یسُوع مسیح اِبنِ داؤد اِبنِ ابرہام دا شجرہ۔ ابرہام تُوں اِضحاق جمیا تے اِضحاق تُوں یعقُوب جمیا تے یعقُوب تُوں یہُوداہ تے اُوندے بِھرا جمے۔ تے یہُوداہ تُوں فارص تے زارح تمر تُوں جمے۔ تے فارص تُوں حصرون تے حصرون تُوں رام جمیا۔ تے رام تُوں عِمّینداب جمیا تے عِمّینداب تُوں نحسون جمیا تے نحسون تُوں سلمون جمیا۔ تے سلمون تُوں بوعز راحب تُوں جمیا تے بوعز تُوں عوبید رُوت تُوں جمیا۔ تے عوبید تُوں یسّی جمیا۔ تے یسّی تُوں داؤد بادشاہ جمیا۔ تے داؤد تُوں سُلیمان اُوں عورت تُوں جمیا جیہڑی پہلے اُوریاہ دی ذال ہئی۔ تے سُلیمان تُوں رحُبعام جمیا تے رحُبعام تُوں ابیاہ جمیا تے ابیاہ تُوں آسا جمیا۔ تے آسا تُوں یہُوسفط جمیا تے یہُوسفط تُوں یُورام جمیا تے یُورام تُوں عُزیاہ جمیا۔ تے عُزیاہ تُوں یُوتام جمیا تے یُوتام تُوں آخز جمیا تے آخز تُوں حِزقیاہ جمیا۔ تے حِزقیاہ تُوں منسّی جمیا تے منسّی تُوں امُون جمیا تے امُون تُوں یُوسیاہ جمیا۔ تے گرفتار تھی تے بابل ونجنڑ دے زمانے ءچ یُوسیاہ تُوں یکُونیاہ تے اُوندے بِھرا جمے۔ تے گرفتار تھی تے بابل ءچ ونجنڑ تُوں بعد یکُونیاہ تُوں سیالتی ایل جمیا تے سیالتی ایل تُوں زرُبابل جمیا۔ تے زرُبابل تُوں ابِیہُود جمیا تے ابِیہُود تُوں اِلیاقِیم جمیا تے اِلیاقِیم تُوں عازور جمیا۔ تے عازور تُوں صدُوق جمیا تے صدُوق تُوں اخیم جمیا تے اخیم تُوں الِیہُود جمیا۔ تے الِیہُود تُوں الِیعزر جمیا تے الِیعزر تُوں متّان جمیا تے متّان تُوں یعقُوب جمیا۔ تے یعقُوب تُوں یُوسف جمیا۔ ایہ اُوں مریم دا پایا ہا جِیں تُوں یسُوع جمیا جیہڑا المسیح اکھویندا ہے۔ اِینویں ساریاں پُشتاں ابرہام تُوں داؤد تئیں چوڈھاں پُشتاں تھیّاں تے داؤد تُوں گِھن تے گرفتار تھی تے بابل ونجنڑ تئیں چوڈھاں پُشتاں تے گرفتار تھی تے بابل ونجنڑ تُوں گِھن تے المسیح تئیں چوڈھاں پُشتاں تھیّاں۔ یسُوع مسیح دی پیدائش اِینویں تھئی جو جِیں ویلے اُوندی ماء مریم دی منگنڑی یُوسف نال تھی گئی تاں اُنہاں دے کٹھے تھیوݨ تُوں پہلے او رُوح القُدس دی قُدرت نال حاملہ تھی گئی۔ اِیں واسطے اُوندے پئے یُوسف، جیہڑا راستباز ہا تے اُونکُوں بدنام کرݨ نہ چاہندا ہا، اُونکُوں چُپ کر تے چھوڑ ڈیوݨ دا اِرادہ کیتا۔ او اِنہاں گالھیں دے بارے ءچ سوچیندا ای پِیا ہا جو رب دے فرشتے اُونکُوں خواب ءچ نظر آ تے آکھیا، ”یُوسف! داؤد دے پوتر، آپنڑی ذال مریم کُوں آپنڑے کولھ گِھن آوݨ تُوں نہ ڈر، کیوں جو جیہڑا اُوندے پیٹ ءچ ہے او رُوح القُدس دی قُدرت نال ہے۔ اُوندے پوتر جمسی تے تُوں اُوندا ناں یسُوع رکھیں کیوں جو اُوہو آپنڑے لوکاں کُوں اُنہاں دے گُناہاں تُوں نجات ڈیسی۔“ ایہ سبھ کُجھ اِیں واسطے تھیّا جو جیہڑا رب العالمین، نبی دی معرفت فرمایا ہا او پُورا تھیوے جو ”ڈیکھو ہِک کُنواری حاملہ تھیسی تے پوتر جمسی تے اُوندا ناں عِمانُوایل رکھیسن ۔“ جِیندا ترجمہ ہے خُدا ساڈے نال۔ جِیں ویلے یُوسف نیندر تُوں اُٹھیا تاں اُوں اُونویں ای کیتا جِینویں رب دے فرشتہ اُونکُوں حُکم ڈِتا ہا تے آپنڑی ذال کُوں آپنڑے گھر گِھن آیا۔ پر اُوں ویلے تئیں اُوندے کولھ نہ آیا جئیں تئیں اُوندا پوتر نہ جمیا تے اُوندا ناں یسُوع رکھیا۔ یسُوع، ہیرودیس بادشاہ دے زمانے ءچ یہُودیہ علاقے دے بیت لحم ءچ جمیا۔ اُوں ویلے سِجھ اُبھار تُوں مجُوسی یروشلیم ءچ ایہ پُچھدے ہوئے آئے جو ”یہُودیاں دا بادشاہ جیہڑا جمے او کِتھاں ہے؟ کیوں جو اساں سِجھ اُبھار آلے پاسے اُوندا تارہ ڈیکھ تے اُونکُوں سجدہ کرݨ آئے ہیں۔“ ایہ سُنڑ تے ہیرودیس بادشاہ تے اُوندے نال یروشلیم دے سبھ لوک گھبرا گئے۔ اُوں قوم دے سبھ سردار کاہِناں تے شریعت دے عالماں کُوں کٹھا کر تے اُنہاں تُوں پُچھیا جو ”المسیح کِتھاں جمسی؟“ اُنہاں اُونکُوں آکھیا، ”یہُودیہ دے بیت لحم ءچ کیوں جو نبی دی معرفت فرمایا گِیا ہے جو ’بیت لحم! یہُوداہ دے علاقے، تُوں یہُوداہ دے حاکماں ءچوں ہرگز چھوٹا نئیں کیوں جو تیڈے ءچوں ہِک حاکم اُٹھسی جیہڑا آجڑی آلی کار میڈی اُمت اِسرائیل دی نگہبانی کریسی ‘۔“ وَل ہیرودیس مجُوسیاں کُوں چُپ کر تے آپنڑے کولھ سڈیا تے اُوں تارے دے ظاہر تھیوݨ دا ٹھیک ویلا دریافت کیتا۔ تے ایہ آکھ تے اُنہاں کُوں بیت لحم بھیجیا جو ”ونجو تے اُوں بال دا ٹھیک ٹھیک پتہ کرو۔ تے جِیں ویلے او مِل ونجے تاں میکُوں وی ڈساؤ تاں جو مَیں وی وَنج تے اُونکُوں سجدہ کراں۔“ او بادشاہ دی گالھ سُنڑ تے روانہ تھئے تے او تارہ جیہڑا اُنہاں کُوں سِجھ اُبھار آلے پاسُوں نظریا ہا اُنہاں دے اگُوں ٹُریا، اِتُھوں تئیں جو اُوں جاہ اُتے وَنج کھڑا تھیّا جِتھاں او بال ہا۔ او تارے کُوں ڈیکھ تے بہُوں خوش تھئے۔ وَل او اُوں گھر ءچ داخل تھئے تے بال کُوں اُوندی ماء مریم دے کولھ ڈیکھ تے اُوندے اگُوں سجدہ کیتا، تے آپنڑے ڈبے کھول تے سونا، لُبان تے مُر اُونکُوں نذر کیتا۔ تے خُدا تُوں خواب ءچ ایہ ہدایت پا تے جو ہیرودیس دے کولھ ولا نہ ونجنڑ، او کہیں بئے رستے تُوں آپنڑے وطن دو لگے گئے۔ اُنہاں دے ونجنڑ تُوں بعد رب دا ہِک فرشتہ یُوسف کُوں خواب ءچ ڈِکھالی ڈِتا تے آکھنڑ لگا، ”اُٹھی۔ بال تے اُوندی ماء کُوں نال گِھن تے مِصر دو بھج وَنج، تے جئیں تئیں مَیں نہ آکھاں اُتھائیں رہوائے، کیوں جو ہیرودیس اِیں بال کُوں گولھ تے مارݨ چاہندے۔“ او فوراً اُٹھی تے رات دے ویلے بال تے اُوندی ماء کُوں گِھن تے مِصر دو ٹُر پِیا۔ تے ہیرودیس دی وفات تئیں اُتھائیں ریہا تاں جو جیہڑی گالھ رب العالمین نبی دی معرفت فرمائی ہئی او پُوری تھیوے جو ”مَیں مِصر تُوں آپنڑے پوتر کُوں سڈیا ۔“ جِیں ویلے ہیرودیس کُوں پتہ لگیا جو مجُوسیاں میڈے نال دوکھا کیتے تاں اُونکُوں بہُوں کاوڑ لگی۔ اُوں بیت لحم تے اُوندے چودھارُوں سپاہی بھیج تے سارے بالاں کُوں جیہڑے ڈُو سال یا اِیں تُوں چھوٹے ہَن قتل کروا ڈِتا، اُوں ویلے دے حساب نال جیہڑی اُوں مجُوسیاں تُوں تحقیق کیتی ہئی۔ اُوں ویلے او گالھ پُوری تھئی جیہڑی یرمیاہ نبی دی معرفت فرمائی گئی ہئی جو ”رامہ ءچ اواز سُنڑائی ڈِتی۔ رووݨ تے وڈے ماتم دی اواز۔ راخِل آپنڑے بالاں کیتے روندی پئی ہے تے تسلی قبول نئیں کریندی کیوں جو او ہِن کائنی ۔“ جِیں ویلے ہیرودیس مر گِیا تاں رب دے فرشتہ مِصر ءچ یُوسف کُوں خواب ءچ ڈِکھالی ڈے تے آکھیا جو ”اُٹھی۔ اِیں بال تے اِیندی ماء کُوں گِھن تے اِسرائیل دے مُلک لگا وَنج، کیوں جو جیہڑے لوک بال کُوں مارݨ چاہندے ہَن او مر گئے ہِن۔“ بس او اُٹھی تے بال تے اُوندی ماء کُوں گِھن تے اِسرائیل دے مُلک ءچ آ گِیا۔ پر ایہ سُنڑ تے جو اَرخلاؤس آپنڑے پِیُو ہیرودیس دی جاہ تے یہُودیہ دا بادشاہ بنڑ گِیا ہے تاں اُتھاں ونجنڑ تُوں ڈریا تے خواب ءچ ہدایت پا تے گلیل دے علاقے دو ٹُر پِیا۔ اُتھاں پُج تے ناصرت ناں دے شہر ءچ راہنڑ لگا۔ تے جیہڑی گالھ نبی دی معرفت فرمائی گئی ہئی او پُوری تھئی جو ”او ناصری اکھویسی۔“ اُنہاں ڈینہاں ءچ یُوحنّا بپتسمہ ڈیوݨ آلا آیا تے یہُودیہ دے بیابان ءچ ایہ منادی کرݨ لگا جو ”توبہ کرو کیوں جو اسمان دی بادشاہی نیڑے آ گئی ہے۔“ ایہ اُوہو ہے جِیندا ذِکر یسعیاہ نبی دی معرفت اِینویں تھیّا ہا جو ”بیابان ءچ ہکل ڈیوݨ آلے دی اواز آندی ہے جو رب دی راہ تیار کرو، تے اُوندے رستے سِدھے بنڑاؤ ۔“ ایہ یُوحنّا اُٹھ دے والاں دے کپڑے پَیندا ہا تے آپنڑی چیل تے چمڑے دا پٹکا بدھی راہندا ہا تے اُوندی خوراک ٹِڈیاں تے جنگلی ماکھی ہئی۔ اُوں ویلے یروشلیم تے سارے یہُودیہ تے یردن دے سارے علاقیاں تُوں لوک یُوحنّا دے کولھ گئے۔ تے آپنڑے گُناہاں دا اِقرار کر تے یردن دریا ءچ اُوں کنُوں بپتسمہ گِھدا۔ پر جِیں ویلے اُوں بہُوں سارے فریسیاں تے صدوقیاں کُوں بپتسمہ کیتے آپنڑے کولھ آندے ڈِٹھا تاں اُنہاں کُوں آکھیا جو ”نانگ دے بالو! تُہاکُوں کئیں چتا ڈِتے جو آوݨ آلے قہر کنُوں بھجو؟ بس ایجھے کم کرو جو نظر آوے جو تُساں توبہ کیتی ہے۔ تے آپنڑی اِیں بُھل ءچ نہ رہ ونجو جو ’ابرہام ساڈا پِیُو ہے،‘ کیوں جو مَیں تُہاکُوں آدھا ہاں جو خُدا اِنہاں پتھراں تُوں ابرہام کیتے اولاد پیدا کر سگدے۔ تے ہُنڑ درختاں دی جڑھ اُتے کُہاڑا رکھ ڈِتا گئے۔ بس جیہڑا درخت چنگا پھل نئیں ڈیندا او کپیا تے بھاہ ءچ سٹیا ویندے۔ مَیں تاں تُہاکُوں توبہ کیتے پانڑی نال بپتسمہ ڈیندا ہاں پر جیہڑا میڈے بعد آندے او مَیں تُوں زیادہ زور آور ہے۔ مَیں تاں اُوندیاں جُتیاں چاوݨ دے وی لائق نئیں۔ او تُہاکُوں رُوح القُدس تے بھاہ نال بپتسمہ ڈیسی۔ اُوندا چھج اُوندے ہتھ ءچ ہے تے او آپنڑے دانڑیاں کُوں بُھوں تُوں اَنج کریسی۔ وَل او دانڑیاں کُوں تاں آپنڑے پَلیاں ءچ کٹھا کریسی پر بُھوں کُوں اُوں بھاہ ءچ سَٹ ڈیسی جیہڑی وِسمنڑ آلی نئیں۔“ اُوں ویلے یسُوع گلیل تُوں یردن دے کنارے یُوحنّا کنُوں بپتسمہ گِھننڑ آیا۔ یُوحنّا ایہ آکھ تے اُونکُوں ہٹکنڑ لگا جو ”مَیں تاں خود تُہاڈے کنُوں بپتسمہ گِھننڑ دا مُتھاج ہاں تے تُساں میڈے کولھ آئے ہیوے؟“ یسُوع جواب ڈِتا، ”ہُنڑ، اِینویں ای تھیوݨ ڈے، کیوں جو مناسب ہے جو اساں خُدا دی مرضی کُوں اِیں طرحاں ای پُورا کرُوں۔“ وَل اُوں تھیوݨ ڈِتا۔ یسُوع بپتسمہ گِھن تے فوراً پانڑی تُوں باہر آیا۔ تے ڈیکھو اُوندے کیتے اسمان کُھل گِیا تے اُوں خُدا دے رُوح کُوں کبوتر وانگُوں آپنڑے اُتے لہندے ڈِٹھا۔ تے اسمان تُوں ایہ اواز آئی جو ”ایہ میڈا پیارا پوتر ہے جیندے کنُوں مَیں بہُوں خوش ہاں۔“ وَل رُوح القُدس یسُوع کُوں بیابان ءچ گِھن گِیا تاں جو او ابلیس تُوں ازمایا ونجے۔ چالیہہ ڈینہہ تے چالیہہ رات دے روزے تُوں بعد آخر اُونکُوں بُکھ لگی۔ وَل ابلیس کولھ آ تے اُونکُوں آکھیا، ”جے تُوں خُدا دا پوتر ہیں تاں اِنہاں پتھراں کُوں آکھ جو ایہ روٹیاں بنڑ ونجنڑ۔“ اُوں جواب ءچ آکھیا، ”لِکھیا ہے جو ’اِنسان صرف روٹی نال ای زندہ نہ راہسی بلکہ ہر گالھ تُوں جیہڑی خُدا دے مُنہ ءچوں نِکلدی ہے ‘۔“ وَل ابلیس اُونکُوں مُقدّس شہر ءچ گِھن گِیا تے ہیکل دے منارے اُتے کھڑا کر تے اُونکُوں آکھیا جو ”جے تُوں خُدا دا پوتر ہیں تاں آپنڑے آپ کُوں تلے سَٹ ڈے کیوں جو لِکھیا ہے جو ’او تیڈے کیتے آپنڑے فرشتیاں کُوں حُکم ڈیسی تے او تیکُوں آپنڑے ہتھاں اُتے چا گِھنسن اِینویں نہ تھیوے جو تیڈے پیراں کُوں پتھر نال دھک لگے ‘۔“ یسُوع اُونکُوں آکھیا، ”ایہ وی لِکھیا ہے جو تُوں رب آپنڑے خُدا دی ازمائش نہ کر ۔“ وَل ابلیس اُونکُوں ہِک بہُوں اُچے پہاڑ اُتے گِھن گِیا تے دُنیا دیاں ساریاں بادشاہیاں تے اُنہاں دی شان و شوکت اُونکُوں ڈِکھائی۔ تے اُونکُوں آکھیا، ”جے تُوں میڈے اگُوں جُھک تے میکُوں سجدہ کریں تاں مَیں ایہ سبھ کُجھ تیکُوں ڈے ڈیساں۔“ یسُوع اُونکُوں آکھیا، ”شیطان! دُور تھی وَنج، کیوں جو لِکھیا ہے جو ’تُوں رب آپنڑے خُدا کُوں سجدہ کر تے صرف اُوندی عبادت کر ‘۔“ وَل ابلیس اُوندے کنُوں چلیا گِیا تے فرشتے آ تے اُوندی خدمت کرݨ لگے۔ جِیں ویلے یسُوع ایہ سُنڑیا جو یُوحنّا پکڑوا ڈِتا گئے تاں او گلیل دے علاقے دو وَل گِیا۔ تے ناصرت کُوں چھوڑ تے کفرنحُوم ءچ راہنڑ لگا، جیہڑا جھیل دے کنارے زبُولُون تے نفتالی دی سرحد اُتے ہے، تاں جو جیہڑا یسعیاہ نبی دی معرفت فرمایا گِیا ہا او پُورا تھیوے جو ”زبُولُون دا علاقہ تے نفتالی دا علاقہ جھیل دی راہ یردن دریا دے پار غیر قوماں دی گلیل: جیہڑے لوک اندھارے ءچ راہندے ہَن اُنہاں تیز روشنی ڈِٹھی جیہڑے موت دے مُلک تے پچھاویں ءچ راہندے ہَن اُنہاں اُتے نُور چمکیا ۔“ اُوں ویلے تُوں یسُوع تبلیغ کرݨ تے ایہ آکھنڑ شروع کیتا، ”توبہ کرو کیوں جو اسمان دی بادشاہی نیڑے آ گئی ہے۔“ گلیل دی جھیل دے کنارے اُتے ٹُردے ہوئے یسُوع ڈُو بِھرانواں، شمعون جیہڑا پطرس اکھویندا ہا تے اُوندے بِھرا اندریاس، کُوں جھیل ءچ جال سٹیندے ڈِٹھا کیوں جو او مچھیرے ہَن۔ تے اُنہاں کُوں آکھیا، ”میڈے پِچُھوں آؤ تے مَیں تُہاکُوں خُدا کیتے بندے پکڑن آلا بنڑیساں۔“ او فوراً آپنڑے جال چھوڑ تے اُوندے پِچُھوں ٹُر پئے۔ اُتھوں اگھاں ودھ تے اُوں بئے ڈُو بِھرا، یعقُوب تے یُوحنّا ڈِٹھے جیہڑے زبدی دے پوتر ہَن تے کشتی ءچ آپنڑے پِیُو نال آپنڑے جالاں دی مرمت کریندے پئے ہَن، تے اُنہاں کُوں سڈیا۔ او فوراً کشتی تے آپنڑے پِیُو کُوں چھوڑ تے اُوندے پِچُھوں ٹُر پئے۔ یسُوع سارے گلیل ءچ پِھردا ریہا تے عبادت خانیاں ءچ تعلیم ڈیندا تے بادشاہی دی خوشخبری سُنڑیندا ریہا، تے لوکاں کُوں ہر طرحاں دی بیماری تے کمزوری تُوں شِفا ڈیندا ریہا۔ یسُوع دی شُہرت سارے سُوریہ ءچ تھی گئی تے لوک سبھ بیماراں کُوں جیہڑے طرحاں طرحاں دیاں بیماریاں تے تکلیفاں دے وکھیڑے ءچ ہَن تے جیہڑے مِرگی دے مریض ہَن، تے مفلُوج ہَن، تے جِنہاں ءچ بدرُوحاں ہَن اُوندے کولھ گِھن آئے تے اُوں اُنہاں کُوں شِفا ڈِتی۔ تے گلیل تے دکُپُلس تے یروشلیم تے یہُودیہ تے یردن دے پار تُوں وڈی بِھیڑ اُوندے پِچُھوں تھی پئی۔ یسُوع اِیں بِھیڑ کُوں ڈیکھ تے پہاڑ اُتے چڑھ گِیا تے جِیں ویلے بہہ گِیا تاں اُوندے شاگرد اُوندے کولھ آئے تے او اُنہاں کُوں اِینویں تعلیم ڈیوݨ لگا: ”مُبارک ہِن او جیہڑے دل دے غریب ہِن، کیوں جو اسمان دی بادشاہی اُونہی دی ہے۔ مُبارک ہِن او جیہڑے ڈُکھی ہِن، کیوں جو او تسلی پیسن۔ مُبارک ہِن او جیہڑے حلیم ہِن، کیوں جو او زمین دے وارث ہوسن۔ مُبارک ہِن او جیہڑے راستبازی دے بُکھے تے ترِسّے ہِن، کیوں جو او رَج سِن۔ مُبارک ہِن او جیہڑے رحم دل ہِن، کیوں جو اُنہاں اُتے رحم کیتا ویسی۔ مُبارک ہِن او جیہڑے پاک دل ہِن، کیوں جو او خُدا کُوں ڈیکھسن۔ مُبارک ہِن او جیہڑے صُلح کرویندے ہِن، کیوں جو او خُدا دے پوتر اکھویسن۔ مُبارک ہِن او جیہڑے راستبازی دے سببّوں ستائے گئے ہِن، کیوں جو اسمان دی بادشاہی اُونہی دی ہے۔ مُبارک ہوسو تُساں جِیں ویلے لوک تُہاکُوں میڈے سببّوں لعن طعن کریسن تے طرحاں طرحاں دے بُرے گالھیں تُہاڈے بارے ءچ نا حق اکھیسن۔ خوش تھیوائے تے جشن منائے کیوں جو اسمان اُتے تُہاکُوں وڈا اجر مِلسی، اِیں واسطے جو لوکاں تُہاڈے تُوں پہلے نبیاں کُوں وی اِینویں ای ستایا ہا۔ تُساں زمین دے نمک ہیوے، پر جے نمک دا مزہ ویندا راہوے تاں او کیہڑی چیز نال نمکین کیتا ویسی؟ وَل او کہیں کم دا نئیں سوائے اِیندے جو باہر سَٹ ڈِتا ونجے تے لوکاں دے پیراں تلے لتاڑیا ونجے۔ تُساں دُنیا دا نُور ہیوے۔ جیہڑا شہر پہاڑ اُتے وسیا ہے او لُک نئیں سگدا۔ تے ڈیوا بال تے تھاں دے تلے نئیں بلکہ ڈیواٹ اُتے رکھیندے ہِن، تاں اُوندے تُوں گھر دے سبھ لوکاں کُوں روشنی پُجدی ہے۔ اِیں طرحاں تُہاڈی روشنی لوکاں دے سامنڑے چمکے تاں جو او تُہاڈے نیک کماں کُوں ڈیکھ تے تُہاڈے اسمانی باپ دی تمجید کرݨ۔ ایہ نہ سمجھو جو مَیں توریت یا نبیاں دے صحیفیاں کُوں منسوخ کرݨ آیا ہاں۔ منسوخ کرݨ نئیں بلکہ پُورا کرݨ آیا ہاں۔ کیوں جو مَیں تُہاکُوں سچ آدھا ہاں جو جئیں تئیں اسمان تے زمین ٹَل نہ ونجنڑ ہِک نقطہ یا ہِک شوشہ توریت ءچوں ہرگز نہ ٹَل سی جئیں تئیں سبھ کُجھ پُورا نہ تھی ونجے۔ بس جیہڑا کوئی اِنہاں چھوٹے تُوں چھوٹے حُکماں ءچوں کہیں کُوں توڑیسی تے ڈُوجھیاں کُوں وی اِینویں کرݨ سکھیسی او اسمان دی بادشاہی ءچ سبھ تُوں چھوٹا اکھویسی۔ پر جیہڑا اُنہاں اُتے عمل کریسی تے اُنہاں دی تعلیم ڈیسی او اسمان دی بادشاہی ءچ وڈا اکھویسی۔ کیوں جو مَیں تُہاکُوں سچ آدھا ہاں جو جے تُہاڈا نیک چال چلنڑ شریعت دے عالماں تے فریسیاں تُوں زیادہ نہ ہوسی تاں تُساں اسمان دی بادشاہی ءچ اصلُوں نہ وَنج سگسو۔ تُساں سُنڑ گِھدا ہے جو پُرانڑے زمانے دے لوکاں کُوں آکھیا گِیا ہا جو ’خون نہ کرائے ، تے جیہڑا خون کریسی او عدالت دی سزا دا حقدار ہوسی۔‘ پر مَیں تُہاکُوں ایہ آدھا ہاں جو جیہڑا آپنڑے بِھرا اُتے کوڑیندے، او عدالت دی سزا دا حقدار ہوسی تے جیہڑا آپنڑے بِھرا کُوں پاگل اکھیسی او وڈی عدالت دی سزا دا حقدار ہوسی۔ تے جیہڑا اُونکُوں احمق اکھیسی او دوزخ دی بھاہ دا سزاوار بنڑسی۔ بس جے قُربان گاہ اُتے نذرانہ پیش کریندے ویلے تیکُوں یاد آوے جو تیڈے بِھرا کُوں تَیں تُوں شکایت ہے، تاں تُوں آپنڑا نذرانہ اُتھائیں قُربان گاہ دے اگُوں چھوڑ ڈے تے وَنج تے آپنڑے بِھرا نال صُلح کر گِھن۔ وَل آ تے آپنڑا نذرانہ پیش کر۔ جئیں تئیں تُوں آپنڑے مُدعی نال راہ ءچ ہیں تُوں اُوندے نال جلدی صُلح کر گِھن، کِتھائیں اِینویں نہ تھیوے جو او تیکُوں مُنصف دے حوالے کر ڈیوے، تے مُنصف تیکُوں سپاہی دے حوالے کر ڈیوے، تے تیکُوں قید خانے ءچ سَٹ ڈِتا ونجے۔ مَیں تیکُوں سچ آدھا ہاں جو تُوں جئیں تئیں پائی پائی ادا نہ کریسیں اُتھوں کڈھائیں نہ چُھٹسیں۔ تُساں سُنڑ گِھدا ہے جو آکھیا گِیا ہا جو ’زِنا نہ کرائے ۔‘ پر مَیں تُہاکُوں ایہ آدھا ہاں جو جئیں کہیں عورت کُوں بُری نِگاہ نال ڈِٹھا تاں اُوں آپنڑے دل ءچ اُوندے نال زِنا کر گِھدا۔ بس جے تیڈی سجی اکھ تَیں کنُوں گُناہ کراوے تاں اُونکُوں کڈھ تے سَٹ ڈے۔ کیوں جو تیڈے کیتے اِیہو چنگا ہے جو تیڈے بدن دے انگاں ءچوں ہِک اَنگ ویندا راہوے بجائے اِیندے جو تیڈا سارا بدن دوزخ ءچ سَٹ ڈِتا ونجے۔ تے جے تیڈا سجا ہتھ تَیں کنُوں گُناہ کراوے تاں اُونکُوں کپ سَٹ۔ کیوں جو تیڈے کیتے اِیہو چنگا ہے جو تیڈے سارے انگاں ءچوں ہِک اَنگ ویندا راہوے بجائے اِیندے جو تیڈا سارا بدن دوزخ ءچ سَٹ ڈِتا ونجے۔ ایہ وی آکھیا گِیا ہا جو ’جیہڑا کوئی آپنڑی ذال کُوں چھوڑے تاں اُونکُوں طلاق لِکھ ڈیوے ۔‘ پر مَیں تُہاکُوں ایہ آدھا ہاں جو جیہڑا کوئی آپنڑی ذال کُوں بدکاری دے سِوا کہیں بئی وجہ کنُوں طلاق ڈیندے اوہ اُوندے تُوں زِنا کرویندے، تے جیہڑا کوئی اُوں طلاق شدہ عورت نال شادی کریندے او زِنا کریندے۔ وَل تُساں سُنڑ چُکے ہیوے جو پُرانڑے زمانے دے لوکاں کُوں آکھیا گِیا ہا جو ’کوئی کُوڑی قَسم نہ چوائے بلکہ آپنڑیاں قَسماں رب کیتے پُوریاں کرائے ۔‘ پر مَیں تُہاکُوں ایہ آدھا ہاں جو اصلُوں قَسم نہ چوائے۔ نہ اسمان دی کیوں جو او خُدا دا تخت ہے، نہ زمین دی کیوں جو او اُوندے پیراں دی چوکی ہے، نہ یروشلیم دی کیوں جو او وڈے بادشاہ دا شہر ہے، نہ آپنڑے سر دی قَسم چوائے کیوں جو تُوں آپنڑے ہِک وال کُوں وی چِٹا یا کالا نئیں کر سگدا۔ اِیں واسطے ہاں دی جاہ ’ہاں‘ تے نہ دی جاہ ’نہ‘ آکھو کیوں جو جیہڑا اِیں کنُوں زیادہ ہے او ابلیس کنُوں ہے۔ تُساں سُنڑ چُکے ہیوے جو آکھیا گِیا ہا جو ’اکھ دے بدلے اکھ تے ڈند دے بدلے ڈند ۔‘ پر مَیں تُہاکُوں ایہ آدھا ہاں جو شریر دا مُقابلہ نہ کرائے بلکہ جیہڑا کوئی تیڈی سجی گَلھ اُتے چاٹ مارے تاں ڈُوجھی وی اُوندے پاسے کر گِھن۔ جے کوئی تَیں اُتے دعویٰ کر تے تیڈا چولا گِھننڑ چاہوے تاں جُبّہ وی اُوندے حوالے کر ڈے۔ تے جے کوئی تیکُوں وِنگار ءچ ہِک مِیل گِھن ونجنڑ چاہوے تاں اُوندے نال ڈُو مِیل لگا وَنج۔ جیہڑا کوئی تَیں تُوں منگے اُونکُوں ڈے تے جیہڑا تَیں تُوں قرض گِھننڑ چاہوے اُونکُوں اِنکار نہ کر۔ تُساں سُنڑ چُکے ہیوے جو آکھیا گِیا ہا جو ’آپنڑے ہمسائے نال محبت رکھ تے دُشمنڑ نال وَیر۔‘ پر مَیں تُہاکُوں ایہ آدھا ہاں جو آپنڑے دُشمنڑاں نال محبت رکھو، تے جیہڑے تُہاکُوں سَتیندے ہِن اُنہاں کیتے دُعا کرو۔ تاں تُساں آپنڑے اسمانی باپ دے فرزند بنڑ سو۔ کیوں جو او آپنڑے سِجھ کُوں نیکاں تے بداں ڈوہائیں اُتے چمکیندے تے نیکاں تے گُنہگاراں ڈوہائیں اُتے مینہ وسیندے۔ کیوں جو جے تُساں صرف اُنہاں نال محبت رکھیندے ہیوے جیہڑے تُہاڈے نال محبت رکھیندے ہِن تاں تُہاکُوں کیا اجر مِلسی؟ کیا محصُول گِھننڑ آلے وی اِینویں نئیں کریندے؟ تے جے تُساں صرف آپنڑے ای بِھرانواں کُوں سلام کرو تاں کیہڑی وڈی گالھ کریندے ہیوے؟ کیا غیر قوماں دے لوک وی اِینویں نئیں کریندے؟ بس تُساں کامِل بنڑو جِینویں تُہاڈا اسمانی باپ کامِل ہے۔“ ”خبر دار، آپنڑے نیک کم لوکاں کُوں ڈِکھاوݨ کیتے نہ کرو۔ کیوں جو تُہاڈا اسمانی باپ تُہاکُوں کوئی اجر نہ ڈیسی۔ بس جِیں ویلے تُوں خیرات کریں تاں آپنڑے اگُوں ڈھنڈورہ نہ پِٹوا، جِینویں منافق عبادت خانیاں تے گلیاں ءچ نرسِنگا وجوا تے کریندے ہِن تاں جو لوک اُنہاں دی تعریف کرݨ۔ مَیں تُہاکُوں سچ آدھا ہاں جو اُنہاں آپنڑا اجر پا گِھدے۔ بلکہ جِیں ویلے تُوں خیرات کریں تاں جیہڑا کُجھ تُوں آپنڑے سجے ہتھ نال ڈیویں اُوندا تیڈے کھبے ہتھ کُوں پتہ نہ لگے۔ تاں جو تیڈی خیرات لُکی راہوے۔ وَل تیڈا باپ جیہڑا لُکے ہوئے کم ڈیدھے، تیکُوں اجر ڈیسی۔ تے جِیں ویلے تُساں دُعا کرو تاں منافقاں آلی کار نہ کرو۔ او عبادت خانیاں تے بازاراں دے چوکاں ءچ کھڑے تھی تے دُعا کرݨ پسند کریندے ہِن تاں جو لوک اُنہاں کُوں ڈیکھنڑ۔ مَیں تُہاکُوں سچ آدھا ہاں جو اُنہاں آپنڑا اجر پا گِھدے۔ بلکہ جِیں ویلے تُوں دُعا کریں تاں آپنڑی کوٹھڑی ءچ وَنج، تے دروازہ بند کر تے آپنڑے اسمانی باپ کنُوں جیہڑا نظر کنُوں لُکیا ہے دُعا کر۔ وَل تیڈا باپ جیہڑا تیڈے لُکے ہوئے کم ڈیدھے تیکُوں اجر ڈیسی۔ تے دُعا کریندے ویلے غیر قوماں آلی کار رَٹے رٹائے لفظ دُہریندے نہ راہو، کیوں جو او سمجھدے ہِن جو اُنہاں دے بہُوں بولنڑ دی وجہ کنُوں اُنہاں دی سُنڑی ویسی۔ بس اُنہاں دے وانگُوں نہ بنڑو کیوں جو تُہاڈا اسمانی باپ تُہاڈے منگنڑ تُوں وی پہلے تُہاڈیاں ضرورتاں تُوں واقف ہے۔ بس تُساں اِینویں دُعا کیتا کرو جو ساڈے باپ، تُوں جیہڑا اسمان اُتے ہیں تیڈا ناں پاک منیا ونجے۔ تیڈی بادشاہی آوے تیڈی مرضی جِینویں اسمان اُتے پُوری تھیندی ہے زمین اُتے وی تھیوے۔ ساڈی روز دی روٹی اَج ساکُوں ڈے۔ تے جِینویں اساں آپنڑے قصُورواراں کُوں معاف کیتے تُوں وی ساڈے قصُور معاف کر۔ تے ساکُوں ازمائش ءچ نہ پا بلکہ بُرائی تُوں بچا۔ [کیوں جو بادشاہی، قُدرت تے جلال ہمیشاں تیڈے ای ہِن۔ آمین۔] جے تُساں لوکاں دے قصُور معاف کریسو تاں تُہاڈا اسمانی باپ وی تُہاکُوں معاف کریسی۔ جے تُساں لوکاں دے قصُور معاف نہ کریسو تاں تُہاڈا اسمانی باپ وی تُہاکُوں معاف نہ کریسی۔ جِیں ویلے تُساں روزہ رکھو تاں منافقاں آلی کار آپنڑا مُنہ نہ بنڑاؤ، کیوں جو او آپنڑاں مُنہ وِگڑیندے ہِن تاں جو لوکاں کُوں پتہ لگے جو او روزے نال ہِن۔ مَیں تُہاکُوں سچ آدھا ہاں جو اُنہاں آپنڑا اجر پا گِھدے۔ بلکہ جِیں ویلے تُوں روزہ رکھیں تاں آپنڑاں مُنہ دھو تے آپنڑے سر ءچ تیل سَٹ، تاں جو بندہ نئیں بلکہ تیڈا اسمانی باپ جیہڑا نظر کنُوں لُکیا ہے، تیکُوں روزہ دار جانڑے۔ اِیں صورت ءچ تیڈا باپ جیہڑا نظر کنُوں لُکے ہوئے کم ڈیدھے، تیکُوں اجر ڈیسی۔ آپنڑے کیتے زمین اُتے مال جمع نہ کرو جِتھاں کیڑا تے زنگ لگ ویندے تے چور سَندھ مار تے چوری کر گِھندے۔ بلکہ آپنڑے کیتے اسمان اُتے خزانہ جمع کرو جِتھاں کیڑا تے زنگ خراب نئیں کریندا تے نہ چور سَندھ مار تے چوری کریندے ہِن۔ کیوں جو جِتھاں تیڈا خزانہ ہے اُتھائیں تیڈا دل وی لگیا راہسی۔ بدن دا چراغ اکھ ہے۔ بس جے تیڈی اکھ ٹھیک ہے تاں تیڈا سارا بدن روشن ہوسی۔ تے جے تیڈی اکھ خراب ہے تاں تیڈا سارا بدن تاریک ہوسی۔ بس جے تیڈے اندر دی روشنی ای اندھارا بنڑ ونجے تاں اندھارا کتنا زیادہ ہوسی! کوئی بندہ ڈُو مالکاں دی خدمت نئیں کر سگدا، کیوں جو یا او ہِک کنُوں نفرت کریسی تے ڈُوجھے نال محبت، یا ہِک نال وفا کریسی تے ڈُوجھے کُوں حقیر جانڑسی۔ تُساں خُدا تے دولت ڈوہائیں دی خدمت نئیں کر سگدے۔ اِیہو وجہ ہے جو مَیں تُہاکُوں آدھا ہاں جو نہ تاں آپنڑی زندگی دی فِکر کرو جو کیا کھاسوں یا کیا پی سُوں، نہ آپنڑے تَن دی جو کیا پیسُوں؟ کیا جان خوراک کنُوں تے بدن پُشاک کنُوں ودھ تے نئیں؟ پکھیں کُوں ڈیکھو جیہڑے نہ تاں رہیندے ہِن نہ کپیندے ہِن نہ گوداماں ءچ جمع کریندے ہِن، وَل وی تُہاڈا اسمانی باپ اُنہاں کُوں کھویندے۔ کیا تُہاڈی قدر اُنہاں کنُوں زیادہ نئیں؟ تُہاڈے ءچوں ایجھا کوݨ ہے جیہڑا فِکر کر تے آپنڑی زندگی دا ہِک لاحظہ وی ودھا سگے؟ تے پُشاک کیتے کیوں فِکر کریندے ہیوے؟ جنگلی سوسن اُتے غور کرو جو او کِینویں ودھدے ہِن۔ نہ او محنت کریندے ہِن نہ کَتیندے ہِن۔ وَل وی مَیں تُہاکُوں آدھا ہاں جو سُلیمان وی آپنڑی ساری شان و شوکت دے باوجود اُنہاں ءچوں کہیں آلی کار پُشاک نہ پَیندا ہا۔ بس جِیں ویلے خُدا میدان دی گھاہ کُوں جیہڑی اَج ہے تے کل تنُور ءچ سَٹ ڈِتی ویسی ایجھی پُشاک پویندے، تاں کمزور اِیمان آلیو! کیا تُہاکُوں نہ پویسی؟ اِیں واسطے فِکر کر تے ایہ نہ آکھو جو اساں کیا کھاسوں یا کیا پی سُوں یا کیا پے سُوں؟ کیوں جو اِنہاں ساریاں چیزاں دی گولھ ءچ تاں غیر قوماں راہندیاں ہِن، پر تُہاڈا اسمانی باپ جانڑدے جو تُساں اِنہاں سبھ چیزاں دے مُتھاج ہیوے۔ پر پہلے تُساں خُدا دی بادشاہی تے راستبازی دی گولھ ءچ راہو تاں ایہ سبھ چیزاں وی تُہاکُوں مِل ویسن۔ بس کل دی فِکر نہ کرو کیوں جو کل دا ڈینہہ آپنڑی فِکر آپ ای کر گِھن سی۔ اَج کیتے اَج دا ڈُکھ کافی ہے۔“ ”عیب جوئی نہ کرو تُہاڈی وی عیب جوئی نہ کیتی ویسی۔ کیوں جو جِینویں تُساں عیب جوئی کریندے ہیوے اُونویں ای تُہاڈی وی عیب جوئی کیتی ویسی، تے جیہڑے تھاں نال تُساں نپیندے ہیوے اُوندے نال ای تُہاڈے کیتے ناپیا ویسی۔ تُوں آپنڑے بِھرا دی اکھ ءچ ککھ کیوں ڈیدھیں تے اُوں شتِیر اُتے غور نئیں کریندا جیہڑا تیڈی اکھ ءچ ہے؟ تے جِیں ویلے تیڈی آپنڑی اکھ ءچ شتِیر ہے تاں تُوں کیہڑے مُنہ نال آپنڑے بِھرا کُوں آکھ سگدیں جو ’آ مَیں تیڈی اکھ ءچوں ککھ کڈھ ڈیواں؟‘ منافق! پہلے آپنڑی اکھ دا شتِیر تاں کڈھ گِھن وَل آپنڑے بِھرا دی اکھ دے ککھ کُوں چنگی طرحاں ڈیکھ تے کڈھ سگسیں۔ پاک چیز کُتیاں دے اگُوں نہ رکھو تے آپنڑے موتی سُوراں دے اگُوں نہ سٹو۔ اِینویں نہ تھیوے جو او اُنہاں کُوں پیراں تلے لتاڑن تے مُڑ تے تُہاکُوں چِیر پھاڑ سٹنڑ۔ منگسو تاں تُہاکُوں ڈِتا ویسی۔ گولھیسو تاں مِلسی۔ دَر کھڑکیسو تاں تُہاڈے کیتے کھولیا ویسی۔ کیوں جو جیہڑا منگدے اُونکُوں مِلدے، جیہڑا گولھیندے او پیندے تے جیہڑا کھڑکیندے اُوندے کیتے کھولیا ویندے۔ تُہاڈے ءچوں ایجھا کیہڑا بندہ ہے جئیں تُوں اُوندا پوتر روٹی منگے تاں او اُونکُوں پتھر ڈیوے؟ یا جے مچھی منگے تاں اُونکُوں نانگ ڈیوے؟ جِیں ویلے تُساں بُرے ہووݨ دے باوجود آپنڑے بالاں کُوں چنگیاں چیزاں ڈیوݨ جانڑدے ہیوے تاں تُہاڈا اسمانی باپ، آپنڑے منگنڑ آلیاں کُوں چنگیاں چیزاں کیوں نہ ڈیسی؟ بس جِینویں تُساں چاہندے ہیوے جو لوک تُہاڈے نال کرݨ تُساں وی اُنہاں نال اُونویں ای کرو، کیوں جو توریت تے نبیاں دی تعلیم اِیہو ہے۔ تنگ دروازے کنُوں داخل تھیؤ۔ پر او دروازہ وڈا تے او رستہ کُھلا ہے جیہڑا تباہی آلے پاسے گِھن ویندے تے اُوندے ءچوں داخل تھیوݨ آلے بہُوں ہِن۔ کیوں جو او دروازہ تنگ ہے تے او رستہ سُکڑا ہے جیہڑا زندگی آلے پاسے گِھن ویندے تے اُوں تُوں داخل تھیوݨ آلے تھوڑے ہِن۔ کُوڑے نبیاں تُوں خبردار راہو جیہڑے تُہاڈے کولھ بھیڈاں دی شکل ءچ آندے ہِن پر اندرُوں چِیرݨ پھاڑن آلے نہر ہِن۔ تُساں اُنہاں دے پھلاں تُوں اُنہاں کُوں سُنجاݨ گِھن سو۔ کیا لوک جھاڑیاں تُوں انگُور یا کنڈیراں تُوں ہنجیر تروڑ سگدن؟ اِینویں ای ہر چنگا درخت چنگا پھل تے ہر بُرا درخت بُرا پھل چیندے۔ چنگے درخت کُوں بُرا پھل نئیں لگ سگدا تے نہ ای بُرے درخت کُوں چنگا پھل لگ سگدے۔ او درخت جیہڑا چنگا پھل نئیں ڈیندا کپ ڈِتا تے بھاہ ءچ سَٹ ڈِتا ویندے۔ بس تُساں اُنہاں کُوں اُنہاں دے پھلاں تُوں سُنجاݨ گِھن سو۔ میکُوں ’مالک! مالک!‘ آکھنڑ آلا ہر بندہ اسمان دی بادشاہی ءچ داخل نہ تھیسی، پر اُوہو جیہڑا میڈے اسمانی باپ دی مرضی اُتے ٹُردے۔ اُوں ڈینہہ بہُوں سارے میکُوں اکھیسن ’مالک! مالک! کیا اساں تُہاڈے ناں نال تبلیغ نئیں کیتی تے تُہاڈے ناں نال بدرُوحاں نئیں کڈھیاں تے تُہاڈے ناں نال بہُوں سارے معجزے نئیں کیتے؟‘ اُوں ویلے مَیں اُنہاں کُوں صاف اکھیساں جو ’میڈی کڈھائیں تُہاڈے نال واقفیت نہ ہئی۔ بدکارو! میڈے سامنڑے تُوں دُور تھی ونجو۔‘ اِیں واسطے جیہڑا کوئی میڈے ایہ گالھیں سُنڑدے تے اُنہاں اُتے عمل کریندے او اُوں عقلمند بندہ وانگُوں ہوسی جئیں آپنڑاں گھر چٹان اُتے بنڑایا۔ تے بارش تھئی تے سیلاب آیا تے اندھاریاں گُھلیاں تے اُوں گھر کُوں ٹکراں ماریاں پر او نہ ڈھٹھا، کیوں جو اُوندی بنیاد چٹان اُتے رکھی گئی ہئی۔ تے جیہڑا کوئی میڈے ایہ گالھیں سُنڑدے تے اُنہاں اُتے عمل نئیں کریندا او اُوں بیوقُوف بندہ وانگُوں ہوسی جئیں آپنڑاں گھر ریت اُتے بنڑایا۔ تے بارش تھئی تے سیلاب آیا تے اندھاریاں گُھلیاں تے اُوں گھر کُوں ٹکراں ماریاں تے او ڈھے پِیا تے اصلُوں برباد تھی گِیا۔“ جیہڑے ویلے یسُوع ایہ گالھیں ختم کر چُکیا تاں بِھیڑ اُوندی تعلیم تُوں حیران تھئی، کیوں جو او اُنہاں دے شریعت دے عالماں وانگُوں نئیں بلکہ ِ اِختیار نال تعلیم ڈیندا ہا۔ جِیں ویلے یسُوع اُوں پہاڑ تُوں تلے لتھا تاں ہِک بہُوں وڈی بِھیڑ اُوندے پِچُھوں تھی پئی۔ تے ڈیکھو ہِک بندہ جِینکُوں کوڑھ دی بیماری ہئی، اُوندے کولھ آیا تے جُھک تے اُونکُوں آکھیا، ”مالک! جے تُساں چاہو تاں میکُوں پاک صاف کر سگدے ہیوے۔“ یسُوع آپنڑا ہتھ ودھا تے اُوندے اُتے رکھیا تے آکھیا، ”مَیں چاہندا ہاں، پاک صاف تھی وَنج۔“ او فوراً کوڑھ تُوں پاک صاف تھی گِیا۔ یسُوع اُونکُوں آکھیا، ”خبر دار، کہیں کُوں نہ ڈساویں بلکہ وَنج تے آپنڑے آپ کُوں کاہِن کُوں ڈِکھا تے جیہڑا نذرانہ مُوسیٰ مقرر کیتے او پیش کر، تاں جو اُنہاں کیتے گواہی ہووے۔“ جِیں ویلے یسُوع کفرنحُوم شہر ءچ داخل تھیّا تاں ہِک صوبیدار اُوندے کولھ آیا تے مِنت کر تے آکھنڑ لگا، ”میڈے مالک! میڈا نوکر فالج دا ماریا گھر ءچ پِیا ہے تے بہُوں تکلیف ءچ ہے۔“ یسُوع اُونکُوں آکھیا، ”مَیں آ تے اُونکُوں شِفا ڈیساں۔“ صوبیدار جواب ءچ آکھیا، ”مالک! مَیں اِیں لائق نئیں جو تُساں میڈی چھت تلے آؤ بلکہ صرف آکھ ڈیؤ تاں میڈا نوکر شِفا پا گِھنسی۔ کیوں جو مَیں خود وی کہیں بئے دے اِختیار ءچ ہاں تے سپاہی میڈے ماتحت ہِن، تے جیہڑے ویلے مَیں ہِک کُوں آدھا ہاں جو ’وَنج‘ تاں او ویندے، تے ڈُوجھے کُوں جو ’آ‘ تاں او آندے تے آپنڑے نوکر کُوں جو ’ایہ کر‘ تاں او کریندے۔“ یسُوع ایہ سُنڑ تے حیران تھیّا تے او آپنڑے پِچُھوں آوݨ آلیاں کُوں آکھنڑ لگا جو ”مَیں تُہاکُوں سچ آدھا ہاں جو مَیں اِسرائیل ءچ وی ایجھا اِیمان نئیں ڈِٹھا۔ تے مَیں تُہاکُوں آدھا ہاں جو بہُوں سارے لوک مشرق تے مغرب تُوں آ تے ابرہام تے اِضحاق تے یعقُوب دے نال اسمان دی بادشاہی دی ضیافت ءچ شریک تھیسن۔ پر بادشاہی دے پوتر باہر اندھارے ءچ سَٹ ڈِتے ویسن جِتھاں رووݨ تے ڈنداں دا پِیہوݨ ہوسی ۔“ تے یسُوع صوبیدار کُوں آکھیا، ”وَنج جِینویں تیڈا اِیمان ہے تیڈے کیتے اُونویں ای تھیوے، تے اُوں ویلے ای نوکر شِفا پا گِھدی۔“ یسُوع پطرس دے گھر ءچ آ تے اُوندی سس کُوں بُخار ءچ پئی ڈِٹھا۔ اُوں اُوندا ہتھ پکڑیا تاں اُوندا بُخار لہہ گِیا تے او اُٹھی تے اُوندی خدمت کرݨ لگی۔ جِیں ویلے شام تھئی تاں بہُوں لوکاں کُوں جِنہاں ءچ بدرُوحاں ہَن اُوندے کولھ گِھن آئے۔ اُوں بدرُوحاں کُوں حُکم ڈے تے کڈھ ڈِتا تے سبھ بیماراں کُوں چنگا کر ڈِتا۔ تاں جو جیہڑا یسعیاہ نبی دی معرفت فرمایا گِیا ہا او پُورا تھیوے جو ”اُوں آپ ای ساڈیاں کمزوریاں گِھن گِھدیاں تے بیماریاں چا گِھدیاں ۔“ جِیں ویلے یسُوع آپنڑے چودھارُوں بِھیڑ ڈِٹھی تاں آپنڑے شاگرداں کُوں جھیل دے پار ونجنڑ دا حُکم ڈِتا۔ وَل شریعت دے ہِک عالم اُوندے کولھ آ تے آکھیا، ”اُستاد! تُساں جِتھاں وی ویسو مَیں تُہاڈے پِچُھوں آساں۔“ یسُوع اُونکُوں آکھیا، ”لومبڑیاں دیاں گھوراں ہوندن تے پکھیاں دے آلہنڑے پر مَیں اِبنِ آدم کیتے کوئی جاہ نئیں جِتھاں مَیں آپنڑا سر رکھ سگاں۔“ ہِک بئے شاگرد اُونکُوں آکھیا، ”مالک! میکُوں اِجازت ڈیؤ جو پہلے وَنج تے آپنڑے پِیُو کُوں دفن کراں۔“ یسُوع اُونکُوں آکھیا، ”تُوں میڈے پِچُھوں آ، تے مُردیاں کُوں آپنڑے مُردے دفن کرݨ ڈے۔“ جِیں ویلے یسُوع کشتی ءچ سوار تھیّا تاں اُوندے شاگرد اُوندے نال تھی پئے۔ تے ڈیکھو جھیل ءچ ایجھا زبردست طوفان اُٹھیا جو کشتی چھلاں ءچ لُک گئی پر یسُوع سُتا پِیا ہا۔ شاگرداں کولھ آ تے اُونکُوں جگایا تے آکھیا، ”مالک! ساکُوں بچا۔ اساں ہلاک تھیندے پئے ہیں۔“ اُوں اُنہاں کُوں آکھیا، ”کمزور اِیمان آلیو! تُساں کیوں ڈر دے ہیوے؟“ وَل اُوں اُٹھی تے ہوا تے پانڑی کُوں دَڑکا ڈِتا تے بالکل سکون تھی گِیا۔ تے لوک حیران تھی تے آکھنڑ لگے، ”ایہ کیجھا بندہ ہے جِیندا حُکم ہوا تے پانڑی وی منیندے ہِن؟“ جِیں ویلے او اُوں پار گدرِینِیاں دے علاقے ءچ پُجیا تاں ڈُو بندے جِنہاں ءچ بدرُوحاں ہَن قبراں ءچوں نِکل تے اُونکُوں مِلے۔ او ایجھے خطرناک ہَن جو کوئی اُوں رستے کنُوں لنگھ نہ سگدا ہا۔ او چیخ تے آکھنڑ لگے، ”خُدا دے پوتر! ساکُوں تیڈے نال کیا کم؟ کیا تُوں وقت تُوں پہلے ای ساکُوں عذاب ءچ سٹنڑ آیا ہیں؟“ اُنہاں کنُوں کُجھ پرے سُؤراں دا ہِک وڈا اِجڑ چردا پِیا ہا۔ بس بدرُوحاں اُوندی مِنت کیتی تے آکھیا جو ”جے تُوں ساکُوں کڈھنڑ ای چاہندا ہیں تاں ساکُوں سُؤراں دے اِجڑ ءچ بھیج ڈے۔“ اُوں اُنہاں کُوں آکھیا، ”ونجو۔“ او نِکل تے سُؤراں ءچ داخل تھی گئیاں تے سُؤراں دا سارا اِجڑ ریڑھ کنُوں بھجدے ہوئے جھیل ءچ وَنج ڈھٹھا تے بُڈ مریا۔ وَل اُنہاں دے چراوݨ آلے بھجے تے شہر وَنج تے لوکاں کُوں سارا قصہ سُنڑایا تے جِنہاں ءچ بدرُوحاں ہَن اُنہاں دا حال وی ڈسایا۔ تے سارا شہر یسُوع کُوں مِلنڑ کیتے نِکل آیا تے اُونکُوں ڈیدھے ای مِنت کرݨ لگے جو ”ساڈے علاقے ءچوں چلیا وَنج۔“ وَل یسُوع کشتی ءچ سوار تھی تے پار گِیا تے آپنڑے شہر ءچ آیا۔ تے لوک ہِک فالج دے مریض کُوں اُوندے کولھ گِھن آئے جیہڑا کَھٹ اُتے ہا۔ یسُوع اُنہاں دا اِیمان ڈیکھ تے فالج دے مریض کُوں آکھیا، ”پوتر حوصلہ رکھ، تیڈے گُناہ معاف تھئے۔“ تے شریعت دے کُجھ عالماں آپنڑے دل ءچ آکھیا، ”ایہ کُفر بَکدے۔“ یسُوع اُنہاں دے خیال جاݨ گِھدے تے آکھیا جو ”تُساں آپنڑے دل ءچ بُرے گالھیں کیوں سوچیندے ہیوے؟ کیا ایہ آکھنڑ اسان ہے جو تیڈے گُناہ معاف تھئے یا ایہ آکھنڑ جو اُٹھی تے ٹُر پِھر؟ پر مَیں چاہندا ہاں جو تُہاکُوں پتہ لگے جو اِبنِ آدم کُوں زمین اُتے گُناہ معاف کرݨ دا اِختیار ہے۔“ وَل اُوں فالج دے مریض کُوں آکھیا، ”اُٹھی، آپنڑی کَھٹ چا تے گھر لگا وَنج۔“ او اُٹھی تے آپنڑے گھر لگا گِیا۔ لوک ایہ ڈیکھ تے ڈر گئے تے خُدا دی حمد کرݨ لگے جئیں اِنسان کُوں ایجھا اِختیار بخشیا۔ یسُوع اُتھوں کنُوں اگُوں ودھ تے متّی ناں دے ہِک محصُول گِھننڑ آلے کُوں محصُول دی چوکی اُتے بیٹھے ڈِٹھا تے اُونکُوں آکھیا، ”میڈے پِچُھوں تھی پو۔“ او اُٹھی تے اُوندے پِچُھوں تھی پِیا۔ تے جِیں ویلے یسُوع متّی دے گھر ءچ کھانڑا کھاوݨ بیٹھا ہا تاں بہُوں سارے محصُول گِھننڑ آلے تے گُنہگار لوک آ تے یسُوع تے اُوندے شاگرداں نال کھانڑا کھاوݨ بیٹھے۔ فریسیاں ایہ ڈِٹھا تاں اُوندے شاگرداں کُوں آکھیا، ”تُہاڈا اُستاد محصُول گِھننڑ آلیاں تے گُنہگاراں دے نال کیوں کھاندے؟“ اُوں ایہ سُنڑ تے آکھیا جو ”تندرُستاں کُوں حکیم دی لوڑ نئیں بلکہ بیماراں کُوں۔ پر تُساں وَنج تے اِیندا مطلب پتہ کرو جو ’مَیں قُربانی نئیں بلکہ رحم پسند کریندا ہاں ۔‘ کیوں جو مَیں راستبازاں کُوں نئیں بلکہ گُنہگاراں کُوں سڈݨ آیا ہاں۔“ اُوں ویلے یُوحنّا دے شاگرداں یسُوع دے کولھ آ تے آکھیا، ”کیا وجہ ہے جو اساں تے فریسی اکثر روزہ رکھیندے ہیں پر تُہاڈے شاگرد روزہ نئیں رکھیندے؟“ یسُوع اُنہاں کُوں آکھیا، ”کیا براتی جِیں ویلے تئیں گھوٹ اُنہاں دے نال ہے ماتم کر سگدے ہِن؟ پر او ڈینہہ آسن جڈاں گھوٹ اُنہاں تُوں جُدا کیتا ویسی۔ اُوں ویلے او روزہ رکھیسن۔ پُرانڑے کپڑے اُتے نویں کپڑے دی ٹاکی کوئی نئیں لیندا، کیوں جو نواں کپڑا سُنگڑ تے پُرانڑے کپڑے ءچوں کُجھ چھیک گِھنسی تے او زیادہ پھٹ ویسی۔ تے انگُور دے تازہ رَس کُوں پُرانڑیاں مشکاں ءچ نئیں بھریندے، کیوں جو مشکاں پھٹ ویندیاں ہِن تے رَس ضائع تھی ویندے، تے مشکاں برباد تھی ویندیاں ہِن۔ بلکہ انگُور دا تازہ رَس نوِیاں مشکاں ءچ بھریندن تے او ڈوہائیں محفوظ راہندن۔“ او اُنہاں کُوں ایہ گالھیں آدھا ای پِیا ہا جو ہِک سردار اُوندے پیراں ءچ ڈھے تے عرض کیتی، ”میڈی دِھی ہُنڑیں موئی ہے پر جے تُساں آ تے اُوندے اُتے آپنڑاں ہتھ رکھو تاں او زندہ تھی ویسی۔“ یسُوع اُٹھی تے اُوندے نال ٹُر پِیا تے اُوندے شاگرد وی اُوندے پِچُھوں تھی پئے۔ تے ڈیکھو ہِک تریمت جِیندا بارہاں سالہاں کنُوں خون جاری ہا اُوندے پِچُھوں آ تے اُوندی پُشاک دے پَلے کُوں ہتھ لایا، کیوں جو آپنڑے دل ءچ ایہ آدھی ہئی جو ”جے مَیں اُوندی پُشاک کُوں ای ہتھ لا گِھنساں تاں ٹھیک تھی ویساں۔“ یسُوع مُڑ تے اُونکُوں ڈِٹھا تے آکھیا، ”دِھی حوصلہ رکھ۔ تیڈے اِیمان تیکُوں چنگا کر ڈِتے۔“ تے او تریمت اُوں ویلے ای ٹھیک تھی گئی۔ جِیں ویلے یسُوع سردار دے گھر آیا تے بانسری وجاوݨ آلیاں کُوں تے بِھیڑ کُوں شور مچیندے ڈِٹھا، تاں آکھیا، ”پرے تھی ونجو کیوں جو چھوہیر موئی نئیں بلکہ سُتی پئی ہے۔“ ایہ سُنڑ تے او اُوندے اُتے کِھلنڑ لگ پئے۔ پر جِیں ویلے بِھیڑ کُوں اُتھوں کڈھ ڈِتا گِیا تاں یسُوع اندر وَنج تے چھوہیر دا ہتھ پکڑیا تے او اُٹھ پئی۔ تے اِیں گالھ دی شُہرت اُوں سارے علاقے ءچ کِھنڈ گئی۔ جیہڑے ویلے یسُوع اُتھوں کنُوں اگُوں روانہ تھیّا تاں ڈُو اندھے اُوندے پِچُھوں دھاڑ دھاڑ کریندے ہوئے آکھنڑ لگے، ”اِبنِ ِ داؤد! ساڈے اُتے رحم کرو۔“ جِیں ویلے او گھر ءچ داخل تھیّا تاں او اندھے اُوندے کولھ آئے تے یسُوع اُنہاں تُوں پُچھیا، ”کیا تُہاڈا اِیمان ہے جو مَیں ایہ کر سگدا ہاں؟“ اُنہاں اُونکُوں آکھیا، ”ہاں مالک۔“ وَل اُوں اُنہاں دے اکھیں کُوں ہتھ لایا تے آکھیا، ”تُہاڈے اِیمان دے مطابق تُہاڈے کیتے تھیوے۔“ تے اُنہاں دے اکھیں کُھل گئیاں تے یسُوع اُنہاں کُوں سختی نال آکھیا، ”خبردار کہیں کُوں پتہ نہ لگے۔“ پر اُنہاں باہر وَنج تے سارے علاقے ءچ اُونکُوں مشہور کر ڈِتا۔ جیہڑے ویلے او باہر ویندے پئے ہَن تاں لوک ہِک گُونگے کُوں جَیندے ءچ بدرُوح ہئی اُوندے کولھ گِھن آئے۔ جِیں ویلے او بدرُوح کڈھ ڈِتی گئی تاں گُونگا بولنڑ لگ پِیا تے لوکاں حیران تھی تے آکھیا جو ”ایجھا اِسرائیل ءچ کڈھائیں نئیں ڈِٹھا گِیا۔“ پر فریسیاں آکھیا جو ”ایہ تاں بدرُوحاں دے سردار دی مدد نال بدرُوحاں کُوں کڈھیندے۔“ یسُوع سارے شہراں تے دیہاتاں ءچ وَنج تے اُنہاں دے عبادت خانیاں ءچ تعلیم ڈیندا تے بادشاہی دی خوشخبری سُنڑیندا تے ہر طرحاں دی بیماری تے کمزوری کُوں دُور کریندا ریہا۔ تے جِیں ویلے اُوں بِھیڑ کُوں ڈِٹھا تاں اُونکُوں اُنہاں اُتے ترس آیا کیوں جو او اُنہاں بھیڈاں وانگُوں جِنہاں دا کوئی آجڑی نہ ہووے بہُوں بدحال تے پریشان ہَن۔ وَل اُوں آپنڑے شاگرداں کُوں آکھیا جو ”فصل تاں بہُوں ہے پر مزدُور تھوڑے ہِن۔ اِیں واسطے فصل دے مالک دی مِنت کرو جو آپنڑی فصل کپنڑ کیتے مزدُور بھیج ڈیوے۔“ وَل یسُوع آپنڑے بارہاں شاگرداں کُوں کولھ سڈ تے اُنہاں کُوں بدرُوحاں کُوں کڈھنڑ تے سبھ بیماریاں تے تکلیفاں کنُوں شِفا ڈیوݨ دا اِختیار بخشیا۔ بارہاں رسُولاں دے ناں ایہ ہِن۔ پہلا شمعون جیہڑا پطرس اکھویندے تے اُوندا بِھرا اندریاس، زبدی دا پوتر یعقُوب تے اُوندا بِھرا یُوحنّا، فِلپُس تے بَرتُلمائی، توما تے متّی محصُول گِھننڑ آلا، حلفئی دا پوتر یعقُوب تے تدّی، شمعون قنانی تے یہُوداہ اِسکریُوتی جئیں اُونکُوں پکڑوا وی ڈِتا۔ یسُوع اِنہاں بارہاں کُوں بھیجیا تے اُنہاں کُوں حُکم ڈے تے آکھیا، ”غیر قوماں دو نہ وَنجائے تے سامریاں دے کہیں شہر ءچ داخل نہ تھیوائے۔ بلکہ اِسرائیل دے گھرانڑے دیاں گُم تھیّاں بھیڈاں دے کولھ وَنجائے۔ ٹُردے ٹُردے ایہ تبلیغ کرائے جو اسمان دی بادشاہی نیڑے آ گئی ہے۔ بیماراں کُوں شِفا ڈیوائے۔ مُردیاں کُوں زندہ کرائے۔ کوڑھیاں کُوں پاک صاف کرائے۔ بدرُوحاں کُوں کڈھائے۔ تُہاکُوں مُفت مِلے، مُفت ڈیوائے۔ آپنڑے کمر بند ءچ نہ سونا چاندی رکھائے نہ پیسے۔ نہ رستے کیتے تھیلا گِھنائے نہ ڈُو ڈُو چولے نہ جُتی تے نہ سوٹی کیوں جو مزدُور آپنڑی مزدُوری دا حقدار ہے۔ تُساں جیہڑے وی شہر یا وستی ءچ داخل تھیوائے تاں پتہ کرائے جو کیہڑا اُوندے ءچ لائق ہے تے جئیں تئیں اُتھوں روانہ نہ تھیؤ، اُتھائیں ٹِکائے۔ تے گھر ءچ داخل تھیندے ہوئے سلام ولائے۔ جے او گھر لائق ہوسی تاں تُہاڈا سلام اُونکُوں پُج ویسی، تے جے لائق نہ ہوسی تاں تُہاڈا سلام تُہاڈے اُتے وَل آسی۔ جے کوئی تُہاکُوں قبول نہ کرے تے تُہاڈے گالھیں نہ سُنڑے تاں اُوں گھر یا شہر کنُوں روانہ تھیندے ہوئے آپنڑے پیراں دی دُھوڑ اُتھائیں چِھنڈک ڈیوائے۔ مَیں تُہاکُوں سچ آدھا ہاں جو عدالت دے ڈینہہ سدُوم تے عمُورہ دے علاقے دا حال اُوں شہر دے حال کنُوں زیادہ برداشت دے لائق ہوسی۔ ڈیکھو مَیں تُہاکُوں بھجیندا ہاں جِینویں بھیڈاں کُوں نہراں ءچ۔ اِیں واسطے تُساں نانگاں وانگُوں ہوشیار تے کبوتراں وانگُوں بھولے بنڑو۔ پر لوکاں کنُوں خبردار رہوائے کیوں جو او تُہاکُوں پکڑ تے عدالتاں ءچ پیش کریسن تے آپنڑے عبادت خانیاں ءچ تُہاکُوں کوڑے مریسن۔ تُساں میڈی وجہ کنُوں حاکماں تے بادشاہاں دے سامنڑے حاضر کیتے ویسو تاں جو اُنہاں، تے غیر قوماں کیتے گواہی ہووے۔ پر جِیں ویلے او تُہاکُوں پکڑواوݨ تاں فِکر نہ کرائے جو اساں کِینویں تے کیا آکھوں کیوں جو جیہڑا کُجھ آکھنڑا ہوسی اُوں ویلے تُہاکُوں ڈسا ڈِتا ویسی۔ کیوں جو آکھنڑ آلے تُساں نئیں بلکہ تُہاڈے اسمانی باپ دا رُوح ہوسی جیہڑا تُہاڈے ءچوں بُولیسی۔ بِھرا کُوں بِھرا تے پِیُو آپنڑے پوتر کُوں قتل کیتے پکڑویسی۔ تے بال آپنڑے ماء پِیُو دے خلاف کھڑے تھی تے اُنہاں کُوں مروا ڈیسن۔ تے میڈے ناں دے سببّوں سبھ لوک تُہاڈے نال دُشمنڑی رکھیسن پر جیہڑا آخر تئیں برداشت کریسی اُوہو نجات پیسی۔ پر جِیں ویلے لوک تُہاکُوں ہِک شہر ءچ ستاوݨ تاں ڈُوجھے شہر کُوں بھج وَنجائے کیوں جو مَیں تُہاکُوں سچ آدھا ہاں جو اِیں کنُوں پہلے جو تُساں اِسرائیل دے سارے شہراں ءچ نہ پِھر گِھن سو، اِبنِ آدم آ ویسی۔ شاگرد آپنڑے اُستاد کنُوں وڈا نئیں ہوندا تے نہ ای نوکر آپنڑے مالک کنُوں۔ شاگرد کیتے کافی ہے جو او آپنڑے اُستاد وانگُوں تے نوکر کیتے ایہ جو او آپنڑے مالک وانگُوں ہووے۔ جِیں ویلے اُنہاں گھر دے مالک کُوں شیطان آکھیا تاں اُوندے گھر آلیاں کُوں کیوں نہ اکھیسن۔ بس اُنہاں کنُوں نہ ڈرو کیوں جو کوئی چیز ڈھکی ہوئی نئیں جیہڑی کھولی نہ ویسی، تے کوئی چیز لُکی ہوئی نئیں جیہڑی ظاہر نہ کیتی ویسی۔ جیہڑا کُجھ مَیں تُہاکُوں اندھارے ءچ آدھا ہاں تُساں اُونکُوں سوجھلے ءچ آکھو۔ تے جیہڑا کُجھ تُساں کَن ءچ سُنڑدے ہیوے کوٹھیاں اُتے اُوندی تبلیغ کرو۔ اُنہاں کنُوں نہ ڈرو جیہڑے جِسم کُوں تاں قتل کر سگدے ہِن پر رُوح کُوں نئیں۔ بلکہ اُوں کنُوں ڈرو جیہڑا جِسم تے رُوح ڈوہائیں کُوں دوزخ ءچ سَٹ سگدے۔ کیا ہِک سِکے ءچ ڈُو چِڑیاں نئیں وِکدیاں؟ تے اُنہاں ءچوں ہِک وی تُہاڈے باپ دی مرضی دے بغیر زمین اُتے نئیں ڈھے سگدی۔ بلکہ تُہاڈے سر دے وال وی گِنڑے ہوئے ہِن۔ بس ڈرو نہ۔ تُہاڈی قدر تاں بہُوں ساریاں چِڑیاں تُوں وی زیادہ ہے۔ بس جیہڑا کوئی لوکاں دے سامنڑے میڈا اِقرار کریسی مَیں وی آپنڑے باپ دے سامنڑے جیہڑا اسمان اُتے ہے اُوندا اِقرار کریساں۔ پر جیہڑا کوئی لوکاں دے سامنڑے میڈا اِنکار کریسی مَیں وی آپنڑے اسمانی باپ دے سامنڑے اُوندا اِنکار کریساں۔ ایہ نہ سمجھو جو مَیں زمین اُتے صُلح کراوݨ آیا ہاں۔ صُلح کراوݨ نئیں بلکہ تلوار چلاوݨ آیا ہاں۔ کیوں جو مَیں اِیں کیتے آیا ہاں جو پوتر کُوں پِیُو کنُوں، دِھی کُوں ماء کنُوں، تے نُونہہ کُوں سس کنُوں اَنج کراں۔ تے بندے دے دُشمنڑ اُوندے گھر دے لوک ای ہوسن۔ جیہڑا کوئی آپنڑے پِیُو یا ماء کُوں مَیں کنُوں زیادہ پیار کریندے او میڈے لائق نئیں، تے جیہڑا کوئی آپنڑے پوتر یا دِھی کُوں مَیں کنُوں زیادہ پیار کریندے او میڈے لائق نئیں۔ تے جیہڑا کوئی آپنڑی صلیب چا تے میڈے پِچُھوں نئیں ٹُردا او میڈے لائق نئیں ۔ جیہڑا کوئی آپنڑی جان بچیندے او اُونکُوں ونجیسی تے جیہڑا میڈی خاطر آپنڑی جان ونجیندے، او اُونکُوں پیسی۔ جیہڑا تُہاکُوں قبول کریندے، او میکُوں قبول کریندے، تے جیہڑا میکُوں قبول کریندے او میڈے بھیجنڑ آلے کُوں قبول کریندے۔ جیہڑا نبی کُوں نبی سمجھ تے قبول کریندے اُونکُوں نبی دا اجر مِلسی، تے جیہڑا نیک کُوں نیک سمجھ تے قبول کریندے اُونکُوں نیک بندے دا اجر مِلسی۔ تے جیہڑا اِنہاں چھوٹیاں ءچوں کہیں کُوں میڈا شاگرد مَن تے ہِک پیالہ ٹھڈا پانڑی ای پِلیسی تاں مَیں تُہاکُوں آدھا ہاں او آپنڑا اجر ہرگز نہ ونجیسی۔“ تے جِیں ویلے یسُوع آپنڑے بارہاں شاگرداں کُوں حُکم ڈے چُکیا تاں او اُتھوں روانہ تھیّا تاں جو اُنہاں دے شہراں ءچ تعلیم ڈیوے تے تبلیغ کرے۔ تے یُوحنّا قید خانہ ءچوں مسیح دے کماں دے بارے ءچ سُنڑ تے آپنڑے شاگرداں دی معرفت اُونکُوں پُچھوا بھیجیا جو ”آوݨ آلے تُساں ای ہیوے یا اساں کہیں بئے دی راہ ڈیکھوں؟“ یسُوع اُنہاں کُوں جواب ڈِتا، ”جیہڑا کُجھ تُساں ڈیدھے تے سُنڑدے ہیوے وَنج تے یُوحنّا کُوں ڈساؤ، جو اندھے ڈیدھے ہِن، منڈے ٹُردے ہِن، کوڑھی پاک صاف کیتے ویندے ہِن، ڈورے سُنڑدے ہِن، مُردے زندہ کیتے ویندے ہِن تے غریباں کُوں خوشخبری سُنڑائی ویندی ہے۔ مُبارک ہے او جیہڑا میڈی وجہ کنُوں ٹھوکر نہ کھاوے۔“ جِیں ویلے یُوحنّا دے شاگرد روانہ تھی گئے تاں یسُوع لوکاں کُوں یُوحنّا دے بارے ءچ آکھنڑ لگا جو ”تُساں بیابان ءچ کیا ڈیکھنڑ گئے ہَوے؟ کیا ہوا نال ہِلدے ہوئے کانے کُوں؟ تاں وَل کیا ڈیکھنڑ گئے ہَوے؟ کیا نفِیس کپڑے پاتے ہوئے بندے کُوں؟ ڈیکھو جیہڑے نفِیس کپڑے پیندے ہِن او شاہی محلاں ءچ راہندے ہِن۔ تاں وَل تُساں کیا ڈیکھنڑ گئے ہَوے؟ کیا ہِک نبی کُوں؟ ہاں، پر مَیں تُہاکُوں آدھا ہاں جو نبی کنُوں وی وڈے کُوں۔ ایہ اُوہو ہے جیندے بارے کلام ءچ لِکھیا ہے جو ’ڈیکھ مَیں آپنڑا پیغمبر تیڈے اگُوں بھجیندا ہاں جیہڑا تیڈے اگُوں تیڈی راہ تیار کریسی ۔‘ مَیں تُہاکُوں سچ آدھا ہاں جو جیہڑے عورتاں ءچوں پیدا تھئے ہِن اُنہاں ءچوں یُوحنّا بپتسمہ ڈیوݨ آلے کنُوں وڈا کوئی نئیں تھیّا، پر جیہڑا اسمان دی بادشاہی ءچ سبھ تُوں چھوٹا ہے او اُوں کنُوں وڈا ہے۔ یُوحنّا بپتسمہ ڈیوݨ آلے دے ڈینہاں کنُوں اِیں ویلے تئیں اسمان دی بادشاہی دی زور نال مخالفت تھیندی پئی ہے تے زور آور اُونکُوں کَھس گِھندے ہِن۔ کیوں جو سارے نبیاں تے توریت، یُوحنّا تئیں نبُوّت کیتی، تے جے تُساں چاہو تاں منّو، ایلیّاہ جیہڑا آوݨ آلا ہا اِیہو ہے۔ جیندے سُنڑݨ دے کَن ہووݨ او سُنڑ گِھنے۔ مَیں اِیں زمانے دے لوکاں کُوں کیندے نال تشبیہ ڈیواں؟ او اُنہاں چھوہراں آلی کار ہِن جیہڑے بازاراں ءچ بیٹھے ہوئے آپنڑے دوستاں کُوں سڈ مار تے آدھن، ’اساں تُہاڈے کیتے بانسری وجائی تے تُساں نہ نچے۔ اساں ماتم کیتا پر تُساں چھاتی نہ پِٹی۔‘ کیوں جو یُوحنّا نہ کھاندا نہ پِیندا آیا تے او آدھن جو اُوندے ءچ بدرُوح ہے۔ اِبنِ آدم کھاندا پِیندا آیا تے او آدھن، ’ڈیکھو ایہ کھاؤُ تے شرابی بندہ، محصُول گِھننڑ آلیاں تے گُنہگاراں دا یار۔‘ پر حِکمت آپنڑے کماں تُوں برحق ثابت تھئی۔“ وَل یسُوع اُنہاں شہراں کُوں ملامت کرݨ لگا جِنہاں ءچ اُوں بہُوں سارے معجزے کیتے ہَن کیوں جو اُنہاں توبہ نہ کیتی ہئی۔ اُونیں آکھیا، ”خُرازین! تَیں اُتے افسوس، بیت صیدا! تَیں اُتے افسوس، کیوں جو جیہڑے معجزے تُہاڈے ءچ کیتے گئے، جے صور تے صیدا ءچ تھیندے تاں اُتھاں دے لوک ٹاٹ پا تے، تے سواہ ءچ بہہ تے کڈݨ دے توبہ کر گِھندے۔ پر مَیں تُہاکُوں آدھا ہاں جو عدالت دے ڈینہہ صور تے صیدا دا حال تُہاڈے حال کنُوں زیادہ برداشت دے لائق ہوسی۔ تے کفرنحُوم! کیا تُوں اسمان تئیں اُچا کیتا ویسیں؟ تُوں تاں عالم ِ ارواح ءچ لہایا ویسیں۔ کیوں جو جیہڑے معجزے تیڈے ءچ ظاہر تھئے، جے سدُوم ءچ ظاہر تھیندے تاں او اَج تئیں قائم راہندا۔ پر مَیں تُہاکُوں آدھا ہاں جو عدالت دے ڈینہہ سدُوم دا حال تَیں کنُوں زیادہ برداشت دے لائق ہوسی۔“ اُوں ویلے یسُوع آکھیا، ”اے باپ، اسمان تے زمین دے مالک، مَیں تیڈا شُکر کریندا ہاں جو تَیں ایہ گالھیں دانا لوکاں تے عالماں کنُوں لُکائیاں تے بالاں اُتے ظاہر کیتیاں۔ ہاں باپ، کیوں جو تیڈی نظر ءچ اِیہو چنگا ہا۔ میڈے باپ دی طرفوں سبھ کُجھ میڈے سپُرد کیتا گِیا ہے تے کوئی پوتر کُوں نئیں جانڑدا سوائے باپ دے، تے نہ ای کوئی باپ کُوں جانڑدے سوائے پوتر دے یا او بندہ جیندے اُتے پوتر اُونکُوں ظاہر کرݨ چاہندے۔ محنت کرݨ آلیو تے بھار تلے دبے ہوئے لوکو! سبھ میڈے کولھ آؤ۔ مَیں تُہاکُوں آرام ڈیساں۔ میڈی پنجالی چا گِھنو تے میڈے کنُوں سِکھو۔ کیوں جو مَیں نرم تے دل دا فروتن ہاں۔ وَل تُہاکُوں آرام مِل سی۔ کیوں جو میڈی پنجالی نرم تے میڈا بھار ہلکا ہے۔“ اُوں ویلے یسُوع سبت دے ڈینہہ رَڑھیں ءچوں تھی تے ویندا پِیا ہا تے اُوندے شاگرداں کُوں بُکھ لگی تے او سِٹے تروڑ تروڑ تے کھاوݨ لگے۔ فریسیاں ایہ ڈیکھ تے اُونکُوں آکھیا جو ”ڈیکھو تُہاڈے شاگرد او کم کریندن جیہڑے سبت دے ڈینہہ کرݨ جائز نئیں ۔“ اُوں اُنہاں کُوں جواب ڈِتا، ”کیا تُساں نئیں پڑھیا جو جِیں ویلے داؤد تے اُوندے ساتھی بُکھے ہَن تاں اُوں کیا کیتا ؟ او کِینویں خُدا دے گھر ءچ گِیا تے نذر دیاں روٹیاں کھادیاں تے آپنڑے ساتھیاں کُوں وی کھاوݨ کیتے ڈِتیاں، بھانویں ایجھیاں روٹیاں کھاوݨ صرف کاہِناں کُوں جائز ہا؟ یا کیا تُساں توریت ءچ ایہ نئیں پڑھیا جو کاہِن سبت دے ڈینہہ ہیکل ءچ سبت دی بے حُرمتی کرݨ دے باوجود وی بے قصُور راہندن ؟ مَیں تُہاکُوں آدھا ہاں جو اِتھاں او ہے جیہڑا ہیکل کنُوں وی وڈا ہے۔ پر جے تُساں اِیں نوِشتہ دا مطلب جانڑدے جو ’مَیں قُربانی نئیں بلکہ رحم پسند کریندا ہاں ،‘ تاں بے قصُوراں کُوں قصُوروار نہ آدھے۔ کیوں جو اِبنِ آدم سبت دا مالک ہے۔“ تے او اُتھوں کنُوں روانہ تھی تے اُنہاں دے عبادت خانے ءچ گِیا۔ اُتھاں ہِک بندہ ہا جِیندا ہتھ سُکیا ہویا ہا۔ فریسیاں اُوندے اُتے اِلزام لاوݨ دے اِرادے نال ایہ پُچھیا جو ”کیا سبت دے ڈینہہ شِفا ڈیوݨ جائز ہے؟“ اُوں اُنہاں کُوں آکھیا، ”تُہاڈے ءچوں ایجھا کوݨ ہے جیندی بھیڈ سبت دے ڈینہہ کھڈے ءچ ڈھے پووے تے او اُونکُوں نہ کڈھے؟ بس اِنسان دی قدر تاں بھیڈ کنُوں بہُوں ای زیادہ ہے۔ اِیں کیتے سبت دے ڈینہہ نیکی کرݨ جائز ہے۔“ وَل اُوں اُوں بندے کُوں آکھیا، ”آپنڑا ہتھ ودھا۔“ اُوں ودھایا تے او اُوندے ڈُوجھے ہتھ آلی کار ٹھیک تھی گِیا۔ وَل فریسی باہر چلے گئے تے اُوندے خلاف مشورہ کیتا جو اُونکُوں کِینویں ہلاک کرُوں۔ یسُوع ایہ معلوم کر تے اُتھوں کنُوں روانہ تھیّا تے لوکاں دی ہِک بِھیڑ اُوندے پِچُھوں ٹُر پئی تے اُوں سبھ کُوں چنگا کر ڈِتا۔ تے اُنہاں کُوں چِتا تے آکھیا جو میکُوں ظاہر نہ کرائے۔ اِینویں یسعیاہ نبی دی پیشن گوئی پُوری تھئی جو ”ڈیکھو میڈا خادم، جِینکُوں مَیں چُنڑیا۔ میڈا محبوب جئیں کنُوں میڈا دل خوش ہے۔ مَیں آپنڑا رُوح اُوندے اُتے نازل کریساں تے او قوماں ءچ اِنصاف دا اعلان کریسی۔ ایہ نہ جھیڑا کریسی نہ شور تے نہ گلیاں ءچ کوئی اُوندی اواز سُنڑسی۔ ایہ لتاڑے ہوئے کانے کُوں نہ تُوڑیسی تے نہ بُجھدے ہوئے ڈیوے کُوں وِسمیسی جئیں تئیں اِنصاف کُوں فتح نہ ڈیوا وے۔ تے اِیندے ناں کنُوں غیر قوماں اُمید رکھیسن ۔“ اُوں ویلے لوک یسُوع دے کولھ ہِک اندھے گُونگے بندے کُوں گِھن آئے جیندے ءچ بدرُوح ہئی۔ اُوں اُونکُوں چنگا کر ڈِتا۔ وَل او اندھا گُونگا ڈیکھنڑ تے بولنڑ لگ گِیا۔ سارے لوک حیران تھی تے آکھنڑ لگے، ”کیا ایہ اِبنِ داؤد ہے؟“ فریسیاں سُنڑ تے آکھیا، ”ایہ بدرُوحاں دے سردار بعل زبُول دی مدد دے بغیر بدرُوحاں کُوں نئیں کڈھیندا۔“ یسُوع اُنہاں دے خیالاں کُوں جاݨ تے اُنہاں کُوں آکھیا، ”جِیں بادشاہی ءچ پُھٹ پے ویندی ہے او تباہ تھی ویندی ہے تے جِیں شہر یا گھر ءچ پُھٹ پے ویسی او قائم نہ راہسی۔ جے شیطان ای شیطان کُوں کڈھیا تاں او آپ ای آپنڑا مخالف تھی گِیا۔ وَل اُوندی بادشاہی کِینویں قائم راہسی؟ تے جے مَیں بعل زبُول دی مدد نال بدرُوحاں کُوں کڈھیندا ہاں تاں تُہاڈے شاگرد کیندی مدد نال کڈھیندے ہِن؟ اِیں واسطے اُوہو تُہاڈے مُنصف ہوسن۔ پر جے مَیں خُدا دی رُوح دی مدد نال بدرُوحاں کُوں کڈھیندا ہاں تاں خُدا دی بادشاہی تُہاڈے کولھ آݨ پُجی۔ یا کوئی بندہ کہیں زور آور دے گھر وڑ تے اُوندا مال کِینویں لُٹ سگدے جئیں تئیں پہلے اُوں زور آور کُوں بَدھ نہ گِھنے؟ وَل او اُوندا گھر لُٹ گِھنسی۔ جیہڑا میڈے نال نئیں او میڈے خلاف ہے، تے جیہڑا میڈے نال جمع نئیں کریندا او کِھنڈیندے۔ اِیں واسطے مَیں تُہاکُوں آدھا ہاں جو آدمیاں دا ہر گُناہ تے کُفر معاف کیتا ویسی پر جیہڑا کُفر رُوح القُدس دے خلاف ہوسی او بخشیا نہ ویسی۔ تے جے کوئی اِبنِ آدم دے خلاف کوئی گالھ کریسی اُونکُوں معاف کیتا ویسی، پر جیہڑا رُوح القُدس دے خلاف کوئی گالھ کریسی او اُونکُوں معاف نہ کیتی ویسی نہ اِیں جہان ءچ نہ آوݨ آلے ءچ۔ یا تاں درخت کُوں چنگا آکھو تے اُوندے پھل کُوں وی چنگا، یا درخت کُوں وی بُرا آکھو تے اُوندے پھل کُوں وی بُرا، کیوں جو درخت آپنڑے پھل کنُوں سُنجانڑیا ویندے۔ نانگ دے بالو! تُساں بُرے تھی تے کِینویں چنگے گالھیں آکھ سگدے ہیوے؟ کیوں جو جیہڑا دل ءچ ہوندے اُوہو زبان اُتے آندے۔ چنگا بندہ آپنڑے دل دے چنگے خزانے ءچوں چنگیاں چیزاں کڈھیندے تے بُرا بندہ بُرے خزانے ءچوں بُریاں چیزاں کڈھیندے۔ تے مَیں تُہاکُوں آدھا ہاں جو عدالت دے ڈینہہ لوکاں کُوں ہر نکمی گالھ دا حساب ڈیونڑاں پوسی۔ کیوں جو تُساں آپنڑے گالھیں دی وجہ کنُوں راستباز یا قصُوروار کھڑائے ویسو۔“ وَل کُجھ شریعت دے عالماں تے فریسیاں جواب ءچ اُونکُوں آکھیا، ”اُستاد، اساں تُہاڈے کنُوں ہِک نشان ڈیکھنڑ چاہندے ہیں۔“ اُوں جواب ڈے تے آکھیا، ”اِیں زمانے دے بُرے تے زِناکار لوک نشان ڈیکھنڑ چاہندے ہِن پر یُوناہ نبی دے نشان دے علاوہ بِیا کوئی نشان اُنہاں کُوں نہ ڈِتا ویسی۔ کیوں جو جِینویں یُوناہ ترے ڈینہہ رات وڈی مچھی دے پیٹ ءچ ریہا اِینویں ای اِبنِ آدم ترے ڈینہہ رات زمین دے اندر راہسی۔ نِینوہ دے لوک عدالت دے ڈینہہ اِیں زمانے دے لوکاں نال کھڑ تے اُنہاں کُوں مُجرم کھڑیسن کیوں جو اُنہاں یُوناہ دی تبلیغ دی وجہ کنُوں توبہ کر گِھدی ہئی تے ڈیکھو اِتھاں او ہے جیہڑا یُوناہ کنُوں وی وڈا ہے۔ جنُوب دی ملکہ عدالت دے ڈینہہ اِیں زمانے دے لوکاں نال کھڑ تے اُنہاں کُوں مُجرم کھڑیسی۔ کیوں جو او بہُوں دُور کنُوں سُلیمان دی حِکمت سُنڑݨ کیتے آئی ہئی تے ڈیکھو اِتھاں او ہے جیہڑا سُلیمان کنُوں وی وڈا ہے ۔ جِیں ویلے کہیں بندے ءچوں بدرُوح نِکلدی ہے تاں او بیاباناں ءچ آرام گولھیندی پِھردی ہے پر نئیں پیندی۔ وَل او آدھی ہے جو ’مَیں آپنڑے اُوں گھر وَل ویساں جِتُھوں نِکلی ہم،‘ تے او آ تے اُوں گھر کُوں خالی تے صاف ستھرا تے سجیا ہویا ڈیدھی ہے۔ وَل او وَنج تے آپنڑے کنُوں وی بدتر سَت بئیاں بدرُوحاں کُوں نال گِھن آندی ہے تے او اندر وَنج تے راہنڑ لگدیاں ہِن تے اُوں بندے دا حال پہلے کنُوں وی بُرا تھی ویندے۔ اِیں زمانے دے بُرے لوکاں دا حال وی ایجھا ای ہوسی۔“ جِیں ویلے یسُوع بِھیڑ نال گالھ کریندا پِیا ہا تاں اُوندی ماء تے بِھرا باہر کھڑے ہَن تے او اُوندے نال گالھ کرݨ چاہندے ہَن۔ کہیں اُونکُوں خبر ڈِتی جو ”تُہاڈی ماء تے تُہاڈے بِھرا باہر کھڑے ہِن تے تُہاڈے نال گالھ کرݨ چاہندے ہِن۔“ یسُوع جواب ءچ آکھیا، ”کوݨ ہے میڈی ماء تے کوݨ ہِن میڈے بِھرا؟“ تے آپنڑے شاگرداں دو ہتھ ودھا تے آکھیا، ”ڈیکھو، میڈی ماء تے میڈے بِھرا ایہ ہِن۔ کیوں جو جیہڑا کوئی میڈے اسمانی باپ دی مرضی اُتے چلدے اُوہو میڈا بِھرا تے میڈی بھینڑ تے میڈی ماء ہے۔“ اُوں ڈینہہ یسُوع گھر تُوں باہر نِکل تے جھیل دے کنارے وَنج بیٹھا۔ اُوندے کولھ لوکاں دی ایجھی وڈی بِھیڑ لگ گئی جو او کشتی ءچ وَنج بیٹھا تے سبھ لوک کنارے اُتے کھڑے ریہے۔ وَل او اُنہاں کُوں مثالاں ءچ بہُوں سارے گالھیں آکھنڑ لگا جو، ”ہِک بیج رہاوݨ آلا بیج رہاوݨ نِکلیا۔ تے رہیندے ویلے کُجھ بیج راہ دے کنارے ڈھٹھا تے پکھیں آ تے اُونکُوں چُگ گِھدا۔ کُجھ پتھریلی زمین اُتے ڈھٹھے جِتھاں مِٹی گھٹ ہئی تے زیادہ مِٹی نہ مِلنڑ دے سببّوں، جلدی اُگ پئے۔ پر جِیں ویلے سِجھ نِکلیا تاں پودے سڑ گئے تے کیوں جو او جڑھ نہ پکڑ سگے، اِیں واسطے سُک گئے۔ کُجھ جھاڑیاں ءچ ڈھٹھے تے جھاڑیاں ودھ تے اُنہاں کُوں دبا گِھدا۔ کُجھ چنگی زمین اُتے ڈھٹھے تے پھل گِھن آئے۔ کوئی سو گُنا، کوئی سَٹھ گُنا، کوئی ترِیح گُنا۔ جیندے سُنڑݨ دے کَن ہووݨ او سُنڑ گِھنے۔“ وَل شاگرداں کولھ آ تے آکھیا، ”تُساں اُنہاں نال مثالاں ءچ گالھیں کیوں کریندے ہیوے؟“ اُوں جواب ءچ آکھیا، ”تُہاکُوں تاں اسمان دی بادشاہی دے راز سمجھنڑ دی قابلیت ڈِتی گئی ہے پر اُنہاں کُوں نئیں ڈِتی گئی۔ کیوں جو جیندے کولھ ہے اُونکُوں ڈِتا ویسی تے اُوندے کولھ زیادہ تھی ویسی پر جیندے کولھ کُجھ نئیں، اُوندے کنُوں او وی جیہڑا اُوندے کولھ ہے گِھن گِھدا ویسی۔ مَیں اُنہاں نال مثالاں ءچ اِیں واسطے گالھیں کریندا ہاں کیوں جو او ڈیدھے ہوئے نئیں ڈیدھے، تے سُنڑدے ہوئے نئیں سُنڑدے تے نئیں سمجھدے۔ یسعیاہ نبی دی ایہ پیشنگوئی اُنہاں اُتے سچ تھیندی ہے جو ’تُساں کَناں نال سُنڑسو پر اصلُوں نہ سمجھسو تے اکھیں نال ڈیکھسو پر اصلُوں نہ جاݨ سو۔ کیوں جو اِیں اُمت دے دل اُتے چربی چڑھ گئی ہے تے او کَناں کنُوں اُچا سُنڑدے ہِن تے اُنہاں آپنڑے اکھیں بند کر گِھدیاں ہِن کِتھائیں اِینویں نہ تھیوے جو او اکھیں کنُوں ڈیکھنڑ تے کَناں نال سُنڑݨ دل نال سمجھنڑ تے رجُوع گِھن آوݨ تے مَیں اُنہاں کُوں شِفا بخشاں ۔‘ پر تُہاڈے اکھیں مُبارک ہِن کیوں جو او ڈیدھیاں ہِن تے تُہاڈے کَن مُبارک ہِن اِیں واسطے جو او سُنڑدے ہِن۔ کیوں جو مَیں تُہاکُوں سچ آدھا ہاں جو بہُوں سارے نبیاں تے راستبازاں کُوں آرزو ہئی جو جیہڑے گالھیں تُساں ڈیدھے ہیوے او وی ڈیکھنڑ پر نہ ڈیکھ سگے تے جیہڑے گالھیں تُساں سُنڑدے ہیوے سُنڑݨ پر نہ سُنڑ سگے۔ بس بیج رہاوݨ آلے دی مثال دا مطلب سُنڑو۔ جِیں ویلے کوئی بادشاہی دا کلام سُنڑدے پر سمجھدا نئیں تاں شیطان اُوں کلام کُوں جیہڑا اُوندے دل ءچ رہایا گِیا ہا کَھس گِھندے۔ ایہ او ہے جیہڑا راہ دے کنارے رہایا گِیا ہا۔ جیہڑا پتھریلی زمین اُتے رہایا گِیا ہا اُوں بندے وانگُوں ہے جیہڑا کلام کُوں سُنڑدے ای خوشی نال قبول کر گِھندے۔ پر او اُوندے ءچ جڑھ نئیں پکڑیندا تے دیر تئیں قائم نئیں راہندا۔ جِیں ویلے کلام دے سببّوں مُصیبت یا ظلم آندے تاں فوراً ٹھوکر کھاندے۔ تے جھاڑیاں ءچ رہایا گِیا بیج اُوندی مثال ہے جیہڑا کلام کُوں سُنڑدا تاں ہے پر دُنیا دی فِکر تے دولت دا فریب اُونکُوں دبا ڈیندے تے اُونکُوں پھل نئیں لگدا۔ پر جیہڑا چنگی زمین ءچ رہایا گِیا اُوں بیج وانگُوں ہے جیہڑا کلام کُوں سُنڑدے تے سمجھدے تے پھل وی گِھن آندے، کوئی سو گُنا، کوئی سَٹھ گُنا تے کوئی ترِیح گُنا۔“ اُوں اُنہاں کُوں ہِک بئی مثال سُنڑائی جو ”اسمان دی بادشاہی اُوں بندے وانگُوں ہے جئیں آپنڑی رَڑھ ءچ چنگا بیج رہایا۔ پر جِیں ویلے لوک سُتے پئے ہَن تاں اُوندا دُشمنڑ آیا تے کنڑک ءچ کڑوے دانڑے دا بیج رَہا گِیا۔ بس جیہڑے ویلے پتے تے سِٹے نِکلے تاں او کڑوے دانڑے ظاہر تھی گئے۔ مالک دے نوکراں آ تے اُونکُوں آکھیا، ’کیا تُساں آپنڑی رَڑھ ءچ چنگا بیج نہ رہایا ہا؟ وَل ایہ کڑوے دانڑے کِتھوں آ گئے؟‘ اُوں جواب ڈِتا، ’ایہ کہیں دُشمنڑ دا کم ہے۔‘ نوکراں پُچھیا، ’کیا تُساں چاہندے ہیوے جو اساں اُنہاں کُوں جمع کرُوں؟‘ پر اُوں آکھیا، ’نہ، اِینویں نہ تھیوے جو اُنہاں کُوں پٹیندے ہوئے تُساں کنڑک کُوں وی پَٹ ڈیؤ۔ فصل دی کٹائی تئیں ڈوہائیں کُوں کٹھے ودھنڑ ڈیؤ تے کٹائی دے ویلے مَیں کٹائی کرݨ آلیاں کُوں آکھ ڈیساں جو پہلے کڑوے دانڑیاں کُوں جمع کر گِھنو تے ساڑن کیتے اُنہاں دے گٹھے بَدھ ڈیؤ تے کنڑک کُوں میڈے گوداماں ءچ جمع کر ڈیؤ‘۔“ اُوں ہِک بئی مثال اُنہاں کُوں سُنڑائی جو ”اسمان دی بادشاہی اُوں رائی دے دانڑے وانگُوں ہے جِینکُوں ہِک بندے گِھدا تے آپنڑی رَڑھ ءچ رَہا ڈِتا۔ ایہ بِیجاں ءچوں سبھ کنُوں چھوٹا ہے پر پھپھڑن تُوں بعد بُوٹیاں ءچوں سبھ سبزیاں کنُوں وڈا تھی ویندے تے ایجھا درخت بنڑ ویندے جو ہوا دے پکھی آ تے اُوندے اُتے آلہنڑے بنڑیندے ہِن ۔“ اُوں ہِک بئی مثال اُنہاں کُوں سُنڑائی جو ”اسمان دی بادشاہی اُوں خمیر وانگُوں ہے جِینکُوں ہِک عورت گِھن تے ترے مُٹھیاں اٹّے ءچ رَلایا تے ہولے ہولے سارا اٹّا خمیر تھی گِیا۔“ ایہ سارے گالھیں یسُوع بِھیڑ کُوں مثالاں ءچ آکھیاں تے بغیر مثال دے او اُنہاں کُوں کُجھ نہ آدھا ہا۔ اِینویں نبی دی آکھی ہوئی گالھ پُوری تھئی جو ”مَیں مثالاں ءچ آپنڑاں مُنہ کھولیساں۔ تے او گالھیں اکھیساں جیہڑیاں دُنیا بنڑݨ دے ویلے کنُوں لُکیاں رہ گئیاں ہِن ۔“ اُوں ویلے او بِھیڑ کُوں چھوڑ تے گھر دے اندر گِیا تے اُوندے شاگرداں اُوندے کولھ آ تے آکھیا جو ”ساکُوں کڑوے دانڑیاں دی مثال دا مطلب سمجھا ڈیؤ۔“ اُوں جواب ڈِتا، ”چنگے بیج دا رہاوݨ آلا اِبنِ آدم ہے۔ رَڑھ دُنیا ہے تے چنگا بیج بادشاہی دے فرزند تے کڑوے دانڑے اُوں شریر دے فرزند ہِن۔ دُشمنڑ جئیں اُنہاں کُوں رہایا ابلیس ہے تے کٹائی دُنیا دا آخر ہے تے کٹائی کرݨ آلے فرشتے ہِن۔ بس جِینویں کڑوے دانڑے جمع کیتے ویندے تے بھاہ ءچ ساڑ ڈِتے ویندن، اُونویں ای دُنیا دے آخر ءچ تھیسی۔ اِبنِ آدم آپنڑے فرشتیاں کُوں بھجیسی تے او ٹھوکر کھواوݨ آلیاں ساریاں چیزاں تے بدکاراں کُوں اُوندی بادشاہی ءچوں جمع کریسن۔ تے اُنہاں کُوں بھاہ دی بٹھی ءچ سَٹ ڈیسن جِتھاں رووݨ تے ڈنداں دا پِیہوݨ ہوسی۔ اُوں ویلے راستباز آپنڑے باپ دی بادشاہی ءچ سورج وانگُوں چمکسنڑ۔ جیندے سُنڑݨ دے کَن ہووݨ او سُنڑ گِھنے۔ اسمان دی بادشاہی رَڑھ ءچ لُکے اُوں خزانے وانگُوں ہے جیہڑا ہِک بندے کُوں مِل گِیا تے اُوں ولا لُکا ڈِتا، وَل او خوشی خوشی گِیا تے آپنڑاں سبھ کُجھ ویچ تے اُوں رَڑھ کُوں مُل گِھن گِھدا۔ تے اسمان دی بادشاہی اُوں وپاری وانگُوں ہے جیہڑا بہُوں اعلیٰ موتیاں دی گولھ ءچ ہا۔ جِیں ویلے اُونکُوں ہِک بہُوں قیمتی موتی مِلیا تاں اُوں وَنج تے آپنڑاں سبھ کُجھ ویچ ڈِتا تے اُونکُوں مُل گِھن گِھدا۔ وَل اسمان دی بادشاہی اُوں وڈے جال وانگُوں ہے جیہڑا جھیل ءچ سٹیا گِیا تے اُوں ہر قِسم دیاں مچھیاں کٹھیاں کر گِھدیاں۔ جِیں ویلے بھر گِیا تاں مچھیرے اُونکُوں چھیک تے کنارے اُتے گِھن آئے تے بہہ تے چنگیاں چنگیاں مچھیاں تھانواں ءچ جمع کر گِھدیاں تے جیہڑیاں خراب ہَن سَٹ ڈِتیاں۔ قیامت آلے ڈینہہ اِینویں ای تھیسی۔ فرشتے نِکلسن تے شریراں کُوں راستبازاں کنُوں اَنج کریسن تے اُنہاں کُوں بھاہ دی بٹھی ءچ سَٹ ڈیسن۔ اُتھاں رووݨ تے ڈنداں دا پِیہوݨ ہوسی۔“ وَل یسُوع پُچھیا، ”کیا تُساں ایہ سارے گالھیں سمجھ گئے؟“ شاگرداں اُونکُوں آکھیا، ”ہاں۔“ یسُوع اُنہاں کُوں آکھیا، ”اِیں واسطے ہر شریعت دا عالم جیہڑا اسمان دی بادشاہی دا شاگرد بنڑیا ہے اُوں گھر دے مالک وانگُوں ہے جیہڑا آپنڑے خزانے ءچوں نوِیاں تے پُرانڑیاں چیزاں کڈھیندے۔“ جِیں ویلے یسُوع ایہ مثالاں سُنڑا گِھدیاں تاں اُتھوں کنُوں چلیا گِیا۔ تے آپنڑے وطن ءچ آ تے اُتھوں دے عبادت خانے ءچ اُنہاں کُوں ایجھی تعلیم ڈیوݨ لگا جو او حیران تھی تے آکھنڑ لگے جو ”ایہ حِکمت تے معجزے او کِتھوں حاصل کریندے؟ کیا ایہ درکھاݨ دا پوتر نئیں؟ تے اِیندی ماء دا ناں مریم نئیں؟ تے کیا یعقُوب تے یُوسف تے شمعون تے یہُوداہ اِیندے بِھرا نئیں؟ تے کیا اِیندیاں ساریاں بھینڑاں اِتھاں ساڈے کولھ نئیں؟ وَل ایہ سبھ کُجھ اِیندے ءچ کِتھوں آیا؟“ اُنہاں اُوندی وجہ کنُوں ٹھوکر کھادی۔ پر یسُوع اُنہاں کُوں آکھیا جو ”نبی دی بےقدری اُوندے آپنڑے وطن تے رشتے داراں دے سوا بِیا کِتھائیں نئیں تھیندی۔“ تے اُوں اُنہاں دی بےاعتقادی دے سببّوں اُتھاں بہُوں معجزے نہ ڈِکھائے۔ اُوں ویلے ہیرودیس جیہڑا مُلک دے چوتھائی حصے اُتے حکُومت کریندا، ہا یسُوع دی شُہرت سُنڑی، تے آپنڑے نوکراں کُوں آکھیا جو ”ایہ یُوحنّا بپتسمہ ڈیوݨ آلا ہے۔ او مُردیاں ءچوں زندہ تھی گئے، اِیں واسطے او معجزے ڈکھیندے۔“ کیوں جو ہیرودیس یُوحنّا کُوں پکڑ تے بدھوایا تے قید خانے ءچ سٹوا ڈِتا ہا۔ اِیندی وجہ ہیرودیس دے بِھرا فِلپُس دی ذال ہیرودیاس ہئی۔ کیوں جو ہیرودیس کُوں یُوحنّا آکھیا ہا جو ”اِینکُوں آپنڑے کولھ رکھنڑ تیکُوں جائز نئیں ۔“ ہیرودیس یُوحنّا کُوں قتل کرݨ چاہندا ہا پر عوام کنُوں ڈر دا ہا کیوں جو او اُونکُوں نبی منیندے ہَن۔ پر جِیں ویلے ہیرودیس دی سالگرہ تھئی تاں ہیرودیاس دی دِھی محفل ءچ مہماناں دے سامنڑے نَچ تے ہیرودیس کُوں خوش کیتا۔ اِیں واسطے ہیرودیس قَسم چا تے اُوندے نال وعدہ کیتا جو ”جیہڑا کُجھ تُوں منگسیں مَیں تیکُوں ڈیساں۔“ چھوہیر آپنڑی ماء دے سِکھاوݨ تے آکھیا، ”میکُوں یُوحنّا بپتسمہ ڈیوݨ آلے دا سر تھال ءچ اِتھائیں منگوا ڈے۔“ بادشاہ غمگین تھیّا پر آپنڑی قَسم تے مہماناں دے سببّوں حُکم ڈِتا جو ڈے ڈِتا ونجے۔ اُوں بندے بھیج تے قید خانے ءچ یُوحنّا دا سر کٹوا ڈِتا۔ تے اُوندا سر تھال ءچ رکھ تے گِھن آئے تے چھوہیر کُوں ڈِتا گِیا تے او اُونکُوں آپنڑی ماء دے کولھ گِھن گئی۔ یُوحنّا دے شاگرد آئے تے اُوندی لاش چا تے اُونکُوں دفن کر ڈِتا تے وَنج تے یسُوع کُوں خبر ڈِتی۔ جِیں ویلے یسُوع ایہ سُنڑیا تاں او کشتی ءچ ہِک ویران جاہ دو کلھا روانہ تھیّا۔ پر لوک ایہ سُنڑ تے شہر شہر کنُوں نِکل تے پیدل ای اُوندے پِچُھوں ٹُر پئے۔ یسُوع لہہ تے وڈی بِھیڑ ڈِٹھی تاں اُونکُوں اُنہاں اُتے ترس آیا تے اُوں اُنہاں دے بیماراں کُوں شِفا بخشی۔ جِیں ویلے شام تھئی تاں شاگرد اُوندے کولھ آ تے آکھنڑ لگے جو ”ایہ جاہ ویران ہے تے دیر وی تھی گئی ہے۔ لوکاں کُوں رُخصت کر ڈیؤ تاں جو او وستیاں ءچ وَنج تے آپنڑے کیتے کھانڑا مُل گِھن سگن۔“ یسُوع آکھیا، ”اِنہاں دا ونجنڑ ضروری نئیں، تُساں ای اِنہاں کُوں کھاوݨ کیتے ڈیؤ۔“ اُنہاں جواب ڈِتا، ”اِتھاں ساڈے کولھ صرف پنج روٹیاں تے ڈُو مچھیاں ہِن۔“ اُوں آکھیا، ”اُنہاں کُوں میڈے کولھ گِھن آؤ۔“ تے اُوں لوکاں کُوں گھاہ اُتے بَہوݨ دا حُکم ڈِتا۔ وَل پنج روٹیاں تے ڈُو مچھیاں گِھدیاں تے اسمان دو ڈیکھ تے برکت ڈِتی، تے روٹیاں تروڑ تے شاگرداں کُوں ڈِتیاں تے شاگرداں لوکاں کُوں۔ سبھ لوکاں رَج تے کھادا تے اُنہاں بچے ہوئے ٹُکڑیاں کنُوں بارہاں ٹوکریاں چاتیاں۔ تے کھاوݨ آلیاں دی تعداد عورتاں تے بالاں دے علاوہ تقریباً پنج ہزار مرد ہئی۔ تے اُوں فوراً شاگرداں کُوں مجبور کیتا جو کشتی ءچ بہہ تے جھیل دے پار چلے ونجنڑ جئیں تئیں او لوکاں کُوں روانہ کرے۔ تے لوکاں کُوں روانہ کر تے او کلھا دُعا کرݨ کیتے ہِک پہاڑ اُتے چڑھ گِیا تے جِیں ویلے شام تھئی تاں او اُتھاں کلھا ہا۔ پر کشتی اُوں ویلے جھیل دے اَدھ ءچ ہئی تے مخالف ہوا دی وجہ تُوں لہراں اُتے ڈولے کھاندی پئی ہئی۔ یسُوع رات دے پِچھلے پہر جھیل اُتے ٹُردے ہوئے اُنہاں دے نیڑے آیا۔ شاگرداں اُونکُوں جھیل اُتے ٹُردے ڈِٹھا تاں گھبرا گئے تے آکھنڑ لگے جو ”ایہ تاں کوئی بُھوت ہے“ تے ڈر کنُوں چیخاں مارݨ لگ پئے۔ پر یسُوع اُنہاں کُوں فوراً آکھیا، ”حوصلہ رکھو۔ مَیں ہاں۔ ڈرو نہ۔“ پطرس اُونکُوں جواب ءچ آکھیا، ”مالک! جے تُساں ہیوے تاں میکُوں حُکم ڈیؤ جو مَیں پانڑی اُتے ٹُر تے تُہاڈے کولھ آواں۔“ اُوں آکھیا، ”آ۔“ وَل پطرس کشتی کنُوں لہہ تے یسُوع دے کولھ ونجنڑ کیتے پانڑی اُتے ٹُرݨ لگا۔ پر جیہڑے ویلے ہوا دا زور ڈِٹھا تاں ڈر گِیا تے جِیں ویلے ڈُبنڑ لگا تاں چیخ تے آکھیا، ”مالک! میکُوں بچاؤ۔“ یسُوع فوراً ہتھ ودھا تے اُونکُوں پکڑ گِھدا تے آکھیا، ”کمزور اِیمان آلے! تَیں کیوں شک کیتے؟“ جِیں ویلے او کشتی ءچ چڑھ آئے تاں ہوا رُک گئی۔ تے وَل جیہڑے لوک کشتی ءچ ہَن اُنہاں اُونکُوں سجدہ کر تے آکھیا، ”یقیناً تُساں خُدا دے پوتر ہیوے۔“ او جھیل پار کر تے گنّیسرت دے علاقے ءچ پُجے۔ تاں اُتھاں دے لوکاں اُونکُوں سُنجانڑ گِھدا تے آسُوں پاسُوں دے سارے علاقے ءچ خبر کر ڈِتی تے سبھ بیماراں کُوں اُوندے کولھ گِھن آئے۔ او اُوندی مِنت کرݨ لگے جو اُوندی پُشاک دے کنارے کُوں ای ہتھ لا گِھننڑ، تے جئیں جئیں ہتھ لایا تندرُست تھی گِیا۔ وَل فریسیاں تے شریعت دے عالماں یروشلیم تُوں یسُوع دے کولھ آ تے آکھیا، ”تُہاڈے شاگرد بزُرگاں دیاں رسماں دی خلاف ورزی کیوں کریندے ہِن، تے کھانڑا کھاوݨ کنُوں پہلے آپنڑے ہتھ نئیں دھوندے؟“ اُوں جواب ڈِتا، ”تُساں کیوں آپنڑیاں رسماں نال خُدا دے حُکماں دی خلاف ورزی کریندے ہیوے؟ کیوں جو خُدا فرمائے، ’آپنڑے ماء پِیُو دی عزت کریں تے جیہڑا کوئی ماء پِیُو کُوں بُرا آکھے او ضرور جان تُوں مار ڈِتا ونجے ۔‘ پر تُساں آدھے ہیوے جو جے کوئی ماء پِیُو کُوں آکھے جو ’میڈی جیہڑی چیز کنُوں تُہاکُوں فائدہ تھی سگدا ہا او خُدا دی نذر تھی گئی۔‘ تاں او اُوں چیز نال آپنڑے ماء پِیُو دی خدمت بےشک نہ کرے۔ بس تُساں آپنڑی رسم نال خُدا دے کلام کُوں بے اثر کر ڈِتے۔ منافقو! یسعیاہ تُہاڈے حق ءچ کیا خُوب نبُوّت کیتی جو ’ایہ لوک زبان کنُوں تاں میڈی تعظیم کریندے ہِن پر اِنہاں دے دل مَیں کنُوں دُور ہِن۔ ایہ بے فائدہ میڈی عبادت کریندے ہِن کیوں جو آدمیاں دے حُکماں دی تعلیم ڈیندے ہِن ‘۔“ تے اُوں لوکاں کُوں آپنڑے کولھ سڈ تے آکھیا، ”سُنڑو تے سمجھو۔ جیہڑی چیز مُنہ ءچ ویندی ہے او بندے کُوں ناپاک نئیں کریندی، پر جیہڑی چیز مُنہ ءچوں نِکلدی ہے اُوہو بندے کُوں ناپاک کریندی ہے۔“ وَل شاگرداں اُوندے کولھ آ تے آکھیا، ”کیا تُساں جانڑدے ہیوے جو فریسی ایہ گالھ سُنڑ تے ناراض تھئے ہِن؟“ اُوں جواب ڈِتا، ”ہر او بُوٹا جیہڑا میڈے اسمانی باپ نئیں رہایا جڑھ کنُوں پَٹ ڈِتا ویسی۔ اُنہاں کُوں چھوڑ ڈیؤ۔ او اندھے راہ ڈِکھاوݨ آلے ہِن، تے جے اندھا ڈُوجھے اندھے کُوں راہ ڈکھیسی تاں ڈوہائیں کھڈے ءچ ڈھاسن۔“ پطرس اُونکُوں جواب ءچ آکھیا، ”ایہ مثال ساکُوں سمجھا ڈیؤ۔“ اُوں آکھیا، ”کیا تُساں وی ہُنڑ تئیں نئیں سمجھے؟ کیا تُساں نئیں سمجھدے جو جیہڑا کُجھ مُنہ ءچ ویندے او پیٹ ءچ ویندے تے خارج تھی ویندے۔ پر جیہڑے گالھیں مُنہ ءچوں نِکلدیاں ہِن او دل ءچوں نِکلدیاں ہِن تے اُوہو بندے کُوں ناپاک کریندیاں ہِن۔ کیوں جو بُرے خیال، قتل، زِنا کاریاں، حرامکاریاں، چوریاں، کُوڑے گواہیاں، بدگوئیاں دل کنُوں ای نِکلدیاں ہِن۔ اِیہو گالھیں ہِن جیہڑیاں بندے کُوں ناپاک کریندیاں ہِن پر ہتھ دھوتے بغیر کھانڑا کھاوݨ بندے کُوں ناپاک نئیں کریندا۔“ وَل یسُوع اُتھوں کنُوں نِکل تے صور تے صیدا دے علاقے کُوں روانہ تھیّا۔ تے ہِک کنعانی تریمت اُنہاں سرحداں ءچوں نِکلی تے اُچی اواز ءچ آکھنڑ لگی، ”مالک، اِبنِ ِ داؤد! میڈے اُتے رحم کرو۔ میڈی دِھی ءچ ہِک بدرُوح ہے جیہڑی اُونکُوں بہُوں ستیندی ہے۔“ پر اُوں اُونکُوں کُجھ جواب نہ ڈِتا۔ تے اُوندے شاگرداں کولھ آ تے اُونکُوں ایہ عرض کیتی جو ”اُونکُوں روانہ کر ڈے کیوں جو او ساڈے پِچُھوں چیخدی ہے۔“ اُوں جواب ءچ آکھیا جو ”مَیں اِسرائیل دے گھرانڑے دیاں گُم تھیّاں بھیڈاں دے علاوہ کہیں کولھ نئیں بھیجیا گِیا۔“ پر اُوں آ تے اُونکُوں سجدہ کیتا تے آکھنڑ لگی، ”مالک! میڈی مدد کرو۔“ اُوں جواب ڈِتا، ”بالاں دی روٹی گِھن تے کُتیاں کُوں سَٹ ڈیوݨ مناسب نئیں۔“ اُوں جواب ڈِتا، ”ہاں مالک، جیہڑے ٹُکڑے مالکاں دی میز کنُوں تلے ڈھاندے ہِن کُتے وی اُنہاں ءچوں کھاندے ہِن۔“ وَل یسُوع اُونکُوں جواب ڈِتا، ”عورت! تیڈا اِیمان بہُوں وڈا ہے۔ جِینویں تُوں چاہندی ہیں تیڈے کیتے اُونویں ای ہووے۔“ تے اُوندی دِھی اُوں ویلے ای شِفا پائی۔ وَل یسُوع اُتھوں کنُوں نِکل تے گلیل دی جھیل دے نیڑے آیا تے پہاڑ اُتے چڑھ تے اُتھائیں بہہ گِیا۔ تے ہِک وڈی بِھیڑ لنگڑیاں، اندھیاں، گُونگیاں، ٹُنڈیاں تے کئی ڈُوجھے بیماراں کُوں نال گِھن تے اُوندے کولھ آئی تے اُنہاں کُوں یسُوع دے قدماں ءچ سَٹ ڈِتا تے اُوں اُنہاں کُوں شِفا بخشی۔ جِیں ویلے لوکاں ڈِٹھا جو گُونگے بُولیندن، ٹُنڈے تندرُست تھیندن، منڈے ٹُردے ہِن تے اندھے ڈیدھے ہِن تاں بہُوں حیران تھئے تے بنی اِسرائیل دے خُدا دی تعریف کیتی۔ وَل یسُوع آپنڑے شاگرداں کُوں کولھ سڈ تے آکھیا، ”میکُوں اِیں بِھیڑ اُتے ترس آندے کیوں جو ایہ لوک ترے ڈینہہ تُوں مسلسل میڈے نال ہِن تے اُنہاں دے کولھ کھاوݨ کیتے کُجھ وی نئیں۔ تے مَیں اُنہاں کُوں بُکھا روانہ کرݨ نئیں چاہندا، کِتھائیں اِینویں نہ تھیوے جو رستے ءچ تھک تے رہ ونجنڑ۔“ شاگرداں اُونکُوں آکھیا، ”اساں بیابان ءچ اِتی لوکاں کیتے روٹیاں کِتھوں گِھن آؤں جیہڑیاں سبھ کیتے پُوریاں تھیوݨ؟“ یسُوع اُنہاں کُوں آکھیا، ”تُہاڈے کولھ کِتی روٹیاں ہِن؟“ اُنہاں آکھیا، ”سَت تے کُجھ چھوٹی مچھیاں ہِن۔“ اُوں لوکاں کُوں زمین اُتے بَہوݨ دا حُکم ڈِتا۔ تے وَل اُوں سَت روٹیاں تے مچھیاں گِھدیاں تے شُکر کر تے تروڑیاں تے شاگرداں کُوں ڈیندا گِیا تے شاگرد لوکاں کُوں۔ سبھ لوکاں رَج تے کھادا تے بچے ہوئے ٹُکڑیاں کنُوں بھریاں ہوئیاں سَت ٹوکریاں چاتیاں۔ تے کھاوݨ آلیاں دی تعداد عورتاں تے بالاں دے علاوہ چار ہزار مرد ہَن۔ وَل یسُوع بِھیڑ کُوں روانہ کرݨ تُوں بعد کشتی ءچ سوار تھیّا تے مگدَن دیاں سرحداں ءچ آ گِیا۔ وَل فریسیاں تے صدوقیاں یسُوع دے کولھ آ تے اُونکُوں ازماوݨ کیتے درخاست کیتی جو ساکُوں کوئی اسمانی نشان ڈِکھاؤ۔ اُوں جواب ءچ اُنہاں کُوں آکھیا، ”شام کُوں تُساں آدھے ہیوے جو ’موسم چنگا راہسی کیوں جو اسمان رَتّا ہے۔‘ تے سویل کُوں ایہ آدھے ہیوے جو ’اَج اندھاری آسی کیوں جو اسمان رَتّا تے دُھندلا ہے۔‘ تُساں اسمان دا رنگ ڈیکھ تے موسم دا اندازہ لاوݨ تاں جانڑدے ہیوے پر زمانے دیاں نشانیاں نئیں سُنجاݨ سگدے۔ اِیں زمانے دے بدکار تے زِنا کار لوک نشان منگدے ہِن پر اُنہاں کُوں یُوناہ دے نشان دے علاوہ بِیا کوئی نشان نہ ڈِتا ویسی۔“ تے او اُنہاں کُوں چھوڑ تے چلا گِیا۔ شاگرد جھیل دے پار ویندے ہوئے روٹی نال گِھننڑ بُھل گئے۔ یسُوع اُنہاں کُوں آکھیا، ”خبردار فریسیاں تے صدوقیاں دے خمیر کنُوں ہوشیار رہوائے۔“ او آپس ءچ بحث کرݨ لگ گئے جو ”اساں روٹی نئیں گِھن آئے اِیں واسطے او آدھے ہوسن۔“ یسُوع اُنہاں دی سوچ جاݨ تے آکھیا، ”کمزور اِیمان آلیو! تُساں کیوں آپس ءچ تکرار کریندے ہیوے جو ساڈے کولھ روٹی نئیں؟ کیا تُساں ہُنڑ تئیں نئیں سمجھے؟ کیا تُہاکُوں پنج ہزار آدمیاں کیتے او پنج روٹیاں یاد نئیں تے ایہ وی جو تُساں کِتی ٹوکریاں چاتیاں ہَن؟ تے نہ چار ہزار بندیاں کیتے او سَت روٹیاں تے ایہ جو تُساں کِتی ٹوکریاں چاتیاں ہَن؟ تُساں ایہ کیوں نئیں سمجھے جو مَیں تُہاکُوں روٹی دے بارے ءچ نئیں آکھیا؟ بس فریسیاں تے صدوقیاں دے خمیر کنُوں خبردار راہو۔“ وَل اُنہاں دی سمجھ ءچ آیا جو یسُوع روٹی دے خمیر کنُوں نئیں بلکہ فریسیاں تے صدوقیاں دی تعلیم کنُوں خبردار راہنڑ کیتے آکھیا ہا۔ جِیں ویلے یسُوع قیصریہ فِلپی دے علاقے ءچ آیا تاں اُوں آپنڑے شاگرداں تُوں پُچھیا، ”لوک اِبنِ آدم کُوں کیا آدھے ہِن؟“ اُنہاں آکھیا، ”کُجھ یُوحنّا بپتسمہ ڈیوݨ آلا آدھے ہِن، کُجھ ایلیّاہ، تے کُجھ یرمیاہ یا نبیاں ءچوں کوئی ۔“ یسُوع اُنہاں کُوں آکھیا، ”پر تُساں میکُوں کیا آدھے ہیوے؟“ شمعون پطرس جواب ڈِتا، ”تُساں زندہ خُدا دے پوتر المسیح ہیوے۔“ یسُوع جواب ءچ اُونکُوں آکھیا، ”شمعون بِن یُوناہ، تُوں مُبارک ہیں کیوں جو ایہ گالھ اِنسان نئیں بلکہ میڈے اسمانی باپ تَیں اُتے ظاہر کیتی ہے۔ تے مَیں وی تیکُوں آدھا ہاں جو تُوں پطرس ہیں، تے مَیں اِیں چٹان اُتے آپنڑی کلیسیا قائم کریساں تے موت وی اُوندے اُتے غالب نہ آ سگسی۔ مَیں اسمان دی بادشاہی دیاں کُنجیاں تیکُوں ڈیساں تے جیہڑا کُجھ تُوں زمین اُتے بدھیسیں او اسمان اُتے بدھیسی، تے جیہڑا کُجھ تُوں زمین اُتے کھولیسیں او اسمان اُتے کھولیا ویسی۔“ اُوں ویلے اُوں شاگرداں کُوں حُکم ڈِتا جو ”کہیں کُوں نہ ڈسائے جو مَیں المسیح ہاں۔“ اُوں ویلے تُوں یسُوع آپنڑے شاگرداں اُتے ظاہر کرݨ شروع کر ڈِتا جو اُوندے کیتے لازمی ہے جو یروشلیم ونجے تے بزُرگاں تے سردار کاہِناں تے شریعت دے عالماں دے ہتُھوں بہُوں ڈُکھ چاوے تے قتل کیتا ونجے، تے تریجھے ڈینہہ زندہ تھی ونجے۔ پطرس اُونکُوں اَنج کر تے ملامت کرݨ لگا جو، ”مالک! خُدا نہ کرے، تُہاڈے نال کڈھائیں اِینویں تھیوے۔“ یسُوع پطرس دو مُڑ تے آکھیا، ”شیطان! میڈے کنُوں دُور تھی وَنج۔ تُوں میڈے کیتے ٹھوکر دا باعث ہیں کیوں جو تُوں خُدا دے گالھیں دا نئیں بلکہ اِنسان دے گالھیں دا لحاظ کریندیں۔“ اُوں ویلے یسُوع آپنڑے شاگرداں کُوں آکھیا، ”جے کوئی میڈی پیروی کرݨ چاہندے تاں او آپنڑی خُودی دا اِنکار کرے تے آپنڑی صلیب چا تے میڈے پِچُھوں تھی پووے۔ کیوں جو جیہڑا کوئی آپنڑی جان بچاوݨ چاہندے اُونکُوں ونجیسی، تے جیہڑا کوئی میڈے کیتے آپنڑی جان ونجیسی اُونکُوں پیسی۔ بندہ جے ساری دُنیا حاصل کر گِھنے پر آپنڑی جان دا نُقصان چاوے تاں اُونکُوں کیا فائدہ تھیسی؟ یا بندہ آپنڑی جان دے بدلے کیا ڈیسی؟ کیوں جو اِبنِ آدم آپنڑے باپ دے جلال ءچ آپنڑے فرشتیاں نال آسی۔ اُوں ویلے ہر ہِک کُوں اُوندے کماں دے مطابق اجر ڈیسی۔ مَیں تُہاکُوں سچ آدھا ہاں جو جیہڑے اِتھاں کھڑے ہِن اُنہاں ءچوں کُجھ ایجھے ہِن جو جئیں تئیں اِبنِ آدم کُوں اُوندی بادشاہی ءچ آندے ہوئے ڈیکھ نہ گِھنسن، ہرگز نہ مرسن۔“ چِھی ڈینہہ بعد یسُوع پطرس، یعقُوب تے یعقُوب دے بِھرا یُوحنّا کُوں نال گِھدا تے اُنہاں کُوں ہِک اُچے پہاڑ اُتے اَنج گِھن گِیا۔ اُتھاں اُنہاں دے سامنڑے اُوندی شکل بدل گئی۔ اُوندا مُنہ سِجھ وانگُوں چمکنڑ پے گِیا تے اُوندا لباس نُور وانگُوں چِٹّا تھی گِیا۔ تے ڈیکھو مُوسیٰ تے ایلیّاہ اُوندے نال گالھیں کریندے نظر آئے۔ پطرس یسُوع کُوں آکھیا، ”مالک! ساڈا اِتھاں راہنڑ چنگا ہے۔ جے تُساں چاہو تاں مَیں اِتھاں ترے خیمے بنڑاواں۔ ہِک تُہاڈے کیتے، ہِک مُوسیٰ کیتے تے ہِک ایلیّاہ کیتے۔“ او ایہ آدھا ای پِیا ہا جو ڈیکھو ہِک نُورانی بدلی اُنہاں اُتے چھاں کر ڈِتی تے اُوں بدلی ءچوں اواز آئی جو ”ایہ میڈا پیارا پوتر ہے جیندے تُوں مَیں بہُوں خوش ہاں، اِیندی سُنڑو۔“ شاگرد ایہ سُنڑ تے مُنہ دے بھار ڈھٹھے تے بہُوں ڈر گئے۔ پر یسُوع کولھ آ تے اُنہاں کُوں ہتھ لایا تے آکھیا، ”اُٹھو، ڈرو نہ۔“ جِیں ویلے اُنہاں آپنڑیاں اکھیں چاتیاں تاں یسُوع دے سِوا بئے کہیں کُوں نہ ڈِٹھا۔ جِیں ویلے او پہاڑ کنُوں تلے لہندے پئے ہَن تاں یسُوع اُنہاں کُوں حُکم ڈِتا جو ”جیہڑا کُجھ تُساں ڈِٹھے جِیں ویلے تئیں اِبنِ آدم مُردیاں ءچوں زندہ نہ تھی ونجے کہیں نال اُوندا ذِکر نہ کرائے۔“ شاگرداں اُوں کنُوں پُچھیا، ”شریعت دے عالم ایہ کیوں آدھے ہِن جو ایلیّاہ دا پہلے آوݨ ضرور ہے؟“ یسُوع جواب ڈِتا، ”ایلیّاہ تاں پہلے آسی تے سبھ کُجھ بحال کریسی ۔ پر مَیں تُہاکُوں آدھا ہاں جو ایلیّاہ تاں آ گئے تے اُنہاں اُونکُوں نئیں سُنجانڑیا، بلکہ جِینویں چاہیا اُونویں ای اُوندے نال کیتا۔ اِینویں ای اِبنِ آدم وی اُنہاں دے ہتُھوں ڈُکھ چیسی۔“ وَل شاگرد سمجھ گئے جو اُوں اُنہاں کُوں یُوحنّا بپتسمہ ڈیوݨ آلے دے بارے ءچ آکھیا ہے۔ جِیں ویلے او بِھیڑ دے کولھ پُجے تاں ہِک بندہ اُوندے کولھ آیا تے اُوندے سامنڑے گوڈے ٹیک تے آکھنڑ لگا، ”مالک! میڈے پوتر اُتے رحم کرو کیوں جو اُونکُوں مِرگی دا دورہ پوندے تے او بہُوں ڈُکھ چیندے۔ اِیں وجہ کنُوں اکثر بھاہ تے پانڑی ءچ ڈھے پوندے۔ مَیں اُونکُوں تُہاڈے شاگرداں کولھ گِھن آیا ہم پر او اُونکُوں شِفا نہ ڈے سگے۔“ یسُوع جواب ءچ آکھیا، ”بےاعتقاد تے گُمراہ قوم! مَیں کڈݨ تئیں تُہاڈے نال راہساں؟ کڈݨ تئیں تُہاڈی برداشت کریساں؟ اُونکُوں میڈے کولھ گِھن آؤ۔“ یسُوع بدرُوح کُوں دَڑکا ڈِتا تاں او چھوہر ءچوں نِکل گئی تے چھوہر اُوں ویلے ای چنگا تھی گِیا۔ وَل شاگرداں کلھیپے ءچ یسُوع دے کولھ آ تے پُچھیا، ”اساں اُونکُوں کیوں نہ کڈھ سگے؟“ یسُوع اُنہاں کُوں جواب ڈِتا، ”آپنڑے اِیمان دی کمی دی وجہ کنُوں۔ کیوں جو مَیں تُہاکُوں سچ آدھا ہاں جو جے تُہاڈے ءچ رائی دے دانڑے دے برابر وی اِیمان ہوسی تاں تُساں اِیں پہاڑ کُوں آکھ سگسو جو ’اِتُھوں کنُوں اُتھاں کِھسک وَنج،‘ تاں او کِھسک ویسی تے تُہاڈے کیتے کوئی کم نا ممکن نہ ہوسی۔ [پر ایہ قِسم دُعا تے روزہ دے بغیر نئیں نِکل سگدی۔“] جِیں ویلے او گلیل ءچ ہَن، یسُوع اُنہاں کُوں آکھیا، ”اِبنِ آدم، بندیاں دے حوالے کیتا ویسی۔ تے او اُونکُوں قتل کریسن تے او تریجھے ڈینہہ زندہ کیتا ویسی۔ ایہ سُنڑ تے او بہُوں غمگین تھئے۔“ او کفرنحُوم ءچ پُجے تاں ہیکل دا سالانہ ٹیکس گِھننڑ آلیاں پطرس دے کولھ آ تے آکھیا، ”کیا تُہاڈا اُستاد ہیکل دا ٹیکس نئیں ڈیندا؟“ اُوں آکھیا، ”ہاں ڈیندے۔“ او گھر ءچ داخل تھیّا تاں یسُوع اُوندے بولنڑ کنُوں پہلے آکھیا، ”شمعون! تیڈا کیا خیال ہے؟ دُنیا دے بادشاہ کیہڑے لوکاں کنُوں محصُول یا ٹیکس گِھندے ہِن؟ آپنڑے پوتراں کنُوں یا غیراں کنُوں؟“ جِیں ویلے اُوں آکھیا، ”غیراں کنُوں،“ تاں یسُوع اُونکُوں آکھیا۔ ”وَل پوتر آزاد تھئے۔ پر اِینویں نہ تھیوے جو اساں اُنہاں کیتے ٹھوکر دا باعث بنڑوں، تُوں جھیل تے وَنج تے کُنڈی سَٹ، تے جیہڑی مچھی پہلے ہتھ آوے، اُوندا مُنہ کھول تاں تیکُوں ہِک سِکہ مِلسی۔ اُونکُوں گِھن تے میڈے تے آپنڑے کیتے اُنہاں کُوں ڈے۔“ اُوں ویلے شاگرد یسُوع دے کولھ آئے تے پُچھنڑ لگے ”اسمان دی بادشاہی ءچ سبھ کنُوں وڈا کوݨ ہے؟“ اُوں ہِک بال کُوں سڈیا تے اُونکُوں اُنہاں دے اَدھ ءچ کھڑا کیتا تے آکھیا، ”مَیں تُہاکُوں سچ آدھا ہاں جو جے تُساں توبہ نہ کرو تے بالاں وانگُوں نہ بنڑو تاں تُساں اسمان دی بادشاہی ءچ اصلُوں داخل نہ تھیسو۔ بس جیہڑا کوئی آپنڑے آپ کُوں اِیں بال وانگُوں چھوٹا بنڑیسی اُوہو اسمان دی بادشاہی ءچ سبھ کنُوں وڈا ہوسی۔ تے جیہڑا کوئی ایجھے بال کُوں میڈے ناں ءچ قبول کریندے او میکُوں قبول کریندے۔ پر جیہڑا کوئی اِنہاں چھوٹیاں ءچوں جیہڑے میڈے اُتے اِیمان گِھن آئے ہِن کہیں کیتے اِیمان تُوں گُمراہ تھیوݨ دا سبب بنڑدے، اُوندے کیتے اِیہو چنگا ہے جو چکّی دا پُڑ اُوندی گِچی ءچ پا تے اُونکُوں ڈونگھے سمندر ءچ بوڈ ڈِتا ونجے۔ گُمراہ کرݨ آلیاں چیزاں دی وجہ کنُوں اِیں دُنیا اُتے افسوس ہے۔ ایجھیاں ٹھوکراں دا ہووݨ تاں ضرور ہے پر اُوں بندے اُتے افسوس جیندی وجہ کنُوں ٹھوکر لگے۔ بس جے تیڈا ہتھ یا تیڈا پیر تَیں کنُوں گُناہ کراوے تاں اُونکُوں کپ تے سَٹ ڈے۔ تیڈا ٹُنڈا یا منڈا تھی تے زندگی ءچ داخل تھیوݨ، تیڈا ڈوہائیں پیراں سمیت ہمیشاں تئیں بلنڑ آلی بھاہ ءچ سٹے ونجنڑ کنُوں چنگا ہے۔ تے جے تیڈی اکھ تَیں کنُوں گُناہ کراوے تاں اُونکُوں کڈھ سَٹ۔ تیڈے کیتے ہِک اکھ نال زندگی ءچ داخل تھیوݨ، ڈوہائیں اکھیں ہوندے ہوئے جہنم دی بھاہ ءچ سَٹ ڈِتے ونجنڑ کنُوں چنگا ہے۔ خبردار اِنہاں چھوٹیاں ءچوں کہیں کُوں ناچیز نہ سمجھو کیوں جو مَیں تُہاکُوں آدھا ہاں جو اُنہاں دے فرشتے اسمان اُتے ہر ویلے میڈے اسمانی باپ دا مُنہ ڈیدھے ہِن۔ [کیوں جو اِبنِ آدم گُم تھئے ہوئیاں کُوں گولھنڑ تے نجات ڈیوݨ آیا ہے۔] تُہاڈا کیا خیال ہے؟ جے کہیں بندے دیاں سو بھیڈاں ہووݨ تے اُنہاں ءچوں ہِک گُم تھی ونجے تاں کیا او ودھانوے بھیڈاں کُوں چھوڑ تے اُوں گُم تھئی کُوں پہاڑاں اُتے نہ گولھیسی؟ تے جے او اُونکُوں گولھ گِھنے تاں مَیں تُہاکُوں سچ آدھا ہاں جو او اُنہاں ودھانوے کنُوں جیہڑیاں گُم نئیں تھئیاں، اُوں بھیڈ دی زیادہ خوشی کریسی۔ اِینویں ای تُہاڈا اسمانی باپ ایہ نئیں چاہندا جو اِنہاں چھوٹیاں ءچوں ہِک وی ہلاک تھیوے۔ جے تیڈا بِھرا تیڈے خلاف گُناہ کرے تاں وَنج تے کلھیپے ءچ اُونکُوں سمجھا۔ جے او تیڈی سُنڑے تاں سمجھ گِھن جو تَیں آپنڑے بِھرا کُوں پا گِھدے۔ پر جے او نہ سُنڑے تاں تُوں آپنڑے نال ہِک یا ڈُو بئے بندے گِھن وَنج تاں جو ہر گالھ دے ڈُو یا ترے گواہ ہووݨ۔ جے او اُنہاں دی وی نہ سُنڑے تاں کلیسیا کُوں ڈسا، تے جے او کلیسیا دی وی نہ سُنڑے تاں اُونکُوں محصُول گِھننڑ آلیاں تے غیر قوماں دے برابر جاݨ۔ مَیں تُہاکُوں سچ آدھا ہاں جو جیہڑا کُجھ تُساں زمین اُتے بدھیسو او اسمان اُتے بدھیسی، تے جیہڑا کُجھ تُساں زمین اُتے کُھلیسو او اسمان اُتے کِھلسی۔ مَیں تُہاکُوں ولا آدھا ہاں جو جے تُہاڈے ءچوں ڈُو بندے زمین اُتے کہیں شے کیتے اِتفاق نال دُعا کریسن تاں او میڈے اسمانی باپ دی طرفوں اُنہاں کیتے تھی ویسی۔ کیوں جو جِتھاں ڈُو یا ترے میڈے ناں ءچ کٹھے ہِن اُتھاں مَیں اُنہاں دے وچال ہاں۔“ اُوں ویلے پطرس کولھ آ تے اُونکُوں پُچھیا، ”مالک! جے میڈا بِھرا میڈا گُناہ کریندا راہوے تاں مَیں اُونکُوں کِتی پھیری معاف کراں؟ کیا سَت پھیری؟“ یسُوع اُونکُوں جواب ڈِتا، ”مَیں تیکُوں سَت پھیری نئیں بلکہ سَت دے ستّر پھیری معاف کرݨ کیتے آدھا ہاں۔ بس اسمان دی بادشاہی اُوں بادشاہ وانگُوں ہے جئیں آپنڑے نوکراں تُوں حساب گِھننڑ چاہیا۔ جِیں ویلے او حساب گِھننڑ لگا تاں ہِک بندہ اُوندے سامنڑے حاضر کیتا گِیا جیندے اُتے ارباں دے حساب نال قرض ہا۔ پر کیوں جو اُوندے کولھ قرض لہاوݨ کیتے کُجھ نہ ہا، اُوندے مالک حُکم ڈِتا جو اُونکُوں، اُوندی ذال تے اُوندے بالاں کُوں تے جیہڑا کُجھ اُوندا ہے سبھ کُجھ ویچ ڈِتا ونجے تے قرض وصُول کر گِھدا ونجے۔ بس نوکر مُنہ دے بھار ڈھے تے اُوندی مِنت کیتی، ’ مالک! میکُوں مُہلت ڈیؤ۔ مَیں تُہاڈا سارا قرض لہا ڈیساں۔‘ مالک کُوں نوکر اُتے ترس آیا تے اُونکُوں چھوڑ ڈِتا تے اُوندا سارا قرض معاف کر ڈِتا۔ جِیں ویلے او نوکر باہر نِکلیا تاں اُونکُوں اُوندے ساتھیاں ءچوں ہِک مِلیا جئیں تُوں اُوں سو دینار گِھننڑاں ہا۔ اُوں اُونکُوں پکڑ تے اُوندا گلا گھُٹیا تے آکھیا جو ’میڈا قرض واپس ڈے۔‘ بس اُوندے ساتھی اُوندے اگُوں ڈھے تے اُوندی مِنت کیتی جو ’میکُوں مُہلت ڈیؤ۔ مَیں تُہاکُوں سارا قرض ڈے ڈیساں۔‘ پر اُوں ہِک نہ سُنڑی بلکہ اُونکُوں قید خانے ءچ سَٹ ڈِتا تاں جو قرض ڈیوݨ تئیں اُتھائیں راہوے۔ جِیں ویلے اُوندے ڈُوجھے ساتھیاں ایہ ڈِٹھا تاں او بہُوں ڈُکھی تھئے تے مالک دے کولھ وَنج تے اُونکُوں سارا حال سُنڑایا۔ وَل اُوندے مالک اُونکُوں سڈوا تے آکھیا، ’ شریر نوکر! مَیں تیڈا سارا قرض اِیں واسطے بخش ڈِتے جو تَیں میڈی مِنت کیتی ہئی۔ کیا تیکُوں لازم نہ ہا جو جِینویں مَیں تیڈے اُتے رحم کیتے تُوں وی آپنڑے ساتھی اُتے رحم کریندا؟‘ تے مالک کاوڑ ءچ اُوں نوکر کُوں سپاہیاں دے حوالے کر ڈِتا تاں جو قرض ڈیوݨ تئیں قید ءچ راہوے۔ میڈا اسمانی باپ وی تُہاڈے نال اِینویں ای کریسی جے تُہاڈے ءچوں ہر ہِک آپنڑے بِھرا کُوں دل تُوں معاف نہ کرے۔“ جِیں ویلے یسُوع ایہ گالھیں کر گِھدیاں تاں او گلیل تُوں روانہ تھی تے یردن دے پار یہُودیہ دے علاقے ءچ آیا۔ بہُوں سارے لوک اُوندے پِچُھوں تھی پئے تے اُوں اُنہاں کُوں شِفا بخشی۔ کُجھ فریسی اُونکُوں ازماوݨ کیتے اُوندے کولھ آ تے آکھنڑ لگے، ”کیا بندے دا آپنڑی ذال کُوں کہیں وی وجہ کنُوں چھوڑ ڈیوݨ جائز ہے؟“ اُوں جواب ءچ آکھیا، ”کیا تُساں نئیں پڑھیا جو مُنڈھ کنُوں خالق اُنہاں کُوں مرد تے عورت بنڑایا تے آکھیا جو ’اِیں وجہ تُوں مرد آپنڑے ماء پِیُو کنُوں اَنج تھی تے آپنڑی ذال نال راہسی تے او ہِک تَن ہوسن ؟‘ بس او ڈُو نئیں بلکہ ہِک تَن ہِن۔ اِیں واسطے جِینکُوں خُدا جوڑیا ہے اُونکُوں اِنسان جُدا نہ کرے۔“ اُنہاں پُچھیا، ”وَل مُوسیٰ ایہ حُکم کیوں ڈِتا ہے جو طلاق نامہ لِکھ تے اُونکُوں چھوڑ ڈے؟“ یسُوع جواب ڈِتا، ”مُوسیٰ تاں تُہاڈی سخت دِلی دے سببّوں آپنڑی ذال کُوں چھوڑ ڈیوݨ دی اِجازت ڈِتی ہئی پر مُنڈھ کنُوں اِینویں نہ ہا۔ مَیں تُہاکُوں آدھا ہاں جو جیہڑا کوئی آپنڑی ذال کُوں اُوندی حرامکاری دے سِوا کہیں بئی وجہ کنُوں چھوڑ ڈیوے تے کہیں بئی عورت نال شادی کر گِھنے او زِنا کریندے [ تے جیہڑا کوئی اُوں چھوڑی ہوئی نال شادی کریندے او وی زِنا کریندے۔]“ شاگرداں اُونکُوں آکھیا، ”جے مرد دا ذال نال ایجھا ای حال ہے تاں شادی نہ کرݨ ای چنگا ہے۔“ اُوں اُنہاں کُوں آکھیا جو ”اِیں گالھ کُوں ہر کوئی قبول نئیں کر سگدا پر اُوہو جِنہاں کُوں قُدرت ڈِتی گئی ہے۔ کیوں جو کُجھ تاں جماندرُو شادی کرݨ دے قابل نئیں ہوندے، تے کُجھ کُوں لوکاں شادی کرݨ دے ناقابل بنڑا ڈِتے، تے کُجھ ایجھے ہِن جِنہاں اسمان دی بادشاہی دی خاطر غیر شادی شدہ راہنڑ قبول کیتا۔ جیہڑا قبول کر سگدے او قبول کرے۔“ اُوں ویلے لوک بالاں کُوں یسُوع دے کولھ گِھن آئے تاں جو او اُنہاں اُتے ہتھ رکھے تے دُعا ڈیوے پر شاگرداں اُنہاں کُوں جِھڑکیا۔ پر یسُوع آکھیا، ”بالاں کُوں میڈے کولھ آوݨ ڈیؤ تے اُنہاں کُوں نہ ہٹکو کیوں جو اسمان دی بادشاہی ایجھیاں ای دی ہے۔“ وَل او اُنہاں اُتے ہتھ رکھ تے اُتھوں روانہ تھی گِیا۔ تے ڈیکھو ہِک بندہ یسُوع دے کولھ آ تے آکھنڑ لگا، ”اُستاد! مَیں کیہڑی نیکی کراں جو ہمیشاں دی زندگی حاصل کراں؟“ اُوں اُونکُوں آکھیا جو ”تُوں مَیں کنُوں نیکی بارے کیوں پُچھدیں؟ نیک تاں بس ہِک ای ہے پر جے تُوں زندگی ءچ داخل تھیوݨ چاہندیں تاں حُکماں اُتے عمل کر۔“ اُوں اُونکُوں آکھیا، ”کیہڑے حُکماں اُتے؟“ یسُوع جواب ڈِتا، ”خون نہ کر، زِنا نہ کر، چوری نہ کر، کُوڑی گواہی نہ ڈے۔ آپنڑے ماء پِیُو دی عزت کر، تے آپنڑے ہمسائے نال آپنڑے وانگُوں محبت کر ۔“ اُوں جوان آکھیا جو ”مَیں اِنہاں ساریاں اُتے عمل کیتا ہے۔ ہُنڑ میڈے ءچ کیہڑی گالھ دی کمی ہے؟“ یسُوع اُونکُوں آکھیا، ”جے تُوں کامِل تھیوݨ چاہندیں تاں وَنج تے آپنڑاں سبھ کُجھ ویچ تے غریباں کُوں ڈے۔ تیکُوں اسمان اُتے خزانہ مِلسی تے آ تے میڈے پِچُھوں تھی پو۔“ پر او جوان ایہ گالھ سُنڑ تے غمگین تھی تے چلیا گِیا کیوں جو بہُوں مالدار ہا۔ تے یسُوع آپنڑے شاگرداں کُوں آکھیا، ”مَیں تُہاکُوں سچ آدھا ہاں جو دولت مند دا اسمان دی بادشاہی ءچ داخل تھیوݨ مُشکل ہے۔ مَیں وَل آدھا ہاں جو اُٹھ دا سُوئی دے نکے ءچوں لنگھ ونجنڑ، دولت مند دے اسمان دی بادشاہی ءچ داخل تھیوݨ کنُوں زیادہ سوکھا ہے۔“ شاگرد ایہ سُنڑ تے بہُوں حیران تھئے تے پُچھنڑ لگے، ”وَل کوݨ نجات پا سگدے ؟“ یسُوع اُنہاں دو ڈیکھ تے آکھیا، ”اِنسان کیتے تاں ایہ نا ممکن ہے پر خُدا کیتے سبھ کُجھ ممکن ہے۔“ وَل پطرس اُونکُوں آکھیا، ”ڈیکھو اساں سبھ کُجھ چھوڑ تے تُہاڈے پِچُھوں تھی پئے ہیں۔ بس ساکُوں کیا مِلسی؟“ یسُوع اُنہاں کُوں آکھیا، ”مَیں تُہاکُوں سچ آدھا ہاں جو نوِیں دُنیا ءچ جِیں ویلے اِبنِ آدم آپنڑے جلالی تخت اُتے بَہسی تاں تُساں وی جیہڑے میڈے پِچُھوں تھی پئے ہیوے بارہاں تختاں اُتے بہہ تے بنی اِسرائیل دے بارہاں قبیلیاں دا اِنصاف کریسو۔ تے جئیں کہیں گھراں یا بِھرانواں یا بھینڑاں یا پِیُو یا ماء یا بالاں یا رَڑھاں کُوں میڈے ناں دی خاطر چھوڑ ڈِتے اُونکُوں سو گُنا مِلسی، تے او ہمیشاں دی زندگی دا وارث تھیسی۔ پر بہُوں سارے جیہڑے اوّل ہِن آخر تھی ویسن تے آخر اوّل۔“ ”کیوں جو اسمان دی بادشاہی اُوں گھر دے مالک وانگُوں ہے جیہڑا سویل نال باہر گِیا تاں جو آپنڑے انگُوراں دے باغ ءچ مزدُوراں کُوں کم تے لاوے۔ تے اُوں مزدُوراں نال ہِک ڈینہوار دی مزدُوری ہِک دینار مُکا تے اُنہاں کُوں آپنڑے انگُوراں دے باغ ءچ بھیج ڈِتا۔ کوئی ترے گھنٹے بعد او ولا باہر گِیا تاں اُوں ڈِٹھا جو کُجھ مزدُور بازار ءچ بیکار کھڑے ہِن، تے اُنہاں کُوں آکھیا، ’تُساں وی میڈے انگُوراں دے باغ ءچ چلے ونجو۔ جیہڑا مناسب ہے تُہاکُوں ڈیساں۔‘ بس او چلے گئے۔ وَل ڈوپہر تے تریجھے پہر دے نیڑے نِکل تے اُوں اِینویں ای کیتا۔ تے او ڈینہہ لہنڑ کنُوں ہِک گھنٹہ پہلے ولا باہر گِیا تے کُجھ بئیاں کُوں کھڑے ڈِٹھا تے اُنہاں کُوں آکھیا، ’تُساں کیوں اِتھاں سارا ڈینہہ بےکار کھڑے ریہے ہیوے؟‘ اُنہاں جواب ڈِتا، ’اِیں واسطے جو ساکُوں کہیں کم تے نئیں کھڑایا۔‘ اُوں اُنہاں کُوں آکھیا، ’تُساں وی انگُوراں دے باغ ءچ چلے ونجو۔‘ جِیں ویلے شام تھئی تاں انگُوراں دے باغ دے مالک آپنڑے مُنشی کُوں آکھیا، ’آخر ءچ کم اُتے کھڑائے ہوئے مزدُوراں کنُوں گِھن تے پہلے تئیں سبھ کُوں سڈ تے اُنہاں دی مزدُوری ڈے چا۔‘ جِیں ویلے او آئے جیہڑے ڈینہہ لہنڑ کنُوں ہِک گھنٹہ پہلے کھڑائے گئے ہَن، اُنہاں کُوں ہِک ہِک دینار مِلیا۔ اِیں واسطے جیہڑے پہلے آئے ہَن، اُنہاں ایہ سمجھیا جو ساکُوں زیادہ مِلسی، پر اُنہاں کُوں وی ہِک ای دینار مِلیا۔ او مزدُوری گِھن تے گھر دے مالک کُوں ایہ آدھے ہوئے شکایت کرݨ لگے جو ’آخر ءچ کم اُتے کھڑائے ونجنڑ آلیاں صرف ہِک گھنٹہ کم کیتے، تے اساں دُھپ ءچ سارا ڈینہہ محنت کیتی پر تُساں اُنہاں کُوں ساڈے برابر کر ڈِتے۔‘ اُوں اُنہاں ءچوں ہِک کُوں جواب ڈِتا، ’میاں مَیں تیڈے نال بے اِنصافی نئیں کریندا۔ کیا تیڈے نال مزدُوری دا ہِک دینار نہ مُکا ہا؟ جیہڑا تیڈا ہے گِھن تے ٹُردا تھی۔ ایہ میڈی مرضی ہے جو جِتّی تیکُوں ڈیندا پِیا ہاں اُتنا ای آخری کُوں ڈیواں۔ کیا میکُوں ایہ حق نئیں جو آپنڑے مال نال جیہڑا کُجھ چاہواں کراں؟ یا تیکُوں میڈی نیکی بُری لگدی ہے؟‘ بس جیہڑے آخر ہِن اوّل، تے جیہڑے اوّل ہِن آخر تھی ویسن۔“ یروشلیم ویندے ہوئے یسُوع بارہاں شاگرداں کُوں اَنج گِھن گِیا تے رستے ءچ اُنہاں کُوں آکھیا، ”ڈیکھو اساں یروشلیم ویندے ہیں تے اِبنِ آدم سردار کاہِناں تے شریعت دے عالماں دے حوالے کیتا ویسی۔ او اُوندے قتل دا حُکم ڈیسن، تے اُونکُوں غیر قوماں دے حوالے کریسن تاں جو او اُوندا مذاق اُڈاوݨ، کوڑے مارݨ تے مصلُوب کرݨ۔ پر او تریجھے ڈینہہ زندہ تھی ویسی۔“ اُوں ویلے زبدی دے پوتراں دی ماء آپنڑے پوتراں دے نال یسُوع کولھ آئی تے جُھک تے اُونکُوں ہِک عرض کیتی۔ یسُوع اُونکُوں آکھیا ”تُوں کیا چاہندی ہیں؟“ اُوں عرض کیتی جو تُہاڈی بادشاہی ءچ میڈے پوتراں ءچوں ہِک تُہاڈے سجے تے ڈُوجھا کھبے پاسُوں بَہوے۔ پر یسُوع جواب ءچ آکھیا، ”تُساں نئیں جانڑدے جو کیا منگدے ہیوے۔ کیا تُساں ڈُکھ دا او پیالہ پی سگدے ہیوے جیہڑا مَیں پِیوݨ آلا ہاں؟“ اُنہاں اُونکُوں آکھیا، ”اساں پی سگدے ہیں۔“ اُوں اُنہاں کُوں آکھیا، ”تُساں میڈا پیالہ تاں پِیسو پر کہیں کُوں آپنڑے سجے یا کھبے پاسُوں بِلھاونڑاں میڈا کم نئیں بلکہ ایہ جاہ صرف اُنہاں کیتے ہے جِنہاں کُوں میڈے باپ اِیں کیتے چُنڑ گِھدے۔“ جِیں ویلے باقی ڈاہ شاگرداں ایہ سُنڑیا تاں او اُنہاں ڈوہائیں بِھرانواں نال خفا تھئے۔ پر یسُوع اُنہاں کُوں آپنڑے کولھ سڈیا تے آکھیا، ”تُہاکُوں پتہ ہے جو غیر قوماں دے سردار اُنہاں اُتے حکُومت کریندے ہِن تے اُنہاں دے امیر اُنہاں اُتے اِختیار جتیندے ہِن۔ تُہاڈے ءچ اِینویں نہ ہوسی بلکہ تُہاڈے ءچ جیہڑا وڈا بنڑݨ چاہوے او تُہاڈا خادم بنڑے۔ تے جیہڑا تُہاڈے ءچوں اوّل تھیوݨ چاہوے او تُہاڈا غُلام بنڑے۔ اِبنِ آدم اِیں واسطے نئیں آیا جو خدمت گِھنے بلکہ اِیں واسطے جو خدمت کرے تے آپنڑی جان بہُوں ساریاں کیتے فِدیہ ءچ ڈیوے۔“ جِیں ویلے او یرِیحُو شہر ءچوں نِکلدے پئے ہَن تاں ہِک وڈی بِھیڑ اُوندے پِچُھوں تھی پئی۔ ڈُو اندھے جیہڑے راہ دے کنارے بیٹھے ہَن ایہ سُنڑ تے جو یسُوع لنگھدا پئے تاں دھاڑ دھاڑ کرݨ لگ پئے گئے جو ”مالک، اِبنِ داؤد! ساڈے اُتے رحم کرو۔“ لوکاں اُنہاں کُوں دَڑکیا جو چُپ راہوݨ پر او تاں بِیا وی دھاڑ دھاڑ کرݨ لگ پئے، ”مالک، اِبنِ داؤد! ساڈے اُتے رحم کرو۔“ یسُوع کھڑ تے اُنہاں کُوں سڈ یا تے پُچھیا، ”ڈساؤ جو مَیں تُہاڈے کیتے کیا کراں؟“ اُنہاں اُونکُوں آکھیا، ”مالک! اِیہو جو ساڈے اکھیں کُھل ونجنڑ۔“ یسُوع کُوں اُنہاں اُتے ترس آیا تے اُنہاں دے اکھیں کُوں ہتھ لایا تے او فوراً ڈیکھنڑ لگ پئے تے اُوندے پِچُھوں ٹُر پئے۔ جِیں ویلے او یروشلیم دے نیڑے پُجے تے زیتون دے پہاڑ اُتے بیت فگے دے کولھ آئے، تاں یسُوع آپنڑے ڈُو شاگرداں کُوں ایہ آکھ تے بھیجیا، ”آپنڑے سامنڑے آلی وستی ءچ ونجو۔ اُوندے ءچ داخل تھیندے ای تُہاکُوں ہِک گڈھاں بدھی ہوئی مِلسی تے اُوندے نال اُوندا بچّہ وی ہوسی۔ اُنہاں کُوں کھول تے میڈے کولھ گِھن آؤ۔ تے جے کوئی تُہاکُوں کُجھ آکھے تاں اکھائے جو مالک کُوں اِنہاں دی ضرورت ہے۔ او فوراً اُنہاں کُوں بھیج ڈیسی۔“ ایہ اِیں واسطے تھیّا جو جیہڑا نبی دی معرفت آکھیا گِیا ہا او پُورا تھیوے جو ”صِیُّون دے لوکاں کُوں آکھو جو، ڈیکھو تُہاڈا بادشاہ تُہاڈے کولھ آندا پِیا ہے او حلیم ہے تے گڈھاں اُتے سوار ہے، بلکہ گڈھاں دے بچّے اُتے ۔“ بس شاگرداں وَنج تے جِینویں یسُوع اُنہاں کُوں حُکم ڈِتا ہا اُونویں ای کیتا۔ تے گڈھاں تے اُوندے بچّے کُوں گِھن تے آپنڑے کپڑے اُوندے اُتے سَٹ ڈِتے تے یسُوع اُوندے اُتے سوار تھی گِیا۔ بِھیڑ ءچوں بہُوں سارے لوکاں آپنڑے کپڑے رستے ءچ وچھا ڈِتے تے کُجھ درختاں دیاں لڑیاں کپ تے راہ ءچ وچھا ڈِتیاں۔ تے بِھیڑ جیہڑی اُوندے اگُوں تے پِچُھوں ٹُردی پئی ہئی نعرے مار مار تے آدھی ہئی، ”اِبنِ داؤد دی تمجید ہووے۔ مُبارک ہے او جیہڑا رب العالمین دے ناں کنُوں آندے۔ سبھ تُوں اُچے اسمان اُتے خُدا دی تمجید ہووے ۔“ جِیں ویلے او یروشلیم ءچ داخل تھیّا تاں سارے شہر ءچ ہلچل مچ گئی تے لوک آکھنڑ لگے جو ”ایہ کوݨ ہے؟“ بِھیڑ آکھیا ”ایہ گلیل دے شہر ناصرت دا نبی یسُوع ہے۔“ یسُوع ہیکل ءچ داخل تھیّا تے اُنہاں ساریاں کُوں جیہڑے اُتھاں خرید و فروخت کریندے پئے ہَن باہر کڈھ ڈِتا، تے پیسے بدلاوݨ آلیاں دیاں میزاں تے کبوتر ویچنڑ آلیاں دے کُھڈے اُلٹ ڈِتے۔ تے اُنہاں کُوں آکھیا، ”لِکھیا ہے جو ’میڈا گھر دُعا دا گھر اکھویسی ،‘ پر تُساں اُونکُوں ’ڈاکواں دا ڈیرہ بنڑا ڈِتے‘۔“ وَل اندھے تے منڈے ہیکل ءچ اُوندے کولھ آئے تے اُوں اُنہاں کُوں شِفا بخشی۔ پر جِیں ویلے سردار کاہِناں تے شریعت دے عالماں اُوندے معجزے ڈِٹھے تے ہیکل ءچ چھوہراں کُوں ”اِبنِ داؤد دی تمجید ہووے“ دے نعرے مریندے ڈِٹھا تاں کوڑیج پئے، تے یسُوع کُوں آکھیا، ”تُوں سُنڑدا پئیں جو ایہ کیا آدھے ہِن؟“ یسُوع اُنہاں کُوں آکھیا، ”ہاں۔ کیا تُساں ایہ نوِشتہ کڈھائیں نئیں پڑھیا جو ’تَیں بالاں تے کھیر پِیوݨ آلیاں دے مُنہ کنُوں وی آپنڑی حمد کروائی‘ ؟“ وَل او اُنہاں کُوں چھوڑ تے شہر کنُوں باہر بیت عنیاہ ءچ گِیا تے رات اُتھائیں گُزاری۔ سویل نال جِیں ویلے او وَل شہر دو آندا پِیا ہا تاں اُونکُوں بُکھ لگی۔ او رستے ءچ ہنجیر دا ہِک درخت ڈیکھ تے اُوندے نیڑے گِیا پر پتراں دے سِوا اُوندے اُتے کُجھ نہ پا تے آکھیا، ”ولا کڈھائیں تیکُوں پھل نہ لگے۔“ تے ہنجیر دا درخت اُوں ویلے ای سُک گِیا۔ شاگرداں ایہ ڈِٹھا تاں حیران تھی تے آکھنڑ لگے، ”ایہ ہنجیر دا درخت ہِک دم کِینویں سُک گِیا؟“ یسُوع جواب ڈِتا، ”مَیں تُہاکُوں سچ آدھا ہاں جو جے اِیمان رکھو تے شک نہ کرو تاں تُساں نہ صرف او جیہڑا ہنجیر دے درخت نال تھئے کر سگسو، بلکہ جے اِیں پہاڑ کُوں وی اکھیسو جو ’پٹیج تے سمندر ءچ وَنج ڈھے‘ تاں اُونویں ای تھیسی۔ تے جیہڑا کُجھ تُساں دُعا ءچ اِیمان نال منگسو او تُہاکُوں مِلسی۔“ جِیں ویلے یسُوع ہیکل ءچ آ تے تعلیم ڈیندا پِیا ہا تاں سردار کاہِناں تے قوم دے بزُرگاں اُوندے کولھ آ تے آکھیا، ”تُوں اِنہاں کماں کُوں کِیں اِختیار نال کریندیں؟ تے تیکُوں ایہ اِختیار کئیں ڈِتے؟“ یسُوع جواب ءچ اُنہاں کُوں آکھیا، ”مَیں وی تُہاڈے کنُوں ہِک گالھ پُچھدا ہاں۔ جے تُساں اُوندا جواب ڈیسو تاں مَیں وی ڈسا ڈیساں جو اِنہاں کماں کُوں کِیں اِختیار نال کریندا ہاں۔ یُوحنّا دا بپتسمہ کِتھوں ہا؟ اسمان دی طرفوں یا اِنسان دی طرفوں؟“ او آپس ءچ تکرار کرݨ لگے، ”جے اساں آکھوں جو، ’اسمان دی طرفوں‘ تاں او ساکُوں اکھیسی ’وَل تُساں اُوندا یقین کیوں نہ کیتا؟‘ پر جے آکھوں، ’اِنسان دی طرفوں،‘ تاں اساں عوام کنُوں ڈردے ہیں کیوں جو سبھ یُوحنّا کُوں نبی منیندے ہِن۔“ بس اُنہاں جواب ءچ یسُوع کُوں آکھیا، ”اساں نئیں جانڑدے۔“ اُوں اُنہاں کُوں آکھیا، ”مَیں وی تُہاکُوں نئیں ڈسیندا جو اِنہاں کماں کُوں کِیں اِختیار نال کریندا ہاں۔ تُساں کیا سمجھدے ہیوے؟ ہِک بندے دے ڈُو پوتر ہَن۔ اُوں پہلے کولھ وَنج تے آکھیا، ’پوتر اَج انگُوراں دے باغ ءچ کم کر۔‘ اُوں جواب ءچ آکھیا، ’مَیں نہ ویساں،‘ پر بعد ءچ پشیمان تھی تے چلیا گِیا۔ وَل پِیُو ڈُوجھے پوتر کولھ وَنج تے اِینویں ای آکھیا۔ اُوں جواب ڈِتا، ’جی ابّا۔‘ پر نہ گِیا۔ اِنہاں ڈوہاں ءچوں کیہڑے پوتر، پِیُو دا حُکم منیا؟“ اُنہاں جواب ڈِتا، ”پہلے۔“ یسُوع اُنہاں کُوں آکھیا، ”مَیں تُہاکُوں سچ آدھا ہاں جو محصُول گِھننڑ آلے تے طوائفاں تُہاڈے کنُوں پہلے خُدا دی بادشاہی ءچ داخل تھیسن۔ کیوں جو یُوحنّا تُہاکُوں راستبازی دا رستہ ڈِکھاوݨ آیا تے تُساں اُوندا یقین نہ کیتا پر محصُول گِھننڑ آلیاں تے طوائفاں اُوندا یقین کیتا۔ تے ایہ ڈیکھ تے وی تُساں پشیمان نہ تھئے جو اُوندا یقین کر گِھندے۔ ہِک بئی مثال سُنڑو۔ ہِک گھر دا مالک ہا جئیں انگُوراں دا باغ رہایا تے اُوندے چودھارُوں واڑ ڈِتی تے اُوندے ءچ رَس کڈھنڑ کیتے حوض کھٹیا تے بُرج بنڑایا تے اُونکُوں ٹھیکیداراں کُوں کاشتکاری کیتے ڈے تے خود پردیس چلیا گِیا۔ جِیں ویلے پھل دا موسم نیڑے آیا تاں اُوں آپنڑے نوکراں کُوں آپنڑاں پھل گِھننڑ کیتے ٹھیکیداراں دے کولھ بھیجیا۔ پر ٹھیکیداراں اُوندے نوکراں کُوں پکڑ تے کہیں کُوں کُٹیا تے کہیں کُوں قتل کیتا تے کہیں کُوں سنگسار کیتا۔ وَل اُوں بئے نوکراں کُوں بھیجیا جیہڑے پہلے نوکراں کنُوں زیادہ ہَن تے اُنہاں اِنہاں نال وی اُوہو سلوک کیتا۔ آخر ءچ اُوں آپنڑے پوتر کُوں ایہ سوچ تے اُنہاں دے کولھ بھیجیا جو او میڈے پوتر دا تاں لحاظ کریسن۔ پر جِیں ویلے ٹھیکیداراں اُوندے پوتر کُوں ڈِٹھا تاں آپس ءچ آکھنڑ لگے، ’اِیہو وارث ہے۔ آؤ اِینکُوں قتل کر تے اِیندی جائیداد اُتے قبضہ کر گِھنوں۔‘ تے اُونکُوں پکڑ تے باغ ءچوں باہر کڈھیا تے قتل کر ڈِتا۔ بس جِیں ویلے باغ دا مالک آسی تاں اُنہاں ٹھیکیداراں نال کیا کریسی؟“ لوکاں جواب ڈِتا، ”او اُنہاں بدکاراں کُوں درد ناک موت ڈیسی تے باغ دا ٹھیکہ بئے ٹھیکیداراں کُوں ڈے ڈیسی جیہڑے موسم تے اُونکُوں پھل ڈیوݨ۔“ یسُوع اُنہاں کُوں آکھیا، ”کیا تُساں خُدا دے کلام ءچ کڈھائیں نئیں پڑھیا جو ’جِیں پتھر کُوں مِستریاں رَد کر ڈِتا۔ اُوہو کونے دے سرے دا پتھر تھی گِیا۔ ایہ رب العالمین دی طرفوں تھیّا تے ساڈی نظر ءچ حیران کُن ہے ؟‘ اِیں واسطے مَیں تُہاکُوں آدھا ہاں جو خُدا دی بادشاہی تُہاڈے کنُوں گِھن گِھدی ویسی تے اُوں قوم کُوں ڈے ڈِتی ویسی جیہڑی بادشاہ دی مرضی دے مطابق پھل گِھن آسی۔ تے جیہڑا کوئی اِیں پتھر اُتے ڈھاسی، ٹوٹے ٹوٹے تھی ویسی پر جیندے اُتے ایہ ڈھاسی اُونکُوں پِیہہ تے رکھ ڈیسی ۔“ جِیں ویلے سردار کاہِناں تے فریسیاں اُوندیاں مثالاں سُنڑیاں تاں سمجھ گئے جو ساڈے حق ءچ اکھیندے۔ تے او اُونکُوں پکڑن دی کوشش ءچ ہَن پر لوکاں کنُوں ڈردے ہَن کیوں جو او اُونکُوں نبی منیندے ہَن۔ یسُوع وَل مثالاں ءچ اُنہاں کُوں آکھنڑ لگا، ”اسمان دی بادشاہی اُوں بادشاہ وانگُوں ہے جئیں آپنڑے پوتر دی شادی کیتی۔ تے آپنڑے نوکراں کُوں بھیجیا جو اُنہاں لوکاں کُوں جِنہاں کُوں شادی دی دعوت ڈِتی گئی ہئی سڈ آوݨ، پر او نہ آئے۔ وَل اُوں بئے نوکراں کُوں ایہ آکھ تے بھیجیا جو ’جِنہاں کُوں دعوت ڈِتی ہے اُنہاں کُوں آکھو جو کھانڑا تیار تھی گئے۔ میڈے ڈاند تے موٹے موٹے جانور ذبح تھی گئے ہِن تے سبھ کُجھ تیار ہے۔ شادی ءچ آؤ۔‘ پر اُنہاں کوئی پرواہ نہ کیتی تے ٹُر پئے۔ کوئی آپنڑی رَڑھ کُوں، کوئی آپنڑے کاروبار ءچ لگ گِیا۔ تے بئیاں اُوندے نوکراں کُوں پکڑ تے اُنہاں دی بے عزتی کیتی تے قتل کر ڈِتا۔ بادشاہ بہُوں کوڑیج گِیا تے اُوں آپنڑا لشکر بھیج تے اُنہاں قاتلاں کُوں مروا ڈِتا تے اُنہاں دا شہر ساڑ ڈِتا۔ وَل اُوں آپنڑے نوکراں کُوں آکھیا، ’شادی دی ضیافت تاں تیار ہے پر جیہڑے سڈے گئے ہَن لائق نہ ہَن۔ بس رستے دے چوکاں اُتے ونجو تے جِتّی تُہاکُوں مِلنڑ، اُنہاں کُوں شادی دی دعوت ڈیؤ۔‘ نوکر گئے تے جِتّی چنگے مندے اُنہاں کُوں مِلے ساریاں کُوں جمع کر تے گِھن آئے تے شادی آلا گھر مہماناں نال بھریج گِیا۔ پر جِیں ویلے بادشاہ مہماناں کُوں ڈیکھنڑ اندر آیا تاں اُوندی نظر ہِک بندے اُتے گئی جیہڑا شادی آلے جوڑے ءچ نہ ہا۔ اُوں اُونکُوں آکھیا، ’میاں تُوں شادی آلا جوڑا پاتے بغیر اِتھاں کیوں آ گئیں؟‘ پر او کوئی جواب نہ ڈے سگیا۔ اِیں وجہ تُوں بادشاہ آپنڑے خادماں کُوں آکھیا، ’اِیندے ہتھ پیر بَدھ تے باہر اندھارے ءچ سَٹ ڈیؤ۔ اُتھاں رووݨ تے ڈنداں دا پِیہوݨ ہوسی۔‘ کیوں جو سڈے ہوئے بہُوں ہِن پر چُنڑے ہوئے تھوڑے۔“ وَل فریسی وَنج تے آپس ءچ صلاح کرݨ لگ پئے جو یسُوع کُوں گالھیں ءچ کِینویں پھساوݨ۔ بس اُنہاں آپنڑے شاگرداں کُوں ہیرودیس دے پیروکاراں نال اُوندے کولھ بھیجیا تے اُنہاں آکھیا، ”اُستاد! اساں جانڑدے ہیں جو تُساں سچے ہیوے تے سچائی نال خُدا دی راہ دی تعلیم ڈیندے ہیوے، تے کہیں دی پرواہ نئیں کریندے کیوں جو تُساں کہیں بندے دے طرفدار نئیں۔ بس ساکُوں ڈساؤ جو تُہاڈے خیال ءچ رومی بادشاہ قیصر کُوں ٹیکس ڈیوݨ جائز ہے یا نئیں؟“ یسُوع اُنہاں دی بُری نیّت معلوم کر تے آکھیا، ”منافقو! میکُوں کیوں ازمیندے ہیوے؟ ٹیکس دا سِکہ میکُوں ڈِکھاؤ۔“ او ہِک دینار اُوندے کولھ گِھن آئے۔ اُوں اُنہاں کنُوں پُچھیا، ”اِیندے اُتے کیندی تصویر تے ناں ہے؟“ اُنہاں اُونکُوں آکھیا، ”رومی بادشاہ قیصر دا۔“ وَل اُوں اُنہاں کُوں آکھیا، ”جیہڑا قیصر دا ہے قیصر کُوں تے جیہڑا خُدا دا ہے خُدا کُوں ڈیؤ۔“ او ایہ سُنڑ تے حیران تھی گئے تے اُونکُوں چھوڑ تے چلے گئے۔ اُوں ڈینہہ صدوقی جیہڑے قیامت دے مُنکر ہَن اُوندے کولھ آئے تے اُوں کنُوں ایہ پُچھیا جو ”اُستاد! مُوسیٰ آکھیا ہا جو جے کوئی بندہ بے اولاد مر ونجے تاں اُوندا بِھرا بیوہ نال شادی کر گِھنے تاں جو آپنڑے بِھرا کیتے نسل پیدا کرے ۔ ہُنڑ ساڈے اِتھاں سَت بِھرا ہَن۔ پہلے بِھرا شادی کیتی تے مر گِیا تے اِیں وجہ کنُوں جو اُوندی اولاد نہ ہئی، اُوندے بِھرا اُوں بیوہ نال شادی کیتی۔ وَل ڈُوجھا بِھرا وی بے اولاد مر گِیا۔ تریجھے بِھرا نال وی اِینویں ای تھیّا۔ اِینویں ستّے بِھرا بیوہ نال شادی کر تے بے اولاد مر گئے۔ آخر ءچ او عورت وی مر گئی۔ بس قیامت ءچ او اُنہاں ستّاں بِھرانواں ءچوں کیندی ذال ہوسی؟ کیوں جو سبھ اُوندے نال شادی کیتی ہئی۔“ یسُوع اُنہاں کُوں جواب ءچ آکھیا، ”تُساں گُمراہ ہیوے اِیں واسطے جو نہ تاں خُدا دے کلام کُوں جانڑدے ہیوے، نہ خُدا دی قُدرت کُوں۔ کیوں جو قیامت ءچ شادی ویاہ نہ تھیسی بلکہ اسمان اُتے لوک فرشتیاں آلی کار ہوسن۔ پر مُردیاں دے زندہ تھیوݨ دے بارے ءچ کیا تُساں ایہ نئیں پڑھیا، جیہڑا خُدا فرمایا ہا ’مَیں ابرہام دا خُدا تے اِضحاق دا خُدا تے یعقُوب دا خُدا ہاں ؟‘ او مُردیاں دا خُدا نئیں بلکہ زندیاں دا خُدا ہے۔“ لوک اُوندی ایہ تعلیم سُنڑ تے حیران تھی گئے۔ جِیں ویلے فریسیاں سُنڑیا جو اُوں صدوقیاں کُوں لاجواب کر ڈِتے تاں او جمع تھی گئے۔ تے اُنہاں ءچوں شریعت دے ہِک عالم اُونکُوں ازماوݨ کیتے پُچھیا، ”اُستاد! توریت ءچ سبھ کنُوں وڈا حُکم کیہڑا ہے؟“ اُوں اُونکُوں آکھیا، ”رب العالمین آپنڑے خُدا نال آپنڑے سارے دل تے آپنڑی ساری جان تے آپنڑی ساری عقل نال محبت رکھ ۔ وڈا تے پہلا حُکم اِیہو ہے۔ تے ڈُوجھا اِیندے وانگُوں ایہ ہے جو آپنڑے ہمسائے نال آپنڑے وانگُوں محبت رکھ ۔ ساری شریعت تے نبیاں دے صحیفیاں دا دار و مدار اِنہاں ڈُو حُکماں اُتے ہے۔“ جیہڑے ویلے فریسی جمع تھئے تاں یسُوع اُنہاں کنُوں پُچھیا، ”المسیح دے بارے ءچ تُہاڈا کیا خیال ہے؟ او کِیندا پوتر ہے؟“ اُنہاں جواب ڈِتا، ”داؤد دا۔“ اُوں اُنہاں کُوں آکھیا، ”وَل داؤد رُوح القُدس دی ہدایت نال اُونکُوں مالک کِینویں آدھا ہے جو ’رب میڈے مالک کُوں آکھیا میڈے سجے پاسُوں بہہ جئیں تئیں مَیں تیڈے دُشمنڑاں کُوں تیڈے پیراں دے تلے نہ کر ڈیواں ؟‘ بس جِیں ویلے داؤد اُونکُوں مالک آدھے تاں او اُوندا پوتر کِینویں تھی سگدے؟“ کوئی ہِک لفظ وی اُوندے جواب ءچ نہ آکھ سگیا تے اُوں ڈینہہ دے بعد نہ ای کہیں کُوں جُرأت تھئی جو اُوں کنُوں مزید سوال کرݨ۔ اُوں ویلے یسُوع بِھیڑ تے آپنڑے شاگرداں کُوں آکھیا جو ”شریعت دے عالم تے فریسی مُوسیٰ دی گدّی اُتے بیٹھے ہِن۔ بس جیہڑا کُجھ او تُہاکُوں سِکھاوݨ او سبھ منّو تے اُوندے اُتے عمل کرو۔ پر اُنہاں وانگُوں کم نہ کرو کیوں جو او آدھے تاں ہِن پر عمل نئیں کریندے۔ او ایجھے بھاری وزن جِنہاں کُوں چاوݨ اوکھا ہے، بَدھ تے لوکاں دے مونڈھیاں اُتے رکھیندے ہِن، پر آپ اُنہاں کُوں انگل وی نئیں لیندے۔ او آپنڑے سبھ کم لوکاں کُوں ڈِکھاوݨ کیتے کریندے ہِن۔ او وڈے تعوِیذ پیندے ہِن، تے آپنڑی پُشاک دے گھیرے چوڑے رکھیندے ہِن۔ او دعوتاں تے عبادت خانیاں ءچ اُچے درجے دیاں کُرسیاں، تے بازاراں ءچ سلام تے آدمیاں کنُوں ربّی اکھواوݨ پسند کریندے ہِن۔ پر تُساں ربّی نہ اکھواؤ کیوں جو تُہاڈا اُستاد ہِکو ہے یعنی مسیح، تے تُساں سبھ بِھرا ہیوے۔ زمین اُتے کہیں کُوں آپنڑا باپ نہ آکھو کیوں جو تُہاڈا باپ ہِکو ہے جیہڑا اسمان اُتے ہے۔ نہ تُساں ہادی اکھواؤ کیوں جو تُہاڈا ہِکو ہادی ہے یعنی المسیح۔ پر جیہڑا تُہاڈے ءچوں وڈا ہے او تُہاڈا خادم بنڑے۔ کیوں جو جیہڑا کوئی آپنڑے آپ کُوں وڈا بنڑیسی او چھوٹا کیتا ویسی تے جیہڑا آپنڑے آپ کُوں چھوٹا بنڑیسی او وڈا کیتا ویسی۔ منافق شریعت دے عالمو تے فریسیو، تُہاڈے اُتے افسوس۔ تُساں اسمان دی بادشاہی لوکاں کیتے بند کریندے ہیوے۔ نہ تاں آپ داخل تھیندے ہیوے تے نہ اُنہاں کُوں جیہڑے داخل تھیوݨ چاہندے ہِن داخل تھیوݨ ڈیندے ہیوے۔ [منافق شریعت دے عالمو تے فریسیو، تُہاڈے اُتے افسوس۔ تُساں بیوہ عورتاں دے گھراں اُتے قبضہ کر گِھندے ہیوے تے ڈِکھاوݨ کیتے لمبیاں لمبیاں دُعاواں کریندے ہیوے۔ تُہاکُوں زیادہ سزا مِلسی۔] منافق شریعت دے عالمو تے فریسیو، تُہاڈے اُتے افسوس۔ تُساں ہِک مُرید بنڑاوݨ کیتے تَری تے خشکی دا سفر کریندے ہیوے تے جِیں ویلے بنڑا گِھندے ہیوے تاں اُونکُوں آپنڑے کنُوں ڈُونڑا جہنم دا حقدار بنڑا ڈیندے ہیوے۔ اندھے راہنماؤ، تُہاڈے اُتے افسوس۔ تُساں آدھے ہیوے جو جے کوئی ہیکل دی قَسم کھاوے تاں کوئی ہرج نئیں، پر جے ہیکل دے سونے دی قَسم کھاوے تاں اُوندا پابند ہوسی۔ اندھے بیوقُوفو، وڈا کیا ہے سونا یا ہیکل جئیں سونے کُوں پاک کیتے؟ تے وَل آدھے ہیوے جو جے کوئی قُربان گاہ دی قَسم کھاوے تاں کوئی ہرج نئیں پر جیہڑی نذر اُوندے اُتے پیش کیتی ویندی ہے جے اُوندی قَسم کھاوے تاں اُوندا پابند ہوسی۔ اندھیو! وڈی چیز کیہڑی ہے نذر یا قُربان گاہ جیہڑی نذر کُوں پاک کریندی ہے؟ بس جیہڑا کوئی قُربان گاہ دی قَسم کھاندے او اُوندی تے اُوندے اُتے پیش کیتی ونجنڑ آلیاں سبھ چیزاں دی قَسم کھاندے۔ تے جیہڑا ہیکل دی قَسم کھاندے او اُوندی تے اُوندے ءچ راہنڑ آلے دی قَسم کھاندے۔ تے جیہڑا کوئی اسمان دی قَسم کھاندے او خُدا دے تخت دی تے اُوندے اُتے بَہنڑ آلے دی قَسم کھاندے۔ منافق شریعت دے عالمو تے فریسیو، تُہاڈے اُتے افسوس۔ تُساں پُودینہ، سونف تے زِیرے دا ڈاہواں حصہ تاں نذر دے طور تے ڈیندے ہیوے پر شریعت دے زیادہ وزنی گالھیں یعنی اِنصاف تے رحم تے اِیمان کُوں چھوڑ ڈِتے۔ لازم ہا جو ایہ وی کریندے تے او وی نہ چھوڑیندے۔ اندھے راہنماؤ! تُساں جیہڑے مچھر کُوں تاں چھنڑیندے ہیوے تے اُٹھ کُوں نِگل ویندے ہیوے۔ منافق شریعت دے عالمو تے فریسیو، تُہاڈے اُتے افسوس۔ تُساں پیالے تے تھالی کُوں باہر کنُوں تاں صاف کریندے ہیوے پر اُنہاں ءچ لُٹ دا مال تے بُرائی بھری پئی ہے۔ اندھے فریسی! پہلے پیالے تے تھالی کُوں اندر کنُوں صاف کر تاں جو او باہر کنُوں وی صاف تھی ونجنڑ۔ منافق شریعت دے عالمو تے فریسیو، تُہاڈے اُتے افسوس۔ تُساں سفیدی تھئی ہوئی قبراں وانگُوں ہیوے جیہڑیاں باہر کنُوں تاں سوہنڑیاں نظر آندیاں ہِن پر اندرُوں مُردیاں دیاں ہڈیاں تے ہر طرحاں دی پلیدگی کنُوں بھریاں ہِن۔ اِینویں ای تُساں وی باہر کنُوں تاں لوکاں کُوں نیک نظر آندے ہیوے پر اندرُوں منافقت تے بے دینی کنُوں بھرے پئے ہیوے۔ منافق شریعت دے عالمو تے فریسیو، تُہاڈے اُتے افسوس۔ تُساں نبیاں دیاں قبراں بنڑیندے تے ولِیاں دے مقبرے سَجیندے ہیوے۔ تے آدھے ہیوے جو جے اساں آپنڑے پِیُو ڈاڈے دے زمانے ءچ ہوندے تاں نبیاں دے قتل کرݨ ءچ اُنہاں دا ساتھ نہ ڈیندے۔ اِینویں تُساں آپ ای منیندے ہیوے جو تُساں نبیاں دے قاتلاں دی نسل ہیوے۔ بس آپنڑے پِیُو ڈاڈے دیاں حرکتاں دی کمی تُساں پُوری کر ڈیؤ۔ سَپو! نانگ دے بالو! تُساں دوزخ دی سزا کنُوں کِینویں بچسو؟ اِیں واسطے ڈیکھو، مَیں نبیاں تے داناواں تے شریعت دے عالماں کُوں تُہاڈے کولھ بھجیندا ہاں۔ تُساں اُنہاں ءچوں کُجھ کُوں قتل تے مصلُوب کریسو تے کُجھ کُوں آپنڑے عبادت خانیاں ءچ کوڑے مریسو، تے ہر شہر ءچ سَتیندے راہسو۔ اِینویں سارے نیک لوکاں دا خون جیہڑا زمین اُتے وہایا گِیا ہا، تُہاڈے اُتے آسی، راستباز ہابل دے خون تُوں گِھن تے برکیاہ دے پوتر زکریاہ دے خون تئیں جِینکُوں تُساں ہیکل تے قُربان گاہ دے وچال قتل کیتا۔ مَیں تُہاکُوں سچ آدھا ہاں جو اِیں زمانے دے لوکاں کُوں اِنہاں سارے گالھیں دا ذمہ دار کھڑایا ویسی۔ یروشلیم! یروشلیم! تُوں جیہڑا نبیاں کُوں قتل کریندیں تے جیہڑے تیڈے کولھ بھیجے گئے اُنہاں کُوں سنگسار کریندیں! مَیں کِتی پھیری ایہ چاہیا جو تیڈے بالاں کُوں اِینویں جمع کر گِھناں جِینویں مُرغی آپنڑے چُوچیاں کُوں آپنڑے پراں تلے جمع کر گِھندی ہے پر تُوں راضی نہ تھیّا۔ ڈیکھو تُہاڈا گھر تُہاڈے کیتے ویران چھوڑیا ویندے۔ کیوں جو مَیں تُہاکُوں آدھا ہاں جو تُساں میکُوں ہُنڑ کنُوں اُوں ویلے تئیں وَل نہ ڈیکھسو جئیں تئیں ایہ نہ اکھیسو جو ’مُبارک ہے او جیہڑا رب العالمین دے ناں تُوں آندے‘۔“ یسُوع ہیکل کنُوں نِکل تے ویندا پِیا ہا جو اُوندے شاگرد اُوندے کولھ آئے تاں جو اُونکُوں ہیکل دیاں عمارتاں ڈِکھاوݨ۔ اُوں اُنہاں کُوں آکھیا، ”کیا تُساں اِنہاں سبھ عمارتاں کُوں ڈیدھے ہیوے؟ مَیں تُہاکُوں سچ آدھا ہاں جو اِتھاں کوئی پتھر اُتے پتھر باقی نہ راہسی بلکہ سبھ کُجھ ڈھا ڈِتا ویسی۔“ وَل جِیں ویلے یسُوع زیتون دے پہاڑ اُتے بیٹھا ہا تاں اُوندے شاگرد کلھیپے ءچ اُوندے کولھ آ تے آکھنڑ لگے، ”ساکُوں ڈساؤ جو ایہ گالھیں کڈݨ تھیسن، تے تُہاڈی آمد تے دُنیا دے خاتمے دا نشان کیا ہوسی؟“ یسُوع جواب ءچ آکھیا، ”خبردار! کوئی تُہاکُوں گُمراہ نہ کر ڈیوے۔ کیوں جو بہُوں سارے میڈے ناں نال آسن تے اکھیسن جو ’مَیں المسیح ہاں،‘ تے بہُوں سارے لوکاں کُوں گُمراہ کریسن۔ تُساں جنگاں تے جنگاں دیاں افواہاں سُنڑسو۔ خبردار! گھبرا نہ وَنجائے، کیوں جو اِنہاں دا تھیوݨ لازم ہے۔ پر اُوں ویلے خاتمہ نہ تھیسی۔ کیوں جو قوم اُتے قوم تے سلطنت اُتے سلطنت چڑھائی کریسی۔ تے جاہ جاہ کال تے زلزلے آسن۔ پر ایہ سارے گالھیں تاں مُصیبتاں دا صرف شروع ای ہوسن۔ اُوں ویلے لوک تُہاکُوں پکڑ تے سخت سزاواں ڈیسن تے قتل کریسن۔ تے سبھ قوماں میڈے ناں دے سببّوں تُہاڈے نال دُشمنڑی رکھیسن۔ اُوں ویلے بہُوں سارے لوک اِیمان کنُوں پِھر ویسن تے ہِک ڈُوجھے کُوں پکڑویسن تے آپس ءچ دُشمنڑی رکھیسن۔ بہُوں سارے کُوڑے نبی اُٹھی کھڑے تھیسن تے بہُوں سارے لوکاں کُوں گُمراہ کر ڈیسن۔ بدکاری دے ودھ ونجنڑ پارُوں لوکاں دی محبت ٹھڈی پے ویسی۔ پر جیہڑا آخر تئیں برداشت کریسی اُوہو نجات پیسی۔ تے بادشاہی دی اِیں خوشخبری دی تبلیغ ساری دُنیا ءچ کیتی ویسی تاں جو سبھ قوماں کیتے گواہی ہووے، وَل خاتمہ تھیسی۔ بس جِیں ویلے تُساں اُوں اُجاڑن آلی مکرُوہ شے کُوں جِیندا ذِکر دانی ایل نبی کیتے ، مُقدّس جاہ اُتے کھڑا ڈیکھو (پڑھن آلا سمجھ گِھنے) تاں اُوں ویلے جیہڑے یہُودیہ ءچ ہووݨ، او پہاڑاں اُتے بھج ونجنڑ۔ جیہڑا چھت اُتے ہووے او گھر ءچوں کُجھ گِھننڑ کیتے تلے نہ لہوے۔ تے جیہڑا رَڑھ ءچ ہووے، آپنڑا کپڑا گِھننڑ کیتے پِچُھوں نہ ونجے۔ پر اُنہاں اُتے افسوس جیہڑیاں اُنہاں ڈینہاں ءچ حاملہ ہوسن تے جیہڑیاں کھیر پِلیندیاں ہوسن! بس دُعا کرو جو تُہاکُوں سیالے ءچ یا سبت دے ڈینہہ بھجنڑاں نہ پووے۔ کیوں جو اُوں ویلے ایجھی وڈی مُصیبت ہوسی جو دُنیا دے شروع کنُوں نہ تاں اَج تئیں آئی ہے، نہ ولا کڈھائیں آسی۔ جے او ڈینہہ گھٹ نہ کیتے ویندے تاں کوئی بندہ زندہ نہ بچدا، پر خُدا دے چُنڑے ہوئے لوکاں دی خاطر او ڈینہہ گھٹائے ویسن۔ اُوں ویلے جے کوئی تُہاکُوں آکھے جو ’المسیح اِتھاں ہے‘ یا ’اُتھاں ہے،‘ تاں یقین نہ کرائے۔ کیوں جو کُوڑے المسیح تے کُوڑے نبی اُٹھی کھڑے تھیسن تے ایجھے وڈے وڈے نشان تے عجیب کم ڈِکھیسن جو جے ممکن ہووے تاں خُدا دے چُنڑے ہوئے لوکاں کُوں وی گُمراہ کر ڈیوݨ۔ ڈیکھو، مَیں تُہاکُوں پہلے ای ڈسا ڈِتے۔ اِیں واسطے جے کوئی تُہاکُوں آکھے جو ’ڈیکھو او بیابان ءچ ہے،‘ تاں باہر نہ وَنجائے یا ایہ جو ’او اندر کوٹھڑیاں ءچ ہے،‘ تاں یقین نہ کرائے۔ کیوں جو جِینویں بجلی مشرق کنُوں چمک تے مغرب تئیں ڈِکھالی ڈیندی ہے، اُونویں ای اِبنِ آدم دا آوݨ ہوسی۔ کیوں جو جِتھاں مُردار ہے اُتھاں گیجھ وی جمع تھی ویسن۔ تے فوراً اُنہاں ڈینہاں دی مُصیبت دے بعد سِجھ اندھارا تھی ویسی تے چَن آپنڑی روشنی نہ ڈیسی، تے اسمان کنُوں تارے ڈھاسن، تے اسمان دیاں طاقتاں ہلائیاں ویسن ۔ اُوں ویلے اِبنِ آدم دا نشان اسمان اُتے ظاہر تھیسی، تے دُنیا دیاں سبھ قوماں چھاتی پِٹسن تے اِبنِ آدم کُوں بدلاں اُتے قُدرت تے وڈے جلال نال آندے ڈیکھسن۔ وَل او آپنڑے فرشتیاں کُوں نرسِنگے دی اُچی اواز نال بھجیسی، تے او اُوندے چُنڑے ہوئے لوکاں کُوں چارے پاسُوں یعنی اسمان دے ہِک سرے کنُوں ڈُوجھے تئیں جمع کریسن۔ ہُنڑ ہنجیر دے درخت کنُوں ہِک سبق سِکھو۔ جِینویں ای اُوندی لڑی نرم تھیندی تے پتر نِکلدے ہِن تاں تُساں جاݨ گِھندے ہیوے جو گرمی آوݨ آلی ہے۔ اِینویں ای، جِیں ویلے تُساں اِنہاں سبھ گالھیں کُوں تھیندا ڈیکھو تاں سمجھ گِھنائے جو اِبنِ ِ آدم نیڑے ہے بلکہ دروازے اُتے ہے۔ مَیں تُہاکُوں سچ آدھا ہاں جو جئیں تئیں ایہ سبھ گالھیں پُوریاں نہ تھی ونجنڑ، اِیں نسل دا خاتمہ نہ تھیسی۔ اسمان تے زمین ٹَل ویسن پر میڈے گالھیں کڈھائیں نہ ٹَلسن۔ پر اُوں ڈینہہ تے اُوں ویلے دے بارے ءچ کوئی نئیں جانڑدا، نہ اسمان دے فرشتے نہ پوتر پر صرف باپ۔ جِینویں نُوح دے ڈینہاں ءچ تھیّا ہا ، اُونویں ای اِبنِ آدم دے آوݨ ویلے تھیسی۔ کیوں جو طوفان کنُوں پہلے دے ڈینہاں ءچ نُوح دے کشتی ءچ ونجنڑ دے ڈینہہ تئیں لوک کھاندے پِیندے تے شادی ویاہ کریندے ہَن۔ اُنہاں کُوں خیال وی نہ ہا جو کیا تھیوݨ آلا ہے، جئیں تئیں طوفان آیا تے اُنہاں سبھ کُوں وہا تے گِھن نہ گِیا۔ اِبنِ آدم دے آوݨ ویلے وی اِینویں ای تھیسی۔ اُوں ویلے ڈُو بندے رَڑھ ءچ ہوسن، ہِک گِھن گِھدا ویسی تے ڈُوجھا چھوڑ ڈِتا ویسی۔ ڈُو عورتاں چکّی پِیہندیاں ہوسن۔ ہِک گِھن گِھدی ویسی تے ڈُوجھی چھوڑ ڈِتی ویسی۔ بس جاگدے راہو کیوں جو تُساں نئیں جانڑدے جو تُہاڈا مالک کیہڑے ڈینہہ آسی۔ پر یاد رکھو جو جے گھر دے مالک کُوں پتہ ہوندا جو چور رات کُوں کیہڑے ویلے آسی، تاں او جاگدا راہندا تے آپنڑے گھر ءچ سَندھ نہ مارݨ ڈیندا۔ اِیں واسطے تُساں وی تیار راہو کیوں جو جِیں ویلے تُہاکُوں توقع وی نہ ہوسی اِبنِ آدم آ ویسی۔ او دیانتدار تے عقلمند نوکر کیہڑا ہے، جِینکُوں اُوندا مالک آپنڑے گھر دے بئے نوکراں چاکراں اُتے مقرر کرے، تاں جو اُنہاں کُوں ویلے نال کھانڑا ڈِتا کرے؟ مُبارک ہے او نوکر جِیندا مالک آ تے اُونکُوں اِینویں ای کریندا ڈیکھے۔ مَیں تُہاکُوں سچ آدھا ہاں جو او اُونکُوں آپنڑی ساری جائیداد دا مُختار بنڑا ڈیسی۔ پر جے او نوکر بُرا ہووے تے آپنڑے دل ءچ آکھے جو ’میڈے مالک کُوں آوݨ ءچ اجنڑ تاں دیر ہے،‘ تے آپنڑے ساتھیاں کُوں مارݨ کُٹنڑ لگے تے شرابیاں نال کھاوݨ پِیوݨ شروع کرے، تاں اُوندا مالک کہیں ایجھے ڈینہہ جو جِیں ویلے نوکر کُوں اُوندے آوݨ دی اُمید نہ ہوسی تے کہیں ایجھے ویلے جیندی اُونکُوں خبر وی نہ ہوسی، وَل آسی۔ تے خُوب کوڑے مروا تے اُونکُوں منافقاں ءچ شامل کر ڈیسی جِتھاں رووݨ تے ڈنداں دا پِیہوݨ ہوسی۔“ ”اُوں ویلے اسمان دی بادشاہی اُنہاں ڈاہ کُنواریاں وانگُوں ہوسی جیہڑیاں آپنڑے ڈیوے گِھن تے گھوٹ دے اِستقبال کیتے نِکلیاں۔ اُنہاں ءچوں پنج بیوقُوف تے پنج عقل مند ہَن۔ جیہڑیاں بیوقُوف ہَن اُنہاں ڈیوے تاں نال گِھن گِھدے پر آپنڑے نال تیل نہ گِھدا۔ پر جیہڑایاں عقلمند ہَن اُنہاں آپنڑے ڈیویاں دے علاوہ کُپیاں ءچ تیل وی آپنڑے نال گِھن گِھدا۔ جِیں ویلے گھوٹ دے آوݨ ءچ دیر تھی گئی تاں سبھ ہنگلاوݨ لگیاں تے سَم گئیاں۔ اَدھ رات کُوں شور مچ گِیا جو ’ڈیکھو گھوٹ آ گئے، اُوندے اِستقبال کیتے ونجو۔‘ اِیں گالھ اُتے ساریاں کُنواریاں جاگ پئیاں تے آپنڑے آپنڑے ڈیوے بالنڑ لگیاں۔ بیوقُوف کُنواریاں عقل مند کُنواریاں کُوں آکھیا، ’آپنڑے تیل ءچوں کُجھ ساکُوں وی ڈے ڈیؤ، کیوں جو ساڈے ڈیوے وِسمدے ویندے ہِن۔‘ عقل مند کُنواریاں جواب ڈِتا، ’نئیں، متاں ایہ تیل ساڈے تے تُہاڈے ڈوہائیں کیتے کافی نہ ہووے۔ چنگا اِیہو ہے جو تُساں دُکان تے ونجو تے آپنڑے کیتے مُل گِھن گِھنو۔‘ جیہڑے ویلے او تیل گِھننڑ ویندیاں پئیاں ہَن تاں گھوٹ آ گِیا تے جیہڑیاں تیار ہَن گھوٹ دے نال شادی دی دعوت ءچ اندر چلیاں گئیاں تے دَر بند تھی گِیا۔ وَل او باقی کُنواریاں وی آ گئیاں تے آکھنڑ لگیاں، ’ مالک! مالک! ساڈے کیتے دَر کھول ڈیؤ۔‘ پر اُوں جواب ڈِتا، ’مَیں تُہاکُوں سچ آدھا ہاں جو مَیں تُہاکُوں نئیں جانڑدا۔‘ اِیں واسطے جاگدے راہو کیوں جو تُساں نہ اُوں ڈینہہ کُوں جانڑدے ہیوے نہ اُوں ویلے کُوں۔ اسمان دی بادشاہی اِینویں ہوسی: ہِک بندے کہیں دُور دے مُلک ونجنڑا ہا۔ اُوں آپنڑے نوکراں کُوں سڈیا تے آپنڑاں مال اُنہاں دے حوالے کر ڈِتا۔ اُوں ہر ہِک کُوں اُوندی قابلیت دے مطابق تقسیم کر ڈِتا، ہِک کُوں سونے دے سِکیاں دے پنج تھیلے ، ڈُوجھے کُوں ڈُو تے تریجھے کُوں ہِک تے وَل او سفر اُتے روانہ تھی گِیا۔ جِیں نوکر کُوں پنج تھیلے مِلے ہَن اُوں فوراً وَنج تے کاروبار کیتا تے پنج تھیلے بئے کَما گِھدے۔ اِینویں ای جِینکُوں ڈُو مِلے ہَن اُوں ڈُو بئے کَما گِھدے۔ پر جِیں بندے کُوں ہِک توڑا مِلیا ہا اُوں وَنج تے زمین کھٹ تے آپنڑے مالک دی رقم لُکا ڈِتی۔ بہُوں عرصہ بعد اُنہاں دا مالک وَل آیا تے نوکراں کنُوں حساب گِھننڑ لگا۔ جِینکُوں پنج تھیلے مِلے ہَن او پنج تھیلے بئے گِھن تے آیا تے آکھنڑ لگا، ’مالک! تُساں میکُوں پنج تھیلے ڈِتے ہَن۔ ڈیکھو مَیں پنج تھیلے بئے کمائے ہِن۔‘ اُوندے مالک اُونکُوں آکھیا، ’شاباش میڈے چنگے تے اِیماندار نوکر۔ تُوں تھوڑے ءچ اِیماندار ریہا۔ مَیں تیکُوں بہُوں ساریاں چیزاں دا مُختار بنڑیساں۔ آپنڑے مالک دی خوشی ءچ شریک تھی۔‘ جِینکُوں ڈُو تھیلے مِلے ہَن او وی آیا تے آکھنڑ لگا، ’ مالک! تُساں میکُوں ڈُو تھیلے ڈِتے ہَن، ڈیکھو مَیں ڈُو تھیلے بئے کَما گِھدن۔‘ اُوندے مالک اُونکُوں آکھیا، ’شاباش میڈے چنگے تے اِیماندار نوکر۔ تُوں تھوڑے ءچ اِیماندار ریہا، مَیں تیکُوں بہُوں ساریاں چیزاں دا مُختار بنڑیساں۔ آپنڑے مالک دی خوشی ءچ شریک تھی۔‘ وَل جِینکُوں ہِک تھیلہ مِلیا ہا او وی آیا تے آکھنڑ لگا، ’ مالک! مَیں جانڑدا ہاں جو تُساں سخت بندے ہیوے، تے جِتھاں نئیں رہایا اُتھوں کپیندے ہیوے، تے جِتھاں نئیں کِھنڈایا، اُتھوں جمع کریندے ہیوے۔ اِیں واسطے مَیں ڈر گِیا تے تُہاڈی رقم زمین ءچ دبا ڈِتی۔ ڈیکھو جیہڑا تُہاڈا ہے، او ایہ ہے۔‘ اُوندے مالک جواب ڈِتا، ’ شریر تے آلسی نوکر! جے تیکُوں پتہ ہا جو جِتھاں مَیں نئیں رہایا اُتھوں کپیندا ہاں، تے جِتھاں بیج نئیں چھٹیا اُتھوں جمع کریندا ہاں، تاں تیکُوں لازم ہا جو میڈی رقم ساہوکاراں کُوں ڈیندا تاں جو مَیں وَل آ تے آپنڑی رقم منافع نال وصُول کر گِھندا۔ ہُنڑ اِینویں کرو جو اِیں کنُوں او تھیلہ گِھن گِھنو تے ڈاہ تھیلے آلے کُوں ڈے ڈیؤ۔ کیوں جو جیندے کولھ ہے اُونکُوں بِیا وی ڈِتا ویسی تے اُوندے کولھ زیادہ تھی ویسی۔ پر جیندے کولھ کُجھ نئیں، اُوندے کنُوں او وی جیہڑا اُوندے کولھ ہے گِھن گِھدا ویسی۔ تے اِیں بے کار نوکر کُوں باہر اندھارے ءچ سَٹ ڈیؤ۔ اُتھاں رووݨ تے ڈنداں دا پِیہوݨ ہوسی۔‘ جِیں ویلے اِبنِ آدم آپنڑے جلال ءچ آسی تے سارے فرشتے اُوندے نال آسن تاں او آپنڑے جلالی تخت اُتے بَہسی۔ وَل ساریاں قوماں اُوندے حضُور جمع کیتیاں ویسن تے او لوکاں کُوں ہِک ڈُوجھے کنُوں اِینویں اَنج کریسی جِینویں آجڑی بھیڈاں کُوں بکریاں کنُوں اَنج کریندے۔ او بھیڈاں کُوں آپنڑے سجے پاسُوں تے بکریاں کُوں آپنڑے کھبے پاسُوں کھڑیسی۔ وَل بادشاہ آپنڑے سجے پاسے آلیاں کُوں اکھیسی، ’آؤ میڈے باپ دے مُبارک لوکو، اُوں بادشاہی کُوں جیہڑی دُنیا بنڑݨ تُوں پہلے تُہاڈے کیتے تیار کیتی گئی ہے، میراث ءچ گِھنو۔ کیوں جو مَیں بُکھا ہم تے تُساں میکُوں کھانڑا کھوایا۔ مَیں ترِسّا ہم تے تُساں میکُوں پانڑی پِلایا۔ پردیسی ہم تے تُساں میکُوں آپنڑے گھر ءچ جاہ ڈِتی۔ ننگا ہم تے تُساں میکُوں کپڑے پوائے۔ بیمار ہم تے تُساں میڈی ڈیکھ بھال کیتی، قید ءچ ہم تے تُساں میکُوں مِلنڑ آئے۔‘ وَل نیک لوک جواب ءچ اُونکُوں اکھیسن، ’مالک! اساں کِیں ویلے تُہاکُوں بُکھا ڈیکھ تے کھانڑا کھوایا یا ترِسّا ڈیکھ تے پانڑی پِلایا؟ اساں کِیں ویلے تُہاکُوں پردیسی ڈیکھ تے گھر ءچ جاہ ڈِتی یا ننگا ڈیکھ تے کپڑے پوائے؟ اساں کِیں ویلے تُہاکُوں بیمار یا قید ءچ ڈیکھ تے تُہاکُوں مِلنڑ آئے؟‘ بادشاہ جواب ڈیسی مَیں تُہاکُوں سچ آدھا ہاں جو ’جِیں ویلے تُساں میڈے اِنہاں سبھ کنُوں چھوٹیاں بِھرانواں ءچوں کہیں ہِک نال ایہ سلوک کیتا تاں میڈے نال کیتا۔‘ وَل او آپنڑے کھبے پاسے آلیاں کُوں اکھیسی، ’لعنتیو! میڈے سامنڑے کنُوں پرے تھی ونجو، تے اُوں ہمیشاں تئیں بلنڑ آلی بھاہ ءچ چلے ونجو جیہڑی ابلیس تے اُوندے فرشتیاں کیتے تیار کیتی گئی ہے۔ کیوں جو مَیں بُکھا ہم تے تُساں میکُوں کھانڑا نہ کھوایا۔ مَیں ترِسّا ہم تے تُساں میکُوں پانڑی نہ پِلایا۔ پردیسی ہم تے تُساں میکُوں آپنڑے گھر ءچ جاہ نہ ڈِتی، ننگا ہم تے تُساں میکُوں کپڑے نہ پوائے، بیمار تے قید ءچ ہم تے تُساں میکُوں مِلنڑ نہ آئے۔‘ وَل او وی جواب ءچ اکھیسن، ’ مالک! اساں کِیں ویلے تُہاکُوں بُکھا یا ترِسّا یا پردیسی یا ننگا یا بیمار یا قید ءچ ڈیکھ تے تُہاڈی خدمت نہ کیتی؟‘ وَل او اُنہاں کُوں جواب ڈیسی، ’مَیں تُہاکُوں سچ آدھا ہاں جو جِیں ویلے تُساں اِنہاں ساریاں کنُوں چھوٹیاں ءچوں کہیں دے نال ایہ سلوک نہ کیتا تاں میڈے نال نہ کیتا۔‘ تے اِنہاں کُوں ہمیشاں دی سزا مِلسی پر راستباز کُوں ہمیشاں دی زندگی۔“ جِیں ویلے یسُوع ایہ گالھیں کر گِھدیاں تاں اُوں آپنڑے شاگرداں کُوں آکھیا، ”تُہاکُوں پتہ ہے جو ڈُو ڈینہہ بعد عید ِ فسح ہے، تے اِبنِ آدم کُوں پکڑوا ڈِتا ویسی تاں جو او صلیب اُتے چڑھا ڈِتا ونجے۔“ اُوں ویلے سردار کاہِن تے قوم دے بزُرگ کاہِن ِ اعظم کائفا دی حویلی ءچ جمع تھئے۔ تے صلاح کیتی جو یسُوع کُوں دوکھے نال پکڑ تے قتل کر ڈیؤں۔ پر آکھنڑ لگے جو ”عید دے ڈینہاں ءچ نئیں، اِینویں نہ تھیوے جو لوکاں ءچ ہنگامہ تھی ونجے۔“ جِیں ویلے یسُوع بیت عنیاہ ءچ شمعون کوڑھی دے گھر ءچ ہا، تاں ہِک عورت سنگِ مرمر دے عِطردان ءچ قیمتی عِطر گِھن تے اُوندے کولھ آئی، تے جِیں ویلے او کھانڑا کھاوݨ بیٹھا تاں اُوندے سر اُتے وِیٹ ڈِتا۔ شاگرد ایہ ڈیکھ تے ناراض تھئے تے آکھنڑ لگے جو ”ایہ عِطر کیوں ضائع کیتا گِیا؟ ایہ تاں چنگی قیمت ءچ ویچ تے رقم غریباں کُوں ڈِتی وَنج سگدی ہئی۔“ یسُوع ایہ جاݨ تے اُنہاں کُوں آکھیا جو ”تُساں اِیں عورت کُوں کیوں پریشان کریندے ہیوے؟ اِیں تاں میڈے نال بھلائی کیتی ہے۔ کیوں جو غریب تاں ہمیشاں تُہاڈے نال ہِن پر مَیں تُہاڈے نال ہمیشاں نہ راہساں۔ تے اُوں میڈے اُتے عِطر وِیٹ تے میڈے بدن کُوں دفن ہووݨ کیتے تیار کیتے۔ مَیں تُہاکُوں سچ آدھا ہاں جو ساری دُنیا ءچ جِتھاں وی خوشخبری دی تبلیغ کیتی ویسی اُتھاں اِیندی یادگاری ءچ اُوندے اِیں کم دا ذِکر وی کیتا ویسی۔“ وَل اُنہاں بارہاں ءچوں ہِک جِیندا ناں یہُوداہ اِسکریُوتی ہا، سردار کاہِناں دے کولھ وَنج تے آکھیا جو ”جے مَیں اُونکُوں تُہاڈے حوالے کروا ڈیواں تاں تُساں میکُوں کیا ڈیسو؟“ اُنہاں چاندی دے ترِیح سکے تول تے اُونکُوں ڈے ڈِتے۔ او اُوں ویلے کنُوں یسُوع کُوں پکڑواوݨ دے موقعے دی تاڑ ءچ راہوݨ لگا۔ بے خمیری روٹی دی عید دے پہلے ڈینہہ شاگرداں یسُوع دے کولھ آ تے پُچھیا جو ”تُساں کِتھاں چاہندے ہیوے جو اساں تُہاڈے کیتے فسح کھاوݨ دی تیاری کرُوں؟“ اُوں جواب ڈِتا، ”شہر ءچ فلاں بندے دے کولھ ونجو تے آکھو، ’اُستاد آدھے جو میڈا مقررہ ویلا نیڑے ہے۔ مَیں آپنڑے شاگرداں دے نال تیڈے گھر ءچ فسح دی عید منیساں‘۔“ بس شاگرداں اُونویں ای کیتا جِینویں یسُوع اُنہاں کُوں حُکم ڈِتا ہا تے فسح تیار کیتا۔ جِیں ویلے شام تھئی تاں یسُوع آپنڑے بارہاں شاگرداں نال کھانڑا کھاوݨ بیٹھا۔ تے کھاوݨ ویلے اُوں آکھیا، ”مَیں تُہاکُوں سچ آدھا ہاں جو تُہاڈے ءچوں ہِک میکُوں پکڑ ویسی۔“ اُنہاں کُوں بہُوں ڈُکھ تھیّا تے او واری واری پُچھنڑ لگے، ”مالک! کیا مَیں تاں نئیں؟“ اُوں جواب ڈِتا، ”جئیں میڈے نال سالنڑ دے مُنگر ءچ ہتھ بوڈے، اُوہو میکُوں پکڑ ویسی۔ اِبنِ آدم تاں جِینویں اُوندے حق ءچ لِکھیا ہے ویندا ای ہے، پر اُوں بندے اُتے افسوس جیندے ذریعے اِبنِ آدم پکڑوایا ویندے۔ اُوندے کیتے چنگا ہا جو او پیدا ای نہ تھیندا۔“ وَل یہُوداہ جیہڑا اُونکُوں پکڑواوݨ کُوں ہا، بول پِیا، ”ربّی! کیا مَیں تاں نئیں؟“ اُوں جواب ڈِتا، ”تَیں آپ آکھ ڈِتے۔“ کھانڑا کھاندے ویلے یسُوع روٹی گِھدی تے شُکر کر تے تروڑی تے شاگرداں کُوں ڈے تے آکھیا، ”گِھنو تے کھاؤ، ایہ میڈا بدن ہے۔“ وَل پیالہ گِھدا تے شُکر کیتا تے اُنہاں کُوں ڈے تے آکھیا، ”تُساں سارے اِیندے ءچوں پیؤ۔ کیوں جو ایہ میڈا خون ہے، عہد دا او خون جیہڑا بہُوں ساریاں دے گُناہاں دی معافی کیتے وہایا ویندے۔ مَیں تُہاکُوں آدھا ہاں جو مَیں انگُور دا رَس اُوں ڈینہہ تئیں ولا کڈھائیں نہ پِیساں، جئیں تئیں آپنڑے باپ دی بادشاہی ءچ تُہاڈے نال نواں نہ پِیواں۔“ وَل او حمد کر تے باہر زیتون دے پہاڑ اُتے گئے۔ وَل یسُوع شاگرداں کُوں آکھیا، ”تُساں سارے اِیں رات میڈی وجہ کنُوں تُھڈا کھاسو کیوں جو کلام ءچ لِکھیا ہے جو ’مَیں آجڑی کُوں مریساں تے اِجڑ دیاں بھیڈاں کِھنڈ ویسن ۔‘ پر مَیں زندہ تھیوݨ تُوں بعد تُہاڈے کنُوں پہلے گلیل کُوں ویساں۔“ پطرس جواب ڈِتا، ”بھانویں تُہاڈی وجہ کنُوں سبھ تُھڈا کھا تے تُہاکُوں چھوڑ ڈیوݨ، پر مَیں کڈھائیں تُہاکُوں نہ چُھڑیساں۔“ یسُوع آکھیا، ”مَیں تیکُوں سچ آدھا ہاں جو اِیں رات کُکڑ دے بانگ ڈیوݨ کنُوں پہلے تُوں ترے پھیری میڈا اِنکار کریسیں۔“ پطرس اُونکُوں آکھیا، ”جے تُہاڈے نال میکُوں مرنڑا وی پووے، وَل وی تُہاڈا اِنکار نہ کریساں۔“ تے سارے شاگرداں وی اِیہو آکھیا۔ وَل یسُوع شاگرداں نال ہِک باغ ءچ پُجیا جِیندا ناں گتسمنی ہا، تے اُنہاں کُوں آکھیا، ”تُساں اِتھاں بَہو، جئیں تئیں مَیں اُتھاں وَنج تے دُعا کراں۔“ او پطرس تے زبدی دے ڈوہائیں پوتراں کُوں نال گِھن گِیا تے غمگین تے بے چین تھیوݨ لگا۔ اُوں ویلے اُوں اُنہاں کُوں آکھیا، ”غم دی شِدت کنُوں مَیں مرݨ آلا ہاں۔ تُساں اِتھائیں راہو تے میڈے نال جاگدے راہو۔“ وَل ذرا اگُوں وَنج تے او زمین اُتے مُنہ دے بھار ڈھے تے دُعا کرݨ لگا جو ”میڈے باپ، جے ممکن ہووے تاں ڈُکھ دا ایہ پیالہ مَیں کنُوں ٹَل ونجے، وَل وی جیہڑا مَیں چاہندا ہاں او نئیں بلکہ جیہڑا تُوں چاہندیں اُوہو تھیوے۔“ وَل شاگرداں دے کولھ آیا تے اُنہاں کُوں سُتا ڈِٹھا تے پطرس کُوں آکھیا، ”کیا تُساں ہِک گھڑی وی میڈے نال جاگ نہ سگے؟ جاگدے تے دُعا کریندے راہو تاں جو ازمائش ءچ نہ پوو۔ رُوح تاں تیار ہے پر جِسم کمزور ہے۔“ وَل او چلیا گِیا تے ایہ آکھ تے دُعا کیتی، ”میڈے باپ! جے ایہ پیالہ میڈے پیتے بغیر ٹَل نئیں سگدا تاں تیڈی مرضی پُوری تھیوے۔“ تے آ تے اُنہاں کُوں وَل وی سُتے ڈِٹھا کیوں جو اُنہاں کُوں ڈاڈھی نیندر آئی ہئی۔ او اُنہاں کُوں چھوڑ تے چلیا گِیا تے وَل تریجھی پھیری اُوہو گالھ آدھے ہوئے دُعا کیتی۔ اُوندے بعد شاگرداں دے کولھ آ تے اُنہاں کُوں آکھیا، ”ہُنڑ سُتے راہو تے آرام کرو۔ ڈیکھو، او ویلا آ گئے جو اِبنِ آدم گُنہگاراں دے حوالے کیتا ویندے۔ اُٹھو جُلوں۔ ڈیکھو میکُوں پکڑواوݨ آلا نیڑے آ پُجے۔“ او ایہ گالھیں کریندا ای پِیا ہا جو یہُوداہ جیہڑا اُنہاں بارہاں ءچوں ہا، اُتھاں آ گِیا۔ اُوندے نال ہِک وڈی بِھیڑ، تلواراں تے سوٹے چا تے آ پُجی، جِینکُوں سردار کاہِن تے قوم دے بزُرگاں بھیجیا ہا۔ اُوندے پکڑواوݨ آلے اُنہاں کُوں ایہ نشانی ڈِتی ہئی جو جِیندا مَیں بوسہ گِھناں، اُوہو یسُوع ہے۔ اُونکُوں پکڑ گِھنائے۔ او فوراً یسُوع دے کولھ آیا تے آکھیا، ”ربّی! سلام“ تے اُوندے بوسے گِھدے۔ یسُوع اُونکُوں آکھیا، ”یار! جیہڑے کم کیتے تُوں آیا ہیں او کر گِھن۔“ وَل اُنہاں اگُوں تھی تے یسُوع کُوں پکڑ تے گرفتار کر گِھدا۔ اِیندے تے یسُوع دے ساتھیاں ءچوں ہِک آپنڑی تلوار چھیک تے کاہِن ِ اعظم دے نوکر اُتے وار کیتا تے اُوندا کَن اُڈا ڈِتا۔ یسُوع اُونکُوں آکھیا، ”آپنڑی تلوار کُوں واپس رکھ گِھن کیوں جو جیہڑے تلوار چیندے ہِن او سبھ تلوار نال مرسن۔ تیکُوں پتہ نئیں جو مَیں آپنڑے باپ کنُوں مِنت کر سگدا ہاں تے او ہُنڑیں فرشتیاں دے بارہاں لشکراں کنُوں وی زیادہ میڈے کولھ بھیج ڈیسی؟ پر اُوں صورت ءچ کلام دیاں او پیشن گوئیاں کِینویں پُوریاں تھیسن جِنہاں دا پُورا تھیوݨ لازم ہے؟“ اُوں ویلے یسُوع بِھیڑ کُوں آکھیا، ”کیا مَیں کوئی ڈاکو ہاں جو تُساں تلواراں تے سوٹیاں چا تے میکُوں پکڑن آئے ہیوے؟ مَیں ہر روز ہیکل ءچ بہہ تے تعلیم ڈیندا ریہاں، اُتھاں تاں تُساں میکُوں گرفتار نہ کیتا۔ پر ایہ سبھ کُجھ اِیں واسطے تھیّا جو نبیاں دے صحیفیاں ءچ لِکھیاں ہوئیاں گالھیں پُوریاں تھیوݨ۔“ وَل سبھ شاگرد اُونکُوں چھوڑ تے بھج گئے۔ جیہڑے لوکاں یسُوع کُوں گرفتار کیتا ہا، او اُونکُوں کاہِن ِ اعظم کائفا دے کولھ گِھن گئے جِتھاں شریعت دے عالم تے بزُرگ جمع ہَن۔ پطرس وی پرے کنُوں اُوندے پِچُھوں پِچُھوں کاہِن ِ اعظم دی حویلی تئیں وَنج پُجیا، تے اندر وَنج تے پہرے آلیاں دے نال بہہ گِیا تاں جو ڈیکھے جو کیا تھیندے۔ سردار کاہِن تے سبھ صدر عدالت آلے یسُوع کُوں قتل کرݨ کیتے اُوندے خلاف کُوڑیاں گواہیاں گولھنڑ لگے، پر نہ مِل سگیاں، بے شک بہُوں سارے کُوڑے گواہ پیش تھئے۔ پر آخر ءچ ڈُو گواہاں آ تے آکھیا جو ”اِیں آکھیا ہا جو مَیں خُدا دی ہیکل کُوں ڈھا تے ترے ڈینہہ ءچ ولا کھڑا کر سگدا ہاں۔“ اِیں اُتے کاہِن ِ اعظم کھڑا تھی تے اُونکُوں آکھیا، ”تُوں جواب کیوں نئیں ڈیندا؟ ایہ تیڈے خلاف کیا گواہی ڈیندے ہِن؟“ پر یسُوع چُپ ای ریہا۔ کاہِن ِ اعظم اُونکُوں آکھیا، ”مَیں تیکُوں زندہ خُدا دی قَسم ڈیندا ہاں جو جے تُوں خُدا دا پوتر المسیح ہیں تاں ساکُوں ڈسا ڈے۔“ یسُوع اُونکُوں آکھیا، ”تَیں خود ای آکھ ڈِتے۔ بلکہ مَیں تُہاکُوں آدھا ہاں جو اِیندے بعد تُساں اِبنِ آدم کُوں قادر ِ مُطلق دے سجے پاسُوں بیٹھا تے اسمان دے بدلاں اُتے آندا ڈیکھسو۔“ وَل کاہِن ِ اعظم ایہ آکھ تے آپنڑے کپڑے پھاڑے جو ”اُوں کُفر بَکیا ہے۔ ہُنڑ ساکُوں گواہاں دی کیا لوڑ ہے؟ ڈیکھو تُساں ہُنڑیں ای ایہ کُفر سُنڑیا ہے۔ تُہاڈا کیا خیال ہے؟“ اُنہاں جواب ڈِتا، ”او سزائے موت دے لائق ہے۔“ وَل اُنہاں اُوندے مُنہ اُتے تُھکیا تے اُونکُوں مُکے مارے تے کُجھ چاٹاں مار تے آکھیا، ”المسیح! ساکُوں نبُوّت کر تے ڈسا جو تیکُوں کئیں مارے؟“ پطرس باہر صحن ءچ بیٹھا ہا جو ہِک کنیز اُتھاں آئی تے آکھنڑ لگی، ”تُوں وی یسُوع گلیلی دے نال ہَویں۔“ اُوں ساریاں دے سامنڑے اِنکار کیتا تے آکھیا، ”پتہ نئیں تُوں کیا آدھی پئی ہیں۔“ وَل او باہر ڈیوڑھی دو گِیا تاں ہِک بئی کنیز اُونکُوں ڈیکھ تے کولھ کھڑے ہوئے لوکاں کُوں آکھیا، ”ایہ بندہ وی یسُوع ناصری دے نال ہا۔“ اُوں قَسم چا تے ولا اِنکار کیتا جو ”مَیں تاں اِیں بندے کُوں نئیں جانڑدا۔“ کُجھ دیر بعد او لوک جیہڑے اُتھاں کھڑے ہَن پطرس دے کولھ آئے تے آکھنڑ لگے، ”بےشک تُوں وی اُنہاں ءچوں ای ہیں کیوں جو تیڈے لہجے تُوں وی اِیہو ظاہر تھیندے۔“ اِیں گالھ تے پطرس قَسم چا تے آکھنڑ لگا جو ”کُوڑ بولنڑ آلے اُتے لعنت۔ مَیں اِیں بندے کُوں نئیں جانڑدا۔“ تے فوراً کُکڑ بانگ ڈِتی۔ پطرس کُوں یسُوع دی او گالھ یاد آئی جیہڑی اُوں آکھی ہئی جو ”کُکڑ دے بانگ ڈیوݨ کنُوں پہلے تُوں ترے پھیری میڈا اِنکار کریسیں،“ تے او باہر وَنج تے بُٹ بُٹ رویا۔ جِیں ویلے سویل تھئی تاں سارے سردار کاہِناں تے قوم دے بزُرگاں صلاح کر تے یسُوع کُوں قتل کرواوݨ دا فیصلہ کیتا۔ تے اُونکُوں بَدھ تے گِھن گئے تے گورنر پِیلاطُس دے حوالے کر ڈِتا۔ جِیں ویلے اُوندے پکڑواوݨ آلے یہُوداہ ایہ ڈِٹھا جو یسُوع کُوں سزائے موت ڈیوݨ دا فیصلہ تھیّا ہے تاں پچھتایا تے چاندی دے او ترِیح سِکے سردار کاہِناں تے بزُرگاں دے کولھ واپس گِھن آ تے آکھنڑ لگا، ”مَیں گُناہ کیتے جو ہِک بے قصُور کُوں قتل کیتے پکڑوائے۔“ او آکھنڑ لگے، ”ساکُوں کیا؟ ایہ تیڈا مسئلہ ہے۔“ یہُوداہ پیسیاں کُوں ہیکل ءچ سَٹ تے چلیا گِیا تے پھانسی گِھن گِھدی۔ سردار کاہِناں پیسے چا گِھدے تے آکھنڑ لگے، ”ایہ رقم تاں خون دی قیمت ہے، اِینکُوں ہیکل دے خزانے ءچ ڈیوݨ جائز نئیں۔“ وَل صلاح مشورے تُوں بعد اُنہاں اُوں رقم نال کُمہار دا کھیت مُل گِھدا تاں جو اُتھاں پردیسیاں کیتے قبرستان بنڑایا ونجے۔ اِیہو وجہ ہے جو او کھیت اَج تئیں خون دا کھیت اکھویندا ہے۔ اُوں ویلے او گالھ پُوری تھئی جیہڑی یرمیاہ نبی دی معرفت آکھی گئی ہئی جو ”اُنہاں چاندی دے ترِیح سِکے گِھن گِھدے یعنی او قیمت جیہڑی بنی اِسرائیل اُوندے کیتے مقرر کیتی ہئی۔ تے اُنہاں کُوں کُمہار دے کھیت کیتے ڈے ڈِتا، جِینویں رب العالمین میکُوں حُکم ڈِتا ۔“ یسُوع گورنر دے سامنڑے کھڑا ہا، تے گورنر اُونکُوں پُچھنڑ لگا، ”کیا تُوں یہُودیاں دا بادشاہ ہیں؟“ یسُوع جواب ڈِتا، ”ایہ تُوں خود آدھیں۔“ پر جِیں ویلے سردار کاہِن تے بزُرگ اُوندے اُتے اِلزام لیندے پئے ہَن تاں اُوں کُجھ جواب نہ ڈِتا۔ اِیں پارُوں پِیلاطُس اُونکُوں آکھیا، ”کیا تُوں ایہ سارے اِلزام نئیں سُنڑدا جیہڑے ایہ تیڈے اُتے لیندے پئین؟“ پر یسُوع جواب ءچ ہِک لفظ وی نہ آکھیا، ایہ تئیں جو گورنر بہُوں حیران تھیّا۔ گورنر دا قانُون ہا جو او عید دے موقع اُتے ہِک قیدی کُوں جِینکُوں لوک چُنڑدے ہَن چھوڑ ڈیندا ہا۔ اُوں ویلے برابّا ناں دا ہِک مشہور قیدی ہا۔ جِیں ویلے لوک کٹھے تھئے تاں پِیلاطُس اُنہاں کنُوں پُچھیا، ”تُساں کِیں کُوں چاہندے ہیوے جو مَیں تُہاڈی خاطر چھوڑ ڈیواں؟ برابّا کُوں یا یسُوع کُوں جیہڑا المسیح اکھویندے؟“ کیوں جو اُونکُوں پتہ ہا جو اُنہاں اُونکُوں حسد نال پکڑوائے۔ جِیں ویلے پِیلاطُس عدالت دے تخت اُتے بیٹھا ہا تاں اُوندی ذال اُونکُوں ایہ پیغام بھیجیا جو ”اِیں نیک بندے دے خلاف کُجھ نہ کرو کیوں جو مَیں اَج خواب ءچ اِیندی وجہ کنُوں بہُوں ڈُکھ چاتے۔“ پر سردار کاہِناں تے بزُرگاں لوکاں کُوں اُبھاریا جو برابّا کُوں منگ گِھننڑ تے یسُوع کُوں مروا چھوڑن۔ گورنر اُنہاں کنُوں پُچھیا جو ”تُساں اِنہاں ڈوہائیں ءچوں کِیں کُوں چاہندے ہیوے جو مَیں تُہاڈے کیتے چھوڑ ڈیواں؟“ اُنہاں آکھیا، ”برابّا کُوں۔“ پِیلاطُس اُنہاں کُوں آکھیا، ”وَل مَیں یسُوع نال جیہڑا المسیح اکھویندے، کیا کراں؟“ سبھ آکھنڑ لگے جو ”اُونکُوں صلیب اُتے چڑھاؤ۔“ اُوں آکھیا، ”کیوں، اُوں کیہڑی بُرائی کیتی ہے؟“ پر او مزید شور مچا تے آکھنڑ لگے ”اِینکُوں صلیب اُتے چڑھاؤ۔“ جِیں ویلے پِیلاطُس ڈِٹھا جو کُجھ نئیں بنڑدا بلکہ اُلٹا ہنگامہ تھیوݨ لگ پئے تاں اُوں پانڑی گِھن تے لوکاں دے سامنڑے آپنڑے ہتھ دھوتے، تے آکھیا، ”مَیں اِیں راستباز دے خون کنُوں بےقصُور ہاں۔ تُساں جانڑو۔“ سارے لوکاں جواب ڈِتا، ”اِیندا خون ساڈے اُتے تے ساڈی نسل دی گردن اُتے!“ وَل پِیلاطُس اُنہاں کیتے برابّا کُوں چھوڑ ڈِتا تے یسُوع کُوں کوڑے مروا تے مصلُوب کرݨ کیتے سپاہیاں دے حوالے کر ڈِتا۔ وَل گورنر دے سپاہی یسُوع کُوں قلعہ دے اندر گِھن گئے تے پلٹن دے سپاہیاں اُونکُوں چارے پاسُوں گھیر گِھدا۔ تے اُوندے کپڑے لہا تے اُونکُوں رتّے رنگ دا چوغہ پوایا۔ وَل کنڈیاں دا تاج بنڑا تے اُوندے سر اُتے رکھیا تے اُوندے سجے ہتھ ءچ ہِک کانا پکڑوا ڈِتا تے اُوندے سامنڑے گوڈے ٹیک تے اُوندا مذاق بنڑاوݨ لگ پئے جو ”یہُودیاں دے بادشاہ! آداب۔“ تے اُوندے اُتے تُھکیا تے اُوہو کانا گِھن تے اُوندے سر اُتے مارݨ لگے۔ جِیں ویلے اُوندا مذاق بنڑا گِھدا تاں اُوندے اُتوں چوغہ لہا تے وَل اُوندے آپنڑے کپڑے اُونکُوں پوائے تے اُونکُوں مصلُوب کرݨ کیتے گِھن گئے۔ جِیں ویلے باہر آئے تاں اُنہاں کُوں کُرین شہر دا ہِک بندہ مِلیا جِیندا ناں شمعون ہا۔ اُنہاں ونگار ءچ اُونکُوں پکڑیا جو او یسُوع دی صلیب چاوے، تے گُلگُتا ناں دی جاہ اُتے پُجے، جیہڑی کھوپڑی دی جاہ اکھویندی ہے۔ اُتھاں اُنہاں یسُوع کُوں کوئی کوڑی شے رَلیا ہویا انگُور دا رَس پِیوݨ کیتے ڈِتا پر اُوں چکھ تے اُونکُوں پِیوݨ تُوں اِنکار کر ڈِتا۔ سپاہیاں یسُوع کُوں مصلُوب کیتا تے پرچی پا تے اُوندے کپڑے آپس ءچ وَنڈ گِھدے۔ وَل اُتھاں بہہ تے اُوندی نِگرانی کرݨ لگے۔ اُوندا اِلزام لِکھ تے اُوندے سر اُتوں صلیب اُتے لا ڈِتا جو ”ایہ یہُودیاں دا بادشاہ یسُوع ہے۔“ اُوں ویلے اُوندے نال ڈُو ڈاکو وی مصلُوب تھئے، ہِک سجے تے ہِک کھبے پاسُوں۔ اُتھوں کنُوں لنگھنڑ آلے سر ہِلا ہِلا تے اُونکُوں لعن طعن کریندے تے اکھیندے ہَن، ”ہیکل کُوں ڈھا تے ترے ڈینہہ ءچ بنڑاوݨ آلے! آپنڑے آپ کُوں بچا۔ جے تُوں خُدا دا پوتر ہیں تاں صلیب تُوں لہہ آ۔“ اِینویں ای سردار کاہِن وی شریعت دے عالماں تے بزُرگاں نال رَل تے اُوندا مذاق بنڑیندے ہوئے آدھے ہَن، ”اِیں ڈُوجھیاں کُوں بچائے پر آپنڑے آپ کُوں نئیں بچا سگدا۔ جے ایہ اِسرائیل دا بادشاہ ہے تاں ہُنڑیں صلیب تُوں لہہ آوے۔ وَل اساں اِیندے اُتے اِیمان گِھن آسُوں۔ اِیندا بھروسا خُدا اُتے ہے۔ جے او اِینکُوں چاہندے تاں ہُنڑ وی اِینکُوں بچا گِھنے، کیوں جو اِیں آکھیا ہا جو مَیں خُدا دا پوتر ہاں۔“ اِینویں ای ڈاکو وی جیہڑے اُوندے نال مصلُوب تھئے ہَن، اُونکُوں لعن طعن کریندے ہَن۔ ڈوپہر کنُوں گِھن تے تریجھے پہر تئیں سارے مُلک ءچ اندھارا چھایا ریہا۔ تریجھے پہر دے نیڑے یسُوع اُچی اواز ءچ آکھیا، ”ایلی، ایلی، لما شبقتنی ؟“ جِیندا مطلب ہے، ”میڈے خُدا! میڈے خُدا! تُوں میکُوں کیوں چھوڑ ڈِتے؟“ جیہڑے لوک اُتھاں کھڑے ہَن اُنہاں ءچوں کُجھ ایہ سُنڑ تے آکھیا جو ”ایہ تاں ایلیّاہ نبی کُوں سڈیندے۔“ تے اُنہاں ءچوں ہِک بندہ فوراً بھج تے ہِک سپنج کُوں انگُور دے سِرکے ءچ بوڈ تے گِھن آیا تے اُونکُوں ہِک کانے اُتے رکھ تے اُونکُوں چُسایا۔ پر باقی لوکاں آکھیا، ”کھڑ ونجو۔ ڈیکھوں، جو ایلیّاہ اُونکُوں بچاوݨ کیتے آندے یا نئیں۔“ وَل یسُوع وڈے زور نال چِلا تے جان ڈے ڈِتی۔ تے ہیکل دا پڑدہ اُتوں کنُوں تلے تئیں پھٹ تے ڈُو ٹوٹے تھی گِیا تے زمین کمب گئی تے چٹاناں تِڑک گئیاں۔ تے قبراں کُھل گئیاں تے بہُوں سارے مُقدّس لوک جیہڑے مر گئے ہَن، زندہ تھی گئے۔ یسُوع دے زندہ تھیوݨ تُوں بعد او قبراں ءچوں نِکل تے مُقدّس شہر ءچ گئے تے بہُوں سارے لوکاں کُوں ڈِکھالی ڈِتے۔ جِیں ویلے صوبیدار تے اُوندے ساتھی جیہڑے یسُوع دی نِگرانی کریندے پئے ہَن، زلزلہ تے سارا واقعہ ڈِٹھا تاں بہُوں ای ڈر تے آکھنڑ لگے جو ”سچ مُچ ایہ خُدا دا پوتر ہا۔“ تے اُتھاں بہُوں ساریاں تریمتاں جیہڑیاں گلیل کنُوں یسُوع دی خدمت کریندیاں ہوئیاں اُوندے پِچُھوں پِچُھوں آئیاں ہَن، پرے کنُوں ڈیدھیاں پئیاں ہَن۔ اُنہاں ءچ مریم مگدلینی ہئی، تے یعقُوب تے یوسیس دی ماء مریم تے زبدی دے پوتراں دی ماء۔ جِیں ویلے شام تھئی تاں ارِمَتِیاہ شہر دا راہوݨ آلا یُوسف ناں دا ہِک امیر بندہ آیا جیہڑا خود وی یسُوع دا شاگرد ہا۔ اُوں پِیلاطُس دے کولھ وَنج تے یسُوع دی لاش منگی تے پِیلاطُس ڈے ڈیوݨ دا حُکم ڈِتا۔ یُوسف لاش کُوں گِھن تے ہِک صاف لینن دی چادر ءچ ولھیٹیا۔ تے اُونکُوں آپنڑی نوِیں قبر ءچ جیہڑی اُوں چٹان ءچ کُھدوائی ہئی رکھ ڈِتا۔ وَل او ہِک وڈا پتھر قبر دے مُنہ اُتے ریڑھ تے چلیا گِیا۔ مریم مگدلینی تے ڈُوجھی مریم اُتھاں قبر دے سامنڑے بیٹھیاں ہَن۔ اگلے ڈینہہ جیہڑا سبت دا ڈینہہ ہا، سردار کاہِناں تے فریسیاں رَل تے پِیلاطُس دے کولھ وَنج تے آکھیا، ”سائیں! ساکُوں یاد ہے جو اُوں دوکھے باز آپنڑے زندہ ہوندے آکھیا ہا جو مَیں ترے ڈینہہ بعد زندہ تھی ویساں۔ اِیں واسطے حُکم ڈے جو تریجھے ڈینہہ تئیں قبر دی نِگرانی کیتی ونجے۔ کِتھائیں اِینویں نہ تھیوے جو اُوندے شاگرد آ تے لاش کُوں چوری کر تے گِھن ونجنڑ تے لوکاں کُوں آکھ ڈیوݨ جو او مُردیاں ءچوں زندہ تھی گِیا ہے، تے ایہ بعد دا دوکھا پہلے آلے دوکھے کنُوں وی بُرا ہووے۔“ پِیلاطُس جواب ڈِتا، ”تُہاڈے کولھ پہرے دار ہِن پئے، اُنہاں کُوں گِھن ونجو تے جِتھاں تئیں تھی سگے قبر دی نِگرانی کرو۔“ بس او پہرے داراں کُوں نال گِھن تے گئے تے پتھر اُتے مُہر لا تے قبر دی نِگرانی کیتی۔ سبت دے بعد ہفتے دے پہلے ڈینہہ سِجھ اُبھرݨ تُوں پہلے مریم مگدلینی تے ڈُوجھی مریم قبر کُوں ڈیکھنڑ آئیاں۔ تے ڈیکھو ہِک وڈا زلزلہ آیا کیوں جو رب دا فرشتہ اسمان کنُوں لتھا تے قبر دے کولھ وَنج تے پتھر کُوں ریڑھ ڈِتا تے اُوندے اُتے بہہ گِیا۔ اُوندی شکل بجلی وانگُوں ہئی تے اُوندے کپڑے برف وانگُوں چِٹے ہَن۔ اُوندے ڈر تُوں پہرے دار کمب گئے تے مُردے وانگُوں تھی گئے۔ فرشتے عورتاں کُوں آکھیا، ”نہ ڈرو۔ مَیں جانڑدا ہاں جو تُساں یسُوع کُوں گولھیندیاں ہیوے جیہڑا مصلُوب تھیّا ہا۔ او اِتھاں کائنی کیوں جو جِینویں اُوں آکھیا ہا زندہ تھی گئے۔ آؤ ڈیکھو، او جاہ جِتھاں او پِیا ہا۔ تے جلدی وَنج تے اُوندے شاگرداں کُوں آکھو جو او مُردیاں ءچوں زندہ تھی گئے تے تُہاڈے کنُوں پہلے گلیل کُوں ویسی۔ تُساں اُونکُوں اُتھاں ڈیکھسو۔ ڈیکھو مَیں تُہاکُوں ڈسا ڈِتے۔“ او ڈر تے وڈی خوشی نال قبر کنُوں فوراً باہر آئیاں تے بھجدِیاں بھجدِیاں گئیاں تاں جو شاگرداں کُوں خبر پُچاوݨ۔ تے ڈیکھو یسُوع اُنہاں کُوں مِلیا تے آکھیا، ”سلام!“ اُنہاں کولھ آ تے اُوندے پیر پکڑ گِھدے تے اُونکُوں سجدہ کیتا۔ وَل یسُوع اُنہاں کُوں آکھیا، ”نہ ڈرو۔ ونجو میڈے بِھرانواں کُوں آکھو جو گلیل کُوں چلے ونجنڑ۔ اُتھاں میکُوں ڈیکھسن۔“ جِیں ویلے او عورتاں ویندیاں پئیاں ہَن تاں پہرے داراں ءچوں کُجھ شہر گئے تے سردار کاہِناں کُوں سارا واقعہ سُنڑایا۔ اُنہاں بزُرگاں نال صلاح کیتی تے سپاہیاں کُوں ہِک وڈی رقم ڈے تے آکھیا، ”تُساں ایہ اکھائے جو رات کُوں جِیں ویلے اساں سُتے پئے ہسے تے اُوندے شاگرد آ تے اُونکُوں چوری گِھن گئے۔ تے جے ایہ گالھ گورنر دے کَن تئیں پُجی تاں اساں اُونکُوں سمجھا تے تُہاکُوں خطرے تُوں بچا گِھنسوں۔“ بس سپاہیاں رقم گِھن گِھدی تے جِینویں اُنہاں کُوں سِکھایا گِیا ہا اُونویں ای کیتا۔ ایہ گالھ اَج تئیں یہُودیاں ءچ مشہور ہے۔ وَل یارہاں شاگرد گلیل گئے تے اُوں پہاڑ اُتے جمع تھئے جیہڑا یسُوع اُنہاں کیتے مقرر کیتا ہا۔ اُنہاں اُونکُوں ڈیکھ تے سجدہ کیتا پر کُجھ شک کیتا۔ یسُوع اُنہاں دے کولھ آ تے اُنہاں کُوں آکھنڑ لگا، ”اسمان تے زمین دا کُل اِختیار میکُوں ڈِتا گِیا ہے۔ اِیں واسطے تُساں ونجو تے ساریاں قوماں کُوں شاگرد بنڑاؤ تے اُنہاں کُوں باپ تے بیٹے تے رُوح القُدس دے ناں ءچ بپتسمہ ڈیؤ۔ تے اُنہاں کُوں ایہ تعلیم ڈیؤ جو اُنہاں سبھ گالھیں اُتے عمل کرݨ جِنہاں دا مَیں تُہاکُوں حُکم ڈِتے، تے ڈیکھو مَیں دُنیا دے آخر تئیں ہمیشاں تُہاڈے نال ہاں۔“ خُدا دے پوتر یسُوع مسیح دے بارے ءچ خوشخبری دا شروع ایہ ہے۔ جِینویں یسعیاہ نبی دے صحیفے ءچ لِکھیا ہے، ”ڈیکھ مَیں آپنڑا پیغمبر تیڈے اگُوں بھجیندا ہاں جیہڑا تیڈی راہ تیار کریسی ۔ بیابان ءچ ہکل ڈیوݨ آلے دی اواز آندی ہے جو ’رب کیتے راہ تیار کرو۔ اُوندے کیتے رستے سِدھے بنڑاؤ ‘۔“ یُوحنّا بپتسمہ ڈیوݨ آلا آیا تے بیابان ءچ تبلیغ کرݨ لگا جو گُناہاں دی معافی کیتے توبہ کر تے بپتسمہ گِھنو۔ یہُودیہ دے علاقے تے یروشلیم دے سارے لوک اُوندے کولھ آئے تے آپنڑے گُناہاں دا اِقرار کر تے یردن دریا ءچ اُوں کنُوں بپتسمہ گِھدا۔ یُوحنّا اُٹھ دے والاں دا لباس پَیندا تے چمڑے دا پٹکا آپنڑی چیل نال بدھی رکھیندا تے ٹِڈیاں تے جنگلی ماکھی کھاندا ہا ۔ تے ایہ تبلیغ کریندا ہا جو ”میڈے بعد او بندہ آوݨ آلا ہے جیہڑا مَیں کنُوں زیادہ زور آور ہے۔ مَیں اِیں لائق نئیں جو جُھک تے اُوندی جُتی دا تسمہ کھول سگاں۔ مَیں تاں تُہاکُوں پانڑی نال بپتسمہ ڈیندا ہاں پر او تُہاکُوں رُوح القُدس نال بپتسمہ ڈیسی۔“ اُنہاں ڈینہاں ءچ یسُوع گلیل دے شہر ناصرت کنُوں آ تے یُوحنّا تُوں یردن دے دریا ءچ بپتسمہ گِھدا۔ جِیں ویلے او پانڑی ءچوں نِکل تے باہر آیا تاں اُوں اسمان کُوں پھٹدے تے رُوح القُدس کُوں کبوتر وانگُوں آپنڑے اُتے لہندے ڈِٹھا۔ تے اسمان کنُوں ایہ اواز آئی جو ”تُوں میڈا پیارا پوتر ہیں، مَیں تَیں کنُوں بہُوں خوش ہاں۔“ اِیں تُوں فوراً بعد رُوح القُدس اُونکُوں بیابان ءچ بھیج ڈِتا۔ او چالیہہ ڈینہہ تئیں بیابان ءچ ریہا تے شیطان کنُوں ازمایا گِیا۔ او جنگلی جانوراں دے نال ریہا تے فرشتے اُوندی خدمت کریندے ریہے۔ وَل یُوحنّا دے پکڑوائے ونجنڑ دے بعد یسُوع گلیل ءچ آیا تے خُدا دی بادشاہی دی خوشخبری دی تبلیغ کیتی۔ او آکھنڑ لگا جو ”وقت پُورا تھی گِیا ہے تے خُدا دی بادشاہی نیڑے آ گئی ہے۔ توبہ کرو تے خوشخبری اُتے اِیمان گِھن آؤ۔“ گلیل دی جھیل دے کنڈے کنڈے ٹُردے ہوئے یسُوع شمعون تے شمعون دے بِھرا اندریاس کُوں ڈِٹھا جیہڑے جھیل ءچ جال سٹیندے پئے ہَن، کیوں جو او مچھیرے ہَن۔ یسُوع اُنہاں کُوں آکھیا، ”میڈے پِچُھوں آؤ تے مَیں تُہاکُوں خُدا کیتے بندے پکڑن آلا بنڑیساں۔“ او فوراً آپنڑے جال چھوڑ تے اُوندے پِچُھوں ٹُر پئے۔ تھوڑا اگُوں وَنج تے اُوں زبدی دے پوتراں یعقُوب تے یُوحنّا کُوں ڈِٹھا جیہڑے آپنڑی کشتی ءچ جالاں دی مرمت کریندے پئے ہَن۔ اُوں اُنہاں کُوں ڈیدھے ای سڈ گِھدا تے او آپنڑے پِیُو کُوں کشتی اُتے مزدُوراں دے نال چھوڑ تے اُوندے پِچُھوں ٹُر پئے۔ وَل او کفرنحُوم ءچ داخل تھئے تے جِینویں ای سبت دا ڈینہہ آیا تاں یسُوع عبادت خانہ ءچ وَنج تے تعلیم ڈیوݨ لگا۔ لوک اُوندی تعلیم سُنڑ تے حیران تھی گئے کیوں جو او اُنہاں کُوں شریعت دے عالماں وانگُوں نئیں بلکہ اِختیار نال تعلیم ڈیندا ہا۔ اُوں ویلے عبادت خانہ ءچ ہِک بندہ ہا جیندے ءچ بدرُوح ہئی۔ او ایہ آدھے ہوئے چیخاں مارݨ لگ پِیا جو ”یسُوع ناصری! ساکُوں تیڈے نال کیا کم؟ کیا تُوں ساکُوں ہلاک کرݨ آئیں؟ مَیں جانڑدا ہاں جو تُوں کوݨ ہیں؟ تُوں خُدا دا قدُّوس ہیں۔“ یسُوع اُونکُوں دَڑکا ڈے تے آکھیا، ”چُپ رہ تے اِیں بندے ءچوں نِکل وَنج۔“ بس او بدرُوح اُوں بندے کُوں بُری طرحاں مروڑ تے وڈے زور نال چیخ مار تے اُوندے ءچوں نِکل گئی۔ سارے لوک حیران تھئے تے ہِک ڈُوجھے کُوں آکھنڑ لگے ”ایہ کیا ہے؟ ایہ تاں نوِیں تعلیم ہے جیہڑی اِختیار نال ڈِتی ویندی پئی ہے۔ او بدرُوحاں کُوں حُکم ڈیندے تے او اُوندا حُکم منیندیاں ہِن۔“ یسُوع دی مشہوری بہُوں جلدی گلیل دے چودھارُوں ہر جاہ تھی گئی۔ او عبادت خانہ ءچوں باہر نِکلدے ای یعقُوب تے یُوحنّا دے نال شمعون تے اندریاس دے گھر آئے۔ شمعون دی سس کُوں تیز بُخار ہا تے اُنہاں یسُوع کُوں اُوندی خبر ڈِتی۔ اُوں کولھ وَنج تے اُوندا ہتھ پکڑ تے اُونکُوں کھڑا کیتا۔ اُوندا بُخار لہہ گِیا تے او اُوندی خدمت کرݨ لگ پئی۔ شام ویلے سِجھ لہندے ای لوک اُتھوں دے سارے بیماراں کُوں تے اُنہاں کُوں جِنہاں ءچ بدرُوحاں ہَن، اُوندے کولھ گِھن آئے۔ تے سارا شہر دروازے اُتے کٹھا تھی گِیا۔ اُوں بہُوں سارے لوکاں کُوں اُنہاں دیاں بیماریاں کنُوں شِفا بخشی تے بہُوں ساریاں بدرُوحاں کُوں کڈھ ڈِتا، پر بدرُوحاں کُوں بولنڑ نہ ڈِتا کیوں جو او جانڑدیاں ہَن جو او کوݨ ہے۔ صُبح سویلے جِیں ویلے اندھارا ای ہا، یسُوع اُٹھی تے گھر کنُوں باہر ہِک ویران جاہ تے وَنج تے دُعا کیتی۔ تے شمعون تے اُوندے ساتھی اُونکُوں گولھنڑ گئے۔ جِیں ویلے او اُنہاں کُوں مِلیا تاں او آکھنڑ لگے جو ”سارے لوک تُہاکُوں گولھیندے پئے ہِن۔“ پر اُوں آکھیا، ”آؤ اساں آسُوں پاسُوں دیاں وستیاں ءچ جُلوں تاں جو مَیں اُتھاں وی تبلیغ کراں کیوں جو مَیں اِیہو کم کرݨ کیتے نِکلیا ہاں۔“ تے او سارے گلیل ءچ اُنہاں دے عبادت خانیاں ءچ تبلیغ کریندا تے بدرُوحاں کُوں کڈھیندا ریہا۔ ہِک بندہ جِینکُوں کوڑھ دی بیماری ہئی، اُوندے کولھ آیا تے اُوندے اگُوں گوڈے ٹیک تے اُوندی مِنت کیتی ”جے تُساں چاہو تاں میکُوں پاک صاف کر سگدے ہیوے۔“ یسُوع اُوندے اُتے ترس کھا تے آپنڑا ہتھ ودھایا تے اُوندے اُتے رکھ تے آکھیا، ”مَیں چاہندا ہاں، پاک صاف تھی وَنج۔“ اُوں ویلے اُوندا کوڑھ ٹھیک تھی گِیا تے او پاک صاف تھی گِیا۔ یسُوع اُونکُوں اُتھوں بھیج ڈِتا تے چِتا تے اُونکُوں آکھیا، ”خبردار! اِیں گالھ دا کہیں نال ذِکر نہ کریں، بلکہ وَنج تے آپنڑے آپ کُوں کاہِن کُوں ڈِکھا تے جیہڑے نذرانے مُوسیٰ مقرر کیتے ہِن، او آپنڑی پاکیزگی کیتے پیش کر، تاں جو اُنہاں کیتے گواہی ہووے ۔“ پر او اُتھوں نِکل تے ہر کہیں کُوں ڈساوݨ لگا تے اِیں گالھ کُوں اِتنا مشہور کر ڈِتا جو یسُوع کہیں وی شہر ءچ ظاہری طور تے داخل نہ تھی سگیا، بلکہ باہر ویران جاہیں ءچ ریہا تے لوک چودھارُوں اُوندے کولھ آندے ہَن۔ کئی ڈینہاں بعد جِیں ویلے یسُوع ولا کفرنحُوم ءچ آیا تاں لوکاں سُنڑیا جو او گھر ءچ ہے۔ وَل اِتی لوک جمع تھی گئے جو دروازے دے نال وی جاہ نہ بچی تے او اُنہاں کُوں کلام سُنڑیندا پِیا ہا۔ تے لوک ہِک فالج دے مریض کُوں چار بندیاں کنُوں چوا تے اُوندے کولھ گِھن آئے۔ پر جِیں ویلے او اُوں بیمار کُوں بِھیڑ دی وجہ کنُوں اُوندے کولھ نہ گِھن آ سگے تاں چھت اُتے چڑھ گئے، تے اُنہاں چھت دا او حصہ اُکھیڑ ڈِتا جِتھاں یسُوع ہا تے اُونکُوں اُدھیڑ تے اُوں کَھٹ کُوں جیندے اُتے فالج دا مریض ہا لٹکا ڈِتا۔ یسُوع اُنہاں لوکاں دا اِیمان ڈیکھ تے فالج دے مریض کُوں آکھیا، ”پوتر، تیڈے گُناہ معاف تھئے۔“ پر شریعت دے کُجھ عالم جیہڑے اُتھاں بیٹھے ہَن، آپنڑے دِلاں ءچ سوچنڑ لگے جو ”ایہ کیوں اِینویں آدھے؟ کُفر بَکدے۔ خُدا دے سِوا کوݨ گُناہ معاف کر سگدے؟“ یسُوع آپنڑی رُوح ءچ فوراً جاݨ گِھدا جو او آپنڑے دِلاں ءچ کیا سوچیندے ہِن تے اُنہاں کُوں آکھیا، ”تُساں کیوں آپنڑے دِلاں ءچ ایہ گالھیں سوچیندے ہیوے؟ کیا فالج دے مریض کُوں ایہ آکھنڑ اسان ہے جو ’تیڈے گُناہ معاف تھئے‘ یا ایہ آکھنڑ جو ’اُٹھی، آپنڑی کَھٹ چا تے ٹُر پِھر؟‘ پر مَیں چاہندا ہاں جو تُہاکُوں پتہ لگے جو اِبنِ آدم کُوں زمین اُتے گُناہ معاف کرݨ دا اِختیار ہے۔“ وَل اُوں فالج دے مریض کُوں آکھیا، ”مَیں تیکُوں آدھا ہاں جو اُٹھی تے آپنڑی کَھٹ چا تے گھر لگا وَنج۔“ او اُٹھیا تے فوراً کَھٹ چا تے اُنہاں ساریاں دے سامنڑے لگا گِیا۔ او سارے حیران تھی گئے تے خُدا دی حمد کر تے آکھنڑ لگے، ”اساں اِینویں پہلے کڈھائیں نئیں ڈِٹھا۔“ یسُوع ولا جھیل دے کنارے اُتے گِیا تاں اُوندے چودھارُوں ہِک وڈی بِھیڑ لگ گئی تے او اُنہاں کُوں تعلیم ڈیوݨ لگا۔ اُتھوں لنگھدے ہوئے اُوں حلفئی دے پوتر لاوی کُوں محصُول دی چوکی اُتے بیٹھے ڈِٹھا تے اُونکُوں آکھیا، ”میڈے پِچُھوں تھی پو۔“ تے او اُٹھی تے اُوندے پِچُھوں تھی پِیا۔ اِیندے بعد یسُوع لاوی دے گھر ءچ کھانڑا کھاوݨ بیٹھا تاں بہُوں سارے محصُول گِھننڑ آلے تے گُنہگار لوک یسُوع تے اُوندے شاگرداں نال کھاوݨ بیٹھے، کیوں جو یسُوع دے پیروکار بہُوں تھی گئے ہَن۔ فریسیاں دے شریعت دے عالماں یسُوع کُوں گُنہگاراں تے محصُول گِھننڑ آلیاں نال کھاندے ڈِٹھا تاں اُوندے شاگرداں کُوں آکھیا، ”ایہ محصُول گِھننڑ آلیاں تے گُنہگاراں دے نال کیوں کھاندے پِیندے۔“ یسُوع ایہ سُنڑ تے اُنہاں کُوں آکھیا، ”تندرُستاں کُوں حکیم دی لوڑ نئیں بلکہ بیماراں کُوں۔ مَیں راستبازاں کُوں نئیں بلکہ گُنہگاراں کُوں سڈݨ آیا ہاں۔“ یُوحنّا دے شاگرد تے فریسی روزے نال ہَن۔ کُجھ لوک یسُوع کولھ آئے تے آکھیا، ”کیا وجہ ہے جو یُوحنّا تے فریسیاں دے شاگرد تاں روزہ رکھیندے ہِن پر تُہاڈے شاگرد روزہ نئیں رکھیندے؟“ یسُوع اُنہاں کُوں جواب ڈِتا، ”کیا براتی گھوٹ دی موجودگی ءچ روزہ رکھ سگدے ہِن؟ جِیں ویلے تئیں گھوٹ اُنہاں دے نال ہے او روزہ نئیں رکھ سگدے۔ پر او ڈینہہ آسن جڈاں گھوٹ اُنہاں تُوں جُدا کیتا ویسی وَل او روزہ رکھیسن۔ پُرانڑے کپڑے اُتے نویں کپڑے دی ٹاکی کوئی نئیں لیندا، نہ تاں نواں کپڑا سُنگڑ تے پُرانڑے کپڑے ءچوں کُجھ چھیک گِھنسی تے او زیادہ پھٹ ویسی۔ تے انگُور دے تازہ رَس کُوں پُرانڑیاں مشکاں ءچ کوئی نئیں بھریندا۔ نہ تاں مشکاں رَس پکنڑ نال پھٹ ویسن تے رَس تے مشکاں ڈوہائیں برباد تھی ویسن بلکہ نویں رَس کُوں نوِیاں مشکاں ءچ بھریندن۔“ سبت دے ڈینہہ یسُوع رَڑھیں ءچوں لنگھدا پِیا ہا تے اُوندے شاگرد ٹُردے ٹُردے کھاوݨ کیتے سِٹے تروڑن لگ پئے۔ فریسیاں اُونکُوں آکھیا، ”ڈیکھ ایہ ایجھا کم کیوں کریندے ہِن جیہڑا سبت دے ڈینہہ جائز نئیں ؟“ اُوں جواب ڈِتا، ”کیا تُساں کڈھائیں نئیں پڑھیا جو جِیں ویلے داؤد تے اُوندے ساتھیاں کُوں ضرورت تھئی تے اُنہاں کُوں بُکھ لگی، تاں اُوں کیا کیتا؟ او کِینویں کاہِن ِ اعظم ابیاتر دے زمانے ءچ خُدا دے گھر ءچ گِیا، تے نذر دیاں روٹیاں گِھن تے آپ وی کھادیاں تے آپنڑے ساتھیاں کُوں وی کھاوݨ کیتے ڈِتیاں، بھانویں ایہ روٹیاں کاہِناں دے علاوہ کہیں بئے کُوں کھاوݨ جائز نہ ہا ؟“ وَل یسُوع اُنہاں کُوں آکھیا، ”سبت اِنسان کیتے بنڑایا گِیا ہے نہ جو اِنسان سبت کیتے۔ بس اِبنِ آدم سبت دا وی مالک ہے۔“ یسُوع ولا عبادت خانہ ءچ داخل تھیّا تے اُتھاں ہِک بندہ ہا جِیندا ہِک ہتھ سُکیا ہویا ہا۔ فریسی اُوندی تاڑ ءچ ہَن جو جے او سبت دے ڈینہہ اُونکُوں شِفا ڈیوے تاں اُوندے اُتے اِلزام لاوݨ۔ یسُوع سُکے ہتھ آلے بندے کُوں آکھیا، ”اُٹھی تے اِتھاں اَدھ ءچ کھڑا تھی۔“ وَل اُنہاں کُوں آکھیا، ”کیا سبت دے ڈینہہ نیکی کرݨ جائز ہے یا بدی کرݨ؟ جان بچاوݨ یا قتل کرݨ؟“ او چُپ ریہے۔ یسُوع اُنہاں دی سخت دِلی دے سببّوں بہُوں ڈُکھی تھیّا۔ اُوں اُنہاں کُوں کاوڑ نال ڈِٹھا تے اُوں بندے کُوں آکھیا، ”آپنڑا ہتھ ودھا۔“ اُوں ودھایا تے اُوندا ہتھ ٹھیک تھی گِیا۔ وَل فریسی فوراً باہر چلے گئے تے ہیرودیس دے پیروکاراں نال مشورہ کرݨ لگے جو اُونکُوں کِینویں ہلاک کرݨ۔ وَل یسُوع آپنڑے شاگرداں نال جھیل دو چلیا گِیا تے گلیل کنُوں لوکاں دی ہِک وڈی بِھیڑ پِچُھوں تھی پئی۔ تے یہُودیہ تے یروشلیم تے اِدُومَیہ تے یردن دریا دے پار تے صور تے صیدا دے علاقے کنُوں ہِک بہُوں وڈی بِھیڑ ایہ سُنڑ تے جو او کیجھے وڈے کم کریندے، اُوندے کولھ آئی۔ بس اُوں آپنڑے شاگرداں کُوں آکھیا، ”بِھیڑ دی وجہ کنُوں میڈے کیتے ہِک چھوٹی کشتی تیار رکھو، تاں جو او میکُوں دبا نہ سٹنڑ۔“ کیوں جو اُوں بہُوں لوکاں کُوں چنگا کیتا ہا اِیں واسطے جِتّی لوک سخت بیماریاں ءچ گرفتار ہَن، اُوندے اُتے ڈھاندے ہَن جو اُونکُوں ہتھ لا گِھننڑ۔ تے بدرُوحاں وی جیہڑے ویلے اُونکُوں ڈیدھیاں ہَن، اُوندے سامنڑے ڈھے تے چیخنڑ پے ویندیاں ہَن جو ”تُوں خُدا دا پوتر ہیں۔“ پر او اُنہاں کُوں سختی نال چِتا تے آدھا ہا جو ”میکُوں ظاہر نہ کرائے۔“ وَل یسُوع پہاڑ اُتے چڑھ گِیا تے جِنہاں کُوں آپ چاہندا ہا اُنہاں کُوں آپنڑے کولھ سڈیا تے او اُوندے کولھ آئے۔ اُوں بارہاں کُوں آپنڑے رسُول مقرر کیتا تاں جو اُوندے نال راہوݨ تے او اُنہاں کُوں تبلیغ کیتے بھیجے۔ اُوں اُنہاں کُوں بدرُوحاں کڈھنڑ دا اِختیار وی ڈِتا۔ او بارہاں ایہ ہِن: شمعون جِیندا ناں یسُوع پطرس رکھیا، تے یعقُوب تے اُوندا بِھرا یُوحنّا جیہڑے زبدی دے پوتر ہَن، (اُنہاں دا ناں یسُوع بُوانِرگِس یعنی گاج دے پوتر رکھیا،) تے اندریاس، تے فِلپُس، تے بَرتُلمائی، تے متّی، تے توما، تے حلفئی دا پوتر یعقُوب، تے تدّی، تے شمعون قنانی ، تے یہُوداہ اِسکریُوتی جئیں اُونکُوں پکڑوا وی ڈِتا۔ وَل یسُوع گھر ءچ آیا تے اِتی لوک کٹھے تھی گئے جو او کھانڑا وی نہ کھا سگے۔ جِیں ویلے اُوندے رشتہ داراں سُنڑیا تاں او اُونکُوں پکڑن کُوں نِکلے کیوں جو اُنہاں دا آکھنڑ ہا جو ”او آپنڑے ہوش ءچ نئیں۔“ تے شریعت دے جیہڑے عالم یروشلیم کنُوں آئے ہَن ایہ آدھے ہَن جو ”اُوندے نال بعل زبُول ہے۔ او بدرُوحاں دے سردار دی مدد نال بدرُوحاں کُوں کڈھیندے۔“ یسُوع اُنہاں کُوں آپنڑے کولھ سڈ تے مثالاں ءچ آکھنڑ لگا جو ”شیطان کُوں شیطان کِینویں کڈھ سگدے؟ تے جے کہیں بادشاہی ءچ پُھٹ پے ونجے تاں او قائم نئیں رہ سگدی۔ تے جے کہیں گھر ءچ پُھٹ پے ونجے تاں او قائم نئیں رہ سگدا۔ تے جے شیطان آپنڑا ای مخالف تھی تے آپنڑے اندر پُھٹ پاوے تاں او قائم نئیں رہ سگدا بلکہ اُوندا خاتمہ تھی ویسی۔ بلکہ کوئی بندہ کہیں زور آلے دے گھر ءچ وڑ تے اُوندا سامان نئیں لُٹ سگدا جِیں ویلے تئیں پہلے او اُوں زورآور کُوں بَدھ نہ گِھنے، وَل ای اُوندا گھر لُٹ گِھنسی۔ مَیں تُہاکُوں سچ آدھا ہاں جو اِنساناں دے سارے گُناہ تے کُفر جیہڑے او کریندے تے بَکدے ہِن معاف کیتے ویسن۔ پر جیہڑا رُوح القُدس دے خلاف کُفر بَکدے او کڈھائیں معافی نہ پے سی بلکہ ابدی گُناہ دا قصُوروار ہے۔“ یسُوع ایہ اِیں واسطے آکھیا کیوں جو او آدھے ہَن ”اُوندے ءچ بدرُوح ہے۔“ وَل یسُوع دی ماء تے اُوندے بِھرا آئے تے باہر کھڑے تھی تے اُونکُوں سڈوایا۔ لوک اُوندے آسُوں پاسُوں بیٹھے ہَن تے اُنہاں اُونکُوں آکھیا، ”ڈیکھ تُہاڈی ماء تے تُہاڈے بِھرا باہر کھڑے تُہاڈا پُچھدے ہِن۔“ اُوں اُنہاں کُوں ایہ جواب ڈِتا، ”میڈی ماء تے میڈے بِھرا کوݨ ہِن؟“ تے اُوں آپنڑے چودھارُوں بیٹھے ہوئے لوکاں دو نظر کر تے آکھیا، ”ڈیکھو میڈی ماء تے میڈے بِھرا ایہ ہِن۔ کیوں جو جیہڑا کوئی خُدا دی مرضی اُتے چلدے اُوہو میڈا بِھرا، میڈی بھینڑ تے میڈی ماء ہے۔“ یسُوع ولا جھیل دے کنارے تعلیم ڈیوݨ لگا۔ تے لوکاں دی ایجھی بِھیڑ لگ گئی جو او جھیل ءچ کھڑی ہِک کشتی اُتے وَنج بیٹھا، تے سبھ لوک جھیل دے کنارے اُتے کھڑے ریہے۔ او اُنہاں کُوں مثالاں ءچ بہُوں سارے گالھیں سِکھاوݨ لگا۔ تے اُوں اُنہاں کُوں ایہ تعلیم ڈِتی: ”سُنڑو، ہِک بیج رہاوݨ آلا بیج رہاوݨ نِکلیا۔ تے رہیندے ویلے کُجھ دانڑے راہ دے کنارے ڈھٹھے تے پکھیں آ تے اُنہاں کُوں چُگ گِھدا۔ کُجھ پتھریلی زمین اُتے ڈھٹھے جِتھاں مِٹی گھٹ ہئی تے زیادہ مِٹی نہ مِلنڑ دے سببّوں جلدی اُگ پئے۔ پر جِیں ویلے سِجھ نِکلیا تاں پودے سڑ گئے تے کیوں جو او جڑھ نہ پکڑ سگے، اِیں واسطے سُک گئے۔ کُجھ جھاڑیاں ءچ ڈھٹھے تے جھاڑیاں ودھ تے اُنہاں کُوں دبا گِھدا تے او پھل نہ گِھن آئے۔ تے کُجھ چنگی زمین اُتے ڈھٹھے تے رہیج پئے تے ودھ تے پھل گِھن آئے کوئی ترِیح گُنا، کوئی سَٹھ گُنا تے کوئی سو گُنا۔“ وَل اُوں آکھیا، ”جیندے کولھ سُنڑݨ دے کَن ہووݨ او سُنڑ گِھنے۔“ جِیں ویلے او کلھا ہا تاں اُوندے بارہاں شاگرداں تے ڈُوجھے ساتھیاں اُوں کنُوں اِنہاں مثالاں دے بارے ءچ پُچھیا۔ اُوں اُنہاں کُوں آکھیا جو ”تُہاڈے اُتے خُدا دی بادشاہی دا راز ظاہر کیتا گِیا ہے پر باہر آلیاں کیتے سارے گالھیں مثالاں ءچ آکھیاں ویندیاں ہِن تاں جو، ’او ڈیکھسن تاں سہی پر جاݨ نہ سگسن تے سُنڑسن تاں سہی پر سمجھ نہ سگسن اِینویں نہ تھیوے جو او میڈے دو رجُوع گِھن آوݨ تے معافی پاوݨ ‘۔“ وَل یسُوع اُنہاں کُوں آکھیا، ”کیا تُساں ایہ مثال نئیں سمجھے؟ وَل باقی مثالاں کِینویں سمجھ سو؟ رہاوݨ آلا خُدا دا کلام رہیندے۔ راہ دے کنارے آلے دانڑے او لوک ہِن جیہڑے کلام سُنڑدے تاں ہِن پر شیطان فوراً کلام کُوں کڈھ تے گِھن ویندے جیہڑا اُنہاں دے دِلاں ءچ رہایا گِیا ہا۔ اِینویں ای جیہڑے پتھریلی زمین ءچ رہائے گئے، او لوک ہِن جیہڑے کلام کُوں سُنڑدے ای خوشی نال قبول کر گِھندے ہِن۔ پر آپنڑے اندر جڑھ نہ رکھنڑ پارُوں دیر تئیں قائم نئیں راہندے تے جِیں ویلے کلام دے سببّوں مُصیبت یا تنگی آندی ہے تاں فوراً ٹھوکر کھاندے ہِن۔ تے جھاڑیاں ءچ ڈھاوݨ آلے بیج او لوک ہِن جیہڑے کلام کُوں سُنڑدے ہِن۔ پر دُنیا دی فِکر تے دولت دا فریب تے ڈُوجھیاں چیزاں دا لالچ آ تے کلام کُوں دبا ڈیندے تے اُونکُوں پھل نئیں لگ دا۔ تے چنگی زمین ءچ ڈھاوݨ آلے بیج وانگُوں او لوک ہِن جیہڑے کلام کُوں سُنڑدے ہِن تے قبول کریندے ہِن تے پھل گِھن آندے ہِن۔ کوئی ترِیح گُنا، کوئی سَٹھ گُنا، کوئی سو گُنا۔“ یسُوع اُنہاں کُوں ایہ وی آکھیا، ”کیا ڈیوا اِیں کیتے گِھن آندے ہِن جو کہیں تھاں یا پلنگ تلے رکھ ڈِتا ونجے؟ کیا اِیں واسطے نئیں جو ڈیواٹ اُتے رکھیا ونجے؟ کیوں جو کوئی چیز لُکی ہوئی نئیں جیہڑی ظاہر نہ کیتی ویسی تے کوئی بھید ایجھا نئیں جیہڑا کھولیا نہ ویسی۔ جیندے کولھ سُنڑݨ آلے کَن ہووݨ، او سُنڑ گِھنے۔“ وَل اُوں اُنہاں کُوں آکھیا، ”جیہڑا کُجھ تُساں سُنڑدے ہیوے غور نال سُنڑو۔ جیہڑے تھاں نال تُساں نپیندے ہیوے اُوندے نال ای تُہاڈے کیتے ناپیا ویسی بلکہ تُہاکُوں زیادہ ڈِتا ویسی ۔ کیوں جو جیندے کولھ ہے اُونکُوں تاں ڈِتا ویسی پر جیندے کولھ کُجھ نئیں، اُوندے کنُوں او وی گِھن گِھدا ویسی جیہڑا اُوندے کولھ ہے۔“ وَل یسُوع آکھیا، ”خُدا دی بادشاہی اِینویں ہے، جِینویں کوئی بندہ زمین ءچ بیج سٹیندے۔ ایہ بیج ڈینہہ رات اُگدا تے ودھدا راہندے، بھانویں رہاوݨ آلا سَم ونجے یا جاگدا راہوے۔ اُونکُوں اِیندا پتہ نئیں لگدا جو ایہ کِینویں تھیندے۔ زمین آپنڑے آپ پھل گِھن آندی ہے، پہلے پتر نِکلدے ہِن، ولا سِٹے تے ولا دانڑے بھریج ویندے ہِن۔ وَل جیہڑے ویلے دانڑے پک ویندے ہِن تاں او فوراً ڈاتری گِھن آندے کیوں جو رَڑھ کپنڑ دا ویلا آ گِیا ہے۔“ وَل یسُوع آکھیا، ”اساں خُدا دی بادشاہی کُوں کیندے نال تشبیہ ڈیؤں تے کیہڑی مثال نال اُونکُوں بیان کرُوں؟ او رائی دے دانڑے وانگُوں ہے جو جِیں ویلے رہایا ویندے تاں زمین دے سبھ بِیجاں کنُوں چھوٹا ہوندے پر جِیں ویلے رَہا یا گِیا تاں اُگ تے ساریاں بُوٹیاں کنُوں وڈا تھی ویندے تے اُوندیاں لڑیاں اِتی وڈیاں تھی ویندیاں ہِن جو ہوا دے پکھی اُوندی چھاں ءچ رہ سگدے ہِن۔“ یسُوع اُنہاں کُوں اِیں طرحاں دیاں بہُوں ساریاں مثالاں نال اُنہاں دی سمجھ دے مطابق کلام سُنڑیندا ہا تے بغیر مثال دے اُنہاں کُوں کُجھ نہ آدھا ہا۔ پر کلھیپے ءچ آپنڑے شاگرداں کُوں سبھ کُجھ سمجھا ڈیندا ہا۔ اُونہی ڈینہہ جِیں ویلے شام تھئی تاں اُوں شاگرداں کُوں آکھیا، ”آؤ جھیل دے پار جُلوں۔“ تے او بِھیڑ کُوں چھوڑ تے اُونکُوں جیہڑے حال ءچ او کشتی ءچ ہا، نال گِھن تے روانہ تھئے۔ کُجھ بئیاں کشتیاں وی اُنہاں دے نال ہَن۔ تے وڈی اندھاری گُھلی تے پانڑی دیاں چھلاں کشتی نال زور نال ٹکراوݨ لگ گئیاں تے اُوندے ءچ پانڑی بھریجنڑ لگا۔ پر یسُوع کشتی دے پِچھلے حصے ءچ ہِک گدّی اُتے سُتا پِیا ہا۔ بس اُنہاں اُونکُوں جگایا تے آکھیا، ”اُستاد! کیا تُہاکُوں پرواہ نئیں جو اساں ہلاک تھیندے پئے ہیں؟“ اُوں جاگ تے ہوا کُوں دَڑکا ڈِتا تے جھیل کُوں آکھیا، ”خاموش تھی! رُک وَنج!“ بس ہوا رُک گئی تے بالکل سکون تھی گِیا۔ وَل اُنہاں کُوں آکھیا، ”تُساں کیوں ڈر دے ہیوے؟ ہُنڑ تئیں اِیمان نئیں رکھیندے؟“ او حد کنُوں زیادہ ڈر گئے تے ہِک بئے کُوں آکھنڑ لگے، ”ایہ کوݨ ہے جِیندا حُکم ہوا تے پانڑی وی منیندے ہِن؟“ وَل او جھیل دے پار گراسینیاں دے علاقے ءچ پُجے۔ جِینویں ای یسُوع کشتی ءچوں لتھا، ہِک بندہ جیندے ءچ بدرُوح ہئی، قبرستان ءچوں نِکل تے اُونکُوں مِلیا۔ او قبراں ءچ راہندا ہا تے ہُنڑ کوئی اُونکُوں زنجیراں نال وی نہ بَدھ سگدا ہا۔ پہلے اُونکُوں اکثر بیڑیاں تے زنجیراں نال بَدھ تے رکھیا ویندا ہا، پر او زنجیراں کُوں تروڑ سٹیندا تے بیڑیاں دے ٹوٹے ٹوٹے کر ڈیندا ہا، تے کوئی اُونکُوں قابو ءچ نہ رکھ سگدا ہا۔ او ڈینہہ رات قبراں تے پہاڑاں ءچ پِھردا تے ہر ویلے چیخدا راہندا تے آپنڑے آپ کُوں پتھراں نال زخمی کر گِھندا ہا۔ او یسُوع کُوں پرے کنُوں ڈیکھ تے بھجیا تے اُونکُوں سجدہ کیتا۔ تے زور نال چیخدے ہوئے آکھیا، ”یسُوع، خُدا تعالیٰ دے پوتر! میکُوں تیڈے نال کیا کم؟ تیکُوں خُدا دا واسطہ، میکُوں عذاب ءچ نہ سَٹ۔“ کیوں جو یسُوع اُونکُوں آکھیا ہا، ”بدرُوح! اِیں بندے ءچوں باہر نِکل وَنج۔“ وَل یسُوع اُوں کنُوں پُچھیا، ”تیڈا ناں کیا ہے؟“ اُوں جواب ڈِتا، ”میڈا ناں لشکر ہے کیوں جو اساں بہُوں سارے ہاں۔“ وَل اُوں اُوندی بہُوں مِنت کیتی جو ”ساکُوں اِیں علاقے کنُوں باہر نہ بھیج۔“ اُتھاں پہاڑ اُتے سُؤراں دا ہِک وڈا اِجڑ چردا پِیا ہا۔ بدرُوحاں اُوندی مِنت کر تے آکھیا جو ”ساکُوں اُنہاں سُؤراں ءچ بھیج ڈے تاں جو اساں اُنہاں ءچ داخل تھی ونجُوں۔“ یسُوع اُنہاں کُوں اِجازت ڈِتی تے بدرُوحاں اُوں بندے ءچوں نِکل تے سُؤراں ءچ داخل تھی گئیاں۔ تے اُوں اِجڑ دے سارے سُؤر، جیہڑے تقریباً ڈُو ہزار ہَن، ریڑھ کنُوں بھجدے ہوئے جھیل ءچ وَنج ڈھٹھے تے بُڈ مرے۔ سُؤر چراوݨ آلے اُتھوں کنُوں بھج پئے تے شہر تے دیہات ءچ اِیں گالھ دی خبر پُچائی۔ بس لوک ایہ ڈیکھنڑ کیتے نِکل آئے۔ او یسُوع دے کولھ آئے، تے اُوں بندے کُوں جیندے ءچ بدرُوحاں دا لشکر ہا، کپڑے پاتے، تے ہوش ءچ بیٹھے ڈِٹھا تاں ڈر گئے۔ جِنہاں ایہ واقعہ ڈِٹھا ہا اُنہاں بدرُوح گرفتہ بندے تے سُؤراں دا حال اُنہاں کُوں بیان کیتا۔ وَل او یسُوع دی مِنت کرݨ لگے جو ”ساڈے علاقے ءچوں چلیا وَنج۔“ جِیں ویلے یسُوع کشتی ءچ چڑھن لگا تاں او بندہ جیہڑا پہلے بدرُوحاں ءچ گرفتار ہا، اُوندی مِنت کرݨ لگا جو ”مَیں تُہاڈے نال ویساں۔“ پر اُوں اُونکُوں اِجازت نہ ڈِتی بلکہ اُونکُوں آکھیا، ”گھر وَنج تے آپنڑے لوکاں کُوں ڈسا جو خُداوند تیڈے کیتے کتنے وڈے کم کیتے تے تیڈے اُتے رحم کیتا۔“ او چلیا گِیا تے دکُپُلس ءچ اِیں گالھ دا چرچا کرݨ لگا جو یسُوع اُوندے کیتے کیجھے وڈے کم کیتے، تے سارے لوک حیران تھیندے ہَن۔ جِیں ویلے یسُوع کشتی ءچ جھیل دے پار گِیا تاں اُتھاں وڈی بِھیڑ اُوندے کولھ آئی، تے او جھیل دے کنارے اُتے ہا۔ وَل مقامی عبادت خانہ دا ہِک سردار جِیندا ناں یائِیر ہا، اُتھاں آیا۔ او یسُوع کُوں ڈیکھ تے اُوندے پیراں ءچ ڈھے پِیا تے مِنت کریندے ہوئے آکھنڑ لگا جو ”میڈی نِکی دِھی مرݨ آلی ہے۔ مہربانی کر تے آؤ تے اُوندے اُتے آپنڑے ہتھ رکھو تاں جو او ٹھیک تھی ونجے تے زندہ راہوے۔“ بس یسُوع اُوندے نال روانہ تھیّا تے وڈی بِھیڑ اُوندے پِچُھوں تھی پئی تے اُوندے اُتے ڈھاندی پئی ہئی۔ بِھیڑ ءچ ہِک تریمت ہئی جِیندا بارہاں سالہاں کنُوں خون جاری ہا۔ او بہُوں حکیماں کنُوں علاج کروا کروا تے ڈُکھ جَھلی کھڑی ہئی، تے آپنڑی ساری جمع پُونجی خرچ کر تے وی اُونکُوں کُجھ فائدہ نہ تھیّا ہا بلکہ زیادہ بیمار تھی گئی ہئی۔ او یسُوع دے بارے ءچ سُنڑ تے بِھیڑ ءچ اُوندے پِچُھوں کنُوں آئی تے اُوندی پُشاک کُوں ہتھ لا یا، کیوں جو او آدھی ہئی جو ”جے مَیں اُوندی پُشاک کُوں ای ہتھ لا گِھنساں تاں ٹھیک تھی ویساں۔“ تے فوراً اُوندا خون واہنڑ بند تھی گِیا، تے اُونکُوں آپنڑے بدن ءچ محسوس تھیّا جو مَیں آپنڑی اِیں بیماری کنُوں شِفا پا گِھدی ہے۔ یسُوع فوراً جاݨ گِھدا جو اُوندے ءچوں قوت نِکلی ہے۔ او بِھیڑ ءچ پِچُھوں مُڑ تے پُچھنڑ لگا، ”کئیں میڈی پُشاک کُوں ہتھ لائے؟“ شاگرداں اُونکُوں آکھیا، ”تُساں ڈیدھے پئے ہیوے جو لوک تُہاڈے اُتے ڈھاندے پئے ہِن، تے وَل وی تُساں پُچھدے ہیوے جو ’کئیں میکُوں ہتھ لائے‘؟“ اُوں چودھارُوں نِگاہ ماری تاں جو اُونکُوں ڈیکھے جئیں اِینویں کیتے؟ او عورت ایہ جاݨ تے جو اُوندے اندر کیا تھئے ڈردی تے کمبدی ہوئی آئی تے اُوندے اگُوں ڈھے تے اُونکُوں ساری حقیقت ڈسائی۔ یسُوع اُونکُوں آکھیا، ”دِھی تیڈے اِیمان تیکُوں چنگا کر ڈِتے۔ خیر نال وَنج تے آپنڑی بیماری کنُوں بچی رہ۔“ او ایہ آدھا ای پِیا ہا جو عبادت خانہ دے سردار دے گھر تُوں کُجھ لوک آ تے آکھنڑ لگے جو ”تُہاڈی دِھی مر گئی ہے۔ ہُنڑ اُستاد کُوں تکلیف کیوں ڈیندے ہیوے؟“ یسُوع اُنہاں دی گالھ اُتے توجہ نہ ڈِتی تے عبادت خانہ دے سردار کُوں آکھیا، ”اصلُوں نہ ڈر، صرف اِیمان رکھ۔“ وَل اُوں پطرس، یعقُوب تے یعقُوب دے بِھرا یُوحنّا دے علاوہ کہیں بئے کُوں آپنڑے نال آوݨ دی اِجازت نہ ڈِتی۔ جِیں ویلے او عبادت خانہ دے سردار دے گھر پُجے تاں اُوں ڈِٹھا جو اُتھاں لوک بہُوں شورشرابہ تے ماتم کریندے پئے ہِن۔ اُوں اندر وَنج تے اُنہاں کُوں آکھیا، ”تُساں کیوں اِتنا شور مچیندے تے روندے ہیوے؟ چُھوہیر موئی نئیں بلکہ سُتی پئی ہے۔“ او اُوندے اُتے کِھلنڑ لگے۔ پر اُوں اُنہاں ساریاں کُوں اُتھوں باہر کڈھ ڈِتا تے چُھوہیر دے ماء پِیُو تے آپنڑے شاگرداں کُوں گِھن تے چھوہیر دے کولھ گِیا۔ وَل چھوہیر دا ہتھ پکڑ تے اُونکُوں آکھیا، ”تلیتا قُومی!“ جِیندا مطلب ہے ”چھوہیر مَیں تیکُوں آدھا ہاں، اُٹھی۔“ چُھوہیر فوراً اُٹھی تے ٹُرݨ پِھرݨ لگ پئی۔ او بارہاں سال دی ہئی۔ ایہ ڈیکھ تے لوک بہُوں ای حیران تھئے۔ وَل اُوں اُنہاں کُوں چِتا تے آکھیا جو ”اِیں گالھ دا کہیں کُوں پتہ نہ چلے۔“ تے آکھیا جو ”چھوہیر کُوں کُجھ کھاوݨ کیتے ڈِتا ونجے۔“ وَل اُتھوں کنُوں روانہ تھی تے یسُوع آپنڑے شہر ناصرت ءچ آیا تے اُوندے شاگرد اُوندے پِچُھوں ٹُر پئے۔ جِیں ویلے سبت دا ڈینہہ آیا تاں او عبادت خانہ ءچ تعلیم ڈیوݨ لگا تے بہُوں سارے لوک سُنڑ تے حیران تھئے تے آکھنڑ لگے ”ایہ گالھیں اُونکُوں کِتھوں آ گئیاں تے ایہ کیجھی حِکمت ہے جیہڑی اُونکُوں عطا کیتی گئی؟ تے ایجھے معجزے او کِینویں ظاہر کریندے؟ کیا ایہ اُوہو درکھاݨ نئیں جیہڑا مریم دا پوتر تے یعقُوب تے یوسیس تے یہُوداہ تے شمعون دا بِھرا ہے؟ تے کیا اُوندیاں بھینڑاں ساڈے نال اِتھائیں نئیں؟“ بس اُنہاں اُوندی وجہ کنُوں ٹھوکر کھادی۔ یسُوع اُنہاں کُوں آکھیا، ”نبی دی بےقدری اُوندے آپنڑے وطن، رشتے داراں تے گھر آلیاں دے علاوہ بِیا کِتھائیں نئیں تھیندی۔“ او کوئی معجزہ اُتھاں نہ ڈِکھا سگیا۔ صرف تھوڑے جِیہے بیماراں اُتے ہتھ رکھ تے اُنہاں کُوں شِفا ڈِتی۔ تے او اُنہاں دی بےاعتقادی تے بہُوں حیران تھیّا۔ وَل یسُوع چارے پاسُوں دے دیہاتاں ءچ پِھردے ہوئے تعلیم ڈیندا ریہا۔ تے اُوں اُنہاں بارہاں کُوں آپنڑے کولھ سڈ تے اُنہاں کُوں ڈُو ڈُو کر تے بھیجنڑ شروع کیتا، تے اُنہاں کُوں بدرُوحاں اُتے اِختیار بخشیا، تے حُکم ڈِتا جو ”سفر کیتے سوٹی دے سوا کُجھ نہ گِھنائے، نہ روٹی، نہ تھیلا، نہ آپنڑے کمر بند ءچ پیسے۔ جُتیاں پا گِھنائے پر ڈُو چولے نہ پوائے۔“ تے اُوں اُنہاں کُوں آکھیا، ”تُساں جیہڑے گھر ءچ داخل تھیؤ جئیں تئیں اُتھوں روانہ نا تھیؤ اُتھائیں ٹِکائے۔ تے جیہڑی جاہ دے لوک تُہاکُوں قبول نہ کرݨ تے تُہاڈی نہ سُنڑݨ تاں اُتھوں کنُوں روانہ تھیندے ویلے آپنڑے پیراں دی دھُوڑ چِھنڈک ڈیوائے تاں جو اُنہاں دے خلاف گواہی ہووے۔“ بس شاگرداں روانہ تھی تے تبلیغ کیتی جو ”توبہ کرو۔“ تے بہُوں ساریاں بدرُوحاں کُوں کڈھیا تے بہُوں سارے بیماراں کُوں زیتون دا تیل لا تے شِفا ڈِتی۔ ہیرودیس بادشاہ یسُوع دا ذِکر سُنڑیا کیوں جو اُوندا ناں مشہور تھی گِیا ہا۔ کُجھ لوکاں آدھے ہَن جو ”یُوحنّا بپتسمہ ڈیوݨ آلا مُردیاں ءچوں زندہ تھی گئے، اِیں واسطے او معجزے ڈکھیندے۔“ پر کُجھ لوک آدھے ہَن جو ”ایلیّاہ ہے،“ تے کُجھ ایہ جو ”پُرانڑے زمانے دے نبیاں آلی کار کوئی نبی ہے۔“ پر ہیرودیس ایہ سُنڑ تے آکھیا جو ”یُوحنّا جِیندا مَیں سر کٹوایا ہا اُوہو زندہ تھی گئے۔“ کیوں جو ہیرودیس بندے بھیج تے یُوحنّا کُوں پکڑوایا تے آپنڑے بِھرا فِلپُس دی ذال ہیرودیاس دے سببّوں اُونکُوں جیل ءچ بَدھ رکھیا ہا۔ کیوں جو ہیرودیس بادشاہ اُوندے نال شادی کر گِھدی ہئی، تے یُوحنّا اُونکُوں آکھیا ہا جو ”تیکُوں آپنڑے بِھرا دی ذال رکھنڑ جائز نئیں۔“ اِیں واسطے ہیرودیاس اُوندے نال دُشمنڑی رکھیندی ہئی تے اُونکُوں قتل کراوݨ چاہندی ہئی پر اِینویں نہ تھی سگیا، کیوں جو ہیرودیس بادشاہ یُوحنّا کُوں ہِک نیک تے پاک بندہ جاݨ تے اُوندے کنُوں ڈردا ہا تے اُوندی حفاظت کریندا ہا۔ او اُوندے گالھیں سُنڑ تے بہُوں حیران تھی ویندا، پر وَل وی خوشی نال سُنڑدا ہا۔ پر جِیں ویلے ہیرودیس آپنڑی سالگرہ دی خوشی ءچ آپنڑے سرکاری تے فوجی افسراں تے گلیل دے رئیساں دی دعوت کیتی تاں آخر کار ہیرودیاس کُوں موقع مِل گِیا۔ جِیں ویلے ہیرودیاس دی دِھی اندر آئی تے نَچ تے ہیرودیس تے اُوندے مہماناں کُوں خوش کیتا تاں بادشاہ اُوں چھوہیر کُوں آکھیا، ”منگ، تُوں جیہڑا کُجھ وی منگسیں مَیں تیکُوں ڈیساں۔“ اُوں قَسم کھا تے آکھیا، ”جیہڑا کُجھ تُوں مَیں کنُوں منگسیں، مَیں آپنڑی ادھی بادشاہی تئیں تیکُوں ڈے ڈیساں۔“ اُوں چُھوہیر باہر وَنج تے آپنڑی ماء کنُوں پُچھیا جو ”مَیں کیا منگاں؟“ اُوں آکھیا، ”یُوحنّا بپتسمہ ڈیوݨ آلے دا سر۔“ چُھوہیر جلدی نال بادشاہ دے کولھ اندر آئی تے عرض کیتی، ”مَیں چاہندی ہاں جو تُساں ہُنڑیں ای ہِک تھال ءچ یُوحنّا بپتسمہ ڈیوݨ آلے دا سر منگوا ڈیؤ۔“ بادشاہ بہُوں ڈُکھی تھیّا پر آپنڑی قَسم تے مہماناں دے سببّوں اِنکار نہ کرݨ چاہیا۔ بس بادشاہ فوراً ہِک سپاہی کُوں حُکم ڈے تے بھیجیا جو ”اُوندا سر گِھن آوے۔“ اُوں قید خانہ ءچ وَنج تے اُوندا سر کٹیا تے ہِک تھال ءچ رکھ تے چھوہیر کُوں ڈِتا تے چھوہیر آپنڑی ماء کُوں ڈِتا۔ جِیں ویلے یُوحنّا دے شاگرداں ایہ سُنڑیا تاں او آئے تے اُوندی لاش چا تے قبر ءچ رکھی۔ وَل رسُول واپس آ تے یسُوع دے کولھ جمع تھئے تے جیہڑا کُجھ اُنہاں کیتا تے سِکھایا ہا سبھ اُونکُوں ڈسایا۔ اُوں اُنہاں کُوں آکھیا، ”تُساں میڈے نال ویران تے کلھی جاہ تے ٹُرے آؤ تے کُجھ آرام کرو۔“ کیوں جو بہُوں لوک آندے ویندے ہَن، اِیں واسطے اُنہاں کُوں کھانڑا کھاوݨ دی وی فُرصت نہ مِلدی ہئی۔ بس او کشتی ءچ بہہ تے اَنج ہِک ویران جاہ تے چلے گئے۔ پر بہُوں سارے لوکاں اُنہاں کُوں ویندے ڈِٹھا تے پچھاݨ گِھدا۔ او سارے شہراں ءچوں کٹھے تھی تے پیدل اُتھاں بھجے تے اُنہاں تُوں پہلے وَنج پُجے۔ یسُوع کشتی تُوں لہہ تے وڈی بِھیڑ ڈِٹھی تے اُونکُوں اُنہاں اُتے ترس آیا کیوں جو او اُنہاں بھیڈاں وانگُوں ہَن جِنہاں دا کوئی آجڑی نہ ہووے۔ تے او اُنہاں کُوں بہُوں سارے گالھیں دی تعلیم ڈیونڑ لگا۔ جِیں ویلے ڈینہہ بہُوں ڈھل گِیا تاں اُوندے شاگرد اُوندے کولھ آ تے آکھنڑ لگے، ”ایہ جاہ ویران ہے تے ڈینہہ بہُوں ڈھل گِیا ہے۔ اِنہاں کُوں روانہ کرو تاں جو چودھارُوں وستیاں تے دیہاتاں ءچ وَنج تے آپنڑے کھاونڑ کیتے کُجھ مُل گِھن گِھننڑ۔“ پر اُوں اُنہاں کُوں جواب ءچ آکھیا، ”تُساں ای اِنہاں کُوں کھاوݨ کیتے ڈیؤ۔“ اُنہاں یسُوع کُوں آکھیا، ”کیا اساں وَنج تے اُنہاں کیتے ڈُو سو دینار دیاں روٹیاں مُل گِھن آؤں تے اُنہاں کُوں کھاوݨ کیتے ڈیؤں؟“ اُوں اُنہاں کُوں آکھیا، ”تُہاڈے کولھ کِتی روٹیاں ہِن؟ ونجو ڈیکھو۔“ اُنہاں پتہ کیتا تے ڈسایا، ”پنج روٹیاں تے ڈُو مچھیاں۔“ یسُوع اُنہاں کُوں چھوٹی چھوٹی ٹولیاں بنڑا تے ساوی گھاہ اُتے بہہ ونجنڑ دا حُکم ڈِتا۔ بس او سو سو تے پنجھاہ پنجھاہ دیاں قطاراں بنڑا تے بہہ گئے۔ وَل اُوں او پنج روٹیاں تے ڈُو مچھیاں گِھدیاں تے اسمان دو ڈیکھ تے برکت ڈِتی، تے روٹیاں تروڑ تے شاگرداں کُوں ڈیندا گِیا جو لوکاں دے اگُوں رکھنڑ تے او ڈُو مچھیاں وی سارے لوکاں ءچ وَنڈ ڈِتیاں۔ سبھ لوکاں رَج تے کھادا وَل اُنہاں روٹی تے مچھی دے بچے ہوئے ٹُکڑیاں دیاں بارہاں ٹوکریاں چاتیاں۔ تے کھاوݨ آلے پنج ہزار مرد ہَن۔ یسُوع فوراً آپنڑے شاگرداں کُوں مجبور کیتا جو کشتی اُتے بہہ تے جھیل دے پار بیت صیدا کُوں چلے ونجنڑ جئیں تئیں او لوکاں کُوں رُخصت کرے۔ لوکاں کُوں رُخصت کرݨ دے بعد او دُعا کرݨ کیتے پہاڑ اُتے چلیا گِیا۔ جِیں ویلے شام تھئی تاں کشتی جھیل دے اَدھ ءچ ہئی تے او کلھا خشکی تے ہا۔ اُوں ڈِٹھا جو اُنہاں کُوں مخالف ہوا دی وجہ کنُوں کشتی کُوں چلاوݨ ءچ وڈی مُشکل تھیندی پئی ہے۔ وَل رات دے پِچھلے پہر او جھیل اُتے ٹُردا ہویا اُنہاں کولھ آیا۔ او اُنہاں کنُوں اگُوں نِکلنڑ چاہندا ہا، پر او اُونکُوں پانڑی اُتے ٹُردے ڈیکھ تے اُونکُوں بُھوت سمجھ تے زور نال چیخنڑ پے گئے، کیوں جو او سارے اُونکُوں ڈیکھ تے ڈر گئے ہَن۔ پر اُوں فوراً اُنہاں کُوں آکھیا ”تسلی رکھو، مَیں ہاں، نہ ڈرو۔“ وَل او کشتی ءچ اُنہاں کولھ آیا تے ہوا رُک گئی۔ او آپنڑے دِلاں ءچ بہُوں حیران تھئے، اِیں واسطے جو او روٹیاں دے بارے ءچ نہ سمجھے ہَن بلکہ اُنہاں دے دل سخت تھی گئے ہَن۔ او جھیل پار کر تے گنّیسرت دے علاقے ءچ پُجے تے کشتی کُوں کنارے نال لا ڈِتا۔ جِینویں ای او کشتی کنُوں لتھے تاں لوکاں یسُوع کُوں پچھاݨ گِھدا۔ او اُوں سارے علاقے ءچ بھجے تے جِتھاں اُوندی موجودگی دی خبر سُنڑی اُتھاں آپنڑے بیماراں کُوں کَھٹاں اُتے چا تے اُوندے کولھ گِھن آوݨ لگے۔ تے وستیاں، شہراں تے دیہاتاں ءچ جِتھاں وی او ویندا ہا لوک بیماراں کُوں بازاراں ءچ رکھ ڈیندے ہَن تے اُوندی مِنت کریندے ہَن جو او اُنہاں کُوں صرف آپنڑے کپڑے کُوں ہتھ لاوݨ ڈیوے۔ تے جیہڑے اُونکُوں ہتھ لا گِھندے ہَن، ٹھیک تھی ویندے ہَن۔ وَل یروشلیم دے کُجھ فریسی تے شریعت دے عالم یسُوع کولھ جمع تھئے۔ تے اُنہاں ڈِٹھا جو اُوندے کُجھ شاگرد ناپاک ہتھاں نال یعنی ہتھ دھوتے بغیر کھانڑا کھاندے ہِن۔ کیوں جو فریسی بلکہ سارے یہُودی آپنڑے بزُرگاں دیاں رسماں دے ایجھے پابند ہَن جو جِیں ویلے تئیں آپنڑے ہتھ چنگی طرحاں دھو نہ گِھننڑ کھانڑا نہ کھاندے ہَن۔ تے بازار تُوں آ تے غُسل کیتے بغیر کھانڑا نہ کھاندے۔ تے اِیں طرحاں بئیاں وی بہُوں ساریاں رسماں ہِن جِنہاں دے او پابند ہِن جِینویں پیالیاں تے مُنگراں تے تانبے دے تھانواں کُوں دھوونڑاں۔ اِیں واسطے فریسیاں تے شریعت دے عالماں یسُوع کنُوں پُچھیا، ”کیا وجہ ہے جو تُہاڈے شاگرد بزُرگاں دیاں رسماں اُتے نئیں چلدے بلکہ ناپاک ہتھاں نال کھانڑا کھاندے ہِن؟“ اُوں اُنہاں کُوں آکھیا، ”یسعیاہ نبی تُساں منافقاں دے بارے کیا خُوب نبُوّت کیتی ہے، جِینویں لِکھیا ہے ’ایہ لوک زبان کنُوں تاں میڈی تعظیم کریندے ہِن پر اِنہاں دے دل مَیں کنُوں دُور ہِن۔ ایہ بے فائدہ میڈی عبادت کریندے ہِن کیوں جو آدمیاں دے حُکماں دی تعلیم ڈیندے ہِن ۔‘ تُساں خُدا دے حُکماں کُوں چھوڑ تے اِنسانی رِیت کُوں قائم رکھیندے ہیوے۔“ تے یسُوع اُنہاں کُوں ایہ وی آکھیا، ”تُساں آپنڑی روایت کُوں قائم رکھنڑ کیتے خُدا دے حُکم کُوں بالکل رَد کر ڈیندے ہیوے۔ کیوں جو مُوسیٰ فرمائے، ’آپنڑے ماء پِیُو دی عزت کریں ،‘ تے ’جیہڑا کوئی آپنڑے ماء پِیُو کُوں بُرا آکھے او ضرور جان تُوں مار ڈِتا ونجے ۔‘ پر تُساں آدھے ہیوے جو جے کوئی آپنڑے پِیُو یا ماء کُوں آکھے جو ’میڈی جیہڑی چیز کنُوں تُہاکُوں فائدہ تھی سگدا ہا او خُدا دی نذر دے طور تے قُربان تھی گئی،‘ تاں ٹھیک ہے۔ اِیندے نال تُساں اُونکُوں آپنڑے ماء پِیُو دی کوئی مدد نئیں کرݨ ڈیندے۔ تے اِینویں تُساں آپنڑی رِیت کنُوں جیہڑی تُساں خود جاری کیتی، خُدا دے کلام کُوں بے اثر کر ڈیندے ہیوے، تے اِیں طرحاں دے بہُوں کم کریندے ہیوے۔“ وَل یسُوع لوکاں کُوں آپنڑے کولھ سڈ تے آکھنڑ لگا، ”تُساں سارے میڈی سُنڑو تے سمجھو۔ کوئی ایجھی چیز نئیں جیہڑی باہر کنُوں اندر وَنج تے اِنسان کُوں ناپاک کر سگے، پر جیہڑیاں چیزاں اِنسان ءچوں نِکلدیاں ہِن اُوہو اُونکُوں ناپاک کریندیاں ہِن۔“ [جیندے سُنڑݨ آلے کَن ہووݨ، او سُنڑ گِھنے۔] جِیں ویلے او بِھیڑ کُوں چھوڑ تے گھر ءچ داخل تھیّا تاں اُوندے شاگرداں اُوں کنُوں اِیں مثال دا مطلب پُچھیا۔ اُوں اُنہاں کُوں آکھیا، ”کیا تُساں وی ایجھے بے سمجھ ہیوے؟ کیا تُساں نئیں سمجھدے جو جیہڑی چیز باہر کنُوں اِنسان دے اندر ویندی ہے او اُونکُوں ناپاک نئیں کر سگدی۔ اِیں واسطے جو او اُوندے دل ءچ نئیں بلکہ پیٹ ءچ ویندی ہے، تے ولا خارج تھی ویندی ہے؟“ ایہ آکھ تے اُوں کھاوݨ آلیاں سبھ چیزاں کُوں پاک قرار ڈِتا۔ وَل اُوں آکھیا، ”جیہڑا کُجھ اِنسان ءچوں نِکلدے، اُوہو اُونکُوں ناپاک کریندے۔ کیوں جو اندر کنُوں یعنی دل ءچوں بُرے خیال، حرامکاریاں، چوریاں، خون ریزیاں، زِنا کاریاں، لالچ، بدکاری، مکر، شہوت پرستی، بدنظری، بدگوئی، شیخی تے حماقت نِکلدے ہِن۔ ایہ ساریاں بُرائیاں اندر کنُوں نِکل تے اِنسان کُوں ناپاک کریندیاں ہِن۔“ وَل یسُوع اُتھوں کنُوں روانہ تھی تے صور تے صیدا دے علاقے ءچ گِیا۔ او ہِک گھر ءچ داخل تھیّا، تے نہ چاہندا ہا جو کہیں کُوں پتہ لگے پر وَل وی لوکاں کُوں پتہ لگ گِیا۔ بلکہ فوراً ہِک تریمت جیندی چھوٹی دِھی ءچ بدرُوح ہئی، یسُوع دے بارے ءچ سُنڑ تے آئی تے اُوندے پیراں ءچ ڈھے پئی۔ ایہ تریمت یُونانی ہئی تے شام دے علاقے فینیکے ءچ پیدا تھئی ہئی۔ اُوں اُوندی مِنت کیتی جو ”میڈی چھوہیر ءچوں بدرُوح کڈھ ڈے۔“ یسُوع اُونکُوں آکھیا، ”پہلے بالاں کُوں پیٹ بھر تے کھاوݨ ڈے کیوں جو بالاں دی روٹی گِھن تے کُتیاں کُوں سَٹ ڈیوݨ مناسب نئیں۔“ اُوں جواب ءچ آکھیا، ”ہاں مالک، پر کُتے وی تاں میز دے تلُوں بالاں دے ڈھٹھے ہوئے ٹُکڑے کھاندے ہِن۔“ اُوں اُونکُوں آکھیا، ”تَیں چنگا جواب ڈِتے، اِیں واسطے وَنج۔ بدرُوح تیڈی دِھی ءچوں نِکل گئی ہے۔“ اُوں آپنڑے گھر وَنج تے ڈِٹھا جو چھوہیر کَھٹ اُتے پئی ہے تے بدرُوح نِکل گئی ہے۔ وَل یسُوع صور دے علاقے کنُوں نِکل تے صیدا دے رستے کنُوں دکُپُلس دے علاقے کنُوں تھیندا ہویا گلیل دی جھیل اُتے پُجیا۔ تے کُجھ لوک ہِک ڈورے کُوں جیہڑا مُشکل نال بُولیندا ہا اُوندے کولھ گِھن آئے تے اُوندی مِنت کیتی جو ”اُوندے اُتے آپنڑا ہتھ رکھو۔“ یسُوع اُوں بندے کُوں بِھیڑ کنُوں اَنج گِھن گِیا تے آپنڑیاں انگلیاں اُوندے کَناں ءچ پاتیاں تے تُھک تے اُوندی زبان کُوں ہتھ لایا۔ وَل اسمان دو نِگاہ کر تے ہِک آہ بھری تے اُونکُوں آکھیا، ”اِفتح،“ یعنی ”کُھل وَنج۔“ تے فوراً اُوندے کَن تے زبان کُھل گئے تے او صاف بولنڑ لگ پِیا۔ یسُوع اُنہاں کُوں حُکم ڈِتا جو ”کہیں کُوں ایہ نہ ڈسائے۔“ پر او جِتنا اُنہاں کُوں منع کریندا ہا، لوک اُتنا زیادہ چرچا کریندے ریہے۔ لوکاں بہُوں ای حیران تھی تے آکھیا، ”جیہڑا کُجھ اُوں کیتے سبھ چنگا کیتے۔ او ڈوریاں کُوں سُنڑݨ تے گُونگیاں کُوں بولنڑ دی طاقت ڈیندے۔“ اُنہاں ڈینہاں ءچ ہِک بہُوں وڈی بِھیڑ وَل کٹھی تھی گئی تے اُنہاں دے کولھ کھاوݨ کیتے کُجھ نہ ہا۔ وَل یسُوع آپنڑے شاگرداں کُوں کولھ سڈ تے آکھیا، ”میکُوں اِیں بِھیڑ اُتے ترس آندے کیوں جو ایہ ترے ڈینہہ تُوں مسلسل میڈے نال ہے تے اِنہاں دے کولھ کھاوݨ کیتے کُجھ نئیں۔ جے مَیں اِنہاں کُوں بُکھا روانہ کر ڈیواں تاں ایہ رستے ءچ تھک تے رہ ویسن کیوں جو اِنہاں ءچوں کُجھ دُور کنُوں آئے ہِن۔“ اُوندے شاگرداں اُونکُوں جواب ڈِتا، ”اِتھاں بیابان ءچ اِتنے لوکاں دا پیٹ بھرݨ کیتے کوئی کِتھوں روٹیاں گِھن آوے؟“ اُوں اُنہاں کنُوں پُچھیا، ”تُہاڈے کولھ کِتی روٹیاں ہِن؟“ اُنہاں جواب ڈِتا، ”سَت۔“ اُوں لوکاں کُوں حُکم ڈِتا جو ”زمین اُتے بہہ ونجو۔“ تے وَل اُوں او سَت روٹیاں گِھدیاں تے شُکر کر تے تروڑیاں تے اُنہاں دے اگُوں رکھنڑ کیتے آپنڑے شاگرداں کُوں ڈیندا گِیا، تے اُنہاں لوکاں دے اگُوں رکھ ڈِتیاں۔ اُنہاں دے کولھ کُجھ چھوٹیاں مچھیاں وی ہَن۔ یسُوع اُنہاں اُتے برکت منگی تے شاگرداں کُوں آکھیا، ”ایہ وی اُنہاں کُوں ڈے ڈیؤ۔“ سبھ لوکاں رَج تے کھادا تے بچے ہوئے ٹُکڑیاں دیاں سَت ٹوکریاں چاتیاں۔ تے لوک چار ہزار دے قریب ہَن۔ وَل یسُوع اُنہاں کُوں رُخصت کیتا۔ تے او فوراً آپنڑے شاگرداں نال کشتی ءچ بہہ تے دَلَمنُوتہ دے علاقے ءچ گِیا۔ وَل فریسی آ تے اُوندے نال تکرار کرݨ لگے، تے اُونکُوں ازماوݨ کیتے اُوں کنُوں کوئی اسمانی نشان منگیا ۔ یسُوع لمبا ساہ گِھدا تے آکھیا، ”اِیں زمانے دے لوک نشان کیوں ڈیکھنڑ چاہندے ہِن؟ مَیں تُہاکُوں سچ آدھا ہاں جو اِیں زمانے دے لوکاں کُوں کوئی نشان نہ ڈِتا ویسی۔“ تے او اُنہاں کُوں چھوڑ تے وَل کشتی ءچ بیٹھا تے پار چلیا گِیا۔ شاگرد روٹی گِھننڑ بُھل گئے ہَن تے اُنہاں دے کولھ کشتی ءچ صرف ہِک روٹی ہئی۔ یسُوع اُنہاں کُوں حُکم ڈِتا جو ”خبردار فریسیاں دے خمیر تے ہیرودیس دے خمیر کنُوں ہوشیار رہوائے۔“ او آپس ءچ بحث کرݨ لگ گئے جو ”او اِیں واسطے اکھیندے ہوسن جو ساڈے کولھ روٹی کائنی۔“ پر یسُوع اُنہاں دی سوچ جاݨ تے اُنہاں کُوں آکھیا، ”تُساں کیوں بحث کریندے ہیوے جو ساڈے کولھ روٹی کائنی؟ کیا تُساں ہُنڑ تئیں نئیں جانڑدے تے سمجھدے؟ کیا تُہاڈا دل سخت تھی گِیا ہے؟ اکھیں رکھیندے ہوئے وی نئیں ڈیدھے تے کَن رکھیندے ہوئے وی نئیں سُنڑدے؟ تے کیا تُہاکُوں یاد نئیں؟ جیہڑے ویلے مَیں پنج روٹیاں پنج ہزار کیتے تروڑیاں تاں تُساں ٹُکڑیاں نال بھریاں ہوئیاں کِتی ٹوکریاں چاتیاں؟“ اُنہاں اُونکُوں آکھیا، ”بارہاں۔“ ”تے جیہڑے ویلے سَت روٹیاں چار ہزار کیتے تروڑیاں تاں تُساں ٹُکڑیاں نال بھریاں ہوئیاں کِتی ٹوکریاں چاتیاں؟“ اُنہاں جواب ڈِتا، ”سَت۔“ اُوں اُنہاں کُوں آکھیا، ”کیا تُساں ہُنڑ تئیں نئیں سمجھدے؟“ وَل او بیت صیدا ءچ آیا تے لوک ہِک اندھے کُوں اُوندے کولھ گِھن آئے تے اُوندی مِنت کیتی جو اُونکُوں ہتھ لاوے۔ او اُوں اندھے دا ہتھ پکڑ تے اُونکُوں وستی کنُوں باہر گِھن گِیا تے اُوندے اکھیں اُتے تُھک تے آپنڑے ہتھ اُوندے اُتے رکھے تے پُچھیا، ”کیا تُوں کُجھ ڈیدھا ہیں؟“ اُوں نِگاہ کر تے آکھیا، ”میکُوں لوک ڈِکھالی تاں ڈیندے ہِن پر اِینویں جِینویں درخت ٹُردے پِھردے ہووݨ۔“ وَل یسُوع دوبارہ آپنڑے ہتھ اُوں بندے دے اکھیں اُتے رکھے۔ اُوں غور نال نظر کیتی تے اُوندے اکھیں ٹھیک تھی گئیاں، تے او ہر چیز صاف صاف ڈیکھنڑ لگا۔ وَل یسُوع اُونکُوں اُوندے گھر بھیج ڈِتا تے آکھیا جو ”اِیں وستی ءچ واپس نہ ونجیں بلکہ سِدھا آپنڑے گھر لگا وَنج۔“ وَل یسُوع تے اُوندے شاگرد قیصریہ فِلپی دے دیہاتاں ءچ چلے گئے۔ رستے ءچ اُوں آپنڑے شاگرداں کنُوں پُچھیا جو ”لوک میکُوں کیا آدھے ہِن؟“ اُنہاں جواب ڈِتا ”کُجھ یُوحنّا بپتسمہ ڈیوݨ آلا، تے کُجھ ایلیّاہ، تے کُجھ نبیاں ءچوں کوئی نبی۔“ اُوں اُنہاں کنُوں پُچھیا، ”پر تُساں میکُوں کیا آدھے ہیوے؟“ پطرس جواب ڈِتا، ”تُساں المسیح ہیوے۔“ وَل اُوں اُنہاں کُوں تاکید کیتی جو ”میڈے بارے ءچ کہیں کُوں ایہ نہ اکھائے۔“ وَل یسُوع اُنہاں کُوں تعلیم ڈیوݨ لگا جو ضرور ہے جو اِبنِ آدم بہُوں ڈُکھ چاوے تے بزُرگ تے سردار کاہِن تے شریعت دے عالم اُونکُوں رَد کرݨ، تے او قتل کیتا ونجے تے تریجھے ڈینہہ ولا زندہ تھی ونجے۔ اُوں ایہ گالھ صاف صاف آکھی تاں پطرس اُونکُوں اَنج کر تے ملامت کرݨ لگا۔ پر اُوں مُڑ تے آپنڑے شاگرداں کُوں ڈِٹھا تے پطرس کُوں ملامت کیتی تے آکھیا، ”شیطان! میڈے کنُوں دُور تھی وَنج کیوں جو تُوں خُدا دے گالھیں دا نئیں بلکہ اِنسان دے گالھیں دا لحاظ کریندیں۔“ وَل اُوں بِھیڑ کُوں آپنڑے شاگرداں سمیت کولھ سڈ تے آکھیا، ”جے کوئی میڈی پیروی کرݨ چاہندے تاں او آپنڑی خُودی دا اِنکار کرے، تے آپنڑی صلیب چا تے میڈے پِچُھوں تھی پووے۔ کیوں جو جیہڑا کوئی آپنڑی جان بچاوݨ چاہندے او اُونکُوں ونجیسی، تے جیہڑا کوئی میڈے تے اِنجیل کیتے آپنڑی جان ونجیسی او اُونکُوں بچیسی۔ تے بندہ جے ساری دُنیا حاصل کر گِھنے پر آپنڑی جان دا نُقصان چاوے تاں اُونکُوں کیا فائدہ تھیسی؟ بندہ آپنڑی جان دے بدلے کیا ڈیسی؟ کیوں جو جیہڑا کوئی اِیں زِنا کار تے گُنہگار قوم ءچ مَیں کنُوں تے میڈے کلام کنُوں شرمیسی، مَیں اِبنِ آدم وی جِیں ویلے آپنڑے باپ دے جلال ءچ پاک فرشتیاں نال آساں تاں اُوندے کنُوں شرمیساں۔“ یسُوع شاگرداں کُوں آکھیا، ”مَیں تُہاکُوں سچ آدھا ہاں جو جیہڑے اِتھاں کھڑے ہِن، اُنہاں ءچوں کُجھ ایجھے ہِن جو جئیں تئیں خُدا دی بادشاہی کُوں قُدرت نال ظاہر تھیندا نہ ڈیکھ گِھننڑ، ہرگز نہ مرسن۔“ چِھی ڈینہہ بعد یسُوع پطرس، یعقُوب تے یُوحنّا کُوں نال گِھدا تے اُنہاں کُوں ہِک اُچے پہاڑ اُتے کلھیپے ءچ گِھن گِیا۔ اُتھاں اُنہاں دے سامنڑے اُوندی صورت بدل گئی۔ اُوندا لباس نُورانی تے بالکل چِٹّا تھی گِیا، ایجھا چِٹّا جو دُنیا دا کوئی دھوبی نئیں کر سگدا۔ اُنہاں کُوں ایلیّاہ تے مُوسیٰ نظر آئے تے ڈوہائیں یسُوع نال گالھیں کریندے ہَن۔ پطرس یسُوع کُوں آکھیا، ”ربّی، ساڈا اِتھاں راہنڑ چنگا ہے۔ بس اساں ترے خیمے بنڑاؤں۔ ہِک تُہاڈے کیتے، ہِک مُوسیٰ کیتے، ہِک ایلیّاہ کیتے۔“ کیوں جو او نہ جانڑدا ہا جو کیا آکھے، اِیں واسطے جو او بہُوں ڈر گئے ہَن۔ وَل ہِک بدّل اُنہاں اُتے چھاں کر ڈِتی تے اُوں بدّل ءچوں اواز آئی جو ”ایہ میڈا پیارا پوتر ہے، اِیندی سُنڑو۔“ اُنہاں فوراً چارے پاسُوں نِگاہ ماری پر اُنہاں یسُوع دے علاوہ آپنڑے نال کہیں بئے کُوں نہ ڈِٹھا۔ جِیں ویلے او پہاڑ کنُوں لہندے پئے ہَن تاں یسُوع اُنہاں کُوں حُکم ڈِتا جو ”جئیں تئیں اِبنِ آدم مُردیاں ءچوں زندہ نہ تھی ونجے، جیہڑا کُجھ تُساں ڈِٹھے کہیں کُوں نہ ڈسائے۔“ اُنہاں اِیں کلام کُوں یاد رکھیا پر آپس ءچ تکرار کریندے ہَن جو ”مُردیاں ءچوں جی اُٹھنڑ“ دا کیا مطلب ہے؟ وَل اُنہاں اُوں کنُوں پُچھیا جو ”شریعت دے عالم کیونکر آدھے ہِن جو ایلیّاہ دا مسیح تُوں پہلے آوݨ ضرور ہے؟“ اُوں اُنہاں کُوں آکھیا جو ”ایلیّاہ تاں پہلے آ تے سبھ کُجھ بحال کریسی، پر کلام ءچ اِبنِ آدم دے بارے ءچ کیوں لِکھیا ہے جو ’او بہُوں ڈُکھ چیسی تے حقیر کیتا ویسی؟‘ پر مَیں تُہاکُوں آدھا ہاں جو ایلیّاہ تاں آ گِیا ہے تے جِینویں اُوندے بارے ءچ لِکھیا ہے اُنہاں اُوندے نال جِینویں چاہیا اُونویں ای کیتا ۔“ جِیں ویلے او باقی شاگرداں دے کولھ آئے تاں ڈِٹھا جو اُنہاں دے آسُوں پاسُوں وڈی بِھیڑ ہے تے شریعت دے عالم اُنہاں نال بحث کریندے پئے ہِن۔ ساری بِھیڑ یسُوع کُوں ڈیکھ تے بہُوں حیران تھئی تے اُوندے دو بھج تے اُونکُوں سلام کیتا۔ اُوں اُنہاں کنُوں پُچھیا، ”تُساں اُنہاں نال کیا بحث کریندے ہیوے؟“ بِھیڑ ءچوں ہِک جواب ڈِتا، ”اُستاد! مَیں آپنڑے پوتر کُوں جیندے ءچ گُونگا کرݨ آلی بدرُوح ہے، تُہاڈے کولھ گِھن آیا ہم۔ او جِتھاں اُونکُوں قابو کر گِھندی ہے، سَٹ ڈیندی ہے تے اُوندے مُنہ کنُوں جَھگ نِکلدی ہے، تے او ڈند پِیہندے تے سُکدا ویندے۔ مَیں تُہاڈے شاگرداں کُوں آکھیا ہا جو بدرُوح کُوں کڈھ ڈیوݨ پر او نہ کڈھ سگے۔“ یسُوع جواب ءچ اُنہاں کُوں آکھیا، ”بےاعتقادو! مَیں کڈݨ تئیں تُہاڈے نال راہساں؟ کڈݨ تئیں تُہاڈی برداشت کریساں؟ اُونکُوں میڈے کولھ گِھن آؤ۔“ بس او چھوہر کُوں اُوندے کولھ گِھن آئے۔ جِیں ویلے بدرُوح یسُوع کُوں ڈِٹھا تاں اُوں فوراً چھوہر کُوں مروڑیا۔ او زمین اُتے ڈھٹھا تے لیٹنڑیاں مارݨ لگا تے اُوندے مُنہ کنُوں جَھگ نِکلنڑ لگ پئی۔ یسُوع اُوندے پِیُو کنُوں پُچھیا، ”اِیندا ایہ حال کڈݨ تُوں ہے؟“ اُوں آکھیا، ”چھوٹے لا کنُوں۔ اُوں اُونکُوں ہلاک کرݨ کیتے کئی پھیری بھاہ تے پانڑی ءچ سٹیا پر جے تُساں کُجھ کر سگدے ہیوے تاں ساڈے اُتے ترس کھا تے ساڈی مدد کرو۔“ یسُوع اُونکُوں آکھیا، ”کیا! جے تُساں کر سگدے ہیوے؟ جیہڑا اِیمان رکھیندے اُوندے کیتے سبھ کُجھ تھی سگدے۔“ اُوں چھوہر دے پِیُو فوراً چیخ تے آکھیا، ”مَیں اِیمان رکھیندا ہاں، تُساں میڈی بےاعتقادی دا علاج کرو۔“ جِیں ویلے یسُوع ڈِٹھا جو لوک بھج بھج تے جمع تھیندے پئے ہِن تاں اُوں بدرُوح کُوں دَڑکا ڈے تے آکھیا، ”گُونگی ڈوری بدرُوح، مَیں تیکُوں حُکم ڈیندا ہاں، اِیں ءچوں نِکل آ تے ولا کڈھائیں اِیندے ءچ داخل نہ تھیویں۔“ بدرُوح چیخ مار تے، تے چھوہر کُوں بہُوں مروڑ تے نِکل گئی۔ چھوہر مُردے وانگُوں تھی گِیا ایہ تئیں جو بہُوں سارے آکھنڑ پے گئے جو ”او مر گئے۔“ پر یسُوع اُوندا ہتھ پکڑ تے اُونکُوں چاتا تے او اُٹھی کھڑا تھیّا۔ جِیں ویلے یسُوع گھر ءچ داخل تھیّا تاں اُوندے شاگرداں کلھیپے ءچ اُوں کنُوں پُچھیا جو ”اساں اُونکُوں کیوں نہ کڈھ سگے؟“ یسُوع جواب ڈِتا، ”ایہ قِسم دُعا دے علاوہ کہیں بئے طریقے نال نئیں نِکل سگدی۔“ وَل او اُتھوں کنُوں روانہ تھئے تے گلیل دے علاقے کنُوں لنگھدے پئے ہَن۔ یسُوع نہ چاہندا ہا جو کہیں کُوں خبر تھیوے، اِیں واسطے جو او آپنڑے شاگرداں کُوں تعلیم ڈیندا تے اُنہاں کُوں اکھیندا ہا جو ”اِبنِ آدم بندیاں دے حوالے کیتا ویسی تے او اُونکُوں قتل کریسن تے او قتل تھیوݨ دے ترے ڈینہہ بعد زندہ تھی ویسی۔“ پر او اِیں گالھ کُوں نہ سمجھدے ہَن تے اُونکُوں پُچھنڑ تُوں ڈر دے ہَن۔ وَل او کفرنحُوم ءچ آئے تے جیہڑے ویلے او گھر ءچ ہا تاں اُوں اُنہاں کنُوں پُچھیا جو ”تُساں رستے ءچ کیا بحث کریندے ہَوے؟“ او چُپ ریہے کیوں جو رستے ءچ آپس ءچ ایہ بحث کریندے ہَن جو وڈا کوݨ ہے؟ وَل یسُوع بہہ تے اُنہاں بارہاں کُوں سڈیا تے اُنہاں کُوں آکھیا جو ”جے کوئی اوّل درجہ پاوݨ چاہندے تاں ساریاں کنُوں چھیکڑ تے ساریاں دا خادم بنڑے۔“ تے ہِک بال کُوں گِھن تے اُنہاں دے اَدھ ءچ کھڑا کیتا۔ وَل اُونکُوں جھولی ءچ گِھن تے اُنہاں کُوں آکھیا، ”جیہڑا کوئی میڈے ناں ءچ ایجھے بال کُوں قبول کریندے او میکُوں قبول کریندے، تے جیہڑا کوئی میکُوں قبول کریندے او میکُوں نئیں بلکہ میڈے بھیجنڑ آلے کُوں قبول کریندے۔“ یُوحنّا اُونکُوں آکھیا، ”اُستاد! اساں ہِک بندے کُوں تُہاڈے ناں ءچ بدرُوحاں کڈھیندے ڈِٹھا تے اساں اُونکُوں منع کرݨ لگے کیوں جو او ساڈی پیروی نئیں کریندا۔“ پر یسُوع آکھیا، ”اُونکُوں منع نہ کرائے کیوں جو ایجھا کوئی نئیں جیہڑا میڈے ناں ءچ معجزے ڈِکھاوے تے جلدی نال میکُوں بُرا آکھ سگے۔ کیوں جو جیہڑا ساڈے خلاف نئیں او ساڈے نال ہے۔ تے جیہڑا کوئی تُہاکُوں اِیں واسطے ہِک پیالہ پانڑی پِلیندے جو تُساں المسیح دے ہیوے، مَیں تُہاکُوں سچ آدھا ہاں جو او آپنڑا اجر ہرگز نہ ونجیسی۔ پر جیہڑا کوئی اِنہاں چھوٹیاں ءچوں جیہڑے میڈے اُتے اِیمان گِھن آئے ہِن، کہیں کیتے اِیمان تُوں گُمراہ تھیوݨ دا سبب بنڑدے، اُوندے کیتے اِیہو چنگا ہے جو چکّی دا پُڑ اُوندی گِچی ءچ پا تے اُونکُوں سمندر ءچ سَٹ ڈِتا ونجے۔ جے تیڈا ہتھ تَیں کنُوں گُناہ کراوے تاں اُونکُوں کپ سَٹ کیوں جو ٹُنڈا تھی تے زندگی ءچ داخل تھیوݨ، ڈُو ہتھاں نال دوزخ دی اُوں بھاہ ءچ سٹے ونجنڑ کنُوں چنگا ہے جیہڑی کڈھائیں وی نئیں وِسمدی۔ [جِتھاں اُنہاں دا کیڑا نئیں مردا تے بھاہ نئیں وِسمدی۔] تے جے تیڈا پیر تَیں کنُوں گُناہ کراوے تاں اُونکُوں کپ سَٹ کیوں جو تیڈے کیتے مَنڈا تھی تے زندگی ءچ داخل تھیوݨ، ڈُو پیراں نال دوزخ ءچ ونجنڑ کنُوں چنگا ہے۔ [جِتھاں اُنہاں دا کیڑا نئیں مردا تے بھاہ نئیں وِسمدی۔] تے جے تیڈی اکھ تَیں کنُوں گُناہ کراوے تاں اُونکُوں کڈھ سَٹ کیوں جو کانڑاں تھی تے خُدا دی بادشاہی ءچ داخل تھیوݨ، ڈُو اکھیں رکھیندے ہوئے دوزخ ءچ ونجنڑ کنُوں چنگا ہے ۔ جِتھاں اُنہاں کُوں کھاوݨ آلے کیڑے نئیں مردے تے بھاہ نئیں وِسمدی۔ کیوں جو ہر بندہ بھاہ نال نمکین کیتا ویسی۔ [تے ہر قُربانی نمک نال نمکین کیتی ویسی۔] نمک چنگا ہے پر جے اُوندا مزہ ویندا راہوے تاں اُونکُوں کیہڑی چیز نال نمکین کریسو؟ آپنڑے ءچ نمک رکھو تے آپس ءچ میل مِلاپ نال راہو۔“ وَل یسُوع اُتھوں کنُوں روانہ تھی تے یردن دے پار یہُودیہ دے علاقے ءچ آیا۔ بِھیڑ اُوندے کولھ وَل جمع تھی گئی تے او آپنڑے دستور دے مطابق اُنہاں کُوں تعلیم ڈیوݨ لگا۔ تے کُجھ فریسیاں کولھ آ تے اُونکُوں ازماوݨ کیتے پُچھیا، ”کیا بندے دا آپنڑی ذال کُوں چھوڑ ڈیوݨ جائز ہے؟“ یسُوع جواب ءچ اُنہاں کُوں آکھیا جو ”مُوسیٰ تُہاکُوں کیا حُکم ڈِتے؟“ اُنہاں آکھیا، ”مُوسیٰ تاں اِجازت ڈِتی ہے جو طلاق نامہ لِکھ تے اُونکُوں چھوڑ ڈیؤ۔“ پر یسُوع اُنہاں کُوں آکھیا جو ”مُوسیٰ تُہاڈی سخت دِلی دے سببّوں تُہاڈے کیتے ایہ حُکم لِکھیا ہا۔ پر خلقت دے شروع کنُوں خُدا اُنہاں کُوں مرد تے عورت بنڑایا۔ ’اِیں واسطے مرد آپنڑے ماء پِیُو کنُوں اَنج تھی تے آپنڑی ذال نال راہسی، تے ڈوہائیں ہِک تَن ہوسن ۔‘ بس او ڈُو نئیں بلکہ ہِک تَن ہِن۔ اِیں واسطے جِینکُوں خُدا جوڑیا ہے اُونکُوں اِنسان جُدا نہ کرے۔“ گھر ءچ شاگرداں یسُوع کنُوں اِیں گالھ دے بارے ولا پُچھیا۔ اُوں اُنہاں کُوں آکھیا، ”جیہڑا کوئی آپنڑی ذال کُوں چھوڑ ڈیوے تے ڈُوجھی نال شادی کر گِھنے تاں او آپنڑی پہلی ذال دے خلاف زِنا کریندے۔ تے جے عورت آپنڑے پئے کُوں چھوڑ تے ڈُوجھے نال شادی کر گِھنے تاں زِنا کریندی ہے۔“ وَل لوک بالاں کُوں اُوندے کولھ گِھن آوݨ لگے تاں جو او اُنہاں اُتے ہتھ رکھے، پر شاگرداں اُنہاں کُوں جِھڑکیا۔ یسُوع ایہ ڈیکھ تے ناراض تھیّا تے اُنہاں کُوں آکھیا، ”بالاں کُوں میڈے کولھ آوݨ ڈیؤ، اُنہاں کُوں نہ ہٹکو، کیوں جو خُدا دی بادشاہی ایجھیاں ای دی ہے۔ مَیں تُہاکُوں سچ آدھا ہاں جو جیہڑا کوئی خُدا دی بادشاہی کُوں بال آلی کار قبول نہ کرے او اُوندے ءچ کڈھائیں داخل نہ تھیسی۔“ وَل اُوں بالاں کُوں آپنڑی جھولی ءچ گِھدا تے اُنہاں اُتے ہتھ رکھ تے اُنہاں کُوں برکت ڈِتی۔ جِیں ویلے یسُوع نِکل تے آپنڑے رستے ویندا پِیا ہا تاں ہِک بندہ بھجدا ہویا آیا تے اُوندے سامنڑے گوڈے ٹیک تے پُچھنڑ لگا جو ”نیک اُستاد! مَیں کیا کراں جو ہمیشاں دی زندگی دا وارث بنڑاں؟“ یسُوع اُونکُوں جواب ڈِتا، ”تُوں میکُوں نیک کیوں آدھا ہیں؟ کوئی نیک نئیں صرف ہِک ہے یعنی خُدا۔ تُوں حُکماں کُوں تاں جانڑدا ہیں جو ’خون نہ کر، زِنا نہ کر، چوری نہ کر، کُوڑی گواہی نہ ڈے، فریب نہ کر، آپنڑے ماء پِیُو دی عزت کر ‘۔“ اُوں آکھیا، ”اُستاد، اِنہاں ساریاں اُتے تاں مَیں چھوٹے لا کنُوں عمل کیتا ہے۔“ یسُوع اُوندے اُتے نِگاہ کیتی تے اُونکُوں اُوندے اُتے پیار آیا تے آکھیا، ”ہِک گالھ دی تَیں ءچ کمی ہے۔ وَنج آپنڑا سبھ کُجھ ویچ تے غریباں کُوں ڈے، تاں تیکُوں اسمان اُتے خزانہ مِلسی۔ وَل آ تے میڈے پِچُھوں ٹُر پو۔“ ایہ سُنڑ تے اُوں بندے دا مُنہ لہہ گِیا تے او غمگین تھی تے چلیا گِیا، کیوں جو او بہُوں مالدار ہا۔ وَل یسُوع چودھارُوں نظر کر تے آپنڑے شاگرداں کُوں آکھیا، ”دولت منداں دا خُدا دی بادشاہی ءچ داخل تھیوݨ کیجھا اوکھا ہے!“ شاگرد اُوندے گالھیں کنُوں حیران تھئے، پر یسُوع اُنہاں کُوں وَل آکھیا، ”بالو، خُدا دی بادشاہی ءچ داخل تھیوݨ کیجھا ای اوکھا ہے! اُٹھ دا سُوئی دے نکے ءچوں لنگھ ونجنڑ، دولت مند دے خُدا دی بادشاہی ءچ داخل تھیوݨ کنُوں سوکھا ہے۔“ شاگرد بہُوں ای حیران تھی تے اُونکُوں آکھنڑ لگے، ”وَل کوݨ نجات پا سگدے ؟“ یسُوع اُنہاں دو نظر کر تے آکھیا، ”اِنسان کیتے تاں ایہ ناممکن ہے پر خُدا کیتے سبھ کُجھ ممکن ہے۔“ پطرس اُونکُوں آکھنڑ لگا، ”ڈیکھ اساں سبھ کُجھ چھوڑ تے تُہاڈے پِچُھوں تھی پئے ہیں۔“ یسُوع آکھیا، ”مَیں تُہاکُوں سچ آدھا ہاں جو جئیں وی میڈے تے خُدا دی اِنجیل دی خاطر آپنڑے گھر یا بِھرانواں یا بھینڑاں یا ماء یا پِیُو یا بالاں یا رَڑھاں کُوں چھوڑ ڈِتا ہووے، اُونکُوں اِیں زمانہ ءچ گھر، بِھرا، بھینڑاں، ماء، بال تے رَڑھ سو گُنا ضرور مِلسی، پر نال نال ظلم وی تے آوݨ آلی دُنیا ءچ اُونکُوں ہمیشاں دی زندگی مِلسی۔ پر بہُوں سارے جیہڑے اوّل ہِن آخر تھی ویسن تے آخر اوّل۔“ تے او یروشلیم دے رستے اُتے ویندے پئے ہَن تے یسُوع اُنہاں دے اگُوں اگُوں ٹُردا ویندا ہا۔ شاگرد حیران تھیوݨ لگے تے جیہڑے پِچُھوں آندے ہَن ڈرݨ لگے۔ وَل او اُنہاں بارہاں کُوں اَنج گِھن تے اُنہاں کُوں او گالھیں ڈسنڑ لگا جیہڑیاں اُوندے اُتے آوݨ آلیاں ہَن۔ اُوں آکھیا، ”اساں یروشلیم ویندے ہیں تے اِبنِ آدم سردار کاہِناں تے شریعت دے عالماں دے حوالے کیتا ویسی۔ او اُوندے قتل دا حُکم ڈیسن تے اُونکُوں غیر قوماں دے حوالے کریسن جیہڑے اُوندا مذاق اُڈیسن تے اُوندے اُتے تُھوکیسن، تے اُونکُوں کوڑے مریسن، تے قتل کریسن۔ پر ترے ڈینہہ بعد او زندہ تھی ویسی۔“ وَل زبدی دے پوتراں یعقُوب تے یُوحنّا یسُوع دے کولھ آ تے اُونکُوں آکھیا، ”اُستاد! اساں چاہندے ہیں جو اساں جیہڑی درخاست تُہاکُوں کرُوں تُساں ساڈے کیتے کرو۔“ اُوں اُنہاں کنُوں پُچھیا، ”تُساں کیا چاہندے ہیوے جو مَیں تُہاڈے کیتے کراں؟“ اُنہاں آکھیا، ”ساڈے اُتے ایہ مہربانی کرو جو تُہاڈے جلال ءچ ساڈے ءچوں ہِک تُہاڈے سجے تے ڈُوجھا تُہاڈے کھبے پاسُوں بَہوے۔“ پر یسُوع اُنہاں کُوں آکھیا، ”تُساں نئیں جانڑدے جو کیا منگدے ہیوے۔ ڈُکھ دا جیہڑا پیالہ مَیں پِیوݨ آلا ہاں، کیا تُساں او پی سگدے ہیوے؟ تے جیہڑا بپتسمہ مَیں گِھننڑ آلا ہاں، تُساں گِھن سگدے ہیوے؟“ اُنہاں جواب ڈِتا، ”اساں کر سگدے ہاں۔“ یسُوع اُنہاں کُوں آکھیا، ”جیہڑا پیالہ مَیں پِیوݨ آلا ہاں تُساں پِیسو، تے جیہڑا بپتسمہ مَیں گِھننڑ آلا ہاں، تُساں گِھنسو ۔ پر کہیں کُوں آپنڑے سجے یا کھبے پاسُوں بِلھاونڑاں میڈا کم نئیں۔ پر جِنہاں کیتے تیار کیتا گِیا ہے اُنہاں کیتے ہے۔“ جِیں ویلے باقی ڈاہ شاگرداں ایہ سُنڑیا تاں یعقُوب تے یُوحنّا نال خفا تھیوݨ لگے۔ پر یسُوع اُنہاں کُوں کولھ سڈ تے آکھیا، ”تُہاکُوں پتہ ہے جو غیر قوماں دے سردار آپنڑے لوکاں اُتے حکُومت کریندے ہِن تے اُنہاں دے امیر اُنہاں اُتے اِختیار جتیندے ہِن۔ پر تُہاڈے ءچ اِینویں نئیں بلکہ تُہاڈے ءچوں جیہڑا وڈا بنڑݨ چاہندے او تُہاڈا خادم بنڑے۔ تے جیہڑا تُہاڈے ءچوں اوّل تھیوݨ چاہوے او ساریاں دا غُلام بنڑے۔ کیوں جو اِبنِ آدم وی اِیں واسطے نئیں آیا جو خدمت گِھنے بلکہ اِیں واسطے جو خدمت کرے تے آپنڑی جان بہُوں ساریاں کیتے فِدیہ ءچ ڈیوے۔“ وَل او یرِیحُو ءچ آئے۔ تے جِیں ویلے یسُوع تے اُوندے شاگرد تے ہِک وڈی بِھیڑ یرِیحُو ءچوں نِکلدی پئی ہئی تاں اُتھاں تمائی دا پوتر برتِمائی جیہڑا ہِک اندھا فقیر ہا، رستے دے کنارے بیٹھا ہا۔ او ایہ سُنڑ تے جو یسُوع ناصری ہے، دھاڑ دھاڑ کریندے ہوئے آکھنڑ لگا جو ”اِبنِ ِ داؤد! یسُوع! میڈے اُتے رحم کرو۔“ لوک اُونکُوں دَڑکاوݨ لگے جو ”چُپ تھی وَنج۔“ پر او بِیا وی دھاڑ دھاڑ کرݨ لگ پِیا جو ”اِبنِ داؤد! میڈے اُتے رحم کرو۔“ یسُوع کھڑ تے آکھیا، ”اُونکُوں سڈو۔“ بس اُنہاں اُوں اندھے کُوں اواز ڈِتی تے آکھیا، ”حوصلہ رکھ، اُٹھی او تیکُوں سڈیندے۔“ او آپنڑا کپڑا سَٹ تے اُچھل پِیا تے یسُوع دے کولھ آیا۔ یسُوع اُوں کنُوں پُچھیا، ”تُوں کیا چاہندا ہیں جو مَیں تیڈے کیتے کراں؟“ اندھے آکھیا، ”ربّی! ایہ جو مَیں ڈیکھ سگاں۔“ یسُوع اُونکُوں آکھیا، ”وَنج تیڈے اِیمان تیکُوں چنگا کر ڈِتے۔“ او فوراً ڈیکھنڑ لگ پِیا تے رستے ءچ اُوندے پِچُھوں ٹُر پِیا۔ جِیں ویلے او یروشلیم دے نیڑے زیتون دے پہاڑ اُتے بیت فگے تے بیت عنیاہ دے نیڑے پُجے تاں یسُوع آپنڑے شاگرداں ءچوں ڈُو کُوں بھیجیا تے اُنہاں کُوں آکھیا جو ”آپنڑے سامنڑے آلی وستی ءچ ونجو تے اُوندے ءچ داخل تھیندے ای تُہاکُوں ہِک جوان گڈھاں بدھیا ہویا مِلسی جئیں اُتے ہُنڑ تئیں کوئی سوار نئیں تھیّا۔ اُونکُوں کھول تے گِھن آؤ۔ جے کوئی تُہاڈے کنُوں پُچھے جو ایہ کیا کریندے ہیوے تاں اکھائے جو مالک کُوں اِیندی ضرورت ہے۔ او فوراً اُونکُوں اِتھاں بھیج ڈیسی۔“ بس او گئے تے اُنہاں کُوں ہِک جوان گڈھاں سامنڑے گلی ءچ دروازہ نال بدھیا ہویا مِلیا تے او اُونکُوں کھولنڑ لگے۔ پر اُتھاں کھڑے ہوئے کُجھ لوکاں اُنہاں تُوں پُچھیا، ”ایہ کیا کریندے ہیوے؟ گڈھاں کُوں کیوں کھولیندے پئے ہیوے؟“ اُنہاں اُوہو کُجھ آکھیا جیہڑا یسُوع اُنہاں کُوں ڈسایا ہا، وَل اُنہاں، اُنہاں کُوں گِھن ونجنڑ ڈِتا۔ بس او گڈھاں کُوں یسُوع کولھ گِھن آئے تے آپنڑے کپڑے اُوندے اُتے سَٹ ڈِتے تے یسُوع اُوندے اُتے سوار تھی گِیا۔ تے بہُوں لوکاں رستے ءچ آپنڑے کپڑے وچھا ڈِتے۔ ڈُوجھیاں رَڑھاں ءچوں لڑیاں کپ تے وچھا ڈِتیاں۔ جیہڑے اُوندے اگُوں پِچُھوں ٹُردے پئے ہَن، نعرے مریندے ویندے ہَن جو ”ہوشعنا! مُبارک ہے او جیہڑا رب العالمین دے ناں کنُوں آندے ۔ مُبارک ہے ساڈے پِیُو داؤد دی بادشاہی جیہڑی آندی پئی ہے۔ سبھ تُوں اُچے اسمان اُتے ہوشعنا۔“ یسُوع یروشلیم ءچ داخل تھی تے ہیکل ءچ آیا تے ہر چیز کُوں غور نال ڈِٹھا۔ وَل او بارہاں شاگرداں نال بیت عنیاہ کُوں گِیا کیوں جو شام تھی گئی ہئی۔ ڈُوجھے ڈینہہ جِیں ویلے او بیت عنیاہ ءچوں نِکلے تاں یسُوع کُوں بُکھ لگی۔ او دُور کنُوں ہنجیر دا ہِک درخت جیندے ءچ پتے ہَن ڈیکھ تے گِیا جو شاید اُوندے ءچ کُجھ پھل مِلے۔ پر جِیں ویلے اُوندے کولھ پُجیا تاں سوائے پتیاں دے کُجھ نہ مِلیا کیوں جو ہنجیر دا موسم نہ ہا۔ اُوں اُونکُوں آکھیا، ”ولا تَیں کنُوں کوئی کڈھائیں پھل نہ کھاوے۔“ تے اُوندے شاگرداں ایہ سُنڑیا۔ وَل او یروشلیم ءچ آئے۔ تے یسُوع ہیکل ءچ داخل تھیّا تے صحن ءچ خرید و فروخت کرݨ آلیاں کُوں باہر کڈھنڑ لگا تے پیسے بدلاوݨ آلیاں دیاں میزاں تے کبوتر ویچنڑ آلیاں دیاں چوکیاں اُلٹ ڈِتیاں۔ اُوں کہیں کُوں ہیکل ءچوں کوئی سامان چا تے نہ ونجنڑ ڈِتا۔ تے تعلیم ڈیندے ہوئے اُنہاں کُوں آکھیا، ”کیا ایہ نئیں لِکھیا جو ’میڈا گھر سبھ قوماں کیتے دُعا دا گھر اکھویسی؟‘ پر تُساں اُونکُوں ’ڈاکواں دا ڈیرہ بنڑا ڈِتے‘ ۔“ سردار کاہِن تے شریعت دے عالم ایہ سُنڑ تے اُونکُوں ہلاک کرݨ دا موقع گولھنڑ لگے کیوں جو اُوں کنُوں ڈر دے ہَن اِیں واسطے جو سبھ لوک اُوندی تعلیم کنُوں حیران ہَن۔ جِیں ویلے شام تھئی تاں یسُوع آپنڑے شاگرداں سمیت شہر کنُوں باہر گئے۔ وَل سویل کُوں جِیں ویلے او اُتھوں کنُوں لنگھے تاں اُنہاں ڈِٹھا جو ہنجیر دا درخت جڑھ تئیں سُکا پِیا ہے۔ پطرس کُوں او گالھ یاد آئی تے اُونکُوں آکھنڑ لگا، ”ربّی! ڈیکھ ایہ ہنجیر دا درخت جیندے اُتے تُساں لعنت کیتی ہئی، سُک گِیا ہے۔“ یسُوع جواب ءچ اُنہاں کُوں آکھیا، ”خُدا اُتے اِیمان رکھو۔ مَیں تُہاکُوں سچ آدھا ہاں جو جیہڑا کوئی اِیں پہاڑ کُوں آکھے جو ’آپنڑی جاہ کنُوں پٹیج وَنج تے سمندر ءچ وَنج ڈھے،‘ تے آپنڑے دل ءچ شک نہ کرے بلکہ یقین رکھے جو جیہڑا کُجھ آدھے او تھی ویسی، تاں اُوندے کیتے اُوہو تھیسی۔ اِیں واسطے مَیں تُہاکُوں آدھا ہاں جو تُساں دُعا ءچ جیہڑا کُجھ منگدے ہیوے یقین رکھو جو تُہاکُوں مِل گئے، تے او تُہاکُوں مِل ویسی۔ جِیں ویلے تُساں دُعا کیتے کھڑے تھیندے ہیوے، جے تُہاکُوں کہیں کنُوں کُجھ شِکوہ ہے تاں اُونکُوں معاف کر ڈیؤ تاں جو تُہاڈا اسمانی باپ وی تُہاڈے گُناہ بخش ڈیوے۔ [ جے تُساں معاف نہ کریسو تاں تُہاڈا اسمانی باپ تُہاڈے گُناہ وی معاف نہ کریسی۔]“ وَل او یروشلیم ءچ آئے۔ تے جِیں ویلے یسُوع ہیکل ءچوں لنگھدا پِیا ہا تاں سردار کاہِن تے شریعت دے عالم تے بزُرگ اُوندے کولھ آئے تے اُونکُوں پُچھنڑ لگے، ”تُوں اِنہاں کماں کُوں کِیں اِختیار نال کریندیں؟ یا کئیں تیکُوں ایہ اِختیار ڈِتے جو ایہ کم کریں؟“ یسُوع اُنہاں کُوں آکھیا، ”مَیں وی تُہاڈے کنُوں ہِک سوال پُچھدا ہاں۔ جے تُساں اُوندا جواب ڈے ڈیسو تاں مَیں وی ڈسا ڈیساں جو مَیں اِنہاں کماں کُوں کِیں اِختیار نال کریندا ہاں۔ یُوحنّا دا بپتسمہ اسمان دی طرفوں ہا یا اِنسان دی طرفوں؟ میکُوں جواب ڈیؤ۔“ او آپس ءچ آکھنڑ لگے جو ”جے اساں آکھوں جو ’اسمان دی طرفوں،‘ تاں او اکھیسی ’وَل تُساں اُوندا یقین کیوں نہ کیتا؟‘ تے جے آکھوں ’اِنسان دی طرفوں،‘ تاں اساں عوام کنُوں ڈردے ہیں کیوں جو سبھ لوک یُوحنّا کُوں واقعی نبی منیندے ہِن۔“ بس اُنہاں جواب ءچ یسُوع کُوں آکھیا، ”اساں نئیں جانڑدے۔“ یسُوع اُنہاں کُوں آکھیا، ”مَیں وی تُہاکُوں نئیں ڈسیندا جو اِنہاں کماں کُوں کِیں اِختیار نال کریندا ہاں۔“ وَل یسُوع اُنہاں نال مثالاں ءچ گالھیں کرݨ لگا جو ”ہِک بندے انگُوراں دا باغ رہایا تے اُوندے چودھارُوں واڑ ڈِتی تے انگُوراں دا رَس کڈھنڑ کیتے ہِک حوض کھٹیا تے چوکیداری کیتے ہِک بُرج بنڑایا۔ وَل او انگُوراں دا باغ ٹھیکیداراں کُوں کاشتکاری کیتے ڈے تے خود پردیس چلیا گِیا۔ وَل پھل دے موسم ءچ اُوں ہِک نوکر کُوں ٹھیکیداراں دے کولھ پھل دا آپنڑا حصہ گِھننڑ کیتے بھیجیا۔ پر اُنہاں اُونکُوں پکڑ تے کُٹیا تے خالی ہتھ بھیج ڈِتا۔ وَل اُوں ہِک بئے نوکر کُوں بھیجیا پر اُنہاں اُوندا سر پھاڑ ڈِتا تے بے عزت کیتا۔ وَل اُوں ہِک بئے کُوں بھیجیا تے اُنہاں اُونکُوں قتل کر ڈِتا۔ اِینویں ای بہُوں بندے بھیجے۔ ٹھیکیداراں اُنہاں ءچوں کُجھ کُوں کُٹیا تے کُجھ کُوں قتل کر ڈِتا۔ ہُنڑ ہِکو راہندا ہا جیہڑا اُوندا پیارا پوتر ہا۔ آخر ءچ اُوں آپنڑے پوتر کُوں ایہ سوچ تے اُنہاں دے کولھ بھیجیا جو او میڈے پوتر دا تاں لحاظ کریسن۔ پر ٹھیکیدار آپس ءچ آکھنڑ لگے جو ’اِیہو وارث ہے۔ آؤ اِینکُوں قتل کرُوں۔ جائیداد ساڈی تھی ویسی۔‘ بس اُنہاں اُونکُوں پکڑ تے قتل کر ڈِتا تے انگُوراں دے باغ کنُوں باہر سَٹ ڈِتا۔ ہُنڑ باغ دا مالک کیا کریسی؟ او آ تے اُنہاں ٹھیکیداراں کُوں ہلاک کریسی تے انگُوراں دا باغ ڈُوجھیاں دے حوالے کر ڈیسی۔ کیا تُساں ایہ نوِشتہ وی نئیں پڑھیا جو ’جِیں پتھر کُوں مِستریاں رَد کر ڈِتا اُوہو کونے دے سرے دا پتھر تھی گِیا۔ ایہ رب العالمین دی طرفوں تھیّا، تے ساڈی نظر ءچ حیران کُن ہے ‘؟“ اِیں تے یہُودی راہنما یسُوع کُوں پکڑن دی کوشش کرݨ لگے کیوں جو او سمجھ گئے ہَن جو ایہ مثال اُنہاں دے خلاف آکھی گئی ہے پر لوکاں دے ڈر دی وجہ کنُوں اُونکُوں چھوڑ تے چلے گئے۔ وَل اُنہاں کُجھ فریسیاں تے ہیرودیس دے پیروکاراں کُوں اُوندے کولھ بھیجیا تاں جو اُوندی کوئی گالھ پکڑ سگن۔ اُنہاں آ تے یسُوع کُوں آکھیا، ”اُستاد، اساں جانڑدے ہیں جو تُساں سچے ہیوے، تے کہیں دی پرواہ نئیں کریندے، کیوں جو تُساں کہیں دے طرفدار نئیں بلکہ سچائی نال خُدا دی راہ ڈسیندے ہیوے۔ بس رومی بادشاہ قیصر کُوں ٹیکس ڈیوݨ جائز ہے یا نئیں؟ اساں ڈیؤں یا نا ڈیؤں؟“ یسُوع اُنہاں دی مکاری کُوں معلوم کر تے اُنہاں کُوں آکھیا، ”تُساں میکُوں کیوں پھساوݨ دی کوشش کریندے ہیوے؟ میڈے کولھ ہِک دینار گِھن آؤ جو مَیں ڈیکھاں۔“ او گِھن آئے۔ اُوں اُنہاں کنُوں پُچھیا، ”اِیندے اُتے کیندی تصویر تے ناں ہے؟“ اُنہاں آکھیا، ”قیصر دا۔“ یسُوع اُنہاں کُوں آکھیا، ”جیہڑا قیصر دا ہے او قیصر کُوں، تے جیہڑا خُدا دا ہے او خُدا کُوں ڈِتا کرو۔“ او یسُوع دی گالھ سُنڑ تے بہُوں حیران تھئے۔ وَل صدوقیاں جیہڑے قیامت دے مُنکر ہَن، یسُوع دے کولھ آ تے اُونکُوں ایہ سوال کیتا جو ”اُستاد! ساڈے کیتے مُوسیٰ لِکھیا ہے جو ’جے کہیں دا بِھرا مر ونجے تے آپنڑی ذال بے اولاد چھوڑ ونجے تاں اُوندا بِھرا اُوندی ذال نال شادی کر گِھنے تاں جو آپنڑے بِھرا کیتے نسل پیدا کرے ۔‘ سَت بِھرا ہَن۔ پہلے شادی کیتی تے بے اولاد مر گِیا۔ وَل ڈُوجھے بِھرا اُوں بیوہ نال شادی کیتی پر او وی بے اولاد مر گِیا تے اِینویں ای تریجھے کیتا۔ تے اِینویں ای ستّاں اُوں عورت نال شادی کیتی پر بے اولاد مر گئے، تے آخر ءچ او عورت وی مر گئی۔ قیامت ءچ او کیندی ذال ہوسی؟ کیوں جو او ستّاں دی ذال بنڑی ہئی۔“ یسُوع اُنہاں کُوں آکھیا، ”کیا تُساں اِیں سبب تُوں گُمراہ نئیں جو نہ خُدا دے کلام کُوں جانڑدے ہیوے، نہ خُدا دی قُدرت کُوں؟ کیوں جو جِیں ویلے لوک مُردیاں ءچوں زندہ تھیسن تاں اُنہاں ءچ شادی ویاہ نہ ہوسی، بلکہ اسمان اُتے فرشتیاں وانگُوں ہوسن۔ پر اِیں بارے ءچ جو مُردے زندہ تھیندے ہِن، کیا تُساں مُوسیٰ دی کتاب ءچ بلدی ہوئی جھاڑی دے بیان ءچ ایہ نئیں پڑھیا جو خُدا مُوسیٰ کُوں آکھیا، ’مَیں ابرہام دا خُدا تے اِضحاق دا خُدا تے یعقُوب دا خُدا ہاں ؟‘ او مُردیاں دا خُدا نئیں بلکہ زندیاں دا خُدا ہے۔ بس تُساں بالکل گُمراہ ہیوے؟“ شریعت دے عالماں ءچوں ہِک اُنہاں کُوں تکرار کریندے سُنڑ تے جاݨ گِھدا جو یسُوع اُنہاں کُوں چنگا جواب ڈِتے۔ او کولھ آیا تے اُوں کنُوں پُچھیا جو ”سبھ حُکماں کنُوں وڈا حُکم کیہڑا ہے؟“ یسُوع جواب ڈِتا، ”اوّل ایہ ہے، ’اِسرائیل! سُنڑ، رب العالمین ساڈا خُدا ہِک ای خُدا ہے۔ تُوں رب العالمین آپنڑے خُدا نال آپنڑے سارے دل تے آپنڑی ساری جان تے آپنڑی ساری عقل تے آپنڑی ساری طاقت نال محبت رکھ ۔‘ ڈُوجھا ایہ ہے جو ’آپنڑے ہمسائے نال اُونویں ای محبت رکھ جِینویں آپنڑے نال رکھیندیں ۔‘ اِنہاں کنُوں وڈا بِیا کوئی حُکم نئیں۔“ شریعت دے عالم اُونکُوں آکھیا، ”اُستاد! بہُوں خُوب، تُساں سچ آکھیا ہیوے جو خُدا ہِک ای ہے تے اُوندے علاوہ بِیا کوئی نئیں۔ تے اُونکُوں سارے دل تے ساری عقل تے ساری طاقت نال محبت رکھنڑ تے آپنڑے ہمسائے کُوں آپنڑے وانگُوں پیار کرݨ سبھ ساڑے ونجنڑ آلیاں قُربانیاں تے نذراں کنُوں ودھ ہے۔“ جِیں ویلے یسُوع ڈِٹھا جو اُوں عقلمندی نال جواب ڈِتے تاں اُونکُوں آکھیا، ”تُوں خُدا دی بادشاہی کنُوں دُور نئیں۔“ تے وَل کہیں اُوں کنُوں سوال کرݨ دی جُرأت نہ کیتی۔ وَل یسُوع ہیکل ءچ تعلیم ڈیندے ہوئے آکھیا جو ”شریعت دے عالم کیونکر آدھے ہِن جو المسیح داؤد دا پوتر ہے؟ داؤد خود رُوح القُدس دی ہدایت نال آکھیا جو ’رب میڈے مالک کُوں آکھیا میڈے سجے پاسُوں بہہ جئیں تئیں مَیں تیڈے دُشمنڑاں کُوں تیڈے پیراں دے تلے نہ کر ڈیواں ۔‘ داؤد تاں خود اُونکُوں مالک آدھے وَل او اُوندا پوتر کِینویں تھی سگدے؟“ سبھ لوک خوشی نال یسُوع دی سُنڑدے ہَن۔ وَل یسُوع آپنڑی تعلیم ءچ آکھیا جو ”شریعت دے عالماں کنُوں خبردار رہوائے جیہڑے لمبے لمبے چولے پا تے پِھرݨ پسند کریندے ہِن تے چاہندے ہِن جو لوک بازاراں ءچ اُنہاں کُوں سلام کرݨ، تے عبادت خانیاں ءچ اُچے درجے دیاں کُرسیاں تے ضیافتاں ءچ صدارت چاہندے ہِن۔ او بیوہ عورتاں دے گھراں کُوں ہڑپ کر گِھندے ہِن تے ڈِکھاوے کیتے لمبیاں لمبیاں دُعاواں کریندے ہِن۔ اُنہاں کُوں زیادہ سزا مِلسی۔“ وَل یسُوع ہیکل دے خزانے دے سامنڑے بہہ تے ڈیدھا پِیا ہا جو لوک ہیکل دے خزانے ءچ پیسے کِینویں سٹیندے ہِن۔ بہُوں سارے دولت مند بہُوں کُجھ سٹیندے پئے ہَن۔ وَل ہِک غریب بیوہ اُتھاں آئی تے اُوں تانبے دے ڈُو چھوٹے سِکے سٹے۔ یسُوع شاگرداں کُوں کولھ سڈ تے آکھیا، ”مَیں تُہاکُوں سچ آدھا ہاں جو جیہڑے ہیکل دے خزانے ءچ سٹیندے پئے ہِن، اِیں غریب بیوہ اُنہاں سبھ کنُوں زیادہ سٹیا ہے۔ کیوں جو ساریاں آپنڑی بہُوں دولت ءچوں کُجھ حصہ سٹیا پر اِیں بیوہ آپنڑی غریبی ءچ وی جیہڑا کُجھ اُوندے کولھ گُزارے کیتے ہا، او سبھ سَٹ ڈِتا۔“ جِیں ویلے یسُوع ہیکل کنُوں باہر ویندا پِیا ہا تاں اُوندے شاگرداں ءچوں ہِک اُونکُوں آکھیا، ”اُستاد! ڈیکھ ایہ کیجھے وڈے پتھر تے کیجھیاں زبردست عمارتاں ہِن؟“ یسُوع اُونکُوں آکھیا، ”تُوں اِنہاں عالیشان عمارتاں کُوں ڈیدھیں؟ اِتھاں کوئی پتھر اُتے پتھر باقی نہ راہسی بلکہ سبھ کُجھ ڈھا ڈِتا ویسی۔“ جِیں ویلے یسُوع زیتون دے پہاڑ اُتے ہیکل دے سامنڑے بیٹھا ہا تاں پطرس، یعقُوب، یُوحنّا تے اندریاس کلھیپے ءچ اُوں کنُوں پُچھیا، ”ساکُوں ڈساؤ جو ایہ گالھیں کڈݨ تھیسن؟ تے جِیں ویلے او پُوریاں تھیوݨ آلیاں ہووݨ، اُوں ویلے دا نشان کیا ہوسی؟“ یسُوع اُنہاں کُوں آکھنڑ لگا جو ”خبردار تُہاکُوں کوئی گُمراہ نہ کر ڈیوے۔ بہُوں سارے میڈے ناں نال آسن تے اکھیسن جو مسیح مَیں ای ہاں تے بہُوں سارے لوکاں کُوں گُمراہ کریسن۔ جِیں ویلے تُساں جنگاں تے جنگاں دیاں افواہاں سُنڑو تاں گھبرا نہ وَنجائے۔ اِنہاں دا تھیوݨ لازم ہے پر اُوں ویلے خاتمہ نہ تھیسی۔ کیوں جو قوم اُتے قوم تے سلطنت اُتے سلطنت چڑھائی کریسی، تے جاہ جاہ زلزلے آسن تے کال پوسن۔ ایہ گالھیں مُصیبتاں دا صرف شروع ای ہوسن۔ پر تُساں خبردار رہوائے کیوں جو لوک تُہاکُوں عدالتاں ءچ پیش کریسن تے تُساں عبادت خانیاں ءچ ماراں کھاسو، تے میڈی وجہ کنُوں حاکماں تے بادشاہاں دے سامنڑے حاضر کیتے ویسو تے ایہ تُہاڈے کیتے گواہی ڈیوݨ دا موقع ہوسی۔ تے لازم ہے جو آخرت تُوں پہلے ساریاں قوماں ءچ خوشخبری دی تبلیغ کیتی ونجے۔ پر جِیں ویلے تُہاکُوں پکڑ تے عدالت ءچ پیش کیتا ونجے تاں پہلے کنُوں فِکر نہ کرائے جو اساں کیا اکھیسوں۔ بلکہ جیہڑا کُجھ تُہاکُوں اُوں ویلے ڈسایا ونجے اُوہو اکھائے، کیوں جو آکھنڑ آلے تُساں نئیں بلکہ رُوح القُدس ہے۔ تے بِھرا کُوں بِھرا تے پِیُو آپنڑے پوتر کُوں قتل کیتے پکڑویسی، تے بال آپنڑے ماء پِیُو دے خلاف کھڑے تھی تے اُنہاں کُوں مروا ڈیسن۔ تے میڈے ناں دے سببّوں سبھ لوک تُہاڈے نال دُشمنڑی رکھیسن پر جیہڑا آخر تئیں برداشت کریسی اُوہو نجات پیسی۔ بس جِیں ویلے تُساں اُوں اُجاڑن آلی مکرُوہ شے کُوں اُوں جاہ کھڑا ڈیکھو، جِتھاں اُوندا کھڑا تھیوݨ جائز نئیں ، (پڑھن آلا سمجھ گِھنے) اُوں ویلے جیہڑے یہُودیہ ءچ ہووݨ او پہاڑاں اُتے بھج ونجنڑ۔ جیہڑا چھت اُتے ہووے او گھر ءچوں کُجھ گِھننڑ کیتے تلے نہ لہوے نہ اندر ونجے۔ تے جیہڑا رَڑھ ءچ ہووے، او آپنڑا کپڑا گِھننڑ کیتے پِچُھوں نہ ونجے۔ پر اُنہاں اُتے افسوس جیہڑیاں اُنہاں ڈینہاں ءچ حاملہ ہوسن تے جیہڑیاں کھیر پِلیندیاں ہوسن! تے دُعا کرو جو ایہ سیالے ءچ نہ ہووے۔ کیوں جو او ویلے ایجھی مُصیبت ہوسی جو دُنیا دی تخلیق کنُوں اَج تئیں نہ تاں آئی ہے نہ ولا کڈھائیں آسی۔ جے رب العالمین اُنہاں ڈینہاں کُوں گھٹ نہ کریندا تاں کوئی بندہ زندہ نہ بچدا، پر اُوں آپنڑے چُنڑے ہوئے لوکاں دی خاطر اُنہاں ڈینہاں کُوں گھٹا ڈِتا۔ اُوں ویلے جے کوئی تُہاکُوں آکھے جو ’ڈیکھو المسیح اِتھاں ہے‘ یا ’اُتھاں ہے‘ تاں یقین نہ کرائے۔ کیوں جو کُوڑے المسیح تے کُوڑے نبی اُٹھی کھڑے تھیسن تے نشان تے عجیب کم ڈِکھیسن جو جے ممکن ہووے تاں خُدا دے چُنڑے ہوئے لوکاں کُوں وی گُمراہ کر ڈیوݨ۔ پر تُساں خبردار رہوائے۔ ڈیکھو مَیں تُہاکُوں پہلے ای سبھ کُجھ ڈسا ڈِتے۔ پر اُنہاں ڈینہاں ءچ اُوں مُصیبت دے بعد سِجھ اندھارا تھی ویسی تے چَن آپنڑی روشنی نہ ڈیسی۔ تے اسمان کنُوں تارے ڈھاسن تے اسمان دیاں طاقتاں ہلائیاں ویسن۔ اُوں ویلے لوک اِبنِ آدم کُوں بدلاں ءچ وڈی قُدرت تے جلال نال آندا ڈیکھسن۔ وَل او فرشتیاں کُوں بھیج تے آپنڑے چُنڑے ہوئے لوکاں کُوں زمین دی اِنتہا کنُوں اسمان دی اِنتہا تئیں ہر جاہ تُوں جمع کریسی۔ ہُنڑ ہنجیر دے درخت کنُوں ہِک سبق سِکھو۔ جِینویں ای اُوندی لڑی نرم تھیندی تے پتر نِکلدے ہِن تاں تُساں جاݨ گِھندے ہیوے جو گرمی آوݨ آلی ہے۔ اِینویں ای جِیں ویلے تُساں اِنہاں سبھ گالھیں کُوں تھیندا ڈیکھو، تاں سمجھ گِھنائے جو او نیڑے بلکہ دروازے اُتے ہے۔ مَیں تُہاکُوں سچ آدھا ہاں جو جئیں تئیں ایہ سبھ گالھیں پُوریاں نہ تھی ونجنڑ، اِیں نسل دا خاتمہ نہ تھیسی۔ اسمان تے زمین ٹَل ویسن پر میڈے گالھیں کڈھائیں نہ ٹَلسن۔ پر اُوں ڈینہہ یا اُوں ویلے دے بارے ءچ کوئی نئیں جانڑدا، نہ اسمان دے فرشتے نہ پوتر پر صرف باپ۔ خبردار! جاگدے تے دُعا کریندے راہو کیوں جو تُساں نئیں جانڑدے جو او وقت کِیں ویلے آسی۔ اِبنِ ِ آدم دا واپس آونڑا اُوں بندے آلی کار ہوسی جئیں کہیں دُور دے مُلک ونجنڑا ہا تے گھر تُوں ویندے ویلے اُوں آپنڑے نوکراں کُوں اِختیار ڈِتا، یعنی ہر ہِک کُوں اُوندی ذمہ داری ڈسا ڈِتی تے چوکیدار کُوں حُکم ڈِتا جو جاگدا راہوے۔ بس جاگدے راہو کیوں جو تُساں نئیں جانڑدے جو گھر دا مالک کِیں ویلے آسی، شام کُوں یا ادھی رات کُوں یا کُکڑ دے بانگ ڈیندے ویلے یا سویل کُوں۔ اِینویں نہ تھیوے جو او اچانک آ تے تُہاکُوں سُتا ڈیکھے۔ جیہڑا کُجھ مَیں تُہاکُوں آدھا ہاں، اُوہو سبھ کُوں آدھا ہاں جو جاگدے راہو۔“ ڈُو ڈینہہ بعد فسح تے بے خمیری روٹی دی عید آوݨ آلی ہئی تے سردار کاہِن تے شریعت دے عالم موقع دی تاڑ ءچ ہَن جو یسُوع کُوں کِینویں دوکھے نال پکڑ تے قتل کرݨ۔ پر او آدھے ہَن جو ”عید ءچ نئیں۔ اِینویں نہ تھیوے جو لوکاں ءچ ہنگامہ تھی ونجے۔“ جِیں ویلے یسُوع بیت عنیاہ ءچ شمعون کوڑھی دے گھر ءچ کھانڑا کھاوݨ بیٹھا تاں ہِک عورت جٹاماسی دا بہُوں مہانگا تے خالص عِطر، سنگِ مرمر دے عِطردان ءچ گِھن آئی، تے عِطردان کُوں تروڑ تے سارا عِطر اُوندے سر اُتے وِیٹ ڈِتا۔ پر کُجھ لوک آپنڑے دل ءچ ناراض تھی تے آکھنڑ لگے جو ”ایہ عِطر کیوں ضائع کیتا گِیا؟ ایہ عِطر ترے سو دینار کنُوں زیادہ ءچ وِک تے غریباں کُوں ڈِتا وَنج سگدا ہا۔“ تے او اُونکُوں جِھڑکنڑ لگے۔ یسُوع آکھیا، ”اُونکُوں چھوڑ ڈیؤ۔ اُونکُوں کیوں پریشان کریندے ہیوے؟ اُوں تاں میڈے نال بھلائی کیتی ہے۔ کیوں جو غریب تاں ہمیشاں تُہاڈے نال راہسن۔ جِیں ویلے چاہو اُنہاں نال نیکی کر سگدے ہیوے پر مَیں تُہاڈے نال ہمیشاں نہ راہساں۔ اُوں کنُوں جیہڑا کُجھ تھی سگدا ہا اُوں کیتا۔ اُوں میڈے دفن تھیوݨ کیتے وقت تُوں پہلاں ای میڈے بدن اُتے عِطر وِیٹیا ہے۔ مَیں تُہاکُوں سچ آدھا ہاں جو ساری دُنیا ءچ جِتھاں وی اِنجیل دی تبلیغ کیتی ویسی اُتھاں اِیندی یادگاری ءچ اُوندے اِیں کم دا ذِکر وی کیتا ویسی۔“ وَل یہُوداہ اِسکریُوتی جیہڑا اُنہاں بارہاں ءچوں ہا، سردار کاہِناں دے کولھ چلیا گِیا تاں جو یسُوع کُوں اُنہاں دے حوالے کر ڈیوے۔ او ایہ سُنڑ تے خوش تھئے تے اُونکُوں پیسے ڈیوݨ دا وعدہ کیتا۔ تے او موقع گولھنڑ لگا جو کہیں طرحاں قابو پا تے اُونکُوں پکڑوا ڈیوے۔ بے خمیری روٹی دی عید دے پہلے ڈینہہ جیندے ءچ فسح دے لیلے کُوں ذبح کیتا ویندا ہا، یسُوع دے شاگرداں اُوں کنُوں پُچھیا، ”تُساں کِتھاں چاہندے ہیوے جو اساں تُہاڈے کیتے فسح کھاوݨ دی تیاری کرُوں؟“ اُوں آپنڑے شاگرداں ءچوں ڈُو کُوں بھیجیا تے اُنہاں کُوں آکھیا، ”شہر ءچ ونجو۔ اُتھاں تُہاکُوں ہِک بندہ مِلسی جیہڑا پانڑی دا گھڑا چا تے ویندا پِیا ہوسی۔ اُوندے پِچُھوں لگے وَنجائے۔ جیہڑے گھر ءچ او داخل تھیوے، اُوندے مالک کُوں اکھائے، ’اُستاد آدھے جو میڈے کیتے مہمان خانہ کِتھاں ہے جِتھاں مَیں آپنڑے شاگرداں نال فسح کھاواں؟‘ او خود تُہاکُوں اُتلی منزل تے گِھن ویسی تے تیار کیتا ہویا ہِک وڈا چوبارہ ڈکھیسی، اُتھائیں ساڈے کیتے تیاری کرائے۔“ بس شاگرد روانہ تھی گئے تے شہر ءچ آ تے سبھ کُجھ اُونویں ای ڈِٹھا جِینویں یسُوع اُنہاں کُوں ڈسایا ہا تے فسح دا کھانڑا تیار کیتا۔ جِیں ویلے شام تھئی تاں یسُوع اُنہاں بارہاں شاگرداں نال آیا۔ تے جِیں ویلے او بیٹھے کھاندے پئے ہَن تاں اُوں آکھیا، ”مَیں تُہاکُوں سچ آدھا ہاں جو تُہاڈے ءچوں ہِک جیہڑا میڈے نال کھانڑا کھاندے، میکُوں پکڑ ویسی۔“ اُنہاں کُوں بہُوں ڈُکھ تھیّا تے واری واری اُونکُوں پُچھنڑ لگے، ”کیا مَیں تاں نئیں ؟“ اُوں اُنہاں کُوں آکھیا جو ”او تُساں بارہاں ءچوں ہِک ہے جیہڑا میڈے نال مُنگر ءچ ہتھ پیندے۔ کیوں جو اِبنِ آدم تاں جِینویں اُوندے حق ءچ لِکھیا ہے ویندا ای ہے۔ پر اُوں بندے اُتے افسوس جیندے ذریعے اِبنِ آدم پکڑوایا ویندے! اُوندے کیتے چنگا ہا جو او پیدا ای نہ تھیندا۔“ کھانڑا کھاندے ویلے یسُوع روٹی گِھدی تے شُکر کر تے تروڑی تے اُنہاں کُوں ڈِتی تے آکھیا، ”گِھنو، ایہ میڈا بدن ہے۔“ وَل اُوں پیالہ گِھدا تے شُکر کر تے اُنہاں کُوں ڈِتا تے اُنہاں ساریاں اُوندے ءچوں پِیتا۔ اُوں اُنہاں کُوں آکھیا، ”ایہ خُدا دے عہد کُوں قائم کرݨ آلا میڈا خون ہے جیہڑا بہُوں ساریاں کیتے وہایا ویندے۔ مَیں تُہاکُوں سچ آدھا ہاں جو انگُور دا رَس اُوں ڈینہہ تئیں ولا کڈھائیں نہ پِیساں، جئیں تئیں خُدا دی بادشاہی ءچ نواں نہ پِیواں۔“ وَل او حمد کر تے باہر زیتون دے پہاڑ اُتے گئے۔ وَل یسُوع شاگرداں کُوں آکھیا، ”تُساں سبھ تُھڈ کھاسو کیوں جو کلام ءچ لِکھیا ہے جو ’مَیں آجڑی کُوں مریساں تے بھیڈاں کِھنڈ ویسن ۔‘ پر مَیں زندہ تھیوݨ تُوں بعد تُہاڈے کنُوں پہلے گلیل کُوں ویساں۔“ پطرس اُونکُوں آکھیا، ”بھانویں سبھ تُھڈ کھا تے تُہاکُوں چھوڑ ڈیوݨ پر مَیں نہ چُھڑیساں۔“ یسُوع آکھیا، ”مَیں تیکُوں سچ آدھا ہاں جو اَج اِیں رات کُکڑ دے ڈُو پھیری بانگ ڈیوݨ کنُوں پہلے تُوں ترے پھیری میڈا اِنکار کریسیں۔“ پر اُوں بہُوں جوش ءچ آ تے آکھیا، ”جے تُہاڈے نال میکُوں مرنڑا وی پووے، وَل وی تُہاڈا اِنکار نہ کریساں۔“ باقی ساریاں وی اِیہو آکھیا۔ وَل او ہِک باغ ءچ آئے جِیندا ناں گتسمنی ہا تے یسُوع آپنڑے شاگرداں کُوں آکھیا، ”جِیں ویلے تئیں مَیں دُعا کریندا ہاں، تُساں اِتھائیں بَہو۔“ او پطرس، یعقُوب تے یُوحنّا کُوں آپنڑے نال گِھن تے بہُوں پریشان تے بے چین تھیوݨ لگا۔ تے اُنہاں کُوں آکھیا، ”غم دی شِدت کنُوں مَیں مرݨ آلا ہاں۔ تُساں اِتھائیں راہو تے میڈے نال جاگدے راہو۔“ او ذرا اگُوں وَنج تے زمین اُتے مُنہ دے بھار ڈھے تے دُعا کرݨ لگا جو ”جے ممکن ہووے تاں آوݨ آلا عذاب مَیں کنُوں ٹَل ونجے۔“ تے آکھیا، ”ابّا! باپ! تیڈے کیتے سبھ کُجھ ممکن ہے۔ ڈُکھ دے اِیں پیالے کُوں مَیں کنُوں ہٹا گِھن۔ وَل وی جیہڑا مَیں چاہندا ہاں او نئیں بلکہ جیہڑا تُوں چاہندیں، اُوہو تھیوے۔“ وَل او آیا تے اُنہاں کُوں سُتا ڈیکھ تے پطرس کُوں آکھیا، ”شمعون! تُوں سُتا پئیں؟ کیا تُوں ہِک گھڑی وی جاگ نہ سگیا؟ جاگدے تے دُعا کریندے راہو تاں جو ازمائش ءچ نہ پوو۔ رُوح تاں تیار ہے پر جِسم کمزور ہے۔“ او وَل چلیا گِیا تے اُوہو گالھ آکھ تے دُعا کیتی۔ وَل آ تے اُنہاں کُوں سُتے ڈِٹھا کیوں جو اُنہاں دے اکھیں نیندر کنُوں بھریاں پئیاں ہَن۔ تے او نہ جانڑدے ہَن جو اُونکُوں کیا جواب ڈیوݨ۔ وَل تریجھی پھیری آ تے اُنہاں کُوں آکھیا، ”ہُنڑ سُتے راہو تے آرام کرو۔ بس او ویلا آ گئے۔ ڈیکھو اِبنِ آدم گُنہگاراں دے حوالے کیتا ویندے۔ اُٹھو جُلوں۔ ڈیکھو میکُوں پکڑواوݨ آلا نیڑے آ پُجے۔“ او ایہ گالھیں کریندا ای پِیا ہا جو یہُوداہ جیہڑا بارہاں ءچوں ہا، اُتھاں آ گِیا۔ اُوندے نال ہِک بِھیڑ، تلواراں تے سوٹے چا تے آ پُجی جِینکُوں سردار کاہِناں تے شریعت دے عالماں تے بزُرگاں بھیجیا ہا۔ اُوندے پکڑواوݨ آلے اُنہاں کُوں ایہ نشانی ڈِتی ہئی جو ”جِیندا مَیں بوسہ گِھناں اُوہو یسُوع ہے۔ اُونکُوں پکڑ تے دھیان نال گِھن وَنجائے۔“ او آ تے فوراً یسُوع دے کولھ گِیا تے آکھیا، ”ربّی!“ تے اُوندے بوسے گِھدے۔ وَل لوکاں یسُوع کُوں پکڑ تے گرفتار کر گِھدا۔ جیہڑے کولھ کھڑے ہَن اُنہاں ءچوں ہِک آپنڑی تلوار چھیک تے کاہِن ِ اعظم دے نوکر اُتے وار کیتا تے اُوندا کَن اُڈا ڈِتا۔ یسُوع اُنہاں کُوں آکھیا، ”کیا مَیں کوئی ڈاکو ہاں جو تُساں میکُوں تلواراں تے سوٹیاں چا تے پکڑن آئے ہیوے؟ مَیں ہر روز ہیکل ءچ تُہاڈے کولھ تعلیم ڈیندا ہم تے تُساں میکُوں گرفتار نہ کیتا۔ پر ایہ اِیں واسطے تھیّا جو خُدا دا کلام پُورا تھیوے۔“ وَل سارے شاگرد اُونکُوں چھوڑ تے بھج گئے۔ پر ہِک نوجوان آپنڑے ننگے جِسم اُتے لینن دی چادر گِھدے ہوئے اُوندے پِچُھوں تھی پِیا۔ اُونکُوں لوکاں پکڑ گِھدا۔ پر او چادر چھوڑ تے ننگا بھج گِیا۔ وَل او یسُوع کُوں کاہِن ِ اعظم دے کولھ گِھن گئے تے سبھ سردار کاہِن، بزُرگ تے شریعت دے عالم اُوندے کولھ جمع تھی گئے۔ پطرس وی پرے کنُوں اُوندے پِچُھوں پِچُھوں کاہِن ِ اعظم دی حویلی دے اندر تئیں گِیا تے پہرے آلیاں نال بہہ تے بھاہ سیکنڑ لگا۔ سردار کاہِن تے سبھ صدر عدالت آلے یسُوع کُوں قتل کرݨ کیتے اُوندے خلاف گواہیاں گولھنڑ لگے پر نہ پائی۔ کیوں جو بہُوں ساریاں اُوندے اُتے کُوڑیاں گواہیاں تاں ڈِتیاں، پر اُنہاں دے بیان نہ مِلدے ہَن۔ وَل کُجھ لوکاں کھڑے تھی تے اُوندے خلاف ایہ کُوڑی گواہی ڈِتی جو ”اساں اُونکُوں ایہ آدھے سُنڑیا ہے جو ’مَیں اِیں ہیکل کُوں جیہڑی ہتھ دی بنڑی ہے، ڈھا ڈیساں تے ترے ڈینہہ ءچ ڈُوجھی کھڑی کر ڈیساں جیہڑی ہتھ دی نہ بنڑی ہوسی‘۔“ پر اِیں پھیری وی اُنہاں دی گواہی آپس ءچ نہ مِلدی ہئی۔ اِیں اُتے کاہِن ِ اعظم اَدھ ءچ کھڑا تھی تے یسُوع کنُوں پُچھیا جو ”تُوں جواب کیوں نئیں ڈیندا؟ ایہ تیڈے خلاف کیا گواہی ڈیندے ہِن؟“ پر او چُپ ای ریہا تے کوئی جواب نہ ڈِتا۔ کاہِن ِ اعظم اُونکُوں ولا پُچھیا، ”کیا تُوں خُدائے محمُود دا پوتر المسیح ہیں؟“ یسُوع جواب ڈِتا، ”ہاں مَیں ہاں، تے تُساں اِبنِ آدم کُوں قادر ِ مُطلق دے سجے پاسُوں بیٹھا تے اسمان دے بدلاں اُتے آندا ڈیکھسو۔“ کاہِن ِ اعظم آپنڑے کپڑے پھاڑ تے آکھیا، ”ہُنڑ ساکُوں گواہاں دی کیا لوڑ ہے؟ تُساں ایہ کُفر سُنڑیا ہے۔ تُہاڈا کیا خیال ہے؟“ اُنہاں سبھ اُوندے خلاف فیصلہ ڈِتا جو ”او موت دے لائق ہے۔“ کُجھ اُوندے اُتے تُھکیا تے کُجھ اُوندے اکھیں اُتے پٹی بَدھ تے اُونکُوں مُکے مارݨ تے اُونکُوں آکھنڑ لگے، ”نبُوّت کر جو کئیں مارے!“ سپاہیاں وی اُونکُوں چماٹاں مار تے آپنڑے قبضہ ءچ گِھن گِھدا۔ جِیں ویلے پطرس تلے صحن ءچ ہا تاں کاہِن ِ اعظم دیاں کنیزاں ءچوں ہِک اُتھاں آئی۔ اُوں پطرس کُوں بھاہ سکیندے ڈیکھ تے اُوندے اُتے نِگاہ کیتی تے آکھنڑ لگی، ”تُوں وی اُوں یسُوع ناصری دے نال ہَویں!“ اُوں اِنکار کیتا تے آکھیا، ”مَیں نہ کُجھ جانڑدا ہاں تے نہ ای سمجھدا ہاں جو تُوں کیا آدھی ہیں۔“ وَل او باہر ڈیوڑھی ءچ چلیا گِیا تے کُکڑ بانگ ڈِتی۔ او کنیز اُونکُوں ڈیکھ تے آپنڑے کولھ کھڑے ہوئے لوکاں کُوں ہِک واری ولا آکھنڑ لگی، ”ایہ اُنہاں ءچوں ہے۔“ پر اُوں ولا اِنکار کیتا۔ تھوڑی دیر بعد اُتھاں کھڑے ہوئے لوکاں پطرس کُوں ولا آکھیا، ”بےشک تُوں اُنہاں ءچوں ہیں کیوں جو تُوں گلیل دے علاقے دا ہیں۔“ پر او قَسم کھاوݨ لگا جو ”کُوڑ بولنڑ آلے اُتے لعنت۔ مَیں اِیں بندے کُوں جِیندا تُساں ذِکر کریندے ہیوے، نئیں جانڑدا۔“ تے فوراً کُکڑ ڈُوجھی پھیری بانگ ڈِتی۔ پطرس کُوں او گالھ جیہڑی یسُوع اُونکُوں آکھی ہئی یاد آئی جو ”کُکڑ دے ڈُو پھیری بانگ ڈیوݨ کنُوں پہلے تُوں ترے پھیری میڈا اِنکار کریسیں۔“ تے اِیں اُتے غور کر تے او رو پِیا۔ سویل تھیندے ای سردار کاہِناں، بزُرگاں تے شریعت دے عالماں تے سبھ صدر ِ عدالت دے ممبراں نال صلاح کر تے یسُوع کُوں بدھیا تے گِھن تے پِیلاطُس دے حوالے کر ڈِتا۔ پِیلاطُس اُوں کنُوں پُچھیا، ”کیا تُوں یہُودیاں دا بادشاہ ہیں؟“ یسُوع جواب ءچ آکھیا، ”ایہ تُوں خود آدھیں۔“ وَل سردار کاہِن اُوندے اُتے بہُوں سارے گالھیں دا اِلزام لیندے ریہے۔ پِیلاطُس اُونکُوں ولا پُچھیا جو ”تُوں کوئی جواب نئیں ڈیندا؟ ڈیکھ ایہ تیڈے اُتے کتنے اِلزام لیندے پئے ہِن۔“ یسُوع وَل وی کُجھ جواب نہ ڈِتا، ایہ تئیں جو پِیلاطُس بہُوں حیران تھیّا۔ عید دے موقع تے پِیلاطُس ہِک قیدی کُوں چھوڑ ڈیندا ہا جیندے کیتے لوک درخاست کریندے ہَن۔ برابّا ناں دا ہِک بندہ اُنہاں باغیاں دے نال قید ءچ ہا جِنہاں بغاوت ءچ قتل و غارت کیتی ہئی۔ تے بِھیڑ کولھ آ تے اُونکُوں درخاست کرݨ لگی جو ”آپنڑے دستور دے مطابق ساڈے کیتے کر۔“ پِیلاطُس جواب ءچ آکھیا، ”کیا تُساں چاہندے ہیوے جو مَیں تُہاڈے کیتے یہُودیاں دے بادشاہ کُوں چھوڑ ڈیواں؟“ کیوں جو اُونکُوں پتہ ہا جو سردار کاہِناں یسُوع کُوں حسد نال پکڑوائے۔ پر سردار کاہِناں بِھیڑ کُوں اُبھاریا، تاں جو پِیلاطُس اُنہاں کیتے برابّا کُوں ای چھوڑ ڈیوے۔ پِیلاطُس اُنہاں کُوں ڈُوجھی پھیری آکھیا، ”وَل مَیں اُوں بندے نال جِینکُوں تُساں یہُودیاں دا بادشاہ آدھے ہیوے، کیا کراں؟“ او وَل چِلائے جو ”اِینکُوں صلیب اُتے چڑھاؤ۔“ تے پِیلاطُس اُنہاں کُوں آکھیا، ”کیوں، اُوں کیہڑی بُرائی کیتی ہے؟“ پر او مزید شور مچا تے آکھنڑ لگے ”اِینکُوں صلیب اُتے چڑھاؤ۔“ پِیلاطُس لوکاں کُوں خوش کرݨ سانگے برابّا کُوں چھوڑ ڈِتا، تے یسُوع کُوں مصلُوب کرݨ کیتے کوڑے مروا تے سپاہیاں دے حوالے کر ڈِتا۔ سپاہی اُونکُوں اُوں صحن ءچ گِھن گئے جیہڑا گورنر دے قلعہ دا حصہ ہا تے ساری پلٹن کُوں سڈوا گِھدا۔ اُنہاں اُونکُوں جامنی چوغہ پوایا تے کنڈیاں دا تاج بنڑا تے اُوندے سر اُتے رکھیا، تے اُونکُوں سلام کر تے آکھنڑ لگے جو ”یہُودیاں دے بادشاہ! سلام،“ تے او اُوندے سر اُتے کانے مریندے تے اُوندے اُتے تُھوکیندے تے گوڈے ٹیک تے اُونکُوں سجدہ کریندے ریہے۔ جِیں ویلے اُوندا مذاق بنڑا گِھدا تاں اُوندے اُتوں جامنی چوغہ لہا تے وَل اُوندے آپنڑے کپڑے اُونکُوں پوا ڈِتے۔ وَل اُونکُوں مصلُوب کرݨ کیتے باہر گِھن گئے۔ شمعون ناں دا ہِک کُرینی بندہ، سکندر تے رُوفُس دا پِیُو، دیہات تُوں آندے ہوئے اُتھوں لنگھیا۔ اُنہاں اُونکُوں وِنگار ءچ پکڑ گِھدا جو او یسُوع دی صلیب چاوے۔ تے او یسُوع کُوں گُلگُتا دے مقام تے گِھن آئے جِیندا ترجمہ ہے کھوپڑی دی جاہ۔ وَل اُونکُوں مُر مِلیا ہویا انگُور دا رَس پِیوݨ کیتے ڈِتا پر اُوں نہ پِیتا۔ تے اُنہاں اُونکُوں مصلُوب کیتا تے پرچی پا تے اُوندے کپڑے آپس ءچ وَنڈ گِھدے۔ اُنہاں سویلے نؤں وجے دے نیڑے اُونکُوں مصلُوب کیتا۔ تے اُوندا اِلزام لِکھ تے اُوندی صلیب اُتے لا ڈِتا گِیا جو ”ایہ یہُودیاں دا بادشاہ ہے۔“ اُنہاں ڈُو ڈاکواں کُوں وی اُوندے نال مصلُوب کیتا، ہِک کُوں اُوندے سجے پاسُوں تے ڈُوجھے کُوں کھبے پاسُوں۔ تے وَل ایہ گالھ پُوری تھئی جو ”او بدکاراں ءچ شمار کیتا گِیا ۔“ تے اُتھوں کنُوں لنگھنڑ آلے سر ہِلا ہِلا تے اُونکُوں لعن طعن کریندے تے اکھیندے ہَن جو ”واہ! ہیکل کُوں ڈھا تے ترے ڈینہہ ءچ بنڑاوݨ آلے، صلیب تُوں لہہ تے آپنڑے آپ کُوں بچا۔“ اِینویں ای سردار کاہِن وی شریعت دے عالماں نال رَل تے آپس ءچ اُوندا مذاق بنڑیندے ہوئے آدھے ہَن، ”اِیں بئیاں کُوں بچایا پر آپنڑے آپ کُوں نئیں بچا سگدا۔ اِسرائیل دے بادشاہ، المسیح، ہُنڑ صلیب تُوں لہہ آ تاں جو اساں ڈیکھ تے اِیمان گِھن آؤں۔“ تے جیہڑے اُوندے نال مصلُوب تھئے ہَن او وی اُونکُوں لعن طعن کریندے ہَن۔ جِیں ویلے ڈوپہر تھئی تاں سارے مُلک ءچ تریجھے پہر تئیں اندھارا چھایا ریہا۔ تریجھے پہر دے نیڑے یسُوع اُچی اواز ءچ آکھیا، ”اِلوہی اِلوہی لما شبقتنی؟“ جِیندا ترجمہ ہے ”میڈے خُدا! میڈے خُدا! تُوں میکُوں کیوں چھوڑ ڈِتا؟“ جیہڑے لوک اُتھاں کھڑے ہَن، اُنہاں ءچوں کُجھ ایہ سُنڑ تے آکھیا، ”ڈیکھو او ایلیّاہ نبی کُوں سڈیندے۔“ تے ہِک بندے بھج تے ہِک سپنج کُوں انگُور دے سِرکے ءچ بوڈ تے ہِک کانے اُتے رکھ تے اُونکُوں چُسایا تے آکھنڑ لگا، ”ذرا کھڑ ونجو، ڈیکھوں جو ایلیّاہ اُونکُوں لہاوݨ آندے یا نئیں۔“ وَل یسُوع وڈی اواز نال چِلا تے دم ڈے ڈِتا۔ تے ہیکل دا پڑدہ اُتوں کنُوں تلے تئیں پھٹ تے ڈُو ٹوٹے تھی گِیا۔ جیہڑا صوبیدار اُوندے سامنڑے کھڑا ہا، اُوں اُونکُوں اِینویں دم ڈیندے ہوئے ڈیکھ تے آکھیا، ”سچ مُچ ایہ بندہ خُدا دا پوتر ہا۔“ کئی عورتاں دُور کنُوں ڈیدھیاں پئیاں ہَن۔ اُنہاں ءچ مریم مگدلینی تے چھوٹے یعقُوب تے یوسیس دی ماء مریم تے سلومی ہَن۔ جِیں ویلے او گلیل ءچ ہا، ایہ عورتاں اُوندے پِچُھوں ٹُر پوندیاں تے اُوندی خدمت کریندیاں ہَن۔ تے بئیاں وی بہُوں ساریاں عورتاں ہَن جیہڑیاں اُوندے نال یروشلیم ءچ آئیاں ہَن۔ او تیاری دا ڈینہہ ہا جیہڑا سبت کنُوں ہِک ڈینہہ پہلے ہوندا ہا۔ اِیں واسطے جِیں ویلے شام تھئی تاں ارِمَتِیاہ شہر دے راہنڑ آلے یُوسف جیہڑا صدر ِ عدالت دا معزز ممبر ہا تے خود وی خُدا دی بادشاہی دا منتظر ہا، جُرأت نال پِیلاطُس دے کولھ وَنج تے یسُوع دی لاش منگی۔ پِیلاطُس حیران تھیّا جو او اِتنی جلدی مر گئے تے صوبیدار کُوں سڈ تے پُچھیا جو ”اُونکُوں موئے کِتی دیر تھی گئی ہے؟“ جِیں ویلے صوبیدار کنُوں حقیقت دا پتہ چلیا تاں لاش یُوسف کُوں ڈے ڈِتی۔ اُوں ہِک لینن دی چادر مُل گِھدی تے لاش کُوں لہا تے اُوں چادر ءچ کفنایا۔ تے ہِک قبر ءچ رکھ ڈِتا جیہڑی چٹان ءچ کھودی گئی ہئی تے قبر دے مُنہ اُتے ہِک پتھر ریڑھ ڈِتا۔ تے مریم مگدلینی تے یوسیس دی ماء مریم ڈیدھیاں پئیاں ہَن جو اُونکُوں کِتھاں رکھیا گِیا ہے۔ جِیں ویلے سبت دا ڈینہہ لنگھ گِیا تاں مریم مگدلینی تے یعقُوب دی ماء مریم تے سلومی خوشبودار مصالحے مُل گِھدے تاں جو وَنج تے یسُوع دی لاش اُتے مَلنڑ۔ او ہفتے دے پہلے ڈینہہ بہُوں سویلے سِجھ نِکلدے ای قبر اُتے آئیاں۔ او آپس ءچ آکھنڑ لگیاں جو ”ساڈے کیتے قبر دے مُنہ اگُوں پتھر کوݨ ریڑھ تے ہٹیسی؟“ پر جِیں ویلے اُنہاں نِگاہ کیتی تاں ڈِٹھا جو او پتھر جیہڑا بہُوں وڈا ہا پہلے کنُوں ای ریڑھیا ہویا ہے۔ قبر آلی غار دے اندر داخل تھی تے اُنہاں ہِک جوان کُوں چِٹا چولا پاتے سجے پاسُوں بیٹھے ڈِٹھا تے بہُوں حیران تھیّاں۔ اُوں اُنہاں کُوں آکھیا، ”ایجھیاں حیران نہ تھیؤ۔ تُساں یسُوع ناصری کُوں گولھیندیاں ہیوے جیہڑا مصلُوب تھیّا ہا۔ او زندہ تھی گئے۔ او اِتھاں کائنی۔ ڈیکھو ایہ او جاہ ہے جِتھاں اُنہاں اُونکُوں رکھیا ہا۔ پر تُساں وَنج تے پطرس تے بئے شاگرداں کُوں آکھو جو او تُہاڈے کنُوں پہلے گلیل کُوں ویسی۔ تُساں اُتھائیں اُونکُوں ڈیکھسو جِینویں اُوں تُہاکُوں آکھیا ہا۔“ او جلدی نال قبر کنُوں باہر نِکل تے بھج پئیاں کیوں جو کمبڑیں تے ہیبت اُنہاں اُتے غالب آ گئی ہئی، تے اُنہاں کہیں کُوں کُجھ نہ آکھیا کیوں جو او ڈردیاں ہَن۔ ہفتے دے پہلے ڈینہہ جِیں ویلے یسُوع صُبح سویلے زندہ تھی گِیا تاں سبھ کنُوں پہلے مریم مگدلینی اُتے ظاہر تھیّا، جیندے ءچوں اُوں سَت بدرُوحاں کڈھیاں ہَن۔ اُوں وَنج تے اُوندے ساتھیاں کُوں جیہڑے غم پارُوں روندے تے ماتم کریندے ہَن، خبر ڈِتی۔ اُنہاں ایہ سُنڑ تے جو یسُوع زندہ ہے تے اُونکُوں ڈِکھالی ڈِتے، یقین نہ کیتا۔ اِیندے بعد یسُوع ڈُوجھی صورت ءچ ڈُو بندیاں اُتے جِیں ویلے او دیہات دو پیدل ویندے پئے ہَن، ظاہر تھیّا۔ اُنہاں وی وَنج تے باقی لوکاں کُوں خبر ڈِتی پر اُنہاں، اُنہاں دا وی یقین نہ کیتا۔ وَل یسُوع اُنہاں یارہاں شاگرداں اُتے جِیں ویلے او کھانڑا کھاوݨ بیٹھے ہَن ظاہر تھیّا۔ اُوں اُنہاں دی بےاعتقادی تے سخت دِلی اُتے اُنہاں کُوں ملامت کیتی، کیوں جو جِنہاں اُوندے زندہ تھیوݨ تُوں بعد اُونکُوں ڈِٹھا ہا اُنہاں، اُنہاں دا یقین نہ کیتا ہا۔ اُوں اُنہاں کُوں آکھیا جو ”تُساں ساری دُنیا ءچ وَنج تے سارے لوکاں دے سامنڑے خوشخبری دی تبلیغ کرو۔ جیہڑا اِیمان گِھن آوے تے بپتسمہ گِھنے او نجات پیسی، پر جیہڑا اِیمان نہ گِھن آوے او مُجرم کھڑایا ویسی۔ تے اِیمان گِھن آوݨ آلیاں دے وچال ایہ معجزے تھیسن: او میڈے ناں نال بدرُوحاں کُوں کڈھیسن، نوِیاں نوِیاں زباناں بُولیسن، نانگاں کُوں چا گِھنسن، تے جے کوئی زہریلی چیز پی گِھنسن تاں اُنہاں کُوں کُجھ نُقصان نہ تھیسی۔ او بیماراں اُتے ہتھ رکھیسن تے او چنگے تھی ویسن۔“ خُداوند یسُوع اُنہاں نال کلام کرݨ تُوں بعد اسمان اُتے چا گِھدا گِیا تے خُدا دے سجے پاسُوں بہہ گِیا۔ وَل شاگرداں نِکل تے جاہ جاہ تبلیغ کیتی، تے خُداوند اُنہاں دے نال کم کریندا ریہا، تے اُنہاں معجزیاں دے وسیلے نال جیہڑے نال نال تھیندے ہَن کلام کُوں ثابت کریندا ریہا۔ معزز تِھیُفِلُس، بہُوں سارے لوکاں اُنہاں واقعات کُوں جیہڑے ساڈے وچال پیش آئے ہَن، لِکھنڑ دی ذمہ داری چاتی۔ اُنہاں او گالھیں بیان کیتیاں جیہڑیاں ساکُوں اُنہاں لوکاں دی طرفوں پُجیاں، جِنہاں شروع کنُوں آپنڑے اکھیں نال ڈِٹھا تے کلام دے خادم ہِن۔ مَیں وی ہر گالھ دا شروع کنُوں ٹھیک ٹھیک پتہ کیتا ہے، اِیں واسطے مَیں مناسب سمجھیا جو اِنہاں کُوں تُہاڈے کیتے ترتیب نال لِکھاں، تاں جو جیہڑے گالھیں تُہاکُوں سِکھائیاں گئیاں ہِن، تُساں اُنہاں دی حقیقت کُوں جاݨ سگو۔ یہُودیہ دے بادشاہ ہیرودیس دے زمانے ءچ ابیاہ دے آبائی خاندان ءچوں زکریاہ ناں دا ہِک کاہِن ہا۔ اُوندی ذال وی ہارُون کاہِن دی اولاد ءچوں ہئی تے اُوندا ناں اِلیشِبَع ہئی۔ او ڈوہائیں خُدا دی نظر ءچ نیک ہَن تے خُداوند دے سارے حُکماں تے قانُوناں اُتے بے عیب عمل کریندے ہَن۔ پر اُنہاں دے اولاد نہ ہئی کیوں جو اِلیشِبَع بانجھ ہئی تے او ڈوہائیں بُڈھے ہَن۔ جِیں ویلے زکریاہ دے آبائی خاندان دی واری آئی تے او خُدا دے حضُور آپنڑی کاہِن آلی خدمت ادا کریندا پِیا ہا، تاں کاہِناں دے دستور دے مطابق اُوندے ناں دی پرچی نِکلی جو او خُداوند دی ہیکل ءچ وَنج تے خوشبودار مصالحہ ساڑے۔ لوکاں دی ساری بِھیڑ خوشبودار مصالحہ ساڑݨ ویلے باہر دُعا کریندی پئی ہئی۔ اُوں ویلے رب دا ہِک فرشتہ خوشبودار مصالحہ ساڑن آلی قُربان گاہ دے سجے پاسے کھڑا اُونکُوں نظر آیا۔ زکریاہ اُونکُوں ڈیکھ تے گھبرا گِیا تے اُوندے اُتے دہشت چھا گئی۔ پر فرشتے اُونکُوں آکھیا، ”زکریاہ! خوف نہ کر کیوں جو تیڈی دُعا سُنڑی گئی ہے تے تیڈے کیتے تیڈی ذال اِلیشِبَع دے پوتر جمسی۔ تُوں اُوندا ناں یُوحنّا رکھیں۔ تیکُوں خوشی تے شادمانی ہوسی تے بہُوں سارے لوک اُوندی پیدائش تُوں خوش تھیسن، کیوں جو او خُداوند دے حضُور ءچ بزُرگ ہوسی۔ او ہرگز نہ انگُور دی نہ کوئی بئی شراب پی سی، تے آپنڑی ماء دے پیٹ تُوں ای رُوح القُدس نال بھریج ویسی۔ تے بنی اِسرائیل دے بہُوں سارے لوکاں کُوں خُداوند دی راہ اُتے جیہڑا اُنہاں دا خُدا ہے ولا گِھن آسی۔ اُوندے ءچ ایلیّاہ جیہی رُوح تے قوت ہوسی تے او خُداوند تُوں پہلے آسی تاں جو پِیُو دا دل اولاد آلے پاسے لاوے تے نافرماناں کُوں نیک لوکاں دی حِکمت آلی راہ آلے پاسے پھیر ڈیوے تے لوکاں کُوں خُداوند دی آمد کیتے تیار کرے۔“ زکریاہ فرشتہ کُوں آکھیا، ”مَیں اِیں گالھ دا کِینویں یقین کراں کیوں جو مَیں تاں بُڈھا ہاں تے میڈی ذال وی بُڈھی ہے؟“ فرشتہ جواب ڈِتا، ”مَیں جبرائیل ہاں جیہڑا خُدا دے حضُور کھڑا راہندا ہاں، تے اِیں واسطے بھیجیا گِیا ہاں جو تیڈے نال کلام کراں تے تیکُوں اِنہاں گالھیں دی خوشخبری سُنڑاواں۔ پر ڈیکھ جیہڑے ڈینہہ تئیں ایہ گالھیں پُوریاں نہ تھی ونجنڑ تیڈی زبان بند راہسی تے تُوں بول نہ سگسیں کیوں جو تُوں میڈے گالھیں دا، جیہڑیاں آپنڑے وقت اُتے پُوریاں تھیسن، یقین نئیں کیتا۔“ باہر لوک زکریاہ دا اِنتظار کریندے، تے حیران ہَن جو اُونکُوں ہیکل ءچ اِتنی دیر کیوں لگی۔ جِیں ویلے او باہر آیا تاں اُنہاں نال بول نہ سگیا۔ لوک سمجھ گئے جو اُوں ہیکل ءچ رویا ڈِٹھی ہے کیوں جو او اُنہاں نال اِشارے ءچ گالھ کریندا ہا تے گُونگا ای ریہا۔ وَل جِیں ویلے زکریاہ دی خدمت دے ڈینہہ پُورے تھی گئے تاں او آپنڑے گھر گِیا۔ اِنہاں ڈینہاں دے بعد اُوندی ذال اِلیشِبَع حاملہ تھئی تے اُوں آپنڑے آپ کُوں پنج مہینے تئیں ایہ آکھ تے لُکائی رکھیا جو ”خُداوند میڈے کیتے ایہ کیتا ہے۔ ہُنڑ اُوں میڈے اُتے نظر کیتی تے لوکاں دے سامنڑے میڈی رسوائی دور کیتی۔“ اِلیشِبَع دے حمل دے چِھینویں مہینے ءچ خُدا جبرائیل فرشتہ کُوں گلیل دے ہِک شہر ناصرت ءچ ہِک کُنواری دے کولھ بھیجیا جیندی منگنڑی یُوسف ناں دے ہِک بندے نال تھئی ہئی جیہڑا داؤد دی اولاد ءچوں ہا۔ تے اُوں کُنواری دا ناں مریم ہا۔ فرشتہ اُوندے کولھ آ تے آکھیا، ”سلام تیکُوں جیندے اُتے فضل تھیّا ہے! خُداوند تیڈے نال ہے۔“ مریم اِیں کلام تُوں بہُوں گھبرا گئی تے سوچنڑ لگی جو ”ایہ کیجھا کلام ہے؟“ فرشتہ اُونکُوں آکھیا، ”مریم خوف نہ کر کیوں جو خُدا دی طرفوں تیڈے اُتے فضل تھیّا ہے۔ تُوں حاملہ تھیسیں تے تیڈے پوتر جم سی۔ اُوندا ناں یسُوع رکھیں۔ او بزُرگ ہوسی تے خُدا تعالیٰ دا پوتر اکھویسی تے خُداوند خُدا اُوندے پِیُو داؤد دا تخت اُونکُوں ڈیسی۔ تے او یعقُوب دی اولاد اُتے ہمیشاں تئیں بادشاہی کریسی تے اُوندی بادشاہی دا اخیر نہ ہوسی۔“ مریم فرشتہ کُوں آکھیا، ”ایہ کِینویں تھی سگدے، مَیں تاں حالی کُنواری ہاں؟“ فرشتہ جواب ءچ اُونکُوں آکھیا، ”رُوح القُدس تیڈے اُتے نازل تھیسی تے خُدا تعالیٰ دی قُدرت تیڈے اُتے چھاں کریسی۔ اِیں وجہ کنُوں او مُقدّس بچّہ، خُدا دا پوتر اکھویسی۔ تے ڈیکھ تیڈی رشتہ دار اِلیشِبَع کُوں وی بُڈھیپے ءچ پوتر جمنڑ آلا ہے۔ او جیہڑی بانجھ اکھویندی ہئی، اُونکُوں چِھینواں مہینہ ہے۔ کیوں جو خُدا کیتے کوئی وی گالھ ناممکن نئیں۔“ مریم آکھیا، ”ڈیکھ مَیں خُداوند دی بندی ہاں۔ میڈے کیتے تیڈے پیغام دے مطابق تھیوے۔“ وَل فرشتہ اُوندے کولُھوں چلیا گِیا۔ اُونہی ڈینہاں ءچ مریم اُٹھی تے جلدی نال پہاڑی علاقے ءچ یہُوداہ دے ہِک شہر کُوں گئی، تے زکریاہ دے گھر ءچ داخل تھی تے اِلیشِبَع کُوں سلام کیتا۔ جِینویں ای اِلیشِبَع مریم دا سلام سُنڑیا تاں بال اُوندے پیٹ ءچ اُچھل پِیا۔ اِلیشِبَع رُوح القُدس نال بھریج گئی تے اُچی اواز نال آکھنڑ لگی جو ”تُوں عورتاں ءچوں مُبارک ہیں، تے تیڈے پیٹ دا پھل مُبارک ہے۔ میڈے اُتے ایہ فضل کِتھوں تھیّا جو میڈے خُداوند دی ماء میڈے کولھ آئی؟ جِینویں ای تیڈے سلام دی اواز میڈے کَناں تئیں پُجی، بال خوشی نال میڈے پیٹ ءچ اُچھل پِیا۔ مُبارک ہیں تُوں جیہڑی اِیمان گِھن آئی جو جیہڑے گالھیں خُداوند دی طرفوں تیکُوں آکھیاں گئیاں ہَن او پُوریاں تھیسن۔“ وَل مریم آکھیا، ”میڈی جان رب دی تعظیم کریندی ہے تے میڈی رُوح میڈے نجات ڈیوݨ آلے خُدا تُوں خوش ہے۔ کیوں جو اُوں آپنڑی بندی دی پست حالی اُتے نِگاہ کیتی تے ہُنڑ تُوں گِھن تے ہر زمانے دے لوک میکُوں مُبارک اکھیسن۔ کیوں جو قادرِ مُطلق میڈے کیتے وڈے وڈے کم کیتے ہِن تے اُوندا ناں پاک ہے۔ اُوندا رحم اُنہاں اُتے نسل در نسل راہندے جیہڑے اُوں کنُوں ڈردے ہِن۔ اُوں آپنڑے بازو نال زور ڈِکھایا تے جیہڑے آپنڑے آپ کُوں وڈا سمجھدے ہَن، اُوں اُنہاں کُوں تِتربِتر کر ڈِتا۔ اُوں اِختیار آلیاں کُوں تخت کنُوں سَٹ ڈِتا تے پست حالاں کُوں اُچا کر ڈِتا۔ اُوں بُکھیاں کُوں چنگیاں چیزاں نال رَجا ڈِتا پر دولت منداں کُوں خالی ہتھ پِچھاں پھیر ڈِتا۔ اُوں آپنڑے خادم اِسرائیل دی مدد کیتی تے آپنڑی اُوں رحمت کُوں یاد فرمایا جیہڑی ابرہام تے اُوندی نسل نال ہمیشاں تئیں راہسی جِینویں اُوں ساڈے پِیُو ڈاڈے نال وعدہ کیتا ہا۔“ تے مریم تقریباً ترے مہینے تئیں اِلیشِبَع دے نال رہ تے ولا آپنڑے گھر وَل گئی۔ وَل اِلیشِبَع دے بال جمنڑ دا وقت تھی گِیا تے اُوندے پوتر جمیا۔ اُوندے ہمسائے تے رشتہ داراں ایہ سُنڑ تے جو خُداوند اُوندے اُتے وڈی رحمت کیتی، اُوندے نال خوشی منائی۔ اٹھویں ڈینہہ او بال دا ختنہ کراوݨ کیتے آئے تے اُوندا ناں اُوندے پِیُو دے ناں اُتے زکریاہ رکھنڑ لگے۔ پر اُوندی ماء آکھیا، ”نئیں، اُوندا ناں یُوحنّا رکھیا ونجے۔“ اُنہاں اُونکُوں آکھیا جو ”تُہاڈے خاندان ءچ تاں کہیں دا وی ایہ ناں نئیں۔“ وَل اُنہاں اُوندے پِیُو کُوں اِشارہ کیتا جو ”تُساں اُوندا ناں کیا رکھنڑا چاہندے ہیوے؟“ اُوں تختی منگوائی تے اُوندے اُتے ایہ لِکھیا ”اُوندا ناں یُوحنّا ہے۔“ تے سبھ حیران رہ گئے۔ اُونہی ویلے زکریاہ دا مُنہ تے زبان کُھل گئی تے او بولنڑ تے خُدا دی حمد کرݨ لگا۔ اُنہاں دے آسے پاسے دے ساریاں لوکاں اُتے خوف چھا گِیا تے یہُودیہ دے سارے پہاڑی علاقے ءچ اِنہاں سبھ گالھیں دا چرچا تھیوݨ لگا۔ سبھ سُنڑݨ آلیاں دل ءچ سوچ تے آکھیا جو ”ایہ چھوہر کیجھا تھیسی؟ کیوں جو رب دا ہتھ اُوندے اُتے ہا۔“ وَل اُوندا پِیُو زکریاہ رُوح القُدس نال بھریج گِیا تے نبُوّت کرݨ لگا، ”رب العالمین، اِسرائیل دے خُدا دی حمد تھیوے، کیوں جو اُوں آپنڑی اُمت دا خیال کر تے اُونکُوں رہائی بخشی تے آپنڑے خادم داؤد دی اولاد ءچوں ساڈے کیتے ہِک نجات ڈیوݨ آلا بھیجیا، جِینویں بہُوں پہلے اُوں آپنڑے پاک نبیاں دی معرفت آکھیا ہا، یعنی جو او ساکُوں ساڈے دُشمنڑاں تُوں تے سبھ نفرت رکھنڑ آلیاں دے ہتُھوں نجات بخشیسی تاں جو او ساڈے پِیُو ڈاڈے اُتے رحم کرے تے آپنڑے پاک عہد کُوں یاد فرماوے، یعنی اُوں قَسم کُوں جیہڑی اُوں ساڈے پِیُو ابرہام نال کھادی ہئی تے میڈے پوتر! تُوں خُدا تعالیٰ دا نبی اکھویسیں کیوں جو تُوں خُداوند دے اگُوں اگُوں ٹُر تے اُوندے رستے تیار کریسیں تاں جو اُوندے لوکاں کُوں نجات دا علم بخشیں جیہڑا اُنہاں کُوں گُناہاں دی معافی تُوں حاصل تھیوے۔ ایہ ساڈے خُدا دی عین رحمت نال تھیسی جیندے سببّوں ساڈے اُتے اسمان کنُوں نُور چمکسی تاں جو اُنہاں کُوں جیہڑے اندھارے تے موت دی چھاں ءچ بیٹھے ہَن روشنی بخشے تے ساڈے پیراں کُوں سلامتی دے رستے اُتے ٹورے۔“ تے او چھوہر یُوحنّا ودھدا تے رُوح ءچ قوت پَیندا گِیا تے بنی اِسرائیل اُتے ظاہر تھیوݨ تئیں بیابان ءچ ریہا۔ اُنہاں ڈینہاں ءچ اِینویں تھیّا جو رومی بادشاہ قیصر اَوگُوستُس دی طرفوں ایہ حُکم جاری تھیّا جو رومی سلطنت دے سارے لوکاں دے ناں لِکھے ونجنڑ۔ ایہ پہلی مردم شماری سُوریہ دے گورنر کورنِیُس دے دور ءچ تھئی۔ تے سبھ لوک ناں لِکھواوݨ کیتے آپنڑے آپنڑے شہر کُوں گئے۔ اِیں واسطے یُوسف وی گلیل دے شہر ناصرت تُوں یہُودیہ ءچ داؤد دے شہر بیت لحم کُوں گِیا، کیوں جو او داؤد دے گھرانڑے تے اولاد ءچوں ہا۔ تاں جو آپنڑی منگیتر مریم نال جیہڑی حاملہ ہئی، ناں لِکھواوے۔ جِیں ویلے او اُتھاں ہَن تاں مریم دے بال جمنڑ دا وقت آ گِیا، تے اُوندا پلوٹھا پوتر جمیا۔ اُوں اُونکُوں کپڑے ءچ ولھیٹ تے کُھرلی ءچ رکھ ڈِتا کیوں جو اُنہاں کیتے سراں ءچ جاہ نہ ہئی۔ اُوں علاقے ءچ کُجھ آجڑی ہَن جیہڑے رات کُوں میدان ءچ رہ تے آپنڑے اِجڑ دی رکھوالی کریندے پئے ہَن۔ رب دا ہِک فرشتہ اُنہاں اُتے ظاہر تھیّا تے رب دا جلال اُنہاں دے چودھارُوں چمکیا تے او بہُوں ڈر گئے۔ پر فرشتے اُنہاں کُوں آکھیا، ”ڈرو نہ، کیوں جو ڈیکھو مَیں تُہاکُوں وڈی خوشی دی بشارت ڈیندا ہاں جیہڑی ساری اُمت کیتے ہوسی۔ اَج داؤد دے شہر ءچ تُہاڈے کیتے ہِک نجات ڈیوݨ آلا پیدا تھئے یعنی المسیح جیہڑا خُداوند ہے۔ تے اُوندا تُہاڈے کیتے ایہ نشان ہے جو تُساں ہِک بال کُوں کپڑے ءچ ولھیٹیا تے کُھرلی ءچ پِیا ہویا پے سو۔“ یک دم فرشتیاں دا ہِک گروہ اُوں فرشتہ نال خُدا دی تعریف کریندا تے ایہ آدھا ظاہر تھیّا جو ”سبھ تُوں اُچے اسمان اُتے خُدا دی تمجید ہووے تے زمین اُتے اُنہاں آدمیاں نال صُلح جِنہاں تُوں او خوش ہے۔“ جِیں ویلے فرشتے اُنہاں کولُھوں اسمان اُتے چلے گئے تاں آجڑیاں آپس ءچ آکھیا، ”آؤ بیت لحم تئیں جُلوں تے ایہ گالھ جیہڑی تھئی ہے تے جیندی خُداوند ساکُوں خبر ڈِتی ہے، ڈیکھوں۔“ بس اُنہاں جلدی نال وَنج تے مریم تے یُوسف کُوں گولھ گِھدا تے اُوں بال کُوں کُھرلی ءچ پِیا ہویا ڈِٹھا۔ اُنہاں کُوں ڈیکھ تے او گالھ جیہڑی اُوں بال دے بارے ءچ آکھی گئی ہئی، مشہور کیتی۔ آجڑیاں دے گالھیں سُنڑ تے سارے لوک حیران تھئے۔ پر مریم اِنہاں سارے گالھیں کُوں آپنڑے دل ءچ رکھ تے غور کریندی ریہی۔ آجڑیاں کُوں جِینویں ڈسایا گِیا ہا، او اُونویں ای سبھ کُجھ ڈیکھ تے، تے سُنڑ تے خُدا دی تعریف کریندے ہوئے واپس وَل گئے۔ جِیں ویلے اَٹھ ڈینہہ پُورے تھئے تے بال دے ختنہ کراوݨ دا وقت آیا تاں اُوندا ناں یسُوع رکھیا گِیا جیہڑا فرشتے مریم کُوں حاملہ تھیوݨ کنُوں پہلے ڈسیا ہا۔ وَل جِیں ویلے مُوسیٰ دی شریعت دے مطابق اُنہاں دے پاک تھیوݨ دے ڈینہہ پُورے تھی گئے تاں یُوسف تے مریم بال کُوں یروشلیم گِھن آئے تاں جو اُونکُوں خُداوند دے حضُور پیش کرݨ، جِینویں خُداوند دی شریعت ءچ لِکھیا ہے جو ”ہر ہِک پلوٹھا رب کیتے مخصوص کیتا ویسی، “ تے خُداوند دی شریعت دے اِیں قول دے مطابق قُربانی کرݨ جو ”گُھگیاں دا ہِک جوڑا یا کبوتر دے ڈُو بچّے گِھن آؤ ۔“ یروشلیم ءچ ہِک بندہ ہا جِیندا ناں شمعون ہا۔ او نیک تے خُدا ترس تے اِسرائیل دی نجات دا اِنتظار کریندا پِیا ہا تے رُوح القُدس اُوندے اُتے ہا۔ رُوح القُدس اُونکُوں ڈسا ڈِتا ہا جو تُوں نہ مرسیں جئیں تئیں تُوں خُداوند دے المسیح کُوں ڈیکھ نہ گِھنیں۔ او رُوح القُدس دی ہدایت نال ہیکل ءچ آیا، تے جیہڑے ویلے ماء پِیُو اُوں بال یسُوع کُوں اندر گِھن آئے تاں جو اُوندے کیتے شریعت دے فرائض ادا کرݨ، تاں شمعون بال کُوں آپنڑی جھولی ءچ گِھن گِھدا تے خُدا دی حمد کر تے آکھنڑ لگا جو ”مالک! تُوں آپنڑے وعدے دے مطابق ہُنڑ آپنڑے خادم کُوں سلامتی نال رُخصت کر۔ کیوں جو میڈے اکھیں تیڈی نجات ڈیکھ گِھدی ہے جیہڑی تُوں سبھ قوماں دے سامنڑے تیار کیتی ہے، تاں جو او غیر قوماں کُوں روشنی ڈیوݨ آلا نُور تے تیڈی اُمت اِسرائیل دا جلال بنڑے۔“ بال دا پِیُو تے اُوندی ماء اِنہاں گالھیں کُوں جیہڑیاں اُوندے حق ءچ آکھیاں ویندیاں ہَن حیران تھیندے ہَن۔ شمعون اُنہاں کیتے دُعائے خیر کیتی تے اُوندی ماء مریم کُوں آکھیا، ”ایہ بال اِسرائیل ءچ بہُوں سارے لوکاں دے ڈھاوݨ تے کھڑے تھیوݨ کیتے مقرر تھئے۔ او ایجھا نشان ہوسی جیندی مخالفت کیتی ویسی، تاں جو بہُوں سارے لوکاں دے دِلاں دے خیال ظاہر تھی ونجنڑ، بلکہ خود تیڈی جان کُوں وی تلوار لگسی۔“ اُتھاں ہِک نبِیّہ وی ہئی یعنی فنُوایل دی دِھی حنّاہ، جیہڑی آشر دے قبیلے ءچوں ہئی۔ او بہُوں بُڈھی ہئی، تے آپنڑی شادی دے بعد سَت سال تئیں آپنڑے پئے نال راہندی ریہی ہئی۔ او چُوراسی (84) سال کنُوں بیوہ ہئی، تے ہیکل ءچوں نہ نِکلدی ہئی بلکہ ڈینہہ رات روزہ رکھ تے دُعا تے عبادت کریندی راہندی ہئی۔ او اُوں ویلے اُنہاں دے کولھ آ تے خُدا دا شُکر کرݨ لگی، تے اُنہاں ساریاں نال جیہڑے یروشلیم دی رہائی دے منتظر ہَن، اُوندے بارے ءچ گالھیں کرݨ لگی۔ جِیں ویلے اُنہاں رب دی شریعت دے مطابق سبھ کُجھ کر گِھدا تاں گلیل ءچ آپنڑے شہر ناصرت کُوں وَل گئے۔ تے او چھوہر ودھدا تے قوت پَیندا گِیا تے حِکمت نال بھریندا گِیا تے خُدا دا فضل اُوندے اُتے ہا۔ یسُوع دے ماء پِیُو ہر سال عید ِ فسح کیتے یروشلیم ویندے ہَن۔ جِیں ویلے او بارہاں سال دا تھیّا تاں او عید دے دستور دے مطابق یروشلیم گئے۔ جڈاں عید دے ڈینہہ پُورے تھئے تاں اُوندے ماء پِیُو گھر وَل گئے پر او چھوہر یسُوع یروشلیم ءچ رہ گِیا تے اُنہاں کُوں پتہ نہ ہا۔ ایہ سوچ تے جو او قافلے ءچ ہے، اُوندے ماء پِیُو ہِک ڈینہہ دا سفر کر تے اُونکُوں آپنڑے رشتہ داراں تے جاݨ پچھاݨ آلیاں ءچ گولھنڑ لگے۔ جِیں ویلے او نہ مِلیا تاں اُونکُوں گولھیندے گولھیندے یروشلیم تئیں واپس گئے۔ ترے ڈینہہ بعد اُنہاں اُونکُوں ہیکل ءچ عالماں دے وچال بیٹھے، اُنہاں دی سُنڑدے تے اُنہاں نال سوال کریندے ڈِٹھا۔ تے جِتّی اُوندی سُنڑدے پئے ہَن، اُوندی سمجھ تے اُوندے جواب سُنڑ تے حیران ہَن۔ اُوندے ماء پِیُو اُونکُوں ڈیکھ تے حیران تھئے تے اُوندی ماء اُونکُوں آکھیا، ”پوتر! تَیں ساڈے نال اِینویں کیوں کیتے؟ ڈیکھ تیڈا پِیُو تے مَیں فِکر مند تھی تے تیکُوں گولھیندے پئے ہسے۔“ اُوں اُنہاں کُوں آکھیا، ”تُساں میکُوں کیوں گولھیندے پئے ہَوے؟ کیا تُہاکُوں پتہ نہ ہا جو میکُوں آپنڑے باپ دے گھر ہووݨ لازم ہے؟“ پر او اُوندی گالھ نہ سمجھے۔ او اُنہاں نال روانہ تھی تے ناصرت ءچ آیا تے اُنہاں دے تابع ریہا۔ اُوندی ماء ایہ سارے گالھیں آپنڑے دل ءچ رکھیاں۔ تے یسُوع حِکمت تے قد ءچ ودھدا گِیا تے خُدا تے اِنسان دی نِگاہ ءچ مقبول تھیندا گِیا۔ رومی بادشاہ تِبرِیُس قیصر دی حکُومت دے پندھرویں سال جِیں ویلے پنطیُس پِیلاطُس یہُودیہ دا گورنر ہا، تے ہیرودیس گلیل دا تے اُوندا بِھرا فِلپُس اِتُوریہ تے ترخونیتِس دا تے لِسانیاس اَبِلینے دا حاکم ہا، تے حنّا تے کائفا کاہِن ِ اعظم ہَن ، اُوں ویلے خُدا دا کلام بیابان ءچ یُوحنّا بِن زکریاہ اُتے نازل تھیّا۔ او یردن دے آسُوں پاسُوں وَنج تے تبلیغ کرݨ لگا جو گُناہاں دی معافی کیتے توبہ کر تے بپتسمہ گِھنو۔ جِینویں یسعیاہ نبی دی کتاب ءچ لِکھیا ہے جو ”بیابان ءچ ہکل ڈیوݨ آلے دی اواز آندی ہے جو رب دی راہ تیار کرو تے اُوندے رستے سِدھے بنڑاؤ۔ ہر وادی بھر ڈِتی ویسی ہر پہاڑ تے ٹِبہ پدھرا کر ڈِتا ویسی جیہڑا ڈِنگا ہے او سِدھا بنڑ ویسی تے جیہڑا اُچا جِھکا ہے ہموار رستہ بنڑ ویسی۔ تے سارے لوک خُدا دی نجات ڈیکھسن ۔“ بس جیہڑے لوک یُوحنّا تُوں بپتسمہ گِھننڑ کیتے آندے ہَن او اُنہاں کُوں آدھا ہا، ”نانگ دے بالو! تُہاکُوں کئیں چتا ڈِتے جو آوݨ آلے قہر کنُوں بھجو؟ بس ایجھے کم کرو جو نظر آوے جو تُساں توبہ کیتی ہے تے آپنڑی اِیں بُھل ءچ نہ راہو جو ’ابرہام ساڈا پِیُو ہے۔‘کیوں جو مَیں تُہاکُوں آدھا ہاں جو خُدا اِنہاں پتھراں کنُوں ابرہام کیتے اولاد پیدا کر سگدے۔ ہُنڑ تاں درختاں دی جڑھ اُتے کُہاڑا رکھ ڈِتا گئے۔ بس جیہڑا درخت چنگا پھل نئیں ڈیندا او کپیا تے بھاہ ءچ سٹیا ویندے۔“ لوکاں اُوں کنُوں پُچھیا، ”وَل اساں کیا کرُوں؟“ اُوں جواب ءچ آکھیا، ”جیندے کولھ ڈُو چولے ہووݨ، او ہِک اُونکُوں ڈیوے جیندے کولھ ہِک وی کائنی، تے جیندے کولھ کھانڑا ہووے او وی اِینویں ای کرے۔“ تے محصُول گِھننڑ آلے وی بپتسمہ گِھننڑ آئے تے اُوں کنُوں پُچھنڑ لگے جو ”اُستاد! اساں کیا کرُوں؟“ اُوں اُنہاں کُوں آکھیا، ”جیہڑا تُہاڈے کیتے مقرر ہے اُوں کنُوں زیادہ نہ گِھنو۔“ سپاہیاں وی اُوں کنُوں پُچھیا جو ”اساں کیا کرُوں؟“ اُوں اُنہاں کُوں آکھیا، ”کہیں اُتے ظلم نہ کرو تے نہ کہیں تُوں ناحق کُجھ گِھنو تے آپنڑی تنخواہ ءچ گُزارہ کرو۔“ جِیں ویلے لوک مسیح دی آمد دے اِنتظار ءچ ہَن تے سارے آپنڑے آپنڑے دل ءچ یُوحنّا دے بارے سوچیندے پئے ہَن جو شاید او المسیح ہے یا نئیں، تاں یُوحنّا سبھ کُوں جواب ءچ آکھیا، ”مَیں تاں تُہاکُوں پانڑی نال بپتسمہ ڈیندا ہاں، پر جیہڑا مَیں کنُوں زور آور ہے، او آوݨ آلا ہے۔ مَیں اُوندی جُتی دا تسمہ کھولنڑ دے لائق نئیں۔ او تُہاکُوں رُوح القُدس تے بھاہ نال بپتسمہ ڈیسی۔ اُوندا چھج اُوندے ہتھ ءچ ہے تے او آپنڑے دانڑیاں کُوں بُھوں تُوں اَنج کریسی۔ وَل او دانڑیاں کُوں تاں آپنڑے پَلیاں ءچ کٹھا کریسی پر بُھوں کُوں اُوں بھاہ ءچ سَٹ ڈیسی جیہڑی وِسمنڑ آلی نئیں۔“ بس یُوحنّا اُنہاں کُوں نصیحت ءچ بہُوں سارے گالھیں ڈسیندا تے خوشخبری سُنڑیندا ریہا۔ پر اِیندے بعد یُوحنّا چوتھائی مُلک دے حاکم ہیرودیس کُوں ملامت کیتی، کیوں جو ہیرودیس آپنڑے بِھرا فِلپُس دی ذال ہیرودیاس نال شادی کیتی ہئی، تے اِیندے علاوہ بہُوں بئے بُرائیاں وی کیتیاں ہَن۔ اِیندے اُتے ہیرودیس اِنہاں سبھ کنُوں ودھ تے ایہ وی کیتا جو یُوحنّا کُوں قید ءچ سَٹ ڈِتا۔ جِیں ویلے سبھ لوکاں بپتسمہ گِھن گِھدا تاں یسُوع وی بپتسمہ گِھدا۔ جِیں ویلے او دُعا کریندا پِیا ہا تاں اسمان کُھل گِیا، تے رُوح القُدس جِسمانی صورت ءچ کبوتر وانگُوں اُوندے اُتے نازل تھیّا تے اسمان کنُوں اواز آئی جو ”تُوں میڈا پیارا پوتر ہیں، تَیں کنُوں مَیں بہُوں خوش ہاں۔“ جِیں ویلے یسُوع خدمت شروع کیتی، او تقریباً ترِیح سال دا ہا۔ جِینویں سمجھیا ویندا ہا او یُوسف دا پوتر ہا۔ یُوسف عیلی دا پوتر ہا، تے او متّات دا تے او لاوی دا تے او ملکی دا تے او ینّا دا تے او یُوسف دا، تے او متِّتیاہ دا تے او عامُوس دا تے او ناحُوم دا تے او اسلیاہ دا تے او نوگہ دا، تے او ماعَت دا تے او متِّتیاہ دا تے او شمِعی دا تے او یوسیخ دا تے او یوداہ دا، تے او یُوحنّا دا تے او ریسا دا تے او زرُبابل دا تے او سیالتی ایل دا تے او نیری دا، تے او ملکی دا تے او اَدّی دا تے او قوسام دا تے او اِلمودام دا تے او عیر دا، تے او یشُوع دا تے او الِیعزر دا تے او یورِیم دا تے او متّات دا تے او لاوی دا، تے او شمعون دا تے او یہُوداہ دا تے او یُوسف دا تے او یُونان دا تے او اِلیاقِیم دا، تے او ملےآہ دا تے او مِنّاہ دا تے او متّتاہ دا تے او ناتن دا تے او داؤد دا، تے او یسّی دا تے او عوبید دا تے او بوعز دا تے او سلمون دا تے او نحسون دا، تے او عِمّینداب دا تے او ارنی دا تے او حصرون دا تے او فارص دا تے او یہُوداہ دا، تے او یعقُوب دا تے او اِضحاق دا تے او ابرہام دا تے او تارہ دا تے او نحُور دا، تے او سروج دا تے او رعُو دا تے او فلج دا تے او عِبر دا تے او سِلح دا، تے او قینان دا تے او ارفکسد دا تے او سم دا تے او نُوح دا تے او لمک دا، تے او متوسِلح دا تے او حنُوک دا تے او یارِد دا تے او مہلل ایل دا تے او قِینان دا، تے او انُوس دا تے او سیت دا تے او آدم دا تے او خُدا دا ہا ۔ وَل یسُوع رُوح القُدس کنُوں بھریج تے یردن کنُوں وَل آیا تے رُوح دی ہدایت نال چالیہہ ڈینہہ تئیں بیابان ءچ پِھردا ریہا، تے ابلیس اُونکُوں ازمیندا ریہا۔ اُنہاں ڈینہاں ءچ اُوں کُجھ نہ کھادا تے جِیں ویلے او ڈینہہ پُورے تھی گئے تاں اُونکُوں بُکھ لگی۔ ابلیس اُونکُوں آکھیا جو ”جے تُوں خُدا دا پوتر ہیں تاں اِیں پتھر کُوں آکھ جو روٹی بنڑ ونجے۔“ یسُوع اُونکُوں جواب ڈِتا، ”لِکھیا ہے جو اِنسان صرف روٹی نال ای زندہ نہ راہسی ۔“ وَل ابلیس اُونکُوں اُچی جاہ تے گِھن گِیا تے ہِک گھڑی ءچ دُنیا دیاں ساریاں بادشاہیاں ڈِکھائیاں، تے اُونکُوں آکھیا، ”مَیں ایہ سارا اِختیار تے اُنہاں دی شان و شوکت تیکُوں ڈے ڈیساں کیوں جو ایہ میڈے سپُرد ہے تے جِینکُوں چاہنداں ہاں ڈیندا ہاں۔ بس جے تُوں میڈے اگُوں سجدہ کریں تاں ایہ سبھ کُجھ تیڈا ہوسی۔“ یسُوع جواب ءچ اُونکُوں آکھیا، ”لِکھیا ہے جو تُوں رب آپنڑے خُدا کُوں سجدہ کر، تے صرف اُوندی ای عبادت کر ۔“ آخر ءچ ابلیس اُونکُوں یروشلیم ءچ گِھن گِیا تے ہیکل دے منارے اُتے کھڑا کر تے اُونکُوں آکھیا، ”جے تُوں خُدا دا پوتر ہیں تاں آپنڑے آپ کُوں تلے سَٹ ڈے۔ کیوں جو لِکھیا ہے جو ’او تیڈے کیتے آپنڑے فرشتیاں کُوں حُکم ڈیسی جو تیڈی حفاظت کرݨ۔‘ تے ایہ وی جو ’او تیکُوں آپنڑے ہتھاں اُتے چا گِھنسن اِینویں نہ تھیوے جو تیڈے پیراں کُوں پتھر نال دھک لگے ‘۔“ یسُوع جواب ءچ اُونکُوں آکھیا، ”فرمایا گِیا ہے جو تُوں رب آپنڑے خُدا دی ازمائش نہ کر ۔“ جِیں ویلے ابلیس ساریاں ازمائشاں کر گِھدیاں تاں کُجھ عرصہ کیتے اُونکُوں چھوڑ ڈِتا۔ وَل یسُوع رُوح القُدس دی قوت نال بھریج تے گلیل ءچ واپس آیا تے چودھارُوں اُوندی مشہوری تھی گئی۔ او اُنہاں دے عبادت خانیاں ءچ تعلیم ڈیندا ریہا، تے سبھ اُوندی تعریف کریندے ہَن۔ وَل یسُوع ناصرت ءچ آیا جِتھاں او پلیا ہا تے آپنڑے دستور دے مطابق سبت دے ڈینہہ عبادت خانہ ءچ گِیا تے تلاوت کرݨ کیتے کھڑا تھیّا۔ یسعیاہ نبی دا صحیفہ اُونکُوں ڈِتا گِیا تے اُوں اُونکُوں کھول تے اُوں جاہ تُوں تلاوت کیتی جِتھاں ایہ لِکھیا ہا جو ”رب دا رُوح میڈے اُتے ہے کیوں جو اُوں میکُوں مسح کیتے تاں جو مَیں غریباں کُوں خوشخبری سُنڑاواں۔ اُوں میکُوں بھیجیا ہے جو قیدیاں کُوں رہائی تے اندھیاں کُوں اکھیں ڈیوݨ دا اعلان کراں کُچلے ہوئیاں کُوں آزاد کراں تے رب دے فضل دے ویلے دا اعلان کراں ۔“ وَل اُوں صحیفہ بند کر تے خادم کُوں ڈے ڈِتا تے بہہ گِیا۔ تے جِتّی عبادت خانہ ءچ موجود ہَن، سبھ دے اکھیں اُوندے اُتے لگیاں ہَن۔ او اُنہاں کُوں آکھنڑ لگا جو ”اَج ایہ نوِشتہ تُہاڈے سامنڑے پُورا تھیّا۔“ سبھ اُوندی تعریف کیتی تے اُنہاں فضل نال بھرے گالھیں اُتے حیران تھئے جیہڑیاں اُوندے مُنہ ءچوں نِکلدیاں ہَن تے آکھنڑ لگے، ”کیا ایہ یُوسف دا پوتر نئیں؟“ یسُوع اُنہاں کُوں آکھیا، ”بے شک تُساں ایہ کہاوت میڈے اُتے اکھیسو جو ’حکیم! آپنڑے آپ کُوں تاں چنگا کر۔‘ تے ایہ وی اکھیسو، ’جیہڑے گالھیں اساں کفرنحُوم ءچ تھیندیاں سُنڑیاں ہَن، آپنڑے وطن ءچ وی کر‘۔“ پر اُوں آکھیا، ”مَیں تُہاکُوں سچ آدھا ہاں جو کوئی نبی آپنڑے وطن ءچ مقبول نئیں تھیندا۔ تے مَیں تُہاکُوں سچ آدھا ہاں جو ایلیّاہ نبی دے زمانے ءچ جِیں ویلے ساڈھے ترے سال تئیں بارش نہ تھئی، ایہ تئیں جو سارے مُلک ءچ سخت کال پے گِیا، اُوں ویلے اِسرائیل ءچ بہُوں ساریاں بیوہ ہَن۔ پر ایلیّاہ اُنہاں ءچوں کہیں دے کولھ نہ بھیجیا گِیا بلکہ مُلک ِ صیدا علاقے دے شہر صارپت ءچ ہِک بیوہ دے کولھ۔ تے الِیشع نبی دے زمانے ءچ اِسرائیل ءچ بہُوں سارے کوڑھی ہَن پر اُنہاں ءچوں کوئی پاک صاف نہ کیتا گِیا پر صرف نعمان جیہڑا شام مُلک دا ہا۔“ جِتّی عبادت خانہ ءچ ہَن، اِنہاں گالھیں کُوں سُنڑدے ای قہر نال بھریج گئے۔ اُوں اُٹھی تے یسُوع کُوں شہر ءچوں باہر کڈھ ڈِتا تے اُوں پہاڑ دی چوٹی اُتے گِھن گئے جیندے اُتے اُنہاں دا شہر آباد ہا تاں جو اُونکُوں اُتھوں کنُوں سر دے بھار سَٹ ڈیوݨ۔ پر او اُنہاں ءچوں نِکل تے چلیا گِیا۔ وَل یسُوع گلیل دے شہر کفرنحُوم کُوں گِیا تے سبت دے ڈینہہ اُنہاں کُوں تعلیم ڈیندا پِیا ہا۔ تے لوک اُوندی تعلیم سُنڑ تے حیران ہَن کیوں جو او اِختیار نال کلام کریندا ہا۔ عبادت خانہ ءچ ہِک بندہ ہا جیندے ءچ بدرُوح ہئی۔ او بہُوں اُچی اواز ءچ چیخنڑ پے گِیا جو ”یسُوع ناصری! ساکُوں تیڈے نال کیا کم؟ کیا تُوں ساکُوں ہلاک کرݨ آئیں؟ مَیں جانڑدا ہاں جو تُوں کوݨ ہیں۔ تُوں خُدا دا قدُّوس ہیں۔“ یسُوع اُونکُوں دَڑکا ڈے تے آکھیا، ”چُپ رہ تے اِیں بندے ءچوں نِکل وَنج۔“ بس او بدرُوح اُوں بندے کُوں اُنہاں دے سامنڑے زمین اُتے زور نال تلے سٹیا تے اُونکُوں تکلیف ڈِتے بغیر اُوندے ءچوں نِکل گئی۔ سارے لوک حیران تھئے تے ہِک ڈُوجھے کُوں آکھنڑ لگے ”ایہ کیجھا کلام ہے؟ او اِختیار تے قُدرت نال بدرُوحاں کُوں حُکم ڈیندے تے او نِکل ویندیاں ہِن۔“ تے آسُوں پاسُوں دے ہر علاقے ءچ یسُوع دی مشہوری تھی گئی۔ وَل یسُوع عبادت خانہ کنُوں نِکل تے شمعون دے گھر گِیا۔ شمعون دی سس کُوں سخت بُخار ہا، تے اُنہاں یسُوع تُوں اُوندے کیتے درخاست کیتی۔ یسُوع اُوندے سرہانڑے کھڑ تے بُخار کُوں دَڑکا ڈِتا تاں او لہہ گِیا تے او فوراً اُٹھی تے اُوندی خدمت کرݨ لگ پئی۔ سِجھ لہندے ای لوک آپنڑے گھراں ءچوں طرحاں طرحاں دے بیماراں کُوں یسُوع دے کولھ گِھن آئے تے اُوں ہر ہِک اُتے ہتھ رکھیا تے اُنہاں کُوں شِفا ڈِتی۔ تے بہُوں ساریاں ءچوں بدرُوحاں ایہ آدھیاں ہوئیاں نِکل گئیاں جو تُوں خُدا دا پوتر ہیں۔ پر او اُنہاں کُوں دَڑکدا تے بولنڑ نہ ڈیندا ہا کیوں جو او جانڑدیاں ہَن جو ایہ المسیح ہے۔ جِیں ویلے سویل تھئی تاں یسُوع نِکل تے ہِک ویران جاہ دو گِیا تے بِھیڑ اُونکُوں گولھیندی ہوئی آئی تے اُونکُوں روکنڑ لگی جو ”ساڈے کولُھوں نہ وَنج۔“ پر اُوں اُنہاں کُوں آکھیا، ”میڈے کیتے لازم ہے جو ڈُوجھے شہراں ءچ وی خُدا دی بادشاہی دی خوشخبری سُنڑاواں کیوں جو مَیں اِیں واسطے ای بھیجیا گِیا ہاں۔“ تے او گلیل دے عبادت خانیاں ءچ تبلیغ کریندا ریہا۔ ہِک ڈینہہ یسُوع گنّیسرت دی جھیل دے کنارے اُتے کھڑا ہا تے خُدا دا کلام سُنڑݨ کیتے بِھیڑ اُوندے اُتے ڈھاندی پئی ہئی۔ تاں اُوں ڈُو کشتیاں جھیل دے کنارے اُتے لگیاں ڈِٹھیاں، پر مچھی پکڑن آلے اُنہاں کُوں اُتھاں چھوڑ تے آپنڑے جال دھوندے پئے ہَن۔ یسُوع اُنہاں ڈُو کشتیاں ءچوں ہِک اُتے چڑھ تے جیہڑی شمعون دی ہئی، تے اُونکُوں درخاست کیتی جو ”کنارے کنُوں تھوڑا جِیہا دُور گِھن جُل۔“ وَل او کشتی ءچ بہہ تے لوکاں کُوں تعلیم ڈیوݨ لگا۔ تعلیم ڈیوݨ تُوں بعد اُوں شمعون کُوں آکھیا، ”کشتی کُوں جِھکے پانڑی ءچ گِھن جُل تے تُساں شکار کیتے آپنڑے جال سٹو۔“ شمعون جواب ءچ آکھیا، ”اُستاد! اساں ساری رات محنت کیتی ہے پر کُجھ ہتھ نئیں آیا۔ وَل وی تُہاڈے آکھنڑ اُتے جال سٹیندا ہاں۔“ جِیں ویلے اُنہاں جال سٹے تاں اِتی ساریاں مچھیاں پکڑ گِھدیاں جو اُنہاں دے جال پڑیجنڑ لگے۔ اِیں واسطے اُنہاں ڈُوجھی کشتی آلے ساتھیاں کُوں اِشارہ کیتا جو ”آؤ ساڈی مدد کرو۔“ بس اُنہاں آ تے ڈوہائیں کشتیاں مچھیاں نال اِتُھوں تئیں بھر ڈِتیاں جو بُڈݨ لگ گئیاں۔ شمعون پطرس ایہ ڈیکھ تے یسُوع دے پیراں اُتے ڈھٹھا تے آکھیا، ”مالک! میڈے کولُھوں چلے ونجو کیوں جو مَیں گُنہگار بندہ ہاں۔“ کیوں جو مچھیاں دے اِیں شکار دی وجہ کنُوں شمعون تے اُوندے دوست بہُوں حیران تھئے۔ تے اِیہو حال زبدی دے پوتراں یعقُوب تے یُوحنّا دا ہا جیہڑے شمعون دے ساتھی ہَن۔ یسُوع شمعون کُوں آکھیا، ”ڈر نہ۔ ہُنڑ کنُوں تُوں خُدا کیتے بندیاں کُوں پکڑیسیں ۔“ او کشتیاں کُوں کنارے اُتے گِھن آئے تے سبھ کُجھ چھوڑ تے اُوندے پِچُھوں ٹُر پئے۔ جِیں ویلے یسُوع ہِک شہر ءچ ہا تاں ڈیکھو ہِک بندہ جیندے سارے جِسم اُتے کوڑھ ہا، اُونکُوں ڈیکھ تے مُنہ بھرنے ڈھے تے اُوندی مِنت کرݨ لگا جو ”مالک! جے تُساں چاہو تاں میکُوں پاک صاف کر سگدے ہیوے۔“ یسُوع آپنڑا ہتھ ودھایا تے اُوندے اُتے رکھ تے آکھیا، ”مَیں چاہندا ہاں۔ پاک صاف تھی وَنج۔“ تے فوراً اُوندا کوڑھ ٹھیک تھی گِیا۔ وَل اُوں اُونکُوں تاکید کیتی جو ”کہیں کُوں نہ ڈساویں بلکہ وَنج تے آپنڑے آپ کُوں کاہِن کُوں ڈِکھا تے جیہڑا نذرانہ مُوسیٰ مقرر کیتے او آپنڑی پاکیزگی کیتے پیش کر، تاں جو اُنہاں کیتے گواہی ہووے ۔“ پر یسُوع دے بارے ءچ خبر مزید کِھنڈ گئی تے بہُوں سارے لوک جمع تھی گئے تاں جو اُوندی سُنڑݨ تے آپنڑیاں بیماریاں کنُوں شِفا پاوݨ۔ پر او اکثر بیابان ءچ الگ وَنج تے دُعا کریندا ہا۔ ہِک ڈینہہ یسُوع تعلیم ڈیندا پِیا ہا تے کُجھ فریسی تے شریعت دے عالم جیہڑے گلیل تے یہُودیہ دی ہر وستی تے یروشلیم کنُوں آئے ہَن، اُتھاں بیٹھے ہَن۔ تے خُداوند دی قُدرت شِفا ڈیوݨ کیتے یسُوع دے نال ہئی۔ اُوں ویلے کئی لوک ہِک فالج دے مریض کُوں کَھٹ اُتے گِھن آئے تے کوشش کیتی جو اُونکُوں گھر دے اندر اُوندے سامنڑے رکھنڑ۔ جِیں ویلے بِھیڑ دی وجہ کنُوں اُونکُوں اندر گِھن تے وَنج نہ سگے تاں چھت اُتے چڑھ گئے تے کھپریل ہٹا تے فالج دے مریض کُوں کَھٹ سمیت لوکاں دے اَدھ ءچ یسُوع دے سامنڑے لہا ڈِتا۔ اُوں اُنہاں دا اِیمان ڈیکھ تے آکھیا، ”جوان! تیڈے گُناہ معاف تھئے۔“ اِیں تُوں شریعت دے عالم تے فریسی سوچنڑ لگے ”ایہ بندہ کوݨ ہے جیہڑا کُفر بَکدے؟ خُدا دے سِوا کوݨ گُناہ معاف کر سگدے؟“ یسُوع اُنہاں دے خیال جاݨ گِھدے تے اُنہاں کُوں آکھیا، ”تُساں آپنڑے دِلاں ءچ اِینویں کیوں سوچیندے ہیوے؟ کیا ایہ آکھنڑ اسان ہے جو ’تیڈے گُناہ معاف تھئے،‘ یا ایہ آکھنڑ جو ’اُٹھی تے ٹُر پِھر؟‘ پر مَیں چاہندا ہاں جو تُہاکُوں پتہ لگے جو اِبنِ آدم کُوں زمین اُتے گُناہ معاف کرݨ دا اِختیار ہے۔“ وَل اُوں فالج دے مریض کُوں آکھیا، ”مَیں تیکُوں آدھا ہاں، اُٹھی تے آپنڑی کَھٹ چا تے گھر لگا وَنج۔“ تے او اُونہی ویلے اُنہاں دے سامنڑے کھڑا تھی گِیا تے جیہڑی کَھٹ اُتے پِیا ہا اُونکُوں چا تے خُدا دی حمد کریندا ہویا آپنڑے گھر چلیا گِیا۔ او سبھ حیران تھی گئے تے خُدا دی حمد کرݨ لگے۔ تے او بہُوں ڈر گئے تے آکھنڑ لگے جو اَج اساں عجیب گالھیں ڈِٹھیاں ہِن۔ اِنہاں گالھیں دے بعد یسُوع باہر گِیا تے ہِک محصُول گِھننڑ آلے کُوں جِیندا ناں لاوی ہا، محصُول دی چوکی اُتے بیٹھے ڈِٹھا تے اُونکُوں آکھیا، ”میڈے پِچُھوں تھی پو۔“ او کھڑا تھیّا تے سبھ کُجھ چھوڑ تے اُوندے پِچُھوں تھی پِیا۔ وَل لاوی آپنڑے گھر ءچ اُوندی وڈی دعوت کیتی تے اُتھاں محصُول گِھننڑ آلے تے ڈُوجھے لوکاں دی، جیہڑے دعوت ءچ شریک ہَن، وڈی بِھیڑ ہئی۔ فریسی تے اُنہاں دے شریعت دے عالم یسُوع دے شاگرداں کُوں شکایت کر تے ایہ آکھنڑ لگے جو ”تُساں محصُول گِھننڑ آلیاں تے گُنہگاراں دے نال کیوں کھاندے پِیندے ہیوے؟“ یسُوع جواب ءچ اُنہاں کُوں آکھیا جو ”تندرُستاں کُوں حکیم دی لوڑ نئیں بلکہ بیماراں کُوں۔ مَیں راستبازاں کُوں نئیں بلکہ گُنہگاراں کُوں توبہ کیتے سڈݨ آیا ہاں۔“ وَل اُنہاں اُونکُوں آکھیا ”یُوحنّا دے شاگرد تاں اکثر روزہ رکھیندے تے دُعا منگدے ہِن تے اِینویں ای فریسیاں دے وی، پر تُہاڈے شاگرد تاں کھاندے پِیندے ہِن۔“ یسُوع اُنہاں کُوں آکھیا، ”کیا تُساں گھوٹ دی موجودگی ءچ براتیاں کنُوں روزہ رکھوا سگدے ہیوے؟ پر او ڈینہہ آسن جڈاں گھوٹ اُنہاں تُوں جُدا کیتا ویسی، وَل اُنہاں ڈینہاں ءچ او روزہ رکھیسن۔“ تے اُوں ہِک مثال وی اُنہاں کُوں سُنڑائی جو ”نویں کپڑے کُوں پھاڑ تے اُوندی ٹاکی پُرانڑے کپڑے اُتے کوئی نئیں لیندا۔ نہ تاں نواں کپڑا وی پھٹ ویسی تے نویں کپڑے دی ٹاکی پُرانڑے کپڑے نال نہ رَلسی۔ تے انگُور دے تازہ رَس کُوں پُرانڑیاں مشکاں ءچ کوئی نئیں بھریندا نہ تاں مشکاں تازہ رَس پکنڑ نال پھٹ ویسن، تے رَس تے مشکاں ڈوہائیں برباد تھی ویسن۔ بلکہ تازہ رَس کُوں نوِیاں مشکاں ءچ بھرنڑا چاہیدے۔ تے کوئی بندہ پُرانڑا رَس پی تے نویں دی خواہش نئیں کریندا کیوں جو او آدھا ہے جو ’پُرانڑی ای چنگی ہے‘۔“ وَل ہِک سبت دے ڈینہہ یسُوع رَڑھیں ءچوں لنگھدا پِیا ہا تے اُوندے شاگرد سِٹے تروڑ تے ہتھاں نال مَل مَل تے کھاندے ویندے ہَن۔ کُجھ فریسی آکھنڑ لگے جو ”تُساں ایجھے کم کیوں کریندے ہیوے جیہڑے سبت دے ڈینہہ کرݨ جائز نئیں؟“ یسُوع جواب ڈِتا، ”کیا تُساں ایہ وی نئیں پڑھیا جو جِیں ویلے داؤد تے اُوندے ساتھی بُکھے ہَن تاں اُنہاں کیا کیتا؟ او کِینویں خُدا دے گھر ءچ گِیا تے نذر دیاں روٹیاں گِھن تے آپ وی کھادیاں تے آپنڑے ساتھیاں کُوں وی کھاوݨ کیتے ڈِتیاں، بھانویں ایجھیاں روٹیاں کھاوݨ کاہِناں دے علاوہ کہیں بئے کُوں جائز نہ ہا ؟“ وَل اُوں اُنہاں کُوں آکھیا، ”اِبنِ آدم سبت دا مالک ہے۔“ ہِک بئے سبت یسُوع عبادت خانہ ءچ داخل تھی تے تعلیم ڈیوݨ لگا، تے اُتھاں ہِک بندہ ہا جِیندا سجا ہتھ سُکیا ہویا ہا۔ شریعت دے عالم تے فریسی اُوندی تاڑ ءچ ہَن جو جے او سبت دے ڈینہہ اُونکُوں شِفا ڈیوے، تاں اُنہاں کُوں اُوندے اُتے اِلزام لاوݨ دا موقع مِل ویسی۔ پر یسُوع کُوں اُنہاں دے خیال پتہ ہَن۔ بس اُوں سُکے ہتھ آلے بندے کُوں آکھیا، ”اُٹھی تے اَدھ ءچ کھڑا تھی وَنج۔“ او اُٹھی تے کھڑا تھی گِیا۔ یسُوع اُنہاں کُوں آکھیا، ”مَیں تُہاکُوں ایہ پُچھدا ہاں جو کیا سبت دے ڈینہہ نیکی کرݨ جائز ہے یا بدی کرݨ؟ جان بچاوݨ یا قتل کرݨ؟“ تے اُنہاں ساریاں اُتے نِگاہ کر تے اُوں بندے کُوں آکھیا، ”آپنڑا ہتھ ودھا۔“ اُوں ودھایا تے اُوندا ہتھ ٹھیک تھی گِیا۔ شریعت دے عالم تے فریسی کاوڑ کنُوں پاگل تھی گئے تے آپس ءچ آکھنڑ لگے جو ”اساں یسُوع نال کیا کرُوں؟“ اُنہاں ڈینہاں ءچ یسُوع دُعا کرݨ کیتے پہاڑ اُتے گِیا تے ساری رات خُدا کنُوں دُعا منگدا ریہا۔ جِیں ویلے سویل تھئی تاں اُوں آپنڑے شاگرداں کُوں سڈیا تے اُنہاں ءچوں بارہاں کُوں چُنڑ تے اُنہاں کُوں رسُول مقرر کیتا، یعنی شمعون جِیندا ناں اُوں پطرس وی رکھیا، تے اُوندا بِھرا اندریاس، تے یعقُوب، یُوحنّا، فِلپُس، بَرتُلمائی، متّی، توما، حلفئی دا پوتر یعقُوب، شمعون جیہڑا حُریت پسند اکھویندا ہا، یعقُوب دا پوتر یہُوداہ تے یہُوداہ اِسکریُوتی جیہڑا اُوندا پکڑواوݨ آلا تھیّا۔ یسُوع اُنہاں دے نال پہاڑ کنُوں تلے لہہ تے ہموار جاہ تے کھڑا تھیّا۔ تے اُوندے شاگرداں دی وڈی جماعت تے لوکاں دی وڈی بِھیڑ اُتھاں جمع ہئی جیہڑے سارے یہُودیہ تے یروشلیم تے صور تے صیدا دے ساحل کنُوں اُوندی سُنڑݨ تے آپنڑیاں بیماریاں کنُوں شِفا پاوݨ کیتے آئے ہَن۔ تے جیہڑے بدرُوحاں دی وجہ کنُوں ڈُکھ تے تکلیف ءچ مُبتلا ہَن او وی چنگے کر ڈِتے گئے۔ سارے لوک اُونکُوں ہتھ لاوݨ دی کوشش کریندے ہَن کیوں جو اُوندے ءچوں قوت نِکلدی ہئی تے ساریاں کُوں شِفا بخشدی ہئی۔ وَل اُوں آپنڑے شاگرداں اُتے نِگاہ کر تے آکھیا، ”مُبارک ہیوے تُساں جیہڑے غریب ہیوے کیوں جو خُدا دی بادشاہی تُہاڈی ہے۔ مُبارک ہیوے تُساں جیہڑے ہُنڑ بُکھے ہیوے کیوں جو تُساں رَج سو۔ مُبارک ہیوے تُساں جیہڑے ہُنڑ روندے ہیوے کیوں جو تُساں کِھلسو۔ جِیں ویلے اِبنِ آدم دی وجہ کنُوں لوک تُہاڈے نال نفرت رکھیسن تے تُہاکُوں خارج کر ڈیسن تے لعن طعن کریسن تے تُہاڈی بدنامی کریسن تاں تُساں مُبارک ہوسو۔ اُوں ڈینہہ خوش تھیوائے تے جشن منائے اِیں واسطے جو ڈیکھو اسمان اُتے تُہاڈا اجر وڈا ہے کیوں جو اُنہاں دے پِیُو ڈاڈے وی نبیاں نال ایجھا ای سلوک کریندے ہَن۔ پر افسوس تُہاڈے اُتے جیہڑے دولت مند ہیوے کیوں جو تُساں آپنڑی تسلی پا چُکے۔ افسوس تُہاڈے اُتے جیہڑے ہُنڑ رجے پئے ہیوے کیوں جو بُکھے ہوسو۔ افسوس تُہاڈے اُتے جیہڑے ہُنڑ کِھلدے ہیوے کیوں جو ماتم کریسو تے روسو۔ افسوس تُہاڈے اُتے جیہڑے ویلے سبھ لوک تُہاڈی تعریف کرݨ کیوں جو اُنہاں دے پِیُو ڈاڈا کُوڑے نبیاں دے نال وی اِینویں ای کریندے ہَن۔ پر مَیں تُساں سُنڑݨ آلیاں کُوں آدھا ہاں جو آپنڑے دُشمنڑاں نال محبت رکھو، تے جیہڑے تُہاڈے نال نفرت کریندے ہِن، اُنہاں نال بھلائی کرو۔ جیہڑے تُہاڈے اُتے لعنت کرݨ اُنہاں کیتے برکت منگو۔ جیہڑے تُہاڈی بے عزتی کرݨ اُنہاں کُوں دُعا ڈیؤ۔ جے کوئی تیڈی ہِک گَلھ اُتے چاٹ مارے تاں ڈُوجھی وی اُوندے پاسُوں پھیر ڈے۔ تے جیہڑا تیڈا چولا گِھننڑ چاہوے، اُونکُوں جُبّہ گِھننڑ کنُوں وی نہ روک۔ جیہڑا کوئی تَیں تُوں منگے اُونکُوں ڈے تے جے کوئی تیڈا مال گِھن گِھنے تاں اُوں کنُوں ولا نہ منگ۔ تے جِینویں تُساں چاہندے ہیوے جو لوک تُہاڈے نال کرݨ، تُساں وی اُنہاں نال اُونویں ای کرو۔ جے تُساں صرف اُنہاں لوکاں نال ای محبت رکھو جیہڑے تُہاڈے نال محبت رکھیندے ہِن تاں تُہاڈا کیا احسان ہے؟ کیوں جو گُنہگار وی آپنڑے محبت رکھنڑ آلیاں نال محبت رکھیندے ہِن۔ تے جے تُساں بھلا کرݨ آلیاں نال ای بھلا کریندے ہیوے تاں تُہاڈا کیا احسان؟ کیوں جو گُنہگار وی اِینویں کریندے ہِن۔ تے جے تُساں قرضہ اُنہاں لوکاں کُوں ڈیندے ہیوے جِنہاں کنُوں قرضہ واپس مِلنڑ دی اُمید ہووے تاں تُہاڈا کیا احسان ہے؟ گُنہگار وی گُنہگاراں کُوں قرضہ ڈیندے ہِن تاں جو سارا واپس گِھننڑ۔ پر تُساں آپنڑے دُشمنڑاں نال محبت رکھو تے بھلائی کرو۔ تے واپس مِلنڑ دی اُمید دے بغیر قرضہ ڈیؤ، تاں تُہاڈا اجر وڈا ہوسی تے تُساں خُدا تعالیٰ دے فرزند ہوسو، کیوں جو او ناشُکریاں تے بداں اُتے وی مہربان ہے۔ جِینویں تُہاڈا باپ رحیم ہے، تُساں وی رحم دل ہووو۔ عیب جوئی نہ کرو، تُہاڈی وی عیب جوئی نہ کیتی ویسی۔ مُجرم نہ بنڑاؤ، تُساں وی مُجرم نہ بنڑائے ویسو۔ معاف کرو، تُہاکُوں وی معاف کیتا ویسی۔ ڈیؤ تاں تُہاکُوں وی ڈِتا ویسی۔ ناپنڑ آلا تھاں چنگی طرحاں دبا تے، ہِلا ہِلا تے، تے مُنہ تئیں بھر تے تُہاڈے برتن ءچ سَٹ ڈِتا ویسی۔ کیوں جو جیہڑے تھاں نال تُساں نپیندے ہیوے اُوندے نال ای تُہاڈے کیتے ناپیا ویسی۔“ یسُوع اُنہاں کُوں ہِک مثال وی آکھی جو ”کیا ہِک اندھا ڈُوجھے اندھے کُوں راہ ڈِکھا سگدے؟ کیا ڈوہائیں کھڈے ءچ نہ ڈھاسن؟ کوئی شاگرد آپنڑے اُستاد کنُوں وڈا نئیں ہوندا پر جڈاں چنگی طرح سِکھ ویندے تاں آپنڑے اُستاد وانگُوں تھی ویسی۔ تُوں آپنڑے بِھرا دی اکھ ءچ ککھ کیوں ڈیدھیں تے اُوں شتِیر اُتے غور نئیں کریندا جیہڑا تیڈی اکھ ءچ ہے؟ تُوں کِینویں آپنڑے بِھرا کُوں آکھ سگدیں جو ’بِھرا آ مَیں تیڈی اکھ ءچوں ککھ کڈھ ڈیواں‘ جِیں ویلے تُوں آپنڑی اکھ دے شتِیر کُوں نئیں ڈیدھا؟ منافق! پہلے آپنڑی اکھ دا شتِیر تاں کڈھ گِھن، وَل آپنڑے بِھرا دی اکھ دے ککھ کُوں چنگی طرحاں ڈیکھ تے کڈھ سگسیں۔ جیہڑا درخت چنگا ہوندے او بُرا پھل نئیں ڈیندا، تے نہ ای بُرا درخت چنگا پھل ڈیندے۔ ہر درخت آپنڑے پھل کنُوں سُنجانڑیا ویندے۔ کنڈے آلیاں جھاڑیاں کنُوں لوک ہنجیر نئیں توڑیندے تے نہ جَھڑ بیری کنُوں انگُور۔ چنگا بندہ آپنڑے دل دے چنگے خزانے ءچوں چنگیاں چیزاں کڈھیندے، تے بُرا بندہ بُرے خزانے ءچوں بُریاں چیزاں کڈھیندے، کیوں جو جیہڑا دل ءچ بھریا ہوندے اُوہو اُوندے مُنہ اُتے آندے۔ جیہڑے ویلے تُساں میڈے آکھنڑ اُتے عمل نئیں کریندے تاں میکُوں مالک، مالک کیوں آدھے ہیوے؟ جیہڑا میڈے کولھ آندے تے میڈے گالھیں سُنڑدے تے اُنہاں اُتے عمل کریندے، مَیں تُہاکُوں ڈسیندا ہاں جو او کئیں وانگُوں ہے۔ او اُوں بندے وانگُوں ہے جئیں گھر بنڑیندے ویلے زمین کُوں بہُوں جِھکا کھٹیا تے گھر دی بنیاد چٹان اُتے رکھی۔ جِیں ویلے سیلاب آیا تے پانڑی دیاں چھلاں اُوں گھر کُوں ٹکراں ماریاں تاں اُونکُوں ہِلا نہ سگیاں کیوں جو او مضبوط بنڑیا ہا۔ پر جیہڑا میڈے گالھیں سُنڑدے تے اُنہاں اُتے عمل نئیں کریندا او اُوں بندے وانگُوں ہے جئیں گھر کُوں زمین اُتے بنیاد دے بغیر بنڑایا۔ جِیں ویلے پانڑی دیاں چھلاں اُونکُوں ٹکراں ماریاں تاں او فوراً ڈھے پِیا تے او گھر اصلُوں برباد تھی گِیا۔“ جِیں ویلے یسُوع ایہ گالھیں لوکاں کُوں سُنڑا گِھدیاں تاں کفرنحُوم ءچ آیا۔ اُوں ویلے رومی فوج دے کہیں صوبہ دار دا ہِک نوکر جیہڑا اُونکُوں عزیز ہا، بیماری کنُوں مرݨ دے قریب ہا۔ اُوں یسُوع دے بارے ءچ سُنڑ تے یہُودیاں دے کئی بزُرگاں کُوں اُوندے کولھ بھیجیا تے اُونکُوں درخاست کیتی جو او آ تے اُوندے نوکر کُوں شِفا ڈیوے۔ او یسُوع دے کولھ آئے تے اُوندی مِنت کر تے آکھنڑ لگے جو ”ایہ بندہ اِیں لائق ہے جو تُساں اُوندی خاطر ایہ کرو کیوں جو او ساڈی قوم نال محبت رکھیندے تے ساڈے عبادت خانہ کُوں وی اُوں بنڑوائے۔“ یسُوع اُنہاں دے نال چلیا۔ پر جِیں ویلے او اُوندے گھر دے نیڑے پُجیا تاں صوبیدار کُجھ دوستاں دے ذریعے اُونکُوں اکھوا بھیجیا جو ”مالک! تکلیف نہ کرو، کیوں جو مَیں اِیں لائق نئیں جو تُساں میڈی چھت تلے آؤ۔ اِیں واسطے مَیں آپنڑے آپ کُوں وی اِیں لائق نہ سمجھیا جو تُہاڈے کولھ آنواں۔ بلکہ زبان کنُوں آکھ ڈیؤ تاں میڈا نوکر شِفا پا گِھنسی۔ کیوں جو مَیں خود وی کہیں بئے دے اِختیار ءچ ہاں تے سپاہی میڈے ماتحت ہِن، تے جیہڑے ویلے مَیں ہِک کُوں آدھا ہاں جو ’وَنج‘ تاں او ویندے، تے ڈُوجھے کُوں جو ’آ‘ تاں او آندے، تے آپنڑے نوکر کُوں جو ’ایہ کر‘ تاں او کریندے۔“ یسُوع ایہ سُنڑ تے اُوندے اُتے حیران تھیّا تے مُڑ تے پِچُھوں آوݨ آلیاں لوکاں کُوں آکھیا، ”مَیں تُہاکُوں آدھا ہاں جو مَیں اِسرائیل ءچ وی ایجھا اِیمان نئیں ڈِٹھا۔“ تے بھیجے ہوئے لوکاں گھر واپس آ تے اُوں نوکر کُوں تندرُست پایا۔ کُجھ عرصے بعد یسُوع نائین ناں دے ہِک شہر کُوں گِیا تے اُوندے شاگرد تے بہُوں سارے لوک اُوندے نال ہَن۔ جِیں ویلے او شہر دے پھاٹک دے نیڑے پُجیا تاں ہِک مُردہ کُوں باہر گِھدی ویندے ہَن۔ او آپنڑی ماء دا ہِکو ہِک پوتر ہا تے او بیوہ ہئی۔ شہر دے بہُوں سارے لوک اُوندے نال ہَن۔ اُونکُوں ڈیکھ تے خُداوند کُوں اُوندے اُتے ترس آیا تے اُونکُوں آکھیا، ”نہ رو۔“ وَل اُوں کولھ آ تے جنازے کُوں ہتھ لایا تے مونڈھا ڈیوݨ آلے کھڑ گئے۔ وَل اُوں آکھیا، ”جوان! مَیں تیکُوں آدھا ہاں اُٹھی۔“ او مُردہ اُٹھی بیٹھا تے بولنڑ لگ پِیا تے یسُوع اُونکُوں اُوندی ماء دے سپُرد کر ڈِتا۔ وَل سبھ لوکاں اُتے دہشت چھا گئی تے او خُدا دی حمد کر تے آکھنڑ لگے جو ”ساڈے وچال ہِک وڈے نبی دا ظہور تھئے تے خُدا آپنڑے لوکاں اُتے نِگاہ کیتی ہے۔“ تے یسُوع دے بارے ءچ ایہ خبر سارے یہُودیہ تے آسُوں پاسُوں کِھنڈ گئی۔ یُوحنّا کُوں اُوندے شاگرداں اِنہاں سبھ گالھیں دی خبر ڈِتی۔ اِیں پارُوں یُوحنّا آپنڑے شاگرداں ءچوں ڈُو کُوں سڈ تے خُداوند دے کولھ ایہ پُچھنڑ کیتے بھیجیا جو ”آوݨ آلے تُساں ای ہیوے یا اساں کہیں بئے دی راہ ڈیکھوں؟“ اُنہاں یسُوع دے کولھ آ تے آکھیا، ”یُوحنّا بپتسمہ ڈیوݨ آلے ساکُوں تُہاڈے کولھ ایہ پُچھنڑ بھیجے جو ’آوݨ آلے تُساں ای ہیوے یا اساں کہیں بئے دی راہ ڈیکھوں‘؟“ اُونہی ویلے یسُوع بہُوں لوکاں کُوں بیماریاں تے مُصیبتاں تے بدرُوحاں کنُوں نجات بخشی تے بہُوں سارے اندھیاں دے اکھیں بحال کیتیاں۔ اِیں واسطے اُوں قاصداں کُوں جواب ڈِتا، ”جیہڑا کُجھ تُساں ڈِٹھا تے سُنڑیا ہے وَنج تے یُوحنّا کُوں ڈساؤ جو اندھے ڈیدھے ہِن، منڈے ٹُردے ہِن، کوڑھی پاک صاف کیتے ویندے ہِن، ڈورے سُنڑدے ہِن، مُردے زندہ کیتے ویندے ہِن، تے غریباں کُوں خوشخبری سُنڑائی ویندی ہے۔ مُبارک ہے او جیہڑا میڈی وجہ کنُوں ٹھوکر نہ کھاوے۔“ جِیں ویلے یُوحنّا دے قاصد چلے گئے تاں یسُوع لوکاں کُوں یُوحنّا دے بارے ءچ آکھنڑ لگا جو ”تُساں بیابان ءچ کیا ڈیکھنڑ گئے ہَوے؟ کیا ہوا نال ہِلدے ہوئے کانے کُوں؟ تاں وَل کیا ڈیکھنڑ گئے ہَوے؟ کیا نفِیس کپڑے پاتے ہوئے بندے کُوں؟ ڈیکھو جیہڑے نفِیس کپڑے پیندے ہِن تے عیش و عشرت کریندے ہِن، او شاہی محلاں ءچ راہندے ہِن۔ تاں وَل تُساں کیا ڈیکھنڑ گئے ہَوے؟ کیا ہِک نبی کُوں؟ ہاں، پر مَیں تُہاکُوں آدھا ہاں جو نبی کنُوں وی وڈے کُوں۔ ایہ اُوہو ہے جیندے بارے کلام ءچ لِکھیا ہے جو ’ڈیکھ مَیں آپنڑا پیغمبر تیڈے اگُوں بھجیندا ہاں جیہڑا تیڈے اگُوں تیڈی راہ تیار کریسی ۔‘ مَیں تُہاکُوں آدھا ہاں جو جیہڑے عورتاں ءچوں پیدا تھئے ہِن، اُنہاں ءچوں یُوحنّا بپتسمہ ڈیوݨ آلے کنُوں وڈا کوئی نئیں، پر جیہڑا خُدا دی بادشاہی ءچ سبھ تُوں چھوٹا ہے او اُوں کنُوں وڈا ہے۔“ جِیں ویلے سبھ عام لوکاں سُنڑیا تاں اُنہاں بلکہ محصُول گِھننڑ آلیاں وی خُدا کُوں برحق مَن گِھدا کیوں جو اُنہاں یُوحنّا دا بپتسمہ گِھن گِھدا ہا۔ پر فریسیاں تے شریعت دے عالماں اُوں کنُوں بپتسمہ نہ گِھن تے آپنڑے کیتے خُدا دی مرضی کُوں رَد کر ڈِتا۔ یسُوع آکھیا، ”مَیں اِیں زمانے دے لوکاں کُوں کیندے نال تشبیہ ڈیواں؟ او کئیں وانگُوں ہِن؟ او اُنہاں چھوہراں وانگُوں ہِن جیہڑے بازار ءچ بیٹھے ہوئے ہِک بئے کُوں سڈ تے آدھے ہِن، ’اساں تُہاڈے کیتے بانسری وجائی تے تُساں نہ نچے۔ اساں ماتم کیتا تے تُساں نہ رُنّے۔‘ کیوں جو یُوحنّا بپتسمہ ڈیوݨ آلا نہ تاں روٹی کھاندا ہویا آیا نہ انگُور دا رَس پِیندا ہویا آیا تے تُساں آدھے ہیوے جو اُوندے ءچ بدرُوح ہے۔ اِبنِ آدم کھاندا پِیندا آیا تے تُساں آدھے ہیوے ’ڈیکھو، ایہ کھاؤُ تے شرابی بندہ، محصُول گِھننڑ آلیاں تے گُنہگاراں دا یار۔‘ پر حِکمت آپنڑے سارے چھوہراں کنُوں برحق ثابت تھئی۔“ وَل کہیں فریسی یسُوع کُوں کھانڑا کھاوݨ دی دعوت ڈِتی۔ بس او اُوں فریسی دے گھر وَنج تے کھانڑا کھاوݨ بیٹھا۔ تاں ڈیکھو اُوں شہر دی ہِک بدکردار عورت ایہ سُنڑ تے جو یسُوع اُوں فریسی دے گھر ءچ کھانڑا کھاوݨ بیٹھے، سنگِ مرمر دے عِطردان ءچ عِطر گِھن آئی۔ تے اُوندے پِچُھوں کھڑ تے روندے ہوئے اُوندے پیراں کُوں ہنجُواں نال پُساوݨ لگی تے آپنڑے والاں نال پُونجھیا، تے اُوندے پیراں کُوں بوسے ڈے تے اُنہاں اُتے عِطر لایا۔ جئیں فریسی یسُوع دی دعوت کیتی ہئی او ایہ ڈیکھ تے آپنڑے دل ءچ آکھنڑ لگا جو ”جے ایہ بندہ نبی ہوندا تاں جاݨ گِھندا جو جیہڑی اُونکُوں ہتھ لیندی پئی ہے او کوݨ تے کیجھی عورت ہے، او تاں بدکار ہے۔“ یسُوع جواب ءچ اُونکُوں آکھیا، ”شمعون! مَیں تیکُوں کُجھ آکھنڑ چاہندا ہاں۔“ اُوں آکھیا، ”جی اُستاد! آکھو۔“ ”کہیں امیر بندے دے ڈُو قرضدار ہَن۔ ہِک پنج سو دینار دا تے ڈُوجھا پنجھاہ دینار دا۔ جِیں ویلے اُنہاں دے کولھ قرض ڈیوݨ کیتے کُجھ نہ ریہا تاں اُوں ڈوہائیں دا قرض بخش ڈِتا۔ بس اُنہاں ڈوہائیں ءچوں کیہڑا اُونکُوں زیادہ پیار کریسی؟“ شمعون جواب ءچ آکھیا، ”میڈے خیال ءچ او جِینکُوں زیادہ بخشیا۔“ اُوں اُونکُوں آکھیا، ”تیڈا فیصلہ ٹھیک ہے۔“ تے وَل اُوں عورت دو مُڑ تے شمعون کُوں آکھیا، ”کیا تُوں اِیں عورت کُوں ڈیدھا ہیں؟ مَیں تیڈے گھر ءچ داخل تھیّا، تَیں میکُوں پیر دھووݨ کیتے پانڑی نہ ڈِتا۔ پر اِیں عورت آپنڑے ہنجُواں نال میڈے پیر پُسا ڈِتے تے آپنڑے والاں نال اُنہاں کُوں پُونجھیا۔ تَیں میکُوں بوسہ نہ ڈِتا پر جیہڑے ویلے کنُوں مَیں اندر آیا ہاں اِیں عورت میڈے پیر چُومنڑ نئیں چھوڑے۔ تَیں میڈے سر ءچ تیل نہ لایا پر اِیں عورت میڈے پیراں اُتے عِطر وِیٹ ڈِتا۔ اِیں واسطے مَیں تیکُوں آدھا ہاں جو اِیندے گُناہ جیہڑے بہُوں ہَن، معاف تھئے تے اِیں واسطے اِیں بہُوں محبت کیتی، پر جیندے تھوڑے گُناہ معاف تھئے او تھوڑی محبت کریندے۔“ وَل اُوں عورت کُوں آکھیا، ”تیڈے گُناہ معاف تھئے۔“ وَل جیہڑے اُوندے نال کھانڑا کھاوݨ بیٹھے ہَن، آپنڑے دل ءچ آکھنڑ لگے جو ”ایہ کوݨ ہے جیہڑا گُناہ وی معاف کریندے؟“ پر یسُوع اُوں عورت کُوں آکھیا، ”تیڈے اِیمان تیکُوں بچا گِھدے، سلامت چلی وَنج۔“ کُجھ عرصے بعد یسُوع آپنڑے بارہاں رسُولاں نال شہراں تے وستیاں ءچ وَنج تے خُدا دی بادشاہی دی خوشخبری سُنڑیندا تے تبلیغ کریندا ریہا۔ تے کُجھ عورتاں جِنہاں بدرُوحاں تے بیماریاں کنُوں شِفا پاتی ہئی یعنی مریم جیہڑی مگدلینی اکھویندی ہئی جیندے ءچوں سَت بدرُوحاں نِکلیاں ہَن، تے یُوأنہ ہیرودیس دے مُنشی خُوزہ دی ذال، تے سُوسنّاہ۔ تے کئی بئیاں عورتاں وی نال ہَن جیہڑیاں آپنڑے مال نال اُوندی خدمت کریندیاں ہَن۔ وَل جِیں ویلے وڈی بِھیڑ جمع تھئی تے ہر شہر دے لوک یسُوع دے کولھ آندے ہَن، اُوں مثال ءچ آکھیا: ”ہِک بیج رہاوݨ آلا بیج رہاوݨ نِکلیا۔ تے رہیندے ویلے کُجھ بیج راہ دے کنارے ڈھٹھا۔ او لتڑیج گِیا تے ہوا دے پکھیں اُونکُوں چُگ گِھدا۔ کُجھ پتھریلی زمین اُتے ڈھٹھا تے پھپھڑ تے سُک گِیا کیوں جو اُونکُوں نمی نہ مِلی۔ کُجھ جھاڑیاں ءچ ڈھٹھا تے جھاڑیاں اُوندے نال ودھ تے اُونکُوں دبا گِھدا۔ تے کُجھ چنگی زمین اُتے ڈھٹھا تے پھپھڑ تے ودھ گِیا تے سو گُنا پھل گِھن آیا۔“ ایہ آکھ تے اُوں آکھیا، ”جیندے سُنڑݨ دے کَن ہووݨ او سُنڑ گِھنے!“ اُوندے شاگرداں اُوں کنُوں پُچھیا جو ”اِیں مثال دا مطلب کیا ہے؟“ اُوں آکھیا، ”تُہاکُوں تاں خُدا دی بادشاہی دے راز سمجھنڑ دی قابلیت ڈِتی گئی ہے، پر ڈُوجھیاں کُوں ایہ مثالاں ءچ بیان کیتا ویندے تاں جو ڈیدھے ہوئے نہ ڈیکھنڑ تے سُنڑدے ہوئے نہ سمجھنڑ۔ اُوں مثال دا مطلب ایہ ہے۔ بیج خُدا دا کلام ہے۔ رستے دے کنارے آلے او لوک ہِن جیہڑے سُنڑدن۔ وَل ابلیس آ تے اُنہاں دے دل ءچوں کلام کُوں کڈھ تے گِھن ویندے، اِینویں نہ تھیوے جو اِیمان گِھن آوݨ تے نجات پاوݨ۔ تے پتھریلی زمین آلے او ہِن جیہڑے کلام کُوں سُنڑ تے اُونکُوں خوشی نال قبول تاں کریندے ہِن پر جڑھ نئیں رکھیندے۔ اِیں واسطے کُجھ عرصہ تئیں اِیمان رکھ تے ازمائش دے ویلے پِھر ویندے ہِن۔ تے جیہڑا جھاڑیاں ءچ ڈھٹھا، اُوہو لوک ہِن جیہڑے سُنڑدے تاں ہِن پر آہستہ آہستہ زندگی دیاں فِکراں تے دولت تے عیش و عشرت ءچ پَھس ویندے ہِن تے اُنہاں دا پھل پکدا نئیں۔ پر چنگی زمین آلے او ہِن جیہڑے کلام کُوں سُنڑ تے سچے تے نیک دل ءچ سنبھالی رکھیندن تے صبر نال پھل گِھن آندے ہِن۔ کوئی بندہ ڈیوا بال تے تھاں نال نئیں لُکیندا تے نہ پلنگ تلے رکھیندا بلکہ ڈیواٹ اُتے رکھیندے تاں جو اندر آوݨ آلیاں کُوں روشنی نظر آوے۔ کوئی چیز لُکی نئیں جیہڑی ظاہر نہ تھی ویسی، تے نہ ای کوئی ایجھا بھید ہے جیہڑا کھولیا نہ ویسی تے نظر نہ آسی۔ بس خبردار راہو جو تُساں کِینویں سُنڑدے ہیوے، کیوں جو جیندے کولھ ہے اُونکُوں ڈِتا ویسی، تے جیندے کولھ کُجھ نئیں، اُوندے کنُوں او وی جیہڑا اُوندے کولھ ہے گِھن گِھدا ویسی۔“ وَل یسُوع دی ماء تے اُوندے بِھرا اُوندے کولھ آئے پر بِھیڑ دی وجہ کنُوں اُوندے کولھ نہ پُج سگے۔ تے اُونکُوں خبر ڈِتی گئی جو ”تُہاڈی ماء تے تُہاڈے بِھرا باہر کھڑے ہِن تے تُہاکُوں مِلنڑ چاہندے ہِن۔“ اُوں جواب ءچ اُنہاں کُوں آکھیا جو ”میڈی ماء تے میڈے بِھرا تاں ایہ ہِن جیہڑے خُدا دا کلام سُنڑدے تے اُوندے اُتے عمل کریندے ہِن۔“ وَل ہِک ڈینہہ یسُوع تے اُوندے شاگرد کشتی ءچ سوار تھئے تے اُوں اُنہاں کُوں آکھیا، ”آؤ جھیل دے پار جُلوں۔“ بس او روانہ تھئے۔ پر جیہڑے ویلے کشتی چلدی ویندی ہئی تاں یسُوع سَم گِیا۔ وَل جھیل ءچ وڈی اندھاری آئی تے کشتی پانڑی نال بھریجنڑ لگ گئی تے او خطرے ءچ ہَن۔ اُنہاں کولھ آ تے اُونکُوں جگایا تے آکھیا، ”مالک، مالک، اساں ہلاک تھیندے پئے ہیں!“ اُوں اُٹھی تے ہوا تے پانڑی دے زور شور کُوں دَڑکا ڈِتا۔ ڈوہائیں جھلیج گئے تے سکون تھی گِیا۔ اُوں اُنہاں کُوں آکھیا، ”تُہاڈا اِیمان کِتھاں گِیا؟“ او ڈر گئے تے بہُوں حیران تھی تے ہِک بئے کُوں آکھنڑ لگے، ”ایہ کوݨ ہے؟ ایہ تاں ہوا تے پانڑی کُوں وی حُکم ڈیندے تے او اُوندی منیندے ہِن۔“ وَل او گراسینیاں دے علاقے ءچ وَنج پُجے جیہڑا اُوں پار گلیل دے سامنڑے ہے۔ جِیں ویلے او کنارے اُتے لتھا تاں اُوں شہر دا ہِک بندہ اُونکُوں مِلیا جیندے ءچ بدرُوحاں ہَن۔ تے اُوں وڈی مُدت کنُوں کپڑے نہ پاتے ہَن تے او گھر ءچ نئیں بلکہ قبرستان ءچ راہندا ہا۔ او یسُوع کُوں ڈیکھ تے زور نال چیخیا تے اُوندے سامنڑے ڈھے تے اُچی اواز نال آکھنڑ لگا، ”یسُوع، خُدا تعالیٰ دے پوتر! میکُوں تیڈے نال کیا کم؟ تیڈی مِنت کریندا ہاں جو میکُوں عذاب ءچ نہ سَٹ۔“ کیوں جو یسُوع بدرُوح کُوں بندے ءچوں نِکل ونجنڑ دا حُکم ڈیندا ہا۔ کیوں جو اُوں، اُوں بندے کُوں کئی پھیری پکڑیا ہا۔ تے بھانویں لوک اُونکُوں قابو ءچ رکھنڑ کیتے زنجیراں تے بیڑیاں نال بَدھ ڈیندے ہَن، وَل وی او زنجیراں کُوں تروڑ ڈیندا ہا تے بدرُوح اُونکُوں بیاباناں ءچ دُرکائی راہندی ہئی۔ یسُوع اُوں کنُوں پُچھیا، ”تیڈا ناں کیا ہے؟“ اُوں آکھیا، ”لشکر،“ کیوں جو اُوندے ءچ بہُوں ساریاں بدرُوحاں ہَن۔ او اُوندی مِنت کرݨ لگیاں جو ”ساکُوں سزا دے کھڈے ءچ ونجنڑ دا حُکم نہ ڈے۔“ اُتھاں پہاڑ اُتے سُؤراں دا ہِک وڈا اِجڑ چردا پِیا ہا۔ اُنہاں یسُوع دی مِنت کیتی جو ”ساکُوں اِنہاں دے اندر ونجنڑ ڈے۔“ اُوں اُنہاں کُوں اِجازت ڈِتی، تے بدرُوحاں اُوں بندے ءچوں نِکل تے سُؤراں ءچ داخل تھی گئیاں تے اِجڑ ریڑھ کنُوں بھجدے ہوئے جھیل ءچ وَنج ڈھٹھا تے بُڈ مریا۔ ایہ واقعہ ڈیکھ تے چراوݨ آلے بھجے تے شہر تے دیہات ءچ اِیں گالھ دی خبر پُچائی۔ لوک اِیں ماجرے کُوں ڈیکھنڑ کیتے نِکلے تے یسُوع دے کولھ آ تے اُوں بندے کُوں جیندے ءچوں بدرُوحاں نِکلیاں ہَن کپڑے پاتے تے ہوش ءچ یسُوع دے قدماں ءچ بیٹھے ڈِٹھا تاں ڈر گئے۔ جِنہاں ایہ واقعہ ڈِٹھا ہا، اُنہاں ڈُوجھیاں کُوں خبر ڈِتی جو بدرُوح گرفتہ بندہ کِینویں چنگا تھیّا۔ وَل گراسینیاں دے آسُوں پاسُوں دے سارے لوکاں اُونکُوں درخاست کیتی جو ”ساڈے کولُھوں چلے ونجو،“ کیوں جو اُنہاں اُتے وڈی دہشت چھا گئی ہئی۔ بس او کشتی ءچ سوار تھی تے واپس چلیا گِیا۔ پر جیہڑے بندے ءچوں بدرُوحاں نِکل گئیاں ہَن، او اُوندی مِنت کرݨ لگا جو ”میکُوں آپنڑے نال ای ونجنڑ ڈیؤ۔“ پر یسُوع اُونکُوں روانہ کر تے آکھیا، ”آپنڑے گھر وَنج تے لوکاں کُوں ڈسا جو خُدا تیڈے کیتے کیجھے وڈے کم کیتے ہِن۔“ او روانہ تھی تے سارے شہر ءچ یسُوع دے وڈے کماں دا جیہڑے اُوں اُوندے واسطے کیتے ہَن چرچا کرݨ لگا۔ جِیں ویلے یسُوع واپس آندا پِیا ہا تاں لوک اُونکُوں خوشی نال مِلے کیوں جو سارے اُوندی راہ بَھلیندے ہَن۔ وَل یائِیر ناں دا ہِک بندہ جیہڑا عبادت خانہ دا سردار ہا، یسُوع دے کولھ آیا تے اُوندے پیراں ءچ ڈھے تے اُوندی مِنت کیتی جو ”میڈے گھر جُلو،“ کیوں جو اُوندی ہِکو ہِک دِھی جیہڑی بارہاں سال دی ہئی، مرݨ آلی ہئی۔ جیہڑے ویلے یسُوع ویندا پِیا ہا تاں لوک اُوندے اُتے ڈھاندے پئے ہَن۔ بِھیڑ ءچ ہِک تریمت ہئی جِیندا بارہاں سالہاں کنُوں خون جاری ہا تے او آپنڑا سارا مال حکیماں اُتے خرچ کیتا ہئی، وَل وی کہیں کنُوں شِفا نہ پا سگی ہئی۔ اُوں یسُوع دے پِچُھوں آ تے اُوندی پُشاک دے پَلے کُوں ہتھ لایا، تے فوراً اُوندا خون واہنڑ بند تھی گِیا۔ وَل یسُوع آکھیا، ”میکُوں کئیں ہتھ لائے؟“ جِیں ویلے سارے اِنکار کرݨ لگے تاں پطرس آکھیا، ”اُستاد! لوک ہِک بئے کُوں دھکے ڈیندے تے تُہاڈے اُتے ڈھاندے پئے ہِن۔“ پر یسُوع آکھیا، ”کہیں میکُوں ہتھ تاں ضرور لائے کیوں جو میکُوں معلوم تھئے جو قوت میڈے ءچوں نِکلی ہے۔“ جِیں ویلے اُوں عورت ڈِٹھا جو مَیں لُک نئیں سگدی تاں کمبدی ہوئی آئی تے اُوندے اگُوں ڈھے تے سارے لوکاں دے سامنڑے ڈساوݨ لگی جو مَیں تیکُوں کیوں ہتھ لایا ہا تے کِینویں اُوں ویلے ای شِفا پا گِھدی۔ یسُوع اُونکُوں آکھیا، ”دِھی تیڈے اِیمان تیکُوں چنگا کر ڈِتے، خیر نال وَنج۔“ او ایہ آدھا ای پِیا ہا جو عبادت خانہ دے سردار دے گھر تُوں کہیں آ تے آکھیا، ”تُہاڈی دِھی مر گئی ہے، ہُنڑ اُستاد کُوں تکلیف نہ ڈیؤ۔“ یسُوع ایہ سُنڑ تے اُونکُوں جواب ڈِتا، ”ڈر نہ، صرف اِیمان رکھ، او بچ ویسی۔“ گھر پُج تے اُوں پطرس، یُوحنّا، یعقُوب تے چھوہیر دے ماء پِیُو دے علاوہ کہیں بئے کُوں اندر نہ ونجنڑ ڈِتا۔ سبھ اُوندے کیتے روندے پِٹدے پئے ہَن پر اُوں آکھیا، ”ماتم نہ کرو، او موئی نئیں بلکہ سُتی پئی ہے۔“ لوک اُوندے اُتے کِھلنڑ لگ پئے کیوں جو اُنہاں کُوں پتہ ہا جو او مر چُکی ہے۔ پر یسُوع اُوندا ہتھ پکڑیا تے اُچی اواز ءچ آکھیا، ”دِھی! اُٹھی۔“ اُوندی رُوح وَل آئی تے او فوراً اُٹھ پئی۔ وَل یسُوع حُکم ڈِتا جو چھوہیر کُوں کُجھ کھاوݨ کیتے ڈِتا ونجے۔ اُوندے ماء پِیُو حیران تھئے تے اُوں اُنہاں کُوں تاکید کیتی جو ”اِیں واقعہ دے بارے ءچ کہیں کُوں نہ ڈسائے۔“ یسُوع اُنہاں بارہاں کُوں سڈ تے اُنہاں کُوں سبھ بیماریاں کنُوں شِفا ڈیوݨ تے بدرُوحاں اُتے قُدرت تے اِختیار بخشیا۔ تے اُنہاں کُوں خُدا دی بادشاہی دی تبلیغ کرݨ تے بیماراں کُوں چنگا کرݨ کیتے بھیجیا۔ تے اُنہاں کُوں آکھیا جو ”رستے کیتے کُجھ نہ گِھنائے نہ سوٹی، نہ تھیلا، نہ روٹی، نہ پیسے تے نہ ڈُو ڈُو چولے۔ جِیں گھر ءچ داخل تھیوائے اُتھائیں ٹِکے رہوائے، تے اُتھوں ای روانہ تھیوائے۔ تے جِیں شہر دے لوک تُہاکُوں قبول نہ کرݨ تاں اُوں شہر کنُوں نِکلدے ویلے آپنڑے پیراں دی دھُوڑ چِھنڈک ڈیوائے تاں جو اُنہاں اُتے گواہی ہووے۔“ بس او روانہ تھی تے ہر وستی ءچ وَنج تے خوشخبری دی تبلیغ کریندے تے مریضاں کُوں شِفا ڈیندے ریہے۔ تے چوتھائی مُلک دا حاکم ہیرودیس ایہ گالھیں سُنڑ تے گھبرا گِیا، کیوں جو کُجھ لوک آدھے ہَن جو یُوحنّا مُردیاں ءچوں زندہ تھی گِیا ہے۔ تے کُجھ ایہ جو ایلیّاہ ظاہر تھیّا ہے، تے کُجھ ایہ جو پُرانڑے نبیاں ءچوں کوئی نبی زندہ تھی گِیا ہے۔ پر ہیرودیس آکھیا، ”یُوحنّا دا سر تاں مَیں کٹوا ڈِتے۔ ہُنڑ ایہ کوݨ ہے جیندے بارے ءچ ایجھے گالھیں سُنڑدا ہاں؟“ بس او یسُوع کُوں ڈیکھنڑ دی کوشش ءچ ریہا۔ وَل رسُولاں جیہڑا کُجھ کیتا ہا، واپس آ تے یسُوع کُوں ڈسایا۔ وَل او اُنہاں کُوں اَنج گِھن تے بیت صیدا ناں دے ہِک شہر دو روانہ تھیّا۔ پر جِیں ویلے لوکاں کُوں ایہ پتہ چلیا تاں او اُوندے پِچُھوں اُتھاں پُج گئے۔ او خوشی نال اُنہاں کُوں مِلیا تے اُنہاں نال خُدا دی بادشاہی دے گالھیں کرݨ لگا، تے جِنہاں کُوں شِفا دی ضرورت ہئی اُنہاں کُوں شِفا بخشی۔ جیہڑے ویلے سورج لہنڑ لگا تاں اُنہاں بارہاں آ تے اُونکُوں آکھیا، ”اِنہاں لوکاں کُوں روانہ کر ڈیؤ تاں جو او چودھارُوں دے دیہاتاں تے وستیاں ءچ وَنج تے ٹِکنڑ تے آپنڑے کھاوݨ دا اِنتظام کرݨ کیوں جو اساں اِتھاں ویران جاہ ءچ ہیں۔“ یسُوع اُنہاں کُوں آکھیا، ”تُساں ای اِنہاں کُوں کھاوݨ کیتے ڈیؤ۔“ اُنہاں آکھیا، ”ساڈے کولھ صرف پنج روٹیاں تے ڈُو مچھیاں ہِن، پر کیا اساں وَنج تے اِنہاں ساریاں کیتے کھانڑا مُل گِھن آؤں!“ کیوں جو او پنج ہزار دے قریب مرد ہَن۔ اُوں آپنڑے شاگرداں کُوں آکھیا جو ”اُنہاں کُوں اندازاً پنجھاہ پنجھاہ دیاں ٹولیاں ءچ بِلھا ڈیؤ۔“ اُنہاں اِینویں ای کیتا تے ساریاں کُوں بِلھا ڈِتا۔ وَل یسُوع او پنج روٹیاں تے ڈُو مچھیاں گِھدیاں تے اسمان دو ڈیکھ تے اُنہاں اُتے برکت ڈِتی تے روٹیاں تروڑ تے شاگرداں کُوں ڈیندا گِیا جو لوکاں دے اگُوں رکھنڑ۔ سبھ لوکاں رَج تے کھادا تے شاگرداں بچے ہوئے ٹُکڑیاں دیاں بارہاں ٹوکریاں چاتیاں۔ ہِک ڈینہہ جِیں ویلے یسُوع کلھا دُعا کریندا پِیا ہا تے شاگرد اُوندے کولھ ہَن تاں اُوں اُنہاں کنُوں پُچھیا، ”لوک میکُوں کیا آدھے ہِن؟“ اُنہاں جواب ڈِتا، ”یُوحنّا بپتسمہ ڈیوݨ آلا، تے کُجھ ایلیّاہ آدھے ہِن، تے کُجھ ایہ جو پُرانڑے نبیاں ءچوں کوئی زندہ تھی گِیا ہے۔“ اُوں اُنہاں کنُوں پُچھیا، ”پر تُساں میکُوں کیا آدھے ہیوے؟“ پطرس جواب ڈِتا، ”خُدا دے المسیح۔“ اُوں اُنہاں کُوں تاکید کر تے حُکم ڈِتا جو ”کہیں کُوں ایہ نہ اکھائے۔“ تے آکھیا، ”ضرور ہے جو اِبنِ آدم بہُوں ڈُکھ چاوے تے بزُرگ تے سردار کاہِن تے شریعت دے عالم اُونکُوں رَد کرݨ، تے او قتل کیتا ونجے تے تریجھے ڈینہہ زندہ تھی ونجے۔“ وَل اُوں ساریاں کُوں آکھیا، ”جے کوئی میڈی پیروی کرݨ چاہندے تاں آپنڑی خُودی دا اِنکار کرے تے ہر روز آپنڑی صلیب چا تے میڈے پِچُھوں تھی پووے۔ کیوں جو جیہڑا کوئی آپنڑی جان بچاوݨ چاہندے او اُونکُوں ونجیسی، تے جیہڑا کوئی میڈی خاطر آپنڑی جان کُوں ونجیسی او اُونکُوں بچیسی۔ بندہ جے ساری دُنیا حاصل کر گِھنے پر آپنڑی جان تُوں محروم تھی ونجے یا اُوندا نُقصان چاوے تاں اُونکُوں کیا فائدہ تھیسی؟ کیوں جو جیہڑا کوئی مَیں کنُوں تے میڈے کلام کنُوں شرمیسی، مَیں اِبنِ آدم وی جِیں ویلے آپنڑے تے آپنڑے باپ دے تے پاک فرشتیاں دے جلال ءچ آساں تاں اُوں کنُوں شرمیساں۔ پر مَیں تُہاکُوں سچ آدھا ہاں جو اُنہاں ءچوں جیہڑے اِتھاں کھڑے ہِن، کُجھ ایجھے ہِن جو جئیں تئیں خُدا دی بادشاہی کُوں ڈیکھ نہ گِھننڑ، ہرگز نہ مرسن۔“ وَل اِنہاں گالھیں دے تقریباً اَٹھ ڈینہہ بعد یسُوع پطرس تے یُوحنّا تے یعقُوب کُوں نال گِھن تے پہاڑ اُتے دُعا کرݨ گِیا۔ جِیں ویلے او دُعا کریندا پِیا ہا تاں اُوندی شکل بدل گئی تے اُوندا لباس چِٹّا تے نُورانی تھی گِیا۔ تے ڈیکھو، ڈُو بندے یعنی مُوسیٰ تے ایلیّاہ اُوندے نال گالھیں کریندے پئے ہَن۔ او جلال ءچ ظاہر تھئے تے اُوندے دُنیا تُوں ونجنڑ دا ذِکر کریندے پئے ہَن جیہڑا یروشلیم ءچ تھیوݨ آلا ہا۔ پطرس تے اُوندے ساتھی نیندر ءچ ہَن پر جِیں ویلے او جاگ گئے تاں اُوندا جلال ڈِٹھا تے اُنہاں ڈُو آدمیاں کُوں وی جیہڑے اُوندے نال کھڑے ہَن۔ جِیں ویلے او بندے اُوں کنُوں ونجنڑ لگے تاں پطرس یسُوع کُوں آکھیا، ”اُستاد! ساڈا اِتھاں راہنڑ چنگا ہے۔ بس اساں ترے خیمے بنڑاؤں، ہِک تُہاڈے کیتے، ہِک مُوسیٰ کیتے تے ہِک ایلیّاہ کیتے۔“ پر پطرس نہ جانڑدا ہا جو کیا آدھے۔ او ایہ آدھا ای پِیا ہا جو ہِک بدّل چھا گِیا تے اُنہاں اُتے چھاں کر ڈِتی۔ جِیں ویلے او بدّل ءچ ولٹیجنڑ لگے تاں ڈر گئے۔ تے بدّل ءچوں اواز آئی جو ”ایہ میڈا پوتر ہے۔ میڈا چُنڑیا ہویا، اِیندی سُنڑو۔“ ایہ اواز آوݨ دے بعد یسُوع کلھا نظر آیا۔ اُنہاں ڈینہاں ءچ شاگرداں کہیں کُوں وی اِیں واقعے دے بارے ءچ نہ ڈسایا بلکہ چُپ ریہے۔ ڈُوجھے ڈینہہ جِیں ویلے او پہاڑ کنُوں لتھے آندے ہَن تاں ہِک وڈی بِھیڑ اُونکُوں آ مِلی۔ بِھیڑ ءچوں ہِک بندے اُچی اواز نال آکھیا، ”اُستاد! مَیں تُہاڈی مِنت کریندا ہاں جو میڈے پوتر اُتے نِگاہ کرو کیوں جو او میڈا ہِکو ہِک پوتر ہے۔ تے ہِک بدرُوح اُونکُوں پکڑ گِھندی ہے تے او ہِک دم چیخنڑ لگ ویندے، تے اُونکُوں اِینویں مروڑ ڈیندی ہے جو او جَھگ مارݨ پے ویندے تے اُونکُوں زخمی کریندی تے مُشکل نال چھوڑیندی ہے۔ مَیں تُہاڈے شاگرداں دی مِنت کیتی ہئی جو او بدرُوح کُوں کڈھ ڈیوݨ پر او نہ کڈھ سگے۔“ یسُوع آکھیا، ”بےاعتقاد تے گُمراہ قوم! مَیں کڈݨ تئیں تُہاڈے نال راہساں تے تُہاڈی برداشت کریساں؟ آپنڑے پوتر کُوں اِتھاں گِھن آ۔“ او آندا ای پِیا ہا جو بدرُوح اُونکُوں زمین اُتے زور نال سَٹ تے مروڑیا۔ پر یسُوع اُوں بدرُوح کُوں دَڑکا ڈِتا تے چھوہر کُوں شِفا بخشی، تے اُوندے پِیُو کُوں ڈے ڈِتا۔ سبھ لوک خُدا دی قُدرت ڈیکھ تے حیران تھئے۔ جیہڑے ویلے سبھ لوک اُنہاں سبھ کماں کنُوں جیہڑے یسُوع کریندا ہا، حیران تھیندے پئے ہَن، اُوں آپنڑے شاگرداں کُوں آکھیا، ”میڈے ایہ گالھیں ذہن ءچ رکھ گِھنو کیوں جو اِبنِ آدم، بندیاں دے حوالے کیتا ونجنڑ آلا ہے۔“ پر شاگرد اِیں گالھ کُوں نہ سمجھدے ہَن بلکہ ایہ اُنہاں کنُوں لُکائی گئی تاں جو اُنہاں کُوں پتہ نہ لگے۔ تے اِیں گالھ دے بارے ءچ اُوندے کنُوں پُچھنڑ تُوں ڈردے ہَن۔ وَل اُنہاں ءچ ایہ تکرار شروع تھئی جو ”ساڈے ءچوں وڈا کوݨ ہے؟“ پر یسُوع اُنہاں دے دِلاں دا خیال جاݨ تے ہِک بال کُوں آپنڑے نال کھڑا کیتا۔ وَل اُنہاں کُوں آکھیا، ”جیہڑا کوئی میڈے ناں ءچ اِیں بال کُوں قبول کریندے او میکُوں قبول کریندے، تے جیہڑا میکُوں قبول کریندے او میڈے بھیجنڑ آلے کُوں قبول کریندے، کیوں جو جیہڑا تُہاڈے ءچوں سبھ کنُوں چھوٹا ہے اُوہو وڈا ہے۔“ یُوحنّا جواب ڈِتا، ”اُستاد! اساں ہِک بندے کُوں تُہاڈے ناں ءچ بدرُوحاں کڈھیندے ڈِٹھا تے اُونکُوں منع کرݨ لگے کیوں جو او ساڈے نال تُہاڈی پیروی نئیں کریندا۔“ پر یسُوع اُونکُوں آکھیا، ”اُونکُوں منع نہ کرائے کیوں جو جیہڑا تُہاڈے خلاف نئیں او تُہاڈے نال ہے۔“ جِیں ویلے او ڈینہہ نیڑے آئے جو یسُوع اسمان اُتے چاتا ونجے تاں اُوں پکّے اِرادے نال یروشلیم دا رُخ کیتا، تے آپنڑے اگُوں قاصد روانہ کیتے۔ او وَنج تے سامریاں دی ہِک وستی ءچ داخل تھئے تاں جو اُوندے کیتے تیاری کرݨ۔ پر اُنہاں اُونکُوں قبول نہ کیتا کیوں جو او یروشلیم دو ویندا پِیا ہا۔ ایہ ڈیکھ تے اُوندے شاگرد یعقُوب تے یُوحنّا آکھنڑ لگے، ”مالک! کیا تُساں چاہندے ہیوے جو اساں حُکم ڈیؤں جو اسمان کنُوں بھاہ نازل تھی تے اُنہاں کُوں بھسم کر ڈیوے [جِینویں ایلیّاہ کیتا]؟“ پر اُوں مُڑ تے اُنہاں کُوں دَڑکا ڈِتا۔ [تے آکھیا، ”تُساں نئیں جانڑدے جو تُساں کیہڑی رُوح دے ہیوے، کیوں جو اِبنِ آدم لوکاں دی جان برباد کرݨ نئیں بلکہ بچاوݨ کیتے آیا ہے۔“] وَل او کہیں بئی وستی ءچ چلے گئے۔ جِیں ویلے او رستے ءچ ٹُردے ویندے ہَن تاں کہیں یسُوع کُوں آکھیا، ”تُساں جِتھاں وی ویسو مَیں تُہاڈے پِچُھوں آساں۔“ یسُوع اُونکُوں آکھیا، ”لومبڑیاں دیاں گھوراں ہوندن تے پکھیاں دے آلہنڑے پر مَیں اِبنِ آدم کیتے کوئی جاہ نئیں جِتھاں مَیں آپنڑا سر رکھ سگاں۔“ وَل اُوں ڈُوجھے کُوں آکھیا، ”میڈے پِچُھوں ٹُر۔“ اُوں آکھیا، ”مالک! میکُوں اِجازت ڈیؤ جو مَیں پہلے وَنج تے آپنڑے پِیُو کُوں دفن کراں۔“ اُوں اُونکُوں آکھیا، ”مُردیاں کُوں آپنڑے مُردے دفن کرݨ ڈے پر تُوں وَنج تے خُدا دی بادشاہی دی تبلیغ کر۔“ ہِک بئے وی آکھیا، ”مالک! مَیں تُہاڈے پِچُھوں آساں پر پہلے میکُوں اِجازت ڈیؤ جو آپنڑے گھر دے لوکاں کنُوں رُخصت تھی آواں۔“ یسُوع جواب ڈِتا، ”جیہڑا کوئی آپنڑا ہتھ ہَل اُتے رکھ تے پِچُھوں ڈیدھے او خُدا دی بادشاہی دے لائق نئیں۔“ اِنہاں گالھیں دے بعد خُداوند بہتّر بئے بندے مقرر کیتے تے اُنہاں کُوں ڈُو ڈُو کر تے آپنڑے کنُوں پہلے اُنہاں شہراں تے وستیاں ءچ روانہ کیتا جِتھاں او خود ونجنڑ آلا ہا۔ تے او اُنہاں کُوں آکھنڑ لگا، ”فصل تاں بہُوں ہے پر مزدُور تھوڑے ہِن۔ اِیں واسطے فصل دے مالک دی مِنت کرو جو آپنڑی فصل کپنڑ کیتے مزدُور بھیج ڈیوے۔ ہُنڑ ونجو، پر ڈیکھو مَیں تُہاکُوں بھجیندا ہاں جِینویں لیلیاں کُوں نہراں ءچ۔ نہ بٹوا گِھن وَنجائے، نہ تھیلا، نہ جُتیاں تے نہ رستے ءچ کہیں کُوں سلام کرائے۔ جِیں وی گھر ءچ داخل تھیؤ تاں پہلے آکھو جو اِیں گھر دی سلامتی ہَوے۔ جے اُتھاں کوئی سلامتی پسند کرݨ آلا بندہ ہوسی تاں تُہاڈا سلام اُوندے اُتے کھڑ ویسی، نہ تاں تُہاڈے اُتے وَل آسی۔ اُونہی گھر ءچ رہوائے تے جیہڑا کُجھ اُنہاں کنُوں مِلے کھاؤ پِیو کیوں جو مزدُور آپنڑی مزدُوری دا حقدار ہے، گھر گھر نہ پِھرائے۔ تے جے تُساں کہیں شہر ءچ داخل تھیؤ تے اُتھاں دے لوک تُہاکُوں قبول کرݨ تاں جیہڑا کُجھ تُہاڈے سامنڑے رکھیا ونجے، کھاؤ۔ اُتھاں دے بیماراں کُوں شِفا ڈیؤ تے اُنہاں کُوں ڈساؤ جو ’خُدا دی بادشاہی تُہاڈے نیڑے آ پُجی ہے۔‘ پر جے تُساں کہیں شہر ءچ داخل تھیؤ تے اُتھاں دے لوک تُہاکُوں قبول نہ کرݨ تاں اُوندے بازاراں ءچ وَنج تے آکھو، ’اساں تُہاڈے شہر دی دھُوڑ کُوں وی جیہڑی ساڈے پیراں اُتے چڑھی ہے، تُہاڈے سامنڑے چِھنڈک ڈیندے ہاں۔ پر ایہ جاݨ گِھنو جو خُدا دی بادشاہی نیڑے اَن پُجی ہے۔‘ مَیں تُہاکُوں آدھا ہاں جو اُوں ڈینہہ سدُوم دا حال اُوں شہر دے حال کنُوں زیادہ برداشت دے لائق ہوسی۔ خُرازین! تَیں اُتے افسوس۔ بیت صیدا! تَیں اُتے افسوس، کیوں جو جیہڑے معجزے تُہاڈے ءچ ظاہر تھئے، جے صور تے صیدا ءچ ظاہر تھیندے تاں اُتھاں دے لوک ٹاٹ پا تے، تے سواہ ءچ بہہ تے کڈݨ دے توبہ کر گِھندے۔ پر عدالت دے ڈینہہ صور تے صیدا دا حال تُہاڈے حال کنُوں زیادہ برداشت دے لائق ہوسی۔ تے کفرنحُوم! کیا تُوں اسمان تئیں اُچا کیتا ویسیں؟ تُوں تاں عالم ِ ارواح ءچ لہایا ویسیں۔ جیہڑا کوئی تُہاڈی سُنڑدے او میڈی سُنڑدے، تے جیہڑا تُہاکُوں نئیں منیندا او میکُوں نئیں منیندا، تے جیہڑا میکُوں نئیں منیندا او میڈے بھیجنڑ آلے کُوں نئیں منیندا۔“ او ستّر خوش تھی تے وَل آئے تے آکھنڑ لگے، ”مالک! تُہاڈے ناں گِھننڑ نال بدرُوحاں وی ساڈے تابع ہِن۔“ اُوں اُنہاں کُوں آکھیا، ”مَیں شیطان کُوں بجلی وانگُوں اسمان کنُوں ڈھاندے ہوئے ڈیدھا پِیا ہم۔ ڈیکھو مَیں تُہاکُوں اِختیار ڈِتے جو سَپاں تے وِٹھوویاں کُوں لتاڑو تے دُشمنڑ دی ساری قُدرت اُتے غالب آؤ تے تُہاکُوں کہیں چیز کنُوں نُقصان نہ پُجسی۔ وَل وی اِیں تُوں خوش نہ تھیؤ جو بدرُوحاں تُہاڈے تابع ہِن بلکہ اِیں گالھ کنُوں خوش تھیؤ جو تُہاڈے ناں اسمان اُتے لِکھے ہوئے ہِن۔“ اُونہی ویلے یسُوع رُوح القُدس کنُوں خوشی نال بھریج گِیا تے آکھنڑ لگا، ”باپ، اسمان تے زمین دے مالک! مَیں تیڈا شُکر کریندا ہاں جو تَیں ایہ گالھیں دانا لوکاں تے عالماں کنُوں لُکائیاں، تے بالاں اُتے ظاہر کیتیاں۔ ہاں، باپ، کیوں جو تیڈی نظر ءچ اِیہو چنگا ہا۔ میڈے باپ دی طرفوں سارا کُجھ میڈے سپُرد کیتا گِیا ہے تے کوئی نئیں جانڑدا جو پوتر کوݨ ہے سِوا باپ دے۔ تے کوئی نئیں جانڑدا جو باپ کوݨ ہے سِوا پوتر دے تے سِوا اُوں بندے دے جیندے اُتے پوتر اُونکُوں ظاہر کرݨ چاہندے۔“ وَل یسُوع شاگرداں دو مُڑ تے خاص اُنہاں کُوں ای آکھیا، ”مُبارک ہِن او اکھیں جیہڑیاں ایہ گالھیں ڈیدھیاں ہِن جِنہاں کُوں تُساں ڈیدھے ہیوے۔ کیوں جو مَیں تُہاکُوں آدھا ہاں جو بہُوں سارے نبیاں تے بادشاہاں چاہیا جو جیہڑے گالھیں تُساں ڈیدھے ہیوے ڈیکھنڑ پر نہ ڈِٹھیاں، تے جیہڑے گالھیں تُساں سُنڑدے ہیوے، سُنڑݨ پر نہ سُنڑیاں۔“ تے ڈیکھو شریعت دا ہِک عالم اُٹھیا تے ایہ آکھ تے یسُوع دی ازمائش کرݨ لگا جو ”اُستاد! مَیں کیا کراں جو ہمیشاں دی زندگی دا وارث بنڑاں؟“ اُوں اُونکُوں آکھیا، ”شریعت ءچ کیا لِکھیا ہے؟ تُوں کِینویں پڑھدیں؟“ اُوں جواب ءچ آکھیا، ”رب العالمین آپنڑے خُدا نال آپنڑے سارے دل تے آپنڑی ساری جان تے آپنڑی ساری طاقت تے آپنڑی ساری عقل نال محبت رکھ تے آپنڑے ہمسائے نال آپنڑے وانگُوں محبت رکھ ۔“ یسُوع اُونکُوں آکھیا، ”تَیں ٹھیک جواب ڈِتے۔ اِیہو کر تاں تُوں جِیندا راہسیں۔“ پر اُوں آپنڑے آپ کُوں راستباز ثابت کرݨ کیتے یسُوع کنُوں پُچھیا، ”تے میڈا ہمسایہ کوݨ ہے؟“ یسُوع جواب ءچ آکھیا، ”ہِک بندہ یروشلیم کنُوں یرِیحُو ویندا پِیا ہا، جو ڈاکواں دے ہتھیں چڑھ گِیا۔ اُنہاں اُوندے کپڑے لہا گِھدے تے اُونکُوں ماریا وی تے اَدھ مویا سَٹ تے چلے گئے۔ خُداوُں ہِک کاہِن اُوں رستے کنُوں ویندا پِیا ہا، پر اُونکُوں ڈیکھ تے ڈُوجھے پاسے کنُوں چلیا گِیا۔ اِینویں ای ہِک لاوی اُوں جاہ آیا۔ او وی اُونکُوں ڈیکھ تے ڈُوجھے پاسے کنُوں چلیا گِیا۔ پر ہِک سامری سفر کریندا کریندا اُتھاں آ گِیا تے اُونکُوں ڈیکھ تے اُوندے اُتے ترس کھادا۔ او اُوندے کولھ آ تے اُوندے زخماں اُتے تیل تے شراب لا تے بدھیا، تے آپنڑے جانور اُتے بِلھا تے سِراں ءچ گِھن گِیا تے اُوندی خبر گِیری کیتی۔ ڈُوجھے ڈینہہ ڈُو دینار کڈھ تے سِراں دے مالک کُوں ڈِتے تے آکھیا، ’اِیندا خیال رکھو تے جے خرچا زیادہ تھی ونجے تاں مَیں وَل آ تے ڈے ڈیساں‘۔“ وَل یسُوع پُچھیا، ”تیڈے خیال ءچ اِنہاں ترِیہاں ءچوں کیہڑا اُوں بندے دا، جیہڑا ڈاکواں دے ہتھیں چڑھ گِیا ہا، ہمسایہ ثابت تھیّا؟“ اُوں آکھیا، ”او جئیں اُوندے اُتے رحم کیتا۔“ یسُوع اُونکُوں آکھیا، ”وَنج، تُوں وی اِینویں ای کر۔“ وَل جِیں ویلے او ویندے پئے ہَن تاں یسُوع ہِک وستی ءچ داخل تھیّا تے مَرتھا ناں دی ہِک عورت اُونکُوں آپنڑے گھر ءچ ٹِکایا۔ مَرتھا دی ہِک بھینڑ ہئی جِیندا ناں مریم ہا۔ او خُداوند دے پیراں دے کولھ بہہ تے اُوندا کلام سُنڑدی پئی ہئی۔ پر مَرتھا خدمت کریندے کریندے گھبرا گئی۔ بس او اُوندے کولھ آ تے آکھنڑ لگی، ”مالک! کیا تُہاکُوں خیال نئیں جو میڈی بھینڑ میکُوں خدمت کرݨ کیتے کلھا چھوڑ ڈِتے؟ اُونکُوں آکھو جو میڈی مدد کرے۔“ خُداوند جواب ءچ آکھیا، ”مَرتھا! مَرتھا! تُوں تاں بہُوں ساریاں چیزاں کیتے پریشان تھیندی پئی ہیں۔ پر ہِک چیز ضرور ہے تے مریم او چنگا حصہ چُنڑ گِھدے جیہڑا اُوں کنُوں کھسیا نہ ویسی۔“ وَل اِینویں تھیّا جو یسُوع کہیں جاہ دُعا کریندا پِیا ہا۔ جِیں ویلے کر گِھدی تاں اُوندے شاگرداں ءچوں ہِک اُونکُوں آکھیا، ”مالک! جِینویں یُوحنّا آپنڑے شاگرداں کُوں دُعا کرݨ سکھائی، تُساں وی ساکُوں سکھاؤ۔“ اُوں اُنہاں کُوں آکھیا، ”جِیں ویلے دُعا کرو تاں آکھو ’اے باپ، تیڈا ناں پاک منیا ونجے، تیڈی بادشاہی آوے۔ ساڈی روز دی روٹی ہر روز ساکُوں ڈِتا کر۔ تے ساڈے گُناہ معاف کر کیوں جو اساں وی آپنڑے ہر قصُوروار کُوں معاف کریندے ہیں تے ساکُوں ازمائش ءچ نہ پا‘۔“ وَل یسُوع اُنہاں کُوں آکھیا، ”فرض کرو جو تُہاڈے ءچوں کوئی بندہ ادھی رات کُوں آپنڑے کہیں دوست کولھ وَنج تے اُونکُوں آکھو، ’دوست! میکُوں ترے روٹیاں ڈے، بعد ءچ مَیں واپس کر ڈیساں۔ کیوں جو میڈا ہِک دوست سفر کر تے میڈے کولھ آیا ہے تے اُوندے اگُوں رکھنڑ کیتے میڈے کولھ کُجھ نئیں۔‘ تے او اندر کنُوں جواب ڈیوے، ’میکُوں تکلیف نہ ڈے، ہُنڑ دَر بند ہے تے میڈے بال میڈے نال بسترے ءچ ہِن، مَیں اُٹھی تے تیکُوں نئیں ڈے سگدا۔‘ مَیں تُہاکُوں آدھا ہاں جو بھانویں او اِیں سببّوں جو او اُوندا دوست ہے، اُٹھی تے اُونکُوں نہ ڈیوے، تاں وی اُوندے ڈھیٹ ہووݨ پارُوں لازمی اُٹھی تے جِتّی ضرورت ہوسی اُونکُوں ڈیسی۔ بس مَیں تُہاکُوں آدھا ہاں منگسو تاں تُہاکُوں ڈِتا ویسی، گولھیسو تاں مِلسی، دَر کھڑکیسو تاں تُہاڈے کیتے کھولیا ویسی۔ کیوں جو جیہڑا منگدے اُونکُوں مِلدے، تے جیہڑا گولھیندے او پیندے، تے جیہڑا کھڑکیندے اُوندے کیتے کھولیا ویندے۔ تُہاڈے ءچوں ایجھا کیہڑا پِیُو ہے جو جِیں ویلے اُوندا پوتر روٹی منگے تاں اُونکُوں پتھر ڈیوے؟ یا مچھی منگے تاں اُونکُوں مچھی دے بدلے نانگ ڈیوے؟ یا انڈا منگے تاں اُونکُوں وِٹھوواں ڈیوے؟ جِیں ویلے تُساں بُرے ہووݨ دے باوجود آپنڑے بالاں کُوں چنگیاں چیزاں ڈیوݨ جانڑدے ہیوے تاں تُہاڈا اسمانی باپ آپنڑے منگنڑ آلیاں کُوں رُوح القُدس کیوں نہ ڈیسی؟“ وَل یسُوع ہِک گُونگا کرݨ آلی بدرُوح کُوں کڈھیندا پِیا ہا تے جیہڑے ویلے او بدرُوح نِکل گئی تاں گُونگا بولنڑ لگ پِیا تے لوک حیران تھئے۔ پر اُنہاں ءچوں کُجھ آکھیا، ”ایہ تاں بدرُوحاں دے سردار بعل زبُول دی مدد نال بدرُوحاں کُوں کڈھیندے۔“ کُجھ بئے لوک یسُوع کُوں ازماوݨ کیتے اُوں کنُوں ہِک اسمانی نشان منگنڑ لگے، پر اُوں اُنہاں دے خیالاں کُوں جاݨ تے آکھیا، ”جیہڑی بادشاہی ءچ پُھٹ پے ونجے، او تباہ تھی ویندی ہے۔ تے جیہڑے گھر ءچ پُھٹ پے ونجے او برباد تھی ویندے۔ تے جے شیطان وی آپنڑا مخالف تھی ونجے تاں اُوندی بادشاہی کِینویں قائم راہسی؟ کیوں جو تُساں میڈے بارے ءچ اکھیندے ہیوے جو ایہ بدرُوحاں کُوں بعل زبُول دی مدد نال کڈھیندے۔ تے جے مَیں بعل زبُول دی مدد نال بدرُوحاں کُوں کڈھیندا ہاں تاں تُہاڈے شاگرد کیندی مدد نال کڈھیندے ہِن؟ اِیں واسطے اُوہو تُہاڈے مُنصف ہوسن۔ پر جے مَیں خُدا دی قُدرت نال بدرُوحاں کُوں کڈھیندا ہاں تاں خُدا دی بادشاہی تُہاڈے کولھ آݨ پُجی۔ جِیں ویلے کوئی زور آور بندہ ہتھیار چا تے آپنڑے گھر دی حفاظت کریندے تاں اُوندا مال محفوظ راہندے۔ پر جیہڑے ویلے اُوندے کنُوں وی زور آلا بندہ اُوندے اُتے حملہ کر تے اُونکُوں قابو کر گِھندے تاں اُوندے سارے ہتھیار جیندے اُتے اُوندا بھروسہ ہا کَھس گِھندے تے اُوندا مال لُٹ تے ونڈا ڈیندے۔ جیہڑا میڈے نال نئیں او میڈے خلاف ہے تے جیہڑا میڈے نال جمع نئیں کریندا، او کِھنڈیندے۔ جِیں ویلے کہیں بندے ءچوں بدرُوح نِکلدی ہے تاں او بیاباناں ءچ آرام گولھیندی پِھردی ہے پر جیہڑے ویلے نئیں مِلدا تاں آدھی ہے جو ’مَیں آپنڑے اُوں گھر ءچ ولا چلی ویساں جِتُھوں نِکلی ہم۔‘ تے او آ تے اُوں گھر کُوں صاف ستھرا تے سجیا ہویا ڈیدھی ہے۔ وَل او وَنج تے آپنڑے کنُوں وی بدتر سَت بئیاں بدرُوحاں کُوں نال گِھن آندی ہے تے او اندر وَنج تے راہنڑ لگدیاں ہِن۔ تے اُوں بندے دا حال پہلے کنُوں وی بُرا تھی ویندے۔“ جِیں ویلے یسُوع ایہ گالھیں کریندا پِیا ہا تاں بِھیڑ ءچوں ہِک عورت اُچی اواز ءچ اُونکُوں آکھیا، ”مُبارک ہے او عورت جئیں تُہاکُوں جمیا تے کھیر پِلایا۔“ اُوں آکھیا، ”ہاں، پر جیہڑے لوک خُدا دا کلام سُنڑدے تے اُوندے اُتے عمل کریندے ہِن او زیادہ مُبارک ہِن۔“ جِیں ویلے بِھیڑ زیادہ تھیوݨ لگی تاں یسُوع آکھنڑ لگا جو ”اِیں زمانے دے لوک بُرے ہِن، او نشان منگدے ہِن۔ پر یُوناہ دے نشان دے علاوہ اُنہاں کُوں کوئی نشان نہ ڈِتا ویسی۔ کیوں جو جِینویں یُوناہ نِینوہ دے لوکاں کیتے نشان ہا، اُونویں ای اِبنِ آدم وی اِیں زمانے دے لوکاں کیتے نشان ہوسی۔ جنُوب دی ملکہ عدالت دے ڈینہہ اِیں زمانے دے لوکاں نال کھڑ تے اُنہاں کُوں مُجرم کھڑیسی کیوں جو او بہُوں دُور کنُوں سُلیمان دی حِکمت سُنڑݨ کیتے آئی ہئی ، تے ڈیکھو اِتھاں او ہے جیہڑا سُلیمان کنُوں وی وڈا ہے۔ نِینوہ دے لوک عدالت دے ڈینہہ اِیں زمانے دے لوکاں نال کھڑ تے اُنہاں کُوں مُجرم کھڑیسن کیوں جو اُنہاں یُوناہ دی تبلیغ دی وجہ کنُوں توبہ کر گِھدی ہئی ، تے ڈیکھو اِتھاں او ہے جیہڑا یُوناہ کنُوں وی وڈا ہے۔ کوئی بندہ ڈیوا بال تے تہہ خانے ءچ یا تھاں دے تلے نئیں رکھیندا بلکہ ڈیواٹ اُتے رکھیندے تاں جو اندر آوݨ آلیاں کُوں روشنی نظر آوے۔ تیڈے بدن دا چراغ تیڈی اکھ ہے۔ جِیں ویلے تیڈی اکھ ٹھیک ہے تاں تیڈا سارا بدن وی روشن ہے۔ پر جِیں ویلے تیڈی اکھ خراب ہے تاں تیڈا بدن وی اندھارا ہے۔ اِیں واسطے خیال کر جو جیہڑی روشنی تیڈے اندر ہے او اندھارا تاں نئیں۔ بس جے تیڈا سارا بدن روشنی نال بھریا ہووے تے کوئی حصہ اندھارے ءچ نہ ہووے، تاں او ایجھا روشن ہوسی جِینویں اُوں ویلے ہوندے جڈاں چراغ آپنڑی چمک نال تیکُوں روشن کریندے۔“ جِیں ویلے یسُوع کلام کریندا پِیا ہا تاں کہیں فریسی اُوندی دعوت کیتی۔ بس او اندر وَنج تے کھانڑا کھاوݨ بیٹھا۔ فریسی ایہ ڈیکھ تے حیران تھیّا جو او بغیر ہتھ دھوتے کھانڑا کھاوݨ بہہ گئے۔ پر خُداوند اُونکُوں آکھیا، ”فریسیو! تُساں پیالے تے تھالی کُوں باہر کنُوں تاں صاف کریندے ہیوے پر تُہاڈے اندر لُٹ دا مال تے بُرائی بھری پئی ہے۔ نادانو، جئیں ظاہر کُوں بنڑائے کیا اُوں باطن کُوں نئیں بنڑایا؟ ہاں، اندر دیاں چیزاں خیرات کر ڈیؤ تاں ڈیکھو تُہاڈے کیتے سبھ کُجھ پاک ہوسی۔ پر فریسیو! تُہاڈے اُتے افسوس، تُساں پُودینہ تے سُداب تے ہر ہِک ترکاری اُتے تاں ڈاہواں حصہ ڈیندے ہیوے، پر اِنصاف تے خُدا دی محبت تُوں غافل راہندے ہیوے۔ چاہیدا ہا جو ایہ وی کریندے تے او وی نہ چھوڑیندے۔ فریسیو! تُہاڈے اُتے افسوس، تُساں عبادت خانیاں ءچ اُچے درجے دیاں کُرسیاں تے بازاراں ءچ سلام چاہندے ہیوے۔ تُہاڈے اُتے افسوس! تُساں اُنہاں پوشیدہ قبراں وانگُوں ہیوے جِنہاں اُتوں لوک نہ جانڑدے ہوئے لنگھ ویندے ہِن ۔“ وَل شریعت دے عالماں ءچوں ہِک اُونکُوں جواب ءچ آکھیا، ”اُستاد! ایہ گالھیں آکھ تے تُساں ساکُوں وی بے عزت کریندے ہیوے۔“ اُوں آکھیا، ”شریعت دے عالمو! تُہاڈے اُتے وی افسوس، تُساں بندیاں اُتے ایجھے بھار لڈیندے ہیوے جِنہاں کُوں چاوݨ مُشکل ہے تے خود اُنہاں کُوں ہِک انگل وی نئیں لیندے۔ تُہاڈے اُتے افسوس! تُساں نبیاں دیاں قبراں بنڑیندے ہیوے، تے تُہاڈے پِیُو ڈاڈے اُنہاں کُوں قتل کیتا ہا۔ بس تُساں گواہ ہیوے تے آپنڑے پِیُو ڈاڈے دے کماں کُوں پسند کریندے ہیوے کیوں جو اُنہاں تاں اُنہاں کُوں قتل کیتا ہا تے تُساں اُنہاں دے مزار بنڑیندے ہیوے۔ اِیں واسطے خُدا آپنڑی حِکمت ءچ آکھیا ہے جو ’مَیں نبیاں تے رسُولاں کُوں اُنہاں دے کولھ بھجیساں۔ او اُنہاں ءچوں کُجھ کُوں قتل کریسن تے کُجھ کُوں ستیسن۔‘ تاں جو سبھ نبیاں دے خون دا جیہڑا دُنیا دے شروع کنُوں وہایا گِیا ہے، اِیں زمانے دے لوکاں کنُوں حساب گِھدا ونجے۔ ہابل دے خون کنُوں گِھن تے اُوں زکریاہ دے خون تئیں جیہڑا قُربان گاہ تے ہیکل دے وچال ہلاک تھیّا ۔ مَیں تُہاکُوں سچ آدھا ہاں جو اِیں زمانے دے لوکاں کنُوں سبھ دا حساب گِھدا ویسی۔ شریعت دے عالمو! تُہاڈے اُتے افسوس، تُساں علم دی کُنجی آپنڑے قبضہ ءچ گِھن گِھدی۔ تُساں خود وی داخل نہ تھئے تے داخل تھیوݨ آلیاں کُوں وی روکیا۔“ جِیں ویلے او اُتھوں نِکلیا تاں شریعت دے عالم تے فریسی اُوندی مخالفت کرݨ تے اُونکُوں چھیڑن لگے تاں جو او بہُوں سارے گالھیں دا ذِکر کرے، تے اُوندی تاڑ ءچ ریہے تاں جو اُوندے مُنہ دی کوئی گالھ پکڑن۔ اِیں دوران ہزاراں لوکاں دی بِھیڑ لگ گئی، ایہ تئیں جو لوک ہِک بئے اُتے ڈھاندے پئے ہَن۔ وَل یسُوع سبھ تُوں پہلے آپنڑے شاگرداں کُوں ایہ آکھنڑ شروع کیتا جو ”فریسیاں دے خمیر یعنی اُنہاں دی منافقت کنُوں ہوشیار رہوائے۔ کیوں جو کوئی چیز ڈھکی ہوئی نئیں جیہڑی کھولی نہ ویسی تے کوئی چیز لُکی ہوئی نئیں جیہڑی ظاہر نہ تھی ویسی۔ اِیں واسطے جیہڑا کُجھ تُساں اندھارے ءچ آکھیا ہے، او سوجھلے ءچ سُنڑیا ویسی۔ تے جیہڑا کُجھ تُساں کوٹھڑیاں دے اندر کَن ءچ آکھیا ہے، اُوندا اعلان مکان دیاں چھتاں اُتے کیتا ویسی۔ پر تُساں دوستاں کُوں مَیں آدھا ہاں جو اُنہاں کنُوں نہ ڈرو جیہڑے جِسم کُوں قتل کریندے ہِن تے اُوندے بعد کُجھ نئیں کر سگدے۔ پر مَیں تُہاکُوں چِتا ڈیندا ہاں جو کئیں کنُوں ڈرنڑا چاہیدے۔ اُوں کنُوں ڈرو جِینکُوں جان کنُوں مارݨ دے بعد دوزخ ءچ سَٹ ڈیوݨ دا اِختیار ہے۔ ہاں! مَیں تُہاکُوں آدھا ہاں جو اُونہی کنُوں ڈرو۔ کیا ڈُو سِکیاں ءچ پنج چِڑیاں نئیں وِکدیاں؟ تاں وی اُنہاں ءچوں کہیں کُوں وی خُدا نئیں بُھلدا۔ بلکہ تُہاڈے سر دے وال وی گِنڑے ہوئے ہِن۔ ڈرو نہ، تُہاڈی قدر تاں بہُوں ساریاں چِڑیاں تُوں زیادہ ہے۔ مَیں تُہاکُوں آدھا ہاں جو جیہڑا کوئی لوکاں دے سامنڑے میڈا اِقرار کریسی، اِبنِ آدم وی خُدا دے فرشتیاں دے سامنڑے اُوندا اِقرار کریسی۔ پر جیہڑا لوکاں دے سامنڑے میڈا اِنکار کریسی، خُدا دے فرشتیاں دے سامنڑے اُوندا اِنکار کیتا ویسی۔ تے جیہڑا کوئی اِبنِ آدم دے خلاف کوئی گالھ کریسی اُونکُوں معاف کیتا ویسی۔ پر جیہڑا رُوح القُدس دے خلاف کُفر بکے اُونکُوں معاف نہ کیتا ویسی۔ تے جیہڑے ویلے او تُہاکُوں عبادت خانیاں ءچ تے حاکماں تے اِختیار آلیاں دے کولھ گِھن ونجنڑ تاں فِکر نہ کرائے جو اساں کِینویں یا کیا جواب ڈیؤں، یا کیا آکھوں، کیوں جو رُوح القُدس اُونہی ویلے تُہاکُوں سِکھا ڈیسی جو کیا آکھنڑاں چاہیدا ہے۔“ وَل بِھیڑ ءچوں ہِک اُونکُوں آکھیا، ”اُستاد! میڈے بِھرا کُوں آکھو جو او جائیداد دا میڈا حصہ میکُوں ڈیوے۔“ یسُوع اُونکُوں آکھیا، ”میاں، کئیں میکُوں تُہاڈا مُنصف یا ونڈاوݨ آلا مقرر کیتے؟“ تے اُوں اُنہاں کُوں آکھیا، ”خبردار! آپنڑے آپ کُوں ہر قِسم دے لالچ کنُوں بچائی رکھو، کیوں جو کہیں اِنسان دی زندگی دا بھروسہ اُوندے مال دولت دی کثرت اُتے نئیں۔“ اُوں اُنہاں کُوں ہِک مثال سُنڑائی جو ”کہیں دولت مند دی زمین ءچ بہُوں فصل تھئی۔ بس او آپنڑے دل ءچ سوچ تے آکھنڑ لگا جو ’مَیں کیا کراں کیوں جو میڈے کولھ جاہ نئیں جِتھاں آپنڑی پیداوار بھر رکھاں؟‘ اُوں آکھیا ’مَیں اِینویں کریساں جو آپنڑے گودام ڈھا تے وڈے بنڑیساں، تے اُنہاں ءچ آپنڑے سارے دانڑے تے مال بھر رکھیساں، تے آپنڑے آپ کُوں اکھیساں، تیڈے کولھ بہُوں سالہاں کیتے بہُوں سارا مال جمع ہے۔ ارام نال رہ، کھا پی تے خوش رہ۔‘ پر خُدا اُونکُوں آکھیا، ’نادان! اِیں رات تیڈی جان تَیں کنُوں گِھن گِھدی ویسی۔ وَل جیہڑا کُجھ تَیں جمع کیتے، او کِیندا ہوسی؟‘ اِینویں ای اُوں بندے نال ہوسی جیہڑا آپنڑے کیتے خزانہ جمع کریندے تے خُدا دے حضُور دولت مند نئیں۔“ وَل یسُوع آپنڑے شاگرداں کُوں آکھیا، ”اِیہو وجہ ہے جو مَیں تُہاکُوں آدھا ہاں جو آپنڑی زندگی دی فِکر نہ کرو جو کیا کھاسوں، نہ آپنڑے بدن دی جو کیا پیسُوں۔ کیوں جو جان خوراک کنُوں تے بدن پُشاک کنُوں ودھ تے ہے۔ کانواں اُتے غور کرو جیہڑے نہ تاں رہیندے ہِن نہ کپیندے ہِن، نہ اُنہاں دے کولھ گودام ہوندے ہِن نہ پَلا۔ وَل وی خُدا اُنہاں کُوں کھویندے۔ تُہاڈی قدر تاں پکھیاں کنُوں بہُوں زیادہ ہے۔ تُہاڈے ءچوں ایجھا کوݨ ہے جیہڑا فِکر کر تے آپنڑی زندگی دا ہِک لاحظہ وی ودھا سگے؟ بس جِیں ویلے ساریاں تُوں چھوٹی گالھ وی نئیں کر سگدے تاں باقی چیزاں دی فِکر کیوں کریندے ہیوے؟ سوسن دے پُھلاں اُتے غور کرو جو او کِینویں ودھدے ہِن۔ نہ او محنت کریندے ہِن نہ کَتیندے ہِن۔ وَل وی مَیں تُہاکُوں آدھا ہاں جو سُلیمان وی آپنڑی ساری شان و شوکت دے باوجود اُنہاں ءچوں کہیں آلی کار پُشاک نہ پَیندا ہا۔ بس جِیں ویلے خُدا میدان دی گھاہ کُوں، جیہڑی اَج ہے تے کل تنُور ءچ سَٹ ڈِتی ویسی، ایجھی پُشاک پویندے، تاں کمزور اِیمان آلیو! تُہاکُوں کیوں نہ پویسی؟ تے فِکر نہ کرائے جو تُساں کیا کھاسو تے کیا پی سو۔ اِیں گالھ کیتے پریشان نہ تھیوائے۔ کیوں جو اِنہاں ساریاں چیزاں دی گولھ ءچ تاں دُنیا دیاں قوماں راہندیاں ہِن۔ پر تُہاڈا باپ جانڑدے جو تُساں اِنہاں چیزاں دے مُتھاج ہیوے۔ بس خُدا دی بادشاہی دی گولھ ءچ راہو تاں ایہ چیزاں وی تُہاکُوں مِل ویسن۔ چھوٹے اِجڑ! نہ ڈر، کیوں جو تُہاڈے باپ کُوں پسند آیا جو تُہاکُوں بادشاہی ڈیوے۔ آپنڑا مال ویچ تے خیرات کر ڈیؤ۔ تے آپنڑے کیتے ایجھے بٹوے بنڑاؤ جیہڑے پُرانڑے نئیں تھیندے یعنی اسمان اُتے ایجھا خزانہ جیہڑا خالی نئیں تھیندا، جِتھاں چور نئیں پُج سگدا تے کیڑا خراب نئیں کریندا۔ کیوں جو جِتھاں تُہاڈا خزانہ ہے، اُتھائیں تُہاڈا دل وی لگیا راہسی۔ تُہاڈی تیاری تھئی ہووے تے تُہاڈے ڈیوے بلدے راہوݨ۔ تُساں اُنہاں آدمیاں وانگُوں بنڑو جیہڑے آپنڑے مالک دی راہ ڈیدھے ہووݨ جو او شادی تُوں کِیں ویلے ولسی تاں جو جیہڑے ویلے او آ تے دَر کھڑکاوے تاں فوراً اُوندے کیتے کھول ڈیوݨ۔ او نوکر مُبارک ہِن، جِنہاں کُوں اُنہاں دا مالک آ تے جاگدا ڈیکھے۔ مَیں تُہاکُوں سچ آدھا ہاں جو او خود تیار تھی تے اُونکُوں دسترخوان اُتے بِلھیسی تے اُنہاں دی خدمت کرݨ لگ ویسی۔ جے او مالک رات دے ڈُوجھے یا تریجھے پہر ءچ آ تے اُنہاں کُوں ایجھے حال ءچ ڈیکھے تاں او نوکر مُبارک ہِن۔ پر یاد رکھائے جو جے گھر دے مالک کُوں چور دے آوݨ دا ویلا پتہ ہوندا تاں او جاگدا راہندا تے آپنڑے گھر ءچ سَندھ نہ مارݨ ڈیندا۔ تُساں وی تیار راہو کیوں جو جِیں ویلے تُہاکُوں توقع وی نہ ہوسی اِبنِ آدم آ ویسی۔“ پطرس آکھیا، ”مالک! کیا تُساں ایہ مثال صرف ساڈے کیتے ای آدھے ہیوے یا سبھ کیتے؟“ خُداوند آکھیا، ”او دیانتدار تے عقلمند مُنشی کیہڑا ہے جِینکُوں اُوندا مالک آپنڑے گھر دے نوکراں چاکراں اُتے مقرر کرے جو او اُنہاں دی خوراک ٹھیک ویلے اُتے ونڈیندا راہوے؟ مُبارک ہے او نوکر جِیندا مالک آ تے اُونکُوں اِینویں ای کریندا ڈیکھے۔ مَیں تُہاکُوں سچ آدھا ہاں جو او اُونکُوں آپنڑی ساری جائیداد دا مُختار بنڑا ڈیسی۔ پر جے او نوکر آپنڑے دل ءچ آکھے جو ’میڈے مالک دے آوݨ ءچ اجنڑ دیر ہے،‘ تے نوکراں تے نوکرانڑیاں کُوں مارݨ تے کھا پی تے شراب دے نشے ءچ دُھت تھیوݨ شروع کرے، تاں اُوندا مالک ایجھے ڈینہہ جو جِیں ویلے نوکر کُوں اُوندے آوݨ دی اُمید نہ ہوسی تے کہیں ایجھے ویلے جیندی اُونکُوں خبر وی نہ ہوسی، وَل آسی، تے خُوب کوڑے مروا تے اُونکُوں بے اِیماناں ءچ شامل کر ڈیسی۔ تے او نوکر جئیں آپنڑے مالک دی مرضی جاݨ گِھدی تے تیاری نہ کیتی تے نہ اُوندی منشا دے مطابق عمل کیتا، بہُوں مار کھاسی۔ پر جئیں نہ جانڑدے ہوئے مار کھاوݨ دے کم کیتے او گھٹ مار کھاسی۔ جِینکُوں بہُوں ڈِتا گئے اُوں کنُوں بہُوں طلب کیتا ویسی، تے جِینکُوں بہُوں سپُرد کیتا گئے اُوں کنُوں زیادہ طلب کیتا ویسی۔ مَیں زمین اُتے بھاہ لاوݨ آیا ہاں تے کاش او لگ گئی ہوندی! پر میکُوں ہِک بپتسمہ گِھننڑاں ہے، تے جئیں تئیں گِھن نہ گِھناں مَیں بہُوں بے چین راہساں! کیا تُساں ایہ سوچیندے ہیوے جو مَیں زمین اُتے صُلح کراوݨ آیا ہاں؟ مَیں تُہاکُوں آدھا ہاں جو نئیں بلکہ جُدائی کراوݨ۔ کیوں جو ہُنڑ کنُوں ہِک گھر دے پنج بندے آپس ءچ مخالفت رکھیسن، ڈُو نال ترے تے ترے نال ڈُو۔ پِیُو پوتر نال مخالفت رکھیسی تے پوتر پِیُو نال، ماء دِھی نال تے دِھی ماء نال، سس نُونہہ نال تے نُونہہ سس نال۔“ وَل اُوں لوکاں کُوں وی آکھیا جو ”جڈاں بدّل کُوں مغرب کنُوں اُٹھدے ڈیدھے ہیوے تاں فوراً آدھے ہیوے جو بارش تھیسی تے اِینویں ای تھیندے۔ تے جڈاں جنُوب دی ہوا گُھلدی ہے تاں آدھے ہیوے جو لُو چلسی تے اِینویں ای تھیندے۔ منافقو! تُساں زمین تے اسمان دی حالت ڈیکھ تے اُوندا مطلب سمجھ ویندے ہیوے پر اِیں زمانے دے دی حالت ڈیکھ تے کیوں نئیں سمجھ سگدے؟ تُساں خود ای فیصلہ کیوں نئیں کر گِھندے جو ٹھیک کیا ہے؟ جیہڑے ویلے تُوں مُدعی نال مُنصف دو ویندا پِیا ہوویں تاں رستے ءچ کوشش کر جو اُوں کنُوں چُھٹ ونجیں۔ اِینویں نہ تھیوے جو او تیکُوں مُنصف دے کولھ چھیک ونجے تے مُنصف تیکُوں سپاہی دے حوالے کر ڈیوے تے سپاہی تیکُوں قید ءچ سَٹ ڈیوے۔ مَیں تیکُوں آدھا ہاں جو جئیں تئیں تُوں پائی پائی ادا نہ کریسیں، اُتھوں کڈھائیں نہ چُھٹسیں۔“ اُوں ویلے کُجھ لوک اُتھاں موجود ہَن جِنہاں یسُوع کُوں اُنہاں گلیلیاں دے بارے ءچ ڈسایا، جِنہاں کُوں پِیلاطُس اُوں ویلے قتل کیتا جڈاں او قُربانیاں پیش کریندے پئے ہَن۔ یسُوع جواب ءچ اُنہاں کُوں آکھیا جو ”کیا تُساں ایہ سمجھدے ہیوے جو اِنہاں گلیلیاں دا ایجھا بُرا انجام اِیں واسطے تھئے جو او باقی سارے گلیلیاں کنُوں زیادہ گُنہگار ہَن؟ مَیں تُہاکُوں آدھا ہاں جو نئیں! بلکہ جے تُساں توبہ نہ کریسو تاں سارے اِینویں ای ہلاک تھیسو۔ یا کیا او اٹھارہاں بندے جِنہاں اُتے شیلوخ دا بُرج ڈھٹھا تے او تلے آ تے مر گئے، یروشلیم دے باقی لوکاں کنُوں زیادہ قصُوروار ہَن؟ مَیں تُہاکُوں آدھا ہاں جو نئیں! بلکہ جے تُساں توبہ نہ کریسو تاں سارے اِینویں ای ہلاک تھیسو۔“ وَل اُوں ایہ مثال سُنڑائی جو ”کہیں بندے آپنڑے انگُوراں دے باغ ءچ ہنجیر دا درخت لایا تے او اُوندے ءچ پھل گولھنڑ آیا پر نہ مِلیا۔ اِیں اُتے اُوں مالی کُوں آکھیا جو ’ڈیکھ مَیں ترے سالہاں کنُوں اِیں ہنجیر دے درخت ءچ پھل گولھنڑ آندا پِیا ہاں تے نئیں مِلدا۔ اِینکُوں کپ سَٹ، ایہ زمین کُوں وی کیوں روکی کھڑے؟‘ مالی جواب ءچ اُونکُوں آکھیا، ’ مالک! اِینکُوں اِیں سال تاں بِیا وی راہنڑ ڈیؤ، تاں جو مَیں اِیندے چودھارُوں گوڈی کر تے کھاد سَٹاں۔ جے ایہ بئے سال پھلیا تاں ٹھیک، نئیں تاں اِینکُوں کپ سَٹائے‘۔“ وَل یسُوع سبت دے ڈینہہ کہیں عبادت خانہ ءچ تعلیم ڈیندا پِیا ہا، تے ڈیکھو ہِک عورت ہئی جِینکُوں اٹھارہاں سالہاں کنُوں ہِک بدرُوح دی وجہ تُوں کمزوری ہئی۔ او کُبڑی تھی گئی ہئی تے کہیں طرح سِدھی نہ تھی سگدی ہئی۔ یسُوع اُونکُوں ڈیکھ تے کولھ سڈیا تے اُونکُوں آکھیا، ”عورت! تُوں آپنڑی کمزوری کنُوں آزاد تھی گئی۔“ وَل اُوں آپنڑے ہتھ اُوندے اُتے رکھے تے او اُونہی ویلے سِدھی تھی گئی تے خُدا دی حمد کرݨ لگ پئی۔ عبادت خانہ دا سردار اِیں واسطے جو یسُوع سبت دے ڈینہہ شِفا ڈِتی، ناراض تھی تے لوکاں کُوں آکھنڑ لگا، ”چِھی ڈینہہ ہِن جِنہاں ءچ کم کرݨ چاہیدے، بس اُنہاں ءچ آ تے شِفا گِھنو نہ جو سبت دے ڈینہہ۔“ خُداوند اُوندے جواب ءچ آکھیا جو ”منافقو! کیا تُہاڈے ءچوں ہر ہِک سبت دے ڈینہہ آپنڑے ڈاند یا گڈھاں کُوں تھان کنُوں کھول تے پانڑی پِلاوݨ کیتے نئیں گِھن ویندا؟ بس کیا ایہ مناسب نہ ہا جو ایہ عورت جیہڑی ابرہام دی دِھی ہے، جِینکُوں شیطان اٹھارہاں سالہاں کنُوں بدھی پِیا ہا، سبت دے ڈینہہ اِیں قید کنُوں آزاد کیتی ویندی؟“ جِیں ویلے اُوں ایہ گالھیں آکھیاں تاں اُوندے سارے مخالف شرمندہ تھئے تے ساری بِھیڑ اُنہاں عظیم کماں تُوں جیہڑے اُوندے ہتُھوں تھیندے ہَن، خوش تھئی۔ بس او آکھنڑ لگا جو ”خُدا دی بادشاہی کیہڑی چیز وانگُوں ہے؟ مَیں اُونکُوں کیندے نال تشبیہ ڈیواں؟ او رائی دے دانڑے وانگُوں ہے جِینکُوں ہِک بندے گِھن تے آپنڑے باغ ءچ رَہا ڈِتا۔ او ودھدے ودھدے درخت بنڑ گِیا تے ہوا دے پکھیں اُوندیاں لڑیاں اُتے بسیرا کیتا۔“ اُوں وَل آکھیا، ”مَیں خُدا دی بادشاہی کُوں کیندے نال تشبیہ ڈیواں؟ او اُوں خمیر وانگُوں ہے جِینکُوں ہِک عورت گِھن تے ترے مُٹھیاں اٹّے ءچ رَلایا تے ہولے ہولے سارا اٹّا خمیر تھی گِیا۔“ وَل یسُوع شہراں تے وستیاں ءچ تعلیم ڈیندا ہویا یروشلیم دا سفر کریندا پِیا ہا، تے کہیں بندے اُوں کنُوں پُچھیا جو ”مالک! کیا نجات پاوݨ آلے تھوڑے ہِن؟“ اُوں اُنہاں کُوں آکھیا، ”تنگ دروازے کنُوں داخل تھیوݨ دی پُوری کوشش کرو کیوں جو مَیں تُہاکُوں آدھا ہاں جو بہُوں سارے داخل تھیوݨ دی کوشش کریسن پر نہ تھی سگسن۔ جِیں ویلے گھر دا مالک اُٹھی تے دروازہ بند کر ڈیسی تے تُساں باہر کھڑے دروازہ کھڑکا تے ایہ اکھیسو جو ’مالک! ساڈے کیتے دَر کھول ڈیؤ۔‘ او جواب ڈیسی جو ’مَیں تُہاکُوں نئیں جانڑدا جو کِتھوں دے ہیوے۔‘ اُوں ویلے تُساں آکھنڑ لگسو جو ’اساں تاں تیڈے سامنڑے کھادا پِیتا تے تَیں ساڈیاں گلیاں ءچ تعلیم ڈِتی۔‘ پر او اکھیسی، ’مَیں تُہاکُوں آدھا ہاں جو مَیں نئیں جانڑدا جو تُساں کِتھوں دے ہیوے۔ بدکارو! تُساں سارے مَیں کنُوں دُور تھی ونجو۔‘ جِیں ویلے تُساں ابرہام تے اِضحاق تے یعقُوب تے سارے نبیاں کُوں خُدا دی بادشاہی ءچ موجود ڈیکھ سو، تے خود کُوں باہر کڈھیا ہویا ڈیکھ سو، اُتھاں رووݨ تے ڈنداں دا پِیہوݨ ہوسی۔ تے لوک مشرق، مغرب، شمال تے جنُوب کنُوں آ تے خُدا دی بادشاہی دی ضیافت ءچ شریک تھیسن۔ تے ڈیکھو کُجھ چھیکڑ ایجھے ہِن جیہڑے اوّل تھی ویسن تے کُجھ اوّل ایجھے ہِن جیہڑے چھیکڑ تھی ویسن۔“ اُونہی ویلے کُجھ فریسیاں آ تے اُونکُوں آکھیا جو ”اِتُھوں کنُوں نِکل تے کہیں بئے پاسے چلیا وَنج کیوں جو ہیرودیس تیکُوں قتل کرݨ چاہندے۔“ اُوں اُنہاں کُوں آکھیا جو ”اُوں لومبڑی کُوں وَنج تے ایہ آکھ ڈیؤ جو ’ڈیکھ مَیں اَج تے کل بدرُوحاں کُوں کڈھنڑ تے بیماراں کُوں شِفا ڈیوݨ دا کم کریندا راہساں تے تریجھے ڈینہہ کمال کُوں پُج ویساں۔‘ پر میکُوں اَج تے کل تے پرسُوں آپنڑا سفر جاری رکھنڑا ہے کیوں جو ممکن نئیں جو نبی یروشلیم کنُوں باہر قتل تھیوے۔ یروشلیم! یروشلیم! تُوں جیہڑا نبیاں کُوں قتل کریندیں تے جیہڑے تیڈے کولھ بھیجے گئے اُنہاں کُوں سنگسار کریندیں۔ مَیں کِتی پھیری ایہ چاہیا جو تیڈے بالاں کُوں اِینویں جمع کر گِھناں جِینویں مُرغی آپنڑے چُوچیاں کُوں آپنڑے پراں تلے جمع کر گِھندی ہے، پر تُوں راضی نہ تھیّا۔ ڈیکھو، تُہاڈا گھر تُہاڈے کیتے ویران چھوڑیا ویندے تے مَیں تُہاکُوں آدھا ہاں جو تُساں میکُوں اُوں ویلے تئیں وَل نہ ڈیکھسو جئیں تئیں نہ اکھیسو جو ’مُبارک ہے او جیہڑا رب العالمین دے ناں تُوں آندے‘۔“ وَل یسُوع سبت دے ڈینہہ فریسیاں دے سرداراں ءچوں کہیں دے گھر کھانڑا کھاوݨ گِیا تے او اُوندی تاڑ ءچ ریہے۔ تے اُتھاں ہِک بندہ اُوندے سامنڑے ہا جِینکُوں جلندر ہا۔ یسُوع فریسیاں تے شریعت دے عالماں کنُوں پُچھیا، ”سبت دے ڈینہہ شِفا ڈیوݨ جائز ہے یا نئیں؟“ او چُپ رہ گئے۔ وَل اُوں اُونکُوں ہتھ لا تے شِفا بخشی تے رُخصت کیتا۔ وَل اُنہاں کُوں آکھیا، ”تُہاڈے ءچوں ایجھا کوݨ ہے جِیندا گڈھاں یا ڈاند کھڈے ءچ ڈھے پووے تے او سبت دے ڈینہہ اُونکُوں فوراً باہر نہ کڈھے؟“ او اِنہاں گالھیں دا جواب نہ ڈے سگے۔ جِیں ویلے یسُوع ڈِٹھا جو مہمان، خصوصی جاہ کِینویں پسند کریندے ہِن تاں اُنہاں کُوں ہِک مثال آکھی جو ”جِیں ویلے کوئی تیکُوں شادی دی دعوت ءچ سڈے تاں مہمانِ خصوصی دی جاہ اُتے نہ بہہ۔ تھی سگدے جو اُوں تَیں کنُوں وی زیادہ کوئی معزز بندہ سڈیا ہووے۔ تے جئیں تیکُوں تے اُونکُوں ڈوہائیں کُوں سڈیا ہے آ تے تیکُوں آکھے جو ’اِینکُوں جاہ ڈے۔‘ وَل تیکُوں شرمندہ تھی تے سبھ کنُوں پِچُھوں باہنڑاں پووے۔ بلکہ جِیں ویلے تُوں سڈیا ونجیں تاں ساریاں کنُوں پِچُھوں وَنج تے بہہ تاں جو جیہڑے ویلے تیڈا میزبان آوے تاں تیکُوں آکھے، ’دوست! سامنڑے آلی کُرسی اُتے وَنج بہہ۔‘ وَل ساریاں دے سامنڑے جیہڑے تیڈے نال کھانڑا کھاوݨ بیٹھے ہِن، تیڈی عزت ہوسی۔ کیوں جو جیہڑا کوئی آپنڑے آپ کُوں وڈا بنڑیسی او چھوٹا کیتا ویسی تے جیہڑا آپنڑے آپ کُوں چھوٹا بنڑیسی او وڈا کیتا ویسی۔“ وَل یسُوع آپنڑے میزبان کُوں وی ایہ آکھیا جو ”جِیں ویلے تُوں ڈوپہر دا یا رات دا کھانڑا پکواویں تاں آپنڑے دوستاں یا بِھرانواں یا رشتہ داراں یا امیر ہمسایاں کُوں نہ سڈ، اِینویں نہ تھیوے جو او وی تیکُوں سڈݨ تے تیڈا احسان لہہ ونجے۔ بلکہ جڈاں تُوں دعوت کریں تاں غریباں، ٹُنڈیاں، مَنڈیاں تے اندھیاں کُوں سڈ، تے تیکُوں برکت مِلسی، کیوں جو اُنہاں دے کولھ کُجھ نئیں جیندے نال او تیڈا احسان لہا سگن، تے تیکُوں اِیں احسان دا بدلہ راستبازاں دی قیامت ءچ مِلسی۔“ جیہڑے یسُوع نال کھانڑا کھاوݨ بیٹھے ہَن، اُنہاں ءچوں ہِک ایہ گالھیں سُنڑ تے اُونکُوں آکھیا، ”مُبارک ہے او جیہڑا خُدا دی بادشاہی ءچ کھانڑا کھاوے۔“ اُوں اُونکُوں آکھیا، ”ہِک بندے وڈی دعوت کیتی تے بہُوں سارے لوکاں کُوں سڈیا۔ تے کھانڑا کھاوݨ ویلے اُوں آپنڑے نوکر کُوں بھیجیا جو مہماناں کُوں آکھے، ’آؤ، ہُنڑ کھانڑا تیار ہے۔‘ پر ساریاں رَل تے عُذر کرݨ شروع کر ڈِتا۔ پہلے بندے اُونکُوں آکھیا، ’مَیں کھیت مُل گِھدے تے میڈا اُونکُوں ڈیکھنڑ کیتے ونجنڑ ضروری ہے۔ مَیں تیڈی مِنت کریندا ہاں جو میڈی معذرت قبول کر۔‘ ڈُوجھے آکھیا، ’مَیں پنج جوڑے ڈاند مُل گِھدے ہِن تے مَیں اُنہاں کُوں ازماوݨ ویندا ہاں۔ مَیں تیڈی مِنت کریندا ہاں جو میڈی معذرت قبول کر۔‘ ہِک بئے آکھیا، ’مَیں شادی کیتی ہے اِیں واسطے نئیں آ سگدا۔‘ بس اُوں نوکر آ تے آپنڑے مالک کُوں اِنہاں گالھیں دی خبر ڈِتی۔ ایہ سُنڑ تے گھر دے مالک کوڑیج تے آپنڑے نوکر کُوں آکھیا، ’جلدی شہر دی گلیاں تے چوکاں ءچ وَنج تے غریباں، ٹُنڈیاں، اندھیاں تے مَنڈیاں کُوں اِتھاں گِھن آ۔‘ نوکر آکھیا، ’مالک! تیڈے آکھنڑ دے مطابق عمل کیتا گِیا ہے پر ہُنڑ وی جاہ خالی ہے۔‘ مالک نوکر کُوں آکھیا، ’رستیاں تے کھیت ءچ وَنج تے لوکاں کُوں مجبور کر تے گِھن آ تاں جو میڈا گھر بھریج ونجے۔ کیوں جو مَیں تُہاکُوں آدھا ہاں جو جیہڑے سڈے گئے ہَن اُنہاں ءچوں کوئی بندہ میڈا کھانڑا چَکھ نہ سگسی‘۔“ جِیں ویلے بہُوں سارے لوک یسُوع دے نال ویندے پئے ہَن تاں اُوں مُڑ تے اُنہاں کُوں آکھیا، ”جے کوئی میڈے کولھ آوے تے آپنڑے پِیُو، ماء، ذال، بال، بِھرا تے بھینڑاں بلکہ آپنڑی جان نال وی دُشمنڑی نہ رکھے، او میڈا شاگرد نئیں تھی سگدا۔ جیہڑا کوئی آپنڑی صلیب چا تے میڈے پِچُھوں نہ آوے او میڈا شاگرد نئیں تھی سگدا۔ کیوں جو تُہاڈے ءچوں ایجھا کوݨ ہے جو جِیں ویلے او ہِک بُرج بنڑاوݨ چاہوے تاں پہلے بہہ تے لاگت دا حساب نہ کر گِھنے جو ’کیا میڈے کولھ اُوندے بنڑاوݨ دا سامان ہے یا نئیں؟‘ اِینویں نہ تھیوے جو جِیں ویلے بنیاد رکھنڑ دے بعد اُونکُوں مکمل نہ کر سگے، تاں ڈیکھنڑ آلے ایہ آکھ تے اُوندے اُتے کِھلنڑ شروع کرݨ جو ’اِیں بندے بُرج بنڑاوݨ شروع تاں کیتی پر مکمل نہ کر سگیا۔‘ یا کیہڑا ایجھا بادشاہ ہے جیہڑا ڈُوجھے بادشاہ نال لڑن ویندا ہووے تے پہلے بہہ تے مشورہ نہ کر گِھنے جو، ’کیا مَیں ڈاہ ہزار نال اُوندا مُقابلہ کر سگدا ہاں یا نئیں جیہڑا وِیہہ ہزار فوج گِھن تے میڈے نال لڑن آندا پِیا ہے؟‘ نئیں تاں جِیں ویلے دُشمنڑ حالی دُور ای ہے، او قاصد بھیج تے صُلح دی درخاست کریسی۔ بس اِیں طرحاں تُہاڈے ءچوں جیہڑا کوئی آپنڑا سبھ کُجھ چھوڑ نہ ڈیوے، میڈا شاگرد نئیں تھی سگدا۔ نمک چنگا تاں ہے پر جے نمک دا مزہ ویندا راہوے تاں اُونکُوں کیہڑی چیز نال نمکین کیتا ویسی؟ نہ او زمین دے کم دا راہسی تے نہ ای کھاد دے۔ لوک اُونکُوں باہر سَٹ ڈیندے ہِن۔ جیندے سُنڑݨ دے کَن ہووݨ او سُنڑ گِھنے۔“ سارے محصُول گِھننڑ آلے تے گُنہگار یسُوع دے کولھ آندے ہَن تاں جو اُوندے گالھیں سُنڑݨ۔ تے فریسی تے شریعت دے عالم شکایت کر تے آدھے ہَن جو ”ایہ بندہ گُنہگاراں کُوں مِلدے تے اُنہاں دے نال کھانڑا کھاندے۔“ یسُوع اُنہاں کُوں ایہ مثال سُنڑائی: ”جے تُہاڈے ءچوں کہیں بندے دیاں سو بھیڈاں ہووݨ تے اُنہاں ءچوں ہِک گُم تھی ونجے تاں کیا او باقی ودھانوے بھیڈاں کُوں بیابان ءچ چھوڑ تے اُوں گُم تھئی کُوں اُوں ویلے تئیں گولھیندا نہ راہسی جئیں تئیں مِل نہ ونجے؟ وَل جیہڑے ویلے مِل ویندی ہے تاں او خوشی کنُوں اُونکُوں آپنڑے مونڈھیاں اُتے چا گِھندے۔ تے گھر آ تے آپنڑے دوستاں تے ہمسایاں کُوں سڈیندے تے آدھے، ’میڈے نال خوشی مناؤ کیوں جو میڈی گُم تھئی ہوئی بھیڈ مِل گئی ہے۔‘ مَیں تُہاکُوں آدھا ہاں جو اِینویں ای ودھانوے (99) راستبازاں دی نسبت جِنہاں کُوں توبہ کرݨ دی ضرورت کائنی، ہِک توبہ کرݨ آلے گُنہگار دی وجہ کنُوں اسمان اُتے زیادہ خوشی کیتی ویسی۔ یا جے کہیں عورت دے کولھ چاندی دے ڈاہ سِکے ہووݨ تے ہِک گُم تھی ونجے تاں کیا او چراغ بال تے گھر ءچ جھاڑُو نہ ڈیسی تے جئیں تئیں مِل نہ ونجے کوشش نال گولھیندی نہ راہسی؟ جِیں ویلے گولھ گِھنسی تاں آپنڑیاں سہیلیاں تے ہمسایاں کُوں سڈ تے ایہ نہ اکھیسی جو ’میڈے نال خوشی مناؤ کیوں جو میڈا گُم تھیّا ہویا سِکہ مِل گِیا ہے۔‘ مَیں تُہاکُوں آدھا ہاں جو اِینویں ای ہِک گُنہگار دے توبہ کرݨ نال خُدا دے فرشتیاں دے سامنڑے خوشی منائی ویندی ہے۔“ وَل اُوں آکھیا جو ”کہیں بندے دے ڈُو پوتر ہَن۔ اُنہاں ءچوں چھوٹے پوتر پِیُو کُوں آکھیا، ’ابّا! جائیداد ءچوں جیہڑا میڈا حصہ بنڑدے میکُوں ڈے چا۔‘ اُوں جائیداد اُنہاں ڈوہائیں ءچ وَنڈ ڈِتی۔ بہُوں ڈینہہ نہ لنگھے جو چھوٹے پوتر آپنڑا سارا مال جمع کیتا تے دُور دراز مُلک کُوں روانہ تھی گِیا تے اُتھاں ساری دولت عیش و عشرت ءچ اُڈا ڈِتی۔ جِیں ویلے سبھ کُجھ خرچ کر گِھدا تاں اُوں مُلک ءچ سخت کال پے گِیا تے او مُتھاج تھیوݨ لگا۔ وَل اُوں مُلک دے ہِک بندے کولھ کم گولھنڑ کیتے گِیا۔ اُوں اُونکُوں آپنڑے کھیتاں ءچ سُؤر چراوݨ بھیجیا۔ او اُنہاں پھلیاں نال جیہڑیاں سُؤر کھاندے ہَن، آپنڑا پیٹ بھرݨ چاہندا ہا پر کوئی اُونکُوں نہ ڈیندا ہا۔ وَل اُوں ہوش ءچ آ تے آکھیا، ’میڈے پِیُو دے مزدُوراں کُوں ضرورت کنُوں وی زیادہ روٹی مِلدی ہے تے مَیں اِتھاں بُکھا مردا پِیا ہاں! مَیں اُٹھی تے آپنڑے پِیُو کولھ ویساں تے اُونکُوں اکھیساں، ”ابّا! مَیں اسمان دے خلاف تے تیڈے خلاف گُناہ کیتے۔ ہُنڑ اِیں لائق نئیں ریہا جو وَل تیڈا پوتر اکھواواں۔ میکُوں آپنڑے مزدُوراں نال رکھ گِھن“۔‘ بس او اُٹھی تے آپنڑے پِیُو دو ٹُر پِیا۔ او اجنڑ بہُوں دُور ای ہا جو اُونکُوں ڈیکھ تے اُوندے پِیُو کُوں اُوندے اُتے ترس آیا تے دِرک تے اُونکُوں ہاں نال لایا تے چُمیا۔ پوتر آکھیا، ’ابّا! مَیں اسمان دے خلاف تے تیڈے خلاف گُناہ کیتے۔ ہُنڑ اِیں لائق نئیں ریہا جو وَل تیڈا پوتر اکھواواں۔‘ پر پِیُو آپنڑے نوکراں کُوں آکھیا، ’چنگی کنُوں چنگی پُشاک کڈھ تے اُونکُوں پواؤ تے اُوندے ہتھ ءچ مُندری تے پیراں ءچ جُتی پواؤ۔ تے موٹا تازہ گابا گِھن تے ذبح کرو تاں جو اساں کھا تے خوشی مناؤں۔ کیوں جو میڈا ایہ پوتر مر گِیا ہا، ہُنڑ زندہ تھئے، گُم تھی گِیا ہا، ہُنڑ مِلیا ہے۔‘ بس او خوشی مناوݨ لگے۔ پر اُوندا وڈا پوتر کھیت ءچ ہا۔ جِیں ویلے او گھر دے نیڑے پُجیا تاں اُوں گاوݨ وجاوݨ تے نچنڑ دی اواز سُنڑی، تے ہِک نوکر کُوں سڈ تے پُچھنڑ لگا جو ’ایہ کیا تھیندا پے؟‘ اُوں اُونکُوں آکھیا، ’تیڈا بِھرا وَل آئے تے تیڈے پِیُو موٹا تازہ گابا ذبح کروایا ہے کیوں جو او اُوندے کولھ سلامت وَل آئے۔‘ او کوڑیج گِیا تے اندر آوݨ نہ چاہندا ہا، پر اُوندا پِیُو باہر آ تے اُونکُوں مناوݨ لگا۔ اُوں آپنڑے پِیُو کُوں جواب ءچ آکھیا، ’ڈیکھ، مَیں اِتنے سالہاں کنُوں تیڈی خدمت کریندا ہاں تے کڈھائیں تیڈی نافرمانی نئیں کیتی۔ پر تُوں میکُوں کڈھائیں بکری دا ہِک لیلا وی نئیں ڈِتا جو آپنڑے دوستاں نال خوشی منیندا۔ پر جِیں ویلے تیڈا ایہ پوتر سارا مال طوائفاں ءچ اُڈا تے آیا تاں تُوں اُوندے کیتے موٹا تازہ گابا ذبح کروا یا۔‘ اُوں اُونکُوں آکھیا، ’پوتر! تُوں تاں ہمیشاں میڈے کولھ ہیں تے جیہڑا کُجھ میڈا ہے او تیڈا ای ہے۔ پر خوشی مناوݨ تے شادمان تھیوݨ لازم ہا کیوں جو تیڈا ایہ بِھرا مر گِیا ہا، ہُنڑ زندہ تھئے، گُم تھی گِیا ہا، ہُنڑ مِل گئے‘۔“ وَل یسُوع شاگرداں کُوں آکھیا جو ”کہیں امیر بندے دا ہِک مُنشی ہا۔ لوکاں اُوندے مالک کولھ اُوندی شکایت کیتی جو او تیڈا مال ضائع کریندے۔ بس اُوں، اُونکُوں سڈ تے آکھیا جو ’ایہ کیا ہے جیہڑا مَیں تیڈے بارے ءچ سُنڑدا پِیا ہاں؟ سارا حساب کتاب میکُوں ڈے، کیوں جو ہُنڑ کنُوں تُوں میڈا مُنشی نئیں رہ سگدا۔‘ اُوں مُنشی آپنڑے دل ءچ آکھیا جو ’مَیں کیا کراں کیوں جو میڈا مالک میکُوں میڈے کم تُوں کڈھیندا پئے؟ مِٹی تاں مَیں کنُوں کھودی نئیں ویندی تے شرم کنُوں بِھیک وی نئیں منگ سگدا۔ مَیں سمجھ گِیا جو کیا کراں تاں جو جِیں ویلے مُختاری تُوں کڈھیا وَنجاں تاں لوک میکُوں آپنڑے گھراں ءچ جاہ ڈیوݨ۔‘ بس اُوں آپنڑے مالک دے ہِک ہِک قرضدار کُوں سڈ تے پہلے کنُوں پُچھیا جو ’تَیں میڈے مالک دا کِتی قرض ڈیونڑاں ہے؟‘ اُوں آکھیا، ’سو مَنڑ تیل۔‘ اُوں اُونکُوں آکھیا، ’آپنڑے کاغذ گِھن تے جلدی نال بہہ تے پنجھاہ لکھ ڈے۔‘ وَل ڈُوجھے کُوں آکھیا، ’تیڈے اُتے کِتی قرض ہے؟‘ اُوں آکھیا، ’سو بوری کنڑک۔‘ اُوں اُونکُوں آکھیا، ’آپنڑے کاغذات گِھن تے اسّی لِکھ ڈے۔‘ مالک اُوں بے اِیمان مُنشی دی تعریف کیتی اِیں واسطے جو اُوں وڈی ہوشیاری نال کم گِھدا ہا۔ کیوں جو اِیں دُنیا دے فرزند آپنڑے جِیہے لوکاں نال دُنیا داری دے معاملات ءچ نُور دے فرزنداں کنُوں زیادہ ہوشیار ہِن۔ مَیں تُہاکُوں آدھا ہاں جو دُنیا دی کمائی نال آپنڑے کیتے دوست بنڑاؤ، تاں جو جِیں ویلے او ویندی راہوے تاں او تُہاکُوں ابدی گھراں ءچ جاہ ڈیوݨ۔ جیہڑا تھوڑے ءچ دیانتدار ہے او بہُوں ءچ وی دیانتدار ہے۔ تے جیہڑا تھوڑے ءچ بددیانت ہے او بہُوں ءچ وی بددیانت ہے۔ بس جِیں ویلے تُساں دُنیاوی دولت دے معاملے ءچ وی دیانتدار ثابت نہ تھئے تاں حقیقی دولت کوݨ تُہاڈے حوالے کریسی؟ تے جے تُساں کہیں ڈُوجھے دے مال ءچ دیانتدار نہ تھئے تاں جیہڑا تُہاڈا آپنڑا ہے اُونکُوں کوݨ تُہاکُوں ڈیسی؟ کوئی نوکر ڈُو مالکاں دی خدمت نئیں کر سگدا، کیوں جو یا تاں ہِک کنُوں نفرت کریسی تے ڈُوجھے نال محبت، یا ہِک نال وفا کریسی تے ڈُوجھے کُوں حقیر جانڑسی۔ تُساں خُدا تے دولت ڈوہائیں دی خدمت نئیں کر سگدے۔“ فریسی جیہڑے پیسے نال پیار کریندے ہَن، اِنہاں سبھ گالھیں کُوں سُنڑ تے اُوندا مذاق اُڈاوݨ لگے۔ یسُوع اُنہاں کُوں آکھیا جو ”تُساں او ہیوے جیہڑے لوکاں دے سامنڑے آپنڑے آپ کُوں راستباز ظاہر کریندے ہیوے پر خُدا تُہاڈے دِلاں دی حالت کنُوں واقف ہے کیوں جو جیہڑی چیز آدمیاں دی نِگاہ ءچ اعلیٰ ہے او خُدا دے حضُور مکرُوہ ہے۔ شریعت تے نبی یُوحنّا تئیں ہَن۔ اُوں ویلے تُوں خُدا دی بادشاہی دی خوشخبری سُنڑائی ویندی ہے تے ہر کوئی اُوندے ءچ داخل تھیوݨ دی زبردست کوشش کریندے۔ پر اسمان تے زمین دا ٹَل ونجنڑ توریت دے ہِک شوشہ دے ٹَل ونجنڑ کنُوں بہُوں سوکھا ہے۔ جیہڑا کوئی آپنڑی ذال کُوں چھوڑ تے کہیں ڈُوجھی نال شادی کریندے او زِنا کریندے تے جیہڑا کوئی بندہ چھوڑی ہوئی عورت نال شادی کریندے او وی زِنا کریندے۔ ہِک امیر بندہ ہا جیہڑا قیمتی تے نفِیس کپڑے پَیندا تے ہر روز خوشی منیندا تے عیش کریندا ہا۔ تے لعزر ناں دا ہِک غریب، جیہڑا ناسُوراں نال بھریا ہویا، اُوندے دروازے اُتے سَٹ ڈِتا گِیا ہا۔ او چاہندا ہا جو امیر بندے دی میز کنُوں ڈھٹھے ہوئے ٹُکڑیاں نال آپنڑا پیٹ بھر گِھنے بلکہ کُتے وی آ تے اُوندے ناسُور چٹیندے ہَن۔ اِینویں تھیّا جو او غریب مر گِیا تے فرشتیاں اُونکُوں گِھن تے ابرہام دی جھولی ءچ پُچا ڈِتا تے امیر بندہ وی مر گِیا تے دفن تھیّا۔ اُوں عالم ِ ارواح دے عذاب ءچ مُبتلا تھی تے آپنڑے اکھیں چاتیاں تے پرے کنُوں ابرہام کُوں ڈِٹھا تے اُوندی جھولی ءچ لعزر کُوں۔ اُوں چِلا تے آکھیا، ’ابّا ابرہام! میڈے اُتے رحم کر تے لعزر کُوں بھیج جو آپنڑی انگل دا سرا پانڑی ءچ بوڈ تے میڈی زبان کُوں ٹھڈا کرے، کیوں جو مَیں اِیں بھاہ ءچ تڑپدا پِیا ہاں۔‘ ابرہام آکھیا، ’پوتر، یاد کر جو تُوں آپنڑی زندگی ءچ چنگیاں چیزاں گِھن گِھدیاں تے اِینویں ای لعزر بُریاں چیزاں۔ پر ہُنڑ او اِتھاں ارام ءچ ہے تے تُوں عذاب ءچ۔ تے اِنہاں گالھیں دے علاوہ ساڈے تے تُہاڈے وچال ہِک بہُوں وڈی کھائی ہے تاں جو جیہڑا کوئی اِتُھوں کنُوں تُہاڈے کولھ ونجنڑ چاہوے، نہ وَنج سگے تے نہ کوئی اُتھوں کنُوں ساڈے دو آ سگے۔‘ اُوں آکھیا، ’اِیں واسطے ابّا! مَیں تیڈی مِنت کریندا ہاں جو تُوں اُونکُوں میڈے پِیُو دے گھر بھیج، کیوں جو میڈے پنج بِھرا ہِن تاں جو او اُنہاں دے سامنڑے اِنہاں گالھیں دی گواہی ڈیوے، اِینویں نہ تھیوے جو او وی اِیں عذاب آلی جاہ ءچ آ ونجنڑ۔‘ ابرہام اُونکُوں آکھیا، ’اُنہاں دے کولھ مُوسیٰ تے نبی تاں ہِن، اُنہاں دی سُنڑݨ۔‘ اُوں آکھیا، ’نہ ابّا ابرہام! پر جے کوئی مُردیاں ءچوں اُنہاں دے کولھ ونجے تاں او توبہ کریسن۔‘ اُوں اُونکُوں آکھیا، ’جے او مُوسیٰ تے نبیاں دی نئیں سُنڑدے تاں جے کوئی مُردیاں ءچوں زندہ تھی ونجے تاں اُوندی وی نہ سُنڑسن‘۔“ وَل یسُوع آپنڑے شاگرداں کُوں آکھیا، ”ایہ ناممکن ہے جو ازمائشاں نہ آوݨ، پر اُوں بندے اُتے افسوس جیندی وجہ کنُوں آوݨ۔ اِنہاں چھوٹیاں ءچوں کہیں کیتے اِیمان تُوں گُمراہ تھیوݨ دا سبب بنڑݨ کنُوں اُوندے کیتے اِیہو چنگا ہے جو چکّی دا بھارا پُڑ اُوندی گِچی ءچ پا تے اُونکُوں سمندر ءچ سَٹ ڈِتا ویندا۔ خبردار راہو! جے تیڈا بِھرا گُناہ کرے تاں اُونکُوں ملامت کر۔ جے توبہ کرے تاں اُونکُوں معاف کر۔ تے جے او ہِک ڈینہہ ءچ سَت پھیری تیڈا گُناہ کرے تے ستّے پھیری تیڈے کولھ آ تے آکھے جو ’میکُوں معاف کر‘ تاں تُوں اُونکُوں معاف کر۔“ اِیں تُوں رسُولاں خُداوند کُوں آکھیا، ”ساڈے اِیمان کُوں ودھا۔“ خُداوند آکھیا جو ”جے تُہاڈا اِیمان رائی دے دانڑے دے برابر وی ہوندا تے تُساں اِیں تُوت دے درخت کُوں آدھے جو جڑھ کنُوں پٹیج تے سمندر ءچ لگ وَنج تاں ایہ تُہاڈی منیندا۔ فرض کرو جو تُہاڈے ءچوں کہیں دا ہِک نوکر زمین رہیندا یا ڈھورڈنگر چریندا ہووے۔ جِیں ویلے او کھیت کنُوں ولے تاں کیا اُوندا مالک اُونکُوں اکھیسی جو ’جلدی نال آ تے کھانڑا کھاوݨ بہہ وَنج؟‘ بالکل نئیں، بلکہ او ایہ اکھیسی، ’میڈا کھانڑا تیار کر، تے جِیں ویلے تئیں مَیں کھاواں پِیواں، کمر بَدھ تے میڈی خدمت کر۔ اُوندے بعد تُوں خود کھا پی گِھنیں؟‘ کیا او اِیں واسطے نوکر دا شُکر ادا کریسی جو اُوں اُوہو کیتا جیہڑا اُونکُوں کرݨ کیتے آکھیا گِیا ہا؟ اِینویں ای تُساں وی جِیں ویلے اِنہاں گالھیں اُتے عمل کر گِھنو جیندے کرݨ دا تُہاکُوں حُکم ڈِتا گِیا ہا تاں آکھو جو ’اساں نکمے نوکر ہاں، اساں صرف اُوہو کیتے جِینویں کرݨ ساکُوں فرض ہا‘۔“ تے اِینویں تھیّا جو یروشلیم کُوں ویندے ہوئے یسُوع سامریہ تے گلیل ءچوں تھی تے ویندا پِیا ہا، تے ہِک وستی ءچ داخل تھیندے ویلے اُونکُوں ڈاہ کوڑھی مِلے۔ اُنہاں دُور کنُوں کھڑے تھی تے اُچی اواز نال آکھیا، ”یسُوع! اُستاد! ساڈے اُتے رحم کرو۔“ اُوں اُنہاں کُوں ڈیکھ تے آکھیا، ”ونجو، آپنڑے آپ کُوں کاہِناں کُوں ڈِکھاؤ۔“ تے اِینویں تھیّا جو او ویندے ویندے پاک صاف تھی گئے۔ وَل اُنہاں ءچوں ہِک ایہ ڈیکھ تے جو اُونکُوں شِفا مِل گئی ہے، اُچی اواز ءچ خُدا دی حمد کریندا وَل آیا، تے یسُوع دے پیراں اُتے مُنہ دے بھار ڈھے تے اُوندا شُکر ادا کرݨ لگا۔ تے او سامری ہا۔ یسُوع پُچھیا، ”کیا ڈاہ دے ڈاہ پاک صاف نہ تھئے ہَن؟ وَل او نؤں کِتھاں ہِن؟ کیا اِیں پردیسی دے علاوہ بِیا کوئی نہ ہا جیہڑا واپس آ تے خُدا دی تعریف کریندا؟“ وَل اُونکُوں آکھیا، ”اُٹھی تے چلیا وَنج، تیڈے اِیمان تیکُوں چنگا کیتے۔“ فریسیاں اُونکُوں پُچھیا، ”خُدا دی بادشاہی کِیں ویلے آسی؟“ یسُوع جواب ءچ اُنہاں کُوں آکھیا، ”خُدا دی بادشاہی ظاہری طور تے نہ آسی۔ تے لوک ایہ نہ اکھیسن جو ’ڈیکھو اِتھاں ہے‘ یا ’اُتھاں ہے۔‘ کیوں جو ڈیکھو خُدا دی بادشاہی تُہاڈے وچال ہے۔“ وَل اُوں شاگرداں کُوں آکھیا، ”او ڈینہہ آسن جو تُہاکُوں اِبنِ آدم دے ڈینہاں ءچوں ہِک ڈینہہ کُوں ڈیکھنڑ دی خواہش ہوسی تے نہ ڈیکھ سو۔ لوک تُہاکُوں اکھیسن جو ’ڈیکھو او اُتھاں ہے،‘ یا ’ڈیکھو او اِتھاں ہے۔‘ پر تُساں چلے نہ وَنجائے تے نہ ای اُنہاں دے پِچُھوں وَنجائے۔ کیوں جو جِینویں بجلی دِرک تے اسمان کُوں ہِک پاسے کنُوں گِھن تے ڈُوجھے پاسے تئیں روشن کر ڈیندی ہے، اِینویں ای اِبنِ آدم آپنڑے آوݨ دے ڈینہہ ءچ ظاہر تھیسی۔ پر لازم ہے جو پہلے او بہُوں ڈُکھ چاوے تے اِیں زمانے دے لوک اُونکُوں رَد کرݨ۔ جِینویں نُوح دے ڈینہاں ءچ تھیّا ہا، اُونویں ای اِبنِ آدم دے ڈینہاں ءچ وی تھیسی۔ لوک کھاندے پِیندے ہَن تے شادی ویاہ کریندے ہَن، اُوں ڈینہہ تئیں جڈاں نُوح کشتی ءچ داخل تھیّا تے طوفان آ تے ساریاں کُوں ہلاک کر ڈِتا ۔ تے لُوط دے ڈینہاں ءچ وی اِینویں ای تھیّا ہا۔ لوک کھاندے پِیندے تے خرید و فروخت کریندے تے کاشتکاری کریندے تے مکان بنڑیندے ہَن۔ پر جیہڑے ڈینہہ لُوط سدُوم کنُوں باہر نِکلیا تاں بھاہ تے گندھک اسمان کنُوں وس تے سبھ کُوں ہلاک کر ڈِتا ۔ اِبنِ آدم دے ظاہر تھیوݨ دے ڈینہہ وی اِینویں ای تھیسی۔ اُوں ڈینہہ جیہڑا چھت اُتے ہووے تے اُوندا مال گھر ءچ ہووے، او اُونکُوں گِھننڑ کیتے تلے نہ لہوے۔ تے اِینویں ای جیہڑا رَڑھ ءچ ہووے او پِچُھوں نہ ونجے۔ لُوط دی ذال کُوں یاد رکھو ۔ جیہڑا کوئی آپنڑی جان بچاوݨ دی کوشش کریسی او اُونکُوں ونجیسی، تے جیہڑا کوئی اُونکُوں ونجیسی او اُونکُوں زندہ رکھیسی۔ مَیں تُہاکُوں آدھا ہاں جو اُوں رات ڈُو بندے ہِک کَھٹ اُتے سُتے پئے ہوسن، ہِک گِھن گِھدا ویسی تے ڈُوجھا چھوڑ ڈِتا ویسی۔ ڈُو عورتاں رَل تے چکّی پِیہندیاں ہوسن، ہِک گِھن گِھدی ویسی تے ڈُوجھی چھوڑ ڈِتی ویسی۔ [ڈُو بندے جیہڑے کھیت ءچ ہوسن، ہِک گِھن گِھدا ویسی تے ڈُوجھا چھوڑ ڈِتا ویسی۔]“ شاگرداں اُونکُوں پُچھیا جو ”مالک! ایہ کِتھاں ہوسی؟“ اُوں اُنہاں کُوں آکھیا، ”جِتھاں مُردار ہے اُتھاں گیجھ وی جمع تھی ویسن۔“ وَل یسُوع شاگرداں کُوں سِکھاوݨ کیتے جو ہر ویلے دُعا کریندے راہوݨ تے ہِمت نئیں ہارنڑی چاہیدی، ایہ مثال سُنڑائی: ”کہیں شہر ءچ ہِک قاضی ہا۔ نہ او خُدا کنُوں ڈردا ہا، تے نہ ای اِنسان دی کوئی پرواہ کریندا ہا۔ اُوں شہر ءچ ہِک بیوہ ہئی جیہڑی اُوں قاضی دے کولھ آ تے ایہ آدھی ہئی جو ’میڈا اِنصاف کر، تے میکُوں مُدعی کنُوں بچا۔‘ شروع ءچ تاں قاضی اِنکار کیتا پر آخر اُوں آپنڑے دل ءچ آکھیا، ’سچ ہے جو مَیں نہ خُدا کنُوں ڈردا ہاں تے نہ کہیں اِنسان دی پرواہ کریندا ہاں۔ پر کیوں جو ایہ بیوہ میکُوں تنگ کریندی ہے، اِیں واسطے مَیں اُوندا اِنصاف کریساں، نہ تاں ایہ ہر روز آ تے میڈے نک ءچ دم کر ڈیسی‘۔“ وَل خُداوند آکھیا، ”سُنڑو، ایہ بے اِنصاف قاضی کیا آدھے؟ تاں وَل کیا خُدا آپنڑے چُنڑے ہوئے لوکاں دا اِنصاف نہ کریسی جیہڑے ڈینہہ رات اُوں کنُوں فریاد کریندے ہِن؟ تے کیا او اُنہاں دی مدد ءچ دیر کریسی؟ مَیں تُہاکُوں آدھا ہاں جو او اُنہاں دا جلدی اِنصاف کریسی۔ وَل وی جِیں ویلے اِبنِ آدم آسی تاں کیا زمین اُتے اِیمان پے سی؟“ وَل یسُوع کُجھ لوکاں کُوں جیہڑے آپنڑے آپ کُوں بہُوں راستباز سمجھدے ہَن تے ڈُوجھیاں کُوں کم تر جانڑدے ہَن، ایہ مثال سُنڑائی: ”ڈُو بندے دُعا کرݨ کیتے ہیکل ءچ گئے۔ ہِک فریسی تے ڈُوجھا محصُول گِھننڑ آلا۔ فریسی کھڑا تھی تے آپنڑے دل ءچ اِینویں دُعا کرݨ لگا جو ’اے خُدا! مَیں تیڈا شُکر کریندا ہاں جو مَیں ڈُوجھے آدمیاں وانگُوں ظالم، بے اِنصاف، زِنا کار یا اِیں محصُول گِھننڑ آلے وانگُوں نئیں۔ مَیں ہفتے ءچ ڈُو پھیری روزہ رکھیندا ہاں تے آپنڑی ساری کمائی دا ڈاہواں حصہ ڈیندا ہاں۔‘ پر محصُول گِھننڑ آلے دُور کھڑ تے اسمان دو نِگاہ وی نہ کیتی بلکہ چھاتی پِٹ پِٹ تے آکھیا، ’اے خُدا! مَیں گُنہگار اُتے رحم کر۔‘ مَیں تُہاکُوں آدھا ہاں جو فریسی نئیں بلکہ محصُول گِھننڑ آلا خُدا دی نظر ءچ نیک بنڑ تے آپنڑے گھر گِیا کیوں جو جیہڑا کوئی آپنڑے آپ کُوں وڈا بنڑیسی او چھوٹا کیتا ویسی تے جیہڑا کوئی آپنڑے آپ کُوں چھوٹا بنڑیسی او وڈا کیتا ویسی۔“ وَل لوک آپنڑے چھوٹے بالاں کُوں وی اُوندے کولھ گِھن آوݨ لگے تاں جو او بالاں اُتے آپنڑا ہتھ رکھے۔ شاگرداں ایہ ڈیکھ تے اُنہاں کُوں جِھڑکیا، پر یسُوع بالاں کُوں آپنڑے کولھ سڈیا تے آکھیا جو ”بالاں کُوں میڈے کولھ آوݨ ڈیؤ تے اُنہاں کُوں نہ ہٹکو کیوں جو خُدا دی بادشاہی ایجھیاں ای دی ہے۔ مَیں تُہاکُوں سچ آدھا ہاں جو جیہڑا کوئی خُدا دی بادشاہی کُوں بالاں وانگُوں قبول نہ کرے او اُوندے ءچ کڈھائیں داخل نہ تھیسی۔“ وَل کہیں سردار اُوں کنُوں ایہ پُچھیا جو ”نیک اُستاد! مَیں کیا کراں جو ہمیشاں دی زندگی دا وارث بنڑاں؟“ یسُوع اُونکُوں آکھیا، ”تُوں میکُوں نیک کیوں آدھیں؟ کوئی نیک نئیں صرف ہِک ہے یعنی خُدا۔ تُوں حُکماں کُوں تاں جانڑدا ہیں جو زِنا نہ کر، خون نہ کر، چوری نہ کر، کُوڑی گواہی نہ ڈے، آپنڑے ماء پِیُو دی عزت کر ۔“ اُوں آکھیا، ”اِنہاں ساریاں اُتے تاں مَیں چھوٹے لا کنُوں عمل کیتا ہے۔“ جیہڑے ویلے یسُوع ایہ سُنڑیا تاں اُونکُوں آکھیا، ”ہِک گالھ دی تیڈے ءچ ہُنڑ تئیں کمی ہے۔ آپنڑا سبھ کُجھ ویچ تے غریباں ءچ وَنڈ ڈے۔ تیکُوں اسمان اُتے خزانہ مِلسی تے وَل آ تے میڈے پِچُھوں تھی پو۔“ ایہ سُنڑ تے او بہُوں غمگین تھیّا کیوں جو بہُوں دولت مند ہا۔ یسُوع اُونکُوں ڈیکھ تے آکھیا، ”دولت منداں دا خُدا دی بادشاہی ءچ داخل تھیوݨ کیجھا اوکھا ہے! اُٹھ دا سُوئی دے نکے ءچوں لنگھ ونجنڑ، دولت مند دے خُدا دی بادشاہی ءچ داخل تھیوݨ کنُوں زیادہ سوکھا ہے۔“ سُنڑݨ آلیاں ایہ آکھیا، ”تاں وَل کوݨ نجات پا سگدے؟“ اُوں جواب ڈِتا، ”جیہڑا اِنسان کیتے ناممکن ہے او خُدا کیتے ممکن ہے۔“ پطرس آکھیا، ”ڈیکھ اساں تاں آپنڑا سبھ کُجھ چھوڑ تے تُہاڈے پِچُھوں تھی پئے ہاں۔“ اُوں اُنہاں کُوں آکھیا، ”مَیں تُہاکُوں سچ آدھا ہاں جو ایجھا کوئی نئیں جئیں خُدا دی بادشاہی دی خاطر گھر یا ذال یا بِھرانواں یا ماء پِیُو یا بالاں کُوں چھوڑ ڈِتا ہووے۔ تے اِیں زمانے ءچ اُونکُوں کئی گُنا زیادہ نہ مِلے تے آوݨ آلی دُنیا ءچ ہمیشاں دی زندگی۔“ وَل اُوں اُنہاں بارہاں کُوں آپنڑے نال گِھدا تے اُنہاں کُوں آکھیا جو ”ڈیکھو اساں یروشلیم کُوں ویندے ہاں تے نبیاں جیہڑا کُجھ اِبنِ آدم دے بارے ءچ لِکھیا ہے او پُورا تھیسی۔ کیوں جو او غیر قوم آلیاں دے حوالے کیتا ویسی تے لوک اُوندا مذاق بنڑیسن تے بے عزت کریسن تے اُوندے اُتے تُھوکیسن، تے اُونکُوں کوڑے مریسن تے قتل کریسن تے او تریجھے ڈینہہ زندہ تھی ویسی۔“ پر شاگرداں کُوں ایہ گالھیں بالکل سمجھ نہ آئیاں۔ اِنہاں گالھیں دا مطلب اُنہاں تُوں لُکیا ریہا تے او نہ سمجھے جو او کیا آدھے۔ جِیں ویلے یسُوع ٹُردے ٹُردے یرِیحُو دے نیڑے پُجیا تاں ہِک اندھا رستے دے کنارے بیٹھا بِھیک منگدا پِیا ہا۔ او بِھیڑ دے لنگھنڑ دی اواز سُنڑ تے پُچھنڑ لگا جو ”ایہ کیا تھیندا پے؟“ اُنہاں اُونکُوں خبر ڈِتی جو ”یسُوع ناصری ویندا پِیا ہے۔“ اُوں اُچی اواز ءچ آکھیا، ”یسُوع، اِبنِ داؤد! میڈے اُتے رحم کرو۔“ جیہڑے اگُوں ویندے پئے ہَن او اُونکُوں دَڑکے ڈیوݨ لگے جو ”چُپ تھی وَنج۔“ پر او تاں بِیا وی دھاڑ دھاڑ کرݨ لگ پِیا جو ”اِبنِ داؤد! میڈے اُتے رحم کرو۔“ یسُوع کھڑ تے حُکم ڈِتا جو ”اُونکُوں میڈے کولھ گِھن آؤ۔“ جِیں ویلے او کولھ آیا تاں اُوں، اُوں کنُوں ایہ پُچھیا، ”تُوں کیا چاہندیں جو مَیں تیڈے کیتے کراں؟“ اُوں آکھیا، ”مالک! ایہ جو مَیں ڈیکھ سگاں۔“ یسُوع اُونکُوں آکھیا، ”ڈیکھنڑ لگ وَنج، تیڈے اِیمان تیکُوں چنگا کر ڈِتا۔“ او اُونہی ویلے ڈیکھنڑ لگ پِیا تے خُدا دی حمد کریندا ہویا یسُوع دے پِچُھوں ٹُرݨ لگ پِیا تے سارے لوکاں ایہ ڈیکھ تے خُدا دی حمد کیتی۔ یسُوع یرِیحُو ءچوں داخل تھی تے ویندا پِیا ہا، تے اُتھاں زکّائی ناں دا ہِک بندہ ہا جیہڑا محصُول گِھننڑ آلیاں دا سردار تے دولت مند ہا۔ او یسُوع کُوں ڈیکھنڑ دی کوشش کریندا ہا جو کیہڑا ہے پر بِھیڑ دے سببّوں ڈیکھ نہ سگدا ہا، اِیں واسطے جو اُوندا قد چھوٹا ہا۔ بس اُونکُوں ڈیکھنڑ کیتے دِرک تے اگُوں چلیا گِیا تے ہِک جنگلی ہنجیر دے درخت اُتے چڑھ گِیا کیوں جو او اُوں جاہ کنُوں لنگھنڑ آلا ہا۔ جِیں ویلے یسُوع اُوں جاہ تے پُجیا تاں اُتے نظر کر تے اُونکُوں آکھیا، ”زکّائی! جلدی نال تلے لہہ آ، کیوں جو اَج میکُوں تیڈے گھر راہنڑ ضرور ہے۔“ زکّائی فوراً تلے لہہ آیا تے اُونکُوں خوشی نال آپنڑے گھر گِھن گِیا۔ جِیں ویلے لوکاں ایہ ڈِٹھا تاں سبھ بُڑبُڑ کرݨ لگے جو ”ایہ ہِک گُنہگار دا مہمان بنڑ گِیا ہے۔“ پر زکّائی کھڑا تھی تے خُداوند کُوں آکھیا، ”مالک! مَیں آپنڑا ادھا مال غریباں کُوں ڈیندا ہاں تے جے مَیں کہیں دا کُجھ ناحق گِھدے تاں اُونکُوں چار گُنا واپس کریندا ہاں ۔“ یسُوع اُونکُوں آکھیا، ”اَج اِیں گھر ءچ نجات آئی ہے، اِیں واسطے جو ایہ وی ابرہام دا پوتر ہے۔ کیوں جو اِبنِ آدم گُم تھئے ہوئیاں کُوں گولھنڑ تے نجات ڈیوݨ آیا ہے۔“ جِیں ویلے لوک اِنہاں گالھیں کُوں سُنڑدے پئے ہَن تاں یسُوع ہِک مثال وی آکھی، اِیں واسطے جو او یروشلیم دے نیڑے ہا تے لوکاں دا خیال ہا جو خُدا دی بادشاہی فوراً ای ظاہر تھی ویسی۔ بس اُوں آکھیا: ”ہِک امیر بندہ دُور دراز مُلک کُوں روانہ تھیّا تاں جو آپنڑے لوکاں دا بادشاہ مقرر تھیوے تے وَل آوے۔ اُوں آپنڑے نوکراں ءچوں ڈاہ کُوں سڈ تے اُنہاں ءچ ڈاہ اشرفیاں وَنڈ ڈِتیاں تے اُنہاں کُوں آکھیا جو ’میڈے ولنڑ تئیں کاروبار کرائے۔‘ پر اُوں شہر دے لوک اُوں کنُوں نفرت کریندے ہَن تے اُوندے پِچُھوں قاصداں دی زبانی پیغام روانہ کیتا جو ’اساں نئیں چاہندے جو ایہ ساڈے اُتے بادشاہی کرے۔‘ جِیں ویلے او بادشاہی حاصل کر تے ولیا تاں اُنہاں نوکراں کُوں سڈوایا جِنہاں کُوں اشرفیاں ڈِتیاں ہَن، تاں جو معلوم کرے جو اُنہاں لین دین نال کیا کمائے۔ پہلا نوکر آیا تے اُوں آکھیا، ’مالک! مَیں ہِک اشرفی نال ڈاہ اشرفیاں بِیا کَما گِھدیاں ہِن۔‘ اُوں اُونکُوں آکھیا، ’شاباش، میڈے چنگے نوکر! تَیں تھوڑی رقم کُوں اِیمانداری نال اِستعمال کیتے، اِیں کیتے ہُنڑ تُوں ڈاہ شہراں اُتے اِختیار رکھ۔‘ ڈُوجھے آ تے آکھیا، ’مالک! مَیں تُہاڈی ہِک اشرفی کنُوں پنج بِیا کَما گِھدیاں ہِن۔‘ اُوں اُونکُوں آکھیا جو ’تُوں وی پنج شہراں دا مُختار تھی۔‘ تریجھے آ تے آکھیا، ’مالک! ڈیکھو تُہاڈی اشرفی ایہ ہے۔ مَیں اِینکُوں رومال ءچ بَدھ تے رکھ ڈِتا ہا، کیوں جو مَیں تُہاڈے کنُوں ڈردا ہم، اِیں واسطے جو تُساں سخت بندے ہیوے۔ تُساں اُوں چیز کُوں وی چا گِھندے ہیوے جِینکُوں تُساں نئیں رکھیا ہوندا تے او فصل کپ گِھندے ہیوے جِینکُوں تُساں نئیں رہایا۔‘ اُوں اُونکُوں آکھیا، ’شریر نوکر! مَیں تیکُوں تیڈے ای گالھیں نال مُلزم کھڑیندا ہاں۔ تُوں میکُوں جانڑدا ہَویں جو سخت بندہ ہاں تے جیہڑی چیز کُوں مَیں نئیں رکھیا، اُونکُوں چا گِھندا ہاں تے جیہڑا نئیں رہایا اُونکُوں کپ گِھندا ہاں۔ وَل تُوں میڈا پیسہ کہیں بینک ءچ کیوں نہ رکھیا تاں جو مَیں وَل آ تے اُونکُوں منافع سمیت گِھن گِھندا؟‘ وَل اُوں جیہڑے اُتھاں کھڑے ہَن اُنہاں کُوں آکھیا جو ’اِیں کنُوں او اشرفی گِھن گِھنو تے ڈاہ اشرفیاں آلے کُوں ڈے ڈیؤ۔‘ اُنہاں اُونکُوں آکھیا، ’مالک! اُوندے کولھ تاں پہلے ای ڈاہ اشرفیاں ہِن۔‘ بادشاہ آکھیا، ’مَیں تُہاکُوں آدھا ہاں جو جیندے کولھ ہے، اُونکُوں بِیا وی ڈِتا ویسی، تے جیندے کولھ کُجھ نئیں، اُوندے کنُوں او وی جیہڑا اُوندے کولھ ہے گِھن گِھدا ویسی۔ پر میڈے اِنہاں دُشمنڑاں کُوں جیہڑے نہ چاہندے ہَن جو مَیں اِنہاں اُتے بادشاہی کراں، اُنہاں کُوں اِتھاں گِھن آؤ تے میڈے سامنڑے قتل کر ڈیؤ‘۔“ ایہ گالھیں آکھ تے یسُوع یروشلیم آلے پاسے اُنہاں دے اگُوں اگُوں ٹُریا۔ جِیں ویلے او اُوں پہاڑ اُتے جیہڑا زیتون دا اکھویندے، بیت فگے تے بیت عنیاہ دے نیڑے پُجیا تاں اُوں شاگرداں ءچوں ڈُو کُوں ایہ آکھ تے بھیجیا جو ”سامنڑے آلی وستی ءچ ونجو۔ اُتھاں داخل تھیندے ای ہِک جوان گڈھاں بدھیا ہویا مِلسی جئیں اُتے ہُنڑ تئیں کوئی سوار نئیں تھیّا۔ اُونکُوں کھول تے گِھن آؤ۔ جے کوئی تُہاڈے کنُوں پُچھے جو ’اُونکُوں کیوں کھولیندے ہیوے؟‘ تاں اکھائے جو ’مالک کُوں اِیندی ضرورت ہے‘۔“ بس جِنہاں کُوں بھیجیا گِیا ہا اُنہاں اُتھاں اُونویں ای ڈِٹھا جِینویں یسُوع اُنہاں کُوں آکھیا ہا۔ جِیں ویلے او گڈھاں کُوں کھولیندے پئے ہَن تاں اُوندے مالکاں اُنہاں کنُوں پُچھیا جو ”اِینکُوں کیوں کھولیندے پئے ہیوے؟“ اُنہاں جواب ڈِتا، ”مالک کُوں اِیندی ضرورت ہے۔“ او اُونکُوں یسُوع دے کولھ گِھن آئے تے اُوندے اُتے آپنڑے کپڑے سَٹ ڈِتے تے یسُوع کُوں اُوندے اُتے سوار کر ڈِتا۔ جِیں ویلے او ویندا پِیا ہا تاں لوک رستے ءچ آپنڑے کپڑے وچھیندے ویندے ہَن۔ وَل جِیں ویلے او شہر دے نیڑے زیتون دے پہاڑ دی لہاند اُتے پُجیا تاں شاگرداں دی ساری جماعت اُنہاں ساریاں معجزیاں دے سببّوں جیہڑے اُنہاں ڈِٹھے ہَن، خوش تھی تے اُچی اواز نال خُدا دی حمد کرݨ لگی جو ”مُبارک ہے او بادشاہ جیہڑا رب العالمین دے ناں کنُوں آندا ہے۔ اسمان اُتے صُلح تے سبھ تُوں اُچے اسمان اُتے خُدا دا جلال!“ بِھیڑ ءچوں کُجھ فریسیاں اُونکُوں آکھیا، ”اُستاد! آپنڑے شاگرداں کُوں دَڑک۔“ اُوں جواب ءچ آکھیا، ”مَیں تُہاکُوں آدھا ہاں جو جے ایہ چُپ راہنڑ تاں پتھر بولنڑ پے ویسن۔“ جِیں ویلے یسُوع نیڑے آ تے شہر اُتے نِگاہ کیتی تاں اُوندے اُتے رُنّا تے آکھیا، ”کاش جو تُوں اَج دے ڈینہہ جانڑ گِھندی جو تیڈی سلامتی کیندے ءچ ہے۔ پر ہُنڑ او تیڈے اکھیں کنُوں اوڈھر تھی گئیاں ہِن۔ کیوں جو او ڈینہہ تیڈے اُتے آسن جو تیڈے دُشمنڑ تیڈے خلاف مورچے بَدھ تے تیکُوں چودھارُوں گھیر گِھنسن تے ہر پاسے کنُوں تنگ کریسن۔ تے تیکُوں تے تیڈے بالاں کُوں جیہڑے تیڈے اندر ہِن زمین اُتے پٹک ڈیسن، تے تیڈے اندر کوئی پتھر اُتے پتھر باقی نہ چھوڑیسن، اِیں واسطے جو تَیں اُوں ویلے کُوں نہ پچھانڑیا جِیں ویلے خُدا تیڈی نجات کیتے تیڈے اُتے نِگاہ کیتی۔“ وَل یسُوع ہیکل ءچ داخل تھیّا تے اُنہاں کُوں کڈھنڑ لگا جیہڑے اُتھاں خرید و فروخت کریندے ہَن، تے اُنہاں کُوں آکھیا، ”لِکھیا ہے جو ’میڈا گھر دُعا دا گھر ہوسی ،‘ پر تُساں اُونکُوں ’ڈاکواں دا ڈیرہ بنڑا ڈِتے ‘۔“ او ہر روز ہیکل ءچ تعلیم ڈیندا ہا پر سردار کاہِن تے شریعت دے عالم تے قوم دے گودے اُونکُوں ہلاک کرݨ دی کوشش ءچ ہَن۔ پر اُنہاں کُوں اِینویں کرݨ دا موقع نہ مِلدا پِیا ہا جو ایہ کِینویں کرݨ کیوں جو سارے لوک اُوندے گالھیں وڈے شوق نال سُنڑدے ہَن۔ ہِک ڈینہہ جِیں ویلے یسُوع ہیکل ءچ لوکاں کُوں تعلیم ڈیندا تے خوشخبری سُنڑیندا پِیا ہا تاں سردار کاہِن تے شریعت دے عالم، بزُرگاں دے نال اُوندے کولھ آئے، تے آکھنڑ لگے، ”ساکُوں ڈسا جو تُوں اِنہاں کماں کُوں کِیں اِختیار نال کریندیں؟ یا کئیں تیکُوں ایہ اِختیار ڈِتے؟“ یسُوع جواب ءچ اُنہاں کُوں آکھیا، ”مَیں وی تُہاڈے کنُوں ہِک گالھ پُچھدا ہاں، میکُوں ڈساؤ۔ یُوحنّا دا بپتسمہ اسمان دی طرفوں ہا یا اِنسان دی طرفوں؟“ اُنہاں آپس ءچ آکھیا جو ”جے اساں آکھوں جو ’اسمان دی طرفوں،‘ تاں او اکھیسی ’وَل تُساں اُوندا یقین کیوں نہ کیتا؟‘ تے جے آکھوں ’اِنسان دی طرفوں،‘ تاں لوک ساکُوں سنگسار کریسن کیوں جو او منیندے ہِن جو یُوحنّا نبی ہا۔“ بس اُنہاں جواب ڈِتا، ”اساں نئیں جانڑدے جو کیندی طرفوں ہا۔“ یسُوع اُنہاں کُوں آکھیا، ”مَیں وی تُہاکُوں نئیں ڈسیندا جو اِنہاں کماں کُوں کِیں اِختیار نال کریندا ہاں۔“ وَل اُوں لوکاں کُوں ایہ مثال آکھنڑ شروع کیتی جو: ”ہِک بندے انگُوراں دا باغ رہایا تے ٹھیکیداراں کُوں کاشتکاری کیتے ڈِتا تے ہِک لمبے عرصہ کیتے پردیس چلیا گِیا۔ پھل دے موسم ءچ اُوں آپنڑا حصہ گِھننڑ کیتے ہِک نوکر کُوں ٹھیکیداراں دے کولھ بھیجیا۔ پر اُنہاں اُونکُوں کُٹیا تے خالی ہتھ بھیج ڈِتا۔ وَل اُوں ہِک بئے نوکر کُوں بھیجیا پر اُنہاں اُونکُوں وی کُٹیا تے اُوندی بہُوں بے عزتی کیتی تے خالی ہتھ بھیج ڈِتا۔ وَل اُوں تریجھے نوکر کُوں بھیجیا، اُونکُوں وی اُنہاں زخمی کر تے کڈھ ڈِتا۔ اِیں اُتے باغ دے مالک آکھیا جو ’مَیں کیا کراں؟ مَیں آپنڑے پیارے پوتر کُوں بھجیساں، شاید او اُوندا لحاظ کرݨ۔‘ جِیں ویلے ٹھیکیداراں اُونکُوں ڈِٹھا تاں آپس ءچ صلاح کر تے آکھنڑ لگے، ’اِیہو وارث ہے، آؤ اِینکُوں قتل کرُوں تاں جو جائیداد ساڈی تھی ونجے۔‘ بس اُنہاں اُونکُوں انگُوراں دے باغ ءچوں باہر کڈھ تے قتل کر ڈِتا۔ ہُنڑ باغ دا مالک اُنہاں نال کیا کریسی؟ او آ تے اُنہاں ٹھیکیداراں کُوں ہلاک کریسی تے انگُوراں دا باغ ڈُوجھیاں دے حوالے کر ڈیسی۔“ لوکاں سُنڑ تے آکھیا، ”خُدا نہ کرے۔“ یسُوع اُنہاں اُتے نِگاہ کیتی تے آکھیا، ”وَل ایہ کیا لِکھیا ہے جو ’جِیں پتھر کُوں مِستریاں رَد کر ڈِتا اُوہو کونے دے سرے دا پتھر تھی گِیا ؟‘ جیہڑا کوئی اُوں پتھر اُتے ڈھاسی، ٹوٹے ٹوٹے تھی ویسی، پر جیندے اُتے او ڈھاسی اُونکُوں پِیہہ تے رکھ ڈیسی۔“ اُونہی ویلے شریعت دے عالماں تے سردار کاہِناں اُونکُوں پکڑن دی کوشش کیتی کیوں جو او سمجھ گئے ہَن جو اُوں او مثال اُنہاں دے خلاف آکھی ہے، پر او لوکاں کنُوں ڈردے ہَن۔ بس او اُوندی تاڑ ءچ ریہے تے جاسُوساں کُوں سچے بندیاں دے بھیس ءچ بھیجیا تاں جو اُوندی کوئی گالھ پکڑ تے اُونکُوں گورنر دے قبضہ ءچ ڈے ڈیوݨ۔ اُنہاں اُوں کنُوں پُچھیا، ”اُستاد! اساں جانڑدے ہیں جو تُہاڈا کلام تے تعلیم درُست ہے تے تُساں کہیں دی طرفداری نئیں کریندے بلکہ سچائی نال خُدا دی راہ دی تعلیم ڈیندے ہیوے۔ ساکُوں رومی بادشاہ قیصر کُوں ٹیکس ڈیوݨ جائز ہے یا نئیں؟“ یسُوع اُنہاں دی مکاری کُوں جانڑدے ہوئے اُنہاں کُوں آکھیا، ”میکُوں ہِک دینار ڈِکھاؤ، اُوندے اُتے کیندی تصویر تے ناں ہے؟“ اُنہاں آکھیا، ”قیصر دا۔“ اُوں اُنہاں کُوں آکھیا، ”بس جیہڑا قیصر دا ہے قیصر کُوں تے جیہڑا خُدا دا ہے، خُدا کُوں ادا کرو۔“ او لوکاں دے سامنڑے اُوندے گالھیں نہ پکڑ سگے بلکہ اُوندے جواب کنُوں بہُوں حیران تھی تے چُپ تھی گئے۔ وَل صدوقی جیہڑے قیامت دے مُنکر ہَن، اُنہاں ءچوں کُجھ لوک اُوندے کولھ آئے تے پُچھنڑ لگے جو ”اُستاد! ساڈے کیتے مُوسیٰ لِکھیا ہے جو جے کہیں بندے دا بِھرا بے اولاد مر ونجے تاں او آپنڑے بِھرا دی بیوہ نال شادی کر گِھنے تاں جو آپنڑے بِھرا کیتے نسل پیدا کرے ۔ ہُنڑ سَت بِھرا ہَن۔ پہلے شادی کیتی تے بے اولاد مر گِیا۔ وَل ڈُوجھے اُوں بیوہ نال شادی کیتی تے بے اولاد مر گِیا، تے اِینویں ای تریجھے کیتا۔ اِینویں ای ستّاں اُوں عورت نال شادی کیتی تے یکے بے اولاد مر گئے۔ آخر ءچ او عورت وی مر گئی۔ بس قیامت ءچ او عورت کیندی ذال ہوسی؟ کیوں جو او اُنہاں ستّاں دی ذال بنڑی ہئی۔“ یسُوع اُنہاں کُوں آکھیا، ”اِیں دُنیا دے لوک تاں شادی ویاہ کریندے ہِن۔ پر جیہڑے لوک آوݨ آلی دُنیا دے لائق کھڑائے ویسن تے مُردیاں ءچوں زندہ تھیسن، او شادی ویاہ نہ کریسن۔ کیوں جو او وَل نہ مرسن اِیں واسطے جو او فرشتیاں وانگُوں ہوسن۔ تے او قیامت دے فرزند تھی تے خُدا دے وی فرزند ہوسن۔ پر اِیں گالھ کُوں جو مُردے زندہ تھی ویندے ہِن، مُوسیٰ وی جھاڑی دے بیان ءچ ظاہر کیتے۔ کیوں جو او رب العالمین کُوں ’ابرہام دا خُدا تے اِضحاق دا خُدا تے یعقُوب دا خُدا‘ اکھیندے ۔ او مُردیاں دا خُدا نئیں بلکہ زندیاں دا خُدا ہے کیوں جو اُوندے نیڑے سارے زندہ ہِن۔“ وَل کُجھ شریعت دے عالماں جواب ڈِتا، ”اُستاد! تُساں ٹھیک آکھے۔“ تے اُنہاں کُوں اُوں کنُوں وَل سوال کرݨ دی جُرأت نہ تھئی۔ وَل یسُوع اُنہاں کُوں آکھیا، ”المسیح کُوں داؤد دا پوتر کِینویں آدھے ہِن؟ داؤد تاں خود زبُور ءچ اکھیندے جو ’رب میڈے مالک کُوں آکھیا میڈے سجے پاسُوں بہہ۔ جئیں تئیں مَیں تیڈے دُشمنڑاں کُوں تیڈے پیراں دی چوکی نہ بنڑا ڈیواں ۔‘ بس داؤد تاں خود اُونکُوں مالک آدھے، وَل او اُوندا پوتر کِینویں تھی سگدے؟“ جِیں ویلے یکے لوک سُنڑدے پئے ہَن تاں یسُوع آپنڑے شاگرداں کُوں آکھیا، ”شریعت دے عالماں کنُوں خبردار رہوائے جیہڑے لمبے لمبے چولے پا تے پِھرݨ پسند کریندے ہِن تے چاہندے ہِن جو لوک اُنہاں کُوں بازاراں ءچ سلام کرݨ، تے عبادت خانیاں ءچ اُچے درجے دیاں کُرسیاں تے ضیافتاں ءچ صدارت چاہندے ہِن۔ او بیوہ عورتاں دے گھراں کُوں ہڑپ کر گِھندے ہِن تے ڈِکھاوے کیتے لمبیاں لمبیاں دُعاواں کریندے ہِن۔ اُنہاں کُوں زیادہ سزا مِلسی۔“ وَل یسُوع نِگاہ چا تے دولت منداں کُوں ڈِٹھا جیہڑے ہیکل دے خزانے ءچ آپنڑے نذرانے سٹیندے پئے ہَن۔ تے ہِک غریب بیوہ کُوں وی اُوندے ءچ تانبے دے ڈُو چھوٹے سِکے سٹیندے ڈِٹھا۔ اِیں تُوں اُوں آکھیا، ”مَیں تُہاکُوں سچ آدھا ہاں جو اِیں بیوہ اُنہاں سبھ کنُوں زیادہ سٹیا۔ کیوں جو اُنہاں ساریاں تاں آپنڑی بہُوں دولت ءچوں کُجھ نذرانہ ڈِتا پر اِیں بیوہ آپنڑی غریبی ءچ وی جیہڑا کُجھ اُوندے کولھ گُزارے کیتے ہا، سارا سَٹ ڈِتا۔“ جِیں ویلے کُجھ شاگرد ہیکل دے بارے ءچ آدھے پئے ہَن جو او نفِیس پتھراں تے نذر تھیّاں چیزاں نال سجی پئی ہے تاں یسُوع آکھیا، ”او ڈینہہ آسن جو اِنہاں چیزاں ءچوں جیہڑیاں تُساں ڈیدھے ہیوے، اِتھاں کوئی پتھر اُتے پتھر باقی نہ راہسی بلکہ سبھ کُجھ ڈھا ڈِتا ویسی۔“ اُنہاں اُوں کنُوں پُچھیا جو ”اُستاد! ایہ گالھیں کڈݨ تھیسن؟ تے جِیں ویلے او تھیوݨ آلیاں ہووݨ، اُوں ویلے دا نشان کیا ہوسی؟“ اُوں آکھیا، ”خبردار، کوئی تُہاکُوں گُمراہ نہ کر ڈیوے کیوں جو بہُوں سارے میڈے ناں نال آسن تے اکھیسن، ’مَیں المسیح ہاں‘ تے ایہ وی جو ’ویلا نیڑے آ گِیا ہے۔‘ تُساں اُنہاں دے پِچُھوں نہ ٹُر پوائے۔ تے جِیں ویلے جنگاں تے فساداں دیاں افواہاں سُنڑو تاں گھبرا نہ وَنجائے کیوں جو پہلے اُنہاں دا تھیوݨ لازم ہے پر اُوں ویلے فوراً خاتمہ نہ تھیسی۔“ وَل اُوں اُنہاں کُوں آکھیا، ”قوم اُتے قوم تے سلطنت اُتے سلطنت چڑھائی کریسی۔ تے وڈے وڈے زلزلے آسن تے جاہ جاہ کال پوسن تے وباواں کِھنڈویسن تے اسمان اُتے وڈے وڈے دہشت ناک گالھیں تے نشانیاں ظاہر تھیسن۔ پر ایہ سبھ کُچھ تھیوݨ کنُوں پہلے او تُہاکُوں میڈے ناں دی وجہ کنُوں گرفتار کریسن تے ڈُکھ ڈیسن، تے عبادت خانیاں دیاں عدالتاں ءچ پیش کریسن، تے قید خانیاں ءچ سَٹویسن، تے بادشاہاں تے حاکماں دے سامنڑے پیش کریسن۔ ایہ تُہاڈے کیتے گواہی ڈیوݨ دا موقع ہوسی۔ بس آپنڑے دل ءچ پکّا اِرادہ کر گِھنو جو پہلے کنُوں فِکر نہ کریسو جو کیا جواب ڈیؤں۔ کیوں جو مَیں تُہاکُوں ایجھی زبان تے حِکمت عطا کریساں جو تُہاڈا کوئی وی مخالف نہ تاں تُہاڈا سامنڑا کر سگسی تے نہ تُہاڈے گالھیں کُوں غلط ثابت کر سگسی۔ تُہاکُوں ماء پِیُو تے بِھرا تے رشتہ دار تے دوست وی پکڑویسن بلکہ تُہاڈے ءچوں کُجھ کُوں مروا ڈیسن، تے میڈے ناں دے سببّوں سبھ لوک تُہاڈے نال دُشمنڑی رکھیسن۔ پر تُہاڈے سر دا ہِک وال وی نہ ڈھاسی۔ آپنڑے صبر نال تُساں آپنڑیاں جاناں کُوں محفوظ رکھیسو۔ وَل جِیں ویلے تُساں یروشلیم کُوں فوجاں دے گھیرے ءچ ڈیکھو تاں سمجھ گِھنائے جو اُوندے برباد تھیوݨ دا ڈینہہ نیڑے ہے۔ اُوں ویلے جیہڑے یہُودیہ ءچ ہووݨ او پہاڑاں اُتے بھج ونجنڑ، تے جیہڑے یروشلیم دے اندر ہووݨ باہر نِکل ونجنڑ، تے جیہڑے دیہات ءچ ہووݨ شہر ءچ داخل نہ تھیوݨ۔ کیوں جو ایہ خُدا دے غضب دے ڈینہہ ہوسن جِنہاں ءچ او سبھ کُجھ جیہڑا پہلے کنُوں لِکھیا گِیا ہے پُورا تھیسی۔ اُنہاں اُتے افسوس جیہڑیاں اُنہاں ڈینہاں ءچ حاملہ ہوسن تے جیہڑیاں کھیر پِلیندیاں ہوسن۔ کیوں جو زمین اُتے بہُوں مُصیبت تے اِیں قوم اُتے وڈا عذاب ہوسی۔ او تلوار نال قتل تھیسن تے قیدی تھی تے ساریاں قوماں ءچ پُچائے ویسن۔ تے جئیں تئیں غیر قوماں دا وقت پُورا نہ تھیوے، یروشلیم غیر قوماں دے پیراں تلے لتاڑیا ویسی۔ سورج، چَن تے تاریاں ءچ نشان ظاہر تھیسن تے زمین اُتے قوماں کُوں تکلیف تھیسی کیوں جو او سمندر تے اُوندیاں چھلاں دے شور کنُوں گھبرا ویسن۔ تے اِیں ڈر کنُوں جو زمین اُتے کیا کیا مُصیبتاں آوݨ آلیاں ہِن، لوکاں دے ہوش و حواس باقی نہ راہسن، اِیں واسطے جو اسمان دیاں طاقتاں ہلائیاں ویسن۔ اُوں ویلے لوک اِبنِ آدم کُوں قُدرت تے وڈے جلال نال بدل اُتے آندا ڈیکھسن ۔ جِیں ویلے ایہ گالھیں تھیوݨ لگنڑ تاں سِدھے کھڑے تھی تے آپنڑی نِگاہ اُتے کرائے کیوں جو تُہاڈی رہائی نیڑے ہے۔“ وَل یسُوع اُنہاں کُوں ہِک مثال سُنڑائی جو ”ہنجیر دے درخت تے باقی ساریاں درختاں کُوں ڈیکھو۔ جِینویں ای اُنہاں ءچ کونپلاں نِکلدیاں ہِن، تُساں ڈیکھ تے جاݨ گِھندے ہیوے جو ہُنڑ گرمی آوݨ آلی ہے۔ اِینویں ای جِیں ویلے تُساں اِنہاں سبھ گالھیں کُوں تھیندا ڈیکھو تاں سمجھ گِھنائے جو خُدا دی بادشاہی نیڑے ہے۔ مَیں تُہاکُوں سچ آدھا ہاں جو جئیں تئیں ایہ سبھ گالھیں پُوریاں نہ تھی ونجنڑ، اِیں نسل دا خاتمہ نہ تھیسی۔ اسمان تے زمین ٹَل ویسن پر میڈے گالھیں کڈھائیں نہ ٹَلسن۔ بس خبردار راہو، اِینویں نہ تھیوے جو تُہاڈے دل عیاشی تے شراب پِیوݨ تے اِیں زندگی دیاں فِکراں ءچ سُست تھی ونجنڑ تے او ڈینہہ تُہاڈے اُتے پھندے وانگُوں اچانک آ ونجے۔ کیوں جو ساری زمین اُتے جِتّی لوک موجود ہوسن اُنہاں ساریاں اُتے اِینویں ای آ پوسی۔ بس ہر ویلے جاگدے تے دُعا کریندے راہو تاں جو تُہاکُوں اِنہاں سارے گالھیں کنُوں جیہڑیاں تھیوݨ آلیاں ہِن، بچنڑ تے اِبنِ آدم دے حضُور ءچ کھڑے تھیوݨ دی قُدرت ہووے۔“ یسُوع ہر روز ہیکل ءچ تعلیم ڈیندا ہا، تے رات کُوں باہر وَنج تے اُوں پہاڑ اُتے راہندا ہا جیہڑا زیتون دا اکھویندے، تے سویل تھیندے ای سارے لوک اُوندے گالھیں سُنڑݨ کیتے ہیکل ءچ اُوندے کولھ آندے ہَن۔ بے خمیری روٹی دی عید جِینکُوں عید ِ فسح وی آدھے ہِن، نیڑے ہئی، تے سردار کاہِن تے شریعت دے عالم موقع دی تاڑ ءچ ہَن جو یسُوع کُوں کِینویں قتل کرݨ، کیوں جو لوکاں کنُوں ڈردے ہَن۔ وَل شیطان یہُوداہ ءچ وڑ گِیا جیہڑا اِسکریُوتی اکھویندا تے اُنہاں بارہاں ءچوں ہا۔ اُوں وَنج تے سردار کاہِناں تے ہیکل دے محافظاں دے افسراں نال مشورہ کیتا جو اُونکُوں کِینویں اُنہاں دے حوالے کرے۔ او خوش تھئے تے اُونکُوں پیسے ڈیوݨ دا وعدہ کیتا۔ او راضی تھی گِیا تے موقع گولھنڑ لگا جو اُونکُوں بغیر ہنگامے دے اُنہاں دے حوالے کرے۔ تے بے خمیری روٹی دی عید دا ڈینہہ آیا جیندے ءچ فسح دی قُربانی کرݨ فرض ہئی۔ یسُوع پطرس تے یُوحنّا کُوں ایہ آکھ تے بھیجیا جو ”ساڈے کیتے فسح کھاوݨ دی تیاری کرو۔“ اُنہاں اُونکُوں پُچھیا، ”تُساں کِتھاں چاہندے ہیوے جو اساں تیاری کرُوں؟“ اُوں آکھیا، ”شہر ءچ داخل تھیندے ای تُہاکُوں ہِک بندہ مِلسی جیہڑا پانڑی دا گھڑا چا تے ویندا پِیا ہوسی۔ جیہڑے گھر ءچ او داخل تھیوے، اُوندے پِچُھوں چلے وَنجائے تے گھر دے مالک کُوں اکھائے، ’اُستاد تیکُوں آدھے جو او مہمان خانہ کِتھاں ہے جِتھاں مَیں آپنڑے شاگرداں نال فسح دی عید دا کھانڑا کھاواں؟‘ او تُہاکُوں اُتلی منزل تے گِھن ویسی تے تیار کیتا ہویا ہِک وڈا چوبارہ ڈکھیسی۔ اُتھائیں تیاری کرائے۔“ اُنہاں وَنج تے سبھ کُجھ اُونویں ای ڈِٹھا جِینویں یسُوع اُنہاں کُوں ڈسایا ہا تے فسح دا کھانڑا تیار کیتا۔ جِیں ویلے وقت تھی گِیا تاں یسُوع تے اُوندے رسُول کھانڑا کھاوݨ بیٹھے۔ اُوں اُنہاں کُوں آکھیا، ”میڈی وڈی خواہش ہئی جو ڈُکھ چاوݨ کنُوں پہلے فسح دا ایہ کھانڑا تُہاڈے نال کھاواں۔ کیوں جو مَیں تُہاکُوں آدھا ہاں جو اُونکُوں ولا کڈھائیں نہ کھاساں جئیں تئیں او خُدا دی بادشاہی ءچ پُورا نہ تھیوے۔“ وَل اُوں پیالہ گِھن تے خُدا دا شُکر کیتا تے آکھیا، ”اِینکُوں گِھن تے آپس ءچ وَنڈ گِھنو۔ کیوں جو مَیں تُہاکُوں آدھا ہاں جو انگُور دا رَس اُوں ویلے تئیں نہ پِیساں جئیں تئیں خُدا دی بادشاہی آ نہ ونجے۔“ وَل اُوں روٹی گِھدی تے شُکر کر تے تروڑی تے شاگرداں کُوں ایہ آکھ تے ڈِتی جو ”ایہ میڈا بدن ہے جیہڑا تُہاڈے کیتے ڈِتا ویندے۔ میڈی یادگاری کیتے اِیہو کیتا کرو۔“ تے اِینویں ای کھانڑے دے بعد اُوں پیالہ گِھدا تے آکھیا، ”ایہ پیالہ میڈے اُوں خون ءچ نواں عہد ہے، جیہڑا تُہاڈے کیتے وہایا ویندے ۔ پر ڈیکھو میکُوں پکڑواوݨ آلے دا ہتھ میڈے نال دسترخوان اُتے ہے۔ اِبنِ آدم تاں جِینویں اُوندے حق ءچ پہلے کنُوں مقرر ہے ویندے، پر اُوں بندے اُتے افسوس جیندے ذریعے پکڑوایا ویندے۔“ ایہ سُنڑ تے او آپس ءچ پُچھنڑ لگے جو ”ساڈے ءچوں کوݨ ہے جیہڑا ایہ کم کریسی؟“ وَل شاگرداں ءچ اِیں گالھ اُتے جو اُنہاں ءچوں وڈا کوݨ سمجھیا ویندے، تکرار تھیوݨ لگی۔ یسُوع اُنہاں کُوں آکھیا، ”غیر قوماں دے بادشاہ آپنڑے لوکاں اُتے حکُومت کریندے ہِن تے اُنہاں اُتے اِختیار آلے آپنڑے آپ کُوں ہمدرد سڈویندے ہِن۔ پر تُساں اِینویں نہ کرائے بلکہ تُہاڈے ءچوں جیہڑا وڈا ہے او چھوٹے وانگُوں تے جیہڑا سردار ہے او خادم وانگُوں بنڑے۔ وڈا کوݨ ہے؟ او جیہڑا دسترخوان اُتے بیٹھے یا او جیہڑا اُوندی خدمت کریندے؟ کیا او نئیں جیہڑا دسترخوان اُتے بیٹھے؟ پر مَیں تُہاڈے وچال خادم وانگُوں ہاں۔ پر تُساں او ہیوے جیہڑے میڈی ازمائیشاں ءچ برابر میڈے نال ریہے۔ تے جِینویں میڈے باپ میکُوں ہِک بادشاہی عطا کیتی ہے، مَیں وی تُہاکُوں عطا کریندا ہاں۔ تاں جو تُساں میڈی بادشاہی ءچ میڈے دسترخوان اُتے کھاؤ پِیو بلکہ تُساں تختاں اُتے بہہ تے بنی اِسرائیل دے بارہاں قبیلیاں دا اِنصاف کریسو۔ شمعون! شمعون! ڈیکھ شیطان اِجازت منگی ہے جو تُہاکُوں دانڑیاں وانگُوں پھٹکے، پر مَیں تیڈے کیتے دُعا کیتی جو تیڈا اِیمان ویندا نہ راہوے۔ تے جِیں ویلے تُوں رجُوع کریں تاں آپنڑے بِھرانواں کُوں مضبوط کریں۔“ اُوں اُونکُوں آکھیا، ”مالک! مَیں تاں تُہاڈے نال قید تھیوݨ بلکہ مرݨ کیتے وی تیار ہاں۔“ یسُوع آکھیا، ”پطرس! مَیں تیکُوں آدھا ہاں جو اَج کُکڑ دے بانگ ڈیوݨ کنُوں پہلے تُوں ترے پھیری میڈا اِنکار کریسیں جو میکُوں نئیں جانڑدا۔“ وَل اُوں اُنہاں کُوں آکھیا جو ”جِیں ویلے مَیں تُہاکُوں بٹوے، رقم تے جُتیاں دے بغیر بھیجیا ہا تاں کیا تُساں کہیں چیز دے مُتھاج تھئے ہَوے؟“ اُنہاں آکھیا، ”کہیں چیز دے نئیں۔“ اُوں اُنہاں کُوں آکھیا، ”پر ہُنڑ جیندے کولھ بٹوا ہووے او اُونکُوں گِھنے تے اِینویں ای تھیلا وی، تے جیندے کولھ تلوار نہ ہووے او آپنڑی چادر ویچ تے تلوار مُل گِھن گِھنے۔ کیوں جو مَیں تُہاکُوں آدھا ہاں جو ایہ نوِشتہ جو ’او بدکاراں ءچ شمار کیتا گِیا ،‘ اُوندا میڈے حق ءچ پُورا تھیوݨ ضرور ہے۔ اِیں واسطے ہر او گالھ جیہڑی میڈے کیتے ہے پُوری تھیوݨ آلی ہے۔“ اُنہاں آکھیا، ”مالک! ڈیکھ اِتھاں ڈُو تلواراں ہِن۔“ اُوں آکھیا، ”بہُوں ہِن۔“ وَل او باہر نِکل تے جِینویں اُوندا دستور ہا، زیتون دے پہاڑ اُتے گِیا تے شاگرد اُوندے پِچُھوں تھی پئے۔ اُوں جاہ پُج تے اُوں اُنہاں کُوں آکھیا، ”دُعا کرو تاں جو ازمائش ءچ نہ پوو۔“ تے او اُنہاں کنُوں اِتنے فاصلے تے گِیا جِتنی دُور تئیں پتھر سٹیا وَنج سگدے تے گوڈے ٹیک تے اِینویں دُعا کرݨ لگا جو ”باپ! جے تُوں راضی ہوویں تاں ڈُکھ دا ایہ پیالہ مَیں کنُوں ہٹا گِھن وَل وی میڈی نئیں بلکہ تیڈی ای مرضی پُوری تھیوے۔“ تے اسمان کنُوں ہِک فرشتہ اُوندے اُتے ظاہر تھیّا جیہڑا اُوندا حوصلہ ودھیندا پِیا ہا۔ وَل او بہُوں پریشانی ءچ مُبتلا تھی تے بِیا وی دل سوزی نال دُعا کرݨ لگا تے اُوندا پسِینہ خون دے قطریاں وانگُوں زمین اُتے ڈھاندا ہا۔ جِیں ویلے دُعا دے بعد شاگرداں دے کولھ آیا تاں اُنہاں کُوں غم دی وجہ کنُوں سُتا ڈِٹھا، تے اُنہاں کُوں آکھیا، ”تُساں کیوں سُتے پئے ہیوے؟ اُٹھی تے دُعا کرو تاں جو ازمائش ءچ نہ پوو۔“ او ایہ گالھیں کریندا ای پِیا ہا جو ہِک بِھیڑ آئی تے اُنہاں بارہاں ءچوں او جِیندا ناں یہُوداہ ہا، اُنہاں دے اگُوں اگُوں ہا۔ او یسُوع دا بوسہ گِھننڑ کیتے اگُوں ودھیا، پر یسُوع اُونکُوں آکھیا، ”یہُوداہ! کیا تُوں بوسہ گِھن تے اِبنِ آدم کُوں پکڑویندیں؟“ جِیں ویلے اُوندے ساتھیاں کُوں پتہ چلیا جو کیا تھیوݨ آلا ہے تاں آکھیا، ”مالک، کیا اساں تلوار چلاؤں؟“ تے اُنہاں ءچوں ہِک، کاہِن ِ اعظم دے نوکر اُتے تلوار نال وار کیتا تے اُوندا سجا کَن اُڈا ڈِتا۔ یسُوع جواب ءچ آکھیا، ”بس، بہُوں تھی گِیا۔“ تے اُوندے کَن کُوں ہتھ لا تے ٹھیک کر ڈِتا۔ وَل یسُوع سردار کاہِناں تے ہیکل دے محافظاں دے سرداراں تے بزُرگاں کُوں جیہڑے اُونکُوں گرفتار کرݨ آئے ہَن آکھیا، ”کیا مَیں کوئی ڈاکو ہاں جو تُساں تلواراں تے سوٹیاں چا تے آئے ہیوے؟ جِیں ویلے مَیں ہر روز ہیکل ءچ تُہاڈے نال ہم تاں تُساں میڈے اُتے ہتھ نہ پایا، پر ایہ تُہاڈی گھڑی تے اندھارے دا اِختیار ہے۔“ وَل او اُونکُوں گرفتار کر تے کاہِن ِ اعظم دے گھر گِھن گئے تے پطرس کُجھ فاصلے تے اُوندے پِچُھوں پِچُھوں ٹُردا ریہا۔ جِیں ویلے اُنہاں صحن دے اَدھ ءچ بھاہ بالی تے سبھ مِل تے بہہ گئے تاں پطرس اُنہاں دے وچال بہہ گِیا۔ ہِک کنیز بھاہ دے روشنی ءچ اُونکُوں بیٹھا ڈیکھ تے اُونکُوں غور نال ڈِٹھا تے آکھیا جو ”ایہ بندہ وی اُوندے نال ہا۔“ پر اُوں ایہ آکھ تے اِنکار کیتا جو ”عورت! مَیں اُونکُوں نئیں جانڑدا۔“ تھوڑی دیر بعد کہیں بئے اُونکُوں ڈیکھ تے آکھیا جو ”تُوں وی اُنہاں ءچوں ہیں۔“ پطرس آکھیا، ”میاں! مَیں نئیں۔“ تقریباً ہِک گھنٹے بعد کہیں بئے بہُوں یقین نال آکھیا جو ”ایہ بندہ بےشک اُوندے نال ہا کیوں جو ایہ وی گلیلی ہے۔“ پطرس آکھیا، ”میاں! مَیں نئیں جانڑدا جو تُوں کیا آدھیں۔“ او اجنڑ آدھا ای پِیا ہا جو اچانک کُکڑ بانگ ڈِتی۔ یسُوع مُڑ تے پطرس دو ڈِٹھا، تے پطرس کُوں مالک دی او گالھ یاد آئی جیہڑی اُوں پطرس کُوں آکھی ہئی جو ”اَج کُکڑ دے بانگ ڈیوݨ کنُوں پہلے تُوں ترے پھیری میڈا اِنکار کریسیں،“ تے او باہر وَنج تے بُٹ بُٹ رویا۔ جیہڑے بندے یسُوع کُوں پکڑی بیٹھے ہَن، اُوندا مذاق بنڑیندے تے اُونکُوں مریندے ہَن۔ اُوندے اکھیں اُتے پٹی بَدھ تے پُچھدے ہَن جو ”نبُوّت کر تے ڈسا جو تیکُوں کئیں مارے؟“ تے اُنہاں بِیا وی بہُوں سارے گُستاخی دے گالھیں اُوندے خلاف کیتیاں۔ سویل تھیندے ای سردار کاہِن تے شریعت دے عالم یعنی قوم دے بزُرگ جمع تھئے تے اُنہاں یسُوع کُوں آپنڑی صدر ِ عدالت ءچ گِھن وَنج تے آکھیا، ”جے تُوں المسیح ہیں تاں ساکُوں ڈسا ڈے۔“ اُوں اُنہاں کُوں آکھیا، ”جے مَیں تُہاکُوں آکھاں تاں تُساں میڈے یقین نہ کریسو، تے جے مَیں پُچھاں تاں جواب نہ ڈیسو۔ پر ہُنڑ کنُوں اِبنِ آدم قادر ِ مُطلق خُدا دے سجے پاسُوں بیٹھا راہسی۔“ اِیں تُوں او سارے آکھنڑ لگے، ”کیا تُوں خُدا دا پوتر ہیں؟“ اُوں اُنہاں کُوں آکھیا، ”تُساں خود آدھے ہیوے جو مَیں ہاں۔“ اُنہاں آکھیا، ”ہُنڑ ساکُوں کہیں گواہی دی کیا لوڑ ہے؟ کیوں جو اساں خود اُوندے مُنہ کنُوں سُنڑ گِھدے۔“ وَل اُنہاں دی ساری جماعت اُٹھی تے اُونکُوں پِیلاطُس دے کولھ گِھن گئی۔ تے اُنہاں اُوندے اُتے اِلزام لاوݨ شروع کیتا جو ”اساں اِیں بندے کُوں آپنڑی قوم کُوں ورغلیندے تے رومی بادشاہ قیصر کُوں ٹیکس ڈیوݨ کنُوں منع کریندے تے آپنڑے آپ کُوں المسیح بادشاہ آدھے ڈِٹھے۔“ پِیلاطُس اُوں کنُوں پُچھیا، ”کیا تُوں یہُودیاں دا بادشاہ ہیں؟“ یسُوع جواب ءچ اُونکُوں آکھیا، ”تُوں خود آدھیں۔“ پِیلاطُس سردار کاہِناں تے عوام کُوں آکھیا، ”مَیں اِیں بندے ءچ کوئی قصُور نئیں ڈیدھا۔“ پر او ضد کر تے آکھنڑ لگے جو ”او تمام یہُودیہ ءچ بلکہ گلیل تُوں گِھن تے اِتھاں تئیں لوکاں کُوں سِکھا سِکھا تے ورغلیندے۔“ پِیلاطُس ایہ سُنڑیا تاں پُچھیا، ”کیا ایہ بندہ گلیلی ہے؟“ تے جِینویں ای اُونکُوں معلوم تھیّا جو او ہیرودیس دے علاقہ دا ہے تاں اُونکُوں ہیرودیس دے کولھ بھیجیا کیوں جو او اُنہاں ڈینہاں ءچ خود وی یروشلیم ءچ ہا۔ جِیں ویلے ہیرودیس یسُوع کُوں ڈِٹھا تاں بہُوں خوش تھیّا کیوں جو اُونکُوں بہُوں عرصے کنُوں یسُوع کُوں ڈیکھنڑ دی خواہش ہئی، اِیں واسطے جو اُوں اُوندے بارے ءچ بہُوں گالھیں سُنڑیاں ہَن۔ تے اُونکُوں اُمید ہئی جو اُوں کنُوں کوئی معجزہ تھیندا ڈیکھ سگسی۔ او بہُوں سارے سوال اُوں کنُوں پُچھدا ریہا، پر یسُوع اُونکُوں کوئی جواب نہ ڈِتا۔ سردار کاہِن تے شریعت دے عالم اُتھاں کھڑے تھی تے بہُوں زور شور نال اُوندے اُتے اِلزام لیندے ریہے۔ وَل ہیرودیس آپنڑے سپاہیاں دے نال رَل تے اُونکُوں ذلیل کیتا تے اُوندا مذاق اُڈایا، تے ہِک چمکنڑاں چوغہ پوا تے اُونکُوں پِیلاطُس دے کولھ واپس بھیج ڈِتا۔ اُونہی ڈینہہ پِیلاطُس تے ہیرودیس ہِک ڈُوجھے دے دوست بنڑ گئے کیوں جو پہلے اُنہاں دی دُشمنڑی ہئی۔ وَل پِیلاطُس، سردار کاہِناں، سرداراں تے عوام کُوں جمع کر تے اُنہاں کُوں آکھیا جو ”تُساں اِیں بندے کُوں ایہ آکھ تے گِھن آئے ہیوے جو ایہ لوکاں کُوں ورغلیندے۔ تے ڈیکھو مَیں خود وی تُہاڈے سامنڑے تفتیش کیتی ہے پر جیہڑے جُرم دا اِلزام تُساں اُوندے اُتے لیندے ہیوے، مَیں اُوندے ءچ ایجھی کوئی گالھ نئیں ڈیدھا۔ تے نہ ہیرودیس، کیوں جو اُوں اُونکُوں ساڈے کولھ واپس بھیج ڈِتے۔ ڈیکھو اُوں کنُوں کوئی ایجھا کم نئیں تھیّا جیندی وجہ تُوں اُونکُوں قتل دی سزا ڈِتی ونجے۔ بس مَیں اُونکُوں کُٹوا تے چھوڑ ڈیندا ہاں۔“ اُوندے کیتے لازم ہا جو ہر عید اُتے مُجرماں ءچوں کہیں ہِک کُوں لوکاں دی خاطر چھوڑ ڈیوے۔ او سارے رَل تے چیخنڑ لگے جو ”اِیں بندے کُوں گِھن وَنج، تے برابّا کُوں ساڈے کیتے چھوڑ ڈے۔“ برابّا شہر ءچ بغاوت تے قتل کرݨ دی وجہ تُوں قید ہا۔ پر پِیلاطُس یسُوع کُوں چھوڑ ڈیوݨ دے اِرادہ نال، اُنہاں نال وَل گالھ کیتی۔ پر او چیخدے ریہے جو ”اُونکُوں مصلُوب کر، مصلُوب کر!“ اُوں تریجھی پھیری اُنہاں کنُوں پُچھیا، ”کیوں؟ آخر اُوں کیہڑی بُرائی کیتی ہے؟ مَیں اُوندے ءچ قتل دی کوئی وجہ نئیں پاتی۔ بس مَیں اُونکُوں کُٹوا تے چھوڑ ڈیندا ہاں۔“ پر او چیخ چیخ تے مطالبہ کرݨ لگے جو اُونکُوں صلیب اُتے چڑھایا ونجے تے اُنہاں دے چیخنڑ نال اُنہاں دی سُنڑی گئی۔ بس پِیلاطُس اُنہاں دی مرضی دے مطابق فیصلہ کیتا، تے جیہڑا بندہ بغاوت تے خون دے جُرم ءچ قید ہا تے جیندی رہائی کیتے اُنہاں درخاست کیتی ہئی اُونکُوں چھوڑ ڈِتا، پر یسُوع کُوں اُنہاں دی مرضی دے مطابق سپاہیاں دے حوالے کر ڈِتا۔ جِیں ویلے اُونکُوں گِھدی ویندے ہَن تاں اُنہاں شمعون ناں دے ہِک کُرینی بندے کُوں جیہڑا دیہات تُوں آندا پِیا ہا، پکڑ گِھدا تے صلیب اُوندے اُتے رکھ ڈِتی تاں جو او اُونکُوں چا تے یسُوع دے پِچُھوں پِچُھوں ٹُرے۔ لوکاں دی ہِک بِھیڑ تے بہُوں ساریاں عورتاں جیہڑیاں اُوندے کیتے وینڑ تے ماتم کریندیاں ہَن، اُوندے پِچُھوں ٹُریاں۔ یسُوع مُڑ تے اُنہاں کُوں آکھیا، ”یروشلیم دی دِھیو! میڈے کیتے نہ رووو، بلکہ آپنڑے تے آپنڑے بالاں کیتے رووو۔ کیوں جو او ڈینہہ آوݨ آلے ہِن جِیں ویلے تُساں ایہ اکھیسو جو او بانجھ عورتاں مُبارک ہِن جِنہاں دے رِحم خالی ریہے تے او چھاتیاں جِنہاں کھیر نئیں پِلایا۔ وَل او پہاڑاں کُوں اکھیسن جو ’ساڈے اُتے ڈھے پوو‘ تے ٹِبیاں کُوں جو ’ساکُوں لُکا گِھنو۔‘ جے او ساوے درخت نال ایہ سبھ کُجھ کریندے ہِن تاں سُکے درخت نال کیا کُجھ نہ کریسن؟“ تے ڈُو مُجرم بئے وی ہَن جِنہاں کُوں اُوندے نال گِھدی ویندے ہَن تاں جو او وی قتل کیتے ونجنڑ۔ جِیں ویلے او اُوں جاہ اُتے پُجے جِینکُوں کھوپڑی آدھے ہِن تاں اُنہاں اُتھاں اُونکُوں صلیب چڑھا ڈِتا تے اُنہاں ڈُو مُجرماں کُوں وی، ہِک کُوں سجے پاسُوں تے ڈُوجھے کُوں کھبے پاسُوں۔ یسُوع آکھیا، ”باپ! اِنہاں کُوں معاف کر کیوں جو ایہ نئیں جانڑدے جو کیا کریندے ہِن۔“ تے اُنہاں پرچی پا تے اُوندے کپڑے آپس ءچ وَنڈ گِھدے۔ لوک کھڑے ڈیدھے پئے ہَن تے سردار وی ٹھٹّھے مار مار تے آدھے ہَن جو ”اِیں بئیاں کُوں بچایا۔ جے ایہ خُدا دا المسیح تے اُوندا چُنڑیا ہویا ہے، تاں آپنڑے آپ کُوں وی بچاوے۔“ سپاہیاں وی اُوندا مذاق اُڈایا۔ اُوں پِیوݨ کیتے اُونکُوں سِرکہ پیش کیتا تے آکھیا جو ”جے تُوں یہُودیاں دا بادشاہ ہیں تاں آپنڑے آپ کُوں بچا۔“ یسُوع دے سر اُتوں ہِک تختی وی لائی گئی جیندے اُتے لِکھیا ہا جو ”ایہ یہُودیاں دا بادشاہ ہے۔“ وَل جیہڑے مُجرم صلیب اُتے چڑھائے گئے ہَن، اُنہاں ءچوں ہِک اُونکُوں طعنہ ڈے تے آکھیا، ”کیا تُوں المسیح نئیں؟ تُوں آپنڑے آپ کُوں تے ساکُوں بچا۔“ پر ڈُوجھے اُونکُوں جِھڑک تے آکھیا، ”کیا تیکُوں خُدا دا ڈر نئیں جڈاں جو تیکُوں وی اُوہو سزا مِلی ہے؟ ساڈی سزا تاں جائز ہے کیوں جو اساں آپنڑے کماں دا بدلہ پیندے پئے ہیں پر اِیں کوئی ایجھا کم نئیں کیتا۔“ وَل اُوں آکھیا، ”یسُوع! جِیں ویلے تُساں آپنڑی بادشاہی ءچ آؤ تاں میکُوں یاد کرائے۔“ یسُوع اُونکُوں آکھیا، ”مَیں تیکُوں سچ آدھا ہاں جو تُوں اَج ای میڈے نال فِردوس ءچ ہوسیں۔“ وَل ڈوپہر کنُوں تریجھے پہر تئیں پُورے مُلک ءچ اندھارا چھایا ریہا، کیوں جو سورج اندھا تھی گِیا ہا۔ تے ہیکل دا پڑدہ پھٹ تے ڈُو ٹوٹے تھی گِیا۔ وَل یسُوع وڈی اواز نال پُکار تے آکھیا، ”باپ! مَیں آپنڑی رُوح تیڈے ہتھاں ءچ ڈیندا ہاں۔“ تے ایہ آکھ تے دم ڈے ڈِتا۔ جِیں ویلے صوبہ دار ایہ حال ڈِٹھا تاں خُدا دی تعریف کریندے ہوئے آکھیا، ”بے شک ایہ بندہ راستباز ہا۔“ تے سبھ لوک جیہڑے اُتھاں جمع ہَن ایہ سبھ ڈیکھ تے چھاتی پِٹدے ہوئے پِچُھوں وَل گئے۔ تے یسُوع دے سبھ جاݨ پچھاݨ آلے تے او عورتاں جیہڑیاں گلیل کنُوں اُوندے نال آئیاں ہَن، پرے کنُوں ایہ سبھ ڈیدھیاں پئیاں ہَن۔ اُتھاں یُوسف ناں دا ہِک نیک تے راستباز بندہ ہا جیہڑا صدر عدالت دا ممبر ہا، پر اُنہاں دی صلاح تے فیصلہ اُتے راضی نہ ہا۔ ایہ یہُودیاں دے شہر ارِمَتِیاہ دا راہنڑ آلا ہا تے خُدا دی بادشاہی دے اِنتظار ءچ ہا۔ اُوں پِیلاطُس دے کولھ وَنج تے یسُوع دی لاش منگی، تے اُونکُوں لہا تے مہین چادر ءچ ولھیٹیا تے اُونکُوں ہِک قبر ءچ جیہڑی چٹان ءچ کھودی گئی ہئی، رکھ ڈِتا۔ اُوں قبر ءچ پہلے کوئی نہ رکھیا گِیا ہا۔ او تیاری دا ڈینہہ ہا تے سبت دا ڈینہہ شروع تھیوݨ آلا ہا۔ او عورتاں جیہڑیاں گلیل کنُوں اُوندے نال آئیاں ہَن، یُوسف دے پِچُھوں پِچُھوں گئیاں تے اُنہاں اُوں قبر کُوں ڈِٹھا تے ایہ وی جو اُوندی لاش کُوں کِینویں رکھیا گِیا ہے۔ وَل اُنہاں واپس وَنج تے خوشبودار مصالحے تے عِطر تیار کیتا پر سبت دے ڈینہہ اُنہاں حُکم دے مطابق آرام کیتا۔ ہفتے دے پہلے ڈینہہ سویل نال او عورتاں خوشبودار مصالحے جیہڑے اُنہاں تیار کیتے ہَن، آپنڑے نال گِھن تے قبر اُتے گئیاں، تے پتھر کُوں قبر کنُوں ریڑھیا ڈِٹھا۔ پر اندر وَنج تے اُنہاں کُوں یسُوع مالک دی لاش نہ مِلی۔ جِیں ویلے او اِیں گالھ تُوں حیران ہَن تاں اچانک ڈُو بندے چمکنڑی پُشاک ءچ اُنہاں دے کولھ آ کھڑے تھئے۔ عورتاں ڈر کنُوں مُنہ دے بھار زمین اُتے جُھک گئیاں پر اُنہاں مرداں اِنہاں کُوں آکھیا جو ”زندہ کُوں مُردیاں ءچ کیوں گولھیندیاں ہیوے؟ او اِتھاں نئیں بلکہ زندہ تھی گئے۔ یاد کرو جو جِیں ویلے او گلیل ءچ ہا تاں اُوں تُہاکُوں آکھیا ہا ’ضرور ہے جو اِبنِ آدم گُنہگاراں دے حوالے کیتا ونجے تے صلیب اُتے چڑھایا ونجے تے تریجھے ڈینہہ زندہ تھی ونجے‘۔“ یسُوع دے گالھیں اُنہاں کُوں یاد آئیاں، تے قبر کنُوں وَل آ تے یارہاں شاگرداں تے باقی سارے لوکاں کُوں اِنہاں سارے گالھیں دی خبر ڈِتی۔ جِنہاں عورتاں، رسُولاں کُوں اِنہاں گالھیں دی خبر ڈِتی او مریم مگدلینی، یُوأنہ، تے یعقُوب دی ماء مریم تے اُنہاں دے نال دیاں باقی عورتاں ہَن۔ پر شاگرداں کُوں ایہ گالھیں خیالی قِصے وانگُوں لگیاں تے اُنہاں، عورتاں دا یقین نہ کیتا۔ وَل وی پطرس اُٹھی تے قبر تئیں بھجیا گِیا تے جُھک تے اندر ڈِٹھا، پر اُونکُوں صرف کفن ای نظر آیا۔ تے او اِیں ماجرے کُوں ڈیکھ تے حیران تھیندا ہویا آپنڑے گھر چلیا گِیا۔ اُوں ڈینہہ اُنہاں ءچوں ڈُو بندے اُوں وستی دو ویندے پئے ہَن جِیندا ناں اِمّاؤُس ہے۔ او یروشلیم کنُوں تقریباً سَت مِیل پرے ہے۔ ٹُردے ٹُردے او آپس ءچ اُنہاں واقعات دے بارے ءچ گالھیں کریندے ویندے ہَن جیہڑے تھئے ہَن۔ جِیں ویلے او آپس ءچ گالھیں تے بحث کریندے پئے ہَن تاں یسُوع خود نیڑے آ تے اُنہاں نال ٹُرݨ لگیا۔ پر او اُونکُوں پچھاݨ نہ سگے کیوں جو اُنہاں دیاں اکھیں اُتے پڑدہ پا ڈِتا گِیا ہا۔ یسُوع اُنہاں کُوں آکھیا، ”تُساں آپس ءچ کیا گالھیں کریندے ویندے ہیوے؟“ او پریشان کھڑے تھی گئے۔ وَل او جِیندا ناں کلِیُپاس ہا، اُونکُوں آکھنڑ لگا، ”کیا تُوں یروشلیم شہر ءچ کلھا پردیسی ہیں جیہڑا نئیں جانڑدا جو اِنہاں ڈینہاں ءچ کیا تھئے؟“ اُوں اُنہاں کُوں آکھیا، ”کیا تھئے؟“ اُنہاں جواب ءچ آکھیا، ”یسُوع ناصری دا واقعہ، جیہڑا آپنڑے کم تے کلام دی وجہ کنُوں خُدا دی نِگاہ ءچ تے سارے لوکاں دے نیڑے قُدرت آلا نبی ہا۔ سردار کاہِناں تے ساڈے حاکماں اُونکُوں پکڑوا ڈِتا تاں جو اُوندے قتل دا حُکم ڈِتا ونجے، تے اُونکُوں صلیب چڑھا ڈِتا۔ پر ساکُوں اُمید ہئی جو اِیہو بنی اِسرائیل کُوں رہائی ڈیسی۔ تے اِیندے علاوہ اِنہاں واقعات کُوں تھئے اَج تریجھا ڈینہہ ہے۔ ساڈے ءچوں کُجھ عورتاں ساکُوں حیران کر ڈِتے جیہڑیاں سویل نال اُوندی قبر اُتے گئیاں ہَن۔ جِیں ویلے اُنہاں کُوں اُوندی لاش نہ مِلی تاں ایہ آدھیاں ہوئیاں آئیاں جو ’اساں رویا ءچ فرشتیاں کُوں ڈِٹھے جیہڑے آدھے ہَن جو او زندہ ہے۔‘ تے ساڈے کُجھ دوست قبر اُتے گئے تے جِینویں عورتاں آکھیا ہا اُونویں ای ڈِٹھا پر اُونکُوں نہ ڈِٹھا۔“ یسُوع اُنہاں کُوں آکھیا، ”نادانو تے نبیاں دے سبھ گالھیں کُوں مننڑ ءچ سُست لوکو! کیا المسیح کیتے لازم نہ ہا جو او ڈُکھاں کُوں برداشت کرݨ تُوں بعد آپنڑے جلال ءچ داخل تھیندا؟“ وَل مُوسیٰ کنُوں گِھن تے سارے نبیاں دے گالھیں جیہڑیاں اُوندے حق ءچ لِکھیاں ہوئیاں ہِن، اُنہاں کُوں سمجھا ڈِتیاں۔ اِتی دیر ءچ او اُوں وستی دے نیڑے پُجے جِتھاں اُنہاں ونجنڑاں ہا تے یسُوع اِینویں ظاہر کیتا جِینویں او اگُوں ونجنڑ چاہندا ہے۔ اُنہاں اُونکُوں ایہ آکھ تے مجبور کیتا جو ”ساڈے کولھ ٹِک پو کیوں جو شام تھیوݨ آلی ہے تے ڈینہہ بہُوں لہہ گِیا ہے۔“ بس او راہنڑ کیتے اُنہاں نال اندر چلیا گِیا۔ جِیں ویلے او کھانڑا کھاوݨ کیتے اُنہاں دے نال بیٹھا تاں اُوں روٹی گِھن تے برکت ڈِتی تے تروڑ تے اُنہاں کُوں ڈیوݨ لگا۔ اِیں تُوں اُنہاں دے اکھیں کُھل گئیاں تے اُنہاں اُونکُوں پچھاݨ گِھدا پر او اُنہاں دی نظر تُوں غائب تھی گِیا۔ اُنہاں ہِک ڈُوجھے کُوں آکھیا جو ”جِیں ویلے او رستے ءچ ساڈے نال گالھیں کریندا تے ساکُوں خُدا دے کلام دے گالھیں سمجھیندا پِیا ہا تاں کیا ساڈے دل خوشی کنُوں نہ بھریج گئے ہَن؟“ بس او اُوں ویلے اُٹھی تے یروشلیم دو وَل گئے تے اُتھاں اُنہاں یارہاں تے اُنہاں دے ساتھیاں کُوں ہِک جاہ تے کٹھے ڈِٹھا۔ او آدھے پئے ہَن جو ”خُداوند سچ مُچ زندہ تھی گئے تے شمعون کُوں ڈِکھالی ڈِتے۔“ وَل اُنہاں رستے دیاں سارے گالھیں ڈسائیاں تے ایہ وی جو اُنہاں کِینویں اُونکُوں روٹی توڑیندے ویلے پچھانڑیا۔ او ایہ گالھیں کریندے ای پئے ہَن جو یسُوع خود اُنہاں دے وچال آ کھڑا تھیّا تے آکھیا، ”تُہاڈی سلامتی ہووے۔“ پر اُنہاں گھبرا تے، تے خوف کھا تے ایہ سمجھیا جو او کہیں بُھوت کُوں ڈیدھے پئے ہِن۔ یسُوع اُنہاں کُوں آکھیا، ”تُساں کیوں گھبریندے ہیوے تے تُہاڈے دِلاں ءچ شک کیوں پیدا تھیندے؟ میڈے ہتھ تے پیر ڈیکھو جو مَیں ای ہاں۔ میکُوں ہتھ لا تے ڈیکھو کیوں جو رُوح دی ہڈی تے گوشت نئیں ہوندا جِینویں میڈے ءچ ڈیدھے ہیوے۔“ ایہ آکھ تے اُوں اُنہاں کُوں آپنڑے ہتھ تے پیر ڈِکھائے۔ پر جِیں ویلے خوشی تے حیرت کنُوں اُنہاں کُوں یقین نہ آندا پِیا ہا، تاں اُوں اُنہاں کنُوں پُچھیا، ”کیا اِتھاں تُہاڈے کولھ کُجھ کھاوݨ کیتے ہے؟“ اُنہاں اُونکُوں بُھنی ہوئی مچھی دا ٹُکڑا ڈِتا۔ اُوں گِھن تے اُنہاں دے سامنڑے کھادا۔ وَل اُوں اُنہاں کُوں آکھیا، ”جِیں ویلے مَیں تُہاڈے نال ہم تاں تُہاکُوں ایہ گالھیں ڈسا ڈِتیاں ہَن جو مُوسیٰ دی توریت، نبیاں دے صحیفیاں تے زبُور ءچ میڈے بارے جیہڑا کُجھ لِکھیا ہے، اُنہاں دا پُورا تھیوݨ ضرور ہے۔“ وَل اُوں اُنہاں دا ذہن کھولیا تاں جو خُدا دے کلام کُوں سمجھنڑ، تے اُنہاں کُوں آکھیا، ”اِینویں لِکھیا ہے جو المسیح ڈُکھ چے سی تے تریجھے ڈینہہ مُردیاں ءچوں زندہ تھی ویسی۔ تے اُوندے ناں ءچ یروشلیم کنُوں شروع کر تے ساریاں قوماں ءچ توبہ تے گُناہاں دی معافی دی تبلیغ کیتی ویسی۔ تُساں اِنہاں گالھیں دے گواہ ہیوے۔ تے ڈیکھو، مَیں تُہاڈے اُتے اُونکُوں نازل کریساں جِیندا وعدہ میڈے باپ کیتے ، پر جئیں تئیں تُہاکُوں اسمان کنُوں قوت نہ مِلے اِیں شہر ءچ ٹِکے راہو۔“ وَل او اُنہاں کُوں بیت عنیاہ تئیں باہر گِھن گِیا تے آپنڑے ہتھ چا تے اُنہاں کُوں برکت ڈِتی۔ تے جِیں ویلے او برکت ڈیندا پِیا ہا تاں اُنہاں کنُوں اَنج تھی گِیا تے اسمان اُتے چا گِھدا گِیا۔ شاگرد اُونکُوں سجدہ کر تے بہُوں خوشی نال یروشلیم دو وَل گئے۔ تے او ہر ویلے ہیکل ءچ حاضر تھی تے خُدا دی حمد کریندے راہندے ہَن۔ ابتدا ءچ کلام ہا تے کلام خُدا دے نال ہا تے کلام خُدا ہا۔ اِیہو ابتدا ءچ خُدا دے نال ہا۔ سبھ چیزاں اُوندے وسیلے خلق تھیّاں تے جیہڑا کُجھ خلق تھئے، اُنہاں ءچوں کوئی چیز اُوندے بغیر خلق نئیں تھئی۔ اُوندے ءچ زندگی ہئی تے او زندگی اِنساناں دا نُور ہئی۔ نُور اندھارے ءچ چمکدا ہے تے اندھارا اُوندے اُتے غالب نہ آیا۔ خُدا ہِک بندے کُوں بھیجیا جِیندا ناں یُوحنّا ہا۔ او اِیں واسطے آیا جو او نُور دی گواہی ڈیوے تاں جو سارے اُوندے وسیلہ نال اِیمان گِھن آوݨ۔ یُوحنّا خود تاں نُور نہ ہا پر نُور دی گواہی ڈیوݨ آیا ہا۔ سچا نُور جیہڑا ہر ہِک اِنسان کُوں روشن کریندے، دُنیا ءچ آوݨ آلا ہا۔ او دُنیا ءچ ہا تے دُنیا اُونکُوں نہ پچھانڑیا بھانویں جو دُنیا اُوندے وسیلے نال پیدا تھئی۔ او اُوندے ءچ آیا جیہڑا اُوندا آپنڑا ہا پر اُوندے آپنڑیاں اُونکُوں قبول نہ کیتا، پر جِتنیاں اُونکُوں قبول کیتا یعنی جیہڑے اُوندے ناں اُتے اِیمان گِھن آئے ہِن، اُوں اُنہاں کُوں خُدا دے فرزند بنڑݨ دا حق بخشیا۔ او نہ خون کنُوں، نہ جِسمانی خواہش کنُوں تے نہ اِنسان دے اِرادے کنُوں بلکہ خُدا کنُوں پیدا تھئے ۔ کلام جِسم اِختیار کیتا تے ساڈے وچال راہندا ریہا۔ اساں اُوندا جلال ڈِٹھا جیہڑا فضل تے سچائی نال بھریا ہویا ہا، ایجھا جلال جِینویں باپ دے اِکلوتے پوتر دا ہوندے۔ اُوندے بارے ءچ یُوحنّا گواہی ڈِتی تے اُچی اواز ءچ آکھیا جو ”ایہ اُوہو ہے جیندے حق ءچ مَیں آکھیا ہا جو جیہڑا میڈے بعد آوݨ آلا ہے، او مَیں کنُوں افضل ہے کیوں جو او مَیں کنُوں پہلے موجود ہا۔“ او فضل کنُوں بھریا ہا تے اساں اُوندے فضل ءچوں فضل اُتے فضل پایا۔ کیوں جو شریعت تاں مُوسیٰ دے وسیلے ڈِتی گئی پر فضل تے سچائی یسُوع مسیح دے وسیلے مِلی۔ خُدا کُوں کڈھائیں کہیں نئیں ڈِٹھا پر اِکلوتا پوتر جیہڑا باپ دی گود ءچ ہے، اُوں ای اُونکُوں ظاہر کیتا۔ تے یُوحنّا دی گواہی ایہ ہے جڈاں یہُودیاں یروشلیم تُوں کاہِن تے لاوی اُوندے کولھ ایہ پُچھنڑ کیتے بھیجے جو ”تُساں کوݨ ہیوے؟“ اُوں اِنکار نہ کیتا بلکہ صاف صاف اِقرار کیتا جو ”مَیں تاں المسیح نئیں۔“ اُنہاں یُوحنّا کنُوں پُچھیا، ”وَل تُساں کوݨ ہیوے؟ کیا تُساں ایلیّاہ ہیوے؟“ یُوحنّا جواب ڈِتا، ”مَیں نئیں۔“ ”کیا تُساں او نبی ہیوے؟“ یُوحنّا جواب ڈِتا، ”نئیں۔“ بس اُنہاں پُچھیا، ”وَل تُساں کوݨ ہیوے؟ ساکُوں ڈساؤ، تاں جو اساں آپنڑے بھیجنڑ آلیاں کُوں ڈسا سگوں۔ تُساں آپنڑے حق ءچ کیا آدھے ہیوے؟“ اُوں آکھیا، ”جِینویں یسعیاہ نبی آکھیا ہے ’مَیں بیابان ءچ ہکل ڈیوݨ آلے دی اواز ہاں جو رب دی راہ کُوں سِدھا بنڑاؤ ‘۔“ فریسی فرقے دے جیہڑے لوک بھیجے گئے ہَن، اُنہاں یُوحنّا کنُوں ایہ پُچھیا، ”جے تُساں نہ المسیح ہیوے، نہ ایلیّاہ، نہ او نبی تاں وَل بپتسمہ کیوں ڈیندے ہیوے؟“ یُوحنّا جواب ءچ اُنہاں کُوں آکھیا جو ”مَیں تاں پانڑی نال بپتسمہ ڈیندا ہاں پر تُہاڈے وچال ہِک بندہ موجود ہے جِینکُوں تُساں نئیں جانڑدے۔ او میڈے بعد آوݨ آلا ہے تے مَیں تاں اُوندی جُتی دا تسمہ کھولنڑ دے وی لائق نئیں۔“ ایہ واقعات یردن دریا دے پار بیت عنیاہ ءچ پیش آئے جِتھاں یُوحنّا بپتسمہ ڈیندا ہا۔ ڈُوجھے ڈینہہ یُوحنّا یسُوع کُوں آپنڑے کولھ آندے ڈیکھ تے آکھیا ”ڈیکھو ایہ خُدا دا لیلا ہے جیہڑا دُنیا دا گُناہ چا تے گِھن ویندے۔ ایہ اُوہو ہے جیندے بارے ءچ مَیں آکھیا ہا جو ’میڈے بعد ہِک بندہ آوݨ آلا ہے جیہڑا مَیں کنُوں افضل ہے اِیں واسطے جو او مَیں کنُوں پہلے ای موجود ہا۔‘ مَیں خود تاں اُونکُوں نہ جانڑدا ہم پر مَیں اِیں واسطے پانڑی نال بپتسمہ ڈیندا آیا تاں جو او بنی اِسرائیل اُتے ظاہر تھی ونجے۔“ وَل یُوحنّا ایہ گواہی ڈِتی جو ”مَیں رُوح القُدس کُوں کبوتر وانگُوں اسمان کنُوں لہندے ڈِٹھے تے او اُوندے اُتے کھڑ گِیا۔ مَیں تاں اُونکُوں پچھانڑدا نہ ہم پر جئیں میکُوں پانڑی نال بپتسمہ ڈیوݨ کیتے بھیجیا ہا اُوں میکُوں ڈسایا جو ’جیندے اُتے رُوح القُدس کُوں لہندے تے کھڑ دا ڈیکھیں، اُوہو رُوح القُدس نال بپتسمہ ڈیسی۔‘ بس مَیں ڈِٹھے تے گواہی ڈِتی ہے جو ایہ خُدا دا پوتر ہے۔“ ڈُوجھے ڈینہہ یُوحنّا آپنڑے ڈُو شاگرداں نال اُتھاں کھڑا ہا۔ اُوں یسُوع کُوں اُتھوں لنگھدا ڈیکھ تے آکھیا ”ڈیکھو! ایہ خُدا دا لیلا ہے۔“ ایہ گالھ سُنڑ تے اُوندے ڈوہائیں شاگرد یسُوع دے پِچُھوں ٹُر پئے۔ یسُوع مُڑ تے اُنہاں کُوں پِچُھوں آندے ڈِٹھا تاں اُنہاں کنُوں پُچھیا، ”تُساں کیا گولھیندے ہیوے؟“ اُنہاں آکھیا، ”ربّی، (یعنی اُستاد) تُساں کِتھاں راہندے ہیوے؟“ اُوں جواب ڈِتا ”جُلو ڈیکھ گِھنو۔“ بس او نال ٹُر پئے تے او جاہ ڈِٹھی جِتھاں او راہندا ہا تے باقی ڈینہہ اُوندے نال گُزار ڈِتا، ایہ ڈاہویں گھنٹے دے نیڑے دا ویلا ہا۔ اُنہاں ڈوہائیں ءچوں جیہڑے یُوحنّا دی گالھ سُنڑ تے یسُوع دے پِچُھوں تھی پئے ہَن، ہِک اندریاس ہا جیہڑا شمعون پطرس دا بِھرا ہا۔ اندریاس پہلا کم ایہ کیتا جو آپنڑے بِھرا شمعون کُوں گولھ تے اُونکُوں آکھیا جو ”ساکُوں المسیح مِل گِیا ہے۔“ (مسیح دا مطلب خُدا دا چُنڑیا ہویا بادشاہ ہے۔) او اُونکُوں یسُوع دے کولھ گِھن آیا۔ یسُوع اُوندے اُتے نِگاہ کیتی تے آکھیا، ”تُوں یُوحنّا دا پوتر شمعون ہیں۔ ہُنڑ کنُوں تیڈا ناں کیفا ہوسی۔“ (کیفا دا ترجمہ پطرس ہے جِیندا مطلب پتھر ہے۔) ڈُوجھے ڈینہہ یسُوع گلیل ءچ ونجنڑ دا اِرادہ کیتا تے فِلپُس کُوں آکھیا، ”میڈے پِچُھوں تھی پو۔“ اندریاس تے پطرس وانگُوں فِلپُس دا وطنی شہر بیت صیدا ہا۔ فِلپُس، نتن ایل کُوں مِلیا تاں اُونکُوں آکھنڑ لگا جو ”جِیندا ذِکر مُوسیٰ توریت ءچ تے نبیاں صحائف ءچ کیتے، او ساکُوں مِل گِیا ہے۔ او یُوسف دا پوتر یسُوع ناصری ہے۔“ نتن ایل پُچھیا، ”کیا ناصرت ءچوں کوئی چنگی چیز نِکل سگدی ہے؟“ فِلپُس آکھیا، ”جُل تے خود ای ڈیکھ گِھن۔“ یسُوع نتن ایل کُوں آندے ڈِٹھا تاں اُوندے بارے آکھیا، ”ڈیکھو! ایہ اصلی اِسرائیلی ہے، اِیندے ءچ مکر نئیں۔“ نتن ایل پُچھیا، ”تُساں میکُوں کِینویں جانڑدے ہیوے؟“ یسُوع جواب ڈِتا، ”فِلپُس دے سڈݨ کنُوں پہلے جیہڑے ویلے تُوں ہنجیر دے درخت تلے ہَویں مَیں تیکُوں ڈیکھ گِھدا ہا۔“ نتن ایل آکھیا، ”ربّی! تُساں خُدا دے پوتر ہیوے۔ تُساں اِسرائیل دے بادشاہ ہیوے۔“ یسُوع جواب ءچ اُونکُوں آکھیا، ”کیا تُوں ایہ سُنڑ تے جو مَیں تیکُوں ہنجیر دے درخت دے تلے ڈِٹھا ہا، اِیں واسطے اِیمان گِھن آئیں؟ تُوں اِیں کنُوں وی وڈے وڈے کم ڈیکھسیں۔“ وَل اُونکُوں آکھیا، ”مَیں تُہاکُوں سچ آدھا ہاں جو تُساں اسمان کُوں کُھلا تے خُدا دے فرشتیاں کُوں اُتے ویندے تے اِبنِ آدم اُتے لہندے ڈیکھسو ۔“ وَل تریجھے ڈینہہ گلیل دی وستی قانا ءچ ہِک شادی تھئی تے یسُوع دی ماء اُتھاں ہئی۔ یسُوع تے اُوندے شاگرداں دی وی اُوں شادی ءچ دعوت ہئی۔ جِیں ویلے انگُور دا رَس ختم تھی گِیا تاں یسُوع دی ماء اُونکُوں آکھیا جو ”اُنہاں دے کولھ انگُور دا رَس مُک گِیا ہے۔“ یسُوع اُونکُوں آکھیا، ”ماء! میکُوں ایہ کیوں آدھی ہیں؟ اجنڑ میڈا وقت نئیں آیا۔“ اُوندی ماء نوکراں کُوں آکھیا، ”جیہڑا کُجھ او تُہاکُوں آکھے، او کرو۔“ اُتھاں پتھر دے چِھی مٹکے رکھے ہَن جِنہاں کُوں یہُودی طہارت کیتے اِستعمال کریندے ہَن۔ ہر مٹکے ءچ ڈُو ڈُو ترے ترے مَنڑ پانڑی دی گُنجائش ہئی۔ یسُوع اُنہاں کُوں آکھیا، ”مٹکیاں ءچ پانڑی بھر ڈیؤ۔“ بس اُنہاں مٹکیاں کُوں مُنہ تئیں بھر ڈِتا۔ وَل اُوں اُنہاں کُوں آکھیا، ”ہُنڑ کڈھ تے دعوت دا اِنتظام چلاوݨ آلے کولھ گِھن ونجو۔“ بس او گِھن گئے۔ دعوت دا اِنتظام چلاوݨ آلے او پانڑی چَکھیا جیہڑا ہُنڑ انگُور دا رَس بنڑ گِیا ہا۔ اُونکُوں پتہ نہ ہا جو او انگُور دا رَس کِتھوں آئے پر نوکر جِنہاں پانڑی بھریا ہا جانڑدے ہَن۔ وَل دعوت دا اِنتظام چلاوݨ آلے گھوٹ کُوں سڈیا تے اُونکُوں آکھیا، ”ہر بندہ شروع ءچ انگُور دا چنگا رَس پیش کریندے تے بعد ءچ جیہڑے ویلے مہمان پی گِھندن، ہلکا رَس پیش کریندے، پر تَیں انگُور دا چنگا رَس ہُنڑ تئیں رکھ چھوڑیا ہے۔“ ایہ یسُوع دا پہلا معجزہ ہا جیہڑا اُوں گلیل دی وستی قانا ءچ ڈِکھا تے آپنڑاں جلال ظاہر کیتا تے اُوندے شاگرد اُوندے اُتے اِیمان گِھن آئے۔ اِیندے بعد او، اُوندی ماء تے بِھرا تے اُوندے شاگرد کفرنحُوم کُوں چلے گئے تے اُتھاں کُجھ ڈینہہ ریہے۔ جِیں ویلے یہُودیاں دی عید ِ فسح نیڑے ہئی تاں یسُوع یروشلیم دو روانہ تھیّا۔ اُوں ہیکل دے صحن ءچ ڈاند، بھیڈاں تے کبوتر ویچنڑ آلیاں کُوں تے پیسے بدلاوݨ آلیاں کُوں بیٹھے ڈِٹھا، تے رسیاں دا کوڑا بنڑا تے بھیڈاں تے ڈانداں سمیت ساریاں کُوں ہیکل ءچوں کڈھ ڈِتا۔ اُوں پیسے بدلاوݨ آلیاں دے سِکے کِھنڈا ڈِتے، تے اُنہاں دے پھٹے پُٹھے کر ڈِتے، تے کبوتر فروشاں کُوں آکھیا، ”اِنہاں کُوں اِتُھوں گِھن ونجو۔ میڈے باپ دے گھر کُوں مَنڈی نہ بنڑاؤ۔“ اُوندے شاگرداں کُوں یاد آیا جو کلام ءچ لِکھیا ہے ”تیڈے گھر دی غیرت میکُوں کھا ویسی ۔“ بس یہُودیاں جواب ءچ اُونکُوں آکھیا، ”اِنہاں کماں دے دفاع ءچ تُوں ساکُوں کیہڑا معجزہ ڈِکھا سگدیں؟“ یسُوع جواب ءچ اُنہاں کُوں آکھیا ”اِیں ہیکل کُوں سَٹ ڈیؤ تاں مَیں ترے ڈینہہ ءچ ولا کھڑا کر ڈیساں۔“ یہُودیاں جواب ڈِتا، ”اِیں ہیکل دے بنڑاوݨ ءچ چھتالیہہ سال لگ گئے ہِن، تے کیا تُوں ترے ڈینہہ ءچ اِینکُوں ولا بنڑا ڈیسیں؟“ پر یسُوع آپنڑے جِسم دی ہیکل دے بارے ءچ آکھیا ہا۔ بس جِیں ویلے او مُردیاں ءچوں زندہ تھیّا تاں اُوندے شاگرداں کُوں یاد آیا جو اُوں ایہ آکھیا ہا تے اُنہاں کُوں خُدا دے کلام تے یسُوع دے آکھے ہوئے لفظاں اُتے یقین آ گِیا۔ جِیں ویلے یسُوع فسح دی عید کیتے یروشلیم ءچ ہا تاں بہُوں سارے لوک اُوندے معجزے ڈیکھ تے اُوندے اُتے اِیمان گِھن آئے، پر یسُوع کُوں اُنہاں اُتے اعتبار نہ ہا، اِیں کیتے جو او ساریاں کُوں جانڑدا ہا۔ اُونکُوں اِیندی ضرورت نہ ہئی جو کوئی اُونکُوں اِنسان دے بارے ءچ ڈساوے کیوں جو او اِنسان دے دل دا حال جانڑدا ہا۔ فریسیاں ءچوں ہِک بندہ ہا جِیندا ناں نِیکُدِیمُس ہا۔ او یہُودیاں دی صدر ِ عدالت دا رُکن ہا۔ او رات دے ویلے یسُوع دے کولھ آ تے آکھنڑ لگا، ”ربّی! اساں جانڑدے ہیں جو تُساں خُدا دی طرفوں آئے ہوئے اُستاد ہیوے کیوں جو جیہڑے معجزے تُساں ڈکھیندے ہیوے، کوئی نئیں ڈِکھا سگدا جئیں تئیں خُدا اُوندے نال نہ ہووے۔“ یسُوع جواب ءچ اُونکُوں آکھیا، ”مَیں تیکُوں سچ آدھا ہاں جو جئیں تئیں کوئی نویں سرے تُوں پیدا نہ تھیوے، او خُدا دی بادشاہی کُوں ڈیکھ نئیں سگدا۔“ نِیکُدِیمُس اُونکُوں آکھیا، ”بندہ جِیں ویلے بُڈھا تھی ونجے تاں او کِینویں ولا پیدا تھی سگدے؟ کیا او ولا آپنڑی ماء دے پیٹ ءچ داخل تھی تے پیدا تھی سگدے؟“ یسُوع جواب ڈِتا، ”مَیں تیکُوں سچ آدھا ہاں جو جئیں تئیں کوئی بندہ پانڑی تے رُوح نال پیدا نہ تھیوے او خُدا دی بادشاہی ءچ داخل نئیں تھی سگدا۔ جیہڑا جِسم کنُوں پیدا تھیندے او جِسمانی ہے تے جیہڑا رُوح کنُوں پیدا تھیندے او رُوحانی ہے۔ حیران نہ تھی جو مَیں تیکُوں آکھے، ’تُہاکُوں نویں سرے تُوں پیدا تھیوݨ ضرور ہے۔‘ ہوا جیہڑے پاسُوں چاہندی ہے گُھل ویندی ہے۔ تُوں اُوندی اواز سُنڑدا ہیں پر ایہ نئیں جانڑدا جو او کِتھوں آندی ہے تے کِتھاں ویندی ہے۔ رُوح کنُوں پیدا تھیوݨ آلے بندے دا حال اِیہو ہے۔“ نِیکُدِیمُس پُچھیا، ”ایہ کِینویں تھی سگدے؟“ یسُوع جواب ءچ اُونکُوں آکھیا، ”اِسرائیل دا اُستاد ہوندے ہوئے وی تُوں ایہ گالھیں کیوں نئیں سمجھدا؟ مَیں تیکُوں سچ آدھا ہاں جو جیہڑا کُجھ اساں جانڑدے ہیں، اُوہو آدھے ہیں، تے جِینکُوں اساں ڈِٹھے اُوندی گواہی ڈیندے ہاں، پر تُساں ساڈی گواہی قبول نئیں کریندے۔ جِیں ویلے مَیں تُہاکُوں زمین دے گالھیں ڈسائیاں تے تُساں یقین نہ کیتا تاں جے مَیں تُہاکُوں اسمان دے گالھیں ڈساواں تاں تُساں کِینویں یقین کریسو؟ کوئی اسمان اُتے نئیں گِیا سوائے اُوندے جیہڑا اسمان کنُوں لتھے یعنی اِبنِ آدم۔ جِینویں مُوسیٰ بیابان ءچ نانگ کُوں اُچائی اُتے چڑھایا ، اُونویں ای ضرور ہے جو اِبنِ آدم وی اُچائی اُتے چڑھایا ونجے۔ تاں جو جیہڑا کوئی اُوندے اُتے اِیمان گِھن آوے ہمیشاں دی زندگی پاوے۔ کیوں جو خُدا دُنیا نال ایجھی محبت کیتی جو اُوں آپنڑا اِکلوتا پوتر بخش ڈِتا تاں جو جیہڑا کوئی اُوندے اُتے اِیمان گِھن آوے، ہلاک نہ تھیوے بلکہ ہمیشاں دی زندگی پاوے۔ کیوں جو خُدا آپنڑے پوتر کُوں دُنیا ءچ اِیں خاطر نئیں بھیجیا جو دُنیا کُوں سزا دا حُکم سُنڑاوے بلکہ اِیں واسطے جو دُنیا اُوندے وسیلے نال نجات پاوے۔ جیہڑا اُوندے اُتے اِیمان گِھن آندے اُوندے اُتے سزا دا حُکم نئیں تھیندا، پر جیہڑا اُوندے اُتے اِیمان نئیں گِھن آندا اُوندے اُتے سزا دا حُکم تھی گئے، اِیں واسطے جو او خُدا دے اِکلوتے پوتر دے ناں اُتے اِیمان نئیں گِھن آیا۔ تے سزا دے حُکم دی وجہ ایہ ہے جو نُور دُنیا ءچ آیا تے لوکاں نُور دی بجائے اندھارے کُوں پسند کیتا، اِیں واسطے جو اُنہاں دے کم بُرے ہَن۔ کیوں جو جیہڑا کوئی بدی کریندے، او نُور کنُوں نفرت کریندے تے نُور دے کولھ نئیں آندا، اِینویں نہ تھیوے جو اُوندے کم ظاہر تھی ونجنڑ۔ پر جیہڑا سچائی دے کم کریندے، او نُور دے کولھ آندے تاں جو ظاہر تھیوے جو اُوندے کم خُدا دے ذریعے کیتے گئے ہِن۔“ اِنہاں گالھیں دے بعد یسُوع تے اُوندے شاگرد یہُودیہ دے علاقے ءچ آئے تے او اُتھاں اُنہاں نال رہ تے بپتسمہ ڈیوݨ لگا۔ یُوحنّا وی شالیم شہر دے نیڑے عینون ءچ بپتسمہ ڈیندا ہا، کیوں جو اُتھاں پانڑی بہُوں ہا، تے لوک آ تے بپتسمہ گِھندے ہَن۔ کیوں جو یُوحنّا اجنڑ تئیں قید خانہ ءچ سٹیا نہ گِیا ہا۔ بس یُوحنّا دے شاگرداں دی، کہیں یہُودی نال طہارت دے بارے ءچ تکرار تھی گئی۔ اِیں واسطے او یُوحنّا دے کولھ آ تے آکھنڑ لگے، ”ربّی! او بندہ جیہڑا یردن دے پار تیڈے نال ہا تے جیندے بارے ءچ تُوں گواہی ڈِتی ہئی، ڈیکھ او وی بپتسمہ ڈیندا ہے تے سبھ اُوندے کولھ آندے ہِن۔“ یُوحنّا جواب ءچ آکھیا، ”اِنسان کُوں کُجھ نئیں مِل سگدا جئیں تئیں اُونکُوں اسمان دی طرفوں نہ ڈِتا ونجے۔ تُساں خود گواہ ہیوے جو مَیں آکھیا ہا جو ’مَیں المسیح نئیں بلکہ اُوندے اگُوں بھیجیا گِیا ہاں۔‘ کُنوار تاں گھوٹ دی ہوندی ہے۔ پر گھوٹ دا دوست جیہڑا نال کھڑا تھی تے اُوندی سُنڑدے، او گھوٹ دی اواز سُنڑ تے خوش تھیندے۔ بس میڈی ایہ خوشی پُوری تھی گئی۔ ضرور ہے جو او ودھے تے مَیں گَھٹاں۔“ جیہڑا اسمان تُوں آندے او سبھ کنُوں اُچا ہے۔ جیہڑا بندہ زمین کنُوں ہے او زمینی ہے تے زمین دے گالھیں کریندے۔ جیہڑا اسمان کنُوں آندے، او ساریاں کنُوں اُچا ہے۔ جیہڑا کُجھ اُوں ڈِٹھا تے سُنڑیا اُونہی دی گواہی ڈیندے، پر اُوندی گواہی کوئی قبول نئیں کریندا۔ جئیں اُوندی گواہی قبول کیتی اُوں اِیں گالھ دی تصدیق کر ڈِتی جو خُدا سچا ہے۔ کیوں جو جِینکُوں خُدا بھیجیا ہے او خُدا دے گالھیں اکھیندے، اِیں واسطے جو خُدا رُوح القُدس ناپ ناپ تے نئیں ڈیندا۔ باپ پوتر نال محبت رکھیندے تے اُوں سبھ کُجھ پوتر دے سپُرد کر ڈِتے۔ جیہڑا پوتر اُتے اِیمان گِھن آندے، ہمیشاں دی زندگی اُوندی ہے، پر جیہڑا پوتر دی نئیں منیندا، او زندگی کُوں نہ ڈیکھسی بلکہ اُوندے اُتے خُدا دا غضب راہسی۔ وَل جِیں ویلے یسُوع کُوں پتہ چلیا جو فریسیاں سُنڑے جو یسُوع یُوحنّا کنُوں وی زیادہ شاگرد بنڑیندے تے بپتسمہ ڈیندے، بھانویں یسُوع خود نئیں بلکہ اُوندے شاگرد بپتسمہ ڈیندے ہَن، تاں او یہُودیہ کُوں چھوڑ تے وَل گلیل کُوں چلیا گِیا۔ اُونکُوں سامریہ ءچوں تھی تے ونجنڑاں ضرور ہا۔ بس او سامریہ دے ہِک شہر ءچ آیا جیہڑا سُوخار اکھویندا ہے۔ ایہ اُوں زمین دے نیڑے ہے جیہڑی یعقُوب آپنڑے پوتر یُوسف کُوں ڈِتی ہئی تے یعقُوب دا کُھوہ اُتھائیں ہا۔ یسُوع سفر کنُوں تھک تے اُوں کُھوہ اُتے بہہ گِیا۔ ایہ ڈوپہر دا ویلا ہا۔ سامریہ دی ہِک عورت اُتھاں پانڑی بھرݨ آئی۔ یسُوع اُونکُوں آکھیا، ”ذرا میکُوں پانڑی پِلا۔“ کیوں جو اُوندے شاگرد کھانڑا مُل گِھننڑ شہر گئے ہَن۔ اُوں سامری عورت اُونکُوں آکھیا، ”تُساں یہُودی تھی تے مَیں سامری کنُوں پانڑی کیوں منگدے ہیوے؟“ کیوں جو یہُودی سامریاں نال کہیں قِسم دا میل مِلاپ نہ رکھیندے ہَن۔ یسُوع جواب ءچ اُونکُوں آکھیا، ”جے تُوں خُدا دی بخشش کُوں جانڑدی تے ایہ وی جو او کوݨ ہے جیہڑا تَیں کنُوں پانڑی منگدے تاں تُوں اُوں کنُوں منگدی تے او تیکُوں زندگی دا پانڑی ڈیندا۔“ عورت اُونکُوں آکھیا، ”سائیں، تُہاڈے کولھ پانڑی بھرݨ کیتے کوئی چیز نئیں تے کُھوہ وی بہُوں جِھکا ہے، وَل او زندگی دا پانڑی تُہاڈے کولھ کِتھوں آیا؟ کیا تُساں ساڈے پِیُو یعقُوب کنُوں وی وڈے ہیوے جئیں ایہ کُھوہ ساکُوں ڈِتا تے خود اُوں تے اُوندے پوتراں تے اُوندے ڈھورڈنگراں اُوندے ءچوں پِیتا؟“ یسُوع جواب ڈِتا، ”جیہڑا کوئی اِیں پانڑی ءچوں پِیندے اُونکُوں ولا تریھ لگسی۔ پر جیہڑا کوئی اُوں پانڑی ءچوں پِیندے جیہڑا مَیں اُونکُوں ڈیساں، اُونکُوں کڈھائیں تریھ نہ لگسی بلکہ جیہڑا پانڑی مَیں اُونکُوں ڈیساں او اُوندے ءچ چشمہ بنڑ ویسی جیہڑا ویہہ تے ہمیشاں دی زندگی ڈیسی۔“ عورت اُونکُوں آکھیا، ”سائیں، میکُوں وی ایہ پانڑی ڈیؤ تاں جو مَیں ترِسّی نہ راہواں تے نہ ای میکُوں پانڑی بھرݨ کیتے اِتھاں آونڑا پووے۔“ یسُوع اُونکُوں آکھیا، ”وَنج تے آپنڑے پئے کُوں اِتھاں سڈ آ۔“ عورت جواب ڈِتا، ”میڈا پایا کائنی۔“ یسُوع اُونکُوں آکھیا، ”تُوں ٹھیک آدھی ہیں جو تیڈا پایا کائنی، کیوں جو تُوں پنج پئے کیتی بیٹھی ہیں تے جِیں کولھ ہُنڑ ہیں او تیڈا پایا کائنی۔ تُوں سچ آدھی ہیں۔“ عورت اُونکُوں آکھیا، ”مالک! میکُوں لگدے جو تُساں نبی ہیوے۔ ساڈے پِیُو ڈاڈا اِیں پہاڑ اُتے عبادت کیتی پر تُساں لوک آدھے ہیوے جو او جاہ جِتھاں عبادت کرنڑی چاہیدی ہے، یروشلیم ءچ ہے۔“ یسُوع اُونکُوں آکھیا، ”بی بی! میڈا یقین کر جو او وقت آوݨ آلا ہے جِیں ویلے تُساں باپ دی عبادت نہ تاں اِیں پہاڑ اُتے کریسو نہ یروشلیم ءچ۔ تُساں جِینکُوں نئیں جانڑدے اُوندی عبادت کریندے ہیوے۔ اساں جِینکُوں جانڑدے ہیں، اُوندی عبادت کریندے ہیں کیوں جو نجات یہُودیاں ءچوں ہے ۔ پر او وقت آوݨ آلا ہے بلکہ ہُنڑ ای ہے جو سچے عبادت کرݨ آلے رُوح تے سچائی نال باپ دی عبادت کریسن۔ کیوں جو باپ آپنڑے کیتے ایجھے ای عبادت کرݨ آلے گولھیندا ہے۔ خُدا رُوح ہے تے ضرور ہے جو اُوندے عبادت گُزار رُوح تے سچائی نال اُوندی عبادت کرݨ۔“ عورت اُونکُوں آکھیا، ”مَیں جانڑدی ہاں جو المسیح جِینکُوں خرِستُس آدھے ہِن، آوݨ آلا ہے۔ جِیں ویلے او آسی تاں ساکُوں سارے گالھیں ڈسا ڈیسی۔“ یسُوع اُونکُوں آکھیا، ”مَیں جیہڑا تیڈے نال گالھیں کریندا پِیا ہاں اُوہو ہاں۔“ اِتی دیر ءچ اُوندے شاگرد آئے تے اُونکُوں ہِک عورت نال گالھیں کریندے ڈیکھ تے حیران تھئے۔ وَل وی کہیں نہ پُچھیا جو ”تُساں کیا چاہندے ہیوے؟ یا اُوندے نال کِیں واسطے گالھیں کریندے پئے ہیوے؟“ بس عورت آپنڑا پانڑی دا گھڑا اُتھائیں چھوڑ تے پِچُھوں تے ولا شہر چلی گئی تے لوکاں کُوں آکھنڑ لگی ”آؤ، ہِک بندے نال مِلو جئیں میکُوں سبھ کُجھ جیہڑا مَیں ہُنڑ تئیں کیتا ہا، ڈسا ڈِتے۔ کیا اِیہو المسیح تاں نئیں؟“ او شہر کنُوں نِکل تے یسُوع دے کولھ آوݨ لگے۔ اِیں دوران اُوندے شاگرد اُونکُوں ایہ درخاست کرݨ لگے جو ”ربّی، کُجھ کھا گِھنو۔“ پر اُوں اُنہاں کُوں آکھیا، ”میڈے کولھ کھاوݨ کیتے ایجھا کھانڑا ہے جِینکُوں تُساں نئیں جانڑدے۔“ بس شاگرد آپس ءچ آکھنڑ لگے، ”کیا کوئی اُوندے کیتے کھانڑا گِھن آئے؟“ یسُوع اُنہاں کُوں آکھیا، ”میڈا کھانڑا ایہ ہے جو مَیں آپنڑے بھیجنڑ آلے دی مرضی پُوری کراں تے اُوندا کم پُورا کراں۔ کیا تُساں آدھے نئیں جو فصل پکنڑ ءچ اجنڑ چار مہینے راہندے ہِن؟ ڈیکھو مَیں تُہاکُوں آدھا ہاں جو آپنڑے اکھیں چا تے کھیتاں اُتے نظر کرو جو فصل کپنڑ کیتے تیار ہے۔ کپنڑ آلا مزدُوری پیندے تے ہمیشاں دی زندگی کیتے پھل جمع کریندے، تاں جو رہاوݨ آلا تے کپنڑ آلا ڈوہائیں رَل تے خوشی مناوݨ۔ اِیں واسطے ایہ اکھاݨ سچ تھیندے جو رہاوݨ آلا بِیا تے کپنڑ آلا بِیا ہے۔ مَیں تُہاکُوں اُوں فصل کُوں کپنڑ کیتے بھیجیا جیندے اُتے تُساں محنت نئیں کیتی۔ بئیاں محنت کیتی تے تُساں اُنہاں دی محنت دے پھل ءچ شریک تھئے۔“ تے اُوں شہر دے بہُوں سارے سامری اُوں عورت دی گواہی سُنڑ تے جو ”اُوں میکُوں سبھ کُجھ جیہڑا مَیں ہُنڑ تئیں کیتا ہا، ڈسا ڈِتے،“ یسُوع اُتے اِیمان گِھن آئے۔ بس جِیں ویلے او سامری لوک اُوندے کولھ آئے تاں اُونکُوں درخاست کرݨ لگے جو ”ساڈے کولھ رہ۔“ اِیں واسطے او ڈُو ڈینہہ اُتھاں ریہا۔ تے اُوندے کلام دے سببّوں بئے وی بہُوں سارے لوک اُوندے اُتے اِیمان گِھن آئے۔ اُنہاں اُوں عورت کُوں آکھیا، ”ہُنڑ اساں تیڈے آکھنڑ تے ای اِیمان نئیں گِھن آئے کیوں جو اساں خود سُنڑ گِھدے تے جانڑدے ہیں جو ایہ فی الحقیقت دُنیا دا نجات ڈیوݨ آلا ہے۔“ ڈُو ڈینہاں بعد یسُوع اُتھوں روانہ تھی تے گلیل کُوں گِیا۔ اُوں خود گواہی ڈِتی جو نبی کُوں آپنڑے وطن ءچ عزت نئیں مِلدی۔ بس جِیں ویلے او گلیل ءچ آیا تاں گلیل دے لوک اُونکُوں خوشی نال مِلے، کیوں جو اُنہاں یروشلیم ءچ عید دے دوران اُوندے سارے کماں کُوں ڈِٹھا ہا جیہڑے اُوں کیتے ہَن۔ یسُوع وَل گلیل دی وستی قانا ءچ آیا جِتھاں اُوں پانڑی کُوں انگُور دا رَس بنڑایا ہا۔ اُتھاں بادشاہ دا ہِک ملازم ہا جِیندا پوتر کفرنحُوم ءچ بیمار ہا۔ او ایہ سُنڑ تے جو یسُوع یہُودیہ تُوں گلیل ءچ آ گِیا ہے، اُوندے کولھ گِیا تے اُونکُوں درخاست کرݨ لگا جو ”میڈا پوتر مرݨ دے نیڑے ہے تُساں وَنج تے اُونکُوں شِفا ڈیؤ۔“ یسُوع اُونکُوں آکھیا، ”جئیں تئیں تُساں لوک معجزہ تے عجیب کم نہ ڈیکھ گِھنو، اصلُوں اِیمان نہ گِھن آسو۔“ بادشاہ دے ملازم اُونکُوں آکھیا، ”مالک! میڈے پوتر دے مرݨ تُوں پہلے جُلو۔“ یسُوع اُونکُوں جواب ڈِتا ”وَنج تیڈا پوتر زندہ راہسی۔“ اُوں بندے اُوں گالھ دا یقین کیتا جیہڑی یسُوع اُونکُوں آکھی ہئی تے چلیا گِیا۔ او رستے ءچ ای ہا جو اُوندے نوکر اُونکُوں مِلے تے آکھنڑ لگے، ”تیڈا پوتر زندہ ہے۔“ اُوں اُنہاں کنُوں پُچھیا، ”اُونکُوں کیہڑے ویلے آرام تھیوݨ پِیا ہا؟“ اُنہاں ڈسایا جو اُوندا بُخار ڈوپہر ہِک وجے دے نیڑے لہہ گِیا ہا۔ وَل پِیُو جاݨ گِیا جو اُوہو وقت ہا جِیں ویلے یسُوع اُونکُوں آکھیا ہا جو ”تیڈا پوتر زندہ راہسی“ تے او خود تے اُوندا سارا گھرانڑا اِیمان گِھن آیا۔ ایہ ڈُوجھا معجزہ ہا جیہڑا یسُوع یہُودیہ تُوں گلیل ءچ آ تے ڈِکھایا۔ اِیندے بعد یہُودیاں دی عید ہئی تے یسُوع یروشلیم کُوں گِیا۔ یروشلیم ءچ بھیڈ آلے پھاٹک دے نیڑے ہِک حوض ہے جیہڑا عبرانی ءچ بیت حسدا اکھویندے تے اُوندے پنج برانڈے ہِن۔ اِنہاں ءچ بہُوں سارے بیمار، اندھے، منڈے تے فالج دے مریض پئے ہَن۔ [او پانڑی دے ہلنڑ دا اِنتظار کریندے ہَن کیوں جو رب دا فرشتہ کڈھائیں کڈھائیں حوض ءچ لہہ تے پانڑی ہلیندا ہا۔ پانڑی ہِلدے ای جیہڑا کوئی پہلے لہہ ویندا اُونکُوں شِفا مِل ویندی ہئی، بھانویں جو او کہیں وی مرض دا شکار ہووے۔] اُتھاں ہِک بندہ ہا جیہڑا اٹھتّریح (38) سالہاں کنُوں بیمار ہا۔ یسُوع اُونکُوں اُتھاں پِیا ڈِٹھا تے جاݨ گِھدا جو او بہُوں عرصے کنُوں اِیں حالت ءچ ہے تاں اُوں کنُوں پُچھیا، ”کیا تُوں شِفا پاوݨ چاہندیں؟“ اُوں بیمار جواب ڈِتا، ”مالک! جیہڑے ویلے پانڑی ہلایا ویندے تاں میڈا کوئی نئیں جیہڑا حوض ءچ لہاوݨ کیتے میڈی مدد کر سگے بلکہ میڈے حوض تئیں ویندے ویندے کوئی بِیا اُوندے ءچ لہہ ویندے۔“ یسُوع اُونکُوں آکھیا، ”اُٹھی تے آپنڑا بسترا چا تے ٹُر پِھر۔“ او بندہ فوراً ٹھیک تھی گِیا تے آپنڑی کَھٹ چا تے ٹُرݨ پِھرݨ لگا۔ او سبت دا ڈینہہ ہا۔ بس یہُودی اُوں بندے کُوں جیہڑا ٹھیک تھی گِیا ہا آکھنڑ لگے جو ”اَج سبت دا ڈینہہ ہے، تیکُوں تیڈا بسترا چا تے ٹُرݨ پِھرݨ جائز نئیں ۔“ اُوں جواب ڈِتا، ”جئیں بندے میکُوں شِفا بخشی اُوں میکُوں آکھیا ہا جو آپنڑا بسترا چا تے ٹُر پِھر۔“ اُنہاں اُونکُوں پُچھیا جو ”او کوݨ ہے جئیں تیکُوں بسترا چا تے ٹُرݨ پِھرݨ دا آکھیا ہے؟“ پر شِفا پاوݨ آلے بندے کُوں پتہ نہ ہا جو اُونکُوں آکھنڑ آلا کوݨ ہا کیوں جو یسُوع بِھیڑ دے سببّوں اگُوں نِکل گِیا ہا۔ اِیندے بعد او یسُوع کُوں ہیکل ءچ مِلیا۔ یسُوع اُونکُوں آکھیا، ”ڈیکھ تُوں ٹھیک تھی گئیں، وَل گُناہ نہ کریں، اِینویں نہ تھیوے جو تَیں اُتے اِیں کنُوں وی وڈی آفت آوے۔“ اُوں وَنج تے یہُودیاں کُوں ڈسایا، ”جئیں میکُوں شِفا ڈِتی ہے او یسُوع ہے۔“ اِیں واسطے یہُودی یسُوع کُوں ستاوݨ لگے کیوں جو او ایجھے کم سبت دے ڈینہہ کریندا ہا۔ پر یسُوع اُنہاں کُوں آکھیا جو ”میڈا باپ ہُنڑ تئیں آپنڑا کم کریندے تے مَیں وی کریندا ہاں۔“ اِیں وجہ کنُوں یہُودی اُونکُوں قتل کرݨ دی زیادہ کوشش کرݨ لگے کیوں جو او نہ صرف سبت دے حُکم دی خلاف ورزی کریندا بلکہ خُدا کُوں خاص آپنڑا باپ آکھ تے آپنڑے آپ کُوں خُدا دے برابر بنڑیندا ہا۔ بس یسُوع اُنہاں کُوں ایہ جواب ڈِتا، ”مَیں تُہاکُوں سچ آدھا ہاں جو پوتر آپنڑی مرضی نال کُجھ نئیں کر سگدا۔ او اُوہو کریندے جیہڑا او آپنڑے باپ کُوں کریندا ڈیدھے، کیوں جو جیہڑے کم او کریندے پوتر وی اُونویں ای کریندے۔ کیوں جو باپ پوتر کُوں پیار کریندے تے آپنڑے سارے کم جیہڑے او کریندے اُونکُوں ڈکھیندا ہے، بلکہ اِنہاں کنُوں وی وڈے وڈے کم اُونکُوں ڈکھیسی تاں جو تُساں حیران تھی ونجو۔ کیوں جو جِینویں باپ مُردیاں کُوں زندہ کر تے زندگی ڈیندے، اُونویں ای پوتر وی جِنہاں کُوں چاہندے زندگی ڈیندے۔ باپ کہیں دی عدالت نئیں کریندا بلکہ اُوں عدالت دا سارا کم پوتر کُوں ڈے ڈِتے، تاں جو سبھ لوک پوتر دی وی عزت کرݨ جِینویں باپ دی عزت کریندے ہِن۔ جیہڑا پوتر دی عزت نئیں کریندا او باپ دی وی جئیں پوتر کُوں بھیجیا ہے، عزت نئیں کریندا۔ مَیں تُہاکُوں سچ آدھا ہاں جو جیہڑا میڈا کلام سُنڑدے تے میڈے بھیجنڑ آلے دا یقین کریندے، ہمیشاں دی زندگی اُوندی ہے تے اُوندے اُتے سزا دا حُکم نئیں تھیندا بلکہ او موت ءچوں نِکل تے زندگی ءچ داخل تھی گِیا ہے۔ مَیں تُہاکُوں سچ آدھا ہاں جو او وقت آندا پئے بلکہ آ گِیا ہے جِیں ویلے مُردے خُدا دے پوتر دی اواز سُنڑسن تے جیہڑے سُنڑسن او زندہ راہسن۔ کیوں جو جِینویں باپ آپنڑے آپ ءچ زندگی رکھیندے اُونویں ای اُوں پوتر کُوں وی ایہ بخشیا جو آپنڑے ءچ زندگی رکھے۔ بلکہ اُوں اُونکُوں عدالت کرݨ دا وی اِختیار بخشیا، کیوں جو او اِبنِ آدم ہے۔ اِیں گالھ کنُوں حیران نہ تھیؤ، کیوں جو او وقت آندا پِیا ہے جو جِتّی قبراں ءچ ہِن، اُوندی اواز سُنڑ تے نِکل آسن۔ جِنہاں نیکی کیتی ہے او زندہ تھی تے زندگی پیسن تے جِنہاں بُرائی کیتی ہے او زندہ تھی تے سزا پیسن۔ مَیں آپنڑے آپ کنُوں کُجھ نئیں کر سگدا۔ مَیں جِینویں سُنڑدا ہاں عدالت کریندا ہاں، تے میڈی عدالت سچی ہے کیوں جو مَیں آپنڑی مرضی نئیں بلکہ آپنڑے بھیجنڑ آلے دی مرضی چاہندا ہاں۔ جے مَیں آپنڑی گواہی خود ڈیواں تاں میڈی گواہی سچی نئیں۔ ہِک بِیا ہے جیہڑا میڈی گواہی ڈیندے تے مَیں جانڑدا ہاں جو میڈے بارے ءچ اُوندی گواہی سچی ہے۔ تُساں یُوحنّا دے کولھ قاصد بھیجے تے اُوں حق دی گواہی ڈِتی۔ مَیں آپنڑے بارے ءچ اِنسان دی گواہی منظور نئیں کریندا وَل وی مَیں ایہ گالھیں اِیں واسطے کریندا ہاں جو تُساں نجات پاؤ۔ یُوحنّا چمکدا تے بلدا ہویا چراغ ہا تے تُساں کُجھ عرصے تئیں اُوندی روشنی ءچ خوش راہونڑا پسند کیتا۔ پر میڈے کولھ یُوحنّا دی گواہی کنُوں وڈی گواہی ہے، کیوں جو جیہڑے کم باپ میکُوں کرݨ کیتے ڈِتے یعنی جیہڑے مَیں کریندا ہاں او میڈے گواہ ہِن جو باپ میکُوں بھیجیا ہے۔ تے باپ جئیں میکُوں بھیجیا ہے، اُوں خود میڈے حق ءچ گواہی ڈِتی ہے۔ تُساں نہ تاں کڈھائیں اُوندی اواز سُنڑی ہے نہ ای اُوندی شکل ڈِٹھی ہے، تے اُوندے کلام کُوں آپنڑے دِلاں ءچ قائم نئیں رکھیندے کیوں جو جِینکُوں اُوں بھیجیا ہے اُوندا یقین نئیں کریندے۔ تُساں خُدا دے کلام ءچ گولھیندے ہیوے کیوں جو سمجھدے ہیوے جو اُوندے ءچ تُہاکُوں ہمیشاں دی زندگی مِلدی ہے۔ ایہ او ہے جیہڑا میڈی گواہی ڈیندے، وَل وی تُساں زندگی پاوݨ کیتے میڈے کولھ نئیں آوݨ چاہندے۔ مَیں اِنساناں کنُوں عزت نئیں چاہندا پر مَیں تُہاکُوں جانڑدا ہاں جو تُہاڈے ءچ خُدا دی محبت نئیں۔ مَیں آپنڑے باپ دے ناں تُوں آیا ہاں تے تُساں میکُوں قبول نئیں کریندے، پر جے کوئی بِیا آپنڑے ای ناں کنُوں آوے تاں تُساں اُونکُوں قبول کر گِھنسو۔ تُساں ہِک ڈُوجھے کنُوں عزت چاہندے ہیوے، تے جیہڑی عزت خُدائے واحد دی طرفوں مِلدی ہے اُونکُوں حاصل کرݨ نئیں چاہندے۔ تُساں کِینویں اِیمان گِھن آ سگدے ہیوے؟ ایہ نہ سمجھو جو مَیں باپ دے سامنڑے تُہاڈے اُتے اِلزام لیساں۔ تُہاڈے اُتے اِلزام لاوݨ آلا تاں ہے یعنی مُوسیٰ جئیں اُتے تُساں اُمید رکھی ہے۔ کیوں جو جے تُساں مُوسیٰ دا یقین کریندے تاں میڈا وی کریندے، اِیں واسطے جو اُوں میڈے بارے ءچ لِکھیا ہے۔ پر جِیں ویلے تُساں اُوندے لِکھے گالھیں دا یقین نئیں کریندے تاں میڈے گالھیں دا کِینویں یقین کریسو؟“ اِنہاں گالھیں دے بعد یسُوع گلیل دی جھیل دے پار گِیا، جِینکُوں تِبریاس دی جھیل وی اکھیندے ہِن۔ ہِک وڈی بِھیڑ اُوندے پِچُھوں تھی پئی کیوں جو جیہڑے معجزے او بیماراں کیتے کریندا ہا او اُنہاں کُوں ڈیدھے ہَن۔ وَل یسُوع پہاڑ اُتے چڑھ گِیا تے آپنڑے شاگرداں نال اُتھاں بہہ گِیا۔ یہُودیاں دی عید ِ فسح نیڑے ہئی۔ جِیں ویلے یسُوع نِگاہ چا تے ڈِٹھا جو میڈے کولھ وڈی بِھیڑ آندی پئی ہے تاں فِلپُس کُوں آکھیا، ”اساں اِنہاں دے کھاوݨ کیتے روٹیاں کِتھوں مُل گِھنوں؟“ پر اُوں اُونکُوں ازماوݨ کیتے ایہ آکھیا ہا کیوں جو او خود جانڑدا ہا جو مَیں کیا کریساں۔ فِلپُس جواب ءچ اُونکُوں آکھیا، ”اِنہاں کیتے ڈُو سو دینار دیاں روٹیاں وی پُوریاں نہ تھیسن جو ہر ہِک کُوں کُجھ مِل سگے۔“ اُوندے شاگرداں ءچوں ہِک، یعنی اندریاس جیہڑا شمعون پطرس دا بِھرا ہا، اُونکُوں آکھیا، ”اِتھاں ہِک چھوہر ہے جیندے کولھ جَوں دیاں پنج روٹیاں تے ڈُو مچھیاں ہِن، پر اِتی لوکاں ءچ اِنہاں نال کیا تھیسی؟“ یسُوع آکھیا، ”لوکاں کُوں بِلھاؤ۔“ اُتھاں بہُوں گھاہ ہئی۔ اِیں واسطے او مرد جیہڑے تقریباً پنج ہزار ہَن، تلے بہہ گئے۔ یسُوع او روٹیاں گِھدیاں تے خُدا دا شُکر ادا کیتا تے اُنہاں ءچ جیہڑے بیٹھے ہَن وَنڈ ڈِتیاں۔ تے اِینویں ای مچھیاں وی جِتّی جِینکُوں ضرورت ہئی وَنڈ ڈِتیاں۔ جِیں ویلے یکے لوک پیٹ بھر تے کھا چُکے تاں اُوں آپنڑے شاگرداں کُوں آکھیا جو ”بچے ہوئے ٹُکڑیاں کُوں جمع کر گِھنو تاں جو کُجھ وی ضائع نہ تھیوے۔“ بس لوکاں دے کھاوݨ تُوں بعد اُنہاں جَوں دیاں روٹیاں کنُوں بچے ہوئے ٹُکڑیاں کُوں جمع کیتا تے اُنہاں دیاں بارہاں ٹوکریاں بھر تے چاتیاں۔ بس لوک یسُوع دا ایہ معجزہ ڈیکھ تے آکھنڑ لگے، ”یقیناً اِیہو او نبی ہے جیہڑا دُنیا ءچ آوݨ آلا ہا ۔“ بس یسُوع ایہ معلوم کر تے جو او میکُوں زبردستی پکڑ تے بادشاہ بنڑاوݨ چاہندے ہِن، وَل کلھا پہاڑ دو روانہ تھی گِیا۔ جِیں ویلے شام تھئی تاں اُوندے شاگرد جھیل دو روانہ تھئے، تے کشتی ءچ بہہ تے جھیل دے پار کفرنحُوم شہر کیتے روانہ تھی گئے۔ اُوں ویلے اندھارا تھی گِیا ہا تے یسُوع اُنہاں کولھ حالی تئیں نہ آیا ہا، تے اندھاری دے سببّوں جھیل ءچ چھلاں اُٹھنڑ پے گئیاں۔ بس جِیں ویلے او کشتی کُوں چلیندے چلیندے ترے چار مِیل اگُوں نِکل آئے تاں اُنہاں یسُوع کُوں جھیل اُتے ٹُردے تے کشتی دے نیڑے آندے ڈِٹھا تے ڈر گئے۔ پر اُوں اُنہاں کُوں آکھیا، ”ڈرو نہ، مَیں ہاں۔“ بس اُنہاں اُونکُوں خوشی نال کشتی ءچ سوار کر گِھدا تے کشتی فوراً اُوں جاہ تے پُج گئی جِتھاں او ویندے پئے ہَن۔ ڈُوجھے ڈینہہ اُوں بِھیڑ، جیہڑی جھیل دے پار رہ گئی ہئی ایہ ڈِٹھا جو اِتھاں ہِک کشتی دے علاوہ کوئی بئی چھوٹی کشتی نہ ہئی تے یسُوع آپنڑے شاگرداں نال کشتی اُتے سوار نہ تھیّا ہا بلکہ صرف اُوندے شاگرد چلے گئے ہَن۔ وَل کُجھ چھوٹیاں کشتیاں تِبریاس تُوں اُوں جاہ دے نیڑے آئیاں جِتھاں اُنہاں یسُوع مالک دے شُکر کرݨ دے بعد روٹی کھادی ہئی۔ بس جِیں ویلے بِھیڑ ڈِٹھا جو نہ تاں یسُوع اُتھاں ہے، نہ اُوندے شاگرد تاں او خود چھوٹیاں کشتیاں ءچ بہہ تے یسُوع کُوں گولھنڑ کیتے کفرنحُوم آئے۔ جِیں ویلے اُنہاں یسُوع کُوں جھیل دے پار گولھ گِھدا تاں آکھیا، ”ربّی! تُساں اِتھاں کِیں ویلے آئے ہیوے؟“ یسُوع جواب ڈِتا، ”مَیں تُہاکُوں سچ آدھا ہاں جو تُساں میکُوں اِیں واسطے نئیں گولھیندے جو میڈے معجزے ڈِٹھے بلکہ اِیں واسطے جو تُہاکُوں پیٹ بھر تے کھاوݨ کُوں روٹیاں مِلیا ہَن۔ فانی خوراک کیتے محنت نہ کرو بلکہ اُوندے کیتے جیہڑی ہمیشاں دی زندگی تئیں باقی راہندی ہے جیہڑی اِبنِ آدم تُہاکُوں عطا کریسی۔ کیوں جو خُدا باپ اُونہی اُتے مُہر کیتی ہے۔“ بس اُنہاں اُونکُوں آکھیا جو ”اساں خُدا دے کم کرݨ کیتے کیا کرُوں؟“ یسُوع جواب ڈِتا، ”خُدا دا کم ایہ ہے جو جِینکُوں اُوں بھیجیا ہے، اُوندے اُتے اِیمان گِھن آؤ۔“ بس اُنہاں اُوں کنُوں پُچھیا، ”وَل تُساں کیہڑا معجزہ ڈکھیسو جِینکُوں ڈیکھ تے اساں تُہاڈے اُتے اِیمان گِھن آؤں؟ تُساں کیہڑا کم کریسو؟ ساڈے پِیُو ڈاڈا بیابان ءچ مَن کھادا اِیں واسطے لِکھیا ہے جو ’اُوں اُنہاں کُوں کھاوݨ کیتے اسمان کنُوں روٹی ڈِتی‘۔“ یسُوع اُنہاں کُوں آکھیا، ”مَیں تُہاکُوں سچ آدھا ہاں جو مُوسیٰ تاں تُہاکُوں اسمان تُوں او روٹی نہ ڈِتی بلکہ میڈا باپ تُہاکُوں اسمان تُوں حقیقی روٹی ڈیندا ہے۔ کیوں جو خُدا دی روٹی او ہے جیہڑی اسمان کنُوں لہہ تے دُنیا کُوں زندگی بخشدی ہے۔“ اُنہاں اُونکُوں آکھیا، ”مالک! ایہ روٹی ہمیشاں ساکُوں ڈِتا کر۔“ یسُوع اُنہاں کُوں آکھیا، ”زندگی دی روٹی مَیں ہاں۔ جیہڑا میڈے کولھ آسی کڈھائیں بُکھا نہ راہسی تے جیہڑا میڈے اُتے اِیمان گِھن آسی کڈھائیں ترِسّا نہ راہسی۔ پر مَیں تُہاکُوں آکھیا جو تُساں میکُوں ڈیکھ گِھدا ہے وَل وی اِیمان نئیں گِھن آندے۔ جِتی لوک باپ میکُوں ڈیندے، او میڈے کولھ آسن تے جیہڑا کوئی میڈے کولھ آسی مَیں اُونکُوں ہرگز نہ کڈھیساں۔ کیوں جو مَیں اسمان کنُوں اِیں واسطے نئیں لتھا جو آپنڑی مرضی پُوری کراں بلکہ اِیں واسطے جو آپنڑے بھیجنڑ آلے دی مرضی پُوری کراں۔ تے میڈے بھیجنڑ آلے دی مرضی ایہ ہے جو جِتی وی لوک اُوں میکُوں ڈِتے ہِن، مَیں اُنہاں ءچوں کہیں کُوں وَنجا نہ ڈیواں بلکہ سبھ کُوں قیامت آلے ڈینہہ ولا زندہ کراں۔ کیوں جو میڈے بھیجنڑ آلے دی مرضی ایہ ہے جو جیہڑا کوئی پوتر کُوں ڈیکھے تے اُوندے اُتے اِیمان گِھن آوے او ہمیشاں دی زندگی پاوے تے مَیں اُونکُوں قیامت آلے ڈینہہ ولا زندہ کراں۔“ بس یہُودی اُوندے اُتے بُڑبُڑ کرݨ لگے اِیں واسطے جو اُوں آکھیا ہا جو ”جیہڑی روٹی اسمان کنُوں لتھی ہئی او مَیں ہاں۔“ تے او آکھنڑ لگے جو، ”کیا ایہ یُوسف دا پوتر یسُوع نئیں جیندے ماء پِیُو کُوں اساں جانڑدے ہاں؟ ہُنڑ او کِینویں آدھے جو مَیں اسمان کنُوں لتھا ہاں؟“ یسُوع جواب ءچ اُنہاں کُوں آکھیا، ”آپس ءچ بُڑبُڑ نہ کرو۔ میڈے کولھ کوئی نئیں آ سگدا جئیں تئیں باپ جئیں میکُوں بھیجیا ہے اُونکُوں چھیک نہ گِھنے، تے مَیں اُونکُوں قیامت آلے ڈینہہ ولا زندہ کریساں۔ نبیاں دے صحیفیاں ءچ ایہ لِکھیا ہے جو ’او سبھ خُدا کنُوں تعلیم گِھنسن ۔‘ جئیں کہیں باپ تُوں سُنڑیا تے سِکھیا ہے، او میڈے کولھ آندے۔ اِیندا مطلب ایہ نئیں جو کہیں کڈھائیں باپ کُوں ڈِٹھے۔ صرف اُوں جیہڑا خُدا دی طرفوں ہے، اُوں ای باپ کُوں ڈِٹھے۔ مَیں تُہاکُوں سچ آدھا ہاں جو جیہڑا کوئی اِیمان گِھن آندے، ہمیشاں دی زندگی اُوندی ہے۔ زندگی دی روٹی مَیں ہاں۔ تُہاڈے پِیُو ڈاڈا بیابان ءچ مَن کھادا تے مر گئے۔ پر ایہ او روٹی ہے جیہڑی اسمان کنُوں لہندی ہے تاں جو بندہ اُوں روٹی ءچوں کھاوے تے نہ مرے۔ مَیں او زندگی دی روٹی ہاں جیہڑی اسمان کنُوں لتھی۔ جے کوئی اِیں روٹی ءچوں کھاوے تاں ہمیشاں تئیں زندہ راہسی۔ ایہ روٹی میڈا گوشت ہے جیہڑا مَیں ساری دُنیا دی زندگی کیتے ڈیساں۔“ اِیں تے یہُودیاں ءچ جھیڑا شروع تھی گِیا تے او آکھنڑ لگے، ”ایہ بندہ کِینویں ساکُوں آپنڑا گوشت کھاوݨ کیتے ڈے سگدے؟“ یسُوع اُنہاں کُوں آکھیا، ”مَیں تُہاکُوں سچ آدھا ہاں جو جئیں تئیں تُساں اِبنِ آدم دا گوشت نہ کھاؤ تے اُوندا خون نہ پِیؤ، تُہاڈے ءچ زندگی نہ ہوسی۔ جیہڑا میڈا گوشت کھاندے تے میڈا خون پِیندے، اُوندے ءچ ہمیشاں دی زندگی ہے تے مَیں اُونکُوں قیامت آلے ڈینہہ ولا زندہ کریساں۔ کیوں جو حقیقی کھانڑا میڈا گوشت تے پِیوݨ دی حقیقی چیز میڈا خون ہے ۔ جیہڑا کوئی میڈا گوشت کھاندے تے میڈا خون پِیندے، او میڈے ءچ قائم راہندے تے مَیں اُوندے ءچ۔ جِینویں زندہ باپ میکُوں بھیجیا تے مَیں باپ دی وجہ کنُوں زندہ ہاں، اِینویں ای جیہڑا میکُوں کھاسی او میڈی وجہ کنُوں زندہ راہسی۔ جیہڑی روٹی اسمان کنُوں لتھی ہے، اِیہو ہے۔ ایہ اُوں روٹی وانگُوں نئیں جِینکُوں پِیُو ڈاڈا کھادا تے مر گئے۔ جیہڑا ایہ روٹی کھاسی او ہمیشاں تئیں زندہ راہسی۔“ ایہ گالھیں یسُوع کفرنحُوم دے ہِک عبادت خانہ ءچ تعلیم ڈیندے ہوئے آکھیاں۔ ایہ گالھیں سُنڑ تے اُوندے شاگرداں ءچوں بہُوں ساریاں آکھیا جو ”ایہ تعلیم بہُوں سخت ہے، اِینکُوں کوݨ سُنڑ سگدے؟“ یسُوع ایہ جاݨ تے جو اُوندے شاگرد اِیں گالھ اُتے آپس ءچ بُڑبُڑ کریندے ہِن، اُنہاں کُوں آکھیا، ”کیا تُساں اِیں تُوں تُھڈا کھاندے ہیوے؟ جے تُساں اِبنِ آدم کُوں اُتے ویندا ڈیکھسو، جِتھاں او پہلے ہا، تاں کیا تھیسی؟ زندہ کرݨ آلی تاں رُوح ہے، اِنسانی طاقت کنُوں کُجھ نئیں تھی سگدا۔ جیہڑے گالھیں مَیں تُہاکُوں آکھیاں ہِن، او رُوح ہِن تے زندگی وی ہِن۔ پر تُہاڈے ءچوں کُجھ ایجھے ہِن جیہڑے اِیمان نئیں گِھن آئے۔“ (کیوں جو یسُوع شروع کنُوں جانڑدا ہا جو اِیمان نہ گِھن آوݨ آلے کوݨ ہِن تے کوݨ میکُوں پکڑویسی۔) وَل اُوں آکھیا، ”اِیں واسطے مَیں تُہاکُوں آکھیا ہا جو کوئی میڈے کولھ نئیں آ سگدا جئیں تئیں باپ اُونکُوں توفیق نہ بخشے۔“ اِیں تُوں اُوندے شاگرداں ءچوں بہُوں سارے اُونکُوں چھوڑ تے چلے گئے تے ولا اُوندے نال نہ ریہے۔ بس یسُوع اُنہاں بارہاں کنُوں پُچھیا، ”کیا تُساں وی ونجنڑ چاہندے ہیوے؟“ شمعون پطرس اُونکُوں جواب ڈِتا، ”مالک! اساں کیندے کولھ ونجُوں؟ ہمیشاں دی زندگی دے گالھیں تاں تُہاڈے ای کولھ ہِن۔ تے اساں اِیمان گِھن آئے تے جاݨ گئے ہیں جو خُدا دے قدُّوس تُساں ای ہیوے۔“ یسُوع اُنہاں کُوں جواب ڈِتا، ”کیا مَیں تُساں بارہاں کُوں نئیں چُنڑ گِھدا؟ وَل وی تُہاڈے ءچوں ہِک شیطان ہے۔“ اُوں ایہ شمعون اِسکریُوتی دے پوتر یہُوداہ دے بارے ءچ آکھیا کیوں جو اِیہو جیہڑا اُنہاں بارہاں ءچوں ہا، اُونکُوں پکڑواوݨ آلا ہا۔ اِنہاں گالھیں دے بعد یسُوع گلیل ءچ پِھردا ریہا کیوں جو یہُودیہ ءچ ونجنڑ نہ چاہندا ہا، اِیں واسطے جو اُتھاں یہُودی اُوندے قتل دی کوشش ءچ ہَن۔ پر یہُودیاں دی چھپراں دی عید نیڑے ہئی۔ بس اُوندے بِھرانواں اُونکُوں آکھیا، ”اِتُھوں کنُوں نِکل تے یہُودیہ دے علاقے دو چلیا وَنج تاں جو تیڈے شاگرد وی ایہ معجزے جیہڑے تُوں کریندیں، ڈیکھ سگن۔ کیوں جو کوئی ایجھا نئیں جیہڑا مشہور تھیوݨ چاہندا ہووے تے لُک تے کم کرے۔ جے تُوں اِنہاں کماں کُوں کریندیں تاں آپنڑے آپ کُوں دُنیا اُتے ظاہر کر۔“ کیوں جو اُوندے بِھرا وی اُوندے اُتے اِیمان نہ گِھن آئے ہَن۔ بس یسُوع اُنہاں کُوں آکھیا، ”میڈا مقررہ وقت اجنڑ نئیں آیا پر تُہاڈے کیتے سارا وقت مناسب ہے۔ دُنیا تُہاڈے نال نفرت نئیں رکھ سگدی پر میڈے نال رکھیندی ہے، کیوں جو مَیں اُوندے خلاف گواہی ڈیندا ہاں جو اُوندے کم بُرے ہِن۔ تُساں عید ءچ ونجو۔ مَیں اجنڑ اِیں عید ءچ نئیں ویندا، کیوں جو حالی تئیں میڈا وقت نئیں آیا۔“ ایہ گالھیں آکھ تے او گلیل دے علاقے ءچ ای ریہا۔ جِیں ویلے اُوندے بِھرا عید ءچ چلے گئے تاں او خود وی گِیا، پر ظاہری طور تے نئیں بلکہ خُفیہ طور تے۔ بس یہُودی عید ءچ اُونکُوں گولھیندے تے پُچھدے پِھردے ہَن جو ”او کِتھاں ہے؟“ تے لوک اُوندے بارے ءچ ہولے ہولے گالھیں کریندے پئے ہَن۔ کُجھ آدھے ہَن جو ”او نیک بندہ ہے“ تے کُجھ آدھے ہَن جو ”کائنی، او لوکاں کُوں گُمراہ کریندے۔“ وَل وی یہُودی سرداراں دے ڈر تُوں کوئی اُوندے بارے ءچ کُھل تے گالھ نہ کریندا ہا۔ جِیں ویلے عید دے ادھے ڈینہہ لنگھ گئے تاں یسُوع ہیکل ءچ وَنج تے تعلیم ڈیوݨ لگا۔ یہُودی حیران تھی تے آکھنڑ لگے جو ”اِیں کُوں بغیر پڑھے علم کِتھوں آ گِیا؟“ یسُوع جواب ءچ اُنہاں کُوں آکھیا، ”میڈی تعلیم میڈی نئیں بلکہ میڈے بھیجنڑ آلے دی ہے۔ جے کوئی اُوندی مرضی اُتے چلنڑ چاہوے تاں او اِیں تعلیم دے بارے ءچ جاݨ گِھنسی جو خُدا دی طرفوں ہے یا مَیں آپنڑے کولُھوں آدھا ہاں۔ جیہڑا آپنڑے کولُھوں کُجھ آدھے او آپنڑی عزت چاہندے پر جیہڑا آپنڑے بھیجنڑ آلے دی عزت چاہندے او سچا ہے تے اُوندے ءچ بُرائی نئیں۔ کیا مُوسیٰ تُہاکُوں شریعت نئیں ڈِتی؟ وَل وی تُہاڈے ءچوں کوئی شریعت اُتے عمل نئیں کریندا۔ تُساں کیوں میکُوں قتل کرݨ دی کوشش ءچ ہیوے؟“ لوکاں جواب ڈِتا، ”تیڈے ءچ تاں کوئی بدرُوح ہے۔ کوݨ تیڈے قتل دی کوشش ءچ ہے؟“ یسُوع جواب ءچ اُنہاں کُوں آکھیا، ”مَیں سبت دے ڈینہہ ہِک کم کیتے، تے تُساں حیران تھیندے ہیوے۔ پر اِیں سببّوں جو مُوسیٰ تُہاکُوں ختنے دا حُکم ڈِتے، (حالانکہ او مُوسیٰ دی طرفوں نئیں بلکہ پِیُو ڈاڈا کنُوں آندا پِیا ہے،) تُساں سبت دے ڈینہہ آپنڑے بالاں دا ختنہ کریندے ہیوے۔ جِیں ویلے سبت دے ڈینہہ بالاں دا ختنہ کیتا ویندے تاں جو مُوسیٰ دی شریعت نہ تروٹے، تاں تُساں مَیں کنُوں کیوں ناراض تھی گئے ہیوے جو مَیں ہِک بندے کُوں سبت دے ڈینہہ بالکل ٹھیک کر ڈِتے؟ صرف ظاہر کُوں ڈیکھ تے فیصلہ نہ کرو بلکہ اِنصاف نال کرو۔“ وَل یروشلیم دے کُجھ راہنڑ آلے آکھنڑ لگے، ”کیا ایہ اُوہو نئیں جیندے قتل دی کوشش تھیندی پئی ہے؟ پر ڈیکھو او کُھلے عام اکھیندے تے او اِینکُوں کُجھ نئیں آدھے۔ کیا سرداراں سچ مچ مَن گِھدے جو اِیہو المسیح ہے؟ اِیں بندے کُوں تاں اساں جانڑدے ہیں جو کِتھوں دا ہے، پر جِیں ویلے المسیح ظاہر تھیسی تاں کوئی نہ جانڑسی جو او کِتھوں دا ہے۔“ بس یسُوع ہیکل ءچ تعلیم ڈیندے ہوئے اُچی اواز ءچ آکھیا، ”تُساں میکُوں وی جانڑدے ہیوے تے ایہ وی جانڑدے ہیوے جو مَیں کِتھوں دا ہاں۔ مَیں آپنڑی مرضی نال نئیں آیا پر جئیں میکُوں بھیجیا ہے، او سچا ہے۔ تُساں اُونکُوں نئیں جانڑدے۔ مَیں اُونکُوں جانڑدا ہاں اِیں واسطے جو مَیں اُوندی طرفوں ہاں تے اُونہی میکُوں بھیجیا ہے۔“ اِیں گالھ تے لوک اُونکُوں پکڑن دی کوشش کرݨ لگے پر کہیں اُوندے اُتے ہتھ نہ پایا کیوں جو اجنڑ اُوندا وقت نہ آیا ہا۔ پر بِھیڑ ءچوں بہُوں سارے اُوندے اُتے اِیمان گِھن آئے تے آکھنڑ لگے جو ”جِیں ویلے المسیح آسی تاں کیا او اِیں بندے کنُوں زیادہ معجزے ڈکھیسی؟“ فریسیاں لوکاں تُوں سُنڑیا جو اُوندے بارے ءچ ہولے ہولے ایہ گالھیں کریندے ہِن۔ بس سردار کاہِناں تے فریسیاں اُونکُوں پکڑن کیتے ہیکل دے سپاہی بھیجے۔ یسُوع آکھیا، ”مَیں بِیا کُجھ ڈینہاں تئیں تُہاڈے کولھ ہاں، وَل مَیں آپنڑے بھیجنڑ آلے کولھ چلیا ویساں۔ تُساں میکُوں گولھیسو پر نہ پیسو، تے جِتھاں مَیں ہاں تُساں نئیں آ سگدے۔“ یہُودی آپس ءچ آکھنڑ لگے، ”ایہ کِتھاں ویسی جو اساں اُونکُوں گولھ نہ سگسوں؟ کیا او اُنہاں دے کولھ جیہڑے یُونانیاں ءچ اِڈے اُڈے وسدے ہِن چلیا ویسی تے یُونانیاں کُوں تعلیم ڈیسی؟ ایہ کیا گالھ ہے جیہڑی اُوں آکھی جو ’تُساں میکُوں گولھیسو پر نہ پیسو‘ تے ’جِتھاں مَیں ہاں، تُساں نئیں آ سگدے‘؟“ وَل عید دے آخری ڈینہہ جیہڑا سبھ تُوں خاص ڈینہہ ہے، یسُوع کھڑا تھیّا تے اُچی اواز ءچ آکھنڑ لگا، ”جے کوئی ترِسّا ہووے تاں میڈے کولھ آوے تے پِیوے۔ جیہڑا کوئی میڈے اُتے اِیمان گِھن آسی اُوندے دل ءچوں، جِینویں خُدا دے کلام ءچ لِکھیا ہے، زندگی دے پانڑی دیاں ندیاں وَیہہ پوسن۔“ اُوں ایہ گالھ اُوں رُوح دے بارے ءچ آکھی جیہڑا یسُوع اُتے اِیمان رکھنڑ آلیاں اُتے نازل تھیوݨ آلا ہا، کیوں جو رُوح القُدس اجنڑ تئیں نازل نہ تھیّا ہا، اِیں واسطے جو یسُوع اجنڑ آپنڑے جلال کُوں نہ پُجیا ہا۔ ایہ گالھیں سُنڑ تے بِھیڑ ءچوں بعض آکھیا، ”بیشک اِیہو او نبی ہے۔“ کُجھ آکھیا، ”ایہ المسیح ہے“ تے کُجھ آکھیا، ”کائنا، کیا مسیح گلیل تُوں آسی؟ کیا خُدا دے کلام ءچ ایہ نئیں لِکھیا جو المسیح داؤد دی نسل تے بیت لحم دی وستی ءچوں آسی، جیہڑا داؤد دا شہر ہا؟“ بس لوکاں ءچ اُوندے سببّوں اِختلاف تھیّا۔ اُنہاں ءچوں کُجھ اُونکُوں پکڑن چاہندے ہَن پر کہیں اُوندے اُتے ہتھ نہ پایا۔ جِیں ویلے ہیکل دے سپاہی سردار کاہِناں تے فریسیاں دے کولھ آئے تاں اُنہاں، اُنہاں کنُوں پُچھیا جو ”تُساں اُونکُوں کیوں نئیں گِھن آئے؟“ سپاہیاں جواب ڈِتا، ”کہیں بندے کڈھائیں ایجھا کلام نئیں کیتا۔“ فریسیاں اُنہاں کُوں جواب ڈِتا، ”کیا تُساں وی اُوندے دوکھے ءچ آ گئے ہیوے؟ کیا سرداراں یا فریسیاں ءچوں کوئی اُوندے اُتے اِیمان گِھن آئے؟ پر ایہ عام لوک جیہڑے شریعت کنُوں واقف نئیں لعنتی ہِن۔“ نِیکُدِیمُس جیہڑا یسُوع کولھ پہلے آیا ہا تے اُنہاں ءچوں ہا، اُوں آکھیا، ”کیا ساڈی شریعت کہیں بندے کُوں مُجرم بنڑیندی ہے جئیں تئیں اُونکُوں سُنڑ تے ایہ معلوم نہ کر گِھنے جو او کیا کریندے؟“ اُنہاں جواب ڈِتا، ”کیا تُوں وی گلیل دے علاقے دا ہیں؟ کلام دی تحقیق کر تے ڈیکھ جو گلیل دے علاقے ءچوں کوئی نبی نہ ہوسی۔“ [وَل اُنہاں ءچوں ہر ہِک آپنڑے آپنڑے گھر دو چلیا گِیا۔] پر یسُوع زیتون دے پہاڑ اُتے چلیا گِیا۔ سویل تھیندے ای او وَل ہیکل ءچ آیا۔ سارے لوک اُوندے کولھ آئے تے او بہہ تے اُنہاں کُوں تعلیم ڈیوݨ لگا۔ اِیں دوران شریعت دے عالم تے فریسی ہِک عورت کُوں گِھن آئے جیہڑی زِنا ءچ پکڑی گئی ہئی۔ اُنہاں اُونکُوں اَدھ ءچ کھڑا کر ڈِتا، تے یسُوع کُوں آکھیا، ”اُستاد! ایہ عورت زِنا کریندے ہوئے پکڑی گئی ہے۔ مُوسیٰ توریت ءچ ساکُوں حُکم ڈِتے جو ایجھی عورت کُوں سنگسار کرو۔ بس تُساں کیا اکھیندے ہیوے؟“ اُنہاں ایہ سوال اُونکُوں ازماوݨ کیتے پُچھیا تاں جو کہیں وجہ کنُوں اُوندے اُتے اِلزام لا سگنڑ ۔ پر یسُوع جُھک تے آپنڑی انگل نال زمین اُتے کُجھ لِکھنڑ لگ پِیا۔ جِیں ویلے او سوال کریندے ریہے تاں اُوں کھڑا تھی تے اُنہاں کُوں آکھیا، ”تُہاڈے ءچوں جیہڑا بے گُناہ ہووے اُوہو سبھ کنُوں پہلے اُونکُوں پتھر مارے۔“ تے ولا جُھک تے زمین اُتے انگل نال لِکھنڑ لگ پِیا۔ او ایہ سُنڑ تے وڈے کنُوں چھوٹے تئیں ہِک ہِک کر تے کِھسک گئے تے یسُوع کلھا رہ گِیا تے او عورت اُتھاں کھڑی رہ گئی۔ یسُوع سِدھا کھڑ تے اُونکُوں پُچھیا، ”عورت! ایہ لوک کِتھاں چلے گئے؟ کیا کہیں تیکُوں مُجرم نئیں کھڑایا؟“ اُوں آکھیا، ”مالک! کہیں نئیں۔“ یسُوع آکھیا، ”مَیں وی تیکُوں سزا نئیں سُنڑیندا۔ چلی وَنج تے ولا گُناہ نہ کریں۔“ یسُوع ولا لوکاں نال کلام کریندے ہوئے آکھیا، ”دُنیا دا نُور مَیں ہاں، جیہڑا کوئی میڈی پیروی کریندے او کڈھائیں اندھارے ءچ نہ چلسی بلکہ اُوندے کولھ زندگی دا نُور ہوسی۔“ فریسیاں اُونکُوں آکھیا، ”تُوں خود ای آپنڑے حق ءچ گواہی ڈیندیں۔ تیڈی گواہی سچی کائنی۔“ یسُوع جواب ءچ اُنہاں کُوں آکھیا، ”بھانویں مَیں آپ ای آپنڑی گواہی ڈیندا ہاں تاں وَل وی میڈی گواہی سچی ہے کیوں جو مَیں جانڑدا ہاں جو مَیں کِتھوں آیا ہاں تے کِتھاں ویندا ہاں۔ پر تُساں نئیں جانڑدے جو مَیں کِتھوں آندا ہاں یا کِتھاں ویندا ہاں۔ تُساں ظاہری شکل دے مطابق فیصلہ کریندے ہیوے، پر مَیں کہیں دا فیصلہ نئیں کریندا۔ تے جے مَیں کہیں دا فیصلہ کراں وی تاں میڈا فیصلہ سچا ہے کیوں جو مَیں کلھا نئیں بلکہ باپ، جئیں میکُوں بھیجیا ہے میڈے نال ہے۔ تے تُہاڈی توریت ءچ وی لِکھیا ہے جو ڈُو آدمیاں دی گواہی سچی ہوندی ہے ۔ ہِک تاں مَیں خود آپنڑی گواہی ڈیندا ہاں تے ہِک میڈا باپ میڈی گواہی ڈیندے جئیں میکُوں بھیجیا ہے۔“ اُنہاں پُچھیا، ”تیڈا باپ کِتھاں ہے؟“ یسُوع جواب ڈِتا، ”نہ تُساں میکُوں جانڑدے ہیوے، نہ ای میڈے باپ کُوں۔ جے میکُوں جانڑدے تاں میڈے باپ کُوں وی جانڑدے۔“ یسُوع ایہ گالھیں ہیکل ءچ ہدیہ پاوݨ آلی جاہ دے نیڑے تعلیم ڈیندے ویلے آکھیاں، پر کہیں اُونکُوں نہ پکڑیا کیوں جو اجنڑ اُوندا وقت نہ آیا ہا۔ یسُوع ولا اُنہاں کُوں آکھیا، ”مَیں ویندا ہاں تے تُساں میکُوں گولھیسو پر آپنڑے گُناہاں ءچ مرسو۔ جِتھاں مَیں ویندا ہاں، اُتھاں تُساں نئیں آ سگدے۔“ بس یہُودی آکھنڑ لگے، ”کیا او آپنڑے آپ کُوں مار گِھنسی، اِیں واسطے اکھیندے ’جِتھاں مَیں ویندا ہاں اُتھاں تُساں نئیں آ سگدے‘؟“ یسُوع اُنہاں کُوں آکھیا، ”تُساں زمین اُتے راہنڑ آلے ہیوے پر مَیں اسمان کنُوں ہاں۔ تُساں اِیں دُنیا دے ہیوے پر مَیں اِیں دُنیا دا نئیں۔ اِیں واسطے مَیں تُہاکُوں ڈسا ڈِتے جو تُساں آپنڑے گُناہاں ءچ مر سو، کیوں جو جے تُساں اِیمان نئیں گِھن آندے جو مَیں اُوہو ہاں تاں تُساں آپنڑے گُناہاں ءچ مرسو۔“ اُنہاں اُوں کنُوں پُچھیا، ”تُوں کوݨ ہیں؟“ یسُوع جواب ڈِتا، ”مَیں اُوہو ہاں جیہڑا مَیں شروع کنُوں تُہاکُوں اکھیندا آیا ہاں۔ مَیں تُہاڈے خلاف بہُوں کُجھ آکھ سگدا ہاں تے فیصلہ کر سگدا ہاں پر میڈا بھیجنڑ آلا سچا ہے تے جیہڑا کُجھ مَیں اُوں کنُوں سُنڑیا ہے اُوہو دُنیا کُوں اکھیندا ہاں۔“ او نہ سمجھے جو یسُوع ساکُوں آپنڑے باپ دے بارے ءچ اکھیندے۔ اِیں واسطے یسُوع آکھیا، ”جِیں ویلے تُساں اِبنِ آدم کُوں اُچائی اُتے چڑھیسو تاں تُہاکُوں معلوم تھیسی جو مَیں اُوہو ہاں تے آپنڑی طرفوں کُجھ نئیں کریندا بلکہ جِینویں باپ میکُوں سِکھایا ہے اُونویں ای ایہ گالھیں آدھا ہاں۔ تے جئیں میکُوں بھیجیا ہے او میڈے نال ہے۔ اُوں میکُوں کلھا نئیں چھوڑیا، کیوں جو مَیں ہمیشاں اُوہو کم کریندا ہاں جیہڑے اُونکُوں پسند ہِن۔“ جِیں ویلے او ایہ گالھیں آدھا پِیا ہا تاں بہُوں سارے اُوندے اُتے اِیمان گِھن آئے۔ بس یسُوع اُنہاں یہُودیاں کُوں جیہڑے اُوندے اُتے اِیمان گِھن آئے ہَن آکھیا جو ”جے تُساں میڈے کلام اُتے قائم راہسو تاں حقیقت ءچ میڈے شاگرد ہوسو، تے سچائی کُوں جاݨ گِھنسو تے سچائی تُہاکُوں آزاد کریسی۔“ اُنہاں اُونکُوں جواب ڈِتا، ”اساں تاں ابرہام دی اولاد ہیں تے کڈھائیں کہیں دی غُلامی ءچ نئیں ریہے۔ تُوں کیوں آدھیں جو تُساں آزاد کیتے ویسو؟“ یسُوع اُنہاں کُوں جواب ڈِتا، ”مَیں تُہاکُوں سچ آدھا ہاں جو جیہڑا کوئی گُناہ کریندے او گُناہ دا غُلام ہے۔ غُلام ہمیشاں تئیں گھر ءچ نئیں راہندا پر پوتر ہمیشاں راہندے۔ اِیں واسطے جے پوتر تُہاکُوں آزاد کریسی تاں تُساں واقعی آزاد تھیسو۔ مَیں جانڑدا ہاں جو تُساں ابرہام دی اولاد ہیوے، وَل وی تُساں میڈے قتل دی کوشش ءچ ہیوے کیوں جو تُہاڈے دِلاں ءچ میڈا کلام جاہ نئیں پَیندا۔ مَیں جیہڑا کُجھ آپنڑے باپ دے حضُور ڈِٹھے، تُہاکُوں اکھیندا ہاں تے تُساں وی اُوہو کریندے ہیوے جیہڑا تُساں آپنڑے باپ کنُوں سُنڑیا ہے۔“ اُنہاں جواب ءچ اُونکُوں آکھیا، ”ساڈا باپ تاں ابرہام ہے۔“ یسُوع اُنہاں کُوں آکھیا، ”جے تُساں ابرہام دی اولاد ہوندے تاں ابرہام وانگُوں کم وی کریندے۔ پر ہُنڑ تُساں میکُوں قتل کرݨ دی کوشش کریندے ہیوے، جئیں تُہاکُوں اُوہو سچائی دی گالھ ڈسائی جیہڑی خُدا کنُوں سُنڑی۔ ابرہام تاں اِینویں کڈھائیں نہ کیتا ہا۔ تُساں اُوہو کریندے ہیوے جیہڑا تُہاڈا پِیُو کریندا ہا۔“ اُنہاں اُونکُوں آکھیا، ”اساں ناجائز اولاد نئیں، ساڈا باپ ہِکو ہے یعنی خُدا۔“ یسُوع اُنہاں کُوں آکھیا، ”جے خُدا تُہاڈا باپ ہوندا تاں تُساں میڈے نال محبت کریندے، اِیں واسطے جو مَیں خُدا ءچوں نِکلیا تے آیا ہاں۔ مَیں آپنڑی مرضی نال نئیں آیا بلکہ اُوں میکُوں بھیجیا ہے۔ تُساں میڈے گالھیں کیوں نئیں سمجھدے؟ اِیں واسطے جو میڈا کلام سُنڑ نئیں سگدے۔ تُساں آپنڑے پِیُو ابلیس کنُوں ہیوے تے آپنڑے پِیُو دیاں خواہشاں کُوں پُورا کرݨ چاہندے ہیوے۔ او شروع کنُوں ای خونی ہے تے سچائی اُتے قائم نئیں ریہا کیوں جو اُوندے ءچ سچائی کائنی۔ جِیں ویلے او کُوڑ بُلیندا ہے تاں آپنڑی فطرت دے مطابق آدھے، کیوں جو او کُوڑا ہے بلکہ کُوڑاں دا پِیُو ہے۔ پر مَیں تاں سچ آدھا ہاں، تے اِیں واسطے تُساں میڈا یقین نئیں کریندے۔ تُہاڈے ءچوں کوݨ ہے جیہڑا میڈے ءچ گُناہ ثابت کر سگدے؟ جے مَیں سچ آدھا ہاں تاں تُساں میڈا یقین کیوں نئیں کریندے؟ جیہڑا خُدا دا ہوندے، او خُدا دے گالھیں سُنڑدے۔ تُساں اِیں واسطے نئیں سُنڑدے کیوں جو تُساں خُدا دے نئیں۔“ یہُودیاں جواب ءچ اُونکُوں آکھیا، ”کیا اساں ٹھیک نہ آدھے ہاسے جو تُوں سامری ہیں تے تیڈے ءچ بدرُوح ہے؟“ یسُوع جواب ڈِتا، ”میڈے ءچ بدرُوح نئیں پر مَیں آپنڑے باپ دی عزت کریندا ہاں تے تُساں میڈی بے عزتی کریندے ہیوے۔ پر مَیں آپنڑی تعریف نئیں چاہندا۔ ہاں، ہِک ہے جیہڑا چاہندے تے اُوہو فیصلہ کریندے۔ مَیں تُہاکُوں سچ آدھا ہاں جو جیہڑا کوئی میڈے کلام اُتے عمل کریسی او کڈھائیں نہ مرسی۔“ یہُودیاں اُونکُوں آکھیا جو ”ہُنڑ ساکُوں پتہ لگ گئے جو تیڈے ءچ بدرُوح ہے۔ ابرہام مر گِیا تے نبی وی مر گئے پر تُوں آدھیں جو ’جیہڑا کوئی میڈے کلام اُتے عمل کریسی او کڈھائیں نہ مرسی۔‘ کیا تُوں ساڈے پِیُو ابرہام تُوں وی وڈا ہیں، جیہڑا مر گئے؟ تے نبی وی مر گئے۔ تُوں آپنڑے آپ کُوں کیا سمجھدیں؟“ یسُوع جواب ڈِتا، ”جے مَیں آپنڑی تعریف آپ کراں تاں او تعریف کہیں کم دی نئیں، پر میڈا باپ جِینکُوں تُساں آپنڑا خُدا آدھے ہیوے، اُوہو میڈی تعریف کریندے۔ تُساں اُونکُوں نئیں جانڑیا، پر مَیں اُونکُوں جانڑدا ہاں تے جے آکھاں جو اُونکُوں نئیں جانڑدا تاں تُہاڈے وانگُوں کُوڑا ہوساں۔ پر مَیں اُونکُوں جانڑدا ہاں تے اُوندے کلام اُتے عمل کریندا ہاں۔ تُہاڈا پِیُو ابرہام میڈا ڈینہہ ڈیکھنڑ دی تمنا ءچ بہُوں خوش ہا تے اُوں ڈِٹھا تے خوش تھیّا۔“ یہُودیاں اُونکُوں آکھیا، ”تیڈی عُمر تاں حالی پنجھاہ سال وی نئیں، وَل کیا تُوں ابرہام کُوں ڈِٹھے؟“ یسُوع اُنہاں کُوں آکھیا، ”مَیں تُہاکُوں سچ آدھا ہاں جو اِیں کنُوں پہلے جو ابرہام پیدا تھیّا، مَیں ہاں۔“ ایہ سُنڑ تے اُنہاں اُونکُوں مارݨ کیتے پتھر چاتے، پر یسُوع اُنہاں کنُوں لُک تے ہیکل ءچوں نِکل گِیا۔ وَل یسُوع ویندے ہوئے ہِک بندے کُوں ڈِٹھا جیہڑا جماندرُو اندھا ہا۔ اُوندے شاگرداں اُوں کنُوں پُچھیا جو ”ربّی! کئیں گُناہ کیتا ہا جو ایہ اندھا جمّے، اِیں یا اِیندے ماء پِیُو ؟“ یسُوع جواب ڈِتا، ”نہ اِیں بندے گُناہ کیتا ہا نہ اِیندے ماء پِیُو، بلکہ ایہ اِیں واسطے تھیّا جو خُدا دے کم اُوندے ءچ ظاہر تھیوݨ۔ جئیں تئیں ڈینہہ دا سوجھلا ہے، ساکُوں اُوندا کم کرݨ ضرور ہے، جئیں میکُوں بھیجیا ہے۔ او رات آندی پئی ہے جیندے ءچ کوئی بندہ کم نئیں کر سگدا۔ جئیں تئیں مَیں دُنیا ءچ ہاں، دُنیا دا نُور ہاں۔“ ایہ آکھ تے اُوں زمین اُتے تُھک سٹی تے تُھک نال مِٹی لوئی تے او مِٹی اندھے دے اکھیں اُتے لا ڈِتی، تے اُونکُوں آکھیا، ”وَنج شیلوخ دے حوض ءچ دھو گِھن۔“ (شیلوخ دا مطلب ہے بھیجیا ہویا۔) بس اُوں اندھے وَنج تے دھو گِھدیاں تے سُجاکھا تھی تے وَل آیا۔ بس ہمسائے تے ڈُوجھے لوک جِنہاں پہلے اُونکُوں منگدے ڈِٹھا ہا، آکھنڑ لگے، ”کیا ایہ اُوہو بندہ نئیں جیہڑا بیٹھا منگدا ہوندا ہا؟“ کُجھ آکھیا، ”ایہ اُوہو ہے۔“ ڈُوجھیاں آکھیا، ”نئیں بلکہ کوئی اُوندا ہم شکل ہے۔“ اُوں خود آکھیا، ”مَیں اُوہو ہاں۔“ تاں او اُونکُوں آکھنڑ لگے ”وَل تیڈے اکھیں کِینویں کُھل گئیاں؟“ اُوں جواب ڈِتا، ”اُوں بندے، جِیندا ناں یسُوع ہے، مِٹی لو تے میڈے اکھیں اُتے لائی تے آکھیا ’وَنج تے شیلوخ ءچ دھو گِھن۔‘ مَیں گِیا تے دھو تے سُجاکھا تھی گِیا۔“ اُنہاں اُونکُوں آکھیا ”او کِتھاں ہے؟“ اُوں آکھیا ”مَیں نئیں جانڑدا۔“ لوک اُوں بندے کُوں جیہڑا پہلے اندھا ہا، فریسیاں دے کولھ گِھن گئے۔ جیہڑے ڈینہہ یسُوع مِٹی لو تے اندھے دے اکھیں کھولیاں ہَن، او سبت دا ڈینہہ ہا۔ اِیں واسطے فریسیاں وی اُوں کنُوں پُچھیا، ”تُوں کِینویں ڈیکھنڑ لگیا؟“ اُوں اُنہاں کُوں آکھیا، ”اُوں میڈے اکھیں اُتے مِٹی لائی، وَل مَیں دھو گِھدا تے ہُنڑ مَیں سُجاکھا ہاں۔“ وَل فریسیاں ءچوں کُجھ آکھنڑ لگے، ”ایہ بندہ خُدا دی طرفوں نئیں کیوں جو او سبت دے ڈینہہ کُوں نئیں منیندا۔“ پر کُجھ آکھنڑ لگے جو ”کوئی گُنہگار بندہ ایجھے معجزے کِینویں ڈِکھا سگدے؟“ بس اُنہاں ءچ پُھٹ پے گئی۔ وَل اُنہاں ولا اُوں اندھے کُوں آکھیا، ”جئیں بندے تیڈے اکھیں کھولیاں ہِن اُوندے بارے ءچ تیڈا کیا خیال ہے؟“ اُوں جواب ڈِتا، ”او نبی ہے۔“ پر یہُودیاں کُوں یقین نہ آیا جو ایہ پہلے اندھا ہا تے سُجاکھا تھی گِیا ہے، جئیں تئیں اُنہاں اُوندے ماء پِیُو کُوں سڈوا تے اُنہاں کنُوں نہ پُچھ گِھدا جو ”کیا ایہ تُہاڈا پوتر ہے، جیندے بارے ءچ تُساں آدھے ہیوے جو او اندھا جمیا ہا؟ وَل او ہُنڑ کِینویں سُجاکھا تھی گئے؟“ اُوندے ماء پِیُو اُنہاں کُوں جواب ڈِتا، ”اساں جانڑدے ہاں جو ایہ ساڈا ای پوتر ہے تے ایہ وی جو او اندھا جمیا ہا، پر ہُنڑ او کِینویں سُجاکھا تھی گئے یا کئیں اُوندے اکھیں کھولیاں، ایہ اساں نئیں جانڑدے۔ تُساں اُوں کنُوں پُچھو، او بالغ ہے، او آپ ڈسیسی۔“ اُوندے ماء پِیُو ایہ یہُودی سرداراں دے ڈر کنُوں آکھیا ہا کیوں جو اُنہاں آپس ءچ فیصلہ کر گِھدا ہا جو جیہڑا کوئی وی اِقرار کریسی جو یسُوع ای المسیح ہے، او عبادت خانہ ءچوں کڈھ ڈِتا ویسی۔ اِیں واسطے اُوندے ماء پِیُو آکھیا جو ”او بالغ ہے، اُوں کنُوں پُچھو۔“ بس اُنہاں اُوں بندے کُوں جیہڑا پہلے اندھا ہا ولا سڈوا تے آکھیا، ”سچ آکھ تے خُدا کُوں جلال ڈے۔ اساں تاں جانڑدے ہیں جو ایہ بندہ گُنہگار ہے۔“ اُوں جواب ڈِتا، ”مَیں ایہ نئیں جانڑدا جو او گُنہگار ہے یا نئیں۔ ہِک گالھ ضرور جانڑدا ہاں جو مَیں پہلے اندھا ہم تے ہُنڑ سُجاکھا ہاں۔“ وَل اُنہاں اُوں کنُوں پُچھیا، ”اُوں تیڈے نال کیا کیتے؟ کِینویں تیڈے اکھیں کھولیاں؟“ اُوں جواب ڈِتا، ”مَیں تاں تُہاکُوں پہلے ڈسا ڈِتے، تے تُساں نئیں سُنڑیا۔ وَل کیوں دوبارہ سُنڑݨ چاہندے ہیوے؟ کیا تُساں وی اُوندے شاگرد بنڑݨ چاہندے ہیوے؟“ او اُونکُوں بُرا بھلا آکھنڑ لگے جو، ”تُوں ای اُوندا شاگرد ہوسیں، اساں تاں مُوسیٰ دے شاگرد ہیں۔ اساں جانڑدے ہیں جو خُدا مُوسیٰ نال کلام کیتے پر اِیں بندے کُوں نئیں جانڑدے جو ایہ کِتھوں دا ہے۔“ اُوں بندے جواب ءچ اُنہاں کُوں آکھیا، ”ایہ بہُوں عجیب گالھ ہے جو تُساں نئیں جانڑدے جو او کِتھوں دا ہے بھانویں اُوں میڈے اکھیں کھول ڈِتیاں۔ اساں جانڑدے ہیں جو خُدا گُنہگاراں دی نئیں سُنڑدا پر جے کوئی خُدا دا خوف رکھے تے اُوندی مرضی اُتے چلے تاں او اُوندی سُنڑدے۔ دُنیا دے شروع کنُوں اِینویں کڈھائیں نئیں سُنڑیا جو جماندرُو اندھے دے اکھیں کہیں کھول ڈِتیاں ہووݨ۔ جے ایہ بندہ خُدا دی طرفوں نہ ہوندا تاں کُجھ نہ کر سگدا۔“ اُنہاں جواب ءچ آکھیا، ”تُوں تاں جمیّا ای گُناہ ءچ ہیں، تُوں ساکُوں کیا سکھیندیں؟“ تے اُنہاں اُونکُوں عبادت خانہ تُوں باہر کڈھ ڈِتا۔ جِیں ویلے یسُوع ایہ سُنڑیا جو اُنہاں اُونکُوں باہر کڈھ ڈِتے، تاں اُوں اُونکُوں گولھ تے آکھیا ”کیا تُوں اِبنِ آدم اُتے اِیمان گِھن آندیں؟“ اُوں جواب ڈِتا، ”مالک! او کوݨ ہے جو مَیں اُوندے اُتے اِیمان گِھن آواں؟“ یسُوع اُونکُوں آکھیا، ”تَیں اُونکُوں ڈِٹھے تے جیہڑا تیڈے نال گالھیں کریندا پئے، اُوہو ہے۔“ اُوں آکھیا، ”مالک! مَیں اِیمان گِھن آندا ہاں۔“ تے اُونکُوں سجدہ کیتا۔ یسُوع آکھیا، ”مَیں عدالت کرݨ کیتے دُنیا ءچ آیا ہاں تاں جو جیہڑے نئیں ڈیدھے او ڈیکھنڑ تے جیہڑے ڈیدھے ہِن، او اندھے تھی ونجنڑ۔“ کُجھ فریسی جیہڑے اُوندے نال کھڑے ہَن ایہ سُنڑ تے پُچھنڑ لگے، ”کیا اساں وی اندھے ہیں؟“ یسُوع اُنہاں کُوں آکھیا جو ”جے تُساں اندھے ہوندے تاں گُنہگار نہ سمجھے ویندے، پر تُساں آدھے ہیوے جو اساں ڈیدھے ہیں، اِیں واسطے تُہاڈا گُناہ قائم راہندے۔“ ”مَیں تُہاکُوں سچ آدھا ہاں جو جیہڑا کوئی بھیڈاں دے واڑے ءچ دروازے کنُوں داخل نئیں تھیندا بلکہ کہیں بئے پاسُوں ٹپ تے اندر آندے، او چور تے ڈاکو ہے۔ پر جیہڑا دروازے کنُوں اندر آندے او بھیڈاں دا آجڑی ہے۔ چوکیدار اُوندے کیتے دروازہ کھولیندے تے بھیڈاں اُوندی اواز سُنڑدیاں ہِن۔ او آپنڑی ہر بھیڈ دا ناں گِھن تے اُنہاں کُوں سڈیندے تے اُنہاں کُوں باہر گِھن ویندے۔ جِیں ویلے او آپنڑیاں ساریاں بھیڈاں کُوں باہر کڈھ گِھندے تاں اُنہاں دے اگُوں اگُوں ٹُردے تے اُوندیاں بھیڈاں اُوندے پِچُھوں پِچُھوں ٹُردیاں ہِن، کیوں جو او اُوندی اواز سُنجڑیندیاں ہِن، پر او کہیں غیر دے پِچُھوں کڈھائیں نہ ٹُرسن بلکہ اُوں کنُوں دُور بھجسن کیوں جو او اُوں غیر دی اواز نئیں سُنجڑیندیاں۔“ یسُوع اُنہاں کُوں ایہ مثال سُنڑائی پر او نہ سمجھے جو او اُنہاں نال کیا گالھیں کریندے۔ بس یسُوع اُنہاں کُوں ولا آکھیا، ”مَیں تُہاکُوں سچ آدھا ہاں جو بھیڈاں دا دروازہ مَیں ہاں۔ او سارے جیہڑے مَیں کنُوں پہلے آئے چور تے ڈاکو ہَن، اِیں واسطے بھیڈاں اُنہاں دی نہ سُنڑی۔ دروازہ مَیں ہاں۔ جیہڑا کوئی میڈے ذریعے داخل تھیسی، او نجات پیسی تے اندر باہر آندا ویندا راہسی تے ساوی گھاہ پیسی۔ چور صرف چوری کرݨ، مار گھتنڑ تے برباد کرݨ آندے۔ مَیں اِیں واسطے آیا ہاں جو لوک زندگی پاوݨ تے کثرت نال پاوݨ۔ چنگا آجڑی مَیں ہاں۔ چنگا آجڑی آپنڑیاں بھیڈاں کیتے جان ڈیندے۔ پر مزدُور جیہڑا نہ تاں بھیڈاں دا آجڑی ہوندے تے نہ ای مالک، او نہر کُوں آندا ڈیکھ تے بھیڈاں کُوں چھوڑ تے بھج ویندے تے نہر بھیڈاں کُوں پکڑ تے تِتربِتر کر ڈیندے۔ او اِیں واسطے بھج ویندے کیوں جو او مزدُور ہے تے اُونکُوں بھیڈاں دی فِکر نئیں۔ چنگا آجڑی مَیں ہاں۔ مَیں آپنڑیاں بھیڈاں کُوں جانڑدا ہاں تے او میکُوں جانڑدیاں ہِن، بالکل اُونویں ای جِینویں باپ میکُوں جانڑدے تے مَیں باپ کُوں جانڑدا ہاں۔ تے مَیں بھیڈاں کیتے آپنڑی جان ڈیندا ہاں۔ میڈیاں بیاں وی بھیڈاں ہِن جیہڑیاں اِیں واڑے دیاں نئیں۔ میکُوں ضرور ہے جو مَیں اُنہاں کُوں وی گِھن آواں تے او میڈی اواز سُنڑسن۔ وَل ہِکو اِجڑ تے ہِکو آجڑی ہوسی۔ میڈا باپ میکُوں اِیں واسطے پیار کریندے، جو مَیں آپنڑی جان قُربان کریندا ہاں تاں جو اُونکُوں ولا گِھن گِھناں۔ میڈی جان مَیں کنُوں کوئی وی نئیں کھسیندا بلکہ مَیں آپنڑی مرضی نال اُونکُوں قُربان کریندا ہاں۔ میڈے کولھ اُونکُوں ڈیوݨ دا وی اِختیار ہے تے اُونکُوں ولا گِھننڑ دا وی اِختیار ہے۔ ایہ حُکم میکُوں میڈے باپ کنُوں مِلیا ہے۔“ اِنہاں گالھیں دے سببّوں یہُودیاں ءچ وَل پُھٹ پے گئی۔ اُنہاں ءچوں بہُوں سارے تاں آکھنڑ لگے، ”اُوندے ءچ بدرُوح ہے تے او پاگل ہے۔ تُساں اُوندی کیوں سُنڑدے ہیوے؟“ بئے بندیاں آکھیا، ”ایہ ایجھے بندے دے گالھیں نئیں جیندے ءچ بدرُوح ہووے۔ کیا کوئی بدرُوح اندھیاں دے اکھیں کھول سگدی ہے؟“ یروشلیم ءچ ہیکل دی مخصوصیت دی عید ہئی تے سیالا ہا۔ یسُوع ہیکل دے سُلیمانی برانڈے ءچ ٹہلدا پِیا ہا۔ یہُودی اُوندے چودھارُوں جمع تھی تے آکھنڑ لگے، ”تُوں کڈھاں تئیں ساکُوں شک ءچ رکھیسیں؟ جے تُوں المسیح ہیں تاں ساکُوں صاف صاف ڈسا۔“ یسُوع جواب ڈِتا، ”مَیں تاں تُہاکُوں ڈسا ڈِتے پر تُساں میڈا یقین ای نئیں کریندے۔ جیہڑے کم مَیں آپنڑے باپ دے ناں نال کریندا ہاں، اُوہو میڈے گواہ ہِن۔ پر تُساں اِیں واسطے یقین نئیں کریندے کیوں جو تُساں میڈیاں بھیڈاں نئیں۔ میڈیاں بھیڈاں میڈی اواز سُنڑدیاں ہِن تے مَیں اُنہاں کُوں جانڑدا ہاں تے او میڈے پِچُھوں پِچُھوں ٹُردیاں ہِن۔ مَیں اُنہاں کُوں ہمیشاں دی زندگی ڈیندا ہاں تے او کڈھائیں ہلاک نہ تھیسن، تے کوئی اُنہاں کُوں میڈے ہتھ کنُوں کَھس نہ سگسی۔ میڈا باپ جئیں اُنہاں کُوں میڈے سپُرد کیتے ساریاں کنُوں وڈا ہے تے کوئی اُنہاں کُوں میڈے باپ دے ہتھ کنُوں نئیں کَھس سگدا۔ مَیں تے میڈا باپ ہِکو ہاں۔“ یہُودیاں ولا اُونکُوں سنگسار کرݨ کیتے پتھر چا تے۔ یسُوع اُنہاں کُوں آکھیا، ”مَیں تُہاکُوں آپنڑے باپ دی طرفوں وڈے وڈے کم ڈِکھائے ہِن۔ تُساں اُنہاں ءچوں کیہڑے کم دی وجہ کنُوں میکُوں سنگسار کریندے ہیوے؟“ یہُودیاں اُونکُوں جواب ڈِتا، ”چنگے کم دی وجہ کنُوں نئیں بلکہ کُفر دے سببّوں سنگسار کریندے ہیں کیوں جو تُوں محض اِنسان ہوندے ہوئے آپنڑے آپ کُوں خُدا بنڑیندیں۔“ یسُوع اُنہاں کُوں جواب ڈِتا، ”کیا تُہاڈی شریعت ءچ ایہ نئیں لِکھیا جو خُدا آکھے، ’تُساں خُدا ہیوے ؟‘ جِیں ویلے اُوں اُنہاں کُوں خُدا آکھیا جِنہاں کولھ اُوندا کلام آیا، تے کتاب ِ مُقدّس غلط نئیں تھی سگدی، تاں تُساں میڈے بارے ءچ جِینکُوں باپ مقرر کر تے دُنیا ءچ بھیجیا، کِینویں اکھیندے ہیوے جو تُوں کُفر بکدا ہیں، اِیں واسطے جو مَیں آکھیا، مَیں خُدا دا پوتر ہاں؟ جے مَیں آپنڑے باپ دے کم نہ کراں تاں میڈا یقین نہ کرو۔ پر جے مَیں کریندا ہاں تاں بھانویں میڈا یقین نہ کرو پر اُنہاں کماں دا یقین تاں کرو، تاں جو جاݨ گِھنو تے سمجھ گِھنو جو باپ میڈے ءچ ہے تے مَیں باپ ءچ۔“ اُنہاں ولا اُونکُوں پکڑن دی کوشش کیتی پر او اُنہاں دے ہتُھوں نِکل گِیا۔ یسُوع ولا یردن دریا دے پار اُوں جاہ تے چلیا گِیا جِتھاں یُوحنّا شروع ءچ بپتسمہ ڈیندا ہا تے اُتھائیں ریہا۔ بہُوں سارے لوک اُوندے کولھ آئے تے آکھنڑ لگے ”یُوحنّا تاں کوئی معجزہ نئیں ڈِکھایا پر جیہڑا کُجھ یُوحنّا اِیندے بارے ءچ آکھیا ہا او سچ ہا۔“ تے اُتھاں بہُوں سارے اُوندے اُتے اِیمان گِھن آئے۔ لعزر ناں دا ہِک بندہ بیمار ہا۔ او آپنڑے بھینڑیں مریم تے مَرتھا نال بیت عنیاہ ناں دی وستی ءچ راہندا ہا۔ بیمار لعزر دی بھینڑ اُوہو مریم ہئی جئیں خُداوند دے سر ءچ عِطر وِیٹیا ہا تے آپنڑے والاں نال اُوندے پیر پُونجھے ہَن۔ اِیں واسطے اُوندے بھینڑیں یسُوع کُوں سنیہا بھیجیا جو مالک! جِینکُوں تُساں عزیز رکھیندے ہیوے، او بیمار ہے۔ یسُوع ایہ سُنڑ تے آکھیا، ”اِیں بیماری دا انجام موت نئیں بلکہ ایہ خُدا دا جلال ظاہر کرݨ کیتے ہے تاں جو اِیندے ذریعے خُدا دے پوتر دا جلال ظاہر تھیوے۔“ یسُوع مَرتھا تے اُوندی بھینڑ مریم تے لعزر نال محبت رکھیندا ہا۔ بس جِیں ویلے اُوں سُنڑیا جو او بیمار ہے تاں جِتھاں ہا اُتھائیں ڈُو ڈینہہ بئے ٹِک پِیا۔ وَل اِیندے بعد شاگرداں کُوں آکھیا، ”آؤ ولا یہُودیہ کُوں جُلوں۔“ شاگرداں اُونکُوں آکھیا، ”ربّی! کُجھ ڈینہہ پہلے تاں یہُودی تُہاکُوں سنگسار کرݨ دی کوشش ءچ ہَن تے وَل وی تُساں اُتھاں واپس ونجنڑ چاہندے ہیوے؟“ یسُوع جواب ڈِتا، ”کیا ڈینہہ ءچ بارہاں گھنٹے نئیں ہوندے؟ جیہڑا بندہ ڈینہہ ءچ ٹُردے، تُھڈا نئیں کھاندا، اِیں واسطے جو او دُنیا دے سوجھلے کُوں ڈیدھے۔ پر جے او رات ویلے ٹُردے تاں اندھارے دی وجہ کنُوں تُھڈا کھاندے، کیوں جو اُوندے کولھ سوجھلا نئیں۔“ وَل اُنہاں کُوں آکھنڑ لگا، ”ساڈا دوست لعزر سَم گِیا ہے پر مَیں اُونکُوں نیندر کنُوں جگاوݨ ویندا پِیا ہاں۔“ بس شاگرداں اُونکُوں آکھیا، ”مالک! جے او سَم گِیا ہے تاں چنگا تھی ویسی۔“ یسُوع تاں لعزر دی موت دے بارے ءچ آکھیا ہا، پر اُنہاں سمجھیا جو او عام نیندر دی گالھ کریندے۔ وَل یسُوع اُنہاں کُوں صاف لفظاں ءچ ڈسایا جو ”لعزر مر گِیا ہے تے مَیں تُہاڈے سببّوں خوش ہاں جو اُتھاں نہ ہم تاں جو تُساں اِیمان گِھن آؤ، پر آؤ اساں اُوندے کولھ جُلوں۔“ وَل توما جِینکُوں جاڑا آدھے ہَن باقی شاگرداں کُوں آکھنڑ لگا جو ”آؤ اساں وی جُلوں تاں جو اُوندے نال مرُوں۔“ اُتھاں پُج تے یسُوع کُوں پتہ لگیا جو لعزر کُوں قبر ءچ رکھے چار ڈینہہ تھی گئے ہِن۔ بیت عنیاہ یروشلیم کنُوں تقریباً ڈُو مِیل دے فاصلے تے ہا تے بہُوں سارے یہُودی مَرتھا تے مریم کُوں اُنہاں دے بِھرا دے بارے ءچ تسلی ڈیوݨ آئے ہَن۔ مَرتھا یسُوع دے آوݨ دی خبر سُنڑ تے اُونکُوں مِلنڑ کیتے باہر نِکلی پر مریم گھر ءچ ای ریہی۔ مَرتھا یسُوع کُوں آکھیا، ”مالک! جے تُساں اِتھاں ہوندے تاں میڈا بِھرا نہ مردا، پر مَیں جانڑدی ہاں جو ہُنڑ وی جیہڑا کُجھ تُساں خُدا کنُوں منگسو، او تُہاکُوں ڈیسی۔“ یسُوع اُونکُوں آکھیا، ”تیڈا بِھرا ولا زندہ تھی ویسی۔“ مَرتھا جواب ڈِتا، ”مَیں جانڑدی ہاں جو او قیامت آلے ڈینہہ زندہ تھی ویسی۔“ یسُوع اُونکُوں آکھیا، ”قیامت تے زندگی تاں مَیں ہاں۔ جیہڑا میڈے اُتے اِیمان گِھن آندے بھانویں او مر وی ونجے، وَل وی زندہ راہسی۔ تے جیہڑا کوئی زندہ ہے تے میڈے اُتے اِیمان گِھن آندے او کڈھائیں نہ مرسی۔ کیا تُوں اِیں گالھ اُتے اِیمان رکھیندی ہیں؟“ اُوں اُونکُوں آکھیا، ”ہاں مالک! میڈا اِیمان ہے جو خُدا دا پوتر المسیح جیہڑا دُنیا ءچ آوݨ آلا ہا، تُساں ای ہیوے۔“ ایہ گالھ آکھ تے مَرتھا چلی گئی تے آپنڑی بھینڑ مریم کُوں اَنج سڈ تے آکھنڑ لگی جو ”اُستاد آ گئے تے تیکُوں سڈیندے۔“ او ایہ سُنڑدے ای فوراً اُٹھی تے یسُوع دے کولھ آئی۔ (یسُوع حالی وستی ءچ داخل نہ تھیّا ہا بلکہ اُوں جاہ اُتے ہا جِتھاں مَرتھا اُونکُوں مِلی ہئی۔) جیہڑے یہُودی گھر ءچ مریم کُوں تسلی ڈیندے پئے ہَن، جِیں ویلے اُنہاں ڈِٹھا جو مریم جلدی نال اُٹھی تے باہر گئی ہے تاں اِیں خیال نال اُوندے پِچُھوں ٹُر پئے جو او قبر اُتے رووݨ ویندی پئی ہے۔ جِیں ویلے مریم اُوں جاہ اُتے پُجی جِتھاں یسُوع ہا تاں اُونکُوں ڈیکھ تے اُوندے پیراں ءچ ڈھے تے آکھیا، ”مالک! جے تُساں اِتھاں ہوندے تاں میڈا بِھرا نہ مردا۔“ جِیں ویلے یسُوع اُونکُوں تے یہُودیاں کُوں جیہڑے اُوندے نال آئے ہَن، روندے ڈِٹھا تاں اُونکُوں بہُوں افسوس تھیّا تے ڈُکھی تھی تے آکھیا، ”تُساں اُونکُوں کِتھاں رکھے؟“ اُنہاں آکھیا، ”اے خُداوند! ساڈے نال آ تے خود ڈیکھ گِھنو۔“ یسُوع رووݨ لگیا۔ اِیں واسطے یہُودیاں آکھیا، ”ڈیکھو او اُونکُوں کتنا عزیز ہا۔“ پر اُنہاں ءچوں کُجھ آکھیا، ”کیا ایہ بندہ جئیں اندھے دے اکھیں کھولیاں، اِیں بندے کُوں مرݨ تُوں بچا نہ سگیا؟“ یسُوع بہُوں ڈُکھی دل نال قبر اُتے آیا۔ او ہِک غار ہئی تے اُوندے اگُوں ہِک پتھر رکھیا ہویا ہا۔ یسُوع آکھیا، ”پتھر کُوں ہٹا ڈیؤ۔“ پر موئے بندے دی بھینڑ مَرتھا اُونکُوں آکھیا، ”مالک! اُوندے ءچوں تاں ہُنڑ بدبُو آندی ہے کیوں جو اُونکُوں موئے ہوئے چار ڈینہہ تھی گئے ہِن۔“ یسُوع اُونکُوں آکھیا، ”کیا مَیں تیکُوں نہ آکھیا ہم جو جے تُوں اِیمان گِھن آسیں تاں خُدا دا جلال ڈیکھسیں؟“ بس اُنہاں پتھر کُوں ہٹا ڈِتا۔ وَل یسُوع اسمان دو اکھیں چا تے آکھیا، ”باپ! مَیں تیڈا شُکر کریندا ہاں جو تُوں میڈی سُنڑ گِھدی۔ مَیں جانڑدا ہاں جو تُوں ہمیشاں میڈی سُنڑدا ہیں پر مَیں اِنہاں لوکاں دی خاطر جیہڑے اِتھاں کھڑے ہِن، ایہ آکھیا تاں جو او اِیمان گِھن آوݨ جو تَیں ای میکُوں بھیجیا ہے۔“ ایہ آکھنڑ دے بعد اُوں اُچی اواز ءچ آکھیا، ”لعزر! باہر نِکل آ۔“ جیہڑا مر گِیا ہا او باہر نِکل آیا۔ اُوندے ہتھ پیر کفن نال بدھے ہوئے ہَن تے اُوندا مُنہ رومال نال ولھیٹیا ہویا ہا۔ یسُوع اُنہاں کُوں آکھیا، ”اُونکُوں کھول تے ونجنڑ ڈیؤ۔“ بس بہُوں سارے یہُودی جیہڑے مریم دے کولھ آئے ہَن تے جِنہاں یسُوع دا ایہ کم ڈِٹھا، اُوندے اُتے اِیمان گِھن آئے۔ پر اُنہاں ءچوں کُجھ لوکاں فریسیاں دے کولھ وَنج تے اُنہاں کُوں یسُوع دے اِیں کم دی خبر ڈِتی۔ وَل سردار کاہِناں تے فریسیاں صدر عدالت دا کٹھ کیتا تے آکھنڑ لگے، ”اساں کیا کریندے ہیں؟ ایہ بندہ تاں بہُوں معجزے ڈکھیندا ہے۔ جے اساں اُونکُوں اِینویں چھوڑ ڈیؤں تاں سبھ اُوندے اُتے اِیمان گِھن آسن تے رومی اِتھاں آ تے ساڈی جاہ تے ساڈی قوم ڈوہائیں کُوں برباد کر ڈیسن۔“ اُنہاں ءچوں ہِک بندہ جِیندا ناں کائفا ہا تے جیہڑا اُوں سال کاہِن ِ اعظم ہا، آکھنڑ لگا، ”تُساں کُجھ نئیں جانڑدے، تے نہ سوچیندے ہیوے جو ساڈے کیتے ایہ چنگا ہے جو قوم دی خاطر ہِک بندہ مار ڈِتا ونجے نہ جو ساری قوم برباد تھیوے۔“ پر اُوں ایہ آپنڑی طرفوں نئیں بلکہ اُوں سال دے کاہِن ِ اعظم دی حیثیت نال نبُوّت کیتی ہئی جو یسُوع پُوری قوم کیتے مرسی۔ تے نہ صرف یہُودی قوم کیتے بلکہ اِیں واسطے وی جو خُدا دے فرزنداں کُوں جیہڑے تِتربِتر تھی گئے ہَن جمع کر تے ہِک کر ڈیوے۔ بس او اُوں ڈینہہ تُوں یسُوع دے قتل دا منصوبہ بنڑاوݨ لگے۔ اِیں واسطے یسُوع یہُودیاں ءچ سرِعام گُھمنڑ پِھرݨ چھوڑ ڈِتا تے بیابان دے نیڑے دے علاقے ءچ اِفرائِیم ناں دے شہر دو چلیا گِیا تے اُتھاں آپنڑے شاگرداں نال راہنڑ لگا۔ جِیں ویلے یہُودیاں دی عید ِ فسح نیڑے ہئی تاں بہُوں سارے لوک دیہات دے علاقیاں کنُوں یروشلیم گئے تاں جو عید ِ فسح کنُوں پہلے آپنڑے آپ کُوں پاک کرݨ۔ او یسُوع کُوں گولھنڑ تے ہیکل ءچ جمع تھی تے ہِک بئے کُوں آکھنڑ لگے، ”تیڈا کیا خیال ہے؟ کیا او عید ءچ نہ آسی؟“ سردار کاہِناں تے فریسیاں حُکم ڈِتا ہویا ہا جو جے کہیں کُوں پتہ لگے جو یسُوع کِتھاں ہے تاں او فوراً اِطلاع ڈیوے تاں جو اساں اُونکُوں گرفتار کر سگوں۔ وَل فسح کنُوں چِھی ڈینہہ پہلے یسُوع بیت عنیاہ ءچ آیا جِتھاں لعزر ہا جِینکُوں یسُوع مُردیاں ءچوں زندہ کیتا ہا۔ اُتھاں اُنہاں اُوندے کیتے شام دا کھانڑا تیار کیتا۔ مَرتھا خدمت کریندی پئی ہئی تے لعزر اُنہاں ءچوں ہا جیہڑے یسُوع نال دسترخوان اُتے بیٹھے ہَن۔ اُوں ویلے مریم کوئی ادھا لِیٹر جٹاماسی دا خالص تے بہُوں مہانگا عِطر یسُوع دے پیراں اُتے لا تے آپنڑے والاں نال اُوندے پیراں کُوں پُونجھیا۔ تے سارے گھر ءچ عِطر دی خوشبو کِھنڈ گئی۔ پر یہُوداہ اِسکریُوتی جیہڑا یسُوع دے شاگرداں ءچوں ہا تے جیہڑا بعد ءچ اُونکُوں پکڑواوݨ آلا ہا، آکھیا، ”ایہ عِطر ترے سو دینار ءچ ویچ تے غریباں کُوں کیوں نہ ڈِتا گِیا؟“ اُوں ایہ اِیں واسطے نہ آکھیا ہا جو اُونکُوں غریباں دی فِکر ہئی بلکہ اِیں واسطے جو او چور ہا تے اُوندے کولھ پیسے آلی تھیلی ہوندی ہئی تے جیہڑا کُجھ اُوندے ءچ سٹیا ویندا ہا، اُوندے ءچوں او کُجھ کڈھ گِھندا ہا۔ یسُوع آکھیا، ”اُونکُوں چھوڑ ڈیؤ۔ اُوں ایہ عِطر میکُوں دفن کرݨ دے ڈینہہ کیتے رکھیا ہویا ہا۔ کیوں جو غریب تاں ہمیشاں تُہاڈے نال راہسن پر مَیں ہمیشاں تُہاڈے نال نہ راہساں۔“ اِیں دوران یہُودیاں دے بہُوں سارے لوک ایہ معلوم کر تے جو او اُتھاں ہے نہ صرف یسُوع دے سببّوں بلکہ لعزر کُوں وی ڈیکھنڑا کیتے آئے جِینکُوں اُوں مُردیاں ءچوں زندہ کیتا ہا۔ اِیں واسطے سردار کاہِناں لعزر کُوں وی مار گھتنڑ دا منصوبہ بنڑایا کیوں جو اُوندے سببّوں بہُوں سارے یہُودی اُنہاں کُوں چھوڑ تے یسُوع تے اِیمان گِھن آئے ہَن۔ ڈُوجھے ڈینہہ بہُوں سارے لوکاں جیہڑے عید کیتے آئے ہَن، ایہ سُنڑ تے جو یسُوع یروشلیم ءچ آندا پِیا ہے، کھجور دیاں لڑیاں گِھدیاں تے اُوندے اِستقبال کیتے آئے تے نعرے مارݨ لگے جو ”ہوشعنا! مُبارک ہے او جیہڑا رب العالمین دے ناں تُوں آندا ہے تے اِسرائیل دا بادشاہ ہے۔“ جِیں ویلے یسُوع کُوں گڈھاں دا بچّہ مِلیا تاں اُوندے اُتے سوار تھی گِیا جِینویں لِکھیا ہے جو ”یروشلیم دے لوکو! تُساں نہ ڈرو۔ ڈیکھو تُہاڈا بادشاہ آندا پِیا ہے۔ او گڈھاں دے بچّے اُتے سوار ہے ۔“ اُوں ویلے تاں اُوندے شاگرد ایہ گالھیں نہ سمجھے پر جِیں ویلے یسُوع آپنڑے جلال کُوں پُجیا تاں اُنہاں کُوں یاد آیا جو ایہ سارے گالھیں اُوندے بارے ءچ لِکھیاں ہَن تے لوکاں اُوندے نال ایہ سلوک کیتا ہا۔ او لوک جیہڑے یسُوع دے نال ہَن جِیں ویلے اُوں اواز ڈے تے لعزر کُوں قبر ءچوں باہر سڈیا، تے مُردیاں ءچوں زندہ کیتا، اِیں گالھ دی گواہی ڈیندے ریہے۔ اِیں سببّوں بہُوں سارے لوک اُوندے اِستقبال کیتے نِکلے کیوں جو اُنہاں سُنڑیا ہا جو اُوں ایہ معجزہ ڈِکھایا ہے۔ فریسیاں ایہ ڈیکھ تے ہِک ڈُوجھے کُوں آکھیا، ”کُجھ سوچو! ساڈے کنُوں کُجھ نئیں بنڑدا۔ ڈیکھو ساری دُنیا اُوندے پِچُھوں ٹُر پئی ہے۔“ جیہڑے لوک عید تے عبادت کیتے آئے ہَن، اُنہاں ءچوں کُجھ یُونانی ہَن۔ او فِلپُس دے کولھ آئے جیہڑا گلیل دے شہر بیت صیدا دا راہنڑ آلا ہا تے درخاست کیتی جو ”سائیں! اساں یسُوع کُوں ڈیکھنڑ چاہندے ہیں۔“ فِلپُس آ تے اندریاس کُوں ڈسا یا، تے وَل اندریاس تے فِلپُس یسُوع کُوں خبر ڈِتی۔ یسُوع جواب ڈِتا، ”اِبنِ آدم دا جلال ظاہر تھیوݨ دا وقت آ گِیا ہے۔ مَیں تُہاکُوں سچ آدھا ہاں جو جئیں تئیں کنڑک دا دانڑا زمین ءچ ڈھے تے مر نئیں ویندا، کلھا راہندھے، پر جے او مر ونجے تاں بہُوں سارا پھل پیدا کریندے۔ جیہڑا بندہ آپنڑی جان کُوں عزیز رکھیندے، او اُونکُوں ونجیسی پر جیہڑا اِیں دُنیا ءچ آپنڑی جان نال نفرت رکھیندے او اُونکُوں ہمیشاں دی زندگی کیتے محفوظ رکھیسی۔ جے کوئی میڈی خدمت کرݨ چاہندے، اُونکُوں ضرور ہے جو میڈی پیروی کرے، تے جِتھاں مَیں ہاں اُتھاں میڈا خادم وی ہوسی۔ جے کوئی میڈی خدمت کرے تاں میڈا باپ اُوندی عزت کریسی۔ ہُنڑ میڈا دل گھبریندا ہے، بس مَیں کیا آکھاں؟ باپ! میکُوں اِیں ویلے کنُوں بچا؟ نئیں، مَیں تاں اِیں مقصد کیتے اِیں ویلے تئیں پُجیا ہاں۔ باپ! آپنڑے ناں کُوں جلال ڈے۔“ وَل اسمان کنُوں اواز آئی جو ”مَیں اُونکُوں جلال ڈِتا ہے تے وَل وی ڈیساں۔“ جیہڑے لوک اُتھاں کھڑے سُنڑدے ہَن، اُنہاں آکھیا جو ”بدّل دی گاج ہے۔“ بیاں آکھیا جو ”فرشتہ اُوندے نال کلام کیتے۔“ یسُوع جواب ءچ آکھیا جو ”ایہ اواز تُہاڈے کیتے آئی ہے نہ جو میڈے کیتے۔ ہُنڑ دُنیا دی عدالت کیتی ویندی ہے۔ ہُنڑ دُنیا دا سردار باہر کڈھ ڈِتا ویسی تے جِیں ویلے مَیں زمین کنُوں اُتے چڑھایا ویساں تاں ساریاں کُوں آپنڑے کولھ چھیک گِھنساں۔“ اُوں ایہ آکھ تے ظاہر کر ڈِتا جو او کیجھی موت مرسی ۔ لوکاں اُونکُوں جواب ڈِتا ”اساں شریعت ءچوں ایہ سُنڑیا ہے جو المسیح ہمیشاں تئیں زندہ راہسی، وَل تُساں کیوں آدھے ہیوے جو ’اِبنِ آدم دا اُچے اُتے چڑھایا ونجنڑ ضرور ہے؟‘ ایہ اِبنِ آدم کوݨ ہے؟“ یسُوع اُنہاں کُوں جواب ڈِتا، ”نُور تُہاڈے نال تھوڑی دیر تئیں بِیا ہے۔ جئیں تئیں نُور تُہاڈے نال ہے نُور ءچ چلدے راہو، اِینویں نہ تھیوے جو اندھارا تُہاکُوں آ جھلے۔ جیہڑا بندہ اندھارے ءچ چلدے، او نئیں جانڑدا جو کِتھاں ویندے۔ جئیں تئیں نُور تُہاڈے نال ہے، نُور اُتے اِیمان گِھن آؤ تاں جو نُور دے فرزند بنڑ سگو۔“ یسُوع ایہ گالھیں آکھ تے چلیا گِیا تے اُنہاں کنُوں آپنڑے آپ کُوں لُکایا۔ بھانویں اُوں اِتی سارے معجزے اُنہاں دے سامنڑے کیتے ہَن، وَل وی او اُوندے اُتے اِیمان نہ گِھن آئے۔ تاں جو یسعیاہ نبی دا آکھیا پُورا تھیوے جو اُوں آکھیا جو ”یا رب! ساڈے پیغام اُتے کوݨ اِیمان گِھن آئے؟ تے رب دی قُدرت کیندے اُتے ظاہر تھئی ؟“ اِیہو وجہ ہئی جو او اِیمان نہ رکھ سگے، جِینویں یسعیاہ ہِک بئی جاہ اُتے آکھیا، ”اُوں اُنہاں دے اکھیں کُوں اندھا تے دِلاں کُوں سخت کر ڈِتا تاں جو اِینویں نہ تھیوے جو او آپنڑے اکھیں کنُوں ڈیکھنڑ تے آپنڑے دِلاں کنُوں سمجھنڑ تے رجُوع کرݨ تے مَیں اُنہاں کُوں شِفا بخشاں ۔“ یسعیاہ ایہ اِیں واسطے آکھیا جو اُوں المسیح دا جلال ڈِٹھا تے اُوں اُوندے بارے ءچ کلام کیتا۔ وَل وی بہُوں سارے سردار اُوندے اُتے اِیمان تاں گِھن آئے پر فریسیاں دی وجہ کنُوں آپنڑے اِیمان دا اِقرار نہ کریندے ہَن، کِتھائیں اِینویں نہ تھیوے جو او عبادت خانہ ءچوں کڈھ ڈِتے ونجنڑ۔ کیوں جو او اِنسان تُوں عزت پاوݨ، خُدا تُوں عزت پاوݨ کنُوں زیادہ پسند کریندے ہَن۔ یسُوع اُچی اواز ءچ آکھیا جو ”جیہڑا کوئی میڈے اُتے اِیمان گِھن آندے، او صرف میڈے اُتے نئیں بلکہ میڈے بھیجنڑ آلے اُتے اِیمان گِھن آندے۔ تے جیہڑا میکُوں ڈیدھے، او میڈے بھیجنڑ آلے کُوں ڈیدھے۔ مَیں نُور تھی تے دُنیا ءچ آیا ہاں تاں جو جیہڑا میڈے اُتے اِیمان گِھن آوے او اندھارے ءچ نہ راہوے۔ جے کوئی میڈے گالھیں سُنڑدے تے اُنہاں اُتے عمل نئیں کریندا تاں مَیں اُوندی عدالت نہ کریساں کیوں جو مَیں دُنیا دی عدالت کرݨ نئیں آیا بلکہ نجات ڈیوݨ آیا ہاں۔ جیہڑا کوئی میڈے اُتے اِیمان نئیں رکھیندا تے میڈے گالھیں کُوں قبول نئیں کریندا، ہِک ہے جیہڑا اُوندی عدالت کریسی یعنی جیہڑا کلام مَیں کیتے، آخری ڈینہہ اُوہو اُونکُوں سزا دے لائق کھڑیسی۔ کیوں جو مَیں آپنڑی طرفوں کُجھ نئیں آدھا بلکہ اسمانی باپ جئیں میکُوں بھیجیا ہے اُونہی میکُوں حُکم ڈِتے جو کیا آکھاں تے کیا بولاں۔ تے مَیں جانڑدا ہاں جو اُوندا حُکم ہمیشاں دی زندگی ہے۔ بس مَیں اُوہو آدھا ہاں جیندے آکھنڑ دا حُکم میکُوں باپ ڈِتے۔“ عید ِ فسح شروع تھیوݨ آلی ہئی تے یسُوع کُوں معلوم ہا جو اُوندا دُنیا تُوں رُخصت تھی تے باپ کولھ ونجنڑ دا ویلا آ گئے۔ او آپنڑے لوکاں نال جیہڑے دُنیا ءچ ہَن محبت رکھیندا ہا تے آخر تئیں محبت رکھیندا ریہا۔ شام دے کھانڑے دا ویلا ہا تے ابلیس پہلے ای شمعون دے پوتر یہُوداہ اِسکریُوتی دے دل ءچ اُونکُوں پکڑوا ڈیوݨ دا خیال پا ڈِتا ہا۔ یسُوع ایہ جاݨ تے جو باپ ساریاں چیزاں میڈے ہتھ ءچ کر ڈِتیاں ہِن، تے مَیں خُدا دے کولُھوں آیا تے خُدا ای دے کولھ واپس ویندا ہاں، دسترخوان تُوں اُٹھی تے آپنڑا چولا لہا ڈِتا تے ہِک تولیہ گِھن تے آپنڑی چیل نال بدھیا۔ اِیندے بعد اُوں ہِک تھاں ءچ پانڑی گھتیا تے آپنڑے شاگرداں دے پیر دھووݨ، تے اُوں رومال نال پُونجھنڑ شروع کیتے جیہڑا آپنڑی چیل نال بدھیا ہا۔ جِیں ویلے او شمعون پطرس تئیں پُجیا تاں پطرس اُونکُوں آکھیا، ”مالک! کیا تُساں میڈے پیر دھوسو؟“ یسُوع جواب ءچ اُونکُوں آکھیا، ”جیہڑا کُجھ مَیں کریندا ہاں تُوں اُونکُوں ہُنڑ نئیں سمجھدا پر بعد ءچ جاݨ گِھنسیں۔“ پطرس اُونکُوں آکھیا، ”تُساں میڈے پیر کڈھائیں نہ دھوسو۔“ یسُوع اُونکُوں جواب ڈِتا، ”جے مَیں تیکُوں نہ دُھوواں تاں تیڈی میڈے نال کوئی شراکت نئیں۔“ شمعون پطرس اُونکُوں آکھیا، ”مالک! صرف میڈے پیر ای نئیں بلکہ ہتھ تے سر وی دھو ڈیؤ۔“ یسُوع اُونکُوں آکھیا، ”جئیں دھا گِھدے اُونکُوں پیراں دے سِوا بِیا کُجھ دھووݨ دی ضرورت نئیں کیوں جو او بالکل پاک ہے، تے تُساں پاک ہیوے پر سارے نئیں۔“ کیوں جو اُونکُوں پتہ ہا جو کوݨ اُونکُوں پکڑویسی، اِیں واسطے اُوں آکھیا جو تُساں یکے پاک نئیں۔ جِیں ویلے اُوں اُنہاں دے پیر دھو گِھدے تاں آپنڑے کپڑے پا تے آپنڑی جاہ تے وَل بہہ گِیا تے اُنہاں کُوں آکھیا، ”مَیں تُہاڈے نال جیہڑا کُجھ کیتے، کیا تُساں اُوندا مطلب سمجھدے ہیوے؟ تُساں میکُوں اُستاد تے مالک آدھے ہیوے تے تُہاڈا آکھنڑ ٹھیک ہے کیوں جو مَیں ہاں۔ بس جِیں ویلے مَیں تُہاڈے اُستاد تے مالک تُہاڈے پیر دھوتے تاں تُہاڈا وی فرض ہے جو ہِک ڈُوجھے دے پیر دھوتا کرو۔ کیوں جو مَیں تُہاکُوں ہِک نمونہ ڈِتے جو جِینویں مَیں کیتے، تُساں وی اُونویں ای کرو۔ مَیں تُہاکُوں سچ آدھا ہاں جو کوئی نوکر آپنڑے مالک کنُوں وڈا نئیں ہوندا تے نہ ای کوئی بھیجیا ہویا آپنڑے بھیجنڑ آلے کنُوں۔ جے تُساں اِنہاں گالھیں کُوں جانڑدے ہیوے تاں مُبارک ہیوے پر شرط ایہ ہے جو اُنہاں اُتے عمل وی کرو۔ مَیں تُساں ساریاں دے بارے ءچ نئیں آدھا۔ جِنہاں کُوں مَیں چُنڑیا ہے مَیں اُنہاں کُوں جانڑدا ہاں۔ پر کلام دی ایہ گالھ پُوری تھیوݨ ضرور ہے جو جیہڑا میڈی روٹی کھاندے اُوہو میڈے اُتے لَت چیندے۔ ہُنڑ مَیں اُوندے تھیوݨ تُوں پہلے ای تُہاکُوں ڈسا ڈیندا ہاں تاں جو جِیں ویلے ایہ تھی ونجے تاں تُساں اِیمان گِھن آؤ جو مَیں اُوہو ہاں۔ مَیں تُہاکُوں سچ آدھا ہاں جو جیہڑا میڈے بھیجے ہوئے کُوں قبول کریندے او میکُوں قبول کریندے تے جیہڑا میکُوں قبول کریندے او میڈے بھیجنڑ آلے کُوں قبول کریندے۔“ اِنہاں گالھیں دے بعد یسُوع آپنڑے دل ءچ بہُوں گھبرایا تے ایہ گواہی ڈِتی جو ”مَیں تُہاکُوں سچ آدھا ہاں جو تُہاڈے ءچوں ہِک میکُوں پکڑ ویسی۔“ شاگرد ہِک بئے کُوں شک دی نِگاہ نال ڈیکھنڑ لگے جو او کیندے بارے ءچ آدھے۔ اُوندے شاگرداں ءچوں ہِک بندہ جِینکُوں یسُوع عزیز رکھیندا ہا، دسترخوان اُتے اُوندے بالکل نال بیٹھا ہا۔ بس شمعون پطرس اُونکُوں اِشارہ کر تے آکھیا، ”پُچھ جو او کیندے بارے ءچ آدھے ہِن۔“ اُوں یسُوع دو جُھک تے پُچھیا، ”مالک! او کوݨ ہے؟“ یسُوع جواب ڈِتا، ”جِینکُوں مَیں روٹی دا گِراں بوڈ تے ڈیساں اُوہو ہوسی۔“ وَل اُوں گِراں بوڈیا تے شمعون اِسکریُوتی دے پوتر یہُوداہ کُوں ڈِتا۔ اِیں گِراں کھاوݨ دے بعد شیطان یہُوداہ ءچ سما گِیا۔ بس یسُوع اُونکُوں آکھیا جو ”جیہڑا کُجھ تیکُوں کرنڑا ہے جلدی کر گِھن۔“ پر دسترخوان اُتے کہیں کُوں معلوم نہ تھیّا جو اُوں اُونکُوں اِینویں کیوں آکھیا۔ کیوں جو یہُوداہ دے کولھ پیسے آلی تھیلی راہندی ہئی اِیں واسطے کُجھ سوچیا جو یسُوع اُونکُوں عید کیتے ضروری سامان مُل گِھننڑ دا آدھا پِیا ہے یا ایہ جو غریباں کُوں کُجھ ڈیوے۔ بس اُوں روٹی دا گِراں گِھدا تے فوراً باہر چلیا گِیا، تے ایہ رات دا ویلا ہا۔ جِیں ویلے یہُوداہ باہر چلیا گِیا تاں یسُوع آکھیا، ”ہُنڑ اِبنِ آدم جلال پایا ہے تے خُدا اُوندے ءچ جلال پایا ہے۔ تے کیوں جو خُدا دا جلال اُوندے تُوں ظاہر تھیسی اِیں واسطے خُدا وی اُوندا جلال ظاہر کریسی بلکہ فوراً کریسی۔ بالو! مَیں تھوڑی دیر بِیا تُہاڈے نال ہاں۔ تُساں میکُوں گولھیسو پر جِینویں مَیں یہُودیاں کُوں آکھیا جو ’جِتھاں مَیں ویندا ہاں، اُتھاں تُساں نئیں آ سگدے،‘ اُونویں ای ہُنڑ تُہاکُوں وی آدھا ہاں۔ مَیں تُہاکُوں ہِک نواں حُکم ڈیندا ہاں جو تُساں ہِک ڈُوجھے نال محبت رکھو۔ جِینویں مَیں تُہاڈے نال محبت رکھی تُساں وی ہِک ڈُوجھے نال محبت رکھو۔ جے تُساں ہِک ڈُوجھے نال محبت رکھیسو تاں سارے لوک جاݨ گِھنسن جو تُساں میڈے شاگرد ہیوے۔“ شمعون پطرس اُونکُوں آکھیا، ”مالک! تُساں کِتھاں ویندے ہیوے؟“ یسُوع جواب ڈِتا ”جِتھاں مَیں ویندا ہاں ہُنڑ تاں تُوں میڈے پِچُھوں نئیں آ سگدا پر بعد ءچ میڈے پِچُھوں آسیں۔“ پطرس اُونکُوں آکھیا، ”مالک! مَیں ہُنڑ تُہاڈے پِچُھوں کیوں نئیں آ سگدا؟ مَیں تاں آپنڑی جان وی تُہاڈے کیتے ڈے ڈیساں۔“ یسُوع جواب ڈِتا، ”کیا تُوں واقعی میڈے کیتے آپنڑی جان ڈیسیں؟ مَیں تیکُوں سچ آدھا ہاں جو کُکڑ بانگ نہ ڈیسی جئیں تئیں تُوں ترے پھیری میڈا اِنکار نہ کر گِھن سیں۔“ ”تُہاڈا دل نہ گھبراوے۔ تُساں خُدا اُتے اِیمان رکھیندے ہیوے، میڈے اُتے وی اِیمان رکھو۔ میڈے باپ دے گھر ءچ بہُوں سارے مکان ہِن، جے نہ ہوندے تاں مَیں تُہاکُوں ڈسا ڈیندا کیوں جو مَیں ویندا ہاں تاں جو تُہاڈے کیتے جاہ تیار کراں۔ تے جے مَیں وَنج تے تُہاڈے کیتے جاہ تیار کراں تاں ولا آ تے تُہاکُوں آپنڑے نال گِھن ویساں تاں جو جِتھاں مَیں ہاں تُساں وی ہوو۔ جِتھاں مَیں ویندا ہاں تُساں اُتھوں دی راہ جانڑدے ہیوے۔“ توما اُونکُوں آکھیا، ”مالک! اساں نئیں جانڑدے جو تُساں کِتھاں ویندے ہیوے، وَل راہ کِینویں جانڑوں؟“ یسُوع اُونکُوں آکھیا جو ”راہ، حق تے زندگی مَیں ہاں، میڈے وسیلہ دے بغیر کوئی باپ دے کولھ نئیں آندا۔ جے تُساں میکُوں جاݨ گِھدا ہوندا تاں میڈے باپ کُوں وی جانڑدے۔ ہُنڑ تُساں اُونکُوں جاݨ گئے ہیوے بلکہ اُونکُوں ڈیکھ گِھدے۔“ فِلپُس اُونکُوں آکھیا، ”مالک! ساکُوں باپ ڈِکھاؤ، ساڈے کیتے اِیہو بہُوں ہے۔“ یسُوع اُونکُوں آکھیا، ”فِلپُس! مَیں اِتی عرصے تُوں تُہاڈے نال ہاں، کیا تُوں میکُوں نئیں جانڑدا؟ جئیں میکُوں ڈِٹھے، اُوں باپ کُوں ڈِٹھے۔ تُوں کیوں آدھیں جو ساکُوں باپ ڈِکھا؟ کیا تیکُوں یقین نئیں جو مَیں باپ ءچ ہاں تے باپ میڈے ءچ؟ مَیں جیہڑے گالھیں تُہاکُوں آدھا ہاں آپنڑی طرفوں نئیں آدھا بلکہ میڈا باپ میڈے ءچ رہ تے آپنڑا کم کریندے۔ میڈا یقین کرو جو مَیں باپ ءچ ہاں تے باپ میڈے ءچ، نئیں تاں میڈے کماں دے سببّوں ای میڈا یقین کرو۔ مَیں تُہاکُوں سچ آدھا ہاں جو جیہڑا میڈے اُتے اِیمان رکھیندے او وی اُوہو کم کریسی جیہڑے مَیں کریندا ہاں بلکہ اِنہاں کنُوں وی وڈے کم کریسی کیوں جو مَیں باپ دے کولھ ویندا ہاں۔ تے جیہڑا کُجھ تُساں میڈے ناں تُوں منگسو، مَیں اُوہو کریساں تاں جو باپ دا جلال پوتر دے وسیلے ظاہر تھیوے۔ جے تُساں میڈے ناں تُوں میڈے کنُوں کُجھ منگسو تاں مَیں اُوہو کریساں۔ جے تُساں میڈے نال محبت کریندے ہیوے تاں میڈے حُکماں اُتے عمل کرو۔ تے مَیں باپ کنُوں درخاست کریساں تے او تُہاکُوں ڈُوجھا مددگار بخش ڈیسی تاں جو او ہمیشاں تئیں تُہاڈے نال راہوے یعنی سچائی دا رُوح، جِینکُوں دُنیا حاصل نئیں کر سگدی کیوں جو نہ تاں اُونکُوں ڈیدھی ہے نہ جانڑدی ہے۔ پر تُساں اُونکُوں جانڑدے ہیوے کیوں جو او تُہاڈے نال راہندے تے تُہاڈے اندر ہوسی۔ مَیں تُہاکُوں یتیم نہ چُھڑیساں، مَیں تُہاڈے کولھ آساں۔ ایہ دُنیا کُجھ دیر بعد میکُوں نہ ڈیکھ سگسی پر تُساں میکُوں ڈیدھے راہسو۔ کیوں جو مَیں زندہ ہاں، تُساں وی زندہ راہسو۔ اُوں ڈینہہ تُساں جاݨ گِھنسو جو مَیں آپنڑے باپ ءچ ہاں تے تُساں میڈے ءچ ہیوے تے مَیں تُہاڈے ءچ۔ جیندے کولھ میڈے حُکم ہِن تے او اُنہاں کُوں منیندے، اُوہو میڈے نال محبت کریندے۔ تے جیہڑا میڈے نال محبت کریندے او میڈے باپ دا پیارا ہوسی تے مَیں اُوندے نال محبت رکھیساں تے آپنڑے آپ کُوں اُوندے اُتے ظاہر کریساں۔“ وَل اُوں یہُوداہ جیہڑا اِسکریُوتی نہ ہا اُونکُوں آکھیا، ”مالک! کیا وجہ ہے جو تُساں آپنڑے آپ کُوں ساڈے اُتے تاں ظاہر کریسو پر دُنیا اُتے نئیں؟“ یسُوع جواب ءچ اُونکُوں آکھیا جو ”جے کوئی میڈے نال محبت کریندے تاں او میڈے کلام اُتے عمل کریسی تے میڈا باپ اُوندے نال محبت کریسی تے اساں اُوندے کولھ آسُوں تے اُوندے نال راہسوں۔ جیہڑا میڈے نال محبت نئیں رکھیندا او میڈے کلام اُتے عمل نئیں کریندا۔ جیہڑا کلام تُساں سُنڑدے ہیوے او میڈا نئیں بلکہ باپ دا ہے جئیں میکُوں بھیجیا۔ مَیں ایہ سبھ گالھیں تُہاڈے نال راہندے ہوئے تُہاکُوں ڈسائیاں۔ پر او مددگار یعنی رُوح القُدس جِینکُوں میڈا باپ میڈے ناں نال بھجیسی، اُوہو تُہاکُوں سارے گالھیں سکھیسی تے جیہڑا کُجھ مَیں تُہاکُوں آکھیا ہے، او سبھ تُہاکُوں یاد ڈیویسی۔ مَیں تُہاکُوں اِطمینان ڈِتی ویندا ہاں، آپنڑا اِطمینان تُہاکُوں ڈیندا ہاں۔ ایہ ایجھا اِطمینان نئیں جیہڑا دُنیا ڈیندی ہے۔ تُہاڈا دل نہ گھبراوے تے نہ ڈرے۔ تُساں میڈے کنُوں سُنڑیا ہے جو مَیں ویندا ہاں تے تُہاڈے کولھ ولا آساں۔ جے تُساں میڈے نال محبت کریندے تاں اِیں گالھ تُوں خوش تھیندے جو مَیں باپ دے کولھ ویندا ہاں کیوں جو باپ مَیں کنُوں وڈا ہے۔ تے ہُنڑ مَیں سارے گالھیں تھیوݨ تُوں پہلے تُہاکُوں ڈسا ڈِتیاں ہِن تاں جو جِیں ویلے او پُوریاں تھی ونجنڑ تاں تُساں اِیمان رکھو۔ اِیندے بعد مَیں تُہاڈے نال زیادہ گالھیں نہ کریساں کیوں جو اِیں دُنیا دا سردار آندا ہے۔ اُونکُوں میڈے اُتے کوئی اِختیار نئیں، پر ایہ اِیں واسطے تھیندے جو دُنیا جاݨ گِھنے جو مَیں باپ نال محبت کریندا ہاں تے جِینویں باپ میکُوں حُکم ڈِتے مَیں اُونویں ای کریندا ہاں۔ اُٹھو اِتُھوں جُلوں۔“ ”انگُور دی حقیقی ویل مَیں ہاں تے میڈا باپ باغبان ہے۔ جیہڑی ٹاہنڑی میڈے ءچ ہے پر پھل نئیں ڈیندی اُونکُوں او کپ سٹیندے، تے جیہڑی پھل ڈیندی ہے اُونکُوں او چھنڈیندے تاں جو او زیادہ پھل ڈیوے۔ تُساں اُوں کلام دے سببّوں جیہڑا مَیں تُہاڈے نال کیتے پاک تھی گئے ہیوے۔ تُساں میڈے ءچ قائم راہو تے مَیں تُہاڈے ءچ قائم راہساں۔ جِینویں ٹاہنڑی جے انگُور دی ویل ءچ قائم نہ راہوے تاں آپنڑے آپ تُوں پھل نئیں ڈے سگدی، اُونویں ای تُساں وی جے میڈے ءچ قائم نہ راہو تاں پھل نئیں ڈے سگدے۔ مَیں انگُور دی ویل ہاں تے تُساں ٹاہنڑیاں ہیوے۔ جیہڑا میڈے ءچ قائم راہندے تے مَیں اُوندے ءچ، اُوہو بہُوں پھل ڈیندے کیوں جو مَیں کنُوں اَنج تھی تے تُساں کُجھ نئیں کر سگدے۔ جے کوئی میڈے ءچ قائم نہ راہوے تاں او ٹاہنڑی وانگُوں سَٹ ڈِتا ویندے تے سُک ویندے، تے لوک اُنہاں کُوں کٹھا کر تے بھاہ ءچ سَٹ ڈیندے ہِن تے او سڑ ویندیاں ہِن۔ جے تُساں میڈے ءچ قائم راہو تے میڈا کلام تُہاڈے دل ءچ قائم راہوے تاں جیہڑا کُجھ منگو او تُہاڈے کیتے تھی ویسی۔ میڈے باپ دا جلال اِیں تُوں تھیندے جو تُساں بہُوں سارا پھل گِھن آؤ۔ وَل تُساں واقعی میڈے شاگرد ہوسو۔ جِینویں باپ میڈے نال محبت کیتی ہے اُونویں ای مَیں تُہاڈے نال محبت کیتی ہے۔ تُساں میڈی محبت ءچ قائم راہو۔ جے تُساں میڈے حُکماں اُتے عمل کریسو تاں میڈی محبت ءچ قائم راہسو، جِینویں مَیں آپنڑے باپ دے حُکماں اُتے عمل کیتے تے اُوندی محبت ءچ قائم ہاں۔ مَیں ایہ گالھیں تُہاکُوں اِیں واسطے آکھیاں ہِن جو میڈی خوشی تُہاڈے ءچ ہووے تے تُہاڈی خوشی پُوری تھی ونجے۔ میڈا حُکم ایہ ہے جو جِینویں مَیں تُہاڈے نال محبت رکھی تُساں وی ہِک ڈُوجھے نال محبت رکھو۔ اِیں کنُوں زیادہ محبت کوئی نئیں کریندا جو آپنڑی جان آپنڑے دوستاں کیتے ڈے ڈیوے۔ جے تُساں میڈے حُکماں اُتے عمل کریسو تاں میڈے دوست ہوسو۔ ہُنڑ کنُوں مَیں تُہاکُوں نوکر نہ اکھیساں کیوں جو نوکر نئیں جانڑدا جو اُوندا مالک کیا کریندے بلکہ مَیں تُہاکُوں دوست آکھیا ہے کیوں جو سبھ کُجھ جیہڑا مَیں آپنڑے باپ کنُوں سُنڑیا ہے تُہاکُوں ڈسا ڈِتے۔ تُساں میکُوں نئیں چُنڑیا بلکہ مَیں تُہاکُوں چُنڑیا تے مقرر کیتے جو تُساں وَنج تے پھل گِھن آؤ تے تُہاڈا پھل قائم راہوے، تاں جو جیہڑا کُجھ تُساں میڈے ناں تُوں باپ کنُوں منگو، او تُہاکُوں ڈیوے۔ مَیں اِنہاں گالھیں دا حُکم تُہاکُوں اِیں واسطے ڈیندا ہاں جو تُساں ہِک ڈُوجھے نال محبت رکھو۔ جے دُنیا تُہاڈے نال نفرت کریندی ہے تاں جاݨ گِھنو جو اُوں تُہاڈے کنُوں پہلے میڈے نال وی نفرت کیتی ہے۔ جے تُساں دُنیا دے ہوندے تاں دُنیا تُہاکُوں آپنڑا سمجھ تے عزیز رکھیندی پر کیوں جو تُساں دُنیا دے نئیں بلکہ مَیں تُہاکُوں دُنیا ءچوں چُنڑ گِھدے اِیں واسطے دُنیا تُہاڈے نال نفرت کریندی ہے۔ او گالھ یاد رکھو جیہڑی مَیں تُہاکُوں ڈسائی ہئی جو نوکر آپنڑے مالک کنُوں وڈا نئیں ہوندا۔ جے اُنہاں میکُوں ستایا ہے تاں او تُہاکُوں وی ستیسن۔ جے اُنہاں میڈی گالھ اُتے عمل کیتا تاں تُہاڈی گالھ اُتے وی عمل کریسن۔ پر او ایہ سبھ کُجھ میڈے ناں دی وجہ تُوں تُہاڈے نال کریسن کیوں جو او میڈے بھیجنڑ آلے کُوں نئیں جانڑدے۔ جے مَیں آ تے اُنہاں نال کلام نہ کریندا تاں او گُنہگار نہ تھیندے پر ہُنڑ اُنہاں دے گُناہ دا اُنہاں کولھ کوئی عُذر نئیں۔ جیہڑا میڈے نال نفرت کریندے او میڈے باپ نال وی نفرت کریندے۔ جے مَیں اُنہاں ءچ او کم نہ کریندا جیہڑے کہیں ڈُوجھے نئیں کیتے تاں او گُنہگار نہ ہوندے پر ہُنڑ اُنہاں ایہ سبھ ڈِٹھا تے وَل وی میڈے تے میڈے باپ ڈوہائیں نال نفرت کیتی ہے۔ پر ایہ اِیں واسطے تھیّا جو اُنہاں دی شریعت ءچ لِکھی ہوئی گالھ پُوری تھی ونجے جو اُنہاں میڈے نال بِلاوجہ نفرت کیتی۔ پر جِیں ویلے او مددگار آسی جِینکُوں مَیں تُہاڈے کولھ باپ دی طرفوں بھجیساں، یعنی سچائی دا رُوح جیہڑا باپ دی طرفوں صادر تھیندا ہے تاں او میڈی گواہی ڈیسی۔ تے تُساں وی گواہی ڈیسو کیوں جو شروع کنُوں میڈے نال ہیوے۔“ ”مَیں ایہ گالھیں اِیں واسطے تُہاکُوں آکھیاں جو تُساں تُھڈا نہ کھاؤ۔ لوک تُہاکُوں عبادت خانیاں ءچوں کڈھ ڈیسن، بلکہ او وقت آوݨ آلا ہے جو جیہڑا کوئی تُہاکُوں قتل کریسی او ایہ سمجھسی جو مَیں خُدا دی خدمت کریندا ہاں۔ تے او ایہ اِیں واسطے کریسن جو اُنہاں نہ تاں باپ کُوں جانڑیا نہ میکُوں۔ پر مَیں ایہ گالھیں تُہاکُوں اِیں واسطے آکھیاں ہِن جو جِیں ویلے اُنہاں دا وقت آوے تاں تُہاکُوں یاد آ ونجے جو مَیں تُہاکُوں پہلے ای چِتا ڈِتا ہا۔ شروع ءچ مَیں ایہ گالھیں اِیں واسطے تُہاکُوں نئیں آکھیا جو مَیں تُہاڈے نال ہم، پر ہُنڑ مَیں آپنڑے بھیجنڑ آلے دے کولھ ویندا ہاں تے تُہاڈے ءچوں کوئی میکُوں نئیں پُچھدا جو تُوں کِتھاں ویندیں؟ بلکہ تُہاڈا دل غم نال بھریج گِیا کیوں جو مَیں ایہ گالھیں تُہاکُوں آکھیاں، پر مَیں تُہاکُوں سچ آدھا ہاں جو میڈا ونجنڑ تُہاڈے کیتے فائدہ مند ہے کیوں جو جے مَیں نہ وَنجاں تاں او مددگار تُہاڈے کولھ نہ آسی پر جے مَیں ویساں تاں اُونکُوں تُہاڈے کولھ بھیج ڈیساں۔ او آ تے دُنیا کُوں گُناہ تے راستبازی تے عدالت دے بارے ءچ قصُوروار کھڑیسی۔ گُناہ دے بارے ءچ اِیں واسطے جو او میڈے اُتے اِیمان نئیں گِھن آندے، راستبازی دے بارے ءچ اِیں واسطے جو مَیں باپ دے کولھ ویندا ہاں تے تُساں میکُوں ولا نہ ڈیکھسو، تے عدالت دے بارے ءچ اِیں واسطے جو دُنیا دے سردار اُتے سزا دا حُکم کیتا گئے ۔ میکُوں تُہاکُوں بِیا وی بہُوں کُجھ آکھنڑا ہے پر حالی تُساں اُوندی برداشت نئیں کر سگدے، پر جِیں ویلے او، یعنی سچائی دا رُوح آسی تاں او پُوری سچائی دو تُہاڈی راہنمائی کریسی۔ کیوں جو او آپنڑی طرفوں کُجھ نہ اکھیسی بلکہ تُہاکُوں صرف اُوہو ڈسیسی جیہڑا کُجھ او سُنڑسی تے تُہاکُوں آوݨ آلے گالھیں دی خبر ڈیسی۔ او میڈا جلال ظاہر کریسی کیوں جو او میڈے گالھیں میڈی زبانی سُنڑ تے تُہاکُوں بیان کریسی۔ جیہڑا کُجھ باپ دا ہے او سبھ میڈا ہے، اِیں واسطے مَیں آکھیا جو رُوح مَیں کنُوں ای حاصل کریندے تے تُہاکُوں خبراں ڈیسی۔ کُجھ دیر بعد تُساں میکُوں نہ ڈیکھسو تے وَل کُجھ دیر بعد ولا میکُوں ڈیکھ گِھنسو۔“ اِیں تُوں اُوندے بعض شاگرداں آپس ءچ آکھیا جو ”ایہ کیا ہے جیہڑا او ساکُوں اکھیندے جو ’کُجھ دیر بعد تُساں میکُوں نہ ڈیکھسو تے کُجھ دیر بعد ولا ڈیکھ گِھنسو‘ تے ’کیوں جو مَیں باپ دے کولھ ویندا ہاں‘؟“ بس او آدھے ریہے جو ”تھوڑی دیر تُوں اُوندا کیا مطلب ہے؟ اساں نئیں جانڑدے جو او کیا آدھے۔“ یسُوع ڈِٹھا جو او مَیں کنُوں پُچھنڑ چاہندے ہِن، تاں اُنہاں کُوں آکھیا، ”کیا تُساں آپس ءچ میڈی اِیں گالھ دے بارے ءچ پُچھدے پئے ہیوے جو کُجھ دیر بعد تُساں میکُوں نہ ڈیکھسو تے کُجھ دیر بعد ولا میکُوں ڈیکھ گِھنسو؟ مَیں تُہاکُوں سچ آدھا ہاں جو تُساں تاں روسو تے ماتم کریسو پر دُنیا خوش تھی سی۔ تُساں ڈُکھی تاں ہوسو پر تُہاڈا ڈُکھ ای خوشی ءچ بدل ویسی۔ جِیں ویلے عورت کُوں بال جمنڑ آلا ہوندے تاں او ڈُکھی تھیندی ہے، اِیں واسطے جو اُوندی تکلیف دا ویلا آ گئے۔ پر جِینویں ای بال جمدے تاں اِیں خوشی دے سببّوں جو ہِک اِنسان دُنیا ءچ آ گئے، او آپنڑا ڈُکھ بُھل ویندی ہے۔ اِینویں ای ہُنڑ تُہاکُوں ڈُکھ تاں ہے پر مَیں تُہاکُوں ولا مِلساں تے تُہاڈا دل خوش تھیسی تے کوئی تُہاڈی خوشی کَھس نہ گِھنسی۔ اُوں ڈینہہ تُساں میڈے تُوں کُجھ نہ پُچھسو۔ مَیں تُہاکُوں سچ آدھا ہاں جو جے تُساں باپ کنُوں میڈے ناں تُوں کُجھ منگسو تاں او تُہاکُوں ڈیسی۔ ہُنڑ تئیں تُساں میڈے ناں تُوں کُجھ نئیں منگیا۔ منگسو تاں مِلسی تاں جو تُہاڈی خوشی پُوری تھیوے۔ مَیں ایہ گالھیں تُہاڈے نال مثالاں ءچ کیتیاں ہِن، پر او ویلا آوݨ آلا ہے جو وَل تُہاکُوں مثالاں ءچ نہ اکھیساں بلکہ آپنڑے باپ دے بارے ءچ تُہاکُوں صاف صاف ڈسیساں۔ اُوں ڈینہہ تُساں میڈے ناں تُوں منگسو تے میکُوں تُہاڈے کیتے باپ کُوں درخاست کرݨ دی ضرورت نہ ہوسی۔ اِیں واسطے جو باپ تاں خود تُہاڈے نال محبت رکھیندے کیوں جو تُساں میڈے نال محبت رکھی ہے تے اِیمان گِھن آئے ہیوے جو مَیں خُدا دی طرفوں آیا ہاں۔ مَیں باپ ءچوں نِکل تے دُنیا ءچ آیا ہاں۔ وَل دُنیا تُوں رُخصت تھی تے باپ کولھ ویندا ہاں۔“ اُوندے شاگرداں آکھیا، ”ڈیکھو، ہُنڑ تُساں صاف صاف آدھے ہیوے تے مثال ءچ نئیں آدھے۔ ہُنڑ اساں جاݨ گئے ہیں جو تُساں سبھ کُجھ جانڑدے ہیوے تے اِیندے مُتھاج نئیں جو کوئی تُہاکُوں پُچھے ، اِیں سببّوں اساں اِیمان گِھن آئے ہیں جو تُساں خُدا ءچوں نِکلے ہیوے۔“ یسُوع اُنہاں کُوں جواب ڈِتا، ”کیا ہُنڑ تُساں اِیمان گِھن آندے ہیوے؟ ڈیکھو او ویلا آندے بلکہ آ گِیا ہے جو تُساں سارے تِتربِتر تھی تے آپنڑے آپنڑے گھراں کُوں ٹُر پوسو تے میکُوں کلھا چھوڑ ڈیسو۔ وَل وی مَیں کلھا نئیں کیوں جو باپ میڈے نال ہے۔ مَیں تُہاڈے نال ایہ گالھیں اِیں واسطے کیتیاں ہِن جو تُساں میڈے ءچ اِطمینان پاؤ۔ دُنیا ءچ ڈُکھ چیندے ہیوے پر حوصلہ رکھو، مَیں دُنیا اُتے غالب آیا ہاں۔“ یسُوع ایہ سبھ کُجھ آکھ ڈِتا تے آپنڑے اکھیں اسمان دو چا تے آکھیا، ”باپ! ہُنڑ ویلا آ گِیا ہے۔ تُوں آپنڑے پوتر دا جلال ظاہر کر تاں جو پوتر تیڈا جلال ظاہر کرے۔ کیوں جو تُوں اُونکُوں سبھ لوکاں اُتے اِختیار بخشیا ہے تاں جو جِنہاں کُوں تُوں اُونکُوں بخشیا ہے اُنہاں ساریاں کُوں او ہمیشاں دی زندگی ڈیوے۔ تے ہمیشاں دی زندگی ایہ ہے جو او تَیں خُدائے واحد تے برحق کُوں تے یسُوع مسیح کُوں جِینکُوں تُوں بھیجیا ہے، جانڑن۔ مَیں اُوں کم کُوں جیہڑا تَیں میکُوں کرݨ کیتے ڈِتا ہا، پُورا کر تے زمین اُتے تیڈا جلال ظاہر کر ڈِتے۔ تے ہُنڑ اے باپ! میکُوں آپنڑے حضُور ءچ جلال ڈے، او جلال جیہڑا مَیں دُنیا دے بنڑݨ کنُوں پہلے تیڈے نال رکھیندا ہم۔ مَیں تیڈا ناں اُنہاں اُتے ظاہر کیتے جِنہاں کُوں تُوں دُنیا ءچوں چُنڑ تے میکُوں ڈِتے۔ او تیڈے ہَن، تے تُوں اُنہاں کُوں میڈے حوالے کر ڈِتے تے اُنہاں تیڈے کلام اُتے عمل کیتا ہے۔ ہُنڑ او جانڑدے ہِن جو جیہڑا کُجھ تَیں میکُوں ڈِتے او سبھ کُجھ تیڈی ای طرفوں ہے۔ کیوں جو جیہڑا کلام تَیں میکُوں ڈِتے او مَیں اُنہاں تئیں پُچا ڈِتے تے اُنہاں اُونکُوں قبول کر تے حقیقی طور تے جاݨ گِھدے جو مَیں تیڈی طرفوں آیا ہاں تے او اِیمان گِھن آئے جو تُوں ای میکُوں بھیجیا ہے۔ مَیں اُنہاں کیتے دُعا کریندا ہاں۔ مَیں دُنیا کیتے دُعا نئیں کریندا بلکہ اُنہاں کیتے جِنہاں کُوں تُوں میکُوں ڈِتے کیوں جو او تیڈے ہِن۔ جیہڑا وی میڈا ہے او تیڈا ہے تے جیہڑا تیڈا ہے او سبھ میڈا ہے تے میڈا جلال اِنہاں دے وسیلے ظاہر تھیّا ہے۔ مَیں اگُوں تُوں دُنیا ءچ نہ راہساں پر او دُنیا ءچ ہِن تے مَیں تیڈے کولھ آندا ہاں۔ قدُّوس باپ! آپنڑے اُوں ناں دے وسیلہ نال جیہڑا تُوں میکُوں بخشیا ہے اُنہاں دی حفاظت کر، تاں جو او ہِک ہووݨ جِینویں اساں ہِک ہیں۔ جئیں تئیں مَیں اُنہاں دے نال ہم، مَیں تیڈے بخشے ہوئے ناں دے وسیلہ نال اُنہاں دی حفاظت کیتی۔ مَیں اُنہاں دی ڈیکھ بھال کیتی تے اُنہاں ءچوں کوئی ہلاک نہ تھیّا سوائے اُوندے جئیں ہلاک تھیونڑا ہا ، تاں جو خُدا دا کلام پُورا تھیوے۔ پر ہُنڑ مَیں تیڈے کولھ آندا ہاں تے مَیں ایہ گالھیں دُنیا ءچ راہندے ہوئے آدھا ہاں تاں جو میڈی ساری خوشی اُنہاں کُوں حاصل تھیوے۔ مَیں تیڈا کلام اُنہاں تئیں پُچا ڈِتے تے دُنیا اُنہاں نال نفرت کیتی ہے کیوں جو جِینویں مَیں دُنیا دا نئیں او وی دُنیا دے نئیں۔ میڈی دُعا ایہ نئیں جو تُوں اُنہاں کُوں دُنیا کنُوں چا گِھن بلکہ ایہ ہے جو اُنہاں کُوں شیطان تُوں محفوظ رکھ۔ جِینویں مَیں دُنیا دا نئیں او وی دُنیا دے نئیں۔ سچائی دے وسیلہ اُنہاں کُوں آپنڑے کیتے وقف کر ڈے۔ تیڈا کلام سچائی ہے۔ جِینویں تُوں میکُوں دُنیا ءچ بھیجیا، اُونویں ای مَیں وی اُنہاں کُوں دُنیا ءچ بھیجیا ہے۔ مَیں آپنڑے آپ کُوں اُنہاں دی خاطر وقف کریندا ہاں تاں جو او وی سچائی دے وسیلے وقف کیتے ونجنڑ۔ مَیں صرف اِنہاں کیتے ای درخاست نئیں کریندا بلکہ اُنہاں کیتے وی جیہڑے اُنہاں دے پیغام دے وسیلے نال میڈے اُتے اِیمان گِھن آسن، تاں جو او سارے ہِک ہووݨ جِینویں باپ، تُوں میڈے ءچ ہیں تے مَیں تیڈے ءچ ہاں۔ مَیں چاہندا ہاں جو او وی ساڈے ءچ ہووݨ تاں جو دُنیا اِیمان گِھن آوے جو تُوں ای میکُوں بھیجے۔ تے او جلال جیہڑا تَیں میکُوں ڈِتے، مَیں اُنہاں کُوں ڈِتے تاں جو او ہِک ہووݨ جِینویں اساں ہِک ہیں۔ مَیں اُنہاں ءچ تے تُوں میڈے ءچ تاں جو او کامِل طور تے ہِک تھی ونجنڑ تے دُنیا جاݨ گِھنے جو تُوں ای میکُوں بھیجیا تے جِینویں تُوں میڈے نال محبت رکھی، اُنہاں نال وی محبت رکھی ہے۔ باپ! مَیں چاہندا ہاں جو جِنہاں کُوں تَیں میڈے حوالے کیتے، او میڈے نال اُتھاں ہووݨ جِتھاں مَیں ہاں، تاں جو او اُوں جلال کُوں ڈیکھ سگنڑ جیہڑا تَیں میکُوں ڈِتے کیوں جو تَیں دُنیا دے بنڑݨ کنُوں وی پہلے ای میڈے نال محبت رکھی ہے۔ عادل باپ! دُنیا تاں تیکُوں نئیں جانڑدی پر مَیں تیکُوں جانڑدا ہاں تے اِنہاں بندیاں وی جاݨ گِھدے جو تُوں میکُوں بھیجیا ہے، تے مَیں اُنہاں کُوں تیڈے ناں تُوں واقف کرا ڈِتے، تے کریندا راہساں تاں جو جیہڑی محبت تیکُوں میڈے نال ہئی او اُنہاں ءچ ہووے تے مَیں وی اُنہاں ءچ ہونواں۔“ جِیں ویلے یسُوع ایہ سارے گالھیں آکھ گِھدیاں تاں او آپنڑے شاگرداں نال قِدرُون ندی دے پار گِیا۔ اُتھاں ہِک باغ ہا تے یسُوع تے اُوندے شاگرد اُوندے ءچ داخل تھئے۔ یہُوداہ، اُوندا پکڑواوݨ آلا وی اُوں جاہ کنُوں واقف ہا کیوں جو یسُوع اکثر آپنڑے شاگرداں کُوں اُتھاں مِلدا ہا۔ بس یہُوداہ رومی فوجیاں دا دستہ تے سردار کاہِناں تے فریسیاں تُوں ہیکل دے کُجھ سپاہی گِھن تے اُتھاں آیا۔ او آپنڑے ہتھاں ءچ مشعلاں، ڈیوے تے ہتھیار چاتی ہوئے ہَن۔ یسُوع اُنہاں سارے گالھیں کُوں جانڑدے ہوئے جیہڑیاں اُونکُوں پیش آوݨ آلیاں ہَن، اگُوں ودھ تے اُنہاں کنُوں پُچھیا، ”کِیں کُوں گولھیندے ہیوے؟“ اُنہاں جواب ڈِتا، ”یسُوع ناصری کُوں۔“ یسُوع اُنہاں کُوں آکھیا، ”او مَیں ای ہاں۔“ اُوندا پکڑواوݨ آلا یہُوداہ وی اُنہاں دے نال کھڑا ہا۔ یسُوع دے ایہ آدھے ای جو ”او مَیں ای ہاں،“ او گھبرا تے پِچُھوں ہٹ گئے تے زمین اُتے ڈھے پئے۔ بس اُوں اُنہاں کُوں وَل پُچھیا، ”تُساں کِیں کُوں گولھیندے ہیوے؟“ اُنہاں آکھیا، ”یسُوع ناصری کُوں۔“ یسُوع جواب ڈِتا، ”مَیں آکھ تاں ڈِتے جو او مَیں ای ہاں۔ بس جے تُساں میکُوں گولھیندے ہیوے تاں اِنہاں کُوں ونجنڑ ڈیؤ۔“ ایہ اُوں اِیں واسطے آکھیا جو اُوندی او گالھ پُوری تھیوے جو ”جِنہاں کُوں تُوں میکُوں ڈِتے مَیں اُنہاں ءچوں کہیں کُوں وی گُم نہ تھیوݨ ڈِتا۔“ وَل شمعون پطرس ہِک تلوار جیہڑی اُوندے کولھ ہئی، چھیک تے کاہِن ِ اعظم دے نوکر اُتے وار کیتا تے اُوندا سجا کَن اُڈا ڈِتا۔ اُوں نوکر دا ناں ملخُس ہا۔ پر یسُوع پطرس کُوں آکھیا، ”آپنڑی تلوار کُوں واپس رکھ، کیا مَیں ڈُکھ دا او پیالہ نہ پِیواں جیہڑا میڈے باپ میکُوں ڈِتے؟“ وَل رومی افسر، اُوندے فوجی تے یہُودیاں دے سپاہیاں یسُوع کُوں گرفتار کر تے بَدھ گِھدا تے اُونکُوں پہلے حنّا دے کولھ گِھن گئے کیوں جو او اُوں سال دے کاہِن ِ اعظم کائفا دا سُسر ہا۔ ایہ اُوہو کائفا ہا جئیں یہُودیاں کُوں صلاح ڈِتی ہئی جو چنگا ہے جو ساری قوم دی خاطر ہِک بندہ مر ونجے۔ شمعون پطرس یسُوع دے پِچُھوں تھی پِیا تے ہِک بِیا شاگرد وی۔ ایہ شاگرد کاہِن ِ اعظم دا جاݨ پچھاݨ آلا ہا تے او یسُوع نال کاہِن ِ اعظم دے صحن ءچ داخل تھی گِیا، پر پطرس باہر پھاٹک اُتے ای کھڑا ریہا۔ بس او ڈُوجھا شاگرد جیہڑا کاہِن ِ اعظم دا جاݨ پچھاݨ آلا ہا، باہر آیا تے دربان عورت کُوں آکھ تے پطرس کُوں اندر گِھن گِیا۔ دربان عورت پطرس کنُوں پُچھیا، ”کیا تُوں وی اُوں بندے دے شاگرداں ءچوں ہیں؟“ اُوں آکھیا، ”مَیں نئیں۔“ سردی دی وجہ کنُوں نوکر تے سپاہی بھاہ بال تے کھڑے سکیندے پئے ہَن تے پطرس وی اُنہاں نال کھڑا تھی تے بھاہ سکیندا پِیا ہا۔ وَل کاہِن ِ اعظم، یسُوع کنُوں اُوندے شاگرداں تے اُوندی تعلیم دے بارے ءچ پُچھیا۔ یسُوع جواب ڈِتا، ”مَیں سبھ لوکاں نال سر ِ عام گالھیں کیتیاں ہِن۔ مَیں ہمیشاں عبادت خانیاں تے ہیکل ءچ تعلیم ڈیندا ریہا ہاں جِتھاں سارے یہُودی کٹھے تھیندے ہِن تے مَیں لُک تے کڈھائیں وی کُجھ نئیں آکھیا۔ تُوں مَیں کنُوں کیوں پُچھدیں؟ جِنہاں میڈے گالھیں سُنڑیاں ہِن اُنہاں کنُوں پُچھ۔ ڈیکھ او چنگی طرح جانڑدے ہِن جو مَیں کیا آکھیا ہے۔“ جِیں ویلے یسُوع ایہ آکھیا تاں سپاہیاں ءچوں ہِک جیہڑا کولھ کھڑا ہا، اُونکُوں چاٹ ماری تے آکھیا، ”تُوں کاہِن ِ اعظم کُوں اِینویں جواب ڈیندیں؟“ یسُوع جواب ڈِتا ”جے مَیں کُجھ غلط آکھیا ہے تاں اُونکُوں غلط ثابت کر، پر جے ٹھیک آکھیا ہے تاں میکُوں کیوں مریندیں؟“ وَل حنّا یسُوع کُوں بدھیا ہویا کاہِن ِ اعظم کائفا دے کولھ بھیج ڈِتا۔ جِیں ویلے شمعون پطرس کھڑا بھاہ سکیندا پِیا ہا تاں کہیں اُوں کنُوں پُچھیا، ”کیا تُوں وی اُوندے شاگرداں ءچوں ہیں؟“ اُوں اِنکار کریندے ہوئے آکھیا، ”مَیں نئیں۔“ کاہِن ِ اعظم دے نوکراں ءچوں ہِک جیہڑا اُوں نوکر دا رشتہ دار ہا جِیندا کَن پطرس تلوار نال اُڈا ڈِتا ہا، پطرس کُوں آکھیا، ”کیا مَیں تیکُوں اُوندے نال باغ ءچ نہ ڈِٹھا ہا؟“ پطرس ولا اِنکار کیتا، تے اُوں ویلے ای کُکڑ بانگ ڈِتی۔ وَل یہُودی راہنما سویل نال یسُوع کُوں کائفا دے کولُھوں رومی گورنر دے قلعہ ءچ گِھن گئے۔ پر او خود قلعہ دے اندر نہ گئے تاں جو ناپاک نہ تھی ونجنڑ بلکہ فسح دا کھانڑا کھا سگنڑ۔ بس پِیلاطُس اُنہاں دے کولھ باہر آیا تے پُچھیا، ”تُساں اِیں بندے اُتے کیا اِلزام لیندے ہیوے؟“ اُنہاں جواب ڈِتا، ”جے ایہ مُجرم نہ ہوندا تاں اساں اِینکُوں تُہاڈے سپُرد نہ کریندے۔“ پِیلاطُس آکھیا، ”تُساں اِینکُوں گِھن ونجو تے خود ای آپنڑی شریعت دے مطابق اِیندا فیصلہ کرو۔“ یہُودیاں جواب ڈِتا، ”کہیں کُوں موت دی سزا ڈیوݨ دی ساکُوں اِجازت نئیں۔“ ایہ اِیں واسطے تھیّا جو یسُوع دی او گالھ پُوری تھیوے جو او کئیں طرحاں دی موت مرسی ۔ وَل پِیلاطُس قلعہ ءچ واپس چلیا گِیا تے یسُوع کُوں اُتھاں سڈوا تے اُوں کنُوں پُچھیا، ”کیا تُوں یہُودیاں دا بادشاہ ہیں؟“ یسُوع جواب ڈِتا، ”کیا تُوں ایہ گالھ آپنڑی طرفوں آدھیں، یا بئیاں میڈے حق ءچ تیکُوں آکھی ہے؟“ پِیلاطُس جواب ڈِتا، ”کیا مَیں یہُودی ہاں؟ تیڈی ای قوم تے سردار کاہِناں تیکُوں میڈے حوالے کیتے۔ تُوں کیا کیتے؟“ یسُوع جواب ڈِتا، ”میڈی بادشاہی اِیں دُنیا دی نئیں۔ جے میڈی بادشاہی اِیں دُنیا دی ہوندی تاں میڈے خادم لڑدے، تاں جو مَیں یہُودیاں دے حوالہ نہ کیتا ویندا، پر میڈی بادشاہی اِتُھوں دی نئیں۔“ پِیلاطُس اُونکُوں آکھیا، ”بس کیا تُوں بادشاہ ہیں؟“ یسُوع جواب ڈِتا، ”تُوں خود آدھیں جو مَیں بادشاہ ہاں۔ مَیں اِیں واسطے پیدا تھیّا تے اِیں مقصد نال دُنیا ءچ آیا ہاں جو سچائی دی گواہی ڈیواں۔ جیہڑا کوئی سچائی دا طرفدار ہے، او میڈی اواز سُنڑدے۔“ پِیلاطُس اُونکُوں آکھیا، ”سچائی کیا ہے؟“ ایہ آکھ تے او ولا یہُودیاں دے کولھ باہر گِیا تے آکھنڑ لگا، ”مَیں تاں اِیں بندے ءچ کوئی جُرم نئیں پایا، پر تُہاڈا دستور ہے جو مَیں فسح دے موقع اُتے تُہاڈے کیتے ہِک قیدی چھوڑ ڈیندا ہاں۔ بس کیا تُساں چاہندے ہیوے جو مَیں تُہاڈے کیتے ’یہُودیاں دے بادشاہ‘ کُوں چھوڑ ڈیواں؟“ او ولا چیخنڑ لگ گئے، ”اِینکُوں نئیں بلکہ برابّا کُوں۔“ برابّا ہِک ڈاکو ہا۔ وَل پِیلاطُس یسُوع کُوں گِھن گِیا تے کوڑے مروائے۔ سپاہیاں کنڈیاں دا تاج بنڑا تے اُوندے سر اُتے رکھیا تے اُونکُوں جامنی چوغہ پوایا۔ وَل اُوندے سامنڑے آ تے آدھے ہَن، ”یہُودیاں دے بادشاہ! آداب“ تے اُوندے چاٹاں وی ماریاں۔ پِیلاطُس ہِک پھیری ولا باہر آیا تے یہُودیاں کُوں آکھیا، ”ڈیکھو مَیں اُونکُوں تُہاڈے کولھ باہر گِھن آندا ہاں تاں جو تُہاکُوں پتہ لگ ونجے جو مَیں اُوندے ءچ کوئی جُرم نئیں ڈِٹھا۔“ یسُوع کنڈیاں دا تاج تے جامنی چوغہ پا تے باہر آیا تے پِیلاطُس اُنہاں کُوں آکھیا، ”ڈیکھو ایہ ہے او بندہ!“ جِیں ویلے سردار کاہِناں تے سپاہیاں اُونکُوں ڈِٹھا تاں چیخنڑ لگ پئے، ”اُونکُوں صلیب اُتے چڑھا ڈیؤ! اُونکُوں صلیب اُتے چڑھا ڈیؤ!“ پِیلاطُس جواب ڈِتا ”تُساں ای اِینکُوں گِھن ونجو تے صلیب اُتے چڑھا ڈیؤ کیوں جو مَیں اِیندے ءچ کوئی جُرم نئیں ڈیدھا۔“ یہُودیاں جواب ڈِتا ”ساڈے کولھ ہِک شریعت ہے تے اُوں شریعت دے مطابق او موت دے لائق ہے کیوں جو اُوں آکھیا ہے جو مَیں خُدا دا پوتر ہاں۔“ جِیں ویلے پِیلاطُس ایہ سُنڑیا تاں بِیا وی ڈر گِیا۔ او ولا قلعہ ءچ چلیا گِیا تے یسُوع تُوں پُچھیا، ”تُوں کِتھوں دا ہیں؟“ پر یسُوع اُونکُوں جواب نہ ڈِتا۔ بس پِیلاطُس اُونکُوں آکھیا، ”تُوں میڈے نال کیوں نئیں بُولیندا؟ کیا تیکُوں پتہ نئیں جو میکُوں اِختیار ہے جو تیکُوں چھوڑ ڈیواں یا صلیب اُتے چڑھا ڈیواں؟“ یسُوع اُونکُوں جواب ڈِتا ”جے ایہ اِختیار تیکُوں اُتوں نہ مِلیا ہوندا تاں تیڈا میڈے اُتے کوئی اِختیار نہ ہوندا۔ اِیں سببّوں جیہڑے بندے میکُوں تیڈے حوالے کیتے، او زیادہ گُنہگار ہے۔“ اِیندے بعد پِیلاطُس اُونکُوں چھوڑ ڈیوݨ دی کوشش کیتی پر یہُودی چیخ چیخ تے آکھنڑ لگے جو ”جے تُوں اِیں بندے کُوں چھوڑ ڈیسیں تاں تُوں رومی بادشاہ قیصر دا خیر خواہ نئیں۔ جیہڑا کوئی آپنڑے بادشاہ ہووݨ دا اعلان کریندے تاں او قیصر دا مخالف ہے۔“ جِیں ویلے پِیلاطُس ایہ سُنڑیا تاں یسُوع کُوں باہر سڈیا تے آپنڑے تختِ عدالت اُتے بہہ گِیا۔ اُوں جاہ کُوں پتھر دا فرش آکھیا ویندا ہا جِینکُوں عبرانی ءچ گبّتا آدھے ہِن۔ ایہ فسح دی تیاری دا ڈینہہ تے چِھینویں گھنٹے دے نیڑے ہا۔ وَل اُوں یہُودیاں کُوں آکھیا، ”ڈیکھو! تُہاڈا بادشاہ۔“ بس او چیخنڑ لگے جو ”اُونکُوں گِھن وَنج! گِھن وَنج! اُونکُوں صلیب اُتے چڑھا ڈے!“ پِیلاطُس آکھیا، ”کیا مَیں تُہاڈے بادشاہ کُوں صلیب اُتے چڑھا ڈیواں؟“ سردار کاہِناں آکھیا، ”قیصر دے علاوہ ساڈا کوئی بادشاہ نئیں۔“ ایہ گالھ سُنڑ تے پِیلاطُس اُونکُوں اُنہاں دے حوالے کر ڈِتا جو اُونکُوں صلیب اُتے چڑھا ڈیوݨ۔ بس او یسُوع کُوں گِھن گئے۔ تے او آپنڑی صلیب چا تے شہر تُوں باہر اُوں جاہ دو گِیا جیہڑی کھوپڑی اکھویندی ہے تے جِینکُوں عبرانی زبان ءچ گُلگُتا آدھے ہِن۔ اُتھاں اُنہاں اُونکُوں تے اُوندے نال ڈُو بئے بندیاں کُوں وی صلیب اُتے چڑھا ڈِتا، ہِک کُوں سجے پاسُوں تے ڈُوجھے کُوں کھبے پاسُوں تے یسُوع کُوں اَدھ ءچ۔ تے پِیلاطُس ہِک تختی اُتے لِکھوا تے صلیب اُتے لٹکا ڈِتی۔ اُوندے اُتے ایہ لِکھیا ہا ”یسُوع ناصری یہُودیاں دا بادشاہ۔“ بہُوں سارے یہُودیاں ایہ تختی پڑھی کیوں جو جیہڑی جاہ تے یسُوع کُوں صلیب اُتے چڑھایا گِیا ہا او شہر دے نیڑے ای ہئی تے تختی اُتے عبرانی، لاطینی تے یُونانی ءچ لِکھیا ہویا ہا۔ اِیں واسطے یہُودیاں دے سردار کاہِناں پِیلاطُس کُوں درخاست کیتی، ”یہُودیاں دا بادشاہ نہ لِکھو بلکہ ایہ جو اُوں دعویٰ کیتا ہا جو مَیں یہُودیاں دا بادشاہ ہاں۔“ پِیلاطُس جواب ڈِتا ”مَیں جیہڑا کُجھ لِکھ ڈِتے بس لِکھ ڈِتے۔“ جِیں ویلے سپاہیاں یسُوع کُوں صلیب اُتے چڑھا ڈِتا تاں اُنہاں یسُوع دے کپڑے گِھدے تے چار حصے کیتے، ہر ہِک سپاہی کیتے ہِک حصہ۔ تے اُوندا چوغہ وی گِھدا جیہڑا پُورے دا پُورا وُنڑیا ہویا ہا تے اُوں ءچ کوئی جوڑ نہ ہا۔ اُنہاں آپس ءچ آکھیا، ”اِیندے ٹوٹے نہ کرُوں بلکہ اِیندے اُتے پرچی پا تے ڈیدھے ہیں جو ایہ کیندے حصہ ءچ آندے۔“ ایہ اِیں واسطے تھیّا جو او نوِشتہ پُورا تھیوے جو ”اُنہاں میڈی پُشاک آپس ءچ وَنڈ گِھدی تے میڈے کپڑیاں اُتے پرچی پاتی ۔“ تے سپاہیاں اِینویں ای کیتا۔ یسُوع دی صلیب دے نیڑے اُوندی ماء، اُوندی خالہ، کلوپاس دی ذال مریم تے مریم مگدلینی، کھڑیاں ہَن۔ یسُوع آپنڑی ماء کُوں تے آپنڑے اُوں شاگرد کُوں جِینکُوں او عزیز رکھیندا ہا نیڑے کھڑے ڈِٹھا تاں ماء کُوں آکھیا، ”ماء! ڈیکھ ایہ تیڈا پوتر ہے۔“ وَل شاگرد کُوں آکھیا، ”ڈیکھ ایہ تیڈی ماء ہے۔“ تے اُوں ویلے کنُوں ای اُوں شاگرد اُونکُوں آپنڑے گھر رکھ گِھدا۔ اِیندے بعد جِیں ویلے یسُوع جاݨ گِھدا جو ہُنڑ سارے گالھیں پُوریاں تھی گئیاں ہِن تاں جو خُدا دے کلام دا لِکھیا پُورا تھیوے تاں آکھیا، ”مَیں ترِسّا ہاں ۔“ نیڑے ای ہِک تھاں سِرکے نال بھریا پِیا ہا۔ اُنہاں ہِک سپنج کُوں سِرکے ءچ بوڈ تے زُوفے دے سرے اُتے رکھ تے اُوندے مُنہ نال لایا۔ بس جِیں ویلے یسُوع او سِرکہ پِیتا تاں آکھیا جو ”سبھ کُجھ پُورا تھی گِیا،“ تے سر جُھکا تے جان ڈے ڈِتی۔ او تیاری دا ڈینہہ ہا، اِیں واسطے یہُودی راہنماواں پِیلاطُس کُوں درخاست کیتی جو اُنہاں دیاں جنگھاں توڑ ڈِتیاں ونجنڑ تے لاشاں لہا گِھدیاں ونجنڑ تاں جو سبت دے ڈینہہ صلیب اُتے نہ راہنڑ کیوں جو او سبت ہِک خاص ڈینہہ ہا ۔ اِیں واسطے سپاہی آئے تے اُنہاں ڈُو بندیاں دیاں جنگھاں بَھن ڈِتیاں جیہڑے اُوندے نال صلیب اُتے چڑھائے گئے ہَن۔ پر جِیں ویلے اُنہاں یسُوع دے کولھ آ تے ڈِٹھا جو او تاں مر گِیا ہے تاں اُوندیاں جنگھاں نہ بَھنیاں۔ پر اُنہاں ءچوں ہِک سپاہی نیزے نال اُوندی پسلی چھیدی تے فوراً خون تے پانڑی واہنڑ پے گِیا۔ جئیں ایہ ڈِٹھے اُوں گواہی ڈِتی ہے تے اُوندی گواہی سچی ہے تے او جانڑدا ہے جو سچ آدھا ہے تاں جو تُساں وی اِیمان گِھن آؤ۔ ایہ گالھیں اِیں واسطے تھیّاں جو خُدا دے کلام ءچ لِکھیا ہویا پُورا تھی ونجے جو ”اُوندی کوئی ہڈی تروڑی نہ ویسی۔“ تے خُدا دا کلام ہِک بئی جاہ تے آدھے جو ”جِینکُوں اُنہاں چھیدیا، اُوندے اُتے نِگاہ کریسن ۔“ اِنہاں گالھیں دے بعد ہِک بندہ یُوسف جیہڑا ارِمَتِیاہ دا راہنڑ آلا ہا تے یسُوع دا شاگرد ہا، پر یہُودی سرداراں دے ڈر کنُوں خُفیہ طور تے، او پِیلاطُس دے کولھ گِیا تے یسُوع دی لاش کُوں گِھن ونجنڑ دی اِجازت منگی۔ پِیلاطُس اِجازت ڈے ڈِتی تے او آ تے یسُوع دی لاش کُوں گِھن گِیا۔ یُوسف نال نِیکُدِیمُس وی آیا جئیں پہلے یسُوع نال رات کُوں مُلاقات کیتی ہئی۔ او آپنڑے نال ترِیح کلو دے قریب مَلیا ہویا مُر تے کوار بُوٹی گِھن آیا۔ بس اُنہاں یسُوع دی لاش کُوں گِھن تے اُونکُوں خوشبودار مصالحے سمیت ہِک مہین چادر ءچ کفنایا جِینویں یہُودیاں ءچ دفن دا دستور ہا۔ جیہڑی جاہ اُتے یسُوع کُوں صلیب اُتے چڑھایا گِیا، اُتھاں ہِک باغ ہا تے اُوں باغ ءچ ہِک نوِیں قبر ہئی جیندے ءچ پہلے کوئی نہ رکھیا گِیا ہا ۔ بس اُنہاں یہُودیاں دی تیاری دے ڈینہہ دی وجہ کنُوں یسُوع کُوں اُتھاں رکھ ڈِتا کیوں جو ایہ قبر نیڑے ہئی۔ ہفتے دے پہلے ڈینہہ سویل نال جِیں ویلے حالی اندھارا ای ہا، مریم مگدلینی قبر اُتے آئی تے ڈِٹھا جو پتھر قبر دے مُنہ کنُوں ہٹیا ہویا ہے۔ بس او شمعون پطرس تے اُوں ڈُوجھے شاگرد دے کولھ بھج تے گئی جِینکُوں یسُوع عزیز رکھیندا ہا تے اُنہاں کُوں آکھیا، ”او مالک کُوں قبر ءچوں کڈھ تے گِھن گئے ہِن تے ساکُوں پتہ نئیں جو اُونکُوں کِتھاں رکھ ڈِتے۔“ ایہ سُنڑدے ای پطرس تے ڈُوجھا شاگرد قبر دو ٹُر پئے۔ او ڈوہائیں کٹھے بھجے پر او ڈُوجھا شاگرد پطرس کنُوں اگُوں نِکل گِیا تے قبر اُتے پہلے پُجیا۔ اُوں جُھک تے ڈِٹھا تے اُونکُوں اندر کفن پِیا ہویا نظر آیا پر اندر نہ گِیا۔ شمعون پطرس اُوندے پِچُھوں پِچُھوں آیا تے قبر ءچ داخل تھی گِیا۔ اُوں ڈِٹھا جو اُتھاں سُوتی کپڑے پئے ہِن، تے او رومال وی جیہڑا یسُوع دے سر اُتے ولھیٹا گِیا ہا، سُوتی کپڑیاں کنُوں اَنج ہِک جاہ تہہ کیتا ہویا پِیا ہا۔ وَل او ڈُوجھا شاگرد وی جیہڑا قبر اُتے پہلے پُجیا ہا، اندر داخل تھیّا، تے اُوں ڈیکھ تے یقین کیتا۔ کیوں جو ہُنڑ تئیں او نوِشتہ کنُوں نہ سمجھ سگے ہَن جو یسُوع دا مُردیاں ءچوں زندہ تھیوݨ ضرور ہا۔ وَل شاگرد آپنڑے گھر چلے گئے۔ پر مریم قبر کنُوں باہر کھڑی روندی ریہی تے روندے روندے اُوں جُھک تے قبر دے اندر نِگاہ کیتی۔ تاں اُوں ڈُو فرشتیاں کُوں چِٹے کپڑے پاتے ہوئے اُتھاں بیٹھے ڈِٹھا، جِتھاں یسُوع دی لاش رکھی گئی ہئی، ہِک کُوں سراہنڑے تے ڈُوجھے کُوں پیراں آلے پاسے۔ فرشتیاں اُونکُوں آکھیا، ”بی بی! تُوں کیوں روندی ہیں؟“ اُوں آکھیا، ”او میڈے مالک کُوں چا تے گِھن گئے ہِن تے میکُوں پتہ نئیں جو اُونکُوں کِتھاں رکھے۔“ ایہ آدھے ای او پِچُھوں تے مُڑی تے یسُوع کُوں کھڑے ڈِٹھا پر نہ سُنجانڑیا جو ایہ یسُوع ہے۔ یسُوع اُونکُوں آکھیا، ”بی بی! تُوں کیوں روندی ہیں؟ کِینکُوں گولھیندی ہیں؟“ اُوں سمجھیا جو شاید او مالی ہے تاں اُونکُوں آکھیا، ”میاں! جے تُوں اُونکُوں اِتُھوں چا تے تاں میکُوں ڈسا ڈے جو اُونکُوں کِتھاں رکھے تاں جو مَیں اُونکُوں گِھن وَنجاں۔“ یسُوع اُونکُوں آکھیا، ”مریم!“ اُوں مُڑ تے اُونکُوں عبرانی زبان ءچ آکھیا، ”ربونی!“ یعنی اُستاد! یسُوع اُونکُوں آکھیا، ”میکُوں پکڑی نہ رکھ کیوں جو مَیں حالی تئیں باپ دے کولھ اُتے نئیں گِیا، بلکہ وَنج تے میڈے بِھرانواں کُوں ڈسا جو مَیں آپنڑے باپ تے آپنڑے خُدا دے کولھ ویندا ہاں جیہڑا تُہاڈا وی باپ تے خُدا ہے۔“ مریم مگدلینی شاگرداں دے کولھ آ تے اُنہاں کُوں خبر ڈِتی جو مَیں خُداوند کُوں ڈِٹھے تے اُوں میڈے نال ایہ گالھیں کیتیاں ہِن۔ وَل اُوں ڈینہہ جیہڑا ہفتے دا پہلا ڈینہہ ہا، شام دے وقت جِیں ویلے شاگرد ہِک جاہ جمع ہَن تے یہُودیاں دے ڈر کنُوں دروازے بند ہَن، یسُوع آ تے اُنہاں دے وچال آ کھڑا تھیّا تے آکھیا، ”تُہاڈی سلامتی ہووے۔“ ایہ آکھ تے اُوں آپنڑے ہتھ تے پسلی اُنہاں کُوں ڈِکھائی۔ شاگرد خُداوند کُوں ڈیکھ تے خوش تھئے۔ یسُوع اُنہاں کُوں ولا آکھیا، ”تُہاڈی سلامتی ہووے! جِینویں باپ میکُوں بھیجیا ہے، اُونویں ای مَیں تُہاکُوں بھجیندا ہاں۔“ ایہ آکھ تے اُوں اُنہاں اُتے پُھونکا ڈِتا تے آکھیا، ”رُوح القُدس گِھنو۔ جِنہاں دے گُناہ تُساں معاف کریسو، اُنہاں دے معاف کیتے ویسن تے جِنہاں دے گُناہ معاف نہ کریسو، او معاف نہ کیتے ویسن۔“ پر توما جِینکُوں جاڑا وی آدھے ہِن تے جیہڑا اُنہاں بارہاں ءچوں ہا، اُنہاں دے نال نہ ہا جڈاں یسُوع آیا ہا۔ باقی شاگرداں اُونکُوں ڈسایا جو اساں خُداوند کُوں ڈِٹھے۔ پر اُوں اُنہاں کُوں آکھیا، ”جئیں تئیں مَیں اُوندے ہتھاں ءچ کِیلاں دے سوراخ نہ ڈیکھ گِھناں تے آپنڑی انگل اُنہاں ءچ نہ پا گِھناں تے آپنڑا ہتھ اُوندی پسلی ءچ نہ پا گِھناں، اُوں ویلے تئیں یقین نہ کریساں۔“ اَٹھ ڈینہہ بعد یسُوع دے شاگرد ہِک پھیری ولا گھر دے اندر ہَن تے توما وی اُنہاں دے نال ہا۔ دروازے بند ہَن، پر یسُوع آ تے اُنہاں دے وچال کھڑا تھی گِیا تے آکھیا، ”تُہاڈی سلامتی ہووے!“ وَل اُوں توما کُوں آکھیا، ”آپنڑی انگل اِتھاں رکھ تے میڈے ہتھاں کُوں ڈیکھ تے آپنڑا ہتھ ودھا تے میڈی پسلی ءچ پا۔ بےاعتقاد نہ تھی بلکہ اعتقاد رکھ۔“ توما اُونکُوں آکھیا، ”میڈے خُداوند! میڈے خُدا!“ یسُوع اُونکُوں آکھیا، ”تُوں تاں ڈیکھ تے میڈے اُتے اِیمان گِھن آئیں۔ مُبارک او ہِن جیہڑے میکُوں بغیر ڈِٹھے اِیمان گِھن آئے ہِن۔“ یسُوع آپنڑے شاگرداں دے سامنڑے بہُوں سارے معجزے کیتے جیہڑے اِیں کتاب ءچ نئیں لِکھے گئے۔ پر ایہ اِیں واسطے لِکھے گئے جو تُساں اِیمان گِھن آؤ جو یسُوع ای خُدا دا پوتر، المسیح ہے تے اِیمان گِھن آ تے اُوندے ناں ءچ زندگی پاؤ۔ اِنہاں گالھیں دے بعد یسُوع ہِک پھیری وَل آپنڑے آپ کُوں شاگرداں اُتے تِبریاس دی جھیل دے کنارے ظاہر کیتا۔ تے اِینویں ظاہر کیتا۔ شمعون پطرس تے توما جیہڑا جاڑا اکھویندے تے نتن ایل جیہڑا گلیل دی وستی قانا دا ہا، تے زبدی دے پوتر، تے ڈُوجھے بئے شاگرد اُتھاں جمع ہَن۔ شمعون پطرس اُنہاں کُوں آکھیا، ”مَیں تاں مچھی پکڑن ویندا ہاں۔“ اُنہاں آکھیا، ”اساں وی تیڈے نال ویندے ہیں۔“ او نِکل تے کشتی ءچ وَنج بیٹھے پر اُوں رات کُجھ نہ پکڑیا۔ سویل نال ای یسُوع کنارے اُتے آ کھڑا تھیّا پر شاگرداں نہ پچھانڑیا جو او یسُوع ہے۔ بس یسُوع اُنہاں کُوں آکھیا، ”بالو! کیا تُہاڈے کولھ کوئی مچھی ہے؟“ اُنہاں جواب ڈِتا، ”کائناں۔“ اُوں اُنہاں کُوں آکھیا، ”جال کُوں کشتی دے سجے پاسے سٹو تاں پکڑیسو۔“ اُنہاں اِینویں ای کیتا تے وَل مچھیاں دی کثرت پارُوں جال چھیک نہ سگے۔ وَل اُوں شاگرد جِینکُوں یسُوع عزیز رکھیندا ہا، پطرس کُوں آکھیا، ”ایہ تاں خُداوند ہے۔“ جِینویں ای شمعون پطرس ایہ سُنڑیا جو ایہ خُداوند ہے اُوں آپنڑا چولا چیل نال بدھیا کیوں جو اُوں اُونکُوں کم کیتے لہایا ہویا ہا تے پانڑی ءچ ٹپّا مار ڈِتا۔ باقی شاگرد مچھیاں دا جال چھکیندے ہوئے کشتی ءچ آئے کیوں جو او کنارے کنُوں بہُوں پرے نہ ہَن تے اندازاً سو گز دا فاصلہ ہا۔ جِیں ویلے کنارے اُتے لتھے تاں ڈِٹھا جو کولیاں دی بھاہ ہے تے اُوندے اُتے مچھی رکھی ہوئی تے روٹی ڈِٹھی۔ یسُوع اُنہاں کُوں آکھیا، ”جیہڑیاں مچھیاں تُساں ہُنڑ پکڑیاں ہِن اُنہاں ءچوں کُجھ گِھن آؤ۔“ شمعون پطرس کشتی اُتے چڑھ گِیا تے جال کُوں کنارے اُتے چھیک آیا۔ او ہِک سو تِرونجھاہ وڈیاں وڈیاں مچھیاں نال بھریا ہا، پر مچھیاں دی کثرت دے باوجود جال وَل وی نہ پھٹیا۔ یسُوع اُنہاں کُوں آکھیا، ”آؤ کھانڑا کھا گِھنو۔“ شاگرداں ءچوں کہیں کُوں وی جُرأت نہ تھئی جو پُچھے جو ”تُوں کوݨ ہیں؟“ کیوں جو او جانڑدے ہَن جو خُداوند ای ہے۔ یسُوع آ تے روٹی گِھدی تے اُنہاں کُوں ڈِتی تے اِینویں ای مچھی وی ڈِتی۔ یسُوع مُردیاں ءچوں زندہ تھی ونجنڑ دے بعد ایہ تریجھی پھیری آپنڑے شاگرداں اُتے ظاہر تھیّا۔ جِیں ویلے اُنہاں کھانڑا کھا گِھدا تاں یسُوع شمعون پطرس کُوں آکھیا، ”یُوحنّا دے پوتر شمعون! کیا تُوں میکُوں اِنہاں کنُوں زیادہ عزیز رکھیندیں؟“ اُوں آکھیا، ”ہاں خُداوند تُساں تاں جانڑدے ای ہیوے جو مَیں تُہاکُوں عزیز رکھیندا ہاں۔“ اُوں جواب ڈِتا، ”تُوں میڈے لیلے چَرا۔“ یسُوع اُونکُوں ولا آکھیا، ”یُوحنّا دے پوتر شمعون! کیا تُوں میکُوں عزیز رکھیندیں؟“ اُوں آکھیا، ”ہاں خُداوند تُساں تاں جانڑدے ای ہیوے جو مَیں تُہاکُوں عزیز رکھیندا ہاں۔“ یسُوع اُونکُوں آکھیا، ”تُوں میڈیاں بھیڈاں دی رکھوالی کر۔“ یسُوع تریجھی پھیری ولا اُونکُوں آکھیا، ”یُوحنّا دے پوتر شمعون! کیا تُوں میکُوں عزیز رکھیندیں؟“ پطرس ڈُکھی تھی گِیا کیوں جو اُوں اُونکُوں تریجھی پھیری آکھیا ہا، ”کیا تُوں میکُوں عزیز رکھیندیں؟“ اُوں اُونکُوں آکھیا، ”اے خُداوند! تُساں تاں سبھ کُجھ جانڑدے ہیوے۔ تُہاکُوں پتہ ہے جو مَیں تُہاکُوں عزیز رکھیندا ہاں۔“ یسُوع اُونکُوں آکھیا، ”تُوں میڈیاں بھیڈاں چَرا۔ مَیں تیکُوں سچ آدھا ہاں جو جِیں ویلے تُوں جوان ہَویں تاں آپ ای آپنڑی چیل بدھیندا ہَویں تے جِتھاں دل آدھا ہا ٹُر پوندا ہَویں۔ پر جِیں ویلے تُوں بُڈھا تھی ویسیں تاں تُوں آپنڑے ہتھ ودھیسیں تے کوئی ڈُوجھا تیڈی چیل بدھیسی تے جِتھاں تُوں ونجنڑ وی نہ چاہسیں، تیکُوں گِھن ویسی۔“ اُوں اِنہاں گالھیں تُوں اِشارہ کر ڈِتا جو پطرس کیجھی موت تُوں خُدا دا جلال ظاہر کریسی۔ تے ایہ آکھ تے اُونکُوں آکھیا، ”میڈے پِچُھوں تھی پو۔“ پطرس مُڑ تے اُوں شاگرد کُوں پِچُھوں آندے ڈِٹھا جِینکُوں یسُوع عزیز رکھیندا ہا تے جئیں شام دے کھانڑے ویلے یسُوع دو جُھک تے پُچھیا ہا، ”مالک! او کوݨ ہے جیہڑا تُہاکُوں پکڑویسی؟“ پطرس اُونکُوں ڈیکھ تے یسُوع کُوں آکھیا، ”اے خُداوند! اِیں بندے دا کیا بنڑسی؟“ یسُوع اُونکُوں آکھیا، ”جے مَیں چاہواں جو ایہ میڈے ولنڑ تئیں زندہ راہوے تاں اِیندے نال تیکُوں کیا؟ تُوں میڈے پِچُھوں ٹُر۔“ بس اِیمانداراں ءچ ایہ گالھ مشہور تھی گئی جو او شاگرد نہ مر سی۔ پر یسُوع ایہ نہ آکھیا ہا جو ”او نہ مرسی“ بلکہ ایہ آکھیا ہا، ”جے مَیں چاہواں جو او میڈے ولنڑ تئیں زندہ راہوے تاں اِیں گالھ نال تیکُوں کیا؟“ ایہ اُوہو شاگرد ہے جیہڑا اِنہاں گالھیں دی گواہی ڈیندے تے جئیں اِنہاں کُوں لِکھیا ہے تے اساں جانڑدے ہیں جو اُوندی گواہی سچی ہے۔ بئے وی بہُوں سارے کم ہِن جیہڑے یسُوع کیتے۔ جے ہر ہِک دے بارے ءچ لِکھیا ویندا تاں مَیں سمجھدا ہاں جو جیہڑیاں کتاباں لِکھیاں ویندیاں اُنہاں کیتے دُنیا ءچ جاہ نہ ہوندی۔ تِھیُفِلُس! مَیں آپنڑی پہلی کتاب ءچ اُنہاں گالھیں کُوں لِکھے جیہڑیاں یسُوع شروع ءچ کریندا تے سکھیندا ریہا، اُوں ڈینہہ تئیں جِیں ویلے او اسمان اُتے چاتا گِیا۔ چاتے ونجنڑ تُوں پہلے اُوں آپنڑے چُنڑے ہوئے رسُولاں کُوں رُوح القُدس دے وسیلہ نال ہدایت کیتی۔ ڈُکھ سہنڑ تُوں بعد اُوں آپنڑے آپ کُوں رسُولاں اُتے ظاہر کر تے، آپنڑے زندہ ہووݨ دے بہُوں سارے ثبوت ڈِتے۔ چالیہہ ڈینہہ تئیں او اُنہاں کُوں نظر آندا تے خُدا دی بادشاہی دے بارے ءچ ڈسیندا ریہا۔ جِیں ویلے او اُنہاں دے نال ہا تاں اُوں اُنہاں کُوں حُکم ڈِتا، ”یروشلیم کنُوں باہر نہ وَنجائے بلکہ باپ دے اُوں وعدے دے پُورے تھیوݨ دا اِنتظار کرائے جِیندا ذِکر تُساں مَیں کنُوں سُنڑ چُکے ہیوے ۔ کیوں جو یُوحنّا تاں پانڑی نال بپتسمہ ڈِتا پر تُساں تھوڑے ڈینہاں دے بعد رُوح القُدس نال بپتسمہ پےسو۔“ جِیں ویلے رسُول یسُوع دے نال ہِک جاہ تے جمع ہَن تاں اُوں کنُوں ایہ پُچھیا، ”اے خُداوند! کیا تُساں اِیں ویلے ای اِسرائیل دی بادشاہی بحال کریسو ؟“ اُوں اُنہاں کُوں آکھیا، ”اُنہاں وقتاں تے معیاداں کُوں جاننڑاں جِنہاں کُوں باپ آپنڑے اِختیار ءچ رکھے، تُہاڈا کم نئیں۔ پر جِیں ویلے رُوح القُدس تُہاڈے اُتے نازل تھیسی تاں تُہاکُوں قوت مِلسی تے تُساں یروشلیم تے یہُودیہ تے سامریہ دے سارے علاقے ءچ بلکہ زمین دی اِنتہا تئیں میڈے گواہ ہوسو۔“ ایہ آکھ تے او اُنہاں دے ڈیدھے ڈیدھے اُتے چا گِھدا گِیا تے بدّل اُونکُوں اُنہاں دے اکھیں کنُوں لُکا گِھدا۔ او حالی تئیں اُونکُوں اسمان دو ویندے ہوئے غور نال ڈیدھے پئے ہَن جو ڈیکھو ڈُو مرد سفید پُشاک ءچ اُنہاں دے کولھ آ کھڑے تھئے، تے آکھنڑ لگے ”گلیل دے مردو! تُساں کھڑے کھڑے اسمان دو کیوں ڈیدھے پئے ہیوے؟ اِیہو یسُوع جیہڑا تُہاڈے سامنڑے اسمان اُتے چا گِھدا گِیا ہے اِینویں ای ولا آسی جِینویں تُساں اُونکُوں اسمان دو ویندے ڈِٹھے۔“ وَل او اُوں پہاڑ تُوں جیہڑا زیتون دا اکھویندے تے یروشلیم کنُوں ادھے مِیل دے فاصلے تے ہے، یروشلیم کُوں واپس گئے۔ شہر ءچ داخل تھی تے او اُوں چوبارے اُتے گئے جِتھاں او یعنی پطرس، یُوحنّا، یعقُوب، اندریاس، فِلپُس، توما، بَرتُلمائی، متّی، حلفئی دا پوتر یعقُوب، شمعون جیہڑا حُریت پسند اکھویندا ہا تے یعقُوب دا پوتر یہُوداہ راہندے ہَن۔ ایہ سارے اُنہاں عورتاں تے یسُوع دی ماء مریم تے اُوندے بِھرانواں نال کٹھے تھی تے دُعا کریندے ریہے۔ اُنہاں ڈینہاں ءچ پطرس بِھرانواں دی جماعت ءچ جیہڑے تقریباً ہِک سو وِیہہ دے نیڑے ہَن، کھڑا تھی تے آکھنڑ لگا، ”بِھراؤ! اُوں نوِشتہ دا پُورا تھیوݨ ضرور ہا، جیہڑا رُوح القُدس پہلے ای داؤد دی زبان کنُوں اکھوا ڈِتا ہا۔ او گالھ یہُوداہ دے بارے ءچ ہئی جئیں یسُوع کُوں پکڑواوݨ آلیاں دی راہنمائی کیتی ہئی، بھانویں او ساڈے نال شمار کیتا گِیا تے اُوں اِیں خدمت دا حصہ پاتا۔“ (بدکاری دی کمائی ہوئی رقم نال اُوں ہِک کھیت مُل گِھدا۔ اُتھاں او سر دے بھار ڈھٹھا تے اُوندا پیٹ پھٹ گِیا تے اُوندیاں آندراں باہر نِکل آئیاں۔ یروشلیم دے سبھ لوکاں کُوں اِیں گالھ دا پتہ لگ گِیا، اِتُھوں تئیں جو اُنہاں آپنڑی زبان ءچ اُوں کھیت دا ناں ای ہَقَل دما رکھ ڈِتا جِیندا مطلب ہے خون دا کھیت۔) پطرس وَل آکھیا، ”زبُور ءچ لِکھیا ہے جو ’اُوندا گھر برباد تھی ونجے تے اُوندے ءچ راہنڑ آلا کوئی نہ ہووے‘ تے ’اُوندی خدمت کوئی بِیا گِھن گِھنے ۔‘ وَل اُنہاں ڈُو بندے پیش کیتے، ہِک دا ناں یُوسف جیہڑا برسبّا اکھویندے تے جِیندا لقب یُوستُس ہے، تے ڈُوجھا متّیاہ کُوں۔ تے ایہ آکھ تے دُعا کیتی جو ”اے خُداوند! تُوں جیہڑا سبھ دے دِلاں کُوں جانڑدا ہیں، ساڈے اُتے ظاہر کر جو اِنہاں ڈوہائیں ءچوں تُوں کِینکُوں چُنڑیا ہے، جو او رسُول ہووݨ تے اِیں خدمت دی ذمہ داری چاوے جِینکُوں یہُوداہ چھوڑ تے اُوں جاہ چلیا گِیا جیندے او لائق ہا۔“ وَل اُنہاں ڈوہاں دے ناں دی پرچی پاتی تے متّیاہ دا ناں نِکلیا۔ بس او اُنہاں یارہاں رسُولاں دے نال شمار کیتا گِیا۔ جِیں ویلے عید ِ پِنتیکُست دا ڈینہہ آیا تاں او سارے ہِک جاہ تے جمع ہَن، جو اچانک اسمان کنُوں ایجھی اواز آئی جِینویں زور دی اندھاری چلدی ہے، تے اُوں اواز نال سارا گھر بھریج گِیا جِتھاں او بیٹھے ہَن۔ اُنہاں کُوں بھاہ دیاں لَمباں وانگُوں زباناں ڈِکھالی ڈِتیاں جیہڑیاں اَنج اَنج تھی تے اُنہاں ءچوں ہر ہِک اُتے آ تے کھڑ گئیاں۔ تے او سارے رُوح القُدس نال بھریج گئے تے مختلف زباناں بولنڑ لگے جِینویں رُوح اُنہاں کُوں قابلیت بخشی ہئی۔ اُوں ویلے دُنیا دی ہر قوم ءچوں خُدا ترس یہُودی، یروشلیم ءچ راہندے ہَن۔ جِیں ویلے اُنہاں ایہ اواز سُنڑی تاں بِھیڑ جمع تھی گئی تے لوک ہکے بکے رہ گئے کیوں جو ہر ہِک کُوں اِیہو سُنڑدا ہا جو ایہ میڈی ای بولی بُولیندے پئے ہِن۔ سارے بہُوں حیران تھی تے آکھنڑ لگے ”کیا ایہ بولنڑ آلے یکے گلیل دے راہوݨ آلے نئیں؟ وَل ایہ کِینویں تھی سگدے جو ہر ہِک آپنڑے آپنڑے وطن دی بولی سُنڑدا پِیا ہے؟ اساں تاں پارتھی، مادی، عِیلامی، مسوپتامیہ، یہُودیہ، کپَدُکیہ، پُنطُس، آسِیہ، فروگیہ، پمفِیلیہ، مِصر تے لِبیا دے اُوں علاقے دے راہنڑ آلے ہیں جیہڑا کُرینے دے نیڑے ہے۔ تے اِتھاں رومی مسافر بھانویں پیدائشی یہُودی بھانویں اُنہاں دے مُرید، تے کریتی تے عرب ہِن۔ پر اساں آپنڑی آپنڑی بولی ءچ اُنہاں کنُوں خُدا دے عظیم کماں دا بیان سُنڑدے ہیں۔“ سبھ حیران تھئے تے پریشان تھی تے ہِک بئے کُوں آکھنڑ لگے، ”ایہ کیا تھیندا پئے؟“ پر کُجھ ٹھٹّھا کر تے آکھیا، ”ایہ تاں شراب دے نشے ءچ ہِن۔“ پر پطرس باقی یارہاں دے نال کھڑا تھیّا تے اُچی اواز ءچ لوکاں کُوں آکھیا، ”یہُودی بِھراؤ تے یروشلیم دے سارے راہنڑ آلیو! ایہ جاݨ گِھنو تے میڈی گالھ توجہ نال سُنڑو۔ ایہ لوک نشہ ءچ نئیں جِینویں تُساں سمجھدے پئے ہیوے کیوں جو حالی تاں سویل دے نؤں وجے ہِن۔ بلکہ ایہ او تھیندا پئے جیہڑا یُوایل نبی دی معرفت آکھیا گئے ’خُدا فرمیندے جو آخری ڈینہاں ءچ اِینویں تھیسی جو مَیں ہر بندے اُتے آپنڑا رُوح نازل کریساں تُہاڈے پوتر تے تُہاڈیاں دِھیاں نبُوّت کریسن تُہاڈے جوان رویا ڈیکھسن تے تُہاڈے بُڈھے خواب۔ مَیں اُنہاں ڈینہاں ءچ آپنڑے خادماں، مرداں تے عورتاں اُتے آپنڑا رُوح نازل کریساں تے او نبُوّت کریسن۔ مَیں اسمان اُتے عجیب کم تے تلے زمین اُتے نشانیاں ڈِکھیساں یعنی خون تے بھاہ تے گھاٹا دُھواں۔ سِجھ تاریک تھی ویسی چَن خون وانگُوں تھی ویسی اِیں کنُوں پہلے جو رب دا عظیم تے جلال آلا ڈینہہ آوے۔ تے اِینویں تھیسی جو جیہڑا وی خُداوند دا ناں گِھنسی، نجات پیسی ۔‘ اِسرائیلیو! سُنڑو، یسُوع ناصری ایجھا بندہ ہا جیندے ذریعے خُدا تُہاڈے وچال معجزے، عجیب کم تے نشان ڈِکھا تے ثابت کیتا جو او خُدا دی طرفوں ہا۔ تُساں آپ ای ایہ گالھ جانڑدے ہیوے۔ جِیں ویلے او خُدا دے پہلے کنُوں بنڑائے منصوبے تے علم دے مطابق پکڑوایا گِیا تاں تُساں اُونکُوں بدکار لوکاں دے ہتُھوں صلیب اُتے چڑھا تے قتل کر ڈِتا۔ پر خُدا اُونکُوں زندہ کر ڈِتا تے موت دے قبضے تُوں چُھڑایا کیوں جو ایہ ممکن نہ ہا جو او موت دے قبضہ ءچ راہندا۔ کیوں جو داؤد اُوندے بارے ءچ آدھا ہے جو ’مَیں رب کُوں ہمیشاں آپنڑے سامنڑے ڈیدھا ریہا کیوں جو او میڈے سجے پاسُوں ہے تاں جو مَیں ہلایا نہ وَنجاں۔ اِیں سببّوں میڈا دل خوش تھیّا تے میڈی زبان خوشی منائی، بلکہ میڈا جِسم وی اُمید ءچ قائم راہسی۔ اِیں واسطے جو تُوں میڈی جان کُوں عالم ِ ارواح ءچ نہ چُھوڑیسیں تے نہ آپنڑے قدُّوس دے سڑن دی نوبت آوݨ ڈیسیں۔ تُوں میکُوں زندگی دے رستے ڈِکھائے، تُوں میکُوں آپنڑی حضُوری ءچ خوشی نال بھر ڈیسیں ۔‘ بِھراؤ! مَیں قوم دے بزُرگ داؤد دے حق ءچ تُہاکُوں دلیری نال آکھ سگدا ہاں جو او مر گِیا تے دفن وی تھیّا تے اُوندی قبر اَج تئیں ساڈے ءچ موجود ہے۔ پر او نبی ہا تے ایہ جانڑدا ہا جو خُدا میڈے نال قَسم کھادی ہے جو مَیں تیڈی نسل ءچوں ہِک بندے کُوں تیڈے تخت اُتے بِلھیساں۔ اُوں پیشن گوئی کریندے ہوئے المسیح دے زندہ تھیوݨ دا ذِکر کیتا جو نہ او عالم ِ ارواح ءچ چھوڑیا گِیا تے نہ اُوندے جِسم کُوں سڑن ڈِتا گِیا۔ خُدا یسُوع کُوں زندہ کیتا تے اساں سارے اِیں گالھ دے گواہ ہیں۔ ہُنڑ اُونکُوں سرفراز کر تے خُدا دے سجے ہتھ بِلھایا گِیا ہے، تے اُوں باپ کنُوں وعدہ کیتا ہویا رُوح القُدس حاصل کر تے نازل کیتا جِیندا اثر تُساں ڈیدھے تے سُنڑدے ہیوے۔ کیوں جو داؤد تاں اسمان اُتے نئیں چڑھیا پر او آپ آدھے جو ’رب میڈے خُداوند کُوں آکھیا، میڈے سجے پاسُوں بہہ، جئیں تئیں مَیں تیڈے دُشمنڑاں کُوں تیڈے پیراں دی چوکی نہ بنڑا ڈیواں ۔‘ بس اِسرائیل دا سارا خاندان جاݨ گِھنے جو خُدا اُوں یسُوع کُوں جِینکُوں تُساں صلیب چڑھایا، خُداوند وی بنڑایا تے المسیح وی۔“ جِیں ویلے اُنہاں ایہ سُنڑیا تاں اُنہاں دے دِلاں کُوں ڈُکھ لگیا تے پطرس تے باقی رسُولاں کُوں آکھیا جو ”بِھراؤ! اساں کیا کرُوں؟“ پطرس اُنہاں کُوں آکھیا، ”توبہ کرو تے تُہاڈے ءچوں ہر ہِک آپنڑے گُناہاں دی معافی کیتے یسُوع مسیح دے ناں ءچ بپتسمہ گِھنے تاں تُساں رُوح القُدس دی نعمت پے سو۔ کیوں جو ایہ وعدہ تُہاڈے کیتے تے تُہاڈی اولاد کیتے بلکہ اُنہاں ساریاں کیتے وی ہے جیہڑے دُور دے ہِن، جِنہاں کُوں خُداوند ساڈا خُدا آپنڑے کولھ سڈیسی۔“ تے پطرس مزید بہُوں سارے گالھیں کیتیاں تے اُنہاں کُوں ایہ نصیحت کیتی جو ”آپنڑے آپ کُوں اِیں بدکار قوم کنُوں بچائی رکھو۔“ بس جِنہاں لوکاں اُوندا کلام قبول کیتا اُنہاں بپتسمہ گِھدا تے اُوں ڈینہہ تقریباً ترے ہزار لوک جماعت ءچ شامل تھی گئے۔ تے ایہ لوک رسُولاں کنُوں تعلیم گِھننڑ، رفاقت رکھنڑ، کٹھے روٹی کھاوݨ تے دُعا کرݨ ءچ لگے ریہے۔ ہر بندے اُتے خوف چھا گِیا تے رسُولاں دے ذریعے بہُوں سارے معجزے تے عجیب کم، ظاہر تھیندے ہَن۔ جیہڑے اِیمان گِھن آئے ہَن او سارے کٹھے راہندے تے اُنہاں دیاں سبھ چیزاں سانجھیاں ہَن۔ تے آپنڑا مال اسباب ویچ تے ہر ہِک کُوں اُوندی ضرورت دے مطابق پیسے وَنڈ ڈیندے ہَن۔ او ہر روز ہِک دل تھی تے ہیکل ءچ جمع تھیندے تے گھراں ءچ روٹی تروڑ تے خوشی تے سادہ دِلی نال کٹھے کھانڑا کھاندے ہَن۔ تے خُدا دی حمد کریندے تے سارے لوکاں دی نظر ءچ مقبول ہَن۔ تے خُداوند ہر روز نجات پاوݨ آلیاں کُوں جماعت ءچ شامل کر ڈیندا ہا۔ پطرس تے یُوحنّا، دُعا ویلے یعنی ڈوپہر ترے وجے ہیکل دو ویندے پئے ہَن۔ اُوں ویلے لوک ہِک بندے کُوں جیہڑا جماندرُو مَنڈا ہا، چاتی آندے ہَن۔ او اُونکُوں اندر ونجنڑ آلیاں کنُوں خیرات منگنڑ کیتے ہر روز ہیکل دے دروازے اُتے جیہڑا خُوبصُورت اکھویندا ہے، چھوڑ ویندے ہَن۔ جِیں ویلے اُوں پطرس تے یُوحنّا کُوں ہیکل ءچ ویندے ڈِٹھا تاں اُنہاں کنُوں خیرات منگی۔ پطرس تے یُوحنّا اُوندے اُتے غور نال نِگاہ کیتی تے پطرس آکھیا، ”ساڈے دو ڈیکھ۔“ او اُنہاں کنُوں کُجھ مِلنڑ دی اُمید تے اُنہاں دو متوجہ تھیّا۔ پطرس آکھیا، ”چاندی، سونا تاں میڈے کولھ نئیں پر جیہڑا کُجھ میڈے کولھ ہے مَیں تیکُوں ڈے ڈیندا ہاں۔ یسُوع مسیح ناصری دے ناں نال اُٹھی، تے ٹُر پِھر۔“ وَل پطرس اُوندا سجا ہتھ پکڑ تے اُونکُوں کھڑا کیتا، تے فوراً اُوندے پیر تے گِٹے مضبوط تھی گئے۔ او ٹپّا مار تے کھڑا تھی گِیا تے ٹُرݨ پِھرݨ لگا، تے ٹپے مریندا تے خُدا دی حمد کریندا ہویا اُنہاں نال ہیکل ءچ داخل تھی گِیا۔ سارے لوکاں اُونکُوں ٹُردے پِھردے تے خُدا دی حمد کریندے ڈیکھ تے اُونکُوں پچھاݨ گِھدا جو ایہ تاں اُوہو ہے جیہڑا ہیکل دے خُوب صورت دروازے اُتے بہہ تے خیرات منگدا ہا، تے او جیہڑا اُوندے نال تھیّا ہا، اُوں تُوں بہُوں ای حیران تھئے۔ جِیں ویلے او بندہ پطرس تے یُوحنّا کُوں پکڑ تے سُلیمانی برانڈے ءچ کھڑا ہا تاں سارے لوک بہُوں حیران تھی تے اُوں دو بھجدے آئے۔ پطرس ایہ ڈیکھ تے لوکاں کُوں آکھیا، ”اِسرائیلیو! تُساں اِیں اُتے کیوں حیران تھیندے ہیوے تے ساکُوں اِینویں کیوں ڈیدھے پئے ہیوے جِینویں اساں آپنڑی قُدرت یا دینداری دے سببّوں اِیں منڈے کُوں ٹُرݨ پِھرݨ دے لائق بنڑا ڈِتے؟ ابرہام، اِضحاق تے یعقُوب دے خُدا یعنی ساڈے پِیُو ڈاڈا دے خُدا آپنڑے خادم یسُوع کُوں جلال ڈِتے۔ تُساں اُونکُوں پکڑوا ڈِتا تے جِیں ویلے پِیلاطُس اُونکُوں چھوڑ ڈیوݨ دا اِرادہ کیتا تاں تُساں پِیلاطُس دے سامنڑے اُوندا اِنکار کیتا۔ تُساں اُوں قدُّوس تے راستباز دا اِنکار کیتا تے درخاست کیتی جو ہِک خونی تُہاڈے کیتے رِہا کر ڈِتا ونجے۔ تُساں زندگی دے مالک کُوں قتل کر ڈِتا جِینکُوں خُدا مُردیاں ءچوں زندہ کیتا۔ اساں اِیندے گواہ ہیں۔ یسُوع دے ناں اُتے اِیمان رکھنڑ نال اِیں بندے، جِینکُوں تُساں ڈیدھے تے جانڑدے ہیوے، شِفا پائی۔ اُوں اِیمان جیہڑا یسُوع دے وسیلے نال ہے اُونکُوں سبھ دے سامنڑے ایہ کامِل تندرُستی ڈِتی۔ تے ہُنڑ میڈے بِھراؤ! مَیں جانڑدا ہاں جو تُساں ایہ کم نادانی ءچ کیتا تے اِینویں ای تُہاڈے سرداراں وی۔ پر خُدا او سارے گالھیں جیہڑیاں اُوں آپنڑے نبیاں دی زبانی آکھیاں ہَن جو اُوندا مسیح ڈُکھ چیسی، اِیں طرحاں پُوریاں کیتیاں۔ بس توبہ کرو تے رجُوع گِھن آؤ تاں جو تُہاڈے گُناہ مِٹائے ونجنڑ تے خُداوند دی طرفوں تُہاڈے کیتے رُوحانی تازگی دا وقت آوے، تے اُوں المسیح یعنی یسُوع کُوں، جِینکُوں اُوں تُہاڈے کیتے مقرر کیتا، ولا بھیجے۔ پر یسُوع دا اسمان اُتے راہنڑ ضرور ہے جئیں تئیں او ساریاں چیزاں بحال نہ کر ڈِتیاں ونجنڑ جِنہاں دا ذِکر خُدا دُنیا دے شروع کنُوں آپنڑے پاک نبیاں دی زبانی کیتے۔ کیوں جو مُوسیٰ آکھیا ہا جو ’خُداوند خُدا تُہاڈے بِھرانواں ءچوں میڈے وانگُوں ہِک نبی پیدا کریسی۔ جیہڑا کُجھ او تُہاکُوں آکھے اُوندی سُنڑائے ۔ جیہڑا بندہ اُوں نبی دی نہ سُنڑسی او اُمت ءچوں فنا کر ڈِتا ویسی ۔‘ بلکہ سموئیل کنُوں گِھن تے پِچھلیاں تئیں جِتّی نبیاں کلام کیتا اُنہاں ساریاں اِنہاں ڈینہاں دی خبر ڈِتی ہے۔ تُساں نبیاں دی اولاد تے اُوں عہد ءچ شریک ہیوے جیہڑا خُدا تُہاڈے پِیُو ڈاڈا نال کیتا جِیں ویلے ابرہام کُوں آکھیا جو ’تیڈی اولاد کنُوں دُنیا دے سبھ لوک برکت پیسن ۔‘ خُدا آپنڑے خادم یسُوع کُوں زندہ کر تے پہلے تُہاڈے کولھ بھیجیا تاں جو تُہاڈے ءچوں ہر ہِک کُوں اُوندیاں بدکاریاں تُوں ہٹا تے برکت ڈیوے۔“ پطرس تے یُوحنّا لوکاں کُوں آدھے ای پئے ہَن جو کاہِن تے ہیکل دے سپاہیاں دا سردار تے صدوقی اُنہاں اُتے چڑھ آئے۔ او بہُوں کاوڑ ءچ ہَن کیوں جو او لوکاں کُوں یسُوع دی مثال ڈے تے مُردیاں ءچوں زندہ تھیوݨ دی تعلیم ڈیندے ہَن۔ اُنہاں پطرس تے یُوحنّا کُوں پکڑ تے ڈُوجھے ڈینہہ تئیں قید خانہ ءچ رکھیا کیوں جو شام تھی گئی ہئی۔ پر کلام سُنڑݨ آلیاں ءچوں بہُوں سارے اِیمان گِھن آئے، اِتُھوں تئیں جو اِیماندار مرداں دی تعداد پنج ہزار تھی گئی۔ ڈُوجھے ڈینہہ یہُودی سردار، بزُرگ، شریعت دے عالم، کاہِن ِ اعظم حنّا، کائفا، یُوحنّا، اِسکندر تے جِتّی سردار کاہِن دے گھرانڑے دے ہَن، یروشلیم ءچ جمع تھئے، تے پطرس تے یُوحنّا کُوں اَدھ ءچ کھڑا کر تے پُچھنڑ لگے، ”تُساں کیندی قُدرت تے ناں نال ایہ کم کیتے؟“ وَل پطرس رُوح القُدس نال بھریج تے اُنہاں کُوں آکھیا، ”اُمت دے سردارو تے بزُرگو! جے اَج ساڈے کنُوں ہِک نیک کم پارُوں پُچھ گُچھ کیتی ویندی ہے جو ایہ معذور کِینویں شِفایاب تھی گِیا، تاں تُساں تے ساری اِسرائیلی قوم ایہ جاݨ گِھنے جو یسُوع مسیح ناصری دے ناں نال جِینکُوں تُساں صلیب اُتے چڑھا ڈِتا تے جِینکُوں خُدا مُردیاں ءچوں زندہ کیتا، ایہ بندہ تُہاڈے سامنڑے تندرُست کھڑا ہے۔ یسُوع ’اُوہو پتھر ہے جِینکُوں تُساں مِستریاں رَد کر ڈِتا تے او کونے دے سرے دا پتھر تھی گِیا ۔‘ تے کہیں بئے دے وسیلے نجات نئیں مِلدی کیوں جو اسمان دے تلے لوکاں کُوں کوئی ڈُوجھا ناں نئیں بخشیا گِیا جیندے وسیلے نال اساں نجات پا سگوں۔“ جِیں ویلے اُنہاں پطرس تے یُوحنّا دی جُرأت ڈِٹھی تے معلوم تھیّا جو او اَن پڑھ تے عام بندے ہِن تاں بہُوں حیران تھئے۔ نال نال اُنہاں جاݨ گِھدا جو ایہ ڈوہائیں یسُوع دے نال رہ چُکے ہِن۔ پر اُوں بندے کُوں جیہڑا چنگا تھیّا ہا، اُنہاں نال کھڑا ڈیکھ تے اُوندے خلاف کُجھ نہ آکھ سگے۔ اِیں واسطے اُنہاں کُوں عدالت کنُوں باہر ونجنڑ دا حُکم ڈے تے آپس ءچ صلاح کرݨ لگے جو ”اساں اِنہاں بندیاں نال کیا کرُوں؟ کیوں جو یروشلیم دے سارے لوک جانڑدے ہِن جو اُنہاں ہِک معجزہ کیتے تے اساں اِیندا اِنکار نئیں کر سگدے۔ پر اِیں واسطے جو ایہ گالھ لوکاں ءچ مزید مشہور نہ تھیوے، اساں اُنہاں کُوں دڑکے ڈیسوں جو ولا یسُوع دا ناں گِھن تے کہیں نال گالھ نہ کرݨ۔“ بس اُنہاں کُوں سڈ تے حُکم ڈِتا جو یسُوع دا ناں گِھن تے ہرگز کہیں نال گالھ نہ کرݨ تے نہ تعلیم ڈیوݨ۔ پر پطرس تے یُوحنّا جواب ڈِتا، ”تُساں ای فیصلہ کرو جو خُدا دی نِگاہ ءچ کیا ٹھیک ہے، اساں تُہاڈی گالھ منُوں یا خُدا دی؟ کیوں جو ممکن نئیں جو اساں جیہڑا کُجھ ڈِٹھا تے سُنڑیا ہے، اُوندا ذِکر نہ کرُوں۔“ عدالت آلیاں اُنہاں کُوں بِیا وی دھمکا تے چھوڑ ڈِتا کیوں جو لوکاں دے سببّوں اُنہاں کُوں سزا ڈیوݨ دا کوئی موقع نہ مِلیا۔ اِیں واسطے جو سارے لوک اُوں واقعے دے سببّوں خُدا دی تعریف کریندے ہَن۔ کیوں جو جیہڑا بندہ اِیں معجزے کنُوں شِفا پا گِیا ہا، چالیہہ سالہاں کنُوں زیادہ عُمر دا ہا۔ جِینویں ای پطرس تے یُوحنّا رِہا تھئے، او آپنڑے لوکاں کولھ چلے گئے تے جیہڑا کُجھ سردار کاہِناں تے بزُرگاں اُنہاں کُوں آکھیا ہا، بیان کیتا۔ جِیں ویلے اُنہاں ایہ سُنڑیا تاں ہِک دل تھی تے خُدا کنُوں دُعا کیتی جو ”مالک! تُوں اسمان، زمین تے سمندر تے جیہڑا کُجھ اُنہاں ءچ ہے، سبھ کُوں بنڑایا۔ تُوں رُوح القُدس دے وسیلے نال ساڈے پِیُو، آپنڑے خادم داؤد دی زبانی فرمایا جو ’غیر قوماں کیوں کاوڑ ءچ ہِن تے اُمتاں کیوں فضول منصوبے بنڑیندیاں ہِن؟ رب تے اُوندے المسیح دی مخالفت ءچ دُنیا دے بادشاہ اُٹھی کھڑے تھئے تے سردار جمع تھی گئے ۔‘ واقعی تیڈے قدُّوس خادم یسُوع دے خلاف جِینکُوں تَیں مسیح مقرر کیتا، ہیرودیس تے پنطیُس پِیلاطُس، بنی اِسرائیل تے غیر قوماں نال کٹھے تھی گئے تاں جو جیہڑا کُجھ تیڈی قُدرت تے اِرادہ دے مطابق پہلے ای مقرر کر ڈِتا گِیا ہا اُوہو تھیوے۔ ہُنڑ اے خُداوند! اُنہاں دیاں دھمکیاں کُوں ڈیکھ تے آپنڑے بندیاں کُوں آپنڑا کلام بہُوں جُرأت نال سُنڑاوݨ دی توفیق ڈے۔ تے تُوں آپنڑی قُدرت دا اِظہار کر تاں جو تیڈے قدُّوس خادم یسُوع دے ناں نال شِفا، معجزے تے عجیب کم تھیوݨ۔“ جِیں ویلے اُنہاں دُعا کر گِھدی تاں او جاہ جِتھاں او جمع ہَن کمب گئی تے او سارے رُوح القُدس نال بھریج گئے تے او خُدا دا کلام جُرأت نال سُنڑاوݨ لگے۔ اِیمانداراں دی جماعت ہِک دل تے یک جان ہئی تے کہیں وی آپنڑے مال کُوں آپنڑا نہ آکھیا بلکہ اُنہاں دی ہر چیز سانجھی ہئی۔ تے رسُول وڈی قُدرت نال خُداوند یسُوع دے مُردیاں ءچوں زندہ تھیوݨ دی گواہی ڈیندے ہَن۔ تے اُنہاں ساریاں اُتے خُدا دا وڈا فضل ہا کیوں جو اُنہاں ءچوں کوئی مُتھاج نہ ہا، اِیں واسطے جو جیہڑے لوک زمیناں یا گھراں دے مالک ہَن، اُنہاں کُوں ویچ ویچ تے وِکیاں ہوئیاں چیزاں دے پیسے گِھن آندے ہَن۔ تے رسُولاں دے پیراں ءچ رکھ ڈیندے ہَن تے او ہر ہِک کُوں اُنہاں دی ضرورت دے مطابق وَنڈ ڈیندے ہَن۔ لاوی قبیلے دا یُوسف ناں دا ہِک بندہ ہا جیہڑا کُپرُس دا راہنڑ آلا ہا۔ رسُولاں اُوندا ناں برنباس رکھیا ہا جِیندا مطلب ہے حوصلہ ڈیوݨ آلا۔ اُوں آپنڑا کھیت ویچ تے پیسے رسُولاں دے پیراں ءچ رکھ ڈِتے۔ حننیاہ ناں دے ہِک بندے، تے اُوندی ذال سفیرہ آپنڑی کُجھ جائیداد ویچی۔ اُوں آپنڑی ذال دے جانڑدے ہوئے قیمت ءچوں کُجھ رقم آپنڑے کولھ رکھ گِھدی تے باقی رقم رسُولاں دے پیراں ءچ رکھ ڈِتی۔ پر پطرس آکھیا، ”حننیاہ! شیطان تیڈے دل ءچ ایہ گالھ کیوں پا ڈِتی جو تُوں رُوح القُدس نال کُوڑ ماریں تے زمین دی قیمت ءچوں کُجھ رکھ چھوڑیں؟ کیا ویچنڑ کنُوں پہلے زمین تیڈی نہ ہئی؟ تے جِیں ویلے ویچی گئی تاں رقم تیڈے اِختیار ءچ نہ ہئی؟ تیڈے دل ءچ ایہ گالھ کِینویں آئی؟ تَیں اِنسان نال نئیں بلکہ خُدا نال کُوڑ مارے۔“ حننیاہ ایہ سُنڑدے ای ڈھٹھا تے مر گِیا، تے سبھ سُنڑݨ آلیاں اُتے بہُوں خوف چھا گِیا۔ وَل کُجھ جوان آئے تے اُوندی لاش کُوں کفن ءچ ولھیٹ تے باہر گِھن گئے تے دفن کر ڈِتا۔ تقریباً ترے گھنٹے بعد اُوندی ذال، اِیں واقعہ کنُوں بے خبر اندر آئی۔ پطرس اُوں کنُوں پُچھیا، ”میکُوں ڈسا، کیا تُساں اِتنے ءچ ای زمین ویچی ہئی؟“ اُوں آکھیا، ”ہاں، اِتنے ءچ ای۔“ پطرس اُونکُوں آکھیا، ”تُساں کیوں خُداوند دے رُوح القُدس کُوں ازماوݨ کیتے ایکا کیتے؟ ڈیکھ، جیہڑے لوکاں تیڈے پئے کُوں دفن کیتے، او دروازے تئیں پُج گئے ہِن تے تیکُوں وی باہر گِھن ویسن۔“ او اُوں ویلے ای پطرس دے پیراں ءچ ڈھے پئی تے مر گئی۔ جوان اندر آئے تاں اُونکُوں مریا ڈیکھ تے باہر گِھن گئے تے اُونکُوں اُوندے پئے نال دفن کر ڈِتا۔ تے ساری کلیسیا بلکہ اِنہاں گالھیں کُوں سبھ سُنڑݨ آلیاں اُتے خوف چھا گِیا۔ تے رسُولاں دے ہتُھوں بہُوں سارے معجزے تے عجیب کم لوکاں ءچ تھیندے ہَن۔ تے سارے اِیماندار ہِک دل تھی تے سُلیمان دے برانڈے ءچ جمع تھیندے ہَن۔ پر ڈُوجھیاں ءچوں کہیں کُوں جُرأت نہ تھیندی ہئی جو اُنہاں ءچ شامل تھی ونجنڑ، بےشک لوک اُنہاں دی بہُوں عزت کریندے ہَن۔ اِیندے باوجود بہُوں سارے مرد تے عورتاں اِیمان گِھن آئے تے خُداوند دے مننڑ آلیاں دی تعداد ودھدی ویندی ہئی۔ اِتُھوں تئیں جو لوک بیماراں کُوں کَھٹاں تے چٹائیاں اُتے گِھن گِھن تے سڑکاں اُتے سَٹ ڈیندے ہَن، تاں جو جِیں ویلے پطرس اُتھوں لنگھے تاں گھٹ و گھٹ اُوندا پرچھانواں ای اُنہاں اُتے پے ونجے۔ تے یروشلیم دے چارے پاسُوں دیاں وستیاں ءچوں بے شمار لوک بیماراں تے اُنہاں کُوں جِنہاں ءچ بدرُوحاں ہَن، آپنڑے نال گِھن آندے ہَن تے او سارے دے سارے چنگے کر ڈِتے ویندے ہَن۔ اِیں گالھ اُتے کاہِن ِ اعظم تے اُوندے سارے ساتھی جیہڑے صدوقیاں دے فرقہ دے ہَن، حسد کنُوں بھریج گئے۔ تے رسُولاں کُوں گرفتار کروا تے جیل ءچ سَٹ ڈِتا۔ پر رات کُوں خُداوند دے ہِک فرشتہ قید خانہ دے دروازے کھولے تے اُنہاں کُوں باہر کڈھ تے آکھنڑ لگا جو ”ونجو ہیکل ءچ کھڑے تھی تے اِیں زندگی دے بارے ءچ سارے گالھیں لوکاں کُوں ڈساؤ۔“ او ایہ سُنڑ تے سویل نال ای ہیکل ءچ گئے تے تعلیم ڈیوݨ لگے۔ پر کاہِن ِ اعظم تے اُوندے ساتھیاں آ تے صدر ِ عدالت آلیاں یعنی بنی اِسرائیل دے سارے بزُرگاں کُوں جمع کیتا تے قید خانہ ءچ اکھوا بھیجیا جو رسُولاں کُوں گِھن آوݨ۔ پر ہیکل دے محافظاں دے افسراں پُج تے اُنہاں کُوں قید خانہ ءچ نہ پاتا تے وَل آ تے خبر ڈِتی جو ”اساں قید خانہ کُوں تاں بہُوں حفاظت نال بند کیتا ہویا تے پہرے داراں کُوں دروازیاں اُتے کھڑے ڈِٹھا، پر جِیں ویلے کھولیا تاں اندر کوئی نہ مِلیا۔“ ہیکل دے محافظاں دے سردار تے سردار کاہِناں ایہ گالھیں سُنڑیاں تاں حیران تھئے تے سوچنڑ لگے جو ہُنڑ کیا تھیسی۔ اُوں ویلے کہیں آ تے اُنہاں کُوں خبر ڈِتی جو ”ڈیکھو، او بندے جِنہاں کُوں تُساں قید کیتا ہا، ہیکل ءچ کھڑے لوکاں کُوں تعلیم ڈیندے پئے ہِن۔“ وَل ہیکل دے محافظاں دا سردار آپنڑے سپاہیاں نال وَنج تے اُنہاں کُوں گِھن آیا پر زور نال نئیں کیوں جو لوکاں کنُوں ڈردے ہَن جو ساکُوں سنگسار نہ کرݨ۔ وَل اُنہاں کُوں گِھن آ تے عدالت ءچ کھڑا کر ڈِتا تے کاہِن ِ اعظم اُنہاں کُوں ایہ آکھیا، ”اساں تاں تُہاکُوں سخت تاکید کیتی ہئی جو ایہ ناں گِھن تے تعلیم نہ ڈیوائے پر ڈیکھو تُساں سارے یروشلیم ءچ آپنڑی تعلیم پھیلا ڈِتی تے اُوں بندے دا خون ساڈی گردن اُتے رکھنڑ چاہندے ہیوے۔“ پطرس تے رسُولاں جواب ءچ آکھیا جو ”ساڈے اُتے اِنسان دے حُکم دی بجائے خُدا دا حُکم مننڑ زیادہ فرض ہے۔ ساڈے پِیُو ڈاڈا دے خُدا، یسُوع کُوں مُردیاں ءچوں زندہ کیتا جِینکُوں تُساں صلیب اُتے چڑھا تے مار ڈِتا ہا۔ خُدا اُونکُوں ای مالک تے نجات ڈیوݨ آلا بنڑا تے آپنڑے سجے ہتھ آلے پاسُوں بِلھا گِھدا تاں جو اِسرائیل کُوں توبہ دی توفیق تے گُناہاں دی معافی بخشے۔ اساں اِنہاں گالھیں دے گواہ ہیں تے رُوح القُدس وی، جیہڑا خُدا آپنڑے فرمانبرداراں کُوں عطا فرمائے۔“ او ایہ سُنڑ تے کوڑیج گئے تے چاہندے ہَن جو اُنہاں کُوں قتل کر ڈیوݨ، پر گملی ایل ناں دے ہِک فریسی جیہڑا شریعت دا عالم تے سارے لوکاں ءچ عزت دار ہا، عدالت ءچ کھڑا تھی تے حُکم ڈِتا جو اِنہاں بندیاں کُوں تھوڑی دیر کیتے باہر کر ڈیؤ۔ وَل اُنہاں کُوں آکھیا، ”اِسرائیلیو! اِنہاں بندیاں دے نال جیہڑا کُجھ کرݨ چاہندے ہیوے، ہوشیاری نال کرائے، کیوں جو کُجھ عرصہ پہلے تھیُوداس اُٹھیا ہا تے دعویٰ کیتا ہا جو مَیں وی کوئی چیز ہاں تے تقریباً چار سو بندے اُوندے نال رَل گئے ہَن۔ پر او ماریا گِیا تے جِتّی اُوندے مننڑ آلے ہَن، سارے تِتربِتر تھی گئے تے اُوندا دعویٰ ختم تھی گِیا۔ اِیں بندے دے بعد مردم شماری دے ڈینہاں ءچ یہُوداہ گلیلی اُٹھیا تے اُوں کُجھ لوک آپنڑے نال کر گِھدے۔ او وی ہلاک تھیّا تے جِتّی اُوندے مننڑ آلے ہَن سارے تِتربِتر تھی گئے۔ بس ہُنڑ مَیں تُہاکُوں آدھا ہاں جو اِنہاں بندیاں کنُوں دُور رہوائے تے اِنہاں نال کُجھ کم نہ رکھائے، کیوں جو ایہ تدبیر یا کم جے اِنساناں دی طرفوں ہے تاں خودبخود برباد تھی ویسی، پر جے خُدا دی طرفوں ہے تاں تُساں اِنہاں بندیاں کُوں روک نہ سگسو بلکہ خُدا نال لڑن آلے کھڑائے ویسو۔“ اُنہاں اُوندی گالھ مَن گِھدی تے رسُولاں کُوں سڈ تے اُنہاں کُوں کوڑے مروائے تے ایہ حُکم ڈے تے چھوڑ ڈِتا جو یسُوع دا ناں گِھن تے گالھ نہ کرائے۔ بس رسُول عدالت ءچوں اِیں گالھ تُوں خوش تھی تے چلے گئے جو اساں یسُوع دے ناں دی خاطر بے عزت تھیوݨ دے لائق تاں تھئے۔ تے او ہیکل تے گھراں ءچ ہر روز تعلیم ڈیوݨ تے اِیں گالھ دی خوشخبری سُنڑاوݨ تُوں باز نہ آئے جو یسُوع ای المسیح ہے۔ اُنہاں ڈینہاں ءچ جِیں ویلے شاگرداں دی تعداد ودھدی ویندی ہئی تاں یُونانی بولنڑ آلے یہُودی، عبرانیاں دی شکایت کرݨ لگے جو ہر روز جِیں ویلے کھانڑا تقسیم تھیندا ہے تاں ساڈیاں بیوہ عورتاں کُوں نظر انداز کیتا ویندے۔ وَل بارہاں رسُولاں، شاگرداں دی جماعت کُوں سڈ تے آکھیا، ”مناسب نئیں جو اساں خُدا دے کلام دی تبلیغ کُوں چھوڑ تے کھاوݨ پِیوݨ دا اِنتظام کرُوں۔ اِیں واسطے بِھراؤ! آپنڑے ءچوں سَت نیک ناں بندے چُنڑ گِھنو جیہڑے رُوح القُدس تے دانائی نال بھرے ہووݨ جو اساں اُنہاں کُوں اِیں کم کیتے مقرر کرُوں۔ پر اساں تاں دُعا ءچ تے کلام دی خدمت ءچ مصروف راہسوں۔“ ایہ گالھ ساری جماعت کُوں پسند آئی۔ بس اُنہاں ستِفُنس ناں دے ہِک بندے کُوں جیہڑا اِیمان تے رُوح القُدس نال بھریا ہویا ہا تے فِلپُس، پرُخُرس، نِیکانور، تِیمون، پرمناس تے نیکُلاؤس کُوں چُنڑ گِھدا۔ نیکُلاؤس انطاکِیہ دا نو مُرید یہُودی ہا۔ تے اِنہاں کُوں رسُولاں دے اگُوں کھڑا کیتا، تے رسُولاں اُنہاں اُتے ہتھ رکھ تے دُعا کیتی۔ خُدا دا کلام پھیلدا ریہا تے یروشلیم ءچ شاگرداں دی تعداد بہُوں ای ودھ گئی تے بہُوں سارے کاہِن اِیمان گِھن آئے۔ ستِفُنس فضل تے قوت نال بھریا ہویا لوکاں ءچ وڈے وڈے عجیب کم تے معجزے ظاہر کریندا ہا۔ کُرینی، اِسکندرِیہ، کلکیہ تے آسِیہ دے کُجھ لوک اُوں عبادت خانہ دے ہَن جیہڑا آزاد کیتے گئے غُلاماں دا اکھویندے۔ او ستِفُنس نال بحث کرݨ لگے۔ پر ستِفُنس رُوح القُدس دی مدد نال اِتنی دانائی نال کلام کریندا ہا جو او اُوندا مُقابلہ نہ کر سگے۔ اِیں تے اُنہاں کُجھ بندیاں کُوں سِکھا تے اکھوا بھیجیا جو ”اساں اِینکُوں مُوسیٰ تے خُدا دے برخلاف کُفر بَکدے سُنڑیا ہے۔“ وَل او عوام تے بزُرگاں تے شریعت دے عالماں کُوں اُکسا تے ستِفُنس اُتے چڑھ گئے تے اُونکُوں پکڑ تے صدر ِ عدالت ءچ گِھن گئے۔ تے کُوڑے گواہ پیش کیتے جِنہاں آکھیا جو ”ایہ بندہ اِیں پاک مقام تے شریعت دے خلاف بولنڑ تُوں باز نئیں آندا، کیوں جو اساں اُونکُوں ایہ آدھے سُنڑیا ہے جو اِیہو یسُوع جیہڑا ناصرۃ دا ہے، اِیں مقام کُوں برباد کر ڈیسی تے اُنہاں رسماں کُوں بدل ڈیسی، جیہڑیاں مُوسیٰ ساکُوں ڈِتیاں ہِن۔“ اُنہاں ساریاں، جیہڑے عدالت ءچ بیٹھے ہَن، ستِفُنس اُتے نِگاہ کیتی تاں ڈِٹھا جو اُوندا چہرہ فرشتے آلی کار ہے۔ وَل کاہِن ِ اعظم، ستِفُنس تُوں پُچھیا، ”کیا ایہ گالھیں سچیاں ہِن؟“ اُوں آکھیا ”بِھراؤ تے بزُرگو سُنڑو! جلالی خُدا ساڈے پِیُو ابرہام اُتے اُوں ویلے ظاہر تھیّا جِیں ویلے او حاران شہر ءچ آباد تھیوݨ کنُوں پہلے مسوپتامیہ ءچ ہا، تے اُونکُوں آکھیا جو ’آپنڑے مُلک تے آپنڑے رشتہ داراں کُوں چھوڑ تے اُوں مُلک ءچ چلیا وَنج جیہڑا مَیں تیکُوں ڈِکھیساں ۔‘ اِیں اُتے ابرہام کسدیاں دے مُلک کنُوں نِکل تے حاران ءچ آباد تھیّا۔ تے اُوندے پِیُو دے مرݨ تُوں بعد خُدا اُونکُوں اُتھوں کنُوں اِیں مُلک ءچ وسا ڈِتا جیندے ءچ تُساں ہُنڑ وسدے ہیوے۔ خُدا اُونکُوں اُوندے ءچ کوئی میراث نہ ڈِتی بلکہ پیر رکھنڑ دی جاہ وی نہ ڈِتی پر وعدہ کیتا جو ’مَیں ایہ زمین تیڈے تے تیڈے بعد تیڈی نسل دے قبضہ ءچ کر ڈیساں،‘ بھانویں اُوں ویلے ابرہام دی اولاد نہ ہئی ۔ خُدا ایہ وی فرمایا، ’تیڈی نسل غیر مُلک ءچ پردیسی ہوسی۔ اُتھاں دے لوک اُنہاں کُوں غُلامی ءچ رکھیسن تے چار سو سال تئیں اُنہاں نال بدسلُوکی کریسن۔‘ وَل خُدا آکھیا جو ’جِیں قوم دی او غُلامی ءچ راہسن، اُونکُوں مَیں سزا ڈیساں تے اُوندے بعد او نِکل تے اِیں جاہ تے میڈی عبادت کریسن ۔‘ تے خُدا ابرہام نال عہد کیتا جِیندا نشان ختنہ کرواوݨ ہا ۔ تے اِینویں ابرہام تُوں اِضحاق پیدا تھیّا تے اٹھویں ڈینہہ اُوندا ختنہ کیتا گِیا تے اِضحاق تُوں یعقُوب تے یعقُوب تُوں بارہاں قبیلیاں دے بزُرگ پیدا تھئے۔ بزُرگاں حسد ءچ آ تے یُوسف کُوں مِصریاں دے ہتھ ویچ ڈِتا۔ پر خُدا اُوندے نال ہا، تے اُوندیاں ساریاں مُصیبتاں تُوں اُونکُوں بچایا، تے اُونکُوں اِتنی حِکمت بخش ڈِتی جو او مِصر دے بادشاہ فرعون دی نِگاہ ءچ مقبول تھی گِیا۔ تے فرعون اُونکُوں مِصر تے آپنڑے سارے گھر دا سردار بنڑا ڈِتا۔ وَل سارے مِصر تے کنعان ءچ کال پے گِیا تے وڈی مُصیبت آئی تے ساڈے پِیُو ڈاڈا کُوں کھانڑا نہ مِلدا ہا۔ پر جِیں ویلے یعقُوب ایہ سُنڑیا جو مِصر ءچ اناج ہے تاں اُوں ساڈے پِیُو ڈاڈا کُوں پہلی پھیری بھیجیا۔ ڈُوجھی پھیری یُوسف آپنڑے بِھرانواں اُتے ظاہر تھی گِیا تے یُوسف دی قومیت فرعون کُوں معلوم تھی گئی۔ وَل یُوسف آپنڑے پِیُو یعقُوب تے اُوندے سارے خاندان کُوں جیہڑے پنجھتر بندے ہَن، سڈوا بھیجیا۔ تے یعقُوب مِصر ءچ گِیا۔ اُتھاں او تے ساڈے پِیُو ڈاڈا مر گئے ۔ بعد ءچ اُنہاں دیاں لاشاں کُوں سِکم شہر ءچ پُچایا گِیا تے اُوں مقبرہ ءچ دفن کیتے گئے جِینکُوں ابرہام پیسے ڈے تے سِکم ءچ بنی ہمور کنُوں مُل گِھدا ہا ۔ پر جِیں ویلے اُوں وعدہ دے پُورے تھیوݨ دا ویلا نیڑے آیا جیہڑا خُدا ابرہام نال کیتا ہا تاں مِصر ءچ ساڈے لوکاں دی تعداد بہُوں ودھ گئی۔ وَل ڈُوجھا بادشاہ جیہڑا یُوسف کُوں نہ جانڑدا ہا، مِصر اُتے حکُومت کرݨ لگ پِیا ۔ اُوں ساڈی قوم نال چالاکی کر تے ساڈے پِیُو ڈاڈا نال اِتُھوں تئیں ظلم کیتا جو او آپنڑے بالاں کُوں باہر سٹنڑ اُتے مجبور تھی گئے تاں جو او زندہ نہ راہنڑ۔ اُوں ویلے مُوسیٰ پیدا تھیّا جیہڑا بہُوں ای خُوبصُورت ہا۔ او ترے مہینے تئیں آپنڑے پِیُو دے گھر ءچ پالیا گِیا، پر جِیں ویلے او باہر سَٹ ڈِتا گِیا تاں فرعون دی دِھی اُونکُوں چا گِھدا تے آپنڑے پوتر آلی کار پالیا۔ تے مُوسیٰ مِصریاں دی ساری تعلیم و تربیت حاصل کیتی تے او کلام تے کم ءچ قوت آلا ہا ۔ جِیں ویلے او تقریباً چالیہہ سالہاں دا تھیّا تاں اُوندے دل ءچ آیا جو مَیں آپنڑے بِھرانواں بنی اِسرائیل دا حال پتہ کراں۔ اُوں اُنہاں ءچوں ہِک کُوں ظلم سہندے ڈیکھ تے اُوندی مدد کیتی تے مِصری کُوں مار تے مظلوم دا بدلہ گِھدا ۔ اُوں تاں خیال کیتا جو میڈے بِھرا سمجھ ویسن جو خُدا میڈے ہتُھوں اُنہاں کُوں رہائی ڈیسی پر او نہ سمجھے۔ وَل ڈُوجھے ڈینہہ اُوں اُنہاں ءچوں ڈُو کُوں آپس ءچ لڑدے ڈِٹھا تے ایہ آکھ تے اُنہاں ءچ صُلح کراوݨ دی کوشش کیتی جو ’جوانو! تُساں تاں بِھرا بِھرا ہیوے، کیوں ہِک بئے اُتے ظلم کریندے ہیوے؟‘ پر جیہڑا آپنڑے ہمسائے اُتے ظلم کریندا پِیا ہا، اُوں مُوسیٰ کُوں ہِک پاسے دھکا ڈے تے آکھیا جو ’تیکُوں کئیں ساڈے اُتے حاکم تے قاضی مقرر کیتے؟ کیا تُوں میکُوں وی قتل کرݨ چاہندیں جِینویں کل اُوں مِصری کُوں قتل کیتا ہا؟‘ مُوسیٰ ایہ گالھ سُنڑ تے بھج گِیا تے مُلک ِ مِدیان ءچ ہِک پردیسی دے طور تے راہنڑ لگا تے اُتھاں اُوندے ڈُو پوتر پیدا تھئے ۔ چالیہہ سال بعد کوہ ِ سِینا دے بیابان ءچ مُوسیٰ کُوں ہِک بلدی ہوئی جھاڑی دے شعلہ ءچ ہِک فرشتہ ڈِکھالی ڈِتا۔ ایہ ڈیکھ تے مُوسیٰ حیران تھیّا تے جِیں ویلے غور نال ڈیکھنڑ کیتے نیڑے گِیا تاں خُداوند دی اواز آئی جو ’مَیں تیڈے پِیُو ڈاڈا دا خُدا یعنی ابرہام، اِضحاق تے یعقُوب دا خُدا ہاں ۔‘ وَل مُوسیٰ کمب گِیا تے اُونکُوں ڈیکھنڑ دی جُرأت نہ ریہی۔ خُداوند اُونکُوں آکھیا جو ’آپنڑے پیراں کنُوں جُتی لہا گِھن کیوں جو جیہڑی جاہ اُتے تُوں کھڑا ہیں، او پاک زمین ہے۔ مَیں مِصر ءچ آپنڑی اُمت دی مُصیبت ڈِٹھی تے اُنہاں دی دھاڑ پِٹ سُنڑی، تے اُنہاں کُوں چُھڑاوݨ کیتے تلے آیا ہاں۔ ہُنڑ مَیں تیکُوں مِصر ءچ بھجیساں ۔‘ جئیں مُوسیٰ دا اُنہاں ایہ آکھ تے اِنکار کیتا ہا جو ’کئیں تیکُوں حاکم تے قاضی مقرر کیتا؟‘ اُونہی کُوں خُدا حاکم تے چُھڑاوݨ آلا بنڑا تے اُوں فرشتہ دے ذریعے بھیجیا جیہڑا اُونکُوں جھاڑی ءچ نظریا ہا۔ اِیہو بندہ اُنہاں کُوں کڈھ آیا تے مِصر تے بحر ِ قُلزم تے بیابان ءچ چالیہہ سال تئیں عجیب کم تے معجزے ڈِکھائے۔ ایہ اُوہو مُوسیٰ ہے جئیں بنی اِسرائیل کُوں آکھیا جو ’خُدا تُہاڈے بِھرانواں ءچوں تُہاڈے کیتے میڈے وانگُوں ہِک نبی پیدا کریسی ۔‘ ایہ اُوہو ہے جیہڑا بیابان دی جماعت ءچ اُوں فرشتہ دے نال وی ہا جیہڑا کوہ ِ سِینا اُتے اُوندے نال ہم کلام تھیّا، تے ساڈے پِیُو ڈاڈا دے نال وی ہا۔ اُونہی کُوں زندہ کلام مِلیا جو ساڈے تئیں پُچا ڈیوے۔ پر ساڈے پِیُو ڈاڈا اُوندا تابعدار تھیوݨ نہ چاہیا بلکہ اُونکُوں رَد کر ڈِتا تے اُنہاں دے دل مِصر دو ولا لگ گئے۔ اُنہاں ہارُون کُوں آکھیا جو ’ساڈے کیتے ایجھے معبُود بنڑا جیہڑے ساڈے اگُوں اگُوں ٹُرݨ، کیوں جو ایہ مُوسیٰ جیہڑا ساکُوں مُلک ِ مِصر ءچوں کڈھ آئے، اساں نئیں جانڑدے جو اُوندے نال کیا تھئے ۔‘ تے اُنہاں ڈینہاں ءچ اُنہاں ویہڑے دی شکل ءچ ہِک بُت بنڑایا تے اُوندے اگُوں قُربانی پیش کیتی تے آپنڑے ہتھاں دے کماں دی خوشی منائی۔ بس خُدا اُنہاں تُوں مُنہ پھیر تے اسمانی تاریاں دی عبادت کرݨ کیتے چھوڑ ڈِتا۔ اِیں واسطے نبیاں دی کتاب ءچ لِکھیا ہے جو ’اِسرائیل دے گھرانڑے! کیا تُساں چالیہہ سال تئیں بیابان ءچ میڈے کیتے قُربانیاں تے نذرانے پیش کریندے ریہے؟ نئیں بلکہ تُساں آپنڑے نال مولک دا تمبُو تے رفان دیوتا دا تارہ چاتی ودے ہَوے، یعنی اُنہاں مُورتاں کُوں جِنہاں کُوں تُساں عبادت کرݨ کیتے بنڑایا ہئی۔ بس مَیں تُہاکُوں بابل تُوں پرے گِھن ویساں ۔‘ بیابان ءچ ساڈے پِیُو ڈاڈا کولھ عہد دا تمبُو ہا۔ او خُدا دے حُکم تے اُوں نمونہ دے مطابق بنڑایا گِیا ہا جیہڑا اُوں مُوسیٰ کُوں ڈِکھایا ہا۔ اُوں تمبُو کُوں ساڈے پِیُو ڈاڈا پہلے بزُرگاں تُوں حاصل کر تے یشُوع دے نال گِھن آئے جِیں ویلے اُنہاں قوماں دی ملکیت اُتے قبضہ کیتا ، جِنہاں کُوں خُدا ساڈے پِیُو ڈاڈا دے سامنڑے کڈھ ڈِتا۔ تے او تمبُو داؤد دے زمانہ تئیں ریہا۔ خُدا دے کرم دی نظر داؤد اُتے ہئی تے اُوں خُدا کُوں درخاست کیتی جو مَیں یعقُوب دے خُدا کیتے گھر بنڑاواں ۔ پر خُدا کیتے گھر بنڑاوݨ آلا سُلیمان ہا۔ پر خُدا تعالیٰ، اِنسانی ہتھاں دے بنڑائے ہوئے گھراں ءچ نئیں راہندا، جِینویں نبی آکھیا ہے جو ’خُداوند فرمیندے، اسمان میڈا تخت تے زمین میڈے پیراں دی چوکی ہے۔ وَل تُساں میڈے کیتے کیجھا گھر بنڑیسو یا میڈے ارام کیتے کیہڑی جاہ بنڑیسو؟ کیا ایہ ساریاں چیزاں مَیں نئیں بنڑائیاں ؟‘ ضِدی لوکو، تُساں دل تُوں تے کَن تُوں اُنہاں آلی کار ہیوے جِنہاں دا ختنہ نہ تھیّا ہووے ، تُساں رُوح القُدس دی ہمیشاں مخالفت کریندے ہیوے جِینویں تُہاڈے پِیُو ڈاڈا کریندے ہَن۔ نبیاں ءچوں کِینکُوں تُہاڈے پِیُو ڈاڈا نئیں ستایا؟ اُنہاں تاں اُوں راستباز [یعنی المسیح] دے آوݨ دی خبر ڈیوݨ آلے کُوں قتل کر ڈِتا تے ہُنڑ تُساں اُوندے پکڑواوݨ آلے تے قاتل تھئے۔ تُساں فرشتیاں دے ذریعے شریعت تاں پائی پر عمل نہ کیتا۔“ جِیں ویلے صدر ِ عدالت آلیاں ایہ گالھیں سُنڑیاں تاں کوڑیج گئے تے اُوندے اُتے ڈند پِیہوݨ لگے۔ پر ستِفُنس رُوح القُدس نال بھریج تے اسمان دو غور نال نِگاہ کیتی تے خُدا دے جلال تے یسُوع کُوں خُدا دے سجے پاسُوں کھڑا ڈیکھ تے آکھیا جو ”ڈیکھو، مَیں اسمان کُوں کُھلیا تے اِبنِ آدم کُوں خُدا دے سجے پاسُوں کھڑا ڈیدھا ہاں۔“ ایہ سُنڑ تے اُنہاں وڈے زور نال چیخ تے آپنڑے کَن بند کر گِھدے تے کٹھے تھی تے اُوندے اُتے جھپٹے۔ تے اُونکُوں شہر کنُوں باہر کڈھ تے سنگسار کرݨ لگے تے اُوندے خلاف گواہی ڈیوݨ آلیاں آپنڑے کپڑے ساؤل ناں دے ہِک جوان دے پیراں کولھ رکھ ڈِتے۔ او ستِفُنس کُوں سنگسار کریندے ریہے تے اُوں ایہ دُعا کیتی جو اے خُداوند یسُوع! میڈی رُوح کُوں قبول کر۔ وَل اُوں گوڈے ٹیک تے وڈی اواز نال آکھیا جو ”اے خُداوند! ایہ گُناہ اِنہاں دے ذمہ نہ لا۔“ تے ایہ آکھ تے سَم گِیا۔ تے ساؤل اُوندے قتل اُتے راضی ہا۔ اُونہی ڈینہہ اُوں کلیسیا اُتے جیہڑی یروشلیم ءچ ہئی، وڈے ظلم دا سلسلہ شروع تھیّا تے رسُولاں دے علاوہ سارے لوک یہُودیہ تے سامریہ دے چودھارُوں تِتربِتر تھی گئے۔ کُجھ اِیماندار لوکاں ستِفُنس کُوں دفنایا تے اُوندے اُتے وڈا ماتم کیتا۔ پر ساؤل کلیسیا کُوں تباہ کریندا ریہا۔ او گھر گھر وَنج تے مرداں تے عورتاں کُوں گِھیل تے قید کرویندا ہا۔ بس جیہڑے تِتربِتر تھئے ہَن او جاہ جاہ کلام دی خوشخبری سُنڑیندے ریہے۔ تے فِلپُس سامریہ شہر ءچ وَنج تے لوکاں ءچ المسیح دی تبلیغ کرݨ لگا۔ لوکاں فِلپُس دے معجزے ڈیکھ تے، تے اُوندے گالھیں سُنڑ تے، ہِک دل تھی تے اُوندے دو توجہ کیتی، کیوں جو بہُوں سارے لوکاں ءچوں بدرُوحاں وڈی اواز نال چیخاں مار تے نِکل گئیاں تے بہُوں سارے مفلُوج تے منڈے چنگے کیتے گئے۔ تے اُوں شہر ءچ وڈی خوشی تھئی۔ اِیں کنُوں پہلے شمعون ناں دا ہِک بندہ اُوں شہر ءچ جادُوگری کریندا ہا تے سامریہ دے لوکاں کُوں حیران کیتی رکھیندا تے ایہ آدھا ہا جو مَیں وی کوئی وڈا بندہ ہاں۔ تے چھوٹے تُوں وڈے تئیں سارے اُوندے دو توجہ کریندے تے آدھے ہَن جو ”ایہ بندہ خُدا دی او قُدرت ہے جِینکُوں وڈی اکھیندے ہِن۔“ او اِیں واسطے اُوندے دو توجہ کریندے ہَن جو اُوں وڈی مُدت کنُوں آپنڑے جادُو دے سببّوں ساریاں کُوں حیران کیتا ہویا ہا۔ پر جِیں ویلے اُنہاں فِلپُس دا یقین کیتا جیہڑا خُدا دی بادشاہی تے یسُوع مسیح دے ناں دی خوشخبری ڈیندا ہا تاں سبھ لوک بھانویں مرد بھانویں عورت بپتسمہ گِھننڑ لگے۔ تے شمعون خود وی یقین کیتا تے بپتسمہ گِھن تے فِلپُس نال تھی پِیا تے نشان تے وڈے وڈے معجزے تھیندے ڈیکھ تے حیران تھیّا۔ جِیں ویلے یروشلیم ءچ رسُولاں سُنڑیا جو سامریہ دے لوکاں خُدا دا کلام قبول کر گِھدے تاں پطرس تے یُوحنّا کُوں اُنہاں کولھ بھیجیا۔ اُتھاں پُج تے اُنہاں نویں اِیمانداراں کیتے دُعا کیتی جو اُنہاں کُوں رُوح القُدس مِلے۔ کیوں جو او اُوں ویلے تئیں اُنہاں ءچوں کہیں اُتے نازل نہ تھیّا ہا۔ اُنہاں صرف خُداوند یسُوع دے ناں اُتے بپتسمہ گِھدا ہا۔ وَل پطرس تے یُوحنّا اُنہاں اُتے ہتھ رکھے تے اُنہاں رُوح القُدس پایا۔ جِیں ویلے شمعون ڈِٹھا جو رسُولاں دے ہتھ رکھنڑ نال رُوح القُدس ڈِتا ویندے تاں اُنہاں کولھ پیسے گِھن تے آکھیا جو ”میکُوں وی ایہ اِختیار ڈیؤ جو جئیں اُتے مَیں ہتھ رکھاں او رُوح القُدس پاوے۔“ پطرس اُونکُوں آکھیا ”تیڈے پیسے تیڈے نال برباد تھیوݨ، کیوں جو تُوں خُدا دی نعمت کُوں پیسیاں نال گِھننڑ دا خیال کیتا۔ اِیں کم ءچ تیڈا کوئی حصہ یا سانجھ نئیں کیوں جو تیڈا دل خُدا دے نزدیک ٹھیک نئیں۔ بس آپنڑی اِیں بدی کنُوں توبہ کر، تے خُداوند کنُوں دُعا کر جو شاید تیڈے دل دے اِیں خیال کُوں معاف کر ڈیوے۔ کیوں جو مَیں ڈیدھا ہاں جو تُوں شدید تلخی تے بُرائی ءچ گرفتار ہیں۔“ شمعون جواب ءچ آکھیا، ”تُساں میڈے کیتے خُداوند کنُوں دُعا کرو جو جیہڑے گالھیں تُساں آکھیاں، اُنہاں ءچوں کوئی میڈے اُتے نہ آوے۔“ پطرس تے یُوحنّا گواہی ڈیوݨ تے خُداوند دا کلام سُنڑاوݨ دے بعد یروشلیم کُوں وَل گئے تے سامریہ دے بہُوں ساریاں وستیاں ءچ خوشخبری سُنڑیندے گئے۔ وَل خُداوند دے فرشتہ فِلپُس کُوں آکھیا جو ”اُٹھی تے جنُوب دو اُوں راہ تئیں وَنج جیہڑی بیابان ءچوں تھی تے یروشلیم تُوں غزہ کُوں ویندی ہے۔“ او اُٹھی تے روانہ تھیّا تاں ڈیکھو ایتھوپِیا دا ہِک خوجہ آندا پِیا ہا۔ او ایتھوپِیا دی ملکہ کنداکے دا ہِک وزیر تے اُوندے سارے خزانے دا مُختار ہا تے یروشلیم ءچ عبادت کیتے آیا ہا۔ او آپنڑی بگھی اُتے سوار ہا تے یسعیاہ نبی دا صحیفہ پڑھدا ہویا واپس ویندا پِیا ہا۔ رُوح القُدس فِلپُس کُوں آکھیا جو ”نزدیک وَنج تے اُوں بگھی دے نال تھی پو۔“ بس فِلپُس اُوندے دو دِرک تے اُونکُوں یسعیاہ نبی دا صحیفہ پڑھدے سُنڑیا تے آکھیا جو ”جیہڑا کُجھ تُساں پڑھدے ہیوے، کیا اُونکُوں سمجھدے وی ہیوے؟“ اُوں آکھیا جو ”ایہ مَیں کِینویں سمجھ سگدا ہاں جئیں تئیں کوئی میڈی راہنمائی نہ کرے؟“ تے اُوں فِلپُس کُوں درخاست کیتی جو ”میڈے کولھ آ بہہ۔“ پاک کلام ءچوں جیہڑا حصہ او پڑھدا پِیا ہا، او ایہ ہا جو ”لوک اُونکُوں بھیڈ آلی کار ذبح کرݨ کیتے گِھن گئے تے جِینویں لیلا آپنڑے وال کُترݨ آلے دے سامنڑے چُپ راہندے، اِینویں ای اُوں آپنڑا مُنہ نہ کھولیا۔ اُوندی بےعزتی کیتی گئی تے اُوندا اِنصاف نہ تھیّا تے کوݨ اُوندی نسل دا حال بیان کریسی؟ کیوں جو زمین اُتے اُوندی زندگی ختم کر ڈِتی گئی ہے ۔“ خوجے فِلپُس کُوں آکھیا، ”مہربانی کر تے میکُوں ڈساؤ جو نبی ایہ کیندے بارے ءچ آدھے؟ آپنڑے یا کہیں بئے دے بارے ءچ؟“ فِلپُس خُدا دے کلام دی اُوں جاہ تُوں شروع کر تے اُونکُوں یسُوع دے بارے ءچ خوشخبری ڈِتی۔ او رستے ءچ ویندے ہوئے، ایجھی جاہ اُتے پُجے جِتھاں پانڑی ہا۔ خوجے آکھیا ”ڈیکھ اِتھاں پانڑی موجود ہے، ہُنڑ میکُوں بپتسمہ گِھننڑ تُوں کیہڑی چیز روکیندی ہے؟“ [فِلپُس آکھیا جو ”جے تُساں دل تے جان نال اِیمان رکھیندے ہیوے تاں بپتسمہ گِھن سگدے ہیوے۔“ اُوں جواب ڈِتا، ”مَیں اِیمان رکھیندا ہاں جو یسُوع مسیح خُدا دا پوتر ہے۔“] بس اُوں بگھی کُوں روکنڑ دا حُکم ڈِتا تے فِلپُس تے خوجہ ڈوہائیں پانڑی ءچ لتھے تے فِلپُس اُونکُوں بپتسمہ ڈِتا۔ جِیں ویلے او پانڑی ءچوں نِکل تے باہر آئے تاں خُداوند دا رُوح فِلپُس کُوں چا تے گِھن گِیا تے خوجے اُونکُوں ولا نہ ڈِٹھا۔ پر او خوشی کریندا ہویا آپنڑی منزل دو روانہ تھی گِیا۔ وَل فِلپُس اشدُود ءچ وَنج نِکلیا تے قیصریہ ءچ پُجنڑ تئیں سارے شہراں ءچ خوشخبری سُنڑیندا گِیا۔ ساؤل جیہڑا ہُنڑ تئیں خُداوند دے شاگرداں کُوں دھمکاوݨ تے قتل کرݨ دی دُھن ءچ ہا، کاہِن ِ اعظم کولھ گِیا، تے اُوں دمشق دے عبادت خانیاں کیتے خط منگے تاں جو جیہڑا وی مسیح دی راہ اُتے ٹُرݨ آلا مِلے بھانویں او مرد ہووے یا عورت، اُونکُوں گرفتار کر تے یروشلیم گِھن آوے۔ جِیں ویلے او سفر کریندے کریندے دمشق دے نیڑے پُجیا تاں اچانک اسمان کنُوں ہِک روشنی اُوندے چودھارُوں آ چمکی۔ او زمین اُتے ڈھے پِیا تے ایہ اواز سُنڑی جو ”ساؤل! ساؤل! تُوں میکُوں کیوں سَتیندیں؟“ ساؤل پُچھیا ”اے خُداوند! تُساں کوݨ ہیوے؟“ اُوں آکھیا ”مَیں یسُوع ہاں جِینکُوں تُوں سَتیندیں؟ ہُنڑ اُٹھی تے شہر ءچ وَنج تے جیہڑا تیکُوں کرنڑا چاہیدے، او تیکُوں ڈسا ڈِتا ویسی۔“ جیہڑے لوک ساؤل دے نال ہَن، او حیران تھی تے چُپ کھڑے رہ گئے کیوں جو اواز تاں سُنڑدے ہَن پر کہیں کُوں ڈیدھے نہ ہَن۔ ساؤل زمین تُوں اُٹھی کھڑا تھیّا پر جِیں ویلے اکھیں کھولیاں تاں اُونکُوں کُجھ ڈِکھالی نہ ڈِتا۔ اِیں واسطے لوک اُوندا ہتھ پکڑ تے دمشق ءچ گِھن گئے۔ تے او ترے ڈینہہ تئیں نہ ڈیکھ سگیا تے نہ اُوں کھادا پِیتا۔ دمشق ءچ حننیاہ ناں دا ہِک شاگرد ہا۔ خُداوند اُونکُوں رویا ءچ آکھیا جو ”حننیاہ!“ اُوں آکھیا ”خُداوند! مَیں حاضر ہاں۔“ خُداوند اُونکُوں آکھیا ”اُٹھ، اُوں گلی ءچ وَنج جیہڑی سِدھی اکھویندی ہے تے یہُوداہ دے گھر ءچ ساؤل ناں دے ہِک بندے کیتے پُچھیں جیہڑا تَرسُس شہر دا ہے۔ ڈیکھ او دُعا کریندا پئے، تے اُوں رویا ءچ حننیاہ ناں دے ہِک بندے کُوں اندر آندے تے آپنڑے اُتے ہتھ رکھیندے ڈِٹھا تاں جو او ولا کنُوں ڈیکھ سگے۔“ حننیاہ جواب ڈِتا ”اے خُداوند! مَیں اِیں بندے دے بارے ءچ بہُوں لوکاں کنُوں سُنڑیا ہے جو یروشلیم ءچ اِیں تیڈے مُقدّساں نال کیجھیاں کیجھیاں بُرائیاں کیتیاں ہِن۔ تے اِتھاں اِینکُوں سردار کاہِناں دی طرفوں اِختیار مِلیا ہے جو جیہڑے لوک تیڈا ناں گِھندے ہِن اُنہاں ساریاں کُوں گرفتار کر گِھنے۔“ پر خُداوند حننیاہ کُوں آکھیا جو ”تُوں وَنج کیوں جو ایہ بندہ غیر قوماں، بادشاہاں تے بنی اِسرائیل ءچ میڈا ناں ظاہر کرݨ کیتے میڈا چُنڑیا ہویا وسیلہ ہے۔ تے مَیں اُونکُوں ڈِکھا ڈیساں جو میڈے ناں دی خاطر اُونکُوں کتنا ڈُکھ جھلنڑا پوسی۔“ بس حننیاہ وَنج تے اُوں گھر ءچ داخل تھیّا تے آپنڑے ہتھ اُوندے اُتے رکھ تے آکھیا ”بِھرا ساؤل! خُداوند یسُوع جیہڑا رستے ءچ تیڈے اُتے ظاہر تھیّا جِیں ویلے تُوں آندا پِیا ہَویں، اُوں میکُوں بھیجیا ہے جو تُوں ولا کنُوں ڈیکھ سگیں تے رُوح القُدس نال بھریج ونجیں۔“ تے فوراً ساؤل دے اکھیں اُتوں چِھلکے آلی کار کوئی چیز ڈھٹھی تے او سُجاکھا تھی گِیا تے اُٹھی تے بپتسمہ گِھدا۔ وَل کُجھ کھا تے طاقت پائی۔ ساؤل کئی ڈینہہ اُنہاں شاگرداں نال ریہا جیہڑے دمشق ءچ ہَن۔ تے فوراً عبادت خانیاں ءچ یسُوع دی تبلیغ کرݨ لگا جو او خُدا دا پوتر ہے۔ سبھ سُنڑݨ آلے حیران تھی تے آکھنڑ لگے ”کیا ایہ اُوہو بندہ نئیں جیہڑا یروشلیم ءچ اِیں ناں دے گِھننڑ آلیاں کُوں برباد کریندا ہا تے اِتھاں وی اِیں مقصد نال آیا ہا جو اُنہاں کُوں گرفتار کر تے سردار کاہِناں کولھ گِھن ونجے؟“ پر ساؤل رُوحانی زور ءچ ودھدا گِیا تے او اِیں گالھ کُوں ثابت کر تے جو المسیح یسُوع ای ہے، دمشق دے راہنڑ آلے یہُودیاں کُوں پریشان کریندا ریہا۔ جِیں ویلے بہُوں ڈینہہ لنگھ گئے تاں یہُودیاں اُونکُوں قتل کرݨ دا منصوبہ بنڑایا۔ پر ساؤل کُوں اُنہاں دی سازش دا پتہ لگ گِیا۔ یہُودی ڈینہہ رات اُونکُوں قتل کرݨ کیتے شہر دے پھاٹکاں دی پہرےداری کریندے ریہے۔ پر اُوندے شاگرداں اُونکُوں ہِک ٹوکرے ءچ بِلھا یا تے رات کُوں کندھ دے گلے تُوں لٹکا تے باہر لہا ڈِتا۔ ساؤل یروشلیم ءچ پُج تے شاگرداں ءچ شامل تھیوݨ دی کوشش کیتی پر سارے اُوں تُوں ڈردے ہَن کیوں جو اُنہاں کُوں یقین نہ آندا ہا جو ایہ شاگرد ہے۔ پر برنباس اُونکُوں آپنڑے نال رسُولاں کولھ گِھن آیا تے اُنہاں کُوں ڈسایا جو ساؤل سفر کریندے ویلے کِینویں خُداوند کُوں ڈِٹھا تے خُداوند اُوندے نال گالھیں کیتیاں تے اُوں کیجھی دلیری نال دمشق ءچ یسُوع دے ناں نال تبلیغ کیتی۔ بس ساؤل یروشلیم ءچ اُنہاں نال آندا ویندا ریہا تے دلیری نال خُداوند دے ناں دی تبلیغ کریندا، تے یُونانی بولنڑ آلے یہُودیاں نال گالھیں تے بحث وی کریندا ہا۔ پر او اُونکُوں قتل کرݨ دی کوشش کرݨ لگے۔ جِیں ویلے بِھرانواں کُوں ایہ پتہ لگیا تاں اُونکُوں قیصریہ ءچ گِھن گئے تے تَرسُس کُوں روانہ کر ڈِتا۔ بس پُورے یہُودیہ، گلیل تے سامریہ ءچ کلیسیا کُوں سکون تھی گِیا تے اُوندی ترقی تھیندی گئی۔ او خُداوند دے خوف ءچ زندگی گُزار تے، تے رُوح القُدس دی مدد نال گِنتری ءچ ودھدی ویندی ہئی۔ تے پطرس جاہ جاہ پِھردا ہویا اُنہاں مُقدّساں کولھ وی پُجیا جیہڑے لُدہ ءچ راہندے ہَن۔ اُتھاں اُونکُوں اَینیاس ناں دا ہِک فالج دا مریض مِلیا جیہڑا اَٹھ سال کنُوں کَھٹ اُتے پِیا ہا۔ پطرس اُونکُوں آکھیا ”اَینیاس! یسُوع مسیح تیکُوں شِفا ڈیندے۔ اُٹھی تے آپنڑا بستر آپ ولھیٹ۔“ او فوراً اُٹھی کھڑا تھیّا۔ وَل لُدہ تے شارُون شہر دے سارے راہنڑ آلے اُونکُوں ڈیکھ تے خُداوند اُتے اِیمان گِھن آئے۔ تے یافا ءچ ہِک شاگردہ ہئی جِیندا ناں تبِیتا ہئی جِیندا مطلب ہرنی ہے، او بہُوں ای نیک کم کریندی تے خیرات کریندی راہندی ہئی۔ اُونہی ڈینہاں ءچ او بیمار تھی تے مر گئی تے اُوندی لاش کُوں غُسل ڈے تے اُتلے کمرے ءچ رکھ ڈِتا۔ تے کیوں جو لُدہ یافا دے نیڑے ای ہا، شاگرداں ایہ سُنڑ تے جو پطرس لُدہ ءچ ہے، ڈُو بندے بھیجے تے اُونکُوں درخاست کیتی جو ”جلدی اِتھاں آ ونجو۔“ پطرس اُٹھی تے اُنہاں نال ٹُر پِیا۔ جِیں ویلے اُتھاں پُجیا تاں اُونکُوں اُتلے کمرے ءچ گِھن گئے تے ساریاں بیوہ عورتاں روندیاں ہوئیاں اُوندے کولھ آ تے جیہڑے چولے تے کپڑے تبِیتا اُنہاں نال راہندے ہوئے بنڑائے ہَن، ڈِکھاوݨ لگیاں۔ پطرس اُنہاں ساریاں کُوں باہر کڈھ ڈِتا تے گوڈے ٹیک تے دُعا کیتی۔ وَل لاش دو مُڑ تے آکھیا ”تبِیتا! اُٹھی۔“ بس اُوں اکھیں کھول ڈِتیاں تے پطرس کُوں ڈیکھ تے اُٹھی تے بہہ گئی۔ اُوں ہتھ پکڑ تے اُونکُوں کھڑا کیتا تے مُقدّساں تے بیوہ عورتاں کُوں سڈ تے تبِیتا کُوں زندہ اُنہاں دے حوالے کیتا۔ ایہ گالھ سارے یافا ءچ مشہور تھی گئی تے بہُوں سارے خُداوند اُتے اِیمان گِھن آئے۔ تے پطرس بہُوں ڈینہہ یافا ءچ شمعون ناں دے ہِک چم رنگنڑ آلے دے گھر ریہا۔ قیصریہ ءچ کُرنیلیُس ناں دا ہِک بندہ ہا۔ او رومی فوج دے اطالوی دستے دا صوبیدار ہا۔ او بہُوں دیندار ہا تے آپنڑے گھرانڑے سمیت خُدا کنُوں ڈردا ہا، تے یہُودیاں کُوں بہُوں خیرات ڈیندا تے ہر ویلے خُدا کنُوں دُعا کریندا ہا۔ ہِک ڈینہہ اُوں ڈوپہر دے ترے وجے دے نیڑے رویا ءچ صاف صاف ڈِٹھا جو خُدا دا ہِک فرشتہ میڈے کولھ آ تے اکھیندے، ”کُرنیلیُس۔“ او ڈر گِیا تے اُونکُوں غور نال ڈیدھے ہوئے آکھیا ”مالک، کیا ہے؟“ فرشتہ اُونکُوں آکھیا ”تیڈی خیرات تے دُعاواں نذرانے دے طور تے خُدا دے حضُور پُج گئیاں ہِن، ہُنڑ کُجھ بندے یافا شہر بھیج تے شمعون کُوں جیہڑا پطرس اکھویندے، سڈوا گِھن۔ او شمعون چم رنگنڑ آلے دے گھر مہمان ہے جِیندا گھر سمندر دے کنارے ہے۔“ جِیں ویلے او فرشتہ چلیا گِیا جئیں اُوندے نال گالھیں کیتیاں ہَن تاں کُرنیلیُس آپنڑے نوکراں ءچوں ڈُو کُوں تے آپنڑے خاص سپاہیاں ءچوں ہِک دیندار کُوں سڈیا، تے اُنہاں کُوں سارے گالھیں ڈسا تے یافا بھیجیا۔ ڈُوجھے ڈینہہ جِیں ویلے او رستے ءچ ہَن تے شہر دے نیڑے پُجے تاں ڈوپہر ویلے پطرس چھت اُتے دُعا کرݨ کیتے گِیا۔ اُونکُوں بُکھ لگی تے کُجھ کھاونڑا چاہندا ہا، پر جِیں ویلے لوک کھانڑا تیار کریندے پئے ہَن تاں اُوندے اُتے بے خُودی طاری تھی گئی۔ اُوں ڈِٹھا جو اسمان کُھل گئے تے کوئی چیز ہِک وڈی چادر آلی کار چارے کونیاں کنُوں لٹکدی ہوئی زمین دو آندی پئی ہئی، جیندے ءچ زمین دے سبھ قِسم دے ڈھورڈنگر تے کیڑے مکوڑے تے ہوا دے پکھی ہِن۔ تے اُونکُوں ہِک اواز آئی جو ”پطرس! اُٹھی، ذبح کر تے کھا۔“ پر پطرس آکھیا ”اے خُداوند! ہرگز نئیں! کیوں جو مَیں کڈھائیں کوئی حرام یا ناپاک چیز نئیں کھادی۔“ او اواز اُونکُوں ولا سُنڑائی ڈِتی جو ”جیہڑی شے کُوں خُدا پاک مقرر کیتے، تُوں اُونکُوں حرام نہ آکھ۔“ ترے پھیری اِینویں ای تھیّا، وَل او چادر فوراً اسمان اُتے چا گِھدی گئی۔ جِیں ویلے پطرس آپنڑے دل ءچ سوچیندا پِیا ہا جو اِیں رویا دا کیا مطلب ہے، تاں کُرنیلیُس دے بھیجے ہوئے بندے شمعون دے گھر دا پتہ معلوم کر تے دروازے اُتے آ کھڑے تھئے۔ تے اواز ڈے تے پُچھنڑ لگے جو ”کیا شمعون جیہڑا پطرس اکھویندے، اِتھائیں مہمان ہے؟“ جِیں ویلے پطرس اُوں رویا دے بارے ءچ سوچیندا پِیا ہا، تاں رُوح القُدس اُونکُوں آکھیا جو ”ڈیکھ ترے بندے تیڈے بارے ءچ پُچھدے پئے ہِن۔ بس اُٹھی تے تلے وَنج تے جِھجکے بغیر اُنہاں نال چلیا وَنج کیوں جو مَیں ای اُنہاں کُوں بھیجے۔“ پطرس تلے لہہ تے اُنہاں آدمیاں کُوں آکھیا، ”جِینکُوں تُساں پُچھدے پئے ہیوے، او مَیں ای ہاں۔ تُساں کیوں آئے ہیوے؟“ اُنہاں آکھیا، ”کُرنیلیُس صوبیدار جیہڑا راستباز تے خُدا دا خوف مننڑ آلا بندہ ہے تے یہُودیاں دی ساری قوم ءچ نیک ناں ہے، اُوں خُدا دے پاک فرشتہ کنُوں ہدایت پاتی جو تیکُوں آپنڑے گھر سڈ تے تُہاڈے تُوں کلام سُنڑے۔“ بس پطرس اُنہاں کُوں اندر سڈ تے اُنہاں دی مہمان داری کیتی۔ سویل نال او اُٹھی تے اُنہاں نال روانہ تھیّا تے یافا ءچوں کُجھ بِھرا اُوندے نال تھی پئے، تے ڈُوجھے ڈینہہ قیصریہ ءچ داخل تھیّا۔ کُرنیلیُس اُنہاں دا اِنتظار کریندا پِیا ہا تے آپنڑے قریبی رشتہ داراں تے دوستاں کُوں سڈی بیٹھا ہا۔ جِیں ویلے پطرس اندر داخل تھیّا تاں کُرنیلیُس اُوندا اِستقبال کیتا تے اُوندے پیراں ءچ ڈھے تے سجدہ کیتا۔ پر پطرس اُونکُوں کھڑا کر تے آکھیا، ”کھڑا تھی، مَیں وی تاں اِنسان ہاں۔“ تے پطرس اُوندے نال گالھیں کریندا ہویا اندر گِیا تے بہُوں سارے لوکاں کُوں کٹھا ڈیکھ تے اُنہاں کُوں آکھیا، ”تُساں جانڑدے ہیوے جو کہیں یہُودی دا غیریہُودی نال اُٹھنڑ باہنڑ یا اُوندے کولھ ونجنڑ شرع دے خلاف ہے پر خُدا میڈے اُتے ظاہر کیتے جو مَیں کہیں بندے کُوں پلیت یا ناپاک نہ آکھاں۔ اِیں واسطے جِیں ویلے مَیں سڈیا گِیا تاں اعتراض کیتے بغیر آ گِیا۔ بس ہُنڑ ڈساؤ جو میکُوں کیوں سڈیا گئے؟“ کُرنیلیُس آکھیا، ”چار ڈینہہ پہلے مَیں آپنڑے گھر ءچ اِیں ویلے یعنی ڈوپہر دے ترے وجے دُعا کریندا پِیا ہم جو اچانک ہِک بندہ چمکدار پُشاک ءچ میڈے سامنڑے آ کھڑا تھیّا تے آکھیا، ’کُرنیلیُس! خُدا تیڈی دُعا سُنڑ گِھدی تے تیڈی خیرات دی خُدا دے حضُور یاد تھئی ہے۔ بس کہیں کُوں یافا بھیج تے شمعون کُوں جیہڑا پطرس اکھویندے آپنڑے کولھ سڈ۔ او سمندر دے کنارے شمعون چم رنگنڑ آلے دے گھر مہمان ہے۔‘ بس مَیں فوراً تُہاکُوں سڈوا بھیجیا تے تُساں وی بہُوں چنگا کیتا جو آ گئے۔ ہُنڑ اساں سارے خُدا دے حضُور ءچ حاضر ہیں تاں جو جیہڑا کُجھ خُداوند تُہاکُوں آکھیا ہے، اُونکُوں سُنڑوں۔“ وَل پطرس آکھنڑ لگا، ”مَیں چنگی طرحاں جاݨ گِیا ہاں جو خُدا کہیں دا طرفدار نئیں بلکہ ہر قوم ءچ جیہڑا اُوں کنُوں ڈردے تے راستبازی دے کم کریندے، او اُونکُوں پسند آندے۔ اُوں بنی اِسرائیل دے کولھ آپنڑا کلام بھیجیا تے یسُوع مسیح دے وسیلے، جیہڑا ساریاں دا خُداوند ہے، صُلح دی خوشخبری سُنڑائی۔ اُوں گالھ کُوں تُساں جانڑدے ہیوے جیہڑی یُوحنّا بپتسمہ ڈیوݨ آلے دی منادی دے بعد گلیل کنُوں گِھن تے سارے یہُودیہ ءچ مشہور تھی گئی، جو خُدا یسُوع ناصری کُوں رُوح القُدس تے قُدرت نال کِینویں مسح کیتا۔ او بھلائی کریندا تے اُنہاں ساریاں کُوں جیہڑے ابلیس دے ظلم دا شکار ہَن، شِفا ڈیندا ریہا کیوں جو خُدا اُوندے نال ہا۔ اساں اُنہاں سارے کماں دے گواہ ہیں جیہڑے اُوں یہُودیاں دے مُلک تے یروشلیم ءچ کیتے۔ اُنہاں اُونکُوں صلیب اُتے چڑھا تے قتل کر ڈِتا۔ پر خُدا اُونکُوں تریجھے ڈینہہ زندہ کر ڈِتا تے ظاہر وی کیتا۔ او سارے لوکاں اُتے ظاہر نئیں تھیّا بلکہ صرف اُنہاں گواہاں اُتے جِنہاں کُوں خُدا پہلے کنُوں چُنڑ گِھدا ہا یعنی ساڈے اُتے جِنہاں اُوندے مُردیاں ءچوں زندہ تھیوݨ دے بعد اُوندے نال کھادا پِیتا۔ تے اُوں ساکُوں حُکم ڈِتا جو لوکاں ءچ تبلیغ کرُوں تے گواہی ڈیؤں جو ایہ اُوہو ہے جیہڑا خُدا دی طرفوں زندیاں تے مُردیاں دا مُنصف مقرر کیتا گئے۔ سارے نبی اِیں بندے دے بارے ءچ گواہی ڈیندن جو جیہڑا کوئی اُوندے اُتے اِیمان گِھن آسی، اُوندے ناں نال گُناہاں تُوں معافی پیسی۔“ پطرس ایہ گالھیں کریندا ای پِیا ہا جو رُوح القُدس اُنہاں ساریاں اُتے نازل تھیّا جیہڑے کلام سُنڑدے پئے ہَن۔ پطرس دے نال آوݨ آلے یہُودی جیہڑے اِیماندار تھی گئے ہَن، او سارے حیران تھیوݨ لگے جو غیریہُودیاں کُوں وی رُوح القُدس دی نعمت بخشی گئی۔ کیوں جو اُنہاں کُوں طرحاں طرحاں دیاں زباناں بُولیندے تے خُدا دی حمد کریندے سُنڑیا۔ وَل پطرس آکھیا، ”جِینویں ساکُوں رُوح القُدس مِلیا، اِنہاں کُوں وی مِلیا ہے۔ کیا کوئی اِنہاں لوکاں کُوں پانڑی دا بپتسمہ گِھننڑ کنُوں روک سگدے؟“ تے اُوں حُکم ڈِتا جو یسُوع مسیح دے ناں نال بپتسمہ ڈِتا ونجے۔ وَل اُنہاں پطرس کُوں درخاست کیتی جو ساڈے نال کُجھ ڈینہہ بِیا ٹِک۔ تے یہُودیہ دے علاقے ءچ راہنڑ آلے رسُولاں تے بِھرانواں سُنڑیا جو غیر قوماں وی خُدا دا کلام قبول کیتے۔ اِیں واسطے جڈاں پطرس یروشلیم ءچ آیا تاں یہُودی جیہڑے اِیماندار تھی گئے ہَن، اُوندے نال ایہ بحث کرݨ لگے جو ”تُوں غیریہُودیاں کولھ گِیا تے اُنہاں نال کھانڑا کھادے۔“ پطرس اُنہاں کُوں سبھ کُجھ شروع کنُوں اخیر تئیں ترتیب نال ڈسایا جو ”مَیں یافا شہر ءچ دُعا کریندا پِیا ہم تے بے خُودی دی حالت ءچ مَیں ہِک رویا ڈِٹھی جو کوئی چیز وڈی چادر وانگُوں چارے کونیاں کنُوں لٹکدی ہوئی اسمان کنُوں تلے لتھی تے مَیں تئیں آئی۔ جِیں ویلے مَیں اُوندے اُتے غور نال نِگاہ کیتی تاں زمین دے ڈھورڈنگر تے جنگلی جانور تے کیڑے مکوڑے تے ہوا دے پکھی ڈِٹھے۔ تے میکُوں ہِک اواز وی ایہ آدھے ہوئے سُنڑائی ڈِتی جو ’پطرس! اُٹھی، ذبح کر تے کھا۔‘ پر مَیں آکھیا ’اے خُداوند ہرگز نئیں! کیوں جو کوئی حرام یا ناپاک چیز کڈھائیں میڈے مُنہ ءچ نئیں گئی۔‘ پر او اواز اسمان کنُوں ڈُوجھی پھیر آئی جو ’جیہڑی شے کُوں خُدا پاک مقرر کیتے، تُوں اُونکُوں حرام نہ آکھ۔‘ ترے پھیری اِینویں ای تھیّا۔ وَل او ساریاں چیزاں اسمان دو چھیک گِھدیاں گئیاں۔ تے ڈیکھو اُونہی ویلے ترے بندے جیہڑے قیصریہ تُوں میڈے کولھ بھیجے گئے ہَن اُوں گھر دے سامنڑے آ کھڑے تھئے جِتھاں اساں راہندے ہسے۔ رُوح القُدس میکُوں آکھیا جو ’جِھجکے بغیر اُنہاں نال چلیا وَنج۔‘ ایہ چِھی بِھرا وی میڈے نال گئے تے اساں اُوں بندے دے گھر ءچ داخل تھئے۔ اُوں ساکُوں ڈسایا جو کِینویں ہِک فرشتہ اُونکُوں گھر ءچ نظر آیا تے آکھنڑ لگا جو ’یافا ءچ کہیں بندے کُوں بھیج تے شمعون کُوں جیہڑا پطرس اکھویندے سڈوا گِھن۔ او تیکُوں ہِک ایجھا پیغام ڈیسی جیندے وسیلے تُوں تے تیڈا سارا خاندان نجات پیسی۔‘ جِیں ویلے مَیں کلام کرݨ لگا تاں رُوح القُدس اُنہاں اُتے اِینویں نازل تھیّا جِینویں شروع ءچ ساڈے اُتے نازل تھیّا ہا۔ تے میکُوں خُداوند دی او گالھ یاد آئی جیہڑی اُوں آکھی ہئی جو ’یُوحنّا تاں پانڑی نال بپتسمہ ڈِتا پر تُساں رُوح القُدس نال بپتسمہ پے سو۔‘ بس جِیں ویلے خُدا اُنہاں کُوں وی اُوہو نعمت ڈِتی جیہڑی ساکُوں خُداوند یسُوع مسیح اُتے اِیمان گِھن آوݨ دے سببّوں مِلی ہئی، تاں مَیں کوݨ ہم جو خُدا کُوں روک سگدا؟“ جِیں ویلے اُنہاں ایہ سُنڑیا تاں چُپ تھی گئے تے خُدا دی حمد کر تے آکھنڑ لگے جو ”وَل تاں خُدا غیر قوماں کُوں وی زندگی حاصل کرݨ کیتے توبہ کرݨ دی توفیق ڈِتی ہے۔“ بس جیہڑے لوک اُوں مُصیبت پارُوں جِیندا آغاز ستِفُنس دی موت تُوں تھیّا ہا، کِھنڈ گئے ہَن، او پِھردے پِھردے فینیکے تے کُپرُس تے انطاکِیہ ءچ پُجے پر یہُودیاں دے علاوہ کہیں بئے کُوں کلام نہ سُنڑیندے ہَن۔ پر اُنہاں ءچوں کُجھ کُپرُس تے کُرین دے ہَن۔ او انطاکِیہ ءچ آ تے یُونانیاں کُوں وی خُداوند یسُوع دی خوشخبری دے گالھیں سُنڑاوݨ لگے۔ خُداوند دا ہتھ اُنہاں اُتے ہا تے بہُوں سارے لوک اِیمان گِھن آ تے خُداوند دو رجُوع تھئے۔ اُنہاں لوکاں دی خبر یروشلیم دی کلیسیا دے کَناں تئیں پُجی تے اُنہاں برنباس کُوں انطاکِیہ تئیں بھیجیا۔ جِیں ویلے او اُتھاں پُجیا تاں لوکاں اُتے خُدا دا فضل ڈیکھ تے بہُوں خوش تھیّا تے اُنہاں سبھ کُوں نصیحت کیتی جو پُورے دل نال خُداوند دے وفادار بنڑے راہو۔ او نیک بندہ ہا تے اِیمان تے رُوح القُدس نال بھریا ہویا ہا۔ تے بہُوں سارے لوک خُداوند دی کلیسیا ءچ شامل تھی گئے۔ وَل برنباس ساؤل دی گولھ ءچ تَرسُس کُوں روانہ تھی گِیا۔ تے جِیں ویلے او مِلیا تاں اُونکُوں انطاکِیہ ءچ گِھن آیا۔ تے ساؤل تے برنباس ہِک سال تئیں اُتھاں دی کلیسیا ءچ شامل تھیندے تے بہُوں سارے لوکاں کُوں تعلیم ڈیندے ریہے۔ شاگرد پہلی پھیری انطاکِیہ ءچ ای مسیحی اکھوائے۔ اُونہی ڈینہاں ءچ کُجھ نبی یروشلیم کنُوں انطاکِیہ ءچ آئے۔ اُنہاں ءچوں ہِک بندے جِیندا ناں اگبُس ہا، کھڑا تھی تے رُوح القُدس دی ہدایت نال ایہ نبُوّت کیتی جو ساری دُنیا ءچ وڈا کال پوسی۔ (ایہ کلَودِیُس دے عہد ءچ پِیا۔) بس شاگرداں فیصلہ کیتا جو آپنڑی آپنڑی مالی حیثیت دے مطابق، یہُودیہ ءچ راہنڑ آلے بِھرانواں دی مدد کیتے کُجھ نہ کُجھ بھیجُوں۔ بس اُنہاں اِینویں ای کیتا تے ساؤل تے برنباس دے ہتھیں آپنڑی مالی مدد بزُرگاں کُوں بھجوا ڈِتی۔ اُنہاں ڈینہاں ءچ ہیرودیس بادشاہ کلیسیا دے کُجھ لوکاں کُوں گرفتار کیتا تاں جو اُنہاں کُوں تکلیف ڈیوے تے یُوحنّا دے بِھرا یعقُوب کُوں تلوار نال قتل کیتا۔ جِیں ویلے ڈِٹھا جو یہُودیاں کُوں ایہ گالھ پسند آئی تاں بے خمیری روٹی دی عید دے ڈینہاں ءچ پطرس کُوں وی گرفتار کر گِھدا، تے اُونکُوں پکڑ تے قید کر ڈِتا تے پہرے کیتے چار چار سپاہیاں دے چار پہریاں ءچ رکھیا، اِیں اِرادے نال جو عید ِ فسح دے بعد اُونکُوں لوکاں دے سامنڑے پیش کرے۔ بس پطرس تاں پہرے ءچ ہا پر ساری کلیسیا اُوندے کیتے خُدا کنُوں دل و جان نال دُعا کریندی پئی ہئی۔ جِیں ویلے ہیرودیس اُونکُوں پیشی کیتے گِھن آوݨ آلا ہا تاں اُونہی رات پطرس ڈُو زنجیراں نال بدھیا ہویا، ڈُو سپاہیاں دے اَدھ ءچ سُتا پِیا ہا تے پہرے دار دروازہ اُتے قید خانہ دی نگہبانی کریندے پئے ہَن۔ ابڑغُت خُداوند دا ہِک فرشتہ ظاہر تھیّا تے پُوری کوٹھڑی ءچ سوجھلا تھی گِیا۔ اُوں پطرس دی پسلی کُوں ہتھ لا تے اُونکُوں جگایا تے آکھیا جو ”جلدی اُٹھی۔ تے زنجیراں اُوندے ہتھاں ءچوں کُھل پئیاں۔“ وَل فرشتے اُونکُوں آکھیا، ”کمر بَدھ تے آپنڑی جُتی پا گِھن۔“ اُوں اِینویں ای کیتا۔ وَل فرشتے اُونکُوں آکھیا، ”آپنڑا چولا پا تے میڈے پِچُھوں تھی پو۔“ پطرس نِکل تے اُوندے پِچُھوں تھی پِیا تے اُونکُوں پتہ نہ لگیا جو فرشتہ جیہڑا کُجھ کریندا پئے او سچ ہے بلکہ ایہ سمجھیا جو مَیں کوئی رویا ڈیدھا پِیا ہاں۔ بس او پہلے تے ڈُوجھے پہرے ءچوں نِکل تے اُوں لُوہے دے دروازے کولھ پُجے جیہڑا شہر دو ویندا ہے۔ او اُنہاں کیتے آپنڑے آپ ای کُھل گِیا۔ بس او نِکل تے گلی دے اخیر تئیں گئے تے فرشتہ فوراً اُوندے کولُھوں چلیا گِیا۔ وَل پطرس ہوش ءچ آ تے آکھیا جو ”ہُنڑ میکُوں پکّا یقین تھی گئے جو خُداوند آپنڑے فرشتہ کُوں بھیج تے میکُوں ہیرودیس دے ہتھ کنُوں چُھڑا گِھدے تے یہُودیاں دے اِرادے کُوں ناکام کر ڈِتے۔“ جِیں ویلے پطرس ایہ جاݨ گِھدا تاں مریم دے گھر گِیا جیہڑی اُوں یُوحنّا دی ماء ہئی جیہڑا مرقس اکھویندے۔ اُتھاں بہُوں سارے لوک جمع تھی تے دُعا کریندے پئے ہَن۔ جِیں ویلے اُوں دروازے دی کِھڑکی کھڑکائی تاں رُدی ناں دی ہِک نوکرانڑی ڈیکھنڑ آئی۔ او پطرس دی اواز سُنجاݨ تے اِتنا خوش تھئی جو دروازہ کھولے بغیر پِچُھوں بھج پئی تے آکھنڑ لگی جو ”پطرس دروازے اُتے کھڑا ہے۔“ اُنہاں اُونکُوں آکھیا، ”تُوں پاگل تھی گئی ہیں،“ پر او یقین نال آدھی ریہی جو ”او پطرس ای ہے۔“ وَل اُنہاں آکھیا جو ”اُوندا فرشتہ ہوسی۔“ پر پطرس کھڑکیندا ریہا تے جِیں ویلے اُنہاں دروازہ کھولیا تاں اُونکُوں ڈیکھ تے حیران تھی گئے۔ اُوں اُنہاں کُوں ہتھ نال اِشارہ کیتا جو چُپ راہوݨ تے اُنہاں کُوں ڈسایا جو خُداوند اُونکُوں کِینویں قید خانہ ءچوں باہر کڈھے۔ وَل آکھیا، ”یعقُوب تے بِھرانواں کُوں اِیں گالھ دی خبر ڈے ڈیوائے“ تے خود کہیں بئی جاہ چلیا گِیا۔ جِیں ویلے سویل تھئی تاں سپاہی بہُوں گھبرا گئے جو پطرس نال کیا تھئے۔ جِیں ویلے ہیرودیس اُونکُوں تلاش کروایا تے اُوندا پتہ نہ چلیا تاں پہرےداراں دی پُچھ گچھ کر تے اُنہاں دے قتل دا حُکم ڈِتا۔ وَل او یہُودیہ کُوں چھوڑ تے قیصریہ ءچ ٹِکیا ریہا۔ ہُنڑ ہیرودیس صور تے صیدا دے لوکاں تُوں بہُوں ناخوش ہا۔ بس او لوک کٹھے تھی تے اُوندے کولھ آئے تے محل دے ناظم بلَستُس کُوں آپنڑا حامی بنڑا تے بادشاہ کُوں صُلح دی درخاست کیتی، اِیں واسطے جو اُنہاں دے مُلک کُوں بادشاہ دے مُلک کنُوں رَسد پُجدی ہئی۔ بس ہیرودیس ہِک ڈینہہ مقرر کر تے آپنڑا شاہی لباس پاتا تے تخت ِ عدالت اُتے بیٹھا تے اُنہاں نال خطاب کرݨ لگا۔ پر لوک چیخنڑ پے گئے جو ”ایہ تاں کہیں معبُود دی اواز ہے، اِنسان دی نئیں۔“ اُونہئی ویلے خُداوند دے فرشتہ اُونکُوں ماریا، کیوں جو اُوں لوکاں دی تعریف قبول کر تے خُدا کُوں جلال نہ ڈِتا تے اُوندے جِسم ءچ کیڑے پے گئے تے او مر گِیا۔ پر خُدا دا کلام ترقی کریندا تے ودھدا گِیا۔ تے برنباس تے ساؤل آپنڑی خدمت پُوری کر تے یُوحنّا کُوں جیہڑا مرقس اکھویندے، نال گِھن تے یروشلیم تُوں واپس آئے۔ انطاکِیہ دی کلیسیا ءچ کئی نبی تے اُستاد ہَن یعنی برنباس تے شمعون جیہڑا کالا اکھویندے تے لُوکِیُس کُرینی تے مناہیم جیہڑا چوتھائی مُلک دے حاکم ہیرودیس دے نال پلیا ہا تے ساؤل۔ جِیں ویلے او خُداوند دی عبادت کریندے تے روزے رکھیندے پئے ہَن تاں رُوح القُدس آکھیا، ”میڈے کیتے برنباس تے ساؤل کُوں اُوں کم کیتے مخصوص کر ڈیؤ جیندے کیتے مَیں اُنہاں کُوں سڈیا ہے۔“ وَل اُنہاں روزہ رکھیا تے دُعا کیتی تے اُنہاں اُتے ہتھ رکھ تے اُنہاں کُوں رُخصت کیتا۔ بس او ڈوہائیں رُوح القُدس دے بھیجے ہوئے، سِلُوکیہ گئے تے اُتھوں کنُوں جہاز اُتے کُپرُس چلے گئے۔ سَلَمِیس ءچ پُج تے او یہُودیاں دے عبادت خانیاں ءچ خُدا دا کلام سُنڑاوݨ لگے تے یُوحنّا اُنہاں دی مدد کیتے اُنہاں دے نال ہا۔ جِیں ویلے او سارے جزیرے ءچوں تھیندے ہوئے پافُس تئیں پُجے تاں اُتھاں اُنہاں کُوں بریسوع ناں دا ہِک یہُودی جادُوگر تے کُوڑا نبی مِلیا۔ او جزیرے دے گورنر سرگیُس پولُس دے نال ہا جیہڑا دانشمند بندہ ہا۔ اُوں ساؤل تے برنباس کُوں سڈ تے خُدا دا کلام سُنڑنڑاں چاہیا پر الِیماس جادُوگر (اِیہو اُوندے ناں دا مطلب ہے) اُنہاں دی مخالفت کیتی تے گورنر کُوں اِیمان گِھن آوݨ کنُوں روکنڑا چاہیا۔ پر ساؤل جِیندا ناں پولُس وی ہے، رُوح القُدس نال بھریج تے اُوندے اُتے غور نال نِگاہ کیتی تے آکھیا جو ”ابلیس دے پوتر! تُوں جیہڑا ہر قِسم دی مکاری تے شرارت نال بھریا ہویا تے ہر طرحاں دی نیکی دا دُشمنڑ ہیں، کیا تُوں خُداوند دے سِدھے رستیاں کُوں وِگاڑن تُوں باز نہ آسیں؟ ہُنڑ ڈیکھ خُداوند دا ہتھ تیڈے خلاف اُٹھیا ہے تے تُوں اندھا تھی تے کُجھ عرصہ تئیں سِجھ کُوں نہ ڈیکھسیں۔“ اُونہئی ویلے کُہیڑ تے اندھارا اُوندے اُتے چھا گِیا تے او لوکاں کُوں گولھیندا پِھردا ریہا جو کوئی اُوندا ہتھ پکڑ تے اُونکُوں نال گِھن ونجے۔ وَل گورنر ایہ واقع ڈیکھ تے، تے خُداوند دی تعلیم کنُوں حیران تھی تے اِیمان گِھن آیا۔ وَل پولُس تے اُوندے ساتھی جہاز دے ذریعے پافُس تُوں روانہ تھی تے پمفِیلیہ صوبے دے شہر پِرگہ ءچ آئے۔ اُتھاں یُوحنّا اُنہاں کُوں چھوڑ تے یروشلیم کُوں واپس وَل گِیا۔ او ڈوہائیں پِرگہ کنُوں روانہ تھی تے پِسِدیہ دے شہر انطاکِیہ ءچ پُجے تے سبت دے ڈینہہ عبادت خانہ ءچ وَنج بیٹھے۔ توریت تے نبیاں دے صحیفے پڑھن تُوں بعد عبادت خانہ دے سرداراں اُنہاں کُوں اکھوا بھیجیا جو ”بِھراؤ! جے لوکاں دی نصیحت کیتے تُہاڈے کولھ پیغام ہے تاں آکھو۔“ بس پولُس کھڑا تھی تے ہتھ نال اِشارہ کر تے آکھیا، ”اِسرائیلیو تے خُدا دا خوف مننڑ آلیو! سُنڑو۔ اِیں اُمت اِسرائیل دے خُدا ساڈے پِیُو ڈاڈا کُوں چُنڑ گِھدا تے جِیں ویلے ایہ اُمت مِصر ءچ پردیسیاں آلی کار راہندی ہئی، اُونکُوں سرفراز کیتا تے آپنڑے زورآور ہتھ نال اُنہاں کُوں اُتھوں کنُوں کڈھ تے گِھن آیا۔ تے تقریباً چالیہہ سال تئیں اُنہاں دیاں عادتاں کُوں بیابان ءچ برداشت کریندا ریہا۔ وَل خُدا کنعان ءچ سَت قوماں کُوں برباد کر تے اُنہاں دی زمین آپنڑے لوکاں کُوں میراث ءچ ڈِتی۔ ایہ سبھ کُجھ تقریباً ساڈھے چار سو سال ءچ تھیّا۔ اِنہاں گالھیں دے بعد سموئیل نبی دے زمانہ تئیں اُنہاں ءچ قاضی مقرر کیتے۔ اِیندے بعد لوکاں بادشاہ کیتے درخاست کیتی تے خُدا اُنہاں کُوں قِیس دا پوتر ساؤل ڈِتا جیہڑا بِنیمِین دے قبیلہ ءچوں ہا ۔ ساؤل چالیہہ سال تئیں بادشاہی کریندا ریہا۔ وَل اُوں ساؤل کُوں تخت تُوں لہاوݨ دے بعد داؤد کُوں اُنہاں دا بادشاہ بنڑایا جیندے بارے ءچ خُدا گواہی ڈِتی جو ’میکُوں یسّی دا پوتر داؤد مِل گئے جیہڑا میڈے دل دے مطابق ہے، اُوہو میڈی ساری مرضی کُوں پُورا کریسی۔‘ اِیندی نسل ءچوں خُدا آپنڑے وعدہ دے مطابق اِسرائیل دے کولھ ہِک نجات ڈیوݨ آلے یعنی یسُوع کُوں بھیجیا۔ یسُوع دے آوݨ کنُوں پہلے یُوحنّا اِسرائیل دی ساری اُمت دے سامنڑے توبہ کرݨ تے بپتسمہ گِھننڑ دی منادی کیتی۔ جِیں ویلے یُوحنّا دا کم پُورا تھیوݨ آلا ہا تاں اُوں آکھیا جو ’تُساں میکُوں کیا سمجھدے ہیوے؟ مَیں او نئیں بلکہ ڈیکھو میڈے بعد او بندہ آوݨ آلا ہے جیندے پیراں دی جُتیاں دا تسمہ مَیں کھولنڑ دے لائق نئیں۔‘ بِھراؤ! ابرہام دے فرزندو تے خُدا دا خوف مننڑ آلیو! اِیں نجات دا کلام ساڈے کولھ بھیجیا گِیا۔ کیوں جو یروشلیم دے راہنڑ آلیاں تے اُوندے سرداراں یسُوع کُوں نہ سُنجانڑیا تے نہ نبیاں دیاں گالھیں سمجھیاں جیہڑیاں ہر سبت کُوں سُنڑائیاں ویندیاں ہِن۔ اِیں واسطے اُوندے اُتے سزا دا حُکم ڈے تے اُنہاں کُوں پُورا کیتا۔ تے بھانویں اُوندے قتل دی کوئی وجہ نہ مِلی وَل وی اُنہاں پِیلاطُس کُوں درخاست کیتی جو اُونکُوں قتل کر ڈِتا ونجے۔ جِیں ویلے او سبھ کُجھ پُورا کر گِھدا جیہڑا اُوندے حق ءچ لِکھیا گِیا ہا تاں اُونکُوں صلیب تُوں لہا تے قبر ءچ رکھ ڈِتا۔ پر خُدا اُونکُوں مُردیاں ءچوں زندہ کر ڈِتا۔ تے جیہڑے لوک گلیل کنُوں اُوندے نال یروشلیم آئے ہَن، او اُنہاں کُوں بہُوں ڈینہاں تئیں ڈِکھالی ڈِتا۔ ہُنڑ اُوہو لوک اُمت دے سامنڑے اُوندے گواہ ہِن۔ تے اساں تُہاکُوں اُوں وعدہ دے بارے ءچ جیہڑا ساڈے پِیُو ڈاڈا نال کیتا گِیا ہا، خوشخبری ڈیندے ہیں جو خُدا یسُوع کُوں زندہ کر تے اُنہاں دی اولاد یعنی ساڈے کیتے اُونہی وعدہ کُوں پُورا کیتا۔ جِینویں ڈُوجھے زبُور ءچ لِکھیا ہے جو ’تُوں میڈا پوتر ہیں، اَج مَیں تیڈا باپ بنڑیا ۔‘ تے یسُوع دے مُردیاں ءچوں زندہ تھیوݨ تے اُوندے جِسم دے سڑن دے بارے ءچ خُدا اِینویں آکھیا ہے، ’مَیں تیکُوں داؤد نال وعدہ کیتیاں ہوئیاں پاک تے سچیاں نعمتاں ڈیساں ۔‘ تے او ہِک بئے زبُور ءچ آدھے جو ’تُوں آپنڑے قدُّوس دے سڑن دی نوبت نہ آوݨ ڈیسیں ۔‘ کیوں جو داؤد تاں آپنڑے زمانہ ءچ خُدا دا مقصد پُورا کرݨ دے بعد موت دی نیندر سَم گِیا تے آپنڑے پِیُو ڈاڈا نال دفن تھیّا تے اُوندے سڑن دی نوبت آئی۔ پر جِینکُوں خُدا زندہ کیتا اُوندے سڑن دی نوبت نئیں آئی۔ بس بِھراؤ! تُساں جاݨ گِھنو جو یسُوع ای دے وسیلے تُہاکُوں گُناہاں دی معافی دی خبر ڈِتی ویندی ہے۔ تے جیہڑے گالھیں کنُوں تُساں مُوسیٰ دی شریعت دے ذریعے نجات نہ پا سگدے ہَوے، ہُنڑ مسیح اُتے اِیمان گِھن آوݨ دے ذریعے ہر کہیں کُوں نجات مِل سگدی ہے۔ بس خبردار! اِینویں نہ تھیوے جو جیہڑا نبیاں دیاں کتاباں ءچ لِکھیا ہے او تُہاڈے اُتے سچ تھیوے جو ’حقارت کرݨ آلیو! ڈیکھو، حیران تھیؤ تے ہلاک تھی ونجو کیوں جو مَیں تُہاڈے زمانے ءچ ہِک کم کرݨ آلا ہاں ایجھا کم جیندی خبر سُنڑ تے وی تُہاکُوں کڈھائیں یقین نہ آسی‘ ۔“ جِیں ویلے برنباس تے پولُس عبادت خانہ ءچوں باہر نِکلدے پئے ہَن تاں لوک اُنہاں دی مِنت کرݨ لگے جو اگلے سبت کُوں وی ایہ گالھیں ساکُوں سُنڑائیاں ونجنڑ۔ جِیں ویلے عبادت ختم تھی گئی تاں بہُوں سارے یہُودی تے خُدا پرست نومُرید یہُودی پولُس تے برنباس دے پِچُھوں تھی پئے۔ اُنہاں ڈوہائیں، اُنہاں نال مزید گالھیں کیتیاں تے زور ڈے تے آکھیا جو خُدا دے فضل اُتے قائم راہو۔ ڈُوجھے سبت، تقریباً سارا شہر خُداوند دا کلام سُنڑݨ کیتے جمع تھی گِیا۔ پر یہُودی اِتی بِھیڑ ڈیکھ تے حسد نال بھریج گئے تے پولُس دے گالھیں دی مخالفت کرݨ تے بُرا بھلا آکھنڑ لگے۔ پولُس تے برنباس دلیری نال آکھنڑ لگے ”لازم ہا جو خُدا دا کلام پہلے تُہاکُوں سُنڑایا ویندا پر کیوں جو تُساں اُونکُوں رَد کریندے ہیوے تے آپنڑے آپ کُوں ہمیشاں دی زندگی دے لائق نئیں سمجھدے تاں ڈیکھو اساں غیر قوماں دو توجہ کریندے ہیں۔ کیوں جو خُداوند ساکُوں ایہ حُکم ڈِتے جو ’مَیں تیکُوں غیر قوماں کیتے نُور مقرر کیتے تاں جو تُوں زمین دی اِنتہا تئیں نجات دا باعث ہوویں‘ ۔“ جِیں ویلے غیر قوم آلیاں ایہ سُنڑیا تاں بہُوں خوش تھئے تے خُداوند دے کلام دی تعریف کرݨ لگے تے جِتّی ہمیشاں دی زندگی کیتے مقرر کیتے گئے ہَن، اِیمان گِھن آئے۔ تے خُداوند دا کلام اُوں سارے علاقے ءچ پھیل گِیا۔ پر یہُودیاں خُدا پرست تے معزز عورتاں تے شہر دے راہنماواں کُوں بھڑکایا تے پولُس تے برنباس کُوں ستاوݨ کیتے اُبھار تے اُنہاں کُوں آپنڑے علاقے ءچوں کڈھ ڈِتا۔ او آپنڑے پیراں دی دھُوڑ اُنہاں دے سامنڑے چِھنڈک تے اکُنیُم کُوں چلے گئے۔ پر شاگرد خوشی تے رُوح القُدس نال معمُور تھیندے ریہے۔ اکُنیُم ءچ وی پولُس تے برنباس یہُودیاں دے عبادت خانہ ءچ گئے تے ایجھی تقریر کیتی جو بہُوں سارے یہُودی تے یُونانی اِیمان گِھن آئے۔ پر جیہڑے یہُودی اِیمان نہ گِھن آئے ہَن، اُنہاں یہُودیاں، غیریہُودیاں کُوں بھڑکایا تے اُنہاں دی سوچ مسیحی بِھرانواں دے خلاف کر ڈِتی۔ بس پولُس تے برنباس اُتھاں بہُوں عرصے تئیں ریہے تے خُداوند دے بھروسے تے دلیری نال کلام کریندے ہَن۔ خُداوند اُنہاں معجزیاں تے عجیب کماں دے ذریعے جیہڑے اُنہاں دے ہتُھوں تھیندے ہَن، آپنڑے فضل دے کلام کُوں برحق ثابت کریندا ریہا۔ پر شہر دے لوک آپس ءچ ونڈیج گئے۔ کُجھ یہُودیاں نال تھی گئے تے کُجھ رسُولاں نال۔ پر جِیں ویلے یہُودی تے غیریہُودی آپنڑے سرداراں نال رَل تے رسُولاں کُوں بے عزت تے سنگسار کرݨ کیتے اُنہاں اُتے چڑھ آئے تاں او اِیندے تُوں واقف تھی تے لُکااُنیہ دے شہر لُسترہ تے دِربے تے نال دیاں وستیاں ءچ بھج گئے۔ تے اُتھاں خوشخبری سُنڑیندے ریہے۔ لُسترہ ءچ ہِک بندہ بیٹھا ہا جیہڑا پیراں کنُوں معذور ہا۔ او جماندرُو مَنڈا ہا تے کڈھائیں نہ ٹُریا ہا۔ او پولُس کُوں گالھیں کریندے سُنڑدا پِیا ہا۔ جِیں ویلے پولُس اُوندے دو غور نال ڈِٹھا جو اُوندے ءچ اِتنا اِیمان ہے جو او شِفا پا سگے، تاں اُچی اواز ءچ آکھیا جو ”آپنڑے پیراں اُتے سِدھا کھڑا تھی وَنج۔“ بس او ٹپّا مار تے کھڑا تھی گِیا تے ٹُرݨ پِھرݨ لگا۔ لوک پولُس دا ایہ کم ڈیکھ تے لُکااُنیہ دی بولی ءچ اُچی اواز نال آکھنڑ لگے جو ”دیوتا ساڈے کولھ اِنسانی شکل ءچ لہہ آئے ہِن۔“ تے اُنہاں برنباس کُوں زِیُوس تے پولُس کُوں ہرمِیس آکھنڑ شروع کر ڈِتا، اِیں واسطے جو زیادہ تر گالھیں پولُس کریندا ہا۔ زِیُوس دیوتا دا مندر شہر دے سامنڑے ہا۔ اُوندا مذہبی راہنما ڈاند تے پُھلاں دے ہار گِھن تے شہر دے پھاٹک اُتے پُجیا کیوں جو او شہر دے لوکاں نال رسُولاں کیتے قُربانی پیش کرݨ چاہندا ہا۔ جِیں ویلے رسُولاں یعنی پولُس تے برنباس ایہ سُنڑیا تاں آپنڑے کپڑے پھاڑ تے لوکاں ءچ وَنج وڑے تے اُچی اواز ءچ آکھنڑ لگے جو ”لوکو! تُساں ایہ کیا کریندے ہیوے؟ اساں وی تُہاڈے آلی کار اِنسان ہیں تے تُہاکُوں خوشخبری سُنڑیندے ہیں تاں جو تُساں اِنہاں بے کار چیزاں کُوں چھوڑ تے زندہ خُدا دو رجُوع گِھن آؤ جئیں زمین تے اسمان تے سمندر تے جیہڑا کُجھ اُنہاں ءچ ہے، پیدا کیتے۔ اُوں پِچھلے زمانہ ءچ سبھ قوماں کُوں آپنڑے آپنڑے رستے اُتے ٹُرݨ ڈِتا۔ وَل وی اُوں آپنڑے آپ کُوں بے گواہ نئیں چھوڑیا۔ بلکہ اُوں مہربانیاں کیتیاں تے اسمان تُوں مینہ وسایا تے فصلاں کیتے موسم عطا کیتے تے تُہاکُوں خوراک تے دِلی خوشی نال بھر ڈِتا۔“ ایہ گالھیں آکھ تے وی لوکاں کُوں بہُوں مُشکل نال روکیا جو اُنہاں کیتے قُربانیاں نہ پیش کرݨ۔ وَل کُجھ یہُودی انطاکِیہ تے اکُنیُم تُوں آئے تے لوکاں کُوں آپنڑے نال مِلا تے پولُس کُوں سنگسار کر ڈِتا تے اُونکُوں مُردہ سمجھ تے شہر تُوں باہر گِھیل تے گِھن گئے۔ پر جِیں ویلے شاگرد اُوندے چودھارُوں آ کھڑے تھئے تاں او اُٹھی تے شہر ءچ آیا تے ڈُوجھے ڈینہہ برنباس نال دِربے چلیا گِیا۔ پولُس تے برنباس اُوں شہر ءچ خوشخبری سُنڑا تے بہُوں سارے شاگرد بنڑا تے لُسترہ، اکُنیُم تے انطاکِیہ دو وَل آئے۔ تے شاگرداں دے دِلاں کُوں مضبوط کریندے تے ایہ نصیحت کریندے ہَن جو ”آپنڑے اِیمان اُتے قائم راہو“ تے آدھے ہَن ”ضرور ہے جو اساں بہُوں ساریاں مُصیبتاں سہہ تے خُدا دی بادشاہی ءچ داخل تھیؤں۔“ اُنہاں ہر کلیسیا ءچ بزُرگاں کُوں مقرر کیتا تے روزہ رکھ تے، تے دُعاواں کر تے اُنہاں کُوں خُداوند دے سپُرد کیتا جئیں اُتے او اِیمان گِھن آئے ہَن۔ وَل پِسِدیہ ءچوں تھیندے ہوئے پمفِیلیہ دے علاقے ءچ پُجے۔ تے پِرگہ ءچ خُدا دا کلام سُنڑا تے اتلّیہ دو چلے گئے۔ اُتھوں او جہاز اُتے سوار تھی تے ولا انطاکِیہ گئے جِتھاں اُنہاں کُوں اُوں خدمت کیتے جیہڑی اُنہاں ہُنڑ پُوری کر گِھدی ہئی خُدا دے فضل دے سپُرد کیتا گِیا ہا۔ اُتھاں پُج تے اُنہاں کلیسیا کُوں کٹھا کر تے او سبھ ڈسایا جیہڑا کُجھ خُدا اُنہاں دے ذریعے کیتا ہا تے ایہ جو اُوں غیر قوماں کیتے اِیمان دا دروازہ کھول ڈِتے۔ تے او شاگرداں دے کولھ بہُوں عرصہ تئیں ٹِکے ریہے۔ وَل کُجھ لوک یہُودیہ تُوں آ تے مسیحی بِھرانواں کُوں ایہ تعلیم ڈیوݨ لگے جو ”جے مُوسیٰ دی رسم دے مطابق تُہاڈا ختنہ نہ تھیّا ہووے تاں تُساں نجات نئیں پا سگدے۔“ جِیں ویلے پولُس تے برنباس دی اُنہاں دے نال سخت تکرار تے بحث تھئی تاں کلیسیا ایہ مقرر کیتا جو پولُس تے برنباس تے اُنہاں ءچوں کُجھ بئے بندے اِیں مسئلہ کیتے رسُولاں تے بزُرگاں کولھ یروشلیم ونجنڑ۔ بس کلیسیا اُنہاں کُوں روانہ کیتا تے او فینیکے تے سامریہ ءچوں تھیندے ہوئے، غیر قوماں دا مسیح اُتے اِیمان گِھن آوݨ دا بیان کریندے گئے تے اِیں خبر نال سبھ بِھرانواں کُوں خوش کریندے گئے۔ جِیں ویلے یروشلیم پُجے تاں کلیسیا، رسُول تے بزُرگ اُنہاں کُوں خوشی نال مِلے تے اُنہاں سبھ کُجھ بیان کیتا جیہڑا خُدا اُنہاں دی معرفت کیتا ہا۔ پر فریسیاں دے فرقہ ءچوں جیہڑے اِیمان گِھن آئے ہَن، کُجھ کھڑے تھی تے آکھنڑ لگے جو ”غیریہُودیاں ءچوں اِیمان گِھن آوݨ آلیاں دا ختنہ کراوݨ تے اُنہاں کُوں مُوسیٰ دی شریعت اُتے عمل کرݨ دا حُکم ڈیوݨ ضرور ہے۔“ بس رسُول تے بزُرگ اِیں گالھ اُتے غور کرݨ کیتے کٹھے تھئے۔ کافی بحث دے بعد پطرس کھڑا تھی تے اُنہاں کُوں آکھیا جو ”بِھراؤ! تُساں جانڑدے ہیوے جو بہُوں عرصہ پہلے خُدا تُساں لوکاں ءچوں میکُوں چُنڑیا جو غیر قوماں میڈی زبان تُوں خوشخبری دا کلام سُنڑ تے اِیمان گِھن آوݨ۔ تے خُدا جیہڑا دِلاں دا حال جانڑدے، اُنہاں کُوں وی ساڈے آلی کار رُوح القُدس ڈے تے گواہی ڈِتی جو اُوں اُنہاں کُوں قبول کر گِھدے، تے اِیمان دے وسیلہ نال اُنہاں دے دل پاک کر تے ساڈے ءچ تے اُنہاں ءچ کوئی فرق نئیں کیتا۔ بس ہُنڑ تُساں شاگرداں دی گردن اُتے ایجھی پنجالی رکھ تے جِینکُوں نہ ساڈے پِیُو ڈاڈا چا سگدے ہَن، نہ ای اساں، خُدا کُوں کیوں ازمیندے ہیوے؟ جڈاں جو ساڈا اِیمان ہے جو ساکُوں خُداوند یسُوع دے فضل دے وسیلے نال نجات مِلسی، جِینویں اُنہاں کُوں مِلسی۔“ وَل ساری جماعت چُپ ریہی تے پولُس تے برنباس دا بیان سُنڑݨ لگی جو خُدا اُنہاں دے ذریعے غیر قوماں ءچ کیجھے کیجھے معجزے تے عجیب کم ظاہر کیتے۔ جِیں ویلے اُنہاں دے گالھیں ختم تھیّاں تاں یعقُوب آکھنڑ لگا جو ”بِھراؤ! میڈی گالھ سُنڑو۔ شمعون تُہاکُوں ڈسائے جو خُدا پہلے کِینویں غیر قوماں اُتے نِگاہ کیتی تاں جو اُنہاں ءچوں لوکاں کُوں چُنڑ تے آپنڑے ناں دی ہِک اُمت بنڑا گِھنے۔ تے نبیاں دے گالھیں وی اِیندے مطابق ہِن۔ جِینویں لِکھیا ہے جو ’اِیندے بعد مَیں ولا آساں تے داؤد دے ڈھٹھے ہوئے تمبُو کُوں کھڑا کریساں تے اُوندے کھنڈراں دی مرمت کر تے اُونکُوں ولا تعمیر کریساں۔ تاں جو باقی لوک یعنی ساریاں قوماں جیہڑیاں میڈے ناں تُوں اکھویندیاں ہِن، خُداوند کُوں گولھنڑ۔‘ ایہ اُوہو خُداوند فرمیندے جیہڑا دُنیا دے شروع تُوں اِنہئی گالھیں دی خبر ڈیندا آیا ہے۔ بس میڈا فیصلہ ایہ ہے جو غیر قوماں ءچوں جیہڑے لوک خُدا دو رجُوع کریندے ہِن اُنہاں کُوں اساں تکلیف نہ ڈیؤں۔ پر اُنہاں کُوں خط لِکھ تے ایہ ڈساؤں جو او بُتاں کُوں نذر کیتیاں ہوئیاں چیزاں تے حرام کاری تے گَل گُھٹ تے مارے ہوئے جانوراں تے خون کنُوں پرہیز کرݨ۔ کیوں جو ہر شہر ءچ پُرانڑے زمانے تُوں مُوسیٰ دی شریعت دی منادی کیتی گئی ہے تے او عبادت خانیاں ءچ ہر سبت کُوں سُنڑائی ویندی ہے۔“ وَل رسُولاں تے بزُرگاں ساری کلیسیا سمیت مناسب سمجھیا جو آپنڑے ءچوں کُجھ بندیاں کُوں چُنڑ تے پولُس تے برنباس دے نال انطاکِیہ بھیجنڑ یعنی یہُوداہ کُوں جیہڑا برسبّا اکھویندے تے سِیلاس کُوں۔ ایہ بِھرانواں ءچ قابل ِ احترام ہَن۔ تے اُنہاں دے ہتھ ایہ خط بھیجیا جو رسُولاں تے بزُرگ بِھرانواں دی طرفوں انطاکِیہ، سُوریہ تے کلکیہ دے اُنہاں مسیحی بِھرانواں کُوں جیہڑے غیر قوماں ءچوں ہِن، سلام پُجے۔ کیوں جو اساں سُنڑیا ہے جو ساڈے ءچوں کُجھ لوکاں جِنہاں کُوں اساں حُکم نہ ڈِتا ہا تُہاکُوں آپنڑے گالھیں نال پریشان کر ڈِتے۔ اِیں واسطے اساں رَل تے مناسب جانڑیا جو کُجھ چُنڑے ہوئے بندیاں کُوں آپنڑے عزیزاں پولُس تے برنباس دے نال تُہاڈے کولھ بھیجُوں۔ ایہ ڈوہائیں ایجھے بندے ہِن جِنہاں آپنڑیاں جاناں کُوں ساڈے خُداوند یسُوع مسیح دے ناں کیتے خطرے ءچ پایا ہویا ہے۔ اِیں واسطے اساں یہُوداہ تے سِیلاس کُوں بھیجیا ہے، جیہڑے ایہ گالھیں زبانی وی بیان کریسن۔ کیوں جو رُوح القُدس تے اساں مناسب سمجھیا جو اِنہاں لازمی گالھیں دے علاوہ تُہاڈے اُتے کوئی بِیا بھار نہ سَٹُوں، جو تُساں بُتاں دیاں قُربانیاں دے گوشت، خون تے گلا گُھٹ تے مارے ہوئے جانوراں دے گوشت تے حرام کاری کنُوں پرہیز کرو۔ جے تُساں آپنڑے آپ کُوں اِنہاں چیزاں کنُوں بچائی رکھیسو تاں چنگا کریسو۔ والسّلام۔ بس او روانہ تھی تے انطاکِیہ پُجے تے جماعت کُوں کٹھا کر تے خط ڈے ڈِتا۔ او خط دے تسلی بخش کلام کُوں پڑھ تے خوش تھئے۔ تے یہُوداہ تے سِیلاس جیہڑے خود وی نبی ہَن، بِھرانواں کُوں نصیحت کر تے مضبوط کر ڈِتا۔ کُجھ ڈینہہ بعد او بِھرانواں تُوں سلامتی دی دُعا گِھن تے آپنڑے بھیجنڑ آلیاں کولھ روانہ کیتے گئے۔ [پر سِیلاس کُوں اُتھاں راہنڑ چنگا لگیا۔] پر پولُس تے برنباس انطاکِیہ ءچ ای کھڑ گئے تے بہُوں سارے بئے لوکاں نال خُداوند دا کلام سکھیندے تے اُوندی تبلیغ کریندے ریہے۔ کُجھ ڈینہہ بعد پولُس، برنباس کُوں آکھیا جو ”جِنہاں شہراں ءچ اساں خُداوند دا کلام سُنڑایا ہا، آؤ وَل اُنہاں ءچ وَنج تے بِھرانواں کُوں ڈیکھوں جو اُنہاں دا کیا حال ہے۔“ برنباس، یُوحنّا کُوں جیہڑا مرقس اکھویندا ہے، نال گِھننڑ چاہندا ہا۔ پر پولُس ایہ مناسب نہ سمجھیا جو جیہڑے بندے اُنہاں نال پمفِیلیہ ءچ ونجنڑ تُوں کنارہ کیتا تے اِیں کم کیتے اُنہاں دے نال نہ گِیا ہا، اُونکُوں نال گِھن ونجُوں۔ بس اُنہاں ءچ ایجھی تکرار تھئی جو او ہِک بئے کنُوں اَنج تھی گئے۔ برنباس مرقس کُوں گِھن تے جہاز ءچ کُپرُس روانہ تھیّا۔ پر پولُس سِیلاس کُوں نال گِھن گِھدا تے بِھرانواں کنُوں خُداوند دے فضل دے سپُرد تھی تے اُتھوں روانہ تھیّا۔ پولُس سُوریہ تے کلکیہ ءچوں تھیندا ہویا کلیسیاواں کُوں مضبوط کریندا گِیا۔ پولُس دِربے تے وَل لُسترہ ءچ وی پُجیا، جِتھاں تِیمُتِھیُس ناں دا ہِک شاگرد ہا۔ اُوندی ماء تاں یہُودی ہئی جیہڑی مسیح اُتے اِیمان گِھن آئی ہئی پر اُوندا پِیُو یُونانی ہا۔ او لُسترہ تے اکُنیُم دے بِھرانواں ءچ نیک ناں ہا۔ پولُس اُونکُوں سفر ءچ آپنڑے نال گِھن ونجنڑ چاہندا ہا اِیں واسطے اُوں اُوندا ختنہ کر ڈِتا کیوں جو اُوں علاقے دے سارے یہُودی جانڑدے ہَن جو اُوندا پِیُو یُونانی ہے۔ وَل او جیہڑے جیہڑے شہراں ءچوں لنگھدے ہَن، اُتھوں دے اِیمانداراں کُوں اُنہاں فیصلیاں دے بارے ءچ ڈسیندے ہَن جیہڑے یروشلیم دے رسُولاں تے بزُرگاں جاری کیتے ہَن تاں جو اُنہاں اُتے عمل کرݨ۔ بس کلیسیاواں اِیمان ءچ مضبوط تھیندیاں تے شمار ءچ ہر روز ودھدیاں گئیاں۔ وَل پولُس تے سِیلاس فروگیہ تے گلِتیہ دے علاقے ءچوں لنگھے کیوں جو رُوح القُدس اُنہاں کُوں آسِیہ ءچ کلام سُنڑاوݨ تُوں روک ڈِتا ہا۔ اُنہاں مُوسیہ دے نیڑے پُج تے بِتُونیہ ءچ داخل تھیوݨ دی کوشش کیتی پر یسُوع دے رُوح اُنہاں کُوں ونجنڑ نہ ڈِتا۔ بس او مُوسیہ کنُوں لنگھدے ہوئے تروآس ءچ آئے۔ رات کُوں پولُس مَکِدُنیہ دے ہِک بندے کُوں رویا ءچ کھڑا ڈِٹھا جیہڑا پولُس دی مِنت کر تے آدھا ہے جو ”اِیں پار مَکِدُنیہ ءچ آ تے ساڈی مدد کر۔“ اُوندی رویا دے بعد اساں فوراً مَکِدُنیہ ونجنڑ دا اِرادہ کیتا کیوں جو اساں ایہ سمجھیا جو خُدا ساکُوں اُتھوں دے لوکاں ءچ خوشخبری سُنڑاوݨ کیتے سڈیا ہے۔ بس تروآس تُوں اساں جہاز اُتے روانہ تھئے تے سمتُراکے تئیں آئے تے ڈُوجھے ڈینہہ نیاپُلِس ءچ۔ اُتھوں اساں فِلپی روانہ تھئے جیہڑا ضلع مَکِدُنیہ دا وڈا شہر ہا تے جِتھاں بہُوں سارے رومی راہندے ہَن۔ اساں کُجھ ڈینہہ اُتھائیں ریہے۔ سبت دے ڈینہہ اساں شہر دے پھاٹک ءچوں نِکل تے دریا دے کنارے گئے کیوں جو اساں سمجھیا ہا جو اُتھاں دُعا کرݨ دی جاہ ہوسی۔ اساں اُتھاں بہہ گئے تے کُجھ عورتاں نال جیہڑیاں اُتھاں جمع تھی گئیاں ہَن، کلام کرݨ لگے۔ ساڈے گالھیں سُنڑݨ آلیاں عورتاں ءچوں لُدیہ ناں دی ہِک عورت ہئی۔ او تھواتِیرہ شہر دی ہئی تے جامنی رنگ دے کپڑے دا کاروبار کریندی ہئی تے بہُوں خُدا پرست ہئی۔ خُداوند اُوندا دل کھولیا تاں جو او پولُس دا پیغام سُنڑے تے اُونکُوں قبول کرے۔ وَل جِیں ویلے اُوں تے اُوندے خاندان بپتسمہ گِھن گِھدا تاں ساکُوں آکھیا جو ”جے تُساں میکُوں خُداوند دی اِیماندار بندی سمجھدے ہیوے تاں جُلو تے میڈے گھر ٹِکو۔“ بس اُوں ساکُوں مجبور کیتا۔ جِیں ویلے اساں دُعا آلی جاہ دو ویندے پئے ہسے تاں ساکُوں ہِک کنیز مِلی جیندے ءچ ہِک ایجھی بدرُوح ہئی جیندے ذریعے او فال گِیری کریندی ہئی۔ او کنیز قسمت دا حال ڈسا تے آپنڑے مالکاں کیتے بہُوں کمائی کریندی ہئی۔ او پولُس تے ساڈے پِچُھوں آ تے چیخنڑ لگ پئی جو ”ایہ لوک خُدا تعالیٰ دے خادم ہِن جیہڑے تُہاکُوں نجات دا رستہ ڈسیندے ہِن۔“ او بہُوں ڈینہاں تئیں اِینویں ای کریندی ریہی۔ آخر پولُس بہُوں تنگ تھی گِیا تے اُوں مُڑ تے بدرُوح کُوں آکھیا جو ”مَیں تیکُوں یسُوع مسیح دے ناں نال حُکم ڈیندا ہاں جو اِیندے ءچوں نِکل وَنج۔“ تے اُونہی ویلے او بدرُوح اُوں چھوہیر ءچوں نِکل گئی۔ جِیں ویلے اُوندے مالکاں ڈِٹھا جو اُنہاں دی کمائی دا ذریعہ ختم تھی گِیا تاں او پولُس تے سِیلاس کُوں پکڑ تے چوک ءچ حاکماں کولھ گِھن گئے۔ اُنہاں پولُس تے سِیلاس کُوں عدالت آلیاں دے سامنڑے پیش کیتا تے آکھیا، ”ایہ لوک یہُودی ہِن تے ساڈے شہر ءچ بہُوں کھلبلی مچیندے ہِن۔ تے ایجھے رسماں دی تعلیم ڈیندے ہِن جِنہاں کُوں مننڑا تے اُنہاں اُتے عمل کرنڑا اساں رومیاں کُوں اصلُوں جائز نئیں۔“ عوام وی اُنہاں نال رَل گئی تے پولُس تے سِیلاس دی مخالفت کرݨ لگ پئی تے حاکماں اُنہاں دے کپڑے پھاڑ تے اُنہاں کُوں بینت نال کُٹنڑ دا حُکم ڈِتا۔ وَل سپاہیاں اُنہاں کُوں بینت مروا تے قید خانہ ءچ سَٹ ڈِتا تے قید خانہ دے داروغہ کُوں حُکم ڈِتا جو اُنہاں دی چنگی طرحاں چوکیداری کرے۔ ایہ حُکم مِلدے ای اُوں اُنہاں کُوں ہِک اندرُونی کوٹھڑی ءچ بند کر ڈِتا تے اُنہاں دے پیراں ءچ بیڑیاں لا ڈِتیاں۔ اَدھ رات ویلے پولُس تے سِیلاس دُعا تے خُدا دی حمد کریندے پئے ہَن تے قیدی سُنڑدے پئے ہَن، جو اچانک ہِک زوردار زلزلہ آیا جیندے نال قید خانہ دیاں بنیاداں ہل گئیاں۔ دروازے فوراً کُھل گئے تے سارے قیدیاں دیاں بیڑیاں وی کُھل گئیاں۔ داروغہ جاگ پِیا تے جِیں ویلے اُوں قید خانہ دے دروازے کُھلے ڈِٹھے تاں سمجھیا جو سارے قیدی قید خانہ ءچوں نِکل تے بھج گئے ہِن۔ بس اُوں آپنڑی تلوار چاتی تے آپنڑے آپ کُوں مارݨ آلا ہا۔ پر پولُس اُچی اواز ءچ آکھیا جو ”آپنڑے آپ کُوں کوئی نُقصان نہ پُچا کیوں جو اساں سارے اِتھائیں ہیں۔“ داروغہ ڈیوا چوا تے اندر گِیا تے کمبدا ہویا پولُس تے سِیلاس دے پیراں ءچ ڈھے پِیا۔ وَل اُنہاں کُوں باہر گِھن آیا تے آکھنڑ لگا، ”صاحبو! مَیں کیا کراں جو نجات پاواں؟“ اُنہاں جواب ڈِتا، ”خُداوند یسُوع مسیح اُتے اِیمان گِھن آ تاں تُوں تے تیڈا خاندان نجات پے سی۔“ وَل اُنہاں اُونکُوں تے اُوندے گھر آلیاں کُوں خُداوند دا کلام سُنڑایا۔ اُونہی ویلے رات کُوں او اُنہاں کُوں گِھن گِیا تے اُنہاں دے زخم دھوتے۔ وَل اُوں تے اُوندے سارے گھر آلیاں بپتسمہ گِھدا۔ داروغہ اُنہاں کُوں آپنڑے گھر گِھن گِیا تے اُنہاں کُوں کھانڑا کھوایا۔ تے آپنڑے سارے گھر آلیاں سمیت خُدا اُتے اِیمان گِھن آ تے بہُوں خوشی منائی۔ جِیں ویلے سویل تھئی تاں رومی حاکماں آپنڑے سپاہیاں کُوں قید خانہ دے داروغہ دے کولھ ایہ حُکم ڈے تے بھیجیا جو ”اُنہاں بندیاں کُوں رِہا کر ڈے۔“ وَل داروغے پولُس کُوں آکھیا جو ”حاکماں تُہاکُوں رِہا کرݨ دا حُکم بھیجیا ہے۔ بس ہُنڑ تُساں نِکل تے سلامت چلے ونجو۔“ پر پولُس جواب ڈِتا ”اُنہاں ساکُوں جیہڑے رومی شہری ہیں ، ساڈا قصُور ثابت کیتے بغیر ساریاں دے سامنڑے ماریا کٹوایا تے قید خانہ ءچ سَٹ ڈِتا تے ہُنڑ چُپ کر تے چھوڑ ڈیوݨ چاہندے ہِن؟ اِینویں نئیں تھی سگدا بلکہ او خود اِتھاں آوݨ تے ساکُوں قید خانہ ءچوں باہر گِھن ونجنڑ۔“ سپاہیاں وَنج تے حاکماں کُوں اِنہاں گالھیں دی خبر ڈِتی۔ جِیں ویلے حاکماں سُنڑیا جو پولُس تے سِیلاس رومی ہِن تاں ڈر گئے، تے اُتھاں آ تے اُنہاں تُوں معافی منگی تے وَل اُنہاں کُوں قید خانہ ءچوں باہر گِھن آئے تے درخاست کیتی جو شہر ءچوں باہر چلے ونجو۔ بس پولُس تے سِیلاس قید خانہ ءچوں باہر نِکل تے لُدیہ دے گھر گئے جِتھاں او مسیحی بِھرانواں کُوں مِلے تے اُنہاں دی حوصلہ افزائی کر تے اُتھوں روانہ تھی گئے۔ اِیندے بعد پولُس تے سِیلاس، امفِپُلِس تے اَپُلّونیہ ءچوں تھیندے ہوئے تھِسّلُنِیکے آئے جِتھاں یہُودیاں دا ہِک عبادت خانہ ہا۔ پولُس آپنڑے دستور دے مطابق عبادت خانے ءچ گِیا تے ترے سبتاں تئیں خُدا دے کلام ءچوں اُنہاں نال بحث کریندا ریہا۔ او اُوندا مطلب واضح کریندا تے ثابت کریندا ہا جو ”المسیح دا ڈُکھ چاوݨ تے مُردیاں ءچوں زندہ تھیوݨ لازمی ہا“ تے ایہ جو ”جِیں یسُوع دی تبلیغ مَیں کریندا ہاں اُوہو المسیح ہے۔“ کُجھ یہُودی اِیں گالھ کُوں مَن تے پولُس تے سِیلاس نال رَل گئے تے اِینویں ای بہُوں سارے خُدا پرست یُونانی تے معزز عورتاں وی۔ پر یہُودیاں حسد دے سببّوں بازاری لوکاں ءچوں کُجھ بدمعاشاں کُوں آپنڑے نال گِھدا تے شہر ءچ ہنگامہ شروع کر ڈِتا تے یاسون دے گھر اُتے حملہ کر ڈِتا کیوں جو پولُس تے سِیلاس کُوں لوکاں دے سامنڑے گِھن آوݨ چاہندے ہَن۔ پر جِیں ویلے اُنہاں کُوں او نہ مِلے تاں یاسون تے بہُوں سارے ڈُوجھے مسیحی بِھرانواں کُوں گِھیل تے شہر دے حاکماں دے کولھ گِھن گئے تے چیخ تے آکھیا ”او بندے جِنہاں ساری دُنیا کُوں اُلٹ پُلٹ کر ڈِتے، ہُنڑ اِتھاں وی آ گئے ہِن، تے یاسون اُنہاں کُوں آپنڑے گھر ءچ ٹِکایا ہے۔ ایہ سبھ لوک رومی بادشاہ قیصر دے حُکماں دی مخالفت کریندن تے آدھے ہِن جو بادشاہ تاں کوئی بِیا ای ہے جِیندا ناں یسُوع ہے۔“ ایہ گالھ سُنڑ تے عوام تے شہر دے حاکم گھبرا گئے۔ تے اُنہاں یاسون تے باقی مسیحی لوکاں کُوں ضمانت اُتے چھوڑ ڈِتا۔ رات تھیندے ای مسیحی بِھرانواں پولُس تے سِیلاس کُوں اُتھوں کنُوں بیرِیہ دو روانہ کر ڈِتا۔ جِیں ویلے او اُتھاں پُجے تاں یہُودی عبادت خانہ ءچ گئے۔ ایہ لوک تھِسّلُنِیکے دے لوکاں کنُوں زیادہ چنگے ہَن کیوں جو اُنہاں پیغام کُوں بہُوں شوق نال قبول کیتا تے او ہر روز خُدا دے کلام دا مطالعہ کریندے ہَن جو واقعی ایہ گالھیں اِینویں ای ہِن یا نئیں۔ بس بہُوں سارے یہُودی تے معزز یُونانی مرد تے عورتاں وی اِیمان گِھن آئے۔ جِیں ویلے تھِسّلُنِیکے دے یہُودیاں کُوں پتہ لگیا جو پولُس بیرِیہ ءچ خُدا دے کلام دی تبلیغ کریندا پِیا ہے تاں او اُتھاں وی آ پُجے تے لوکاں کُوں ہنگامہ کرݨ اُتے اُکساوݨ لگے۔ وَل بِھرانواں فوراً پولُس کُوں سمندر دے کنڈے دو روانہ کر ڈِتا پر سِیلاس تے تِیمُتِھیُس بیرِیہ ءچ ای ریہے۔ جیہڑے لوک پولُس دے نال ساتھی دے طور تے گئے، او اُونکُوں اتھینے ءچ چھوڑ تے اِیں حُکم نال وَل آئے جو سِیلاس تے تِیمُتِھیُس جلدی تُوں جلدی پولُس دے کولھ آوݨ۔ جِیں ویلے پولُس اتھینے ءچ اُنہاں دا اِنتظار کریندا پِیا ہا تاں ایہ ڈیکھ تے جو سارا شہر بُتاں نال بھریا پِیا ہے، اُوندا ہاں سڑ گِیا۔ اِیں واسطے او عبادت خانہ ءچ یہُودیاں تے خُدا پرست یُونانیاں نال بحث کریندا راہندا ہا تے اُنہاں کُوں وی جیہڑے اُونکُوں ہر روز بازار ءچ مِلدے ہَن۔ کُجھ اِپکُوری تے ستوئیکی فیلسُوف اُوندے نال بحث ءچ پے گئے۔ اُنہاں ءچوں کُجھ آکھیا جو ”ایہ بکواسی کیا آکھنڑ چاہندا ہے؟“ کُجھ ایہ آکھنڑ لگے جو ”ایہ تاں اجنبی دیوتیاں دی خبر ڈیوݨ آلا لگدے۔“ کیوں جو پولُس یسُوع تے قیامت دی خوشخبری ڈیندا ہا۔ وَل او اُونکُوں آپنڑے نال اریوپگُس اُتے گِھن گئے تے آکھنڑ لگے ”کیا اساں جاݨ سگدے ہیں جو ایہ نوِیں تعلیم جیہڑی تُوں ڈیندیں کیا ہے؟ اساں تیڈے مُنہ کنُوں بہُوں حیران کرݨ آلے گالھیں سُنڑدے پئے ہیں۔ اساں ایہ جاننڑاں چاہندے ہیں جو اِنہاں دا کیا مطلب ہے؟“ (کیوں جو اتھینے دے لوک کیا مقامی کیا پردیسی، آپنڑا سارا فارغ وقت فقط نوِیں نوِیں گالھیں سُنڑݨ یا سُنڑاوݨ ءچ لنگھیندے ہَن۔) پولُس اریوپگُس دے اَدھ ءچ کھڑا تھی تے آکھیا جو ”اتھینے آلیو! مَیں ڈیدھا ہاں جو تُساں ہر گالھ ءچ بہُوں مذہبی ہیوے۔ کیوں جو جِیں ویلے مَیں تُہاڈے شہر ءچ پِھردا پِیا ہم تاں میڈی نِگاہ تُہاڈے معبُوداں اُتے وی پئی۔ مَیں ڈِٹھا جو ہِک قُربان گاہ اُتے ایہ لِکھیا ہا ’نا معلوم خُدا کیتے۔‘ بس جِینکُوں تُساں بغیر جانڑدے ہوئے پُوجدے ہیوے، مَیں تُہاکُوں اُونہی دی خبر ڈیندا ہاں۔ جِیں خُدا دُنیا تے اُوندے سارے چیزاں کُوں پیدا کیتا او اسمان تے زمین دا مالک ہے۔ او ہتھ دے بنڑائے مندراں ءچ نئیں راہندا۔ او اِنسان دے ہتُھوں خدمت نئیں گِھندا کیوں جو او کہیں چیز دا مُتھاج نئیں، او تاں سارے اِنساناں کُوں زندگی، ساہ تے سارا کُجھ ڈیندے۔ اُوں ہِک بندے ءچوں لوکاں دی ہر قوم کُوں پیدا کیتا تاں جو پُوری زمین آباد تھیوے، تے اُوں اُنہاں دی زندگی دا وقت تے راہنڑ کیتے حد بندی مقرر کیتی۔ خُدا ایہ سبھ کُجھ کیتا، تاں جو او اُونکُوں گولھنڑ تے اُوندے نیڑے آ تے اُونکُوں پا گِھننڑ، بھانویں او ساڈے ءچوں کہیں کنُوں دُور نئیں۔ کیوں جو اساں اُوندے ءچ زندہ، ٹُردے پِھردے تے موجود ہیں جِینویں جو تُہاڈے کُجھ شاعراں وی آکھیا ہے جو ’اساں تاں اُوندی اولاد وی ہیں۔‘ جے اساں خُدا دی اولاد ہیں تاں ساکُوں ایہ نئیں سوچنڑاں چاہیدا جو خُدا تعالیٰ دی ذات سونے، چاندی یا پتھر دی مُورت ہے جیہڑی کہیں اِنسان دی ماہرانہ کاریگری ہووے۔ خُدا ماضی دی ایجھی جہالت کُوں نظرانداز کر ڈِتا پر ہُنڑ او سارے اِنساناں کُوں ہر جاہ حُکم ڈیندے جو توبہ کرݨ۔ کیوں جو اُوں ہِک ڈینہہ مقرر کر ڈِتے جِیں ویلے او عدل نال ساری دُنیا دی عدالت اُوں بندے دے ذریعے کریسی جِینکُوں اُوں مقرر کیتا ہے۔ تے اُونکُوں مُردیاں ءچوں زندہ کر تے ایہ گالھ سارے اِنساناں اُتے ثابت کر ڈِتی ہے۔“ جِیں ویلے لوکاں مُردیاں دی قیامت دے بارے ءچ سُنڑیا تاں اُنہاں ءچوں کُجھ اِیں گالھ کُوں کِھل ءچ اُڈا ڈِتا تے کُجھ آکھیا جو ”اساں اِیں موضوع تے وَل کہیں ویلے تَیں تُوں سُنڑسوں۔“ اِیں واسطے پولُس اُنہاں ءچوں نِکل گِیا۔ پر کُجھ لوک پولُس نال آ مِلے تے اِیمان گِھن آئے۔ اُنہاں ءچوں ہِک دِیونُسییُس اریوپگُس دی مجلس دا رُکن ہا تے دَمَرِس ناں دی ہِک عورت ہئی تے اُنہاں دے علاوہ بئے وی ہَن۔ اِیندے بعد پولُس اتھینے ءچوں نِکل تے کُرِنتُھس چلیا گِیا تے اُتھاں اُونکُوں ہِک یہُودی مِلیا جِیندا ناں اَکوِلہ ہا۔ او پُنطُس دا راہنڑ آلا ہا تے آپنڑی ذال پرسکِلہ نال نواں نواں اِطالِیہ تُوں آیا ہا کیوں جو کلَودِیُس شہنشاہ حُکم ڈِتا ہا جو سارے یہُودی روم شہر ءچوں نِکل ونجنڑ۔ بس پولُس اُنہاں کولھ گِیا، تے کیوں جو اَکوِلہ تے پرسکِلہ وی تمبُو بنڑاوݨ دا کم کریندے ہَن جِینویں پولُس کریندا ہا، اِیں واسطے او اُنہاں نال رہ تے کم کرݨ لگا۔ پر او ہر سبت، عبادت خانہ ویندا تے یہُودیاں تے یُونانیاں نال بحث کر تے اُنہاں کُوں قائل کریندا ہا۔ جِیں ویلے سِیلاس تے تِیمُتِھیُس مَکِدُنیہ تُوں آئے تاں پولُس آپنڑا سارا وقت کلام دی تبلیغ کرݨ ءچ گُزارݨ لگا۔ او یہُودیاں دے سامنڑے گواہی ڈیندا ہا جو یسُوع ای المسیح ہے۔ جِیں ویلے او پولُس دے خلاف تھی تے اُونکُوں بُرا بھلا آکھنڑ لگ پئے تاں اُوں آپنڑے کپڑے جھاڑ تے اُنہاں کُوں آکھیا، ”تُہاڈا خون تُہاڈی ای گردن اُتے ہووے۔ مَیں اِیندا ذمہ دار نئیں، ہُنڑ تُوں مَیں غیریہُودیاں کولھ ویساں۔“ وَل پولُس اُتھوں نِکل گِیا تے ہِک خُدا پرست بندے طِطُس یُوستُس دے گھر وَنج ٹِکیا جیہڑا عبادت خانہ دے نال ہا۔ عبادت خانہ دا سردار کرِسپُس آپنڑے سارے خاندان سمیت خُداوند اُتے اِیمان گِھن آیا تے کُرِنتُھس دے بئے بہُوں سارے لوکاں وی کلام سُنڑیا تے اِیمان گِھن آئے تے اُنہاں بپتسمہ گِھدا۔ ہِک رات خُداوند پولُس کُوں رویا ءچ آکھیا، ”خوف نہ کر بلکہ آدھا وَنج تے چُپ نہ رہ، کیوں جو اِیں شہر ءچ میڈے بہُوں لوک ہِن۔ کوئی تیڈے اُتے حملہ کر تے تیکُوں نُقصان نہ پُچیسی کیوں جو مَیں تیڈے نال ہاں۔“ بس پولُس اُتھاں ڈیڈھ سال تئیں ریہا تے اُنہاں کُوں خُدا دا کلام سکھیندا ریہا۔ جِیں ویلے گلیّو اَخیہ دا گورنر ہا تاں یہُودیاں رَل تے پولُس اُتے ہَلہ بول ڈِتا تے اُونکُوں پکڑ تے عدالت ءچ گِھن گئے، تے آکھنڑ لگے جو ”ایہ بندہ لوکاں کُوں ایجھے طریقہ نال خُدا دی عبادت کرݨ کیتے اُبھریندے جیہڑا ساڈی شریعت دے خلاف ہے۔“ پولُس کُجھ بولنڑ ای آلا ہا جو گلیّو یہُودیاں کُوں آکھیا، ”یہُودیو! جے ایہ کہیں جُرم یا کہیں وڈی شرارت دی گالھ ہوندی تاں مَیں لازمی تُہاڈی سُنڑدا۔ پر تُہاڈا اِلزام تاں کُجھ لفظاں، نانواں تے تُہاڈی آپنڑی شریعت دے مسئلیاں نال تعلق رکھیندے۔ اِیں واسطے تُساں خود ای بُھگتا گِھنو۔ مَیں ایجھے گالھیں دا مُنصف نہ بنڑساں۔“ تے اُوں اُنہاں کُوں عدالت ءچوں کڈھوا ڈِتا۔ وَل سارے لوک عبادت خانہ دے سردار سوستھِنیس کُوں پکڑ تے عدالت دے سامنڑے مارݨ لگ پئے پر گلیّو اِنہاں گالھیں دی کُجھ پرواہ نہ کیتی۔ بس پولُس بہُوں ڈینہاں تئیں کُرِنتُھس ءچ ریہا، وَل او بِھرانواں کنُوں رُخصت تھی تے جہاز اُتے سُوریہ دو چلیا گِیا۔ پرسکِلہ تے اَکوِلہ وی اُوندے نال ہَن۔ روانہ تھیوݨ تُوں پہلے پولُس آپنڑی مَنت پُوری تھیوݨ پارُوں کِنخریہ ءچ آپنڑا سر مُنوایا۔ جِیں ویلے پولُس اِفِسُس پُجیا تاں اُوں اَکوِلہ تے پرسکِلہ کُوں اُتھائیں چھوڑ ڈِتا۔ او خود ہِک عبادت خانہ ءچ وَنج تے یہُودیاں نال بحث کرݨ لگ پِیا۔ پر جِیں ویلے اُنہاں اُونکُوں درخاست کیتی جو ساڈے کولھ کُجھ دیر بِیا رہ تاں اُوں منظور نہ کیتی، بلکہ ایہ آکھ تے اُنہاں تُوں رُخصت تھیّا جو ”جے خُدا دی مرضی ہوئی تاں مَیں تُہاڈے کولھ ولا آساں۔“ وَل جہاز اُتے سوار تھی تے اِفِسُس تُوں روانہ تھی گِیا۔ او قیصریہ ءچ پُج تے یروشلیم چلیا گِیا تے کلیسیا کُوں سلام کیتا تے وَل انطاکِیہ دو روانہ تھی گِیا۔ انطاکِیہ ءچ کُجھ عرصہ گُزارݨ تُوں بعد پولُس اُتھوں روانہ تھیّا تے گلِتیہ تے فروگیہ دے سارے علاقیاں ءچوں لنگھدے ہوئے سبھ شاگرداں دے اِیمان کُوں مضبوط کریندا گِیا۔ اِیں دوران اپُلّوس ناں دا ہِک یہُودی جیہڑا اِسکندرِیہ دا راہنڑ آلا ہا، اِفِسُس آ پُجیا۔ او تقریر کرݨ ءچ ماہر تے خُدا دے کلام دا ڈاڈھا علم رکھیندا ہا۔ اُوں بندے خُداوند دی راہ دی تعلیم پاتی ہئی تے رُوحانی جوش نال کلام کریندا تے یسُوع دے بارے ءچ صحیح تعلیم ڈیندا ہا، پر فقط یُوحنّا ای دے بپتسمہ تُوں واقف ہا۔ او عبادت خانہ ءچ دلیری نال کلام کرݨ لگا۔ پر پرسکِلہ تے اَکوِلہ اُوندے گالھیں سُنڑ تے اُونکُوں گھر گِھن گئے تے اُونکُوں خُدا دی راہ دی تعلیم مزید چنگی طرحاں سمجھائی۔ جِیں ویلے اپُلّوس سمندر پار اَخیہ ونجنڑ دا اِرادہ کیتا تاں بِھرانواں اُوندی ہِمت ودھائی تے اُتھوں دے شاگرداں کُوں لِکھیا جو اُونکُوں گرم جوشی نال مِلنڑ۔ اُتھاں پُج تے اُوں لوکاں دی بہُوں مدد کیتی جیہڑے خُدا دے فضل نال اِیمان گِھن آئے ہَن۔ کیوں جو او خُدا دے کلام نال ایہ ثابت کر تے جو یسُوع ای المسیح ہے بہُوں جوش نال بحث کریندا تے یہُودیاں اُتے غالب آندا ہا۔ جِیں ویلے اپُلّوس کُرِنتُھس ءچ ہا تاں پولُس پہاڑی علاقہ ءچوں لنگھدے ہوئے اِفِسُس پُجیا۔ اُتھاں اُونکُوں کُجھ شاگرد مِلے۔ پولُس اُنہاں تُوں پُچھیا جو ”کیا اِیمان گِھن آوݨ ویلے تُہاکُوں رُوح القُدس مِلیا ہا؟“ اُنہاں جواب ڈِتا ”کائنا، اساں کڈھائیں رُوح القُدس دے بارے ءچ نئیں سُنڑیا۔“ اِیں گالھوں پولُس آکھیا جو ”وَل تُساں کِیندا بپتسمہ گِھدے؟“ اُنہاں جواب ڈِتا ”یُوحنّا دا بپتسمہ۔“ پولُس آکھیا ”یُوحنّا تاں توبہ دا بپتسمہ ڈِتا تے آکھیا جو ’او جیہڑا میڈے بعد آوݨ آلا ہے تُساں اُوندے اُتے اِیمان گِھن آؤ یعنی یسُوع اُتے‘۔“ ایہ سُنڑ تے اُنہاں خُداوند یسُوع دے ناں ءچ بپتسمہ گِھدا۔ جِیں ویلے پولُس اُنہاں اُتے ہتھ رکھے تاں رُوح القُدس اُنہاں اُتے نازل تھیّا تے او غیر زباناں بولنڑ تے نبُوّت کرݨ لگے۔ تے او سارے تقریباً بارہاں بندے ہَن۔ وَل پولُس ترے مہینے تئیں عبادت خانہ ءچ وَنج تے دلیری نال خُدا دی بادشاہی دے بارے ءچ بحث کریندا تے لوکاں کُوں قائل کریندا ریہا۔ پر اُنہاں ءچوں کُجھ سخت دل تھی تے اِیمان نہ گِھن آئے بلکہ مسیح دی اِیں راہ کُوں لوکاں دے سامنڑے بُرا بھلا آکھنڑ لگے تاں پولُس اُنہاں کُوں چھوڑ ڈِتا۔ او مسیحی شاگرداں کُوں نال گِھن تے تُرنّس دے سکُول ءچ وَنج تے ہر روز بحث کریندا راہندا ہا۔ ایہ سلسلہ ڈُو سال تئیں چلدا ریہا، اِتُھوں تئیں جو آسِیہ ءچ راہنڑ آلیاں بھانویں یہُودی بھانویں یُونانی، سبھ خُداوند دا کلام سُنڑیا۔ تے خُدا پولُس دے ہتُھوں وڈے وڈے معجزے ڈکھیندا ہا۔ اِتُھوں تئیں جو رومال تے پٹکے جیہڑے اُوندے جِسم نال لگدے ہَن، بیماراں اُتے سٹے ویندے ہَن تے او آپنڑیاں بیماریاں تُوں شِفا پا گِھندے ہَن، تے بدرُوحاں اُنہاں ءچوں نِکل ویندیاں ہَن۔ پر اِڈے اُڈے پِھرݨ آلے کُجھ یہُودی عامل وی خُداوند یسُوع دے ناں نال بدرُوحاں کُوں کڈھنڑ لگے۔ او بدرُوحاں کُوں کڈھنڑ کیتے ایہ آدھے ہَن جو ”جئیں یسُوع دی پولُس تبلیغ کریندے، مَیں اُونہی دے ناں دی قَسم ڈے تے تیکُوں نِکل ونجنڑ دا حُکم ڈیندا ہاں۔“ تے سِکِوا ناں دے یہُودی سردار کاہِن دے سَت پوتر وی اِیہو کم کریندے ہَن۔ پر ہِک ڈینہہ بدرُوح اُنہاں کُوں آکھیا جو ”مَیں یسُوع کُوں تاں جانڑدی ہاں تے پولُس دا وی پتہ ہے پر تُساں کوݨ ہیوے؟“ وَل جئیں بندے ءچ بدرُوح ہئی، اُوں اُنہاں اُتے ٹپّا ماریا تے اُنہاں کُوں قابو کر تے ایجھا کُٹیا جو او اُتھوں زخمی تے ننگے ای بھج گئے۔ جِیں ویلے اِفِسُس دے یہُودیاں تے یُونانیاں کُوں اِیں گالھ دا پتہ چلیا تاں اُنہاں اُتے خوف چھا گِیا تے خُداوند یسُوع دے ناں دی تعریف تھئی۔ تے بہُوں سارے لوکاں جیہڑے اِیمان گِھن آئے ہَن، آ تے آپنڑے بُرے کماں دا اِظہار تے اِقرار کیتا۔ تے بہُوں سارے جادُوگراں آپنڑیاں کتاباں کُوں کٹھا کر تے سبھ لوکاں دے سامنڑے بھاہ لا ڈِتی تے جِیں ویلے اُنہاں کتاباں دی قیمت دا اندازہ کیتا گِیا تاں او پنجھاہ ہزار چاندی دے سِکے ہئی۔ اِینویں خُداوند دا کلام بہُوں زور نال جڑھ پکڑیندا تے پھیلدا گِیا۔ اِنہاں گالھیں دے بعد پولُس پکّا اِرادہ کر گِھدا جو ”مَیں مَکِدُنیہ تے اَخیہ دے علاقے ءچوں تھیندا ہویا یروشلیم چلیا ویساں تے وَل اُتھوں روم وَنج تے اُوں شہر کُوں وی ڈیکھ ساں۔“ بس اُوں آپنڑے خدمت گُزاراں ءچوں تِیمُتِھیُس تے اِراستُس کُوں مَکِدُنیہ روانہ کیتا تے خود کُجھ دیر آسِیہ دے صوبہ ءچ ریہا۔ اُوں ویلے مسیح دی راہ دے بارے ءچ وڈا ہنگامہ تھیّا۔ کیوں جو دیمیترِیُس ناں دا ہِک سُنیارا ہا جیہڑا اَرتمِس دے مندر دے چاندی دے چھوٹے چھوٹے نمونے بنڑویندا ہا، تے کاریگراں کُوں بہُوں کم ڈویندا ہا۔ اُوں اُنہاں کُوں تے اِیں پیشے نال تعلق رکھنڑ آلے بئے کاریگراں کُوں جمع کیتا تے آکھیا، ”بِھراؤ! تُساں جانڑدے ہیوے جو ساکُوں اِیں کم دی وجہ کنُوں دولت مِلدی ہے۔ پر تُساں ڈیدھے تے سُنڑدے ہیوے جو ایہ بندہ پولُس اِفِسُس تے تقریباً سارے آسِیہ ءچ بہُوں سارے لوکاں کُوں قائل کر تے گُمراہ کریندا پِیا ہے تے آدھے جو ہتھ دے بنڑائے بُت اصلُوں خُدا نئیں۔ بس فقط اِیں گالھ دا ای ڈر نئیں جو ساڈے پیشے دی بےقدری تھیسی بلکہ عظیم دیوی اَرتمِس دے مندر دی حیثیت وی گھٹ تھی ویسی تے ساڈی دیوی جیندی پُوجا سارا صوبہ آسِیہ بلکہ پُوری دُنیا کریندی ہے، اُوندے ناں دی عظمت وی نہ راہسی۔“ جِیں ویلے اُنہاں ایہ سُنڑیا تاں قہر ءچ آ گئے تے زور نال نعرے مارݨ لگ پئے جو ”اِفِسِیاں دی دیوی اَرتمِس بہُوں عظیم ہے۔“ سارے شہر ءچ افراتفری مچ گئی تے لوکاں گِیُس تے ارِسترخُس مَکِدُنیہ آلیاں کُوں جیہڑے پولُس نال آئے ہَن پکڑ گِھدا تے اُنہاں کُوں گھلیندے ہوئے تماشا گاہ دو بھج پئے۔ پولُس وی مجمع ءچ ونجنڑ چاہندا ہا پر شاگرداں اُونکُوں ونجنڑ نہ ڈِتا۔ تے آسِیہ دے حاکماں ءچوں کُجھ جیہڑے پولُس دے دوست ہَن، اُونکُوں پیغام بھیج تے مِنت کیتی جو تماشا گاہ ءچ نہ ونجے۔ مجمع ءچ کھلبلی مچی ہوئی ہئی کیوں جو سارے لوک اُچی اواز ءچ آپنڑی آپنڑی آدھے پئے ہَن۔ تے بہُوں سارے لوکاں کُوں تاں ایہ وی پتہ نہ ہا جو او اُتھاں کیوں کٹھے تھئے ہِن۔ ایہ ڈیکھ تے یہُودیاں اِسکندر کُوں مجمع ءچوں کڈھ تے اگُوں کر ڈِتا۔ اِسکندر لوکاں کُوں چُپ تھی ونجنڑ دا اِشارہ کیتا تاں جو او اُنہاں کُوں آپنڑی صفائی پیش کر سگے۔ پر جِینویں ای لوکاں کُوں پتہ لگیا جو او یہُودی ہے تاں سارے ہِک اواز تھی تے ڈُو گھنٹے تئیں نعرے مریندے ریہے جو ”اِفِسِیاں دی دیوی اَرتمِس عظیم ہے۔“ وَل شہر دے ناظم لوکاں کُوں ٹھڈا کر تے آکھیا، ”اِفِسُس دے راہنڑ آلیو! کیہڑا بندہ نئیں جانڑدا جو اِفِسِیاں دا شہر وڈی دیوی اَرتمِس دے مندر تے اُوں مُورت دا محافظ ہے جیہڑی اسمان دی طرفوں ڈھٹھی ہئی؟ بس جڈاں اِنہاں گالھیں دا اِنکار کوئی نئیں کر سگدا تاں لازم ہے جو تُساں چُپ راہو تے سوچے بغیر کُجھ کم نہ کرو۔ کیوں جو تُساں جیہڑے آدمیاں کُوں اِتھاں گِھن آئے ہیوے اُنہاں نہ تاں مندراں کُوں لُٹیا ہے تے نہ ای ساڈی دیوی دی شان ءچ گُستاخی کیتی ہے۔ اِیں واسطے جے دیمیترِیُس تے اُوندے ہم پیشہ کاریگر کہیں دے خلاف دعویٰ کریندے ہووݨ تاں عدالت دے دروازے کُھلے ہِن تے مُنصف موجود ہِن۔ اُتھاں او ہِک ڈُوجھے اُتے مقدمہ کر سگدے ہِن۔ تے جے کوئی ڈُوجھا مسئلہ وی ہے تاں اُوندا فیصلہ قانُونی مجلس ءچ تھی سگدے۔ ساکُوں تاں خطرہ ہے جو اَج دے ہنگامے دے مُجرم نہ کھڑائے ونجُوں کیوں جو اِیں تماشے دے بارے ءچ ساڈے کولھ کوئی جواب نئیں۔“ ایہ آکھ تے اُوں مجلس کُوں برخاست کر ڈِتا۔ جِیں ویلے افراتفری ختم تھی گئی تاں پولُس شاگرداں کُوں سڈ تے نصیحت کیتی تے اُنہاں کنُوں رُخصت تھی تے مَکِدُنیہ کیتے روانہ تھی گِیا۔ تے اُوں علاقے کنُوں لنگھدے ہوئے اِیمانداراں کُوں بہُوں نصیحت کر تے یُونان پُجیا، جِتھاں او ترے مہینے تئیں ریہا۔ جِیں ویلے او جہاز ءچ سُوریہ ونجنڑ آلا ہا تاں یہُودیاں اُوندے خلاف سازش کیتی۔ اِیں واسطے اُوں اِرادہ کیتا جو مَکِدُنیہ ءچوں تھی تے واپس چلیا ونجے۔ کُجھ لوک یعنی پُرس دا پوتر سوپَترُس جیہڑا بیرِیہ دا ہا تے ارِسترخُس تے سِکُندُس جیہڑے تھِسّلُنِیکے دے ہَن تے گِیُس جیہڑا دِربے دا ہا تے تِیمُتِھیُس، تے آسِیہ صوبے دے تخِکُس تے ترُفِمُس، اُوندے نال ہَن۔ ایہ اگُوں روانہ تھئے تے تروآس ءچ ساڈا اِنتظار کریندے ریہے۔ پر اساں بے خمیری روٹی دی عید دے بعد فِلپی کنُوں جہاز ءچ روانہ تھئے تے پنج ڈینہہ بعد تروآس ءچ اُنہاں کُوں وَنج مِلے تے سَت ڈینہہ تئیں اُتھائیں ریہے۔ ہفتے دے پہلے ڈینہہ جِیں ویلے اساں خُداوند دی یادگاری ءچ روٹی تروڑن کیتے کٹھے تھئے تاں پولُس لوکاں نال گالھ کرݨ لگا۔ اُوں ڈُوجھے ڈینہہ اُتھوں کنُوں روانہ تھیونڑا ہا، اِیں واسطے او رات دیر تئیں کلام کریندا ریہا۔ جِیں چوبارے ءچ اساں کٹھے ہسے، اُوندے ءچ بہُوں سارے ڈیوے بلدے پئے ہَن۔ تے یُوتخُس ناں دا ہِک نوجوان کِھڑکی ءچ بیٹھا ہا۔ جڈاں پولُس دیر تئیں گالھیں کریندا ریہا تاں او سُنڑدے سُنڑدے سَم گِیا تے ڈاڈھی نیندر ءچ تریجھی منزل تُوں تلے وَنج ڈھٹھا۔ جِیں ویلے اُونکُوں چاتا گِیا تاں او مویا پِیا ہا۔ پولُس تلے لتھا تے اُوں نوجوان نال وَلھٹیج گِیا تے اُونکُوں آپنڑے باہیں ءچ گِھن تے آکھنڑ لگا، ”گھبراؤ نہ، اِیندے ءچ جان ہے۔“ وَل اُوں، اُتے وَنج تے روٹی تروڑی تے ساریاں نال رَل تے کھادی۔ وَل او سوجھلا تھیوݨ تئیں اُنہاں نال گالھیں کرݨ تُوں بعد اُتھوں کنُوں روانہ تھی گِیا۔ لوک اُوں نوجوان کُوں زندہ گھر گِھن گئے تے اُنہاں کُوں بہُوں تسلی تھئی۔ اساں اگُوں وَنج تے جہاز اُتے اسُّس کُوں روانہ تھئے تاں جو اُتھوں پولُس کُوں جہاز اُتے سوار کر گِھنوں کیوں جو اُوں پہلے کنُوں ای اُتھاں پیدل پُج ونجنڑ دا اِرادہ کر گِھدا ہا۔ بس جِیں ویلے او ساکُوں اسُّس ءچ مِلیا تاں اساں اُونکُوں جہاز اُتے چڑھا گِھدا تے مِتُلینے چلے گئے۔ اُتھوں کنُوں اساں جہاز اُتے روانہ تھئے تے ڈُوجھے ڈینہہ خِیُس دے سامنڑے پُجے تے تریجھے ڈینہہ سامُس تئیں آئے تے اگلے ڈینہہ مِیلیتُس پُجے۔ پولُس ایہ فیصلہ کر گِھدا ہا جو او اِفِسُس کولُھوں لنگھے تاں جو اُونکُوں آسِیہ ءچ مزید دیر نہ لگے۔ کیوں جو او جلدی نال یروشلیم وَنج تے پِنتیکُست دا ڈینہہ اُتھاں گُزارنڑاں چاہندا ہا۔ مِیلیتُس پُج تے پولُس اِفِسُس ءچ پیغام بھیج تے کلیسیا دے بزُرگاں کُوں سڈوایا۔ جِیں ویلے او آئے تاں اُنہاں کُوں آکھیا، ”تُساں جانڑدے ہیوے جو جئیں ڈینہہ تُوں مَیں آسِیہ ءچ پیر رکھیا ہے میڈی زندگی تُہاڈے سامنڑے کیجھی لنگھدی پئی ہے۔ مَیں بہُوں عاجزی نال، تے ہنجُو وہا وہا تے خُداوند دی خدمت کریندا ریہا، تے میکُوں یہُودیاں دی وڈیاں وڈیاں سازشاں دا سامنڑا کرنڑا پِیا ہا۔ جیہڑے گالھیں تُہاڈے فائدے کیتے ہَن اُنہاں کُوں مَیں بغیر کہیں جِھجک دے بیان کیتا بلکہ اعلانیہ طور تے گھر گھر وَنج تے سِکھایا۔ مَیں یہُودیاں تے یُونانیاں ڈوہائیں دے سامنڑے گواہی ڈیندا ریہا ہاں جو او خُدا دو رجُوع کر تے توبہ کرݨ تے ساڈے خُداوند یسُوع المسیح اُتے اِیمان گِھن آوݨ۔ ڈیکھو ہُنڑ مَیں رُوح دا پابند تھی تے یروشلیم ویندا پِیا ہاں تے میکُوں پتہ نئیں جو اُتھاں میڈے نال کیا تھیسی۔ فقط اِیہو جانڑدا ہاں جو رُوح القُدس دی طرفوں ہر شہر ءچ اِیہو آگاہی مِلدی ریہی جو قید تے مُصیبتاں میڈے اِنتظار ءچ ہِن۔ پر مَیں آپنڑی جان کُوں عزیز نئیں رکھیندا بس ایہ چاہندا ہاں جو مَیں آپنڑی خدمت دا دور تے او کم جیہڑا خُداوند یسُوع میکُوں ڈِتے، پُورا کراں یعنی خُدا دے فضل دی خوشخبری سُنڑاوݨ دا کم۔ ہُنڑ مَیں جانڑدا ہاں جو تُساں جِنہاں ءچ مَیں خُدا دی بادشاہی دی تبلیغ کریندا ریہا ہاں میکُوں وَل نہ ڈیکھسو۔ اِیں واسطے اَج مَیں تُہاکُوں صاف آکھ ڈیندا ہاں جو مَیں تُہاڈے ءچوں کہیں دی ہلاکت دا ذمہ دار نئیں ۔ کیوں جو مَیں بغیر کہیں جِھجک دے خُدا دا پُورا مقصد تُہاڈے اُتے ظاہر کریندا ہاں۔ بس آپنڑا تے آپنڑے سارے اِجڑ دا خیال رکھو جیندے تُساں رُوح القُدس دی طرفوں نگہبان مقرر کیتے گئے ہیوے تاں جو خُدا دی کلیسیا دی نگہبانی کرو، جِینکُوں اُوں آپنڑے پوتر دے خون نال مُل گِھدے۔ مَیں ایہ جانڑدا ہاں جو میڈے ونجنڑ دے بعد پھاڑ ڈیوݨ آلے نہر تُہاڈے وچال آ ویسن تے اِجڑ کُوں نہ چُھڑیسن۔ بلکہ تُہاڈے ءچوں ای ایجھے لوک اُٹھسن جیہڑے حق کُوں تروڑ مروڑ تے پیش کریسن تاں جو شاگرداں کُوں آپنڑے پاسے چھیک گِھننڑ۔ اِیں واسطے خبردار رہوائے تے یاد رکھائے جو مَیں ترے سال تئیں ڈینہہ رات ہنجُو وہا وہا تے ہر ہِک کُوں خطرے تُوں آگاہ کریندا ریہا۔ ہُنڑ مَیں تُہاکُوں خُدا تے اُوندے فضل دے کلام دے سپُرد کریندا ہاں جیہڑا تُہاڈے اِیمان دی ترقی دا سبب بنڑ سگدے تے تُہاکُوں سارے مُقدّساں ءچ شامل کر تے میراث دا حقدار بنڑا سگدے۔ مَیں کہیں دے سونے، چاندی یا کپڑے دا لالچ نئیں کیتا۔ تُساں خود جانڑدے ہیوے جو مَیں آپنڑے ہتھاں نال آپنڑی تے آپنڑے ساتھیاں دیاں ضرورتاں پُوریاں کیتیاں ہَن۔ مَیں تُہاکُوں ایہ سبھ کر تے ڈِکھایا جو اساں کِینویں محنت کر تے کمزوراں کُوں سنبھال سگدے ہیں۔ خُداوند یسُوع دے لفظاں کُوں یاد رکھو جو اُوں آکھیا، ’ڈیونڑا گِھننڑ کنُوں زیادہ مُبارک ہے‘۔“ اِنہاں گالھیں دے بعد پولُس اُنہاں ساریاں نال گوڈے ٹیک تے دُعا کیتی۔ او سارے بہُوں رُنّے تے پولُس دے گَل لگ تے اُوندے بوسے گِھدے۔ تے پولُس دی اِیں گالھ تُوں بہُوں ڈُکھی تھئے جو ”تُساں میکُوں ولا نہ ڈیکھسو۔“ وَل اُونکُوں جہاز تئیں چھوڑن گئے۔ جِیں ویلے اساں اُنہاں کنُوں اَنج تھی تے جہاز ءچ روانہ تھئے تاں سِدھے کوس ءچ آئے۔ ڈُوجھے ڈینہہ اساں رُدُس پُجے، ولا اُتھوں کنُوں پترہ ٹُر پئے۔ اُتھاں ہِک جہاز مِلیا جیہڑا سِدھا فینیکے ویندا پِیا ہا۔ اساں اُوندے ءچ سوار تھی تے روانہ تھئے۔ جِیں ویلے کُپرُس جزیرہ نظریا تاں اساں اُونکُوں کھبے ہتھ چھوڑ تے سُوریہ کیتے روانہ تھئے تے صور ءچ لتھے کیوں جو اُتھاں ساڈے جہاز کُوں مال لہاونڑا ہا۔ اُتھاں راہنڑ آلے شاگرداں کُوں گولھ تے اساں اُنہاں نال سَت ڈینہہ تئیں ریہے۔ اُنہاں رُوح دی ہدایت نال پولُس کُوں یروشلیم ونجنڑ تُوں منع کیتا۔ جِیں ویلے او ڈینہہ لنگھ گئے تاں اساں اُتھوں کنُوں اگُوں ونجنڑ کیتے روانہ تھئے تے ساریاں ذالاں تے بالاں سمیت ساکُوں شہر کنُوں باہر تئیں پُچایا۔ وَل سمندر دے کنارے اساں گوڈے ٹیک تے دُعا منگی۔ اِیندے بعد ہِک ڈُوجھے کُوں خُدا حافظ آکھ تے اساں جہاز ءچ سوار تھی گئے، تے او آپنڑے آپنڑے گھر وَل گئے۔ اساں صور کنُوں اگُوں گئے تے پَتُلمِیس ءچ جہاز تُوں لتھے۔ اُتھاں اساں بِھرانواں کُوں سلام کیتا تے اُنہاں دے نال ہِک ڈینہہ تئیں ریہے۔ ڈُوجھے ڈینہہ اساں روانہ تھئے تے قیصریہ ءچ پُج تے فِلپُس ناں دے ہِک بندے دے گھر ٹِکے جیہڑا نجات دی خوشخبری سُنڑیندا ہا تے یروشلیم ءچ چُنڑے ہوئے سَت مددگاراں ءچوں ہا ۔ اُوندیاں چار کُنواریاں دِھیاں ہَن جیہڑیاں نبُوّت کریندیاں ہَن۔ جِیں ویلے ساکُوں اُتھاں راہندے بہُوں ڈینہہ تھی گئے تاں ہِک نبی جِیندا ناں اگبُس ہا یہُودیہ تُوں آیا۔ اُوں ساڈے کولھ آ تے پولُس دا کمر بند گِھدا تے اُوندے نال آپنڑے ہتھ پیر بَدھ تے آکھنڑ لگا، ”رُوح القُدس فرمیندے جو یروشلیم دے یہُودی اِیں کمر بند دے مالک کُوں اِینویں بَدھ تے غیر قوماں دے حوالے کر ڈیسن۔“ ایہ سُنڑ تے اساں تے اُتھوں دے اِیمانداراں پولُس دی مِنت کیتی جو او یروشلیم نہ ونجے۔ پر پولُس جواب ڈِتا، ”تُساں ایہ کیا کریندے ہیوے؟ کیوں رو رو تے میڈا دل تُڑیندے ہیوے؟ مَیں یروشلیم ءچ خُداوند یسُوع دے ناں دی خاطر صرف بدھیجنڑ کیتے ای نئیں بلکہ مرݨ کیتے وی تیار ہاں۔“ جِیں ویلے او کہیں طرحاں وی قائل نہ تھیّا تاں اساں ایہ آکھ تے چُپ تھی گئے جو ”خُداوند دی مرضی پُوری تھیوے۔“ اُوندے بعد اساں سفر دی تیاری کیتی تے یروشلیم کیتے روانہ تھئے۔ قیصریہ دے کُجھ شاگرد وی ساڈے نال ٹُر پئے تے ساکُوں مَنَاسون دے گھر گِھن آئے جِتھاں اساں ٹِکنڑاں ہا۔ مَنَاسون کُپرُس دا راہنڑ آلا ہا تے پُرانڑے شاگرداں ءچوں ہا۔ جِیں ویلے اساں یروشلیم پُجے تاں بِھرا بہُوں جوش نال ساکُوں مِلے۔ ڈُوجھے ڈینہہ اساں پولُس کُوں نال گِھن تے یعقُوب کُوں مِلنڑ گئے۔ اُتھاں سارے بزُرگ پہلے تُوں جمع ہَن۔ پولُس اُنہاں کُوں سلام آکھیا تے تفصیل نال ڈسایا جو خُدا اُوندی خدمت دے ذریعے غیریہُودیاں ءچ کیا کُجھ کیتے۔ ایہ سُنڑ تے اُنہاں خُدا دی حمد کیتی تے وَل اُونکُوں آکھیا، ”بِھرا! تُوں آپ ڈیدھیں جو ہزاراں یہُودی اِیمان گِھن آئے ہِن تے او سارے شریعت اُتے عمل کرݨ ءچ بہُوں جوشیلے ہِن۔ اُنہاں کُوں ایہ ڈسایا گِیا ہے جو تُوں غیر قوماں ءچ راہنڑ آلے یہُودیاں کُوں مُوسیٰ کُوں چھوڑ ڈیوݨ دی تعلیم ڈیندا ہیں جو بالاں دا ختنہ نہ کرو تے رسماں کُوں نہ منّو۔ بس ہُنڑ کیا کیتا ونجے؟ کیوں جو او ضرور سُنڑسن جو تُوں اِتھاں آ گِیا ہیں۔ اِیں واسطے جیہڑا کُجھ اساں تیکُوں آدھے ہیں او کر۔ ساڈے کولھ چار بندے ہِن جِنہاں مَنت منّی ہے۔ اُنہاں کُوں آپنڑے نال گِھن وَنج تے اُنہاں نال رَل تے پاک تھیوݨ دیاں ساریاں رسماں کُوں پُورا کر، تے اُنہاں دا خرچا وی چا تاں جو او آپنڑے سر مُنوا سگنڑ۔ وَل ہر کہیں کُوں پتہ چل ویسی جو جیہڑے گالھیں تیڈے خلاف کیتیاں گئیاں ہِن او کُوڑیاں ہِن بلکہ تُوں خود وی شریعت اُتے عمل کر تے زندگی گُزریندا ہیں۔ تے جِتھوں تئیں اُنہاں غیریہُودیاں دا سوال ہے جیہڑے اِیمان گِھن آئے ہِن، اُنہاں کیتے اساں فیصلہ کر تے پہلے ای خط لِکھ ڈِتے جو او بُتاں دیاں قُربانیاں دے گوشت تے خون تُوں، گَل گُھٹ تے مارے ہوئے جانوراں دا گوشت کھاوݨ تُوں تے حرام کاری تُوں پرہیز کرݨ۔“ اِیں واسطے ڈُوجھے ڈینہہ پولُس اُنہاں بندیاں کُوں نال گِھن گِیا تے اُنہاں نال خود وی پاک تھیوݨ دیاں رسماں پُوریاں کر تے ہیکل ءچ داخل تھیّا تے اُوں تاریخ دے بارے ءچ ڈسایا جڈاں اُنہاں دے پاک تھیوݨ دے ڈینہہ پُورے تھیسن تے اُنہاں دیاں قُربانیاں پیش کیتیاں ویسن۔ جِیں ویلے پاک تھیوݨ دے سَت ڈینہہ پُورے تھئے تاں آسِیہ دے کُجھ یہُودیاں پولُس کُوں ہیکل ءچ ڈیکھ تے لوکاں ءچ ہلچل مچا ڈِتی تے اُونکُوں پکڑ تے چیخنڑ لگے جو ”اِسرائیلیو! ساڈی مدد کرو۔ اِیہو بندہ ہے جیہڑا ہر جاہ لوکاں کُوں ساڈے خلاف، ساڈی شریعت دے خلاف تے اِیں ہیکل دے خلاف تعلیم ڈیندا ہے۔ اِیندے علاوہ اُوں یُونانیاں کُوں وی ہیکل ءچ گِھن آ تے اِیں پاک جاہ کُوں ناپاک کر ڈِتے۔“ کیوں جو اُنہاں پہلے ای ترُفِمُس اِفِسی کُوں شہر ءچ پولُس نال ڈیکھ گِھدا ہا تے سوچیندے پئے ہَن جو پولُس اُونکُوں ہیکل ءچ گِھن آیا ہے۔ سارے شہر ءچ ہلچل مچ گئی تے لوک بھج بھج تے کٹھے تھیوݨ لگے۔ اُنہاں پولُس کُوں پکڑ گِھدا تے ہیکل ءچوں گِھیل تے باہر کڈھ آئے تے دروازے بند کر ڈِتے۔ جِیں ویلے اُونکُوں قتل کرݨ دی کوشش ءچ ہَن تاں رومی پلٹن دے سپہ سالار کُوں خبر پُجی جو سارے یروشلیم ءچ ہلچل مچ گئی ہے۔ او فوراً پلٹن دے سپاہیاں تے افسراں کُوں گِھن تے اُنہاں دے کولھ تلے بھجدا آیا۔ جِیں ویلے لوکاں پلٹن دے سپہ سالار کُوں تے سپاہیاں کُوں ڈِٹھا تاں پولُس کُوں مارݨ تُوں رُک گئے۔ پلٹن دے سپہ سالار نیڑے آ تے اُونکُوں گرفتار کر تے ڈُو زنجیراں نال بدھنڑ دا حُکم ڈِتا۔ وَل پُچھیا ایہ بندہ کوݨ ہے تے اِینیں کیا کیتے؟ بِھیڑ ءچوں کہیں کُجھ آکھیا تے کہیں کُجھ۔ اِتنا شور مچ گِیا جو سپہ سالار کُوں حقیقت معلوم نہ تھی سگی، اِیں واسطے اُوں حُکم ڈِتا جو پولُس کُوں قلعہ ءچ پُچا ڈِتا ونجے۔ جِیں ویلے پوڑیاں اُتے پُجیا تاں عوام دی زبردستی دی وجہ تُوں سپاہیاں کُوں اُونکُوں چا تے گِھن ونجنڑاں پِیا۔ کیوں جو لوکاں دی بِھیڑ پولُس دے پِچُھوں چیخ چیخ تے ایہ آدھی پئی ہئی جو ”اُونکُوں مار گھتو۔“ سپاہی پولُس کُوں قلعہ دے اندر گِھن ونجنڑ آلے ای ہَن جو اُوں پلٹن دے سپہ سالار کُوں آکھیا، ”کیا مَیں تیکُوں کُجھ آکھ سگدا ہاں؟“ اُوں پُچھیا، ”کیا تُوں یُونانی جانڑدا ہیں؟ کیا تُوں او مِصری نئیں جئیں کُجھ عرصہ پہلے بغاوت کیتی ہئی تے چار ہزار قاتلاں کُوں بیابان ءچ گِھن گِیا ہَویں؟“ پولُس آکھیا، ”مَیں یہُودی ہاں تے کلکیہ دے مشہور شہر تَرسُس دا راہنڑ آلا ہاں۔ مَیں تُہاڈی مِنت کریندا ہاں جو میکُوں لوکاں نال گالھ کرݨ دی اِجازت ڈیؤ۔“ جِیں ویلے سپہ سالار تُوں اِجازت گِھن گِھدی تاں اُوں پوڑیاں اُتے کھڑا تھی تے لوکاں کُوں ہتھ دا اِشارہ کیتا۔ جِیں ویلے او چُپ تھی گئے تاں اُنہاں کُوں عبرانی زبان ءچ اِینویں آکھنڑ لگا: ”بِھراؤ تے بزُرگو، ہُنڑ میڈے گالھیں سُنڑو جیہڑیاں مَیں آپنڑے دفاع ءچ اکھیندا ہاں۔“ جِیں ویلے لوکاں اُونکُوں عبرانی بُولیندے سُنڑیا تاں بِیا وی چُپ تھی گئے۔ وَل اُوں آکھیا، ”مَیں یہُودی ہاں تے کلکیہ دے شہر تَرسُس ءچ پیدا تھیّا، پر میڈی تربیت اِیں شہر ءچ گملی ایل دے پیراں ءچ تھئی۔ مَیں پِیُو ڈاڈا دی شریعت اُتے پابندی نال عمل کرݨ دی تعلیم گِھدی۔ مَیں خُدا کیتے ایجھا جوشیلا ہم جِینویں اَج تُساں ہیوے۔ مَیں مسیح دی راہ اُتے چلنڑ آلیاں کُوں ستایا، ایہ تئیں جو قتل وی کیتا۔ مَیں مرداں تے عورتاں ڈوہائیں کُوں بَدھ بَدھ تے قید خانہ ءچ سٹوا ڈِتا۔ کاہِن ِ اعظم تے سارے بزُرگ میڈے گواہ ہِن جو بِھرانواں کیتے مَیں اُنہاں کنُوں خط گِھدے تے دمشق دو روانہ تھیّا جو اِیں راہ اُتے ٹُرݨ آلے جِتّی اُتھاں ہووݨ، اُنہاں کُوں وی بَدھ تے یروشلیم گِھن آواں تے سزا ڈیواں۔ مَیں جِیں ویلے سفر کریندا کریندا دمشق دے نیڑے پُجیا تاں ڈوپہر ویلے اسمان کنُوں ہِک تیز روشنی آئی تے میڈے چودھارُوں چمکنڑ لگ پئی۔ مَیں زمین اُتے ڈھے پِیا تے ہِک اواز سُنڑی جیہڑی میکُوں آدھی پئی ہئی، ’ساؤل! ساؤل! تُوں میکُوں کیوں سَتیندیں؟‘ مَیں پُچھیا، ’اے خُداوند! تُساں کوݨ ہیوے؟‘ اُوں آکھیا، ’مَیں یسُوع ناصری ہاں جِینکُوں تُوں سَتیندیں۔‘ جیہڑے میڈے نال ہَن اُنہاں روشنی تاں ڈِٹھی پر میڈے نال گالھیں کرݨ آلی اواز نہ سُنڑی۔ مَیں پُچھیا، ’اے خُداوند! مَیں کیا کراں؟‘ خُداوند میکُوں آکھیا، ’اُٹھی دمشق وَنج، اُتھاں تیکُوں او سارا کُجھ جیہڑا تیڈے کرݨ کیتے مقرر تھیّا ہے ڈسا ڈِتا ویسی۔‘ اُوں نُور دے جلال دی وجہ کنُوں میکُوں کُجھ ڈِکھالی نہ ڈِتا، اِیں واسطے میڈے ساتھی میڈا ہتھ پکڑ تے میکُوں دمشق گِھن گئے۔ اُتھاں حننیاہ ناں دا ہِک بندہ جیہڑا شریعت دا سخت پابند تے اُتھوں دے یہُودیاں ءچ بہُوں نیک ناں ہا، میڈے کولھ آ تے آکھنڑ لگا، ’بِھرا ساؤل! وَل سُجاکھا تھی وَنج۔‘ مَیں اُونہی ویلے سُجاکھا تھی گِیا تے اُونکُوں ڈیکھنڑ لگا۔ وَل اُوں آکھیا جو ’ساڈے پِیُو ڈاڈا دے خُدا تیکُوں چُنڑ گِھدے تاں جو تُوں اُوندی مرضی کُوں جانڑیں تے اُوں راستباز کُوں ڈیکھیں تے اُوندے مُنہ دے گالھیں سُنڑیں۔ کیوں جو تُوں سارے لوکاں دے سامنڑے اُنہاں گالھیں دی جیہڑیاں تَیں سُنڑیاں تے ڈِٹھیاں ہِن، گواہی ڈیسیں۔ ہُنڑ کیجھی دیر؟ اُٹھی بپتسمہ گِھن، تے اُوندا ناں گِھن تے آپنڑے گُناہ دھو گِھن۔‘ جِیں ویلے مَیں یروشلیم وَل آیا تے ہیکل ءچ دُعا کریندا پِیا ہم تاں مَیں بے خود تھی گِیا۔ مَیں خُداوند کُوں ڈِٹھا تے ایہ آدھے سُنڑیا جو ’جلدی کر تے فوراً یروشلیم ءچوں نِکل وَنج کیوں جو او میڈے بارے ءچ تیڈی گواہی قبول نہ کریسن۔‘ مَیں جواب ڈِتا، ’اے خُداوند! ایہ لوک جانڑدے ہِن جو مَیں ہر ہِک عبادت خانہ ءچ ویندا ہم تے کِینویں تیڈے مننڑ آلیاں کُوں قید کرویندا تے کُٹویندا ہم۔ تے جِیں ویلے تیڈے شہید ستِفُنس دا خون وہایا ویندا پِیا ہا تاں مَیں وی اُتھائیں موجود ہم تے اُوندے قتل اُتے راضی تے اُونکُوں قتل کرݨ آلیاں دے کپڑیاں دی حفاظت کریندا پِیا ہم۔‘ خُداوند میکُوں آکھیا، ’وَنج مَیں تیکُوں غیر قوماں دے کولھ بہُوں دُور بھجیساں‘۔“ بِھیڑ اِیں گالھ تئیں تاں پولُس دی سُنڑدی ریہی۔ وَل اُچی اواز نال آکھنڑ پے گئی جو ایجھے بندے کُوں زمین تُوں ختم کر ڈے۔ او زندہ راہنڑ دے لائق نئیں۔ جِیں ویلے او چیخدے تے آپنڑے کپڑے سٹیندے تے دھُوڑ اُڈیندے ہَن، تاں پلٹن دے سپہ سالار پولُس کُوں قلعہ دے اندر گِھن ونجنڑ دا حُکم ڈِتا تے آکھیا جو ”اُونکُوں کوڑے مارو تے اُوندا بیان گِھنو تاں جو میکُوں پتہ لگے جو ایہ لوک اُوندے اُتے کیوں اِینویں چیخدے پئے ہِن۔“ جِیں ویلے او کوڑے لاوݨ کیتے پولُس کُوں بدھنڑ لگے تاں اُوں، اُوں رومی افسر کُوں جیہڑا نال ای کھڑا ہا آکھیا، ”کیا ہِک رومی شہری کُوں اُوندا جُرم ثابت کیتے بغیر کوڑیاں نال مارݨ جائز ہے؟“ صوبہ دار ایہ سُنڑیا تاں او پلٹن دے سپہ سالار دے کولھ گِیا تے اُنہاں کُوں خبر ڈے تے آکھیا، ”تُساں کیا کریندے ہیوے؟ ایہ بندہ تاں رومی ہے۔“ پلٹن دے سپہ سالار پولُس دے کولھ آ تے پُچھیا، ”میکُوں ڈسا، کیا تُوں رومی ہیں؟“ اُوں آکھیا، ”ہاں۔“ پلٹن دے سپہ سالار آکھیا، ”مَیں تاں ہِک بہُوں وڈی رقم ڈے تے رومی شہریت گِھدی ہئی۔“ پولُس آکھیا، ”مَیں تاں جماندرُو رومی ہاں ۔“ جیہڑے سپاہی اُوندا بیان گِھننڑ آلے ہَن، او فوراً پِچھاں ہٹ گئے تے پلٹن دا سپہ سالار وی ایہ جاݨ تے گھبرا گِیا جو جِینکُوں مَیں بدھیا ہویا ہے او رومی ہے۔ ڈُوجھے ڈینہہ پلٹن دے سپہ سالار پولُس کُوں کھول ڈِتا تے ایہ حقیقت جانڑن کیتے جو یہُودی اُوندے اُتے کیوں اِلزام لیندے ہِن، سردار کاہِناں تے یہُودیاں دی صدر ِ عدالت کُوں جمع تھیوݨ دا حُکم ڈِتا۔ وَل پولُس کُوں تلے گِھن وَنج تے سامنڑے کھڑا کر ڈِتا۔ پولُس عدالت دے ارکان کُوں غور نال ڈیکھ تے آکھیا، ”میڈے بِھراؤ! مَیں اَج تئیں بہُوں نیک نیّتی نال خُدا دے حُکماں دے مطابق زندگی گُزریندا ریہا ہاں۔“ اِیندے تے کاہِن ِ اعظم حننیاہ اُوندے کولھ کھڑے لوکاں کُوں حُکم ڈِتا جو اُوندے مُنہ اُتے چاٹ مارو۔ پولُس اُونکُوں آکھیا، ”سفیدی تھئی ہوئی کندھ! خُدا تیکُوں مریسی۔ تُوں اِتھاں شریعت دے مطابق میڈا اِنصاف کرݨ کیتے بیٹھیں پر تُوں خود شریعت دے خلاف میکُوں مارݨ دا حُکم ڈیندیں؟“ جیہڑے نال کھڑے ہَن آکھنڑ لگے، ”تیکُوں خُدا دے کاہِن ِ اعظم کُوں بُرا آکھنڑ دی جُرأت کِینویں تھئی؟“ پولُس آکھیا، ”بِھراؤ! میکُوں معلوم نہ ہا جو ایہ کاہِن ِ اعظم ہے، کیوں جو لِکھیا ہے جو تُوں آپنڑی قوم دے سردار کُوں بُرا نہ آکھ۔“ جِیں ویلے پولُس کُوں پتہ لگیا جو اُنہاں ءچوں کُجھ صدوقی ہِن تے کُجھ فریسی تاں اُوں عدالت ءچ اُچی اواز ءچ آکھیا، ”بِھراؤ! مَیں فریسی ہاں تے فریسی پِیُو دا پوتر ہاں۔ میڈے اُتے اِیں واسطے مقدمہ چلایا ویندا پئے جو مَیں اُمید رکھیندا ہاں جو مُردے وَل زندہ تھیسن۔“ اُوندے ایہ آدھے ای فریسیاں تے صدوقیاں ءچ تکرار شروع تھی گئی تے حاضرین ءچ پُھٹ پے گئی۔ کیوں جو صدوقی تاں آدھے ہَن جو قیامت نہ تھیسی تے نہ ای فرشتے کوئی چیز ہِن نہ رُوح، پر فریسی اِنہاں سبھ کُوں منیندے ہِن۔ بس اُتھاں ہنگامہ تھی گِیا، تے فریسیاں ءچوں کُجھ شریعت دے عالم کھڑے تھی گئے تے جھیڑا کر تے آکھنڑ لگے جو ”اساں اِیں بندے ءچ کوئی قصُور نئیں ڈیدھے تے جے کہیں فرشتے یا رُوح اِیندے نال گالھ کیتی ہے تاں کیا تھیّا؟“ تے جِیں ویلے جھیڑا ودھ گِیا تاں پلٹن دے سپہ سالار کُوں اِیں گالھ دا ڈر لگیا جو پولُس دے ٹوٹے ٹوٹے نہ کر ڈِتے ونجنڑ، اِیں واسطے اُوں فوجیاں کُوں حُکم ڈِتا جو ”تلے ونجنڑ تے اُونکُوں اُتھوں زبردستی کڈھ تے قلعہ ءچ گِھن آوݨ۔“ اُونہی رات خُداوند پولُس دے کولھ آ کھڑا تھیّا تے آکھیا، ”حوصلہ رکھ، جِینویں تَیں یروشلیم ءچ میڈی گواہی ڈِتی ہے، اُونویں ای تیکُوں روم ءچ گواہی ڈیونڑی پوسی۔“ سویل نال یہُودیاں رَل تے فیصلہ کیتا تے لعنت دی قَسم کھادی جو ”جیہڑے ویلے تئیں اساں پولُس کُوں مار نہ گھتوں، اُوں ویلے تئیں نہ کُجھ کھاسوں، نہ کُجھ پِیسوں۔“ اِیں سازش ءچ چالیہہ بندیاں تُوں زیادہ شریک ہَن۔ بس او سردار کاہِناں تے بزُرگاں دے کولھ گئے تے آکھنڑ لگے جو ”اساں لعنت دی قَسم کھادی ہے جو پولُس کُوں قتل کرݨ تُوں پہلے کُجھ نہ کھاسوں۔ بس ہُنڑ تُساں صدر ِ عدالت آلیاں نال رَل تے پلٹن دے سپہ سالار کُوں درخاست کرو جو پولُس کُوں تُہاڈے سامنڑے گِھن آوے تاں جو اُوندے مقدمہ دی حقیقت مزید پُچھی ونجے۔ اُوندے اِتھاں پُجنڑ کنُوں پہلے اساں اُونکُوں قتل کر ڈیوݨ کیتے تیار ہیں۔“ پر جِیں ویلے پولُس دے بھڑینجے کُوں اِیں سازش دا پتہ چلیا تاں اُوں قلعہ ءچ وَنج تے پولُس کُوں خبر ڈِتی۔ وَل پولُس ہِک صوبہ دار کُوں سڈوایا تے آکھیا جو ”اِیں نوجوان کُوں پلٹن دے سپہ سالار دے کولھ گِھن وَنج کیوں جو ایہ اُونکُوں کُجھ ڈساوݨ چاہندا ہے۔“ بس او اُونکُوں پلٹن دے سپہ سالار دے کولھ گِھن گِیا تے آکھنڑ لگا، ”پولُس قیدی میکُوں سڈیا تے میکُوں درخاست کیتی جو اِیں جوان کُوں تُہاڈے کولھ گِھن آواں کیوں جو ایہ تُہاکُوں کُجھ ڈساوݨ چاہندے۔“ پلٹن دا سپہ سالار اُوں جوان دا ہتھ پکڑ تے اُونکُوں اَنج گِھن گِیا تے پُچھنڑ لگا، ”تُوں میکُوں کیا ڈساونڑا چاہندا ہیں؟“ اُوں آکھیا، ”یہُودیاں ایکا کر تے تُہاکُوں درخاست کرݨ دا فیصلہ کیتا ہے جو تُساں پولُس کُوں مزید تفتیش کیتے کل صدر ِ عدالت دے سامنڑے گِھن آؤ۔ پر تُساں اُنہاں دی گالھ نہ منائے کیوں جو اُنہاں ءچوں چالیہہ تُوں زیادہ اُوندے اُتے حملہ کرݨ دی تاڑ ءچ ہِن، جِنہاں قَسم کھادی ہے جو پولُس کُوں قتل کیتے بغیر نہ تاں اساں کُجھ کھاسوں تے نہ ای کُجھ پِیسوں تے ہُنڑ او تیار ہِن۔ صرف تُہاڈے فیصلے دا اِنتظار ہے۔“ بس سپہ سالار اُوں نوجوان کُوں ایہ حُکم ڈے تے بھیج ڈِتا جو ”اِنہاں گالھیں دا جیہڑیاں تَیں میکُوں ڈسائیاں، کہیں کُوں پتہ نہ لگے۔“ سردار آپنڑے ڈُو صوبہ داراں کُوں سڈوا تے آکھیا، ”پلٹن دے ڈُو سو سپاہی، ستّر گُھڑ سوار تے ڈُو سو نیزہ بردار رات دے نؤں وجے قیصریہ ونجنڑ کیتے تیار رکھائے۔“ وَل حُکم ڈِتا جو پولُس کیتے سواری دا اِنتظام کیتا ونجے تاں جو او گورنر فیلِکس کولھ حفاظت نال پُج ونجے۔ تے اُوں ہِک خط اِیں موضوع دا لِکھیا۔ کلَودِیُس لُوسِیاس دی طرفوں معزز گورنر فیلِکس کُوں سلام۔ اِیں بندے کُوں یہُودی پکڑ تے مارݨ آلے ای ہَن جو مَیں سپاہیاں کُوں گِھن گِیا تے اُونکُوں چُھڑوا گِھدا کیوں جو میکُوں معلوم تھیّا ہا جو او ہِک رومی شہری ہے۔ مَیں پتا کرݨ چاہندا ہم جو او اُوندے اُتے کیا اِلزام لیندے پئے ہِن، اِیں واسطے مَیں اُونکُوں اُنہاں دی صدر ِ عدالت ءچ پیش کیتا۔ تے پتہ لگیا جو اُنہاں دا اِلزام اُنہاں دی شریعت دے مسئلیاں نال تعلق رکھیندے پر اُوندے خلاف ایجھا کوئی اِلزام نئیں جیندی وجہ تُوں اُونکُوں موت یا قید دی سزا ڈِتی ونجے۔ جِیں ویلے میکُوں خبر تھئی جو اُوندے خلاف کوئی سازش تھیندی پئی ہے تاں مَیں اِینکُوں فوراً تُہاڈے کولھ بھیج ڈِتا تے اُوندے اُتے اِلزام لاوݨ آلیاں کُوں حُکم ڈِتا جو او تُہاڈے حضُور ءچ آ تے آپنڑا مقدمہ پیش کرݨ۔ بس سپاہی اُوندے حُکم دے مطابق پولُس کُوں آپنڑے نال گِھن گئے تے اُوں رات ای اُنہاں کُوں انتیپترِس ءچ پُچا ڈِتا۔ ڈُوجھے ڈینہہ او گُھڑ سواراں کُوں اُنہاں نال اگُوں ونجنڑ کیتے چھوڑ تے خود قلعہ دو وَل گئے۔ جِیں ویلے گُھڑ سوار قیصریہ پُجے تاں اُنہاں گورنر کُوں خط ڈے تے پولُس کُوں اُوندے حضُور ءچ پیش کر ڈِتا۔ گورنر خط پڑھ تے پُچھیا، ”ایہ کیہڑے صوبے دا ہے؟“ تے ایہ معلوم کر تے جو کلکیہ دا ہے تاں اُونکُوں آکھیا، ”مَیں تیڈا مقدمہ اُوں ویلے سُنڑساں جِیں ویلے تیڈے مُدعی وی اِتھاں حاضر ہوسن۔“ وَل اُوں پولُس کُوں ہیرودیس دے قلعہ ءچ قید رکھنڑ دا حُکم ڈِتا۔ پنج ڈینہہ بعد کاہِن ِ اعظم حننیاہ، کُجھ بزُرگاں تے تِرطُلُس وکیل نال قیصریہ پُجیا تے گورنر دے حضُور ءچ پولُس دے خلاف فریاد کیتی۔ جِیں ویلے پولُس حاضر کیتا گِیا تاں تِرطُلُس اُوندے اُتے اِلزام لا تے آکھیا، ”معزز فیلِکس! اساں تُہاڈے سببّوں بہُوں امن نال زندگی گُزریندے پئے ہیں تے تُساں آپنڑی دُور اندیشی نال اِیں قوم دے فائدے کیتے چنگیاں تبدیلیاں کیتیاں ہِن۔ اساں ہر جاہ تے ہر ویلے تُہاڈیاں مہربانیاں دی وجہ تُوں تُہاڈے بہُوں شُکر گُزار ہیں۔ ہُنڑ تُہاکُوں تکلیف ڈِتے بغیر درخاست کریندا ہاں جو مہربانی نال ساڈے ہِک ڈُو گالھیں سُنڑ گِھنو۔ اساں ڈِٹھے جو ایہ بندہ بہُوں خطرناک ہے۔ ایہ دُنیا دے سارے یہُودیاں ءچ فساد پیدا کریندے تے ناصری دے بِدعتی فرقہ دا راہنما ہے۔ اِینیں تاں ہیکل کُوں وی ناپاک کرݨ دی کوشش کیتی ہئی۔ اِیں واسطے اساں اِینکُوں پکڑ گِھدے۔ [اساں آپنڑی شریعت دے مطابق اِیندے اُتے مقدمہ چلاوݨ چاہندے ہسے۔ پر پلٹن دا سپہ سالار لُوسِیاس اُونکُوں ساڈے ہتھاں ءچوں زبردستی کَھس تے گِھن گِیا، تے اِلزام لاوݨ آلیاں کُوں تُہاڈے کولھ ونجنڑ دا حُکم ڈِتا۔] اِیندی تفتیش کر تے تُہاکُوں اُنہاں اِلزاماں دی حقیقت معلوم تھی ویسی جیہڑے اساں اِیندے اُتے لائے ہِن۔“ یہُودی وی وکیل نال رَل تے آکھنڑ لگے جو ”ایہ گالھیں بالکل سچ ہِن۔“ جِیں ویلے گورنر پولُس کُوں بولنڑ دا اِشارہ کیتا تاں اُوں جواب ڈِتا، ”کیوں جو مَیں جانڑدا ہاں جو تُساں بہُوں سالاں تُوں اِیں قوم دی عدالت کریندے ہیوے، اِیں واسطے مَیں خوشی نال آپنڑی صفائی پیش کریندا ہاں۔ تُساں خود پتہ کر سگدے ہیوے جو بارہاں ڈینہہ پہلے مَیں یروشلیم ءچ عبادت کرݨ گِیا ہم۔ میڈے اُتے اِلزام لاوݨ آلیاں میکُوں ہیکل ءچ کہیں نال وی بحث کریندے یا عبادت خانیاں ءچ یا اِڈے اُڈے شہر ءچ فساد کریندے نئیں ڈِٹھا۔ ہُنڑ او اِنہاں اِلزاماں کُوں جیہڑے او میڈے اُتے لیندے پئے ہِن، تُہاڈے سامنڑے ثابت نئیں کر سگدے۔ پر مَیں تُہاڈے سامنڑے اِقرار کریندا ہاں جو مسیح دی راہ جِینکُوں او بِدعت قرار ڈیندے ہِن اُوندے مطابق مَیں آپنڑے پِیُو ڈاڈا دے خُدا دی عبادت کریندا ہاں تے جیہڑا کُجھ توریت تے نبیاں دے صحائف ءچ لِکھیا ہے اُنہاں ساریاں اُتے میڈا اِیمان ہے۔ مَیں وی خُدا تُوں اُوہو اُمید رکھیندا ہاں جیہڑی ایہ رکھیندے ہِن جو راستباز تے ناراست ڈوہائیں دی قیامت تھیسی۔ اِیں واسطے میڈی تاں اِیہو کوشش راہندی ہے جو خُدا تے اِنسان ڈوہائیں دے سامنڑے میڈی نیّت نیک راہوے۔ بہُوں سالاں بعد مَیں آپنڑی قوم کُوں خیرات پُچاوݨ تے خُدا کُوں نذرانے پیش کرݨ کیتے یروشلیم آیا ہم۔ جِیں ویلے اُنہاں میکُوں ہیکل ءچ ایہ کم کریندے ڈِٹھا تاں مَیں طہارت دی حالت ءچ ہم۔ نہ کوئی ہنگامہ ہا تے نہ کوئی فساد۔ ہا، آسِیہ دے کُجھ یہُودی ہَن۔ جے اُنہاں کُوں کوئی شکایت ہئی تاں اُنہاں کُوں اِتھاں تُہاڈے کولھ حاضر تھی تے میڈے اُتے اِلزام لاوݨ چاہیدا ہا۔ یا ایہ لوک جیہڑے اِتھاں موجود ہِن ڈساوݨ جو جِیں ویلے مَیں صدر ِ عدالت ءچ پیش تھیّا ہم تاں اُنہاں میڈے ءچ کیا بُرائی ڈِٹھی ہئی؟ سوائے اِیں ہِک گالھ دے جیہڑی مَیں اُچی اواز ءچ آکھی ہئی جو اَج تُہاڈے سامنڑے میڈے اُتے مُردیاں دی قیامت دے بارے ءچ مقدمہ کیتا گِیا ہے۔“ وَل فیلِکس جیہڑا مسیح دی راہ دے بارے ءچ چنگی طرحاں جانڑدا ہا، ایہ آکھ تے مقدمہ ملتوی کر ڈِتا جو ”جِیں ویلے پلٹن دا سپہ سالار لُوسِیاس اِتھاں آسی تاں مَیں تُہاڈے مقدمہ دا فیصلہ کریساں۔“ تے صوبہ دار کُوں حُکم ڈِتا جو پولُس کُوں پہرے ءچ تاں رکھیا ونجے پر زیادہ سختی نہ کیتی ونجے تے اِیندے ساتھیاں ءچوں کہیں کُوں اُوندی خدمت کرݨ تُوں منع نہ کیتا ونجے۔ کُجھ ڈینہاں بعد فیلِکس آپنڑی ذال دُروسِلہ کُوں جیہڑی یہُودی ہئی نال گِھن تے آیا۔ اُوں پولُس کُوں سڈوا بھیجیا تے یسُوع مسیح اُتے اِیمان گِھن آوݨ دے بارے ءچ اُوندے گالھیں سُنڑیاں۔ جِیں ویلے او راستبازی، پرہیزگاری تے آوݨ آلی عدالت دے بارے ءچ بیان کریندا پِیا ہا تاں فیلِکس ڈر تے آکھنڑ لگا، ”اجنڑ ایہ بہُوں ہے، تُوں وَنج سگدیں۔ جڈاں میکُوں فُرصت مِلسی تاں مَیں تیکُوں ولا سڈوا گِھنساں۔“ فیلِکس کُوں پولُس دی طرفوں پیسے مِلنڑ دی اُمید وی ہئی، اِیں واسطے او اُونکُوں ولا ولا سڈویندا تے اُوندے نال گالھیں کریندا ہا۔ ڈُو سالاں بعد فیلِکس دی جاہ پُرکِیُس فیستُس گورنر مقرر تھیّا تے فیلِکس خود کُوں یہُودیاں دا خیر خواہ ثابت کرݨ کیتے پولُس کُوں قید ءچ ای چھوڑ گِیا۔ فیستُس صوبے ءچ پُجنڑ دے ترے ڈینہہ بعد قیصریہ تُوں یروشلیم گِیا۔ تے سردار کاہِناں تے یہُودی راہنماواں اُوندے حضُور آ تے پولُس دے خلاف فریاد کیتی۔ اُنہاں پولُس دی مخالفت ءچ گورنر کُوں درخاست کیتی جو او پولُس کُوں یروشلیم ءچ سڈوا بھیجے کیوں جو اُنہاں تاڑ لا تے اُونکُوں رستے ءچ مارݨ دا منصوبہ بنڑایا ہا۔ پر فیستُس جواب ڈِتا ”پولُس تاں قیصریہ ءچ قید ہے تے مَیں خود وی جلدی اُتھاں ونجنڑ آلا ہاں۔ بس تُہاڈے ءچوں کُجھ اِختیار آلے لوک میڈے نال ونجنڑ تے جے اُوں واقعی کوئی غلط کم کیتے تاں اُتھائیں اُوندے اُتے مقدمہ دائر کیتا ونجے۔“ او اُنہاں ءچ اَٹھ ڈاہ ڈینہہ ریہا تے وَل قیصریہ چلیا گِیا۔ اُتھاں ڈُوجھے ای ڈینہہ تخت ِ عدالت اُتے بہہ تے حُکم ڈِتا جو پولُس کُوں حاضر کیتا ونجے۔ جِیں ویلے پولُس حاضر تھیّا تاں یہُودیاں جیہڑے یروشلیم کنُوں آئے ہَن، اُوندے چودھارُوں کھڑے تھی تے بہُوں سارے سخت اِلزام لاوݨ شروع کر ڈِتے پر کوئی ثبوت پیش نہ کر سگے۔ پولُس آپنڑی صفائی ءچ ایہ آکھیا جو ”مَیں نہ تاں یہُودیاں دی شریعت دے خلاف کوئی قصُور کیتے، نہ ہیکل دے تے نہ ای قیصر بادشاہ دے خلاف۔“ پر فیستُس خود کُوں یہُودیاں دا خیر خواہ ثابت کرݨ چاہندا ہا، اِیں واسطے اُوں پولُس کُوں آکھیا، ”کیا تیکُوں یروشلیم ونجنڑ منظور ہے تاں جو مَیں اِیں مقدمہ دا فیصلہ اُتھاں کراں؟“ پولُس جواب ڈِتا، ”مَیں اِتھاں قیصر دی عدالت ءچ کھڑا ہاں۔ میڈے مقدمہ دا فیصلہ اِتھائیں تھیونڑا چاہیدے۔ تُساں خود وی چنگی طرحاں جانڑدے ہیوے جو مَیں یہُودیاں دا کوئی قصُور نئیں کیتا۔ جے مَیں قصُوروار ہاں یا مَیں موت دی سزا دے لائق کوئی کم کیتا ہے تاں میکُوں مرݨ تُوں اِنکار نئیں۔ پر جیہڑے اِلزامات یہُودی میڈے اُتے لیندے پئے ہِن، جے او کُوڑے ہِن تاں وَل کہیں کُوں حق نئیں جو میکُوں اُنہاں دے حوالے کرے۔ مَیں قیصر کُوں اپیل کریندا ہاں۔“ وَل فیستُس آپنڑے مُشیراں نال مشورہ کر تے جواب ڈِتا ”تُوں قیصر کُوں اپیل کیتی ہے تاں تُوں قیصر دے کولھ ای ویسیں۔“ کُجھ ڈینہہ بعد اگرِپّا بادشاہ تے برنِیکے، قیصریہ آئے تاں جو فیستُس نال مُلاقات کر سگنڑ۔ تے اُنہاں دے کُجھ ڈینہہ تئیں اُتھاں راہنڑ دے بعد فیستُس پولُس دے مقدمہ دا حال بادشاہ کُوں اِینویں بیان کیتا جو ”اِتھاں ہِک بندہ ہے جِینکُوں فیلِکس قید ءچ چھوڑ گِیا ہے۔ جِیں ویلے مَیں یروشلیم ءچ ہم تاں سردار کاہِن تے یہُودیاں دے بزُرگاں اُوندے خلاف فریاد کیتی تے سزا دے حُکم دی درخاست کیتی۔ مَیں اُنہاں کُوں ڈسایا جو رومی دستور دے مطابق کوئی بندہ سزا پاوݨ کیتے حوالہ نئیں کیتا وَنج سگدا جئیں تئیں جو اُونکُوں آپنڑے اِلزام لاوݨ آلیاں دے آمنڑے سامنڑے اُنہاں دے اِلزام دے بارے آپنڑی سچائی پیش کرݨ دا موقع نہ ڈِتا ونجے۔ بس جِیں ویلے او لوک اِتھاں آئے تاں مَیں کُجھ دیر نہ کیتی بلکہ ڈُوجھے ڈینہہ ای تخت ِ عدالت اُتے بہہ تے اُوں بندے کُوں گِھن آوݨ دا حُکم ڈِتا۔ پر جِیں ویلے اُوندے اُتے اِلزام لاوݨ آلے آپنڑا دعویٰ پیش کرݨ کیتے اُٹھے تاں اُنہاں اُوندے اُتے کہیں ایجھے جُرم دا اِلزام نہ لایا جیندی میکُوں توقع ہئی۔ بلکہ آپنڑے مذہب تے یسُوع ناں دے ہِک بندے دے بارے ءچ بحث کریندے ہَن جیہڑا مر گِیا ہا تے پولُس اُونکُوں زندہ اکھیندے۔ مَیں بہُوں اُلجھن ءچ ہم جو ایجھے گالھیں دی تفتیش کِینویں کراں، اِیں واسطے مَیں پولُس تُوں پُچھیا جو ’کیا تیکُوں یروشلیم ونجنڑ منظور ہے تاں جو اِنہاں گالھیں دا فیصلہ اُتھاں تھیوے؟‘ پر پولُس اپیل کر ڈِتی جو اُوندے مقدمے دا فیصلہ شہنشاہ دی عدالت ءچ تھیوے۔ اِیں واسطے مَیں حُکم ڈِتے جو او قیصر دے کولھ ونجنڑ تئیں حوالات ءچ بند راہوے۔“ اگرِپّا فیستُس کُوں آکھیا، ”مَیں وی اُوں بندے دے گالھیں اُوندی زبانی سُنڑݨ چاہندا ہاں۔“ اُوں جواب ڈِتا، ”تُساں کل سُنڑ گِھنسو۔“ ڈُوجھے ڈینہہ اگرِپّا تے برنِیکے وڈی شان و شوکت نال آئے تے فوج دے اعلیٰ افسراں تے شہر دے معزز لوکاں نال دیوان خانہ ءچ داخل تھئے۔ فیستُس حُکم ڈِتا جو پولُس کُوں اِتھاں حاضر کیتا ونجے۔ وَل فیستُس آکھیا، ”اگرِپّا بادشاہ تے حاضرین! تُساں اِیں بندے کُوں ڈیدھے ہیوے جیندے خلاف ساری یہُودی قوم میکُوں یروشلیم تے اِتھاں قیصریہ ءچ چیخ چیخ تے درخاست کیتی جو اِینکُوں زندہ نہ چھوڑیا ونجے۔ پر میکُوں معلوم تھئے جو اِیں قتل دے لائق ایجھا کوئی جُرم نئیں کیتا تے جِیں ویلے اُوں شہنشاہ کُوں اپیل کیتی تاں مَیں اِینکُوں اُتھائیں بھیج ڈیوݨ دا فیصلہ کیتا۔ پر قیصر کُوں لِکھنڑ کیتے میڈے کولھ کوئی خاص گالھ نئیں، اِیں واسطے مَیں اُونکُوں تُہاڈے سامنڑے تے خاص کر اگرِپّا بادشاہ تُہاڈے سامنڑے حاضر کیتے تاں جو تفتیش دے بعد کوئی ایجھی گالھ معلوم تھیوے جِینکُوں مَیں قیصر کُوں لِکھ تے بھیج سگاں۔ کیوں جو کہیں قیدی کُوں بھجیندے ویلے اُوندے اُتے لائے گئے اِلزامات کُوں ظاہر نہ کرݨ، میڈے نزدیک عقل دی گالھ نئیں۔“ اِیں گالھوں اگرِپّا بادشاہ پولُس کُوں آکھیا، ”تیکُوں آپنڑے حق ءچ بولنڑ دی اِجازت ہے۔“ اِیں واسطے پولُس ہتھ چا تے آپنڑی صفائی پیش کرݨ لگا جو ”اگرِپّا بادشاہ! مَیں آپنڑے آپ کُوں خوش قسمت سمجھدا ہاں جو تُہاڈے سامنڑے یہُودیاں دے اِلزاماں دے جواب ءچ آپنڑی صفائی پیش کریندا پِیا ہاں۔ خاص کر اِیں واسطے جو تُساں سارے یہُودی رسم و رواج تے مسئلیاں تُوں واقف ہیوے۔ اِیں واسطے مَیں مِنت کریندا ہاں جو تُساں صبر نال میڈی سُنڑو۔ یہُودی چنگی طرحاں جانڑدے ہِن جو پہلے آپنڑی قوم ءچ تے اُوندے بعد یروشلیم ءچ جوانی تُوں میڈا کردار کیجھا ہا۔ او شروع کنُوں میکُوں جانڑدے ہِن تے جے چاہوݨ تاں میڈے حق ءچ گواہی ڈے سگدے ہِن جو مَیں فریسی ہوندے ہوئے آپنڑے مذہب دے سبھ کنُوں پابند فرقہ دے مطابق زندگی گُزریندا ہم۔ ہُنڑ اُوں وعدے دی اُمید دی وجہ کنُوں جیہڑا خُدا ساڈے پِیُو ڈاڈا نال کیتا ہا میڈے اُتے ایہ مقدمہ کیتا ویندا پئے۔ اُونہی وعدے دے پُورے تھیوݨ دی اُمید اُتے ساڈے بارہاں دے بارہاں قبیلے ڈینہہ رات دل و جان نال خُدا دی عبادت کریندے راہندے ہِن۔ پر بادشاہ سلامت! اِیں اُمید دے سببّوں یہُودی میڈے اُتے مقدمہ دائر کریندے پئے ہِن۔ تُساں اِیں گالھ دا کیوں یقین نئیں کریندے جو خُدا مُردیاں کُوں ولا کنُوں زندہ کر ڈیسی؟ ہِک وقت ہا جڈاں مَیں یسُوع ناصری دے ناں دی ہر طرحاں مخالفت کرݨ آپنڑا فرض سمجھدا ہم۔ اِیں واسطے مَیں یروشلیم ءچ اِینویں ای کیتا۔ مَیں سردار کاہِناں کنُوں اِختیار گِھن تے بہُوں سارے مُقدّساں کُوں قید ءچ سٹیا تے جِیں ویلے اُنہاں کُوں سزائے موت سُنڑائی ویندی ہئی تاں مَیں وی اِیہو صلاح ڈیندا ہم۔ مَیں ہر ہِک عبادت خانہ ءچ اُنہاں کُوں سزا ڈیندا ہم تے کُفر بَکنڑ اُتے مجبور کریندا ہم۔ اُنہاں دی مخالفت ءچ مَیں اِتنا دیوانہ بنڑ گِیا جو مَیں ڈُوجھے مُلکاں دے شہراں ءچ وَنج تے وی اُنہاں کُوں سَتیندا ہم۔ ہِک پھیری مَیں سردار کاہِناں دی اِجازت تے اِختیار نال اِیں کم کیتے دمشق دا سفر کریندا پِیا ہم۔ بادشاہ سلامت! ڈوپہر کُوں جِیں ویلے مَیں رستے ءچ ہم تاں مَیں اسمان کنُوں روشنی آندی ڈِٹھی جیہڑی سِجھ دی روشنی تُوں وی بہُوں تیز ہئی تے او آ تے میڈے تے میڈے نال سفر کرݨ آلیاں دے چودھارُوں چمکنڑ لگ پئی۔ اساں سارے زمین اُتے ڈھے پئے تے مَیں ہِک اواز سُنڑی جیہڑی میکُوں عبرانی زبان ءچ آدھی پئی ہئی جو ’ساؤل! ساؤل! تُوں میکُوں کیوں سَتیندیں؟ میڈے خلاف لڑن بیوقُوفی ہے ۔‘ مَیں پُچھیا، ’اے خُداوند! تُساں کوݨ ہیوے؟‘ خُداوند جواب ڈِتا، ’مَیں یسُوع ہاں جِینکُوں تُوں سَتیندیں۔ پر اُٹھی آپنڑے پیراں اُتے کھڑا تھی وَنج، کیوں جو مَیں تَیں اُتے اِیں واسطے ظاہر تھیّا ہاں جو تیکُوں آپنڑا خادم تے گواہ مقرر کراں تاں جو تُوں اِنہاں گالھیں دی گواہی ڈیویں جیہڑیاں تَیں ہُنڑ ڈِٹھیاں ہِن تے اُنہاں دی وی جیہڑیاں مَیں تیڈے اُتے ظاہر کریساں۔ مَیں تیکُوں تیڈے لوکاں تے غیر قوماں کنُوں بچیندا راہساں، جِنہاں دے کولھ تیکُوں بھجیندا پِیا ہاں، جو تُوں اُنہاں دے اکھیں کھولیں تاں جو او اندھارے کنُوں روشنی دو تے شیطان دے اِختیار کنُوں خُدا دو رجُوع گِھن آوݨ، تے میڈے اُتے اِیمان گِھن آ تے گُناہاں دی معافی پاوݨ، تے خُدا دے پاک لوکاں ءچ شریک تھی تے میراث حاصل کرݨ۔‘ اِیں واسطے اگرِپّا بادشاہ! مَیں اُوں اسمانی رویا دا نافرمان نئیں تھیّا۔ بلکہ پہلے مَیں دمشق دے لوکاں ءچ، وَل یروشلیم تے سارے یہُودیہ دے راہنڑ آلیاں تے غیر قوماں ءچ وی تبلیغ کیتی جو او توبہ کرݨ تے خُدا دو رجُوع کرݨ، تے آپنڑے نیک عمل تُوں توبہ دا ثبوت ڈیوݨ۔ اِنہاں گالھیں دے سببّوں یہُودیاں میکُوں ہیکل ءچ پکڑ تے قتل کرݨ دی کوشش کیتی۔ پر مَیں خُدا دی مدد نال اَج تئیں ہر چھوٹے وڈے دے سامنڑے گواہی ڈیندا ہاں۔ مَیں اُنہاں گالھیں دے سِوا کُجھ نئیں آدھا جِنہاں دی پیشن گوئی نبیاں تے مُوسیٰ کیتی ہے، جو المسیح ضرور ڈُکھ چیسی تے ساریاں کنُوں پہلے مُردیاں ءچوں زندہ تھی تے اِیں اُمت تے غیر قوماں کُوں نُور دا پیغام ڈیسی۔“ جِیں ویلے پولُس آپنڑی صفائی ءچ ایہ آدھا ای پِیا ہا تاں فیستُس اُونکُوں روک تے اُچی اواز نال آکھیا، ”پولُس تُوں دیوانہ تھی گئیں۔ علم دی زیادتی تیکُوں پاگل کر ڈِتے۔“ پولُس جواب ڈِتا، ”معزز فیستُس! مَیں دیوانہ نئیں بلکہ سچائی تے عقل دے گالھیں کریندا ہاں۔ بادشاہ اِنہاں گالھیں تُوں واقف ہے تے مَیں اُوندے نال کُھل تے گالھ کر سگدا ہاں۔ میکُوں یقین ہے جو اِنہاں گالھیں ءچوں کوئی وی اُوں کنُوں لُکی نئیں کیوں جو ایہ قصہ کہیں کونے ءچ نئیں تھیّا۔ اگرِپّا بادشاہ! کیا تُساں نبیاں کُوں منیندے ہیوے؟ مَیں جانڑدا ہاں جو تُساں منیندے ہیوے۔“ اگرِپّا پولُس کُوں آکھیا، ”کیا تُوں سوچیندیں جو میکُوں تھوڑی جیہی تبلیغ کر تے مسیحی بنڑݨ اُتے قائل کر سگدیں؟“ پولُس جواب ڈِتا، ”مَیں تاں خُدا تُوں دُعا کریندا ہاں جو بھانویں تھوڑی جیہی یا زیادہ، نہ فقط تُساں بلکہ جتنے وی اَج میڈی سُنڑدے پئے ہِن، میڈے وانگُوں تھی ونجنڑ، سِوا اِنہاں زنجیراں دے۔“ وَل بادشاہ، گورنر تے برنِیکے تے اُنہاں نال بیٹھے ہوئے باقی سبھ لوک وی کھڑے تھی گئے۔ تے باہر نِکل تے ہِک ڈُوجھے کُوں آکھنڑ لگے، ”ایہ بندہ کُجھ ایجھا نئیں کریندا جو اِینکُوں موت دی سزا ڈِتی ونجے یا قید ءچ رکھیا ونجے۔“ اگرِپّا بادشاہ فیستُس کُوں آکھیا جو ”جے ایہ بندہ قیصر کُوں اپیل نہ کریندا تاں چُھٹ سگدا ہا۔“ جِیں ویلے ایہ فیصلہ تھیّا جو اساں جہاز ءچ اِطالِیہ ویسوں تاں پولُس تے کُجھ ڈُوجھے قیدی شہنشاہی پلٹن دے ہِک صوبہ دار دے سپُرد کر ڈِتے گئے جِیندا ناں یُولِیُس ہا۔ اساں ادرمُتیُّم تُوں ہِک جہاز اُتے سوار تھی تے روانہ تھئے جیہڑا آسِیہ دی ساحلی بندرگاہاں کنُوں تھیندا ہویا اگُوں ونجنڑ آلا ہا تے تھِسّلُنِیکے دا ارِسترخُس مَکِدُنی ساڈے نال ہا۔ ڈُوجھے ڈینہہ جِیں ویلے جہاز صیدا ءچ کھڑا تھیّا تاں یُولِیُس مہربانی کر تے پولُس کُوں دوستاں نال مُلاقات کرݨ دی اِجازت ڈے ڈِتی تاں جو اُوندی خدمت تھی سگے۔ اُتھوں کنُوں ولا اساں جہاز اُتے روانہ تھئے تے کیوں جو ہوا ساڈے مخالف ہئی اِیں واسطے اساں [ہوا تُوں بچنڑ کیتے] کُپرُس دے شمال کنُوں لنگھے۔ وَل اساں کلکیہ تے پمفِیلیہ دے سمندر کنُوں لنگھ تے اگُوں ودھے تے لُوکیہ دے شہر مُورہ ءچ وَنج لتھے۔ صوبہ دار کُوں اُتھاں اِسکندرِیہ دا ہِک جہاز مِل گِیا جیہڑا اِطالِیہ ویندا پِیا ہا۔ بس ساکُوں اُوندے اُتے بِلھا ڈِتا۔ اساں بہُوں ڈینہاں تئیں ہولے ہولے اگُوں ودھدے ریہے تے مُشکل نال کَنِدُس دے سامنڑے پُجے پر تیز ہوا ساکُوں سِدھے اگُوں نہ ونجنڑ ڈِتا۔ وَل اساں ہوا تُوں بچنڑ کیتے سلمونے دے سامنڑے کنُوں تھی تے کریتے دے جنُوب کنُوں ٹُرے، تے بہُوں مُشکل نال ساحل دے نال نال اگُوں ودھدے ہوئے حسِین ناں دی بندرگاہ ءچ پُجے جِتُھوں لَسَیہ شہر نزدیک ہا۔ سفر ءچ بہُوں ڈینہہ گُزر گئے ہَن تے ہُنڑ سمندری سفر بِیا وی خطرے آلا تھی گِیا کیوں جو روزہ دا ڈینہہ لنگھ گِیا ہا ۔ پولُس اُنہاں کُوں نصیحت کر تے آکھیا، ”بِھراؤ! میکُوں لگدے جو ساڈا سفر بہُوں نُقصان دہ ہوسی، نہ صرف مال اسباب تے جہاز بلکہ ساڈیاں جاناں کُوں وی خطرہ ہے۔“ پر صوبہ دار پولُس دے گالھیں سُنڑݨ دی بجائے جہاز دے مالک تے اُوندے کپتان دے گالھیں کُوں زیادہ اہمیت ڈِتی۔ کیوں جو او بندرگاہ سیالا گُزارݨ کیتے چنگی نہ ہئی اِیں واسطے ڈھیر لوکاں دا فیصلہ ایہ ہا جو اساں اگُوں ودُھوں تے جے تھی سگے تاں فِینِکس ءچ پُج تے سیالے دا موسم لنگھاؤں۔ ایہ کریتے دی ہِک بندرگاہ ہئی جِیندا رُخ شمال مشرق تے جنُوب مشرق دو ہا۔ جِیں ویلے جنُوب کنُوں ہلکی ہلکی ہوا گُھلنڑ شروع تھی گئی تاں او سمجھے جو ”ہُنڑ ساڈا مقصد پُورا تھی سگدے۔“ اِیں واسطے اُنہاں لنگر چا تے جہاز ٹوریا تے کریتے دے ساحل دے نال نال اگُوں ودھے۔ پر تھوڑی دیر بعد ہِک طوفانی ہوا جیہڑی شمال مشرقی اکھویندی ہے، گُھل پئی۔ جِیں ویلے جہاز اُوندی گرفت ءچ آ گِیا تے اُوندا سامنڑا نہ کر سگیا، تاں اساں مجبور تھی تے جہاز کُوں ہوا نال واہنڑ ڈِتا۔ واہندے واہندے کوَدہ جزیرہ دے گھٹ ہوا آلے پاسے پُجے تاں اساں چھوٹی کشتی کُوں بہُوں مُشکل نال قابو ءچ کر سگے۔ تے جِیں ویلے جہاز چلاوݨ آلیاں اُونکُوں جہاز اُتے چڑھا گِھدا تاں جہاز کُوں تروٹنڑ کنُوں بچاوݨ کیتے اُونکُوں رسیاں نال بَدھ ڈِتا۔ اُنہاں کُوں ڈر ہا جو جہاز سُورتِس دے نیڑے ریت دیاں ٹِبیاں ءچ پَھس ویسی، اِیں واسطے اُنہاں لنگر کُوں سمندر ءچ سَٹ ڈِتا ۔ ڈُوجھے ڈینہہ جِیں ویلے جہاز طوفانی ہوا ءچ بہُوں ای لوڈے کھاوݨ لگا تاں اُنہاں جہاز کُوں ہولا کرݨ کیتے مال سمندر ءچ سٹنڑ شروع کر ڈِتا۔ تریجھے ڈینہہ اُنہاں آپنڑے ای ہتھاں نال جہاز دا ضروری سامان وی سَٹ ڈِتا۔ جِیں ویلے بہُوں ڈینہاں تئیں نہ تاں سِجھ ڈِٹھا نہ تارے تے شدید طوفان چلدا پِیا ہا تاں بچنڑ دی آخری اُمید وی ختم تھی گئی۔ بہُوں عرصے تُوں اُنہاں کُجھ نہ کھادا ہا تاں آخر کار پولُس اُنہاں دے اَدھ ءچ کھڑا تھی تے آکھیا، ”بِھراؤ! جے تُساں میڈی نصیحت منیندے تے کریتے کنُوں روانہ نہ تھیندے تاں ایہ نُقصان تے ڈُکھ نہ چیندے۔ پر ہُنڑ مَیں تُہاڈی مِنت کریندا ہاں جو حوصلہ نہ ہارو۔ تُساں ءچوں کہیں دا جانی نُقصان نہ تھیسی پر فقط جہاز دا۔ کیوں جو خُدا جِیندا مَیں بندہ ہاں تے جیندی مَیں عبادت وی کریندا ہاں، اُوندا فرشتہ اِیں رات میڈے کولھ آیا، تے آکھنڑ لگا، ’پولُس! اصلُوں نہ ڈر۔ تُوں رومی بادشاہ قیصر دے حضُور لازمی پیش تھیسیں تے تیڈی خاطر خُدا اُنہاں ساریاں دی جان بخش ڈِتی ہے جیہڑے جہاز اُتے تیڈے نال سفر کریندے پئے ہِن۔‘ اِیں واسطے صاحبو! تُساں آپنڑا حوصلہ وڈا رکھو۔ میڈا اِیمان ہے جو اُوہو کُجھ تھیسی جیہڑا میڈے خُدا میکُوں فرمائے۔ پر اساں ضرور کہیں جزیرے اُتے وَنج پُجسوں۔“ چوڈھویں رات کُوں جِیں ویلے اساں بحر ِادریہ ءچ اِڈے اُڈے ٹکریندے ودے ہسے تاں ادھی رات دے نیڑے جہاز چلاوݨ آلیاں محسوس کیتا جو او کنارے دے نیڑے پُجدے پئے ہِن۔ اُنہاں پانڑی دی گہرائی ناپی تاں او اسّی ہتھ ہئی۔ وَل تھوڑا اگُوں وَنج تے ناپی تاں سَٹھ ہتھ ہئی۔ اِیں ڈر کنُوں جو کِتھائیں چٹاناں نال ٹکرا ونجے، اُنہاں جہاز دے پِچھلے حصہ کنُوں چار لنگر سمندر ءچ سَٹ ڈِتے تے سویل تھیوݨ کیتے دُعا کرݨ لگے۔ جہاز چلاوݨ آلیاں جہاز تُوں بھج نِکلنڑ کیتے چھوٹی کشتی کُوں تلے لہایا پر ظاہر ایہ کیتا جو او جہاز دے اگُوں آلے حصہ کنُوں پانڑی ءچ لنگر سٹنڑ چاہندے ہَن۔ تاں پولُس صوبہ دار تے سپاہیاں کُوں آکھیا، ”جے ایہ لوک جہاز اُتے نہ راہسن تاں تُساں نئیں بچ سگدے۔“ اِیں واسطے سپاہیاں کشتی دیاں رسیاں کپ ڈِتیاں تے اُونکُوں سمندر ءچ چھوڑ ڈِتا۔ سویل تھیوݨ کنُوں ذرا پہلے پولُس ساریاں دی مِنت کیتی جو کُجھ کھا گِھنو تے آکھیا جو ”پِچھلے چوڈھاں ڈینہہ تُوں تُساں لوک فِکر کریندے کریندے کھانڑے کُوں ہتھ تئیں نئیں لایا۔ ہُنڑ مَیں تُہاڈی مِنت کریندا ہاں جو کُجھ کھا گِھنو، کیوں جو تُہاڈے بچنڑ کیتے ایہ ضروری ہے۔ تے یقین رکھو جو تُساں ءچوں کہیں دا وی کُجھ نُقصان نہ تھیسی۔“ ایہ آکھ تے پولُس کُجھ روٹی گِھدی تے ساریاں دے سامنڑے خُدا دا شُکر کیتا تے اُونکُوں تروڑ تے کھاوݨ لگا۔ اِیندے نال ساریاں دا حوصلہ ودھیا تے او وی کھاوݨ لگے۔ اساں سارے ڈُو سو چھہتر بندے ہسے جیہڑے اُوں جہاز اُتے سوار ہَن۔ جِیں ویلے اُنہاں پیٹ بھر تے کھا گِھدا تاں اُنہاں ساریاں دانڑیاں کُوں سمندر ءچ سَٹ ڈِتا، تاں جو جہاز ہولا تھی ونجے۔ جِیں ویلے ڈینہہ نِکلیا تاں اُنہاں اُوں مُلک کُوں نہ سُنجانڑیا، پر ہِک ساحل ڈِٹھا جِیندا کنارہ صاف ہا۔ اُنہاں صلاح کیتی جو جے ممکن ہووے تاں جہاز کُوں اُوندے اُتے چڑھا گِھنوں۔ بس لنگر کھول تے سمندر ءچ چھوڑ ڈِتے تے جہاز دا رُخ بدلنڑ آلے چپُوواں دیاں رسیاں وی کھول ڈِتیاں۔ سامنڑے دا پڑدہ کھول تے اُتے چڑھا ڈِتا تے کنارے دو ودھے۔ پر جہاز ایجھی جاہ تے وَنج پِیا جِتھاں ڈوہائیں پاسُوں سمندر دا زور ہا۔ جہاز سُکی جاہ اُتے پُج تے ریت اُتے وَنج ٹِکیا۔ اُوندے اگُوں آلا حصہ تاں ریت ءچ دَھس گِیا پر پِچھلا حصہ چھلاں دے زور نال تِڑکنڑ لگا۔ سپاہیاں دی صلاح ہئی جو قیدیاں کُوں مار سٹنڑ کِتھائیں اِینویں نہ تھیوے جو اُنہاں ءچوں کوئی تیر تے بھج ونجے۔ پر صوبہ دار پولُس دی زندگی بچاوݨ کیتے اُنہاں کُوں اِیں اِرادے تُوں روک ڈِتا تے حُکم ڈِتا جو جیہڑے تیر سگدے ہِن او پہلے سمندر ءچ ٹپّا مار تے خشکی اُتے پُج ونجنڑ۔ تے باقی لکڑ دے پھٹیاں اُتے تے جہاز دیاں بنڑیاں چیزاں دی مدد نال آپنڑی جان بچاوݨ۔ بس اِیں طرحاں سارے دے سارے خشکی اُتے سلامت پُج گئے۔ جِیں ویلے اساں خیریت نال پُج گئے تاں ساکُوں پتہ لگیا جو جزیرے دا ناں مِلِتے ہے۔ اُتھوں دے لوک ساڈے نال وڈی مہربانی نال پیش آئے۔ اُنہاں بھاہ بال تے ساڈا اِستقبال کیتا کیوں جو بارش تھیندی پئی ہئی تے سردی ہئی۔ جِیں ویلے پولُس لکڑیاں دا گٹھا جمع کر تے بھاہ ءچ سٹیا تاں بھاہ دی گرمی دی وجہ کنُوں ہِک نانگ باہر نِکل تے اُوندے ہتھ اُتے وَلھٹیج گِیا۔ جِیں ویلے جزیرہ دے لوکاں نانگ کُوں اُوندے ہتھ نال لٹکدے ڈِٹھا تاں آپس ءچ آکھنڑ لگے جو ”بے شک ایہ بندہ کوئی خونی ہے۔ ایہ سمندر ءچ مرݨ کنُوں تاں بچ گِیا ہے پر اِنصاف اُونکُوں زندہ نہ چھوڑیسی۔“ پر پولُس نانگ کُوں بھاہ ءچ چِھنڈک ڈِتا تے اُونکُوں کوئی تکلیف نہ تھئی۔ او لوک اِنتظار ءچ ہَن جو اِیندا جِسم سُج سی تے او مر تے ڈھے پوسی پر بہُوں اِنتظار دے بعد جِیں ویلے پولُس کُوں کوئی تکلیف نہ تھئی تاں اُنہاں دا خیال بدل گِیا تے آکھیا جو ”ایہ ضرور کوئی دیوتا ہے۔“ اُوں جاہ دے نیڑے جزیرہ دے حاکم پُبلِیُس دی جاگیر ہا۔ او ساڈا اِستقبال کر تے آپنڑے گھر گِھن گِیا تے ترے ڈینہہ تئیں ساڈی چنگی مہمان نوازی کیتی۔ تے پُبلِیُس دا پِیُو بُخار تے دَست دے سببّوں بیمار ہا۔ پولُس اُوندی خبرگیری کرݨ گِیا تے دُعا دے بعد آپنڑے ہتھ اُوندے اُتے رکھے تے اُونکُوں شِفا ڈِتی۔ جِیں ویلے اِینویں تھیّا تاں اُوں جزیرے دے باقی مریض وی آ تے شِفا پاوݨ لگے۔ اُنہاں ساکُوں بہُوں عزت ڈِتی تے اگُوں ونجنڑ دے وقت سفر کیتے ساڈی ضرورت دیاں ساریاں چیزاں جہاز اُتے رکھوا ڈِتیاں۔ ترے مہینے بعد اساں اِسکندرِیہ دے ہِک جہاز ءچ روانہ تھئے جیہڑا سیالا گُزارݨ کیتے اُوں جزیرے ءچ رُکیا پِیا ہا۔ اِیں جہاز دا نشان جاڑا دیوتا ہا۔ پہلے اساں سرَکُوسہ پُجے تے ترے ڈینہہ اُتھاں ریہے۔ اُتھوں کنُوں نِکل تے اساں ریگِیُم گئے۔ ڈُوجھے ڈینہہ جنُوبی ہوا گُھلی تے اساں ہِک ڈینہہ بعد پُتیُلِی وَنج پُجے۔ اُتھاں ساکُوں کُجھ بِھرا مِلے۔ اُنہاں دی دعوت اُتے اساں سَت ڈینہہ تئیں اُنہاں دے کولھ ریہے۔ تے اِینویں اساں روم وَنج پُجے۔ اُتھاں دے بِھرانواں ساڈی خبر سُنڑ تے ساڈے اِستقبال کیتے اَپّیُس دے چوک تے ترے سرائے تئیں آئے۔ پولُس اُنہاں کُوں ڈیکھ تے خُدا دا شُکر ادا کیتا تے اُونکُوں بہُوں حوصلہ تھیّا۔ روم پُجنڑ تُوں بعد پولُس کُوں ہِک پہرے دار دی نِگرانی ءچ کلھا راہنڑ دی اِجازت مِل گئی۔ ترے ڈینہہ بعد پولُس یہُودی راہنماواں کُوں سڈوایا۔ جِیں ویلے او جمع تھئے تاں پولُس اُنہاں کُوں آکھیا، ”بِھراؤ، مَیں آپنڑی اُمت دے تے پِیُو ڈاڈا دیاں رسماں دے خلاف کوئی کم نئیں کیتا وَل وی میکُوں یروشلیم ءچ گرفتار کر تے رومیاں دے حوالے کر ڈِتا گئے۔ تفتیش کرݨ تُوں بعد او میکُوں چھوڑ ڈیوݨ چاہندے ہَن کیوں جو مَیں کوئی ایجھا کم نہ کیتا ہا جو میکُوں سزائے موت ڈِتی ونجے۔ پر جِیں ویلے یہُودیاں مخالفت کیتی تاں مَیں مجبوراً رومی بادشاہ قیصر کُوں اپیل کیتی، پر اِیں واسطے نئیں جو مَیں آپنڑی ای قوم اُتے کوئی اِلزام لاوݨ چاہندا ہم۔ بس مَیں تُہاکُوں اِیں واسطے سڈوایا جو تُہاڈے نال مُلاقات کراں تے گالھ کراں کیوں جو مَیں بنی اِسرائیل دی اُمید دی وجہ کنُوں زنجیراں نال بدھیا پِیا ہاں۔“ اُنہاں جواب ڈِتا، ”ساکُوں یہُودیہ تُوں تُہاڈے بارے ءچ نہ تاں کوئی خط مِلے تے نہ اُتھوں کنُوں آئے ہوئے بِھرانواں ساکُوں تُہاڈی کوئی خبر ڈِتی، تے نہ ای تُہاڈے خلاف کُجھ آکھیا۔ پر اساں تُہاڈے خیال جاننڑاں چاہندے ہیں۔ ایہ تاں ساکُوں معلوم ہے جو لوک ہر جاہ اِیں فرقہ دے خلاف گالھیں کریندے ہِن۔“ وَل اُنہاں پولُس دے گالھیں سُنڑݨ کیتے ہِک ڈینہہ مقرر کیتا۔ جِیں ویلے او ڈینہہ آیا تاں او پہلے کنُوں وی زیادہ تعداد ءچ اُوں گھر ءچ آئے جِتھاں او راہندا ہا۔ سویل تُوں گِھن تے شام تئیں پولُس اُنہاں کُوں سمجھا سمجھا تے خُدا دی بادشاہی دے بارے ءچ گواہی ڈِتی تے مُوسیٰ دی توریت تے نبیاں دے صحیفیاں ءچوں اُنہاں کُوں یسُوع دے بارے ءچ قائل کرݨ دی کوشش کیتی۔ کُجھ اُوندے گالھیں سُنڑ تے قائل تھی گئے پر کُجھ نہ منے۔ جِیں ویلے او آپس ءچ مُتفق نہ تھئے تاں پولُس اُنہاں دے روانہ تھیوݨ تُوں پہلے ایہ گالھ آکھی جو ”رُوح القُدس یسعیاہ نبی دی معرفت ساڈے پِیُو ڈاڈا دے بارے ءچ ٹھیک ای آکھیا ہا جو ’اِیں قوم دے کولھ وَنج تے آکھ جو تُساں سُنڑدے تاں راہسو پر سمجھ نہ سگسو، ڈیدھے تاں راہسو پر پچھاݨ نہ سگسو۔ کیوں جو اِیں قوم دے دل اُتے چربی چڑھ گئی ہے۔ او اُچا سُنڑݨ لگے ہِن تے اُنہاں آپنڑے اکھیں بند کر گِھدیاں ہِن۔ کِتھائیں اِینویں نہ تھیوے جو او اکھیں کنُوں ڈیکھنڑ، تے کَناں نال سُنڑݨ، دل نال سمجھنڑ تے رجُوع گِھن آوݨ تے مَیں اُنہاں کُوں شِفا بخشاں ۔‘ اِیں واسطے مَیں چاہندا ہاں جو تُساں جاݨ گِھنو جو خُدا دی نجات دا پیغام غیریہُودیاں دے کولھ وی بھیجیا گِیا ہے تے او اُونکُوں سُنڑسن۔“ [جِیں ویلے پولُس ایہ آکھیا تاں یہُودی آپس ءچ تکرار کریندے ہوئے اُتھوں چلے گئے۔] پولُس پُورے ڈُو سال تئیں آپنڑے کرایہ دے مکان ءچ ریہا تے جیہڑے اُوندے نال مُلاقات کرݨ آندے ہَن، اُنہاں ساریاں کُوں خوشی نال مِلدا ریہا۔ او بہُوں دلیری نال خُدا دی بادشاہی دی خوشخبری سُنڑیندا تے خُداوند یسُوع المسیح دے بارے ءچ تعلیم ڈیندا ریہا تے کہیں اُونکُوں روکنڑ دی کوشش نہ کیتی۔ ایہ خط میں پولُس دی طرفوں ہے جیہڑا یسُوع مسیح دا خادم ہاں۔ میں رسُول ہووݨ کیتے سڈیا گِیا ہاں تے خُدا دی خوشخبری سُناوݨ کیتے مقرر کیتا گِیا ہاں۔ اِیں خوشخبری دا وعدہ خُدا بہُوں پہلے کنُوں آپنڑے نبیاں دی معرفت پاک کلام ءچ آپنڑے پوتر دے بارے ءچ کیتا، جیہڑا جِسمانی لحاظ نال تاں داؤد دی نسل ءچوں ہا، پر پاکیزگی دی رُوح دے لحاظ نال مُردیاں ءچوں زندہ تھیوݨ دے سببّوں بہُوں قُدرت نال خُدا دا پوتر ثابت تھیّا۔ ایہ ساڈا خُداوند یسُوع المسیح ہے، جیندے وسیلے تے ناں دی خاطر ساکُوں فضل تے رسُول ہووݨ دی ذمہ داری مِلی، تاں جو سبھ قوماں ءچوں لوک اِیمان گِھن آ تے یسُوع دے تابع تھی ونجنڑ۔ تے تُساں وی اُنہاں لوکاں ءچ شامل ہیوے جیہڑے یسُوع مسیح دے لوک ہووݨ کیتے سڈے گئے ہِن۔ ایہ خط اُنہاں سارے خُدا دے پیاریاں دے ناں ہے جیہڑے روم ءچ ہِن تے مُقدّس تھیوݨ کیتے سڈے گئے ہِن۔ ساڈے باپ خُدا تے خُداوند یسُوع المسیح دی طرفوں تُہاکُوں فضل تے اِطمینان حاصل تھیندا راہوے۔ پہلے تاں مَیں تُساں ساریاں کیتے یسُوع مسیح دے وسیلے نال آپنڑے خُدا دا شُکر کریندا ہاں جو تُہاڈے اِیمان دی مشہوری ساری دُنیا ءچ تھیندی پئی ہے۔ خُدا جیندی خدمت مَیں دل و جان نال اُوندے پوتر دی خوشخبری سُنڑا تے کریندا ہاں، میڈا گواہ ہے جو مَیں تُہاکُوں آپنڑیاں دُعاواں ءچ ہمیشاں یاد کریندا ہاں۔ تے آپنڑیاں سبھ دُعاواں ءچ ایہ درخاست کریندا ہاں جو آخر کار خُدا دی مرضی نال مَیں تُہاڈے کولھ آ سگاں۔ کیوں جو مَیں تُہاکُوں مِلنڑ دی بہُوں سِک رکھیندا ہاں تاں جو تُہاکُوں کوئی ایجھی رُوحانی نعمت ڈے سگاں جیہڑی تُہاڈے اِیمان دی مضبوطی دا سبب بنڑے، یعنی ایہ جو تُہاڈے نال میکُوں وی اُوں اِیمان دے سببّوں تسلی مِلے جیہڑا تُہاڈے تے میڈے ڈوہائیں ءچ ہے۔ بِھراؤ، مَیں نئیں چاہندا جو تُساں اِیں گالھ کنُوں ناواقف راہو جو مَیں کئی پھیری تُہاڈے کولھ آوݨ دا اِرادہ کیتا، تاں جو جِینویں ڈُوجھیاں غیر قوماں ءچ میڈی خدمت پھل گِھن آئی، تُساں ءچ وی گِھن آوے، پر مَیں اَج تئیں رُکیا ریہا۔ مَیں یُونانیاں تے غیر یُونانیاں، داناواں تے ناداناں ڈوہائیں دا قرض دار ہاں۔ اِیں واسطے مَیں تُہاکُوں وی جیہڑے روم ءچ ہیوے خوشخبری سُنڑاوݨ دی بہُوں سِک رکھیندا ہاں۔ مَیں خوشخبری کنُوں نئیں شرمیندا کیوں جو او ہر اِیمان گِھن آوݨ آلے دی نجات کیتے خُدا دی قُدرت ہے۔ پہلے یہُودی کیتے ، وَل غیریہُودی کیتے۔ کیوں جو خوشخبری خُدا دی راستبازی کُوں ظاہر کریندی ہے، او راستبازی جیہڑی اِیمان ای دے ذریعے حاصل تھیندی ہے، جِینویں پاک کلام ءچ لِکھیا ہے جو ”راستباز اِیمان نال زندہ راہسی ۔“ پر خُدا دا قہر اُنہاں لوکاں دی ساری بے دینی تے بدکاری اُتے اسمان کنُوں ظاہر تھیندے جیہڑے سچائی کُوں آپنڑی بدکاری نال دبا ڈیندے ہِن۔ کیوں جو خُدا دے بارے ءچ جیہڑا کُجھ وی معلوم تھی سگدے او اُنہاں کیتے ظاہر ہے، اِیں واسطے جو خُدا آپ اُونکُوں اُنہاں اُتے ظاہر کر ڈِتے۔ کیوں جو دُنیا دی پیدائش کنُوں گِھن تے اَج تئیں خُدا دیاں اَن ڈِٹھیاں صفتاں یعنی اُوندی ابدی قُدرت تے الٰہی ذات، بنڑائیاں ہوئیاں چیزاں کنُوں صاف ڈِکھالی ڈیندیاں ہِن۔ اِیں واسطے اِنسان دے کولھ کوئی بہانہ نئیں۔ بے شک او خُدا دے بارے ءچ جانڑدے تاں ہَن پر اُنہاں اُوندی خُدائی دے لائق اُوندی تمجید تے شُکرگزاری نہ کیتی بلکہ او فضول سوچاں ءچ پے گئے تے اُنہاں دے ناسمجھ دِلاں اُتے اندھارا چھا گِیا۔ او عقلمند ہووݨ دا دعویٰ کریندے ہَن، پر بیوقُوف نِکلے۔ تے غیرفانی تے جلالی خُدا دی بجائے فانی اِنسان، پکھیاں، ڈھورڈنگراں تے کیڑے مکوڑیاں دی پُوجا کیتی۔ اِیں واسطے خُدا وی اُنہاں دے دِلاں دیاں بُریاں خواہشاں دے مطابق اُنہاں کُوں ناپاکی ءچ چھوڑ ڈِتا تے نتیجے ءچ اُنہاں آپنڑے بدناں کُوں آپس ءچ بے حُرمت کیتا۔ اُنہاں خُدا دی سچائی کُوں کُوڑ نال بدّل ڈِتا تے مخلوقات دی زیادہ عبادت تے خدمت کیتی، بجائے خالق دی جیہڑا ہمیشاں تئیں تمجید دے لائق ہے۔ آمین۔ اِیں واسطے خُدا اُنہاں کُوں شرمناک خواہشاں ءچ چھوڑ ڈِتا۔ اِتُھوں تئیں جو اُنہاں دیاں عورتاں آپنڑے فطرتی جنسی تعلقات کُوں غیر فطرتی تعلقات ءچ بدّل ڈِتا۔ اِینویں ای مرد وی عورتاں نال آپنڑے فطرتی جنسی تعلق کُوں چھوڑ تے آپس ءچ مست تھی گئے یعنی مرداں، مرداں نال بُرائی کیتی تے اُنہاں آپنڑے آپ ءچ گُمراہی دے لائق سزا پاتی۔ تے جِینویں اُنہاں خُدا کُوں جاننڑاں پسند نہ کیتا، اِینویں ای خُدا وی اُنہاں کُوں گندے خیالاں دے حوالے کر ڈِتا جو نامناسب کم کرݨ۔ او ہر طرحاں دی ناراستی، بدی، لالچ، ناانصافی، حسد، قتل، جھیڑے، فریب تے بُغض نال بھریج گئے۔ او چغلی کرݨ آلے، کُوڑے اِلزام لاوݨ آلے، خُدا تُوں نفرت کرݨ آلے، گُستاخ، مغرُور تے شیخی باز، بدی دے بانی، آپنڑے ماء پِیُو دے نافرمان، بیوقُوف، بے وفا، بے محبت تے بے رحم تھی گئے۔ بھانویں او خُدا دا ایہ حُکم جانڑدے ہِن جو ایجھے کم کرݨ آلے موت دی سزا دے حقدار ہِن، وَل وی نہ صرف او آپ اِیہو کم کریندے ہِن بلکہ ایجھا کرݨ آلے کُوں چنگا سمجھدے ہِن۔ اِیں واسطے اِلزام لاوݨ آلے، تُوں جیہڑا کوئی وی ہونویں تیڈے کولھ کوئی بہانہ نئیں۔ کیوں جو جڈاں تُوں ڈُوجھے اُتے اِلزام لیندیں تے خود اُوہو کم کریندیں تاں اِینویں آپنڑے آپ کُوں مُجرم بنڑیندیں۔ اساں جانڑدے ہیں جو خُدا ایجھے کم کرݨ آلے دی عدالت حق دے مطابق کریندے۔ اِنسان! تُوں جیہڑا ایجھے کم کرݨ آلیاں اُتے اِلزام لیندیں تے خود اُوہو کم کریندیں، کیا ایہ سمجھدیں جو تُوں خُدا دی عدالت کنُوں بچ ویسیں؟ کیا تُوں خُدا دی مہربانی، برداشت تے صبر کُوں نا چیز سمجھدیں؟ تے کیا ایہ نئیں جانڑدا جو خُدا تیکُوں توبہ کرݨ دو گِھن ونجنڑ کیتے تیڈے اُتے مہربانی کریندے؟ پر تُوں آپنڑے سخت تے توبہ نہ کرݨ آلے دل دے سببّوں آپنڑے کیتے غضب جمع کریندا پِیا ہیں، خُدا دے غضب دے ڈینہہ کیتے جڈاں خُدا دا سچا اِنصاف ظاہر تھیسی۔ او ”ہر بندے کُوں اُوندے اعمال دے مطابق بدلہ ڈیسی ۔“ جیہڑے نیک کماں ءچ قائم رہ تے جلال، عزت تے ختم نہ ہووݨ آلی زندگی دے طالب ہِن اُنہاں کُوں ہمیشاں دی زندگی ڈیسی۔ پر جیہڑے خود غرض ہِن تے سچائی کُوں چھوڑ تے بُرائی دے پِچُھوں چلدے ہِن اُنہاں اُتے قہر تے عذاب نازل تھیسی۔ ہر اِنسان اُتے جیہڑا بُرائی کریندے، مُصیبت تے پریشانی آسی، پہلے یہُودی اُتے ولا غیریہُودی اُتے۔ پر ہر اُوں بندے کُوں جیہڑا نیکی کریندے جلال، عزت تے سکون مِلسی، پہلے یہُودی کُوں ولا غیریہُودی کُوں۔ کیوں جو خُدا کہیں دی طرفداری نئیں کریندا۔ جیہڑے لوکاں کُوں شریعت نئیں مِلی تے گُناہ کریندے ہِن، او شریعت دے بغیر ہلاک تھیسن تے او جِنہاں کولھ شریعت ہے تے گُناہ کریندے ہِن، اُنہاں کُوں شریعت دے مطابق سزا مِلسی۔ کیوں جو شریعت کُوں سُنڑݨ آلے خُدا دی نِگاہ ءچ راستباز نئیں ہوندے بلکہ شریعت اُتے عمل کرݨ آلے ای راستباز کھڑائے ویسن۔ ہاں او قوماں جِنہاں کولھ شریعت نئیں جڈاں او فطرتی طور تے شریعت دے مطابق کم کریندیاں ہِن تاں شریعت نہ ہوندے ہوئے وی او خود آپنڑے کیتے ہِک شریعت ہِن۔ او ایہ ظاہر کریندے ہِن جو شریعت دے حُکم اُنہاں دے دِلاں اُتے لِکھے ہوئے ہِن تے اُنہاں دا ضمیر وی اِیں گالھ دی گواہی ڈیندا ہے، کیوں جو اُنہاں دے خیال کہیں ویلے اُنہاں اُتے اِلزام لیندن تے کہیں ویلے اُنہاں کُوں بےقصُور آدھن۔ ایہ اُوں ڈینہہ تھیسی جڈاں خُدا یسُوع مسیح دے وسیلے اِنساناں دیاں لُکیاں گالھیں دا اِنصاف کریسی جِینویں مَیں خوشخبری سُنڑیندا ہاں۔ پر جے تُوں یہُودی اکھویندیں تے شریعت اُتے بھروسہ کریندیں تے خُدا اُتے فخر کریندیں، تے اُوندی مرضی جانڑدیں تے شریعت دی تعلیم گِھن تے چنگے گالھیں پسند کریندیں، تے جے تیکُوں اِیں گالھ اُتے وی یقین ہے جو تُوں اندھیاں دا راہنما تے اندھاریاں ءچ راہنڑ آلیاں کیتے روشنی ہیں، تے احمقاں کُوں سِکھاوݨ آلا تے بالاں دا اُستاد ہیں کیوں جو تیڈے کولھ شریعت ءچ علم تے حق دا نمونہ ہے، تاں وَل تُوں جیہڑا بئیاں کُوں سکھیندیں، آپنڑے آپ کُوں کیوں نئیں سکھیندا؟ تُوں جیہڑا وعظ کریندیں جو چوری نہ کر، خود کیوں چوری کریندیں؟ تُوں جیہڑا آدھیں جو زِنا نہ کر، خود کیوں زِنا کریندیں؟ تُوں جیہڑا بُتاں کنُوں نفرت کریندیں، خود بُت خانیاں کُوں کیوں لُٹ گِھندیں؟ تُوں جیہڑا شریعت اُتے فخر کریندیں، تُوں خود کیوں شریعت دی نافرمانی کر تے خُدا دی بے عزتی کریندیں؟ اِیہو وجہ ہے جو پاک کلام ءچ لِکھیا ہے جو ”تُہاڈی وجہ کنُوں غیر قوماں ءچ خُدا دے ناں دی توہین کیتی ویندی ہے ۔“ ختنہ دا فائدہ تاں ہے پر شرط ایہ ہے جو تُوں شریعت اُتے عمل کریں۔ پر جے تُوں شریعت دی نافرمانی کریندیں تاں تُوں اُنہاں دے برابر ہیں جیہڑے ختنہ نئیں کریندے۔ جے او بندہ جِیندا ختنہ نہ تھیّا ہووے، شریعت دے حُکماں اُتے عمل کریندے تاں کیا او ختنہ تھئے ہوئے لوکاں دے برابر نہ سمجھیا ویسی؟ بلکہ کیا او جِیندا ختنہ نہ تھیّا ہووے پر شریعت اُتے عمل کریندے، تیکُوں جِیندا ختنہ تھیّا تے جیندے کولھ شریعت ہے، پر اُوندے اُتے عمل نئیں کریندا، قصُوروار نہ کھڑیسی؟ کیوں جو او یہُودی نئیں جیہڑا ظاہری طور تے ہووے تے نہ ای او ختنہ ہے جیہڑا ظاہری تے جِسمانی ہے۔ بلکہ یہُودی اُوہو ہے جیہڑا دِلی طور تے یہُودی ہے تے ختنہ اُوہو ہے جیہڑا دل دا تے رُوحانی ہے نہ جو لِکھے ہوئے حُکم دا۔ ایجھے اِنسان دی تعریف آدمیاں دی طرفوں نئیں بلکہ خُدا دی طرفوں ہوندی ہے۔ بس یہُودی ہووݨ دا کیا فائدہ ہے تے ختنہ ءچ کیا خُوبی ہے؟ ہر لحاظ نال بہُوں سارا ہے۔ خاص طور تے ایہ جو خُدا دا کلام اُنہاں دے سپُرد کیتا گئے۔ جے کُجھ بے وفا تھی گئے تاں کیا تھیّا؟ کیا اُنہاں دی بے وفائی دے سببّوں خُدا وفا داری کرݨ چھوڑ ڈیسی؟ ہرگز نئیں۔ بلکہ خُدا سچا ہے بھانویں ہر بندہ کُوڑا ہے۔ جِینویں پاک کلام ءچ لِکھیا ہے جو ”تُوں آپنڑے گالھیں ءچ سچا ثابت ہوسیں تے آپنڑے مقدمے ءچ جیت سیں ۔“ پر ہُنڑ مَیں ہِک گالھ اِنسان وانگُوں اکھیندا ہاں۔ جے ساڈی بدی خُدا دی راستبازی ظاہر کریندی ہے تاں اساں کیا آکھوں؟ کیا ایہ جو خُدا ساڈے اُتے غضب نازل کر تے بے اِنصافی کریندے؟ ہرگز نئیں۔ جے اِینویں تھیوے تاں خُدا دُنیا دا اِنصاف کِینویں کریسی؟ پر کوئی شاید ایہ آکھے جو ”جے میڈے کُوڑ دی وجہ کنُوں خُدا دی سچائی زیادہ ظاہر تھی تے اُوندا جلال ودھیندی ہے تاں وَل مَیں کیوں قصُوروار سمجھیا ویندا ہاں؟“ کیوں نہ ایہ آکھوں جو ”آؤ اساں بُرائی کرُوں تاں جو بھلائی تھیوے؟“ کُجھ لوک ساڈے اُتے اِلزام لیندے ہِن جو ساڈی تعلیم اِیہو ہے۔ پر ایجھے لوکاں دا مُجرم کھڑایا ونجنڑاں اِنصاف ہے۔ بس اِیندا نتیجہ کیا ہے؟ کیا اساں یہُودی اُنہاں کنُوں چنگے ہیں؟ اصلُوں نئیں۔ اساں تاں پہلے ای آکھ ڈِتے جو یہُودی تے غیریہُودی سارے دے سارے گُناہ دے قبضے ءچ ہِن۔ جِینویں لِکھیا ہے جو ”کوئی نیک نئیں۔ ہِک وی نئیں۔ کوئی سمجھدار نئیں۔ کوئی خُدا دا طالب نئیں۔ سارے گُمراہ تھی گئے ہِن، یکے کہیں کم دے نئیں ریہے۔ بھلائی کرݨ آلا کوئی نئیں۔ ہِک وی نئیں ۔ اُنہاں دا گَل کُھلی قبر وانگُوں ہے۔ اُنہاں دی زبان فریب دے گالھیں کریندی ہے ۔ اُنہاں دے ہونٹاں اُتے نانگاں دا زہر ہے ۔ اُنہاں دا مُنہ لعنت تے کڑواہٹ کنُوں بھریا ہے ۔ اُنہاں دے پیر قتل کرݨ کیتے جلدی کریندن۔ اُنہاں دے رستیاں ءچ تباہی تے مُصیبت ہے۔ او امن دے رستے کنُوں واقف نئیں ۔ اُنہاں دے اکھیں ءچ خُدا دا ڈر کائنی ۔“ بس اساں جانڑدے ہیں جو شریعت جیہڑا کُجھ آدھی ہے، اُنہاں کُوں آدھی ہے جیہڑے شریعت دے پابند ہِن، تاں جو ہر مُنہ بند تھی ونجے تے ساری دُنیا خُدا دے سامنڑے سزا دی حقدار ہووے۔ کیوں جو شریعت دے کم کر تے کوئی بندہ خُدا دی نِگاہ ءچ راستباز نئیں کھڑ سگدا بلکہ شریعت دے وسیلے گُناہ دی پچھاݨ تھیندی ہے۔ پر ہُنڑ خُدا شریعت دے بغیر راستباز کھڑاوݨ دی ہِک راہ ظاہر کیتی ہے جیندی گواہی توریت تے نبیاں تُوں تھیندی ہے۔ یعنی خُدا دی او راستبازی جیہڑی یسُوع مسیح اُتے اِیمان گِھن آوݨ نال سبھ اِیمانداراں کُوں مِلدی ہے۔ یہُودیاں تے غیر یہُودیاں ءچ کوئی فرق نئیں، کیوں جو ساریاں گُناہ کیتا تے خُدا دے جلال کنُوں محروم ہِن۔ پر خُدا دے فضل دے سببّوں مُفت راستباز کھڑائے ویندے ہِن، اُوں مخلصی دے ذریعے جیہڑی یسُوع مسیح دے وسیلہ مِلدی ہے۔ خُدا اُونکُوں مقرر کیتا جو او آپنڑے خون دے سببّوں ایجھا کفارہ بنڑ ونجے جیہڑا اِیمان گِھن آوݨ آلے کیتے فائدہ مند ہووے۔ ایہ خُدا آپنڑی راستبازی ظاہر کرݨ کیتے کیتا، کیوں جو اُوں بہُوں صبر تے برداشت نال اُنہاں گُناہاں دی سزا نہ ڈِتی جیہڑے ماضی ءچ تھئے ہَن۔ بلکہ اِیں زمانہ ءچ وی آپنڑی راستبازی ظاہر کرݨ کیتے، کیوں جو او خود وی عادل ہے تے ہر بندے کُوں جیہڑا یسُوع اُتے اِیمان گِھن آندے، راستباز کھڑاوݨ آلا ہے۔ بس فخر کِتھاں ریہا؟ اِیندی گُنجائش ای نہ ریہی۔ کیہڑی شریعت دی وجہ تُوں؟ کیا اعمال دے وسیلے نال؟ نئیں، بلکہ اِیمان دی شریعت دے وسیلے نال۔ اِیں واسطے اساں اِیں نتیجے اُتے پُجدے ہیں جو اِنسان شریعت اُتے عمل کرݨ نال نئیں بلکہ اِیمان گِھن آوݨ دے سببّوں راستباز کھڑایا ویندا ہے۔ کیا خُدا صرف یہُودیاں دا خُدا ہے؟ کیا او غیریہُودیاں دا نئیں؟ بے شک او غیریہُودیاں دا وی ہے۔ کیوں جو ہِک ای خُدا ہے جیہڑا ختنہ تھئے ہوئیاں تے ختنہ نہ تھئے ہوئے لوکاں، ڈُوہائیں کُوں اُنہاں دے اِیمان دے وسیلے نال راستباز کھڑیسی۔ کیا اساں شریعت کُوں اِیمان دے سببّوں منسوخ کریندے ہیں؟ ہرگز نئیں بلکہ شریعت کُوں قائم رکھیندے ہیں۔ اساں ابرہام دے بارے ءچ جیہڑا جِسمانی لحاظ نال ساڈا پِیُو ہے، کیا آکھوں؟ اِیندے بارے ءچ اُونکُوں کیا پتہ لگیا؟ جے او آپنڑے اعمال دی وجہ کنُوں راستباز کھڑدا تاں اُونکُوں فخر کرݨ دا حق ہوندا پر خُدا دے حضُور ءچ نئیں۔ کیوں جو خُدا دا کلام آدھے جو ”ابرہام خُدا اُتے اِیمان گِھن آیا تے ایہ اُوندے کیتے راستبازی شمار کیتا گِیا ۔“ کم کرݨ آلے دی مزدُوری کوئی تحفہ نئیں بلکہ اُوندا حق سمجھی ویندی ہے۔ پر جیہڑا بندہ کم نئیں کریندا بلکہ بدکاراں کُوں راستباز بنڑاوݨ آلے خُدا اُتے اِیمان رکھیندے، اُوندا اِیمان اُوندے کیتے راستبازی شمار کیتا ویندے۔ بس جئیں بندے کُوں خُدا اُوندے اعمال دے بغیر راستباز آدھے، داؤد وی اُوں بندے کُوں اِینویں مُبارک اکھیندے، جو ”مُبارک او ہِن جِنہاں دیاں بدکاریاں بخش ڈِتیاں گئیاں، تے جِنہاں دے گُناہاں اُتے پڑدہ پاتا گِیا۔ مُبارک ہے او بندہ جیندے گُناہاں دا رب حساب نہ کریسی ۔“ بس کیا ایہ مُبارک بادی صرف ختنہ تھئے ہوئیاں کیتے ای ہے یا ختنہ نہ تھئے ہوئیاں کیتے وی ہے؟ کیوں جو اساں آدھے ہیں جو ابرہام دا اِیمان اُوندے کیتے راستبازی شمار کیتا گِیا۔ پر او کیہڑی حالت ءچ راستباز شمار کیتا گِیا؟ ختنہ کرواوݨ تُوں بعد ءچ یا پہلے؟ ایہ اُوندے ختنہ کرواوݨ تُوں پہلے دی گالھ ہئی نہ جو بعد دی۔ تے اُونکُوں ختنہ دا نشان اُوں راستبازی اُتے مُہر دے طور تے مِلیا، جیہڑی اُونکُوں ختنہ کرواوݨ تُوں پہلے اِیمان رکھنڑ دے سببّوں مِلی۔ اِینویں او اُنہاں ساریاں دا پِیُو ہے جیہڑے اِیمان گِھن آندے ہِن تے بھانویں اُنہاں دا ختنہ نئیں تھیّا، راستبازاں ءچ شمار کیتے ویندے ہِن۔ تے او اُنہاں ختنہ کرواوݨ آلیاں دا وی پِیُو ہے جِنہاں نہ صرف ختنہ کروایا بلکہ ساڈے پِیُو ابرہام دے اُوں اِیمان دی وی پیروی کریندے ہِن جیہڑا اُونکُوں ختنہ کرواوݨ تُوں پہلے حاصل ہا۔ کیوں جو خُدا ابرہام تے اُوندی نسل نال وعدہ کیتا ہا جو او دُنیا دے وارث ہوسن، پر ایہ وعدہ شریعت دے سببّوں نہ کیتا گِیا ہا بلکہ اُوں راستبازی دے سببّوں جیہڑی اِیمان دے وسیلے نال مِلدی ہے۔ کیوں جو جے صرف شریعت آلے ای دُنیا دے وارث ہووݨ تاں اِیمان بے فائدہ ہوندا تے خُدا دا وعدہ وی بے مقصد ہوندا۔ کیوں جو شریعت غضب گِھن آندی ہے تے جِتھاں شریعت نئیں اُتھاں حُکم عدُولی وی نئیں ۔ اِیں واسطے ایہ وعدہ اِیمان دے سببّوں مِلدے تاں جو فضل دے طور تے ہووے تے ابرہام دی یکی نسل کیتے ہووے، صرف اُنہاں کیتے نئیں جیہڑے شریعت دے مننڑ آلے ہِن بلکہ اُنہاں کیتے وی جیہڑے ابرہام وانگُوں اِیمان رکھیندے ہِن۔ کیوں جو ابرہام اساں ساریاں دا پِیُو ہے، جِینویں لِکھیا ہے جو ”مَیں تیکُوں بہُوں ساریاں قوماں دا پِیُو مقرر کیتے ۔“ ابرہام خُدا دی نِگاہ ءچ ساڈا پِیُو ہے جیندے اُتے او اِیمان رکھیندا ہا تے جیہڑا مُردیاں کُوں زندہ کریندے تے غیر موجود چیزاں کُوں اِینویں سڈ گِھندے جِینویں او موجود ہِن۔ ابرہام نا اُمیدی ءچ وی اِیمان رکھیندا ہا تے بہُوں ساریاں قوماں دا پِیُو بنڑیا جِینویں جو اُونکُوں آکھیا گِیا ہا جو ”تیڈی نسل اِینویں ای ہوسی ۔“ ابرہام تقریباً سو سال دا ہا تے جانڑدا ہا جو اُوندا جسم مُردے آلی کار ہے تے سارہ دا رِحم وی مُردے آلی کار ہے، وَل وی اُوندا اِیمان کمزور نہ تھیّا۔ اُوں اِیمان دی کمی دے سببّوں خُدا دے وعدہ اُتے شک نہ کیتا بلکہ اِیمان ءچ مضبوط تھی تے خُدا دی تمجید کیتی۔ اُونکُوں پکا یقین ہا جو جِیں خُدا وعدہ کیتے او اُونکُوں پُورا کرݨ دی وی قُدرت رکھیندے۔ اِیں واسطے ابرہام دا اِیمان اُوندے کیتے راستبازی شمار کیتا گِیا۔ ایہ گالھ جو ”اِیمان اُوندے کیتے راستبازی شمار کیتا گِیا،“ صرف اُوندے کیتے نئیں لِکھیا گِیا بلکہ ساڈے کیتے وی جِنہاں کیتے اِیمان راستبازی شمار کیتا ویسی۔ کیوں جو اساں اُوں خُدا اُتے اِیمان گِھن آئے ہیں جئیں ساڈے خُداوند یسُوع کُوں مُردیاں ءچوں زندہ کیتا۔ او ساڈے گُناہاں کیتے موت دے حوالے کیتا گِیا تے ساکُوں راستباز بنڑاوݨ کیتے زندہ کیتا گِیا۔ بس جِیں ویلے اساں اِیمان دی وجہ کنُوں راستباز کھڑائے گئے تاں خُداوند یسُوع المسیح دے وسیلے ساڈی خُدا دے نال صُلح ہے۔ یسُوع دے وسیلے ساکُوں اِیمان دے سببّوں او فضل حاصل تھیّا جیندے اُتے اساں قائم وی ہیں، تے اساں خُدا دے جلال دی اُمید اُتے خوش ہیں۔ تے صرف اِیہو نئیں بلکہ اساں مُصیبتاں ءچ خوش تھیندے ہیں کیوں جو اساں جانڑدے ہیں جو مُصیبت نال صبر پیدا تھیندے۔ تے صبر نال مُستقل مزاجی تے مُستقل مزاجی نال اُمید پیدا تھیندی ہے۔ ایجھی اُمید ساکُوں مایوس نئیں کریندی کیوں جو رُوح القُدس جیہڑا ساکُوں بخشیا گِیا ہے اُوں ساڈے دِلاں کُوں خُدا دی محبت نال بھر ڈِتے۔ کیوں جو جِیں ویلے اساں سارے بے وس ہسے تاں مسیح عین موقع تے اساں بدکاراں کیتے آپنڑی جان ڈِتی۔ کہیں راستباز دی خاطر وی کوئی مُشکل نال آپنڑی جان ڈیسی پر شاید کوئی کہیں نیک بندے کیتے آپنڑی جان ڈیوݨ دی جُرأت کرے۔ پر خُدا ساڈے اُتے آپنڑی محبت اِینویں ظاہر کیتی جو جِیں ویلے اساں گُنہگار ای ہسے تاں مسیح ساڈی خاطر آپنڑی جان ڈِتی۔ جڈاں مسیح دے خون دے وسیلے نال اساں راستباز کھڑائے گئے تاں ایہ گالھ زیادہ یقینی ہے جو اساں اُوندے وسیلے خُدا دے عذاب تُوں بچ ویسوں۔ کیوں جو جِیں ویلے خُدا دے دُشمنڑ ہووݨ دے باوجود اُوندے پوتر دی موت دے وسیلے ساڈی اُوندے نال صُلح تھی گئی تاں صُلح تھیوݨ تُوں بعد اساں اُوندی زندگی دے سببّوں ضرور ای بچ ویسوں۔ تے نہ صرف ایہ بلکہ اساں آپنڑے خُداوند یسُوع المسیح دے ذریعے خُدا اُتے فخر کریندے ہیں جیندے وسیلے ساڈی خُدا نال صُلح تھی گئی ہے۔ بس جِینویں ہِک بندے دے سببّوں گُناہ دُنیا ءچ آیا تے گُناہ دے سببّوں موت آ گئی تے اِینویں موت سارے اِنساناں ءچ پھیل گئی کیوں جو ساریاں گُناہ کیتا۔ شریعت دے ڈِتے ونجنڑ کنُوں پہلے دُنیا ءچ گُناہ تاں ہا پر جِتھاں شریعت نئیں ہوندی اُتھاں گُناہ دا حساب وی نئیں کیتا ویندا۔ وَل وی آدم کنُوں مُوسیٰ تئیں موت اُنہاں اُتے وی حکُومت کیتی، جِنہاں آدم دی نافرمانی وانگُوں گُناہ نہ کیتا، جیہڑا آوݨ آلے مسیح دو اِشارہ ہا ۔ پر گُناہ دے اثر تے فضل دی نعمت دے اثر ءچ بہُوں فرق ہے۔ کیوں جو ہِک بندے دے گُناہ دے سببّوں بہُوں سارے اِنسان مر گئے پر ہِک بندے یعنی یسُوع مسیح دے فضل دے سببّوں بہُوں سارے اِنساناں کُوں خُدا دا فضل تے اُوندی نعمت مِلی ہے۔ تے ہِک بندے دے گُناہ دے انجام تے خُدا دی نعمت ءچ بہُوں فرق ہے کیوں جو ہِک گُناہ دا انجام سزا دے حُکم دی شکل ءچ سامنڑے آیا۔ پر بہُوں سارے گُناہاں تُوں بعد وی فضل دا انجام لوکاں دے راستباز کھڑائے ونجنڑ دی شکل ءچ سامنڑے آیا۔ کیوں جو جڈاں ہِک بندے دے گُناہ دی وجہ کنُوں موت ساریاں اُتے حکُومت کیتی تاں جیہڑے لوک خُدا دے بہُوں زیادہ فضل تے راستبازی دی نعمت حاصل کریندے ہِن، او وی ہِک بندے یعنی یسُوع مسیح دے وسیلے نال ہمیشاں دی زندگی ءچ ضرور حکُومت کریسن۔ اِیں واسطے جِینویں ہِک بندے دے گُناہ دے سببّوں سبھ آدمیاں کیتے موت دی سزا دا حُکم تھیّا، اُونویں ای راستبازی دے ہِکے کم دے سببّوں سارے آدمی راستباز کھڑ تے زندگی پیندن ۔ کیوں جو جِینویں ہِک بندے دی نافرمانی دے سببّوں بہُوں سارے لوک گُنہگار بنڑ گئے، اُونویں ای ہِک بندے دی فرمانبرداری دے سببّوں بہُوں سارے لوک راستباز کھڑائے ویسن۔ بعد ءچ شریعت آ گئی تاں جو گُناہ زیادہ تھی ونجے پر جِتھاں گُناہ زیادہ تھیّا اُتھاں فضل اُوں کنُوں وی زیادہ تھیّا۔ تاں جو جِینویں گُناہ موت دے ذریعے حکُومت کیتی، اُونویں ای خُدا دا فضل وی راستبازی دے ذریعے حکُومت کریسی تے ساڈے خُداوند یسُوع مسیح دے وسیلے نال ہمیشاں دی زندگی ڈیسی۔ بس اساں کیا آکھوں؟ کیا گُناہ کریندے رہ ونجُوں تاں جو ساڈے اُتے فضل زیادہ تھیوے؟ ہرگز نئیں! اساں جیہڑے گُناہ دے اعتبار کنُوں مر گئے ہیں تاں ہُنڑ کِینویں گُناہ آلی زندگی گُزار سگدے ہیں؟ کیا تُساں نئیں جانڑدے جو ساڈے ءچوں جیہڑے لوکاں مسیح یسُوع ءچ شامل تھیوݨ دا بپتسمہ گِھدے تاں اُوندی موت ءچ شامل تھیوݨ دا بپتسمہ گِھدے؟ بس بپتسمہ دے وسیلہ اساں اُوندی موت ءچ شامل تھی تے اُوندے نال دفن تھئے تاں جو جِینویں مسیح اسمانی باپ دی جلالی قُدرت دے وسیلے نال مُردیاں ءچوں زندہ کیتا گِیا، اُونویں ای اساں وی نوِیں زندگی گُزاروں۔ کیوں جو جڈاں اساں مسیح دی موت ءچ شامل تھی گئے ہیں، تاں بے شک اُوندے مُردیاں ءچوں زندہ تھیوݨ ءچ وی شامل تھی ویسوں۔ تے اساں جانڑدے ہیں جو ساڈی پُرانڑی اِنسانیت مسیح دے نال صلیب اُتے چڑھائی گئی تاں جو ساڈے بدن ءچوں گُناہ دی طاقت ختم تھی ونجے تے اساں اگُوں تے گُناہ دی غُلامی ءچ نہ راہوں۔ کیوں جو جیہڑا مر گِیا او گُناہ تُوں وی ازاد تھی گِیا۔ جڈاں اساں مسیح دے نال مر گئے تاں ساکُوں یقین ہے جو اُوندے نال زندہ وی تھی ویسوں۔ کیوں جو ساکُوں پتا ہے جو جڈاں مسیح مُردیاں ءچوں زندہ کیتا گِیا تاں ولا کڈھائیں نہ مرسی۔ موت دا اُوندے اُتے کوئی اِختیار نئیں۔ جِیں ویلے او مویا تاں ہمیشاں کیتے گُناہ دی طاقت کُوں ختم کرݨ کیتے مویا، پر ہُنڑ جڈاں او زندہ ہے، تاں خُدا دے جلال کیتے زندہ ہے۔ اِینویں ای تُساں وی آپنڑے آپ کُوں گُناہ دے لحاظ نال تاں مُردہ، پر خُدا دے جلال کیتے یسُوع مسیح ءچ زندہ سمجھو۔ بس گُناہ کُوں آپنڑے فانی جِسم اُتے حکُومت نہ کرݨ ڈیؤ تاں جو او تُہاکُوں آپنڑی خواہشاں دے تابع نہ رکھ سگے۔ آپنڑے جِسم دے انگاں کُوں بدی دے ہتھیار بنڑݨ کیتے گُناہ دے سپُرد نہ کرو بلکہ آپنڑے آپ کُوں مُردیاں ءچوں زندہ سمجھ تے خُدا دی خدمت کیتے پیش کرو تے آپنڑے جِسم دے انگاں کُوں راستبازی دے ہتھیار بنڑݨ کیتے خُدا دے سپُرد کرو۔ کیوں جو تُساں شریعت دے ماتحت نئیں بلکہ فضل دے ماتحت ہیوے، اِیں واسطے گُناہ دا تُہاڈے اُتے اِختیار نہ ہوسی۔ وَل کیا کرُوں؟ کیا اساں اِیں واسطے گُناہ کریندے راہوں جو اساں شریعت دے ماتحت نئیں بلکہ فضل دے ماتحت ہیں؟ ہرگز نئیں۔ کیا تُساں نئیں جانڑدے جو تُساں جیندی فرمانبرداری کرݨ کیتے آپنڑے آپ کُوں غُلاماں وانگُوں سپُرد کر ڈیندے ہیوے، اُوندے ای غُلام ہیوے؟ یا تُساں گُناہ دے غُلام ہیوے، جِیندا انجام موت ہے، یا خُدا دے، جِیندا انجام راستبازی ہے۔ پر خُدا دا شُکر ہے جو بےشک پہلے تُساں گُناہ دے غُلام ہَوے پر ہُنڑ دل نال اُوں تعلیم دے تابع تھی گئے ہیوے جیہڑی تُہاڈے سپُرد کیتی گئی۔ تُساں گُناہ دی غُلامی کنُوں آزاد تھی تے راستبازی دے غُلام تھی گئے۔ مَیں تُہاڈی اِنسانی کمزوری دی وجہ کنُوں، غُلامی دی ایہ مثال ڈیندا پِیا ہاں۔ جِینویں تُساں آپنڑے انگاں کُوں بدکاری کرݨ کیتے ناپاکی تے بدکاری دی غُلامی ءچ ڈے ڈِتا ہا، ہُنڑ آپنڑے انگاں کُوں پاک تھیوݨ کیتے راستبازی دی غُلامی ءچ ڈے ڈیؤ۔ جِیں ویلے تُساں گُناہ دے غُلام ہَوے تاں راستبازی کنُوں آزاد ہَوے۔ پر جیہڑے گالھیں کنُوں تُساں ہُنڑ شرمندہ ہیوے، اُنہاں کنُوں تُہاکُوں کیا مِلیا؟ کیوں جو اُنہاں دا انجام موت ہے۔ پر ہُنڑ گُناہ دی غُلامی کنُوں آزاد تھی تے خُدا دی غُلامی ءچ آ گئے ہیوے۔ تے تُہاکُوں اِیندا پھل مِلدا پئے جئیں تُوں پاکیزگی حاصل تھیندی ہے تے جِیندا انجام ہمیشاں دی زندگی ہے۔ کیوں جو گُناہ دی مزدُوری موت ہے پر خُدا دی نعمت ساڈے خُداوند یسُوع مسیح ءچ ہمیشاں دی زندگی ہے۔ بِھراؤ! کیا تُساں نئیں جانڑدے (مَیں اُنہاں کُوں آدھا ہاں جیہڑے شریعت کنُوں واقف ہِن) جو اِنسان صرف اُوں ویلے تئیں شریعت دے ماتحت ہے، جئیں تئیں او زندہ ہے؟ مثال دے طور تے ہِک شادی شدہ عورت شریعت دے مطابق پئے دے زندہ ہووݨ تئیں اُوندی پابند ہوندی ہے ، پر جے اُوندا پایا مر ونجے تاں او شادی آلے قانُون تُوں آزاد تھی ویندی ہے۔ جے او آپنڑے پئے دے جیندے جی کہیں بئے بندے دی تھی ونجے تاں زانیہ اکھویسی۔ پر جے اُوندا پایا مر ونجے تاں او اِیں شریعت کنُوں آزاد تھی ویندی ہے۔ اُوں حالت ءچ او کہیں بئے بندے دی تھی وی ونجے تاں او زانیہ نہ اکھویسی۔ بِھراؤ! تُساں وی مسیح دے بدن دے وسیلے نال شریعت دے اعتبار نال مر گئے ہیوے تاں جو کہیں بئے دے تھی ونجو یعنی مسیح دے جیہڑا مُردیاں ءچوں زندہ کیتا گِیا تاں جو تُساں خُدا کیتے پھل گِھن آؤ۔ جِیں ویلے اساں آپنڑی جِسمانی فطرت دے مطابق زندگی گُزریندے ہسے تاں شریعت گُناہ دیاں خواہشاں پیدا کریندی ہئی۔ تے ایہ خواہشاں ساڈے اَنگاں اُتے اثر کریندیاں ہَن تے ایجھے پھل پیدا کریندیاں ہَن جِنہاں دا انجام موت ہے۔ پر ہُنڑ اساں مر تے شریعت دی قید ءچوں چُھٹ گئے ہیں۔ تے اساں لِکھی ہوئی شریعت دے پُرانڑے طریقہ دے مطابق نئیں بلکہ رُوح القُدس دے نویں طریقہ دے مطابق خدمت کریندے ہیں۔ بس اساں کیا آکھوں؟ کیا شریعت گُناہ ہے؟ ہرگز نئیں بلکہ جے شریعت نہ ہوندی تاں میکُوں گُناہ دا پتہ نہ لگدا۔ مثلاً جے شریعت ایہ نہ آدھی جو ”تُوں لالچ نہ کر “ تاں میکُوں لالچ دا پتہ نہ چلدا۔ پر گُناہ اِیں حُکم کنُوں فائدہ چا تے میڈے اندر ہر طرحاں دا لالچ پیدا کر ڈِتا کیوں جو شریعت دے بغیر گُناہ مُردہ ہے۔ ہِک وقت ہا جو مَیں شریعت دے بغیر زندگی گُزریندا ہم پر جِیں ویلے حُکم آیا تاں گُناہ زندہ تھی گِیا تے مَیں مر گِیا۔ تے جیہڑے حُکم دا مقصد زندگی ڈیوݨ ہا اُوہو میڈے کیتے موت دا سبب بنڑ گِیا۔ کیوں جو گُناہ اِیں حُکم کنُوں فائدہ چا تے میکُوں ورغلایا تے اِیندے ذریعے میکُوں مار سٹیا۔ بس شریعت پاک ہے تے اُوندا ہر حُکم وی پاک، راست تے چنگا ہے۔ تاں کیا اُوہو چیز جیہڑی چنگی ہے میڈے کیتے موت بنڑ گئی؟ ہرگز نئیں بلکہ گُناہ ہِک چنگی چیز کنُوں فائدہ چا تے میڈی موت دی وجہ بنڑ گِیا تاں جو گُناہ دی اصلیّت ظاہر تھی ونجے تے حُکم دے ذریعے گُناہ حد تُوں زیادہ مکرُوہ معلوم تھیوے۔ اساں جانڑدے ہیں جو شریعت ہِک رُوحانی چیز ہے پر مَیں جِسمانی ہاں تے گُناہ دی غُلامی ءچ وِک گِیا ہاں۔ مَیں نئیں سمجھدا جو کیا کریندا ہاں، کیوں جو جیہڑا کُجھ کرݨ چاہندا ہاں، اُونکُوں تاں نئیں کریندا بلکہ اُوہو کریندا ہاں، جئیں تُوں میکُوں نفرت ہے۔ تے جے او کریندا ہاں جِینکُوں مَیں کرݨ نئیں چاہندا تاں مَیں منیندا ہاں جو شریعت چنگی ہے۔ تاں وَل ایہ کرݨ آلا مَیں نئیں بلکہ او گُناہ ہے جیہڑا میڈے ءچ وسدے۔ مَیں جانڑدا ہاں جو میڈے ءچ یعنی میڈے جِسم ءچ تاں کوئی نیکی نئیں وسدی۔ بھانویں نیکی کرݨ دا اِرادہ میڈے ءچ موجود ہے، پر مَیں اِیں اِرادے اُتے عمل نئیں کر سگدا۔ جیہڑی نیکی کرݨ چاہندا ہاں اُونکُوں تاں نئیں کریندا پر او بُرائی جِینکُوں کرݨ نئیں چاہندا اُونکُوں کر گِھندا ہاں۔ بس جے مَیں او کریندا ہاں جِینکُوں کرݨ نئیں چاہندا تاں کرݨ آلا مَیں نہ ریہا بلکہ گُناہ ہے جیہڑا میڈے اندر وسدے۔ بس مَیں ایجھا قانُون پَیندا ہاں جو جِیں ویلے مَیں نیکی کرݨ دا اِرادہ کریندا ہاں تاں بُرائی میڈے کولھ آ موجود تھیندی ہے۔ کیوں جو دِلُوں تاں مَیں خُدا دی شریعت تُوں بہُوں خوش ہاں، پر میکُوں آپنڑے انگاں ءچ ہِک بئی شریعت نظر آندی ہے جیہڑی میڈی عقل دی شریعت نال لڑ تے میکُوں گُناہ دی اُوں شریعت دا قیدی بنڑا ڈیندی ہے جیہڑی میڈے انگاں ءچ کم کریندی ہے۔ ہائے! مَیں کیجھا بدبخت اِنسان ہاں۔ اِیں موت دے بدن کنُوں میکُوں کوݨ چُھڑویسی؟ خُدا دا شُکر ہے جو او ساڈے خُداوند یسُوع مسیح دے وسیلے میکُوں چُھڑویسی۔ بس میڈا حال ایہ ہے جو مَیں آپنڑی عقل کنُوں خُدا دی شریعت دا تے جِسم کنُوں گُناہ دی شریعت دا غُلام ہاں۔ اِیں واسطے جیہڑے مسیح یسُوع ءچ ہِن، ہُنڑ اُنہاں اُتے سزا دا حُکم نئیں۔ کیوں جو رُوح القُدس دی زندگی بخشنڑ آلی قوت تُہاکُوں مسیح یسُوع دے ذریعے گُناہ تے موت دی قوت کنُوں آزاد کر ڈِتے۔ ساڈی اِنسانی فطرت دی کمزوری دے سببّوں شریعت ساکُوں نہ بچا سگی پر خُدا ایہ کیتے۔ اُوں آپنڑے پوتر کُوں گُنہگاراں جِیہے جِسم ءچ بھیجیا تاں جو او گُناہ کیتے قُربان تھیوے۔ اِیں طرحاں خُدا جِسم ءچ ای گُناہ کُوں سزا ڈِتی، تاں جو شریعت دے تقاضے ساڈے ءچ پُورے تھیوݨ، جیہڑے جِسمانی فطرت دے مطابق نئیں بلکہ رُوح القُدس دے مطابق زندگی گُزریندے ہیں۔ جیہڑے لوک جِسمانی فطرت دے مطابق زندگی گُزریندے ہِن او نفسانی گالھیں دے خیال ءچ راہندے ہِن، پر جیہڑے لوک رُوح دے مطابق زندگی گُزریندے ہِن او رُوحانی گالھیں دے خیال ءچ راہندے ہِن۔ جِسمانی نیّت موت ہے پر رُوحانی نیّت زندگی تے اِطمینان ہے۔ کیوں جو جِسمانی نیّت خُدا دی مخالفت کریندی ہے۔ او نہ تاں خُدا دی شریعت دے تابع ہے نہ تھی سگدی ہے۔ جیہڑے لوک جِسمانی فطرت دے اِختیار ءچ ہِن، خُدا کُوں خوش نئیں کر سگدے۔ پر تُساں جِسمانی فطرت دے اِختیار ءچ نئیں بلکہ رُوح دے اِختیار ءچ ہیوے، شرط ایہ ہے جو خُدا دا رُوح القُدس تُہاڈے ءچ وسیا ہووے۔ پر جیندے ءچ مسیح دا رُوح القُدس نئیں او مسیح دا نئیں۔ پر جے مسیح تُہاڈے ءچ ہے تاں بے شک تُہاڈا جِسم تاں گُناہ دی وجہ کنُوں مُردہ ہے پر تُہاڈی رُوح راستبازی دی وجہ کنُوں زندہ ہے۔ خُدا یسُوع کُوں مُردیاں ءچوں زندہ کیتا تے اُوندا رُوح تُہاڈے ءچ وسیا ہویا ہے۔ او اُونہی رُوح القُدس دے وسیلے جیہڑا تُہاڈے ءچ ہے تُہاڈے فانی جِسماں کُوں وی زندہ کریسی جِینویں اُوں مسیح کُوں زندہ کیتا۔ اِیں واسطے بِھراؤ! اساں قرض دار تاں ہیں پر جِسمانی فطرت دے نئیں جو اُوندے مطابق زندگی گُزاروں۔ کیوں جو جے تُساں جِسمانی فطرت دے مطابق زندگی گُزریسو تاں ضرور مرسو پر جے رُوح القُدس دے ذریعے جِسم دے بُرے کماں کُوں مریسو تاں تُساں زندہ راہسو۔ کیوں جو جیہڑے وی خُدا دے رُوح القُدس دی ہدایت نال چلدے ہِن اُوہو خُدا دے پوتر ہِن۔ کیوں جو تُہاکُوں ایجھی رُوح نئیں مِلی جیہڑی تُہاکُوں ڈرݨ آلے غُلام بنڑیندی ہے بلکہ خُدا دی رُوح مِلی ہے جیہڑی تُہاکُوں لےپالک بنڑیندی ہے جیندے وسیلے نال اساں ”ابّا“ یعنی ”باپ“ آکھ تے سڈیندے ہیں۔ رُوح القُدس آپ ساڈی رُوح دے نال مِل تے گواہی ڈیندے جو اساں خُدا دے فرزند ہیں۔ تے جے فرزند ہیں تاں وارث وی ہیں یعنی خُدا دے وارث تے مسیح دے ہم میراث، شرط ایہ ہے جو اساں اُوندے نال ڈُکھ چاؤں تاں جو اُوندے نال جلال وی پاؤں۔ مَیں سمجھدا ہاں جو جیہڑے ڈُکھ اساں اِیں زمانے ءچ سہندے پئے ہیں، اُوں جلال دے مُقابلے ءچ کُجھ وی نئیں جیہڑا ساڈے اُتے ظاہر تھیوݨ آلا ہے۔ کیوں جو ساری مخلوق بہُوں شوق نال خُدا دے پوتراں دے ظاہر تھیوݨ دے اِنتظار ءچ ہے۔ کیوں جو ساری مخلوق آپنڑی مرضی نال نئیں بلکہ خُدا دی مرضی نال لعنت دے اِختیار ءچ کر ڈِتی گئی، اِیں اُمید نال جو ہِک ڈینہہ ساری مخلوق وی فانی حالت دی غُلامی کنُوں چُھڑا گِھدی ویسی تے خُدا دے پوتراں دی جلالی آزادی ءچ شریک تھیسی۔ اساں جانڑدے ہیں جو ساری مخلوق اَج تئیں کراہندی ہے جِینویں جو اُونکُوں بال جمنڑ دیاں درداں لگ گئیاں ہِن۔ تے صرف اُوہو نئیں بلکہ اساں وی جِنہاں کُوں رُوح القُدس دے پہلے پھل مِلے ہِن، آپنڑے دل ءچ کراہندے ہوئے اُوں ویلے دا اِنتظار کریندے پئے ہیں جِیں ویلے خُدا ساکُوں لےپالک بنڑا تے ساڈے بدن کُوں رہائی ڈیسی ۔ کیوں جو اِیں اُمید ءچ ساکُوں نجات مِلی۔ پر جے او چیز جیندی اُمید ہے سامنڑے آ ونجے تاں وَل کیجھی اُمید؟ کوݨ اُوں چیز دی اُمید رکھیندے، جیہڑی اُونکُوں پہلے ای مِل گئی ہووے؟ پر جے اساں اُوں چیز دی اُمید رکھیندے ہیں جیہڑی ہُنڑ ساڈے کولھ موجود نئیں، تاں اساں صبر نال اُوندا اِنتظار کریندے ہیں۔ اِینویں ای رُوح القُدس وی ساڈی کمزوری ءچ ساڈی مدد کریندے۔ اساں تے ایہ نئیں جانڑدے جو کیہڑی چیز کیتے دُعا کرݨ چاہیدی ہے۔ پر رُوح آپ ایجھے ہائیں بھر بھر تے ساڈی شفاعت کریندے، جِنہاں دا بیان نئیں تھی سگدا۔ تے او جیہڑا ساڈے دِلاں کُوں پرکھدا ہے رُوح القُدس دی سوچ کُوں جانڑدے کیوں جو رُوح القُدس خُدا دی مرضی دے مطابق مُقدّساں دی شفاعت کریندے۔ تے اساں جانڑدے ہیں جو ساریاں چیزاں مِل تے خُدا نال محبت رکھنڑ آلیاں کیتے بھلائی پیدا کریندیاں ہِن یعنی اُنہاں کیتے جیہڑے اُوندے اِرادے دے مطابق سڈے گئے ہِن۔ کیوں جو جِنہاں کُوں خُدا پہلے کنُوں جانڑیا، اُنہاں کُوں اُوں پہلے کنُوں مقرر وی کیتا جو او اُوندے پوتر آلی کار بنڑݨ تاں جو اُوندا پوتر بہُوں سارے بِھرانواں ءچوں پلیٹھی دا ہووے۔ تے جِنہاں کُوں اُوں پہلے کنُوں مقرر کیتا اُنہاں کُوں سڈیا وی، تے جِنہاں کُوں سڈیا اُنہاں کُوں راستباز وی کھڑایا، تے جِنہاں کُوں راستباز کھڑایا اُنہاں کُوں جلال وی بخشیا۔ بس اساں اِنہاں گالھیں دے بارے ءچ کیا آکھوں؟ جے خُدا ساڈے پاسے ہے تاں کوݨ ساڈا مخالف تھی سگدے؟ جئیں آپنڑے پوتر کُوں قُربان کرݨ تُوں وی دریغ نہ کیتا بلکہ ساڈے ساریاں کیتے اُونکُوں موت دے حوالے کر ڈِتا تاں او اُوندے نال ساکُوں بئیاں ساریاں چیزاں وی کیوں نہ ڈیسی؟ کوݨ خُدا دے چُنڑے ہوئے لوکاں اُتے اِلزام لا سگدے؟ خُدا آپ اُنہاں کُوں راستباز بنڑیندے۔ کوݨ اُنہاں کُوں قصُوروار کھڑا سگدے؟ مسیح یسُوع جیہڑا مر گِیا تے زندہ وی تھی گِیا تے جیہڑا خُدا دے سجے پاسُوں موجود ہے، اُوہو ساڈی شفاعت وی کریندے۔ کوݨ ساکُوں مسیح دی محبت کنُوں اَنج کریسی؟ کیا مُصیبت یا تنگی یا ظلم یا قحط یا ننگا پن یا خطرہ یا تلوار؟ جِینویں لِکھیا ہے جو ”اساں تیڈی خاطر سارا ڈینہہ موت دا سامنڑا کریندے ہیں، اساں ذبح تھیوݨ آلیاں بھیڈاں وانگُوں سمجھے ویندے ہیں ۔“ وَل وی اِنہاں سارے حالات ءچ ساکُوں اُوندے وسیلے نال زبردست فتح حاصل تھیندی ہے جئیں ساڈے نال محبت کیتی۔ کیوں جو میکُوں یقین ہے جو کوئی چیز وی ساکُوں خُدا دی اُوں محبت کنُوں اَنج نہ کر سگسی جیہڑی ساڈے خُداوند یسُوع المسیح دے ذریعے ساڈے اُتے ظاہر کیتی گئی ہے، نہ موت، نہ زندگی، نہ فرشتے، نہ حکومتاں، نہ حال دیاں نہ مُستقبل دیاں چیزاں، نہ قُدرت، نہ بُلندی، نہ پستی نہ کوئی بئی مخلوق۔ مَیں مسیح ءچ سچ آدھا ہاں، کُوڑ نئیں بُولیندا بلکہ میڈا ضمیر وی رُوح القُدس دے تابع تھی تے گواہی ڈیندے، جو مَیں بہُوں غمگین ہاں تے میڈا دل ہر ویلے ڈُکھدا راہندے۔ کاش اِینویں تھی سگدا جو آپنڑے بِھرانواں دی خاطر جیہڑے میڈی قوم دے لوک ہِن، مَیں مسیح کنُوں جُدا تھی ویندا۔ او بنی اِسرائیل ءچوں ہِن تے لےپالک تھیوݨ دا حق تے جلال تے یکے عہد تے شریعت تے عبادت تے وعدے وی اُنہاں کیتے ای ہِن۔ قوم دے بزُرگ اُنہاں دے ای ہِن تے المسیح وی جِسمانی طور تے اُنہاں ءچوں ہے، جیہڑا ساریاں اُتے حکُومت کرݨ آلا خُدا ہے۔ اُوندی حمد ہمیشاں تئیں تھیندی راہوے۔ آمین۔ اِیندا ایہ مطلب نئیں جو خُدا دا وعدہ کُوڑا تھی گئے کیوں جو جِتّی اِسرائیل دی نسل ءچوں ہِن او سارے اصلی اِسرائیلی نئیں۔ تے نہ ابرہام دی یکی نسل اُوندی اولاد ہے بلکہ خُدا آکھیا ہے، ”اِضحاق تُوں ای تیڈی نسل اکھویسی ۔“ یعنی جِسمانی فرزند خُدا دے فرزند نئیں بلکہ صرف وعدہ دے فرزند نسل ءچ شمار کیتے ویندے ہِن۔ کیوں جو وعدہ دا قول ایہ ہے جو ”مَیں مقررہ ویلے تے واپس آساں تے سارہ دے پوتر ہوسی ۔“ صرف اِیہو نئیں بلکہ رِبقہ وی ہِک بندے یعنی ساڈے پِیُو اِضحاق کنُوں حاملہ ہئی۔ جِینویں لِکھیا ہے جو ”مَیں یعقُوب نال تاں محبت رکھی پر عیسو نال نفرت ۔“ وَل اساں کیا آکھوں؟ کیا خُدا بے اِنصاف ہے؟ ہرگز نئیں! کیوں جو او مُوسیٰ کُوں آدھے، ”مَیں جیندے اُتے چاہندا ہاں ترس کھاندا ہاں تے جیندے اُتے چاہندا ہاں رحم کریندا ہاں ۔“ اِیں واسطے اِیندا تعلق نہ تاں اِنسان دی خواہش نال ہے تے نہ ای اُوندی بھج دھروک نال بلکہ خُدا دے رحم نال ہے۔ کیوں جو کلام ءچ خُدا فرعون کُوں آکھیا، ”مَیں تیکُوں اِیں واسطے کھڑا کیتے جو تیڈے سببّوں آپنڑی قُدرت ظاہر کراں تے اِینویں ساری دُنیا ءچ میڈا ناں مشہور تھی ونجے ۔“ بس خُدا جئیں اُتے چاہندے رحم کریندے تے جِینکُوں چاہندے اُونکُوں سخت کریندے۔ ہُنڑ تُوں میکُوں اکھیسیں ”وَل خُدا ساکُوں کیوں قصُوروار آدھے؟ کوݨ اُوندی مرضی دے خلاف کھڑا تھی سگدے؟“ اِنسان! تُوں کوݨ ہیں جیہڑا خُدا کُوں جواب ڈیندیں؟ کیا کوئی بنڑی ہوئی چیز آپنڑے بنڑاوݨ آلے کُوں آکھ سگدی ہے جو ”تَیں میکُوں اِینویں کیوں بنڑائے؟ “ کیا کُمہار کُوں اِختیار نئیں جو لوئی ہوئی مِٹی کنُوں ہِک تھاں عزت آلے کماں کیتے بنڑاوے تے ڈُوجھا ذِلت آلے کماں کیتے۔ بس حیرانگی دی کیا گالھ ہے، جے خُدا آپنڑے غضب تے آپنڑی قُدرت کُوں ظاہر کرݨ دے اِرادے نال اُنہاں کُوں جِنہاں اُتے غضب تھیسی، جیہڑے ہلاکت کیتے تیار کیتے گئے ہَن، بہُوں صبر نال برداشت کریندا ریہا، تاں جو آپنڑے جلال دی دولت اُنہاں دے ذریعے ظاہر کرے جِنہاں اُتے رحم تھیسی، جیہڑے جلال کیتے پہلے کنُوں تیار کیتے ہَن۔ یعنی ساڈے ذریعے جِنہاں کُوں اُوں نہ صرف یہُودیاں ءچوں بلکہ غیریہُودیاں ءچوں وی سڈیا۔ جِینویں ہوسِیع نبی دی کتاب ءچ خُدا فرمیندے جو ”جیہڑی میڈی قوم نہ ہئی اُونکُوں مَیں آپنڑی قوم اکھیساں تے جیہڑی محبوبہ نہ ہئی اُونکُوں محبوبہ اکھیساں ۔“ تے اِینویں تھیسی جو ”جِتھاں اُنہاں کُوں آکھیا گِیا جو تُساں میڈی قوم کائنی اُتھاں او زندہ خُدا دے پوتر اکھویسن ۔“ تے یسعیاہ نبی وی اِسرائیل دے بارے ءچ اواز ڈے تے آدھا ہے، ”بھانویں بنی اِسرائیل دی تعداد سمندر دی ریت آلی کار ہے وَل وی اُنہاں ءچوں تھوڑے ای بچسن۔ کیوں جو رب آپنڑے کلام کُوں زمین اُتے مکمل طور تے، تے بہُوں تیزی نال پُورا کریسی ۔“ تے جِینویں یسعیاہ پیشن گوئی کیتی ”جیکر لشکراں دا رب ساڈی نسل کُوں زندہ نہ چُھوڑیندا تاں اساں سدُوم آلی کار تھی ویندے تے عمُورہ وانگُوں ختم تھی ویندے ۔“ بس اساں کیا آکھوں؟ ایہ جو غیریہُودی جیہڑے راستبازی دے طالب نہ ہَن راستبازی حاصل کیتی یعنی او راستبازی جیہڑی اِیمان نال ہے۔ پر بنی اِسرائیل جیہڑے شریعت دے ذریعے راستبازی دے طالب ہَن، اُونکُوں حاصل نہ کر سگے۔ کیوں؟ اِیں واسطے جو اُنہاں اِیمان نال نئیں بلکہ اعمال دے ذریعے اُونکُوں گولھیا تے تُھڈا لگنڑ آلے پتھر کنُوں تُھڈا کھادا۔ جِینویں لِکھیا ہے جو ”ڈیکھ مَیں صِیُّون ءچ تُھڈا لواوݨ دا ہِک پتھر تے ٹھوکر کھواوݨ دی ہِک چٹان رکھیندا ہاں پر جیہڑا اُوندے اُتے اِیمان گِھن آسی او کڈھائیں شرمندہ نہ تھیسی ۔“ بِھراؤ! اِسرائیلی قوم کیتے میڈی دِلی خواہش تے خُدا کنُوں میڈی دُعا ہے جو او نجات پاوݨ۔ کیوں جو مَیں اُنہاں دا گواہ ہاں جو او خُدا کیتے غیرت تاں رکھیندے ہِن پر سمجھ نال نئیں۔ او اُوں راستبازی کنُوں واقف نہ ہَن جیہڑی خُدا دی طرفوں ہے بلکہ خود آپنڑی راستبازی کُوں قائم کرݨ دی کوشش کریندے ریہے، اِیں واسطے او خُدا دی راستبازی دے تابع نہ تھئے ۔ کیوں جو مسیح شریعت دی تکمیل ہے تے نتیجے ءچ ہر اِیمان گِھن آوݨ آلا راستباز کھڑایا ویندے۔ کیوں جو مُوسیٰ اُوں راستبازی دے بارے ءچ جیہڑی شریعت کنُوں ہے ایہ لِکھیا ہے جو ”جیہڑا اُنہاں حُکماں اُتے عمل کریندے او اُنہاں دے وسیلے زندہ راہسی ۔“ پر جیہڑی راستبازی اِیمان تُوں حاصل تھیندی ہے او ایہ آدھی ہے جو آپنڑے دل ءچ ایہ نہ آکھ جو ”اسمان اُتے کوݨ چڑھسی؟“ (یعنی مسیح کُوں تلے گِھن آوݨ کیتے،) یا ”کوݨ تلے گہراؤ ءچ لہسی ؟“ (یعنی مسیح کُوں مُردیاں ءچوں زندہ کر تے اُتے گِھن آوݨ کیتے۔) تاں کیا آدھی ہے؟ ایہ جو ”کلام تیڈے کولھ ہے بلکہ تیڈے مُنہ ءچ تے تیڈے دل ءچ ہے ۔“ ایہ اِیمان دا اُوہو کلام ہے جیندی اساں تبلیغ کریندے ہیں جو، جے تُوں آپنڑی زبان نال اِقرار کریں جو یسُوع خُداوند ہے تے آپنڑے دل نال اِیمان گِھن آویں جو خُدا اُونکُوں مُردیاں ءچوں زندہ کیتے تاں نجات پا گِھنسیں۔ کیوں جو راستباز کھڑائے ونجنڑ کیتے دل نال اِیمان گِھن آونڑاں ہوندے تے نجات حاصل کرݨ کیتے اِقرار مُنہ کنُوں کیتا ویندے۔ اِیں واسطے خُدا دا کلام ایہ آدھے جو ”جیہڑا کوئی اُوندے اُتے اِیمان گِھن آسی او کڈھائیں شرمندہ نہ تھیسی ۔“ کیوں جو یہُودی تے غیریہُودی ءچ کوئی فرق نئیں اِیں واسطے جو اُوہو خُداوند سبھ دا خُداوند ہے تے سبھ کُوں جیہڑے اُوندے تُوں دُعا کریندن فیاضی نال برکت ڈیندے۔ کیوں جو ”جیہڑا وی رب دا ناں گِھنسی نجات پیسی ۔“ پر او اُوندا ناں کِینویں گِھننڑ جیندے اُتے او اِیمان نہ گِھن آئے؟ تے اُوندے اُتے اِیمان کِینویں گِھن آوݨ جیندے بارے ءچ نئیں سُنڑیا؟ تے کِینویں سُنڑݨ جئیں تئیں کوئی اُنہاں کُوں خوشخبری نہ سُنڑاوے؟ تے خوشخبری کِینویں سُنڑاوݨ جئیں تئیں کوئی اُنہاں کُوں نہ بھیجے ؟ اِیں واسطے لِکھیا ہے جو ”اُنہاں دے پیر کیجھے بختاں آلے ہِن جیہڑے خوشخبری سُنڑیندن ۔“ پر ساریاں اُوں خوشخبری کُوں قبول نئیں کیتا۔ اِیں واسطے یسعیاہ آدھے جو ”یا رب، ساڈے پیغام اُتے کوݨ اِیمان گِھن آئے ؟“ بس اِیمان پیغام سُنڑݨ تُوں پیدا تھیندے یعنی مسیح دا کلام سُنڑݨ تُوں۔ پر مَیں پُچھدا ہاں، کیا اُنہاں نئیں سُنڑیا؟ بے شک سُنڑیا، جِینویں لِکھیا ہے جو ”اُنہاں دی اواز پُوری زمین تئیں تے اُنہاں دا پیغام دُنیا دی اِنتہا تئیں پُج گِیا ۔“ مَیں ولا پُچھدا ہاں، کیا بنی اِسرائیل نئیں سمجھیا؟ پہلے تاں مُوسیٰ آدھا ہے جو ”مَیں اُنہاں کنُوں جیہڑے قوم وی کائنی تُہاکُوں غیرت ڈیویساں ہِک نادان قوم کنُوں تُہاکُوں کاوڑ ڈیویساں ۔“ وَل یسعیاہ بہُوں دلیری نال ایہ آدھے جو ”جیہڑے میکُوں نہ گولھیندے ہَن، اُنہاں میکُوں گولھ گِھدا تے جیہڑے میڈے طالب نہ ہَن، مَیں اُنہاں اُتے ظاہر تھی گِیا ۔“ پر بنی اِسرائیل دے بارے ءچ او فرمیندا ہے جو ”سارا ڈینہہ مَیں باغی تے ضِدی قوم کیتے آپنڑے ہتھ ودھائی ریہا ۔“ اِیں واسطے مَیں پُچھدا ہاں، کیا خُدا آپنڑی قوم کُوں رَد کر ڈِتے؟ ہرگز نئیں! کیوں جو مَیں وی اِسرائیلی تے ابرہام دی نسل ءچوں ہاں تے بِنیمِین دے قبیلہ ءچوں ہاں۔ خُدا آپنڑی قوم کُوں جِینکُوں او پہلے کنُوں جانڑدا ہا، رَد نئیں کیتا۔ کیا تُساں نئیں جانڑدے جو خُدا دا کلام ایلیّاہ دے بارے ءچ کیا فرمیندے، جو او کِینویں خُدا کُوں اِسرائیل دے خلاف ایہ فریاد کریندے جو ”یا رب، اُنہاں تیڈے نبیاں کُوں قتل کیتے تے تیڈیاں قُربان گاہیں کُوں ڈھا ڈِتے۔ ہُنڑ مَیں کلھا ای بچیا ہاں تے او میکُوں وی مارݨ چاہندے ہِن۔“ پر خُدا اُونکُوں جواب ڈِتا، ”مَیں آپنڑے کیتے سَت ہزار بندے بچا گِھدے ہِن جِنہاں بعل دے بُت کُوں سجدہ نئیں کیتا ۔“ اِیں طرحاں اِیں زمانے ءچ وی فضل نال چُنڑے ہوئے کُجھ باقی ہِن۔ تے جے فضل کنُوں چُنڑے گئے ہِن تاں وَل اعمال کنُوں نئیں، نہ تاں فضل، فضل نہ راہندا۔ تاں نتیجہ کیا نِکلیا؟ بنی اِسرائیل کُوں او چیز نہ مِلی جِینکُوں او گولھیندا ریہا۔ پر او خُدا دے چُنڑے ہوئے لوکاں کُوں مِل گئی جڈاں جو باقی سارے سخت دل کر ڈِتے گئے۔ جِینویں جو لِکھیا ہے جو ”خُدا اُنہاں کُوں سُست طبیعت ڈِتی تے ایجھے اکھیں جیہڑیاں نہ ڈیکھنڑ تے ایجھے کَن جیہڑے نہ سُنڑݨ تے اَج تئیں او اِینویں ای ہِن ۔“ تے داؤد آدھے جو ”اُنہاں دا دسترخوان اُنہاں کیتے جال تے پھندا تے تُھڈا کھاوݨ تے سزا دا سبب بنڑ ونجے۔ اُنہاں دے اکھیں اندھے تھی ونجنڑ تاں جو ڈیکھ نہ سگنڑ تے اُنہاں دیاں کمراں ہمیشاں جُھکیاں راہوݨ ۔“ مَیں وَل اکھیندا ہاں، کیا اُنہاں ایجھا تُھڈا کھادے جو ڈھے پووݨ؟ ہرگز نئیں! بلکہ اُنہاں دی گُمراہی دے سببّوں غیریہُودیاں کُوں نجات حاصل کرݨ دا موقع مِلیا تاں جو یہُودیاں کُوں غیرت آوے۔ جڈاں یہُودیاں دی گُمراہی دُنیا دی برکت دا سبب بنڑی تے اُنہاں دا رُوحانی زوال غیریہُودیاں کیتے بےحد برکت دا سبب بنڑیا تاں اُنہاں دی مکمل بحالی کیجھی زیادہ برکت دا سبب ہوسی۔ ہُنڑ مَیں تُساں غیریہُودیاں کُوں آدھا ہاں۔ مَیں غیریہُودیاں کیتے رسُول مقرر تھیّا ہاں اِیں واسطے آپنڑی خدمت دی تعریف کریندا ہاں، تاں جو کہیں طرحاں وی مَیں آپنڑی قوم آلیاں کُوں غیرت ڈیوا تے اُنہاں ءچوں بہُوں کُوں نجات ڈیوا سگاں۔ کیوں جو جِیں ویلے اُنہاں دا رَد تھی ونجنڑ، دُنیا کیتے خُدا نال صُلح دا سبب بنڑ گِیا تاں اُنہاں دا ولا قبول تھی ونجنڑ مُردیاں ءچوں زندہ تھی ونجنڑ الی کار نہ ہوسی؟ جے نذر دا پہلا پیڑا پاک ہووے تاں سارا مَلیا ہویا اٹّا وی پاک ہوسی تے جے جڑھ پاک ہے تاں اُوندیاں لڑیاں وی پاک ہوسن۔ بے شک کُجھ لڑیاں کپ ڈِتیاں گئیاں تے تُوں جنگلی زیتون ہوندے ہوئے اُنہاں دی جاہ پیوند تھی گِیا، تے زیتون دے درخت دی جڑھ دے روغن ءچ حصہ دار تھی گِیا۔ پر تُوں اُنہاں تروٹیاں لڑیاں دے مُقابلہ ءچ فخر نہ کر۔ جے فخر کریں تاں یاد رکھ جو تُوں جڑھ کُوں نئیں بلکہ جڑھ تیکُوں سنبھالی کھڑی ہے۔ تُوں ضرور ایہ اکھیسیں جو ”او لڑیاں اِیں واسطے کپ ڈِتیاں گئیاں جو مَیں پیوند تھی وَنجاں۔“ ٹھیک ہے۔ پر او اِیمان نہ گِھن آوݨ دے سببّوں کپ ڈِتیاں گئیاں تے تُوں تاں اِیمان گِھن آوݨ دی وجہ کنُوں قائم ہیں۔ بس مغرُور نہ تھی بلکہ ڈردا رہ، کیوں جو جِیں ویلے خُدا اصلی لڑیاں کُوں نہ چھوڑیا تاں او تیکُوں وی نہ چھوڑیسی۔ اِیں واسطے خُدا دی مہربانی تے سختی ڈوہائیں اُتے غور کر، سختی اُنہاں اُتے جیہڑے ڈھے پئے، تے مہربانی تَیں اُتے۔ پر شرط ایہ ہے جو تُوں اُوندی مہربانی اُتے قائم راہویں نہ تاں تُوں وی کپ ڈِتا ویسیں۔ تے جے یہُودی وی ضد چھوڑ تے اِیمان گِھن آوݨ تاں پیوند کیتے ویسن کیوں جو خُدا اُنہاں کُوں ولا پیوند کرݨ دی قُدرت رکھیندے۔ تُوں خود زیتون دے اُوں درخت کنُوں جیہڑا قُدرتی طور تے جنگلی ہے، قُدرت دے خلاف چنگے زیتون دے درخت ءچ پیوند کیتا گِیا ہیں، تاں وَل ایہ جیہڑیاں اصل لڑیاں ہِن آپنڑے ای زیتون دے درخت ءچ ضرور پیوند کیتیاں ویسن۔ بِھراؤ! مَیں اِیں راز کُوں تُہاکُوں سمجھاونڑاں چاہندا ہاں تاں جو تُساں آپنڑے آپ اُتے فخر نہ کرو۔ گالھ ایہ ہے جو اِسرائیل دا ہِک حصہ سخت دل تھی گِیا ہے تے جئیں تئیں غیر قوماں مکمل طور تے داخل نہ تھی ونجنڑ او اِینویں ای راہسی۔ وَل پُوری قوم اِسرائیل کُوں نجات مِلسی۔ کیوں جو لِکھیا ہے ”چُھڑاوݨ آلا صِیُّون ءچوں نِکل سی او بدکاراں کُوں یعقُوب کنُوں کڈھیسی۔ تے اُنہاں نال میڈا ایہ عہد ہوسی جِیں ویلے مَیں اُنہاں دے گُناہ دُور کر ڈیساں ۔“ بنی اِسرائیل دے بہُوں سارے لوک خوشخبری دے دُشمنڑ ہِن تے اِیندے نال تُہاکوں فائدہ ہے پر ہُنڑ وی او خُدا دے چُنڑے ہوئے لوک ہِن تے پِیُو ڈاڈا دی وجہ کنُوں خُدا دے پیارے ہِن۔ کیوں جو خُدا دیاں نعمتاں تے اُوندا بُلاوا کڈھائیں تبدیل نئیں تھیندا۔ جِینویں تُساں غیریہُودی پہلے نافرمان ہَوے پر ہُنڑ یہُودیاں دی نافرمانی دے سببّوں تُہاڈے اُتے خُدا دا رحم تھیّا ہے، اِینویں ای ہُنڑ یہُودی نافرمانی کریندے ہِن تاں جو تُہاڈے اُتے رحم تھیوݨ دی وجہ کنُوں اُنہاں اُتے وی رحم تھیوے۔ کیوں جو خُدا ساریاں کُوں نافرمانی ءچ گرفتار تھیوݨ ڈِتے تاں جو او ساریاں اُتے رحم کرے۔ واہ! خُدا دی دولت، اُوندی حِکمت تے اُوندا علم بہُوں گہرا ہے! اُوندے فیصلے سمجھ کنُوں اصلُوں باہر ہِن، تے اُوندیاں راہاں کوݨ گولھ سگدے! ”رب دی سوچ کُوں کوݨ جاݨ سگدے؟ یا کوݨ اُوندا صلاح کار بنڑ سگدے ؟ یا کئیں اُونکُوں پہلے کُجھ ڈِتا، جِیندا صِلہ اُونکُوں ڈِتا ونجے ؟“ کیوں جو ساریاں چیزاں اُوندی طرفوں، اُوندے وسیلے نال تے اُوندے کیتے ہِن۔ اُوندی تمجید ہمیشاں تئیں تھیندی راہوے۔ آمین۔ بس بِھراؤ! مَیں خُدا دیاں رحمتاں دا واسطہ ڈے تے تُہاڈی مِنت کریندا ہاں جو آپنڑے جِسم ہِک ایجھی قُربانی دے طور تے پیش کرو جیہڑی زندہ، پاک تے خُدا دی پسندیدہ ہے۔ اِیہو تُہاڈی مناسب عبادت ہے۔ اِیں دُنیا دے طور طریقے اِختیار نہ کرو بلکہ سوچ نوِیں تھی ونجنڑ دے سببّوں تُساں وی بدل ونجو، تاں جو تُساں خُدا دی نیک، پسندیدہ تے کامِل مرضی کُوں تجربے نال جاݨ سگو۔ مَیں اُوں فضل دی وجہ کنُوں جیہڑا میڈے اُتے تھئے، تُہاڈے ءچوں ہر ہِک کُوں آدھا ہاں جو جِتنا سمجھنڑ مناسب ہے کوئی آپنڑے آپ کُوں اُوں کنُوں زیادہ نہ سمجھے بلکہ ہر ہِک آپنڑی حقیقت کُوں اُوں اِیمان دے ناپ دے مطابق چنگی طرحاں جاݨ گِھنے، جیہڑا خُدا اُونکُوں بخش ڈِتے۔ جِینویں ساڈے ہِک جِسم ءچ بہُوں سارے اَنگ ہِن تے اُنہاں سارے انگاں دا کم ہِک جِیہا نئیں، اُونویں ای بھانویں اساں بہُوں سارے ہیں، وَل وی مسیح ءچ شامل تھی تے ہِک جِسم ہیں تے آپس ءچ ہِک ڈُوجھے دے اَنگ۔ تے خُدا دا جیہڑا فضل ساڈے اُتے تھیّا ہے اُوندے مطابق ساکُوں طرحاں طرحاں دیاں نعمتاں مِلیاں ہِن۔ اِیں واسطے جِینکُوں نبُوّت کرݨ دی نعمت مِلی ہووے، او آپنڑے اِیمان دے مطابق نبُوّت کرے۔ یا جِینکُوں خدمت کرݨ دی نعمت مِلی ہووے، او خدمت ءچ مصروف راہوے۔ یا جِینکُوں تعلیم ڈیوݨ دی نعمت مِلی ہووے، او تعلیم ڈیندا راہوے۔ یا جِینکُوں نصیحت ڈیوݨ دی نعمت مِلی ہووے، او نصیحت کریندا راہوے۔ یا جِینکُوں خیرات ڈیوݨ دی نعمت مِلی ہووے، او فیاضی نال ڈیوے۔ جِینکُوں راہنمائی کرݨ دی نعمت مِلی ہووے، او جوش نال راہنمائی کریندا راہوے، جِینکُوں رحم کرݨ دی نعمت مِلی ہووے، او خوشی نال رحم کرے۔ محبت ڈِکھاوے دی نہ ہووے۔ بُرائی کنُوں نفرت رکھو۔ نیکی کُوں پکڑی رکھو۔ برادرانہ محبت نال ہِک ڈُوجھے کُوں پیار کرو۔ آپنڑے کنُوں زیادہ ڈُوجھیاں دی عزت کرو۔ کوشش ءچ سُستی نہ کرو، بلکہ رُوحانی جوش نال بھرے راہو تے خُداوند دی خدمت کریندے راہو۔ اُمید ءچ خوش، مُصیبت ءچ صابر، دُعا کرݨ ءچ لگے راہو۔ مُقدّساں دیاں ضرورتاں پُوریاں کرو، مہمان نوازی کریندے راہو۔ جیہڑے تُہاکُوں سَتیندے ہِن، اُنہاں کیتے برکت دی دُعا منگو۔ لعنت نہ کرو بلکہ برکت منگو۔ خوشی مناوݨ آلیاں نال خوشی مناؤ، رووݨ آلیاں نال روؤ۔ ہِک ڈُوجھے نال اِتفاق نال راہو۔ اُچے اُچے خیال نہ بدھو، بلکہ پست لوکاں نال میل جول رکھو۔ آپنڑے آپ کُوں ڈُوجھیاں کنُوں عقل مند نہ سمجھو۔ بُرائی دا جواب بُرائی نال نہ ڈیؤ۔ دھیان نال او کم کرو جیہڑا ساریاں دی نِگاہ ءچ چنگا ہووے۔ جئیں تئیں ممکن ہووے تُساں آپنڑی طرفوں ہر اِنسان نال صُلح رکھو۔ عزیزو! بدلہ نہ گِھنو بلکہ خُدا دے غضب کُوں موقع ڈیؤ کیوں جو لِکھیا ہے جو ”رب فرمیندے، اِنتقام گِھننڑ میڈا کم ہے، بدلہ مَیں ای گِھنساں ۔“ بلکہ ”جے تیڈا دُشمنڑ بُکھا ہووے تاں اُونکُوں کھانڑا ڈے، جے ترِسّا ہووے تاں پانڑی پِلا، کیوں جو اِینویں کرݨ نال تُوں اُوندے سر اُتے بلدے انگاریاں دا ڈھیر لا ڈیسیں ۔“ بدی کُوں آپنڑے اُتے غالب نہ آوݨ ڈے بلکہ نیکی نال بدی اُتے غالب آ۔ ہر بندہ اِختیار آلیاں حکومتاں دی تابعداری کرے، کیوں جو کوئی حکُومت ایجھی نئیں جیہڑی خُدا دی طرفوں نہ ہووے۔ جیہڑیاں حکومتاں موجود ہِن، خُدا ای دی طرفوں مقرر تھئیاں ہِن۔ اِیں واسطے جیہڑا کوئی حکُومت دی مخالفت کریندے او خُدا دے قائم کیتے ہوئے اِنتظام دی مخالفت کریندے، اُونکُوں سزا مِلسی۔ کیوں جو نیک کم کرݨ آلا حاکماں کنُوں نئیں ڈردا۔ پر بُرے کم کرݨ آلا ڈردے۔ جے تُوں حاکم کنُوں بے خوف راہوݨ چاہندیں تاں نیکی کیتا کر، وَل اُوندی طرفوں تیکُوں شاباش مِلسی۔ حاکم تیڈی بھلائی کیتے خُدا دا خادم ہے۔ پر جے تُوں غلط کم کریں تاں ڈر کیوں جو اُوندے ہتھ ءچ تلوار اِینویں نئیں ڈِتی گئی۔ او خُدا دا خادم ہے تے ہر مُجرم کُوں سزا ڈے تے خُدا دا غضب ظاہر کریندے۔ اِیں واسطے نہ صرف سزا کنُوں بچنڑ کیتے بلکہ آپنڑے ضمیر کُوں صاف رکھنڑ کیتے وی حکُومت دے تابع راہو۔ تُساں ٹیکس وی اِیں وجہ تُوں ڈیندے ہیوے، کیوں جو حکُومت کرݨ آلے خُدا دے خادم ہِن تے آپنڑے کم ءچ مصروف راہندے ہِن۔ ہر ہِک کُوں اُوندا حق ڈِتا کرو۔ جِینکُوں ٹیکس ڈیونڑا چاہیدے اُونکُوں ٹیکس ڈیؤ، جِینکُوں محصُول ڈیونڑا ہووے اُونکُوں محصُول ڈیؤ، جئیں کنُوں ڈرنڑا چاہیدے، اُوں کنُوں ڈرو تے جِیندا احترام کرنڑا چاہیدے، اُوندا احترام کرو۔ آپس دی محبت دے سِوا کہیں چیز دے قرضدار نہ راہو کیوں جو جیہڑا ڈُوجھے نال محبت رکھیندے او شریعت اُتے عمل کریندے۔ کیوں جو ایہ سارے حُکم جو ”زِنا نہ کر، خون نہ کر، چوری نہ کر، لالچ نہ کر “ تے اِنہاں دے علاوہ جیہڑے وی حُکم باقی ہِن، اُنہاں ساریاں دا خلاصہ اِیں ہِک حُکم ءچ موجود ہے جو ”آپنڑے ہمسائے نال آپنڑے وانگُوں محبت رکھ ۔“ محبت آپنڑے ہمسائے نال بُرائی نئیں کریندی اِیں واسطے محبت کرݨ شریعت کُوں پُورا کرݨ ہے۔ وقت کُوں پچھانڑو تے اِینویں ای کرو، کیوں جو نیندر کنُوں جاگنڑ دا ویلا آ گِیا ہے۔ جِیں ویلے اساں اِیمان گِھن آئے ہسے، اُوں وقت دی نسبت ہُنڑ ساڈی نجات بہُوں نیڑے ہے۔ رات تقریباً لنگھ گئی ہے تے ڈینہہ نِکلنڑ آلا ہے، اِیں واسطے اساں اندھارے دے کماں کُوں چھوڑ تے نُور دے ہتھیار بَدھ گِھنوں۔ اساں حیادار زندگی گُزاروں جِینویں لوک ڈینہہ دی روشنی ءچ کریندے ہِن۔ اِیں واسطے ساڈے ءچ نچنڑ ٹپنڑ، نشہ بازی، زِناکاری، شہوت پرستی، جھیڑے تے حسد وغیرہ نہ ہووے۔ بلکہ خُداوند یسُوع المسیح کُوں پا گِھنو تے جِسم دیاں بُریاں خواہشاں کُوں پُورا کرݨ ءچ نہ لگے راہو۔ کمزور اِیمان آلے کُوں آپنڑے ءچ شامل تاں کر گِھنو پر جِینکُوں او صحیح یا غلط سمجھدا ہے اُوندے بارے ءچ تکرار نہ کرو۔ ہِک بندے دا اعتقاد ہے جو ہر چیز کھا سگدے پر ڈُوجھا بندہ جِیندا اِیمان کمزور ہے، او صرف سبزیاں کھاندے۔ ہر چیز دے کھاوݨ آلا پرہیز کرݨ آلے کُوں کم تر نہ سمجھے تے پرہیز کرݨ آلا کھاوݨ آلے اُتے اِلزام نہ لاوے کیوں جو اُونکُوں خُدا قبول کر گِھدے۔ تُوں کوݨ ہیں جو کہیں ڈُوجھے دے نوکر اُتے اِلزام لاویں؟ او قائم ہے یا ڈھٹھا پِیا ہے، اُوندے مالک دا فیصلہ ہے۔ بلکہ او قائم کیتا ویسی کیوں جو خُداوند اُونکُوں قائم کرݨ اُتے قادر ہے۔ کوئی بندہ تاں ہِک ڈینہہ کُوں ڈُوجھے ڈینہہ کنُوں چنگا سمجھدے تے کوئی سارے ڈینہاں کُوں برابر جانڑدے۔ ہر بندے کُوں آپنڑے ضمیر دے مطابق فیصلہ کرنڑا چاہیدے۔ جیہڑا بندہ کہیں ڈینہہ کُوں خاص سمجھ تے منیندے، او اُونکُوں خُدا دی خاطر منیندے۔ تے جیہڑا گوشت کھاندے او خُداوند دی تعظیم ءچ کھاندے کیوں جو او خُدا دا شُکر کریندے۔ تے جیہڑا پرہیز کریندے او وی خُداوند دی تعظیم ءچ پرہیز کریندے تے او وی خُدا دا شُکر کریندے۔ کیوں جو ساڈے ءچوں کوئی وی صرف آپنڑے واسطے زندہ نئیں راہندا تے نہ ای کوئی صرف آپنڑے واسطے مردے۔ جے اساں زندہ ہیں تاں خُداوند دی خاطر زندہ ہیں، تے جے مردے ہیں تاں خُداوند دی خاطر مردے ہیں، اِیں واسطے بھانویں اساں زندہ راہوں یا مرُوں، اساں خُداوند ای دے ہیں۔ کیوں جو مسیح اِیں واسطے مویا تے زندہ تھیّا جو مویاں تے زندیاں ڈوہائیں دا خُداوند ہووے۔ وَل تُوں آپنڑے بِھرا اُتے کیوں اِلزام لیندیں، یا اُونکُوں کیوں حقیر سمجھدیں؟ اساں تاں سارے دے سارے خُدا دے تختِ عدالت دے سامنڑے حاضر کیتے ویسوں۔ جِینویں لِکھیا ہے جو ”خُداوند فرمیندا ہے میکُوں آپنڑی حیات دی قَسم میڈے سامنڑے ہر ہِک گوڈا جُھکسی تے ہر ہِک زبان خُدا دا اِقرار کریسی ۔“ بس ساڈے ءچوں ہر ہِک کُوں خُدا دے سامنڑے آپنڑا حساب ڈیونڑا پوسی۔ اِیں واسطے اساں ہِک ڈُوجھے اُتے اِلزام نہ لاؤں بلکہ دل ءچ اِرادہ کر گِھنوں جو آپنڑے بِھرا دے سامنڑے ایجھی کوئی چیز نہ رکھوں جیہڑی اُوندے کیتے تُھڈا کھاوݨ یا ڈھاوݨ دا سبب ہووے۔ میکُوں پتہ ہے بلکہ خُداوند یسُوع ءچ پُورا یقین ہے جو کوئی چیز آپنڑے آپ ءچ حرام نئیں ہوندی، پر جیہڑا اُونکُوں حرام سمجھدے اُوندے کیتے حرام ہے۔ جے تیڈے کوئی چیز کھاوݨ تُوں تیڈے بِھرا کُوں ڈُکھ پُجدے تاں وَل تُوں محبت دے اصُول اُتے نئیں ٹُردا۔ جِیں بندے کیتے مسیح آپنڑی جان قُربان کیتی تُوں اُونکُوں آپنڑے کھاوݨ نال ہلاک نہ کر۔ لوکاں کُوں اُوں چیز کُوں بُرا آکھنڑ دا موقع نہ ڈے جیہڑی تیڈی نِگاہ ءچ چنگی ہے۔ کیوں جو خُدا دی بادشاہی کھاوݨ پِیوݨ دے بارے ءچ نئیں بلکہ راستبازی، میل مِلاپ تے اُوں خوشی دے بارے ءچ ہے جیہڑی رُوح القُدس دی طرفوں مِلدی ہے۔ جیہڑا کوئی اِینویں مسیح دی خدمت کریندے اُونکُوں خُدا پسند کریندے تے او لوکاں ءچ مقبول ہے۔ آؤ اساں اُنہاں گالھیں دے طالب راہوں جیہڑیاں میل مِلاپ تے آپس دی ترقی دا سبب ہِن۔ صرف کھاوݨ دی خاطر خُدا دے کم کُوں نہ وِگاڑ۔ ہر چیز پاک تاں ہے پر جے تیڈے کھاوݨ نال ڈُوجھے کُوں تُھڈا لگدے تاں وَل او غلط ہے۔ اِیہو چنگا ہے جو تُوں نہ گوشت کھاویں، نہ انگُور دا رَس پِیویں تے نہ ایجھا کم کریں جیندے نال تیڈے بِھرا کُوں تُھڈا لگے۔ تیڈا جیہڑا اِیمان ہے، اُونکُوں آپنڑے تے خُدا دے حضُور ای راہنڑ ڈے۔ او بندہ مُبارک ہے جیہڑا اُوں چیز دی وجہ کنُوں جِینکُوں او جائز سمجھدے آپنڑے آپ کُوں قصُوروار نئیں کھڑیندا۔ پر جیہڑا بندہ کہیں چیز دے بارے ءچ شک کریندے تے وَل وی اُونکُوں کھاندے او آپنڑے آپ کُوں قصُوروار کھڑیندے کیوں جو او اِیمان نال نئیں کھاندا۔ تے جیہڑا کُجھ اِیمان نال نئیں او گُناہ ہے۔ اساں جیہڑے اِیمان ءچ پکّے ہیں ساڈا فرض ہے جو کمزور اِیمان آلیاں دیاں کمزوریاں دا لحاظ کرُوں، نہ صرف آپنڑی خوشی کرُوں۔ ساڈے ءچوں ہر بندہ آپنڑے ہمسائے کُوں اُوندی بھلائی کیتے خوش کرے تاں جو اُوندی رُوحانی ترقی تھیوے۔ کیوں جو مسیح وی آپنڑی خوشی دا خیال نہ رکھیا بلکہ لِکھیا ہے جو ”تیڈے لعن طعن کرݨ آلیاں دی لعن طعن میڈے اُتے آ پئی ہے ۔“ جیہڑے گالھیں پہلے لِکھیاں گئیاں او ساڈی نصیحت کیتے لِکھیاں گئیاں تاں جو صبر نال تے خُدا دے کلام دی تسلی نال ساڈی اُمید قائم راہوے۔ ہُنڑ صبر تے تسلی ڈیوݨ آلا خُدا تُہاکُوں مسیح یسُوع دے بندے ہوندے ہوئے آپس ءچ ہِک دل تھی تے راہوݨ دی توفیق ڈیوے۔ تاں جو تُساں رَل تے ہِک زبان تھی تے ساڈے مالک یسُوع المسیح دے خُدا تے باپ دی تمجید کرو۔ جِینویں مسیح تُہاکُوں قبول کر گِھدے، اِینویں ای تُساں وی ہِک ڈُوجھے کُوں قبول کرو تاں جو خُدا کُوں جلال مِلے۔ مَیں تُہاکُوں ڈسیندا ہاں جو یسُوع مسیح خُدا دی سچائی ثابت کرݨ کیتے یہُودیاں دا خادم بنڑیا، تاں جو اُنہاں وعدیاں دی تصدیق کرے جیہڑے پِیُو ڈاڈے نال کیتے گئے ہَن، تے غیریہُودی خُدا دے رحم دی وجہ کنُوں اُوندی تعریف کرݨ۔ جِینویں لِکھیا ہے جو ”اِیں واسطے مَیں غیر قوماں ءچ تیڈا اِقرار کریساں، تے تیڈے ناں دی حمد کریساں ۔“ تے ایہ وی لِکھیا ہے جو ”غیر قومو! اُوندی اُمت نال خوشی مناؤ ۔“ تے ایہ وی جو ”سبھ قومو! رب دی حمد کرو تے سبھ اُمتو! اُوندی تعریف کرو ۔“ تے یسعیاہ وی آدھا ہے جو ”یسّی دی جڑھ ءچوں نوِیں شاخ نِکلسی یعنی او بندہ جیہڑا غیر قوماں اُتے حکُومت کرݨ کیتے اُٹھسی اُوندے اُتے غیر قوماں اُمید رکھیسن ۔“ خُدا جیہڑا اُمید دا سرچشمہ ہے تُہاکُوں اِیمان رکھنڑ دے سببّوں ساری خوشی تے اِطمینان نال بھر ڈیوے تاں جو رُوح القُدس دی قُدرت نال تُہاڈی اُمید ودھدی ونجے۔ میڈے بِھراؤ! میکُوں تُہاڈے بارے ءچ یقین ہے جو تُساں خود وی نیکی تے علم نال بھریج گئے ہیوے تے ہِک ڈُوجھے کُوں نصیحت کرݨ دے قابل وی ہیوے۔ وَل وی مَیں کُجھ گالھیں بہُوں دلیری نال تُہاکُوں یاد ڈیواوݨ کیتے لِکھیاں ہِن۔ خُدا میڈے اُتے فضل کیتے جو مَیں غیریہُودیاں ءچ مسیح یسُوع دا خادم بنڑ تے خوشخبری دی خدمت کاہِن دی طرحاں کراں، تاں جو غیریہُودی رُوح القُدس دے ذریعے مُقدّس تھی تے ایجھی نذر بنڑ ونجنڑ، جیہڑی خُدا دے حضُور ءچ مقبول تھیوے۔ اِیں واسطے مَیں یسُوع مسیح دے وسیلے خُدا کیتے آپنڑی خدمت اُتے فخر کر سگدا ہاں۔ پر میکُوں کہیں بئے کم کُوں بیان کرݨ دی جُرأت نئیں سوائے اِنہاں کماں دے جیہڑے مسیح غیریہُودیاں کُوں خُدا دے تابع کرݨ کیتے میڈے ذریعے کیتے۔ اُوں ایہ سبھ کُجھ، کم، کلام، معجزیاں تے عجیب کماں دی طاقت تے رُوح القُدس دی قُدرت دے وسیلے نال کیتا۔ اِینویں مَیں یروشلیم تُوں گِھن تے اِلُرِکُم صوبے تئیں مسیح دی خوشخبری دی پُوری پُوری تبلیغ کیتی۔ میڈا صرف ایہ مقصد ہا جو جِتھاں مسیح دا ناں نئیں پُجیا، اُتھاں خوشخبری سُنڑاواں، کیوں جو مَیں کہیں بئے دی بنیاد اُتے کُجھ بنڑاوݨ نئیں چاہندا۔ بلکہ جِینویں لِکھیا ہے اُونویں ای تھیوے جو ”جِنہاں کُوں اُوندی خبر نئیں پُجی، او ڈیکھسن تے جِنہاں اصلُوں نئیں سُنڑیا، اُنہاں کُوں سمجھ آسی ۔“ اِیں سببّوں مَیں تُہاڈے کولھ آوݨ کنُوں حالی تئیں رُکیا ریہا۔ پر ہُنڑ اِنہاں علاقیاں ءچ میڈی خدمت کرݨ کیتے جاہ باقی نئیں ریہی، تے مَیں بہُوں سالاں کنُوں تُہاڈے کولھ آوݨ چاہندا وی ہاں۔ اِیں واسطے میکُوں اُمید ہے جو اسپین ویندے ویلے تُہاڈے کنُوں تھیندا ویساں، تے تُہاڈے نال چنگی طرحاں مُلاقات کرݨ تُوں بعد میکُوں اُمید ہے جو تُساں اگُوں دے سفر کیتے میڈی مدد کریسو۔ پر ہُنڑ مَیں مُقدّساں دی خدمت کرݨ کیتے یروشلیم ویندا پِیا ہاں۔ کیوں جو مَکِدُنیہ تے اَخیہ دے ایماندار یروشلیم دے غریب مُقدّساں کیتے چندہ بھیجنڑ چاہندے ہِن۔ ایہ کم اُنہاں خوشی نال تاں کیتا پر یروشلیم دے مُقدّساں دے قرضدار وی ہَن۔ کیوں جو جے غیر قوماں یہُودیاں دی رُوحانی برکتاں ءچ شامل تھئیاں ہِن تاں ضروری ہے جو او وی آپنڑی جِسمانی برکتاں نال یہُودیاں دی خدمت کرݨ۔ بس میں اِیں رقم کُوں اُنہاں تئیں پُچا تے اِیں خدمت کُوں پُورا کرݨ تُوں بعد تُہاڈے کنُوں تھیندا ہویا اسپین روانہ تھی ویساں۔ مَیں جانڑدا ہاں جو جِیں ویلے تُہاڈے کولھ آساں تاں مسیح دیاں ساریاں برکتاں گِھن تے آساں۔ بِھراؤ! مَیں تُہاکُوں ساڈے خُداوند یسُوع المسیح دا واسطہ ڈے تے، تے رُوح القُدس دی محبت یاد ڈیوا تے مِنت کریندا ہاں جو میڈے نال رَل تے خُدا کنُوں میڈے کیتے دُعا ءچ لگے راہو، دُعا کرو جو مَیں یہُودیہ دے غیر اِیمانداراں کنُوں بچیا راہاں تے میڈی خدمت یروشلیم دے مُقدّساں کُوں پسند آوے۔ وَل میں خُدا دی مرضی نال تُہاڈے کولھ خوشی نال آساں تے تُہاڈے نال رہ تے تازہ تھی ویساں۔ خُدا جیہڑا اِطمینان دا سرچشمہ ہے، تُساں ساریاں نال راہوے۔ آمین۔ مَیں تُہاکُوں ساڈی بھینڑ فیبے دی جیہڑی کِنخریہ دی کلیسیا دی خادمہ ہے سفارش کریندا ہاں، جو جِینویں مُقدّساں کُوں چاہیدے تُساں اُونکُوں خُداوند ءچ خوشی نال قبول کرو۔ جِیں کم ءچ اُونکُوں تُہاڈی مدد دی لوڑ ہووے، اُوندی مدد کرو کیوں جو او وی بہُوں ساریاں دی مددگار ریہی ہے بلکہ میڈی وی۔ پرسِکہ تے اَکوِلہ کُوں میڈا سلام آکھو۔ او مسیح یسُوع ءچ میڈے ہم خدمت ہِن۔ اُنہاں میڈی خاطر آپنڑے آپ کُوں خطرے ءچ پاتا ہویا ہا۔ نہ صرف میں بلکہ غیر قوماں دیاں سبھ کلیسیاواں وی اُنہاں دیاں شُکر گُزار ہِن۔ اُوں کلیسیا کُوں وی سلام آکھو جیہڑی اُنہاں دے گھر ءچ ہے۔ میڈے عزیز اِپینِتُس کُوں سلام آکھو جیہڑا آسِیہ ءچ مسیح اُتے سبھ تُوں پہلے اِیمان گِھن آوݨ آلا ہا۔ مریم کُوں سلام آکھو، جئیں تُہاڈے واسطے بہُوں محنت کیتی۔ اندرُنِیکُس تے یُونِیاس کُوں سلام آکھو۔ او میڈے رشتہ دار ہِن تے میڈے نال قید ہَن تے رسُولاں ءچ مشہور ہِن تے مَیں کنُوں پہلے مسیح ءچ شامل تھئے۔ اَمپلیاطُس کُوں سلام آکھو جیہڑا خُداوند ءچ میڈا عزیز ہے۔ اُربانُس کُوں جیہڑا مسیح ءچ ساڈا ہم خدمت ہے تے میڈے عزیز استخُس کُوں سلام آکھو۔ اَپلِّیس کُوں سلام آکھو جیہڑا مسیح ءچ مقبول ہے۔ اَرسِتُبُولُس دے گھر آلیاں کُوں سلام آکھو۔ میڈی قوم آلے ہیرودیون کُوں سلام آکھو۔ نَرکِسُس دے اُنہاں گھر آلیاں کُوں سلام آکھو جیہڑے خُداوند دے لوک ہِن۔ ترُوفَینہ تے ترُوفوسہ کُوں سلام آکھو جیہڑیاں خُداوند کیتے محنت کریندیاں ہِن۔ میڈی عزیز پرسِس کُوں سلام آکھو جئیں خُداوند کیتے بہُوں محنت کیتی ہے۔ رُوفُس جیہڑا خُداوند دا چُنڑیا ہویا ہے تے اُوندی ماء جیہڑی میڈی ماء وانگُوں ہے، ڈوہائیں کُوں سلام آکھو۔ اَسُنکرِتُس، فلِگون، ہِرمیس، پترُباس، ہرماس تے اُنہاں بِھرانواں کُوں جیہڑے اُنہاں دے نال ہِن، سلام آکھو۔ فِلُلگُس، یُولیہ، نیریُوس تے اُوندی بھینڑ تے اُلُمپاس تے اُنہاں سبھ مُقدّساں کُوں جیہڑے اُنہاں دے نال ہِن، سلام آکھو۔ آپس ءچ پاک بوسہ گِھن تے ہِک ڈُوجھے کُوں سلام کرو۔ مسیح دیاں ساریاں کلیسیاواں تُہاکُوں سلام آدھیاں ہِن۔ ہُنڑ بِھراؤ! مَیں تُہاڈی مِنت کریندا ہاں جو اُنہاں لوکاں تُوں خبردار راہو جیہڑے پارٹی بازی کرویندن تے اُوں تعلیم دے خلاف جیہڑی تُہاکُوں مِلی ہے، تعلیم ڈے تے تُھڈا کھواوݨ دا سبب ہِن۔ اُنہاں تُوں دُور راہو۔ کیوں جو ایجھے لوک ساڈے خُداوند مسیح دی نئیں بلکہ آپنڑے پیٹ دی خدمت کریندے ہِن۔ او آپنڑے مِٹھے تے خوشامد دے گالھیں نال اُنہاں لوکاں کُوں دوکھا ڈیندے ہِن، جیہڑے کُجھ نئیں جانڑدے۔ تُہاڈی فرمانبرداری ساریاں ءچ مشہور تھی گئی ہے، اِیں واسطے مَیں تُہاڈے بارے ءچ خوش ہاں، پر ایہ چاہندا ہاں جو تُساں نیکی کرݨ دے بارے ءچ سمجھدار بنڑ ونجو تے بدی کرݨ دے بارے ءچ بھولے بنڑ ونجو۔ خُدا جیہڑا اِطمینان دا سرچشمہ ہے، شیطان کُوں تُہاڈے پیراں تلے جلد کُچلوا ڈیسی۔ ساڈے خُداوند یسُوع مسیح دا فضل تُہاڈے نال راہوے۔ میڈا ہم خدمت تِیمُتِھیُس تے میڈی قوم آلے لُوکِیُس، یاسون تے سوسِپطرُس تُہاکُوں سلام آدھے ہِن۔ مَیں تِرتیُس جئیں اِیں خط کُوں پولُس کیتے لِکھیا ہے، تُہاکُوں خُداوند ءچ سلام آدھا ہاں۔ گِیُس، جیہڑا میڈی تے اِتھاں دی ساری کلیسیا دی مہمان نوازی کریندے، تُہاکُوں سلام آدھے۔ شہر دا خزانچی اِراستُس تے کوارتُس بِھرا تُہاکُوں سلام آدھے ہِن۔ [ساڈے خُداوند یسُوع مسیح دا فضل تُہاڈے نال ہووے۔ آمین۔] خُدا دی تمجید ہووے جیہڑا تُہاکُوں میڈی خوشخبری یعنی یسُوع مسیح دی تبلیغ دے وسیلے مضبوط کر سگدا ہے، اُوں بھید دے مُکاشفہ دے مطابق جیہڑا ازل کنُوں لُکیا ریہا پر ہُنڑ ظاہر تھی گئے۔ او ازلی خُدا دے حُکم دے مطابق نبیاں دیاں کتاباں دے ذریعے ساریاں قوماں کُوں ڈسایا گِیا ہے تاں جو او اِیمان گِھن آ تے خُدا دے تابع تھی ونجنڑ۔ تے ہُنڑ یسُوع مسیح دے وسیلے نال اُوں واحد تے حِکمت آلے خُدا دی ابد تئیں تمجید تھیندی راہوے۔ آمین۔ ایہ خط میں پولُس دی طرفوں ہے جیہڑا خُدا دی مرضی نال یسُوع مسیح دا رسُول ہووݨ کیتے سڈیا گِیا، تے ساڈے بِھرا سوستھِنیس دی طرفوں، خُدا دی اُوں کلیسیا دے ناں جیہڑی کُرِنتُھس شہر ءچ ہے، یعنی اُنہاں دے ناں جیہڑے یسُوع مسیح ءچ پاک کیتے گئے تے مُقدّس لوک ہووݨ کیتے سڈے گئے ہِن۔ ایہ خط اُنہاں ساریاں دے ناں وی ہے جیہڑے جاہ جاہ یسُوع مسیح دا ناں گِھندے ہِن جیہڑا اُنہاں دا تے ساڈا خُداوند ہے۔ ساڈے خُدا باپ تے خُداوند یسُوع مسیح دی طرفوں تُہاکُوں فضل تے اِطمینان حاصل تھیندا راہوے۔ مَیں تُہاڈے کیتے ہمیشاں خُدا دا شُکر کریندا ہاں کیوں جو اُوں یسُوع مسیح ءچ تُہاڈے اُتے فضل کیتے۔ تُساں اُوندے ءچ ہر لحاظ نال یعنی ہر قِسم دا کلام کرݨ تے علم رکھنڑ ءچ دولتمند تھی گئے ہیوے۔ اِینویں مسیح دے بارے ءچ ساڈی گواہی تُہاڈے ءچ چنگی طرحاں قائم تھی گئی ہے۔ ہُنڑ ساڈے خُداوند یسُوع مسیح دے ظاہر تھیوݨ دے اِنتظار ءچ راہندے ہوئے تُہاکُوں کہیں رُوحانی نعمت دی کمی نئیں۔ اُوہو تُہاکُوں آخر تئیں قائم وی رکھیسی تاں جو تُساں ساڈے خُداوند یسُوع مسیح دے واپس آوݨ دے ڈینہہ بے اِلزام تھیؤ۔ خُدا وفادار ہے جئیں تُہاکُوں آپنڑے پوتر، ساڈے خُداوند یسُوع مسیح دی شراکت کیتے سڈیا ہے۔ بِھراؤ! مَیں آپنڑے خُداوند یسُوع المسیح دے ناں کنُوں تُہاڈی مِنت کریندا ہاں جو تُساں ہِک ڈُوجھے نال اِتفاق رکھو، تے تُہاڈے ءچ پارٹی بازی نہ ہووے، بلکہ تُساں سارے ہِک دل تے ہِک سوچ تھی تے ہِک مُٹھ راہو۔ میڈے بِھراؤ! خلوئے دے گھر آلیاں میکُوں خبر ڈِتی ہے جو تُہاڈے ءچ جھیڑے تھیندے پئے ہِن۔ میڈا مطلب ایہ ہے جو تُہاڈے ءچوں کوئی آپنڑے آپ کُوں ”پولُس دا شاگرد“ آدھے، کوئی ”اپُلّوس دا“ کوئی ”کیفا دا“ تے کوئی ”مسیح دا۔“ کیا مسیح ونڈیج گِیا؟ کیا پولُس تُہاڈے کیتے صلیب اُتے چڑھایا گِیا؟ کیا تُساں پولُس دے ناں اُتے بپتسمہ گِھدا ہا؟ مَیں خُدا دا شُکر کریندا ہاں جو کرِسپُس تے گِیُس دے علاوہ مَیں کہیں کُوں بپتسمہ نئیں ڈِتا، تے ہُنڑ کوئی ایہ نئیں آکھ سگدا جو اُنہاں میڈے ناں اُتے بپتسمہ گِھدے۔ ہاں ستِفناس دے گھر آلیاں کُوں وی مَیں بپتسمہ ڈِتے۔ جے کہیں بئے کُوں بپتسمہ ڈِتا ہووے تاں میکُوں یاد نئیں۔ کیوں جو مسیح میکُوں بپتسمہ ڈیوݨ کیتے نئیں بلکہ خوشخبری سُنڑاوݨ کیتے بھیجے، او وی حِکمت آلی تقریر نال نئیں تاں جو یسُوع المسیح دی صلیب بے اثر نہ تھیوے۔ کیوں جو ہلاک تھیوݨ آلیاں کیتے تاں صلیب دا پیغام بیوقُوفی ہے پر نجات پاوݨ آلیاں کیتے خُدا دی قُدرت ہے۔ کیوں جو لِکھیا ہے جو ”مَیں دانشمنداں دی دانش کُوں فنا کر ڈیساں تے عقلمنداں دی عقل کُوں رَد کر ڈیساں ۔“ کِتھاں ہے دانش مند؟ کِتھاں ہے شریعت دا عالم؟ کِتھاں ہے اِیں جہان دا بحث کرݨ آلا؟ کیا خُدا دُنیا دی حِکمت کُوں بیوقُوفی نئیں کھڑایا؟ کیوں جو خُدا آپنڑی حِکمت دے مطابق ایہ فیصلہ کیتے جو دُنیا آلے آپنڑی حِکمت نال خُدا کُوں نہ جانڑݨ بلکہ خُدا کُوں ایہ پسند آیا جو اِیں بیوقُوفی دے پیغام دے وسیلے نال جیندی اساں تبلیغ کریندے ہیں اِیمان گِھن آوݨ آلیاں کُوں نجات بخشے۔ یہُودی نشان منگدے ہِن تے یُونانی دُنیاوی حِکمت گولھیندے ہِن۔ پر اساں صلیب اُتے چڑھائے گئے مسیح دی تبلیغ کریندے ہیں تے ایہ گالھ یہُودیاں کیتے تُھڈا کھاوݨ دا سبب ہے تے غیریہُودیاں کیتے بیوقُوفی۔ پر خُدا دے سڈے ہوئے لوکاں کیتے بھانویں او یہُودی ہووݨ یا غیریہُودی، مسیح خُدا دی قُدرت تے اُوندی حِکمت ہے۔ کیوں جو خُدا دی بیوقُوفی آدمیاں دی حِکمت کنُوں زیادہ حِکمت آلی ہے تے خُدا دی کمزوری آدمیاں دے زور کنُوں زیادہ زور آور ہے۔ بِھراؤ! اِیں گالھ اُتے غور کرو جو جِیں ویلے خُدا تُہاکُوں سڈیا تاں تُساں کیا ہَوے۔ تُہاڈے ءچوں بہُوں گھٹ دُنیا دی نظر ءچ حِکمت آلے، بہُوں گھٹ اثر رکھنڑ آلے تے بہُوں گھٹ وڈے خاندان آلے ہَن۔ پر خُدا اُنہاں کُوں جیہڑے دُنیا دی نظر ءچ بیوقُوف ہَن چُنڑ گِھدا تاں جو حِکمت آلیاں کُوں شرمندہ کرے تے جیہڑے دُنیا دی نظر ءچ کمزور ہَن اُنہاں کُوں چُنڑ گِھدا تاں جو زور آلیاں کُوں شرمندہ کرے۔ خُدا اِیں جہان دے ذلیل تے حقیر سمجھے ونجنڑ آلیاں کُوں بلکہ ناچیزاں کُوں چُنڑ گِھدا تاں جو اُنہاں چیزاں کُوں جیہڑیاں کُجھ سمجھیاں ویندیاں ہِن، فنا کرے۔ تاں جو کوئی بندہ خُدا دے سامنڑے فخر نہ کر سگے۔ پر ایہ خُدا دی طرفوں ہے جو تُساں مسیح یسُوع ءچ ہیوے جیہڑا ساڈے کیتے حِکمت بنڑیا یعنی راستبازی، پاکیزگی تے مخلصی۔ تاں جو جِینویں لِکھیا ہے اُونویں ای تھیوے جو ”جیہڑا فخر کرے او رب اُتے فخر کرے ۔“ بِھراؤ! جِیں ویلے مَیں تُہاڈے کولھ آیا ہم تاں خُدا دے راز دی منادی شاندار خطاب تے حِکمت دا اِظہار کریندے ہوئے نہ آیا ہم۔ کیوں جو مَیں فیصلہ کر گِھدا ہا جو تُہاڈے ءچ یسُوع المسیح بلکہ اُوندے صلیب اُتے چڑھائے ونجنڑ دی تبلیغ دے علاوہ کوئی بئی گالھ نہ کریساں۔ مَیں کمزوری تے ڈر دی حالت ءچ کمبدا ہویا تُہاڈے کولھ آیا۔ مَیں پیغام تے تبلیغ کریندے ویلے حِکمت تے قائل کرݨ آلے الفاظ اِستعمال کرݨ دی بجائے صرف رُوح القُدس دی قوت اُتے بھروسا کیتا، تاں جو تُہاڈا اِیمان اِنسانی حِکمت اُتے نئیں بلکہ خُدا دی قُدرت اُتے قائم ہووے۔ اساں حِکمت دے گالھیں اُنہاں لوکاں کُوں آدھے ہیں جیہڑے اِیمان ءچ بالغ ہِن، پر ایہ حِکمت نہ اِیں جہان دی ہے تے نہ ای اِیں جہان دے ختم تھی ونجنڑ آلے حاکماں دی ہے۔ بلکہ اساں خُدا دی او حِکمت پیش کریندے ہیں جیہڑی پہلے راز وانگُوں لُکی ہوئی ہئی، پر ہُنڑ ظاہر کیتی گئی ہے، تے جِینکُوں خُدا اِیں موجودہ جہان تُوں پہلے ای ساڈے جلال کیتے مقرر کر ڈِتا ہا۔ اِیں جہان دے حاکماں ءچوں کہیں وی اِیں حِکمت کُوں نہ سمجھیا۔ جے سمجھ گِھندے تاں جلال دے خُداوند کُوں صلیب اُتے نہ چڑھیندے۔ پر جِینویں پاک کلام ءچ لِکھیا ہے اُونویں ای تھیّا جو ”جیہڑا نہ تاں کہیں اکھ ڈِٹھا، نہ کہیں کَن سُنڑیا، نہ کہیں دے خیال ءچ آیا، او سبھ کُجھ خُدا اُنہاں کیتے تیار کیتا جیہڑے اُوں نال محبت رکھیندے ہِن ۔“ پر اساں اُتے خُدا اُنہاں کُوں رُوح القُدس دے وسیلے نال ظاہر کیتا، کیوں جو رُوح القُدس ہر گالھ، اِتُھوں تئیں جو خُدا دے گہرے راز دے گالھیں وی جانڑدے۔ اِنسان دے دل دے گالھیں کُوں کوݨ جاݨ سگدے، سوائے اُوندی آپنڑی رُوح دے جیہڑی اُوندے ءچ ہے۔ اِینویں ای خُدا دے رُوح القُدس دے سِوا کوئی خُدا دے دل دے گالھیں نئیں جاݨ سگدا۔ ساکُوں اِیں دُنیا دا رُوح نئیں مِلیا بلکہ خُدا دا رُوح القُدس مِلیا ہے تاں جو اساں اُنہاں برکتاں کُوں جاݨ سگوں جیہڑیاں ساکُوں خُدا دی طرفوں بخشیاں گئیاں ہِن۔ ایہ گالھیں اساں اِنسانی حِکمت دے سِکھائے ہوئے لفظاں نال نئیں بلکہ رُوح القُدس دے سِکھائے ہوئے لفظاں ءچ بیان کریندے ہیں۔ اساں رُوحانی لوکاں کُوں رُوحانی گالھیں سمجھیندے ہیں ۔ پر جیہڑا بندہ رُوحانی نئیں او خُدا دے رُوح دے گالھیں قبول نئیں کریندا، کیوں جو او اُوندی نظر ءچ بیوقُوفی ہِن تے نہ ای اُنہاں کُوں سمجھ سگدے کیوں جو او صرف رُوح القُدس دے ذریعے سمجھیاں ویندیاں ہِن۔ جیندے ءچ رُوح القُدس ہے او سبھ کُجھ پرکھ گِھندے پر او خود کہیں کنُوں پرکھیا نئیں ویندا جِینویں جو لِکھیا ہے ”رب دی سوچ کُوں کئیں جانڑیا جو اُونکُوں صلاح ڈے سگے ؟“ پر ساڈے ءچ مسیح دی سوچ ہے۔ بِھراؤ! مَیں تُہاڈے نال اِینویں گالھیں نہ کر سگیا جِینویں رُوحانی لوکاں نال کیتیاں ویندیاں ہِن، بلکہ جِینویں جسمانی لوکاں نال جیہڑے اجنڑ تئیں مسیح ءچ بال ہِن۔ مَیں تُہاکُوں کھیر پِلایا، کھانڑا نئیں کھوایا، کیوں جو تُساں اُونکُوں ہضم کرݨ دے قابل نہ ہَوے بلکہ ہُنڑ وی اِیں قابل نئیں ۔ تُساں اجنڑ تئیں جِسمانی لوکاں وانگُوں زندگی گُزریندے پئے ہیوے۔ کیوں جو تُہاڈے ءچ حسد تے جھیڑے ہِن تاں کیا تُساں دُنیاوی نئیں؟ کیا تُساں اِنسانی طور طریقے اُتے نئیں چلدے پئے؟ جِیں ویلے ہِک آدھے جو ”مَیں پولُس دا شاگرد ہاں“ تے ڈُوجھا آدھے جو ”مَیں اپُلّوس دا“ تاں کیا تُساں دُنیاوی لوکاں وانگُوں نہ تھئے؟ آخر اپُلّوس کیا ہے تے پولُس کیا ہے؟ ایہ صرف خادم ہِن جِنہاں دے وسیلے تُساں اِیمان گِھن آئے تے اساں ڈُوہائیں اُوہو کم کیتا جیہڑا خُداوند ساڈے کیتے علیحدہ علیحدہ مقرر کیتا۔ مَیں بُوٹا لایا، اپُلّوس پانڑی ڈِتا پر ودھایا خُدا۔ نہ لاوݨ آلا کُجھ ہے، نہ پانڑی ڈیوݨ آلا، پر خُدا سبھ کُجھ ہے جیہڑا اُونکُوں ودھاوݨ آلا ہے۔ لاوݨ آلے تے پانڑی ڈیوݨ آلے ڈوہائیں دا ہِکو مقصد ہے تے ہر ہِک کُوں آپنڑی محنت دے مطابق اجر مِلسی۔ کیوں جو اساں رَل تے خُدا دے کم کرݨ آلے ہیں تے تُساں خُدا دی کھیتی ہیوے۔ تے تُساں خُدا دا گھر وی ہیوے۔ مَیں اُوں فضل دے مطابق جیہڑا خُدا میکُوں بخشیا ہے، ہِک ماہر مِستری وانگُوں بنیاد رکھی ہے تے کوئی ڈُوجھا اُوندے اُتے گھر بنڑیندا پئے۔ پر ہر ہِک کُوں خبردار راہونڑاں چاہیدے جو او کِینویں بنڑیندے۔ کیوں جو جیہڑی بنیاد رکھی گئی ہے او یسُوع مسیح ہے تے اُوندے علاوہ ہُنڑ کوئی بندہ ڈُوجھی بنیاد نئیں رکھ سگدا۔ جیہڑا وی اِیں بنیاد کُوں اُسریندے ویلے سونا، چاندی، قیمتی پتھر، لکڑ، گھاہ یا بُھوں اِستعمال کریندے، اُوندے کم کُوں بھاہ عدالت دے ڈینہہ ظاہر کر ڈیسی کیوں جو بھاہ کم کُوں ازما تے ثابت کریسی جو کیجھا ہے۔ جئیں کہیں دا کیتا ہویا کم باقی راہسی، اُونکُوں اجر مِلسی۔ تے جِیندا کم سڑ ویسی او نُقصان چیسی پر خود سڑدے سڑدے بچ ویسی۔ کیا تُساں نئیں جانڑدے جو تُساں خُدا دی ہیکل ہیوے تے خُدا دا رُوح القُدس تُہاڈے ءچ وسیا ہویا ہے؟ جے کوئی خُدا دی ہیکل کُوں برباد کریسی تاں خُدا اُونکُوں برباد کریسی کیوں جو خُدا دی ہیکل پاک ہے تے او تُساں ہیوے۔ آپنڑے آپ کُوں فریب نہ ڈیؤ۔ جے تُہاڈے ءچوں کوئی آپنڑے آپ کُوں اِیں دُنیا دے معیار دے مطابق حِکمت آلا سمجھدا ہے تاں او نادان بنڑے تاں جو سچ مُچ دانا بنڑ سگے۔ کیوں جو دُنیا جِینکُوں حِکمت سمجھدی ہے، او خُدا دی نظر ءچ بیوقُوفی ہے، جِینویں لِکھیا ہے جو ”او عقلمنداں کُوں اُنہاں دی چالاکی ءچ پَھسا ڈیندے ۔“ تے ایہ وی جو ”رب جانڑدے جو عقلمنداں دیاں سوچاں بےکار ہوندیاں ہِن ۔“ اِیں واسطے کہیں اِنسان اُتے فخر نئیں کرنڑا چاہیدا کیوں جو سبھ کُجھ تُہاڈا ہے۔ بھانویں او پولُس ہووے یا اپُلّوس ہووے، پطرس ہووے یا دُنیا ہووے، زندگی ہووے یا موت ہووے، اِیں زمانے دیاں چیزاں ہووݨ یا آوݨ آلے زمانے دیاں، سبھ کُجھ تُہاڈا ہے تے تُساں مسیح دے ہیوے تے مسیح خُدا دا ہے۔ بس لوک ساکُوں مسیح دا خادم تے خُدا دے راز ڈساوݨ دا مُختار سمجھنڑ۔ ایہ ضروری ہے جو مُختار دیانتدار ہووے۔ میڈے کیتے ایہ اِنتہائی ہلکی گالھ ہے جو تُساں یا کوئی اِنسانی عدالت میکُوں پرکھے بلکہ مَیں تاں خود وی آپنڑے آپ کُوں نئیں پرکھدا۔ میڈا ضمیر میکُوں ملامت نئیں کریندا پر اِیں تُوں مَیں بے قصُور ثابت نئیں تھیندا، بلکہ میڈا پرکھنڑ آلا خُداوند ہے۔ اِیں واسطے تُساں وقت کنُوں پہلے کہیں گالھ دا فیصلہ نہ کرو بلکہ خُداوند دے آوݨ دا انتظار کرو۔ جیہڑے گالھیں اندھارے ءچ لُکے ہوئے ہِن او اُنہاں کُوں روشنی ءچ گِھن آسی تے لوکاں دے دل دے منصوبے ظاہر کریسی۔ اُوں ویلے ہر ہِک دی تعریف خُدا دی طرفوں کیتی ویسی۔ بِھراؤ! مَیں تُہاڈی خاطر اِنہاں گالھیں ءچ آپنڑا تے اپُلّوس دا ذِکر مثال دے طور تے پیش کیتے تاں جو تُساں ساڈے ذریعے سِکھو جو ”لِکھے ہوئے کنُوں اگھاں نہ ودھو۔“ تے تُہاڈے ءچوں کوئی کہیں ہِک دی حمایت ءچ ڈُوجھے دے خلاف نہ پُھنڈے۔ آخر تَیں ءچ تے ڈُوجھے ءچ فرق کوݨ کریندے؟ تیڈے ءچ کیہڑی خاص چیز ہے جیہڑی تیکُوں خُدا کنُوں نئیں مِلی؟ تے جڈاں تیکُوں مِلی ہے تاں فخر کیجھا جِینویں جو خود حاصل کیتی ہووے؟ واہ جی واہ! تُساں تاں پہلے کنُوں ای رجے ہوئے ہیوے! پہلے کنُوں ای دولت مند ہیوے! تُساں ساڈے بغیر بادشاہی وی کرݨ لگے ہیوے! کاش تُساں واقعی بادشاہی کریندے تاں جو اساں وی تُہاڈے نال بادشاہی کر سگدے! میکُوں تاں اِینویں لگدے جو خُدا اساں رسُولاں کُوں سبھ تُوں گھٹیا بنڑا تے اُنہاں جنگی قیدیاں وانگُوں پیش کیتے، جِنہاں کیتے موت مقرر تھی گئی ہے کیوں جو اساں پُوری دُنیا، فرشتیاں تے اِنساناں کیتے تماشا بنڑ گئے ہیں۔ اساں مسیح دی خاطر بیوقُوف بنڑ گئے ہیں، پر تُساں مسیح ءچ عقل مند ہیوے۔ اساں کمزور ہیں پر تُساں زور آور ہیوے۔ لوک تُہاڈی عزت کریندن پر ساڈی بے عزتی۔ اساں اِیں ویلے تئیں بُکھے ترِسّے ہیں، پھٹے پُرانڑے کپڑے پیندے ہیں، مُکے کھاندے تے رُلدے پِھردے ہیں۔ اساں آپنڑے ہتھاں نال سخت محنت کریندے ہیں۔ لوک ساکُوں بُرا بھلا آدھے ہِن پر اساں اُنہاں کُوں دُعا ڈیندے ہیں۔ جِیں ویلے لوک ساکُوں ستیندن تاں برداشت کریندے ہیں۔ او ساکُوں بدنام کریندے ہِن پر اساں نرم مزاجی نال جواب ڈیندے ہیں۔ اساں اَج تئیں دُنیا دے گند تے کُوڑے وانگُوں ہیں۔ اِنہاں گالھیں دے لِکھنڑ دا میڈا مقصد تُہاکُوں شرمندہ کرݨ نئیں بلکہ مَیں تُہاکُوں آپنڑے عزیز فرزند سمجھ تے خبردار کریندا ہاں۔ کیوں جو جے مسیح ءچ تُہاڈے ہزار اُستاد وی ہووݨ، وَل وی تُہاڈے پِیُو بہُوں سارے نئیں۔ کیوں جو یسُوع مسیح ءچ تُہاکُوں خوشخبری سُنڑاوݨ دے سببّوں مَیں ای تُہاڈا پِیُو بنڑیا۔ بس مَیں تُہاڈی مِنت کریندا ہاں جو میڈے نمونے اُتے ٹُرو۔ اِیں واسطے مَیں تِیمُتِھیُس کُوں جیہڑا خُداوند یسُوع ءچ میڈا عزیز تے وفادار فرزند ہے، تُہاڈے کولھ بھجیندا پِیا ہاں۔ او تُہاکُوں میڈے او طریقے یاد ڈیویسی جِنہاں اُتے مَیں یسُوع مسیح ءچ ہوندے ہوئے عمل کریندا ہاں تے جیہڑے مَیں ہر جاہ تے ہر کلیسیا ءچ سکھیندا ہاں۔ تُہاڈے ءچ کُجھ لوک ایہ سوچ تے بہُوں شیخی مریندے ہِن جو مَیں تُہاڈے کولھ آوݨ آلا ای نئیں۔ پر جے خُداوند دی مرضی تھئی تاں مَیں بہُوں جلدی تُہاڈے کولھ آساں، تے وَل مَیں اِنہاں شیخی بازاں دی نہ صرف گالھیں بلکہ اِنہاں دی طاقت وی جاݨ گِھنساں۔ کیوں جو خُدا دی بادشاہی صرف گالھیں نال نئیں بلکہ قُدرت نال ظاہر تھیندی ہے۔ تُساں کیا چاہندے ہیوے، جو مَیں سوٹی گِھن تے تُہاڈے کولھ آواں یا محبت تے نرم مزاجی نال؟ مَیں سُنڑیا ہے جو تُہاڈی جماعت ءچ ایجھی حرامکاری تھیندی پئی ہے جیہڑی غیر قوماں ءچ وی نئیں تھیندی، یعنی ہِک بندہ ایجھا ہے جیہڑا آپنڑی مَترئی ماء نال گُناہ کریندا ہے۔ تُساں وَل وی پُھنڈدے ہیوے۔ تُہاکُوں تاں اِیں گالھ اُتے ماتم کرنڑا چاہیدا ہا۔ جئیں ایہ بُرا کم کیتے، اُونکُوں تُہاڈے ءچوں کڈھ ڈیونڑا چاہیدے۔ بھانویں مَیں ظاہری طور تے تُہاڈے نال موجود نہ ہم وَل وی رُوحانی طور تے اُتھاں تُہاڈے نال ہم، تے میں اُوں زانی دے خلاف فیصلہ کر ڈِتے جِینویں میں اُتھاں موجود ہوواں۔ وَل جِیں ویلے تُساں خُداوند یسُوع دے ناں اُتے جمع تھیسو، تے مَیں وی رُوحانی طور تے حاضر ہوساں تے ساڈے خُداوند یسُوع دی قُدرت وی تُہاڈے نال ہوسی، تاں اُوں بندے کُوں جِسمانی ہلاکت کیتے شیطان دے حوالے کر ڈیؤ تاں جو خُداوند یسُوع دے واپس آوݨ دے ڈینہہ اُوندی رُوح بچ ونجے۔ تُہاڈا فخر کرݨ ٹھیک نئیں۔ کیا تُساں نئیں جانڑدے جو تھوڑا جِیہا خمیر سارے مَلے ہوئے اٹّے کُوں خمیرا کر ڈیندے؟ آپنڑے آپ کُوں بدی دے اُوں پُڑانڑے خمیر تُوں پاک کر گِھنو تاں جو تازہ مَلیا ہویا اٹّا بنڑ ونجو۔ تُساں ہیوے خمیر تُوں پاک کیوں جو مسیح جیہڑا فسح دا لیلا ہے ساڈے کیتے قُربان کیتا گئے۔ بس آؤ اساں عید مناؤں پر پُرانڑی خمیری روٹی نال نئیں جیہڑی گُناہ تے بدی دی روٹی ہے بلکہ بے خمیری روٹی نال جیہڑی خالص دِلی تے سچائی دی روٹی ہے۔ مَیں آپنڑے خط ءچ تُہاکُوں ایہ لِکھیا ہا جو زِناکاراں نال تعلق نہ رکھائے۔ میڈا مطلب ایہ نئیں جو دُنیا دے زِناکاراں نال، لالچیاں نال، ظالماں یا بُتاں دی پُوجا کرݨ آلیاں نال اصلُوں نہ مِلائے، کیوں جو اِینویں تاں تُہاکُوں دُنیا تُوں نِکلنڑاں پوسی۔ پر مَیں ایہ لِکھیا ہا جو جے کوئی اِیمان ءچ بِھرا اکھویندے تے وَل وی زِناکار، لالچی، بُتاں دا مننڑ آلا، مندھے کڈھنڑ آلا، شرابی یا ٹَھگ ہووے تاں اُوندے نال تعلق نہ رکھائے بلکہ ایجھیاں نال کھانڑا تئیں نہ کھوائے۔ کیوں جو باہر آلیاں دے بارے ءچ فیصلہ کرݨ نال میڈا کیا واسطہ؟ پر جیہڑے جماعت ءچ ہِن، کیا اُنہاں دے بارے ءچ فیصلہ کرݨ تُہاڈا کم نئیں؟ پر باہر آلیاں دا فیصلہ تاں خُدا ای کریسی۔ بس ”اُوں بدکار کُوں آپنڑے ءچوں کڈھ ڈیؤ ۔“ تُہاڈے ءچ ایہ جُرأت کِینویں تھئی جو تُساں ہِک ڈُوجھے دے جھیڑے دے فیصلے کیتے مُقدّساں دی بجائے غیر اِیمانداراں دی عدالت ءچ ونجو؟ کیا تُساں نئیں جانڑدے جو خُدا دے لوک دُنیا دا اِنصاف کریسن؟ تے جِیں ویلے تُہاکُوں دُنیا دا اِنصاف کرنڑا ہے تاں کیا تُساں اِیں قابل وی نئیں جو چھوٹے چھوٹے گالھیں دا فیصلہ کر سگو؟ کیا تُساں نئیں جانڑدے جو اساں فرشتیاں دا اِنصاف کریسوں؟ تاں کیا اساں اِیں دُنیا دے معاملات دا فیصلہ نئیں کر سگدے؟ جے تُہاڈے ءچ ایجھے دُنیاوی مقدمے ہووݨ تاں اُنہاں کُوں ایجھے مُنصف دے سامنڑے کیوں پیش کریندے ہیوے جِنہاں دی کلیسیا دی نِگاہ ءچ کوئی حیثیت نئیں؟ مَیں تُہاکُوں شرمندہ کرݨ کیتے ایہ آدھا ہاں۔ کیا واقعی تُہاڈے ءچ ہِک وی عقل مند نئیں جیہڑا آپنڑے بِھرانواں دا فیصلہ کر سگے؟ بلکہ بِھرا ڈُوجھے بِھرانواں اُتے مقدمہ کریندن تے او وی غیر اِیمانداراں دے سامنڑے۔ اصل ءچ تُہاڈی وڈی غلطی ایہ ہے جو تُساں آپس ءچ مقدمہ بازی کریندے ہیوے۔ کیا اِیں تُوں ظلم برداشت کرݨ چنگا نئیں؟ کیا اِیں تُوں نُقصان قبول کرݨ چنگا نئیں؟ بجائے اِیندے تُساں خود ظلم کریندے ہیوے تے نُقصان کریندے ہیوے تے او وی آپنڑے ای بِھرانواں دا۔ کیا تُساں نئیں جانڑدے جو بدکار خُدا دی بادشاہی دے وارث نہ ہوسن؟ دوکھے ءچ نہ رہوائے۔ نہ حرام کار، نہ بُتاں دی پُوجا کرݨ آلے، نہ زِنا کار، نہ لونڈے باز، نہ چور، نہ لالچی، نہ شرابی، نہ مندھے کڈھنڑ آلے، نہ ظالم خُدا دی بادشاہی دے وارث ہوسن۔ تُہاڈے ءچوں کُجھ ایجھے ای ہَن، پر تُساں خُداوند یسُوع المسیح دے ناں ءچ، تے خُدا دے رُوح القُدس دے ذریعے دھویج گئے، پاک تھی گئے تے راستباز وی کھڑائے گئے۔ ”سبھ چیزاں میڈے کیتے جائز ہِن “ پر سبھ چیزاں فائدہ مند نئیں۔ سبھ چیزاں میڈے کیتے جائز تاں ہِن پر مَیں کہیں چیز دا غُلام نہ بنڑساں۔ بےشک ”کھانڑا پیٹ کیتے تے پیٹ کھانڑے کیتے ہے تے خُدا اِنہاں ڈُوہائیں کُوں ختم کر ڈیسی۔“ پر بدن حرام کاری کیتے نئیں بلکہ خُداوند کیتے ہے تے اُوہو اُوندا مالک ہے۔ تے خُدا آپنڑی قُدرت نال ساکُوں وی زندہ کریسی جِینویں خُداوند یسُوع کُوں زندہ کیتا۔ کیا تُساں نئیں جانڑدے جو تُہاڈے بدن مسیح دے اَنگ ہِن؟ کیا مَیں مسیح دے انگاں کُوں گِھن تے کہیں طوائف نال جوڑ ڈیواں؟ ہرگز نئیں! کیا تُساں نئیں جانڑدے جو جیہڑا کہیں طوائف نال سَمدے، او اُوندے نال ہِک تَن تھی ویندے؟ کیوں جو لِکھیا ہے جو ”او ڈوہائیں ہِک تَن ہوسن ۔“ پر جیہڑا آپنڑے آپ کُوں خُداوند نال جوڑ ڈیندے او رُوحانی طور تے اُوندے نال ہِک تھی ویندے۔ حرام کاری کنُوں بھجو۔ اِنسان دے ڈُوجھے سارے گُناہ بدن نال تعلق نئیں رکھیندے پر حرام کار آپنڑے بدن دا وی گُنہگار ہے۔ کیا تُساں نئیں جانڑدے جو تُہاڈا بدن رُوح القُدس دی ہیکل ہے جیہڑا تُہاڈے ءچ وسدے تے جیہڑا تُہاکُوں خُدا دی طرفوں مِلے؟ تُساں آپنڑے مالک نئیں کیوں جو قیمت نال مُل گِھدے گئے ہیوے۔ بس آپنڑے بدن تُوں خُدا دا جلال ظاہر کرو ۔ جیہڑے گالھیں تُساں لِکھیاں ہِن، اُنہاں دے بارے ءچ میڈا جواب ایہ ہے جو بے شک بندے کیتے چنگا ہے جو شادی نہ کرے ۔ پر حرام کاری کنُوں بچنڑ کیتے ہر مرد کُوں چاہیدے جو اُوندی ذال ہووے تے ہر عورت کُوں چاہیدے جو اُوندا پایا ہووے۔ پایا آپنڑی ذال دا حق ادا کرے تے اُونویں ای ذال آپنڑے پئے دا۔ ذال کُوں آپنڑے بدن اُتے اِختیار نئیں بلکہ اُوندے پئے کُوں ہے۔ اُونویں ای پئے کُوں وی آپنڑے بدن اُتے اِختیار نئیں بلکہ اُوندی ذال کُوں ہے۔ تُساں ڈوہائیں ہِک ڈُوجھے کنُوں اَنج نہ رہوائے سوائے ڈوہائیں دی رضامندی دے تے صرف کُجھ عرصہ کیتے تاں جو دُعا کرݨ کیتے فُرصت مِل سگے پر بعد ءچ ولا کٹھے تھی ونجائے، کِتھائیں اِینویں نہ تھیوے جو تُساں آپنڑے آپ اُتے قابو نہ رکھ سگو تے شیطان تُہاکُوں ازمائش ءچ سَٹ ڈیوے۔ ایہ مَیں رعایت ڈیندے ہوئے آدھا پِیا ہاں، نہ جو حُکم ڈیندے ہوئے۔ مَیں تاں چاہندا ہاں جو جِینویں مَیں ہاں سارے بندے اُونویں ہووݨ۔ پر ہر ہِک کُوں خُدا دی طرفوں اَنج اَنج نعمت مِلی ہے، کہیں کُوں کوئی، کہیں کُوں کوئی۔ مَیں غیر شادی شدہ تے بیوہ عورتاں کُوں ایہ آدھا ہاں جو جے میڈے وانگُوں راہنڑ تاں اُنہاں کیتے چنگا ہے۔ پر جے برداشت دی طاقت نہ ہووے تاں شادی کر گِھننڑ کیوں جو شادی کر گِھننڑ خواہش دی بھاہ ءچ سڑدے راہنڑ کنُوں چنگا ہے۔ پر جیہڑے شادی شدہ ہِن اُنہاں کُوں مَیں نئیں بلکہ خُداوند حُکم ڈیندے جو ذال آپنڑے پئے کُوں نہ چھوڑے۔ پر جے اُونکُوں چھوڑ ڈیندی ہے تاں وَل شادی نہ کرے یا آپنڑے پئے نال ولا صُلح کر گِھنے تے پایا وی آپنڑی ذال کُوں طلاق نہ ڈیوے۔ باقی لوکاں کُوں خُداوند نئیں بلکہ میں ای ایہ آدھا ہاں جو جے کہیں اِیماندار بِھرا دی غیر اِیماندار ذال ہووے پر او اُوندے نال راہنڑ ءچ راضی ہووے تاں پایا اُونکُوں نہ چھوڑے۔ تے جے کہیں اِیماندار بھینڑ دا پایا غیر اِیماندار ہووے پر اُوندے نال راہنڑ کیتے راضی ہووے تاں او عورت پئے کُوں نہ چھوڑے۔ کیوں جو جیہڑا پایا اِیماندار نئیں او آپنڑی ذال دے سببّوں پاک ہے تے غیر مسیحی ذال آپنڑے اِیماندار پئے دے سببّوں پاک ہے، نہ تاں تُہاڈے بال ناپاک ہوندے پر ہُنڑ پاک ہِن۔ پر جے کوئی غیر ایماندار پایا یا ذال اَنج تھیوݨ چاہوے تاں اُونکُوں تھیوݨ ڈیؤ۔ اِیں صورت ءچ کوئی اِیماندار بِھرا یا بھینڑ پابند نئیں، کیوں جو خُدا ساکُوں صُلح سلامتی نال راہوݨ کیتے سڈیا ہے۔ ذال! تیکُوں کیا پتہ، متاں تُوں آپنڑے پئے دی نجات دا سبب بنڑ ونجیں، تے پئے! تیکُوں کیا پتہ، متاں تُوں آپنڑی ذال دی نجات دا سبب بنڑ ونجیں؟ پر جِینویں خُداوند ہر بندے کُوں مقرر کیتا ہے تے جِینویں خُدا ہر ہِک کُوں سڈیا ہے، اُونویں ای او ٹُرے۔ مَیں یکے کلیسیاواں ءچ اِیہو اصُول مقرر کریندا ہاں۔ جیہڑا ختنے دی حالت ءچ سڈیا گئے، او ختنے دی حالت ءچ راہوے تے جیہڑا ختنے دے بغیر سڈیا گئے او ختنہ نہ کراوے۔ ختنہ کراوݨ یا نہ کراوݨ کوئی خاص گالھ نئیں بلکہ خُدا دے حُکماں اُتے عمل کرݨ ای سبھ کُجھ ہے۔ ہر بندہ اُوں حالت ءچ ای راہوے جیندے ءچ او سڈیا گئے۔ جے تُوں غُلامی دی حالت ءچ سڈیا گئیں تاں پریشان نہ تھی، پر جے تیکُوں ازاد تھیوݨ دا موقع مِلے تاں ازاد تھی وَنج۔ کیوں جو جیہڑا غُلامی دی حالت ءچ خُداوند ءچ سڈیا گئے او خُداوند دا ازاد کیتا ہویا ہے۔ اِینویں ای جیہڑا ازادی دی حالت ءچ سڈیا گئے او مسیح دا غُلام ہے۔ تُساں قیمت ڈے تے مُل گِھدے گئے ہیوے، اِنساناں دے غُلام نہ بنڑو۔ بِھراؤ! جیہڑا کوئی جیہڑے حال ءچ سڈیا گئے، او اُوں حال ءچ ای خُدا ءچ قائم راہوے۔ کُنواریاں دے بارے ءچ خُداوند دا ڈِتا ہویا کوئی حُکم میڈے کولھ نئیں، پر خُداوند دی رحمت نال ہِک دیانتدار بندے دی حیثیت نال مَیں آپنڑی شخصی رائے ڈیندا ہاں۔ میڈے خیال ءچ اِیں مُصیبت دے دور ءچ تُہاڈے کیتے اِیہو چنگا ہے جو تُساں جِینویں ہیوے اُونویں ای راہو۔ جے شادی شدہ ہیں تاں ذال کُوں چھوڑ ڈیوݨ دا خیال نہ کر۔ جے ذال نئیں تاں شادی کرݨ دی کوشش نہ کر۔ پر جے تُوں شادی کر وی گِھدی ہے تاں ایہ کوئی گُناہ نئیں تے جے کوئی کُنواری چھوہیر شادی کر گِھنے تاں ایہ وی گُناہ نئیں۔ پر ایجھے لوک مُصیبتاں برداشت کریسن تے مَیں تُہاکُوں مُصیبت تُوں بچاوݨ چاہندا ہاں۔ بِھراؤ! مَیں ایہ آدھا ہاں جو وقت گھٹ ہے، اِیں واسطے اگُوں کنُوں ذال آلے اِینویں ہووݨ جِینویں او بغیر ذال دے ہِن۔ رووݨ آلے ایجھے ہووݨ جو جِینویں او روندے نئیں تے خوشی مناوݨ آلے ایجھے ہووݨ جِینویں او خوشی نئیں منیندے۔ مُل گِھننڑ آلے ایجھے ہووݨ جِینویں اُنہاں دے کولھ کُجھ نئیں۔ تے دُنیا دا کاروبار کرݨ آلے اِینویں ہووݨ جِینویں جو دل نال نہ کریندے ہووݨ کیوں جو دُنیا دی موجودہ شکل بدلدی ویندی ہے۔ مَیں ایہ چاہندا ہاں جو تُساں بے فِکر راہو۔ غیر شادی شدہ بندہ خُداوند دے گالھیں دی فِکر ءچ راہندے جو کِینویں خُداوند کُوں خوش کرے۔ پر شادی شدہ بندہ دُنیا دے گالھیں دے بارے ءچ فِکر مند راہندے جو کِینویں آپنڑی ذال کُوں خوش کرے۔ تے اُوندی توجہ ڈُوہائیں پاسے راہندی ہے۔ غیر شادی شدہ عورت خُداوند دے گالھیں دی فِکر ءچ راہندی ہے جو اُوندا جِسم تے رُوح ڈوہائیں پاک ہووݨ۔ پر شادی شدہ عورت دُنیا دی فِکر ءچ راہندی ہے جو کِینویں آپنڑے پئے کُوں خوش کرے۔ مَیں ایہ تُہاڈے فائدے کیتے آدھا ہاں نہ جو پابندی لاوݨ کیتے تاں جو چنگے چال چلنڑ نال تُساں بغیر رکاوٹ دے خُداوند دی خدمت ءچ مصروف راہو۔ جے کہیں کُنواری چھوہیر دا پِیُو ایہ سمجھدے جو او آپنڑی چھوہیر دا حق مریندے تے اُوندی جوانی ڈھلدی ویندی ہے تے شادی دی ضرورت وی معلوم تھیوے تاں اُونکُوں چاہیدے جو چھوہیر کُوں پرنا چھوڑے کیوں جو ایہ کوئی گُناہ نئیں۔ وَل وی او بندہ جئیں آپنڑے دل ءچ پکّا اِرادہ کر گِھدے تے جیہڑا ایہ ضرورت محسوس نئیں کریندا تے آپنڑی خواہش اُتے اِختیار رکھیندے تے دل ءچ نیّت کیتی ہے جو او آپنڑی چھوہیر کُوں کُنواری ای راہنڑ ڈیسی تاں او چنگا کریندے۔ بس جیہڑا آپنڑی کُنواری چھوہیر دی شادی کر ڈیندے او چنگا کریندے تے جیہڑا اِینویں نئیں کریندا او اُوں تُوں وی چنگا کریندے۔ ذال آپنڑے پئے دے جیندے جی اُوندی پابند ہے پر جے او مر ونجے تاں او جیندے نال چاہوے ڈُوجھی شادی کر سگدی ہے، شرط ایہ ہے جو او خُداوند دا شاگرد ہووے۔ پر میڈی رائے ایہ ہے جو جے او بیوہ ای راہوے تاں زیادہ خوش راہسی تے مَیں سمجھدا ہاں جو خُدا دا رُوح القُدس میڈے ءچ وی ہے۔ بُتاں کُوں پیش کیتیاں ونجنڑ آلیاں قُربانیاں دے بارے ءچ ایہ ہے: اساں جانڑدے ہیں جو ”اساں سارا علم رکھیندے ہیں“ پر علم غرور پیدا کریندے جڈاں جو محبت ترقی بخشیندی ہے۔ جیہڑا وی سمجھدا ہے جو او کُجھ جانڑدا ہے تاں او ہُنڑ تئیں اُونویں نئیں جانڑدا جِینویں جاننڑاں چاہیدے۔ پر جیہڑا خُدا نال محبت رکھیندے، خُدا اُونکُوں جانڑدے۔ بُتاں دیاں قُربانیاں دا گوشت کھاوݨ دے بارے ءچ اساں جانڑدے ہیں جو دُنیا ءچ بُتاں دی حقیقت بالکل نئیں۔ خُدا ہِک ہے تے اُوندے علاوہ کوئی معبُود نئیں۔ بھانویں اسمان ءچ تے زمین اُتے بہُوں ساریاں چیزاں معبُود اکھویندیاں ہِن تے کُجھ لوکاں کیتے بہُوں سارے ”خُدا“ تے ”خُداوند“ ہِن پر ساڈے کیتے تاں ہِکو ای خُدا ہے یعنی اسمانی باپ جیہڑا ساریاں چیزاں دا خالق ہے تے اساں اُوندے کیتے زندہ ہیں۔ تے ہِک ای خُداوند ہے یعنی یسُوع مسیح جیندے وسیلے نال ساریاں چیزاں وجود ءچ آئیاں تے اساں وی اُوندے وسیلے نال زندہ ہیں۔ پر ایہ علم ساریاں دے کولھ نئیں، بلکہ کُجھ ایماندار ہُنڑ تئیں بُتاں دے عادی ہِن۔ اِیں واسطے جِیں ویلے او قُربانی دا گوشت کھاندن تاں ایہ سمجھ تے جو بُت دی پُوجا کریندے پئین، آپنڑے ضمیر دی کمزوری دے سببّوں آپنڑے آپ کُوں قصُوروار سمجھنڑ لگدن۔ اصل ءچ کھانڑا ساکُوں خُدا دے نیڑے نہ گِھن آسی۔ جے اساں نہ کھاؤں تاں ساڈا کوئی نُقصان نئیں تے جے کھا گِھنوں تاں فائدہ وی نئیں۔ پر خبردار راہو، اِینویں نہ تھیوے جو تُہاڈی ایہ ازادی کمزور اِیمان آلیاں کیتے تُھڈا کھاوݨ دا سبب بنڑ ونجے۔ کیوں جو جے کوئی کمزور اِیمان آلا تَیں علم رکھنڑ آلے کُوں بُت خانہ ءچ کھانڑا کھاندے ڈیکھے تاں کیا اُونکُوں آپنڑے ضمیر دے خلاف بُتاں دی قُربانی دے گوشت کُوں کھا گِھننڑ دی جُرأت نہ مِل ویسی؟ اِینویں تیڈا علم اُوں کمزور اِیمان آلے دی ہلاکت دا سبب بنڑ ویسی جیندے کیتے مسیح آپنڑی جان قُربان کیتی۔ تُوں آپنڑے بِھرانواں دے کمزور ضمیر کُوں دھک لگنڑ دا سبب بنڑ تے نہ صرف اُنہاں دے خلاف گُناہ کیتے بلکہ مسیح دے خلاف وی۔ اِیں واسطے جے میڈا کھانڑا میڈے مسیحی بِھرا کیتے تُھڈا لگنڑ دا سبب ہے تاں مَیں گوشت کڈھائیں نہ کھاساں تاں جو آپنڑے بِھرا کیتے تُھڈا لگنڑ دا سبب نہ بنڑاں۔ کیا مَیں ازاد نئیں؟ کیا مَیں رسُول نئیں؟ کیا مَیں یسُوع کُوں نئیں ڈِٹھا جیہڑا ساڈا خُداوند ہے؟ کیا تُساں خُداوند کیتے میڈی خدمت دا پھل نئیں؟ جے مَیں ڈُوجھیاں دی نظر ءچ رسُول نئیں تاں کم از کم تُہاڈی نظر ءچ تاں ہاں کیوں جو تُساں خُداوند ءچ میڈے رسُول ہووݨ دا ثبوت ہیوے۔ میکُوں پرکھنڑ آلیاں کیتے اِیہو میڈا جواب ہے: کیا ساکُوں کھاوݨ پِیوݨ دا حق نئیں؟ کیا ساکُوں ایہ حق نئیں جو کہیں اِیماندار عورت کُوں پرنا گِھنوں تے اُونکُوں آپنڑے نال گِھدی پِھرُوں، جِینویں بئے رسُول، خُداوند دے بِھرا تے کیفا کریندے ہِن؟ کیا صرف میڈے تے برنباس کیتے ضروری ہے جو خدمت کرݨ دے نال نال محنت کر تے آپنڑا گُزارا کرُوں ؟ کیہڑا سپاہی آپنڑے خرچے اُتے جنگ کریندے؟ کیہڑا کِسان انگُور دا باغ لا تے انگُور نئیں کھاندا؟ یا کیہڑا آجڑی آپنڑا اِجڑ چرا تے، اُوندا کھیر نئیں پِیندا؟ کیا مَیں ایہ گالھیں اِنسانی سوچ نال آدھا ہاں؟ کیا شریعت وی اِیہو نئیں آدھی؟ بس مُوسیٰ دی شریعت ءچ لِکھیا ہے جو ”گہاوݨ ویلے ڈاند دا مُنہ نہ بدھیں ۔“ کیا خُدا کُوں ڈانداں دی ای فِکر ہے؟ کیا او خاص کر ایہ ساڈے کیتے نئیں آدھا؟ ہاں ایہ ساڈے کیتے لِکھیا گئے کیوں جو ہَل وہاوݨ آلا اُمید اُتے ہَل وہیندے تے گہاوݨ آلا اُمید اُتے گہیندے جو میکُوں فصل دا کُجھ حصہ ضرور مِلسی۔ جڈاں اساں تُہاڈے فائدے کیتے رُوحانی بیج رہایا تاں کیا ساکُوں ایہ حق نئیں جو اساں تُہاڈے ءچوں دُنیاوی چیزاں دی فصل کپوں؟ جِیں ویلے ڈُوجھیاں کُوں ایہ حق ہے جو تُہاڈے تُوں کُجھ گِھننڑ تاں کیا ساڈا حق اُنہاں کنُوں زیادہ نہ ہوسی؟ وَل وی اساں اِیں حق کُوں اِستعمال نہ کیتا بلکہ سبھ کُجھ برداشت کریندے ریہے تاں جو ساڈے سببّوں مسیح دی خوشخبری ءچ رکاوٹ نہ تھیوے۔ کیا تُساں نئیں جانڑدے جو جیہڑے ہیکل ءچ خدمت کریندے ہِن، اُنہاں کُوں کھانڑا اُتھوں مِلدے؟ تے جیہڑے قُربان گاہ اُتے خدمت کریندے ہِن، اُنہاں کُوں اُنہاں قُربانیاں ءچوں حصہ مِلدے؟ اِینویں ای خُداوند وی مقرر کیتے جو خوشخبری دی تبلیغ کرݨ آلے خوشخبری قبول کرݨ آلیاں دی مدد نال گُزارہ کرݨ۔ پر مَیں اِیں حق کُوں اِستعمال نئیں کیتا تے نہ ای اِیں خیال نال لِکھدا پِیا ہاں جو ہُنڑ کُجھ مِلسی۔ کوئی میڈے تُوں میڈے فخر دا سبب کَھس گِھنے، اِیں تُوں میڈے کیتے بہتر ہے جو میں مر ونجاں۔ پر جڈاں مَیں خوشخبری دی تبلیغ کریندا ہاں تاں اِیندے ءچ میڈا کوئی فخر نئیں کیوں جو ایہ تاں میڈے اُتے فرض ہے۔ بلکہ میڈے اُتے افسوس، جے مَیں خوشخبری دی تبلیغ نہ کراں۔ جے مَیں آپنڑی مرضی نال تبلیغ کریندا ہاں تاں وَل میڈے کیتے اجر ہے پر میں ایہ آپنڑی مرضی نال نئیں کریندا بلکہ خُدا ایہ ذمہ داری میڈے سپُرد کیتی ہے۔ بس میڈا اجر کیا ہے؟ صرف ایہ جو خوشخبری کُوں مُفت کر ڈیواں تے اُوں حق دا فائدہ نہ چاواں جیہڑا تبلیغ دی وجہ کنُوں میکُوں مِلدا ہے۔ بھانویں مَیں ازاد ہاں تے کہیں دا پابند نئیں، وَل وی مَیں آپنڑے آپ کُوں سبھ دا غُلام بنڑا ڈِتے تاں جو زیادہ لوکاں کُوں مسیح کولھ گِھن آ سگاں۔ یہُودیاں دے وچال مَیں آپنڑے آپ کُوں یہُودیاں آلی کار بنڑایا تاں جو یہُودیاں کُوں گِھن آواں۔ شریعت دے مننڑ آلیاں دے وچال شریعت دا مننڑ آلا بنڑیا تاں جو شریعت آلیاں کُوں گِھن آواں، بےشک مَیں آپ شریعت دا پابند نہ ہم۔ جِنہاں دے کولھ شریعت نئیں، اُنہاں دے وچال مَیں بغیر شریعت آلا بنڑیا تاں جو اُنہاں کُوں جِنہاں کولھ شریعت نئیں گِھن آواں۔ بےشک مَیں خُدا دی شریعت تُوں ازاد نئیں بلکہ مسیح دی شریعت دے تابع ہاں۔ کمزوراں دی خاطر کمزور بنڑیا تاں جو کمزوراں کُوں گِھن آواں۔ مَیں ساریاں لوکاں دی خاطر سبھ کُجھ بنڑیا تاں جو کہیں نہ کہیں طرحاں کُجھ کُوں بچا سگاں۔ مَیں ایہ سبھ کُجھ خوشخبری دی خاطر کریندا ہاں تاں جو ڈُوجھیاں نال خوشخبری دیاں برکتاں ءچ شریک تھی سگاں۔ کیا تُساں نئیں جانڑدے جو مُقابلے ءچ بھجنڑ آلے تاں سبھ بھجدے ہِن پر اِنعام صرف ہِک کُوں مِلدے؟ تُساں وی اِینویں ای بھجو تاں جو اِنعام حاصل کرو۔ مُقابلہ ءچ حصہ گِھننڑ آلے ہر طرحاں دا پرہیز کریندے ہِن۔ او لوک ہِک مُرجھاوݨ آلا ہار حاصل کرݨ کیتے اِینویں کریندے ہِن، پر اساں اُوں ہار کیتے اِینویں کریندے ہیں جیہڑا کڈھائیں نہ مُرجھیسی۔ اِیں واسطے مَیں وی اِینویں ای نئیں بلکہ مقصد سامنڑے رکھدے ہوئے بھجدا ہاں تے مُکے باز آلی کار لڑدا ہاں، ہوا کُوں مارݨ آلے آلی کار نئیں۔ بلکہ مَیں آپنڑے بدن اُتے سختی کریندا ہاں تے اُونکُوں قابو ءچ رکھیندا ہاں، اِینویں نہ تھیوے جو ڈُوجھیاں کُوں تبلیغ کر تے، مَیں خود اِنعام تُوں محروم تھی وَنجاں۔ بِھراؤ! مَیں تُہاکُوں یاد ڈیواوݨ چاہندا ہاں جو ساڈے پِیُو ڈاڈا کِینویں بدّل تلے ریہے تے سارے سمندر ءچوں تھی تے پار لنگھے۔ اُنہاں ساریاں مُوسیٰ دے پیروکار تھیوݨ کیتے، بدّل تے سمندر ءچ بپتسمہ گِھدا۔ تے ساریاں ہِکو رُوحانی خوراک کھادی، تے ساریاں ہِکو رُوحانی پانڑی پِیتا، کیوں جو او اُوں رُوحانی چٹان کنُوں پانڑی پِیندے ہَن جیہڑی اُنہاں دے نال چلدی ہئی تے او چٹان مسیح ہئی۔ وَل وی خُدا اُنہاں ءچوں بہُوں ساریاں تُوں راضی نہ تھیّا، اِیں واسطے او بیابان ءچ ای ہلاک تھی گئے ۔ ایہ گالھیں ساڈے کیتے ہِک سبق ہِن تاں جو اساں اُنہاں لوکاں آلی کار بُرے چیزاں دی خواہش نہ کرُوں۔ تُساں بُت پرستی نہ کرو جِینویں اُنہاں ءچوں کُجھ لوکاں کیتی جِینویں جو لِکھیا ہے، ”لوک کھاوݨ پِیوݨ کیتے بیٹھے تے وَل اُٹھی تے نچنڑ ٹپنڑ لگے ۔“ اساں حرام کاری نہ کرُوں جِینویں اُنہاں لوکاں ءچوں کُجھ لوکاں کیتی تے ہِکو ڈینہہ ءچ تریوِیہہ ہزار مارے گئے ۔ تے اساں مسیح دی ازمائش نہ کرُوں جِینویں اُنہاں ءچوں کُجھ کیتی تے سَپاں اُنہاں کُوں ہلاک کر ڈِتا ۔ بُڑبُڑ نہ کرو جِینویں اُنہاں ءچوں کُجھ لوکاں بُڑبُڑ کیتی تے موت دے فرشتے دے ہتُھوں مارے گئے ۔ ایہ گالھیں اُنہاں کیتے سبق دے طور تے پیش آئیاں تے اساں آخری زمانے آلیاں دی نصیحت کیتے لِکھیاں گئیاں۔ بس جیہڑا کوئی آپنڑے آپ کُوں اِیمان ءچ مضبوطی نال قائم سمجھدے، خبردار راہوے جو کِتھائیں ڈھے نہ پووے۔ تُہاڈے اُتے ایجھی ازمائش نئیں آئی جیہڑی تُہاڈی برداشت تُوں باہر ہووے۔ تے خُدا وفادار ہے، او تُہاڈی برداشت کنُوں زیادہ سخت ازمائش تُہاڈے اُتے نہ آوݨ ڈیسی۔ بلکہ جِیں ویلے ازمائش آسی تاں او اُوں کنُوں بچ نِکلنڑ دی راہ وی پیدا کر ڈیسی تاں جو تُساں برداشت کر سگو۔ اِیں واسطے عزیزو! بُت پرستی کنُوں بھجو۔ مَیں تُہاکُوں سمجھ دار جاݨ تے ایہ گالھیں آدھا ہاں۔ تُساں خود میڈے گالھیں کُوں پرکھو۔ جِیں ویلے اساں [مسیح دی یادگاری ءچ] اُوں برکت دے پیالے اُتے برکت منگ تے پِیندے ہیں تاں کیا اساں مسیح دے خون ءچ شریک نئیں تھیندے؟ تے جڈاں او روٹی تروڑ تے کھاندے ہیں تاں کیا اساں مسیح دے بدن ءچ شریک نئیں تھیندے ؟ روٹی ہِکو ہے اِیں واسطے اساں جیہڑے بہُوں سارے ہیں ہِکو بدن ہیں کیوں جو اساں سارے اُوہو ہِک روٹی ءچ شریک تھیندے ہیں۔ بنی اِسرائیل اُتے غور کرو۔ کیا قُربانی دا گوشت کھاوݨ آلے قُربان گاہ دی عبادت ءچ شریک نئیں؟ کیا میڈا مطلب ایہ ہے جو بُت کوئی چیز ہِن یا بُتاں دی قُربانی کوئی چیز ہے؟ نئیں، بلکہ میڈا مطلب ایہ ہے جو جیہڑیاں قُربانیاں غیر قوم آلے کریندے ہِن او خُدا کیتے نئیں بلکہ بدرُوحاں کیتے کریندے ہِن تے مَیں نئیں چاہندا جو تُساں بدرُوحاں نال کوئی واسطہ رکھو۔ تُساں خُداوند دے پیالے تے بدرُوحاں دے پیالے ڈوہائیں ءچوں نئیں پی سگدے۔ تُساں خُداوند دے دسترخوان تے بدرُوحاں دے دسترخوان ڈوہائیں ءچ شریک نئیں تھی سگدے۔ کیا اساں اِینویں کرݨ نال خُداوند دے قہر کُوں نئیں بھڑکیندے؟ کیا اساں اُوں کنُوں زیادہ زورآور ہیں؟ ”سبھ چیزاں جائز ہِن“ پر سبھ چیزاں مفید نئیں۔ سبھ چیزاں جائز تاں ہِن پر سبھ چیزاں ترقی دا سبب نئیں۔ کوئی آپنڑا فائدہ نہ گولھے بلکہ ڈُوجھے دا۔ جیہڑا گوشت بازار ءچ وِکدے، او کھاؤ تے آپنڑے ضمیر کُوں تسلی ڈیوݨ کیتے اِیندے بارے ءچ کُجھ نہ پُچھو ۔ کیوں جو ”زمین تے اُوندیاں سبھ چیزاں رب دیاں ہِن ۔“ جے کوئی غیر اِیماندار تُہاکُوں کھانڑے دی دعوت ڈیوے تے تُساں ونجنڑ چاہو تاں جیہڑا کُجھ تُہاڈے سامنڑے رکھیا ونجے اُونکُوں کھاؤ تے آپنڑے ضمیر کُوں تسلی ڈیوݨ کیتے کُجھ نہ پُچھو۔ پر جے کوئی تُہاکُوں چتاوے جو ”ایہ بُتاں دی قُربانی دا گوشت ہے“ تاں چتاوݨ آلے کیتے تے ضمیر دے سببّوں اُونکُوں نہ کھاؤ۔ میڈا مطلب ہے تیڈے ضمیر کیتے نئیں بلکہ ڈُوجھے بندے دے ضمیر کیتے۔ میڈی ازادی ڈُوجھے بندے دے ضمیر دے سببّوں کیوں پرکھی ونجے ؟ جے مَیں اُوں کھانڑے کُوں شُکر کر تے کھا گِھندا ہاں تاں اُوندے سببّوں کیوں بدنام کیتا ویندا ہاں، کیوں جو میں تاں اُونکُوں خُدا دا شُکر کر تے کھاندا ہاں۔ بس تُساں بھانویں کھاؤ یا پِیو یا جیہڑا کُجھ کرو، سبھ خُدا دے جلال کیتے کرو۔ تُساں نہ یہُودیاں کیتے نہ یُونانیاں کیتے تے نہ ای خُدا دی کلیسیا کیتے تُھڈا کھاوݨ دا سبب بنڑو۔ اِینویں ای مَیں وی سبھ گالھیں ءچ ساریاں کُوں خوش کرݨ دی کوشش کریندا ہاں۔ مَیں آپنڑا نئیں بلکہ ڈُوجھیاں دا فائدہ گولھیندا ہاں تاں جو او نجات پاوݨ۔ تُساں میڈے نمونے اُتے ٹُرو جِینویں مَیں مسیح دے نمونے اُتے ٹُردا ہاں۔ مَیں تُہاڈی تعریف کریندا ہاں جو تُساں ہر گالھ ءچ میکُوں یاد رکھیندے تے اُنہاں تعلیمات کُوں قائم رکھیندے ہیوے جیہڑیاں مَیں تُہاکُوں پُچائیاں۔ پر مَیں چاہندا ہاں جو تُساں ایہ وی جاݨ گِھنو جو ہر مرد دا سر مسیح ہے تے عورت دا سر مرد ہے تے مسیح دا سر خُدا ہے۔ اِیں واسطے جے کوئی مرد سر کج تے دُعا یا نبُوّت کرے تاں او آپنڑے سر دی بے عزتی کریندے۔ تے اِینویں ای جے کوئی عورت آپنڑا سر کجے بغیر دُعا یا نبُوّت کرے تاں او آپنڑے سر دی بے عزتی کریندی ہے، کیوں جو او سر مُنڈی دے برابر ہے۔ جے کوئی عورت آپنڑے سر اُتے بوچھنڑ نئیں گِھندی تاں او آپنڑا سر وی مُنوا ڈیوے پر جے او سر مُنواوݨ کُوں شرم دی گالھ سمجھدی ہے تاں او بوچھنڑ نال آپنڑا سر کجے۔ پر مرد کُوں آپنڑا سر نئیں کجنڑاں چاہیدا کیوں جو او خُدا دی صورت تے اُوندا جلال ہے پر عورت مرد دا جلال ہے، کیوں جو مرد عورت کنُوں نئیں بلکہ عورت مرد کنُوں بنڑائی گئی ہے۔ تے مرد عورت دی خاطر نئیں بلکہ عورت مرد دی خاطر پیدا کیتی گئی۔ بس فرشتیاں دی وجہ کنُوں عورت کُوں چاہیدے جو آپنڑے سر اُتے تابع ہووݨ دی نشانی رکھے۔ وَل وی خُداوند ءچ عورت کُوں مرد دی تے مرد کُوں عورت دی ضرورت ہے۔ کیوں جو جِینویں عورت مرد ءچوں نِکلی، اُونویں ای مرد وی عورت دے وسیلے نال پیدا تھیندے پر سبھ چیزاں خُدا دی طرفوں ہِن۔ تُساں خود ای فیصلہ کرو، کیا کہیں عورت دا سر کجے بغیر خُدا کنُوں دُعا کرݨ مناسب ہے؟ کیا فطرت خود وی ایہ نئیں سکھیندی جو جے مرد دے سر دے وال لمبے ہووݨ تاں ایہ اُوندے کیتے شرم دی گالھ ہے؟ پر جے عورت لمبے وال رکھے تاں ایہ اُوندے کیتے شان دی گالھ ہے کیوں جو لمبے وال اُونکُوں پڑدے کیتے ڈِتے گئے ہِن۔ جے کوئی اِیندے اُتے بحث کرݨ چاہندے تاں او جاݨ گِھنے جو نہ ساڈا ایجھا دستور ہے نہ خُدا دی کلیسیاواں دا۔ ہُنڑ جیہڑی ہدایت مَیں تُہاکُوں کریندا ہاں اُوندے ءچ تُہاڈے کیتے تعریف دی کوئی گالھ نئیں، کیوں جو تُہاڈا عبادت کیتے جمع تھیوݨ فائدہ نئیں بلکہ نُقصان دا سبب ہے۔ پہلی گالھ ایہ ہے جو مَیں سُنڑے جو جِیں ویلے تُساں کلیسیا دے طور تے جمع تھیندے ہیوے تاں تُہاڈے ءچ تفرقے تھیندے ہِن۔ تے میکُوں کہیں حد تئیں اِیں گالھ دا یقین وی ہے۔ تُہاڈے ءچ تفرقے دا ہووݨ ضرور ہے تاں جو ظاہر تھی ونجے جو تُہاڈے ءچ کیہڑے لوک سچے ہِن۔ بس جِیں ویلے تُساں جمع تھیندے ہیوے تاں تُہاڈا کھانڑا حقیقی عشائے ربانی نئیں تھی سگدا۔ کیوں جو ہر بندہ ڈُوجھے دا اِنتظار کیتے بغیر کھانڑا کھا گِھندے۔ کوئی تاں بُکھا رہ ویندے تے کہیں کُوں نشہ تھی ویندے۔ کیا کھاوݨ تے پِیوݨ کیتے تُہاڈے گھر نئیں؟ یا کیا تُساں خُدا دی کلیسیا کُوں ناچیز سمجھ تے جِنہاں کولھ کُجھ نئیں اُنہاں کُوں شرمندہ کریندے ہیوے؟ مَیں تُہاکُوں کیا آکھاں؟ کیا اِیں کیتے تُہاڈی تعریف کراں؟ مَیں تُہاڈی تعریف نئیں کر سگدا۔ کیوں جو ایہ گالھ میکُوں خُداوند کنُوں مِلی تے مَیں تُہاڈے تئیں پُچا ڈِتی ہے جو خُداوند یسُوع جِیں رات او پکڑوایا گِیا، روٹی گِھدی، تے شُکر کر تے تروڑی تے آکھیا، ”ایہ میڈا بدن ہے جیہڑا تُہاڈے کیتے ڈِتا ویندے ۔ میڈی یادگاری کیتے اِیہو کیتا کرو۔“ اِینویں ای، کھانڑے دے بعد اُوں پیالہ وی گِھدا تے آکھیا، ”ایہ پیالہ او نواں عہد ہے جیہڑا میڈے خون دے وسیلے بدھیا ویندے ۔ جِیں ویلے وی اِینکُوں پِیو، میڈی یادگاری کیتے اِیہو کیتا کرو۔“ کیوں جو جِیں ویلے تُساں ایہ روٹی کھاندے تے اِیں پیالے ءچوں پِیندے ہیوے تاں خُداوند دی موت دا اعلان کریندے ہیوے جئیں تئیں او ولا نہ آوے۔ اِیں واسطے جیہڑا کوئی نامناسب طریقے نال خُداوند دی روٹی کھاندے یا اِیں پیالے ءچوں پِیندے او خُداوند دے بدن تے خون دے خلاف گُناہ کرݨ دا قصُوروار ہوسی۔ بس اِیں روٹی ءچوں کھاوݨ تے اِیں پیالے ءچوں پِیوݨ کنُوں پہلے ہر بندہ آپنڑے آپ کُوں پرکھ گِھنے۔ کیوں جو جیہڑا کوئی کھاندے پِیندے ویلے خُداوند دے بدن کُوں نئیں سُنجانڑدا او اِیں کھاوݨ تے پِیوݨ نال آپنڑے اُتے سزا گِھن آندے۔ اِیہو وجہ ہے جو تُہاڈے ءچوں بہُوں سارے لوک کمزور تے بیمار ہِن بلکہ کئی مر وی گئے ہِن۔ پر جے اساں آپنڑے آپ کُوں پرکھدے تاں سزا نہ پیندے۔ پر خُداوند ساکُوں سزا ڈے تے ساڈی تربیت کریندے تاں جو اساں دُنیا دے نال مُجرم نہ بنڑوں۔ اِیں واسطے میڈے بِھراؤ! جِیں ویلے تُساں کھاوݨ کیتے کٹھے تھیندے ہیوے تاں ہِک ڈُوجھے دا اِنتظار کرو۔ جے کوئی بُکھا ہووے تاں آپنڑے گھرُوں کھا گِھنے تاں جو تُہاڈا کٹھا تھیوݨ سزا دا سبب نہ بنڑے۔ مَیں بئے گالھیں اُتھائیں آ تے ٹھیک کریساں۔ بِھراؤ! مَیں نئیں چاہندا جو تُساں رُوحانی نعمتاں دے بارے ءچ بے خبر راہو۔ تُساں جانڑدے ہیوے جو جیہڑے ویلے تُساں غیر اِیماندار ہَوے تاں تُساں گُونگے بُتاں دے پِچُھوں ٹُردے ہَوے، جِینویں وی کوئی تُہاکُوں گِھن ویندا ہا۔ اِیں واسطے مَیں تُہاکُوں سمجھاوݨ چاہندا ہاں جو جیہڑا بندہ خُدا دے رُوح القُدس دی ہدایت نال گالھ کریندے، او کڈھائیں وی ”یسُوع اُتے لعنت“ نئیں کر سگدا، تے کوئی وی رُوح القُدس دی ہدایت دے بغیر نئیں آکھ سگدا جو ”یسُوع خُداوند ہے۔“ نعمتاں تاں طرحاں طرحاں دیاں ہِن، پر رُوح القُدس ہِکو ہے۔ خدمتاں وی طرحاں طرحاں دیاں ہِن، پر خُداوند ہِک ای ہے۔ خُدا دے کم طرحاں طرحاں دے ہِن، پر خُدا ہِک ای ہے جیہڑا ساریاں ءچ ہر طرحاں دا اثر پیدا کریندے۔ ہر بندے ءچ رُوح القُدس دا اِظہار ہِک ڈُوجھے دے فائدہ کیتے ہے۔ کہیں کُوں رُوح القُدس دی طرفوں حِکمت نال بھریا ہویا کلام ڈِتا ویندے تے کہیں کُوں اُونہئی رُوح دے وسیلے علم نال بھریا ہویا کلام۔ کہیں کُوں اُونہئی رُوح نال اِیمان دی تے کہیں کُوں شِفا ڈیوݨ دی نعمت مِلدی ہے۔ کہیں کُوں معجزے ڈِکھاوݨ دی قُدرت، تے کہیں کُوں نبُوّت کرݨ دی، کہیں کُوں رُوحاں دا اِمتیاز کرݨ دی، کہیں کُوں طرحاں طرحاں دیاں زباناں بولنڑ دی، تے کہیں کُوں زباناں دا ترجمہ کرݨ دی توفیق مِلی ہے۔ ایہ ساریاں نعمتاں اُوہو ہِک ای رُوح القُدس ڈیندے تے ہر ہِک کُوں آپنڑی مرضی دے مطابق ونڈیندے۔ جِینویں اِنسانی بدن ہِک ہے تے اُوندے بہُوں سارے اَنگ ہِن تے او سبھ اَنگ رَل تے ہِک بدن بنڑیندن، اُونویں ای مسیح دا بدن وی ہے۔ کیوں جو اساں ساریاں بھانویں یہُودی ہِن یا یُونانی، بھانویں غُلام ہِن یا آزاد، ہِکو رُوح دے وسیلہ نال ہِک بدن تھیوݨ کیتے بپتسمہ گِھدے، تے ساکُوں ساریاں کُوں ہِکو رُوح القُدس مِلیا ہے۔ بس بدن ہِک اَنگ نال نئیں بلکہ بہُوں سارے انگاں نال بنڑدے۔ جے پیر آکھے، ”کیوں جو مَیں ہتھ نئیں اِیں واسطے بدن دا حصہ کائنی،“ تاں او اِیں وجہ کنُوں بدن تُوں اَنج تاں نئیں۔ تے جے کَن آکھے، ”کیوں جو مَیں اکھ نئیں اِیں واسطے بدن دا حصہ نئیں،“ تاں او اِیں وجہ کنُوں بدن تُوں اَنج تاں نئیں۔ جے سارا بدن اکھ ای ہوندا تاں سُنڑدا کِتھوں؟ جے سارا بدن کَن ای ہوندا تاں سُنگھدا کِتھوں؟ پر سچ ایہ ہے جو خُدا ہر اَنگ کُوں بدن ءچ آپنڑی مرضی دے مطابق رکھیا ہے۔ جے او سارے ہِکو ای اَنگ ہوندے تاں بدن کِتھاں ہوندا۔ پر اصل ءچ اَنگ تاں بہُوں ہِن پر بدن ہِکو ای ہے۔ اکھ ہتھ کُوں نئیں آکھ سگدی جو ”میکُوں تیڈی ضرورت نئیں،“ تے نہ سر پیراں کُوں آکھ سگدے جو ”میکُوں تیڈی لوڑ کائنی۔“ بلکہ بدن دے او اَنگ جیہڑے ڈُوجھیاں دی نسبت بہُوں کمزور لگدے ہِن، او زیادہ ضروری ہِن۔ تے او اَنگ جِنہاں کُوں اساں ڈُوجھے انگاں کنُوں گھٹ عزت دے لائق سمجھدے ہیں، اُنہاں کُوں زیادہ عزت ڈیندے ہیں تے جِنہاں کُوں لُکا تے رکھیندے ہیں، اُنہاں کُوں زیادہ اہمیت ڈیندے ہیں۔ پر جیہڑے اَنگ لُکائے نئیں ویندے، اُنہاں کُوں اِیندی لوڑ کائنی۔ پر خُدا بدن کُوں اِینویں بنڑائے جو گھٹ عزت آلیاں کُوں زیادہ عزت ڈِتی ونجے، تاں جو بدن ءچ تفرقہ نہ ہووے بلکہ اَنگ ہِک ڈُوجھے دی برابر فِکر رکھنڑ۔ جے بدن دا ہِک اَنگ ڈُکھدے تاں سارے اَنگ اُوندے نال ڈُکھدے ہِن۔ تے جے ہِک اَنگ کُوں عزت مِلدی ہے تاں سارے اَنگ اُوندے نال خوشی منیندے ہِن۔ بس تُساں رَل تے مسیح دا بدن ہیوے تے کلھے کلھے اُوندے اَنگ ہیوے۔ تے خُدا کلیسیا ءچ پہلے رسُول، ڈُوجھے نبی، تریجھے اُستاد، وَل معجزے ڈِکھاوݨ آلے، وَل شِفا ڈیوݨ دی نعمت آلے، مددگار، اِنتظام چلاوݨ آلے، تے طرحاں طرحاں دیاں زباناں بولنڑ آلے مقرر کیتے۔ کیا یکے رسُول ہِن؟ کیا یکے نبی ہِن؟ کیا یکے اُستاد ہِن؟ کیا یکے معجزے ڈِکھاوݨ آلے ہِن؟ کیا ساریاں کُوں شِفا ڈیوݨ دی نعمت مِلی ہے؟ کیا سارے طرحاں طرحاں دیاں زباناں بُولیندے ہِن؟ کیا سارے اِنہاں زباناں دا ترجمہ کریندے ہِن؟ پر تُساں اعلیٰ نعمتاں گِھننڑ دی سِک ءچ راہو۔ پر ہُنڑ مَیں تُہاکُوں سبھ تُوں چنگا طریقہ ڈسیندا ہاں۔ جے مَیں اِنساناں تے فرشتیاں دیاں زباناں بولاں پر محبت نہ رکھاں تاں مَیں صرف ٹن ٹن کریندا گھنٹا یا جھن جھن کریندی جھانجھ ہاں۔ تے جے میکُوں نبُوّت دی نعمت مِلے تے مَیں ہر راز تے علم کنُوں واقف تھی وَنجاں، تے جے میڈا اِیمان اِتُھوں تئیں کامِل ہووے جو پہاڑاں کُوں ہٹا ڈیواں، پر محبت نہ رکھاں تاں مَیں کُجھ وی نئیں۔ جے میں آپنڑا مال غریباں ءچ ونڈا ڈیواں تے آپنڑا بدن بھاہ لاوݨ کیتے ڈے ڈیواں پر محبت نہ رکھاں تاں میکُوں کُجھ فائدہ نئیں۔ محبت صبر کریندی ہے تے مہربان ہے۔ محبت حسد نئیں کریندی، محبت شیخی نئیں مریندی تے غرور نئیں کریندی، بدتمیزی نئیں کریندی، خود غرضی نئیں کریندی، جلدی کاوڑ ءچ نئیں آندی، ڈُوجھیاں دی غلطی یاد نئیں رکھیندی، بے اِنصافی تُوں نئیں بلکہ سچائی تُوں خوش تھیندی ہے۔ سبھ کُجھ سہہ گِھندی ہے، ہر حالت ءچ یقین رکھیندی ہے، سارے گالھیں دی اُمید رکھیندی ہے، سبھ گالھیں دی برداشت کریندی ہے۔ محبت کڈھائیں ختم نئیں تھیندی پر نبُوّتاں ختم تھی ویسن، غیر زباناں مُک ویسن تے علم ختم تھی ویسی۔ کیوں جو ہُنڑ ساڈا علم نامکمل ہے تے ساڈی نبُوّت کامِل نئیں پر جِیں ویلے کامِل آسی تاں نامکمل چیزاں ویندیاں راہسن۔ جِیں ویلے مَیں بال ہم تاں بالاں وانگُوں بُولیندا ہم، بالاں وانگُوں سوچیندا ہم تے بالاں وانگُوں سمجھدا ہم۔ پر جِیں ویلے جوان تھیّا تاں بچپن دے گالھیں چھوڑ ڈِتیاں۔ ہُنڑ ساکُوں شیشے ءچ دُھندلا نظر آندے پر اُوں ویلے آمنڑے سامنڑے ڈیکھسوں۔ اِیں ویلے میڈا علم نامکمل ہے پر اُوں ویلے پُوری طرحاں پچھاݨ گِھنساں، جِینویں خُدا میکُوں پُوری طرحاں پچھانڑے۔ بس اِیمان، اُمید تے محبت ایہ ترِیحو ہمیشاں قائم راہندن پر محبت اِنہاں ءچوں افضل ہے۔ محبت دے طالب راہو تے رُوحانی نعمتاں دی وی سِک رکھو، خاص طور تے نبُوّت کرݨ دی نعمت دی۔ کیوں جو جیہڑا کوئی غیر زبان ءچ گالھیں کریندے او اِنسان نال نئیں بلکہ خُدا نال گالھیں کریندے، اِیں واسطے جو اُوندی گالھ کوئی نئیں سمجھدا۔ او رُوح القُدس دی قُدرت نال غیب دی گالھ آدھے۔ پر جیہڑا نبُوّت کریندے او لوکاں کُوں اُنہاں دی ترقی، نصیحت تے تسلی دے گالھیں آدھے۔ جیہڑا کوئی غیر زبان ءچ گالھیں کریندے او آپنڑی ترقی کیتے کریندے۔ پر جیہڑا نبُوّت کریندے او کلیسیا دی ترقی کیتے کریندے۔ مَیں چاہندا ہاں جو تُساں سارے غیر زباناں ءچ گالھیں کرو پر اِیں تُوں زیادہ ایہ چاہندا ہاں جو نبُوّت کرو۔ جے غیر زباناں بولنڑ آلا کلیسیا دی ترقی کیتے ترجمہ نہ کرے تاں نبُوّت کرݨ آلا اُوں کنُوں وڈا ہے۔ بِھراؤ! جے مَیں تُہاڈے کولھ آ تے غیر زباناں ءچ گالھیں کراں پر تُہاڈے نال کہیں مُکاشفہ یا علم یا نبُوّت یا تعلیم دی گالھ نہ کراں تاں تُہاکُوں کیا فائدہ تھیسی؟ جے بانسری یا بربط جِیہے بے جان سازاں کُوں وجیندے ویلے اُنہاں اوازاں ءچ فرق نہ ہووے تاں اُنہاں ءچوں نِکلنڑ آلے سُر کِینویں پچھانڑے ویسن؟ جے نرسِنگے دی اواز صاف سُنڑائی نہ ڈیوے تاں کوݨ جنگ کیتے تیار تھیسی؟ اِینویں ای جے تُساں زبان کنُوں صاف صاف گالھ نہ آکھو تاں کوݨ تُہاڈی سمجھسی؟ تُساں ہوا نال گالھیں کرݨ آلے ہوسو۔ دُنیا ءچ بہُوں ساریاں بولیاں ہِن تے اُنہاں ءچوں کوئی وی بے معنی نئیں۔ پر جے مَیں کہیں زبان کُوں سمجھ نہ سگاں تاں او زبان بولنڑ آلے کیتے مَیں غیر ہوساں تے او وی میڈے کیتے غیر ہوسی۔ اِینویں ای تُساں وی جیہڑے رُوحانی نعمتاں دی سِک رکھیندے ہیوے، اُنہاں نعمتاں ءچ ماہر بنڑݨ دی کوشش کرو جِنہاں نال کلیسیا دی ترقی تھیوے۔ اِیں واسطے جیہڑا کوئی غیر زبان ءچ گالھیں کریندے، او دُعا کرے جو او اُوندا ترجمہ وی کر سگے۔ کیوں جو جے مَیں غیر زبان ءچ دُعا کراں تاں میڈی رُوح تاں دُعا کریندی ہے پر میڈی عقل کُجھ نئیں کریندی۔ اِیں واسطے کیا کرنڑا چاہیدے؟ مَیں رُوح نال وی دُعا کریساں تے عقل نال وی دُعا کریساں، رُوح نال وی حمد کریساں تے عقل نال وی حمد کریساں۔ نہ تاں جے تُوں صرف رُوح نال ای خُدا دی تعریف کریں تاں ناواقف بندہ تیڈی شُکرگزاری اُتے کِینویں ”آمین“ اکھیسی؟ کیوں جو او نئیں جانڑدا جو تُوں کیا آدھیں۔ تُوں تاں بے شک چنگی طرحاں خُدا دا شُکر کریندا پِیا ہوسیں پر اِیندے نال ڈُوجھے دی ترقی نئیں تھیندی۔ مَیں خُدا دا شُکر کریندا ہاں جو مَیں تُہاڈے ءچوں سبھ تُوں زیادہ غیر زباناں بُولیندا ہاں۔ پر کلیسیا ءچ ڈاہ ہزار گالھیں غیر زبان ءچ کرݨ تُوں میکُوں ایہ زیادہ پسند ہے جو ڈُوجھیاں دی تعلیم کیتے صرف پنج گالھیں عقل نال کراں۔ بِھراؤ! تُساں سمجھ ءچ بال آلی کار نہ بنڑو۔ بُرائی ءچ تاں بالاں وانگُوں بنڑو پر سمجھ ءچ بالغ بنڑو۔ شریعت ءچ لِکھیا ہے جو ”رب فرمیندے مَیں غیر زباناں تے پردیسی ہونٹاں دے ذریعے اِیں قوم نال گالھ کریساں وَل وی او میڈی نہ سُنڑسن ۔“ بس غیر زباناں اِیمانداراں کیتے نئیں بلکہ غیر اِیمانداراں کیتے نشان ہِن۔ تے نبُوّت غیر اِیمانداراں کیتے نئیں بلکہ اِیمانداراں کیتے ہے۔ جے ساری کلیسیا ہِک جاہ جمع ہووے تے سارے دے سارے غیر زباناں بولنڑ لگ پووݨ تے کُجھ ناواقف یا غیر اِیماندار لوک اندر آ ونجنڑ تاں کیا او تُہاکُوں پاگل نہ سمجھسن؟ پر جے سارے نبُوّت کریندے ہووݨ تے کوئی غیرایماندار یا غیر واقف بندہ اُتھاں آ ونجے تاں او تُہاڈے گالھیں سُنڑ تے قائل تھی ویسی تے اِینویں سارے اُونکُوں چنگی طرحاں پرکھ گِھنسن۔ اُوندے دل دے راز ظاہر تھی ویسن تے او مُنہ بھرنے ڈھے تے خُدا کُوں سجدہ کریسی تے منیسی جو ”خُدا سچ مُچ تُہاڈے وچال ہے۔“ بِھراؤ! وَل کیا کرنڑا چاہیدے؟ جِیں ویلے تُساں عبادت کیتے جمع تھیندے ہیوے تاں ہر ہِک دے دل ءچ کوئی زبُور یا تعلیم یا مُکاشفہ یا غیر زبان یا اُوندا ترجمہ ہوندے۔ بس سبھ کُجھ رُوحانی ترقی کیتے ہوونڑا چاہیدے۔ جے غیر زبان ءچ گالھیں کرو تاں ڈُو یا زیادہ تُوں زیادہ ترے بندے واری واری بولنڑ تے کوئی اُوندا ترجمہ کرے۔ جے کوئی ترجمہ کرݨ آلا نہ ہووے تاں غیر زبان بولنڑ آلا جماعت ءچ چُپ راہوے تے دل ای دل ءچ خُدا نال گالھیں کرے۔ نبیاں ءچوں ڈُو یا ترے کلام کرݨ تے باقی اُنہاں دے کلام کُوں پرکھنڑ۔ پر جے ہِک دے کلام کریندے ویلے کہیں ڈُوجھے اُتے اِلہام نازل تھیوے تاں پہلا بندہ چُپ تھی ونجے۔ کیوں جو تُساں سارے ہِک ہِک کر تے نبُوّت کر سگدے ہیوے تے سبھ لوک سِکھسن تے اُنہاں دا حوصلہ ودھسی۔ نبیاں دیاں رُوحاں نبیاں دے تابع ہوندیاں ہِن، کیوں جو خُدا بدنظمی دا نئیں بلکہ امن دا خُدا ہے۔ تے جِینویں مُقدّساں دی کلیسیا ءچ دستور ہے عورتاں کلیسیا دے اِجتماع ءچ چُپ راہنڑ۔ اُنہاں کُوں بولنڑ دی اِجازت نئیں بلکہ تابع راہنڑ جِینویں جو توریت ءچ وی لِکھیا ہے۔ ہاں جے کوئی گالھ پُچھنڑ چاہوے تاں گھر ءچ آپنڑے پئے کنُوں پُچھے۔ اِیں واسطے جو ایہ شرم دی گالھ ہے جو عورت کلیسیا دے اِجتماع ءچ بولے۔ کیا خُدا دا کلام تُہاڈے تُوں شروع تھیّا ہے یا صرف تُہاڈے تئیں پُجیا ہے؟ جے کوئی آپنڑے آپ کُوں نبی یا رُوحانی سمجھے تاں اُونکُوں پتہ ہوونڑاں چاہیدے جو جیہڑا کُجھ مَیں لِکھدا ہاں خُداوند دا حُکم ہے۔ جے کوئی اِینکُوں نظر انداز کرے تاں اُونکُوں وی نظر انداز کیتا ویسی۔ بس بِھراؤ! نبُوّت کرݨ دی سِک رکھو تے غیر زباناں بولنڑ تُوں کہیں کُوں منع نہ کرو۔ پر ایہ سبھ کُجھ مناسب طریقے تے تربیت نال کیتا ونجے۔ ہُنڑ بِھراؤ! مَیں تُہاکُوں اُوہو خوشخبری یاد ڈیویندا ہاں، جیندی تبلیغ مَیں تُہاڈے ءچ کیتی ہے، جِینکُوں تُساں قبول کر گِھدے تے جیندے اُتے تُساں قائم وی ہیوے۔ اُوں خوشخبری دے وسیلے تُہاکُوں نجات وی مِلدی ہے شرط ایہ ہے جو تُساں اُوں گالھ اُتے قائم راہو جیہڑی مَیں تُہاکُوں پُچائی ہے، نہ تاں تُہاڈا اِیمان گِھن آوݨ بے فائدہ ہے۔ کیوں جو مَیں تُہاکُوں سبھ تُوں زیادہ ضروری گالھ پُچا ڈِتی ہے جیہڑی میکُوں وی پُجی ہئی، جو مسیح خُدا دے کلام دے مطابق ساڈے گُناہاں کیتے مویا ، تے دفن تھیّا تے خُدا دے کلام دے مطابق تریجھے ڈینہہ زندہ تھی گِیا ، تے پطرس کُوں تے ولا بارہاں شاگرداں کُوں ڈِکھالی ڈِتا۔ اُوندے بعد او پنج سو تُوں زیادہ بِھرانواں کُوں ہِکو پھیری ڈِکھالی ڈِتا جِنہاں ءچوں اکثر ہُنڑ تئیں زندہ ہِن، پر کُجھ سَم گئے ہِن۔ وَل او یعقُوب کُوں ڈِکھالی ڈِتا تے اِیندے بعد سارے رسُولاں کُوں۔ تے سبھ کنُوں آخر ءچ او میکُوں ڈِکھالی ڈِتا جیہڑا پُورے ڈینہاں دا جم نہ ہم۔ کیوں جو مَیں رسُولاں ءچوں ساریاں کنُوں کمتر ہاں بلکہ رسُول اکھواوݨ دے لائق وی نئیں، اِیں واسطے جو مَیں خُدا دی کلیسیا کُوں سَتیندا ہم۔ پر ہُنڑ مَیں جیہڑا کُجھ ہاں، خُدا دے فضل نال ہاں، تے او فضل جیہڑا اُوں میڈے اُتے کیتا او ضائع نئیں تھیّا کیوں جو مَیں ساریاں تُوں زیادہ محنت کیتی، بےشک ایہ محنت مَیں آپنڑی کوشش نال نئیں بلکہ خُدا دے فضل نال کیتی، جیہڑا میڈے اُتے ہا۔ بس بھانویں مَیں ہوواں بھانویں ڈُوجھے، اساں ہِکو خوشخبری دی تبلیغ کریندے ہیں تے اُوندے اُتے تُساں اِیمان وی گِھن آئے۔ جڈاں مسیح دے مُردیاں ءچوں زندہ تھیوݨ دی تبلیغ کیتی ویندی ہے تاں تُہاڈے ءچوں کُجھ کِینویں اکھیندے ہِن جو مُردیاں دی قیامت نئیں ہوندی؟ جے مُردیاں دی قیامت نئیں تاں مسیح وی زندہ نئیں تھیّا۔ تے جے مسیح زندہ نئیں تھیّا تاں ساڈی تبلیغ دا کوئی فائدہ نئیں تے تُہاڈا اِیمان گِھن آوݨ وی بے فائدہ ہے۔ تے اساں خُدا دے کُوڑے گواہ ثابت تھئے کیوں جو اساں گواہی ڈِتی ہے جو مسیح کُوں خُدا مُردیاں ءچوں زندہ کیتے۔ پر جے حقیقت ءچ مُردے زندہ نئیں تھیندے تاں خُدا اُونکُوں زندہ نئیں کیتا۔ کیوں جو جے مُردے زندہ نئیں تھیندے تاں مسیح وی زندہ نئیں تھیّا۔ تے جے مسیح زندہ نئیں تھیّا تاں تُہاڈا اِیمان بے فائدہ ہے تے تُساں ہُنڑ تئیں آپنڑے گُناہاں ءچ بدھے پئے ہیوے۔ بلکہ جیہڑے مسیح اُتے اِیمان رکھیندے ہوئے سَم گئے ہِن او وی ہلاک تھئے۔ جے مسیح اُتے ساڈی اُمید صرف اِیں زندگی کیتے ہے تاں اساں ساریاں لوکاں کنُوں زیادہ بدنصیب ہیں۔ پر حقیقت تاں ایہ ہے جو مسیح مُردیاں ءچوں زندہ تھی گئے تے او مُردیاں ءچوں زندہ تھیوݨ آلیاں ءچوں پہلا پھل ہے۔ کیوں جو جِیں ویلے ہِک بندے دے سببّوں موت دُنیا ءچ آئی تاں مُردیاں دی قیامت وی ہِک بندے دے سببّوں ای آندی ہے۔ تے جِینویں آدم ءچ سبھ مردے ہِن، اُونویں ای مسیح ءچ سبھ زندہ کیتے ویسن۔ پر ہر ہِک آپنڑی آپنڑی واری نال۔ سبھ تُوں پہلے مسیح جیہڑا پہلا پھل ہے، تے وَل مسیح دے آوݨ تے اُوندے لوک۔ وَل آخرت ہوسی۔ اُوں ویلے مسیح ساری حکُومت، سارا اِختیار تے قُدرت فنا کر تے بادشاہی کُوں خُدا باپ دے حوالے کر ڈیسی۔ کیوں جو مسیح کُوں اُوں ویلے تئیں بادشاہی کرݨ ضرور ہے جئیں تئیں او سارے دُشمنڑاں کُوں آپنڑے پیراں تلے نہ کر گِھنے۔ آخری دُشمنڑ جیہڑا فنا کیتا ویسی، او موت ہے۔ کیوں جو لِکھیا ہے جو ”خُدا سبھ کُجھ اُوندے پیراں تلے کر ڈِتے ۔“ پر جِیں ویلے کلام آدھے جو ”سبھ کُجھ“ اُوندے تابع کر ڈِتا گئے تاں ظاہر ہے جو خُدا جئیں سبھ کُجھ مسیح دے تابع کر ڈِتے، خود شامل نئیں۔ بلکہ جِیں ویلے سبھ کُجھ پوتر دے تابع تھی ویسی تاں پوتر خود وی خُدا دے تابع تھی ویسی جئیں سبھ کُجھ پوتر دے تابع کر ڈِتے تاں جو خُدا ای ہر لحاظ نال سبھ کُجھ ہووے۔ جے مُردیاں دی قیامت نئیں ہوندی تاں او لوک کیا کریسن جیہڑے مُردیاں دی خاطر بپتسمہ گِھندے ہِن؟ جے مُردے زندہ نئیں تھیندے تاں وَل اُنہاں کیتے بپتسمہ کیوں گِھندے ہِن؟ تے اساں کیوں ہر ویلے آپنڑے آپ کُوں خطرے ءچ پائی ودے ہیں؟ بِھراؤ! ساڈے خُداوند یسُوع مسیح ءچ ہوندے ہوئے، مَیں تُہاڈے اُتے فخر کریندا ہاں تے اِیں فخر دی قَسم کھا تے آدھا ہاں جو مَیں تاں ہر روز مردا ہاں۔ جے مَیں صرف اِنسانی اُمید رکھیندے ہوئے اِفِسُس ءچ جنگلی جانوراں نال لڑیا تاں میکُوں کیا فائدہ تھیّا؟ جے مُردے زندہ نہ کیتے ویسن، تاں ”آؤ کھاؤں پِیؤں کیوں جو کل تاں مرنڑا ای ہے ۔“ دوکھا نہ کھاؤ، بُریاں صُحبتاں چنگیاں عادتاں کُوں وِگاڑ ڈیندیاں ہِن۔ چنگی طرحاں ہوش ءچ آؤ تے گُناہ نہ کرو۔ کیجھی شرم دی گالھ ہے جو ہُنڑ وی تُہاڈے ءچوں کُجھ خُدا کُوں نئیں جانڑدے۔ ایہ میں تُہاکُوں شرم ڈیواوݨ کیتے آدھا ہاں۔ ہُنڑ کوئی ایہ اکھیسی جو ”مُردے کِینویں زندہ تھی ویندے ہِن تے اُنہاں دا جِسم کیجھا ہوسی؟“ بےوقُوفو! جئیں تئیں بیج مِٹی ءچ ختم نئیں تھی ویندا، ودھدا نئیں۔ تے جیہڑا تُوں رہیندا ہیں ایہ او بُوٹا نئیں جیہڑا پیدا تھیوݨ آلا ہے۔ او صرف دانڑا ہے بھانویں کنڑک دا ہووے یا کہیں بئی فصل دا۔ پر خُدا اُوں دانڑیں کُوں آپنڑی مرضی دے مطابق جِسم ڈیندے بلکہ ہر بیج کُوں اُوندی قِسم دے مطابق خاص جِسم ڈیندے۔ سبھ گوشت ہِکو جِیہا نئیں ہوندا۔ اِنساناں دا گوشت بِیا ہے، جانوراں دا بِیا، پکھیں دا بِیا تے مچھی دا بِیا ہے۔ اسماناں اُتے وی جِسم ہِن تے زمین اُتے وی، پر اسمانیاں دی شان بئی ہے تے زمینیاں دی بئی۔ سِجھ دی شان بئی ہے، چَن دی بئی، تاریاں دی بئی بلکہ ہر تارے دی شان فرق ہے۔ مُردیاں دی قیامت وی اِینویں ای ہے۔ دفناوݨ ویلے جِسم فانی حالت ءچ رہایا ویندے تے غیرفانی حالت ءچ زندہ تھی ویندے۔ او بے حُرمتی دی حالت ءچ رہایا ویندے تے جلال دی حالت ءچ زندہ تھی ویندے۔ کمزوری دی حالت ءچ رہایا ویندے تے طاقت دی حالت ءچ زندہ تھی ویندے۔ فطرتی جِسم دفن کیتا ویندے تے رُوحانی جِسم زندہ تھی ویندے۔ جے فطرتی جِسم ہے تاں رُوحانی جِسم وی ہے۔ اِیں واسطے کلام ءچ لِکھیا وی ہے جو ”پہلا بندہ یعنی آدم زندہ اِنسان بنڑیا ۔“ آخری آدم یعنی مسیح زندگی بخشنڑ آلی رُوح بنڑیا۔ رُوحانی پہلے نہ ہا بلکہ فطرتی جِسم ہا۔ بعد ءچ رُوحانی آیا۔ پہلا بندہ زمین دی مِٹی کنُوں بنڑایا گِیا پر ڈُوجھا بندہ اسمان کنُوں آیا۔ خاکی اِنسان خاکی آدم وانگُوں ہِن پر اسمانی اِنسان، اسمان کنُوں آئے ہوئے اِنسان وانگُوں۔ جِینویں اساں اُوں خاکی دی صورت اُتے پیدا تھئے، اُونویں ای اساں اُوں اسمانی اِنسان دی صورت اُتے وی ہوسُوں۔ بِھراؤ! میڈا مطلب ایہ ہے جو خون تے گوشت خُدا دی بادشاہی دے وارث نئیں تھی سگدے تے نہ جیہڑا فانی ہے، غیرفانی دا وارث تھی سگدے۔ ڈیکھو مَیں تُہاکُوں ہِک راز دی گالھ ڈسیندا ہاں۔ اساں سارے موت دی نیندر تاں نہ سَم سُوں پر سارے بدل ویسوں۔ تے ایہ ہِک دم اکھ جھمکدیاں ای تھی ویسی جِیں ویلے آخری نرسِنگا وجایا ویسی۔ کیوں جو نرسِنگا وجایا ویسی، تے مُردے غیرفانی جِسم دی حالت ءچ زندہ تھی ویسن تے اساں سارے بدل ویسوں۔ کیوں جو ضرور ہے جو ایہ جیہڑا فانی ہے، غیرفانی لباس پا گِھنے تے ایہ مرݨ آلا جِسم ہمیشاں دی زندگی دا لباس پاوے۔ تے جِیں ویلے ایہ فانی جِسم حیاتی دا لباس پا گِھنسی تے ایہ مرݨ آلا جِسم ہمیشاں دی حیاتی دا لباس پا گِھنسی تاں او قول پُورا تھیسی جیہڑا لِکھیا ہے جو موت فتح دا گِراں تھی گئی۔ ”موت! تیڈی فتح کِتھاں ہے؟ موت! تیڈا ڈنگ کِتھاں ہے ؟“ موت دا ڈنگ گُناہ ہے تے گُناہ دا زور شریعت ہے۔ پر خُدا دا شُکر ہے جیہڑا ساڈے خُداوند یسُوع مسیح دے وسیلے نال ساکُوں فتح بخشیندے۔ اِیں کیتے میڈے عزیز بِھراؤ! مضبوط تے قائم راہو تے خُدا دی خدمت ءچ ہمیشاں جوش نال بھرے راہو کیوں جو تُساں جانڑدے ہیوے جو خُداوند کیتے تُہاڈی محنت بے فائدہ نئیں۔ جیہڑا چندہ مُقدّساں کیتے جمع کیتا ویندے اُوندے بارے ءچ تُساں اِیں ہدایت اُتے عمل کرو جیہڑی مَیں گلِتیہ دیاں کلیسیاواں کُوں کیتی ہے، یعنی ہر ہفتے دے پہلے ڈینہہ تُہاڈے ءچوں ہر بندہ آپنڑی آمدنی دے مطابق کُجھ آپنڑے کولھ جمع کر رکھے، تاں جو میڈے آوݨ تے تُہاکُوں چندہ جمع کرݨ دی لوڑ نہ پووے۔ وَل جِیں ویلے مَیں آساں تاں جِنہاں کُوں تُساں منظور کریسو مَیں اُنہاں کُوں خط ڈے تے بھیج ڈیساں تاں جو تُہاڈی خیرات یروشلیم پُچا ڈیوݨ۔ جے میڈا ونجنڑ وی مناسب ہوسی تاں او میڈے نال ای ویسن۔ مَیں مَکِدُنیہ تُوں تھیندا ہویا تُہاڈے کولھ آساں کیوں جو میکُوں مَکِدُنیہ تُوں تھی تے ونجنڑاں تاں ہے۔ تے شاید تُہاڈے نال راہواں بلکہ شاید سیالا وی تُہاڈے کولھ گُزاراں تاں جو تُساں میڈے اگُوں دے سفر کیتے میڈی مدد کر سگو جِتھاں وی مَیں ونجنڑا ہوسی۔ مَیں ایہ نئیں چاہندا جو میڈی مُلاقات تُہاڈے نال رستے ءچ تھیوے بلکہ میکُوں اُمید ہے جو جے خُداوند دی مرضی تھئی تاں کُجھ عرصہ تُہاڈے کولھ راہساں۔ پر عید پِنتیکُست تئیں مَیں اِفِسُس ءچ راہساں، کیوں جو اِتھاں میڈے کیتے تبلیغ کرݨ دا ہِک وڈا دروازہ کُھلیا پِیا ہے، بےشک مخالفت کرݨ آلے وی بہُوں ہِن۔ جے تِیمُتِھیُس پُج ونجے تاں خیال رکھائے جو او تُہاڈے کولھ بے فِکر ٹِکے کیوں جو او وی میڈے وانگُوں خُداوند دی خدمت کریندا پِیا ہے۔ بس کوئی اُونکُوں حقیر نہ سمجھے بلکہ اُونکُوں صحیح سلامت بھیج ڈیوائے جو میڈے کولھ آ ونجے کیوں جو مَیں اُوندا تے بئے بِھرانواں دا اِنتظار کرینداں پِیا ہاں۔ اپُلّوس بِھرا کُوں مَیں بہُوں زور ڈے تے آکھے جو او وی مسیحی بِھرانواں دے نال تُہاڈے کولھ آوے پر اِیں ویلے او راضی نہ تھیّا۔ جے بعد ءچ مناسب موقع مِلیا تاں او ضرور آسی۔ جاگدے راہو۔ اِیمان ءچ قائم راہو۔ دلیر تھیؤ تے مضبوط تھیندے ونجو۔ جیہڑا کُجھ کریندے ہیوے محبت نال کرو۔ بِھراؤ! تُساں ستِفناس دے خاندان دے بارے ءچ تاں جانڑدے ہیوے جو او اَخیہ دے ساریاں کنُوں پہلے پھل ہِن تے مُقدّساں دی خدمت کرݨ ءچ لگے ہوئے ہِن۔ مَیں تُہاڈی مِنت کریندا ہاں جو ایجھے لوکاں دے تابع راہو بلکہ ہر ہِک دے، جیہڑا اِیں کم تے محنت ءچ شریک ہے۔ مَیں ستِفناس، فرتُوناتُس تے اخیکُس دے آوݨ تُوں خوش ہاں کیوں جو اُنہاں میڈی مدد کر تے تُہاڈی غیر حاضری دی کمی کُوں پُورا کر ڈِتا۔ اُنہاں میڈی تے تُہاڈی رُوح کُوں تازہ کیتے۔ بس ایجھیاں دی قدر کیتا کرو۔ آسِیہ دیاں کلیسیاواں تُہاکُوں سلام آدھیاں ہِن۔ اَکوِلہ تے پرسِکہ، اُوں کلیسیا سمیت جیہڑی اُنہاں دے گھر ءچ جمع تھیندی ہے، تُہاکُوں خُداوند دے ناں ءچ بہُوں بہُوں سلام آدھے ہِن۔ سارے بِھرا تُہاکُوں سلام آدھے ہِن۔ پاک بوسہ گِھن تے ہِک بئے کُوں سلام آکھو۔ مَیں پولُس، آپنڑے ہتھ نال سلام لِکھدا ہاں۔ جیہڑا کوئی خُداوند نال محبت نئیں رکھیندا، اُوندے اُتے لعنت۔ ساڈا خُداوند آوے! خُداوند یسُوع مسیح دا فضل تُہاڈے نال راہوے۔ میڈی محبت مسیح یسُوع ءچ تُساں سبھ نال راہوے۔ (آمین۔) ایہ خط میں پولُس دی طرفوں ہے جیہڑا خُدا دی مرضی نال مسیح یسُوع دا رسُول ہاں، تے ساڈے بِھرا تِیمُتِھیُس دی طرفوں، خُدا دی کلیسیا دے ناں جیہڑی کُرِنتُھس شہر ءچ ہے تے پُورے اَخیہ دے سارے مُقدّساں دے ناں۔ ساڈے باپ خُدا تے خُداوند یسُوع مسیح دی طرفوں تُہاکُوں فضل تے اِطمینان حاصل تھیندا راہوے۔ ساڈے خُداوند یسُوع مسیح دے خُدا تے باپ دی حمد ہووے جیہڑا بہُوں ای رحیم باپ تے ہر طرحاں دی تسلی ڈیوݨ آلا خُدا ہے۔ اُوہو ساڈیاں ساریاں مُصیبتاں ءچ ساکُوں تسلی ڈیندے تاں جو اساں اُوندی طرفوں مِلی ہوئی تسلی نال ڈُوجھیاں کُوں وی تسلی ڈے سگوں جیہڑے کہیں وی قِسم دی مُصیبت ءچ ہِن۔ کیوں جو جِینویں اساں مسیح دے ڈُکھ ءچ بہُوں زیادہ شریک تھیندے ہیں، اُونویں ای ساکُوں مسیح دے وسیلے تسلی وی بہُوں زیادہ مِلدی ہے۔ جے اساں مُصیبت برداشت کریندے ہیں تاں او تُہاڈی تسلی تے نجات کیتے ہے تے جے تسلی پیندے ہیں تاں او وی تُہاڈی تسلی کیتے ہے جیندے سببّوں تُساں اُنہاں ڈُکھاں کُوں صبر نال برداشت کر سگسو جیہڑے اساں وی برداشت کریندے ہیں۔ تے تُہاڈے بارے ءچ ساڈی اُمید مضبوط ہے کیوں جو ساکُوں یقین ہے جو جِینویں تُساں ڈُکھاں ءچ ساڈے نال شریک ہیوے اُونویں ای تسلی ءچ وی شریک ہوسو۔ بِھراؤ! اساں نئیں چاہندے جو تُساں اُوں مُصیبت کنُوں بے خبر راہو جیہڑی آسِیہ ءچ ساڈے اُتے آئی۔ ایہ مُصیبت اِتنی شدید تے ساڈی برداشت کنُوں باہر ہئی جو اساں تاں زندگی کنُوں وی ہتھ دھو بیٹھے ہسے۔ بلکہ اساں محسوس کر گِھدا ہا جو ساڈی موت یقینی ہے۔ ایہ اِیں واسطے تھیّا جو اساں آپنڑے آپ اُتے نئیں بلکہ اُوں خُدا اُتے بھروسہ رکھوں جیہڑا مُردیاں کُوں زندہ کریندے۔ اُوں ساکُوں موت دے وڈے خطرے کنُوں بچائے تے بچیسی تے ساکُوں پُوری اُمید ہے جو او اگُوں تے وی بچیندا راہسی۔ تُساں وی دُعا دے ذریعے ساڈی مدد کرو تاں جو او فضل جیہڑا بہُوں سارے لوکاں دی دُعا دے وسیلے ساڈے اُتے تھیّا ہے، اُوندے کیتے بہُوں سارے لوک ساڈے بارے ءچ خُدا دا شُکر کرݨ۔ ساکُوں آپنڑے ضمیر دی اِیں گواہی اُتے فخر ہے جو اساں دُنیا ءچ تے خاص طور تے تُہاڈے سامنڑے اُوں پاک دِلی تے سچائی نال زندگی گُزاری ہے جیہڑی خُدا دی طرفوں مِلدی ہے۔ ایہ ساڈی آپنڑی اِنسانی حِکمت نال نئیں بلکہ خُدا دے فضل نال تھئے۔ اساں تُہاکُوں ایجھے گالھیں نئیں لِکھدے، جیہڑیاں تُساں پڑھ تے سمجھ نہ سگو تے میکُوں اُمید ہے جو جِینویں تُہاکُوں ساڈی کُجھ سمجھ آ گئی ہے، تُساں آخر تئیں وی پُوری طرحاں سمجھ گِھنسو۔ وَل خُداوند یسُوع دے واپس آوݨ دے ڈینہہ جِینویں اساں تُہاڈے کیتے فخر دا سبب ہیں، اُونویں ای تُساں وی ساڈے کیتے فخر دا سبب ہوسو۔ اِیں گالھ اُتے بھروسا رکھ تے مَیں اِرادہ کیتا ہا جو پہلے تُہاڈے کولھ آواں تاں جو تُہاکُوں ڈُونڑا فائدہ تھیوے۔ یعنی تُہاڈے کولُھوں تھیندا ہویا مَکِدُنیہ چلیا وَنجاں تے مَکِدُنیہ کنُوں وَل تُہاڈے کولھ آواں۔ اِیندے بعد تُساں میکُوں یہُودیہ دو روانہ کر ڈیوائے۔ جِیں ویلے مَیں اِرادہ کیتا تاں کیا بغیر سوچے سمجھے کیتا ہا؟ یا جیہڑے منصوبے بنڑیندا ہاں کیا دُنیاوی لوکاں آلی کار بنڑیندا ہاں جو ”ہاں ہاں“ وی کراں تے ”نہ نہ“ وی؟ جِینویں خُدا سچا ہے اُونویں ای تُہاڈے نال ساڈے پیغام ءچ ”ہاں“ تے ”نہ“ ڈوہائیں نئیں ہوندے۔ کیوں جو خُدا دے پوتر یسُوع مسیح، جیندی تبلیغ سِیلاس، تِیمُتِھیُس تے مَیں تُہاڈے وچال کیتی، اُوندے ءچ ”ہاں“ تے ”نہ“ ڈوہائیں نہ ہَن بلکہ اُوندے ءچ ہمیشاں ”ہاں“ ای ہئی۔ کیوں جو خُدا دے سارے وعدے مسیح ءچ ”ہاں“ دے نال پُورے کیتے گئے ہِن۔ اِیں واسطے اساں اُوندے وسیلے نال ”آمین“ آدھے ہیں تاں جو ساڈے وسیلے خُدا دا جلال ظاہر تھیوے۔ تے خُدا ای ہے جیہڑا ساکُوں تُہاڈے نال مسیح ءچ قائم رکھیندے تے ساکُوں مقرر کر تے مخصوص کیتے۔ تے اُوں ساڈے اُتے آپنڑی مُہر وی کیتی تے رُوح القُدس کُوں آپنڑیاں برکتاں دے بیعانہ دے طور تے ساڈے دِلاں ءچ پاتا۔ خُدا گواہ ہے جو مَیں کُرِنتُھس اِیں واسطے واپس نئیں آیا جو مَیں تُہاکُوں دڑکنڑ تُوں باز راہوݨ چاہندا ہم۔ میڈا ایہ مقصد نئیں جو اساں اِیمان دے بارے ءچ تُہاڈے اُتے حُکم چلاؤں، بلکہ تُہاڈی خوشی کیتے تُہاڈے مددگار ہیں، کیوں جو تُساں آپنڑے اِیمان اُتے مضبوطی نال قائم راہندے ہیوے۔ بس مَیں آپنڑے دل ءچ اِرادہ کر گِھدا ہا جو ولا تُہاڈے کولھ پریشان تھی تے نہ آواں کیوں جو جے مَیں تُہاکُوں پریشان کراں تاں میکُوں کوݨ خوش کریسی، سوائے تُہاڈے جیہڑے میڈی وجہ کنُوں پریشان تھئے؟ مَیں تُہاکُوں اِیہو گالھ لِکھی ہئی تاں جو جِیں ویلے مَیں آواں تاں میکُوں اُنہاں لوکاں کنُوں ڈُکھ نہ پُجے جِنہاں کنُوں میکُوں خوشی مِلنڑی چاہیدی ہئی، کیوں جو میکُوں تُہاڈے ساریاں اُتے اِیں گالھ دا بھروسا ہے جو جیہڑی میڈی خوشی ہے اُوہو تُساں ساریاں دی وی خوشی ہے۔ مَیں بہُوں مُصیبت تے پریشانی ءچ تے بہُوں سارے ہنجُو وہا وہا تے تُہاکُوں لِکھیا ہا پر میڈا مقصد تُہاکُوں ڈُکھ ڈیوݨ نہ ہا بلکہ مَیں چاہندا ہم جو تُساں جاݨ گِھنو جو مَیں تُہاڈے نال کِتنی گہری محبت رکھیندا ہاں۔ جے کہیں بندے ڈُکھ ڈِتے تاں صرف میکُوں ای نئیں بلکہ کہیں حد تئیں تُساں ساریاں کُوں وی ڈِتے۔ مَیں ایہ گالھ زیادہ سختی نال نئیں کرݨ چاہندا۔ پر اُوں بندے کیتے ایہ سزا بہُوں ہے جیہڑی اُونکُوں تُساں بہُوں ساریاں دی طرفوں مِلی ہے۔ بس ہُنڑ تُساں اُوندا قصُور معاف کر ڈیؤ تے اُونکُوں تسلی ڈیؤ۔ اِینویں نہ تھیوے جو او حد تُوں زیادہ ڈُکھ پارُوں تباہ تھی ونجے۔ اِیں واسطے مَیں تُہاڈی مِنت کریندا ہاں جو اُونکُوں آپنڑی محبت دا یقین ڈیواؤ۔ مَیں اِیں واسطے وی لِکھیا ہا جو تُہاڈا اِمتحان گِھن تے ڈیکھاں جو تُساں سارے گالھیں ءچ فرمانبردار ہیوے یا نئیں۔ جِینکُوں تُساں معاف کریندے ہیوے اُونکُوں مَیں وی معاف کریندا ہاں۔ جے مَیں معافی ڈِتی تاں مسیح کُوں حاضر جاݨ تے تُہاڈی خاطر معاف کیتا۔ اِینویں نہ تھیوے جو شیطان کُوں ساڈے تُوں فائدہ چاوݨ دا موقع مِل ونجے کیوں جو اساں اُوندیاں چالاں کُوں چنگی طرحاں جانڑدے ہیں۔ جِیں ویلے مَیں مسیح دی خوشخبری دی تبلیغ کیتے تروآس پُجیا تاں خُداوند میڈے کیتے خدمت دا دروازہ کھول ڈِتا ہا۔ وَل وی میکُوں دِلی سکون نہ تھیّا کیوں جو میکُوں میڈا بِھرا طِطُس اُتھاں نہ مِلیا ہا۔ اِیں واسطے مَیں اُنہاں لوکاں تُوں رُخصت تھی تے مَکِدُنیہ روانہ تھی گِیا۔ پر خُدا دا شُکر ہے جو او ساکُوں مسیح دی فتح دے جلُوس ءچ ہمیشاں گِھن ویندے تے ساڈے وسیلے نال مسیح کُوں جانڑݨ دی خوشبو ہر جاہ کِھنڈیندے۔ کیوں جو خُدا دے حضُور ءچ اساں نجات پاوݨ آلیاں تے ہلاک تھیوݨ آلیاں ڈوہائیں کیتے مسیح دی خوشبو ہیں۔ کُجھ لوکاں کیتے تاں موت ڈیوݨ آلی بدبُو تے کُجھ لوکاں کیتے زندگی ڈیوݨ آلی خوشبو ہیں۔ تے کوݨ اِیں کم دے لائق ہے؟ اساں اُنہاں اکثر لوکاں آلی کار نئیں جیہڑے پیسے کیتے خُدا دے کلام ءچ ملاوٹ کریندے ہِن بلکہ خُدا دی طرفوں تے اُونکُوں حاضر جاݨ تے مسیح ءچ سچے دل نال گالھ کریندے ہیں۔ کیا اساں وَل آپنڑی تعریف دا ڈھنڈورہ پِٹنڑ لگ ونجُوں؟ کیا ساکُوں کُجھ لوکاں وانگُوں تُہاڈے کولھ سفارشی چِٹھیاں گِھن آوݨ یا تُہاڈے کنُوں گِھن ونجنڑ دی ضرورت ہے؟ نئیں، تُساں خود ساڈی چِٹھی ہیوے، جیہڑی ساڈے دِلاں اُتے لِکھی پئی ہے۔ اِینکُوں سبھ لوک جانڑدے تے پڑھدے ہِن۔ ایہ صاف ظاہر ہے جو تُساں مسیح دی او چِٹھی ہیوے جیہڑی اُوں ساڈی خدمت دے ذریعے لِکھی ہے۔ او چِٹھی مَس نال نئیں بلکہ زندہ خُدا دے رُوح القُدس نال لِکھی گئی ہے، پتھر دیاں تختیاں اُتے نئیں بلکہ اِنسانی دِلاں دیاں تختیاں اُتے۔ مسیح دے ذریعے خُدا اُتے ساڈا ایجھا ای بھروسا ہے۔ ایہ گالھ نئیں جو ساڈے ءچ کوئی لیاقت ہے جو اساں خود کُجھ کرݨ دا دعویٰ کر سگوں بلکہ ساڈی لیاقت خُدا دی طرفوں ہے، جئیں ساکُوں نویں عہد دے خادم ہووݨ دے لائق وی بنڑایا ہے۔ ایہ عہد لِکھے ہوئے حُکماں اُتے نئیں بلکہ رُوح اُتے قائم ہے کیوں جو لِکھے ہوئے حُکم مار سٹیندے ہِن پر رُوح القُدس زندگی ڈیندے۔ جِیں ویلے او موت گِھن آوݨ آلا نِظام جیندے الفاظ پتھر دیاں تختیاں اُتے لِکھے گئے ہَن، ایجھا جلالی ہا جو بنی اِسرائیل کُوں مُوسیٰ دے چہرے دے نُور کُوں ڈیکھنڑ دی تاب نہ ہئی بھانویں جو او نُور گھٹدا ویندا ہا، تاں رُوح القُدس دے نِظام دا جلال اُوں کنُوں کِتنا زیادہ ہوسی؟ جِیں ویلے قصُوروار کھڑاوݨ آلا نِظام جلالی ہا، تاں راستباز کھڑاوݨ آلا نِظام کِتنا زیادہ جلالی ہوسی۔ بلکہ پہلے نِظام دا جلال، اِیں زیادہ جلالی نِظام دے مُقابلے ءچ ہُنڑ غیر جلالی لگدا ہے۔ کیوں جو جڈاں مِٹ ونجنڑ آلا نِظام جلالی ہا تاں ہمیشاں تئیں قائم راہنڑ آلا نِظام بہُوں زیادہ جلالی ہوسی۔ بس ایجھی اُمید رکھیندے ہوئے اساں بہُوں دلیر ہیں۔ اساں مُوسیٰ وانگُوں نئیں جئیں آپنڑے چہرے اُتے نقاب کر گِھدا تاں جو بنی اِسرائیل اُوں مِٹ ونجنڑ آلے جلال کُوں نہ ڈیکھ سگنڑ۔ اُنہاں دے ذہن سخت تھی گئے تے اَج تئیں پُرانڑے عہد دیاں کتاباں پڑھدے ویلے اُنہاں دے دل اُتے پڑدہ پِیا راہندے۔ ایہ پڑدہ صرف مسیح دے وسیلے نال چاتا ویندے۔ اَج تئیں جڈاں وی مُوسیٰ دی کتاب پڑھی ویندی ہے، اُنہاں دے دل اُتے پڑدہ پِیا راہندے۔ پر جِیں ویلے کہیں دا دل خُداوند دو رجُوع کریسی تاں او پڑدہ ہٹا ڈِتا ویسی۔ کیوں جو خُداوند رُوح ہے تے جِتھاں خُداوند دا رُوح القُدس ہے اُتھاں ازادی ہے۔ اِیں واسطے شیشے آلی کار اساں ساریاں دے بے نقاب چہریاں تُوں خُداوند دا جلال ظاہر تھیندے تے اساں خُداوند دے رُوح القُدس دے وسیلے نال آہستہ آہستہ اُوندی جلالی صورت ءچ بدلدے ویندے ہیں۔ بس کیوں جو ساکُوں خُدا دی رحمت نال ایہ خدمت مِلی ہے، اِیں واسطے اساں ہِمت نئیں چھوڑیندے۔ اساں شرم دے لُکے گالھیں کُوں چھوڑ ڈِتے۔ نہ اساں مکاری کریندے ہیں تے نہ ای خُدا دے کلام ءچ ملاوٹ کریندے ہیں۔ بلکہ سچائی کُوں ظاہر کر تے خُدا دے حضُور ہر بندے دے دل ءچ آپنڑے آپ کُوں نیک ظاہر کریندے ہیں۔ جے او خوشخبری جیندی اساں تبلیغ کریندے ہیں ہُنڑ وی پڑدہ دے پِچھے لُکی ہوئی ہے تاں صرف ہلاک تھیوݨ آلیاں کیتے ہے۔ اِیں جہان دے خُدا یعنی شیطان غیر اِیمانداراں دی عقل کُوں اندھا کر ڈِتے تاں جو او خوشخبری دا نُور نہ ڈیکھ سگنڑ، جیہڑا مسیح دے جلال کُوں ظاہر کریندے یعنی مسیح دے جیہڑا خُدا دی صورت اُتے ہے۔ کیوں جو اساں آپنڑی نئیں بلکہ مسیح یسُوع دی تبلیغ کریندے ہیں جو اُوہو خُداوند ہے تے آپنڑے بارے ءچ ایہ آدھے ہیں جو یسُوع دی خاطر اساں تُہاڈی خدمت کرݨ آلے ہیں۔ کیوں جو خُدا ای ہے جئیں فرمائے جو ”اندھارے ءچوں نُور چمکے“ تے اُوں ای ساڈے دِلاں ءچ آپنڑا نُور چمکایا تاں جو اساں خُدا دے جلال دے نُور کُوں پچھاݨ سگوں جیہڑا یسُوع مسیح دے چہرے تُوں ظاہر تھیندے۔ پر ایہ خزانہ ساڈے ءچ رکھیا گِیا ہے جیہڑے مِٹی دے تھانواں وانگُوں ہیں تاں جو ظاہر تھی ونجے جو ایہ حد کنُوں زیادہ قُدرت خُدا دی طرفوں ہے نہ جو ساڈی طرفوں۔ اساں ہر پاسُوں دبائے تاں ویندے ہیں پر ٹُکڑے ٹُکڑے نئیں تھیندے۔ پریشان تاں تھیندے ہیں پر نا اُمید نئیں تھیندے۔ ستائے تاں ویندے ہیں پر کلھے نئیں چھوڑے ویندے۔ سٹے تاں ویندے ہیں پر تباہ نئیں تھیندے۔ اساں آپنڑے بدن ءچ یسُوع دی موت چاتی ودے ہیں تاں جو یسُوع دی زندگی وی ساڈے بدن ءچوں ظاہر تھیوے۔ کیوں جو اساں جیندے جی یسُوع دی خاطر موت دا مُنہ ڈیدھے راہندے ہیں تاں جو یسُوع دی زندگی ساڈے فانی بدن ءچ ظاہر تھیوے۔ بس موت تاں ساڈے ءچ اثر کریندی ہے پر زندگی تُہاڈے ءچ ۔ کلام ءچ لِکھیا ہے جو ”مَیں اِیمان گِھن آیا تے اِیں واسطے آکھیا ۔“ ساڈے ءچ ایجھا ای اِیمان ہے، اِیں واسطے اساں وی اِیمان گِھن آوݨ دے سببّوں اکھیندے ہیں۔ کیوں جو اساں جانڑدے ہیں جو خُداوند یسُوع کُوں مُردیاں ءچوں زندہ کرݨ آلا ساکُوں وی یسُوع دے وسیلے زندہ کریسی تے تُہاڈے نال آپنڑے سامنڑے حاضر کریسی۔ ایہ سبھ کُجھ تُہاڈے فائدے کیتے ہے تاں جو بہُوں سارے لوکاں اُتے فضل تھیوے تے نتیجہ ءچ شُکرگُزاری ودھدی ونجے جیندے نال خُدا کُوں جلال مِلے۔ اِیں واسطے اساں حوصلہ نئیں چھوڑیندے۔ بےشک اساں ظاہری طور تے ختم تھیندے ویندے ہیں، وَل وی اندر ای اندر ہر روز نویں بنڑدے ویندے ہیں۔ ساڈی ایہ بہُوں عارضی تے ہلکی جیہی مُصیبت ساڈے کیتے ایجھا بھاری تے ابدی جلال پیدا کریندی پئی ہے۔ اِیں واسطے اساں نظر آوݨ آلیاں چیزاں اُتے نئیں بلکہ نظر نہ آوݨ آلیاں چیزاں اُتے غور کریندے ہیں کیوں جو نظر آوݨ آلیاں چیزاں عارضی ہِن پر نظر نہ آوݨ آلیاں ابدی ہِن۔ اساں جانڑدے ہیں جو جِیں ویلے ایہ تمبُو یعنی ساڈا بدن ڈھا ڈِتا ویسی جیہڑا زمین اُتے ساڈا گھر ہے تاں ساکُوں خُدا کنُوں اسمان اُتے ایجھا گھر مِلسی جیہڑا اِنسانی ہتھ دا بنڑیا ہویا نئیں بلکہ ابدی ہے۔ اِیں واسطے اساں اِیں موجودہ تمبُو ءچ کراہندے ہیں تے ساکُوں بہُوں سِک ہے جو اساں آپنڑے اسمانی گھر کُوں کپڑیاں وانگُوں پا گِھنوں تاں جو اُونکُوں پا گِھننڑ تُوں بعد ننگے نہ راہوں ۔ اساں اِیں تمبُو ءچ راہندے ہوئے بھار تلے کراہندے ہیں اِیں واسطے نئیں جو اساں اِیں بدن کُوں چھوڑن چاہندے ہیں بلکہ اِیں واسطے جو ڈُوجھا بدن کپڑیاں وانگُوں پا گِھننڑ چاہندے ہیں تاں جو جیہڑا فانی ہے او ابدی زندگی ءچ غرق تھی ونجے۔ خُدا خود ساکُوں اِیں مقصد کیتے بنڑایا ہے تے رُوح القُدس ساکُوں آوݨ آلیاں چیزاں دے بیعانہ ءچ ڈِتا۔ بس اساں ہمیشاں حوصلہ رکھیندے ہیں تے ایہ جانڑدے ہیں جو جئیں تئیں اساں بدن دے گھر ءچ ہیں، خُداوند دے گھر کنُوں دُور ہیں کیوں جو اساں اِیمان ءچ ٹُردے ہیں نہ جو اکھیں نال ڈیکھنڑ نال۔ ہا، ساکُوں حوصلہ ہے تے ایہ بدن چھوڑ تے خُداوند دے گھر ءچ راہونڑا ساکُوں زیادہ منظور ہے۔ بس بھانویں اساں اِیں بدن ءچ راہندے ہوؤں یا نئیں، ساڈا مقصد تاں اُونکُوں خوش کرݨ ہے۔ کیوں جو اساں ساریاں کُوں مسیح دے تختِ عدالت دے سامنڑے حاضر تھیونڑاں ہے تاں جو ہر بندہ آپنڑے کماں دا بدلہ پاوے جیہڑے اُوں آپنڑے بدن ءچ راہندے ہوئے کیتے ہِن، بھانویں چنگے ہِن یا بُرے۔ اساں خُداوند دے خوف کُوں سامنڑے رکھ تے ڈُوجھیاں کُوں سمجھاوݨ دی کوشش کریندے ہیں۔ خُدا دے اگُوں ساڈی حقیقت ظاہر ہے تے میکُوں اُمید ہے جو تُساں وی ساکُوں چنگی طرحاں جانڑدے ہوسو۔ اِیندا مطلب ایہ نئیں جو اساں تُہاڈے سامنڑے ولا کنُوں آپنڑے نیک تھیوݨ دا اعلان کریندے پئے ہیں بلکہ تُہاکُوں موقع ڈیوݨ چاہندے ہیں جو تُساں ساڈے اُتے فخر کرو تے اُنہاں کُوں جواب ڈے سگو جیہڑے دل دے گالھیں اُتے نئیں بلکہ ظاہری گالھیں اُتے فخر کریندے ہِن۔ جے اساں دیوانے ہیں تاں خُدا کیتے ہیں تے جے ہوش ءچ ہیں تاں تُہاڈے کیتے۔ اساں مسیح دی محبت دے سببّوں مجبور ہیں کیوں جو اساں اِیں نتیجے اُتے پُجے ہیں جو جِیں ویلے مسیح ساریاں کیتے مویا تاں اِیندا مطلب ہے جو سبھ مر گئے۔ تے او اِیں واسطے ساریاں دی خاطر مویا جو جیہڑے زندہ ہِن او اگُوں تے آپنڑے کیتے زندہ نہ راہوݨ بلکہ صرف اُوندے کیتے جیہڑا اُنہاں کیتے مویا تے ولا زندہ تھی گِیا۔ بس ہُنڑ اساں کہیں کُوں دُنیاوی نظر نال نئیں ڈیدھے۔ ہا، بےشک ہِک وقت اساں مسیح کُوں وی اُونویں ای ڈِٹھا ہا پر ہُنڑ اُونکُوں اِینویں نئیں ڈیدھے۔ اِیں واسطے جے کوئی مسیح ءچ ہے تاں او نوِیں مخلوق ہے۔ پُرانڑی زندگی ویندی ریہی، ڈیکھو نوِیں زندگی شروع تھی گئی ہے۔ ایہ سبھ خُدا دی طرفوں ہے جئیں مسیح دے ذریعے ساڈے نال صُلح کر گِھدی تے صُلح کراوݨ دی خدمت ساڈے حوالے کر ڈِتی۔ مطلب ایہ ہے جو خُدا مسیح دے وسیلے دُنیا نال صُلح کیتی تے لوکاں دے گُناہاں کُوں اُنہاں دے ذمہ نہ لایا تے صُلح دا ایہ پیغام اُوں ساڈے حوالے کر ڈِتے۔ اِیں واسطے اساں مسیح دے ایلچی ہیں جِینویں جو خُدا ساڈے ذریعے لوکاں کُوں سمجھیندے۔ تے اساں مسیح دی طرفوں تُہاڈی مِنت کریندے ہیں جو ”خُدا نال صُلح کر گِھنو۔“ خُدا مسیح کُوں جیہڑا گُناہ کنُوں واقف نہ ہا، ساڈے کیتے گُناہ کھڑایا تاں جو اساں مسیح ءچ خُدا دی راستبازی تھی ونجُوں۔ اساں جیہڑے خُدا دے کم ءچ شریک ہیں تُہاڈی مِنت کریندے ہیں جو خُدا دے اُوں فضل کُوں جیہڑا تُہاڈے اُتے تھئے بے فائدہ نہ تھیوݨ ڈیؤں۔ کیوں جو او فرمیندے جو ”مَیں قبولیت دے ویلے تیڈی سُنڑ گِھدی تے نجات دے ڈینہہ تیڈی مدد کیتی ۔“ ڈیکھو! ہُنڑ قبولیت دا ویلا ہے تے ایہ نجات دا ڈینہہ ہے۔ اساں کہیں وی گالھ ءچ تُھڈا کھاوݨ دا سبب نئیں بنڑدے تاں جو ساڈی اِیں خدمت اُتے کوئی انگل نہ چاوے۔ بلکہ خُدا دے خادم ہوندے ہوئے اساں ہر گالھ تُوں آپنڑی نیکی ظاہر کریندے ہیں، یعنی بہُوں صبر نال، مُصیبت ءچ، مُشکلات ءچ، تنگی ءچ، کوڑے کھا تے، قید ءچ رہ تے، فساد دا سامنڑا کر تے، سخت محنت کر تے، آپنڑیاں نیندراں حرام کر تے، بُکھے رہ تے، پاکیزگی، علم، تحمل، مہربانی، رُوح القُدس، سچی محبت، سچے کلام، خُدا دی قُدرت دے ذریعے تے راستبازی دے ہتھیاراں دے ذریعے جیہڑے ساڈے سجے کھبے ہتھاں ءچ ہِن، عزت تے بے عزتی ءچ، بدنامی تے نیک نامی ءچ۔ اساں سچے ہیں پر وَل وی لوک ساکُوں دوکھے باز سمجھدے ہِن۔ اساں مشہور ہیں، وَل وی لوک ساکُوں نئیں جانڑدے۔ اساں موت دے مُنہ ءچ راہندے ہیں، پر ڈیکھو وَل وی زندہ ہیں۔ مار کھاندے راہندے ہیں پر جان کنُوں نئیں مردے۔ ڈُکھی ہیں پر ہمیشاں خوش راہندے ہیں، غریب ہیں پر بہُوں ساریاں کُوں دولت مند بنڑا ڈیندے ہیں، مسکین ہیں پر ساڈے کولھ سبھ کُجھ ہے۔ کُرِنتھیو! اساں تُہاڈے نال کُھل تے گالھیں کریندے ہیں تے ساڈا دل تُہاڈے کیتے وڈا تھی گئے۔ ساڈے دِلاں ءچ تُہاڈے کیتے جاہ گھٹ نئیں تھئی پر تُہاڈے دِلاں ءچ ساڈے کیتے جاہ گھٹ تھی گئی ہے۔ مَیں تُہاکُوں آپنڑی اولاد سمجھ تے ایہ آدھا ہاں جو بدلے ءچ تُساں وی آپنڑے دِلاں کُوں ساڈے کیتے وڈا کرو۔ غیر اِیمانداراں دے نال ہِک پنجالی دے تلے زندگی نہ گُزارو کیوں جو راستبازی تے بدکاری دا آپس ءچ کیا واسطہ؟ یا روشنی تے اندھارے ءچ کیا تعلق؟ مسیح دا ابلیس نال کیا اِتفاق؟ یا اِیماندار دی غیر اِیماندار نال کیا شراکت؟ خُدا دی ہیکل دا بُتاں نال کیا تعلق؟ کیوں جو اساں زندہ خُدا دی ہیکل ہیں، جِینویں خُدا فرمایا ہے جو ”مَیں اُنہاں ءچ راہساں تے اُنہاں دے وچال پِھرساں۔ مَیں اُنہاں دا خُدا ہوساں تے او میڈی قوم ہوسن ۔ اِیں واسطے رب فرمیندے اُنہاں ءچوں نِکل تے اَنج راہو تے کہیں وی پلیت شے کُوں ہتھ نہ لاؤ ۔ وَل مَیں تُہاکُوں قبول کریساں تے تُہاڈا باپ ہوساں تے تُساں میڈے پوتر دِھیاں ہوسو۔ ایہ قول رب قادر مُطلق دا ہے۔“ عزیزو، ساڈے نال ایجھے وعدے کیتے گئے ہِن، اِیں واسطے آؤ اساں آپنڑے آپ کُوں جِسم تے رُوح کُوں ناپاک کرݨ آلی ہر چیز کنُوں پاک کرُوں تے خُدا دا خوف منیندے ہوئے آپنڑی پاکیزگی کُوں کمال تئیں پُچاؤں۔ ساکُوں آپنڑے دِلاں ءچ جاہ ڈیؤ۔ نہ اساں کہیں نال بے اِنصافی کیتی، نہ کہیں کُوں وِگاڑیا تے نہ کہیں کُوں دوکھا ڈِتے۔ مَیں تُہاکُوں قصُوروار کھڑاوݨ کیتے ایہ نئیں اکھیندا۔ مَیں پہلے ای لِکھ ڈِتے جو تُساں ساڈے دِلاں ءچ وس گئے ہیوے تے ہُنڑ ساڈا زندہ راہنڑ تے مرݨ تُہاڈے نال ہے۔ مَیں بہُوں دلیری نال تُہاڈے نال گالھیں کریندا ہاں، پر میکُوں تُہاڈے اُتے فخر وی ہے۔ مَیں تسلی نال بھریج گِیا ہاں تے مُصیبتاں ءچ وی میڈا دل خوشی نال بھریا ہے۔ جِیں ویلے اساں مَکِدُنیہ پُجے تاں ساکُوں سکون نہ مِلیا۔ بلکہ ساکُوں چودھارُوں پریشانیاں دا سامنڑا کرنڑا پِیا، باہرُوں لڑائیاں ہَن تے اندرُوں دہشتاں۔ وَل وی خُدا جیہڑا مایُوس لوکاں کُوں حوصلہ ڈیندے، طِطُس کُوں اُتھاں بھیج تے ساکُوں تسلی ڈِتی۔ ساڈا حوصلہ نہ صرف اُوندے پُج ونجنڑ نال تھیّا بلکہ اُوندی اُوں تسلی نال وی تھیّا جیہڑی اُونکُوں تُہاڈی طرفوں مِلی ہئی۔ اُوں تُہاڈا میڈے کیتے سِک رکھنڑ، تُہاڈا افسوس کرݨ تے تُہاڈا جوش جیہڑا میڈے کیتے ہا، ساکُوں بیان کیتا جیندے تُوں مَیں بِیا وی خوش تھیّا۔ بھانویں مَیں آپنڑے پہلے خط نال تُہاکُوں ڈُکھ ڈِتا، وَل وی مَیں پچھتیندا نئیں، بے شک پہلے پچھتیندا ہم۔ کیوں جو میں ڈیدھا ہاں جو اُوں خط نال تُہاکُوں ڈُکھ تاں پُجے پر صرف کُجھ عرصہ کیتے۔ تے ہُنڑ مَیں خوش ہاں، اِیں واسطے نئیں جو تُہاکُوں ڈُکھ پُجے بلکہ اِیں واسطے جو اِیں ڈُکھ تُہاکُوں توبہ کرݨ تئیں پُچایا۔ کیوں جو تُہاڈا ڈُکھ خُدا دے مقصد دے مطابق ہا، اِیں واسطے تُہاکُوں ساڈے سببّوں کہیں قِسم دا نُقصان نہ پُجیا۔ کیوں جو جیہڑا ڈُکھ خُدا دے مقصد دے مطابق ہوندے، او ایجھی توبہ پیدا کریندے جیہڑا نجات دو گِھن ویندے۔ اِیندے نال پچھتاوا نئیں تھیندا، پر دُنیاوی ڈُکھ موت پیدا کریندے۔ بس ڈیکھو، او ڈُکھ جیہڑا خُدا دے مقصد دے مطابق ہا، اُوں تُہاڈے ءچ کتنا جوش، آپنڑا دفاع کرݨ دا کِتنا شوق، کِتنی ناراضگی، کِتنا ڈر، کِتنی سِک تے کِتنی غیرت پیدا کر ڈِتی تے سزا ڈیوݨ دی کِتنی تیاری۔ تُساں ہر لحاظ نال ثابت کر ڈِتے جو تُساں اِیں معاملے ءچ بے قصُور ہیوے۔ بےشک مَیں او خط لِکھیا تاں ہا، پر اِیں واسطے نئیں جو اُوں غلط کم کرݨ آلے دے بارے ءچ لِکھاں یا اُوندے بارے ءچ جِیندے نال غلط کم تھئے، بلکہ اِیں واسطے جو خُدا دے حضُور تُہاڈے اُتے ظاہر تھی ونجے جو تُساں ساڈے کیتے کِتنا جوش رکھیندے ہیوے۔ اِیں واسطے ساکُوں تسلی ہے۔ تے اِیں تسلی دے علاوہ طِطُس کُوں خوش ڈیکھ تے ساکُوں بئی وی خوشی تھئی کیوں جو تُساں ساریاں دے سببّوں اُوندی رُوح وَل تازہ تھی گئی۔ مَیں اُوندے سامنڑے تُہاڈے بارے ءچ فخر کیتا ہا تے میں شرمندہ نئیں تھیّا۔ بلکہ جِینویں اساں تُہاکُوں ہمیشاں سچے گالھیں ڈسائیاں ہِن، اُونویں ای جیہڑا فخر اساں تُہاڈے بارے ءچ طِطُس دے سامنڑے کیتا او وی سچ ثابت تھیّا۔ جِیں ویلے اُونکُوں یاد آندے جو تُساں کِتنے فرمانبردار ہَوے تے کِینویں ڈردے تے کمبدے ہوئے اُوندا اِستقبال کیتا، تاں اُوندی محبت تُہاڈے نال بئی وی زیادہ تھی ویندی ہے۔ مَیں بہُوں خوش ہاں تے میکُوں تُہاڈے بارے ءچ ہر لحاظ نال چنگی طرحاں تسلی تھی گئی ہے۔ بِھراؤ! اساں تُہاکُوں خُدا دے اُوں فضل دے بارے ءچ ڈسیندے ہیں جیہڑا مَکِدُنیہ دی کلیسیاواں اُتے تھئے، جو کِینویں سخت مُصیبت دی ازمائش ءچ وی اُنہاں دی وڈی خوشی تے سخت غریبی، اُنہاں دی سخاوت کُوں بہُوں ودھا ڈِتا۔ مَیں اِیں گالھ دا گواہ ہاں جو جِتّی او ڈے سگدے ہَن، اُنہاں ڈِتا بلکہ گُنجائش تُوں وی زیادہ آپنڑی خوشی نال ڈِتا۔ اُنہاں وڈے زور نال ساکُوں مِنت کیتی جو مُقدّساں کُوں خیرات ڈیوݨ ءچ ساکُوں وی شریک تھیوݨ ڈیؤ۔ تے صرف ساڈی اُمید دے مطابق ای نئیں ڈِتا بلکہ پہلے آپنڑے آپ کُوں خُداوند کیتے وقف کیتا تے وَل خُدا دی مرضی نال ساڈے کیتے وی۔ اِیں واسطے اساں طِطُس کُوں نصیحت کیتی جو جِینویں اُوں اِیں خیرات دے کم کُوں پہلے شروع کیتا ہا، اُونویں ای تُہاڈے ءچ اِیں کم کُوں پُورا کرے۔ بس جِینویں تُساں ہر گالھ ءچ یعنی اِیمان، کلام، علم، جوش تے ساڈے نال محبت ءچ ودھدے ویندے ہیوے، اُونویں ای اِیں خیرات دے کم ءچ وی اگُوں ودھدے ونجو۔ مَیں تُہاکُوں اِینویں کرݨ دا حُکم نئیں ڈیندا پِیا بلکہ ڈُوجھیاں دے جوش دے مُقابلہ ءچ تُہاڈی محبت دی سچائی کُوں ازمیندا پِیا ہاں۔ کیوں جو تُساں ساڈے خُداوند یسُوع مسیح دے فضل کُوں جانڑدے ہیوے جو او بھانویں دولت مند ہا، وَل وی تُہاڈی خاطر غریب بنڑ گِیا تاں جو تُساں اُوندی غریبی دے سببّوں دولت مند بنڑ ونجو۔ ہُنڑ اِیں معاملے دے بارے ءچ میڈا مشورہ سُنڑو جو تُہاڈے کیتے کیا فائدہ مند ہے۔ پِچھلے سال تُساں نہ صرف ہدیہ ڈیوݨ ءچ بلکہ ڈیوݨ دے اِرادے ءچ وی سبھ تُوں اگُوں ہَوے۔ ہُنڑ اِیں کم کُوں پُورا وی کرو، تاں جو جِینویں تُساں جوش نال اِرادہ کیتے، اُونویں ای آپنڑی گُنجائش دے مطابق اُونکُوں پُورا وی کرو۔ کیوں جو جے ڈیوݨ دی نیّت ہووے تاں خُدا خیرات اُوندے مطابق قبول کریندے جیہڑی ڈیوݨ آلے دے کولھ ہے، نہ جو اُوندے مطابق جیہڑی اُوندے کولھ نئیں۔ میڈا ایہ مطلب نئیں جو بئیاں کُوں ارام مِلے تے تُہاکُوں تنگی بلکہ برابری ہووے۔ اِیں ویلے تُہاڈے کولھ بہُوں ہے تے تُساں اُنہاں دی کمی پُوری کر سگدے ہیوے تاں جو جڈاں اُنہاں دے کولھ بہُوں ہوسی تاں او تُہاڈی وی کمی پُوری کر سگسن تے اِینویں برابری تھی ویسی۔ جِینویں لِکھیا ہے جو ”جئیں بہُوں کٹھا کیتا اُوندے کولھ زیادہ نہ بچیا تے جئیں گھٹ کٹھا کیتا اُوندے کولھ وی پُورا تھی گِیا ۔“ خُدا دا شُکر ہے جئیں تُہاڈے کیتے طِطُس دے دل ءچ ایجھا جوش پیدا کیتے جِینویں میڈا تُہاڈے کیتے ہے۔ اُوں نہ صرف ساڈی درخاست قبول کیتی بلکہ او بہُوں جوش تے آپنڑی خوشی نال تُہاڈے دو روانہ تھیّا۔ اساں اُوندے نال اُوں بِھرا کُوں بھجیندے پئے ہیں جیندی تعریف خوشخبری دی تبلیغ کرݨ دے سببّوں سبھ کلیسیاواں ءچ تھیندی پئی ہے۔ تے صرف اِیہو نئیں بلکہ کلیسیاواں اُونکُوں چُنڑ گِھدے جو او ساڈے نال سفر کرے جڈاں اساں خیرات کُوں یروشلیم پُچاؤں۔ اساں ایہ کم خُداوند کُوں جلال ڈیوݨ کیتے تے آپنڑی خدمت دے شوق کُوں ظاہر کرݨ کیتے کریندے ہیں۔ اساں اِیں کنُوں بچنڑا چاہندے ہیں جو جِیں خیرات دا اساں اِنتظام کریندے ہیں، اُوندے بارے ءچ کوئی ساڈے اُتے انگل نہ چاوے۔ اساں پُوری کوشش کریندے ہیں جو اُوہو کم کرُوں جیہڑے نہ صرف خُداوند دی نظر ءچ چنگے ہووݨ بلکہ اِنساناں دی نظر ءچ وی۔ اساں اُنہاں ڈُوہائیں بِھرانواں دے نال ہِک بئے بِھرا کُوں وی بھجیندے پئے ہیں جِینکُوں اساں بہُوں سارے گالھیں ءچ چنگی طرحاں ازمایا تے بہُوں پُر جوش ڈِٹھا ہے۔ ہُنڑ کیوں جو تُہاڈے اُتے بہُوں بھروسا ہے، اِیں واسطے او بِیا وی پُر جوش تھی گئے۔ جے کوئی طِطُس دے بارے ءچ پُچھے تاں او میڈا ساتھی تے تُہاڈی مدد کرݨ کیتے میڈا نال خدمت کریندے۔ جے بئے بِھرانواں دے بارے ءچ سوال ہووے تاں او کلیسیاواں دے نمائندے تے مسیح دے جلال دا سبب ہِن۔ بس اُنہاں کُوں آپنڑی محبت تے ساڈے اُوں فخر کُوں جیہڑا تُہاڈے اُتے ہے، کلیسیاواں دے سامنڑے ثابت کرو۔ میکُوں اُوں خدمت دے بارے ءچ جیہڑی مُقدّساں دی خاطر کیتی ویندی ہے، تُہاکُوں لِکھنڑ دی ضرورت نئیں۔ کیوں جو مَیں جانڑدا ہاں جو تُساں دِلی شوق نال مدد کرݨ چاہندے ہیوے تے اِیں پارُوں میں مَکِدُنیہ دے لوکاں دے سامنڑے تُہاڈے اُتے فخر کریندا ہاں۔ مَیں اُنہاں کُوں ڈسایا جو اَخیہ دے لوک پِچھلے سال کنُوں مدد کرݨ کیتے تیار ہَن۔ تُہاڈے جوش بہُوں ساریاں کُوں اِیں کم کیتے اُبھارے۔ پر مَیں اِنہاں بِھرانواں کُوں اِیں واسطے بھجیندا پِیا ہاں جو اِیندے بارے ءچ تُہاڈے اُتے ساڈا فخر غلط نہ نِکلے بلکہ جِینویں مَیں آکھے، تُساں بالکل اُونویں ای تیار راہو۔ اِینویں نہ تھیوے جو مَکِدُنیہ دے کُجھ لوک میڈے نال آوݨ تے تُہاکُوں تیار نہ پاوݨ تے تُہاڈے نال ساکُوں وی اُوں بھروسے دے سببّوں جیہڑا تُہاڈے اُتے ہا، شرمندہ تھیونڑا پووے۔ اِیں واسطے مَیں بِھرانواں کُوں ایہ درخاست کرݨ بہُوں ضروری سمجھیا جو او مَیں کنُوں پہلے تُہاڈے کولھ پُج ونجنڑ تے او ہدیہ جیندے ڈیوݨ دا وعدہ تُساں کیتے، وقت کنُوں پہلے تیار رکھنڑ۔ وَل ظاہر تھیسی جو او زبردستی جمع کیتا ہویا ہدیہ نئیں بلکہ خوشی نال ڈِتا ہویا ہدیہ ہے۔ یاد رکھو جو جیہڑا تھوڑا رہیندے او تھوڑا کپیسی تے جیہڑا زیادہ رہیندے او زیادہ کپیسی۔ ہر ہِک، دل ءچ جِتنا ڈیوݨ دا اِرادہ کیتے اُتنا ای ڈیوے، نہ ڈُکھی تھی تے، تے نہ مجبوری نال کیوں جو خُدا خوشی نال ڈیوݨ آلے کُوں پیار کریندے۔ خُدا تُہاڈے اُتے ہر طرحاں دا فضل کثرت نال کر سگدے، تاں جو تُہاڈے کولھ ہمیشاں ہر چیز ضرورت کنُوں زیادہ ہووے تے ہر ہِک نیک کم کیتے تُہاڈے کولھ بہُوں کُجھ موجود ہووے۔ جِینویں جو لِکھیا ہے ”اُوں غریباں کُوں فیاضی نال ڈِتے۔ اُوندی راستبازی ہمیشاں تئیں قائم راہسی ۔“ خُدا جیہڑا رہاوݨ آلے کُوں بیج تے کھاوݨ آلے کُوں روٹی ڈیندے، اُوہو تُہاکُوں وی بیج ڈیسی بلکہ تُہاڈے بیج دے ذخیرے کُوں ودھیسی تے تُہاڈی راستبازی دی فصل کُوں زیادہ کریسی۔ تُساں ہر طرحاں مالا مال تھی تے ہر موقع تے فیاضی کر سگسو۔ تے او فیاضی ساڈے وسیلہ نال خُدا دی شُکرگزاری دا سبب بنڑسی۔ کیوں جو تُہاڈی اِیں خدمت دے سببّوں نہ صرف مُقدّساں دیاں ضرورتاں پُوریاں تھیندیاں ہِن بلکہ بہُوں لوک خُدا دی خُوب شُکرگزاری کریندے ہِن۔ تُہاڈی اِیں خدمت دا ثبوت ڈیکھ تے او خُدا دی تعریف کریسن جو تُساں مسیح دی خوشخبری دا اِقرار کر تے اُوندے اُتے عمل وی کریندے ہیوے تے اُنہاں دی، تے سبھ لوکاں دی مدد کرݨ ءچ بہُوں فیاضی کریندے ہیوے۔ او تُہاڈے کیتے بہُوں محبت نال دُعا کریندے ہِن کیوں جو تُہاڈے اُتے خُدا دا بہُوں فضل ہے۔ خُدا دا شُکر اُوندی اُوں بخشش کیتے جِیندا بیان لفظاں ءچ ممکن نئیں۔ ہُنڑ مَیں پولُس جیندے بارے ءچ کُجھ لوک آدھے ہِن جو تُہاڈے سامنڑے تاں عاجز ہاں پر غیر حاضری ءچ دلیر ہاں، مسیح دی عاجزی تے نرمی یاد ڈیویندے ہوئے خود تُہاکُوں درخاست کریندا ہاں۔ بلکہ مِنت کریندا ہاں جو تُہاڈے کولھ آ تے میکُوں اُوں دلیری نال نہ پیش آونڑا پووے، جِینویں کُجھ لوکاں نال پیش آوݨ دا اِرادہ رکھیندا ہاں جیہڑے ساڈے بارے ءچ سوچیندن جو اساں دُنیاوی طور تے زندگی گُزریندے ہیں۔ بےشک اساں دُنیا ءچ زندگی گُزریندے ہیں پر اساں دُنیاوی لوکاں وانگُوں نئیں لڑدے۔ کیوں جو ساڈی لڑائی دے ہتھیار دُنیاوی نئیں بلکہ خُدا دی طرفوں مضبوط قلعیاں کُوں ڈھا ڈیوݨ دی قُدرت رکھیندے ہِن۔ اساں اُنہاں دلیلاں تے ہر اُوں چیز کُوں ڈھا ڈیندے ہیں جیہڑی خُدا دی پچھاݨ دے خلاف اُٹھ کھڑی تھئی ہے تے اساں ہر خیال کُوں قید کر تے مسیح دا فرمانبردار بنڑا ڈیندے ہیں۔ تے جِیں ویلے تُہاڈی فرمانبرداری پُوری تھی ونجے تاں اساں ہر طرحاں دی نافرمانی دی سزا ڈیوݨ کیتے تیار ہوسُوں۔ تُساں ظاہری چیزاں اُتے غور کریندے ہیوے۔ جے کہیں کُوں آپنڑے آپ اُتے ایہ بھروسا ہے جو او مسیح دا ہے تاں اُونکُوں ایہ وی سوچ گِھننڑاں چاہیدے جو جِینویں او مسیح دا ہے اُونویں ای اساں وی ہیں۔ کیوں جو جے مَیں آپنڑے اُوں اِختیار اُتے کُجھ زیادہ فخر وی کراں، جیہڑا خُداوند ساکُوں تُہاڈی ترقی کیتے ڈِتے نہ جو وِگاڑن کیتے، تاں اِیندے بارے ءچ مَیں شرمندہ نہ تھیساں۔ میں نئیں چاہندا جو اِینویں لگے جو میں خطاں دے ذریعے تُہاکُوں ڈراوݨ دی کوشش کریندا پِیا ہاں، کیوں جو کُجھ لوک تاں آدھے ہِن جو ”پولُس دے خط تاں بہُوں کارآمد تے زبردست ہِن پر جِیں ویلے او خود موجود ہوندا ہے تاں معمولی جِیہا لگدے تے اُوندی تقریر کہیں کم دی نئیں ہوندی۔“ اِینویں آکھنڑ آلیاں کُوں ایہ سمجھنڑا چاہیدے جو جِینویں اساں آپنڑی غیر حاضری ءچ خط ءچ لِکھدے ہیں اُونویں ای اساں اُتھاں آ تے عمل وی کریسوں۔ کیوں جو ساڈی جُرأت نئیں جو اساں آپنڑے آپ کُوں اُنہاں ءچ شمار کرُوں یا اُنہاں نال آپنڑا مُقابلہ کرُوں جیہڑے ہمیشاں آپنڑے ای مُنہ کنُوں آپنڑی تعریف کریندے ہِن۔ جڈاں او آپنڑے آپ کُوں معیار بنڑا تے آپنڑے آپ کُوں پرکھدے ہِن تے آپنڑا ہِک بئے نال موازنہ کریندے ہِن، تاں او کِتنے نادان ہِن۔ پر اساں مناسب حد تُوں زیادہ فخر نہ کریسوں بلکہ صرف اُوں خدمت دی حدود دے مطابق فخر کریسوں جیہڑی خُدا ساڈے کیتے مقرر کیتی ہے، جیندے ءچ تُساں وی آ گئے ہیوے۔ اساں فخر کرݨ ءچ آپنڑے آپ کُوں حد تُوں زیادہ نئیں ودھیندے کیوں جو اساں مسیح دی خوشخبری ڈیندے ہوئے تُہاڈے تئیں پُج گئے ہیں۔ جے تُہاڈے تئیں نہ پُجے ہوندے تاں بئی گالھ ہوندی۔ تے اساں آپنڑی حد تُوں باہر وَنج تے بئے دی محنت اُتے فخر نئیں کریندے بلکہ اُمید رکھیندے ہیں جو تُہاڈے اِیمان ءچ ترقی پارُوں تے اِینویں تُہاڈے ذریعے ساڈی خدمت دی حد وی مزید ودھے، تاں جو اساں تُہاڈے علاقہ تُوں اگُوں وی خوشخبری سُنڑا سگوں۔ ایہ نئیں جو کہیں ڈُوجھے دے کم اُتے فخر کرُوں۔ غرض جیہڑا فخر کرے او رب اُتے فخر کرے ۔ کیوں جو جیہڑا آپنڑی تعریف کریندے، او مقبول نئیں بلکہ جِینکُوں خُداوند نیک سمجھدے، اُوہو مقبول ہے۔ کاش جو تُساں میڈی ذرا جیہی بیوقُوفی برداشت کریندے! ہا، برداشت تاں تُساں کریندے ای ہیوے۔ میڈے دل ءچ تُہاڈے کیتے خُدا وانگُوں غیرت ہے کیوں جو مَیں تُہاڈا رشتہ ہِکو پئے یعنی مسیح نال طے کیتے تاں جو تُہاکُوں ہِک پاک دامن کُنواری وانگُوں اُوندے کولھ پیش کراں۔ پر میکُوں ڈر ہے، کِتھائیں اِینویں نہ تھیوے جو جِینویں نانگ آپنڑی مکاری نال حوّا کُوں ورغلا گِھدا، اُونویں ای تُہاڈے خیال وی خراب تھی ونجنڑ تے تُساں مسیح کیتے اُوں خلوص دِلی تے پاک دامنی کُوں چھوڑ ڈیؤ۔ کیوں جو جے کوئی آ تے کہیں بئے یسُوع دی تبلیغ کریندے، جیندی اساں نئیں کیتی، یا جے تُساں کہیں بئی طرحاں دی رُوح قبول کریندے ہیوے جیہڑی اُوں رُوح تُوں فرق ہے جیہڑی تُہاکُوں مِلی ہئی، یا جے تُساں بئی خوشخبری قبول کریندے ہیوے جیہڑی اُوں خوشخبری کنُوں فرق ہے جیہڑی تُساں قبول کیتی ہئی، تاں تُساں اُونکُوں صحیح برداشت کریندے ہیوے ۔ مَیں نئیں سمجھدا جو مَیں اُنہاں ”افضل رسُولاں“ کنُوں کمتر ہاں۔ بھانویں مَیں تقریر کرݨ ءچ ماہر نئیں، پر میڈے کولھ علم تاں ضرور ہے تے اِیندا ثبوت اساں تُہاکُوں ہر گالھ ءچ تے ہر طرحاں ڈے ڈِتے۔ کیا ایہ میڈا جُرم ہا جو مَیں خُدا دی خوشخبری تُہاکُوں مُفت سُنڑا تے آپنڑے آپ کُوں پست کیتا تاں جو تُساں اُچے تھی ونجو؟ مَیں ڈُوجھی کلیسیاواں کُوں لُٹیا یعنی اُنہاں کنُوں مدد گِھدی تاں جو تُہاڈی خدمت کراں۔ تے جِیں ویلے مَیں تُہاڈے کولھ ہم تے میکُوں ضرورت پئی تاں مَیں تُہاڈے ءچوں کہیں کُوں ذرا وی تکلیف نہ ڈِتی کیوں جو مَکِدُنیہ کنُوں مسیحی بِھرانواں آ تے میڈی ضرورت پُوری کیتی۔ مَیں تُہاڈے اُتے کوئی بھار نئیں سٹیا تے نہ ای ولا سٹیساں۔ مسیح دی سچائی دی قَسم جیہڑی میڈے اندر ہے، اَخیہ دے سبھ علاقیاں ءچ کوئی بندہ میکُوں اِیں فخر کرݨ کنُوں روک نہ سگسی۔ آخر کیوں؟ کیا اِیں واسطے جو مَیں تُہاڈے نال محبت نئیں رکھیندا؟ خُدا جانڑدے جو مَیں تُہاڈے نال محبت رکھیندا ہاں۔ جیہڑا کُجھ مَیں کریندا ہاں اُوہو کریندا راہساں تاں جو اُنہاں کُوں موقع نہ ڈیواں جیہڑے فخر کر تے دعویٰ کرݨ چاہندے ہِن جو اُنہاں دے کم ساڈے وانگُوں ہِن۔ کیوں جو ایجھے لوک کُوڑے رسُول تے دوکھے بازی نال کم کرݨ آلے ہِن تے آپنڑے آپ کُوں مسیح دے رسُولاں دے ہم شکل بنڑا گِھندے ہِن۔ تے ایہ کوئی انوکھی گالھ نئیں کیوں جو شیطان وی آپنڑے آپ کُوں نُورانی فرشتے دا ہم شکل بنڑا گِھندے۔ اِیں واسطے ایہ کوئی وڈی گالھ نئیں جے اُوندے خادم وی آپنڑے آپ کُوں راستبازی دے خادماں وانگُوں بنڑا گِھننڑ۔ پر اُنہاں دا انجام اُنہاں دے کماں دے مطابق ہوسی۔ مَیں ولا آدھا ہاں جو کوئی میکُوں بیوقُوف نہ سمجھے۔ نہ تاں جے بیوقُوف سمجھ تے ای قبول کر گِھنو تاں جو مَیں وی آپنڑے آپ اُتے تھوڑا جِیہا فخر کراں۔ جیہڑا کُجھ مَیں ہُنڑ فخر کر تے آدھا ہاں او خُداوند دی طرفوں نئیں بلکہ مَیں بیوقُوف آلی کار آدھا ہاں۔ پر جڈاں بہُوں سارے دُنیاوی طور تے فخر کریندے ہِن تاں مَیں وی کریساں۔ تُساں خود اِتی عقل مند ہیوے جو بیوقُوفاں دے گالھیں خوشی نال برداشت گِھندے ہیوے۔ جے کوئی تُہاکُوں غُلام بنڑیندے یا تُہاکُوں لُٹیندے، یا تُہاکُوں دوکھا ڈیندے، یا تُہاڈے اُتے رُعب پیندے، یا تُہاڈے مُنہ اُتے چاٹ مریندے تاں تُساں برداشت کر گِھندے ہیوے۔ ایہ آکھ تے میکُوں شرم آندی ہے جو اساں اِتنے کمزور ہسے جو اِینویں نہ کر سگے۔ بےشک میڈا ایہ آکھنڑ بیوقُوفی ہے پر جے کوئی کہیں گالھ اُتے فخر کرݨ دی جُرأت کریندے تاں مَیں وی اُوہو فخر کرݨ دی جُرأت کریندا ہاں۔ کیا او عبرانی ہِن؟ مَیں وی ہاں۔ کیا او اِسرائیلی ہِن؟ مَیں وی ہاں۔ کیا او ابرہام دی اولاد ہِن؟ مَیں وی ہاں۔ کیا او مسیح دے خادم ہِن؟ میں ایہ گالھ پاگل آلی کار کریندا پِیا ہاں۔ مَیں اُنہاں کنُوں زیادہ اُوندا خادم ہاں۔ مَیں اُنہاں کنُوں زیادہ محنت کیتی، زیادہ دفعہ قید تھیّا، زیادہ کوڑے کھادے، کئی پھیری موت دا سامنڑا کیتا۔ مَیں یہُودیاں دے ہتُھوں پنج پھیری ہِک گھٹ چالیہہ چالیہہ کوڑے کھادے، ترے پھیری میکُوں بینت نال ماریا گِیا، ہِک پھیری میں سنگسار کیتا گِیا، ترے پھیری میڈا جہاز تباہ تھیّا، تے ہِک ڈینہہ تے ہِک رات مَیں کُھلے سمندر ءچ گُزاری۔ مَیں لگاتار سفر ءچ ریہا، دریا دے خطریاں ءچ، ڈاکواں دے خطریاں ءچ، آپنڑی قوم آلیاں دے خطریاں ءچ، غیر قوماں دے خطریاں ءچ، شہر دے خطریاں ءچ، بیابان دے خطریاں ءچ، سمندر دے خطریاں ءچ، تے کُوڑے اِیمانداراں دے خطریاں ءچ ریہا۔ مَیں محنت تے مُشقت کیتی، اکثر ساری رات جاگدا ریہا، بُکھا تے ترِسّا تے بہُوں پھیری فاقہ کیتا، سردی تے ننگے پن ءچ ریہا۔ اِنہاں سارے گالھیں دے علاوہ ساریاں کلیسیاواں دی فِکر دا بھار ہر روز میڈے اُتے راہندے۔ کیندی کمزوری نال مَیں کمزور نئیں تھیندا؟ تے کیندی گُمراہی تُوں میڈا دل نئیں ڈُکھدا؟ جے میکُوں فخر کرنڑا ای ہے تاں مَیں اِنہاں گالھیں اُتے فخر کریساں جیہڑیاں میڈی کمزوری کُوں ظاہر کریندیاں ہِن۔ خُداوند یسُوع دا خُدا تے باپ، جیندی ہمیشاں تئیں حمد تھیوے، جانڑدا ہے جو مَیں کُوڑ نئیں مریندا۔ دمشق شہر دے حاکم جیہڑا اَرِتاس بادشاہ دے ماتحت ہا، میکُوں گرفتار کرݨ کیتے شہر دے پھاٹکاں اُتے پہرا لا ڈِتا ہا۔ پر بِھرانواں میکُوں ٹوکرے ءچ بِلھا تے دیوار دی ہِک کِھڑکی کنُوں باہر تلے لہا ڈِتا تے اِینویں مَیں اُوندے ہتُھوں بچ نِکلیا۔ میڈا فخر کرݨ ضروری ہے۔ بھانویں اِیندا کوئی فائدہ نئیں، وَل وی مَیں خُداوند دی طرفوں مِلے ہوئے رویا تے مُکاشفیاں دا ذِکر کریساں۔ مَیں مسیح اُتے اِیمان رکھنڑ آلے ہِک بندے کُوں جانڑدا ہاں جیہڑا چوڈھاں سال پہلے اچانک تریجھے اسمان تئیں چا گِھدا گِیا۔ مَیں نئیں جانڑدا جو او جِسم ءچ یا بغیر جِسم دے چاتا گِیا، خُدا ای جانڑدے۔ مَیں ایہ وی جانڑدا ہاں جو او بندہ اچانک فِردوس ءچ پُچایا گِیا، جِسم ءچ یا بغیر جِسم دے، خُدا ای جانڑدے تے اُتھاں اُوں ایجھے گالھیں سُنڑیاں جیہڑیاں بیان نئیں تھی سگدیاں تے جِنہاں دا آکھنڑ اِنسان کیتے جائز نئیں۔ مَیں ایجھے بندے اُتے فخر کریساں پر آپنڑے آپ اُتے فخر نہ کریساں سوائے آپنڑیاں کمزوریاں دے۔ جے فخر کرݨ چاہاں تاں ایہ میڈی بیوقُوفی نہ ہوسی، اِیں واسطے جو مَیں سچ بُولیساں۔ پر مَیں فخر نہ کریساں تاں جو کوئی بندہ جِینویں میکُوں ڈیدھے یا سُنڑدے، اُوں کنُوں ودھ نہ سمجھے۔ پر زیادہ مُکاشفیاں دے سببّوں میڈے جِسم ءچ ہِک کنڈا پوڈ ڈِتا گئے یعنی شیطان دا قاصد جیہڑا میکُوں ستیندا راہندے تاں جو مَیں حد کنُوں زیادہ پُھنڈ نہ وَنجاں۔ مَیں اِیندے بارے ءچ خُداوند کنُوں ترے پھیری مِنت کیتی جو ایہ میڈے کولُھوں دُور تھی ونجے۔ پر اُوں میکُوں آکھیا جو ”میڈا فضل تیڈے کیتے کافی ہے کیوں جو میڈی قُدرت دا اِظہار کمزوری ءچ پُورا تھیندے ۔“ اِیں واسطے مَیں وڈی خوشی نال آپنڑی کمزوری اُتے فخر کریساں تاں جو مسیح دی قُدرت میڈے اُتے راہوے۔ اِیہو وجہ ہے جو مسیح دی خاطر میں کمزوری ءچ، بے عزتی ءچ، تکلیفاں ءچ، ستائے ونجنڑ ءچ، تے تنگی ءچ خوش ہاں کیوں جو جِیں ویلے مَیں کمزور ہوندا ہاں اُوں ویلے ای مَیں مضبوط ہوندا ہاں۔ تُساں ای میکُوں مجبور کیتے جو مَیں فخر کر تے بیوقُوف بنڑ ونجاں، جڈاں جو تُہاکُوں تاں میڈی تعریف کرنڑی چاہیدی ہئی۔ بےشک مَیں کُجھ وی نئیں پر وَل وی تُہاڈے ”افضل رسُولاں“ کنُوں کہیں گالھ ءچ گھٹ نئیں۔ مَیں بہُوں صبر نال، تے نشاناں تے عجیب کماں تے معجزیاں دے وسیلے نال تُہاڈے وچال رسُول ہووݨ دے ثبوت ظاہر کریندا ریہا۔ مَیں تُہاکُوں کیہڑی گالھ ءچ ڈُوجھیاں کلیسیاواں کنُوں گھٹ کھڑایا، سِوا اِیندے جو مَیں تُہاڈے اُتے مالی بوجھ نہ سٹیا؟ میڈی ایہ بے اِنصافی معاف کرو۔ ڈیکھو! مَیں تریجھی پھیری تُہاڈے کولھ آوݨ کیتے تیار ہاں۔ مَیں تُہاڈے اُتے بھار نہ بنڑساں کیوں جو مَیں تُہاڈے مال دا نئیں بلکہ تُہاڈا ای طالب ہاں۔ کیوں جو بالاں کُوں ماء پِیُو کیتے نئیں بلکہ ماء پِیُو کُوں بالاں کیتے پیسہ جمع کرݨ چاہیدے۔ اِیں واسطے مَیں تُہاڈی خاطر بہُوں خوشی نال آپنڑا سبھ کُجھ خرچ کر ڈیساں بلکہ آپ وی خرچ تھی ویساں۔ جے مَیں تُہاڈے نال بہُوں محبت رکھاں تاں کیا تُساں میڈے نال گھٹ محبت رکھیسو؟ بے شک مَیں خود تُہاڈے اُتے بھار نہ سٹیا پر کُجھ لوک ایہ سمجھدے ہِن جو مَیں مکار ہاں تے تُہاکُوں دوکھا ڈے تے پَھسا گِھدے۔ جیہڑے لوکاں کُوں مَیں تُہاڈے کولھ بھیجیا، کیا میں اُنہاں دے ذریعے تُہاڈے کنُوں کوئی ناجائز فائدہ چاتے؟ مَیں طِطُس دی مِنت کیتی جو تُہاڈے کولھ ونجے تے اُوندے نال ہِک بئے بِھرا کُوں وی بھیجیا۔ کیا طِطُس تُہاڈے کنُوں کوئی ناجائز فائدہ چاتے؟ کیا اساں ہِکو رُوح کنُوں ہدایت گِھن تے نہ ٹُرے؟ کیا اساں ہِکو راہ اُتے نہ ٹُرے؟ کیا تُساں ہُنڑ تئیں اِیہو سمجھدے ہیوے جو اساں تُہاڈے سامنڑے آپنڑا دفاع پیش کریندے ہیں؟ اساں تاں مسیح دے بندے ہوندے ہوئے خُدا کُوں حاضر جاݨ تے بُولیندے ہیں تے عزیزو، اساں جیہڑا کُجھ وی کریندے ہیں او تُہاڈی ترقی کیتے کریندے ہیں۔ کیوں جو میکُوں ڈر ہے جو کِتھائیں اِینویں نہ تھیوے جو جڈاں مَیں آواں تاں جِینویں مَیں چاہندا ہاں تُہاکُوں اُونویں نہ پاواں، تے جِینویں تُساں چاہندے ہیوے میں اُونویں نہ ہوواں۔ میکُوں ڈر ہے جو تُہاڈے ءچ جھیڑے، حسد، کاوڑ، خود غرضی، بدزبانی، چُغل خوری، شیخی تے فساد ہوسن۔ میکُوں ڈر ہے جو جِیں ویلے مَیں آساں تاں خُدا تُہاڈے سامنڑے میکُوں شرمندہ کریسی تے میکُوں بہُوں سارے لوکاں دے سببّوں افسوس کرنڑا پوسی جِنہاں پہلے ای گُناہ کیتے ہِن تے ہُنڑ وی آپنڑی ناپاکی، زِناکاری تے عیاشی کنُوں جیہڑی اُنہاں کیتی توبہ نئیں کیتی۔ ایہ تریجھی پھیری مَیں تُہاڈے کولھ آندا پِیا ہاں۔ ہر گالھ ڈُو یا ترے گواہاں دی شہادت ڈیوݨ نال سچ ثابت تھی ویسی ۔ جِیں ویلے میں ڈُوجھی پھیری تُہاڈے کولھ آیا ہم تاں میں اُوں ویلے تُہاکُوں چتایا ہا تے ہُنڑ غیر حاضر ہوندے ہوئے وی ولا اُنہاں کُوں جِنہاں پہلے گُناہ کیتے ہَن تے بئیاں کُوں وی چتیندا پِیا ہاں جو جڈاں میں واپس آساں تاں کہیں کُوں وی نہ چُھڑیساں، کیوں جو تُساں اِیں گالھ دا ثبوت منگدے ہیوے جو مسیح میڈے ءچ کلام کریندے۔ او تُہاکُوں سِدھا کرݨ کیتے کمزور نئیں بلکہ تُہاڈے وچال زور آور ہے۔ ہا، او کمزوری دی حالت ءچ صلیب اُتے چڑھایا گِیا پر خُدا دی قُدرت دے سببّوں زندہ ہے، تے اساں وی اُوندی طرحاں کمزور تاں ہیں پر اُوندے نال خُدا دی اُوں قُدرت دے سببّوں زندہ ہوسُوں جیہڑی تُہاڈے کیتے ہے۔ تُساں آپنڑے آپ کُوں ازما تے پتا کرو جو اِیمان ءچ ہیوے یا نئیں۔ آپنڑے آپ کُوں پرکھو۔ کیا تُساں آپنڑے بارے ءچ ایہ نئیں جانڑدے جو یسُوع مسیح تُہاڈے ءچ ہے؟ نہ تاں تُساں اِیمان دے اِمتحان ءچ ناکام ہیوے۔ پر میکُوں اُمید ہے جو تُہاکُوں پتہ لگ ویسی جو اساں ناکام نئیں۔ اساں خُدا تُوں دُعا کریندے ہیں جو تُساں بُرائی نہ کرو۔ اِیں واسطے نئیں جو اساں کامیاب نظر آؤں بلکہ اِیں واسطے جو تُساں اُوہو کرو جیہڑا چنگا ہے، بےشک اساں ناکام ای نظر آؤں۔ کیوں جو اساں حق دے خلاف کُجھ نئیں کر سگدے بلکہ صرف حق کیتے کر سگدے ہیں۔ کیوں جو اساں خوش ہیں جڈاں تُساں زور آور ہیوے بھانویں اساں کمزور ہیں۔ تے ساڈی دُعا ہے جو تُساں کامل تھی ونجو۔ اِیں واسطے مَیں آپنڑی غیر موجودگی ءچ ایہ گالھیں لِکھدا پِیا ہاں تاں جو اُتھاں آ تے میکُوں اُوں اِختیار دے مطابق سختی نہ کرنڑی پووے جیہڑا خُداوند میکُوں تعمیر کرݨ کیتے ڈِتے نہ جو ڈھاوݨ کیتے۔ غرض بِھراؤ! خوش راہو، کامِل بنڑدے ونجو، حوصلہ رکھو، ہِک سوچ رکھو، میل مِلاپ رکھو، وَل خُدا جیہڑا محبت تے سلامتی دا سرچشمہ ہے تُہاڈے نال راہسی۔ پاک بوسہ نال ہِک ڈُوجھے کُوں سلام آکھو۔ سبھ مُقدّس لوک تُہاکُوں سلام آدھے ہِن۔ خُداوند یسُوع مسیح دا فضل، خُدا دی محبت تے رُوح القُدس دی شراکت تُساں ساریاں نال تھیندی راہوے۔ ایہ خط میں پولُس رسُول دی طرفوں ہے۔ مَیں نہ تاں اِنساناں دی طرفوں، نہ کہیں بندے دے وسیلے رسُول مقرر کیتا گِیا بلکہ یسُوع المسیح تے خُدا باپ دے وسیلے جئیں یسُوع مسیح کُوں مُردیاں ءچوں زندہ کیتا۔ تے او سارے مسیحی بِھرا وی جیہڑے میڈے نال ہِن، گلِتیہ دی کلیسیاواں کُوں سلام آدھن۔ خُدا باپ تے ساڈے خُداوند یسُوع مسیح دی طرفوں تُہاکُوں فضل تے اِطمینان حاصل تھیندا راہوے۔ یسُوع آپنڑے آپ کُوں ساڈے گُناہاں کیتے قُربان کر ڈِتا تاں جو او ساکُوں ساڈے خُدا تے باپ دی مرضی دے مطابق اِیں موجودہ بُرے زمانے کنُوں بچا گِھنے۔ خُدا دی تمجید ہمیشاں تئیں تھیندی راہوے۔ آمین۔ میں حیران ہاں جو تُساں اِتنی جلدی خُدا کنُوں مُنہ پِھریندے پئے ہیوے جئیں تُہاکُوں مسیح دے فضل نال سڈیا تے تُساں کہیں بئی خوشخبری دے پِچُھوں لگ گئے ہیوے۔ کوئی ڈُوجھا ہے ای کائنا۔ ہا، کُجھ لوک تُہاکُوں پریشان کریندے پئے ہِن جیہڑے مسیح دی خوشخبری کُوں تروڑ مروڑ تے پیش کرݨ چاہندے ہِن۔ پر جے اساں یا اسمان تُوں کوئی فرشتہ اُوں خوشخبری دے علاوہ جیہڑی اساں تُہاکُوں سُنڑائی ہے کوئی بئی خوشخبری سُنڑاوے تاں اُوندے اُتے لعنت۔ جِینویں اساں پہلے آکھ ڈِتے اُونویں ای ہُنڑ مَیں ولا اکھیندا ہاں جو جے کوئی اُوں خوشخبری دے علاوہ جئیں اُتے تُساں اِیمان گِھن آئے ہَوے، تُہاکُوں بئی خوشخبری سُنڑاوے تاں اُوندے اُتے لعنت۔ کیا مَیں ایہ کوشش کریندا پِیا ہاں جو لوک میکُوں پسند کرݨ یا خُدا میکُوں پسند کرے؟ کیا مَیں آدمیاں کُوں خوش کرݨ چاہندا ہاں؟ جے ہُنڑ تئیں آدمیاں کُوں خوش کرݨ دی کوشش ءچ لگا راہندا تاں مسیح دا خادم نہ ہوندا۔ بِھراؤ! مَیں تُہاکُوں ڈساوݨ چاہندا ہاں جو جیہڑی خوشخبری مَیں تُہاکُوں سُنڑائی ہے او کہیں اِنسان دی طرفوں نئیں۔ نہ او میکُوں کہیں بندے دی طرفوں مِلی تے نہ او میکُوں کہیں بندے سکھائی بلکہ او میکُوں یسُوع مسیح دی طرفوں مُکاشفے ءچ مِلی۔ تُساں تاں سُنڑیا ہے جو جِیں ویلے مَیں یہُودی طور طریقے دا پابند ہم تاں میڈا چال چلنڑ کیجھا ہا۔ مَیں خُدا دی کلیسیا کُوں کِینویں حد تُوں زیادہ ستیندا تے اُنہاں کُوں تباہ کرݨ دی کوشش کریندا ہم۔ مَیں یہُودی طور طریقے ءچ آپنڑے ہم عُمر یہُودیاں کنُوں زیادہ ودھدا ویندا ہم تے بزُرگاں دیاں روایتاں اُتے غیرت نال عمل کریندا ہم۔ پر خُدا میکُوں میڈی پیدائش کنُوں پہلے ای چُنڑ گِھدا تے آپنڑے فضل نال میکُوں آپنڑی خدمت کیتے سڈ گِھدا۔ تے جِیں ویلے اُوندی مرضی تھئی تاں آپنڑے پوتر کُوں میڈے اُتے ظاہر کیتا تاں جو مَیں غیر قوماں کُوں اُوندی خوشخبری سُنڑاواں۔ اُوں ویلے مَیں خون تے گوشت کنُوں صلاح نہ گِھدی، تے نہ یروشلیم ءچ اُنہاں دے کولھ گِیا جیہڑے مَیں کنُوں پہلے رسُول مقرر کیتے گئے ہَن، بلکہ سِدھا عرب دو چلیا گِیا تے بعد ءچ دمشق وَل آیا۔ ترے سال بعد میں پطرس نال مُلاقات کرݨ کیتے یروشلیم گِیا تے پندھراں ڈینہہ تئیں اُوندے کولھ ریہا۔ پر ڈُوجھے رسُولاں ءچوں کہیں کُوں نہ مِلیا سوائے خُداوند دے بِھرا یعقُوب دے۔ جیہڑے گالھیں مَیں تُہاکُوں لِکھدا پِیا ہاں، خُدا گواہ ہے جو او کُوڑیاں نئیں۔ اِیندے بعد مَیں سُوریہ تے کلکیہ دے علاقیاں ءچ گِیا۔ یہُودیہ دیاں مسیحی کلیسیاواں میکُوں ذاتی طور تے نہ جانڑدیاں ہَن۔ او صرف ایہ سُنڑدیاں ہَن جو ”جیہڑا بندہ پہلے ساکُوں ستیندا ہا، او ہُنڑ اُوں اِیمان دی تبلیغ کریندے جِینکُوں پہلے برباد کرݨ دی کوشش کریندا ہا۔“ تے او میڈے سببّوں خُدا دی تمجید کریندیاں ہَن۔ وَل چوڈھاں سال بعد مَیں برنباس نال ولا یروشلیم چلیا گِیا تے طِطُس کُوں وی نال گِھن گِیا۔ میڈا اُتھاں ونجنڑ ہِک مُکاشفہ دی وجہ تُوں ہا۔ مَیں اُنہاں لوکاں نال جیہڑے کلیسیا ءچ وڈے راہنما سمجھے ویندے ہَن، کلھیپے ءچ مُلاقات کیتی تے اُنہاں کُوں او خوشخبری پیش کیتی جیہڑی مَیں غیر قوماں کُوں سُنڑیندا ہم۔ میں نئیں چاہندا جو میڈی او بھج دھروک جیہڑی مَیں پہلے کیتی ہئی تے ہُنڑ تئیں کریندا ہاں، بے فائدہ تھیوے۔ پر میڈے ساتھی طِطُس کُوں وی بھانویں او یُونانی ہا ختنہ کراوݨ اُتے مجبور نہ کیتا گِیا۔ ایہ مسئلہ اُنہاں کُوڑے مسیحی بِھرانواں دی طرفوں بنڑیا، جیہڑے چُپ چپیتے ساڈے وچال وڑ آئے ہَن تاں جو جاسُوسی کر تے اُوں ازادی کُوں جاݨ سگنڑ جیہڑی مسیح یسُوع ءچ ساکُوں حاصل تھئی ہئی تے ساکُوں ولا غُلامی ءچ گِھن آوݨ۔ پر اساں ہِک لاحظے کیتے وی اُنہاں دی کہیں گالھ کُوں قبول نئیں کیتا تاں جو خوشخبری دی سچائی تُہاڈے ءچ قائم راہوے۔ جماعت دے او لوک جیہڑے وڈے سمجھے ویندے ہَن (او کیجھے وی ہَن، میکُوں اِیندے نال کُجھ واسطہ نئیں کیوں جو خُدا کہیں بندے دا طرفدار نئیں،) اُنہاں میڈی تبلیغ ءچ کُجھ اضافہ نہ کیتا۔ بلکہ اُنہاں ڈِٹھا جو جِینویں یہُودیاں کُوں خوشخبری سُنڑاوݨ دا کم پطرس دے سپُرد کیتا گِیا ہا، اُونویں ای غیر یہُودیاں کُوں خوشخبری سُنڑاوݨ دا کم میڈے سپُرد کیتا گئے۔ کیوں جو خُدا جئیں یہُودیاں دے رسُول پطرس ءچ اثر پیدا کیتے اُوں ای غیر یہُودیاں کیتے میڈے ءچ اثر پیدا کیتے۔ تے جِیں ویلے یعقُوب، پطرس تے یُوحنّا جیہڑے کلیسیا دے سربراہ سمجھے ویندے ہَن، ایہ ڈِٹھا جو خُدا میکُوں وی خاص توفیق ڈِتی ہے تاں اُنہاں میکُوں تے برنباس کُوں سجا ہتھ ڈے تے آپنڑی شراکت ءچ قبول کر گِھدا۔ تے اِیں گالھ اُتے اِتفاق کیتا جو اساں غیر قوماں ءچ خدمت کرُوں تے او یہُودیاں ءچ۔ اُنہاں صرف ایہ آکھیا جو غریباں کُوں یاد رکھائے۔ ایہ کرݨ کیتے تاں مَیں پہلے ای تیار ہم۔ پر جِیں ویلے پطرس انطاکِیہ ءچ آیا تاں مَیں اُوندے سامنڑے اُوندی مخالفت کیتی کیوں جو او ملامت دے لائق ہا۔ اِیں واسطے جو یعقُوب دی طرفوں کُجھ لوکاں دے آوݨ کنُوں پہلے پطرس غیر قوماں دے نال کھانڑا کھاندا ہا پر جِیں ویلے او لوک اُتھاں پُجے تاں پطرس ختنہ کرواوݨ اُتے زور ڈیوݨ آلیاں دے ڈر کنُوں رُک گِیا تے غیر قوماں تُوں اَنج تھی گِیا۔ وَل باقی مسیحی بِھرا جیہڑے پہلے یہُودی ہَن، منافقت ءچ پطرس نال رَل گئے، ایہ تئیں جو برنباس وی اُنہاں دی منافقت ءچ گُمراہ تھی گِیا۔ جِیں ویلے مَیں ڈِٹھا جو او خوشخبری دی سچائی دے مطابق نئیں چلدے، تاں مَیں سبھ دے سامنڑے پطرس کُوں آکھیا جو ”تُوں یہُودی ہوندے ہوئے غیر قوماں وانگُوں زندگی گُزریندا پئیں نہ جو یہُودیاں وانگُوں۔ وَل تُوں کِینویں غیر قوماں کُوں یہُودیاں وانگُوں زندگی گُزارݨ کیتے مجبور کر سگدیں؟“ ”اساں پیدائشی یہُودی ہیں، گُنہگار غیر قوماں ءچوں نئیں۔ پر ایہ جانڑدے ہیں جو اِنسان شریعت اُتے عمل کرݨ نال نئیں بلکہ صرف یسُوع المسیح اُتے اِیمان گِھن آوݨ نال راستباز کھڑایا ویندے۔ اِیں واسطے اساں وی مسیح یسُوع اُتے اِیمان گِھن آئے تاں جو شریعت اُتے عمل کرݨ نال نئیں بلکہ مسیح اُتے اِیمان گِھن آوݨ نال راستباز کھڑائے ونجُوں کیوں جو شریعت دے اعمال کنُوں تاں کوئی اِنسان راستباز نئیں کھڑایا وَنج سگدا۔ پر اساں جیہڑے مسیح ءچ راستباز تھیوݨ چاہندے ہیں، جے خود ای گُنہگار نِکلُوں تاں کیا مسیح گُناہ دا سبب ہے؟ ہرگز نئیں! جیہڑا کُجھ مَیں ڈھا ڈِتے جے اُونکُوں وَل کھڑا کراں تاں آپنڑے آپ کُوں قصُوروار بنڑیندا ہاں ۔ کیوں جو شریعت دے وسیلے ای مَیں شریعت دے لحاظ نال مر گِیا، تاں جو خُدا کیتے زندہ راہواں۔ مَیں مسیح نال صلیب اُتے چڑھایا گِیا ہاں تے ہُنڑ مَیں زندہ نہ ریہا بلکہ مسیح میڈے ءچ زندہ ہے۔ تے جیہڑی زندگی مَیں ہُنڑ گُزریندا پِیا ہاں او خُدا دے پوتر اُتے اِیمان گِھن آوݨ نال گُزریندا پِیا ہاں، جئیں میڈے نال محبت رکھی تے میڈے کیتے آپنڑی جان ڈے ڈِتی۔ مَیں خُدا دے فضل کُوں رَد نئیں کریندا۔ کیوں جو جے راستبازی شریعت دے وسیلے نال حاصل کیتی وَنج سگدی تاں مسیح دا مرݨ بے فائدہ ہوندا۔“ نادان گلِتیو! تُہاڈے اُتے کئیں جادُو کر ڈِتے؟ تُہاڈے سامنڑے یسُوع مسیح تے اُوندی صلیبی موت کُوں اِتنی صفائی نال پیش کیتا گئے جِینویں ایہ تُہاڈے اکھیں دے سامنڑے تھیّا ہووے۔ مَیں تاں تُہاڈے کنُوں صرف ایہ پُچھنڑ چاہندا ہم جو کیا رُوح القُدس تُہاکُوں شریعت اُتے عمل کرݨ نال حاصل تھئے یا پیغام کُوں سُنڑ تے اُوندے اُتے اِیمان گِھن آوݨ نال؟ کیا تُساں ایجھے نادان ہیوے جو رُوح القُدس دے وسیلے شروع کیتی ہوئی نوِیں زندگی کُوں ہُنڑ جِسمانی کوشش نال پُورا کرݨ چاہندے ہیوے؟ کیا تُساں اِتنیاں تکلیفاں بے فائدہ برداشت کیتیاں؟ پر شاید بے فائدہ نئیں۔ خُدا جیہڑا تُہاکُوں رُوح القُدس بخشیندا تے معجزے ظاہر کریندا ہے۔ کیا او ایہ اِیں واسطے کریندے جو تُساں شریعت اُتے عمل کریندے ہیوے یا اِیں واسطے جو تُساں پیغام سُنڑ تے اِیمان گِھن آئے ہیوے؟ اِینویں ای ابرہام ”خُدا اُتے اِیمان گِھن آیا تے ایہ اُوندے کیتے راستبازی شمار کیتا گِیا ۔“ بس جاݨ گِھنو جو اِیمان گِھن آوݨ آلے ای ابرہام دی حقیقی اولاد ہِن۔ خُدا دے کلام پہلے ای پیشن گوئی کیتی ہئی جو خُدا غیر قوماں کُوں اِیمان دے وسیلے راستباز کھڑیسی۔ تے وقت کنُوں پہلے ای ابرہام کُوں ایہ خوشخبری سُنڑا ڈِتی ہئی جو ”تیڈے وسیلے نال سبھ قوماں برکت پیسن ۔“ بس جیہڑے اِیمان گِھن آندے ہِن او اِیماندار ابرہام نال برکت پیندے ہِن ۔ پر جیہڑے خُدا دی نظر ءچ مقبول تھیوݨ کیتے شریعت دے اعمال اُتے بھروسا رکھیندے ہِن، اُنہاں سبھ اُتے لعنت ہے۔ کیوں جو لِکھیا ہے جو ”ہر ہِک اُتے لعنت جیہڑا شریعت دی کتاب دے سبھ گالھیں اُتے عمل نئیں کریندا ۔“ ہُنڑ ایہ صاف ظاہر ہے جو شریعت دے وسیلے نال کوئی بندہ خُدا دی نِگاہ ءچ راستباز نئیں کھڑدا کیوں جو لِکھیا ہے جو ”راستباز اِیمان نال ای زندہ راہسی ۔“ تے شریعت دا اِیمان نال کوئی تعلق نئیں بلکہ لِکھیا ہے جو ”جیہڑا اُنہاں حُکماں اُتے عمل کریندے، او اُنہاں دے وسیلے زندہ راہسی ۔“ مسیح ساڈے کیتے لعنتی بنڑ تے ساکُوں شریعت دی لعنت کنُوں چُھڑا گِھدا کیوں جو لِکھیا ہے جو ”جیہڑا کوئی درخت اُتے لٹکایا گِیا او لعنتی ہے، “ اِیندا مقصد ایہ ہا جو ابرہام کُوں ڈِتی ہوئی برکت مسیح یسُوع دے وسیلے نال غیر قوماں تئیں پُجے تے اساں اِیمان دے وسیلے نال اُوں رُوح القُدس کُوں حاصل کرُوں جِیندا وعدہ کیتا گِیا ہے۔ بِھراؤ! مَیں اِنسانی زندگی دی ہِک مثال ڈیندا ہاں جو بھانویں کوئی اِنسانی معاہدہ ای ہووے، جڈاں اُوندی تصدیق تھی گئی ہووے تاں نہ کوئی اُونکُوں ختم کر سگدے تے نہ ای اُوندے ءچ کُجھ ودھا سگدے۔ خُدا دے وعدے وی جیہڑے اُوں ابرہام تے اُوندی نسل نال کیتے، اِینویں ای ہِن۔ پر کلام ایہ نئیں آدھا جو ”نسلاں نال“ یعنی بہُوں ساریاں نال، بلکہ ”تیڈی نسل نال “ یعنی ہِک ای اِنسان نال۔ تے او مسیح ہے۔ میڈا مطلب ایہ ہے جو او عہد جیندی تصدیق خُدا پہلے ای کر ڈِتی ہئی، اُونکُوں شریعت جیہڑی چار سو ترِیح سال بعد آئی، ختم نئیں کر سگدی تے نہ اُوں وعدے کُوں منسوخ کر سگدی ہے۔ کیوں جو جے وراثت شریعت اُتے عمل کرݨ دے سببّوں ہوندی تاں او وعدے دے سببّوں نہ ہوندی، پر خُدا ابرہام کُوں وعدے دے طور تے وراثت بخشی۔ وَل شریعت کیوں ڈِتی گئی؟ او اِنسان دیاں نافرمانیاں ظاہر کرݨ کیتے بعد ءچ ڈِتی گئی تاں جو ابرہام دی اُوں اولاد دے آوݨ تئیں قائم راہوے جِیندا وعدہ کیتا گِیا ہا۔ تے شریعت فرشتیاں دے وسیلے نال ہِک درمیانی یعنی مُوسیٰ دی معرفت ڈِتی گئی۔ درمیانی ہِک تُوں زیادہ بندیاں کیتے ہوندے، پر خُدا ہِک ای ہے [تے ابرہام نال وعدہ کرݨ ویلے کوئی درمیانی استعمال نئیں کیتا۔] تاں کیا شریعت خُدا دے وعدے دے خلاف ہے؟ ہرگز نئیں! کیوں جو جے کوئی ایجھی شریعت ڈِتی ویندی جیہڑی زندگی بخش سگدی تاں راستبازی شریعت دے ذریعے حاصل تھیندی۔ پر خُدا دا کلام آدھے جو سبھ لوک گُناہ دے قبضے ءچ ہِن تاں جو او وعدہ جیہڑا یسُوع مسیح اُتے اِیمان گِھن آوݨ نال مِلدے اُنہاں ساریاں نال پُورا کیتا ونجے جیہڑے اِیمان گِھن آندے ہِن۔ اِیمان دی راہ بنڑݨ تُوں پہلے اساں شریعت دی قید ءچ ہسے تے جئیں تئیں اِیمان دی راہ ظاہر نہ تھی گئی، اساں پابند ہسے۔ بس شریعت ساکُوں مسیح تئیں پُجنڑ کیتے ساڈی نگہبان ہئی تاں جو اساں اِیمان دے وسیلے نال راستباز کھڑائے ونجُوں۔ پر ہُنڑ اِیمان دی راہ آ گئی ہے تے اساں شریعت دی نگہبانی ءچ نئیں ریہے۔ کیوں جو تُساں سارے یسُوع مسیح اُتے اِیمان گِھن آوݨ دے وسیلے نال خُدا دی اولاد بنڑ گئے ہیوے۔ تُساں ساریاں جِنہاں مسیح ءچ شریک تھیوݨ دا بپتسمہ گِھدے، مسیح کُوں کپڑے پاوݨ وانگُوں پا گِھدے۔ ہُنڑ نہ کوئی یہُودی ریہا نہ کوئی یُونانی، نہ کوئی غُلام نہ کوئی ازاد تے نہ کوئی مرد تے نہ کوئی عورت، کیوں جو ہُنڑ تُساں سارے مسیح یسُوع ءچ ہِک ہیوے۔ تے جے تُساں مسیح دے ہیوے تاں ابرہام دی نسل تے وعدے دے مطابق وارث وی ہیوے۔ مَیں ایہ آدھا ہاں جو وارث جئیں تئیں بال ہے، اُوندی تے ہِک غُلام دی حالت ءچ کوئی فرق نئیں بھانویں او ساریاں چیزاں دا مالک ہے۔ تے او پِیُو دی مقرر کیتی ہوئی عُمر تئیں نگہباناں تے مُختاراں دے اِختیار ءچ راہندے۔ اِینویں ای اساں وی جِیں ویلے بال ہسے تاں دُنیاوی اصُولاں دی غُلامی ءچ ہسے۔ پر جِیں ویلے وقت پُورا تھی گِیا تاں خُدا آپنڑے پوتر کُوں بھیجیا جیہڑا عورت تُوں پیدا تھیّا تے شریعت دے تابع پیدا تھیّا، تاں جو او ساکُوں جیہڑے شریعت دے تابع ہیں، چُھڑا گِھنے تے ساکُوں لےپالک پوتر تھیوݨ دا درجہ مِلے۔ کیوں جو تُساں پوتر ہیوے اِیں واسطے خُدا آپنڑے پوتر دا رُوح القُدس ساڈے دِلاں ءچ بھیجیا تے او ”ابّا“ یعنی ”باپ“ آکھ تے سڈیندا راہندے۔ بس ہُنڑ تُساں غُلام نئیں ریہے بلکہ پوتر بنڑ گئے ہیوے، تے جے پوتر تھئے تاں خُدا تُہاکُوں وارث وی بنڑا ڈِتے۔ اِیں تُوں پہلے جِیں ویلے تُساں خُدا تُوں واقف نہ ہَوے تاں تُساں ایجھے معبُوداں دے غُلام ہَوے جیہڑے خُدا ہِن کائنی۔ پر ہُنڑ جڈاں تُساں خُدا کُوں پچھاݨ گِھدے بلکہ خُدا تُہاکُوں پچھاݨ گِھدے تاں تُساں کیوں اُنہاں کمزور تے بے کار اصُولاں دو واپس ویندے پئے ہیوے؟ کیا ولا کنُوں اُنہاں دی غُلامی ءچ آوݨ چاہندے ہیوے؟ تُساں ڈینہاں، مہینیاں، موسماں تے سالاں کُوں منیندے ہیوے۔ میکُوں ڈر ہے جو جیہڑی محنت مَیں تُہاڈے اُتے کیتی ہے، کِتھائیں بے فائدہ نہ تھی ونجے۔ بِھراؤ! مَیں تُہاڈی مِنت کریندا ہاں جو میڈے وانگُوں بنڑو جِینویں پہلے مَیں تُہاڈے وانگُوں بنڑیا ہم ۔ تُساں میڈا کُجھ نُقصان نئیں کیتا۔ تُہاکُوں یاد ہوسی جو مَیں پہلی پھیری بیماری دی حالت ءچ تُہاکُوں خوشخبری سُنڑائی ہئی۔ میڈی ایہ جِسمانی حالت تُہاڈی ازمائش دا سبب ہئی، پر تُساں نہ تاں میکُوں حقیر جانڑیا تے نہ ای مَیں تُوں نفرت کیتی۔ اِیندے بجائے تُساں میکُوں خُدا دے فرشتہ وانگُوں بلکہ مسیح یسُوع وانگُوں قبول کیتا۔ ہُنڑ تُہاڈی او خوشی کِتھاں گئی؟ کیوں جو مَیں تُہاڈا گواہ ہاں جو جے ممکن ہوندا تاں تُساں آپنڑے اکھیں وی کڈھ تے میکُوں ڈے ڈیندے۔ کیا تُہاڈے نال سچ بولنڑ دے سببّوں مَیں تُہاڈا دُشمنڑ بنڑ گِیا ہاں؟ او لوک تُہاکُوں آپنڑا دوست بنڑاوݨ دی کوشش تاں کریندے ہِن پر اُنہاں دی نیّت صاف کائنی۔ او تُہاکُوں میڈے تُوں اَنج کراوݨ چاہندے ہِن تاں جو تُساں اُنہاں دے ای بنڑے راہو۔ ہا، نیک نیّتی نال دوست بنڑاوݨ چنگا ہے جے ایہ کوشش ہر ویلے کیتی ونجے نہ صرف جڈاں میں اُتھاں تُہاڈے کولھ حاضر ہوندا ہاں۔ میڈے بالو! تُہاڈے کیتے میکُوں ولا کنُوں بال جاوݨ وانگُوں دے درد لگے ہِن تے اُوں ویلے تئیں لگے راہسن، جئیں تئیں مسیح دی صورت تُہاڈے ءچ قائم نہ تھی ونجے۔ میڈا دل چاہندے جو ہُنڑ تُہاڈے کولھ ہوواں تے بئے طریقے نال بولاں کیوں جو مَیں تُہاڈے بارے ءچ بہُوں شک ءچ ہاں۔ میکُوں ڈساؤ! تُساں جیہڑے شریعت دے تابع تھیوݨ چاہندے ہیوے، کیا شریعت دے گالھیں نئیں سُنڑدے؟ اُوندے ءچ لِکھیا ہے جو ابرہام دے ڈُو پوتر ہَن، ہِک غُلام عورت ءچوں، ڈُوجھا ازاد ءچوں۔ جیہڑا پوتر غُلام عورت ءچوں ہا او اِنسانی فطرت دے مطابق پیدا تھیّا پر جیہڑا پوتر ازاد ءچوں پیدا تھیّا، او خُدا دے وعدے دے مطابق پیدا تھیّا ۔ اِنہاں گالھیں ءچ ہِک مثال ہے کیوں جو ایہ عورتاں ڈُو عہداں دو اِشارہ کریندیاں ہِن۔ ہِک کوہ ِسِینا اُتے بدھیا ہویا عہد ہے جیندے ءچوں غُلام ای پیدا تھیندے ہِن تے او ہاجرہ ہے۔ ہاجرہ عرب دے کوہ ِ سِینا دو اِشارہ ہے تے موجودہ یروشلیم دو وی، کیوں جو یروشلیم آپنڑے بالاں سمیت غُلامی ءچ ہے۔ پر اسمانی یروشلیم ازاد ہے تے اُوہو ساڈی ماء ہے۔ کیوں جو کلام ءچ لِکھیا ہے جو ”اے بانجھ! تُوں جئیں بال نئیں جمیّا، خوشی دے نعرے لا۔ تُوں جِینکُوں جمنڑ دا درد نئیں تھیّا، اُچی اواز نال پُکار، کیوں جو چھوڑی ہوئی تریمت دے بال پئے آلی دے بالاں تُوں زیادہ ہوسن ۔“ اِیں واسطے بِھراؤ! تُساں اِضحاق آلی کار وعدے دے فرزند ہیوے۔ پر جِینویں اُوں وقت اِنسانی فطرت دے مطابق پیدا تھیّا ہویا بال رُوح دی قُدرت نال پیدا تھئے ہوئے کُوں سَتیندا ہا، ہُنڑ وی اِینویں ای تھیندے۔ پر خُدا دا کلام کیا آدھے؟ ایہ جو ”اِیں کنیز تے اُوندے پوتر کُوں کڈھ ڈیؤ کیوں جو کنیز دا پوتر ازاد دے پوتر نال ہرگز وارث نہ ہوسی ۔“ اِیں واسطے بِھراؤ! اساں غُلام عورت دی اولاد نئیں بلکہ ازاد دی ہیں۔ مسیح ساکُوں ازاد راہنڑ کیتے ازاد کیتے۔ بس اِیں ازادی ءچ ثابت قدم راہو تے ولا غُلامی دی پنجالی ءچ نہ جُتو۔ ڈیکھو! مَیں پولُس خود تُہاکُوں آدھا ہاں جو جے تُساں ختنہ کرواؤ تاں مسیح کنُوں تُہاکُوں کوئی فائدہ نہ تھیسی ۔ بلکہ مَیں ہر اُوں بندے کُوں جیہڑا ختنہ کرویندے وَل آدھا ہاں جو اُونکُوں ساری شریعت اُتے عمل کرݨ فرض ہے۔ تُساں جیہڑے شریعت دے وسیلے نال راستباز بنڑݨ چاہندے ہیوے، مسیح کنُوں اَنج تھی گئے ہیوے تے فضل تُوں محروم تھی گئے ہیوے۔ پر اساں رُوح القُدس دے وسیلے اِیمان نال راستباز تھیوݨ دے انتظار ءچ ہیں، جیندی ساکُوں اُمید ہے۔ کیوں جو مسیح یسُوع ءچ ہوندے ہوئے ختنہ کراوݨ یا نہ کراوݨ دی کوئی اہمیت نئیں۔ صرف او اِیمان اہم ہے جیہڑا محبت کرݨ نال ظاہر تھیندے۔ تُساں چنگی طرحاں بھجدے پئے ہَوے۔ کئیں تُہاکُوں سچائی اُتے عمل کرݨ تُوں روک ڈِتے؟ اِینویں کرݨ تے اُکساوݨ آلا خُدا نئیں جئیں تُہاکُوں سڈے۔ تھوڑا جِیہا خمیر سارے مَلے ہوئے اٹّے کُوں خمیرا کر ڈیندے۔ میکُوں خُداوند یسُوع ءچ تُہاڈے اُتے بھروسہ ہے جو تُساں کوئی بئی سوچ نہ رکھیسو پر جیہڑا بندہ تُہاڈے ءچ پریشانی پیدا کریندے بھانویں جیہڑا وی ہووے، اُونکُوں سزا مِلسی۔ بِھراؤ! جے مَیں ہُنڑ تئیں ختنے دی تبلیغ کریندا ہاں تاں حالی تئیں کیوں ستایا ویندے ہاں؟ جے میں ایجھی تبلیغ کریندا تاں لوک صلیب دا پیغام سُنڑ تے تُھڈا نہ کھاندے۔ جے تُہاکُوں پریشان کرݨ آلے نہ صرف آپنڑا ختنہ کرویندے بلکہ آپنڑے آپ کُوں خوجے بنڑا گِھندے تاں چنگا ہوندا۔ بِھراؤ! تُساں ازاد راہنڑ کیتے سڈے گئے ہیوے پر اِیں ازادی کُوں آپنڑیاں جِسمانی خواہشاں کُوں پُورا کرݨ کیتے اِستعمال نہ کرو بلکہ محبت نال ہِک ڈُوجھے دی خدمت کریندے راہو۔ کیوں جو ساری شریعت اِیں ہِک گالھ ءچ ای پُوری تھی ویندی ہے جو ”تُوں آپنڑے ہمسائے نال آپنڑے وانگُوں محبت رکھ ۔“ جے تُساں ہِک ڈُوجھے کُوں چِیر پھاڑ تے کھاندے ہیوے تاں خبردار، کِتھائیں اِینویں نہ تھیوے جو ہِک ڈُوجھے کُوں ختم کر ڈیؤ۔ مَیں تاں ایہ آدھا ہاں جو رُوح القُدس دے مطابق چلو تاں وَل تُساں نفسانی خواہشاں کُوں ہرگز پُورا نہ کریسو۔ کیوں جو نفس رُوح دے خلاف خواہش کریندے تے رُوح نفس دے خلاف۔ ایہ ڈوہائیں ہِک ڈُوجھے دے مخالف ہِن، اِیں واسطے جیہڑا کم تُساں کرݨ چاہندے ہیوے او نئیں کر سگدے۔ پر جے تُساں پاک رُوح دی ہدایت نال چلدے ہیوے تاں شریعت دے تابع نئیں ہوندے۔ نفسانی کم تاں صاف ظاہر ہِن یعنی، زِناکاری، ناپاکی، شہوت پرستی، بُت پرستی، جادُوگری، دُشمنڑی، جھیڑے، حسد، کاوڑ، خود غرضی، نا اتفاقی، پارٹی بازی، بُغض، نشہ بازی، نچنڑ ٹپنڑ تے اِنہاں جِیہے بئے کم۔ اِنہاں گالھیں دے بارے ءچ مَیں پہلے تُہاکُوں آکھیا ہا تے ہُنڑ ولا آدھا ہاں، جو ایجھے کم کرݨ آلے خُدا دی بادشاہی دے وارث نہ ہوسن۔ پر رُوح القُدس دا پھل محبت، خوشی، اِطمینان، صبر، مہربانی، نیکی، وفاداری، نرم دِلی تے پرہیزگاری ہے۔ ایجھے کماں دی کوئی شریعت مخالفت نئیں کریندی۔ تے جیہڑے مسیح یسُوع دے ہِن اُنہاں آپنڑی اِنسانی فطرت کُوں اُوندے جذبات تے بُریاں خواہشاں سمیت صلیب اُتے چڑھا ڈِتے۔ جے اساں رُوح القُدس دے وسیلے زندہ ہیں تاں رُوح القُدس دی ہدایت دے مطابق زندگی گُزاروں۔ اساں غیر مناسب فخر، ہِک ڈُوجھے کُوں بھڑکاوݨ تے ہِک ڈُوجھے کنُوں حسد کرݨ چھوڑ ڈیؤں۔ بِھراؤ! جے کوئی کہیں گُناہ ءچ پَھس ونجے تاں تُساں جیہڑے رُوحانی ہیوے، ایجھے بندے کُوں حلیمی نال بحال کر ڈیؤ۔ پر آپنڑا وی خیال رکھو جو کِتھائیں تُساں وی کہیں ازمائش دا شکار نہ تھی ونجو۔ ہِک بئے دا بھار چاؤ تے اِینویں ای مسیح دی شریعت کُوں پُورا کرو۔ جے کوئی آپنڑے آپ کُوں کُجھ سمجھے، پر او کُجھ وی نہ ہووے، تاں او آپنڑے آپ کُوں دوکھا ڈیندے۔ اِیں واسطے ہر بندہ آپنڑے کماں کُوں پرکھے، وَل جے او چنگے ہووݨ تاں ایہ ڈُوجھیاں دے نال مُقابلہ کیتے بغیر آپنڑے آپ اُتے فخر کرݨ دا موقع ہوسی۔ کیوں جو ہر ہِک بندہ آپنڑا ای بھار چیسی ۔ کلام دی تعلیم پاوݨ آلا آپنڑیاں ساریاں چنگیاں چیزاں ءچ تعلیم ڈیوݨ آلے کُوں شامل کرے۔ دوکھا نہ کھاؤ، خُدا بیوقُوف نئیں بنڑایا وَنج سگدا۔ بندہ جیہڑا کُجھ رہیندے، اُوہو کپیسی۔ جیہڑا کوئی آپنڑیاں بُریاں خواہشاں کیتے رہیندے، او ہلاکت دی فصل کپیسی۔ تے جیہڑا کوئی رُوح القُدس کُوں خوش کرݨ کیتے رہیندے، او رُوح القُدس دی طرفوں ہمیشاں دی زندگی دی فصل کپیسی۔ اساں نیکی کرݨ ءچ ہِمت نہ ہارُوں کیوں جو جے بے دل نہ تھیسوں تاں پُورے وقت اُتے فصل کپیسوں۔ اِیں واسطے جئیں تئیں موقع مِلے اساں ساریاں نال نیکی کرُوں، خاص کر اہل ِ اِیمان نال۔ ڈیکھو! مَیں آپنڑے ہتھ نال کیجھے موٹے موٹے حرفاں ءچ تُہاکُوں لِکھدا پِیا ہاں۔ جیہڑے لوک ڈُوجھیاں دے سامنڑے آپنڑے آپ کُوں چنگا ڈِکھاوݨ چاہندے ہِن، او تُہاکُوں ختنہ کراوݨ اُتے مجبور کرݨ دی کوشش کریندے ہِن۔ پر اُنہاں دا مقصد صرف ایہ ہے جو مسیح دی صلیبی موت دے پیغام دی وجہ کنُوں ستائے نہ ونجنڑ۔ کیوں جو ختنہ کراوݨ آلے خود وی شریعت اُتے عمل نئیں کریندے، پر تُہاڈا ختنہ کراوݨ چاہندے ہِن تاں جو او تُہاڈی جِسمانی حالت اُتے فخر کر سگنڑ۔ پر خُدا نہ کرے جو مَیں کہیں چیز اُتے فخر کراں سوائے آپنڑے خُداوند یسُوع مسیح دی صلیب اُتے، جیندے ذریعے دُنیا دی اہمیت میڈے کیتے صلیب اُتے چڑھ گئی ہے تے میڈی اہمیت دُنیا کیتے۔ کیوں جو ختنہ کراوݨ یا نہ کراوݨ دی کوئی اہمیت نئیں، بلکہ صرف نویں سرے تُوں پیدا تھیوݨ دی ہے۔ تے جیہڑے اِیں اصُول اُتے چلدے ہِن اُنہاں کُوں تے خُدا دے اِسرائیل کُوں اِطمینان تے رحم حاصل تھیندا راہوے۔ میڈے بدن اُتے زخماں دے داغ ایہ ظاہر کریندے ہِن جو مَیں یسُوع دا بندہ ہاں، اِیں واسطے کوئی میکُوں اگُوں تُوں تکلیف نہ ڈیوے۔ بِھراؤ! ساڈے خُداوند یسُوع مسیح دا فضل تُہاڈی رُوح نال راہوے۔ آمین۔ ایہ خط میں پولُس دی طرفوں ہے جیہڑا خُدا دی مرضی نال یسُوع مسیح دا رسُول ہاں، اُنہاں مُقدّساں دے ناں جیہڑے اِفِسُس ءچ راہندے ہِن تے یسُوع مسیح ءچ وفادار ہِن۔ تُہاکُوں ساڈے باپ خُدا تے خُداوند یسُوع مسیح دی طرفوں فضل تے اِطمینان حاصل تھیندا راہوے۔ ساڈے خُداوند یسُوع مسیح دے خُدا تے باپ دی حمد ہووے جئیں ساکُوں مسیح ءچ اسمان دی ہر رُوحانی برکت بخشی ہے۔ اُوں دُنیا بنڑاوݨ کنُوں پہلے ای ساکُوں مسیح ءچ چُنڑ گِھدا تاں جو اساں اُوندے حضُور پاک تے بے عیب تھیؤں۔ محبت ءچ خُدا آپنڑی مرضی تے نیک اِرادے دے مطابق پہلے کنُوں ای فیصلہ کیتا جو او ساکُوں یسُوع مسیح دے ذریعے آپنڑے لے پالک پوتر بنڑاوے، تاں جو اُوندے اُوں جلال آلے فضل دی حمد ہووے، جیہڑا اُوں آپنڑے عزیز پوتر دے وسیلے نال ساکُوں مُفت بخشیا۔ ساکُوں مسیح دے خون دے وسیلے نال مخلصی یعنی گُناہاں دی معافی مِلی ہے۔ ایہ خُدا دے اُوں بے حد فضل دے سببّوں تھیّا، جیہڑا اُوں بہُوں حِکمت تے دانائی نال ساڈے اُتے کثرت نال نازل کیتا۔ تے خُدا آپنڑی مرضی دے راز کُوں آپنڑی خوشی دے مطابق ساڈے اُتے ظاہر کر ڈِتا، جِیندا اُوں مسیح ءچ پُورا کرݨ دا اِرادہ کیتا ہا، تے خُدا دی مرضی ایہ ہے جو مناسب وقت اُتے او ساریاں چیزاں کُوں مسیح ءچ کٹھا کرے، بھانویں اسمان دیاں ہووݨ یا زمین دیاں۔ مسیح ءچ ساکُوں وی وراثت مِل گئی ہے کیوں جو خُدا جیہڑا سبھ کُجھ آپنڑی مرضی تے مقصد دے مطابق کریندے، اُوں آپنڑے اِرادہ دے مطابق ساڈے کیتے ایہ پہلے کنُوں ای مقرر کیتے۔ تاں جو اساں جِنہاں سبھ کنُوں پہلے مسیح اُتے اُمید رکھی ہئی، اُوندے جلال دی تعریف دا سبب بنڑوں۔ تے جِیں ویلے تُساں وی سچائی دے کلام کُوں یعنی آپنڑی نجات دی خوشخبری کُوں سُنڑیا تے مسیح اُتے اِیمان گِھن آئے تاں خُدا تُہاڈے اُتے وی وعدہ کیتے ہوئے رُوح القُدس دی مُہر لائی۔ رُوح القُدس ساڈی میراث دا بیعانہ ہے جئیں تئیں ساکُوں مخلصی نہ مِل ونجے، تاں جو خُدا دے جلال دی تعریف کیتی ونجے۔ مَیں وی ایہ سُنڑ تے جو تُساں خُداوند یسُوع اُتے اِیمان رکھیندے ہیوے تے سارے مُقدّساں نال محبت کریندے ہیوے، تُہاڈے کیتے خُدا دا شُکر کرݨ کنُوں باز نئیں آندا تے آپنڑیاں دُعاواں ءچ تُہاکُوں یاد کریندا ہاں۔ مَیں دُعا کریندا ہاں جو ساڈے خُداوند یسُوع مسیح دا خُدا جیہڑا جلال آلا باپ ہے، تُہاکُوں حِکمت تے مُکاشفے دی رُوح بخشے تاں جو تُساں اُونکُوں چنگی طرحاں جاݨ گِھنو تے تُہاڈے دل دے اکھیں روشن تھی ونجنڑ تاں جو تُساں جاݨ گِھنو جو خُدا تُہاکُوں کیجھی اُمید کیتے سڈے تے مُقدّساں کیتے اُوندے جلال آلی میراث دی دولت کیجھی ہے، تے ایہ وی جو اساں اِیمان گِھن آوݨ آلیاں کیتے اُوندی قُدرت کیجھی عظیم ہے۔ ایہ اُوہو بے حد قُدرت ہے جِیندے نال اُوں مسیح کُوں مُردیاں ءچوں زندہ کر تے اسمان اُتے آپنڑے سجے پاسے بِلھایا، تے اُونکُوں ہر قِسم دی حکُومت تے اِختیار تے قُدرت تے ریاست بلکہ ہر ہِک ناں کنُوں اُچا کیتا، نہ صرف اِیں جہان ءچ بلکہ آوݨ آلے جہان ءچ وی۔ خُدا سبھ کُجھ اُوندے پیراں تلے کر ڈِتے تے اُونکُوں کلیسیا دی خاطر یکے چیزاں دا سردار بنڑایا۔ کلیسیا مسیح دا بدن ہے تے مسیح نال کامل تھیندی ہے جیہڑا ہر ہِک چیز کُوں کامل کریندے۔ تُساں پہلے آپنڑے قصُوراں تے گُناہاں دی وجہ کنُوں رُوحانی طور تے مُردہ ہَوے تے دُنیا دے طور طریقے اُتے چلدے تے ہوائی طاقتاں دے سردار یعنی ابلیس دی پیروی کریندے ہَوے۔ ایہ رُوح ہُنڑ تئیں نافرمان لوکاں ءچ تاثیر رکھیندی ہے۔ ہِک وقت ہا جِیں ویلے اساں وی اُنہاں ءچ شامل ہسے تے نفسانی خواہشاں ءچ زندگی گُزریندے تے دل تے دماغ دی ہر ہَوس کُوں پُورا کرݨ ءچ لگے راہندے ہسے۔ اساں ڈُوجھیاں وانگُوں فطرتی طور تے غضب دے حقدار ہسے۔ پر خُدا جیہڑا بہُوں ای رحم کرݨ آلا ہے، اُوں ساڈے نال ایجھی محبت رکھی جو جِیں ویلے اساں گُناہاں دی وجہ کنُوں مُردہ ہسے، تاں اُوں ساکُوں مسیح دے نال زندہ کیتا۔ ہا، تُہاکُوں فضل نال ای نجات مِلی ہے۔ خُدا ساکُوں مسیح یسُوع نال زندہ کر تے اسمانی مقاماں ءچ اُوندے نال بِلھایا، تاں جو او آپنڑی اُوں مہربانی دے وسیلے جیہڑی مسیح یسُوع ءچ ساڈے اُتے تھئی ہے، آوݨ آلے زمانیاں ءچ آپنڑے حد کنُوں زیادہ فضل دی دولت کُوں ظاہر کرے۔ کیوں جو تُہاکُوں اِیمان گِھن آوݨ دے وسیلے فضل نال ای نجات مِلی ہے۔ ایہ تُہاڈی طرفوں نئیں بلکہ خُدا دی بخشش ہے۔ ایہ تُہاڈے کماں دا پھل نئیں، اِیں واسطے کوئی فخر نئیں کر سگدا۔ کیوں جو اساں خُدا دی کاریگری ہیں تے اُوں ساکُوں مسیح یسُوع ءچ نیک کماں کیتے نویں سِروں پیدا کیتا۔ ایہ نیک کم اُوں پہلے ای ساڈے کیتے تیار کیتے ہَن۔ بس یاد رکھو جو ماضی ءچ تُساں جیہڑے پیدائشی طور تے غیر قوم آلے ہَوے، کیا ہَوے۔ ختنہ کراوݨ آلے یہُودی تُہاکُوں ”بغیر ختنہ آلے“ آدھے ہَن، بھانویں اُنہاں دا ختنہ صرف اِنسانی ہتھ نال جِسم ءچ کیتا ہویا کم ہے۔ اُوں ویلے تُساں مسیح کنُوں جُدا، بنی اِسرائیل دے غیر شہری، اُنہاں نال کیتے ہوئے عہداں دے وعدیاں کنُوں اَݨسُوویں تے دُنیا ءچ نا اُمید تے خُدا کنُوں ناواقف ہَوے۔ پر تُساں جیہڑے پہلے دُور ہَوے ہُنڑ یسُوع مسیح ءچ اُوندے خون دے وسیلے خُدا دے نیڑے گِھن آئے گئے ہیوے۔ مسیح ساڈی صُلح ہے جئیں یہُودی تے غیر یہُودی ڈوہائیں کُوں ہِک کر ڈِتے تے دُشمنڑی تے جُدائی دی اُوں دیوار کُوں جیہڑی ساڈے وچال ہئی، آپنڑے جِسم کُوں قُربان کر تے ڈھا ڈِتے۔ کیوں جو اُوں شریعت کُوں اُوندے حُکماں تے قانُوناں سمیت ختم کر ڈِتے، تاں جو یہُودی تے غیر یہُودی کُوں آپنڑے آپ ءچ ہِک نواں اِنسان بنڑا تے صُلح کرا ڈیوے ۔ تے اِینویں آپنڑی صلیبی موت دے ذریعے دُشمنڑی کُوں ختم کر تے ڈُوہائیں کُوں ہِک تَن بنڑا تے خُدا نال میل مِلاپ کروا ڈِتا۔ تے اُوں تُساں غیر قوم آلیاں کُوں جیہڑے کہیں ویلے اُوندے کنُوں دُور ہَوے تے یہُودیاں کُوں وی جیہڑے اُوندے نزدیک ہَن، ڈُوہائیں کُوں صُلح دی خوشخبری ڈِتی۔ تے ہُنڑ اساں مسیح دے ذریعے ہِکو رُوح القُدس ءچ باپ دے حضُور آ سگدے ہیں۔ بس ہُنڑ تُساں پردیسی تے اجنبی نئیں ریہے بلکہ خُدا دے مُقدّساں دے ہم وطن تے خُدا دے گھرانڑے دے لوک بنڑ گئے ہیوے۔ تُساں ہِک ایجھی عمارت ہیوے جیہڑی رسُولاں تے نبیاں دی بنیاد اُتے اُساری گئی ہے، جیندے کونے دے سرے دا پتھر یسُوع مسیح خود ہے۔ مسیح ءچ ہر حصہ آپس ءچ جُڑ تے خُداوند کیتے ہِک پاک ہیکل بنڑدی ویندی ہے۔ تے تُساں وی خُداوند ءچ دُوجھیاں نال تعمیر تھیندے ویندے ہیوے تاں جو ایجھا گھر بنڑے جیندے ءچ خُدا آپنڑے رُوح القُدس دے وسیلے راہوے۔ اِیں واسطے مَیں پولُس جیہڑا تُساں غیر قوماں دی خاطر مسیح یسُوع کیتے قیدی ہاں تُہاڈے کیتے دُعا کریندا ہاں ۔ تُساں یقیناً خُدا دے فضل دی تبلیغ کرݨ دی اُوں ذمہ داری دے بارے ءچ سُنڑیا ہوسی جیہڑی تُہاڈے کیتے میکُوں مِلی۔ یعنی ایہ جو خُدا آپنڑا بھید میڈے اُتے مُکاشفے ءچ ظاہر کیتا، جِینویں میں پہلے تُہاکُوں لِکھیا ہے۔ او پڑھ تے تُہاکُوں پتہ لگسی جو مَیں مسیح دے بھید کُوں سمجھدا ہاں۔ پُرانڑے زمانیاں ءچ خُدا ایہ بھید لوکاں اُتے ظاہر نہ کیتا، پر ہُنڑ رُوح القُدس دے وسیلے اُوندے مُقدّس رسُولاں تے نبیاں اُتے ظاہر کیتا ہے۔ او بھید ایہ ہے جو مسیح یسُوع ءچ غیر قوماں وی بنی اِسرائیل نال خوشخبری دے وسیلے میراث ءچ شریک ہِن تے ہِکو بدن دے اَنگ ہِن تے خُدا دے وعدہ ءچ شامل ہِن۔ خُدا دے فضل دی برکت دے وسیلے جیہڑی اُوندی قُدرت دے اثر نال میکُوں مِلی، مَیں اِیں خوشخبری دا خادم بنڑیا۔ بھانویں میں مُقدّساں ءچوں ساریاں کنُوں چھوٹا ہاں، وَل وی میڈے اُتے ایہ فضل تھئے جو مَیں غیر قوماں کُوں مسیح دی بے حد دولت دی خوشخبری سُنڑاواں، تے سارے لوکاں اُتے اُوں بھید آلا منصوبہ ظاہر کراں جیہڑا پُرانڑے زمانیاں ءچ ہر چیز کُوں پیدا کرݨ آلے خُدا دے کولھ لُکیا ہویا ہا۔ خُدا دا مقصد ہا جو ہُنڑ کلیسیا دے وسیلے نال اُوندی ہر طرحاں دی حِکمت، اُنہاں حکُومت آلیاں تے اِختیار آلیاں اُتے ظاہر تھی ونجے جیہڑے اسمانی مقاماں ءچ ہِن۔ ایہ ای خُدا دا ازلی اِرادہ ہا جیہڑا اُوں ساڈے خُداوند یسُوع مسیح دے ذریعے پُورا کیتا۔ ہُنڑ مسیح ءچ تے مسیح اُتے اِیمان رکھ تے اساں دلیری تے اعتماد نال خُدا دے کولھ آ سگدے ہیں۔ اِیں واسطے مَیں مِنت کریندا ہاں جو تُساں میڈی اِنہاں مُصیبتاں دی وجہ کنُوں جیہڑیاں مَیں تُہاڈی خاطر سہندا ہاں ہِمت نہ ہارو کیوں جو او تُہاڈے کیتے عزت دا سبب ہِن۔ اِیں واسطے مَیں آپنڑے خُداوند یسُوع المسیح دے باپ دے اگُوں گوڈے ٹیکدا ہاں، جیندے تُوں اسمان تے زمین دے ہر خاندان کُوں ناں مِلے۔ میں دُعا کریندا ہاں جو او آپنڑے جلال دی دولت دے مطابق تُہاکُوں ایہ بخشے جو تُساں اُوندے رُوح القُدس دے ذریعے آپنڑے آپ ءچ بہُوں زور آور تھی ونجو، تے تُہاڈے اِیمان دے وسیلے نال مسیح تُہاڈے دِلاں ءچ راہوے۔ مَیں ایہ وی دُعا کریندا ہاں جو تُساں محبت ءچ جڑھ پکڑ تے، تے محبت دی بنیاد اُتے قائم تھی تے سارے مُقدّساں دے نال چنگی طرحاں جاݨ سگو جو اُوندی محبت دی لمبائی، چوڑائی، اُچائی تے گہرائی کِتی ہے، یعنی مسیح دی محبت کُوں سمجھ سگو جیہڑی سمجھ کنُوں باہر ہے تاں جو تُساں خُدا دی ذات دیاں خُوبیاں نال بھریج ونجو۔ ہُنڑ خُدا دی تعریف تھیوے جیہڑا آپنڑی اُوں قُدرت دے وسیلے جیہڑی ساڈے ءچ اثر کریندی ہے، ساڈے منگنڑ یا سوچنڑ کنُوں بہُوں زیادہ وڈے کم کر سگدے۔ کلیسیا دے وسیلے تے یسُوع مسیح دے وسیلے اُوندی حمد پُشت در پُشت تے ہمیشاں تئیں تھیندی راہوے۔ آمین۔ بس مَیں جیہڑا خُداوند یسُوع دی خاطر قید ءچ ہاں، تُہاڈی مِنت کریندا ہاں جو اُوں بُلاوے دے لائق زندگی گُزارو جیندے کیتے خُدا تُہاکُوں سڈے۔ یعنی کمال فروتنی، نرم دِلی تے صبر نال، محبت ءچ ہِک ڈُوجھے دی برداشت کرو۔ رُوح القُدس تُہاکُوں ہِک کر ڈِتے، اِیں واسطے ہِک ڈُوجھے نال صُلح ءچ بدھے رہ تے اِینکُوں قائم رکھنڑ دی کوشش کرو۔ ہِک ای بدن ہے تے ہِک ای رُوح القُدس، تے اِینویں ای جِیں ویلے تُساں سڈے گئے ہَوے تاں ہِک ای اُمید رکھنڑ کیتے سڈے گئے ہَوے، تے ہِک ای خُداوند ہے، ہِک ای اِیمان تے ہِک ای بپتسمہ ہے، تے خُدا وی ہِک ہے جیہڑا ساریاں دا باپ ہے۔ اُوہو ساریاں دے اُتے، ساریاں دے نال تے ساریاں دے اندر ہے۔ پر ساڈے ءچوں ہر ہِک کُوں مسیح دی بخشش دے مطابق مختلف نعمتاں مِلیاں ہِن۔ اِیں واسطے فرمایا گِیا ہے جو ”جِیں ویلے او اُچائی اُتے چڑھیا تاں قیدیاں کُوں نال گِھن گِیا تے لوکاں کُوں تحفے ڈِتے ۔“ اُوندے ”اسمان اُتے چڑھن“ دا مطلب ہے جو او پہلے زمین دے تلویں علاقے ءچ لتھا وی ہا۔ تے جیہڑا تلے لتھا، او اُوہو ہے جیہڑا ساریاں اسماناں کنُوں وی اُتے چڑھ گِیا تاں جو پُوری کائنات کُوں بھر ڈیوے۔ اُوں کُجھ لوکاں کُوں رسُول، کُجھ کُوں نبی، کُجھ کُوں تبلیغ کرݨ آلے تے کُجھ کُوں نگہبان تے کُجھ کُوں اُستاد بنڑایا، تاں جو مُقدّس لوک خدمت دے کم کرݨ دے قابل بنڑݨ تے اِینویں مسیح دے بدن دی ترقی تھیوے، جئیں تئیں اساں سارے اِیمان تے خُدا دے پوتر دی پچھاݨ ءچ ہِک تھی تے بالغ نہ بنڑ ونجُوں، یعنی مسیح دی پُوری کاملیت تئیں پُج نہ ونجُوں۔ وَل اساں اگُوں تے بال نہ راہسوں تے غلط تعلیم دی ہر تیز ہوا نال پانڑی دیاں چھلاں وانگُوں اِڈے اُڈے واہندے نہ راہوں، تے چالباز تے مکار لوکاں دے گُمراہ کر ڈیوݨ آلے منصوبیاں دا شکار نہ بنڑوں۔ بلکہ اساں محبت نال سچائی اُتے قائم رہ تے ہر گالھ ءچ مسیح آلی کار بنڑدے ونجُوں، جیہڑا سر ہے۔ اُوندے وسیلے پُورا بدن آپنڑے ہر جوڑ دی مدد نال آپس ءچ جُڑ تے قائم راہندے تے ہر اَنگ دے آپنڑا آپنڑا کم کرݨ نال پُورا بدن محبت ءچ ودھدے تے ترقی کریندے۔ اِیں واسطے مَیں آدھا ہاں بلکہ خُداوند یسُوع ءچ چتیندا ہاں جو اگُوں تُوں تُساں غیر قوماں وانگُوں جیہڑیاں آپنڑے بےکار خیالاں دے مطابق چلدیاں ہِن، زندگی نہ گُزارو۔ اُنہاں دی عقل ماری گئی ہے تے خُدا دی ڈِتی ہوئی زندگی ءچ اُنہاں دا کوئی حصہ نئیں کیوں جو او آپنڑی سخت دِلی پارُوں جاہل بنڑ گئے ہِن۔ بے شرم تھی تے اُنہاں آپنڑے آپ کُوں شہوت پرستی دے حوالے کیتا تے ہر طرحاں دے گندے کم بہُوں شوق نال کریندے ہِن۔ پر تُساں مسیح دی ایجھی تعلیم نئیں سِکھی بلکہ تُساں یسُوع دے بارے ءچ سُنڑیا تے اُوندے ءچ تھی تے اُوں سچائی دے مطابق جیہڑی یسُوع ءچ ہے تعلیم سِکھی جو آپنڑی پُرانڑی فطرت کُوں اُوندے پہلے چال چلنڑ سمیت لہا سٹو جیہڑی دوکھے باز خواہشاں دے سببّوں وِگڑدی ویندی ہے، تے رُوح القُدس نال آپنڑے ذہن کُوں نواں بنڑا گِھنو۔ تے نوِیں فطرت کُوں پا گِھنو جیہڑی سچی راستبازی تے پاکیزگی ءچ خُدا دی صورت اُتے پیدا کیتی گئی ہے۔ اِیں واسطے کُوڑ مارݨ چھوڑ تے ہر بندہ آپنڑے ہمسائے نال سچ بولے کیوں جو اساں سارے ہِک بدن دے اَنگ ہیں۔ غُصے ءچ آ تے گُناہ نہ کرو تے تُہاڈا غُصہ سِجھ لہوݨ تئیں نہ راہوے۔ تے ابلیس کُوں موقع نہ ڈیؤ۔ چوری کرݨ آلا اگُوں تے چوری نہ کرے بلکہ آپنڑے ہتھاں نال محنت کر تے کوئی چنگا کم کرے تاں جو مُتھاجاں دی مدد کرݨ کیتے اُوندے کولھ کُجھ ہووے۔ تُہاڈے مُنہ ءچوں کوئی گندی گالھ نہ نِکلے بلکہ صرف اُوہو گالھ نِکلے جیہڑی چنگی تے فائدہ مند ہووے تاں جو سُنڑݨ آلیاں کُوں وی اُوندے تُوں برکت مِلے۔ خُدا دے رُوح القُدس کُوں ناراض نہ کرو جیندے نال تُہاڈے اُتے مخلصی دے ڈینہہ کیتے مُہر کیتی گئی ہے۔ ہر قِسم دی نفرت، قہر، تکرار، بدگوئی تے بُرائی کُوں آپنڑے ءچوں کڈھ ڈیؤ۔ ہر ہِک نال مہربانی تے نرم دِلی نال پیش آؤ۔ جِینویں خُدا مسیح ءچ تُہاڈے قصُور معاف کیتے ہِن، تُساں وی ہِک ڈُوجھے دے قصُور معاف کرو۔ عزیز فرزند ہوندے ہوئے، خُدا دے نمونے اُتے چلو ۔ تے تُساں وی محبت نال زندگی گُزارو جِینویں مسیح ساڈے نال محبت کیتی تے ساڈے کیتے آپنڑے آپ کُوں خوشبو دار نذرانہ تے قُربانی دے طور تے خُدا کُوں ڈے ڈِتا۔ تُہاڈے ءچ حرام کاری یا کہیں قِسم دی ناپاکی یا لالچ دا ناں تئیں نہ گِھدا ونجے کیوں جو ایہ مُقدّساں کیتے مناسب نئیں۔ تے نہ ای شرم آلے گالھیں، بَک بَک یا گندے گالھیں ہووݨ، کیوں جو ایہ مناسب نئیں بلکہ تُہاڈی زبان اُتے شُکرگزاری ہووے۔ کیوں جو تُساں ایہ جانڑدے ہیوے جو کہیں حرامکار، ناپاک یا لالچی بندے دی مسیح تے خُدا دی بادشاہی ءچ کوئی میراث نئیں بلکہ لالچی بندہ بُت پرست دے برابر ہے۔ کوئی تُہاکُوں فضول گالھیں نال دوکھا نہ ڈیوے، کیوں جو اِنہاں گالھیں دے سببّوں نافرماناں اُتے خُدا دا غضب نازل تھیندے۔ اِیں واسطے ایجھے لوکاں دے کماں ءچ شریک نہ تھیؤ۔ کیوں جو پہلے تُساں اندھارے ءچ ہَوے پر ہُنڑ خُداوند ءچ ہوندے ہوئے تُساں نُور ءچ ہیوے۔ بس نُور دے فرزنداں وانگُوں زندگی گُزارو۔ کیوں جو نُور دا پھل ہر طرحاں دی نیکی، پرہیزگاری تے سچائی ہے۔ تے تجربے نال معلوم کریندے راہو جو خُداوند کُوں کیا پسند ہے۔ اندھارے دے بے پھل کماں ءچ شریک نہ تھیؤ بلکہ اُنہاں اُتے ملامت کرو۔ کیوں جو لوکاں دے لُک چُھپ تے کیتے ہوئے کماں دا ذِکر کرݨ وی شرم دی گالھ ہے۔ پر ہر چیز جِیندے اُتے روشنی کیتی ویندی ہے، او صاف نظر آندی ہے، کیوں جو جیہڑا کُجھ روشنی ءچ گِھن آیا ویندے، او روشن تھی ویندے۔ اِیں واسطے فرمایا گئے جو ”اے سمنڑ آلے، جاگ مُردیاں ءچوں زندہ تھی وَنج تاں مسیح دا نُور تیڈے اُتے چمکسی۔“ بس غور نال ڈیکھو جو تُساں کِینویں زندگی گُزریندے ہیوے، بے سمجھاں وانگُوں نئیں بلکہ سمجھداراں وانگُوں زندگی گُزارو۔ تے وقت کُوں چنگی طرحاں استعمال کرو کیوں جو ڈینہہ بُرے ہِن۔ اِیں واسطے بے سمجھ نہ بنڑو بلکہ خُداوند دی مرضی معلوم کرو جو او کیا ہے۔ شراب ءچ دُھت نہ تھیؤ کیوں جو ایہ بدکاری دو گِھن ویندی ہے بلکہ رُوح القُدس نال بھریندے راہو۔ آپس ءچ زبُور، حمد تے رُوحانی گیت گاندے راہو تے خُداوند دی تعریف ءچ دل نال گاندے وجیندے راہو۔ تے ہمیشاں ہر گالھ ءچ ساڈے خُداوند یسُوع مسیح دے ناں نال خُدا باپ دا شُکر کریندے راہو۔ مسیح دے خوف ءچ ہِک ڈُوجھے دے تابع راہو۔ ذالو! آپنڑے پایاں دے تابع راہو جِینویں خُداوند دے تابع ہیوے۔ کیوں جو پایا ذال دا سر ہے، جِینویں مسیح آپنڑے بدن یعنی کلیسیا دا سر ہے تے اُوہو اُوندا نجات ڈیوݨ آلا ہے۔ اِیں واسطے جِینویں کلیسیا مسیح دے تابع ہے اُونویں ای ذالاں وی ہر گالھ ءچ آپنڑے پایاں دے تابع راہوݨ۔ پایو! آپنڑیاں ذالاں نال اُونویں ای محبت رکھو جِینویں مسیح کلیسیا نال رکھی تے اُوندے کیتے آپنڑی جان ڈے ڈِتی، تاں جو او کلیسیا کُوں کلام دے ذریعے پانڑی نال غُسل ڈے تے صاف تے مُقدّس بنڑا ڈیوے، تے ایجھی جلال آلی کلیسیا بنڑا تے آپنڑے کولھ حاضر کرے جیندے ءچ کوئی داغ یا جُھری یا کوئی بِیا نُقص نہ ہووے بلکہ او پاک تے بے اِلزام ہووے۔ اِینویں ای پایاں کُوں چاہیدے جو او آپنڑیاں ذالاں نال آپنڑے بدن وانگُوں محبت رکھنڑ۔ جیہڑا آپنڑی ذال نال محبت رکھیندے، او آپنڑے آپ نال محبت رکھیندے۔ کیوں جو کوئی بندہ آپنڑے جِسم نال دُشمنڑی نئیں کریندا بلکہ اُونکُوں کھویندے تے اُوندی ڈیکھ بھال کریندے جِینویں مسیح کلیسیا دی کریندے، کیوں جو اساں اُوندے بدن دے اَنگ ہیں۔ [جِینویں کلام ءچ لِکھیا ہے] ”اِیں وجہ تُوں مرد آپنڑے ماء پِیُو کنُوں اَنج تھی تے آپنڑی ذال نال راہسی تے او ڈوہائیں ہِک تَن ہوسن ۔“ ایہ بہُوں گہرا راز ہے پر ایہ مَیں مسیح تے کلیسیا دے بارے ءچ آدھا ہاں۔ بہرحال تُہاڈے ءچوں ہر پئے کُوں چاہیدے جو او آپنڑی ذال نال آپنڑے وانگُوں محبت رکھے تے ذال کُوں وی چاہیدے جو او آپنڑے پئے دی عزت کرے۔ بالو! خُداوند ءچ آپنڑے ماء پِیُو دے فرمانبردار راہو کیوں جو ایہ واجب ہے۔ ”آپنڑے ماء پِیُو دی عزت کر ۔“ ایہ پہلا حُکم ہے جیندے نال وعدہ وی ہے جو ”تیڈا بھلا تھیسی تے تیڈی عُمر زمین اُتے دراز تھیسی ۔“ تے اولاد آلیو! تُساں آپنڑے بالاں کُوں کاوڑ نہ ڈیواؤ بلکہ خُداوند دی طرفوں تربیت تے نصیحت ڈے تے اُنہاں دی پرورش کرو۔ نوکرو! ڈردے تے کمبدے ہوئے صاف دِلی نال آپنڑے دُنیاوی مالکاں دی فرمانبرداری کرو جِینویں مسیح دی کریندے ہیوے۔ آدمیاں کُوں خوش کرݨ آلیاں آلی کار صرف ڈِکھاوے کیتے خدمت نہ کرو بلکہ مسیح دے خدمت گُزار ہوندے ہوئے دل نال خُدا دی مرضی پُوری کرو۔ تے اِیں خدمت کُوں آدمیاں دی نئیں بلکہ خُداوند دی سمجھ تے جوش نال کرو، کیوں جو تُساں جانڑدے ہیوے جو خُداوند ہر بندے کُوں اُوندے چنگے کم دا اجر ڈیسی بھانویں او بندہ غُلام ہووے یا آزاد۔ مالکو! تُساں وی آپنڑے نوکراں نال ایجھا ای سلوک کرو۔ اُنہاں کُوں دھمکیاں نہ ڈیؤ کیوں جو تُساں جانڑدے ہیوے جو اُنہاں دا تے تُہاڈا ڈُوہائیں دا مالک اسمان اُتے ہے تے او کہیں دا طرفدار نئیں۔ آخری گالھ ایہ ہے جو تُساں خُداوند ءچ تے اُوندی زبردست قُدرت ءچ مضبوط بنڑ ونجو۔ خُدا دے ڈِتے ہوئے سارے ہتھیار تے حفاظتی لباس پا گِھنو تاں جو تُساں ابلیس دے منصوبیاں دا مُقابلہ کر سگو۔ کیوں جو ساکُوں خون تے گوشت دے خلاف نئیں بلکہ حُکمراناں، اِختیار آلیاں، اِیں اندھاری دُنیا دے حاکماں تے شریر رُوحانی طاقتاں دے خلاف جنگ کرنڑی ہے جیہڑیاں اسمانی جاہیں ءچ ہِن۔ اِیں واسطے تُساں خُدا دے ڈِتے ہوئے سارے ہتھیار تے حفاظتی لباس پا گِھنو تاں جو جڈاں بدی دا ڈینہہ آوے تاں تُساں دُشمنڑ دا مُقابلہ کر سگو تے سبھ کُجھ پُورا کر تے قائم رہ سگو۔ بس اِینویں قائم راہو یعنی سچائی دا پٹکا آپنڑی چیل نال بَدھ گِھنو، راستبازی دا سینہ بند بَدھ گِھنو، صُلح دی خوشخبری دی تیاری دی جُتی آپنڑے پیراں ءچ پا گِھنو، تے اِیندے علاوہ اِیمان دی ڈھال چاتی رکھو جیندے نال تُساں شیطان دے سارے بلدے ہوئے تِیراں کُوں بُجھا سگو۔ تے نجات دا ٹوپ تے رُوح القُدس دی تلوار کُوں جیہڑی خُدا دا کلام ہے گِھن گِھنو۔ ہر ویلے رُوح القُدس ءچ ہر طرحاں نال دُعا تے مِنت کریندے راہو۔ تے اِیں مقصد کیتے جاگدے راہو تے سارے مُقدّساں کیتے ہر ویلے دُعا کریندے راہو۔ میڈے کیتے وی دُعا کرو تاں جو جڈاں کڈھائیں میکُوں بولنڑ دا موقع مِلے تاں خُدا میکُوں ایجھے الفاظ ڈیوے جو خوشخبری دے راز کُوں دلیری نال ظاہر کر سگاں، جیندی خاطر مَیں زنجیراں نال بدھیا ہویا مسیح دا ایلچی ہاں۔ تے دُعا کرو جو مَیں اُونکُوں ایجھی دلیری نال بیان کراں جِینویں میڈے اُتے فرض ہے۔ تخِکُس جیہڑا عزیز بِھرا تے خُداوند ءچ وفادار خادم ہے، تُہاکُوں سبھ کُجھ ڈسا ڈیسی، تاں جو تُساں وی میڈی حالت کنُوں واقف تھی ونجو۔ مَیں اُونکُوں تُہاڈے کولھ اِیں واسطے بھجیندا پِیا ہاں جو او تُہاکُوں ساڈی حالت کنُوں واقف کراوے تے تُہاڈے دِلاں کُوں تسلی ڈیوے۔ خُدا باپ تے خُداوند یسُوع مسیح دی طرفوں تُساں بِھرانواں کُوں اِیمان دے نال اِطمینان تے محبت حاصل تھیوے جیہڑے ساڈے خُداوند یسُوع مسیح دے نال ختم نہ تھیوݨ آلی محبت رکھیندے ہِن، اُنہاں ساریاں اُتے فضل تھیندا راہوے۔ ایہ خط مسیح یسُوع دے خادماں پولُس تے تِیمُتِھیُس دی طرفوں، نگہباناں تے کلیسیا دے اِنتظام کرݨ آلیاں سمیت فِلپی دے سارے مُقدّساں دے ناں ہے جیہڑے یسُوع المسیح دے ہِن۔ ساڈے خُدا باپ تے خُداوند یسُوع مسیح دی طرفوں تُہاکُوں فضل تے اِطمینان حاصل تھیندا راہوے۔ مَیں جڈاں وی تُہاکُوں یاد کریندا ہاں، آپنڑے خُدا دا شُکر کریندا ہاں۔ تُہاڈے کیتے آپنڑی ہر دُعا ءچ مَیں بہُوں خوشی نال دُعا کریندا ہاں، اِیں واسطے جو تُساں پہلے ڈینہہ کنُوں اَج تئیں خوشخبری سُنڑاوݨ ءچ میڈے نال شریک ریہے ہیوے۔ تے میکُوں اِیں گالھ دا یقین ہے جو خُدا، جئیں تُساں لوکاں ءچ نیک کم شروع کیتے، او اُونکُوں یسُوع مسیح دے واپس آوݨ دے ڈینہہ تئیں پُورا کر ڈیسی۔ ایہ مناسب ہے جو میں تُہاڈے ساریاں دے بارے ءچ ایجھا خیال کراں، کیوں جو تُساں ہمیشاں میڈے دل ءچ راہندے ہیوے۔ تے بھانویں میں قید ءچ ہوواں یا خوشخبری دا دفاع تے تصدیق کریندا ہوواں، تُساں میڈے نال خُدا دے فضل ءچ شریک ہیوے۔ خُدا گواہ ہے جو میڈے دل ءچ تُہاڈے کیتے یسُوع مسیح جیہی محبت ہے تے مَیں تُساں ساریاں کُوں مِلنڑ دی سِک رکھیندا ہاں۔ میڈی دُعا ہے جو تُہاڈی محبت ودھدی ونجے تے تُساں علم تے ہر طرحاں دی سمجھ ءچ ودھدے ونجو، تاں جو تُساں پچھاݨ سگو جو کیہڑے گالھیں چنگیاں ہِن تے تُساں مسیح دے واپس آوݨ دے ڈینہہ تئیں صاف دل تے بے عیب راہو، تے یسُوع مسیح دے وسیلے نال راستبازی دے پھل نال بھریندے راہو۔ تے اِینویں خُدا دے جلال دی تعریف تھیوے۔ بِھراؤ! مَیں تُہاکُوں ڈساوݨ چاہندا ہاں جو جیہڑا کُجھ میڈے اُتے گُزرے او خوشخبری ودھاوݨ دا سبب بنڑیا ہے۔ اِتُھوں تئیں جو شاہی محل دے سارے سپاہیاں تے باقی لوکاں کُوں صاف پتا چل گئے جو مَیں مسیح دی خاطر قید ءچ ہاں۔ تے میڈے قید تھیوݨ دی وجہ کنُوں اکثر بِھرا خُداوند ءچ اِتُھوں تئیں دلیر تھی گئین جو او بے خوف تے جُرأت نال خُدا دا کلام سُنڑاوݨ لگے ہِن۔ بےشک کئی لوک تاں حسد تے پارٹی بازی دی وجہ کنُوں مسیح دی تبلیغ کریندے ہِن پر کئی نیک نیّتی نال۔ نیک نیّتی آلے تاں محبت دی وجہ تُوں تبلیغ کریندے ہِن، ایہ جاݨ تے جو میکُوں خوشخبری دے دفاع کیتے اِتھاں رکھیا گئے۔ پر ڈُوجھے خلوص دل نال نئیں بلکہ حسد دی وجہ کنُوں مسیح دی تبلیغ کریندے ہِن تاں جو قید ءچ میڈے ڈُکھ کُوں ودھاوݨ۔ پر کیا فرق پِیا، اہم گالھ ایہ ہے جو مسیح دی خوشخبری تاں سُنڑائی ویندی ہے بھانویں بُری نیّت نال یا نیک نیّت نال تے مَیں اِیں گالھ کنُوں خوش ہاں۔ تے مَیں خوش راہساں کیوں جو مَیں جانڑدا ہاں جو تُہاڈی دُعا تے یسُوع مسیح دے رُوح القُدس دی مدد نال اِیندا انجام میڈی رہائی ہوسی۔ میڈا یقین تے اُمید ایہ ہے جو میکُوں کہیں گالھ ءچ شرمندہ نہ تھیونڑا پوسی بلکہ جیہڑی کمال دلیری نال مسیح دا جلال میڈے سببّوں ماضی ءچ ہمیشاں ظاہر تھیندا ریہا ہے، اُونویں ای ہُنڑ وی ظاہر تھیسی، بھانویں مَیں زندہ راہواں یا مر وَنجاں۔ کیوں جو زندہ راہنڑ تاں میڈے کیتے مسیح ہے تے مرنڑا نفع۔ پر جے میڈا جِسمانی طور تے زندہ راہنڑ میڈے کم کیتے پھل دار ہوسی، تاں مَیں نئیں جانڑدا جو ڈُوہائیں ءچوں کِینکُوں چُنڑاں۔ مَیں اِنہاں ڈُوہائیں ءچ پھسیا پِیا ہاں۔ دل تاں چاہندے جو دُنیا کُوں چھوڑ تے مسیح دے کولھ وَنج راہاں کیوں جو ایہ زیادہ چنگا ہے۔ پر میڈا جِسمانی طور تے زندہ راہنڑ تُہاڈے کیتے زیادہ ضروری ہے۔ اِیں واسطے میکُوں اِیں گالھ دا بہُوں یقین ہے جو مَیں زندہ راہساں بلکہ تُساں ساریاں دے نال راہساں تاں جو تُساں اِیمان ءچ ترقی کرو تے خوش راہو۔ تے جِیں ویلے مَیں تُہاڈے کولھ ولا آساں تاں یسُوع مسیح ءچ تُہاڈی خوشی جیہڑی میڈے کیتے ہے مزید وی زیادہ تھی ویسی۔ کُجھ وی تھی ونجے، اِتنا ضرور کرو جو تُہاڈا چال چلنڑ مسیح دی خوشخبری دے لائق ہووے تاں جو بھانویں مَیں تُہاکُوں ڈیکھنڑ آواں یا نہ آواں، ضرور تُہاڈے بارے ءچ سُنڑاں جو تُساں ہِک رُوح ءچ قائم ہیوے تے ہِک جان تھی تے خوشخبری دے اِیمان کیتے بہُوں محنت کریندے پئے ہیوے۔ تے ایہ وی جو تُساں کہیں گالھ ءچ وی آپنڑے مخالفاں کنُوں خوف زدہ نئیں۔ ایہ اُنہاں کیتے تاں ہلاکت دا نشان، پر تُہاڈے کیتے نجات دا نشان ہے تے ایہ خُدا دی طرفوں ہے۔ کیوں جو تُہاڈے اُتے نہ صرف مسیح اُتے اِیمان گِھن آوݨ دا فضل تھئے بلکہ اُوندی خاطر ڈُکھ سہوݨ دا وی۔ تُساں وی اُونہئی تکلیفاں ءچ شامل ہیوے جیہڑیاں میکُوں برداشت کریندے ہوئے ڈِٹھا ہَوے تے ہُنڑ وی سُنڑدے ہیوے جو مَیں اُونویں ای کریندا پِیا ہاں۔ بس جے تُہاکُوں مسیح ءچ کُجھ حوصلہ تے اُوندی محبت کنُوں تسلی مِلدی ہے، تے جے رُوح القُدس دی شراکت ہے تے جے تُہاڈے ءچ رحمدلی تے ہمدردی پائی ویندی ہے، تاں میڈی خوشی اِینویں پُوری کرو جو ہِک ای سوچ رکھو، ہِکو جیہی محبت رکھو، ہِک جان تھیؤ تے یک دل راہو۔ خود غرضی تے غیر مناسب فخر کنُوں دُور راہو بلکہ حلیمی نال ہِک ڈُوجھے کُوں آپنڑے تُوں چنگا سمجھو۔ ہر کوئی صرف آپنڑے فائدے دا نئیں بلکہ ڈُوجھیاں دے فائدے دا وی خیال رکھے۔ تُہاڈا مزاج اُونویں ای ہووے جِینویں مسیح یسُوع دا ہا۔ بھانویں او خُدا دی صورت اُتے ہا ، وَل وی اُوں خُدا دے برابر ہووݨ کُوں آپنڑے قبضہ ءچ رکھنڑ دی چیز نہ سمجھیا۔ بلکہ آپنڑے آپ کُوں خالی کر ڈِتا، تے غُلام دی صورت اِختیار کر تے اِنساناں جِیہا بنڑ گِیا ۔ اُوں اِنسانی شکل ءچ ظاہر تھی تے آپنڑے آپ کُوں پست کر ڈِتا تے موت بلکہ صلیبی موت تئیں فرمانبرداری کیتی۔ اِیں واسطے خُدا اُونکُوں بہُوں ای اُچا مقام ڈِتا، تے اُونکُوں او ناں بخشیا جیہڑا ہر ناں کنُوں اعلیٰ ہے۔ تاں جو یسُوع دے ناں اُتے ہر ہِک گوڈا جُھکے، بھانویں او اسمان اُتے ہووے یا زمین اُتے یا زمین دے تلے۔ تے ہر زبان خُدا باپ دے جلال کیتے اِقرار کرے جو یسُوع مسیح ای خُداوند ہے۔ بس میڈے عزیزو، جِینویں تُساں ہمیشاں فرمانبرداری کیتی ہے، اُونویں ای ہُنڑ وی نہ صرف میڈی موجودگی ءچ بلکہ غیر موجودگی ءچ وی، ڈردے تے کمبدے ہوئے آپنڑی نجات دے کم کریندے راہو ۔ کیوں جو او خُدا ای ہے جیہڑا تُہاڈے ءچ آپنڑا نیک اِرادہ پُورا کرݨ دی نیّت تے طاقت پیدا کریندے۔ تے ہر کم بغیر شکایت تے بحث دے کیتا کرو۔ تاں جو تُساں بے اِلزام تے پاک تھی تے ٹیڑھے تے گُمراہ لوکاں ءچ خُدا دے بے عیب فرزند بنڑے راہو، جِنہاں دے وچال تُساں اسمان دے تاریاں وانگُوں چمکدے ہیوے۔ تے زندگی دا کلام پیش کریندے ہیوے تاں جو مسیح دے واپس آوݨ دے ڈینہہ میکُوں فخر ہووے جو نہ تاں میڈی بھج دھروک بیکار گئی تے نہ محنت بے فائدہ تھئی۔ جے تُہاڈی خدمت تے قُربانی اُتے جیہڑی اِیمان دی وجہ کنُوں ہے، میڈی جان وِیٹے ونجنڑ آلی نذر دے طور تے وِیٹی ونجے تاں وَل وی مَیں خوش ہاں تے تُساں ساریاں نال خوشی کریندا ہاں۔ اِینویں ای تُہاکُوں وی خوش تھی تے میڈی خوشی ءچ شریک تھیونڑا چاہیدے۔ میکُوں خُداوند یسُوع ءچ ایہ اُمید ہے جو تِیمُتِھیُس کُوں جلدی تُہاڈے کولھ بھیج ڈیساں تاں جو تُہاڈے بارے ءچ خبر سُنڑ تے میکُوں وی تسلی تھیوے۔ کیوں جو میڈے کولھ اُوندے جِیہا بِیا کوئی نئیں جیہڑا سچے دل نال تُہاڈی فِکر کریندا ہووے۔ سبھ آپنڑے آپنڑے گالھیں دی فِکر ءچ ہِن نہ جو یسُوع مسیح دی۔ پر تُساں تاں جانڑدے ہیوے جو تِیمُتِھیُس بھروسے دے لائق ثابت تھئے کیوں جو جِینویں پوتر پِیُو نال کم کریندے، اُونویں ای اُوں میڈے نال رَل تے خوشخبری دی تبلیغ کرݨ دی خدمت کیتی ہے۔ مَیں اُمید کریندا ہاں جو جِینویں ای میکُوں پتا چلسی جو میڈا کیا انجام تھیوݨ آلا ہے، مَیں اُونکُوں تُہاڈے کولھ بھیج ڈیساں۔ بلکہ میکُوں خُداوند اُتے بھروسا ہے جو مَیں وی جلدی آساں۔ پر مَیں اِپفُردِتُس کُوں تُہاڈے کولھ بھیجنڑ ضروری سمجھیا۔ او میڈا بِھرا، ہم خدمت، تے مسیح ءچ میڈے نال سپاہی بلکہ او تُہاڈا قاصد تے میڈیاں ضرورتاں پُوریاں کرݨ کیتے خدمت گُزار ہے۔ او تُہاڈے ساریاں نال مِلنڑ دی سِک رکھیندا تے پریشان وی ہا کیوں جو تُساں اُوندی بیماری دا حال سُنڑیا ہا۔ بے شک او اِتنا بیمار تھی گِیا ہا جو مرݨ آلا ہا پر خُدا اُوندے اُتے رحم کیتا تے نہ صرف اُوندے اُتے بلکہ میڈے اُتے وی، تاں جو میڈا ڈُکھ مزید نہ ودھے۔ اِیں واسطے میکُوں خیال آیا جو اُونکُوں جلدی بھیج ڈیواں تاں جو تُساں اُونکُوں ولا ڈیکھ تے خوش تھی ونجو تے میڈی پریشانی وی گھٹ ونجے۔ بس تُساں خُداوند ءچ وڈی خوشی نال اُوندا اِستقبال کرائے تے ایجھے لوکاں دی عزت کیتا کرو۔ کیوں جو او مسیح دی خدمت دی خاطر مرݨ آلا ہا۔ اُوں آپنڑی جان خطرے ءچ پا ڈِتی تاں جو او میڈی او خدمت کرے جیہڑی تُساں نہ کر سگے۔ غرض میڈے بِھراؤ! خُداوند ءچ خوش راہو۔ تُہاکُوں ایہ گالھ ولا ولا لِکھنڑ ءچ میکُوں تاں کوئی مسئلہ نئیں تے اِیندے ءچ تُہاڈا تحفظ ہے۔ اُنہاں کُتیاں کنُوں ہُشیار راہو، یعنی اُنہاں بدکاراں تے جِسم کٹواوݨ آلیاں کنُوں ۔ کیوں جو اصلی ختنہ کراوݨ آلے تاں اساں ہیں جیہڑے خُدا دے رُوح القُدس دی ہدایت نال عبادت کریندے تے مسیح یسُوع اُتے فخر کریندے ہیں تے جِسمانی گالھیں اُتے بھروسا نئیں کریندے، بھانویں جو مَیں تاں جِسمانی گالھیں اُتے بھروسا کر سگدا ہاں۔ جے کوئی جِسمانی گالھیں اُتے بھروسا کر سگدے تاں مَیں اُوں کنُوں وی زیادہ کر سگدا ہاں۔ اٹھویں ڈینہہ میڈا ختنہ تھیّا، مَیں اِسرائیلی قوم تے بِنیمِین دے قبیلہ ءچوں ہاں، عبرانیاں دا عبرانی۔ شریعت اُتے عمل کرݨ دے اعتبار نال مَیں فریسی ہاں، تے میں اِتنا غیرت مند ہم جو کلیسیا کُوں ستیندا ہم تے شریعت دی راستبازی دے اعتبار نال بے اِلزام ہم۔ پر جیہڑا کُجھ پہلے میڈے کیتے نفع دا سبب ہا، مَیں اُونکُوں مسیح دی خاطر نُقصان سمجھ گِھدے۔ بلکہ میڈے کیتے آپنڑے خُداوند یسُوع مسیح کُوں جانڑن اِتنی قیمتی گالھ ہے جو اُوندے مُقابلہ ءچ ڈُوجھیاں سبھ چیزاں کُوں نُقصان سمجھدا ہاں۔ اُوندی خاطر مَیں سبھ چیزاں دا نُقصان برداشت کیتے تے اُنہاں کُوں کُوڑا سمجھدا ہاں تاں جو مسیح کُوں حاصل کر گِھناں، تے اُوندے ءچ ہوواں۔ پر آپنڑی راستبازی دے سببّوں نئیں جیہڑی شریعت اُتے عمل کرݨ نال مِلدی ہے بلکہ اُوں راستبازی دے سببّوں جیہڑی مسیح اُتے اِیمان گِھن آوݨ دے نال مِلدی ہے۔ او راستبازی خُدا دی طرفوں تے اِیمان دے ذریعے مِلدی ہے۔ مَیں مسیح کُوں تے اُوندے زندہ تھیوݨ دی قُدرت کُوں جانڑنڑاں، اُوندے نال ڈُکھاں ءچ شریک تھیوݨ تے اُوندی موت ءچ اُوندے جِیہا بنڑنڑاں چاہندا ہاں، تاں جو کہیں طرحاں مُردیاں ءچوں زندہ تھیوݨ دے درجہ تئیں پُج ونجاں۔ میڈا مطلب ایہ نئیں جو مَیں ایہ سبھ کُجھ پا گِھدے یا کامِل تھی گِیا ہاں بلکہ مَیں او سبھ کُجھ پاوݨ کیتے بھجدا ویندا پِیا ہاں جیندے کیتے یسُوع مسیح میکُوں پکڑیا ہا۔ بِھراؤ! میں ایہ نئیں سمجھدا جو مَیں اُونکُوں پا گِھدے پر مَیں اِیہو ہِک گالھ کریندا ہاں جو جیہڑے چیزاں پِچُھوں رہ گئیاں ہِن اُنہاں کُوں بُھل تے اگُوں آلیاں چیزاں دو ودھدا ونجاں۔ مَیں سِدھا منزل دو بھجدا ویندا ہاں تاں جو او اِنعام حاصل کراں جیندے کیتے خُدا میکُوں یسُوع مسیح ءچ اسمان دو سڈیا ہے۔ اِیں واسطے ساڈے ءچوں جِتّی کامِل ہِن، اساں اِیہو خیال رکھوں۔ تے جے کہیں گالھ ءچ تُہاڈا بِیا خیال ہووے تاں خُدا اُونکُوں وی تُہاڈے اُتے ظاہر کر ڈیسی۔ بہرحال جِتھاں تئیں اساں پُج گئے ہیں، اُوندے مطابق زندگی گُزاروں۔ بِھراؤ! تُساں سارے میڈے نمونے اُتے ٹُرو تے اُنہاں لوکاں اُتے غور کرو جیہڑے ساڈے ڈِتے ہوئے نمونہ اُتے ٹُردے ہِن۔ کیوں جو جِینویں میں کئی پھیری تُہاکُوں آکھیا ہا تے ہُنڑ وی رو رو تے آدھا ہاں جو بہُوں سارے ایجھے ہِن جیہڑے آپنڑے چال چلنڑ نال مسیح دی صلیب دے دُشمنڑ ہِن۔ اُنہاں دا انجام ہلاکت ہے، اُنہاں دا پیٹ ای اُنہاں دا خُدا ہے۔ او آپنڑے شرم دے گالھیں اُتے فخر کریندے ہِن تے دُنیاوی چیزاں دے خیال ءچ لگے راہندے ہِن۔ پر ساڈی شہریت اسمان اُتے ہے تے اساں آپنڑے نجات ڈیوݨ آلے یعنی خُداوند یسُوع مسیح دے اُتھوں کنُوں واپس آوݨ دے اِنتظار ءچ ہیں۔ او آپنڑی طاقت نال سارے چیزاں کُوں آپنڑے تابع کر سگدے تے اِیں طاقت دے ذریعے او ساڈے پست حال بدن دی شکل بدل تے اُونکُوں آپنڑے بدن وانگُوں جلال آلا بنڑا ڈیسی۔ اِیں واسطے میڈے پیارے بِھراؤ، جِنہاں نال مِلنڑ دی مَیں سِک رکھیندا ہاں تے تُساں جیہڑے میڈی خوشی تے میڈا تاج ہیوے۔ میڈے عزیزو، خُداوند ءچ اِینویں ای قائم راہو۔ یُوؤدیہ تے سُنتخے ڈُوہائیں بھینڑیں دی میں مِنت کریندا ہاں جو تُساں خُداوند یسُوع ءچ یک دل راہو۔ تے میڈے سچے سنگتی، مَیں تیکُوں وی عرض کریندا ہاں جو اِنہاں عورتاں دی مدد کر، کیوں جو اُنہاں کلیمینس تے میڈے نال خدمت کرݨ آلے باقی لوکاں سمیت میڈے نال خوشخبری سُنڑاوݨ ءچ بہُوں محنت کیتی ہے۔ اِنہاں ساریاں دے ناں کتاب ِ حیات ءچ لِکھے ہِن۔ خُداوند ءچ ہر وقت خوش راہو۔ میں ولا آدھا ہاں جو خوش راہو۔ تُہاڈی نرم دِلی سارے لوکاں اُتے ظاہر تھیوے۔ یاد رکھو جو خُداوند آوݨ آلا ہے۔ کہیں گالھ دی فِکر نہ کرو، بلکہ ہر حالت ءچ دُعا تے مِنت دے ذریعے تُہاڈیاں درخاستاں خُدا دے سامنڑے شُکرگزاری نال پیش کیتیاں ونجنڑ۔ وَل خُدا دا اِطمینان جیہڑا سمجھ تُوں باہر ہے، تُہاڈے دِلاں تے خیالاں کُوں مسیح یسُوع ءچ محفوظ رکھیسی۔ بِھراؤ، آخری گالھ ایہ ہے جو جِتّی گالھیں سچیاں ہِن، جِتّی گالھیں شرافت دیاں ہِن، جِتّی گالھیں اِنصاف دیاں ہِن، جِتّی گالھیں پاک ہِن تے جِتّی گالھیں سوہنڑیاں تے چنگیاں لگدیاں ہِن یعنی جِتّی گالھیں نیک تے تعریف دے لائق ہِن، اُنہاں اُتے غور کریندے راہو۔ جیہڑا کُجھ تُساں میں تُوں سِکھیا، حاصل کیتا، سُنڑیا تے میڈے ءچ ڈِٹھا، اُوندے اُتے عمل کریندے راہو۔ تے خُدا جیہڑا اِطمینان دا چشمہ ہے تُہاڈے نال راہسی۔ مَیں خُداوند ءچ بہُوں خوش ہاں جو اِتنے عرصے بعد تُساں ولا میڈی فِکر کیتی ہے۔ بے شک تُہاکُوں پہلے وی فِکر ہئی پر تُہاکُوں کُجھ کرݨ دا موقع نہ مِلیا۔ مَیں ایہ کہیں ضرورت دی وجہ کنُوں نئیں آدھا کیوں جو مَیں ہر حالت ءچ خوش راہنڑ سِکھ گِھدے۔ مَیں تنگ حالی ءچ وی راہنڑ جانڑدا ہاں تے خوشحالی ءچ وی۔ ہر گالھ تے ہر حالت ءچ، رجیا ہویا تے بُکھ ءچ، امیری تے غریبی ءچ زندگی گُزارݨ سِکھیا ہے۔ مَیں یسُوع المسیح دے وسیلے جیہڑا میکُوں طاقت ڈیندے، سبھ کُجھ کر سگدا ہاں۔ وَل وی تُساں چنگا کیتے جو میڈی مُصیبت ءچ شامل تھئے۔ تُساں فِلپی دے راہنڑ آلیو چنگی طرحاں جانڑدے ہیوے جو خوشخبری دی خدمت دے شروع ءچ جِیں ویلے مَیں مَکِدُنیہ کنُوں روانہ تھیّا ہم تاں تُہاڈے علاوہ کہیں کلیسیا پیسے ڈیوݨ دے معاملے ءچ میڈی مدد نہ کیتی۔ جِیں ویلے مَیں تھِسّلُنِیکے شہر ءچ ہم تاں تُساں میڈیاں ضرورتاں کُوں پُورا کرݨ کیتے ہِک پھیری نئیں بلکہ کئی پھیری مدد کیتی۔ میں ایہ اِیں واسطے نئیں آدھا جو مَیں کوئی امداد چاہندا ہاں بلکہ مَیں ایہ چاہندا ہاں جو تُہاکُوں تُہاڈے نیک کماں دا اجر مِل ونجے۔ میڈے کولھ سبھ کُجھ ہے بلکہ ضرورت تُوں زیادہ ہے۔ تُہاڈیاں بھیجیاں ہوئیاں شیواں اِپفُردِتُس دے ہتُھوں گِھن تے میڈے کولھ بہُوں کُجھ تھی گئے۔ ایہ ہِک ایجھی خوشبودار تے مقبول قُربانی ہے جیہڑی خُدا کُوں پسند ہے۔ میڈا خُدا آپنڑے جلال آلی دولت ءچوں یسُوع مسیح دے ذریعے تُہاڈیاں ساریاں ضرورتاں پُوریاں کر ڈیسی۔ ساڈے خُدا تے باپ دی تمجید ہمیشاں تئیں تھیندی راہوے۔ آمین۔ اُتھاں دے سارے مُقدّساں کُوں مسیح یسُوع ءچ سلام آکھو۔ جیہڑے بِھرا میڈے نال ہِن، او تُہاکُوں سلام آدھے ہِن۔ اِتھاں دے سارے مُقدّس لوک، خاص طور تے قیصر بادشاہ دے گھر آلے تُہاکُوں سلام آدھے ہِن۔ خُداوند یسُوع مسیح دا فضل تُہاڈی رُوح نال راہوے۔ ایہ خط میں پولُس دی طرفوں ہے جیہڑا خُدا دی مرضی نال مسیح یسُوع دا رسُول ہاں تے بِھرا تِیمُتِھیُس دی طرفوں وی۔ ایہ اُنہاں مُقدّساں یعنی مسیح ءچ وفادار بِھرانواں دے ناں ہے جیہڑے کلُسے شہر ءچ ہِن۔ ساڈے خُدا باپ دی طرفوں تُہاکُوں فضل تے اِطمینان حاصل تھیندا راہوے۔ اساں جِیں ویلے وی تُہاڈے کیتے دُعا کریندے ہیں تاں ہمیشاں آپنڑے خُداوند یسُوع المسیح دے باپ، یعنی خُدا دا شُکر ادا کریندے ہیں کیوں جو اساں سُنڑیا ہے جو تُساں مسیح یسُوع اُتے اِیمان رکھیندے ہیوے تے سارے مُقدّساں نال محبت کریندے ہیوے۔ ایہ اُنہاں اُمید کیتیاں ہوئیاں برکتاں دی وجہ کنُوں ہے جیہڑیاں تُہاڈے کیتے اسمان اُتے رکھیاں ہِن تے جِیندا ذِکر تُساں خوشخبری دے سچے کلام ءچ پہلے سُنڑ گِھدے، جیہڑی تُہاڈے کولھ پُجی ہے۔ او ساری دُنیا ءچ اِینویں پھل ڈیندی تے ودھدی ویندی ہے، جِینویں تُہاڈے ءچ وی کریندی پئی ہے، اُوں ڈینہہ کنُوں جڈاں تُساں خُدا دے فضل دے بارے ءچ سُنڑیا تے اُونکُوں سچ جانڑیا۔ تُساں ایہ خوشخبری ساڈے نال خدمت کرݨ آلے پیارے بِھرا اِپفُردِتُس کنُوں سُنڑی جیہڑا تُہاڈی خاطر مسیح دا وفادار خادم ہے۔ اُوں ای ساکُوں اُوں محبت دے بارے ءچ ڈسایا جیہڑی رُوح القُدس تُہاڈے دِلاں ءچ پیدا کیتی ہے۔ اِیں واسطے جئیں ڈینہہ تُوں اساں ایہ سُنڑیا ہے، اساں تُہاڈے کیتے دُعا کریندے پئے ہیں۔ ساڈی درخاست ہے جو خُدا تُہاکُوں ساری حِکمت تے رُوحانی سمجھ دے ذریعے، آپنڑی مرضی دے علم نال بھر ڈیوے، تاں جو تُہاڈا چال چلنڑ خُداوند دے لائق ہووے تے اُونکُوں ہر طرحاں پسند آوے۔ تے تُساں ہر چنگے کم ءچ پھلدار بنڑو تے خُدا دی پچھاݨ ءچ ودھدے ونجو۔ تے تُساں اُوندے جلال آلی قُدرت دے مطابق ہر طرحاں دی طاقت ءچ مضبوط تھیندے ونجو تاں جو تُہاڈے ءچ خوشی نال بے حد برداشت تے صبر پیدا تھیوے، تے باپ دا شُکر کریندے راہو جئیں تُہاکُوں اِیں لائق بنڑائے جو نُور ءچ مُقدّساں دی میراث ءچ شریک تھیؤ۔ خُدا ساکُوں اندھارے دے قبضے ءچوں چُھڑا تے آپنڑے عزیز پوتر دی بادشاہی ءچ داخل کیتے، جیندے وسیلے نال ساکُوں مخلصی یعنی گُناہاں تُوں معافی مِلی ہے۔ مسیح اَن ڈِٹھے خُدا دی ظاہری صورت ہے تے ساری مخلوقات اُتے پلوٹھا ہے۔ اُوندے وسیلے سبھ چیزاں خلق تھئیاں، بھانویں او اسمان دیاں ہووݨ یا زمین دیاں، ڈِٹھیاں ہووݨ یا اَن ڈِٹھیاں، تخت ہووݨ یا طاقتاں، حکومتاں ہووݨ یا اِختیار۔ خُدا سبھ چیزاں کُوں مسیح دے وسیلے تے اُوندی خاطر پیدا کیتا۔ مسیح ساریاں چیزاں کنُوں پہلے ہے تے اُوندے ءچ سبھ چیزاں قائم راہندیاں ہِن۔ اُوہو بدن یعنی کلیسیا دا سر ہے۔ اُوہو مُنڈھ ہے تے مُردیاں ءچوں زندہ تھیوݨ آلیاں ءچوں پلوٹھا، تاں جو سارے گالھیں ءچ اُوندا درجہ پہلا ہووے۔ کیوں جو خُدا کُوں پسند آئے جو اُوندی پُوری فطرت تے خُوبیاں مسیح ءچ نظر آوݨ۔ اُوندی ایہ مرضی ہئی جو مسیح دے وسیلے سبھ چیزاں نال آپنڑی صُلح کر گِھنے بھانویں او اسمان دیاں ہووݨ یا زمین دیاں۔ اُوں مسیح دے خون دے وسیلے جیہڑا صلیب اُتے وہایا گِیا صُلح سلامتی قائم کیتی۔ ہِک وقت ہا جِیں ویلے تُساں خُدا کنُوں بہُوں دُور ہَوے تے آپنڑی بُری سوچ تے کماں دے سببّوں اُوندے دُشمنڑ ہَوے۔ پر ہُنڑ مسیح دی جِسمانی موت دے وسیلے نال اُوں تُہاڈے نال صُلح کر گِھدی ہے تاں جو تُہاکُوں پاک، بے عیب تے بے اِلزام بنڑا تے آپنڑے حضُور پیش کرے۔ پر شرط ایہ ہے جو تُساں آپنڑے اِیمان دی بنیاد اُتے مضبوطی نال قائم راہو تے خوشخبری دی اُوں اُمید کُوں نہ چھوڑو جیہڑی تُہاکُوں خوشخبری سُنڑن نال مِلی ہے۔ خوشخبری دی تبلیغ اسمان دے تلے ساری مخلوقات ءچ کیتی گئی ہے تے مَیں پولُس اُوندا خادم بنڑیا۔ ہُنڑ مَیں اُنہاں ڈُکھاں دے سببّوں خوش ہاں جیہڑے مَیں تُہاڈی خاطر چیندا پِیا ہاں کیوں جو مَیں مسیح دے بدن یعنی کلیسیا دی خاطر مسیح دیاں مُصیبتاں دی کمی کُوں آپنڑے بدن ءچ پُورا کریندا پِیا ہاں۔ خُدا میکُوں کلیسیا دا خادم بنڑا تے ایہ ذمہ داری تُہاڈی خاطر ڈِتی جو مَیں اُوندے کلام دی تبلیغ پُوری طرحاں کراں۔ یعنی او راز جیہڑا سارے زمانیاں تے نسلاں کنُوں لُکیا ریہا، پر ہُنڑ خُدا دے مُقدّساں اُتے ظاہر تھئے۔ خُدا اُنہاں اُتے ایہ ظاہر کرݨ چاہندا ہا جو او راز غیر قوماں کیتے کِتنا بیش قیمت تے جلال آلا ہے۔ تے او راز ایہ ہے جو مسیح جیہڑا جلال دی اُمید ہے، تُہاڈے ءچ راہندے۔ اساں مسیح دی تبلیغ کریندے ہیں تے کمال دانائی نال سارے لوکاں کُوں نصیحت کریندے تے تعلیم ڈیندے ہیں، تاں جو اساں ہر بندے کُوں مسیح ءچ رُوحانی طور تے بالغ بنڑا تے پیش کر سگوں۔ اِیں مقصد کیتے مَیں مسیح دی اُوں وڈی قُدرت نال سخت محنت کریندا ہاں، جیہڑی میڈے اُتے زور نال اثر کریندی ہے۔ مَیں تُہاکُوں ڈساوݨ چاہندا ہاں جو مَیں تُہاڈے کیتے تے لَودِیکیہ آلیاں کیتے بلکہ اُنہاں ساریاں اِیمانداراں کیتے جِنہاں میڈا چہرہ نئیں ڈِٹھا بہُوں محنت کریندا پِیا ہاں۔ تاں جو اُنہاں دے دِلاں کُوں حوصلہ تھیوے تے او آپس دی محبت ءچ ہِک ڈُوجھے نال بدھے راہوݨ، تے اعتماد دی ساری دولت کُوں پاوݨ جیہڑی پُوری سمجھ نال مِلدی ہے، تے خُدا دے راز کُوں پچھاݨ گِھننڑ جیہڑا مسیح خود ہے۔ جیندے ءچ حِکمت تے علم دے سارے خزانے لُکے ہوئے ہِن۔ ایہ مَیں اِیں واسطے آدھا ہاں جو کوئی تُہاکُوں مِٹھے مِٹھے پر کُوڑے دلیلاں نال گُمراہ نہ کر ڈیوے۔ بے شک مَیں بظاہر تُہاڈے نال اُتھاں موجود نئیں، وَل وی مَیں رُوحانی طور تے تُہاڈے نال ہاں تے ایہ ڈیکھ تے خوش ہاں جو تُساں ترتیب نال زندگی گُزریندے تے مسیح اُتے آپنڑے اِیمان ءچ قائم ہیوے۔ بس جِینویں تُساں مسیح یسُوع کُوں آپنڑا خُداوند قبول کر گِھدے، اُونویں ای اُوندے ءچ چلدے راہو۔ اُوندے ءچ جڑھ پکڑیندے تے تعمیر تھیندے ونجو تے جِینویں تُساں تعلیم گِھدی ہے اُونویں ای اِیمان ءچ مضبوط راہو تے خُدا دی بہُوں شُکرگزاری کیتا کرو۔ خبردار! کوئی بندہ تُہاکُوں اُنہاں فلسفیانہ تے بے فائدہ دوکھے آلے گالھیں دا شکار نہ کر گِھنے، جیہڑیاں اِنسانی روایتاں تے دُنیاوی اصُولاں دے مطابق ہِن نہ جو مسیح دے مطابق۔ کیوں جو مسیح ءچ خُدا دی ساری معمُوری ہِک جسمانی بدن ءچ راہندی ہے۔ تے تُساں مسیح ءچ معمُور تھی گئے ہیوے جیہڑا ہر حکُومت تے اِختیار دا سر ہے۔ مسیح ءچ آ تے تُہاڈا ایجھا ختنہ تھئے جیہڑا ہتھ نال نئیں بلکہ مسیح دے وسیلے تھئے، جیندے نال تُہاڈی پُرانڑی فطرت تُہاڈے تُوں اَنج کر ڈِتی گئی ہے۔ جِیں ویلے تُساں بپتسمہ گِھدا تاں تُساں مسیح دے نال دفن تھی گئے، تے تُساں اُوندے نال زندہ وی کیتے گئے کیوں جو تُساں خُدا دی قُدرت اُتے اِیمان گِھن آئے جئیں مسیح کُوں مُردیاں ءچوں زندہ کیتا۔ تُساں تاں آپنڑے گُناہاں دے سببّوں تے ختنہ نہ کراوݨ دے سببّوں مُردہ ہَوے، پر خُدا تُہاکُوں مسیح نال زندہ کیتے۔ اُوں ساڈے سارے گُناہ معاف کر ڈِتے تے حُکم عدُولی دے لِکھے ہوئے اِلزاماں کُوں مِٹا ڈِتا جیہڑے ساڈے خلاف ہَن، تے اُونکُوں صلیب اُتے کِیلاں نال جَڑ تے، ساڈے کنُوں دُور کر ڈِتا، تے حُکمراناں تے اِختیار آلیاں دے ہتھیاراں کُوں گِھن تے صلیب دے وسیلے اُنہاں اُتے فتح پائی تے اُنہاں دا کُھلے عام تماشا بنڑایا۔ اِیں واسطے کوئی وی تُہاکُوں کھاوݨ، پِیوݨ، عید مناوݨ، نویں چَن تے سبت دے بارے ءچ قصُوروار نہ کھڑاوے۔ ایہ تاں آوݨ آلیاں چیزاں دا صرف پرچھانواں ہِن، پر حقیقت تاں مسیح ہے۔ کوئی بندہ ظاہری پرہیزگاری تے فرشتیاں دی عبادت کرݨ نال تُہاکُوں اِنعام کنُوں محروم نہ کر ڈیوے۔ ایجھا بندہ رویا ڈیکھنڑ دے بارے ءچ گالھیں کریندا راہندے تے آپنڑی جِسمانی سوچ نال بِلاوجہ پُھلیا ہوندے۔ او مسیح کُوں جیہڑا بدن دا سر ہے پکڑی نئیں رکھیا، جیندے نال سارا بدن پرورش پا تے، تے جوڑاں تے پٹھیاں دے ذریعے آپس ءچ جُڑ تے خُدا دی مدد نال ودھدا ویندے۔ جے تُساں مسیح نال مر تے دُنیاوی اصُولاں کنُوں آزاد تھی گئے ہیوے تاں ہُنڑ دُنیا آلیاں وانگُوں زندگی کیوں گُزریندے پئے ہیوے؟ ایجھے دُنیاوی حُکماں دے کیوں پابند تھیندے ہیوے مثلاً ”اِینکُوں ہتھ نہ لاؤ، اِینکُوں نہ چکھو تے نہ جھلّو؟“ ایہ ساریاں چیزاں اِستعمال تھی تے فنا تھی ویندیاں ہِن تے ایہ صرف اِنسانی حُکم تے تعلیم ہِن۔ ایہ حُکم ڈیکھنڑ ءچ حِکمت آلے تاں لگدے ہِن کیوں جو اُنہاں ءچ خود بنڑائے ہوئے مذہبی اعمال تے پرہیزگاری تے جِسم کُوں ڈُکھ ڈیونڑ اُتے زور ڈِتا گئے پر جِسمانی خواہشاں اُتے قابو پاوݨ ءچ اُنہاں کنُوں کوئی مدد نئیں مِلدی۔ تُساں مسیح نال زندہ کیتے گئے، اِیں واسطے اُنہاں چیزاں دی خواہش ءچ راہو جیہڑیاں اسمان اُتے ہِن، جِتھاں مسیح خُدا دے سجے پاسُوں بیٹھے۔ اسمان دیاں چیزاں دے خیال ءچ راہو نہ جو زمین دیاں چیزاں دے۔ کیوں جو تُساں مر گئے تے تُہاڈی زندگی مسیح دے نال خُدا ءچ لُکی ہوئی ہے۔ جِیں ویلے مسیح جیہڑا تُہاڈی زندگی ہے، ظاہر تھیسی تاں تُساں وی اُوندے نال جلال ءچ ظاہر تھیسو۔ بس تُساں آپنڑیاں دُنیاوی خواہشاں کُوں ختم کر ڈیؤ یعنی زِنا کاری، ناپاکی، شہوت پرستی، بُریاں خواہشاں تے لالچ کُوں جیہڑا بُت پرستی دے برابر ہے۔ کیوں جو اُنہاں دی وجہ تُوں خُدا دا غضب نافرماناں اُتے نازل تھیندے۔ ہِک وقت ہا جڈاں تُساں وی آپنڑی پُرانڑی زندگی ءچ اِنہاں دے مطابق چلدے ہَوے۔ پر ہُنڑ تُساں اِنہاں ساریاں کُوں چھوڑ ڈیؤ یعنی کاوڑ، ناراضگی، بُغض، بدگوئی، تے آپنڑے مُنہ کنُوں مندھے کڈھنڑ۔ ہِک ڈُوجھے نال کُوڑ نہ بولو کیوں جو تُساں آپنڑی پُرانڑی فطرت کُوں اُوندے کماں سمیت لہا ڈِتے۔ تے نوِیں فطرت کُوں کپڑے وانگُوں پا گِھدے، جیہڑی علم حاصل کریندے ہوئے آپنڑے خالق دی صورت اُتے نویں بنڑ دی ویندی ہے۔ اِیں نوِیں زندگی ءچ نہ تاں کوئی یہُودی ریہا، نہ یُونانی، نہ ختنے آلا نہ بغیر ختنے آلا، نہ جنگلی نہ وحشی، نہ غُلام نہ آزاد، صرف مسیح ای سبھ کُجھ تے ساریاں ءچ ہے۔ تُساں خُدا دے چُنڑے ہوئے، پاک تے عزیز لوک ہیوے، اِیں واسطے رحم، ہمدردی، فروتنی، نرمی تے صبر دے کپڑے پا گِھنو۔ ہِک ڈُوجھے دی برداشت کرو تے جے کوئی شکایت ہووے تاں ہِک ڈُوجھے کُوں معاف کرو۔ جِینویں خُداوند تُہاکُوں معاف کیتے، اُونویں ای تُساں وی معاف کرو۔ تے اُنہاں ساریاں خُوبیاں تُوں ودھ تے محبت کُوں پا گِھنو جیہڑی سبھ کُوں مکمل طور تے اتحاد ءچ بدھی رکھیندی ہے۔ تے مسیح دے اِطمینان کُوں آپنڑے دِلاں اُتے حکُومت کرݨ ڈیؤ، کیوں جو تُساں ہِک بدن ہوندے ہوئے صُلح نال راہوݨ کیتے سڈے گئے ہیوے، تے تُساں شُکر گُزار راہو۔ مسیح دے کلام کُوں آپنڑے دِلاں ءچ مکمل طور تے وسنڑ ڈیؤ تے کمال حِکمت دے نال ہِک ڈُوجھے کُوں تعلیم ڈیؤ تے نصیحت کرو۔ تے آپنڑے دِلاں ءچ شُکرگزاری کریندے ہوئے خُدا کیتے زبُور، حمد تے رُوحانی گیت گاؤ۔ تے جیہڑا کُجھ تُساں آدھے یا کریندے ہیوے خُداوند یسُوع دے ناں نال کرو تے اُوندے وسیلے نال خُدا باپ دا شُکر ادا کرو۔ ذالو، جِینویں خُداوند ءچ مناسب ہے، آپنڑے پایاں دے تابع راہو۔ پایو، آپنڑیاں ذالاں نال محبت رکھو تے اُنہاں نال سختی نال پیش نہ آؤ۔ بالو، ہر گالھ ءچ ماء پِیُو دے فرمانبردار راہو کیوں جو خُداوند کُوں ایہ پسند ہے۔ اولاد آلیو، آپنڑے بالاں اُتے اِتی سختی نہ کرو جو او بے دل تھی ونجنڑ۔ نوکرو، آپنڑے دُنیاوی مالکاں دے ہر گالھ ءچ فرمانبردار راہو، لوکاں کُوں خوش کرݨ آلیاں آلی کار صرف ڈِکھاوے کیتے نئیں بلکہ خلوص دِلی تے خُدا دے خوف نال۔ جیہڑا کم کرو اُونکُوں دل نال کرو، جِینویں جو خُداوند کیتے کریندے ہیوے، نہ جو کہیں اِنسان کیتے۔ کیوں جو تُساں جانڑدے ہیوے جو تُہاکُوں اِیندے بدلہ ءچ خُداوند دی طرفوں میراث مِلسی۔ تُساں آپنڑے خُداوند مسیح دی خدمت کریندے پئے ہیوے۔ پر بُرائی کرݨ آلا آپنڑی بُرائی دا بدلہ پے سی کیوں جو خُدا کہیں دی طرفداری نئیں کریندا۔ مالکو! آپنڑے نوکراں نال عدل تے اِنصاف نال پیش آؤ کیوں جو تُساں جانڑدے ہیوے جو اسمان اُتے تُہاڈا وی ہِک مالک ہے۔ شُکرگزاری تے بیداری نال دُعا کرݨ ءچ مصروف راہو۔ تے ساڈے کیتے وی دُعا کرو جو خُدا ساڈے کیتے کلام سُنڑاونڑ دا دروازہ کھول ڈیوے تاں جو مَیں مسیح دے راز دی تبلیغ کر سگاں جیندی وجہ کنُوں قید ءچ ہاں۔ تے دُعا کرو جو مَیں اُونکُوں اِینویں صاف ظاہر کراں جِینویں میکُوں کرݨ چاہیدے۔ ہر موقع کُوں چنگی طرح استعمال کریندے ہوئے غیر اِیمانداراں نال ہوشیاری نال پیش آؤ۔ تُہاڈی گُفتگو ایجھی فضل نال بھری تے سوہنڑی ہووے، جو تُہاکُوں ہر بندہ کُوں مناسب جواب ڈیونڑ آ ونجے۔ عزیز بِھرا تخِکُس جیہڑا وفادار خادم تے خُداوند دی خدمت ءچ میڈا ساتھی ہے میڈا سارا حال تُہاکُوں ڈسا ڈیسی۔ مَیں اُونکُوں اِیں مقصد کیتے بھجیندا پِیا ہاں جو تُہاکُوں ساڈی خبر مِل ونجے تے او تُہاکُوں حوصلہ ڈیوے۔ اُوندے نال اُنیسمُس کُوں وی بھجیندا پِیا ہاں۔ او وفادار تے عزیز بِھرا ہے بلکہ تُہاڈے ءچوں ای ہے۔ ایہ ڈوہائیں تُہاکُوں اِتُھوں دے سارے گالھیں ڈسا ڈیسن۔ ارِسترخُس جیہڑا میڈے نال قید ءچ ہے تے مرقس جیہڑا برنباس دا رشتے دار ہے، تُہاکُوں سلام آدھے۔ تُہاکُوں مرقس کیتے ہدایت ڈِتی گئی ہے جو جے او تُہاڈے کولھ آوے تاں اُونکُوں خوشی نال قبول کرائے۔ تے یسُوع وی جیہڑا یُوستُس اکھویندے تُہاکُوں سلام آدھے۔ یہُودی اِیمانداراں ءچوں صرف اِیہو ترے بندے خُدا دی بادشاہی دے پیغام دی تبلیغ کرݨ ءچ میڈے ہم خدمت تے میڈی تسلی دا سبب ریہے ہِن۔ اِپَفراس جیہڑا تُہاڈے ءچوں ہے تے مسیح یسُوع دا خادم ہے تُہاکُوں سلام آدھے۔ او بہُوں محنت نال تُہاڈے کیتے دُعا کریندے جو تُساں خُدا دی پُوری مرضی ءچ کامِل تے پُورے اعتقاد نال ثابت قدم راہو۔ مَیں اُوندے حق ءچ گواہی ڈیندا ہاں جو او تُہاڈے کیتے تے لَودِیکیہ تے ہِیراپُلس دے اِیمانداراں کیتے بہُوں محنت کریندے۔ پیارا طبیب لُوقا تے دیماس تُہاکُوں سلام آدھے ہِن۔ لَودِیکیہ دے بِھرانواں تے نُمفاس بھینڑ تے اُوندے گھر ءچ جمع تھیوݨ آلی کلیسیا کُوں سلام اکھائے۔ جِیں ویلے تُساں ایہ خط پڑھ گِھنو تاں ایہ لَودِیکیہ دی کلیسیا ءچ وی پڑھیا ونجے، تے جیہڑا خط لَودِیکیہ دی کلیسیا دے ناں ہے اُونکُوں وی تُساں پڑھ گِھنائے۔ اَرخِپُس کُوں اکھائے جو جیہڑی خدمت خُداوند ءچ اُوندے سپُرد تھئی ہے اُونکُوں ہوشیاری نال پُورا کرے۔ مَیں پولُس آپنڑے ہتھ نال تُہاکُوں سلام لِکھدا پِیا ہاں۔ میڈے زنجیراں کُوں یاد رکھائے۔ خُدا دا فضل تُہاڈے نال راہوے۔ ایہ خط پولُس، سِیلاس تے تِیمُتِھیُس دی طرفوں تھِسّلُنِیکے دی کلیسیا دے ناں ہے جیہڑی خُدا باپ تے خُداوند یسُوع المسیح ءچ ہے۔ فضل تے اِطمینان تُہاکُوں حاصل تھیندا راہوے۔ تُساں ساریاں کیتے اساں ہمیشاں خُدا دا شُکر ادا کریندے ہیں، تے آپنڑیاں دُعاواں ءچ ہر ویلے تُہاکُوں یاد رکھیندے ہیں۔ اساں تُہاڈے کم جیہڑے اِیمان دی وجہ کنُوں ہِن، تے تُہاڈی محنت جیہڑی محبت دا نتیجہ ہے، تے تُہاڈے صبر کُوں جیہڑا ساڈے خُداوند یسُوع المسیح اُتے اُمید رکھنڑ دے سببّوں تُہاڈے ءچ پیدا تھئے، آپنڑے خُدا تے باپ دی حضُوری ءچ یاد کریندے ہیں۔ عزیز بِھراؤ، تے خُدا دے پیاریو، اساں جانڑدے ہیں جو تُساں خُدا دے چُنڑے ہوئے ہیوے۔ کیوں جو ساڈی خوشخبری صرف لفظاں نال نئیں بلکہ قُدرت، رُوح القُدس تے پُورے یقین نال تُہاڈے تئیں پُجی ہے۔ تُساں جانڑدے ہیوے جو اساں تُہاڈے وچال تُہاڈی خاطر کِینویں زندگی گُزریندے ہسے۔ بھانویں سخت مُصیبت آئی، وَل وی تُساں کلام کُوں رُوح القُدس دی ڈِتی ہوئی خوشی نال قبول کر تے ساڈے تے خُداوند دے نمونے اُتے چلنڑ آلے بنڑ گئے۔ اِینویں تُساں مَکِدُنیہ تے اَخیہ دے سبھ اِیمانداراں کیتے نمونہ بنڑ گئے۔ خُداوند دا پیغام تُہاڈے وسیلے نہ صرف مَکِدُنیہ تے اَخیہ ءچ پھیل گِیا، بلکہ تُہاڈا اِیمان جیہڑا خُدا اُتے ہے، اُوندی خبر ہر جاہ ایجھی پھیل گئی ہے جو ہُنڑ ساڈے آکھنڑ دی کوئی ضرورت کائنی۔ کیوں جو لوک خود ڈسیندے ہِن جو جِیں ویلے اساں تُہاڈے کولھ آئے تاں تُساں کِینویں خوشی نال ساڈا اِستقبال کیتا، تے کِینویں بُتاں کُوں چھوڑ تے زندہ تے برحق خُدا دی عبادت کرݨ کیتے اُوندے دو آئے، تے ایہ وی جو تُساں اُوندے پوتر دے اسمان کنُوں آوݨ دا اِنتظار کریندے ہیوے، یعنی یسُوع جِینکُوں خُدا مُردیاں ءچوں زندہ کیتا تے جیہڑا ساکُوں آوݨ آلے غضب کنُوں بچیندے۔ بِھراؤ! تُساں خود جانڑدے ہیوے جو ساڈا تُہاڈے کولھ آوݨ بے فائدہ نہ تھیّا۔ بلکہ جِینویں تُساں جانڑدے ہیوے، اساں فِلپی ءچ ڈُکھ چاتے تے بہُوں بے عزت تھئے۔ وَل وی ساکُوں آپنڑے خُدا ءچ دلیری تھئی جو خُدا دی خوشخبری بہُوں مخالفت دے باوجود تُہاکُوں سُنڑاؤں۔ کیوں جو ساڈی نصیحت نہ گُمراہی دے سببّوں، تے نہ ناپاک مقصد دے سببّوں تے نہ چلاکی دے سببّوں ہے۔ بلکہ جِینویں خُدا ساکُوں مقبول بندے سمجھ تے خوشخبری ساڈے سپُرد کیتی ہے، اُونویں ای اساں خوشخبری بیان کریندے ہیں۔ اساں آدمیاں کُوں نئیں بلکہ خُدا کُوں خوش کرݨ چاہندے ہیں جیہڑا ساڈے دِلاں کُوں پرکھدے۔ تُساں جانڑدے ہیوے جو اساں کڈھائیں وی خوشامد نئیں کیتی تے نہ لالچ نال کلام کیتے، خُدا اِیندا گواہ ہے۔ اساں آدمیاں دی تعریف دے مُتھاج نئیں نہ ای تُہاڈی نہ بئے دی، بھانویں اساں مسیح دے رسُول ہووݨ دی حیثیت نال تُہاڈے اُتے آپنڑا بھار سَٹ سگدے ہسے۔ اِیندے بجائے، جِینویں ہِک ماء آپنڑے بالاں دی نرمی نال ڈیکھ بھال کریندی ہے اُونویں ای اساں وی تُہاڈے وچال نرمی نال ریہے۔ تُہاڈے کیتے ساڈی محبت اِتنی ہئی جو اساں نہ صرف خُدا دی خوشخبری سُنڑاونڑ بلکہ تُہاکُوں آپنڑی جان ڈے ڈیوݨ تئیں راضی ہسے کیوں جو تُساں ساکُوں بہُوں عزیز ہَوے۔ بِھراؤ! ساڈی او سخت محنت تُہاکُوں ضرور یاد آندی ہوسی۔ اساں خُدا دی خوشخبری سُنڑیندے ہوئے ڈینہہ رات آپنڑے ہتھاں نال کم کریندے ہسے تاں جو کہیں اُتے بھار نہ بنڑوں۔ تُساں وی گواہ ہیوے تے خُدا وی گواہ ہے جو تُساں اِیمان گِھن آوݨ آلیاں نال ساڈا چل چلنڑ کیجھا پاک، راست تے بے عیب ریہا۔ تُساں جانڑدے ہیوے جو جِیہا سلوک ہِک پِیُو آپنڑے بالاں نال کریندے، اُونویں ای اساں وی تُہاڈے نال کریندے ریہے۔ اساں ہر ہِک کُوں نصیحت تے تسلی ڈیندے ریہے تے سمجھیندے ریہے جو تُساں خُدا دے لائق زندگی گُزارو، جئیں تُہاکُوں آپنڑی بادشاہی تے جلال ءچ شریک تھیوݨ کیتے سڈیا ہے۔ اساں ہمیشاں اِیں واسطے وی خُدا دا شُکر ادا کریندے ہیں جو جِیں ویلے تُساں خُدا دے پیغام کُوں ساڈی زبانی سُنڑیا تاں اُونکُوں آدمیاں دا کلام سمجھ تے نئیں بلکہ جِینویں او حقیقت ءچ ہے اُونکُوں خُدا دا کلام سمجھ تے قبول کیتا۔ تے او کلام تُساں اِیمان گِھن آوݨ آلیاں ءچ اثر وی کریندا پِیا ہے۔ کیوں جو بِھراؤ، تُساں وی خُدا دیاں اُنہاں کلیسیاواں وانگُوں بنڑ گئے جیہڑیاں یہُودیہ صوبے ءچ مسیح یسُوع ءچ ہِن۔ کیوں جو تُساں آپنڑے ہم وطناں دے ہتُھوں اُوہو تکلیفاں چاتیاں جیہڑیاں اُنہاں یہُودیاں کنُوں چاتیاں ہَن۔ یہُودیاں خُداوند یسُوع کُوں تے نبیاں کُوں وی مار سٹیا تے ساکُوں وی بہُوں ستایا۔ او لوک خُدا کُوں پسند نئیں، تے سارے لوکاں دے دُشمنڑ ہِن، کیوں جو او ساکُوں غیر قوماں کُوں خُدا دا کلام سُنڑاوݨ کنُوں روکیندے ہِن تاں جو او نجات نہ پاوݨ۔ اِینویں اُنہاں دے گُناہاں دا پیالہ بھریندا راہندے۔ پر آخر خُدا دا غضب اُنہاں اُتے نازل تھی گِیا۔ بِھراؤ! جِیں ویلے اساں تھوڑے عرصے کیتے تُہاڈے کنُوں اَنج تھئے ہسے، بےشک جِسمانی طور تے نہ جو دِلی طور تے، تاں تُہاڈے نال ولا مِلنڑ کیتے بہُوں بے چین ہسے۔ اِیں واسطے اساں تُہاڈے کولھ آوݨ چاہندے ہسے خاص طور تے مَیں پولُس ولا ولا کوشش کیتی، پر شیطان ساکُوں روکی رکھیا۔ آخر ساڈی اُمید تے خوشی تے فخر دا تاج کیا ہے؟ خُداوند یسُوع دے واپس آوݨ ویلے جڈاں اساں اُوندے سامنڑے پیش تھیسوں تاں ساڈی اُمید یا خوشی یا او تاج جیندے اُتے اساں فخر کریسوں، کیا او تُساں ای نئیں؟ یقیناً ساڈا جلال تے ساڈی خوشی تُساں ای تاں ہیوے۔ اِیں واسطے جِیں ویلے اساں مزید برداشت نہ کر سگے تاں بہتر سمجھیا جو اساں اتھینے ءچ کلھے راہوں، تے تِیمُتِھیُس کُوں، جیہڑا ساڈا بِھرا تے مسیح دی خوشخبری دی تبلیغ ءچ خُدا دا خادم ہے، تُہاڈے کولھ بھیجیا تاں جو تُہاکُوں مضبوط کرے تے اِیمان ءچ تُہاڈا حوصلہ ودھاوے، تاں جو اِنہاں مُصیبتاں دے سببّوں کوئی گھبرا نہ ونجے، کیوں جو تُساں خود جانڑدے ہیوے جو اساں اِنہاں کیتے مقرر کیتے گئے ہیں۔ جِیں ویلے اساں تُہاڈے کولھ ہسے تاں تُہاکُوں ڈسیندے راہندے ہسے جو اساں تکلیفاں چیسوں۔ تے تُساں جانڑدے ہیوے جو اِینویں ای تھیّا۔ اِیں واسطے جڈاں مَیں مزید برداشت نہ کر سگیا تاں تُہاڈے اِیمان دا حال پتا کرݨ کیتے تِیمُتِھیُس کُوں بھیجیا، کِتھائیں اِینویں نہ تھیوے جو شیطان تُہاکُوں ازمایا ہووے تے ساڈی محنت بے فائدہ تھی گئی ہووے۔ پر ہُنڑ تِیمُتِھیُس تُہاڈے کولُھوں اِتھاں وَل آیا ہے تے تُہاڈے اِیمان تے محبت دے بارے ءچ چنگی خبر ڈِتی ہے۔ اُوں ڈسائے جو تُساں ہمیشاں ساکُوں پیار نال یاد کریندے ہیوے تے ساکُوں مِلنڑ دی ایجھی سِک رکھیندے ہیوے جِینویں اساں تُہاڈے کیتے رکھیندے ہیں۔ اِیں واسطے بِھراؤ! اساں آپنڑی ساری تنگی تے مُصیبت ءچ تُہاڈے اِیمان دی وجہ تُوں تُہاڈے بارے ءچ تسلی پاتی۔ ساڈی جان تازہ تھی گئی ہے کیوں جو تُساں خُداوند یسُوع ءچ قائم ہیوے۔ جیہڑی خوشی تُہاڈی وجہ تُوں ساکُوں خُدا دے حضُور حاصل تھئی ہے، اُوندے بدلے ءچ اساں خُدا دا جِتنا وی شُکر ادا کرُوں گھٹ ہوسی۔ اساں ڈینہہ رات بہُوں دُعا کریندے ہیں جو تُہاکُوں مِلُوں تے تُہاڈے اِیمان دی کمی کُوں پُورا کر ڈیؤں۔ ہُنڑ ساڈا خُدا تے باپ خود، تے ساڈا خُداوند یسُوع تُہاڈے دو ساڈی راہنمائی کرے۔ خُداوند کرے جو جِینویں ساکُوں تُہاڈے نال محبت ہے اُونویں ای تُہاڈی محبت وی آپس ءچ تے سبھ لوکاں نال ودھدی ونجے۔ او تُہاڈے دِلاں کُوں ایجھا مضبوط کرے جو جِیں ویلے ساڈا خُداوند یسُوع آپنڑے سارے مُقدّساں نال آوے تاں تُہاڈے دل ساڈے خُدا تے باپ دے سامنڑے پاک تے بے عیب ہووݨ۔ ہِک آخری گالھ ایہ ہے بِھراؤ، اساں تُہاکُوں سِکھایا ہے جو خُدا کُوں راضی کرݨ کیتے کِینویں زندگی گُزارنڑی چاہیدی ہے تے تُساں اِینویں کریندے وی ہیوے۔ ہُنڑ اساں خُداوند یسُوع ءچ تُہاڈی مِنت کریندے تے نصیحت کریندے ہیں جو اِینویں کرݨ ءچ مزید ترقی کرو۔ کیوں جو تُساں جانڑدے ہیوے جو اساں خُداوند یسُوع دی طرفوں تُہاکُوں کیا کیا حُکم ڈِتے۔ خُدا دی مرضی ایہ ہے جو تُساں پاک راہو تے زِناکاری کنُوں بچے راہو۔ تے تُہاڈے ءچوں ہر ہِک پاک تے باعزت طریقے نال آپنڑے جِسم کُوں قابو ءچ رکھنڑ جانڑے۔ اُنہاں قوماں وانگُوں شہوت پرستی ءچ زندگی نہ گُزارو، جیہڑیاں خُدا کُوں نئیں جانڑدیاں۔ تے اِیں معاملے ءچ کوئی وی آپنڑے بِھرا کُوں دوکھا نہ ڈیوے یا اُوندے نال زیادتی نہ کرے۔ خُداوند ایجھے کم کرݨ آلیاں کُوں سزا ڈیسی جِینویں جو اساں تُہاکُوں پہلے ای ڈسا تے خبردار کر ڈِتے۔ کیوں جو خُدا ساکُوں ناپاکی کیتے نئیں بلکہ پاکیزگی کیتے سڈیا ہے۔ اِیں واسطے جیہڑا ایہ ہدایت نئیں منیندا او اِنسان کُوں نئیں بلکہ خُدا کُوں رَد کریندے، جیہڑا تُہاکُوں رُوح القُدس عطا کریندے۔ ہُنڑ برادرانہ محبت دے بارے ءچ کُجھ لِکھنڑ دی ضرورت نئیں کیوں جو خُدا خود تُہاکُوں ہِک ڈُوجھے نال محبت کرݨ سِکھائے، تے تُساں مَکِدُنیہ دے سبھ بِھرانواں نال محبت کریندے ہیوے۔ وَل وی بِھراؤ! اساں تُہاکُوں نصیحت کریندے ہیں جو اِیندے ءچ بِیا وی ترقی کریندے راہو۔ تے جِینویں اساں تُہاکُوں ہدایت کیتی ہے، ہر بندہ چُپ چاپ رہ تے آپنڑے کم ءچ لگا راہوے تے آپنڑے ہتھ نال محنت کر تے روٹی کماوݨ دی کوشش کرے۔ اِینویں تُساں باہر آلیاں دے سامنڑے عزت دی زندگی گُزریسو تے کہیں چیز دے مُتھاج نہ راہسو۔ بِھراؤ! اساں نئیں چاہندے جو تُساں اُنہاں اِیمانداراں دے حال دے بارے ءچ ناواقف راہو جیہڑے سَم گئے ہِن، تاں جو تُساں اُنہاں وانگُوں غم نہ کرو جِنہاں کُوں کوئی اُمید نئیں۔ کیوں جو جڈاں ساکُوں یقین ہے جو یسُوع مر گِیا تے ولا زندہ تھی گِیا، تاں ساکُوں اِیندا وی یقین ہے جو خُدا اُنہاں کُوں وی جیہڑے مسیحی ہوندے ہوئے سَم گئے ہِن، یسُوع نال ولا گِھن آسی۔ اساں خُداوند دی طرفوں تُہاکُوں آدھے ہیں جو اساں جیہڑے زندہ ہیں تے خُداوند دے آوݨ تئیں باقی راہسوں، اُنہاں کنُوں پہلے ہرگز اُونکُوں نہ مِلسُوں جیہڑے پہلے سَم گئے ہِن۔ کیوں جو خُداوند خود وڈی اُچی اواز ءچ ہِک حُکم نال تے سردار فرشتہ دی اواز تے خُدا دے نرسِنگے دے وجائے ونجنڑ دے نال اسمان تُوں تلے لہہ آسی۔ تے پہلے تاں او جیہڑے مسیح ءچ مر گئے ہِن زندہ تھی ویسن۔ وَل اساں جیہڑے باقی ہیں اُنہاں دے نال بدلاں اُتے چا گِھدے ویسوں تاں جو ہوا ءچ خُداوند دا اِستقبال کرُوں تے اِینویں ہمیشاں اُوندے نال راہسوں۔ اِیں واسطے تُساں اِنہاں گالھیں نال ہِک ڈُوجھے کُوں تسلی ڈِتا کرو۔ بِھراؤ! ساکُوں ایہ سبھ کُجھ تھیوݨ دے وقت تے تاریخاں دے بارے ءچ لِکھنڑ دی لوڑ کائنی کیوں جو تُساں چنگی طرحاں جانڑدے ہیوے جو خُداوند دے واپس آوݨ دا ڈینہہ اِینویں آوݨ آلا ہے جِینویں چور رات کُوں آندے۔ جِیں ویلے لوک اکھیندے ہوسن جو ”ہُنڑ امن تے سلامتی ہے“ اُوں ویلے ہلاکت اِینویں اچانک آ ویسی جِینویں حاملہ عورت کُوں بال جمنڑ دے درد شروع تھی ویندن تے او اصلُوں نہ بچسن۔ پر بِھراؤ! تُساں اندھارے ءچ نئیں جو او ڈینہہ چور وانگُوں تُہاڈے اُتے آ پووے۔ کیوں جو تُساں سارے نُور دے فرزند تے ڈینہہ دے فرزند ہیوے۔ اساں نہ رات دے ہیں نہ اندھارے دے۔ اِیں واسطے اساں ڈُوجھیاں وانگُوں سُتے نہ راہوں بلکہ جاگدے تے ہوشیار راہوں۔ کیوں جو جیہڑے سَمدے ہِن او رات کُوں ای سَمدے ہِن تے جیہڑے پی تے مست تھیندے ہِن او وی رات کُوں ای تھیندے ہِن۔ پر اساں ڈینہہ دے فرزند ہیں، اِیں واسطے ساکُوں چاہیدے جو اِیمان تے محبت دا سینہ بند لا تے، تے نجات دی اُمید دا جنگی ٹوپ پا تے ہوشیار راہوں۔ کیوں جو خُدا ساکُوں اِیں واسطے نئیں چُنڑیا جو ساڈے اُتے غضب نازل تھیوے بلکہ اِیں واسطے جو اساں آپنڑے خُداوند یسُوع مسیح دے وسیلے نال نجات حاصل کرُوں۔ مسیح ساڈی خاطر اِیں واسطے جان ڈِتی جو اساں اُوندے نال زندہ راہوں، بھانویں اُوندی آمد دے ڈینہہ موئے ہوؤں یا زندہ، اِیں واسطے تُساں ہِک ڈُوجھے دی حوصلہ افزائی کرو تے ترقی دا سبب بنڑو جِینویں جو تُساں کریندے وی ہیوے۔ پیارے بِھراؤ! اساں تُہاکُوں درخاست کریندے ہیں جو جیہڑے تُہاڈے ءچ محنت کریندے ہِن تے خُداوند ءچ تُہاڈے راہنما ہِن تے تُہاکُوں نصیحت کریندے ہِن، اُنہاں دی قدر کرو۔ اُنہاں دی خدمت دی وجہ تُوں محبت نال اُنہاں دی بہُوں عزت کرو۔ تے آپس ءچ میل مِلاپ رکھو۔ بِھراؤ! اساں تُہاڈی مِنت کریندے ہیں جو آلسیاں کُوں سمجھاؤ، بے دِلاں کُوں ہِمت ڈیواؤ، کمزوراں دی مدد کرو تے سارے لوکاں نال صبر نال پیش آؤ۔ خبردار! کوئی بندہ کہیں نال بدی دے بدلے بدی نہ کرے بلکہ ہر حال ءچ آپس ءچ تے سبھ لوکاں نال نیکی کرݨ دی کوشش ءچ راہو۔ ہر ویلے خوش راہو۔ بلاناغہ دُعا کرو۔ ہر گالھ ءچ شُکرگزاری کرو کیوں جو مسیح یسُوع ءچ تُہاڈے کیتے خُدا دی اِیہو مرضی ہے۔ رُوح القُدس دے کم کُوں نہ روکو ۔ نبُوّتاں دی حقارت نہ کرو، بلکہ ہر گالھ کُوں ازماؤ۔ جیہڑی چنگی ہووے اُونکُوں پکڑی راہو۔ ہر طرحاں دی بدی کنُوں دُور راہو۔ خُدا جیہڑا اِطمینان دا سر چشمہ ہے آپ ای تُہاکُوں مکمل طور تے پاک کرے۔ تے تُہاڈی رُوح، جان تے تُہاڈے جِسم خُداوند یسُوع مسیح دے آوݨ تئیں بے عیب تے محفوظ راہوݨ۔ تُہاکُوں سڈݨ آلا وفادار ہے تے او اِینویں ای کریسی۔ بِھراؤ! ساڈے کیتے وی دُعا کرو۔ سارے بِھرانواں کُوں پاک بوسیاں نال میڈا سلام آکھو۔ مَیں خُداوند دے ناں ءچ تُہاکُوں تاکید کریندا ہاں جو سارے بِھرانواں کُوں ایہ خط پڑھ تے سُنڑایا ونجے۔ ساڈے خُداوند یسُوع مسیح دا فضل تُہاڈے نال راہوے۔ ایہ خط پولُس، سِیلاس تے تِیمُتِھیُس دی طرفوں تھِسّلُنِیکے دی کلیسیا دے ناں ہے جیہڑی خُدا باپ تے خُداوند یسُوع المسیح ءچ ہے۔ ساڈے باپ خُدا تے خُداوند یسُوع مسیح دی طرفوں تُہاکُوں فضل تے اِطمینان حاصل تھیندا راہوے۔ بِھراؤ! ساڈے اُتے فرض ہے جو ہر ویلے تُہاڈے کیتے خُدا دا شُکر کریندے راہوں۔ تے ایہ مناسب وی ہے کیوں جو تُساں اِیمان ءچ بہُوں ترقی کریندے پئے ہیوے تے تُہاڈی آپس دی محبت وی ودھدی ویندی ہے۔ اِیں واسطے اساں خُدا دیاں کلیسیاواں ءچ فخر نال تُہاڈا ذِکر کریندے ہیں جو ظلم تے مُصیبتاں سہوݨ دے باوجود تُساں بہُوں صبر نال آپنڑے اِیمان اُتے قائم ہیوے۔ ایہ خُدا دی سچی عدالت دا واضح ثبوت ہے تاں جو تُساں اُوندی بادشاہی دے لائق تھی سگو جیندے کیتے تُساں ڈُکھ چیندے پئے ہیوے۔ خُدا دی نظر ءچ ایہ اِنصاف ہے جو او تُہاکُوں ڈُکھ ڈیوݨ آلیاں کُوں بدلے ءچ ڈُکھ ڈیوے، تے تُہاکُوں ڈُکھ چاوݨ آلیاں کُوں ساڈے نال ارام ڈیوے۔ ایہ اُوں ویلے ہوسی جِیں ویلے خُداوند یسُوع آپنڑے زورآور فرشتیاں دے نال بھڑکدی ہوئی بھاہ ءچ اسمان ءچوں ظاہر تھیسی۔ او اُنہاں کُوں سزا ڈیسی جیہڑے خُدا کُوں نئیں جانڑدے تے ساڈے خُداوند یسُوع دی خوشخبری کُوں نئیں منیندے۔ ایجھے لوک خُداوند دی حضُوری تے اُوندی جلالی قُدرت کنُوں دُور تھی تے ابدی ہلاکت دی سزا پیسن۔ ایہ اُوں ڈینہہ تھیسی جڈاں یسُوع آ تے آپنڑے مُقدّس لوکاں ءچ جلال پیسی تے سبھ اِیماندار اُوندی شان ڈیکھ تے حیران تھیسن تے اُوندی تعریف کریسن۔ اُنہاں ءچ تُساں وی شامل ہوسو کیوں جو تُساں ساڈی گواہی اُتے اِیمان گِھن آئے ہَوے۔ اِیں واسطے اساں تُہاڈے کیتے ہر ویلے دُعا کریندے راہندے ہیں جو ساڈا خُدا تُہاکُوں اُوں بُلاوے دے لائق بنڑاوے جیندے کیتے اُوں تُہاکُوں سڈے تے تُہاڈی ہر نیک خواہش تے اِیمان نال کیتے ہوئے کم کُوں آپنڑی قُدرت نال پُورا کرے، تاں جو ساڈے خُداوند یسُوع مسیح دا ناں تُہاڈی وجہ کنُوں عزت پاوے تے تُساں وی اُوندے وسیلے عزت پاؤ۔ ایہ ساڈے خُدا تے خُداوند یسُوع مسیح دے فضل نال تھیسی۔ بِھراؤ! اساں آپنڑے خُداوند یسُوع مسیح دی ڈُوجھی آمد تے اُوندے کولھ جمع تھیوݨ دے بارے ءچ تُہاکُوں ایہ درخاست کریندے ہیں، جو جڈاں لوک دعویٰ کرݨ جو کہیں اِلہام یا پیغام تُوں یا ساڈی طرفوں کہیں خط تُوں پتا چلے جو خُداوند دے واپس آوݨ دا ڈینہہ آ گئے تاں تُساں پریشان نہ تھیوائے تے نہ گھبرائے۔ تُساں کہیں دے دوکھے ءچ نہ اوائے۔ کیوں جو او ڈینہہ اُوں ویلے تئیں نہ آسی جئیں تئیں خُدا دے خلاف وڈی بغاوت نہ تھی ونجے تے او بدکار ظاہر نہ تھی ونجے جِیندا انجام ہلاکت ہے۔ او ہر ہِک دی مخالفت کریسی جیہڑا معبُود اکھویندے یا جیندی پُوجا تھیندی ہے تے آپنڑے آپ کُوں اُنہاں تُوں وڈا بنڑیسی۔ اِتُھوں تئیں جو او خُدا دی ہیکل ءچ بہہ تے دعویٰ کریسی جو او خُدا ہے۔ کیا تُہاکُوں یاد نئیں جو جِیں ویلے مَیں تُہاڈے نال ہم تاں تُہاکُوں ایہ گالھیں ڈسیندا راہندا ہم؟ تے تُساں جانڑدے ہیوے جو کیا کُچھ اُوں بدکار کُوں روکی پئے تاں جو او صرف آپنڑے مقرر وقت اُتے ظاہر تھیوے۔ کیوں جو بدی دی لُکی ہوئی طاقت ہُنڑ وی آپنڑا اثر کریندی پئی ہے، پر ہِک روکنڑ آلا وی ہے تے جئیں تئیں او روکنڑ آلا رستے کنُوں ہٹایا نہ ونجے او اُوں بدکار کُوں روکی رکھیسی۔ وَل او بدکار ظاہر تھیسی جِینکُوں خُداوند یسُوع آپنڑے مُنہ دی پُھوک نال مار سٹیسی تے آپنڑی آمد دے جلال نال برباد کر ڈیسی۔ اِیں بدکار دی آمد شیطان دے اثر دے مطابق ہر طرحاں دی کُوڑی قُدرت، نشاناں تے معجزیاں نال ہوسی۔ تے او ہلاک تھیوݨ آلیاں کیتے بُرائی دے ہر طرحاں دے دوکھے استعمال کریسی۔ او لوک اِیں واسطے ہلاک تھیسن جو اُنہاں حق کُوں قبول کرݨ تُوں اِنکار کیتے جیندے وسیلے او نجات پا سگدے ہَن۔ اِیں واسطے خُدا اُنہاں کُوں گُمراہی ءچ پھسنڑ ڈیندے تاں جو او کُوڑ کُوں سچ مننڑ۔ تے جِتّی لوک سچائی دا یقین نئیں کریندے بلکہ بُرائی کُوں پسند کریندے ہِن، او سبھ سزا پیسن۔ پر بِھراؤ تے خُداوند دے پیاریو! تُہاڈے کیتے خُدا دا شُکر کریندے راہوݨ ساڈے اُتے فرض ہے کیوں جو اُوں تُہاکُوں شروع کنُوں ای چُنڑ گِھدے جو تُساں رُوح القُدس دے ذریعے پاکیزگی حاصل کر تے، تے حق اُتے اِیمان گِھن آ تے نجات پاؤ۔ خُدا تُہاکُوں اِیں نجات کیتے ساڈی سُنڑائی ہوئی خوشخبری دے ذریعے سڈیا تاں جو تُساں ساڈے خُداوند یسُوع مسیح دے جلال ءچ شامل تھی ونجو۔ اِیں واسطے بِھراؤ! ثابت قدم راہو تے اُنہاں تعلیمات اُتے قائم راہو جیہڑیاں تُساں ساڈی زبانی سُنڑیاں یا ساڈے خط دے ذریعے سِکھیاں۔ ہُنڑ ساڈا خُداوند یسُوع مسیح خود تے ساڈا باپ خُدا جئیں ساڈے نال محبت رکھی تے آپنڑے فضل نال ابدی تسلی تے چنگی اُمید بخشی، تُہاڈے دِلاں کُوں تسلی بخشے تے ہر نیک کم تے کلام ءچ تُہاکُوں مضبوط کرے۔ آخری گالھ ایہ ہے بِھراؤ! ساڈے کیتے دُعا کرو جو ساڈے ذریعے خُداوند دا کلام جلدی پھیل ونجے تے عزت پاوے جِینویں تُہاڈے ءچ تھئے، تے ایہ وی دُعا کرو جو اساں بُرے تے شریر لوکاں کنُوں بچے راہوں کیوں جو سارے لوکاں ءچ اِیمان نئیں۔ پر خُداوند وفادار ہے۔ او تُہاکُوں مضبوط کریسی تے شیطان کنُوں محفوظ رکھیسی۔ ساکُوں خُداوند ءچ یقین ہے جو جیہڑا حُکم اساں تُہاکُوں ڈیندے ہیں، تُساں اُوندے اُتے عمل کریندے ہیوے تے کریندے راہسو۔ خُداوند تُہاڈے دِلاں کُوں خُدا دی محبت تے آپنڑے صبر کُوں جانڑن دی ہدایت ڈیوے۔ بِھراؤ! اساں آپنڑے خُداوند یسُوع مسیح دے ناں ءچ تُہاکُوں حُکم ڈیندے ہیں جو اُنہاں سبھ بِھرانواں کنُوں دُور راہو جیہڑے آلسی ہووݨ تے اُوں تعلیم دے مطابق نئیں چلدے جیہڑی اُنہاں کُوں ساڈی طرفوں مِلی۔ تُساں خود جانڑدے ہیوے جو تُہاکُوں ساڈے نمونے اُتے کِینویں چلنڑا چاہیدے، کیوں جو اساں تُہاڈے وچال آلسی نہ ہسے، تے نہ ای اساں کہیں دی روٹی مُفت ءچ کھاندے ہسے بلکہ ڈینہہ رات سخت محنت کریندے ہسے تاں جو تُہاڈے ءچوں کہیں اُتے بھار نہ بنڑوں۔ اِیں واسطے نئیں جو ساڈا تُہاڈے اُتے کوئی حق نہ ہا بلکہ اِیں واسطے جو ایجھا نمونہ پیش کرُوں جیندے اُتے تُساں چل سگو۔ جڈاں اساں تُہاڈے کولھ ہسے تاں اُوں ویلے وی تُہاکُوں ایہ حُکم ڈِتا ہا جو، ”جیہڑا بندہ کم کرݨ نئیں چاہندا، او کھاوے وی نہ۔“ اساں سُنڑیا ہے جو تُہاڈے ءچ کُجھ ایجھے وی ہِن جیہڑے آلسی ہِن۔ او خود تاں کُجھ کریندے نئیں بلکہ ڈُوجھیاں دے کم ءچ دَخل ڈیندے ہِن۔ ایجھے لوکاں کُوں اساں خُداوند یسُوع مسیح دے ناں ءچ حُکم ڈیندے ہیں تے نصیحت کریندے ہیں جو او چُپ چاپ آپنڑا کم کر تے محنت دی روٹی کھاوݨ۔ پر بِھراؤ، تُساں نیک کم کرݨ ءچ ہِمت نہ ہارو۔ جے کوئی ساڈے اِیں خط ءچ لِکھی ہوئی نصیحت اُتے عمل نہ کرے تاں اُوندے اُتے نظر رکھو تے اُوندے نال تعلق چھوڑ ڈیؤ تاں جو او شرمسار تھیوے۔ پر اُونکُوں دُشمنڑ نہ سمجھو بلکہ بِھرا سمجھ تے نصیحت کرو۔ ہُنڑ خُداوند جیہڑا اِطمینان دا چشمہ ہے خود تُہاکُوں ہمیشاں تے ہر حالت ءچ اِطمینان بخشے۔ خُداوند تُساں سبھ نال راہوے۔ مَیں پولُس آپنڑے ہتھ نال ایہ سلام لِکھدا ہاں۔ ہر خط ءچ میڈا اِیہو نشان ہوندے جیہڑا مَیں ثبوت دے طور تے لِکھدا ہاں۔ ساڈے خُداوند یسُوع مسیح دا فضل تُساں ساریاں نال راہوے۔ ایہ خط میں پولُس دی طرفوں ہے جیہڑا ساڈے نجات ڈیوݨ آلے خُدا تے ساڈی اُمید یعنی یسُوع مسیح دے حُکم نال اُوندا رسُول مقرر کیتا گِیا ہاں، تِیمُتِھیُس دے ناں جیہڑا اِیمان دے لحاظ نال میڈے حقیقی پوتر وانگُوں ہے۔ تیکُوں خُدا باپ تے ساڈے خُداوند یسُوع مسیح دی طرفوں فضل، رحم تے اِطمینان حاصل تھیندا راہوے۔ مَیں مَکِدُنیہ دو روانہ تھیندے ویلے تیکُوں نصیحت کیتی ہئی جو تُوں اِفِسُس ءچ رہ تے، غلط تعلیم ڈیوݨ آلیاں کُوں تاکید کر جو او اِینویں کرݨ تُوں باز آ ونجنڑ، تے فرضی کہانڑیاں تے ختم نہ تھیوݨ آلے شِجریاں اُتے غور نہ کرݨ۔ ایجھے گالھیں جھیڑے پیدا کریندیاں ہِن تے خُدا دے کم کُوں پُورا نئیں کریندیاں جیہڑا اِیمان نال کیتا ویندے۔ میڈی اِیں نصیحت دا مقصد او محبت ہے جیہڑی پاک دِلی، نیک نیّتی تے حقیقی اِیمان نال پیدا تھیندی ہے۔ کُجھ لوک اِنہاں کنُوں بھٹک گئے ہِن تے فضول گالھیں ءچ لگ گئے ہِن۔ او شریعت دے عالم بنڑݨ چاہندے ہِن پر جیہڑے گالھیں او آدھے ہِن تے جِنہاں دا یقین نال دعویٰ کریندے ہِن، اُنہاں کُوں خود وی نئیں سمجھدے۔ اساں جانڑدے ہیں جو شریعت چنگی ہے، پر شرط ایہ ہے جو اُونکُوں مناسب طور تے اِستعمال کیتا ونجے۔ اساں ایہ وی جانڑدے ہیں جو شریعت راستبازاں کیتے نئیں بلکہ بے شرع لوکاں، باغیاں، بدکاراں، گُنہگاراں، ناپاکاں، بے دیناں، ماء پِیُو کُوں قتل کرݨ آلیاں، خونیاں تے اُنہاں کیتے ہے جیہڑے زِنا کار ہِن، چھوہر باز ہِن، اغوا کرݨ آلے ہِن، کُوڑ مریندے ہِن، کُوڑیاں قَسماں چیندے ہِن، تے ایجھے بہُوں سارے کم کریندے ہِن جیہڑے صحیح تعلیم دے خلاف ہِن۔ ایہ تعلیم مُبارک خُدا دے جلال آلی اُوں خوشخبری دے مطابق ہے جیہڑی میڈے سپُرد کیتی گئی ہے۔ مَیں آپنڑے خُداوند یسُوع مسیح دا شُکر کریندا ہاں جئیں میکُوں طاقت ڈِتی تے دیانتدار جاݨ تے آپنڑی خدمت کیتے مقرر کیتا۔ بھانویں مَیں پہلے کُفر بَکنڑ آلا، اِیمانداراں کُوں ستاوݨ تے بے عزت کرݨ آلا ہم، پر خُدا میڈے اُتے رحم کیتا کیوں جو مَیں اِیمان گِھن آوݨ کنُوں پہلے تے نادانی ءچ ایہ سبھ کُجھ کیتا ہا۔ تے ساڈے خُداوند دا فضل میڈے اُتے بہُوں زیادہ تھیّا، اُوں اِیمان تے محبت نال جیہڑا مسیح یسُوع ءچ ہے۔ ایہ گالھ سچ تے ہر لحاظ نال قبول کرݨ دے لائق ہے جو ”مسیح یسُوع گُنہگاراں کُوں نجات ڈیوݨ کیتے دُنیا ءچ آیا،“ جِنہاں ءچوں سبھ تُوں وڈا گُنہگار مَیں ہاں۔ پر میڈے اُتے رحم اِیں واسطے تھیّا جو خُداوند یسُوع مسیح میڈے ذریعے جیہڑا سبھ تُوں وڈا گُنہگار ہاں، آپنڑا کمال صبر ظاہر کرے تاں جو مَیں اُنہاں ساریاں کیتے نمونہ بنڑ سگاں جیہڑے اُوندے اُتے اِیمان گِھن آ تے ہمیشاں دی زندگی پیسن۔ ہُنڑ ازلی تے ابدی بادشاہ یعنی غیرفانی تے نظر نہ آوݨ آلے واحد خُدا دی عزت تے تعریف ہمیشاں تئیں تھیندی راہوے۔ آمین۔ تِیمُتِھیُس میڈے پوتر، مَیں تیکُوں ایہ نصیحت اُنہاں پیشنگوئیاں دے مطابق کریندا ہاں جیہڑیاں تیڈے بارے ءچ کیتیاں گئیاں ہَن تاں جو تُوں اُنہاں دی مدد نال چنگی لڑائی لڑیں، تے اِیمان تے نیک نیّتی اُتے قائم راہویں کیوں جو کُجھ لوکاں اِینکُوں رَد کر ڈِتے، تے آپنڑے اِیمان دا بیڑا غرق کر گِھدے۔ اُنہاں ءچ ہُمِنِیُس تے سکندر وی ہِن، جِنہاں کُوں مَیں شیطان دے حوالے کر ڈِتے تاں جو او کُفر بَکنڑ کنُوں باز راہونڑا سِکھنڑ۔ سبھ تُوں پہلے مَیں ایہ نصیحت کریندا ہاں جو سبھ لوکاں کیتے درخاستاں، دُعاواں، مِنتاں تے شُکر گُزاریاں کیتیاں ونجنڑ، بادشاہاں تے وڈے اِختیار آلیاں کیتے وی تاں جو اساں خُدا ترسی تے عزت نال پُر امن تے پُر سکون زندگی گُزار سگوں۔ ایجھی دُعا کرݨ چنگی گالھ ہے تے ساڈے نجات ڈیوݨ آلے خُدا کُوں پسند ہے۔ او چاہندے جو سبھ لوک نجات پاوݨ تے سچائی کُوں پچھاݨ گِھننڑ۔ کیوں جو خُدا ہِک ہے تے خُدا تے اِنساناں دے وچال درمیانی وی ہِکو ای ہے یعنی مسیح یسُوع جیہڑا اِنسان ہے جئیں آپنڑے آپ کُوں ساریاں دی مخلصی کیتے فِدیہ دے طور تے ڈے ڈِتا۔ اِینویں اُوں مقرر وقت اُتے اِیں گالھ دی گواہی ڈِتی۔ اِیں مقصد کیتے میکُوں تبلیغ کرݨ آلا تے رسُول تے غیر قوماں کُوں اِیمان تے سچائی دے گالھیں سِکھاوݨ آلا مقرر کیتا گِیا۔ مَیں کُوڑ نئیں مریندا بلکہ سچ آدھا ہاں۔ بس مَیں چاہندا ہاں جو بندے ہر جاہ، کاوڑ تے تکرار دے بغیر پاک ہتھاں کُوں چا تے دُعا کرݨ۔ اِینویں ای عورتاں مناسب کپڑے پا تے آپنڑے آپ کُوں حیاداری تے پرہیزگاری نال سنوارݨ، نہ جو فیشن کر تے وال بنڑاوݨ نال تے نہ ای سونے دے زیور یا موتیاں یا قیمتی پُشاک نال۔ بلکہ آپنڑے آپ کُوں نیک کماں نال سنوارݨ جِینویں خُدا پرستی دا دعویٰ کرݨ آلیاں عورتاں کُوں مناسب ہے۔ عورت کُوں چاہیدے جو او چُپ رہ تے پُوری فرمانبرداری نال سِکھے۔ مَیں عورت کُوں اِجازت نئیں ڈیندا جو تعلیم ڈیوے یا مرد اُتے حُکم چلاوے بلکہ او چُپ راہوے۔ کیوں جو پہلے آدم کُوں بنڑایا گِیا تے بعد ءچ حوّا کُوں۔ تے آدم دوکھے ءچ نہ آیا بلکہ عورت دوکھا کھا تے گُنہگار تھی گئی۔ پر اُونکُوں بال جمنڑ نال نجات مِلسی ، پر شرط ایہ ہے جو او اِیمان، محبت، پاکیزگی تے پرہیزگاری نال زندگی گُزریندی راہوے۔ ایہ گالھ سچ ہے جو ”جیہڑا بندہ کلیسیا ءچ نگہبان بنڑݨ چاہندے، او چنگے کم دی خواہش کریندے۔“ اِیں واسطے نگہبان کُوں چاہیدے جو او بے اِلزام، ہِک ذال دا پایا، پرہیزگار، مُتّقی، شریف، مہمان نواز تے تعلیم ڈیوݨ دے قابل ہووے۔ او شرابی تے مار کُٹائی کرݨ آلا نہ ہووے بلکہ نرم دل ہووے۔ او بحث کرݨ آلا تے پیسیاں دا لالچی نہ ہووے۔ او آپنڑے گھر دا چنگی طرحاں بندوبست کرݨ آلا ہووے تے آپنڑے بالاں کُوں بہُوں سنجیدگی نال قابو ءچ رکھنڑ آلا ہووے۔ کیوں جو جے کوئی آپنڑے ای گھر کُوں نئیں سنبھال سگدا تاں او خُدا دی کلیسیا دی ڈیکھ بھال کِینویں کریسی؟ او نواں نواں ایماندار نہ ہووے، اِینویں نہ تھیوے جو او مغرُور تھی تے ابلیس وانگُوں سزا پاوے۔ تے او غیر اِیمانداراں ءچ وی نیک ناں ہووے، اِینویں نہ تھیوے جو کوئی اُونکُوں بُرا بھلا آکھے تے او ابلیس دے پھندے ءچ پَھس ونجے۔ اِینویں ای جماعت دا اِنتظام کرݨ آلیاں کُوں وی چاہیدے جو او سنجیدہ ہووݨ، ڈُو زباناں آلے، شرابی تے پیسے دے لالچی نہ ہووݨ۔ او اِیمان دے راز کُوں نیک نیّتی نال محفوظ رکھنڑ۔ پر ضروری ہے جو او پہلے چنگی طرحاں پرکھے ونجنڑ، وَل جے بے اِلزام نِکلنڑ تاں اُنہاں کُوں اِنتظام کرݨ دی خدمت ڈیؤ۔ اُنہاں دی ذالاں کُوں وی چاہیدے جو او سنجیدہ ہووݨ، ڈُوجھیاں کُوں بدنام کرݨ آلیاں نہ ہووݨ بلکہ پرہیز گار تے ہر گالھ ءچ اِیماندار ہووݨ۔ اِنتظام کرݨ آلے ہِک ذال آلے ہووݨ تے آپنڑے بالاں تے گھراں کُوں چنگی طرحاں سنبھالنڑ آلے ہووݨ۔ کیوں جو جیہڑے اِنتظام کرݨ آلے چنگی خدمت کریندے ہِن اُنہاں کُوں چنگا مرتبہ مِلدے تے او مسیح یسُوع اُتے آپنڑے اِیمان ءچ دلیری وی حاصل کریندے ہِن۔ مَیں تیڈے کولھ جلدی آوݨ دی اُمید کریندا پِیا ہاں، وَل وی تیکُوں ایہ گالھیں اِیں واسطے لِکھدا پِیا ہاں، جو جے میکُوں آوݨ ءچ دیر تھی ونجے تاں تیکُوں پتا ہووے جو خُدا دے گھر آلیاں دے وچال جیہڑے زندہ خُدا دی کلیسیا تے حق دا تھمبا تے بنیاد ہِن، ساڈا چال چلنڑ کِینویں ہوونڑا چاہیدے۔ اِیندے ءچ کوئی شک نئیں جو ساڈے اِیمان دا راز وڈا ہے یعنی او جِسم ءچ ظاہر تھیّا، رُوح دے وسیلے نال صادق ثابت تھیّا فرشتیاں کُوں ڈِکھالی ڈِتا، غیر قوماں ءچ اُوندی تبلیغ تھئی دُنیا ءچ لوک اُوندے اُتے اِیمان گِھن آئے تے او جلال ءچ اسمان اُتے چاتا گِیا۔ پر رُوح القُدس صاف فرمیندے جو آوݨ آلے ڈینہاں ءچ کُجھ لوک مسیحی اِیمان کنُوں مُنہ پھیر تے گُمراہ کرݨ آلیاں رُوحاں تے شیطانی تعلیم دی پیروی کریسن۔ ایہ تعلیم اُنہاں کُوڑے آدمیاں دی منافقت دی وجہ کنُوں آندی ہے جِنہاں دے ضمیر سڑ تے بے حِس تھی گئے ہِن۔ ایہ لوک شادی کرݨ تُوں منع کریندے ہِن تے اُنہاں کھانڑیاں کنُوں پرہیز کرݨ دا حُکم ڈیندے ہِن، جِنہاں کُوں خُدا اِیں واسطے پیدا کیتے جو اِیماندار جیہڑے سچائی کُوں جانڑدن، اُنہاں کُوں شُکرگزاری نال کھاوݨ۔ خُدا دی پیدا کیتی ہوئی ہر ہِک چیز چنگی ہے تے جے شُکرگزاری نال کھادی ونجے تاں کہیں وی چیز تُوں اِنکار نئیں کرݨ چاہیدا، کیوں جو او خُدا دے کلام نال تے دُعا نال پاک تھی ویندی ہے۔ تِیمُتِھیُس جے تُوں بِھرانواں کُوں ایہ گالھیں یاد کرویسیں تاں مسیح یسُوع دا چنگا خادم ہوسیں، ایجھا خادم جئیں اُوں اِیمان تے چنگی تعلیم دے گالھیں نال پرورش پاتی ہووے جیندے اُتے تُوں عمل کریندا آ یا ہیں۔ پر اُنہاں بے ہُودہ تے فرضی کہانڑیاں کنُوں کنارہ کر بلکہ دینداری کیتے مشق کر۔ کیوں جو جِسمانی مشق کنُوں کُجھ فائدہ تاں تھیندے پر دینداری ہر لحاظ نال فائدہ مند ہوندی ہے تے اِیندے ءچ نہ صرف اِیں زندگی کیتے بلکہ آوݨ آلی زندگی کیتے وی وعدہ موجود ہے۔ ایہ گالھ سچ تے ہر لحاظ نال قبول کرݨ دے لائق ہے۔ اِیہو وجہ ہے جو اساں سخت محنت تے کوشش کریندے ہیں کیوں جو اساں آپنڑی اُمید اُوں زندہ خُدا اُتے رکھی ہے جیہڑا سارے اِنساناں کُوں، خاص کر اِیمانداراں کُوں نجات ڈیوݨ آلا ہے۔ اِنہاں گالھیں دی تعلیم ڈے، تے اِنہاں اُتے عمل کرݨ دا حُکم ڈے۔ کوئی وی تیڈی جوانی دی وجہ تُوں تیکُوں حقیر نہ سمجھے بلکہ تُوں کلام کرݨ، چال چلنڑ، محبت، اِیمان تے پاکیزگی ءچ اِیمانداراں کیتے نمونہ بنڑ۔ میڈے آوݨ تئیں خُدا دا کلام دی تلاوت کرݨ، نصیحت کرݨ تے تعلیم ڈیوݨ ءچ مصروف رہ۔ اُوں نعمت تُوں غافل نہ رہ جیہڑی تیکُوں پیشن گوئی دے ذریعے مِلی جڈاں جماعت دے بزُرگاں تیڈے اُتے آپنڑے ہتھ رکھے۔ اِنہاں گالھیں اُتے دھیان ڈے، تے آپنڑے آپ کُوں اُنہاں کیتے وقف کر ڈے تاں جو سارے لوک تیڈی ترقی ڈیکھنڑ۔ آپنڑے چال چلنڑ تے آپنڑی تعلیم دا خاص خیال رکھ۔ اِنہاں گالھیں اُتے عمل کریندا رہ کیوں جو اِینویں کرݨ نال تُوں آپنڑی تے آپنڑے سُنڑݨ آلیاں دی نجات دا سبب ہوسیں۔ کہیں وڈی عُمر آلے کُوں نہ جِھڑک بلکہ اُونکُوں آپنڑا پِیُو سمجھ تے نصیحت کر، تے نینگراں کُوں بِھرا سمجھ تے، وڈی عُمر آلیاں عورتاں کُوں ماء سمجھ تے، تے جوان عورتاں کُوں پاکیزگی نال بھینڑاں سمجھ تے۔ اُنہاں بیوہ عورتاں دا خیال رکھ، تے عزت کر جیہڑیاں واقعی ضرورت مند ہِن۔ جے کہیں بیوہ دے پوتر یا پوترے ہووݨ تاں او پہلے آپنڑے خاندان کُوں سنبھال تے ماء پِیُو دا حق ادا کرݨ سِکھنڑ، کیوں جو ایہ خُدا کُوں پسند ہے۔ جیہڑی عورت واقعی ضرورت مند بیوہ ہے تے جِیندا کوئی نئیں، او خُدا اُتے اُمید رکھیندی ہے تے ڈینہہ رات خُدا کنُوں مدد منگدی تے دُعا کریندی ہے۔ پر جیہڑی بیوہ عیاشی ءچ زندگی گُزریندی ہے، او زندہ ہوندے ہوئے وی مُردہ ہے۔ اِنہاں گالھیں دے بارے ءچ لوکاں کُوں نصیحت کر تاں جو کوئی اُنہاں اُتے اِلزام نہ لا سگے۔ جیہڑا بندہ آپنڑے رشتہ داراں، خاص کر آپنڑے گھر آلیاں دا خیال نئیں کریندا او اِیمان دا مُنکر ہے تے غیر اِیمانداراں کنُوں وی بدتر ہے۔ بیوہ عورتاں دی فہرست ءچ صرف اُوں بیوہ دا ناں لِکھیا ونجے جیندی عُمر سَٹھ سال تُوں زیادہ ہووے تے ہِک پئے دی زال ریہی ہووے، تے نیک کم کرݨ ءچ مشہور ہووے یعنی اُوں آپنڑے بالاں دی تربیت کیتی ہووے، مہمان نوازی کیتی ہووے، مُقدّساں دی خدمت ءچ اُنہاں دے پیر دھوتے ہووݨ، مُصیبت دے ماریاں دی مدد کیتی ہووے تے ہر نیک کم کرݨ ءچ مصروف ریہی ہووے۔ پر جوان بیوہ عورتاں دے ناں نہ لِکھے ونجنڑ کیوں جو جڈاں اُنہاں دیاں نفسانی خواہشاں اُنہاں اُتے غالب آ ویندیاں ہِن تاں او مسیح تُوں دُور تھی تے ولا شادی کرݨ چاہندیاں ہِن، تے قصُوروار بنڑ ویندیاں ہِن کیوں جو اُنہاں آپنڑے پہلے وعدے کُوں چھوڑ ڈِتے۔ اِیندے علاوہ او گھر گھر بیکار پِھردیاں ہِن تے نہ صرف بیکار راہندیاں ہِن بلکہ فضول گالھیں کر تے ڈُوجھیاں دے معاملیاں ءچ دخل اندازی وی کریندیاں ہِن تے غیرمناسب گالھیں آدھیاں ہِن۔ اِیں واسطے مَیں جوان بیوہ عورتاں کُوں صلاح ڈیندا ہاں جو او شادی کرݨ، بال جمنڑ، آپنڑا گھر سنبھالنڑ تے کہیں مخالف کُوں بدگوئی کرݨ دا موقع نہ ڈیوݨ۔ کیوں جو کُجھ گُمراہ تھی تے شیطان دی پیروی کرݨ لگ گئیاں ہِن۔ جے کہیں اِیماندار عورت دے خاندان ءچ بیوہ عورتاں ہووݨ تاں او اُنہاں دی مدد کرے تے کلیسیا اُتے بھار نہ سٹیا ونجے تاں جو او اُنہاں دی مدد کر سگے جیہڑیاں واقعی بے سہارا ہِن۔ جیہڑے بزُرگ چنگی راہنمائی کریندے ہِن، خاص کر او جیہڑے کلام سُنڑیندے تے تعلیم ڈیندے ہِن، ڈُونڑی عزت دے حقدار ہِن۔ کیوں جو خُدا دا کلام آدھے جو ”گہاوݨ ویلے ڈاند دا مُنہ نہ بدھیں“ تے ایہ وی جو ”مزدُور آپنڑی مزدُوری دا حقدار ہے ۔“ کہیں بزُرگ اُتے لائے ونجنڑ آلے کہیں وی اِلزام کُوں ڈُو یا ترے گواہاں دے بغیر قبول نہ کر۔ پر گُناہ کرݨ آلیاں کُوں ساریاں دے سامنڑے ملامت کر تاں جو ڈُوجھیاں کیتے وی عِبرت ہووے۔ مَیں خُدا، مسیح یسُوع تے چُنڑے ہوئے فرشتیاں کُوں گواہ بنڑا تے تیکُوں تاکید کریندا ہاں جو اِنہاں گالھیں اُتے بغیر تعصب تے بغیر طرفداری دے عمل کر۔ کہیں بندے اُتے ہتھ رکھ تے اُونکُوں خدمت کیتے مقرر کرݨ ءچ جلدی نہ کر، تے نہ ڈُوجھیاں دے گُناہاں ءچ شریک تھی۔ آپنڑے آپ کُوں پاک رکھ۔ اگُوں تے صرف پانڑی ای نہ پِیتا کر بلکہ آپنڑے معدہ دے سببّوں تھوڑا جِیہا انگُور دا رَس وی پِیتا کر کیوں جو تُوں اکثر بیمار راہندیں۔ کُجھ لوکاں دے گُناہ اُنہاں دے عدالت ءچ حاضر تھیوݨ کنُوں پہلے ای ظاہر تھی ویندے ہِن تے کُجھ دے بعد ءچ۔ اِینویں ای کُجھ نیک کم صاف نظر آندے ہِن تے جیہڑے صاف نظر نئیں آندے او لُکے نئیں رہ سگدے۔ جیہڑے نوکر غُلامی دی پنجالی ءچ ہِن او آپنڑے مالکاں کُوں پُوری عزت دے لائق سمجھنڑ تاں جو کوئی خُدا دے ناں دی تے ساڈی تعلیم دی بدنامی نہ کرے۔ جِنہاں غُلاماں دے مالک اِیماندار ہِن، او اُنہاں کُوں مسیحی بِھرا ہووݨ پارُوں گھٹ عزت نہ ڈیوݨ، بلکہ اُنہاں دی زیادہ خدمت کرݨ کیوں جو اُنہاں دی خدمت کنُوں فائدہ چاوݨ آلے اِیماندار تے عزیز ہِن۔ تُوں اِنہاں گالھیں دی تعلیم تے نصیحت ڈے۔ جے کوئی غلط تعلیم ڈیندے تے خُداوند یسُوع مسیح دے صحیح کلام تے اُوں تعلیم کُوں نئیں منیندا جیہڑی خُدا پرستی دے مطابق ہے، تاں او مغرُور ہے تے کُجھ نئیں جانڑدا۔ اُونکُوں فضول بحث تے لفظاں دے بارے ءچ تکرار کرݨ دا مرض ہے جِیندا نتیجہ حسد، جھیڑے، بدگوئیاں تے ڈُوجھیاں دے بارے ءچ بُری سوچ رکھنڑ ہے، تے اُنہاں لوکاں ءچ جِنہاں دی عقل وِگڑ گئی ہے، جھیڑے پیدا تھیندے ہِن۔ سچائی اُنہاں کنُوں چِھک گِھدی گئی ہے تے او دینداری کُوں نفع دا ذریعہ سمجھدے ہِن۔ پر دینداری دے نال نال آپنڑی حالت اُتے خوش راہوݨ وڈے نفع دی گالھ ہے کیوں جو اساں دُنیا ءچ نہ کُجھ گِھن تے آئے ہیں تے نہ کُجھ اُوندے ءچوں گِھن تے وَنج سگدے ہیں۔ بس جے ساڈے کولھ کھاوݨ تے پاوݨ کیتے ہے تاں اُوندے اُتے خوش راہوں۔ جیہڑے لوک دولت مند تھیوݨ چاہندے ہِن، او ازمائش ءچ پے تے بہُوں فضول تے نُقصان پُچاوݨ آلیاں خواہشاں دے پھندے ءچ پَھس ویندے ہِن تے تباہی تے ہلاکت دے دریا ءچ غرق تھی ویندے ہِن۔ کیوں جو پیسیاں دا لالچ ہر قِسم دی بُرائی دی جڑھ ہے تے کُجھ لوک دولت دے لالچ ءچ آ تے آپنڑے اِیمان تُوں گُمراہ تھی گئے تے آپنڑے آپ کُوں بہُوں ڈُکھ ڈِتے۔ پر تُوں خُدا دے بندے، اِنہاں کنُوں بھج تے راستبازی، دینداری، اِیمان، محبت، صبر تے نرم دِلی دا طالب تھی۔ اِیمان دی چنگی کُشتی لڑ۔ ہمیشاں دی زندگی اُتے قبضہ کر گِھن جیندے کیتے تُوں سڈیا گِیا ہَویں، تے جِیندے بارے ءچ تَیں بہُوں سارے گواہاں دے سامنڑے چنگا اِقرار کیتا ہا۔ مَیں خُدا کُوں جیہڑا ہر چیز کُوں زندگی ڈیندے تے مسیح یسُوع کُوں جئیں پنطیُس پِیلاطُس دے سامنڑے چنگا اِقرار کیتا ہا، گواہ بنڑا تے تیکُوں تاکید کریندا ہاں، جو جئیں تئیں ساڈا خُداوند یسُوع مسیح ظاہر نہ تھی ونجے، جیہڑا حُکم تیکُوں ڈِتا گئے اُوندے اُتے بغیر کہیں غلطی تے ناکامی دے عمل کر۔ کیوں جو خُدا مناسب وقت اُتے مسیح کُوں ظاہر کریسی۔ خُدا مُبارک تے واحد حاکم، بادشاہاں دا بادشاہ تے خُداونداں دا خُداوند ہے۔ صرف اُوہو غیر فانی ہے، تے او اُوں نُور ءچ راہندے جِتھاں کوئی پُج نئیں سگدا۔ اُونکُوں کہیں اِنسان نئیں ڈِٹھا تے نہ ڈیکھ سگدے۔ اُوندی عزت تے سلطنت ہمیشاں تئیں قائم راہوے، آمین۔ اِیں موجودہ جہان دے دولت منداں کُوں حُکم ڈے جو او مغرُور نہ تھیوݨ تے دولت جیہی غیر یقینی چیز اُتے اُمید نہ رکھنڑ بلکہ خُدا اُتے، جیہڑا ساڈی خوشی کیتے ساریاں چیزاں ساکُوں کثرت نال ڈیندے۔ اُنہاں کُوں حُکم ڈے جو او نیکی کرݨ تے نیک کماں دے لحاظ نال دولت مند بنڑݨ تے ہمیشاں سخاوت کر تے ڈُوجھیاں دی مدد کرݨ کیتے تیار راہوݨ۔ اِینویں او آپنڑے کیتے ہِک چنگا خزانہ جمع کریسن یعنی آوݨ آلے زمانے کیتے ہِک مضبوط بنیاد، تے اِینویں حقیقی زندگی اُتے قبضہ کرݨ۔ تِیمُتِھیُس! اِیں امانت دی جیہڑی تیڈے سپُرد کیتی گئی ہے، حفاظت کر، تے بے ہُودہ گالھیں تے فضول خیالاں کنُوں کنارہ کر، کیوں جو ایجھے علم کُوں علم آکھنڑ ای غلط ہے۔ کُجھ لوک ایجھے علم دی وجہ کنُوں آپنڑے اِیمان تُوں گُمراہ تھی گئے ہِن۔ خُدا دا فضل تُساں سبھ نال راہوے۔ ایہ خط میں پولُس دی طرفوں ہے جیہڑا خُدا دی مرضی نال یسُوع مسیح دا رسُول ہاں تاں جو اُوں وعدہ کیتی ہوئی زندگی دی تبلیغ کراں جیہڑی مسیح یسُوع ءچ مِلدی ہے۔ ایہ خط پیارے پوتر تِیمُتِھیُس دے ناں ہے۔ ساڈے خُدا باپ تے خُداوند یسُوع مسیح دی طرفوں تیکُوں فضل، رحم تے اِطمینان حاصل تھیندا راہوے۔ مَیں خُدا دا شُکر ادا کریندا ہاں جیندی عبادت مَیں آپنڑے پِیُو ڈاڈے دی طرحاں نیک نیّتی نال کریندا ہاں، تے تیکُوں ڈینہہ رات آپنڑیاں دُعاواں ءچ یاد کریندا ہاں۔ تیڈے ہنجُواں کُوں یاد کر تے مَیں تیکُوں مِلنڑ دی سِک رکھیندا ہاں تاں جو تیکُوں مِل تے خوش تھی سگاں۔ میکُوں تیڈا او حقیقی اِیمان وی یاد آندے جیہڑا پہلے تیڈی نانی لُوئِس تے تیڈی ماء یُونِیکے دا ہا، تے میکُوں یقین ہے جو اُوہو اِیمان تیڈا وی ہے۔ اِیہو وجہ ہے جو مَیں تیکُوں یاد ڈیویندا ہاں جو تُوں خُدا دی اُوں نعمت دی بھاہ کُوں نویں سرے تُوں بھڑکا ڈے جیہڑی میڈے ہتھ رکھنڑ نال تیکُوں مِلی ہے۔ کیوں جو جیہڑی رُوح خُدا ساکُوں ڈِتی ہے او ساکُوں بُزدل نئیں بنڑیندی بلکہ طاقت، محبت تے تربیت ڈیندی ہے۔ اِیں واسطے تُوں ساڈے خُداوند دی گواہی ڈیوݨ تُوں نہ شرما، تے نہ میڈے تُوں جیہڑا اُوندی خاطر قیدی ہاں بلکہ خُدا دی قُدرت دی مدد نال میڈے نال خوشخبری دی خاطر ڈُکھ چا۔ کیوں جو اُوں ساکُوں نجات ڈِتی ہے تے مُقدّس زندگی گُزارݨ کیتے سڈے۔ ایہ ساڈے اعمال دی وجہ کنُوں نئیں بلکہ اُوندے آپنڑے خاص اِرادے تے فضل دی وجہ تُوں ہے۔ ایہ فضل ساڈے اُتے مسیح یسُوع ءچ ازل کنُوں ای تھی گِیا ہئی، پر ہُنڑ او ساڈے نجات ڈیوݨ آلے یسُوع مسیح دے آوݨ نال ظاہر تھئے۔ اُوں موت دی طاقت کُوں ختم کر ڈِتا تے غیر فانی زندگی کُوں آپنڑی خوشخبری دے وسیلے نال روشن کر ڈِتا۔ خُدا میکُوں اِیں خوشخبری دی تبلیغ کرݨ آلا، رسُول تے اُستاد مقرر کیتا۔ اِیہو وجہ ہے جو مَیں ہُنڑ ڈُکھ چیندا ہاں۔ پر مَیں شرمیندا نئیں کیوں جو جئیں اُتے مَیں اِیمان رکھیندا ہاں، اُونکُوں جانڑدا ہاں تے میکُوں یقین ہے جو او آپنڑے وَل آوݨ آلے ڈینہہ تئیں میڈی امانت دی حفاظت کر سگدے۔ ہُنڑ مسیح یسُوع ءچ آپنڑے اِیمان تے محبت اُتے قائم رہ تے اُنہاں صحیح گالھیں کُوں جیہڑیاں تُوں میں کنُوں سُنڑیاں آپنڑے کیتے ہِک نمونہ بنڑائی رکھ۔ تے رُوح القُدس دی مدد نال جیہڑا ساڈے ءچ وسدا پئے، اُوں چنگی امانت دی حفاظت کر جیہڑی تیڈے سپُرد کیتی گئی ہے۔ تُوں جانڑدا ہیں جو آسِیہ صوبے ءچ سارے لوکاں میکُوں چھوڑ ڈِتے۔ اُنہاں ءچ فُوگلُس تے ہرمُگِنیُس وی شامل ہِن۔ اُنیسِفرُس دے خاندان اُتے خُداوند دی رحمت تھیوے کیوں جو اُوں بہُوں دفعہ میکُوں تازہ دم کیتے تے میڈیاں قید دیاں زنجیراں کنُوں کڈھائیں نئیں شرمایا۔ بلکہ جڈاں او روم ءچ آیا تاں بہُوں کوشش نال گولھ تے میکُوں مِلیا۔ خُداوند کرے جو قیامت آلے ڈینہہ اُوندے اُتے خُداوند دا رحم تھیوے۔ تیکُوں چنگی طرحاں پتا ہے جو اُوں اِفِسُس ءچ میڈی بہُوں خدمت کیتی ہئی۔ بس میڈے فرزند، تُوں اُوں فضل دے ذریعے جیہڑا مسیح یسُوع ءچ تیڈے اُتے تھئے، مضبوط تھی۔ تے جیہڑے گالھیں تُوں میڈے کنُوں بہُوں سارے گواہاں دی موجودگی ءچ سُنڑیاں ہِن، اُنہاں کُوں ایجھے دیانتدار لوکاں دے سپُرد کر جیہڑے ڈُوجھیاں کُوں وی سِکھاوݨ دے قابل ہووݨ۔ مسیح یسُوع دے چنگے سپاہی وانگُوں ڈُکھ سہنڑ ءچ میڈے نال شریک تھی۔ کوئی سپاہی آپنڑے آپ کُوں دُنیا دے معاملیاں ءچ نئیں پھسیندا کیوں جو او بھرتی کرݨ آلے کُوں خوش کرݨ چاہندے۔ اُونویں ای جے کوئی پہلوان اصُولاں دے مطابق مُقابلہ نئیں کریندا تاں اُونکُوں جیت دا سہرا نئیں مِلدا۔ جیہڑا کِسان سخت محنت کریندے، سبھ توں پہلے اُونکُوں پیداوار دا حصہ مِلنڑا چاہیدے۔ اِنہاں گالھیں اُتے جیہڑیاں مَیں آدھا ہاں غور کر کیوں جو خُداوند تیکُوں اِنہاں سارے گالھیں دی سمجھ ڈیسی۔ یسُوع مسیح کُوں یاد رکھ جیہڑا داؤد دی نسل ءچوں ہے تے مُردیاں ءچوں زندہ تھی گئے۔ ایہ اُوہو خوشخبری ہے جیہڑی مَیں سُنڑیندا ہاں۔ اِیں خوشخبری کیتے مَیں ڈُکھ چیندا ہاں بلکہ مُجرم وانگُوں قید ءچ ہاں، پر خُدا دا کلام کہیں قید ءچ نئیں۔ اِیں واسطے مَیں خُدا دے چُنڑے ہوئے لوکاں دی خاطر سبھ کُچھ سہندا ہاں تاں جو او وی اُوں نجات کُوں جیہڑی مسیح یسُوع دے ذریعے مِلدی ہے، ابدی جلال سمیت حاصل کرݨ۔ ایہ گالھ سچ ہے جو جے اساں مسیح نال مر گئے تاں اُوندے نال زندہ وی راہسوں۔ جے اساں ڈُکھ سَہسوں تاں اُوندے نال بادشاہی وی کریسوں۔ جے اساں اُوندا اِنکار کریسوں تاں او وی ساڈا اِنکار کریسی۔ جے اساں بےوفا تھی ویسوں، وَل وی او وفادار راہسی کیوں جو او خود آپنڑا اِنکار نئیں کر سگدا ۔ ایہ گالھیں لوکاں کُوں یاد ڈیوا، تے خُداوند کُوں گواہ بنڑا تے اُنہاں کُوں تاکید کر جو لفظاں دے بارے ءچ تکرار نہ کرݨ کیوں جو اِیں تُوں کُجھ حاصل نئیں تھیندا بلکہ سُنڑݨ آلے وِگڑ ویندے ہِن۔ کوشش کر تے خُدا دے سامنڑے آپنڑے آپ کُوں ہِک ایجھا کم کرݨ آلا پیش کر جیہڑا مقبول ہووے، جِینکُوں شرمندہ نہ تھیونڑا پووے تے جیہڑا سچائی دے کلام کُوں ٹھیک طرحاں سکھیندا ہووے۔ بے ہُودہ بکواس کنُوں دُور رہ، کیوں جو اِیندے نال لوک زیادہ بے دین تھی ویندن، تے اُنہاں دا کلام کینسر وانگُوں کِھنڈ ویندے۔ ہُمِنِیُس تے فِلیتُس ایجھے ای لوکاں ءچوں ہِن۔ او سچائی کنُوں گُمراہ تھی تے ایہ آدھے ہِن جو قیامت تھی گئی ہے، تے اِینویں او کُجھ لوکاں دا اِیمان خراب کریندے پئے ہِن۔ وَل وی خُدا دی مضبوط بنیاد قائم راہندی ہے تے اُوندے اُتے اِنہاں گالھیں دی مُہر تھی گئی ہے جو ”رب آپنڑے بندیاں کُوں پچھاݨ گِھندے ۔“ تے ”جیہڑا کوئی رب دا ناں گِھندے او بدی تُوں دُور راہوے۔“ ہِک وڈے گھر ءچ نہ صرف سونے چاندی دے تھاں ہوندن بلکہ لکڑ تے مِٹی دے وی ہوندن۔ کُجھ عزت آلے کماں کیتے تے کُجھ عام کماں کیتے۔ بس جے کوئی آپنڑے آپ کُوں اِنہاں بے ہُودہ گالھیں کنُوں پاک صاف رکھیسی تاں او عزت کیتے اِستعمال تھیوݨ آلے تھاں وانگُوں بنڑ ویسی۔ او مُقدّس ہوسی، آپنڑے مالک دے کم آسی تے ہر نیک کم کیتے تیار تھیسی۔ جوانی دیاں بُریاں خواہشاں کنُوں بھج۔ جیہڑے لوک پاک دل نال خُداوند تُوں دُعا کریندے ہِن اُنہاں دے نال رَل تے راستبازی، اِیمان، محبت تے صُلح دے پِچُھوں لگا رہ۔ بیوقُوفی تے جہالت دی بحث تُوں دُور رہ کیوں جو تُوں جانڑدیں جو اِنہاں نال جھیڑے تھیندن، تے خُداوند دے خادم کُوں جھیڑا نئیں کرنڑا چاہیدا بلکہ او ساریاں نال نرمی نال پیش آوے، تعلیم ڈیوݨ دے لائق تے برداشت کرݨ آلا ہووے۔ آپنڑے مخالفاں کُوں حلیمی نال سمجھاوے۔ شاید خُدا اُنہاں کُوں توبہ دی توفیق ڈیوے تے او سچائی کُوں پچھاݨ گِھننڑ۔ وَل او ہوش ءچ آسن تے ابلیس دے پھندے کنُوں چُھٹ ویسن جِتھاں او اُوندے تابع راہوݨ کیتے رکھے گئے ہَن۔ پر ایہ جاݨ گِھن جو اخیر زمانے ءچ بہُوں بُرے ڈینہہ آسن۔ لوک خود غرض، پیسیاں دے لالچی، شیخی مارݨ آلے، تکبر کرݨ آلے، چُغلی کرݨ آلے، ماء پِیُو دے نا فرمان، نا شُکرے، ناپاک، محبت تُوں خالی، سخت دل، بدنام کرݨ آلے، آپنڑے نفس اُتے قابو نہ رکھنڑ آلے، ظالم، نیکی دے دُشمنڑ، دوکھے باز، بے پرواہ، مغرُور تے خُدا دی نسبت عیش و عشرت کُوں زیادہ پسند کرݨ آلے ہوسن۔ او دیندار تاں لگسن پر زندگی ءچ دینداری دا کوئی اثر قبول نہ کریسن۔ ایجھیاں کنُوں دُور ای راہویں۔ اِنہاں ءچ کُجھ ایجھے وی ہِن جیہڑے چُپ چپیتے گھراں ءچ وڑ آندے ہِن تے چھچھوری عورتاں کُوں آپنڑے قابو ءچ کر گِھندے ہِن جیہڑیاں گُناہاں ءچ دبیاں ہوندیاں ہِن تے طرحاں طرحاں دیاں بُریاں خواہشاں دے تابع راہندیاں ہِن۔ ایہ عورتاں تعلیم حاصل کریندیاں راہندیاں ہِن پر سچائی دی پچھاݨ تئیں کڈھائیں نئیں پُجدیاں۔ جِینویں جادُوگر ینیّس تے یمبریس مُوسیٰ دی مخالفت کیتی ہئی، اُونویں ای ایہ لوک وی سچائی دی مخالفت کریندے ہِن۔ اُنہاں دا دماغ وِگڑ گئے ہِن تے ایہ اِیمان دے لحاظ نال نا مقبول ہِن۔ پر ایہ زیادہ کامیاب نہ تھی سگسنڑ کیوں جو اُنہاں دی نادانی سبھ لوکاں اُتے ظاہر تھی ویسی جِینویں اُنہاں جادُوگراں دی تھئی ہئی۔ پر تُوں تعلیم ءچ، چال چلنڑ ءچ، مقصد ءچ، اِیمان ءچ، صبر ءچ، محبت ءچ، برداشت ءچ، ستائے ونجنڑ تے ڈُکھ چاوݨ ءچ میڈی پیروی کیتی۔ تُوں جانڑدیں جو انطاکِیہ، اکُنیُم تے لُسترہ ءچ میڈے اُتے کِتنے ڈُکھ آئے پر خُداوند میکُوں اُنہاں ساریاں تُوں رہائی بخشی۔ اصل ءچ سبھ لوک جیہڑے مسیح یسُوع ءچ دینداری دی زندگی گُزارݨ چاہندے ہِن، او سبھ ستائے ویسن۔ تے بدکار تے دوکھے باز لوک فریب ڈیندے ڈیندے تے فریب کھاندے کھاندے وِگڑدے ویسن۔ پر تُوں اِنہاں گالھیں اُتے قائم رہ جیہڑیاں تَیں سکھیاں ہِن تے جِنہاں دا تیکُوں پُورا یقین ہے، کیوں جو تُوں جانڑدا ہیں جو اِنہاں گالھیں کُوں سِکھاوݨ آلے کوݨ ہِن۔ تے تُوں چھوٹے لا کنُوں خُدا دے پاک صحیفیاں تُوں واقف ہیں جیہڑے تیکُوں مسیح یسُوع اُتے اِیمان گِھن آوݨ نال نجات حاصل کرݨ دی دانائی بخش سگدن۔ ہر ہِک مُقدّس صحیفہ خُدا دے اِلہام کنُوں ہے تے او تعلیم ڈیوݨ، ملامت کرݨ، اصلاح کرݨ تے راستبازی ءچ تربیت ڈیوݨ کیتے مفید ہے۔ تاں جو خُدا دا بندہ کامِل بنڑے تے ہر ہِک نیک کم کرݨ کیتے تیار تھی ونجے۔ مَیں خُدا تے یسُوع مسیح کُوں جیہڑا زندیاں تے مُردیاں دی عدالت کریسی، گواہ بنڑا تے مسیح دے ظہور تے بادشاہی دی یاد ڈیوا تے تیکُوں تاکید کریندا ہاں، جو تُوں کلام دی تبلیغ کر، تے اِیندے کیتے چنگے ماڑے ویلے تیار رہ، بہُوں صبر نال تے تعلیم ڈیندے ہوئے لوکاں کُوں سمجھا، ملامت کر، تے نصیحت کر۔ کیوں جو ایجھا وقت آندا پئے جو لوک صحیح تعلیم دی برداشت نہ کریسن بلکہ آپنڑیاں آپنڑیاں نفسانی خواہشاں دے مطابق ایجھے اُستاد جمع کریسن جیہڑے اُوہو اکھیسن جیہڑا او سُنڑݨ چاہندے ہِن۔ او سچائی سُنڑݨ تُوں آپنڑے کَن پھیر گِھنسن تے فرضی کہانڑیاں دو توجہ ڈیسن۔ پر تُوں ہر حال ءچ ہوشیار رہ، ڈُکھ برداشت کر، خوشخبری دی تبلیغ کر، تے آپنڑی خدمت کُوں پُورا کر۔ کیوں جو میں تاں انگُور دے رَس وانگُوں قُربان گاہ اُتے نذر دے طور تے وِیٹیا ویندا پِیا ہاں تے میڈے اِیں دُنیا تُوں کُوچ دا وقت آ گئے۔ مَیں چنگی لڑائی لڑ گِھدی ہے۔ مَیں دوڑ کُوں مُکا گِھدے تے اِیمان کُوں محفوظ رکھے۔ ہُنڑ راستبازی دا تاج میڈے کیتے رکھیا ہے۔ ایہ تاج خُداوند جیہڑا عادل مُنصف ہے میکُوں آپنڑے واپس آوݨ دے ڈینہہ ڈیسی۔ تے نہ صرف میکُوں بلکہ اُنہاں ساریاں کُوں وی جِنہاں اُوندے ظاہر تھیوݨ دی سِک رکھی ہے۔ میڈے کولھ جلدی آوݨ دی کوشش کر۔ کیوں جو دیماس دُنیا نال محبت کر تے میکُوں چھوڑ ڈِتے تے تھِسّلُنِیکے چلیا گئے۔ تے کریسکینس گلِتیہ تے طِطُس دلمتیہ کُوں روانہ تھی گئے۔ صرف لُوقا میڈے نال ہے۔ تُوں مرقس کُوں آپنڑے نال گِھن آ کیوں جو او میڈی خدمت ءچ میڈے کیتے فائدہ مند ہے۔ تخِکُس کُوں مَیں اِفِسُس بھیج ڈِتے۔ جِیں ویلے تُوں آویں تاں او چولا جیہڑا مَیں تروآس ءچ کرپُس دے کولھ چھوڑ آیا ہم آپنڑے نال گِھدی آویں، تے کتاباں وی خاص کر او جیہڑیاں کَھل اُتے لِکھیاں ہِن۔ پِتّل دے برتن بنڑاوݨ آلے سکندر میکُوں بہُوں نُقصان پُچائے۔ خُداوند اُونکُوں اُوندے کماں دا بدلہ ڈیسی۔ تُوں اُوں کنُوں خبردار راہویں کیوں جو اُوں ساڈے پیغام دی سخت مخالفت کیتی ہئی۔ عدالت ءچ میڈی پہلی پیشی ویلے کوئی میڈی مدد کیتے نہ آیا بلکہ ساریاں میکُوں چھوڑ ڈِتا۔ خُدا اُنہاں تُوں اِیندا حساب نہ گِھنے۔ پر خُداوند میڈا مددگار ہئی، تے اُوں میکُوں طاقت ڈِتی تاں جو میڈے وسیلے اُوندا پیغام پُوری طرحاں سُنڑایا ونجے تے سارے غیر قوماں آلے اُونکُوں سُنڑݨ۔ تے اِینویں مَیں شیر دے مُنہ کنُوں چُھڑایا گِیا۔ خُداوند میکُوں ہر بُرے حملے کنُوں بچیسی تے سلامتی نال آپنڑی اسمانی بادشاہی ءچ پُچیسی۔ اُوندی تعریف ہمیشاں تئیں تھیندی راہوے۔ آمین۔ پرِسکہ تے اَکوِلہ کُوں تے اُنیسِفرُس دے خاندان کُوں سلام آکھ۔ اِراستُس کُرِنتُھس شہر ءچ رہ گئے تے مَیں ترُفِمُس کُوں مِیلیتُس ءچ چھوڑ ڈِتے کیوں جو او بیمار ہا۔ ٹَھڈ دے موسم تُوں پہلے میڈے کولھ پُجنڑ دی کوشش کر۔ یُوبُولُس، پُودینس، لینُس، کلودِیہ تے سبھ مسیحی بِھرا تیکُوں سلام آدھے ہِن۔ خُداوند تیڈی رُوح نال راہوے۔ خُدا دا فضل تیڈے اُتے تھیندا راہوے۔ ایہ خط میں پولُس دی طرفوں ہے جیہڑا خُدا دا خادم تے یسُوع مسیح دا رسُول ہاں۔ میں اِیں واسطے مقرر کیتا گِیا تاں جو خُدا دے چُنڑے ہوئے لوک اِیمان ءچ تے اُوں سچائی دی پچھاݨ ءچ ترقی کرݨ جیہڑی دیندار زندگی دو گِھن ویندی ہے، تے اُوں ہمیشاں دی زندگی دی اُمید اُتے قائم راہوݨ، جِیندا وعدہ خُدا جیہڑا کُوڑ نئیں مریندا، زمانے دے شروع تھیوݨ کنُوں وی پہلے کر ڈِتے۔ پر ہُنڑ اُوں آپنڑے مقرر کیتے وقت اُتے آپنڑے کلام دی تبلیغ دے ذریعے اُونکُوں ظاہر کیتا۔ اِیں تبلیغ دا کم ساڈے نجات ڈیوݨ آلے خُدا دے حُکم نال میڈے سپُرد کیتا گئے۔ ایہ خط طِطُس دے ناں ہے جیہڑا اِیمان دی شراکت دے مطابق میڈا سچا فرزند ہے۔ تیکُوں خُدا باپ تے ساڈے نجات ڈیوݨ آلے مسیح یسُوع دی طرفوں فضل تے اِطمینان حاصل تھیندا راہوے۔ مَیں تیکُوں کریتے ءچ اِیں واسطے چھوڑ ڈِتا ہا تاں جو جیہڑا کم اُتھاں ادُھورا رہ گِیا ہا، تُوں اُونکُوں پُورا کر سگیں، تے ہر شہر ءچ بزُرگاں کُوں مقرر کریں جِینویں مَیں تیکُوں ہدایت ڈِتی ہئی۔ بزُرگ بے اِلزام ہووے، ہِک ذال آلا ہووے، اُوندے بال اِیماندار ہووݨ تے عیاشی تے نافرمانی دے اِلزام کنُوں پاک ہووݨ۔ نگہبان کُوں خُدا دے لوکاں دا مُختار ہووݨ دے سببّوں بے اِلزام ہوونڑا چاہیدے۔ او ضِدی تے کوڑیل نہ ہووے، شرابی تے مار کُٹ کرݨ آلا نہ ہووے تے نہ ای پیسے دا لالچی ہووے۔ بلکہ مہمان نواز، بھلائی نال محبت کرݨ آلا، مُتّقی، اِنصاف پسند، پاک تے آپنڑے نفس اُتے قابو رکھنڑ آلا ہووے۔ جیہڑا سچا کلام اُونکُوں سِکھایا گئے، او اُوندے اُتے قائم راہوے تاں جو او صحیح تعلیم نال ڈُوجھیاں کُوں نصیحت ڈے سگے تے مخالفاں کُوں وی سمجھا سگے۔ کیوں جو بہُوں سارے لوک باغی، فضول گالھیں کرݨ آلے تے دغاباز ہِن، خاص کر او جیہڑے ختنہ کراوݨ اُتے زور ڈیندے ہِن ۔ ایجھے لوکاں دا مُنہ بند کرݨ ضروری ہے، اِیں واسطے جو او ناجائز نفع دی خاطر غلط تعلیم سِکھا تے گھراں دے گھر برباد کر ڈیندے ہِن۔ اُنہاں دے آپنڑے نبیاں ءچوں ہِک تاں اِتُھوں تئیں آکھ ڈِتے جو ”کریتی لوک ہمیشاں کُوڑے، ظالم جنگلی جانور، سُست پیٹُو ہوندے ہِن۔“ ایہ گواہی سچی ہے۔ اِیں واسطے اُنہاں کُوں سختی نال ملامت کیتا کر تاں جو اُنہاں دا اِیمان صحت مند راہوے، تے او یہُودیاں دیاں فرضی کہانڑیاں تے ایجھے لوکاں دے حُکماں اُتے دھیان نہ ڈیوݨ جیہڑے سچائی کنُوں مُنہ پھیر گِھندے ہِن۔ جیہڑے خود پاک ہِن اُنہاں کیتے سبھ چیزاں پاک ہِن، پر ناپاک تے اِیمان نہ رکھنڑ آلیاں کیتے کوئی چیز پاک نئیں، کیوں جو اُنہاں دی عقل تے دل ڈوہائیں ناپاک ہِن۔ او خُدا دی پچھاݨ دا دعویٰ تاں کریندے ہِن پر آپنڑے کماں تُوں اُوندا اِنکار کریندے ہِن، کیوں جو او مکرُوہ تے نافرمان ہِن تے کوئی نیک کم کرݨ دے قابل نئیں۔ پر تُوں او سِکھا جیہڑا صحیح تعلیم دے مطابق ہے۔ بزُرگ مرداں کُوں سِکھا جو او پرہیزگار، شریف تے مُتّقی ہووݨ تے اِیمان رکھنڑ ءچ تے محبت تے صبر کرݨ ءچ مضبوط ہووݨ۔ اِینویں ای بزُرگ عورتاں کُوں سِکھا جو او خُدا پرست زندگی گُزارݨ۔ او تُہمت لاوݨ آلیاں تے شرابی نہ ہووݨ بلکہ نیک گالھیں سِکھاوݨ آلیاں ہووݨ، تاں جو او جوان عورتاں کُوں سمجھا سگنڑ جو او آپنڑے پایاں تے بالاں کُوں پیار کرݨ، تے مُتّقی، پاک دامن، گھر دا کم کرݨ آلیاں تے مہربان ہووݨ تے آپنڑے پایاں دے تابع راہوݨ تاں جو خُدا دے کلام دی بدنامی نہ تھیوے۔ اِینویں ای جوان مرداں کُوں وی نصیحت کر جو او مُتّقی بنڑݨ۔ تُوں خود سارے گالھیں ءچ نیک کم کر تے اُنہاں کیتے نمونہ بنڑ۔ تیڈی تعلیم ءچ صاف دِلی تے شرافت نظر آوے، تے تیڈا کلام ایجھا صحیح ہووے جو کوئی بندہ اُوندے اُتے انگل نہ چا سگے تاں جو مخالفاں کُوں ساڈے اُتے اِلزام لاوݨ دا موقع نہ مِلے تے او شرمندہ تھی ونجنڑ۔ غُلاماں کُوں سِکھا جو آپنڑے مالکاں دے تابع راہوݨ، اُنہاں کُوں ہر گالھ ءچ راضی کرݨ تے بحث کیتے بغیر گالھ مننڑ، چوری نہ کرݨ بلکہ ہر کم پُوری اِیمانداری نال کرݨ تاں جو اُنہاں دے سارے کم ساڈے نجات ڈیوݨ آلے خُدا دی تعلیم کُوں پُرکشش بنڑاوݨ۔ کیوں جو خُدا دا او فضل ظاہر تھی گِیا ہے جیہڑا یکے اِنساناں دی نجات دا سبب ہے۔ او فضل ساکُوں تربیت ڈیندے جو اساں بے دینی تے دُنیاوی خواہشاں کُوں چھوڑ تے اِیں موجودہ جہان ءچ پرہیزگاری، راستبازی، تے دینداری نال زندگی گُزاروں، تے نال نال اُوں مُبارک اُمید یعنی آپنڑے عظیم خُدا تے نجات ڈیوݨ آلے یسُوع مسیح دے جلال ظاہر تھیوݨ دے اِنتظار ءچ راہوں۔ مسیح آپنڑے آپ کُوں ساڈی خاطر ڈے ڈِتا تاں جو ساڈا فِدیہ ڈے تے ساکُوں ہر طرحاں دی بدکاری کنُوں چُھڑا گِھنے، تے ساکُوں پاک کر تے آپنڑے کیتے ہِک ایجھی اُمت بنڑا گِھنے جیہڑی نیک کم کرݨ ءچ سرگرم راہوے۔ تُوں ایہ گالھیں سِکھا، تے پُورے اِختیار نال نصیحت تے تنبیہ کریندا رہ۔ کوئی وی تیکُوں حقیر نہ سمجھے۔ لوکاں کُوں یاد ڈیوا جو او حاکماں تے اِختیار آلیاں دے تابع راہوݨ، اُنہاں دا حُکم مننڑ تے ہر نیک کم کُوں کرݨ کیتے تیار راہوݨ، کہیں دی بدگوئی نہ کرݨ، تکراری نہ ہووݨ بلکہ نرم دل ہووݨ تے سبھ لوکاں نال بہُوں حلیمی نال پیش آوݨ۔ اساں وی ہِک وقت نادان، نافرمان تے گُمراہ ہسے تے ہر طرحاں دیاں خواہشاں تے عیاشیاں دی غُلامی ءچ ہسے، تے کینہ تے حسد ءچ زندگی گُزریندے پئے ہسے۔ ڈُوجھے ساڈے تُوں نفرت کریندے ہَن تے اساں ڈُوجھیاں تُوں۔ پر جِیں ویلے ساڈے نجات ڈیوݨ آلے خُدا دی مہربانی تے محبت ظاہر تھئی تاں خُدا ساکُوں نجات ڈِتی پر ساڈے نیک کماں دی وجہ کنُوں نئیں جیہڑے اساں کیتے بلکہ آپنڑے رحم دی وجہ کنُوں۔ ایہ نجات ساکُوں رُوح القُدس دے وسیلے مِلی جئیں ساکُوں دھو تے نویں سرے تُوں پیدا کیتا تے نوِیں زندگی ڈِتی۔ خُدا رُوح القُدس کُوں ساڈے نجات ڈیوݨ آلے یسُوع مسیح دے وسیلے ساڈے اُتے بہُوں فیاضی نال نازل کیتا، تاں جو اساں اُوندے فضل دے طفیل راستباز کھڑائے ونجُوں تے اُوں ہمیشاں دی زندگی دے وارث بنڑوں جیندی اساں اُمید رکھیندے ہیں۔ ایہ گالھ سچ ہے تے مَیں چاہندا ہاں جو تُوں اِنہاں گالھیں اُتے خاص زور ڈے تاں جو خُدا اُتے اِیمان گِھن آوݨ آلے دھیان نال نیک کماں ءچ مصروف راہوݨ۔ ایہ گالھیں سبھ کیتے چنگیاں تے مفید ہِن۔ پر احمقانہ بحث، شجرے تے شریعت دے بارے ءچ جھیڑیاں تے لڑائیاں کنُوں دُور رہ کیوں جو ایہ بے فائدہ تے فضول ہِن۔ تفرقے باز کُوں ہِک ڈُو پھیری نصیحت کر، تے بعد ءچ اُوں کنُوں کنارہ کر۔ یقین رکھ جو ایجھا بندہ گُمراہ تھی گئے تے گُناہ کر تے آپنڑے آپ کُوں قصُور وار بنڑیندے۔ جِیں ویلے مَیں اَرتِماس یا تخِکُس کُوں تیڈے کولھ بھجیساں تاں نِیکُپُلس ءچ میڈے کولھ آوݨ دی کوشش کریں کیوں جو مَیں ٹَھڈ دا موسم اُتھائیں گُزارݨ دا فیصلہ کیتے۔ زیناس وکیل تے اپُلّوس دے اگُوں دے سفر ءچ اُنہاں دی مدد کریں تے ایہ وی ڈیکھیں جو اُنہاں کُوں کہیں چیز دی کمی نہ راہوے۔ ساڈے لوکاں کُوں وی چاہیدے جو او چنگے کماں ءچ لگے راہونڑا سِکھنڑ تاں جو ضرورتاں کُوں پُورا کر سگنڑ تے بے پھل زندگی نہ گُزارݨ۔ میڈے سبھ ساتھی تیکُوں سلام آدھے ہِن۔ جیہڑے اِیمان ءچ ساکُوں عزیز رکھیندے ہِن، اُنہاں کُوں ساڈا سلام آکھ۔ خُدا دا فضل تُساں ساریاں نال راہوے۔ ایہ خط میں پولُس دی طرفوں ہے جیہڑا مسیح یسُوع دی خاطر قید ءچ ہاں تے بِھرا تِیمُتِھیُس دی طرفوں وی۔ ایہ خط فِلیمون دے ناں ہے جیہڑا ساڈا عزیز ہم خدمت ہے، تے افیہ بھینڑ، اَرخِپُس جیہڑا ساڈے نال مسیح دا سپاہی ہے تے فِلیمون دے گھر ءچ جمع تھیوݨ آلی کلیسیا دے ناں ہے۔ ساڈے خُدا باپ تے خُداوند یسُوع مسیح دی طرفوں تُہاکُوں فضل تے اِطمینان حاصل تھیندا راہوے۔ ‏ میں تیکُوں آپنڑیاں دُعاواں ءچ یاد کر تے ہمیشاں آپنڑے خُدا دا شُکر کریندا ہاں کیوں جو میں سُنڑدا ہاں جو تُوں خُداوند یسُوع مسیح اُتے اِیمان رکھیندیں تے خُدا دے سارے مُقدّساں کیتے محبت رکھیندیں۔ مَیں دُعا کریندا ہاں جو اِیمان ءچ تیڈی شراکت ایجھی موثر ہووے جو تُوں ہر برکت کُوں جیہڑی مسیح ءچ مِلی ہے چنگی طرحاں سمجھ سگیں۔ کیوں جو بِھرا، میکُوں تیڈی محبت تُوں بہُوں خوشی تے تسلی مِلی ہے کیوں جو تَیں مُقدّساں دے دِلاں کُوں تازہ کیتے۔ اِیں واسطے، بھانویں جو مسیح دا بندہ ہوندے ہوئے میکُوں ایجھی دلیری تاں ہے جو تیکُوں او کم کرݨ دا حُکم ڈیواں جیہڑا تیکُوں کرݨ چاہیدے۔ وَل وی میکُوں ایہ زیادہ پسند ہے جو مَیں تیکُوں محبت دی وجہ تُوں درخاست کراں۔ مَیں پولُس، جیہڑا بُڈھا تے اِیں ویلے مسیح یسُوع دی خاطر قیدی ہاں، آپنڑے پوتر اُنیسمُس دے بارے ءچ تیکُوں مِنت کریندا ہاں، جِیندا مَیں قید ءچ رُوحانی لحاظ نال پِیُو بنڑیا۔ ہِک وقت ہا جو او تیڈے کہیں کم دا نہ ہا پر ہُنڑ او میڈے تے تیڈے ڈُوہائیں دے کم دا ہے۔ ہُنڑ مَیں اُونکُوں یعنی آپنڑے دل دے ٹوٹے کُوں تیڈے کولھ واپس بھجیندا پِیا ہاں۔ میں تاں اُونکُوں آپنڑے کولھ ای رکھنڑ چاہندا ہم تاں جو جئیں تئیں مَیں خوشخبری سُنڑاوݨ دی وجہ تُوں قید ءچ ہاں، او تیڈی جاہ تے میڈی خدمت کرے۔ پر تیڈی اِجازت دے بغیر مَیں کُجھ کرݨ نئیں چاہندا تاں جو تیڈا نیک کم مجبوری نال نئیں بلکہ خوشی نال ہووے۔ تھی سگدے جو اُنیسمُس تَیں کنُوں کُجھ دیر کیتے اِیں واسطے اَنج ریہا ہووے جو بعد ءچ ہمیشاں کیتے تیڈے کولھ راہوے، پر ہُنڑ ہِک غُلام وانگُوں نئیں بلکہ غُلام کنُوں ودھ تے یعنی ہِک بِھرا وانگُوں۔ او میکُوں عزیز ہے پر مَیں کنُوں ودھ تے تیکُوں عزیز ہے نہ صرف اِنسانی طور تے بلکہ خُداوند دے بندہ دی حیثیت نال وی۔ بس جے تُوں میکُوں آپنڑا ساتھی سمجھدیں تاں اُونکُوں اُونویں قبول کر جِینویں میکُوں قبول کریندیں۔ جے اُوں تیڈا کُجھ نُقصان کیتے یا اُوں تیڈا کُجھ ڈیونڑے تاں اُونکُوں میڈے ناں لِکھ گِھن۔ مَیں پولُس آپنڑے ہتھ نال لِکھیندا ہاں جو میں تیکُوں او ادا کر ڈیساں۔ ایہ یاد ڈیواوݨ دی لوڑ نئیں جو میڈا قرض جیہڑا تیڈے اُتے ہے، او تُوں خود ہیں۔ ہا بِھرا، خُداوند دی خاطر میڈے اُتے ایہ مہربانی کر جو میکُوں تَیں تُوں کوئی فائدہ مِلے۔ مسیح ءچ میڈے دل کُوں تازہ کر۔ مَیں تیڈی فرمانبرداری اُتے یقین کر تے تیکُوں لِکھدا پِیا ہاں تے جانڑدا ہاں جو جیہڑا کُجھ تیکُوں آدھا پِیا ہاں، تُوں اُوں کنُوں ودھ کریسیں۔ ہِک بئی گزارش ایہ وی ہے جو میڈے راہنڑ کیتے جاہ تیار رکھیں کیوں جو میکُوں اُمید ہے جو تُہاڈیاں دُعاواں دے وسیلے مَیں قید کنُوں چُھٹ تے تُہاڈے ءچ آ ویساں۔ اِپَفراس جیہڑا مسیح یسُوع دی خاطر میڈے نال قید ہے، تیکُوں سلام آدھے۔ تے مرقس، ارِسترخُس، دیماس تے لُوقا وی جیہڑے میڈے نال خدمت کریندے ہِن، تیکُوں سلام آدھے ہِن۔ ساڈے خُداوند یسُوع مسیح دا فضل تُہاڈی رُوح نال راہوے۔ گُزرے زمانیاں ءچ خُدا ساڈے پِیُو ڈاڈا نال مختلف موقعیاں اُتے تے مختلف طریقیاں نال نبیاں دے وسیلے کلام کیتا، پر اِنہاں آخری ڈینہاں ءچ اُوں آپنڑے پوتر دے وسیلے ساڈے نال کلام کیتا، جِینکُوں اُوں سبھ چیزاں دا وارث بنڑایا تے جیندے وسیلے اُوں کائنات کُوں خلق کیتا۔ پوتر خُدا دے جلال دی چمک تے اُوندی ذات دا عین نقش ہے، تے او آپنڑے قُدرت آلے کلام نال سبھ چیزاں کُوں سنبھلیندے۔ او گُناہاں تُوں پاک کرݨ تُوں بعد اسمان اُتے عظیم خُدا دے سجے پاسے وَنج بیٹھا۔ اِینویں او فرشتیاں کنُوں اِتنا بزُرگ تھی گِیا جِتنا اُوں اُنہاں کنُوں افضل ناں میراث ءچ پایا۔ کیوں جو فرشتیاں ءچوں خُدا کڈھاں کہیں کُوں آکھیا جو ”تُوں میڈا پوتر ہیں اَج مَیں تیڈا باپ بنڑیا ۔“ تے وَل ایہ جو ”مَیں اُوندا باپ ہوساں تے او میڈا پوتر ہوسی ۔“ تے وَل جِیں ویلے خُدا آپنڑے پلوٹھے کُوں دُنیا ءچ گِھن آندے تاں اکھیندے جو ”خُدا دے سبھ فرشتے اُونکُوں سجدہ کرݨ۔“ فرشتیاں دے بارے ءچ او آدھے جو ”او آپنڑے فرشتیاں کُوں ہواواں آپنڑے خادماں کُوں بھاہ دے لُمبے بنڑیندے ۔“ پر پوتر دے بارے ءچ اکھیندے جو ”اے خُدا، تیڈا تخت ہمیشاں تئیں قائم راہسی، تیڈی بادشاہی دا عصا اِنصاف دا عصا ہے۔ تَیں نیکی نال محبت تے بُرائی تُوں نفرت کیتی۔ اِیں واسطے خُدا، ہاں تیڈے خُدا تیکُوں شادمانی دے تیل نال مخصوص کر تے تیڈے ساتھیاں کنُوں زیادہ سرفراز کیتا ۔“ تے ایہ وی اکھیندے جو ”اے خُداوند، تَیں شروع ءچ زمین دی بنیاد رکھی تے اسمان تیڈے ہتھاں دی کاریگری ہے۔ او ختم تھی ویسن پر تُوں قائم راہسیں۔ او سارے کپڑیاں وانگُوں گھس ویسن۔ تُوں اُنہاں کُوں چادر وانگُوں ولھیٹ ڈیسیں تے او کپڑیاں وانگُوں بدل ڈِتے ویسن۔ پر تُوں لاتبدیل ہیں تے تیڈی زندگی کڈھائیں ختم نہ تھیسی ۔“ خُدا فرشتیاں ءچوں کہیں دے بارے ءچ ایہ کڈھاں آکھیا جو ”تُوں میڈے سجے پاسُوں بہہ جئیں تئیں مَیں تیڈے دُشمنڑاں کُوں تیڈے پیراں دی چوکی نہ بنڑا ڈیواں ؟“ کیا او سارے فرشتے خدمت گُزار رُوحاں نئیں، جیہڑیاں نجات پاوݨ آلیاں دی خدمت کیتے بھیجیاں ویندیاں ہِن؟ اِیں واسطے لازم ہے جو جیہڑا کلام اساں سُنڑے، اُوندے اُتے بِیا وی غور کرُوں، کِتھائیں اِینویں نہ تھیوے جو اساں وَیہہ تے اُوندے کنُوں دُور لگے ونجُوں۔ کیوں جو جڈاں او کلام جیہڑا فرشتیاں دے ذریعے فرمایا گِیا ہا ، قائم ریہا تے اُوندی ہر خلاف ورزی تے نافرمانی دی سزا مِلدی ہئی، تاں وَل جے اساں اِتنی وڈی نجات کُوں نظر انداز کرُوں تاں کِینویں بچ سگسوں؟ کیوں جو اِیں نجات دا اعلان پہلے خُداوند خود کیتا تے وَل جِنہاں لوکاں اِینکُوں سُنڑیا، اُنہاں اُوندی سچائی ساڈے اُتے ثابت کر ڈِتی۔ نال ای خُدا آپنڑی مرضی دے مطابق نشاناں، عجیب کماں، قِسم قِسم دے معجزیاں تے رُوح القُدس دیاں ونڈیاں ہوئیاں نعمتاں دے ذریعے خود وی اُوندی گواہی ڈیندا ریہا۔ خُدا اُوں آوݨ آلی دُنیا کُوں جِیندا ذِکر اساں کریندے ہیں، فرشتیاں دے تابع نئیں کیتا۔ بلکہ کلام ءچ کِتھائیں ایہ آکھیا گِیا ہے جو ”اِنسان کیا چیز ہے جو تُوں اُوندا خیال رکھیں؟ یا آدم زاد کیا ہے جو تُوں اُوندی فِکر کریں؟ تَیں اُونکُوں فرشتیاں کنُوں کُجھ ای گھٹ بنڑایا۔ تے جلال تے عزت دا تاج اُونکُوں پوایا۔ [تے آپنڑے ہتھاں دے کماں اُتے اُونکُوں مُختار بنڑایا۔] تے سبھ کُجھ اُوندے پیراں تلے کر ڈِتا ۔“ جِیں ویلے لِکھیا ہے جو ”سبھ کُجھ اُوندے پیراں تلے کر ڈِتا“ تاں اِیندا مطلب ہے جو خُدا کوئی ایجھی چیز نئیں چھوڑی جیہڑی اُوندے تابع نہ کیتی گئی ہووے۔ پر اساں ہُنڑ تئیں ساریاں چیزاں اُوندے تابع نئیں ڈیدھے۔ پر اساں یسُوع کُوں، جِینکُوں کُجھ دیر کیتے فرشتیاں کنُوں گھٹ کیتا گِیا، موت دا ڈُکھ سہنڑ دے سببّوں شان تے عزت دا تاج پاتے ہوئے ڈیدھے ہیں۔ ہا خُدا دے فضل نال اُوں ہر اِنسان کیتے موت دا مزہ چکھیا۔ کیوں جو مناسب ہا جو خُدا جیندے کیتے تے جیندے وسیلے نال سبھ چیزاں موجود ہِن، جِیں ویلے او بہُوں سارے فرزنداں کُوں آپنڑے جلال ءچ شامل کرے تاں اُنہاں دی نجات دے بانی یسُوع کُوں ڈُکھاں دے ذریعے کامِل بنڑاوے۔ پاک کرݨ آلا یسُوع تے پاک تھیوݨ آلے لوک ہِکو خاندان دے ہِن۔ اِیں واسطے او اُنہاں کُوں بِھرا آکھنڑ تُوں نئیں شرمیندا۔ او فرمیندے جو ”مَیں آپنڑے بِھرانواں کُوں تیڈے ناں دا بیان کریساں، تے جماعت دے وچال تیڈی حمد دے گیت گاساں ۔“ تے وَل ایہ جو ”مَیں اُوندے اُتے بھروسا رکھیساں ۔“ تے ایہ جو ”ڈیکھ مَیں اُنہاں بالاں نال حاضر ہاں جیہڑے خُدا میکُوں ڈِتے ہِن ۔“ بس کیوں جو خُدا دے فرزند خون تے گوشت نال بنڑے ہوئے اِنسان ہِن، اِیں واسطے یسُوع خود وی اُنہاں آلی کار اِنسان بنڑیا تاں جو آپنڑی موت دے وسیلے نال موت دی قُدرت رکھنڑ آلے یعنی ابلیس کُوں تباہ کرے، تے اُنہاں کُوں چُھڑا گِھنے جیہڑے ساری عُمر موت دے ڈر کنُوں غُلامی ءچ گرفتار ریہے۔ ہُنڑ ظاہر ہے جو یسُوع فرشتیاں دی نئیں بلکہ ابرہام دی نسل دی فِکر کریندے۔ اِیں واسطے ضروری ہا جو او ہر لحاظ نال آپنڑے بِھرانواں وانگُوں بنڑے، تاں جو او خُدا دی خدمت کریندے ہوئے ہِک رحم دل تے وفادار کاہِن ِ اعظم بنڑ تے اُنہاں دے گُناہاں دا کفارہ ڈے سگے۔ تے کیوں جو یسُوع خود ازمائش دا سامنڑا کریندے ہوئے ڈُکھ برداشت کیتے، اِیں واسطے او اُنہاں دی وی مدد کر سگدے جیہڑے ازمائش دا سامنڑا کریندے ہِن۔ اِیں واسطے میڈے پاک بِھراؤ، تُساں جیہڑے اسمانی دعوت ءچ شریک ہیوے، یسُوع اُتے غور کرو جیہڑا رسُول تے کاہِن ِ اعظم ہے تے جِیندا اساں اِقرار کریندے ہیں۔ جِینویں مُوسیٰ خُدا دے گھر ءچ وفادار ہا، اُونویں ای یسُوع آپنڑے مقرر کرݨ آلے نال وفادار ریہا۔ پر جِینویں گھر بنڑاوݨ آلا اُوں گھر کنُوں زیادہ عزت دے لائق سمجھیا ویندے، اُونویں ای یسُوع وی مُوسیٰ کنُوں زیادہ عزت دے لائق ہے۔ ہر گھر دا کوئی نہ کوئی بنڑاوݨ آلا ہوندے، پر سبھ چیزاں دا بنڑاوݨ آلا خُدا ہے۔ مُوسیٰ تاں خادم دی حیثیت نال خُدا دے سارے گھر ءچ وفادار ریہا، تاں جو اُنہاں گالھیں دی گواہی ڈیوے جیہڑیاں خُدا آئندہ بیان کرݨ آلا ہے ۔ پر مسیح پوتر دی حیثیت نال خُدا دے گھر دا مُختار ہے۔ تے اُوندے گھر آلے اساں ہیں پر شرط ایہ ہے جو اساں اُوں دلیری تے اُمید کُوں مضبوطی نال قائم رکھوں جیندے اُتے اساں فخر کریندے ہیں۔ بس جِینویں رُوح القُدس فرمیندے ”جے اَج تُساں خُدا دی اواز سُنڑو تاں آپنڑے دِلاں کُوں سخت نہ کرو، جِینویں لوکاں بغاوت کر تے بیابان ءچ ازمائش دے وقت کیتا۔ اُتھاں تُہاڈے پِیُو ڈاڈے میکُوں ازما تے میڈا اِمتحان گِھدا بھانویں چالیہہ سال تئیں میڈے کم ڈِٹھے۔ اِیں واسطے مَیں اُوں نسل نال ناراض تھیّا تے آکھیا جو ’اُنہاں دے دل ہمیشاں گُمراہ تھیندے راہندن، تے اُنہاں میڈے رستیاں کُوں نئیں پچھانڑیا۔‘ اِیں واسطے مَیں آپنڑے غضب ءچ قَسم کھادی جو او اُوں جاہ ءچ کڈھائیں داخل نہ تھیسن جِتھاں مَیں اُنہاں کُوں ارام ڈیونڑا ہا ۔“ بِھراؤ، خبردار راہو جو تُہاڈے ءچوں کہیں دا دل بُرائی پارُوں تے اِیمان نہ رکھنڑ پارُوں زندہ خُدا تُوں پِھر نہ ونجے۔ پر جئیں تئیں اَج دا ڈینہہ آکھیا ویندے، ہر روز ہِک ڈُوجھے کُوں نصیحت کریندے راہو تاں جو تُہاڈے ءچوں کوئی وی گُناہ دے دوکھے ءچ آ تے سخت دل نہ تھی ونجے۔ کیوں جو اساں مسیح ءچ شریک تھی گئے ہیں پر شرط ایہ ہے جو جیہڑا اعتماد اساں شروع ءچ کریندے ریہے ہیں اُوندے اُتے آخر تئیں مضبوطی نال قائم راہوں۔ جِینویں آکھیا گِیا ہے جو ”جے اَج تُساں اُوندی اواز سُنڑو تاں آپنڑے دِلاں کُوں سخت نہ کرو، جِینویں بغاوت ءچ کیتا ہا ۔“ او کیہڑے ہَن جِنہاں خُدا دی اواز سُنڑ تے وی بغاوت کیتی؟ کیا او سارے نہ ہَن جیہڑے مُوسیٰ دی راہنمائی ءچ مِصر تُوں باہر نِکلے ہَن؟ تے او کیہڑے ہَن جِنہاں نال خُدا چالیہہ سال تئیں ناراض ریہا؟ کیا اُنہاں لوکاں نال نئیں جِنہاں گُناہ کیتا تے اُنہاں دیاں لاشاں بیابان ءچ پئیاں رہ گئیاں؟ تے خُدا کیندے بارے ءچ قَسم کھا تے آکھیا جو او اُوں جاہ ءچ کڈھائیں داخل نہ تھیسن جِتھاں مَیں اُنہاں کُوں ارام ڈیونڑا ہا؟ کیا ایہ اُوہو نئیں جِنہاں نافرمانی کیتی ہئی؟ اِینویں اساں ڈیدھے ہیں جو او اِیمان نہ رکھنڑ دی وجہ تُوں اُوں ارام دی جاہ ءچ داخل نہ تھی سگے۔ بس جڈاں خُدا دا ایہ وعدہ قائم ہے جو اساں اُوندے ارام دی جاہ ءچ داخل تھی سگدے ہیں تاں ساکُوں خبردار راہونڑا چاہیدے، کِتھائیں اِینویں نہ تھیوے جو تُہاڈے ءچوں کوئی اُوندے ءچ داخل تھیوݨ کنُوں محروم رہ ونجے۔ کیوں جو جِینویں اُنہاں لوکاں خوشخبری سُنڑی اُونویں ای اساں وی خوشخبری سُنڑی ہے، پر جیہڑا پیغام اُنہاں سُنڑیا او اُنہاں کیتے بے فائدہ ثابت تھیّا کیوں جو اُنہاں اُونکُوں اِیمان نال نہ سُنڑیا۔ صرف اساں جیہڑے اِیمان گِھن آئے ہیں خُدا دے ارام دی جاہ ءچ داخل تھیندے ہیں جِینویں اُوں آکھے جو ”مَیں آپنڑے غضب ءچ قَسم کھادی جو او اُوں جاہ ءچ کڈھائیں داخل نہ تھیسن جِتھاں مَیں اُنہاں کُوں ارام ڈیونڑا ہا ۔“ بھانویں جو دُنیا دے بنڑائے ونجنڑ دے وقت کنُوں اُوندے کم پُورے تھی گئے ہَن ۔ بلکہ ستویں ڈینہہ دے بارے ءچ کہیں جاہ تے اِینویں فرمایا گئے جو ”خُدا آپنڑے کم کُوں ستویں ڈینہہ مکمل کیتا تے اِیں تُوں فارغ تھیّا ۔“ تے وَل اُونہئی جاہ تے او آدھے، ”او اُوں جاہ ءچ کڈھائیں داخل نہ تھیسن جِتھاں مَیں اُنہاں کُوں ارام ڈیونڑا ہا۔“ جِنہاں سبھ تُوں پہلے ایہ خوشخبری سُنڑی او آپنڑی نافرمانی دی وجہ کنُوں داخل نہ تھی سگے، پر کُجھ ہُنڑ وی داخل تھی سگدے ہِن۔ تے خُدا ہِک بِیا ڈینہہ مقرر کیتا یعنی اَج۔ بہُوں سالاں بعد اُوں داؤد دے ذریعے ایہ گالھ آکھی جِینویں پہلے ذِکر تھیّا ہے جو ”جے اَج تُساں اُوندی اواز سُنڑو تاں آپنڑے دِلاں کُوں سخت نہ کرو۔“ جے یشُوع بِن نُون اُنہاں کُوں ارام ڈِتا ہوندا تاں خُدا اُوندے بعد ہِک بئے ڈینہہ دا ذِکر نہ کریندا۔ اِیں واسطے خُدا دے لوکاں کیتے ایجھا خاص ارام باقی ہے جیہڑا سبت دے ڈینہہ آلی کار ہے۔ کیوں جو جیہڑا کوئی خُدا دے ارام ءچ داخل تھیندے او خُدا وانگُوں آپنڑے کماں تُوں فارغ تھی تے ارام کریندے۔ اِیں واسطے آؤ، اساں اُوں ارام ءچ داخل تھیوݨ دی پُوری کوشش کرُوں تاں جو کوئی بندہ پِیُو ڈاڈا دے نافرمانی دے نمونے اُتے ٹُر تے، ڈھے نہ پووے۔ کیوں جو خُدا دا کلام زندہ تے موثر ہے۔ او ہر ڈُو دھاری تلوار کنُوں زیادہ تیز ہے، اِتُھوں تئیں جو جان تے رُوح، تے جوڑاں تے مِکھ کُوں چِیردا ہویا لنگھ ویندے، تے دل دے خیالاں تے اِرادیاں کُوں پرکھدے۔ کائنات دی کوئی چیز خُدا دی نظر کنُوں لُکی ہوئی نئیں، بلکہ جیندے حضُور ءچ ساکُوں جواب ڈیونڑے، اُوندی نظر ءچ ہر چیز بے نقاب تے ظاہر ہے۔ بس جڈاں ساڈا ہِک ایجھا عظیم کاہِن ِ اعظم ہے جیہڑا اسماناں کنُوں لنگھ گِیا یعنی خُدا دا پوتر یسُوع، تاں آؤ اساں آپنڑے اِیمان اُتے قائم راہوں، جِیندا اِقرار اساں کریندے ہیں۔ کیوں جو ساڈا کاہِن ِ اعظم ایجھا نئیں جیہڑا ساڈیاں کمزوریاں ءچ ساڈا ہمدرد نہ بنڑ سگے بلکہ او ساڈے وانگُوں سارے گالھیں ءچ ازمایا گِیا، وَل وی بے گُناہ ریہا۔ اِیں واسطے اساں خُدا دے فضل دے تخت دے کولھ دلیری نال جُلوں تاں جو او ساڈے اُتے رحم کرے تے اساں اُوں فضل کُوں حاصل کرُوں جیہڑا ضرورت ویلے ساڈی مدد کرے۔ ہر کاہِن ِ اعظم آدمیاں ءچوں چُنڑیا ویندے تاں جو او خُدا نال تعلق رکھنڑ آلے گالھیں ءچ لوکاں دی نمائندگی کرے تے گُناہاں کیتے نذراں تے قُربانیاں پیش کرے۔ او بے سمجھ تے گُمراہ لوکاں نال نرمی نال پیش آ سگدے کیوں جو اُوندے ءچ وی کمزوریاں ہوندیاں ہِن۔ اِیہو وجہ ہے جو لوکاں دے گُناہاں دے نال نال اُونکُوں آپنڑے گُناہاں دی خاطر وی قُربانیاں پیش کرنڑیاں پوندیاں ہِن۔ کہیں بندے کُوں کاہِنِ اعظم دا باعزت عُہدہ آپنڑی مرضی نال نئیں مِلدا بلکہ ہارُون آلی کار خُدا دی طرفوں سڈے ونجنڑ نال مِلدے۔ اِینویں ای مسیح وی کاہِن ِ اعظم بنڑݨ دی عزت آپنڑی مرضی نال نئیں گِھدی بلکہ خُدا اُونکُوں فرمائے جو ”تُوں میڈا پوتر ہیں، اَج مَیں تیڈا باپ بنڑیا ۔“ تے خُدا ہِک بئی جاہ تے وی فرمیندے جو ”تُوں مَلک صِدق آلی کار ہمیشاں تئیں کاہِن ہیں ۔“ جِیں ویلے یسُوع اِیں دُنیا ءچ ہا، اُوں خُدا کنُوں جیہڑا اُونکُوں موت کنُوں بچا سگدا ہا، اُچی اواز ءچ تے ہنجُو وہا وہا تے دُعاواں تے مِنتاں کیتیاں، تے اُوندی سُنڑی گئی کیوں جو اُوں آپنڑے آپ کُوں خُدا کیتے وقف کیتا ہا۔ پوتر ہووݨ دے باوجود اُوں ڈُکھ چا چا تے تابعداری سِکھی ۔ اِیں طرح کاملیت تئیں پُجنڑ تُوں بعد او اُنہاں ساریاں کیتے ابدی نجات دا سبب بنڑیا جیہڑے اُوندی تابعداری کریندے ہَن۔ تے خُدا اُونکُوں مَلک صِدق وانگُوں کاہِن ِ اعظم مقرر کیتا۔ اِیندے بارے ءچ ساکُوں مزید بہُوں کُجھ آکھنڑا ہے پر تُہاکُوں سمجھاونڑا مُشکل ہے، کیوں جو تُساں ڈورے ہیوے۔ وقت دے حساب نال تاں ہُنڑ تئیں تُہاکُوں اُستاد ہوونڑا چاہیدا ہا پر ہُنڑ تئیں اِیں گالھ دی لوڑ ہے جو کوئی بندہ تُہاکُوں خُدا دے کلام دے بنیادی اصُول ولا سِکھاوے۔ تُہاکُوں روٹی کھاوݨ دی نئیں بلکہ کھیر پِیوݨ دی لوڑ ہے۔ جیہڑا کھیر پِیندے، او حالی تئیں چھوٹا بال ہے، تے راستبازی دی تعلیم کنُوں ناواقف ہے۔ پر روٹی وڈیاں کیتے ہوندی ہے جیہڑے تجربے تے تربیت نال اِیں قابل تھی گئے ہِن جو نیکی تے بُرائی ءچ فرق کر سگنڑ۔ اِیں واسطے آؤ، اساں مسیح دے بارے ءچ بنیادی تعلیم دے گالھیں کُوں دُہراوݨ چھوڑ تے بالغ ہووݨ دو قدم ودھاؤں۔ اساں موت گِھن آوݨ آلے کماں کنُوں توبہ کرݨ، خُدا اُتے اِیمان رکھنڑ، بپتسمہ گِھننڑ، مخصوص کرݨ کیتے سر اُتے ہتھ رکھنڑ، مُردیاں دی قیامت تے ابدی عدالت دی تعلیم دی بنیاد ولا نہ رکھوں۔ جیکر خُدا دی مرضی ہوئی تاں اساں اِینویں ای کریسوں۔ او لوک جِنہاں دے دل ہِک پھیری روشن تھی گئے ہِن تے جِنہاں اسمانی نعمت دا مزہ چَکھ گِھدے، جِنہاں کُوں رُوح القُدس مِلیا ہے، جِنہاں خُدا دے کلام دی چنگائی تے آوݨ آلے جہان دیاں قوتاں دا تجربہ کیتا ہا، جے او آپنڑے اِیمان کنُوں پِھر ونجنڑ تاں اُنہاں کُوں ولا کنُوں توبہ دو رجُوع کراوݨ ممکن نئیں۔ کیوں جو آپنڑے اِیں کم نال او خُدا دے پوتر کُوں ڈُوجھی پھیری صلیب اُتے چڑھا تے اعلانیہ ذلیل کریندے ہِن۔ جیہڑی زمین ولا ولا تھیوݨ آلی بارش کُوں جذب کریندی تے کھیتی باڑی کرݨ آلے کُوں چنگی فصل ڈیندی ہے، اُوں زمین کُوں خُدا دی طرفوں برکت مِلدی ہے۔ پر جے او زمین جھاڑیاں تے کنڈیر پیدا کریندی راہوے تاں او کہیں کم دی نئیں۔ اُوندے اُتے لعنت جلدی آوݨ آلی ہے تے آخر کار اُونکُوں ساڑ ڈِتا ویسی۔ عزیزو! بھانویں اساں ایہ گالھیں آدھے ہیں، وَل وی اساں تُہاڈے کیتے اِنہاں کنُوں چنگے گالھیں دا یقین رکھیندے ہیں جِنہاں دا تعلق نجات نال ہے۔ کیوں جو خُدا بے اِنصاف نئیں جو او تُہاڈے کم تے اُوں محبت کُوں بُھل ونجے جیہڑی تُساں اُوندے ناں دی خاطر اُوندے مُقدّساں دی خدمت کر تے ظاہر کیتی تے ہُنڑ وی کریندے پئے ہیوے۔ اساں چاہندے ہیں جو تُہاڈے ءچوں ہر ہِک اِینویں ای آخر تئیں کوشش کریندا راہوے تاں جو جِنہاں گالھیں دی تُساں اُمید رکھیندے ہیوے، او پُوریاں تھی ونجنڑ۔ تُساں آلسی نہ بنڑو بلکہ اُنہاں دے نمونے اُتے ٹُرو جیہڑے آپنڑے اِیمان تے صبر دے سببّوں وعدیاں دے وارث تھیندے ہِن۔ جِیں ویلے خُدا ابرہام نال وعدہ کیتا تاں اُوں آپنڑے ای ناں دی قَسم کھادی کیوں جو قَسم کھاوݨ کیتے خُدا کنُوں وڈا کوئی نہ ہا۔ خُدا فرمایا ”مَیں تیکُوں ضرور برکت ڈیساں تے تیڈی اولاد کُوں بہُوں ودھیساں۔“ اِینویں ابرہام صبر نال اِنتظار کر تے وعدہ کیتی ہوئی برکت گِھدی۔ لوک تاں آپنڑے کنُوں وڈے دی قَسم کھاندے ہِن تے قَسم گالھ دی تصدیق کر تے جھیڑے کُوں ختم کریندی ہے۔ اِیں واسطے جِیں ویلے خُدا دی مرضی تھئی جو وعدے دے وارثاں اُتے بِیا وی صاف طور تے ظاہر کرے جو میڈا اِرادہ لاتبدیل ہے تاں اُوں قَسم کھا تے اِیندی تصدیق کیتی۔ کیوں جو خُدا کُوڑ نئیں مار سگدا، اِیں واسطے خُدا دا وعدہ تے خُدا دی قَسم ڈُو ایجھیاں چیزاں ہِن جیہڑیاں لاتبدیل ہِن۔ تے اِنہاں دی وجہ کنُوں اساں جیہڑے پناہ کیتے خُدا دو بھج آئے ہیں، وڈے حوصلے نال اُوں اُمید کُوں جیہڑی ساڈے سامنڑے ہے، پکڑی رکھ سگدے ہیں۔ ایہ اُمید ساڈے کیتے ایجھے لنگر آلی کار ہے جیہڑا مضبوط تے قائم راہندے۔ تے ایہ اُمید ساکُوں پڑدے دے پِچُھوں خُدا دی سبھ تُوں مُقدّس جاہ تئیں پُچیندی ہے، جِتھاں یسُوع ساڈے کنُوں پہلے ای وَنج تے ہمیشاں کیتے مَلک ِ صِدق آلی کار کاہِن ِ اعظم بنڑ تے ساڈی خاطر داخل تھی گِیا ہے۔ ایہ مَلک صِدق، سالم شہر دا بادشاہ تے خُدا تعالیٰ دا کاہِن ہا۔ جِیں ویلے ابرہام بادشاہاں کُوں مار تے واپس آندا پِیا ہا تاں مَلک صِدق اُونکُوں مِلیا تے برکت ڈِتی ۔ ابرہام اُونکُوں سارے لُٹے ہوئے مال ءچوں ڈاہواں حصہ وی ڈِتا۔ پہلے تاں مَلک صِدق دے ناں دا مطلب ”صداقت دا بادشاہ“ ہے تے وَل کیوں جو او سالم شہر دا بادشاہ ہا، اِیں واسطے او ”سلامتی دا بادشاہ“ وی ہے۔ اُوندے ماء پِیُو بلکہ اُوندے پِیُو ڈاڈے دا وی کوئی ذِکر نئیں تے نہ ای اُوندی زندگی دے شروع یا آخر دا۔ بلکہ او خُدا دے پوتر وانگُوں ہمیشاں تئیں کاہِن ہے۔ ہُنڑ غور کرو جو ایہ کیجھا عظیم بندہ ہا، جِینکُوں ساڈی قوم دے بزُرگ ابرہام لُٹے ہوئے مال ءچوں ڈاہواں حصہ ڈِتا۔ بنی لاوی ءچوں او جیہڑے کاہِن مقرر کیتے ویندے ہِن، اُنہاں کُوں ایہ حُکم ڈِتا گِیا ہے جو او آپنڑی قوم یعنی آپنڑے اِسرائیلی بِھرانواں کنُوں ڈاہواں حصہ گِھننڑ، بھانویں جو او وی ابرہام دی نسل ءچوں ہِن۔ پر مَلک صِدق دا تعلق لاوی قبیلے ءچوں نئیں، وَل وی اُوں ابرہام کنُوں ڈاہواں حصہ گِھدا، تے ابرہام کُوں جیندے نال وعدے کیتے گئے ہَن، برکت ڈِتی۔ تے بےشک چھوٹے کُوں وڈے تُوں برکت مِلدی ہے۔ اِتھاں تاں ڈاہواں حصہ گِھننڑ آلے کاہِن فانی اِنسان ہِن، پر اُتھاں ڈاہواں حصہ گِھننڑ آلا مَلک صِدق ہے جیندے بارے ءچ ایہ گواہی ڈِتی ویندی ہے جو او زندہ ہے۔ بلکہ اساں آکھ سگدے ہیں جو ڈاہواں حصہ گِھننڑ آلی لاوی قوم، ابرہام دے وسیلے نال ڈاہواں حصہ ڈِتا، کیوں جو جِیں ویلے مَلک صِدق ابرہام کُوں مِلیا تاں لاوی قوم اُوں ویلے آپنڑے پِیُو ڈاڈا ابرہام دے جِسم ءچ ہئی۔ جیکر بنی لاوی دی کہانت، جیندے نال اُمت کُوں شریعت عطا کیتی گئی ہئی، لوکاں کُوں کامِل بنڑا سگدی تاں وَل ڈُوجھے کاہِن دی کیا لوڑ ہئی، جیہڑا ہارُون آلی کار نہ ہووے بلکہ مَلک صِدق آلی کار ہووے؟ کیوں جو جڈاں وی کہانت بدلدی ہے تاں شریعت دا بدل ونجنڑ وی لازمی ہے۔ خُداوند یسُوع جیندے بارے ءچ ایہ گالھیں آکھیاں ویندیاں ہِن، او ہِک ڈُوجھے قبیلے کنُوں ہا تے اُوں قبیلے دے کہیں فرد کڈھائیں قُربان گاہ اُتے خدمت نہ کیتی ہئی۔ کیوں جو ایہ ظاہر ہے جو ساڈا خُداوند یہُوداہ دی نسل ءچوں ہا تے مُوسیٰ اِیں قوم ءچوں کاہِن ہووݨ دا کوئی ذِکر نئیں کیتا۔ کہانت دی ایہ تبدیلی بِیا وی واضح تھی ویندی ہے جِیں ویلے مَلک صِدق جِیہا ہِک بِیا کاہِن ظاہر تھئے، جیہڑا شریعت دے تقاضے دے مطابق لاوی قوم آلا ہووݨ پارُوں نئیں بلکہ ختم نہ تھیوݨ آلی زندگی دی قُدرت پارُوں مقرر تھئے۔ کیوں جو اُوندے حق ءچ ایہ گواہی ڈِتی گئی ہے جو ”تُوں مَلک صِدق آلی کار ہمیشاں تئیں کاہِن ہیں ۔“ اِینویں او پُرانڑا حُکم کمزور تے بے فائدہ تھیوݨ پارُوں منسوخ تھی گِیا۔ کیوں جو شریعت کہیں چیز کُوں کامِل نئیں کیتا تے اُوندی جاہ تے ساکُوں ہِک زیادہ چنگی اُمید عطا کیتی گئی ہے جیندے وسیلے اساں خُدا دے نزدیک وَنج سگدے ہیں۔ تے ڈُوجھی گالھ ایہ ہے جو خُدا قَسم کھا تے مسیح کُوں کاہِن مقرر کیتا۔ ڈُوجھے کاہِن بغیر قَسم دے مقرر تھئے، پر مسیح کاہِن بنڑ گِیا، جِیں ویلے رب اُونکُوں قَسم کھا تے فرمایا جو ”مَیں قَسم کھادی ہے تے مَیں اُونکُوں نہ تُڑیساں، جو تُوں ہمیشاں تئیں کاہِن ہیں۔“ قَسم دی وجہ تُوں یسُوع ہِک بہتر عہد دی ضمانت ڈیوݨ آلا بنڑیا۔ تریجھی گالھ ایہ ہے جو پہلے کاہِن بہُوں ہوندے ہَن کیوں جو او موت دی وجہ تُوں قائم نہ رہ سگدے ہَن۔ پر یسُوع ہمیشاں تئیں قائم راہنڑ آلا ہے، اِیں واسطے اُوندی کہانت ہمیشاں تئیں ہے۔ اِینویں ای جیہڑے لوک یسُوع دے وسیلے نال خُدا دے کولھ آندے ہِن، او اُنہاں کُوں پُوری پُوری نجات ڈے سگدے کیوں جو او اُنہاں دی شفاعت کرݨ کیتے ہمیشاں زندہ ہے۔ ساکُوں ایجھے ای کاہِن ِ اعظم دی لوڑ ہئی جیہڑا پاک، بے قصُور، تے بے عیب ہووے، گُنہگاراں کنُوں اَنج تے اسمان کنُوں وی اُچا کیتا گِیا ہووے۔ او ڈُوجھے سردار کاہِناں وانگُوں نہ ہووے جِنہاں کُوں پہلے آپنڑے گُناہاں کیتے تے وَل آپنڑے لوکاں دے گُناہاں کیتے ہر روز قُربانیاں پیش کرݨ دی لوڑ ہوندی ہے۔ یسُوع تاں آپنڑے آپ کُوں قُربان کر تے ہِکے پھیری ایجھی قُربانی پیش کیتی جیہڑی ہمیشاں کیتے کافی ہے۔ شریعت تاں ایجھے آدمیاں کُوں کاہِنِ اعظم مقرر کریندی ہے جیہڑے کمزور ہِن، پر شریعت دے بعد خُدا قَسم کھا تے آپنڑے پوتر کُوں مقرر کیتا جیہڑا ہمیشاں تئیں کامِل ہے۔ جیہڑے گالھیں اساں ہُنڑ اکھیندے پئے ہیں، اُنہاں ءچوں مرکزی گالھ ایہ ہے جو ساڈا ایجھا کاہِن ِ اعظم ہے جیہڑا اسمان اُتے عظیم خُدا دے تخت دے سجے پاسے وَنج بیٹھے، تے اُوں مُقدّس گھر ءچ یعنی حقیقی تمبُو ءچ خدمت کریندے جِینکُوں کہیں اِنسان نئیں بلکہ خُداوند کھڑا کیتے۔ ہر کاہِن ِ اعظم نذراں تے قُربانیاں پیش کرݨ کیتے مقرر کیتا ویندے۔ اِیں واسطے لازمی ہا جو ساڈے سردار کاہِن دے کولھ وی پیش کرݨ کیتے کُجھ ہووے۔ جے یسُوع زمین اُتے ہوندا تاں کاہِن نہ ہوندا کیوں جو اِتھاں شریعت دے مطابق نذراں پیش کرݨ آلے کاہِن موجود ہِن، جیہڑے اُوں مُقدّس گھر ءچ خدمت کریندے ہِن جیہڑا اسمانی ہیکل دی نقل تے اُوندا پچھاواں ہے۔ اِیہو وجہ ہے جو جِیں ویلے مُوسیٰ مُقدّس تمبُو بنڑاوݨ لگا تاں اُوں ویلے خُدا اُونکُوں فرمایا، ”ساریاں چیزاں اُوں نمونے دے مطابق دھیان نال بنڑا جیہڑا تیکُوں پہاڑ اُتے ڈِکھایا گِیا ہا۔“ پر ہُنڑ مسیح کُوں ڈُوجھے کاہِناں کنُوں افضل خدمت مِلی ہے کیوں جو او اُوں افضل عہد دا درمیانی ہے، جیہڑا چنگے وعدیاں اُتے قائم کیتا گِیا ہے۔ جے پہلا عہد بے نُقص ہوندا تاں ڈُوجھے عہد دی لوڑ ای نہ پوندی۔ پر خُدا اُنہاں لوکاں دے عیب ڈیکھ تے فرمیندے جو ”ڈیکھ! مَیں رب فرمیندا ہاں جو او ڈینہہ آندے پئے ہِن جڈاں مَیں اِسرائیل دے گھرانڑے، تے یہُوداہ دے گھرانڑے دے نال ہِک نواں عہد بدھیساں۔ ایہ اُوں عہد آلی کار نہ ہوسی، جیہڑا مَیں اُنہاں دے پِیُو ڈاڈے نال بدھیا ہم جڈاں مَیں اُنہاں دا ہتھ پکڑ تے اُنہاں کُوں مِصر دے مُلک ءچوں کڈھ تے گِھن آیا ہم۔ کیوں جو او میڈے عہد اُتے قائم نہ ریہے اِیں واسطے مَیں اُنہاں دو توجہ نہ کیتی۔ رب ایہ وی فرمیندے جو جیہڑا عہد مَیں اُنہاں ڈینہاں تُوں بعد بنی اِسرائیل نال بدھیساں، او ایہ ہوسی جو مَیں آپنڑے حُکم اُنہاں دے ذہناں ءچ پیساں تے اُنہاں دے دِلاں اُتے لِکھیساں مَیں ای اُنہاں دا خُدا ہوساں تے او میڈی قوم ہوسن۔ کہیں کُوں ایہ لوڑ نہ ہوسی جو او آپنڑے ہمسائے یا آپنڑے بِھرا کُوں ایہ تعلیم ڈیوے جو رب کُوں سُنجاݨ، کیوں جو چھوٹے تُوں وڈے تئیں سبھ میکُوں سُنجاݨ گِھنسن۔ مَیں اُنہاں دے قصُور معاف کریساں تے اُنہاں دے گُناہ ولا یاد نہ کریساں ۔“ خُدا ”نویں عہد“ دا ذِکر کر تے پہلے کُوں پُرانڑا قرار ڈِتا۔ تے جیہڑی چیز پہلے دی ہے او پُرانڑی تے ناکارہ ہے، او جلدی ختم تھی ویسی۔ پہلے عہد ءچ وی عبادت دے قانُون ہَن تے زمین اُتے مُقدّس گھر وی ہئی۔ یعنی ہِک تمبُو بنڑایا گِیا جیندے ڈُو حصے ہَن۔ پہلے حصے ءچ چراغ دان، میز تے اُوندے اُتے نذر دیاں روٹیاں ہَن۔ اُوں حصے کُوں مُقدّس کمرہ آدھے ہَن۔ وَل ڈُوجھے پڑدے دے پِچُھوں او جاہ ہئی جِینکُوں سبھ تُوں مُقدّس کمرہ آکھیا ویندا ہا۔ اُوندے ءچ خوشبودار مصالحہ ساڑن آلی سونے دی قُربان گاہ تے عہد دا صندوق ہا جیہڑا سونے نال مڑھیا ہویا ہا۔ اُوں صندوق ءچ مَن نال بھریا ہویا سونے دا برتن، ہارُون دی سوٹی جیندے ءچوں پُھلاں دیاں ڈوڈیاں نِکلیاں پئیاں ہَن، تے پتھر دیاں او تختیاں ہَن جِنہاں اُتے عہد دے حُکم کندہ کیتے گئے ہَن۔ صندوق دے اُتے کروبی فرشتے بنڑائے ہوئے ہَن، جیہڑے خُدا دے جلال کُوں ظاہر کریندے ہَن تے کفارہ دی جاہ یعنی صندوق دے ڈھکنڑ اُتے چھاں کیتی راہندے ہَن۔ پر اِنہاں گالھیں دی تفصیل بیان کرݨ دا ایہ موقع نئیں۔ بس اِنہاں چیزاں دے اِیں ترتیب نال تیار تھی ونجنڑ تُوں بعد کاہِن آپنڑی خدمت کرݨ کیتے تمبُو دے پہلے حصے ءچ بار بار داخل تھیندے راہندے ہَن۔ پر ڈُوجھے حصے ءچ صرف کاہِن ِ اعظم ویندا ہا، پر او وی سال ءچ صرف ہِک پھیری۔ تے او قُربانی دے خون دے بغیر نئیں ویندا، جیہڑا او آپنڑے تے قوم دے بُھل چُک ءچ کیتے ہوئے گُناہاں دی خاطر پیش کریندا ہا۔ اِیں تُوں رُوح القُدس ایہ اِشارہ ڈیندے جو جڈاں تئیں ایہ پہلا تمبُو موجود ہے، سبھ تُوں مُقدّس جاہ تئیں ونجنڑ دا رستہ نئیں کُھلیا۔ او موجودہ زمانے کیتے ہِک مثال ہے، تے ایہ ظاہر کریندے جو جیہڑیاں نذراں تے قُربانیاں اُتھاں پیش کیتیاں ویندیاں ہِن، او عبادت کرݨ آلے دے دل کُوں کامل تے مُطمئن نئیں کر سگدیاں۔ اُنہاں دا تعلق صرف کھاوݨ پِیوݨ تے غُسل دیاں مختلف رسماں نال ہے۔ ایہ جِسمانی قانُون ہِن جیہڑے صرف نویں نِظام دے آوݨ تئیں مقرر کیتے گئے ہِن۔ پر ہُنڑ مسیح کاہِن ِ اعظم بنڑ تے آ گئے تے ساکُوں چنگیاں برکتاں مِلدیاں پئیاں ہِن۔ او عظیم تے کامِل تمبُو ءچ داخل تھی گِیا ہے جیہڑا اِنسانی ہتھاں دا بنڑایا ہویا نئیں یعنی اِیں دُنیا دا نئیں۔ او بکریاں تے وچھیاں دا خون گِھن تے نئیں بلکہ آپنڑا خون گِھن تے ہِکے پھیری سبھ تُوں مُقدّس جاہ ءچ داخل تھی گِیا تے ساکُوں ایجھی مخلصی ڈِتی جیہڑی ہمیشاں کیتے ہے۔ کیوں جو جِیں ویلے بکریاں تے ڈانداں دے خون تے ویہڑیاں دی سواہ دے چِھنڈکے ونجنڑ نال ناپاک لوک جِسمانی طور تے پاک تھیندے ہِن، تاں مسیح دا خون جئیں ازلی رُوح القُدس دے وسیلے نال آپنڑے آپ کُوں خُدا دے حضُور ءچ ہِک بے عیب قُربانی دے طور تے پیش کر ڈِتا، تُہاڈے دل کُوں موت گِھن آوݨ آلے کماں تُوں کیوں نہ پاک کریسی تاں جو تُساں زندہ خُدا دی عبادت کر سگو۔ اِیہو وجہ ہے جو مسیح نویں عہد دا درمیانی ہے تاں جو خُدا دی طرفوں سڈے گئے لوک وعدہ کیتی ہوئی ابدی میراث کُوں حاصل کر سگنڑ۔ ایہ صرف اِیں واسطے ممکن تھئے جو مسیح آپنڑی جان فِدیہ دے طور تے ڈے ڈِتی تاں جو اُنہاں کُوں اُنہاں گُناہاں دی سزا تُوں چُھڑاوے جیہڑے اُنہاں پہلے عہد دے دوران کیتے ہَن۔ جِتھاں وصیّت ہے اُتھاں وصیّت کرݨ آلے دی موت دا ثابت تھیوݨ وی لازمی ہے، کیوں جو وصیّت صرف موت دے بعد عمل ءچ آندی ہے۔ وصیّت کرݨ آلے دے جِیندے جی وصیّت اُتے عمل نئیں تھی سگدا۔ اِیہو وجہ ہے جو پہلا عہد وی بغیر خون دے نئیں بدھیا گِیا۔ جِیں ویلے مُوسیٰ پُوری قوم کُوں شریعت دا ہِک ہِک حُکم سُنڑا ڈِتا تاں اُوں وچھیاں تے بکریاں دا خون گِھن تے پانڑی ءچ رَلایا۔ وَل اُوں رتّی اُون تے زُوفے دے ذریعے اُوں خون کُوں شریعت دی کتاب تے سارے لوکاں اُتے چِھنڈک ڈِتا تے آکھیا، ”ایہ خون اُوں عہد کُوں قائم کریندے جیندے اُتے خُدا تُہاکُوں عمل کرݨ دا حُکم ڈِتے۔“ اِینویں مُوسیٰ خون کُوں مُقدّس تمبُو اُتے تے عبادت دیاں سبھ چیزاں اُتے چِھنڈک ڈِتا۔ اصل ءچ شریعت دے مطابق تقریباً سبھ چیزاں خون نال پاک کیتیاں ویندیاں ہِن تے جِیں ویلے تئیں خون نہ وہایا ونجے معافی نئیں مِلدی۔ بس ایہ لازم ہا جو ایہ چیزاں جیہڑیاں اسمانی چیزاں دی نقل ہِن، اُنہاں قُربانیاں دے وسیلے نال پاک کیتیاں ونجنڑ، پر اسمانی چیزاں اِنہاں کنُوں چنگیاں قُربانیاں دے وسیلے نال پاک کیتیاں ونجنڑ۔ مسیح اِنسانی ہتھاں دے بنڑے مُقدّس گھر ءچ داخل نئیں تھیّا، جیہڑا حقیقی مُقدّس گھر دی صرف نقل ہے، بلکہ اسمان ءچ ای داخل تھیّا تاں جو او ساڈی خاطر خُدا دے سامنڑے حاضر تھیوے۔ زمین اُتے کاہِن ِ اعظم سبھ تُوں مُقدّس کمرے ءچ کہیں ڈُوجھے دا یعنی جانوراں دا خون گِھن تے ہر سال ویندے پر مسیح آپنڑے آپ کُوں قُربانی دے طور تے ولا ولا پیش نئیں کیتا۔ نہ تاں دُنیا دے شروع کنُوں گِھن تے ہُنڑ تئیں اُونکُوں ولا ولا موت دا ڈُکھ چاونڑا پوندا۔ پر ہُنڑ زمانیاں دے آخر ءچ مسیح ہِک پھیری ظاہر تھیّا تاں جو آپنڑے آپ کُوں قُربان کرݨ نال گُناہ کُوں ختم کر ڈیوے۔ تے جِینویں اِنسان دا ہِک پھیری مرݨ تے اُوندے بعد عدالت دا تھیوݨ مقرر ہے، اُونویں ای مسیح وی بہُوں سارے لوکاں دے گُناہ آپنڑے سر اُتے چاوݨ کیتے ہِکے پھیری قُربان تھیّا۔ تے او ڈُوجھی پھیری گُناہ چاوݨ کیتے نئیں بلکہ اُنہاں لوکاں کُوں نجات ڈیوݨ کیتے ڈِکھالی ڈیسی جیہڑے اُوندے اِنتظار ءچ ہِن۔ مُوسیٰ دی شریعت آوݨ آلیاں چنگیاں چیزاں دا صرف ہِک پچھاواں ہے نہ جو او اصل ہے۔ اِیں واسطے جیہڑیاں قُربانیاں ہر سال پیش کیتیاں ویندیاں ہِن، او خُدا دے کولھ آوݨ آلیاں کُوں ہرگز کامِل نئیں کر سگدیاں۔ جے کر سگدیاں تاں کیا اُنہاں دا پیش کیتا ونجنڑ ختم نہ تھی ویندا؟ کیوں جو جے عبادت کرݨ آلے ہِکے پھیری ہمیشاں کیتے پاک تھی ویندے تاں اُنہاں دا دل اُنہاں کُوں ولا گُنہگار نہ آدھا۔ پر او قُربانیاں لوکاں کُوں ہر سال یاد ڈیویندیاں ہِن جو او گُنہگار ہِن۔ کیوں جو ممکن نئیں جو بکریَاں تے ڈانداں دا خون گُناہاں کُوں مِٹا سگے۔ اِیں واسطے جِیں ویلے مسیح دُنیا ءچ آیا تاں اُوں خُدا کُوں آکھیا جو ”تَیں قُربانیاں تے نذرانیاں کُوں پسند نہ کیتا بلکہ میڈے کیتے ہِک بدن تیار کیتا تُوں ساڑے ونجنڑ آلیاں قُربانیاں تے گُناہ تُوں پاک کرݨ آلیاں قُربانیاں تُوں خوش نہ تھیّا۔ اُوں ویلے مَیں آکھیا جو ’اے خُدا، ڈیکھ مَیں حاضر ہاں تاں جو مَیں تیڈی مرضی پُوری کراں جِینویں میڈے بارے ءچ کتاب ءچ لِکھیا ہے ‘۔“ پہلے تاں او فرمیندے جو ”تَیں قُربانیاں، نذرانے، ساڑے ونجنڑ آلیاں قُربانیاں تے گُناہ تُوں پاک کرݨ آلیاں قُربانیاں کُوں پسند نہ کیتا تے نہ اُنہاں تُوں خوش تھیّا۔“ بھانویں جو او قُربانیاں شریعت دے مطابق کیتیاں ویندیاں ہَن۔ وَل او آدھے جو ”ڈیکھ مَیں حاضر ہاں، تاں جو مَیں تیڈی مرضی پُوری کراں۔“ اِینویں او پہلیاں قُربانیاں کُوں ختم کریندے تاں جو ڈُوجھی کُوں قائم کرے۔ خُدا دی مرضی دا نتیجہ ایہ ہے جو اساں یسُوع مسیح دے جِسم دے ہِکے پھیری قُربان تھیوݨ دے وسیلے نال پاک کر ڈِتے گئے ہیں۔ ہر کاہِن روزانہ ہیکل ءچ کھڑا تھی تے آپنڑی خدمت انجام ڈیندے، تے اُوہو قُربانیاں ولا ولا پیش کریندے جیہڑیاں گُناہاں کُوں کڈھائیں مِٹا نئیں سگدیاں۔ پر مسیح گُناہاں کُوں مِٹاوݨ کیتے ہِکو قُربانی پیش کیتی جیہڑی ہمیشاں کیتے ہے تے وَل خُدا دے سجے پاسُوں وَنج بیٹھا۔ اُوں ویلے تُوں او اِنتظار ءچ ہے جو اُوندے دُشمنڑ اُوندے پیراں دی چوکی بنڑ ونجنڑ۔ کیوں جو اُوں پاک تھیوݨ آلیاں کُوں ہِکے قُربانی نال ہمیشاں تئیں کامِل کر ڈِتے۔ رُوح القُدس وی ساکُوں اِیں گالھ دی گواہی ایہ آکھ تے ڈیندے جو، ”رب فرمیندے، ’جیہڑا عہد مَیں اُنہاں ڈینہاں تُوں بعد آپنڑے لوکاں نال کریساں، او ایہ ہے: مَیں آپنڑے حُکم اُنہاں دے دِلاں ءچ پیساں تے اُنہاں دے ذہناں اُتے لِکھیساں۔ مَیں اُنہاں دے گُناہاں تے بُرائیاں کُوں ولا کڈھائیں یاد نہ کریساں‘ ۔“ بس جڈاں گُناہاں دی معافی تھی گئی تاں وَل گُناہاں تُوں پاک کرݨ دی قُربانی دی کیا لوڑ ہے؟ اِیں واسطے میڈے بِھراؤ! اساں یسُوع دے خون دے وسیلے نال اُوں سبھ تُوں مُقدّس جاہ ءچ پُورے اعتقاد نال داخل تھی سگدے ہیں۔ مسیح آپنڑے بدن دی قُربانی نال ہِک نواں تے زندگی ڈیوݨ آلا رستہ کھول ڈِتے جیہڑا پڑدے تُوں اگُوں گِھن ویندے ۔ تے او ساڈا ایجھا وڈا سردار کاہِن ہے جیہڑا خُدا دے گھر دا مُختار ہے۔ اِیں واسطے آؤ اساں سچے دل تے پُورے اِیمان نال خُدا دے کولھ جُلوں، کیوں جو ساڈے دل خون دے چھِنڈکیاں نال گُناہ تُوں پاک کیتے گئے ہِن تے ساڈے بدن صاف پانڑی نال دھوتے گئے ہِن۔ اساں آپنڑی اُوں اُمید کُوں مضبوطی نال پکڑی رکھوں جِیندا اساں اِقرار کریندے ہیں کیوں جو جئیں وعدہ کیتے او وفادار ہے۔ تے آؤ اساں غور کرُوں جو کِینویں ہِک ڈُوجھے کُوں محبت تے نیک کم کرݨ کیتے اُبھار سگدے ہیں۔ آپس ءچ میل جول رکھنڑ نہ چھوڑوں جِینویں کُجھ لوکاں دی عادت بنڑ گئی ہے بلکہ اساں ہِک ڈُوجھے کُوں مزید حوصلہ ڈیؤں خاص کر ایہ ڈیدھے ہوئے جو مسیح دے واپس آوݨ دا ڈینہہ نیڑے آندا پِیا ہے۔ کیوں جو جے اساں حق دی پچھاݨ کرݨ تُوں بعد جاݨ بُجھ تے گُناہ کریندے راہوں تاں گُناہاں تُوں پاک کرݨ دی کوئی بئی قُربانی باقی نئیں۔ وَل صرف خُدا دی عدالت دا خوفناک اِنتظار تے بھڑکدی ہوئی بھاہ باقی ہے جیہڑی خُدا دے دُشمنڑاں کُوں کھا ویسی۔ جڈاں مُوسیٰ دی شریعت کُوں رَد کرݨ آلا ڈُو یا ترے بندیاں دی گواہی نال بغیر رحم دے قتل کر ڈِتا ویندے، تاں او بندہ کِتنی وڈی سزا دے لائق ہوسی جئیں خُدا دے پوتر دی توہین کیتی تے عہد قائم کرݨ آلے خون کُوں جیندے نال او پاک تھیّا ہا، ناپاک سمجھیا، تے فضل ڈیوݨ آلے رُوح القُدس دی بے عزتی کیتی۔ کیوں جو اساں اُونکُوں جانڑدے ہیں جئیں فرمائے جو ”اِنتقام گِھننڑ میڈا کم ہے، بدلہ مَیں ای گِھنساں۔“ تے وَل ایہ جو ”رب العالمین آپنڑے لوکاں دا اِنصاف کریسی ۔“ ایہ ہِک خوفناک گالھ ہے جو زندہ خُدا ساکُوں سزا ڈیوݨ کیتے پکڑے۔ پر اُنہاں پہلے ڈینہاں کُوں یاد کرو جِیں ویلے تُساں اِیمان نال روشن تھیوݨ تُوں بعد شدید تکلیفاں دا ڈُکھ برداشت کیتا۔ کڈھائیں تاں لعن طعن تے مُصیبتاں دے سببّوں تُساں خود تماشا بنڑے تے کڈھائیں ڈُوجھیاں کُوں تکلیفاں سہندے ہوئے ڈیکھ تے اُنہاں نال شریک تھئے۔ تُساں قیدیاں نال ہمدردی کیتی تے آپنڑے مال دے لُٹے ونجنڑ کُوں وی خوشی نال قبول کیتا کیوں جو تُساں جانڑدے ہَوے جو ہِک بہتر تے ابدی ملکیت تُہاڈے کولھ ہے۔ بس ہِمت نہ ہارو کیوں جو اِیندا اجر وڈا ہے۔ تُہاکُوں وڈے صبر نال کم گِھننڑا چاہیدے تاں جو تُساں خُدا دی مرضی پُوری کر تے او چیز حاصل کر سگو جِیندا اُوں وعدہ کیتے۔ کیوں جو ہُنڑ تھوڑی جیہی دیر باقی ہے جو ”آوݨ آلا آ ویسی، تے دیر نہ لیسی۔ میڈا راستباز بندہ اِیمان نال زندہ راہسی، جے او پِچھاں ہٹ ونجے تاں میڈا دل اُوں کنُوں خوش نہ تھیسی ۔“ پر اساں پِچھاں ہٹ تے ہلاک تھیوݨ آلے نئیں، بلکہ اِیمان رکھ تے نجات پاوݨ آلے ہیں۔ اِیمان، اُمید کیتی ہوئی چیزاں دے بارے ءچ اعتماد تے اَن ڈِٹھے چیزاں دا یقین ہے۔ اِیمان دی وجہ کنُوں ساڈے پِیُو ڈاڈا خُدا دی نظر ءچ مقبول تھئے۔ اِیمان دی وجہ کنُوں ساکُوں سمجھ آندی ہے جو ساری کائنات خُدا دے حُکم نال بنڑی ہے۔ جیہڑیاں چیزاں اساں ڈیدھے ہیں، او نظر آوݨ آلیاں چیزاں نال نئیں بنڑیاں۔ اِیمان دی وجہ کنُوں ای ہابل خُدا کُوں قائن کنُوں بہتر قُربانی پیش کیتی۔ اُوندے اِیمان دی وجہ تُوں خُدا اُوندے نذرانے قبول کر تے گواہی ڈِتی جو ایہ راستباز ہے۔ تے بھانویں جو ہابل مر گئے، وَل وی او آپنڑے اِیمان دی مثال دے وسیلے نال ہُنڑ تئیں کلام کریندے ۔ اِیمان دی وجہ کنُوں ای حنُوک مرے بغیر اسمان اُتے زندہ چا گِھدا گِیا۔ کہیں کُوں اُوندا پتہ نہ لگیا کیوں جو خُدا اُونکُوں چا گِھدا ہا۔ اُوندے چا تے ونجنڑ کنُوں پہلے اُوندے حق ءچ گواہی ڈِتی گئی جو او خُدا کُوں پسند آئے ۔ تے بغیر اِیمان دے خُدا کُوں پسند آوݨ ناممکن ہے، کیوں جو لازم ہے جو خُدا دے کولھ آوݨ آلا اِیمان رکھے جو خُدا موجود ہے تے او اُنہاں کُوں اجر ڈیندے جیہڑے اُوندے طالب ہِن۔ اِیمان دی وجہ کنُوں ای نُوح اُنہاں چیزاں دے بارے ءچ جیہڑیاں اُوں وقت تئیں نظر نہ آندیاں ہَن، خُدا دی طرفوں ہدایت پا تے خُدا دا خوف منیندے ہوئے آپنڑے سارے خاندان کُوں بچاوݨ کیتے کشتی بنڑائی۔ اِینویں اِیمان رکھنڑ نال اُوں دُنیا کُوں قصُوروار بنڑایا تے اُوں راستبازی دا وارث بنڑ گِیا جیہڑی اِیمان نال مِلدی ہے ۔ اِیمان دی وجہ کنُوں ای ابرہام جِیں ویلے سڈیا گِیا تاں خُدا دا حُکم مَن تے اُوں جاہ دو چلیا گِیا جیہڑی بعد ءچ اُونکُوں میراث ءچ مِلنڑ آلی ہئی۔ بھانویں جو او جانڑدا وی نہ ہا جو او کِتھاں ویندا پئے، وَل وی روانہ تھی گِیا ۔ اِیمان دی وجہ کنُوں ای او خُدا دے وعدہ کیتے ہوئے اُوں مُلک ءچ ہِک پردیسی دے طور تے اِضحاق تے یعقُوب سمیت جیہڑے وعدے ءچ اُوندے نال وارث ہَن، تمبُواں ءچ راہنڑ لگا۔ کیوں جو ابرہام اُوں مضبوط بنیاد آلے شہر دے اِنتظار ءچ ہا، جِیندا نقشہ بنڑاوݨ آلا تے تعمیر کرݨ آلا خود خُدا ہے۔ اِیمان دی وجہ کنُوں ای سارہ حاملہ تھیوݨ دی طاقت پاتی بھانویں اُوندی بال جمنڑ دی عُمر گُزر گئی ہئی کیوں جو سارہ کُوں یقین ہا جو وعدہ کرݨ آلا وفادار ہے۔ اِینویں ہِک بندے کنُوں جیہڑا مُردہ جِیہا ہا، اسمان دے تارے تے سمندر دے کنارے دی ریت دے برابر اولاد پیدا تھئی ۔ ایہ سارے لوک اِیمان رکھیندے ہوئے مر گئے تے وعدہ کیتیاں ہوئیاں چیزاں نہ پاتیاں، بلکہ صرف دُور کنُوں ای ڈیکھ تے خوش تھئے، تے اِقرار کیتا جو اساں زمین اُتے پردیسی تے مسافر ہیں۔ جیہڑے ایجھے گالھیں کریندے ہِن، او ظاہر کریندے ہِن جو او ہُنڑ تئیں آپنڑے وطن دی گولھ ءچ ہِن۔ جے او اُوں مُلک دا خیال کریندے جیندے ءچوں او نِکل تے آئے ہَن تاں اُنہاں دے کولھ واپس ونجنڑ دا موقع ہوندا۔ پر حقیقت ءچ او ہِک بہتر یعنی اسمانی مُلک دی سِک ءچ ہَن۔ اِیں واسطے خُدا اُنہاں دا خُدا اکھواوݨ تُوں نئیں شرمیندا بلکہ اُوں اُنہاں کیتے ہِک شہر تیار کیتا۔ اِیمان دی وجہ کنُوں ای ابرہام آپنڑے اِمتحان دے وقت اِضحاق کُوں قُربانی دے طور تے نذر کیتا۔ ہا، ابرہام جیندے نال وعدے کیتے گئے ہَن او آپنڑے کلھے پوتر کُوں قُربان کرݨ کیتے تیار تھی گِیا، بھانویں خُدا آکھیا ہا جو ”اِضحاق تُوں ای تیڈی نسل اکھویسی ۔“ ابرہام سمجھیا جو خُدا مُردیاں کُوں وی زندہ کرݨ دی قُدرت رکھیندے۔ تے اِیں لحاظ نال اِضحاق اُونکُوں مُردیاں ءچوں ولا زندہ مِلیا۔ اِیمان دی وجہ کنُوں ای اِضحاق آپنڑے ڈُوہائیں پوتراں یعقُوب تے عیسو کُوں اُنہاں دے آوݨ آلے ڈینہاں کیتے برکت ڈِتی ۔ اِیمان دی وجہ کنُوں ای یعقُوب مردے ویلے یُوسف دے ڈُوہائیں پوتراں کُوں برکت ڈِتی تے آپنڑی سوٹی دا سہارا گِھن تے خُدا کُوں سجدہ کیتا ۔ اِیمان دی وجہ کنُوں ای یُوسف مردے ویلے بنی اِسرائیل دے مِصر ءچوں نِکل ونجنڑ دا ذِکر کیتا تے آپنڑیاں ہڈیاں دفن کرݨ دے بارے ءچ حُکم ڈِتا ۔ اِیمان دی وجہ کنُوں ای مُوسیٰ دے ماء پِیُو اُوندے جمنڑ دے بعد ترے مہینے تئیں اُونکُوں لُکائی رکھیا، کیوں جو اُنہاں ڈِٹھا جو ایہ بال بہُوں سوہنڑا ہے تے اُنہاں بادشاہ دا حُکم تروڑن دا خوف نہ کیتا ۔ اِیمان دی وجہ کنُوں ای مُوسیٰ وڈا تھی تے فرعون دی دِھی دا پوتر سڈواوݨ کنُوں اِنکار کیتا۔ کُجھ ڈینہہ گُناہ دا مزہ چاوݨ دی بجائے اُوں خُدا دی اُمت نال رَل تے بدسلُوکی برداشت کرݨ زیادہ پسند کیتا۔ اُوں مسیح دی خاطر بے عزت تھیوݨ کُوں مِصر دے خزانیاں کنُوں وڈی دولت سمجھیا کیوں جو اُوندی نِگاہ اجر اُتے لگی ہوئی ہئی۔ اِیمان دی وجہ کنُوں ای اُوں بادشاہ دی کاوڑ کنُوں خوف نہ کھادا تے مِصر چھوڑ ڈِتا۔ او اِینویں ثابت قدم ریہا جِینویں اَن ڈِٹھے خُدا کُوں ڈِٹھا ہووے۔ اِیمان دی وجہ کنُوں ای اُوں فسح دی عید کرݨ تے چوکھٹاں اُتے خون چِھنڈکنڑ اُتے عمل کروایا تاں جو پلوٹھیاں کُوں ہلاک کرݨ آلا فرشتہ بنی اِسرائیل دے پلوٹھیاں کُوں ہلاک نہ کرے ۔ اِیمان دی وجہ کنُوں ای بنی اِسرائیل بحر قُلزم ءچوں اِینویں لنگھے جِینویں سُکی زمین اُتے ٹُر تے گئے ہووݨ۔ پر جِیں ویلے مِصریاں اُونکُوں پار کرݨ دی کوشش کیتی تاں بُڈ گئے ۔ اِیمان دی وجہ کنُوں ای بنی اِسرائیل سَت ڈینہہ تئیں یرِیحُو شہر دی چاردیواری دے چودھارُوں چکر لیندے ریہے تے چاردیواری ڈھے پئی ۔ اِیمان دی وجہ کنُوں ای راحب طوائف اِسرائیلی جاسُوساں کُوں سلامتی نال قبول کیتا تے اِیں واسطے او نافرماناں دے نال ہلاک تھیوݨ تُوں بچ گئی۔ تے ہُنڑ مزید کیا آکھاں؟ اِتنی فُرصت کائنی جو جِدعون، برق، سمسُون، اِفتاہ، داؤد، سموئیل تے ڈُوجھے نبیاں دے بارے ءچ بیان کراں۔ اِیمان دی وجہ کنُوں ای او سلطنتاں اُتے غالب آئے، اِنصاف کریندے ریہے، وعدہ کیتیاں ہوئیاں چیزاں کُوں حاصل کیتا، شیراں دے مُنہ بند کیتے ، بھاہ دی طاقت کُوں وِسمایا ، تلواراں نال مرݨ کنُوں بچ نِکلے، کمزوری ءچ زور آور تھئے، جنگ ءچ بہادر بنڑے، دُشمنڑاں دیاں فوجاں کُوں شکست ڈِتی۔ تے عورتاں کُوں آپنڑے مُردے زندہ مِلے ۔ کُجھ اُتے تشدد کیتا گِیا، پر اُنہاں رہائی قبول نہ کیتی تاں جو اُنہاں کُوں قیامت ءچ ہِک بہتر زندگی مِلے۔ کُجھ مذاق دا نشانہ بنڑے، تے کوڑے کھادے، کُجھ زنجیراں نال بدھے گئے تے قید ءچ سٹے گئے۔ او سنگسار کیتے گئے، آرے نال چِیرے گئے، تلوار نال قتل کیتے گئے، بھیڈاں تے بکریاں دی کَھل پا تے مُتھاجی ءچ، مُصیبت تے بدسلُوکی دا سامنڑا کریندے ہوئے جاہ جاہ پِھردے ریہے۔ دُنیا اُنہاں دے لائق نہ ہئی۔ او غاراں، زمین دے کھڈیاں ءچ راہندے ہوئے، جنگلاں تے پہاڑاں ءچ آوارہ پِھردے ریہے۔ اُنہاں ساریاں دے اِیمان دی وجہ کنُوں اُنہاں دے حق ءچ چنگی گواہی ڈِتی گئی پر اُنہاں کُوں وعدہ کیتی ہوئی چیز نہ مِلی۔ کیوں جو خُدا پہلے کنُوں ای ساڈے کیتے ہِک چنگا منصوبہ بنڑایا ہا تاں جو او لوک صرف ساڈے نال ای کامِل کیتے ونجنڑ۔ اِیں واسطے جڈاں گواہاں دی اِتنی وڈی بِھیڑ ساکُوں چارے پاسُوں ولھیٹی کھڑی ہے تاں آؤ، اساں وی ہر ہِک چیز کُوں جیہڑی ساڈے کیتے رکاوٹ دا سبب ہے تے اُوں گُناہ کُوں جیہڑا ساکُوں اسانی نال پَھسا گِھندے پرے کرُوں، تے اُوں دوڑ ءچ صبر نال بھجدے راہُوں جیہڑی ساڈے کیتے مقرر کیتی گئی ہے۔ اساں آپنڑی دِید یسُوع اُتے لائی رکھوں جیہڑا اِیمان دا بانی تے کامل کرݨ آلا ہے، جئیں اُوں خوشی پارُوں جیہڑی اُوندی نظراں دے سامنڑے ہئی، صلیب دا ڈُکھ سہہ تے اُوندی شرمندگی دی پرواہ نہ کیتی۔ تے ہُنڑ خُدا دے تخت دے سجے پاسُوں بیٹھے۔ ہا، تُساں اُوندے اُتے غور کرو جئیں گُنہگاراں دی طرفوں اِتنی مخالفت برداشت کیتی، تاں جو تُساں بے دل تھی تے ہِمت نہ ہارو۔ تُساں گُناہ نال لڑن ءچ حالی تئیں ایجھا مُقابلہ نئیں کیتا جو تُہاڈا خون وِیہہ گِیا ہووے۔ کیا تُساں اُوں نصیحت کُوں بُھل گئے ہیوے جیہڑی تُہاکُوں فرزنداں وانگُوں کیتی گئی ہے جو ”میڈے پوتر، رب دی تربیت کُوں حقیر نہ سمجھ، تے جڈاں او تیکُوں ملامت کرے تاں بے دل نہ تھیویں۔ کیوں جو جیندے نال رب محبت رکھیندے اُوندی تربیت وی کریندے، تے جِینکُوں پوتر بنڑا گِھندے اُونکُوں سزا وی ڈیندے ۔“ تُساں مُصیبت کُوں تربیت سمجھ تے برداشت کرو۔ خُدا تُہاکُوں آپنڑے پوتر سمجھ تے تُہاڈے نال سلوک کریندے۔ او کیہڑا پوتر ہے جیندی تربیت اُوندا پِیُو نئیں کریندا؟ پر جے تُہاڈی تربیت نہ کیتی ونجے، جِینویں جو ساریاں دی کیتی ویندی ہے تاں تُساں خُدا دے حقیقی پوتر نئیں بلکہ ناجائز اولاد ہوسو۔ اِیندے علاوہ جِیں ویلے ساڈا جِسمانی پِیُو ساڈی تربیت کریندے تے اساں اُوندی عزت کریندے ہیں، تاں کیا آپنڑے رُوحانی باپ دی زیادہ تابعداری کر تے زندگی نہ پاؤں؟ ساڈے پِیُو تاں تھوڑے ڈینہاں کیتے آپنڑی سمجھ دے مطابق ساڈی تربیت کریندے ہَن، پر خُدا ساڈے فائدہ کیتے ساڈی تربیت کریندے تاں جو جِینویں او پاک ہے اساں وی پاک بنڑ ونجُوں۔ ہُنڑ ہر طرحاں دی تربیت ساکُوں ڈُکھ دا سبب لگدی ہے، خوشی دا نئیں۔ پر جیہڑے اُونکُوں سہہ سہہ تے پکّے تھی ویندن، او بعد ءچ سکون تے راستبازی دا پھل پیندن۔ بس تُساں آپنڑے تھکے ہوئے ہتھاں تے کمزور گوڈیاں کُوں مضبوط کرو ۔ تے ”آپنڑے ٹُرݨ کیتے سِدھے رستے اِستعمال کرو “ تاں جو لنگڑا مزید لنگڑا نہ تھیوے بلکہ شِفا پاوے۔ ہِک ڈُوجھے نال صُلح سلامتی نال راہو تے اُوں پاکیزگی دے طالب راہو، جیندے بغیر کوئی خُداوند کُوں نہ ڈیکھسی۔ دھیان کرو جو کوئی بندہ خُدا دے فضل کنُوں محروم نہ رہ ونجے، اِینویں نہ تھیوے جو کوئی بندہ کڑوی جڑھ آلی کار پُھٹ تے تُہاکُوں تکلیف ڈیوے تے بہُوں سارے لوکاں کُوں وِگاڑ ڈیوے۔ خبردار، نہ کوئی زِناکار ہووے یا نہ عیسو وانگُوں بے دین، جئیں ہِک وقت دے کھانڑے کیتے آپنڑے پلیٹھی دے حق کُوں ویچ ڈِتا۔ تُساں جانڑدے ہیوے جو بعد ءچ جڈاں اُوں برکت کُوں وراثت ءچ گِھننڑ چاہیا تاں قبول نہ کیتا گِیا۔ اُونکُوں توبہ کرݨ دا موقع نہ مِلیا بھانویں جو او ہنجُو وہا وہا تے اُوں برکت کُوں حاصل کرݨ دی کوشش کریندا ریہا۔ تُساں سِینا پہاڑ دے کولھ نئیں آئے جِینکُوں ہتھ لاوݨ ممکن ہا۔ او پہاڑ بھاہ نال بلدا پِیا ہا تے کالے بدّل، اندھارے تے طوفان نال چارے پاسُوں گِھریا ہویا ہا۔ اُوں ویلے نرسِنگے دی اواز تے کلام کرݨ آلے دی ایجھی اواز سُنڑائی ڈِتی جیندے پارُوں لوکاں مِنت کیتی جو ساڈے نال بِیا کلام نہ کیتا ونجے۔ کیوں جو او ڈر تے اِیں حُکم دی برداشت نہ کر سگے جو ”جے کوئی جانور وی اُوں پہاڑ نال لگ ونجے تاں اُونکُوں وی سنگسار کر ڈِتا ونجے ۔“ او نظارہ اِتنا خوفناک ہا جو مُوسیٰ آکھیا، ”مَیں خوف نال کمبدا ہاں ۔“ بلکہ تُساں صِیُّون پہاڑ، تے زندہ خُدا دے شہر یعنی اسمانی یروشلیم دے کولھ آئے ہیوے، تے خوشی مناوݨ آلے لکھاں فرشتیاں، تے اُنہاں پلوٹھیاں دی جماعت دے کولھ جِنہاں دے ناں اسمان اُتے لِکھے ہِن، تے سبھ دے مُنصف خُدا، تے کامِل کیتے ہوئے راستبازاں دیاں رُوحاں دے کولھ آئے ہیوے۔ تُساں نویں عہد دے درمیانی یسُوع تے اُوندے اُوں چِھنڈکے ہوئے خون دے کولھ آئے ہیوے جیہڑا ہابل دے خون دی نسبت چنگا پیغام ڈیندا ہے۔ خبردار! آپنڑے نال کلام کرݨ آلے دا اِنکار نہ کرائے کیوں جو جِیں ویلے بنی اِسرائیل زمین اُتے ہدایت کرݨ آلے دا اِنکار کر تے بچ نہ سگے تاں جے اساں اسمان کنُوں ہدایت کرݨ آلے دا اِنکار کریسوں تاں کِینویں بچ سگسوں؟ اُوں ویلے خُدا دی اواز زمین کُوں ہِلا ڈِتا، پر ہُنڑ اُوں ایہ وعدہ کیتے جو ”ہِک پھیری ولا مَیں نہ صرف زمین کُوں بلکہ اسمان کُوں وی ہِلا ڈیساں ۔“ خُدا دا ”ہِک پھیری ولا“ آکھنڑ صاف ظاہر کریندے جو پیدا کیتیاں ہوئیاں چیزاں جیہڑیاں ہلائیاں وَنج سگدیاں ہِن مِٹا ڈِتیاں ویسن تاں جو جیہڑیاں ہلائیاں نئیں وَنج سگدیاں، صرف اُوہو قائم راہوݨ۔ اِیں واسطے جڈاں ساکُوں ایجھی بادشاہی مِلدی پئی ہے، جیہڑی ہلائی نئیں وَنج سگدی، تاں آؤ اساں شُکر کرُوں تے خوف تے احترام نال خُدا دی ایجھی عبادت کرُوں جیہڑی اُونکُوں پسند ہے۔ کیوں جو ساڈا خُدا ”ساڑ تے سواہ کر ڈیوݨ آلی بھاہ ہے ۔“ برادرانہ محبت قائم رکھو۔ مسافراں دی مہمان نوازی نہ بُھلو کیوں جو اِینویں کرݨ نال کُجھ لوکاں بے خبری ءچ فرشتیاں دی مہمان نوازی کیتی ہے۔ تُساں قیدیاں کُوں اِینویں یاد رکھو جِینویں جو تُساں خود اُنہاں دے نال قید ءچ ہیوے، تے جِنہاں دے نال بدسلُوکی کیتی ویندی ہے اُنہاں کُوں اِینویں یاد رکھو جِینویں جو تُساں خود آپنڑے بدن ءچ برداشت کریندے پئے ہیوے۔ شادی کرݨ سبھ لوکاں ءچ عزت دی گالھ سمجھی ونجے تے میاں بیوی دا رشتہ بے داغ راہوے، کیوں جو خُدا حرام کاراں تے زِنا کاراں دی عدالت کریسی۔ پیسے دے لالچ کنُوں دُور راہو تے جِتنا تُہاڈے کولھ ہے اُوندے ءچ خوش راہو، کیوں جو خُدا فرمائے ”مَیں تَیں تُوں آپنڑا ہتھ کڈھائیں نہ چیساں تے تیکُوں کڈھائیں نہ چُھڑیساں ۔“ اِیں واسطے اساں پُوری دلیری نال آکھ سگدے ہیں جو ”رب میڈا مددگار ہے مَیں خوف نہ کھاساں اِنسان میڈا کیا وِگاڑ سگدے ؟“ آپنڑے راہنماواں کُوں یاد رکھو جِنہاں تُہاکُوں خُدا دا کلام سُنڑایا۔ اُنہاں دی زندگی دے انجام اُتے غور کرو تے اُنہاں دے اِیمان دے نمونے اُتے ٹُرو۔ یسُوع مسیح کل تے اَج بلکہ ہمیشاں تئیں ہِکو جِیہا ہے۔ قِسم قِسم دیاں عجیب تعلیماں کنُوں گُمراہ نہ تھیؤ۔ چنگا ایہ ہے جو تُہاڈے دل خُدا دے فضل نال طاقت پاوݨ، نہ جو کھاوݨ دے اصُولاں نال جیندے اُتے ٹُرݨ نال کوئی رُوحانی فائدہ نئیں تھیندا۔ ساڈی ہِک ایجھی قُربان گاہ ہے جیندے ءچوں مُقدّس تمبُو دی خدمت کرݨ آلے کاہِن کُوں کھاوݨ دا حق نئیں۔ کاہِن ِ اعظم جانوراں دا خون سبھ تُوں مُقدّس کمرے ءچ گُناہ دے کفارے کیتے گِھن ویندے پر اُنہاں دے جِسم ڈیرے دی حدود کنُوں باہر ساڑ ڈِتے ویندن۔ اِینویں ای یسُوع وی لوکاں کُوں خود آپنڑے خون نال پاک کرݨ کیتے شہر دے پھاٹک دے باہر ڈُکھ چاتا۔ اِیں واسطے آؤ، اساں یسُوع دی ذِلت کُوں آپنڑے اُتے گِھن تے ڈیرے دی حد کنُوں باہر اُوندے کولھ جُلوں۔ کیوں جو اِیں دُنیا ءچ ساڈا کوئی قائم راہنڑ آلا شہر نئیں بلکہ اساں اُوں شہر دی گولھ ءچ ہیں جیہڑا آوݨ آلا ہے۔ اِیں واسطے اساں یسُوع دے وسیلے نال آپنڑی حمد دی قُربانی خُدا دے حضُور پیش کریندے راہوں یعنی خُدا دے ناں دا اِقرار کریندے راہوں۔ ایہ ساڈے ہونٹاں دا مناسب پھل ہے۔ تے بھلائی تے سخاوت کرݨ نہ بُھلائے کیوں جو خُدا ایجھیاں قُربانیاں کُوں پسند کریندے۔ آپنڑے راہنماواں دے تابع دار تے فرمانبردار راہو کیوں جو او تُہاڈی رُوحانی نِگرانی کریندے ہِن، ایہ جانڑدے ہوئے جو اِیں خدمت دا حساب ڈیونڑا پوسی۔ اُنہاں دے فرمانبردار راہو تاں جو آپنڑا کم خوشی نال کرݨ نہ جو شکایت نال، کیوں جو اِیں صورت ءچ تُہاکُوں کوئی فائدہ نہ تھیسی۔ ساڈے کیتے دُعا کریندے راہو۔ ساکُوں یقین ہے جو ساڈا دل صاف ہے تے اساں ہر لحاظ نال نیک زندگی گُزارݨ چاہندے ہیں۔ پر مَیں تُہاڈی مِنت کریندا ہاں جو خاص کر اِیں کیتے دُعا کرو جو مَیں جلدی تُہاڈے کولھ آ سگاں۔ اِطمینان دا خُدا جئیں اُوں ابدی عہد قائم کرݨ آلے خون دے ذریعے بھیڈاں دے عظیم آجڑی یعنی ساڈے خُداوند یسُوع کُوں مُردیاں ءچوں زندہ کیتا، تُہاکُوں ہر چنگی شے ڈیوے تاں جو تُساں اُوندی مرضی پُوری کر سگو، تے جیہڑا کُجھ اُوندی نظر ءچ پسندیدہ ہے، او یسُوع مسیح دے وسیلے نال ساڈے ءچ پیدا کرے۔ مسیح دی تعریف ہمیشاں تئیں تھیندی راہوے۔ آمین۔ بِھراؤ، مَیں مِنت کریندا ہاں جو میڈے نصیحت دے گالھیں صبر نال سُنڑو، جِنہاں کُوں مَیں مختصر لِکھے۔ مَیں تُہاکُوں خبر ڈیندا ہاں جو ساڈا بِھرا تِیمُتِھیُس رِہا کر ڈِتا گئے۔ جے او جلدی آ گِیا تاں مَیں اُونکُوں نال گِھن تے تُہاکُوں مِلنڑ آساں۔ آپنڑے سارے راہنماواں تے سارے مُقدّساں کُوں سلام اکھائے۔ اِطالِیہ مُلک دے بِھرا تُہاکُوں سلام آدھے ہِن۔ تُساں ساریاں اُتے فضل تھیندا راہوے۔ ایہ خط میں یعقُوب دی طرفوں ہے جیہڑا خُدا دا تے خُداوند یسُوع مسیح دا خادم ہاں، بنی اِسرائیل دے بارہاں قبیلیاں کُوں جیہڑے غیر یہُودی قوماں ءچ تِتربِتر تھی گئے ہِن، سلام پُجے۔ میڈے بِھراؤ، جِیں ویلے تُساں طرحاں طرحاں دیاں ازمائیشاں دا سامنڑا کریندے ہیوے تاں اِینکُوں وڈی خوشی دی گالھ سمجھو۔ کیوں جو تُساں جانڑدے ہیوے جو تُہاڈے اِیمان دا اِمتحان تُہاڈے ءچ صبر پیدا کریندے۔ تے صبر کُوں آپنڑا اثر پُورا کرݨ ڈیؤ تاں جو تُساں پکّے تے کامِل تھی ونجو تے تُہاڈے ءچ کہیں گالھ دی کمی نہ راہوے۔ جے تُہاڈے ءچوں کہیں ءچ حِکمت دی کمی ہووے تاں او خُدا کنُوں منگے جیہڑا جِھڑکے بغیر ساریاں کُوں فیاضی نال ڈیندے تے خُدا اُونکُوں ڈیسی۔ پر اِیمان نال منگے تے ذرا وی شک نہ کرے، کیوں جو شک کرݨ آلا سمندر دی چھل وانگُوں ہوندے جیہڑی ہوا دے زور نال اُچھلدی راہندی ہے۔ ایجھا بندہ ایہ نہ سمجھے جو اُونکُوں خُداوند کنُوں کُجھ مِلسی، کیوں جو او ڈُو دِلا ہے تے کہیں گالھ اُتے نئیں کھڑدا۔ غریب بِھرانواں کُوں مسیح ءچ آپنڑے اُچے مرتبہ اُتے فخر کرنڑا چاہیدے۔ تے دولت مند بِھرانواں کُوں آپنڑے چھوٹے مرتبہ اُتے کیوں جو او گھاہ دے پُھل وانگُوں مُرجھا ویسن۔ جِیں ویلے سِجھ نِکلدے تاں دُھپ دی تیزی گھاہ کُوں سُکا ڈیندی ہے، اُوندا پُھل جَھڑ ویندے تے اُوندی خوبصورتی ختم تھی ویندی ہے۔ اِینویں ای دولت مند وی آپنڑی راہ اُتے ٹُردے ٹُردے مِٹی ءچ مِل ویسی۔ مُبارک ہے او بندہ جیہڑا ازمائش ویلے ثابت قدم راہندے، کیوں جو کامیاب تھیوݨ اُتے اُونکُوں اِنعام ءچ زندگی دا او تاج مِلسی جِیندا وعدہ خُداوند آپنڑے سبھ پیار کرݨ آلیاں نال کیتے۔ ازمائش ویلے کوئی ایہ نہ آکھے جو ”ایہ ازمائش خُدا دی طرفوں ہے،“ کیوں جو نہ تاں خُدا بُرائی نال ازمایا وَنج سگدے تے نہ او کہیں کُوں ازمائش ءچ پیندے۔ بلکہ ہر بندہ اُوں ویلے ازمایا ویندے جِیں ویلے اُوندی نفسانی خواہش اُونکُوں ورغلا تے پَھسا گِھندی ہے۔ وَل خواہش حاملہ تھی تے گُناہ پیدا کریندی ہے تے گُناہ بالغ تھی تے موت پیدا کریندے۔ میڈے پیارے بِھراؤ، دوکھا نہ کھاؤ۔ ہر چنگی برکت تے کامِل نعمت اسمان کنُوں خُدا دی طرفوں مِلدی ہے جیہڑا نُوراں دا خالق ہے۔ اُوندے ءچ نہ تبدیلی آندی ہے تے نہ ای او پچھانویں وانگُوں تبدیل تھیندے۔ اُوں آپنڑی مرضی نال ساکُوں سچائی دے کلام دے وسیلے نال پیدا کیتا تاں جو اساں اُوندی مخلوقات ءچوں پہلے پھل وانگُوں خاص تھیؤں۔ میڈے پیارے بِھراؤ، یاد رکھو جو ہر بندہ سُنڑݨ ءچ تیز، بولنڑ ءچ اتاولا نہ ہووے تے جلدی کوڑیجنڑ آلا نہ ہووے۔ کیوں جو اِنسان دی کاوڑ او راستبازی پیدا نئیں کریندی جیہڑی خُدا چاہندے۔ اِیں واسطے ساری ناپاکی تے بُرائی کُوں دُور کر تے اُوں کلام کُوں فروتنی نال قبول کر گِھنو جیہڑا تُہاڈے دِلاں ءچ رہایا گئے تے تُہاکُوں نجات ڈے سگدے۔ کلام اُتے عمل کرݨ آلے بنڑو نہ جو صرف سُنڑݨ آلے جیہڑے خود کُوں دوکھا ڈیندے ہِن۔ کیوں جو جیہڑا کوئی صرف کلام کُوں سُنڑݨ آلا ہووے تے اُوندے اُتے عمل کرݨ آلا نہ ہووے، او اُوں بندے وانگُوں ہے جیہڑا شیشے ءچ آپنڑی شکل ڈیدھے۔ او اُونکُوں ڈیکھ تے چلیا ویندے تے فوراً بُھل ویندے جو میں کیجھا لگدا پِیا ہم۔ پر جیہڑا ازادی ڈیوݨ آلی کامِل شریعت اُتے غور نال نظر کریندا راہندے، تے جیہڑا کُجھ سُنڑدے اُونکُوں بُھلدا نئیں بلکہ اُوندے اُتے عمل کریندے، او آپنڑے ہر کم ءچ برکت پیسی۔ جے کوئی بندہ آپنڑے آپ کُوں دیندار سمجھدا ہووے تے وَل وی آپنڑی زبان کُوں قابو ءچ نہ رکھیندا ہووے تاں او آپنڑے آپ کُوں دوکھا ڈیندے۔ اُوندی دینداری فضول ہے۔ ساڈے خُدا باپ دی نظر ءچ حقیقی تے بے عیب دینداری ایہ ہے جو یتیماں تے بیوہ عورتاں دی مُصیبت ویلے خبر گِیری کرو تے آپنڑے آپ کُوں دُنیا کنُوں بچا تے بے داغ رکھو۔ میڈے بِھراؤ، ساڈے جلالی خُداوند یسُوع مسیح اُتے اِیمان رکھیندے ہوئے تُہاڈے ءچ طرفداری نہ ہووے۔ جے ہِک بندہ سونے دی مُندری تے شاندار کپڑے پاتے ہوئے تُہاڈی جماعت ءچ آوے تے ہِک غریب بندہ میلے کُچیلے کپڑے پاتے ہوئے آوے۔ تے تُساں اُوں شاندار کپڑے آلے دا لحاظ کر تے اُونکُوں آکھو جو ”اِتھاں چنگی جاہ تے باہو“ پر اُوں غریب کُوں آکھو جو ”تُوں اُتھاں کھڑا رہ“ یا ”میڈے پیراں دے کولھ بہہ وَنج“ تاں کیا تُساں طرفداری نہ کیتی تے بدنیتی نال فیصلہ نہ کیتا؟ میڈے پیارے بِھراؤ سُنڑو! کیا خُدا دُنیا دے غریباں کُوں نئیں چُنڑیا جو اِیمان ءچ دولت مند ہووݨ تے اُوں بادشاہی دے وارث ہووݨ جِیندا اُوں آپنڑے محبت رکھنڑ آلیاں کُوں ڈیوݨ دا وعدہ کیتے؟ پر تُساں غریب دی بے عزتی کیتی۔ کیا دولت مند ای تُہاڈے اُتے ظلم نئیں کریندے تے تُہاکُوں عدالتاں ءچ گِھیل تے نئیں گِھن ویندے؟ کیا ایہ لوک مسیح دے ناں دی توہین نئیں کریندے جیندے ناں تُوں تُساں اکھویندے ہیوے؟ پر جے تُساں خُدا دے کلام دے اِیں شاہی فرمان اُتے جو ”آپنڑے ہمسائے نال آپنڑے وانگُوں محبت رکھ “ عمل کریندے ہیوے تاں چنگا کریندے ہیوے۔ پر جے تُساں طرفداری نال کم گِھندے ہیوے تاں گُناہ کریندے ہیوے تے شریعت تُہاکُوں قصُوروار کھڑیندی ہے۔ کیوں جو جے کوئی ساری شریعت اُتے عمل کرے پر کہیں ہِک حُکم دا نافرمان ہووے تاں او ساری شریعت دا قصُوروار کھڑدے۔ کیوں جو جئیں آکھیا جو ”زِنا نہ کر،“ اُوں ایہ وی آکھیا جو ”خون نہ کر ۔“ بس جے تُوں زِنا تاں نئیں کریندا پر خون کریندیں تاں تُوں شریعت دا نافرمان بنڑیا۔ اِیں واسطے تُساں جیہڑا کُجھ وی اکھیندے یا کریندے ہیوے، یاد رکھو جو تُہاڈی عدالت ازاد کرݨ آلی شریعت دے مطابق تھیسی۔ کیوں جو جئیں رحم نئیں کیتا، اُوندا اِنصاف بغیر رحم دے کیتی ویسی پر رحم اِنصاف اُتے غالب آندے۔ میڈے بِھراؤ! جے کوئی دعویٰ کرے جو مَیں اِیمان رکھیندا ہاں پر عمل نہ کریندا ہووے تاں کیا فائدہ؟ کیا ایجھا اِیمان اُونکُوں نجات ڈے سگدے؟ جے کہیں بِھرا یا بھینڑ کولھ کپڑے تے روزانہ کھاوݨ کیتے روٹی نہ ہووے، تے تُہاڈے ءچوں کوئی اُونکُوں آکھے جو ”سلامتی نال وَنج، گرم تھی، تے کھا پی،“ پر اُنہاں کُوں جِسمانی ضرورت دیاں چیزاں نہ ڈیوے تاں کیا فائدہ؟ اِینویں ای جے اِیمان دے نال اعمال نہ ہووݨ تاں او اِیمان مُردہ ہے۔ تھی سگدے جو کوئی آکھے جو ”تُوں اِیمان رکھیندا ہیں پر مَیں نیک اعمال کریندا ہاں۔“ تُوں بغیر اعمال دے آپنڑا اِیمان میکُوں ڈِکھا تے مَیں آپنڑا اِیمان آپنڑے اعمال تُوں تیکُوں ڈِکھیساں۔ تُوں اِیمان رکھیندیں جو خُدا ہِک ای ہے۔ بہُوں چنگا کریندیں، ایہ تاں بدرُوحاں وی منیندیاں ہِن تے ڈر تے کمبدیاں ہِن۔ پر بیوقُوف! کیا تُوں ایہ وی نئیں سمجھدا جو اِیمان اعمال دے بغیر مُردہ ہے؟ جِیں ویلے ساڈے پِیُو ابرہام آپنڑے پوتر اِضحاق کُوں قُربان گاہ اُتے نذر کیتا تاں کیا او آپنڑے اُوں عمل دی وجہ کنُوں راستباز نہ کھڑایا گِیا؟ تُساں ڈیکھ سگدے ہیوے جو اُوندے اِیمان اُوندے اعمال نال رَل تے کم کیتا تے اعمال دے ذریعے اِیمان کامِل تھی گِیا۔ اِینویں خُدا دے کلام دی ایہ گالھ پُوری تھئی جو ”ابرہام خُدا اُتے اِیمان گِھن آیا تے ایہ اُوندے کیتے راستبازی شمار کیتا گِیا ،“ تے ”او خُدا دا دوست اکھوایا۔“ بس تُساں ڈیکھ گِھدے جو اِنسان اعمال نال راستباز کھڑایا ویندے نہ جو کلھے اِیمان نال۔ اِینویں ای کیا راحب طوائف آپنڑے اعمال دی وجہ تُوں راستباز نہ کھڑائی گئی جڈاں اُوں جاسُوساں کُوں پناہ ڈِتی تے ڈُوجھے رستے کنُوں بھیج ڈِتا ؟ بس جِینویں بدن بغیر رُوح دے مُردہ ہے، اُونویں ای اِیمان وی بغیر اعمال دے مُردہ ہے۔ میڈے بِھراؤ! تُہاڈے ءچوں بہُوں سارے کلام سِکھاوݨ آلے نہ بنڑݨ کیوں جو تُساں جانڑدے ہیوے جو خُدا ڈُوجھیاں دے مُقابلے ءچ اساں اُستاداں دی زیادہ سختی نال عدالت کریسی۔ اِیں واسطے جو اساں سبھ بہُوں ساریاں غلطیاں کریندے ہیں۔ کامِل بندہ او ہے جیہڑا آپنڑی کہیں گالھ ءچ خطا نئیں کریندا۔ ایجھا بندہ آپنڑے سارے بدن کُوں وی قابو ءچ رکھ سگدے۔ ڈیکھو، اساں گھوڑیاں دے مُنہ ءچ لگام پا ڈیندے ہیں تاں جو او ساڈا حُکم مننڑ تے اِینویں اساں اُنہاں دا پُورا جِسم آپنڑی مرضی نال گُھما سگدے ہیں۔ سمندری جہازاں کُوں وی ڈیکھو، بھانویں او وڈے وڈے ہوندن تے تیز ہواواں نال چلائے ویندن، وَل وی ہِک چھوٹے چپُو دے ذریعے چلاوݨ آلے دی مرضی دے مطابق موڑے وَنج سگدن۔ اِینویں ای زبان وی جِسم دا ہِک چھوٹا جِیہا اَنگ ہے پر وڈی شیخی مریندی ہے۔ ڈیکھو! ہِک چھوٹی جیہی چنگاری نال کتنے وڈے جنگل ءچ بھاہ لگ ویندی ہے۔ زبان وی ہِک بھاہ ہے۔ او باقی انگاں دے وچال رہ تے آپنڑے اندر بُرائی دی ہِک دُنیا رکھی پئی ہے۔ زبان ساڈا او اَنگ ہے جیہڑا سارے جِسم کُوں وِگاڑ ڈیندے تے اِنسان دی ساری زندگی کُوں ساڑ ڈیندے کیوں جو او خود دوزخ دی بھاہ نال بلدا راہندے۔ اِنسان ہر قِسم دے جانوراں، پکھیاں، کیڑے مکوڑیاں تے سمندری جانوراں کُوں آپنڑے قابو ءچ کر سگدے بلکہ کیتا وی ہے۔ پر کوئی اِنسان زبان کُوں قابو ءچ نئیں رکھ سگدا۔ ایہ ہِک بلا ہے جیہڑی کڈھائیں نئیں رُکدی تے ہلاک کرݨ آلے زہر نال بھری ہوئی ہے۔ اِیں زبان نال ای اساں آپنڑے خُداوند تے باپ دی حمد کریندے ہیں تے اِیندے نال ای اِنساناں کُوں جیہڑے خُدا دی صورت اُتے خلق کیتے گئے ہِن لعنت کریندے ہیں۔ ہِکو مُنہ ءچوں برکت تے لعنت نِکلدی ہے۔ میڈے بِھراؤ، اِینویں تاں نئیں ہوونڑا چاہیدا۔ کیا چشمہ دے ہِکو مُنہ ءچوں مِٹھا تے کھارا پانڑی نِکل سگدے؟ میڈے بِھراؤ، کیا ہنجیر دے درخت تُوں زیتون یا انگُور تُوں ہنجیر پیدا تھی سگدے ہِن؟ نئیں۔ اِینویں ای کھارے پانڑی دے چشمہ ءچوں مِٹھا پانڑی نئیں نِکل سگدا۔ تُہاڈے ءچوں کیہڑا دانشمند تے سمجھدار ہے؟ جے کوئی ایجھا ہے تاں او اِینکُوں آپنڑے چنگے چال چلنڑ دے ذریعے ثابت کرے تے ایجھے نیک اعمال دے ذریعے وی جیہڑے حِکمت تُوں پیدا تھیوݨ آلی حلیمی نال کیتے ویندن۔ پر جے تُہاڈے دل ءچ سخت حسد تے خود غرضی ہے تاں شیخی نہ مارو تے نہ ای سچائی دے خلاف کُوڑ مارو۔ ایجھی حِکمت اسمان کنُوں نئیں لہندی بلکہ دُنیاوی، نفسانی تے شیطانی ہے۔ کیوں جو جِتھاں حسد تے خود غرضی ہوندی ہے اُتھاں فساد تے ہر طرحاں دا بُرا کم وی ہوندا ہے۔ پر جیہڑی حِکمت اسمان کنُوں آندی ہے، اوّل تاں او پاک ہوندی ہے، وَل امن پسند، نرم مزاج تے تربیت قبول کرݨ آلی ہوندی ہے تے رحم تے چنگے کماں نال بھری ہوندی ہے۔ اُوندے ءچ طرفداری تے منافقت نئیں ہوندی۔ صُلح کراوݨ آلے جیہڑے صُلح رہیندن او راستبازی دی فصل کپیندن۔ تُہاڈے ءچ لڑائیاں تے جھیڑے کِتھوں آ گئے۔ کیا او اُنہاں نفسانی خواہشاں تُوں نئیں جیہڑیاں تُہاڈے ءچ فساد پیدا کریندیاں ہِن؟ تُساں کہیں چیز دی خواہش کریندے ہیوے پر او تُہاکُوں نئیں مِلدی تاں قتل کریندے ہیوے۔ تُساں حسد کریندے ہیوے پر جیہڑا کُجھ چاہندے ہیوے حاصل نئیں کر سگدے تاں لڑدے تے جھیڑا کریندے ہیوے۔ تُہاکُوں اِیں واسطے نئیں مِلدا کیوں جو تُساں خُدا کنُوں نئیں منگدے۔ تے جِیں ویلے منگدے ہیوے تاں مِلدا نئیں کیوں جو بُری نیّت نال منگدے ہیوے تاں جو آپنڑیاں نفسانی خواہشاں کُوں پُورا کر سگو۔ خُدا نال بے وفائی کرݨ آلیو! کیا تُہاکُوں پتہ نئیں جو دُنیا نال دوستی رکھنڑ خُدا نال دُشمنڑی کرݨ ہے؟ اِیں واسطے جیہڑا کوئی دُنیا دا دوست بنڑݨ چاہندے او خُدا دا دُشمنڑ بنڑ ویندے۔ کیا تُساں ایہ سوچیندے ہیوے جو خُدا دا کلام بے مقصد فرمیندے جو خُدا اُوں رُوح کیتے جیہڑا اُوں ساڈے دِلاں ءچ وسایا ہے غیرت رکھیندا ہے ؟ پر او تاں ساکُوں زیادہ توفیق ڈیندے۔ اِیں واسطے کلام ءچ آکھیا گئے جو، ”خُدا مغرُوراں دا مُقابلہ کریندے پر عاجزی کرݨ آلیاں اُتے مہربانی کریندے ۔“ اِیں واسطے خُدا دے تابع راہو۔ ابلیس دا مُقابلہ کرو تاں او تُہاڈے کنُوں بھج ویسی۔ خُدا دے نیڑے آؤ تاں او تُہاڈے نیڑے آسی۔ گُنہگارو، آپنڑے ہتھاں کُوں صاف کر گِھنو۔ تے ڈُو دِلیو، آپنڑے دِلاں کُوں پاک کر گِھنو۔ افسوس کرو، ماتم کرو تے وینڑ کرو۔ تُہاڈا کِھلنڑ ماتم ءچ بدل ونجے تے تُہاڈی خوشی غم ءچ بدل ونجے۔ خُداوند دے سامنڑے عاجزی کرو تاں او تُہاکُوں سرفراز کریسی۔ بِھراؤ، تُساں آپس ءچ ہِک ڈُوجھے دی بدگوئی نہ کرو۔ جیہڑا آپنڑے بِھرا دی بدگوئی کریندے یا اُوندے اُتے اِلزام لیندے، او شریعت دی بدگوئی کریندے تے اُوندے اُتے اِلزام لیندے۔ تے جے تُوں شریعت اُتے اِلزام لیندیں تاں تُوں شریعت اُتے عمل کرݨ دی بجائے اُوندی عدالت کریندیں۔ شریعت دا ڈیوݨ آلا تے مُنصف ہِکو ای ہے یعنی خُدا جیہڑا نجات وی ڈے سگدے تے ہلاک وی کر سگدے۔ پر تُوں کوݨ ہیں جیہڑا آپنڑے ہمسائے اُتے اِلزام لیندیں؟ تُساں جیہڑے ایہ آدھے ہیوے جو ”اَج یا کل اساں فلاں شہر ءچ ویسوں، ہِک سال اُتھاں راہسوں تے کاروبار کر تے پیسہ کمیسوں۔“ ذرا سوچو! تُساں نئیں جانڑدے جو کل کیا تھیسی۔ تُہاڈی زندگی ہے ای کیا؟ بُخارات آلی کار ہے۔ ہُنڑیں نظر آئے، ہُنڑیں غیب تھی گئے۔ اِیندے بجائے تُہاکُوں ایہ آکھنڑا چاہیدے جو ”جے خُداوند دی مرضی تھئی تاں اساں زندہ راہسوں تے ایہ یا او کم کریسوں۔“ پر تُساں شیخی مریندے تے اُوندے اُتے فخر کریندے ہیوے۔ اِیں طرحاں دا سارا فخر بُرا ہے۔ بس جیہڑا نیکی کرݨ جانڑدے پر نئیں کریندا، ایہ اُوندے کیتے گُناہ ہے۔ دولت مندو، سُنڑو! تُساں آپنڑے اُتے آوݨ آلیاں مُصیبتاں اُتے روو تے ماتم کرو۔ تُہاڈا مال گَل سڑ گئے تے تُہاڈے کپڑیاں کُوں کیڑا کھا گئے۔ تُہاڈے سونے تے چاندی کُوں زنگ لگ گئے۔ تے او زنگ تُہاڈے خلاف گواہی ڈیسی تے بھاہ وانگُوں تُہاڈا گوشت کھا ویسی۔ کیوں جو تُساں آخری ڈینہاں کیتے دولت دے ڈھیر لا گِھدے ہِن۔ ڈیکھو! جیہڑی مزدُوری تُساں آپنڑے کھیتاں ءچ کم کرݨ آلیاں کُوں نئیں ڈِتی، او تُہاڈے خلاف چیخدی پئی ہے تے فصل کپنڑ آلیاں دی فریاد لشکراں دے رب دے کَناں تئیں پُج گئی ہے۔ تُساں زمین اُتے عیش و عشرت تے مزے نال زندگی گُزاری۔ تُساں آپنڑے آپ کُوں گاں وانگُوں ذبح دے ڈینہہ کیتے موٹا کیتا۔ تُساں بے قصُور کُوں قصُوروار بنڑایا تے قتل کر ڈِتا بھانویں اُوں تُہاڈا مُقابلہ نہ کیتا۔ اِیں کیتے بِھراؤ! خُداوند دے آوݨ تئیں صبر کرو۔ کِسان کُوں ڈیکھو، جیہڑا زمین ءچوں قیمتی پیداوار حاصل کرݨ کیتے خزاں تے بہار دے مینہ دا صبر نال اِنتظار کریندے۔ تُساں وی صبر کرو تے دِلاں کُوں مضبوط رکھو کیوں جو خُداوند دی آمد نیڑے ہے۔ بِھراؤ! ہِک ڈُوجھے دی شکایت نہ کرو تاں جو تُہاڈی عدالت نہ تھیوے۔ ڈیکھو! مُنصف دروازے اُتے کھڑے۔ بِھراؤ! جیہڑے نبیاں خُداوند دے ناں نال کلام کیتا، اُنہاں کُوں ڈُکھ چاوݨ تے صبر کرݨ دا نمونہ سمجھو۔ ڈیکھو، اساں صبر کرݨ آلیاں کُوں مُبارک آدھے ہیں۔ تُساں ایُّوب دے صبر دے بارے ءچ تاں سُنڑیا ای ہے تے ایہ وی جانڑدے ہیوے جو خُدا دی طرفوں اِیندا کیا انجام تھیّا، کیوں جو خُداوند وڈا رحم دل تے مہربان ہے۔ پر بِھراؤ! سبھ تُوں ودھ تے ایہ ہے جو قَسم نہ چاؤ، نہ اسمان دی، نہ زمین دی تے نہ کہیں بئی شے دی بلکہ ہاں دی جاہ ہاں آکھو تے نہ دی جاہ نہ۔ اِینویں نہ تھیوے جو تُساں سزا دے لائق کھڑائے ونجو۔ جے تُہاڈے ءچوں کوئی مُصیبت ءچ ہے تاں اُونکُوں چاہیدے جو دُعا کرے، تے جیہڑا خوش ہے، او حمد دے گیت گاوے۔ جے کوئی بیمار ہے تاں او کلیسیا دے بزُرگاں کُوں سڈواوے تاں جو او بزُرگ خُداوند دے ناں نال بیمار کُوں تیل لا تے اُوندے کیتے دُعا کرݨ۔ اِیمان نال منگی ہوئی دُعا دے سببّوں بیمار بچ ویسی۔ خُداوند اُونکُوں شِفا ڈیسی تے جے اُوں گُناہ کیتے ہووݨ تاں او معاف کیتے ویسن۔ اِیں کیتے تُساں ہِک ڈُوجھے دے سامنڑے آپنڑے گُناہاں دا اِقرار کرو تے ہِک ڈُوجھے کیتے دُعا کرو تاں جو شِفا پاؤ۔ کیوں جو راستباز دی دُعا دے اثر نال بہُوں کُجھ تھی سگدے۔ ایلیّاہ ساڈے وانگُوں اِنسان ہا۔ اُوں اِیمان نال دُعا کیتی جو مینہ نہ وسے تے ساڈھے ترے سال تئیں زمین اُتے مینہ نہ وسیا۔ اُوں ولا دُعا کیتی تاں اسمان کنُوں مینہ وسیا تے زمین فصلاں پیدا کیتیاں۔ میڈے بِھراؤ! جے تُہاڈے ءچوں کوئی سچائی دے رستے کنُوں پِھر ونجے تے کوئی ڈُوجھا اُونکُوں ولا گِھن آوے، تاں یاد رکھو جو گُنہگار کُوں گُمراہی کنُوں واپس گِھن آوݨ آلا، ہِک جان کُوں موت کنُوں بچیسی تے بہُوں سارے گُناہاں اُتے پڑدہ پیسی۔ ایہ خط میں پطرس دی طرفوں ہے جیہڑا یسُوع مسیح دا رسُول ہاں، خُدا دے اُنہاں چُنڑے ہوئے لوکاں دے ناں جیہڑے پردیسیاں آلی کار پُنطُس، گلِتیہ، کپَدُکیہ، آسِیہ تے بتُھنیہ ءچ جاہ جاہ تے راہندے ہِن۔ خُدا باپ تُہاکُوں ازلی علم دے مطابق چُنڑ گِھدا تے اُوندے رُوح تُہاکُوں مخصوص تے مُقدّس کیتا۔ نتیجے ءچ تُساں یسُوع مسیح دی فرمانبرداری کریندے ہیوے تے اُوندے چِھنڈکے گئے خون نال پاک صاف تھی گئے ہیوے۔ تُہاکُوں ڈھیر سارا فضل تے اِطمینان حاصل تھیندا راہوے۔ ساڈے خُداوند یسُوع مسیح دے خُدا تے باپ دی حمد تھیوے۔ اُوں یسُوع مسیح کُوں مُردیاں ءچوں زندہ کر تے آپنڑی وڈی رحمت نال ساکُوں نویں سرے تُوں پیدا کیتا، تے ہُنڑ ساکُوں ہِک زندہ اُمید مِلی ہے یعنی ہِک نہ ختم تھیوݨ آلی، بے داغ تے لازوال میراث جیہڑی خُدا دی طرفوں ساڈے کیتے اسمان اُتے محفوظ ہے۔ خُدا آپنڑی قُدرت دے ذریعے تے تُہاڈے اِیمان دے وسیلہ نال تُہاڈی حفاظت کریندا راہسی جئیں تئیں تُہاکُوں او نجات نہ مِل ونجے جیہڑی آخرت ءچ ظاہر تھیوݨ آلی ہے۔ اِیہو وجہ ہے جو تُساں خوشی منیندے ہیوے، بھانویں جو کُجھ دیر کیتے طرحاں طرحاں دیاں ازمائیشاں دی وجہ کنُوں تُہاکُوں ڈُکھ برداشت کرنڑا پوندے، تاں جو تُہاڈا ازمایا ہویا اِیمان جیہڑا بھاہ نال خالص کیتے ہوئے فانی سونے تُوں وی بہُوں قیمتی ہے، اصلی ثابت تھی ونجے تے یسُوع مسیح دے ظہور دے ڈینہہ تعریف، جلال تے عزت مِلنڑ دا سبب ہووے۔ تُساں یسُوع کُوں نئیں ڈِٹھا وَل وی اُوندے نال محبت کریندے ہیوے۔ بھانویں تُساں اِیں وقت اُونکُوں نئیں ڈیدھے، وَل وی اُوندے اُتے اِیمان رکھیندے ہوئے ایجھی خوشی منیندے ہیوے جیہڑی بیان تُوں باہر تے جلال آلی ہے۔ تے تُساں آپنڑے اِیمان دا مقصد یعنی نجات حاصل کریندے پئے ہیوے۔ اِیں نجات دے بارے ءچ نبیاں بہُوں تحقیق تے تلاش کیتی، تے اُوں فضل دے بارے ءچ نبُوّت کیتی جیہڑا تُہاڈے اُتے تھیوݨ آلا ہا۔ اُنہاں پتا کرݨ دی کوشش کیتی جو مسیح دا رُوح جیہڑا اُنہاں ءچ ہا، کیندے دو تے کیہڑے وقت دو اِشارہ کریندا پِیا ہا، جِیں ویلے اُوں مسیح دے ڈُکھ سہنڑ، تے بعد ءچ جلال پاوݨ دی پیشنگوئی کیتی ہئی۔ رُوح القُدس نبیاں اُتے ایہ ظاہر کیتا جو ایہ گالھیں کریندے ہوئے او آپنڑی نئیں بلکہ تُہاڈی خدمت کریندے پئے ہِن تے ہُنڑ خوشخبری دی تبلیغ کرݨ آلیاں، اسمان کنُوں بھیجے ہوئے رُوح القُدس دی قُدرت نال تُہاکُوں ایہ گالھیں ڈسائیاں۔ ایہ گالھیں ایجھیاں ہِن جو فرشتے وی اِنہاں کُوں سمجھنڑ دی بہُوں سِک رکھیندے ہِن۔ اِیں واسطے ذہنی طور تے تیار تے ہوشیار تھی ونجو تے اُوں فضل اُتے پُوری اُمید رکھو جیہڑا یسُوع مسیح دے ظہور ویلے تُہاڈے اُتے تھیسی۔ خُدا دے فرمانبردار فرزند ہوندے ہوئے آپنڑی جہالت دے زمانہ دیاں بُریاں خواہشاں دے تابع نہ تھیؤ، بلکہ جِینویں تُہاڈا سڈݨ آلا پاک ہے اُونویں ای تُساں وی آپنڑے سارے چال چلنڑ ءچ پاک بنڑو۔ کیوں جو کلام ءچ لِکھیا ہے جو ”آپنڑے آپ کُوں پاک رکھو کیوں جو مَیں پاک ہاں ۔“ خُدا، جِیں تُوں تُساں باپ آکھ تے دُعا کریندے ہیوے، بغیر طرفداری دے ہر بندے دے عمل دے مطابق اُوندا اِنصاف کریندے، اِیں واسطے جئیں تئیں تُساں دُنیا ءچ مسافر دے طور تے راہندے ہیوے، خُدا دے خوف ءچ زندگی گُزارو۔ کیوں جو تُساں جانڑدے ہیوے جو خُدا تُہاکُوں اُوں بے کار چال چلنڑ کنُوں مخلصی ڈِتی ہے جیہڑا تُہاکُوں پِیُو ڈاڈے تُوں مِلیا ہا۔ تے او مخلصی فانی چیزاں یعنی سونے چاندی دی قیمت نال نئیں تھئی، بلکہ ہِک بے عیب تے بے داغ لیلے یعنی مسیح دے قیمتی خون نال۔ خُدا مسیح کُوں دُنیا بنڑاوݨ تُوں پہلے مقرر کیتا پر تُہاڈے کیتے اُونکُوں اِیں آخری زمانے ءچ ظاہر کیتا۔ تُساں مسیح دے وسیلے نال خُدا اُتے اِیمان گِھن آئے ہیوے، جئیں اُونکُوں مُردیاں ءچوں زندہ کیتا تے جلال بخشیا تاں جو تُہاڈا اِیمان تے تُہاڈی اُمید خُدا اُتے ہووے۔ تُساں سچائی دے تابع تھی تے آپنڑے آپ کُوں پاک کیتے، جیندی وجہ کنُوں بِھرانواں ءچ سچی محبت پیدا تھئی۔ اِیں واسطے آپس ءچ دل و جان نال محبت رکھو۔ تُساں فانی بیج کنُوں نئیں بلکہ غیرفانی بیج کنُوں، خُدا دے کلام دے وسیلے نال نویں سرے تُوں پیدا تھئے ہیوے، جیہڑا زندہ تے ہمیشاں تئیں قائم ہے۔ جِینویں کلام ءچ لِکھیا ہے جو ”ہر بندہ گھاہ آلی کار ہے اُوندی ساری شان گھاہ دے پُھل وانگُوں ہے گھاہ سُک ویندی تے پُھل ڈھے ویندے پر خُداوند دا کلام ہمیشاں تئیں قائم راہندے ۔“ ایہ اُوہو خوشخبری دا کلام ہے جیہڑا تُہاکُوں سُنڑایا گئے۔ اِیں واسطے ہر قِسم دی بُرائی، فریب، منافقت، حسد تے بدگوئی کُوں چھوڑ ڈیؤ۔ نویں پیدا تھئے بالاں وانگُوں خالص رُوحانی کھیر دی خواہش ءچ راہو تاں جو اُوندے ذریعے آپنڑی نجات ءچ ودھدے ونجو۔ کیوں جو تُساں خُداوند دی مہربانی دا مزہ چکھ گِھدے۔ تُساں مسیح دے یعنی اُوں زندہ پتھر دے کولھ آندے پئے ہیوے، جِینکُوں اِنساناں رَد کر ڈِتا ہا، پر خُدا چُنڑ گِھدا تے قیمتی سمجھیا۔ تے تُساں زندہ پتھراں آلی کار ہِک رُوحانی گھر بنڑدے ویندے ہیوے تاں جو مُقدّس کاہِن بنڑو تے ایجھیاں رُوحانی قُربانیاں پیش کرو جیہڑیاں یسُوع مسیح دے وسیلہ نال خُدا دے حضُور مقبول تھیندیاں ہِن۔ کیوں جو خُدا دے کلام ءچ لِکھیا ہے جو ”ڈیکھو، مَیں صِیُّون ءچ ہِک پتھر رکھیندا ہاں، کونے دے سرے دا چُنڑیا ہویا تے قیمتی پتھر جیہڑا اُوندے اُتے اِیمان گِھن آسی کڈھائیں شرمندہ نہ تھیسی ۔“ تُساں اِیمان گِھن آوݨ آلیاں کیتے تاں او قیمتی ہے پر اِیمان نہ گِھن آوݨ آلیاں کیتے نئیں، جِینویں جو لِکھیا ہے جو ”جِیں پتھر کُوں مِستریاں رَد کر ڈِتا اُوہو کونے دے سرے دا پتھر تھی گِیا ۔“ تے او ”تُھڈا لواوݨ دا ہِک پتھر تے ٹھوکر کھواوݨ دی ہِک چٹان بنڑ گِیا ۔“ او کلام اُتے اِیمان نہ گِھن آوݨ دی وجہ کنُوں تُھڈا کھاندے ہِن۔ تے اِیہو کُجھ اُنہاں دا مُقدر وی ہا۔ پر تُساں ہِک چُنڑی ہوئی نسل، شاہی کاہِن، مُقدّس قوم تے ایجھی اُمت ہیوے جیہڑی خُدا دی خاص ملکیت ہے، تاں جو تُساں اُوندے خُوبیاں دا اعلان کرو جئیں تُہاکُوں اندھارے ءچوں آپنڑی حیران کرݨ آلی روشنی ءچ سڈیا ہے۔ پہلے تُساں کوئی اُمت نہ ہَوے، پر ہُنڑ خُدا دی اُمت بنڑ گئے ہیوے۔ پہلے تُہاڈے اُتے رحمت نہ تھئی ہئی پر ہُنڑ تُہاڈے اُتے رحمت تھئی ہے۔ عزیزو، مَیں تُہاڈی مِنت کریندا ہاں جو تُساں جیہڑے اِیں دُنیا ءچ پردیسیاں تے مسافراں وانگُوں ہیوے، اُنہاں بُریاں خواہشاں کنُوں دُور راہو جیہڑیاں تُہاڈے نال لڑائی کریندیاں راہندیاں ہِن۔ غیر قوماں ءچ آپنڑا چال چلنڑ ایجھا نیک رکھو جو بیشک او تُہاڈے اُتے بدکار ہووݨ دے اِلزام لیندن پر تُہاڈے نیک کماں کُوں ڈیکھ تے عدالت دے ڈینہہ خُدا دی حمد کرݨ۔ خُداوند دی خاطر ہر اِنسانی اِنتظام دے تابع راہو، بھانویں بادشاہ ہووے جیہڑا سبھ تُوں اعلیٰ اِختیار آلا ہے، بھانویں حاکم ہووݨ جِنہاں کُوں اُوں اِیں واسطے مقرر کیتے جو بدکاراں کُوں سزا ڈیوݨ تے نیکی کرݨ آلیاں دی تعریف کرݨ۔ کیوں جو خُدا دی مرضی ایہ ہے جو تُساں نیکی کر تے جہالت دے گالھیں کرݨ آلے ناسمجھ لوکاں دے مُنہ بند کر ڈیؤ۔ تُساں ازاد ہیوے، اِیں واسطے ازادی نال زندگی گُزارو، پر آپنڑی ازادی کُوں بدکاری دا پڑدہ نہ بنڑاؤ بلکہ آپنڑے آپ کُوں خُدا دے غُلام جانڑو۔ سبھ دی عزت کرو، آپنڑے اِیماندار بِھرانواں نال محبت رکھو۔ خُدا تُوں ڈرو تے بادشاہ دی عزت کرو۔ نوکرو! وڈے احترام نال آپنڑے مالکاں دے تابع راہو، نہ صرف نیکاں تے رحم دِلاں دے بلکہ بدمزاجاں دے وی۔ جے کوئی خُدا دی مرضی دا خیال کریندے ہوئے نا حق ڈُکھ تے تکلیفاں برداشت کریندے تاں ایہ گالھ قابلِ تعریف ہے۔ جے تُساں گُناہ کر تے چاٹاں کھاندے تے صبر کریندے ہیوے تاں ایہ کیہڑی فخر دی گالھ ہے؟ پر جے نیکی کرݨ دے باعث ڈُکھ چیندے تے صبر نال کم گِھندے ہیوے تاں ایہ گالھ خُدا دے نزدیک قابلِ تعریف ہے۔ تُساں اِیں کیتے ای سڈے گئے ہیوے، کیوں جو مسیح تُہاڈے کیتے ڈُکھ چا تے ہِک نمونہ چھوڑ گِیا تاں جو تُساں اُوندے نقش ِ قدم اُتے ٹُرو۔ ”اُوں نہ تاں کڈھائیں گُناہ کیتا تے نہ اُوندے مُنہ ءچوں مکر دی گالھ نِکلی ۔“ نہ اُوں مندھے کھا تے کڈھائیں مندھے کڈھے، تے نہ ڈُکھ چا تے کڈھائیں کہیں کُوں دڑکے ڈِتے، بلکہ آپنڑے آپ کُوں اِنصاف نال عدالت کرݨ آلے خُدا دے حوالے کر ڈِتا۔ او خود آپنڑے ای بدن اُتے ساڈے گُناہاں دا بھار چا تے صلیب اُتے چڑھ گِیا تاں جو اساں گُناہاں دے اعتبار نال مر تے راستبازی دے اعتبار نال زندہ تھی ونجُوں۔ ”اُوندے زخماں تُوں تُہاکُوں شِفا مِلی ہے ۔“ پہلے تُساں بھیڈاں وانگُوں آوارہ پِھردے ہَوے پر ہُنڑ آپنڑیاں جاناں دے آجڑی تے نگہبان دے کولھ واپس آ گئے ہیوے۔ ذالو! اِینویں ای تُساں وی آپنڑے پایاں دے تابع راہو۔ وَل بھانویں اُنہاں ءچوں کُجھ خُدا دے کلام کُوں نہ منیندے ہووݨ، او آپنڑی ذال دا چال چلنڑ ڈیکھ تے اِیمان دو آ ویسن۔ اُنہاں کُوں کُجھ آکھنڑ دی ضرورت نہ ہوسی، جڈاں او آپنڑی ذال دا پاک چال چلنڑ تے اُوندے ءچ خُدا دا خوف ڈیکھسن۔ آپنڑی ظاہری خُوب صورتی دا خیال نہ کرو جِینویں جو فیشن کر تے وال بنڑاونڑا، تے سونے دے زیور تے قیمتی کپڑے پاونڑا، بلکہ تُساں باطنی طور تے یعنی حلیمی تے نرم مزاجی نال آپنڑے آپ کُوں سنوارو۔ اِیں غیرفانی خوبصورتی دی خُدا دی نظر ءچ بہُوں قدر ہے۔ گُزرے زمانہ ءچ خُدا اُتے اُمید رکھنڑ آلیاں مُقدّس عورتاں وی آپنڑے آپ کُوں اِینویں سنواردیاں تے آپنڑے پایاں دے تابع راہندیاں ہَن۔ جِینویں سارہ، جئیں آپنڑے پئے ابرہام کُوں مالک آکھ تے اُوندی فرمانبرداری کیتی۔ جے تُساں وی نیکی کرو تے کہیں وی ڈراوݨ آلی چیز تُوں نہ ڈرو تاں تُساں وی سارہ دیاں دِھیاں ہوسو۔ پائیو! تُساں وی آپنڑیاں ذالاں کُوں آپنڑے تُوں کمزور جاݨ تے اُنہاں دے نال سمجھداری نال زندگی گُزارو، تے اُنہاں کُوں زندگی دیاں نعمتاں ءچ برابر شریک جاݨ تے اُنہاں دی عزت کرو تاں جو تُہاڈیاں دُعاواں رُک نہ ونجنڑ۔ آخری گالھ ایہ ہے جو تُساں سارے ہِک ڈُوجھے نال ہمدردی، برادرانہ محبت، رحم دِلی تے عاجزی نال راہو۔ بُرائی دے بدلے بُرائی نہ کرو، تے مندھے دا جواب مندھے نال نہ ڈیؤ بلکہ اِیندے بجائے ڈُوجھیاں کیتے برکت چاہو کیوں جو خُدا تُہاکُوں برکت دے وارث تھیوݨ کیتے سڈیا ہے۔ جِینویں جو کلام ءچ لِکھیا ہے ”جیہڑا خوشی نال زندگی گُزارݨ تے چنگے ڈینہہ ڈیکھنڑ چاہندے او آپنڑی زبان کُوں بُرے گالھیں تُوں تے ہونٹاں کُوں فریب دے گالھیں تُوں باز رکھے۔ بُرائی کنُوں دُور راہوے تے بھلائی کرے صُلح دا طالب تھیوے تے اُوندی کوشش ءچ راہوے کیوں جو رب دے اکھیں راستبازاں اُتے ہِن تے اُوندے کَن اُنہاں دی دُعا اُتے لگے راہندن پر رب دا چہرہ بدکاراں دے خلاف ہے ۔“ جے تُساں نیکی کرݨ دا جوش رکھیندے ہیوے تاں کوݨ تُہاکُوں نُقصان پُچیسی؟ پر جے تُساں نیکی کرݨ پارُوں ڈُکھ چاؤ وی تاں تُساں مُبارک ہیوے۔ اُنہاں دیاں دھمکیاں تُوں نہ ڈرو تے نہ گھبراؤ۔ مسیح کُوں آپنڑے دِلاں ءچ خُداوند مَن تے مُقدّس جانڑو۔ تے جے کوئی تُہاڈے کنُوں تُہاڈی اُمید دی وجہ پُچھے تاں اُونکُوں جواب ڈیوݨ کیتے ہمیشاں تیار راہو، پر حلیمی تے خُدا دے خوف نال۔ تے آپنڑی نیّت صاف رکھو تاں جو تُہاڈے نیک چال چلنڑ دے بارے ءچ جیہڑا مسیح ءچ ہے، غلط بیانی کرݨ آلے آپنڑے اِلزام لاوݨ اُتے شرمندہ تھیوݨ۔ جے خُدا دی اِیہو مرضی ہے جو تُساں نیکی کر تے ڈُکھ چاؤ تاں ایہ بُرائی کر تے ڈُکھ چاوݨ تُوں چنگا ہے۔ کیوں جو مسیح جیہڑا راستباز ہا، بدکاراں دے گُناہاں دی خاطر ہمیشاں کیتے ہِکے پھیری ڈُکھ چاتا تاں جو ساکُوں خُدا تئیں پُچا ڈیوے۔ او جِسم دے اعتبار نال تاں ماریا گِیا پر رُوح دے اعتبار نال زندہ کیتا گِیا۔ اِیں حالت ءچ اُوں وَنج تے اُنہاں قیدی رُوحاں ءچ تبلیغ کیتی، جیہڑیاں پِچھلے زمانہ ءچ نافرمان ہَن، جِیں ویلے خُدا نُوح دی کشتی بنڑݨ تئیں صبر نال اِنتظار کیتا۔ اُوں کشتی ءچ بہُوں تھوڑے یعنی اَٹھ بندے پانڑی ءچوں لنگھ تے بچ نِکلے۔ اُوہو پانڑی بپتسمہ دو اِشارہ ہے جیہڑا یسُوع مسیح دے زندہ تھیوݨ دے وسیلے نال ہُنڑ تُہاکُوں بچیندے۔ ایہ نئیں جو تُہاڈے جِسم دی گندگی دھویج ویندی ہے بلکہ تُساں نیک نیّتی نال خُدا دے طالب تھی ویندے ہیوے۔ یسُوع اسمان اُتے وَنج تے خُدا دے سجے پاسے بہہ گِیا ہے تے فرشتے، اِختیار آلے، تے طاقتاں اُوندے تابع کیتے گئے ہِن۔ جڈاں مسیح جِسمانی طور تے ڈُکھ چاتا تاں تُساں وی اُوں وانگُوں ڈُکھ چاوݨ کیتے تیار راہو کیوں جو جئیں وی مسیح دی خاطر ڈُکھ سہے، اُوں گُناہ کُوں چھوڑ ڈِتے۔ ہُنڑ او دُنیا ءچ آپنڑی باقی زندگی اِنسانی بُریاں خواہشاں دے مطابق نئیں بلکہ خُدا دی مرضی دے مطابق گُزارے۔ تُساں پہلے ای آپنڑی زندگی دا بہُوں وقت اُوہو کرݨ ءچ گُزار ڈِتے جیہڑا غیر قوماں کُوں پسند ہے یعنی شہوت پرستی، بُریاں خواہشاں، شراب پِیوݨ، نچنڑ گاوݨ، نشے بازی تے بُت پرستی ءچ، جیہڑا بہُوں مکرُوہ کم ہے۔ تے ہُنڑ او لوک حیران تھیندن جو تُساں ایجھیاں سبھ بدکاریاں ءچ اُنہاں دا ساتھ نئیں ڈیندے، تے او تُہاکُوں بُرا بھلا آدھے ہِن۔ پر اُنہاں کُوں اُونکُوں حساب ڈیونڑا پوسی جیہڑا زندیاں تے مُردیاں دی عدالت کرݨ کُوں تیار ہے۔ تے اُنہاں لوکاں کُوں جیہڑے ہُنڑ مر گئے ہِن، اِیں واسطے خوشخبری سُنڑائی گئی ہئی جو بیشک جِسمانی طور تے تاں اُنہاں دی عدالت اِنساناں دی طرحاں تھیوے، پر رُوحانی لحاظ نال زندہ راہوݨ جِینویں خُدا زندہ ہے۔ سبھ چیزاں دے خاتمے دا وقت نیڑے ہے۔ اِیں واسطے دُعا کرݨ کیتے سنجیدہ تے ہوشیار راہو۔ سبھ تُوں اہم گالھ تاں ایہ ہے جو آپس ءچ گھاٹی محبت رکھو کیوں جو محبت بہُوں سارے گُناہاں اُتے پڑدہ پا ڈیندی ہے۔ بُڑبُڑ کیتے بغیر مہمان نوازی کرو۔ خُدا ہر ہِک کُوں کوئی نہ کوئی نعمت عطا کیتی ہے۔ اِیں واسطے اِنہاں مختلف نعمتاں کُوں خُدا دے چنگے مُختار آلی کار ہِک ڈُوجھے دی خدمت کرݨ ءچ اِستعمال کرو۔ جے کوئی کُجھ بیان کرے تاں اِینویں کرے جِینویں خُدا اُوندے ذریعے کلام کریندا پئے۔ جے کوئی خدمت کرے تاں اُوں طاقت نال کرے جیہڑی خُدا ڈیندے تاں جو سبھ گالھیں ءچ یسُوع مسیح دے وسیلہ نال خُدا دا جلال ظاہر تھیوے۔ جلال تے سلطنت ہمیشاں تئیں اُوندا ای ہووے۔ آمین۔ عزیزو! جیہڑی مُصیبت بھاہ آلی کار تُہاڈی ازمائش کیتے تُہاڈے اُتے آئی ہے اُوندے تُوں حیران تھی تے ایہ نہ سوچو جو ساڈے نال انوکھی گالھ تھئی ہے۔ بلکہ خوشی مناؤ جو تُساں مسیح دے ڈُکھاں ءچ شریک تھی گئے ہیوے تاں جو جِیں ویلے اُوندا جلال ظاہر تھیوے تاں تُساں مزید وی خوش تھی سگو۔ جے مسیح دے ناں دے سببّوں تُہاڈی بے عزتی کیتی ویندی ہے تاں تُساں مُبارک ہیوے کیوں جو خُدا دا جلالی رُوح القُدس تُہاڈے اُتے چھاں کیتی پئے۔ پر تُہاڈے ءچوں کوئی وی ایجھا نہ ہووے جیہڑا کہیں کُوں قتل کرݨ، چوری یا بدکاری کرݨ یا ڈُوجھیاں دے کم ءچ دَخل ڈیوݨ دی وجہ کنُوں ڈُکھ چاوے۔ پر جے کوئی مسیح دا بندہ ہووݨ دے سببّوں ڈُکھ چاوے تاں شرماوے نہ بلکہ خُدا دی تعریف کرے جو او اِیں ناں تُوں سڈیا ویندے۔ کیوں جو عدالت دا ویلا آ گئے تے عدالت خُدا دے گھر آلیاں تُوں شروع تھیسی تے جڈاں عدالت ساڈے تُوں شروع تھیسی تاں اُنہاں دا انجام کیا ہوسی جیہڑے خُدا دی خوشخبری کُوں نئیں منیندے۔ تے ”جڈاں راستباز ای مُشکل نال نجات پیسی، تاں بے دین تے گُنہگار دا کیا بنڑسی ؟“ اِیں واسطے جیہڑے لوک خُدا دی مرضی دے مطابق ڈُکھ سہندے ہِن، او آپنڑے آپ کُوں آپنڑے وفادار خالق دے سپُرد کرݨ تے نیکی کریندے راہوݨ۔ تُساں جیہڑے کلیسیا دے بزُرگ ہیوے، میں تُہاکُوں ہِک بزُرگ، مسیح دے ڈُکھاں دا گواہ، تے اُوندے ظاہر تھیوݨ آلے جلال ءچ شریک تھیوݨ آلے دی حیثیت نال ایہ نصیحت کریندا ہاں جو تُساں خُدا دے اِجڑ دی نگہبانی کرو، جیہڑا تُہاڈے سپُرد کیتا گئے۔ ایہ خدمت مجبوری نال نئیں بلکہ خُدا دی مرضی دے مطابق خوشی نال، مال دولت دے لالچ کیتے نئیں بلکہ دِلی شوق نال کرو۔ تے جیہڑے لوک تُہاڈے سپُرد ہِن اُنہاں اُتے حُکم نہ چلاؤ بلکہ اِجڑ کیتے چنگا نمونہ بنڑو۔ وَل جِیں ویلے سردار آجڑی ظاہر تھیسی تاں تُساں اِنعام ءچ ایجھا تاج پیسو جِیندا جلال کڈھائیں ختم نہ تھیسی۔ اِینویں ای نوجوانو، تُساں بزُرگاں دے تابع راہو تے عاجزی نال ہِک ڈُوجھے دی خدمت کریندے راہو کیوں جو ”خُدا مغرُوراں دی مُقابلہ کریندے پر عاجزی کرݨ آلیاں اُتے مہربانی کریندے ۔“ بس خُدا دے زورآور ہتھ دے تلے عاجزی نال راہو تے او تُہاکُوں مناسب ویلے تے سرفراز کریسی۔ آپنڑیاں ساریاں فِکراں اُوندے اُتے سَٹ ڈیؤ کیوں جو او تُہاڈی فِکر کریندے۔ ہوشیار تے خبردار راہو کیوں جو تُہاڈا دُشمنڑ ابلیس گجنڑ آلے ببرشیر وانگُوں گولھیندا ودے جو کہیں کُوں پھاڑ کھاوے۔ اِیمان ءچ مضبوط راہندے ہوئے اُوندا مُقابلہ کرو۔ تُساں جانڑدے ہیوے جو پُوری دُنیا ءچ تُہاڈے بِھرا وی اِینویں ای ڈُکھ سہندے پئے ہِن۔ تُہاڈے تھوڑی دیر تئیں ڈُکھ چاوݨ تُوں بعد، خُدا جیہڑا سارے فضل دا مالک ہے تے جئیں مسیح دے ذریعے تُہاکُوں آپنڑے ابدی جلال ءچ شریک تھیوݨ کیتے سڈے، اُوہو خود تُہاکُوں کامِل، مضبوط، قائم تے زورآور کریسی۔ سلطنت ہمیشاں تئیں اُوندی ای راہوے۔ آمین۔ مَیں سِیلاس دے ہتھ جیہڑا میڈی نظر ءچ ہِک وفادار بِھرا ہے، ایہ مختصر خط لِکھوا تے تُہاکُوں بھیجیا ہے تاں جو تُہاڈی حوصلہ افزائی تھیوے۔ مَیں گواہی ڈیندا ہاں جو خُدا دا سچا فضل اِیہو ہے۔ اِیندے اُتے قائم راہو۔ بابل دی کلیسیا جیہڑی تُہاڈے وانگُوں چُنڑی ہوئی ہے تُہاکُوں سلام آدھی ہے۔ میڈا پوتر مرقس وی تُہاکُوں سلام آدھے۔ ہِک ڈُوجھے کُوں پاک بوسے نال سلام آکھو۔ تُساں ساریاں کُوں جیہڑے مسیح ءچ ہیوے، اِطمینان حاصل تھیندا راہوے۔ ایہ خط میں شمعون پطرس دی طرفوں جیہڑا یسُوع مسیح دا خادم تے رسُول ہاں، اُنہاں لوکاں دے ناں ہے جِنہاں ساڈے خُدا تے نجات ڈیوݨ آلے یسُوع مسیح دی راستبازی دے ذریعے ساڈے وانگُوں قیمتی اِیمان حاصل کیتے۔ خُدا تے ساڈے خُداوند یسُوع دی پچھاݨ دے سببّوں تُہاکُوں ڈھیگ سارا فضل تے اِطمینان حاصل تھیندا راہوے۔ خُدا دی اِلٰہی قُدرت ساکُوں او سبھ چیزاں ڈِتیاں جیہڑیاں دیندار زندگی کیتے ضروری ہِن۔ تے ایہ ساکُوں اُوندی پچھاݨ دے وسیلے نال مِلیاں، جئیں ساکُوں آپنڑے جلال تے نیکی دے ذریعے سڈے۔ اِنہاں دے ذریعے اُوں ساڈے نال قیمتی تے بہُوں وڈے وعدے کیتے تاں جو اُنہاں دے وسیلہ نال تُساں اِیں دُنیاوی خرابی کنُوں جیہڑی بُری خواہش دے سببّوں ہے، چُھٹ تے خُدا دی اِلٰہی ذات ءچ شریک تھی ونجو۔ اِیں واسطے تُساں پُوری کوشش کرو جو آپنڑے اِیمان نال نیکی تے نیکی نال علم، تے علم نال پرہیزگاری تے پرہیزگاری نال صبر تے صبر نال دینداری، تے دینداری نال برادرانہ پیار تے برادرانہ پیار نال محبت ودھے۔ کیوں جو جے ایہ خُوبیاں تُہاڈے ءچ موجود ہووݨ تے ودھدیاں ونجنڑ تاں او تُہاکُوں ساڈے خُداوند یسُوع مسیح کُوں پچھانڑن ءچ بے کار تے بے پھل نہ ہووݨ ڈیسن۔ پر جیندے ءچ ایہ خُوبیاں نہ ہووݨ، او اندھا ہے تے اُوندی نظر اِتنی کمزور ہے جو اُونکُوں صرف نزدیک دیاں چیزاں نظر آندیاں ہِن تے آپنڑے پہلے گُناہاں کنُوں پاک تھیوݨ کُوں بُھلی بیٹھے۔ بس بِھراؤ! اِیں گالھ کُوں ثابت کرݨ دی زیادہ کوشش کرو جو تُساں خُدا دے چُنڑے تے سڈے ہوئے لوک ہیوے۔ کیوں جو جے اِینویں کریسو تاں کڈھائیں گُناہ ءچ نہ ڈھاسو۔ بلکہ اِیندے نال تُساں ساڈے خُداوند تے نجات ڈیوݨ آلے یسُوع مسیح دی ابدی بادشاہی ءچ وڈی عزت نال داخل کیتے ویسو۔ اِیں واسطے مَیں تُہاکُوں ایہ گالھیں ہمیشاں یاد ڈیویندا راہساں بھانویں تُساں اُنہاں کنُوں واقف ہیوے تے اُوں سچائی اُتے قائم ہیوے جیہڑی تُہاکُوں مِلی ہے۔ بلکہ جِیں ویلے تئیں مَیں اِیں فانی بدن ءچ ہاں تُہاکُوں یاد ڈیوا ڈیوا تے تُہاڈی حوصلہ افزائی کرݨ آپنڑے اُتے فرض سمجھدا ہاں، کیوں جو ساڈے خُداوند یسُوع مسیح میڈے اُتے ظاہر کیتے جو میڈے فانی بدن دے ختم تھیوݨ دا ویلا جلدی آوݨ آلا ہے۔ بس مَیں پُوری کوشش کریساں جو میڈے کُوچ کرݨ تُوں بعد تُساں اِنہاں گالھیں کُوں ہمیشاں یاد رکھ سگو۔ کیوں جو جِیں ویلے اساں تُہاکُوں آپنڑے خُداوند یسُوع مسیح دی قُدرت تے واپس آوݨ دے بارے ءچ ڈسایا ہا تاں اساں چالاکی نال گھڑیاں کہانڑیاں دی پیروی نہ کیتی ہئی بلکہ اساں اُوندی عظمت دے اکھیں ڈِٹھے گواہ ہسے۔ اُوں خُدا باپ تُوں اُوں ویلے عزت تے جلال پایا، جِیں ویلے اُوں عظیم جلال ءچوں اُونکُوں ایہ اواز آئی جو ”ایہ میڈا پیارا پوتر ہے جیندے تُوں مَیں بہُوں خوش ہاں ۔“ جڈاں اساں اُوندے نال مُقدّس پہاڑ اُتے ہسے تاں اساں خود اسمان تُوں اِیہو اواز آندی سُنڑی۔ اِیندے علاوہ ساڈے کولھ نبیاں دا او کلام ہے جیہڑا بالکل معتبر ہے۔ جے تُساں اُوندے اُتے خُوب دھیان ڈیؤ تاں چنگا کریسو، کیوں جو او ہِک چراغ ہے جیہڑا اندھاری جاہ ءچ روشنی ڈیندے جئیں تئیں سوجھلا نہ تھیوے تے سویل دا تارہ تُہاڈے دِلاں ءچ نہ چمکے ۔ پر پہلے ایہ جاݨ گِھنو جو خُدا دے کلام دی کوئی نبُوّت کہیں نبی دی ذاتی تفسیر نئیں۔ کیوں جو نبُوّت دی کوئی گالھ اِنسان دی خواہش نال کڈھائیں نئیں تھئی بلکہ بندے رُوح القُدس دی تحریک دے سببّوں خُدا دی طرفوں بُولیندے ہَن۔ پر جِینویں بنی اِسرائیل ءچ کُوڑے نبی وی ہَن، اُونویں ای تُہاڈے ءچ وی کُوڑے اُستاد ہوسن۔ او چلاکی نال ہلاک کرݨ آلیاں بِدعتاں کِھنڈیسن، بلکہ آپنڑے اُوں مالک دا اِنکار کریسن جئیں اُنہاں کُوں مُل گِھدا ہا۔ ایجھے کماں نال او آپنڑے اُتے جلد ہلاکت گِھن آسن۔ بہُوں سارے لوک اُنہاں دی شہوت پرستی دی پیروی کریسن جیندے سببّوں سچائی دی راہ دی بدنامی تھیسی۔ لالچ دے سببّوں ایہ اُستاد فرضی گالھیں سُنڑا تے تُہاڈے تُوں ناجائز فائدہ چیسن۔ پر اُنہاں دی سزا دا حُکم بہُوں پہلے کنُوں تھی گئے، تے او سزا تیار ہے تے اُنہاں دی ہلاکت ءچ دیر نہ تھیسی۔ ڈیکھو، خُدا اُنہاں فرشتیاں کُوں نئیں چھوڑیا جِنہاں گُناہ کیتا، بلکہ اُنہاں کُوں اندھارے دیاں زنجیراں نال بَدھ تے دوزخ ءچ سَٹ ڈِتا تاں جو عدالت دے ڈینہہ تئیں قید ءچ راہوݨ۔ اِینویں ای خُدا قدیم دُنیا کُوں نہ چھوڑیا بلکہ دُنیا دے بے دین لوکاں اُتے طوفان بھیج تے صرف راستبازی دی منادی کرݨ آلے نُوح کُوں بئے سَت لوکاں سمیت بچا گِھدا۔ تے خُدا سدُوم تے عمُورہ دے شہراں کُوں ہلاکت دے لائق قرار ڈے تے اُنہاں کُوں ساڑ تے سواہ کر ڈِتا تے آوݨ آلے زمانہ دے بے دیناں کیتے عِبرت دا نشان بنڑا ڈِتا۔ پر راستباز لُوط کُوں بچایا جیہڑا بدکاراں دے گندے چال چلنڑ تُوں تنگ ہا۔ کیوں جو اُنہاں دے وچال راہندے ہوئے، اُوں راستباز آدمی دا پاک دل اُنہاں دے بُرے کماں کُوں ڈیکھ تے، تے سُنڑ تے عذاب ءچ راہندا ہا۔ تاں ظاہر ہے جو خُداوند دیندار لوکاں کُوں ازمائش تُوں بچاوݨ تے بے دین لوکاں کُوں عدالت دے ڈینہہ تئیں سزا ءچ رکھنڑ جانڑدے خاص کر اُنہاں کُوں جیہڑے آپنڑے جِسم دیاں گندیاں خواہشاں دی پیروی کریندے ہِن تے اِختیار کُوں حقیر سمجھدے ہِن۔ ایہ لوک گُستاخ تے مغرُور ہِن تے جلالی ہستیاں دی توہین کرݨ تُوں نئیں ڈردے۔ حالانکہ اِیندے مُقابلہ ءچ فرشتے وی، جیہڑے طاقت تے قُدرت ءچ اُنہاں تُوں وڈے ہِن، خُداوند دے سامنڑے لعن طعن کر تے اُنہاں ہستیاں اُتے اِلزام نئیں لیندے۔ پر ایہ کُوڑے اُستاد، آپنڑی فطرت اُتے چلنڑ آلے ناسمجھ جانوراں وانگُوں ہِن جیہڑے اِیں واسطے پیدا تھئے ہِن جو اُنہاں کُوں پکڑیا تے ختم کیتا ونجے۔ او اُوندی توہین کریندے ہِن جیہڑا کُجھ او نئیں سمجھدے، تے اُنہاں دی بربادی ءچ او وی برباد تھی ویسن۔ ڈُوجھیاں کُوں نُقصان پُچاوݨ دے بدلے ءچ اُنہاں کُوں نُقصان تھیسی۔ اُنہاں دے نیڑے لُطف چاوݨ تُوں مُراد ایہ ہے جو ڈینہہ ویلے کُھل تے عیاشی کرݨ۔ او داغ تے دھبے ہِن جیہڑے تُہاڈے نال رفاقتی کھانڑے ءچ شریک تھی تے عیاشیاں کریندے ہِن۔ اُنہاں دے اکھیں ہر ویلے زِناکار عورتاں دی گولھ ءچ راہندیاں ہِن، تے گُناہ کرݨ تُوں کڈھائیں باز نئیں آندیاں۔ او کمزور لوکاں کُوں غلط کم کرݨ کیتے ورغلیندے ہِن تے لالچ کرݨ ءچ ماہر ہِن۔ او لعنتی ہِن۔ او صحیح راہ کُوں چھوڑ تے گُمراہ تھی گئے ہِن تے بلعام بِن بعور دے رستے اُتے ٹُردے پئے ہِن جئیں بُرے کماں دی مزدُوری کُوں پسند کیتا۔ پر گڈھاں اُونکُوں اِیں گُناہ پارُوں ملامت کیتی۔ اُوں جانور، جیہڑا بولنڑ دے قابل نہ ہا، اِنسان جیہی اواز ءچ گالھ کیتی تے نبی کُوں اُوندی بیوقُوفی کنُوں روکیا ۔ ایہ لوک سُکے ہوئے چشمے تے اندھاری دے اُڈائے ہوئے بدّل ہِن۔ اِنہاں کیتے سخت اندھارا مقرر ہے۔ ایہ لوک غرور دیاں فضول گالھیں کریندے ہِن، تے بے ہُودہ جسمانی خواہشاں نال ایجھے لوکاں کُوں ورغلیندے ہِن جیہڑے گُمراہی ءچ راہوݨ آلیاں ءچوں ہُنڑیں ہُنڑیں بچ نِکلے ہِن۔ ایہ کُوڑے اُستاد اُنہاں دے نال تاں ازادی دا وعدہ کریندے ہِن پر خود بُرائی دے غُلام بنڑے پئے ہِن۔ کیوں جو جیہڑی چیز اِنسان اُتے غالب آ ویندی ہے، اِنسان اُوندی غُلامی ءچ ہوندے۔ تے جے او لوک خُداوند تے نجات ڈیوݨ آلے یسُوع مسیح دی پچھاݨ دے وسیلہ نال دُنیا دی گندگی کنُوں چُھٹ تے ولا کنُوں اُوندے ءچ پَھس ونجنڑ تے اُوندے قبضے ءچ آ ونجنڑ، تاں اُنہاں دی حالت پہلی حالت کنُوں وی بدتر تھی ویندی ہے۔ جِنہاں صداقت دی راہ کُوں جاݨ تاں گِھدا پر اُوں پاک حُکم کنُوں پِھر گئے جیہڑا اُنہاں کُوں ڈِتا گِیا ہا، تاں اُنہاں کیتے اِیہو چنگا ہا جو اِیں راہ کُوں کڈھائیں نہ جانڑدے۔ اُنہاں اُتے ایہ کہاوت سچ آندی ہے جو ”کُتا آپنڑی اُلٹی دو واپس آندے“ تے ”دھاتی ہوئی سُورنی ولا چِکڑ ءچ ویندی ہے۔“ عزیزو! ایہ ڈُوجھا خط ہے جیہڑا مَیں تُہاکُوں لِکھدا پِیا ہاں۔ مَیں ڈُوہائیں خطاں ءچ تُہاڈی یاداشت کُوں تازہ کر تے تُہاڈے ذہناں ءچ پاک سوچ کُوں اُبھارݨ دی کوشش کیتی۔ مَیں چاہندا ہاں جو تُساں پاک نبیاں دیاں پیشن گوئیاں تے ساڈے خُداوند تے نجات ڈیوݨ آلے دے حُکم کُوں یاد رکھو جیہڑا اساں رسُولاں دے ذریعے تُہاڈے تئیں پُجیا ہے۔ سبھ تُوں پہلے تُہاکُوں ایہ سمجھنڑا چاہیدے جو آخری ڈینہاں ءچ ایجھے ٹھٹّھا باز لوک آسن جیہڑے آپنڑیاں نفسانی خواہشاں دے مطابق زندگی گُزریسن، تے اکھیسن، ”مسیح دے آوݨ دا وعدہ کِتھاں گِیا؟ ساڈے پِیُو ڈاڈا تاں مر گئے تے دُنیا دے خلق تھیوݨ تُوں ہُنڑ تئیں سبھ کُجھ اِینویں ای ہے۔“ او جاݨ بُجھ تے بُھل گئے جو اسمان خُدا دے کلام دے ذریعے بہُوں پہلے تُوں بنڑائے گئے، تے زمین پانڑی ءچوں تے پانڑی دے ذریعے بنڑی۔ تے اُوہو پانڑی دے ذریعے اُوں وقت دی دُنیا بُڈ تے تباہ تھی گئی۔ تے موجودہ اسمان تے زمین خُدا دے کلام دے وسیلہ نال بھاہ ءچ ساڑے ونجنڑ کیتے رکھے گئے ہِن۔ او بے دیناں دی عدالت تے ہلاکت دے ڈینہہ تئیں محفوظ راہسن۔ عزیزو! ہِک گالھ کڈھائیں نہ بُھلائے جو خُداوند دی نظر ءچ ہِک ڈینہہ ہزار سال تے ہزار سال ہِک ڈینہہ دے برابر ہِن۔ خُداوند آپنڑا وعدہ پُورا کرݨ ءچ دیر نئیں کریندا جِینویں کُجھ لوک سمجھدے ہِن، بلکہ او تُہاڈے کیتے صبر کریندے، کیوں جو او کہیں دی ہلاکت نئیں چاہندا بلکہ چاہندے جو ہر کوئی توبہ کرے۔ پر خُداوند دے واپس آوݨ دا ڈینہہ چور وانگُوں آ ویسی۔ اُوں ڈینہہ اسمان بہُوں خوفناک اواز نال غائب تھی ویسن، تے اسمان دیاں سبھ چیزاں بھاہ دی شِدت کنُوں پگھر ویسن تے زمین تے اُوندے اُتے دے سبھ کم ظاہر تھی ویسن۔ جِیں ویلے سبھ چیزاں اِینویں پگھرݨ آلیاں ہِن تاں تُہاکُوں کیجھے لوک ہوونڑا چاہیدے؟ تُہاکُوں تاں بہُوں ای پاکیزگی تے پرہیزگاری دی زندگی گُزریندے ہوئے خُدا دے اُوں ڈینہہ دے بہُوں مُشتاق تے اِنتظار ءچ راہونڑا چاہیدے جو او جلد آسی۔ اُوں ڈینہہ اسمان بھاہ نال سڑ تے برباد تھی ویسی تے اسمان دیاں سبھ چیزاں بھاہ دی شِدت کنُوں پگھر ویسن۔ پر اساں خُدا دے وعدے دے مطابق نویں اسمان تے نوِیں زمین دے اِنتظار ءچ ہیں جِتھاں راستبازی سکونت کریندی ہے۔ بس عزیزو، کیوں جو تُساں اِنہاں گالھیں دے اِنتظار ءچ ہیوے، اِیں واسطے پُوری کوشش کرو جو تُساں خُدا دے نال صُلح ءچ اُوندے نزدیک بے داغ تے بے اِلزام تے ثابت تھیؤ۔ ساڈے خُداوند دے صبر کُوں نجات حاصل کرݨ دا موقع سمجھو، جِینویں ساڈے عزیز بِھرا پولُس وی اُوں حِکمت دے مطابق جیہڑی خُدا اُونکُوں ڈِتی ہے، تُہاکُوں لِکھیا ہے۔ او آپنڑے سبھ خطاں ءچ اِنہاں گالھیں دا ذِکر کریندے۔ اُوندے کُچھ گالھیں دا سمجھنڑ مُشکل ہے، تے احمق تے بے قیام لوک اُنہاں دے معنی کُوں اِینویں تروڑ مروڑ تے پیش کریندے ہِن، جِینویں او ڈُوجھے صحیفیاں نال وی کریندے ہِن۔ او آپنڑے کیتے تباہی پیدا کریندے ہِن۔ اِیں واسطے عزیزو! تُساں جیہڑے اِنہاں گالھیں تُوں پہلے ای خبردار ہیوے، ہوشیار راہو، اِینویں نہ تھیوے جو بدکاراں دے غلط گالھیں تُہاکُوں گُمراہ کر تے محفوظ جاہ تُوں ہٹا ڈیوݨ۔ بلکہ ساڈے خُداوند تے نجات ڈیوݨ آلے یسُوع مسیح دے فضل تے علم ءچ ودھدے ونجو۔ اُوندی تعریف ہُنڑ وی تھیوے تے ہمیشاں تئیں تھیندی راہوے۔ آمین۔ اساں زندگی دا او کلام بیان کریندے ہیں جیہڑا شروع کنُوں ہا، جِینکُوں اساں سُنڑیا تے آپنڑے اکھیں نال ڈِٹھا تے غور نال نظر کیتی بلکہ ہتھ لا تے ڈِٹھا۔ او جیہڑا خود زندگی ہا، ظاہر تھیّا تے اساں اُونکُوں ڈِٹھا۔ اساں اُوندی گواہی ڈے تے تُہاکُوں اُوں ہمیشاں دی زندگی دی خبر ڈیندے ہیں، جیہڑی باپ دے نال ہئی تے ساڈے اُتے ظاہر تھئی۔ جیہڑا کُجھ اساں ڈِٹھا تے سُنڑیا، اُوندی خبر تُہاکُوں ڈیندے ہیں تاں جو تُساں وی اِیں رفاقت ءچ ساڈے نال شریک تھیؤ۔ تے ساڈی رفاقت تاں باپ تے اُوندے پوتر یسُوع مسیح دے نال ہے۔ اساں ایہ گالھیں تُہاکُوں اِیں واسطے لِکھدے پئے ہیں جو ساڈی خوشی پُوری تھی ونجے۔ او پیغام جیہڑا اساں مسیح کنُوں سُنڑیا تے تُہاکُوں ڈسیندے ہیں، او ایہ ہے جو خُدا نُور ہے تے اُوندے ءچ ذرا وی اندھارا کائنی۔ جے اساں اُوندے نال رفاقت رکھنڑ دا دعویٰ کریندے ہیں پر اندھارے ءچ ٹُردے ہیں تاں اساں کُوڑے ہیں تے سچائی اُتے عمل نئیں کریندے۔ پر جے اساں نُور ءچ ٹُردے ہیں جِینویں جو او خود نُور ءچ ہے تاں اساں ہِک ڈُوجھے نال رفاقت رکھیندے ہیں تے اُوندے پوتر یسُوع دا خون ساکُوں سبھ گُناہاں تُوں پاک کریندے۔ جے اساں بے گُناہ ہووݨ دا دعویٰ کرُوں تاں آپنڑے آپ کُوں دوکھا ڈیندے ہیں تے ساڈے ءچ سچائی کائنی۔ پر جے اساں آپنڑے گُناہاں دا اِقرار کرُوں تاں او ساڈے گُناہ معاف کرݨ تے ساکُوں بُرائی کنُوں پاک کرݨ ءچ وفادار تے عادل ہے۔ جے اساں دعویٰ کرُوں جو اساں گُناہ نئیں کیتا تاں خُدا کُوں کُوڑا آدھے ہیں تے اُوندا کلام ساڈے ءچ نئیں۔ میڈے بالو! مَیں تُہاکُوں ایہ گالھیں اِیں واسطے لِکھدا پِیاں ہاں جو تُساں گُناہ نہ کرو۔ پر جے کوئی گُناہ کرے تاں خُدا باپ دے حضُور ءچ ساڈی سفارش کرݨ آلا ہِک موجود ہے یعنی یسُوع مسیح جیہڑا راستباز ہے۔ اُوہو ساڈے گُناہاں دا کفارہ ڈیوݨ آلا ہے تے نہ صرف ساڈے گُناہاں دا بلکہ ساری دُنیا دے گُناہاں دا وی۔ جے اساں اُوندے حُکماں اُتے عمل کرُوں تاں ساکُوں یقین تھی ویندے جو اساں اُونکُوں جاݨ گِھدے۔ جیہڑا آدھے جو ”مَیں مسیح کُوں جاݨ گِھدے“ پر اُوندے حُکماں اُتے عمل نئیں کریندا تاں او کُوڑا ہے تے اُوندے ءچ سچائی کائنی۔ پر جیہڑا اُوندے کلام اُتے عمل کریندے تاں اُوندے ءچ خُدا دی محبت یقیناً کامِل تھی گئی ہے۔ اِیں تُوں ساکُوں پتہ چلدے جو اساں اُوندی رفاقت ءچ ہیں۔ جیہڑا کوئی آدھے جو میں خُدا ءچ قائم ہاں تاں اُونکُوں چاہیدے جو او وی اُونویں ای زندگی گُزارے جِینویں مسیح گُزاری۔ عزیزو! مَیں تُہاکُوں کوئی نواں حُکم نئیں لِکھیندا پِیا بلکہ اُوہو پُرانڑا حُکم جیہڑا شروع کنُوں تُہاکُوں مِلیا ہے۔ ایہ پُرانڑا حُکم اُوہو پیغام ہے جیہڑا تُساں سُنڑ گِھدے ۔ پر مَیں جیہڑا حُکم تُہاکُوں لِکھ تے بھجیندا پِیا ہاں، او اِیں لحاظ نال نواں ہے جو اُوندی سچائی مسیح ءچ تے تُہاڈی زندگی ءچ نظر آندی ہے۔ کیوں جو اندھارا ختم تھیندا ویندے تے حقیقی نُور چمکنڑ لگ گئے۔ جیہڑا کوئی نُور ءچ ہووݨ دا دعویٰ کریندے، پر آپنڑے بِھرانواں نال دُشمنڑی رکھیندے، او حالی تئیں اندھارے ءچ ہے۔ جیہڑا کوئی آپنڑے بِھرانواں نال محبت رکھیندے، او نُور ءچ راہندے تے اُوندے ءچ تُھڈا کھواوݨ آلی کوئی چیز نئیں۔ پر جیہڑا آپنڑے بِھرانواں نال دُشمنڑی رکھیندے، او اندھارے ءچ ہے تے اندھارے ءچ ای ٹُردے۔ او نئیں جانڑدا جو کِتھاں ویندے کیوں جو اندھارے اُونکُوں اندھا کر ڈِتے۔ بالو! مَیں تُہاکُوں اِیں واسطے لِکھدا پِیا ہاں جو مسیح دے ناں دے وسیلے نال تُہاڈے گُناہ معاف کر ڈِتے گئے ہِن۔ بزُرگو! مَیں تُہاکُوں اِیں واسطے لِکھدا پِیا ہاں جو تُساں اُونکُوں جیہڑا ازل کنُوں موجود ہے، جاݨ گِھدے۔ جوانو! مَیں تُہاکُوں اِیں واسطے لِکھدا پِیا ہاں جو تُساں ابلیس اُتے غالب آ گئے ہیوے۔ بالو! مَیں تُہاکُوں اِیں واسطے لِکھیا ہے جو تُساں خُدا باپ کُوں جاݨ گِھدے۔ بزُرگو! مَیں تُہاکُوں اِیں واسطے لِکھیا ہے جو تُساں اُونکُوں جیہڑا ازل کنُوں موجود ہے، جاݨ گِھدے۔ جوانو! مَیں تُہاکُوں اِیں واسطے لِکھیا ہے جو تُساں مضبوط ہیوے تے خُدا دا کلام تُہاڈے دِلاں ءچ وسدے، تے تُساں ابلیس اُتے غالب آ گئے ہیوے۔ نہ دُنیا نال محبت رکھو، نہ دُنیا دیاں چیزاں نال۔ جے کوئی دُنیا نال محبت رکھیندے تاں اُوندے ءچ خُدا باپ دی محبت نئیں۔ کیوں جو جیہڑا کُجھ دُنیا ءچ ہے یعنی جِسم دی بُری خواہش، اکھیں دا لالچ تے زندگی دی شیخی، او باپ دی طرفوں نئیں بلکہ دُنیا دی طرفوں ہے۔ دُنیا تے اُوندیاں خواہشاں ڈوہائیں ختم تھی ویندیاں ہِن پر جیہڑا خُدا دی مرضی اُتے ٹُردے، او ہمیشاں تئیں قائم راہندے۔ بالو! ایہ دُنیا دا آخری ویلا ہے۔ جِینویں تُساں سُنڑیا ہے جو مسیح دا مخالف آوݨ آلا ہے، اُوندے مطابق ہُنڑ مسیح دے بہُوں سارے مخالف اُٹھی کھڑے تھئے ہِن۔ اِیں تُوں ساکُوں پتہ چلدے جو آخری ویلا آ گئے۔ ایہ لوک ساڈے ءچوں نِکلے تاں ہِن پر اصل ءچ ساڈے ءچوں نہ ہَن۔ جے ساڈے ءچوں ہوندے تاں ساڈے نال راہندے۔ پر اُنہاں دے نِکل ونجنڑ تُوں ثابت تھی گئے جو او ساڈے ءچوں نہ ہَن۔ پر تُساں تاں اُوں قدُّوس دی طرفوں رُوح القُدس نال مسح کیتے گئے ہیوے تے تُساں سارے سچائی کُوں جانڑدے ہیوے۔ مَیں تُہاکُوں اِیں واسطے نئیں لِکھیا جو تُساں سچائی کُوں نئیں جانڑدے بلکہ اِیں واسطے جو تُساں سچائی کُوں جانڑدے ہیوے تے اِیں واسطے وی جو کوئی کُوڑ سچائی دی طرفوں نئیں۔ وَل کُوڑا کوݨ ہے؟ اُوہو جیہڑا یسُوع دے المسیح ہووݨ دا اِنکار کریندے۔ اُوہو مسیح دا مخالف ہے۔ او باپ تے پوتر دا اِنکار کریندے۔ جیہڑا کوئی پوتر دا اِنکار کریندے، اُوندے کولھ باپ وی نئیں تے جیہڑا پوتر دا اِقرار کریندے، اُوندے کولھ باپ وی ہے۔ او پیغام جیہڑا تُساں شروع کنُوں سُنڑدے آئے ہیوے، تُہاڈے دل ءچ قائم راہوے۔ جے او پیغام تُہاڈے ءچ قائم راہوے تاں تُساں وی باپ تے اُوندے پوتر ءچ قائم راہسو۔ تے جیہڑا وعدہ اُوں ساڈے نال کیتے، او ہمیشاں دی زندگی ہے۔ مَیں ایہ گالھ اُنہاں دے بارے ءچ لِکھی ہے جیہڑے تُہاکُوں گُمراہ کرݨ دی کوشش کریندے ہِن۔ پر رُوح القُدس جیندے نال مسیح تُہاکُوں مسح کیتے، تُہاڈے دِلاں ءچ قائم راہندے، اِیں واسطے ضرورت کائنی جو کوئی تُہاکُوں سِکھاوے۔ رُوح القُدس ای تُہاکُوں سارے گالھیں سکھیندے تے جیہڑا کُجھ او سکھیندے، سچائی ہے کُوڑ نئیں۔ بس جِینویں اُوں تُہاکُوں سِکھائے، اُونویں ای تُساں مسیح ءچ قائم راہو۔ ہُنڑ پیارے بالو! مسیح ءچ قائم راہو تاں جو جِیں ویلے او ظاہر تھیوے تاں ساکُوں اعتماد ہووے تے اُوندے آوݨ اُتے اساں اُوندے سامنڑے شرمندہ نہ تھیؤں۔ جڈاں تُساں جانڑدے ہیوے جو مسیح راستباز ہے تاں تُساں ایہ وی جانڑدے ہوسو جو جیہڑا کوئی راستبازی دے کم کریندے، او رُوحانی طور تے خُدا دا فرزند ہے۔ ڈیکھو باپ ساڈے نال کیجھی محبت کیتی ہے جو اساں خُدا دے فرزند اکھویندے ہیں۔ تے اساں واقعی ہیں وی۔ دُنیا ساکُوں اِیں واسطے نئیں جانڑدی جو اِیں اُونکُوں وی نہ جانڑیا۔ عزیزو! اساں اِیں ویلے خُدا دے فرزند ہیں پر اجنڑ تئیں ایہ ظاہر نئیں تھیّا جو بِیا کیا کُجھ ہوسُوں۔ پر اِتنا جانڑدے ہیں جو جِیں ویلے یسُوع ظاہر تھیسی تاں اساں اُوندے وانگُوں ہوسُوں کیوں جو اساں اُونکُوں اُونویں ای ڈیکھسوں جِینویں او اصل ءچ ہے۔ تے جیہڑا کوئی یسُوع تُوں ایہ اُمید رکھیندے، او آپنڑے آپ کُوں پاک رکھیندے، جِینویں او خود پاک ہے۔ جیہڑا کوئی گُناہ کریندے او شریعت دی مخالفت کریندے، کیوں جو گُناہ شریعت دی مخالفت ای ہے۔ تے تُساں جانڑدے ہیوے جو یسُوع اِیں واسطے ظاہر تھیّا ہا جو گُناہاں کُوں چا گِھن ونجے تے اُوندے ءچ کوئی گُناہ نئیں۔ جیہڑا کوئی اُوندے ءچ قائم راہندے، او گُناہ نئیں کریندا۔ جیہڑا کوئی گُناہ کریندے، اُوں نہ تاں مسیح کُوں پچھانڑیا تے نہ اُونکُوں جانڑیا ہے۔ بالو! کہیں دے دوکھے ءچ نہ اوائے۔ جیہڑا کوئی نیک کم کریندے، او نیک ہے جِینویں مسیح نیک ہے۔ جیہڑا کوئی گُناہ کریندا راہندے، او ابلیس دا بندہ ہے، کیوں جو ابلیس شروع کنُوں ای گُناہ کریندا ریہا ہے۔ خُدا دا پوتر اِیں واسطے ظاہر تھئے جو ابلیس دے کماں کُوں برباد کر ڈیوے۔ جیہڑا کوئی خُدا تُوں پیدا تھئے، او گُناہ نئیں کریندا راہندا کیوں جو اُوندے ءچ خُدا دی فطرت راہندی ہے۔ اُوندے کیتے گُناہ کرݨ ناممکن ہے کیوں جو او خُدا دا پوتر ہے۔ اِتُھوں پتہ چلدے جو کیہڑے خُدا دے فرزند ہِن تے کیہڑے ابلیس دے۔ جیہڑا نیک کم نئیں کریندا تے آپنڑے بِھرانواں نال محبت نئیں رکھیندا، او خُدا دا بندہ کائنی۔ ایہ اُوہو پیغام ہے جیہڑا تُساں شروع کنُوں سُنڑیا ہے جو ہِک ڈُوجھے نال محبت رکھو۔ قائن وانگُوں نہ بنڑو جیہڑا ابلیس دا بندہ ہا تے جئیں آپنڑے بِھرا کُوں قتل کیتا۔ اُوں کیوں اُونکُوں قتل کیتا؟ اِیں واسطے جو اُوندے کم بُرے ہَن پر اُوندے بِھرا دے نیک۔ اِیں واسطے بِھراؤ! جے دُنیا تُہاڈے نال دُشمنڑی رکھیندی ہے تاں حیران نہ تھیؤ۔ اساں جانڑدے ہیں جو اساں موت کنُوں نِکل تے زندگی ءچ داخل تھی گئے ہیں، کیوں جو اساں آپنڑے بِھرانواں نال محبت رکھیندے ہیں۔ جیہڑا کوئی محبت نئیں رکھیندا، او ہُنڑ تئیں موت دی حالت ءچ ہے۔ جیہڑا کوئی آپنڑے بِھرا نال دُشمنڑی رکھیندے، او خونی ہے۔ تے تُساں جانڑدے ہیوے جو کہیں خونی ءچ ہمیشاں دی زندگی نئیں ہوندی۔ اساں محبت کُوں اِیں تُوں جانڑیا ہے جو یسُوع مسیح ساڈے کیتے آپنڑی جان قُربان کر ڈِتی۔ تے ساڈے اُتے وی ایہ فرض ہے جو اساں آپنڑے بِھرانواں کیتے آپنڑی جان قُربان کرُوں۔ جے کہیں دے کولھ دُنیا دا مال موجود ہووے پر او آپنڑے بِھرانواں کُوں مُتھاج ڈیکھ تے اُنہاں اُتے رحم نہ کرے تاں خُدا دی محبت اُوندے ءچ کِینویں قائم رہ سگدی ہے؟ بالو! اساں صرف کلام تے زبان نال ای نئیں بلکہ سچائی تے آپنڑے اعمال نال وی محبت کرُوں۔ اِیں تُوں اساں جاݨ گِھنسوں جو اساں سچائی دے ہیں تے خُدا دے حضُور دلیری حاصل کریسوں۔ جے ساڈا دل ساکُوں قصُوروار کھڑیندے تاں خُدا ساڈے دل تُوں وڈا ہے تے سبھ کُجھ جانڑدے۔ عزیزو! جے ساڈا دل ساکُوں قصُوروار نئیں کھڑیندا تاں اساں دلیری نال خُدا دے سامنڑے آ سگدے ہیں۔ تے اساں جیہڑا کُجھ اُوں کنُوں منگدے ہیں، او ساکُوں اُوندی طرفوں مِل ویندے، کیوں جو اساں اُوندے حُکماں اُتے عمل کریندے ہیں تے اُوہو کریندے ہیں جیہڑا اُونکُوں پسند ہے۔ تے اُوندا حُکم ایہ ہے جو اساں اُوندے پوتر یسُوع مسیح دے ناں اُتے اِیمان رکھوں تے اُوندے حُکم دے مطابق ہِک ڈُوجھے نال محبت رکھوں۔ جیہڑا کوئی خُدا دے حُکماں اُتے عمل کریندے، او خُدا ءچ قائم راہندے تے خُدا اُوندے ءچ۔ تے اساں جانڑدے ہیں جو خُدا ساڈے ءچ اُوں رُوح القُدس دے ذریعے جیہڑا اُوں ساکُوں بخشیا ہے، قائم راہندے۔ عزیزو! تُساں ہر ہِک رُوح دا یقین نہ کرو بلکہ رُوحاں کُوں پرکھو جو او خُدا دی طرفوں ہِن یا نئیں۔ کیوں جو بہُوں سارے کُوڑے نبی دُنیا ءچ نِکل آئے ہِن۔ تُساں خُدا دے رُوح القُدس کُوں اِینویں پچھاݨ سگدے ہیوے جو جیہڑی رُوح ایہ اِقرار کرے جو یسُوع مسیح اِنسانی جسم ءچ آئے، او خُدا دی طرفوں ہے۔ پر جیہڑی رُوح یسُوع دے بارے ءچ ایہ اِقرار نہ کرے تاں او خُدا دی طرفوں نئیں۔ اِیہو مسیح دے مخالف دی رُوح ہے جیندے بارے ءچ تُساں سُنڑ گِھدے جو او آوݨ آلا ہے بلکہ ہُنڑ وی دُنیا ءچ موجود ہے۔ بالو! تُساں خُدا کنُوں ہیوے تے کُوڑے لوکاں اُتے غالب آ گئے ہیوے، کیوں جو جیہڑا تُہاڈے ءچ ہے، او اُوں کنُوں جیہڑا دُنیا ءچ ہے بہُوں وڈا ہے۔ او دُنیا کنُوں ہِن، اِیں واسطے دُنیا دے گالھیں کریندے ہِن تے دُنیا آلے اُنہاں دی سُنڑدے ہِن۔ پر اساں خُدا کنُوں ہیں تے جیہڑا کوئی خُدا کُوں جانڑدے او ساڈی سُنڑدے۔ پر جیہڑا خُدا کنُوں نئیں او ساڈی نئیں سُنڑدا۔ اِینویں اساں سچائی دی رُوح تے گُمراہ کرݨ آلی رُوح ءچ فرق کر سگدے ہیں۔ عزیزو! آؤ اساں ہِک ڈُوجھے نال محبت رکھوں کیوں جو محبت خُدا دی طرفوں ہے تے جیہڑا کوئی محبت رکھیندے، او خُدا دا فرزند ہے تے خُدا کُوں جانڑدے۔ پر جیہڑا محبت نئیں رکھیندا او خُدا کُوں نئیں جانڑدا کیوں جو خُدا محبت ہے۔ جیہڑی محبت خُدا ساڈے نال رکھیندے، اُونکُوں اُوں اِینویں ظاہر کیتا جو اُوں آپنڑے کلھے پوتر کُوں دُنیا ءچ بھیج ڈِتا تاں جو ساکُوں اُوندے وسیلے زندگی مِلے۔ محبت ایہ نئیں جو اساں خُدا نال محبت کیتی بلکہ ایہ ہے جو اُوں ساڈے نال محبت کیتی تے آپنڑے پوتر کُوں بھیجیا تاں جو او ساڈے گُناہاں دا کفارہ بنڑے۔ عزیزو! جڈاں خُدا ساڈے نال ایجھی محبت کیتی تاں ساکُوں وی چاہیدے جو اساں وی ہِک ڈُوجھے نال محبت رکھوں۔ خُدا کُوں کہیں کڈھائیں نئیں ڈِٹھا پر جے اساں ہِک ڈُوجھے نال محبت رکھیندے ہیں تاں خُدا ساڈے ءچ راہندے تے اُوندی محبت ساڈے ءچ کامِل تھی گئی ہے۔ خُدا آپنڑا رُوح القُدس ساکُوں ڈِتے، اِیں واسطے اساں جانڑدے ہیں جو خُدا ساڈے ءچ راہندے تے اساں اُوندے ءچ۔ اساں ڈیکھ گِھدے تے ہُنڑ گواہی ڈیندے ہیں جو باپ آپنڑے پوتر کُوں دُنیا دا نجات ڈیوݨ آلا بنڑا تے بھیج ڈِتے۔ جیہڑا کوئی اِقرار کریندے جو یسُوع خُدا دا پوتر ہے، خُدا اُوندے ءچ راہندے تے او خُدا ءچ۔ جیہڑی محبت خُدا کُوں ساڈے نال ہے، اساں اُونکُوں جاݨ گئے ہیں تے ساکُوں اُوندا یقین ہے۔ خُدا محبت ہے تے جیہڑا محبت ءچ قائم راہندے، او خُدا ءچ قائم راہندے تے خُدا اُوندے ءچ۔ اِینویں محبت ساڈے ءچ کامِل تھی گئی ہے، تاں جو عدالت دے ڈینہہ ساکُوں دلیری ہووے کیوں جو جِینویں مسیح ہے، اُونویں ای اساں وی اِیں دُنیا ءچ ہیں۔ محبت ءچ خوف نئیں ہوندا بلکہ کامِل محبت خوف کُوں دور کر ڈیندی ہے، کیوں جو خوف دا تعلق سزا نال ہوندے تے جیہڑا ڈردے، اُوندے ءچ محبت کامِل نئیں تھئی۔ اساں اِیں واسطے محبت رکھیندے ہیں جو پہلے خُدا ساڈے نال محبت رکھی۔ جے کوئی آکھے جو ”مَیں خُدا نال محبت رکھیندا ہاں“ پر آپنڑے بِھرا نال دُشمنڑی رکھیندے تاں او کُوڑا ہے۔ جیہڑا آپنڑے بِھرا نال جِینکُوں اُوں ڈِٹھے، محبت نئیں رکھیندا، او خُدا نال کِینویں محبت رکھ سگدے جِینکُوں اُوں نئیں ڈِٹھا؟ ساکُوں تاں اُوندی طرفوں ایہ حُکم مِلیا ہے جو جیہڑا کوئی خُدا نال محبت رکھیندے، او آپنڑے بِھرا نال وی محبت رکھے۔ جیہڑا کوئی ایہ اِیمان رکھیندے جو یسُوع ای المسیح ہے، او خُدا دا فرزند ہے تے جیہڑا باپ نال محبت رکھیندے او اُوندے فرزنداں نال وی محبت رکھیندے۔ جِیں ویلے اساں خُدا نال محبت رکھیندے ہیں تے اُوندے حُکماں اُتے عمل کریندے ہیں تاں اِیں تُوں معلوم تھی ویندے جو اساں خُدا دے فرزنداں نال وی محبت رکھیندے ہیں۔ خُدا نال محبت رکھنڑ دا مطلب ایہ ہے جو اساں اُوندے حُکماں اُتے عمل کرُوں تے اُوندے حُکم بھارے نئیں۔ جیہڑا کوئی خُدا دا فرزند ہے، او دُنیا اُتے غالب آندے۔ تے جیندے نال اساں دُنیا اُتے غالب آ تے فتح پائی، او ساڈا اِیمان ہے۔ دُنیا اُتے کوݨ غالب آندے؟ صرف اُوہو جِیندا اِیمان ہے جو یسُوع خُدا دا پوتر ہے۔ ایہ اُوہو ہے جیہڑا پانڑی تے خون دے وسیلہ نال آیا ہا یعنی یسُوع مسیح۔ او نہ صرف پانڑی دے وسیلہ نال بلکہ پانڑی تے خون ڈُوہائیں دے وسیلہ نال آیا ہا تے رُوح القُدس اُوندی گواہی ڈیندے کیوں جو رُوح ای سچائی ہے۔ تے گواہی ڈیوݨ آلے ترے ہِن یعنی رُوح، پانڑی تے خون، تے ایہ ترِیحے ہِکو گالھ اُتے مُتفق ہِن۔ جِیں ویلے اساں اِنساناں دی گواہی قبول کر گِھندے ہیں تاں خُدا دی گواہی اُوں کنُوں کتنی ودھ ہے تے ایہ اُوہو گواہی ہے جیہڑی اُوں آپنڑے پوتر دے حق ءچ ڈِتی۔ جیہڑا خُدا دے پوتر اُتے اِیمان رکھیندے، او آپنڑے آپ ءچ اِیہو گواہی رکھیندے۔ جئیں خُدا اُتے یقین نئیں رکھیا، اُوں خُدا کُوں کُوڑا آکھیا کیوں جو او اُوں گواہی اُتے اِیمان نئیں رکھیندا جیہڑی خُدا آپنڑے پوتر دے حق ءچ ڈِتی ہے۔ تے او گواہی ایہ ہے جو خُدا ساکُوں ہمیشاں دی زندگی ڈِتی تے ایہ زندگی اُوندے پوتر ءچ ہے۔ جیندے کولھ پوتر ہے، اُوندے کولھ زندگی ہے، پر جیندے کولھ خُدا دا پوتر نئیں، اُوندے کولھ زندگی وی نئیں۔ مَیں تُہاکُوں جیہڑے خُدا دے پوتر دے ناں اُتے اِیمان گِھن آئے ہیوے، ایہ گالھیں اِیں واسطے لِکھیاں ہِن جو تُساں جاݨ گِھنو جو تُہاڈے کولھ ہمیشاں دی زندگی ہے۔ ساکُوں خُدا اُتے ایہ اعتماد ہے جو اساں جیہڑا کُجھ اُوندی مرضی دے مطابق منگدے ہیں، او ساڈی سُنڑدے۔ جِیں ویلے ساکُوں معلوم ہے جو جیہڑا کُجھ اساں اُوں کنُوں منگدے ہیں، او ساڈی سُنڑدے تاں ایہ وی جانڑدے ہیں جو جیہڑا کُجھ منگیا ہے، او مِل وی گِیا ہے۔ جے کوئی آپنڑے بِھرا کُوں ایجھا گُناہ کریندے ڈیکھے جِیندا انجام موت نئیں تاں دُعا کرے تے خُدا اُونکُوں زندگی بخشیسی یعنی اُوں بندے کُوں جئیں ایجھا گُناہ نئیں کیتا، جِیندا انجام موت ہووے۔ گُناہ ایجھا وی ہوندے جیہڑا موت گِھن آندے۔ مَیں ایہ نئیں آدھا جو ایجھا گُناہ کرݨ آلے بندے دے بارے ءچ دُعا کرو۔ اُونویں تاں ہر قِسم دی بُرائی گُناہ ہے پر ایجھا گُناہ وی ہے جِیندا انجام موت نئیں۔ اساں جانڑدے ہیں جو جیہڑا کوئی خُدا دا فرزند بنڑ گئے، او گُناہ نئیں کریندا راہندا کیوں جو خُدا دا پوتر اُوندی حفاظت کریندے تے ابلیس اُونکُوں نُقصان نئیں پُچا سگدا۔ اساں جانڑدے ہیں جو اساں خُدا دے فرزند ہیں، تے ایہ وی جو ساری دُنیا ابلیس دے قبضہ ءچ ہے۔ اساں ایہ وی جانڑدے ہیں جو خُدا دا پوتر آ گِیا ہے تے اُوں ساکُوں سمجھ بخشی ہے تاں جو برحق خُدا کُوں جانڑوں۔ تے اساں اُوندے ءچ ہیں جیہڑا برحق ہے یعنی اُوندے پوتر یسُوع مسیح ءچ۔ حقیقی خُدا تے ہمیشاں دی زندگی اُوہو ہے۔ بالو! آپنڑے آپ کُوں بُتاں کنُوں بچائی رکھو۔ ایہ خط مَیں بزُرگ دی طرفوں، خُدا دی اُوں چُنڑی ہوئی بی بی تے اُوندے فرزنداں دے ناں ہے جِنہاں نال نہ صرف مَیں بلکہ او سارے جیہڑے سچائی کنُوں واقف ہِن، سچی محبت رکھیندے ہِن، کیوں جو سچائی ساڈے ءچ قائم راہندی ہے تے ہمیشاں تئیں ساڈے نال راہسی۔ خُدا باپ تے باپ دے پوتر یسُوع مسیح دی طرفوں سچائی تے محبت سمیت فضل، رحم تے اِطمینان ساڈے نال راہسن۔ جِیں ویلے میکُوں پتہ چلیا جو تیڈے کُچھ فرزند باپ دے حُکم دے مطابق سچائی اُتے ٹُردے ریہے ہِن تاں میکُوں خوشی تھئی۔ مَیں مِنت کریندا ہاں جو اساں سبھ ہِک ڈُوجھے نال محبت رکھوں۔ ایہ کوئی نواں حُکم نئیں جیہڑا میں لِکھدا پِیا ہاں، بلکہ اُوہو جیہڑا شروع کنُوں ساڈے کولھ ہے۔ محبت ایہ ہے جو اساں خُدا دے حُکماں اُتے عمل کرُوں۔ ایہ اُوہو حُکم ہے جیہڑا تُساں شروع کنُوں سُنڑیا ہے، تے تُہاکُوں اُوندے اُتے عمل کرنڑا چاہیدے۔ کیوں جو گُمراہ کرݨ آلے بہُوں سارے لوک دُنیا ءچ نِکل آئے ہِن جیہڑے یسُوع مسیح دے اِنسانی جِسم ءچ آوݨ دا اِنکار کریندے ہِن۔ ایجھا ہر بندہ گُمراہ کرݨ آلا تے مسیح دا مخالف ہے۔ خبردار راہو جو جِنہاں چیزاں کیتے اساں محنت کیتی ہے او تُہاڈے ہتُھوں نِکل نہ ونجنڑ بلکہ تُہاکُوں پُورا اجر مِلے۔ ہر کوئی جیہڑا مسیح دی تعلیم اُتے قائم نئیں راہندا بلکہ اگُوں ودھ ویندے، اُوندے کولھ خُدا نئیں۔ جیہڑا وی یسُوع دی تعلیم اُتے قائم راہندے اُوندے کولھ باپ تے پوتر ڈُوہائیں ہِن۔ جے کوئی تُہاڈے کولھ آوے پر ایہ تعلیم نہ ڈیوے تاں اُونکُوں آپنڑے گھر ءچ داخل نہ تھیوݨ ڈیؤ بلکہ سلام وی نہ کرو۔ کیوں جو جیہڑا کوئی ایجھے بندے کُوں سلام کریندے او اُوندے بُرے کماں ءچ شریک تھیندے۔ میکُوں لِکھنڑاں تاں بہُوں کُجھ ہے پر میں اُونکُوں کاغذ تے قلم نال لِکھ تے نئیں بھیجنڑا چاہندا بلکہ اُمید رکھیندا ہاں جو تُہاڈے کولھ آ تے آمنڑے سامنڑے گالھ کریساں تاں جو ساڈی خوشی پُوری تھی ونجے۔ خُدا دی چُنڑی ہوئی تیڈی بھینڑ دے فرزند، تیکُوں سلام آدھے ہِن۔ ایہ خط مَیں بزُرگ دی طرفوں، پیارے گِیُس دے ناں ہے جیندے نال مَیں سچی محبت کریندا ہاں۔ میڈے عزیز! مَیں ایہ دُعا کریندا ہاں جو تُوں ہر لحاظ نال ترقی کریں، تے جِینویں تُوں رُوحانی طور تے صحت مند ہیں، اُونویں ای جِسمانی طور تے وی صحت مند ہوویں۔ میکُوں بہُوں خوشی تھئی جڈاں کُجھ بِھرانواں آ تے تیڈے بارے ءچ گواہی ڈِتی جو تُوں سچائی دے مطابق زندگی گُزریندا پئیں۔ میڈے کیتے اِیں کنُوں ودھ بئی کوئی خوشی نئیں، جو مَیں آپنڑے بالاں کُوں سچائی دے مطابق زندگی گُزریندے ہوئے سُنڑاں۔ میڈے عزیز! تُوں بِھرانواں کیتے جیہڑا کُجھ کریندیں، بہُوں دیانتداری نال کریندیں، بیشک او تیڈی جاݨ پچھاݨ آلے نئیں۔ اُنہاں اِتُھوں دی کلیسیا دے سامنڑے تیڈی محبت دی گواہی ڈِتی ہئی۔ جے تُوں اُنہاں دے اگُوں دے سفر کیتے اِینویں مدد کریں جِینویں خُدا دے بندے کیتے مناسب ہے تاں ایہ تیڈی مہربانی ہوسی۔ کیوں جو او مسیح دے ناں دی خاطر خدمت کیتے نِکلے ہِن، تے غیر اِیمانداراں تُوں کُجھ نئیں گِھندے۔ اِیں واسطے ساڈا فرض ہے جو اُنہاں لوکاں دی مدد کرُوں تاں جو سچائی دی خاطر اساں وی اُنہاں دے نال مِل تے خدمت کر سگوں۔ مَیں اُتھاں دی کلیسیا کُوں کُجھ لِکھیا تاں ہا پر دِیُترفِیس جیہڑا کلیسیا ءچ وڈا بنڑݨ چاہندے، ساکُوں قبول نئیں کریندا۔ جِیں ویلے مَیں آساں تاں اُونکُوں اُوندے ایہ کم جیہڑے او کریندا پئے، یاد ڈیویساں کیوں جو او ساڈے خلاف بُرے گالھیں کریندے۔ تے صرف اِیہو نئیں بلکہ بِھرانواں کُوں خود وی قبول نئیں کریندا تے ڈُوجھیاں کُوں جیہڑے اُنہاں کُوں قبول کرݨ چاہندے ہِن، روکیندے، تے کلیسیا ءچوں کڈھ ڈیندے۔ میڈے عزیز! بُرائی دی نئیں بلکہ نیکی دی راہ اُتے ٹُر۔ نیکی کرݨ آلا خُدا تُوں ہے تے جیہڑا بُرائی کریندے، اُوں خُدا کُوں اصلُوں نئیں پچھانڑیا۔ دیمیترِیُس دے حق ءچ سبھ لوک چنگی گواہی ڈیندے ہِن تے خود سچائی وی گواہی ڈیندی ہے۔ اساں وی اِیہو گواہی ڈیندے ہیں تے تُوں جانڑدیں جو ساڈی گواہی سچی ہے۔ میکُوں لِکھنڑاں تاں بہُوں کُجھ ہا پر سیاہی تے قلم نال نئیں لِکھنڑ چاہندا۔ بلکہ مَیں اُمید رکھیندا ہاں جو تیڈے کولھ جلدی آساں تے وَل اساں آمنڑے سامنڑے گالھیں کریسوں۔ تیکُوں اِطمینان حاصل تھیندا راہوے۔ اِتُھوں دے یکے دوست سلام آدھن۔ تُوں اُتھوں دے ہِک ہِک دوست کُوں سلام آکھیں۔ ایہ خط میں یہُوداہ دی طرفوں ہے جیہڑا یسُوع مسیح دا خادم تے یعقُوب دا بِھرا ہاں، اُنہاں لوکاں دے ناں جیہڑے سڈے گئے ہِن تے خُدا باپ دے عزیز ہِن تے یسُوع مسیح دے وسیلے نال محفوظ رکھے گئے ہِن۔ تُہاکُوں ڈھیر سارا رحم، اِطمینان تے محبت حاصل تھیندی راہوے۔ عزیزو! مَیں تُہاکُوں اُوں نجات دے بارے ءچ لِکھنڑ دا بہُوں شوق رکھیندا ہم جیندے ءچ اساں سارے شریک ہیں، پر مَیں ایہ نصیحت کرݨ ضروری سمجھدا ہاں جو تُساں اُوں اِیمان کیتے بہُوں محنت کرو جیہڑا خُدا آپنڑے مُقدّساں کُوں ہِکے پھیری ہمیشاں کیتے سپُرد کر ڈِتا ہا۔ کُجھ بدکار لوک لُک تے تُہاڈے وچال آ گئے ہِن جیہڑے ساڈے خُدا دے فضل کُوں آپنڑی شہوت پرستی دا بہانہ بنڑائی پئے ہِن، تے ساڈے واحد مالک تے خُداوند یسُوع مسیح دا اِنکار کریندے ہِن۔ ایجھے لوکاں دی سزا دا حُکم بہُوں پہلے کنُوں ای لِکھ ڈِتا گِیا ہا۔ بھانویں تُساں ایہ سبھ کُجھ جانڑدے ہیوے، وَل وی مَیں تُہاکُوں ایہ گالھ یاد ڈیواوݨ چاہندا ہاں جو خُداوند آپنڑے لوکاں کُوں مِصر ءچوں چُھڑا گِھدا پر بعد ءچ اِیمان نہ رکھنڑ آلیاں کُوں ہلاک کر ڈِتا۔ تے جیہڑے فرشتیاں آپنڑے مقام کُوں قائم نہ رکھیا بلکہ آپنڑی مقررہ جاہ کُوں چھوڑ ڈِتا، اُنہاں کُوں خُدا ابدی زنجیراں نال بَدھ تے عدالت دے عظیم ڈینہہ تئیں اندھارے ءچ قید رکھیا ہے۔ اِینویں ای سدُوم تے عمُورہ تے اُوندے آسُوں پاسُوں دے شہراں دے لوک وی زِنا کاری تے بدفعلی کرݨ لگ پئے ہَن۔ تے او ہمیشاں تئیں بلنڑ آلی بھاہ دی سزا بُھگتدے ہوئے عِبرت دا نشان بنڑ گئے۔ اِیندے باوجود ایہ لوک آپنڑی خوش فہمی ءچ رہ تے آپنڑے جِسم کُوں ناپاک کریندے ہِن، ہر اِختیار کُوں حقیر جانڑدے ہِن تے جلالی ہستیاں دی توہین کریندے ہِن۔ پر فرشتیاں دے سردار مِیکائیل وی مُوسیٰ دی لاش دے بارے ءچ ابلیس نال تکرار تے بحث کریندے ویلے لعن طعن کر تے اُوندے اُتے اِلزام لاوݨ دی جُرأت نہ کیتی بلکہ ایہ آکھیا جو ”خُداوند تیکُوں ملامت کرے۔“ پر ایہ لوک اُنہاں گالھیں دے بارے ءچ توہین کریندے ہِن جِنہاں دے بارے ءچ سمجھ نئیں رکھیندے۔ تے جِنہاں گالھیں کُوں او بے سمجھ جانوراں آلی کار آپنڑی فطرت نال سمجھدے ہِن، اُوہو اُنہاں کُوں برباد کر ڈیندیاں ہِن۔ اِنہاں اُتے افسوس! کیوں جو ایہ قائن دے رستے اُتے ٹُرے تے بلعام وانگُوں پیسے دے لالچ ءچ لوکاں کُوں دوکھا ڈیندے ریہے تے قورح وانگُوں مخالفت کر تے ہلاک تھئے ۔ ایہ لوک تُہاڈیاں رفاقتی دعوتاں ءچ دریا ءچ لُکیاں ہوئیاں چٹاناں وانگُوں ہِن۔ ایہ ایجھے آجڑی ہِن جیہڑے بے دھڑک کھاندے ہِن۔ ایہ بغیر پانڑی دے بدلاں وانگُوں ہِن جِنہاں کُوں ہوا چا گِھن ویندی ہے۔ ایہ پتر کیر دے بے پھل درخت ہِن جیہڑے جڑھ کنُوں اُکھڑ گئے ہِن تے اِینویں ڈُوہائیں لحاظ نال مُردہ ہِن۔ ایہ سمندر دیاں بے قابو چھلاں ہِن جیہڑیاں آپنڑی بے شرمی دی جَھگ مریندیاں ہِن۔ ایہ او اوارہ تارے ہِن جِنہاں کیتے اندھاری جاہ ہمیشاں کیتے مقرر کر ڈِتی گئی ہے۔ حنُوک وی جیہڑا آدم دی ستویں پُشت ءچوں ہا، اِنہاں دے بارے ءچ پیشن گوئی کیتی ہئی جو ”ڈیکھو! خُداوند آپنڑے لکھاں پاک فرشتیاں نال آندا پئے تاں جو سبھ لوکاں دا اِنصاف کرے تے بے دین گُنہگاراں کُوں اُنہاں دیاں سبھ بدکاریاں دی وجہ تُوں تے اُنہاں گُستاخ گالھیں دی وجہ تُوں جیہڑیاں اُنہاں اُوندی شان ءچ کیتیاں ہِن، قصُوروار کھڑاوے ۔“ ایہ لوک ہمیشاں بَک بَک تے عیب جوئی کریندے ہِن تے آپنڑیاں خواہشاں دے پِچُھوں ٹُردے ہِن تے آپنڑے بارے ءچ وڈے بول بُولیندے ہِن تے آپنڑے فائدے کیتے ڈُوجھیاں دی خوشامد کریندے ہِن۔ پر عزیزو! اُنہاں گالھیں کُوں یاد رکھو جیہڑیاں ساڈے خُداوند یسُوع مسیح دے رسُول پہلے ای آکھ چُکے ہِن۔ اُنہاں تُہاکُوں آکھیا ہا جو ”آخری ڈینہاں ءچ ٹھٹّھا کرݨ آلے نِکلسن جیہڑے آپنڑی بے دینی دیاں خواہشاں دے پِچُھوں ٹُرسن۔“ اِیہو او لوک ہِن جیہڑے تفرقے پیندے ہِن، ایہ نفسانی ہِن تے اُنہاں ءچ رُوح القُدس نئیں۔ پر عزیزو! تُساں آپنڑے پاک اِیمان ءچ ترقی کر تے رُوح القُدس دی مدد نال دُعا کریندے راہو۔ آپنڑے آپ کُوں خُدا دی محبت ءچ قائم رکھو تے خُداوند یسُوع مسیح دی رحمت دے منتظر راہو جِیندا نتیجہ ابدی زندگی ہے۔ جیہڑے لوک شک ءچ مُبتلا ہِن، اُنہاں اُتے ترس کھاؤ۔ کُجھ کُوں بھاہ ءچوں جھپٹّا مار تے بچا گِھنو تے کُجھ اُتے خُدا دے خوف نال رحم کرو تے اُوں پُشاک تُوں نفرت کرو جیہڑی اِنسانی فطرت دی وجہ کنُوں داغ دار تھی گئی ہے۔ ہُنڑ جیہڑا تُہاکُوں گُمراہی تُوں بچا سگدے تے آپنڑی جلال آلی حضُوری ءچ بہُوں وڈی خوشی نال بے عیب بنڑا تے پیش کر سگدے، ساڈے نجات ڈیوݨ آلے واحد خُدا دا جلال، عظمت، قُدرت تے اِختیار ساڈے خُداوند یسُوع مسیح دے وسیلے نال جِینویں ازل تُوں ہے، ہُنڑ وی ہووے تے ہمیشاں تئیں تھیندا راہوے۔ آمین۔ ایہ یسُوع مسیح دا مُکاشفہ ہے جیہڑا اُونکُوں خُدا اِیں واسطے ڈِتا جو او آپنڑے بندیاں کُوں او گالھیں ڈِکھاوے جِنہاں دا جلدی تھیوݨ ضرور ہے۔ اُوں آپنڑے فرشتہ کُوں بھیج تے ایہ گالھیں آپنڑے بندہ یُوحنّا اُتے ظاہر کیتیاں، تے جیہڑا کُجھ یُوحنّا ڈِٹھا، اُوں اُوندی گواہی ڈِتی ہے بھانویں او خُدا دے کلام دی گواہی ہووے یا یسُوع مسیح دی۔ مُبارک ہے او جیہڑا اِیں نبُوّت دے کلام دی تلاوت کریندے تے مُبارک ہِن او جیہڑے سُنڑ تے اِیں نبُوّت ءچ لِکھے ہوئے کلام اُتے عمل کریندے ہِن، کیوں جو وقت نزدیک ہے۔ ایہ پیغام یُوحنّا دی طرفوں، اُنہاں سَت کلیسیاواں دے ناں ہے جیہڑیاں آسِیہ صوبے ءچ ہِن۔ تُہاکُوں اُوندی طرفوں فضل تے اِطمینان حاصل تھیندا راہوے، جیہڑا ہے، جیہڑا ہا تے جیہڑا آوݨ آلا ہے، تے اُنہاں سَت رُوحاں دی طرفوں جیہڑیاں اُوندے تخت دے سامنڑے ہِن، تے یسُوع مسیح دی طرفوں جیہڑا سچا گواہ تے مُردیاں ءچوں زندہ تھیوݨ آلیاں ءچوں پلوٹھا تے دُنیا دے بادشاہاں اُتے حُکمران ہے۔ او ساڈے نال محبت رکھیندے تے اُوں آپنڑے خون دے وسیلہ نال ساکُوں ساڈے گُناہاں تُوں رہائی بخشی، تے ساکُوں ہِک بادشاہی یعنی آپنڑے خُدا تے باپ دی خدمت کیتے کاہِن وی بنڑایا۔ جلال تے قُدرت ہمیشاں تئیں اُوندی راہوے۔ آمین۔ ”ڈیکھو او بدلاں اُتے آوݨ آلا ہے تے ہر اکھ اُونکُوں ڈیکھسی جِنہاں اُونکُوں چھیدیا ہا او وی ڈیکھسن تے زمین دیاں سبھ قوماں اُوندے سببّوں دھاڑپِٹ کریسن ہا، اِینویں ای تھیوے۔ آمین ۔“ خُداوند خُدا جیہڑا ہے، جیہڑا ہا تے جیہڑا آوݨ آلا ہے یعنی قادر ِ مُطلق فرمیندے، ”الفا تے اومیگا مَیں ہاں ۔“ مَیں یُوحنّا، تُہاڈا بِھرا تے یسُوع دی پیروی کریندے ہوئے ڈُکھ، بادشاہی تے صبر ءچ تُہاڈا شریک ہاں۔ مَیں خُدا دا کلام سُنڑاوݨ تے یسُوع دی گواہی ڈیوݨ دی وجہ کنُوں اُوں جزیرہ اُتے بھیجیا گِیا ہم جیہڑا پتمُس اکھویندے۔ خُداوند دے ڈینہہ میں رُوح القُدس دے اثر ءچ آ گِیا ہم تے مَیں آپنڑے پِچُھوں نرسِنگے جیہی ہِک اواز سُنڑی، جیہڑی آدھی پئی ہئی جو ”جیہڑا کُجھ تُوں ڈیدھا ہیں اُونکُوں ہِک کتاب ءچ لِکھ گِھن تے ستّاں کلیسیاواں کُوں بھیج ڈے جیہڑیاں اِفِسُس، سمُرنہ، پِرگمُن، تھواتِیرہ، سردِیس، فِلدِلفیہ تے لَودِیکیہ ءچ ہِن۔“ جِیں ویلے میں آپنڑے نال کلام کرݨ آلے کُوں ڈیکھنڑ کیتے مُڑیا تاں میکُوں سونے دے سَت چراغ دان نظر آئے۔ تے مَیں اُنہاں چراغ داناں دے اَدھ ءچ ہِک بندہ ڈِٹھا جیہڑا اِبنِ آدم جِیہا ہا۔ اُوں پیراں تئیں چولا پاتا ہویا ہا تے سینہ اُتے سنہری سینہ بند بدھی پِیا ہا۔ اُوندا سر تے اُوندے وال اُون بلکہ برف وانگُوں چِٹے ہَن تے اُوندے اکھیں بھاہ دے شعلہ وانگُوں ہَن۔ اُوندے پیر بٹھی ءچ تپائے ہوئے خالص پِتّل وانگُوں ہَن تے اُوندی اواز زور نال واہندے پانڑی وانگُوں ہئی۔ اُوندے سجے ہتھ ءچ سَت تارے ہَن۔ اُوندے مُنہ ءچوں ہِک ڈُو دھاری تیز تلوار نِکلدی پئی ہئی تے اُوندا چہرہ اِینویں چمکدا پِیا ہا جِینویں سِجھ پُوری شِدت نال چمکدا پِیا ہووے۔ اُونکُوں ڈیکھ تے مَیں اُوندے پیراں ءچ بے جان جِیہا تھی تے ڈھے پِیا، پر اُوں آپنڑا سجا ہتھ میڈے اُتے رکھیا تے آکھیا جو ”خوف نہ کر، مَیں اوّل تے آخر ہاں۔ مَیں او ہاں جیہڑا زندہ راہندا ہاں۔ مَیں مر گِیا ہم پر ڈیکھ ہُنڑ مَیں ہمیشاں کیتے زندہ ہاں۔ موت تے عالم ِ ارواح دیاں چابیاں میڈے کولھ ہِن۔ اِیں واسطے جیہڑا کُجھ تَیں ڈِٹھے تے جیہڑا کُجھ ہُنڑ ہے تے جیہڑا اِنہاں دے بعد واقع تھیوݨ آلا ہے، اُنہاں کُوں لِکھ گِھن۔ او سَت تارے جیہڑے تَیں میڈے سجے ہتھ ءچ ڈِٹھے ہِن تے سونے دے سَت چراغ داناں دا راز ایہ ہے: او سَت تارے تاں سَت کلیسیاواں دے فرشتے ہِن تے سَت چراغ دان سَت کلیسیاواں ہِن۔“ اِفِسُس دی کلیسیا دے فرشتہ کُوں ایہ لِکھ جو جیہڑا آپنڑے سجے ہتھ ءچ سَت تارے گِھدی کھڑے تے سونے دے سَت چراغ داناں دے وچال پِھردے، او فرمیندے جو ”مَیں تیڈے کم، تیڈی محنت تے تیڈی ثابت قدمی کُوں جانڑدا ہاں۔ تے ایہ وی جانڑدا ہاں جو تُوں بدکاراں کُوں برداشت نئیں کر سگدا تے جیہڑے آپنڑے آپ کُوں رسُول آدھے ہِن پر ہِن نئیں، تَیں اُنہاں کُوں ازمائے تے کُوڑا ثابت کیتے۔ تے تُوں صبر کریندا ہیں تے میڈے ناں دی خاطر مُصیبت برداشت کریندے کریندے نئیں تھکدا۔ پر میکُوں تَیں تُوں ایہ شکایت ہے جو تَیں آپنڑی پہلے آلی محبت چھوڑ ڈِتی ہے۔ بس یاد کر جو تُوں کِتھوں ڈھٹھا ہیں۔ توبہ کر تے، اُوہو کم کر جیہڑے پہلے کریندا ہَویں، نہ تاں مَیں تیڈے کولھ آ تے تیڈے چراغ کُوں اُوندی جاہ کنُوں ہٹا ڈیساں۔ پر ایہ گالھ تیڈے حق ءچ ہے جو تُوں نِیکُلیاں دے کماں تُوں نفرت کریندیں جِنہاں تُوں مَیں وی نفرت کریندا ہاں۔ جیندے کَن ہووݨ او سُنڑے جو رُوح القُدس کلیسیاواں کُوں کیا فرمیندے۔ جیہڑا غالب آسی مَیں اُونکُوں زندگی دے اُوں درخت دا پھل کھاوݨ کیتے ڈیساں جیہڑا خُدا دے فِردوس ءچ ہے۔“ سمُرنہ دی کلیسیا دے فرشتہ کُوں ایہ لِکھ جو جیہڑا اوّل تے آخر ہے تے جیہڑا مر گِیا ہا تے ولا زندہ تھی گئے، او فرمیندے جو ”مَیں تیڈی مُصیبت تے غریبی کُوں جانڑدا ہاں، پر حقیقت ءچ تُوں دولت مند ہیں ۔ تے مَیں اُنہاں لوکاں دی تُہمت کُوں وی جانڑدا ہاں جیہڑے آپنڑے آپ کُوں بنی اِسرائیل تاں اکھیندے ہِن پر ہِن نئیں بلکہ شیطان دی جماعت ہِن۔ جیہڑے ڈُکھ تیکُوں سہنڑے ہوسن اُنہاں کنُوں نہ ڈر۔ ڈیکھ ابلیس تیڈے لوکاں ءچوں کُجھ کُوں قید ءچ بند کراوݨ آلا ہے تاں جو تیکُوں ازماوے تے تُوں ڈاہ ہِک ڈینہہ تئیں مُصیبت چانویں۔ جان ڈیوݨ تئیں وفادار رہ تاں مَیں تیکُوں زندگی دا تاج ڈیساں۔ جیندے کَن ہووݨ او سُنڑے جو رُوح القُدس کلیسیاواں کُوں کیا فرمیندے۔ جیہڑا غالب آسی اُونکُوں ڈُوجھی موت کنُوں کوئی نُقصان نہ پُجسی۔“ پِرگمُن دی کلیسیا دے فرشتہ کُوں لِکھ جو جیندے کولھ ڈُو دھاری تلوار ہے، او فرمیندے جو ”مَیں جانڑدا ہاں جو جِتھاں تُوں راہندیں اُتھاں شیطان دا تخت ہے، پر وَل وی تُوں میڈے ناں نال وفادار ریہا ہیں۔ تے اُنہاں ڈینہاں ءچ وی جِیں ویلے میڈا سچا گواہ اِنتپاس تیڈے شہر ءچ شہید کیتا گِیا جِتھاں شیطان راہندے، اُوں ویلے وی تَیں میڈے اُتے اِیمان رکھنڑ تُوں اِنکار نئیں کیتا۔ پر میکُوں تیڈے تُوں کُجھ گالھیں دی شکایت ہے جو تیڈے ءچوں کُجھ لوک بلعام دی تعلیم دی پیروی کریندے ہِن، جئیں بلق کُوں سِکھایا جو بنی اِسرائیل کُوں کِینویں گُمراہ کرے تے نتیجے ءچ اُنہاں بُتاں کُوں نذر کیتیاں گئیاں قُربانیاں دا گوشت کھادا تے حرام کاری کیتی۔ اِینویں ای تیڈے ءچ ایجھے لوک وی ہِن جیہڑے نِیکُلیاں دی تعلیم دی پیروی کریندے ہِن۔ اِیں واسطے توبہ کر، نہ تاں مَیں جلدی تیڈے کولھ آساں تے آپنڑے مُنہ دی تلوار نال اُنہاں نال لڑساں۔ جیندے کَن ہووݨ او سُنڑے جو رُوح القُدس کلیسیاواں کُوں کیا فرمیندے۔ جیہڑا غالب آسی مَیں اُونکُوں پوشیدہ مَن ءچوں ڈیساں۔ مَیں اُونکُوں ہِک سفید پتھر وی ڈیساں جیندے اُتے نواں ناں لِکھیا ہویا ہوسی، جِیندا علم صرف اُونکُوں ہوسی جِینکُوں او مِلسی۔“ تھواتِیرہ دی کلیسیا دے فرشتہ کُوں لِکھ جو خُدا دا پوتر جیندے اکھیں بھاہ دے شعلہ وانگُوں تے جیندے پیر خالص پِتّل وانگُوں ہِن، ایہ فرمیندے جو ”مَیں تیڈے کماں، تیڈی محبت، تیڈے اِیمان، تیڈی خدمت تے تیڈی ثابت قدمی کُوں جانڑدا ہاں تے ایہ وی جو تُوں ہُنڑ پہلے کنُوں وی زیادہ کم کریندا پِیا ہیں۔ پر میکُوں تیڈے تُوں ایہ شکایت ہے جو تَیں اُوں عورت اِیزبل کُوں جیہڑی آپنڑے آپ کُوں نبِیّہ آدھی ہے، نئیں روکیا۔ او میڈے خادماں کُوں تعلیم ڈے تے گُمراہ کریندی ہے جو او بُتاں کُوں پیش کیتیاں گئیاں قُربانیاں دا گوشت کھاوݨ تے حرامکاری کرݨ۔ مَیں اُونکُوں مُہلت ڈِتی ہے جو او آپنڑی بدکرداری تُوں توبہ کرے پر او توبہ کرݨ نئیں چاہندی۔ ڈیکھو! مَیں اُونکُوں اِینویں سزا ڈیساں جو او بسترے اُتے پئی راہسی تے جیہڑے اُوندے نال زِنا کریندے ہِن، جے او آپنڑے بُرے کماں تُوں توبہ نہ کریسن تاں مَیں اُنہاں کُوں وی سخت مُصیبت ءچ پَھسا ڈیساں۔ ہا، مَیں اُوں عورت دے فرزنداں کُوں جان کنُوں مار ڈیساں۔ وَل ساریاں کلیسیاواں کُوں پتا لگ ویسی جو مَیں ای ہاں جیہڑا دِلاں تے ذہناں کُوں پرکھدا ہاں تے مَیں تُہاڈے ءچوں ہر ہِک کُوں اُوندے کماں دے مطابق بدلہ ڈیساں۔ پر تُساں تھواتِیرہ دے باقی لوکاں کُوں جِنہاں اِیزبل دی تعلیم دی پیروی نئیں کیتی تے جِنہاں اُنہاں گالھیں کُوں نئیں سِکھیا، جِنہاں کُوں لوک شیطان دے گہرے راز آدھے ہِن، مَیں ایہ آدھا ہاں جو مَیں تُہاڈے اُتے کوئی بِیا بھار نہ پیساں، سوائے اِیندے جو جیہڑا کُجھ تُہاڈے کولھ ہے، اُونکُوں میڈے آوݨ تئیں مضبوطی نال پکڑی رکھو۔ جیہڑا غالب آسی تے آخر تئیں میڈی مرضی دے مطابق عمل کریسی، مَیں اُونکُوں قوماں اُتے اِختیار ڈیساں، بالکل اِینویں جِینویں مَیں وی آپنڑے باپ کنُوں اِختیار پاتے، ’او لُوہے دی سوٹی نال اُنہاں اُتے حکُومت کریسی، تے اُنہاں کُوں مِٹی دے تھانواں آلی کار ٹُکڑے ٹُکڑے کر ڈیسی ۔‘ تے مَیں اُونکُوں صُبح دا تارہ وی ڈیساں۔ جیندے کَن ہووݨ او سُنڑے جو رُوح القُدس کلیسیاواں کُوں کیا فرمیندے۔“ سردِیس دی کلیسیا دے فرشتہ کُوں لِکھ جو جیندے کولھ خُدا دیاں سَت رُوحاں تے سَت تارے ہِن، او ایہ فرمیندے جو ”مَیں تیڈے کماں کُوں جانڑدا ہاں۔ تُوں زندہ اکھویندا ہیں، پر ہیں مُردہ۔ نیندر کنُوں جاگ تے جیہڑا باقی ہے تے مرݨ آلا ہے، اُونکُوں مضبوط کر گِھن، کیوں جو مَیں تیڈے کم خُدا دی نِگاہ ءچ مکمل نئیں ڈِٹھے۔ اِیں واسطے یاد کر جو جیہڑی تعلیم تَیں گِھدی تے سُنڑی ہئی، اُوندے اُتے قائم رہ تے توبہ کر گِھن۔ پر جے تُوں نیندر کنُوں نہ جاگسیں تاں مَیں چور وانگُوں آساں تے تیکُوں پتہ وی نہ ہوسی جو مَیں کیہڑے ویلے تَیں اُتے آ پوساں۔ پر سردِیس ءچ تیڈے کُجھ لوک ایجھے ہِن جِنہاں آپنڑے کپڑیاں کُوں ناپاک نئیں کیتا۔ او چِٹے کپڑے پاتے ہوئے میڈے نال ٹُرسن، کیوں جو او اِیندے لائق ہِن۔ جیہڑا غالب آسی، اُونکُوں اُنہاں آلی کار چِٹے کپڑے پوا ڈِتے ویسن تے مَیں اُوندا ناں کتاب ِ حیات ءچوں کڈھائیں خارج نہ کریساں بلکہ آپنڑے باپ تے اُوندے فرشتیاں دے سامنڑے اُوندے ناں دا اِقرار کریساں۔ جیندے کَن ہووݨ او سُنڑے جو رُوح القُدس کلیسیاواں کُوں کیا فرمیندے۔“ فِلدِلفیہ دی کلیسیا دے فرشتہ کُوں لِکھ جو جیہڑا قدُّوس تے سچا ہے تے داؤد دی کُنجی رکھیندے، جیندے کھولے ہوئے کُوں کوئی بند نئیں کر سگدا تے جیندے بند کیتے ہوئے کُوں کوئی کھول نئیں سگدا، اُوہو ایہ فرمیندے جو ”مَیں تیڈے کماں کُوں جانڑدا ہاں۔ ڈیکھ! مَیں تیڈے سامنڑے ہِک دروازہ کھول رکھے جِینکُوں کوئی بند نئیں کر سگدا۔ مَیں جانڑدا ہاں جو تیڈے ءچ طاقت گھٹ ہے پر تَیں میڈے کلام اُتے عمل کیتے تے میڈے ناں دا اِنکار نئیں کیتا۔ ڈیکھ! مَیں شیطان دی جماعت دے اُنہاں لوکاں نال جیہڑے آپنڑے آپ کُوں بنی اِسرائیل آدھے ہِن پر ہِن نئیں بلکہ کُوڑے ہِن، اِینویں کریساں جو او آ تے تیڈے پیراں اُتے ڈھے تے سجدہ کریسن تے منیسن جو مَیں تیڈے نال محبت رکھیندا ہاں۔ تَیں میڈے صبر کرݨ دے بارے ءچ کلام اُتے عمل کیتے، اِیں واسطے مَیں وی ازمائش دے اُوں ویلے جیہڑا ساری دُنیا اُتے آوݨ آلا ہے، تیڈی حفاظت کریساں۔ ڈیکھ! مَیں جلدی آندا پِیا ہاں۔ جیہڑا کُجھ تیڈے کولھ ہے، اُونکُوں مضبوطی نال پکڑی رکھ تاں جو تیڈا تاج کوئی کَھس نہ گِھنے۔ جیہڑا غالب آسی، مَیں اُونکُوں آپنڑے خُدا دی ہیکل ءچ ہِک تھمبا بنڑا ڈیساں۔ او ہمیشاں تئیں اُتھاں راہسی تے مَیں اُوندے اُتے آپنڑے خُدا دا ناں تے آپنڑے خُدا دے شہر دا ناں لِکھساں یعنی نواں یروشلیم جیہڑا میڈے خُدا دی طرفوں اسمان کنُوں لہوݨ آلا ہے۔ تے مَیں اُوندے اُتے آپنڑا نواں ناں وی لِکھساں۔ جیندے کَن ہووݨ او سُنڑے جو رُوح القُدس کلیسیاواں کُوں کیا فرمیندے۔“ لَودِیکیہ دی کلیسیا دے فرشتہ کُوں لِکھ جو جیہڑا آمین ہے تے وفادار تے سچا گواہ تے جیندے وسیلے خُدا سبھ کُجھ بنڑائے، اُوہو ایہ فرمیندے جو ”مَیں تیڈے کماں کُوں جانڑدا ہاں جو تُوں نہ تاں ٹھڈا ہیں نہ گرم۔ کاش جو تُوں ٹھڈا یا گرم ہوندا۔ پر کیوں جو تُوں نہ گرم ہیں نہ ٹھڈا بلکہ نیم گرم ہیں، اِیں واسطے مَیں تیکُوں آپنڑے مُنہ ءچوں تُھکنڑ آلا ہاں۔ تُوں آدھیں جو مَیں دولت مند ہاں تے مالدار بنڑ گِیا ہاں تے کہیں چیز دا مُتھاج نئیں پر تُوں ایہ نئیں جانڑدا جو تُوں بدبخت، ترس دے قابل، غریب، اندھا تے ننگا ہیں۔ میڈا مشورہ ایہ ہے جو مَیں کنُوں بھاہ ءچ خالص کیتا ہویا سونا مُل گِھن چا، تاں جو دولت مند تھی ونجیں تے مَیں کنُوں چِٹے کپڑے گِھن چا، تاں جو اُنہاں کُوں پا تے تیکُوں ننگا تھیوݨ دے سببّوں شرمندہ نہ تھیونڑا پووے تے آپنڑے اکھیں ءچ پاوݨ کیتے سُرمہ گِھن چا، تاں جو ڈیکھ سگیں۔ مَیں جِنہاں نال پیار کریندا ہاں، اُنہاں کُوں ملامت کریندا تے سزا ڈے تے اُنہاں دی تربیت وی کریندا ہاں۔ اِیں واسطے ہوشیار تھی، تے توبہ کر۔ ڈیکھ! مَیں دروازہ اُتے کھڑا کھڑکیندا پِیا ہاں۔ جے کوئی میڈی اواز سُنڑ تے دروازہ کھولیسی تاں مَیں اندر آ تے اُوندے نال کھانڑا کھاساں تے او میڈے نال۔ جیہڑا غالب آسی، مَیں اُونکُوں آپنڑے نال آپنڑے تخت اُتے بِلھیساں، جِینویں مَیں غالب آیا ہاں تے آپنڑے باپ دے نال اُوندے تخت اُتے بہہ گِیا ہاں۔ جیندے کَن ہووݨ، او سُنڑے جو رُوح القُدس کلیسیاواں کُوں کیا فرمیندے۔“ اِنہاں گالھیں دے بعد مَیں نِگاہ چاتی تاں اسمان ءچ ہِک دروازہ کُھلیا ہویا ڈِٹھا تے اُوں نرسِنگے جیہی اواز کُوں جئیں پہلے میڈے نال گالھ کیتی ہئی، ایہ اکھیندے ہوئے سُنڑیا جو ”اِتھاں اُتاں آ وَنج۔ مَیں تیکُوں او گالھیں ڈِکھیساں، جِنہاں دا اِیندے بعد تھیوݨ ضرور ہے۔“ وَل میں رُوح القُدس دے اثر ءچ آ گِیا تے کیا ڈیدھا ہاں جو اسمان اُتے ہِک تخت ہے تے اُوندے اُتے کوئی بیٹھا ہے۔ تے جیہڑا تخت اُتے بیٹھا ہا، او ڈیکھنڑ ءچ یشب تے عقیق وانگُوں نظر آندا ہا تے ہِک پِینگھ جیہڑی زمُرد وانگُوں ہئی، تخت دے چودھارُوں ہئی۔ اُوں تخت دے چودھارُوں چوِّیہہ تخت ہَن جِنہاں اُتے چوِّیہہ بزُرگ چِٹے کپڑے پاتی بیٹھے ہَن تے اُنہاں دے سِراں اُتے سونے دے تاج ہَن۔ اُوں تخت ءچوں بجلیاں تے گجکار دیاں اوازاں نِکلدیاں پئیاں ہَن۔ تخت دے سامنڑے سَت چراغ بلدے پئے ہَن جیہڑے خُدا دیاں سَت رُوحاں ہِن۔ تے اُوں تخت دے سامنڑے بَلّور آلی کار ہِک شیشے دا سمندر ہئی۔ تخت دے اَدھ ءچ تے چودھارُوں چار جاندار ہَن جِنہاں دے اگُوں پِچُھوں اکھیں ای اکھیں ہَن۔ پہلا جاندار ببرشیر وانگُوں ہا، ڈُوجھا ڈاند وانگُوں، تریجھے دی شکل اِنسان وانگُوں ہئی تے چوتھا اُڈدے ہوئے عقاب وانگُوں ہا۔ تے چارے جانداراں دے چِھی چِھی کھمب ہَن، تے ایہ ہر پاسُوں تے کھمباں دے اندرُوں وی اکھیں نال بھرے ہوئے ہَن۔ تے او ڈینہہ رات رُکے بغیر ایہ آدھے راہندے ہَن، ”قدُّوس، قدُّوس، قدُّوس خُداوند، قادر مُطلق خُدا جیہڑا ہا، جیہڑا ہے تے جیہڑا آوݨ آلا ہے۔“ جڈاں وی او جاندار اُوندی تمجید، عزت تے شُکرگزاری کریندے ہِن جیہڑا تخت اُتے بیٹھے تے ہمیشاں تئیں زندہ ہے، تاں او چوِّیہہ بزُرگ اُوندے اگُوں ڈھے پوندے ہِن جیہڑا تخت اُتے بیٹھے تے اُونکُوں جیہڑا ہمیشاں تئیں زندہ ہے سجدہ کریندے ہِن۔ او آپنڑے تاج اُوں تخت دے سامنڑے رکھ تے ایہ آدھے ہِن جو ”اے خُداوند ساڈے خُدا تُوں ای جلال، عزت تے قُدرت دے لائق ہیں، کیوں جو تَیں ای ساریاں چیزاں کُوں خلق کیتے، تے او ساریاں تیڈی ای مرضی نال وجود ءچ آئیاں ہِن۔“ وَل مَیں اُوندے سجے ہتھ ءچ، جیہڑا تخت اُتے بیٹھا ہا، ہِک طُومار ڈِٹھا جیہڑا ڈوہائیں پاسُوں لِکھیا ہویا ہا تے جِینکُوں سَت مُہراں لا تے بند کیتا گِیا ہا۔ تے مَیں ہِک فرشتہ کُوں ڈِٹھا جیہڑا اُچی اواز نال ایہ آدھا پِیا ہا جو ”کوݨ اِنہاں مُہراں کُوں تروڑ تے اِیں طُومار کُوں کھولنڑ دے لائق ہے؟“ پر نہ اسمان اُتے نہ زمین اُتے تے نہ زمین دے تلے کوئی بندہ ہا جیہڑا اُوں طُومار کُوں کھول تے اُونکُوں پڑھ سگے۔ تے مَیں بُٹ بُٹ رووݨ لگ پِیا کیوں جو کوئی وی اِیں لائق نہ مِلیا جیہڑا اُوں طُومار کُوں کھول سگے یا اُونکُوں پڑھ سگے۔ وَل اُنہاں بزُرگاں ءچوں ہِک میکُوں آکھیا جو ”نہ رو، ڈیکھ، یہُوداہ دے قبیلے دا ببرشیر جیہڑا داؤد دی نسل ہے، غالب آیا ہے۔ اُوہو اُوں طُومار کُوں تے اُوندیاں ستّے مُہراں کُوں کھول سگدے۔“ وَل مَیں اُوں تخت، چارے جانداراں تے اُنہاں بزُرگاں دے وچال ہِک لیلا کھڑا ڈِٹھا جیہڑا ذبح تھیّا ہویا لگدا ہا۔ اُوندے سَت سینگ ہَن تے سَت اکھیں۔ ایہ خُدا دیاں سَت رُوحاں ہِن جیہڑیاں ساری زمین اُتے بھیجیاں گئیاں ہِن۔ او لیلا آیا تے اُوں تخت اُتے بیٹھے ہوئے دے سجے ہتھ کنُوں او طُومار گِھن گِھدا۔ تے جِیں ویلے اُوں او طُومار گِھن گِھدا تاں او چارے جاندار تے او چوِّیہہ بزُرگ، لیلے دے سامنڑے سجدہ ءچ ڈھے پئے۔ اُنہاں ءچوں ہر ہِک دے کولھ ستار تے خوشبودار مصالحے نال بھرے سونے دے مُنگر ہَن۔ ایہ مُقدّساں دیاں دُعاواں ہِن۔ تے او ایہ نواں گیت گاوݨ لگے جو ”تُوں ای اِیں لائق ہیں جو طُومار کُوں گِھن تے اُوندیاں مُہراں کھولیں، کیوں جو تَیں ذبح تھی تے آپنڑے خون نال ہر قبیلہ، ہر زبان، ہر اُمت تے ہر قوم ءچوں لوکاں کُوں خُدا دے واسطے مُل گِھن گِھدے۔ تے اُنہاں کُوں ساڈے خُدا کیتے ہِک بادشاہی تے کاہِن بنڑا ڈِتا تے او زمین اُتے بادشاہی کریسن۔“ وَل مَیں نِگاہ کیتی تاں لکھاں کروڑاں فرشتیاں دی اواز سُنڑی جیہڑے اُوں تخت تے اُنہاں جانداراں تے بزُرگاں دے چودھارُوں موجود ہَن۔ او اُچی اواز نال آدھے پئے ہَن جو ”ذبح تھیّا ہویا لیلا ای قُدرت، دولت، حِکمت، عزت، جلال تے تمجید دے لائق ہے۔“ وَل مَیں اسمان تے زمین اُتے، تے زمین دے تلے تے سمندر دی ساری مخلوق کُوں یعنی سبھ شیواں کُوں جیہڑیاں اُنہاں ءچ ہِن، ایہ آدھے ہوئے سُنڑیا جو ”جیہڑا تخت اُتے بیٹھا ہے، اُوندی تے لیلے دی تمجید، عزت، جلال تے قُدرت ہمیشاں تئیں راہوے۔“ تے چارے جانداراں آکھیا، ”آمین“ تے بزُرگاں ڈھے تے سجدہ کیتا۔ وَل مَیں ڈِٹھا جو لیلے اُنہاں سَت مُہراں ءچوں ہِک مُہر کھولی۔ تے مَیں چارے جانداراں ءچوں ہِک کُوں گجکار جیہی اواز ءچ ایہ آدھے سُنڑیا جو ”آ!“ تے مَیں نِگاہ کیتی تاں چِٹا گھوڑا ڈِٹھا جیندے اُتے سوار دے ہتھ ءچ کمان ہئی۔ اُونکُوں تاج ڈِتا گِیا تے او فتح کریندا ہویا نِکلیا تاں جو بِیا وی فتح کرے۔ جِیں ویلے لیلے ڈُوجھی مُہر کھولی تاں مَیں ڈُوجھے جاندار کُوں ایہ آدھے ہوئے سُنڑیا جو ”آ!“ وَل ہِک رَتّا گھوڑا نِکلیا تے اُوندے سوار کُوں ایہ اِختیار ڈِتا گِیا جو او زمین تُوں صُلح چا گِھنے تاں جو لوک ہِک ڈُوجھے کُوں قتل کرݨ۔ تے اُونکُوں ہِک وڈی تلوار وی ڈِتی گئی۔ جِیں ویلے اُوں تریجھی مُہر کھولی تاں مَیں تریجھے جاندار کُوں ایہ آدھے ہوئے سُنڑیا جو ”آ!“ جِیں ویلے مَیں نِگاہ کیتی تاں ہِک کالا گھوڑا ڈِٹھا جیندے سوار دے ہتھ ءچ ترکڑی ہئی۔ مَیں اُنہاں چارے جانداراں ءچوں اواز آلی کار ایہ اکھیندے ہوئے سُنڑیا، ”ہِک کلو دانڑیاں دا مُل ہِک دینار تے ترے کلو جَوں دا مُل ہِک دینار۔ پر تیل تے انگُور دے رَس دا نُقصان نہ کر۔“ جِیں ویلے اُوں چوتھی مُہر کھولی تاں مَیں چوتھے جاندار کُوں ایہ آدھے ہوئے سُنڑیا جو ”آ!“ جِیں ویلے مَیں نِگاہ کیتی تاں ڈِٹھا جو ہِک گھوڑا ہے جِیندا رنگ پِیلا جِیہا ہا تے جیندے سوار دا ناں موت ہے۔ اُوندے پِچُھوں پِچُھوں عالم ِ ارواح ہئی۔ اُونکُوں زمین دے چوتھے حصہ اُتے اِختیار ڈِتا گِیا جو تلوار، کال، وبا تے زمین دے جنگلی جانوراں دے ذریعے لوکاں کُوں مارے۔ جِیں ویلے اُوں پنجویں مُہر کھولی تاں مَیں قُربان گاہ دے تلے اُنہاں لوکاں دیاں رُوحاں ڈِٹھیاں جیہڑے خُدا دے کلام دی خاطر تے آپنڑے اِیمان دی شہادت اُتے قائم راہوݨ دے سببّوں شہید کیتے گئے ہَن۔ اُنہاں اُچی اواز ءچ آکھیا، ”اے مالک! قدُّوس تے سچے خُدا، تُوں کڈݨ تئیں زمین آلیاں دی عدالت نہ کریسیں تے اُنہاں کنُوں ساڈے خون دا بدلہ نہ گِھنسیں؟“ وَل اُنہاں ءچوں ہر ہِک کُوں چِٹے کپڑے ڈِتے گئے تے اُنہاں کُوں آکھیا گِیا جو ”تھوڑی دیر بِیا اِنتظار کرو تاں جو تُہاڈے ہم خدمت بِھرانواں دا وی شمار پُورا تھی ونجے جیہڑے تُہاڈے آلی کار قتل کیتے ونجنڑ آلے ہِن۔“ جِیں ویلے لیلے چِھینویں مُہر کھولی تاں مَیں ڈِٹھا جو ہِک وڈا زلزلہ آیا تے سِجھ بکری دے والاں دے ٹاٹ آلی کار کالا تھی گِیا، چَن خون وانگُوں رَتّا تھی گِیا، تے اسمان دے تارے زمین اُتے ڈھے پئے جِینویں زور دی ہوا چلنڑ نال ہنجیر دے درخت کنُوں کچا پھل ڈھے پوندے۔ تے اسمان اِینویں غیب تھی گِیا جِینویں کوئی طُومار ولھیٹ ڈِتا گِیا ہووے تے ہر ہِک پہاڑ تے جزیرہ آپنڑی آپنڑی جاہ کنُوں ہٹ گِیا۔ وَل زمین دے بادشاہ، سردار، فوجی افسر، مالدار، زورآور بلکہ سارے لوک غُلام تے آزاد، غاراں تے پہاڑاں دیاں چٹاناں ءچ وَنج لُکے۔ او پہاڑاں تے چٹاناں کُوں آکھنڑ لگے جو ”ساڈے اُتے ڈھے پوو تے ساکُوں اُوندے چہرہ کنُوں جیہڑا تخت اُتے بیٹھے تے لیلے دے غضب کنُوں بچا گِھنو، کیوں جو اُنہاں دے غضب دا عظیم ڈینہہ آ گِیا ہے تے ہُنڑ کوݨ بچ سگدے؟“ اِیندے بعد مَیں ڈِٹھا جو زمین دیاں چارے چُنڈاں اُتے چار فرشتے کھڑے ہَن۔ او زمین دیاں چارے ہواواں کُوں روکی کھڑے ہَن تاں جو زمین یا سمندر یا کہیں درخت اُتے ہوا نہ چلے۔ وَل مَیں ہِک بئے فرشتے کُوں مشرق کنُوں اُتے چڑھدے ڈِٹھا جیندے کولھ زندہ خُدا دی مُہر ہئی۔ اُوں اُنہاں چارے فرشتیاں کُوں جِنہاں کُوں زمین تے سمندر کُوں نُقصان پُچاوݨ دا اِختیار ڈِتا گِیا ہا، اُچی اواز ءچ آکھیا، ”جِیں ویلے تئیں اساں آپنڑے خُدا دے بندیاں دے متھیاں اُتے مُہر نہ لا گِھنوں، زمین تے سمندر تے درختاں کُوں نُقصان نہ پُچائے۔“ وَل مَیں سُنڑیا جو جیہڑے لوکاں اُتے مُہر کیتی گئی ہئی، اُنہاں دا شمار ہِک لکھ چوتالیہہ ہزار (1,44,000) ہا تے او بنی اِسرائیل دے سارے قبیلیاں ءچوں ہَن۔ یہُوداہ دے قبیلہ ءچوں بارہاں ہزار (12,000) اُتے مُہر کیتی گئی، رُوبِن دے قبیلہ ءچوں بارہاں ہزار اُتے، جد دے قبیلہ ءچوں بارہاں ہزار اُتے، آشر دے قبیلہ ءچوں بارہاں ہزار اُتے، نفتالی دے قبیلہ ءچوں بارہاں ہزار اُتے، منسّی دے قبیلہ ءچوں بارہاں ہزار اُتے، شمعون دے قبیلہ ءچوں بارہاں ہزار اُتے، لاوی دے قبیلہ ءچوں بارہاں ہزار اُتے، اِشکار دے قبیلہ ءچوں بارہاں ہزار اُتے، زبُولُون دے قبیلہ ءچوں بارہاں ہزار اُتے، یُوسف دے قبیلہ ءچوں بارہاں ہزار اُتے تے بِنیمِین دے قبیلہ ءچوں بارہاں ہزار اُتے مُہر کیتی گئی۔ اِیندے بعد جِیں ویلے مَیں نِگاہ کیتی تاں ڈِٹھا جو ہر قوم، قبیلہ، اُمت تے اہل زبان دی ہِک ایجھی وڈی بِھیڑ ہے جِیندا شمار کرݨ ممکن نئیں۔ او چِٹے کپڑے پا تے تخت تے لیلے دے سامنڑے کھڑی ہئی۔ تے او ہتھاں ءچ کھجور دیاں لڑیاں گِھدے ہوئے اُچی اواز ءچ آدھی پئی ہئی، ”نجات ساڈے خُدا دی طرفوں، جیہڑا تخت اُتے بیٹھے، تے لیلے دی طرفوں مِلدی ہے۔“ تے سارے فرشتے تخت دے چودھارُوں تے اُنہاں بزُرگاں تے چارے جانداراں دے چودھارُوں کھڑے ہَن۔ وَل او تخت دے سامنڑے مُنہ دے بھار ڈھے پئے تے خُدا کُوں سجدہ کر تے آکھنڑ لگے ”آمین! حمد تے جلال تے حِکمت تے شُکر تے عزت تے قُدرت تے طاقت ہمیشاں تئیں ساڈے خُدا دی ہووے۔ آمین۔“ وَل بزُرگاں ءچوں ہِک مَیں کنُوں پُچھیا جو ”ایہ چِٹے کپڑے پاتے ہوئے کوݨ لوک ہِن تے کِتھوں آئے ہِن؟“ مَیں جواب ڈِتا ”میڈے آقا! ایہ تاں تُساں ای جانڑدے ہیوے۔“ وَل اُوں آکھیا جو ”ایہ لوک او ہِن جیہڑے وڈی مُصیبت ءچوں نِکل تے آئے ہِن۔ اُنہاں آپنڑے کپڑے لیلے دے خون نال دھو تے چِٹے کیتے ہِن۔ اِیں واسطے او خُدا دے تخت دے سامنڑے حاضر ہِن تے ڈینہہ رات اُوندی ہیکل ءچ اُوندی عبادت کریندے ہِن تے او جیہڑا تخت اُتے بیٹھے، اُنہاں ءچ سکونت کریسی۔ او نہ تاں کڈھائیں بُکھے تھیسن تے نہ ترِسّے۔ نہ اُنہاں کُوں دُھپ تنگ کریسی تے نہ گرمی ۔ کیوں جو او لیلا جیہڑا تخت دے اَدھ ءچ ہے، اُنہاں دا آجڑی ہوسی تے اُنہاں کُوں زندگی دے پانڑی دے چشمیاں تئیں گِھن ویسی۔ تے خُدا اُنہاں دے اکھیں دے سارے ہنجُو پُونجھ ڈیسی ۔“ جِیں ویلے لیلے ستویں مُہر کھولی تاں اسمان ءچ تقریباً ادھے گھنٹے تئیں خاموشی تھی گئی۔ وَل مَیں اُنہاں ستّاں فرشتیاں کُوں ڈِٹھا جیہڑے خُدا دے سامنڑے کھڑے راہندے ہَن۔ اُنہاں کُوں سَت نرسِنگے ڈِتے گئے۔ ہِک بِیا فرشتہ خوشبودار مصالحہ ساڑن کیتے سونے دا ہِک تھاں گِھن آیا تے قُربان گاہ دے کولھ وَنج کھڑا تھیّا۔ اُونکُوں بہُوں سارا خوشبودار مصالحہ ڈِتا گِیا تاں جو او اُونکُوں سارے مُقدّساں دیاں دُعاواں نال تخت دے سامنڑے دی سنہری قُربان گاہ اُتے پیش کرے۔ اُوں خوشبودار مصالحے دا دُھوواں مُقدّساں دیاں دُعاواں دے نال فرشتہ دے ہتھ کنُوں اُتے اُٹھیا تے خُدا دے حضُور وَنج پُجیا۔ وَل فرشتے قُربان گاہ کنُوں بھاہ گِھن تے خوشبودار مصالحہ ساڑن دے تھاں ءچ بھری تے اُونکُوں زمین اُتے سَٹ ڈِتا تے گجکار دیاں اوازاں تے بجلیاں چمکیاں تے زلزلہ آیا۔ اُوندے بعد او سَت فرشتے جِنہاں دے کولھ او سَت نرسِنگے ہَن، آپنڑا آپنڑا نرسِنگا وجاوݨ کیتے تیار تھئے۔ جِیں ویلے پہلے فرشتے آپنڑا نرسِنگا وجایا تاں خون مِلے ہوئے ننڑاوے تے بھاہ پیدا تھئی جیہڑے زمین اُتے سَٹ ڈِتے گئے۔ اُوندے نال ہِک تِہائی زمین، ہِک تِہائی درخت تے ساری ساوی گھاہ سڑ گئی۔ جِیں ویلے ڈُوجھے فرشتے آپنڑا نرسِنگا وجایا تاں بھاہ نال بلدی ہوئی ہِک پہاڑ جیہی بہُوں وڈی چیز سمندر ءچ سَٹ ڈِتی گئی۔ اُوندے نال ہِک تِہائی سمندر خون بنڑ گِیا، سمندر دے ہِک تِہائی جاندار مر گئے تے ہِک تِہائی جہاز تباہ تھی گئے۔ جِیں ویلے تریجھے فرشتے آپنڑا نرسِنگا وجایا تاں مشعل آلی کار بلدا ہویا ہِک وڈا تارہ اسمان کنُوں تروٹ تے ہِک تِہائی دریاواں تے پانڑی دے چشمیاں اُتے ڈھے پِیا۔ اُوں تارے دا ناں ”کوڑ “ ہے۔ اُوندے نال ہِک تِہائی پانڑی کوڑا تھی گِیا تے بہُوں سارے لوک اُوں کوڑے پانڑی دے سببّوں مر گئے۔ جِیں ویلے چوتھے فرشتے آپنڑا نرسِنگا وجایا تاں ہِک تِہائی سِجھ تے ہِک تِہائی چَن تے ہِک تِہائی تاریاں دا نُقصان تھیّا، اِتُھوں تئیں جو اُنہاں دا ہِک تِہائی حصہ اندھارا تھی گِیا تے اِینویں ڈینہہ دے ہِک تِہائی تے رات دے ہِک تِہائی حصے دی روشنی غائب تھی گئی۔ جِیں ویلے مَیں وَل نِگاہ کیتی تاں ہِک بہُوں وڈا عقاب اسمان دے اَدھ ءچ اُڈدا ہویا ڈِٹھا تے اُونکُوں اُچی اواز نال ایہ آدھے سُنڑیا جو ”اُنہاں ترے فرشتیاں دے نرسِنگیاں دی اواز دے سببّوں، جِنہاں دا وجایا ونجنڑ باقی ہے، زمین دے راہوݨ آلیاں اُتے افسوس، افسوس، افسوس!“ جِیں ویلے پنجویں فرشتے آپنڑا نرسِنگا وجایا تاں مَیں ہِک تارہ ڈِٹھا جیہڑا اسمان کنُوں تروٹ تے زمین اُتے ڈھٹھا ہا۔ اُوں تارے کُوں بے تَل کھڈے دی کُنجی ڈِتی گئی۔ جِیں ویلے اُوں کھڈے کُوں کھولیا تاں اُوندے ءچوں دُھوواں اِینویں نِکلیا جِینویں ہِک بہُوں وڈی بٹھی ءچوں دُھوواں نِکلدے۔ کھڈے دے دُھوئیں دی وجہ کنُوں سِجھ تے ساری ہوا اندھارا تھی گئی۔ اُوں دُھوئیں ءچوں زمین اُتے ٹِڈیاں نِکل پئیاں۔ اُنہاں کُوں زمین دے وِٹھوویاں وانگُوں لڑن دی طاقت ڈِتی گئی۔ تے اُنہاں کُوں آکھیا گِیا جو ”زمین دی گھاہ تے کہیں ساوے بُوٹے یا درخت کُوں نُقصان نہ پُچائے، بلکہ صرف اُنہاں لوکاں کُوں جِنہاں دے متھے اُتے خُدا دی مُہر نئیں۔“ ٹِڈیاں کُوں جان کنُوں مارݨ دا نئیں بلکہ صرف لوکاں کُوں پنج مہینے تئیں ایجھی اذیت ڈیوݨ دا اِختیار ڈِتا گِیا ہا جیہڑی اِنسان کُوں وِٹھوویاں دے لڑن نال تھیندی ہے۔ اُنہاں ڈینہاں ءچ لوک موت گولھیسن پر اُنہاں کُوں نہ مِلسی۔ او مرݨ دی خواہش کریسن تے موت اُنہاں کنُوں بھجسی۔ اُنہاں ٹِڈیاں دے جِسم ایجھے گھوڑیاں وانگُوں ہَن جیہڑے جنگ کیتے تیار کیتے گئے ہووݨ۔ اُنہاں دے سِراں اُتے سونے دے تاجاں جِیہیاں چیزاں ہَن تے اُنہاں دیاں شکلاں اِنسانی شکلاں وانگُوں ہَن۔ اُنہاں دے وال عورتاں دے والاں وانگُوں ہَن تے ڈند ببرشیر دے ڈنداں وانگُوں۔ اُنہاں دے سینے اُتے لُوہے آلی کار سینے بند ہَن، تے اُنہاں دے کھمباں دی اواز ایجھی ہئی جِینویں جنگ دے میدان ءچ بے شمار گھوڑیاں تے رتھاں دے بھجنڑ نال تھیندی ہے۔ اُنہاں دیاں پُچھاں تے ڈنگ وِٹھوویاں وانگُوں ہَن تے اُنہاں دیاں پُچھاں ءچ پنج مہینے تئیں لوکاں کُوں تکلیف ڈیوݨ دی طاقت ہئی۔ کھڈے دا فرشتہ اُنہاں دا بادشاہ ہا۔ اُوندا ناں عبرانی ءچ ”ابدّون“ تے یُونانی ءچ ”اپُلّیون“ یعنی ہلاک کرݨ آلا ہے۔ پہلا افسوس تاں تھی گِیا، اِیندے بعد ڈُو افسوس تھیوݨ آلے ہِن۔ جِیں ویلے چِھینویں فرشتے آپنڑا نرسِنگا وجایا تاں مَیں خُدا دے سامنڑے آلی سنہری قُربان گاہ دے چارے سینگاں کنُوں ہِک اواز آندی سُنڑی۔ او اُوں چِھینویں فرشتے کُوں جیہڑا نرسِنگا گِھدی کھڑا ہا ایہ آدھی پئی ہئی جو ”اُنہاں چارے فرشتیاں کُوں جیہڑے وڈے دریا فرات دے کولھ بدھے پئے ہِن، کھول ڈے۔“ او چارے فرشتے جیہڑے خاص کر اُونہئی سال تے اُونہئی مہینے تے اُونہی ڈینہہ تے اُونہئی لاحظے کیتے تیار کیتے گئے ہَن، کھول ڈِتے گئے تاں جو ہِک تِہائی اِنساناں کُوں مار سٹنڑ۔ میکُوں سُنڑائی ڈِتا جو گُھڑسوار فوجاں دی تعداد وِیہہ کروڑ ہئی۔ او گھوڑے تے اُنہاں دے سوار جِنہاں کُوں مَیں آپنڑی رویا ءچ ڈِٹھا ہا، ایجھے سینے بند پاتی ودے ہَن جیہڑے بھاہ وانگُوں رتّے، سُنبل وانگُوں نیلے تے گندھک وانگُوں پِیلے ہَن۔ تے اُنہاں گھوڑیاں دے سر ببرشیر وانگُوں ہَن۔ اُنہاں دے مُنہ کنُوں بھاہ، دُھوواں تے گندھک نِکلدی پئی ہئی۔ اِنہاں ترے آفتاں یعنی بھاہ، دُھوئیں تے گندھک دی وجہ کنُوں جیہڑیاں اُنہاں دے مُنہ ءچوں نِکلدیاں پئیاں ہَن، اِنساناں دی ہِک تِہائی آبادی ہلاک تھی گئی۔ اُنہاں گھوڑیاں دی طاقت اُنہاں دے مُنہ تے پُچھاں ءچ ہئی۔ ایہ پُچھاں نانگاں وانگُوں ہَن جِنہاں دے سر نُقصان پُچیندے ہَن۔ باقی لوکاں جیہڑے اِنہاں آفتاں کنُوں نہ مرے، آپنڑے ہتھاں دے کماں کنُوں توبہ نہ کیتی۔ او اُنہاں بدرُوحاں دی تے سونے، چاندی، پِتّل تے لکڑ دے بنڑے ہوئے بُتاں دی عبادت کرݨ تُوں باز نہ آئے جیہڑے نہ تاں ڈیکھ سگدے ہِن، نہ سُنڑ سگدے ہِن تے نہ ٹُر سگدے ہِن۔ تے اُنہاں قتل، جادُوگری، حرام کاری تے چوری کرݨ تُوں توبہ نہ کیتی۔ وَل مَیں ہِک بئے زور آور فرشتے کُوں ڈِٹھا جیہڑا اسمان کنُوں لہندا پِیا ہا۔ او بدّل کُوں ولھیٹی پِیا ہا تے اُوندے سر اُتے کمان ہئی۔ اُوندا چہرہ سِجھ وانگُوں ہا تے جنگھاں بھاہ دے تھمبیاں وانگُوں ہَن۔ اُوندے ہتھ ءچ ہِک چھوٹا طُومار ہا جیہڑا کُھلا پِیا ہا۔ اُوں آپنڑا سجا پیر سمندر اُتے تے کھبا خشکی اُتے رکھیا، تے اُچی اواز ءچ اِینویں بولیا جِینویں ببرشیر گجدے۔ جِیں ویلے او بولیا تاں نال نال گجکار دیاں سَت آوازاں سُنڑائی ڈِتیاں۔ اُنہاں گجکار دیاں آوازاں کُوں سُنڑ تے مَیں لِکھنڑ لگا ہم جو اسمان کنُوں ہِک اواز ایہ آدھے ہوئے سُنڑی جو، ”جیہڑا کُجھ گجکار دیاں سَت آوازاں آکھیا ہے اُونکُوں راز ءچ رکھ، تے نہ لِکھ۔“ وَل اُوں فرشتے، جِینکُوں مَیں سمندر تے خشکی اُتے کھڑے ڈِٹھا ہا، آپنڑا سجا ہتھ اسمان دو اُچا کیتا، تے ہمیشاں تئیں زندہ راہوݨ آلے خالق دی جئیں اسمان، زمین، سمندر تے اُنہاں دے اندر دیاں ساریاں چیزاں کُوں خلق کیتا، قَسم چا تے آکھیا جو ”ہُنڑ مزید دیر نہ تھیسی۔ بلکہ اُنہاں ڈینہاں ءچ جڈاں ستواں فرشتہ آپنڑا نرسِنگا وجاوݨ آلا ہوسی تاں خُدا دا لُکیا ہویا راز، جِینویں اُوں آپنڑے خدمت گُزار نبیاں کُوں ڈِتا ہا، کُھل تے پُورا تھی ویسی۔“ وَل او اواز جیہڑی اسمان کنُوں سُنڑائی ڈِتی ہئی، اُوں میکُوں ولا آکھیا جو ”اگُوں ودھ تے او طُومار گِھن چا جیہڑا سمندر تے خشکی اُتے کھڑے ہوئے فرشتہ دے ہتھ ءچ کُھلیا پِیا ہے۔“ اِیں واسطے مَیں اُوں فرشتہ دے کولھ گِیا تے اُونکُوں آکھیا ”ایہ طُومار میکُوں ڈے چا۔“ اُوں آکھیا، ”اِینکُوں گِھن تے کھا گِھن۔ ایہ تیڈے ڈھیڈ کُوں کوڑا کر ڈیسی پر تیڈے مُنہ ءچ شہد وانگُوں مِٹھا لگسی۔“ مَیں او طُومار فرشتہ دے ہتھ کنُوں گِھن تے کھا گِھدا۔ او میڈے مُنہ ءچ تاں شہد وانگُوں مِٹھا لگیا پر کھاوݨ دے بعد میڈا ڈھیڈ کوڑا تھی گِیا۔ تے میکُوں ڈسایا گِیا جو ”تیکُوں بہُوں ساریاں اُمتاں، قوماں، زباناں تے بادشاہاں دے بارے ءچ ولا کنُوں نبُوّت کرݨ ضرور ہے۔“ وَل میکُوں ناپنڑ کیتے ڈنڈے جِیہا ہِک کانا ڈِتا گِیا تے ڈسایا گِیا جو ”اُٹھی تے خُدا دی ہیکل تے قُربان گاہ کُوں ناپ تے اُتھاں عبادت کرݨ آلیاں کُوں گِنڑ ۔ پر ہیکل دے باہر آلے صحن کُوں چھوڑ ڈیویں تے اُونکُوں نہ ناپیں کیوں جو او غیر قوماں کُوں ڈے ڈِتا گئے۔ او بِتالیہہ مہینیاں تئیں مُقدّس شہر کُوں لتڑیندے راہسن۔ مَیں آپنڑے ڈُو گواہاں کُوں اِختیار ڈیساں تے او ٹاٹ ولھیٹ تے ہِک ہزار ڈُو سو سَٹھ (1,260) ڈینہہ تئیں نبُوّت کریسن۔“ ایہ زیتون دے ڈُو درخت تے ڈُو چراغ دان ہِن جیہڑے زمین دے مالک دے حضُور کھڑے ہِن ۔ جے کوئی اُنہاں کُوں نُقصان پُچاوݨ چاہوے تاں اُنہاں دے مُنہ ءچوں بھاہ نِکلدی ہے تے اُنہاں دے دُشمنڑاں کُوں کھا ویندی ہے۔ جیہڑا کوئی اُنہاں کُوں نُقصان پُچاوݨ چاہسی، او وی ضرور اِینویں ای ہلاک تھیسی۔ اُنہاں کُوں ایہ اِختیار ہے جو اسمان کُوں بند کر ڈیوݨ تاں جو اُنہاں دی نبُوّت دے ڈینہاں ءچ بارش نہ تھیوے۔ تے اُنہاں کُوں پانڑی اُتے اِختیار ہے جو خون ءچ تبدیل کر ڈیوݨ تے جِیں ویلے وی چاہوݨ قِسم قِسم دیاں آفتاں، زمین اُتے نازل کرݨ ۔ جِیں ویلے او آپنڑی گواہی ڈے ڈیسن تاں بے تَل کھڈے کنُوں نِکلنڑ آلا حیوان اُنہاں اُتے حملہ کریسی تے اُنہاں اُتے غالب آ تے اُنہاں کُوں مار سٹیسی۔ تے اُنہاں دیاں لاشاں اُوں وڈے شہر دیاں سڑکاں اُتے پئیاں راہسن جِینکُوں علامتی طور تے سدُوم تے مِصر دا ناں ڈِتا گئے۔ اُوں شہر ءچ ساڈا خُداوند وی صلیب اُتے چڑھایا گِیا ہا۔ تے مختلف اُمتاں، قبیلیاں، زباناں تے قوماں دے لوک اُنہاں دیاں لاشاں کُوں ساڈھے ترے ڈینہہ تئیں ڈیدھے راہسن تے اُنہاں کُوں دفناوݨ نہ ڈیسن۔ زمین دے راہنڑ آلے اُنہاں دی موت اُتے شادمان تھی تے خوشی منیسن تے ہِک ڈُوجھے کُوں تحفے بھجیسن کیوں جو اُنہاں ڈوہائیں نبیاں، زمین آلیاں کُوں ستایا ہا۔ پر ساڈھے ترے ڈینہہ بعد خُدا دی طرفوں اُنہاں ءچ زندگی دا دم پُھونکیا گِیا تے او آپنڑے پیراں اُتے کھڑے تھی گئے۔ اُنہاں دے ڈیکھنڑ آلیاں اُتے بہُوں خوف چھا گِیا۔ وَل اُنہاں کُوں اسمان کنُوں ہِک اُچی اواز سُنڑائی ڈِتی جیہڑی ایہ آدھی پئی ہئی جو ”اِتھاں اُتے آ ونجو۔“ تے او بدلاں اُتے سوار تھی تے دُشمنڑاں دے ڈیدھے ڈیدھے اسمان اُتے چلے گئے۔ اُوں ویلے ہِک وڈا زلزلہ آیا تے شہر دا ڈاہواں حصہ ڈھے پِیا۔ سَت ہزار لوک اُوں زلزلے نال مارے گئے تے جیہڑے باقی بچ گئے، اُنہاں دہشت زدہ تھی تے اسمان دے خُدا دی تعریف کیتی۔ ڈُوجھا افسوس تھی گِیا۔ ہُنڑ ڈیکھو تریجھا افسوس جلدی تھیوݨ آلا ہے۔ جِیں ویلے ستویں فرشتے آپنڑا نرسِنگا وجایا تاں اسمان کنُوں اُچیاں اوازاں آوݨ لگیاں جیہڑیاں ایہ آدھیاں پئیاں ہَن، ”دُنیا دی بادشاہی ساڈے خُداوند تے اُوندے مسیح دی تھی گئی ہے تے او ہمیشاں تئیں بادشاہی کریندا راہسی۔“ تے اُنہاں چوِّیہہ بزُرگاں جیہڑے خُدا دے حضُور آپنڑے آپنڑے تخت اُتے بیٹھے ہَن، مُنہ دے بھار ڈھے تے خُدا کُوں سجدہ کیتا تے آکھیا جو ”اے خُداوند، قادر ِ مُطلق خُدا، تُوں جیہڑا ہیں تے ہَویں اساں تیڈا شُکر کریندے ہیں کیوں جو تَیں آپنڑے عظیم اِختیار کُوں اِستعمال کر تے بادشاہی کیتی ۔ قوماں کاوڑ ءچ آ گئیاں تے تیڈا عذاب نازل تھیّا۔ ہُنڑ ویلا آ گِیا ہے جو مُردیاں دی عدالت کیتی ونجے تے تُوں آپنڑے خدمت گُزار نبیاں تے مُقدّساں کُوں تے چھوٹے وڈیاں کُوں جیہڑے تیڈا خوف منیندے ہِن، اجر بخشیں تے جِنہاں زمین اُتے تباہی مچائی ہئی اُنہاں کُوں تباہ کر ڈِتا ونجے۔“ وَل خُدا دی ہیکل جیہڑی اسمان ءچ ہے کھول ڈِتی گئی تے اُوندے اندر اُوندے عہد دا صندوق نظر آیا۔ تے بجلیاں تے گجکار دیاں اوازاں پیدا تھیّاں، زلزلہ آیا تے بہُوں ننڑاوے پئے۔ وَل اسمان اُتے ہِک عظیم نشان ڈِکھالی ڈِتا یعنی ہِک عورت سِجھ کُوں ولھیٹی پئی ہئی تے چَن اُوندے پیراں تلے ہئی تے بارہاں تاریاں دا تاج اُوندے سر اُتے ہا ۔ او عورت حاملہ ہئی تے چیخدی پئی ہئی کیوں جو اُونکُوں بال جمنڑ دی تکلیف تھیندی پئی ہئی۔ وَل اسمان اُتے ہِک بِیا نشان ڈِکھالی ڈِتا یعنی ہِک بہُوں وڈا لال اژدہا جیندے سَت سر تے ڈاہ سینگ ہَن تے ہر ہِک سر اُتے ہِک تاج ہا۔ اُوندی پُچھڑ اسمان دے ہِک تِہائی تارے چِھک تے اُنہاں کُوں زمین اُتے سَٹ ڈِتا۔ وَل اژدہا اُوں عورت دے سامنڑے جیہڑی بال جمنڑ آلی ہئی، وَنج کھڑا تھیّا تاں جو جِیں ویلے او بال جمّے تاں اُونکُوں کھا ونجے۔ اُوں عورت ہِک پوتر جمیا، ہِک ایجھے بال کُوں جیہڑا ”لُوہے دی سوٹی نال ساریاں قوماں اُتے حکُومت کرݨ کُوں ہا۔ “ وَل اُوندے بال کُوں اُتھوں چا تے خُدا تے خُدا دے تخت دے کولھ پُچا ڈِتا گِیا۔ تے او عورت بیابان ءچ بھج گئی جِتھاں خُدا اُوندے کیتے ہِک جاہ تیار کیتی ہئی تاں جو اُتھاں ہِک ہزار ڈُو سو سَٹھ (1,260) ڈینہہ تئیں اُوندی ڈیکھ بھال کیتی ونجے۔ وَل اسمان اُتے جنگ تھئی۔ مِیکائیل تے اُوندے فرشتے اژدہا نال لڑے۔ اژدہا تے اُوندے فرشتے اُنہاں نال لڑے پر اُنہاں دے سامنڑے کھڑ نہ سگے تے اِیندے بعد اسمان اُتے اُنہاں کیتے جاہ نہ ریہی۔ تے او وڈا اژدہا یعنی اُوہو پُرانڑا نانگ جِیندا ناں ابلیس تے شیطان ہے تے جیہڑا ساری دُنیا کُوں گُمراہ کریندے، او تے اُوندے فرشتے وی زمین اُتے سَٹ ڈِتے گئے۔ وَل مَیں اسمان کنُوں ہِک اُچی اواز سُنڑی جیہڑی ایہ آدھی پئی ہئی جو ”ہُنڑ ساڈے خُدا دی نجات، قُدرت تے بادشاہی تے اُوندے مسیح دا اِختیار ظاہر تھئے کیوں جو ساڈے بِھرانواں اُتے اِلزام لاوݨ آلا جیہڑا ڈینہہ رات خُدا دے حضُور اُنہاں اُتے اِلزام لیندا راہندے، تلے سَٹ ڈِتا گئے۔ او لوک لیلے دے خون تے آپنڑی گواہی ڈیوݨ دے سببّوں اُوندے اُتے غالب آئے، اُنہاں آپنڑیاں زندگیاں کُوں عزیز نہ سمجھیا، اِتُھوں تئیں جو موت کُوں گَل لا گِھدا۔ اِیں واسطے اسمانو تے اُنہاں ءچ راہنڑ آلیو، خوشی مناؤ۔ پر زمین تے سمندر ءچ راہنڑ آلیو، تُہاڈے اُتے افسوس، کیوں جو ابلیس تُہاڈے کولھ تلے سَٹ ڈِتا گئے۔ او بہُوں قہر ءچ ہے کیوں جو او جانڑدے جو اُوندے کولھ بہُوں گھٹ وقت ہے۔“ جِیں ویلے اژدہے ڈِٹھا جو او زمین اُتے سَٹ ڈِتا گئے تاں اُوں عورت کُوں ستاوݨ کیتے اُوندے پِچُھوں پے گِیا جئیں پوتر جمیا ہا۔ پر اُوں عورت کُوں ہِک وڈے عقاب دے ڈُو کھمب ڈِتے گئے تاں جو او اژدہے دی پہنچ تُوں باہر نِکل تے بیابان ءچ آپنڑے اُوں مقام دو اُڈ ونجے، جِتھاں ہِک زمانے، زمانیاں، تے ادھے زمانے تئیں اُوندی پرورش کیتی ویسی۔ اژدہے آپنڑے مُنہ کنُوں اُوں عورت دے پِچُھوں دریا وانگُوں پانڑی وہا ڈِتا تاں جو اُونکُوں سیلاب ءچ وہا ڈیوے۔ پر زمین اُوں عورت دی مدد کیتی تے آپنڑا مُنہ کھول تے اُوں دریا کُوں پی گِھدا جیہڑا اژدہے آپنڑے مُنہ کنُوں وہایا ہا۔ وَل اژدہے کُوں عورت اُتے بہُوں کاوڑ آئی تے او اُوندے باقی بالاں نال یعنی اُنہاں نال جیہڑے خُدا دے حُکماں اُتے عمل کریندے ہِن تے یسُوع دی گواہی ڈیوݨ اُتے قائم ہِن، جنگ کرݨ گِیا۔ تے اژدہا سمندر دے کنارے اُتے کھڑا تھی گِیا۔ وَل مَیں ہِک حیوان کُوں سمندر ءچوں نِکلدے ڈِٹھا۔ اُوندے ڈاہ سینگ تے سَت سر ہَن تے سینگاں اُتے ڈاہ تاج ہَن۔ اُوندے ہر سر اُتے کُفر دے ناں لِکھے ہَن۔ جیہڑے حیوان کُوں مَیں ڈِٹھا ہا، اُوندی شکل چیتے وانگُوں ہئی، پیر ریچھ وانگُوں تے مُنہ ببرشیر آلی کار ہا۔ اژدہے آپنڑی قُدرت، آپنڑا تخت تے وڈا اِختیار اُوں حیوان کُوں ڈے ڈِتا۔ مَیں اُوندے سِراں ءچوں ہِک اُتے ہلاک کرݨ آلے زخم دا نشان ڈِٹھا۔ او زخم ٹھیک تھی گِیا تے سبھ دُنیا آلے حیران تھی تے اُوں حیوان دے پِچُھوں تھی پئے۔ اُنہاں اژدہے دی پُوجا کیتی کیوں جو اُوں آپنڑا اِختیار اُوں حیوان کُوں ڈے ڈِتا ہا۔ اُنہاں اُوں حیوان دی وی پُوجا کیتی تے آکھنڑ لگے جو ”اِیں حیوان وانگُوں کوݨ ہے؟ کوݨ اِیندے نال لڑ سگدے؟“ حیوان کُوں وڈے وڈے بول بولنڑ تے کُفر بَکنڑ کیتے ہِک مُنہ ڈِتا گِیا۔ اُونکُوں اِختیار ڈِتا گِیا جو او بِتالیہہ مہینے تئیں ایہ کم کریندا راہوے۔ اُوں خُدا دی شان ءچ کُفر بَکنڑ کیتے آپنڑا مُنہ کھولیا جو اُوندے ناں تے اُوندی سکونت گاہ دے خلاف یعنی اسمان ءچ راہنڑ آلیاں دے خلاف کُفر بکے۔ اُونکُوں مُقدّساں نال جنگ کرݨ تے اُنہاں اُتے غالب آوݨ دی طاقت ڈِتی گئی، تے ہر قبیلے، اُمت، زبان تے قوم اُتے اِختیار ڈِتا گِیا۔ زمین دے سبھ راہنڑ آلے اُوں حیوان دی عبادت کریسن، یعنی او سبھ جِنہاں دے ناں دُنیا دے شروع تُوں اُوں لیلے دی کتاب ِ حیات ءچ نئیں لِکھے گئے جیہڑا ذبح تھئے۔ جیندے کَن ہووݨ، او سُنڑ گِھنے۔ ”جِنہاں کُوں قیدی بنڑنڑیں او قیدی بنڑسن۔ جِنہاں کُوں تلوار نال قتل تھیونڑے او تلوار نال قتل تھیسن ۔“ اِیں واسطے مُقدّساں کُوں صبر کرݨ تے اِیمان ءچ مضبوط راہنڑ دی خاص ضرورت ہے۔ وَل مَیں ہِک بئے حیوان کُوں زمین ءچوں نِکلدے ڈِٹھا۔ اُوندے ڈُو سینگ ہَن جیہڑے ہِک لیلے دے سینگاں وانگُوں ہَن ، پر اژدہے وانگُوں بُولیندا ہا ۔ او پہلے حیوان دا سارا اِختیار اُوندی خاطر چلیندا ہا تے دُنیا تے اُوندے راہنڑ آلیاں تُوں اُوں پہلے حیوان دی عبادت کرویندا ہا، یعنی اُوں حیوان دی جِیندا ہلاک کرݨ آلا زخم ٹھیک تھی گِیا ہا۔ او وڈے وڈے کرِشمے ڈکھیندا ہا، اِتُھوں تئیں جو لوکاں دے اکھیں دے سامنڑے اسمان کنُوں بھاہ نازل کر ڈیندا ہا۔ اُنہاں کرِشمیاں دے ذریعے جیہڑے اُونکُوں اُوں پہلے حیوان دی خاطر ڈِکھاوݨ دا اِختیار ڈِتا گِیا ہا، او زمین آلیاں کُوں گُمراہ کریندا ہا۔ تے اُنہاں کُوں حُکم ڈیندا ہا جو اُوں حیوان دا بُت بنڑاؤ جِینکُوں تلوار نال ہلاک کرݨ آلا زخم لگیا ہا پر وَل وی او زندہ ہے۔ اُونکُوں پہلے حیوان دے بُت ءچ دم پُھونکنڑ دا اِختیار ڈِتا گِیا تاں جو حیوان دا بُت بول سگے تے جیہڑے اُوں بُت کُوں سجدہ کرݨ دا اِنکار کرݨ، اُنہاں کُوں قتل کروا چھوڑے۔ چھوٹیاں، وڈیاں، امیر، غریب، ازاد، غُلام بلکہ سبھ لوکاں کُوں ڈُوجھے حیوان مجبور کیتا جو او سجے ہتھ اُتے یا متھے اُتے نشان لواوݨ۔ تے صرف او لوک جِنہاں اُتے پہلے حیوان دا نشان یعنی اُوندا ناں یا اُوندے ناں دا عدد ہوسی، خرید و فروخت کر سگسن۔ اِیں گالھ کُوں سمجھنڑ کیتے حِکمت دی لوڑ ہے۔ جیہڑا سمجھدار ہے، او اِیں حیوان دے عدد دا حساب کر گِھنے کیوں جو ایہ ہِک بندے دا عدد ہے تے اُوندا عدد چِھی سو چِھیئیٹھ (666) ہے۔ وَل مَیں نِگاہ کیتی تاں ڈِٹھا جو او لیلا صِیُّون پہاڑ اُتے کھڑا ہے تے اُوندے نال ہِک لکھ چوتالیہہ ہزار (1,44,000) بندے وی کھڑے ہَن جِنہاں دے متھے اُتے اُوندا تے اُوندے باپ دا ناں لِکھیا ہا۔ وَل مَیں اسمان کنُوں ہِک ایجھی اواز سُنڑی جیہڑی زور نال واہندے پانڑی وانگُوں تے بجلی دی ہِک وڈی گجکار وانگُوں ہئی۔ تے ایہ اواز جیہڑی میں سُنڑی ہئی اِینویں ہئی جِینویں سِتار وجاوݨ آلے آپنڑے ساز وجیندے پئے ہووݨ۔ او تخت، چارے جانداراں تے بزُرگاں دے سامنڑے ہِک نواں گیت گاندے پئے ہَن۔ تے اُنہاں ہِک لکھ چوتالیہہ ہزار بندیاں دے علاوہ جیہڑے دُنیا ءچوں مُل گِھدے گئے ہَن، کوئی بِیا اُوں گیت کُوں نہ سِکھ سگیا۔ ایہ او لوک ہِن جِنہاں آپنڑے آپ کُوں عورتاں نال ناپاک نئیں کیتا بلکہ کنوارے ہِن۔ ایہ او ہِن جیہڑے لیلے دے پِچُھوں پِچُھوں ٹُردے ہِن، جِتھاں وی او ویندے۔ او آدمیاں ءچوں مُل گِھدے گئے ہِن تاں جو او خُدا تے لیلے کیتے فصل دا پہلے پھل ہووݨ۔ اُنہاں دے مُنہ ءچوں کڈھائیں کُوڑ نئیں نِکلیا، بلکہ او بے عیب ہِن۔ وَل مَیں ہِک بئے فرشتے کُوں اسمان ءچ اُڈدے ڈِٹھا۔ اُوندے کولھ زمین دے راہنڑ آلیاں یعنی ہر قوم، قبیلے، اہل ِ زبان تے اُمت کُوں سُنڑاوݨ کیتے ابدی خوشخبری ہئی۔ اُوں اُچی اواز ءچ آکھیا جو ”خُدا کنُوں ڈرو تے اُوندی تمجید کرو کیوں جو اُوندے عدالت کرݨ دا ویلا آݨ پُجیا ہے۔ اُونکُوں ای سجدہ کرو جئیں اسمان، زمین، سمندر تے پانڑی دے چشمے خلق کیتے۔“ اُوندے بعد ہِک ڈُوجھا فرشتہ ایہ آدھا ہویا آیا جو ”ڈھے پِیا، او عظیم شہر بابل ڈھے پِیا جئیں آپنڑی حرام کاری تے مستی دا شراب ساریاں قوماں کُوں پِلائی۔“ وَل اُوندے بعد تریجھا فرشتہ آیا تے اُچی اواز نال آکھنڑ لگا جو ”جیہڑا کوئی اُوں حیوان تے اُوندے بُت دی عبادت کرے تے اُوندا نشان آپنڑے متھے یا ہتھ اُتے لاوے، اُونکُوں وی خُدا دے قہر دی شراب پِیونڑی پوسی جیہڑی بغیر ملاوٹ دے، اُوندے غضب دے پیالہ ءچ بھری گئی ہے ۔ تے او پاک فرشتیاں تے لیلے دے سامنڑے بھاہ تے گندھک دے عذاب ءچ مُبتلا راہسی۔ ایجھے لوکاں دے عذاب دا دُھواں ہمیشاں تئیں اُٹھدا راہسی۔ جیہڑے حیوان تے اُوندے بُت دی عبادت کریندے ہِن تے اُوندے ناں دا نشان لیندے ہِن اُنہاں کُوں ڈینہہ رات ارام نہ مِلسی۔“ اِیں واسطے مُقدّساں یعنی خُدا دے حُکماں اُتے عمل کرݨ آلیاں تے یسُوع اُتے اِیمان رکھنڑ آلیاں کُوں صبر کرݨ دی ضرورت ہے۔ وَل مَیں اسمان کنُوں ہِک اواز کُوں ایہ آدھے ہوئے سُنڑیا، ”لِکھ! مُبارک ہِن او جیہڑے ہُنڑ کنُوں خُداوند ءچ مردے ہِن۔“ رُوح القُدس فرمیندے، ”ہا! او آپنڑی محنت تُوں چُھٹ تے ارام پیسن کیوں جو اُنہاں دے اعمال اُنہاں دے پِچُھوں پِچُھوں آ تے اُنہاں دے نال راہسن۔“ وَل مَیں نِگاہ کیتی تاں ڈِٹھا جو ہِک چِٹا بدّل ہے تے اُوندے اُتے اِبنِ آدم جِیہا کوئی بیٹھا ہے جیندے سر اُتے سونے دا تاج تے ہتھ ءچ تیز ڈاتری ہے۔ وَل ہیکل ءچوں ہِک بِیا فرشتہ نِکلیا تے بدّل اُتے بیٹھے ہوئے بندے کُوں اُچی اواز ءچ آکھیا جو ”آپنڑی ڈاتری چلا تے کپ۔ فصل کپنڑ دا ویلا آ گئے، کیوں جو زمین دی فصل پک گئی ہے۔“ بس اُوں جیہڑا بدّل اُتے بیٹھا ہا، آپنڑی ڈاتری زمین اُتے چلائی تے فصل دی کٹائی تھی گئی۔ وَل ہِک بِیا فرشتہ اُوں ہیکل ءچوں نِکلیا جیہڑی اسمان اُتے ہے۔ اُوندے ہتھ ءچ وی تیز ڈاتری ہئی۔ وَل ہِک بِیا فرشتہ جِیندا بھاہ اُتے اِختیار ہا، قُربان گاہ کنُوں آیا تے تیز ڈاتری آلے فرشتہ کُوں اُچی اواز ءچ آکھیا جو ”آپنڑی ڈاتری چلا تے زمین دی ویل کنُوں انگُور دے گُچھے کپ گِھن کیوں جو اُوندے انگُور پک گئے ہِن۔“ اُوں فرشتے آپنڑی ڈاتری زمین اُتے چَلائی تے اُوندے انگُور کٹھے کر تے خُدا دے قہر دے رَس کڈھنڑ آلے وڈے حوض ءچ سَٹ ڈِتے۔ وَل اُنہاں کُوں شہر کنُوں باہر اُوں وڈے حوض ءچ پیراں تلے لتاڑ ڈِتا گِیا تے حوض ءچوں اِتنا خون وہیا جو او گھوڑیاں دیاں لگاماں تئیں پُج تے تقریباً ہِک سو اسّی (180) مِیل تئیں واہندا گِیا۔ وَل مَیں اسمان ءچ ہِک بِیا عظیم تے حیران کرݨ آلا نشان ڈِٹھا یعنی سَت فرشتے سَت آفتاں گِھدی کھڑے ہَن۔ ایہ آفتاں آخری ہِن کیوں جو اِنہاں نال خُدا دا قہر ختم تھی ویندے۔ وَل مَیں شیشے وانگُوں ہِک سمندر ڈِٹھا جیندے ءچ بھاہ رَلی پئی ہئی۔ اُوں شیشے دے سمندر دے کولھ او لوک کھڑے ہَن جیہڑے حیوان تے اُوندے بُت تے اُوندے ناں دے عدد اُتے غالب آئے ہَن۔ اُنہاں دے ہتھاں ءچ خُدا دے ڈِتے ہوئے سِتار ہَن۔ تے او خُدا دے بندہ مُوسیٰ دا گیت تے لیلے دا گیت گاندے پئے ہَن، ”اے خُداوند، قادر ِ مُطلق خُدا! تیڈے کم کتنے عظیم تے عجیب ہِن۔ اے قوماں دے ازلی بادشاہ! تیڈیاں راہاں راست تے سچیاں ہِن۔ اے خُداوند! کوݨ تیڈا خوف نہ منیسی تے کوݨ تیڈے ناں دی تمجید نہ کریسی؟ کیوں جو صرف تُوں ای قدُّوس ہیں۔ ساریاں قوماں آ تے تیڈے سامنڑے سجدہ کریسن کیوں جو تیڈے صداقت دے کم ظاہر تھی گئے ہِن۔“ اِنہاں گالھیں دے بعد مَیں ڈِٹھا جو عہد دا تمبُو یعنی ہیکل اسمان ءچ کھول ڈِتی گئی۔ تے اُوں ہیکل ءچوں سَت فرشتے سَت آفتاں گِھدی ہوئے باہر آئے۔ او صاف چمکدی ہوئی لینن دی پُشاک پاتے ہوئے ہَن تے سینے اُتے سنہری سینہ بند بدھی کھڑے ہَن۔ وَل چار جانداراں ءچوں ہِک، اُنہاں سَت فرشتیاں کُوں سونے دے سَت مُنگر ڈِتے جیہڑے ہمیشاں تئیں زندہ راہنڑ آلے خُدا دے قہر نال بھرے پئے ہَن۔ ساری ہیکل خُدا دے جلال تے اُوندی قُدرت دے دُھوئیں نال بھریج گئی تے اُنہاں فرشتیاں دیاں سَت آفتاں ختم تھی ونجنڑ تئیں کوئی اُوں ہیکل ءچ داخل نہ تھی سگیا۔ وَل مَیں ہیکل ءچوں ہِک اُچی اواز سُنڑی جئیں اُنہاں ستّے فرشتیاں کُوں ایہ آکھیا، ”ونجو، خُدا دے قہر دے سَت مُنگراں کُوں زمین اُتے وِیٹ ڈیؤ۔“ پہلا فرشتہ گِیا تے اُوں آپنڑا مُنگر زمین اُتے وِیٹ ڈِتا۔ اِیندے نال جیہڑے لوکاں اُتے اُوں حیوان دا نشان لگا ہا تے جیہڑے اُوں بُت دی عبادت کریندے ہَن، اُنہاں دے جِسماں اُتے بہُوں بُرے تے درد ناک مَلے نِکل آئے۔ وَل ڈُوجھے فرشتے آپنڑا مُنگر سمندر اُتے وِیٹ ڈِتا تے سارا سمندر مُردے دے خون وانگُوں تھی گِیا تے سمندر ءچ سارے جاندار مر گئے۔ وَل تریجھے فرشتے آپنڑا مُنگر دریاواں تے چشمیاں دے پانڑی اُتے وِیٹ ڈِتا تے اُنہاں دا پانڑی وی خون بنڑ گِیا۔ وَل مَیں پانڑیاں اُتے اِختیار رکھنڑ آلے فرشتہ کُوں ایہ آدھے ہوئے سُنڑیا جو ”اے قدُّوس خُدا، تُوں جیہڑا ہیں تے جیہڑا ہَویں، تُوں ایجھے فیصلے کرݨ ءچ عادل ہیں، کیوں جو اُنہاں تیڈے مُقدّساں تے نبیاں دا خون وہایا تے تَیں اُنہاں کُوں پِیوݨ کیتے خون ای ڈِتا۔ او اِیندے ای لائق ہِن۔“ وَل مَیں قُربان گاہ ءچوں ایہ اواز سُنڑی جو ”اے خُداوند، قادر ِ مُطلق خُدا، بے شک تیڈے فیصلے سچے تے راست ہِن۔“ وَل چوتھے فرشتے آپنڑا مُنگر سِجھ اُتے وِیٹ ڈِتا تے سِجھ کُوں لوکاں کُوں بھاہ نال ساڑن دا اِختیار ڈِتا گِیا۔ لوک گرمی دی شِدت پارُوں سڑ گئے تے خُدا دے ناں دی توہین کرݨ لگے، جیہڑا اِنہاں آفتاں اُتے اِختیار رکھیندے۔ اُنہاں توبہ کرݨ تے خُدا دی تعریف کرݨ تُوں اِنکار کر ڈِتا۔ وَل پنجویں فرشتے آپنڑا مُنگر حیوان دے تخت اُتے وِیٹ ڈِتا جیندے نال اُوندی بادشاہی ءچ اندھارا تھی گِیا۔ لوک شدید درد دے سببّوں آپنڑیاں زباناں کپنڑ لگے، تے آپنڑے ڈُکھاں تے مَلّیاں دی وجہ کنُوں اسمان دے خُدا دے ناں دی توہین کرݨ لگے پر اُنہاں آپنڑے کماں تُوں توبہ نہ کیتی۔ وَل چِھینویں فرشتے آپنڑا مُنگر وڈے فرات دریا اُتے وِیٹ ڈِتا تے دریا دا پانڑی سُک گِیا تاں جو مشرق دے بادشاہاں دے آوݨ کیتے راہ تیار تھی ونجے۔ وَل مَیں اژدہے دے مُنہ کنُوں تے حیوان دے مُنہ کنُوں تے کُوڑے نبی دے مُنہ کنُوں ڈیڈراں دی شکل وانگُوں ترے ناپاک رُوحاں کُوں نِکلدے ڈِٹھا۔ ایہ بدرُوحاں ہِن جِنہاں دا کم شیطانی کرِشمے ڈِکھاوݨ ہے۔ ایہ بدرُوحاں ساری دُنیا دے بادشاہاں دے کولھ ویندیاں ہِن تاں جو اُنہاں کُوں اُوں جنگ کیتے جمع کرݨ جیہڑی قادر ِ مُطلق خُدا دی عدالت دے عظیم ڈینہہ تھیسی۔ [خُداوند فرمیندے] ”ڈیکھو! مَیں چور وانگُوں آندا پِیا ہاں مُبارک ہے او جیہڑا جاگدا راہندے تے آپنڑی پُشاک کُوں حفاظت نال رکھیندے۔ اِینویں نہ تھیوے جو او ننگا پِھرے تے لوک اُوندا ننگا پن ڈیکھنڑ۔“ وَل بدرُوحاں اُنہاں سارے بادشاہاں کُوں اُوں جاہ جمع کیتا جِیندا ناں عبرانی ءچ ”ہرمجدون “ ہے۔ وَل ستویں فرشتے آپنڑا مُنگر ہوا اُتے وِیٹ ڈِتا تے ہیکل دے تخت ءچوں ہِک وڈی اواز ایہ آدھی ہوئی سُنڑائی ڈِتی جو ”پُورا تھی گِیا!“ وَل بجلیاں تے گجکار دیاں آوازاں پیدا تھیّاں تے ہِک بہُوں وڈا زلزلہ آیا۔ اِنسان دے زمین اُتے پیدا تھیوݨ دے ویلے تُوں اَج تئیں ایجھا زلزلہ کڈھائیں نہ آیا ہا۔ تے او عظیم شہر بابل پھٹ تے ترے ٹوٹے تھی گِیا تے قوماں دے شہر وی تباہ تھی گئے۔ اِینویں خُدا اُوں وڈے شہر بابل دیاں بُرائیاں یاد کیتیاں تاں جو اُونکُوں آپنڑے قہر دے شراب نال بھریا ہویا مُنگر پِلاوے۔ ہر ہِک جزیرہ آپنڑی جاہ کنُوں کِھسک گِیا تے پہاڑاں دا پتا نہ چلیا۔ تے اسمان کنُوں لوکاں اُتے مَنڑ مَنڑ دے ننڑاوے ڈھٹھے۔ ایہ آفت بہُوں ای سخت ہئی، اِیں واسطے لوک ننڑاوے ڈھاوݨ دی آفت دی وجہ کنُوں خُدا دے ناں دی توہین کرݨ لگے۔ اُنہاں سَت فرشتیاں ءچوں ہِک جیندے کولھ سَت مُنگر ہَن، میڈے کولھ آ تے آکھیا جو ”میڈے نال آ۔ مَیں تیکُوں ڈِکھیساں جو اُوں وڈی طوائف کُوں کیا سزا مِلنڑ آلی ہے جیہڑی پانڑیاں اُتے بیٹھی ہے۔ زمین دے بادشاہاں اُوندے نال زِنا کیتا تے زمین دے راہنڑ آلے اُوندی حرام کاری دی شراب نال دُھت تھی گئے۔“ او فرشتہ میکُوں رُوح ءچ بیابان ءچ گِھن گِیا۔ اُتھاں مَیں ہِک عورت کُوں رتّے رنگ آلے ہِک ایجھے حیوان اُتے سوار ڈِٹھا جیندے سَت سر تے ڈاہ سینگ ہَن تے جیندے سارے جِسم اُتے کُفر دے ناں لِکھے ہَن۔ او عورت جامنی تے رتّے رنگ آلے کپڑے پاتی تے سونے دے زیوراں، قیمتی پتھراں تے موتیاں نال سجی ہوئی ہئی۔ اُوندے ہتھ ءچ ہِک سنہری پیالہ ہا جیہڑا مکرُوہ چیزاں تے اُوندی حرام کاری دی ناپاکی نال بھریا پِیا ہا۔ اُوندے متھے اُتے ایہ راز آلا ناں لِکھیا ہا، ”عظیم شہر بابل، سبھ طوائفاں تے زمین دیاں مکرُوہ چیزاں دی ماء۔“ مَیں ڈِٹھا جو او عورت مُقدّساں تے یسُوع دے شہیداں دا خون پی پی تے مدہوش تھی گئی ہئی۔ اُونکُوں ڈیکھ تے میکُوں بہُوں حیرانگی تھئی۔ پر اُوں فرشتے میکُوں آکھیا جو ”تُوں کیوں حیران تھی گِیا ہیں؟ مَیں تیکُوں اُوں عورت دا تے اُوں حیوان دا راز ڈسیندا ہاں، جیندے اُتے او سوار ہے تے جیندے سَت سر تے ڈاہ سینگ ہِن۔ جیہڑا حیوان تَیں ڈِٹھے، او پہلے ہا، پر ہُنڑ نئیں۔ او بے تَل کھڈے کنُوں نِکلسی تے ہلاک تھی ویسی۔ تے زمین دے او راہنڑ آلے جِنہاں دے ناں دُنیا بنڑݨ کنُوں پہلے کتاب ِ حیات ءچ لِکھے نئیں گئے، اُوں حیوان کُوں ڈیکھ تے حیران رہ ویسن، کیوں جو او پہلے ہا، پر ہُنڑ نئیں تے وَل آوݨ آلا ہے۔ اِیں گالھ کُوں سمجھنڑ کیتے حِکمت دی لوڑ ہے، او ستّے سر سَت پہاڑ ہِن جِنہاں اُتے او عورت بیٹھی ہے۔ او سَت بادشاہ وی ہِن۔ پنج تاں ختم تھی گئے ہِن، ہِک موجود ہے تے ہِک اجنڑ آیا نئیں۔ جِیں ویلے او آسی تاں صرف کُجھ عرصے کیتے راہسی۔ جیہڑا حیوان پہلے ہا تے ہُنڑ نئیں، او اٹھواں بادشاہ ہے۔ پر او اُنہاں ستّاں ءچوں ہے تے ہلاک تھی ویسی۔ او ڈاہ سینگ جیہڑے تَیں ڈِٹھے، ڈاہ بادشاہ ہِن جِنہاں کُوں ہُنڑ تئیں بادشاہی نئیں مِلی پر اُنہاں کُوں صرف ہِک گھنٹے کیتے اُوں حیوان دے نال بادشاہ دا اِختیار مِلسی۔ اُنہاں ساریاں دا اِرادہ ہِک ہے تے او آپنڑی قُدرت تے اِختیار اُوں حیوان دے حوالہ کر ڈیسن۔ او لیلے نال جنگ کریسن پر لیلا اُنہاں اُتے غالب آسی کیوں جو او خُداونداں دا خُداوند تے بادشاہاں دا بادشاہ ہے۔ اُوندے نال اُوندے سڈے ہوئے، چُنڑے ہوئے تے وفادار لوک وی ہِن۔“ وَل اُوں فرشتے میکُوں آکھیا جو ”جِنہاں پانڑیاں اُتے تُوں اُوں وڈی طوائف کُوں ڈِٹھے، او اُمتاں، گروہ، قوماں تے اہل ِ زبان ہِن۔ او حیوان تے ڈاہ سینگ جِنہاں کُوں تَیں ڈِٹھے، اُوں طوائف کنُوں نفرت کریسن تے اُونکُوں تباہ کر تے ننگا کر ڈیسن۔ او اُوندا گوشت کھا گِھنسن تے اُونکُوں بھاہ ءچ سَٹ تے ساڑ ڈیسن۔ کیوں جو خُدا آپنڑا مقصد پُورا کرݨ کیتے اُنہاں دے دل ءچ ایہ گالھ پیسی جو او ہِکی صلاح نال آپنڑے شاہی اِختیار کُوں اُوں حیوان دے حوالہ کر ڈیوݨ جئیں تئیں خُدا دے گالھیں پُوریاں نہ تھی ونجنڑ۔ تے جئیں عورت کُوں تَیں ڈِٹھے، او اُوہو عظیم شہر ہے جیہڑا زمین دے بادشاہاں اُتے حکُومت کریندے۔“ اِیندے بعد مَیں ہِک بئے فرشتہ کُوں اسمان کنُوں لہندے ڈِٹھا۔ او وڈے اِختیار آلا ہا تے اُوندے نُور کنُوں ساری زمین روشن تھی گئی۔ اُوں اُچی اواز ءچ ہکل ڈے تے آکھیا، ”ڈھے پِیا! عظیم شہر بابل ڈھے پِیا! او بدرُوحاں دا گھر بنڑ گِیا تے ہر بدرُوح دے راہنڑ دی جاہ تے ہر ناپاک تے مکرُوہ پکھیاں دے ٹِکنڑ دی جاہ تھی گِیا۔ کیوں جو ساریاں قوماں اُوندی حرام کاری تے مستی دی شراب پی تے ڈھے پئیاں ہِن۔ زمین دے بادشاہاں اُوندے نال زِنا کیتا، دُنیا دے تاجر اُوندی بے حد عیاشی تُوں دولت مند تھی گئے۔“ وَل مَیں اسمان کنُوں ہِک بئی اواز ایہ آدھے سُنڑی جو ”میڈی اُمت دے لوکو، اُوندے ءچوں نِکل آؤ تاں جو تُساں اُوندے گُناہاں ءچ شریک نہ تھیؤ تے اُوندیاں آفتاں تُہاڈے اُتے نہ آوݨ۔ کیوں جو اُوندے گُناہاں دا ڈھیر اسمان تئیں لگ گئے تے خُدا اُوندیاں بدکاریاں یاد کیتیاں ہِن۔ جِینویں بابل کیتے، تُساں وی اُوندے نال اُونویں ای کرو۔ اُونکُوں اُوندے کماں دا ڈُونڑا بدلہ ڈیؤ، تے جِتنا پیالہ اُوں بھر تے ڈِتے، تُساں اُوں کنُوں ڈُونڑا بھر تے اُونکُوں ڈیؤ۔ جِتنی شان تے عیاشی نال اُوں زندگی گُزاری، اُتنے ای عذاب تے غم ءچ اُونکُوں سَٹ ڈیؤ کیوں جو او آپنڑے دل ءچ آدھی ہے جو ’مَیں تخت اُتے ملکہ بنڑی بیٹھی ہاں کوئی بیوہ تاں نئیں تھی گئی مَیں کڈھائیں ماتم نہ کریساں۔‘ اِیں واسطے ہِکو ڈینہہ ءچ آفتاں یعنی موت، ماتم تے کال اُونکُوں آن پکڑیسن او بھاہ ءچ سڑ تے سواہ تھی ویسی کیوں جو اُوندی عدالت کرݨ آلا خُداوند خُدا قُدرت آلا ہے۔“ جِیں ویلے ساری زمین دے بادشاہ، جِنہاں اُوندے نال زِنا کیتا تے اُوندی عیاشی ءچ شریک تھئے، اُوندے سڑن دا دُھوواں ڈیکھسن تاں اُوندے کیتے روسن تے ماتم کریسن، تے اُوندا عذاب ڈیکھ تے ڈر کنُوں دُور وَنج کھڑسن تے اکھیسن ”افسوس! افسوس! عظیم شہر، زور آلے شہر بابل! صرف ہِک گھنٹے ءچ ای تیکُوں سزا مِل گئی۔“ زمین دے تاجر اُوندے کیتے رو تے ماتم کریسن کیوں جو اُنہاں دا مال ہُنڑ کوئی مُل نئیں گِھندا۔ یعنی سونا، چاندی، قیمتی پتھر، موتی، شاندار لینن، جامنی کپڑے، ریشمی، رتّے کپڑے، قِسم قِسم دی خوشبودار لکڑ، ہاتھی دے ڈنداں نال بنڑی ہر چیز، قیمتی لکڑ، پِتّل، لُوہے تے سنگِ مرمر نال بنڑی ہر چیز، دار چینی، مصالحے، عُود، مُر، لُبان ، انگُور دا رَس، زیتون دا تیل، میدہ تے کنڑک، ڈھانڈے، بھیڈاں، گھوڑے تے رَتھ تے بندے غُلاماں دے طور تے۔ او اکھیسن ”تیڈے مَن پسند میوے تیڈے تُوں ویندے ریہے۔ تیڈیاں لذیذ تے شاندار چیزاں تیڈے ہتھ کنُوں نِکل گئیاں۔ ہُنڑ او تیکُوں کڈھائیں نہ مِلسن۔“ تے اِنہاں چیزاں دے تاجر، جیہڑے اُوندے سببّوں دولت مند بنڑ گئے ہَن، اُوندا عذاب ڈیکھ تے ڈر نال پرے کھڑ تے روسن تے ماتم کریسن۔ تے اکھیسن ”افسوس! افسوس! او عظیم شہر جیہڑا مہین لینن، جامنی تے رتّے کپڑے پَیندا ہا تے سونے، قیمتی پتھر تے موتیاں نال سجیا راہندا ہا۔ صرف ہِک گھنٹے ءچ اُوندی اِتنی وڈی دولت برباد تھی گئی“ تے بحری جہازاں دے سارے کپتان، مسافر، جہاز چلاوݨ آلے تے جتنے وی سمندر دے ذریعے تجارت کریندے ہَن، دُور کھڑے تھی ویسن۔ او اِیں شہر دے سڑن دا دُھوواں ڈیکھسن تے افسوس نال اکھیسن ”کیہڑا شہر اِیں عظیم شہر وانگُوں ہا؟“ او آپنڑے سِراں اُتے مِٹی سٹیسن تے رو رو تے ماتم کریسن تے چیخ تے اکھیسن ”افسوس! افسوس! عظیم شہر، جیندی دولت دے سببّوں سبھ بحری جہازاں آلے مالدار تھی گئے ہَن، صرف ہِک گھنٹے ءچ او تباہ کر ڈِتا گئے۔“ ”اسمانو اُوندی تباہی اُتے خوشی مناؤ مُقدّسو، رسُولو تے نبیو خوشی مناؤ کیوں جو خُدا تُہاڈے حق ءچ فیصلہ کر تے اُوندی عدالت کیتی ہے۔“ وَل ہِک بئے زور آور فرشتے وڈی چکّی دے پُڑ وانگُوں ہِک پتھر چاتا تے اُونکُوں سمندر ءچ ایہ آدھے ہوئے سَٹ ڈِتا جو ”بابل دا عظیم شہر وی اِینویں ای زور نال سٹیا ویسی تے وَل اُوندا کڈھائیں پتا نہ چلسی۔ سِتار وجاوݨ آلیاں، گاوݨ آلیاں، بانسری وجاوݨ آلیاں تے نرسِنگے وجاوݨ آلیاں دی اواز تیڈے ءچ ولا کڈھائیں سُنڑائی نہ ڈیسی۔ کوئی وی پیشہ ور تے کہیں وی قِسم دا کاریگر تیڈے ءچ کڈھائیں نہ مِلسی۔ تے چکّی دی اواز تیڈے ءچ کڈھائیں سُنڑائی نہ ڈیسی۔ چراغ دی روشنی ولا کڈھائیں تیڈے ءچ نہ چمکسی گھوٹ تے کُنوار دیاں اوازاں کڈھائیں تیڈے ءچ سُنڑائی نہ ڈیسن کیوں جو تیڈے تاجر دُنیا دے وڈے وڈے لوک ہَن تے تیڈی جادُوگری نال ساریاں قوماں گُمراہ تھی گئیاں۔ تے اُوں شہر ءچوں نبیاں تے مُقدّساں دا خون مِلیا بلکہ سبھ لوکاں دا خون جیہڑے زمین اُتے قتل کیتے گئے ہَن۔“ اِیندے بعد مَیں اسمان اُتے لوکاں دی ہِک بہُوں وڈی جماعت کُوں ایہ آدھے ہوئے سُنڑیا جو ”ہلّلُویاہ! نجات تے جلال تے قُدرت ساڈے خُدا ای دی ہے، کیوں جو اُوندے فیصلے سچے تے راست ہِن۔ اُوں وڈی طوائف اُتے اُوں سزا دا حُکم کیتا جئیں آپنڑی حرام کاری نال دُنیا کُوں خراب کر ڈِتا ہا۔ خُدا اُوں کنُوں آپنڑے بندیاں دے خون دا بدلہ گِھن گِھدے۔“ تے اُنہاں ہِک پھیری ولا اُچی اواز ءچ آکھیا ”ہلّلُویاہ! اُوں طوائف دے سڑن دا دُھوواں ہمیشاں تئیں اُٹھدا راہسی۔“ وَل چوِّیہہ بزُرگاں تے چارے جانداراں خُدا کُوں جیہڑا تخت اُتے بیٹھا ہا، ڈھے تے سجدہ کیتا تے آکھیا ”آمین۔ ہلّلُویاہ!“ وَل تخت کنُوں ایہ اواز آئی جو ”خُدا دے بندیو! تُساں جیہڑے اُوندا ڈر رکھیندے ہیوے بھانویں چھوٹے ہیوے یا وڈے، ساڈے خُدا دی حمد کرو۔“ وَل مَیں ہِک وڈی جماعت جیہی اواز جیہڑی زور نال واہندے پانڑی جیہی تے بجلی دی گجکار وانگُوں ہئی، ایہ آدھے ہوئے سُنڑی، ”ہلّلُویاہ! کیوں جو ساڈا خُداوند قادر ِ مُطلق خُدا بادشاہی کریندے۔ آؤ اساں خوشی مناؤں تے بہُوں شادمان تھیؤں اُوندی تعریف کرُوں کیوں جو لیلے دی شادی دا وقت آ گئے تے اُوندی کُنوار آپنڑے آپ کُوں تیار کر گِھدے۔ اُونکُوں چمکدار تے صاف مہین لینن دے کپڑے پاوݨ دا حق مِلے“ کیوں جو مہین لینن دے کپڑیاں دا مطلب مُقدّساں دی صداقت دے کم ہِن۔ وَل اُوں فرشتے میکُوں آکھیا جو ”لِکھ، ’مُبارک ہِن او جیہڑے لیلے دی شادی دی دعوت ءچ سڈے گئے ہِن‘۔“ اُوں مزید آکھیا جو ”ایہ خُدا دے سچے گالھیں ہِن۔“ وَل مَیں اُونکُوں سجدہ کرݨ کیتے اُوندے پیراں ءچ ڈھے پِیا پر اُوں میکُوں آکھیا، ”خبردار! اِینویں نہ کر۔ مَیں وی تیڈے نال تے تیڈے بِھرانواں نال جیہڑے یسُوع دی گواہی ڈیوݨ اُتے قائم ہِن، خدمت کرݨ آلا ہاں۔ خُدا ای کُوں سجدہ کر کیوں جو یسُوع دی گواہی ڈیوݨ نبُوّت دی رُوح ہے۔“ وَل مَیں اسمان کُوں کُھلیا ڈِٹھا تے میکُوں ہِک چِٹا گھوڑا نظر آیا جِیندا سوار وفادار تے سچا اکھویندے تے اِنصاف نال عدالت تے جنگ کریندے۔ اُوندے اکھیں بھاہ دے شعلے وانگُوں ہِن تے اُوندے سر اُتے بہُوں سارے تاج ہِن۔ تے اُوں سوار اُتے ہِک ناں وی لِکھیا ہویا ہے جِینکُوں اُوندے علاوہ بِیا کوئی نئیں جانڑدا۔ او رَت ءچ پُسے ہوئے کپڑے پاتی ودے تے اُوندا ناں ”خُدا دا کلام“ ہے۔ اسمانی فوجاں چِٹے تے صاف لینن دے کپڑے پاتے ہوئیاں چِٹے گھوڑیاں اُتے سوار تھی تے اُوندے پِچُھوں پِچُھوں آندیاں پئیاں ہِن۔ اُوندے مُنہ ءچوں ہِک تیز تلوار نِکلدی ہے جیندے نال او قوماں کُوں مریسی۔ او لُوہے دے عصا نال اُنہاں اُتے حکُومت کریسی۔ او اُنہاں کُوں قادر ِ مُطلق خُدا دے قہر دے شراب دے حوض ءچ انگُوراں وانگُوں لتاڑ ڈیسی۔ اُوندے کپڑیاں تے ستھل اُتے ایہ ناں لِکھیا ہویا ہے ”بادشاہاں دا بادشاہ، خُداونداں دا خُداوند۔“ وَل مَیں ہِک فرشتہ کُوں سِجھ اُتے کھڑے ڈِٹھا۔ اُوں اسمان ءچ اُڈدے ہوئے سارے پکھیاں کُوں اُچی اواز نال آکھیا، ”آؤ تے خُدا دی وڈی دعوت ءچ شریک تھیوݨ کیتے جمع تھی ونجو۔ بادشاہاں، سپہ سالاراں، زور آوراں، گھوڑیاں تے اُنہاں دے سواراں دا گوشت تے ازاد تے غُلام، چھوٹے تے وڈے سبھ آدمیاں دا گوشت کھاؤ۔“ وَل مَیں حیوان کُوں زمین دے بادشاہاں تے اُنہاں دیاں فوجاں کُوں اُوں گھوڑے دے سوار تے اُوندے لشکر نال جنگ کرݨ کیتے جمع تھیندے ڈِٹھا۔ پر اُوں حیوان کُوں گرفتار کر گِھدا گِیا تے اُوندے نال اُوں کُوڑے نبی کُوں وی جئیں اُوندی خاطر معجزانہ نشان ڈِکھائے ہَن۔ اُنہاں معجزیاں دے ذریعے اُوں اُنہاں لوکاں کُوں جِنہاں حیوان دا نشان لوایا ہا تے اُوندے بُت دی عبادت کیتی ہئی، گُمراہ کیتا ہا۔ او ڈوہائیں گندھک نال بلدی ہوئی بھاہ دی جھیل ءچ زندہ سَٹ ڈِتے گئے۔ تے باقی لوک اُوندی تلوار نال ہلاک تھی گئے جیہڑی گھوڑے دے سوار دے مُنہ کنُوں نِکلدی ہئی۔ تے سارے پکھی اُنہاں دا گوشت کھا کھا تے رَج گئے۔ وَل مَیں ہِک فرشتہ کُوں اسمان کنُوں لَہندے ڈِٹھا۔ اُوندے ہتھ ءچ بے تَل کھڈے دی کُنجی تے ہِک وڈی زنجیر ہئی۔ اُوں اژدہے یعنی اُوں پُرانڑے نانگ کُوں جیہڑا ابلیس تے شیطان ہے، پکڑیا تے ہِک ہزار سال کیتے بَدھ ڈِتا۔ تے بے تَل کھڈے ءچ سَٹ ڈِتا تے کھڈے کُوں بند کر تے اُوندے اُتے مُہر لا ڈِتی تاں جو اژدہا قوماں کُوں گُمراہ نہ کر سگے جِیں ویلے تئیں ہِک ہزار سال پُورے نہ تھی ونجنڑ۔ اِیندے بعد ضرور ہے جو اُونکُوں کُجھ عرصے کیتے کھولیا ونجے۔ وَل مَیں تخت ڈِٹھے جِنہاں اُتے او لوک بیٹھے ہَن جِنہاں کُوں عدالت کرݨ دا اِختیار ڈِتا گِیا ہا۔ تے مَیں اُنہاں لوکاں دیاں رُوحاں ڈِٹھیاں جِنہاں دے سر یسُوع دی گواہی ڈیوݨ تے خُدا دے کلام دی وجہ کنُوں کپ ڈِتے گئے ہَن۔ اُنہاں لوکاں، نہ تاں اُوں حیوان دی تے نہ اُوندے بُت دی عبادت کیتی تے نہ متھے یا ہتھاں اُتے اُوندا نشان لوایا ہا۔ او زندہ تھی گئے تے ہِک ہزار سال تئیں مسیح دے نال بادشاہی کریندے ریہے۔ باقی مُردے ہِک ہزار سال پُورے تھیوݨ تئیں زندہ نہ تھئے۔ ایہ پہلی قیامت ہے۔ مُبارک تے مُقدّس ہِن او لوک جیہڑے پہلی قیامت ءچ شریک ہِن۔ اُنہاں اُتے ڈُوجھی موت دا کوئی اِختیار نئیں بلکہ او خُدا تے مسیح دے کاہِن ہوسن تے ہزار سال تئیں اُوندے نال بادشاہی کریندے راہسن۔ جِیں ویلے ہزار سال پُورے تھی ویسن تاں شیطان آپنڑی قید ءچوں رِہا کر ڈِتا ویسی۔ او نِکل تے ساریاں قوماں کُوں جیہڑیاں زمین دے چارے کونیاں ءچ آباد ہِن یعنی جُوج ماجُوج کُوں گُمراہ کر تے جنگ کیتے جمع کریسی۔ اُنہاں دا شمار سمندر دی ریت دے برابر ہوسی۔ او ساری زمین اُتے کِھنڈ گئے تے مُقدّساں دے ڈیرے تے اُوں عزیز شہر کُوں چودھارُوں گھیر گِھدا۔ وَل اسمان کنُوں بھاہ نازل تھئی تے اُنہاں کُوں ساڑ تے سواہ کر ڈِتا۔ تے ابلیس، جئیں اُنہاں کُوں گُمراہ کیتا ہا، گندھک تے بھاہ دی جھیل ءچ سٹیا گِیا جِتھاں او حیوان تے کُوڑا نبی وی ہئی تے او ڈینہہ رات ہمیشاں تئیں عذاب ءچ راہسن۔ وَل مَیں ہِک وڈا سفید تخت ڈِٹھا تے اُونکُوں وی جیہڑا اُوندے اُتے بیٹھا ہا۔ زمین تے اسمان اُوندی حضُوری کنُوں بھج گئے تے اُنہاں کُوں کِتھائیں جاہ نہ مِلی۔ تے مَیں چھوٹے وڈے سارے مُردیاں کُوں تخت دے سامنڑے کھڑے ڈِٹھا تے کتاباں کھولیاں گئیاں۔ وَل ہِک بئی کتاب وی کھولی گئی جیہڑی کتاب ِ حیات ہے۔ تے ساریاں مُردیاں دی عدالت اُنہاں دے اعمال دے مطابق کیتی گئی جیہڑے اُنہاں کتاباں ءچ لِکھے ہَن۔ سمندر اُنہاں مُردیاں کُوں جیہڑے اُوندے ءچ ہَن ڈے ڈِتا، تے موت تے عالم ِ ارواح آپنڑے مُردیاں کُوں ڈے ڈِتا۔ تے ہر ہِک دی عدالت اُوندے اعمال دے مطابق کیتی گئی۔ وَل موت تے عالم ِ ارواح کُوں بھاہ دی جھیل ءچ سَٹ ڈِتا گِیا۔ ایہ بھاہ دی جھیل ڈُوجھی موت ہے۔ تے جئیں کہیں دا ناں کتاب ِ حیات ءچ لِکھیا ہویا نہ مِلیا، اُونکُوں بھاہ دی جھیل ءچ سَٹ ڈِتا گِیا۔ وَل مَیں ہِک نواں اسمان تے ہِک نوِیں زمین ڈِٹھی کیوں جو پہلا اسمان تے پہلی زمین چلی گئی ہئی تے کوئی سمندر نہ ریہا۔ وَل مَیں مُقدّس شہر نویں یروشلیم کُوں خُدا کنُوں اسمان تُوں لہندے ڈِٹھا۔ او اُوں کُنوار وانگُوں سجایا گِیا ہا جئیں آپنڑے پئے کیتے سنگھار کیتا ہووے۔ تے مَیں تخت ءچوں کہیں کُوں اُچی اواز نال ایہ آدھے سُنڑیا جو ”ڈیکھ خُدا دی سکونت گاہ ہُنڑ اِنساناں دے وچال ہے تے او اُنہاں نال سکونت کریسی۔ او اُوندے لوک ہوسن تے خُدا خود اُنہاں نال راہسی تے اُنہاں دا خُدا ہوسی۔ او اُنہاں دے اکھیں دے سارے ہنجُو پُونجھ ڈیسی۔ وَل نہ موت باقی راہسی نہ ماتم، نہ رووݨ تے نہ کوئی درد باقی راہسی کیوں جو پہلیاں چیزاں ویندیاں ریہیاں۔“ وَل اُوں جیہڑا تخت اُتے بیٹھا ہا آکھیا، ”ڈیکھ مَیں ساریاں چیزاں کُوں نواں بنڑیندا پِیا ہاں۔“ وَل آکھیا جو ”لِکھ کیوں جو ایہ گالھیں اعتماد دے لائق تے سچے ہِن۔“ وَل اُوں میکُوں آکھیا جو ”مکمل تھی گِیا! مَیں الفا تے اومیگا، ابتدا تے اِنتہا ہاں۔ مَیں ترِسّے کُوں زندگی دے پانڑی دے چشمہ ءچوں مُفت پِلیساں۔ جیہڑا غالب آسی او اِنہاں چیزاں دا وارث ہوسی۔ مَیں اُوندا خُدا ہوساں تے او میڈا پوتر ہوسی۔ پر بُزدلاں، غیر اِیمانداراں، گندے کم کرݨ آلیاں، قاتلاں، حرام کاراں، جادُوگراں، بُت پرستاں تے سبھ کُوڑیاں دی جاہ بھاہ تے گندھک نال سڑن آلی جھیل ہوسی۔ ایہ ڈُوجھی موت ہے۔“ وَل اُنہاں سَت فرشتیاں ءچوں جِنہاں دے کولھ آخری سَت آفتاں نال بھرے سَت مُنگر ہَن، ہِک آ تے میکُوں آکھیا جو ”آ، مَیں تیکُوں کُنوار، یعنی لیلے دی ذال ڈِکھیساں۔“ تے او میکُوں رُوح ءچ ہِک وڈے، اُچے پہاڑ اُتے گِھن گِیا تے میکُوں مُقدّس شہر یروشلیم ڈِکھایا جیہڑا خُدا کنُوں اسمان تُوں تلے لہندا پِیا ہا۔ او شہر خُدا دے جلال نال روشن ہا تے اُوندی چمک بہُوں ای قیمتی پتھر یعنی یشب وانگُوں ہئی تے بَلّور وانگُوں بالکل صاف۔ اُوندی چاردیواری بہُوں وڈی تے اُچی ہئی تے اُوندے بارہاں پھاٹک ہَن۔ تے ہر پھاٹک اُتے ہِک فرشتہ ہئی۔ اُنہاں پھاٹکاں اُتے بنی اِسرائیل دے بارہاں قبیلیاں دے ناں لِکھے ہوئے ہَن۔ ترے پھاٹک مشرق دو، ترے شمال دو، ترے جنُوب دو تے ترے مغرب دو ہَن۔ اُوں شہر دی چاردیواری دی بنیاد بارہاں پتھراں اُتے قائم ہئی جِنہاں اُتے لیلے دے بارہاں رسُولاں دے ناں لِکھے ہَن۔ جیہڑا فرشتہ میڈے نال گالھ کریندا پِیا ہا، اُوندے کولھ شہر تے اُوندے پھاٹکاں تے چاردیواری کُوں ناپنڑ کیتے سونے دا گز ہا۔ او شہر چورس ہا یعنی اُوندی لمبائی تے چوڑائی برابر ہئی۔ اُوں گز نال شہر کُوں ناپیا تاں او چوڈھاں سو (1,400) مِیل ہا۔ اُوندی لمبائی، چوڑائی تے اُچائی برابر ہئی۔ وَل اُوں چاردیواری کُوں اِنسانی ناپ دے مطابق ناپیا تاں او ہِک سو چوتالیہہ (144) ہتھ ہئی، جیہڑا فرشتے اِستعمال کیتا۔ او دیوار یشب پتھر نال بنڑی ہئی تے شہر بالکل صاف شیشے وانگُوں خالص سونے دا بنڑیا ہویا ہا۔ شہر دی چاردیواری دیاں بنیاداں ہر قِسم دے قیمتی پتھر نال سجیاں ہوئیاں ہَن۔ پہلی بنیاد یشب پتھر نال بنڑی ہئی، ڈُوجھی نیلم نال، تریجھی شب چراغ نال، چوتھی زمُرد نال۔ پنجویں عقیق نال، چِھینویں لعل نال، ستویں سنہرے پتھر نال، اٹھوِیں فیروزہ نال، نانویں زبر جد نال، ڈاہویں یمنی پتھر نال، یارہویں سُنبلی پتھر نال تے بارہویں یاقُوت نال۔ او بارہاں پھاٹک بارہاں موتیاں دے ہَن یعنی ہر پھاٹک سالم موتی دا ہا۔ شہر دی سڑک بالکل صاف شیشہ وانگُوں خالص سونے دی ہئی۔ مَیں شہر ءچ کوئی ہیکل نہ ڈِٹھی کیوں جو خُداوند، قادر ِ مُطلق خُدا تے لیلا اُوندی ہیکل ہِن۔ او شہر سِجھ تے چَن دا مُتھاج نئیں، کیوں جو او خُدا دے نُور نال روشن ہے تے لیلا اُوندا چراغ ہے۔ قوماں اُوندی روشنی ءچ ٹُرسن تے زمین دے بادشاہ اُوندے ءچ آپنڑا شاندار سامان گِھن آسن۔ تے اُوندے پھاٹک ڈینہہ ویلے کڈھائیں وی بند نہ ہوسن کیوں جو اُتھاں رات نہ ہوسی۔ قوماں دی شان تے دولت اُوندے ءچ گِھن آئی ویسی۔ کوئی ناپاک چیز یا کوئی گندے کم کرݨ آلا یا کُوڑ گھڑن آلا اُوندے ءچ کڈھائیں داخل نہ تھیسی، پر صرف اُوہو جِنہاں دے ناں لیلے دی کتاب ِ حیات ءچ لِکھے گئے ہِن۔ وَل اُوں فرشتے میکُوں زندگی دے پانڑی دا دریا ڈِکھایا جیہڑا بَلّور آلی کار بالکل صاف ہا۔ او خُدا تے لیلے دے تخت کنُوں نِکل تے شہر دی وڈی سڑک دے اَدھ ءچوں واہندا ہا۔ اُوں دریا دے ڈوہائیں پاسُوں حیات دا درخت ہا۔ او درخت پھلاں دیاں بارہاں فصلاں ڈیندا ہا یعنی ہر مہینہ پھل ڈیندا ہا تے اُوندے پتیاں کنُوں قوماں کُوں شِفا مِلدی ہئی۔ اُتھاں کوئی چیز نہ ہوسی جِیندے اُتے لعنت ہوسی۔ خُدا تے لیلے دا تخت اُوں شہر ءچ ہوسی تے اُوندے بندے اُوندی عبادت کریسن۔ او اُوندا مُنہ ڈیکھسن تے اُوندا ناں اُنہاں دے متھیاں اُتے لِکھیا ہوسی۔ وَل کڈھائیں رات نہ تھیسی تے او چراغ تے سِجھ دی روشنی دے مُتھاج نہ ہوسن کیوں جو خُداوند خُدا خود اُنہاں کُوں روشن کریسی تے او ہمیشاں تئیں بادشاہی کریندے راہسن۔ اُوں فرشتے میکُوں آکھیا، ”ایہ گالھیں اعتماد دے قابل تے سچے ہِن۔ خُداوند جیہڑا نبیاں دیاں رُوحاں دا خُدا ہے، آپنڑا فرشتہ اِیں غرض نال بھیجیا ہے جو او آپنڑے بندیاں اُتے او گالھیں ظاہر کرے جِنہاں دا جلدی واقع تھیوݨ ضرور ہے۔“ ”ڈیکھ، مَیں جلدی آوݨ آلا ہاں۔ مُبارک ہے او جیہڑا اِیں نبُوّت دے گالھیں اُتے عمل کریندے۔“ مَیں یُوحنّا اُوہو ہاں جئیں اِنہاں گالھیں کُوں سُنڑیا تے ڈِٹھا۔ جِیں ویلے مَیں ایہ گالھیں سُنڑ تے ڈیکھ گِھدیاں تاں میں سجدہ ءچ اُوں فرشتے دے پیراں ءچ ڈھے پِیا جئیں میکُوں ایہ گالھیں ڈِکھائیاں ہَن۔ پر اُوں میکُوں آکھیا، ”خبردار! اِینویں نہ کر۔ مَیں وی تیڈے نال، تیڈے بِھرانواں نال جیہڑے نبی ہِن تے اُنہاں ساریاں نال جیہڑے اِیں کتاب دی نبُوّت دے گالھیں منیندے ہِن، خدمت کرݨ آلا ہاں۔ خُدا کُوں ای سجدہ کر۔“ وَل اُوں میکُوں آکھیا، ”تُوں اِیں کتاب دی نبُوّت دے گالھیں کُوں مُہر لا تے بند کر تے نہ رکھ، کیوں جو وقت نزدیک ہے ۔ جیہڑا بُرائی کریندے، او بُرائی ای کریندا راہوے۔ جیہڑا ناپاک ہے، او ناپاک ای راہوے۔ جیہڑا راستبازی کریندے، او راستبازی ای کریندا راہوے۔ تے جیہڑا پاک ہے، او پاک ای راہوے۔“ ”ڈیکھ، مَیں جلدی آوݨ آلا ہاں۔ تے ہر ہِک دے کم دے مطابق ڈیوݨ کیتے اجر میڈے کولھ ہے۔ الفا تے اومیگا، اوّل تے آخر، ابتدا تے اِنتہا مَیں ہاں۔ مُبارک ہِن او جیہڑے آپنڑے چولے دھوندے ہِن کیوں جو زندگی دے درخت تئیں پُجنڑ دا حق پیسن تے اُنہاں پھاٹکاں کنُوں شہر ءچ داخل تھیسن۔ پر کُتے، جادُوگر، حرام کار، خونی، بُت پرست، کُوڑی گالھ گھڑن تے پسند کرݨ آلے باہر راہسن۔ مَیں یسُوع آپنڑا فرشتہ اِیں واسطے بھیجیا ہے جو او کلیسیاواں کیتے اِنہاں گالھیں دی تُہاڈے اگُوں گواہی ڈیوے۔ مَیں داؤد دی اصل تے نسل تے صُبح دا نُورانی تارہ ہاں۔“ رُوح تے کُنوار آدھی ہے، ”آ“ تے او وی جیہڑا سُنڑدا ہے، آکھے، ”آ۔“ جیہڑا ترِسّا ہووے تے جیہڑا زندگی دا پانڑی چاہوے او اُونکُوں مُفت ءچ گِھن گِھنے۔ مَیں ہر ہِک بندے دے اگُوں جیہڑا اِیں کتاب دی نبُوّت دے گالھیں سُنڑدے، گواہی ڈیندا ہاں جو جے کوئی بندہ اُنہاں ءچ کُجھ ودھیسی تاں خُدا اِیں کتاب ءچ لِکھیاں ہوئیاں آفتاں اُوندے اُتے نازل کریسی۔ تے جے کوئی نبُوّت دی اِیں کتاب دے گالھیں ءچوں کُجھ کڈھیسی تاں خُدا اِیں کتاب ءچ ذِکر کیتے ہوئے حیات دے درخت تے مُقدّس شہر ءچوں اُوندا حصہ کڈھ ڈیسی۔ اِنہاں گالھیں دی گواہی ڈیوݨ آلا فرمیندے، ”بے شک مَیں جلدی آوݨ آلا ہاں۔“ ”آمین! ہا، اے خُداوند یسُوع آ۔“ خُداوند یسُوع دا فضل مُقدّساں دے نال راہوے۔ آمین۔