq lumbar dalem damé!” Laguq Paulus bebase léq petugas nike, “Tiang pade warge negare Roma. Ndéqman teadilin tiang pade sampun tepecut léq julu dengan luwéq dait tetamaq ojok dalem bui. Dait mangkin ie pade suruq tiang pade lalo tedoq-tedoq? Tiang pade ndéq mélé! Suruq pejabat-pejabat kote nike dateng ojok deriki jari bébasang tiang pade.” Petugas-petugas nike ngelaporang hal nike tipaq pejabat-pejabat kote nike. Waktu ie pade dengah bahwe Paulus dait Silas warge negare Roma, ie pade jari takut. Terus ie pade lumbar tunas maap léq Paulus dait Silas, beterus ngatong deduaqne sugul léman bui, dait tunas adéq ie pade bilin kote nike. Paulus dait Silas bilin bui nike terus lumbar ojok balé Lidia. Sesampun bedait kance dengan-dengan percaye saq araq léq derike, dait ngebéng semanget léq ie pade, Paulus dait Silas berangkat. Paulus dait Silas ngelanjutang kelampanne langan Ampipolis, dait Apolonia, terus dateng léq Tesalonika. Léq derike araq balé ibadah dengan Yahudi. Make Paulus éndah lumbar ojok balé ibadah nike -- maraq saq biase ie laksaneang -- terus ie pade saling tukah pendapet kance dengan-dengan léq derike mengenai ayat-ayat Kitab Suci. Ie laksaneang nike telu jelo Sabat beturut-turut. Siq dasar ayat-ayat Kitab Suci ie jelasang dait buktiang bahwe Almasih saq tejanjiqang siq Allah harus menderite dait teidupang malik léman ninggal. Basen Paulus, “Deside Isa saq tiang beriteang tipaq side nike, Almasih saq tejanjiqang.” Araq pire dengan jari percaye, terus turut Paulus dait Silas, maraq nike éndah luwéq dengan bangse-bangse lain saq takut léq Allah, dait luwéq malik dengan-dengan nine saq tehormatin. Laguq dengan-dengan Yahudi talon até. Ie pade ngempoh dengan-dengan jahat saq begerame léq peken, terus ie pade ngorayang léq selapuq kote nike dait nyerbu balé sopoq dengan percaye aranne Yason, jari boyaq Paulus dait Silas, séngaq ie pade mélé jauq Paulus dait Silas sugul ngadep dengan luwéq. Laguq sewaktu ie pade ndéq ndait Paulus dait Silas, ie pade ngoros Yason dait pire dengan percaye lainne ojok arepan pejabat-pejabat kote nike. Ie pade bekuih, “Dengan-dengan niki ngorayang léq mbé-mbé! Mangkin kotente éndah tedatengin siq ie pade, dait Yason sampun nerimaq ie pade léq baléne. Ie pade ngelanggar aturan-aturan Kaisar Roma, séngaq ie pade bebase bahwe araq malik raje lain saq bepeséngan Deside Isa.” Siq ucapan-ucapanne nike, ie pade miaq dengan luwéq dait pare pejabat kote nike jari osah. Laguq sesampun ie pade mauq jaminan léman Yason dait léman semeton-semeton seiman lainne, make ie pade telepas. Léq kelem nike dengan-dengan percaye léq kote nike, suruq Paulus dait Silas ojok Berea. Sesampun dateng léq derike, Paulus dait Silas lumbar ojok balé ibadah Yahudi. Dengan-dengan léq Berea solahan aténe tebanding dengan-dengan léq Tesalonika. Seneng gati angen ie pade dengahang berite mengenai Deside Isa, dait sebilang jelo ie pade berajah Kitab Suci adéqne nenaoq napi pengajahan Paulus nike kenaq atao ndéq. Luwéq léq antare ie pade saq percaye léq Deside Isa, dait ndéqne sekediq éndah dengan-dengan Yunani saq tehormatin saq percaye; nine atao mame. Waktu dengan-dengan Yahudi léq Tesalonika dengah bahwe Paulus nyampéang éndah Manik Allah léq Berea, ie pade dateng éndah ojok Berea ngasut dengan-dengan léq derike dait miaq ie pade osah. Becat-becat semeton-semeton léq Berea nike ngatong Paulus ojok pesisi, laguq Silas dait Timotius tetep ndot léq kote nike. Sesampun ie pade ngatong Paulus jangke dateng Atena, semeton-semeton nike tulak ojok Berea dait jauq pesen léman Paulus adéq Silas dait Timotius becat-becat boyaq ie. Sewaktu Paulus kenyeke ngantih Silas dait Timotius léq Atena, aséq gati angenne serioq kote nike penoq siq berhale-berhale. Keranaq nike léq balé ibadah, Paulus saling tukah pendapet kance dengan-dengan Yahudi dait dengan-dengan lain saq nyembah Allah léq derike. Maraq nike éndah léq peken-peken, sebilang jelo ie saling tukah pendapet kance sebilang dengan saq araq léq derike. Guru-guru léman aliran Epikuros dait aliran Stoa bedebat éndah kance ie. Pire dengan léman ie pade bebase, “Napi saq mélé teraosang siq dengan niki? Penenaoqne cume sekediq, laguq ie luwéq raos!” Dengan-dengan saq lain bebase, “Ruene ie beriteang mengenai déwe-déwe bangse lain.” Ie pade bebase maraq nike, lantaran Paulus bebaos mengenai Deside Isa dait mengenai idup malik sesampun ninggal. Terus ie pade jauq Paulus ngadep sidang Areopagus. Léq derike ie pade beketuan tipaq Paulus, “Tiang pade melét nenaoq pengajahan baru saq side beriteang nike. Séngaq side nyampéang hal-hal saq lain gati kedengahanne léq kentok tiang pade. Keranaq nike tiang pade melét nenaoq artine.” ( Séngaq selapuq dengan Atena dait dengan-dengan pendateng saq ndot léq derike seneng gati kadu sise waktune jari dengahang dait ngeraosang berite-berite saq paling baru.) Sewaktu Paulus nganjeng léq julu dengan-dengan saq bekumpul léq Areopagus nike, Paulus bebase, “Hai dengan-dengan Atena! Tiang serioq bahwe dalem selapuq hal side taat beribadah tipaq déwe-déwe. Séngaq waktu tiang lampaq-lampaq léq sekiter kotende, sambil merhatiang taoq-taoqde sembahyang, tiang serioq éndah sopoq méje taoq kurban; léq derike araq tetulis, ‘Tipaq Allah Saq Nénten Tekenal’. Allah saq side pade sembah laguq ndéq side pade kenal nike, Ie saq tiang beriteang tipaq side pade. Allah saq cipteang dunie niki dait selapuq isine, Ie Tuhan penguase langit dait gumi. Ie nénten meneng léq dalem balé-balé déwe saq tepiaq siq manusie. Ie éndah nénten merluang bantuan manusie, séngaq Ie saq ngicanin idup dait embok dait selapuqne tipaq manusie. Léman sopoq manusie Ie jariang selapuq bangse dait mréntahang ie pade ndot léq seantéro gumi. Ie éndah saq nentuang léman penembéqne, piran dait léq mbé ie pade kanggo idup. Allah ngelaksaneang nike adéq ie pade boyaq Ie. Mudah-mudahan ie pade bedait kance Allah léq waktu ie pade boyaq Ie. Laguq setetune Allah nénten jaoq léman ite sopoq-sopoq. Maraq saq ite dengah léman dengan, ‘Ite idup dait bau ngeruit dait araq léq gumi niki lantaran kuase Allah.’ Pade éndah kance napi saq teucapang siq penyair-penyairde. Basen ie pade, ‘Ite niki bangse saq tejariang siq Allah éndah.’ Séngaq ite niki bangse saq tejariang siq Allah, ite ndéq kanggo nganggep Allah pade maraq tetato saq tepiaq léman emas atao perak atao batu saq tepiaq menurut kepinteran manusie. Selapuq perbuatante saq bodo nike sampun telupaqang siq Allah, laguq mangkin Allah mréntahang selapuq dengan léq seantéro dunie betobat léman dose-dose ie pade. Séngaq Allah sampun nentuang sopoq waktu jari ngadilin seantéro dunie secare adil. Tugas nike gen telaksaneang siq sopoq dengan saq sampun tetentuang siq Allah léq hal nike. Dait adéq selapuq dengan yakin léq hal nike, Allah sampun ngidupang malik dengan nike léman ninggal!” Waktu dengan-dengan nike dengah mengenai idup malik sesampun ninggal, araq léman ie pade saq keleléqang Paulus. Araq éndah saq bebase, “Tiang pade melét dengah side bebaos malik mengenai hal niki léq waktu saq lain.” Beterus Paulus bilin ie pade. Laguq araq léq antare ie pade saq bepihak léq Paulus dait percaye léq Deside Isa, léq antarene: Dionisius, anggote majelis Areopagus dait sopoq dengan nine aranne Damaris, dait araq pire dengan malik. Sesampun nike Paulus bilin Atena dait lumbar ojok Korintus. Léq derike ie bedait kance sopoq dengan Yahudi aranne Akwila, asalne léman negeri Pontus. Akwila baruq gati dateng léman Italia kance seninene aranne Priskila. Ie pade dateng ojok Korintus séngaq Kaisar Klaudius sampun mréntahang selapuq dengan Yahudi sugul léman Roma. Paulus lumbar jangoq ie pade, terus ndot léq derike kance ie pade, dait begawéan bareng-bareng kance ie pade, séngaq pegawéanne pade maraq Paulus, tukang miaq kémah. Laguq léq sebilang jelo Sabat, Paulus bebaos-baos léq balé ibadah, jari ngeyakinang dengan-dengan Yahudi dait dengan bangse-bangse lain. Sesampun Silas dait Timotius dateng léman Makedonia, Paulus kadu selapuq waktune jari beriteang Manik Allah dait ngebéng kesaksian tipaq dengan-dengan Yahudi bahwe Deside Isa nike Almasih saq tejanjiqang siq Allah. Laguq lantaran dengan-dengan terus doang nentang dait ngewade ie, make Paulus ngerapang kerepuk léman kelambine jari ngebéng peringetan tipaq kesalaqan ie pade. Basen Paulus, “Side mésaq saq nanggung kesalaqande. Tiang ndéq salaq, tiang bersi! Mulai mangkin tiang gen lalo ojok dengan bangse-bangse lain.” Paulus bilin ie pade, terus lumbar ojok balé Titius Yustus, dengan saq ndéq Yahudi, laguq ie nyembah Allah. Baléne bedékétan kance balé ibadah. Laguq Krispus, kepale balé ibadah nike kance selapuq keluargene percaye léq Junjungan Saq Mulie Deside Isa. Dait luwéq éndah dengan-dengan Korintus lainne dengah berite saq tesampéang siq Paulus, dait ie pade percaye léq Deside Isa terus tebaptis. Léq sopoq kelem, Tuhan bemanik tipaq Paulus léq dalem sopoq penyerioqan, manik-Ne, “Ndaq takut! Beriteang terus Manik Allah, dait ndaq tedoq. Séngaq Tiang araq bareng side. Ndéq araq sopoq dengan juaq saq bau ngelaksaneang saq jahat tipaq side, séngaq luwéq umat Tiang léq kote niki.” Keranaq nike Paulus ndot léq Korintus setaun setenge ngonéqne, dait ngajahang Manik Allah tipaq ie pade. Sewaktu Galio jari gubernur Akaya, dengan-dengan Yahudi besopoq nentang Paulus dait jauq ie ojok pengadilan. Basen ie pade, “Dengan niki ngebéng pengaruh léq dengan luwéq adéq nyembah Allah siq care saq betentangan kance hukum Taurat!” Sewaktu Paulus mélé bejawab, Galio sampun bebase tipaq dengan-dengan Yahudi, “Hai dengan-dengan Yahudi! Lamun saq telaporang niki masalah pelanggaran atao kejahatan, mule sepatutne tiang sabar dengahang laporande niki. Laguq niki pegejuhan mengenai ucapan-ucapan dait aran-aran dait éndah hukum-hukumde mésaq! Jari side pade saq harus nyeleséang ie. Tiang ndéq mélé ngadilin hal-hal saq maraq niki!” Terus Galio tundung ie pade sugul. Make ie pade bau Sostenes, kepale balé ibadah nike, dait ngempuk ie léq julu méje pengadilan. Laguq Galio tetu-tetu ndéq peduli léq hal nike. Sesampun nike Paulus masih ngonéq ndot léq Korintus. Beterus ie bepamit léq dengan-dengan percaye léq derike, terus belayar kance Priskila dait Akwila ojok Siria. Léq Kengkrea, Paulus peleng bulune saq tealurang bélo lantaran nazarne tipaq Tuhan. Sesampun dateng léq Epesus, Paulus bilin Priskila dait Akwila, terus tame ojok balé ibadah dait saling tukah pendapet kance dengan-dengan Yahudi léq derike. Ie pade tunas adéq Paulus mélé ngonéqan ndot kance ie pade, laguq ie ndéq mélé. Timaq maraq nike, léq waktu gen berangkat, Paulus bebase, “Lamun Allah ngijinang, tiang gen tulak malik ojok deriki.” Sesampun bebase maraq nike, ie berangkat léman Epesus. Sesampun turun léq Kaisarea, ie lumbar ojok Yerusalem jari ngucapang salam tipaq jemaah léq derike, terus berangkat ojok Antiokia. Sesampun ndot léq derike pire jelo ngonéqne, ie berangkat malik ojok daérah Galatia dait Prigia jari neguqang iman selapuq dengan percaye. Léq waktu nike, araq sopoq dengan Yahudi kelahiran Aleksandria dateng ojok Epesus, aranne Apolos. Ie ceket ngeraos dait paham gati mengenai isi Kitab Suci, dait sampun tedidik jari nerimaq pengajahan mengenai Tuhan. Make ie semanget gati ngajahang mengenai Deside Isa secare teliti, timaq baruq baptisan Yahya doang saq ie taoq. Ie mulai bani ngajahang léq balé ibadah, dait léq waktu Priskila dait Akwila dengah pengajahanne, ie pade jauq ie ojok balé. Terus léq derike ie tejelasang malik secare teliti mengenai karye Allah. Beterus Apolos beniat lumbar ojok Akaya. Make dengan-dengan saq percaye tipaq Deside Isa léq Epesus, nulis surat tipaq semeton-semeton saq percaye léq Akaya adéq ie pade nerimaq Apolos. Dait sewaktu Apolos dateng léq Akaya, ternyate bantuanne bemanpaat gati umaq dengan-dengan saq lantaran rahmat Allah sampun percaye léq Deside Isa. Séngaq siq bukti-bukti saq kuat ie kalahang dengan-dengan Yahudi waktu ie pade bedebat léq julun dengan luwéq. Dait ie buktiang kadu ayat-ayat saq araq léq Kitab Suci bahwe Deside Isa nike Almasih. Sewaktu Apolos masih léq Korintus, Paulus kenyeke jelajahin daérah-daérah pedaleman terus dateng léq Epesus. Léq derike ie bedait kance pire dengan saq sampun percaye léq Deside Isa. Paulus beketuan léq ie pade, “Napi side pade sampun nerimaq Roh Suci waktu side pade percaye léq Deside Isa?” Ie pade bejawab, “Ndéqman, malahan tiang pade ndéqman dengah araq Roh Suci.” Paulus beketuan, “Lamun maraq nike, kadu baptisan napi side pade tebaptis?” “Kadu baptisan Yahya,” Jawab ie pade. Terus Paulus bebase, “Yahya baptis dengan jari nyatayang bahwe dengan-dengan nike sampun tobat léman dose-dosene. Laguq léq waktu nike éndah Yahya bebase léq dengan-dengan Israel bahwe, ie pade harus percaye léq Dengan saq gen rauh sesampun Yahya, nike Deside Isa.” Sesampun ie pade dengah hal nike, ie pade tebaptis léq dalem peséngan Junjungan Saq Mulie Deside Isa. Dait léq waktu Paulus noloq imene léq atas ie pade, Roh Suci turun léq ie pade, terus ie pade mulai ngeraos kadu base lain dait benubuat. Selapuqne nike kire-kire araq due olas dengan luwéqne. Telu bulan ngonéqne Paulus terus bani bebaos tipaq dengan-dengan léq balé ibadah dait bedebat kance ie pade mengenai Kerajaan Allah. Laguq pire dengan léq antare dengan-dengan nike pagah dait ie pade ndéq mélé percaye. Léq julu selapuq dengan saq bekumpul léq derike, ie pade ngewade pengajahan mengenai Tuhan nike. Keranaq nike Paulus bilin ie pade, terus lumbar kance pengiring-pengiringne ojok sekolah Tiranus. Léq derike sebilang jelo ie besoal jawab kance dengan-dengan. Paulus tetep ngelaksaneang hal nike due taun ngonéqne, jangke selapuq dengan saq ndot léq wilayah Asia, timaq dengan Yahudi atao dengan Yunani, selapuqne dengah Manik Tuhan. Allah miaq keajaipan-keajaipan saq luar biase langan Paulus. Malahan araq dengan saq jauq saputangan atao kéréng saq sampun tekadu siq Paulus ojok dengan-dengan sakit, make penyakit ie pade telang dait roh jahat éndah sugul léman ie pade. Pire dengan belian Yahudi lumbar ojok mbé-mbé, nyugulang roh jahat léman dengan-dengan. Ie pade éndah cobaq kadu peséngan Junjungan Saq Mulie Deside Isa jari nyugulang roh-roh jahat nike. Basen ie pade léq roh-roh jahat nike, “Léq dalem peséngan Deside Isa saq teberiteang siq Paulus, tiang préntahang side sugul!” Araq sopoq imam kepale, aranne Skewa, bedowé pituq bije mame, ie pade saq ngelaksaneang hal saq maraq nike. Laguq roh jahat nike ngeraos léq ie pade, “Tiang kenal Deside Isa dait Paulus éndah tiang kenal, laguq side niki sai?” Terus dengan saq tekuasein siq roh jahat nike nyelontak dait gemes gati entan ie cakrah bije-bije Skewa nike jangke bakat dait ie pade pelai léman balé nike belondan séngaq kelambine soék. Selapuq dengan Yahudi dait dengan bangse-bangse lain saq ndot léq Epesus dengah peristiwe nike, terus ie pade jari takut. Make peséngan Junjungan Saq Mulie Deside Isa sayan kesohor. Luwéq dengan saq sampun jari percaye léq Deside Isa, dateng ngakuq léq julun dengan luwéq selapuq perbuatan-perbuatan ie pade. Dait ie pade saq biase kadu ilmu-ilmu séhér, ngumpulang buku-buku ie pade terus sedutne léq julu dengan luwéq. Aji buku-buku nike lamun terékéng selapuqne, araq kire-kire séket iyu képéng perak. Make, siq care saq hébat nike manik Tuhan sayan nyebar dait sayan kuat pengaruhne. Sesampun peristiwe-peristiwe nike, Paulus beniat lumbar ojok Makedonia dait Akaya terus ojok Yerusalem. Basen Paulus, “Sesampun ojok derike, tiang harus lalo ojok Roma éndah.” Jari ie ngutus due pembantune, Timotius dait Erastus jari lumbar ojok Makedonia, laguq Paulus mésaq masih ndot pire waktu ngonéqne léq Asia. Kire-kire léq waktu nike éndah araq keributan beléq léq Epesus lantaran pengajahan mengenai Langan saq tepetitoqang siq Junjungan Saq Mulie nike. Séngaq léq kote nike araq sopoq dengan tukang pandé perak aranne Demetrius saq piaqang Dewi Artemis balé-baléan léman perak. Usahe dengan nike bau datengang hasil saq beléq léq buruh-buruhne. Keranaq nike ie ngumpulang buruh-buruhne bareng kance buruh-buruh tukang pandé perak saq lainne, terus bebase, “Semeton senamian! Side pade nenaoq bahwe ite mauq pengasilan léman pegawéan niki. Mangkin side pade sampun serioq dait dengah mésaq napi saq telaksaneang siq Paulus nike. Ie bebase bahwe déwe-déwe saq tepiaq siq manusie nike ndéqne déwe. Dait ie sampun nyesatang luwéq dengan, ndéqne cume léq deriki, léq Epesus, laguq gen jangke dateng selapuq wilayah Asia. Bahayene bahwe usahente niki gen lengé aranne. Dait ndéqne nike doang, malahan gedéng Déwi Artemis éndah teréméhang dait kemulieanne teicaq-icaq; padahal ie déwi saq tesembah siq selapuq dengan léq Asia dait léq seantéro dunie!” Sesampun ie pade dengah hal nike, angen ie pade jari panas, terus ie pade nyurak-nyurak, “Idup Artemis, déwi dengan Epesus!” Make keributan nike sayan beléq jangke dateng selapuq kote. Beterus perusuh-perusuh bau Gayus dait Aristarkus, ie dengan-dengan Makedonia saq ngiring Paulus léq dalem kelampanne, terus ie pade teoros ojok gedung kesenian nike. Paulus mélé tame turut ie pade, laguq dengan-dengan saq percaye léq Deside Isa balaq ie. Araq pembeléq-pembeléq propinsi Asia nike, saq besahabat kance Paulus, suruq dengan bebadaq léq Paulus adéq ie ndaq tame léq gedung kesenian nike. Léq waktu nike dengan-dengan saq bekumpul léq gedung nike sampun jari biur lantur. Araq saq nyurak maraq niki, araq éndah saq nyurak maraq nike, séngaq luwéqan léq antare ie pade saq ndéq nenaoq kembéq ie pade bekumpul léq derike. Terus sopoq dengan aranne Aleksander tejelek ojok julu siq dengan-dengan Yahudi. Ie mauq keterangan léman dengan luwéq mengenai napi saq telaksane. Make Aleksander ngebéng tande kadu imene adéqne tebéng kesempatan jari béle diriqne léq julun dengan-dengan nike. Laguq sewaktu ie pade serioq bahwe ie dengan Yahudi, bareng-bareng ie pade nyurak keras-keras, “Idup Artemis! Déwi dengan Epesus!” Ahirne jurutulis kote berhasil piaq tenang dengan luwéq nike. Ie bebase, “Penduduk Epesus! Sebilang dengan nenaoq bahwe Epesus nike kote saq meliharaq gedéng Déwi Artemis dait tetatone saq turun léman langit. Ndéq araq sopoq dengan juaq saq bau nentang hal nike. Keranaq nike side pade tenang, dait ndaq gupuh-gupuh gawéq napi-napi. Side pade jauq dengan-dengan nike ojok deriki ndéqne lantaran ie pade sampun ngerampok gedéng déwe atao lantaran ie pade sampun menghine déwinte. Lamun Demetrius kance buruh-buruhne nike araq bedowé sopoq pengaduan tipaq dengan, alurang ie pade jauq pelekare nike ojok pengadilan. Pengadilan bau nerimaq hal nike dait pejabat-pejabat pemréntah éndah tetep araq. Laguq lamun masih araq malik pelekare saq lain saq side pade melétang, nike harus teseleséang léq dalem rapat umum saq sah. Séngaq napi saq telaksane jelo niki bau bahayeang ite. Ite bau tetuduh miaq keributan, séngaq ite ndéq bedowé sopoq alasan saq kenaq léq keributan niki.” Sesampun jelasang selapuq hal nike, jurutulis kote nike suruq dengan luwéq nike uléq. Sesampun keadaan léq Epesus tentrem malik, Paulus ngumpulang jemaah dait neguqang angen ie pade. Terus Paulus bepamit léq dengan-dengan nike, dait ngelanjutang kelampanne ojok Makedonia. Paulus datengin daérah-daérah Makedonia, dait luwéq ngebéng naséhat léq dengan-dengan saq percaye léq Deside Isa dait ngebéng ie pade semanget. Beterus ie lumbar ojok Yunani. Telu bulan ngonéqne ie ndot léq derike. Sewaktu ie kenyeke berejap gen belayar ojok Siria, araq berite bahwe dengan-dengan Yahudi kenyeke mupakat gen nyematéq ie. Keranaq nike ie mutusang gen tulak langan Makedonia. Sopater bije Pirus saq asalne léman Berea lumbar bareng kance ie; maraq nike éndah Aristarkus dait Sekundus dengan léman Tesalonika, dait Gayus dengan Derbe, Timotius, Tikikus dait Tropimus, dengan-dengan léman propinsi Asia. Ie pade lumbar bejulu ngantih léq Troas. Sesampun Perayaan Ruti Ndéq Beragi, tiang pade belayar bilin Pilipi. Sesampun lime jelo, tiang pade bekumpul malik kance ie pade léq Troas. Léq derike tiang pade ndot pituq jelo ngonéqne. Léq jelo penembéq dalem minggu nike, sewaktu tiang pade bekumpul jari bareng-bareng bekelor, Paulus bebaos kance semeton-semeton seiman léq derike, séngaq ie beniat gen berangkat léq jemaqne. Léq kamar atas taoq tiang pade bekumpul nike araq luwéq dilah saq nyale. Sopoq terune aranne Eutikus tokol léq jendéle. Séngaq Paulus ngonéq gati bebaos, terune nike jari ngantok gati jangke ie ketindoqan léq jendéle nike, terus ie geriq léman tingket saq ketelu. Waktu ie teangkat siq dengan-dengan, terune nike sampun milinang. Laguq Paulus turun ojok bawaq, terus rebaqang diriqne léq atas terune nike dait kapongne. Basen Paulus, “Ndaq kuatir, ie masih idup!” Beterus Paulus taék malik ojok atas, dait bagi-bagiang ruti, terus ie pade bekelor bareng-bareng. Sesampun inggas bekelor, Paulus bebaos malik kance dengan-dengan nike jangke dateng subuh. Beterus Paulus berangkat. Dengan-dengan jauq uléq terune saq sampun idup nike ojok baléne. Ie pade merase seneng dait tehibur. Tiang pade juluan lumbar ojok kapal, terus belayar ojok Asos jari bait Paulus léq derike sesuai kance pesen léman ie, séngaq ie mélé lumbar ojok derike langan darat. Sesampun bedait léq Asos, Paulus taék ojok kapal terus tiang pade belayar ojok Metilene. Léman derike tiang pade belayar malik, dait jemaqne dateng léq taoq saq berandangan kance pulao Kios. Jemaqne tiang pade dateng léq Samos, dait karing sejelo malik dateng léq Miletus. Paulus sampun mutusang ndéqne nyelaloq léq Epesus, adéqne ndéq sie-sieang waktu léq daérah Asia. Lamun iniq Paulus mélé becat-becat dateng léq Yerusalem léq Hari Raye Pentakosta. Léman Miletus Paulus ngirim berite ojok Epesus jari tunas pare pemimpin jemaah léq derike dateng bedait kance ie. Sesampun ie pade dateng, Paulus bebase léq ie pade, “Semeton-semeton sampun nenaoq berembé tiang idup sengonéq niki léq antare side pade léman jelo penembéq tiang dateng léq Asia. Siq kerendahan até dait sedih gati, tiang ngelayanin Tuhan léq tengaq-tengaq penderitean saq tiang alamin lantaran rencane jahat dengan-dengan Yahudi saq mélé nyematéq tiang. Side pade sampun nenaoq bahwe tiang secare terus-terang nyampéang léq side pade napi saq bemanpaat umaq side pade. Tiang ngajah side pade léq taoq-taoq dengan luwéq dait léq balé-balé. Tipaq bangse-bangse Yahudi dait dengan bangse-bangse lain, selapuqne tiang peringet adéq ie pade tobat léman dose-dosene dait parek ojok Allah, serte beriman léq Junjungante Saq Mulie Deside Isa. Mangkin jari taat léq préntah Roh Suci, tiang lalo ojok Yerusalem. Dait tiang ndéq ngerti napi saq gen nimpe tiang léq derike. Tiang cume nenaoq bahwe léq sebilang kote, Roh Suci sampun secare teges nyampéang léq tiang, bahwe tiang gen tame bui dait gen menderite. Laguq tiang ndéq peduli léq idup tiang niki, asal tiang bau nutuqang tugas saq tepercayeang siq Junjungan Saq Mulie Deside Isa tipaq tiang dait asal tiang tetep setie jangke penutuq idup tiang jari beriteang Kabar Solah mengenai rahmat Allah nike. Dait mangkin tiang nenaoq, side selapuq saq sampun tiang datengin jari nyampéang berite mengenai Kerajaan Allah, ndéq gen bedait kance tiang malik. Keranaq nike mangkin secare teges tiang sampéang tipaq side pade bahwe lamun araq léq antare side pade saq binase éraq, nike ndéqne salaq tiang. Tiang ndéq uwah bilin tugas tiang jari jelasang selapuq rencane Allah tipaq side pade. Side pade harus jagaq diriqde dait jagaq éndah selapuq jemaah saq sampun tepercayeang léq side pade siq Roh Suci jari tejagaq; séngaq side pade sampun teangkat jari pengawas jemaah nike. Side pade harus jagaq jemaah Allah nike maraq pengarat jagaq dombe-dombene, séngaq Allah sampun jariang jemaah nike jari dowé-Ne siq daraq Bije-Ne mésaq. Sesampun tiang bilin, pasti gen dateng serigale-serigale saq galak ojok tengaq-tengaq side pade. Dait dengan-dengan saq side pade jagaq nike gen jari mangse serigale-serigale nike. Malahan léq antare side mésaq éndah gen araq dengan-dengan saq gen nyampéang berite saq ndéq kenaq. Hal nike ie pade laksaneang adéq dengan-dengan saq sampun percaye léq Deside Isa jari sesat dait turut ie pade. Keranaq nike, side pade bejage-jage! Inget bahwe telu taun ngonéqne, siq luwéq nyugulang aiq mate, peteng menah, tiang ndéq engkah-engkahne ngajah sebilang dengan léman side pade. Mangkin tiang serahang side pade ojok Tuhan dait tipaq berite rahmat-Ne saq bekuase neguqang side pade dait ngicanin side pade paice jari warisan saq tetentuang umaq selapuq dengan saq sampun Ie suciang. Tiang ndéq uwah harepang emas, perak atao kelambi léman sai juaq. Side mésaq nenaoq bahwe siq ime tiang mésaq tiang begawéan jari keperluan tiang mésaq dait batur-batur saq milu kance tiang. Léq dalem selapuq hal tiang sampun ngebéng teladan tipaq side bahwe siq begawéan pacu-pacu maraq niki, ite harus tulung dengan-dengan saq lemah. Séngaq ite harus inget léq napi saq sampun temanikang Junjungan Saq Mulie Deside Isa, ‘Bahagiean ite ngebéng ketimbang nerimaq.’ ” Sesampun bebase maraq niki, Paulus bareng dengan-dengan nike sujut bedo'e. Ie pade selapuq nangis sambil ngapong ie dait siduk ie. Ie pade sedih terutame lantaran Paulus bebase bahwe ie pade ndéq gen serioq ie malik. Terus ie pade ngatong Paulus jangke dateng kapal. Tiang pade tunas pamit léq pemimpin-pemimpin jemaah léman Epesus nike, terus bilin ie pade. Terus tiang pade belayar langsung ojok pulao Kos; dait jemaqne tiang pade dateng léq pulao Rodos. Léman derike tiang pade belayar ojok pelabuan Patara. Léq Patara tiang pade ndait kapal saq gen ojok Penisia. Jari tiang pade taék léq kapal nike terus berangkat dait tiang pade belayar jangke tiang pade serioq pulao Siprus léq sedi kiri, laguq tiang pade terus belayar ojok Siria. Tiang pade belabuh léq Tirus, séngaq léq derike kapal taoq tiang pade numpang gen nurunang muatanne. Léq taoq nike tiang pade lalo jangoq dengan-dengan saq percaye léq Deside Isa, terus ndot bareng kance ie pade pituq jelo ngonéqne. Langan petunjuk léman Roh Allah, dengan-dengan nike ngebéng naséhat tipaq Paulus adéqne ndaq lumbar ojok Yerusalem. Laguq sesampun waktune tiang pade harus berangkat, tiang pade bilin ie pade, terus ngelanjutang kelampan tiang pade léman derike. Ie pade selapuq lantong anak kance seninene ngatong tiang pade jangke dateng luah kote. Léq sedin pesisi, tiang pade selapuq sujut bedo'e. Sesampun nike tiang pade besalam-salaman, terus tiang pade taék ojok kapal, dait ie pade uléq ojok baléne. Tiang pade belayar terus léman Tirus jangke dateng Ptolemais. Léq derike tiang pade lalo jangoq semeton-semeton saq percaye léq Deside Isa jari ngucapang salam tipaq ie pade, terus ndot sejelo bareng ie pade. Léq jemaqne tiang pade berangkat malik, terus dateng léq Kaisarea. Léq derike tiang pade lalo ojok balén Pilipus dengan saq beriteang Kabar Solah nike, ie salaq sopoq léman pituq dengan saq tepiléq léq Yerusalem, dait tiang pade ndot léq baléne. Empat bijene saq dedare sampun nerimaq paice jari benubuat. Sesampun pire ngonéqne tiang pade araq léq derike, araq sopoq nabi rauh léman Yudea, aranne Agabus. Nabi nike rauh tipaq tiang pade, terus bait sabuk Paulus. Kadu sabuk nike ie taliq ime naéne mésaq, terus bebase, “Niki saq temanikang siq Roh Suci: Dengan saq ngépé sabuk niki gen tetaliq maraq niki léq Yerusalem siq dengan-dengan Yahudi, dait teserahang ojok dengan bangse-bangse lain.” Waktu tiang pade dengah hal nike, tiang pade dait selapuq semeton saq ndot léq Kaisarea nike sanget siqne tunas léq Paulus adéq ie ndaq lumbar ojok Yerusalem. Laguq jawab Paulus, “Napi manpaatne side pade nangis maraq niki jangke piaq angen tiang susah? Tiang sampun siep, ndéqne cume jari tebau léq derike, laguq éndah maté lantaran Junjungan Saq Mulie Deside Isa.” Paulus ndéq mélé dengah tiang pade, jari tiang pade engkah balaq ie, “Menengang, pekayunan Tuhan doang saq telaksane.” Sesampun tiang pade ndot léq derike pire jelo ngonéqne, tiang pade barang-barang, terus berangkat ojok Yerusalem. Pire semeton léman Kaisarea milu éndah kance tiang pade jari ngatong tiang pade ojok balén Manason, séngaq tiang pade gen madéq léq baléne. (Manason nike dengan Siprus saq sampun ngonéq jari pengiring Deside Isa.) Sewaktu tiang pade dateng léq Yerusalem, semeton-semeton léq derike cemoh gati angenne nyambut tiang pade. Léq jemaqne Paulus lumbar bareng kance tiang pade jangoq Yakub; selapuq pemimpin-pemimpin jemaah araq éndah léq derike. Sesampun tiang pade ngucapang salam tipaq ie pade, Paulus nyeriteang léq ie pade selapuq saq sampun telaksaneang siq Allah langan ie léq antare dengan bangse-bangse lain. Sesampun dengah cerite Paulus nike, ie pade selapuq mulieang Allah. Beterus bebase léq Paulus, “Semeton tiang Paulus, side harus nenaoq bahwe sampun beiyu-iyu dengan Yahudi saq percaye léq Deside Isa. Selapuqne nike dengan-dengan saq setie dait taat léq Hukum Taurat. Dait mangkin ie pade dengah bahwe side ngajah selapuq dengan Yahudi saq ndot léq antare dengan bangse-bangse lain adéqne ngelepas hukum Musa. Side ajah ie pade adéq ndaq sunat bije-bijene atao turut adat istiadat Yahudi. Mangkin dengan-dengan Yahudi saq sampun percaye nike pasti gen dengah bahwe side sampun araq léq deriki. Jari berembé mangkin? Solahan side turut naséhat tiang pade. Araq empat dengan léq deriki saq sampun benazar tipaq Tuhan. Nah, silaq side lumbar ngaraqang upacare penyucian diriq bareng kance ie pade, dait side saq nanggung selapuq biayene, adéq ie pade bau peleng bulune. Siq care nike gen nyate tipaq selapuq dengan bahwe napi saq sampun ie pade dengah mengenai side ndéqne tetu, séngaq side mésaq ngelaksaneang Hukum Taurat. Laguq mengenai dengan bangse-bangse lain, saq sampun percaye léq Deside Isa, tiang pade sampun ngirim surat léq ie pade mengenai keputusan tiang pade, bahwe ie pade ndéq kanggo ngelorang keloran saq sampun teaturang tipaq berhale, ndaq kelorang daraq, ndaq kelorang binatang saq maté tepekok; dait ndaq gawéq perbuatan-perbuatan saq cabul.” Sesampun nike Paulus lumbar kance dengan-dengan saq empat nike, terus ngaraqang upacare penyucian diriq bareng kance ie pade. Beterus ie pade tame ojok Gedéng Allah jari bebadaq karing pire jelo upacare penyucian nike gen inggas, dait piran kurban umaq ie pade sopoq-sopoq teaturang. Sesampun gen tutuq pituq jelo, araq pire dengan Yahudi léman Asia serioq Paulus léq dalem Gedéng Allah. Terus ie pade hasut dengan luwéq dait bau Paulus sambil nyurak-nyurak, “Hai, dengan-dengan Israel! Tulung! Paulus niki dengan saq lalo ojok mbé-mbé jari ngajahang selapuq dengan pengajahan saq nentang bangse Israel, nentang Hukum Taurat dait nentang Gedéng Allah niki. Dait mangkin malahan ie jauq dengan bangse-bangse lain tame ojok dalem Gedéng Allah dait najisang taoq saq suci niki!” ( Ie pade bebase maraq nike séngaq ie pade serioq Tropimus dengan Epesus nike araq bareng kance Paulus léq kote; dait ie pade paran bahwe Paulus sampun jauq ie ojok dalem Gedéng Allah.) Selapuq kote jari biur lantur, dait selapuq dengan pelai bekerimpun. Ie pade bau Paulus, dait orosne sugul léman Gedéng Allah. Langsung waktu nike éndah lawang Gedéng Allah teimpet. Léq waktu dengan-dengan saq miaq keributan nike berusahe matéq Paulus, araq dengan saq ngelapor ojok kepale pasukan bahwe selapuq kote Yerusalem biur lantur. Langsung kepale pasukan nike jauq pire prewire dait prajurit, terus becat-becat lumbar ojok taoq keributan nike. Waktu dengan luwéq nike serioq kepale pasukan nike dateng bareng pasukanne, ie pade engkah ngempuk Paulus. Kepale pasukan nike ngerapetin Paulus, terus bau ie dait suruq dengan borgol ie. Terus kepale pasukan nike beketuan, sai Paulus nike dait napi saq sampun ie piaq. Separo léman dengan luwéq nike bejawab maraq niki dait separo éndah bejawab maraq nike. Keadaanne ore gade jangke kepale pasukan nike ndéq iniq nenaoq napi setetune saq telaksane. Keranaq nike ie mréntahang adéq Paulus tejauq ojok markas. Waktu ie pade jauq Paulus jangke dateng undak-undak, dengan-dengan saq miaq keributan nike ngamuk sehingge Paulus harus teopong siq prajurit-prajurit nike. Ie pade teturut léman mudi siq dengan-dengan saq miaq keributan sambil nyurak-nyurak, “Matéq ie!” Sewaktu gen tame ojok dalem markas, Paulus bebase léq kepale pasukan nike, “Napi kanggo tiang matur semendaq kance pelungguh?” “Napi side tao base Yunani?” kepale pasukan nike beketuan. “Lamun maraq nike side niki ndéqne dengan Mesir saq piranan ngaraqang pemberontakan dait jauq pelai empat iyu pengaco saq kadu gegaman tame ojok padang gurun?” Jawab Paulus, “Tiang dengan Yahudi, warge kote Tarsus, kote saq penting léq Kilikia. Tulung ijinang tiang ngeraos kance dengan-dengan nike.” Jari sesampun tebéng ijin, Paulus nganjeng léq undak-undak, terus ngebéng tande kadu imene. Selapuq dengan jari tenang, beterus Paulus ngeraos kance dengan-dengan nike kadu base Ibrani. Basen Paulus, “Bapaq-bapaq dait semeton-semeton senamian! Tiang gen ngajuang pembélean tiang tipaq side pade. Silaq dengahang!” Waktu dengan-dengan nike dengah Paulus mulai bebaos kadu base Ibrani, ie pade jari sayan tenang malik. Make Paulus ngelanjutang keteranganne. “Tiang dengan Yahudi, Tiang tebijeang léq Tarsus léq negeri Kilikia, laguq tiang tebeléqang léq deriki léq Yerusalem, dait tedidik pacu-pacu siq Gamaliel kadu hukum saq teicanin siq nabi Musa tipaq leluhurte. Pade maraq semeton-semeton senamian saq araq léq deriki jelo niki, tiang éndah dengan saq rajin begawéan bagi Allah. Tiang nganiaye pengiring-pengiring Junjungan Saq Mulie Deside Isa jangke maté. Ie pade selapuq saq mame dait saq nine, tiang bau dait tiang tamaq ojok dalem bui. Imam Agung mésaq dait selapuq Mahkamah Agame bau ngicanin kesaksian bahwe tiang ndéq beduste. Séngaq ie pade saq sampun ngicanin tiang surat kuase saq tetujuang tipaq dengan-dengan Yahudi léq Damsyik. Kadu surat nike tiang kanggo bau pengiring-pengiring Junjungan Saq Mulie Deside Isa saq araq léq derike, dait jauq ie pade ojok Yerusalem jari tehukum.” “Waktu tiang kenyeke dalem kelampan gen dateng léq Damsyik waktu nike panjeng jelo, sopoq cahaye saq menah gati selung-selung besinar léman langit léq sekelining tiang. Tiang rebaq ojok tanaq, terus tiang dengah suare tipaq tiang, ‘Saulus, Saulus! Kembéq side nganiaye Tiang?’ Terus tiang beketuan, ‘Sai Pelungguh, Tuan?’ Jawab-Ne, ‘Tiang Isa dengan Nazaret saq side aniaye nike.’ Dengan-dengan saq araq bareng kance tiang léq derike serioq éndah cahaye nike, laguq ie pade ndéq dengah suare saq tetujuang tipaq tiang. Terus tiang beketuan malik, ‘Napi saq harus tiang piaq, Tuhan?’ Dait jawab Tuhan, ‘Ures, dait tame ojok Damsyik. Laun léq derike side gen tebadaq napi saq sampun tetentuang siq Allah side laksaneang.’ Tiang jari bute lantaran maten tiang keselaq siq cahaye nike. Jari batur-batur tiang saq déndén tiang tame ojok Damsyik. Léq derike araq sopoq dengan aranne Ananias. Ie dengan saq soléh dait taat ngelaksaneang Hukum Taurat. Selapuq dengan Yahudi saq ndot léq Damsyik hormat gati léq ie. Ie dateng jangoq tiang, terus nganjeng léq dékét tiang dait bebase, ‘Saulus semeton tiang, bukaq penentengde dait nyerioq malik!’ Waktu nike éndah tiang pedasang ie dait tiang tao serioq ie. Beterus ie bebase léq tiang, ‘Allah leluhurte sampun miléq side jari nenaoq pekayunan-Ne, jari serioq Saq Kenaq, dait jari dengah suare-Ne. Side gen jari saksi saq nyebarang tipaq selapuq dengan napi saq sampun side serioq dait dengah. Mangkin ndaq ngantih ngonéq-ngonéq malik. Silaq ures, dait serahang diriqde tebaptis. Tunas tipaq Tuhan adéq side tebébasang léman dose-dosende.’ ” “Tiang tulak ojok Yerusalem, dait sewaktu tiang kenyeke bedo'e léq Gedéng Allah, roh tiang tekuasein siq kuase ilahi. Tiang serioq Tuhan; Ie bemanik léq tiang, ‘Becat bilin Yerusalem, séngaq dengan-dengan léq deriki ndéq gen nerimaq kesaksiande mengenai Tiang.’ Jawab tiang, ‘Tuhan, ie pade tetu-tetu nenaoq bahwe tiang niki sampun tame ojok balé-balé ibadah jari bau ie pade dait ngempuk dengan-dengan saq percaye léq Deside. Maraq nike éndah waktu saksi Deside Stepanus tematéq, tiang mésaq araq léq derike dait tiang setuju ie tematéq. Malahan tiang saq jagaq kelambi dengan-dengan saq nyematéq ie.’ Laguq Tuhan bemanik malik léq tiang, ‘Silaq lumbar, séngaq Tiang gen suruq side lumbar ojok taoq saq jaoq, tipaq dengan bangse-bangse lain.’ ” Dengan-dengan masih dengahang Paulus bebaos, laguq léq ucapanne saq penutuq nike ie pade bekuih sekeras-kerasne, “Matéq doang dengan saq maraq niki! Ie ndéq patut idup!” Sambil ie pade bekuih, ie pade ngerapang jubah-jubah ie pade, dait nyugulang kerepukne. Beterus kepale pasukan nike préntahang jauq Paulus ojok markas adéqne teperiksaq kadu kekerasan dait adéqne tetaoq kembéq dengan-dengan Yahudi bekuih maraq nike tipaq ie. Laguq waktu Paulus sampun tetaliq gen tepecut, Paulus bebase léq prewire saq nganjeng léq derike, “Napi kanggo sopoq dengan warge negare Roma tepecut sendéqman ie teadilin?” Dengah hal nike, prewire nike lumbar ojok kepale pasukan dait bebase, “Napi saq gen bapaq laksaneang niki? Dengan niki warge negare Roma!” Beterus kepale pasukan nike lumbar ojok Paulus dait beketuan, “Silaq badaq, napi side warge negare Roma?” Jawab Paulus, “Mule tetu, tiang warge negare Roma.” Basen kepale pasukan nike malik, “Tiang jari warge negare Roma siq care bebayah luwéq gati!” Jawab Paulus, “Laguq tiang tebijeang jari warge negare Roma.” Waktu nike éndah, anggote-anggote tentere saq mélé meriksaq Paulus nike, mundur dait kepale pasukan nike éndah jari takut lantaran ie sampun borgol Paulus, padahal Paulus warge negare Roma. Kepale pasukan nike melét gati nenaoq napi setetune saq jari penyebap dengan-dengan Yahudi nyalahang Paulus. Keranaq nike léq jemaqne ie ngempoh imam-imam kepale dait Mahkamah Agame adéqne bekumpul. Terus Paulus tejauq ngadep ojok ie pade selapuq. Paulus merhatiang anggote-anggote mahkamah nike terus bebase, “Semeton-semeton tiang! Jangke dateng jelo niki tiang ndéq merase salaq tipaq Allah léq dalem até nurani tiang mengenai kehidupan tiang.” Waktu Paulus bebase maraq nike, Imam Agung Ananias préntah dengan saq nganjeng léq dékét Paulus namper cangkem Paulus. Beterus Paulus bebase léq imam Agung nike, “Allah pasti namper side, dengan munapik saq puraq-puraq suci! Side melinggih léq derike ngadilin tiang kadu Hukum Taurat, padahal side mésaq ngelanggar hukum nike siq care suruq dengan namper tiang!” Dengan-dengan saq araq léq dékét Paulus bebase léq Paulus, “Side menghine imam Agung Allah!” Jawab Paulus, “Semeton-semeton, tiang ndéq nenaoq, bahwe ie imam agung. Mule sampun araq tetulis léq dalem Kitab Suci, ‘Ndaq side menghine pemimpin bangsende.’ ” Paulus serioq bahwe separo anggote-anggote mahkamah nike asalne léman dengan-dengan golongan Saduki dait separone malik dengan-dengan Parisi. Keranaq nike ie bebase léq mahkamah nike, “Semeton-semeton, tiang dengan Parisi dait keturunan Parisi, tiang teadilin léq deriki lantaran tiang percaye bahwe dengan-dengan ninggal gen idup malik.” Sewaktu Paulus bebase maraq nike, dengan-dengan Parisi dait dengan-dengan Saduki mulai betungkasan, sehingge sidang nike jari due golongan. ( Séngaq dengan-dengan Saduki bedowé keyakinan bahwe dengan ninggal ndéq gen idup malik, ndéq araq malaékat, dait roh-roh éndah ndéq araq, laguq dengan Parisi percaye léq selapuqne nike.) Beterus araq keributan saq beléq. Pire dengan Parisi saq jari ahli taurat nganjeng dait secare keras ie nentang hal nike, basen ie pade, “Menurut tiang pade dengan niki tetu-tetu ndéq salaq! Sang araq roh atao malaékat saq ngeraos léq ie!” Pegejuhan nike jari sayan beléq jangke kepale pasukan nike jari takut lamun Paulus gen tekembul siq ie pade. Make ie préntahang pasukanne bait Paulus léman tengaq-tengaq dengan luwéq dait jauq ie ojok markas. Léq kelem nike, Junjungan Saq Mulie Deside Isa Almasih ngadeg léq dékét Paulus dait bemanik, “Teguqang angende! Side sampun ngebéng kesaksian mengenai Tiang léq Yerusalem. Laun side harus ngebéng kesaksian léq Roma éndah.” Jemaqne masih aru gati, dengan-dengan Yahudi mulai miaq komplotan. Ie pade besumpah ndéq gen bekelor atao nginem lamun ie pade ndéqman matéq Paulus. Araq petang dase dengan lebih saq miaq komplotan nike. Ie pade lumbar ojok imam-imam kepale dait pemimpin-pemimpin Yahudi dait matur, “Tiang pade sampun besumpah bareng-bareng, bahwe tiang pade ndéq gen bekelor atao nginem napi juaq lamun tiang pade ndéqman matéq Paulus. Nah, mangkin semeton-semeton dait anggote-anggote Mahkamah Agame adéqne ngirim surat ojok kepale pasukan Roma nike jari tunas ie jauq Paulus tulak ngadep side pade, maraq side pade gen meriksaq malik pelekarene pacu-pacu. Dait tiang pade siep gen nyematéq ie sendéqman dateng léq deriki.” Laguq bije léman sanak Paulus saq nine dengah rencane komplotan nike. Make ie lumbar ojok markas nyampéang hal nike léq Paulus. Terus Paulus ngempoh sopoq prewire dait bebase léq ie, “Jauq terune niki ojok kepale pasukan, araq saq gen ie laporang léq kepale pasukan.” Prewire nike jauq terune nike ojok kepale pasukan dait matur, “Paulus, tahenan nike ngempoh tiang, dait ngelakoq adéq tiang jauq terune niki tipaq pelungguh; araq saq gen ie laporang.” Kepale pasukan nike negel ime terune nike, terus jauqne ojok sedi mésaq-mésaq dait beketuan, “Napi saq mélé side laporang léq tiang?” Terune nike bejawab, “Dengan-dengan Yahudi sampun sepakat gen tunas adéq pelungguh jauq Paulus ngadep Mahkamah Agame jemaq, maraqne ie pade mélé meriksaq malik pelekarene pacu-pacu. Laguq sampunang pelungguh turut keméléqne nike, séngaq araq petang dase dengan lebih saq kenyeke nyeboq gen ngadang ie léq tengaq langan. Ie pade selapuqne sampun besumpah ndéq gen bekelor dait nginem lamun ie pade ndéqman matéq Paulus. Mangkin selapuqne sampun siep; karing ngantih jawaban pelungguh doang.” Basen kepale pasukan nike, “Ndaq bebadaq léq sai-sai bahwe side sampun ngelaporang hal niki léq tiang.” Terus suruqne terune nike uléq. Beterus kepale pasukan nike ngempoh due prewire, dait bebase léq ie pade, “Siepang satak prajurit dait pituq pulu tentere saq nunggang jaran dait satak tentere saq jauq tumbak, adéq ie pade berangkat jam siwaq kelem niki éndah ojok Kaisarea. Siepang éndah jaran adéqne tekadu siq Paulus terus jauq ie selamet jangke dateng Gubernur Peliks.” Terus kepale pasukan nike nulis surat saq tetulis maraq niki, “Saq Mulie Gubernur Peliks. Salam léman Klaudius Lisias! Dengan niki sampun tebau siq dengan-dengan Yahudi dait aroh tematéq siq ie pade, lamun tiang ndéq dateng kance pasukan tiang dait nyelametang ie; séngaq tiang dengah bahwe ie warge negare Roma. Lantaran tiang melét nenaoq napi setetune kesalaqan saq tetuduhang tipaq ie, make tiang jauq ie ojok Mahkamah Agame ie pade. Ternyate dengan niki ndéq piaq napi-napi saq patut tehukum siq hukuman maté atao tebui. Tuduhan dengan-dengan nike tipaq ie cume mengenai hal-hal saq berubungan kance Hukum Tauratne mésaq. Beterus tiang mauq laporan bahwe araq rencane jahat léman dengan-dengan Yahudi tipaq ie, jari tiang langsung ngirim ie ojok Pelungguh, dait sampun tiang suruq selapuq penuntutne ngajuang pengaduanne tipaq pelungguh.” Beterus anggote-anggote tentere nike ngelaksaneang tugasne. Ie pade bait Paulus, terus kelem nike éndah jauqne Paulus ojok Antipatris. Jemaqne ie pade ngalurang pasukan saq kadu jaran ngelanjutang kelampanne kance Paulus, dait ie pade tulak ojok markas. Waktu pasukan saq kadu jaran nike dateng léq Kaisarea, ie pade nyampéang surat nike tipaq Gubernur, dait nyerahang Paulus tipaq ie. Sesampun surat nike tebace siq Gubernur, ie beketuan léq Paulus léman mbé asalne. Sewaktu ie wikan bahwe Paulus asalne léman Kilikia, ie bebase, “Bagus! Tiang gen meriksaq pelekarende, lamun dengan-dengan saq nuntut side nike sampun dateng léq deriki.” Terus ie mréntahang adéqne Paulus tetahen léq dalem istane Herodes. Lime jelo sesampun nike, Imam Agung Ananias dait pemimpin-pemimpin Yahudi lumbar ojok Kaisarea bareng sopoq pengacare aranne Tertulus. Ie pade ngadep Gubernur Peliks dait nyampéang tuduhan ie pade tipaq Paulus. Sewaktu Tertulus tempoh ojok julu, ie tuduh Paulus maraq niki, “Bapaq Gubernur Saq Mulie! Siq pimpinan pelungguh negeri tiang pade tentrem. Dait lantaran kebijaksanean pelungguh sampun luwéq saq tepesolah umaq bangse tiang pade. Tiang pade tetep sambut hal nike léq mbé juaq siq rase syukur. Laguq adéqne sampunang tetéh luwéq waktu pelungguh, tiang tunas adéq pelungguh pirengang pengaduan tiang pade saq singket niki. Tiang pade ndait dengan niki jari pengaco saq bahaye gati. Léq mbé-mbé ie nimbulang keributan léq antare dengan-dengan Yahudi, dait ie jari pemimpin golongan dengan-dengan Nasrani. Malahan ie sampun nyobaq najisang Gedéng Allah, laguq tiang pade bau ie. [Maksut tiang pade ngadilin ie menurut Hukum Taurat tiang mésaq. Laguq kepale pasukan Lisias ngerebut ie léman tiang pade, dait mréntahang adéq penuntut-penuntutne ngadep pelungguh.] Lamun pelungguh meriksaq dengan niki, pelungguh mésaq gen pireng léman ie kebenaran selapuqne saq tiang pade tuduhang tipaq ie.” Dengan-dengan Yahudi saq léq derike éndah milu nuduh Paulus dait setuju léq selapuq saq tesampéang siq Tertulus. Terus Gubernur nike ngebéng tande léq Paulus bahwe ie kanggo ngeraos. Beterus Paulus ngeraos, “Tiang nenaoq bahwe pelungguh sampun jari hakim negeri niki betaun-taun ngonéqne. Keranaq nike tiang seneng ngajuang pembélean tiang niki léq arepan pelungguh. Pelungguh bau selidik mésaq bahwe ndéq lebih léman due olas jelo saq liwat tiang lalo ojok Yerusalem jari sembahyang. Dait ndéq uwah dengan-dengan Yahudi nike ndait tiang betungkasan kance sopoq dengan juaq atao ngumpulang dengan jari miaq keributan léq Gedéng Allah atao léq balé-balé ibadah atao léq mbé doang léq dalem kote. Ie pade éndah ndéq bau buktiang tuduhan-tuduhan saq ie pade ajuang tipaq pelungguh mengenai tiang. Mule tiang harus ngaku léq arepan pelungguh bahwe tiang nyembah Allah leluhur tiang pade menurut pengajahan saq teajahang siq Deside Isa nike saq ie pade anggep sopoq kepercayean. Laguq tiang masih percaye léq selapuqne saq tetulis léq Kitab Suci Taurat dait Kitab Nabi-nabi. Pade maraq ie pade, tiang éndah bedowé harepan tipaq Allah bahwe selapuq dengan gen idup malik sesampun ninggal -- dengan-dengan saq soléh dait maraq nike éndah dengan-dengan jahat! Keranaq nike tiang tetep berusahe sebagus-bagusne, adéq até nurani tiang bersi tipaq Allah dait tipaq manusie. Sesampun pire taun ndéq ndot léq Yerusalem, tiang tulak ojok derike jari jauq bantuan képéng tipaq bangse tiang dait jari ngaturang persembahan tipaq Allah. Sewaktu tiang kenyeke ngelaksaneang nike, ie pade ndait tiang léq Gedéng Allah, sesampun tiang nutuqang upacare penyucian diriq. Tiang ndéq kance dengan luwéq, dait waktu nike ndéq araq éndah keributan léq derike. Cume araq pire dengan Yahudi léq derike léman Propinsi Asia. Ie pade saq seharusne araq léq deriki jari nyampéang pengaduan ie pade léq pelungguh, lamun ie pade araq bedowé tuduhan tipaq tiang. Atao alurang dengan-dengan niki mésaq jelasang kejahatan napi saq ie pade ndait léq tiang sewaktu tiang tejauq ojok arepan Mahkamah Agame. Ie pade cume ndait kalimat saq sopoq niki doang saq tiang ucapang léq julun ie pade: Tiang teadilin jelo niki séngaq tiang percaye bahwe dengan-dengan ninggal gen teidupang malik.” Terus Peliks saq sampun luwéq wikan mengenai pengajahan Deside Isa, nutuqang sidang pelekare nike, basene, “Tiang gen mutusang pelekare niki, lamun kepale pasukan Lisias sampun dateng.” Terus ie mréntahang prewire saq betanggung jawab léq Paulus nike adéqne tetep nahen Paulus, laguq ngebéng sekediq kebébasan léq ie dait ngijinang batur-baturne ngebéng napi saq ie perluang. Pire jelo sesampun nike Peliks dateng kance seninene aranne Drusila; ie dengan Yahudi. Terus Peliks suruq dengan bait Paulus, dait Peliks pirengang Paulus ngeraos mengenai iman tipaq Deside Isa Almasih. Laguq sewaktu Paulus ngeraos mengenai kebenaran, penguasean diriq dait penghakiman saq gen dateng, Peliks jari takut. Terus ie bebase, “Side kanggo lumbar mangkin. Tiang gen ngempoh side malik lamun araq kesempatan.” Léq waktu nike Peliks beharep gen mauq képéng léman Paulus. Keranaq nike ie rimpes suruq dengan ngempoh Paulus jari ngeraos kance ie. Sesampun due taun, Perkius Pestus gentiq Peliks jari gubernur. Dait lantaran Peliks kayun nyenengang angen dengan-dengan Yahudi, ie ngalurang Paulus tetep léq dalem bui. Telu jelo sesampun Pestus dateng léq daérah nike, ie lumbar léman Kaisarea ojok Yerusalem. Léq derike imam-imam kepale dait pemimpin-pemimpin Yahudi ngajuang léq ie tuduhan ie pade tipaq Paulus. Ie pade terus doang kédéq Pestus adéq siq kesolahan angenne tipaq ie pade, ie mélé suruq dengan jauq Paulus ojok Yerusalem; séngaq ie pade sampun sepakat jari nyematéq Paulus léq tengaq langan. Laguq jawab Pestus, “Paulus kenyeke tetahen léq Kaisarea; dait tiang mésaq ndéq ngonéq malik gen tulak ojok derike. Jari, alurang dengan-dengan saq tehormatin léq antare side pade lumbar bareng kance tiang ojok Kaisarea dait pelekareang ie léq derike, lamun mule ie sampun piaq kesalaqan.” Sesampun meneng léq Yerusalem kire-kire baluq atao sepulu jelo malik, Pestus tulak ojok Kaisarea. Jemaqne ie ngaraqang sidang pengadilan dait mréntahang adéq Paulus tejauq ngadep. Sewaktu Paulus dateng, dengan-dengan Yahudi saq sampun dateng léman Yerusalem nganjeng léq sekeliningne, dait mulai ngajuang tuduhan-tuduhan saq berat tipaq Paulus. Laguq ie pade ndéq bau buktiang tuduhan-tuduhan nike. Sebalikne, dalem pembéleanne, Paulus bebase, “Tiang ndéq piaq sopoq hal saq salaq tipaq Hukum Taurat dengan Yahudi atao tipaq Gedéng Allah atao tipaq Kaisar Roma.” Laguq Pestus kayun nyenengang angen dengan Yahudi. Beterus ie beketuan léq Paulus, “Napi side mélé lumbar ojok Yerusalem jari teadilin léq derike léq julu tiang mengenai tuduhan-tuduhan nike?” Jawab Paulus, “Tiang kenyeke nganjeng léq arepan mahkamah Kaisar Roma; dait léq taoq nike tiang harus teadilin. Pelungguh mésaq wikan bahwe tiang ndéq salaq léq dengan Yahudi. Lamun tiang sampun ngelanggar hukum dait piaq hal saq patut tehukum siq hukuman maté, tiang réde maté. Laguq lamun tuduhan-tuduhan ie pade ndéq kenaq, ndéq araq sopoq dengan juaq saq kanggo nyerahang tiang tipaq ie pade. Tiang tunas teadilin léq pengadilan Kaisar!” Sesampun berunding kance penaséhat-penaséhatne, Pestus bebase, “Side mélé teadilin léq pengadilan Kaisar, jari side harus lumbar ngadep Kaisar.” Pire jelo sesampun nike, Raje Agripa dait Bernike rauh léq Kaisarea jari ngucapang selamet léq Pestus. Sesampun pire jelo ie pade araq léq derike, Pestus jelasang pelekare Paulus léq Raje Agripa. Pestus bebase, “Araq léq deriki sopoq tahenan saq teadéqang siq Peliks. Waktu tiang araq léq Yerusalem, imam-imam kepale dait pemimpin-pemimpin Yahudi ngajuang pengaduan ie pade tipaq dengan nike dait tunas adéq tiang mutusang hukuman tipaq ie. Laguq jawab tiang bahwe dengan Roma ndéq kanggo nyerahang maraq nike doang sopoq dengan saq tetuduh jari tehukum, lamun saq tetuduh ndéqman tepade arepan kance penuntut-penuntutne dait tebéng kesempatan béle diriq. Jari, waktu ie pade dateng ojok deriki, tiang ndéq ngantih ngonéq-ngonéq. Jemaqne tiang langsung ngaraqang sidang pengadilan dait mréntahang adéq dengan nike tejauq ngadep. Sewaktu pare penuntutne nganjeng ngajuang pengaduan ie pade, ie pade ndéq ngajuang sopoq juaq kejahatan maraq saq tiang badéq gen ie pade ajuang. Ie pade cume béde pendapet kance ie mengenai agamene mésaq dait mengenai sopoq dengan saq pesénganne Deside Isa. Dengan nike sampun ninggal, laguq Paulus pagah bahwe dengan nike idup. Séngaq tiang bingung berembé entan tiang mauq keterangan mengenai pelekare nike, tiang beketuan léq Paulus napi ie mélé lumbar ojok Yerusalem dait teadilin pelekarene léq derike. Laguq Paulus tunas taék banding; ie tunas adéq ie tetep ndot léq tahenan jangke pelekarene teputusang siq Kaisar. Keranaq nike tiang préntahang adéq ie tetep tetahen, jangke tiang mauq kesempatan ngirim ie ojok Kaisar.” Terus Raje Agripa bebase léq Pestus, “Tiang mésaq éndah melét dengah dengan nike.” “Jemaq pelungguh bau pirengang ie,” jawab Pestus. Jemaqne Raje Agripa dait Bernike rauh kadu upacare kerajaan. Ie pade tame ruang sidang teiring siq kepale-kepale pasukan dait dengan-dengan saq tehormatin léq kote nike. Siq préntah Pestus, Paulus tejauq tame. Terus basen Pestus, “Baginde Agripa dait pare hadirin! Dengan niki sampun teaduang tipaq tiang siq selapuq bangse Yahudi, saq léq Yerusalem, dait saq araq léq deriki. Ie pade nuntut sambil nyurak-nyurak bahwe ie ndéq patut tealurang idup. Laguq tiang ndéq ndait sopoq juaq kesalaqan saq sampun ie piaq saq bau tehukum siq hukuman maté. Dait lantaran ie mésaq sampun tunas adéq pelekarene teadilin léq pengadilan Kaisar, tiang sampun mutusang gen ngirim ie ojok Kaisar. Laguq tiang ndéqman bedowé keterangan napi-napi saq teges mengenai diriqne jari tetulis léq surat tiang tipaq Kaisar. Keranaq nike tiang jauq ie ojok arepan pelungguh senamian, terutame gati tipaq Raje Agripa! Maksut tiang adéq sesampun pemeriksaan niki, tiang bau nulis sopoq laporan. Séngaq menurut pendapet tiang, ndéqne pantes ngirim sopoq tahenan lamun ndéq jelas kesalaqan-kesalaqan saq tetuduhang tipaq ie.” Raje Agripa bebase léq Paulus, “Side teijinang ngeraos jari béle diriq.” Paulus ngangkat imene terus nyampéang pembéleanne, maraq niki, “Baginde Agripa! Tiang merase bahagie gati bau ngajuang pembélean tiang malahan léq arepan pelungguh mengenai selapuq pengaduan saq teajuang tipaq tiang siq dengan-dengan Yahudi; terutame gati lantaran pelungguh tetu-tetu wikan adat-istiadat dait masalah-masalah dengan Yahudi. Keranaq nike, tiang tunas pelungguh kayun sabar mirengang keterangan tiang. Selapuq dengan Yahudi nenaoq berembé tiang idup léman tiang masih bajang. Ie pade nenaoq bahwe léman masih bajang, tiang sampun idup léq antare bangse tiang mésaq léq Yerusalem. Sampun ngonéq ie pade nenaoq mengenai tiang. Dait lamun ie pade mélé, ie pade bau ngebéng kesaksian bahwe léman penembéq tiang sampun idup sebagé dengan Parisi dait turut selapuq aturanne saq paling keras léq dalem agame tiang pade. Dait mangkin tiang nganjeng léq deriki jari teadilin séngaq tiang percaye léq perjanjian saq tepiaq siq Allah tipaq leluhur tiang pade. Perjanjian nike éndah saq teharep-harepang siq kedue olas suku bangse Israel, sehingge ie pade ibadah tipaq Allah kenjelo dait kekelem. Dait lantaran tiang percaye léq perjanjian nike, Raje Agripa saq mulie, tiang tesalaqang siq dengan-dengan Yahudi. Kembéq side pade dengan-dengan Yahudi ndéq iniq percaye bahwe Allah ngidupang malik dengan ninggal? Laéq tiang mésaq éndah bedowé pendapet bahwe tiang harus ngelaksaneang selapuq-lapuqne jari nentang Deside Isa léman Nazaret nike. Dait mule nike saq sampun tiang laksaneang léq Yerusalem. Kadu surat kuase léman imam-imam kepale, tiang sampun tamaq ojok dalem bui luwéq dengan saq tehususang bagi Allah. Malahan tiang éndah milu setuju bahwe ie pade harus tehukum maté. Rimpes gati tiang nyiksaq ie pade léq balé-balé ibadah dait paksaq ie pade tilas napi saq ie pade percaye nike. Panas gati atén tiang léq ie pade, sehingge ojok kote-kote lain éndah tiang lalo paléq ie pade léq derike.” “Siq maksut nike éndah, tiang jauq surat kuase dait préntah léman imam-imam kepale, tiang lalo ojok Damsyik. Raje Agripa saq mulie, sewaktu tiang léq tengaq langan, léq waktu tengari, tiang serioq sopoq cahaye léman langit saq menahan malik léman cahaye jelo. Cahaye nike ngempor léq sekelining dengan-dengan saq lampaq bareng kance tiang. Tiang pade rebaq ojok tanaq, terus tiang dengah suare saq bebase léq tiang kadu base Ibrani, ‘Saulus, Saulus! Kembéq side nganiaye Tiang? Sengke side nendang sopoq hal saq tajep.’ Jawab tiang, ‘Sai Pelungguh?’ Dait jawab Junjungan Saq Mulie, ‘Tiang Isa saq side aniaye. Ures dait nganjeng! Tiang nyatayang diriq tipaq side siq maksut gen ngangkat side jari pelayan Tiang. Side harus jari saksi mengenai selapuq hal saq side serioq jelo niki mengenai Tiang dait mengenai napi saq gen Tiang petitoqang léq side laun léq waktu saq gen dateng. Tiang gen kelin side léman bangse Israel dait léman dengan bangse-bangse lain. Tiang gen ngutus side lumbar ojok ie pade jari miaq meléng penenteng ie pade, adéq ie pade bebalik léman peteng ojok menah dait léman kuase Belis tipaq Allah. Adéq siq imanne tipaq Tiang, ie pade mauq pengampunan dose dait mauq bagian léq napi saq tetentuang jari dengan-dengan saq tehususang bagi Allah.’ ” “Keranaq nike, Baginde Agripa, tiang tetep berusahe taat léq penyerioqan saq sampun tiang terimaq léman Allah nike. Secare terus terang tiang badaq tipaq dengan-dengan bahwe ie pade harus betobat léman dose-dose ie pade dait nyerahang diriq tipaq Allah, dait metitoqang léq dalem idup ie pade bahwe ie pade sampun betobat léman dose-dose ie pade. Tiang badaq hal nike penembéqne léq Damsyik, terus léq Yerusalem dait léq selapuq wilayah Yudea dait léq antare dengan bangse-bangse lain. Keranaq nike tiang tebau siq dengan-dengan Yahudi léq Gedéng Allah dait ie pade berusahe nyematéq tiang. Laguq jangke mangkin niki tiang telindungin siq Allah, sehingge tiang bau nganjeng léq deriki jari ngebéng kesaksian tiang tipaq selapuq dengan -- saq beléq atao saq kodéq. Napi saq tiang ucapang niki ndéqne lain léman napi saq sampun tenubuatang siq nabi-nabi dait nabi Musa éndah; bahwe Almasih saq tejanjiqang siq Allah nike harus menderite, dait jari dengan penembéq saq idup malik sesampun ninggal; adéq siq hal nike Ie bau beriteang terang, tipaq dengan-dengan Yahudi dait dengan bangse-bangse lain.” Sewaktu Paulus kenyeke nyampéang pembéleanne nike, Pestus nyurak, “Side sampun jogang Paulus! Ilmunde saq luwéq nike sampun jariang side jogang!” Laguq jawab Paulus, “Tiang ndéq jogang, Tuan Pestus. Ucapan-ucapan saq tiang sampéang nike kenaq dait sugul léman pikiran saq waras. Baginde Agripa mésaq wikan gati hal-hal niki. Keranaq nike tiang bani ngeraos léq arepan pelungguh secare terus terang. Tiang yakin ndéq araq sopoq juaq léman hal-hal nike saq ndéqman tewikanang siq pelungguh, séngaq selapuqne nike ndéq telaksane léq taoq-taoq saq kesempil. Baginde Agripa saq mulie, napi pelungguh percaye léq napi saq tesampéang siq nabi-nabi? Tiang yakin pelungguh percaye!” Terus Raje Agripa bebase léq Paulus, “Side paran molah jariang tiang dengan Nasrani léq waktu saq singket niki?” Jawab Paulus, “Léq waktu saq singket atao léq waktu saq ngonéq, tiang bedo'e tipaq Allah adéq pelungguh dait bapaq-bapaq senamian saq pirengang tiang jelo niki gen jari maraq tiang -- kecuali borgol-borgol niki!” Beterus Baginde Agripa, gubernur dait Bernike, serte selapuq saq lainne nganjeng. Sesampun araq léq luah, ie pade bebase sopoq kance saq lainne, “Dengan niki ndéq piaq sopoq hal saq patut tehukum siq hukuman maté atao tebui.” Terus basen Raje Agripa léq Pestus, “Dengan niki sampun bau tebébasang, seandéne ie ndéq nuntut pelekarene teadilin léq Pengadilan Kaisar.” Sesampun teputusang bahwe tiang pade harus belayar ojok Italia, Paulus dait pire dengan tahenan saq lain teserahang ojok Yulius, prewire pasukan tentere Roma saq tesebut “Pasukan Kaisar”. Tiang pade taék ojok kapal saq dateng léman Adramitium, beterus berangkat kadu kapal nike saq sampun siep belayar ojok pelabuan-pelabuan léq propinsi Asia. Aristarkus, dengan Makedonia saq dateng léman Tesalonika, belayar éndah bareng kance tiang pade. Jemaqne tiang pade dateng léq Sidon. Paulus teperlakuang secare bagus gati siq Yulius. Ie teijinang jangoq batur-baturne adéq ie pade iniq ngebéng napi saq ie perluang. Léman derike tiang pade belayar malik. Séngaq angin dateng belainan arah kance kapal, tiang pade terus belayar bedurus léq pesisi pulao Siprus. Beterus tiang pade babar segare saq berandangan kance Kilikia dait Pampilia terus dateng léq Mira léq negeri Likia. Léq derike prewire nike ndait sopoq kapal léman Aleksandria saq mélé belayar ojok Italia. Beterus ie alih tiang pade ojok kapal nike. Pire jelo ngonéqne, tiang pade belayar adéng gati, dait sengke gati tiang pade belayar jangke bau dateng dékét kote Knidus. Séngaq angin masih doang ndéq bagus, tiang pade ndéq bau belayar ojok jurusan semule. Make tiang pade belayar ojok lauq pulao Kreta langan Tanjung Salmone. Sengke gati tiang pade belayar bedurus léq pesisi pulao nike, ahirne tiang pade dateng léq sopoq taoq aranne Pelabuan Indah, ndéqne jaoq léman kote Lasea. Waktu nike Jelo Puase dengan Yahudi sampun liwat. Tiang pade sampun luwéq bisang waktu sie-sie, sehingge ndéq aman malik jari belayar. Keranaq nike Paulus peringet ie pade, “Semeton-semeton, menurut pendapet tiang, gen bahaye gati lamun ite belayar terus. Ite gen ngalamin kerugian beléq ndéqne cume léq muatante dait kapalte, laguq nyawente éndah gen celake.” Laguq prewire nike lebih percaye léq jurumudi dait kapten kapal nike ketimbang ucapan-ucapan Paulus. Pelabuan léq derike mule ndéq bagus jari taoq ndot kapal-kapal sengonéq musim telih. Keranaq nike luwéqan anak buah kapal setuju belayar malik bilin pelabuan nike séngaq ie pade mélé berusahe adéq bau dateng léq Peniks dait ndot léq derike sengonéq musim telih. Peniks nike sopoq pelabuan léq Kreta saq andang bat daye dait bat lauq. Léq waktu nike dateng angin léman lauq adéng-adéng. Anak buah kapal nike laporan ie pade gen bau belayar malik. Jari ie pade ngangkat jangkar terus belayar bedurus léq pesisi pulao Kreta. Laguq ndéq ngonéq sesampun nike, dateng angin beléq gati -- nike angin saq tesebut angin Timuq Segare -- keras gati dateng léman darat, dait ngampes kapal tiang pade. Keranaq nike ndéq mungkin kapal nike belayar terus ngelawan angin, make tiang pade nyerah doang dait ngalurang kapal nike éléh tejauq siq angin. Tiang pade merase aman sekediq waktu tiang pade liwat léq lauq pulao Kauda saq kodéq nike. Léq derike sengke gati tiang pade bau nguasein perau kodéq saq araq léq kapal tiang pade. Sesampun perau kodéq nike tetaékang ojok kapal, terus kapal nike teteguqang kadu tali saq tetaliq ngelingkerin kapal nike. Séngaq takut kesandek léq dasar gerés Sirtis saq dawot, layar teturunang, terus kapal tealurang nurut angin. Angin terus ngamuk, sehingge jemaqne, muatan kapal mulai tetetéh ojok segare. Jelo selanjutne anak buah kapal nike netéh éndah pekakas-pekakas kapal ojok segare kadu imene mésaq. Bejelo-jeloan ngonéqne tiang pade ndéq serioq jelo dait bintang, dait angin tetep ngamuk. Ahirne telang harepan tiang pade gen bau selamet. Pire waktu ngonéqne dengan-dengan nike ndéq bekelor. Beterus Paulus nganjeng léq tengaq-tengaq ie pade dait bebase, “Semeton-semeton! Lamun side pade turut naséhat tiang dait ndéq belayar léman Kreta, ite ndéq ngalamin selapuq saq lengé dait rugi maraq niki. Laguq mangkin sanget siq tiang tunas adéq side pade beléqang angen. Ndéq araq sopoq dengan juaq léman side saq gen ninggal; ite cume gen kélangan kapal niki doang. Séngaq uwiq bian malaékat léman Allah saq tiang sembah, Ie Allah saq dowéang tiang, rauh tipaq tiang. Manik malaékat nike, ‘Ndaq takut, Paulus! Séngaq side gen ngadep Kaisar. Dait setetune lantaran rahmat Allah, selapuq dengan saq belayar kance side gen selamet lantaran side.’ Keranaq nike, semeton-semeton, side pade harus tabah! Séngaq tiang percaye léq Allah bahwe selapuqne gen telaksane maraq saq temanikang tipaq tiang. Laguq ite gen kesasar léq sopoq pulao.” Léq kelem saq keempat olas tiang pade kenyeke ngompal léq Segare Adria. Kire-kire tengaq kelem anak buah kapal merase kapal kenyeke ngerapetin darat. Jari ie pade ngulurang tali saq tegantungin batu jari ngukur dalemne segare. Ternyate taoq nike dalemne petang dase méter kurang sekediq. Ndéq ngonéq sesampun nike, ie pade ngukur malik, dait kire-kire telung dase méter dalemne léq taoq nike. Ie pade takut kapal gen kandas léq batu karang, jari ie pade nurunang empat jangkar léman bagian mudi kapal, terus beharep lamun bau becat-becat menah. Tedoq-tedoq pare anak buah kapal berusahe pelai léman kapal nike. Ie pade nurunang perau kodéq ojok aiq, maraqne gen nurunang jangkar léman julu kapal. Laguq Paulus bebase tipaq prewire dait prajurit-prajurit saq léq kapal nike, “Lamun anak buah kapal niki ndéq ndot léq kapal, semeton-semeton selapuqne ndéq gen selamet.” Keranaq nike, prajurit-prajurit nike peleng tali perau kodéq nike, sehingge perau kodéq nike éléh. Léq waktu sendéqman tiwoq jelo, Paulus nganjurang adéq ie pade selapuq bekelor. Paulus bebase, “Sampun empat olas jelo ngonéqne semeton selapuqne cume ngantih-ngantih doang siq rase takut dait ndéq ngelorang napi-napi. Tiang nganjurang, bekelor sekediq. Nike solah umaq side pade, adéq side pade kuat malik. Séngaq semeton selapuqne gen selamet dait ndéq kurang napi-napi.” Sesampun bebase maraq nike Paulus bait ruti terus ngucapang syukur tipaq Allah léq julu ie pade selapuq. Beterus ie bagi-bagiang ruti nike, dait bekelor. Beterus ie pade selapuq besemanget malik dait milu bekelor éndah. Selapuq saq araq léq kapal nike araq satak pituq pulu enem dengan. Sesampun selapuqne bekelor secukupne, ie pade tetéh muatan gandum ojok segare adéq kapal jari déang. Sesampun menah, anak buah kapal serioq daratan, laguq ie pade ndéq taoq daratan napi nike. Ie pade serioq sopoq pulao kodéq kance pesisine. Jari ie pade beniat belabuh léq derike, lamun bau. Make tali-tali jangkar tepeleng terus jangkar-jangkar nike tealurang ketelep léq segare. Léq waktu nike éndah ie pade ngelepas tali saq naliq kemudi-kemudi. Beterus ie pade taékang layar léq bagian julu kapal adéq angin tiup kapal nike ojok pesisi. Laguq kapal nike kesandek léq dasar gerés. Bagian julune ketalet dait ndéq iniq nguit, dait bagian mudine remuk teampes siq umbak saq keras. Prajurit-prajurit léq kapal nike beniat nyematéq selapuq dengan tahenan, séngaq ie pade takut ndaq-ndaq laun araq saq ngonong ojok darat dait pelai. Laguq prewire nike segah niat ie pade séngaq ie mélé nyelametang Paulus. Ie suruq selapuq dengan saq tao ngonong nimproh juluan dait ngonong ojok pesisi; saq lain turut mudi dait betegelan léq papan-papan atao kayuq peleng-pelengan kapal nike. Siq care nike tiang pade selapuq selamet jangke dateng darat. Sesampun selamet dateng léq darat, baruq tiang pade taoq bahwe pulao nike aranne Malta. Penduduk pulao nike gerasaq gati léq tiang pade. Ie pade sambut tiang pade selapuq secare bagus dait nyalaqang api jari tiang pade séngaq sampun mulai turun ujan dait hawene telih. Paulus ngumpulang kayuq-kayuq, dait noloq kayuq-kayuq nike léq atas api. Sopoq ulah sugul lantaran panasne api nike, terus catok imene. Sewaktu penduduk pulao nike serioq ulah nike begantung léq ime Paulus, ie pade bebase sopoq kance saq lainne, “Dengan niki pasti sampun nyematéq dengan, séngaq timaq ie sampun selamet léman bahaye léq segare, Déwi Keadilan ndéq ngalurang ie idup.” Laguq Paulus kerapang ulah nike ojok dalem api, dait sekediq juaq ndéqne beridap sakit. Pikir ie pade karing seberaq ime Paulus gen baq atao selung-selung ie gen rebaq dait ninggal. Laguq sesampun ngantih ngonéqan malik, dait ndéq araq napi-napi saq nimpe Paulus, ie pade berobah pikiran, terus bebase bahwe Paulus nike déwe. Ndéq jaoq léman taoq nike araq tanaq dowéne Publius, penguase pulao nike. Tiang pade tesambut secare bagus jari temuéne sengonéq telu jelo. Léq waktu nike bapaqne kenyeke sakit, teserang telih panas dait désentri. Paulus lumbar serioq bapaq saq sakit nike terus bedo'e dait noloq imene léq atasne, sehingge ie selah. Keranaq peristiwe nike selapuq dengan saq sakit léq pulao nike dateng ojok Paulus, dait ie pade teselahang. Ie pade béng tiang luwéq hadiah, dait sewaktu tiang pade gen belayar, ie pade ngatongang ojok kapal selapuq saq tiang pade perluang léq kelampan tiang pade. Sesampun telu bulan léq derike, tiang pade berangkat léman pulao nike taék sopoq kapal léman Aleksandria saq belabuh léq derike sengonéq musim telih. Kapal nike kadu simbul “Déwe Kembar”. Tiang pade belabuh léq kote Sirakusa dait ndot léq derike telu jelo. Léman derike tiang pade belayar malik durus pesisi jangke dateng léq kote Regium. Jemaqne angin mulai dateng léman lauq, sehingge dalem due jelo tiang pade dateng léq kote Putioli. Léq derike tiang pade bedait kance pire dengan saq percaye léq Deside Isa, dait lantaran undangan ie pade tiang pade ndot kance ie pade pituq jelo ngonéqne. Beterus tiang pade berangkat ojok Roma. Semeton-semeton léq Roma saq percaye léq Deside Isa pade dengah kabar mengenai tiang pade, sehingge ie pade lumbar jangke dateng Peken Apius dait Tres Taberne jari nyambut tiang pade. Waktu Paulus bedait kance ie pade, ie ngucapang syukur léq Allah dait teteguqang aténe. Sesampun dateng léq Roma, Paulus teijinang ndot mésaq dait tekawal siq sopoq prajurit. Sesampun telu jelo, Paulus pesilaq tokoh-tokoh dengan Yahudi léq derike. Dait sesampun ie pade bekumpul, Paulus bebase léq ie pade, “Semeton-semeton! Tiang ndéq salaq napi-napi léq bangsente, atao ngelanggar adat istiadat saq ite terimaq léman leluhurte. Timaq maraq nike tiang tebau léq Yerusalem dait teserahang ojok dengan-dengan Roma. Sesampun pelekare tiang teperiksaq, ie pade mélé bébasang tiang, séngaq ternyate tiang ndéq piaq sopoq kesalaqan saq patut tehukum siq hukuman maté. Laguq lantaran tetentang siq dengan-dengan Yahudi, tiang terpakse nuntut pelekare tiang teadilin léq pengadilan Kaisar Roma. Tiang laksaneang nike ndéqne lantaran tiang bedowé sopoq tuntutan tipaq bangse tiang mésaq. Keranaq nike tiang tunas bedait kance side pade, jari ngeraos kance side pade. Tiang teborgol cume lantaran tiang percaye léq pengharepan saq tetu-tetu tepercaye siq dengan-dengan Israel.” Terus ie pade bebase léq Paulus, “Tiang pade ndéqman nerimaq surat léman Yudea mengenai side. Dait ndéq araq sopoq semeton juaq léman derike saq dateng jauq kabar mengenai side atao nuturang saq lengé mengenai side. Laguq tiang pade melét éndah dengah mengenai pendapet side, séngaq tiang pade selapuq sampun dengah dengan-dengan ngewade pengajahan saq side percaye nike.” Beterus ie pade nentuang sopoq jelo jari bedait kance Paulus. Léq jelo nike luwéq dengan dateng ojok taoqne Paulus ndot. Léman kelémaq jangke bian Paulus jelasang dait ngebéng kesaksian tipaq ie pade mengenai Kerajaan Allah. Kadu ayat-ayat léman Kitab Nabi Musa kance Kitab Nabi-nabi, Paulus berusahe miaq ie pade percaye mengenai Deside Isa. Araq saq percaye léq napi saq tesampéang Paulus, laguq araq éndah saq ndéq percaye. Siq pendapet saq béde-béde ie pade bilin taoq nike. Paulus masih bebase, “Mule kenaq napi saq temanikang siq Roh Suci langan Nabi Yesaya tipaq leluhurte: ‘Pade lumbar sampéang ojok bangse niki: Side gen tetep dengah, laguq ndéq ngerti; side gen tetep merhatiang laguq ndéq taoq napi saq telaksane. Séngaq pikiran dengan-dengan nike sampun kongol, kentok ie pade sampun kedok dait penenteng ie pade sampun tepedemang. Hal niki telaksane adéq penenteng ie pade ndaq nyerioq, kentok ie pade ndaq dedengah, pikiran ie pade ndaq ngerti, terus bebalik, sehingge Tiang, nyelahang ie pade.’ ” Ahirne Paulus bebase, “Semeton-semeton harus nenaoq bahwe kabar mengenai keselametan saq léman Allah mangkin sampun tesampéang tipaq bangse-bangse lain dait ie pade gen dengah hal nike!” [ Sesampun Paulus bebase maraq nike, dengan-dengan Yahudi nike bilin taoq nike sambil betungkasan sopoq kance saq lainne.] Due taun ngonéqne Paulus ndot léq Roma, léq balé saq ie séwe mésaq. Paulus seneng nerimaq selapuq dengan saq dateng jangoq ie. Dait bani ie nyampéang tipaq ie pade mengenai Kerajaan Allah, dait mengenai Junjungan Saq Mulie Deside Isa Almasih. Paulus bébas ngelaksaneang nike ndéq araq saq halangin ie. Semeton senamian saq araq léq Roma, saq tekasihin siq Allah dait saq sampun tepiléq jari dengan-dengan saq tehususang bagi Allah. Tiang, Paulus, sampun tepiléq siq Allah jari rasul-Ne dait éndah nyampéang Kabar Solah léman Allah. Kabar Solah nike sampun tejanjiqang siq Allah léq jaman laéq langan perantarean nabi-nabi-Ne dait sampun tetulis léq Kitab Suci. Kabar Solah nike mengenai Bije-Ne, Junjungante Saq Mulie Deside Isa Almasih. Secare manusie Deside Isa nike keturunan Daud, laguq secare ilahi Deside Isa nike setetune Bije saq asalne léman Allah. Hal nike tenyatayang léman kuase saq luar biase sewaktu Deside Isa idup malik léman ninggal. Langan Deside Isa éndah Allah ngicanin tiang paice dait jabatan rasul jari bimbing selapuq bangse adéq ie pade percaye dait taat tipaq Bije saq asalne léman Allah adéq peséngan-Ne temulieang. Saq temaksut selapuq bangse nike, lantong side pade saq araq léq Roma; séngaq side pade éndah sampun temanikang jari dowén Deside Isa Almasih. Nike lantaranne tiang nulis tipaq side pade. Semoge Allah Bapante dait Junjungante Saq Mulie Deside Isa Almasih, ngicanin rahmat dait damé sejahtere tipaq side pade. Pertame-tame, langan Deside Isa Almasih, tiang ngucapang syukur léq Allah lantaran semeton-semeton senamian; séngaq seantéro dunie sampun dengah bahwe side pade tetu-tetu percaye léq Almasih. Tiang tetep inget léq side pade lamun tiang bedo'e. Allah jari saksi bahwe napi saq tiang ucapang niki mule tetu. Ie Allah saq tiang layanin sepenoq angen siq nyampéang Kabar Solah mengenai Bije-Ne. Tiang tunas léq Allah mudah-mudahan mangkin tiang teijinang dateng tipaq side pade. Séngaq tiang melét gati bedait kance side pade, adéq tiang bau bagiang tipaq side pade paice-paice rohani jari neguqang side pade. Maksut tiang, lantaran ite pade-pade sampun bedowé iman léq dalem Deside Isa Almasih, jari ite bau saling hibur dait saling neguqang. Semeton senamian, tiang mélé adéq side pade nenaoq bahwe setetune sampun pire kali tiang beniat gen jangoq side pade, laguq araq doang halanganne. Tiang melét adéq léq antare side pade pegawéan tiang araq éndah hasilne maraq pegawéan tiang sampun berhasil léq antare dengan bangse-bangse lain. Séngaq tiang bedowé kewajiban tipaq selapuq bangse: Dengan Yunani atao saq ndéq Yunani, saq sekolah atao saq ndéq sekolah. Keranaq nike tiang éndah melét gati nyampéang Kabar Solah nike tipaq side pade saq araq léq Roma. Tiang tetu-tetu percaye léq Kabar Solah nike, séngaq Kabar Solah nike kekuatan Allah jari nyelametang selapuq dengan saq percaye; penembéqne dengan Yahudi, beterus dengan bangse-bangse lain éndah. Séngaq léq dalem Kabar Solah nike Allah nyatayang berembé manusie tejariang kenaq léq arepan-Ne sehingge hubungan manusie kance Allah jari solah malik; hal nike langan beriman léq Allah léman penembéq jangke dateng penutuq. Nike pade maraq saq tetulis léq Kitab Suci, “Dengan saq tejariang kenaq léq arepan Allah sehingge hubunganne kance Allah jari solah malik, ie gen idup siq iman!” Léman sorge Allah nyatayang murke-Ne tipaq selapuq dose dait kejahatan manusie, séngaq kejahatan jari penghalang manusie nenaoq kebenaran mengenai Allah. Napi saq bau tetaoq siq manusie mengenai Allah sampun jelas léq dalem até nurani manusie, séngaq Allah mésaq sampun nyatayang hal nike tipaq manusie. Léman Allah cipteang dunie, sipat-sipat Allah saq ndéq penggitan, keadaan-Ne sebagé Allah dait kuase-Ne saq kekel, sampun bau tepahamin siq manusie langan selapuq saq sampun tecipteang. Jari, manusie tetu-tetu ndéq bedowé alasan napi juaq jari ndéq kenal kance Allah. Manusie nenaoq Allah, laguq manusie ndéq mulieang Ie sebagé Allah, dait ndéqne éndah besyukur tipaq Allah. Sebalikne, até ie pade saq bodo sampun jari peteng. Ie pade merase diriqne bijaksane, padahal setetune bodo. Nénten Allah saq kekel saq ie pade sembah, laguq tetato-tetato saq ruene maraq mahluk saq bau maté, misalne: Manusie, kedit, binatang saq benaé empat dait binatang saq ngumang. Keranaq nike Allah menengang ie pade tekuasein siq keméléq angen ie pade jari gawéq saq bejat. Sehingge ie pade piaq hal-hal saq merilaq léq sepadene mésaq. Séngaq ie pade gentiq kebenaran Allah siq duste dait mulieang serte nyembah mahluk, siq ngelupaqang Penciptene saq harus tepuji selaéq-laéqne, amin. Séngaq manusie ngelaksaneang hal saq maraq nike, jari Allah menengang ie pade turut napsune saq hine. Dengan-dengan nine léq antare ie pade ndéqne berangen malik léq dengan mame maraq saq biase léq manusie, laguq malahan berangen kance sepade ninene. Dengan mame éndah maraq nike; ie pade ndéqne malik secare wajar berubungan kance dengan nine, laguq birahi léq sepade mamene. Dengan mame gawéq perbuatan saq merilaq tipaq sepade mamene, sehingge ie pade nerimaq pembalesan saq setimpal kance perbuatan ie pade saq jahat nike. Séngaq manusie ndéq merase perlu nenaoq Allah, make Allah menengang pikiran ie pade jari séde sehingge ie pade ngelaksaneang hal-hal saq ndéq kanggo telaksaneang. Pikiran ie pade penoq siq selapuq hal saq jahat, saq ndéq kenaq; penoq siq keserakahan, lengé angenne, penoq siq dengki, napsu mélé nyematéq, besiaq, nipu dait dendem, ndéqne peduli léq Tuhan, ie pade demen nyumpaq, tukang pitnah, sombong dait kurang ajar, meriq léq Allah. Ie pade ceket gati boyaq care-care baru jari miaq kejahatan, ngelawan dengan toaq. Ie pade ndéq bedowé akal budi, ndéq setie dait ndéq bedowé belas kasihan. Ie pade nenaoq bahwe menurut hukum Allah, dengan saq ngelaksaneang selapuq hal nike patut tehukum maté, laguq timaq maraq nike ie pade tetep ngelaksaneang éndah hal-hal nike; dait malahan ie pade setuju lamun dengan lain éndah ngelaksaneang hal nike. Keranaq nike semeton senamian, sai setetune side pade sehingge hakimin dengan lain? Side mésaq ndéqne bébas léman kesalaqan, séngaq lamun side pade hakimin dengan lain padahal side mésaq ngelaksaneang hal saq pade maraq dengan-dengan nike, make side pade mutusang hukuman tipaq diriqde mésaq. Ite nenaoq bahwe Allah mutusang hukuman tipaq dengan-dengan saq ngelaksaneang perbuatan-perbuatan saq maraq nike, keputusan Allah nike kenaq. Laguq selapuq side pade, semeton-semeton, side mésaq ngelaksaneang éndah hal-hal saq selapuq side pade tuduhang tipaq dengan-dengan lain! Dait side pade pikir selapuq side pade gen bau luput léman hukuman Allah? Atao side pade ngeréméhang kemurahan Allah dait kesolahan kance kesabaran Allah saq beléq nike? Pasti side pade selapuq nenaoq bahwe Allah nyatayang kesolahan angen-Ne séngaq Allah kayun adéq side pade selapuq betobat léman dose-dose side pade. Laguq side pade pagah dait ndéq mélé betobat. Keranaq nike side mésaq saq miaq hukuman side pade jari sayan berat, sewaktu Allah nyatayang murke-Ne dait mutusang hukuman saq adil. Séngaq Allah gen bales sebilang dengan pade maraq perbuatanne. Allah ngicanin idup sejati dait kekel tipaq ie pade saq pacu-pacu ngelaksaneang napi saq solah, adéq ie mauq saq mulie dait saq terhomat, dait saq kekel. Laguq dengan-dengan saq mentingang diriqne mésaq dait ndéq mélé taat léq kebenaran, laguq turut hal-hal saq jahat, make Allah gen murke gati léq dengan-dengan nike. Sebilang dengan saq demen gawéq jahat gen sengsare dait menderite, penembéqne dengan Yahudi, dait dengan bangse-bangse lain éndah. Laguq selapuq dengan saq demen ngelaksaneang napi saq solah gen teicanin kemuliean dait kehormatan dait damé sejahtere léman Allah. Penembéqne tipaq dengan Yahudi maraq nike éndah tipaq dengan bangse-bangse lain. Séngaq perlakuan Allah pade tipaq selapuq dengan. Dengan bangse-bangse lain bedose, ie pade ndéq ngerti Hukum Taurat, jari ie pade tehukum siq Allah léq luah hukum nike. Laguq dengan-dengan Yahudi bedose sesampun ie pade ngerti hukum nike, keranaq nike ie pade gen tetuntut éndah siq dasar hukum nike. Ndéqne dengan saq dengah Hukum Taurat saq tenyatayang sebagé dengan kenaq léq arepan Allah, laguq dengan saq taat léq hukum nike, saq gen tenyatayang kenaq. Dengan bangse-bangse lain ndéqne kenal kance Hukum Taurat, laguq lamun siq keméléqne mésaq ie pade mélé ngelaksaneang napi saq tepréntahang siq Hukum Taurat nike, make aténe mésaq saq jari hukum tipaq ie pade, timaq ie pade ndéq kenal kance Hukum Taurat. Tingkah laku ie pade nyatayang bahwe napi saq tepréntahang siq hukum nike tetulis léq dalem até ie pade. Dait éndah até nurani ie pade buktiang hal nike, séngaq pikiranne mésaq saling tuduh atao saling béle. Maraq nike saq gen telaksane léq jelo saq sampun tetentuang nike. Léq jelo nike -- menurut Kabar Solah saq tiang sampéang, Allah langan Deside Isa Almasih gen hakimin selapuq hal saq teseboq léq dalem até dait pikiran selapuq dengan. Laguq mangkin berembé side pade niki? Side pade ngaku dengan Yahudi, side pade beharep sepenoq angen léq Hukum Taurat dait side pade bangge siq hubungan side pade kance Allah. Side pade nenaoq pekayunan Allah. Dait lantaran teajah kadu Hukum Taurat, side pade nenaoq mbé saq solah dait mbé saq ndéq solah. Side pade yakin bahwe side pade jari pemimpin dengan bute dait cahaye tipaq dengan-dengan saq araq léq dalem peteng. Side pade bimbing dengan-dengan saq ndéqman déwase pikiranne dait guru-guru dengan saq bodo. Side pade yakin bahwe léq dalem Hukum Taurat side pade bedowé penenaoq dait kebenaran. Side pade ngajah dengan lain, nah kembéq side pade ndéq ngajah diriqde mésaq? Side pade ngajah dengan adéqne ndéq memaling, laguq kembéq side mésaq memaling? Side pade ngajah dengan adéq ie ndéq bezinah, laguq kembéq side mésaq bezinah? Side pade meriq tipaq berhale, laguq kembéq side mésaq ngerampok barang-barang léman balé-balé berhale. Side pade bangge-banggeang bahwe side pade bedowé Hukum Taurat, laguq kembéq side mésaq menghine Allah siq care ngelanggar Hukum Taurat nike. Léq dalem Kitab Suci tetulis maraq niki, “Lantaran side, dengan-dengan Yahudi, make peséngan Allah jari tehine léq antare bangse-bangse lain.” Lamun side pade taat léq Hukum Taurat, make sunat side pade nike araq éndah manpaatne. Laguq lamun side pade ndéq taat léq hal-hal saq tepréntahang dalem Hukum Taurat nike, make sunat side pade nike ndéq araq manpaatne malik. Lamun sopoq dengan saq ndéq Yahudi saq ndéq tesunat, laguq ie taat léq Hukum Taurat, napi ie ndéq teanggep siq Allah sebagé dengan saq sampun tesunat? Dait dengan-dengan saq ndéq tesunat laguq saq ngelaksaneang Hukum Taurat, gen hakimin side pade saq bedowé hukum saq tetulis dait sunat, laguq ngelanggar hukum nike. Dengan-dengan Yahudi timaqne bedowé Hukum Taurat dait tesunat, laguq malahan dengan-dengan saq ndéq tesunat saq taat léq Hukum Taurat. Séngaq dengan Yahudi saq sejati ndéqne dengan saq cume aranne doang dengan Yahudi, dait dengan saq tetu-tetu tesunat ie ndéqne dengan saq tesunat secare lahiriah doang. Laguq dengan Yahudi sejati nike, dengan saq ndéq penggitan keyahudianne dait sunat saq sejati nike perobahan léq dalem até siq Roh Allah. Dengan saq maraq nike nerimaq pujian léman Allah, ndéqne léman manusie. Lamun maraq nike napi keuntunganne jari dengan Yahudi? Dait napi manpaatne taat tipaq aturan sunat? Pasti luwéq gati manpaatne! Penembéqne, séngaq tipaq dengan Yahudi Allah percayeang manik-Ne. Laguq berembé lamun separo léman dengan Yahudi ndéq setie léq Allah? Napi lantaran nike Allah jari ndéq setie? Tetu-tetu ndéqne maraq nike! Séngaq sampun jelas Allah tetep kenaq timaq selapuq manusie salaq, léq Kitab Suci araq tetulis, “Adéq Deside terbukti kenaq léq selapuq saq Deside manikang, dait Deside menang sewaktu teadilin.” Laguq lamun kesalaqante nyatayang kebenaran Allah, napi saq mélé ite ucapang malik? Bahwe Allah nénten adil lamun Ie nyatayang murke-Ne? (Mule napi saq teketuanang niki wajar secare manusie.) Tetu-tetu ndéqne maraq nike! Séngaq lamun Allah nénten adil, berembé Ie bau hakimin dunie niki? Laguq lamun lantaran perbuatan saq salaq, kebenaran Allah jari sayan nyate sehingge Ie tepuji, kembéq dengan saq piaq kejahatan nike masih tehakimin sebagé dengan saq bedose? Kembéq ite ndéq kanggo bebase, “Solahan ite piaq hal saq jahat, adéqne timbul hal saq kenaq.” Mule araq dengan-dengan saq pitnah tiang, ie paran tiang ngeraos maraq nike. Dengan-dengan saq maraq nike sepatutne tehukum siq Allah. Nah, napi kedudukante sebagé dengan Yahudi solahan ketimbang kedudukan bangse lain? Tetu-tetu ndéqne maraq nike! Sampun tiang sampéang bahwe dengan Yahudi dait maraq nike éndah dengan bangse-bangse lain, selapuqne sampun tekuasein siq dose. Maraq saq tetulis léq dalem Kitab Suci, “Ndéq araq sopoq dengan juaq saq kenaq léq arepan Allah, ndéq araq sopoq dengan saq ngerti dait ndéq araq sopoq dengan juaq saq nyembah Allah. Selapuq dengan sampun jaoqang diriqne léman Allah; selapuqne sampun sesat. Ndéq araq sopoq dengan saq gawéq hal saq solah, timaq sopoq dengan juaq! Kerongkongan ie pade maraq kuburan saq ngangaq, tipu muslihat sugul léman élaq ie pade dait biwih ie pade nyebarang pitnah, maraq racun ulah. Biwih ie pade penoq siq kutukan dait sumpaq senaq. Naén ie pade becat gati lamun mélé nyiksaq dait nyematéq dengan. Kesusahan dait keancuran, turut ie pade ojok mbé doang ie pade laiq. Ie pade ndéq kenal kance napi nike langan damé, dait rase takut léq Allah tetu-tetu ndéq araq léq dengan nike.” Mangkin ite nenaoq bahwe selapuq saq tetulis dalem Hukum Taurat nike tetujuang tipaq dengan-dengan saq araq léq bawaq kekuasean hukum nike, jari ndéq araq sopoq dengan juaq saq bau ngebéng alasan napi-napi, dait Allah berhak nuntut selapuq isi dunie niki. Séngaq ndéq sopoq dengan juaq saq bau tejariang kenaq léq arepan Allah, sehingge hubunganne kance Allah jari solah malik lantaran ngelaksaneang Hukum Taurat. Sebalikne hukum nike cume nyatayang tipaq manusie bahwe manusie bedose. Laguq mangkin ndéqne kadu Hukum Taurat, Allah sampun nyatayang langan berembé manusie tejariang kenaq léq arepan-Ne. Hukum Taurat dait kitab nabi-nabi sampun nyatayang hal nike, bahwe Allah ngicanin langan tipaq manusie berembé tejariang kenaq léq arepan-Ne, cume lamun manusie beriman léq dalem Deside Isa Almasih. Allah piaq hal nike umaq selapuq dengan saq percaye tipaq Almasih. Allah nénten béde-bédeang dengan. Séngaq selapuq dengan sampun bedose dait ndéqne bau dateng ojok kemuliean Allah. Laguq cume lantaran rahmat-Ne, Allah jariang manusie kenaq léq arepan-Ne secare cume-cume langan penebusan léq dalem Deside Isa Almasih. Allah ngurbanang Deside Isa Almasih, adéq Allah ngalihang murke-Ne léman manusie, dait Deside Isa nanggung hukuman dose-dose manusie. Manusie tejariang kenaq léq arepan Allah lamun ie percaye bahwe Deside Isa Almasih numpahang daraq-Ne dait ngurbanang idup-Ne umaq manusie. Allah piaq maraq nike jari nyatayang keadilan-Ne. Séngaq léq waktu saq laéq Allah sampun sabar tipaq selapuq dose manusie, sehingge Allah nénten hukum ie pade. Laguq mangkin, Allah buktiang keadilan-Ne tipaq dose-dose manusie nike, Allah buktiang bahwe diriq-Ne kenaq dait sebilang dengan saq beriman léq dalem Deside Isa Almasih tenyatayang sebagé dengan saq kenaq léq arepan Allah. Keranaq nike, ite ndéq bedowé alasan malik jari nyombongang diriq. Kembéq maraq nike? Napi lantaran ite ngelaksaneang saq tetulis dalem Hukum Taurat? Ndéq! Laguq lantaran imante. Séngaq kesimpulanne maraq niki: Manusie tenyatayang sampun tejariang kenaq léq arepan Allah sehingge hubunganne kance Allah jari solah malik, ndéqne lantaran ie ngelaksaneang napi saq tetulis dalem Hukum Taurat, laguq lantaran ie beriman léq dalem Deside Isa Almasih. Napi Allah nike Allahne dengan Yahudi doang? Napi Ie Allah dengan bangse-bangse lain éndah? Tetu. Mule Ie éndah Allahne dengan bangse-bangse lain! Séngaq Allah cume sopoq. Ie gen jariang kenaq léq arepan-Ne, dengan-dengan Yahudi langan iman dait éndah dengan bangse-bangse lain langan iman. Napi niki artine bahwe lantaran ite beriman léq dalem Deside Isa Almasih, ite batalang Hukum Taurat? Tetu-tetu ndéqne maraq nike! Malahan siq imante léq dalem Deside Isa Almasih nike, ite ngukuhang hukum nike. Lamun maraq nike napi pendapet ite mengenai Ibrahim, leluhur bangsente? Berembé pengalamanne? Lamun hal-hal saq ie laksaneang miaq ie tejariang kenaq léq arepan Allah sehingge hubunganne kance Allah jari solah malik, make araq éndah alasan Ibrahim jari nyombongang diriqne, laguq ie ndéq bau nyombongang diriqne léq arepan Allah. Léq Kitab Suci araq tetulis, “Ibrahim percaye tipaq Allah, dait lantaran percayene nike ie teterimaq siq Allah sebagé dengan saq tejariang kenaq léq arepan Allah.” Dengan saq begawéan nerimaq upaq dait upaqne nike ndéqne teanggep jari hadiah séngaq nike hakne. Sebalikne dengan saq ndéq begawéan laguq percaye léq Allah saq bau jariang dengan jahat tejariang kenaq léq arepan-Ne, nike lantaran imanne ndéqne lantaran hasil perbuatanne mésaq. Pade maraq basen Daud éndah, bahagie dengan saq sampun teterimaq sebagé dengan saq tejariang kenaq léq arepan Allah sehingge hubunganne kance Allah jari solah malik, ndéqne lantaran perbuatanne, “Bahagie dengan saq kesalaqanne teampunin dait dose-dosene sampun teapus siq Allah! Bahagie dengan saq dose-dosene ndéq tetuntut siq Allah!” Napi ucapan bahagie niki cume tetujuang tipaq dengan-dengan Yahudi doang? Atao tipaq dengan bangse-bangse lain éndah? Sendéqmanne sampun tiang sebut bahwe Ibrahim teterimaq siq Allah sebagé dengan saq tejariang kenaq léq arepan-Ne, séngaq Ibrahim beriman léq Ie. Nah, piran Allah nyatayang hal nike tipaq Ibrahim? Sendéqman atao sesampun Ibrahim tesunat sesuai préntah Allah? Mule sendéqman ie tesunat, ndéqne sesampun ie tesunat. Ie tesunat mudian, dait sunatne nike jari tande bahwe Allah sampun nerimaq ie tejariang kenaq léq arepan Allah, séngaq ie beriman tipaq Allah. Ie teterimaq siq Allah sewaktu ie ndéqman ngelaksaneang sunat saq tepréntahang siq Allah. Dait Ibrahim jari bapaq selapuq dengan percaye saq ndéq besunat, dait ie pade teterimaq siq Allah sebagé dengan saq tejariang kenaq léq arepan-Ne. Ibrahim éndah bapaq dengan-dengan saq besunat, nike dengan-dengan saq ndéq cume taat tipaq aturan sunat, laguq lantaran ie pade éndah idup beriman tipaq Allah, pade maraq Ibrahim saq beriman sendéqman ie ngelaksaneang sunat saq tepréntahang siq Allah. Allah bejanji tipaq Ibrahim dait keturunanne bahwe dunie niki gen jari dowéne. Allah bejanji maraq nike ndéq lantaran Ibrahim taat léq Hukum Taurat, laguq lantaran ie beriman tipaq Allah sehingge ie teterimaq siq Allah sebagé dengan saq tejariang kenaq léq arepan-Ne sehingge hubunganne kance Allah jari solah malik. Séngaq lamun cume dengan-dengan saq taat tipaq Hukum Taurat doang saq gen nerimaq napi saq tejanjiqang siq Allah, make ndéq araq artine dengan beriman tipaq Allah, dait janji Allah niki éndah batal. Hukum Taurat datengang murke Allah, laguq lamun ndéq araq hukum nike make ndéq gen araq éndah pelanggaran. Keranaq nike, janji Allah jari dasar dengan beriman tipaq Allah. Hal nike jari jaminan umaq selapuq keturunan Ibrahim. Janji nike teicanin tipaq ie pade langan rahmat léman Allah, ndéq cume jari dengan saq taat tipaq Hukum Taurat doang, laguq umaq ie pade saq beriman tipaq Allah, pade maraq Ibrahim nike sebagé bapaqte selapuq. Séngaq maraq niki Allah bemanik tipaq Ibrahim, “Tiang sampun jariang side umaq selapuq bangse.” Ibrahim nike bapaqte léq arepan Allah. Dait Ibrahim percaye tipaq Allah. Ie Allah saq ngidupang dengan ninggal, Ie éndah Allah saq cipteang siq manik-Ne napi saq ndéq araq jari araq. Timaq sampun ndéq araq harepan malik, laguq Ibrahim tetep doang beharep dait percaye. Keranaq nike ie jari bapaq luwéq bangse. Pade maraq saq tetulis dalem Kitab Suci, “Keturunan side gen jari luwéq gati.” Ibrahim nenaoq léq waktu nike bahwe ie ndéq mungkin malik gen bedowé keturunan, séngaq ragene sampun lingsir gati dait umurne gen satus taun; maraq nike éndah Sarah, sebiniqanne nike bangkol, laguq iman Ibrahim ndéq jari kurang. Ie tetep percaye dait ndéq ragu-ragu tipaq janji Allah, malahan imanne jariang ie sayan kuat -- sehingge ie mulieang Allah. Ie yakin gati bahwe Allah pasti bau ngelaksaneang napi saq sampun Ie janjiqang nike. Keranaq nike Ibrahim teterimaq siq Allah sebagé dengan saq tejariang kenaq léq arepan Allah sehingge hubunganne kance Allah jari solah malik. Manik Allah léq dalem Kitab Suci, “Teterimaq siq Allah sebagé dengan saq tejariang kenaq léq arepan Allah sehingge hubunganne kance Allah jari solah malik,” tetulis ndéq umaq Ibrahim doang, laguq umaq ite éndah. Ite éndah gen teterimaq siq Allah sebagé dengan saq tejariang kenaq léq arepan Allah sehingge hubungante kance Allah jari solah malik, séngaq ite percaye tipaq Allah saq ngidupang Junjungante Saq Mulie Deside Isa léman ninggal. Deside Isa niki sampun teserahang jari tematéq lantaran dose-dosente; terus Ie teidupang malik siq Allah adéq ite bau tejariang kenaq léq arepan-Ne sehingge hubungante kance Allah jari solah malik. Mangkin ite sampun tejariang kenaq léq arepan Allah sehingge hubungante kance Allah jari solah malik lantaran imante. Dait lantaran nike ite bedowé damé sejahtere kance Allah langan Junjungante Saq Mulie Deside Isa Almasih. Séngaq ite beriman léq dalem Deside Isa, langan Ie ite bau tame ojok dalem rahmat Allah, dait mangkin siq rahmat nike ite idup. Keranaq nike ite besukecite dait beharep bahwe ite gen nerimaq kemuliean Allah! Malahan luwéqan malik, ite éndah besukecite léq dalem penderitean, séngaq ite nenaoq bahwe penderitean miaq dengan jari tekun. Dait ketekunan miaq dengan jari tahen uji; niki saq nimbulang pengharepan. Dait pengharepan saq maraq niki ndéq gen ngecéweang ite, séngaq aténte sampun teisiq siq Allah siq kasih-Ne. Hal nike telaksaneang siq Allah langan Roh Suci-Ne, saq sampun teicanin tipaq ite. Léq waktu ite dalem keadaan lemah, Almasih ninggal umaq ite dengan-dengan saq durhake, léq waktu saq tepat saq tetentuang siq Allah. Séngaq ndéqne mudaq sopoq dengan réde maté umaq dengan saq kenaq, laguq sang umaq dengan saq solah araq dengan saq bani maté. Laguq Allah nyatayang kasih-Ne léq ite sewaktu Deside Isa ninggal umaq ite, léq waktu ite masih bedose. Mangkin ite sampun tejariang kenaq léq arepan Allah sehingge hubungante kance Allah jari solah malik langan ninggal-Ne Almasih; keranaq nike pasti ite gen teselametang éndah léman murke Allah siq Almasih. Lamun léq waktu ite masih jari musuh Allah, ite tedaméang kance Allah siq ninggal Bije-Ne, lebih-lebih mangkin sesampun hubungante kance Allah solah malik, pasti ite gen teselametang éndah langan idup Almasih. Dait luwéqan malik, ite éndah besukecite léq dalem Allah langan Junjungante Saq Mulie Deside Isa Almasih, séngaq langan Ie ite sampun nerimaq pendaméan. Dose tame ojok dalem dunie langan sopoq dengan, dait léman dose nike sampun datengang kematéan, akibatne, selapuq umat manusie gen ngalamin kematéan, lantaran selapuq dengan bedose. Sendéqman Hukum Taurat teturunang, dose sampun araq léq dalem dunie. Laguq dose ndéqne teperitungang, séngaq ndéq araq hukum saq bau telanggar. Timaq maraq nike, kematéan nguasein selapuq manusie léman jaman Adam jangke jaman Musa, malahan dengan-dengan saq ndéq miaq pelanggaran maraq saq telaksaneang siq Adam, dengan-dengan nike milu éndah tekuasein siq kematéan. Adam nike jari gambaran sopoq dengan saq gen rauh. Laguq paice Allah tetu-tetu béde kance pelanggaran saq tepiaq siq Adam. Pelanggaran Adam jari penyebap luwéq dengan maté, laguq jaoq beléqan malik rahmat léman Allah saq teicanin tipaq dengan luwéq, langan sopoq dengan, nike Deside Isa Almasih. Rahmat Allah éndah jaoq beléqan léman dose sopoq dengan nike, séngaq penghakiman léq sopoq pelanggaran saq tepiaq siq Adam, nike jari penyebap penghukuman. Laguq rahmat Allah tipaq luwéq pelanggaran, nike jari penyebap manusie tejariang kenaq léq arepan Allah. Langan sopoq pelanggaran saq tepiaq siq Adam kematéan nguasein selapuq dengan. Laguq selapuq dengan saq nerimaq kelimpahan rahmat dait paice tejariang kenaq léq arepan Allah langan Deside Isa Almasih, gen idup dait bekuase. Séngaq sopoq pelanggaran saq tepiaq siq Adam, sampun datengang penghukuman tipaq sebilang manusie. Laguq sopoq karye Almasih saq jariang manusie kenaq léq arepan Allah, miaq selapuq dengan kenaq léq arepan Allah dait ngicanin ie pade idup. Dait maraq luwéq dengan jari dengan bedose lantaran sopoq dengan saq ndéq taat, maraq nike éndah luwéq dengan gen bau tejariang kenaq léq arepan Allah lantaran sopoq dengan lain taat léq Allah. Allah ngicanin Hukum Taurat adéq selapuq dengan bau serioq berembé bedosene ie pade, laguq sayan manusie bedose, sayan belimpah-limpah rahmat Allah. Pade maraq dose nguasein selapuq dengan dait datengang kematéan, mangkin rahmat Allah bekuase dait jariang ite kenaq léq arepan Allah, sehingge ite nerimaq idup sejati dait kekel langan Junjungante Saq Mulie Deside Isa Almasih. Lamun maraq nike napi saq bau ite raosang malik? Napi ite tetep doang gawéq dose, adéq rahmat Allah sayan beromboq? Pasti ndéqne maraq nike; dose ndéq bekuase malik léq ite, jari segerah ite bau terus-terusan idup dalem dose? Semeton senamian, napi side pade ndéq nenaoq bahwe sewaktu ite tebaptis léq dalem Almasih, artine ite tebaptis dalem ninggal-Ne. Siq baptisan ite tekubur bareng kance Almasih dait milu ninggal bareng Ie, adéqne pade maraq Almasih teidupang léman ninggal-Ne siq kemuliean Bapa saq mulie, maraq nike éndah ite gen idup dalem idup saq baru. Lamun ite sampun jari sopoq kance Almasih dalem ninggal-Ne, ite éndah gen jari sopoq kance Ie dalem idup-Ne saq sampun teidupang malik. Selapuqte sampun nenaoq, bahwe tabiat ite saq laéq sampun tematéqang bareng Almasih léq kayuq salib adéq awakte saq bedose nike telang kuasene, adéq ite ndéqne malik tekuasein siq dose. Séngaq lamun sopoq dengan ninggal, dengan nike tebébasang léman kuase dose. Laguq lamun ite sampun ninggal kance Almasih, ite percaye bahwe ite éndah gen idup bareng kance Ie. Séngaq ite nenaoq bahwe Almasih sampun idup malik léman ninggal, dait Ie nénten gen ninggal malik; kematéan nénten bekuase malik léq diriq-Ne. Ninggal saq Ie alamin, nike ninggal tipaq dose, hal nike telaksane cume sekali doang jari selaéq-laéqne. Dait kehidupan-Ne nike idup bagi Allah. Maraq nike éndah side pade harus anggep bahwe diriq side pade sampun ninggal tipaq dose, laguq idup bagi Allah dalem Deside Isa Almasih. Ndaq malik alurang dose nguasein awakde saq iniq binase, adéq side pade ndaq turut keméléqne saq jahat. Ndaq éndah side pade nyerahang bagian-bagian awakde tipaq kuase dose jari tekadu léq maksut-maksut jahat. Laguq serahang diriqde tipaq Allah sebagé dengan saq sampun tealihang léman kematéan tipaq idup. Dait serahang bagian-bagian awakde tipaq Allah adéqne tekadu jari maksut-maksut saq kenaq léq arepan Allah. Dose ndéqne kanggo nguasein side pade, séngaq side pade ndéq malik idup léq bawaq Hukum Taurat, laguq léq bawaq rahmat Allah. Mangkin napi kesimpulante? Napi ite gen gawéq dose lantaran ite ndéq léq bawaq Hukum Taurat, laguq léq bawaq rahmat Allah? Pasti ndéqne maraq nike! Napi side pade nenaoq bahwe lamun side pade nyerahang diriq tipaq sopoq dengan jari taat léq ie, make artine side pade jari pelayan dengan nike – léq dalem dose saq jauq side pade ojok kematéan, atao dalem ketaatan saq jariang side pade kenaq léq arepan Allah sehingge hubungan side pade kance Allah jari solah malik. Laguq syukur tipaq Allah, séngaq laéq side pade jari panjak dose, laguq mangkin siq sepenoq angen side pade taat léq pengajahan saq sampun teajahang tipaq side pade. Side pade sampun tebébasang léman dose, dait sampun jari hambe saq tejariang kenaq léq arepan Allah. Lantaran penenaoq side pade kurang gati, tiang kadu conto-conto mengenai hambe, adéq side pade bau ngerti. Laéq side pade sampun nyerahang bagian-bagian awakde sebagé panjak hal-hal saq kotor dait jahat. Hal nike jauq side pade tipaq maksut-maksut saq jahat. Maraq nike éndah mangkin side pade harus nyerahang awak side pade sebagé hambe saq tejariang kenaq léq arepan Allah. Hal nike jauq side pade tipaq penyucian. Sewaktu side pade jari hambe dose, side pade ndéq léq bawaq kuase saq jariang side pade kenaq léq arepan Allah. Napi saq jari keuntungan side pade léq waktu nike? Mangkin selapuqne jari hal saq merilaq, séngaq perbuatan-perbuatan side pade nike cume jauq kematéan. Laguq mangkin side pade sampun tebébasang léman dose, dait side pade jari pelayan Allah, keuntungan saq side pade mauq mangkin, penyucian saq ahirne jauq side pade tipaq idup sejati dait kekel. Séngaq upaq dose nike kematéan; laguq paice Allah nike idup sejati dait kekel dalem Junjungante Saq Mulie Deside Isa Almasih. Semeton-semeton tiang! Side pade sampun nenaoq Hukum Taurat. Jari side pade nenaoq bahwe kekuasean hukum tipaq sopoq dengan berlaku cume sewaktu dengan nike idup. Misalne sopoq dengan nine saq bedowé semame, ie harus teriket léq hukum kance semamene saq masih idup. Laguq lamun semamene ninggal, dengan nine nike bébas léman hukum saq ngiket ie tipaq semamene. Lamun dengan nine nike idup kance dengan mame lain sewaktu semamene masih araq, make dengan nine nike teparan bezinah. Laguq lamun semamene ninggal, make menurut hukum ie sampun bébas, dait lamun ie merariq malik kance dengan mame saq lain, make ie ndéq bezinah. Maraq nike éndah halne side pade, semeton tiang senamian. Side pade sampun ninggal tipaq Hukum Taurat langan rage Deside Isa Almasih dait jari dowé-Ne saq sampun teidupang malik léman ninggal. Deside Isa teidupang léman ninggal adéq ite ngasilang buaq saq solah bagi Allah léq dalem idupte. Séngaq, laéq ite idup menurut keméléq awak saq bedose. Léq waktu nike keméléq nike timbul séngaq araq Hukum Taurat saq pengaruhin diriqte. Nike jari penyebap ite ngelaksaneang hal-hal saq jauq akibat kematéan. Laguq mangkin ite sampun tebébasang léman Hukum Taurat. Ite sampun ninggal umaq hukum saq laéq nguasein ite. Ite ndéq malik ngelayanin menurut hukum saq tetulis nike. Mangkin ite ngelayanin dalem keadaan saq baru dalem Roh Allah. Lamun maraq nike, napi saq bau ite ucapang malik? Napi Hukum Taurat nike dose? Pasti ndéq! Laguq setetune hukum nike saq ngajah tiang mengenai dose. Tiang ndéq gen nenaoq napi artine melét nike, lamun ndéq tebadaq siq hukum nike, “Ndaq melét.” Langan hukum nike, dose mauq kesempatan jari nimbulang macem-macem keméléq léq dalem atén tiang; séngaq lamun Hukum Taurat nike ndéq araq, make dose éndah maté. Laéq tiang idup ndéq kadu Hukum Taurat. Laguq sesampun araq préntah léman hukum nike dose mulai idup dait tiang maté. Make préntah nike saq maksutne mule jari ngicanin idup malahan datengang kematéan tipaq tiang. Séngaq langan préntah nike, dose bait kesempatan nipu dait nyematéq tiang. Hukum Taurat nike suci dait sebilang préntah léq dalem hukum nike éndah suci, adil dait solah. Mangkin, napi niki artine bahwe saq solah nike datengang kematéan tipaq tiang? Pasti ndéq! Dose nike saq datengang kematéan tipaq tiang kadu saq solah nike, adéq jari sayan nyate éndah kejahatan dose nike. Dait langan préntah-préntah nike sayan nyate berembé jahatne dose nike. Séngaq ite nenaoq bahwe Hukum Taurat nike mengenai hal-hal saq berubungan kance roh; laguq tiang niki manusie siq keméléq awak saq bedose saq sampun tejual jari panjak dose. Séngaq tiang mésaq ndéq ngerti perbuatan tiang. Hal-hal saq melét tiang laksaneang nike, ndéq tiang laksaneang; laguq hal-hal saq tiang meriq, malahan nike saq tiang laksaneang. Mangkin lamun tiang laksaneang hal-hal saq betentangan kance keméléq tiang, nike artine tiang setuju bahwe Hukum Taurat nike solah. Jari, setetune ndéqne tiang saq ngelaksaneang nike, laguq dose saq nguasein diriq tiang. Séngaq tiang nenaoq bahwe ndéq araq sopoq juaq saq solah léq dalem diriq tiang; nike keméléq awak tiang saq bedose. Séngaq araq angen tiang piaq hal saq solah, laguq tiang ndéq sanggup laksaneang. Tiang ndéq ngelaksaneang saq solah saq tiang melét laksaneang, laguq tiang ngelaksaneang hal-hal saq jahat, saq ndéq mélé tiang laksaneang. Lamun tiang ngelaksaneang hal-hal saq ndéq mélé tiang laksaneang, nike artine ndéqne tiang saq ngelaksaneang hal-hal nike, laguq dose saq nguasein diriq tiang. Jari, tiang ndait hukum niki: Lamun tiang mélé ngelaksaneang saq solah, make cume saq jahat doang saq timbul léman diriq tiang. Mule batin tiang suke léq hukum Allah, laguq tiang sadar bahwe léq dalem bagian-bagian awak tiang araq éndah hukum lain saq pengaruhin tiang -- nike hukum saq ngelawan hukum akal budi tiang. Keranaq nike tiang teriket dalem hukum dose saq araq léq bagian-bagian awak tiang. Ndéqne araq malik penghukuman léq dengan-dengan saq sampun idup léq dalem Deside Isa Almasih. Séngaq hukum Roh Allah saq miaq ite idup léq dalem Deside Isa Almasih sampun bébasang tiang léman hukum saq jauq dose dait kematéan. Napi saq ndéq mungkin telaksaneang siq Hukum Taurat lantaran kelemahan manusie, sampun telaksaneang siq Allah. Dose saq araq léq dalem tabiat manusie nike sampun tekalahang siq Allah langan pengurbanan Bije-Ne mésaq saq rauh ojok dunie jari maraq manusie saq bedose, jari ngapus dose. Hal nike telaksaneang siq Allah adéq pekayunan-Ne saq tenyatayang dalem Hukum Taurat nike bau telaksaneang léq dalem diriqte saq idup menurut Roh Allah, dait ndéqne menurut tabiat manusie. Dengan-dengan saq idup menurut tabiat manusie, gen tetep mikirang napi saq jari keméléq tabiat manusiene, laguq dengan-dengan saq idup menurut Roh Allah, ie gen tetep mikirang napi saq jari pekayunan Roh Allah. Lamun pikirande tekuasein siq keméléq tabiat manusie, make akibatne kematéan, laguq lamun pikirande tekuasein siq Roh Allah, make akibatne idup dait damé sejahtere kance Allah. Dengan saq pikiranne tekuasein siq keméléq tabiat manusie, dengan nike bemusuhan kance Allah; lantaran dengan nike ndéqne taat léq hukum Allah; dait mule ie ndéq iniq patuh léq hukum Allah. Dengan-dengan saq idup menurut tabiat manusie, ndéqne mungkin nyenengang Allah. Laguq side pade ndéq idup menurut tabiat manusie, side pade idup menurut Roh Allah -- lamun, Roh Allah tetu-tetu araq léq dalem diriqde. Dengan saq ndéq bedowé Roh Almasih, ie ndéqne dowén Almasih. Laguq lamun Almasih idup léq dalem diriqde, make timaq awakde gen ninggal lantaran dose, laguq Roh Allah ngicanin idup tipaq side, séngaq hubungande kance Allah sampun solah. Lamun Roh Allah saq ngidupang Almasih léman ninggal idup léq dalem diriqde, make Ie saq ngidupang Almasih léman ninggal gen ngidupang éndah awakde saq iniq binase nike siq Roh-Ne saq idup léq dalem diriqde. Keranaq nike semeton senamian, ite bedowé tanggung jawab, laguq tanggung jawab nike ndéqne léq tabiat manusie; ite ndéq perlu idup menurut keméléqne. Séngaq lamun side pade idup menurut tabiat manusie, make side pade gen maté; laguq lamun siq kuase Roh Allah side pade terus doang nyematéq perbuatan-perbuatande saq bedose, make side pade gen idup. Dengan-dengan saq tebimbing siq Roh Allah, ie jari bije-bije dowén Allah. Séngaq Roh saq teicanin siq Allah tipaq side pade, ndéq gen miaq side jari hambe sehingge side pade idup dalem ketakutan, laguq Roh Allah nike jariang side bije-bije dowén Allah. Dait siq kuase Roh Allah nike ite bau nyebut Allah nike, “Bapa, ya Bapa!” Roh Allah bareng kance rohte nyatayang bahwe ite niki jari bije-bije dowén Allah. Nah, lamun ite bije dowén Allah, make ite éndah ahli waris-Ne saq gen nerimaq berkah-berkah saq tesedieang siq Allah jari bije-bije dowé-Ne. Ite gen nerimaq bareng-bareng kance Almasih napi saq sampun tesedieang siq Allah umaq Ie; séngaq lamun ite milu menderite bareng kance Almasih, ite gen milu temulieang bareng kance Ie. Selapuq penderitean saq ite alamin mangkin niki, menurut pendapet tiang, tetu-tetu ndéqne bau tebandingang siq kemuliean saq gen tenyatayang tipaq ite. Selapuq mahluk melét gati ngantih piran waktune Allah nyatayang bije-bije saq jari dowé-Ne. Séngaq selapuq mahluk araq léq bawaq pikiran saq sie-sie, ndéqne lantaran keméléqne mésaq, laguq siq pekayunan-Ne, siq pengharepan bahwe: Selapuq mahluk gen tebébasang léman kuase saq binaseang dait gen tebébasang serte temulieang bareng kance bije-bije dowén Allah. Ite nenaoq bahwe jangke mangkin selapuq mahluk ngeluh lantaran menderite, maraq dengan nine saq menderite sewaktune nganak. Ndéqne selapuq mahluk doang saq ngeluh, laguq ite mésaq éndah ngeluh léq dalem aténte. Ite saq sampun nerimaq paice léman hasil penembéq Roh Allah, ite masih doang ngantih piran Allah bébasang diriqte selapuqne dait jariang ite bije-bije dowé-Ne. Séngaq siq beharep, make ite teselametang. Laguq lamun napi saq ite harepang nike sampun ite serioq, make nike ndéqne malik harepan. Séngaq sai saq masih beharep léq napi saq sampun ie serioq? Laguq lamun ite beharep léq hal saq ndéqman ite serioq, make ite gen sabar ngantih. Maraq nike éndah Roh Allah nulung ite lamun ite ndéq kuat. Séngaq ite ndéq nenaoq berembé setetune ite bedo'e; Roh nike mésaq saq do'eang ite tipaq Allah siq keluhan-keluhan saq ndéq bau ite ucapang. Make Allah saq selidik até manusie, wikan pekayunan Roh nike, séngaq Roh nike do'eang dengan-dengan saq tehususang bagi Allah, pade maraq pekayunan Allah. Ite nenaoq mangkin bahwe Allah milu bekarye ngatur selapuq hal, sehingge ngasilang saq solah umaq dengan-dengan saq ngasihin Ie dait saq tepiléq menurut rencane-Ne. Séngaq selapuq dengan saq tepiléq siq Allah léman penembéq sampun tetentuang bahwe ie pade gen jari maraq Bije-Ne. Bije-Ne nike jari saq penembéq léq antare semeton-semeton senamian. Allah miléq dengan-dengan saq sampun tetentuang juluan; dait dengan-dengan saq tepiléq nike tejariang kenaq léq arepan-Ne sehingge hubungan ie pade kance Allah jari solah malik dait ie pade temulieang éndah. Mangkin, napi saq gen teraosang malik mengenai selapuqne nike? Lamun Allah léq pihak ite, sai saq bau ngelawan ite? Allah rédeang Bije-Ne mésaq, malahan Ie nyerahang Bije nike umaq ite selapuq. Segerah Allah nénten gen ngicanin secare cume-cume tipaq ite selapuq hal saq lainne? Sai saq gen nuntut ite, dengan-dengan saq tepiléq siq Allah? Allah mésaq nyatayang bahwe ite tejariang kenaq léq arepan-Ne sehingge hubungante kance Ie jari solah malik. Napi araq dengan saq mélé ngukum ite? Malahan Deside Isa Almasih do'eang ite! Ie saq sampun ninggal dait saq sampun teidupang malik léman ninggal dait melinggih léq sedi kanan Allah. Napi araq saq bau misahang kasih Junjungante Saq Mulie Deside Isa Almasih kance ite? Napi bau kesusahan, kesengsarean, penganiayean, kelapahan, kemiskinan, bahaye atao kematéan gen jari penghalang? Dalem Kitab Suci tetulis maraq niki, “Sejeloan tiang pade idup léq dalem bahaye maut lantaran Deside. Tiang pade teanggep maraq dombe saq gen tesembeléh.” Setetune ndéq! Malahan léq keadaan saq maraq nike ite lebihan léman dengan-dengan menang, langan Ie saq ngasihin ite! Séngaq tiang yakin gati bahwe léq seantéro dunie, kematéan dait kehidupan, malaékat dait penguase dait anceman-anceman saq araq éraq; atao kekuatan-kekuatan saq lainne; saq araq léq langit atao léq bawaq gumi atao éndah hal-hal napi doang saq lain, selapuqne ndéq gen bau misahang kasih Allah léq ite, maraq saq sampun tenyatayang léq dalem Deside Isa Almasih, Junjungante Saq Mulie. Napi saq tiang ucapang niki kenaq séngaq tiang ngeraos léq arepan Almasih. Tiang ndéq beduste, até nurani tiang saq tebimbing siq Roh Suci ngeyakinang tiang éndah napi saq tiang sampéang niki kenaq. Atén tiang sedih gati dait menderite gati lantaran semeton-semeton tiang saq sebangse kance tiang, nike bangse Israel. Séngaq umaq ie pade tiang mésaq réde tekutuk siq Allah dait tekelin léman Almasih. Ie pade dengan-dengan saq tepiléq siq Allah dait tejariang bije-bije dowé-Ne, Ie nyatayang kemuliean-Ne tipaq ie pade dait ngaraqang perjanjian-perjanjian kance ie pade dait ngebéng ie pade Hukum Taurat. Ie pade tepréntahang siq Allah berembé entan beribadah, dait ie pade sampun nerimaq janji-janji-Ne. Ie pade keturunan léman leluhurte. Secare jasmani Almasih asalne léman bangse ie pade. Ie atasan malik léman selapuqne. Ie Allah saq harus tepuji jangke selaéq-laéqne. Amin! Laguq Manik Allah ndéq mungkin gagal; ndéqne selapuq dengan saq asalne léman Israel nike dengan Israel. Ndéqne selapuq keturunan Ibrahim nike bije-bije Ibrahim, séngaq Manik Allah tipaq Ibrahim, “Cume keturunan Ishak doang saq gen tesebut keturunande.” Nike artine bahwe keturunan Ibrahim saq jari bije-bije dowén Allah cume keturunanne saq tebijeang lantaran janji Allah. Séngaq maraq niki janji Allah nike, “Léq waktu saq tetentuang, Tiang gen tulak, dait Sarah gen bedowé bije mame.” Dait niki éndah: Ribkah bijeang due bije mame léman sopoq amaq, Ishak leluhurte. Sendéqman kedue bije nike tebijeang, Allah sampun nentuang piléqan-Ne, adéq rencane-Ne mengenai sai saq Ie piléq tetep berlaku. Séngaq léq waktu kedue bije Ribkah nike ndéqman tao ngelaksaneang napi-napi saq solah atao saq jahat, Allah sampun bemanik tipaq Ribkah, “Saq beléqan gen jari pelayan saq kodéqan.” Léq dalem Kitab Suci tetulis Allah bemanik maraq niki, “Yakub Tiang kasihin laguq Esau Tiang meriq.” Napi kesimpulante mangkin? Allah nénten adil? Ndéqne mungkin! Séngaq Allah bemanik tipaq Musa, “Tiang gen nyatayang rahmat tipaq dengan saq Tiang suke nyatayang rahmat, dait Tiang gen nyatayang belas kasihan tipaq dengan saq Tiang suke nyatayang belas kasihan.” Jari, keputusan Allah nike nénten teicanin lantaran keméléq manusie atao usahe manusie, laguq menurut rahmat Allah. Séngaq léq dalem Kitab Suci tetulis, “Allah bemanik tipaq raje Mesir, ‘Tiang jariang side raje siq sopoq maksut niki, adéq langan side Tiang nyatayang kekuasean dait miaq aran Tiang kesohor léq seantéro dunie.’ ” Jari, Allah nyatayang rahmat-Ne tipaq sopoq dengan, lamun Allah kayunang hal nike. Dait Allah miaq dengan jari pagah, lamun Allah kayunang hal nike éndah. Nah, side pade gen bebase léq tiang, “Lamun maraq nike kembéq Allah masih nyalahang manusie? Tekan ndéq araq sopoq dengan juaq saq bau halangin pekayunan Allah?” Laguq side pade, side pade cume manusie biase, dait side pade ndéq patut nimbal tipaq Allah! Napi bau barang saq tepiaq beketuan léq dengan saq miaq, “Kembéq side piaq tiang maraq niki?” Napi dengan saq miaq keméq nike ndéq bedowé hak miaq tanaq malit nike semélé angenne? Léman sebongkah tanaq malit, dengan nike berhak miaq due macem rue: Saq sopoq tekadu jari tujuan saq mulie, dait saq sopoqne malik tekadu jari tujuan biase. Maraq nike éndah napi saq tecipteang siq Allah. Allah nyatayang murke-Ne dait nyatayang kekuasean-Ne. Laguq Allah éndah sabar tipaq ie pade saq harus tehukum lantaran perbuatanne miaq Allah jari murke. Malahan Allah sabar jari nyatayang kesugihan dait kesolahan-Ne saq belimpah-limpah tipaq dengan-dengan saq Ie kasihin, saq sampun Ie siepang sendéqmanne jari nerimaq kemuliean-Ne, termasuk ite saq sampun temanikang siq Allah, ndéqne léman bangse Yahudi doang, laguq léman bangse-bangse lain éndah. Séngaq léq dalem kitab Nabi Hosea, Allah bemanik, “Dengan-dengan saq ndéq dowén Tiang, gen Tiang sebut ‘Bije-bije dowén Tiang’. Bangse saq ndéq Tiang kasihin, gen Tiang sebut ‘Kekasih Tiang’. Dait léq taoq léq mbé tebadaq tipaq dengan, ‘Side pade ndéqne dengan-dengan dowén Tiang’, gen tesebut, ‘Bije-bije dowén Allah saq idup.’ ” Nabi Yesaya éndah bebase secare tegas mengenai bangse Israel, “Timaq jumlah bangse Israel nike maraq gerés léq segare, cume sekediq doang saq gen selamet; séngaq Tuhan gen gelis ngukum selapuq isi dunie, adil dait sempurne.” Yesaya éndah bebase maraq niki, “Seandéne Tuhan penguase alam semeste ndéq ngadéqang ite keturunan, pasti ite selapuq sampun maraq Sodom dait Gomora.” Jari, kesimpulanne: Bangse-bangse lain saq ndéq uwah berusahe adéqne jari kenaq léq arepan Allah, mangkin tejariang kenaq léq arepan Allah sehingge hubungan ie pade kance Allah jari solah malik langan iman ie pade. Sebalikne dengan-dengan Yahudi tetep berusahe taat léq hukum adéq tejariang kenaq léq arepan Allah. Laguq malahan ie pade ndéq berhasil. Kembéq ie pade ndéq berhasil? Séngaq ie pade ngelaksaneang hal nike ndéqne lantaran beriman tipaq Allah, laguq siq usahene mésaq. Make ie pade geriq kedantuk léq “Batu Sandungan”. Mengenai batu nike tetulis léq Kitab Suci maraq niki, “Perhatiang niki: Léq Sion sampun Tiang toloq sopoq batu saq gen miaq dengan kedampes; sopoq batu saq miaq dengan geriq. Laguq dengan saq percaye léq Ie, ndéq gen teperilaq.” Semeton senamian! Tiang melét gati adéq bangse tiang éndah teselametang. Dait tiang tetu-tetu do'eang ie pade tipaq Allah. Tiang bau ngebéng kesaksian bahwe setetune ie pade semanget gati ngawule léq Allah. Laguq semangetne nike ndéq tedasarang siq pengertian saq kenaq. Ie pade ndéq nenaoq berembé adéqne jari kenaq léq arepan Allah sehingge hubungan ie pade kance Allah jari solah malik. Dait lantaran ie pade cume boyaq siq carene mésaq adéqne jari kenaq léq arepan Allah, lantaran hal nike ie pade ndéq patuh léq care saq teicanin siq Allah saq jariang manusie kenaq léq arepan-Ne. Séngaq Almasih nike tujuan léman Hukum Taurat. Jari, sebilang dengan saq percaye tipaq Almasih tejariang kenaq léq arepan Allah. Tetulis siq Musa bahwe dengan saq tejariang kenaq léq arepan Allah sehingge hubunganne kance Allah jari solah malik atas dasar Hukum Taurat, “Dengan nike gen idup siq ketaatanne léq Hukum Taurat nike.” Laguq dengan saq tejariang kenaq léq arepan Allah langan iman tipaq Allah, dalem Kitab Suci tetulis maraq niki, “Ndaq side bebase léq dalem angende, ‘Sai saq gen taék ojok sorge?’ (artine jauq Almasih turun), atao, ‘Sai saq gen turun ojok jurang maut?’ (artine saq ngangkat Almasih taék léman ninggal).” Maksutne maraq niki, “Berite léman Allah nike rapet gati léq side; léq biwihde dait dalem aténde.” Nike berite léman Allah mengenai iman saq tiang sebarang. Séngaq lamun side ngaku kadu biwihde bahwe, Deside Isa nike Junjungan Saq Mulie, dait percaye léq dalem aténde bahwe Allah sampun ngidupang Deside Isa Almasih léman ninggal, make side gen selamet. Séngaq siq aténe dengan percaye sehingge Allah nerimaq ie jari dengan saq tejariang kenaq léq arepan Allah sehingge hubunganne kance Ie jari solah malik. Dait siq biwihne dengan ngaku dait ie gen teselametang. Léq dalem Kitab Suci tetulis, “Dengan saq percaye léq Ie ndéq gen teperilaq.” Nike berlaku tipaq selapuq dengan, séngaq ndéq araq bédene antare dengan Yahudi kance dengan bangse-bangse lain. Allah saq sopoq nike, Tuhan umaq selapuq dengan. Ie ngicanin berkah saq belimpah-limpah tipaq selapuq dengan saq nunas léq Ie. Séngaq dengan Yahudi atao dengan bangse-bangse lain ndéq araq bédene. Tuhan saq pade umaq selapuq manusie, Ie ngicanin berkah saq belimpah-limpah tipaq selapuq dengan saq tunas léq Ie. Dalem Kitab Suci tetulis, “Selapuq dengan saq ngempoh peséngan Tuhan gen teselametang.” Laguq berembé dengan bau ngempoh Ie lamun ie pade ndéq percaye? Dait berembé ie pade bau percaye léq Ie lamun ie pade ndéqman dengah berite mengenai Ie? Terus berembé ie pade bau dengah berite mengenai Ie lamun ndéq araq dengan saq nyampéang tipaq ie pade? Dait berembé dengan bau nyampéang berite mengenai Ie lamun ie pade ndéq teutus? Léq dalem Kitab Suci tetulis maraq niki, “Berembé solahne kedatengan dengan-dengan saq jauq Kabar Solah!” Laguq ndéqne selapuq dengan Yahudi nerimaq Kabar Solah nike. Séngaq maraq basen Yesaya, “Tuhan, sai saq percaye léq berite saq tiang sampéang niki?” Keranaq nike, dengan-dengan jari beriman séngaq ie pade dengah berite. Dait berite nike tedengah séngaq araq dengan saq nyampéang manik Almasih. Laguq tiang beketuan: Napi tetu ie pade ndéqman dengah berite nike? Pasti sampun! Séngaq araq tetulis léq Kitab Suci, “Suare ie pade sampun kedengahan ojok seantéro dunie, napi saq ie pade sampéang sampun dateng ojok poton dunie.” Tiang beketuan malik: Napi bangse Israel ndéqman nenaoq? Penembéqne Musa bebase, “Allah bemanik maraq niki, ‘Tiang gen miaq side jari talon até tipaq bangse-bangse saq ndéqne bangse Israel. Dait tiang gen miaq side pade sili léq sopoq bangse saq bodo.’ ” Yesaya sayan bani malik bebase, “Maraq niki Manik Allah, ‘Dengan-dengan saq ndéq boyaq Tiang, ie pade sampun bedait kance Tiang; dait Tiang nyatayang diriq Tiang tipaq ie pade saq ndéq ngetuanang Tiang.’ ” Laguq mengenai bangse Israel, Yesaya bebase, maraq niki Manik Allah, “Sejeloan Tiang ngulurang imen Tiang tipaq sopoq bangse saq pagah dait ndéq taat.” Tiang beketuan: Napi Allah sampun nolaq Israel, umat-Ne mésaq? Pasti ndéq! Tiang mésaq dengan Israel, keturunan Ibrahim dait léman suku Benyamin. Allah nénten nolaq Israel saq sampun Ie piléq léman semule. Side pade nenaoq napi saq tetulis léq Kitab Suci mengenai Elia sewaktu ie tunasang tipaq Allah mengenai Israel. Elia matur, “Tuhan, selapuq nabi Deside sampun ie pade matéq, selapuq méje-méje taoq kurban Deside sampun teancurang. Mangkin karing tiang doang saq masih idup, laguq ie pade gen matéq tiang éndah.” Napi jawaban Allah tipaq Elia? Manik Allah, “Sampun Tiang adéqang pituq iyu dengan umaq Tiang mésaq. Ie pade ndéq uwah nyembah Déwe Baal.” Maraq nike éndah mangkin niki: Araq sise dengan saq tepiléq siq Allah lantaran rahmat-Ne. Allah miléq lantaran rahmat-Ne, dait ndéq lantaran perbuatan manusie; séngaq lamun Allah miléq lantaran perbuatan manusie, make rahmat Allah nike ndéqne rahmat saq sejati. Jari, berembé? Israel ndéq mauq napi saq ie pade boyaq. Saq mauq cume dengan-dengan saq sampun tepiléq siq Allah, saq lain selapuq jari pagah. Séngaq dalem Kitab Suci tetulis maraq niki, “Allah miaq até dait pikiran ie pade jari bebel; dait dateng mangkin penenteng ie pade ndéq tao nyerioq dait kentok ie pade ndéq tao dedengah.” Basen Daud éndah, “Alurang jamuan-jamuan saq ie pade piaq jari jeret dait perangkep, penghalang dait balesan tipaq diriqne mésaq. Alurang penenteng ie pade jari peteng adéq ie pade ndaq nyerioq; dait alurang ie pade jari bongkok selaéq-laéqne.” Tiang beketuan malik: Sewaktu ie pade kedampes, napi ie pade harus geriq? Pasti ndéq! Laguq lantaran ie pade bedose, make bangse-bangse lain malahan teselametang, sehingge ie pade jari talon até tipaq bangse-bangse lain nike. Lantaran pelanggaran ie pade berarti kesugihan umaq dunie, dait kegagalan ie pade berarti kesugihan umaq bangse-bangse lain; pasti beléqan malik kesempurnean ie pade. Laguq mangkin tiang sampéang tipaq side pade, dengan bangse-bangse lain! Sengonéq tiang jari rasul umaq dengan bangse-bangse lain, tiang anggep pegawéan tiang nike sopoq hal saq mulie. Tiang harep pegawéan tiang niki bau nimbulang talon até léq bangse tiang mésaq, adéq siq hal nike tiang bau nyelametang pire dengan léman ie pade. Séngaq lamun ie pade tetolaq siq Allah, hubungan dunie kance Allah tedaméang; lebih-lebih lamun lantaran ie pade teterimaq! Pasti nike maraq dengan ninggal saq idup malik! Lamun sepeleng ruti sebagé hasil saq penembéq nike suci, selapuq ruti nike éndah suci. Dait lamun akah lolo nike suci, make pémpang-pémpangne éndah suci. Separo léman pémpang-pémpang lolo zaitun sampun tepeleng. Dait léq onos pelengan nike tedekung pémpang lolo zaitun saq tiwoq léq taoq saq ndéq keruan. Dait mangkin side pade tedekung ojok derike adéq side pade mauq keloran saq pade léman akah dait kesuburan lolo zaitun nike. Ndaq side pade nyombongang diriq tipaq ie pade saq sampun peleng nike. Side pade harus tetep inget, ndéqne pémpang saq jauq keloran ojok akah, laguq akah saq nungke pémpang. Laguq side pade gen bebase, “Pasti, pémpang-pémpang nike tepeleng adéq tiang pade tedekung léq lolone!” Nike mule kenaq. Laguq ie pade tetetéh lantaran ie pade ndéq percaye, sebalikne side pade teterimaq lantaran iman side pade. Keranaq nike ndaq side pade jari sombong lantaran hal nike; sebalikne side pade harus merase takut. Séngaq lamun Allah ndéq merase sayang jari netéh pémpang-pémpang saq asli nike, ndaq paran Allah ndéq gen merase sayang jari netéh side pade éndah! Keranaq nike, ite nyaksiang berembé solahne dait berembé éndah tegesne Allah. Allah berlaku teges tipaq dengan-dengan saq gawéq dose, laguq Ie ngasihin side pade -- asal side pade tetep idup léq dalem kasih-Ne. Lamun ndéq maraq nike, make side pade éndah gen tepeleng. Dait mengenai pémpang-pémpang saq tepeleng nike, lamun ie pade sadar dait percaye, make ie pade gen teterimaq malik; séngaq Allah bedowé kuase jari dekung ie malik. Séngaq lamun side pade sebagé pémpang lolo zaitun saq ndéq keruan taoqne tiwoq sampun tepeleng, dait betentangan kance keadaan side nike, side sampun tedekung léq lolo zaitun saq asli. Pasti solahan malik pémpang-pémpang saq asli, ie pade gen tedekung léq lolone saq mule. Semeton-semeton senamian! Tiang harep side pade ndéq anggep diriqde ceket. Tiang melét side pade nenaoq sopoq rahasie: Separo léman dengan Yahudi keras até laguq hal nike gen tahen cume jangke penoq jumlah dengan bangse-bangse lain saq dateng. Siq care saq pade dengan Yahudi gen teselametang. Séngaq araq tetulis léq dalem Kitab Suci, “Pembébas gen rauh léman Sion; Ie gen netéh selapuq kejahatan léman keturunan Yakub. Tiang piaq perjanjian nike kance ie pade léq waktu Tiang ngapus dose-dose ie pade.” Mengenai Kabar Solah, dengan Yahudi ndéq nerimaq hal nike, make ie pade jari musuh Allah lantaran side pade; mengenai piléqan Allah, Allah tetep ngasihin ie pade demi leluhur ie pade. Séngaq Allah ndéq nyesel léq paice dait piléqan-Ne. Laéq, side pade ndéq taat tipaq Allah. Laguq mangkin, Allah sampun nyatayang rahmat-Ne lantaran dengan Yahudi ndéq taat. Maraq nike éndah mangkin dengan Yahudi ndéq taat tipaq Allah adéq siq rahmat saq side pade terimaq léman Allah, ie pade nerimaq rahmat Allah. Séngaq Allah menengang selapuq umat manusie tekuasein siq ndéq taat, adéq Allah bau nyatayang rahmat-Ne tipaq selapuq manusie. Luar biase gati kesugihan Allah, kebijaksanean dait pewikanan-Ne! Sai saq bau selidik keputusan-keputusan Allah? Sai saq bau ngerti langan-langan Allah? Dalem Kitab Suci tetulis maraq niki, “Sai saq nenaoq pikiran Tuhan? Sai saq bau naséhatin Tuhan? Sai saq sampun ngaturin tipaq Tuhan sehingge ie bau nuntut balesan-Ne?” Allah saq cipteang selapuqne. Selapuqne asalne léman Allah, dait selapuqne nike bagi Allah. Pade mulieang Allah selaéq-laéqne! Amin. Semeton-semeton senamian! Siq kemurahan Allah léq ite, sanget siq tiang tunas adéq side pade serahang diriqde jari kurban saq idup, saq suci dait nyenengang Allah. Seharusne maraq niki ibadah side pade tipaq Allah. Ndaq turut kebiasean dunie niki, laguq robah diriqde mésaq siq pembaruan budi side pade, adéq bau bédeang pekayunan Allah: Saq solah, saq nyenengang Allah, dait saq sempurne. Allah sampun ngicanin tiang rahmat, keranaq nike tiang naséhatin side pade selapuq: Ndaq side pade merase atasan léman saq setetune. Sebalikne side pade harus anggep diriq sewajarne. Sebilang dengan harus serioq diriqne menurut iman saq teicanin siq Allah. Awakte bedowé luwéq bagian, sopoq-sopoq bagian bedowé tugas mésaq. Maraq nike éndah ite dalem Deside Isa Almasih. Timaqne luwéq, setetune ite maraq sopoq awak. Dait ite sopoq kance saq lainne saling berubungan jari bagian-bagian léq dalem sopoq awak. Ite sopoq-sopoq bedowé paice saq belainan. Paice nike teicanin siq Allah tipaq ite menurut rahmat-Ne. Lamun sopoq dengan bedowé paice jari benubuat, alurang ie benubuat menurut imanne. Lamun bedowé paice jari ngelayanin dengan lain, harus ngelayanin dengan lain. Lamun bedowé paice jari ngajahang, harus pacu-pacu ngajahang. Lamun bedowé paice jari ngebéng naséhat, alurang ie naséhatin dengan lain. Dengan saq ngebéng, ngebéng secare ihlas. Dengan saq mimpin, harus mimpin pacu-pacu, dengan saq nyatayang belas kasihan léq dengan lain harus ngelaksaneang siq sukecite. Kasihde nike harus ndéq puraq-puraq. Jaoqin selapuq hal saq jahat, dait laksaneang saq solah. Side pade harus saling kasihin sopoq kance saq lain maraq dengan besemetonan dait side pade harus saling senjuluq ngebéng hormat. Pade begawéan rajin-rajin, ndaq mayus. Besemanget ngelayanin Tuhan. Pade besukecite dalem pengharepan, pade sabar léq segale macem kesusahan dait tetep bedo'e. Pade tulung semeton-semetonde saq kekurangan dait béng nyodoq léq balé side pade! Pade tunas berkah léman Allah umaq dengan-dengan saq nganiaye side pade. Ndaq side pade kutuk ie. Milu begembire kance dengan-dengan saq gembire, dait nangis kance dengan saq nangis. Pade idup secare rukun sopoq kance saq lainne. Ndaq kajuman, laguq jauq diriqde léq hal-hal saq sederhane. Ndaq anggep diriqde pinteran léman saq setetune. Ndaq bales kejahatan siq kejahatan, laksaneang napi saq kenaq tipaq selapuq dengan. Usaheang léq pihak side pade adéqne idup damé kance selapuq dengan. Semeton senamian saq tiang kasihin, ndaq gati bales dendem, alurang Allah saq ngukum. Séngaq araq tetulis léq Kitab Suci: “Pembalesan nike hak Tiang. Tiang gen nuntut pembalesan, manik Allah.” Sebalikne lamun musuh side pade lapah, béng ie ngelor; dait lamun ie bedak béng ie nginem, séngaq siq piaq hal nike side pade miaq ie ilaq. Ndaq tekalahang siq kejahatan. Laguq side pade harus kalahang kejahatan nike siq hal saq solah. Sebilang dengan harus tunduk léq pemréntah, séngaq ndéq araq pemréntah saq ndéq berasal léman Allah. Dait pemréntah saq araq tetentuang siq Allah. Keranaq nike dengan saq ngelawan pemréntah pade maraq dengan saq ngelawan napi saq sampun tetetepang siq Allah. Dait dengan saq piaq maraq nike gen mauq hukuman. Séngaq dengan saq perbuatanne solah ndéqne perlu takut léq pemréntah. Cume dengan saq perbuatanne jahat doang saq takut. Lamun side pade mélé ndéq merase takut léq pemréntah, side pade harus ngelaksaneang hal saq solah, make side pade gen tepuji siq pemréntah. Séngaq pemréntah nike pelayan Allah saq begawéan jari kesolahan side pade. Laguq lamun perbuatan side pade jahat, mule side pade harus takut léq pemréntah séngaq ndéqne sie-sie pemréntah nike bekuase jari ngukum dengan. Pemréntah nike pelayan Allah saq balesang murke Allah tipaq dengan-dengan saq gawéq kejahatan. Keranaq nike side pade harus tunduk léq pemréntah -- ndéqne cume lantaran murke Allah, laguq éndah lantaran até nurani. Nike éndah alasanne kembéq side pade bayah pajek, séngaq pemréntah nike pegawé-pegawé saq tepercaye siq Allah jari ngelaksaneang tugas saq husus. Béng tipaq selapuq dengan saq patut side béng: Bayah pajek side pade lamun side pade tewajibang bayah, dait bayah dudukan lamun side pade tewajibang bayah dudukan. Takut léq dengan saq patut tetakutang dait hormatin dengan saq patut tehormatin. Ndaq berutang napi juaq léq sai-sai, laguq side pade harus saling kasihin sopoq kance lainne. Séngaq dengan saq ngasihin sepadene manusie, ie sampun sepenoqne ngelaksaneang Hukum Taurat. Préntah-préntah nike: Ndaq bezinah, ndaq nyematéq, ndaq memaling, ndaq melét napi saq teépéang siq dengan lain; dait selapuq préntah-préntah lainne sampun tesimpulang jari sopoq hukum, “Kasihin sepadende manusie maraq side pade ngasihin diriqde.” Dengan saq ngasihin sepade manusie ndéqne gen gawéq kejahatan léq sepadene. Jari dengan saq ngasihin sepade manusie, ie sampun sepenoqne ngelaksaneang Hukum Taurat. Laksaneang selapuq hal nike, dait ngerti keadaan mangkin, bahwe sampun wayene side pade ures léman tindoq. Séngaq keselametante sampun rapet tebanding waktu ite baruq percaye. Kelem gen liwat dait seberaq malik gen jari menah. Keranaq nike silaq ite engkah gawéq perbuatan-perbuatan saq jahat. Ite harus kadu perlengkapan senjate terang. Ite harus gawéq hal-hal saq solah maraq saq biase tegawéq siq dengan kenaq; ndaq beseneng-seneng jangke liwat bates atao, bowos-bowosan. Ndaq gawéq perbuatan saq cabul dait ndaq turut keméléq hawe napsu. Dait ndaq besiaq atao talon até. Laguq kadu Junjungan Saq Mulie Deside Isa Almasih sebagé perlengkapan senjate terang. Dait ndaq turut keméléq awak saq bedose jari muasang hawe napsu. Terimaq dengan saq lemah imanne, ndaq hakimin pendapetne. Araq dengan saq bedowé iman bahwe ie bau ngelorang napi juaq, laguq araq dengan lain saq ndéq kuat imanne; cume bau ngelor sayur-sayuran doang. Dengan saq ngelorang napi juaq, ndaq menghine dengan saq cume ngelorang keloran tertentu doang. Dait dengan saq ngelor keloran tertentu doang, ndéq éndah ngukum dengan saq ngelorang selapuqne, séngaq Allah sampun nerimaq ie. Sai side pade setetune sehingge side pade bani ngadilin pelayan dengan lain? Timaq pelayan nike rebaq atao nganjeng, nike urusan majikanne. Dait mule pelayan nike pasti gen nganjeng malik séngaq Allah sanggup piaq ie nganjeng. Araq dengan saq merase bahwe araq jelo-jelo tertentu saq pentingan léman jelo-jelo saq lain, laguq araq éndah saq bedowé pendapet bahwe selapuq jelo pade doang. Alurang sopoq-sopoq dengan beranggepan menurut pikiranne mésaq. Dengan saq mentingang jelo-jelo tertentu ie ngelaksaneang bagi Allah. Dengan saq ndéq mentingang jelo-jelo tertentu ie ngelaksaneang éndah bagi Allah. Dengan saq ngelorang selapuq macem keloran, ie ngelaksaneang bagi Allah dait ie besyukur tipaq Allah. Maraq nike éndah dengan saq cume ngelor keloran tertentu doang, ie pade ngelaksaneang bagi Allah dait besyukur tipaq Ie. Ndéq araq sopoq dengan juaq léq antare ite saq idup umaq diriqne mésaq; dait ndéq araq sopoq dengan juaq saq maté umaq diriqne mésaq. Lamun ite idup, ite idup bagi Tuhan. Dait lamun ite maté, ite éndah maté bagi Tuhan. Jari, idup atao maté, ite dowén Tuhan. Almasih sampun ninggal dait idup malik adéq Ie jari Junjungan Saq Mulie umaq dengan-dengan saq idup dait dengan-dengan saq sampun ninggal éndah. Jari, semeton-semeton, kembéq side ngadilin semeton side pade saq seiman? Dait kembéq side pade hine ie? Ite selapuq gen bareng-bareng ngadep tahte penghakiman Allah. Séngaq araq tetulis léq Kitab Suci, maraq niki manik Tuhan, “Demi idup Tiang, sebilang dengan gen sujut léq arepan Tiang, dait sebilang dengan gen ngaku bahwe Tiang Allah.” Jari, ite sopoq-sopoq harus betanggung jawab léq selapuq perbuatante tipaq Allah. Keranaq nike ite ndaq saling hakimin. Sebalikne turut hukum niki: Ndaq jangke miaq semeton side pade jari tegode dait bedose. Tiang taoq léq dalem Junjungan Saq Mulie Deside Isa, dait yakin bahwe ndéq araq sopoq hal saq najis léman diriqne mésaq; laguq lamun sopoq dengan anggep hal-hal nike najis, bagi dengan nike hal-hal nike najis. Lamun napi saq side pade kelor nike jari nyakitin angen semetonde, artine perbuatan side pade ndéqne tedasarang siq kasih. Séngaq Almasih sampun ninggal umaq ie, ndaq alurang semetonde nike teancurang siq napi saq side pade kelorang. Keranaq nike ndaq alurang diriqde tepitnah mengenai napi saq solah léq side pade. Séngaq Kerajaan Allah ndéqne soal napi saq bau tekelorang dait teinem, laguq mengenai keadaan tejariang kenaq léq arepan Allah, damé sejahtere dait sukecite léq dalem Roh Suci. Dengan saq ngelayanin Almasih maraq nike, nyenengang Allah dait tehargein siq dengan lain. Keranaq nike silaq ite gawéq napi saq datengang damé sejahtere dait saling neguqang iman. Ndaq lantaran soal keloran side pade nyédaq napi saq sampun tepiaq siq Allah. Selapuq hal nike suci; laguq lamun lantaran keloran side pade miaq dengan lain bedose, make side pade salaq. Solahan side pade ndéq ngelorang daging atao nginem anggur, atao ngelaksaneang napi juaq lamun hal nike miaq semeton side pade jari bedose. Napi saq side pade percaye, pade tegel kepercayean nike jari diriqde mésaq léq arepan Allah. Bahagie dengan saq ndéq hukum diriqne mésaq mengenai napi saq ie anggep solah. Laguq dengan saq merase ragu-ragu léq napi saq ie kelorang, ie sampun tehukum séngaq ie ndéq ngelaksaneang hal nike atas dasar iman. Dait napi saq telaksaneang ndéq atas dasar iman, nike dose. Ite saq kuat imanne harus sabar léq kelemahan dengan saq lemah keyakinanne. Ndaq ite cume nyenengang diriqte mésaq. Sebalikne sebilang dengan léq antare ite harus nyenengang angen sepadente demi kesolahanne jari neguqang imanne. Séngaq Almasih mésaq nénten mikirang diriq-Ne mésaq. Léq Kitab Suci tetulis maraq niki, “Selapuq penghinean saq ie pade tujuang tipaq Deside, sampun nimpe tiang.” Selapuq saq tetulis léq Kitab Suci mule tetulis jari ngajah ite, adéq siq ketekunan dait penghiburan saq araq léq tulisan-tulisan nike ite mauq pengharepan. Semoge Allah sumber ketekunan dait penghiburan nulung side pade jari idup dalem kerukunan sesuai kance pekayunan Deside Isa Almasih. Sehingge siq sopoq angen dait sopoq suare, side pade selapuq ngemulieang Allah, Bapa Junjungante Saq Mulie Deside Isa Almasih. Keranaq nike side pade wajib saling nerimaq pade éndah maraq Almasih nerimaq side pade jari ngemulieang Allah. Séngaq, pade inget bahwe Almasih sampun ngelayanin dengan Yahudi demi kebenaran Allah dait jari ngukuhang janji-janji-Ne tipaq leluhurte. Adéq dengan bangse-bangse lain éndah ngemulieang Allah lantaran rahmat-Ne tipaq ie pade. Léq dalem Kitab Suci tetulis maraq niki, “Keranaq nike tiang gen mulieang Deside léq antare bangse-bangse, tiang gen nyanyiang Zabur umaq peséngan Deside.” Araq éndah tetulis maraq niki, “Pade begembire bareng umat-Ne, hai bangse-bangse!” Dait niki éndah, “Pade puji Tuhan, selapuq bangse-bangse! Selapuq dengan pade puji Ie!” Dait niki éndah saq teucapang siq Yesaya, “Gen muncul sopoq dengan léman keturunan Isai, saq gen mréntah selapuq bangse-bangse; tipaq Ie bangse-bangse gen beharep.” Semoge Allah, sumber pengharepan nike, penoqin angen side pade siq sukecite dait damé sejahtere séngaq side pade percaye léq Ie dait siq kuase Roh Suci side pade gen sayan kuat, belimpah-limpah siq pengharepan. Semeton-semeton senamian! Tiang yakin bahwe araq luwéq gati hal saq solah léq side. Side pade sampun nenaoq selapuq-selapuqne dait bau saling ajah sopoq kance lainne. Laguq léq hal tertentu, léq dalem surat niki tiang peringet side pade secare teges, lantaran rahmat saq sampun teicanin léq tiang. Allah sampun ngutus tiang jari pelayan Deside Isa Almasih tipaq dengan bangse-bangse lain, tiang nyampéang Kabar Solah léman Allah tipaq ie pade adéq ie pade bau teterimaq siq Allah jari persembahan saq husus dait tesuciang siq Roh Suci. Jari, léq dalem Deside Isa Almasih tiang merase bangge gati siq pelayanan tiang tipaq Allah niki. Tiang ndéq bani ngeraosang saq lain kecuali napi saq sampun tepiaq siq Almasih langan diriq tiang, tugas tiang bimbing dengan bangse-bangse lain adéqne taat léq Allah langan ucapan-ucapan dait perbuatan-perbuatan tiang. Langan keajaipan-keajaipan saq luar biase éndah selapuqne nike telaksane siq kuase Roh Suci. Kabar Solah mengenai Almasih sampun tiang sampéang tipaq dengan-dengan mulai léman Yerusalem dateng Ilirikum. Tiang anggep sebagé kehormatan nyampéang Kabar Solah léman Allah léq taoq-taoq léq mbé dengan-denganne ndéqman dengah mengenai Almasih. Séngaq tiang ndéq mélé begawéan léq dasar saq sampun tetoloq siq dengan lain. Araq tetulis léq Kitab Suci, “Dengan-dengan saq ndéq uwah nerimaq berite mengenai Ie, gen serioq; dait ie pade saq ndéq uwah dengah, gen ngerti.” Keranaq nike tiang rimpes gati araq halangan jari jangoq side pade. Laguq mangkin pegawéan tiang léq daérah-daérah nike sampun tutuq. Sampun pire taun ngonéqne tiang melét gati dateng jangoq side pade. Laun lamun tiang liwat léq kote side pade dalem kelampan tiang ojok Spanyol, tiang beharep léq derike tiang bedait kance side pade dait beseneng-seneng seberaq kance side pade. Sesampun nike tiang beharep side pade bau nulung tiang jari ngelanjutang kelampan tiang ojok Spanyol. Laguq mangkin tiang kenyeke dalem kelampan ojok Yerusalem jari ngatong sumbangan umaq dengan-dengan saq tehususang bagi Allah saq araq léq Yerusalem. Séngaq jemaah-jemaah léq Makedonia dait Akaya sampun setuju jari ngebéng sumbangan tipaq dengan-dengan miskin léq antare dengan-dengan saq tehususang bagi Allah, léq Yerusalem. Seneng gati angen ie pade ngebéng sumbangan nike. Mule sepatutne ie pade nulung semeton-semeton saq miskin léq Yerusalem nike; séngaq léman dengan-dengan Yahudi nike dengan bangse-bangse lain sampun nerimaq berkah léman Allah. Jari, dengan bangse-bangse lain nike patut éndah nulung dengan-dengan Yahudi siq berkah-berkah saq berue barang. Lamun tiang sampun nyeleséang tugas niki, dait nyerahang selapuq sumbangan, tiang gen lalo ojok Spanyol dait nyelaloq léq kotende. Lamun tiang dateng tipaq side pade, tiang yakin bahwe tiang gen dateng siq penoq berkah Almasih umaq side pade. Demi Junjungante Saq Mulie Deside Isa Almasih dait demi kasih Roh Suci, sanget siq tiang tunas léq side pade, semoge side pade bedo'e bareng kance tiang léq arepan Allah mengenai perjuangan tiang. Do'eang adéq Allah nyelametang tiang léman dengan-dengan saq ndéq percaye saq araq léq Yudea, adéq tugas tiang ngatong sumbangan ojok Yerusalem niki teterimaq secare bagus siq dengan-dengan saq tehususang bagi Allah saq araq léq derike. Siq pekayunan Allah, tiang gen dateng tipaq side pade siq sukecite dait gen merase tehibur léq tengaq-tengaq side pade. Semoge Allah, sumber damé sejahtere gen bareng kance side pade selapuq! Amin. Tiang tunas side pade perhatiang semetonte saq nine, Pebe, ie pelayan jemaah léq Kengkrea. Pade terimaq ie léq dalem Junjungan Saq Mulie, maraq saq patut jari dengan-dengan saq tehususang bagi Allah. Pade tulung ie lamun ie merluang bantuan side pade séngaq ie mésaq sampun nulung luwéq dengan dait tiang éndah tetulung siq ie. Sampéang salam tiang tipaq Priskila dait Akwila, batur-batur tiang saq bareng-bareng bagawéan kance tiang léq dalem Deside Isa Almasih. Ie pade aroh maté lantaran mélé nyelametang tiang. Tiang ngucapang tampi asih léq ie pade -- dait ndéqne tiang doang, laguq selapuq jemaah léman bangse-bangse lain éndah. Sampéang éndah salam tiang tipaq jemaah saq bekumpul léq balé ie pade. Salam tipaq Epenetus, batur saq tiang kasihin, ie dengan saq penembéq percaye tipaq Almasih léq daérah Asia. Salam tiang éndah tipaq Mariam saq maté-matéan begawéan umaq side pade. Sampéang salam tiang éndah tipaq Andronikus dait Yunias, ie pade sebangse kance tiang dait sampun tebui bareng-bareng kance tiang. Sendéqman tiang percaye léq Almasih, ie pade sampun juluan percaye. Deduaqne tehormatin léq antare pare rasul. Salam tipaq Ampliatus saq tiang kasihin léq dalem Junjungan Saq Mulie. Sampéang salam tiang tipaq Urbanus, batur saq bareng begawéan dalem Almasih dait tipaq Stakis batur saq tiang kasihin éndah. Salam tipaq Apeles saq sampun tahen uji dalem Almasih. Salam éndah tipaq Aristobulus dait dengan-dengan saq ndot léq baléne. Salam tipaq Herodion. Ie sebangse kance tiang. Salam éndah tipaq semeton-semeton saq percaye léq Junjungan Saq Mulie, saq ndot léq balé Narkisus. Sampéang salam tiang tipaq Tripena dait Triposa saq maté-matéan begawéan umaq Junjungan Saq Mulie. Salam tipaq Persis saq tiang kasihin, saq maté-matéan begawéan umaq Junjungan Saq Mulie. Salam tipaq Rupus bareng inaqne saq sampun tiang anggep maraq inaq tiang mésaq. Rupus nike dengan saq tepiléq siq Junjungan Saq Mulie. Sampéang salam tiang tipaq Asinkritus, Plegon, Hermes, Patrobas, Hermas dait selapuq semeton saq bareng kance ie pade. Sampéang salam tiang tipaq Pilologus dait Yulia; dait Nereus bareng semetonne saq nine; tipaq Olimpas dait tipaq selapuq dengan saq tehususang bagi Allah saq bareng kance ie pade. Silaq side pade besalam-salaman sebagé semeton seiman. Selapuq jemaah Almasih nyampéang salam tipaq side pade. Semeton-semeton senamian! Sanget siq tiang tunas léq side pade adéq side pade waspade tipaq dengan-dengan saq nimbulang perpecahan dait nyesatang dengan léman perajahan saq sampun ie pade terimaq. Jaoqang diriqde léman dengan-dengan saq maraq nike. Séngaq dengan-dengan saq gawéq maraq nike ndéq begawéan umaq Almasih, Junjungante Saq Mulie, sebalikne ie pade cume muasang keméléqne mésaq. Siq rayuan dait ucapan saq manis-manis, ie pade nipu dengan-dengan saq tulus angenne. Ketaatan side pade sampun tetaoq siq selapuq dengan. Dait tiang seneng gati dengah hal nike. Laguq tiang melét adéq side pade bijaksane léq hal-hal saq solah, dait bersi léman hal-hal saq jahat. Allah sumber damé sejahtere gen ngancurang Belis léq bawaq naén side pade. Rahmat Junjungante Saq Mulie Deside Isa Almasih araq bareng kance side pade. Timotius, batur saq bareng begawéan kance tiang nyampéang salamne tipaq side pade, maraq nike éndah Lukius, Yason dait Sosipater saq sebangse kance tiang. Tiang, Tertius saq nulis surat niki, ngucapang salam léq dalem Junjungan Saq Mulie tipaq side pade selapuq. Gayus éndah ngirim salam tipaq side pade. Tiang ndot léq baléne dait selapuq jemaah éndah nyodoq léq baléne. Erastus saq jari bendahare kote éndah nyampéang salam tipaq side pade, maraq nike éndah semetonte Kuartus. [ Rahmat Junjungante Saq Mulie Deside Isa Almasih bareng kance side pade. Amin.] Puji syukur tipaq hadirat Allah! Ie bekuase neguqang side pade, sesuai kance Kabar Solah saq tiang sampéang mengenai Deside Isa Almasih, sesuai kance pernyataan rahasie saq sampun berabad-abad ngonéqne ndéq tetaoq siq dengan. Laguq mangkin siq préntah Allah saq kekel, rahasie nike sampun tenyatayang dait tesampéang tipaq selapuq bangse langan kitab nabi-nabi, adéq ie pade selapuq percaye dait taat léq Ie. Ie sopoq-sopoqne Allah Saq Mahebijaksane. Temulieang langan Deside Isa Almasih selaéq-laéqne! Amin. Tiang tetep besyukur tipaq Allah mengenai side pade, séngaq side pade sampun nerimaq rahmat léman Allah langan Deside Isa Almasih. Lantaran side pade sampun araq léq dalem Almasih, make idupde sugih léq dalem selapuq hal. Penenaoqde mengenai selapuq hal sampun dalem gati, dait side pade ceket ngajahang penenaoq nike. Hal nike nyatayang bahwe berite mengenai Almasih sampun tetu-tetu tepahamin jangke dalem aténde, sehingge side pade ndéq kekurangan sopoq paice juaq, dait side pade kenyeke ngantos kerauhan Junjungante Saq Mulie Deside Isa Almasih. Almasih mésaq gen jamin side pade jangke dateng penutuqne; adéq léq waktu jelo Tuhan, side pade tedait ndéq araq cacat cele. Allah nike setie. Ie sampun ngemanikang dait pesopoq side kance Bije-Ne, nike Deside Isa Almasih, Junjungante Saq Mulie. Semeton senamian! Siq peséngan Junjungante Saq Mulie Deside Isa Almasih, tiang tunas adéq side pade selapuq idup rukun; adéq ndaq araq perpecahan léq antare side. Adéq side pade besopoq, sopoq angen dait sopoq pikiran. Séngaq, dengan-dengan léman keluarge Kloe ngelaporang tipaq tiang bahwe araq pegejuhan léq antare side. Saq tiang maksut nike, bahwe léq antare side araq saq bebase, “Tiang léman golongan Paulus”, araq éndah saq bebase, “Tiang léman golongan Apolos”. Saq lain bebase, “Tiang léman golongan Kepas”. Saq lainne malik bebase, “Tiang léman golongan Almasih.” Segerah Almasih tebagi-bagi? Napi Paulus tepakuq léq kayuq salib umaq side pade? Tekan side pade ndéq tebaptis adéqne jari pengiring-pengiring Paulus? Syukur ndéq araq sopoq dengan juaq saq tiang baptis léq antare side, selain Krispus dait Gayus. Ndaq jangke araq sopoq dengan saq bebase bahwe tiang sampun baptis ie adéqne jari pengiring tiang. ( Mule tetu, Stepanus dait keluargene, mule tiang saq baptis ie pade. Laguq lainan siq ie pade, seinget tiang, ndéq araq malik dengan lain saq tiang baptis.) Almasih ngutus tiang ndéqne jari baptis dengan, laguq jari nyampéang Kabar Solah léman Allah; dait nike éndah harus tiang laksaneang ndéq kadu kepinteran ngeraos secare manusie, adéq kuase ninggal-Ne Almasih léq kayuq salib ndéq sie-sie. Séngaq bagi dengan-dengan saq mule gen binase, berite mengenai ninggal-Ne Almasih léq kayuq salib nike teanggep jari sopoq hal saq bodo. Laguq, bagi ite saq teselametang siq Allah, berite nike kekuatan Allah. Séngaq léq dalem Kitab Suci, Allah bemanik, “Kebijaksanean dengan arip gen Tiang binaseang, dait pengertian dengan-dengan berilmu gen Tiang musnahang.” Lamun maraq nike, léq mbé dengan-dengan saq arip nike? Léq mbé ahli-ahli Taurat nike? Léq mbé dengan-dengan saq girang nentang nike? Tekan Allah sampun miaq kebijaksanean dunie niki jari sopoq hal saq bodo? Séngaq timaq berembé ceketne manusie, ie ndéq bau kenal kance Allah kadu kepinteranne mésaq. Laguq malahan lantaran Allah bijaksane, make Ie kayun nyelametang dengan-dengan saq percaye léq Ie langan berite saq tiang pade sampéang, saq teanggep hal saq bodo siq dunie. Dengan Yahudi nuntut keajaipan jari bukti, dait dengan Yunani ngutameang kebijaksanean dunie niki. Laguq tiang pade cume nyampéang Almasih saq ninggal tepakuq léq kayuq salib. Berite nike nyinggung perasaan dengan Yahudi, dait teanggep hal saq bodo siq dengan bangse-bangse lain. Laguq bagi dengan-dengan saq sampun temanikang siq Allah -- dengan Yahudi dait dengan bangse-bangse lain -- Almasih nike kekuatan dait kebijaksanean Allah. Séngaq napi saq ruene bodo laguq léman Allah, nike lebih bijaksane tebanding kebijaksanean manusie; dait saq ruene lemah laguq léman Allah, nike kuatan tebanding kekuatan manusie. Semeton senamian! Cobaq inget berembé keadaande léq waktu Allah ngemanikang side pade. Cume sekediq doang léq antare side saq bijaksane, atao bekuase atao saq atas kedudukanne menurut pandangan manusie. Séngaq mule Allah sediah miléq saq teanggep bodo siq dunie niki, adéq dengan-dengan pinter jari ilaq. Dait Allah miléq éndah saq teanggep lemah siq dunie niki, adéq dengan-dengan saq gagah perkase jari ilaq. Allah miléq saq teanggep rendah, hine, dait malahan saq teanggep ndéq araq artine siq dunie niki, adéq Allah ngancurang saq teanggep penting siq dunie. Siq care nike ndéq araq sopoq dengan juaq saq bau nyombongang diriqne léq arepan Allah. Allah mésaq saq miaq side araq léq dalem Deside Isa Almasih. Langan Almasih ite tejariang bijaksane. Dait langan Ie éndah Allah miaq ite tejariang kenaq léq arepan-Ne sehingge hubungante kance Allah jari solah malik, jariang ite dengan-dengan saq tehususang bagi Allah dait bébasang ite. Jari, maraq saq tetulis dalem Kitab Suci, “Dengan saq mélé bangge, harus bangge léq dalem Tuhan.” Semeton senamian! Léq waktu tiang dateng ojok side, dait beriteang léq side mengenai rencane Allah saq ndéqman tetaoq siq dunie, tiang ndéq kadu kebijaksanean dunie niki atao ngeraos siq raos saq muluk-muluk. Séngaq tiang sampun mutusang bahwe sengonéq tiang araq bareng kance side pade, tiang ndéq melét nenaoq napi-napi, selain mengenai Deside Isa Almasih; terutame bahwe Ie sampun ninggal tepakuq léq kayuq salib. Malahan sewaktu tiang araq bareng kance side pade, tiang dalem keadaan lemah dait ngijik siq takut tiang. Berite saq tiang sampéang tipaq side ndéq tiang sampéang kadu ucapan-ucapan saq manis-manis menurut kebijaksanean manusie. Tiang nyampéang nike kadu kuase Roh Allah. Tiang piaq maraq nike, adéq iman side tipaq Almasih ndéqne siq dasar kebijaksanean manusie, laguq siq dasar kuase Allah. Timaqne maraq nike, léq antare dengan-dengan saq kehidupan rohanine sampun kuat, tiang mule ngeraos mengenai kebijaksanean. Laguq kebijaksanean niki ndéqne kebijaksanean dunie, atao kebijaksanean penguase-penguase jaman niki, saq kekuaseanne gen musnah. Kebijaksanean saq tiang sampéang nike kebijaksanean léman Allah. Kebijaksanean nike ndéqne tetaoq siq dunie, laguq Allah sampun nyedieang ite kemuliean sendéqman dunie niki tecipteang. Ndéq araq sopoq dengan juaq léman penguase-penguase jaman niki saq nenaoq mengenai kebijaksanean nike. Séngaq, seandéne ie pade sampun nenaoq, pasti ie pade ndéq gen pakuq léq kayuq salib Junjungan Saq Mulie nike. Sebalikne hal nike maraq saq tetulis dalem Kitab Suci, “Napi saq ndéq uwah teserioq atao tedengah siq manusie, dait ndéq uwah éndah timbul dalem pikiran manusie, nike saq tesedieang siq Allah umaq dengan-dengan saq ngasihin Ie.” Laguq Allah sampun nyatayang léq ite siq perantarean Roh-Ne. Roh nike selidik selapuq hal, jangke ojok rencane-rencane Allah timaq saq paling rahasie éndah. Séngaq sai saq nenaoq isi até sopoq dengan, selain roh dengan nike mésaq? Maraq nike éndah mengenai Allah. Saq wikan pekayunan Allah cume Roh Allah mésaq! Dait ite, ndéq nerimaq roh dunie niki, laguq Roh saq léman Allah, adéq ite nenaoq selapuq saq sampun teicanin siq Allah tipaq ite. Dait lantaran tiang pade nyampéang hal-hal rohani tipaq ie pade saq bedowé Roh Allah, tiang pade ngeraos mengenai paice-paice Allah siq ucapan saq ndéq teajahang tipaq tiang pade siq hikmat manusie, laguq siq Roh Allah. Dengan saq ndéq bedowé Roh Allah, ndéq bau nerimaq napi saq tenyatayang siq Roh nike. Séngaq bagi dengan nike, hal-hal nike teanggep hal saq bodo. Dengan nike ndéq iniq ngerti, séngaq hal-hal nike cume bau tenilai secare rohani. Dengan saq bedowé Roh Allah bau nilai selapuq hal, laguq ndéq araq sopoq dengan juaq saq berhak nilai Ie. Léq dalem Kitab Suci tetulis, “Sai saq nenaoq pikiran Tuhan? Dait sai saq naséhatin Ie?” Laguq ite bedowé pikiran saq pade kance Almasih! Semeton senamian, setetune tiang ndéq tao ngeraos kance side pade maraq kance dengan saq idup menurut Roh Allah. Tiang cume tao ngeraos kance side maraq kance dengan saq ndéq bedowé Roh Allah; maraq kance dengan saq masih bebéaq dalem percayenne tipaq Almasih. Tiang cume bau ngebéng side keloran bebéaq, ndéqne keloran dengan déwase; lantaran side pade ndéqman kuat nerimaq. Laguq mangkin éndah side pade masih ndéqman kuat nerimaq hal nike, séngaq side pade dengan saq ndéq bedowé Roh Allah. Séngaq lamun side pade masih talon até dait besiaq sopoq kance saq lainne, napi nike ndéq buktiang bahwe side pade dengan saq ndéq bedowé Roh Allah dait idup secare duniawi? Lamun araq saq bebase, “Tiang léman golongan Paulus”, dait saq lain bebase, “Tiang léman golongan Apolos”, napi nike ndéq buktiang bahwe side dengan saq ndéq bedowé Roh Allah? Setetune sai Apolos nike? Dait sai Paulus? Tiang pade cume pelayan-pelayan Allah, saq sampun bimbing side pade jari percaye tipaq Almasih. Tiang pade cume ngelaksaneang pegawéan saq tetugasang siq Tuhan tipaq tiang pade sopoq-sopoq. Tiang nenalet dait Apolos saq nyiram, laguq Allah mésaq saq niwoqang. Jari saq paling penting nike Allah, séngaq Ie saq niwoqang. Saq nalet dait saq nyiram ndéqne penting; deduaqne nike pade kedudukanne. Sopoq-sopoq gen nerimaq upaq menurut lelahne begawéan. Tiang pade dengan-dengan saq bareng-bareng begawéan bagi Allah; dait side pade, lendang Allah, gedung Allah éndah. Menurut rahmat Allah, tiang sebagé ahli bangunan sampun noloq dasar gedung nike, dait dengan lain penganjeng gedung léq atas dasar nike. Sebilang dengan harus merhatiang bagus-bagus berembé ie miaq gedung léq atas dasar nike. Séngaq Allah mésaq sampun nyedieang Deside Isa Almasih sebagé sopoq-sopoqne dasar jari gedung nike; ndéq araq dasar saq lain. Araq saq miaq gedung léq atas dasar nike kadu emas, araq saq kadu perak, araq saq kadu batu permate, araq éndah saq kadu kayuq, pupaq gero atao jami. Pegawéan sebilang dengan éraq gen penggitan léq waktu Almasih rauh malik. Séngaq léq jelo Tuhan nike api gen miaq pegawéan sopoq-sopoq dengan gen penggitan. Api gen nguji dait nentuang mutu pegawéan nike. Lamun gedung saq tepiaq siq dengan léq atas dasar nike bau tahen api, dengan nike gen nerimaq upaqne. Laguq lamun pegawéanne julat, ie gen rugi; ie mésaq gen selamet, laguq maraq dengan saq selamet sugul léman api. Napi side pade ndéq nenaoq bahwe side pade gedéng Allah dait Roh Allah araq léq dalem side pade? Lamun araq dengan saq nyédaq gedéng Allah, Allah éndah gen nyédaq dengan nike. Séngaq Gedéng Allah nike husus bagi Allah doang, dait side pade gedéng Allah nike. Ndaq sopoq dengan juaq nipu diriqne mésaq. Lamun araq dengan léq antare side merase diriqne bijaksane menurut ukuran dunie niki, alurang dengan nike jari bodo, adéq ie jari tetu-tetu bijaksane. Séngaq saq teanggep bijaksane siq dunie, hal nike bodo bagi Allah. Léq Kitab Suci araq tetulis, “Dengan-dengan bijaksane tebau siq Allah kadu kepinteranne mésaq.” Araq tetulis maraq niki éndah, “Tuhan wikan bahwe pikiran dengan-dengan saq bijaksane, nike pikiran saq ndéq araq manpaatne.” Keranaq nike, ndaq sopoq dengan juaq saq ngajum manusie, séngaq selapuq-lapuqne sampun teicanin jari dowénde: Paulus, Apolos, Kepas, dunie niki, kehidupan dait kematéan, jaman niki atao jaman saq gen dateng, selapuq-lapuqne dowénde. Dait side pade jari dowén Almasih, dait Almasih dowén Allah. Anggep bahwe tiang pade pelayan-pelayan Almasih, saq betanggung jawab beriteang rencane-rencane Allah saq ndéqman tetaoq siq dunie. Saq pertame-tame tetuntut léman pelayan saq maraq nike, bahwe ie setie léq majikanne. Bagi tiang, ndéqne jari soal napi saq side pade -- atao sai juaq -- pikirang éndah mengenai diriq tiang. Malahan napi saq tiang mésaq pikirang mengenai diriq tiang nike ndéqne jari soal. Tiang ndéq merase salaq dalem hal napi juaq, laguq nike ndéqne bukti bahwe tiang mule ndéq salaq. Tuhan mésaq saq nentuang tiang salaq atao ndéq. Keranaq nike, ndaq side pade becat-becat nentuang bahwe sopoq dengan salaq atao ndéq, séngaq ndéqman waktune. Antih jangke Tuhan rauh éraq. Ie saq gen bukaq selapuq rahasie-rahasie saq teseboq léq dalem peteng. Ie saq gen bungkar selapuq niat saq araq léq dalem até manusie. Léq waktu nike baruq sebilang dengan nerimaq pujian léman Allah maraq saq patut ie terimaq. Semeton senamian! Jari kepentingande, tiang sampun laksaneang selapuqne nike tipaq Apolos dait léq diriq tiang mésaq. Maksutne adéq conto léman tiang pade nike, side pade bau berajah napi arti ucapan niki, “Pade patuh léq aturan saq araq”, siq care nike ndéq araq sopoq dengan juaq léman side pade saq kanggo bangge-banggeang sopoq dengan, terus menghine saq lain. Sai saq jariang side lebihan léman dengan lain? Tekan selapuqne side terimaq léman Allah? Jari, kembéq mélé nyombongang diriq, maraqne napi saq araq léq side nike side anggep léman diriqde mésaq? Mule side ndéq merluang napi-napi malik! Side pade sampun sugih! Side pade sampun jari raje! Dait tiang pade ndéq. Mule bagus gati lamun side pade sampun jari raje, adéq tiang pade bau mréntah bareng side. Séngaq menurut pendapet tiang, tiang pade rasul-rasul, sampun tejariang pantoan siq Allah léq julun manusie dait pare malaékat. Tiang pade maraq dengan-dengan hine saq tehukum siq hukuman maté léq julun dengan luwéq dait tesurak-surak siq dunie. Lantaran Almasih, tiang pade niki jari dengan bodo, laguq side pade bijaksane léq dalem Almasih! Tiang pade lemah, laguq side pade kuat! Tiang pade tecele, dait side pade teajum-ajum! Jangke mangkin niki tiang pade kelapahan dait bedak; kelambi tiang pade masih saq léq awak doang; tiang pade tesiksaq siq dengan; tiang pade ndéq bedowé taoq ndot; tiang pade gawéq pegawéan saq berat gati jari boyaq napkah. Lamun tiang pade tekutuk, tiang pade bales siq berkah; lamun tiang pade teaniaye, tiang pade sabar; lamun tiang pade telengé-lengéang siq dengan, tiang pade bales kadu ucapan-ucapan saq solah. Tiang pade ndéqne lebih léman dedoro dunie niki; jangke mangkin tiang pade masih teanggep maraq dedoro gumi. Surat niki tiang tulis tipaq side pade, ndéqne jari miaq side pade ilaq, laguq jari peringetin side pade maraq anak-anak tiang mésaq. Séngaq timaq side pade sampun bedowé sepulu iyu guru léq dalem Almasih, laguq side pade ndéq bedowé luwéq bapaq. Léq dalem idupde sebagé dengan-dengan saq araq léq dalem Almasih, tiang saq jari bapaqde, séngaq tiang saq jauq Kabar Solah mengenai Almasih tipaq side. Keranaq nike sanget siq tiang tunas adéq side pade turut teladan tiang. Léq hal nike tiang sampun ngutus Timotius ojok side, tiang ngasihin ie maraq anak tiang mésaq. Ie kanak saq bau tesaduq. Laun ie gen ngingetang side pade mengenai care idup saq tiang turut sesampun percaye tipaq Almasih, care idup nike saq tiang ajahang tipaq sebilang jemaah saq araq léq mbé-mbé. Pire dengan léq antare side sampun jari sombong, séngaq ie pade paran tiang ndéq gen dateng ojok side. Laguq lamun Tuhan ngijinang, ndéqne ngonéq malik tiang gen dateng éndah ojok side. Léq waktu nike, tiang gen serioq éndah kekuatan dengan-dengan saq sombong nike; ndéqne cume ucapanne doang. Séngaq Kerajaan Allah ndéqne mengenai ucapan doang, laguq éndah mengenai kuase. Jari, piléq doang napi saq side pade melétang! Napi side pade mélé tiang dateng jari ngajah side pade secare keras atao secare alus dait kasih sayang? Tiang setetune sampun nerimaq laporan bahwe léq antare side araq perbuatan-perbuatan cabul saq langsot gati: Araq léq antare side saq bezinah kance inaq téréqne, padahal dengan-dengan saq ndéq kenal Allah ndéq gawéq hal maraq nike. Timaq maraq nike, masih doang side sombong. Sebalikne side harus sedih, dait sugulang dengan saq gawéq hal nike léman tengaq-tengaq side. side pade harus nyerahang dengan nike ojok Belis adéq awak dengan nike binase dait siq care nike rohne teselametang léq jelo kerauhan Junjungan Saq Mulie Deside Isa. Side pade ndéq patut merase sombong. Sang side pade sampun nenaoq, “Ragi ruti saq sekediq miaq selapuq adonan jari mbal!” Keranaq nike, tetéh juluq ragi ruti saq masih araq, nike ragi dose, adéq side pade jari maraq adonan saq baru, bersi léman ragi dose saq laéq, dait tiang nenaoq bahwe side pade mule maraq nike. Séngaq, perayaan Paskahte sampun siep, lantaran Almasih saq jari anak dombe Paskahte, sampun tesembeléh. Jari, silaq ite rayeang hal nike kadu ruti saq ndéq beragi, ruti saq jari lambang kemurnian dait selapuq saq teterimaq siq Allah. Ndaq ite rayeang hal nike kadu ruti saq teragiq siq ragi ruti saq laéq, nike ragi dose dait kejahatan. Léq dalem surat tiang saq piranan, tiang badaq side adéq ndaq begaul kance dengan saq gawéq cabul. Maksut tiang ndéqne dengan saq gawéq cabul, atao serakah, atao penipu atao penyembah berhale saq tetu-tetu ndéq kenal Allah. Ndéqne ie pade saq tiang maksut; séngaq lamun side pade ndéq mélé rapet kance ie pade, make side pade harus sugul léman dunie niki. Maksut tiang, bahwe side pade ndaq begaul kance dengan saq ngaku diriqne semeton seiman, laguq dengan nike perbuatanne cabul, atao serakah, atao nyembah berhale, atao girang pitnah dengan, atao tukang bowos, atao pemalingan. Kance dengan saq maraq nike, ndaq gati side tokol atao bekelor bareng-bareng kance ie! Napi araq léq antare side pade lamun bepelekare kance semetonne, bani lumbar tipaq hakim saq ndéq kenal Allah, dait ndéq lumbar ojok dengan-dengan saq tehususang bagi Allah jari nyeleséang pelekare nike? Napi side pade ndéq nenaoq bahwe dengan-dengan saq tehususang bagi Allah gen ngadilin dunie niki? Jari, lamun mule side pade gen ngadilin dunie niki, napi side pade ndéq sanggup nyeleséang pelekare-pelekare saq ndéq araq artine? Napi side pade ndéq nenaoq bahwe ite gen ngadilin malaékat-malaékat? Jari, lebih-lebih pelekare-pelekare kehidupan sebilang jelo? Make, lamun araq pelekare-pelekare maraq nike, napi side pade ngelaporang tipaq dengan-dengan saq tetu-tetu ndéq bedowé kedudukan léq dalem jemaah? Merilaq gati! Pasti léq antare side araq sopoq dengan saq cukup bijaksane jari nyeleséang masalah léq antare semeton-semeton seiman! Napi araq semeton saq sopoq boyaq keadilan tipaq semeton saq lain, dait malahan léq dengan-dengan saq ndéq seiman? Araq masalah léq antare side pade doang sampun jari kekalahan umaq side. Bagusan side pade teperlakuang ndéq adil, atao terugiang! Laguq malahan side mésaq perlakuang dengan lain secare ndéq adil. Side mésaq éndah saq ngerugiang dengan lain. Dait malahan nike side pade laksaneang tipaq semeton-semeton seiman! Napi side pade nenaoq bahwe dengan-dengan saq ndéq turut pekayunan Allah, ndéq gen mauq bagian léq dalem Kerajaan Allah? Ndaq sesat! Dengan-dengan saq gawéq perbuatan saq cabul, dengan-dengan saq nyembah berhale, saq bezinah, saq gawéq cabul kance sepade jenisne, saq memaling, saq serakah, saq girang bowos, saq girang pitnah dengan lain, dait saq meres dengan lain -- selapuq dengan saq maraq nike, ndéqne gen mauq bagian léq dalem Kerajaan Allah. Pire dengan léq antare side laéq bedowé kelakuan maraq nike. Laguq mangkin side pade tenyatayang bersi léman dose. Side pade sampun jari dowén Allah saq husus. Side pade sampun tejariang kenaq léq arepan Allah sehingge hubungan side pade kance Allah jari solah malik, nike lantaran peséngan Junjungan Saq Mulie Deside Isa Almasih dait lantaran Roh Allahte. Araq saq bebase bahwe sebilang dengan kanggo ngelaksaneang selapuq hal. Laguq umaq tiang ndéq selapuqne araq manpaatne. Jari, timaq tiang kanggo ngelaksaneang napi juaq, laguq tiang ndéq mélé ngalurang diriq tiang tekuasein siq napi juaq. Araq éndah saq bebase bahwe keloran nike umaq tian, dait tian tesedieang umaq keloran. Laguq deduaqne gen temusnahang siq Allah. Awak manusie ndéqne kanggo tekadu jari gawéq perbuatan saq cabul, laguq cume jari ngelayanin Tuhan. Dait Tuhan gen meliharaq awak nike. Allah sampun ngidupang Junjungan Saq Mulie Deside Isa Almasih léman ninggal, maraq nike éndah Allah gen ngidupang ite siq kuase-Ne. Napi semeton senamian ndéq nenaoq bahwe awakde nike anggote rage Almasih. Jari, napi kanggo tiang bait sopoq anggote rage Almasih, terus jariang ie anggote awak dengan saq jari pelacur? Ndéqne kanggo gati! Atao sang side pade ndéqman nenaoq bahwe dengan saq bareng tindoq kance pelacur, jari sopoq kance pelacur nike! Séngaq léq dalem Kitab Suci tetulis, “Deduaqne jari sopoq.” Laguq dengan saq pesopoq diriqne kance Tuhan, Roh Tuhan kance roh dengan nike jari sopoq. Jaoqang diriqde léman perbuatan-perbuatan saq cabul. Séngaq selapuq dose lain saq tepiaq siq dengan, telaksane léq luah awak dengan nike. Laguq dengan saq gawéq perbuatan cabul, artine gawéq dose tipaq awakne mésaq. Napi side pade ndéq nenaoq bahwe awakde nike taoq Roh Allah. Roh nike ndot léq dalem side pade. Dait Allah mésaq saq ngicanin side Roh nike. Diriqde ndéqne dowénde mésaq. Nike dowén Allah. Side pade sampun tebeli dait tebayah lunas siq Allah. Keranaq nike, mulieang Allah kadu awakde. Mangkin tiang gen sampéang masalah-masalah saq side pade sebut léq dalem suratde. Lamun sopoq dengan mame ndéq merariq, nike solah. Laguq, adéq ndéq tegode jari gawéq perbuatan saq cabul, solahan sebilang dengan mame bedowé seninene mésaq, dait sebilang dengan nine bedowé semamene mésaq. Semame harus ngelaksaneang kewajibanne sebagé semame tipaq seninene, maraq nike éndah senine harus ngelaksaneang kewajibanne sebagé senine tipaq semamene. Senine ndéq bedowé kuase léq awakne mésaq; saq bekuase léq awakne nike, semamene. Maraq nike éndah semame ndéq bedowé kuase léq awakne mésaq; saq bekuase léq awakne nike, seninene. Ndaq saling jaoqin sopoq kance saq lain sebagé senine semame. Kecuali jari sementare waktu, asal deduaqne sampun setuju. Siq care nike sopoq-sopoq bau bedo'e. Laguq sesampun nike, side pade harus rukun malik dait idup berembé seharusne senine semame. Lamun ndéq maraq nike, side pade gen kene rayuan Belis, séngaq side pade ndéq kuat nahen napsu. Tiang sampéang hal niki ndéqne sebagé préntah, laguq cume ngebéng naséhat. Setetune tiang demenan lamun selapuq dengan jari maraq tiang. Laguq sopoq-sopoq dengan sampun nerimaq paice saq husus léman Allah. Sopoq dengan bedowé paice maraq niki, saq lain bedowé paice maraq nike. Tipaq dengan-dengan saq ndéqman merariq dait tipaq dengan-dengan nine saq sampun bebalu, niki naséhat tiang: Solahan side tetep idup mésaq maraq tiang. Laguq lamun side ndéq bau nahen napsu, solahan side merariq. Séngaq solahan side merariq ketimbang napsunde beléq. Tipaq ie pade saq sampun merariq, niki préntah tiang: (Setetune ndéqne tiang saq ngebéng préntah niki, laguq Tuhan.) Sopoq dengan nine saq sampun merariq ndaq séang semamene. Laguq lamun ie sampun séang semamene, ie harus tetep ndéq besemame, atao tulak ojok semamene. Dait sopoq semame ndéqne kanggo séang seninene. Tipaq saq lain-lainne, maraq niki naséhat tiang -- niki naséhat tiang mésaq, ndéqne léman Tuhan -- lamun araq sopoq semeton besenine kance dengan nine saq ndéq percaye léq Almasih, dait seninene setuju idup bareng kance ie, dengan nike ndéqne kanggo séang seninene. Dait lamun sopoq dengan nine besemame kance dengan saq ndéq percaye léq Almasih, dait semamene setuju jari idup bareng kance ie, make senine nike ndéqne kanggo séang semamene. Séngaq semame saq ndéq percaye léq Almasih tesuciang lantaran ie merariq kance dengan saq sampun beriman léq Almasih. Maraq nike éndah senine saq ndéq percaye léq Almasih tesuciang lantaran ie merariq kance semame saq sampun beriman léq Almasih. Lamun ndéq maraq nike, bije-bije ie pade gen teparan bije-bije najis, padahal mangkin bije-bije nike sampun tesuciang. Laguq lamun dengan saq ndéq percaye nike séang senine atao semamene, ndaq balaq ie. Léq dalem hal niki saq nine atao saq mame bébas. Séngaq Allah manikang side jari idup léq dalem damé sejahtere. Séngaq side sebagé senine -- saq sampun percaye léq Almasih -- berembé side bau nenaoq secare pasti bahwe side ndéq bau nyelametang semamende? Maraq nike éndah side sebagé semame saq percaye léq Almasih, berembé side bau nenaoq secare pasti bahwe side ndéq bau nyelametang seninende? Sopoq-sopoq harus ngatur kehidupanne menurut bimbingan Tuhan, maraq saq sampun tetentuang siq Allah tipaq ie léq waktu Allah ngemanikang ie jari percaye léq Allah. Nike aturan saq tiang ajahang léq sebilang jemaah. Umpamene, lamun sopoq dengan sampun tesunat léq waktu ie nerimaq Allah, make dengan nike ndaq berusahe telangang tande-tande sunat nike. Maraq nike éndah lamun sopoq dengan ndéqman tesunat léq waktu ie nerimaq Allah, ndaq dengan nike belakoq tesunat. Séngaq turut atao ndéq aturan sunat, deduaqne pade-pade ndéq araq artine. Saq penting turut hukum-hukum Allah. Sebilang dengan harus tetep idup dalem keadaan maraq waktu ie temanikang siq Allah. Lamun léq waktu side pade temanikang, side pade jari hambe, ndaq side pade susah-susah mikirang hal nike. Laguq lamun laun side pade mauq kesempatan jari dengan bébas, kadu kesempatan nike. Séngaq sopoq dengan saq temanikang siq Tuhan waktu ie masih jari hambe, ie jari dengan saq bébas léq arepan Tuhan. Dait sopoq dengan bébas saq temanikang siq Almasih, ie jari hambe Almasih. Side sampun tebeli siq Allah dait sampun lunas tebayah. Keranaq nike, ndaq side nyerahang diriqde jari hambe manusie. Jari, semeton senamian, timaq berembé keadaan side sewaktu temanikang, side harus tetep idup maraq nike bareng kance Allah. Mangkin mengenai dengan-dengan nine saq ndéqman merariq. Mengenai hal nike, tiang ndéq nerimaq préntah napi-napi léman Tuhan. Laguq sebagé dengan saq patut tepercaye lantaran rahmat Tuhan, tiang mélé nyampéang naséhat tiang. Lamun inget selapuq kesusahan saq ngancem mangkin niki, tiang rase solahan lamun dengan tetep idup maraq keadaanne saq mangkin. Lamun side sampun bedowé senine ndaq berusahe séang seninende nike. Lamun side ndéqman bedowé senine ndaq boyaq senine. Laguq lamun side merariq, nike ndéqne dose. Maraq nike éndah lamun sopoq dedare merariq, ndéqne berarti ie bedose. Cume, ie pade saq merariq nike gen hadepin luwéq kesusahan. Dait tiang melét adéq side pade ndéq tetimpe siq kesusahan-kesusahan nike. Maksut tiang maraq niki, semeton senamian: Ite ndéq bedowé luwéq waktu malik. Mulai léman mangkin, sebilang dengan saq sampun bedowé senine, adéqne idup maraqne ie ndéq bedowé senine; dengan saq nangis, idup maraqne ie ndéq sedih angenne; dengan saq réréq, maraqne ie ndéq gembire; dengan saq sampun beli, maraqne ie ndéq bedowé napi-napi; dait dengan-dengan saq ngadu barang-barang saq araq léq dunie niki, harus idup maraqne ie ndéq ngadu hal-hal nike. Séngaq ndéqne ngonéq malik dunie niki, dalem keadaanne saq mangkin, gen musnah! Tiang melét adéq side pade ndéq idup léq dalem kekuatiran. Dengan saq ndéq bedowé senine gen hususang pikiranne léq hal-hal mengenai Tuhan, lantaran ie mélé nyenengang Tuhan. Laguq dengan saq bedowé senine gen luwéq mikirang hal-hal dunie niki, séngaq ie melét nyenengang seninene; akibatne perhatianne tebagi-bagi. Sopoq dengan nine saq ndéq bedowé semame, atao sopoq dedare gen luwéq mikirang hal-hal mengenai Tuhan, séngaq ie melét adéq awak dait rohne jari dowén Tuhan. Laguq sopoq dengan nine saq sampun bedowé semame, hususang pikiranne léq hal-hal dunie niki, séngaq ie melét nyenengang semamene. Tiang nulis selapuqne nike jari kesolahande mésaq, ndéqne siq maksut halangin kebébasande. Saq tiang melétang cume adéq side ngelaksaneang saq kenaq dait patut, dait adéq side bau hususang pikirande tipaq Tuhan. Lamun sopoq dengan merase ndéq ngelaksaneang hal saq sepatutne tipaq berayene, lamun ie ndéq bau nahen napsune, dait ie merase perlu merariq kance dedare nike, alurang ie laksaneang napi saq bagus menurut ie. Ie ndéq bedose, lamun ie pade merariq. Laguq lamun sopoq dengan sampun miaq keputusan léq dalem angenne ndéq gen merariq kance berayene dait keputusanne nike ndéqne tepaksaq, make saq ie laksaneang nike solah, asal ie kuat ngelaksaneang hal nike. Jari, dengan saq merariq solah perbuatanne, dait dengan saq ndéq merariq solahan malik perbuatanne. Sopoq dengan nine saq sampun merariq teriket tipaq semamene cume sengonéq semamene idup. Lamun semamene sampun milinang, dengan nine nike bébas merariq malik kance dengan saq ie demenang; asal dengan nike dengan saq percaye léq Almasih. Laguq ie gen lebih bahagie lamun ie ndéq merariq malik. Nike pendapet tiang mésaq, laguq tiang rase bahwe saq tiang ucapang niki siq kuase Roh Allah. Mangkin mengenai keloran saq teaturang tipaq berhale. Mule kenaq maraq basen dengan bahwe, “Ite selapuq sampun bedowé penenaoq.” Kepinteran miaq dengan jari sombong, laguq kasih pesolah dengan. Dengan saq beranggepan bahwe ie bedowé sopoq penenaoq, setetune ndéqman nenaoq sedalem-dalemne. Laguq dengan saq tetu-tetu ngasihin Allah, ie tekenal siq Allah. Mengenai masalah ngelor keloran saq sampun teaturang tipaq berhale, ite nenaoq bahwe ndéq araq berhale léq dunie. Dait ite nenaoq éndah bahwe Allah cume sopoq; ndéq araq saq lain. Mule luwéq éndah napi saq tesebut déwe; saq araq léq langit dait saq araq léq gumi. Laguq bagi ite, Allah cume sopoq. Ie Bapa saq cipteang selapuq-lapuqne, dait ite idup umaq Ie. Dait Tuhan cume sopoq éndah, nike Deside Isa Almasih. Langan Ie selapuq hal tecipteang, dait lantaran Ie make ite idup. Timaq maraq nike, ndéqne selapuq dengan nenaoq hal nike. Araq dengan saq lantaran masih terus nyembah berhale, ngelor keloran nike sebagé keloran saq sampun teaturang tipaq berhale. Sehingge até nurani ie pade saq lemah merase jari kotor. Setetune keloran nike ndéqne miaq hubungante kance Allah jari sayan rapet. Lamun ite ngelor keloran nike, ite ndéq mauq keuntungan napi-napi. Sebalikne lamun ite ndéq ngelor keloran nike, ite éndah ndéq rugi napi-napi. Laguq, onyaq-onyaq! Ndaq jangke telaksane bahwe dengan lain jari bedose -- lantaran keyakinanne ndéqman kuat -- séngaq side pade bébas ngelaksaneang napi juaq. Maksut tiang maraq niki: Misalne side pade, saq bedowé penenaoq saq kuat, kenyeke tokol bekelor léq kuil berhale. Beterus araq sopoq dengan serioq side pade tokol bekelor léq derike. Lamun keyakinan dengan nike ndéq kuat, make side pade gen miaq dengan nike bani éndah ngelor keloran saq sampun teaturang tipaq berhale nike. Dait lantaran nike, make penenaoq side pade miaq dengan saq keyakinanne ndéq kuat jari sesat. Padahal Almasih ninggal umaq dengan nike éndah. Dait lamun side pade piaq dose maraq nike tipaq semeton-semetonde -- artine side pade nyédaq keyakinan ie pade saq lemah -- make side pade bedose tipaq Almasih. Keranaq nike, lamun keloran jari penyebap semeton tiang bedose, make tiang ndéq gen mélé gati ngelorang daging selaéq-laéqne. Séngaq ndaq-ndaq semeton tiang bedose lantaran tiang. Napi tiang niki ndéqne dengan bébas? Napi tiang niki ndéqne rasul? Napi tiang ndéq uwah serioq Deside Isa Junjungante Saq Mulie? Napi side pade ndéqne hasil pegawéan tiang léq dalem Tuhan? Lamun dengan-dengan lain ndéq mélé akuq tiang sebagé rasul, laguq bagi side pade tiang rasul! Séngaq idupde léq dalem Tuhan nike, buktiang bahwe tiang niki sopoq rasul. Lamun dengan ngeraosang tiang, tiang gen jawab maraq niki: Napi tiang ndéq berhak bekelor dait nginem? Napi tiang ndéq berhak jauq sopoq senine saq seiman bareng-bareng dalem kelampan tiang, maraq saq telaksaneang siq sanak-sanak Junjungan Saq Mulie Deside Isa dait siq rasul-rasul lainne, termasuk Kepas? Atao cume tiang dait Barnabas doang saq teharusang boyaq napkah mésaq? Napi araq anggote tentere saq harus biayaq diriqne mésaq léq dalem angkatan perang? Napi araq petani saq nalet anggur léq kebonne terus ndéqne kelorang hasil anggur léman kebon nike? Atao napi araq pengarat saq meliharaq dombe, terus ndéq nginem susu léman dombe-dombene nike? Tiang nyampéang hal nike ndéqne tedasarang napi saq biase dalem pengalaman sebilang jelo doang, laguq séngaq Hukum Taurat nyatayang hal nike éndah. Léq dalem Kitab Musa tetulis, “Sampi saq kenyeke ngicaq-icaq gandum jari kelin tolang gandum léman léndongne, ndaq tepelébék biwihne.” Napi sampi nike saq teperhatiang siq Allah? Atao hal nike saq temaksut umaq ite? Mule nike saq tetulis umaq ite. Séngaq dengan saq begawéan léq lendang dait dengan saq mersiq gandumne sampun sepatutne begawéan dait beharep gen nerimaq separo léman hasil pegawéanne. Tiang pade sampun sawur binéq rohani léq dalem idupde. Jari, lamun tiang pade mataq hasil duniawi léman side pade, napi nike artine tiang pade nuntut luwéqan léman side pade? Lamun dengan-dengan lain berhak beharep hal niki léman side pade, napi tiang pade ndéq lebih berhak malik léman ie pade? Laguq tiang ndéq kadu hak nike. Sebalikne tiang demenan nanggung selapuq hal ketimbang nimbulang penghalang penyebaran Kabar Solah mengenai Almasih. Side pasti nenaoq bahwe dengan saq begawéan léq Gedéng Allah ie pade nerimaq keloran léman Gedéng Allah. Dait dengan-dengan saq ngurus méje taoq kurban, mauq bagian léman kurban saq teaturang léq derike. Maraq nike éndah Tuhan sampun nentuang bahwe dengan saq beriteang Kabar Solah nike harus mauq napkahne léman pemberitean nike. Laguq sopoq juaq léman hak nike ndéq uwah tiang kadu. Dait tiang nulis surat niki éndah ndéqne bedowé maksut adéqne hal nike saq telaksaneang léq tiang mangkin. Bagusan tiang maté ketimbang hal saq tiang banggeang nike telang. Séngaq, lamun nike cume soal beriteang Kabar Solah léman Allah, make tiang ndéq berhak bangge, séngaq Allah sampun mréntahang tiang jari ngelaksaneang hal nike. Celake tiang, lamun tiang ndéq beriteang Kabar Solah nike! Misalne tiang ngelaksaneang pegawéan nike siq keméléq tiang mésaq, make tiang kanggo beharep jari mauq upaq. Laguq lantaran tewajibang make tiang beriteang Kabar Solah nike. Tiang tetugasang siq Allah jari ngelaksaneang hal nike. Lamun maraq nike, napi saq jari upaq tiang? Niki upaqne: Bahwe tiang bau beriteang Kabar Solah nike ndéq teupaq siq napi-napi, séngaq tiang ndéq nuntut hak-hak tiang sebagé dengan saq beriteang Kabar Solah nike. Tiang niki ndéqne hambe sai-sai; tiang bébas. Timaq maraq nike, tiang sampun jariang diriq tiang niki hambe tipaq selapuq dengan. Tiang ngelaksaneang nike adéq tiang bau jariang dengan pengiring Almasih seluwéq-luwéqne. Tipaq dengan Yahudi, tiang piaq diriq tiang maraq dengan Yahudi, adéq tiang bau jariang dengan Yahudi pengiring Almasih. Tipaq dengan-dengan saq idup menurut Hukum Taurat, tiang piaq maraqne tiang teriket léq hukum nike, timaq setetune tiang ndéq teriket léq hal nike. Tiang piaq hal nike adéq tiang bau jauq ie pade jari pengiring Almasih. Tipaq dengan bangse-bangse lain, tiang piaq diriq tiang maraq dengan bangse-bangse lain, saq idup léq luah Hukum Taurat. Tiang ngelaksaneang nike adéq tiang bau jauq ie pade jari pengiring Almasih. Laguq nike ndéqne berarti bahwe tiang ndéq taat léq préntah-préntah Allah; malahan tiang tekuasein siq préntah-préntah Almasih. Léq tengaq-tengaq dengan-dengan saq keyakinanne ndéq kuat, tiang éndah piaq diriq tiang maraq sopoq dengan saq ndéq kuat keyakinanne, adéq tiang bau jauq ie pade jari pengiring Almasih. Singketne, tiang jari selapuq-lapuqne tipaq selapuq dengan adéq tiang bau nyelametang seluwéq-luwéqne léman ie pade. Selapuq nike tiang laksaneang jari Kabar Solah léman Allah nike, adéq tiang mauq bagian léq dalemne. Side pasti nenaoq bahwe léq dalem perlombaan selapuq saq milu perlombaan milu pelai, laguq cume sopoq dengan saq nerimaq hadiah. Keranaq nike pade pelai pacu-pacu sehingge side nerimaq hadiahne. Sebilang dengan saq kenyeke dalem perlombaan, nahen diriqne léq selapuq hal. Ie ngelaksaneang nike lantaran ie melét mauq sopoq mahkote saq iniq séde. Laguq ite niki nahen diriq dalem selapuq hal lantaran ite melét mauq sopoq mahkote saq kekel. Keranaq nike tiang pelai tipaq tujuan saq sampun tetentuang. Maraq dalem pertandingan tinju, tiang ndéq gen sembarangan bejagur. Tiang ngelatih dait nguasein awak tiang, adéq sesampun beriteang Kabar Solah léman Allah tipaq dengan lain, ndaq jangke tiang mésaq tetolaq. Semeton senamian! Side pade harus inget napi saq telaksane tipaq leluhurte sewaktu ie pade ngiring Musa. Ie pade selapuq telindungin siq awan, dait selamet mbelat Segare Béaq. Adéqne bau jari pengiring-pengiring Musa, ie pade selapuq tebaptis léq dalem awan dait léq dalem segare nike. Ie pade selapuq ngelor keloran rohani saq pade, dait nginem ineman rohani saq pade. Ie pade selapuq nginem léman gunung batu rohani saq araq bareng kance ie pade; gunung batu nike Almasih mésaq. Timaq maraq nike, luwéq léman ie pade saq Allah nénten suke, dait lantaran nike mayit-mayit ie pade begelanyat léq padang gurun. Selapuqne nike jari conto umaq ite, jari ngingetang ite adéq ndaq melétang hal-hal saq jahat maraq ie pade. Dait adéq ite éndah ndaq nyembah berhale maraq saq tegawéq siq separo léman ie pade. Léq dalem Kitab Suci tetulis, “Make bangse nike mulai ngelor dait nginem, dait ngigel jari nyembah berhale.” Ite ndéq kanggo gawéq hal-hal saq cabul maraq saq telaksaneang siq separo léman ie pade. Sehingge dalem sejelo doang, telu likur iyu dengan léman ie pade ninggal. Ite ndéq kanggo cobe Tuhan maraq saq telaksaneang siq separo léman ie pade laéq, sehingge ie pade ninggal tekakoq siq ulah saq beracun. Ite ndéq kanggo éndah ngerumun; maraq saq telaksaneang siq separo léman ie pade laéq, sehingge ie pade tematéq siq malaékat maut. Selapuq hal nike telaksane tipaq ie pade adéqne jari conto bagi dengan-dengan lain. Dait selapuqne nike tetulis éndah adéqne jari peringetan tipaq ite. Séngaq mangkin ite idup léq ahir jaman. Dengan saq paran diriqne kuat nganjeng, harus onyaq-onyaq; ndaq jangke ie geriq. Sebilang cobe saq side alamin, nike cobe saq biase tealamin siq manusie. Laguq Allah setie léq janji-Ne. Ie nénten gen menengang side tecobe lebihan léman kekuatande. Léq waktu side tetimpe siq cobe, Ie gen ngicanin side langan sehingge side bau nahen cobe nike. Keranaq nike, semeton senamian saq tiang kasihin, jaoqang diriqde léman penyembahan berhale. Tiang ngeraos léq side maraq tipaq dengan-dengan saq bijaksane. Side pade harus timbang mésaq ucapan tiang niki. Sewaktu ite nginem anggur siq ucapan syukur tipaq Allah, napi hal nike ndéq nyatayang bahwe ite niki besopoq kance daraq Almasih? Dait sewaktu ite bagi-bagiang ruti jari tekelorang bareng-bareng, napi nike ndéq nyatayang bahwe ite besopoq dalem rage Almasih? Séngaq cume araq sopoq ruti, dait selapuqte ngelor léman ruti saq sopoq nike éndah, make ite saq luwéq niki jari sopoq awak. Cobaq perhatiang bangse Israel. Tekan ie pade saq ngelor keloran saq teaturang nike bareng-bareng mauq bagian léman méje taoq kurban nike? Napi maksut tiang léq hal nike? Berhale atao keloran saq teaturang tipaq berhale nike ndéq bedowé arti napi-napi. Napi saq teaturang tipaq berhale, nike ndéqne teaturang tipaq Allah, laguq tipaq roh-roh jahat. Dait tiang ndéq mélé side pade besopoq kance roh jahat. Side pade ndéq kanggo nginem léman cawan léq méje perjamuan Tuhan dait éndah léman cawan léq méje perjamuan Belis. Side pade ndéq kanggo kelorang ruti léq méje perjamuan Tuhan, dait éndah léq méje perjamuan Belis. Atao ite mélé piaq Tuhan talon até? Napi ite kuatan tebanding Tuhan? “Ite kanggo piaq napi doang saq ite melétang.” Mule kenaq! Laguq ndéqne selapuq saq ite melétang nike araq manpaatne. “Ite kanggo piaq napi doang saq ite melétang” -- laguq ndéqne selapuq saq ite melétang nike bau pesolah idupte. Ndaq sopoq dengan juaq bejuang jari kepentingan diriqne mésaq. Sebilang dengan harus bejuang jari kepentingan dengan lain. Side pade kanggo ngelorang napi doang saq tejual léq peken. Ndéqne perlu teperiksaq juluq, timaq araq keberatan-keberatan léq dalem até nurani side. Séngaq dalem Kitab Suci tetulis, “Gumi dait selapuq isine dowén Tuhan.” Lamun side pade tepesilaq bekelor siq sopoq dengan saq ndéq percaye léq Almasih, dait side pade terimaq pesilaqan nike, kelorang napi saq tepesajiq umaq side. Ndaq side periksaq léman mbé asalne keloran nike, adéq ndéq araq keberatan-keberatan léq dalem até nurani side. Laguq lamun araq saq bebase léq side, “Keloran niki sampun teaturang tipaq berhale,” ndaq kelor keloran nike, lantaran merhatiang kepentingan dengan nike dait lantaran suare até nurani. Maksut tiang ndéqne suare até nurani side, laguq suare até nurani dengan nike. Sang araq saq beketuan, “Kembéq kebébasan tiang harus tebatesin siq suare até nurani dengan lain? Lamun tiang ngelor keloran siq rase syukur tipaq Allah, kembéq dengan ngewade tiang lantaran keloran nike, padahal tiang sampun ngucap syukur tipaq Allah?” Napi juaq saq side laksaneang -- side bekelor atao side nginem -- laksaneang selapuqne nike jari mulieang Allah. Pade idup maraq nike sehingge side ndéq jari penyebap dengan lain piaq dose; napi ie pade dengan Yahudi atao dengan bangse-bangse lain, atao jemaah Allah. Pade idup maraq tiang. Tiang berusahe nyenengang angen selapuq dengan dalem selapuq hal. Tiang ndéq araq bedowé maksut jari kepentingan tiang mésaq. Saq jari tujuan tiang cume adéq ie pade selapuq teselametang. Turut teladan tiang, maraq tiang éndah turut teladan Almasih. Tiang puji side pade séngaq side pade tetep inget léq tiang dait turut perajahan saq tiang ajahang tipaq side pade. Laguq tiang mélé side pade nenaoq sopoq hal malik, bahwe saq jari kepale léq sebilang dengan mame nike, Almasih; saq jari kepale léq senine nike, semame dait saq jari kepale léq Almasih nike, Allah. Lamun sopoq dengan mame léq waktu bedo'e atao léq waktu benubuat léq julun dengan luwéq, ngengadu kerudung, make dengan nike menghine Almasih. Dait lamun sopoq dengan nine léq waktu bedo'e atao benubuat léq julun dengan luwéq ndéq ngengadu kerudung, make ie menghine semamene saq jari kepale léq diriqne. Nike pade doang maraqne ulu dengan nine nike sampun tepeleng bulune. Séngaq lamun sopoq dengan nine ndéq mélé ngengadu kerudung, solahan bulune tepeleng. Laguq lamun sopoq dengan nine begunting atao tepeleng bulune, make nike sopoq penghinean tipaq ie. Keranaq nike bagusan ie ngengadu kerudung. Dengan mame ndéqne perlu ngengadu kerudung, séngaq ie nyatayang pribadi dait kemuliean Allah. Laguq dengan nine jari nyatayang kemuliean dengan mame, séngaq dengan mame ndéqne tejariang léman dengan nine, dengan nine saq tejariang léman dengan mame. Dengan mame ndéqne tecipteang lantaran dengan nine, laguq dengan nine tecipteang lantaran dengan mame. Lantaran hal nike, dait lantaran pare malaékat, dengan nine harus kadu kerudung saq nyatayang wibawene. Timaq maraq nike dalem kehidupante léq dalem Tuhan, ndéq araq dengan mame saq ndéq merluang dengan nine, dait ndéq araq dengan nine saq ndéq merluang dengan mame. Séngaq timaq dengan nine penembéq tecipteang léman dengan mame, laguq sesampun nike dengan mame tebijeang léman dengan nine; dait selapuq hal asalne léman Allah. Cobaq semeton senamian timbang mésaq hal niki: Napi solah sopoq dengan nine bedo'e tipaq Allah léq julu dengan luwéq, ndéqne ngengadu kerudung? Léman pengalaman saq biase, side pade sampun teajah bahwe sopoq hal saq merilaq lamun dengan mame bélo bulune. Laguq bagi dengan nine, bulu nike teicanin jari penutup ulune dait bulu saq bélo jari kebanggeanne. Nah, lamun araq saq mélé nentang mengenai masalah niki, tiang pade dait jemaah-jemaah Allah lainne ndéq bedowé kebiasean saq maraq nike. Mengenai hal saq selanjutne niki, tiang ndéq puji side pade. Kumpulan-kumpulan ibadahde ndéqne ngasilang saq solah, laguq saq ndéq solah. Penembéqne tiang dengah, bahwe léq dalem kumpulan-kumpulan ibadahde araq golongan-golongan saq saling béde paham. Dait tiang yakin bahwe kabar nike kenaq. Mule harus araq perpecahan léq antare side, adéq laun penggitan sai-sai dengan saq tahen léq dalem ujian. Laguq léq waktu side pade bekumpul, saq side pade araqang nike ndéqne Perjamuan Tuhan. Séngaq léq waktu bekelor, side pade sopoq-sopoq berebutan bait keloranne mésaq, jangke araq saq ndéq mauq napi-napi, laguq saq lainne jari bowos. Kembéq jangke maraq nike? Tekan side bedowé balé? Side bau bekelor dait nginem léq derike! Atao side mélé menghine jemaah Allah dait perilaq dengan-dengan miskin? Napi saq harus tiang ucapang léq side pade? Napi harus tiang puji side pade? Ndéq! Tiang ndéq gati gen puji side pade. Séngaq saq tiang ajahang léq side, nike tiang terimaq léman Tuhan mésaq: Bahwe léq kelem nike sewaktu Deside Isa, Junjungante Saq Mulie tehianatin, Ie bait ruti, dait sesampun Ie ngucapang syukur tipaq Allah léq ruti nike, Ie peleng-peleng ruti nike kadu gading-Ne, terus bemanik, “Niki ragen Tiang saq teserahang umaq side pade. Laksaneang niki jari nginget Tiang.” Maraq nike éndah sesampun inggas medaran, Deside Isa bait cawan saq berisi anggur terus bemanik, “Cawan niki perjanjian Allah saq baru, saq tesahang kadu daraq Tiang. Sebilang side pade nginem anggur niki, laksaneang niki jari nginget Tiang.” Mule sebilang side pade ngelorang ruti dait nginem anggur niki, side pade beriteang ninggal-Ne Junjungante Saq Mulie, jangke Ie rauh. Keranaq nike, dengan saq ngelorang ruti atao nginem léman cawan Tuhan siq care saq ndéq patut, dengan nike bedose tipaq Tuhan saq sampun ngurbanang rage dait daraq-Ne. Jari, sebilang dengan harus meriksaq diriqne juluq, baruq ie kanggo ngelorang ruti dait nginem anggur nike. Séngaq lamun dengan ngelorang ruti dait nginem anggur ndéqne ngakuq ragen Tuhan, dengan nike ngelor dait nginem jari nerimaq hukuman Allah tipaq diriqne mésaq. Keranaq nike luwéq léq antare side pade saq sakit dait lemah, dait araq éndah saq ninggal. Laguq lamun ite nguji diriqte mésaq juluq, ite ndéq gen tehukum siq Allah. Laguq lamun ite tehukum siq Allah, Ie gen ngajah ite, adéq ite ndéq kene hukuman bareng kance dunie niki. Keranaq nike, semeton-semeton tiang, lamun side pade bekumpul jari bekelor léq perjamuan Tuhan, side pade harus saling antih. Lamun araq saq lapah, ie harus bekelor juluq léq balé. Lamun side pade perhatiang hal niki, make kumpulan-kumpulan ibadahde ndéqne gen datengang hukuman léman Allah léq diriqde mésaq. Mengenai masalah-masalah saq lain, laun gen tiang jelasang tipaq side, lamun tiang dateng. Mangkin mengenai paice-paice saq teicanin siq Roh Allah. Mengenai hal nike, tiang mélé adéq semeton-semeton nenaoq saq setetune. Pade inget bahwe sendéqman side pade kenal Tuhan, side pade kena pengaruh jari turut berhale saq pakoq. Side pade harus nenaoq bahwe dengan saq tepimpin siq Roh Allah ndéq gen bebase, “Tekutuk Deside Isa!” Maraq nike éndah ndéq araq sopoq dengan juaq saq bau ngaku, “Deside Isa nike Junjungan Saq Mulie!” lamun dengan nike ndéq tepimpin siq Roh Allah. Araq macem-macem paice léman Roh Allah, laguq selapuqne teicanin siq Roh saq sopoq. Araq macem-macem pegawéan jari ngelayanin Tuhan, laguq Tuhan saq telayanin nike, Tuhan saq sopoq éndah! Araq luwéq care Allah ngelaksaneang karye-Ne dalem kehidupante, laguq saq ngicanin kekuatan tipaq sebilang dengan nike, Allah saq sopoq éndah. Laguq tipaq sebilang dengan, tepercayeang paice Roh Allah jari kepentingan bareng-bareng. Tipaq sopoq dengan, Roh nike ngicanin paice jari bebaos siq hikmat. Tipaq saq lain Roh saq pade nike ngicanin paice jari bebaos siq penenaoq. Tipaq sopoq dengan Roh saq pade ngicanin iman, dait tipaq saq lain Roh nike ngicanin paice jari nyelahang dengan. Tipaq sopoq dengan Roh nike ngicanin kuase jari miaq keajaipan, dait tipaq saq lain Roh nike ngicanin paice jari benubuat, dait tipaq saq lain malik Roh nike ngicanin paice jari béde-bédeang macem-macem roh. Tipaq sopoq dengan Roh nike ngicanin paice jari bebaos kadu base-base saq ajaip, dait tipaq saq lain Roh nike ngicanin paice jari jelasang arti léman base-base saq ajaip nike. Selapuqne nike telaksaneang siq Roh saq sopoq nike éndah; sopoq-sopoq dengan teicanin paice saq husus menurut pekayunan Roh nike. Almasih nike maraq awak manusie; awak nike sopoq, laguq bedowé luwéq anggote. Selapuq anggote nike, timaqne luwéq, laguq sopoq awak. Maraq nike éndah ite selapuq, timaq dengan Yahudi atao dengan bangse-bangse lain, hambe-hambe atao dengan bébas; ite selapuq sampun tebaptis siq Roh saq pade nike, adéq ite tejariang sopoq léq rage Almasih nike. Ite selapuq sepenoqne éndah ngalamin Roh saq sopoq nike. Séngaq awak nike mésaq ndéqne berasal léman sopoq anggote doang laguq luwéq anggotene. Lamun naé muni, “Tiang ndéqne ime, keranaq nike tiang ndéqne bagian léman awak,” nike ndéqne berarti bahwe naé nike ndéqne bagian léman awak. Dait lamun kentok muni, “Séngaq tiang ndéq penenteng, make tiang ndéqne bagian léman awak,” nike éndah ndéqne berarti bahwe kentok nike ndéqne bagian léman awak. Seandéne selapuq awak nike jari penenteng doang, berembé awak nike bau dengah? Atao lamun selapuq awak nike jari kentok doang, berembé awak nike bau ngambuq? Ite serioq bahwe Allah saq noloq anggote-anggote nike léq awak. Sopoq-sopoq tetoloq siq Allah léq taoqne menurut pekayunan-Ne. Lamun selapuqne cume sopoq anggote doang, mbé saq tesebut awak? Jari mule araq luwéq anggote, laguq awak cume sopoq. Keranaq nike, penenteng ndéqne bau muni léq ime, “Tiang ndéq merluang side!” atao ulu muni léq naé, “Tiang ndéq merluang side!” Sebalikne anggote-anggote awak saq teanggep lemah nike, ite perluang gati; dait anggote-anggote saq ite anggep kurang solah, malahan nike anggote-anggote saq ite béng perhatian husus. Anggote-anggote awak saq ndéq solah ruene, malahan lebih ite perhatiang. Anggote-anggote awak saq sampun solah ruene, ndéqne merluang perhatiante. Allah sampun nyusun awakte maraq nike sehingge anggote-anggote saq kurang solah tebéng perhatian saq husus. Siq care nike awak nike ndéqne tebagi-bagi; sopoq-sopoq anggote saling perhatiang sopoq kance saq lainne. Lamun sopoq anggote menderite, selapuq anggote saq lainne menderite éndah; lamun sopoq anggote tepuji, selapuq anggote saq lainne milu seneng. Semeton-semeton senamian bareng-bareng jari rage Almasih dait side pade sopoq-sopoq éndah jari anggote léman rage nike. Maraq nike éndah léq dalem jemaah, Allah sampun nentuang taoq jari macem-macem dengan: Penembéqne rasul-rasul; kedue nabi-nabi, ketelu guru-guru, terus ie pade saq mauq paice jari miaq keajaipan-keajaipan, jari nyelahang dengan, jari nulung dengan lain, jari mimpin, dait jari bebaos kadu macem-macem base saq ajaip. Ie pade ndéqne selapuqne rasul, atao nabi, atao guru. Ndéq selapuqne mauq paice jari miaq keajaipan, atao jari nyelahang dengan, atao jari bebaos kadu macem-macem base saq ajaip, atao jari ngartiang base-base nike. Keranaq nike, side pade harus berusahe pacu-pacu adéqde mauq paice-paice saq paling utame. Laguq selanjutne niki tiang nyatayang léq side langan saq lebih utame. Timaqne tiang tao ngeraos kadu macem-macem base malaékat, laguq lamun tiang ndéq bedowé kasih, make napi saq tiang raosang nike cume jari maraq suaren gong beléq ongkatne doang. Timaq tiang bedowé paice jari benubuat dait tiang nenaoq selapuq rahasie dait bedowé selapuq penenaoq, dait timaq tiang bedowé iman saq sempurne sehingge tiang bau miaq gunung ngalih, laguq lamun tiang ndéq bedowé kasih, make tiang ndéq bedowé arti napi-napi! Maraq nike éndah seandéne selapuq dowén tiang, tiang sedekahang tipaq dengan miskin, dait tiang serahang diriq tiang jari tetunuq, laguq lamun tiang ndéq bedowé kasih, make selapuqne nike ndéq araq manpaatne umaq tiang. Kasih nike sabar, kasih nike murah até, ie ndéq talon até. Ie ndéq girang sesumbar, dait ndéqne sombong. Ie ndéq angkuh, ndéqne kasar, ie ndéq maksaq dengan lain harus turut keméléqne mésaq, ndéq becat sili, dait ndéq dendem. Ie ndéqne seneng léq hal saq ndéq adil, laguq ie cume seneng léq hal saq kenaq. Ie tahen menderite dalem selapuq hal, percaye léq selapuq hal, beharep léq selapuq hal, dait tekun léq dalem selapuq hal. Kasih nike ndéqne gen uwah araq tutuqne, nubuat gen tutuq. Base saq ajaip gen tutuq, penenaoq gen musnah. Séngaq penenaoqte dait nubuatte ndéqne sempurne. Laguq lamun saq sempurne sampun dateng, make saq ndéq sempurne nike gen musnah. Sewaktu tiang masih kodéq, tiang ngeraos maraq kanak kodéq, tiang bedowé perasaan maraq kanak kodéq dait pikiran tiang éndah maraq kanak kodéq. Laguq mangkin tiang sampun déwase, kelakuan tiang saq maraq kanak kodéq sampun tiang tetéh. Napi saq ite serioq mangkin niki maraq lingon saq saru léq dalem kesene. Laguq éraq ite gen serioq langsung secare jelas. Mangkin tiang ndéqman nenaoq selapuqne, laguq éraq tiang gen nenaoq selapuqne, maraq Allah wikan selapuqne mengenai diriq tiang. Jari, ketelu hal niki saq tetep araq: Iman, pengharepan, dait kasih. Saq paling beléq léq antare ketelune nike kasih. Jariang kasih nike tujuan side pade saq paling utame. Dait berusahe éndah jari mauq paice-paice saq teican siq Roh Allah, terutame gati paice benubuat. Dengan saq ngeraos kadu base-base saq ajaip, ie ndéqne ngeraos tipaq manusie laguq tipaq Allah. Ndéq araq dengan saq ngerti napi saq ie raosang, séngaq Roh Allah saq miaq ie ngucapang hal-hal saq rahasie nike. Sebalikne dengan saq benubuat, ie ngeraos kance manusie; jari pesolah ie pade, ngebéng naséhat dait hibur ie pade. Dengan saq ngeraos kadu base saq ajaip, ie cume pesolah diriqne mésaq. Laguq dengan saq benubuat ie pesolah jemaah. Bagus gati lamun semeton senamian tao ngeraos kadu base-base saq ajaip. Laguq saq paling bagus, lamun semeton senamian benubuat. Séngaq dengan saq benubuat lebih beraji ketimbang dengan saq tao ngeraos kadu base saq ajaip; lain halne lamun dengan saq ngeraos kadu base saq ajaip nike iniq jelasang mésaq napi saq ie ucapang nike adéq bau pesolah selapuq jemaah. Lamun misalne tiang dateng ojok side terus tiang ngeraos kadu macem-macem base saq ajaip napi manpaatne nike umaq side pade? Tetu-tetu ndéq araq manpaatne! Lain halne lamun tiang nyatayang sopoq rahasie léman Allah, atao tiang jelasang sopoq hal mengenai Allah, atao tiang nyampéang nubuat, atao tiang ngajahang. Alat-alat tetabuhan saq ndéq bedowé nyawe maraq misalne suling dait kecapi, lamun tepuniqang ndéq keruan-ruan, berembé dengan nenaoq lagu napi saq tepuniqang nike? Sopoq conto saq lainne malik: Lamun terompét tetiup semélé-mélé, sai saq gen siep lumbar perang? Maraq nike éndah siq kepinteran side ngeraos kadu macem-macem base saq ajaip. Lamun siq kepinterande nike side bebase kadu base saq ndéq jelas, ndéq araq sopoq dengan juaq saq iniq ngerti napi saq side ucapang. Ucapan-ucapande nike gen sie-sie. Léq dunie niki araq luwéq gati base, laguq ndéq araq sopoq juaq léman base-base nike saq ndéq bedowé arti. Laguq lamun tiang ndéq ngerti base saq teucapang siq sopoq dengan, make dengan saq ngeraos kadu base saq ndéq tiang ngerti nike jari dengan asing léq tiang, maraq nike juaq tiang léq dengan nike. Mengenai side mésaq, tiang nenaoq side pade melét gati mauq paice-paice léman Roh Allah. Laguq saq terutame gati, side pade harus berusahe kadu kemampuande jari pesolah jemaah. Keranaq nike dengan saq ngeraos kadu base saq ajaip, harus bedo'e adéq ie éndah teicanin paice jari jelasang napi saq ie ucapang nike. Séngaq lamun tiang bedo'e kadu base saq ajaip, roh tiang mule bedo'e laguq pikiran tiang ndéq milu bedo'e. Jari, napi saq harus tiang laksaneang? Niki saq tiang laksaneang: Tiang bedo'e siq roh tiang, laguq tiang éndah gen bedo'e siq pikiran tiang. Tiang gen benyanyi siq roh tiang dait tiang éndah gen benyanyi siq pikiran tiang. Séngaq lamun side ngucap syukur léq Allah siq rohde doang, dait araq dengan lain saq ndéq ngerti base ajaip léman Roh Allah nike, segerah dengan nike tao ngucapang, “Amin” léq do'e syukurde nike? Séngaq ie ndéq nenaoq napi saq side ucapang. Timaq do'e syukurde tipaq Tuhan nike solah gati, laguq do'e nike ndéq pesolah dengan lain. Tiang besyukur léq Allah séngaq tiang mésaq tao ngeraos kadu base saq ajaip nike lebih léman side pade. Laguq léq dalem kumpulan-kumpulan ibadah tipaq Tuhan, tiang demenan ngucapang lime ucapan saq bau piaq dengan paham ketimbang ngucapang beribu-ribu ucapan kadu base saq ajaip, adéq tiang bau ngajah dengan lain. Semeton senamian, ndaq side bedowé pikiran maraq kanak-kanak. Léq hal kejahatan, side harus maraq kanak kodéq. Laguq léq hal pikiran, side harus jari dengan saq déwase. Léq dalem Hukum Taurat araq tetulis, “Manik Tuhan, ‘Léman dengan-dengan saq bedowé base saq lain, dait léman biwih dengan-dengan pendateng, Tiang gen bemanik tipaq bangse niki, timaq maraq nike ie pade ndéq gen dengahang Tiang.’ ” Jari, paice ngeraos kadu base saq ajaip nike tande, ndéqne jari dengan saq beriman, laguq jari dengan saq ndéq beriman; dait paice jari benubuat nike tande, ndéqne jari dengan saq ndéq beriman, laguq jari dengan saq beriman. Keranaq nike, lamun misalne léq dalem kumpulan jemaah, selapuq jemaah ngeraos kadu base ajaip, terus araq dateng dengan luah, atao dengan-dengan saq ndéq percaye léq Almasih, pasti dengan-dengan nike gen anggep side pade selapuq sampun jogang! Laguq lamun side selapuq benubuat, terus dateng dengan luah atao dengan saq ndéq percaye léq Almasih, make hal-hal saq side kabarang nike gen nyatayang dose-dose dengan nike dait piaq ie sadar léq dose-dosene. Hal-hal saq ndéq penggitan dalem aténe gen tenyatayang, sehingge ie gen ngerendahang diriqne, beterus nyembah Allah. Ie gen ngaku bahwe Allah tetu-tetu araq léq tengaq-tengaq side pade. Jari, semeton senamian, napi arti selapuqne nike? Lamun side pade bekumpul, sebilang dengan harus araq saq teaturang: Sopoq dengan benyanyi, saq lain ngajahang, atao araq saq nyampéang berite léman Allah, atao paice jari ngeraos kadu base saq ajaip, atao paice jari jelasang base saq ajaip nike, laguq selapuqne nike harus tekadu jari ngajahang dait jari pesolah selapuqne. Lamun araq saq mélé ngeraos kadu base saq ajaip, harus araq due atao paling luwéq telu dengan doang secare begiliran, dait harus araq éndah saq jelasang napi artine saq teucapang siq dengan saq ngeraos nike. Lamun ndéq araq saq tao jelasang hal nike, make dengan-dengan saq ngeraos kadu base saq ajaip nike harus engkah ngeraos léq dalem kumpulan ibadah nike. Alurang ie pade ngeraos léq dalem angenne mésaq tipaq Allah. Umaq ie pade saq mauq paice jari nabi, cume due atao telu dengan léq antare ie pade saq kanggo benubuat, dait saq lain merhatiang napi saq ie pade ucapang nike. Laguq lamun misalne berite léman Allah nike dateng tipaq sopoq dengan lain saq tokol léq dalem kumpulan ibadah nike, make dengan saq kenyeke ngeraos nike harus engkah ngeraos. Siq care nike, semeton senamian sopoq-sopoq bau benubuat; adéq selapuqne bau nerimaq perajahan dait mauq kekuatan. Paice jari benubuat takluk tipaq nabi saq bedowé paice nike. Séngaq Allah nénten suke kekacoan, laguq damé sejahtere. Maraq saq berlaku léq dalem selapuq jemaah Allah, dengan nine harus tedoq léq dalem kumpulan jemaah. Ie pade ndéq kanggo ngeraos. Ie pade harus taat léq préntah, maraq saq teatur léq Hukum Taurat. Lamun ie pade mélé nenaoq sopoq hal, solahan ie pade beketuan léq semamene léq balé. Ndéqne patut lamun araq dengan nine ngeraos léq dalem kumpulan jemaah. Napi Manik Allah dateng léman side pade? Atao cume tipaq side doang manik nike tesampéang? Lamun araq dengan saq merase bedowé paice jari nabi, atao bedowé paice saq lain, dengan nike harus sadar bahwe napi saq tiang tulis niki préntah léman Tuhan. Laguq lamun araq saq ndéq mélé nerimaq, ndaq perhatiang ie. Keranaq nike semeton senamian, pade berusahe adéq mauq paice benubuat, dait ndaq balaq dengan saq mélé ngeraos kadu macem-macem base saq ajaip. Laguq selapuqne harus telaksaneang secare bagus dait tertib. Dait mangkin, semeton senamian, tiang mélé adéq side pade inget malik léq Kabar Solah léman Allah saq tiang beriteang tipaq side laéq. Side pade nerimaq dait percaye tipaq Almasih lantaran Kabar Solah nike. Lamun side percaye sepenoq angen léq napi saq tiang beriteang nike, make Kabar Solah nike nyelametang side pade; kecuali lamun side percaye ndéqne siq pengertian. Napi saq tiang sampéang tipaq semeton senamian nike, nike sampun tiang terimaq éndah. Saq paling penting, tiang sampéang tipaq side bahwe Almasih ninggal lantaran dose-dosente maraq saq tetulis léq dalem Kitab Suci, tiang sampéang tipaq side bahwe Almasih ninggal lantaran dose-dosente; bahwe Ie temakamang, laguq sesampun nike teidupang malik léq jelo saq ketelu. Nike éndah tetulis léq Kitab Suci. Tiang badaq éndah léq side bahwe Almasih saq teidupang malik nike nyatayang éndah diriq-Ne léq Kepas, dait sesampun nike tipaq kedue olas rasul. Sesampun nike Ie nyatayang diriq éndah sekaligus tipaq lebih léman lime ratus pengiring-Ne. Luwéq léman dengan-dengan nike masih idup jangke mangkin, cume pire dengan saq sampun ninggal. Sesampun nike Almasih nyatayang diriq éndah tipaq Yakub dait sesampun nike tipaq selapuq rasul. Saq penutuq gati Ie nyatayang diriq léq tiang éndah -- tiang saq maraq bebéaq saq teanakang sendéqman wayene! Tiang niki rasul Tuhan saq paling hine. Tiang ndéq patut tesebut rasul, séngaq tiang sampun nganiaye jemaah Allah. Laguq lantaran rahmat Allah tiang jari maraq keadaan tiang saq mangkin. Dait ndéq sie-sie Allah ngicanin rahmat-Ne léq tiang. Malahan tiang saq lelahan begawéan ketimbang selapuq rasul saq lainne. Laguq nike setetune ndéqne usahe tiang; nike rahmat Allah saq ngasihin tiang dait saq bekarye bareng kance tiang. Jari, léman sai side nerimaq Kabar Solah nike -- timaq nike léman tiang atao léman rasul-rasul saq lain -- nike ndéqne jari soal. Saq penting tiang pade beriteang Kabar Solah nike dait side percaye. Lamun saq tiang pade beriteang nike bahwe Almasih sampun teidupang malik léman ninggal, kembéq araq léq antare side saq bebase bahwe dengan ninggal ndéqne gen teidupang malik? Lamun tetu dengan ninggal ndéq gen teidupang malik, nike artine Almasih éndah nénten teidupang malik léman ninggal. Dait lamun misalne Almasih nénten teidupang malik léman ninggal, make sie-sie napi saq tiang pade beriteang dait sie-sie éndah side pade percaye. Lebih léman nike, ternyate bahwe tiang pade beduste mengenai Allah, séngaq tiang pade beriteang bahwe Allah sampun ngidupang malik Almasih léman ninggal, padahal Allah nénten ngidupang Ie malik -- lamun seandéne tetu, bahwe dengan ninggal ndéq teidupang malik! Séngaq lamun dengan ninggal ndéq teidupang malik, make Almasih éndah nénten teidupang malik léman ninggal. Dait lamun Almasih nénten teidupang malik, make sie-sie side pade percaye; nike artine side pade masih dalem keadaan bedose. Siq care nike artine bahwe dengan-dengan saq sampun ninggal léq dalem Almasih, ndéq bedowé harepan éndah. Lamun pengharepante tipaq Almasih cume sewaktu ite masih idup léq dunie niki doang, make ite niki dengan saq paling rugi léman selapuq umat manusie léq dunie niki! Laguq nyatene Almasih sampun teidupang malik léman ninggal. Ie jari saq penembéq léman ie pade saq sampun ninggal. Séngaq kematéan tame ojok dalem dunie siq perantarean sopoq dengan, maraq nike éndah idup malik léman kematéan teicanin tipaq manusie siq perantarean sopoq dengan éndah. Séngaq pade maraq léq dalem Adam selapuq manusie ninggal, maraq nike éndah léq dalem Almasih selapuq dengan gen teidupang. Laguq sopoq-sopoq gen teidupang menurut giliranne: Almasih jari saq penembéq; beterus éraq léq waktu Ie rauh malik, sesampun nike giliran dengan-dengan saq jari dowén Almasih. Sesampun nike baruq kiamat. Léq waktu nike Almasih gen binaseang selapuq pemréntahan, selapuq kekuasean, dait selapuq kekuatan; terus Ie gen nyerahang kekuasean-Ne sebagé Raje, tipaq Allah, Bapante. Almasih harus tetep mréntah jangke Allah jariang selapuq musuh Almasih takluk léq Almasih. Musuh saq paling penutuq saq gen tebinaseang nike kematéan. Léq dalem Kitab Suci tetulis maraq niki, “Allah sampun jariang selapuq-lapuqne takluk léq Almasih.” Jelas bahwe saq temaksut “selapuq-lapuqne” nike ndéq termasuk Allah, saq miaq selapuq-lapuqne nike takluk léq Almasih. Laguq sesampun selapuqne tetaklukang léq Almasih, make Bije saq asalne léman Allah nike, gen taklukang diriq-Ne tipaq Allah saq sampun jariang selapuq-lapuqne takluk léq Allah. Make Allah mésaq gen jari selapuq-lapuqne léq dalem selapuq-lapuqne. Lamun dengan ninggal ndéq teidupang malik, kembéq araq dengan saq tebaptis umaq dengan ninggal? Napi manfaatne ie pade ngelaksaneang hal nike? Lamun mule dengan ninggal tetu-tetu ndéq gen teidupang malik, kembéq ie pade ngelaksaneang hal nike? Dait kembéq éndah tiang pade mélé hadepin bahaye sebilang waktu? Semeton senamian! Sebilang jelo tiang berandangan kance bahaye saq ngancem jiwe tiang, laguq hal nike jari kebanggean tiang léq dalem Deside Isa Almasih, Junjungante Saq Mulie lantaran side pade, napi saq tiang sampéang niki kenaq. Lamun nike cume léman pikiran manusie doang, napi untungne umaq tiang bejuang maraqne ngelawan binatang saq galak léq kote niki, léq Epesus? Lamun mule dengan ninggal ndéq teidupang malik, make, “Silaqte bekelor dait nginem dait beseneng-seneng, séngaq lémaq ite gen ninggal.” Ndaq jangke tetipu! Pergaulan saq lengé nyédaq kebiasean saq bagus. Pade sadar mangkin, dait ndaq gawéq dose malik. Sepatutne side pade harus ilaq, bahwe léq antare side araq saq ndéq kenal Allah. Sang araq saq beketuan, “Berembé dengan ninggal teidupang malik? Awak saq berembé saq teicanin léq ie pade sesampun ie pade teidupang malik?” Bodo gati! Lamun side nalet binéq léq dalem tanaq, binéq nike ndéq gen tiwoq, lamun binéq nike ndéqman maté juluq. Dait binéq saq side talet léq dalem tanaq nike -- sang binéq gandum atao binéq lain -- ie cume tolang binéq nike doang, laun ndéqne selapuq tetaletan saq gen tiwoq. Allah mésaq saq gen ngicanin binéq nike rue saq solah menurut pekayunan-Ne. Léq sebilang macem binéq, Allah ngicanin rue taletanne sopoq-sopoq. Awak mahluk-mahluk saq bedowé nyawe ndéqne pade selapuqne. Ruen awak manusie béde kance ruen awak binatang-binatang, dait ruen awak kedit-kedit béde éndah kance ruen awak empaq-empaq. Maraq nike éndah araq awak sorge dait araq awak dunie, laguq kemuliean awak sorge béde kance awak dunie. Kemuliean jelo lain kance kemuliean bulan. Bintang-bintang éndah bedowé kemulieanne mésaq. Malahan bintang-bintang nike sopoq-sopoq lain éndah kemulieanne. Maraq nike halne éraq dengan-dengan ninggal saq teidupang malik. Awak saq tekubur nike, awak saq iniq séde, laguq awak saq teidupang malik nike awak saq ndéq iniq séde. Léq waktu awak nike tekuburang, awak nike hine; laguq teidupang malik dalem kemuliean. Léq waktu tekubur, awak nike lemah; laguq teidupang malik léq dalem kekuatan. Awak saq tekubur, nike awak léman dunie; laguq sesampun idup malik, make awak nike awak saq teicanin siq Roh Allah. Araq awak saq léman dunie, araq éndah awak saq léman Roh Allah. Dalem Kitab Suci tetulis maraq niki, “Manusie saq penembéq, Adam, jari mahluk saq idup,” laguq Adam saq penutuq nike Roh saq ngicanin idup. Saq dateng juluan nike saq jasmani, ndéq saq rohani. Saq rohani dateng mudian. Adam saq penembéq tejariang léman tanaq, laguq Adam saq kedue asalne léman sorge. Dengan-dengan dunie niki maraq Adam saq penembéq, saq tejariang léman tanaq, laguq dengan-dengan sorge nike maraq Ie saq rauh léman sorge. Pade maraq ite mangkin, maraq Adam saq tejariang léman tanaq, make éraq ite gen jari maraq Ie saq léman sorge nike. Maksut tiang, semeton senamian: Awak saq tejariang léman daraq dait daging ndéq mauq taoq léq dalem Kerajaan Allah; dait awak saq iniq binase ndéqne iniq jari kekel. Pade perhatiang rahasie niki: Ndéqne selapuqte gen ninggal, laguq ite selapuqne gen berobah. Hal niki gen selung-selung telaksane sepengkejep mate, sewaktu terompét penutuq tetiup. Séngaq sewaktu kedengahan suare terompét nike, dengan-dengan ninggal gen teidupang malik kadu awak saq kekel, dait ite selapuqne gen terobah. Awakte saq iniq ninggal niki harus tegentiq siq awak saq ndéq iniq ninggal, dait awak saq léman dunie harus tegentiq siq awak saq léman sorge. Lamun awak saq iniq ninggal sampun tegentiq siq awak saq ndéq iniq ninggal, dait awak saq léman dunie sampun tegentiq siq awak saq léman sorge, léq waktu nike baruq telaksane napi saq tetulis léq dalem Kitab Suci, “Kematéan sampun temusnahang; kemenangan sampun dateng!” “Wahai maut, léq mbé kemenangande? Wahai maut, léq mbé racunde?” Racun maut nike dose, dait dose ngelaksaneang kuasene langan Hukum Taurat. Laguq syukur tipaq Allah; Ie ngicanin ite kemenangan langan Deside Isa Almasih, Junjungante Saq Mulie. Keranaq nike, semeton senamian saq tiang kasihin, side pade harus kuat dait kukuh. Pade terus pacu-pacu begawéan bagi Tuhan. Séngaq side pade nenaoq bahwe selapuq saq side pade laksaneang bagi Tuhan, ndéqne sie-sie. Mangkin mengenai képéng saq side pade mélé sumbang tipaq dengan-dengan soléh, tiang anjurang adéq side pade laksaneang menurut petunjuk saq tiang béng tipaq jemaah-jemaah léq Galatia. Léq jelo penembéq sebilang minggu, side pade sopoq-sopoq harus kelin képéng sesuai penghasilanne. Toloq képéng nike jangke tiang dateng, adéq léq waktu nike ndéqne perlu malik tekumpulang. Laun lamun tiang dateng, tiang gen ngutus dengan-dengan saq sampun side pade anggep patut. Tiang gen ngebéng surat léq ie pade, adéq ie pade jauq képéng sumbangan nike ojok Yerusalem. Dait lamun teanggep kenaq tiang milu éndah bareng kance ie pade, make tiang gen lalo bareng kance ie pade. Tiang gen jangoq side pade sesampun tiang liwat léq Makedonia, séngaq tiang beniat gen liwat léq derike. Sang tiang gen madéq piro jelo ngonéqne kance side pade, atao sang sengonéq musim telih. Sesampun nike side pade bau tulung tiang ngelanjutang kelampan tiang ojok taoq saq lainne. Tiang ndéq mélé jangoq side pade sekedar nyelaloq doang. Lamun Tuhan ngijinang, tiang gen ndot ngonéqan malik kance side pade. Laguq tiang gen ndot léq Epesus, jangke jelo Pentakosta, séngaq léq deriki luwéq kesempatan jari ngelaksaneang pegawéan saq bemanpaat, timaq luwéq éndah dengan saq nentang pegawéan nike. Lamun Timotius dateng, terimaq ie bagus-bagus adéq ie beridap betah léq antare side pade, séngaq ie maraq tiang éndah begawéan bagi Tuhan. Ndaq jangke araq saq ngeréméhang ie. Tulung ie adéqne bau selamet ngelanjutang kelampanne malik tulak ojok tiang, séngaq tiang ngantih kedatenganne bareng kance semeton-semeton saq lainne. Mengenai semetonte Apolos, sampun pire kali tiang suruq ie adéq bareng kance semeton saq lainne lumbar jangoq side pade. Laguq ie ndéqman merase yakin bahwe ie harus lumbar mangkin. Laguq laun lamun araq kesempatan, ie pasti gen dateng. Side pade harus waspade dait kuat léq dalem iman. Ndaq takut dait harus tetep kuat. Selapuq saq side pade laksaneang, laksaneang nike léq dalem kasih. Side pasti kenal kance Stepanus dait keluargene; ie pade saq penembéq jari percaye tipaq Almasih léq Akaya. Ie pade sepenoq angenne begawéan husus jari ngelayanin dengan-dengan saq tehususang bagi Allah. Keranaq nike, pade taat léq dengan-dengan saq maraq nike, dait dengan-dengan lain saq begawéan dait ngelayanin bareng ie pade. Tiang seneng siq kedatengan Stepanus, Portunatus dait Akaikus, séngaq ie pade saq nyukupang napi saq masih kurang léq side pade. Ie pade sampun miaq angen tiang jari seneng, maraq ie pade nyenengang angen side. Keranaq nike, side pade harus hargein dengan-dengan saq maraq nike. Jemaah-jemaah léq Asia Kodéq nyampéang salam tipaq side pade. Akwila kance Priskila dait jemaah saq bekumpul léq balé ie pade éndah ngirim salam tipaq side pade. Selapuq semeton léq deriki nyampéang salam tipaq side pade. Pade besalam-salaman sebagé semeton seiman. Tiang romboq léq deriki salam saq tiang tulis mésaq: Salam léman tiang, Paulus. Dengan saq ndéq ngasihin Tuhan, pasti ie tekutuk! Tuhan gen gelis rauh! Rahmat Junjungan Saq Mulie, Deside Isa Almasih araq bareng kance side. Kasih tiang araq bareng kance side selapuq léq dalem Deside Isa Almasih. Semeton senamian jemaah Allah léq Korintus dait selapuq dengan-dengan saq tehususang bagi Allah léq selapuq wilayah Akaya. Tiang, Paulus, rasul Deside Isa Almasih, saq teangkat siq pekayunan Allah, bareng-bareng kance semetonte Timotius, beharep semoge Allah Bapante dait Junjungan Saq Mulie, Deside Isa Almasih ngicanin rahmat dait damé sejahtere tipaq side pade. Puji syukur tipaq Allah, Bapa léman Junjungante Saq Mulie, Deside Isa Almasih. Ie Bapa saq penoq siq belas kasihan, dait Allah sumber selapuq penghiburan. Ie hibur tiang pade léq sebilang penderitean saq tiang pade alamin, adéq siq penghiburan saq tiang pade terimaq léman Allah nike, tiang pade bau éndah hibur selapuq dengan saq dalem penderitean. Kesengsarean-kesengsarean saq tealamin siq Almasih sampun luwéq tiang pade alamin éndah. Dait langan Almasih éndah, tiang pade nerimaq penghiburan saq melimpah. Lamun tiang pade ngalamin penderitean, nike setetune jari penghiburan dait keselametan side pade. Lamun tiang pade nerimaq penghiburan, make side pade milu éndah nerimaq penghiburan sehingge side pade mauq kekuatan adéq tabah dalem kesengsarean-kesengsarean maraq saq tiang pade alamin éndah. Tiang pade tetep yakin dait ndéq uwah ragu-ragu mengenai side pade, séngaq tiang pade nenaoq bahwe side pade milu menderite kance tiang pade. Dait lantaran nike side pade milu éndah nerimaq penghiburan bareng kance tiang pade. Semeton senamian! Tiang pade mélé side pade nenaoq mengenai penderitean saq tiang pade alamin léq wilayah Asia Kodéq. Penderitean saq tiang pade tanggung nike berat gati sehingge tiang pade ndéq beharep malik gen idup; idapne maraq sampun tehukum siq hukuman maté doang. Laguq hal nike telaksane adéq tiang pade ndaq beharep léq kekuatan mésaq, laguq léq Allah saq ngidupang dengan ninggal. Ie saq sampun nyelametang tiang pade léman bahaye kematéan saq beléq nike. Dait Ie éndah saq gen nyelametang tiang pade éraq léq jelo-jelo saq gen dateng, séngaq tipaq Ie tiang pade beharep. Tiang pade yakin bahwe side pade do'eang tiang pade, adéq luwéq dengan ngucapang syukur tipaq Allah lantaran paice saq tiang pade terimaq séngaq luwéqne do'e ie pade umaq tiang pade. Tiang pade bangge, séngaq até nurani tiang pade ngebéng kesaksian tipaq tiang pade bahwe idup tiang pade léq dunie niki -- terutame hubungan tiang pade kance side pade sampun tiang pade laksaneang secare ihlas dait murni. Tiang pade ngelaksaneang hal nike, ndéqne siq kebijaksanean manusie, laguq siq rahmat Allah. Lantaran keyakinan nike léq penembéqne tiang ngerencaneang jari jangoq side pade adéq side pade mauq rahmat saq kedue kaline. Tiang bedowé maksut jangoq side pade léq kelampan tiang ojok Makedonia, dait selaloq malik léq side sewaktu tiang tulak, adéq side pade bau tulung tiang ngelanjutang kelampan ojok Yudea. Laguq tiang sampun ngerobah niat tiang nike; nah, napi nike artine pendirian tiang ndéq tetep? Sewaktu miaq rencane, napi tiang miaq rencane menurut keméléq tiang mésaq, semendaq ngeraos, “Enggih” dait karing semendaqne “Ndéq”? Demi Allah saq setie, janji tiang léq side ndéqne “Enggih” dait “Ndéq”. Séngaq Deside Isa Almasih, Bije saq asalne léman Allah, saq teberiteang tipaq side siq Silwanus, Timotius, dait siq tiang mésaq ndéqne “Enggih” atao “Ndéq”. Laguq sebalikne léq dalem Deside Isa Almasih cume araq “Enggih”. Séngaq Almasih nike “Enggih” bagi selapuq janji Allah. Siq dasar nike ite ngucapang “Amin” jari mulieang Allah. Séngaq Ie saq sampun neguqang tiang pade bareng-bareng kance side léq dalem Almasih, nike Allah saq sampun nyuciang dait ngesahang ite. Keranaq nike Allah sampun ngesahang ite jari dowé-Ne, dait ngicanin Roh Suci léq dalem aténte sebagé jaminan bahwe Ie gen ngicanin ite selapuq saq Ie janjiqang. Allah jari saksi tiang -- séngaq Ie wikan angen tiang -- bahwe tiang burung lumbar ojok Korintus, séngaq tiang ngasihin side pade. Tiang ndéq maksaq side pade mengenai napi saq harus side pade percaye, séngaq side pade sampun tetu-tetu percaye léq Almasih. Tiang cume begawéan bareng-bareng kance side pade adéq side pade sayan bahagie. Keranaq nike tiang sampun miaq keputusan ndéq gen dateng malik ojok side léq waktu angen tiang sedih. Séngaq lamun tiang miaq side pade jari sedih, sai malik saq tao hibur tiang, selain dengan-dengan nike éndah saq sampun tiang piaq sedih angenne? Keranaq nike tiang nulis surat niki tipaq side, adéq lamun tiang dateng, ndaq tiang tepiaq jari sedih siq ie pade saq seharusne miaq tiang seneng. Séngaq tiang yakin bahwe lamun tiang seneng, make side selapuqne pasti gen seneng éndah. Tiang nulis tipaq side siq até saq sedih dait kuatir dait luwéq nyugulang aiq mate. Maksut tiang ndéqne adéq side jari sedih, laguq adéq side pade nenaoq bahwe tiang tetu-tetu ngasihin side pade. Lamun araq dengan saq miaq dengan jari sedih, make hal nike ie laksaneang ndéqne tipaq tiang, laguq tipaq selapuqde atao sekurang-kurangne pire dengan léman side, adéq tiang ndéq ngelebihang raos. Léq dengan saq maraq nike, hukuman saq teputusang tipaq ie siq separo lebih léman side, sampun cukup. Mangkin side pade harus ngampunin ie dait hibur ie, adéq ie ndaq binase lantaran kesedihan saq berat gati. Keranaq nike tiang tunas, adéq side pade nyatayang malik léq ie bahwe side pade tetu-tetu ngasihin ie. Tiang nulis surat niki tipaq side siq maksut jari nguji side pade, napi side pade tetep taat dalem selapuq hal. Lamun side ngampunin dengan saq sampun miaq kesalaqan léq side make tiang éndah ngampunin dengan nike. Séngaq napi saq sampun tiang ampunin -- lamun mule araq saq perlu teampunin -- nike tiang ampunin léq arepan Almasih jari kesolahan side pade. Tiang laksaneang nike adéq Belis ndaq mauq kesempatan jari nguasein ite; séngaq ite nenaoq rencane-rencanene. Sewaktu tiang dateng léq Troas siq maksut jari beriteang Kabar Solah mengenai Almasih, Tuhan sampun bukaqang tiang langan jari begawéan léq taoq nike. Laguq tiang ndéq tenang séngaq léq derike ndéq bedait kance semetonte Titus. Jari tiang bepamit léq dengan-dengan léq taoq nike terus lalo ojok Makedonia. Laguq syukur tipaq Allah! Ie tetep mimpin tiang pade milu léq arak-arakan kemenangan-Ne. Allah kadu tiang pade adéq berite mengenai Almasih nyebar maraq ambu sengéh saq ambune dateng mbé-mbé. Tiang pade ndéqne maraq luwéq dengan saq boyaq keuntungan léman Manik Allah. Tujuan-tujuan tiang pade murni, séngaq tiang pade tetugasang siq Allah. Dait Allah mésaq cingakin bahwe tiang pade nyampéang berite nike sebagé hambe-hambe Almasih. Napi hal niki maraqne tiang pade mulai puji diriq tiang pade? Atao napi perlu tiang pade petitoqang surat pujian tipaq side pade, atao léman side pade maraq saq teperluang siq dengan-dengan lain? Side mésaq saq jari surat pujian tiang pade, saq tetulis léq dalem atén tiang pade dait saq bau tetaoq dait tebace siq sebilang dengan. Ie pade bau serioq bahwe side pade surat saq tetulis siq Almasih, saq tekirim langan tiang pade. Surat nike ndéqne tetulis kadu mangsi, laguq kadu Roh Allah saq idup; ndéq éndah léq atas batu tulis, laguq léq até manusie. Tiang pade bebase maraq nike lantaran keyakinan tiang pade léq Allah langan Almasih. Tiang pade ndéq bedowé sopoq alasan jari nyatayang bahwe tiang pade sanggup ngelaksaneang pegawéan niki, laguq Allah saq ngicanin kemampuan nike tipaq tiang pade. Allah saq jariang tiang pade mampu jari pelayan léq sopoq perjanjian saq baru; perjanjian saq beharep léq Roh Allah, ndéqne léq hukum saq tetulis. Séngaq saq tetulis nike jauq kematéan, laguq Roh Allah nike ngicanin idup. Sewaktu perjanjian saq jauq kematéan nike tepiaq dait teukir léq batu, cahaye Allah besinar menah tandur léq penjarupan nabi Musa. Cahayene menah gati sehingge bangse Israel ndéqne sanggup serioq penjarupan nabi Musa, timaq cahaye léq penjarupanne nike sampun saru léq waktu nike. Lamun saq jauq kematéan nike tesahang siq kemuliean saq beléq, pasti perjanjian saq tepiaq siq Roh Allah, tesahang siq kemuliean saq beléqan malik. Lamun perjanjian saq ngukum manusie maraq nike muliene, pasti gen muliean malik perjanjian saq gen miaq manusie tejariang kenaq léq arepan Allah sehingge hubungan manusie kance Allah jari solah malik. Jari bau teparan bahwe napi saq laéq mulie, sampun ndéq mulie malik lantaran kemuliean saq mangkin niki. Lamun saq cume tahen sementare, maraq nike muliene, pasti napi saq kekel nike gen muliean malik. Séngaq tiang pade bedowé harepan maraq nike, make tiang pade bani ngeraos maraq nike. Tiang pade ndéq maraq nabi Musa saq ngilipang penjarupanne kadu kerudung adéq bangse Israel ndéq serioq cahaye Tuhan saq gen telang léman penjarupanne. Pikiran ie pade sampun tetutup. Dait jangke jelo niki éndah pikiran ie pade masih tetutup siq kerudung léq waktu ie pade bace perjanjian saq laéq nike. Kerudung nike cume bau tebukaq lamun dengan araq léq dalem Almasih. Mangkin éndah lamun ie pade bace kitab Musa, kerudung nike masih nutup pikiran ie pade. Laguq lamun sopoq dengan bebalik tipaq Tuhan, kerudung nike teangkat léman muen dengan nike. Tuhan nike Roh, dait léq mbé Roh Allah araq, léq derike éndah araq kemerdékean. Mangkin muente selapuq ndéq tetutup siq kerudung, dait ite nyatayang kemuliean Junjungan Saq Mulie Deside Isa Almasih. Dait lantaran nike ite secare terus-menerus terobah adéq jari maraq Ie; sayan ngonéq ite sayan mulie. Kemuliean nike asalne léman Tuhan, dait Roh nike Tuhan. Tiang pade laksaneang pegawéan niki lantaran kemurahan Allah. Keranaq nike tiang pade ndéq telang semanget. Tiang pade ndéq kadu care saq nyeboq-nyeboq saq merilaq. Tiang pade ndéq mélé licik begawéan atao palsuang Manik Allah. Sebalikne tiang pade ngelayanin Allah siq até saq murni menurut pekayunan-Ne. Keranaq nike, tiang pade ijinang selapuq dengan nilai diriq tiang pade léq dalem até nurani ie pade léq arepan Allah. Lamun Kabar Solah saq tiang pade beriteang nike masih ndéqman tepahamin éndah, make cume dengan-dengan saq kenyeke nuju keancuran doang saq ndéq paham, nike dengan-dengan saq ndéq percaye, saq pikiranne sampun tebuteang siq penguase jahat jaman mangkin niki, sehingge ie pade ndéq serioq cahaye Kabar Solah mengenai kemuliean Almasih, saq jari gambaran Allah. Berite saq tiang pade sampéang nike ndéqne berite mengenai tiang mésaq. Berite nike berite mengenai Deside Isa Almasih; bahwe Ie Tuhan; dait tiang pade hambe-hambe side pade lantaran Almasih. Allah saq bemanik, “Léman peteng tiwoq cahaye.” Allah nike éndah saq niwoqang cahaye nike léq dalem aténte, adéq terang pikirante jari pahamin kemuliean Allah saq besinar léq penjarupan Almasih. Laguq harte rohani saq solah nike tiang pade toloq léq dalem gerabah, nike diriq tiang mésaq. Siq care nike nyate bahwe keagungan kuase nike asalne léman Allah dait ndéqne léman tiang pade. Tiang pade tetindes léq dalem selapuq hal, laguq tiang pade ndéq kejepit. Tiang pade bingung, laguq ndéq jangke putus ase. Tiang pade teaniaye, laguq tiang pade ndéq teadéqang mésaq-mésaq. Dait timaq tiang pade kereng tetimpak jangke geriq, laguq tiang pade ndéq maté. Ninggal-Ne Almasih masih tetep beridap léq awak tiang pade, adéq kehidupan-Ne éndah jari nyate léq awak tiang pade. Sengonéq tiang pade idup, tetep tiang pade teancem siq kematéan lantaran Deside Isa, adéq siq care nike kehidupan Deside Isa éndah bau tenyatayang léq awak tiang pade saq iniq binase niki. Niki artine bahwe léq dalem diriq tiang pade, araq kematéan saq berusahe nyematéq tiang pade, laguq tiang pade seneng bahwe araq kehidupan saq kenyeke giat léq dalem diriqde. Léq dalem Kitab Suci tetulis maraq niki, “Tiang percaye, keranaq nike tiang ngeraos”. Siq semanget percaye saq maraq nike éndah, tiang pade ngeraos séngaq tiang pade percaye. Tiang pade yakin bahwe Allah saq sampun ngidupang malik Deside Isa Almasih, gen ngidupang tiang pade éndah bareng Deside Isa, dait gadingang side pade kance tiang pade ojok arepan-Ne. Selapuqne nike jari kepentingan side. Séngaq sayan luwéq dengan nerimaq rahmat, sayan luwéq éndah do'e syukur saq tesampéang tipaq Allah; siq care nike Allah temulieang. Keranaq nike tiang pade ndéq telang harepan, timaq tiang pade secare lahiriah jari sayan lemah laguq secare rohani tiang pade tejariang baru sebilang jelo. Dait penderitean saq déang niki saq tiang pade alamin sementare, gen ngasilang sopoq kemuliean saq beléq dait kekel. Kemuliean nike beléqan lamun tebanding siq penderitean nike. Séngaq tiang pade ndéq merhatiang hal-hal saq penggitan, laguq hal-hal saq ndéq penggitan. Séngaq saq penggitan cume tahen sementare, laguq saq ndéq penggitan nike kekel selaéq-laéqne. Séngaq tiang pade nenaoq bahwe lamun balé -- nike awak -- saq taoq ite ndot léq gumi niki tebungkar, Allah gen nyedieang ite sopoq balé léq sorge, saq tepiaq siq Allah mésaq dait saq tahen selaéq-laéqne. Léq dalem balé saq mangkin niki, ite ngeluh séngaq ite melét gati ndot léq dalem balénte saq léq sorge nike. Balé nike awakte saq baru. Sengonéq ite ndot léq dalem balé saq léman dunie niki, ite ngeluh séngaq bandeante berat. Ndéqne lantaran ite melét lepas léman awakte saq léman dunie niki, laguq lantaran ite melét kadu awak saq léman sorge nike, adéq awakte saq iniq maté niki tekuasein siq saq idup. Malahan Allah mésaq saq nyiepang ite jari hal nike, dait Ie ngicanin Roh-Ne tipaq ite jari jaminan. Keranaq nike atén tiang pade tetep merase kuat. Tiang pade nenaoq bahwe sengonéq tiang pade masih ndot léq dalem awak tiang pade niki, tiang pade masih jaoq léman Tuhan. Séngaq tiang pade idup siq dasar percaye tipaq Almasih, ndéqne siq dasar léq napi saq bau teserioq, keranaq nike atén tiang pade jari kuat. Tiang pade demenan lepas léman awak tiang pade niki, adéq bau ndot ngiring Tuhan. Keranaq nike tiang pade berusahe pacu-pacu jari nyenengang Ie, timaq sewaktu tiang pade masih araq léq awak tiang pade léq dunie, atao léq luahne. Séngaq pasti ite selapuq gen tejauq ojok arepan pengadilan Almasih, dait sopoq-sopoq gen mauq balesan sesuai kance perbuatanne léq dunie niki -- perbuatan solah atao jahat. Tiang pade nenaoq napi artine takut léq Tuhan; keranaq nike tiang pade berusahe ngeyakinang dengan. Allah wikan léq tiang pade, dait tiang harep side pade éndah kenal tiang pade léq dalem aténde. Siq care niki tiang pade ndéq tunas adéq side pade muji diriq tiang. Tiang pade cume mélé ngebéng sopoq alasan saq solah léq side adéq jari bangge léq tiang pade, adéq side pade nenaoq berembé side pade harus jawab dengan-dengan saq utameang rue dengan dait ndéq utameang sipatne. Lamun tiang pade ruene maraq dengan jogang, nike demi kepentingan Allah. Dait lamun tiang pade ruene waras, nike demi kepentingan side. Kasih Almasih saq nguasein tiang pade; dait tiang pade sadar bahwe lamun sopoq dengan sampun ninggal umaq selapuq dengan, make artine bahwe selapuq dengan sampun ninggal. Almasih ninggal jari selapuq dengan, adéq dengan-dengan saq idup, ndéqne idup malik umaq diriqne mésaq, laguq umaq Almasih saq sampun ninggal dait teidupang malik demi kepentingan ie pade. Keranaq nike, tiang pade ndéq malik nilai dengan menurut ukuran manusie. Mule tiang pade sampun nilai Almasih secare manusie, laguq mangkin ndéq maraq nike malik. Jari sai saq araq léq dalem Almasih, ie ciptean baru: Saq laéq sampun ndéq araq malik, setetune saq baru sampun dateng. Selapuqne nike asalne léman Allah. Langan Almasih Allah jariang hubungante jari solah malik kance Ie, terus ite tetugasang adéq dengan-dengan lain éndah bau solah hubunganne kance Allah. Tiang pade beriteang bahwe siq perantarean Almasih, Allah jariang hubungan manusie kance Ie jari solah malik. Hal nike tejariang siq Allah dait Allah nénten nuntut selapuq kesalaqan-kesalaqan saq sampun tepiaq siq manusie tipaq diriq-Ne. Dait tiang pade sampun tetugasang siq Allah jari beriteang kabar nike. Jari, tiang pade utusan-utusan Almasih. Allah sampun nyampéang manik-Ne langan tiang pade. Demi peséngan Almasih, sanget siq tiang pade tunas: Pade terimaq paice léman Allah saq bau miaq side pade tedaméang kance Allah! Almasih nénten bedose, laguq Allah jariang Ie nanggung dosente, adéq ite tejariang kenaq léq arepan-Ne sehingge hubungante kance Allah jari solah malik. Lantaran tiang pade bareng-bareng begawéan ngiring Allah, make sanget siq tiang pade tunas ndaq side pade sie-sieang rahmat Allah saq sampun side pade terimaq nike. Léq Kitab Suci, Allah bemanik, “Léq waktu Tiang seneng, Tiang sampun dengahang side, dait léq jelo penyelametan, Tiang sampun nulung side.” Mangkin niki waktune Allah seneng, mangkin niki jelo penyelametan nike! Tiang pade ndéq mélé pelayanan tiang pade tesalaqang, keranaq nike tiang pade berusahe ndéq ngebéng ndéq ngebéng sopoq dengan juaq jari ngelaksaneang hal nike. Sebalikne, dalem selapuq hal, tiang pade nyatayang bahwe tiang pade hambe-hambe Allah. Séngaq, segale macem kesulitan sampun tiang pade alamin dait tiang sabar: Tiang pade tesiksaq, tebui, tekembul; tiang pade begawéan Jangke lelah, kereng ndéq tindoq dait kereng éndah ndéq bedowé keloran. Secare tulus, bijaksane, sabar dait murah até, tiang pade nyatayang bahwe tiang pade hambe Allah. Tiang pade éndah beharep sepenoq angen léq pertulungan Roh Allah, dait siq kasih saq ihlas, dait dalem kebenaran dait kekuasean Allah, tiang pade nyatayang bahwe tiang pade hambe-hambe Allah. Tiang pade beharep léq pekayunan Allah jari senjate tiang pade jari nyerang atao béle diriq. Tiang pade tehormatin, laguq tehine éndah; tepuji, dait tepitnah éndah. Timaq tiang pade jujur, tiang pade tetuduh ndéq jujur. Tiang pade ndéq teanggep kesohor, laguq tiang pade tekenal siq selapuq dengan. Tiang pade teparan maté, laguq nyatene tiang pade masih idup. Timaq tiang pade teaniaye, tiang pade ndéq maté. Timaq angen tiang pade tepiaq aséq, laguq tiang pade tetep seneng éndah. Ruene tiang pade miskin, laguq tiang pade sampun miaq luwéq dengan jari sugih. Ruene tiang pade ndéq bedowé napi-napi, laguq setetune tiang pade bedowé selapuq-lapuqne. Semeton senamian saq tiang kasihin léq Korintus! Tiang pade sampun terus-terang léq side. Selapuq isi atén tiang pade sampun tiang pade sampéang. Léq dalem atén tiang pade, araq taoq saq beléq umaq side, laguq kodéq gati taoq umaq tiang pade léq dalem aténde. Mangkin, alurang tiang ngeraos maraq léq anak-anak tiang mésaq. Pade bukaq aténde umaq tiang pade. Ndaq side bepasangan kance dengan-dengan saq ndéq beriman léq Deside Isa; hal nike ndéqne paut. Ndéqne mungkin hal saq kenaq iniq besopoq kance saq jahat! Napi iniq cahaye besopoq kance peteng? Napi kancen pade antare Almasih dait Belial? Napi kancen pade dengan saq beriman léq Almasih dait dengan saq ndéq beriman léq Almasih? Napi hubunganne antare gedéng Allah kance berhale? Ite niki gedéng Allah saq idup. Allah mésaq bemanik, “Tiang gen araq léq tengaq-tengaq ie pade, dait idup bareng kance ie pade. Tiang gen jari Allah ie pade, dait ie pade gen jari umat Tiang. Keranaq nike, bilin dengan-dengan saq ndéq kenal Allah nike, dait kelin diriqde léman ie pade. Ndaq gati berubungan kance saq najis, make Tiang gen nerimaq side. Tiang gen jari Bapa side, dait side gen jari bije-bije Tiang, maraq nike manik Tuhan Saq Mahekuase.” Semeton senamian saq tiang kasihin! Selapuq janji nike tetujuang tipaq ite. Keranaq nike ite harus persiq diriq léman selapuq hal saq najisang awak dait rohte. Ite harus takut léq Allah, adéq ite bau idup husus umaq Ie léq dalem kesempurnean. Terimaq tiang pade léq dalem aténde. Tiang pade ndéq gawéq salaq léq sai-sai, dait ndéq uwah araq dengan saq tiang pade rugiang. Tiang pade ndéq uwah boyaq keuntungan léman sai-sai. Tiang sampéang maraq nike, ndéqne jari nyalahang side pade. Séngaq, maraq saq sampun tiang sampéang laéq, tiang pade tetu-tetu ngasihin side pade, dait ite batur-batur seidup-sematé. Tiang yakin sepenoqne léq side pade. Malahan tiang bangge gati léq side! Timaq tiang pade ngalamin luwéq kesulitan, angen tiang sanget tehibur lantaran side pade. Angen tiang tetu-tetu gembire! Waktu tiang pade dateng léq Makedonia, tiang pade tetu-tetu ndéq mauq mentelah. Léman mbé-mbé tiang pade mauq kesulitan: Léman pihak saq lain araq pegejuhan, léman dalem atén tiang mésaq araq ketakutan. Laguq syukur, Allah tetep hibur dengan saq rendah até; Ie hibur atén tiang pade siq kedatengan Titus. Atén tiang pade tehibur ndéqne cume lantaran Titus dateng, laguq éndah lantaran Titus ngelaporang berembé aténe tehibur siq side pade. Ie bebadaq léq tiang pade bahwe side pade melét gati bedait kance tiang; bahwe side pade nyesel léq perbuatande laéq dait mangkin réde béle tiang. Hal nike miaq tiang sayan seneng malik. Timaq surat tiang miaq angende jari sedih, tiang ndéq nyesel nulis surat nike. Mule léq waktu tiang serioq bahwe surat tiang nike miaq side pade sedih -- timaq kesedihande nike cume sementare -- tiang jari nyesel éndah sekediq. Laguq mangkin tiang seneng -- ndéqne lantaran angende jari sedih, laguq lantaran kesedihande nike miaq kelakuande berobah. Mule kesedihande nike pade maraq pekayunan Allah. Jari, tiang pade ndéq miaq side pade jari rugi. Séngaq sedih saq maraq nike ngasilang perobahan até saq datengang keselametan. Dait dengan ndéq gen nyesel léq hal nike. Sebalikne, sedih saq pade maraq keméléq manusie ngasilang kematéan. Cobaq side pade perhatiang napi hasilne umaq side, kesedihan saq pade maraq pekayunan Allah! Hasilne, side pade tetu-tetu berusahe gen piaq keadaan jari solah! Side pade jari meriq léq dose, side pade takut, side pade kangen, side pade jari besemanget, side pade réde ngukum saq salaq! Léq dalem selapuq persoalan niki sampun side pade buktiang bahwe side pade ndéq salaq. Jari, timaq tiang sampun nulis surat nike, tiang nulis ndéqne lantaran dengan saq salaq nike. Ndéqne éndah lantaran dengan saq menderite lantaran kesalaqan nike. Tiang nulis surat nike adéq léq arepan Allah, side pade sadar mésaq berembé beléqne kerédeande tipaq tiang pade. Keranaq nike angen tiang pade tehibur. Selain tehibur, saq terutame gati tiang pade jari seneng lantaran serioq Titus gembire; aténe tehibur siq semeton senamian. Tiang mule sampun bangge-banggeang side pade léq ie. Syukur, side pade ndéq merilaq tiang. Selapuq saq sampun tiang pade sampéang léq side nike kenaq. Maraq nike éndah napi saq tiang pade bangge-banggeang mengenai side pade léq Titus, ternyate tetu éndah. Mangkin ie sayan ngasihin side pade, séngaq ie inget berembé taatne side selapuq, dait berembé side pade nerimaq ie siq hormat dait patuh. Tiang seneng gati, séngaq side pade bau tepercaye léq dalem selapuq hal. Semeton senamian, tiang pade mélé side pade nenaoq éndah mengenai rahmat Allah tipaq jemaah-jemaah léq Makedonia. Ie pade sampun teuji siq kesulitan-kesulitan saq berat. Laguq léq tengaq-tengaq kesulitan-kesulitan nike, ie pade gembire dait murah até dalem hal ngebéng sumbangan jari nulung dengan lain, timaq ie pade miskin gati. Tiang bau mastiang bahwe ie pade ngebéng semampu ie pade, malahan lebih. Timaq ndéq araq saq suruq, sanget siq ie pade tunas léq tiang pade lamun bau ie pade teijinang milu ngebéng sumbangan tipaq dengan-dengan saq tehususang bagi Allah léq Yudea. Ie pade ngebéng jaoq luwéqan léman saq tiang pade harepang. Penembéq ie pade nyerahang diriq tipaq Tuhan, beterus tipaq tiang pade éndah, pade maraq pekayunan Allah. Keranaq nike tiang pade sanget nganjurang Titus -- saq baruq mulaiang usahe nike, adéqne ngelanjutang usahe saq solah niki léq antare side pade éndah. Side pade mule lebihan dalem selapuq-lapuqne: Side pade lebihan dalem hal percaye, dalem hal nyatayang pendapet, dalem hal penenaoq, dalem segale macem usahe, dait dalem hal kasihde tipaq tiang pade. Keranaq nike, side pade éndah lebihan léq dalem usahe saq solah niki. Tiang ndéq nganjurang nike jari sopoq préntah. Laguq siq nyatayang berembé semangetne dengan lain nulung sepade manusie, tiang éndah melét nenaoq seberembé kasihde. Séngaq side pade sampun nenaoq rahmat Junjungante Saq Mulie Deside Isa Almasih. Ie sugih, laguq Ie piaq diriq-Ne miskin jari kepentingande, adéq siq kemiskinan-Ne nike, side pade jari sugih. Menurut pendapet tiang, sepatutne side pade nutuqang napi saq sampun side pade piaq taun saq juluan. Séngaq side pade saq penembéq gati mikirang dait mulaiang usahe niki. Jari, mangkin side pade harus ngelanjutang menurut kemampuande. Side pade harus besemanget jari nutuqang usahe nike, maraq semangetde laéq miaq rencane nike. Lamun side pade ihlas ngebéng, make Allah gen nerimaq sumbangande nike siq dasar napi saq araq léq side, ndéqne siq dasar léq napi saq ndéq araq léq side. Léq dalem Kitab Suci tetulis, “Dengan saq ngumpulang luwéq, ndéqne belebihan, dait dengan saq ngumpulang sekediq, ndéqne kekurangan.” Tiang pade tetu-tetu besyukur léq Allah séngaq Ie sampun ngicanin rahmat tipaq Titus adéqne besemanget maraq tiang pade jari nulung side pade! Séngaq Titus ndéqne cume réde léq napi saq tiang pade tunas, laguq ie éndah semanget gati mélé nulung side pade jangke siq keméléqne mésaq ie mutusang lumbar ojok side. Bareng kance ie, tiang pade ngirim éndah sopoq semeton saq tehormatin gati léq selapuq jemaah séngaq pegawéanne nyampéang Kabar Solah léman Allah. Selain nike, dengan nike sampun tepiléq éndah dait tetentuang siq jemaah-jemaah jari bareng kance tiang pade léq dalem kelampan tiang pade. Séngaq tiang pade gen lampaq jari nyampéang sumbangan nike, adéq Tuhan temulieang, dait adéq side pade serioq bahwe tiang pade réde nulung. Tiang pade onyaq-onyaq gati adéqne ndaq araq dengan saq nyalahang tiang pade dalem hal nyampéang sumbangan saq beléq niki. Tiang pade mélé jujur ndéqne cume léq arepan Tuhan, laguq léq julu manusie éndah. Bareng-bareng kance Titus dait semeton nike, tiang pade ngirim éndah sopoq semeton saq lain. Sampun pire kali tiang pade nguji ie, ternyate ie tetep seneng nulung. Dait mangkin, ie tetu-tetu mélé nulung side pade séngaq ie percaye gati léq side. Mengenai Titus, ie batur tiang, saq begawéan kance tiang jari nulung side pade. Dait mengenai kedue semeton nike, saq lumbar bareng kance ie, ie pade dengan-dengan saq teutus siq jemaah-jemaah dait jari kebanggean umaq Almasih. Tiang pade harep side pade nyatayang kasihde léq ie pade, adéq selapuq jemaah nenaoq bahwe side pade ngasihin ie pade dait napi saq tiang pade banggeang mengenai side pade mule tetu. Setetune ndéqne perlu malik tiang nulis tipaq side pade mengenai sumbangan saq kenyeke tekirim tipaq dengan-dengan saq tehususang bagi Allah léq Yudea. Tiang nenaoq side pade seneng nulung, dait sampun tiang banggeang side pade tipaq dengan-dengan léq Makedonia. Tiang badaq ie pade, bahwe léman taun saq juluan, semeton-semeton léq Akaya sampun siep gen ngebéng sumbangan. Dait semangetde sampun miaq luwéq dengan léman ie pade milu besemanget éndah. Mangkin tiang ngutus Titus dait kedue semeton nike tipaq side adéq napi saq tiang pade bangge-banggeang mengenai side pade ndaq cume jari ucapan doang. Jari, side pade harus tetu-tetu siep, séngaq tiang nyampéang léq ie pade bahwe side pade siep léq hal nike. Tiang kuatir lamun araq dengan-dengan Makedonia saq milu bareng kance tiang léq waktu tiang dateng ojok side. Dait lamun tedait siq ie pade bahwe side ndéqman siep, berembé ilaqne tiang pade laun, lantaran sampun nyampéang bahwe tiang pade percaye gati léq side! Dait side mésaq gen ilaq éndah. Keranaq nike tiang merase perlu ngutus ie pade tipaq side juluan jari ngurus sumbangan saq side pade janjiqang nike. Hal nike tiang laksaneang, adéq laun lamun tiang dateng, sumbangande nike sampun siep. Siq care nike, nyate bahwe sumbangande nike tebéng secare ihlas, dait ndéqne lantaran paksaqan. Pade inget! Dengan saq sawur binéq sekediq, gen mauq hasil saq sekediq éndah. Laguq dengan saq sawur binéq luwéq, gen mauq hasil saq luwéq éndah. Sebilang dengan harus ngebéng menurut keihlasan angenne. Ndaq ie ngebéng setenge angen atao terpakse, séngaq Allah ngasihin dengan saq ngebéng siq até saq sukecite. Allah bekuase ngicanin side pade rahmat saq belimpah-limpah, adéq side pade tetep bedowé napi saq side pade perluang; malahan side pade gen belebihan jari ngelaksaneang hal saq solah. Léq Kitab Suci tetulis mengenai Allah, “Ie bagi-bagiang tipaq dengan miskin; kebenaran-Ne kekel selaéq-laéqne.” Allah saq nyedieang binéq jari dengan-dengan saq sawur binéq, dait saq nyedieang ite keloran. Ie éndah gen nyedieang dait jariang luwéq napi saq side pade sawur, adéqne hasil kemurahan aténde sayan luwéq éndah. Siq care nike side pade gen jari cukup léq selapuq hal, sehingge side pade tetep bau ngebéng siq murah até. Dait sumbangan-sumbangande saq tiang pade bagi-bagiang nike miaq luwéq dengan jari besyukur léq Allah. Séngaq perbuatan solah saq side pade laksaneang niki ndéqne cume nyukupang kekurangan dengan-dengan saq tehususang bagi Allah doang, laguq éndah miaq luwéq dengan besyukur léq Allah. Dait lantaran side pade sampun tahen uji léq dalem pelayanan nike, ie pade mulieang Allah séngaq ie pade serioq kesetieande léq Kabar Solah mengenai Almasih saq side pade iring nike. Ie pade éndah mulieang Allah, séngaq side pade murah até jari bagi-bagiang léq ie pade, dait tipaq selapuq dengan lain napi saq araq léq side. Make ie pade gen do'eang side pade siq rase kasih lantaran rahmat Allah saq limpah léq side. Side pade harus besyukur léq Allah lantaran rahmat-Ne saq luar biase nike! Tiang, Paulus, dengan saq teparan ndéq bani lamun berandangan mue kance side, laguq bani lamun jaoq léman side, tiang peringet side demi Almasih saq lemah lembut dait gerasaq. Sanget siq tiang tunas ndaq miaq tiang jari bani léq side pade lamun tiang dateng laun. Séngaq tiang beniat gen teges léq dengan-dengan saq paran bahwe tiang pade begawéan siq tujuan duniawi. Mule tiang pade masih idup léq dalem dunie, laguq perjuangan tiang pade ndéqne siq dasar tujuan duniawi. Senjate-senjate saq tiang pade kadu léq dalem perjuangan tiang pade ndéqne senjate dunie niki, laguq senjate-senjate Allah saq bekuase. Siq senjate-senjate nike tiang pade ngancurang bénténg-bénténg. Tiang pade ngancurang pikiran-pikiran saq nyesatang dait segale macem kesombongan saq nentang penenaoq jari kenal kance Allah. Tiang pade taklukang pikiran dengan-dengan dait miaq ie pade taat tipaq Almasih. Dait lamun side pade sampun tetu-tetu taat, tiang pade siep jari ngukum selapuq kedurhakean. Side pade harus sadar berembé keadaan saq setetune. Lamun sopoq dengan tetu-tetu yakin bahwe ie dowén Almasih, ie harus ngingetang diriqne mésaq dait sadar bahwe tiang pade jari dowén Almasih éndah maraq ie. Tiang ndéq ilaq lamun tiang harus luwéqan bangge-banggeang kekuasean saq sampun teicanin siq Tuhan tipaq tiang pade, séngaq kekuasean nike teicanin jari ngebéng semanget léq side pade, ndéqne jari nyenyédaq. Tiang ndéq mélé side pade merase bahwe tiang nakut-nakutin side pade kadu surat-surat tiang. Lantaran araq bebase, “Surat-surat Paulus nike teges dait bedowé wibawe, laguq lamun ie mésaq araq léq tengaq-tengaq ite, pribadine lemah dait ucapan-ucapanne ndéq bedowé arti napi-napi!” Dengan saq maraq nike seharusne sadar bahwe lamun tiang pade araq léq tengaq-tengaq side pade, perbuatan tiang pade tepat maraq saq tiang pade tulis léq dalem surat-surat tiang pade. Pasti tiang pade ndéq bani bandingang atao anggep diriq tiang pade sederajat kance dengan-dengan saq nganggep diriqne atas derajatne. Berembé bodone ie pade! Ie pade miaq ukuran mésaq dait nilai diriqne mésaq kadu ukuran nike. Tiang pade ndéqne maraq nike. Lamun tiang pade bangge-banggeang diriq, tiang pade ndéq keliwat bates. Tiang pade tetep léq dalem bates-bates daérah pegawéan saq sampun tetentuang siq Allah umaq tiang pade. Dait side pade termasuk léq dalem daérah nike. Jari, sewaktu tiang pade jangoq side pade dait jauq Kabar Solah mengenai Almasih tipaq side, tiang pade ndéq sugul léman bates-bates daérah pegawéan tiang pade. Tiang pade ndéq puji diriq léq pegawéan dengan lain saq araq léq luah bates saq tetentuang siq Allah tipaq tiang pade. Sebalikne tiang pade tetep léq dalem bates-bates saq tetentuang siq Allah léq tiang pade dait beharep bahwe side pade sayan percaye léq Almasih, adéq tiang pade bau ngelaksaneang pegawéan saq beléqan léq antare side pade. Siq care nike tiang pade bau beriteang Kabar Solah nike léq negeri-negeri lain siq care ndéq bangge-banggeang diriq léq pegawéan saq sampun telaksaneang léq wilayah pelayanan dengan lain. Léq dalem Kitab Suci tetulis, “Dengan saq mélé banggeang sopoq hal, seharusne banggeang napi saq sampun telaksaneang siq Tuhan.” Séngaq ndéqne dengan saq puji diriqne saq tahen uji, laguq dengan saq tepuji siq Tuhan. Tiang mélé adéq side pade sabar léq kebodoan tiang saq sekediq nike. Mule side pade sampun nyatayang kesabarande léq tiang. Tiang kangen léq side, maraq Allah mésaq éndah kangen léq side. Side pade maraq sopoq dedare genten saq sampun tiang janjiqang jari tetikah kance sopoq dengan mame, nike Almasih. Laguq tiang kuatir pikirande gen tegode jari ndéq setie malik léq Almasih, pade maraq Hawa laéq éndah tegode siq kelicikan ulah. Séngaq ruene side pade seneng doang nerimaq dengan saq dateng ojok side dait ngajahang mengenai Deside Isa saq lain -- ndéqne Deside Isa saq tiang pade kenalang léq side. Dait side pade mélé éndah nyambut roh dait “kabar solah” saq tetu-tetu béde kance Roh Allah dait Kabar Solah saq sampun side pade terimaq léman tiang pade. Tiang tetu-tetu ndéq merase bawaqan léman “rasul-rasul” saq luar biase nike! Sang tiang kurang ceket ngeraos, laguq mengenai penenaoq, tiang ndéqne dengan saq bodo. Nike sampun tiang pade buktiang léq side dalem selapuq hal. Léq waktu tiang beriteang Kabar Solah léman Allah tipaq side, tiang ndéq tunas biaye napi-napi léq side pade; dait siq care nike tiang miaq diriq tiang jari bawaqan. Hal nike tiang laksaneang adéq side saq teatasang. Napi nike sopoq kesalaqan tiang léq side? Waktu tiang ngelayanin side pade, tiang tebiayaq siq jemaah-jemaah lain. Bau teparan tiang ngerugiang jemaah-jemaah nike adéq tiang bau nulung side pade. Lamun léq waktu nike tiang kekurangan, tiang ndéq uwah nyusahang sopoq juaq léman side pade. Selapuq saq tiang perluang tesedieang siq semeton-semeton saq dateng léman Makedonia. Tiang jagaq bagus-bagus adéq tiang ndéq nyusahang side pade léq hal napi juaq, dait tiang gen tetep gawéq maraq nike. Saq tiang banggeang niki ndéqne bau tehalangin siq sai-sai léq selapuq negeri Akaya, lantaran pengajahan Almasih saq kenaq araq léq tiang. Kembéq tiang sampéang maraq nike? Napi lantaran tiang ndéq ngasihin side pade? Allah wikan tiang ngasihin side pade! Napi saq tiang laksaneang mangkin gen terus tiang laksaneang adéq “rasul-rasul” saq lain nike ndéq bedowé alasan jari beléq-beléqang diriqne dait bebase bahwe ie pade begawéan maraq tiang pade. Dengan-dengan maraq nike ie rasul-rasul palsu. Ie dengan-dengan saq pegawéanne ngakalin dengan siq care nyamar jari rasul-rasul Almasih. Ndaq bengaq léq hal nike, séngaq Belis éndah nyamar jari malaékat terang! Jari, ndaq bengaq éndah lamun pelayan-pelayan Belis nyamar jari pelayan-pelayan saq kenaq léman Allah. Ahirne ie pade éndah gen nerimaq balesan saq setimpal kance selapuq perbuatan ie pade. Tiang sampéang karing sekali: Ndaq jangke araq saq nganggep tiang bodo. Laguq lamun side pade nganggep tiang maraq nike, ijinang tiang saq bodo niki bau bangge éndah sekediq. Mangkin niki gen tiang jelasang, napi saq tiang banggeang nike, laguq ndéqne Tuhan saq manikang tiang nyampéang maraq nike. Léq dalem hal niki tiang tetu-tetu ngeraos maraq dengan bodo. Mule araq luwéq dengan saq banggeang hal-hal duniawi, jari tiang mélé éndah bangge maraq nike. Séngaq siq angen saq seneng ie pade sabar léq dengan bodo, lantaran side pade merase diriq ceket gati! Side pade alurang diriqde tejariang panjak siq dengan, atao meres dait bait keuntungan léman side pade, atao merase diriqne atasan léman side pade dait bani namper side pade. Tiang ilaq akuq bahwe tiang pade lemah gati jari piaq maraq nike. Laguq napi saq dengan lain bani banggeang, tiang éndah bani! (Tiang ngeraos maraq dengan bodo.) Napi ie pade dengan Ibrani? Tiang éndah dengan Ibrani. Napi ie pade dengan Israel? Tiang éndah dengan Israel. Napi ie pade keturunan Ibrahim? Tiang éndah maraq nike! Napi ie pade pelayan-pelayan Almasih? Kedengahanne maraq tiang niki sampun telang akal, laguq tiang mule pelayan saq solahan léman ie pade selapuqne! Tiang luwéqan begawéan, tiang kerengan tetamaq ojok dalem bui, tiang luwéqan tesiksaq dait kereng gati gen maté. Sampun lime kali tiang tesiksaq siq dengan Yahudi, tempuk telung dase siwaq kali kadu pecut. Telu kali tiang tepecut siq dengan-dengan Roma; sampun éndah tiang tepeléwas kadu batu. Telu kali tiang ngalamin kandas kapal léq segare, dait sekali tiang ngompal léq segare empat likur jam ngonéqne. Kereng gati tiang lalo ojok taoq saq luwéq bahayene: Teancem bahaye belabur, bahaye rampok, bahaye léman pihak Yahudi dait léman pihak ndéq Yahudi, bahaye léq dalem kote, dait léq luah kote, bahaye léq segare, dait bahaye léman dengan-dengan saq ngaku semeton padahal ndéq. Tiang setenge maté begawéan dait bejuang keras: Kereng ndéq tindoq, ndéq ngelor, ndéq nginem, kereng gati tiang kelapahan, ketelihan séngaq kurang kelambi dait ndéq bedowé taoq ndot. Selain nike, sebilang jelo tiang kuatir éndah léq keadaan selapuq jemaah. Lamun araq saq lemah tiang éndah milu merase lemah. Lamun araq saq bedose, angen tiang milu remuk. Jari, lamun tiang harus banggeang sopoq hal, make hal-hal saq tiang banggeang nike nyatayang kelemahan tiang. Allah, Bapa léman Junjungante Saq Mulie Deside Isa, wikan bahwe tiang ndéq beduste. Tepuji peséngan-Ne selaéq-laéqne. Sewaktu tiang araq léq Damsyik, gubernur saq bekuase léq derike, léq bawaq pemréntahan Raje Aretas, mréntahang tenterene jagaq jebak beléq kote nike jari bau tiang. Laguq siq sopoq keranjang tiang teturunang ojok bawaq langan sopoq loang léq tembok. Maraq nike entane tiang lolos léman kekuasean gubernur nike. Mule ndéq araq manpaatne banggeang diriq. Laguq tiang mélé éndah banggeang hal-hal saq Allah nyatayang tipaq tiang léq dalem wahyu atao dalem penyerioqan. Tiang kenal sopoq dengan Nasrani saq empat olas taun saq sampun liwat teangkat ojok langit saq ketelu. (Tiang ndéq nenaoq napi tetu-tetu awakne saq kerangkatan atao nike cume penyerioqan doang -- cume Allah saq wikan.) Mengenai dengan nike saq mélé tiang banggeang, ndéqne mengenai diriq tiang mésaq. Mengenai diriq tiang, cume hal-hal saq nyatayang kelemahan tiang nike saq mélé tiang banggeang. Seandéne tiang éndah melét banggeang sopoq hal, tiang ndéq mélé jari dengan saq luwéq raos saq ndéq araq isine; tiang ngucapang kebenaran. Laguq tiang tahen diriq tiang, adéq ndéq araq dengan saq anggep tiang lebihan léman napi saq sampun ie serioq tiang laksaneang atao saq sampun ie dengah léman tiang. Laguq adéq tiang ndéq jari sombong lantaran penyerioqan-penyerioqan saq luar biase nike, tiang teicanin sopoq duwi léq dalem awak tiang, nike sopoq utusan Belis jari nyakitin tiang, adéq tiang ndaq jari sombong. Telu kali tiang bedo'e tipaq Tuhan adéq utusan Belis nike tesediq léman tiang. Laguq jawab Tuhan, “Rahmat Tiang léq side sampun cukup; séngaq kuase Tiang malahan jari sempurne lamun side dalem keadaan lemah.” Keranaq nike tiang demenan banggeang kelemahan-kelemahan tiang, séngaq lamun tiang lemah, make léq waktu nike tiang merase Almasih ngelindungin tiang siq kekuatan-Ne. Jari tiang seneng siq kelemahan-kelemahan tiang. Tiang éndah seneng lamun lantaran Almasih tiang tepitnah, tiang ngalamin kesulitan, tepaléq-paléq dait tiang ngalamin kesusahan. Séngaq lamun tiang lemah, make léq waktu nike tiang jari kuat. Mule tetu tiang sampun miaq diriq tiang maraq dengan bodo -- laguq side pade saq maksaq tiang jari maraq nike. Setetune side pade harus puji tiang. Séngaq timaq tiang ndéq bedowé arti napi-napi, tiang tetu-tetu ndéq kalah kance “rasul-rasul” saq luar biase nike! Keajaipan-keajaipan kance hal-hal saq luar biase dait pegawéan-pegawéan saq beléq-beléq sampun tenyatayang tipaq side pade secare sabar, jari buktiang bahwe tiang sopoq rasul. Léq dalem hal napi side pade kurang teperhatiang, tebanding jemaah-jemaah saq lain? Paling-paling cume dalem hal niki: Bahwe tiang ndéq nyusahang side pade jari ngebéng tiang biaye. Tiang tunas maap léq kesalaqan tiang nike! Mangkin niki sampun saq ketelu kaline tiang siep jari jangoq side pade. Dait tiang ndéq mélé nyusahang side pade, séngaq saq tiang melétang ndéqne napi saq side pade épéang, laguq diriqde. Séngaq ndéqne bije-bije saq harus boyaqang dengan toaqne napkah, laguq dengan toaq saq harus boyaqang bije-bijene napkah. Keranaq nike, angen tiang seneng dait réde ngurbanang selapuq-lapuqne umaq side, malahan diriq tiang mésaq éndah. Lamun maraq nike rase kasih tiang léq side pade, napi patut side pade kurang ngasihin tiang? Jari, side pade setuju bahwe tiang ndéq uwah nyusahang side pade. Laguq araq saq bebase bahwe tiang niki licik; bahwe tiang mauq keuntungan léman side pade lantaran tiang nipu. Nike ndéqne mungkin! Napi langan dengan-dengan saq tiang utus nike tiang bait keuntungan léman side pade? Tiang sampun ngutus Titus lumbar jangoq side pade, dait tiang ngutus semeton seiman saq lain nike lumbar bareng-bareng kance ie. Napi Titus bait keuntungan léman side pade? Laguq tiang pade kance due begawéan siq tujuan saq pade dait napi saq tiang pade laksaneang nike kadu care saq pade! Iniq doang side pade beranggepan bahwe sengonéq niki tiang pade kenyeke berusahe béle diriq léman side pade. Side pade keliru gati! Allah wikan bahwe selapuq saq tiang pade ucapang nike menurut pekayunan Almasih. Dait selapuq saq tiang pade laksaneang nike jari neguqang imande. Tiang kuatir bahwe laun léq waktu tiang jangoq side pade, tiang ndait side pade ndéq maraq napi saq tiang pade harepang. Ndaq-ndaq laun araq saq begejuh, talon até, gedek, mélé menang mésaq, saling pitnah, saling hasut, sombong dait ngorayang. Tiang takut lamun tiang dateng malik, tiang gen terendahang siq Allah léq julun side pade, dait tiang gen nangis séngaq luwéq léq antare side pade saq laéq bedose, ndéqman tobat léman perbuatan-perbuatanne saq cabul, kotor dait ndéq patut. Niki saq ketelu kaline tiang dateng jangoq side pade. Dalem Kitab Suci tetulis, “Sebilang pelekare harus tebuktiang siq kesaksian due atao telu dengan saksi, baruq pelekare nike sah.” Dengan-dengan saq laéq saq sampun gawéq dose dait selapuq dengan lainne, sampun tiang peringet bejulu sewaktu tiang dateng jangoq side pade saq kedue kaline. Mangkin, léq waktu tiang bejaoqan kance side, tiang peringet malik bahwe lamun tiang dateng malik, ndéq araq sopoq dengan léman ie pade saq gen luput léman hukuman. Make side pade gen mauq selapuq bukti saq side pade melétang bahwe Almasih tetu-tetu bemanik langan tiang. Lamun Almasih ngelaksaneang hal nike tipaq side pade, Ie nénten gen alem-alem, sebalikne Ie nyatayang kuase-Ne léq antare side. Mule léq waktu Ie tepakuq léq kayuq salib Ie lemah, laguq mangkin Ie idup dalem kuase Allah. Mule tiang pade lemah léq dalem Almasih, laguq tiang pade gen idup bareng kance Ie siq kuase Allah. Cobaq side pade uji diriqde mésaq napi side pade tetu-tetu idup léq dalem iman tipaq Almasih! Pasti side pade sadar bahwe Deside Isa Almasih araq léq dalem side pade! -- lain halne lamun mule side pade ndéq tetu-tetu percaye. Tiang harep side pade sadar bahwe tiang pade ndéqne dengan saq ndéq tahen uji. Tiang pade bedo'e tipaq Allah semoge Ie kayun nulung side pade adéq side pade ndéq gawéq jahat. Ndéqne jari nyatayang bahwe tiang pade dengan-dengan saq berhasil, laguq adéq side pade ngelaksaneang napi saq solah, timaq ruene tiang pade maraq dengan-dengan saq gagal. Séngaq tiang pade ndéq tao piaq napi-napi jari ngelawan kebenaran; tiang pade cume bau ngelaksaneang kebenaran. Tiang pade seneng lamun tiang pade lemah, dait side pade kuat. Tiang pade bedo'e éndah adéq side pade jari sempurne. Keranaq nike tiang nulis surat niki léq waktu tiang ndéqman araq léq tengaq-tengaq side pade. Siq care nike, lamun tiang dateng laun, tiang ndéq gen keras tipaq side siq kekuasean saq teicanin siq Tuhan léq tiang. Kekuasean nike teicanin jari ngebéng side pade semanget, ndéqne jari ngancurang. Ahirne, semeton senamian, side pade harus gembire, dait berusahe jari sempurne. Terimaq selapuq naséhat tiang. Side pade harus sepaham dait idup dalem damé sejahtere. Allah sumber kasih dait damé sejahtere gen araq bareng kance side pade. Side pade harus besalam-salaman sopoq kance saq lain siq penoq kasih. Selapuq dengan-dengan saq tehususang bagi Allah ngirim salam tipaq side. Rahmat Junjungan Saq Mulie Deside Isa Almasih dait kasih Allah dait persahabatan léq dalem Roh Suci araq bareng kance side pade selapuq! Taat léq pekayunan Allah Bapante, Almasih nyerahang diriq-Ne jari kurban demi dose-dosente, adéq ite teselametang léman jaman saq jahat niki. Puji syukur tipaq Allah selaéq-laéqne! Amin. Tiang bengaq léq side pade! Side pade temanikang siq Allah lantaran rahmat Almasih, laguq mangkin side pade becat gati lupaq léq Allah dait turut “kabar solah” saq lain léman Kabar Solah saq léman Allah. Setetune ndéq araq “kabar solah saq lain”, laguq araq dengan-dengan saq gen miaq side pade jari ore dait ngerobah Kabar Solah mengenai Almasih. Dengan saq beriteang “kabar solah” saq lain léman Kabar Solah saq sampun tiang pade beriteang, alurang ie tekutuk siq Allah -- timaq dengan nike tiang mésaq atao malaékat léman sorge! Tiang pade sampun nyampéang hal nike laéq, mangkin tiang sampéang malik: Dengan saq beriteang léq side “kabar solah” saq lainan léman Kabar Solah saq sampun side pade terimaq léman tiang pade, dengan nike harus tekutuk siq Allah! Napi siq care nike tiang jari maraq dengan saq melét teakuq siq manusie? Tetu-tetu ndéqne maraq nike! Tiang cume ngarepang pengakuan léman Allah. Napi tiang kenyeke berusahe mikat angen manusie adéq tedemen siq dengan? Lamun tiang masih piaq maraq nike, tiang ndéqne hambe Almasih. Side pade harus nenaoq bahwe Kabar Solah saq tiang beriteang nike ndéqne berasal léman manusie. Tiang ndéq nerimaq kabar nike léman manusie, dait ndéq sopoq dengan juaq saq ngajahang hal nike léq tiang, laguq sampun teturunang langan wahyu siq Deside Isa Almasih. Pasti side pade sampun dengah berembé idup tiang laéq jari penganut agame Yahudi. Side pade nenaoq berembé kejemne tiang perlakuang jemaah Allah dait berembé kerasne tiang berusahe ngancurang ie pade. Dalem hal ngelaksaneang agame Yahudi, tiang lebihan tebanding kance dengan Yahudi lainne saq anjar-anjar tiang. Tiang semanget gati léq hal-hal mengenai adat istiadat leluhur tiang pade. Laguq lantaran rahmat Allah, tiang sampun tepiléq siq Allah sendéqman tiang tebijeang dait ngemanikang tiang jari pelayan-Ne. Allah nyatayang Bije-Ne léq dalem tiang adéq tiang nyampéang mengenai Ie tipaq dengan-dengan saq ndéq Yahudi. Léq waktu nike tiang ndéq lalo tunas naséhat ojok sai juaq. Tiang éndah ndéq lalo ojok Yerusalem jari bedait kance ie pade saq sampun jari rasul sendéqman tiang. Laguq tiang lalo ojok negeri Arab, beterus léman derike tulak malik ojok Damsyik. Telu taun sesampun nike, tiang lalo ojok Yerusalem jari bekenalan kance Kepas. Tiang ndot kance ie cume lime olas jelo ngonéqne. Tiang ndéq serioq rasul-rasul saq lain, kecuali Yakub, sanak Junjungan Saq Mulie Deside Isa. Léq arepan Allah, tiang yakinang side bahwe tiang ndéq beduste mengenai napi saq tiang tulis tipaq side. Sesampun nike tiang lalo ojok daérah-daérah Siria dait Kilikia. Laguq muen tiang tetep ndéq tetandaq siq jemaah-jemaah Almasih léq Yudea. Ie pade cume dengah basen dengan, “Dengan saq laéq nganiaye ite, mangkin beriteang kabar solah mengenai iman saq laéq mélé ie musnahang.” Make, ie pade mulieang Allah lantaran tiang. Empat olas taun sesampun nike, tiang lalo malik ojok Yerusalem bareng kance Barnabas dait Titus éndah tiang jauq. Tiang lalo ojok Yerusalem atas dasar wahyu léman Allah. Dait dalem sopoq sangkep saq husus kance pemimpin-pemimpin léq derike, tiang jelasang Kabar Solah saq tiang beriteang tipaq dengan-dengan saq ndéq Yahudi. Séngaq tiang ndéq mélé usahe tiang saq laéq, atao saq mangkin, cume sie-sie. Titus, saq bareng kance tiang, ie dengan Yunani, laguq ie ndéq tepaksaq turut aturan sunat, timaq araq dengan-dengan saq maksaq hal nike. Ie pade dengan-dengan saq tame secare tedoq-tedoq dait puraq-puraq jari semeton seiman. Ie pade tame tedoq-tedoq jari nyelidik kebébasan saq araq léq ite, séngaq ite araq léq dalem Deside Isa Almasih. Maksut ie pade milu nulakang ite léq keadaan saq semule sebagé hambe, laguq tiang pade ndéq mélé nyerah léq ie pade, séngaq tiang pade mélé jagaq adéq Kabar Solah nike tetep murni tipaq side pade. Laguq timaqne maraq nike, ndéq araq hal-hal baru saq tetuntut léman tiang siq pemimpin-pemimpin nike -- umaq tiang ndéq araq bédene dengan saq tehormat atao ndéq, séngaq Allah ndéq béde-bédeang dengan. Sebalikne, ie pade ngakuq bahwe Allah sampun nugasang tiang jari beriteang Kabar Solah tipaq dengan-dengan saq ndéq besunat, pade maraq Ie sampun nugasang Petrus jari beriteang Kabar Solah nike tipaq dengan saq besunat. Séngaq Allah saq ngicanin Petrus kemampuan jari rasul umaq dengan-dengan saq besunat, ngicanin éndah léq tiang kemampuan jari rasul tipaq dengan-dengan saq ndéq besunat. Yakub, Kepas dait Yahya, saq teanggep jari pemimpin-pemimpin jemaah, ngakuq bahwe Allah sampun ngicanin tiang rahmat-Ne. Make ie pade besalaman kance Barnabas dait tiang sebagé tande persahabatan. Beterus ie pade dait tiang pade setuju bahwe tiang pade gen begawéan léq antare dengan-dengan saq ndéq besunat, dait ie pade léq antare dengan-dengan saq besunat. Sopoq-sopoqne petunasan ie pade adéq tiang pade merhatiang dengan miskin. Dait tiang malahan seneng ngelaksaneang hal nike. Sewaktu Petrus dateng ojok Antiokia, tiang nentang ie secare terang-terangan, séngaq ie salaq. Penembéqne ie tokol bekelor bareng kance dengan-dengan saq ndéq besunat. Laguq sesampun dengan-dengan utusan Yakub dateng, ie jaoqang diriqne léman semeton-semeton saq ndéq besunat dait ndéqne mélé malik bekelor kance ie pade, séngaq takut léq dengan-dengan saq mélé adéqne selapuq dengan tesunat. Semeton-semeton Yahudi saq lain éndah milu-miluan munapik maraq Petrus, sehingge Barnabas éndah milu maraq ie pade. Sewaktu tiang serioq bahwe kelakuan ie pade sampun ndéqne sesuai malik kance kebenaran Kabar Solah nike, tiang sampéang tipaq Petrus léq julun selapuq dengan saq araq léq derike, “Lamun side dengan Yahudi idup maraq dengan saq ndéq kenal kance Allah dait ndéqne idup maraq dengan Yahudi, kembéq mangkin side mélé maksaq semeton-semeton saq ndéq besunat jari idup maraq dengan Yahudi?” Menurut keturunan, tiang pade mule dengan Yahudi dait ndéqne “dengan bedose léman bangse-bangse lain”. Timaq maraq nike tiang pade nenaoq bahwe dengan tejariang kenaq léq arepan Allah sehingge hubunganne kance Allah jari solah malik cume lantaran percaye léq Deside Isa Almasih, dait ndéqne lantaran ngelaksaneang Hukum Taurat. Tiang pade éndah percaye léq Deside Isa Almasih, adéq hubungan tiang pade kance Allah jari solah malik langan iman tiang pade léq dalem Almasih, ndéqne lantaran tiang pade ngelaksaneang Hukum Taurat. Séngaq siq care ngelaksaneang Hukum Taurat, ndéq araq sopoq dengan juaq saq bau miaq hubunganne kance Allah jari solah malik. Tiang pade berusahe adéq tiang pade tejariang kenaq léq arepan Allah sehingge hubungan tiang pade kance Allah jari solah malik langan idup léq dalem Almasih. Laguq lamun sesampun ngelaksaneang maraq nike, ternyate tiang pade tetep “dengan-dengan bedose” éndah maraq dengan-dengan saq ndéq Yahudi, napi niki artine Almasih saq jari penyebap tiang pade bedose? Pasti ndéqne maraq nike! Lamun tiang mulai ngaraqang malik pengajahan Hukum Taurat saq sampun tiang sédaq, make tiang nyatayang bahwe tiang sampun ngelanggar hukum nike. Laguq tiang sampun maté bagi Hukum Taurat -- tematéq siq hukum nike mésaq -- adéq tiang bau idup bagi Allah. Tiang sampun tepakuq léq kayuq salib ngiring Almasih. Mangkin ndéqne malik tiang saq idup, laguq Almasih saq idup léq dalem diriq tiang. Dait idup saq tiang alamin mangkin niki, idup siq iman tipaq Bije saq asalne léman Allah saq ngasihin tiang dait saq sampun ngurbanang diriq-Ne umaq tiang. Tiang ndéq ngeréméhang rahmat Allah. Lamun dengan tejariang kenaq léq arepan Allah sehingge hubunganne kance Allah jari solah malik lantaran ngelaksaneang Hukum Taurat, nike artine ninggalne Almasih ndéq araq manpaatne! Semeton senamian dengan-dengan Galatia! Side pade tetu-tetu bodo! Sang side pade sampun kene siq pengaruh dengan? Padahal ninggalne Almasih léq kayuq salib sampun tiang jelasang léq side sejelas-jelasne! Cobaq badaq tiang saq sopoq niki doang: Napi side pade sampun nerimaq Roh Allah lantaran ngelaksaneang Hukum Taurat, atao lantaran side pade percaye léq pemberitean Kabar Solah léman Allah? Kembéq side pade bodo gati? Side pade sampun mulai idup baru siq Roh Allah, segerah mangkin side pade mélé nyempurneang diriqde siq kekuatande mésaq? Percume doang selapuq saq sampun side pade alamin nike? Segerah selapuq nike sie-sie! Allah ngicanin Roh-Ne léq side dait ngaraqang keajaipan-keajaipan léq antare side pade. Napi Allah ngelaksaneang nike lantaran side pade ngelaksaneang Hukum Taurat atao lantaran side pade percaye léq pemberitean Kabar Solah léman Allah? Pade maraq saq tetulis léq dalem Kitab Suci mengenai Ibrahim, “Ibrahim percaye léq Allah, dait lantaran percayene nike ie tejariang kenaq léq arepan Allah sehingge hubunganne kance Allah jari solah malik.” Keranaq nike, side pade harus nenaoq bahwe selapuq dengan saq idup léman iman, ie pade nike keturunan Ibrahim. Kitab Suci, saq sampun juluan wikan bahwe Allah gen miaq dengan-dengan saq ndéq Yahudi bau tejariang kenaq léq arepan-Ne sehingge hubungan ie pade kance Allah jari solah malik langan iman, sampun juluan beriteang kabar solah nike tipaq Ibrahim, “Langan side, selapuq suku-suku bangse gen mauq berkah léman Allah.” Ibrahim beriman, make ie teberkahin. Maraq nike éndah selapuq dengan saq beriman, gen teberkahin bareng kance Ibrahim. Dengan-dengan saq beharep sepenoq angen léq Hukum Taurat, selapuqne idup léq bawaq kutukan. Séngaq léq dalem Kitab Suci tetulis, “Dengan saq ndéq setie ngelaksaneang selapuq saq tetulis dalem Kitab Hukum Taurat tekutuk siq Allah!” Ndéq araq sopoq dengan juaq saq bau tejariang kenaq léq arepan Allah sehingge hubunganne kance Allah jari solah malik lantaran ngelaksaneang Hukum Taurat. Hal nike sampun tenyatayang léq dalem Kitab Suci, “Dengan saq tejariang kenaq léq arepan Allah sehingge hubunganne kance Allah jari solah malik, ie gen idup siq iman!” Laguq Hukum Taurat nike ndéqne tedasarang siq iman. Dalem Kitab Suci tetulis bahwe dengan saq ngelaksaneang Hukum Taurat, gen idup lantaran hukum nike. Laguq Almasih sampun nebus ite léman kutukan Hukum Taurat. Ie piaq hal nike siq ngalurang diriq-Ne tekutuk lantaran ite. Séngaq léq dalem Kitab Suci tetulis, “Tekutuk dengan saq ninggal tegantung léq kayuq salib.” Almasih ngelaksaneang maraq nike adéq berkah saq tejanjiqang siq Allah tipaq Ibrahim teicanin éndah tipaq dengan bangse-bangse lain. Sehingge langan iman, ite nerimaq Roh saq tejanjiqang siq Allah nike. Semeton senamian! Tiang béng side conto léman pengalaman sebilang jelo. Lamun dengan miaq surat wasiat saq sampun tesahang, make ndéq araq sopoq dengan juaq saq bau batalang atao ngeromboq surat wasiat nike. Maraq nike éndah halne selapuq janji saq sampun teicanin tipaq Ibrahim dait tipaq keturunanne. Léq Kitab Suci ndéqne tetulis “dait tipaq selapuq keturunan side”, maraqne tipaq luwéq dengan, laguq cume tipaq sopoq dengan, “dait tipaq keturunan side”, nike Almasih. Saq mélé tiang sampéang léq deriki: Janji Allah sampun tepiaq dait tesahang juluan. Hukum Taurat saq teicanin empat ratus telung dase taun sesampun nike ndéqne bau batalang pengesahanne dait ngapus janji Allah nike. Séngaq lamun napi saq teicanin siq Allah nike teharepang siq dasar Hukum Taurat, make nike ndéqne malik rahmat saq tejanjiqang. Malahan lantaran Allah sampun bejanji léq Ibrahim, make Allah ngicanin hal nike léq ie. Lamun maraq nike, jari napi Hukum Taurat teicanin? Jawabne bahwe hukum nike teromboqang jari nyatayang pelanggaran manusie. Hukum Taurat nike berlaku jangke dateng sopoq dengan keturunan Ibrahim, saq tesebut léq dalem janji Allah tipaq Ibrahim. Hukum Taurat nike tesampéang siq malaékat-malaékat langan perantarean sopoq manusie. Jari, harus araq due pihak, baruq teperluang sopoq perantare. Laguq Allah nénten merluang perantare, séngaq Allah mésaq saq ngelaksaneang. Napi hal nike artine bahwe Hukum Taurat belawanan kance janji Allah? Pasti ndéqne maraq nike! Séngaq lamun Hukum Taurat teicanin jari sopoq hal saq ngidupang, make manusie bau tejariang kenaq léq arepan Allah sehingge hubunganne kance Allah jari solah malik langan Hukum Taurat. Laguq léq dalem Kitab Suci tetulis bahwe selapuq umat manusie sampun araq léq bawaq kuase dose, adéq janji saq asalne léman iman léq dalem Deside Isa Almasih bau dateng tipaq dengan-dengan saq percaye. Sendéqman iman nike dateng, mule ite araq léq bawaq pengawasan Hukum Taurat. Ite maraq tekurung jangke iman nike tenyatayang. Siq care nike, Hukum Taurat nike sampun jari panutan saq jauq ite tipaq Almasih, adéq ite tejariang kenaq léq arepan Allah sehingge hubungante kance Allah jari solah malik lantaran iman. Sesampun iman nike dateng, ite ndéqne malik araq léq bawaq pengawasan Hukum Taurat saq jari panutan nike. Side pade sampun jari bije-bije dowén Allah siq iman léq dalem Deside Isa Almasih. Side pade selapuqne sampun tebaptis siq peséngan Almasih, jari side pade sampun nerimaq léq diriq side pade sipat-sipat Almasih. Dalem hal niki ndéq araq malik bédene dengan Yahudi dait dengan Yunani, antare hambe dait dengan bébas, antare mame dait nine. Side selapuqne sopoq léq dalem Deside Isa Almasih. Lamun side pade dowén Almasih, make side pade keturunan Ibrahim. Dait side pade gen nerimaq napi saq tejanjiqang siq Allah. Maraq nike éndah halne ite: Sengonéq ite ndéqman déwase, ite tejariang panjak siq roh-roh saq nguasein dunie niki. Laguq léq waktu saq tepat, Allah ngutus Bije-Ne ojok dunie. Ie tebijeang siq sopoq dengan nine dait idup léq bawaq kekuasean Hukum Taurat. Siq care nike Ie nebus dengan-dengan saq idup léq bawaq kekuasean Hukum Taurat; adéq ite éndah bedowé hak jari bije-bije dowén Allah. Keranaq side pade bije-bije dowén Allah, Allah mréntahang Roh Bije-Ne tame ojok dalem aténde dait atén tiang, nike Roh saq bemanik, “Bapa, ya Bapa.” Jari, side pade ndéqne malik hambe, laguq bije. Dait lantaran side pade bije dowén Allah, make side éndah jari ahli-ahli waris lantaran Allah. Laéq side pade ndéq kenal Allah, keranaq nike side pade jariang diriqde hambe léman kuase-kuase saq setetune ndéqne Allah. Laguq mangkin side pade kenal Allah, atao tepatne malik Allah kenal side pade. Nah, kembéq side pade mélé tulak malik tipaq roh-roh dunie saq lemah dait miskin? Kembéq side pade mélé tejariang panjak siq roh-roh nike? Side pade taat léq jelo-jelo saq husus, bulan-bulan saq husus, dait taun-taun saq husus. Tiang kuatir, ndaq-ndaq usahe tiang léq side pade jari sie-sie doang. Semeton senamian! Sanget siq tiang tunas léq side pade adéq side pade jari maraq tiang. Séngaq tiang éndah sampun jari maraq side pade. Side pade ndéq uwah miaq kesalaqan léq tiang. Side pade pasti masih inget napi saq jari penyebap léq penembéqne tiang beriteang Kabar Solah nike léq side. Nike lantaran tiang sakit. Léq waktu nike side pade ndéq merase kenjering léq tiang, timaq keadaan awak tiang jari cobe beléq umaq side pade. Malahan side pade nerimaq tiang maraq nerimaq malaékat Allah atao maraq nerimaq Deside Isa Almasih mésaq. Side pade bahagie gati waktu nike. Laguq mangkin, léq mbé kebahagiean nike? Tiang nenaoq bahwe léq waktu nike side pade réde congkél penentengde mésaq jari béng tiang, lamun nike bau telaksaneang. Napi mangkin side pade sampun anggep tiang musuh, lantaran tiang nyatayang saq kenaq tipaq side? Dengan-dengan saq lain nike semanget gati boyaq side pade, laguq maksut-maksut ie pade lengé. Ie pade cume mélé kelin side pade léman tiang, adéq side pade besemanget turut ie pade. Mule bagus besemanget léq hal-hal saq solah, asal tetep maraq nike, dait ndaq cume lamun tiang araq bareng kance side pade. Bije-bije tiang saq tiang kasihin! Mangkin tiang niki menderite malik lantaran side pade. Tiang menderite maraq sopoq inaq saq menderite sewaktu nganak. Tiang gen tetep menderite, lamun sipat-sipat Almasih ndéqman tetu-tetu araq léq dalem diriqde! Tiang melét gati araq léq tengaq-tengaq side pade mangkin, adéq tiang bau ngeraos kance side siq care saq lain, séngaq tiang ndéq nenaoq malik mélé piaq napi léq side pade! Semeton-semeton saq mélé idup léq bawaq kekuasean Hukum-hukum Taurat, cobaq dengahang tiang! Tiang gen badaq side napi saq setetune tetulis léq dalem kitab Hukum Taurat. Léq derike tetulis bahwe Ibrahim bedowé due bije: Inaq léman bije saq sopoq nike sopoq hambe, dait inaq léman bije saq lain nike sopoq dengan saq merdéke. Bije léman dengan nine saq jari hambe tebijeang biase lantaran keméléq manusie. Laguq bije léman nine saq merdéke, tebijeang séngaq tejanjiqang siq Allah. Niki bau tekadu jari perumpamean. Due dengan nine nike ibarat due perjanjian: Saq sopoq asalne léman Gunung Sinai -- nike Hagar; bije-bijene tebijeang sebagé hambe. Jari, Hagar nike Gunung Sinai, léq negeri Arab. Ie jari lambang kote Yerusalem saq araq mangkin, séngaq ie idup sebagé hambe bareng kance bije-bijene. Laguq Yerusalem saq léq sorge nike dengan nine saq merdéke, dait ie saq jari inaqte. Séngaq léq dalem Kitab Suci tetulis, “Pade gembire side hai dengan nine saq bangkol, saq ndéq uwah nganak! Pade besukecite dait besurak-surakan hai side saq ndéq uwah idap sakitne nganak! Séngaq dengan nine saq tebilin siq semamene gen mauq bije luwéqan tebanding dengan nine saq idup bareng kance semamene.” Semeton senamian! Pade maraq Ishak, side pade bije-bije léman janji Allah. Léq waktu nike bije saq tebijeang menurut keméléq manusie, nganiaye bije saq tebijeang lantaran pekayunan Roh Allah. Maraq nike éndah mangkin. Laguq napi saq tetulis léq dalem Kitab Suci? Léq derike tetulis maraq niki: “Sediq hambe nine nike bareng kance bijene, séngaq bije léman hambe nine nike ndéqne gen jari ahli waris bareng kance bije léman dengan nine saq merdéke nike.” Jari, semeton-semeton, ite niki ndéqne bije-bije léman sopoq hambe nine; ite niki bije-bije léman dengan nine saq merdéke. Mangkin ite merdéke, séngaq Almasih sampun merdékeang ite! Keranaq nike pertahenang kemerdékean side dait ndaq mélé tejariang hambe malik. Pade inget, lamun side pade nyunat diriqde, nike artine Almasih ndéq araq manpaatne léq side. Saq ngucapang niki tiang mésaq, Paulus. Karing sekali tiang peringet dengan saq nyunat diriqne, bahwe ie wajib ngelaksaneang selapuq Hukum Taurat! Side pade, saq melét tejariang kenaq léq arepan Allah sehingge hubungande kance Allah jari solah malik langan Hukum Taurat, sampun tekelin léman Almasih dait sampun araq léq luah rahmat Allah. Séngaq langan Roh Allah dait siq iman, ite ngantih napi saq kenaq, nike pade maraq napi saq ite harepang. Séngaq léq dalem Deside Isa Almasih, besunat atao ndéq besunat ndéq araq manpaatne; laguq saq datengang manpaat, iman saq bekarye langan kasih. Laéq side pade bejuang secare bagus. Sai saq sampun halangin side pade sehingge side pade ndéq taat malik léq kebenaran? Pasti saq ngelaksaneang nike nénten Allah saq sampun ngemanikang side pade! Basen dengan, “Ragi ruti saq sekediq gen miaq mbal selapuq adonan.” Léq dalem Almasih, tiang yakin bahwe side ndéq gen turut pikiran saq lain. Dait tiang yakin bahwe saq nyesatang pikirande, gen tehukum siq Allah. Mengenai tiang, semeton senamian, kembéq tiang tetep doang temusuhin lamun tiang masih beriteang bahwe aturan sunat nike perlu? Lamun tiang mule beriteang maraq nike, make napi saq tiang beriteang mengenai salib Almasih ndéq nimbulang masalah. Bagusan dengan-dengan saq nyesatang pikiran side nike langsung doang sugul léman jemaah! Side sampun temanikang jari dengan saq merdéke. Laguq ndaq kadu kemerdékeande nike jari tetep ngelaksaneang kehidupan léq dalem dose, sebalikne side pade harus saling kasihin dait saling tulung. Selapuq Hukum Taurat tesimpulang léq dalem préntah saq sopoq niki, “Side harus ngasihin sepadende manusie, maraq side ngasihin diriqde mésaq.” Laguq lamun side pade saling kakoq dait saling kaken, awas, ndaq jangke side pade saling binaseang. Maksut tiang maraq niki: Menengang Roh Allah mimpin side pade, dait ndaq idup menurut keméléq tabiat manusie. Séngaq keméléq tabiat manusie belawanan kance pekayunan Roh Allah, dait pekayunan Roh Allah belawanan kance keméléq tabiat manusie. Kedue-duene saling belawanan, sehingge side pade ndéq bau ngelaksaneang napi saq side pade melétang. Laguq lamun Roh Allah mimpin side pade, make side pade ndéq tekuasein siq Hukum Taurat. Keméléq tabiat manusie nyate dalem perbuatan-perbuatan saq cabul, kotor dait ndéq patut; dalem penyembahan berhale dait ilmu séhér; saling bemusuhan, besiaq, talon até, becat sili, dait mentingang diriq mésaq, perpecahan dait saling ilon, serte dengki, bowos-bowosan, péste-péste jangke liwat bates dait saq lain-lainne. Léq selapuqne nike mangkin tiang peringet side pade maraq tiang sampun peringet éndah side pade laéq, bahwe dengan-dengan saq ngelaksaneang hal-hal maraq nike ndéq gen mauq bagian léq dalem Kerajaan Allah. Laguq buaq Roh nike: Kasih, sukecite, damé sejahtere, sabar, murah até, gawéq hal saq solah, kesetiean, lemah lembut, nguasein diriq. Ndéq araq hukum saq nentang hal-hal nike. Dengan-dengan saq sampun jari dowén Deside Isa Almasih, dengan-dengan nike sampun nyematéq keméléq tabiat manusiene kance selapuq napsu dait keméléqne. Lamun ite idup menurut Roh, alurang idupte éndah tepimpin siq Roh. Ndaq ite jari sombong, saling nyakitang angen, dait saling talon até sopoq kance saq lainne. Semeton senamian! Lamun sopoq dengan tedait gawéq dose, side pade saq idup menurut Roh Allah harus bimbing dengan nike adéqne tulak ojok langan saq kenaq. Laguq side pade harus ngelaksaneang nike secare lemah lembut, dait jagaq ndaq jangke side mésaq tegode éndah. Side pade harus saling tulung léq kesusahan dengan, adéq siq care nike side pade taat léq préntah Almasih. Lamun sopoq dengan paran diriqne penting, padahal ndéq, dengan nike beduste léq diriqne mésaq. Sebilang dengan harus meriksaq mésaq napi kelakuanne solah atao ndéq. Lamun solah, ie bau merase bangge siq hal nike. Laguq ndaq ie bandingang kance napi saq telaksaneang siq dengan lain. Séngaq sopoq-sopoq dengan harus bedowé rase tanggung jawab mésaq. Dengan saq nerimaq pengajahan mengenai Manik Allah, sepatutne ie bagiang selapuq saq solah saq araq léq ie tipaq dengan saq ngebéng pengajahan nike. Ndaq sesat. Allah ndéqne bau teanggep réméh! Napi saq tetalet, nike saq tepataq. Lamun dengan nalet menurut tabiat manusiene, ie gen mataq kematéan léman tabiatne nike. Laguq lamun ie nalet menurut pimpinan Roh Allah, ie gen mataq idup sejati dait kekel léman Roh Allah. Keranaq nike, ndaq ite jari pendaq ngelaksaneang hal-hal saq solah; séngaq lamun ite ndéq mentelah ngelaksaneang hal-hal nike, make léq sopoq jelo éraq ite gen mauq hasilne. Jari, semasih ite araq kesempatan, ite harus ngelaksaneang saq solah tipaq selapuq dengan, terutame gati tipaq semeton-semetonte saq seiman. Perhatiang solah-solah bagian niki saq tiang tulis mésaq kadu hurup saq beléq-beléq. Dengan-dengan saq mélé ajum diriqne léq hal-hal saq lahiriah, ie pade saq berusahe maksaq side turut aturan sunat. Laguq ie pade laksaneang nike cume adéq ie pade ndéq teaniaye lantaran salib Almasih. Dengan-dengan saq turut aturan sunat éndah ndéqne ngelaksaneang Hukum Taurat. Laguq ie pade mélé side pade tesunat, adéq ie pade bau banggeang bahwe side pade taat léq aturan nike. Laguq tiang tetu-tetu ndéq mélé banggeang napi juaq, selain Junjungante Saq Mulie Deside Isa Almasih saq sampun ninggal tepakuq léq kayuq salib. Séngaq lantaran Ie sampun ninggal léq kayuq salib, make dunie ndéqne bedowé arti napi-napi malik umaq tiang. Dait tipaq dunie niki, tiang éndah piaq diriq maraqne sampun tepakuq léq kayuq salib. Tesunat atao ndéq tesunat, nike ndéqne penting. Saq penting nike jari ciptean baru. Bagi dengan-dengan saq idup menurut pendapet nike, dait maraq nike éndah Israel saq jari dowén Allah, tiang harep Allah gen ngicanin damé sejahtere dait rahmat-Ne. Selanjutne, ndaq jangke sopoq dengan juaq nyusahang tiang malik, séngaq léq awak tiang araq bukti-bukti bahwe tiang pengiring Deside Isa. Rahmat Junjungante Saq Mulie Deside Isa Almasih, tetep araq bareng kance side pade. Amin. Dengan-dengan saq tehususang bagi Allah léq Epesus, saq setie léq Deside Isa Almasih! Tiang, Paulus, siq pekayunan Allah jari rasul Deside Isa Almasih, beharep semoge Allah Bapante dait Junjungan Saq Mulie Deside Isa Almasih ngicanin rahmat dait damé sejahtere tipaq side pade. Puji syukur tipaq Allah, Bapa Junjungante Saq Mulie Deside Isa Almasih! Ie ngicanin ite berkah siq selapuq berkah rohani léq dalem sorge, séngaq ite araq léq dalem Almasih. Sendéqman dunie niki tecipteang, Allah sampun miléq ite langan Almasih siq maksut adéq ite jari dowé-Ne saq husus dait ndéq bedowé cacat cele léq arepan-Ne. Lantaran kasih Allah, make Ie sampun juluan nentuang bahwe langan Deside Isa Almasih, Ie gen ngangkat ite jari bije-bije dowé-Ne sesuai pekayunan-Ne, adéqne tepuji rahmat-Ne saq mulie, rahmat saq teicanin tipaq ite langan Bije saq asalne léman Ie saq sanget Ie sayang. Séngaq léq dalem Almasih dait siq daraq-Ne ite bau tetebus, nike pengampunan dose sesuai rahmat-Ne saq melimpah. Ie ngelaksaneang nike lantaran Ie sanget ngasihin ite, dait kasih nike limpahang-Ne tipaq ite siq kebijaksanean dait pengertian. Menurut pekayunan-Ne mésaq, Allah nyatayang rahasie rencane-Ne tipaq ite; Ie sampun netepang bahwe rencane-Ne nike gen teseleséang langan Almasih. Rencane nike adéq selapuq saq léq sorge dait saq léq gumi, tejariang sopoq léq dalem Almasih sebagé kepale. Dait hal nike gen teseleséang siq Allah lamun sampun dateng waktune. Tiang nyampéang “léq dalem Almasih”, séngaq léq dalem Ie tiang pade mauq bagian saq tejanjiqang -- tiang pade saq léman penembéq tetentuang jari nerimaq bagian nike sesuai maksut Allah, saq léq dalem selapuqne bekarye menurut keputusan pekayunan-Ne. Siq care nike, tiang pade saq penembéq beharep léq Almasih, bau memuji Allah lantaran kemuliean-Ne! Side pade éndah sampun jari dengan-dengan saq tehususang bagi Allah sewaktu side pade dengahang manik kebenaran, nike Kabar Solah saq nyelametang side. Léq dalem Almasih éndah, side pade tesahang siq Roh Suci, saq tejanjiqang nike. Roh nike jari jaminan bahwe ite gen nerimaq napi saq tejanjiqang siq Allah tipaq umat-Ne. Niki ngebéng keyakinan léq ite bahwe Allah gen bébasang umat-Ne. Puji syukur tipaq Allah lantaran keagungan-Ne! Keranaq nike, mulai léman tiang dengah mengenai iman side pade léq Junjungan Saq Mulie Deside Isa Almasih, dait mengenai kasihde léq selapuq dengan-dengan saq tehususang bagi Allah, ndéq tutuq-tutuq tiang besyukur léq Allah mengenai side pade. Tetep tiang sebut arande sewaktu tiang bedo'e. Tiang tunas adéq Allah Junjungante Saq Mulie Deside Isa Almasih, Bapa Saq Mulie, ngicanin Roh hikmat dait wahyu sehingge side pade kenal kance Ie. Roh nike gen jariang side pade bijaksane, dait gen nyatayang Allah tipaq side pade sehingge side pade kenal kance Ie. Tiang tunas adéq Allah jariang até nuraninde becahaye; adéq side pade ngerti napi saq bau side pade harepang léman Allah saq ngemanikang side pade. Adéq side pade nenaoq éndah berembé limpahne berkah-berkah saq solah saq tesedieang siq Allah tipaq dengan-dengan saq tehususang umaq Ie; dait berembé hébatne Allah bekarye siq penoq kuase léq dalem diriqte saq percaye, sesuai kekuatan kuase-Ne, saq Ie laksaneang sewaktu Ie ngidupang Almasih léman ninggal dait ngicanin Ie kedudukan saq paling atas ngiring Allah léq sorge. Kedudukan Almasih nike jaoq atasan tebanding kance kedudukan selapuq pemréntah, selapuq penguase, selapuq pemimpin, selapuq tuan-tuan, dait sai juaq saq sampun teicanin kedudukan saq atas; saq idup léq jaman niki dait saq gen idup léq jaman saq gen dateng. Selapuqne tetaklukang siq Allah léq bawaq kekuasean Almasih, dait Almasih sampun teicanin tipaq jemaah sebagé kepale léman selapuq saq araq. Jemaah nike rage Almasih, tesempurneang siq Ie saq nyempurneang selapuq-lapuqne. Laéq side pade maté secare rohani lantaran pelanggaran-pelanggaran dait dose-dose side pade. Léq waktu nike side pade turut kebiasean-kebiasean dunie niki; artine side pade taat léq penguase-penguase saq araq léq awang-awang, nike roh saq mangkin nguasein até dengan-dengan saq durhake. Laéq ite selapuq pade éndah kance ie pade; ite idup turut tabiat manusie dait ngelaksaneang napi saq nyenengang awak dait pikirante saq jahat. Léq waktu nike éndah ite jari dengan-dengan saq temurkeang siq Allah, pade maraq dengan-dengan lain. Laguq Allah saq limpah siq rahmat, lantaran kasih-Ne saq beléq, saq Ie limpahang tipaq ite, sehingge léq waktu ite masih maté secare rohani lantaran pelanggaran-pelanggarante, Ie ngidupang ite malik bareng-bareng kance Almasih. Jari, cume lantaran rahmat Allah, side pade teselametang siq Allah. Dait léq dalem Deside Isa Almasih, Allah ngidupang ite malik bareng kance Deside Isa, adéq ite mréntah ngiring Ie léq sorge. Allah ngelaksaneang nike adéq léq jaman saq gen dateng, manusie bau serioq berembé beléq rahmat-Ne saq tenyatayang tipaq ite langan kesolahan-Ne langan perantarean Deside Isa Almasih. Séngaq lantaran rahmat Allah side pade teselametang langan iman; nike ndéqne hasil usahende, laguq teicanin siq Allah, nike ndéqne hasil pegawéande: Sampunang araq dengan saq nyombongang diriqne. Séngaq ite niki ciptean Allah, dait langan Deside Isa Almasih, Allah miaq ite adéq ite ngelaksaneang hal-hal saq solah saq sampun Ie siepang umaq ite. Semeton senamian saq ndéq dengan Yahudi! Pade inget keadaande léq waktu saq laéq: Side pade tesebut “dengan ndéq besunat”, siq dengan Yahudi saq ngaku diriqne tesunat (maksutne saq sampun mauq tande saq tepiaq siq manusie léq awak ie pade). Léq waktu nike side pade idup jaoq léman Almasih, side pade dengan pendateng saq ndéq termasuk umat piléqan Allah, Israel. Side pade ndéq termasuk léq dalem iketan perjanjian saq tepiaq siq Allah kance umat-Ne. Side pade idup léq dunie niki ndéqne bedowé harepan dait ndéqne bedowé Allah. Laguq mangkin, lantaran side pade sampun léq dalem Deside Isa Almasih, side pade saq laéq jaoq, sampun terapetang siq ninggalne Almasih. Séngaq Almasih nike damé sejahterente, saq sampun pesopoq kedue pihak dait saq sampun ngerobohang tembok saq misahang, nike permusuhan. Séngaq siq ninggal-Ne sebagé manusie Ie sampun batalang Hukum Taurat kance selapuq préntah dait ketentuanne, jari nyipteang keduene tejariang sopoq manusie baru léq dalem diriq-Ne, dait siq care nike ngaraqang damé sejahtere. Siq ninggal-Ne léq kayuq salib, Almasih daméang keduene kance Allah, sehingge ndéq araq malik permusuhan. Keranaq nike Almasih rauh dait beriteang damé sejahtere tipaq side; léq side pade dengan bangse-bangse lain saq laéq jaoq léman Allah, dait tipaq dengan Yahudi saq rapet kance Allah. Siq perantarean Almasih, ite selapuq -- dengan Yahudi atao dengan bangse-bangse lain -- léq dalem sopoq Roh, bau parek tipaq Bapa. Keranaq nike, side pade ndéq malik termasuk dengan pendateng atao dengan luah. Mangkin side pade bareng-bareng jari dengan-dengan saq tehususang bagi Allah. Side pade anggote-anggote keluarge Allah. Side pade éndah tepenganjeng léq atas dasar saq tetoloq siq rasul-rasul dait nabi-nabi, dait Deside Isa Almasih saq jari batu utame. Ie saq nyusun selapuq bangunan nike jari Gedéng Allah saq suci. Léq dalem Almasih, side pade kenyeke tepenganjeng éndah bareng kance dengan-dengan lain jari taoq Allah meneng langan Roh-Ne. Keranaq nike tiang, Paulus, tebui lantaran Deside Isa Almasih jari kepentingan side pade dengan bangse-bangse lain. Pasti side pade sampun dengah mengenai tugas saq tepercayeang léq tiang jari nyampéang rahmat Allah tipaq side pade. Allah nyatayang rahasie rencane-Ne léq tiang langan wahyu. (Mengenai hal niki sendéqmanne sampun tiang tulis secare singket, dait lamun side pade bace, side pade gen paham rahasie mengenai Almasih, maraq saq tiang pahamin.) Laéq rahasie nike ndéq uwah tesampéang tipaq manusie, laguq mangkin Roh Allah sampun nyatayang tipaq rasul-rasul dait nabi-nabi-Ne. Rahasie nike maraq niki: Langan Kabar Solah nike, dengan saq ndéq Yahudi milu jari ahli-ahli waris dait anggote léman sopoq awak, dait milu nerimaq napi saq tejanjiqang siq Allah langan Deside Isa Almasih. Tiang niki hambe léman Kabar Solah nike, sesuai rahmat saq teicanin siq Allah. Tiang nerimaq rahmat nike menurut karye kuase Allah. Léq antare selapuq dengan-dengan saq tehususang bagi Allah, tiang saq paling hine. Laguq Allah ngicanin tiang rahmat niki: Tugas jari beriteang Kabar Solah tipaq dengan-dengan saq ndéq Yahudi mengenai kesugihan Almasih saq ndéq iniq bis nike; dait éndah adéq langan tiang selapuq dengan nenaoq berembé Allah, pencipte alam semeste niki, ngelaksaneang rencane-Ne saq léman laéq gati terahasieang tipaq dunie. Maksut Allah nike adéq mangkin, langan jemaah, tesampéang macem-macem hikmat Allah tipaq pemréntah-pemréntah dait penguase-penguase léq sorge. Allah ngelaksaneang nike pade maraq rencane-Ne saq kekel, saq Ie laksaneang siq perantarean Deside Isa Almasih, Junjungante Saq Mulie. Léq dalem Almasih ite jari bani parek tipaq Allah siq penoq keyakinan langan imante tipaq Ie. Keranaq nike, saq tiang tunas: Ndaq putus ase serioq penderitean tiang lantaran side pade, séngaq selapuqne nike kemulieande. Keranaq nike tiang sujut léq arepan Bapa. Léman Ie sebilang keluarge léq sorge dait léq gumi nerimaq aranne. Tiang bedo'e adéq Allah menurut kemuliean-Ne saq melimpah neguqang batinde siq Roh-Ne. Sehingge siq iman side pade, Almasih meneng léq dalem aténde, dait side berakah kuat maraq lolo kayuq serte tedasarang léq dalem kasih. Tiang bedo'e semoge bareng-bareng kance selapuq dengan saq tehususang bagi Allah, side pade bau paham mengenai berembé galuh dait bélone serte atasne dait dalemne kasih Almasih, saq menurut akal manusie ndéqne bau tepahamin sedalem-dalemne. Tiang bedo'e adéq side pade kenal kasih Almasih nike, sehingge side pade tepenoqin dalem selapuq kesempurnean Allah. Bagi Allah, saq sanggup ngelaksaneang jaoq luwéqan léman napi saq ite do'eang atao pikirang, sesuai kuase-Ne saq bekarye léq dalem ite, bagi Ie kemuliean léq dalem jemaah dait léq dalem Deside Isa Almasih turun temurun jangke selaéq-laéqne! Amin. Keranaq nike tiang -- sopoq tahenan, saq tetahen lantaran jari pelayan Tuhan -- tiang béng naséhat, adéq idupde sebagé dengan-dengan saq sampun temanikang siq Allah, idup maraq maksut Allah ngemanikang side. Side pade harus tetep rendah até, lemah lembut, dait sabar. Petitoqang kasihde siq care saling tulung sopoq kance saq lain. Dait pade berusahe meliharaq kesatuan Roh siq care kadu damé sejahtere jari pengiketne: Sopoq awak, dait sopoq Roh, pade maraq side sampun temanikang tipaq sopoq pengharepan saq araq dalem maksut Allah ngemanikang side. Cume araq sopoq Tuhan, sopoq iman, sopoq baptisan, sopoq Allah dait Bapa léman selapuq, Allah saq léq atas selapuq dait bekarye langan selapuq dait léq dalem selapuq. Sopoq-sopoq ite nerimaq rahmat menurut ukuran saq teicanin siq Almasih. Léq dalem Kitab Suci tetulis, “Sewaktu Ie taék ojok taoq saq paling atas, Ie gadingang luwéq tawanan; dait Ie ngicanin paice-paice tipaq manusie.” Nah, lamun teparan “Ie taék” artine Ie tetu-tetu sampun turun jangke taoq saq paling bawaq léq gumi niki. Dait Ie saq sampun turun nike, Ie éndah saq taék jangke taoq saq jaoq atasan léman selapuq langit jari penoqang selapuq-lapuqne. Ie saq ngicanin rasul-rasul dait nabi-nabi, dengan-dengan saq nyampéang Kabar Solah dait pemimpin-pemimpin jemaah dait guru-guru jemaah. Hal nike Ie laksaneang jari ngelengkapin dengan-dengan saq tehususang bagi Allah jari pegawéan pelayanan, jari pembangunan rage Almasih. Siq care nike ite selapuq jari sopoq siq iman saq pade dait pengertian saq pade mengenai Bije saq asalne léman Allah. Dait ite jari dengan-dengan saq déwase, saq sayan ngonéq jari sayan sempurne maraq Almasih. Make ite ndéq jari kanak-kanak malik saq ndéq tetep pendirian dait tejauq ketoq-ketéq siq macem-macem pengajahan lantaran tipu muslihat manusie dait léq dalem kelicikan ie pade saq nyesatang. Sebalikne, ite harus nyatayang kebenaran siq até saq penoq kasih, sehingge dalem selapuq hal ite sayan ngonéq jari sayan sempurne maraq Almasih saq jari kepalente. Léq bawaq pimpinan-Ne, selapuq anggote awak nike tesusun rapi, dait saling tehubungang siq sendi-sendine sopoq-sopoq. Dait lamun sebilang anggote nike begawéan maraq saq seharusne, make selapuq awak nike gen jari sayan déwase dait kuat langan kasih. Keranaq nike demi peséngan Tuhan, niki saq gen tiang sampéang dait tegesang: Sampunang malik idup maraq dengan-dengan saq ndéq kenal kance Allah siq pikiranne saq sie-sie. Pikiran ie pade nike sampun bute. Ie pade ndéq kenal kance kehidupan saq teicanin siq Allah, séngaq ie pade tetu-tetu bodo dait pagah. Ie pade sampun ndéq bedowé rase ilaq malik, sehingge ie pade turut selapuq napsune, dait serakah gawéq perbuatan saq cabul. Laguq side pade ndéq maraq nike. Side pade sampun berajah jari kenal kance Almasih. Séngaq side pade sampun dengah mengenai Ie dait nerimaq pengajahan léq dalem Ie menurut kebenaran saq nyate léq dalem Deside Isa. Keranaq nike tetéh selapuq tabiat manusiende saq laéq, saq kenyeke nyédaq siq keméléq-keméléq saq nyesatang. Roh dait pikirande harus tejariang baru selapuqne. Side pade harus idup jari manusie baru saq tecipteang menurut pekayunan Allah léq dalem kebenaran dait kesucian saq setetune. Keranaq nike semeton senamian, sampunang malik beduste. Side pade harus jujur sopoq kance saq lain, séngaq ite selapuq pade-pade jari bagian jemaah Almasih. Lamun side pade sili, ndaq alurang hal nike jari penyebap side pade bedose. Ndaq sili sejeloan, adéq Belis ndéq mauq kesempatan. Dengan saq biase memaling harus engkah memaling. Sebalikne ie harus begawéan adéqne mauq napkahne secare jujur dait mauq nulung dengan saq kekurangan. Lamun side pade ngeraos, ndaq kadu ucapan-ucapan saq kotor. Kadu ucapan-ucapan saq solah saq bau ngajah dait nulung dengan lain. Ucapan-ucapan saq maraq nike gen datengang rahmat tipaq dengan-dengan saq dengah. Ndaq miaq Roh Allah jari aséq. Side pade sampun tesahang siq Roh Allah bahwe side pade jari dowén Allah. Roh nike éndah jari jaminan bahwe jelo penyelametan gen dateng tipaq side. Tetéh selapuq rase sakit até, dendem, sili, betungkasan dait nyumpaq-nyumpaq. Ndaq malik araq rase meriq atao perasaan lain saq maraq nike. Sebalikne, side pade harus gerasaq dait murah até sopoq kance saq lain, dait saling ngampunin pade maraq Allah ngampunin side pade langan Almasih. Keranaq nike side pade harus turut teladan Allah, séngaq side pade bije-bije saq tekasihin siq Allah. Idupde harus tekuasein siq kasih, maraq Almasih éndah ngasihin ite. Ie ngurbanang diriq-Ne umaq ite, jari sopoq persembahan saq sengéh dait kurban saq nyenengang Allah. Laguq perbuatan-perbuatan saq cabul dait saq ndéq patut, atao serakah, ndaq gati teraosang léq tengaq-tengaq side pade -- mule maraq nike sepatutne dengan-dengan saq tehususang bagi Allah. Ndéqne patut éndah side ngucapang raos saq kotor saq ndéq araq manpaatne dait saq ndéq pantes. Sebalikne side pade harus ngucapang syukur tipaq Allah. Pade perhatiang solah-solah: Dengan saq gawéq perbuatan saq cabul, atao ndéq patut, atao serakah (kelakuan maraq nike pade doang maraq nyembah berhale), dengan nike ndéqne mauq bagian léq dalem Kerajaan Almasih dait Allah. Ndaq side pade tetipu siq raosan-raosan saq kosong. Séngaq hal-hal niki saq datengang murke Allah tipaq dengan-dengan durhake. Jari, ndaq gati berubungan kance dengan-dengan maraq nike. Laéq side mésaq araq léq dalem peteng. Mangkin side pade sampun jari terang léq dalem Tuhan. Keranaq nike side pade harus idup sebagé bije-bije terang. Séngaq terang cume ngasilang kesolahan dait keadilan dait kebenaran. Pade berusahe jari nguji napi saq nyenengang Tuhan. Ndaq gawéq perbuatan-perbuatan saq ndéq araq manpaatne saq tegawéq siq dengan-dengan saq idup léq dalem peteng. Sebalikne, side pade harus nyatayang kesalaqan-kesalaqanne. ( Séngaq hal-hal saq ie pade laksaneang nyeboq-nyeboq nike, jari teraosang doang sampun merilaq gati.) Selapuq hal saq teperhatiang léq dalem menah, gen pedas penggitan. Séngaq selapuq saq penggitan nike terang. Keranaq nike tesampéang maraq niki, “Pade ures, hai side saq tindoq, dait idup léman ninggal! Almasih gen becahaye léq atasde.” Keranaq nike, pade perhatiang solah-solah berembé side idup. Ndaq idup maraq dengan-dengan bodo; pade idup maraq dengan-dengan saq bijaksane. Manpaatang solah-solah selapuq kesempatan saq araq léq side, séngaq jaman niki jaman saq jahat. Ndaq bodo, laguq selidik napi saq tekayunang siq Tuhan. Ndaq side pade bowos siq anggur, séngaq nike gen nyédaq side pade. Sebalikne side pade harus tekuasein siq Roh Allah. Léq waktu side pade ngeraos, kadu ucapan-ucapan saq araq léq dalem Zabur, nyanyiang pujian bagi Allah dait lagu rohani. Side pade harus memuji Tuhan siq sepenoq angen. Sebilang waktu dait léq hal napi juaq side harus besyukur léq Allah Bapa, siq peséngan Deside Isa Almasih, Junjungante Saq Mulie. Jari hormatin Almasih, side harus saling hormatin sopoq kance saq lain. Hai senine, tunduk léq semamende, maraq tipaq Tuhan. Séngaq semame nike jari kepale léq seninene, pade maraq Almasih éndah jari kepale léq jemaah dait Ie éndah saq nyelametang jemaah saq jari rage-Ne. Pade maraq jemaah éndah tunduk léq Almasih, maraq nike éndah léq dalem selapuq hal, senine harus tunduk léq semame. Hai semame, kasihin seninende, pade maraq Almasih ngasihin jemaah dait ngurbanang diriq-Ne umaq jemaah nike. Almasih ngelaksaneang nike jari nyuciang jemaah, sesampun Ie persiq siq baptisan dait manik-Ne. Siq care nike Almasih miaq jemaah nike bau nganjeng secare agung dait murni léq arepan-Ne, ndéq araq bedowé cacat atao cele. Maraq nike éndah semame harus ngasihin seninene maraq ie ngasihin awakne mésaq. Dengan saq ngasihin seninene artine ie ngasihin diriqne mésaq. ( Ndéq uwah araq dengan saq meriq léq awakne mésaq. Sebalikne, ie peliharaq dait jagaq, maraq Almasih éndah peliharaq jemaah-Ne. Ite nenaoq hal nike, séngaq ite anggote-anggote rage Almasih.) Léq dalem Kitab Suci tetulis, “Keranaq nike sopoq dengan mame gen bilin inaq amaqne dait besopoq kance seninene, dait deduaqne gen jari sopoq.” Ayat nike bedowé maqne saq dalem. Dait tiang hubungang hal nike antare Almasih kance jemaah. Laguq ayat nike araq éndah hubunganne kance side pade. Sebilang semame harus ngasihin seninene maraq ie ngasihin diriqne mésaq dait sebilang senine harus berusahe hormat léq semamene. Kanak-kanak saq jari pengiring Almasih, harus taat léq dengan toaqde séngaq hal nike saq patut telaksaneang. “Pade hormatin amaqde dait inaqde”. Nike préntah Allah saq penembéq saq berisi janji, “Adéq side bahagie dait bélo umurde léq gumi.” Semeton senamian saq jari amaq! Ndaq perlakuang bije-bijende semélé angende sehingge ie pade jari sili. Sebalikne, didik ie pade léq dalem pengajahan dait naséhat Tuhan. Semeton senamian saq jari hambe! Pade turut préntah tuande saq léq dunie niki. Laksaneang hal nike siq rase hormat dait patuh serte pacu-pacu, pade maraq side pade laksaneang tipaq Almasih. Ndaq side bekelakuan maraq nike cume léq waktu side teawasin, cume jari teajum siq manusie. Laguq side pade harus laksaneang sebagé hambe Almasih saq kenyeke turut pekayunan Allah sepenoq angen. Pegawéan saq side pade laksaneang sebagé hambe nike, harus side pade laksaneang siq até saq gembire maraq Tuhan saq side pade layanin, dait ndéqne manusie. Pade inget bahwe sebilang dengan, timaq hambe atao dengan merdéke, lamun ie ngelaksaneang hal-hal saq solah, ie gen nerimaq balesan léman Tuhan. Semeton senamian saq jari tuan! Side pade harus bekelakuan maraq nike éndah léq hambe-hambende. Ndaq malik kadu anceman-anceman. Inget bahwe side pade dait hambe-hambende nike pade-pade bedowé sopoq Tuan, nike Tuhan saq léq sorge. Ie nénten béde-bédeang dengan. Ahirne, side harus jari kuat siq kekuatan saq side pade mauq léman kuase Tuhan, séngaq side pade araq léq dalem Tuhan. Pade kadu selapuq perlengkapan perang saq teicanin siq Allah, adéq side pade bau tahen ngelawan siasat-siasat Belis saq licik nike. Séngaq ite bejuang ndéqne ngelawan manusie, laguq ngelawan selapuq kekuatan sétan-sétan saq nguasein jaman saq jahat niki. Ite ngelawan roh-roh jahat saq araq léq awang-awang. Keranaq nike, mangkin, pade kadu selapuq perlengkapan perang Allah, adéq léq jelo saq jahat, side pade sanggup ngelawan serangan-serangan musuh. Dait adéq sesampun side pade bejuang jangke tutuq, side pade masih gagah perkase. Side pade harus tetep bejage-jage. Pade kadu kesetieande léq Allah jari sabuk, dait ketulusan jari kelambi besinde. Kerédeande jari beriteang Kabar Solah damé sejahtere jari sepatunde. Sebilang waktu kadu percayende tipaq Tuhan jari senjate penangkis, siq care nike side pade bau kalahang selapuq anak panaq berapi léman si jahat. Pade bait keselametan jari songkoq waje, dait Manik Allah jari kléwang léman Roh Allah. Laksaneang selapuqne nike sambil bedo'e jari tunas pertulungan léman Allah. Léq sebilang kesempatan, pade bedo'e léq dalem Roh dait side pade harus tetep bejage-jage léq dalem do'ende nike siq petunasan saq ndéq araq tutuqne umaq selapuq dengan-dengan saq tehususang bagi Allah. Dait do'eang tiang éndah, adéq léq waktu tiang ngeraos, Allah ngicanin tiang ucapan-ucapan saq tepat. Dait adéq tiang bani jari nyampéang rahasie Kabar Solah nike. Lantaran Kabar Solah léman Allah nike, tiang jari sopoq utusan, dait mangkin araq léq dalem bui. Pade bedo'e adéq tiang bani ngeraos mengenai Kabar Solah nike, berembé tiang harus ngeraos. Tikikus, semetonte dait pelayan saq setie dalem karye Tuhan, gen badaq side selapuq hal mengenai tiang, adéq side pade nenaoq keadaan tiang dait pegawéan tiang. Keranaq nike tiang ngutus ie tipaq side, jari badaq side selapuq keadaan tiang pade, adéq ie beléqang angende. Damé sejahtere dait kasih dait iman léman Allah, Bapa dait léman Junjungan Saq Mulie Deside Isa Almasih araq bareng kance semeton senamian. Rahmat Allah araq bareng kance selapuq dengan saq ngasihin Junjungante Saq Mulie Deside Isa Almasih siq kasih saq kekel. Selapuq dengan-dengan saq tehususang bagi Allah saq araq léq Pilipi, dait saq sampun léq dalem Deside Isa Almasih. Dait semeton-semeton pengawas dait pelayan jemaah! Tiang, Paulus, kance Timotius, hambe-hambe Deside Isa Almasih, beharep semoge rahmat dait sejahtere léman Allah, Bapante, dait Junjungan Saq Mulie Deside Isa Almasih araq bareng kance side pade. Tiang ngucap syukur tipaq Allah, sebilang tiang inget léq side pade. Dait sebilang tiang do'eang side selapuq, Tiang bedo'e siq sukecite. Tiang besyukur tipaq Allah séngaq side pade sampun nulung tiang nyampéang Kabar Solah léman Allah mulai léman jelo penembéq jangke mangkin niki. Séngaq léq dalem atén tiang, tiang yakin bahwe Allah, saq sampun mulai karye saq solah léq dalem diriqde gen nutuqang éndah jangke kerauhan Deside Isa Almasih. Mule patut tiang bedowé perasaan maraq nike léq side pade, séngaq selapuqde tetep araq léq angen tiang. Dait side pade éndah sampun bareng kance tiang nerimaq rahmat saq sampun teicanin siq Allah tipaq tiang sewaktu tiang masih léq bui dait sewaktu tiang béle dait pertahenang Kabar Solah nike. Séngaq Allah nike saksi tiang bahwe tiang tetu-tetu kangen léq side siq rase kasih léman Deside Isa Almasih. Niki do'e tiang umaq side pade: Semoge kasih side pade sayan luwéq léq dalem penenaoq saq kenaq dait léq dalem selapuq pengertian. Sehingge side pade tao piléq napi saq paling solah. Siq care nike, jangke kerauhan Almasih side pade jari suci dait ndéq bedowé cacat cele, penoq siq kebajikan, saq cume bau tehasilang siq Deside Isa Almasih, jari kemuliean dait pujian bagi Allah. Tiang mélé side pade nenaoq bahwe hal-hal saq sampun telaksane léq tiang, malahan jari penyebap luwéqan malik dengan dengah dait percaye léq Kabar Solah nike. Akibatne, selapuq pengawal istane dait selapuq dengan lain nenaoq bahwe tiang tebui lantaran tiang jari pelayan Almasih. Dait keadaan tiang saq tebui niki sampun miaq luwéq semeton-semeton seiman léq kote niki jari sayan yakin léq dalem Tuhan, sehingge ie pade sayan bani, ndéqne takut-takut malik ngabarang Manik Allah. Mule araq pire dengan léq antare ie pade saq beriteang Almasih lantaran talon até dait mélé betungkasan, laguq saq lainne beriteang Almasih séngaq bedowé maksut saq solah. Ie pade saq beriteang siq maksut saq solah ngelaksaneang hal nike lantaran kasih, séngaq ie pade nenaoq bahwe tiang araq léq dalem bui jari béle Kabar Solah léman Allah nike. Laguq dengan saq lain beriteang Almasih siq maksut saq ndéq ihlas; ie pade beriteang jari kepentinganne mésaq. Siq care nike ie pade beharep bau miaq tiang jari sayan susah léq dalem bui. Laguq ndéqne kembé-kembé! Séngaq napi juaq maksutne, jujur atao palsu, saq penting Almasih teberiteang éndah; tiang jari seneng. Dait tiang gen tetep merase maraq nike, séngaq tiang nenaoq bahwe siq do'e-do'ende dait siq bantuan léman Roh Deside Isa Almasih, tiang gen tebébasang. Séngaq saq tiang melétang gati dait saq tiang harepang nike, adéq léq dalem selapuq hal tiang ndéq teperilaq. Sebalikne tiang beharep adéq sebilang waktu, terutame gati mangkin, tiang bani sehingge siq selapuq awak dait roh tiang -- timaq tiang idup atao maté -- Almasih temulieang. Séngaq bagi tiang idup nike umaq Almasih dait maté nike keuntungan. Laguq lamun tiang idup léq dunie niki, tiang harus begawéan dait beramal. Jari mbé saq harus tiang piléq, mindah tiang. Tiang teantuq léman due pihak. Tiang melét gati bilin dunie niki, terus lalo dait araq bareng kance Almasih, séngaq nike jaoq solahan; laguq, jari kepentingan side, solahan lamun tiang masih ndot léq dunie. Tiang yakin léq hal nike. Keranaq nike tiang nenaoq tiang gen tetep ndot bareng kance side pade, adéq side pade sayan maju dait besukecite léq dalem iman. Keranaq nike, laun lamun tiang tulak ojok side, kebanggean side pade léq dalem Deside Isa Almasih gen sayan luwéqan malik lantaran tiang. Cume, padeang idupde kance Kabar Solah mengenai Almasih, adéq lamun tiang dateng, tiang bau serioq, atao lamun tiang ndéq dateng, tiang bau dengah bahwe side pade tetep araq léq dalem sopoq roh dait siq sopoq angen bejuang bareng-bareng léq dalem iman saq asalne léman Kabar Solah léman Allah nike. Side pade harus tetep bani: Ndaq side pade takut léq musuh-musuhde. Bagi ie pade, selapuqne nike tande kebinasean, laguq umaq side pade nike tande keselametan saq asalne léman Allah. Séngaq Allah sampun ngicanin paice tipaq side pade ndéqne cume jari percaye léq Almasih, laguq jari menderite éndah bagi Almasih. Mangkin side pade milu éndah kance tiang dalem perjuangan saq pade maraq saq laéq side serioq léq tiang, dait saq mangkin side dengah mengenai tiang. Jari, lantaran léq dalem Almasih araq naséhat, araq penghiburan kasih, araq persahabatan léq dalem Roh Suci, araq rase saling kasihin dait belas kasihan, sempurneang sukecite tiang siq hal-hal niki: Side pade harus sopoq angen dait sopoq pikiran, léq dalem sopoq kasih, sopoq jiwe, sopoq tujuan. Ndaq ngelaksaneang napi juaq lantaran jari kepentingan mésaq, atao jari nyombongang diriq. Sebalikne, side pade sopoq-sopoq harus rendah até anggep dengan lain solahan tebanding diriqde mésaq. Sebilang dengan ndaq cume merhatiang kepentinganne mésaq, laguq kepentingan dengan lain éndah. Side pade harus bedowé pikiran maraq Deside Isa Almasih: Séngaq timaq Ie bedowé sipat ilahi, laguq Ie nénten nganggep bahwe keadaan-Ne saq ilahi nike harus tepertahenang. Sebalikne, Ie lepas selapuqne terus jari pade maraq sopoq hambe. Ie jari pade maraq manusie. Dait léq dalem keadaan sebagé manusie, Ie ngerendahang diriq-Ne dait taat jangke ninggal -- malahan jangke ninggal léq kayuq salib. Keranaq nike Ie tetinggiang gati siq Allah dait Ie teicanin peséngan saq atasan léman selapuq peséngan. Adéq léq dalem peséngan Deside Isa Almasih, selapuq mahluk saq léq sorge, dait saq léq gumi, dait saq léq bawaq gumi, gen sujut léq arepan-Ne. Dait selapuq biwih gen ngaku, “Deside Isa Almasih nike Junjungan Saq Mulie,” bagi kemuliean Allah, Bapante. Semeton senamian saq tiang kasihin, side pade tetep taat, keranaq nike jari dengan saq sampun teselametang, side pade harus ngamalang hal-hal saq kenaq, siq rase hormat dait patuh léq Allah, ndéqne cume maraq sewaktu tiang araq léq tengaq-tengaq side pade, laguq lebihan malik mangkin, sewaktu tiang jaoq léman side pade, séngaq Allah mésaq saq bekarye léq dalem diriqde jari miaq side pade réde dait sanggup ngelaksaneang menurut maksut Allah saq solah. Laksaneang napi juaq siq care ndaq ngerumun dait betungkasan. Adéq side pade ndéq araq cacat cele dait murni, sebagé bije-bije dowén Allah saq idup tulus dait kenaq léq tengaq-tengaq dengan-dengan jahat dait bedose, sehingge léq antare ie pade, side pade becahaye maraq bintang-bintang léq dalem dunie. Léq waktu nike éndah, side pade harus nyatayang tipaq ie pade Manik Allah saq ngicanin idup. Adéq siq care nike, tiang bau jari bangge sewaktu éraq Deside Isa Almasih rauh malik, séngaq ternyate tiang ndéq sie-sie lelah berusahe. Laguq timaq daraq tiang harus tetumpahang éndah jari kurban bagi Allah dait pengabdian demi imande, tiang cemoh dait tiang besukecite kance side pade selapuq. Maraq nike éndah side pade harus merase seneng dait milu gembire bareng tiang. Léq dalem Junjungan Saq Mulie Deside Isa Almasih, tiang beharep bau aruan ngutus Timotius tipaq side, adéq atén tiang jari tenang séngaq tiang nenaoq hal mengenai side. Séngaq dengan saq araq kance tiang, ndéq araq sopoq dengan juaq saq sopoq angen dait sopoq pikiran maraq tiang kance ie dait saq tetu-tetu merhatiang kepentingan side. Séngaq selapuq saq lainne cume ngurus kepentingan diriqne mésaq doang, ndéqne kepentingan Deside Isa Almasih. Side nenaoq bahwe kesetieanne sampun teuji. Ie sampun begawéan bareng kance tiang jari nyampéang Kabar Solah léman Allah. Tiang pade kance due maraq anak kance amaq. Keranaq nike jelap sesampun tiang nenaoq berembé jarine pelekare tiang laun, tiang gen ngutus ie ojok side. Laguq tiang percaye léq dalem Tuhan, bahwe tiang mésaq ndéqne pire ngonéq malik gen dateng éndah jangoq side pade. Mengenai semetonte Epaproditus, saq side pade utus jari nulung tiang, tiang anggep perlu suruq ie tulak ojok side. Ie sampun bareng kance tiang léq dalem pegawéan dait perjuangan tiang. Séngaq ie sampun kangen gati léq side selapuqne, dait ie ndéq tenang séngaq side pade sampun mauq berite bahwe ie sakit. Mule tetu ie sakit jangke gen ninggal. Laguq Allah periak léq ie; dait ndéqne cume ie doang, laguq tiang éndah, adéq tiang ndaq jari sayan sedih malik. Keranaq nike sayan beléq éndah angen tiang gen suruq ie tulak ojok side, adéq side pade seneng malik lamun side pade bedait kance ie, dait kuatir tiang jari sayan kurang. Jari, terimaq ie siq sukecite léq dalem Tuhan. Hormatin selapuq dengan saq maraq ie. Séngaq ie jangke gen ninggal demi pengabdianne tipaq Almasih dait nyawene tetaroqang jari genepang napi saq kurang léq dalem usahe side pade nulung tiang. Ahirne, semeton-semeton tiang, side pade harus besukecite léq dalem Tuhan. Tiang ndéq merase berat jari nulis malik napi saq sampun tiang tulis tipaq side sendéqmanne; séngaq hal nike solah jari keselametande. Onyaq-onyaq léq dengan-dengan saq gawéq hal-hal saq jahat, dengan-dengan saq pantes tesebut acong. Ie pade paksaq adéq dengan-dengan tesunat. Séngaq ite niki dengan-dengan saq sampun nerimaq sunat saq sejati, saq beribadah siq Roh Allah, dait jari bangge léq dalem Deside Isa Almasih dait ndéq percaye léq hal-hal saq lahiriah. Setetune tiang bau doang beharep sepenoq angen léq hal-hal saq lahiriah nike. Séngaq lamun araq dengan saq merase ie bedowé alasan jari beharep sepenoq angen léq hal-hal saq lahiriah, tiang lebihan malik. Tiang tesunat sewaktu beumur baluq jelo. Tiang tebijeang jari dengan Israel, léman suku bangse Benyamin; tiang dengan Ibrani tulén. Dalem hal ketaatan léq Hukum-hukum Taurat, tiang niki anggote golongan Parisi. Malahan tiang semanget gati sehingge tiang nganiaye jemaah. Lamun tenilai menurut Hukum Taurat, tiang dengan saq solah saq ndéq bedowé cacat cele. Laguq lantaran Almasih, make selapuqne saq laéq tiang anggep untung, mangkin selapuqne nike tiang anggep rugi. Ndéqne hal-hal nike doang; laguq malahan selapuq hal tiang anggep hal-hal saq ngerugiang doang. Saq tiang épéang mangkin niki lebih mulie: Kenal kance Deside Isa Almasih, Junjungan tiang Saq Mulie. Lantaran Almasih, make tiang sampun lepas selapuqne. Tiang anggep selapuqne nike maraq dedoro doang, adéq tiang mauq Almasih, dait araq léq dalem Ie ndéqne siq kebenaran tiang mésaq lantaran taat léq Hukum Taurat, laguq siq kebenaran lantaran percaye léq Almasih, nike kebenaran saq teicanin siq Allah, siq dasar percaye léq Deside Isa Almasih. Sopoq-sopoqne saq tiang melétang nike adéq tiang kenal kance Almasih dait ngalamin kuase saq ngidupang Ie léman ninggal. Tiang melét milu menderite bareng kance Ie dait jari pade maraq Ie dalem hal ninggal-Ne. Adéq léq penutuqne tiang mésaq gen teidupang malik léman tengaq-tengaq dengan ninggal. Tiang ndéq paran bahwe tiang sampun berhasil atao sampun jari sempurne, laguq tiang tetep berusahe, sang tiang iniq mauq, séngaq tiang éndah sampun tebau siq Deside Isa Almasih. Semeton senamian, tiang ndéq merase bahwe tiang sampun berhasil ngerebut hadiah nike. Laguq araq sopoq hal saq tiang laksaneang, tiang ngelupaqang napi saq araq léq mudin tiang, dait berusahe keras adéq tiang mauq napi saq araq léq julun tiang. Dait pelai terus tipaq tujuan adéq mauq hadiah, dait tiang temanikang siq Allah léman sorge langan Deside Isa jari mauq hadiah nike. Ite selapuq saq sampun déwase secare rohani, harus bedowé pikiran maraq nike. Laguq lamun léq antare side araq saq lain pendapetne, make Allah gen jelasang éndah hal nike léq side. Laguq ite harus idup menurut napi saq sampun ite turut jangke mangkin niki. Semeton senamian! Silaq turut teladan tiang. Pade perhatiang selapuq dengan saq idup menurut teladan saq sampun tiang pade béng léq side. Séngaq tiang sampun rimpes gati badaq side, dait mangkin tiang ulang malik sambil tiang nangis, bahwe araq luwéq dengan saq idup jari musuh salib Almasih. Idup dengan-dengan maraq nike gen tutuq léq keancuran, séngaq Tuhan ie pade, tianne mésaq. Hal-hal saq merilaq, malahan nike saq ie pade banggeang; séngaq ie pade cume mikirang hal-hal saq araq léq dunie niki doang. Laguq ite niki warge sorge, dait léman derike éndah ite ngantos, Junjungan Saq Mulie Deside Isa Almasih sebagé Juruselamet. Awakte saq lemah niki gen terobah siq Almasih jari maraq rage-Ne mésaq saq mulie. Ie bau ngelaksaneang nike lantaran Ie bedowé kuase jari ngalahang selapuq-lapuqne. Keranaq nike, semeton-semeton tiang saq tiang kasihin dait saq tiang kangen, saq jari sukecite dait mahkote tiang, side pade harus tetep teguq léq dalem Tuhan! Tiang tunas tipaq Euodia dait Sintike adéq ie pade sopoq angen dait sopoq pikiran léq dalem Tuhan. Tipaq batur tiang saq setie, tiang tunas adéq side tulung semeton-semeton nike. Deduaqne sampun lelah begawéan bareng kance tiang jari beriteang Kabar Solah léman Allah; pade maraq Klémen dait selapuq dengan lainne saq begawéan bareng kance tiang. Aran-aran ie pade araq tetulis léq dalem Kitab Kehidupan. Semoge side pade tetep besukecite léq dalem Tuhan. Karing sekali tiang ucapang: Pade besukecite! Kelakuande saq solah harus teserioq siq selapuq dengan: Séngaq ndéqne ngonéq malik Tuhan gen rauh. Ndaq side pade kuatir léq napi juaq. Laguq nyatayang tipaq Allah selapuq hal saq side melétang dalem do'e dait petunasan siq ucapan syukur. Damé sejahtere léman Allah saq ndéqne tepahamin siq pikiran manusie, gen meliharaq até dait pikirande léq dalem Deside Isa Almasih. Ahirne, semeton senamian, pikirang selapuq saq kenaq, selapuq saq mulie, selapuq saq adil, selapuq saq suci, selapuq saq solah, selapuq saq maiq tedengah, selapuq saq tesebut kebajikan dait patut tepuji, pikirang selapuqne nike. Laksaneang napi saq side pade perajahin, terimaq, dengah dait serioq léman tiang. Allah sumber damé sejahtere, gen araq bareng kance side pade. Tiang sanget besukecite léq dalem Tuhan, séngaq sesampun bégaq ngonéq, baruq mangkin niki pikiran dait perasaan side pade araq malik tipaq tiang. Perhatian side mule tetep araq, laguq side pade ndéq araq kesempatan. Hal niki tiang sampéang ndéqne lantaran tiang kekurangan, séngaq tiang sampun berajah cukupang diriq tiang siq napi saq araq. Tiang sampun ngalamin idup kekurangan, dait éndah idup saq belebihan. Tiang sampun nenaoq rahasiene ngadepin keadaan napi juaq; timaq nike keadaan makmur atao keadaan miskin, keadaan méwah atao saq kekurangan. Segale macem keadaan bau tiang hadepin siq kekuatan saq teicanin siq Almasih tipaq tiang. Laguq napi saq side pade laksaneang nike mule solah, bahwe side pade sampun nulung tiang léq waktu tiang susah. Side pade dengan Pilipi! Side mésaq nenaoq bahwe laéq sewaktu tiang bilin Makedonia, sewaktu Kabar Solah nike tiang beriteang penembéqne, side pade sopoq-sopoqne jemaah saq nulung tiang; side pade sopoq-sopoqne saq milu merase untung dait rugi idup bareng tiang. Sewaktu tiang léq Tesalonika dait merluang bantuan, lebih léman sekali side pade sampun ngirim bantuan tipaq tiang. Nike ndéqne berarti tiang cume mélé nerimaq bantuan. Saq tiang melétang adéq tiang mauq serioq hasil-hasil saq ngeromboq keuntungande. Tiang sampun nerimaq selapuqne -- malahan jangke limpah! Selapuq bantuan saq side pade kirim tipaq tiang, sampun tiang terimaq léman Epaproditus. Bantuan-bantuan léman side pade nike maraq sopoq persembahan saq sengéh, sopoq kurban saq nyenengang Allah dait teterimaq siq Allah. Allah tiang gen cukupang selapuq keperluande menurut kesugihan dait kemuliean-Ne léq dalem Deside Isa Almasih. Temulieang Allah Bapante selaéq-laéqne! Amin. Sampéang salam tiang tipaq selapuq dengan saq tehususang bagi Allah léq dalem Deside Isa Almasih. Dait terimaq éndah salam léman semeton-semeton saq araq bareng kance tiang léq deriki. Selapuq dengan saq tehususang bagi Allah léq kote niki, terutame ie pade saq araq léq istane Kaisar, ngirim salam tipaq side pade. Rahmat léman Junjungan Saq Mulie Deside Isa Almasih araq bareng roh side. Keranaq pengharepan, saq tesedieang umaq side pade léq sorge. Mengenai pengharepan nike sampun juluan side pade dengah léq dalem manik kebenaran, nike Kabar Solah léman Allah. Kabar Solah léman Allah nike nyebar léq seantéro dunie dait terus-menerus datengang berkah, pade maraq saq sampun telaksane léq antare side pade mulai léman side pade dengah dait ngerti mengenai rahmat Allah saq setetune. Hal nike tesampéang tipaq side siq Epapras, batur saq tiang pade kasihin. Epapras nike pelayan Almasih saq setie begawéan jari kepentingante. Léman ie tiang pade dengah mengenai kasih side pade saq asalne léman Roh Allah. Keranaq nike tiang pade tetep bedo'e adéq side pade nerimaq selapuq hikmat dait pengertian saq kenaq, sehingge side pade nenaoq pekayunan Allah secare sempurne. Siq care nike side pade bau idup menurut pekayunan Allah, dait tetep nyenengang Allah, sehingge léq dalem selapuq hal, side pade bau ngasilang hal-hal saq solah. Dait penenaoq side pade mengenai Allah éndah gen sayan beromboq. Semoge siq kuase léman Allah saq mulie, side pade teteguqang sehingge side pade sanggup menderite léq selapuq hal secare tekun dait sabar dait besyukur léq Bapa. Séngaq Bapa nike saq miaq side pade patut nerimaq napi saq tesedieang siq Allah umaq dengan-dengan saq tehususang bagi Allah léq dalem Kerajaan Terang. Ie sampun bébasang ite léman penguase saq nguasein peteng dait ngalihang ite ojok dalem Kerajaan Bije-Ne saq Ie kasihin. Siq Bije-Ne nike ite tetebus; artine dose-dosente sampun teampunin. Almasih nike gambar Allah saq nénten penggitan, saq sengake, lebih utame léman selapuq saq tecipteang. Séngaq langan Ie Allah cipteang selapuq hal saq araq léq sorge dait saq araq léq gumi, selapuq hal saq penggitan dait saq ndéq penggitan, lantong selapuq roh saq bekuase dait saq mréntah. Selapuq hal tecipteang siq Almasih dait lantaran Almasih. Sendéqman selapuqne araq, Almasih sampun juluan araq. Dait lantaran Ie éndah make selapuqne araq léq taoqne mésaq-mésaq. Jemaah nike ibarat ragene, dait Almasih jari sirahne. Ie saq sengake, saq teidupang selaéq-laéqne léq antare dengan ninggal, sehingge Ie jari saq paling utame léman selapuqne. Allah mésaq saq kayun adéq selapuq keilahian Allah saq sempurne, araq éndah secare lengkap léq dalem diriq Bije saq asalne léman Ie. Dait langan Bije nike éndah Allah mutusang jari miaq selapuqne jari solah malik kance Ie -- selapuq saq araq léq gumi dait saq araq léq sorge. Hal nike telaksaneang siq Allah langan Bije-Ne ninggal léq kayuq salib. Laéq idup side pade jaoq léman Allah dait ngemusuhin Allah léq dalem até dait pikiran maraq saq nyate léman perbuatan side pade saq jahat. Laguq mangkin, siq ninggal Bije-Ne, Allah jariang hubungan side pade kance Ie jari solah malik. Siq care nike side pade bau tejauq ojok arepan Allah dalem keadaan suci, murni dait ndéq bedowé cacat cele. Laguq side pade harus tetep setie percaye dait teguq léq keyakinande nike. Ndaq jangke side pade ngelepas harepan saq sampun teicanin tipaq side pade sewaktu side pade nerimaq Kabar Solah léman Allah. Kabar nike sampun teberiteang tipaq sebilang dengan léq seantéro dunie. Dait lantaran hal nike juaq tiang, Paulus sampun jari pelayan. Mangkin tiang seneng menderite jari kepentingande. Séngaq siq penderitean lahiriah tiang, tiang genepang napi saq harus tederite siq Almasih bagi jemaah-Ne, nike rage-Ne. Tiang temanikang siq Allah jari pelayan jemaah-Ne demi kepentingande, adéq tiang nyampéang Manik Allah selapuqne tipaq side; nike rahasie saq sampun berabad-abad ngonéqne terahasieang siq Allah léq selapuq dengan, laguq mangkin tenyatayang siq Allah tipaq umat-Ne. Tipaq umat-Ne nike Allah kayun nyatayang berembé bagusne dait agungne rahasie nike umaq selapuq bangse. Rahasie nike: Almasih araq léq dalem diriqde. Nike artine bahwe side pade bedowé pengharepan jari mauq kemuliean. Almasih nike saq tiang pade beriteang tipaq selapuq dengan. Tiang pade béng naséhat dait ngajah ie pade selapuq siq kebijaksanean. Tujuan tiang pade adéq sebilang dengan bau tejauq tipaq Allah jari dengan-dengan saq sampun déwase léq dalem Almasih. Adéqne bau telaksane hal nike, tiang pacu-pacu begawéan. Tiang berusahe siq selapuq kekuatan saq teicanin siq Allah léq tiang, dait saq bekarye léq dalem diriq tiang siq penoq kuase. Tiang melét side pade nenaoq berembé beratne tiang bejuang umaq side dait umaq ie pade saq léq Laodikia dait jari selapuq saq ndéqman kenal tiang secare pribadi. Selapuqne niki tiang laksaneang adéq até ie pade jari kuat dait ie pade saling kasihin sehingge ie pade jari teguq besopoq. Siq care nike ie pade jari tetu-tetu ngerti dait yakin serte paham rahasie Allah, saq temaksut nike Almasih mésaq. Léq dalem Almasih nike tesimpen selapuq harte hikmat dait penenaoq léman Allah. Tiang badaq niki adéq side pade ndaq tetipu siq sai juaq saq manis-manis ucapanne léq side. Séngaq timaq tiang bejaoqan kance side pade, anggep bahwe tiang araq léq antare side pade. Dait tiang seneng serioq side pade idup tertib dait teguq beriman tipaq Almasih. Semeton senamian sampun nerimaq Deside Isa Almasih sebagé Tuhan. Keranaq nike side pade harus tetep idup léq dalem Ie, imande maraq akah lolo kayuq saq kuat dait tepenganjeng léq atas-Ne, side pade harus tetep teguq léq dalem iman side pade, maraq saq sampun teajahang léq side. Dait aténde harus belimpah-limpah siq rase syukur. Side pade harus onyaq-onyaq ndaq jangke araq saq pengaruhin siq pengajahan-pengajahan saq palsu dait ndéq araq manpaatne. Pengajahan-pengajahan nike asalne léman adat istiadat dait roh-roh dunie, ndéqne berasal léman Almasih. Séngaq léq dalem Almasih meneng selapuq kepribadian Allah secare sempurne. Side pade éndah sampun tejariang sempurne léq dalem Almasih. Almasih nike kepale selapuq pemréntah dait penguase. Séngaq léq dalem Almasih, side pade sampun tesunat, ndéqne siq sunat saq tepiaq siq manusie, laguq siq sunat saq tepiaq siq Almasih, saq bébasang side pade léman kuase tabiat saq bedose. Séngaq sewaktu side pade tebaptis, side pade tekubur bareng-bareng kance Almasih; dait siq baptisan nike éndah, side pade milu teidupang malik bareng-bareng kance Almasih, séngaq side pade percaye léq kuase Allah saq sampun ngidupang Almasih léman ninggal. Laéq, side pade sampun maté secare rohani lantaran dose-dosende dait lantaran side pade ndéq tesunat secare lahiriah. Laguq mangkin Allah ngidupang side pade bareng-bareng kance Almasih. Allah sampun ngampunin selapuq dosente, dait surat hukumante, saq ngancem kadu sarat-sarat saq berat nike tebatalang siq Almasih. Siq care surat nike tepakuq léq kayuq salib, Allah ngapus selapuq tuduhan tipaq ite. Léq salib nike Almasih miaq selapuq roh-roh saq mréntah dait bekuase jari ndéq bedowé kekuatan malik. Ie pade tejariang pantoan dengan luwéq sewaktu Almasih gadingang ie pade jari tawanan dalem arak-arakan kemenangan. Keranaq nike ndaq ngalurang dengan ngukum side pade mengenai keloran atao ineman, atao mengenai hari-hari raye agame, atao perayaan-perayaan bulan baru, atao mengenai jelo Sabat. Selapuqne nike cume bayangan léman hal-hal saq gen dateng, laguq kenyataan léman hal-hal nike setetune Almasih! Ndaq side pade ngalurang diriqde terugiang siq dengan saq puraq-puraq ngerendahang diriqne dait nyembah malaékat-malaékat. Dengan nike sombong siq pikiran-pikiranne saq duniawi dait bangge-banggeang penyerioqan-penyerioqanne. Ie pade ndéq teguq betegelan léq Ulu, saq ngicanin keloran tipaq selapuq awak dait saq ngubungang selapuq awak nike jari sopoq awak langan sendi-sendi dait uwat-uwatne. Langan Ulu nike éndah selapuq awak sayan beléq menurut pekayunan Allah. Lamun side pade sampun ninggal bareng kance Almasih, dait sampun tebébasang léman roh-roh dunie, kembéq side pade idup maraq dengan saq masih tekuasein siq dunie niki? Kembéq side pade taat léq aturan-aturan maraq niki, “Ndaq tegel niki”, “Ndaq rasaq nike”, “Ndaq kintur niki?” Selapuq aturan nike sesampunne tekadu ndéq araq manpaatne malik. Nike cume aturan-aturan dait pengajahan-pengajahan saq tepiaq siq manusie. Aturan-aturan niki, timaq ruene penoq hikmat siq ibadah saq tepiaq mésaq, misalne ngerendahang diriq, nyiksaq diriq, laguq selapuqne nike ndéq araq manpaatne kecuali jari muasang napsu manusie. Side pade sampun teidupang malik bareng kance Almasih. Keranaq nike side pade harus berusahe jari mauq hal-hal saq léq sorge, léq taoq Almasih mréntah ngiring Allah. Pikirang hal-hal saq araq léq derike, ndaq tipaq hal-hal saq léq dunie. Séngaq side pade sampun ninggal, dait idupde teilipang bareng kance Almasih léq dalem Allah. Nah, sumber idupde saq sejati nike Almasih, dait lamun Ie penggitan éraq side pade gen araq éndah bareng kance Ie léq dalem kemuliean-Ne! Keranaq nike, matéq keméléq-keméléq dunie saq ngerongrong diriqde, misalne: bezinah, hal-hal saq ndéq pantes, hawe napsu, keméléq saq jahat, dait serakah (séngaq serakah nike pade maraq nyembah berhale). Hal-hal maraq nike saq datengang murke Allah tipaq dengan-dengan saq durhake. Laéq side mésaq turut keméléq-keméléq nike, sewaktu side pade masih tekuasein siq keméléq-keméléq nike. Laguq mangkin side pade harus tetéh hal-hal saq jahat nike léman diriqde: ndaq malik sili, atao ngamuk atao bedowé perasaan saq lengé tipaq dengan lain. Ndaq gati sugul léman biwihde ucapan-ucapan saq lengé atao ucapan saq kotor. Ndaq berugung sopoq kance saq lainne, séngaq idup saq laéq dait selapuq tabiatne sampun side pade tetéh. Mangkin side pade sampun teicanin idup saq baru. Side pade jari manusie baru, saq kenyeke tejariang baru terus-menerus siq penciptene, nike Allah, menurut gambar Allah. Maksutne adéq side pade kenal kance Allah secare sempurne. Dalem hal niki, ndéq araq malik bédene antare dengan Yunani dait dengan Yahudi, dengan besunat dait ndéq besunat, dengan Barbar dait dengan Skit, hambe dait dengan merdéke. Laguq sebalikne, Almasih nike selapuq-lapuqne dait léq dalem selapuq-lapuqne. Side pade jari dengan-dengan saq tehususang bagi Allah. Allah ngasihin side pade dait tepiléq jari dowé-Ne saq husus. Keranaq nike side pade harus nyatayang belas kasihan, side pade harus murah até, rendah até, lemah lembut dait sabar. Side pade harus sabar sopoq kance saq lainne, dait saling ngampunin lamun araq saq dendem tipaq saq lain. Pade maraq Tuhan sampun ngampunin side pade, jari side pade éndah harus mélé saling ngampunin sopoq kance saq lain. Dait léq atas selapuqne nike: Side pade harus kadu kasih, jari pengiket saq pesopoq dait nyempurneang. Damé sejahtere Almasih harus mréntah léq dalem aténde, séngaq jari hal nike side pade sampun temanikang jari sopoq awak. Dait pade besyukur. Manik Almasih harus araq secare belimpah-limpah léq antare side, sehingge side siq selapuq hikmat ngajah dait ngebéng peringetan tipaq sopoq dengan dait saq lain sambil nyanyiang zabur, dait puji-pujian serte nyanyian rohani, side ngucap syukur tipaq Allah léq dalem aténde. Napi juaq saq side pade laksaneang atao ucapang, hal nike harus telaksaneang dait teucapang siq peséngan Junjungan Saq Mulie Deside Isa Almasih, sambil ngucap syukur tipaq Allah Bapa léq napi saq telaksaneang siq Deside Isa umaq side. Semeton senamian saq jari senine! Pade tunduk léq semamende, séngaq maraq nike seharusne kelakuande sebagé dengan saq idup léq dalem Tuhan. Semeton senamian saq jari semame! Pade kasihin seninende. Ndaq sakitin angen seninende. Kanak-kanak! Pade taat léq dengan toaqde dalem selapuq hal, séngaq perbuatan saq maraq nike saq nyenengang Allah. Semeton senamian saq jari bapaq! Ndaq sakitin angen bije-bijende adéq ie pade ndéq jari putus ase. Semeton senamian saq jari hambe! Pade taat léq majikande saq araq léq dunie niki dalem selapuq hal. Ketaatande nike ndaq cume léq waktu ie araq léq julunde adéq side teajum, laguq adéqde taat léq ie siq angen saq ihlas, séngaq side pade hormatin Tuhan. Napi juaq saq side piaq, piaq nike siq segenep aténde maraq tipaq Tuhan, dait ndéqne tipaq manusie. Pade inget bahwe side pade gen nerimaq upaq léman Tuhan. Napi saq tesedieang siq Tuhan umaq umat-Ne, nike saq gen teicanin tipaq side. Séngaq majikan saq setetune side pade kenyeke layanin nike, Almasih mésaq. Dait sai juaq saq piaq kesalaqan, gen tanggung kesalaqan-kesalaqan nike; séngaq Tuhan nénten béde-bédeang dengan. Semeton senamian saq jari majikan! Side pade harus perlakuang hambe-hambende secare kenaq dait adil. Pade inget bahwe side pade éndah bedowé sopoq majikan léq sorge. Side pade harus tekun bedo'e dait tetep waspade dait besyukur léq Allah. Do'eang éndah tiang pade adéq Allah ngicanin tiang pade kesempatan saq bagus jari nyampéang berite mengenai rahasie Almasih. Lantaran hal nike make mangkin niki tiang araq léq dalem bui. Bedo'e adéq tiang bau jelasang rahasie nike sejelas-jelasne maraq berembé seharusne. Léq dalem hubungan side pade kance dengan-dengan saq ndéq percaye, side pade harus idup bijaksane dait solah-solah kadu sebilang kesempatan. Adéq hal-hal saq side pade ucapang miaq dengan jari seneng. Side pade harus nenaoq berembé seharusne side pade bejawab napi saq teketuanang siq dengan. Tikikus, semetonte saq ite kasihin, gen badaq side pade selapuqne mengenai tiang. Ie setie begawéan bagi Tuhan bareng kance tiang pade. Tiang ngutus ie tipaq side siq maksut adéq side pade nenaoq keadaan tiang pade dait side pade tehibur. Tikikus gen lumbar bareng kance Onesimus; ie éndah salaq sopoq dengan léman kalangande. Ie dengan saq setie, dait tiang pade ngasihin ie. Ie pade gen bebadaq tipaq side selapuqne saq telaksane léq taoq tiang niki. Aristarkus, saq bareng tebui kance tiang, ngirim salam tipaq side pade. Maraq nike éndah Markus, pisaqne Barnabas. (Side pade sampun tekirimang berite jari nyambut ie lamun ie dateng ojok side.) Salam éndah léman Isa saq tesebut Yustus. Cume ketelu dengan niki léman ie pade saq besunat saq jari batur tiang saq bareng-bareng begawéan umaq Kerajaan Allah; ie pade saq sampun miaq angen tiang jari tehibur. Salam léman Epapras. Ie éndah salaq sopoq dengan léman kalangande. Ie hambe Deside Isa Almasih, saq tetep tekun do'eang side pade. Sanget siqne tunas léq Allah adéq keyakinan side jari kuat dait side pade tetu-tetu déwase, adéq side pade jari sempurne dait taat léq pekayunan Allah. Tiang saksiang mésaq bahwe ie sampun lelah begawéan jari side pade dait jari dengan-dengan saq léq Laodikia dait léq Hierapolis. Tabib Lukas, saq ite kasihin, dait Demas ngirim salam tipaq side. Sampéang salam tiang pade tipaq semeton-semeton seiman léq Laodikia; dait éndah tipaq Nimpa dait tipaq jemaah saq beribadah léq baléne. Sesampun side tebaceang surat niki, usaheang éndah tebaceang léq jemaah Laodikia. Maraq nike éndah side mésaq harus bace surat saq gen tekirim léman Laodikia tipaq side. Dait badaq Arkipus, “Inget solah-solah bahwe side harus nutuqang tugas saq sampun side terimaq léman Tuhan.” Salam léman tiang, Paulus. Salam niki tiang tulis kadu ime tiang mésaq. Inget bahwe tiang masih léq dalem bui! Rahmat Allah araq bareng kance side pade. Semeton senamian jemaah léq Tesalonika, saq jari dengan-dengan saq tehususang bagi Allah Bapa dait Junjungan Saq Mulie Deside Isa Almasih! Tiang pade Paulus, Silas dait Timotius beharep semoge Allah ngicanin side pade rahmat dait damé sejahtere. Semeton senamian saq tekasihin siq Allah, tiang pade nenaoq bahwe Allah sampun miléq side pade. Séngaq tiang pade nyampéang Kabar Solah léq side ndéqne siq ucapan-ucapan doang, laguq éndah siq kuase dait siq Roh Suci. Dait tiang pade yakin gati léq kebenaran Kabar Solah nike. Side pade nenaoq berembé tiang pade begawéan sewaktu tiang pade araq léq tengaq-tengaq side pade. Side pade turut teladan tiang pade dait teladan Tuhan. Timaq side pade sanget menderite, side pade gembire nyambut manik saq tiang pade beriteang tipaq side. Sukecite nike teicanin siq Roh Suci. Siq care nike side pade jari conto léq selapuq dengan saq percaye léq Deside Isa Almasih saq araq léq Makedonia dait Akaya. Séngaq mulai léman side pade, manik Tuhan sampun nyebar jangke dateng Makedonia dait Akaya. Dait ndéqne cume nike doang; malahan berite mengenai iman side pade tipaq Allah sampun nyebar éndah ojok mbé-mbé, sehingge tiang pade ndéq perlu malik ngeraos napi-napi. Selapuq dengan nike ngeraos mengenai berembé side pade nerimaq tiang pade sewaktu laéq tiang pade dateng ojok side. Ie pade ngeraos mengenai berembé side pade bilin berhale-berhale dait dateng tipaq Allah saq idup dait kenaq jari ngabdi léq Ie. Ie pade ngeraos éndah mengenai berembé side pade ngantih kerauhan Bije-Ne léman sorge, Deside Isa, saq sampun teidupang siq Allah léman ninggal. Deside Isa nike éndah saq nyelametang ite léman murke Allah saq gen dateng. Semeton senamian! Side mésaq nenaoq bahwe kedatengan tiang pade ojok taoqde ndéqne sie-sie. Side pade nenaoq bahwe sendéqman tiang pade dateng ojok side léq Tesalonika, tiang pade sampun teaniaye dait tehine léq Pilipi. Laguq siq pertulungan Allah, tiang pade jari bani beriteang tipaq side pade Kabar Solah saq asalne léman Allah léq dalem perjuangan saq berat. Séngaq naséhat tiang pade ndéqne berasal léman kesesatan; dait ndéqne éndah siq maksut saq ndéq murni atao jari nipu. Tetu-tetu ndéqne maraq nike! Tiang pade ndéq ngeraos jari nyenengang angen dengan, laguq jari nyenengang Allah, saq nguji atén tiang pade. Séngaq tiang pade teanggep patut siq Allah jari nyampéang Kabar Solah nike. Side mésaq nenaoq bahwe tiang pade ndéq uwah ngeraos saq manis-manis atao ngakalang side pade jari seboq maksut-maksut serakah. Allah jari saksine! Tiang pade ndéq éndah berusahe adéq teajum siq dengan -- timaq léman side pade atao dengan lain. Setetune sebagé rasul Almasih, tiang pade bau doang nuntut napi juaq léman side pade. Laguq tiang pade secare lemah lembut sewaktu tiang araq léq tengaq-tengaq side pade, maraq sopoq inaq saq peliharaq bije-bijene. Lantaran kasih sayang tiang pade, tiang pade réde ngebéng side ndéqne cume Kabar Solah saq léman Allah nike, laguq idup tiang pade éndah. Séngaq tiang pade tetu-tetu ngasihin side pade! Pasti side pade masih inget berembé kerasne tiang pade berusahe dait bejuang. Kenjelo kekelem tiang pade begawéan adéq tiang pade ndéq nyusahang sai juaq léman side pade sewaktu tiang pade nyebarang Kabar Solah saq léman Allah nike tipaq side. Tiang pade idup soléh, adil dait ndéq araq cacat cele tipaq side pade saq sampun percaye léq Almasih. Side pade jari saksi-saksi tiang pade, maraq nike éndah Allah. Side pade nenaoq bahwe tiang pade perlakuang side pade sopoq-sopoq maraq sopoq amaq saq perlakuang bije-bijene. Tiang pade ngebéng semanget tipaq side dait sanget siq tiang pade tunas adéq side pade idup menurut pekayunan Allah, saq sampun ngemanikang side pade tame ojok dalem kerajaan dait kemuliean-Ne. Araq malik sopoq hal lain saq miaq tiang pade tetep besyukur léq Allah. Séngaq waktu tiang pade nyampéang berite léman Allah tipaq side, side pade dengah dait nerimaq Manik Allah nike ndéqne sebagé berite léman manusie, laguq sebagé berite saq tetu-tetu léman Allah, saq kenyeke bekarye léq dalem diriqde saq percaye léq Almasih. Semeton senamian, hal saq side pade alamin sampun éndah tealamin siq jemaah-jemaah Allah léq Yudea saq jari dowén Deside Isa Almasih. Side pade ngalamin penderitean léman bangsende mésaq, pade maraq saq tealamin siq jemaah-jemaah Allah léq Yudea nike léman dengan-dengan Yahudi. Dengan-dengan nike saq nyematéq Junjungan Saq Mulie Deside Isa dait nabi-nabi, dait nganiaye tiang pade. Napi saq nyenengang Allah ndéq ie pade peduli dait selapuq manusie ie pade musuhin. Malahan ie pade berusahe ngalangin tiang pade jari beriteang Manik Allah tipaq dengan bangse-bangse lain adéq ie pade mauq keselametan. Siq care nike ie pade terus sayan ngeromboq dose-dose ie pade jangke genep jumlahne. Dait mangkin ie pade tetimpe siq murke Allah. Laguq semeton senamian, sementare waktu tiang jaoq léman side pade -- jaoq léq mate laguq rapet léq angen -- tiang pade sayan kangen kance side dait tetu-tetu berusahe jari jangoq side pade! Tiang pade beniat lumbar jangoq side pade; dait tiang sampun berusahe, laguq Belis ngalangin tiang pade. Setetune side pade harepan dait sukecite tiang pade. Séngaq éraq lamun Junjungante Saq Mulie Deside Isa rauh, dait ite parek léq arepan-Ne, make side pade saq gen jari kebanggean tiang pade. Mule side pade niki saq jari kemuliean dait sukecite tiang pade. Ahirne rase kangen tiang pade ndéqne bau tetahen malik. Keranaq nike tiang pade mutusang araqan tiang pade ndot mésaq léq Atena, terus tiang pade ngutus semetonte Timotius. Timotius nike pelayan Allah saq begawéan bareng kance tiang pade jari beriteang Kabar Solah mengenai Almasih. Tiang pade ngutus Timotius tipaq side, adéq ie neguqang até side pade dait ngebéng naséhat mengenai iman side pade. Siq care nike ndéq araq sopoq dengan juaq léman side pade saq bimbang imanne lantaran penderitean-penderiteante niki. Side mésaq nenaoq bahwe penderitean-penderitean nike sampun jari rencane Allah léq ite. Sewaktu tiang pade masih araq bareng kance side pade, sampun tiang pade badaq side bahwe ite gen menderite. Dait mule hal nike tetu-tetu sampun telaksane; side pade éndah sampun nenaoq hal nike. Keranaq nike tiang ngutus Timotius, séngaq tiang melét gati nenaoq berembé imande. Tiang kuatir Belis berhasil gode side pade sehingge selapuq usahe tiang pade jari sie-sie. Mangkin Timotius sampun tulak dait sampun nyampéang berite gembire léq tiang pade mengenai iman dait kasih side pade. Ie badaq tiang pade bahwe side pade tetep inget tiang pade léq angende. Dait side pade melét bedait kance tiang pade, pade maraq tiang pade éndah melét bedait kance side pade. Keranaq nike, semeton senamian, léq dalem selapuq kesusahan dait penderitean tiang pade, tiang pade merase tehibur siq berite mengenai side pade dait siq iman side pade, sehingge mangkin tiang pade idup malik, asal side pade tetep araq léq dalem Tuhan. Berembé beléq ucapan syukur tiang pade léq Allah siq selapuq sukecite saq tiang pade alamin léq arepan-Ne lantaran side pade. Kenjelo kekelem tiang pade pacu-pacu bedo'e, adéq tiang pade bau bedait langsung kance side pade, jari cukupang napi saq kurang léq iman side pade. Semoge Allah Bapante mésaq, dait Junjungante Saq Mulie Deside Isa ngicanin tiang pade langan jari bedait kance side pade. Semoge Tuhan ngeromboqang dait pebeléq kasih side pade sopoq kance saq lainne dait tipaq selapuq dengan, pade maraq tiang pade éndah ngasihin side. Siq care nike Tuhan gen neguqang aténde, sehingge side pade suci dait ndéq bedowé cacat cele léq arepan Allah Bapante, léq waktu Junjungan Saq Mulie Deside Isa rauh teiring siq selapuq dengan saq jari dowé-Ne. Ahirne semeton senamian, tiang pade tunas léq side pade dait ngebéng side pade naséhat léq dalem Deside Isa Almasih: Side sampun dengah léman tiang pade berembé side pade harus idup adéq nyenengang pekayunan Allah. Hal nike mule side pade sampun turut, laguq solahan sayan pacu-pacu malik side pade ngelaksaneang. Séngaq side pade sampun nenaoq petunjuk-petunjuk saq sampun tiang pade sampéang léq side siq kuase Junjungan Saq Mulie Deside Isa. Maraq niki pekayunan Allah, side pade harus jari suci, jaoqang diriqde léman perbuatan saq cabul. Sebilang dengan mame léq antare side pade harus nenaoq berembé idup kance seninene mésaq dait idup suci dait mulie. Ndaq idup turut hawe napsu, maraq saq tegawéq siq dengan saq ndéq kenal Allah. Dalem hal maraq nike, ndaq araq sopoq dengan juaq miaq kesalaqan tipaq semetonne, atao nipu ie. Laéq sampun tiang pade peringet side pade secare keras, bahwe Tuhan gen ngukum dengan-dengan saq miaq kesalaqan-kesalaqan maraq nike. Allah ngemanikang ite, ndéqne jari gawéq napi saq najis, laguq napi saq suci. Dengan saq nolaq pengajahan niki, ndéqne nolaq manusie, laguq nolaq Allah saq ngicanin Roh-Ne saq suci tipaq side. Ndéqne perlu malik tiang pade nulis tipaq side mengenai kasih léq semeton-semeton, séngaq side mésaq sampun berajah saling kasih léman Allah. Dait hal niki sampun side pade nyatayang tipaq selapuq semeton seiman léq selapuq wilayah Makedonia. Laguq, naséhat tiang pade léq semeton senamian, adéq side pade sayan pacu-pacu malik ngelaksaneang hal nike. Pade berusahe idup tenang dait ndaq turut campur urusan dengan lain. Side pade harus begawéan boyaq napkah mésaq, pade maraq pesen tiang pade laéq léq side. Lamun side pade idup maraq nike, side pade ndéq beharep léq sai-sai, dait dengan-dengan lain gen hormat léq side pade. Semeton senamian, tiang pade melét adéq side pade nenaoq saq setetune mengenai dengan-dengan saq sampun ninggal; adéq side pade ndéq bedukecite maraq dengan-dengan lain saq ndéq bedowé pengharepan. Séngaq lamun ite percaye bahwe Deside Isa sampun ninggal dait idup malik, make ite percaye éndah bahwe Allah gen ngidupang malik dengan saq sampun ninggal léq dalem Deside Isa, dait ngumpulang ie pade bareng-bareng kance Ie. Mengenai hal nike, niki manik Tuhan saq tiang pade mélé sampéang léq side: Léq waktu Junjungan Saq Mulie Deside Isa rauh, ite saq masih idup ndéq gen senjuluq dengan-dengan saq sampun ninggal. Éraq sewaktu araq tande, léq waktu datu malaékat gen bekuih siq suare saq beléq dait terompét Allah tepuniqang, make Junjungan Saq Mulie Deside Isa mésaq gen turun léman sorge, dait ie pade saq sampun ninggal léq dalem Almasih gen juluan teidupang. Sesampun nike, ite saq masih idup waktu nike gen bareng-bareng teangkat kance ie pade ojok awang-awang jari bedait kance Tuhan léq derike. Terus ite gen ndot kance Tuhan selaéq-laéqne. Keranaq nike, side pade harus saling hibur siq ucapan-ucapan niki. Semeton senamian, tiang pade ndéq perlu nulis tipaq side piran waktune saq tepat hal-hal nike gen telaksane. Séngaq side mésaq nenaoq secare jelas bahwe jelo kerauhan Tuhan nike gen dateng maraq maling léq kekelem. Lamun dengan bebase, “Selapuqne aman dait tentrem,” make waktu nike selung-selung ie pade gen tetimpe siq kebinasean, dait ndéq araq sopoq dengan juaq saq bau luput. Hal nike gen telaksane selung-selung maraq dengan nine saq kenyeke sakit gen nganak. Laguq side pade ndéqne dengan saq idup léq dalem peteng, sehingge jelo nike miaq side pade tinjot maraq tedatengin maling. Side pade selapuq bije-bije terang; side pade golongan dengan saq idup léq dalem terang léq waktu tengari. Ite ndéqne dengan saq idup léq dalem peteng, atao golongan dengan saq araq léq kelem saq peteng. Keranaq nike ndaq ite tindoq maraq dengan-dengan lain. Ite harus bejage-jage dait sadar. Léq kekelem dengan tindoq, dait léq kekelem éndah dengan jari bowos. Laguq ite niki golongan dengan-dengan saq idup léq menah kenjelo; keranaq nike ite harus sadar, kadu kelambi besi, nike kasih dait iman sebagé pelindung, dait kadu ketopong, nike pengharepan keselametan. Allah nénten nentuang ite jari tehukum, laguq jari teselametang langan Junjungante Saq Mulie Deside Isa Almasih. Ie ninggal umaq ite adéq léq waktu Ie rauh éraq -- napi ite masih idup, atao ite sampun ninggal -- ite bau idup bareng kance Ie. Keranaq nike, side pade harus tetep saling naséhatin dait saling neguqang, pade maraq saq kenyeke side pade laksaneang mangkin niki. Semeton senamian, sanget siq tiang pade tunas adéq side pade hargein dengan-dengan saq lelah begawéan léq tengaq-tengaqde; ie pade saq sampun tepiléq siq Tuhan jari mimpin dait peringet side pade. Pacu-pacu hormatin ie pade siq kasih lantaran inget napi saq ie pade laksaneang. Pade tetep idup léq dalem damé sopoq kance saq lain. Semeton senamian, tiang pade éndah ngebéng naséhat, peringet ie pade saq idup ndéq tertib; hibur dengan saq kuatir angenne; pade tulung dengan saq lemah dait sabar léq selapuq dengan. Jagaq adéq ndaq araq saq bales kejahatan siq kejahatan. Tetep berusahe jari laksaneang saq solah, sopoq kance saq lain dait tipaq selapuq dengan. Pade tetep besukecite. Dait pade tetep bedo'e. Besyukur léq dalem selapuq hal, séngaq nike saq tekayunang siq Allah léman side pade sebagé dengan saq idup léq dalem Deside Isa Almasih. Ndaq pedaqang Roh, dait ndaq ngeréméhang nubuat-nubuat. Uji selapuq hal dait tegel napi saq solah. Jaoqang diriqde léman segale macem kejahatan. Semoge Allah damé sejahtere nyuciang side selapuqne dait semoge roh, jiwe dait awakde tepeliharaq secare sempurne dait ndéq bedowé cacat cele léq waktu kerauhan Deside Isa Almasih, Junjungante Saq Mulie. Ie saq ngemanikang side nike setie, Ie éndah saq gen genepang hal nike. Semeton senamian, do'eang tiang pade! Sampéang salam tiang pade tipaq selapuq semeton siq penoq kasih. Siq kuase Tuhan, sanget siq tiang tunas adéq side baceang surat niki léq selapuq semeton saq seiman. Rahmat Deside Isa Almasih, Junjungante Saq Mulie, araq bareng kance side pade. Semeton senamian jemaah léq Tesalonika, saq jari dengan-dengan saq tehususang bagi Allah Bapante dait Junjungan Saq Mulie Deside Isa Almasih! Tiang pade, Paulus, Silas dait Timotius beharep semoge Allah Bapa dait Junjungan Saq Mulie Deside Isa Almasih ngicanin side pade rahmat dait damé sejahtere. Semeton senamian, tiang pade tetep ngucapang syukur tipaq Allah lantaran side pade. Dait mule sepatutne tiang pade piaq maraq nike, séngaq iman side pade sayan beléq dait kasih side pade sopoq kance saq lain sayan beléq éndah. Lantaran hal nike, léq arepan jemaah Allah, tiang pade bangge léq side pade lantaran iman dait ketabahan side pade léq dalem selapuq penganiayean dait penderitean saq side pade alamin. Dait léq deriki nyate berembé adilne penghakiman Allah, saq nyatayang bahwe side pade patut jari warge Kerajaan Allah, side pade saq mangkin menderite lantaran Kerajaan nike. Ie ngelaksaneang napi saq adil, dait gen datengang pembalesan tipaq dengan saq miaq side pade menderite. Dait tipaq side saq mangkin niki menderite -- maraq nike éndah léq tiang pade -- Allah gen ngicanin rase lege léq jelo Junjungan Saq Mulie Deside Isa turun léman sorge nyatayang diriq-Ne teiring siq malaékat-malaékat-Ne, dalem kuase-Ne, léq dalem api saq ngelaur-laur, jari nentuang pembalesan tipaq ie pade saq ndéq mélé kenal kance Allah dait ndéq mélé taat léq Kabar Solah mengenai Deside Isa, Junjungante Saq Mulie. Dengan-dengan nike gen nerimaq hukuman kebinasean selaéq-laéqne, tejaoqang léman hadirat Tuhan dait léman kemuliean kekuatan-Ne; selapuqne nike gen telaksane léq jelo Ie rauh éraq jari temulieang siq selapuq dengan-dengan saq percaye, lantong side pade éndah séngaq side pade percaye léq kesaksian saq tiang pade beriteang tipaq side pade. Keranaq nike tiang pade tetep do'eang side pade. Tiang pade bedo'e adéq Allah jariang idup side pade patut menurut pekayunan-Ne; jari hal nike Ie ngemanikang side pade. Dait adéq siq kuase-Ne Ie nyempurneang keméléqde jari piaq saq solah, dait nyempurneang selapuq pegawéan iman side pade. Sehingge peséngan Deside Isa, Junjungante Saq Mulie, temulieang léq dalem side dait side léq dalem Ie, menurut rahmat Allahte dait Junjungan Saq Mulie Deside Isa Almasih. Mengenai kerauhan Junjungante Saq Mulie Deside Isa Almasih, dait mengenai ite saq gen tekumpulang jari ndot bareng kance Ie, niki saq sanget siq tiang pade tunas léman side pade: Ndaq becat-becat bingung dait osah lantaran araq berite bahwe jelo Tuhan sampun rauh. Sang berite nike asalne léman roh, raos dengan, atao surat saq maraqne léman tiang pade. Ndaq alurang dengan miaq side pade jari sesat siq care napi juaq. Séngaq sendéqman Jelo nike dateng, juluan harus telaksane maraq niki: Luwéq dengan murtat, dait manusie durhake saq harus tebinaseang gen metitoqang diriqne. Siq sombongne ie gen ngelawan dait atasang diriqne léman selapuq saq tesembah atao selapuq déwe saq teanggep Allah siq manusie. Malahan ie gen tokol léq dalem Gedéng Allah, dait nyatayang diriqne sebagé Allah. Napi side ndéq inget bahwe tiang sampun kereng badaq selapuqne nike sewaktu tiang masih araq bareng kance side pade? Dait mangkin side pade nenaoq napi saq nahen ie, sehingge ie baruq gen nyatayang diriq léq waktu saq sampun tetentuang tipaq ie. Séngaq secare rahasie kedurhakean sampun mulai bekarye, laguq mangkin masih araq saq nahen. Laguq éraq lamun saq nahen ie nike sampun tesingkirang, léq waktu nike si pendurhake baruq gen nyatayang diriqne, laguq Junjungan Saq Mulie Deside Isa gen nyematéq ie siq napas-Ne dait gen ngemusnahang ie, lamun Ie rauh malik. Kedatengan si pendurhake nike pegawéan Belis, dait gen tebarengin macem-macem kuase, tande dait muqjizat saq palsu. Ie gen kadu segale macem tipu muslihat saq jahat jari nyesatang dengan-dengan saq gen binase. Ie pade gen binase séngaq ie pade ndéq nerimaq kebenaran dait ndéq ngasihin kebenaran saq bau nyelametang ie pade. Dait lantaran hal nike Allah datengang tipaq ie pade sopoq kuase saq nyesatang, sehingge ie pade percaye léq hal-hal saq duste, adéq tehukum selapuq dengan saq ndéq percaye tipaq kebenaran dait saq seneng léq kejahatan. Semeton senamian saq tekasihin siq Tuhan! Tiang pade harus tetep ngucapang syukur tipaq Allah mengenai side pade. Séngaq léman penembéqne Allah sampun piléq side pade jari teselametang langan penyucian saq telaksaneang siq Roh dait langan iman léq dalem kebenaran. Jari hal nike Allah ngemanikang side pade langan Kabar Solah saq tiang pade beriteang tipaq side pade, adéq side pade milu ngeraseang kemuliean Junjungante Saq Mulie Deside Isa Almasih. Keranaq nike, semeton senamian, side harus kuat dait kukuh dait tetep percaye léq pengajahan-pengajahan saq sampun tiang pade sampéang tipaq side, secare langsung atao kadu tulisan. Semoge Ie, Junjungante Saq Mulie Deside Isa Almasih, dait Allah, Bapante, saq léq dalem rahmat-Ne sampun ngasihin ite dait sampun ngicanin penghiburan saq kekel dait pengharepan saq solah tipaq ite, ngibur dait neguqang aténde léq dalem pegawéan dait ucapan saq solah. Ahirne semeton senamian, pade do'eang tiang pade. Pade bedo'e adéq manik Tuhan sayan teterimaq dait temulieang, pade maraq saq sampun telaksane léq antare side. Dait adéq tiang pade teselametang léman dengan-dengan saq bejat dait jahat. Séngaq ndéqne selapuq dengan mauq iman. Laguq Tuhan setie. Ie gen neguqang aténde dait ngelindungin side pade léman saq jahat. Dait tiang pade percaye léq dalem Tuhan, bahwe side pade kenyeke ngelaksaneang dait gen terus ngelaksaneang napi saq tiang pade pesen léq side. Semoge Tuhan tetep bimbing aténde tipaq kasih Allah, dait tipaq ketabahan Almasih. Semeton senamian, dalem peséngan Junjungan Saq Mulie Deside Isa Almasih, tiang pade ngebéng naséhat adéq side pade jaoqang diriqde léman selapuq semeton saq ndéq ngelaksaneang pegawéanne, dait saq ndéq turut pengajahan-pengajahan saq sampun side pade terimaq léman tiang pade. Side mésaq nenaoq bahwe side pade harus turut teladan léman tiang pade. Tiang pade ndéq lupaq begawéan sewaktu tiang pade araq léq tengaq-tengaq side pade. Tiang pade ndéq ngelor keloran dengan secare cume-cume. Sebalikne kenjelo kekelem tiang pade lelah begawéan adéq tiang pade ndéq nyusahang sai juaq léq antare side. Hal nike tiang pade laksaneang ndéqne lantaran tiang pade ndéq bedowé hak nuntut, laguq lantaran tiang pade mélé jari teladan saq bau side pade turut. Sewaktu tiang pade masih araq léq tengaq-tengaq side pade, tiang pade béng peringetan niki, “Dengan saq ndéq mélé begawéan, ndéqne kanggo bekelor.” Tiang pade sampéang hal niki séngaq tiang pade dengah bahwe araq dengan-dengan léq antare side saq idupne ndéq tertib. Ie pade ndéq ngelaksaneang napi juaq, kecuali répot léq hal-hal saq ndéq araq manpaatne. Siq kuase Junjungan Saq Mulie Deside Isa Almasih, tiang pade béng naséhat dengan-dengan nike dait ngebéng peringetan, adéq ie pade tenang begawéan dait boyaqang diriqne mésaq napkah. Laguq side pade, semeton senamian, ndaq pendaq ngelaksaneang napi saq solah. Sang laun araq dengan saq ndéq mélé nurut napi saq tiang pade sampéang léq dalem surat niki. Side pade harus waspade léq dengan saq maraq nike dait ndaq bebatur kance ie adéq ie ilaq. Laguq ndaq perlakuang ie maraq musuh; laguq béng ie naséhat maraq semetonde. Semoge Ie, Tuhan damé sejahtere, tetep ngicanin side damé sejahtere-Ne, dalem selapuq hal. Tuhan araq bareng kance side selapuq. Salam léman tiang, Paulus. Tiang mésaq saq nulis salam niki. Niki tande saq tiang toloq léq selapuq surat tiang. Rahmat Junjungante Saq Mulie Deside Isa Almasih, araq bareng kance side pade selapuq. Tiang melét adéq side tetep ndot léq Epesus maraq saq sampun tiang tegesang léq side sewaktu tiang lalo ojok Makedonia. Séngaq, léq Epesus araq pire dengan saq nyebarang pengajahan saq ndéq kenaq, dait side harus balaq ie pade. Badaq ie pade adéqne ndaq malik ngerépotang diriq siq dongéng-dongéng dait cerite-cerite asal-usul saq ndéq araq tutuqne. Selapuqne nike cume nimbulang masalah doang, dait ndéqne jauq dengan idup tertib léq dalem iman léq arepan Allah. Tujuan naséhat tiang nike adéq dengan bau ngasihin siq até saq suci, dait até nurani saq murni serte léman iman saq tulus ihlas. Araq separo dengan saq sampun ndéq idup maraq nike malik, dait sesat siq ucapan-ucapan saq ndéq araq manpaatne. Ie pade mélé jari guru Hukum Taurat, nike hukum saq tetulis léq dalem Kitab Suci Taurat, padahal ie mésaq ndéqne paham mengenai hal-hal saq ie pade ucapang atao hal-hal saq utame saq secare yakin ie pade sampéang. Ite nenaoq bahwe Hukum Taurat nike bagus, lamun tekadu maraq berembé sepatutne. Harus teinget bahwe Hukum Taurat ndéqne tepiaq jari dengan-dengan saq kenaq, laguq jari dengan-dengan durhake, dengan-dengan saq ndéq adil, dengan saq ndéq kenal Tuhan, jari dengan saq bedose, dengan-dengan saq mentingang dunie, dengan-dengan saq ndéq bedowé agame, dait jari dengan saq nyematéq amaq atao inaqne, jari selapuq tukang nyematéq, jari dengan-dengan saq cabul, saq gawéq perbuatan saq cabul kance sepade jenisne, penculik, penduste, dengan saq besumpah palsu, dait selapuq hal-hal lain saq betentangan kance pengajahan saq kenaq, saq tedasarang léman Kabar Solah saq mulie léman Allah Saq Tepuji, saq penyebaranne tepercayeang léq tiang. Tiang besyukur léq Deside Isa Almasih Junjungante Saq Mulie. Ie sampun ngicanin tiang kekuatan jari pelayan-Ne, dait saq nganggep tiang patut ngelaksaneang pelayanan nike, timaq laéq tiang pitnah dait nganiaye dait menghine Ie. Laguq Allah periak léq tiang, séngaq léq waktu nike tiang ndéqman percaye, jari tiang ndéq taoq napi saq tiang laksaneang. Dait malahan rahmat secare melimpah teicanin tipaq tiang siq iman dait kasih léq dalem Deside Isa Almasih. Setetune kenaq ucapan niki -- keranaq nike harus teterimaq dait tepercaye sepenoqne --: “Deside Isa Almasih rauh ojok dunie niki jari nyelametang dengan bedose.” Dait tiang dengan saq paling bedose. Laguq lantaran hal nike malahan Allah periak léq tiang, adéq Deside Isa Almasih bau nyatayang selapuq kesabaran-Ne tipaq tiang, dengan saq paling bedose niki. Dait niki jari sopoq conto tipaq selapuq dengan saq éraq gen percaye léq Ie dait mauq idup saq kekel. Allah, Raje selapuq jaman, patut tehormatin dait tepuji selaéq-laéqne, séngaq Ie saq kekel, saq ndéq penggitan dait saq Esa! Amin. Timotius, bije tiang! Tugas niki tiang percayeang tipaq side sesuai kance napi saq sampun tenubuatang mengenai diriqde, adéq teteguqang siq nubuat nike side bejuang léq dalem perjuangan saq solah siq iman dait até nurani saq murni. Pire dengan sampun nolaq até nuranine saq murni nike, dait lantaran nike iman ie pade jari mandek, léq antarene Himenus dait Aleksander, saq sampun tiang serahang tipaq Belis adéq ie pade berajah engkah menghine. Pertame-tame, sanget siq tiang tunas adéq petunasan, do'e serte ucapan syukur tesampéang tipaq Allah umaq selapuq dengan; umaq raje-raje dait umaq selapuq dengan saq bekuase. Tunas adéq ite bau idup tenang dait tentrem dalem selapuq kesoléhan dait kehormatan. Nike saq solah dait saq nyenengang Allah, Juruselamette. Allah kayun adéq selapuq dengan teselametang dait mauq penenaoq mengenai kebenaran. Séngaq, cume araq sopoq Allah, dait cume sopoq perantare antare Allah kance manusie, nike manusie Deside Isa Almasih. Ie sopoq manusie saq sampun nyerahang diriq-Ne jari nebus selapuq dengan: Kesaksian nike tenyatayang léq waktu saq tepat. Dait lantaran nike tiang sampun tetentuang jari dengan saq nyampéang berite dait jari rasul serte guru umaq dengan-dengan saq ndéq Yahudi léq dalem iman dait kebenaran. Napi saq tiang sampéang niki setetune kenaq, tiang ndéq beduste. Tiang mélé adéq léq sebilang taoq, dengan mame bedo'e dait nengadahang kedue imene saq suci, ndéq tebarengin rase gedek atao betungkasan. Maraq nike éndah dengan-dengan nine, harus ngerias diriqne secare sederhane dait kadu kelambi saq pantes. Ndaq ngengadu potongan bulu saq macem-macem ruene, atao periasan-periasan emas atao mutiare, atao kelambi saq mahel-mahel. Sebalikne, dengan-dengan nine harus ngerias diriqne siq perbuatan-perbuatan saq solah, pade maraq saq telaksaneang siq dengan nine saq beribadah. Dengan nine harus tedoq dait patuh sewaktu nerimaq pengajahan. Tiang ndéq ngijinang lamun dengan nine ngajah atao mréntah dengan mame; ie pade harus tedoq. Séngaq saq penembéq tecipteang nike Adam dait sesampun nike baruq Hawa. Dait ndéqne Adam saq tetipu, laguq Hawa, sehingge ngelanggar préntah Allah. Timaqne maraq nike, dengan nine gen teselametang lantaran nganak, asal ie tekun léq dalem iman, kasih dait kesucian dait idup sederhane. Mule kenaq ucapan niki, “Dengan saq melét jari pengawas jemaah, setetune ie melétang sopoq pegawéan saq solah.” Keranaq nike pengawas jemaah harus dengan saq ndéq bedowé cacat cele, semame léman sopoq senine, tao nahen diriqne, bijaksane, bedowé tate kerame; demen béng dengan nyodoq léq baléne, dait ceket ngajah dengan; ndaq dengan saq girang bowos, atao girang sili. Sebalikne, ie harus gerasaq, demen bedamé dait ndéqne tejariang panjak siq képéng. Ie harus tao ngatur keluargene secare solah, dait didik bije-bijene jari taat dait hormat léq ie. Séngaq lamun dengan ndéq tao ngurus keluargene mésaq, berembé ie bau ngurus jemaah Allah? Pengawas jemaah ndéqne kanggo dengan saq baruq betobat, séngaq laun ie jari sombong dait kene hukuman Belis. Ie harus dengan saq solah aranne léq masyarakat; séngaq lamun ndéqne maraq nike, ie gen tehine siq dengan, sehingge ie geriq ojok dalem siasat Belis. Pelayan jemaah éndah, harus dengan saq solah dait tulus; ndéq kanggo dengan saq girang bowos siq anggur atao dengan saq mentingang képéng. Ie pade harus taat léq rahasie iman saq sampun tenyatayang siq Allah, dait selapuqne nike harus telaksaneang siq angen saq tulus. Ie pade harus teuji bejulu, dait lamun ternyate ie mule ndéq bedowé cacat cele, baruq ie bau jari pelayan léq dalem jemaah. Senine ie pade harus éndah dengan saq solah, ndéqne dengan saq girang pitnah dengan. Ie pade harus tao nahen diriqne dait jujur léq dalem selapuq hal. Pelayan jemaah harus bedowé cume sopoq senine. Ie harus tao ngurus bije-bijene dait keluargene. Dengan-dengan saq solah entane jari pelayan léq dalem jemaah, gen tehormatin dait jari sayan bani ngeraos mengenai iman ie pade tipaq Almasih. Tiang beharep gen bau jangoq side léq waktu saq ndéq ngonéq malik. Timaq maraq nike, tiang tulis surat niki tipaq side, adéq lamun tiang telat dateng, side sampun nenaoq berembé ite harus idup sebagé keluarge Allah, nike jemaah Allah saq idup. Jemaah niki saq jari pilar dait dasar kebenaran. Ndéq araq sopoq dengan juaq saq tao nilas, berembé beléqne rahasie ibadahte: Ie saq sampun nyatayang diriq-Ne léq dalem wujut manusie, dait tenyatayang kenaq siq Roh Allah, dait tesaksiang siq pare malaékat. Beritene teumumang léq antare bangse-bangse saq ndéq kenal Allah, dait Ie tepercaye léq dalem dunie dait teangkat ojok dalem kemuliean. Roh Allah secare teges nyatayang bahwe léq waktu-waktu saq gen dateng, separo dengan gen murtat, terus turut roh-roh penyesat dait pengajahan-pengajahan sétan, saq tesampéang langan dengan-dengan saq girang beduste saq até nuranine sampun jari maraq batu. Ie pade ngajah dengan adéqne ndéq merariq dait ndéq ngelorang keloran saq tertentu. Padahal keloran nike tecipteang siq Allah adéqne tekelorang siq ucapan syukur siq dengan-dengan saq sampun percaye tipaq Almasih dait sampun nenaoq kebenaran. Selapuq saq tecipteang siq Allah nike solah, dait ndéq araq sopoq juaq saq harus teanggep haram lamun sampun teterimaq siq rase syukur tipaq Allah. Séngaq Manik Allah dait do'e miaq keloran nike jari halal. Lamun side ngingetang semeton-semetonte mengenai selapuqne nike, side gen jari pelayan Deside Isa Almasih saq solah. Dait side tetep tedidik léq hal-hal mengenai iman dait selapuq pengajahan saq solah saq sampun side turut sengonéq niki. Jaoqang cerite-cerite tahyul dait dongéng-dongéng leluhur. Latih diriqde jari kehidupan saq beribadah. Latihan jasmani sekediq doang manpaatne, laguq ibadah nike bemanpaat dalem selapuq hal, séngaq berisi janji, jari idup saq mangkin niki dait jari idup saq gen dateng. Hal nike kenaq dait patut teterimaq dait tepercaye sepenoqne. Keranaq nike ite bejuang dait pacu-pacu begawéan, séngaq ite beharep sepenoqne léq Allah saq idup; Ie Juruselamet selapuq dengan, terutame gati dengan-dengan saq percaye. Beriteang dait ajahang selapuqne nike. Ndaq alurang sopoq dengan juaq ngeréméhang side lantaran side masih bajang. Sebalikne, side harus jari teladan tipaq dengan-dengan percaye léq dalem ucapande, léq dalem tingkah laku side, léq dalem kasihde, léq dalem kesetieande dait léq dalem kesuciande. Jangke tiang dateng laun, side harus tekun baceang Kitab Suci dait ngebéng semanget dait ngajah ie pade. Ndaq side lupaq ngengadu paice léman Roh Allah saq teicanin tipaq side siq nubuat sewaktu pemimpin-pemimpin jemaah noloq imene léq atas ulunde. Laksaneang selapuqne nike pacu-pacu adéq kemajuande teserioq siq selapuq dengan. Perhatiang pacu-pacu diriqde dait perhatiang éndah pengajahan side. Side harus tetep setie ngelaksaneang selapuqne nike, séngaq siq care nike side gen nyelametang diriqde mésaq dait dengan-dengan saq dengahang side. Ndaq side rengas léq dengan saq toaqan léman side, laguq béng ie naséhat maraq amaqde mésaq. Peringet dengan-dengan saq kodéqan maraq semetonde mésaq, dait dengan-dengan nine saq toaq maraq inaqde mésaq. Dengan-dengan nine saq bajangan harus side perlakuang maraq adiqde mésaq, siq angen saq tulus. Pade hormatin bebalu-bebalu saq tetu-tetu idup mésaq. Laguq lamun sopoq bebalu bedowé bije atao bai, ie pade saq penembéq harus tebéng pengertian bahwe ie pade wajib merhatiang keluarge ie pade, dait bales budi dengan toaq dait papuq ie pade. Séngaq hal nike saq nyenengang Allah. Bebalu saq tetu-tetu idup mésaq, dait ndéqne bedowé sai-sai saq meliharaq ie, cume beharep léq Allah. Kenjelo kekelem ie tekun bedo'e nunas tulung léq Allah. Laguq bebalu saq demen idup beseneng-seneng, sampun maté timaq ie masih idup. Sampéang petunjuk-petunjuk niki tipaq ie pade, adéq ie pade idup ndéq bedowé cacat cele. Laguq lamun araq dengan saq ndéq meliharaq semeton jarine, lebih-lebih keluargene mésaq, dengan nike murtat; ie lengéan léman dengan saq ndéq beriman. Cume bebalu saq bedowé syarat-syarat niki saq bau tame dalem daptar bebalu-bebalu: Umurne harus ndéqne kurang léman enem dase taun, saq cume sekali merariq, terbukti jari dengan nine saq ngelaksaneang hal-hal saq solah, meliharaq bije-bijene jangke beléq secare bagus, béng dengan nyodoq léq baléne, ngelayanin dengan-dengan saq percaye, nulung dengan-dengan saq susah, dait pacu-pacu ngelaksaneang segale macem pegawéan saq solah. Ndaq tamaq ojok dalem daptar nike bebalu-bebalu saq masih bajang. Séngaq lamun napsu birahine masih kuat, ie pade mélé merariq malik, dait bilin Almasih. Make ie pade salaq séngaq nilas janji saq teicanin tipaq ie dait datengang hukuman léq diriqne mésaq. Selain nike ie pade girang mayus dait sugul tame ojok balé dengan. Dait saq lengéan malik, ie pade berajah pitnah aran dengan lain dait turut campur léq urusan dengan lain, dait ngeraosang hal-hal saq ndéq patut teraosang. Keranaq nike tiang mélé adéq bebalu-bebalu saq masih bajang merariq malik, bedowé bije, dait ngurus keluargene, adéq musuh-musuhte ndéq mauq kesempatan jari ngelengé-lengéang arante. Séngaq araq bebalu-bebalu saq sampun sesat turut Belis. Laguq lamun sopoq dengan nine saq percaye léq Almasih bedowé semeton jari saq sampun jari bebalu, ie harus nulung bebalu-bebalu nike; ndaq alurang jemaah saq nanggung ie pade. Siq care nike jemaah bau nulung bebalu-bebalu saq tetu-tetu ndéq bedowé semeton jari. Pemimpin jemaah saq ngelaksaneang tugasne secare solah, patut tebéng penghargean due kali lipet, terutame gati ie pade saq rajin hotbah dait ngajahang. Séngaq léq dalem Kitab Suci tetulis, “Sampi saq kenyeke begawéan ngicaq-icaq gandum jari nyugulang tolang gandum ndaq tetungkem biwihne”, dait maraq nike éndah, “Dengan saq begawéan berhak nerimaq upaqne”. Ndaq percaye tuduhan tipaq sopoq pemimpin jemaah, kecuali lamun tebuktiang siq due saksi atao lebih. Dengan saq gawéq dose, harus teperinget léq julun selapuq jemaah, adéq saq lain jari takut. Léq arepan Allah, Deside Isa Almasih, serte malaékat-malaékat saq Ie piléq, sanget siq tiang tunas adéq side turut petunjuk-petunjuk niki ndaq bedowé rase curige léq sai juaq, dait ndaq bepihak léq sai-sai. Ndaq side becat gati toloq imende léq atas sopoq dengan jari ngesahang pengangkatanne sebagé pelayan Tuhan. Lamun dengan lain bedose, ndaq milu terlibat léq dalem dose nike. Jagaq diriqde adéq tetep suci. Ndaq malik nginem aiq doang; laguq inem éndah anggur sekediq adéq solah idap tiande, séngaq side girang sakit-sakitan. Dose separo dengan sendéqman teadilin sampun penggitan secare jelas. Laguq dose dengan lain baruq tetaoq sesampun teadilin. Maraq nike éndah perbuatan-perbuatan solah langsung penggitan. Dait timaqne ndéq mudaq penggitan, ndéqne bau terus teseboq. Selapuq dengan saq jari hambe, harus nganggep majikan ie pade patut tehormatin sepenoqne, adéq dengan ndéq bau ngelengéang peséngan Allah dait pengajahante. Hambe-hambe saq majikanne dengan saq percaye léq Almasih, ndéqne kanggo ngeréméhang majikanne séngaq ie pade bareng-bareng percaye léq Almasih. Malahan ie pade seharusne ngelayanin majikan ie pade solahan malik, séngaq majikan saq telayanin secare solah nike pade-pade dengan percaye dait pade-pade tekasihin siq Allah. Ajahang niki dait béng naséhat mengenai selapuqne niki. Sai-sai saq ngajahang pengajahan saq lain dait ndéqne setuju kance pengajahan saq kenaq léman Junjungante Saq Mulie Deside Isa Almasih, dait kance pengajahan saq sesuai kance ibadahte, nike dengan saq sombong, dait ndéqne taoq napi-napi! Penyakitne demen bedebat dait betungkasan mengenai istilah-istilah sehingge nimbulang talon até, ndéq akor, pitnah, curige saq ndéq solah, dait béde pendapet saq ndéq araq tutuqne léq antare dengan-dengan saq ndéq waras pikiranne dait jaoq léman kebenaran. Ie pade paran bau jari sugih léman ibadah. Mule ibadah nike lamun tebarengin siq rase cukup ngebéng keuntungan saq beléq. Séngaq ndéq araq napi juaq saq ite jauq ojok dalem dunie niki, dait ndéq araq éndah saq bau ite jauq sugul! Jari, lamun araq keloran dait kelambi, nike sampun cukup. Laguq dengan-dengan saq mélé jari sugih, tegode dait tejeret siq segale macem keméléq saq bodo dait saq nyédaq. Keméléq-keméléq nike miaq dengan jari ancur dait celake. Séngaq cinte léq képéng nike sumber macem-macem kejahatan. Araq separo dengan saq sesat léman imanne dait nyiksaq diriqne siq macem-macem dukecite lantaran paléq képéng. Laguq side niki dowén Allah, jari side harus jaoqang selapuqne nike. Pade usaheang keadilan, ibadah, kesetiean, kasih, kesabaran, dait até saq lemah lembut. Pade bejuang dalem peperangan iman saq kenaq dait boyaq jangke mauq idup saq kekel. Séngaq jari hal nike Allah ngemanikang side, sewaktu side ngakuq léq julun dengan luwéq bahwe side percaye léq Almasih. Dait mangkin, léq arepan Allah saq ngicanin idup tipaq selapuqne, dait léq arepan Deside Isa Almasih saq sampun nyampéang kesaksian saq kenaq léq arepan Pontius Pilatus, tiang tunas hal niki léq side: Pade taat léq selapuq préntah nike, ndaq jangke araq cacat dait cele jangke Junjungante Saq Mulie Deside Isa Almasih nyatayang diriq-Ne. Kerauhan-Ne gen tetentuang léq waktu saq tepat siq Allah mésaq. Ie sopoq-sopoqne Penguase tunggal; Ie agung, Raje léq atas selapuq raje, dait Tuan léq atas selapuq tuan. Ie doang saq ndéq bau tekuasein siq kematéan; Ie idup léq dalem cahaye saq ndéq bau terapetin siq sai juaq. Ndéq araq sopoq manusie saq sampun serioq Ie, atao bau serioq Ie. Umaq Ie hormat dait kuase selaéq-laéqne! Amin. Tipaq dengan-dengan saq sugih léq dunie niki, side harus béng naséhat adéqne ndaq sombong dait ndaq beharep léq barang-barang saq ndéq kekel -- misalne kesugihan. Ie pade harus beharep léq Allah saq ngicanin selapuq hal tipaq ite secare belimpah-limpah adéq ite nikmatin. Peringet adéq ie pade ngelaksaneang saq solah, jari sugih dalem kebajikan, demen besedekah. Siq care nike ie pade ngumpulang harte saq bau jari dasar saq solah léq waktu saq gen dateng. Dait siq hal nike ie pade gen mauq idup saq kekel, nike idup saq sejati. Jagaq solah-solah napi saq sampun tepercayeang léq side, Timotius! Jaoqang diriqde léman raosan-raosan saq ndéq araq manpaatne dait saq ndéq suci dait raosan-raosan mengenai hal-hal saq tesebut penenaoq padahal ndéq. Séngaq araq dengan-dengan saq ngajahang penenaoq nike dait siq care nike sampun nyimpang léman iman. Rahmat Allah araq bareng kance side pade! Timotius, bije tiang saq tiang kasihin! Surat niki léman tiang, Paulus, rasul Deside Isa Almasih saq tepiléq siq Allah jari nyampéang janji mengenai idup léq dalem Deside Isa Almasih. Allah Bapa dait Deside Isa Almasih Junjungante Saq Mulie ngicanin side berkah, rahmat dait damé sejahtere. Tiang besyukur léq Allah saq tiang layanin siq angen saq tulus, maraq saq telaksaneang siq pare leluhur tiang laéq. Tiang tetep besyukur léq Allah sebilang tiang inget side léq dalem do'e, timaq kenjelo atao kekelem. Tiang inget léq kesedihan aténde. Keranaq nike tiang melét gati serioq side malik adéq tiang bau tetu-tetu jari gembire. Tiang inget léq imande saq tulus ihlas, pade maraq iman niniqde saq nine Lois dait Eunike inaqde. Dait tiang yakin bahwe iman nike éndah idup léq dalem diriqde. Keranaq nike, tiang ingetang side adéq side terus idupang paice saq teicanin siq Allah tipaq side sewaktu tiang noloq ime tiang léq atasde. Séngaq Roh saq Allah icanin tipaq ite, ndéqne Roh saq miaq ite jari penakut. Sebalikne Roh Allah nike miaq ite jari kuat, penoq siq kasih dait tao nahen diriq. Keranaq nike, ndaq ilaq besaksi mengenai Tuhante, dait ndaq éndah ilaq mengenai tiang, saq tebui lantaran Ie. Sebalikne siq kekuatan léman Allah, side milu menderite lantaran Kabar Solah nike. Allah nyelametang ite dait ngemanikang ite siq care saq suci. Ie ngelaksaneang hal nike nénten tedasarang siq napi saq sampun ite laksaneang, laguq tedasarang siq rencane-Ne mésaq dait rahmat-Ne. Allah ngicanin ite rahmat-Ne langan Deside Isa Almasih sendéqman dunie niki tecipteang. Dait mangkin, Allah nyatayang rahmat-Ne nike tipaq ite siq kerauhan Juruselamette, Deside Isa Almasih. Deside Isa ngalahang kuase kematéan dait datengang idup saq kekel langan Kabar Solah nike. Jari Kabar Solah niki tiang sampun tetentuang sebagé dengan saq beriteang kabar nike, sebagé rasul dait sebagé guru. Lantaran selapuqne nike tiang nerimaq penderitean niki, laguq tiang tetep ndéq ilaq, séngaq tiang nenaoq gati sai saq tiang percaye. Tiang yakin bahwe napi saq sampun Ie percayeang léq tiang, Ie éndah sanggup jagaq jangke Jelo Tuhan. Turut pacu-pacu pengajahan saq kenaq saq sampun tiang sampéang tipaq side. Dait side harus tetep percaye léq iman dait kasih léq dalem Deside Isa Almasih. Siq bantuan léman Roh Allah saq idup léq dalem ite, side harus jagaq napi saq solah saq sampun tepercayeang tipaq side. Side nenaoq bahwe selapuq dengan léq daérah Asia Kodéq sampun bilin tiang, lantong Pigelus dait Hermogenes. Laguq keluarge Onesiporus sampun pire kali miaq angen tiang seneng. Semoge Tuhan kayun nyatayang rahmat-Ne tipaq ie pade. Timaq tiang léq dalem bui, Onesiporus ndéqne ilaq léq keadaan tiang nike. Sewaktu tiang dateng léq Roma, ie tetep berusahe boyaq tiang jangke ie bedait kance tiang. Dait side nenaoq bahwe léq Epesus, ie luwéq gati nulung tiang. Semoge Tuhan nyatayang rahmat-Ne tipaq ie léq jelo Almasih rauh malik. Timotius, bije tiang! Side harus jari kuat siq rahmat léq dalem Deside Isa Almasih. Napi saq sampun side dengah léman tiang léq julu luwéq saksi percayeang hal nike tipaq dengan-dengan saq bau tepercaye dait éndah saq ceket ngajah dengan lain. Side harus milu menderite sebagé prajurit Deside Isa Almasih saq solah. Sopoq prajurit saq kenyeke bejuang, ndéqne gen piaq diriqne répot siq urusan-urusanne mésaq, séngaq ie mélé nyenengang komendanne. Sopoq dengan saq jari pemaén olah rage ndéqne gen jari juare léq dalem sopoq pertandingan, lamun ie ndéq taat léq aturan-aturan. Petani saq sampun lelah begawéan, ie saq paling penembéq berhak mauq hasil tetaletanne. Pikirang napi saq tiang sampéang nike, séngaq Tuhan gen ngicanin side kesanggupan jari ngerti selapuqne. Ingetang niki: Kabar Solah saq tiang beriteang, nike kabar mengenai Deside Isa Almasih, keturunan Daud; nike Almasih saq sampun idup malik léman ninggal. Lantaran tiang nyampéang Kabar Solah nike, tiang jari menderite; malahan jangke teranté maraq sopoq penjahat. Laguq Manik Allah ndéqne bau teranté. Keranaq nike tiang sabar nanggung selapuqne nike demi kepentingan dengan-dengan saq sampun tepiléq siq Allah, adéq ie pade éndah mauq keselametan saq teicanin langan Deside Isa Almasih, dait saq tebarengin siq kemuliean saq kekel. Mule kenaq ucapan niki, “Lamun ite sampun ninggal ngiring Ie, ite éndah gen idup ngiring Ie. Lamun ite tetep tekun, ite éndah gen mréntah ngiring Ie. Lamun ite nilas Ie, Ie éndah gen tilas ite. Lamun ite ndéq setie, Ie tetep setie, séngaq Ie ndéq gen bau nilas diriq-Ne mésaq.” Side harus ingetang dengan-dengan mengenai selapuqne niki. Naséhat ie pade léq arepan Allah, adéqne ndaq begejuh mengenai istilah-istilah. Nike ndéq araq manpaatne, malahan cume piaq kaco dengan-dengan saq dengah. Side harus berusahe pacu-pacu adéqne teakuq siq Allah jari dengan saq patut begawéan léq Ie. Pade berusahe adéq side ndéq ilaq léq pegawéande, laguq kenaq-kenaq entan ngajahang mengenai kebenaran. Jaoqin raosan-raosan saq ndéq araq manpaatne dait saq ndéq suci. Raosan-raosan saq maraq nike cume miaq dengan sayan jahat. Ucapan-ucapan dengan-dengan nike becat gati ngelontoq maraq penyakit kangker saq ganas. Léq antare ie pade termasuk Himenus dait Piletus. Ie pade sampun nyimpang léman kebenaran, dait miaq iman separo dengan jari kaco. Basen ie pade bahwe idup malik léman kematéan sampun telaksane. Laguq dasar kuat saq tepiaq siq Allah ndéqne bau tegerik. Léq atasne tetulis maraq niki, “Tuhan kenal kance dengan-dengan saq jari dowé-Ne”, dait, “Dengan-dengan saq nyebut peséngan Tuhan, ie harus jaoqang diriqne léman kejahatan.” Léq dalem balé saq beléq araq macem-macem perabotanne. Araq saq tepiaq léman perak atao emas, laguq araq éndah saq léman kayuq atao tanaq. Araq saq tekadu jari maksut saq mulie, dait araq éndah saq tekadu jari maksut saq kurang mulie. Dengan saq persiq diriqne léman selapuq saq jahat, dengan nike gen tekadu jari maksut saq mulie. Ie jari dowé saq husus dait bemanpaat umaq majikanne. Ie tesiepang jari tekadu umaq sebilang pegawéan saq solah. Keranaq nike, jaoqin hawe napsu dengan bajang, usaheang keadilan, kesetiean, kasih dait kedaméan bareng-bareng kance ie pade saq beharep tipaq Tuhan siq até saq suci. Ndaq milu bedebat kance dengan bodo saq ndéq nenaoq napi-napi. Side nenaoq bahwe selapuqne nike cume nimbulang pegejuhan. Dengan saq begawéan tipaq Tuhan ndéqne patut besiaq; ie harus tao bebatur kance selapuq dengan, dait bau ngajah dengan secare solah dait sabar. Ie harus secare lemah lembut ngajah dengan-dengan saq girang ngelawan; mudah-mudahan Allah ngicanin kesempatan léq dengan-dengan nike adéqne betobat léman dose-dose ie pade dait nenaoq kebenaran. Siq care nike ie pade jari sadar malik, dait lepas léman kuase Belis saq sampun jeret ie pade dait maksaq ie pade turut keméléqne. Pade inget niki: Léq jelo-jelo penutuq gen araq luwéq kesusahan. Manusie gen mentingang diriqne mésaq, ie ngutameang képéng, sombong dait beléqan raos saq ndéq araq manpaatne. Ie pade demen pitnah dengan, ngelawan dengan toaqne, ndéqne tao betampi asih, dait meriq léq agame. Ie pade ndéq bedowé kasih léq sepade manusie, ndéqne demen bedamé, ie pade girang ngelengé-lengéang aran dengan lain, demen kadu kekerasan, ie pade kejem dait ndéqne demen léq hal saq solah. Ie pade girang behianat, angkuh dait ndéqne girang bepikir bélo. Ie pade demenan léq kesenengan dunie ketimbang turut pekayunan Allah. Timaq secare lahiriah, ie pade taat ngelaksaneang ibadah, laguq ndéqne nerimaq kekuatan léman agame nike. Ndaq rapet kance dengan-dengan saq maraq nike. Araq léq antare ie pade saq sampun tame tedoq-tedoq ojok balé-balé, terus gode dengan-dengan nine saq lemah saq bedowé luwéq gati dose dait tekuasein siq macem-macem keméléq. Dengan-dengan nine nike tetep melét teajah, laguq ndéq uwah taoq mengenai kebenaran. Pade maraq Yanes dait Yambres saq laéq ngelawan Musa, maraq nike éndah dengan-dengan nike ngelawan kebenaran. Pikiran ie pade séde, dait iman ie pade ndéq tahen uji. Laguq ie pade ndéq gen sayan maju, séngaq kebodoan ie pade gen tetaoq siq selapuq dengan, maraq saq tealamin éndah siq Yanes dait Yambres. Laguq side sampun turut pengajahan-pengajahan tiang, kelakuan tiang, tujuan idup tiang, iman tiang, kesabaran tiang, kasih tiang dait ketabahan tiang. Side sampun serioq tiang teaniaye dait tiang menderite. Side nenaoq selapuq saq telaksane tipaq tiang léq Antiokia, léq Ikonium, dait léq Listra; dait side nenaoq selapuq penderitean saq tiang alamin! Laguq Tuhan nyelametang tiang léman selapuqne nike. Mule selapuq dengan saq mélé idup beribadah dait idup léq dalem Deside Isa Almasih gen teaniaye, laguq dengan-dengan saq jahat dait dengan-dengan penipu gen sayan jahat. Ie pade nyesatang dengan lain, padahal ie mésaq tepiaq sesat éndah. Laguq side, Timotius, side harus tetep idup léq dalem kebenaran saq sampun teajahang tipaq side dait saq side percaye sepenoqne, dait inget sai saq ngajah side. Harus side inget bahwe léman side masih kodéq side sampun kenal Kitab Suci saq bau ngicanin side pengertian jari mauq keselametan langan iman léq Deside Isa Almasih. Selapuq saq tetulis léq dalem Kitab Suci, teilham siq Allah dait bemanpaat jari ngajah, jari nyatayang kesalaqan, pesolah kelakuan, dait jari didik dengan léq dalem kebenaran. Sehingge sebilang dengan saq jari dowén Allah telengkapin jari ngelaksaneang sebilang pegawéan saq solah. Léq arepan Allah dait Deside Isa Almasih saq gen hakimin selapuq dengan saq idup dait saq sampun ninggal; dait demi kerauhan-Ne serte kerajaan-Ne, tiang bepesen tipaq side: Side harus nyampéang Manik Allah, timaq waktune solah atao ndéq, nyatayang napi saq salaq, peringet dait béng naséhat dait ajah secare sabar. Séngaq gen dateng waktune dengan ndéqne mélé malik nerimaq pengajahan saq kenaq. Sebalikne, ie pade gen turut keméléqne mésaq, dait ngumpulang luwéq guru adéqne ngajahang hal-hal saq solah tedengah léq kentok ie pade. Ie pade sulen kentokne jari dengah kebenaran, laguq gen dengahang cerite-cerite dongéng. Timaq maraq nike, side harus nguasein diriqde léq dalem keadaan napi juaq. Pade tabah léq dalem penderitean, laksaneang tugasde sebagé dengan saq nyampéang Kabar Solah nike dait tutuqang solah-solah kewajibande jari pelayan Allah. Mengenai diriq tiang, sampun dateng waktune tiang gen maté jari kurban tipaq Allah. Karing seberaq tiang gen bilin dunie niki. Tiang sampun seleséang pertandingan sebagus-bagusne, dait mangkin tiang sampun araq léq garis penutuq. Tiang tetep meliharaq iman. Dait mangkin tiang sampun tesedieang mahkote kebenaran saq gen teicanin tipaq tiang siq Tuhan, Hakim saq adil nike, léq jelo-Ne, nike ndéqne cume léq tiang, laguq éndah tipaq selapuq dengan saq melét gati ngantos kerauhan Tuhan. Pade berusahe becat dateng ojok tiang, séngaq Demas sampun bilin tiang lantaran ie mentingang dunie niki. Ie sampun lumbar ojok Tesalonika. Krekes sampun lumbar ojok Galatia, dait Titus ojok Dalmatia. Cume Lukas saq araq kance tiang. Tutut Markus dait ténaq ie milu bareng side, séngaq ie bau nulung tiang léq dalem pelayanan tiang. Titikus sampun tiang suruq lumbar ojok Epesus. Lamun side dateng, jauq éndah jubah saq tiang adéqang léq Troas léq balé Karpus. Jauq éndah kitab-kitab tiang, terutame selapuq gulungan saq tepiaq léman léndong. Aleksander, saq jari tukang tembage nike sampun ngelaksaneang hal-hal saq jahat gati léq tiang. Tuhan gen bales ie menurut perbuatanne. Side mésaq harus onyaq-onyaq léq ie, séngaq ie tetu-tetu nentang pengajahan saq ite jauq. Sewaktu penembéq tiang ngajuang pembélean tiang, ndéq araq sopoq dengan juaq saq dampingin tiang; selapuqne bilin tiang. Mudah-mudahan ndéqne ie pade saq nanggung hal nike! Laguq Tuhan araq bareng kance tiang. Ie ngicanin kekuatan sehingge tiang sanggup beriteang selapuq Kabar Solah nike, adéq tedengah siq selapuq dengan saq ndéq Yahudi. Dait tiang tebébasang léman biwih singe. Mule Tuhan gen bébasang tiang léman selapuq niat dengan saq jahat, dait Ie gen gadingang tiang selamet jangke tame ojok Kerajaan-Ne léq sorge. Bagi Tuhan kemuliean selaéq-laéqne! Amin. Salam tiang tipaq Priskila dait Akwila dait tipaq keluarge Onesiporus. Erastus ndot léq Korintus, dait Tropimus sampun tiang bilin sewaktu ie masih sakit léq Miletus. Pade berusahe pacu-pacu jari dateng sendéqman musim telih. Ebulus, Pudes, Linus dait Klaudia ngirim salam tipaq side; maraq nike éndah selapuq semeton saq seiman lainne. Tuhan tetep araq bareng rohde. Rahmat-Ne araq bareng kance side. Titus, bije tiang! Tiang, Paulus, nulis surat niki sebagé hambe Allah dait rasul Deside Isa Almasih. Tiang tepiléq dait teutus jari meliharaq iman dengan-dengan saq sampun tepiléq siq Allah, dait jari meliharaq penenaoq mengenai kebenaran saq nyate léq ibadahte. Pengajahan nike tedasarang léq pengharepan bahwe ite gen nerimaq idup sejati dait kekel. Allah sampun janjiqang idup nike sendéqman awal jaman -- dait Allah ndéqne mungkin beduste. Léq waktu saq sampun Ie tentuang, Allah nyatayang janji-Ne nike léq dalem manik-Ne. Manik nike sampun tepercayeang léq tiang, dait tiang nyampéang manik nike sesuai kance préntah Allah, Juruselamet ite. Titus, bije tiang saq sah léq dalem imante saq pade. Rahmat dait damé sejahtere léman Allah Bapa dait Deside Isa Almasih, Juruselamette araq bareng kance side. Tiang bilin side léq Kreta adéq side bau ngurus hal-hal saq masih perlu teatur. Dait adéq side ngangkat pemimpin-pemimpin jemaah léq sebilang kote, maraq saq sampun tiang pesen léq side: Dengan saq jari pemimpin jemaah harus dengan saq ndéq bedowé cacat cele; ie harus bedowé cume sopoq senine; bije-bijene harus idup léq dalem iman dait ndéqne tekenal jari kanak tele dait saq ndéq bau teatur. Pengawas jemaah nike dengan saq ngurus karye Allah, ie ndéqne kanggo bedowé cacat cele. Ie ndéq kanggo sombong atao becat sili, atao girang bowos, atao girang besiaq atao serakah. Laguq ie harus demen béng dengan nyodoq léq baléne, demen léq hal-hal saq solah, bijaksane, adil, soléh dait tao nahen diriq. Ie harus bedowé keyakinan saq teguq léq pengajahan saq kenaq, maraq saq sampun teajahang léq ie. Siq care nike ie sanggup ngebéng naséhat léq dengan tedasarang ajahan nike, dait ngeyakinang dengan-dengan saq nentang ie. Séngaq araq luwéq dengan saq ndéq mélé teatur, terutame léq antare ie pade saq ngelaksaneang hukum sunat. Ie pade nyesatang dengan lain siq raos saq ndéq araq manpaatne. Dengan-dengan saq maraq nike harus tetungkem biwihne, séngaq ie pade miaq kaco luwéq keluarge siq pengajahan-pengajahan saq ndéq-ndéq. Ie pade ngelaksaneang nike cume lantaran mélé boyaq keuntungan saq ndéq patut! Laéq ie pade sampun bedowé sopoq nabi, saq asalne léman Kreta éndah, bebase, “Dengan-dengan Kreta girang beduste, dait maraq binatang buas saq serakah dait mayus.” Napi saq teucapang siq nabi nike mule kenaq. Keranaq nike side harus peringet ie pade secare teges; adéq ie pade jari séhat léq dalem iman dait ndéqne malik percaye léq dongéng-dongéng Yahudi, atao aturan-aturan saq tepiaq siq dengan-dengan saq ndéq mélé nerimaq kebenaran. Selapuq-lapuqne suci umaq dengan-dengan saq suci. Laguq umaq dengan-dengan saq kotor pikiranne dait saq ndéq beriman, ndéq araq napi juaq saq suci, séngaq pikiran dait até nurani ie pade sampun kotor! Ie pade bebase bahwe ie pade kenal kance Allah, laguq siq perbuatan ie pade, ie pade nilas Ie. Ie pade bejat, durhake dait ndéqne sanggup ngelaksaneang hal-hal saq solah. Laguq side, Titus, side harus ngajahang pengajahan saq kenaq. Béng naséhat dengan-dengan mame saq lingsir, adéq ie pade tao nahen diriqne, bijaksane, idup jari dengan saq patut tehormatin, idup dalem iman, kasih dait dalem ketekunan. Maraq nike éndah dengan-dengan nine saq lingsir, ie pade harus idup jari dengan-dengan saq beribadah, ndéqne kanggo pitnah dengan lain, ndéqne kanggo ketagihan ineman keras, laguq ie pade harus tao ngajahang hal-hal saq solah, adéq siq care nike ie pade bau didik dengan-dengan nine saq masih bajang jari ngasihin semame dait bije-bijene, jari bijaksane, idup suci dait jari senine saq solah saq taat léq semamene. Siq care nike ndéq araq dengan saq bau ngewade Manik Allah. Maraq nike éndah, béng naséhat dengan-dengan bajang adéq ie pade nguasein diriqne dalem selapuq hal, dait side mésaq harus jari teladan kelakuan saq solah. Side harus jujur dait pacu-pacu ngajahang. Kadu base saq bijaksane, saq ndéq bau tecele siq dengan, adéq musuh-musuhde jari ilaq, séngaq ndéq araq hal-hal saq lengé saq bau ie pade raosang mengenai ite. Hambe-hambe harus taat léq majikanne, dait nyenengang majikanne léq dalem selapuq hal. Ie pade ndéq kanggo ngelawan, atao memaling. Ie pade harus nyatayang bahwe ie pade tetep tulus ihlas dait setie, adéq dengan gen muji pengajahan mengenai Allah, Juruselamet ite. Séngaq rahmat Allah saq nyelametang selapuq manusie sampun nyate. Rahmat Allah nike didik ite adéq ndéq malik idup betentangan kance pekayunan Allah dait ndéq turut keméléq duniawi. Ite tedidik jari idup bijaksane, adil dait beribadah léq dalem dunie niki. Mangkin niki ite ngantih pengharepan saq miaq bahagie serte berembé Allah dait Juruselamette Deside Isa Almasih nyatayang kemuliean-Ne saq Maheagung. Ie sampun ngurbanang diriq-Ne umaq ite jari bébasang ite léman selapuq kejahatan, dait nyuciang dengan-dengan saq jari dowé-Ne mésaq, dait saq rajin ngelaksaneang saq solah. Ajahang selapuqne nike, dait béng naséhat dait yakinang dengan-dengan saq dengahang side siq wibawe. Ndaq alurang sopoq dengan juaq ngeréméhang side. Pade ingetang anggote jemaahde adéq ie pade tunduk léq pemréntah dait dengan-dengan saq bekuase, dait mélé ngelaksaneang sebilang pegawéan saq solah. Badaq ie pade adéqne ndaq pitnah dengan atao betungkasan kance sai juaq, laguq adéqne gerasaq dait harus tetep lemah lembut tipaq selapuq dengan. Séngaq laéq ite mésaq éndah bodo, sesat dait ndéq taat. Ite tejariang hambe siq macem-macem napsu dait keméléq; ite idup siq niat-niat saq jahat dait talon até, dait ite saling meriq. Laguq Allah, Juruselamette nyatayang kasih dait kesolahan-Ne tipaq ite. Léq waktu nike Ie sampun nyelametang ite, ndéqne lantaran perbuatan solah saq sampun ite laksaneang, laguq lantaran rahmat-Ne. Allah nyelametang ite langan Roh-Ne saq ngicanin ite kelahiran baru dait idup baru, siq care persiq ite. Allah ngicanin ite Roh-Ne siq perantarean Deside Isa Almasih, Juruselamette, adéq ite sebagé dengan saq tejariang kenaq léq arepan Allah sehingge hubungante kance Allah jari solah malik siq rahmat-Ne, berhak nerimaq idup saq kekel menurut pengharepante. Ucapan niki tetu-tetu kenaq. Dait tiang mélé adéq side tegesang hal-hal niki, adéq dengan-dengan saq percaye léq Allah tetu-tetu berusahe ngelaksaneang pegawéan-pegawéan saq solah dait bemanpaat tipaq selapuq dengan. Jaoqang diriqde léman pegejuhan saq ndéq araq manpaatne, cerite-cerite silsilah, betungkasan dait besiaq mengenai Hukum Taurat. Selapuqne nike ndéq araq manpaatne dait sie-sie. Dengan saq jari penyebap perpecahan léq dalem jemaah, harus side peringet sekali due; sesampun nike ndaq malik bebatur kance ie. Side nenaoq bahwe dengan saq maraq nike tetu-tetu sesat dait dose-dosene ngukum diriqne mésaq. Tiang gen becat ngutus Artemas atao Titikus ojok side, pade berusahe dateng ojok tiang léq Nikopolis, séngaq tiang sampun mutusang jari ndot léq derike sengonéq musim telih. Pade berusahe pacu-pacu jari nulung Zenas, ahli Taurat nike, dait Apolos, adéq ie pade bau berangkat dait ndéqne kekurangan napi-napi. Dengan-dengante harus berajah ngelaksaneang hal-hal saq solah, adéqne bau nyukupang keperluan-keperluan saq mule tetu-tetu teperluang; ndaq jangke ie pade idup ndéq araq manpaatne. Selapuq semeton saq araq bareng tiang, ngirim salam tipaq side. Sampéang salam tiang tipaq ie pade saq ngasihin tiang pade léq dalem iman. Rahmat Tuhan araq bareng kance side pade. Pilemon, batur dait dengan saq bareng begawéan kance tiang pade! Tiang, Paulus, sopoq tahenan lantaran Deside Isa Almasih, bareng kance semetonte Timotius, nulis surat niki tipaq side, dait tipaq jemaah saq bekumpul léq balénde; dait éndah tipaq semetonte saq nine Apia, dait tipaq Arkipus, batur saq pade-pade bejuang kance ite. Rahmat dait damé sejahtere léman Allah, Bapante dait léman Junjungan Saq Mulie Deside Isa Almasih araq bareng kance side. Tiang ngucap syukur tipaq Allah tiang, sebilang tiang inget side léq dalem do'e tiang. Séngaq tiang dengah mengenai kasihde tipaq selapuq dengan suci dait mengenai imande léq Deside Isa Almasih Junjungan Saq Mulie. Tiang bedo'e semoge hubungante besemeton léq dalem iman gen ngasilang pengertian saq sayan luwéq mengenai sebilang hal saq solah léq antare ite bagi Almasih. Pilemon, lantaran kasihde, tiang mauq penghiburan dait kekuatan séngaq até dengan-dengan suci sampun side hibur. Keranaq nike, timaq léq dalem Almasih tiang bedowé kebébasan jari mréntah side napi saq harus side laksaneang, laguq lantaran kasihde nike, tiang cume tunas doang. Tiang, Paulus, saq sampun toaq dait mangkin tiang kenyeke tetahen léq dalem bui lantaran Deside Isa Almasih, ngajuang sopoq petunasan léq side mengenai bije tiang léq dalem Almasih saq sampun tiang mauq sewaktu tiang araq léq dalem bui niki, aranne Onesimus. Laéq ie ndéq araq manpaatne léq side, laguq mangkin ie bemanpaat, ndéqne cume léq side doang, laguq léq tiang éndah. Mangkin ie saq tiang kasihin nike tiang suruq tulak malik tipaq side. Setetune tiang melét suruq ie ndot kance tiang jari penggentiq side, adéq ie bau nulung tiang, sengonéq tiang araq léq dalem bui niki lantaran beriteang Kabar Solah léman Allah. Laguq tiang ndéq mélé ngelaksaneang napi-napi lamun side ndéqman setuju, adéq saq solah nike ndaq side laksaneang secare terpakse, laguq secare ihlas. Sang Onesimus bekelin léman side cume sementare waktu, adéq side bau miaq ie tulak malik selaéq-laéqne. Mangkin Onesimus nike ndéqne sekedar hambe doang, ie lebihan léman nike. Ie jari semeton saq pade-pade ite kasihin, secare manusie dait léq dalem Tuhan. Ie bemanpaat gati umaq tiang, lebih-lebih léq side! Pasti ie bemanpaat gati jari pelayan atao jari semeton léq dalem Tuhan! Lamun side anggep tiang baturde saq seiman, side harus terimaq malik Onesimus maraq side nerimaq tiang. Lamun ie salaq atao berutang léq side, alurang tiang saq nanggung selapuqne nike. Tiang, Paulus, nulis kadu ime tiang mésaq: Tiang gen lunasang selapuqne. Tiang ndéqne perlu ingetang bahwe side mésaq berutang léq tiang, nike diriqde mésaq. Semeton tiang Pilemon, semoge léq dalem Tuhan side bemanpaat umaq tiang, adéq angen tiang jari gembire léq dalem Almasih. Tiang tulis surat niki lantaran yakin bahwe side gen ngelaksaneang napi saq tiang tunas. Malahan tiang nenaoq side gen ngelaksaneang saq lebihan léman nike. Selain nike, tulung sedieang tiang taoq jari madéq léq balénde, séngaq tiang beharep adéq langan do'e-do'ende tiang gen tetulakang tipaq side. Epapras, saq araq bareng kance tiang léq dalem bui lantaran Almasih, ngirim salam tipaq side. Terimaq éndah salam batur-batur tiang: Markus, Aristarkus, Demas dait Lukas. Rahmat Junjungan Saq Mulie Deside Isa Almasih araq bareng roh side. Léq jaman laéq, Allah kereng bemanik léq leluhurte langan nabi-nabi kadu macem-macem care. Laguq léq jaman ahir niki, Allah bemanik léq ite langan perantarean Bije-Ne, saq sampun tetentuang jari ahli waris selapuq saq araq. Langan Ie Allah sampun cipteang alam semeste. Ie saq nyugulang cahaye kemuliean Allah saq menah tandur; Ie wujut nyate Allah. Ie éndah saq meliharaq keselametan alam semeste niki siq manik-Ne saq bekuase. Sesampun Ie ngapus dose, Ie melinggih léq sedi kanan Saq Maheagung léq taoq saq paling atas. Bije saq asalne léman Allah nike mauq kedudukan jaoq atasan léman malaékat, dait peséngan saq teicanin siq Allah léq Ie éndah jaoq muliean léman peséngan saq teicanin tipaq malaékat. Allah nénten uwah bemanik maraq niki léq sopoq malaékat, “Deside Bije saq asalne léman Tiang, léq jelo niki Tiang sampun jariang Deside Bije Tiang.” Dait, “Tiang gen jari Bapa-Ne, dait Ie gen jari Bije Tiang.” Laguq sewaktu Allah ngutus Bije-Ne saq sengake ojok dunie niki, Allah bemanik maraq niki, “Selapuq malaékat Allah wajib nyembah Ie.” Mengenai malaékat-malaékat, Allah bemanik maraq niki, “Allah miaq malaékat-malaékat-Ne jari angin, dait pelayan-pelayan-Ne jari nyale api.” Laguq mengenai Bije-Ne, Allah bemanik, “Tahte Deside, ya Allah, gen kekel selaéq-laéqne! Pemréntahan Deside nike pemréntahan saq adil. Deside suke léq keadilan, dait meriq léq hal saq jahat, keranaq nike Allah, Allah Deside, miléq Deside dait ngicanin Deside kehormatan saq datengang sukecite, lebihan léman batur-batur Deside.” Allah bemanik éndah, “Deside, Tuhan, léq penembéqne cipteang gumi, dait Deside mésaq cipteang langit. Selapuqne nike gen musnah, dait jari lotoh maraq kelambi; laguq Deside gen tetep araq. Gumi langit niki gen Deside lepit maraq kelambi, dait gen Deside gentiq siq saq lain. Laguq Deside nénten gen berobah, dait idup Deside nénten gen tutuq.” Ndéqne araq sopoq juaq malaékat saq sampun nerimaq Manik Allah saq maraq niki, “Melinggih léq sedi kanan Tiang, jangke Tiang miaq musuh-musuh Deside takluk léq Deside.” Malaékat-malaékat nike cume roh-roh saq ngelayanin Allah, dait saq tepréntah siq Allah jari ngelayanin dengan-dengan saq gen nerimaq keselametan. Keranaq nike ite harus sayan pacu-pacu merhatiang pengajahan-pengajahan saq sampun ite dengah, adéq ite ndaq jangke bilin pengajahan-pengajahan nike. Manik Allah saq tesampéang langan pare malaékat tipaq leluhurte ternyate kenaq, dait dengan saq ndéq turut atao ndéq taat nerimaq hukuman saq setimpal. Berembé ite gen lepasang diriq, lamun ite ndéq merhatiang keselametan saq beléq nike? Penembéqne, keselametan nike teberiteang siq Tuhan, terus teteguqang umaq ite siq ie pade saq sampun dengah léman Ie. Allah sampun neguqang kesaksian dengan-dengan nike siq ngaraqang macem-macem tande dait muqjizat serte paice léman Roh Allah saq tebagi-bagiang menurut pekayunan-Ne mésaq. Séngaq ndéqne tipaq malaékat-malaékat Allah naklukang dunie saq gen dateng, saq kenyekente raosang niki. Sebalikne, araq sopoq kesaksian saq tetulis maraq niki, “Napi manusie nike, Ya Allah, sehingge Deside ilingang ie? Atao bije manusie sehingge Deside merhatiang ie? Léq waktu saq singket Deside jariang ie bawaqan sekediq léman malaékat. Deside ngicanin ie mahkote kemuliean dait hormat. Selapuq-lapuqne sampun Deside taklukang léq ie.” Séngaq siq naklukang selapuq hal tipaq Ie, nénten araq sopoq hal saq Ie kecualiang, saq nénten takluk léq Ie. Laguq mangkin niki ndéqman ite serioq, bahwe selapuq hal sampun tetaklukang léq Ie. Laguq ite serioq bahwe Ie, Deside Isa, dalem waktu saq singket sampun tepiaq bawaqan léman malaékat, dait Ie sampun teicanin mahkote kemuliean dait hormat séngaq sengsare ninggal-Ne nike, adéq siq rahmat Allah Ie ngalamin maut demi selapuq manusie. Mule sampun sepatutne Allah -- lantaran Ie dait siq Ie selapuq-lapuqne sampun tecipteang -- nike Allah saq gadingang luwéq dengan tipaq kemuliean, nyempurneang éndah Deside Isa, saq mimpin ie pade tipaq keselametan, siq penderitean. Séngaq Ie saq nyuciang manusie dait ie pade saq tesuciang, ie pade selapuq asalne léman saq Sopoq; keranaq nike Ie nénten ilaq akuq ie pade jari sanak-sanak-Ne. Manik-Ne, “Tiang gen beriteang léq sanak-sanak Tiang mengenai Deside. Tiang gen memuji Deside léq tengaq-tengaq jemaah.” Deside Isa bemanik éndah, “Tiang gen beharep léq Allah.” Dait Ie bemanik éndah, “Niki Tiang, bareng kance bije-bije saq sampun teicanin siq Allah tipaq Tiang.” Séngaq dengan-dengan saq Ie sebut bije, nike mahluk manusie saq bau ninggal, make Deside Isa mésaq jari pade kance ie pade dait idup dalem keadaan manusie. Hal nike Ie piaq, adéq siq ninggal-Ne Ie bau binaseang Belis saq nguasein kematéan. Siq care nike Ie bébasang dengan-dengan saq seumur idup tejariang panjak lantaran takut léq kematéan. Sampun nyate bahwe ndéqne malaékat saq Ie tulung, laguq keturunan Ibrahim. Nike artine bahwe Ie harus jari pade kance sanak-sanak-Ne léq dalem selapuq-lapuqne. Dait siq care nike Ie bau jari Imam Agung saq bedowé belas kasihan dait setie tipaq Allah. Siq pelayanan-Ne nike dose manusie bau teampunin. Dait lantaran Ie mésaq sampun menderite dait tecobe, Ie bau nulung dengan-dengan saq mauq cobe, séngaq Ie mésaq sampun tecobe dait menderite. Keranaq nike, semeton-semeton saq suci, saq nerimaq bagian léman Allah saq sampun ngemanikang léman sorge, side pade harus merhatiang Rasul dait Imam Agung saq sampun ite percaye, nike Deside Isa. Ie setie léq Allah saq sampun miléq Ie léq karye nike, pade maraq Musa laéq setie ngelaksaneang tugasne léq Gedéng Allah. Laguq Deside Isa patut nerimaq penghormatan saq beléqan léman Musa. Séngaq dengan saq piaq balé harus lebih tehormatin tebanding balé nike mésaq. Mule sebilang balé araq saq miaq, laguq saq miaq selapuq-lapuqne nike Allah mésaq. Musa setie jari pelayan léq dalem gedéng Allah jari ngebéng kesaksian mengenai napi saq gen teberiteang léq jaman saq gen dateng. Laguq Almasih setie sebagé Bije saq asalne léman Allah saq betanggung jawab léq gedéng Allah. Dait ite niki gedéng Allah, lamun ite tetep besemanget dait tetep yakin jari mauq napi saq ite harepang. Keranaq nike, maraq manik Roh Allah, “Lamun léq jelo niki side dengahang Manik Allah, ndaq side pagah maraq leluhurde, sewaktu ie pade ngelawan Allah, dait nguji Allah léq padang gurun. ‘Léq derike leluhurde cobe Tiang dait nguji Tiang,’ Manik Allah, ‘Padahal ie pade sampun serioq karye Tiang petang dase taun ngonéqne.’ Keranaq nike Tiang menggah léq ie pade dait Tiang bemanik, ‘Até ie pade tetep sesat, ie pade ndéq mélé taat léq préntah-préntah Tiang.’ Tiang menggah dait besumpah, ‘Ie pade ndéq gen tame ojok negeri nike jari mauq mentelah bareng kance Tiang.’ ” Semeton senamian, onyaq-onyaq ndaq jangke araq sopoq dengan juaq léq antare side bedowé angen saq jahat dait ndéq percaye, sehingge ie murtat léman Allah saq idup! Jari, adéq ndéq araq sopoq dengan juaq léq antare side saq pagah lantaran tipu muslihat dose sehingge nentang Allah, side pade harus saling naséhatin sebilang jelo sengonéq masih tesebut “Jelo Niki”. Ite selapuq sampun mauq bagian léq dalem Almasih lamun ite tetep percaye léq pengharepante saq penembéq jangke penutuqne. Araq tetulis, “Lamun léq jelo niki side dengahang Manik Allah, ndaq side pagah maraq sewaktu ngelawan Allah.” Sai dengan-dengan saq dengah Manik Allah terus ngelawan Ie? Tekan ie pade saq tepimpin siq Musa sugul léman Mesir? Dait tipaq sai Allah murke petang dase taun ngonéqne? Tekan tipaq ie pade saq bedose, dait saq ninggal léq padang gurun? Tipaq sai Allah sampun besumpah bahwe ie pade ndéq gen tame ojok taoq-Ne mentelah, selain tipaq ie pade saq ndéq taat nike? Jari, sampun jelas léq ite, bahwe ie pade ndéq bau tame séngaq ie pade ndéq percaye. Keranaq nike sengonéq janji jari tame ojok dalem taoq-Ne mentelah masih berlaku, ite harus tetep merase takut ndaq-ndaq araq sopoq dengan léq antare side teanggep gagal tame ojok dalemne. Séngaq Kabar Solah nike sampun teberiteang léq ite, pade maraq tipaq ie pade. Laguq léq ie pade, manik nike ndéq araq manpaatne. Séngaq sewaktu ie pade dengah, ie pade ndéq percaye. Laguq ite saq beriman gen tame ojok taoq-Ne mentelah. Hal nike kenaq kance napi saq temanikang siq Allah, maraq niki, “Léq dalem murke Tiang, Tiang besumpah, ‘Ie pade ndéq gen tame jari mauq mentelah bareng kance Tiang.’ ” Allah bemanik maraq nike timaq karye-Ne sampun tutuq mulai léman dunie niki Ie cipteang. Séngaq mengenai jelo kepituq, araq tetulis maraq niki, “Léq jelo saq kepituq Allah mentelah léman selapuq karye-Ne.” Mengenai hal nike araq éndah tetulis maraq niki, “Ie pade ndéq gen tame ojok negeri nike jari mauq mentelah bareng kance Tiang.” Jari ie pade saq penembéq dengah berite mengenai Kabar Solah nike, ndéqne tame ojok taoq-Ne mentelah séngaq ie pade ndéq percaye. Lamun maraq nike sampun jelas bahwe araq dengan-dengan saq gen tame ojok taoq-Ne mentelah nike. Séngaq Allah sampun nentuang sopoq jelo, saq tesebut “Jelo Niki”. Betaun-taun sesampun nike Allah bemanik mengenai hal nike langan Daud, léq dalem ayat saq onéq sampun tesebut, “Lamun léq jelo niki side dengahang Manik Allah, ndaq side pagah.” Séngaq lamun Yusak sampun jauq dengan-dengan nike tame ojok taoq-Ne mentelah, make Allah nénten gen bemanik malik mengenai sopoq jelo saq lain. Jari, umaq dengan-dengan saq tehususang bagi Allah masih araq janji jari mentelah maraq Allah mentelah léq jelo saq kepituq nike. Séngaq dengan-dengan saq sampun tame ojok taoq-Ne mentelah, ie pade gen mentelah éndah léman selapuq pegawéanne, pade maraq Allah. Keranaq nike, silaq ite berusahe pacu-pacu jari tame ojok taoq-Ne mentelah nike, adéq ndaq jangke sopoq dengan juaq léman ite saq gagal maraq ie pade laéq, lantaran ndéqne percaye léq Allah. Manik Allah nike idup dait kuat; merangan léman selapuq kléwang saq bemangan due. Manik nike nusuk dalem gati jangke misahang jiwe dait roh; sendi-sendi dait sumsum, malahan bau bédeang pikiran dait niat até manusie. Ndéq araq sopoq mahluk juaq saq bau seboq diriqne léman arepan Allah. Selapuqne pedas penggitan dait kebukaq léq arepan-Ne. Dait ite harus betanggung jawab tipaq Allah. Keranaq nike ite harus tetu-tetu percaye léq pengakuan imante. Séngaq ite bedowé Imam Agung saq beléq saq sampun liwatin selapuq langit, Ie Deside Isa, Bije saq asalne léman Allah. Imam Agungte nike ndéqne imam saq ndéq bau ngeraseang kelemahan-kelemahante. Sebalikne, Ie sampun tecobe léq dalem selapuq hal, pade maraq ite mésaq; cume Ie nénten piaq dose! Keranaq nike, silaq ite baniang diriq parek ojok tahte paice-Ne adéq mauq rahmat dait paice, sehingge ite mauq pertulungan léq waktune. Sebilang Imam Agung tepiléq léq antare manusie, dait tetetepang jari ngewakilin manusie léq urusan ie pade kance Allah. Tugasne jari ngaturang persembahan dait kurban lantaran dose. Imam Agung nike bau paham ie pade saq jahat dait sesat, lantaran ie mésaq luwéq kelemahan. Dait, lantaran ie mésaq lemah, make ie harus ngaturang kurban, ndéqne cume lantaran dose-dose umat, laguq lantaran dose-dosene mésaq éndah. Dait ndéq araq sopoq dengan juaq saq bait kehormatan nike umaq diriqne mésaq, laguq ie temanikang siq Allah pade maraq Harun. Maraq nike éndah Almasih. Ie nénten mulieang diriq-Ne mésaq jari Imam Agung. Allah mésaq saq ngangkat Ie. Manik Allah tipaq Ie, “Deside Bije saq asalne léman Tiang, léq jelo niki Tiang sampun jariang Deside Bije Tiang.” Pade maraq léq ayat saq lain Allah bemanik éndah, “Deside Imam selaéq-laéqne, menurut aturan Imam Melkisedek.” Sewaktu Almasih idup léq dunie niki, Ie bedo'e dait sanget siq-Ne tunas léq Allah, saq sanggup nyelametang Ie léman ninggal. Dait lantaran kesoléhan-Ne Allah mirengang Ie. Deside Isa nike Bije saq asalne léman Allah, laguq timaqne maraq nike, Ie berajah jari taat langan penderitean-Ne. Make sesampun Ie tesempurneang, Ie jari sumber keselametan saq kekel tipaq selapuq dengan saq taat léq Ie, dait Allah éndah nyatayang Ie jari Imam Agung, menurut aturan Imam Melkisedek. Mengenai kedudukan Deside Isa jari Imam Agung, masih luwéq saq perlu tiang pade sampéang léq side, laguq sengke jari jelasang hal nike, séngaq side pade ndéq iniq becat ngerti. Setetune sampun waktune side jari guru, laguq nyatene side pade masih perlu berajah léman dengan lain mengenai hal-hal saq paling dasar léman pengajahan Allah. Side pade ndéqman mampu nerimaq keloran saq tegéng; side pade masih harus nginem susu doang. Dengan saq masih nginem susu, artine ie masih bebéaq; ie ndéqman bedowé pengalaman mengenai napi saq kenaq dait napi saq salaq. Keloran saq tegéng nike umaq dengan déwase saq sampun bedowé pengalaman, tao béde-bédeang mbé saq solah dait mbé saq jahat. Keranaq nike silaq ite bilin dasar-dasar penembéq léman pengajahan mengenai Almasih ngalih ojok tingket kedéwasean. Ndaq malik ite ngulang perajahan dasar bahwe dengan harus engkah ngelaksaneang hal-hal saq ndéq bemanpaat, dait harus percaye tipaq Allah, atao perajahan dasar mengenai pembaptisan, atao mengenai noloq ime léq atas dengan, atao mengenai idup malik sesampun ninggal atao hukuman saq kekel. Dait hal nike saq gen ite piaq, lamun Allah ngijinang. Séngaq, dengan-dengan saq sampun murtat, ndéqne mungkin tebimbing malik. Laéq ie pade sampun araq léq dalem terang léman Allah, dait sampun ngeraseang paice sorge. Ie pade éndah sampun mauq bagian léq dalem Roh Suci. Ie pade nenaoq léman pengalaman ie pade bahwe Manik Allah nike solah, dait ie pade sampun ngeraseang paice-paice saq penoq kuase léman jaman saq gen dateng. Laguq sesampun nike ie pade murtat, ndéqne mungkin ie pade bau tebimbing malik adéqne tobat léman dose-dose ie pade. Séngaq ie pade pakuq malik léq kayuq salib Bije saq asalne léman Allah dait miaq Ie tehine léq julun dengan luwéq. Tanaq saq ngisep aiq ujan saq kereng turun léq atasne, beterus ngasilang taletan-taletan saq bemanpaat umaq penyakapne, tanaq nike teberkahin siq Allah. Laguq lamun tanaq nike ngasilang lolo ré dait taletan saq beduwi, make tanaq nike ndéq araq manpaatne dait éraq gen tekutuk siq Allah, dait selanjutne gen tetunuq jangke bis. Laguq semeton senamian saq tiang kasihin, timaq tiang pade nyampéang maraq nike, laguq tiang pade yakin mengenai side pade. Tiang pade yakin bahwe side pade sampun nerimaq hal-hal saq solahan, nike berkah-berkah saq jari bagian léman keselametande. Séngaq Allah nénten Allah saq nénten adil. Allah nénten gen lupaq napi saq sampun side pade laksaneang bagi Allah, dait kasih saq sampun side pade nyatayang tipaq peséngan-Ne sewaktu nulung dengan-dengan saq tehususang bagi Allah saq jangke mangkin masih side pade laksaneang. Tiang pade melét gati adéq side pade sopoq-sopoq tetep besemanget jangke dateng penutuqne, adéq side pade pasti mauq napi saq side pade harepang nike. Tiang pade ndéq mélé side pade jari mayus. Laguq tiang pade melét adéq side pade idup maraq dengan-dengan saq bedowé napi saq tejanjiqang siq Allah, saq ie pade terimaq lantaran iman dait kesabaran ie pade. Sewaktu Allah bejanji tipaq Ibrahim, Ie besumpah demi diriq-Ne mésaq, séngaq ndéq araq saq atasan léman Ie. Allah bemanik, “Tiang bejanji gen ngebéng side berkah saq belimpah-limpah dait gen miaq keturunande jari luwéq.” Ibrahim sabar ngantos, make ie nerimaq napi saq tejanjiqang siq Allah léq ie. Lamun dengan besumpah, ie besumpah demi aran dengan saq atasan léman ie, sehingge ndéq araq dengan saq nentang sumpah nike. Keranaq nike, jari ngeyakinang ie pade saq berhak nerimaq janji nike mengenai kepastian keputusan-Ne, Allah sampun jamin diriq-Ne kadu sumpah. Kedue hal nike ndéqne bau berobah: Allah nénten mungkin beduste mengenai janji dait sumpah-Ne. Keranaq nike, ite saq boyaq perlindungan léq Allah, bedowé kebanian saq kuat jari mauq pengharepan saq araq léq julunte. Pengharepante nike maraq jangkar saq tetalet dalem gati dait taoqte betegelan saq kuat dait aman umaq jiwente, saq sampun nembus kelambu saq begantung léq dalem Gedéng Suci Allah, léq taoq nike Deside Isa sampun tame dait bukaqang ite langan, nike sesampun Ie jari Imam Agung selaéq-laéqne, menurut aturan Imam Melkisedek. Melkisedek niki raje léman Salem dait imam Allah Saq Maheagung. Sewaktu Ibrahim tulak léman perang ngalahang raje-raje, Melkisedek rauh nyambut ie dait ngicanin ie berkah. Beterus Ibrahim ngaturin Melkisedek sepersepulu léman napi saq ie rebut. (Peséngan Melkisedek artine, saq penembéq, “Raje Keadilan” dait lantaran Ie raje léman Salem, make artine éndah “Raje Damé”.) Mengenai Melkisedek niki ndéq araq keterangan bahwe ie bedowé amaq atao inaq atao leluhur; ndéq araq éndah keterangan mengenai kelahiranne, atao ninggalne. Ie pade maraq Bije saq asalne léman Allah; Ie Imam saq kekel. Jari, ite bau serioq léq deriki berembé agungne Melkisedek niki; Ie agung sehingge Ibrahim, bapaq leluhur bangsente, ngicanin ie sepersepulu léman selapuq harte saq ie mauq léman perang nike. Léq dalem Hukum Taurat, tetentuang bahwe imam-imam keturunan Lewi saq betugas bait sepersepulu léman dowé bande dait penghasilan umat Israel, nike semeton-semetonne mésaq timaq ie pade bareng-bareng keturunan Ibrahim. Melkisedek ndéqne keturunan Lewi, laguq ie éndah nerimaq sepersepulu léman selapuq saq terebut siq Ibrahim, Melkisedek éndah ngicanin berkah tipaq Ibrahim saq setetune sampun bedowé janji-janji léman Allah. Mule ndéqne bau tetilas bahwe dengan saq teberkahin nike bawaqan léman dengan saq ngicanin berkah. Imam-imam saq nerimaq bagian sepersepulu, nike manusie saq iniq ninggal. Laguq mengenai Melkisedek saq nerimaq bagian sepersepulu nike, menurut Kitab Suci tetep idup. Jari bau teparan, bahwe Lewi -- saq keturunanne bait bagian sepersepulu léman umat Israel -- bebayah éndah bagian nike langan Ibrahim. Timaqne Lewi ndéqman tebijeang, laguq bau teparan ie sampun araq léq dalem awak Ibrahim leluhurne, sewaktu Melkisedek bedait kance Ibrahim. Siq pimpinan imam-imam Lewi, Hukum Taurat teicanin tipaq umat Israel. Séngaq imam-imam Lewi nike ndéqne bau ngelaksaneang secare sempurne napi saq harus ie laksaneang, make harus araq imam lain, saq maraq Imam Melkisedek, dait ndéqne léman golongan Imam Harun malik! Jari, lamun kedudukan imam-imam berobah, Hukum Taurat éndah harus berobah. Saq temaksut léq deriki mengenai sopoq dengan saq asalne léman suku lain, padahal léman suku niki ndéqne uwah sopoq dengan juaq saq betugas jari imam. Selapuq dengan nenaoq bahwe Junjungante Saq Mulie asalne léman suku Yehuda; dait Musa ndéq uwah nyebut suku nike sewaktu ie bebaos mengenai imam-imam. Hal saq teraosang niki jari sayan jelas malik, waktu araq sopoq imam lain saq maraq Melkisedek. Ie teangkat jari imam, ndéqne atas dasar aturan-aturan manusie, laguq atas dasar idup saq ndéqne iniq binase. Séngaq mengenai Ie araq kesaksian, “Deside imam selaéq-laéqne, menurut aturan Melkisedek.” Jari, mangkin aturan saq laéq sampun tebatalang, séngaq ndéq kuat dait ndéq araq manpaatne. Hukum Taurat ndéqne bau jariang napi juaq jari sempurne. Keranaq nike mangkin ite teicanin sopoq pengharepan saq solahan; siq hal nike ite bau parek tipaq Allah. Dait éndah, selapuqne nike tebarengin siq sumpah léman Allah. Ndéq araq sumpah maraq nike sewaktu imam-imam saq lain nike teangkat. Laguq Deside Isa teangkat jari imam kadu sumpah, sewaktu Allah bemanik léq Ie, “Tuhan sampun besumpah, dait Ie nénten gen ngerobah keputusan-Ne, ‘Deside niki Imam selaéq-laéqne.’ ” Siq care éndah Deside Isa jari jaminan léman sopoq perjanjian saq solahan. Selain nike, luwéq imam-imam saq lain, séngaq ie pade sopoq-sopoq ninggal sehingge ndéq bau ngelanjutang jabatanne. Laguq Deside Isa idup selaéq-laéqne, dait jabatanne jari imam ndéqne tegentiq siq dengan lain. Keranaq nike jari selaéq-laéqne Deside Isa bau nyelametang dengan-dengan saq parek ojok Allah langan Ie, séngaq Ie idup selaéq-laéqne jari Perantare ie pade. Jari, Deside Isa nike Imam Agung saq ite perluang. Ie suci; léq Ie nénten araq kesalaqan atao dose napi juaq. Deside Isa tekelin léman dengan-dengan bedose, dait tetaékang jangke ojok taoq saq atasan léman selapuq langit. Deside Isa nénten maraq imam-imam agung saq lain, saq sebilang jelo harus ngaturang kurban persembahan lantaran dose-dosene mésaq juluq, baruq lantaran dose-dose umat. Deside Isa ngaturang kurban cume sekali doang jari selaéq-laéqne, sewaktu Ie ngaturang diriq-Ne mésaq jari kurban. Hukum Taurat netepang dengan saq ndéq sempurne jari imam agung. Laguq sesampun nike, léman hukum nike, Allah miaq janji kadu sumpah bahwe Allah ngangkat jari Imam Agung, Bije saq asalne léman Allah saq sampun sempurne selaéq-laéqne. Saq jari inti selapuqne niki bahwe: Ite bedowé Imam Agung saq maraq nike, saq melinggih léq sedi kanan Saq Maheagung léq sorge. Ie ngelaksaneang tugas sebagé Imam Agung léq Ruang Mahesuci, léq dalem Kémah Tuhan saq sejati, saq tepiaq siq Tuhan, ndéqne siq manusie. Sebilang imam agung teangkat jari ngaturang kurban atao persembahan tipaq Allah. Maraq nike éndah Imam Agungte; harus araq saq Ie aturang. Seandéne Ie araq léq dunie niki, Ie nénten gen jari imam, séngaq sampun araq imam saq ngaturang kurban saq tetuntut léq dalem Hukum Taurat. Pegawéan saq ie pade laksaneang jari imam nike setetune cume sopoq gambaran dait bayangan léman napi saq araq léq sorge. Hal nike laéq sampun tesampéang siq Allah tipaq Musa, sewaktu Musa gen piaq Kémah Tuhan. Maraq niki Manik Allah tipaq Musa, “Inget! selapuqne nike harus side piaq menurut conto gambar saq tepetitoqang tipaq side léq atas gunung.” Laguq mangkin Deside Isa nerimaq tugas jari imam saq jaoq muliean léman napi saq telaksaneang siq imam-imam nike. Séngaq Ie sampun jari Perantare sopoq perjanjian saq muliean, séngaq tedasarang siq janji-janji saq solahan. Lamun ndéq araq kekurangan léq perjanjian saq penembéq, make ndéqne perlu malik tepiaq perjanjian saq kedue. Laguq Allah sampun ngewade umat-Ne, sehingge Allah bemanik, “Inget! gen dateng waktune, Tiang gen miaq perjanjian saq baru kance bangse Israel, dait kance bangse Yehuda. Ndéqne maraq perjanjian saq Tiang piaq kance leluhur ie pade sewaktu Tiang pimpin ie pade sugul léman negeri Mesir. Ie pade ndéq setie léq perjanjian saq Tiang piaq kance ie pade, keranaq nike Tiang nolaq ie pade.” Laguq mangkin, niki perjanjian saq gen Tiang piaq kance umat Israel léq jelo-jelo saq gen dateng, manik Tuhan: “Tiang gen noloq hukum Tiang léq dalem pikiran ie pade, dait gen Tiang tulis léq até ie pade. Tiang gen jari Allah ie pade, dait ie pade gen jari umat Tiang.” Ie pade ndéq perlu ngajah sepade wargene, atao bebadaq tipaq semetonne, “Side harus kenal kance Tuhan.” Séngaq ie pade selapuq, beléq atao kodéq, gen kenal kance Tiang. Tiang gen ngampunin kesalaqan-kesalaqan ie pade, dait Tiang ndéq gen inget malik dose-dose ie pade. Siq nyugulang perjanjian saq baru, Allah nyatayang bahwe perjanjian saq penembéq nike jari batal, dait napi saq sampun tebatalang gen becat telang. Perjanjian saq penembéq bedowé aturan-aturan ibadah, dait éndah bedowé taoq ibadah saq tepiaq siq manusie. Sopoq kémah tepiaq saq bagian julune tesebut Ruang Suci. Léq derike araq tetoloq tangkaq dilah dait araq éndah méje kance ruti saq teaturang tipaq Allah. Léq bagian dalemne, léq bagian mudi kelambu saq kedue, araq ruangan saq tesebut Ruang Mahesuci. Léq dalem ruangan nike araq méje taoq kurban saq tepiaq léman emas jari tunuq dupe, dait araq éndah Peti Perjanjian saq selapuqne telapis siq emas. Léq dalem peti nike araq guci emas saq berisi manna, tunjangne Harun saq sampun besuli, dait due lémpéngan batu tulis saq léq atasne tetulis sepulu préntah léman Allah. Léq atas Peti nike araq due Kerub kemuliean saq ngudung taoq pendaméan. Laguq mangkin selapuqne nike ndéqne bau tejelasang sopoq-sopoq. Maraq nike selapuqne teatur. Sebilang jelo imam-imam tame ojok dalem bagian julu kémah nike jari ngelaksaneang ibadah ie pade. Saq tame ojok bagian paling dalem léman kémah nike cume imam agung doang. Ie ngelaksaneang hal nike cume sekali setaun. Ie ngelaksaneang nike jauq daraq jari teaturang tipaq Allah lantaran diriqne mésaq dait lantaran dose-dose saq ndéq sediah tepiaq siq umat-Ne. Siq care nike, Roh Allah nyatayang secare jelas, bahwe sengonéq kémah léq bagian julu nike masih araq, langan tame ojok dalem Ruang Mahesuci nike ndéqman tebukaq. Niki jari lambang jaman saq mangkin; artine bahwe persembahan-persembahan dait kurban-kurban binatang saq teaturang tipaq Allah, ndéqne bau nyempurneang até nurani dengan saq jauq persembahan. Séngaq upacare-upacare nike cume berubungan kance keloran, ineman, dait macem-macem upacare penyucian. Selapuqne cume aturan-aturan lahiriah saq berlaku cume jangke selapuq hal tejariang baru. Laguq Almasih sampun rauh jari Imam Agung bagi hal-hal saq solah saq gen dateng, séngaq Ie sampun tame ojok dalem kémah saq beléqan dait lebih sempurne, saq ndéq tepiaq siq ime manusie, artine ndéq berasal léman dunie saq tecipteang niki. Almasih tame léq Ruang Mahesuci léq dalem kémah nike cume sekali doang jari selaéq-laéqne. Léq waktu nike Ie nénten gadingang daraq bémbéq mame atao daraq anak sampi jari teaturang; Ie gadingang daraqne mésaq, dait siq care nike Ie bébasang ite selaéq-laéqne. Daraq léman bémbéq dait sampi mame dait awu-awu léman kurban anak sampi, tekadu jari ketis dengan-dengan saq najis adéq ie pade jari bersi secare lahiriah. Jari, lamun daraq dait awu-awu nike bau persiq kenajisan dengan-dengan nike, lebih-lebih daraq Almasih! Siq Roh saq kekel, Almasih ngaturang diriq-Ne mésaq tipaq Allah jari kurban saq sempurne. Daraq-Ne persiq até nuraninte léman perbuatan saq ndéq araq manpaatne, adéq ite bau beribadah tipaq Allah saq idup. Keranaq nike Almasih jari Perantare sopoq perjanjian saq baru, adéq dengan saq sampun temanikang siq Allah bau nerimaq berkah-berkah saq kekel saq sampun tejanjiqang siq Allah, lantaran ninggal-Ne nike sampun nebus pelanggaran-pelanggaran saq tepiaq léq perjanjian saq penembéq. Lamun araq surat warisan, harus éndah araq buktine bahwe dengan saq miaq surat nike sampun ninggal. Séngaq surat warisan ndéqne berlaku lamun dengan saq miaq surat nike masih idup. Surat nike berlaku cume sesampun dengan nike ninggal. Keranaq nike perjanjian saq penembéq éndah harus tesahang siq daraq. Léq penembéqne Musa nyampéang selapuq préntah saq tetulis léq Hukum Taurat tipaq bangse Israel. Sesampun nike Musa bait daraq anak sampi dait daraq bémbéq mame, terus campurne kance aiq, beterus teketisang léq Kitab Hukum Taurat nike dait léq selapuq bangse Israel kadu hisop dait bulu dombe bewarne béaq toaq. Sambil ngelaksaneang hal nike Musa bebase, “Niki daraq saq ngesahang perjanjian léman Allah saq harus side pade taatin.” Beterus siq care saq pade, Musa éndah ketis daraq nike léq kémah ibadah dait léq selapuq pekakas saq tekadu ibadah. Mule menurut Hukum Taurat, jangke-jangke selapuq hal tesuciang siq daraq; dait dose cume bau teampunin lamun araq penumpahan daraq. Siq care nike barang-barang saq jari lambang hal-hal saq léq sorge perlu tesuciang. Laguq léq hal-hal saq léq sorge nike teperluang kurban saq jaoq solahan malik. Séngaq Almasih nénten tame ojok Ruang Suci saq tepiaq siq manusie, saq cume jari lambang léman saq setetune. Almasih mésaq tame ojok sorge; mangkin léq derike Ie ngadep Allah jari kepentingan ite. Imam Agung sebilang taun tame ojok Ruang Mahesuci jauq daraq sopoq binatang. Laguq Almasih nénten ngulang-ulang tame jari ngaturang diriq-Ne. Séngaq lamun maraq nike, artine Ie sampun beulang-ulang menderite mulai léman dunie niki tecipteang. Laguq nyatene, mangkin léq jaman penutuq niki, Ie rauh cume sekali doang jari ngapus dose siq ngurbanang diriq-Ne mésaq. Pade maraq manusie sampun tetetepang jari ninggal cume sekali dait sesampun nike teadilin siq Allah. Maraq nike éndah Almasih, cume sekali doang teaturang jari kurban saq ngapus dose luwéq dengan. Sesampun nike Ie gen rauh malik saq kedue kaline, ndéqne jari nyeleséang persoalan dose, laguq jari ngicanin keselametan tipaq dengan-dengan saq ngantos kerauhan-Ne. Hukum Taurat cume ngebéng gambaran saq saru-saru mengenai hal-hal saq solah saq gen dateng, dait ndéqne gambaran saq setetune léman hal-hal nike. Keranaq nike, hukum nike ndéq mungkin nyempurneang ie pade saq parek tipaq Allah siq kurban saq pade, saq sebilang taun tetep teaturang. Séngaq lamun mule bau, pasti dengan-dengan ndéqne malik ngaturang kurban, lantaran ie pade saq beribadah nike ndéq sadar malik léq dose sesampun sekali tesuciang jari selaéq-laéqne. Laguq nyatene kurban-kurban saq teaturang sebilang taun nike malahan miaq dengan jari inget léq dose-dose ie pade, séngaq daraq sampi dait daraq bémbéq mame mule ndéqne bau ngapus dose. Keranaq nike sewaktu Almasih tame ojok dunie, Ie matur léq Allah, “Deside nénten suke kurban dait persembahan; sebalikne Deside sampun nyedieang rage umaq Tiang. Deside nénten nerimaq kurban saq tetunuq atao kurban jari pengapus dose. Beterus Tiang matur, ‘Niki Tiang, ya Allah! Tiang parek jari ngelaksaneang pekayunan Deside, maraq saq tetulis léq dalem Kitab Suci mengenai Tiang!’ ” Léq penembéqne Almasih matur, “Deside nénten suke kurban dait persembahan; Deside nénten nerimaq kurban binatang saq tetunuq jari persembahan dait léq kurban jari pengampunan dose.” Timaq selapuq kurban nike teaturang menurut Hukum Taurat. Sesampun nike Almasih matur, “Niki Tiang, ya Allah! Tiang parek jari ngelaksaneang pekayunan Deside.” Siq care nike Allah ngapus selapuq kurban saq laéq nike, dait gentiqne siq kurban saq kedue, nike Almasih. Dait lantaran pekayunan Allah nike, ite sampun tesuciang langan persembahan rage Almasih, sekali jari selaéq-laéqne. Sebilang imam ngelaksaneang tugasne jari imam sebilang jelo, dait beulang-ulang ie ngaturang kurban-kurban saq pade. Laguq kurban-kurban nike tetu-tetu ndéq bau ngapus dose. Sebalikne, Almasih cume ngaturang sopoq kurban jari pengampunan dose, dait kurban nike berlaku selaéq-laéqne. Sesampun ngaturang kurban nike, Almasih melinggih léq sedi kanan Allah, dait mréntah bareng kance Allah. Dait mangkin Almasih ngantos jangke Allah miaq musuh-musuh-Ne takluk léq Ie. Jari siq sopoq kurban, Almasih nyempurneang dengan-dengan saq sampun tepersiq léman dose. Mengenai hal nike Roh Allah éndah besaksi tipaq ite, “ ‘Niki perjanjian saq gen Tiang piaq kance ie pade, léq jelo-jelo saq gen dateng.’ Ie bemanik éndah, ‘Gen Tiang toloq hukum-hukum Tiang léq dalem até ie pade, dait gen Tiang tulis hal nike léq dalem pikiran ie pade.’ ” “Tiang gen lupaqang dose-dose dait kejahatan-kejahatan ie pade.” Jari, dose-dose dait kejahatan-kejahatan nike sampun teampunin, make ndéqne perlu malik teaturang kurban lantaran dose. Jari, semeton-semeton senamian, siq ninggalne Deside Isa nike, mangkin ite bani tame ojok dalem Ruang Mahesuci. Deside Isa sampun bukaqang ite sopoq langan saq baru, dait saq jauq ite tipaq kehidupan langan kelambu, nike rage Deside Isa mésaq. Dait mangkin ite bedowé sopoq imam saq agung saq betanggung jawab léq Gedéng Allah. Keranaq nike silaq ite ngadep Allah siq angen saq tulus dait iman saq teguq; siq até saq sampun tesuciang léman perasaan salaq, dait siq awak saq sampun tepersiq kadu aiq saq murni. Ite harus tetu-tetu percaye léq pengharepan saq sampun ite akuq, séngaq Allah nike setie dait Ie gen nepatin janji-Ne. Dait silaq ite saling perhatiang, adéq ite saling ngebéng semanget léq dalem kasih dait léq dalem pegawéan saq solah. Ndaq ite jaoqang diriq léman acare-acare ibadahte, maraq saq tebiaseang siq pire dengan, laguq silaq ite saling naséhat, dait sayan pacu ngelaksaneang lantaran jelo Tuhan sayan rapet. Séngaq lamun penenaoq mengenai kebenaran léman Allah sampun tesampéang tipaq ite, laguq ite masih doang sediah gawéq dose, make ndéqne araq malik kurban jari ngapus dosente. Laguq sopoq-sopoqne saq araq umaq ite, penghakiman saq nakutang dait api murke-Ne saq gen nunuq jangke bis dengan-dengan durhake! Dengan saq ndéq taat léq hukum saq teicanin siq Musa tehukum maté ndéq araq ampun, lamun araq saksi due atao telu dengan, saq buktiang bahwe ie salaq. Berembé beratne hukuman saq gen teterimaq siq dengan saq ngicaq-icaq Bije saq asalne léman Allah. Dengan nike nganggep hine daraq perjanjian Allah, nike ninggalne Almasih saq persiq ie léman dose. Ie menghine Roh saq ngicanin rahmat. Ite nenaoq sai Ie saq bemanik, “Tiang gen bales! Tiang gen ngukum!” dait saq bemanik, “Tuhan gen hakimin umat-Ne.” Berembé kenjeringne lamun geriq ojok gading Allah Saq Idup! Pade inget berembé keadaan semeton senamian léq waktu saq julu. Sesampun side pade nerimaq cahaye Allah, side pade luwéq menderite; laguq side pade tetep tahen léq dalem perjuangan saq berat. Araq waktune side pade tehine dait teperlakuang secare ndéq bagus léq julun dengan luwéq. Araq waktune éndah side pade milu éndah menderite kance ie pade saq teperlakuang maraq nike, dait side pade milu ngeraseang kesedihan dengan saq tebui. Dait sewaktu selapuq dowén side pade terampas, side pade seneng nerimaq hal nike, séngaq side pade nenaoq bahwe side pade masih bedowé hal saq solahan, saq gen bau tahen selaéq-laéqne. Keranaq nike, ndaq putus ase, séngaq lamun side pade tetep percaye, make araq upaq saq beléq léq hal nike. Side pade perlu ketekunan, adéq side pade bau ngelaksaneang pekayunan Allah dait siq care nike bau nerimaq napi saq tejanjiqang siq Allah. Séngaq léq dalem Kitab Suci tetulis, “Cume karing seberaq doang, make Ie saq gen rauh nike, gen gelis rauh; Ie nénten gen tunde-tunde kerauhan-Ne. Dait dengan-dengan Tiang saq soléh gen idup siq iman; laguq lamun araq léq antare ie pade saq mundur, make Tiang ndéq suke léq ie.” Ite niki ndéqne umat saq ngundurang diriq dait binase. Sebalikne, ite niki umat saq percaye léq Allah dait saq mauq idup. Iman nike dasar léman selapuq hal saq ite harepang dait bukti léman selapuq hal saq ndéq ite serioq. Séngaq siq iman, dengan-dengan léq jaman laéq tedemenang siq Allah. Lantaran iman ite ngerti, bahwe alam semeste sampun tecipteang siq Manik Allah, sehingge napi saq ite serioq sampun telaksane léman napi saq ndéq bau ite serioq. Lantaran iman Habil sampun ngaturang tipaq Allah kurban saq solahan léman kurban saq teaturang siq Kain. Lantaran imanne nike, Habil teterimaq siq Allah jari dengan saq kenaq, séngaq nyate bahwe Allah nerimaq persembahanne. Habil sampun ninggal, laguq lantaran imanne nike, ie masih ngeraos. Lantaran iman Henok kerangkatan, adéq ie ndéq ngalamin ninggal, dait ie ndéq tedait, séngaq Allah sampun ngangkat ie. Séngaq sendéqman ie kerangkatan, ie mauq kesaksian, bahwe ie nyenengang Allah. Laguq lamun ndéq bedowé iman ndéqne mungkin dengan bau nyenengang Allah. Séngaq dengan saq parek tipaq Allah harus percaye bahwe Allah araq, dait bahwe Allah ngicanin upaq tipaq dengan saq pacu-pacu boyaq Ie. Lantaran iman, make Nuh -- siq petunjuk léman Allah mengenai sopoq hal saq ndéqman penggitan -- siq taat nyiepang kapal jari nyelametang keluargene; dait lantaran imanne nike dunie tehukum dait ie tetentuang jari nerimaq kebenaran, sesuai kance imanne. Lantaran iman Ibrahim taat, sewaktu ie temanikang jari berangkat ojok negeri saq gen ie terimaq jari dowéne, terus ie berangkat timaq ie ndéq nenaoq taoq saq ie laiq. Lantaran iman ie ndot jari dengan pendateng léq tanaq saq tejanjiqang siq Allah tipaq ie. Ibrahim ndot léq derike léq dalem kémah kance Ishak dait Yakub, saq milu jari ahli waris léq janji saq pade. Séngaq Ibrahim kenyeke ngantos kote saq terencaneang dait tepiaq siq Allah kadu dasar saq kuat. Lantaran iman Ibrahim dait Sarah mauq kekuatan jari mauq keturunan, timaq ie pade sampun lingsir gati, séngaq ie pade nganggep Allah, saq ngicanin janji nike setie. Timaq léq waktu nike Ibrahim sampun lingsir gati jari bedowé bije, laguq ie mauq keturunan luwéq gati, jangke ndéqne bau terékéng, maraq luwéqne bintang léq langit dait gerés léq sedin segare. Dalem iman, dengan-dengan nike selapuq sampun ninggal ndéqne mauq napi saq tejanjiqang, laguq cume serioq dait nyambut ie léman jaoq. Ie pade ngakuq bahwe ie pade dengan-dengan pendateng dait musapir léq gumi niki. Séngaq dengan-dengan saq bebase maraq nike setetune nyatayang bahwe ie pade kenyeke boyaq negerine mésaq. Ndéqne negeri saq sampun ie pade bilin nike saq ie pade pikirang. Séngaq lamun maraq nike, make ie pade bedowé luwéq kesempatan jari tulak ojok negeri nike. Laguq nyatene, ie pade angenang sopoq negeri saq solahan, nike negeri saq léq sorge. Keranaq nike Allah nénten ilaq lamun ie pade nyebut Ie jari Allah ie pade, séngaq Allah sampun nyedieang ie pade sopoq kote. Lantaran iman make Ibrahim, sewaktu ie tecobe, ngaturang Ishak. Ie, saq sampun nerimaq janji nike, réde ngaturang bijene saq nunggal. Timaq tipaq ie sampun tesampéang: “Keturunan asalne léman Ishak nike saq gen tesebut keturunande.” Ibrahim yakin bahwe Allah sanggup ngidupang malik Ishak léman ninggal -- jari, bau teparan, Ibrahim sampun nerimaq malik Ishak léman ninggal. Lantaran iman make Ishak, sewaktu gen ninggal, ngicanin berkah tipaq Yakub dait Esau jari hal-hal saq gen dateng. Lantaran iman, make sendéqman Yakub ninggal, ie ngicanin berkahne tipaq bije-bije Yusup, sambil beselanggah léq otak tunjangne dait nyembah Allah. Lantaran iman, make Yusup sewaktu gen ninggal bebadaq mengenai dengan-dengan Israel sugul léman Mesir, dait bepesen adéq tolang-tolangne tejauq éndah. Lantaran iman make Musa, sesampun ie tebijeang, teseboq sengonéq telu bulan siq dengan toaqne, séngaq ie pade serioq, bahwe kanak nike solah ruene dait ie pade ndéq takut léq préntah raje. Lantaran iman make Musa, sesampun déwase, ndéqne mélé tesebut bije léman putri Piraun. Ie senengan menderite bareng kance dengan-dengan saq tehususang bagi Allah, ketimbang sementare waktu ngeraseang kesenengan léman idup saq bedose. Ie nganggep penghinean séngaq Almasih nike beléqan léman selapuq kesugihan Mesir, séngaq Musa harepang upaq léq jelo saq gen dateng. Lantaran iman make Musa sampun bilin Mesir dait ndéqne beridap takut léq murke raje. Ie ngelanjutang tujuanne maraq ie sampun serioq napi saq ndéq penggitan nike. Lantaran iman make ie ngaraqang Paskah dait ketisang daraq léq lawang balé dengan Israel adéq Malaékat Maut ndaq nyematéq bije-bije ie pade saq sengake. Lantaran iman make ie pade sampun mbelat Segare Béaq, maraqne ie pade lampaq léq atas tanaq saq gero, laguq dengan-dengan Mesir tegulung siq aiq segare nike, sewaktu ie pade éndah cobaq mbelat segare nike. Lantaran iman make tembok-tembok Yeriko ruk, sesampun kote nike tekiterin pituq jelo ngonéqne. Lantaran iman, make Rahab, dengan nine pelacur nike, ndéqne milu binase bareng-bareng kance dengan-dengan durhake, séngaq ie sampun nerimaq secare solah mate-mate Israel. Dait napi malik saq harus tiang sebut? Séngaq tiang gen kekurangan waktu, lamun tiang gen nyeriteang mengenai Gideon, Barak, Simson, Yepta, Daud, Samuel dait nabi-nabi, saq lantaran iman sampun naklukang kerajaan-kerajaan, ngamalang kebenaran, mauq napi saq tejanjiqang, nungkem biwih singe-singe, pedaqang api saq ngelaur, selamet léman gacukan kléwang. Ie pade lemah, laguq jari kuat; ie pade perkase dalem peperangan sehingge ngalahang pasukan-pasukan bangse lain. Araq dengan-dengan nine saq nerimaq malik dengan-denganne saq sampun ninggal, lantaran teidupang. Laguq araq éndah saq tesiksaq dait ndéqne mélé nerimaq pembébasan, lantaran mélé teidupang malik jari sopoq kehidupan saq solahan. Araq saq teoloq-oloq, tepecut, tetaliq kadu ranté dait saq tetamaqang ojok dalem bui. Ie pade tepeléwas siq batu jangke ninggal, araq saq tepeleng kadu gergaji, dait saq tematéq kadu kléwang. Ie pade ngambar kadu kelambi saq tepiaq léman léndong dombe atao léndong bémbéq; ie pade miskin, teaniaye dait tesiksaq. Dunie niki ndéqne taoq saq pantes umaq ie pade, ie pade ngambar léq padang gurun dait léq bukit-bukit, dait ndot léq dalem goe-goe dait léq dalem loang-loang tanaq. Berembé beléqne kemenangan saq temauq siq selapuq dengan nike lantaran iman ie pade! Laguq ie pade ndéq nerimaq napi saq tejanjiqang siq Allah, séngaq Allah bedowé rencane saq solahan léq ite. Rencane-Ne nike bahwe cume bareng kance ite, ie pade gen jari sempurne. Nah, mengenai diriqte mésaq, léq sekiterte araq luwéq gati saksi! Keranaq nike, silaq ite tetéh selapuq saq nyusahang ite dait dose saq halangin ite. Dait tekun pelai léq dalem perlombaan saq tewajibang umaq ite. Silaq ite laksaneang nike siq perhatiante cume tetujuang tipaq Deside Isa Almasih, séngaq Ie saq mimpin ite léq dalem iman, dait saq jauq imante nike tipaq kesempurnean. Deside Isa tahen menderite léq kayuq salib! Ie nénten peduli bahwe ninggal léq kayuq salib nike sopoq hal saq merilaq. Deside Isa cume iling léq sukecite saq gen Ie terimaq éraq. Mangkin Ie melinggih léq sedi kanan tahte Allah. Pade inget léq Ie saq tekun nanggung penganiayean saq luar biase tipaq diriq-Ne léman pihak dengan-dengan bedose, adéq side ndaq jari lemah dait putus ase. Séngaq léq dalem perjuangande ngelawan dose, side pade ndéq uwah bejuang jangke harus numpahang daraq. Dait ndaq side lupaqang naséhat Allah niki, saq teicanin léq side jari bije-bije dowén Allah: “Bije-bije dowén Tiang, perhatiang solah-solah didikan Tuhan, dait ndaq putus ase lamun Ie peringet side. Séngaq Tuhan ngempuk sebilang dengan saq Ie kasihin, dait Ie gen didik sebilang dengan saq teakuq jari bije-bije dowé-Ne.” Side pade harus nerimaq didikan léman Allah jari sopoq perajahan léman sopoq amaq. Séngaq napi araq sopoq kanak saq ndéq uwah tempuk siq amaqne? Lamun side pade ndéq milu tehukum maraq selapuq bijene saq lain niki artine side pade ndéqne bije saq sah, laguq bije saq ndéq sah. Ite bedowé amaq léq dunie. Ie ngajah ite, dait ite hormat léq ie. Lamun maraq nike, lebih-lebih Bapa selapuq roh, pasti ite harus lebihan malik taat léq Ie adéq ite bedowé idup. Dengan toaqte saq léq dunie didik ite cume léq waktu saq araq batesne, menurut napi saq ie pade anggep solah. Laguq Allah didik ite jari kesolahante mésaq, adéq ite mauq bagian léq dalem kesucian-Ne. Mule léq waktu ite tedidik ndéqne miaq angente seneng, laguq cume miaq ite sedih doang. Laguq sesampun nike ngasilang kebenaran saq ngicanin damé léq ie pade saq tedidik. Keranaq nike, kuatang imende saq lemah dait jengkunde saq ngijik nike! Side harus tetep lampaq léq langan saq rate, adéq naénde saq démpang ndéqne kedesor, laguq malahan jari selah. Pade berusahe idup rukun kance selapuq dengan. Pade berusahe éndah jari idup suci. Séngaq ndéq araq sopoq dengan juaq bau serioq Tuhan lamun ie ndéq idup maraq nike. Jagaq adéq ndaq araq sopoq dengan juaq saq jaoqang diriqne léman rahmat Allah, adéq ndaq jangke araq saq jari maraq taletan beracun léq tengaq-tengaq side pade sehingge nimbulang kesulitan dait nyédaq luwéq dengan siq racunne. Jagaq adéq ndaq jangke araq dengan saq gawéq perbuatan saq cabul atao bedowé napsu saq rendah maraq Esau, saq jual hakne sebagé bije saq sengake, cume jari sepiring keloran. Séngaq side pade nenaoq, bahwe sesampun nike, sewaktu ie gen nerimaq berkah nike ie tetolaq, séngaq ie ndéq mauq kesempatan jari pesolah kesalaqanne, timaq ie boyaq jangke nangis. Séngaq side pade ndéq dateng tipaq gunung saq bau tekintur dait api saq begelaur, tipaq taoq saq peteng dedet, dait angin pusut; tipaq suare terompét, dait tipaq suare saq miaq ie pade saq dengah suare nike nunas, adéq ndaq malik ngeraos kance ie pade. Séngaq ie pade ndéq tahen dengah préntah saq tesampéang siq suare nike. Séngaq suare nike bebase, “Selapuq saq kintur gunung niki, ndéqne peduli binatang atao sai juaq, harus tepeléwas kadu batu jangke maté.” Luar biase gati napi saq teserioq siq dengan-dengan Israel nike jangke Musa bebase, “Tiang takut gati dait ngijik!” Sebalikne, side pade sampun dateng ojok bukit Sion dait kote Allah saq idup, nike Yerusalem saq léq sorge kance beiyu-iyu malaékatne. Side pade turut sopoq kumpulan saq meriah -- dait tipaq bije-bije saq sengake, saq aran-aranne tecatet léq sorge. Side pade parek tipaq Allah, Hakim selapuq umat manusie. Side pade hadepin roh-roh dengan saq kenaq, saq sampun tejariang sempurne. Side pade parek tipaq Deside Isa, Perantare léq perjanjian saq baru nike; side pade ngadepin ketisan daraq saq besuare kuatan léman daraq Habil. Keranaq nike, onyaq-onyaq ndaq jangke side ndéq mélé dengahang Ie saq bemanik nike. Ie pade saq ndéq mélé dengah Ie saq rauh ojok gumi dait nyampéang Manik Allah, ndéqne bau pelai. Lebih-lebih ite niki saq dengahang Ie saq bemanik léman sorge! Lamun ite ndéq mélé dengahang Ie, ndéq mungkin ite bau selamet! Léq waktu nike suare-Ne miaq gumi jari inggur. Laguq mangkin Ie bejanji, “Karing sekali, Tiang gen piaq inggur ndéqne cume gumi, laguq langit éndah.” Manik-Ne “karing sekali” nyatayang bahwe seantéro dunie saq sampun tecipteang gen tepiaq inggur dait tesingkirang, adéq saq masih cume saq ndéq bau tepiaq inggur. Keranaq nike, ite harus ngucap syukur léq Allah, séngaq ite nerimaq léman Ie sopoq kerajaan saq ndéq bau teguncang. Ite patut besyukur dait beribadah tipaq Allah siq rase hormat dait takut, maraq care saq tekayunang siq Allah. Séngaq Allahte maraq api saq ngotongang. Side pade harus tetep idup dalem kasih sopoq kance saq lain maraq semeton. Ndaq berat angende béng nyodoq dengan-dengan pendateng. Séngaq siq ngelaksaneang hal nike, ndéqne sadar araq pire dengan saq sampun nerimaq malaékat léq baléne. Pade inget léq dengan-dengan saq araq léq dalem bui, anggep diriqde éndah araq léq dalem bui bareng kance ie pade. Dait dengan-dengan saq semélé-mélé teperlakuang, side pade harus inget léq ie pade maraq side pade éndah teperlakuang maraq nike. Selapuq dengan harus nyatayang rase hormat léq janji nikahne, nike lantaranne senine-semame harus setie sopoq kance saq lainne. Dengan saq gawéq perbuatan saq cabul dait dengan saq bezinah gen teadilin siq Allah. Ndaq idupde tejariang panjak siq képéng, laguq side pade harus merase puas siq napi saq araq léq side. Séngaq Allah sampun bemanik, “Tiang tetu-tetu ndéq gen ngalurang side dait Tiang tetu-tetu ndéq gen bilin side.” Keranaq nike ite bani matur, “Tuhan nike Penulung tiang, tiang ndéq takut. Napi saq bau tepiaq siq manusie léq tiang?” Ndaq lupaq léq pemimpin-pemimpinde saq nyampéang Manik Allah tipaq side. Perhatiang berembé léq penutuq idup ie pade dait turut teladan ie pade. Deside Isa Almasih tetep pade, timaq laéq, mangkin dait jangke selaéq-laéqne. Ndaq alurang diriqde tepiaq sesat siq pengajahan-pengajahan saq ndéq keruan. Aténte harus teteguqang siq rahmat Allah, nike saq solah; ndaq lantaran aturan-aturan mengenai keloran. Dengan-dengan saq laéq taat léq aturan-aturan nike, ndéq mauq manpaatne. Ite bedowé sopoq méje taoq kurban jari ngaturang kurban tipaq Allah. Dait dengan-dengan saq ngelayanin léq dalem Kémah Tuhan, ndéqne berhak ngelorang kurban saq araq léq atas méje taoq kurban nike. Daraq binatang saq teaturang jari kurban pengampunan dose, tejauq siq imam agung ojok Ruang Mahesuci, laguq bangké binatang nike tetunuq léq luah kémah. Nike lantaranne Deside Isa éndah ninggal léq luah jebak beléq kote jari persiq umat-Ne léman dose siq daraq-Ne mésaq. Keranaq nike, silaq ite parek tipaq Ie léq luah perkémahan dait milu tehine bareng kance Ie. Séngaq léq gumi ndéq araq taoq ndot saq kekel umaq ite; ite boyaq kote saq gen dateng. Keranaq nike, siq perantare Deside Isa, ite harus tetep memuji-muji Allah; nike jari kurban syukurte tipaq Ie, saq ite aturang langan ucapan jari mulieang peséngan-Ne. Ndaq lupaq piaq hal saq solah dait saling tulung, séngaq niki kurban-kurban saq nyenengang Allah. Pade taat léq préntah pemimpin-pemimpinde, dait pade tunduk léq ie pade. Séngaq ie pade tetep merhatiang jiwende, dait ie pade harus betanggung jawab tipaq Allah. Lamun side pade taat léq ie pade, ie pade bau begawéan siq angen saq seneng; lamun ndéq, make ie pade gen begawéan siq angen saq sedih, dait hal nike ndéq gen miaq side pade untung. Pade terus do'eang tiang pade. Tiang pade yakin até nurani tiang pade bersi. Séngaq léq dalem selapuq hal tiang pade tetep mélé ngelaksaneang napi saq kenaq. Terutame sanget siq tiang tunas, adéq side pade do'eang tiang adéq Allah gelis gadingang tiang tulak ojok side. Allah sumber damé sejahtere, langan daraq perjanjian saq kekel, sampun jauq tulak léman tengaq-tengaq dengan ninggal Pengarat Agung selapuq dombe, nike Deside Isa Almasih, Junjungante Saq Mulie. Semoge Allah sumber damé sejahtere nike nyempurneang side pade siq selapuq saq solah saq side pade perluang jari ngelaksaneang pekayunan-Ne. Semoge siq perantarean Deside Isa Almasih, Allah ngelaksaneang napi saq Ie kayunang léq dalem ite. Bagi Ie kemuliean selaéq-laéqne! Amin. Tiang tunas adéq side pade réde perhatiang selapuq naséhat-naséhat tiang niki, séngaq surat tiang niki ndéqne bélo. Side pade harus nenaoq bahwe semetonte Timotius sampun lumbar. Lamun ie sampun dateng ojok tiang, laun tiang kance ie jangoq side pade. Sampéang salam tiang pade tipaq selapuq pemimpinde dait tipaq selapuq dengan-dengan saq tehususang bagi Allah. Terimaq éndah salam léman semeton-semeton léq Italia. Rahmat Allah araq bareng kance side pade. Semeton senamian, dengan-dengan saq tehususang bagi Allah saq nyebar léq seantéro dunie! Salam léman tiang, Yakub, hambe Allah dait hambe Junjungan Saq Mulie Deside Isa Almasih. Semeton senamian! Lamun side pade ngalamin macem-macem cobe, side pade harus anggep hal nike jari kebahagiean. Séngaq side pade nenaoq, bahwe ujian tipaq imande nike ngasilang ketekunan. Jagaq adéq ketekunande nike ngasilang kesempurnean, adéq side pade jari sempurne dait lengkap, ndéq kekurangan léq hal napi juaq. Lamun araq sopoq dengan léq antare side saq kekurangan hikmat, ie harus tunas léman Allah, make Allah gen ngicanin ie; séngaq léq sebilang dengan, Allah ngicanin secare murah até dait nénten ngungkit-ngungkit kesalaqanne. Laguq dengan saq nunas dalem iman, ie ndéq kanggo bimbang. Séngaq dengan saq bimbang angenne maraq umbak léq segare dait lito laté tetiup siq angin. Alurang semeton saq idupne sederhane merase bangge lantaran kedudukanne saq atas. Maraq nike éndah halne léq dengan sugih lantaran kedudukanne saq rendah, séngaq ie gen musnah maraq kembang pupaq. Sewaktu tiwoq jelo siq panasne saq keras, make pupaq nike gen jari layu sehingge roroq kembangne dait telang éndah kesolahanne. Maraq nike éndah dengan saq sugih; ie gen ancur léq waktu ie kenyeke berusahe. Bahagie dengan saq tahen sewaktu ie tecobe. Séngaq sesampun ie bau tahen léq cobe nike, ie gen nerimaq upaqne, nike mahkote kehidupan saq tejanjiqang siq Allah tipaq dengan-dengan saq ngasihin Ie. Lamun sopoq dengan mauq cobe, ndaq ie bebase, “Cobe niki datengne léman Allah!” Séngaq Allah ndéqne bau tecobe siq kejahatan, dait Ie éndah ndéq cobe sai juaq. Laguq dengan tecobe siq keméléqne mésaq, teoros dait tetipu siq keméléqne. Beterus, lamun keméléq saq jahat nike teturut, make gen datengang dose; dait lamun dose sampun masak, make kematéan saq jari akibatne. Semeton senamian saq tiang kasihin; ndaq side pade jari sesat. Selapuq hal saq solah saq teicanin dait paice saq sempurne datengne léman sorge, teturunang siq Bapa, sumber selapuq cahaye dait saq ndéq iniq berobah atao bekurang lantaran perobahan. Siq pekayunan-Ne mésaq Ie sampun jariang ite ciptean baru siq manik kebenaran, Ie ngelaksaneang nike adéq ite jari bije saq sengake léq antare selapuq mahluk ciptean-Ne. Pade perhatiang niki solah-solah, semeton senamian saq tiang kasihin! Sebilang dengan harus becat dedengah, laguq ndéqne becat bebase dait ndéqne becat gedek. Dengan saq gedek ndéqne bau ngelaksaneang saq kenaq léq arepan Allah. Keranaq nike, tetéh selapuq kebiasean saq lengé dait saq jahat. Terimaq Manik Allah setulusne léq dalem aténde, séngaq Manik nike bedowé kekuatan jari nyelametang side pade. Side pade harus jari dengan-dengan saq ngelaksaneang Manik Tuhan, ndaq cume dengah doang, sehingge siq care nike side nipu diriqde mésaq. Dengan saq dengahang Manik Allah, laguq ndéqne ngelaksaneang, nike maraq dengan saq kenyeke merhatiang ruene mésaq léq julu kesene. Sesampunne perhatiang solah-solah, ie lumbar dait langsung ngelupaqang berembé rue muene nike. Hukum Allah sempurne dait bedowé kekuatan jari merdékeang manusie. Dait dengan saq nyelidik dait pacu-pacu merhatiang dait ngelaksaneang hukum-hukum nike, dait ndéqne cume dengah doang beterus lupaq, dengan nike gen bahagie léq napi juaq saq ie laksaneang. Lamun araq sopoq dengan saq merase diriqne ngelaksaneang ibadah, laguq ie ndéq jagaq ucapanne, ie nipu diriqne mésaq; ibadahne ndéq araq manpaatne. Ibadah saq murni dait sejati menurut Allah Bapante: Nulung anak-anak iwoq dait bebalu-bebalu saq menderite, dait jagaq diriq mésaq adéq ndaq tesédaq siq dunie niki. Semeton-semeton tiang! Sebagé dengan saq beriman léq Deside Isa Almasih, Junjungante Saq Mulie, ndaq side pade girang béde-bédeang dengan tedasarang hal-hal lahiriah. Séngaq lamun araq sopoq dengan sugih ngengadu ali-ali emas dait kelambi solah dateng ojok perkumpulande, beterus dateng éndah sopoq dengan miskin saq ngengadu kelambi roék, make side pade lebih hormat léq dengan saq bekelambi solah nike. Side pade bebase léq ie, “Silaq pelungguh melinggih léq kursi saq paling solah niki,” laguq léq dengan saq miskin, side pade bebase, “Nganjeng léq to!” atao “Tokol léq bawaq dékét naén tiang.” Siq perbuatan maraq nike, side pade miaq perbédean léq dalem angen side pade dait jari hakim siq pikiran-pikiran saq jahat. Inget, semeton-semeton saq tiang kasihin! Dengan saq miskin léq dunie niki tepiléq siq Allah adéqne jari dengan saq sugih léq dalem iman dait jari ahli waris Kerajaan saq sampun tejanjiqang siq Allah tipaq dengan-dengan saq ngasihin Ie. Laguq malahan side menghine dengan miskin, padahal dengan-dengan sugih nike saq nindes side pade dait jauq side pade ojok pengadilan! Ie pade saq menghine peséngan saq paling tehormatin saq side pade terimaq léman Allah. Side pade ngelaksaneang saq kenaq, lamun side pade ngelaksaneang hukum utame saq tetulis léq Kitab Suci niki, “Kasihin sepadende manusie, pade maraq side ngasihin diriqde mésaq.” Laguq lamun side pade béde-bédeang dengan tedasarang hal-hal lahiriah, make side piaq dose, dait hukum Allah nyatayang bahwe side pade ngelanggar hukum. Séngaq sai juaq saq turut hukum nike, laguq ngeréméhang sopoq bagian léman hukum nike, ie salaq tipaq selapuqne. Séngaq Ie saq bemanik, “Ndaq bezinah,” Ie éndah saq bemanik, “Ndaq nyematéq.” Jari lamun side pade ndéq bezinah, laguq nyematéq make side pade éndah ngelanggar hukum. Jari side pade harus bebase dait bekelakuan maraq dengan saq gen teadilin menurut hukum Allah saq merdékeang manusie. Séngaq bagi dengan saq ndéq nyatayang belas kasihan, hukumanne ndéq gen kadu belas kasihan éndah, laguq dengan saq bedowé belas kasihan ndéq gen takut ngadepin penghakiman! Semeton senamian! Napi manpaatne dengan bebase, “Tiang dengan saq bedowé iman,” lamun ie ndéq buktiang siq perbuatanne? Napi bau iman saq maraq nike nyelametang ie? Seumpame sopoq semeton mame atao nine merluang kelambi dait ndéq bedowé keloran saq cukup sebilang jelo. Napi manpaatne side pade bebase léq ie, “Silaq lumbar, kadu kelambi saq anget dait bekelor jangke besuh!”, laguq side pade ndéq béng ie napi saq jari keperluan awakne? Maraq nike éndah iman, lamun ndéqne tenyatayang siq perbuatan, make iman nike setetune maté. Sang araq dengan saq bebase, “Léq side araq iman dait léq tiang araq perbuatan.” Tiang gen bejawab, “Petitoqang léq tiang imande laguq ndaq siq perbuatan, dait tiang gen petitoqang iman tiang siq perbuatan tiang.” Side pade percaye bahwe Allah cume sopoq? Nike solah! Laguq sétan-sétan éndah percaye léq hal nike dait ie pade ngijik siq takutne! Hai side pade saq bebel! Napi perlu tebuktiang léq side bahwe ndéq araq manpaatne bedowé iman lamun ndéq tebarengin siq perbuatan? Serioq Ibrahim leluhurte! Ie tejariang kenaq léq arepan Allah lantaran perbuatanne, sewaktu ie ngaturang bijene, Ishak tipaq Allah, léq atas méje taoq kurban. Dalem hal niki sampun jelas bahwe iman harus tenyatayang siq perbuatan dait siq perbuatan nike iman jari sempurne. Hal nike sesuai ayat Kitab Suci, “Ibrahim percaye léq Allah, dait lantaran imanne nike make ie tejariang kenaq léq arepan Allah.” Keranaq nike Ibrahim tesebut, “Sahabat Allah.” Mangkin sampun jelas, bahwe dengan tejariang kenaq léq arepan Allah, lantaran napi saq telaksaneang siq dengan nike, dait ndéqne cume lantaran imanne doang. Serioq éndah Rahab, dengan nine pelacur nike. Ie tejariang kenaq léq arepan Allah lantaran perbuatanne, sewaktu ie nerimaq mate-mate Israel léq dalem baléne dait nulung ie pade pelai nyelametang diriq liwat langan saq lain. Jari, maraq awak saq ndéq bedowé roh, nike awak saq maté, maraq nike éndah iman, lamun ndéq tebarengin siq perbuatan, iman nike maté. Semeton senamian! Ndaq léq antare side luwéq saq mélé jari guru. Side pade nenaoq bahwe ite saq jari guru gen teadilin beratan tebanding dengan lain. Ite selapuq kereng miaq kesalaqan. Laguq dengan saq ndéq uwah miaq kesalaqan siq ucapan-ucapanne, ie dengan saq sempurne, saq bau nguasein selapuq awakne. Ite masang plébék léq biwih jaran adéq ie mélé turut keméléqte, make ite bau ngatur selapuq awak jaran nike. Bait éndah conto sopoq kapal. Timaq kapal nike beléq gati dait tedorong siq angin saq keras, laguq ie teatur siq kemudi saq kodéq gati, menurut keméléq jurumudi. Maraq nike éndah élaqte, timaq élaq nike bagian awak saq kodéq, laguq ie bau nyombongang diriq mengenai hal-hal saq beléq-beléq. Cobaq serioq, gawah saq beléq bau tesedut siq api saq kodéq! Élaq éndah pade maraq api. Léq antare bagian-bagian awakte, élaq nike sumber kejahatan saq bau piaq najis selapuq awak dait ngidupang rode kehidupan, élaq nike mésaq tenyalaqang siq api nerake. Segale macem binatang buas, kedit, binatang saq ngumang dait empaq, bau tepiaq isah, dait sampun éndah tepiaq isah siq manusie. Laguq élaq manusie ndéqne bau tepiaq isah siq sai juaq. Élaq nike jahat dait ndéqne bau tekuasein; penoq siq racun saq nyematéq. Ite kadu élaq nike jari ngucapang syukur léq Tuhan dait Bapante, laguq éndah jari ngutuk sepade manusie, saq sampun tecipteang menurut gambar Allah. Léman biwih saq pade sugul ucapan-ucapan berkah dait éndah ucapan-ucapan kutukan. Sepatutne ndéqne maraq nike. Napi araq pengembulan nyugulang aiq due macem, aiq tawah kance aiq pait léman pengembulan saq pade? Semeton tiang senamian! Lolo are ndéqne bau ngasilang buaq Zaitun, dait lolo anggur ndéqne bau éndah ngasilang buaq are. Pengembulan saq aiqne paéq ndéqne bau éndah nyugulang aiq saq tawah. Sai léq antare side pade saq bijaksane dait bebudi? Ie harus nyatayang hal nike langan perbuatanne saq solah saq tebarengin siq kebijaksanean saq dateng léman até saq lemah lembut. Laguq lamun side pade talon até dait mentingang diriqde mésaq, ndaq side pade banggeang diriq dait ndaq beduste ngelawan kebenaran. Kebijaksanean maraq nike ndéqne berasal léman sorge. Ie berasal léman dunie, dait napsu manusie, dait léman sétan. Léq mbé araq talon até dait mentingang diriq mésaq, léq derike éndah araq keributan dait segale macem perbuatan saq jahat. Laguq kebijaksanean saq asalne léman atas, pertame-tame murni, beterus demen bedamé, gerasaq, penurut, penoq belas kasihan dait ngasilang perbuatan-perbuatan saq solah, ndéq bepihak dait ndéq munapik. Buaq-buaq léman kebenaran nike tesawur léq dalem damé umaq dengan saq demen bedamé. Léman mbé asalne selapuq pesiaqan dait pegejuhan léq antare side? Tekan nike dateng léman hawe napsu side saq saling bejuang léq dalem awakde? Side pade bedowé keméléq, laguq ndéq mauq napi saq jari keméléqde nike, terus side pade nyematéq! Side pade talon até, laguq side pade éndah ndéq mauq napi saq side pade boyaq, terus side pade betungkasan dait besiaq. Side pade ndéq mauq napi-napi lantaran side pade ndéq bedo'e. Dait timaq side pade sampun bedo'e, side pade ndéq nerimaq, séngaq side pade salaq bedo'e, séngaq napi saq side pade tunas nike gen side pade bisang jari muasang hawe napsunde. Side pade dengan saq ndéq setie! Napi side pade nenaoq bahwe lamun side pade bebatur kance dunie, make side pade jari musuh Allah? Jari, sai-sai saq mélé jari sahabat dunie niki, ie jariang diriqne musuh Allah. Ndaq paran bahwe Kitab Suci ndéq bedowé alasan nyatayang, “Roh saq tetoloq siq Allah léq dalem diriqte, nike roh saq keras keméléqne.” Timaq maraq nike, rahmat Allah saq teicanin tipaq ite kuatan tebanding keméléq rohte nike. Keranaq nike léq dalem Kitab Suci tetulis éndah, “Allah nentang dengan saq sombong, laguq sebalikne Ie ngasihin dengan saq rendah até.” Keranaq nike, pade tunduk léq Allah dait pade lawan Belis, make Belis gen pelai léman side pade. Rapetang diriqde léq Allah, dait Allah éndah gen ngerapetin side pade. Persiq imende, side pade saq bedose! Dait suciang aténde, side pade saq due angen! Pade sadar léq sengsarende, bedukecite dait nangis éroq aséq; keréréqande harus berobah jari tangisan, dait sukecitende jari dukecite! Pade rendahang diriq léq arepan Tuhan, make Tuhan gen ninggiang side pade. Semeton senamian, ndaq saling pitnah. Dengan saq pitnah semetonne, ie ngewade hukum dait ngadilin ie. Dait lamun side pade ngadilin hukum, nike artine side pade ndéq taat léq hukum-hukum nike, laguq jari hakimne. Padahal cume sopoq saq berhak miaq hukum tipaq manusie dait ngadilin manusie, nike Allah saq bekuase nyelametang dait binaseang. Jari, sai setetune side sehingge side mélé ngadilin sepade manusie? Semeton-semeton saq bebase, “Jelo niki atao lémaq tiang pade gen lumbar ojok sopoq kote, dait ndot léq derike setaun ngonéqne bedagang dait boyaq képéng.” Padahal napi saq gen telaksane léq kehidupande lémaq, side mésaq éndah ndéq gen nenaoq! Idup side pade cume maraq pendet saq penggitan seberaq doang, beterus telang. Seharusne side pade bebase maraq niki, “Lamun Tuhan ngijinang, tiang pade gen idup dait ngelaksaneang hal saq maraq niki atao hal saq maraq nike.” Laguq mangkin side pade banggeang diriq léq dalem kesombongande, selapuq kesombongan saq maraq nike salaq. Keranaq nike, dengan saq nenaoq napi saq solah saq harus ie laksaneang laguq ndéqne laksaneang, dengan nike bedose. Mangkin umaq side pade, dengan-dengan sugih! Side pade harus nangis dait ngerung éroq aséq lantaran sengsare saq gen nimpe side pade! Kesugihande sampun berek. Kelambinde sampun tekaken siq tembréné. Emas dait perakde sampun bekarat; karatne gen jari saksi ngelawan side pade dait gen ngaken awakde jangke bis maraq api. Side pade sampun ngumpulang harte léq ahir jaman. Side pade ndéq bayah upaq dengan-dengan saq begawéan léq lendangde. Mangkin dengahang kuihan ie pade! Dengan-dengan saq ngumpulang hasil lendangde, bekuih nunas tulung, dait kuihan ie pade sampun dateng tipaq Allah, Tuhan penguase alam semeste. Side pade sampun idup méwah dait ngeraseang kesenengan dunie niki. Side pade sampun muasang aténde maraq dengan saq kenyeke mokohang diriq jari jelo penampahan. Side pade ngukum dait nyematéq dengan-dengan saq kenaq, dait ie pade ndéq ngelawan side pade. Keranaq nike, pade sabar semeton-semeton tiang, jangke Tuhan rauh. Pade serioq berembé sabarne sopoq petani ngantih jangke tanaqne ngasilang hasil saq mahel ajine. Ie sabar ngantih ujan saq penembéq dait ujan saq penutuq. Side pade éndah harus sabar dait teguqang angende, séngaq jelo kerauhan Tuhan sampun rapet. Ndaq pade ngerumun dait saling nyalahang, adéq side pade ndéq tehukum siq Allah. Inget! Hakim sampun rapet, siep gen rauh. Semeton senamian, pade turut teladan penderitean dait kesabaran pare nabi saq sampun bebaos siq peséngan Tuhan. Ie pade tesebut bahagie séngaq ie pade tekun. Side pade sampun dengah mengenai ketekunan Ayub, dait side pade nenaoq berembé ahirne Tuhan ngicanin ie berkah. Séngaq Tuhan nike Mahe Pengasih dait Mahe Penyayang. Laguq saq terutame gati: Ndaq besumpah, timaq demi langit, atao demi gumi, atao demi napi juaq. Lamun mule tetu, badaq tetu atao lamun ndéq, badaq ndéq, adéq side ndéq tehukum siq Allah. Lamun léq antare side araq saq kenyeke menderite, ie harus bedo'e. Lamun araq saq seneng, ie harus benyanyi memuji Allah. Lamun araq saq sakit, ie harus ngempoh pemimpin-pemimpin jemaah. Dait pemimpin-pemimpin nike harus do'eang dengan saq sakit nike dait ngolésang minyak siq peséngan Tuhan. Do'e saq asalne léman iman gen nyelametang dengan sakit nike dait Tuhan gen nyelahang ie; dait lamun ie sampun piaq dose, make dosene nike gen teampunin. Keranaq nike, side pade harus saling ngakuq dose dait saling do'eang, adéq side pade teselahang. Do'e dengan saq kenaq lamun siq yakin tedo'eang, beléq gati kuasene. Elia pade-pade manusie maraq ite. Ie bedo'e pacu-pacu adéqne ndéq turun ujan, make ujan ndéqne turun sengonéq telu setenge taun. Sesampun nike ie bedo'e malik, beterus langit nurunang ujan sehingge tanaq bau ngasilang malik. Semeton-semeton tiang! Lamun léq antare side araq malik sopoq dengan saq nyimpang léman kebenaran, beterus sopoq dengan saq lain miaq dengan nike tulak tipaq Allah, side pade harus nenaoq bahwe: Dengan saq miaq dengan bedose bebalik léman langanne saq sesat, ie nyelametang jiwe dengan saq bedose nike léman kematéan dait segah dengan piaq dose malik. Silaq ite besyukur léq Allah, Bapa Junjungante Saq Mulie Deside Isa Almasih! Lantaran rahmat-Ne saq beléq gati, Ie ngicanin idup saq baru tipaq ite, siq care ngidupang malik Deside Isa Almasih léman tengaq-tengaq dengan ninggal. Hal nike ngebéng ite harepan saq pasti. Ite beharep jari nerimaq sopoq bagian saq ndéq bau binase saq ndéq bedowé cacat cele dait saq ndéq layu, saq tesimpen léq sorge umaq side. Séngaq side pade beriman léq Allah, Ie gen jagaq side pade siq kuase-Ne, jangke side pade nerimaq keselametan saq sampun siep tenyatayang léq ahir jaman éraq. Pade besukecite siq hal nike, timaq mangkin sementare waktu side pade harus bedukecite lantaran side pade ngalamin macem-macem cobe. Maksut selapuqne nike jari buktiang kemurnian iman side pade. Emas saq bau séde doang, teuji kadu api. Maraq nike éndah iman side pade saq jaoq mahelan ajine léman emas, harus teuji éndah, sehingge side pade gen tepuji dait tehormatin dait temulieang léq jelo Deside Isa Almasih rauh malik. Side pade ngasihin Ie, timaq side pade ndéq uwah serioq Ie. Dait side pade percaye léq Ie timaq mangkin side pade ndéq serioq Ie. Keranaq nike side pade gembire séngaq sukecite saq mulie dait ndéq bau teucapang. Séngaq side pade sampun dateng léq tujuan imande, nike keselametan jiwende. Keselametan niki saq teteliti dait teselidik siq pare nabi, dait ie pade sampun benubuat mengenai rahmat saq tesedieang siq Allah tipaq side. Ie pade selidik berembé dait piran hal nike gen telaksane, saq temaksut siq Roh Almasih saq araq léq dalem diriq ie pade, nike Roh saq sendéqmanne ngebéng kesaksian mengenai selapuq penderitean saq harus tealamin siq Almasih dait mengenai selapuq kemuliean saq gen telaksane sesampun nike. Tipaq nabi-nabi nike, Allah sampun nyatayang bahwe napi saq ie pade laksaneang -- nike hal-hal saq mangkin niki side pade dengah léman ie pade siq nyampéang Kabar Solah tipaq side pade siq perantarean kuase Roh Allah saq teturunang léman sorge -- ndéqne jari kepentinganne mésaq, laguq jari ngelayanin side. Malahan malaékat-malaékat éndah melét wikan kabar saq ie pade sampéang nike. Keranaq nike, pade siepang pikirande dait waspade dait beharep sepenoqne léq rahmat saq gen teicanin tipaq side léq waktu Deside Isa Almasih rauh éraq. Idup sebagé bije-bije saq taat léq Allah. Ndaq side turut selapuq hawe napsu saq nguasein side pade léq waktu side pade ndéqman kenal kance Allah. Sebalikne, side pade harus suci léq dalem selapuq saq side pade laksaneang, pade maraq Allah saq manikang side pade nike suci. Séngaq araq tetulis, “Side harus suci, séngaq Tiang suci.” Side pade nyebut Allah nike Bapa, nike Allah saq hakimin manusie setimpal kance perbuatanne sopoq-sopoq ndéqne béde-bédeang dengan. Keranaq nike sengonéq side pade masih araq léq dunie niki, side pade harus idup takut léq Ie. Séngaq side pade nenaoq bahwe side pade sampun tetebus léman kehidupande saq sie-sie saq tewarisang siq leluhurde. Ie nebus side ndéq kadu barang-barang saq gen binase maraq emas atao perak, laguq siq daraq saq mahel, nike daraq Almasih mésaq, saq jari maraq anak dombe saq ndéq bedowé cacat cele saq tekurbanang tipaq Allah. Almasih sampun tepiléq siq Allah sendéqman dunie tecipteang, laguq baruq tenyatayang léq jaman ahir niki demi side. Langan Almasih nike side pade percaye léq Allah saq sampun ngidupang Ie léman ninggal dait saq mulieang Ie, sehingge imande dait pengharepande tetujuang tipaq Allah. Side pade sampun nyuciang diriq lantaran side pade taat léq kebenaran, sehingge side pade bau ngasihin selapuq semeton secare tulus ihlas. Keranaq nike, side pade harus saling kasihin sopoq kance saq lainne siq sepenoq angen. Séngaq mangkin side pade sampun tebijeang malik ndéqne léman binéq manusie saq bau binase, laguq léman binéq saq ndéq binase, nike Manik Allah saq idup dait saq kekel. Dalem Kitab Suci tetulis maraq niki, “Selapuq umat manusie maraq pupaq, dait selapuq kemulieanne maraq kembang pupaq. Pupaq jari layu, kembang éndah jari roroq, laguq manik Tuhan kekel selaéq-laéqne.” Manik nike Kabar Solah saq sampun tesampéang tipaq side. Keranaq nike, tetéh léman diriqde selapuq saq jahat; selapuq tipu muslihat dait segale macem kemunapikan, talon até, dait pitnah. Side harus jari maraq bebéaq saq baruq tebijeang saq tetep bedak siq susu saq murni dait saq rohani. Siq care nike side pade gen jari sayan beléq dait nerimaq keselametan. Side tetu-tetu sampun ngeraseang mésaq bahwe Tuhan nike solah. Keranaq nike, silaq parek tipaq Tuhan, batu saq idup. Nike batu saq tetetéh siq manusie, laguq saq tepiléq dait beraji léq arepan Allah. Side pade batu-batu saq idup. Keranaq nike side pade tekadu éndah jari penganjeng gedéng rohani, dait side pade jari imam-imam suci, saq ngaturang kurban rohani saq nyenengang Allah langan Deside Isa Almasih. Séngaq léq dalem Kitab Suci tetulis maraq niki, “Setetune Tiang noloq léq Sion sopoq batu saq utame, saq tepiléq dait beraji; dait dengan saq percaye léq Ie ndéq gen teperilaq.” Batu nike beraji léq side pade saq percaye. Laguq léq dengan-dengan saq ndéq percaye, berlaku ayat-ayat Kitab Suci niki, “Batu saq ndéq tekadu siq tukang-tukang bangunan nike, sampun jari batu saq paling utame,” dait, “Batu nike saq gen miaq dengan kedampes, batu saq miaq dengan geriq.” Ie pade kedampes lantaran ie pade ndéq taat léq Manik Allah. Maraq nike sampun tetentuang siq Allah mengenai ie pade. Laguq side pade bangse saq tepiléq, imam-imam saq ngelayanin raje, bangse saq suci, umat dowén Allah mésaq. Allah miléq side pade dait ngemanikang side pade sugul léman taoq saq peteng jari tame ojok cahaye-Ne saq menah tandur, siq maksut adéq side pade nyampéang berite mengenai karye-karye-Ne saq luar biase. Laéq side pade ndéqne umat Allah, laguq mangkin side pade sampun jari umat Allah. Laéq side pade ndéq teperiak siq Allah, laguq mangkin side pade nerimaq belas kasihan-Ne. Semeton senamian saq tiang kasihin! Side pade jari dengan pendateng dait musapir léq dunie niki. Keranaq nike tiang naséhatin side pade adéq ndaq turut keméléq tabiat manusie saq beperang ngelawan jiwe. Side pade harus bedowé kelakuan saq solah léq tengaq-tengaq dengan saq ndéq kenal Allah, sehingge lamun ie pade pitnah side pade teparan jari dengan jahat, ie pade bau serioq léman perbuatan side saq solah, sehingge ie pade gen mulieang Allah léq jelo kerauhan Tuhan. Lantaran Tuhan, side pade harus taat tipaq sebilang manusie saq jari penguase; tipaq raje saq jari penguase paling utame, atao tipaq pejabat pemréntah saq tepiléq siq raje jari ngukum dengan saq gawéq jahat dait hormatin dengan saq ngelaksaneang hal saq solah. Séngaq Allah kayun adéq siq perbuatan-perbuatan side saq solah side pade tungkem biwih dengan saq bodo. Side pade harus idup maraq dengan merdéke, laguq ndaq kadu kemerdékeande nike jari ngilipang kejahatan, laguq pade idup sebagé hambe Allah. Pade hormatin selapuq dengan, kasihin semeton-semetonde, takut tipaq Allah, dait hormatin raje. Semeton senamian saq jari hambe, pade tunduk léq majikande sehormat-hormatne; ndéqne cume tipaq ie pade saq tulus angenne dait gerasaq, laguq éndah tipaq ie pade saq kejem. Séngaq, nike rahmat Allah, lamun side pade lantaran sadar léq pekayunan Allah, sabar menderite lantaran perlakuan saq ndéq adil. Séngaq napi pantes tepuji lamun side pade menderite hukuman saq seharusne side pade terimaq lantaran kesalaqan? Laguq lamun side pade menderite lantaran ngelaksaneang saq kenaq, nike aranne rahmat. Nike lantaranne Allah manikang side pade. Séngaq Almasih mésaq sampun menderite demi side pade, dait siq care nike Ie ngicanin side pade sopoq teladan saq harus side pade turut. Ie nénten uwah piaq dose, dait tipu muslihat nénten uwah sugul léman cangkem-Ne. Sewaktu Ie tesumpaq senaq, Ie nénten bebales nyumpaq senaq. Sewaktu Ie menderite, Ie nénten ngancem; Ie cume nyerahang pelekare-Ne léq Allah, saq ngadilin secare adil. Almasih mésaq saq nanggung dose-dosente léq dalem rage-Ne léq atas kayuq salib, adéq ite saq sampun bébas léman kuase dose, idup bagi kebenaran. Leket-leket saq araq léq Almasih nike saq nyelahang side pade. Laéq side pade maraq dombe saq sesat, laguq mangkin side pade sampun tulak tipaq Pengarat dait Pemeliharaq jiwende. Maraq nike éndah side pade, senine-senine harus tunduk tipaq semame adéq lamun léq antare ie pade araq saq ndéq percaye léq Manik Allah, kelakuande bau miaq ie pade jari percaye dait ndéq perlu side pade bebase napi-napi léq ie pade, séngaq ie pade serioq idupde saq soléh dait murni. Ndaq keingesande cume keingesan saq penggitan léman luah, maraq misal ngengadu potongan bulu saq macem-macem ruene, ngengadu periasan emas, atao kelambi saq mahel-mahel. Sebalikne, keingesande harus dateng léman dalem batin, budi pekerti saq lemah lembut dait tenang; nike keingesan saq kekel saq mahel ajine léq arepan Allah. Maraq niki entane dengan-dengan nine saq soléh léq jaman laéq, ie pade saq beharep léq Allah peringes diriqne siq care tunduk léq semame ie pade. Maraq nike éndah Sarah, ie taat léq Ibrahim dait nyebut ie majikanne. Mangkin side éndah jari bije-bije Sarah, lamun side pade ngelaksaneang hal-hal saq solah dait ndéq takut léq napi juaq. Dait side pade éndah, semame-semame, side pade harus idup bijaksane tipaq seninende, dait siq kesadaran bahwe ie pade kaum saq lemah. Lantaran bareng-bareng kance ie, side nerimaq rahmat Allah, nike kehidupan. Siq care nike ndéq araq saq halangin do'ende. Ahirne, side pade harus sopoq angen, saling sayang, saling kasihin kance selapuq semeton, lemah lembut, dait rendah até. Ndaq bales kejahatan siq kejahatan, atao sumpaq senaq tebales siq sumpaq senaq; sebalikne side harus bales perbuatan-perbuatan nike siq tunasang berkah léman Allah. Séngaq jari hal nike Allah ngemanikang side pade adéq side pade nerimaq berkah léman Ie. Séngaq léq dalem Kitab Suci tetulis: “Dengan saq mélé nikmatin idup dait mélé ngalamin jelo-jelo saq solah, harus jagaq biwihne adéqne ndéq ngeraosang hal-hal saq jahat, dait ndéqne ngucapang hal-hal saq duste. Ie harus jaoqang diriqne léman hal-hal saq jahat dait ngelaksaneang saq solah; ie harus pacu-pacu bejuang jari mauq perdaméan. Séngaq Tuhan tetep merhatiang dengan-dengan saq kenaq, dait Tuhan tetep mirengang do'e-do'e ie pade saq nunas tulung; laguq Tuhan ngelawan dengan-dengan saq gawéq jahat.” Sai saq mélé gawéq jahat léq side, lamun side pade rajin ngelaksaneang hal saq solah? Laguq timaq side pade harus menderite lantaran ngelaksaneang hal-hal saq solah, side pade bahagie! Ndaq takut léq sai juaq, dait ndaq kuatir. Laguq léq dalem aténde, side pade harus ngebéng penghormatan saq husus tipaq Almasih sebagé Junjungan Saq Mulie. Dait side pade harus tetep siep bejawab tipaq sebilang dengan saq beketuan mengenai pengharepan saq araq léq side. Laguq laksaneang hal nike secare lemah lembut dait hormat dait até nurani saq murni, adéq lamun side pade tepitnah lantaran side pade idup soléh léq dalem Almasih, make dengan saq pitnah nike gen jari ilaq mésaq. Solahan menderite lantaran ngelaksaneang saq solah -- lamun nike pekayunan Allah -- ketimbang menderite lantaran gawéq saq jahat. Séngaq Almasih mésaq ninggal cume sekali doang, jari selaéq-laéqne lantaran dose manusie -- Ie saq ndéq salaq, ninggal demi dengan saq salaq. Almasih ngelaksaneang hal nike adéq Ie bau bimbing side tipaq Allah. Ie tematéq léq dalem keadaan-Ne sebagé manusie, laguq teidupang malik menurut Roh. Dait dalem keadaan Roh nike, Ie lumbar beriteang Kabar Solah léman Allah tipaq roh-roh saq araq léq dalem bui: Nike roh dengan-dengan saq ndéq taat léq Allah léq jaman Nuh. Léq waktu nike siq sabar Allah ngantos ie pade betobat sengonéq Nuh miaq kapal. Cume dengan-dengan saq araq léq dalem kapal doang -- selapuqne baluq dengan -- saq teselametang léman belabur beléq nike. Peristiwe nike jari perumpamean léman baptisan saq mangkin niki nyelametang side pade. Baptisan niki ndéqne sopoq upacare jari persiq awak léman selapuq saq kotor-kotor, laguq jari petunasan tipaq Allah adéq Ie ngicanin até nurani saq murni. Baptisan nike nyelametang side pade séngaq Deside Isa Almasih sampun idup malik léman ninggal, dait sampun taék ojok sorge serte melinggih léq sedi kanan Allah. Selapuq malaékat, selapuq penguase dait selapuq kekuatan takluk léq Ie. Séngaq Almasih sampun menderite secare jasmani, side pade éndah harus kuatang diriq siq pikiran maraq nike. Séngaq dengan saq menderite secare jasmani, ie sampun engkah piaq dose. Keranaq nike, semasih araq waktu léq dunie niki side pade harus idup menurut pekayunan Allah, dait ndéqne menurut keméléq manusie. Léq waktu saq laéq, side pade sampun bégaq ngonéqne ngelaksaneang napi saq demen telaksaneang siq dengan-dengan saq ndéq kenal Allah. Léq waktu nike side pade idup turutang hawe napsu, bowos-bowosan, péste-péste jangke liwat bates, nginem-nginem dait nyembah berhale saq tebalaq. Mangkin dengan saq ndéq kenal Allah, bengaq bahwe side pade ndéq milu idup maraq ie pade dalem kehidupan saq bedose jangke liwat bates. Keranaq nike ie pade pitnah side pade. Laguq éraq ie pade harus bejawab tipaq Allah saq sampun siep ngadilin dengan saq idup dait saq ninggal. Nike lantaranne, Kabar Solah léman Allah sampun teberiteang éndah tipaq dengan-dengan ninggal. Maksutne adéq ie pade, saq sampun teadilin dalem keadaan jasmani -- maraq halne selapuq dengan gen teadilin -- siq roh bau idup menurut pekayunan Allah. Selapuq hal sampun gen tutuq, keranaq nike side pade harus nguasein diriq dait tenang, adéq side pade tao bedo'e. Léq atas selapuq nike, hal saq paling utame: Side harus pacu-pacu saling kasihin sopoq kance saq lain, séngaq kasih segah dengan piaq dose malik. Side pade harus béng nyodoq sopoq dengan dait saq lainne léq balénde, ndaq ngerumun. Sebagé pengurus saq setie léman rahmat Allah, side pade sopoq-sopoq harus kadu paice saq sampun side pade terimaq jari kepentingan side bareng-bareng. Lamun araq dengan saq ngeraos, ie harus ngeraos sebagé dengan saq nyampéang Manik Allah. Lamun araq sopoq hambe, ie harus ngelayanin siq kekuatan saq teicanin siq Allah léq ie, adéq léq dalem selapuq hal Allah temulieang langan Deside Isa Almasih. Ie saq bekuase dait patut temulieang selaéq-laéqne. Amin. Semeton senamian saq tiang kasihin, ndaq side pade bengaq siq siksaqan saq nimpe side pade sebagé ujian, maraqne sopoq hal saq luar biase telaksane léq side pade. Sebalikne, side pade harus seneng lantaran milu menderite bareng-bareng kance Almasih. Make éraq lamun kemuliean Almasih tenyatayang, side pade gen besukecite. Side pade bahagie lamun side pade tehine lantaran peséngan Almasih, séngaq Roh kemuliean, nike Roh Allah araq léq side. Keranaq nike, ndaq jangke araq sopoq dengan juaq léq antare side saq menderite lantaran ie tukang nyematéq, atao maling, atao dengan jahat, atao lantaran ie turut campur urusan dengan lain. Laguq lamun side pade menderite lantaran side pade pengiring Almasih, ndaq ilaq lantaran hal nike, laguq side pade harus mulieang Allah siq peséngan Almasih nike. Sampun dateng waktune Allah ngadilin dunie. Dait dengan-dengan saq tehususang bagi Allah saq gen teadilin bejulu. Jari, lamun Allah gen mulai léman ite, berembé jarine laun kance dengan-dengan saq ndéq percaye léq Kabar Solah léman Allah nike? “Lamun dengan-dengan saq kenaq doang sengke teselametang, lebih-lebih saq gen telaksane léq dengan-dengan saq bedose dait saq ndéq kenal Tuhan.” Keranaq nike, dengan-dengan saq menderite lantaran pekayunan Allah, harus tetep gawéq saq solah dait nyerahang jiwe ie pade tipaq Penciptene saq setie. Mangkin tipaq pare pemimpin jemaah saq araq léq antare side pade, tiang ngebéng naséhat. Tiang, sebagé dengan saq mimpin jemaah éndah, saq sampun nyaksiang mésaq selapuq kesengsarean Almasih, dait saq pade-pade mauq bagian léq dalem kemuliean saq gen tenyatayang éraq. Side pade harus bimbing dengan-dengan saq tepercayeang siq Allah léq side pade, pade maraq pengarat saq ngarat dombe-dombe. Ndaq lantaran terpakse, laguq secare ihlas, sesuai kance pekayunan Allah; ndaq lantaran side mélé boyaq keuntungan, laguq lantaran side pacu-pacu ngelaksaneang hal nike. Ndaq side pade piaq maraqne side pade mélé mréntah ie pade saq tepercayeang tipaq side pade, laguq side pade harus jari teladan umaq ie pade. Dait léq waktu Pengarat Agung nike rauh éraq, side pade gen nerimaq mahkote kemuliean saq ndéq iniq layu. Maraq nike éndah side pade, dengan-dengan bajang, side pade harus tunduk léq dengan-dengan lingsir. Side selapuq harus ngerendahang diriq dait saling ngelayanin secare rendah até. Séngaq, “Allah nentang dengan saq sombong, laguq periak léq dengan saq rendah até.” Keranaq nike, rendahang diriqde léq bawaq gading Allah saq kuat, adéq Ie ninggiang side pade lamun sampun waktune. Serahang selapuq kekuatirande tipaq Allah, séngaq Ie saq meliharaq side. Side pade harus tetep sadar dait bejage-jage, séngaq Belis nike musuhde. Ie maraq singe saq lampaq lito-laté sambil ngaum boyaq mangse jari tekaken. Lawan ie siq iman saq kuat, séngaq side pade nenaoq bahwe selapuq semetonde léq seantéro dunie éndah menderite maraq side pade. Dait Allah, sumber selapuq rahmat, saq sampun ngemanikang side léq dalem Almasih tipaq kemuliean-Ne saq kekel, gen nyempurneang, neguqang, nguatang dait ngukuhang side. Ie saq bekuase jangke selaéq-laéqne! Amin. Surat tiang saq singket niki tiang tulis tipaq side siq bantuan Silwanus, saq tiang anggep semeton seiman saq bau tepercaye. Tiang mélé ngebéng semanget léq side dait ngeyakinang side pade bahwe napi saq tiang tulis niki berite saq kenaq mengenai rahmat Allah. Side pade harus pacu-pacu percaye léq rahmat Allah nike. Semeton-semetonte léq Babilon, saq tepiléq éndah siq Allah, ngirim salam tipaq side; maraq nike éndah bije tiang Markus. Pade besalam-salaman sopoq kance saq lainne siq penoq kasih. Damé sejahtere araq bareng side selapuq saq araq léq dalem Almasih. Amin. Semeton senamian saq sampun nerimaq iman saq pade solahne kance iman tiang pade, lantaran napi saq kenaq, saq asalne léman Deside Isa Almasih, Junjungante Saq Mulie dait Juruselamette. Surat niki léman Simon Petrus, salaq sopoq hambe dait rasul Deside Isa Almasih. Rahmat dait damé sejahtere Allah melimpah tipaq side, séngaq side pade kenal kance Allah dait Deside Isa, Junjungante Saq Mulie. Selapuq hal saq bemanpaat jari idup saq soléh sampun teicanin tipaq ite siq kuase Ilahi-Ne, langan napi saq ite taoq mengenai Deside Isa Almasih saq sampun ngemanikang ite siq kuase-Ne saq mulie dait ajaip. Siq care nike Allah ngicanin ite janji-janji saq luar biase dait beraji. Siq janji-janji nike side pade bau lepas léman hawe napsu saq jahat saq nyédaq dunie niki, dait side pade nerimaq sipat ilahi. Keranaq nike, side pade harus pacu-pacu berusahe adéq side pade tetep percaye léq Almasih dait percayende nike tenyatayang siq idup saq solah. Selain idup saq solah, side pade perlu jari dengan saq bedowé penenaoq, dait selain penenaoq, side pade harus éndah tao nguasein diriq. Dait selain tao nguasein diriq, side pade harus éndah berusahe miaq diriq jari tabah ngadepin selapuq hal. Selain tabah ngadepin selapuq hal, side pade harus éndah idup menurut pekayunan Allah. Dait idup menurut pekayunan Allah harus éndah telengkapin siq kasih tipaq semeton-semeton seiman. Beterus kasihde tipaq semeton-semeton seiman harus teromboq siq kasih tipaq selapuq dengan. Lamun sipat-sipat nike araq léq side pade secare belimpah-limpah, side pade gen jari sayan rajin dait berhasil, dalem hal kenal kance Deside Isa Almasih Junjungante Saq Mulie. Laguq dengan saq ndéq bedowé sipat-sipat saq maraq nike, pikiranne kontéq, ie ndéq tao nyerioq séngaq ie lupaq bahwe dose-dosene saq laéq sampun teapus. Keranaq nike, semeton senamian, pacu-pacu berusahe adéq maksut Allah ngemanikang dait miléq diriq side pade jari sayan teguq. Lamun side pade ngelaksaneang hal nike, side pade ndéq gen murtat. Siq care nike side pade gen teicanin hak sepenoqne jari tame ojok Kerajaan saq kekel, nike Kerajaan Junjungante Saq Mulie dait Juruselamette Deside Isa Almasih. Keranaq nike, tiang tetep ingetang side pade mengenai hal nike, timaq side pade sampun nenaoq dait tetep teguq léq dalem kebenaran saq sampun side pade terimaq nike. Sengonéq tiang masih idup, tiang merase wajib ngingetang side pade mengenai hal-hal nike. Séngaq tiang nenaoq bahwe ndéqne ngonéq malik tiang gen bilin dunie niki, lantaran Junjungante Saq Mulie Deside Isa Almasih sampun nyatayang secare jelas léq tiang. Make tiang gen berusahe adéq side pade tetep inget hal-hal nike timaq tiang sampun lalo. Léq waktu tiang pade badaq side pade mengenai kuase dait kerauhan Junjungan Saq Mulie Deside Isa Almasih. Selapuq nike ndéqne dongéng-dongéng saq tepiaq siq kepinteran manusie. Keagungan Almasih nike sampun tiang pade serioq mésaq. Tiang pade serioq mésaq sewaktu Ie nerimaq kehormatan dait keagungan léman Allah Bapa. Waktu nike kedengahan suare léman Saq Mahemulie, saq bemanik léq Ie, “Niki Bije Tiang saq Tiang kasihin. Ie saq nyenengang Tiang.” Tiang pade dengah suare nike dateng léman sorge sewaktu tiang pade araq bareng kance Ie léq atas gunung saq suci nike. Keranaq nike tiang pade sayan yakin malik léq Manik Allah saq tesampéang siq pare nabi. Bagusan side pade merhatiang manik nike maraq merhatiang dilah saq besinar léq taoq saq peteng jangke tiwoq jelo, dait cahaye bintang timuq mulai besinar léq dalem aténde. Hal utame saq harus side pade taoq: Bahwe ndéq araq sopoq juaq nubuat léq dalem Kitab Suci bau tetapsirang menurut pendapet mésaq. Séngaq ndéq uwah araq nubuat saq tehasilang cume lantaran keméléq manusie. Laguq Roh Suci nguasein dengan nike jari nyampéang manik saq asalne léman Allah mésaq. Léq waktu saq laéq léq antare dengan-dengan saq tehususang bagi Allah sampun araq nabi-nabi palsu. Maraq nike éndah léq antare side gen dateng guru-guru palsu. Ie pade gen ngajahang pengajahan-pengajahan sesat, saq binaseang dengan. Dait ie pade gen tilas Penguase saq sampun nebus ie pade. Siq care nike ie pade datengang kebinasean tipaq diriqne mésaq, saq selung-selung nimpe ie pade. Timaqne maraq nike, luwéq dengan gen turut care idup guru-guru palsu nike, saq tekuasein siq hawe napsu ie pade. Dait perbuatan guru-guru nike gen miaq luwéq dengan menghine care idup saq tekayunang siq Allah. Séngaq ie pade serakah, make guru-guru palsu nike gen nyeriteang léq side pade cerite-cerite saq tekarang mésaq jari mauq keuntungan léman side pade. Laguq hukuman tipaq ie pade sampun ngonéq tesiepang, dait kebinasean saq sampun tetentuang umaq ie pade ndéq gen teundur malik. Malaékat-malaékat saq bedose éndah ndéq tebébasang léman hukuman siq Allah, laguq tetetéh ojok dalem api nerake, ie pade tetamaq ojok dalem jurang saq peteng, jari tetahen léq derike jangke jelo penghakiman. Maraq nike éndah dunie léq jaman laéq, Allah nénten menengang ie pade lepas léman hukuman. Allah datengang belabur beléq tipaq dunie dengan-dengan saq jahat léq waktu nike. Cume Nuh, dengan saq nyampéang kebenaran nike saq teselametang, bareng kance pituq dengan lainne. Pade éndah maraq kote Sodom dait Gomora: Allah musnahang kote-kote nike siq api adéqne jari sopoq peringetan saq nakutang umaq selapuq dengan saq ndéq kenal kance Allah. Laguq Ie nyelametang Lot, dengan saq soléh nike, saq menderite gati siq kelakuan dengan saq idupne turut hawe napsu lantaran ndéq taat léq hukum Allah. Léq tengaq dengan-dengan saq maraq nike, Lot saq soléh nike idup menderite batin, séngaq sebilang jelo serioq dait dengah perbuatan-perbuatan ie pade saq jahat. Jari, Tuhan wikan berembé entane nyelametang dengan-dengan saq soléh lamun ie pade mauq cobe. Dait Tuhan wikan berembé entane nahen dengan-dengan saq jahat adéqne tesiksaq léq jelo penghakiman, terutame dengan-dengan saq turut keméléq-keméléq hawe napsu ie pade saq kotor dait saq menghine kekuasean Allah. Bani gati dait sombongne guru-guru palsu nike sehingge ie pade ndéq takut-takut menghine hal-hal saq mulie. Malaékat-malaékat saq jaoq kuatan dait bekuase ketimbang guru-guru palsu nike, ndéq bani nuduh ie pade siq ucapan-ucapan saq menghine léq arepan Tuhan. Laguq guru-guru nike, ie pade maraq binatang saq ndéq bedowé akal, saq teanakang cume jari tebau dait tematéq doang. Ie pade menghine hal-hal saq ndéq ie pade taoq. Lantaran perbuatanne nike, ie pade gen tebinaseang maraq binatang-binatang gamang. Jari balesan penderitean saq ie pade piaq, ie pade gen menderite sengsare. Bagi ie pade hal saq nyenengang até nike, ngelaksaneang napi juaq léq kenjelo jari muasang keméléq awakne. Ie pade maraq dedoro dait cele, saq bowos siq hawe napsu ie pade lamun ie pade tokol bekelor dait nginem bareng-bareng kance side pade. Ie pade ndéq pendaq-pendaq piaq dose, mate ie pade penoq siq napsu zinah. Dait ie pade nipu dengan-dengan saq ndéq kuat imanne. Até ie pade sampun biase siq keserakahan. Ie pade dengan-dengan saq tekutuk. Séngaq ie pade ndéq mélé turut langan saq kenaq, make ie pade jari sesat. Ie pade turut langan saq laéq teliwatin siq Bileam, bije Beor, saq melét gati mauq képéng léman perbuatanne saq jahat. Laguq ie mauq peringetan saq keras léq kejahatanne nike, sewaktu bagalne ngeraos kadu base manusie. Make nabi nike tepaksaq adéqne engkah ngelaksaneang perbuatanne saq jogang nike. Guru-guru palsu nike maraq embulan aiq saq gero dait maraq awun-awun saq tetiup siq angin pusut. Allah sampun nyedieang umaq ie pade sopoq taoq saq peteng dedet. Ie pade ngucapang ucapan-ucapan saq sombong dait ndéq araq isine dait kadu hawe napsu saq cabul jari jauq tulak dengan-dengan saq baruq ngelepasang diriq léman dengan-dengan saq idupne sesat. Guru-guru palsu nike janjiqang kemerdékean tipaq dengan-dengan nike, laguq ie mésaq tejariang panjak siq kebiasean-kebiasean saq nyédaq manusie. Séngaq lamun dengan tekalahang siq sopoq hal, make ie hambe léman saq ngalahang ie nike. Dengan saq kenal kance Tuhan dait Juruselamette Deside Isa Almasih, ie pade sampun lepas léman kuase-kuase dunie saq miaq manusie najis. Laguq lamun sesampun nike ie tejeret malik sehingge tekalahang siq kuase-kuase nike, make keadaan dengan nike léq penutuqne lengéan malik tebanding waktu sendéqmanne. Bagusan dengan-dengan saq maraq nike ndéq uwah kenal care idup saq tekayunang siq Allah, ketimbang ie pade kenal, laguq sesampun nike ndéq mélé turut préntah-préntah suci saq teicanin tipaq ie pade. Napi saq ie pade laksaneang pade maraq pepatah niki, “Acong gen ngaken malik napi saq uwah ie utaqang”, dait, “Bawi saq uwah tepandiqang, gen begoloq malik léq dalem reraok.” Semeton senamian saq tiang kasihin! Niki surat tiang saq kedue tipaq side. Léq dalem kedue surat niki, tiang berusahe ngidupang pikiran-pikirande saq murni. Tiang anjurang adéq side pade inget léq ucapan-ucapan saq laéq tesampéang siq nabi-nabi Allah, dait léq préntah léman Junjungan Saq Mulie dait Juruselamette, saq tesampéang tipaq side langan rasul-rasul. Saq terutame harus side pade nenaoq, bahwe léq jelo-jelo penutuq gen dateng tukang-tukang oloq, nike dengan-dengan saq idup menurut hawe napsune. Maraq niki basen ie pade, “Mbé janji mengenai kerauhan-Ne nike? Bapaq-bapaq leluhurte sampun ninggal, laguq selapuq-lapuqne masih pade doang maraq waktu dunie niki tecipteang!” Ie pade sediah ndéq mélé ngaku bahwe laéq Allah cipteang langit dait gumi siq manik-Ne. Gumi Ie cipteang léman aiq, dait siq aiq; dait siq aiq éndah -- nike aiq léman belabur saq beléq -- dunie saq laéq nike temusnahang. Laguq langit dait gumi saq araq mangkin niki tepeliharaq siq Manik Allah, éraq nike éndah temusnahang siq api. Mangkin langit dait gumi masih tepeliharaq jangke dateng jelone dengan-dengan saq ndéq kenal Tuhan tehukum dait tebinaseang. Laguq semeton-semeton tiang saq tiang kasihin, ndaq side lupaq léq sopoq hal niki, bahwe bagi Tuhan, sejelo ndéq araq bédene kance siyu taun -- dait siyu taun pade maraq sejelo. Tuhan nénten lupaq ngicanin napi saq sampun Ie janjiqang timaq araq saq beranggepan maraq nike. Sebalikne, Ie sabar léq side pade, séngaq Ie nénten kayun sopoq dengan juaq saq binase. Allah kayun adéq selapuq dengan betobat léman dose-dosene. Laguq jelo kerauhan Tuhan gen rauh maraq maling. Léq jelo nike, langit gen musnah siq suare saq dahsyat, dait selapuq saq araq léq langit gen bis julat, dait gumi kance selapuq saq araq léq dalemne gen musnah. Jari, lamun selapuqne nike gen teancurang siq care saq maraq nike, berembé sepatutne side pade harus idup suci dait soléh, side pade saq kenyeke ngantih dait miaq kerauhan jelo Allah sayan becat. Séngaq léq jelo nike langit gen bis julat, dait selapuq saq araq léq dunie gen anyong lantaran panasne. Laguq ite ngantih napi saq sampun tejanjiqang siq Allah, nike langit saq baru dait gumi saq baru, léq derike taoqne kebenaran. Keranaq nike, semeton senamian saq tiang kasihin, sementare side pade ngantih jelo nike, pade berusahe pacu-pacu jari idup suci dait ndéq bedowé cacat cele léq arepan Allah, dalem perdaméan kance Ie. Anggep kesabaran Tuhante jari kesempatan saq teicanin tipaq side adéq bau selamet. Paulus, semetonte saq ite kasihin, sampun nulis saq maraq nike éndah tipaq side pade. Ie nulis hal nike siq kebijaksanean saq teicanin siq Allah tipaq ie. Léq dalem selapuq suratne, Paulus tetep nulis mengenai hal nike. Mule araq pire hal saq sengke tepahamin léq dalem surat-suratne nike. Dait hal nike saq teputer-balik siq dengan-dengan saq ndéq taoq napi-napi dait saq ndéq teguq imanne. Hal nike ndéq miaq bengaq, séngaq bagian-bagian saq lain léman Kitab Suci tepiaq maraq nike éndah siq ie pade. Napi saq ie pade laksaneang nike cume datengang kebinasean tipaq diriqne mésaq. Laguq side pade, semeton senamian saq tiang kasihin, side pade sampun nenaoq mengenai hal nike. Keranaq nike, waspade adéq ndaq jangke side pade teoros ojok dalem kesesatan dengan-dengan saq ndéq kenal hukum, sehingge keyakinan side pade telang. Side pade harus sayan kuat léq dalem rahmat dait dalem hal kenal kance Deside Isa Almasih, Junjungante Saq Mulie dait Juruselamette. Bagi Ie kemuliean dait kehormatan, mangkin dait jangke selaéq-laéqne! Amin. Isi surat niki mengenai Manik saq ngicanin idup, nike Manik saq sampun araq léman penembéq. Tiang pade sampun dengah ie dait serioq mésaq. Tiang pade sampun perhatiang dait negel ie siq ime tiang pade. Idup nike sampun tenyatayang, dait tiang pade sampun serioq ie. Keranaq nike tiang pade ngebéng kesaksian mengenai hal nike. Tiang pade beriteang léq side pade mengenai idup sejati dait kekel, saq araq bareng Bapa, dait saq sampun tenyatayang tipaq tiang pade. Napi saq sampun tiang pade serioq dait dengah, nike éndah saq tiang pade beriteang tipaq side pade, adéq side pade bareng kance tiang pade éndah, idup akrab kance Bapa dait kance Bije-Ne, nike Deside Isa Almasih. Tiang pade nulis niki adéq angente pacu-pacu gembire. Niki berite saq sampun tiang pade dengah léman Almasih, dait saq tiang pade dait saq tiang pade sampéang tipaq side pade: Allah nike cahaye, dait léq Ie tetu-tetu ndéq araq saq peteng. Lamun ite bebase bahwe ite idup akrab kance Allah, padahal ite idup léq dalem saq peteng, make ite beduste siq ucapan-ucapan dait siq perbuatan. Laguq lamun ite idup léq dalem cahaye, maraq Allah araq léq dalem cahaye, make ite idup akrab, rukun sopoq kance saq lainne, dait daraq Deside Isa Almasih, Bije-Ne nike, nyuciang ite léman selapuq dose. Lamun ite bebase bahwe ite ndéq bedose, ite nipu diriqte mésaq; dait kebenaran ndéq araq léq dalem ite. Laguq lamun ite ngaku dose-dosente léq Allah, make Ie setie dait adil, sehingge Ie gen ngampunin dose-dosente dait nyuciang ite léman selapuq kejahatan. Laguq lamun ite bebase bahwe ite ndéq bedose, make setetune ite anggep Allah jari penduste, dait hal nike nyatayang bahwe Manik-Ne ndéq araq léq dalem aténte. Bije-bije tiang! Tiang tulis surat niki tipaq side pade adéqde ndéq piaq dose. Laguq lamun araq saq piaq dose, make ite bedowé sopoq perantare léq arepan Bapa, nike Deside Isa Almasih saq adil. Dait langan Ie, ite bau tedaméang léman selapuq dose-dosente, dait ndéqne umaq dose-dosente doang, laguq éndah umaq dose-dose seantéro dunie. Niki tandene bahwe ite kenal kance Allah, nike lamun ite taat léq préntah-préntah-Ne. Dengan saq bebase, “Tiang kenal Allah,” laguq ndéq taat léq préntah-préntah-Ne, dengan nike penduste, dait kebenaran ndéq araq léq dalem aténe. Laguq dengan saq taat léq Manik Allah, make kasih tipaq Allah sempurne gati léq dengan nike. Siq care nike ite nenaoq bahwe ite idup léq dalem Allah. Sai-sai saq bebase bahwe ie idup léq dalem Allah, ie harus idup pade maraq care Almasih idup. Semeton senamian saq tiang kasihin! Saq tiang tulis niki ndéqne préntah saq baru. Niki préntah saq laéq saq sampun tesampéang ojok side sewaktu side baruq percaye léq Almasih. Nike Manik léman Allah saq sendéqmanne sampun side pade dengah. Timaqne maraq nike, préntah saq tiang tulis niki baru éndah. Séngaq kebenaranne nyate léq dalem Almasih dait léq diriq side pade. Séngaq peteng kenyeke telang dait cahaye saq kenaq mulai besinar. Dengan saq bebase bahwe ie araq léq dalem cahaye laguq dengan nike masih meriq léq semetonne, make dengan nike masih araq léq dalem peteng jangke mangkin. Dengan saq ngasihin semetonne, ie idup léq dalem cahaye, sehingge léq ie ndéq araq hal-hal saq miaq dengan lain jari sesat. Laguq dengan saq meriq léq semetonne, ie araq léq dalem peteng. Ie idup léq dalem peteng, dait ndéq nenaoq ojok mbé aningne, séngaq peteng nike miaq penentengne jari bute. Tiang nulis tipaq side, hai kanak-kanak, séngaq dosende sampun teampunin lantaran peséngan Almasih. Tiang nulis tipaq side, hai bapaq-bapaq, séngaq side sampun kenal kance Ie saq sampun araq léman penembéqne. Tiang nulis tipaq side, dengan-dengan bajang, séngaq side pade sampun ngalahang Si Jahat. Tiang nulis tipaq side, hai kanak-kanak, séngaq side pade kenal kance Bapa. Tiang nulis tipaq side, hai bapaq-bapaq, séngaq side pade sampun kenal kance Ie, saq sampun araq léman penembéqne. Tiang nulis tipaq side, hai dengan-dengan bajang, séngaq side pade kuat dait Manik Allah araq léq dalem aténde, dait side pade sampun ngalahang Si Jahat. Ndaq side ngasihin dunie niki, atao napi juaq saq araq léq dalem dunie niki. Lamun side pade ngasihin dunie, make kasih tipaq Bapa ndéq araq léq side pade. Séngaq selapuq saq araq léq dalem dunie niki -- keméléq tabiat manusie dait saq temelétang siq penenteng dait kesombongan idup -- selapuqne nike hal-hal saq asalne ndéqne léman Bapa, laguq léman dunie. Dunie dait selapuq keméléqne kenyeke telang. Laguq dengan saq turut pekayunan Allah, tetep idup jangke selaéq-laéqne. Bije-bije tiang, niki jaman ahir! Sendéqmanne sampun tebadaq tipaq side bahwe penentang Almasih gen dateng; dait mangkin sampun araq luwéq dengan saq nentang Almasih. Nike tandene bahwe ahir jaman sampun rapet. Mule ie pade dengan-dengan saq asalne léman ite, laguq ie pade ndéqne bagian léman ite, séngaq lamun ie pade léman ite, pasti ie pade tetep bareng-bareng kance ite. Laguq ie pade bilin ite, adéqne nyate bahwe ie pade selapuq mule ndéqne bagian léman ite. Laguq side pade sampun nerimaq paice léman saq Mahesuci, dait side pade selapuq sampun nenaoq. Jari, tiang nulis niki tipaq side pade ndéqne lantaran side pade ndéq kenal kebenaran, laguq malahan lantaran side pade sampun kenal hal nike, dait side pade éndah nenaoq bahwe ndéq araq duste saq asalne léman kebenaran. Sai saq beduste nike? Saq beduste nike dengan saq nilas bahwe Deside Isa nike Almasih. Dengan nike penentang Almasih, ie ndéq ngakuq Bapa dait Bije saq asalne léman Allah. Dengan saq ndéq ngakuq Bije saq asalne léman Allah, artine ndéq nerimaq Bapa éndah. Dait dengan saq ngakuq Bije saq asalne léman Allah, artine nerimaq Bapa éndah. Keranaq nike, berite saq sampun side pade dengah léman penembéq, harus side pade jagaq pacu-pacu léq dalem aténde. Lamun berite nike side pade perhatiang pacu-pacu, side pade gen tetep idup léq dalem Bije saq asalne léman Allah dait Bapa. Dait hal niki saq tejanjiqang siq Almasih tipaq ite; idup sejati dait kekel. Tiang tulis niki tipaq side mengenai dengan-dengan saq kenyeke berusahe nyesatang side pade. Laguq mengenai side pade, Almasih sampun curahang Roh-Ne tipaq side pade. Dait sengonéq Roh-Ne araq léq side pade, ndéq perlu araq dengan lain ngajah side pade. Séngaq Roh-Ne ngajah side pade mengenai selapuq hal; dait napi saq Ie ajahang nike kenaq, ndéqne duste. Keranaq nike, side pade harus taat léq napi saq teajahang siq Roh nike, dait side pade harus tetep idup léq dalem Almasih. Jari, bije-bije tiang, pade tetep idup léq dalem Almasih, adéq éraq sewaktu Ie rauh, ite parek tipaq Almasih siq keyakinan saq pasti dait ndéq nyeboq lantaran ilaq. Side pade sampun nenaoq bahwe Almasih nike kenaq. Keranaq nike side pade harus nenaoq éndah bahwe sebilang dengan saq idup menurut kebenaran, ie asalne léman Allah. Serioq berembé beléq kasih Allah léq ite, sehingge ite teakuq jari bije-bije dowé-Ne. Dait mule ite niki bije-bije dowén Allah. Keranaq nike dunie saq jahat niki ndéq kenal kance ite, séngaq dunie ndéq kenal kance Allah. Semeton senamian saq tiang kasihin! Mangkin ite niki bije-bije dowén Allah, laguq keadaante éraq ndéqman jelas. Laguq ite nenaoq bahwe lamun Almasih rauh, ite gen jari maraq Ie, séngaq ite gen serioq Ie léq dalem keadaan-Ne saq setetune. Selapuq dengan saq bedowé harepan maraq niki léq Almasih, jagaq diriqne adéqne tetu-tetu suci, bersi léman dose maraq Almasih nike suci. Dengan saq piaq dose, ngelanggar hukum Allah; séngaq dose nike pelanggaran hukum Allah. Side pade nenaoq bahwe Almasih sampun rauh jari ngapus dose-dose manusie, dait bahwe ndéq araq dose léq dalem diriq-Ne. Selapuq dengan saq idup léq dalem Almasih, ndéq terus-terusan piaq dose. Dengan saq tetep piaq dose, ndéq uwah serioq dait kenal kance Almasih. Bije-bije tiang, ndaq alurang sai juaq nyesatang side pade. Sai-sai saq ngelaksaneang napi saq kenaq, nike kenaq, pade maraq Almasih nike kenaq. Laguq dengan saq tetep piaq dose, nike anak Belis, séngaq Belis gawéq dose léman penembéqne. Nike lantaranne Bije saq asalne léman Allah rauh, jari ngancurang pegawéan Belis. Dengan saq asalne léman Allah, ndéq terus-terusan piaq dose, séngaq sipat Allah mésaq araq léq ie. Dait lantaran Allah nike jari Bapane, make ie ndéq bau terus-terusan piaq dose. Niki bédene antare bije-bije dowén Allah kance anak-anak dowén Belis: Sai-sai saq ndéq ngelaksaneang préntah Allah, atao ndéq ngasihin semetonne, ie ndéqne bije dowén Allah. Léman penembéqne sampun tesampéang berite niki tipaq side: Ite harus saling kasihin sopoq kance saq lain. Ndaq ite maraq Kain, saq jari anak Belis dait nyematéq semetonne mésaq. Napi penyebapne Kain nyematéq semetonne? Séngaq ie ngelaksaneang hal-hal saq jahat, laguq hal-hal saq telaksaneang siq semetonne nike kenaq. Keranaq nike, semeton-semeton, ndaq bengaq lamun dengan-dengan dunie niki meriq léq side pade. Ite nenaoq bahwe ite sampun sugul léman kematéan, dait ngalih tipaq idup. Ite nenaoq nike, séngaq ite ngasihin sepade semetonte. Dengan saq ndéq ngasihin sepadene manusie, artine masih tekuasein siq kematéan. Dengan saq meriq léq semetonne, pade maraq tukang nyematéq, dait side pade nenaoq bahwe tukang nyematéq ndéq bedowé idup sejati dait kekel. Langan hal niki ite nenaoq kasih Almasih: Bahwe Ie sampun nyerahang idup-Ne umaq ite. Keranaq nike, ite éndah harus nyerahang idupte umaq semeton-semetonte! Lamun sopoq dengan bedowé lebih, serioq semetonne saq ndéq bedowé, laguq ndéq mélé nulung semetonne nike, berembé dengan nike bau bebase bahwe ie ngasihin Allah? Bije-bije tiang! Ndaq ite ngasihin cume léq biwih atao cume siq ucapan doang. Ite harus ngasihin siq kasih saq sejati, saq tebuktiang siq perbuatante dait léq dalem kebenaran. Maraq nike entane ite nenaoq bahwe ite niki asalne léman kebenaran. Maraq nike éndah aténte iniq tentrem léq arepan Allah. Séngaq ite nenaoq, bahwe lamun ite tesalaqang siq aténte, Allah beléqan léman aténte, dait Ie wikan selapuqne. Jari, semeton senamian saq tiang kasihin, lamun aténte ndéq nyalahang ite, ite parek tipaq Allah siq keyakinan saq pasti. Dait napi saq ite tunas léman Ie, ite gen nerimaq, séngaq ite taat léq préntah-préntah-Ne dait ite ngelaksaneang napi saq nyenengang Ie. Niki préntah-Ne tipaq ite: Ite harus percaye léq Bije-Ne, nike Deside Isa Almasih, dait ite harus saling kasihin, maraq saq sampun tepréntahang siq Almasih tipaq ite. Selapuq dengan saq taat léq préntah-préntah-Ne, idup léq dalem Allah, dait Allah araq léq dalem ie pade. Dait ite nenaoq bahwe Allah araq léq dalem ite, séngaq Ie sampun ngicanin Roh-Ne tipaq ite. Semeton-semeton saq tiang kasihin! Ndaq percaye léq sebilang roh, laguq uji juluq roh-roh nike, napi roh nike asalne léman Allah atao ndéq. Séngaq luwéq nabi palsu sampun begerame ojok mbé-mbé. Maraq niki entane adéq side pade nenaoq napi nike Roh Allah atao ndéq: Sebilang roh saq ngaku bahwe Deside Isa rauh ojok dunie jari manusie, roh nike dateng léman Allah. Laguq roh saq ndéq ngakuq Deside Isa, roh nike ndéqne dateng léman Allah. Roh nike roh penentang Almasih. Side pade sampun dengah bahwe roh nike gen dateng, dait mangkin ie sampun araq léq dalem dunie niki. Laguq bije-bije tiang, side pade asalne léman Allah. Side pade sampun ngalahang nabi-nabi palsu, séngaq Roh saq araq léq side beléqan kuasene kance roh saq araq léq dalem dunie. Nabi-nabi palsu nike bebaos mengenai hal-hal dunie, dait dunie dengah napi saq ie pade sampéang, séngaq ie pade asalne léman dunie. Laguq ite niki asalne léman Allah; dait dengan saq kenal kance Allah, dengah ucapante. Dengan saq asalne ndéq léman Allah, ndéqne dengah ucapante. Siq care nike ite nenaoq bédene antare Roh kebenaran dait roh saq nyesatang. Semeton senamian saq tiang kasihin! Silaq ite saling kasihin sopoq kance saq lain, séngaq kasih nike asalne léman Allah. Sebilang dengan saq bedowé rase kasih, asalne léman Allah dait kenal kance Allah. Dengan saq ndéq bedowé rase kasih, ie ndéq kenal kance Allah; séngaq Allah nike kasih. Siq care niki kasih Allah nike tenyatayang léq ite, siq care ngutus Bije-Ne saq nunggal ojok dalem dunie adéq ite mauq idup langan Bije-Ne nike. Niki kasih nike: Ndéqne ite saq sampun ngasihin Allah, laguq Allah saq ngasihin ite dait saq sampun ngutus Bije-Ne adéq langan Ie, ite tedaméang léman dose-dosente. Semeton senamian saq tiang kasihin, lamun maraq nike beléqne kasih Allah léq ite, ite éndah harus saling kasihin sopoq kance saq lain. Ndéq araq sopoq dengan juaq saq sampun serioq Allah. Laguq lamun ite saling kasihin, Allah tetep araq léq dalem ite dait kasih-Ne jari sempurne léq dalem ite. Séngaq Allah sampun ngicanin Roh-Ne tipaq ite, make ite nenaoq bahwe ite sampun araq léq dalem Allah, dait Allah léq dalem ite. Tiang pade sampun serioq Bije-Ne, dait tiang pade beriteang bahwe Ie teutus siq Bapa jari Juruselamet dunie niki. Sai-sai saq ngaku bahwe Deside Isa nike Bije saq asalne léman Allah, Allah araq léq dalem dengan nike, dait dengan nike éndah araq léq dalem Allah. Ite sampun nenaoq dait percaye mengenai kasih Allah tipaq ite. Allah nike kasih. Dengan saq idupne tekuasein siq kasih, dengan nike araq léq dalem Allah, dait Allah léq dalem ie. Siq care niki kasih Allah tejariang sempurne léq dalem ite, adéq ite parek tipaq Allah siq keyakinan saq pasti léq Jelo Pengadilan, séngaq idupte léq dunie niki pade maraq idup Almasih. Léq dalem kasih, ndéq araq rase takut, séngaq kasih saq sempurne nelangang selapuq rase takut. Séngaq léq dalem rase takut araq siksaq hukuman dait dengan saq takut ndéqman sempurne léq dalem kasih. Ite ngasihin, séngaq Allah sampun juluan ngasihin ite. Lamun sopoq dengan bebase, “Tiang ngasihin Allah,” laguq ie ndéq ngasihin semetonne, dengan nike penduste. Séngaq dengan saq ndéq ngasihin semetonne saq ie serioq, ndéq mungkin bau ngasihin Allah saq ndéq ie serioq. Niki préntah saq teicanin siq Almasih tipaq ite: Sai juaq saq ngasihin Allah harus éndah ngasihin semetonne. Sebilang dengan saq percaye bahwe Deside Isa nike Almasih, dengan nike asalne léman Allah. Sai-sai saq ngasihin Allah, make ie éndah ngasihin dengan saq asalne léman Allah. Siq care niki ite nenaoq bahwe ite ngasihin bije-bije saq asalne léman Allah: Ite ngasihin Allah dait taat léq préntah-préntah-Ne. Séngaq, kasih tipaq Allah artine: Bahwe ite taat léq préntah-préntah-Ne. Dait préntah-préntah-Ne nike ndéqne berat umaq ite, séngaq sai saq asalne léman Allah, ie ngalahang dunie. Niki kemenangan saq ngalahang dunie, nike imante. Sai saq bau ngalahang dunie, selain dengan saq percaye bahwe Deside Isa nike Bije saq asalne léman Allah? Niki Ie saq rauh ojok dunie siq aiq dait daraq, nike Deside Isa Almasih; ndéqne siq aiq doang, laguq éndah siq daraq. Dait Roh Allah mésaq saq ngicanin kesaksian bahwe nike kenaq, séngaq Roh nike kebenaran. Séngaq araq telu saksi léq dalem sorge: Bapa, Manik dait Roh Suci; dait ketelune nike sopoq. Dait araq telu saq jari saksi léq gumi: Roh, aiq dait daraq, ketelune nike sopoq. Ite percaye léq kesaksian manusie, laguq kesaksian Allah kuatan malik. Dait nike kesaksian saq sampun teicanin siq Allah mengenai Bije-Ne. Keranaq nike, dengan saq percaye léq Bije saq asalne léman Allah, sampun nerimaq kesaksian nike léq dalem aténe; laguq dengan saq ndéq percaye tipaq Allah, sampun anggep bahwe Allah beduste, séngaq ie ndéq percaye napi saq temanikang siq Allah mengenai Bije-Ne. Niki kesaksian nike: Allah sampun ngicanin ite idup sejati dait kekel, dait idup nike araq léq dalem Bije-Ne. Dengan saq bedowé Bije saq asalne léman Allah, bedowé idup nike; dait dengan saq ndéq bedowé Bije saq asalne léman Allah nike, ndéq bedowé idup nike. Tiang nulis tipaq side pade, adéq side pade saq percaye tipaq Bije saq asalne léman Allah, nenaoq bahwe side pade sampun bedowé idup sejati dait kekel. Dait ite parek tipaq Allah siq keyakinan saq pasti, séngaq ite yakin Ie ngabulang do'ente, lamun ite tunas sopoq hal saq sesuai kance pekayunan-Ne. Lamun ite nenaoq bahwe Ie mirengang ite dait napi saq ite tunas, make ite éndah nenaoq bahwe ite sampun nerimaq selapuq hal saq sampun ite tunas léman Ie. Lamun side pade serioq salaq sopoq semeton seiman piaq dose saq ndéq datengang kematéan, side pade harus bedo'e tipaq Allah; dait Allah gen ngicanin ie idup nike. Hal niki berlaku tipaq ie pade saq dosene ndéq datengang kematéan. Laguq araq dose saq datengang kematéan. Mengenai hal nike tiang ndéq badaq bahwe side pade harus bedo'e tipaq Allah. Selapuq kejahatan nike dose, laguq araq dose saq ndéq datengang kematéan. Ite nenaoq bahwe selapuq dengan saq asalne léman Allah, ndéq terus-terusan piaq dose, séngaq Bije saq asalne léman Allah ngelindungin ie, dait Si Jahat ndéq bau piaq napi-napi léq ie. Ite nenaoq bahwe ite dowén Allah, dait seantéro dunie niki araq léq bawaq kekuasean Si Jahat. Ite nenaoq bahwe Bije saq asalne léman Allah sampun rauh dait sampun ngicanin ite pengertian, adéq ite kenal kance Allah saq kenaq. Ite idup léq dalem Allah saq kenaq dait léq dalem Bije-Ne, Deside Isa Almasih. Ie Allah saq kenaq, dait idup sejati dait kekel. Bije-bije tiang, jaoqang diriqde léman berhale-berhale! Tipaq Inaq saq tepiléq siq Allah, dait tipaq bije-bijene saq tetu-tetu tiang kasihin. Léman tiang, pemimpin jemaah dait selapuq dengan saq nenaoq kebenaran. Séngaq Allah araq léq dalem aténte, dait gen tetep araq bareng kance ite selaéq-laéqne. Paice, rahmat dait damé sejahtere léman Allah Bapa, dait léman Deside Isa Almasih, Bije saq asalne léman Bapa nike, gen araq bareng kance ite léq dalem kebenaran dait dalem kasih. Tiang gembire gati nenaoq bahwe araq separo bije-bijende idup menurut kebenaran, maraq saq sampun tepréntahang siq Allah Bapa tipaq ite. Keranaq nike, Inaq, sanget siq tiang tunas adéq ite selapuq saling kasihin. Napi saq tiang nyatayang niki ndéqne sopoq préntah saq baru umaq side, laguq menurut préntah saq sampun araq léq ite léman penembéq ite percaye. Kasih nike artine ite idup menurut préntah-préntah-Ne. Dait préntah saq sampun side pade dengah léman penembéqne nike, bahwe side pade harus idup siq care saling kasihin sopoq kance saq lain. Luwéq penyesat sampun nyebar ojok seantéro dunie. Ie pade dengan-dengan saq ndéq ngakuq bahwe Deside Isa Almasih sampun rauh ojok dunie jari sopoq manusie. Nike penyesat dait penentang Almasih. Keranaq nike jagaq ndaq jangke side pade kélangan napi saq sampun tiang pade usaheang umaq side pade. Pade berusahe adéq side pade nerimaq selapuq upaqde léman Allah. Dengan saq ndéq percaye léq pengajahan Almasih, laguq nyimpang léman napi saq teajahang siq Ie, dengan nike ndéq bedowé Allah. Dengan saq tetep léq dalem pengajahan Almasih, artine ie bedowé Allah Bapa dait Bije saq asalne léman Allah. Keranaq nike, lamun araq dengan dateng dait nyampéang léq side pengajahan saq ndéq teajahang siq Almasih, ndaq nerimaq dengan nike léq dalem balénde atao ngebéng salam tipaq ie. Séngaq dengan saq ngebéng salam tipaq dengan saq maraq nike milu éndah kance dengan nike gawéq perbuatan saq jahat. Luwéq gati saq perlu tiang badaq tipaq side, laguq bagusan ndéq langan surat. Tiang beharep gen bau dateng dait ngeraos langsung kance side pade, adéq sukecitente jari sempurne. Bije-bije semetonde saq nine, saq tepiléq éndah siq Allah ngirim salam tipaq side. Tipaq Gayus saq tiang kasihin léq dalem kebenaran, léman tiang pemimpin jemaah. Tiang bedo'e semoge side tetep séhat dait ndéq araq saq kurang léq side, pade maraq jiwende éndah séhat. Tiang seneng gati sewaktu pire dengan semeton dateng dait ngebéng kesaksian tipaq tiang berembé setiene side léq kebenaran, séngaq mule side tetep idup menurut kebenaran. Ndéq araq saq miaq tiang lebih besukecite, selain dengah kabar bahwe bije-bije tiang idup menurut kebenaran. Semeton tiang saq tiang kasihin, side setie gati léq pegawéan saq side laksaneang tipaq semeton-semeton saq lain; malahan saq ndéqman side kenal éndah. Ie pade sampun ngebéng kesaksian léq julun jemaah mengenai kasihde. Tulung ie pade adéqne bau ngelanjutang kelampan ie pade dait siq care nike nyenengang Allah, séngaq léq dalem kelampan jari ngelayanin Almasih, ie pade ndéq nerimaq bantuan napi juaq léman dengan-dengan saq ndéq kenal kance Allah. Keranaq nike ite harus nulung semeton-semeton saq maraq nike, adéq ite milu léq dalem usahe ie pade jari beriteang kebenaran. Tiang sampun nulis surat saq singket tipaq jemaah, laguq Diotrepes saq melét jari dengan saq paling utame léq dalem jemaah, ndéqne mélé ngakuq tiang pade. Laun lamun tiang dateng, gen tiang ingetang selapuq hal saq sampun ie laksaneang, nike mengenai hal-hal jahat dait duste saq ie ucapang mengenai tiang pade! Laguq selapuqne nike ndéqman cukup tipaq ie. Léq waktu semeton-semeton nike dateng, ie ndéq mélé nerimaq ie pade. Malahan ie balaq dengan-dengan saq mélé nerimaq semeton-semeton nike, dait ie suruq dengan-dengan nike sugul léman jemaah! Semeton senamian saq tiang kasihin, ndaq tiru napi saq jahat, laguq tiru napi saq solah. Dengan saq ngelaksaneang saq solah, asalne léman Allah. Dait dengan saq piaq jahat, ndéqne uwah serioq Allah. Mengenai Demetrius, selapuq dengan ngebéng kesaksian saq solah, malahan kebenaran nike mésaq ngebéng kesaksian saq maraq nike. Tiang pade éndah ngebéng kesaksian saq solah, dait napi saq tiang pade sampéang bau tesaduq. Luwéq gati saq perlu tiang sampéang léq side, laguq solahan lamun tiang ndéq kadu surat. Tiang beharep becat bedait kance side dait bau ngeraos langsung. Damé sejahtere araq bareng kance side! Salam léman sahabat-sahabatde. Sampéang salam tiang tipaq sahabat-sahabatte sopoq-sopoq. Tipaq selapuq dengan saq sampun temanikang dait saq sanget tekasihin siq Allah Bapa serte tepeliharaq bagi Deside Isa Almasih. Léman -- Yudas -- hambe Deside Isa Almasih dait semetonne Yakub. Rahmat, damé sejahtere dait kasih belimpah-limpah umaq side pade. Semeton senamian saq tiang kasihin! Tiang tetu-tetu beniat nulis surat tipaq side pade, mengenai keselametan saq pade-pade sampun ite terimaq. Laguq mangkin tiang merase jari sopoq keharusan ngebéng naséhat tipaq side pade langan surat niki adéq side pade terus bejuang jari pertahenang iman saq sampun sekali teicanin jari selaéq-laéqne tipaq dengan-dengan saq tehususang bagi Allah. Séngaq ite ndéq sadar, araq pire dengan saq secare tedoq-tedoq tame ojok tengaq-tengaqte, nike dengan-dengan saq léman laéq sampun tetentuang jari dengan-dengan saq gen nerimaq hukuman. Ie pade dengan-dengan saq ndéq kenal kance Allah saq salaq guneang berite mengenai rahmat Allahte, jari mauq kesempatan idup léq dalem macem-macem hawe napsu, dait saq nolaq Deside Isa Almasih, sopoq-sopoqne Penguase dait Junjungante Saq Mulie. Laguq, timaq side pade tetu-tetu sampun nenaoq selapuqne nike, tiang mélé ingetang side pade mengenai berembé Tuhan nyelametang umat Israel léman negeri Mesir, laguq sesampun nike binaseang dengan-dengan saq ndéq percaye saq araq léq antare ie pade. Inget éndah pare malaékat saq ndéq taat jangke liwat bates kekuasean ie pade, sehingge lumbar bilin taoq ie pade ndot. Allah taliq dait sekep malaékat-malaékat nike kadu ranté saq kekel, léq taoq saq peteng léq bawaq gumi. Léq derike ie pade tetahen terus jangke dateng hukuman saq gen ie pade terimaq léq jelo penghukuman saq beléq nike éraq. Inget éndah kote Sodom dait Gomora dait kote-kote léq sekiterne, saq pendudukne sampun gawéq hal-hal saq cabul pade maraq saq tegawéq siq malaékat-malaékat nike. Ie pade gawéq hal-hal saq ndéq wajar jari kepuasan ie pade sehingge ie pade tesiksaq siq hukuman api saq kekel, gen tejariang peringetan umaq selapuq dengan. Maraq nike éndah dengan-dengan nike. Siq impi-impi ie pade, ie pade piaq dose léq awakne mésaq dait menghine kekuasean Allah, dait menghine selapuq saq mulie léq sorge. Mikael mésaq, saq jari datune malaékat-malaékat nike, ndéqne uwah piaq maraq nike. Sewaktu ie betungkasan kance Belis mengenai mayitne Musa, Mikael ndéqne bani hakimin Belis siq ucapan-ucapan saq menghine. Ucapan Mikael cume maraq niki, “Tuhan gen semprak side!” Laguq siq penghinean-penghinean, dengan-dengan nike nyerang selapuq hal saq ie pade ndéq ngerti. Dengan-dengan nike pade maraq binatang-binatang saq ndéq bedowé akal, saq nenaoq hal-hal kadu perasaanne, laguq malahan nike saq jari penyebap ie pade binase. Celake ie pade! Ie pade sampun turut langan saq pade maraq Kain. Adéqne mauq képéng, ie pade namaqang diriqne ojok dunie sesat, pade maraq Bileam. Dait ie pade éndah teancurang lantaran ngelawan pade maraq Korah. Sewaktu side pade ngaraqang rowah, tingkah laku dengan-dengan nike tetu-tetu nyepaqang angen. Séngaq ie pade melak ndéq araq ilaqne, dait ie cume mentingang diriqne mésaq. Ie pade maraq awan saq tetiup siq angin, laguq ndéq nurunang ujan. Ie pade éndah maraq lolo saq ndéq ngasilang buaq timaq léq musim buaq; lolo-lolo saq akahne sampun teembot dait tetu-tetu sampun maté. Pade maraq umbak saq ganas léq segare nimbulang kowok, maraq nike éndah ie pade ngowokang perbuatan-perbuatan saq merilaq. Ie pade maraq bintang-bintang saq ngambar, dait saq sampun tesedieang taoqne siq Allah léq taoq saq peteng dedet jari selaéq-laéqne. Henok, keturunan saq kepituq léman Adam, laéq sampun benubuat mengenai dengan-dengan nike. Henok bebase, “Serioq, Tuhan rauh kance beiyu-iyu malaékat-Ne saq suci jari hakimin selapuq dengan. Tuhan gen ngukum dengan-dengan saq ndéq kenal Ie lantaran perbuatan-perbuatan ie pade saq bejat. Dait Ie gen hukum dengan bedose dait durhake lantaran selapuq ucapan penghinean saq ie ucapang.” Dengan-dengan nike tetep doang ngerumun dait nyalahang dengan lain. Ie pade idup menurut hawe napsu ie pade saq bedose. Ie pade ngajum diriqne mésaq dait ie pade demen ngajum dengan adéqne mauq keuntungan. Laguq side pade, semeton-semeton saq tiang kasihin, inget léq napi saq laéq tesampéang siq rasul-rasul Junjungante Saq Mulie Deside Isa Almasih. Ie pade sampun badaq side juluan bahwe éraq sewaktu gen ahir jaman niki gen dateng dengan-dengan saq gen ngoloq side pade, nike dengan-dengan saq idup menurut hawe napsu ie pade saq bedose. Ie pade dengan-dengan saq nimbulang permusuhan. Ie pade ndéq tekuasein siq Roh Allah, laguq siq keméléq-keméléq tabiat dunie niki. Laguq side pade, semeton senamian saq tiang kasihin, terus pesolah diriqde léq atas dasar imande saq paling suci. Dait bedo'e siq kuase Roh Allah, dait tetep idup léq bawaq pengasihan Allah sengonéq side pade ngantos rahmat Deside Isa Almasih Junjungante Saq Mulie, saq gen ngicanin side idup sejati dait kekel. Side pade harus nyatayang belas kasihan léq dengan-dengan saq bimbang aténe. Araq éndah dengan-dengan saq patut side selametang siq care ngerebut ie pade léman api. Laguq tipaq dengan-dengan lainne, side patut nyatayang belas kasihan saq tebarengin siq rase takut. Malahan meriq léq kelambi ie pade saq sampun jari kotor siq hawe napsu dunie. Allah, saq sanggup jagaq adéq side pade ndéq geriq, dait saq sanggup gadingang side ojok hadirat-Ne saq Mulie siq sukecite dait ndéq bedowé cacat cele, Ie sopoq-sopoqne Allah, Juruselamette langan Deside Isa Almasih Junjungante Saq Mulie. Ie Allah saq mulie, agung, bekuase dait berwibawe léman jaman laéq jangke mangkin dait jari selaéq-laéqne! Amin. Isi kitab niki mengenai wahyu saq teicanin siq Allah tipaq Deside Isa Almasih. Adéq Almasih nyatayang hal nike tipaq hambe-hambe-Ne, nike hal-hal saq harus becat telaksane. Beterus Ie ngutus malaékat-Ne tipaq Yahya, hambe-Ne, jari jelasang hal-hal nike. Yahya sampun besaksi mengenai Manik Allah dait mengenai kesaksian saq teicanin siq Deside Isa Almasih, nike selapuq saq sampun ie serioq. Bahagie dengan saq baceang dait dengan saq dengahang berite nubuat kitab niki dait taat léq napi saq tetulis léq dalemne. Séngaq ndéqne ngonéq malik selapuqne niki gen telaksane. Tipaq kepituq jemaah léq daérah Asia Kodéq. Umaq side pade rahmat dait sejahtere léman Ie saq araq mangkin, saq sampun araq léq jaman laéq, dait saq masih araq léq waktu saq gen dateng. Léman tiang, Yahya dait léman kepituq roh saq araq léq arepan tahte Allah, dait léman Deside Isa Almasih, saksi saq setie. Ie saq penembéq teidupang malik léman ninggal dait Ie penguase raje-raje dunie. Bagi Deside Isa saq ngasihin ite, dait siq ninggal-Ne Ie bébasang ite léman dose-dosente dait jariang ite sopoq kerajaan dait imam-imam, saq ngelayanin Allah, Bapa-Ne. Bagi Ie kemuliean dait kuase jangke selaéq-laéqne. Amin! Pade serioq Ie rauh léq dalem awan! Selapuq dengan gen serioq Ie, termasuk éndah ie pade saq sampun galah Ie. Selapuq bangse léq gumi gen éroq aséq lantaran Ie. Tetu, nike pasti! Amin! “Tiang niki saq penembéq dait saq penutuq, Manik Allah, Tuhan saq araq, saq sampun araq, dait saq araq selaéq-laéqne, Saq Mahekuase.” Tiang Yahya, semetonde saq senasip kance side pade léq dalem kesusahan, dalem kerajaan dait léq dalem ketekunan jari ngantos kerauhan Deside Isa. Tiang tetetéh ojok Pulao Patmos lantaran tiang beriteang Manik Allah dait kesaksian Deside Isa. Léq jelo Tuhan, tiang tekuasein siq Roh Allah, terus tiang dengah suare saq beléq -- maraq suare terompét -- kedengahan léq mudi tiang. Basen suare nike, “Tulis léq dalem sopoq kitab napi saq side serioq, dait kirim tipaq pituq jemaah niki: Epesus, Smirna, Pergamus, Tiatira, Sardis, Piladelpia, dait Laodikia.” Tiang ngéngat andang mudi jari serioq sai nike saq ngeraos tipaq tiang. Terus tiang serioq pituq naé dilah saq tepiaq léman emas. Léq tengaq-tengaq naé-naé dilah nike nganjeng sopoq dengan saq penggitan maraq Bije Manusie. Ie ngadu jubah saq bélone jangke cokor-Ne. Léq dade-Ne Ie ngadu tutup dade emas. Sirah dait bulu-Ne putéq maraq bulu dombe, putéqne maraq salju. Penyermin-Ne nyale maraq api. Cokor-Ne nyale maraq tembage saq tetunuq. Suare-Ne maraq belabur saq beléq gati. Gading-Ne saq kanan negel pituq bintang, dait léman cangkem-Ne sugul sopoq kléwang bemangan due saq merang gati. Penjarupan-Ne besinar maraq jelo léq waktu tengari. Waktu tiang serioq Ie, tiang nyungkur léq arepan-Ne maraq dengan maté. Laguq Ie noloq gading-Ne saq kanan léq atas tiang beterus bemanik, “Ndaq takut! Tiang saq penembéq dait saq penutuq. Tiang niki saq idup! Tiang sampun ninggal, laguq silaq serioq; Tiang idup jangke selaéq-laéqne. Tiang bekuase léq kematéan, dait léq dunie dengan maté. Keranaq nike, tulis hal-hal saq side serioq, nike hal-hal saq araq mangkin niki, dait hal-hal saq gen telaksane éraq. Niki rahasie léman pituq bintang saq side serioq léq ime kanan Tiang, dait léman pituq naé dilah emas nike: Pituq bintang nike pare malaékat kepituq jemaah, dait pituq naé dilah nike kepituq jemaah nike.” “Tipaq malaékat jemaah léq Epesus, tulis maraq niki: Niki manik léman Ie saq negel pituq bintang léq gading-Ne saq kanan, dait bemargi léq antare kepituq naé dilah emas nike. Tiang nenaoq selapuq pegawéande, selapuq usahende, dait kesabarande. Tiang nenaoq bahwe side pade ndéq tao sabar tipaq dengan jahat, dait bahwe side pade sampun nguji dengan-dengan saq ngaku diriqne rasul padahal setetune ndéq, dait side pade mauq bukti bahwe ie pade penduste. Side pade sabar dait side pade menderite lantaran aran Tiang, dait side pade ndéq putus ase. Laguq niki keberatan Tiang tipaq side pade: Side pade ndéq ngasihin Tiang maraq kasih side pade saq semule. Keranaq nike pade inget berembé dalemne side pade sampun geriq! Pade tobat léman dose-dosende, dait laksaneang napi saq semule side pade laksaneang. Lamun ndéq, make Tiang gen dateng tipaq side dait bait naé dilahde nike léman taoqne. Laguq araq saq solah léq side: Side pade meriq léq perbuatan pengiring-pengiring Nikolaus, saq Tiang meriq éndah. Sai bedowé kentok, harus ie dengahang napi saq temanikang siq Roh Allah tipaq jemaah-jemaah! Sai-sai saq menang, gen Tiang béng kelorang buaq léman lolo kehidupan saq tiwoq léq Taman Pirdaus Allah.” “Tipaq malaékat jemaah léq Smirna tulis maraq niki: Niki manik léman Ie saq penembéq dait saq penutuq -- saq sampun ninggal dait idup malik. Tiang nenaoq kesusahan-kesusahan side pade; Tiang nenaoq keadaan side pade saq miskin -- laguq setetune side pade sugih! Tiang nenaoq pitnah-pitnah saq tetujuang tipaq side pade siq dengan-dengan saq ngaku diriqne Yahudi, padahal ndéq; ie pade jemaah Belis! Ndaq takut léq penderitean saq ndéq pire ngonéq malik side gen alamin. Inget, Belis gen namaqang separo léman side pade ojok dalem bui jari cobe side pade. Side pade gen menderite sepulu jelo ngonéqne. Side pade harus setie léq Tiang jangke ninggal, make Tiang gen ngicanin side mahkote kehidupan. Sai-sai saq iniq dedengah, harus perhatiang napi saq temanikang siq Roh Allah tipaq jemaah-jemaah! Sai-sai saq menang, ndéq gen menderite napi-napi lantaran kematéan saq kedue.” “Tipaq malaékat jemaah léq Pergamus, tulis maraq niki: Niki manik léman Ie saq negel kléwang bemangan due saq merang gati. Tiang nenaoq léq mbé side ndot, nike léq taoqne Belis betahte. Side pade setie léq Tiang, malahan sewaktu Antipas, saksi Tiang saq setie nike, tematéq léq julunde léq taoq Belis ndot, side pade ndéq nilas bahwe side percaye léq Tiang. Laguq timaq maraq nike, araq pire hal saq Tiang ndéq suke léman side pade: Araq separo dengan léq antare side pade saq turut napi saq teajahang siq Bileam, saq ngebéng naséhat tipaq Balak jari nyesatang dengan Israel ojok dalem dose, sehingge ie pade ngelorang keloran saq sampun teaturang tipaq berhale dait gawéq perbuatan saq cabul. Maraq nike éndah araq léq antare side pade dengan-dengan saq percaye léq pengajahan pare pengiring Nikolaus. Keranaq nike, side pade harus tobat léman dose-dosende! Lamun ndéq, karing semendaq Tiang gen dateng tipaq side pade dait perang kance dengan-dengan nike kadu kléwang saq araq léq biwih Tiang. Sai bedowé kentok, harus ie dengahang napi saq temanikang siq Roh Allah tipaq jemaah-jemaah! Sai-sai saq menang, gen Tiang béng kelorang manna saq teseboq, dait Tiang gen béng ie pade batu putéq. Léq batu nike tetulis sopoq aran saq baru, saq ndéq tetaoq siq sai-sai, selain siq dengan saq nerimaq batu putéq nike.” “Tipaq malaékat jemaah léq Tiatira, tulis maraq niki: Niki manik léman Bije saq asalne léman Allah, saq penyermin-Ne nyale maraq api, dait cokor-Ne maraq rue tembage tetunuq. Tiang nenaoq selapuq saq side pade laksaneang, kasihde, imande, pengabdiande, dait kesabarande. Tiang nenaoq bahwe mangkin side pade begawéan luwéqan léman saq laéq. Laguq Tiang wade side, lantaran side pade ngalurang Izebel, dengan nine saq ngaku diriqne utusan Allah nike. Sampun luwéq hambe-hambe Tiang saq tesesatang siq ie adéq gawéq perbuatan saq cabul dait ngelorang keloran saq sampun teaturang tipaq berhale. Sampun Tiang béng ie kesempatan adéq tobat léman dose-dosene, laguq ie ndéq mélé engkah gawéq perbuatan-perbuatan saq cabul nike. Pade inget! Tiang gen nimpak ie jangke sakit léq petindoqanne. Léq derike ie dait dengan-dengan saq bezinah kance ie gen menderite gati. Selapuqne nike mangkin gen Tiang laksaneang -- kecuali lamun ie pade engkah gawéq hal-hal saq jahat bareng-bareng kance ie. Pare pengiringne gen Tiang matéq éndah adéq selapuq jemaah sadar bahwe Tiang saq nguji pikiran dait até manusie. Tiang gen bales side pade menurut perbuatande sopoq-sopoq. Laguq side pade saq lainne léq Tiatira ndéq turut pengajahan saq jahat nike, dait ndéq berajah ilmu-ilmu Belis. Tiang bemanik bahwe Tiang ndéq gen ngeromboqang bandean saq lain léq side pade. Laguq jangke waktu Tiang dateng éraq, side pade harus tetep tegel napi saq sampun side pade épéang. Ie pade gen nerimaq bintang timuq léman Tiang. Sai bedowé kentok, harus ie dengahang napi saq temanikang siq Roh Allah tipaq jemaah-jemaah!” “Tipaq malaékat jemaah léq Sardis, tulis maraq niki: Niki manik léman Ie saq bedowé kepituq Roh Allah dait kepituq bintang nike. Tiang nenaoq selapuq saq side pade laksaneang. Side pade teparan idup, padahal side pade maté! Keranaq nike, pade ures, dait teguqang napi saq masih araq léq side pade sendéqman selapuqne bis maté. Séngaq Tiang ndait bahwe napi saq side pade laksaneang, ndéq sopoq juaq saq sempurne léq arepan Allah. Keranaq nike, pade inget malik léq napi saq sampun teajahang tipaq side pade laéq dait napi saq sampun side pade dengah. Laksaneang nike dait pade tobat léman dose-dosende. Lamun side pade ndéq bejage-jage, Tiang gen dateng tipaq side maraq maling; dait side pade ndéq gen nenaoq piran waktune Tiang dateng. Laguq léq tengaq-tengaq side pade saq araq léq Sardis masih araq dengan saq jagaq adéq kelambine tetep bersi. Ie pade gen lampaq bareng-bareng kance Tiang kadu kelambi putéq, séngaq ie pade pantes léq hal nike. Tipaq ie pade saq menang gen tekaduang jubah putéq. Aran ie pade ndéq gen Tiang apus léman kitab kehidupan. Dait léq arepan Bapa Tiang serte malaékat-malaékat-Ne Tiang gen ngaku bahwe ie pade dowén Tiang. Sai bedowé kentok, harus ie dengahang napi saq temanikang siq Roh Allah tipaq jemaah-jemaah!” “Tipaq malaékat jemaah léq Piladelpia, tulis maraq niki: Niki manik léman Ie Saq Suci dait Saq Kenaq. Ie saq negel kunci saq teépéang siq Daud; lamun Ie bukaq, ndéq araq sopoq dengan juaq saq bau ngimpet malik, dait lamun Ie ngimpet, ndéq sopoq dengan juaq saq bau bukaq. Tiang nenaoq napi saq side pade laksaneang: Pade serioq, Tiang sampun bukaqang side pade lawang, saq ndéq bau teimpet siq sai juaq. Tiang nenaoq bahwe kekuatande cume sekediq, laguq side pade turut manik Tiang dait side pade ndéq nilas aran Tiang. Pade inget niki: Dengan-dengan saq jari umat Belis nike, penduste-penduste saq ngaku diriqne Yahudi padahal ndéq, gen Tiang paksaq dateng dait sujut léq julunde. Dait ie pade gen nenaoq bahwe Tiang ngasihin side. Séngaq side pade sampun turut manik Tiang adéq tetep tekun, Tiang éndah gen ngelindungin side pade léman jaman kesusahan saq gen nimpe seantéro dunie. Hal nike gen telaksane jari cobe selapuq dengan léq gumi. Tiang gen becat dateng! Jagaq solah-solah napi saq side pade épéang, adéq ndéq araq sopoq dengan juaq saq ngerebut mahkote side pade. Dengan saq menang, gen Tiang jariang teken saq utame léq dalem Gedéng Suci Allah Tiang, dait ie gen ndot léq taoq nike selaéq-laéqne. Peséngan Allah Tiang dait aran kote Allah Tiang -- nike Yerusalem baru saq gen turun léman sorge, léman Allah Tiang -- gen Tiang tulis léq diriq dengan nike. Aran Tiang saq baru éndah gen Tiang tulis léq ie. Sai bedowé kentok, harus ie dengahang napi saq temanikang siq Roh Allah tipaq jemaah-jemaah!” “Tipaq malaékat jemaah léq Laodikia, tulis maraq niki: Niki manik léman Amin, Saksi saq setie dait kenaq, sumber selapuq hal saq tecipteang siq Allah. Tiang nenaoq napi saq side pade laksaneang; Tiang nenaoq side pade ndéq nyet dait éndah ndéq beneng. Solahan lamun side pade nyet atao beneng! Laguq side pade anget-anget kungkuq; beneng ndéq, nyet éndah ndéq. Keranaq nike side pade gen Tiang utaqang sugul léman cangkem Tiang. Side pade bebase, ‘Tiang pade sugih dait selapuq cukup; tiang pade ndéq kurang napi-napi!’ Laguq side pade ndéq nenaoq berembé melarat dait berembé sedihne keadaande! Side pade miskin, bekelombas, dait bute. Keranaq nike Tiang naséhatin side pade adéq beli emas léman Tiang, nike emas saq tulén, adéq side pade jari sugih. Beli éndah kelambi putéq léman Tiang adéq side pade bekelambi dait ngilipang keadaan side pade saq bekelombas dait merilaq. Dait beli éndah minyak jari teolés léq penentengde adéq side pade tao nyerioq. Dengan-dengan saq Tiang kasihin, ie pade saq Tiang peringet dait Tiang empuk, keranaq nike side pade harus rédeang angende dait tobat léman dose-dosende. Silaq pade serioq! Tiang nganjeng léq julu lawang dait beketok. Lamun araq dengan saq dengah suare Tiang dait bukaqang lawang, Tiang gen tame jari bedait kance ie; Tiang gen bekelor bareng ie, dait ie bekelor bareng kance Tiang. Ie pade saq menang, gen Tiang ijinang tokol léq tahte Tiang bareng kance Tiang, pade maraq Tiang mésaq éndah sampun menang dait mangkin tokol bareng Bapa Tiang léq tahte-Ne. Sai bedowé kentok, harus ie dengahang napi saq temanikang siq Roh Allah tipaq jemaah-jemaah!” Sesampun nike tiang mauq penyerioqan malik. Tiang serioq sopoq lawang kebukaq léq sorge. Beterus kedengahan malik suare saq penembéq sampun bebase tipaq tiang maraq suare terompét. Basen suare nike, “Silaq taék ojok deriki. Tiang gen petitoqang side napi saq gen telaksane éraq.” Langsung tiang tekuasein siq Roh Allah. Terus tiang serioq araq sopoq tahte léq sorge, dait araq sopoq dengan melinggih léq tahte nike. Penjarupan Dengan nike besinar maraq permate baiduri pandan dait permate jeliman. Sopoq sabuk bidedari saq bewarne zamrud lingkerin tahte nike. Léq sekelining tahte nike araq empat likur tahte saq lain. Léq derike melinggih empat likur pemimpin saq bekelambi putéq, dait kadu mahkote emas. Léman tahte nike sugul cahaye kisap dait suare guntur saq beléq. Dait léq arepan tahte nike araq pituq obor saq nyale; nike kepituq Roh Allah. Dait léq arepan tahte nike éndah araq sopoq saq penggitan maraq segare kace, menéng maraq kristal. Léq tengaq-tengaq tahte, léq sebilang sedine, araq empat mahluk, saq bagian julu dait bagian mudine penoq siq mate. Mahluk saq penembéq penggitan maraq singe. Saq kedue, maraq anak sampi mame. Saq ketelu bedowé mue maraq muen manusie. Saq keempat, penggitan maraq kedit rajewali saq kenyeke kesur. Keempat mahluk nike, sopoq-sopoq bedowé enem keléték, sekeliningne dait léq bagian dalemne penoq siq mate. Peteng menah mahluk-mahluk nike ndéq engkah-engkah bekuih, “Suci, suci, suci, Allah, Tuhan Saq Mahekuase; saq araq, saq sampun araq, dait saq araq selaéqne.” Keempat mahluk nike nyanyiang lagu-lagu pujian, hormat dait syukur tipaq Ie saq melinggih léq tahte nike, Ie saq idup selaéq-laéqne. Dait sewaktu mahluk-mahluk nike benyanyi, keempat likur pemimpin nike nyungkur léq arepan Dengan saq melinggih léq tahte nike, terus nyembah Ie saq idup selaéq-laéqne. Beterus ie pade timpoh mahkote-mahkote ie pade léq arepan tahte nike, dait matur, “Ya Allah, Ya Tuhan tiang pade! Deside doang saq patut nerimaq pujian, hormat dait kuase. Séngaq Deside saq cipteang selapuq-lapuqne, dait siq pekayunan Deside éndah selapuqne nike sampun araq dait tecipteang.” Beterus tiang serioq sopoq gulungan kitab léq gading-Ne saq melinggih léq tahte nike. Kitab nike penoq siq tulisan léq bagian dalem dait bagian luahne, dait teségel kadu pituq ségel. Terus tiang serioq sopoq malaékat saq perkase bekuih-kuih siq suare saq beléq, “Sai saq patut bukaq ségel-ségel niki dait bukaq kitab niki?” Laguq timaq léq sorge, atao léq gumi, atao léq bawaq gumi ndéq araq sopoq dengan juaq saq sanggup bukaq kitab nike, dait serioq isine. Make tiang nangis éroq aséq séngaq ndéq araq sopoq dengan juaq saq patut bukaq kitab nike, dait serioq isine. Terus salaq sopoq léq antare pemimpin-pemimpin nike bebase léq tiang, “Ndaq nangis! Silaq pade serioq! Singe léman suku bangse Yehuda, keturunan Daud, sampun menang. Ie sanggup bukaq pituq ségel dait bukaq gulungan kitab nike.” Beterus tiang serioq, sopoq Anak Dombe nganjeng léq tengaq-tengaq tahte nike, tekeliningin siq keempat mahluk dait selapuq pemimpin nike. Anak Dombe nike ruene maraq sampun tesembeléh. Ie bedowé pituq tanggéq dait pituq mate: Nike pituq Roh Allah saq sampun teutus ojok seantéro dunie. Beterus Anak Dombe nike maju dait bait gulungan kitab nike léman gading kanan Dengan saq melinggih léq atas tahte. Léq waktu Anak Dombe nike ngelaksaneang hal nike, keempat mahluk dait keempat likur pemimpin nike nyungkur léq arepan-Ne. Ie pade sopoq-sopoq negel kecapi dait cawan emas saq berisi menyan, nike do'e-do'e dengan-dengan saq tehususang bagi Allah. Ie pade nyanyiang sopoq lagu saq baru: “Deside patut bait kitab nike, dait bukaq ségel-ségelne. Séngaq Deside sampun tesembeléh, dait siq ninggal Deside, manusie léman selapuq suku, base, umat dait bangse sampun Deside tumbas bagi Allah. Deside sampun jariang ie pade sopoq kerajaan, dait jari imam-imam, adéq ie pade ngelayanin Allahte, dait mréntah léq gumi.” Beterus tiang serioq malik dait Tiang dengah suare malaékat saq beiyu-iyu dait bejute-jute luwéqne. Ie pade nganjeng ngiterin tahte dait keempat mahluk serte pare pemimpin nike. Dait ie pade benyanyi siq suare saq beléq, “Anak Dombe saq sampun tesembeléh nike, patut nerimaq kuase, kesugihan, kebijaksanean dait kekuatan; Ie patut tehormatin, temulieang dait tepuji-puji!” Beterus tiang dengah selapuq mahluk léq sorge, léq gumi, léq bawaq gumi dait léq dalem segare -- selapuq mahluk léq alam semeste niki -- benyanyi, “Bagi Ie saq melinggih léq atas tahte, dait bagi Anak Dombe nike, selapuq pujian dait hormat dait kemuliean dait kuase jari selaéq-laéqne!” Make keempat mahluk nike bebase, “Amin!” Dait pemimpin-pemimpin nike éndah nyungkur dait nyembah. Sesampun nike tiang serioq Anak Dombe nike bukaq ségel saq penembéq léq antare kepituq ségel nike. Terus tiang dengah sopoq léq antare keempat mahluk nike bebase, “Silaq!” Suare mahluk nike maraq suare guntur. Make tiang serioq, terus penggitan sopoq jaran putéq. Penunggangne negel sopoq panaq, dait ie teicanin sopoq mahkote. Terus ie maju sebagé pemenang jari ngerebut kemenangan. Beterus Anak Dombe nike bukaq ségel saq kedue, dait tiang dengah mahluk saq kedue bebase, “Silaq!” Terus sopoq jaran saq lain sugul malik. Jaran nike béaq warnene. Penunggangne teicanin kuase jari bait damé sejahtere léman gumi, adéq manusie saling matéq. Make ie teicanin sopoq kléwang saq beléq. Beterus Anak Dombe nike bukaq ségel saq ketelu. Dait tiang dengah mahluk saq ketelu bebase, “Silaq!” Make tiang serioq, terus penggitan sopoq jaran bideng. Penunggangne negel sepasang dacin léq imene. Dait tiang dengah maraq araq suare léq tengaq-tengaq keempat mahluk nike bebase, “Sekilo gandum saq solah, ajine maraq upaq sejelo, dait telu kilo gandum jenis saq lain ajine maraq upaq sejelo éndah. Laguq ndaq nyédaq minyak dait anggur nike!” Beterus Anak Dombe nike bukaq ségel saq keempat. Dait tiang dengah mahluk saq keempat bebase, “Silaq!” Tiang serioq, terus penggitan sopoq jaran saq ijo kuning. Aran penunggangne Maut dait alam maut milu bareng kance ie. Deduaqne teicanin kuase jari nyematéq seperempat bagian gumi siq kléwang, siq kelapahan, siq wabah penyakit dait siq binatang-binatang buas saq araq léq gumi. Sesampun nike Anak Dombe nike bukaq ségel saq kelime. Make tiang serioq léq bawaq méje taoq kurban, araq jiwe-jiwe dengan-dengan saq ninggal tematéq lantaran Manik Allah dait lantaran kesaksian ie pade. Ie pade bekuih siq suare saq beléq, “Ya Tuhan Saq Mahekuase, saq suci dait kenaq! Pire ngonéq malik baruq Deside ngadilin penduduk gumi dait ngukum ie pade lantaran sampun nyematéq tiang pade?” Ie pade sopoq-sopoq teicanin sopoq jubah saq putéq. Terus ie pade tesuruq mentelah semendaq, jangke sampun cukup jumlah batur-batur seperjuangan dait semeton-semeton ie pade saq gen tematéq maraq ie pade. Terus tiang serioq Anak Dombe nike bukaq ségel saq keenem. Araq lindur saq beléq gati. Jelo jari bideng maraq kéréng bideng saq kasar, dait bulan jari béaq maraq daraq. Bintang-bintang roroq léman langit ojok gumi maraq buaq are saq masih odaq roroq léman lolone sewaktu tegerik siq angin pusut. Langit keset maraq kertas tegulung, dait selapuq gunung dait pulao tegésér léman taoqne. Terus raje-raje dunie, pare pembeléq, panglime-panglime, dengan-dengan sugih dait dengan-dengan bekuase, dait dengan-dengan saq lainne, hambe dait dengan merdéke, selapuqne nyeboq léq dalem goe-goe dait léq selak-selak batu gunung. Tipaq gunung-gunung dait batu-batu nike ie pade bekuih, “Silaq endet tiang pade! Seboq tiang pade léman arepan Ie saq melinggih léq atas tahte, dait léman murke Anak Dombe nike! Séngaq jelo murke saq dahsyat sampun dateng, sai saq bau tahen?” Sesampun nike, tiang serioq empat malaékat nganjeng léq keempat penjuru gumi. Ie pade nahen keempat angin léq gumi adéq ndéq araq angin saq betiup léq darat atao léq segare, atao léq leloloan. Terus tiang serioq sopoq malaékat saq lain sugul léman timuq. Ie jauq ségel léman Allah saq idup. Siq suare saq beléq malaékat nike bekuih tipaq keempat malaékat saq sampun mauq kuase léman Allah jari nyédaq gumi dait segare. Malaékat nike bebase, “Ndaq nyédaq gumi atao segare, atao leloloan lamun tiang pade ndéqman ngebéng tande ségel léq telakar hambe-hambe Allahte.” Beterus tiang dengah bahwe araq satus petang dase empat iyu dengan saq tebéng tande ségel léman Allah léq telakar ie pade. Dengan-dengan nike tebait léman kedue olas suku bangse Israel. Léman suku Yehuda dueolas iyu, léman suku Ruben dueolas iyu, léman suku Gat dueolas iyu, léman suku Asyer dueolas iyu, léman suku Naptali dueolas iyu, léman suku Manasye dueolas iyu, léman suku Simeon dueolas iyu, léman suku Lewi dueolas iyu, léman suku Isakar dueolas iyu, léman suku Zebulon dueolas iyu, léman suku Yusup dueolas iyu, dait léman suku Benyamin dueolas iyu. Sesampun nike tiang serioq malik, terus penggitan kumpulan manusie saq luar biase luwéqne -- ndéq araq sopoq dengan juaq saq bau rékéng jumlahne. Ie pade dengan-dengan léman sebilang bangse, suku, kaum, dait base. Léq arepan tahte dait léq arepan Anak Dombe nike ie pade selapuq nganjeng kadu jubah putéq dait negel pémpang-pémpang lolo palem léq imene. Terus siq suare saq beléq ie pade bekuih, “Keselametante datengne léman Allahte, saq melinggih léq atas tahte, dait léman Anak Dombe nike!” Selapuq malaékat nganjeng ngiterin tahte dait pare pemimpin dait keempat mahluk nike. Malaékat-malaékat nike nyungkur léq arepan tahte terus nyembah Allah. Ie pade bebase, “Amin! Ya Tuhan tiang pade, bagi Deside selapuq pujian, kemuliean, hikmat, ucapan syukur, hormat, kuase, dait kekuatan jangke selaéq-laéqne! Amin!” Salaq sopoq dengan léman pemimpin-pemimpin nike beketuan léq tiang, “Sai dengan-dengan saq bejubah putéq niki dait léman mbé ie pade dateng?” “Mindah tiang, tuan. Pelungguh mésaq saq wikan,” jawab tiang. Make ie bebase léq tiang, “Niki dengan-dengan saq sampun selamet léman mase penganiayean saq beléq. Ie pade sampun popoq jubah ie pade dait tejariang putéq kadu daraq Anak Dombe nike. Keranaq nike ie pade nganjeng léq arepan tahte Allah, dait beribadah tipaq Ie peteng menah léq dalem Gedéng Suci Allah. Dait Ie saq melinggih léq atas tahte nike gen ngelindungin ie pade siq kémah-Ne. Ie pade ndéq malik gen beridap lapah, atao bedak; jelo atao panas jelo ndéq malik gen nimpe ie pade, séngaq Anak Dombe saq melinggih léq tengaq-tengaq tahte nike gen jari pengarat ie pade. Ie gen jauq ie pade ojok embulan aiq kehidupan. Dait Allah gen usap selapuq aiq penenteng léman penenteng ie pade.” Sewaktu Anak Dombe nike bukaq ségel saq kepituq, sorge jari sepi kire-kire setenge jam ngonéqne. Terus tiang serioq kepituq malaékat saq nganjeng léq arepan Allah, dait ie pade teicanin pituq terompét. Sopoq malaékat saq lain, saq jauq sopoq tangkaq dupe emas, rauh dait nganjeng léq julu méje taoq kurban. Ie teicanin menyan luwéq gati jari teaturang bareng-bareng kance do'e selapuq dengan saq tehususang bagi Allah léq atas méje taoq kurban saq tepiaq léman emas léq arepan tahte nike. Bareng kance do'e dengan-dengan saq tehususang bagi Allah, pendet dupe saq kenyeke nyale nike nyempuq taék léman ime malaékat saq nganjeng léq arepan Allah nike. Beterus malaékat nike bait tangkaq dupe nike, dait isiqne siq api léman méje taoq kurban, terus timpohne ojok gumi. Make kedengahan suare guntur kance kisap dait araq lindur. Sesampun nike, pituq malaékat saq negel pituq terompét nike sampun siep gen niup terompétne. Malaékat penembéq niup terompétne, make ujan és dait api becampur daraq, selapuqne geriq ojok gumi. Sepertelu gumi bis julat; maraq nike éndah sepertelu léman leloloan, dait selapuq pupaq saq ijo. Terus malaékat saq kedue niup terompétne, terus araq penggitan maraq ruen sopoq gunung beléq saq kenyeke nyale tesaut ojok dalem segare. Sepertelu segare berobah jari daraq, dait sepertelu léman selapuq mahluk léq segare maté; maraq nike éndah sepertelu léman kapal-kapal musnah. Beterus malaékat saq ketelu niup terompétne, make sopoq bintang saq beléq, saq nyale maraq obor, geriq léman langit, terus nimpe sepertelu léman kokoq-kokoq dait pengembulan-pengembulan aiq. (Aran bintang nike “Apsintus”.) Make sepertelu léman aiq jari pait, dait luwéq dengan ninggal séngaq nginem aiq saq sampun jari pait nike. Terus malaékat keempat niup terompétne. Make suare terompét nike ngempuk sepertelu léman cahaye jelo, sepertelu léman bulan, dait sepertelu léman bintang-bintang sehingge sepertelu léman selapuqne nike jari peteng. Sepertelu léman kenjelo ndéq terang malik dait maraq nike éndah sepertelu léman kelem. Beterus tiang serioq dait dengah sopoq kedit rajewali saq kenyeke kesur léq atas langit, bekuih, “Celake! Celake! Celake selapuq dengan léq gumi lamun kedengahan suare ketelu terompét lainne saq gen tetiup siq ketelu malaékat saq lain!” Terus malaékat kelime niup terompétne, dait tiang serioq sopoq bintang geriq léman langit ojok gumi. Bintang nike teicanin kunci jurang maut. Make bintang nike bukaq jurang maut nike, terus sugul pendet léman dalemne maraq pendet léman keren saq beléq. Jelo dait awang-awang jari peteng siq pendet léman jurang nike. Terus léman dalem pendet nike sugul balang-balang saq turun ojok gumi. Balang-balang nike teicanin kuase saq pade maraq saq teicanin tipaq teledu. Ie pade tebalaq nyédaq pupaq, atao leloloan, atao tetaletan-tetaletan lainne. Ie pade cume kanggo nyerang dengan-dengan saq léq telakarne ndéq araq tande ségel léman Allah. Balang-balang nike ndéq teijinang nyematéq dengan-dengan nike, laguq cume nyiksaq ie pade sengonéq lime bulan. Sakit lantaran siksaqan balang-balang nike pade maraq sakitne tesenget siq teledu. Sengonéq lime bulan nike, dengan-dengan nike berusahe adéqne iniq ninggal, laguq ie pade ndéq iniq ninggal; ie pade melét ninggal, laguq maut jaoq léman ie pade. Rue balang nike maraq jaran saq siep lalo perang. Léq otak balang-balang nike araq penggitan maraq rue mahkote emas. Mue balang-balang nike pade maraq mue manusie. Bulu balang-balang nike maraq bulu dengan nine, dait gigine pade maraq gigi singe. Dade balang-balang nike maraq tetutup siq kelambi besi. Suare kelétékne pade maraq suare pasukan keréte-keréte jaran saq luwéq saq kenyeke nyerbu perang. Ie pade bedowé élong dait senget maraq teledu. Dait léq dalem élongne nike araq kekuatan jari nyiksaq manusie sengonéq lime bulan. Ie pade bedowé raje saq mréntah ie pade, dait raje nike malaékat jurang maut. Dalem base Ibrani aranne Abadon; dait dalem base Yunani Apolion (saq artine “Penyédaq”). Celake saq penembéq sampun liwat. Sesampun nike araq due celake malik saq gen dateng. Beterus malaékat saq keenem niup terompétne. Make tiang dengah suare dateng léman keempat bucu méje taoq kurban saq tepiaq léman emas saq araq léq arepan Allah. Suare nike bemanik tipaq malaékat saq keenem nike, “Lepas keempat malaékat saq tetaliq léq dékét Kokoq Eprat, kokoq saq beléq nike!” Keempat malaékat nike telepas. Ie pade sampun tesiepang husus umaq jam, jelo, bulan, dait taun nike jari nyematéq sepertelu léman selapuq umat manusie. Tiang dengah bahwe jumlah pasukan-pasukan saq kadu jaran nike araq satak jute luwéqne. Dait dalem penyerioqan tiang, tiang serioq jaran-jaran nike dait penunggang-penunggangne. Penunggang-penunggangne kadu kelambi besi saq bewarne béaq toaq dait biru maraq batu nilam, dait kuning maraq urirang. Otak jaran-jaran nike maraq otak singe, dait léman biwihne sugul api, pendet, dait urirang. Sepertelu léman umat manusie ninggal siq telu bencane nike; api, pendet, dait urirang saq sugul léman biwih jaran-jaran nike. Kekuatan jaran-jaran nike araq léq biwihne dait léq élongne éndah. Élong-élongne maraq ulah saq bedowé otak. Siq élongne nike, jaran-jaran nike nyiksaq manusie. Laguq sise umat manusie saq ndéq ninggal siq bencane-bencane nike ndéqne tobat léman perbuatanne mésaq. Ie pade ndéq mélé engkah nyembah roh-roh jahat dait berhale-berhale emas, perak, tembage, batu dait kayuq saq ndéq iniq gitaq atao dengah atao lampaq. Ie pade éndah ndéq mélé tobat léman perbuatan-perbuatan nyematéq dengan, ilmu-ilmu séhér, gawéq perbuatan saq cabul dait memaling. Terus tiang serioq sopoq malaékat perkase saq lain turun léman sorge. Ie tekerubung siq awan, dait sopoq sabuk bidedari ngelingkerin ulune. Muene becahaye maraq jelo dait naéne maraq teken api. Léq imene araq sopoq gulungan kitab kodéq saq kebukaq. Naé kananne ngicaq segare, dait naé kirine léq darat. Terus ie bekuih siq suare saq beléq maraq suare singe-singe saq ngeraq. Sesampun malaékat nike bekuih, kepituq guntur bejawab siq suare saq beléq. Sesampun kepituq guntur nike besuare, tiang mélé nulis hal nike, laguq tiang dengah suare léman sorge, “Rahasieang napi saq tesampéang siq pituq guntur nike; ndaq tulis hal nike!” Terus malaékat saq tiang serioq nganjeng léq segare dait léq darat nike ngangkat imene saq kanan ojok langit. Ie besumpah siq peséngan Allah saq idup selaéq-laéqne, saq cipteang langit, gumi dait segare dait selapuq saq araq léq dalemne. Basen malaékat nike, “Ndéq gen tetunde malik waktune! Laguq sewaktu malaékat kepituq niup terompétne, Allah gen ngelaksaneang rencane rahasie-Ne, maraq saq sampun Ie sampéang tipaq hambe-hambe-Ne, nike pare nabi.” Beterus suare saq sampun tiang dengah léman sorge nike bebase malik léq tiang, “Silaq lumbar bait gulungan kitab saq kebukaq léq ime malaékat saq nganjeng léq segare dait léq darat nike.” Beterus tiang lalo ojok malaékat nike dait tunas adéq ie ngicanin tiang gulungan kitab nike. Malaékat nike bebase, “Silaq bait dait kelorang niki. Léq dalem tiande ie gen jari pait, laguq léq dalem biwihde ie manis maraq madulani.” Tiang bait gulungan kitab nike léman imene, terus tiang kelor. Léq biwih rasene maraq madulani, laguq sesampun tiang belet ie, léq dalem tian ie jari pait. Beterus ie bebase léq tiang, “Sampéang karing sekali nubuat tipaq luwéq bangse, kaum, base, dait raje.” Sesampun nike tiang teicanin sepeleng kayuq saq mirip tunjang pengukur, terus tepréntahang, “Silaq lumbar ukur Gedéng Suci Allah dait méje taoq kurban, dait rékéng pire luwéq dengan saq beribadah léq dalemne. Laguq ndaq ukur leléah saq léq luah Gedéng Suci Allah nike, séngaq bagian nike sampun teserahang tipaq bangse-bangse lain. Ie pade gen ngicaq-icaq kote saq suci nike petang dase due bulan ngonéqne. Tiang gen ngutus due saksi Tiang saq kadu kelambi tande dukecite, dait ie pade gen nyampéang nubuat léman Allah sengonéq siyu satak enem dase jelo.” Due saksi nike due lolo zaitun dait due naén dilah saq araq léq arepan Tuhan penguase alam semeste. Lamun araq dengan saq mélé nyakitin ie pade, make léman biwih ie pade sugul api saq binaseang musuh-musuhne. Siq care nike, selapuq dengan saq mélé nyakitin ie pade gen maté. Ie pade bedowé kuase jari ngimpet langit adéq ndaq turun ujan sengonéq ie pade nyampéang nubuat léman Allah. Ie pade bedowé kuase éndah léq selapuq pengembulan aiq, ngerobah aiq jari daraq. Dait ie pade éndah bedowé kuase jari ngempuk gumi siq segale macem bencane, piran doang ie pade mélé ngelaksaneang hal nike. Sesampun ie pade tutuq nyampéang kesaksian ie pade, binatang saq sugul léman jurang maut gen ngelawan ie pade dait ngalahang serte nyematéq ie pade. Dait mayit ie pade gen begelanyat léq rurung kote beléq, léq taoq Tuhan ie pade tepakuq léq kayuq salib. Aran kiasan kote nike Sodom dait Mesir. Dengan-dengan léman selapuq bangse, suku, base, dait kaum gen serioq mayit ie pade telu setenge jelo ngonéqne, dait ndéq ngijinang mayit-mayit nike tekubur. Penduduk gumi gen gembire dait besukecite lantaran kematéan kedue saksi nike. Ie pade gen ngerayeang hal nike dait saling ngirim hadiah, séngaq kedue nabi nike sampun datengang luwéq siksean tipaq selapuq dengan léq gumi. Sesampun telu setenge jelo, tame roh kehidupan léman Allah ojok dalem kedue nabi nike. Beterus ie pade ures dait nganjeng, sehingge selapuq dengan saq serioq ie pade jari takut gati. Beterus dengan-dengan nike dengah suare saq keras léman sorge ngempoh kedue nabi nike, “Silaq taék ojok deriki!” Beterus léq julu musuh-musuh ie pade, ie pade taék ojok sorge, tekerubung siq awan. Make léq waktu nike araq lindur saq beléq. Sepersepulu bagian léman kote nike remuk, dait pituq iyu dengan maté lantaran lindur nike. Dengan-dengan saq lainne jari takut gati, terus ie pade mulieang Allah léq sorge. Celake saq kedue sampun liwat. Laguq pade serioq! Celake saq ketelu gen becat dateng. Beterus malaékat kepituq niup terompétne, make léq sorge kedengahan suare-suare saq beléq gati saq bebase, “Kerajaan dunie sampun jari kerajaan Tuhante dait kerajaan Almasih. Ie gen mréntah jangke selaéq-laéqne.” Make keempat likur pemimpin saq melinggih léq tahte ie pade léq arepan Allah, nyungkur dait nyembah Allah. Ie pade matur, “Ya Allah, Tuhan saq Mahekuase, saq araq, dait saq sampun araq! Tiang pade besyukur léq Deside séngaq Deside sampun kadu kuase Deside saq beléq, dait sampun mulai mréntah jari raje! Bangse-bangse ngamuk séngaq sampun waktune Deside numpahang murke Deside, dait sampun waktune éndah Deside ngadilin dengan-dengan ninggal. Niki waktune jari ngicanin upaq tipaq hambe-hambe Deside, pare nabi, dait tipaq selapuq dengan-dengan saq tehususang bagi Deside, nike selapuq dengan saq takut dait hormat léq peséngan Deside, beléq dait kodéq. Niki waktune jari ngancurang dengan-dengan saq ngancurang gumi!” Make Gedéng Suci Allah léq sorge kebukaq, dait penggitan Peti Perjanjian léq dalemne. Terus araq kisap saling samber dait suare guntur begeruduk, dait lindur dait ujan és saq beléq. Terus penggitan léq langit sopoq tande saq beléq. Sopoq dengan nine saq bekelumbung siq jelo, kenyeke nganjeng léq atas bulan. Léq ulune araq sopoq mahkote saq berisi due olas bintang. Dengan nine nike kenyeke betian, dait lantaran sampun dateng waktune nganak, make ie nyurak kesakitan. Terus penggitan éndah léq langit sopoq tande saq lain. Araq sopoq nage béaq toaq saq beléq gati saq bedowé pituq otak dait sepulu tanggéq. Sebilang otakne ngengadu sopoq mahkote. Siq élongne ie ngoros sepertelu bintang-bintang léq langit dait timpohne ojok gumi. Nage nike nganjeng léq julun dengan nine saq mélé nganak nike siq maksut gen belet anakne, sesampun ie teanakang. Terus dengan nine nike anakang sopoq kanak mame saq gen mréntah selapuq bangse siq tunjang besi. Laguq kanak nike terampas léman dengan nine nike, terus tejauq tipaq Allah dait ojok arepan tahte-Ne. Make dengan nine nike pelai ojok padang gurun, ojok taoq saq sampun tesedieang siq Allah umaq ie. Léq taoq nike ie gen tepeliharaq siyu satak enem dase jelo ngonéqne. Terus léq sorge araq perang. Mikael bareng kance malaékat-malaékatne betempur ngelawan nage nike. Dait nage nike tetulung éndah siq malaékat-malaékatne, ngelawan Mikael. Laguq nage nike tekalahang. Ie dait malaékat-malaékatne ndéq bau malik ndot léq sorge. Nage saq beléq nike tetetéh ojok luah, nike ulah toaq saq tesebut Belis atao Sétan, saq nyesatang seantéro dunie. Ie tetetéh ojok gumi kance selapuq malaékatne. Terus tiang dengah suare saq beléq léq sorge bebase, “Mangkin sampun rauh keselametan, kuase, dait Kerajaan Tuhante serte kekuasean Almasih saq tejanjiqang nike. Séngaq saq nuduh semeton-semetonte léq arepan Allah kenjelo kekelem sampun tesugulang léman sorge. Semeton-semetonte sampun ngalahang ie siq daraq Anak Dombe nike, dait siq kesaksian ie pade. Ie pade réde ngurbanang nyawe ie pade jangke ninggal. Keranaq nike, sorge dait selapuq saq araq léq dalemne harus besukecite! Laguq celake gumi dait segare, séngaq Belis sampun turun tipaq side siq murke saq beléq gati, séngaq ie nenaoq bahwe waktune karing seberaq.” Léq waktu nage nike sadar bahwe ie sampun tetetéh ojok gumi, ie mulai paléq dengan nine saq sampun nganakang kanak mame nike. Laguq dengan nine nike teican due keléték kedit rajewali saq beléq, adéqne kesur ojok taoqne léq padang gurun, nike taoqne tepeliharaq telu setenge taun ngonéqne, jaoq léman serangan nage. Make nage nike nyugulang luwéq gati aiq léman biwihne maraq aiq kokoq tipaq dengan nine nike adéqne teéléhang siq kokoq nike. Laguq dengan nine nike tetulung siq gumi; gumi pengangaq biwihne dait belet aiq saq sugul léman biwih nage nike. Nage nike jari gedek gati léq dengan nine nike, terus ie lalo nyerbu keturunan saq lain léman dengan nine nike, nike selapuq dengan saq taat léq hukum-hukum Allah, dait saq ngebéng kesaksian mengenai Deside Isa dait kuase-Ne. Terus nage nike nganjeng léq pesisi. Beterus tiang serioq sopoq binatang sugul léman segare. Ie bedowé sepulu tanggéq dait pituq otak. Léq sebilang tanggéqne araq sopoq mahkote, dait léq sebilang otakne tetulis sopoq aran penghinean tipaq Allah. Binatang saq tiang serioq nike ruene maraq macan tutul, dait naéne maraq naé beruang, biwihne maraq biwih singe. Terus binatang nike tebéng siq nage nike kekuatanne mésaq, dait tahtene, dait kekuaseanne saq beléq. Sopoq léman kepituq otak binatang nike ruene maraq bakat saq sampun parah gati, laguq bakat nike sampun selah. Seantéro gumi jari takjub terus turut binatang nike. Dait ie pade nyembah nage nike séngaq ie sampun ngebéng kekuaseanne tipaq binatang nike. Dait ie pade nyembah binatang nike éndah. Basen ie pade, “Ndéq araq saq pade kance binatang niki! Ndéq araq saq bau perang ngelawan ie!” Binatang nike teicanin biwih saq sombong gati dait menghine Allah. Ie teijinang mréntah petang dase due bulan ngonéqne. Terus ie mulai menghine Allah, dait peséngan Allah. Maraq nike éndah taoq Allah meneng, dait selapuq saq araq léq sorge éndah tehine. Ie teijinang éndah ngelawan dengan-dengan saq tehususang bagi Allah dait ngalahang ie pade. Dait kekuasean léq selapuq suku, kaum, base, dait bangse teserahang léq ie. Binatang nike gen tesembah siq selapuq dengan saq idup léq gumi, kecuali dengan-dengan saq aranne sampun tetulis sendéqman dunie tecipteang, léq dalem kitab kehidupan dowén Anak Dombe saq sampun tesembeléh. Keranaq nike, lamun side pade bedowé kentok jari dedengah, dengahang berite niki: “Dengan saq harus tetahen, pasti gen tetahen. Dait dengan saq harus tematéq kadu kléwang, pasti gen tematéq kadu kléwang. Keranaq nike dengan-dengan saq tehususang bagi Allah harus tabah dait setie.” Terus tiang serioq sopoq binatang lain sugul léman gumi. Ie bedowé due tanggéq maraq tanggéq anak dombe. Suarene maraq suare nage. Léq julu binatang saq penembéq nike ie kadu kekuaseanne saq beléq saq temauq léman binatang nike éndah. Seantéro gumi dait selapuq saq araq léq dalemne, ie paksaq nyembah binatang saq penembéq nike, saq sampun selah léman bakatne saq parah. Binatang saq kedue nike ngaraqang tande-tande saq ajaip. Léq julun selapuq dengan ie miaq api turun léman langit ojok gumi. Dait selapuq dengan saq idup léq gumi tesesatang siq tande-tande saq ie piaq léq julun binatang saq penembéq nike. Dait ie pade selapuq ie suruq miaq sopoq tetato léman binatang saq sampun bakat siq kléwang laguq tetep idup. Binatang saq kedue nike tebéng kuase jari ngebéng nyawe tipaq tetato nike, sehingge tetato nike tao ngeraos, dait nyematéq selapuq dengan saq ndéq mélé nyembah ie. Selapuq dengan, beléq dait kodéq, sugih dait miskin, hambe dait dengan merdéke, tepaksaq siq binatang nike jari nerimaq tande léq ime kanan ie pade atao léq telakar ie pade. Ndéq araq sopoq dengan juaq saq bau beli atao jual barang selain léman ie pade saq ngengadu tande nike, nike aran binatang nike mésaq, atao angke saq nyatayang aran nike. Léq dalem hal niki perlu araq hikmat. Dengan saq bijaksane tao ngerékéng angke binatang nike, séngaq angke nike aran sopoq manusie. Angkene nike enem ratus enem dase enem. Beterus tiang serioq Anak Dombe nike penggitan nganjeng léq atas Bukit Sion. Bareng kance Ie araq satus petang dase empat iyu dengan saq léq telakar ie pade tetulis peséngan-Ne dait peséngan Bapa-Ne. Terus tiang dengah suare léman langit maraq suare belabur saq beléq dait maraq suare guntur saq beléq. Suare nike kedengahan maraq suare pemaén-pemaén kecapi saq kenyeke puniq kecapine. Léq arepan tahte dait keempat mahluk dait pare pemimpin léq sekelining tahte nike, satus petang dase empat iyu dengan nike nyanyiang sopoq nyanyian saq baru. Nyanyian nike ndéq bau teperajahin siq sai-sai kecuali satus petang dase empat iyu dengan saq sampun tetebus léman gumi. Ie pade dengan-dengan saq tetep murni maraq dedare genten, séngaq ndéq uwah berubungan kance dengan nine. Ie pade iring Anak Dombe nike ojok mbé Ie lumbar. Léman antare selapuq manusie, ie pade saq sampun tetebus jari persembahan saq penembéq tipaq Allah dait tipaq Anak Dombe nike. Ie pade ndéq uwah beduste; dait ndéq araq cacat cele sekediq juaq léq ie pade. Terus tiang serioq sopoq malaékat lain saq kesur atas gati léq langit. Malaékat nike jauq Kabar Solah saq kekel jari tesampéang tipaq manusie léq gumi, nike tipaq selapuq bangse, suku, base, dait kaum. Malaékat nike bekuih siq suare saq beléq, “Pade takut tipaq Allah, dait pade puji keagungan-Ne! Séngaq sampun waktune Allah hakimin manusie. Pade sembah Ie, saq cipteang langit, gumi, segare, dait selapuq pengembulan aiq!” Malaékat kedue nerutuk malaékat saq penembéq sambil bekuih, “Sampun runtuh! Kote Babel saq beléq sampun runtuh! Ie sampun miaq selapuq bangse jari bowos siq aiq anggur -- nike anggur léman napsu perbuatanne saq cabul!” Sopoq malaékat ketelu nerutuk due malaékat nike, sambil bekuih siq suare saq beléq, “Dengan saq nyembah binatang nike dait tetatone, dait bedowé tande binatang nike léq telakar atao léq imene, dengan nike gen nginem anggur Allah, nike anggur murke-Ne saq sampun Ie isiq ojok cawan murke-Ne, dait ndéq tekurangin! Selapuq dengan nike gen tesiksaq léq dalem api dait urirang léq arepan malaékat-malaékat suci dait léq arepan Anak Dombe nike. Pendet léman api saq nyiksaq dengan-dengan nike gen nyempuq terus selaéq-laéqne. Ie pade tesiksaq peteng menah ndéq araq engkah-engkahne. Ie pade saq nyembah binatang nike dait tetatone, selapuq dengan saq bedowé tande aran binatang nike.” Dalem hal niki dengan-dengan saq tehususang bagi Allah saq taat léq préntah-préntah Allah dait saq beriman léq Deside Isa, perlu jari tabah. Terus tiang dengah suare léman sorge, “Tulis niki: Mulai mangkin, bahagie dengan-dengan ninggal saq ninggal léq dalem Tuhan!” “Kenaq!” Jawab Roh Allah. “Ie pade gen mentelah begawéan berat, lantaran selapuq hasil pegawéan ie pade tetep gen bareng kance ie pade.” Beterus tiang serioq, make penggitan sopoq awan saq putéq. Léq atas awan nike melinggih sopoq dengan saq ruene maraq Bije Manusie. Léq sirah-Ne araq sopoq mahkote emas, dait léq gading-Ne araq sopoq awis saq merang. Beterus sopoq malaékat saq lain sugul léman Gedéng Suci Allah, siq suare saq beléq, ie matur tipaq Ie saq melinggih léq atas awan nike, “Ompéhang awis Deside nike dait pataq mangkin, séngaq sampun waktune mataq; gumi sampun masak bau tepataq!” Terus Ie saq melinggih léq atas awan nike ngompéhang awis-Ne ojok gumi, make gumi tepataq. Beterus tiang serioq sopoq malaékat saq lain malik sugul léman Gedéng Suci Allah saq léq sorge. Ie éndah negel sopoq awis saq merang. Sesampun nike, sopoq malaékat lain, saq nguasein api, dateng léman méje taoq kurban. Siq suare saq beléq ie matur tipaq malaékat saq negel awis saq merang nike, “Ompéhang awisde nike dait keret buaq-buaq lolo anggur léq gumi, séngaq buaq-buaqne sampun masak!” Make malaékat nike ompéh awisne ojok gumi dait awisne buaq-buaq anggur léman lolone, terus timpohne ojok dalem alat saq tekadu meres anggur, nike murke Allah. Buaq-buaq anggur nike teperes léq luah kote, dait léman alat pemeres anggur nike ngélék daraq maraq kokoq, jaoqne telu ratus kilométer, dait dalemne jangke gen due méter. Beterus tiang serioq léq langit sopoq tande saq lain, saq ajaip dait luar biase gati. Araq pituq malaékat kance pituq bencane saq penutuq. Nike saq penutuqne Allah numpahang murke-Ne. Sesampun nike, araq tiang serioq maraq ruen segare kace becampur api. Tiang serioq éndah dengan-dengan saq sampun menang ngelawan binatang nike, tetatone nike dait angke saq jari tande binatang nike. Dengan-dengan saq menang nike nganjeng léq sedin segare kace sambil negel kecapi saq teicanin siq Allah tipaq ie pade. Dait ie pade nyanyiang nyanyian Musa, hambe Allah, dait nyanyian Anak Dombe. Suarene: “Ya Allah, Tuhan Saq Mahekuase, agung dait ajaip gati karye-karye Deside! Raje selapuq bangse, adil dait kenaq tindakan-tindakan Deside! Sai saq nénten takut léq Deside, ya Tuhan? Sai saq nénten kayun mulieang peséngan Deside? Deside doang saq suci. Selapuq bangse gen parek nyembah Deside lantaran keadilan Deside sampun tenyatayang tipaq selapuq dengan.” Sesampun nike tiang serioq Gedéng Suci Allah léq sorge kebukaq, dait Kémah Tuhan araq léq dalemne. Terus kepituq malaékat kance kepituq bencane nike sugul léman Gedéng Suci Allah. Kelambi ie pade léman lénen saq bersi dait putéq ngempor. Dait ie pade kadu tutup dade saq tepiaq léman emas. Beterus salaq sopoq léman empat mahluk nike ngicanin tipaq kepituq malaékat nike pituq cawan emas saq penoq siq murke Allah, -- nike Allah saq idup selaéq-laéqne. Make Gedéng Suci Allah nike penoq siq pendet kemuliean dait kuase Allah. Dait sengonéq kepituq bencane saq tejauq siq kepituq malaékat nike ndéqman tutuq, ndéq araq sopoq dengan juaq saq bau tame ojok dalem Gedéng Suci Allah. Terus tiang dengah suare saq beléq léman dalem Gedéng Suci Allah bemanik tipaq kepituq malaékat nike, “Silaq lumbar dait tumpahang isi kepituq cawan murke Allah nike ojok gumi!” Malaékat saq penembéq lumbar, dait numpahang isi cawanne ojok gumi. Make tiwoq budun-budun saq nakutang dait bahaye léq selapuq dengan saq bedowé tande binatang nike, dait léq dengan-dengan saq nyembah tetatone. Sesampun nike malaékat kedue numpahang isi cawanne ojok segare. Make aiq segare jari daraq, maraq daraq dengan ninggal, dait maté éndah selapuq mahluk saq idup léq dalem segare. Beterus malaékat saq ketelu numpahang isi cawanne ojok kokoq-kokoq dait ojok pengembulan-pengembulan aiq, make selapuq aiqne jari daraq. Tiang dengah malaékat saq bekuase léq aiq nike bebase, “Hukuman saq Deside turunang nike adil, Deside saq Mahesuci, Allah saq araq, dait saq sampun araq! Séngaq ie pade sampun numpahang daraq dengan-dengan saq tehususang bagi Allah dait daraq nabi-nabi; mangkin Deside ngicanin ie pade nginem daraq. Mule hal nike patut umaq ie pade!” Terus tiang dengah suare léman méje taoq kurban, “Ya Allah, Tuhan Saq Mahekuase, kenaq dait adil selapuq keputusan Deside!” Sesampun nike malaékat keempat numpahang isi cawanne ojok jelo, make jelo éndah teijinang ngotongang manusie siq api. Manusie tekotongang siq panas jelo saq keras nike, dait ie pade ngutuk peséngan Allah, saq bekuase léq bencane-bencane nike. Timaq maraq nike, ie pade ndéq mélé tobat léman dose-dose ie pade dait ndéq mélé mulieang Allah. Terus malaékat kelime numpahang isi cawanne ojok tahte binatang nike. Make selapuq kerajaan binatang nike jari peteng, dait manusie ngakoq élaqne mésaq lantaran sakitan. Terus ie pade ngutuk Allah léq sorge lantaran ie pade sakitan dait lantaran budun-budun ie pade. Laguq ie pade ndéq mélé éndah tobat léman perbuatan-perbuatan ie pade saq jahat. Sesampun nike malaékat keenem numpahang isi cawanne ojok kokoq Eprat saq beléq nike. Make kokoq nike gero sehingge raje-raje léman timuq bau liwat. Terus tiang serioq telu roh jahat saq ruene maraq lépang. Sopoq-sopoq lépang nike sugul léman biwih nage, léman biwih binatang, dait léman biwih nabi palsu. Ie pade roh-roh sétan saq miaq keajaipan-keajaipan. Ketelu roh nike lalo ojok selapuq raje léq seantéro dunie dait ngumpulang ie pade jari betempur léq jelo saq beléq, nike jelo Allah Saq Mahekuase. “Pade dengahang! Tiang dateng maraq maling! Bahagie dengan saq tetep bejage-jage dait jagaq kelambine, sehingge ie ndéq lampaq bekelombas dait jari ilaq léq julun dengan luwéq!” Beterus roh-roh nike ngumpulang raje-raje nike léq sopoq taoq saq dalem base Ibrani aranne Harmagedon. Sesampun nike malaékat kepituq numpahang isi cawanne ojok awang-awang. Make kedengahan suare saq beléq léman tahte léq Gedéng Suci Allah, “Sampun inggas!” Terus araq kisap saling samber dait suare guntur saq begeruduk dait lindur saq beléq. Ndéq uwah araq lindur saq maraq nike léman manusie tecipteang. Niki lindur saq paling beléq! Kote saq beléq nike towéq jari telu bagian, dait kote-kote bangse-bangse saq lain ancur. Terus Allah iling léq Babel saq beléq nike. Make Allah ngicanin ie nginem anggur léman cawan anggur murke-Ne. Selapuq pulao telang, dait selapuq gunung éndah musnah. Ujan és saq beléq, saq sopoq-sopoq beratne séket kilo, geriq léman langit nimpe dengan-dengan. Make ie pade ngutuk Allah lantaran bencane ujan és saq beléq gati nike. Sesampun nike salaq sopoq léman kepituq malaékat saq negel pituq cawan nike dateng ojok tiang dait bebase léq tiang, “Silaq, tiang gen petitoqang side berembé pelacur saq beléq nike gen tehukum, nike kote beléq saq tepiaq léq dékét kokoq-kokoq. Raje-raje dunie gawéq perbuatan saq cabul kance ie, dait penghuni gumi jari bowos lantaran nginem anggur perbuatanne saq cabul.” Terus Roh Allah nguasein tiang, dait malaékat nike jauq tiang ojok padang gurun, léq derike tiang serioq sopoq dengan nine tokol léq atas sopoq binatang saq béaq toaq warnene, dait saq penoq tetulis siq aran-aran saq menghine Allah. Binatang nike bedowé pituq otak dait sepulu tanggéq. Dengan nine nike kadu kelambi saq bewarne lempok lomaq dait béaq toaq, dait tepayas siq periasan-periasan emas, permate-permate, dait mutiare. Léq imene ie negel sopoq cawan emas saq penoq siq hal-hal saq najis dait kotor, hasil léman perbuatanne saq cabul. Léq telakarne tetulis sopoq aran saq bedowé arti rahasie. Aran nike “Babel Saq Beléq, inen selapuq pelacur dait dengan bejat léq dunie.” Terus tiang serioq bahwe dengan nine nike bowos siq daraq dengan-dengan saq tehususang bagi Allah dait daraq dengan-dengan saq tematéq lantaran setie léq Deside Isa. Sewaktu tiang serioq dengan nine nike, tiang jari bengaq gati. Terus malaékat nike bebase léq tiang, “Kembéq side bengaq? Gen tiang badaq side rahasie dengan nine nike dait rahasie binatang saq ie tunggang nike, nike binatang saq bedowé pituq otak dait sepulu tanggéq. Binatang nike laéq sampun side serioq, laguq mangkin sampun ndéq araq malik. Karing semendaq malik ie gen sugul léman jurang maut dait tame ojok dalem kebinasean. Dengan-dengan saq idup léq gumi, saq aranne ndéq tetulis léq kitab kehidupan léman sendéqman dunie tecipteang gen bengaq lamun serioq binatang nike. Séngaq laéq binatang nike sampun araq, mangkin ie ndéq araq malik, laguq ie gen dateng malik. Dalem hal niki perlu araq hikmat dait pengertian. Pituq otak nike pituq gunung; nike gunung-gunung taoq dengan nine nike tokol. Dait pituq otak nike éndah pituq raje: Lime léman ie pade sampun teancurang, sopoq masih mréntah, dait saq sopoqne malik ndéqman dateng. Lamun ie dateng éraq ie gen mréntah semendaq doang. Dait binatang saq laéq sampun araq, laguq mangkin ndéq araq malik, nike raje saq kebaluq. Ie éndah salaq sopoq léman kepituq raje nike, saq mangkin nuju kebinasean. Sepulu tanggéq saq side serioq, nike sepulu raje saq ndéqman mulai mréntah. Laguq ie pade gen teicanin kuase jari mréntah jari raje bareng-bareng kance binatang nike sejam ngonéqne. Kesepulu raje niki selapuqne bedowé tujuan saq pade; ie pade selapuqne nyerahang kekuatan dait kekuasean ie pade tipaq binatang nike. Ie pade gen perang ngelawan Anak Dombe nike. Laguq Anak Dombe nike kance pengiring-pengiring-Ne saq setie saq sampun Ie manikang dait Ie piléq nike gen ngalahang raje-raje nike, séngaq Ie Tuan selapuq tuan, dait Raje selapuq raje.” Malaékat nike éndah bebase, “Aiq saq side serioq nike, taoq pelacur nike tokol, nike bangse-bangse, rakyat-rakyat, kaum dait base. Sepulu tanggéq saq side serioq dait binatang nike gen meriq léq pelacur nike. Ie pade gen ngerampas selapuq saq ie épéang, dait miaq ie jari bekelombas. Ie pade gen kelor dagingne dait binaseangne kadu api. Séngaq Allah sampun noloq léq até ie pade keméléq jari ngelaksaneang pekayunan-Ne. Allah miaq ie pade sepakat jari nyerahang kekuasean ie pade tipaq binatang nike, adéq binatang nike mréntah, jangke selapuq Manik Allah telaksane. Dengan nine saq side serioq nike, kote beléq, saq mréntah raje-raje léq gumi.” Sesampun nike tiang serioq sopoq malaékat saq lain turun léman sorge. Ie bedowé kekuasean saq beléq, dait kemulieanne miaq selapuq gumi jari menah. Siq suare saq beléq, ie bekuih, “Sampun runtuh! Babel beléq sampun runtuh! Mangkin ie jari taoq ndot sétan-sétan dait roh-roh jahat. Léq dalemne idup segale macem kedit saq najis dait saq temeriq siq dengan. Séngaq selapuq bangse sampun nginem anggur napsu perbuatanne saq cabul. Raje-raje dunie gawéq perbuatan saq cabul kance ie, dait pedagang-pedagang léq gumi jari sugih siq napsune saq ndéq bau teandek.” Terus tiang dengah suare saq lain léman sorge, “Pade sugul, umat Tiang! Sugul léman dalemne! Ndaq side pade turut dose-dosene, dait milu nanggung hukumanne! Séngaq dosene betumpuk-tumpuk jangke dateng langit, dait Allah éndah iling léq kejahatanne. Perlakuang ie maraq ie sampun perlakuang side pade; bales ie due kali lipet selapuq saq sampun ie laksaneang. Isiqang cawanne siq ineman saq due kali kerasan léman ineman saq ie sadangang umaq side pade. Béng ie penderitean dait dukecite saq pade luwéqne kance kemuliean dait keméwahan saq ie béng tipaq diriqne mésaq. Séngaq ie tetep doang bebase léq diriqne, ‘Tiang niki ratu saq mréntah! Tiang ndéq bebalu; tiang ndéq gen ngalamin kesedihan!’ Lantaran nike, make dalem sejelo doang ie gen tetimpe siq bahle -- penyakit, kesedihan, dait kelapahan. Dait ie gen tekotongang siq api, séngaq Tuhan Allah bekuase hakimin ie.” Raje-raje dunie saq milu léq dalem perbuatan-perbuatan saq cabul dait idup léq dalem napsu dengan nine nike, gen tangisin dait éroq aséq léq kote nike lamun ie pade serioq pendet nyempuq léman api saq ngotongang ie. Ie pade gen nganjeng léman jaoq séngaq ie pade takut kene siq penderiteanne. Basen ie pade, “Aduh, celake gati kote saq kesohor niki -- kote Babel saq kuat! Dalem sejam doang hukumande sampun telaksaneang!” Pare pedagang léq gumi éndah nangis dait bedukecite lantaran dengan nine nike, séngaq ndéq araq sopoq dengan juaq saq bau malik beli barang-barang dagangan ie pade. Ndéq araq saq beli emas, perak, permate, dait mutiare ie pade; lakar lénen, lakar warne lempok lomaq, sutre dait lakar warne béaq toaq; segale macem kayuq saq sengéh ambune, barang-barang léman gading gajah dait léman kayuq-kayuq saq mahel-mahel, léman tembage, besi, dait pualam; léndong kayuq manis, ragi-ragian, sesengéhan, mur, dait menyan; anggur dait minyak, tepung dait gandum; sampi dait dombe, jaran dait keréte, hambe-hambe, malahan nyawe manusie. Pedagang-pedagang nike bebase léq dengan nine nike, “Selapuq saq side melétang sampun ndéq araq malik, dait selapuq saq solah dait méwah sampun telang. Side ndéq gen ndait ie malik!” Pare pedagang saq sampun jari sugih lantaran bedagang léq kote nike gen nganjeng léman jaoq, séngaq ie pade takut kene siq penderiteanne. Ie pade gen nangis dait éroq aséq, terus bebase, “Aduh, celake gati kote saq kesohor niki! Biasene ie ngengadu kelambi lénen, lakar warne lempok lomaq dait lakar warne béaq toaq; biasene ie penoq siq periasan emas, permate, dait mutiare! Laguq dalem sejam doang ie sampun kélangan selapuq kesugihanne nike!” Selapuq kapten kapal, penumpang, dait anak buah kapal, dait selapuq dengan saq pemétaqne léq segare, nganjeng léman jaoq. Dait bekuih sewaktu ie pade serioq pendet nyempuq léman api saq julatang kote nike. Ie pade bekuih, “Ndéq uwah araq kote lain maraq kote saq beléq niki!” Make ie pade sawur awu-awu léq ulu ie pade jari tande dukecite, terus nangis dait éroq aséq bekuih-kuih, “Aduh, celake gati kote saq beléq niki! Kesugihanne sampun miaq selapuq dengan saq bedowé kapal-kapal léq segare jari sugih! Laguq dalem sejam doang, ie sampun kélangan selapuq-lapuqne!” Hai sorge, pade besukecite lantaran keancuran kote nike! Hai dengan-dengan saq tehususang bagi Allah, rasul-rasul, dait nabi-nabi, pade besukecite! Séngaq Allah sampun ngukum ie jari pembalesan léq napi saq sampun ie laksaneang tipaq side pade! Sesampun nike, sopoq malaékat saq perkase ngangkat sopoq batu -- saq beléqne maraq batu gilingan saq beléq terus tesaut ojok segare, dait bebase, “Maraq niki entane kote Babel saq kesohor nike gen tesaut sehingge ndéq gen tedait malik. Suare kecapi, penyanyi-penyanyi, dait peniup-peniup suling dait terompét ndéq gen kedengahan malik léq dalemde, ndéq gen tedait éndah sopoq dengan saq ahli léq bidang kesenian léq derike, dait suare batu penggilingan éndah ndéq gen kedengahan malik. Dengan ndéq gen serioq malik cahaye dilah léq dalemde; dait ndéq gen kedengahan éndah suare dengan begawé ngawinang léq derike. Pedagang-pedagang nike dengan-dengan saq paling tehormatin léq gumi, dait siq ilmu-ilmu séhérde side nipu selapuq bangse léq dunie!” Babel tehukum séngaq léq dalem kote nike sampun kendaitan daraq nabi-nabi, daraq dengan-dengan saq tehususang bagi Allah, dait daraq selapuq dengan saq sampun tematéq léq gumi. Sesampun nike tiang dengah suare saq nyaring maraq suare dengan luwéq bekuih-kuih léman sorge, “Pade mulieang Allah! Allahte nike Allah saq nyelametang; Ie Allah saq agung dait bekuase! Penghakimanne adil dait bijaksane! Ie sampun mutusang hukuman tipaq pelacur saq beléq nike, saq nyédaq dunie siq perbuatanne saq cabul. Allah sampun hukum pelacur nike, séngaq ie nyematéq hambe-hambe Allah.” Terus dengan luwéq nike bekuih malik, “Pade mulieang Allah! Pendet léman api nike nyempuq selaéq-laéqne!” Make keempat likur pemimpin dait keempat mahluk saq léq sekelining tahte nike nyungkur dait nyembah Allah saq melinggih léq atas tahte. Ie pade matur, “Amin! Pade mulieang Allah!” Terus kedengahan suare léman tahte nike, “Pade mulieang Allah, hai selapuq hambe Allah, dait selapuq dengan -- beléq dait kodéq -- saq takut léq Allah!” Sesampun nike tiang dengah maraq suare sekumpulan dengan saq luwéq gati; suarene maraq umbak saq beléq dait maraq guntur. Tiang dengah suare ie pade, “Pade mulieang Allah! Séngaq Tuhante, Allah Saq Mahekuase nike, mangkin sampun mréntah jari raje! Silaq ite besukecite dait gembire; silaq ite puji keagungan-Ne! Séngaq sampun dateng jelo pernikahan Anak Dombe nike, dait pengantén-Ne sampun siep. Ie sampun teicanin kelambi lénen saq putéq ngempor jari tekadu.” (Kelambi lénen nike perbuatan-perbuatan saq kenaq saq telaksaneang siq dengan-dengan saq tehususang bagi Allah.) Terus malaékat nike bebase léq tiang, “Tulis niki: ‘Bahagie dengan saq tepesilaq ojok gawé ngawinang Anak Dombe nike.’ ” Beterus malaékat nike bebase malik léq tiang, “Niki manik saq kenaq léman Allah.” Tiang nyungkur léq julun malaékat nike gen nyembah ie, laguq ie bebase léq tiang, “Ndaq! Ndaq nyembah tiang, pade sembah Allah! Séngaq tiang éndah hambe pade maraq side dait maraq selapuq semetonde saq setie léq kesaksian Deside Isa!” Séngaq kesaksian Deside Isa nike roh nubuat. Beterus tiang serioq sorge kebukaq, terus penggitan sopoq jaran putéq. Aran penunggang-Ne Saq Setie dait Saq Kenaq. Ie adil dalem mutusang hukuman dait dalem peperangan saq Ie laksaneang. Penyermin-Ne maraq nyale api dait léq sirah-Ne Ie ngengadu luwéq mahkote. Léq Ie tetulis sopoq aran; dait cume Ie mésaq saq wikan aran nike. Jubah saq Ie kadu sampun tecelep léq dalem daraq. Dait Ie tesebut “Manik Allah”. Dait selapuq pasukan saq léq sorge ngiring Ie; ie pade nunggang jaran-jaran putéq, dait bekelambi lénen saq putéq bersi. Léman cangkem-Ne sugul sopoq kléwang saq merang dait siq kléwang nike Ie gen ngalahang bangse-bangse, dait Ie gen mréntah ie pade siq tunjang besi. Ie gen meres anggur léq dalem alat pemeres anggur murke Allah Saq Mahekuase. Léq jubah-Ne dait léq impung-Ne tetulis aran niki, “Raje selapuq raje, dait Tuan selapuq tuan.” Terus tiang serioq sopoq malaékat nganjeng léq atas jelo. Siq suare saq beléq ie bekuih tipaq selapuq kedit saq kesur léq langit, “Silaq bekumpul ojok gawé beléq saq terayeang siq Allah! Silaq kelorang daging raje-raje, daging panglime-panglime, dait daging pahlawan-pahlawan; silaq kelorang daging pare penunggang jaran dait daging jaran-jaranne, dait daging selapuq umat manusie, beléq dait kodéq, hambe dait dengan merdéke!” Beterus tiang serioq binatang nike, dait raje-raje gumi kance pasukan perang ie pade, bekumpul jari betempur ngelawan Ie saq nunggang jaran putéq nike dait pasukan perang-Ne. Make binatang nike tebau bareng-bareng kance nabi palsu saq sampun miaq keajaipan-keajaipan léq julun binatang nike. (Siq keajaipan-keajaipan nike binatang nike nipu dengan-dengan saq bedowé tande binatang nike dait dengan-dengan saq nyembah tetato binatang nike.) Terus binatang nike dait nabi palsu nike tetetéh idup-idup ojok dalem segare api saq nyale siq urirang. Dait selapuq pasukan perang ie pade tematéq siq kléwang saq sugul léman cangkem penunggang jaran putéq nike; dait kedit-kedit éndah dateng ngaken daging ie pade jangke besuh. Sesampun nike tiang serioq sopoq malaékat turun léman sorge. Léq imene ie negel kunci jurang maut dait sopoq ranté saq beléq. Terus ie bau nage, ulah toaq nike, -- nike Belis dait Sétan nike -- dait sékoqne siyu taun ngonéqne. Beterus malaékat nike tetéh nage nike ojok dalem jurang maut, dait lentingne jurang nike dait teségel, adéq nage nike ndéq bau malik nyesatang bangse-bangse sendéqman tutuq waktu saq siyu taun nike. Sesampun nike ie harus telepas, laguq waktune singket. Beterus tiang serioq tahte-tahte, dait dengan-dengan saq tokol léq tahte-tahte nike teicanin kuase jari mutusang hukuman. Tiang serioq éndah jiwe-jiwe dengan-dengan saq sampun tepeleng belongne lantaran ie pade ngebéng kesaksian mengenai Deside Isa, dait nyampéang Manik Allah. Dengan-dengan nike ndéq nyembah binatang, atao tetatone. Ie pade ndéq uwah nerimaq tande binatang nike léq telakar dait léq ime ie pade. Make ie pade idup malik dait mréntah jari raje bareng Almasih siyu taun ngonéqne. Niki penembéqne dengan-dengan ninggal teidupang malik. (Laguq dengan-dengan ninggal saq lainne ndéqman teidupang léq waktu saq siyu taun nike.) Bahagie dengan-dengan saq milu teidupang malik léq waktu saq penembéq nike. Ie pade patut jari dowén Allah. Kematéan saq kedue ndéq bekuase malik léq ie pade. Ie pade gen jari imam-imam Allah dait imam-imam Almasih; dait ie pade gen mréntah bareng Almasih siyu taun ngonéqne. Sesampun tutuq waktu saq siyu taun nike, Belis gen telepas léman bui, dait ie gen lalo nyesatang bangse-bangse saq nyebar léq seantéro gumi, nike Gog dait Magoq, dait ngumpulang ie pade jari perang dait jumlah ie pade luwéq gati, maraq gerés léq segare. Beterus ie pade bepencar-pencar ojok seantéro gumi, terus ngepung kémah dengan-dengan saq tehususang bagi Allah dait kote saq tetunah siq Allah. Laguq api turun léman langit dait musnahang ie pade. Beterus Belis saq nyesatang ie pade nike, tesaut ojok segare api dait urirang. Léq derike taoqne binatang dait nabi palsu nike tetetéh, dait ie pade gen tesiksaq kenjelo kekelem jangke selaéq-laéqne. Sesampun nike tiang serioq sopoq tahte putéq saq beléq dait Ie saq melinggih léq atasne. Langit dait gumi musnah léman arepan-Ne, sehingge ndéq penggitan malik. Dait tiang serioq dengan-dengan ninggal, beléq dait kodéq, nganjeng léq arepan tahte nike. Make kitab-kitab tebukaq. Terus sopoq kitab saq lain tebukaq éndah, nike kitab kehidupan. Beterus hukuman tetimpeang tipaq dengan-dengan saq ninggal, setimpal kance perbuatan ie pade maraq saq tecatet léq dalem kitab-kitab nike. Beterus segare nyerahang dengan-dengan ninggal saq araq léq dalemne. Maut dait Alam Maut éndah nyerahang dengan-dengan ninggal saq araq léq ie. Dait dengan-dengan ninggal nike selapuqne tehukum siq hukuman saq setimpal kance perbuatan ie pade. Beterus Maut dait Alam Maut nike tetetéh ojok segare api. (Segare api niki kematéan saq kedue.) Dengan-dengan saq aranne ndéq tetulis léq kitab kehidupan, tetetéh ojok dalem segare api. Terus tiang serioq langit saq baru dait gumi saq baru, séngaq langit saq penembéq dait gumi saq penembéq éndah sampun telang, dait segare éndah ndéq araq malik. Make tiang serioq kote suci nike, nike Yerusalem saq baru, turun léman sorge, léman Allah. Kote nike sampun tesiepang maraq sopoq pengantén nine saq tepayas jari bedait kance pengantén mame. Terus tiang dengah suare saq beléq léman tahte nike, “Mangkin kémah Allah araq léq tengaq-tengaq manusie! Ie gen idup kance ie pade, dait ie pade gen jari umat-Ne. Allah mésaq gen araq kance ie pade dait jari Allah ie pade. Ie gen usap selapuq aiq penenteng léman penenteng ie pade. Kematéan ndéq gen araq malik; kesedihan, tangisan, atao kesakitan gen ndéq araq éndah. Hal-hal saq laéq sampun musnah.” Terus Ie saq melinggih léq atas tahte nike bemanik, “Mangkin Tiang jariang selapuqne baru!” Ie bemanik éndah léq tiang, “Tulis niki, séngaq selapuq manik niki kenaq dait bau tepercaye.” Beterus manik-Ne, “Sampun selesé! Tiang niki saq penembéq dait saq penutuq; Tiang Tuhan léman Penembéq jangke Penutuq. Sebilang dengan saq bedak, gen Tiang béng nginem secare cume-cume léman pengembulan aiq kehidupan. Dengan-dengan saq menang gen nerimaq hal-hal nike léman Tiang. Tiang gen jari Allahne, dait ie jari bije Tiang. Laguq dengan penakut, dengan saq ndéq percaye, dengan bejat, tukang nyematéq, dengan saq gawéq perbuatan cabul, tukang-tukang séhér, penyembah berhale, dait selapuq penduste, gen tetetéh ojok dalem segare api dait urirang saq nyale, nike kematéan saq kedue.” Sopoq léq antare kepituq malaékat saq sampun negel cawan-cawan saq penoq siq kepituq bencane penutuq nike, dateng ojok tiang dait bebase, “Silaq! Gen tiang petitoqang side pengantén nine, nike pengantén-Ne Anak Dombe.” Make Roh Allah nguasein tiang, dait malaékat nike jauq tiang ojok pucuk gunung saq beléq dait atas gati. Ie metitoqang tiang Yerusalem, kote suci nike, saq turun léman sorge, léman Allah. Kote nike penoq siq kemuliean Allah dait cahayene pade maraq permate saq paling solah, maraq batu baiduri pandan saq menéng maraq kristal. Tembok penyengkerne atas gati, bedowé due olas jebak beléq, dait tejagaq siq due olas malaékat. Léq jebak-jebak beléqne tetulis aran-aran kedue olas suku bangse Israel. Léq sedi timuq araq telu jebak beléq, léq sedi daye telu jebak beléq, léq sedi lauq telu jebak beléq dait léq sedi bat telu jebak beléq. Tembok kote nike tepiaq léq atas due olas batu dasar. Léq atas batu-batu dasar nike tetulis aran-aran kedue olas rasul Anak Dombe nike. Malaékat saq bebaos kance tiang nike bedowé tunjang pengukur léman emas, jari ngukur kote nike, jebak-jebak beléqne dait tembokne. Kote nike ruene maraq persegi empat -- bélone pade kance gamberne. Make malaékat nike ngukur kote nike kadu tunjang pengukurne; bélone due iyu samas kilométer; gamber dait atasne pade maraq bélone. Waktu malaékat nike ngukur tembokne, ternyate atas tembok nike enem dase méter. Ukuran saq tekadu siq malaékat nike maraq ukuran saq tekadu siq manusie. Tembok kote nike tepiaq léman batu baiduri pandan, dait kotene léman emas tulén, menéng maraq kace. Batu-batu dasar kote nike terias siq segale macem batu permate. Batu dasar saq penembéq tepiaq léman batu baiduri pandan, saq kedue léman batu nilam, ketelu léman batu yakut, keempat léman batu zamrud, kelime léman batu baiduri sepah, keenem léman batu jeliman, kepituq léman batu ratne cempake, kebaluq léman batu pirus, kesiwaq léman batu topas, kesepulu léman batu krisopras, kesolas léman batu lazuardi, dait saq kedue olas léman batu kecubung. Kedue olas jebak beléqne tepiaq léman due olas mutiare, sopoq-sopoq lawang tepiaq léman sopoq mutiare. Langan léq kote nike tepiaq léman emas tulén, menéng maraq kace. Tiang ndéq serioq Gedéng Suci Allah léq dalem kote nike, séngaq Gedéng Sucine nike Allah mésaq, nike Tuhan Saq Mahekuase, dait Anak Dombe nike. Kote nike ndéq perlu temenahin siq jelo atao bulan, séngaq ie temenahin siq kemuliean Allah, dait Anak Dombe nike dilahne. Bangse-bangse léq dunie gen lampaq léq dalem cahayene, dait raje-raje éndah gen jauq kesugihan ie pade ojok dalem kote nike. Jebak-jebak beléq kote nike gen tebukaq sejeloan; séngaq ndéq araq kelem léq derike. Kemuliean dait kesugihan bangse-bangse gen tejauq ojok dalem kote nike. Laguq dengan saq ngelaksaneang hal-hal saq ékék, atao dengan saq beduste -- tetu-tetu ndéq gen tame ojok dalemne. Saq gen tame cume dengan saq aranne tetulis léq dalem kitab kehidupan, kitab Anak Dombe nike. Tiang éndah tepetitoqang siq malaékat nike kokoq aiq kehidupan. Kokoq nike menéng maraq kristal dait ngélék léman tahte Allah dait tahte Anak Dombe nike, léq tengaq-tengaq langan kote nike. Léq sedi kokoq nike, léq sebilang sedine araq lolo-lolo kehidupan, saq bebuaq due olas kali setaun, sekali sebulan. Daunne tekadu jari nyelahang bangse-bangse. Léq dalem kote nike ndéq araq napi juaq saq kene siq kutuk Allah. Tahte Allah dait tahte Anak Dombe nike gen araq léq dalem kote nike. Hambe-hambe-Ne gen ibadah tipaq Ie, dait serioq penjarupan-Ne. Peséngan-Ne gen tetulis léq telakar ie pade. Ie pade ndéq gen merluang dilah atao cahaye jelo, séngaq kelem ndéq araq malik, dait Tuhan Allah mésaq gen menahin ie pade. Make ie pade gen mréntah jari raje selaéq-laéqne. Terus malaékat nike bebase léq tiang, “Manik-manik niki kenaq dait bau tepercaye. Tuhan Allah saq ngicanin Roh-Ne tipaq nabi-nabi, sampun ngutus malaékat-Ne jari nyatayang tipaq hambe-hambe-Ne napi saq harus becat telaksane.” “Setetune Tiang gen becat dateng! Bahagie dengan saq taat léq pesen-pesen nubuat dalem kitab niki!” Tiang, Yahya, sampun dengah dait serioq selapuqne niki. Sesampun tiang engkah serioq dait dengah ie, tiang nyungkur léq julun malaékat saq sampun nyatayang selapuqne nike tipaq tiang, dait tiang gen nyembah ie, laguq ie bebase léq tiang, “Ndaq! Ndaq nyembah tiang! Pade sembah Allah! Séngaq tiang éndah hambe pade maraq side, dait maraq semeton-semetonde pare nabi dait selapuq dengan saq taat léq pesen-pesen dalem kitab niki!” Terus ie bebase malik, “Ndaq rahasieang pesen-pesen nubuat léq dalem kitab niki, séngaq sampun rapet waktune selapuqne niki gen telaksane. Dengan saq jahat, alurang terus gawéq jahat; dengan saq najis, alurang najisang diriqne; dengan saq kenaq, alurang terus ngelaksaneang kebenaran, dait dengan saq idup husus bagi Allah, alurang terus idup husus bagi Allah.” “Setetune ndéqne ngonéq malik Tiang gen becat dateng dait jauq pahale jari bales sebilang dengan menurut perbuatanne. Tiang niki saq penembéq dait saq penutuq; Tiang Tuhan léman Penembéq jangke Penutuq.” Bahagie dengan saq popoq jubahne jangke bersi sehingge ie pade bedowé hak ngelorang buaq léman lolo kehidupan dait tame ojok dalem kote nike langan jebak beléqne. Laguq dengan-dengan saq ngelaksaneang hal-hal saq ékék, tukang-tukang séhér, dengan-dengan saq gawéq perbuatan saq cabul, saq nyematéq, saq nyembah berhale, dait dengan-dengan saq beduste, siq ucapan-ucapan atao siq perbuatan, selapuq dengan nike taoqne léq luah kote nike. “Tiang, Isa, sampun ngirim malaékat Tiang tipaq side pade, adéq ie ngebéng kesaksian mengenai selapuq hal-hal niki jari kepentingan jemaah-jemaah. Tiang niki keturunan Daud; Tiang bintang timuq saq menah tandur nike.” Roh Allah dait Pengantén Nine nike bebase, “Silaq!” Sebilang dengan saq dengah niki éndah harus ngucapang, “Silaq!”. Sai saq bedak, ie harus dateng! Dait sai saq melét, ie harus bait aiq kehidupan nike secare cume-cume. Tipaq sebilang dengan saq dengah pesen-pesen nubuat léq dalem kitab niki, tiang, Yahya ngebéng kesaksian: “Lamun sopoq dengan ngeromboqang sopoq hal léq pesen-pesen nubuat niki, make Allah gen ngeromboqang tipaq ie bencane-bencane saq tetulis léq dalem kitab niki. Dait lamun sopoq dengan ngurangin sopoq hal léman pesen-pesen nubuat niki, make Allah éndah gen ngurangin bagianne maraq saq tetulis léq dalem kitab niki -- nike bagian léman lolo kehidupan dait léman kote suci nike.” Ie saq ngicanin kesaksian mengenai selapuqne niki bemanik, “Kenaq, Tiang gen becat dateng!” Amin! Silaq rauh, Junjungan Saq Mulie Deside Isa! Rahmat Junjungan Saq Mulie Deside Isa araq bareng kance side selapuq! Amin.