မိူဝ်ႈၵေႃႇၸႃႉႁူဝ်ပိုင်းၼၼ်ႉၽြႃးပဵၼ်ၸဝ်ႈၽၢၼ်ႇသၢင်းႁဵတ်းပဵၼ်ၽႃႉၵၢင်ႁၢဝ်တင်းလိၼ်မိူင်းဢေႃႈ။-
လိၼ်မိူင်းၼႆႉ ဢမ်ႇပႆႇပဵၼ်ပၵ်းပဵၼ်ပိူင်သင်လႄႈပဝ်ႇလၢပ်ႈဝႆႉဢေႃႈ။ ၵႃႈၼိူဝ်ဢၼ်လိုၵ်ႉဢၼ်လမ်ႇၼၼ်ႉဢၼ်လပ်းသိင်ႇႁူမ်ႇသုမ်ႇဝႆႉလႄႈဝိၺိၺ်ႇၽြႃးပဵၼ်ၸဝ်ႈတူင်ႉၼိုင်ၵႂႃႇမႃးယူႇၵႃႈၼိူဝ်ပၢင်ႇၽိဝ်ၼမ်ႉဢေႃႈ။-
ၽြႃးပဵၼ်ၸဝ်ႈၵေႃႈမီးဢမိင်ႉလႄႈဝႃႈ၊ “ႁႂ်ႈဢၼ်လႅင်းပဵၼ်မႃးသေ၊” ဝႃႈၼင်ႇၼႆလႄႈဢၼ်လႅင်းပေႃႇပဵၼ်မႃးဢေႃႈ။-
ၽြႃးပဵၼ်ၸဝ်ႈတူၺ်းႁၼ်ပဵၼ်ဢၼ်လီလႄႈၸင်ႇၽႄဢၼ်လႅင်းသေၵႃႈတီႈဢၼ်လပ်းသိင်ႇဝႆႉသေယဝ်ႉ။-
မၼ်းၸဝ်ႈႁွင်ႉႁဵၵ်ႈဢၼ်လႅင်းၼၼ်ႉဝႃႈ၊ “ၵၢင်ဝၼ်း၊” ဢၼ်လပ်းသိင်ႇၼၼ်ႉဝႃႈ၊ “ၵၢင်ၶိုၼ်း၊” ဝႃႈၼင်ႇၼႆဢေႃႈ။ ႁူဝ်ၶမ်ႈပူၼ်ႉယဝ်ႉလႄႈႁူဝ်ၼႂ်ႁွတ်ႈမႃးသေယဝ်ႉ၊ပဵၼ်ဝၼ်းတီႈၼိုင်ႈဢေႃႈ။
ၵမ်းၼၼ်ႉ ၽြႃးပဵၼ်ၸဝ်ႈမီးဢမိင်ႉလႄႈဝႃႈ၊ “ႁႂ်ႈၼႃႈၽႃႉပဵၼ်မႃးသေၵႃႈတီႈၼမ်ႉတင်းလၢႆၼႆႉသေ၊သမ်ႉႁႂ်ႈၼမ်ႉတင်းလၢႆၼင်ႇၵၼ်ၽႄဢွၵ်ႇၵၼ်သေ၊” ဝႃႈၼင်ႇၼႆလႄႈၼႃႈၽႃႉၵေႃႈပဵၼ်မႃးဢေႃႈ။-
ၽြႃးပဵၼ်ၸဝ်ႈႁဵတ်းၼႃႈၽႃႉၼၼ်ႉလႄႈၽႄၼမ်ႉဢၼ်မီးၵႃႈၼိူဝ်ၽႃႉတင်းၼမ်ႉဢၼ်မီးၵႃႈတႂ်ႈၽႃႉဝႆႉလႄႈ၊-
မၼ်းၸဝ်ႈႁွင်ႉႁဵၵ်ႈၼႃႈၽႃႉၼၼ်ႉဝႃႈ၊ “ၵၢင်ႁၢဝ်” ဢေႃႈ။ ႁူဝ်ၶမ်ႈပူၼ်ႉယဝ်ႉလႄႈႁူဝ်ၼႂ်ႁွတ်ႈမႃးသေယဝ်ႉ၊ပဵၼ်ဝၼ်းတီႈသွင်ဢေႃႈ။
ၵမ်းၼၼ်ႉ ၽြႃးပဵၼ်ၸဝ်ႈသမ်ႉမီးဢမိင်ႉလႄႈဝႃႈ၊ “ႁႂ်ႈၼမ်ႉဢၼ်မီးၵႃႈတႂ်ႈၵၢင်ႁၢဝ်ၼႆႉၸုတုမ်ၵၼ်ယူႇတီႈလဵဝ်သေ။ သမ်ႉႁႂ်ႈတီႈဢၼ်ႁႅင်ႈပေႃႇဢွၵ်ႇသေ၊” ဝႃႈၼင်ႇၼႆလႄႈၸင်ႇပဵၼ်ၸိူဝ်ႉၼင်ႇၼႆဢေႃႈ။-
မၼ်းၸဝ်ႈႁွင်ႉႁဵၵ်ႈတီႈဢၼ်ႁႅင်ႈၼၼ်ႉဝႃႈ၊ “လိၼ်၊” သေယဝ်ႉ၊ၼမ်ႉဢၼ်ၸုတုမ်ၵၼ်ၼၼ်ႉဝႃႈ၊ “ပၢင်ႇလၢႆႇ” လႄႈ၊ၽြႃးပဵၼ်ၸဝ်ႈႁၼ်လွင်ႈတၢင်းၼၼ်ႉပဵၼ်ဢၼ်လီဢေႃႈ။-
ၵမ်းၼၼ်ႉ၊ၽြႃးပဵၼ်ၸဝ်ႈသမ်ႉမီးဢမိင်ႉထႅင်ႈလႄႈဝႃႈ၊ “ၼိူဝ်လိၼ်ၼႆႉႁႂ်ႈတူၼ်ႈၵူႈၸိူဝ်ႉၵူႈမဵဝ်း၊ၸႃႉၸဵမ်တူၼ်ႈယိူဝ်ႈလႂ်၊တူၼ်ႈၶဝ်ႈတူၼ်ႈမၢၵ်ႇလႂ်၊ဢၼ်ၸၢင်ႈမီးမဵတ်ႉမီးၽၼ်း၊ဢိၵ်ႇတင်းတူၼ်ႈမႆႉဢၼ်ၸၢင်ႈမီးၸိူဝ်ႉမီးၽၼ်းမဵဝ်းလႂ်မဵဝ်းၼၼ်ႉၵႃႈမီးဢွၵ်ႇပဵၼ်မႃးၵႃႈၼိူဝ်လိၼ်သေ၊” ဝႃႈၼင်ႇၼႆလႄႈ၊-
ၼိူဝ်လိၼ်ၼႆႉၵေႃႈတူၼ်ႈယိူဝ်ႈလႂ်၊တူၼ်ႈၶဝ်ႈတူၼ်ႈမၢၵ်ႇဢၼ်ၸၢင်ႈပႃးမဵတ်ႉပႃးၽၼ်းလႂ်၊တူၼ်ႈမႆႉဢၼ်ၸၢင်ႈမီးမဵတ်ႉၸိူဝ်ႉမဵတ်ႉၽၼ်းမဵဝ်းလႂ်မဵဝ်းၼၼ်ႉဢွၵ်ႇပဵၼ်မႃးၸိူဝ်ႉၼင်ႇၼႆဢေႃႈ။-
ၽြႃးပဵၼ်ၸဝ်ႈတူၺ်းႁၼ်ပဵၼ်ဢၼ်လီသေလႄႈ၊ႁူဝ်ၶမ်ႈပူၼ်ႉယဝ်ႉလႄႈႁူဝ်ၼႂ်ႁွတ်ႈမႃးသေယဝ်ႉ၊ပဵၼ်ဝၼ်းတီႈသၢမ်ဢေႃႈ။
ၵမ်းၼၼ်ႉ၊ၽြႃးပဵၼ်ၸဝ်ႈသမ်ႉမီးဢမိင်ႉထႅင်ႈလႄႈဝႃႈ၊ “ႁႂ်ႈႁူင်းဢၼ်ႁိူဝ်ႈလႅင်းတၢင်းလၢႆဢွၵ်ႇမႃးၵႃႈၼိူဝ်ၽႃႉၵၢင်ႁၢဝ်ပုၼ်ႈတႃႇတေၸၵ်ႉၽႄၵၢင်ဝၼ်းတင်းၵၢင်ၶိုၼ်း၊ၼင်ႇႁိုဝ်တၵ်းပဵၼ်ပုၼ်ႈၼိမိၵ်ႈလၢၵ်ႈၶၼႃႇၶိင်ႇဢုတုလႂ်ဝၼ်းလႂ်ပီလႂ်သေ။-
ႁႂ်ႈၶဝ်ႁိူဝ်ႈလႅင်းယူႇၵႃႈၼႂ်းၽႃႉၵၢင်ႁၢဝ်၊ႁႂ်ႈလႆႈလႅင်းထွင်ႇတီႈလိၼ်မိူင်းသေ” ဝႃႈၼင်ႇၼႆလႄႈၸင်ႇပဵၼ်ၸိူဝ်ႉၼင်ႇၼႆဢေႃႈ။-
ၽြႃးပဵၼ်ၸဝ်ႈႁဵတ်းပဵၼ်ႁူင်းလႅင်းလူင်သွင်လုၵ်ႈ၊ဢၼ်ယဵင်ႈၶႅၼ်းယႂ်ႇၼႃႇလုၵ်ႈၼိုင်ႈၼၼ်ႉႁွင်ႉဝႃႈ၊တႃဝၼ်းၼၼ်ႉႁႂ်ႈဢုပ်ႉပိူင်ႇၵၢင်ဝၼ်း၊ဢၼ်ႁမ်ႉလဵၵ်ႉလုၵ်ႈၼိုင်ႈၼၼ်ႉႁွင်ႉဝႃႈ၊လိူၼ်ၼၼ်ႉႁႂ်ႈဢုပ်ႉပိူင်ႇၵၢင်ၶိုၼ်း၊ဢိၵ်ႇတင်းလၢဝ်တၢင်းလၢႆဢေႃႈ။-
မၼ်းၸဝ်ႈဢဝ်ႁူင်းလႅင်းလူင်ၸိူဝ်းၼၼ်ႉဝႆႉၵႃႈၼိူဝ်ၽႃႉၵၢင်ႁၢဝ်ပုၼ်ႈဢၼ်တၵ်းထွင်ႇလႅင်းၵႃႈၼိူဝ်လိၼ်မိူင်း။-
ဢိၵ်ႇတင်းႁႂ်ႈလႆႈဢုပ်ႉပိူင်ႇၵၢင်ဝၼ်းၵၢင်ၶိုၼ်းလႄႈ၊ၸၵ်းၽႄဢၼ်လႅင်းသေၵႃႈတီႈဢၼ်လပ်းသိင်ႇဝႆႉဢေႃႈ။ ၽြႃးပဵၼ်ၸဝ်ႈတူၺ်းႁၼ်ပဵၼ်ဢၼ်လီလႄႈ၊-
ႁူဝ်ၶမ်ႈပူၼ်ႉယဝ်ႉလႄႈႁူဝ်ၼႂ်ႁွတ်ႈမႃးသေယဝ်ႉ၊ပဵၼ်ဝၼ်းတီႈသီႇဢေႃႈ။
ၽြႃးပဵၼ်ၸဝ်ႈသမ်ႉမီးဢမိင်ႉထႅင်ႈလႄႈဝႃႈ၊ “ၼႂ်းၼမ်ႉၼႆႉႁႂ်ႈတူဝ်သတ်းတရိၵ်ႈသၢၼ်ႇဢၼ်ဢသၢၵ်ႈလိပ်းလႄႈၸၢင်ႈတူင်ႉၸၢင်ႈၼိုင်ပေႃႇပဵၼ်ၼမ်ၵိုၼ်းမႃးသေ။ ၼိူဝ်လိၼ်မိူင်းၼႆႉၵေႃႈႁႂ်ႈၼူၵ်ႉတၢင်းလၢႆမိၼ်ယူႇၼႂ်းၼႃႈၽႃႉၵၢင်ႁၢဝ်သေ၊” ဝႃႈၼင်ႇၼႆဢေႃႈ။-
ၼင်ႇၼၼ်ႉလႄႈၽြႃးပဵၼ်ၸဝ်ႈၽၢၼ်ႇသၢင်းတူဝ်သတ်းတရိၵ်ႈသၢၼ်ႇၸႃႉၸဵမ်ပႃလူင်လႂ်၊ဢိၵ်ႇတင်းတူဝ်သတ်းဢၼ်ဢသၢၵ်ႈလိပ်းၵႃႈၼႂ်းပၢင်ႇလၢႆႇဢိၵ်ႇတင်းၼူၵ်ႉဢၼ်မိၼ်ယူႇမဵဝ်းၽႂ်မဵဝ်းမၼ်းတင်းသဵင်ႈတင်းလူင်ဢေႃႈ။ ၽြႃးပဵၼ်ၸဝ်ႈတူၺ်းႁၼ်ပဵၼ်ဢၼ်လီဢေႃႈ။-
ၽြႃးပဵၼ်ၸဝ်ႈၵေႃႈပၼ်တၢင်းလီတီႈၶဝ်ၵႃႈမီးလႄႈဝႃႈ၊ႁႂ်ႈၵိူတ်ႇလဵင်ႉၽႄႈၼမ်ၵိုၼ်းမႃးႁႂ်ႈပေႃးတဵမ်ပၢင်ႇလၢႆႇၵႂႃႇဢိၵ်ႇတင်းႁႂ်ႈၼူၵ်ႉတင်းလၢႆၽႄႈၼမ်ၵိုၼ်းမႃးၵႃႈၼိူဝ်လိၼ်မိူင်းတႃႉ။-
ႁူဝ်ၶမ်ႈပူၼ်ႉယဝ်ႉၸင်ႇႁူဝ်ၼႂ်ႁွတ်ႈမႃးသေယဝ်ႉ၊ပဵၼ်ဝၼ်းတီႈႁႃႈဢေႃႈ။
ၵမ်းၼၼ်ႉ၊ၽြႃးပဵၼ်ၸဝ်ႈသမ်ႉမီးဢမိင်ႉထႅင်ႈလႄႈဝႃႈ၊ “ၼိူဝ်လိၼ်မိူင်းၼႆႉႁႂ်ႈတူဝ်သတ်းဢၼ်မီးဢသၢၵ်ႈလိပ်းပဵၼ်မႃးမဵဝ်းလႂ်မဵဝ်းၼၼ်ႉ၊ၸႃႉၸဵမ်တူဝ်ထိူၼ်ႇလႂ်၊တူဝ်ငႄႈလႂ်၊တူဝ်ဢၼ်ၸၢင်ႈလိူၼ်ႈၸၢင်ႈၵၢၼ်းလႂ်၊ႁင်းၽႂ်ႁင်းမၼ်းသေ၊” ဝႃႈၼင်ႇၼႆလႄႈၸင်ႇပဵၼ်မႃးၸိူဝ်ႉၼင်ႇၼႆဢေႃႈ။-
ၼင်ႇၼၼ်ႉလႄႈၽြႃးပဵၼ်ၸဝ်ႈၽၢၼ်ႇသၢင်းတူဝ်သတ်းတရိၵ်ႈသၢၼ်ႇတူဝ်ထိူၼ်ႇလႂ်၊တူဝ်ယဵၼ်ႇတူဝ်ငႄႈလႂ်၊တူဝ်ဢၼ်ၸၢင်ႈလိူၼ်ႈၸၢင်ႈၵၢၼ်းၵႃႈၼိူဝ်လိၼ်လႂ်၊မဵဝ်းလႂ်မဵဝ်းၼၼ်ႉလႄႈ၊ၽြႃးပဵၼ်ၸဝ်ႈတူၺ်းႁၼ်ပဵၼ်ဢၼ်လီဢေႃႈ။
ၵမ်းၼၼ်ႉ၊ၽြႃးပဵၼ်ၸဝ်ႈလၢတ်ႈလႄႈဝႃႈ၊ “ႁဵတ်းပဵၼ်ၵူၼ်းၸွမ်းၼင်ႇပုင်ႇႁၢင်ႈႁဝ်း၊ႁၢင်ႈၽၢင်ဢၼ်လဵဝ်ၵၼ်တင်းႁဝ်းတႃႉ။ ႁႂ်ႈမၼ်းဢုပ်ႉပိူင်ႇပႃပၢင်ႇလၢႆႇလႂ်၊ၼူၵ်ႉၵၢင်ႁၢဝ်လႂ်၊တူဝ်ယဵၼ်ႇတူဝ်ငႄႈလႂ်၊ဢိၵ်ႇတင်းတရိၵ်ႈသၢၼ်ႇဢၼ်ၸၢင်ႈၵႂႃႇၸၢင်ႈၵၢၼ်းၵႃႈၼိူဝ်လိၼ်ၵူႈၸိူဝ်ႉၵူႈပိူင်လႂ်သေ၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈၽြႃးပဵၼ်ၸဝ်ႈၽၢၼ်ႇသၢင်းႁဵတ်းပဵၼ်ၵူၼ်းၸွမ်းၼင်ႇႁၢင်ႈၽၢင်မၼ်းၸဝ်ႈဢေႃႈ။ မၼ်းၸဝ်ႈၽၢၼ်ႇသၢင်းႁဵတ်းပဵၼ်ၶဝ်ႁႂ်ႈပဵၼ်ၵူၼ်းၸၢႆးတင်းၵူၼ်းယိင်းသေယဝ်ႉ၊-
ပၼ်တၢင်းလီတီႈၶဝ်လႄႈဝႃႈ၊ “ၵိူတ်ႇလဵင်ႉလုၵ်ႈလဵင်ႉလၢင်းလႄႈယႂ်ႇၽႄၼမ်ၵိုၼ်းႁႂ်ႈတဵမ်လိၼ်မိူင်းတႃႉ။ ႁႂ်ႈမီးဢႃႇၼႃႇၵႃႈၼိူဝ်လိၼ်မိူင်းတႃႉ။ ဢုပ်ႉပိူင်ႇပႃပၢင်ႇလၢႆႇလႂ်၊ၼူၵ်ႉလႂ်တင်းတူဝ်သတ်းၵူႈမဵဝ်းမဵဝ်းတႃႉ၊” ဝႃႈၼင်ႇၼႆဢေႃႈ။-
ၽြႃးပဵၼ်ၸဝ်ႈဝႃႈ၊ “တူၺ်းလူး။ ၵဝ်ပၼ်တူၼ်ႈဢၼ်မီးမၢၵ်ႇၶဝ်ႈႁူင်းၼမ်ႉၵူႈမဵဝ်းဢိၵ်ႇတင်းတူၼ်ႈမႆႉဢၼ်မီးမွၵ်ႇမီးမၢၵ်ႇၵူႈၸိူဝ်ႉၵူႈမဵဝ်းပုၼ်ႈသူတၵ်းၵိၼ်ၼၼ်ႉယဝ်ႉ။-
တီႈတူဝ်သတ်းတရိၵ်ႈသၢၼ်ႇၵူႈမဵဝ်းမဵဝ်းၸႃႉၸဵမ်ၼူၵ်ႉလႂ်လႄႈသင်၊တူဝ်ႈဢၼ်ၸၢင်ႈလိူၼ်ႈၸၢင်ႈၵၢၼ်းလႂ်လႄႈသင်၊ဢိၵ်ႇတင်းၵႃႈဢၼ်မီးဢသၢၵ်ႈလိပ်းၼၼ်ႉပုၼ်ႈဢၼ်ၶဝ်တၵ်းၵိၼ်ၸိုင်၊ၵဝ်ပၼ်တူၼ်ႈယိူဝ်ႈလႂ်တူၼ်ႈမႆႉဢၼ်ၽိူဝ်ပူင်းလႂ်ၵူႈမဵဝ်းဝႆႉယဝ်ႉ၊” ဝႃႈၼင်ႇၼႆလႄႈၸင်ႇပဵၼ်ၸိူဝ်ႉၼင်ႇၼႆဢေႃႈ။-
ၽြႃးပဵၼ်ၸဝ်ႈလူတူၺ်းၵႃႈဢၼ်မၼ်းၸဝ်ႈၽၢၼ်ႇသၢင်းႁဵတ်းပဵၼ်ဝႆႉတင်းသဵင်ႈတင်းလူင်သေယဝ်ႉ၊မၼ်းၸဝ်ႈႁၼ်ပဵၼ်ဢၼ်လီဢေႃႈ။ ႁူဝ်ၶမ်ႈပူၼ်ႉယဝ်ႉလႄႈႁူဝ်ၼႂ်ႁွတ်ႈမႃးသေယဝ်ႉ၊ပဵၼ်ဝၼ်းတီႈႁူၵ်းဢေႃႈ။
ၼင်ႇၼၼ်လႄႈၶိူင်ႈပိူင်ၸၵျႃႇဝလႃႇၵႃႈမီးတင်းသဵင်ႈတင်းမူတ်းၸေးၸုမ်ႇၸွတ်ႇတူဝ်ႈယဝ်ႉတူဝ်ႈလီငၢမ်းဢေႃႈ။-
မိူဝ်ႈဢၼ်ႁွတ်ႈထိုင်ဝၼ်းတီႈၸဵတ်းၼၼ်ႉပိူဝ်ႈဢၼ်ၽြႃးပဵၼ်ၸဝ်ႈၽၢၼ်ႇသၢင်းႁဵတ်းပဵၼ်ၼၼ်ႉၸွတ်ႇၸေးယဝ်ႉတူဝ်ႈလီငၢမ်းယဝ်ႉလႄႈၼႂ်းဝၼ်းၼၼ်ႉမၼ်းၸဝ်ႈၵိုတ်းသဝ်းသေတၢင်းဢၼ်ၽၢၼ်ႇသၢင်းႁဵတ်းပဵၼ်ၼၼ်ႉဢေႃႈ။-
ၽြႃးပဵၼ်ၸဝ်ႈပၼ်တၢင်းလီတီႈဝၼ်းတီႈၸဵတ်းၼၼ်ႉလႄႈဝႆႉႁႂ်ႈပဵၼ်ဝၼ်းထွတ်ႈမျၢတ်ႈမူတ်းၸၢင်ႇ၊ၵွပ်ႈပိူဝ်ႈဢၼ်မၼ်းၸဝ်ႈၽၢၼ်ႇသၢင်းႁဵတ်းပဵၼ်ၶိူင်ႈပိူင်ၵႃႈမီးၸွတ်ႇၸေး ယဝ်ႉတူဝ်ႈလီငၢမ်းလႄႈၵိုတ်းသဝ်းယူႇၼိမ်ၼိမ်ၼၼ်ႉဢေႃႈ။-
လွင်ႈတၢင်းၼႆႉၸမ်ႉ၊ပဵၼ်ငဝ်ႈႁၢၵ်ႈပိုၼ်းလွင်ႈဢၼ်ၶိူင်ႈပိူင်ၸၵျႃႇဝလႃႇလႆႈၶၢမ်ႇတၢင်းဢၼ်ၽၢၼ်ႇသၢင်းႁဵတ်းပဵၼ်မႃးၼၼ်ႉဢေႃႈ။
မိူဝ်ႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈၽၢၼ်ႇသၢင်းႁဵတ်းပဵၼ်ၸၵျႃႇဝလႃႇၼၼ်ႉ၊တီႈလိၼ်မိူင်းၼႆႉတူၼ်ႈယိူဝ်ႈတူၼ်ႈယႃႈဢမ်ႇပႆႇမီးသေတူၼ်ႈ၊မဵတ်ႉၶဝ်ႈၽၼ်းၽၵ်းဢမ်ႇပႆႇငွၵ်ႈပႆႇငူင်းသေတူၼ်ႈ ၵွပ်ႈပိူဝ်ႈမၼ်းၸဝ်ႈဢမ်ႇပႆႇႁႂ်ႈၽူၼ်တူၵ်းၵႃႈၼိူဝ်လိၼ်လႄႈဢမ်ႇပႆႇမီးၵူၼ်းဢၼ်ႁဵတ်းႁႆႈႁဵတ်းၼႃး။-
ၵူၺ်းၵႃႈ၊ဢၢႆႁိူဝ်ႇလိၼ်ဢွၵ်ႇလႄႈႁႂ်ႈၼႃႈလိၼ်ယမ်းဝႆႉဢေႃႈ။
ၵမ်းၼၼ်ႉ၊ ထႃႇဝရႃႉၽြႃး၊ ၽြႃးပဵၼ်ၸဝ်ႈဢဝ်မုၼ်ႈလိၼ်ႁဵတ်းပဵၼ်ၵူၼ်းလႄႈသမ်ႉပဝ်ႇၸီႇဝႃႉဢသၢၵ်ႈသႂ်ႇၵႃႈၼႂ်းၶူႈလင်မၼ်းသေယဝ်ႉ၊ၵူၼ်းၸင်ႇပဵၼ်သတ်ႉတဝႃႇဢၼ်ဢသၢၵ်ႈလိပ်းမႃးဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ ၽြႃးပဵၼ်ၸဝ်ႈၵေႃႈၽုၵ်ႇသွမ်ႈသူၼ်ဢူးယဵၼ်ႇၽၢႆႇဝၼ်းဢွၵ်ႇၵႃႈတီႈ ဢေႇတိၼ်ႇ၊ သေယဝ်ႉ၊တီႈၼၼ်ႈမၼ်းၸဝ်ႈၶျႃးတီႈယူႇပၼ်ႁႂ်ႈၵူၼ်းဢၼ်မၼ်းၸဝ်ႈၽၢၼ်ႇသၢင်းၼၼ်ႉယူႇသဝ်းဢေႃႈ။-
မၼ်းၸဝ်ႈႁဵတ်းႁႂ်ႈတူၼ်ႈဢၼ်ႁၢင်ႈလီၵူႈမဵဝ်းမဵဝ်းဢွၵ်ႇလႄႈႁႂ်ႈတူၼ်ႈၸိူဝ်းၼၼ်ႉမၢၵ်ႇမၢၵ်ႇဢၼ်လီၵိၼ်ၵူႈၸိူဝ်ႉၵူႈမဵဝ်းဢေႃႈ။ မၼ်းၸဝ်ႈႁႂ်ႈမီးတူၼ်ႈဢသၢၵ်ႈတူၼ်ႈၼိုင်ႈဢိၵ်ႇတင်းတူၼ်ႈဢၼ်ႁႂ်ႈႁုၸႅင်ႈလွင်ႈလီလွင်ႈၸႃႉတူၼ်ႈၼိုင်ႈၵႃႈၼႂ်းၵၢင်သူၼ်ၼၼ်ႉဢေႃႈ။
မီးၼမ်ႉမႄႈၼိုင်ႈလႆၵႂႃႇၵႃႈၼႂ်းသူၼ် ဢေႇတိၼ်ႇ၊ လႄႈႁဵတ်းႁႂ်ႈသူၼ်ယမ်းဢေႃႈ။ ၼမ်ႉမႄႈၼၼ်ႉလႆပူၼ်ႉဢွၵ်ႇသူၼ်ဢူးယဵၼ်ႇၵႂႃႇလႄႈတႅၵ်ႇၽႄပဵၼ်ၵႂႃႇသီႇၵႄးဢေႃႈ။-
ၵႄးတီႈၼိုင်ႈလႆႈၸိုဝ်ႈဝႃႈ၊ၼမ်ႉမႄႈ ၽိသူၼ်ႇ၊ လႄႈလႆလူင်းၸွမ်းမိူင်း ႁႃႇဝိလႃႉ၊ တီႈဢၼ်မီးၶမ်းဢေႃႈ။-
ၶမ်းမိူင်းၼၼ်ႉၸႅတ်ႈလီၼႃႇဢေႃႈ။ သႅင်ၵေႉပတေႇလႃႉတင်းသႅင်ၸၢႆးၶႃးယွတ်ႇၵေႃႈမီးဢေႃႈ။-
ၵႄးတီႈသွင်လႆႈၸိုဝ်ႈၼမ်ႉမႄႈ ၵိႁုၼ်ႇ၊ လႄႈလႆလူင်းၸွမ်းမိူင်း ဢေႇတီႇဢူဝ်းပီးယႃး၊ ဢေႃႈ။-
ၵႄးတီႈသၢမ်လႆႈၸိုဝ်ႈၼမ်ႉမႄႈ ထႆးၵရိတ်ႈ၊ လႄႈလႆၵႂႃႇၽၢႆႇဝၼ်းဢွၵ်ႇမိူင်း ဢႃႇသီးရီးယႃး၊ သေယဝ်ႉ၊ၵႄးတီႈသီႇပဵၼ်ၼမ်ႉမႄႈ ဢုၽရတ်ႉ၊ ဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ ၽြႃးပဵၼ်ၸဝ်ႈဢဝ်ၵူၼ်းၼၼ်ႉဝႆႉၵႃႈၼႂ်းသူၼ်ဢူးယဵၼ်ႇ ဢေႇတိၼ်ႇ၊ ႁႂ်ႈလႆႈပႂ်ႉတူၺ်းပႂ်ႉႁဵတ်းဢေႃႈ။-
ထႃႇဝရႃႉၽြႃး၊ ၽြႃးပဵၼ်ၸဝ်ႈပိင်းၺၢပ်ႈတီႈၵူၼ်းၼၼ်ႉလႄႈဝႃႈ၊ “မႂ်းမီးဢၶႂၢင်ႉဢၼ်လႆႈၵိၼ်မၢၵ်ႇၵႃႈတီႈတူၼ်ႈၸိူဝ်းဢၼ်မီးၼႂ်းသူၼ်ဢူးယဵၼ်ႇၼႆႉၵူႈတူၼ်ႈဢေႃႈ။-
ၵူၺ်းၵႃႈ၊မၢၵ်ႇတူၼ်ႈဢၼ်ၸၢင်ႈပၼ်ၺၢၼ်ႇဢၼ်ႁုၸႅင်ႈလွင်ႈလီလွင်ႈၸႃႉၼႆႉၸိုင်၊မႂ်းဢမ်ႇလႆႈၵိၼ်။ ၼႂ်းဝၼ်းဢၼ်ၵိၼ်ၼၼ်ႉမႂ်းတၵ်းလႆႈတၢႆဢမၢၼ်ႇၶၼ်ပဵၼ်ဢေႃႈ၊” ဝႃႈၼင်ႇၼႆဝႆႉဢေႃႈ။
ၵမ်းၼၼ်ႉ၊ ထႃႇဝရႃႉၽြႃး၊ ၽြႃးပဵၼ်ၸဝ်ႈလၢတ်ႈဝႃႈ၊ “ၵူၼ်းၸၢႆးဢမ်ႇထုၵ်ႇလီယူႇၵူၺ်းၶေႃမၼ်းၵေႃႉလဵဝ်။ ၵဝ်တၵ်းပၼ်ၵေႃႉဢၼ်ထုၵ်ႇဢၼ်ၵိုင်ႇၵၼ်တင်းမၼ်းၼၼ်ႉႁႂ်ႈလႆႈၸွႆႈၵမ်ႉၸွႆႈထႅမ်မၼ်းလူးၵွၼ်ႇ၊” ဝႃႈၼင်ႇၼႆသေယဝ်ႉ။-
မၼ်းၸဝ်ႈဢဝ်လိၼ်လႄႈႁဵတ်းပဵၼ်တူဝ်သတ်းတရိၵ်ႈသၢၼ်ႇတင်းလၢႆ၊တင်းၼူၵ်ႉတင်းလၢႆၵႃႈမီးလႄႈဢဝ်မႃးၸူးၵႃႈတီႈၵူၼ်းႁႂ်ႈလႆႈႁုလွင်ႈဢၼ်ၵူၼ်းတၵ်းပၼ်ၸိုဝ်ႈပၼ်သဵင်ၸိူဝ်ႉၼင်ႇႁိုဝ်ၼၼ်ႉဢေႃႈ။ ၼင်ႇၼၼ်လႄႈတူဝ်သတ်းတင်းသဵင်ႈတင်းလူင်ၸင်ႇမီးၸိုဝ်ႈမီးသဵင်ႁင်းၽႂ်ႁင်းမၼ်းဢေႃႈ။-
ၵူၼ်းပၼ်ၸိုဝ်ႈပၼ်သဵင်တီႈတူဝ်သတ်းတရိၵ်ႈသၢၼ်ႇတင်းသဵင်ႈတင်းမူတ်း ဢိၵ်ႇတင်းပၼ်ၸိုဝ်ႈပၼ်သဵင်တီႈၼူၵ်ႉတင်းလၢႆႁင်းၽႂ်ႁင်းမၼ်းယဝ်ႉသေၵေႃႈ၊တူဝ်သတ်းၸိူဝ်းၼၼ်ႉယင်းဢမ်ႇပဵၼ်ၵေႃႉသႄႈဢၼ်ထုၵ်ႇဢၼ်ၵိုင်ႇၵၼ်တင်းမၼ်းႁႂ်ႈလႆႈၸွႆႈၵမ်ႉၸွႆႈထႅမ်မၼ်းသေၸိူဝ်ႉသေမဵဝ်း။
ၵမ်းၼၼ်ႉ၊ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဵတ်းႁႂ်ႈၵူၼ်းၼွၼ်းၼူၵ်ႇၼႃႇသေလႄႈ၊မိူဝ်ႈဢၼ်မၼ်းယင်းၼွၼ်းလပ်းယူႇၼၼ်ႉမၼ်းၸဝ်ႈထွၼ်ဢဝ်လုပ်ႇၶၢင်ႈမၼ်းလႅမ်ႈၼိုင်ႈဢွၵ်ႇယဝ်ႉၸင်ႇဢဝ်ၼိူဝ်ႉမၼ်းၶိုၼ်းငီႇငႅၼ်ႇၵၼ်သေဢေႃႈ။-
ထႃႇဝရႃႉၽြႃး၊ ၽြႃးပဵၼ်ၸဝ်ႈဢဝ်လုပ်ႇၶၢင်ႈၼၼ်ႉႁဵတ်းပဵၼ်ၵူၼ်းယိင်းလႄႈ၊ဢဝ်မႃးၸူးတီႈၵူၼ်းၸၢႆးၼၼ်ႉဢေႃႈ။-
ၵူၼ်းၸၢႆးၼၼ်ႉၵေႃႈလၢတ်ႈဝႃႈ၊ “တေႃႈလဵဝ်ၼႆႉ။ ၵေႃႉၼႆႉပဵၼ်လုပ်ႇၵႃႈၼႂ်းလုပ်ႇၵဝ်၊ ပဵၼ်ၼိူဝ်ႉၵႃႈၼႂ်းၼိူဝ်ႉၵဝ်ဢေႃႈ။ ပိူဝ်ႈဢၼ်ဢဝ်မၼ်းဢွၵ်ႇၵႃႈၼႂ်း၊ ၵူၼ်းမႃးလႄႈ၊တၵ်းလႆႈႁွင်ႉဝႃႈ၊ၵူၼ်းယိင်းဢေႃႈ၊” ဝႃႈၼင်ႇၼႆဢေႃႈ။
ၵွပ်ႈၼႆႉလႄႈၵူၼ်းၸၢႆးတၵ်းလႆႈၽၢတ်ႇယၢၼ်ၵၼ်တင်းပေႃႈမႄႈမၼ်းလႄႈႁူမ်ႈပွင်းၵၼ်တင်းမေးမၼ်းသေယဝ်ႉ၊ၶဝ်သွင်ၵေႃႉတၵ်းပဵၼ်ၼိူဝ်ႉလိူတ်ႈဢၼ်လဵဝ်ၵၼ်ဢေႃႈ။
ၶဝ်ၽူဝ်မေးသွင်ၵေႃႉၼၼ်ႉယူႇတူဝ်ပူၺ်ယူႇလႄႈၵၢင်းလွတ်ႈတင်းတၢင်းဢၼ်ဢၢႆၵၼ်ဢေႃႈ။
ၼႂ်းတူဝ်သတ်းၵႃႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈၽၢၼ်ႇသၢင်းႁဵတ်းပဵၼ်ဝႆႉၵႃႈမီးတင်းသဵင်ႈတင်းလူင်ၼၼ်ႉငူးၸိုင်၊လၵ်းလႅမ်သေပိူၼ်ႈဢေႃႈ။ ငူးမႃးထၢမ်တီႈၵူၼ်းယိင်းလႄႈဝႃႈ၊ “သူဢမ်ႇလႆႈၵိၼ်မၢၵ်ႇၵႃႈဢၼ်မီးၼႂ်းသူၼ်ဢူးယဵၼ်ႇၼႆႉသေတူၼ်ႈဝႃႈၼႆ၊ၽြႃးပဵၼ်ၸဝ်ႈပိင်းၺၢပ်ႈဝႆႉတႄႉႁိုဝ်း၊” ဝႃႈၼင်ႇၼႆဢေႃႈ။
ၵူၼ်းယိင်းၵေႃႈၶိုၼ်းလၢတ်ႈလႄႈဝႃႈ၊ “ႁဝ်းမီးဢၶႂၢင်ႉဢၼ်လႆႈၵိၼ်မၢၵ်ႇၵႃႈဢၼ်မီးၼႂ်းသူၼ်ဢူးယဵၼ်ႇၼႆႉဢေႃႈ။-
ၵူၺ်းၵႃႈ၊တူၼ်ႈဢၼ်မီးၼႂ်းၶိူင်ႈၵၢင်သူၼ်ဢူးယဵၼ်ႇၼၼ်ႉၸမ်ႉ၊ၽြႃးပဵၼ်ၸဝ်ႈဢမ်ႇႁႂ်ႈႁဝ်းၵိၼ်မၢၵ်ႇမၼ်း၊ယင်းဢမ်ႇႁႂ်ႈလႆႈတိူဝ်ႉလႆႈယိပ်းၶႃႈ၊ပေႃးပူၼ်ႉလိူဝ်ၸိုင်၊တၵ်းလႆႈတၢႆဢေႃႈ၊” ဝႃႈၼင်ႇၼႆဢေႃႈ။
ငူးသမ်ႉၶိုၼ်းလၢတ်ႈလႄႈဝႃႈ၊ “သူတၵ်းလႆႈတၢႆဢမ်ႇၸႂ်ႈ။-
လွင်ႈမၼ်းၸမ်ႉ၊ၽြႃးပဵၼ်ၸဝ်ႈႁုလွင်ႈဢၼ်ပေႃးသူၵိၼ်မၢၵ်ႇၼၼ်ႉၸိုင်၊သူတၵ်းပဵၼ်ၸိူဝ်ႉၼင်ႇမၼ်းၸဝ်ႈမႃး၊မၢၵ်ႇတႃၺၢၼ်ႇသူၵေႃႈတၵ်းၽုၺ်ႇလႅင်းမႃး၊ၸၢင်ႈမေႃႁုလွင်ႈလီလွင်ႈၸႃႉမႃးၼၼ်ႉလႄႈမၼ်းၸဝ်ႈၸင်ႇပိင်းၺၢပ်ႈဝႆႉၸိူဝ်ႉၼင်ႇၼႆဢေႃႈ၊” ဝႃႈၼင်ႇၼႆဢေႃႈ။
ၵူၼ်းယိင်းၼၼ်ႉတူၺ်းႁၼ်လွင်ႈဢၼ်မၢၵ်ႇၼၼ်ႉပဵၼ်ဢၼ်ႁၢင်ႈလီထုၵ်ႇတႃၼႃႇသေလႄႈပဵၼ်မၢၵ်ႇဢၼ်လီၵိၼ်လီၶူပ်းၼႃႇထုၵ်ႇဢူၵ်းထုၵ်ႇၸႂ်ၵူၺ်းဢမ်ႇၵႃး၊မၼ်းယင်းပဵၼ်မၢၵ်ႇတူၼ်ႈဢၼ်ႁႂ်ႈမီးၺၢၼ်ႇပိင်ႇၺႃႇၼမ်မႃးၼၼ်ႉသေလႄႈမၼ်းဝိတ်းဢဝ်မၢၵ်ႇၼၼ်ႉၵိၼ်ဢေႃႈ။ တီႈၽူဝ်မၼ်းၵေႃႈမၼ်းပၼ်လႄႈၽူဝ်မၼ်းၵေႃႈၵိၼ်ဢေႃႈ။-
မိူဝ်ႈဢၼ်ၵိၼ်ယဝ်ႉၼၼ်ႉမၢၵ်ႇတႃၺၢၼ်ႇၶဝ်ပိုတ်ႇပၢင်ႇလႅင်းမႃးၵမ်းလဵဝ်သေယဝ်ႉ၊ႁုလွင်ႈဢၼ်ၶဝ်ယူႇတူဝ်ပူၺ်ယူႇၼၼ်ႉလႄႈၸင်ႇဢဝ်မႂ်မၢၵ်ႇလိူဝ်ႇယဵပ်ႉလႄႈ၊ဝဵၼ်းတူဝ်ၶဝ်ဝႆႉယူႇဢေႃႈ။
ၶဝ်သွင်ၵေႃႉလႆႈငိၼ်းသဵင် ထႃႇဝရႃႉၽြႃး၊ ၽြႃးပဵၼ်ၸဝ်ႈပႆၵႂႃႇပႆမႃးၵႃႈၼႂ်းသူၼ်ဢူးယဵၼ်ႇၼႂ်းၶဵင်ႇႁူဝ်ၶမ်ႈၼၼ်ႉလႄႈပၢႆႈတဵတ်ႇမႅပ်းၵႃႈၼႂ်းၵႄႈတူၼ်ႈမႆႉႁႂ်ႈလႆႈလွတ်ႈသေတၢင်းဢၼ်ယူႇၵႃႈတီႈၽၢႆႇၼႃႈမၼ်းၸဝ်ႈဢေႃႈ။-
ထႃႇဝရႃႉၽြႃး၊ ၽြႃးပဵၼ်ၸဝ်ႈၵေႃႈႁွင်ႉၵူၼ်းလႄႈဝႃႈ၊ “မႂ်းမီးၵႃႈလႂ်” ဝႃႈၼင်ႇၼႆဢေႃႈ။
မၼ်းၶိုၼ်းဢိူဝ်လႄႈဝႃႈ၊ “ၶႃႈၸဝ်ႈငိၼ်းသဵင်ၸဝ်ႈႁဝ်းၵႃႈၼႂ်းသူၼ်ဢူးယဵၼ်ႇၼႆႉယူႇၶႃႈဢေႃႈ။ ၶႃႈၸဝ်ႈၵူဝ်ၵွပ်ႈပိူဝ်ႈဢၼ်ယူႇတူဝ်ပူၺ်ၼႆႉလႄႈၸင်ႇပၢႆႈတဵတ်ႇမႅပ်းသေၵႃႈတီႈၸဝ်ႈႁဝ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၵေႃႈထၢမ်လႄႈဝႃႈ၊ “ၽူႈလႂ်လၢတ်ႈၼႄမႂ်းလွင်ႈဢၼ်မႂ်းယူႇတူဝ်ပူၺ်ၼႆႉ။ မႂ်းၵိၼ်မၢၵ်ႇဢၼ်ၵဝ်သင်ႇဝႆႉဝႃႈ၊ယႃႇပေၵိၼ်ၼၼ်ႉယဝ်ႉႁိုဝ်း၊” ဝႃႈၼင်ႇၼႆဢေႃႈ။
ၵူၼ်းၵေႃႈၶိုၼ်းလၢတ်ႈလႄႈဝႃႈ၊ “ၵူၼ်းယိင်းဢၼ်ၸဝ်ႈႁဝ်းဢၢပ်ႈပၼ်ၶႃႈၸဝ်ႈၼၼ်ႉဢဝ်မၢၵ်ႇၼၼ်ႉပၼ်တီႈၶႃႈၸဝ်ႈလႄႈၶႃႈၸဝ်ႈၵိၼ်မႅၼ်ႈတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၽြႃးပဵၼ်ၸဝ်ႈၵေႃႈထၢမ်တီႈၵူၼ်းယိင်းၼၼ်ႉလႄႈဝႃႈ၊ “ႁဵတ်းသင်လႄႈမႂ်းႁဵတ်းၸိူဝ်ႉၼင်ႇၼႆ၊” ဝႃႈၼႆလႄႈ၊ၵူၼ်းယိင်းၼၼ်ႉၶိုၼ်းလၢတ်ႈလႄႈဝႃႈ၊ “ငူးပႅတ်ႉလႅၼ်ၶႃႈၸဝ်ႈလႄႈၶႃႈၸဝ်ႈၵိၼ်မႅၼ်ႈၶႃႈယဝ်ႉ၊” ဝႃႈၼင်ႇၼႆဢေႃႈ။
ၵမ်းၼၼ်ႉ၊ ထႃႇဝရႃႉၽြႃး၊ ၽြႃးပဵၼ်ၸဝ်ႈမီးဢမိင်ႉတီႈငူးလႄႈဝႃႈ၊ “ၵွပ်ႈလူၺ်ႈလွင်ႈဢၼ်မႂ်းႁဵတ်းၼႆႉလႄႈမႂ်းတၵ်းလႆႈၶၢမ်ႇတၢမ်ႇဢၼ်ၵိၼ်ႇဢၼ်ဝႃႈၼႃႇသေတူဝ်သတ်ႉတဝႃႇတင်းသဵင်ႈတင်းလူင်ၼႆႉဢေႃႈ။ တႄႇဢဝ်မိူဝ်ႈလဵဝ်ၼႆႉၵႂႃႇမႂ်းတၵ်းလႆႈဢဝ်တွင်ႉလိူၼ်ႈၵႂႃႇလႄႈၵိၼ်မုၼ်ႈလိၼ်ၸူဝ်ႈဢသၢၵ်ႈမႂ်းဢေႃႈ။-
ၵဝ်တၵ်းႁႂ်ႈမႂ်းတင်းၵူၼ်းယိင်းဝႆႉတၢင်းၽိတ်းတီႈၵၼ်လႄႈၸိူဝ်ႉၶိူဝ်းမႂ်းတင်းၸိူဝ်ႉၶိူဝ်းၵူၼ်းယိင်းႁႂ်ႈပဵၼ်ရၢၼ်ႇသူႇၵၼ်ဢေႃႈ။ မၼ်းတၵ်းၶိုတ်ႈႁူဝ်မႂ်းလႄႈမႂ်းတၵ်းၶိုတ်ႈသူၼ်ႈတိၼ်မၼ်းဢေႃႈ၊” ဝႃႈၼင်ႇၼႆဢေႃႈ။
တီႈၵူၼ်းယိင်းၼၼ်ႉၵေႃႈမၼ်းၸဝ်ႈမီးဢမိင်ႉလႄႈဝႃႈ၊ “ၵဝ်တၵ်းႁႂ်ႈတုၵ်ႉၶႃႉဢၼ်ပႃးပတိၵ်ႈသၼ်ႇထေႇၼၼ်ႉၼမ်ၵိုၼ်းၼႃႇတီႈမႂ်းလႄႈ၊တၵ်းႁႂ်ႈၶၢမ်ႇဝူၺ်ႇတၼႃႇဢၼ်ယၢပ်ႇၼႃႇယၢမ်းမိူဝ်ႈဢၼ်ၵိူတ်ႇလုၵ်ႈၼၼ်ႉတီႈမႂ်းဢေႃႈ။ ပိၵ်ႉသမ်ႉပဵၼ်ၸိူဝ်ႉၼၼ်သေၵေႃႈမႂ်းတၵ်းၸွမ်းဢလူဝ်ႇၽူဝ်မႂ်းလႄႈၶၢမ်ႇဢဝ်တၢင်းဢၼ်ၽူဝ်မႂ်းဢုပ်ႉပိူင်ႇဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈသမ်ႉမီးဢမိင်ႉတီႈၵူၼ်းၸၢႆးလႄႈဝႃႈ၊ “မႂ်းထွမ်ႇၵႂၢမ်းမေးမႂ်းလႄႈၵိၼ်မၢၵ်ႇဢၼ်ၵဝ်သင်ႇဝႆႉဝႃႈ၊ယႃႇပေၵိၼ်ၼၼ်ႉယဝ်ႉ။ ၵွပ်ႈလူၺ်ႈလွင်ႈဢၼ်မႂ်းႁဵတ်းၼႆလႄႈလိၼ်ၼႆႉလႆႈၶၢမ်ႇဢၼ်ၵိၼ်ႇဢၼ်ဝႃႈပုၼ်ႈမႂ်း၊တေႃႇၸူဝ်ႈဢသၢၵ်ႈမႂ်းၼၼ်ႉမႂ်းတၵ်းလႆႈႁဵတ်းယၢပ်ႇႁဵတ်းၽိုတ်ႇၼႃႇလူင်လၢင်ၸင်ႇတေပေႃးၵုမ်ႇလဵင်ႉတွင်ႉမႂ်းဢေႃႈ။-
တူၼ်ႈယိူဝ်ႈတူၼ်ႈယႃႈဢိၵ်ႇတင်းတူၼ်ႈၼၢမ်တၵ်းဢွၵ်ႇႁုၼ်ႈမႃးလႄႈ၊မႂ်းတၵ်းလႆႈၵိၼ်မၢၵ်ႇၽၵ်းယိူဝ်ႈၽၵ်းၶဵဝ်ဢၼ်ႁုၼ်ႈဢွၵ်ႇမႃးၼႂ်းတူင်ႈႁႆႈတူင်ႈၼႃးၼၼ်ႉဢေႃႈ။-
မႂ်းတၵ်းလႆႈႁဵတ်းယၢပ်ႇႁဵတ်းယဵၼ်းတေႃႇႁွတ်ႈႁိူဝ်ႇၼႃႈၽၢၵ်ႇမႂ်းဢွၵ်ႇပုၼ်ႈၼင်ႇႁိုဝ်လိၼ်တၵ်းႁႂ်ႈတူၼ်ႈဢၼ်မႂ်းၵိၼ်ငွၵ်ႈငူင်းႁုၼ်ႈမႃး၊တေႃႇႁွတ်ႈမႂ်းၶိုၼ်းၸူးၵႃႈတီႈလိၼ်ဢၼ်မႂ်းဢွၵ်ႇပဵၼ်မႃးၼၼ်ႉဢေႃႈ။ လွင်ႈမၼ်းၸမ်ႉ၊မႂ်းၼႆႉပဵၼ်ဢၼ်ဢဝ်မုၼ်ႈလိၼ်ႁဵတ်းပဵၼ်မႃးလႄႈ၊တၵ်းလႆႈၶိုၼ်းၸူးၵႃႈတီႈလိၼ်ဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၵူၼ်းၸၢႆးပၼ်ၸိုဝ်ႈမေးမၼ်းလႄႈဝႃႈ၊ ဢေးဝႃႉ၊ ဝႃႈၼႆ၊ၵွပ်ႈပိူဝ်ႈမၼ်းပဵၼ်မႄႈၵူၼ်းဢၼ်ဢသၢၵ်ႈလိပ်းယူႇတင်းသဵင်ႈတင်းလူင်ၼၼ်ႉဢေႃႈ။-
ထႃႇဝရႃႉၽြႃး၊ ၽြႃးပဵၼ်ၸဝ်ႈၵေႃႈဢဝ်ၼင်သတ်းႁဵတ်းၶူဝ်းၼုင်ႈပုၼ်ႈ ဢႃႇတမ်ႇ၊ တင်းမေးမၼ်းလႄႈႁႂ်ႈၶဝ်သွင်ၵေႃႉၼုင်ႈဢေႃႈ။
ထႃႇဝရႃႉၽြႃး၊ ၽြႃးပဵၼ်ၸဝ်ႈၵေႃႈလၢတ်ႈဝႃႈ၊ “မိူဝ်ႈလဵဝ်ၵူၼ်းၼႆႉပဵၼ်ၸိူဝ်ႉၼင်ႇႁဝ်းသေပႃးပႃးယဝ်ႉလႄႈ၊မီးၺၢၼ်ႇဢၼ်ၸၢင်ႈႁုၸႅင်ႈလွင်ႈလီလွင်ႈၸႃႉၼၼ်ႉယဝ်ႉ။ မၼ်းဢမ်ႇထုၵ်ႇလီလႆႈၵိၼ်မၢၵ်ႇတူၼ်ႈဢသၢၵ်ႈၼၼ်ႉသေလႄႈဢသၢၵ်ႈလိပ်းယူႇထႃႇဝရႃႉၼၼ်ႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ ထႃႇဝရႃႉၽြႃး၊ ၽြႃးပဵၼ်ၸဝ်ႈႁေႃႈမၼ်းဢွၵ်ႇသေသူၼ်ဢူးယဵၼ်ႇ ဢေႇတိၼ်ႇ၊ ၵႂႃႇႁႂ်ႈမၼ်းၵႂႃႇႁဵတ်းၵၢၼ်ၽုၵ်ႇသွမ်ႈၵိၼ်ၼႂ်းလိၼ်တီႈဢၼ်မၼ်းဢွၵ်ႇပဵၼ်မႃးၼၼ်ႉသေဢေႃႈ။-
မၼ်းၸဝ်ႈသမ်ႉပွႆႇၸႂ်ႉ ၶေႇရုၽဵမ်ႇ၊ တင်းလၢႆၸိူဝ်းၼၼ်ႉတင်းလၢပ်ႇဢၼ်ႁိူဝ်ႈမၢပ်ႈၼၼ်ႉပႂ်ႉဝႆႉၵႃႈတီႈၽၢႆႇဝၼ်းဢွၵ်ႇသူၼ်ဢူးယဵၼ်ႇ ဢေႇတိၼ်ႇ၊ ႁႂ်ႈလႆႈပႂ်ႉသဵၼ်ႈတၢင်းတူၼ်ႈဢသၢၵ်ႈၼၼ်ႉဝႆႉဢေႃႈ။
လိုၼ်းၼၼ်ႉ ဢႃႇတမ်ႇ၊ သိူၵ်ႈသမ်ႇၵၼ်တင်းမေးမၼ်းလႄႈမေးမၼ်းပႃးပတိၵ်ႈသၼ်ႇထေႇသေယဝ်ႉ၊ၵိူတ်ႇလဵင်ႉမႃးလုၵ်ႈၸၢႆးၵေႃႉၼိုင်ႈဢေႃႈ။ မၼ်းၼၢင်းဝႃႈ၊ “ၵွပ်ႈပိူဝ်ႈ ထႃႇဝရႃႉၽြႃး၊ ၸွႆႈထႅမ်ၵဝ်လႄႈၵဝ်လႆႈလုၵ်ႈၸၢႆးယဝ်ႉ၊” ဝႃႈၼႆလႄႈႁွင်ႉၸိုဝ်ႈလုၵ်ႈၸၢႆးဝႃႈ၊ ၵႃႇဢိၼႃႉ၊ ဢေႃႈ။-
ဝၢႆးၼၼ်ႉသမ်ႉၵိူတ်ႇလဵင်ႉထႅင်ႈၼွင်ႉၸၢႆးမၼ်း ဢႃႇပေႇလႃႉ၊ ဢေႃႈ။ ဢႃႇပေႇလႃႉ၊ ၼၼ်ႉပဵၼ်ၵူၼ်းလဵင်ႉသူဝ်းလႄႈ ၵႃႇဢိၼႃႉ၊ ၸမ်ႉ၊ပဵၼ်ၵေႃႉဢၼ်ႁဵတ်းႁႆႈႁဵတ်းၼႃးဢေႃႈ။-
မိူဝ်ႈဢၶိင်ႇႁွတ်ႈမႃးၼၼ်ႉ ၵႃႇဢိၼႃႉ၊ ဢဝ်မၢၵ်ႇၶဝ်ႈႁူင်းၼမ်ႉဢၼ်လႆႈမႃးသေၵႃႈၼႂ်းႁႆႈၼႂ်းၼႃးၼၼ်ႉမႃးလူႇတၢၼ်းတီႈ ထႃႇဝရႃႉၽြႃး၊ ဢေႃႈ။-
ဢႃႇပေႇလႃႉ၊ ၵေႃႈဢဝ်သူဝ်းဢွၼ်ႇဢၼ်ၵိူတ်ႇဢွၼ်တၢင်းပိူၼ်ႈၵႃႈၼႂ်းၽုင်သူဝ်းမၼ်းဢိၵ်ႇတင်းၵွၼ်ႈၶႆၵွၼ်ႈမၼ်းသူဝ်းၼၼ်ႉသၢၵ်ႈလူႇဢေႃႈ။ ထႃႇဝရႃႉၽြႃး၊ ထုၵ်ႇၸႂ်ၵျိူၵ်ႈၸႂ် ဢႃႇပေႇလႃႉ၊ ဢိၵ်ႇလူၺ်ႈတၢင်းလူႇမၼ်းၼၼ်ႉလႄႈ၊-
ဢမ်ႇထုၵ်ႇၸႂ်ၵျိူၵ်ႈၸႂ် ၵႃႇဢိၼႃႉ၊ ဢိၵ်ႇလူၺ်ႈၶိူင်ႈတၢင်းလူႇမၼ်းၼၼ်ႉဢေႃႈ။ ၵႃႇဢိၼႃႉ၊ ၵေႃႈၸႂ်မႆႈၶႂ်ႈၸႃႉၼႃႇလႄႈၼႃႈလုယူႇဢေႃႈ။-
မိူဝ်ႈၼၼ်ႉ ထႃႇဝရႃႉၽြႃး၊ လၢတ်ႈတီႈ ၵႃႇဢိၼႃႉ၊ လႄႈဝႃႈ၊ “ၵွပ်ႈသင်လႄႈမႂ်းဢွၵ်ႇတေႃးသႃႉယူႇ၊ၵွပ်ႈသင်လႄႈမႂ်းၼႃႈလုယူႇ။-
ပေႃးမႂ်းႁဵတ်းလီၸိုင်၊ၵဝ်တၵ်းႁပ်ႉတုင်းဢဝ်မႂ်းဢေႃႈ။ ၵွပ်ႈပိူဝ်ႈမႂ်းဢမ်ႇႁဵတ်းလီလႄႈဢပျတ်ႈမူပ်ႇယူႇၵႃႈတီႈၼႃႈၽၵ်းတူဢေႃႈ။ ဢပျတ်ႈၼၼ်ႉၶႂ်ႈသူၼ်းမႂ်းဢေႃႈ။ ၵူၺ်းၵႃႈ၊မႂ်းလူဝ်ႇပႄႉၼႅင်ႇမၼ်းဢေႃႈ၊” ဝႃႈၼင်ႇၼႆဢေႃႈ။
လိုၼ်းၼၼ်ႉ၊ ၵႃႇဢိၼႃႉ၊ ၸူဝ်းဢဝ်ၼွင်ႉၸၢႆးမၼ်း ဢႃႇပေႇလႃႉ၊ ၵႂႃႇလႄႈမိူဝ်ႈဢၼ်ၶဝ်ႁွတ်ႈၽႅဝ်ၵႂႃႇၵႃႈတီႈတူင်ႈၼႃးၼၼ်ႉ၊ ၵႃႇဢိၼႃႉ၊ ႁဵတ်းတၢင်းၽိတ်းသႂ်ႇၼွင်ႉၸၢႆးမၼ်း ဢႃႇပေႇလႃႉ၊ လႄႈဢဝ်တၢႆသေဢေႃႈ။
ထႃႇဝရႃႉၽြႃး၊ ထၢမ် ၵႃႇဢိၼႃႉ၊ လႄႈဝႃႈ၊ “ၼွင်ႉၸၢႆးမႂ်း ဢႃႇပေႇလႃႉ၊ မီးၵႃႈလႂ်၊” ဝႃႈၼင်ႇၼႆလႄႈ၊မၼ်းၶိုၼ်းတွပ်ႇလႄႈဝႃႈ၊ “ၵဝ်ၶႃႈဢမ်ႇႁုတီႈၶႃႈ။ ၸွင်ႇၵဝ်ၶႃႈပဵၼ်ၵေႃႉဢၼ်ပႂ်ႉထိင်းၼွင်ႉၸၢႆးၵဝ်ၶႃႈႁိုဝ်း၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၵေႃႈလၢတ်ႈဝႃႈ၊ “မႂ်းႁဵတ်းၸိူဝ်ႉၼင်ႇႁိုဝ်ယဝ်ႉ။ သဵင်လိူတ်ႈၼွင်ႉၸၢႆးမႂ်းၼၼ်ႉလုၵ်ႉသေၵႃႈတီႈလိၼ်မိူင်းႁွင်ႉတိူင်ႇၵဝ်ယူႇဢေႃႈ။-
မိူဝ်ႈလဵဝ်ၼႆႉမႂ်းတၵ်းလႆႈၶၢမ်ႇတၢမ်ႇတၢင်းဢၼ်ၵိၼ်ႇဝႃႈသေၵႃႈတီႈလိၼ်ဢၼ်တႅၵ်ႇငၢၵ်ႈလႄႈၸုပ်ႇဢဝ်လိူတ်ႈၼွင်ႉၸၢႆးမႂ်းဢၼ်မႂ်းထွၵ်ႇၼၼ်ႉဢေႃႈ။-
ပိၵ်ႉသမ်ႉမႂ်းၵႆႉၶတ်းၸႂ်ၽုၵ်ႇသွမ်ႈသေၵေႃႈလိၼ်မိူင်းတၵ်းတေဢမ်ႇပၼ်ႁႅင်းပုၼ်ႈဢၼ်တၵ်းငွၵ်ႈငူင်းမႃး၊မႂ်းတၵ်းလႆႈပဵၼ်ၵေႃႉဢၼ်ဢွၵ်ႇပၢႆႈၵႂႃႇလႄႇလၢဝ်းယူႇၵႃႈၼႂ်းလေႃးၵႃႉၼႆႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ၵႃႇဢိၼႃႉ၊ ၶိုၼ်းလဝ်ႈလၢတ်ႈတီႈ ထႃႇဝရႃႉၽြႃး၊ လႄႈဝႃႈ၊ “တၢမ်ႇဢပျတ်ႈၶႃႈၸဝ်ႈၼႆႉၼၵ်းၼႃႇသေဢၼ်ၶႃႈၸဝ်ႈၶၢမ်ႇလႆႈတီႈၶႃႈဢေႃႈ။-
ၸဝ်ႈႁဝ်းႁေႃႈၶႃႈၸဝ်ႈဢွၵ်ႇသေၵႃႈတီႈလိၼ်ၼႆႉဢိၵ်ႇတင်းၵႃႈတီႈၽၢႆႇၼႃႈၸဝ်ႈႁဝ်းတီႈၶႃႈယဝ်ႉ။ ၶႃႈၸဝ်ႈတၵ်းလႆႈပဵၼ်ၵေႃႉဢၼ်ဢွၵ်ႇပၢႆႈပိူၼ်ႈသေယဝ်ႉ၊လႄႇလၢဝ်းယူႇၵႃႈၼႂ်းလေႃးၵႃႉၼႆႉတီႈၶႃႈယဝ်ႉ။ လိူဝ်သေၼၼ်ႉၶဝ်ၸိူဝ်းဢၼ်ထူပ်းႁၼ်ၶႃႈၸဝ်ႈၸိူဝ်းၼၼ်ႉတၵ်းဢဝ်ၶႃႈၸဝ်ႈတၢႆတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ ထႃႇဝရႃႉၽြႃး၊ လၢတ်ႈဝႃႈ၊ “ဢမ်ႇလႆႈပဵၼ်ၸိူဝ်ႉၼင်ႇၼၼ်။ ပေႃးသေၵေႃႉသေၵူၼ်းဢဝ်မႂ်းတၢႆၸိုင်၊ၵေႃႉၼၼ်ႉတၵ်းလႆႈၶၢမ်ႇဢပျတ်ႈတၢမ်ႇၸဵတ်းပုၼ်ႈဢေႃႈ၊” ဝႃႈၼင်ႇၼႆသေယဝ်ႉ၊ ထႃႇဝရႃႉၽြႃး၊ ႁဵတ်းတီႈမၢတ်ႈတီႈမၢႆၵႃႈၼိူဝ် ၵႃႇဢိၼႃႉ၊ ႁႂ်ႈလႆႈပဵၼ်ပုၼ်ႈလွင်ႈၼင်ႇႁိုဝ်ၶဝ်ၸိူဝ်းဢၼ်ထူပ်းၺႃး ၵႃႇဢိၼႃႉ၊ ၼၼ်ႉတၵ်းတေဢမ်ႇလႆႈဢဝ်မၼ်းတၢႆၼၼ်ႉဢေႃႈ။-
ၵႃႇဢိၼႃႉ၊ ၵေႃႈဢွၵ်ႇသေၵႃႈတီႈၽၢႆႇၼႃႈ ထႃႇဝရႃႉၽြႃး၊ ၵႂႃႇလႄႈယူႇသဝ်းၵႃႈၼႂ်းမိူင်း ၼေႃႇတႃႉ၊ ဢၼ်မီးၽၢႆႇဝၼ်းဢွၵ်ႇသူၼ်ဢူးယဵၼ်ႇ ဢေႇတိၼ်ႇ၊ ၼၼ်ႉဢေႃႈ။
ၵႃႇဢိၼႃႉ၊ တင်းမေးမၼ်းလႆႈလုၵ်ႈၸၢႆးၵေႃႉၼိုင်ႈလႄႈႁွင်ႉၸိုဝ်ႈဝႃႈ၊ ဢေးၼွၵ်ႉ၊ ဢေႃႈ။ ၵႃႇဢိၼႃႉ၊ တႄႇတင်ႈဝဵင်းလႄႈႁွင်ႉၸိုဝ်ႈဝဵင်းၼၼ်ႉၸွမ်းၸိုဝ်ႈလုၵ်ႈၸၢႆးမၼ်းလႄႈဝႃႈ၊ဝဵင်း ဢေးၼွၵ်ႉ၊ ဢေႃႈ။-
ဢေးၼွၵ်ႉ၊ လႆႈလုၵ်ႈၸၢႆး ဢီႇရတ်ႉ၊ဢီႇရတ်ႉ၊ သမ်ႉမီးလုၵ်ႈၸၢႆး မႁုယေႇလႃႉ၊မႁုယေႇလႃႉ၊ သမ်ႉမီးလုၵ်ႈၸၢႆး မႀုသလႃႉ၊မႀုသလႃႉ၊ မီးလုၵ်ႈၸၢႆး လႃႇမႅၵ်ႈ၊ ဢေႃႈ။-
လႃႇမႅၵ်ႈ၊ မီးမေးသွင်ၵေႃႉ ဢႃႇတႃႉ၊ တင်း ၸိလႃႉ၊ ဢေႃႈ။-
ဢႃႇတႃႉ၊ ၵိူတ်ႇလဵင်ႉလုၵ်ႈၸၢႆး ယႃႇပလႃႉ၊ ၵေႃႉဢၼ်ပဵၼ်ပူႇမွၼ်ႇၸိူဝ်ႉၶိူဝ်းၶဝ်ၸိူဝ်းဢၼ်ၸၢင်ႈယူႇၼႂ်းသုမ်ႉထဵင်လႄႈလဵင်ႉၽုင်သူဝ်းၽုင်ဝူဝ်းၼၼ်ႉဢေႃႈ။-
ၼွင်ႉၸၢႆးမၼ်း ယုပလႃႉ၊ ၸမ်ႉ၊ပဵၼ်ပူႇမွၼ်ႇၸိူဝ်ႉၶိူဝ်းၶဝ်ၸိူဝ်းဢၼ်ၸၢင်ႈပဝ်ႇပီႇလဵတ်းတိင်ႇၸိူဝ်းၼၼ်ႉဢေႃႈ။-
ၸိလႃႉ၊ ၸမ်ႉ၊ၵိူတ်ႇလဵင်ႉလုၵ်ႈၸၢႆး တုပလႃႉၵႃႇဢိၼႃႉ၊ ၵေႃႉဢၼ်ပဵၼ်သြႃႇၸၢင်ႈလဵၵ်းၸၢင်ႈတွင်းၵူႈမဵဝ်းမဵဝ်းၼၼ်ႉဢေႃႈ။ ၼွင်ႉယိင်း တုပလႃႉၵႃႇဢိၼႃႉ၊ ၸမ်ႉ၊မီးၸိုဝ်ႈႁွင်ႉဝႃႈ၊ ၼေႇမႃႉ၊ ဢေႃႈ။
လႃႇမႅၵ်ႈ၊ လၢတ်ႈတီႈမေးမၼ်းသွင်ၵေႃႉၼၼ်ႉလႄႈဝႃႈ၊ “ ဢႃႇတႃႉ၊ တင်း ၸိလႃႉ၊ ႟။ မၢတ်ႈတွင်းၵႂၢမ်းၵဝ်ၼႆႉဝႆႉတႃႉ။ မေး လႃႇမႅၵ်ႈ၊ ႟။ ထွမ်ႇငိၼ်းၵႂၢမ်းၵဝ်တႃႉ။ ၵဝ်လႆႈဢဝ်ၵူၼ်းၸၢႆးမၢဝ်ႇၵေႃႉၼိုင်ႈတၢႆၵွပ်ႈပိူဝ်ႈမၼ်းႁဵတ်းႁႂ်ႈၵဝ်လႆႈၸဵပ်းသႅပ်ႇၼၼ်ႉဢေႃႈ။
ပေႃးၵေႃႉဢၼ်ဢဝ် ၵႃႇဢိၼႃႉ၊ တၢႆၼၼ်ႉလႆႈၶၢမ်ႇတၢမ်ႇဢပျတ်ႈၸဵတ်းပုၼ်ႈၸိုင်၊ ၵေႃႉဢၼ်ဢဝ် လႃႇမႅၵ်ႈ၊ တၢႆၼၼ်ႉတၵ်းလႆႈၶၢမ်ႇၸဵတ်းသိပ်းၸဵတ်းပုၼ်ႈဢေႃႈ၊” ဝႃႈၼင်ႇၼႆဢေႃႈ။
ဢႃႇတမ်ႇ၊ တင်းမေးမၼ်းၵိူတ်ႇလဵင်ႉလုၵ်ႈၸၢႆးထႅင်ႈၵေႃႉၼိုင်ႈဢေႃႈ။ ဢေးဝႃႉ၊ လၢတ်ႈဝႃႈ၊ “ၽြႃးပဵၼ်ၸဝ်ႈတႅၼ်းပၼ်လုၵ်ႈၸၢႆးတီႈၵဝ်ႁႂ်ႈလႆႈတၢင်တူဝ် ဢႃႇပေႇလႃႉ၊ ၵေႃႉဢၼ် ၵႃႇဢိၼႃႉ၊ ဢဝ်တၢႆၼၼ်ႉယဝ်ႉ၊” ဝႃႈၼႆလႄႈႁွင်ႉၸိုဝ်ႈဝႃႈ၊ သေးထႃႉ၊ ဢေႃႈ။-
သေးထႃႉ၊ လႆႈလုၵ်ႈၸၢႆး ဢေႇၼုတ်ႉ၊ ဢေႃႈ။ တႄႇၸႃႉဢဝ်မိူဝ်ႈၶိင်ႇယၢမ်းၼၼ်ႉမႃးၵူၼ်းမေႃၵၢဝ်ႇႁႃၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ဢေႃႈ။
ၼႆႉၸမ်ႉ၊ပဵၼ်ၸရၢင်းၸူဝ်ႈလုၵ်ႈပၢၼ်လၢၼ်ၸိူဝ်ႉၶိူဝ်း ဢႃႇတမ်ႇ၊ ဢေႃႈ။ မိူဝ်ႈဢၼ်ၽြႃးပဵၼ်ၸဝ်ႈၽၢၼ်ႇသၢင်းမဵဝ်းၵူၼ်းၼၼ်ႉ၊မၼ်းၸဝ်ႈၽၢၼ်ႇသၢင်းႁဵတ်းပဵၼ်ၸွမ်းၼင်ႇႁၢင်ႈၽၢင်မၼ်းၸဝ်ႈဢေႃႈ။-
မၼ်းၸဝ်ႈၽၢၼ်ႇသၢင်းႁဵတ်းပဵၼ်ၵူၼ်းၸၢႆးတင်းၵူၼ်းယိင်းသေယဝ်ႉ၊ပၼ်တၢင်းလီတီႈၶဝ်လႄႈ၊ႁွင်ႉႁဵၵ်ႈဝႃႈ၊ ဢႃႇတမ်ႇ၊ ဢၼ်ပွင်ႇဝႃႈ၊ “မဵဝ်းၵူၼ်း” ဝႃႈၼႆဢေႃႈ။-
မိူဝ်ႈဢၼ် ဢႃႇတမ်ႇ၊ မီးဢသၢၵ်ႈပၢၵ်ႇသၢမ်သိပ်းပီၼၼ်ႉမၼ်းလႆႈလုၵ်ႈၸၢႆးၵေႃႉၼိုင်ႈဢၼ်မီးႁၢင်ႈၽၢင်ဢၼ်လဵဝ်ၵၼ်တင်းမၼ်းၼၼ်ႉလႄႈႁွင်ႉၸိုဝ်ႈဝႃႈ၊ သေးထႃႉ၊ ဢေႃႈ။-
ဝၢႆးသေၼၼ်ႉ ဢႃႇတမ်ႇ၊ ဢသၢၵ်ႈလိပ်းယူႇထႅင်ႈပႅတ်ႇပၢၵ်ႇပီလႄႈလႆႈလုၵ်ႈၸၢႆးလႂ်တင်းလုၵ်ႈယိင်းလႂ်ထႅင်ႈသေယဝ်ႉ၊-
ဢသၢၵ်ႈမၼ်းယိုၼ်းယၢဝ်းထိုင်ၵဝ်ႈပၢၵ်ႇသၢမ်သိပ်းပီလႄႈတၢႆၵႂႃႇဢေႃႈ။
သေးထႃႉ၊ ၵေႃႈမိူဝ်ႈဢၼ်မီးဢသၢၵ်ႈပၢၵ်ႇပၢႆႁႃႈပီၼၼ်ႉလႆႈလုၵ်ႈၸၢႆးၸိုဝ်ႈ၊ ဢေႇၼုတ်ႉ၊ ဢေႃႈ။-
ဝၢႆးသေၼၼ်ႉ သေးထႃႉ၊ ဢသၢၵ်ႈလိပ်းယူႇထႅင်ႈပႅတ်ႇပၢၵ်ႇပၢႆၸဵတ်းပီလႄႈလႆႈလုၵ်ႈၸၢႆးလႂ်တင်းလုၵ်ႈယိင်းလႂ်ထႅင်ႈသေယဝ်ႉ၊-
မိူဝ်ႈဢၼ်ဢသၢၵ်ႈထူၼ်ႈတဵမ်ၵဝ်ႈပၢၵ်ႇပၢႆသိပ်းသွင်ပီၼၼ်ႉတၢႆၵႂႃႇဢေႃႈ။
ဢေႇၼုတ်ႉ၊ ၼၼ်ႉမိူဝ်ႈဢၼ်ဢသၢၵ်ႈမီးၵဝ်ႈသိပ်းပီၼၼ်ႉလႆႈလုၵ်ႈၸၢႆးၸိုဝ်ႈ၊ ၵႃႇဢိၼၼ်ႇ၊ ဢေႃႈ။-
ဝၢႆးသေၼၼ်ႉ၊ ဢေႇၼုတ်ႉ၊ ဢသၢၵ်ႈလိပ်းယူႇထႅင်ႈပႅတ်ႇပၢၵ်ႇပၢႆသိပ်းႁႃႈပီလႄႈလႆႈလုၵ်ႈၸၢႆးလႂ်တင်းလုၵ်ႈယိင်းလႂ်ထႅင်ႈသေယဝ်ႉ၊-
မိူဝ်ႈဢၼ်ဢသၢၵ်ႈထူၼ်ႈတဵမ်ၵဝ်ႈပၢၵ်ႇပၢႆႁႃႈပီၼၼ်ႉတၢႆၵႂႃႇဢေႃႈ။
မိူဝ်ႈဢၼ် ၵႃႇဢိၼၼ်ႇ၊ မီးဢသၢၵ်ႈၸဵတ်းသိပ်းပီၼၼ်ႉလႆႈလုၵ်ႈၸၢႆး မႁႃႇလေႇလေႇလႃႉ၊ ဢေႃႈ။-
ဝၢႆးသေၼၼ်ႉ ၵႃႇဢိၼၼ်ႇ၊ ဢသၢၵ်ႈလိပ်းယူႇထႅင်ႈပႅတ်ႇပၢၵ်ႇသီႇသိပ်းပီလႄႈလႆႈလုၵ်ႈၸၢႆးလႂ်၊တင်းလုၵ်ႈယိင်းလႂ်ထႅင်ႈသေယဝ်ႉ၊-
မိူဝ်ႈဢၼ်ဢသၢၵ်ႈထူၼ်ႈတဵမ်ၵဝ်ႈပၢၵ်ႇပၢႆသိပ်းပီၼၼ်ႉတၢႆၵႂႃႇဢေႃႈ။
မိူဝ်ႈဢၼ် မႁႃႇလေႇလေႇလႃႉ၊ မီးဢသၢၵ်ႈႁူၵ်းသိပ်းႁႃႈပီၼၼ်ႉလႆႈလုၵ်ႈၸၢႆးၸိုဝ်ႈ၊ ယႃႇရိတ်ႉ၊ ဢေႃႈ။-
ဝၢႆးသေၼၼ်ႉ၊ မႁႃႇလေႇလေႇလႃႉ၊ ဢသၢၵ်ႈလိပ်းယူႇထႅင်ႈပႅတ်ႇပၢၵ်ႇသၢမ်သိပ်းပီလႄႈလႆႈလုၵ်ႈၸၢႆးလႂ်တင်းလုၵ်ႈယိင်းလႂ်ထႅင်ႈသေယဝ်ႉ၊-
မိူဝ်ႈဢၼ်ဢသၢၵ်ႈထူၼ်ႈတဵမ်ပႅတ်ႇပၢၵ်ႇၵဝ်ႈသိပ်းႁႃႈပီၼၼ်ႉတၢႆၵႂႃႇဢေႃႈ။
မိူဝ်ႈဢၼ် ယႃႇရိတ်ႉ၊ မီးဢသၢၵ်ႈပၢၵ်ႇႁူၵ်းသိပ်းသွင်ပီၼၼ်ႉလႆႈလုၵ်ႈၸၢႆးၸိုဝ်ႈ၊ ဢေးၼွၵ်ႉ၊ ဢေႃႈ။-
ဝၢႆးသေၼၼ်ႉ ယႃႇရိတ်ႉ၊ ဢသၢၵ်ႈလိပ်းယူႇထႅင်ႈပႅတ်ႇပၢၵ်ႇပီလႄႈလႆႈလုၵ်ႈၸၢႆးလႂ်၊တင်းလုၵ်ႈယိင်းလႂ်ထႅင်ႈသေယဝ်ႉ၊-
မိူဝ်ႈဢၼ်ဢသၢၵ်ႈထူၼ်ႈတဵမ်ၵဝ်ႈပၢၵ်ႇႁူၵ်းသိပ်းသွင်ပီၼၼ်ႉတၢႆၵႂႃႇဢေႃႈ။
မိူဝ်ႈဢၼ် ဢေးၼွၵ်ႉ၊ မီးဢသၢၵ်ႈႁူၵ်းသိပ်းႁႃႈပီၼၼ်ႉလႆႈလုၵ်ႈၸၢႆးၸိုဝ်ႈ၊ မထုသလႃႉ၊ ဢေႃႈ။-
ဝၢႆးသေ မထုသလႃႉ၊ ၵိူတ်ႇယဝ်ႉၼၼ်ႉ ဢေးၼွၵ်ႉ၊ ၵႂႃႇမႃးလူၺ်ႈၵၼ်တင်းၽြႃးပဵၼ်ၸဝ်ႈသၢမ်ပၢၵ်ႇပီတဵမ်တဵမ်လႄႈ၊လႆႈလုၵ်ႈၸၢႆးလႂ်၊တင်းလုၵ်ႈယိင်းလႂ်ထႅင်ႈသေယဝ်ႉ၊-
ဢသၢၵ်ႈမၼ်းယိုၼ်းယၢဝ်းထူၼ်ႈထိုင်သၢမ်ပၢၵ်ႇႁူၵ်းသိပ်းႁႃႈပီဢေႃႈ။-
ဢေးၼွၵ်ႉ၊ ၵႂႃႇမႃးလူၺ်ႈၵၼ်တင်းၽြႃးပဵၼ်ၸဝ်ႈယူႇသေလႄႈႁၢႆၵႂႃႇၵွပ်ႈပိူဝ်ႈၽြႃးပဵၼ်ၸဝ်ႈႁပ်ႉဢဝ်မၼ်းၵႂႃႇဢေႃႈ။
မိူဝ်ႈဢၼ် မထုသလႃႉ၊ မီးဢသၢၵ်ႈပၢၵ်ႇပႅတ်ႇသိပ်းၸဵတ်းပီၼၼ်ႉလႆႈလုၵ်ႈၸၢႆးၸိုဝ်ႈ၊ လႃႇမႅၵ်ႈ၊ ဢေႃႈ။-
ဝၢႆးသေၼၼ်ႉ၊ မထုသလႃႉ၊ ဢသၢၵ်ႈလိပ်းယူႇထႅင်ႈၸဵတ်းပၢၵ်ႇပႅတ်ႇသိပ်းသွင်ပီလႄႈလႆႈလုၵ်ႈၸၢႆးလႂ်၊တင်းလုၵ်ႈယိင်းလႂ်ထႅင်ႈသေယဝ်ႉ၊-
မိူဝ်ႈဢၼ်ဢသၢၵ်ႈမၼ်းထူၼ်ႈတဵမ်ၵဝ်ႈပၢၵ်ႇႁူၵ်းသိပ်းၵဝ်ႈပီၼၼ်ႉတၢႆၵႂႃႇဢေႃႈ။
မိူဝ်ႈဢၼ် လႃႇမႅၵ်ႈ၊ မီးဢသၢၵ်ႈပၢၵ်ႇပႅတ်ႇသိပ်းသွင်ပီၼၼ်ႉမၼ်းလႆႈလုၵ်ႈၸၢႆးသေလႄႈ၊-
လၢတ်ႈလႄႈဝႃႈ၊ “လုၵ်ႈၵေႃႉၼႆႉတၵ်းပဵၼ်ၵေႃႉဢၼ်ၵႄႇသႄႇႁဝ်းဢွၵ်ႇလႄႈတၵ်းႁႂ်ႈႁဝ်းလႆႈသၢၵ်ႈသႃႇလူၺ်ႈၵၢၼ်ငၢၼ်းႁဝ်းဢိၵ်ႇတင်းတၢင်းဢၼ်မိုဝ်းႁဝ်းလႆႈႁဵတ်းယၢပ်ႇႁဵတ်းၽိုတ်ႇၵွပ်ႈပိူဝ်ႈလိၼ်ဢၼ် ထႃႇဝရႃႉၽြႃး၊ ၵိၼ်ႇဝႃႈဝႆႉၼၼ်ႉဢေႃႈ၊” ဝႃႈၼင်ႇၼႆလႄႈႁွင်ႉၸိုဝ်ႈလုၵ်ႈၼၼ်ႉဝႃႈ၊ ၼူဝ်းဢႃႇ၊ ဢေႃႈ။-
ဝၢႆးသေၼၼ်ႉ လႃႇမႅၵ်ႈ၊ ဢသၢၵ်ႈလိပ်းယူႇထႅင်ႈႁႃႈပၢၵ်ႇၵဝ်ႈသိပ်းႁႃႈပီလႄႈလႆႈလုၵ်ႈၸၢႆးလႂ်တင်းလုၵ်ႈယိင်းလႂ်ထႅင်ႈသေယဝ်ႉ၊-
မိူဝ်ႈဢၼ်ဢသၢၵ်ႈထူၼ်ႈတဵမ်ၸဵတ်းပၢၵ်ႇၸဵတ်းသိပ်းၸဵတ်းပီၼၼ်ႉတၢႆၵႂႃႇဢေႃႈ။
ဝၢႆးသေ ၼူဝ်းဢႃႇ၊ မီးဢသၢၵ်ႈႁႃႈပၢၵ်ႇပီၼၼ်ႉမၼ်းလႆႈလုၵ်ႈၸၢႆးသၢမ်ၵေႃႉ သေႇမႃႉ၊ႁႃႇမႃႉ၊ တင်း ယႃႇၽႅတ်ႈ၊ ဢေႃႈ။
မိူဝ်ႈဢၼ်မဵဝ်းၵူၼ်းယႂ်ႇၽႄၼမ်ၵိုၼ်းၸွတ်ႇတူဝ်ႈၵမ်ႇၽႃႇၵႂႃႇသေယဝ်ႉ၊ၶဝ်ၵိူတ်ႇလဵင်ႉလုၵ်ႈယိင်းလႂ်ဢေႃႈ။-
မိူဝ်ႈၼၼ်ႉလုၵ်ႈၸၢႆးၽြႃးပဵၼ်ၸဝ်ႈၸိူဝ်းၼၼ်ႉႁၼ်လုၵ်ႈယိင်းၵူၼ်းၸိူဝ်းၼၼ်ႉႁၢင်ႈလီလႄႈ၊ဢွၼ်ၵၼ်ဢဝ်ပဵၼ်မေးၵႃႈၼင်ႇဢၼ်ၶဝ်ထုၵ်ႇၸႂ်ၼၼ်ႉဢေႃႈ။-
ပိူဝ်ႈၼႆလႄႈ ထႃႇဝရႃႉၽြႃး၊ လၢတ်ႈဝႃႈ၊ “ၵဝ်တၵ်းဢမ်ႇႁႂ်ႈဝိၺိၺ်ႇၵဝ်ယူႇၼႂ်းၵူၼ်းသေႇသေႇ။ လွင်ႈမၼ်းၸမ်ႉ၊ၵူၼ်းပဵၼ်ၼိူဝ်ႉၼင်ဢေႃႈ။ ႁႂ်ႈဢသၢၵ်ႈၶဝ်မီးပၢၵ်ႇပၢႆသၢဝ်းပီသေ၊” ဝႃႈၼင်ႇၼႆဢေႃႈ။-
မိူဝ်ႈၸူဝ်ႈပၢၼ်ယၢမ်းၼၼ်ႉ၊မီးၵူၼ်းဢၼ်တူဝ်ယႂ်ႇႁႅင်းလူင်ဢၼ်ပဵၼ်လုၵ်ႈလၢၼ်ၸိူဝ်ႉၶိူဝ်းၵူၼ်းယိင်းၸိူဝ်းဢၼ်ႁူမ်ႈပွင်းၵၼ်တင်းလုၵ်ႈၸၢႆးၽြႃးပဵၼ်ၸဝ်ႈၸိူဝ်းၼၼ်ႉဢေႃႈ။ ၶဝ်ၼၼ်ႉပဵၼ်ၵူၼ်းႁႅင်းလူင်၊ၵူၼ်းဢၼ်ၸိုဝ်ႈသဵင်ဢွၵ်ႇႁူင်ႁၢင်းၸွတ်ႇၵႂႃႇၸဵမ်မိူဝ်ႈၵွၼ်ႇမိူဝ်ႈမိုၼ်ႉၼၼ်ႉဢေႃႈ။
ၽြႃးပဵၼ်ၸဝ်ႈႁုႁၼ်လွင်ႈဢၼ်ဢပျတ်ႈၵူၼ်းၵႃႈၼိူဝ်လိၼ်မိူင်းၼႆႉယႂ်ႇၼႃႇလႄႈတၢင်းၵျၢမ်ႇတၢင်းပွင်ႁူဝ်ၸႂ်ၶဝ်ၵႃႈမီးတင်းသဵင်ႈတင်းလူင်ပဵၼ်ဢၼ်ႁၢႆႉဢၼ်ယုတ်ႈၵူၺ်းၵူၺ်းၵူႈမိူဝ်ႈၵူႈဝၼ်းတႃႇသေႇဢမ်ႇထၢတ်ႇၼၼ်ႉလႄႈ၊-
မၼ်းၸဝ်ႈမႆႈၸႂ်ၼႅင်ၸႂ်လူၺ်ႈတၢင်းဢၼ်မၼ်းၸဝ်ႈလႆႈႁဵတ်းပဵၼ်ၵူၼ်းဝႆႉၵႃႈၼိူဝ်လိၼ်မိူင်းၼၼ်ႉဢေႃႈ။-
ပိူဝ်ႈၼႆလႄႈမၼ်းၸဝ်ႈလၢတ်ႈဝႃႈ၊ “ၵဝ်တၵ်းပႄႇၽဵဝ်ႈၵူၼ်းဢၼ်ၵဝ်ၽၢၼ်ႇသၢင်းဝႆႉၼႆႉဢိၵ်ႇတင်းတူဝ်သတ်းတင်းသဵင်ႈတင်းလူင်ပႅတ်ႈသေၵႃႈၼိူဝ်လိၼ်မိူင်းဢေႃႈ။ လွင်ႈမၼ်းၸမ်ႉ၊ၵဝ်မႆႈၸႂ်ၼႅင်ၸႂ်လူၺ်ႈလွင်ႈဢၼ်ၵဝ်လႆႈၽၢၼ်ႇသၢင်းႁဵတ်းပဵၼ်ၶဝ်ဝႆႉၼၼ်ႉဢေႃႈ၊” ဝႃႈၼင်ႇၼႆဢေႃႈ။-
ၼႂ်းဝႃႈၼၼ်သေၵေႃႈ ထႃႇဝရႃႉၽြႃး၊ ၵျိူၵ်ႈၸႂ်ထုၵ်ႇၸႂ် ၼူဝ်းဢႃႇ၊ ဢေႃႈ။
ၼႆႉၸမ်ႉ၊ပဵၼ်ပိုၼ်းလွင်ႈ ၼူဝ်းဢႃႇ၊ ဢေႃႈ။ ၼူဝ်းဢႃႇ၊ ပဵၼ်ၵေႃႉဢၼ်သိုဝ်ႈတေႃႇ၊ၵေႃႉဢၼ်ၸေးၸုမ်ႇပဵၼ်ၵူၼ်းလီၼႂ်းၸူဝ်ႈပၢၼ်ၼၼ်ႉလႄႈပဵၼ်ၵေႃႉဢၼ်ၵႂႃႇမႃးလူၺ်ႈၵၼ်တင်းၽြႃးပဵၼ်ၸဝ်ႈယူႇဢေႃႈ။-
မၼ်းမီးလုၵ်ႈၸၢႆးသၢမ်ၵေႃႉ သေႇမႃႉ၊ႁႃႇမႃႉ၊ တင်း ယႃႇၽႅတ်ႈ၊ ဢေႃႈ။-
မိူဝ်ႈၼၼ်ႉလိၼ်မိူင်းပဵၼ်ဢၼ်တူႇၼဝ်ႈၵႂႃႇသိုဝ်ႈၼႃႈတႂ်ႈတႃၽြႃးပဵၼ်ၸဝ်ႈလႄႈ၊ၵႃႈၼိူဝ်လိၼ်မိူင်းၼႆႉလွင်ႈတၢင်းဢၼ်ႁၢႆႉဢၼ်ယုတ်ႈၸွတ်ႇတူဝ်ႈၵႂႃႇၵူႈတီႈၵူႈလႅၼ်ယူႇဢေႃႈ။-
ၽြႃးပဵၼ်ၸဝ်ႈတူၺ်းလိၼ်မိူင်းလႄႈႁၼ်လွင်ႈတၢင်းဢၼ်တူႇၼဝ်ႈၵွပ်ႈပိူဝ်ႈၵူၼ်းတင်းလၢႆဢွၼ်ၵၼ်ႁဵတ်းလွင်ႈတၢင်းဢၼ်မိူၵ်ႈလိူင်းယူႇၼၼ်ႉဢေႃႈ။
ၽြႃးပဵၼ်ၸဝ်ႈလၢတ်ႈတေႃႇ ၼူဝ်းဢႃႇ၊ လႄႈဝႃႈ၊ “ၵဝ်တႅပ်းတတ်းႁႂ်ႈလႆႈဢဝ်မဵဝ်းသတ်ႉတဝႃႇမူၺ်ႉႁၢႆပႅတ်ႈယဝ်ႉ၊ၵွပ်ႈပိူဝ်ႈၵူၼ်းႁဵတ်းမိူၵ်ႈႁဵတ်းႁၢႆႉၼႃႇလႄႈလိၼ်မိူင်းတဵမ်လူၺ်ႈတၢင်းႁၢႆႉတၢင်းယုတ်ႈၶဝ်လႄႈၵဝ်တၵ်းယႃႉၽဵဝ်ႈပႅတ်ႈတင်းသဵင်ႈတင်းမူတ်းယဝ်ႉ။-
ဢဝ်မႆႉ ၵူဝ်ၽရႃႉ၊ သေယဝ်ႉ၊ႁဵတ်းႁိူဝ်းသၢင်းၽေႃးပုၼ်ႈမႂ်းတႃႉ။ ႁဵတ်းပဵၼ်လုၵ်း၊ပဵၼ်လုၵ်းၵႃႈၼႂ်းမၼ်းသေယဝ်ႉ၊ဢဝ်ယၢင်ပႅၵ်ႇတႃးၸဵမ်ၼွၵ်ႈၸဵမ်ၼႂ်းတႃႉ။-
ႁိူဝ်းသၢင်းၽေႃးၼၼ်ႉႁႂ်ႈၼႃႈယၢဝ်းမီးသၢမ်ပၢၵ်ႇသွၵ်ႇ၊ၼႃႈၵႂၢင်ႈႁႃႈသိပ်းသွၵ်ႇလႄႈတၢင်းသုင်ႁႂ်ႈမီးသၢမ်သိပ်းသွၵ်ႇတႃႉ။-
ႁူးလႅင်းဢၼ်သုင်သွၵ်ႇၼိုင်ႈၼၼ်ႉၵေႃႈႁဵတ်းဝႆႉႁွပ်ႈႁွပ်ႈတႃႉ။ ႁဵတ်းပဵၼ်ႁၢၼ်ႉတႂ်ႈ၊ႁၢၼ်ႉၵၢင်၊ႁၢၼ်ႉၼိူဝ်သၢမ်ႁၢၼ်ႉလႄႈဝႆႉၽၵ်းတူႁူးၼိုင်ႈတီႈၶၢင်ႈႁိူဝ်းသၢင်းၽေႃးၼၼ်ႉတႃႉ။-
ၵဝ်တၵ်းႁႂ်ႈၼမ်ႉထူမ်ႈလိၼ်မိူင်းႁႂ်ႈလႆႈယႃႉၽဵဝ်ႈပႅတ်ႈသတ်ႉတဝႃႇဢၼ်ဢသၢၵ်ႈလိပ်းတႂ်ႈၽႃႉၼိူဝ်လိၼ်တင်းမူတ်းယဝ်ႉ။ ၵူႈၸိူဝ်ႉၵူႈမဵဝ်းၵႃႈမီးတင်းသဵင်ႈတင်းမူတ်းတၵ်းလႆႈတၢႆဢေႃႈ။-
ၼႂ်းဝႃႈၼၼ်သေၵေႃႈၵဝ်တၵ်းဝႆႉၵတိသဵတ်ႈၸႃႇလႄႈႁႂ်ႈပတိၺိၺ်ႇၵဝ်တႄႇၵႃႈတီႈမႂ်းဢေႃႈ။ ၸႃႉၸဵမ်မႂ်းလႄႈလုၵ်ႈၸၢႆးမႂ်း၊မေးမႂ်းတင်းလုၵ်ႈပႂ်ႉမႂ်းတင်းလၢႆတၵ်းလႆႈၶဝ်ႈၵႃႈၼႂ်းႁိူဝ်းသၢင်းၽေႃးၼၼ်ႉဢေႃႈ။-
ၵႃႈၼႂ်းတရိၵ်ႈသၢၼ်ႇဢၼ်ဢသၢၵ်ႈလိပ်းၵူႈၸိူဝ်ႉၵူႈမဵဝ်းၼၼ်ႉမႂ်းတၵ်းလႆႈဢဝ်တူဝ်ပေႃႈတူဝ်မႄႈၵူပ်ႉၵူႈၵၼ်လႄႈသႂၢင်းသႂ်ႇၵႃႈၼႂ်းႁိူဝ်းသၢင်းၽေႃးႁႂ်ႈၶဝ်လႆႈဢသၢၵ်ႈလိပ်းၶျၢမ်းသႃႇလူၺ်ႈၵၼ်တင်းမႂ်းဢေႃႈ။-
ၼူၵ်ႉၵေႃႈမဵဝ်းလႂ်မဵဝ်းၼၼ်ႉ၊တူဝ်ထိူၼ်ႇၵေႃႈမဵဝ်းလႂ်မဵဝ်းၼၼ်ႉ၊တရိၵ်ႈသၢၼ်ႇဢၼ်ၸၢင်ႈၵႂႃႇၸၢင်ႈၵၢၼ်းၵေႃႈမဵဝ်းလႂ်မဵဝ်းၼၼ်ႉ၊တူဝ်ပေႃႈတူဝ်မႄႈၵူပ်ႉၵူႈၵၼ်လႄႈတၵ်းဢွၼ်ၵၼ်မႃးၸူးၵႃႈတီႈမႂ်းႁႂ်ႈဢသၢၵ်ႈလႆႈလိပ်းဢေႃႈ။-
မႂ်းတၵ်းလႆႈဢဝ်တၢင်းၵိၼ်ဢၼ်လီၵိၼ်ၵူႈၸိူဝ်ႉၵူႈပိူင်ၸုသိမ်းဝႆႉတီႈမႂ်းလႄႈတၵ်းပဵၼ်ပုၼ်ႈဢၼ်တူဝ်မႂ်းတၵ်းၵိၼ်ဢိၵ်ႇတင်းပုၼ်ႈတရိၵ်ႈသၢၼ်ႇတင်းလၢႆတၵ်းၵိၼ်ဢေႃႈ၊” ဝႃႈၼင်ႇၼႆဢေႃႈ။-
ၼူဝ်းဢႃႇ၊ ၵေႃႈႁဵတ်းၸွမ်းၵႃႈၼင်ႇဢၼ်ၽြႃးပဵၼ်ၸဝ်ႈသင်ႇႁဵတ်းၼၼ်ႉဢေႃႈ။
ထႃႇဝရႃႉၽြႃး၊ လၢတ်ႈတီႈ ၼူဝ်းဢႃႇ၊ လႄႈဝႃႈ၊ “ၼႂ်းၵူၼ်းၵႃႈမီးၼႂ်းၶိင်ႇၸူဝ်ႈပၢၼ်မိူဝ်ႈလဵဝ်ၼႆႉၵဝ်ႁုႁၼ်လွင်ႈဢၼ်မီးမႂ်းၵေႃႉလဵဝ်ၵူၺ်းသိုဝ်ႈတေႃႇဢေႃႈ။ မႂ်းႁွင်ႉဢဝ်ၵူၼ်းႁိူၼ်းၵူၼ်းယေးမႂ်းသေလႄႈၶဝ်ႈၵႃႈၼႂ်းႁိူဝ်းသၢင်းၽေႃးတႃႉ။-
ၼင်ႇႁိုဝ်တူဝ်သတ်းၵူႈမဵဝ်းတင်းၼူၵ်ႉၵူႈမဵဝ်းတၵ်းတေဢသၢၵ်ႈလိပ်းယူႇလႄႈသိုပ်ႇၵႂႃႇမိူဝ်းၼႃႈၵႃႈတီႈလိၼ်မိူင်းၼၼ်ႉၸိုင်၊ဢဝ်တူဝ်သတ်းမဵဝ်းဢၼ်မူတ်းသႂ်တူဝ်ပေႃႈတူဝ်မႄႈ၊ယႄႈမဵဝ်းၸဵတ်းၵူႈ၊တူဝ်သတ်းမဵဝ်းဢၼ်ဢမ်ႇမူတ်းသႂ်ၸမ်ႉ၊ဢဝ်တူဝ်ပေႃႈတူဝ်မႄႈယႄႈမဵဝ်းယႄႈၵူႈၵူၺ်းလႄႈ၊-
ၼူဝ်းဢႃႇ၊ ၵေႃႈႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉၼၼ်ႉဢေႃႈ။
ယၢမ်းမိူဝ်ႈဢၼ်ၼမ်ႉထူမ်ႈမိူင်းၼၼ်ႉ ၼူဝ်းဢႃႇ၊ ဢသၢၵ်ႈလႆႈႁူၵ်းပၢၵ်ႇပီဢေႃႈ။-
မၼ်းဢိၵ်ႇတင်းမေးမၼ်းပႃးၸဵမ်လုၵ်ႈၸၢႆးမၼ်းတင်းလၢႆတင်းလုၵ်ႈပႂ်ႉမၼ်းၸိူဝ်းၼၼ်ႉၶဝ်ႈၵႃႈၼႂ်းႁိူဝ်းသၢင်းၽေႃးႁႂ်ႈလႆႈလွတ်ႈၽေးၼမ်ႉထူမ်ႈမိူင်းၼၼ်ႉဢေႃႈ။-
ၸွမ်းၼင်ႇဢၼ်ၽြႃးပဵၼ်ၸဝ်ႈသင်ႇလၢတ်ႈဝႆႉၼၼ်ႉ၊ၵႃႈဢၼ်ပဵၼ်တူဝ်သတ်းဢၼ်မူတ်းသႂ်ဢၼ်ဢမ်ႇမူတ်းသႂ်လႂ်၊တင်းၼူၵ်ႉၵူႈမဵဝ်းလႂ်၊ဢိၵ်ႇတင်းတူဝ်ဢၼ်ၸၢင်ႈလိူၼ်ႈၸၢင်ႈၵၢၼ်းတူဝ်ပေႃႈတူဝ်မႄႈပဵၼ်ၵူႈပဵၼ်ၵူႈ။-
ဢွၼ်ၵၼ်ၶဝ်ႈၵႃႈၼႂ်းႁိူဝ်းသၢင်းၽေႃးလူၺ်ႈၵၼ်တင်း ၼူဝ်းဢႃႇ၊ ဢေႃႈ။-
ဝၢႆးသေၼၼ်ႉၸဵတ်းဝၼ်းၼမ်ႉထူမ်ႈမိူင်းပေႃႇပဵၼ်မႃးဢေႃႈ။
မိူဝ်ႈဢၼ်ဢသၢၵ်ႈ ၼူဝ်းဢႃႇ၊ တဵမ်ထူၼ်ႈႁူၵ်းပၢၵ်ႇပီၼႂ်းလိူၼ်တီႈသွင်လႆႈသိပ်းၸဵတ်းဝၼ်းၼၼ်ႉ၊ႁူးၼမ်ႉဢၼ်ယႂ်ႇဢၼ်ၵႂၢင်ႈတႅၵ်ႇဢွၵ်ႇသေၵႃႈၼႂ်းဢၼ်လိုၵ်ႉဢၼ်လမ်ႇလိၼ်မိူင်းမႃးလႄႈ၊ၽၵ်းတူႁူးၼမ်ႉၵၢင်ႁၢဝ်တင်းလၢႆၵေႃႈၽုၺ်ႇပိုတ်ႇသေယဝ်ႉ။-
ၽူၼ်တူၵ်းၵႃႈၼိူဝ်လိၼ်မိူင်းသီႇသိပ်းဝၼ်းသီႇသိပ်းၶိုၼ်းတဵမ်တဵမ်ဢေႃႈ။-
ၼႂ်းဝၼ်းၼၼ်ႉ ၼူဝ်းဢႃႇ၊ လႄႈမေးမၼ်းၶဝ်ႈၵႃႈၼႂ်းႁိူဝ်းသၢင်းၽေႃးႁူမ်ႈလူၺ်ႈၵၼ်တင်းလုၵ်ႈၸၢႆးၶဝ်သၢမ်ၵေႃႉ၊ သေႇမႃႉ၊ႁႃႇမႃႉ၊ တင်း ယႃႇၽႅတ်ႈ၊ ဢိၵ်ႇလူၺ်ႈမေးၶဝ်ဢေႃႈ။-
ၸႃႉၸဵမ်တူဝ်ထိူၼ်ႇမဵဝ်းလႂ်မဵဝ်းၼၼ်ႉ၊တူဝ်ဢၼ်ယဵၼ်ႇဢၼ်ငႄႈတူဝ်သတ်းဢၼ်လိူၼ်ႈဢၼ်ၵၢၼ်းၵူႈမဵဝ်းဢိၵ်ႇတင်းၼူၵ်ႉၵူႈမဵဝ်း။-
သတ်ႉတဝႃႇဢၼ်ဢသၢၵ်ႈလိပ်းၵႃႈမီးတင်းသဵင်ႈတင်းလူင်တူဝ်ပေႃႈတူဝ်မႄႈပဵၼ်ၵူပ်ႉပဵၼ်ၵူႈဢွၼ်ၵၼ်ၶဝ်ႈၵႃႈၼႂ်းႁိူဝ်းသၢင်းၽေႃးႁူမ်ႈလူၺ်ႈၵၼ်တင်း ၼူဝ်းဢႃႇ၊ ၶဝ်ပေႃႈမႄႈလုၵ်ႈ။-
ၸွမ်းၵႃႈၼင်ႇဢၼ်ၽြႃးပဵၼ်ၸဝ်ႈသင်ႇလၢတ်ႈဝႆႉၼၼ်ႉဢေႃႈ။ ဝၢႆးၼၼ်ႉ ထႃႇဝရႃႉၽြႃး၊ ဢိုတ်းႁပ်းၽၵ်းတူလႄႈႁႂ်ႈ ၼူဝ်းဢႃႇ၊ ယူႇတၢင်းၼႂ်းသေဢေႃႈ။
ၼမ်ႉၵေႃႈထူမ်ႈၶိုၼ်ႈယူႇၶိူဝ်းၶိူဝ်းသီႇသိပ်းဝၼ်းသီႇသိပ်းၶိုၼ်းတဵမ်တဵမ်လႄႈယွင်ႈႁိူဝ်းသၢင်းၽေႃးယူၵ်ႉၶိုၼ်ႈၽၢၵ်ႈလိၼ်ၵႂႃႇဢေႃႈ။-
ၼမ်ႉၼၼ်ႉယဵင်ႈႁိုင်ယဵင်ႈလိုၵ်ႉမႃးၼႃႇလူင်လၢင်သေလႄႈႁိူဝ်းသၢင်းၽေႃးၵေႃႈၽူးလွင်ႈယူႇၵႃႈၼိူဝ်ၼမ်ႉဢေႃႈ။-
သတ်ႉတဝႃႇဢၼ်ဢသၢၵ်ႈလိပ်းၵူႈၸိူဝ်ႉၵူႈမဵဝ်းၸႃႉၸဵမ်ၼူၵ်ႉလႂ်၊တင်းတရိၵ်ႈသၢၼ်ႇၵူႈၸိူဝ်ႉၵူႈမဵဝ်းဢိၵ်ႇတင်းၵူၼ်းတင်းလၢႆတၢႆသဵင်ႈဢေႃႈ။-
ၵႃႈဢၼ်ထူၺ်ႈၸႂ်ၶဝ်ႈထူၺ်ႈၸႂ်ဢွၵ်ႇၵႃႈၼိူဝ်လိၼ်မိူင်းတၢႆသဵင်ႈဢေႃႈ။-
ထႃႇဝရႃႉၽြႃး၊ ယႃႉၽဵဝ်ႈသတ်ႉတဝႃႇၵႃႈဢၼ်ဢသၢၵ်ႈလိပ်းၵူႈၸိူဝ်ႉၵူႈမဵဝ်း၊ၸႃႉၸဵမ်မဵဝ်းၵူၼ်းလႄႈတရိၵ်ႈသၢၼ်ႇၵူႈမဵဝ်းဢိၵ်ႇတင်းၼူၵ်ႉတင်းလၢႆပႅတ်ႈသေၵႃႈတီႈလိၼ်မိူင်းလႄႈၵူၺ်းမီး ၼူဝ်းဢႃႇ၊ ဢိၵ်ႇတင်းၶဝ်ၸိူဝ်းဢၼ်မီးယူႇႁူမ်ႈလူၺ်ႈၵၼ်တင်းမၼ်းၸိူဝ်းၼၼ်ႉၵိုတ်းၵျၢၼ်ႇဝႆႉၵႃႈၼႂ်းႁိူဝ်းသၢင်းၽေႃးၼၼ်ႉဢေႃႈ။-
ၼမ်ႉၵေႃႈယင်းဢမ်ႇယွမ်းၵႂႃႇသေဢိတ်းလႄႈထူမ်ႈဝႆႉယူႇပၢၵ်ႇႁႃႈသိပ်းဝၼ်းတဵမ်တဵမ်ဢေႃႈ။
ၽြႃးပဵၼ်ၸဝ်ႈယင်းဢမ်ႇလိုမ်း ၼူဝ်းဢႃႇ၊ ဢိၵ်ႇတင်းတရိၵ်ႈသၢၼ်ႇၸိူဝ်းဢၼ်မီးလူၺ်ႈၵၼ်တင်းမၼ်းၼႂ်းႁိူဝ်းသၢင်းၽေႃးၼၼ်ႉလႄႈ၊မၼ်းၸဝ်ႈႁႂ်ႈလူမ်းထူဝ်းသေယဝ်ႉ၊ၼမ်ႉယွမ်းၵႂႃႇဢေႃႈ။-
ႁူးၼမ်ႉၵႃႈၼႂ်းတီႈဢၼ်လိုၵ်ႉဢၼ်လမ်ႇလိၼ်မိူင်းလႂ်၊ဢိၵ်ႇတင်းၽၵ်းတူႁူးၼမ်ႉၵၢင်ႁၢဝ်တင်းလၢႆဢိုတ်းႁပ်းႁႂ်ႈၽူၼ်ႁိူတ်ႇၵႂႃႇသေလႄႈ၊-
ၼမ်ႉယွမ်းလူင်းၵႂႃႇၼႂ်းၸူဝ်ႈပၢၵ်ႇပၢႆႁႃႈသိပ်းဝၼ်းဢေႃႈ။-
ၼႂ်းလိူၼ်တီႈၸဵတ်းလႆႈသိပ်းၸဵတ်းဝၼ်းၼၼ်ႉႁိူဝ်းသၢင်းၽေႃးတၢင်ႇယူႇဝႆႉၵႃႈၼိူဝ်လွႆ ဢႃႇရရတ်ႉ၊ ဢေႃႈ။-
ၼမ်ႉယွမ်းလူင်းၵႂႃႇတိၵ်းတိၵ်းတေႃႇထိုင်ႁွတ်ႈၸိၵ်းလွႆတင်းလၢႆပေႃႇမႃးၼႂ်းလိူၼ်သိပ်းမႂ်ႇဝၼ်းၼိုင်ႈၼၼ်ႉဢေႃႈ။
ဝၢႆးသေသီႇသိပ်းဝၼ်းယဝ်ႉၸင်ႇ၊ ၼူဝ်းဢႃႇ၊ ၽုၺ်ႇႁူးလၢင်းတဵၼ်သေယဝ်ႉ၊ပွႆႇၵႃလမ်တူဝ်ၼိုင်ႈဢွၵ်ႇၵႂႃႇဢေႃႈ။-
ၵႃလမ်ၼၼ်ႉဢမ်ႇၶိုၼ်းပွၵ်ႈမႃးလႄႈမိၼ်ၵႂႃႇမိၼ်မႃးယူႇတေႃႇထိုင်ႁွတ်ႈၼမ်ႉႁႅင်ႈၵႂႃႇဢေႃႈ။-
ၵမ်းၼၼ်ႉ၊ ၼူဝ်းဢႃႇ၊ ၸင်ႇပွႆႇၼူၵ်ႉတူႈတူဝ်ၼိုင်ႈဢွၵ်ႇၵႂႃႇႁႂ်ႈလႆႈႁုလွင်ႈဢၼ်ၼမ်ႉလႆႈယွမ်းလူင်းၵႂႃႇမူတ်းယဝ်ႉႁိုဝ်ၼၼ်ႉဢေႃႈ။-
ၵွပ်ႈပိူဝ်ႈၼမ်ႉယင်းထူမ်ႈလိၼ်မိူင်းယူႇၼၼ်ႉလႄႈၼူၵ်ႉတူႈၼၼ်ႉဢမ်ႇမီးတီႈၸပ်းလႄႈၶိုၼ်းပွၵ်ႈမႃးၸူးတီႈႁိူဝ်းသၢင်းၽေႃးသေယဝ်ႉ၊ ၼူဝ်းဢႃႇ၊ ၵေႃႈယိုၼ်ႈမိုဝ်းတိၺွပ်းဢဝ်ၼူၵ်ႉတူႈၼၼ်ႉဢေႃႈ။-
မၼ်းပႂ်ႉယူႇထႅင်ႈၸဵတ်းဝၼ်းသေယဝ်ႉ၊သမ်ႉဢဝ်ၼူၵ်ႉတူႈတူဝ်ၼၼ်ႉၶိုၼ်းပွႆႇၵႂႃႇထႅင်ႈဢေႃႈ။-
ထိုင်ၶိင်ႇတၢမ်းၶမ်ႈၼူၵ်ႉတူႈၼၼ်ႉၵၢပ်ႈဢဝ်မႂ်မႆႉသၢၼ်ႇလုၼ်ႇဢၼ်ၸင်ႇၵၢပ်ႈဢဝ်မႃးဢၼ်မႂ်ႇမႂ်ႇလႄႈၶိုၼ်းပွၵ်ႈမႃးၸူးတီႈ ၼူဝ်းဢႃႇ၊ ဢေႃႈ။ မၼ်းၵေႃႈႁုႁၼ်လွင်ႈဢၼ်ၼမ်ႉယွမ်းၵႂႃႇမူတ်းယဝ်ႉၼၼ်ႉဢေႃႈ။-
ဝၢႆးသေၼၼ်ႉမၼ်းပႂ်ႉယူႇထႅင်ႈၸဵတ်းဝၼ်းသေယဝ်ႉ၊သမ်ႉဢဝ်ၼူၵ်ႉတူႈတူဝ်ၼၼ်ႉၶိုၼ်းပွႆႇၵႂႃႇထႅင်ႈပွၵ်ႈၼိုင်ႈလႄႈၵမ်းၼႆႉၼူၵ်ႉတူႈတူဝ်ၼၼ်ႉဢမ်ႇၶိုၼ်းပွၵ်ႈမႃးယဝ်ႉ။
မိူဝ်ႈ ၼူဝ်းဢႃႇ၊ ဢသၢၵ်ႈလႆႈႁူၵ်းပၢၵ်ႇပၢႆၼိုင်ႈပီလိူၼ်တီႈၼိုင်ႈဝၼ်းတီႈၼိုင်ႈၼၼ်ႉၼမ်ႉယွမ်းၵႂႃႇယဝ်ႉလႄႈ ၼူဝ်းဢႃႇ၊ ၽုၺ်ႇပိုတ်ႇမုင်းႁိူဝ်းသၢင်းၽေႃးသေယဝ်ႉ၊မိူဝ်ႈဢၼ်မုင်ႈတူၺ်းၸိုင်၊ႁၼ်လွင်ႈဢၼ်ၼမ်ႉယွမ်းၵႂႃႇၵႃႈၼိူဝ်လိၼ်မိူင်းယဝ်ႉၼၼ်ႉဢေႃႈ။-
လိူၼ်တီႈသွင်သၢဝ်းၸဵတ်းဝၼ်းလိၼ်မိူင်းယူတ်းႁႅင်ႈၵႂႃႇလီငၢမ်းဢေႃႈ။
ၽြႃးပဵၼ်ၸဝ်ႈၸင်ႇလၢတ်ႈတီႈ ၼူဝ်းဢႃႇ၊ လႄႈဝႃႈ၊-
“ႁွင်ႉဢဝ်မေးမႂ်းဢိၵ်ႇတင်းလုၵ်ႈၸၢႆးလုၵ်ႈပႂ်ႉမႂ်းတင်းလၢႆဢွၵ်ႇႁိူဝ်းသၢင်းၽေႃးလႄႈလူင်းၵႂႃႇတႃႉ။-
ဢဝ်ၼူၵ်ႉလႂ်ဢိၵ်ႇတင်းတူဝ်သတ်းၸိူဝ်းဢၼ်မီးလူၺ်ႈၵၼ်တင်းမႂ်းၵႃႈမီးၸိူဝ်းၼၼ်ႉလူင်းၵႂႃႇၸွမ်းမႂ်းလႄႈပွႆႇႁႂ်ႈၶဝ်ၵႂႃႇၵိူတ်ႇၵႂႃႇၽႄႈလႄႈၸွတ်ႇတဵမ်လိၼ်မိူင်းတႃႉ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉၸႃႉၸဵမ် ၼူဝ်းဢႃႇ၊ လႄႈမေးမၼ်းဢိၵ်ႇတင်းလုၵ်ႈၸၢႆးလုၵ်ႈပႂ်ႉမၼ်းတင်းလၢႆဢွၵ်ႇႁိူဝ်းသၢင်းၽေႃးလႄႈလူင်းၵႂႃႇဢေႃႈ။-
တူဝ်သတ်းတင်းလၢႆဢိၵ်ႇတင်းၼူၵ်ႉၸိူဝ်းၼၼ်ႉၵေႃႈဢွၼ်ၵၼ်ဢွၵ်ႇႁိူဝ်းသၢင်းၽေႃးလႄႈလူင်းၵႂႃႇၵူပ်ႉၽႂ်ၵူႈမၼ်းသေဢေႃႈ။
ၼူဝ်းဢႃႇ၊ ၵေႃႈတႄႇႁဵတ်းၶဵင်ႇတၢင်းလူႇပုၼ်ႈတၵ်းသၢၵ်ႈလူႇတီႈ ထႃႇဝရႃႉၽြႃး၊ သေယဝ်ႉ၊ဢဝ်တူဝ်သတ်းဢၼ်မူတ်းသႂ်ဢိၵ်ႇတင်းၼူၵ်ႉဢၼ်မူတ်းသႂ်ယေႈမဵဝ်းယေႈတူဝ်ပုၼ်ႈႁႂ်ႈပဵၼ်တူဝ်တၢင်းလူႇဢၼ်တုတ်ႇၽႆးၵႃႈၼိူဝ်ၶဵင်ႇတၢင်းလူႇၼၼ်ႉဢေႃႈ။-
ဢၢႆႁွမ်ဢၢႆႁူၺ်းတူဝ်တၢင်းလူႇၼၼ်ႉထုၵ်ႇၸႂ် ထႃႇဝရႃႉၽြႃး၊ လႄႈမၼ်းၸဝ်ႈလၢတ်ႈၼႂ်းၸႂ်လႄႈဝႃႈ၊ “ၵမ်းလိုၼ်းၵဝ်တၵ်းဢမ်ႇၵိၼ်ႇဢမ်ႇဝႃႈလိၼ်မိူင်းထႅင်ႈၵွပ်ႈပိူဝ်ႈတၢင်းႁဵတ်းၵူၼ်းၼၼ်ႉယဝ်ႉ။ ၵူၼ်းၸိုင်၊ၸဵမ်မိူဝ်ႈယင်းလဵၵ်ႉယင်းဢွၼ်ႇၼၼ်ႉၵေႃႈၸၢင်ႈၶႆႈၸႂ်ၵျၢမ်ႇပွင်ဢၼ်ႁၢႆႉဢၼ်မိူၵ်ႈၼၼ်ႉၵဝ်ႁုယဝ်ႉ။ ၸိူဝ်ႉၼင်ႇဢၼ်ၵဝ်ႁဵတ်းယဝ်ႉၵႂႃႇၼႆႉ ၵမ်းလိုၼ်းၵဝ်တၵ်းဢမ်ႇယႃႉၽဵဝ်ႈသတ်ႉတဝႃႇဢၼ်ဢသၢၵ်ႈလိပ်းတင်းသဵင်ႈတင်းလူင်ၸိူဝ်းၼႆႉထႅင်ႈယဝ်ႉ။-
ၸူဝ်ႈဢၼ်လိၼ်မိူင်းယင်းမီးယူႇၼႆႉၶိင်ႇဢၼ်ဝၢၼ်ႇပိုၼ်ၽုၵ်ႇသွမ်ႈ၊ၶိင်ႇဢၼ်ပၢတ်ႇထိူဝ်သိမ်းဢဝ်တၵ်းတေလႆႈမီးဢေႃႈ။ ၶိင်ႇၵတ်း၊ၶိင်ႇမႆႈ၊ၶိင်ႇႁိုဝ်ႉ၊ၶိင်ႇႁႅင်ႈ၊ၶိင်ႇၵၢင်ဝၼ်း၊ၶိင်ႇၵၢင်ၶိုၼ်း၊တေဢမ်ႇလႆႈထၢတ်ႇ” ဝႃႈၼင်ႇၼႆတီႈတူဝ်ၸဝ်ႈၵဝ်ႇဢေႃႈ။
ၽြႃးပဵၼ်ၸဝ်ႈပၼ်တၢင်းလီတီႈ ၼူဝ်းဢႃႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉလႄႈဝႃႈ၊ “သူၵိူတ်ႇလဵင်ႉလုၵ်ႈလၢင်းၼမ်ၼမ်လႄႈႁႂ်ႈလုၵ်ႈလၢင်းၸိူဝ်ႉၶိူဝ်းသူၸွတ်ႇတူဝ်ႈၵႂႃႇၵႃႈၼိူဝ်လိၼ်မိူင်းတႃႉ။-
တူဝ်သတ်းၵူႈၸိူဝ်ႉၵူႈမဵဝ်းၸႃႉၸဵမ်ၼူၵ်ႉၵူႈမဵဝ်း ဢိၵ်ႇတင်းပႃဢၼ်မီးၼႂ်းၼမ်ႉၵူႈၸိူဝ်ႉၵူႈပိူင်ၵႃႈမီးတင်းသဵင်ႈတင်းလူင်တၵ်းလႆႈၵူဝ်ႁႄသူဢေႃႈ။ ၵဝ်ဢဝ်ၵႃႈမီးတင်းသဵင်ႈတင်းလူင်ဢၼ်ၸၢင်ႈတူင်ႉၸၢင်ႈၼိုင်ယူႇၸိူဝ်းၼၼ်ႉဢၢပ်ႈပၼ်ၵႃႈၼႂ်းမိုဝ်းသူႁႂ်ႈသူလႆႈဢုပ်ႉပိူင်ႇဢေႃႈ။-
ၵႃႈဢၼ်ပဵၼ်တူဝ်ဢၼ်ထူၺ်ႈၸႂ်လႄႈတူင်ႉယူႇၼိုင်ယူႇၸိူဝ်းၼၼ်ႉပဵၼ်ပုၼ်ႈတၢင်းၵိၼ်သူဢေႃႈ။ ၵဝ်ဢဝ်ၵႃႈမီးတင်းသဵင်ႈတင်းလူင်ဢၢပ်ႈပၼ်ႁႂ်ႈသူလႆႈၵိၼ်ၸိူဝ်ႉၼင်ႇမၢၵ်ႇၼင်ႇႁူင်းယဝ်ႉ။-
ၵူၺ်းၵႃႈ၊ယႃႇပေၵိၼ်ၼိူဝ်ႉပႃးလူၺ်ႈတင်းလိူတ်ႈမၼ်းၼၼ်ႉ။ လွင်ႈမၼ်းၸမ်ႉ၊ဢသၢၵ်ႈမၼ်းမီးၵႃႈၼႂ်းလိူတ်ႈၼၼ်ႉဢေႃႈ။-
ပေႃးသေၵေႃႉသေၵူၼ်းထွၵ်ႇလိူတ်ႈၵူၼ်းၸိုင်၊ၵဝ်တၵ်းယွၼ်းဢဝ်လိူတ်ႈၵေႃႉဢၼ်ထွၵ်ႇလိူတ်ႈၵူၼ်းၼၼ်ႉဢေႃႈ။ တီႈတူဝ်သတ်းဢၼ်ထွၵ်ႇလိူတ်ႈၵူၼ်းၵေႃႈၵဝ်တၵ်းယွၼ်းဢဝ်လိူတ်ႈတူဝ်သတ်းၼၼ်ႉဢေႃႈ။-
ၽြႃးပဵၼ်ၸဝ်ႈၽၢၼ်ႇသၢင်းႁဵတ်းပဵၼ်ၵူၼ်းၸွမ်းၼင်ႇႁၢင်ႈၽၢင်မၼ်းၸဝ်ႈဢေႃႈ။ ပိူဝ်ႈၼႆလႄႈပေႃးသေၵေႃႉသေၵူၼ်းထွၵ်ႇလိူတ်ႈၵူၼ်းၸိုင်၊ၵေႃႉၼၼ်ႉတၵ်းတေလႆႈၶၢမ်ႇတၢင်းဢၼ်မဵဝ်းၵူၼ်းမၼ်းၼင်ႇၵၼ်ၶိုၼ်းထွၵ်ႇလိူတ်ႈမၼ်းဢေႃႈ။
“သူၸမ်ႉ၊ၵိူတ်ႇလဵင်ႉလုၵ်ႈလၢင်းၼမ်ၼမ်လႄႈႁႂ်ႈလုၵ်ႈလၢင်းၸိူဝ်ႉၶိူဝ်းသူၸွတ်ႇတူဝ်ႈၵႂႃႇၵႃႈၼိူဝ်လိၼ်မိူင်းတႃႉ၊” ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈသမ်ႉလၢတ်ႈတီႈ ၼူဝ်းဢႃႇ၊ တင်းလုၵ်ႈၸၢႆးမၼ်းတင်းလၢႆလႄႈဝႃႈ၊-
“မိူဝ်ႈလဵဝ်ၼႆႉ ၵဝ်ႁဵတ်းပတိၺိၺ်ႇလႄႈဝႆႉၵတိသဵတ်ႈၸႃႇၵႃႈတီႈသူပေႃႈလုၵ်ႈဢိၵ်ႇတင်းၵႃႈတီႈၸိူဝ်ႉၶိူဝ်းသူမိူဝ်းၼႃႈ၊-
ဢိၵ်ႇတင်းၵႃႈတီႈသတ်ႉတဝႃႇဢၼ်ဢသၢၵ်ႈလိပ်းယူႇၸႃႉၸဵမ်ၼူၵ်ႉလႂ်၊ဢိၵ်ႇတင်းၵႃႈတီႈတူဝ်သတ်းၵူႈမဵဝ်းၸိူဝ်းဢၼ်ဢွၵ်ႇႁိူဝ်းသၢင်းၽေႃးလႄႈလူင်းၸွမ်းသူမႃးၵႃႈမီးတင်းသဵင်ႈတင်းလူင်ၼၼ်ႉဢေႃႈ။-
ပတိၺိၺ်ႇၵဝ်ၸမ်ႉ၊ၵမ်းလိုၼ်းသတ်ႉတဝႃႇဢၼ်ဢသၢၵ်ႈလိပ်းယူႇၵႃႈမီးတင်းသဵင်ႈတင်းလူင်တၵ်းဢမ်ႇလႆႈသုမ်းၵွပ်ႈပိူဝ်ႈတၢင်းဢၼ်ၼမ်ႉထူမ်ႈမိူင်း။ ၵမ်းလိုၼ်းတၢင်းဢၼ်ၼမ်ႉထူမ်ႈမိူင်းဢၼ်တၵ်းယႃႉၽဵဝ်ႈလိၼ်မိူင်းပႅတ်ႈၼၼ်ႉၵေႃႈတၵ်းဢမ်ႇမီးယဝ်ႉ။-
သၢၵ်ႈသေႇပုၼ်ႈပတိၺိၺ်ႇဢၼ်ၵဝ်ဝႆႉဝူင်ႈၵၢင်ၵဝ်တင်းသူဢိၵ်ႇတင်းသတ်ႉတဝႃႇၵႃႈဢၼ်ဢသၢၵ်ႈလိပ်းယူႇတင်းလၢႆၼႆႉတႄႇယူႇသေႇသေႇသိုပ်ႇသိုပ်ႇတၢမ်တၢမ်ဝႃႈၼႆ၊ႁႂ်ႈလႆႈပဵၼ်လၢၵ်ႈၶၼႃႇသၢၵ်ႈသေႇဝႆႉၸိုင်၊-
ၵဝ်တၵ်းဢဝ်ႁူင်းႁႆးၵဝ်ဝႆႉၵႃႈတီႈမွၵ်ႇၵုမ်ႈဢေႃႈ။ ဢၼ်ၼၼ်ႉတၵ်းပဵၼ်လၢၵ်ႈၶၼႃႇသၢၵ်ႈသေႇဢၼ်ၵဝ်ႁဵတ်းပတိၺိၺ်ႇၵတိလူၺ်ႈၵၼ်တင်းလိၼ်မိူင်းဢေႃႈ။-
မိူဝ်ႈဢၼ်ၵဝ်ႁႂ်ႈၽႃႉၽူၼ်ၵုမ်ႈမႃးၼၼ်ႉႁူင်းႁႆးတၵ်းပေႃႇမႃးၵႃႈတီႈမွၵ်ႇၵုမ်ႈဢေႃႈ။-
မိူဝ်ႈၼၼ်ႉ ၵဝ်တၵ်းၶုၵ်းၸႂ်လႆႈၶႆႈၸႂ်ထူပ်းပတိၺိၺ်ႇၵဝ်ဢၼ်ဝႆႉၵႃႈတီႈသူဢိၵ်ႇတင်းတူဝ်သတ်းတင်းသဵင်ႈတင်းလူင်လူၺ်ႈလွင်ႈၵမ်းလိုၼ်းတၵ်းဢမ်ႇမီးတၢင်းဢၼ်ၼမ်ႉထူမ်ႈလိၼ်မိူင်းလႄႈယႃႉၽဵဝ်ႈသတ်ႉတဝႃႇဢၼ်ဢသၢၵ်ႈလိပ်းထႅင်ႈၼၼ်ႉဢေႃႈ။-
ယၢမ်းမိူဝ်ႈဢၼ်ႁူင်းႁႆးပေႃႇမႃးၵႃႈတီႈမွၵ်ႇၵုမ်ႈၼၼ်ႉၵဝ်တၵ်းတူၺ်းႁၼ်လႄႈၶုၵ်းၸႂ်လႆႈၶႆႈၸႂ်ထူပ်းပတိၺိၺ်ႇထႃႇဝရႃႉဢၼ်ၵဝ်ႁဵတ်းဝူင်ႈၵၢင်ၵဝ်တင်းသူပႃးၸဵမ်သတ်ႉတဝႃႇဢၼ်ဢသၢၵ်ႈလိပ်းယူႇၵႃႈၼိူဝ်လိၼ်မိူင်းတင်းသဵင်ႈတင်းလူင်ဢေႃႈ။-
ဢၼ်ၼႆႉၸမ်ႉ၊ပဵၼ်လၢၵ်ႈၶၼႃႇသၢၵ်ႈသေႇပတိၺိၺ်ႇၵတိဢၼ်ၵဝ်ဝႆႉၵႃႈၼႂ်းဝူင်ႈၵၢင်ၵဝ်တင်းသတ်ႉတဝႃႇဢၼ်ဢသၢၵ်ႈလိပ်းယူႇတင်းသဵင်ႈတင်းလူင်ၼၼ်ႉယဝ်ႉ၊” ဝႃႈၼင်ႇၼႆဢေႃႈ။
လုၵ်ႈၸၢႆး ၼူဝ်းဢႃႇ၊ ၸိူဝ်းဢၼ်ဢွၵ်ႇသေၵႃႈတီႈႁိူဝ်းသၢင်းၽေႃးလူင်းမႃးၼၼ်ႉပဵၼ် သေႇမႃႉ၊ႁႃႇမႃႉ၊ တင်း ယႃႇၽႅတ်ႈ၊ ဢေႃႈ။ ႁႃႇမႃႉ၊ ပဵၼ်ပေႃႈ ၶႃႇၼၼ်ႇ၊ ဢေႃႈ။-
လုၵ်ႈၸၢႆး ၼူဝ်းဢႃႇ၊ သၢမ်ၵေႃႉၼႆႉပဵၼ်ပူႇပေႃႈၵူၼ်းမိူင်းလေႃးၵႃႉတင်းသဵင်ႈတင်းလူင်ဢေႃႈ။
ၼူဝ်းဢႃႇ၊ ပဵၼ်ၸဝ်ႈႁႆႈၸဝ်ႈၼႃးလႄႈပဵၼ်ၵေႃႉဢၼ်ၽုၵ်ႇသွမ်ႈတူၼ်ႈမၢၵ်ႇၸပိတ်ႉဢွၼ်တၢင်းပိူၼ်ႈဢေႃႈ။-
မၼ်းၵိၼ်ၼမ်ႉမၢၵ်ႇၸပိတ်ႉမဝ်းၼႃႇလႄႈထွတ်ႇလွၼ်ႈၶူဝ်းၼုင်ႈမၼ်းသေယဝ်ႉ၊ယူႇတူဝ်ပူၺ်ယူႇၵႃႈၼႂ်းသုမ်ႉမၼ်းဢေႃႈ။-
မိူဝ်ႈၼၼ်ႉ ႁႃႇမႃႉ၊ ပေႃႈ ၶႃႇၼၼ်ႇ၊ ႁၼ်တၢင်းဢၼ်ပေႃႈၶဝ်ယူႇတူဝ်ပူၺ်ယူႇလႄႈမၼ်းဢွၵ်ႇၵႂႃႇမွၵ်ႇလၢတ်ႈတီႈပီႈၼွင်ႉမၼ်းသွင်ၵေႃႉသေယဝ်ႉ။-
သေႇမႃႉ၊ တင်း ယႃႇၽႅတ်ႈ၊ ဢဝ်ၶူဝ်းၼုင်ႈတၢင်ႇၵႃႈၼိူဝ်ႁူဝ်မႃႇႁူၼ်လင်ၸူးတီႈပေႃႈၶဝ်လႄႈႁူမ်ႇပၼ်တူဝ်ပူၺ်ပေႃႈၶဝ်ၼၼ်ႉဢေႃႈ။ ၶဝ်သွင်ၵေႃႉဝၢႆႇၼႃႈဢွၵ်ႇၽၢႆႇတၢင်းၼွၵ်ႈယူႇလႄႈဢမ်ႇႁၼ်တူဝ်ပူၺ်ပေႃႈၶဝ်ၼၼ်ႉ၊-
မိူဝ်ႈဢၼ် ၼူဝ်းဢႃႇ၊ တိုၼ်ႇမႃးၼၼ်ႉမၼ်းလႆႈႁုလွင်ႈဢၼ်လုၵ်ႈၸၢႆးမၼ်းၵေႃႉလဵၵ်ႉႁဵတ်းၸိူဝ်ႉၼင်ႇၼၼ်တီႈမၼ်းသေလႄႈလၢတ်ႈဝႃႈ၊
“တၢင်းဢၼ်ၵိၼ်ႇဝႃႈ၊ႁႂ်ႈတူၵ်းၵႃႈၼိူဝ် ၶႃႇၼၼ်ႇ၊ တႃႉ။ ႁႂ်ႈမၼ်းလႆႈပဵၼ်ၶႃႈတီႈပီႈမၼ်းၼွင်ႉမၼ်းၸိူဝ်းၼၼ်ႉတႃႉ။
ႁႂ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈပၼ်တၢင်းလီမၢင်ႇၵလႃႇတီႈ သေႇမႃႉ၊ သေၵမ်းလူၺ်ႈ။ ႁႂ်ႈ ၶႃႇၼၼ်ႇ၊ ပဵၼ်ၶႃႈတီႈ သေႇမႃႉ၊ တႃႉ။
ႁႂ်ႈၽြႃးပဵၼ်ၸဝ်ႈႁဵတ်းႁႂ်ႈ ယႃႇၽႅတ်ႈ၊ ၶိုၼ်ႈယႂ်ႇၼမ်ၵိုၼ်းသေၵမ်းလူၺ်ႈ။ ႁႂ်ႈၸိူဝ်ႉၶိူဝ်းမၼ်းယူႇထုၵ်ႇမေႃၵၼ်တင်းၵူၼ်းမဵဝ်း သေႇမႃႉ၊ သေၵမ်းလူၺ်ႈ။ ႁႂ်ႈ ၶႃႇၼၼ်ႇ၊ ပဵၼ်ၶႃႈတီႈ ယႃႇၽႅတ်ႈ၊ တႃႉ၊” ဝႃႈၼင်ႇၼႆဢေႃႈ။
ဝၢႆးသေၼမ်ႉထူမ်ႈမိူင်းယဝ်ႉလႄႈ ၼူဝ်းဢႃႇ၊ ဢသၢၵ်ႈလိပ်းထႅင်ႈသၢမ်ပၢၵ်ႇႁႃႈသိပ်းပီဢေႃႈ။-
မိူဝ်ႈဢၼ်ဢသၢၵ်ႈတဵမ်ထူၼ်ႈၵဝ်ႈပၢၵ်ႇႁႃႈသိပ်းပီၼၼ်ႉမၼ်းလႆႈသဵင်ႈၵၢမ်ႇၵႂႃႇဢေႃႈ။
ၼႆႉၸမ်ႉ၊ပဵၼ်ၸရၢင်းၸိူဝ်ႉၶိူဝ်းၸူဝ်ႈလုၵ်ႈပၢၼ်လၢၼ်လုၵ်ႈၸၢႆး ၼူဝ်းဢႃႇ၊ ဢၼ်ပဵၼ် သေႇမႃႉ၊ႁႃႇမႃႉ၊ ဢိၵ်ႇတင်း ယႃႇၽႅတ်ႈ၊ ၼၼ်ႉဢေႃႈ။ ဝၢႆးသေၼမ်ႉထူမ်ႈမိူင်းယဝ်ႉၼၼ်ႉၶဝ်မီးလုၵ်ႈမီးလၢင်းဢေႃႈ။
လုၵ်ႈၸၢႆး ယႃႇၽႅတ်ႈ၊ ၸမ်ႉ၊ပဵၼ် ၵေႃးမႃႇ၊မႃႇၵေႃးၵႃႉ၊မႃႇတေႇ၊ယႃႇဝၼ်ႇ၊တုပလႃႉ၊မႄႇသႅၵ်ႉ၊ ဢိၵ်ႇတင်း တိရတ်ႉ၊ ဢေႃႈ။-
ၶိူဝ်း ၵေႃးမႃႇ၊ ပဵၼ်ၵူၼ်းမဵဝ်း ဢသၵႄႇၼတ်ႉ၊ရိၽတ်ႉ၊ တင်းၵူၼ်းမဵဝ်း တေႃႇၵမႃႉ၊ ဢေႃႈ။-
ၶိူဝ်း ယႃႇဝၼ်ႇ၊ ပဵၼ်ၵူၼ်းမဵဝ်း ဢေးလိသႃႇ၊သပဵၼ်ႇ၊ သၢႆးပရၢတ်ႈ၊ တင်းၵူၼ်းမဵဝ်း ရူဝ်းတေႇ၊ ဢေႃႈ။-
ၶဝ်ပဵၼ်ပူႇပေႃႈၵူၼ်းမဵဝ်းဢၼ်ယူႇႁိမ်းၽင်ႇပၢင်ႇလၢႆႇၼၼ်ႉဢေႃႈ။ ၸိူဝ်ႉၶိူဝ်းၵူၼ်းမဵဝ်း ယႃႇၽႅတ်ႈ၊ ၸိူဝ်းၼၼ်ႉယူႇၽၢတ်ႇၽႄၵၼ်မိူင်းၽႂ်မိူင်းမၼ်းပဵၼ်ၵူၼ်းမဵဝ်းလႂ်မဵဝ်းၼၼ်ႉလႄႈလၢတ်ႈၵႂၢမ်းၽႃႇသႃႇဢၼ်ပႅၵ်ႇဢၼ်ပိူင်ႈၵၼ်ႁင်းၽႂ်ႁင်းမၼ်းဢေႃႈ။
လုၵ်ႈၸၢႆး ႁႃႇမႃႉ၊ ၸမ်ႉ၊ပဵၼ် ၵုသႃႉ၊ဢေးၵျိပ်ႉ၊လိပ်ႉပီးယႃး၊ ဢိၵ်ႇတင်း ၶႃႇၼၼ်ႇ၊ ဢေႃႈ။-
ၶိူဝ်း ၵုသႃႉ၊ ပဵၼ်ၵူၼ်းမဵဝ်း သေးၽႃႉ၊ႁႃႇဝိလႃႉ၊သႃႇပတႃႉ၊ရႃႇမႃႉ၊ တင်းၵူၼ်းမဵဝ်း သပ်ႉတေႇၶႃႉ၊ ဢေႃႈ။ ၶိူဝ်း ရႃႇမႃႉ၊ ၽႄဢွၵ်ႇမႃးပဵၼ်ၵူၼ်းမဵဝ်း သေးပႃႉ၊ တင်းၵူၼ်းမဵဝ်း တေႇတၼ်ႇ၊ ဢေႃႈ။-
ၵုသႃႉ၊ မီးလုၵ်ႈၸၢႆးဢၼ်ၸိုဝ်ႈ ၼိမ်ႇရေႃးတႃႉ၊ မၼ်းပဵၼ်ၵေႃႉဢၼ်ပႄႉသိုၵ်းဢွၼ်တၢင်းပိူၼ်ႈလႄႈႁတ်းႁၢၼ်ႁႅင်းယႂ်ႇၼႃႇၵႃႈၼိူဝ်လိၼ်မိူင်းၼႆႉဢေႃႈ။-
မၼ်းပဵၼ်ၵူၼ်းလႃႈထိူၼ်ႇဢၼ်ႁႅင်းယႂ်ႇလူင်ၵေႃႉၼိုင်ႈၽၢႆႇၼႃႈ ထႃႇဝရႃႉၽြႃး၊ လႄႈပိူၼ်ႈယင်းၸၢပ်ႈၵႂၢမ်းဝႆႉဝႃႈ၊ “မိူၼ်ၼင်ႇလႃႈထိူၼ်ႇလူင် ၼိမ်ႇရေႃးတႃႉ၊ ဢၼ်ႁႅင်းယႂ်ႇတီႈၽၢႆႇၼႃႈ ထႃႇဝရႃႉၽြႃး၊ ” ဝႃႈၼႆဢေႃႈ။-
သိုင်ႇတိူင်းမိူင်းမၼ်းဢၼ်ပဵၼ်ဢွၼ်တၢင်းၼၼ်ႉပဵၼ်ဝဵင်း ပႃႇပေႇလႃႉ၊ ဝဵင်း ဢေႇရိၵ်ႉ၊ တင်းဝဵင်း ဢၵ်ႉၵတ်ႉ၊ တင်းသၢမ်ဝဵင်းၼႆႉမီးၼႂ်းမိူင်း သိၼႃႇ၊ ဢေႃႈ။-
လုၵ်ႉသေၵႃႈတီႈမိူင်းၼၼ်ႉမၼ်းၵႂႃႇၵႃႈတီႈမိူင်း ဢႃႇသီးရီးယႃး၊ သေလႄႈတႄႇတင်ႈဝဵင်း ၼိၼေႇဝူၺ်ႇ၊ ဝဵင်း ရႁေႃႇၽူတ်ႉ၊ ဝဵင်း ၵႃႇလႃႉ၊-
တင်းဝဵင်း ရေးသိၼ်ႇ၊ ဢၼ်မီးၵႃႈၼႂ်းဝူင်ႈၵၢင်ဝဵင်းလူင် ၼိၼေႇဝူၺ်ႇ၊ တင်းဝဵင်းလူင် ၵႃႇလႃႉ၊ ၼၼ်ႉဢေႃႈ။
ၸိူဝ်ႉၶိူဝ်းလုၵ်ႈလၢၼ် ဢေးၵျိပ်ႉ၊ ၸမ်ႉ၊ပဵၼ်ၵူၼ်းမဵဝ်း လုတိမ်ႇ၊ဢၼမ်ႇ၊လႄးႁပ်ႉ၊ၼပ်ႉတုႁိမ်ႇ၊ -
ၵူၼ်းမဵဝ်း ပႃႇသရုသိမ်ႇ၊ ၵူၼ်းမဵဝ်း ၵႃႇသလုႁိမ်ႇ၊ ၵူၼ်းမဵဝ်း ၵပ်ႉတေႃးရိမ်ႇ၊ ဢိၵ်ႇတင်းၵူၼ်းမဵဝ်း ၽိလိတ်ႉတိ၊ ဢၼ်သိုပ်ႇလူင်းမႃးသေၵူၼ်းမဵဝ်း ၵပ်ႉတေႃးရိမ်ႇ၊ ၼၼ်ႉဢေႃႈ။
ၶႃႇၼၼ်ႇ၊ မီးလုၵ်ႈၸၢႆးတူၼ်ႈပဵၼ် ၸိတုၼ်ႇ၊ လႄႈသမ်ႉမီးထႅင်ႈ ႁေႇထႃႉ၊ သေယဝ်ႉ။-
ၸိူဝ်ႉၶိူဝ်းၵူၼ်းမဵဝ်း ယေႇပုသိ၊ ၵူၼ်းမဵဝ်း ဢႃႇမေႃးရိ၊ ၵူၼ်းမဵဝ်း ၵိရၵႃႇသိ၊-
ႁိဝိ၊ဢႃႇၵိ၊သိၼိ၊-
ဢႃႇဝတိ၊ၸေႇမရိ၊ ဢိၵ်ႇတင်းၵူၼ်းမဵဝ်း ႁႃႇမသိ၊ ၸိူဝ်းၼၼ်ႉသိုပ်ႇလၢမ်းလူင်းမႃးဢေႃႈ။ လိုၼ်းၼၼ်ႉၸိူဝ်ႉၶိူဝ်း ၶႃႇၼၼ်ႇ၊ မဵဝ်းၽႂ်မဵဝ်းမၼ်းၸွတ်ႇတူဝ်ႈၵႂႃႇ၊-
တေႃႇထိုင်ႁွတ်ႈလႅၼ်လိၼ်မိူင်း ၶႃႇၼၼ်ႇ၊ ဢၼ်တႄႇဢဝ်မိူင်း ၸိတုမ်ႇ၊ ၵႂႃႇၽၢႆႇတၢင်းၸၢၼ်းၸူးၵႃႈတီႈဝဵင်း ၵေႇရႃႇ၊ ဝဵင်း ၵႃႇၸႃႉ၊ လႄႈၵႂႃႇၽၢႆႇတၢင်းဝၼ်းဢွၵ်ႇၸူးၵႃႈတီႈဝဵင်း သေႃးတုမ်ႇ၊ ဝဵင်း ၵေႃးမေႃးရႃႉ၊ ဝဵင်း ဢႃႇတမႃႇ၊ တေႃႇႁွတ်ႈဝဵင်း ၸေႇပူဝ်းဢိမ်း၊ ႁိမ်းဝဵင်း လႃႇသႃႉ၊ ဢေႃႈ။-
ၸိူဝ်ႉၶိူဝ်းၸူဝ်ႈလုၵ်ႈပၢၼ်လၢၼ် ႁႃႇမႃႉ၊ ၸိူဝ်းၼၼ်ႉယူႇၽၢတ်ႇၽႄၵၼ်မိူင်းၽႂ်မိူင်းမၼ်းပဵၼ်ၵူၼ်းမဵဝ်းလႂ်မဵဝ်းၼၼ်ႉလႄႈလၢတ်ႈၵႂၢမ်းၽႃႇသႃႇဢၼ်ပႅၵ်ႇဢၼ်ပိူင်ႈၵၼ်ႁင်းၽႂ်ႁင်းမၼ်းဢေႃႈ။
သေႇမႃႉ၊ ပီႈၸၢႆးလူင် ယႃႇၽႅတ်ႈ၊ ၼၼ်ႉပဵၼ်ပူႇပေႃႈၸိူဝ်ႉၶိူဝ်းၵူၼ်းမဵဝ်း ႁေႇပြႄး၊ ဢေႃႈ။-
လုၵ်ႈၸၢႆးၶိူဝ်း သေႇမႃႉ၊ ၸမ်ႉ၊ပဵၼ် ဢေႇလမ်ႇ၊ဢႃႇသုရိ၊ဢႃႇၽၵ်ႉၸတ်ႉ၊လုတႃႉ၊ တင်း ဢႃႇရမ်ႇ၊ ဢေႃႈ။-
ၶိူဝ်း ဢႃႇရမ်ႇ၊ ပဵၼ်ၵူၼ်းမဵဝ်း ဢုၸႃႉ၊ႁုလႃႉ၊ၵေႇသႃႇ၊ တင်းၵူၼ်းမဵဝ်း မႃႇသႃႉ၊ ဢေႃႈ။-
ဢႃႇၽၵ်ႉၸတ်ႉ၊ မီးလုၵ်ႈၸၢႆး သႃႇလႃႉ၊ သေလႄႈ သႃႇလႃႉ၊ သမ်ႉမီးလုၵ်ႈၸၢႆး ႁေႇပႃႇ၊ ဢေႃႈ။-
ႁေႇပႃႇ၊ မီးလုၵ်ႈၸၢႆးသွင်ၵေႃႉလႄႈၵေႃႉၼိုင်ႈၸိုဝ်ႈ ၽႃႇလႅၵ်ႉ၊ ၼႂ်းၸူဝ်ႈပၢၼ် ၽႃႇလႅၵ်ႉ၊ ၼၼ်ႉၶဝ်ၽႄလိၼ်မိူင်းမႅင်ႇၵၼ်ဢေႃႈ။ ၵေႃႉၼိုင်ႈသမ်ႉၸိုဝ်ႈ ယွၵ်ႉတၼ်ႇ၊ ဢေႃႈ။-
ၶိူဝ်း ယွၵ်ႉတၼ်ႇ၊ ပဵၼ်မဵဝ်း ဢႃႇလမေႃႇတတ်ႉ၊သေႇလပ်ႉ၊ႁႃႇၸႃႇမႃႇဝိတ်ႉ၊ယေႇရႃႇ၊-
ႁႃႇတေႃးရမ်ႇ၊ဢုၸလႃႉ၊တိၵ်ႉလႃႇ၊-
ဢေႃႇပလႃႉ၊ဢပိမေႇလႃႉ၊သေးပႃႉ၊-
ဢေႃႇၽိရႃႉ၊ႁႃႇဝိလႃႉ၊ ဢိၵ်ႇတင်းၵူၼ်းမဵဝ်း ယေႃးပပ်ႉ၊ ဢေႃႈ။ ၸိူဝ်ႉၶိူဝ်းၵူၼ်းမဵဝ်းၸိူဝ်းၼႆႉၽႄဢွၵ်ႇမႃးသေၵႃႈတီႈၶိူဝ်း ယွၵ်ႉတၼ်ႇ၊ ဢေႃႈ။-
သိုင်ႇၸိုင်ႈဝၢၼ်ႈမိူင်းဢၼ်ၶဝ်ယူႇၸမ်ႉ၊တႄႇဢဝ်သေၵႃႈတီႈဝဵင်း မေႇသႃႉ၊ ၽႄၸွတ်ႇၵႂႃႇတေႃႇႁွတ်ႈၽၢႆႇတၢင်းဝၼ်းဢွၵ်ႇလွႆ သေႇၽႃႇ၊ ဢေႃႈ။-
ၶဝ်ၸိူဝ်းၼႆႉပဵၼ်ၸိူဝ်ႉၶိူဝ်းၸူဝ်ႈလုၵ်ႈပၢၼ်လၢၼ် သေႇမႃႉ၊ လႄႈယူႇၽၢတ်ႇၽႄၵၼ်မိူင်းၽႂ်မိူင်းမၼ်းပဵၼ်ၵူၼ်းမဵဝ်းလႂ်မဵဝ်းၼၼ်ႉလႄႈလၢတ်ႈၵႂၢမ်းၽႃႇသႃႇဢၼ်ပႅၵ်ႇဢၼ်ပိူင်ႈၵၼ်ႁင်းၽႂ်ႁင်းမၼ်းဢေႃႈ။
ၶဝ်ၸိူဝ်းၼႆႉပဵၼ်ၵူၼ်းမဵဝ်းဢၼ်သိုပ်ႇလၢမ်းမႃးသေၵႃႈတီႈ ၼူဝ်းဢႃႇ၊ သေလႄႈၵူၼ်းမဵဝ်းၽႂ်မဵဝ်းမၼ်းတႄႇတင်ႈမိူင်းၽႂ်မိူင်းမၼ်းသေယဝ်ႉ၊ယူႇၶေႃၶေႃႁင်းၽႂ်ႁင်းမၼ်းဢေႃႈ။ ဝၢႆးသေၼမ်ႉထူမ်ႈမိူင်းယဝ်ႉၼၼ်ႉၵူၼ်းဝၢၼ်ႈၵူၼ်းမိူင်းၵႃႈမီးတင်းသဵင်ႈတင်းလူင်ၵႃႈၼိူဝ်လိၼ်မိူင်းၼႆႉပဵၼ်ၸိူဝ်ႉၶိူဝ်းၵူၼ်းဢၼ်လုၵ်ႉသေၵႃႈတီႈ ၼူဝ်းဢႃႇ၊ သိုပ်ႇလူင်းမႃးၼၼ်ႉဢေႃႈ။
ၶိင်ႇမိူဝ်ႈၼၼ်ႉၵူၼ်းၼိူဝ်လိၼ်မိူင်းတင်းသဵင်ႈတင်းလူင်လၢတ်ႈၵႂၢမ်းၽႃႇသႃႇဢၼ်လဵဝ်ၵၼ်လၢတ်ႈၵႂၢမ်းမဵဝ်းလဵဝ်ၵၼ်ၵူၺ်းဢေႃႈ။-
ၼႂ်းမိူဝ်ႈဢၼ်ၶဝ်ယင်းတိုၵ်ႉပႆၵႂႃႇၶၢဝ်းတၢင်းၼႃႈဝၼ်းဢွၵ်ႇယူႇၼၼ်ႉ ၶဝ်ႁွတ်ႈၵႂႃႇၵႃႈတီႈဢၼ်ပၢင်ႇလီပဵင်းလီၵႃႈၼႂ်းမိူင်း သိၼႃႇ၊ လႄႈၶျႃးတီႈယူႇၵႃႈတီႈၼၼ်ႈဢေႃႈ။-
ၶဝ်ၼင်ႇၵၼ်လၢတ်ႈတီႈၵၼ်လႄႈဝႃႈ၊ “မႃး႟။ ႁဝ်းဢွၼ်ၵၼ်ႁဵတ်းမၢၵ်ႇဢုတ်ႇလႄႈၽဝ်ၵႅၼ်ႇၵႅၼ်ႇတႃႉႁဝ်း၊” ဝႃႈၼင်ႇၼႆဢေႃႈ။ ၶဝ်ၵေႃႈလႆႈမၢၵ်ႇဢုတ်ႇပုၼ်ႈတႃႇတႄႇတင်ႈ၊ဢိၵ်ႇလူၺ်ႈၵႆးတဝ်းမဵဝ်းၼိုင်ႈဢၼ်ၼွၵ်းဢၢင်းၵတေႇဢေႃႈ။-
ၶဝ်လၢတ်ႈလႄႈဝႃႈ၊ “မႃး႟။ ၵူဝ်ႁဝ်းတၵ်းၽၢတ်ႇၽႄၵၼ်ၵႂႃႇၵႃႈၼိူဝ်လိၼ်မိူင်းၼႆႉလႄႈႁဝ်းဢွၼ်ၵၼ်တႄႇတင်ႈဝဵင်းဢိၵ်ႇလူၺ်ႈသဝ်လၢင်းလူင်ဢၼ်သုင်ၶိုတ်းပဵင်းၽႃႉပဵင်းမွၵ်ႇလႄႈႁဵတ်းႁႂ်ႈၸိုဝ်ႈသဵင်ႁဝ်းႁူင်ႁၢင်းတႃႉႁဝ်း၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ ၵျွလူင်းမႃးလူတူၺ်းဝဵင်းဢိၵ်ႇတင်းသဝ်လၢင်းလူင်ဢၼ်ၵူၼ်းၸိူဝ်းၼၼ်ႉတႄႇႁဵတ်းယူႇၼၼ်ႉသေယဝ်ႉ။-
မၼ်းၸဝ်ႈလၢတ်ႈလႄႈဝႃႈ၊ “တူၺ်းလူးၶဝ်ပဵၼ်ၵူၼ်းမဵဝ်းလဵဝ်ၵၼ်လၢတ်ႈၵႂၢမ်းၽႃႇသႃႇဢၼ်လဵဝ်ၵၼ်လႄႈၶဝ်ၸၢင်ႈႁဵတ်းၸိူဝ်ႉၼင်ႇၼႆဢွၼ်တၢင်းယဝ်ႉ၊လိုၼ်းၼၼ်ႉၶဝ်ၵျၢမ်ႇဝႆႉႁႂ်ႈႁဵတ်းသင်ၵေႃႈၶဝ်တေႁဵတ်းၵႂႃႇယဝ်ႉ။-
ၼင်ႇႁိုဝ်ၶဝ်ၼင်ႇၵၼ်တၵ်းဢမ်ႇႁုထွမ်ႇၵႂၢမ်းၵၼ်ၸိုင်၊မႃး႟။ ႁဝ်းလူင်းၵႂႃႇႁဵတ်းႁႂ်ႈၵႂၢမ်းၶဝ်သုၵ်ႉသၢၵ်ႉသူၼ်သၢၼ်ၵၼ်ၵႂႃႇတႃႉႁဝ်း၊” ဝႃႈၼင်ႇၼႆဢေႃႈ။-
ႁဵတ်းၼၼ်လႄႈ၊ ထႃႇဝရႃႉၽြႃး၊ ႁႂ်ႈၶဝ်ၽၢတ်ႇၽႄၸွတ်ႇၸႅတ်ႇၵႂႃႇၵႃႈၼိူဝ်လိၼ်မိူင်းလႄႈ၊ၶဝ်ဢမ်ႇၸၢင်ႈတႄႇႁဵတ်းဝဵင်းၼၼ်ႉယဝ်ႉ။-
ဝဵင်းၼၼ်ႉလႆႈႁွင်ႉဝႃႈ၊ဝဵင်း ပႃႇပေႇလႃႉ၊ ဝႃႈၼႆၵွပ်ႈပိူဝ်ႈ ထႃႇဝရႃႉၽြႃး၊ ႁဵတ်းႁႂ်ႈၵႂၢမ်းၵူၼ်းသုၵ်ႉသၢၵ်ႉသူၼ်သၢၼ်ၵၼ်ၵႂႃႇၼၼ်ႉသေယဝ်ႉ၊တႄႇဢဝ်တီႈၼၼ်ႈၵႂႃႇမၼ်းၸဝ်ႈႁႂ်ႈၵူၼ်းၽၢတ်ႇၽႄၸွတ်ႇတူဝ်ႈၵႂႃႇၵႃႈၼိူဝ်လိၼ်မိူင်းၵူႈတီႈၵူႈလႅၼ်ဢေႃႈ။
ၼႆႉၸမ်ႉ၊ပဵၼ်ၸရၢင်းၸိူဝ်ႉၶိူဝ်းၸူဝ်ႈလုၵ်ႈပၢၼ်လၢၼ် သေႇမႃႉ၊ ဢေႃႈ။ ဝၢႆးသေၼမ်ႉထူမ်ႈမိူင်းယဝ်ႉသွင်ပီ၊မိူဝ်ႈဢၼ်ဢသၢၵ်ႈ သေႇမႃႉ၊ တဵမ်ပၢၵ်ႇပီၼၼ်ႉမၼ်းလႆႈလုၵ်ႈၸၢႆးဢၼ်ႁွင်ႉဝႃႈ၊ ဢႃႇၽၵ်ႉၸတ်ႉ၊ ဢေႃႈ။-
လိုၼ်းၼၼ်ႉမၼ်းဢသၢၵ်ႈလိပ်းယူႇထႅင်ႈႁႃႈပၢၵ်ႇပီလႄႈလႆႈလုၵ်ႈၸၢႆးလႂ်၊တင်းလုၵ်ႈယိင်းလႂ်ထႅင်ႈဢေႃႈ။
မိူဝ်ႈဢၼ် ဢႃႇၽၵ်ႉၸတ်ႉ၊ မီးဢသၢၵ်ႈသၢမ်သိပ်းႁႃႈပီၼၼ်ႉလႆႈလုၵ်ႈၸၢႆး သႃႇလႃႉ၊ ဢေႃႈ။-
လိုၼ်းၼၼ်ႉမၼ်းမီးဢသၢၵ်ႈလိပ်းယူႇထႅင်ႈသီႇပၢၵ်ႇပၢႆသၢမ်ပီလႄႈလႆႈလုၵ်ႈၸၢႆးလႂ်၊တင်းလုၵ်ႈယိင်းလႂ်ထႅင်ႈဢေႃႈ။
မိူဝ်ႈဢၼ် သႃႇလႃႉ၊ မီးဢသၢၵ်ႈသၢမ်သိပ်းပီၼၼ်ႉလႆႈလုၵ်ႈၸၢႆး ႁေႇပႃႇ၊ ဢေႃႈ။-
လိုၼ်းၼၼ်ႉမၼ်းမီးဢသၢၵ်ႈလိပ်းယူႇထႅင်ႈသီႇပၢၵ်ႇပၢႆသၢမ်ပီလႄႈလႆႈလုၵ်ႈၸၢႆးတင်းလုၵ်ႈယိင်းလႂ်ထႅင်ႈဢေႃႈ။
မိူဝ်ႈဢၼ် ႁေႇပႃႇ၊ မီးဢသၢၵ်ႈသၢမ်သိပ်းသီႇပီၼၼ်ႉလႆႈလုၵ်ႈၸၢႆး ၽႃႇလႅၵ်ႉ၊ ဢေႃႈ။-
လိုၼ်းၼၼ်ႉမၼ်းမီးဢသၢၵ်ႈလိပ်းယူႇထႅင်ႈသီႇပၢၵ်ႇသၢမ်သိပ်းပီလႄႈလႆႈလုၵ်ႈၸၢႆးလႂ်တင်းလုၵ်ႈယိင်းလႂ်ထႅင်ႈဢေႃႈ။
မိူဝ်ႈဢၼ် ၽႃႇလႅၵ်ႉ၊ မီးဢသၢၵ်ႈသၢမ်သိပ်းပီၼၼ်ႉလႆႈလုၵ်ႈၸၢႆး ရီးဢူႇ၊ ဢေႃႈ။-
လိုၼ်းၼၼ်ႉမၼ်းဢသၢၵ်ႈလိပ်းယူႇထႅင်ႈသွင်ပၢၵ်ႇပၢႆၵဝ်ႈပီလႄႈလႆႈလုၵ်ႈၸၢႆးလႂ်၊လုၵ်ႈယိင်းလႂ်ထႅင်ႈဢေႃႈ။
မိူဝ်ႈဢၼ် ရီးဢူႇ၊ မီးဢသၢၵ်ႈသၢမ်သိပ်းသွင်ပီၼၼ်ႉလႆႈလုၵ်ႈၸၢႆး ၸေးရွၵ်ႉ၊ ဢေႃႈ။-
လိုၼ်းၼၼ်ႉမၼ်းဢသၢၵ်ႈလိပ်းယူႇထႅင်ႈသွင်ပၢၵ်ႇပၢႆၸဵတ်းပီလႄႈလႆႈလုၵ်ႈၸၢႆးလႂ်၊လုၵ်ႈယိင်းလႂ်ထႅင်ႈဢေႃႈ။
မိူဝ်ႈဢၼ် ၸေးရွၵ်ႉ၊ မီးဢသၢၵ်ႈသၢမ်သိပ်းပီၼၼ်ႉလႆႈလုၵ်ႈၸၢႆး ၼႃႇၶေႃႇ၊ ဢေႃႈ။-
လိုၼ်းၼၼ်ႉမၼ်းဢသၢၵ်ႈလိပ်းယူႇထႅင်ႈသွင်ပၢၵ်ႇပီတဵမ်လႄႈလႆႈလုၵ်ႈၸၢႆးလႂ်၊လုၵ်ႈယိင်းလႂ်ထႅင်ႈဢေႃႈ။
မိူဝ်ႈဢၼ် ၼႃႇၶေႃႇ၊ မီးဢသၢၵ်ႈသၢဝ်းၵဝ်ႈပီၼၼ်ႉလႆႈလုၵ်ႈၸၢႆး တေႇရႃႉ၊ ဢေႃႈ။-
လိုၼ်းၼၼ်ႉမၼ်းဢသၢၵ်ႈလိပ်းယူႇထႅင်ႈပၢၵ်ႇပၢႆသိပ်းၵဝ်ႈပီလႄႈလႆႈလုၵ်ႈၸၢႆးလႂ်၊လုၵ်ႈယိင်းလႂ်ထႅင်ႈဢေႃႈ။
မိူဝ်ႈဢၼ် တေႇရႃႉ၊ မီးဢသၢၵ်ႈၸဵတ်းသိပ်းပီၼၼ်ႉလႆႈလုၵ်ႈၸၢႆး ဢႃႇပြမ်ႇ၊ၼႃႇၶေႃႇ၊ တင်း ႁႃႇရၼ်ႇ၊ ဢေႃႈ။
ၼႆႉၸမ်ႉ၊ပဵၼ်ၸရၢင်းၸိူဝ်ႉၶိူဝ်းၸူဝ်ႈလုၵ်ႈပၢၼ်လၢၼ် တေႇရႃႉ၊ ဢေႃႈ။ တေႇရႃႉ၊ ၼၼ်ႉမီးလုၵ်ႈၸၢႆး ဢႃႇပြမ်ႇ၊ၼႃႇၶေႃႇ၊ တင်း ႁႃႇရၼ်ႇ၊ ဢေႃႈ။ ႁႃႇရၼ်ႇ၊ မီးလုၵ်ႈၸၢႆးမၼ်း လေႃးတႃႉ၊ သေယဝ်ႉ၊-
ႁႃႇရၼ်ႇ၊ ၼၼ်ႉတၢႆဢွၼ်တၢင်းပေႃႈမၼ်း တေႇရႃႉ၊ ၵႃႈတီႈဝဵင်းဢၼ်ၽင်ႁူၵ်ႉၽင်ႁႄႇမၼ်းဝဵင်း ဢုရႃႉ၊ မိူင်း ၶႃႇလတေး၊ ၼၼ်ႉဢေႃႈ။-
ဢႃႇပြမ်ႇ၊ ဢဝ်မေးၸိုဝ်ႈဝႃႈ၊ ၸႃႇရေး၊ သေလႄႈ ၼႃႇၶေႃႇ၊ သမ်ႉဢဝ်မေးၸိုဝ်ႈဝႃႈ၊ မိလၶႃႇ၊ လုၵ်ႈယိင်း ႁႃႇရၼ်ႇ၊ ဢေႃႈ။ ႁႃႇရၼ်ႇ၊ မီးထႅင်ႈလုၵ်ႈယိင်းဢၼ်မီးၸိုဝ်ႈဝႃႈ၊ ဢိၸၶႃႇ၊ ဢေႃႈ။-
ၸႃႇရေး၊ ၸမ်ႉ၊ဢမ်ႇမီးလုၵ်ႈမီးလၢင်း။
တေႇရႃႉ၊ ႁွင်ႉဢဝ်လုၵ်ႈၸၢႆးမၼ်း ဢႃႇပြမ်ႇ၊ တင်းလၢၼ်ၸၢႆးမၼ်း လေႃးတႃႉ၊ လုၵ်ႈၸၢႆး ႁႃႇရၼ်ႇ၊ ဢိၵ်ႇတင်းလုၵ်ႈပႂ်ႉမၼ်း ၸႃႇရေး၊ မေး ဢႃႇပြမ်ႇ၊ သေလႄႈဢွၵ်ႇဝဵင်း ဢုရႃႉ၊ မိူင်း ၶႃႇလတေး၊ ၼၼ်ႉႁႂ်ႈလႆႈၵႂႃႇၸူးမိူင်း ၶႃႇၼၼ်ႇ၊ လႄႈႁွတ်ႈထိုင်ဝဵင်း ႁႃႇရၼ်ႇ၊ သေယဝ်ႉ၊ယူႇသဝ်းၵႃႈတီႈၼၼ်ႈဢေႃႈ။-
တေႇရႃႉ၊ ၵေႃႈတၢႆၵႂႃႇၵႃႈတီႈဝဵင်း ႁႃႇရၼ်ႇ၊ မိူဝ်ႈဢၼ်ဢသၢၵ်ႈမၼ်းထူၼ်ႈတဵမ်သွင်ပၢၵ်ႇပၢႆႁႃႈပီၼၼ်ႉဢေႃႈ။
ထႃႇဝရႃႉၽြႃး၊ လၢတ်ႈတီႈ ဢႃႇပြမ်ႇ၊ လႄႈဝႃႈ၊ “ဢွၵ်ႇသေၵႃႈတီႈမိူင်းမႂ်းဢိၵ်ႇတင်းႁိူၼ်းပေႃႈမႂ်းတင်းၸိူဝ်ႉၶိူဝ်းမႂ်းသေလႄႈ၊ၵႂႃႇၸူးမိူင်းဢၼ်ၵဝ်တၵ်းၼႄပၼ်မႂ်းၼၼ်ႉတႃႉ။-
ၵဝ်တၵ်းႁႂ်ႈၸိူဝ်ႉၶိူဝ်းမႂ်းၼမ်ၵိုၼ်းလႄႈ၊ၶဝ်တၵ်းလႆႈပဵၼ်မဵဝ်းၵူၼ်းဢၼ်ယႂ်ႇၼႃႇဢေႃႈ။ ၵဝ်တၵ်းပၼ်တၢင်းလီမၢင်ႇၵလႃႇတီႈမႂ်းလႄႈၸိုဝ်ႈသဵင်မႂ်းတၵ်းၸွတ်ႇသႃႇႁူင်ႁၢင်းသေယဝ်ႉ၊မႂ်းတၵ်းလႆႈပဵၼ်ၵေႃႉဢၼ်ပၼ်တၢင်းလီမၢင်ႇၵလႃႇဢေႃႈ။
“ၵဝ်တၵ်းပၼ်တၢင်းလီမၢင်ႇၵလႃႇတီႈၵေႃႉဢၼ်ပၼ်တၢင်းလီမၢင်ႇၵလႃႇတီႈမႂ်းလႄႈ တီႈၵေႃႉဢၼ်ၵိၼ်ႇဝႃႈမႂ်းၼၼ်ႉၵဝ်တၵ်းၵိၼ်ႇဝႃႈမၼ်းဢေႃႈ။ ၵူၼ်းမဵဝ်းတင်းသဵင်ႈတင်းလူင်ၵႃႈၼိူဝ်လိၼ်မိူင်းၼႆႉတၵ်းလႆႈၶၢမ်ႇဢဝ်တၢင်းလီမၢင်ႇၵလႃႇၵႃႈၼႂ်းမႂ်းဢေႃႈ၊” ဝႃႈၼင်ႇၼႆဢေႃႈ။
ဢႃႇပြမ်ႇ၊ ၵေႃႈႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉလႄႈ၊ဢွၵ်ႇဝဵင်း ႁႃႇရၼ်ႇ၊ ၵႂႃႇဢေႃႈ။ လေႃးတႃႉ၊ ၵေႃႈၵႂႃႇၸွမ်းမၼ်းဢေႃႈ။ မိူဝ်ႈယၢမ်းၼၼ်ႉ ဢႃႇပြမ်ႇ၊ မီးဢသၢၵ်ႈၸဵတ်းသိပ်းႁႃႈပီယဝ်ႉဢေႃႈ။-
ဢႃႇပြမ်ႇ၊ ဢဝ်မေးမၼ်း ၸႃႇရေး၊ တင်းလၢၼ်ၸၢႆးမၼ်း လေႃးတႃႉ၊ ဢိၵ်ႇတင်းဢုၵ်ႉၸႃႇၵႃႈဢၼ်ၶဝ်မၢၵ်ႈမီးၸဵမ်ၶႃႈၵူၼ်းၸႂ်ႉၵူၼ်းသွႆၸိူဝ်းဢၼ်ၶဝ်လႆႈၵႃႈၼႂ်းဝဵင်း ႁႃႇရၼ်ႇ၊ ၸိူဝ်းၼၼ်ႉသေယဝ်ႉ၊ဢွၵ်ႇၵႂႃႇၸူးမိူင်း ၶႃႇၼၼ်ႇ၊ ပုၼ်ႉဢေႃႈ။ မိူဝ်ႈဢၼ်ၶဝ်ႁွတ်ႈထိုင်မိူင်း ၶႃႇၼၼ်ႇ၊ ၵႂႃႇၼၼ်ႉ၊-
ဢႃႇပြမ်ႇ၊ ပႆၽႃႇလတ်းၵႂႃႇၵႃႈၼႂ်းမိူင်းၼၼ်ႉတေႃႇၶဝ်ႁွတ်ႈထိုင်တီႈတူၼ်ႈမႆႉၼိမ် မေႃႇရေး၊ ၵႃႈတီႈမိူင်း သေးၶိမ်ႇ၊ ဢေႃႈ။ မိူဝ်ႈယၢမ်းၼၼ်ႉၵူၼ်းမဵဝ်း ၶႃႇၼၼိ၊ ယူႇသဝ်းၵႃႈၼႂ်းမိူင်းၼၼ်ႉယူႇဢေႃႈ။-
ထႃႇဝရႃႉၽြႃး၊ ပေႃႇမႃးၵႃႈတီႈ ဢႃႇပြမ်ႇ၊ လႄႈလၢတ်ႈဝႃႈ၊ “ၵဝ်တၵ်းဢဝ်မိူင်းၼႆႉပၼ်တီႈၸိူဝ်ႉၶိူဝ်းမႂ်းဢေႃႈ၊” ဝႃႈၼင်ႇၼႆဢေႃႈ။ ပိူဝ်ႈၼႆလႄႈ ဢႃႇပြမ်ႇ၊ ႁဵတ်းၶဵင်ႇတၢင်းလူႇပုၼ်ႈ ထႃႇဝရႃႉၽြႃး၊ ဢၼ်ပေႃႇမႃးၵႃႈတီႈမၼ်းၼၼ်ႉဢေႃႈ။-
လိုၼ်းၼၼ်ႉမၼ်းၶၢႆႉၵႂႃႇတၢင်းၸၢၼ်းၵႂႃႇၸူးတီႈမိူင်းလွႆၽၢႆႇဝၼ်းဢွၵ်ႇဝဵင်း ပေႇလႃႉ၊ ၼၼ်ႉလႄႈႁဵတ်းသုမ်ႉထဵင်မၼ်းဝူင်ႈၵၢင်ဝဵင်း ပေႇသလႃႉ၊ ၽၢႆႇဝၼ်းတူၵ်းတင်းဝဵင်း ဢႃႇဢိ၊ ၽၢႆႇဝၼ်းဢွၵ်ႇသေယဝ်ႉ၊တီႈၼၼ်ႈၵေႃႈမၼ်းႁဵတ်းၶဵင်ႇတၢင်းလူႇလႄႈဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ဢေႃႈ။-
ႁဵတ်းၼၼ်လႄႈလုၵ်ႉသေတီႈၼိုင်ႈၶၢႆႉၵႂႃႇတီႈၼိုင်ႈသေၵႂႃႇၸူးပွတ်းတၢင်းၸၢၼ်းမိူင်း ၶႃႇၼၼ်ႇ၊ သေဢေႃႈ။-
ၵူၺ်းၵႃႈ၊မိူဝ်ႈယၢမ်းၼၼ်ႉၶဝ်ႈၵႃႈမၢၵ်ႇပႅင်းပေႃႇပဵၼ်မႃးၵႃႈၼႂ်းမိူင်း ၶႃႇၼၼ်ႇ၊ ဢေႃႈ။ ပိူဝ်ႈဢၼ်ၶဝ်ႈၵႃႈမၢၵ်ႇပႅင်းၼႃႇလႄႈ ဢႃႇပြမ်ႇ၊ ၶၢႆႉလူင်းတၢင်းၸၢၼ်းထႅင်ႈလႄႈထိုင်ၵႂႃႇၵႃႈတီႈမိူင်း ဢေးၵျိပ်ႉ၊ ႁႂ်ႈလႆႈသွၼ်ႈပိုင်ႈၸူဝ်ႈၼိုင်ႈၶၢဝ်းၼိုင်ႈဢေႃႈ။-
မိူဝ်ႈဢၼ်မၼ်းၸမ်တၵ်းၶၢမ်ႈလႅၼ်လိၼ်ၶဝ်ႈၸူးမိူင်း ဢေးၵျိပ်ႉ၊ ၼၼ်ႉမၼ်းလၢတ်ႈတီႈမေးမၼ်း ၸႃႇရေး၊ လႄႈဝႃႈ၊ “မႂ်းပဵၼ်မႄႈယိင်းဢၼ်ႁၢင်ႈလီၼႃႇဢေႃႈ။-
မိူဝ်ႈဢၼ်ၵူၼ်း ဢေးၵျိပ်ႉ၊ ၶဝ်ႁၼ်မႂ်းၼၼ်ႉၶဝ်တၵ်းဝႃႈမႂ်းပဵၼ်မေးၵဝ်ၼႆလႄႈၶဝ်တၵ်းဢဝ်ၵဝ်တၢႆသေႁႂ်ႈဢသၢၵ်ႈမႂ်းၶျၢမ်းသႃႇဢေႃႈ။-
မႂ်းတေလႆႈလၢတ်ႈဝႃႈ၊ပဵၼ်ၼွင်ႉယိင်းၵဝ်ၼႆတႃႉ။ ပေႃးဝႃႈၸိူဝ်ႉၼင်ႇၼၼ်ၸိုင်၊ၵွပ်ႈပိူဝ်ႈမႂ်းလႄႈဢသၢၵ်ႈၵဝ်တၵ်းလႆႈၶျၢမ်းသႃႇသေယဝ်ႉ၊ၶဝ်တၵ်းႁပ်ႉတွၼ်ႈၵဝ်လီလီငၢမ်းငၢမ်းဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈဢၼ် ဢႃႇပြမ်ႇ၊ ၶၢမ်ႈလႅၼ်လိၼ်ၶဝ်ႈၸူးမိူင်း ဢေးၵျိပ်ႉ၊ ၼၼ်ႉၵူၼ်း ဢေးၵျိပ်ႉ၊ ၶဝ်ႁၼ်ဝႃႈ၊ ၸႃႇရေး၊ ၼၼ်ႉႁၢင်ႈလီၼႃႇဢေႃႈ။-
မူးမၢတ်ႈၽွင်းမိူင်းၵမ်ႈၽွင်ႈၵေႃႈလႆႈႁၼ်မၼ်းလႄႈၶဝ်တၢင်ႇလဝ်ႈတီႈၶုၼ်ႁေႃၶမ်းမိူင်း ဢေးၵျိပ်ႉ၊ လွင်ႈဢၼ်မႄႈယိင်းၼၼ်ႉႁၢင်ႈလီထၼ်ႇႁိုဝ်ၼၼ်ႉဢေႃႈ။ ႁဵတ်းၼၼ်လႄႈမႄႈယိင်းၼၼ်ႉလႆႈၶၢမ်ႇတၢင်းဢၼ်ဢဝ်သႂၢင်းၶဝ်ႈၵႃႈၼႂ်းႁေႃဢေႃႈ။-
ၵွပ်ႈပိူဝ်ႈမႄႈယိင်းၼၼ်ႉၶုၼ်ႁေႃၶမ်းႁဵတ်းၵျေးၸူးတီႈ ဢႃႇပြမ်ႇ၊ သေလႄႈဢဝ်သူးလၢပ်ႈဢၼ်ပဵၼ်ၽုင်သူဝ်းၽုင်ပႄႉလႂ်၊ၽုင်ဝူဝ်းၽုင်မႃႉတင်းၶႃႈလႂ်၊ၵလႃႇဢုၵ်ႈလႂ်၊ဢၢပ်ႈပၼ်မၼ်းဢေႃႈ။
ၵွပ်ႈပိူဝ်ႈၶုၼ်ႁေႃၶမ်းသိမ်းဢဝ် ၸႃႇရေး၊ ၼၼ်ႉလႄႈ ထႃႇဝရႃႉၽြႃး၊ ႁႂ်ႈၽေးတၢမ်ႇတၢင်းၶႆႈတၢင်းပဵၼ်ဢၼ်ယႂ်ႇၼႃႇတူၵ်းႁွတ်ႈၵႃႈၼိူဝ်ၶုၼ်ႁေႃၶမ်းဢိၵ်ႇတင်းၵႃႈၼိူဝ်ၵူၼ်းႁၢင်ႈၵူၼ်းႁေႃၸိူဝ်းၼၼ်ႉဢေႃႈ။-
ၶုၼ်ႁေႃၶမ်းၸင်ႇႁွင်ႉဢဝ် ဢႃႇပြမ်ႇ၊ လႄႈထၢမ်ဝႃႈ၊ “မႂ်းႁဵတ်းသင်ၵႃႈတီႈၵဝ်။ ႁဵတ်းသင်လႄႈမႂ်းဢမ်ႇလၢတ်ႈၵဝ်လွင်ႈဢၼ်မႄႈယိင်းၼႆႉပဵၼ်မေးမႂ်း။-
ၵွပ်ႈသင်လႄႈမႂ်းလၢတ်ႈဝႃႈ၊မႄႈယိင်းၼႆႉပဵၼ်ၼွင်ႉယိင်းမႂ်းဝႃႈၼႆလႄႈႁႂ်ႈၵဝ်သမ်ႉပေႃးလႆႈသိမ်းဢဝ်တႃႇတေႁဵတ်းမေးၵဝ်။ မိူဝ်ႈလဵဝ်ၼႆႉမႂ်းၶိုၼ်းဢဝ်မၼ်းလႄႈဢွၵ်ႇၵႂႃႇတႃႉ၊” ဝႃႈၼင်ႇၼႆဢေႃႈ။-
ၶုၼ်ႁေႃၶမ်းၵေႃႈပၼ်ဢမိင်ႉတီႈၵူၼ်းမၼ်းႁႂ်ႈၶဝ်ဢဝ် ဢႃႇပြမ်ႇ၊ ဢိၵ်ႇတင်းမေးမၼ်းဢိၵ်ႇတင်းဢုၵ်ႉၸႃႇၵႃႈဢၼ်မၼ်းမၢၵ်ႈမီးၼၼ်ႉသူင်ႇႁႂ်ႈဢွၵ်ႇမိူင်းၶဝ်ၵႂႃႇဢေႃႈ။
ဢႃႇပြမ်ႇ၊ ၵေႃႈပႃးဢဝ်မေးမၼ်းဢိၵ်ႇတင်း လေႃးတႃႉ၊ ဢိၵ်ႇတင်းဢုၵ်ႉၸႃႇၵႃႈဢၼ်မၼ်းမၢၵ်ႈမီးတင်းသဵင်ႈတင်းမူတ်းဢွၵ်ႇၵႂႃႇၽၢႆႇတၢင်းႁွင်ႇမိူင်း ဢေးၵျိပ်ႉ၊ လႄႈၶိုၼ်းမိူဝ်းၵႂႃႇၸူးပွတ်းၸၢၼ်းမိူင်း ၶႃႇၼၼ်ႇ၊ ပုၼ်ႉဢေႃႈ။-
ယၢမ်းၼၼ်ႉ ဢႃႇပြမ်ႇ၊ မၢၵ်ႈမီးလူၺ်ႈၽုင်သူဝ်း၊ၽုင်ပႄႉ၊ၽုင်ဝူဝ်း၊ၽုင်မႃႉလႂ်ဢိၵ်ႇတင်းငိုၼ်းၶမ်းၼမ်ၼႃႇလူင်လၢင်ဢေႃႈ။-
မၼ်းလုၵ်ႉသေၵႃႈတီႈၼိုင်ႈၶၢႆႉၵႂႃႇၵႃႈတီႈၼိုင်ႈၵႂႃႇၸူးဝဵင်း ပေႇသလႃႉ၊ တေႃႇထိုင်ႁွတ်ႈၵႃႈတီႈသုမ်ႉထဵင်ဢၼ်မၼ်းပူၵ်းဝႆႉမိူဝ်ႈၵမ်းဢွၼ်တၢင်းၵႃႈၼႂ်းဝူင်ႈၵၢင်ဝဵင်း ပေႇသလႃႉ၊ တင်းဝဵင်း ဢႃႇဢိ၊-
ၵႃႈတီႈႁိမ်းၶဵင်ႇတၢင်းလူႇမၼ်းၵဝ်ႇၵဝ်ႇၼၼ်ႉသေလႄႈ၊တီႈၼၼ်ႈမၼ်းႁဵတ်းပထၼႃႇဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ဢေႃႈ။
လေႃးတႃႉ၊ ၵေႃႈမီးၽုင်သူဝ်း၊ၽုင်ပႄႉ၊ၽုင်ဝူဝ်း၊ၽုင်မႃႉတင်းသုမ်ႉထဵင်ဢေႃႈ။-
ပိူဝ်ႈၼႆလႄႈပၢင်ႇယိူဝ်ႈဢမ်ႇပေႃးဢမ်ႇၵုမ်ႇပုၼ်ႈၶဝ်တၵ်းယူႇလူၺ်ႈၵၼ်လႆႈၵွပ်ႈပိူဝ်ႈဢုၵ်ႉၸႃႇတူဝ်သတ်းၶဝ်ၼမ်ၵိုၼ်းလူၼ်ႉလိူဝ်ၵႂႃႇလႄႈ၊ၶဝ်ဢမ်ႇယူႇတီႈလဵဝ်ၵၼ်လႆႈ။-
ၵူၼ်းလဵင်ႉဝူဝ်း ဢႃႇပြမ်ႇ၊ တင်းၵူၼ်းလဵင်ႉဝူဝ်း လေႃးတႃႉ၊ ၸိူဝ်းၼၼ်ႉၵေႃႈမီးတၢင်းဢၼ်ၽိတ်းၵၼ်မႃးဢေႃႈ။ မိူဝ်ႈၼၼ်ႉၵူၼ်း ၶႃႇၼၼိ၊ တင်းၵူၼ်း ၽေႇရၸိ၊ ၶဝ်ယူႇၵႃႈၼႂ်းမိူင်းၼၼ်ႉဢေႃႈ။
မိူဝ်ႈၼၼ်ႉ၊ ဢႃႇပြမ်ႇ၊ လၢတ်ႈတီႈ လေႃးတႃႉ၊ လႄႈဝႃႈ၊ “ႁဝ်းပဵၼ်ပီႈၼွင်ႉၵၼ်လႄႈၵူၼ်းလဵင်ႉဝူဝ်းၵဝ်တင်းၵူၼ်းလဵင်ႉဝူဝ်းမႂ်းၸိူဝ်းၼႆႉဢမ်ႇထုၵ်ႇလီၽိတ်းၵၼ်။-
ႁဝ်းၽၢတ်ႇၵၼ်ၵႃႈတီႈၼႆႈတႃႉ။ လိူၵ်ႈဢဝ်ၼႃႈလိၼ်ၽၢႆႇတၢင်းဢၼ်မႂ်းၵျိူၵ်ႈၸႂ်ၼၼ်ႉတႃႉ။ ပေႃးမႂ်းၵႂႃႇယူႇၽၢႆႇၼိုင်ႈၸိုင်၊ၵဝ်တၵ်းၵႂႃႇယူႇတၢင်ႇၽၢႆႇဢိူဝ်း၊” ဝႃႈၼင်ႇၼႆဢေႃႈ။
လေႃးတႃႉ၊ ၵေႃႈမုင်ႈတူၺ်းၸေးၸေးသေယဝ်ႉ၊ႁၼ်လွင်ႈတၢင်းဢၼ်ပၢင်ႇပဵင်းၼမ်ႉ ယေႃးတၢၼ်ႇ၊ ၸွမ်းသဵၼ်ႈတၢင်းဢၼ်ၵႂႃႇၸူးဝဵင်း ၸေႃႇရႃႉ၊ ၼၼ်ႉၼမ်ႉလိူင်ႇၼႃႇမိူၼ်ၼင်ႇသူၼ်ဢူးယဵၼ်ႇ ထႃႇဝရႃႉၽြႃး၊ ဢိၵ်ႇတင်းမိူၼ်ၸိူဝ်ႉၼင်ႇမိူင်း ဢေးၵျိပ်ႉ၊ ၼၼ်ႉဢေႃႈ။ လွင်ႈတၢင်းၸိူဝ်းၼႆႉပဵၼ်မိူဝ်ႈဢွၼ်တၢင်း ထႃႇဝရႃႉၽြႃး၊ ဢမ်ႇပႆႇယႃႉၽဵဝ်ႈဝဵင်း သေႃးတုမ်ႇ၊ တင်းဝဵင်း ၵေႃးမေႃးရႃႉ၊ ၼၼ်ႉဢေႃႈ။-
ႁဵတ်းၼၼ်လႄႈ လေႃးတႃႉ၊ လိူၵ်ႈဢဝ်ပၢင်ႇပဵင်းၼမ်ႉႁွင်ႈ ယေႃးတၢၼ်ႇ၊ တင်းသဵင်ႈပုၼ်ႈတူဝ်ၸဝ်ႈၵဝ်ႇသေလႄႈၶၢႆႉၵႂႃႇၸူးၽၢႆႇတၢင်းဝၼ်းဢွၵ်ႇပုၼ်ႉသေဢေႃႈ။ ၶဝ်သွင်ၵေႃႉၵေႃႈၽၢတ်ႇၵၼ်တီႈၼၼ်ႈၵႂႃႇသေဢေႃႈ။-
ဢႃႇပြမ်ႇ၊ တႄႇသဝ်းယူႇၵႃႈၼႂ်းမိူင်း ၶႃႇၼၼ်ႇ၊ လႄႈ လေႃးတႃႉ၊ ၵႂႃႇတႄႇသုမ်ႉတႄႇသွင်းၵႃႈတီႈပၢင်ႇပဵင်းႁိမ်းဝဵင်း သေႃးတုမ်ႇ၊ ဢေႃႈ။-
ၵူၼ်းဝဵင်း သေႃးတုမ်ႇ၊ ၼၼ်ႉႁၢႆႉမိူၵ်ႈလိူင်းၵျၢမ်းၼႃႇလူင်လၢင်လႄႈႁဵတ်းဢပျတ်ႈၼမ်ၼႃႇၽၢႆႇၼႃႈ ထႃႇဝရႃႉၽြႃး၊ ဢေႃႈ။
လိုၼ်းသေ လေႃးတႃႉ၊ ၽၢတ်ႇဢွၵ်ႇၵႂႃႇယဝ်ႉၼၼ်ႉ၊ ထႃႇဝရႃႉၽြႃး၊ လၢတ်ႈတီႈ ဢႃႇပြမ်ႇ၊ လႄႈဝႃႈ၊ “ယူႇၵႃႈတီႈဢၼ်မႂ်းမီးၼႆႉယူႇသေလႄႈမုင်ႈတူၺ်းသီႇၸဵင်ႇပႅတ်ႇၼႃႈၸေးၸေးတႃႉ။-
ၵဝ်တၵ်းဢဝ်လိၼ်ၵႃႈဢၼ်မႂ်းမုင်ႈႁၼ်တင်းသဵင်ႈတင်းလူင်ၸိူဝ်းၼႆႉဢၢပ်ႈပၼ်တီႈမႂ်းဢိၵ်ႇတင်းၸိူဝ်ႉၶိူဝ်းမႂ်းတႃႇသေႇဢမ်ႇထၢတ်ႇဢေႃႈ။-
ၸိူဝ်ႉၶိူဝ်းမႂ်းၼႆႉၵေႃႈၵဝ်တၵ်းႁႂ်ႈၼမ်ၵိုၼ်းထၢၼ်ႈပေႃးၽူႈလႂ်ဢမ်ႇၼပ်ႉဢမ်ႇဢၢၼ်ႇလႆႈမိူၼ်ၸိူဝ်ႉၼင်ႇဢၼ်ဢမ်ႇၼပ်ႉဢမ်ႇဢၢၼ်ႇမုၼ်ႈလိၼ်လႆႈၼၼ်ႉဢေႃႈ။-
မိူဝ်ႈလဵဝ်ၵႂႃႇလႄႇလဵပ်ႈတူၺ်းၶွပ်ႇၼမ်ႉလႅၼ်လိၼ်တင်းသဵင်ႈတင်းမူတ်းတႃႉ။ ၵဝ်တၵ်းဢၢပ်ႈပၼ်တီႈမႂ်းဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ ဢႃႇပြမ်ႇ၊ ၶၢႆႉသုမ်ႉထဵင်မၼ်းၵႂႃႇတႄႇသဝ်းၵႃႈတီႈပႃႇတူၼ်ႈမႆႉၼိမ် မမ်ႇရေႇ၊ ၵႃႈၼႂ်းဝဵင်း ႁေႇပရုၼ်ႇ၊ ပုၼ်ႉဢေႃႈ။ တီႈၼၼ်ႈမၼ်းႁဵတ်းၶဵင်ႇတၢင်းလူႇပုၼ်ႈ ထႃႇဝရႃႉၽြႃး၊ ဢေႃႈ။
ၶုၼ်ႁေႃၶမ်း ဢမ်ႇရေႇၽႄးလႃႉ၊ မိူင်း သိၼႃႇ၊ ၶုၼ်ႁေႃၶမ်း ဢႃႇရုတ်ႉ၊ မိူင်း ဢေႇလႃႉသႃႇ၊ ၶုၼ်ႁေႃၶမ်း ၶေးတေႃးရလေႃးမႃႉ၊ မိူင်း ဢေႇလမ်ႇ၊ တင်းၶုၼ်ႁေႃၶမ်း တိတလႃႉ၊ မိူင်း ၵေႃးဢိမ်ႇ၊ ၶဝ်သီႇပႃးၼႆႉ။-
တိုၵ်းသိုၵ်းတေႃႇၵၼ်တင်းၶုၼ်ႁေႃၶမ်းႁႃႈပႃးဢၼ်ပဵၼ်ၶုၼ်ႁေႃၶမ်း ပႄႇရႃႉ၊ မိူင်း သေႃးတုမ်ႇ၊ ၶုၼ်ႁေႃၶမ်း ၽိရသႃႉ၊ မိူင်း ၵေႃးမေႃးရႃႉ၊ ၶုၼ်ႁေႃၶမ်း သိၼပ်ႉ၊ မိူင်း ဢႃႇတမႃႇ၊ ၶုၼ်ႁေႃၶမ်း သေႇမပႃး၊ မိူင်း ၸေႇပူဝ်းဢိမ်း၊ တင်းၶုၼ်ႁေႃၶမ်း မိူင်း ပေႇလႃႇ၊ ၸိူဝ်းၼၼ်ႉဢေႃႈ။ မိူင်း ပေႇလႃႇ၊ ၼၼ်ႉမီးထႅင်ႈၸိုဝ်ႈၼိုင်ႈႁွင်ႉဝႃႈ၊မိူင်း ၸေႃႇရႃႉ၊ ဢေႃႈ။-
ၶုၼ်ႁေႃၶမ်းႁႃႈပႃးၼႆႉၽွမ်ႉၵၼ်လႄႈၸုတုမ်ၵၼ်ၵႃႈတီႈထူင်ႉ သိတ်ႉတိမ်ႇ၊ ဢၼ်မိူဝ်ႈလဵဝ်ႁွင်ႉဝႃႈ၊ ပၢင်ႇလၢႆႇတၢႆ၊ ၼၼ်ႉဢေႃႈ။-
ၶဝ်ၶၢမ်ႇယူႇတႂ်ႈမိုဝ်းၶုၼ်ႁေႃၶမ်း ၶေးတေႃးရလေႃးမႃႉ၊ သိပ်းသွင်ပီတဵမ်တဵမ်သေယဝ်ႉ၊ၼႂ်းပီဢၼ်ထူၼ်ႈထိုင်သိပ်းသၢမ်ပီၼၼ်ႉၶဝ်လုၵ်ႉၽိုၼ်ႉဢေႃႈ။-
ၼႂ်းပီဢၼ်ထူၼ်ႈထိုင်သိပ်းသီႇပီၼၼ်ႉၶုၼ်ႁေႃၶမ်း ၶေးတေႃးရလေႃးမႃႉ၊ ဢိၵ်ႇတင်းၶုၼ်ႁေႃၶမ်းဢၼ်ယူႇၽၢႆႇမၼ်းၸိူဝ်းၼၼ်ႉဢွၼ်ၵၼ်ၶီႇသိုၵ်းလႄႈတိုၵ်းတေႃးယႃႉၽဵဝ်ႈၵူၼ်းမဵဝ်း ရေႇၽိမ်ႇ၊ ဢၼ်မီးၵႃႈၼႂ်းဝဵင်း ဢႃသတရုတ်ႉၵႃၼိမ်ႇ၊ လႂ်၊ၵူၼ်းမဵဝ်း ၸူးၸိမ်ႇ၊ ၵႃႈၼႂ်းဝဵင်း ႁႃႇမႃႉ၊ လႂ်ၵူၼ်းမဵဝ်း ဢေႇမိမ်ႇ၊ ဢၼ်ယူႇၵႃႈၼႂ်းပၢင်ႇပဵင်း ၵိရိယသိမ်း၊ လႂ်၊-
ဢိၵ်ႇတင်းၵူၼ်းမဵဝ်း ႁေႃးရိ၊ ဢၼ်ယူႇၼိူဝ်လွႆ ဢေႇတုမ်ႇ၊ ၸိူဝ်းၼၼ်ႉပႅတ်ႈသေလႄႈလိုပ်ႈလမ်းၸွမ်းတေႃႇႁွတ်ႈထိုင်ဝဵင်း ဢေးလပရၼ်ႇ၊ ဢၼ်မီးၵႃႈႁိမ်းထိူၼ်ႇပုၼ်ႉၼၼ်ႉဢေႃႈ။-
ၵမ်းၼၼ်ႉ၊ၶဝ်ၶိုၼ်းပွၵ်ႈမိူဝ်းၸူးတၢင်းဝဵင်း ၵႃႇတေႇသႃႉ၊ ဢၼ်ႁွင်ႉဝႃႈ၊ဝဵင်း ဢိၼ်ႇမိသပတ်ႉ၊ ပုၼ်ႉဢေႃႈ။ ၶဝ်တိုၵ်းတေႃးပႄႉၼႅင်ႇၵူၼ်းမဵဝ်း ဢႃႇမလႅၵ်ႉ၊ လႂ်၊ဢိၵ်ႇတင်းၵူၼ်းမဵဝ်း ဢႃႇမေႃးရိ၊ ဝဵင်း ႁႃႇၸၸုၼ်ႇတႃႇမႃႇ၊ လႂ်ၸိူဝ်းၼၼ်ႉတင်းသဵင်ႈတင်းလူင်ဢေႃႈ။
ပိူဝ်ႈၼႆလႄႈၶုၼ်ႁေႃၶမ်းမိူင်း သေႃးတုမ်ႇ၊ မိူင်း ၵေႃးမေႃးရႃႉ၊ မိူင်း ဢႃႇတမႃႇ၊ မိူင်း ၸေႇပူဝ်းဢိမ်း၊ တင်းၶုၼ်ႁေႃၶမ်းမိူင်း ပေႇလႃႇ၊ ၶဝ်ႁႃႈပႃးၶီႇသိုၵ်းၶိုၼ်ႈၸူးတီႈပၢင်ႇပဵင်း သိတ်ႉတိမ်ႇ၊ သေလႄႈ၊-
တိုၵ်းၵၼ်တင်းၶုၼ်ႁေႃၶမ်းသီႇပႃးဢၼ်ပဵၼ်ၶုၼ်ႁေႃၶမ်းမိူင်း သိၼႃႇ၊ မိူင်း ဢေႇလႃႉသႃႇ၊ မိူင်း ဢေႇလမ်ႇ၊ တင်းၶုၼ်ႁေႃၶမ်းမိူင်း ၵေႃးဢိမ်ႇ၊ ၸိူဝ်းၼၼ်ႉဢေႃႈ။-
ၵႃႈတီႈၼႂ်းပၢင်ႇပဵင်းထူင်ႉ သိတ်ႉတိမ်ႇ၊ ၼၼ်ႉမီးလုၵ်းမီးၶုမ်ၼမ်ၼႃႇဢၼ်တဵမ်ဝႆႉတင်းယၢင်ၵႆးတဝ်းမဵဝ်းၼိုင်ႈၼၼ်ႉဢေႃႈ။ မိူဝ်ႈဢၼ်ၶုၼ်ႁေႃၶမ်းမိူင်း သေႃးတုမ်ႇ၊ တင်းၶုၼ်ႁေႃၶမ်းမိူင်း ၵေႃးမေႃးရႃႉ၊ ဢွၵ်ႇပၢႆႈၼႃႈသိုၵ်းၼၼ်ႉၶဝ်တူၵ်းၵႂႃႇၵႃႈၼႂ်းလုၵ်းၼႂ်းၶုမ်ၸိူဝ်းၼၼ်ႉဢေႃႈ။ ၶုၼ်ႁေႃၶမ်းဢၼ်ၵိုတ်းယူႇသၢမ်ပႃးၼၼ်ႉၸမ်ႉ၊ပၢႆႈလွတ်ႈၵႂႃႇထိုင်ၵႃႈၼိူဝ်လွႆဢေႃႈ။-
ၶုၼ်ႁေႃၶမ်းသီႇပႃးဢၼ်ပႄႉၼႅင်ႇၼၼ်ႉဢွၼ်ၵၼ်သိမ်းဢဝ်ဢုၵ်ႉၸႃႇၶူဝ်းလဵင်းဢိၵ်ႇတင်းၶဝ်ႈၼမ်ႉတၢင်းၵိၼ်ၵူႈၸိူဝ်ႉၵူႈပိူင်ဢၼ်မီးၵႃႈတီႈဝဵင်း သေႃးတုမ်ႇ၊ တင်းဝဵင်း ၵေႃးမေႃးရႃႉ၊ ဢေႃႈ။-
လေႃးတႃႉ၊ ဢၼ်ပဵၼ်လၢၼ်ၸၢႆး ဢႃႇပြမ်ႇ၊ ဢၼ်ယူႇၵႃႈတီႈဝဵင်း သေႃးတုမ်ႇ၊ ၼၼ်ႉၵေႃႈၶဝ်တိၺွပ်းဢဝ်ၵႂႃႇပႃးၸဵမ်တင်းဢုၵ်ႉၸႃႇၵႃႈဢၼ်မၼ်းပိူင်ႇတင်းသဵင်ႈတင်းမူတ်းဢေႃႈ။
ၵူၺ်းၵႃႈ၊ၵူၼ်းဢၼ်ပၢႆႈလွတ်ႈၵႂႃႇၼၼ်ႉၵေႃႉၼိုင်ႈၵႂႃႇမွၵ်ႇလၢတ်ႈလွင်ႈတၢင်းၸိူဝ်းၼၼ်ႉထိုင်တီႈ ဢႃႇပြမ်ႇ၊ ၵူၼ်းမဵဝ်း ႁေႇပြႄး၊ ၵေႃႉဢၼ်ယူႇၵႃႈႁိမ်းပႃႇတူၼ်ႈမႆႉၼိမ် မမ်ႇရေႇ၊ ၵူၼ်းမဵဝ်း ဢႃႇမေႃးရိ၊ ၼၼ်ႉဢေႃႈ။ မမ်ႇရေႇ၊ တင်းပီႈဢၢႆႈမၼ်း ဢေႇသၵေႃးလႃႉ၊ တင်း ဢႃႇၼေႇရႃႉ၊ ၶဝ်သၢမ်ပီႈၼွင်ႉပဵၼ်ၵေႃႉသႄႈဢၼ်ၽွမ်ႉၵၼ်တင်း ဢႃႇပြမ်ႇ၊ ဢေႃႈ။-
မိူဝ်ႈဢၼ် ဢႃႇပြမ်ႇ၊ လႆႈငိၼ်းၶၢဝ်ႇလွင်ႈဢၼ်လၢၼ်ၸၢႆးမၼ်းလႆႈၶၢမ်ႇပိူၼ်ႈတိၺွပ်းဢဝ်ၵႂႃႇၼၼ်ႉၸိုင်၊မၼ်းႁွင်ႉဢဝ်ၵူၼ်းသိုၵ်းမၼ်းသၢမ်ပၢၵ်ႇပၢႆသိပ်းပႅတ်ႇၵေႃႉပဵၼ်ၶဝ်ၸိူဝ်းဢၼ်ၵိူတ်ႇလဵင်ႉမႃးၼႂ်းႁိူၼ်းၼႂ်းယေးမၼ်းလႄႈလႆႈၽိုၵ်းလႆႈသွၼ်ဝႆႉၼၼ်ႉလႄႈၶဝ်လိုပ်ႈလမ်းၸွမ်းၶုၼ်ႁေႃၶမ်းသီႇပႃးၼၼ်ႉၵႂႃႇတေႃႇထိုင်ႁွတ်ႈဝဵင်း တၢၼ်ႇ၊ ပုၼ်ႉဢေႃႈ။-
မၼ်းၽႄမႅင်ႇၵူၼ်းမၼ်းပဵၼ်လၢႆမူႇလၢႆၸုမ်းသေယဝ်ႉ၊ၶိင်ႇၵၢင်ၶိုၼ်းၸင်ႇတိုၵ်းတေႃးပႄႉၼႅင်ႇၶဝ်သေလႄႈလိုပ်ႈလမ်းၶဝ်ၵႂႃႇတေႃႇထိုင်ႁွတ်ႈဝဵင်း ႁေႃၽႃႉ၊ ၽၢႆႇႁွင်ႇဝဵင်း တမ်ႇမတ်ႉသၵတ်ႉ၊ ပုၼ်ႉဢေႃႈ။-
မၼ်းသမ်ႉၶိုၼ်းသိမ်းဢဝ်ဢုၵ်ႉၸႃႇၶူဝ်းလဵင်းဢၼ်ၶဝ်တိၺွပ်းဢဝ်ၵႂႃႇၸိူဝ်းၼၼ်ႉဢိၵ်ႇတင်းလၢၼ်ၸၢႆးမၼ်း လေႃးတႃႉ၊ ၸႃႉၸဵမ်ဢုၵ်ႉၸႃႇၵႃႈဢၼ်မၼ်းပိူင်ႇတင်းသဵင်ႈတင်းလူင်ဢိၵ်ႇတင်းၽူႈယိင်းတင်းလၢႆတင်းၵူၼ်းတူၵ်းၵႅၼ်းတင်းလၢႆၸိူဝ်းၼၼ်ႉဢေႃႈ။
မိူဝ်ႈဢၼ် ဢႃႇပြမ်ႇ၊ ပႄႉၶုၼ်ႁေႃၶမ်း ၶေးတေႃးရလေႃးမႃႉ၊ တင်းၶုၼ်ႁေႃၶမ်းဢၼ်ယူႇၽၢႆႇမၼ်းၸိူဝ်းၼၼ်ႉသေလႄႈၶိုၼ်းပွၵ်ႈသေၵႃႈတီႈၼႃႈသိုၵ်းမႃးၼၼ်ႉၸိုင်၊ၶုၼ်ႁေႃၶမ်း သေႃးတုမ်ႇ၊ ဢွၵ်ႇမႃးႁႂ်ႈလႆႈႁူပ်ႉႁူဝ်တၢင်းမၼ်းၵႃႈတီႈႁူၺ်ႈ သႃႇဝေႇ၊ ဢၼ်ႁွင်ႉဝႃႈ၊ ႁူၺ်ႈၶုၼ်ႁေႃၶမ်း၊ ၼၼ်ႉဢေႃႈ။-
ၶုၼ်ႁေႃၶမ်း မေႇလၶိၸေႇတႅၵ်ႈ၊ မိူင်း သႃႇလႅမ်ႇ၊ ဢၼ်ပဵၼ်ယဵၸ်ႈပရေႃးႁဵၵ်ႈ ၽြႃးပဵၼ်ၸဝ်ႈဢၼ်သုင်မျၢတ်ႈၼႃႇသေပိူၼ်ႈၼၼ်ႉၵေႃႈ၊ပႃးဢဝ်ၶဝ်ႈမုၼ်းတင်းၼမ်ႉမၢၵ်ႇၸပိတ်ႉမႃးတီႈ ဢႃႇပြမ်ႇ၊ သေယဝ်ႉ။-
ပၼ်တၢင်းလီတီႈမၼ်းလႄႈဝႃႈ၊ “ႁႂ်ႈၽြႃးပဵၼ်ၸဝ်ႈဢၼ်သုင်မျၢတ်ႈၼႃႇသေပိူၼ်ႈလႄႈၽၢၼ်ႇသၢင်းႁဵတ်းပဵၼ်ၵၢင်ႁၢဝ်လိၼ်မိူင်းၼၼ်ႉပၼ်တၢင်းလီတီႈ ဢႃႇပြမ်ႇ၊ သေၵမ်းလူၺ်ႈ။-
ႁႂ်ႈၽြႃးပဵၼ်ၸဝ်ႈဢၼ်သုင်မျၢတ်ႈၼႃႇသေပိူၼ်ႈလႄႈပၼ်ႁႂ်ႈမႂ်းပႄႉၼႅင်ႇရၢၼ်ႇသူႇတင်းလၢႆၼၼ်ႉလႆႈၶၢမ်ႇဢဝ်တၢင်းဢၼ်ယွင်ႈယေႃးသေၵမ်းလူၺ်ႈ၊” ဝႃႈၼင်ႇၼႆဢေႃႈ။ ဢႃႇပြမ်ႇ၊ ၵေႃႈဢဝ်ၼႂ်းဢုၵ်ႉၸႃႇၵႃႈဢၼ်မၼ်းပိူင်ႇၼၼ်ႉသိပ်းပုၼ်ႈပုၼ်ႈၼိုင်ႈလူႇပၼ်တီႈၶုၼ်ႁေႃၶမ်း မေႇလၶိၸေႇတႅၵ်ႈ၊ ဢေႃႈ။
ၶုၼ်ႁေႃၶမ်း သေႃးတုမ်ႇ၊ ၼၼ်ႉလၢတ်ႈတီႈ ဢႃႇပြမ်ႇ၊ လႄႈဝႃႈ၊ “ဢုၵ်ႉၸႃႇၶူဝ်းလဵင်းတင်းလၢႆၸိူဝ်းၼၼ်ႉသိမ်းဢဝ်ပုၼ်ႈတူဝ်ၸဝ်ႈၵဝ်ႇတႃႉ။ ၵူၺ်းၵႃႈ၊ၵူၼ်းၵဝ်ၶႃႈၸိူဝ်းၼၼ်ႉႁဵတ်းၵျေးၸူးလႄႈပၼ်ၶိုၼ်းတီႈၵဝ်ၶႃႈသေၵမ်းၶႃႈ၊” ဝႃႈၼင်ႇၼႆဢေႃႈ။
ဢႃႇပြမ်ႇ၊ ၶိုၼ်းလၢတ်ႈလႄႈဝႃႈ၊ “ၵဝ်ၶႃႈယူၵ်ႉမိုဝ်းၵႃႈတီႈၽၢႆႇၼႃႈ ထႃႇဝရႃႉၽြႃး၊ ၽြႃးပဵၼ်ၸဝ်ႈဢၼ်သုင်မျၢတ်ႈၼႃႇသေပိူၼ်ႈၸဝ်ႈၵၢင်ႁၢဝ်တင်းလိၼ်မိူင်းၼၼ်ႉလႄႈႁဵတ်းဢတိၵ်ႈထၢၼ်ႇၸမ်ႉ။-
ဢုၵ်ႉၸႃႇၶူဝ်းလဵင်းဢၼ်ပဵၼ်ၶွင်ၶုၼ်လူင်ၼၼ်ႉၸႃႉၸဵမ်မႆသဵၼ်ႈၼိုင်ႈ၊သၢႆၶႅပ်းတိၼ်သဵၼ်ႈၼိုင်ႈၵေႃႈၵဝ်တၵ်းဢမ်ႇဢဝ်သေၸိူဝ်ႉသေမဵဝ်း။ ႁဵတ်းၼႆၸင်ႇတေလွတ်ႈတၢင်းဢၼ်ၶုၼ်လူင်တၵ်းလၢတ်ႈဝႃႈ၊ ‘ၵဝ်ပၼ်လႄႈ ဢႃႇပြမ်ႇ၊ မၢၵ်ႈမီးဢေႃႈ၊’ ဝႃႈၼင်ႇၼႆၼၼ်ႉဢေႃႈ။-
ၼွၵ်ႈသေမဵဝ်းဢၼ်ၵူၼ်းဢွၼ်ႇၵဝ်လႆႈဢဝ်ၵိၼ်ဢဝ်တိုဝ်းၼၼ်ႉၵဝ်တၵ်းဢမ်ႇဢဝ်သင်သေၸိူဝ်ႉသေမဵဝ်းပုၼ်ႈတူဝ်ၸဝ်ႈၵဝ်ႇ၊ၵူၺ်းၵႃႈ၊ႁႂ်ႈ ဢႃႇၼေႇရႃႉ၊ဢေႇသၵေႃးလႃႉ၊ တင်း မမ်ႇရေႇ၊ ၶဝ်ၸိူဝ်းဢၼ်ၽွမ်ႉၵဝ်ၼၼ်ႉဢဝ်ပုၼ်ႈတႃႇတူဝ်ၶဝ်တႃႉ၊” ဝႃႈၼင်ႇၼႆဢေႃႈ။
ဝၢႆးၼၼ်ႉ ဢႃႇပြမ်ႇ၊ လႆႈႁၼ်ပျႃႇတိၵ်ႈရူႇပႃႇရူင်ႇ ထႃႇဝရႃႉၽြႃး၊ လႄႈလႆႈငိၼ်းဢမိင်ႉမၼ်းၸဝ်ႈဢၼ်ဝႃႈ၊ “ ဢႃႇပြမ်ႇ၊ ႟။ ယႃႇပေမႆႈၸႂ်ၵဝ်ပဵၼ်တီႈဢၼ်ႁႄႉဢၼ်ၵင်ႈပုၼ်ႈမႂ်းလႄႈတၵ်းပၼ်ဢၵျူဝ်းဢၼ်ယႂ်ႇဢၼ်မျၢတ်ႈတီႈမႂ်းဢေႃႈ၊” ဝႃႈၼင်ႇၼႆဢေႃႈ။
ဢႃႇပြမ်ႇ၊ ၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈယင်းဢမ်ႇမီးလုၵ်ႈမီးလၢင်းသေၵေႃႉသေၵူၼ်းလႄႈ၊ၵေႃႉဢၼ်တေၶၢမ်ႇဢဝ်ဢမူၺ်ႇၶႃႈၸဝ်ႈၼၼ်ႉ၊ယင်းတေပဵၼ် ဢေးလျေႇၸႃႇ၊ ၵူၼ်းဝဵင်း တမ်ႇမတ်ႉသၵတ်ႉ၊ ၼၼ်ႉၵူၺ်းတီႈၶႃႈဢေႃႈ။ ပိူဝ်ႈၼႆလႄႈဢၵျူဝ်းဢၼ်ယႂ်ႇမျၢတ်ႈဢၼ်ၸဝ်ႈႁဝ်းတေပၼ်ၶႃႈၸဝ်ႈၼၼ်ႉတေပဵၼ်ဢၼ်လႂ်ၶႃႈ။-
ၵွပ်ႈပိူဝ်ႈၸဝ်ႈႁဝ်းဢမ်ႇပၼ်လုၵ်ႈလၢင်းတီႈၶႃႈၸဝ်ႈသေၵေႃႉၼၼ်ႉလႄႈ၊ၶႃႈၸႂ်ႉၶႃႈၸဝ်ႈၵေႃႉၼႆႉတေလႆႈၶၢမ်ႇဢဝ်ဢမူၺ်ႇၶႃႈၸဝ်ႈတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
ၵမ်းၼၼ်ႉ၊ ဢႃႇပြမ်ႇ၊ သမ်ႉလႆႈငိၼ်းပျႃႇတိၵ်ႈ ထႃႇဝရႃႉၽြႃး၊ ထႅင်ႈလႄႈဝႃႈၸမ်ႉ၊ “ၶႃႈမႂ်း ဢေႇလေႇၸႃႇ၊ တေလႆႈၶၢမ်ႇဢဝ်ဢမူၺ်ႇမႂ်းဢမ်ႇၸႂ်ႈ။ လုၵ်ႈဢွၵ်ႇလုၵ်ႈတႄႉမႂ်းတၵ်းတေလႆႈၶၢမ်ႇဢဝ်ဢမူၺ်ႇမႂ်းဢေႃႈ၊” ဝႃႈၼင်ႇၼႆသေယဝ်ႉ၊-
ဢဝ်မၼ်းဢွၵ်ႇမႃးၵႃႈတီႈၼွၵ်ႈသေလႄႈဝႃႈ၊ “ႁႅၼ်တူၺ်းၵၢင်ႁၢဝ်သေလႄႈပေႃးၼပ်ႉဢၢၼ်ႇလၢဝ်ၵၢင်ႁၢဝ်တင်းလၢႆလႆႈၸိုင်၊ၼပ်ႉဢၢၼ်ႇတႃႉ။ ၸိူဝ်ႉၶိူဝ်းၸူဝ်ႈလုၵ်ႈပၢၼ်လၢၼ်မႂ်းတၵ်းၼမ်ၵိုၼ်းမိူၼ်ၸိူဝ်ႉၼင်ႇၼၼ်ဢေႃႈ၊” ဝႃႈၼင်ႇၼႆဢေႃႈ။
ဢႃႇပြမ်ႇ၊ ၵေႃႈယုမ်ႇမၢတ်ႈဢိင်ပိုင်ႈ ထႃႇဝရႃႉၽြႃး၊ လႄႈ၊မၼ်းၸဝ်ႈထုၵ်ႇၸႂ်ၵျိူၵ်ႈၸႂ်မၼ်းလႄႈ၊မၢတ်ႈတၢင်းယုမ်ႇမၢတ်ႈမၼ်းၼၼ်ႉပဵၼ်တၢင်းဢၼ်သိုဝ်ႈတေႃႇဢေႃႈ။
ပိူဝ်ႈၼႆလႄႈ ထႃႇဝရႃႉၽြႃး၊ လၢတ်ႈတီႈမၼ်းလႄႈဝႃႈ၊ “ၵဝ်ပဵၼ် ထႃႇဝရႃႉၽြႃး၊ ဢၼ်ဢဝ်မႂ်းဢွၵ်ႇသေဝဵင်း ဢုရႃႉ၊ ဢၼ်ပဵၼ်တီႈယူႇၵူၼ်း ၶႃႇလတေး၊ ၶဝ်ၼၼ်ႉမႃးပုၼ်ႈတၵ်းပၼ်မိူင်းၼႆႉႁႂ်ႈမႂ်းပိူင်ႇၼၼ်ႉဢေႃႈ။” ဝႃႈၼင်ႇၼႆဢေႃႈ။
ဢႃႇပြမ်ႇ၊ ၶိုၼ်းလဝ်ႈထၢမ်လႄႈဝႃႈ၊ “ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တီႈၶႃႈ။ လွင်ႈဢၼ်ၶႃႈၸဝ်ႈတၵ်းလႆႈပိူင်ႇမိူင်းၼႆႉၼၼ်ႉၶႃႈၸဝ်ႈတေလႆႈႁဵတ်းၸိူဝ်ႉၼင်ႇႁိုဝ်လႄႈႁုလႆႈတီႈၶႃႈ၊” မိူဝ်ႈဢၼ်ဝႃႈၼင်ႇၼႆၸိုင်။
မၼ်းၸဝ်ႈလၢတ်ႈလႄႈဝႃႈ၊ “ဢဝ်ဝူဝ်းမႄႈသိုဝ်ႇတူဝ်ၼိုင်ႈ၊ပႄႉမႄႈတူဝ်ၼိုင်ႈ၊တင်းသူဝ်းပေႃႈတူဝ်ၼိုင်ႈ၊ၵူႈတူဝ်ႁႂ်ႈမီးဢသၢၵ်ႈသၢမ်ပီ ဢိၵ်ႇတင်းၼူၵ်ႉတူႈတူဝ်ၼိုင်ႈတင်းၵႃၵႄတူဝ်ၼိုင်ႈမႃးပုၼ်ႈၵဝ်တႃႉ၊” ဝႃႈၼင်ႇၼႆဢေႃႈ။-
ဢႃႇပြမ်ႇ၊ ၵေႃႈဢဝ်သတ်းၸိူဝ်းဢၼ်ဝႃႈမႃးၸိူဝ်းၼၼ်ႉမႃးတီႈၽြႃးပဵၼ်ၸဝ်ႈသေယဝ်ႉ၊ၽႃႇတူဝ်ၶဝ်ႁဵတ်းသွင်ၽၢၵ်ႇ၊ၶပ်ႉႁဵတ်းသွင်ထႅဝ်၊ယေႈထႅဝ်တမ်းၼိူဝ်ႉယေႈၽၢၵ်ႇဢေႃႈ။ ၼိူဝ်ႉၼူၵ်ႉၸိူဝ်းၼၼ်ႉတႄႉမၼ်းဢမ်ႇၽႃႇ။-
လၢင်းတႃႉတင်းလၢႆလေႃႇလူင်းၸူးတီႈၼိူဝ်ႉၸိူဝ်းၼၼ်ႉလႄႈ ဢႃႇပြမ်ႇ၊ ႁေႃႈပႅတ်ႈဢေႃႈ။
မိူဝ်ႈဢၼ်ၵၢင်ဝၼ်းတူၵ်းၸိုင်၊ ဢႃႇပြမ်ႇ၊ ၼွၼ်းလပ်းၵႂႃႇလႄႈၼွၼ်းၼူၵ်ႇၼႃႇဢေႃႈ။ မိူဝ်ႈၼၼ်ႉမၼ်းတူၵ်းၸႂ်ၵူဝ်ႁႄလႄႈဢၼ်လပ်းသိင်ႇမိုတ်ႈၼႃႇလူင်လၢင်ႁူမ်ႇသုမ်ႇမၼ်းဝႆႉသေယဝ်ႉ၊-
ထႃႇဝရႃႉၽြႃး၊ လၢတ်ႈတီႈမၼ်းလႄႈဝႃႈ၊ “မၢတ်ႈတွင်းဝႆႉလီလီ၊ၸိူဝ်ႉၶိူဝ်းလုၵ်ႈလၢၼ်မႂ်းတၵ်းတေလႆႈၵႂႃႇပဵၼ်ၶႅၵ်ႇၵႃႈတီႈတၢင်ႇဝၢၼ်ႈတၢင်ႇမိူင်းလႄႈတေလႆႈၶၢမ်ႇႁဵတ်းၶႃႈဢၼ်ပိူၼ်ႈၼိၵ်ႈၸၢၵ်ႈတဵၵ်းငႅၼ်းတီႈၼႂ်းမိူင်းၼၼ်ႉသီႇပၢၵ်ႇပီဢေႃႈ။-
ၵူၺ်းၵႃႈ၊ၵဝ်တၵ်းပၼ်တၢမ်ႇတီႈၵူၼ်းမဵဝ်းဢၼ်ၸႂ်ႉၵိၼ်ၶဝ်ၼၼ်ႉသေလႄႈမိူဝ်ႈဢၼ်ၶဝ်ပွၵ်ႈၶိုၼ်းမႃးၼၼ်ႉၶဝ်တၵ်းလႆႈပႃးဢဝ်ဢုၵ်ႉၸႃႇၶူဝ်းလဵင်းၶဝ်မႃးၸွမ်းၼမ်ၼႃႇဢေႃႈ။-
မႂ်းၸမ်ႉ၊တၵ်းတေလႆႈဢသၢၵ်ႈယၢဝ်းယိုၼ်းၵႄႇထဝ်ႈသေလႄႈ၊တၵ်းလႆႈတၢႆလႄႈၵႂႃႇၸူးတီႈပူႇမွၼ်ႇမႂ်းၼိမ်ၼိမ်လီလီသေယဝ်ႉ၊တၵ်းလႆႈၶၢမ်ႇတၢင်းဢၼ်သၢင်းၵျူဝ်ႇလီလီဢေႃႈ။-
မိူဝ်ႈဢၼ်ၸိူဝ်ႉၶိူဝ်းမဵဝ်းၵူၼ်းမႂ်းႁွတ်ႈထိုင်သီႇသိုပ်ႇယဝ်ႉၸင်ႇ၊ၶဝ်တၵ်းလႆႈၶိုၼ်းမႃးဢေႃႈ။ လွင်ႈမၼ်းၸမ်ႉ၊ၵဝ်တၵ်းဢမ်ႇပႆႇႁေႃႈၵူၼ်းမဵဝ်း ဢႃႇမေႃးရိ၊ ၶဝ်ဢွၵ်ႇတေႃႇထိုင်ႁွတ်ႈၸူဝ်ႈဢၼ်တုၸရိူၵ်ႈဢပျတ်ႈၶဝ်လႆႈၶၢမ်ႇၸီႇယၢင်ႇပၼ်တၢမ်ႇဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်တႃဝၼ်းတူၵ်းလႄႈလပ်းသိင်ႇမႃးၼၼ်ႉၸိုင်၊မုၵ်ႉၽႆးဢၼ်ဢွၵ်ႇၵႂၼ်းယူႇ၊ဢိၵ်ႇတင်းၵွၵ်းဝၢၼ်ႇၽႆးဢၼ်တႆႈႁိူဝ်ႈယူႇၼၼ်ႉပေႃႇမႃးလႄႈၶၢမ်ႈၵႂႃႇၵႄႈဝူင်ႈၵၢင်ထႅဝ်ၼိူဝ်ႉဢၼ်ၶပ်ႉဝႆႉၸိူဝ်းၼၼ်ႉဢေႃႈ။-
မိူဝ်ႈယၢမ်းၼၼ်ႉ၊ ထႃႇဝရႃႉၽြႃး၊ ႁဵတ်းပတိၺိၺ်ႇလူၺ်ႈၵၼ်တင်း ဢႃႇပြမ်ႇ၊ ၵႃႈတီႈၼၼ်ႈလႄႈဝႃႈ၊ “ၵဝ်ဝႆႉၵတိသဵတ်ႈၸႃႇဢၼ်ဢဝ်မိူင်းၼႆႉ၊ၸႃႉဢဝ်လႅၼ်လိၼ်မိူင်း ဢေးၵျိပ်ႉ၊ တေႃႇႁွတ်ႈမႄႈၼမ်ႉ ဢုၽရတ်ႉ၊-
မဵဝ်း ဢႃႇမေႃးရိ၊ မဵဝ်း ၶႃႇၼၼိ၊ မဵဝ်း ၵိရၵႃႇသိ၊ ဢိၵ်ႇတင်းမိူင်းၵူၼ်းမဵဝ်း ယေႇပုသိ၊ ၸိူဝ်းၼၼ်ႉဢၢပ်ႈပၼ်တီႈၸိူဝ်ႉၶိူဝ်းမႂ်းဢေႃႈ၊” ဝႃႈၼင်ႇၼႆဢေႃႈ။
ၸႃႇရေး၊ မေး ဢႃႇပြမ်ႇ၊ ၼၼ်ႉဢမ်ႇၵိူတ်ႇလုၵ်ႈၵိူတ်ႇလၢင်းလႄႈမၼ်းမီးၶႃႈမႄႈယိင်းၵူၼ်းမဵဝ်း ဢေးၵျိပ်ႉ၊ ၵေႃႉၼိုင်ႈဢၼ်ၸိုဝ်ႈ ႁႃႇၵရႃႉ၊ ၼၼ်ႉဢေႃႈ။-
ၸႃႇရေး၊ ၸင်ႇလၢတ်ႈတီႈ ဢႃႇပြမ်ႇ၊ လႄႈဝႃႈ၊ၵွပ်ႈပိူဝ်ႈ “ ထႃႇဝရႃႉၽြႃး၊ ဢမ်ႇပၼ်ႁႂ်ႈၵဝ်ၶႃႈလႆႈၵိူတ်ႇလုၵ်ႈၵိူတ်ႇလၢင်းလႄႈၶႅၼ်းတေႃႈၶဝ်ႈၼွၼ်းလူၺ်ႈၵၼ်တင်းၶႃႈမႄႈယိင်းၵဝ်ၶႃႈၼႆႉတႃႉ။ မၼ်းၸၢင်ႈၶႄးတေၵိူတ်ႇလဵင်ႉလုၵ်ႈပုၼ်ႈၵဝ်ၶႃႈၶႃႈဢေႃႈ၊” ဝႃႈၼင်ႇၼႆလႄႈ ဢႃႇပြမ်ႇ၊ ၵေႃႈၽွမ်ႉဢေႃႈ။-
ႁဵတ်းၼၼ်လႄႈ ၸႃႇရေး၊ ဢဝ်ၶႃႈမႄႈယိင်းမၼ်းၼၼ်ႉဢၢပ်ႈပၼ်ႁႂ်ႈ ဢႃႇပြမ်ႇ၊ ဢဝ်ႁဵတ်းမေးမၼ်းဢေႃႈ။ လွင်ႈတၢင်းၼၼ်ႉပဵၼ်မိူဝ်ႈဝၢႆးသေ ဢႃႇပြမ်ႇ၊ ယူႇသဝ်းၼႂ်းမိူင်း ၶႃႇၼၼ်ႇ၊ သိပ်းပီယဝ်ႉၼၼ်ႉဢေႃႈ။-
ဢႃႇပြမ်ႇ၊ ၵေႃႈၶဝ်ႈၸူး ႁႃႇၵရႃႉ၊ လႄႈမၼ်းပႃးပတိၵ်ႈသၼ်ႇထေႇဢေႃႈ။ မိူဝ်ႈဢၼ် ႁႃႇၵရႃႉ၊ ႁုလွင်ႈဢၼ်မၼ်းပႃးပတိၵ်ႈသၼ်ႇထေႇၼၼ်ႉၸိုင်၊မၼ်းမီးၸႂ်ၽႅၼ်သုင်မႃးလႄႈႁဵတ်းဢမ်ႇၼပ်ႉဢမ်ႇၶၢၼ်းတီႈၸဝ်ႈၼၢင်းမၼ်းဢေႃႈ။
ၸႃႇရေး၊ လၢတ်ႈတီႈ ဢႃႇပြမ်ႇ၊ လႄႈဝႃႈ၊ “ဢပျတ်ႈတၢင်းၽိတ်းၼႆႉတူၵ်းႁွတ်ႈၼိူဝ်ၸဝ်ႈသေၵမ်း။ တူဝ်ၵဝ်ၶႃႈဢဝ်မၼ်းဢၢပ်ႈပၼ်ၼႂ်းဝၢင်ႈႁူဝ်ဢူၵ်းၸဝ်ႈယဝ်ႉ။ ၸဵမ်မိူဝ်ႈဢၼ်မၼ်းႁုလွင်ႈဢၼ်မၼ်းပႃးပတိၵ်ႈသၼ်ႇထေႇၼၼ်ႉမၼ်းႁဵတ်းဢမ်ႇၼပ်ႉဢမ်ႇၶၢၼ်းတီႈၵဝ်ၶႃႈဢေႃႈ။ ပိူဝ်ႈၼႆလႄႈႁႂ်ႈ ထႃႇဝရႃႉၽြႃး၊ ၸီႇယၢင်ႇဢမုၵႄႈဝူင်ႈၵၢင်ၵဝ်ၶႃႈတင်းၸဝ်ႈႁဝ်းသေၵမ်းလူၺ်ႈ၊” ဝႃႈၼင်ႇၼႆဢေႃႈ။
ဢႃႇပြမ်ႇ၊ ၶိုၼ်းလၢတ်ႈတီႈ ၸႃႇရေး၊ လႄႈဝႃႈ၊ “လီယဝ်ႉ။ မၼ်းပဵၼ်ၶႃႈသူလႄႈမီးၼႂ်းမိုဝ်းသူယူႇယဝ်ႉ။ သူၶႂ်ႈႁဵတ်းၸိူဝ်ႉၼင်ႇႁိုဝ်တီႈမၼ်းၵေႃႈႁဵတ်းတႃႉ၊” ဝႃႈၼင်ႇၼႆလႄႈ ၸႃႇရေး၊ ၵေႃႈ ၼိၵ်ႈၸၢၵ်ႈငႅၼ်းသႄး ႁႃႇၵရႃႉ၊ ၼႃႇလူင်လၢင်လႄႈ ႁႃႇၵရႃႉ၊ ဢွၵ်ႇပၢႆႈသေၸဝ်ႈၼၢင်းမၼ်းၵႂႃႇဢေႃႈ။
မိူဝ်ႈၼၼ်ႉတမၢၼ်ႇၵၢင်ႁၢဝ် ထႃႇဝရႃႉၽြႃး၊ မႃးႁပ်ႉႁူဝ်တၢင်း ႁႃႇၵရႃႉ၊ ၵႃႈတီႈၼမ်ႉဢွၵ်ႇႁူးၼႂ်းထိူၼ်ႇလႅင်ႉတီႈသဵၼ်ႈတၢင်းဢၼ်ၵႂႃႇၸူးဝဵင်း သုရႃႉ၊ ၼၼ်ႉလႄႈထၢမ်ဝႃႈ။-
“ ႁႃႇၵရႃႉ၊ ၶႃႈ ၸႃႇရေး၊ ႟။ မႂ်းလုၵ်ႉၵႃႈလႂ်မႃး။ တေၵႂႃႇၵႃႈတီႈလႂ်၊” ဝႃႈၼင်ႇၼႆလႄႈ။ မၼ်းၶိုၼ်းလၢတ်ႈလႄႈဝႃႈ၊ “ၶႃႈၸဝ်ႈဢွၵ်ႇပၢႆႈသေၸဝ်ႈၼၢင်းၶႃႈၸဝ်ႈမႃးဢေႃႈ၊” ဝႃႈၼင်ႇၼႆဢေႃႈ။
တမၢၼ်ႇၵၢင်ႁၢဝ် ထႃႇဝရႃႉၽြႃး၊ သမ်ႉလၢတ်ႈလႄႈဝႃႈ၊ “ၶိုၼ်းမိူဝ်းၸူးတီႈၸဝ်ႈၼၢင်းမႂ်းသေလႄႈၶၢမ်ႇႁဵတ်းၶႃႈမၼ်းတႃႉ။-
ၵဝ်တၵ်းပၼ်ႁႂ်ႈၸိူဝ်ႉၶိူဝ်းမႂ်းၼမ်ၵိုၼ်းတေႃႇႁွတ်ႈၽူႈလႂ်ဢမ်ႇၼပ်ႉဢမ်ႇဢၢၼ်ႇလႆႈဢေႃႈ။-
မႂ်းတၵ်းၵိူတ်ႇလဵင်ႉလုၵ်ႈၸၢႆးမႃးလႄႈပၼ်ၸိုဝ်ႈပၼ်သဵင်ဝႃႈ၊ ဢိသမေႇလႃႉ၊ ဝႃႈၼႆတႃႉ။ လွင်ႈမၼ်းၸမ်ႉ၊ ထႃႇဝရႃႉၽြႃး၊ လႆႈငိၼ်းသဵင်ဢၼ်မႂ်းလႆႈၶၢမ်ႇတုၵ်ႉၶႃႉၼၼ်ႉယဝ်ႉ။-
ၵူၺ်းၵႃႈ၊လုၵ်ႈၸၢႆးမႂ်းတၵ်းႁၢႆႉလိူင်းၵျၢမ်းၼႃႇမိူၼ်ၸိူဝ်ႉၼင်ႇမႃႉလီႈထိူၼ်ႇသေယဝ်ႉ၊မၼ်းတၵ်းပဵၼ်ရၢၼ်ႇသူႇယူႇၽၢႆႇၼိုင်ႈတင်းၵူၼ်းတင်းသဵင်ႈတင်းလူင်လႄႈၵူၼ်းတင်းသဵင်ႈတင်းလူင်ၵေႃႈတၵ်းပဵၼ်ရၢၼ်ႇသူႇၵၼ်တင်းမၼ်းဢေႃႈ။ မၼ်းတၵ်းယူႇၽၢတ်ႇယၢၼ်သေၵႃႈတီႈပီႈမၼ်းၼွင်ႉမၼ်းတင်းလႆႈဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ႁႃႇၵရႃႉ၊ ႁွင်ႉႁဵၵ်ႈၸိုဝ်ႈ ထႃႇဝရႃႉၽြႃး၊ ၸဝ်ႈဢၼ်လၢတ်ႈတေႃႇမၼ်းၼၼ်ႉလႄႈဝႃႈ၊ “ၸဝ်ႈႁဝ်းပဵၼ် ဢေးရွႆး၊ တီႈၶႃႈဢေႃႈ၊” ဝႃႈၼင်ႇၼႆ၊ပိူဝ်ႈဢၼ်မၼ်းဝႃႈ၊ “ၸွင်ႇၵဝ်ႁၼ်ၽြႃးပဵၼ်ၸဝ်ႈတႄႉလႄႈဢသၢၵ်ႈလိပ်းယူႇဝၢႆးသေလႆႈႁၼ်မၼ်းၸဝ်ႈၼၼ်ႉႁိုဝ်း၊” ဝႃႈၼင်ႇၼႆဢေႃႈ။-
ၸၢပ်ႈသႅင်ႇလူၺ်ႈလွင်ႈၼႆႉလႄႈၼမ်ႉမေႃႇဢၼ်မီးဝူင်ႈၵၢင်ဝဵင်း ၵႃႇတေႇသႃႉ၊ တင်းဝဵင်း ပေႇရိတ်ႉ၊ ၼၼ်ႉပိူၼ်ႈႁွင်ႉဝႃႈ၊ “ ပေႇလႁေႇရွႆႇ၊ ” ဢၼ်ပွင်ႇဝႃႈ၊ၽြႃးပဵၼ်ၸဝ်ႈဢၼ်ဢသၢၵ်ႈလိပ်းလႄႈႁုႁၼ်ၵဝ်၊ဝႃႈၼင်ႇၼႆဢေႃႈ။
ႁႃႇၵရႃႉ၊ ၵိူတ်ႇလဵင်ႉလုၵ်ႈၸၢႆးတီႈ ဢႃႇပြမ်ႇ၊ သေယဝ်ႉ၊ ဢႃႇပြမ်ႇ၊ ႁွင်ႉႁဵၵ်ႈၸိုဝ်ႈလုၵ်ႈမၼ်းၼၼ်ႉဝႃႈ၊ ဢိသမေႇလႃႉ၊ ဝႃႈၼႆဢေႃႈ။-
မိူဝ်ႈယၢမ်းၼၼ်ႉ ဢႃႇပြမ်ႇ၊ ဢသၢၵ်ႈလႆႈပႅတ်ႇသိပ်းႁူၵ်းပီယဝ်ႉဢေႃႈ။
မိူဝ်ႈဢၼ်ဢသၢၵ်ႈ ဢႃႇပြမ်ႇ၊ လႆႈၵဝ်ႈသိပ်းၵဝ်ႈပီၼၼ်ႉ ထႃႇဝရႃႉၽြႃး၊ ပေႃႇမႃးတီႈမၼ်းလႄႈလၢတ်ႈဝႃႈ၊ၵဝ်ပဵၼ် “ ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ ဢေႃႈ။ ၵႂႃႇမႃးၵႃႈတီႈၽၢႆႇၼႃႈၵဝ်လႄႈမီးတင်းၸေးၸိမ်ႇလူၺ်ႈတၢင်းဢၼ်လီဢၼ်ငၢမ်းတႃႉ။-
ၵဝ်တၵ်းဝႆႉၵတိပတိၺိၺ်ႇၵႃႈတီႈမႂ်းလႄႈပၼ်ႁႂ်ႈၸိူဝ်ႉၶိူဝ်းမႂ်းယႂ်ႇၽႄၼမ်ၵိုၼ်းဢေႃႈ၊” ဝႃႈၼင်ႇၼႆဢေႃႈ။-
ဢႃႇပြမ်ႇ၊ ၵေႃႈၶုပ်ႉၶဝ်ႇဢဝ်ၼႃႈမၼ်းမူပ်ႇၸပ်းလိၼ်ယူႇလႄႈၽြႃးပဵၼ်ၸဝ်ႈသမ်ႉလၢတ်ႈလႄႈဝႃႈ၊-
“ၵတိပတိၺိၺ်ႇဢၼ်ၵဝ်ဝႆႉတီႈမႂ်းၸမ်ႉ၊မႂ်းတၵ်းပဵၼ်ပေႃႈမဵဝ်းၵူၼ်းၼမ်ၼႃႇဢေႃႈ။-
ၸိုဝ်ႈမႂ်းတၵ်းဢမ်ႇလႆႈႁွင်ႉဝႃႈ၊ ဢႃႇပြမ်ႇ၊ တၵ်းလႆႈၸိုဝ်ႈဝႃႈ၊ ဢႃႇပြႃႇႁၢမ်ႇ၊ ဢေႃႈ။ လွင်ႈမၼ်းၸမ်ႉ၊ၵဝ်ႁဵတ်းႁႂ်ႈမႂ်းပဵၼ်ပေႃႈမဵဝ်းၵူၼ်းၼမ်ၼႃႇယဝ်ႉ။-
ၵဝ်တၵ်းပၼ်ႁႂ်ႈၸိူဝ်ႉၶိူဝ်းမႂ်းယႂ်ႇၽႄၼမ်ၵိုၼ်းလႄႈၼႂ်းၶဝ်ၵမ်ႈၽွင်ႈတၵ်းလႆႈပဵၼ်ၶုၼ်ႁေႃၶမ်းလူးၵွၼ်ႇဢေႃႈ။ ၵဝ်တၵ်းႁႂ်ႈၸိူဝ်ႉၶိူဝ်းမႂ်းလႆႈပဵၼ်မဵဝ်းၵူၼ်းၼမ်ၼႃႇဢေႃႈ။
“ၵဝ်တၵ်းႁႂ်ႈၵတိသဵတ်ႈၸႃႇၵဝ်တႄႇမၼ်ႈၵူႈၸူဝ်ႈၵူႈပၢၼ်ၵႃႈတီႈမႂ်း ဢိၵ်ႇတင်းၸိူဝ်ႉၶိူဝ်းၸူဝ်ႈလုၵ်ႈပၢၼ်လၢၼ်သိုပ်ႇသိုပ်ႇတၢမ်တၢမ်သေလႄႈၵဝ်တၵ်းပဵၼ်ၽြႃးပဵၼ်ၸဝ်ႈမႂ်းဢိၵ်ႇတင်းၸိူဝ်ႉၶိူဝ်းမႂ်းဢေႃႈ။-
ၵဝ်တၵ်းဢဝ်မိူင်း ၶႃႇၼၼ်ႇ၊ ဢၼ်မႂ်းပဵၼ်ၶႅၵ်ႇယူႇတေႃႈလဵဝ်ၼႆႉဢၢပ်ႈပၼ်ႁႂ်ႈပဵၼ်မိူင်းမႂ်း ဢိၵ်ႇတင်းၸိူဝ်ႉၶိူဝ်းမႂ်းသေႇသေႇသေယဝ်ႉ၊ၵဝ်တၵ်းပဵၼ်ၽြႃးၶဝ်ဢေႃႈ၊” ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈလၢတ်ႈတီႈ ဢႃႇပြႃႇႁၢမ်ႇ၊ ထႅင်ႈလႄႈဝႃႈ၊ “မႂ်းဢိၵ်ႇတင်းၸိူဝ်ႉၶိူဝ်းမႂ်းၵူႈသိုပ်ႇၵူႈၶိူဝ်းၵေႃႈတၵ်းလႆႈပႂ်ႉၵမ်ပႂ်ႉၸွမ်းၵတိပတိၺိၺ်ႇၵဝ်ဢေႃႈ။-
လူၺ်ႈလွင်ႈဢၼ်သူပႂ်ႉၸွမ်းၵတိပတိၺိၺ်ႇၵဝ်ၼၼ်ႉလႄႈ၊ၸႃႉၸဵမ်မႂ်းဢိၵ်ႇတင်းၸိူဝ်ႉၶိူဝ်းမႂ်းတၵ်းလႆႈၶၢမ်ႇတၢင်းဢၼ်ႁဵတ်းမၢင်ႇၵလႃႇပၢတ်ႇပၢႆၼင်ၵႃႈတီႈၵူၼ်းၸၢႆးၵူႈၵေႃႉဢေႃႈ။-
ႁႂ်ႈလႆႈပဵၼ်လၢၵ်ႈၶၼႃႇသၢၵ်ႈသေႇၵတိပတိၺိၺ်ႇဝူင်ႈၵၢင်မႂ်းတင်းၵဝ်ၸိုင်၊တႄႇဢဝ်မိူဝ်ႈလဵဝ်ၼႆႉၵႂႃႇ၊-
ၵူၼ်းၸၢႆးဢၼ်ၵိူတ်ႇလဵင်ႉမႃးၵႃႈတီႈႁိူၼ်းသူသေဢမ်ႇဝႃႈ၊ၵူၼ်းၸၢႆးဢၼ်ၵိူတ်ႇလဵင်ႉမႃးၵႃႈၼႂ်းႁိူၼ်းၶႃႈဢၼ်သူသိုဝ်ႉဢဝ်သေဢမ်ႇဝႃႈ၊ၵေႃႉဢၼ်ဢသၢၵ်ႈလႆႈပႅတ်ႇဝၼ်းၼၼ်ႉတၵ်းလႆႈၶၢမ်ႇတၢင်းဢၼ်ႁဵတ်းမၢင်ႇၵလႃႇပၢတ်ႇပၢႆၼင်ၵူႈၵေႃႉဢေႃႈ။-
တၢင်းဢၼ်ႁဵတ်းမၢင်ႇၵလႃႇပၢတ်ႇပၢႆၼင်ၵူႈၵေႃႉၵူႈၵူၼ်းၼၼ်ႉပဵၼ်လၢၵ်ႈၶၼႃႇတီႈၼိူဝ်ႉတီႈၼင်သူလွင်ႈဢၼ်ၵတိပတိၺိၺ်ႇၵဝ်ၼႆႉတႄႇယူႇထႃႇဝရႃႉၵႃႈၼိူဝ်သူၼၼ်ႉဢေႃႈ။-
ၵူၼ်းၸၢႆးၵေႃႉဢၼ်ဢမ်ႇၶၢမ်ႇတၢင်းဢၼ်ႁဵတ်းမၢင်ႇၵလႃႇပၢတ်ႇပၢႆၼင်ၼၼ်ႉတၵ်းဢမ်ႇႁႂ်ႈၶဝ်ပဵၼ်ၵူၼ်းၵဝ်။ လွင်ႈမၼ်းၸမ်ႉ၊မၼ်းဢမ်ႇႁပ်ႉၶၢမ်ႇဢဝ်ၵတိပတိၺိၺ်ႇၵဝ်ဢေႃႈ။”
ၽြႃးပဵၼ်ၸဝ်ႈသမ်ႉလၢတ်ႈတီႈ ဢႃႇပြႃႇႁၢမ်ႇ၊ လႄႈဝႃႈ၊ “မေးမႂ်းၼၼ်ႉၵေႃႈတေဢမ်ႇလႆႈႁွင်ႉၸိုဝ်ႈဝႃႈ၊ ၸႃႇရေး၊ တႄႇၸႃႉဢဝ်တေႃႈလဵဝ်ၼႆႉၵႂႃႇတေလႆႈႁွင်ႉၸိုဝ်ႈဝႃႈ၊ ၸႃႇရႃႇ၊ ဝႃႈၼင်ႇၼႆဢေႃႈ။-
ၵဝ်တၵ်းပၼ်တၢင်းလီတီႈမၼ်းလႄႈသမ်ႉတၵ်းပၼ်လုၵ်ႈၸၢႆးၵေႃႉၼိုင်ႈတီႈမႂ်းဢၼ်မၼ်းတၵ်းၵိူတ်ႇလဵင်ႉမႃးပၼ်မႂ်းၼၼ်ႉဢေႃႈ။ ၵဝ်တၵ်းပၼ်တၢင်းလီမၢင်ႇၵလႃႇႁႂ်ႈမၼ်းပဵၼ်မႄႈမဵဝ်းၵူၼ်းလၢႆၸိူဝ်ႉလၢႆမဵဝ်းသေလႄႈၶုၼ်ႁေႃၶမ်းၼမ်ၼႃႇတၵ်းပေႃႇဢွၵ်ႇမႃးၵႃႈၼႂ်းၸိူဝ်ႉၶိူဝ်းမၼ်းဢေႃႈ၊” ဝႃႈၼင်ႇၼႆဢေႃႈ။
ဢႃႇပြႃႇႁၢမ်ႇ၊ ၶုပ်ႉၶဝ်ႇဢဝ်ၼႃႈမၼ်းမူပ်ႇၸပ်းလိၼ်ယူႇလႄႈယုမ်ႉၶူဝ်သေလႄႈလၢတ်ႈၼႂ်းၸႂ်ဝႃႈ၊ “ၵူၼ်းထဝ်ႈဢၼ်မီးဢသၢၵ်ႈပၢၵ်ႇပီၼႆႉၸွင်ႇတေမီးလုၵ်ႈလႆႈယူႇလူးၵွၼ်ႇႁိုဝ်း၊ ၸႃႇရႃႇ၊ ဢၼ်မီးဢသၢၵ်ႈၵဝ်ႈသိပ်းပီၼႆႉၵေႃႈၸွင်ႇတေၵိူတ်ႇလုၵ်ႈလႆႈယူႇလူးၵွၼ်ႇႁိုဝ်း၊” ဝႃႈၼင်ႇၼႆၵႃႈၼႂ်းၸႂ်သေယဝ်ႉ၊-
လဝ်ႈထၢမ်တီႈၽြႃးပဵၼ်ၸဝ်ႈလႄႈဝႃႈ၊ “ႁႂ်ႈ ဢိသမေႇလႃႉ၊ ဢသၢၵ်ႈလိပ်းယူႇၵႃႈတီႈၽၢႆႇၼႃႈၸဝ်ႈႁဝ်းသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ၽြႃးပဵၼ်ၸဝ်ႈဝႃႈ၊ “ဢမ်ႇၸႂ်ႈၵူၺ်း။ မေးမႂ်း ၸႃႇရႃႇ၊ တၵ်းၵိူတ်ႇလဵင်ႉလုၵ်ႈၸၢႆးမႃးလႄႈမႂ်းတၵ်းလႆႈႁွင်ႉႁဵၵ်ႈၸိုဝ်ႈမၼ်းဝႃႈ၊ ဢိၸၢၵ်ႈ၊ ဝႃႈၼႆဢေႃႈ။ ၵဝ်တၵ်းႁဵတ်းႁႂ်ႈၵတိပတိၺိၺ်ႇၵဝ်တႄႇယူႇဝူင်ႈၵၢင်ၵဝ်တင်းမၼ်းဢိၵ်ႇတင်းၸိူဝ်ႉၶိူဝ်းမၼ်းတႃႇသေႇဢေႃႈ။ ၵတိပတိၺိၺ်ႇၼၼ်ႉတၵ်းပဵၼ်ၵတိပတိၺိၺ်ႇထႃႇဝရႃႉဢေႃႈ။-
ၵဝ်လႆႈငိၼ်းၵႂၢမ်းဢၼ်မႂ်းလဝ်ႈယွၼ်းပုၼ်ႈ ဢိသမေႇလႃႉ၊ ၼၼ်ႉယူႇ။ ပိူဝ်ႈၼႆၵဝ်တၵ်းပၼ်တၢင်းလီတီႈမၼ်းႁႂ်ႈၸိူဝ်ႉၶိူဝ်းမၼ်းၼမ်ၵိုၼ်းသေယဝ်ႉ၊ႁႂ်ႈမၼ်းပဵၼ်ပေႃႈၶုၼ်သိပ်းသွင်ပႃးဢေႃႈ။ ၵဝ်တၵ်းႁႂ်ႈၸိူဝ်ႉၶိူဝ်းမၼ်းပဵၼ်မဵဝ်းၵူၼ်းဢၼ်ယႂ်ႇၼႃႇဢေႃႈ။-
ၼႂ်းဝႃႈၼၼ်သေၵေႃႈ ၵတိသဵတ်ႈၸႃႇၵဝ်တၵ်းတႄႇၵႃႈၼိူဝ်လုၵ်ႈၸၢႆးမႂ်း ဢိၸၢၵ်ႈ၊ ဢၼ် ၸႃႇရႃႇ၊ တၵ်းၵိူတ်ႇလဵင်ႉမိူဝ်ႈဢၼ်ၶွပ်ႈၶူပ်ႇၶိင်ႇၼႆႉပီၼႃႈၼၼ်ႉဢေႃႈ၊” ဝႃႈၼင်ႇၼႆသေယဝ်ႉ၊-
ၶေႃႈၵႂၢမ်းဢၼ်ၽြႃးပဵၼ်ၸဝ်ႈလၢတ်ႈတီႈ ဢႃႇပြႃႇႁၢမ်ႇ၊ ၼၼ်ႉသုတ်းယဝ်ႉလႄႈ မၼ်းၸဝ်ႈၽၢတ်ႇသေ ဢႃႇပြႃႇႁၢမ်ႇ၊ ၵႂႃႇဢေႃႈ။
ၼႂ်းဝၼ်းၼၼ်ႉၵမ်းလဵဝ် ဢႃႇပြႃႇႁၢမ်ႇ၊ ႁဵတ်းၸွမ်းဢမိင်ႉၽြႃးပဵၼ်ၸဝ်ႈ၊ဢဝ်လုၵ်ႈၸၢႆးမၼ်း ဢိသမေႇလႃႉ၊ ဢိၵ်ႇတင်းၵႃႈဢၼ်ပဵၼ်ၵူၼ်းၸၢႆးဢၼ်မီးၼႂ်းႁိူၼ်းမၼ်း၊ၸႃႉၸဵမ်ၶႃႈဢၼ်ၵိူတ်ႇလဵင်ႉမႃးၵႃႈၼႂ်းၼႃႈႁိူၼ်းမၼ်း၊တင်းၶႃႈဢၼ်သိုဝ်ႉဢဝ်မႃးၵူႈၵေႃႉၵူႈၵူၼ်းၼၼ်ႉလႆႈၶၢမ်ႇဢဝ်တၢင်းဢၼ်ႁဵတ်းမၢင်ႇၵလႃႇပၢတ်ႇပၢႆၼင်သေဢေႃႈ။-
မိူဝ်ႈယၢမ်း ဢႃႇပြႃႇႁၢမ်ႇ၊ ၶၢမ်ႇဢဝ်တၢင်းဢၼ်ႁဵတ်းမၢင်ႇၵလႃႇပၢတ်ႇပၢႆၼင်ၼၼ်ႉဢသၢၵ်ႈမၼ်းမီးၵဝ်ႈသိပ်းပၢႆၵဝ်ႈပီယဝ်ႉလႄႈ၊-
လုၵ်ႈၸၢႆးမၼ်း ဢိသမေႇလႃႉ၊ ၵေႃႈမီးဢသၢၵ်ႈသိပ်းသၢမ်ပီယဝ်ႉဢေႃႈ။-
ၶဝ်သွင်ၵေႃႉပေႃႈလုၵ်ႈၶၢမ်ႇဢဝ်တၢင်းဢၼ်ႁဵတ်းမၢင်ႇၵလႃႇပၢတ်ႇပၢႆၼင်ၼႂ်းဝၼ်းလဵဝ်ၵၼ်။-
ႁူမ်ႈလူၺ်ႈၵၼ်တင်းၶႃႈၶဝ်ၵူႈၵေႃႉၵူႈၵူၼ်းဢေႃႈ။
ထႃႇဝရႃႉၽြႃး၊ ပေႃႇမႃးတီႈ ဢႃႇပြႃႇႁၢမ်ႇ၊ ႁိမ်းပၢင်ႇမႆႉၼိမ် မမ်ႇရေႇ၊ ယၢမ်းမိူဝ်ႈဢၼ် ဢႃႇပြႃႇႁၢမ်ႇ၊ ၼင်ႈယူႇၵႃႈတီႈႁူးၽၵ်းတူသုမ်ႉထဵင်မၼ်းၽွင်းယၢမ်းလႅတ်ႇမႆႈၼႃႇၼၼ်ႉ၊-
မၼ်းမုင်ႈႁၼ်ၵူၼ်းသၢမ်ၵေႃႉၸုၵ်းယူႇၵႃႈတီႈၽၢႆႇၼႃႈမၼ်းလႄႈလႅၼ်ႈဢွၵ်ႇၵႂႃႇႁပ်ႉႁူဝ်တၢင်းၶုပ်ႉၶဝ်ႇဢဝ်ၼႃႈမၼ်းၶုပ်ႉမူပ်ႇၸပ်းလိၼ်ယူႇလႄႈလၢတ်ႈဝႃႈ၊-
“ၸဝ်ႈၶဝ်႟။ ယင်းဢမ်ႇၵိုတ်းလိုဝ်ႈလႄႈယႃႇပေပူၼ်ႉႁိူၼ်းၵဝ်ၶႃႈၵႂႃႇသေၵမ်း။ ႁႂ်ႈၵဝ်ၶႃႈလႆႈလုမ်းလႃးသူၸဝ်ႈသေၵမ်းတီႈၶႃႈ။-
ႁႂ်ႈၵဝ်ၶႃႈလႆႈဢဝ်ၼမ်ႉ ပုၼ်ႈတႃႇသုၵ်ႈတိၼ်သူၸဝ်ႈသေလႄႈလိုဝ်ႈသဝ်းတႂ်ႈတူၼ်ႈမႆႉၼႆႉသေၵမ်းၶႃႈ။-
ပုၼ်ႈတႃႇတေမီးႁႅင်းႁႂ်ႈလႆႈသိုပ်ႇၶၢဝ်းတၢင်းၸိုင်၊ႁႂ်ႈၵဝ်ၶႃႈလႆႈၸႃႇၵႃႉလဵင်ႉလူတၢင်းၵိၼ်ဢိတ်းၼိုင်ႈသေၵမ်းၶႃႈ။ သူၸဝ်ႈမႃးၵႃႈတီႈႁိူၼ်းၵဝ်ၶႃႈႁႂ်ႈၵဝ်ၶႃႈလႆႈၶၢမ်ႇဢဝ်ဢၵျူဝ်းတီႈၶႃႈယဝ်ႉ။ ပိူဝ်ႈၼႆလႄႈႁႂ်ႈၵဝ်ၶႃႈလႆႈလုမ်းလႃးသူၸဝ်ႈသေၵမ်းတီႈၶႃႈ၊” ဝႃႈၼင်ႇၼႆဢေႃႈ။- ၶဝ်ၵေႃႈၶိုၼ်းလၢတ်ႈလႄႈဝႃႈ၊ “လီယဝ်ႉႁဵတ်းၸွမ်းၵႃႈၼင်ႇဢၼ်မႂ်းလၢတ်ႈၼႆႉတႃႉ၊” ဝႃႈၼင်ႇၼႆဢေႃႈ။-
ဢႃႇပြႃႇႁၢမ်ႇ၊ ၵေႃႈႁိပ်ႈၼႅတ်ႈလႅၼ်ႈၵႂႃႇၸူးတီႈ ၸႃႇရႃႇ၊ ၵႃႈၼႂ်းသုမ်ႉသေလႄႈလၢတ်ႈဝႃႈ၊ “ဢဝ်ၽွင်ၶဝ်ႈၵျုင်ႇသေသၢမ်ၸွႆႉၼူတ်ႈသေလႄႈၼိုင်ႈပၼ်ၶဝ်ႈမုၼ်းၽႂ်းၽႂ်းတႃႉ၊” ဝႃႈၼင်ႇၼႆသေယဝ်ႉ၊-
လႅၼ်ႈၵႂႃႇၸူးၵႃႈတီႈၽုင်ဝူဝ်းမၼ်းလႄႈၸုင်ဢဝ်ဝူဝ်းပေႃႈဢွၼ်ႇဢၼ်ပီးလီမၼ်းလီၼၼ်ႉၵႂႃႇပၼ်ႁႂ်ႈၵူၼ်းၸႂ်ႉႁႅမ်သေတူမ်ႈႁုင်ပၼ်ၽႂ်းၽႂ်းဢေႃႈ။-
လိုၼ်းၼၼ်ႉ၊မၼ်းဢဝ်ၼမ်ႉၼူမ်းဢိၵ်ႇတင်းၶႆၼမ်ႉၼူမ်းၵၢမ်ႈဢိၵ်ႇတင်းၼိူဝ်ႉဝူဝ်းဢၼ်ႁုင်ယဝ်ႉၼၼ်ႉႁႅၼ်းတမ်းပၼ်ၽၢႆႇၼႃႈၶဝ်သေယဝ်ႉ၊ၸုၵ်းယူႇတႂ်ႈတူၼ်ႈမႆႉပႂ်ႉလုမ်းလႃးၶဝ်ဢေႃႈ။ ၶဝ်ၵေႃႈၵိၼ်ဢေႃႈ။
မိူဝ်ႈၼၼ်ႉၶဝ်ထၢမ်တီႈမၼ်းလႄႈဝႃႈ၊ “မေးမႂ်း ၸႃႇရႃႇ၊ မီးၵႃႈလႂ်၊” ဝႃႈၼင်ႇၼႆလႄႈ၊ မၼ်းၶိုၼ်းလၢတ်ႈဝႃႈ၊ “မီးယူႇၼႂ်းသုမ်ႉဢေႃႈ၊” ဝႃႈၼင်ႇၼႆဢေႃႈ။
ၼႂ်းၶဝ်ၼၼ်ႉၵေႃႉၼိုင်ႈလၢတ်ႈလႄႈဝႃႈ၊ “ပီၼႃႈမႃးၵဝ်သမ်ႉတၵ်းမႃးထႅင်ႈဢေႃႈ။ မိူဝ်ႈၼၼ်ႉမေးမႂ်း ၸႃႇရႃႇ၊ တၵ်းတေၵိူတ်ႇလဵင်ႉလုၵ်ႈၸၢႆးဢေႃႈ၊” ဝႃႈၼင်ႇၼႆဢေႃႈ။ မိူဝ်ႈဢၼ်ဝႃႈၼင်ႇၼႆယူႇၼၼ်ႉ ၸႃႇရႃႇ၊ မီးႁိမ်းၽၵ်းတူၽၢႆႇလင်ၵေႃႉဢၼ်လၢတ်ႈၵႂၢမ်းၼၼ်ႉလႄႈလႆႈငိၼ်းၵႂၢမ်းၼၼ်ႉဢေႃႈ။-
မိူဝ်ႈၼၼ်ႉ၊ ဢႃႇပြႃႇႁၢမ်ႇ၊ တင်း ၸႃႇရႃႇ၊ ထဝ်ႈၼႃႇယဝ်ႉလႄႈ ၸႃႇရႃႇ၊ ၼၼ်ႉၸွမ်းၼင်ႇလိူတ်ႈႁူဝ်လိူၼ်ဢၼ်မႄႈယိင်းၶဝ်ပဵၼ်ယူႇသေႇသေႇၼၼ်ႉထၢတ်ႇၵိုတ်းၵႂႃႇတီႈမၼ်းယဝ်ႉဢေႃႈ။-
ပိူဝ်ႈၼႆလႄႈ ၸႃႇရႃႇ၊ ယုမ်ႉၶူဝ်ႁင်းမၼ်းလႄႈလၢတ်ႈၼႂ်းၸႂ်ဝႃႈ၊ “တေႃႈလဵဝ်ၵဝ်ပေႃးထဝ်ႈထၼ်ႇၼႆႉယဝ်ႉလႄႈၸွင်ႇၵဝ်မီးၸႂ်ဢၼ်ၶႂ်ႈပျေႃႇယူႇလူးၵွၼ်ႇႁိုဝ်း။ ၸဝ်ႈၽူဝ်ၵဝ်ၵေႃႈပေႃးထဝ်ႈယဝ်ႉ၊” ဝႃႈၼႆၼႂ်းၸႂ်မၼ်းဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ ထၢမ် ဢႃႇပြႃႇႁၢမ်ႇ၊ လႄႈဝႃႈ၊ “ႁဵတ်းသင်လႄႈမေးမႂ်း ၸႃႇရႃႇ၊ ၶႂ်ႈၶူဝ်လႄႈလၢတ်ႈဝႃႈ၊ ‘ၵဝ်ထဝ်ႈယဝ်ႉလႄႈတၵ်းၵိူတ်ႇလဵင်ႉလုၵ်ႈလႆႈယူႇႁိုဝ်း၊’ ဝႃႈၼင်ႇၼႆၸိူဝ်ႉၼင်ႇႁိုဝ်။-
ဢၼ် ထႃႇဝရႃႉၽြႃး၊ ဢမ်ႇတၢတ်ႈၼိူင်ႇလႆႈၼၼ်ႉၸွင်ႇမီးသေၸိူဝ်ႉသေပိူင်ႁိုဝ်း။ ၵႃႈၼင်ႇဢၼ်ၵဝ်ဝႃႈဝႆႉၼၼ်ႉပီၼႃႈမႃးၵဝ်တၵ်းၶိုၼ်းမႃးၸူးမႂ်းလႄႈ ၸႃႇရႃႇ၊ တၵ်းၵိူတ်ႇလဵင်ႉလုၵ်ႈၸၢႆးဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈဢၼ် ၸႃႇရႃႇ၊ ၵူဝ်ႁႄလႄႈထဵင်ဝႃႈ၊ “ၶႃႈၸဝ်ႈဢမ်ႇၶႂ်ႈၶူဝ်ၶႃႈ၊” ဝႃႈၼႆဢေႃႈ။ မၼ်းၸဝ်ႈၶိုၼ်းလၢတ်ႈဝႃႈ၊ “ဢမ်ႇၸႂ်ႈၵူၺ်းမႂ်းၶႂ်ႈၶူဝ်ဢေႃႈ၊” ဝႃႈၼင်ႇၼႆဢေႃႈ။
ၵူၼ်းၸိူဝ်းၼၼ်ႉဢွၵ်ႇလႄႈဝၢႆႇၼႃႈၸူးဝဵင်း သေႃးတုမ်ႇ၊ သေလႄႈၵႂႃႇဢေႃႈ။ ဢႃႇပြႃႇႁၢမ်ႇ၊ ၵေႃႈၸွမ်းသူင်ႇၶဝ်ဢေႃႈ။-
ထႃႇဝရႃႉၽြႃး၊ လၢတ်ႈလႄႈဝႃႈ၊ “ၸွင်ႇၵဝ်လီသိူင်ႇဝႆႉလွင်ႈဢၼ်ၵဝ်တၵ်းတေႁဵတ်းၼႆႉလႄႈယင်းဢမ်ႇမွၵ်ႇဢမ်ႇလၢတ်ႈၼႄ ဢႃႇပြႃႇႁၢမ်ႇ၊ ႁိုဝ်း။-
ၸိူဝ်ႉၶိူဝ်းမၼ်းတၵ်းပဵၼ်မဵဝ်းၵူၼ်းဢၼ်ယႂ်ႇဢၼ်မျၢတ်ႈသေလႄႈပျေႉၸုမ်ႇတင်းတၼ်းၶူဝ်းၵွပ်ႈလူၺ်ႈမၼ်းလႄႈၵူၼ်းမဵဝ်းတင်းသဵင်ႈတင်းလူင်တေလႆႈၶၢမ်ႇတၢင်းလီမၢင်ႇၵလႃႇဢေႃႈ။-
ၵဝ်လိူၵ်ႈၵဵပ်းဢဝ်မၼ်းႁႂ်ႈမၼ်းသိုပ်ႇသင်ႇသွၼ်ပိင်းၺၢပ်ႈတီႈၸူဝ်ႈလုၵ်ႈပၢၼ်လၢၼ်မၼ်း၊ႁႂ်ႈၶဝ်လႆႈၸွမ်းတြႃး ထႃႇဝရႃႉၽြႃး၊ သေလႄႈၵမ်ၵျၢင်ႉၸွမ်းသဵၼ်ႈတၢင်းတြႃးဢၼ်သိုဝ်ႈဢၼ်တေႃႇဢေႃႈ။ ပုၼ်ႈလွင်ႈၵဝ်တေလႆႈႁဵတ်းၵူႈၸိူဝ်ႉၵူႈပိူင်ၸွမ်းၵႃႈၼင်ႇဢၼ်ၵဝ်ဝႆႉၵတိ တီႈ ဢႃႇပြႃႇႁၢမ်ႇ၊ ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ထႃႇဝရႃႉၽြႃး၊ မွၵ်ႇလၢတ်ႈတီႈ ဢႃႇပြႃႇႁၢမ်ႇ၊ လႄႈဝႃႈ၊ “သဵင်ႁွင်ႉသႅၼ်ႇတၢင်ႇဢပျတ်ႈၵႃႈၼိူဝ်ဝဵင်း သေႃးတုမ်ႇ၊ တင်းဝဵင်း ၵေႃးမေႃးရႃႉ၊ ယႂ်ႇၼႃႇလႄႈတုၸရိူၵ်ႈဢပျတ်ႈၶဝ်ၵေႃႈၼၵ်းၼႃႇဢေႃႈ။
တေႃႈလဵဝ်ၼႆႉၵဝ်တၵ်းလူင်းၵႂႃႇလူတူၺ်းလွင်ႈဢၼ်ၶဝ်ႁဵတ်းၸွမ်းၼင်ႇသဵင်ႁွင်ႉသႅၼ်ႇဢၼ်ၵဝ်လႆႈငိၼ်းၼၼ်ႉတေၸႂ်ႈတႄႉႁိုဝ်း၊ဢမ်ႇၸႂ်ႈႁိုဝ်းၼၼ်ႉတၵ်းလႆႈႁုဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၵူၼ်းၸိူဝ်းၼၼ်ႉဢွၵ်ႇၵႂႃႇၸူးဝဵင်း သေႃးတုမ်ႇ၊ သေယဝ်ႉ၊ ထႃႇဝရႃႉၽြႃး၊ ၸမ်ႉ၊ယင်းၵိုတ်းယူႇလူၺ်ႈၵၼ်တင်း ဢႃႇပြႃႇႁၢမ်ႇ၊ ယူႇဢေႃႈ။-
ဢႃႇပြႃႇႁၢမ်ႇ၊ သုတ်ႉၸမ် ထႃႇဝရႃႉၽြႃး၊ လႄႈလဝ်ႈထၢမ်လႄႈဝႃႈ၊ “ၸဝ်ႈႁဝ်းတေယႃႉပႅတ်ႈၶဝ်ၸိူဝ်းဢၼ်သိုဝ်ႈတေႃႇႁူမ်ႈလူၺ်ႈၵၼ်တင်းၶဝ်ၸိူဝ်းဢၼ်ဢမ်ႇတြႃးၼၼ်ႉတီႈၶႃႈႁိုဝ်း။-
သင်ဝႃႈမီးၵူၼ်းသိုဝ်ႈတေႃႇႁႃႈသိပ်းၵေႃႉၵႃႈၼႂ်းဝဵင်းၸိုင်၊ၸဝ်ႈႁဝ်းတေယႃႉပႅတ်ႈတင်းဝဵင်းတီႈၶႃႈႁိုဝ်း။ ၵွပ်ႈလူၺ်ႈၵူၼ်းႁႃႈသိပ်းၵေႃႉၼၼ်ႉလႄႈယင်းဢမ်ႇသေလၢႆဝဵင်းၼၼ်ႉတီႈၶႃႈႁိုဝ်း။-
ၸဝ်ႈႁဝ်းတေၶႃႈၸႂ်ၵူၼ်းၼၼ်ႉႁူမ်ႈလူၺ်ႈၵၼ်တင်းၶဝ်ၸိူဝ်းဢၼ်ဢမ်ႇတြႃးၼၼ်ႉဢမၢၼ်ႇၶၼ်ပဵၼ်တီႈၶႃႈႁိုဝ်း။ ယႃႇႁႂ်ႈလႆႈပဵၼ်ၸိူဝ်ႉၼၼ်သေၵမ်းတီႈၶႃႈ။ ပေႃးၸဝ်ႈႁဝ်းႁဵတ်းၸိူဝ်ႉၼင်ႇၼၼ်ၸိုင်၊ၵူၼ်းသိုဝ်ႈတေႃႇတင်းလၢႆတၵ်းလႆႈၶၢမ်ႇတၢင်းဢၼ်ၸီႇယၢင်ႇၸွမ်းၵၼ်တင်းၶဝ်ၸိူဝ်းဢၼ်ဢမ်ႇတြႃးၼၼ်ႉတီႈၶႃႈဢေႃႈ။ ယႃႇႁႂ်ႈလႆႈပဵၼ်ၸိူဝ်ႉၼင်ႇၼၼ်သေၵမ်း။ ၸဝ်ႈဢၼ်ၸီႇယၢင်ႇလိၼ်မိူင်းတင်းသဵင်ႈတင်းလူင်ၼၼ်ႉတၵ်းၸီႇယၢင်ႇၸွမ်းၼင်ႇတြႃးဢမ်ႇၸႂ်ႈတီႈၶႃႈႁိုဝ်း၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၶိုၼ်းလၢတ်ႈလႄႈဝႃႈ၊ “ပေႃးၵဝ်ထူပ်းႁၼ်ၵူၼ်းသိုဝ်ႈတေႃႇႁႃႈသိပ်းၵေႃႉၵႃႈၼႂ်းဝဵင်း သေႃးတုမ်ႇ၊ ၸိုင်၊ၵဝ်တၵ်းဢမ်ႇပၼ်တၢမ်ႇတီႈၵူၼ်းတင်းဝဵင်းၵွပ်ႈလူၺ်ႈၶဝ်ဢေႃႈ၊” ဝႃႈၼင်ႇၼႆဢေႃႈ။
ဢႃႇပြႃႇႁၢမ်ႇ၊ လဝ်ႈလၢတ်ႈထႅင်ႈလႄႈဝႃႈ၊ “ၸဝ်ႈၽြႃးတီႈၶႃႈ၊ၶႃႈၸဝ်ႈပဵၼ်ၵူၼ်းဢၼ်တႅမ်ႇယေႃႈၵူၺ်းလႄႈဢမ်ႇမီးဢၶႂၢင်ႉဢယေးဢၼ်လၢတ်ႈၵႃႈသင်သေၵေႃႈတၢင်းဢၼ်ၶႃႈၸဝ်ႈၶတ်းၸႂ်သိုပ်ႇလၢတ်ႈယူႇၼႆႉယႃႇပေပၼ်ဢပျတ်ႈသေၵမ်းတီႈၶႃႈ။-
ပေႃးၵူၼ်းသိုဝ်ႈတေႃႇဢမ်ႇတဵမ်ႁႃႈသိပ်းၵေႃႉလႄႈယွမ်းႁႃႈၵေႃႉၸိုင်၊ၸဝ်ႈႁဝ်းတေယႃႉဝဵင်းၼၼ်ႉတင်းသဵင်ႈတင်းလူင်ပႅတ်ႈၶႃႈႁိုဝ်း၊” ဝႃႈၼင်ႇၼႆလႄႈ၊ ထႃႇဝရႃႉၽြႃး၊ ၶိုၼ်းလၢတ်ႈဝႃႈ၊ “ပေႃးၵဝ်ထူပ်းႁၼ်ၵူၼ်းသိုဝ်ႈတေႃႇသီႇသိပ်းႁႃႈၵေႃႉၸိုင်၊ၵဝ်တၵ်းဢမ်ႇယႃႉပႅတ်ႈၵူၺ်း၊” ဝႃႈၼင်ႇၼႆဢေႃႈ။
ဢႃႇပြႃႇႁၢမ်ႇ၊ သမ်ႉလဝ်ႈလၢတ်ႈထႅင်ႈလႄႈဝႃႈ၊ “ပေႃးဝႃႈမီးသီႇသိပ်းၵူၺ်းၶႃႈလူး၊” မိူဝ်ႈဢၼ်ဝႃႈၼင်ႇၼႆၸိုင်၊မၼ်းၸဝ်ႈၶိုၼ်းဝႃႈ၊ “ပေႃးဝႃႈမီးသီႇသိပ်းၵေႃႉၸိုင်၊ၵဝ်တၵ်းဢမ်ႇယႃႉပႅတ်ႈၵူၺ်း၊” ဝႃႈၼင်ႇၼႆဢေႃႈ။
ဢႃႇပြႃႇႁၢမ်ႇ၊ လဝ်ႈလၢတ်ႈဝႃႈ၊ “ဢူဝ်းၸဝ်ႈၽြႃးတီႈၶႃႈ။ ယႃႇပေမီးၸႂ်ၶႂ်ႈၸႃႉသေၵမ်းတီႈၶႃႈ။ ႁႂ်ႈၶႃႈၸဝ်ႈလႆႈလဝ်ႈယွၼ်းသေၵမ်းတီႈၶႃႈ။ ပေႃးဝႃႈမီးသေသၢမ်သိပ်းၸိုင်၊တေႁဵတ်းၸိူဝ်ႉၼင်ႇႁိုဝ်တီႈၶႃႈ၊” ဝႃႈၼင်ႇၼႆလႄႈ။ မၼ်းၸဝ်ႈၶိုၼ်းလၢတ်ႈဝႃႈ၊ “ပေႃးမီးသၢမ်သိပ်းၸိုင်၊ၵဝ်တၵ်းဢမ်ႇယႃႉပႅတ်ႈၵူၺ်း၊” ဝႃႈၼင်ႇၼႆဢေႃႈ။
ဢႃႇပြႃႇႁၢမ်ႇ၊ လဝ်ႈလၢတ်ႈလႄႈဝႃႈ၊ “ၸဝ်ႈၽြႃးတီႈၶႃႈ။ တၢင်းဢၼ်ၶႃႈၸဝ်ႈၶတ်းၸႂ်သိုပ်ႇလဝ်ႈယွၼ်းၼႆႉယႃႇပေပၼ်ဢပျတ်ႈသေၵမ်းတီႈၶႃႈ၊သင်ဝႃႈထူပ်းႁၼ်သေသၢဝ်းၵေႃႉၵူၺ်းၶႃႈလူး၊” ဝႃႈၼင်ႇၼႆလႄႈ၊ မၼ်းၸဝ်ႈဝႃႈ၊ “ပေႃးၵဝ်ထူပ်းႁၼ်သၢဝ်းၵေႃႉၸိုင်၊ၵဝ်တၵ်းဢမ်ႇယႃႉပႅတ်ႈၵူၺ်း၊” ဝႃႈၼင်ႇၼႆဢေႃႈ။
ဢႃႇပြႃႇႁၢမ်ႇ၊ ၵေႃႈလဝ်ႈလၢတ်ႈဝႃႈ၊ “ၸဝ်ႈၽြႃးတီႈၶႃႈ၊ယႃႇပေမီးၸႂ်ၶႂ်ႈၸႃႉသေၵမ်းတီႈၶႃႈ၊ႁႂ်ႈလႆႈလဝ်ႈယွၼ်းၵမ်းလိုၼ်းသုတ်းသေၵမ်းၶႃႈ၊သင်ဝႃႈထူပ်းႁၼ်သေသိပ်းၵေႃႉၵူၺ်းၸိုင်၊တေႁဵတ်းၸိူဝ်ႉၼင်ႇႁိုဝ်တီႈၶႃႈ၊” ဝႃႈၼင်ႇၼႆလႄႈ၊ မၼ်းၸဝ်ႈလၢတ်ႈဝႃႈ၊ “ပေႃးထူပ်းႁၼ်သိပ်းၵေႃႉၸိုင်၊ၵဝ်တၵ်းဢမ်ႇယႃႉပႅတ်ႈၵူၺ်း၊” ဝႃႈၼင်ႇၼႆဢေႃႈ။-
ဝၢႆးသေ ထႃႇဝရႃႉၽြႃး၊ လၢတ်ႈတေႃႇ ဢႃႇပြႃႇႁၢမ်ႇ၊ ယဝ်ႉတူဝ်ႈၼၼ်ႉမၼ်းၸဝ်ႈဢွၵ်ႇၵႂႃႇသေဢေႃႈ။ ဢႃႇပြႃႇႁၢမ်ႇ၊ ၵေႃႈပွၵ်ႈမိူဝ်းႁိူၼ်းၵႂႃႇသေဢေႃႈ။
မိူဝ်ႈဢၼ်တမၢၼ်ႇၵၢင်ႁၢဝ်သွင်ပႃးၼၼ်ႉႁွတ်ႈထိုင်တီႈဝဵင်း သေႃးတုမ်ႇ၊ မိူဝ်ႈၶိင်ႇႁူဝ်ၶမ်ႈၼၼ်ႉၸိုင်၊ လေႃးတႃႉ၊ ၼင်ႈယူႇၵႃႈတီႈၽၵ်းတူဝဵင်းဢေႃႈ။ မိူဝ်ႈဢၼ်မၼ်းႁၼ်ၶဝ်သွင်ၵေႃႉၼၼ်ႉၸိုင်၊မၼ်းလုၵ်ႉလႄႈႁပ်ႉႁူဝ်တၢင်းၶဝ်သေယဝ်ႉ၊ၶုပ်ႉမူပ်ႇယူႇၵႃႈၼိူဝ်လိၼ်ယဝ်ႉၸင်ႇ၊-
လၢတ်ႈလႄႈဝႃႈ၊ “ၸဝ်ႈၶဝ်႟။ ၶႅၼ်းတေႃႈမႃးၵႃႈတီႈႁိူၼ်းၵဝ်ၶႃႈလႄႈႁႂ်ႈၵဝ်ၶႃႈလႆႈလုမ်းလႃးသူၸဝ်ႈသေၵမ်း။ သုၵ်ႈတိၼ်လႄႈလိုဝ်ႈသဝ်းသေၶမ်ႈၼိုင်ႈယဝ်ႉၸင်ႇၵၢင်ၼႂ်ၸဝ်ႉၸဝ်ႉလုၵ်ႉလႄႈသိုပ်ႇၶၢဝ်းတၢင်းသူၸဝ်ႈၵႂႃႇသေၵမ်းၶႃႈ၊” ဝႃႈၼင်ႇၼႆလႄႈ။ ၶဝ်သွင်ၵေႃႉၼၼ်ႉၵေႃႈဝႃႈ၊ “ႁဝ်းဢမ်ႇၶဝ်ႈယဝ်ႉ၊ႁဝ်းတေယူႇၵၢင်တၢင်းၼႆႉသေႁႂ်ႈပူၼ်ႉၶိုၼ်းၵႂႃႇၵူၺ်းယဝ်ႉ၊” ဝႃႈၼင်ႇၼႆဢေႃႈ။
ၵွပ်ႈပိူဝ်ႈမၼ်းတိုၵ်းယူင်းၸူဝ်းဢဝ်ၼႃႇလူင်လၢင်လႄႈၶဝ်သွင်ၵေႃႉၸွမ်းၵႂႃႇၵႃႈတီႈႁိူၼ်းမၼ်းဢေႃႈ။ လေႃးတႃႉ၊ ၼိုင်ႈၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈသေႁႅၼ်းပၼ်ၶဝ်ႈလီၽၵ်းဝၢၼ်ပုၼ်ႈၶႅၵ်ႇသွင်ၵေႃႉၼၼ်ႉသေယဝ်ႉ၊ႁႂ်ႈၶဝ်ၵိၼ်ဢေႃႈ။
ၸူဝ်ႈဢၼ်ၶႅၵ်ႇဢမ်ႇပႆႇၼွၼ်းၼၼ်ႉၵူၼ်းၸၢႆးၸဵမ်လဵၵ်ႉၸဵမ်ယႂ်ႇဢၼ်မီးၼႂ်းဝဵင်း သေႃးတုမ်ႇ၊ ၵူႈတီႈၵူႈလႅၼ်တင်းသဵင်ႈတင်းလူင်ဢွၼ်ၵၼ်မႃးဝႅင်းႁွပ်ႈႁိူၼ်းၶဝ်သေလႄႈ၊-
ႁွင်ႉပၢဝ်ႇတီႈ လေႃးတႃႉ၊ လႄႈဝႃႈ၊ “ၵူၼ်းၸၢႆးဢၼ်မႃးၵိုတ်းသဝ်းၵႃႈတီႈႁိူၼ်းမႂ်းၶမ်ႈၼႆႉၼၼ်ႉမီးၵႃႈလႂ်။ ဢဝ်ၶဝ်ဢွၵ်ႇမႃးပၼ်ႁႂ်ႈႁဝ်းသိူၵ်ႈသမ်ႇၵႃႇမႃႉလူၺ်ႈၵၼ်တင်းၶဝ်တႃႉ၊” ဝႃႈၼင်ႇၼႆဢေႃႈ။
လေႃးတႃႉ၊ ၵေႃႈဢွၵ်ႇပႃႈၼွၵ်ႈၵႂႃႇၸူးတီႈၶဝ်လႄႈဢိုတ်းၽၵ်းတူၽၢႆႇတၢင်းလင်ဝႆႉသေယဝ်ႉ၊-
လၢတ်ႈတီႈၶဝ်လႄႈဝႃႈ၊ “ပီႈၼွင်ႉၶဝ်႟။ ၵဝ်တွင်းပၢၼ်ႇသူဢေႃႈ။ ယႃႇပေႁဵတ်းဢထမ်ႇမႃႉထၼ်ႇၼႆႉသေၵမ်း။-
တူၺ်းလူး၊ၵဝ်ၶႃႈမီးလုၵ်ႈယိင်းသၢဝ်ၸႅတ်ႈသွင်ၵေႃႉဢေႃႈ။ ႁႂ်ႈၵဝ်ၶႃႈလႆႈဢဝ်ၶဝ်သွင်ၵေႃႉၼၼ်ႉဢွၵ်ႇမႃးပၼ်သူလႄႈၵႃႈၼင်ႇဢၼ်သူမီးဢလူဝ်ႇၼၼ်ႉႁဵတ်းတီႈၶဝ်သေၵမ်း။ တီႈၵူၼ်းၸၢႆးၸိူဝ်းၼႆႉပိူဝ်ႈဢၼ်ပဵၼ်ၶႅၵ်ႇၵဝ်လႄႈယႃႇပေႁဵတ်းၵႃႈသင်တီႈၶဝ်သေၵမ်း။ ၵဝ်တၵ်းလႆႈၵႅတ်ႇၶႄၶဝ်ပၼ်ဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ၶဝ်သမ်ႉဝႃႈ၊ “ဝႄႈပၼ်တၢင်းႁဝ်းတႃႉ။ မႂ်းၼႆႉပဵၼ်ၶႅၵ်ႇဢၼ်မႃးသွၼ်ႈပိုင်ႈတီႈၼႆႈၵူၺ်းလႄႈ၊မႂ်းယင်းတေၸီႇယၢင်ႇတြႃးၵႃႈၼိူဝ်ႁဝ်းႁိုဝ်း။ ဝႄႈပၼ်တၢင်းႁဝ်းတႃႉ။ ပေႃးဢမ်ႇၼၼ်ႁဝ်းတၵ်းႁဵတ်းဢထမ်ႇမႃႉတီႈမႂ်းၼႃႇသေဢၼ်ႁဝ်းတၵ်းႁဵတ်းတီႈၶဝ်ၼၼ်ႉဢေႃႈ၊” ဝႃႈၼင်ႇၼႆသေယဝ်ႉ၊ၶဝ်ၽိုတ်ႉဢီး လေႃးတႃႉ၊ ပႅတ်ႈလႄႈသုတ်ႉၸူးၵႂႃႇႁႂ်ႈလႆႈယႃႉၽၵ်းတူတႅၵ်ႇလႅဝ်ဢေႃႈ။-
မိူဝ်ႈၼၼ်ႉတမၢၼ်ႇၵၢင်ႁၢဝ်သွင်ပႃးၼၼ်ႉယိုၼ်ႈမိုဝ်းဢွၵ်ႇလႄႈတိုတ်ႉၸၼ်ဢဝ် လေႃးတႃႉ၊ ၶဝ်ႈႁိူၼ်းသေယဝ်ႉ၊ဢိုတ်းၽၵ်းတူဝႆႉသေဢေႃႈ။-
ႁဵတ်းၼၼ်လႄႈတမၢၼ်ႇၵၢင်ႁၢဝ်သွင်ပႃးၼၼ်ႉႁဵတ်းႁႂ်ႈၶဝ်ၸိူဝ်းဢၼ်ယူႇၵႃႈၼွၵ်ႈႁိူၼ်းၼၼ်ႉၸဵမ်လဵၵ်ႉၸဵမ်ယႂ်ႇတႃမွတ်ႇၵႂႃႇၵူႈၵေႃႉထၢၼ်ႈပေႃးဢမ်ႇၸၢင်ႈႁႃၽၵ်းတူဢေႃႈ။
တမၢၼ်ႇၵၢင်ႁၢဝ်သွင်ပႃးၼၼ်ႉလၢတ်ႈတီႈ လေႃးတႃႉ၊ လႄႈဝႃႈ၊ “ၵႃႈဢၼ်မႂ်းမီးပီႈၼွင်ႉၸိူဝ်ႉၶိူဝ်းၸႃႉၸဵမ်လုၵ်ႈၸၢႆးလႂ်၊လုၵ်ႈယိင်းမႂ်းလႂ်၊လုၵ်ႈၶူၺ်မႂ်းလႂ်၊ဢိၵ်ႇတင်းသူၺ်ႇပီႈမဵဝ်းၼွင်ႉမႂ်းတင်းလၢႆဢၼ်မီးၵႃႈၼႂ်းဝဵင်းၼႆႉႁွင်ႉဢဝ်ၶဝ်ဢွၵ်ႇသေၵႃႈတီႈၼႆႈၵႂႃႇတႃႉ။-
ႁဝ်းတၵ်းယႃႉတီႈၼႆႈပႅတ်ႈယဝ်ႉ။ ၵွပ်ႈပိူဝ်ႈဢၼ် ထႃႇဝရႃႉၽြႃး၊ လႆႈငိၼ်းသဵင်ဢၼ်ႁွင်ႉသႅၼ်ႇတၢင်ႇဢပျတ်ႈၵူၼ်းဝဵင်းၼႆႉႁႅင်းၼႃႇလႄႈပွႆႇၸႂ်ႉႁႂ်ႈႁဝ်းမႃးယႃႉပႅတ်ႈဝဵင်းၼႆႉယဝ်ႉ၊” ဝႃႈၼင်ႇၼႆဢေႃႈ။
လေႃးတႃႉ၊ ၵေႃႈၵႂႃႇမွၵ်ႇလၢတ်ႈတီႈလုၵ်ႈၶူၺ်ဢၼ်မၢႆၵၼ်တင်းလုၵ်ႈယိင်းမၼ်းၸိူဝ်းၼၼ်ႉလႄႈဝႃႈ၊ “ႁိပ်ႈၼႅတ်ႈႁႂ်ႈလႆႈဢွၵ်ႇသေၵႃႈတီႈၼႆႈၵႂႃႇတႃႉ။ ထႃႇဝရႃႉၽြႃး၊ တၵ်းတေယႃႉၽဵဝ်ႈဝဵင်းၼႆႉပႅတ်ႈယဝ်ႉ၊” ဝႃႈၼင်ႇၼႆသေၵေႃႈ၊ၶဝ်ထၢင်ႇဝႃႈ၊ယွၵ်ႇယဝ်ႈပႅတ်ႉလႅၼ်ၵၼ်ၵူၺ်းဢေႃႈ။
မိူဝ်ႈဢၼ်ႁူဝ်မိူင်းသႂ်မႃးၼၼ်ႉတမၢၼ်ႇၵၢင်ႁၢဝ်လၢတ်ႈႁႂ်ႈ လေႃးတႃႉ၊ ႁိပ်ႈၼႅတ်ႈလႄႈလၢတ်ႈဝႃႈ၊ “ႁဵတ်းၶၼ်ႁဵတ်းၽႂ်းတႃႉ။ ၼင်ႇႁိုဝ်ဢသၢၵ်ႈသူတၵ်းဢမ်ႇသုမ်းၸိုင်၊ႁွင်ႉဢဝ်မေးမႂ်းတင်းလုၵ်ႈယိင်းမႂ်းသွင်ၵေႃႉၼၼ်ႉလႄႈဢွၵ်ႇၵႂႃႇၶၼ်ၶၼ်ၽႂ်းၽႂ်းတႃႉ၊” ဝႃႈၼင်ႇၼႆသေၵေႃႈ။-
မၼ်းယင်းတိုဝ်လႄႈယူႇဢေႃႈ။ ၵွပ်ႈပိူဝ်ႈဢၼ် ထႃႇဝရႃႉၽြႃး၊ ဢဵတ်းလူၶဝ်လႄႈတမၢၼ်ႇၵၢင်ႁၢဝ်ၸိူဝ်းၼၼ်ႉတိုတ်ႉၸၼ်ဢဝ်မိုဝ်းမၼ်းဢိၵ်ႇတင်းမိုဝ်းမေးမၼ်းတင်းမိုဝ်းလုၵ်ႈယိင်းမၼ်းသွင်ၵေႃႉၼၼ်ႉသေလႄႈဢွၵ်ႇဝဵင်းၵႂႃႇဢေႃႈ။-
မိူဝ်ႈၼၼ်ႉတမၢၼ်ႇၵၢင်ႁၢဝ်ပႃးၼိုင်ႈလၢတ်ႈဝႃႈ၊ “လႅၼ်ႈပၢႆႈႁႂ်ႈဢသၢၵ်ႈသူလႆႈလွတ်ႈတႃႉ။ ယႃႇပေဝၢႆႇတူၺ်းၶိုၼ်းတၢင်းလင်။ ယႃႇပေၵိုတ်းၵႃႈၼႂ်းပၢင်ႇပဵင်းၼႆႉ။ လႅၼ်ႈပၢႆႈၶိုၼ်ႈလွႆၵႂႃႇႁႂ်ႈလွတ်ႈတၢင်းတၢႆတႃႉ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ လေႃးတႃႉ၊ ယင်းလဝ်ႈလၢတ်ႈလႄႈဝႃႈ၊ “ၸဝ်ႈ႟။ ယႃႇပေႁႂ်ႈၵဝ်ၶႃႈလႆႈႁဵတ်းၸိူဝ်ႉၼင်ႇၼၼ်သေၵမ်း။-
ၸဝ်ႈႁဝ်းႁဵတ်းၵျေးၸူးဢၼ်ယႂ်ႇၼႃႇတီႈၵဝ်ၶႃႈလႄႈၵႄႇသေႇဢသၢၵ်ႈၵဝ်ၶႃႈတီႈၶႃႈယဝ်ႉ။ လွႆၼၼ်ႉၵႆၼႃႇလႄႈၸူဝ်ႈဢၼ်ၵဝ်ၶႃႈဢမ်ႇပႆႇပၢႆႈႁွတ်ႈၵႂႃႇထိုင်ၵႃႈတီႈၼၼ်ႈၼၼ်ႉၽေးဢုပၢတ်ႈတၵ်းလမ်းၸွမ်းၶိုတ်းၵဝ်ၶႃႈလႄႈၵဝ်ၶႃႈတၵ်းလႆႈတၢႆတီႈၶႃႈယဝ်ႉ။-
ၸဝ်ႈႁဝ်းႁၼ်ဝဵင်းဢွၼ်ႇၼၼ်ႉယူႇဢမ်ႇၸႂ်ႈၶႃႈႁိုဝ်း။ ဝဵင်းဢွၼ်ႇၼၼ်ႉၸမ်တၢၼ်ႇတၢၼ်ႇလႄႈႁႂ်ႈၵဝ်ၶႃႈလႆႈပၢႆႈၵႂႃႇၸူးၵႃႈတီႈၼၼ်ႈသေၵမ်း။ ဝဵင်းၼၼ်ႉပဵၼ်ဝဵင်းလဵၵ်ႉဝဵင်းဢွၼ်ႇဢမ်ႇၸႂ်ႈၶႃႈႁိုဝ်း။ သင်ပၢႆႈၵႂႃႇၸူးၸိုင်၊ၸၢင်ႈတေလွတ်ႈၽေးတၢင်းတၢႆဢေႃႈ၊” ဝႃႈၼင်ႇၼႆဢေႃႈ။
ၸဝ်ႈၼၼ်ႉၵေႃႈၶိုၼ်းလၢတ်ႈလႄႈဝႃႈ၊ “လီယဝ်ႉ။ ၵဝ်ၽွမ်ႉၵႂၢမ်းဢၼ်မႂ်းလဝ်ႈယွၼ်းၼၼ်ႉယဝ်ႉ။ ၵဝ်တၵ်းတေဢမ်ႇယႃႉဝဵင်းဢွၼ်ႇဢၼ်မႂ်းလၢတ်ႈယူႇၼၼ်ႉပႅတ်ႈ။-
ႁဵတ်းဝႆးဝႆးတႃႉ။ လႅၼ်ႈပၢႆႈၽႂ်းၽႂ်းတႃႉ။ ၸူဝ်ႈဢၼ်မႂ်းဢမ်ႇပႆႇႁွတ်ႈထိုင်ၵႃႈတီႈဝဵင်းၼၼ်ႉၸိုင်၊ၵဝ်ဢမ်ႇၸၢင်ႈႁဵတ်းၵႃႈသင်သေၸိူဝ်ႉသေပိူင်လႆႈၵူၺ်း၊” ဝႃႈၼင်ႇၼႆဢေႃႈ။ ၵွပ်ႈပိူဝ်ႈၼႆလႄႈဝဵင်းဢွၼ်ႇၼၼ်ႉလႆႈႁွင်ႉဝႃႈ၊ဝဵင်း ၸေႃႇရႃႉ၊ ဢေႃႈ။
ယၢမ်းမိူဝ်ႈဢၼ် လေႃးတႃႉ၊ ၶဝ်ႁွတ်ႈၵႃႈၼႂ်းဝဵင်း ၸေႃႇရႃႉ၊ ၵႂႃႇၼၼ်ႉပဵၼ်ၶိင်ႇဢၼ်ၵၢင်ဝၼ်းဢွၵ်ႇမႃးၵႃႈၼိူဝ်လိၼ်မိူင်းယဝ်ႉဢေႃႈ။-
မိူဝ်ႈဢၼ် ထႃႇဝရႃႉၽြႃး၊ ႁႂ်ႈၽူၼ်ဢၼ်ပဵၼ်ၽႆးတင်းၵၢၼ်ႉလုၵ်ႉသေၵႃႈတီႈမၼ်းၸဝ်ႈၵႃႈၼိူဝ်ၵၢင်ႁၢဝ်ပုၼ်ႉတူၵ်းလူင်းမႃးသႂ်ႇဝဵင်း သေႃးတုမ်ႇ၊ တင်းဝဵင်း ၵေႃးမေႃးရႃႉ၊ ဢေႃႈ။-
မၼ်းၸဝ်ႈယႃႉၽဵဝ်ႈဝဵင်းသွင်ဝဵင်းၼၼ်ႉၸႃႉၸဵမ်ပၢင်ႇပဵင်းတင်းသဵင်ႈတင်းလူင်ဢိၵ်ႇတင်းၵူၼ်းဝဵင်းတင်းသဵင်ႈတင်းလူင်ဢိၵ်ႇတင်းတူၼ်ႈၵႃႈဢၼ်ဢွၵ်ႇၵႃႈၼိူဝ်လိၼ်ၸိူဝ်းၼၼ်ႉပႅတ်ႈဢေႃႈ။-
မေး လေႃးတႃႉ၊ ၸမ်ႉ၊ဝၢႆႇတူၺ်းၶိုၼ်းတၢင်းလင်လႄႈပဵၼ်သဝ်ၵိူဝ်ၵႂႃႇသေဢေႃႈ။
ၶိင်ႇႁူဝ်ၼႂ်ၸဝ်ႉၸဝ်ႉ၊ ဢႃႇပြႃႇႁၢမ်ႇ၊ လႅၼ်ႈဢွၵ်ႇၸူးတီႈဢၼ်မၼ်းယၢမ်ႈၸုၵ်းယူႇၽၢႆႇၼႃႈ ထႃႇဝရႃႉၽြႃး၊ ၼၼ်ႉသေယဝ်ႉ၊-
မုင်ႈတူၺ်းဝဵင်း သေႃးတုမ်ႇ၊ တင်းဝဵင်း ၵေႃးမေႃးရႃႉ၊ ဢိၵ်ႇတင်းပၢင်ႇပဵင်းတင်းသဵင်ႈတင်းလူင်လႄႈလႆႈႁၼ်ၵႂၼ်းၽႆးလုၵ်ႉယူႇၵႃႈၼိူဝ်မိူင်းၼၼ်ႉမိူၼ်ၸိူဝ်ႉၼင်ႇႁူင်းတဝ်ႈၽႆးဢၼ်ယႂ်ႇၼႃႇၼၼ်ႉဢေႃႈ။-
ၼႂ်းဝႃႈၼၼ်သေၵေႃႈမိူဝ်ႈဢၼ်ၽြႃးပဵၼ်ၸဝ်ႈယႃႉၽဵဝ်ႈဝဵင်းၸိူဝ်းၼၼ်ႉပႅတ်ႈသေၵႃႈတီႈပၢင်ႇပဵင်းတီႈဢၼ် လေႃးတႃႉ၊ ယူႇသဝ်းမႃးၼၼ်ႉၸိုင်၊မၼ်းၸဝ်ႈၶုၵ်းၸႂ်လႆႈ ဢႃႇပြႃႇႁၢမ်ႇ၊ ယူႇလႄႈပွႆႇၶႂၢင်း လေႃးတႃႉ၊ လွတ်ႈသေႁႂ်ႈလႆႈယူႇလူင်ႉလီလွတ်ႈလီဢေႃႈ။
ပိူဝ်ႈဢၼ် လေႃးတႃႉ၊ ဢမ်ႇႁတ်းယူႇၵႃႈၼႂ်းဝဵင်း ၸေႃႇရႃႉ၊ လႄႈႁွင်ႉဢဝ်လုၵ်ႈယိင်းမၼ်းသွင်ၵေႃႉၼၼ်ႉၶၢႆႉၵႂႃႇၵႃႈၼိူဝ်လွႆလႄႈယူႇၵႃႈၼႂ်းထမ်ႈဢေႃႈ။-
လုၵ်ႈယိင်းလူင်ၼၼ်ႉလၢတ်ႈတီႈၼွင်ႉယိင်းမၼ်းလႄႈဝႃႈ၊ “ပေႃႈႁဝ်းထဝ်ႈမႃးယဝ်ႉ။ ၵႃႈၼႂ်းလေႃးၵႃႉၼႆႉၽူႈၸၢႆးဢၼ်တေဢဝ်ႁႃးလႄႈႁႂ်ႈလႆႈၵိူတ်ႇလုၵ်ႈၵိူတ်ႇလၢင်းၼၼ်ႉဢမ်ႇမီးသေၵေႃႉသေၵူၼ်းယဝ်ႉ။-
မႃးတႃႉ။ ႁဝ်းတိုၵ်းႁႂ်ႈပေႃႈႁဝ်းၵိၼ်ၼမ်ႉလဝ်ႈမၢၵ်ႇၸပိတ်ႉမဝ်းလႄႈပၼ်ႁႂ်ႈမၼ်းၼွၼ်းလူၺ်ႈၵၼ်တင်းႁဝ်းပုၼ်ႈလွင်ႈၼင်ႇႁိုဝ်ၸိူဝ်ႉၶိူဝ်းပေႃႈႁဝ်းတၵ်းသိုပ်ႇၽႄႈၵႂႃႇၼၼ်ႉတႃႉ၊” ဝႃႈၼင်ႇၼႆဢေႃႈ။-
ၶိုၼ်းၼၼ်ႉၶဝ်ႁႂ်ႈပေႃႈၶဝ်မဝ်းၼမ်ႉလဝ်ႈမၢၵ်ႇၸပိတ်ႉသေလႄႈလုၵ်ႈယိင်းလူင်ၼၼ်ႉၶဝ်ႈၸူးလႄႈၼွၼ်းလူၺ်ႈပေႃႈမၼ်းဢေႃႈ။ ပိူဝ်ႈဢၼ် လေႃးတႃႉ၊ မဝ်းၼႃႇလူင်လၢင်လႄႈမၼ်းဢမ်ႇႁုလွင်ႈဢၼ်မၼ်းႁဵတ်းၵႃႈသင်ၼၼ်ႉ။
ၼႂ်းဝၼ်းမိူဝ်ႈၽုၵ်ႈၵေႃႉယႂ်ႇၼၼ်ႉလၢတ်ႈတီႈၼွင်ႉယိင်းမၼ်းလႄႈဝႃႈ၊ “မိူဝ်ႈၶမ်ႈဝႃးၵဝ်ပေႃးလႆႈၼွၼ်းလူၺ်ႈၵၼ်တင်းပေႃႈႁဝ်းယဝ်ႉ။ ၶမ်ႈၼႆႉသမ်ႉႁဵတ်းႁႂ်ႈပေႃႈႁဝ်းမဝ်းၼမ်ႉမၢၵ်ႇၸပိတ်ႉထႅင်ႈတႃႉ။ မႂ်းၶဝ်ႈၼွၼ်းလူၺ်ႈလႄႈႁႂ်ႈၸိူဝ်ႉၶိူဝ်းပေႃႈႁဝ်းလႆႈသိုပ်ႇၽႄႈၵႂႃႇၵႃႈတီႈႁဝ်းတႃႉ၊” ဝႃႈၼင်ႇၼႆဢေႃႈ။-
ၶိုၼ်းၼၼ်ႉၵေႃႈၶဝ်တိုၵ်းႁႂ်ႈပေႃႈၶဝ်မဝ်းသေယဝ်ႉ၊လုၵ်ႈယိင်းၵေႃႉလဵၵ်ႉၼၼ်ႉၶဝ်ႈၸူးလႄႈၼွၼ်းလူၺ်ႈပေႃႈမၼ်းဢေႃႈ။ ပေႃႈမၼ်းၵေႃႈမဝ်းၼႃႇလူင်လၢင်လႄႈမၼ်းဢမ်ႇႁုလွင်ႈဢၼ်မၼ်းႁဵတ်းၵႃႈသင်ၼၼ်ႉ။-
ၼင်ႇၼၼ်လႄႈလုၵ်ႈယိင်း လေႃးတႃႉ၊ သွင်ၵေႃႉၼၼ်ႉပႃးပတိၵ်ႈသၼ်ႇထေႇလူၺ်ႈပေႃႈၶဝ်ႁင်းၽႂ်ႁင်းမၼ်းသေယဝ်ႉလႄႈ၊-
လုၵ်ႈယိင်းၵေႃႉယႂ်ႇၵိူတ်ႇလဵင်ႉလုၵ်ႈၸၢႆးလႄႈႁွင်ႉႁဵၵ်ႈၸိုဝ်ႈဝႃႈ၊ မေႃႇၽႃႉ၊ ဢေႃႈ။ မၼ်းပဵၼ်ပူႇမွၼ်ႇၵူၼ်းမဵဝ်း မေႃႇၽႃႉ၊ တေႃႇထိုင်ႁွတ်ႈမိူဝ်ႈလဵဝ်ၼႆႉလႄႈ၊-
လုၵ်ႈယိင်းၵေႃႉလဵၵ်ႉၵေႃႈလႆႈလုၵ်ႈၸၢႆးလႄႈႁွင်ႉႁဵၵ်ႈၸိုဝ်ႈဝႃႈ၊ ပိၼ်ႇဢမ်ႇမိ၊ ဢေႃႈ။ မၼ်းသမ်ႉပဵၼ်ပူႇမွၼ်ႇၵူၼ်းမဵဝ်း ဢမ်ႇမုၼ်ႇ၊ ဢေႃႈ။
ဢႃႇပြႃႇႁၢမ်ႇ၊ ၵေႃႈၶၢႆႉသေၵႃႈတီႈ မမ်ႇရေႇ၊ ၵႂႃႇၸူးပွတ်းၸၢၼ်းမိူင်း ၶႃႇၼၼ်ႇ၊ သေလႄႈယူႇသဝ်းၵႃႈတီႈဝဵင်း ၵေႇရႃႇ၊ ဝူင်ႈၵၢင်ဝဵင်း ၵႃႇတေႇသႃႉ၊ တင်းဝဵင်း သုရႃႉ၊ ပုၼ်ႉဢေႃႈ။-
မိူဝ်ႈမၼ်းယူႇတီႈဝဵင်း ၵေႇရႃႇ၊ ၼၼ်ႉမၼ်းဝႃႈမေးမၼ်း ၸႃႇရႃႇ၊ ၼၼ်ႉပဵၼ်ၼွင်ႉယိင်းမၼ်းဝႃႈၼင်ႇၼႆလႄႈ ဢၽိမလႅၵ်ႉ၊ ၶုၼ်ႁေႃၶမ်းဝဵင်း ၵေႇရႃႇ၊ သိမ်းဢဝ် ၸႃႇရႃႇ၊ ဢေႃႈ။-
ၼႂ်းၶိင်ႇၵၢင်ၶိုၼ်းၽြႃးပဵၼ်ၸဝ်ႈပေႃႇမႃးၵႃႈတီႈ ဢၽိမလႅၵ်ႉ၊ ၼႂ်းတၢင်းၼွၼ်းၽၼ်လႄႈလၢတ်ႈဝႃႈ၊ “မႂ်းတၵ်းလႆႈတၢႆၵွပ်ႈပိူဝ်ႈမႂ်းသိမ်းဢဝ်ၽူႈယိင်းၵေႃႉၼႆႉဢေႃႈ။ လွင်ႈမၼ်းၸမ်ႉ၊မၼ်းပဵၼ်မေးပိူၼ်ႈဢေႃႈ၊” ဝႃႈၼင်ႇၼႆဢေႃႈ။
ဢၽိမလႅၵ်ႉ၊ ၵေႃႈပိူဝ်ႈဢၼ်ဢမ်ႇပႆႇလႆႈတိူဝ်ႉထုၵ်ႇၵၼ်တင်း ၸႃႇရႃႇ၊ လႄႈလဝ်ႈလၢတ်ႈဝႃႈ၊ “ၸဝ်ႈၽြႃးတီႈၶႃႈ။ ၶႃႈၸဝ်ႈသိုဝ်ႈတေႃႇယူႇတီႈၶႃႈဢေႃႈ။ ၸွင်ႇၸဝ်ႈႁဝ်းတၵ်းယႃႉၽဵဝ်ႈၶႃႈၸဝ်ႈႁူမ်ႈလူၺ်ႈၵၼ်တင်းၵူၼ်းၶႃႈၸဝ်ႈတီႈၶႃႈႁိုဝ်း။-
တူဝ် ဢႃႇပြႃႇႁၢမ်ႇ၊ လၢတ်ႈဝႃႈ၊မႄႈယိင်းၼႆႉပဵၼ်ၼွင်ႉယိင်းမၼ်းဝႃႈၼင်ႇၼႆလႄႈတူဝ်မႄႈယိင်းၼၼ်ႉၵေႃႈလၢတ်ႈဝႃႈ၊ ဢႃႇပြႃႇႁၢမ်ႇ၊ ပဵၼ်ပီႈဢၢႆႈမၼ်းဝႃႈၼႆတီႈၶႃႈဢေႃႈ။ ပိူဝ်ႈဢၼ်ၶႃႈၸဝ်ႈမီးၸႂ်သၽေႃးဢၼ်သိုဝ်ႈယူဝ်းဢိၵ်ႇတင်းမိုဝ်းဢၼ်မူတ်းၸၢင်ႇသေလႄႈႁဵတ်းလွင်ႈတၢင်းၼႆႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈၶိုၼ်းလၢတ်ႈၵႃႈၼႂ်းတၢင်းၼွၼ်းၽၼ်ၼၼ်ႉလႄႈဝႃႈ၊ “ၸႂ်ႈယဝ်ႉ။ ၵဝ်ႁုလွင်ႈဢၼ်မႂ်းမီးၸႂ်သၽေႃးဢၼ်သိုဝ်ႈယူဝ်းလႄႈႁဵတ်းၸိူဝ်ႉၼင်ႇၼၼ်ၼၼ်ႉယူႇ၊ၼင်ႇႁိုဝ်မႂ်းတၵ်းဢမ်ႇလႆႈၽိတ်းပိူင်ႈၵဝ်ၸိုင်၊ၵဝ်ၸင်ႇႁႄႉၶႅၼ်မႂ်းလႄႈဢမ်ႇပၼ်ႁႂ်ႈမႂ်းလႆႈတိူဝ်ႉထုၵ်ႇၵၼ်တင်းမၼ်းၼၼ်ႉယဝ်ႉ။-
တေႃႈလဵဝ်ၼႆႉဢဝ်ၽူႈယိင်းၼၼ်ႉၶိုၼ်းဢၢပ်ႈပၼ်တီႈၽူဝ်မၼ်းတႃႉ။ ၽူဝ်မၼ်းၼၼ်ႉပဵၼ်ပရေႃးၽႅတ်ႈ လႄႈမၼ်းတၵ်းတေသူးတွင်းပုၼ်ႈမႂ်းႁႂ်ႈမႂ်းလႆႈလွတ်ႈတၢင်းတၢႆဢေႃႈ။ ပေႃးမႂ်းယင်းဢမ်ႇၶိုၼ်းဢၢပ်ႈၸိုင်၊ၸႃႉၸဵမ်မႂ်းလႄႈၵူၼ်းမႂ်းတင်းလၢႆတၵ်းတေလႆႈတၢႆဢေႃႈ၊” ဝႃႈၼင်ႇၼႆဢေႃႈ။
ထိုင်ဝၼ်းမိူဝ်ႈၽုၵ်ႈၵၢင်ၼႂ်ၸဝ်ႉၸဝ်ႉ ဢၽိမလႅၵ်ႉ၊ ႁွင်ႉဢဝ်မူးမၢတ်ႈၽွင်းမိူင်းမၼ်းတင်းလၢႆမႃးလႄႈမွၵ်ႇလၢတ်ႈလွင်ႈတၢင်းဢၼ်ပဵၼ်မႃးၸိူဝ်းၼၼ်ႉတီႈၶဝ်လႄႈၶဝ်ၵူဝ်ႁႄၼႃႇလူင်လၢင်ဢေႃႈ။-
ဢၽိမလႅၵ်ႉ၊ ၸင်ႇႁွင်ႉဢဝ် ဢႃႇပြႃႇႁၢမ်ႇ၊ သေလႄႈထၢမ်ဝႃႈ၊ “ႁဵတ်းသင်လႄႈမႂ်းႁဵတ်းၸိူဝ်ႉၼင်ႇၼႆတီႈႁဝ်း။ ၵဝ်လႆႈၽိတ်းပိူင်ႈၸိူဝ်ႉၼင်ႇႁိုဝ်တီႈမႂ်းယဝ်ႉလႄႈမႂ်းႁဵတ်းႁႂ်ႈဢပျတ်ႈဢၼ်ယႂ်ႇၼႃႇလူင်လၢင်ၼႆႉတူၵ်းႁွတ်ႈၵႃႈၼိူဝ်ၵဝ်ဢိၵ်ႇတင်းၵႃႈၼိူဝ်မိူင်းၵဝ်ၸိူဝ်ႉၼင်ႇၼႆ။-
ၵွပ်ႈသင်လႄႈမႂ်းႁဵတ်းဢမုဢၼ်ၽူႈလႂ်ဢမ်ႇထုၵ်ႇလီႁဵတ်းတီႈၵဝ်ၼၼ်ႉၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ဢႃႇပြႃႇႁၢမ်ႇ၊ ၶိုၼ်းလၢတ်ႈလႄႈဝႃႈ၊ “ၵဝ်ၶႃႈထၢင်ႇၵူၼ်းၵႃႈတီႈၼႆႈဢမ်ႇၵူဝ်ႁႄၽြႃးပဵၼ်ၸဝ်ႈလႄႈတၵ်းတေဢဝ်ၵဝ်ၶႃႈတၢႆႁႂ်ႈလႆႈသိမ်းဢဝ်မေးၵဝ်ၶႃႈလႄႈၸင်ႇလႆႈႁဵတ်းၸိူဝ်ႉၼင်ႇၼႆမႅၼ်ႈတီႈၶႃႈယဝ်ႉဢေႃႈ။-
မၼ်းပဵၼ်ၼွင်ႉယိင်းၵဝ်ၶႃႈၸႂ်ႈတႄႉၶႃႈဢေႃႈ။ ႁဝ်းႁူမ်ႈပေႃႈဢမ်ႇႁူမ်ႈမႄႈလႄႈ၊ၵဝ်ၶႃႈဢဝ်မၼ်းပဵၼ်မေးၶႃႈဢေႃႈ။-
မိူဝ်ႈဢၼ်ၽြႃးပဵၼ်ၸဝ်ႈသူင်ႇၵဝ်ၶႃႈဢွၵ်ႇသေႁိူၼ်းၵဝ်ၶႃႈၵႂႃႇၵႃႈတီႈတၢင်ႇဝၢၼ်ႈတၢင်ႇမိူင်းၸိုင်၊ၵဝ်ၶႃႈလႆႈသင်ႇလၢတ်ႈတီႈမၼ်းဝႆႉလႄႈဝႃႈ၊ ‘ၼႂ်းတၢင်းဢၼ်မႂ်းမီးသဵတ်ႈၸႃႇၵႃႈၼိူဝ်ၵဝ်ထၼ်ႇႁိုဝ်ၼၼ်ႉ၊မိူဝ်ႈဢၼ်ႁွတ်ႈထိုင်ၵႂႃႇၵႃႈတီႈလႂ်သေဢမ်ႇဝႃႈ၊မႂ်းတေလႆႈမွၵ်ႇပိူၼ်ႈဝႃႈ၊ၵဝ်ပဵၼ်ပီႈဢၢႆႈမႂ်းဝႃႈၼႆတႃႉ၊’ ဝႃႈၼင်ႇၼႆဝႆႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ႁဵတ်းၼၼ်လႄႈ ဢၽိမလႅၵ်ႉ၊ ဢဝ် ၸႃႇရႃႇ၊ ၶိုၼ်းပၼ်တီႈ ဢႃႇပြႃႇႁၢမ်ႇ၊ သေယဝ်ႉ၊ယင်းဢဝ်ၸႃႉၸဵမ်ၽုင်သူဝ်း၊ၽုင်ဝူဝ်းလႂ်၊ဢိၵ်ႇတင်းၶႃႈၵူၼ်းၸႂ်ႉလႂ်၊ပၼ်ၵႂႃႇၸွမ်းသေလႄႈ၊-
လၢတ်ႈတီႈ ဢႃႇပြႃႇႁၢမ်ႇ၊ လႄႈဝႃႈ၊ “ၵႃႈၼႂ်းမိူင်းၵဝ်တင်းသဵင်ႈတင်းလူင်ၼႆႉမႂ်းၶႂ်ႈယူႇသဝ်းၵႃႈတီႈလႂ်ၵေႃႈယူႇသဝ်းတႃႉ၊” ဝႃႈၼင်ႇၼႆဢေႃႈ။-
တီႈ ၸႃႇရႃႇ၊ ၵေႃႈမၼ်းလၢတ်ႈလႄႈဝႃႈ၊ “ၵဝ်ပၼ်ငိုၼ်းႁဵင်ၼိုင်ႈတီႈပီႈဢၢႆႈမႂ်းႁႂ်ႈလႆႈပဵၼ်တၢင်းမႄးသရေႇၼႃႈတႃမႂ်းယဝ်ႉ။ ႁႂ်ႈၵူၼ်းၵူႈၵေႃႉႁုလွင်ႈဢၼ်မႂ်းဢမ်ႇလႆႈၽိတ်းပိူင်ႈၵႃႈသင်ၼၼ်ႉသေၵမ်း၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မႃးလူမႃးတူၺ်း ၸႃႇရႃႇ၊ ၸွမ်းၵႃႈၼင်ႇဢၼ်ဝႃႈဝႆႉလႄႈႁဵတ်းပၼ်ၵႃႈၼင်ႇဢၼ်ၵတိၸဝ်ႈမီးၼၼ်ႉ၊-
ၸႃႇရႃႇ၊ ပႃးပတိၵ်ႈသၼ်ႇထေႇသေယဝ်ႉ၊ၵိူတ်ႇလဵင်ႉလုၵ်ႈၸၢႆးမႃးမိူဝ်ႈဢၼ် ဢႃႇပြႃႇႁၢမ်ႇ၊ ထဝ်ႈၼႃႇၼၼ်ႉဢေႃႈ။ လုၵ်ႈၸၢႆးၼၼ်ႉၵိူတ်ႇလဵင်ႉမႃးၼႂ်းၶိင်ႇၵႃႇလႃႉဢၼ်ၽြႃးပဵၼ်ၸဝ်ႈမၵ်းၶၢၼ်းဝႆႉၼၼ်ႉဢေႃႈ။-
ဢႃႇပြႃႇႁၢမ်ႇ၊ ႁွင်ႉႁဵၵ်ႈၸိုဝ်ႈလုၵ်ႈၸၢႆးမၼ်းဝႃႈ၊ ဢိၸၢၵ်ႈ၊ ဢေႃႈ။-
မိူဝ်ႈဢၼ် ဢိၸၢၵ်ႈ၊ ၵိူတ်ႇမႃးလႆႈပႅတ်ႇဝၼ်းၼၼ်ႉၸိုင်၊ ဢႃႇပြႃႇႁၢမ်ႇ၊ ႁဵတ်းပၼ်မၢင်ႇၵလႃႇတၢင်းဢၼ်ပၢတ်ႇပၢႆၼင်ၸွမ်းၵႃႈၼင်ႇဢၼ်ၽြႃးပဵၼ်ၸဝ်ႈမီးဢမိင်ႉဝႆႉၼၼ်ႉဢေႃႈ။-
မိူဝ်ႈဢၼ် ဢိၸၢၵ်ႈ၊ ၵိူတ်ႇလဵင်ႉၼၼ်ႉဢသၢၵ်ႈ ဢႃႇပြႃႇႁၢမ်ႇ၊ လႆႈပၢၵ်ႇပီယဝ်ႉဢေႃႈ။-
ၸႃႇရႃႇ၊ လၢတ်ႈလႄႈဝႃႈ၊ “ၽြႃးပဵၼ်ၸဝ်ႈပၼ်ႁႂ်ႈၵဝ်လႆႈသိူဝ်းပျေႃႇလႄႈယုမ်ႉၶူဝ်ဢေႃႈ။ ၶဝ်ၸိူဝ်းဢၼ်လႆႈငိၼ်းၶၢဝ်ႇၼၼ်ႉၵေႃႈတၵ်းယုမ်ႉၶူဝ်လူၺ်ႈၵၼ်တင်းၵဝ်ဢေႃႈ၊” ဝႃႈၼင်ႇၼႆသေယဝ်ႉ၊-
သမ်ႉလၢတ်ႈထႅင်ႈလႄႈဝႃႈ၊ “ၽူႈလႂ်တၵ်းႁတ်းလၢတ်ႈတီႈ ဢႃႇပြႃႇႁၢမ်ႇ၊ ဝႆႉလႄႈဝႃႈ၊ ၸႃႇရႃႇ၊ တၵ်းပၼ်ၵိၼ်ၼူမ်းတီႈလုၵ်ႈလၢင်းမၼ်း၊” ဝႃႈၼင်ႇၼႆၼၼ်ႉယၢမ်းမိူဝ်ႈဢၼ် ဢႃႇပြႃႇႁၢမ်ႇ၊ ဢသၢၵ်ႈထဝ်ႈၵႄႇၼႃႇၼႆႉ “ၵဝ်လႆႈၵိူတ်ႇလဵင်ႉပၼ်လုၵ်ႈၸၢႆးတီႈမၼ်းယဝ်ႉ၊” ဝႃႈၼင်ႇၼႆဢေႃႈ။
လုၵ်ႈၸၢႆးၼၼ်ႉယႂ်ႇမႃးလႄႈၼႂ်းဝၼ်းဢၼ်ၽၢတ်ႇၼူမ်းၼၼ်ႉ၊ ဢႃႇပြႃႇႁၢမ်ႇ၊ ႁဵတ်းပွႆးလူင်ဢေႃႈ။
ဝၼ်းၼိုင်ႈ ဢိသမေႇလႃႉ၊ လုၵ်ႈၸၢႆး ႁႃႇၵရႃႉ၊ ၵူၼ်းမဵဝ်း ဢေးၵျိပ်ႉ၊ ဢၼ်ၵိူတ်ႇလဵင်ႉႁူမ်ႈလူၺ်ႈၵၼ်တင်း ဢႃႇပြႃႇႁၢမ်ႇ၊ ၼၼ်ႉလဵၼ်ႈလူၺ်ႈၵၼ်တင်း ဢိၸၢၵ်ႈ၊ လုၵ်ႈၸၢႆး ၸႃႇရႃႇ၊ ယူႇဢေႃႈ။-
ၸႃႇရႃႇ၊ ႁၼ်ၶဝ်သွင်ၵေႃႉလႄႈလၢတ်ႈတီႈ ဢႃႇပြႃႇႁၢမ်ႇ၊ ဝႃႈ၊ “လိုပ်ႈၶႃႈမႄႈယိင်းၼႆႉတင်းလုၵ်ႈၸၢႆးမၼ်းဢွၵ်ႇၵႂႃႇတႃႉ။ လုၵ်ႈၸၢႆးမၼ်းတၵ်းတေဢမ်ႇလႆႈႁိမ်ဢမူၺ်ႇလုၵ်ႈၸၢႆးၵဝ်ၶႃႈ ဢိၸၢၵ်ႈ၊ လႃးလႃးၵူၺ်း၊” ဝႃႈၼင်ႇၼႆဢေႃႈ။-
ၵွပ်ႈပိူဝ်ႈ ဢိသမေႇလႃႉ၊ ၵေႃႈပဵၼ်လုၵ်ႈၸၢႆးၵေႃႉၼိုင်ႈလႄႈ ဢႃႇပြႃႇႁၢမ်ႇ၊ ငိၼ်းယၢပ်ႇၸႂ်ၼႃႇဢေႃႈ။-
ၽြႃးပဵၼ်ၸဝ်ႈလၢတ်ႈတီႈ ဢႃႇပြႃႇႁၢမ်ႇ၊ လႄႈဝႃႈ၊ “ယႃႇပေယၢပ်ႇၸႂ်လူၺ်ႈလုၵ်ႈၸၢႆးဢွၼ်ႇတင်းၶႃႈမႂ်း ႁႃႇၵရႃႉ၊ ၼႆႉ။ ႁဵတ်းၸွမ်းၸိူဝ်ႉၼင်ႇဢၼ် ၸႃႇရႃႇ၊ လၢတ်ႈၼၼ်ႉတႃႉ။ ၵွပ်ႈပိူဝ်ႈၸိူဝ်ႉႁိုဝ်ဝႃႈၼႆၸမ်ႉ၊ၸိူဝ်ႉၶိူဝ်းမႂ်းတၵ်းတႄႇၼိူဝ် ဢိၸၢၵ်ႈ၊ ၵူၺ်းဢေႃႈ။-
တီႈလုၵ်ႈၸၢႆးမႂ်းဢၼ်လႆႈတီႈၶႃႈၽူႈယိင်းၼႆႉၵေႃႈၵွပ်ႈပိူဝ်ႈပဵၼ်လုၵ်ႈၸၢႆးမႂ်းၼၼ်ႉၵဝ်တၵ်းႁႂ်ႈမၼ်းလႆႈပဵၼ်ၸိူဝ်ႉၶိူဝ်းမဵဝ်းၵူၼ်းမဵဝ်းၼိုင်ႈဢေႃႈ၊” ဝႃႈၼင်ႇၼႆဢေႃႈ။
ဢႃႇပြႃႇႁၢမ်ႇ၊ ၵေႃႈလုၵ်ႉၶိင်ႇၵၢင်ၼႂ်ၸဝ်ႉၸဝ်ႉသေယဝ်ႉ၊ဢဝ်တၢင်းၵိၼ်ၵမ်ႈၽွင်ႈတင်းၼမ်ႉသႂ်ႇထူင်ၼင်တဵမ်တဵမ်ႁွႆႈပၼ်တီႈႁူဝ်မႃႇ ႁႃႇၵရႃႉ၊ သေလႄႈပွႆႇၶဝ်မႄႈလုၵ်ႈဢွၵ်ႇၵႂႃႇသေဢေႃႈ။ ႁႃႇၵရႃႉ၊ ၵေႃႈဢွၵ်ႇၵႂႃႇသေလႄႈလႄႇၵႂႃႇလႄႇမႃးယူႇၵႃႈၼႂ်းထိူၼ်ႇ ပေႇရသေးၽႃႉ၊ ၼၼ်ႉဢေႃႈ။-
မိူဝ်ႈဢၼ်ၼမ်ႉမူတ်းၵႂႃႇၸိုင်၊မၼ်းဢဝ်လုၵ်ႈဢွၼ်ႇၼၼ်ႉဝၢင်းဝႆႉၵႃႈတႂ်ႈယုမ်းမႆႉသေယဝ်ႉ၊-
ၵႂႃႇၼင်ႈယူႇၵူၺ်းမၼ်းႁၢင်ႇၵႆမွၵ်ႈႁူၵ်းသိပ်းဝႃးဢေႃႈ။ မၼ်းလၢတ်ႈလႄႈဝႃႈ၊ “ၵဝ်ဢမ်ႇၶႂ်ႈႁၼ်လုၵ်ႈၵဝ်တၢႆၵႂႃႇၼၼ်ႉ၊” ဝႃႈၼင်ႇၼႆသေယဝ်ႉ၊မိူဝ်ႈဢၼ်မၼ်းယင်းၼင်ႈယူႇၼၼ်ႉမၼ်းႁွင်ႉႁႆႈဢေႃႈ။
ၽြႃးပဵၼ်ၸဝ်ႈငိၼ်းသဵင်လုၵ်ႈဢွၼ်ႇၼၼ်ႉလႄႈတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈလုၵ်ႉသေၽႃႉၵၢင်ႁၢဝ်မွၵ်ႇလၢတ်ႈတီႈ ႁႃႇၵရႃႉ၊ လႄႈဝႃႈ၊ “ ႁႃႇၵရႃႉ၊ ႟။ ႁဵတ်းသင်လႄႈမႂ်းယၢပ်ႇၸႂ်ၶီၸႂ်ယူႇ။ ယႃႇပေမႆႈၸႂ်။ ၽြႃးပဵၼ်ၸဝ်ႈငိၼ်းသဵင်လုၵ်ႈၸၢႆးဢွၼ်ႇၼၼ်ႉယဝ်ႉ၊-
လုၵ်ႉတႃႉ။ ၵႂႃႇႁွပ်ႇဢုမ်ႈဢဝ်မၼ်းလီလီတႃႉ။ ၵဝ်တၵ်းႁႂ်ႈမၼ်းပဵၼ်မဵဝ်းၸိူဝ်ႉၸၢတ်ႈၵူၼ်းဢၼ်ယႂ်ႇၼႃႇဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉၽြႃးပဵၼ်ၸဝ်ႈၽုၺ်ႇမၢၵ်ႇတႃ ႁႃႇၵရႃႉ၊ လႄႈမၼ်းလႆႈႁၼ်ၼမ်ႉမေႃႇမေႃႇၼိုင်ႈဢေႃႈ။ မၼ်းၸင်ႇၵႂႃႇတဵၵ်းၼမ်ႉထႅမ်သႂ်ႇထူင်ၼင်တဵမ်တဵမ်လႄႈပၼ်လုၵ်ႈၸၢႆးဢွၼ်ႇမၼ်းၵိၼ်ဢေႃႈ။-
ၽြႃးပဵၼ်ၸဝ်ႈမီးယူႇလူၺ်ႈၵၼ်တင်းလုၵ်ႈၸၢႆးဢွၼ်ႇၼၼ်ႉလႄႈမၼ်းယႂ်ႇသုင်မႃးၵႃႈၼႂ်းထိူၼ်ႇ ပႃႇရၼ်ႇ၊ သေပဵၼ်လႃႈထိူၼ်ႇဢၼ်မေႃယိုဝ်းၵၢင်ႇၵတ်ႉၶႅၼ်ႇၼႃႇၵေႃႉၼိုင်ႈဢေႃႈ။-
မႄႈမၼ်းဢဝ်ၼၢင်းယိင်း ဢေးၵျိပ်ႉ၊ ၵေႃႉၼိုင်ႈမႃးပၼ်ႁႂ်ႈလႆႈပဵၼ်မေးမၼ်းဢေႃႈ။
မိူဝ်ႈၼၼ်ႉ၊ ဢၽိမလႅၵ်ႉ၊ ဢွၼ်ၸဝ်ႈၵွၼ်းတပ်ႉသိုၵ်းမၼ်း ၽိၵေႃးလႃႉ၊ ၸွမ်းၵႂႃႇလႄႈလၢတ်ႈတီႈ ဢႃႇပြႃႇႁၢမ်ႇ၊ လႄႈဝႃႈ၊ “ၽြႃးပဵၼ်ၸဝ်ႈမီးယူႇၽၢႆႇမႂ်းၼႂ်းလွင်ႈတၢင်းဢၼ်မႂ်းႁဵတ်းၵူႈၸိူဝ်ႉၵူႈပိူင်ၼၼ်ႉဢေႃႈ။-
ပိူဝ်ႈၼႆလႄႈတိူင်ႇၵတိတီႈၽြႃးပဵၼ်ၸဝ်ႈလွင်ႈဢၼ်မႂ်းတၵ်းတေဢမ်ႇပႅတ်ႉလႅၼ်ၵဝ်ဢိၵ်ႇတင်းလုၵ်ႈလၢၼ်ၸိူဝ်ႉၶိူဝ်းၵဝ်ၼၼ်ႉတႃႉ။ ၸွမ်းၵႃႈၼင်ႇဢၼ်ၵဝ်မီးသဵတ်ႈၸႃႇၵႃႈတီႈမႂ်းၼၼ်ႉ၊မႂ်းၵေႃႈမီးၵတိသဵတ်ႈၸႃႇၵႃႈတီႈၵဝ်ဢိၵ်ႇတင်းၵႃႈတီႈမိူင်းဢၼ်မႂ်းသွၼ်ႈပိုင်ႈယူႇၼႆႉတႃႉ၊” ဝႃႈၼင်ႇၼႆဢေႃႈ။-
ဢႃႇပြႃႇႁၢမ်ႇ၊ ၵေႃႈဝႃႈ၊ “ၵဝ်ၶႃႈဝႆႉၵတိဢေႃႈ၊” ဝႃႈၼင်ႇၼႆဢေႃႈ။
ဢႃႇပြႃႇႁၢမ်ႇ၊ သမ်ႉပွင်ႉတေႃႇ ဢၽိမလႅၵ်ႉ၊ လူၺ်ႈလွင်ႈၼမ်ႉမေႃႇဢၼ်ၶႃႈၵူၼ်းၸႂ်ႉၵူၼ်းသွႆ ဢၽိမလႅၵ်ႉ၊ ႁိမ်ဢဝ်ၼၼ်ႉလႄႈ၊-
ဢၽိမလႅၵ်ႉ၊ တွင်းပၢၼ်ႇလႄႈဝႃႈ၊ “ပဵၼ်ၽူႈလႂ်ႁဵတ်းၵေႃႈၵဝ်ယင်းဢမ်ႇလႆႈႁု။ မႂ်းယင်းဢမ်ႇမွၵ်ႇလၢတ်ႈၵဝ်သေပွၵ်ႈၵဝ်တိုၵ်ႉလႆႈငိၼ်းတေႃႈလဵဝ်ၼႆႉၵူၺ်းဢေႃႈ၊” ဝႃႈၼင်ႇၼႆဢေႃႈ။-
ႁဵတ်းၼၼ်လႄႈ ဢႃႇပြႃႇႁၢမ်ႇ၊ ဢဝ်သူဝ်းလႂ်၊ဝူဝ်းလႂ်၊ပၼ်တီႈ ဢၽိမလႅၵ်ႉ၊ လႄႈၶဝ်ဝႆႉၵတိသဵတ်ႈၸႃႇတီႈၵၼ်ဢေႃႈ။-
ဢႃႇပြႃႇႁၢမ်ႇ၊ ၸတ်းဢဝ်သူဝ်းမႄႈဢွၼ်ႇၸဵတ်းတူဝ်ဢွၵ်ႇသေၵႃႈၼႂ်းၽုင်သူဝ်းဝႆႉၶေႃၶေႃသေယဝ်ႉ၊-
ဢၽိမလႅၵ်ႉ၊ ထၢမ်လႄႈဝႃႈ၊ “ႁဵတ်းသင်လႄႈမႂ်းၸတ်းဢွၵ်ႇသူဝ်းမႄႈဢွၼ်ႇၸိူဝ်းၼၼ်ႉ၊” ဝႃႈၼင်ႇၼႆဢေႃႈ။
ဢႃႇပြႃႇႁၢမ်ႇ၊ ၶိုၼ်းလၢတ်ႈလႄႈဝႃႈ၊ “ႁပ်ႉတုင်းဢဝ်သူဝ်းမႄႈဢွၼ်ႇၸဵတ်းတူဝ်ၼႆႉတႃႉ။ လွင်ႈတၢင်းၼႆႉပဵၼ်သၢၵ်ႈသေႇၽၢႆႇၵဝ်ဢၼ်ဝႃႈ၊ၵဝ်ၶုတ်းၼမ်ႉမေႃႇၼႆႉၼၼ်ႉဢေႃႈ၊” ဝႃႈၼင်ႇၼႆဢေႃႈ။-
ၵွပ်ႈၼႆလႄႈတီႈၼၼ်ႈလႆႈႁွင်ႉဝႃႈ၊ ပေႇရသေးၽႃႉ၊ ဝႃႈၼႆ၊ၵွပ်ႈပိူဝ်ႈပဵၼ်တီႈဢၼ်ၶဝ်တိူင်ႇဝႃႈၵတိ တီႈၵၼ်ၼၼ်ႉဢေႃႈ။
ဝၢႆးသေၶဝ်ဝႆႉၵတိသဵတ်ႈၸႃႇတီႈၵၼ်ၵႃႈတီႈ ပေႇရသေးၽႃႉ၊ ယဝ်ႉၼၼ်ႉ၊ ဢၽိမလႅၵ်ႉ၊ တင်း ၽိၵေႃးလႃႉ၊ ပွၵ်ႈမိူဝ်းၵႂႃႇၵႃႈတီႈမိူင်း ၽိလိတ်ႉတိ၊ သေဢေႃႈ။-
ဢႃႇပြႃႇႁၢမ်ႇ၊ ၽုၵ်ႇတူၼ်ႈမၢၵ်ႇၵႅင်းၵႃႈတီႈ ပေႇရသေးၽႃႉ၊ လႄႈၵူဝ်းၵႂၢႆႇ ထႃႇဝရႃႉၽြႃး၊ ၽြႃးပဵၼ်ၸဝ်ႈဢၼ်တႄႇယူႇသေႇသေႇဢေႃႈ။-
ဢႃႇပြႃႇႁၢမ်ႇ၊ သွၼ်ႈပိုင်ႈယူႇၵႃႈတီႈမိူင်း ၽိလိတ်ႉတိ၊ ႁိုင်ၼႃႇလူင်လၢင်ဢေႃႈ။
ဝၢႆးၼၼ်ႉဢမ်ႇႁိုင်ဢမ်ႇၼၢၼ်းၽြႃးပဵၼ်ၸဝ်ႈႁွင်ႉ ဢႃႇပြႃႇႁၢမ်ႇ၊ သေလႄႈၸၢမ်းတူၺ်းမၼ်းလႄႈဝႃႈ၊ “ ဢႃႇပြႃႇႁၢမ်ႇ၊ ႟။” ဝႃႈၼင်ႇၼႆလႄႈ ဢႃႇပြႃႇႁၢမ်ႇ၊ ၵေႃႈတွပ်ႇလႄႈဝႃႈ၊ “ဢေႃႈၶႃႈ။ ၶႃႈၸဝ်ႈမီးယူႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈမီးဢမိင်ႉလႄႈဝႃႈ၊ “ဢဝ်လုၵ်ႈၸၢႆးမႂ်း ဢိၸၢၵ်ႈ၊ ဢၼ်မႂ်းမီးၵေႃႉလဵဝ်လႄႈႁၵ်ႉၼႃႇလူင်လၢင်ၼၼ်ႉဢွၵ်ႇၵႂႃႇၸူးမိူင်း မေႃးရိ၊ ပုၼ်ႉတႃႉ။ ၵႃႈၼိူဝ်လွႆဢၼ်ၵဝ်တၵ်းၼႄပၼ်တီႈမႂ်းၼၼ်ႉဢဝ်မၼ်းႁဵတ်းတူဝ်တၢင်းလူႇဢၼ်တုတ်ႇၽႆးလႄႈသၢၵ်ႈလူႇပုၼ်ႈၵဝ်တႃႉ၊” ဝႃႈၼင်ႇၼႆဢေႃႈ။
ထႅင်ႈဝၼ်းၼိုင်ႈ ဢႃႇပြႃႇႁၢမ်ႇ၊ လုၵ်ႉၸဝ်ႉၸဝ်ႉသေယဝ်ႉ၊ႁႃၽိုၼ်းပုၼ်ႈဢၼ်တၵ်းတုတ်ႇၽႆးသေလႄႈႁၢင်ႈၵွပ်းမႃႉလီႈမၼ်းယဝ်ႉၸင်ႇႁွင်ႉဢဝ် ဢိၸၢၵ်ႈ၊ တင်းၶႃႈၵူၼ်းၸႂ်ႉမၼ်းသွင်ၵေႃႉဢွၼ်ၵၼ်ဢွၵ်ႇၵႂႃႇၸူးၵႃႈတီႈဢၼ်ၽြႃးပဵၼ်ၸဝ်ႈသင်ႇလၢတ်ႈဝႆႉၼၼ်ႉဢေႃႈ။-
မိူဝ်ႈဢၼ်ႁွတ်ႈထိုင်တီႈၶၢဝ်းတၢင်းလႆႈသၢမ်ဝၼ်းၼၼ်ႉၸိုင်၊ ဢႃႇပြႃႇႁၢမ်ႇ၊ မုင်ႈႁၼ်တီႈၼၼ်ႈမီးယူႇတီႈႁမ်ႉၵႆၵႆပုၼ်ႉလႄႈ၊-
ၸင်ႇလၢတ်ႈတီႈၶႃႈၵူၼ်းၸႂ်ႉသွင်ၵေႃႉၼၼ်ႉလႄႈဝႃႈ၊ “သူဢဝ်တင်းမႃႉလီႈလႄႈပႂ်ႉထႃႈဝႆႉၵႃႈတီႈၼႆႈတႃႉ။ ၵဝ်တင်းလုၵ်ႈၸၢႆးဢွၼ်ႇၼႆႉတၵ်းသိုပ်ႇၶိုၼ်ႈၵႂႃႇၵႃႈတီႈၼၼ်ႈလႄႈႁဵတ်းဝၢတ်ႈၵူဝ်းၵႂၢႆႇယဝ်ႉၸင်ႇတေၶိုၼ်းလူင်းမႃးၸူးတီႈသူဢေႃႈ၊” ဝႃႈၼင်ႇၼႆဢေႃႈ။
ဢႃႇပြႃႇႁၢမ်ႇ၊ ႁႅၼ်းပၼ်ႁႂ်ႈ ဢိၸၢၵ်ႈ၊ ႁၢပ်ႇၽိုၼ်းပုၼ်ႈတၵ်းတုတ်ႇၽႆးၼၼ်ႉသေယဝ်ႉ၊တူဝ်မၼ်းၸမ်ႉ၊ပႃးဢဝ်မိတ်ႈတင်းထၢၼ်ႇၽႆးလႅင်ပုၼ်ႈတႃႇသုမ်ၽႆးၼၼ်ႉသေလႄႈၶဝ်ၵႂႃႇၸွမ်းၵၼ်ဢေႃႈ။-
ဢိၸၢၵ်ႈ၊ ႁွင်ႉဝႃႈ၊ “ပေႃႈ” ဝႃႈၼႆလႄႈ၊ ဢႃႇပြႃႇႁၢမ်ႇ၊ ၵေႃႈတွပ်ႇလႄႈဝႃႈ၊ “ဢီႈသင်လုၵ်ႈၸၢႆးၵဝ်၊” ဝႃႈၼင်ႇၼႆဢေႃႈ။ ဢိၸၢၵ်ႈ၊ ၸင်ႇထၢမ်လႄႈဝႃႈ၊ “ၵဝ်ၶႃႈႁၼ်ပႃးၽိုၼ်းပႃးၽႆးမႃးယူႇဢေႃႈ။ သူဝ်းဢွၼ်ႇပုၼ်ႈဢၼ်တၵ်းၽဝ်ပဵၼ်တူဝ်တၢင်းလူႇၼၼ်ႉ၊မီးၵႃႈလႂ်ၶႃႈ၊” မိူဝ်ႈဢၼ်ထၢမ်ဝႃႈၼင်ႇၼႆၸိုင်၊
ဢႃႇပြႃႇႁၢမ်ႇ၊ ၶိုၼ်းလၢတ်ႈလႄႈဝႃႈ၊ “ၽြႃးပဵၼ်ၸဝ်ႈတေမႄးႁႅၼ်းပုၼ်ႈမၼ်းၸဝ်ႈတူဝ်ၼိုင်ႈဢေႃႈ၊” ဝႃႈၼင်ႇၼႆလႄႈ၊ပႆၸွမ်းၵၼ်ၵႂႃႇဢေႃႈ။
ၶဝ်ၵေႃႈႁွတ်ႈထိုင်ၵႂႃႇတီႈဢၼ်ၽြႃးပဵၼ်ၸဝ်ႈသင်ႇလၢတ်ႈဝႆႉၼၼ်ႉဢေႃႈ။ မိူဝ်ႈၼၼ်ႉ ဢႃႇပြႃႇႁၢမ်ႇ၊ တႄႇႁဵတ်းၶဵင်ႇတၢင်းလူႇသေယဝ်ႉ၊ဢဝ်ၽိုၼ်းၵေႃႇၵႃႈၼိူဝ်ၼၼ်ႉယဝ်ႉၸင်ႇၽုၵ်ႇမတ်ႉလုၵ်ႈၸၢႆးမၼ်းသေယဝ်ႉ၊ဢဝ်တၢင်ႇၵႃႈၼိူဝ်ၵွင်ၽိုၼ်းဢၼ်ၵေႃႇဝႆႉၵႃႈၼိူဝ်ၶဵင်ႇၼၼ်ႉသေလႄႈ။-
မၼ်းယိုၼ်ႈမိုဝ်းလႄႈဢဝ်မိတ်ႈပုၼ်ႈတႃႇတေဢဝ်လုၵ်ႈၸၢႆးမၼ်းတၢႆဢေႃႈ။
မိူဝ်ႈၼၼ်ႉတမၢၼ်ႇၵၢင်ႁၢဝ် ထႃႇဝရႃႉၽြႃး၊ ယူႇၵႃႈၼိူဝ်ၵၢင်ႁၢဝ်သေလႄႈလၢတ်ႈမႃးလႄႈဝႃႈ၊ “ ဢႃႇပြႃႇႁၢမ်ႇ၊ ႟။ ဢႃႇပြႃႇႁၢမ်ႇ၊ ” ဝႃႈၼင်ႇၼႆလႄႈ၊ မၼ်းၶိုၼ်းတွပ်ႇဝႃႈ၊ “ဢေႃႈၶႃႈ။ ၶႃႈၸဝ်ႈမီးယူႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။
တမၢၼ်ႇၵၢင်ႁၢဝ်ၼၼ်ႉလၢတ်ႈလႄႈဝႃႈ၊ “ယႃႇပေတိူဝ်ႉပေထုၵ်ႇလုၵ်ႈၸၢႆးဢွၼ်ႇၼၼ်ႉ။ ယႃႇပေႁဵတ်းၵႃႈသင်တီႈမၼ်းလႃးလႃး။ တေႃႈလဵဝ်ၵဝ်ႁုလွင်ႈဢၼ်မႂ်းၵူဝ်ယမ်ၽြႃးပဵၼ်ၸဝ်ႈထၢၼ်ႇႁိုဝ်လႄႈယင်းဢမ်ႇတွပ်ႇဢမ်ႇထဵင်တၢင်းဢၼ်ၵဝ်ယွၼ်းဢဝ်လုၵ်ႈၸၢႆးမႂ်းဢၼ်မႂ်းမီးၵေႃႉလဵဝ်ၵူၺ်းၼၼ်ႉယဝ်ႉ၊” ဝႃႈၼင်ႇၼႆဢေႃႈ။
ဢႃႇပြႃႇႁၢမ်ႇ၊ ဝၢႆႇတူၺ်းလႄႈႁၼ်သူဝ်းပေႃႈဢွၼ်ႇတူဝ်ၼိုင်ႈဢၼ်ၶဝ်မၼ်းၶမ်ယုမ်းဝႆႉယူႇၽၢႆႇတၢင်းလင်မၼ်းဢေႃႈ။ ဢႃႇပြႃႇႁၢမ်ႇ၊ ၵႂႃႇတိဢဝ်သူဝ်းပေႃႈဢွၼ်ႇၼၼ်ႉသေလႄႈ ႁဵတ်းပဵၼ်တူဝ်တၢင်းလူႇဢၼ်တုတ်ႇၽႆးတၢင်တူဝ်လုၵ်ႈၸၢႆးမၼ်းသေလႄႈသၢၵ်ႈလူႇဢေႃႈ။-
တီႈၼၼ်ႈ ဢႃႇပြႃႇႁၢမ်ႇ၊ ႁွင်ႉႁဵၵ်ႈၸိုဝ်ႈဝႃႈ၊ “ ထႃႇဝရႃႉၽြႃး၊မႄးႁႅၼ်းပၼ်၊ ” ဝႃႈၼင်ႇၼႆလႄႈဢွၼ်ၵၼ်ႁွင်ႉဝႃႈ၊ “ၵႃႈၼိူဝ်လွႆ ထႃႇဝရႃႉၽြႃး၊ တီႈဢၼ်မၼ်းၸဝ်ႈမႄးႁႅၼ်းပၼ်၊” ဝႃႈၼင်ႇၼႆႁၢၼ်ႉတေႃႇဝၼ်းမိူဝ်ႈၼႆႉဢေႃႈ။
ဝၢႆးၼၼ်ႉတမၢၼ်ႇၵၢင်ႁၢဝ် ထႃႇဝရႃႉၽြႃး၊ သမ်ႉႁွင်ႉ ဢႃႇပြႃႇႁၢမ်ႇ၊ ထႅင်ႈလႄႈဝႃႈ၊-
“ၵဝ်ဢဝ်တင်းၵႂၢမ်းဢၼ်ဢွၵ်ႇသူပ်း ထႃႇဝရႃႉၽြႃး၊ ၼၼ်ႉတိူင်ႇၵတိၵႃႈၼႂ်းၼႃႇမႃႉၸိုဝ်ႈသဵင်ၵဝ်ၼၼ်ႉၸမ်ႉ၊ၵွပ်ႈပိူဝ်ႈမႂ်းႁဵတ်းၸိူဝ်ႉၼင်ႇၼႆယင်းဢမ်ႇတွပ်ႇဢမ်ႇထဵင်လႄႈဢဝ်လုၵ်ႈၸၢႆးဢၼ်မႂ်းမီးၵေႃႉလဵဝ်ၵူၺ်းပၼ်တီႈၵဝ်ၼၼ်ႉၵဝ်တၵ်းပၼ်တၢင်းလီတီႈမႂ်းလိူင်ႇၼမ်ၼႃႇဢေႃႈ။-
ၵဝ်တၵ်းႁႂ်ႈၸိူဝ်ႉၶိူဝ်းမႂ်းၼမ်ၵိုၼ်းၼႃႇလူင်လၢင်မိူၼ်ၸိူဝ်ႉၼင်ႇလၢဝ်ၵၢင်ႁၢဝ် ဢိၵ်ႇတင်းမိူၼ်ၸိူဝ်ႉၼင်ႇမဵတ်ႉႁိၼ်မဵတ်ႉသၢႆးတီႈပၢင်ႇႁၢတ်ႇသၢႆးၼမ်ႉသမ်ႇမုၵ်ႈတြႃႇၼၼ်ႉဢေႃႈ။ ၸိူဝ်ႉၶိူဝ်းမႂ်းတၵ်းလႆႈပႄႉရၢၼ်ႇသူႇၶဝ်တင်းလၢႆဢေႃႈ။-
ၵွပ်ႈပိူဝ်ႈမႂ်းထွမ်ႇဢဝ်ဢမိင်ႉၵဝ်လႄႈမဵဝ်းၵူၼ်းတင်းလၢႆတၵ်းဢွၼ်ၵၼ်ၶေႃယွၼ်းတၢင်းလီမၢင်ႇၵလႃႇၸႃႉဢၼ်ၵဝ်ပၼ်တီႈၸိူဝ်ႉၶိူဝ်းမႂ်းၼၼ်ႉဝႃႈၼႆၵဝ်ဝႆႉၵတိတီႈမႂ်းဢေႃႈ၊” ဝႃႈၼင်ႇၼႆဢေႃႈ။-
ဢႃႇပြႃႇႁၢမ်ႇ၊ ၶိုၼ်းမႃးၸူးတီႈၶႃႈၵူၼ်းၸႂ်ႉမၼ်းသွင်ၵေႃႉၼၼ်ႉသေလႄႈၶဝ်ၸွမ်းၵၼ်မိူဝ်းၵႂႃႇၸူးတီႈ ပေႇရသေးၽႃႉ၊ တီႈဢၼ် ဢႃႇပြႃႇႁၢမ်ႇ၊ ယူႇသဝ်းၼၼ်ႉဢေႃႈ။
ဝၢႆးၼၼ်ႉဢမ်ႇႁိုင်ဢမ်ႇၼၢၼ်း ဢႃႇပြႃႇႁၢမ်ႇ၊ လႆႈငိၼ်းၶၢဝ်ႇလွင်ႈဢၼ် မိလၶႃႇ၊ ၵိူတ်ႇလဵင်ႉလုၵ်ႈၸၢႆးပႅတ်ႇၵေႃႉ တီႈ ၼႃႇၶေႃႇ၊ ၼွင်ႉၸၢႆး ဢႃႇပြႃႇႁၢမ်ႇ၊ ၼၼ်ႉဢေႃႈ။-
လုၵ်ႈတူၼ်ႈပဵၼ် ဢုၸႃႉ၊ လႄႈၼွင်ႉၸၢႆးမၼ်းပဵၼ် ပုၸႃႉ၊ၵေႇမူၺ်ႇလႃႉ၊ ဢၼ်ပဵၼ်ပေႃႈ ဢႃႇရမ်ႇ၊-
ၶႄးသႅတ်ႉ၊ႁႃႇၸေႃႇ၊ပိလတႃႇသႃႉ၊ယိတလပ်ႉ၊ပေႇသူၺ်ႇလႃႉ၊ ဢၼ်ပဵၼ်ပေႃႈ ရေႇပႅၵ်ႉၵႃႉ၊ ၼၼ်ႉဢေႃႈ။-
မိလၶႃႇ၊ ၵိူတ်ႇလဵင်ႉလုၵ်ႈၸၢႆးပႅတ်ႇၵေႃႉၼႆႉတီႈ ၼႃႇၶေႃႇ၊ ၼွင်ႉၸၢႆး ဢႃႇပြႃႇႁၢမ်ႇ၊ ဢေႃႈ။-
မေးၼွႆႉ ၼႃႇၶေႃႇ၊ ဢၼ်လႆႈၸိုဝ်ႈ ရုမႃႇ၊ ၵေႃႈၵိူတ်ႇလဵင်ႉ တေးပႃႉ၊ၵႃႇႁမ်ႇ၊တႁႃႇသႃႉ၊ တင်း မႃႇၶႃႇ၊ ဢေႃႈ။
ၸႃႇရႃႇ၊ ဢသၢၵ်ႈယိုၼ်းယၢဝ်းထိုင်ပၢၵ်ႇပၢႆသၢဝ်းၸဵတ်းပီဢေႃႈ။-
မၼ်းတၢႆၵႂႃႇၵႃႈတီႈဝဵင်း ၵိရိယႃႉဢႃႇပႃႇ၊ (ႁေႇပရုၼ်ႇ) မိူင်း ၶႃႇၼၼ်ႇ၊ လႄႈ ဢႃႇပြႃႇႁၢမ်ႇ၊ ၵေႃႈမႆႈၸႂ်ၶီၸႂ်လႄႈႁွင်ႉႁႆႈၵွပ်ႈပိူဝ်ႈ ၸႃႇရႃႇ၊ တၢႆၵႂႃႇၼၼ်ႉဢေႃႈ။
မၼ်းၸင်ႇလုၵ်ႉသေၵႃႈတီႈႁိမ်းတူဝ်တၢႆၼၼ်ႉလႄႈၵႂႃႇလၢတ်ႈတီႈၵူၼ်းမဵဝ်း ႁိတ်ႉတိ၊ ၶဝ်လႄႈဝႃႈ၊-
“ၵဝ်ပဵၼ်ၶႅၵ်ႇဢၼ်သွၼ်ႈယူႇၵႃႈတီႈသူၼႆႉလႄႈႁႂ်ႈၵဝ်လႆႈသၢင်းၵျူဝ်ႇမေးၵဝ်ၸိုင်၊ၶၢႆပၼ်တီႈလိၼ်ပႃႇႁဵဝ်ႈၵႂၢၵ်ႈၼိုင်ႈသေၵမ်း၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ ဢႃႇပြႃႇႁၢမ်ႇ၊ ၵူမ်ႈႁူဝ်ၵႃႈတီႈၽၢႆႇၼႃႈၶဝ်သေလႄႈ၊-
လၢတ်ႈဝႃႈ၊ “ပေႃးသူမီးၸႂ်ဢၼ်ပၼ်ဢၶႂၢင်ႉႁႂ်ႈၵဝ်လႆႈၽင်မေးၵဝ်တီႈၼႆႈၸိုင်၊ဢွၼ်ၵၼ်ယွၼ်းႁႂ်ႈ ဢေႇၽရုၼ်ႇ၊ လုၵ်ႈၸၢႆး ၸေႃးႁႃႇ၊ ၼၼ်ႉ။-
ၶၢႆႁူးထမ်ႈ မၵ်ႉပေႇလႃႉ၊ ဢၼ်မီးႁိမ်းလႅၼ်ၼႃးမၼ်းၼၼ်ႉပၼ်သေၵမ်း။ ၸွမ်းၼင်ႇၵႃႈၶၼ်မၼ်းထိူၵ်ႈတၢၼ်ႇၼၼ်ႉဢွၼ်ၵၼ်ယွၼ်းႁႂ်ႈမၼ်းၶၢႆပၼ်တီႈၵဝ်ၵႃႈတီႈၽၢႆႇၼႃႈသူၵူၼ်းတင်းလၢႆ၊ပုၼ်ႈဢၼ်ၵဝ်တၵ်းပိူင်ႇလိၼ်ၵႂၢၵ်ႈၼိုင်ႈပုၼ်ႈပႃႇႁဵဝ်ႈသေၵမ်း၊” ဝႃႈၼင်ႇၼႆဢေႃႈ။
ဢေႇၽရုၼ်ႇ၊ ၵေႃႈတူဝ်မၼ်းၼင်ႈယူႇၵႃႈၼႂ်းၵႄႈၵူၼ်း ႁိတ်ႉတိ၊ ၸိူဝ်းဢၼ်မီးယူႇၵႃႈၼႂ်းပၢင်ၵုမ်ၵႃႈတီႈၽၵ်းတူဝဵင်းၼၼ်ႉယူႇလႄႈလႆႈထွမ်ႇၸွမ်းငိၼ်းၸွမ်းသေလႄႈလၢတ်ႈလႄႈဝႃႈ၊-
“ၸဝ်ႈႁဝ်းတီႈၶႃႈ။ ထွမ်ႇသေၵမ်း။ ၵဝ်ၶႃႈပၼ်တူင်ႈၼႃးတင်းတူင်ႈပႃးၸဵမ်တင်းႁူးထမ်ႈၼၼ်ႉတီႈၸဝ်ႈႁဝ်းယူႇဢေႃႈ။ ၵႃႈတီႈၽၢႆႇၼႃႈၵူၼ်းမဵဝ်းၵဝ်ၶႃႈၸိူဝ်းၼႆႉၵဝ်ၶႃႈပၼ်ႁႂ်ႈၸဝ်ႈႁဝ်းလႆႈၽင်တူဝ်တၢႆမေးၸဝ်ႈႁဝ်းၶႃႈဢေႃႈ၊” ဝႃႈၼင်ႇၼႆဢေႃႈ။
ဢႃႇပြႃႇႁၢမ်ႇ၊ သမ်ႉၵူမ်ႈႁူဝ်ၵႃႈတီႈၽၢႆႇၼႃႈၵူၼ်းမဵဝ်း ႁိတ်ႉတိ၊ ၸိူဝ်းၼၼ်ႉသေယဝ်ႉ၊-
လၢတ်ႈတီႈ ဢေႇၽရုၼ်ႇ၊ လႄႈဝႃႈ၊ “ထွမ်ႇသေၵမ်း။ ႁႂ်ႈၵဝ်လႆႈယွၼ်းလၢတ်ႈသေၵမ်း။ ၵဝ်တၵ်းသိုဝ်ႉဢဝ်တူင်ႈၼႃးၼၼ်ႉတင်းတူင်ႈဢေႃႈ။ ႁပ်ႉတုင်းဢဝ်ၵႃႈၶၼ်မၼ်းတီႈၵဝ်သေၵမ်း။ ႁဵတ်းၼၼ်ၸင်ႇၵဝ်တၵ်းၽင်တူဝ်တၢႆမေးၵဝ်ဢေႃႈ၊” ဝႃႈၼင်ႇၼႆႁႂ်ႈပရိၵ်ႈသၢတ်ႈလႆႈငိၼ်းဢေႃႈ။
ဢႃႇပြႃႇႁၢမ်ႇ၊ ၵေႃႈၽွမ်ႉသေယဝ်ႉ၊ၸင်ႇပၼ်ငိုၼ်းသီႇပၢၵ်ႇၶႅပ်းၵႃႈၼင်ႇဢၼ် ဢေႇၽရုၼ်ႇ၊ တႅပ်းတတ်းၵႃႈၶၼ်ၽၢႆႇၼႃႈၶဝ်ၸိူဝ်းဢၼ်ထွမ်ႇၸွမ်းငိၼ်းၸွမ်းၼၼ်ႉ၊ပၼ်ၸွမ်းၼင်ႇၼမ်ႉၼၵ်းဢၼ်မၢၼ်ႇဢၼ်ၵူၼ်းၵႃႉၵူၼ်းၶၢႆၶဝ်သုင်းၼၼ်ႉဢေႃႈ။
ၵွပ်ႈၼႆလႄႈ၊တူင်ႈၼႃး မၵ်ႉပေႇလႃႉ၊ ဢၼ် ဢေႇၽရုၼ်ႇ၊ ပိူင်ႇဢၼ်မီးၽၢႆႇဝၼ်းဢွၵ်ႇ မမ်ႇရေႇ၊ ၸႃႉၸဵမ်တူင်ႈၼႃးတင်းႁူးထမ်ႈဢၼ်မီးၵႃႈၼႂ်းမၼ်းဢိၵ်ႇတင်းတူၼ်ႈမႆႉဢၼ်မီးၸွမ်းႁိမ်းမၼ်းတင်းသဵင်ႈတင်းလူင်ၼၼ်ႉဢၢပ်ႈပၼ် ဢႃႇပြႃႇႁၢမ်ႇ၊-
ၽၢႆႇၼႃႈပရိၵ်ႈသၢတ်ႈၵူၼ်းမဵဝ်း ႁိတ်ႉတိ၊ ၸိူဝ်းဢၼ်ၶဝ်ႈပႃးၵႃႈၼႂ်းပၢင်ၵုမ်ၼၼ်ႉယဝ်ႉလီလီငၢမ်းငၢမ်းဢေႃႈ။
ၼင်ႇၼၼ်လႄႈ ဢႃႇပြႃႇႁၢမ်ႇ၊ ၽင်တူဝ်တၢႆမေးမၼ်း ၸႃႇရႃႇ၊ ၵႃႈတီႈႁူးထမ်ႈၵႃႈၼႂ်းမိူင်း ၶႃႇၼၼ်ႇ၊ ၼၼ်ႉဢေႃႈ။-
ၵွပ်ႈပိူဝ်ႈၸိူဝ်ႉၼင်ႇၼႆလႄႈၵႂၢၵ်ႈလိၼ်ဢၼ်ၵူၼ်းမဵဝ်း ႁိတ်ႉတိ၊ ၶဝ်ပိူင်ႇတင်းႁူးထမ်ႈဢၼ်မီးတီႈၼၼ်ႈမႃးပဵၼ်ၵႂၢၵ်ႈလိၼ်ဢၼ် ဢႃႇပြႃႇႁၢမ်ႇ၊ ပိူင်ႇပုၼ်ႈတႃႇတေဢဝ်ႁဵတ်းပဵၼ်ပႃႇႁဵဝ်ႈဢေႃႈ။
ဢႃႇပြႃႇႁၢမ်ႇ၊ ၵႄႇထဝ်ႈၼႃႇယဝ်ႉ။ ထႃႇဝရႃႉၽြႃး၊ ၵေႃႈပၼ်တၢင်းလီတီႈမၼ်းၼႂ်းလွင်ႈတၢင်းဢၼ်မၼ်းႁဵတ်းၵူႈၸိူဝ်ႉၵူႈပိူင်ၼၼ်ႉယဝ်ႉ။-
မၼ်းၸင်ႇလၢတ်ႈတီႈၶႃႈမၼ်းဢၼ်ဢသၢၵ်ႈယႂ်ႇသေပိူၼ်ႈၵႃႈၼႂ်းၵူၼ်းႁိူၼ်းၵူၼ်းယေးဢၼ်ပႂ်ႉထိင်းၽၢၼ်ႇတႃႇၼႃႈႁိူၼ်းယူႇၼၼ်ႉလႄႈဝႃႈ၊ “ဢဝ်မိုဝ်းမႂ်းသွၼ်ႈတႂ်ႈဝၢင်ႈၶႃ ၵဝ်ဝႆႉလႄႈတိူင်ႇဝႃႇတႃႉ။-
ၵဝ်ၶႂ်ႈႁႂ်ႈမႂ်းတိူင်ႇၵၢဝ်ႇၵတိၵႃႈၼႂ်းၸိုဝ်ႈသဵင် ထႃႇဝရႃႉၽြႃး၊ ဢၼ်ပဵၼ်ၽြႃးၵၢင်ႁၢဝ်ဢိၵ်ႇတင်းလိၼ်မိူင်းၼင်ႇႁိုဝ်မႂ်းတၵ်းဢမ်ႇဢဝ်မႄႈယိင်းမိူင်း ၶႃႇၼၼ်ႇ၊ မႃးပဵၼ်မေးလုၵ်ႈၸၢႆးၵဝ်။-
မႂ်းတၵ်းလႆႈၵႂႃႇမိူဝ်းၸူးဝၢၼ်ႈၵဝ်ႇမိူင်းလင်ၵဝ်သေလႄႈႁႃမႄႈယိင်းၵႃႈၼႂ်းပီႈၼွင်ႉၸိူဝ်ႉၶိူဝ်းၵဝ်ပုၼ်ႈတၵ်းပဵၼ်မေးလုၵ်ႈၸၢႆးၵဝ် ဢိၸၢၵ်ႈ၊ ဢေႃႈ၊” ဝႃႈၼင်ႇၼႆဢေႃႈ။
ၶႃႈမၼ်းၵေႃႈထၢမ်လႄႈဝႃႈ၊ “ပေႃးဝႃႈၽူႈသၢဝ်ၼၼ်ႉဢမ်ႇၶႂ်ႈၽၢတ်ႇႁိူၼ်းလႄႈဢမ်ႇၸွမ်းၵဝ်ၶႃႈမႃးတီႈမိူင်းၼႆႉၸိုင်၊တေလႆႈႁဵတ်းၸိူဝ်ႉၼင်ႇႁိုဝ်ၶႃႈ။ ၸွင်ႇၵဝ်ၶႃႈတေလႆႈဢဝ်လုၵ်ႈၸၢႆးၸဝ်ႈႁဝ်းသူင်ႇၵႂႃႇတီႈဝၢၼ်ႈၵဝ်ႇမိူင်းလင်ၸဝ်ႈႁဝ်းပုၼ်ႉၶႃႈႁိုဝ်း၊” ဝႃႈၼင်ႇၼႆဢေႃႈ။
ဢႃႇပြႃႇႁၢမ်ႇ၊ ၶိုၼ်းလၢတ်ႈလႄႈဝႃႈ၊ “ႁဵတ်းသတိတႃႉ။ ယႃႇပေဢွၼ်သူင်ႇလုၵ်ႈၸၢႆးၵဝ်ၵႂႃႇၵႃႈတီႈမိူင်းၼၼ်ႉသေၵမ်း။-
ထႃႇဝရႃႉၽြႃး၊ ၽြႃးပဵၼ်ၸဝ်ႈၵၢင်ႁၢဝ်ဢဝ်ၵဝ်ဢွၵ်ႇသေႁိူၼ်းပေႃႈၵဝ်ၵႃႈတီႈမိူင်းတီႈယူႇပီႈၼွင်ႉၸိူဝ်ႉၶိူဝ်းၵဝ်မႃးသေယဝ်ႉ၊ႁဵတ်းတိသဵတ်ႈၸႃႇလႄႈဢဝ်မိူင်းၼႆႉဢၢပ်ႈပၼ်တီႈလုၵ်ႈလၢၼ်ၸိူဝ်ႉၶိူဝ်းၵဝ်ယဝ်ႉဢေႃႈ။ မၼ်းၸဝ်ႈတၵ်းပွႆႇၸႂ်ႉတမၢၼ်ႇၵၢင်ႁၢဝ်မၼ်းၸဝ်ႈဢွၼ်ႁူဝ်မႂ်းၵႂႃႇလႄႈမႂ်းတၵ်းတေလႆႈႁႃမေးပၼ်ပုၼ်ႈလုၵ်ႈၸၢႆးၵဝ်ၵႃႈတီႈၼၼ်ႈဢေႃႈ။-
ပေႃးမႄႈယိင်းၼၼ်ႉဢမ်ႇၶႂ်ႈၸွမ်းမႂ်းမႃးၸိုင်၊မႂ်းတၵ်းတေလွတ်ႈၵၢင်းသေဢၼ်မႂ်းတိူင်ႇၵၢဝ်ႇၵတိဝႆႉၼၼ်ႉဢေႃႈ။ ၵူၺ်းၵႃႈ၊ယႃႇပေဢွၼ်သူင်ႇလုၵ်ႈၸၢႆးၵဝ်ၵႂႃႇၸူးမိူင်းၼၼ်ႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၶႃႈၵေႃႉၼၼ်ႉဢဝ်မိုဝ်းမၼ်းသွၼ်ႈတႂ်ႈဝၢင်ႈၶႃၸဝ်ႈမၼ်း ဢႃႇပြႃႇႁၢမ်ႇ၊ သေယဝ်ႉ၊တိူင်ႇၵၢဝ်ႇၵတိၸွမ်းၼင်ႇ ဢႃႇပြႃႇႁၢမ်ႇ၊ ၶႂ်ႈႁႂ်ႈပဵၼ်ၼၼ်ႉသေဢေႃႈ။
ၶႃႈ ဢႃႇပြႃႇႁၢမ်ႇ၊ ၼၼ်ႉဢဝ်ၵလႃႇဢုၵ်ႈၸဝ်ႈမၼ်းသိပ်းတူဝ်ဢိၵ်ႇတင်းၶွင်ၽၢၵ်ႇလၢၵ်ႈသွင်ႇၼမ်ၼႃႇၵႂႃႇၵႃႈတီႈဝဵင်း မေႇသူဝ်ႇပူဝ်ႇတေးမီးယႃး၊ တီႈဢၼ် ၼႃႇၶေႃႇ၊ ယူႇသဝ်းၼၼ်ႉဢေႃႈ။-
မိူဝ်ႈဢၼ်မၼ်းႁွတ်ႈထိုင်ၼၼ်ႉမၼ်းႁႂ်ႈၵလႃႇဢုၵ်ႈၸိူဝ်းၼၼ်ႉၶုပ်ႉမူပ်ႇႁိမ်းၼမ်ႉမေႃႇၵႃႈၼွၵ်ႈဝဵင်းဢေႃႈ။ ယၢမ်းၼၼ်ႉပဵၼ်ၶိင်ႇဝၢႆးဝၼ်းလႄႈပဵၼ်ၽွင်းယၢမ်းဢၼ်ၽူႈယိင်းတင်းလၢႆဢွၵ်ႇမႃးတဵၵ်းၼမ်ႉဢေႃႈ။-
မၼ်းသူးတွင်းလႄႈဝႃႈ၊ “ ထႃႇဝရႃႉၽြႃး၊ ၽြႃးပဵၼ်ၸဝ်ႈ၊ၸဝ်ႈ ဢႃႇပြႃႇႁၢမ်ႇ၊ ၼၼ်ႉတီႈၶႃႈ။ ဝၼ်းမိူဝ်ႈၼႆႉၶႅၼ်းတေႃႈႁႂ်ႈတၢင်းၵျၢမ်ႇတၢင်းပွင်ၶႃႈၸဝ်ႈဢွင်ႇမႅင်ႇသေလႄႈ၊ႁႂ်ႈၵတိတေႃႇၸဝ်ႈႁဝ်းတႄႇပဵၼ်မႃးၵႃႈၼိူဝ်ၸဝ်ႈၶႃႈၸဝ်ႈသေၵမ်းတီႈၶႃႈ။-
ၶႃႈၸဝ်ႈမီးယူႇႁိမ်းၼမ်ႉမေႃႇဢၼ်လုၵ်ႈယိင်းသၢဝ်တင်းလၢႆဢၼ်ယူႇၵႃႈၼႂ်းဝဵင်းတၵ်းမႃးတဵၵ်းၼမ်ႉၼၼ်ႉတီႈၶႃႈယဝ်ႉဢေႃႈ။-
ၶႃႈၸဝ်ႈတေယွၼ်းၵႃႈတီႈသၢဝ်သေၵေႃႉၵေႃႉႁႂ်ႈမၼ်းၶျႃးပုင်းၼမ်ႉမၼ်းလူင်းပုၼ်ႈၶႃႈၸဝ်ႈတေၵိၼ်ၼၼ်ႉဢေႃႈ။ သင်ဝႃႈသၢဝ်ၼၼ်ႉဝႃႈ၊ ‘ၵိၼ်သေၵမ်း။ တီႈၵလႃႇဢုၵ်ႈၸိူဝ်းၼၼ်ႉၵေႃႈတၵ်းတေတိုၵ်းပၼ်ဢေႃႈ၊’ ဝႃႈၼႆၸိုင်၊ႁႂ်ႈၽူႈသၢဝ်ၼၼ်ႉပဵၼ်ၵေႃႉဢၼ်ၸဝ်ႈႁဝ်းမႄးႁႅၼ်းပၼ်ပုၼ်ႈ ဢိၸၢၵ်ႈ၊ ဢၼ်ပဵၼ်ၶႃႈၸႂ်ႉၸဝ်ႈႁဝ်းၼၼ်ႉသေၵမ်း။ ပေႃးပဵၼ်မႃးၸိူဝ်ႉၼင်ႇၼႆၸိုင်၊ၶႃႈၸဝ်ႈလႆႈႁုလွင်ႈဢၼ်ၸဝ်ႈႁဝ်းႁႂ်ႈၵတိၸဝ်ႈႁဝ်းတႄႇပဵၼ်ၵႃႈၼိူဝ်ၸဝ်ႈၼၢႆးၶႃႈၸဝ်ႈၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၸူဝ်ႈဢၼ်မၼ်းသူးတွင်းယူႇယင်းဢမ်ႇပႆႇယဝ်ႉၼၼ်ႉ၊ ရေႇပႅၵ်ႉၵႃႉ၊ တဵင်ႇမေႃႈၼမ်ႉလႄႈႁွတ်ႈမႃးဢေႃႈ။ ရေႇပႅၵ်ႉၵႃႉ၊ ၼၼ်ႉပဵၼ်လုၵ်ႈယိင်း ပေႇသူၺ်ႇလႃႉ၊ ဢၼ်ပဵၼ်လုၵ်ႈၸၢႆး ၼႃႇၶေႃႇ၊ တင်းမေးမၼ်း မိလၶႃႇ၊ ဢေႃႈ။ ၼႃႇၶေႃႇ၊ ပဵၼ်ၼွင်ႉၸၢႆး ဢႃႇပြႃႇႁၢမ်ႇ၊ ဢေႃႈ။
မၼ်းပဵၼ်သၢဝ်ၸႅတ်ႈဢၼ်ႁၢင်ႈလီၼႃႇဢေႃႈ။ မၼ်းလူင်းၵႂႃႇတီႈၼမ်ႉမေႃႇလႄႈတဵၵ်းၼမ်ႉသႂ်ႇတဵမ်မေႃႈသေယဝ်ႉ၊ၶိုၼ်ႈမႃးဢေႃႈ။-
ၶႃႈၼၼ်ႉလႅၼ်ႈၵႂႃႇၵႃႈတီႈမၼ်းသေယဝ်ႉ၊လၢတ်ႈလႄႈဝႃႈ၊ “ႁဵတ်းၵျေးၸူးပၼ်ႁႂ်ႈၵဝ်လႆႈၵိၼ်ၼမ်ႉၵႃႈၼႂ်းမေႃႈမႂ်းၼႆႉသေၵမ်း၊” ဝႃႈၼင်ႇၼႆဢေႃႈ။
ရေႇပႅၵ်ႉၵႃႉ၊ ၼၼ်ႉၶိုၼ်းလၢတ်ႈလႄႈဝႃႈ၊ “ၵိၼ်သေၵမ်းၶႃႈ၊” ဝႃႈၼႆသေယဝ်ႉ၊ၶျႃးပၼ်မေႃႈၼမ်ႉမၼ်းၶၼ်ၶၼ်ၽႂ်းၽႂ်းသေလႄႈဢဝ်ၼမ်ႉပၼ်ႁႂ်ႈမၼ်းၵိၼ်ဢေႃႈ။-
မိူဝ်ႈဢၼ်ၵိၼ်ၼမ်ႉယဝ်ႉၼၼ်ႉ ရေႇပႅၵ်ႉၵႃႉ၊ သမ်ႉလၢတ်ႈလႄႈဝႃႈ၊ “ၶႃႈၸဝ်ႈသမ်ႉတၵ်းဢွႆႇၼမ်ႉပၼ်တီႈၵလႃႇဢုၵ်ႈၸိူဝ်းၼၼ်ႉဢိမ်ႇဢိမ်ႇဢေႃႈ၊” ဝႃႈၼင်ႇၼႆသေယဝ်ႉ၊-
ဢဝ်ၵႃႈၼႂ်းမေႃႈၼမ်ႉမၼ်းထွၵ်ႇသႂ်ႇၵႃႈၼႂ်းႁၢင်းၼမ်ႉပုၼ်ႈၵလႃႇဢုၵ်ႈသေလႄႈလႅၼ်ႈၵႂႃႇတဵၵ်းသႂ်ႇထႅင်ႈတေႃႇႁွတ်ႈၵလႃႇဢုၵ်ႈတင်းလၢႆထၢၼ်ႈပေႃးၵိၼ်ဢိမ်ႇၵူႈတူဝ်ဢေႃႈ။-
ၵူၼ်းၸၢႆးၼၼ်ႉလွမ်ပႂ်ႉတူၺ်းမၼ်းၼၼ်ႉယူႇတဵတ်ႇတဵတ်ႇႁႂ်ႈလႆႈႁုႁၼ်လွင်ႈတၢင်းဢၼ် ထႃႇဝရႃႉၽြႃး၊ ပၼ်ႁႂ်ႈတၢင်းၵျၢမ်ႇတၢင်းပွင်မၼ်းဢွင်ႇမႅင်ႇၼၼ်ႉဢေႃႈ။
ဝၢႆးသေ ရေႇပႅၵ်ႉၵႃႉ၊ ဢွႆႇၼမ်ႉပၼ်ယဝ်ႉၼၼ်ႉၵူၼ်းၸၢႆးၵေႃႈဢဝ်သွႆႈၶမ်းမဵဝ်းဢၼ်ႁွႆႈၶူႈလင်ဢၼ်ၼမ်ႉၼၵ်းမၼ်းမီးၵျၢပ်ႈၼိုင်ႈၼၼ်ႉပၼ်တီႈမၼ်းဢိၵ်ႇတင်းဢဝ်ဝႅၼ်ၶမ်းၵူႈၼိုင်ႈၼမ်ႉၼၵ်းမၼ်းမီးသိပ်းၵျၢပ်ႈၼၼ်ႉသုပ်းပၼ်တီႈမိုဝ်းမၼ်းယဝ်ႉၸင်ႇ၊-
လၢတ်ႈလႄႈဝႃႈ၊ “မႂ်းပဵၼ်လုၵ်ႈယိင်းၽူႈလႂ်။ ၵႃႈတီႈႁိူၼ်းပေႃႈမႂ်းၸွင်ႇမီးတီႈယူႇပုၼ်ႈၵဝ်ဢိၵ်ႇတင်းၵူၼ်းၵဝ်တၵ်းလိုဝ်ႈသဝ်းပုၼ်ႈၶိုၼ်းၼိုင်ႈႁိုဝ်း၊” ဝႃႈၼင်ႇၼႆဢေႃႈ။
ရေႇပႅၵ်ႉၵႃႉ၊ ၵေႃႈလၢတ်ႈလႄႈဝႃႈ၊ “ပေႃႈၵဝ်ၶႃႈပဵၼ် ပေႇသူၺ်ႇလႃႉ၊ လုၵ်ႈၸၢႆး ၼႃႇၶေႃႇ၊ တင်းမေးမၼ်း မိလၶႃႇ၊ ၶႃႈဢေႃႈ။-
ၵႃႈတီႈႁိူၼ်းႁဝ်းၶႃႈမီးၽိူင်းဢိၵ်ႇတင်းယိူဝ်ႈႁႅင်ႈလႂ်တင်းတၢင်းၵိၼ်ဢၼ်လီၵိၼ်လီၶူပ်းလႂ်၊ဢိၵ်ႇတင်းတီႈယူႇတီႈသဝ်းလႂ်ၼမ်ၼႃႇၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၵူၼ်းၸၢႆးၼၼ်ႉၶုပ်ႉၶဝ်ႇၵူဝ်းၵႂၢႆႇ ထႃႇဝရႃႉၽြႃး၊ သေလႄႈ၊-
လၢတ်ႈဝႃႈ၊ “ယုၵ်ႉယွင်ႈယွင်ႈယေႃး ထႃႇဝရႃႉၽြႃး၊ ၽြႃးပဵၼ်ၸဝ်ႈ၊ၸဝ်ႈၵဝ်ၶႃႈ ဢႃႇပြႃႇႁၢမ်ႇ၊ ဢၼ်ပႃးတင်းသဵတ်ႈၸႃႇသေလႄႈႁႂ်ႈၵတိတႄႇၼိူဝ်ၸဝ်ႈၵဝ်ၶႃႈၼၼ်ႉတီႈၶႃႈဢေႃႈ။ ထႃႇဝရႃႉၽြႃး၊ ဢွၼ်သူင်ႇၵဝ်ၶႃႈႁႂ်ႈလႆႈႁွတ်ႈၵႂႃႇၵႃႈတီႈပီႈၼွင်ႉၸိူဝ်ႉၶိူဝ်းၸဝ်ႈၵဝ်ၶႃႈၸဝ်ႈၼၼ်ႉတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
ရေႇပႅၵ်ႉၵႃႉ၊ လႅၼ်ႈၵႂႃႇၸူးႁိူၼ်းမႄႈမၼ်းလႄႈမွၵ်ႇလၢတ်ႈလွင်ႈတၢင်းၸိူဝ်းၼၼ်ႉဢေႃႈ။-
ရေႇပႅၵ်ႉၵႃႉ၊ မီးပီႈၸၢႆးၵေႃႉၼိုင်ႈဢၼ်ၸိုဝ်ႈ လႃႇပၢၼ်ႇ၊ ၼၼ်ႉလႅၼ်ႈဢွၵ်ႇၵႂႃႇၸူးၼမ်ႉမေႃႇတီႈဢၼ်ၶႃႈ ဢႃႇပြႃႇႁၢမ်ႇ၊ မီးၼၼ်ႉဢေႃႈ။-
လႃႇပၢၼ်ႇ၊ သမ်ႉပေႃးလႆႈႁၼ်သွႆႈၶမ်းႁွႆႈၶူႈလင်တင်းဝႅၼ်ဢၼ်သုပ်းတီႈၶႅၼ်ၼွင်ႉယိင်းမၼ်းဢိၵ်ႇတင်းသမ်ႉပေႃးလႆႈငိၼ်းလွင်ႈတၢင်းဢၼ်ၵူၼ်းၸၢႆးၼၼ်ႉလၢတ်ႈတေႃႇၼွင်ႉယိင်းမၼ်းၸိူဝ်ႉၼင်ႇႁိုဝ်ၼၼ်ႉယဝ်ႉယဝ်ႉဢေႃႈ။ မၼ်းၸင်ႇၵႂႃႇၸူးတီႈၶႃႈ ဢႃႇပြႃႇႁၢမ်ႇ၊ ဢၼ်ၸုၵ်းယူႇႁိမ်းၵလႃႇဢုၵ်ႈဢၼ်မီးၵႃႈတီႈႁိမ်းၼမ်ႉမေႃႇၼၼ်ႉသေယဝ်ႉ၊-
လၢတ်ႈလႄႈဝႃႈ၊ “ၵေႃႉဢၼ် ထႃႇဝရႃႉၽြႃး၊ ပၼ်တၢင်းလီၼႆႉ႟။ ၶဝ်ႈၵႃႈၼႂ်းႁိူၼ်းၵဝ်ၶႃႈသေၵမ်း၊ႁဵတ်းသင်လႄႈၸုၵ်းယူႇၵႃႈၼွၵ်ႈၼႆႉ။ ၵဝ်ၶႃႈမႄးႁႅၼ်းလုၵ်းတီႈၼွၼ်းယဝ်ႉ၊ဢိၵ်ႇတင်းတီႈဢၼ်ၵလႃႇဢုၵ်ႈတၵ်းယူႇၼၼ်ႉဢေႃႈ၊” ဝႃႈၼင်ႇၼႆဢေႃႈ။
ႁဵတ်းၼၼ်လႄႈၵူၼ်းၸၢႆးၼၼ်ႉၵေႃႈၶဝ်ႈၵႃႈၼႂ်းႁိူၼ်းဢေႃႈ။ လႃႇပၢၼ်ႇ၊ ၵေႃႈပူတ်းတၢင်ႇၵလႃႇဢုၵ်ႈၸိူဝ်းၼၼ်ႉသေယဝ်ႉ၊ဢွႆႇယိူဝ်ႈႁႅင်ႈဢိၵ်ႇတင်းတၢင်းၵိၼ်ပၼ်သေဢေႃႈ။ သမ်ႉဢဝ်ၼမ်ႉမႃးပၼ်ၶႃႈ ဢႃႇပြႃႇႁၢမ်ႇ၊ တင်းၵူၼ်းမၼ်းၸိူဝ်းၼၼ်ႉပုၼ်ႈတၵ်းသုၵ်ႈတိၼ်ဢေႃႈ။-
မိူဝ်ႈဢၼ်ဢဝ်တၢင်းၵိၼ်မႃးတမ်းပၼ်ၼၼ်ႉၸိုင်၊ၵူၼ်းၸၢႆးၼၼ်ႉလၢတ်ႈလႄႈဝႃႈ၊ “ၸူဝ်ႈဢၼ်ၵဝ်ၶႃႈယင်းဢမ်ႇပႆႇလႆႈလၢတ်ႈၵႂၢမ်းဢၼ်ၵဝ်ၶႃႈလူဝ်ႇလၢတ်ႈၼၼ်ႉၵဝ်ၶႃႈတေဢမ်ႇပႆႇၵိၼ်လူးၵွၼ်ႇၶႃႈ၊” ဝႃႈၼင်ႇၼႆဢေႃႈ။ လႃႇပၢၼ်ႇ၊ ၵေႃႈလၢတ်ႈဝႃႈ၊ “ပေႃးပဵၼ်ၼႆၵေႃႈလၢတ်ႈသေၵမ်းၶႃႈ၊” ဝႃႈၼင်ႇၼႆဢေႃႈ။
ၵူၼ်းၸၢႆးၼၼ်ႉၵေႃႈလၢတ်ႈလႄႈဝႃႈ၊ “ၵဝ်ၶႃႈပဵၼ်ၶႃႈ ဢႃႇပြႃႇႁၢမ်ႇ၊ ဢေႃႈ။-
ထႃႇဝရႃႉၽြႃး၊ ပၼ်တၢင်းလီၼမ်ၼႃႇလူင်လၢင်တီႈၸဝ်ႈၵဝ်ၶႃႈလႄႈႁဵတ်းႁႂ်ႈမၼ်းပဵၼ်သထေးလူင်ဢေႃႈ။ မၼ်းၸဝ်ႈပၼ်ၽုင်သူဝ်း၊ၽုင်ဝူဝ်း၊ငိုၼ်းၶမ်း၊ၶႃႈၵူၼ်းၸၢႆး၊ၶႃႈၵူၼ်းယိင်း၊ၵလႃႇဢုၵ်ႈလႂ်၊တင်းမႃႉလီႈလႂ်ဢေႃႈ။-
ၸႃႇရႃႇ၊ ၵေႃႉပဵၼ်မေးၸဝ်ႈၵဝ်ၶႃႈၼၼ်ႉဢသၢၵ်ႈမၼ်းၵႄႇထဝ်ႈၼႃႇယဝ်ႉလႄႈသမ်ႉၵိူတ်ႇလဵင်ႉလုၵ်ႈၸၢႆးၵေႃႉၼိုင်ႈပုၼ်ႈၸဝ်ႈၵဝ်ၶႃႈဢေႃႈ။ ၸဝ်ႈၵဝ်ၶႃႈဢဝ်ဢုၵ်ႉၸႃႇမၼ်းၵႃႈမီးတင်းသဵင်ႈတင်းလူင်ဢၢပ်ႈပၼ်တီႈလုၵ်ႈၸၢႆးမၼ်းယဝ်ႉဢေႃႈ။-
ၸဝ်ႈၵဝ်ၶႃႈၼၼ်ႉႁႂ်ႈၵဝ်ၶႃႈဝႆႉၵတိႁႂ်ႈထွမ်ႇဢဝ်ဢမိင်ႉမၼ်းတင်းၵႂၢမ်းဢၼ်တိူင်ႇၵတိလႄႈဝႃႈ၊ ‘ယႃႇပေလိူၵ်ႈဢဝ်ၽူႈယိင်းၵႃႈၼႂ်းၸိူဝ်ႉၶိူဝ်းၵူၼ်း ၶႃႇၼၼိ၊ ၵႃႈၼႂ်းမိူင်းဢၼ်ၵဝ်ယူႇၼႆႉမႃးပဵၼ်မေးလုၵ်ႈၸၢႆးၵဝ်။-
ၵႂႃႇၸူးတီႈႁိူၼ်းပေႃႈၵဝ်၊ၵႃႈတီႈၸိူဝ်ႉၶိူဝ်းၵဝ်သေလႄႈႁႃမေးပၼ်မၼ်းတႃႉ၊’ ဝႃႈၼင်ႇၼႆတီႈၵဝ်ၶႃႈဢေႃႈ။-
ၵဝ်ၶႃႈၵေႃႈၶိုၼ်းလၢတ်ႈတီႈမၼ်းလႄႈဝႃႈ၊ ‘ပေႃးဝႃႈၽူႈယိင်းၼၼ်ႉဢမ်ႇၸွမ်းၵဝ်ၶႃႈမႃးၸိုင်၊တေလႆႈႁဵတ်းၸိူဝ်ႉၼင်ႇႁိုဝ်ၶႃႈ၊’ ဝႃႈၼင်ႇၼႆလႄႈ၊-
ၸဝ်ႈၵဝ်ၶႃႈၶိုၼ်းလၢတ်ႈလႄႈဝႃႈ၊ ‘ ထႃႇဝရႃႉၽြႃး၊ ၸဝ်ႈဢၼ်ၵဝ်ၸပ်းၸွမ်းႁွမ်းပႆၼႆႉတၵ်းပွႆႇတမၢၼ်ႇၵၢင်ႁၢဝ်မၼ်းၸဝ်ႈၵႂႃႇလူၺ်ႈၵၼ်တင်းမႂ်းလႄႈႁဵတ်းႁႂ်ႈတၢင်းၵျၢမ်ႇတၢင်းပွင်မႂ်းဢွင်ႇမႅင်ႇဢေႃႈ။ မႂ်းတေလႆႈမႄႈယိင်းၵႃႈၼႂ်းၵူၼ်းမဵဝ်းၵဝ်၊ၵႃႈၼႂ်းၵူၼ်းႁိူၼ်းပေႃႈၵဝ်၊ပုၼ်ႈတႃႇတေပဵၼ်မေးပုၼ်ႈလုၵ်ႈၸၢႆးၵဝ်ဢေႃႈ၊’ ဝႃႈၼင်ႇၼႆဢေႃႈ။-
‘လွင်ႈတၢင်းဢၼ်တေလႆႈလွတ်ႈၵၢင်းတၢင်းဢၼ်တိူင်ႇၵၢဝ်ႇၵတိၼၼ်ႉၸိုင်၊မီးလွင်ႈလဵဝ်ၵူၺ်းဢေႃႈ။ လွင်ႈၼၼ်ႉၸမ်ႉ၊ပေႃးမႂ်းႁွတ်ႈထိုင်ၵႃႈတီႈၸိူဝ်ႉၶိူဝ်းၵဝ်ၵႂႃႇလႄႈၶဝ်ထဵင်ပႅတ်ႈမႂ်းၸိုင်၊မႂ်းတေလွတ်ႈၵၢင်းဢေႃႈ၊’ ဝႃႈၼင်ႇၼႆဝႆႉဢေႃႈ။
“မိူဝ်ႈၵႆႈၵဝ်ၶႃႈႁွတ်ႈမႃးတီႈၼမ်ႉမေႃႇလႄႈသူးတွင်းဝႃႈ၊ ‘ ထႃႇဝရႃႉၽြႃး၊ ၽြႃးပဵၼ်ၸဝ်ႈ၊ၸဝ်ႈၵဝ်ၶႃႈ ဢႃႇပြႃႇႁၢမ်ႇ၊ ၼၼ်ႉတီႈၶႃႈ႟။ ၶႅၼ်းတေႃႈႁႂ်ႈတၢင်းၵျၢမ်ႇတၢင်းပွင်ၵဝ်ၶႃႈဢွင်ႇမႅင်ႇသေၵမ်းတီႈၶႃႈ။-
ယၢမ်းမိူဝ်ႈဢၼ်ၵဝ်ၶႃႈမီးယူႇတီႈႁိမ်းၼမ်ႉမေႃႇၼႆႉ၊မိူဝ်ႈဢၼ်ၽူႈသၢဝ်သေၵေႃႉၵေႃႉမႃးတဵၵ်းၼမ်ႉၼၼ်ႉၸိုင်၊ၵဝ်ၶႃႈတေယွၼ်းၵိၼ်ၼမ်ႉၵႃႈတီႈမေႃႈၼမ်ႉမၼ်းဢေႃႈ။-
ပေႃးယိင်းသၢဝ်ၼၼ်ႉဝႃႈၵိၼ်သေၵမ်းၶႃႈဝႃႈၼႆလႄႈသမ်ႉယင်းဢွႆႇၼမ်ႉပၼ်တီႈၵလႃႇဢုၵ်ႈၸိူဝ်းၼႆႉၸိုင်၊ၶႅၼ်းတေႃႈႁႂ်ႈယိင်းသၢဝ်ၼၼ်ႉပဵၼ်ၵေႃႉဢၼ်ၸဝ်ႈႁဝ်းလိူၵ်ႈဢဝ်ႁႂ်ႈပဵၼ်မေးပုၼ်ႈလုၵ်ႈၸၢႆးၸဝ်ႈၵဝ်ၶႃႈၸဝ်ႈသေၵမ်းတီႈၶႃႈ၊’ ဝႃႈၼင်ႇၼႆဢေႃႈ။-
ၸူဝ်ႈဢၼ်ၵဝ်ၶႃႈသူးတွင်းယူႇၼႂ်းၸႂ်ယင်းဢမ်ႇပႆႇယဝ်ႉၼၼ်ႉၵဝ်ၶႃႈႁၼ် ရေႇပႅၵ်ႉၵႃႉ၊ တဵင်ႇမေႃႈၼမ်ႉမႃးတဵၵ်းၼမ်ႉတီႈၼမ်ႉမေႃႇဢေႃႈ။ ၵဝ်ၶႃႈၵေႃႈယွၼ်းတီႈမၼ်းလႄႈဝႃႈ၊ ‘ပၼ်ၵိၼ်ၼမ်ႉဢိတ်းၼိုင်ႈသေၵမ်း၊’ ဝႃႈၼႆလႄႈ၊-
မၼ်းၵေႃႈၶျႃးမေႃႈၼမ်ႉမၼ်းပၼ်ၶၼ်ၶၼ်ၽႂ်းၽႂ်းသေလႄႈလၢတ်ႈဝႃႈ၊ ‘ၵိၼ်သေၵမ်းၶႃႈ။ တီႈၵလႃႇဢုၵ်ႈလႂ်ၵေႃႈၵဝ်ၶႃႈတၵ်းတေဢွႆႇၼမ်ႉပၼ်ဢေႃႈ၊’ ဝႃႈၼင်ႇၼႆသေလႄႈပၼ်ၵဝ်ၶႃႈၵိၼ်ၼမ်ႉဢေႃႈ။ တီႈၵလႃႇဢုၵ်ႈလႂ်ၵေႃႈမၼ်းဢွႆႇၼမ်ႉပၼ်ဢေႃႈ။-
ၵဝ်ၶႃႈတွင်ႈထၢမ်မၼ်းလႄႈဝႃႈ၊ ‘မႂ်းပဵၼ်လုၵ်ႈယိင်းၽူႈလႂ်၊’ မိူဝ်ႈဢၼ်ဝႃႈၼင်ႇၼႆၸိုင်၊မၼ်းလၢတ်ႈဝႃႈ၊ ‘ၵဝ်ၶႃႈပဵၼ်လုၵ်ႈယိင်း ပေႇသူၺ်ႇလႃႉ၊ လုၵ်ႈၸၢႆး ၼႃႇၶေႃႇ၊ တင်း မိလၶႃႇ၊ ဢေႃႈ၊’ ဝႃႈၼင်ႇၼႆဢေႃႈ။ မိူဝ်ႈၼၼ်ႉၵဝ်ၶႃႈဢဝ်မွင်ႈၶမ်းဢၼ်ႁွႆႈတီႈၶူႈလင်ၼၼ်ႉပၼ်မၼ်း၊ဢိၵ်ႇတင်းဝႅၼ်ၶမ်းၵူႈၼိုင်ႈသုပ်းတိုဝ်းပၼ်တီႈၶႅၼ်မၼ်းသေယဝ်ႉ၊-
ၵဝ်ၶႃႈၶုပ်ႉၶဝ်ႇလႄႈဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၼၼ်ႉ၊ၵွပ်ႈပိူဝ်ႈၽြႃးပဵၼ်ၸဝ်ႈၸဝ်ႈၵဝ်ၶႃႈ ဢႃႇပြႃႇႁၢမ်ႇ၊ ၼၼ်ႉဢွၼ်သူင်ႇၵဝ်ၶႃႈႁွတ်ႈထိုင်တီႈၸိူဝ်ႉၶိူဝ်းၸဝ်ႈၵဝ်ၶႃႈသိုဝ်ႈသိုဝ်ႈသေလႄႈ၊တီႈၼၼ်ႈၵဝ်ၶႃႈလႆႈထူပ်းလုၵ်ႈယိင်းသၢဝ်ၼႂ်းၸိူဝ်ႉၶိူဝ်းၼၼ်ႉပုၼ်ႈလုၵ်ႈၸၢႆးၸဝ်ႈၵဝ်ၶႃႈၼၼ်ႉလႄႈၵဝ်ၶႃႈယွင်ႈယေႃးၵျေးၸူး ထႃႇဝရႃႉၽြႃး၊ တီႈၶႃႈဢေႃႈ။-
တေႃႈလဵဝ်ၼႆႉပေႃးသူၸဝ်ႈတၵ်းႁဵတ်းၵျေးၸူး ဢိၵ်ႇတင်းသဵတ်ႈၸႃႇတီႈၸဝ်ႈၵဝ်ၶႃႈၸိုင်၊ၶႅၼ်းတေႃႈလၢတ်ႈသေၵမ်းတီႈၶႃႈ။ ပေႃးဢမ်ႇပဵၼ်လႆႈၸိူဝ်ႉၼင်ႇၼၼ်ၵေႃႈလၢတ်ႈသေၵမ်းတီႈၶႃႈ။ ၵဝ်ၶႃႈလူဝ်ႇတႅပ်းတတ်းၸႂ်လွင်ႈဢၼ်တေလႆႈႁဵတ်းၸိူဝ်ႉၼင်ႇႁိုဝ်ၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
လႃႇပၢၼ်ႇ၊ တင်း ပေႇသူၺ်ႇလႃႉ၊ ၶိုၼ်းလၢတ်ႈလႄႈဝႃႈ၊ “ၸွမ်းလူၺ်ႈလွင်ႈတၢင်းၼႆႉပဵၼ်ဢၼ် ထႃႇဝရႃႉၽြႃး၊ ၸီႇယၢင်ႇလႄႈႁဝ်းဢမ်ႇမီးတီႈတၵ်းလၢတ်ႈၵႃႈသင်ယဝ်ႉ။-
ရေႇပႅၵ်ႉၵႃႉ၊ မီးၵႃႈတီႈၼႆႈယဝ်ႉ။ ႁွင်ႉဢဝ်မၼ်းၵႂႃႇတႃႉ။ ႁႂ်ႈမၼ်းပဵၼ်မေးလုၵ်ႈၸၢႆးၸဝ်ႈမႂ်းၸွမ်းၼင်ႇဢၼ် ထႃႇဝရႃႉၽြႃး၊ ၶိုင်ပွင်ၼၼ်ႉတႃႉ၊” ဝႃႈၼင်ႇၼႆဢေႃႈ။-
မိူဝ်ႈဢၼ်ၶႃႈ ဢႃႇပြႃႇႁၢမ်ႇ၊ ငိၼ်းၵႂၢမ်းၼၼ်ႉၸိုင်၊မၼ်းၵူမ်ႈႁူဝ်ၵွမ်းႁူဝ်သေလႄႈဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ သေယဝ်ႉ၊-
ၸူၵ်းဢဝ်ၶူဝ်းငိုၼ်းၶူဝ်းၶမ်းလႂ်ဢိၵ်ႇတင်းၶူဝ်းၼုင်ႈတၢင်းမႆလႂ်ပၼ်တီႈ ရေႇပႅၵ်ႉၵႃႉ၊ သေဢေႃႈ။ တီႈပီႈဢၢႆႈမၼ်းတင်းမႄႈမၼ်းၵေႃႈမၼ်းပၼ်လၢၵ်ႈသွင်ႇဢၼ်ထိူၵ်ႈၵႃႈၼႃႇၼၼ်ႉဢေႃႈ။
လိုၼ်းၼၼ်ႉၶႃႈ ဢႃႇပြႃႇႁၢမ်ႇ၊ တင်းၵူၼ်းမၼ်းၸိူဝ်းၼၼ်ႉဢွၼ်ၵၼ်ၵိၼ်ၶူပ်းသေယဝ်ႉ၊ၵိုတ်းသဝ်းတီႈၼၼ်ႈၶိုၼ်းၼိုင်ႈယဝ်ႉၸင်ႇၵၢင်ၼႂ်လုၵ်ႉၸဝ်ႉၸဝ်ႉလႄႈလၢတ်ႈဝႃႈ၊ “ႁႂ်ႈၵဝ်ၶႃႈလႆႈမိူဝ်းၵႂႃႇတီႈၸဝ်ႈၵဝ်ၶႃႈသေၵမ်း၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉပီႈဢၢႆႈ ရေႇပႅၵ်ႉၵႃႉ၊ တင်းမႄႈၶဝ်လၢတ်ႈလႄႈဝႃႈ၊ “ႁႂ်ႈလုၵ်ႈယိင်းဢွၼ်ႇၼႆႉၵိုတ်းယူႇတီႈႁဝ်းသေမွၵ်ႈသိပ်းဝၼ်းလႄႈ၊ၸင်ႇႁႂ်ႈမၼ်းၵႂႃႇၸွမ်းသေၵမ်း၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ၶႃႈ ဢႃႇပြႃႇႁၢမ်ႇ၊ ၼၼ်ႉလၢတ်ႈလႄႈဝႃႈ၊ “ယႃႇပေႁၢမ်ႈတၢပ်ႈၵဝ်ၶႃႈသေၵမ်း။ ထႃႇဝရႃႉၽြႃး၊ ႁဵတ်းႁႂ်ႈၶၢဝ်းတၢင်းၵဝ်ၶႃႈဢွင်ႇမႅင်ႇယဝ်ႉဢေႃႈ။ ၶႅၼ်းတေႃႈႁႂ်ႈၵဝ်ၶႃႈလႆႈမိူဝ်းၸူးၵႃႈတီႈၸဝ်ႈၵဝ်ၶႃႈသေၵမ်း၊” ဝႃႈၼင်ႇၼႆဢေႃႈ။
ၶဝ်ၶိုၼ်းလၢတ်ႈလႄႈဝႃႈ၊ “ႁဝ်းတၵ်းႁွင်ႉဢဝ်လုၵ်ႈယိင်းသၢဝ်ၼၼ်ႉမႃးသေလႄႈထၢမ်တူၺ်းဢလူဝ်ႇမၼ်းလူးၵွၼ်ႇ၊” ဝႃႈၼင်ႇၼႆလႄႈ၊-
ၶဝ်ႁွင်ႉဢဝ်မၼ်းမႃးလႄႈထၢမ်ဝႃႈ၊ “ၸွင်ႇမႂ်းၶႂ်ႈၵႂႃႇၸွမ်းၵေႃႉၼႆႉႁိုဝ်း၊” ဝႃႈၼင်ႇၼႆဢေႃႈ။ ရေႇပႅၵ်ႉၵႃႉ၊ ၵေႃႈလၢတ်ႈဝႃႈ၊ “ၵဝ်ၶႃႈတၵ်းၸွမ်းၵႂႃႇၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၶဝ်ပွႆႇ ရေႇပႅၵ်ႉၵႃႉ၊ ဢိၵ်ႇတင်းၶႃႈၵူၼ်းထိင်းမၼ်းၵႂႃႇလူၺ်ႈၵၼ်တင်းၶႃႈ ဢႃႇပြႃႇႁၢမ်ႇ၊ တင်းၵူၼ်းမၼ်းၸိူဝ်းၼၼ်ႉသေဢေႃႈ။-
ၶဝ်ပၼ်တၢင်းလီတီႈ ရေႇပႅၵ်ႉၵႃႉ၊ လႄႈဝႃႈ၊ “ ရေႇပႅၵ်ႉၵႃႉ၊ ႟။ ႁႂ်ႈမႂ်းပဵၼ်မႄႈမိုၼ်ႇမႄႈသႅၼ် သေၵမ်းလူၺ်ႈ။ ႁႂ်ႈၸိူဝ်ႉၶိူဝ်းမႂ်းပႄႉၼႅင်ႇဝဵင်းရၢၼ်ႇသူႇမႂ်းတင်းလၢႆသေၵမ်းလူၺ်ႈ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ ရေႇပႅၵ်ႉၵႃႉ၊ တင်းမႄႈယိင်း ဢၼ်ၸွမ်းမၼ်းတင်းလၢႆႁႅၼ်းၶူဝ်းသေလႄႈ၊ ၶီႇၵလႃႇဢုၵ်ႈၸွမ်းၶႃႈ ဢႃႇပြႃႇႁၢမ်ႇ၊ ၵႂႃႇသေဢေႃႈ။
မိူဝ်ႈၶိင်ႇၼၼ်ႉ၊ ဢိၸၢၵ်ႈ၊ ၶဝ်ႈၵႂႃႇၼႂ်းထိူၼ်ႇလႅင်ႉ ပေႇလႁေႇရွႆႇ၊ လႄႈမီးယူႇၽၢႆႇတၢင်းၸၢၼ်းမိူင်း ၶႃႇၼၼ်ႇ၊ ဢေႃႈ။-
မၼ်းဢွၵ်ႇလႄႇၼႂ်းတူင်ႈၼႃးၶိင်ႇႁူဝ်ၶမ်ႈလႄႈႁႂ်ႈလႆႈလိုဝ်ႈႁိူဝ်ႉလိုဝ်ႈၸႂ်ယူႇၼၼ်ႉမၼ်းမုင်ႈႁၼ်ၽုင်ၵလႃႇဢုၵ်ႈပႆမႃးယူႇဢေႃႈ။-
မိူဝ်ႈဢၼ် ရေႇပႅၵ်ႉၵႃႉ၊ ႁၼ် ဢိၸၢၵ်ႈ၊ ၼၼ်ႉၸိုင်၊မၼ်းလူင်းသေၵလႃႇဢုၵ်ႈသေယဝ်ႉ၊-
ထၢမ်ၶႃႈ ဢႃႇပြႃႇႁၢမ်ႇ၊ လႄႈဝႃႈ၊ “ၵေႃႉဢၼ်ပႆၼႂ်းၼႃးမႃးၸူးႁဝ်းယူႇၼၼ်ႉပဵၼ်ၽူႈလႂ်၊” ဝႃႈၼင်ႇၼႆလႄႈ၊ၶႃႈၼၼ်ႉၶိုၼ်းလၢတ်ႈလႄႈဝႃႈ၊ “ပဵၼ်ၸဝ်ႈၵဝ်ၶႃႈၶႃႈဢေႃႈ၊” ဝႃႈၼင်ႇၼႆဢေႃႈ။ မိူဝ်ႈၼၼ်ႉ ရေႇပႅၵ်ႉၵႃႉ၊ ဢဝ်ၽႃႈဝႆႁူမ်ႇၼႃႈမၼ်းဝႆႉသေဢေႃႈ။
ၶႃႈၼၼ်ႉၵေႃႈမွၵ်ႇလၢတ်ႈလွင်ႈတၢင်းဢၼ်မၼ်းႁဵတ်းမႃးယဝ်ႉတင်းသဵင်ႈတင်းလူင်ၼၼ်ႉတီႈ ဢိၸၢၵ်ႈ၊ ဢေႃႈ။-
ဢိၸၢၵ်ႈ၊ ၸင်ႇဢွၼ် ရေႇပႅၵ်ႉၵႃႉ၊ ၶဝ်ႈၵႃႈၼႂ်းသုမ်ႉထဵင်ဢၼ်မႄႈမၼ်း ၸႃႇရႃႇ၊ လႆႈယူႇမႃးၼၼ်ႉသေယဝ်ႉ၊ၵမ်းၼၼ်ႉ ရေႇပႅၵ်ႉၵႃႉ၊ ၵေႃႈလႆႈပဵၼ်မေးမၼ်းယဝ်ႉဢေႃႈ။ ဢိၸၢၵ်ႈ၊ ႁၵ်ႉပႅင်း ရေႇပႅၵ်ႉၵႃႉ၊ ၼႃႇလႄႈလႆႈၼိမ်ၸႂ်ယဵၼ်ၸႂ်ၵႃႈၼႂ်းတၢင်းဢၼ်မႄႈမၼ်းတၢႆၼၼ်ႉဢေႃႈ။
ဢႃႇပြႃႇႁၢမ်ႇ၊ ဢဝ်မေးဢၼ်လႆႈၸိုဝ်ႈ ၵေႇတုရႃႉ၊ ထႅင်ႈဢေႃႈ။-
မၼ်းၵိူတ်ႇလဵင်ႉလုၵ်ႈၸၢႆး ၸိမ်းရမ်ႇ၊ယွၵ်ႉသၢၼ်ႇ၊မေႇတၢၼ်ႇ၊မိတျၼ်ႇ၊ဢိသၽၵ်ႉ၊ ဢိၵ်ႇတင်း သုဢႃႇ၊ ဢေႃႈ။-
ယွၵ်ႉသၢၼ်ႇ၊ မီးလုၵ်ႈၸၢႆး သေးပႃႉ၊ ဢိၵ်ႇတင်း တေႇတၼ်ႇ၊ လႄႈၸိူဝ်ႉၶိူဝ်း တေႇတၼ်ႇ၊ တင်းလၢႆၸမ်ႉ၊ပဵၼ်ၵူၼ်းမဵဝ်း ဢႃႇသုရိမ်ႇ၊ ၵူၼ်းမဵဝ်း လေႇတုသိမ်ႇ၊ ဢိၵ်ႇတင်းၵူၼ်းမဵဝ်း လေႇဢုမ်ႇမိမ်ႇ၊ ဢေႃႈ။-
လုၵ်ႈၸၢႆး မိတျၼ်ႇ၊ ၸမ်ႉ၊ပဵၼ် ဢေးၽႃႇ၊ဢေးၽေႇရႃႉ၊ႁႃႇၼုၵ်ႉ၊ဢပိတႃႉ၊ တင်း ဢေးလတႃႇ၊ ဢေႃႈ။ ၶဝ်ၸိူဝ်းၼႆႉတင်းသဵင်ႈတင်းလူင်ပဵၼ်ၸိူဝ်ႉၶိူဝ်း ၵေႇတုရႃႉ၊ ဢေႃႈ။
ဢႃႇပြႃႇႁၢမ်ႇ၊ ဢဝ်ဢုၵ်ႉၸႃႇၵႃႈမီးတင်းသဵင်ႈတင်းလူင်ပၼ်တီႈ ဢိၸၢၵ်ႈ၊ ဢေႃႈ။-
တီႈလုၵ်ႈၸၢႆးဢၼ်လႆႈတီႈမေးၼွႆႉမၼ်းၸိူဝ်းၼၼ်ႉၵေႃႈ၊မၼ်းပၼ်လၢၵ်ႈသွင်ႇသေယဝ်ႉ၊မိူဝ်ႈဢၼ်မၼ်းယင်းဢသၢၵ်ႈလိပ်းယူႇၼၼ်ႉမၼ်းပွႆႇလုၵ်ႈၸၢႆးၸိူဝ်းၼၼ်ႉဢွၵ်ႇၵႂႃႇၸူးတီႈမိူင်းဝၼ်းဢွၵ်ႇပုၼ်ႉ ႁႂ်ႈလႆႈယူႇႁၢင်ႇၵႆၵၼ်တင်းလုၵ်ႈၸၢႆးမၼ်း ဢိၸၢၵ်ႈ၊ ဢေႃႈ။
လုၵ်ႈၸၢႆးမၼ်း ဢိၸၢၵ်ႈ၊ ဢိၵ်ႇတင်း ဢိသမေႇလႃႉ၊ ၸိူဝ်းၼၼ်ႉ ဢွၼ်ၵၼ်ဢဝ်မၼ်းၵႂႃႇသၢင်းၵျူဝ်ႇၵႃႈၼႂ်းႁူးထမ်ႈ မၵ်ႉပေႇလႃႉ၊ ဢၼ်မီးၽၢႆႇတၢင်းဝၼ်းဢွၵ်ႇတူင်ႈၼႃး မမ်ႇရေႇ၊ ဢၼ်ဢွၼ်တၢင်းပဵၼ်တူင်ႈၼႃး ဢေႇၽရုၼ်ႇ၊ လုၵ်ႈၸၢႆး ၸေႃးႁႃႇ၊ ၵူၼ်းမဵဝ်း ႁိတ်ႉတိ၊ ၼၼ်ႉဢေႃႈ။-
တူင်ႈၼႃးၼႆႉ ဢႃႇပြႃႇႁၢမ်ႇ၊ သိုဝ်ႉဢဝ်တီႈၵူၼ်းမဵဝ်း ႁိတ်ႉတိ၊ ၶဝ်လႄႈ တီႈၼၼ်ႈလႆႈသၢင်းၵျူဝ်ႇ ဢႃႇပြႃႇႁၢမ်ႇ၊ တင်းမေးမၼ်း ၸႃႇရႃႇ၊ ဢေႃႈ။-
ဝၢႆးသေ ဢႃႇပြႃႇႁၢမ်ႇ၊ တၢႆၵႂႃႇယဝ်ႉၼၼ်ႉၽြႃးပဵၼ်ၸဝ်ႈပၼ်တၢင်းလီတီႈလုၵ်ႈၸၢႆးမၼ်း ဢိၸၢၵ်ႈ၊ ၵေႃႉဢၼ်ယူႇႁိမ်းၼမ်ႉမေႃႇ ပေႇလႁေႇရွႆႇ၊ ၼၼ်ႉဢေႃႈ။
ဢိသမေႇလႃႉ၊ လုၵ်ႈၸၢႆး ဢႃႇပြႃႇႁၢမ်ႇ၊ ဢၼ်ၵိူတ်ႇလဵင်ႉမႃးတီႈ ႁႃႇၵရႃႉ၊ ၵူၼ်းမဵဝ်း ဢေးၵျိပ်ႉ၊ ၶႃႈ ၸႃႇရႃႇ၊ ၼၼ်ႉ။-
မီးလုၵ်ႈၸၢႆးၸိူဝ်းဢၼ်ၶပ်ႉတၢမ်းၵၼ်လူင်းမႃးၼၼ်ႉပဵၼ် ၼပႃႇယုတ်ႉ၊ၵေႇတႃႇ၊ဢႃႇတပေႇလႃႉ၊မိပသမ်ႇ၊-
မိသေႇမႃႉ၊တုမႃႇ၊မႃႇၸႃႉ၊-
ႁႃႇတတ်ႉ၊တေႇမႃႉ၊ယေႇတုရႃႉ၊ၼႃႇၽိသႃႉ၊ ဢိၵ်ႇတင်း ၵေႇတမႃႇ၊ ၸိူဝ်းၼၼ်ႉဢေႃႈ။-
ၶဝ်ၸိူဝ်းၼၼ်ႉ လႆႈပဵၼ်ပူႇပဵၼ်ပေႃႈၵူၼ်းမဵဝ်းသိပ်းသွင်မဵဝ်းလႄႈ ၸိုဝ်ႈသဵင်ၶဝ်ၼၼ်ႉ ႁွင်ႉႁဵၵ်ႈၸွမ်းၸိုဝ်ႈဝဵင်းၽႂ်ဝဵင်းမၼ်း၊လမ်းတပ်ႉၽႂ်လမ်းတပ်ႉမၼ်းဢေႃႈ။-
ဢိသမေႇလႃႉ၊ ဢသၢၵ်ႈယိုၼ်းယၢဝ်းထိုင်ပၢၵ်ႇသၢမ်သိပ်းပၢႆၸဵတ်းပီၸင်ႇတၢႆၵႂႃႇသေလႄႈ၊မၼ်းလႆႈၶၢမ်ႇတၢင်းဢၼ်သိမ်းဢဝ်ၵႂႃႇၸူးတီႈၵူၼ်းမဵဝ်းမၼ်းဢေႃႈ။-
ၸိူဝ်ႉၶိူဝ်း ဢိသမေႇလႃႉ၊ ၸိူဝ်းၼၼ်ႉ၊ယူႇၼႂ်းမိူင်းဝူင်ႈၵၢင်ဝဵင်း ႁႃႇဝိလႃႉ၊ တင်းဝဵင်း သုရႃႉ၊ ၽၢႆႇဝၼ်းဢွၵ်ႇမိူင်း ဢေးၵျိပ်ႉ၊ ၸွမ်းသဵၼ်ႈတၢင်းဢၼ်ၵႂႃႇၸူးမိူင်း ဢႃႇသီးရီးယႃး၊ ပုၼ်ႉဢေႃႈ။ ၶဝ်ယူႇၽၢတ်ႇၵၼ်တင်းၸိူဝ်ႉၶိူဝ်း ဢႃႇပြႃႇႁၢမ်ႇ၊ တၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉဢေႃႈ။
ၼႆႉၸမ်ႉ၊ပဵၼ်လွင်ႈၸိူဝ်ႉၶိူဝ်း ဢိၸၢၵ်ႈ၊ လုၵ်ႈၸၢႆး ဢႃႇပြႃႇႁၢမ်ႇ၊ ဢေႃႈ။-
ဢိၸၢၵ်ႈ၊ ၼႆႉမိူဝ်ႈဢၼ်ဢသၢၵ်ႈမၼ်းမီးသီႇသိပ်းၼၼ်ႉၸိုင်၊ပဵၼ်ႁိူၼ်းႁူမ်ႈၵၼ်တင်း ရေႇပႅၵ်ႉၵႃႉ၊ လုၵ်ႈယိင်း ပေႇသူၺ်ႇလႃႉ၊ ၵူၼ်းမဵဝ်း ဢႃႇရမိၼ်ႉ၊ မိူင်း မေႇသူဝ်ႇပူဝ်ႇတေးမီးယႃး၊ လႄႈပဵၼ်ၼွင်ႉယိင်း လႃႇပၢၼ်ႇ၊ ဢေႃႈ။-
ၵွပ်ႈပိူဝ်ႈ ရေႇပႅၵ်ႉၵႃႉ၊ ဢမ်ႇၵိူတ်ႇလုၵ်ႈၵိူတ်ႇလၢင်းၼၼ်ႉ ဢိၸၢၵ်ႈ၊ သူးတွင်းတီႈ ထႃႇဝရႃႉၽြႃး၊ ပုၼ်ႈမၼ်းလႄႈ ထႃႇဝရႃႉၽြႃး၊ ထွမ်ႇဢဝ်လႄႈ ရေႇပႅၵ်ႉၵႃႉ၊ ပႃးပတိၵ်ႈသၼ်ႇထေႇသေယဝ်ႉ၊-
ၵိူတ်ႇလဵင်ႉလုၵ်ႈၽႃၽႄမႃးဢေႃႈ။ ၸူဝ်ႈဢၼ်ဢမ်ႇပႆႇၵိူတ်ႇလဵင်ႉၼၼ်ႉ ၶဝ်သွင်ၵေႃႉၼၼ်ႉတဵၵ်းၵၼ်ႉၵၼ်ၵႃႈၼႂ်းတွင်ႉလႄႈ ရေႇပႅၵ်ႉၵႃႉ၊ ဝႃႈ၊ “လွင်ႈဢၼ်လၢၵ်ႇလၢႆးၸိူဝ်ႉၼင်ႇၼႆၼႆႉ ႁဵတ်းသင်သမ်ႉမႃးပဵၼ်တီႈၵဝ်ၼႆႉ၊” ဝႃႈၼင်ႇၼႆလႄႈမၼ်းလဝ်ႈထၢမ်တီႈ ထႃႇဝရႃႉၽြႃး၊ ဢေႃႈ။-
ထႃႇဝရႃႉၽြႃး၊ လၢတ်ႈတီႈမၼ်းလႄႈဝႃႈ၊ “ၵႃႈၼႂ်းတွင်ႉမႂ်းမီးၵူၼ်းသွင်မဵဝ်းဝႆႉဢေႃႈ။ ၵူၼ်းသွင်မဵဝ်း ဢၼ်ၶေႉၶဵင်ႇၵၼ်တၵ်းၵိူတ်ႇလဵင်ႉမႃး ၵႃႈတီႈမႂ်းဢေႃႈ။ ၵူၼ်းမဵဝ်းၼိုင်ႈတၵ်းႁႅင်းယႂ်ႇသေၵူၼ်းတၢင်ႇမဵဝ်းလႄႈ ၵေႃႉယႂ်ႇၼၼ်ႉတၵ်းလႆႈပဵၼ်ၶႃႈၵူၼ်းၸႂ်ႉတီႈ ၵေႃႉလဵၵ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၶိင်ႇမၼ်းထိုင်ၼၼ်ႉၸိုင်၊မၼ်းၵိူတ်ႇလဵင်ႉလုၵ်ႈၸၢႆးၽႃၽႄမႃးဢေႃႈ။-
ၵေႃႉဢၼ်ၵိူတ်ႇလဵင်ႉမႃးဢွၼ်တၢင်းၼၼ်ႉ ၽိဝ်ၼိူဝ်ႉလႅင်ၸၢင်းႁၢင်းလႄႈ ၼင်မၼ်းမိူၼ်ၸိူဝ်ႉၼင်ႇသိူဝ်ႈၶူၼ်သတ်းဝႆႉဢေႃႈ။ ပိူဝ်ႈၼႆလႄႈ ၶဝ်ႁွင်ႉႁဵၵ်ႈၸိုဝ်ႈမၼ်းဝႃႈ၊ ဢေးသေႃး၊ ဢေႃႈ။-
ၵေႃႉပႃႈလိုၼ်းၼၼ်ႉ ယိပ်းၵမ်သူၼ်ႈတိၼ် ဢေးသေႃး၊ မၼ်ႈမၼ်ႈသေလႄႈၵိူတ်ႇလဵင်ႉမႃးဢေႃႈ။ ပိူဝ်ႈၼႆၸင်ႇၶဝ်ႁွင်ႉႁဵၵ်ႈၸိုဝ်ႈမၼ်းဝႃႈ၊ ယႃႇၵုပ်ႈ၊ ဢေႃႈ။ မိူဝ်ႈဢၼ်ၶဝ်သွင်ၵေႃႉၵိူတ်ႇလဵင်ႉမႃးၼၼ်ႉ ဢိၸၢၵ်ႈ၊ မီးဢသၢၵ်ႈႁူၵ်းသိပ်းယဝ်ႉဢေႃႈ။
လုၵ်ႈဢွၼ်ႇသွင်ၵေႃႉၼၼ်ႉ ယႂ်ႇမႃးလႄႈ ဢေးသေႃး၊ ပဵၼ်ၵူၼ်းလႃႈထိူၼ်ႇဢၼ်ယိုဝ်းၵၢင်ႇၵတ်ႉၶႅၼ်ႇၼႃႇလႄႈ ပဵၼ်ၵူၼ်းဢၼ်လႄႇထိူၼ်ႇလႄႇၶိူဝ်းဢေႃႈ။ ယႃႇၵုပ်ႈ၊ ၸမ်ႉ၊ပဵၼ်ၵူၼ်းဢၼ်ၸႂ်ဢူၼ်ႈၸႂ်လီလႄႈ ၸၢင်ႈယူႇႁိူၼ်းယူႇယေးၵူၺ်းဢေႃႈ။-
ဢိၸၢၵ်ႈ၊ ႁၵ်ႉပႅင်း ဢေးသေႃး၊ ၵွပ်ႈပိူဝ်ႈယၢမ်ႈလႆႈၵိၼ်ၼိူဝ်ႉတူဝ်ထိူၼ်ႇဢၼ် ဢေးသေႃး၊ ၵႆႉယိုဝ်းလႆႈမႃးပၼ်ၼၼ်ႉလႄႈ ရေႇပႅၵ်ႉၵႃႉ၊ ၸမ်ႉ၊ႁၵ်ႉပႅင်း ယႃႇၵုပ်ႈ၊ ဢေႃႈ။-
ဝၼ်းၼိုင်ႈယၢမ်းမိူဝ်ႈဢၼ် ယႃႇၵုပ်ႈ၊ ယင်းတူမ်ႈၽၵ်းၼမ်ႉထူဝ်ႇယူႇၼၼ်ႉ ဢေးသေႃး၊ ၵႂႃႇလႄႇထိူၼ်ႇပွၵ်ႈမႃးဢေႃႈ။ ၵွပ်ႈပိူဝ်ႈတွင်ႉမႆႈႁႅင်းၼႃႇလႄႈ၊-
မၼ်းလၢတ်ႈတီႈ ယႃႇၵုပ်ႈ၊ လႄႈဝႃႈ၊ “ၵဝ်ႁိူဝ်ႉၼူၼ်းတွင်ႉမႆႈၼႃႇယဝ်ႉ။ ဢဝ်တၢင်းၵိၼ်ထူဝ်ႇလႅင်ၼၼ်ႉလဵင်ႉၵဝ်လူး၊” ဝႃႈၼင်ႇၼႆဢေႃႈ။ ၵွပ်ႈၸိူဝ်ႉၼႆလႄႈၶဝ်ႁွင်ႉႁဵၵ်ႈမၼ်းဝႃႈ၊ ဢေႇတုမ်ႇ၊ ၼႆဢေႃႈ။
ယႃႇၵုပ်ႈ၊ ၵေႃႈတွပ်ႇလႄႈဝႃႈ၊ “ပေႃးမႂ်းပၼ်ဢရႃႇလုၵ်ႈတူၼ်ႈၼၼ်ႉတီႈၵဝ်ၸိုင်၊ၵဝ်တၵ်းပၼ်ၵိၼ်ဢေႃႈ၊” ဝႃႈၼင်ႇၼႆလႄႈ၊
ဢေးသေႃး၊ ၵေႃႈဝႃႈ၊ “လီယဝ်ႉ။ ၵဝ်တၵ်းတေတၢႆယဝ်ႉ။ ဢရႃႇလုၵ်ႈတူၼ်ႈၼႆႉပၼ်ဢၵျူဝ်းၵဝ်ၵႃႈသင်ၵေႃႈဢမ်ႇၸႂ်ႈ၊” ဝႃႈၼင်ႇၼႆဢေႃႈ။
ယႃႇၵုပ်ႈ၊ သမ်ႉလၢတ်ႈလႄႈဝႃႈ၊ “ပေႃးပဵၼ်ၼႆတိူင်ႇဝႃႈၵတိဢွၼ်တၢင်းတႃႉ။” ဝႃႈၼင်ႇၼႆလႄႈ ဢေးသေႃး၊ ၵေႃႈတိူင်ႇဝႃႈၵတိသေယဝ်ႉ၊ဢဝ်ဢရႃႇလုၵ်ႈတူၼ်ႈမၼ်းဢၢပ်ႈပၼ်တီႈ ယႃႇၵုပ်ႈ၊ သေဢေႃႈ။-
ၵမ်းၼၼ်ႉ၊ ယႃႇၵုပ်ႈ၊ ဢဝ်ၶဝ်ႈမုၼ်းၵမ်ႈၽွင်ႈ ဢိၵ်ႇတင်းၽၵ်းၼမ်ႉထူဝ်ႇၼၼ်ႉပၼ်လႄႈ ဢေးသေႃး၊ ၵေႃႈၵိၼ်ယဝ်ႉသူတ်ႉယဝ်ႉၸင်ႇဢွၵ်ႇၵႂႃႇဢေႃႈ။ လွင်ႈတၢင်းၼႆႉ ပဵၼ်လွင်ႈဢၼ် ဢေးသေႃး၊ ဝႆႉမဝ်မၢင်တီႈဢရႃႇလုၵ်ႈတူၼ်ႈမၼ်းထၼ်ႇႁိုဝ်ၼၼ်ႉဢေႃႈ။
ဝၢႆးသေတၢင်းဢၼ်ၶဝ်ႈၵႃႈမၢၵ်ႇပႅင်းဢၼ်ယၢမ်ႈပဵၼ်ၼႂ်းၸူဝ်ႈပၢၼ် ဢႃႇပြႃႇႁၢမ်ႇ၊ ၵႃႈတီႈမိူင်းၶဝ်ၼၼ်ႉသမ်ႉၶိုၼ်းပဵၼ်ထႅင်ႈလႄႈ ဢိၸၢၵ်ႈ၊ ၵႂႃႇၸူး ဢၽိမလႅၵ်ႉ၊ ၶုၼ်ႁေႃၶမ်းၵူၼ်းမဵဝ်း ၽိလိတ်ႉတိ၊ ၵႃႈၼႂ်းဝဵင်း ၵေႇရႃႇ၊ ပုၼ်ႉဢေႃႈ။-
ထႃႇဝရႃႉၽြႃး၊ ပေႃႇမႃးၵႃႈတီႈမၼ်းလႄႈလၢတ်ႈဝႃႈ၊ “မႂ်းယႃႇပေၵႂႃႇမိူင်း ဢေးၵျိပ်ႉ၊ ပုၼ်ႉ။ ယူႇသဝ်းၵႃႈတီႈမိူင်းဢၼ်ၵဝ်လၢတ်ႈႁႂ်ႈမႂ်းယူႇၼႆႉတႃႉ။-
ယူႇသဝ်းၵႃႈတီႈမိူင်းၼႆႉတႃႉ။ ၵဝ်တၵ်းမီးယူႇလူၺ်ႈၵၼ်တင်းမႂ်းလႄႈပၼ်တၢင်းလီမၢင်ႇၵလႃႇတီႈမႂ်းဢေႃႈ။ ၵဝ်တၵ်းဢဝ်မိူင်းၼႆႉတင်းသဵင်ႈတင်းမူတ်းပၼ်တီႈမႂ်းဢိၵ်ႇတင်းၸိူဝ်ႉၶိူဝ်းမႂ်းဢေႃႈ။ လွင်ႈမၼ်းၸမ်ႉ၊ၵႂၢမ်းၵတိဢၼ်ၵဝ်တိူင်ႇဝႃႈဝႆႉတီႈပေႃႈမႂ်း ဢႃႇပြႃႇႁၢမ်ႇ၊ ၼၼ်ႉၵဝ်တၵ်းႁႂ်ႈတႄႇယူႇဢေႃႈ။-
ၵဝ်တၵ်းႁႂ်ႈၸိူဝ်ႉၶိူဝ်းမႂ်းၼမ်ၵိုၼ်းမိူၼ်ၸိူဝ်ႉၼင်ႇလၢဝ်ၵၢင်ႁၢဝ်လႄႈမိူင်းၼႆႉတင်းသဵင်ႈတင်းမူတ်းၵေႃႈၵဝ်တၵ်းပၼ်ၸိူဝ်ႉၶိူဝ်းမႂ်းဢေႃႈ။ ၵွပ်ႈလူၺ်ႈၸိူဝ်ႉၶိူဝ်းမႂ်းၼၼ်ႉၵူၼ်းမဵဝ်းတင်းလၢႆတၵ်းဢွၼ်ၵၼ်လႆႈၶၢမ်ႇတၢင်းလီမၢင်ႇၵလႃႇဢေႃႈ။-
ၵွပ်ႈပိူဝ်ႈ ဢႃႇပြႃႇႁၢမ်ႇ၊ ထွမ်ႇဢဝ်ၵႂၢမ်းၵဝ်လႄႈၵမ်ၵျၢင်ႉၸွမ်းၼႄးဢုပတေႇၵဝ်၊ဢိၵ်ႇတင်းပိင်းၺၢပ်ႈတြႃးၵဝ်ၼၼ်ႉလႄႈၵဝ်တၵ်းပၼ်တၢင်းလီတီႈမႂ်းဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ဢိၸၢၵ်ႈ၊ ယူႇသဝ်းၵႃႈတီႈဝဵင်း ၵေႇရႃႇ၊ သေဢေႃႈ။-
မိူဝ်ႈဢၼ်ပိူၼ်ႈတွင်ႈထၢမ်မၼ်းလွင်ႈမေးမၼ်းၸိုင်၊မၼ်းဢမ်ႇႁတ်းဝႃႈပဵၼ်မေးမၼ်းလႄႈမၼ်းမွၵ်ႇပိူၼ်ႈဝႃႈပဵၼ်ၼွင်ႉယိင်းမၼ်းဝႃႈၼႆၼၼ်ႉၵွပ်ႈပိူဝ်ႈမၼ်းၵူဝ်ပိူၼ်ႈတၵ်းဢဝ်မၼ်းတၢႆလႄႈသိမ်းဢဝ် ရေႇပႅၵ်ႉၵႃႉ၊ ဢၼ်ႁၢင်ႈလီၼႃႇၼၼ်ႉဢေႃႈ။-
မိူဝ်ႈဢၼ်မၼ်းယူႇသဝ်းၵႃႈတီႈၼၼ်ႈႁိုင်တၢၼ်ႇတၢၼ်ႇယဝ်ႉၸိုင်၊ဝၼ်းၼိုင်ႈၶုၼ်ႁေႃၶမ်း ဢၽိမလႅၵ်ႉ၊ ယူႇတီႈႁူးလၢင်းတဵၼ်သေမုင်ႈႁၼ် ဢိၸၢၵ်ႈ၊ ယွၵ်ႇလဵၼ်ႈၵၼ်တင်းမေးမၼ်း ရေႇပႅၵ်ႉၵႃႉ၊ ယူႇၼၼ်ႉဢေႃႈ။-
ၶုၼ်ႁေႃၶမ်း ဢၽိမလႅၵ်ႉ၊ ၸင်ႇႁွင်ႉဢဝ် ဢိၸၢၵ်ႈ၊ မႃးလႄႈဝႃႈ၊ “ ရေႇပႅၵ်ႉၵႃႉ၊ ပဵၼ်မေးမႂ်းတႄႉတႄႉလႄႈႁဵတ်းသင်မႂ်းဝႃႈပဵၼ်ၼွင်ႉယိင်းမႂ်းၸိူဝ်ႉၼင်ႇႁိုဝ်။” ဝႃႈၼင်ႇၼႆဢေႃႈ။ ဢိၸၢၵ်ႈ၊ ၵေႃႈၶိုၼ်းလၢတ်ႈလႄႈဝႃႈ၊ “ၵဝ်ၶႃႈထၢင်ႇဝႃႈ၊ပေႃးၵဝ်ၶႃႈလၢတ်ႈဝႃႈ၊ပဵၼ်မေးၵဝ်ၶႃႈဝႃႈၼႆၸိုင်၊ၵဝ်ၶႃႈတၵ်းလႆႈတၢႆဢေႃႈ၊” ဝႃႈၼင်ႇၼႆဢေႃႈ။-
ၶုၼ်ႁေႃၶမ်း ဢၽိမလႅၵ်ႉ၊ ၵေႃႈဝႃႈ၊ “မႂ်းပႅတ်ႉလႅၼ်ႁဝ်းထၼ်ႇၼႆႉႁိုဝ်း။ ပေႃးၵူၼ်းၵဝ်သေၵေႃႉၵေႃႉဢမ်ႇဝႆႉသတိလႄႈၼွၼ်းမႅၼ်ႈလူၺ်ႈၵၼ်တင်းမေးမႂ်းၸိုင်၊မႂ်းႁဵတ်းႁႂ်ႈဢပျတ်ႈတူၵ်းႁွတ်ႈၵႃႈၼိူဝ်ႁဝ်းယဝ်ႉ၊” ဝႃႈၼင်ႇၼႆသေယဝ်ႉ၊-
ၶုၼ်ႁေႃၶမ်း ဢၽိမလႅၵ်ႉ၊ ၸင်ႇပၼ်သတိတီႈၵူၼ်းမၼ်းၵူႈၵေႃႉလႄႈဝႃႈ၊ “ၵေႃႉဢၼ်ၽိတ်းပိူင်ႈၶဝ်သွင်ၵေႃႉၽူဝ်မေးၼႆႉတၵ်းလႆႈၶၢမ်ႇတၢမ်ႇတၢႆဢေႃႈ၊” ဝႃႈၼင်ႇၼႆဢေႃႈ။
ဢိၸၢၵ်ႈ၊ ဝၢၼ်ႇၸိူဝ်ႉဝၢၼ်ႇၽၼ်းၵႃႈတီႈမိူင်းၼၼ်ႉလႄႈၼႂ်းပီၼၼ်ႉမၼ်းလႆႈပၢတ်ႇဢဝ်သိမ်းဢဝ်ပၢၵ်ႇပုၼ်ႈၵွပ်ႈပိူဝ်ႈ ထႃႇဝရႃႉၽြႃး၊ ပၼ်တၢင်းလီတီႈမၼ်းဢေႃႈ။-
မၼ်းၶိုၼ်ႈယႂ်ႇမႂ်ႇသုင်မႃးတိၵ်းတိၵ်းလႄႈပဵၼ်သထေးမႃးဢေႃႈ။-
ပိူဝ်ႈဢၼ်မၼ်းမီးၽုင်သူဝ်း၊ၽုင်ပႄႉ၊ၽုင်ဝူဝ်း၊ဢိၵ်ႇတင်းၶႃႈၵူၼ်းၸႂ်ႉမၼ်းၼမ်ၵိုၼ်းမႃးၼႃႇလူင်လၢင်ၼၼ်ႉလႄႈၵူၼ်းမဵဝ်း ၽိလိတ်ႉတိ၊ ၶဝ်ငိၼ်းၶွႆမၼ်းၼႃႇလႄႈ၊-
ၼမ်ႉမေႃႇၸဵမ်မိူဝ်ႈၸူဝ်ႈပၢၼ်ၵူၼ်းၸႂ်ႉပေႃႈမၼ်း ဢႃႇပြႃႇႁၢမ်ႇ၊ ၶုတ်းဝႆႉၸိူဝ်းၼၼ်ႉၵေႃႈၶဝ်ဢဝ်လိၼ်ထူမ်ပႅတ်ႈၵူႈမေႃႇဢေႃႈ။
မိူဝ်ႈၼၼ်ႉၶုၼ်ႁေႃၶမ်း ဢၽိမလႅၵ်ႉ၊ လၢတ်ႈတီႈ ဢိၸၢၵ်ႈ၊ လႄႈဝႃႈ၊ “မႂ်းၼႆႉတၼ်းၶူဝ်းယႂ်ႇသေႁဝ်းယဝ်ႉ။ ဢွၵ်ႇသေမိူင်းႁဝ်းၵႂႃႇတႃႉ၊” ဝႃႈၼင်ႇၼႆလႄႈ၊-
ဢိၸၢၵ်ႈ၊ ၵေႃႈဢွၵ်ႇဝဵင်းၼၼ်ႉၵႂႃႇတႄႇတင်ႈသုမ်ႉထဵင်ၵႃႈတီႈပၢင်ႇႁူၺ်ႈ ၵေႇရႃႇ၊ သေလႄႈယူႇတီႈၼၼ်ႈႁိုင်ဝႆႉတၢၼ်ႇတၢၼ်ႇဢေႃႈ။-
ၼမ်ႉမေႃႇၸိူဝ်းဢၼ်ၶုတ်းဝႆႉၸဵမ်မိူဝ်ႈၸူဝ်ႈပၢၼ် ဢႃႇပြႃႇႁၢမ်ႇ၊ ဢၼ်ၵူၼ်းမဵဝ်း ၽိလိတ်ႉတိ၊ ၶဝ်ထူမ်ပႅတ်ႈၸိူဝ်းၼၼ်ႉ ဢိၸၢၵ်ႈ၊ သမ်ႉၶိုၼ်းမႄးၶုတ်းသေယဝ်ႉ၊ၶိုၼ်းပၼ်ၸိုဝ်ႈပၼ်သဵင်ဢၼ်ပေႃႈမၼ်းယၢမ်ႈႁွင်ႉႁဵၵ်ႈမိူဝ်ႈဢွၼ်တၢင်းၼၼ်ႉဢေႃႈ။
ၶႃႈၵူၼ်းၸႂ်ႉ ဢိၸၢၵ်ႈ၊ ၸိူဝ်းၼၼ်ႉၶုတ်းၼမ်ႉမေႃႇမေႃႇၼိုင်ႈၵႃႈတီႈပၢင်ႇႁူၺ်ႈၼၼ်ႉလႄႈထူပ်းၺႃးၼမ်ႉဢွၵ်ႇႁူးဢေႃႈ။-
ၵူၼ်းလဵင်ႉသတ်းၵူၼ်းဝဵင်း ၵေႇရႃႇ၊ ၶဝ်ႁိမ်ၵၼ်တင်းၵူၼ်းလဵင်ႉသတ်း ဢိၸၢၵ်ႈ၊ ၸိူဝ်းၼၼ်ႉလႄႈလၢတ်ႈဝႃႈ၊ “ၼမ်ႉၼႆႉပဵၼ်ၼမ်ႉႁဝ်းဢိူဝ်း၊” ဝႃႈၼင်ႇၼႆလႄႈ၊ ဢိၸၢၵ်ႈ၊ ႁွင်ႉႁဵၵ်ႈၼမ်ႉမေႃႇၼၼ်ႉၸိုဝ်ႈဝႃႈ၊ ဢေးသိၵ်ႉ၊ ဢၼ်ပွင်ႇဝႃႈ၊ႁိမ်ႁူင်ႇၵၼ်ဢေႃႈ။
ၶႃႈၵူၼ်းၸႂ်ႉ ဢိၸၢၵ်ႈ၊ သမ်ႉၶုတ်းထႅင်ႈၼမ်ႉမေႃႇတၢင်ႇမေႃႇဢေႃႈ။ ၼမ်ႉမေႃႇၼၼ်ႉၵေႃႈၶဝ်ယင်းမႃးႁိမ်ထႅင်ႈလႄႈမၼ်းႁွင်ႉႁဵၵ်ႈၸိုဝ်ႈဝႃႈ၊ သိတၼႃႉ၊ ဢၼ်ပွင်ႇဝႃႈ၊ဝႆႉတၢင်းၽိတ်းတေႃႇၵၼ်၊ဝႃႈၼႆဢေႃႈ။-
မၼ်းသမ်ႉၶၢႆႉၵႂႃႇၶုတ်းထႅင်ႈၼမ်ႉမေႃႇတၢင်ႇမေႃႇလႄႈၵမ်းၼႆႉဢမ်ႇမီးၵေႃႉႁိမ်ၵေႃႉၵဝ်းယဝ်ႉၸင်ႇမၼ်းႁွင်ႉႁဵၵ်ႈၸိုဝ်ႈဝႃႈ၊ ရႁေႃႇၽူတ်ႉ၊ ဢၼ်ပွင်ႇဝႃႈ၊လွတ်ႈလႅဝ်း၊သေလႄႈလၢတ်ႈဝႃႈ၊ “ၵမ်းၼႆႉ ထႃႇဝရႃႉၽြႃး၊ ပၼ်ႁႂ်ႈႁဝ်းယူႇလူင်ႉလီလွတ်ႈလီၵႃႈၼႂ်းမိူင်းၼႆႉယဝ်ႉ။ ႁဝ်းတၵ်းလႆႈလီလႆႈပဵၼ်ၶိုၼ်ႈယႂ်ႇမႂ်ႇသုင်ၼႃႇလူင်လၢင်ယဝ်ႉ၊” ဝႃႈၼင်ႇၼႆဢေႃႈ။
လိုၼ်းၼၼ်ႉ၊ ဢိၸၢၵ်ႈ၊ ၶၢႆႉဢွၵ်ႇသေၵႃႈတီႈၼၼ်ႈသေယဝ်ႉ၊သမ်ႉၵႂႃႇၸူးတီႈ ပေႇရသေးၽႃႉ၊ ဢေႃႈ။-
ၶိုၼ်းၼၼ်ႉ၊ ထႃႇဝရႃႉၽြႃး၊ ပေႃႇမႃးၵႃႈတီႈမၼ်းလႄႈလၢတ်ႈဝႃႈ၊ “ၵဝ်ပဵၼ်ၽြႃးပေႃႈမႂ်း ဢႃႇပြႃႇႁၢမ်ႇ၊ ဢေႃႈ။ ယႃႇပေမႆႈၸႂ်ၵႃႈသင်ၵဝ်မီးယူႇၽၢႆႇမႂ်းဢေႃႈ။ ၵဝ်တၵ်းပၼ်တၢင်းလီတီႈမႂ်းလႄႈႁႂ်ႈၸိူဝ်ႉၶိူဝ်းမႂ်းယႂ်ႇၽႄၼမ်ၵိုၼ်းမႃးၵွပ်ႈပိူဝ်ႈၵတိၵဝ်ဢၼ်ဝႆႉၵႃႈတီႈၶႃႈၵဝ် ဢႃႇပြႃႇႁၢမ်ႇ၊ ၼၼ်ႉဢေႃႈ၊” ဝႃႈၼင်ႇၼႆဢေႃႈ။-
ဢိၸၢၵ်ႈ၊ တႄႇႁဵတ်းၶဵင်ႇတၢင်းလူႇၵႃႈတီႈၼၼ်ႈလႄႈဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ဢေႃႈ။ မၼ်းၶျႃးတီႈယူႇတၼ်းသဝ်းသေႇၶျႃႇလီငၢမ်းယဝ်ႉလႄႈ၊ၶႃႈၵူၼ်းၸႂ်ႉမၼ်းတင်းလၢႆၶုတ်းၼမ်ႉမေႃႇထႅင်ႈဢေႃႈ။
မိူဝ်ႈၼၼ်ႉ၊ၶုၼ်ႁေႃၶမ်း ဢၽိမလႅၵ်ႉ၊ ႁွင်ႉဢဝ် ဢႁုၸတ်ႉ၊ ၵေႃႉသႄႈမၼ်းဢိၵ်ႇတင်း ၽိၵေႃးလႃႉ၊ ၸဝ်ႈၵွၼ်းတပ်ႉသိုၵ်းလူင်မၼ်းသေယဝ်ႉ၊လုၵ်ႉတီႈဝဵင်း ၵေႇရႃႇ၊ ၵႂႃႇၸူးတီႈ ဢိၸၢၵ်ႈ၊ ဢေႃႈ။-
ဢိၸၢၵ်ႈ၊ ၵေႃႈထၢမ်ဝႃႈ၊ “သူၶၢၼ်ႉႁၼ်ၵဝ်လႄႈ၊ယင်းႁေႃႈၵဝ်ဢွၵ်ႇမိူင်းသူမႃးယဝ်ႉ။ ႁဵတ်းသင်လႄႈသူမႃးၸူးၵဝ်၊” ဝႃႈၼင်ႇၼႆလႄႈ၊
ၶဝ်ၵေႃႈလၢတ်ႈလႄႈဝႃႈ၊ “ႁဝ်းႁုဝႃႈ၊ ထႃႇဝရႃႉၽြႃး၊ မီးယူႇၽၢႆႇမႂ်းတႄႉယဝ်ႉလႄႈ၊ႁဝ်းထၢင်ႇဝႃႈထုၵ်ႇလီမီးၵႂၢမ်းသဵတ်ႈၸႃႇတေႃႇၵၼ်ၼႂ်းဝူင်ႈၵၢင်ႁဝ်းဢေႃႈ။ ႁဝ်းၶႂ်ႈႁႂ်ႈမႂ်းဝႆႉၵတိ၊-
လွင်ႈဢၼ်မႂ်းတေဢမ်ႇယႃႉဢမ်ႇၵဝ်းႁဝ်းမိူၼ်ၸိူဝ်ႉၼင်ႇဢၼ်ႁဝ်းဢမ်ႇတိူဝ်ႉဢမ်ႇၶိူၵ်ႈမႂ်း၊ယင်းႁဵတ်းၵျေးၸူးလႄႈပွႆႇမႂ်းၵႂႃႇၼိမ်ၼိမ်လီလီၼၼ်ႉဢေႃႈ။ တေႃႈလဵဝ်ၼႆႉမႂ်းပဵၼ်ၵေႃႉဢၼ် ထႃႇဝရႃႉၽြႃး၊ ပၼ်တၢင်းလီမၢင်ႇၵလႃႇဢမၢၼ်ႇၶၼ်ပဵၼ်ယဝ်ႉ၊” ဝႃႈၼင်ႇၼႆဢေႃႈ။-
ဢိၸၢၵ်ႈ၊ ၵေႃႈႁႅၼ်းပၼ်ပွႆးၵိၼ်ပွႆးသူတ်ႉပုၼ်ႈၶဝ်လႄႈၶဝ်ဢွၼ်ၵၼ်ၵိၼ်သူတ်ႉသေဢေႃႈ။-
ၶိင်ႇၵၢင်ၼႂ်ၸဝ်ႉၸဝ်ႉၶဝ်လုၵ်ႉလႄႈၵေႃႉၼိုင်ႈလႄႈၵေႃႉၼိုင်ႈၼင်ႇၵၼ်ၵၼ်ႁဵတ်းၵတိသဵတ်ႈၸႃႇတီႈၵၼ်သေယဝ်ႉ၊ ဢိၸၢၵ်ႈ၊ သူင်ႇၶဝ်မိူဝ်းၵႂႃႇၼိမ်ၼိမ်လီလီလႄႈၶဝ်ၵေႃႈဢွၵ်ႇၶိုၼ်းမိူဝ်းၵႂႃႇၼိမ်ၼိမ်လီလီဢေႃႈ။
ၼႂ်းဝၼ်းၼၼ်ႉၶႃႈၵူၼ်းၸႂ်ႉ ဢိၸၢၵ်ႈ၊ ၸိူဝ်းၼၼ်ႉမႃးမွၵ်ႇလၢတ်ႈမၼ်းလွင်ႈၼမ်ႉမေႃႇဢၼ်ၶဝ်ၶုတ်းၼၼ်ႉလႄႈဝႃႈ၊ “ႁဝ်းထူပ်းၺႃးၼမ်ႉယဝ်ႉ၊” ဝႃႈၼင်ႇၼႆဢေႃႈ။-
မၼ်းႁွင်ႉႁဵၵ်ႈၸိုဝ်ႈၼမ်ႉမေႃႇၼၼ်ႉဝႃႈ၊ သေးၽႃႉ၊ ပွင်ႇဝႃႈ၊ “တီႈဢၼ်ဝႆႉၵတိ” ဝႃႈၼႆဢေႃႈ။ ပိူဝ်ႈၼႆၸင်ႇႁွင်ႉႁဵၵ်ႈဝႃႈ၊ဝဵင်း ပေႇရသေးၽႃႉ၊ ႁၢၼ်ႉတေႃဝၼ်းမိူဝ်ႈၼႆႉဢေႃႈ။
မိူဝ်ႈဢၼ် ဢေးသေႃး၊ လႆႈဢသၢၵ်ႈသီႇသိပ်းပီၼၼ်ႉမၼ်းဢဝ်မေးၼႂ်းၵူၼ်းမဵဝ်း ႁိတ်ႉတိ၊ ၶဝ်သွင်ၵေႃႉ၊ဢၼ်ပဵၼ် ယုတိတ်ႉ၊ လုၵ်ႈယိင်း ပေႇရိ၊ ဢိၵ်ႇတင်း ပႃႇသမတ်ႉ၊ လုၵ်ႈယိင်း ဢေႇလုၼ်ႇ၊ ဢေႃႈ။-
ၶဝ်သွင်ၵေႃႉၼၼ်ႉပဵၼ်လုၵ်ႈပႂ်ႉဢၼ်ႁဵတ်းႁႂ်ႈ ဢိၸၢၵ်ႈ၊ ဢိၵ်ႇတင်း ရေႇပႅၵ်ႉၵႃႉ၊ မႆႈၸႂ်ယၢပ်ႇၸႂ်ဢေႃႈ။
မိူဝ်ႈၼၼ်ႉ၊ ဢိၸၢၵ်ႈ၊ ထဝ်ႈၼႃႇယဝ်ႉလႄႈတႃမူဝ်းထၢၼ်ႈပေႃးဢမ်ႇႁၼ်လႆႈ။ မၼ်းႁွင်ႉလုၵ်ႈၸၢႆးတူၼ်ႈမၼ်း ဢေးသေႃး၊ လႄႈဝႃႈ၊ “လုၵ်ႈၸၢႆးၵဝ်႟၊” ဝႃႈၼႆလႄႈ၊ ဢေးသေႃး၊ ၵေႃႈၶိုၼ်းတွပ်ႇလႄႈဝႃႈ၊ “ဢေႃႈတီႈၶႃႈ၊” ဝႃႈၼင်ႇၼႆဢေႃႈ။
ဢိၸၢၵ်ႈ၊ လၢတ်ႈလႄႈဝႃႈ၊ “တေႃႈလဵဝ်ၵဝ်ထဝ်ႈၼႃႇယဝ်ႉ။ တေတၢႆဝၼ်းလႂ်ၵေႃႈဢမ်ႇႁု။-
ၸူဝ်ႈဢၼ်ၵဝ်ဢမ်ႇပႆႇတၢႆၼႆႉၼင်ႇႁိုဝ်ၵဝ်တေလႆႈပၼ်မၢင်ႇၵလႃႇတၢင်းလီတီႈမႂ်းၸိုင်၊-
မႂ်းဢဝ်ၵၢင်ႇတင်းပိုၼ်ၵၢင်ႇမႂ်းၵႂႃႇယိုဝ်းတူဝ်ထိူၼ်ႇမႃးသေလႄႈႁုင်ၽၵ်းၼိူဝ်ႉဝၢၼ်ဝၢၼ်ဢၼ်ၵဝ်မၵ်ႉၼၼ်ႉလဵင်ႉၵဝ်တႃႉ၊” ဝႃႈၼင်ႇၼႆဢေႃႈ။
ယၢမ်းမိူဝ်ႈဢၼ် ဢိၸၢၵ်ႈ၊ လၢတ်ႈတေႃႇ ဢေးသေႃး၊ ယူႇၼၼ်ႉ ရေႇပႅၵ်ႉၵႃႉ၊ လႆႈငိၼ်းသေယဝ်ႉ၊ဝၢႆးသေ ဢေးသေႃး၊ ဢွၵ်ႇၵႂႃႇလႄႇထိူၼ်ႇႁႂ်ႈလႆႈတူဝ်ထိူၼ်ႇၼၼ်ႉ၊-
မၼ်းလၢတ်ႈတီႈ ယႃႇၵုပ်ႈ၊ လႄႈဝႃႈ၊ “ၵဝ်လႆႈငိၼ်းပေႃႈမႂ်းလၢတ်ႈတီႈပီႈဢၢႆႈမႂ်း ဢေးသေႃး၊ လႄႈဝႃႈ၊-
‘ၵႂႃႇယိုဝ်းတူဝ်ထိူၼ်ႇမႃးႁုင်လဵင်ႉပေႃႈတႃႉ။ ပေႃးၵဝ်ၵိၼ်ယဝ်ႉၸင်ႇ၊ၸူဝ်ႈၵဝ်ယင်းဢမ်ႇပႆႇတၢႆၼႆႉၵဝ်တေပၼ်တၢင်းလီတီႈမႂ်းၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢေႃႈ၊’ ဝႃႈၼႆယဝ်ႉ။-
လုၵ်ႈၸၢႆးမႄႈ၊ထွမ်ႇလႄႈႁဵတ်းၸွမ်းၵႂၢမ်းၵဝ်တႃႉ။-
ၵႂႃႇၵႃႈတီႈၽုင်ပႄႉလႄႈလိူၵ်ႈဢဝ်မႃးတူဝ်ပီးလီမၼ်းလီသွင်တူဝ်တႃႉ။ ၵဝ်တေႁုင်ပၼ်ၽၵ်းၼိူဝ်ႉဝၢၼ်ဝၢၼ်ဢၼ်ပေႃႈမႂ်းမၵ်ႉၼႃႇၼၼ်ႉဢေႃႈ။-
မႂ်းဢဝ်ၵႂႃႇပၼ်ႁႂ်ႈပေႃႈမႂ်းၵိၼ်တႃႉ။ မၼ်းတေပၼ်မၢင်ႇၵလႃႇတၢင်းလီတီႈမႂ်းၸူဝ်ႈဢၼ်မၼ်းဢမ်ႇပႆႇတၢႆၼၼ်ႉဢေႃႈ၊” ဝႃႈၼင်ႇၼႆဢေႃႈ။
ယႃႇၵုပ်ႈ၊ ၶိုၼ်းလၢတ်ႈတီႈမႄႈမၼ်းလႄႈဝႃႈ၊ “မႄႈ႟။ ပီႈ ဢေးသေႃး၊ ပဵၼ်ၵေႃႉဢၼ်မီးၶူၼ်လႄႈၵဝ်ၶႃႈၸမ်ႉ၊ၼိူဝ်ႉၼင်မိုၼ်ႈလီၶျေႃးလီဝႆႉၶႃႈဢေႃႈ။-
ပေႃႈႁဝ်းၸၢင်ႈၶႄးတၵ်းလုပ်ႈၵမ်းတူၺ်းလႄႈႁုႁၼ်တၢင်းဢၼ်ၵဝ်ၶႃႈပႅတ်ႉလႅၼ်ဢေႃႈ။ ပေႃးပဵၼ်ၼႆၸိုင်၊ယႃႇဝႃႈတေလႆႈတၢင်းလီမၢင်ႇၵလႃႇလႄႈတေလႆႈဢႃႉမၢင်ႇၵလႃႇဢၼ်ၵိၼ်ႇဝႃႈၼၼ်ႉၵူၺ်းဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊မႄႈမၼ်းသမ်ႉလၢတ်ႈလႄႈဝႃႈ၊ “လုၵ်ႈၸၢႆးမႄႈ႟။ ဢႃႉမၢင်ႇၵလႃႇဢၼ်ၵိၼ်ႇဝႃႈၸိူဝ်ႉၼင်ႇႁိုဝ်ၵေႃႈႁႂ်ႈတူၵ်းႁွတ်ႈၵႃႈၼိူဝ်ၵဝ်တႃႉ။ ၵူၺ်းႁဵတ်းၸွမ်းၵႂၢမ်းၵဝ်လႄႈၵႂႃႇဢဝ်ပႄႉသွင်တူဝ်မႃးပၼ်ၵဝ်တႃႉ၊” ဝႃႈၼင်ႇၼႆဢေႃႈ။-
ၵွပ်ႈၼႆလႄႈ ယႃႇၵုပ်ႈ၊ ၵႂႃႇဢဝ်ပႄႉသွင်တူဝ်မႃးပၼ်မႄႈမၼ်းလႄႈ၊မႄႈမၼ်းၵေႃႈၶိုင်ပွင်ႁဵတ်းၽၵ်းၼိူဝ်ႉဝၢၼ်ဝၢၼ်ဢၼ်ပေႃႈမၼ်းမၵ်ႉၼၼ်ႉဢေႃႈ။-
မိူဝ်ႈၼၼ်ႉ ရေႇပႅၵ်ႉၵႃႉ၊ ဢဝ်သိူဝ်ႈ ဢေးသေႃး၊ ဢၼ်လီၼႃႇလူင်လၢင်ဢၼ်မီးၼႂ်းႁိူၼ်းၼၼ်ႉၼုင်ႈပၼ် ယႃႇၵုပ်ႈ၊ သေယဝ်ႉ၊-
ဢဝ်ၼင်ပႄႉႁူမ်ႇပၼ်တီႈၶႅၼ်မိုဝ်းတင်းတီႈၶေႃး ယႃႇၵုပ်ႈ၊ တီႈဢၼ်ဢမ်ႇဢွၵ်ႇၶူၼ်ၼၼ်ႉဢေႃႈ။-
ၵမ်းၼၼ်ႉ ဢဝ်ၽၵ်းၼိူဝ်ႉဝၢၼ်ဝၢၼ်ႁႅၼ်းသႂ်ႇပၢၼ်ႉတင်းၶဝ်ႈမုၼ်းဢၼ်မၼ်းႁဵတ်းၼၼ်ႉပၼ်ႁႂ်ႈ ယႃႇၵုပ်ႈ၊ ဢဝ်ၵႂႃႇဢေႃႈ။
ယႃႇၵုပ်ႈ၊ ၵေႃႈၵႂႃႇၸူးပေႃႈမၼ်းသေယဝ်ႉႁွင်ႉလႄႈဝႃႈ၊ “ပေႃႈ႟၊” ဝႃႈၼင်ႇၼႆလႄႈ၊ ပေႃႈမၼ်းၶိုၼ်းဢိူဝ်လႄႈဝႃႈ၊ “မႂ်းပဵၼ်လုၵ်ႈၸၢႆးၵေႃႉလႂ်၊” ဝႃႈၼင်ႇၼႆဢေႃႈ။
ယႃႇၵုပ်ႈ၊ ၵေႃႈလၢတ်ႈလႄႈဝႃႈ၊ “ၵဝ်ၶႃႈပဵၼ်လုၵ်ႈၸၢႆးတူၼ်ႈပေႃႈႁဝ်း ဢေးသေႃး၊ ဢေႃႈ။ ၵႃႈၼင်ႇဢၼ်ပေႃႈႁဝ်းသင်ႇလၢတ်ႈၼၼ်ႉၵဝ်ၶႃႈႁဵတ်းမႃးၶႃႈယဝ်ႉ။ လုၵ်ႉလႄႈၵိၼ်ၼိူဝ်ႉတူဝ်ထိူၼ်ႇဢၼ်ၵဝ်ၶႃႈႁႅၼ်းမႃးၼႆႉသေယဝ်ႉ၊ပၼ်တၢင်းလီတီႈၵဝ်ၶႃႈသေၵမ်းၶႃႈ၊” ဝႃႈၼင်ႇၼႆဢေႃႈ။
ဢိၸၢၵ်ႈ၊ ထၢမ်လႄႈဝႃႈ၊ “လုၵ်ႈၸၢႆးပေႃႈ႟။ သင်သမ်ႉပႄႉၸဵဝ်းလႆႈမႃးဝႆးထၼ်ႇၼႆႉ၊” မိူဝ်ႈဢၼ်ဝႃႈၼင်ႇၼႆၸိုင်၊ ယႃႇၵုပ်ႈ၊ ၶိုၼ်းလၢတ်ႈလႄႈဝႃႈ၊ “ ထႃႇဝရႃႉၽြႃး၊ ၽြႃးပဵၼ်ၸဝ်ႈပေႃႈႁဝ်းၼၼ်ႉၸွႆႈထႅမ်လႄႈၵဝ်ၶႃႈၸဵဝ်းလႆႈမႃးၶႃႈဢေႃႈ၊” ဝႃႈၼင်ႇၼႆဢေႃႈ။
ဢိၸၢၵ်ႈ၊ ၸင်ႇလၢတ်ႈတီႈ ယႃႇၵုပ်ႈ၊ လႄႈဝႃႈ၊ “သုတ်ႉၸမ်မႃးႁႂ်ႈပေႃႈလႆႈလုပ်ႈၵမ်းတူၺ်းလူး။ ၸွင်ႇၸႂ်ႈ ဢေးသေႃး၊ တႄႉႁိုဝ်း၊” ဝႃႈၼင်ႇၼႆသေယဝ်ႉ၊-
ယႃႇၵုပ်ႈ၊ ၵေႃႈသုတ်ႉၸမ်ၵႂႃႇလႄႈ၊ပေႃႈမၼ်းလုပ်ႈၵမ်းတူၺ်းယဝ်ႉၸင်ႇလၢတ်ႈလႄႈဝႃႈ၊ “သဵင်မႂ်းပဵၼ်သဵင် ယႃႇၵုပ်ႈ၊ လႄႈ မိုဝ်းမႂ်းတႄႉပဵၼ်မိုဝ်း ဢေးသေႃး၊ ယဝ်ႉ၊” ဝႃႈၼင်ႇၼႆဢေႃႈ။-
ၵွပ်ႈပိူဝ်ႈမိုဝ်းမၼ်းမီးၶူၼ်မိူၼ် ဢေးသေႃး၊ ဝႆႉလႄႈ၊ပေႃႈမၼ်းယင်းဢမ်ႇႁုသၢႆငၢႆလွင်ႈဢၼ်ပဵၼ် ယႃႇၵုပ်ႈ၊ ၼၼ်ႉလႄႈဢၢင်ႈတၵ်းပၼ်တၢင်းလီဢေႃႈ။-
ၵူၺ်းၵႃႈ၊သမ်ႉထၢမ်ထႅင်ႈလႄႈဝႃႈ၊ “ၸွင်ႇၸႂ်ႈ ဢေးသေႃး၊ တႄႉႁိုဝ်း၊” ဝႃႈၼင်ႇၼႆလႄႈ၊ ယႃႇၵုပ်ႈ၊ ၵေႃႈၶိုၼ်းလၢတ်ႈဝႃႈ၊ “ၸႂ်ႈတႄႉၶႃႈဢေႃႈ၊” ဝႃႈၼင်ႇၼႆဢေႃႈ။
ဢိၸၢၵ်ႈ၊ ၸင်ႇလၢတ်ႈလႄႈဝႃႈ၊ “ဢဝ်ၽၵ်းၼိူဝ်ႉတမ်းပၼ်ၵဝ်တႃႉ။ ဝၢႆးသေၵိၼ်ယဝ်ႉၸိုင်၊ပေႃႈတေပၼ်တၢင်းလီတီႈမႂ်းဢေႃႈ၊” ဝႃႈၼင်ႇၼႆယဝ်ႉၸင်ႇ၊ ယႃႇၵုပ်ႈ၊ ဢဝ်တမ်းပၼ်ႁိမ်းပေႃႈမၼ်းလႄႈ ပေႃႈမၼ်းၵေႃႈၵိၼ်သေယဝ်ႉ၊ၼမ်ႉမၢၵ်ႇၸပိတ်ႉၵေႃႈဢဝ်ပၼ်လႄႈပေႃႈမၼ်းၵေႃႈၵိၼ်ဢေႃႈ။-
လိုၼ်းၼၼ်ႉပေႃႈမၼ်းလၢတ်ႈတီႈမၼ်းလႄႈဝႃႈ၊ “လုၵ်ႈၸၢႆးၵဝ်႟။ သုတ်ႉမႃးလႄႈၼူမ်ၵဝ်တႃႉ။” မိူဝ်ႈဢၼ်ဝႃႈၼင်ႇၼႆၸိုင်၊-
ယႃႇၵုပ်ႈ၊ သုတ်ႉၸူးလႄႈၼူမ်ပေႃႈမၼ်းဢေႃႈ။ ယၢမ်းၼၼ်ႉပေႃႈမၼ်းလႆႈဢၢႆႁွမ်ၶူဝ်းၼုင်ႈမၼ်းလႄႈ၊ပၼ်တၢင်းလီလႄႈဝႃႈ၊ “တူၺ်းလူး။ ဢၢႆႁွမ်လုၵ်ႈၸၢႆးၵဝ်ၼႆႉ မိူၼ်ၸိူဝ်ႉၼင်ႇဢၢႆႁွမ်တူင်ႈၼႃးဢၼ် ထႃႇဝရႃႉၽြႃး၊ ပၼ်တၢင်းလီၼၼ်ႉဢေႃႈ။-
ပိူဝ်ႈၼႆလႄႈႁႂ်ႈၽြႃးပဵၼ်ၸဝ်ႈပၼ်ၼမ်ႉၼၢႆးၵႃႈတီႈၽႃႉၵၢင်ႁၢဝ်၊ၶွၼ်ႇၼမ်ႉမၼ်းလိၼ်၊ၶဝ်ႈပိူၵ်ႇၶဝ်ႈသၢၼ်၊ဢိၵ်ႇတင်းၼမ်ႉမၢၵ်ႇၸပိတ်ႉၼမ်ၼႃႇတီႈမႂ်းသေၵမ်းလူၺ်ႈ။-
ႁႂ်ႈၸိူဝ်ႉၶိူဝ်းၵူၼ်းတင်းလၢႆလႆႈပဵၼ်ၶႃႈၵူၼ်းၸႂ်ႉမႂ်း၊ႁႂ်ႈမဵဝ်းၵူၼ်းတင်းလၢႆလႆႈၵူမ်ႈႁူဝ်ၵွမ်းႁူဝ်ၵႃႈတီႈၽၢႆႇၼႃႈမႂ်း၊ႁႂ်ႈမႂ်းလႆႈဢုပ်ႉၵႃႈၼိူဝ်ပီႈၼွင်ႉၸိူဝ်ႉၶိူဝ်းမႂ်းလႄႈႁႂ်ႈၸူဝ်ႈလုၵ်ႈပၢၼ်လၢၼ်မႄႈမႂ်းလႆႈၵူမ်ႈၵွမ်းႁူဝ်ၵႃႈတီႈၽၢႆႇၼႃႈမႂ်းသေၵမ်းလူၺ်ႈ။ ႁႂ်ႈၶဝ်ၸိူဝ်းဢၼ်ၵိၼ်ႇဝႃႈမႂ်းတင်းလၢႆၼၼ်ႉလႆႈၶၢမ်ႇတၢင်းၵိၼ်ႇဝႃႈလႄႈႁႂ်ႈၶဝ်ၸိူဝ်းဢၼ်ပၼ်တၢင်းလီတီႈမႂ်းတင်းလၢႆ လႆႈၶၢမ်ႇဢဝ်တၢင်းလီမၢင်ႇၵလႃႇသေၵမ်းလူၺ်ႈ၊” ဝႃႈၼင်ႇၼႆဢေႃႈ။
ၼင်ႇၼၼ်လႄႈ ဢိၸၢၵ်ႈ၊ ပၼ်တၢင်းလီမၢင်ႇၵလႃႇတီႈ ယႃႇၵုပ်ႈ၊ ယဝ်ႉတူဝ်ႈယဝ်ႉလႄႈ၊မိူဝ်ႈဢၼ် ယႃႇၵုပ်ႈ၊ ယင်းတိုၵ်ႉဢွၵ်ႇသေၵႃႈတီႈၽၢႆႇၼႃႈပေႃႈမၼ်းၵႂႃႇယူႇၼၼ်ႉပီႈဢၢႆႈမၼ်း ဢေးသေႃး၊ ၵႂႃႇလႄႇထိူၼ်ႇပွၵ်ႈမႃးၽႅဝ်ႁိူၼ်းၵမ်းလဵဝ်ဢေႃႈ။
မၼ်းၵေႃႈမႃးႁဵတ်းၽၵ်းၼိူဝ်ႉဢၼ်ဝၢၼ်ဝၢၼ်လႄႈ၊ဢဝ်ၵႂႃႇပၼ်တီႈပေႃႈမၼ်းသေယဝ်ႉ၊လၢတ်ႈလႄႈဝႃႈ၊ “ပေႃႈ႟။ လုၵ်ႉလႄႈၵိၼ်ၽၵ်းၼိူဝ်ႉတူဝ်ထိူၼ်ႇဢၼ်ၵဝ်ၶႃႈႁုင်ပၼ်ပေႃႈႁဝ်းၼႆႉသေၵမ်းၶႃႈ။ ပေႃးယဝ်ႉ၊ၶႅၼ်းတေႃႈပၼ်တၢင်းလီမၢင်ႇၵလႃႇတီႈၵဝ်ၶႃႈသေၵမ်းၶႃႈ၊” ဝႃႈၼင်ႇၼႆဢေႃႈ။
ဢိၸၢၵ်ႈ၊ ၵေႃႈထၢမ်လႄႈဝႃႈ၊ “မႂ်းပဵၼ်ၽူႈလႂ်၊” ဝႃႈၼင်ႇၼႆလႄႈ၊မၼ်းၶိုၼ်းလၢတ်ႈလႄႈဝႃႈ၊ “ၵဝ်ၶႃႈပဵၼ်လုၵ်ႈၸၢႆးလူင်ပေႃႈႁဝ်း ဢေးသေႃး၊ ၶႃႈဢေႃႈ၊” ဝႃႈၼင်ႇၼႆဢေႃႈ။
ဢိၸၢၵ်ႈ၊ ပဵၼ်ဢၼ်သၼ်ႇသၼ်ႇသၢႆသၢႆၼႃႇလူင်လၢင်လႄႈလၢတ်ႈဝႃႈ၊ “ပေႃးပဵၼ်ၼႆၵေႃႉဢၼ်ႁႅမ်တူဝ်သတ်းသေႁုင်ၼိူဝ်ႉသူင်ႇပၼ်ၵဝ်မိူဝ်ႈၵႆႈၼၼ်ႉပဵၼ်ၽူႈလႂ်။ ၸူဝ်ႈဢၼ်မႂ်းဢမ်ႇပႆႇမႃးၼႆႉၵူၺ်း၊ၵဝ်ပေႃးလႆႈၵိၼ်သဵင်ႈယဝ်ႉ။ ၵဝ်ၵေႃႈပေႃးလႆႈပၼ်တၢင်းလီမၢင်ႇၵလႃႇတီႈမၼ်းယဝ်ႉ။ တၢင်းလီမၢင်ႇၵလႃႇၼၼ်ႉၵေႃႈပဵၼ်ပုၼ်ႈမၼ်းဢမၢၼ်ႇၶၼ်ပဵၼ်ယဝ်ႉ၊” ဝႃႈၼင်ႇၼႆဢေႃႈ။
ဢေးသေႃး၊ လႆႈငိၼ်းလွင်ႈတၢင်းၼၼ်ႉလႄႈ၊ပဵၼ်တၢင်းဢၼ်ၶေႃးၶူမ်ၼႃႇလႄႈ၊ပၢဝ်ႇသႅၼ်ႇတင်းသဵင်ဢၼ်ယႂ်ႇၼႃႇလႄႈဝႃႈ၊ “ဢူဝ်းပေႃႈ။ တီႈၵဝ်ၶႃႈၵေႃႈပၼ်တၢင်းလီသေၵမ်းၶႃႈ။ ပၼ်ပႃးၵဝ်ၶႃႈသေၵမ်းၶႃႈ၊” ဝႃႈၼင်ႇၼႆဢေႃႈ။
ဢိၸၢၵ်ႈ၊ ၵေႃႈလၢတ်ႈလႄႈဝႃႈ၊ “ၼွင်ႉၸၢႆးမႂ်းမႃးပႅတ်ႉလႅၼ်ဢဝ်တၢင်းလီမၢင်ႇၵလႃႇမႂ်းၵႂႃႇယဝ်ႉ၊” မိူဝ်ႈဢၼ်ဝႃႈၼင်ႇၼႆၸိုင်။
ဢေးသေႃး၊ လၢတ်ႈဝႃႈ၊ “မၼ်းၼႆႉၵိုင်ႇႁွင်ႉၸိုဝ်ႈဝႃႈ၊ ယႃႇၵုပ်ႈ၊ တႄႉတႄႉယဝ်ႉ။ မၼ်းပႅတ်ႉလႅၼ်ၵဝ်ၶႃႈထူၼ်ႈထိုင်သွင်ပွၵ်ႈၶႃႈယဝ်ႉ။ ပွၵ်ႈဢွၼ်တၢင်းမၼ်းဢဝ်ဢရႃႇလုၵ်ႈတူၼ်ႈၵဝ်ၶႃႈၵႂႃႇယဝ်ႉလႄႈ၊ပွၵ်ႈၼႆႉမၼ်းသမ်ႉဢဝ်တၢင်းလီမၢင်ႇၵလႃႇၵဝ်ၶႃႈၵႂႃႇၶႃႈယဝ်ႉ။ ပေႃႈႁဝ်းဢမ်ႇဢဝ်တၢင်းလီမၢင်ႇၵလႃႇဢၼ်ၵိုတ်းၵျၢၼ်ႇဝႆႉပုၼ်ႈၵဝ်ၶႃႈသေဢိတ်းသေဢီႈယဝ်ႉၶႃႈႁိုဝ်း၊” ဝႃႈၼင်ႇၼႆဢေႃႈ။
ဢိၸၢၵ်ႈ၊ ၶိုၼ်းလၢတ်ႈလႄႈဝႃႈ၊ “ၵဝ်ပေႃးလႆႈႁႂ်ႈမၼ်းပဵၼ်ၸဝ်ႈမႂ်းယဝ်ႉ။ ၵဝ်လႆႈႁႂ်ႈပီႈၼွင်ႉၸိူဝ်ႉၶိူဝ်းမႂ်းတင်းလၢႆပဵၼ်ၶႃႈမၼ်းယဝ်ႉ။ လႆႈဢဝ်ၶဝ်ႈပိူၵ်ႇၶဝ်ႈသၢၼ်လႂ်တင်းၼမ်ႉမၢၵ်ႇၸပိတ်ႉလႂ်ထွၵ်ႈၵမ်ႉၸွႆႈထႅမ်မၼ်းယဝ်ႉ။ ပိူဝ်ႈၼႆလႄႈ၊လုၵ်ႈၸၢႆးၵဝ်႟။ ၵဝ်ဢမ်ႇၸၢင်ႈႁဵတ်းၸိူဝ်ႉႁိုဝ်ပၼ်မႂ်းယဝ်ႉ၊” ဝႃႈၼင်ႇၼႆဢေႃႈ။
ဢေးသေႃး၊ သိုပ်ႇယွၼ်းတီႈပေႃႈမၼ်းထႅင်ႈလႄႈဝႃႈ၊ “ပေႃႈၵဝ်ၶႃႈ႟။ ၸွင်ႇပေႃႈႁဝ်းမီးတၢင်းလီမၢင်ႇၵလႃႇၶေႃႈလဵဝ်ၵူၺ်းၶႃႈႁိုဝ်း။ ဢူဝ်းပေႃႈ၊တီႈၵဝ်ၶႃႈၵေႃႈပၼ်တၢင်းလီမၢင်ႇၵလႃႇသေၵမ်းၶႃႈ။ ပၼ်ပႃးၵဝ်ၶႃႈသေၵမ်းၶႃႈ၊” ဝႃႈၼင်ႇၼႆလႄႈႁွင်ႉႁႆႈယူႇဢေႃႈ။-
မိူဝ်ႈၼၼ်ႉ၊ ဢိၸၢၵ်ႈ၊ လၢတ်ႈတီႈမၼ်းလႄႈဝႃႈ၊ “တီႈယူႇတီႈသဝ်းမႂ်းတၵ်းႁၢင်ႇၵႆၵၼ်တင်းတီႈဢၼ်ၶွၼ်ႇၼမ်ႉမၼ်းလိၼ်မီးၼၼ်ႉလႄႈတၵ်းယူႇ ၵႆသေတီႈဢၼ်ၼမ်ႉၼၢႆးတူၵ်းၽႃႉၼၼ်ႉဢေႃႈ။”
“မႂ်းတၵ်းလႆႈလဵင်ႉဢသၢၵ်ႈမႂ်းလူၺ်ႈလၢပ်ႇလူၺ်ႈလႅဝ်းဢေႃႈ။ မႂ်းတၵ်းလႆႈႁဵတ်းၶႃႈတီႈၼွင်ႉၸၢႆးမႂ်းၵူၺ်းယဝ်ႉ။ ၵူၺ်းၵႃႈ၊မိူဝ်ႈဢၼ်မႂ်းလုၵ်ႉၽိုၼ်ႉပႄႉၼႅင်ႇၸိုင်၊ မႂ်းတေလႆႈၵၢင်းလွတ်ႈသေတၢင်းဢၼ်မၼ်းဢုပ်ႉပိူင်ႇၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵွပ်ႈပိူဝ်ႈပေႃႈၶဝ်ပၼ်တၢင်းလီတီႈ ယႃႇၵုပ်ႈ၊ ၼၼ်ႉလႄႈ ဢေးသေႃး၊ ၸင်း ယႃႇၵုပ်ႈ၊ သေလၢတ်ႈၼႂ်းၸႂ်မၼ်းလႄႈဝႃႈ၊ “ၶိင်ႇၵႃႇလႃႉဢၼ်တၵ်းလႆႈမႆႈၸႂ်ထိုင်ၸႂ်၊လူၺ်ႈလွင်ႈတၢင်းတၢႆပေႃႈၵဝ်ၼၼ်ႉၸမ်ၼႃႇယဝ်ႉလႄႈ၊လိုၼ်းၼၼ်ႉၸင်ႇၵဝ်တၵ်းဢဝ် ယႃႇၵုပ်ႈ၊ တၢႆဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ် ရေႇပႅၵ်ႉၵႃႉ၊ လႆႈႁုလႆႈငိၼ်းတၢင်းၵျၢမ်ႇတၢင်းပွင် ဢေးသေႃး၊ ၼၼ်ႉၸိုင်၊မၼ်းႁွင်ႉဢဝ် ယႃႇၵုပ်ႈ၊ လႄႈလၢတ်ႈဝႃႈ၊ “ထွမ်ႇလူး။ ပီႈဢၢႆႈမႂ်း ဢေးသေႃး၊ ၼၼ်ႉၵျၢမ်ႇပွင်ဢဝ်မႂ်းတၢႆႁႂ်ႈလႆႈပျေႇၸႂ်မၼ်းယဝ်ႉ။-
လုၵ်ႈၸၢႆးမႄႈ႟။ ႁဵတ်းၸွမ်းၵႂၢမ်းၵဝ်တႃႉ။ ယၢမ်းလဵဝ်ၼႆႉၵမ်းလဵဝ်ပၢႆႈၵႂႃႇၸူးပီႈဢၢႆႈၵဝ် လႃႇပၢၼ်ႇ၊ တီႈဝဵင်း ႁႃႇရၼ်ႇ၊ ပုၼ်ႉတႃႉ။-
သွၼ်ႈပိုင်ႈယူႇတီႈပေႃႈလုင်းမႂ်းၸူဝ်ႈၼိုင်ႈၶၢဝ်းၼိုင်ႈတေႃႇထိုင်ႁွတ်ႈပီႈဢၢႆႈမႂ်းတေႃးသႃႉယဵၼ်လႄႈ၊-
မိူဝ်ႈဢၼ်မၼ်းလိုမ်းလွင်ႈဢၼ်မႂ်းႁဵတ်းတီႈမၼ်းၼၼ်ႉယဝ်ႉၸင်ႇ၊ၵဝ်တေပွႆႇၸႂ်ႉၵူၼ်းၵႂႃႇႁွင်ႉမႂ်းၶိုၼ်းမႃးဢေႃႈ။ ၼႂ်းဝၼ်းမိူဝ်ႈလဵဝ်ၼႆႉႁဵတ်းသင်လႄႈၵဝ်တၵ်းလႆႈသုမ်းလုၵ်ႈၸၢႆးၵဝ်တင်းသွင်ၵေႃႉၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ရေႇပႅၵ်ႉၵႃႉ၊ လၢတ်ႈတီႈ ဢိၸၢၵ်ႈ၊ လႄႈဝႃႈ၊ “ၵဝ်ၶႃႈငိၼ်းၸၢၼ်ႈငိၼ်းၸင်းမေး ဢေးသေႃး၊ ဢၼ်ပဵၼ်ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၸိူဝ်းၼႆႉၼႃႇယဝ်ႉ၊သင်ဝႃႈ ယႃႇၵုပ်ႈ၊ တႄႇၼႃႈႁိူၼ်းလူၺ်ႈမႄႈယိင်း ႁိတ်ႉတိ၊ ဢၼ်ပဵၼ်ၵူၼ်းမိူင်းၼႆႉထႅင်ႈၸိုင်၊ၵဝ်ၶႃႈလူဝ်ႇတၢႆၵူၺ်းၶႃႈယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ဢိၸၢၵ်ႈ၊ ႁွင်ႉဢဝ် ယႃႇၵုပ်ႈ၊ မႃးပၼ်တၢင်းလီသေလႄႈသင်ႇလၢတ်ႈမၼ်းလႄႈဝႃႈ၊ “ယႃႇပေဢဝ်မေးၵႃႈၼႂ်းၸိူဝ်ႉၶိူဝ်းမႄႈယိင်း ၶႃႇၼၼ်ႇ၊ ၼႆႉ။-
ၵႂႃႇၵႃႈတီႈမိူင်း မေႇသူဝ်ႇပူဝ်ႇတေးမီးယႃး၊ ၸူးၵႃႈတီႈႁိူၼ်းပူႇမႂ်း ပေႇသူၺ်ႇလႃႉ၊ သေယဝ်ႉ၊တႄႇၼႃႈႁိူၼ်းလူၺ်ႈသၢဝ်တီႈၼၼ်ႈ၊ၼႂ်းလုၵ်ႈယိင်းပေႃႈလုင်းသူ လႃႇပၢၼ်ႇ၊ ၼၼ်ႉသေၵေႃႉၵေႃႉတႃႉ။-
ႁႂ်ႈ ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ ပၼ်တၢင်းလီၵႃႈၼိူဝ်ၼႃႈႁိူၼ်းမႂ်းလႄႈႁႂ်ႈမႂ်းၵိူတ်ႇလဵင်ႉလုၵ်ႈလဵင်ႉလၢင်းၼမ်ၵိုၼ်းႁႂ်ႈလႆႈပဵၼ်ပူႇပဵၼ်ပေႃႈမဵဝ်းၵူၼ်းၼမ်ၼႃႇသေၵမ်းလူၺ်ႈ။-
ႁႂ်ႈမၼ်းၸဝ်ႈပၼ်တၢင်းလီမၢင်ႇၵလႃႇတီႈမႂ်း၊ဢိၵ်ႇတင်းၸိူဝ်ႉၶိူဝ်းမႂ်းမိူၼ်ၸိူဝ်ႉၼင်ႇဢၼ်မၼ်းၸဝ်ႈပၼ်တီႈ ဢႃႇပြႃႇႁၢမ်ႇ၊ ဢိၵ်ႇတင်းႁႂ်ႈမႂ်းလႆႈၶၢမ်ႇဢဝ်ဢမူၺ်ႇလိၼ်မိူင်းဢၼ်မႂ်းသွၼ်ႈပိုင်ႈယူႇမိူဝ်ႈလဵဝ်ဢၼ်ၽြႃးပဵၼ်ၸဝ်ႈပၼ်ဝႆႉတီႈ ဢႃႇပြႃႇႁၢမ်ႇ၊ ၼၼ်ႉသေၵမ်းလူၺ်ႈ၊” ဝႃႈၼင်ႇၼႆဢေႃႈ။-
ႁဵတ်းၼၼ်လႄႈ၊ ဢိၸၢၵ်ႈ၊ ပွႆႇၸႂ်ႉ ယႃႇၵုပ်ႈ၊ ၵႂႃႇတီႈမိူင်း မေႇသူဝ်ႇပူဝ်ႇတေးမီးယႃး၊ ၸူးတီႈ လႃႇပၢၼ်ႇ၊ လုၵ်ႈၸၢႆး ပေႇသူၺ်ႇလႃႉ၊ ၵူၼ်းမဵဝ်း ဢႃႇရမိၼ်ႉ၊ လႄႈပဵၼ်ပီႈဢၢႆႈ ရေႇပႅၵ်ႉၵႃႉ၊ မႄႈ ယႃႇၵုပ်ႈ၊ ဢိၵ်ႇတင်း ဢေးသေႃး၊ ၼၼ်ႉဢေႃႈ။
ဢေးသေႃး၊ လႆႈႁုလွင်ႈဢၼ် ဢိၸၢၵ်ႈ၊ ပၼ်တၢင်းလီတီႈ ယႃႇၵုပ်ႈ၊ သေယဝ်ႉ၊ပွႆႇမၼ်းၵႂႃႇၸူးတီႈမိူင်း မေႇသူဝ်ႇပူဝ်ႇတေးမီးယႃး၊ ႁႂ်ႈလႆႈၵႂႃႇႁႃမေးတီႈၼၼ်ႈၵူၺ်းဢမ်ႇၵႃး၊ႁုလွင်ႈမိူဝ်ႈဢၼ် ဢိၸၢၵ်ႈ၊ ပၼ်တၢင်းလီတီႈမၼ်းၼၼ်ႉ၊ယင်းပိင်းၺၢပ်ႈဢမ်ႇႁႂ်ႈဢဝ်မေးၽူႈယိင်း ၶႃႇၼၼ်ႇ၊-
သမ်ႉႁုလွင်ႈဢၼ် ယႃႇၵုပ်ႈ၊ ထွမ်ႇဢဝ်ၵႂၢမ်းပေႃႈၵႂၢမ်းမႄႈၶဝ်လႄႈ၊ၵႂႃႇၸူးတီႈမိူင်း မေႇသူဝ်ႇပူဝ်ႇတေးမီးယႃး၊ သေလႄႈ၊-
ဢေးသေႃး၊ ႁုလွင်ႈဢၼ် ဢိၸၢၵ်ႈ၊ ဢမ်ႇထုၵ်ႇၸႂ်ၽူႈယိင်း ၶႃႇၼၼ်ႇ၊ ၸိူဝ်းၼၼ်ႉဢေႃႈ။-
ပိူဝ်ႈၼႆမၼ်းၵႂႃႇၸူးတီႈ ဢိသမေႇလႃႉ၊ လုၵ်ႈၸၢႆး ဢႃႇပြႃႇႁၢမ်ႇ၊ လႄႈဢဝ်လုၵ်ႈယိင်းမၼ်း မႁႃႇလတ်ႉ၊ ၼွင်ႉယိင်း ၼပႃႇယုတ်ႉ၊ ၼၼ်ႉမႃးပဵၼ်မေးမၼ်းထႅင်ႈဢေႃႈ။
ယႃႇၵုပ်ႈ၊ ဢွၵ်ႇဝဵင်း ပေႇရသေးၽႃႉ၊ ၵႂႃႇၸူးဝဵင်း ႁႃႇရၼ်ႇ၊ ပုၼ်ႉဢေႃႈ၊-
ၶိင်ႇႁူဝ်ၶမ်ႈတႃဝၼ်းတူၵ်းယဝ်ႉလႄႈမၼ်းႁွတ်ႈထိုင်တီႈၼိုင်ႈသေယဝ်ႉ၊ၵိုတ်းလိုဝ်ႈတီႈၼၼ်ႈၶိုၼ်းၼိုင်ႈလႄႈမၼ်းဢဝ်မၢၵ်ႇႁိၼ်မွၼ်ႁူဝ်သေၼွၼ်းဢေႃႈ။-
မၼ်းၼွၼ်းၽၼ်ႁၼ်လွင်ႈဢၼ်ၶူဝ်လႆပူၵ်းတင်ႈၼိူဝ်လိၼ်မိူင်းၵၢႆႇထိုင်ၽႃႉၵၢင်ႁၢဝ်ဝႆႉလႄႈ၊တမၢၼ်ႇၵၢင်ႁၢဝ်ၽြႃးပဵၼ်ၸဝ်ႈတင်းလၢႆၶိုၼ်ႈၶိုၼ်ႈလူင်းလူင်းယူႇၸွမ်းၶူဝ်လႆၼၼ်ႉဢေႃႈ။-
ထႃႇဝရႃႉၽြႃး၊ ၸုၵ်းယူႇၵႃႈၼိူဝ်ၶူဝ်လႆၼၼ်ႉလႄႈဝႃႈ၊ “ၵဝ်ပဵၼ် ထႃႇဝရႃႉၽြႃး၊ ၽြႃး ဢႃႇပြႃႇႁၢမ်ႇ၊ ၽြႃး ဢိၸၢၵ်ႈ၊ ၼၼ်ႉဢေႃႈ။ ၵဝ်တၵ်းဢဝ်မိူင်းဢၼ်မႂ်းၼွၼ်းယူႇၼႆႉပၼ်တီႈမႂ်းဢိၵ်ႇတင်းၵႃႈတီႈၸိူဝ်ႉၶိူဝ်းလုၵ်ႈလၢၼ်မႂ်းဢေႃႈ။-
ၸိူဝ်ႉၶိူဝ်းမႂ်းတၵ်းၼမ်ၵိုၼ်းတၢၼ်ႇမုၼ်ႈလိၼ်လႄႈၽႄႈဢွၵ်ႇၵႂႃႇဢေႃႈ။ ၶဝ်တၵ်းၸွတ်ႇတူဝ်ႈၵႂႃႇသီႇၸဵင်ႇပႅတ်ႇၼႃႈဢေႃႈ။ ၵႃႈၼႂ်းမႂ်းဢိၵ်ႇတင်းၸိူဝ်ႉၶိူဝ်းမႂ်းၼၼ်ႉၵူၼ်းမဵဝ်းတင်းသဵင်ႈတင်းလူင်တၵ်းလႆႈၶၢမ်ႇဢဝ်တၢင်းလီမၢင်ႇၵလႃႇဢေႃႈ။-
ၵဝ်မီးယူႇလူၺ်ႈၵၼ်တင်းမႂ်းဢေႃႈ။ ၵဝ်တၵ်းၸွမ်းပႂ်ႉမႂ်းယူႇၼႂ်းတၢင်းဢၼ်မႂ်းၵႂႃႇၵူႈတီႈၵူႈလႅၼ်ၼၼ်ႉလႄႈ၊သမ်ႉဢဝ်မႂ်းၶိုၼ်းမႃးၸူးတီႈမိူင်းၼႆႉလူးၵွၼ်ႇဢေႃႈ။ ၸူဝ်ႈဢၼ်ၵဝ်ဢမ်ႇပႆႇႁဵတ်းၸွမ်းၵႃႈဢၼ်ၵဝ်လၢတ်ႈဝႆႉတီႈမႂ်းၼႆႉယဝ်ႉတူဝ်ႈၸိုင်၊ၵဝ်တၵ်းဢမ်ႇပႅတ်ႈမႂ်းဝႆႉၵူၺ်း၊” ဝႃႈၼင်ႇၼႆဢေႃႈ။
ယႃႇၵုပ်ႈ၊ တိုၼ်ႇမႃးလႄႈလၢတ်ႈဝႃႈ၊ “ ထႃႇဝရႃႉၽြႃး၊ မီးယူႇၵႃႈတီႈၼႆႈဢမၢၼ်ႇၶၼ်ပဵၼ်ဢေႃႈ။ ၵဝ်ယင်းဢမ်ႇႁုလွင်ႈဢၼ်မၼ်းၸဝ်ႈမီးယူႇၵႃႈတီႈၼႆႈၼၼ်ႉ၊” ဝႃႈၼင်ႇၼႆလႄႈ၊-
မၼ်းၵူဝ်ႁႄၼႃႇလႄႈဝႃႈ၊ “တီႈၼႆႈပဵၼ်တီႈဢၼ်လီၵူဝ်လီႁႄၼႃႇလူင်လၢင်ဢေႃႈ။ ဢမ်ႇမိူၼ်တၢင်ႇတီႈတၢင်ႇလႅၼ်လႄႈပဵၼ်ပိၵ်ႈမၢၼ်ႇၽြႃးပဵၼ်ၸဝ်ႈ၊ပဵၼ်ႁူးၽၵ်းတူၵၢင်ႁၢဝ်တႄႉတႄႉဝႃႈဝႃႈယဝ်ႉ၊” ဝႃႈၼင်ႇၼႆဢေႃႈ။
ယႃႇၵုပ်ႈ၊ လုၵ်ႉၸဝ်ႉၸဝ်ႉလႄႈ၊ဢဝ်မၢၵ်ႇႁိၼ်ဢၼ်မွၼ်ႁူဝ်မၼ်းၼၼ်ႉပူၵ်းတင်ႈဝႆႉႁႂ်ႈပဵၼ်သဝ်လၵ်းတီႈမၢတ်ႈတီႈတွင်းသေယဝ်ႉ၊ဢဝ်ၼမ်ႉမၼ်းလေႃႇသႂ်ႇၵႃႈၼိူဝ်ၸိၵ်းမၢၵ်ႇႁိၼ်ၼၼ်ႉဢေႃႈ။-
မၼ်းႁွင်ႉႁဵၵ်ႈပၼ်ၸိုဝ်ႈတီႈၼၼ်ႈဝႃႈ၊ ပေႇႀလႃႉ၊ ဢေႃႈ။ ၸိုဝ်ႈၵဝ်ႇဝဵင်းၼၼ်ႉႁွင်ႉႁဵၵ်ႈဝႃႈ၊ လုၸႃႉ၊ ဢေႃႈ။-
မိူဝ်ႈၼၼ်ႉ၊ ယႃႇၵုပ်ႈ၊ ဝႆႉၵတိသဵတ်ႈၸႃႇလႄႈဝႃႈ၊ “ပေႃးၸဝ်ႈႁဝ်းတၵ်းမီးယူႇလူၺ်ႈၵၼ်တင်းၵဝ်ၶႃႈသေလႄႈ၊ၸွမ်းပႂ်ႉၼႂ်းသဵၼ်ႈတၢင်းဢၼ်ၵဝ်ၶႃႈၵႂႃႇၼႆႉလႄႈပၼ်ႁႂ်ႈၵဝ်ၶႃႈလႆႈၵိၼ်လႆႈၼုင်ႈယူႇ၊-
ပေႃးၵဝ်ၶႃႈလႆႈပွၵ်ႈမိူဝ်းလူင်ႉလီလွတ်ႈလီၸူးတီႈႁိူၼ်းပေႃႈၵဝ်ၶႃႈၸိုင်၊ၵမ်းၼၼ်ႉ ထႃႇဝရႃႉၽြႃး၊ တၵ်းပဵၼ်ၽြႃးပဵၼ်ၸဝ်ႈၵဝ်ၶႃႈၶႃႈဢေႃႈ။-
မၢၵ်ႇႁိၼ်ဢၼ်ၵဝ်ၶႃႈပူၵ်းတင်ႈဝႆႉ ႁႂ်ႈပဵၼ်သဝ်လၵ်းတီႈမၢတ်ႈတီႈတွင်းၼႆႉၵေႃႈတၵ်းလႆႈပဵၼ်ပိၵ်ႈမၢၼ်ႇၽြႃးပဵၼ်ၸဝ်ႈဢေႃႈ။ ၼႆႉၵူၺ်းဢမ်ႇၵႃး၊ၵႃႈၼႂ်းတၢင်းလီမၢင်ႇၵလႃႇဢုၵ်ႉၸႃႇၶူဝ်းလဵင်းၵႃႈဢၼ်ၸဝ်ႈႁဝ်းပၼ်ၵဝ်ၶႃႈၼၼ်ႉသိပ်းပုၼ်ႈပုၼ်ႈၼိုင်ႈတၵ်းလူႇပၼ်တီႈၸဝ်ႈႁဝ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ယႃႇၵုပ်ႈ၊ သိုပ်ႇၶၢဝ်းတၢင်းၵႂႃႇၸူးတၢင်းမိူင်းဝၼ်းဢွၵ်ႇလႄႈ၊-
မၼ်းမုင်ႈႁၼ်ၼမ်ႉမေႃႇမေႃႇၼိုင်ႈၵႃႈၼႂ်းပၢင်ႇယိူဝ်ႈတီႈၼိုင်ႈဢေႃႈ။ ၽုင်သူဝ်းသၢမ်ၽုင်ၼွၼ်းလိုဝ်ႈလွမ်ႉဝႅင်းၼမ်ႉမေႃႇဝႆႉဢေႃႈ။ ၽုင်သူဝ်းၸိူဝ်းၼၼ်ႉယၢမ်ႈၵိၼ်ၼမ်ႉတီႈၼမ်ႉမေႃႇဢၼ်ဢဝ်မၢၵ်ႇႁိၼ်လူင်ဢိုတ်းႁူမ်ႇဝႆႉၼၼ်ႉလႄႈ၊-
မိူဝ်ႈဢၼ်ၽုင်သူဝ်းတင်းသဵင်ႈၸုတုမ်ႁွတ်ႈထိုင်မူတ်းယဝ်ႉၼၼ်ႉၸိုင်၊ၵူၼ်းလဵင်ႉသူဝ်းၶဝ်ၸၢင်ႈၵိင်ႈၽုၺ်ႇမၢၵ်ႇႁိၼ်ၼၼ်ႉသေလႄႈ၊ဢွႆႇၼမ်ႉပၼ်သူဝ်းၶဝ်ယဝ်ႉၸင်ႇ၊ၶဝ်ၶိုၼ်းၵိင်ႈဢိုတ်းႁူမ်ႇဝႆႉဢေႃႈ။
ယႃႇၵုပ်ႈ၊ ထၢမ်တီႈၵူၼ်းလဵင်ႉသူဝ်းၸိူဝ်းၼၼ်ႉလႄႈဝႃႈ၊ “ၵေႃႉသႄႈတင်းလၢႆၶဝ်႟။ သူလုၵ်ႉၵႃႈတီႈလႂ်မႃးၶႃႈ၊” မိူဝ်ႈဢၼ်ဝႃႈၼင်ႇၼႆၼၼ်ႉ၊ၶဝ်လၢတ်ႈဝႃႈ၊ “ႁဝ်းလုၵ်ႉသေၵႃႈတီႈဝဵင်း ႁႃႇရၼ်ႇ၊ မႃးဢေႃႈ၊” ဝႃႈၼင်ႇၼႆဢေႃႈ။
မၼ်းၵေႃႈထၢမ်လႄႈဝႃႈ၊ “ၸွင်ႇႁုၸၵ်း လႃႇပၢၼ်ႇ၊ လုၵ်ႈၸၢႆး ၼႃႇၶေႃႇ၊ ၼၼ်ႉၶႃႈႁိုဝ်း၊” ဝႃႈၼင်ႇၼႆလႄႈ၊ၶဝ်ၶိုၼ်းတွပ်ႇဝႃႈ၊ “ႁုဢေႃႈ၊” ဝႃႈၼင်ႇၼႆဢေႃႈ။
မၼ်းသမ်ႉၶိုၼ်းထၢမ်လႄႈဝႃႈ၊ “ၸွင်ႇမၼ်းယူႇလီယူႇၶႃႈႁိုဝ်း၊” ဝႃႈၼင်ႇၼႆလႄႈ၊ ၶဝ်ၶိုၼ်းလၢတ်ႈဝႃႈ၊ “မၼ်းယူႇလီယူႇဢေႃႈ။ မိူဝ်ႈလဵဝ်ၼႆႉလုၵ်ႈယိင်းမၼ်း ရႃႇၶေႇလႃႉ၊ ဢွၼ်ၽုင်သူဝ်းမၼ်းသေမႃးယူႇဢေႃႈ၊” ဝႃႈၼင်ႇၼႆဢေႃႈ။
ယႃႇၵုပ်ႈ၊ လၢတ်ႈလႄႈဝႃႈ၊ “ယင်းၸဝ်ႉယူႇလႄႈယင်းဢမ်ႇပႆႇထိုင်ၶိင်ႇဢၼ်ဢဝ်သူဝ်းၶဝ်ႈၶွၵ်ႈလႄႈ၊ႁဵတ်းသင်သမ်ႉဢမ်ႇဢွႆႇၼမ်ႉပၼ်သူဝ်းသေၶိုၼ်းပွႆႇၵႂႃႇၵႃႈတီႈပၢင်ႇယိူဝ်ႈထႅင်ႈၶႃႈ၊” ဝႃႈၼင်ႇၼႆလႄႈ။
ၶဝ်ၵေႃႈဝႃႈ၊ “မၼ်းဢမ်ႇငၢႆႈၵူၺ်း။ မိူဝ်ႈလႂ်ၽုင်သူဝ်းတင်းသဵင်ႈႁွတ်ႈထိုင်မႃးမူတ်းယဝ်ႉၸင်ႇႁဝ်းၵိင်ႈမၢၵ်ႇႁိၼ်ၽုၺ်ႇၽႃၼမ်ႉမေႃႇသေယဝ်ႉ၊လႆႈဢွႆႇပၼ်ၼမ်ႉဢေႃႈ၊” ဝႃႈၼင်ႇၼႆဢေႃႈ။
ယၢမ်းမိူဝ်ႈဢၼ်မၼ်းယင်းလၢတ်ႈၵႂၢမ်းတေႃႇၶဝ်ယူႇၼၼ်ႉ ရႃႇၶေႇလႃႉ၊ ဢွၼ်ၽုင်သူဝ်းမၼ်းသေလႄႈႁွတ်ႈမႃးဢေႃႈ။-
မိူဝ်ႈဢၼ်မၼ်းႁၼ် ရႃႇၶေႇလႃႉ၊ ႁွတ်ႈမႃးလူၺ်ႈၵၼ်တင်းၽုင်သူဝ်းပေႃႈလုင်းမၼ်း လႃႇပၢၼ်ႇ၊ ၼၼ်ႉၸိုင်၊မၼ်းၵႂႃႇတီႈၼမ်ႉမေႃႇလႄႈၵိင်ႈၽုၺ်ႇမၢၵ်ႇႁိၼ်ပႅတ်ႈသေယဝ်ႉ၊ဢွႆႇၼမ်ႉပၼ်သူဝ်းၸိူဝ်းၼၼ်ႉဢေႃႈ။-
ၵမ်းၼၼ်ႉ မၼ်းၼူမ် ရႃႇၶေႇလႃႉ၊ လႄႈၼမ်ႉတႃတူၵ်းၵွပ်ႈပိူဝ်ႈၸူမ်းၼႃႇၼၼ်ႉသေယဝ်ႉ။-
မွၵ်ႇလၢတ်ႈလွင်ႈဢၼ်မၼ်းပဵၼ်လၢၼ်ၸၢႆး လႃႇပၢၼ်ႇ၊ လႄႈပဵၼ်လုၵ်ႈၸၢႆး ရေႇပႅၵ်ႉၵႃႉ၊ ၼၼ်ႉတီႈ ရႃႇၶေႇလႃႉ၊ ဢေႃႈ။ ရႃႇၶေႇလႃႉ၊ ၵေႃႈလႅၼ်ႈမိူဝ်းၵႂႃႇလၢတ်ႈထိုင်ပေႃႈမၼ်းဢေႃႈ။-
လႃႇပၢၼ်ႇ၊ လႆႈငိၼ်းၶၢဝ်ႇဝႃႈလၢၼ်ၸၢႆးမၼ်း ယႃႇၵုပ်ႈ၊ ႁွတ်ႈမႃးဝႃႈၼႆလႄႈ၊မၼ်းၼႅတ်ႈၵႂႃႇၶၼ်ၶၼ်ၽႂ်းၽႂ်းသေႁပ်ႉႁူဝ်တၢင်းသေယဝ်ႉ၊ၵွတ်ႇဢုမ်ႈၸုပ်ႇၼူမ်လႄႈဢွၼ်မိူဝ်းႁိူၼ်းၵႂႃႇဢေႃႈ။ မိူဝ်ႈဢၼ် ယႃႇၵုပ်ႈ၊ မွၵ်ႇလၢတ်ႈၼႄလွင်ႈတူဝ်ၸဝ်ႈၵဝ်ႇၵူႈလွင်ႈၵူႈတၢင်းတီႈ လႃႇပၢၼ်ႇ၊ ယဝ်ႉၼၼ်ႉၸိုင်၊-
လႃႇပၢၼ်ႇ၊ လၢတ်ႈဝႃႈ၊ “လီယဝ်ႉ။ မႂ်းပဵၼ်ၼိူဝ်ႉလိူတ်ႈၵဝ်ၸႅတ်ႈၸႅတ်ႈဢေႃႈ၊” ဝႃႈၼင်ႇၼႆဢေႃႈ။ ယႃႇၵုပ်ႈ၊ ယူႇၵႃႈတီႈၼၼ်ႈလိူၼ်ၼိုင်ႈၸမ်ၸမ်ဢေႃႈ။
လႃႇပၢၼ်ႇ၊ လၢတ်ႈတီႈ ယႃႇၵုပ်ႈ၊ လႄႈဝႃႈ၊ “ၵွပ်ႈပိူဝ်ႈမႂ်းပဵၼ်လၢၼ်ၸၢႆးၵဝ်လႄႈဢမ်ႇထုၵ်ႇႁဵတ်းၵၢၼ်ၵဝ်လၢႆလၢႆလွၵ်ႇလွၵ်ႇ။ မႂ်းၶႂ်ႈလႆႈၵႃႈႁႅင်းၵႃႈႁိုဝ်ၵေႃႈယွၼ်းတႃႉ၊” ဝႃႈၼင်ႇၼႆဢေႃႈ။-
လႃႇပၢၼ်ႇ၊ ၸမ်ႉ၊မီးလုၵ်ႈယိင်းသွင်ၵေႃႉဢေႃႈ။ ၵေႃႉပီႈၸိုဝ်ႈ၊ လေးဢႃႇ၊ လႄႈၵေႃႉၼွင်ႉၸိုဝ်ႈ ရႃႇၶေႇလႃႉ၊ ဢေႃႈ။-
လေးဢႃႇ၊ ၼၼ်ႉမၢၵ်ႇတႃႁၢင်ႈလီ လႄႈ၊ ရႃႇၶေႇလႃႉ၊ ၸမ်ႉ၊ႁၢင်ႈၽၢင်ယဵၼ်ႇလီႁၢင်ႈလီဢေႃႈ။
ပိူဝ်ႈဢၼ် ယႃႇၵုပ်ႈ၊ ငိၼ်းႁၵ်ႉပႅင်း ရႃႇၶေႇလႃႉ၊ လႄႈမၼ်းလၢတ်ႈတီႈ လႃႇပၢၼ်ႇ၊ လႄႈဝႃႈ၊ “ပေႃးလုင်းႁဝ်းပၼ်ၵဝ်ၶႃႈဢဝ် ရႃႇၶေႇလႃႉ၊ ၸိုင်၊ၵဝ်ၶႃႈတေၶၢမ်ႇႁဵတ်းၵၢၼ်ပၼ်လုင်းႁဝ်းၸဵတ်းပီဢေႃႈ၊” ဝႃႈၼင်ႇၼႆဢေႃႈ။
လႃႇပၢၼ်ႇ၊ ၵေႃႈဝႃႈ၊ “ၽိူဝ်ႇတေပၼ်တီႈပိူၼ်ႈတၢင်ႇၵေႃႉပေႃးပၼ်မႂ်းၸိုင်၊ယဵင်ႈၶႅၼ်းတေလီလႄႈယူႇၸွမ်းၵဝ်တႃႉ၊” ဝႃႈၼင်ႇၼႆဢေႃႈ။-
ယႃႇၵုပ်ႈ၊ ၵေႃႈၶၢမ်ႇႁဵတ်းၵၢၼ်ၸဵတ်းပီႁႂ်ႈလႆႈ ရႃႇၶေႇလႃႉ၊ ဢေႃႈ။ ပိူဝ်ႈဢၼ်မၼ်းငိၼ်းႁၵ်ႉငိၼ်းပႅင်း ရႃႇၶေႇလႃႉ၊ လႄႈၸူဝ်ႈၸဵတ်းပီၼၼ်ႉမၼ်းထၢင်ႇမိုဝ်ႉဝၼ်းၼၼ်ႉဢမ်ႇပေႃးႁိုင်ဢေႃႈ။
ယႃႇၵုပ်ႈ၊ ၵေႃႈလၢတ်ႈတီႈ လႃႇပၢၼ်ႇ၊ လႄႈဝႃႈ၊ “ၶိင်ႇဝၼ်းဢၼ်ၶဵၼ်းၼၼ်ႉၸေးၶႃႈယဝ်ႉ။ သွင်ႇမၢင်ႇၵလႃႇပၼ်ၵဝ်ၶႃႈႁူမ်ႈလူၺ်ႈၵၼ်တင်းလုၵ်ႈယိင်းလုင်းႁဝ်းတႃႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ၊ လႃႇပၢၼ်ႇ၊ ႁႅၼ်းပၼ်ပွႆးသွင်ႇမၢင်ႇၵလႃႇလႄႈၽိတ်ႈႁွင်ႉၶႅၵ်ႇတီႈၼၼ်ႈတင်းလၢႆဢေႃႈ။-
ၵူၺ်းၵႃႈ၊ၼႂ်းၶိုၼ်းၼၼ်ႉမၼ်းဢဝ် လေးဢႃႇ၊ သႂၢင်းသႂ်ႇပၼ် ယႃႇၵုပ်ႈ၊ လႄႈ၊ ယႃႇၵုပ်ႈ၊ လႆႈၼွၼ်းလူၺ်ႈၵၼ်တင်း လေးဢႃႇ၊ ဢေႃႈ။-
( လႃႇပၢၼ်ႇ၊ ဢဝ်သၢဝ်ၵူၼ်းၸႂ်ႉမၼ်း ၸိလပႃႉ၊ ဢၢပ်ႈပၼ်လုၵ်ႈယိင်းမၼ်း လေးဢႃႇ၊ ပုၼ်ႈဢၼ်တၵ်းပဵၼ်သၢဝ်ၵူၼ်းၸႂ်ႉမၼ်းဢေႃႈ။-)
မိူဝ်ႈဢၼ်မိူင်းလႅင်းၼၼ်ႉ ယႃႇၵုပ်ႈ၊ ႁုႁၼ်လွင်ႈဢၼ်ပဵၼ် လေးဢႃႇ၊ လႄႈ၊မၼ်းလုၵ်ႉၵႂႃႇလၢတ်ႈတီႈ လႃႇပၢၼ်ႇ၊ လႄႈဝႃႈ၊ “လုင်းႁဝ်းႁဵတ်းၸိူဝ်ႉၼင်ႇႁိုဝ်တီႈၵဝ်ၶႃႈ။ ၵဝ်ၶႃႈၶၢမ်ႇႁဵတ်းၵၢၼ်ႁႂ်ႈလႆႈ ရႃႇၶေႇလႃႉ၊ တႄႉတႄႉဝႃႈဝႃႈဢေႃႈ။ ႁဵတ်းသင်လႄႈပႅတ်ႉလႅၼ်ၵဝ်ၶႃႈၸိူင်ႉၼင်ႇၼႆ၊” ဝႃႈၼင်ႇၼႆဢေႃႈ။
လႃႇပၢၼ်ႇ၊ ၵေႃႈလၢတ်ႈလႄႈဝႃႈ၊ “ထုင်းၽိင်ႈႁဝ်းမိူင်းၼႆႉလုၵ်ႈယိင်းၵေႃႉလဵၵ်ႉဢမ်ႇလႆႈတႄႇၼႃႈႁိူၼ်းဢွၼ်တၢင်းၵေႃႉယႂ်ႇၵူၺ်း။-
ပႂ်ႉထႃႈႁႂ်ႈတဵမ်ၸဵတ်းဝၼ်းမၼ်းၼၼ်ႉထႅင်ႈလူးၵွၼ်ႇတႃႉ။ ၵဝ်တၵ်းႁႂ်ႈမႂ်းဢဝ် ရႃႇၶေႇလႃႉ၊ ဢိူဝ်း၊ၵူၺ်းၵႃႈမႂ်းလူဝ်ႇၶၢမ်ႇႁဵတ်းၵၢၼ်ပုၼ်ႈၵဝ်ထႅင်ႈၸဵတ်းပီဢေႃႈ၊” ဝႃႈၼင်ႇၼႆဢေႃႈ။
ယႃႇၵုပ်ႈ၊ ၵေႃႈၽွမ်ႉလႄႈပႂ်ႉႁႂ်ႈပွႆးသွင်ႇမၢင်ႇၵလႃႇတဵမ်ၸဵတ်းဝၼ်းသေယဝ်ႉ၊ လႃႇပၢၼ်ႇ၊ ဢဝ်လုၵ်ႈယိင်းမၼ်း ရႃႇၶေႇလႃႉ၊ ဢၢပ်ႈပၼ် ယႃႇၵုပ်ႈ၊ ဢေႃႈ။-
( လႃႇပၢၼ်ႇ၊ ဢဝ်သၢဝ်ၵူၼ်းၸႂ်ႉမၼ်း ပိလႁႃႇ၊ ဢၢပ်ႈပၼ်လုၵ်ႈယိင်းမၼ်း ရႃႇၶေႇလႃႉ၊ ပုၼ်ႈဢၼ်တၵ်းပဵၼ်သၢဝ်ၵူၼ်းၸႂ်ႉမၼ်းဢေႃႈ။-)
ယႃႇၵုပ်ႈ၊ လႆႈၼွၼ်းလူၺ်ႈ ရႃႇၶေႇလႃႉ၊ လႄႈယဵင်ႈၶႅၼ်းႁၵ်ႉ ရႃႇၶေႇလႃႉ၊ ၼႃႇသေ လေးဢႃႇ၊ ဢေႃႈ။ ႁဵတ်းၼၼ်လႄႈသမ်ႉၶၢမ်ႇႁဵတ်းၵၢၼ်ပၼ် လႃႇပၢၼ်ႇ၊ ထႅင်ႈၸဵတ်းပီဢေႃႈ။
မိူဝ်ႈဢၼ် ထႃႇဝရႃႉၽြႃး၊ ႁုႁၼ်လွင်ႈဢၼ် လေးဢႃႇ၊ ဢမ်ႇလႆႈၶၢမ်ႇဢဝ်တၢင်းႁၵ်ႉမိူၼ် ရႃႇၶေႇလႃႉ၊ ၼၼ်ႉၸိုင်၊ပၼ်ဢၶႂၢင်ႉႁႂ်ႈ လေးဢႃႇ၊ ၵိူတ်ႇလဵင်ႉလုၵ်ႈလဵင်ႉလၢင်းလႄႈ ရႃႇၶေႇလႃႉ၊ ၸမ်ႉ၊ဢမ်ႇလႆႈၵိူတ်ႇလဵင်ႉလုၵ်ႈသေၵေႃႉဢေႃႈ။-
လေးဢႃႇ၊ ပႃးပတိၵ်ႈသၼ်ႇထေႇၵိူတ်ႇလဵင်ႉလုၵ်ႈၸၢႆးၵေႃႉၼိုင်ႈလႄႈ၊မၼ်းဝႃႈ၊ “ ထႃႇဝရႃႉၽြႃး၊ တူၺ်းထိုင်တုၵ်ႉၶႃႉတၢင်းၶၢၼ်ၸႂ်ၵဝ်ယဝ်ႉ။ တေႃႈလဵဝ်ၼႆႉၽူဝ်ၵဝ်တၵ်းႁၵ်ႉၵဝ်ယဝ်ႉ၊” ဝႃႈၼင်ႇၼႆလႄႈႁွင်ႉႁဵၵ်ႈၸိုဝ်ႈလုၵ်ႈၸၢႆးၼၼ်ႉဝႃႈ၊ ရုပိၼ်ႇ၊ ဢေႃႈ။-
မၼ်းသမ်ႉပႃးပတိၵ်ႈသၼ်ႇထေႇထႅင်ႈလႄႈၵိူတ်ႇလဵင်ႉလုၵ်ႈၸၢႆးမႃးထႅင်ႈသေယဝ်ႉသမ်ႉဝႃႈ၊ “ၵွပ်ႈပိူဝ်ႈ ထႃႇဝရႃႉၽြႃး၊ ငိၼ်းလွင်ႈဢၼ်ၵဝ်ဢမ်ႇလႆႈၶၢမ်ႇဢဝ်တၢင်းႁၵ်ႉၼၼ်ႉလႄႈ၊မၼ်းၸဝ်ႈဢဵတ်းလူပၼ်လုၵ်ႈၸၢႆးၼႆႉတီႈၵဝ်ယဝ်ႉ၊” ဝႃႈၼႆလႄႈ၊ႁွင်ႉႁဵၵ်ႈၸိုဝ်ႈလုၵ်ႈၸၢႆးၼၼ်ႉဝႃႈ၊ သိမုၼ်ႇ၊ ဢေႃႈ။-
ဝၢႆးၼၼ်ႉမၼ်းသမ်ႉပႃးပတိၵ်ႈသၼ်ႇထေႇထႅင်ႈလႄႈ၊ၵိူတ်ႇလဵင်ႉလုၵ်ႈၸၢႆးထႅင်ႈၵေႃႉၼိုင်ႈသေယဝ်ႉ၊လၢတ်ႈဝႃႈ၊ “ၵဝ်ပေႃးၵိူတ်ႇလဵင်ႉလုၵ်ႈၸၢႆးသၢမ်ၵေႃႉပၼ်တီႈၽူဝ်ၵဝ်ယဝ်ႉလႄႈ၊ၵမ်းၼႆႉမၼ်းႁူမ်ႈၸႂ်ၵၼ်တင်းၵဝ်ယဝ်ႉ၊” ဝႃႈၼႆလႄႈ၊ႁွင်ႉႁဵၵ်ႈၸိုဝ်ႈလုၵ်ႈၸၢႆးၼၼ်ႉဝႃႈ၊ လေႇဝိ၊ ဢေႃႈ။-
ၵမ်းၼၼ်ႉ မၼ်းသမ်ႉပႃးပတိၵ်ႈသၼ်ႇထေႇထႅင်ႈလႄႈၵိူတ်ႇလဵင်ႉလုၵ်ႈၸၢႆးမႃးထႅင်ႈသေယဝ်ႉလၢတ်ႈဝႃႈ၊ “ၵမ်းၼႆႉၵဝ်တေယွင်ႈယေႃး ထႃႇဝရႃႉၽြႃး၊ ဢေႃႈ၊” ဝႃႈၼႆလႄႈ၊ႁွင်ႉႁဵၵ်ႈၸိုဝ်ႈလုၵ်ႈၸၢႆးၼၼ်ႉဝႃႈ၊ ယုတႃႉ၊ ဢေႃႈ။ ဝၢႆးၼၼ်ႉတၢင်းဢၼ်မၼ်းၵိူတ်ႇလုၵ်ႈၵိူတ်ႇလၢင်းၼၼ်ႉထၢတ်ႇၵႂႃႇဢေႃႈ။
မိူဝ်ႈၼၼ်ႉ ရႃႇၶေႇလႃႉ၊ ယင်းဢမ်ႇၵိူတ်ႇလုၵ်ႈၵိူတ်ႇလၢင်းပၼ်တီႈ ယႃႇၵုပ်ႈ၊ သေၵေႃႉလႄႈ၊ငိၼ်းၶွႆငိၼ်းၸင်းပီႈၼၢင်းမၼ်းသေလႄႈ၊လၢတ်ႈတီႈ ယႃႇၵုပ်ႈ၊ လႄႈဝႃႈ၊ “ပၼ်လုၵ်ႈလၢင်းတီႈၵဝ်ၶႃႈသေၵမ်း။ ပေႃးဢမ်ႇၼၼ်ၵဝ်ၶႃႈတၵ်းတၢႆယဝ်ႉ၊” ဝႃႈၼင်ႇၼႆဢေႃႈ။
ယႃႇၵုပ်ႈ၊ ၸႂ်လမ် ရႃႇၶေႇလႃႉ၊ လႄႈလၢတ်ႈဝႃႈ၊ “ၵဝ်ပဵၼ်ၵေႃႉဢၼ်တၢင်တူဝ်ၽြႃးပဵၼ်ၸဝ်ႈဢၼ်ဢမ်ႇပၼ်ဢၶႂၢင်ႉ ႁႂ်ႈမႂ်းၵိူတ်ႇလုၵ်ႈၵိူတ်ႇလၢင်းၼၼ်ႉႁိုဝ်း၊” ဝႃႈၼင်ႇၼႆဢေႃႈ။
ရႃႇၶေႇလႃႉ၊ ဝႃႈ၊ “သၢဝ်ၵူၼ်းၸႂ်ႉၵဝ်ၶႃႈ ပိလႁႃႇ၊ မီးယူႇဢေႃႈ။ ၶဝ်ႈၼွၼ်းတီႈမၼ်းႁႂ်ႈမၼ်းၵိူတ်ႇလုၵ်ႈပုၼ်ႈၵဝ်တၵ်းလဵင်ႉၼၼ်ႉသေၵမ်း။ ႁဵတ်းၼႆၸင်ႇၵဝ်ၶႃႈတေလႆႈပဵၼ်မႄႈၵွပ်ႈပိူဝ်ႈမၼ်းဢေႃႈ။” ဝႃႈၼင်ႇၼႆသေယဝ်ႉ၊-
ဢဝ်သၢဝ်ၵူၼ်းၸႂ်ႉမၼ်း ပိလႁႃႇ၊ သႂၢင်းၶဝ်ႈတီႈၽူဝ်မၼ်းလႄႈ၊ ယႃႇၵုပ်ႈ၊ လႆႈၼွၼ်းလူၺ်ႈ ပိလႁႃႇ၊ ဢေႃႈ။-
ပိလႁႃႇ၊ ၵေႃႈပႃးပတိၵ်ႈသၼ်ႇထေႇလႄႈၵိူတ်ႇလဵင်ႉလုၵ်ႈၸၢႆးပၼ်တီႈ ယႃႇၵုပ်ႈ၊ ဢေႃႈ။-
ရႃႇၶေႇလႃႉ၊ လၢတ်ႈလႄႈဝႃႈ၊ “ၽြႃးပဵၼ်ၸဝ်ႈၸီႇယၢင်ႇတြႃးၽၢႆႇၵဝ်ယဝ်ႉ။ မၼ်းၸဝ်ႈထွမ်ႇဢဝ်ၵႂၢမ်းၵဝ်လႄႈပၼ်လုၵ်ႈၸၢႆးတီႈၵဝ်ယဝ်ႉ၊” ႁွင်ႉႁဵၵ်ႈၸိုဝ်ႈဝႃႈ၊ တၢၼ်ႇ၊ ဢေႃႈ။-
ပိလႁႃႇ၊ သမ်ႉပႃးပတိၵ်ႈသၼ်ႇထေႇထႅင်ႈလႄႈ၊ၵိူတ်ႇလဵင်ႉလုၵ်ႈၸၢႆးပၼ်တီႈ ယႃႇၵုပ်ႈ၊ ထႅင်ႈၵေႃႉၼိုင်ႈသေယဝ်ႉ၊-
ရႃႇၶေႇလႃႉ၊ သမ်ႉဝႃႈ၊ “ၵဝ်ၶေႉၶဵင်ႇၵၼ်တင်းပီႈၼၢင်းၵဝ်လႄႈၵဝ်ပႄႉယဝ်ႉ၊” ဝႃႈၼင်ႇၼႆလႄႈ၊ႁွင်ႉႁဵၵ်ႈၸိုဝ်ႈလုၵ်ႈၸၢႆးၼၼ်ႉဝႃႈ၊ ၼပ်ႉထလိ၊ ဢေႃႈ။-
လေးဢႃႇ၊ ၵေႃႈမိူဝ်ႈဢၼ်မၼ်းႁုႁၼ်တၢင်းဢၼ်ၵိူတ်ႇလုၵ်ႈၵိူတ်ႇလၢင်းမၼ်းထၢတ်ႇယဝ်ႉၼၼ်ႉၸိုင်၊မၼ်းဢဝ်သၢဝ်ၵူၼ်းၸႂ်ႉမၼ်း ၸိလပႃႉ၊ ဢၢပ်ႈပၼ်ႁႂ်ႈပဵၼ်မေး ယႃႇၵုပ်ႈ၊ ဢေႃႈ။-
ၸိလပႃႉ၊ ၵေႃႈၵိူတ်ႇလဵင်ႉလုၵ်ႈၸၢႆးပၼ်တီႈ ယႃႇၵုပ်ႈ၊ မႃးသေလႄႈ၊-
လေးဢႃႇ၊ လၢတ်ႈလႄႈဝႃႈ၊ “ၵဝ်လႆႈဢၵျူဝ်းဢၼ်လီ၊” ဝႃႈၼင်ႇၼႆလႄႈႁွင်ႉႁဵၵ်ႈၸိုဝ်ႈလုၵ်ႈၸၢႆးၼၼ်ႉဝႃႈ၊ ၵၢတ်ႉ၊ ဢေႃႈ။-
ၸိလပႃႉ၊ ၼၼ်ႉသမ်ႉၵိူတ်ႇလဵင်ႉလုၵ်ႈၸၢႆးပၼ်တီႈ ယႃႇၵုပ်ႈ၊ ထႅင်ႈလႄႈ၊-
လေးဢႃႇ၊ ဝႃႈ၊ “ၵဝ်မီးမၢင်ႇၵလႃႇဢေႃႈ။ ၵမ်းၼႆႉမႄႈယိင်းတင်းလၢႆတေဢွၼ်ၵၼ်ႁွင်ႉၵဝ်ဝႃႈ၊မီးမၢင်ႇၵလႃႇ၊” ဝႃႈၼင်ႇၼႆလႄႈ၊ႁွင်ႉႁဵၵ်ႈၸိုဝ်ႈလုၵ်ႈၸၢႆးၼၼ်ႉဝႃႈ၊ ဢႃႇသျႃႇ၊ ဢေႃႈ။
ၶၢဝ်းယၢမ်းပၢတ်ႇၶဝ်ႈၵျုင်ႇၼၼ်ႉ ရုပိၼ်ႇ၊ ၵႂႃႇၵႃႈတီႈတူင်ႈၼႃးလႄႈထူပ်းၺႃးမၢၵ်ႇယႃႈဢၶျူဝ်ႇလႄႈဝိတ်းဢဝ်မႃးပၼ်မႄႈၶဝ် လေးဢႃႇ၊ ဢေႃႈ။ ရႃႇၶေႇလႃႉ၊ ယွၼ်းတီႈ လေးဢႃႇ၊ လႄႈဝႃႈ၊ “မၢၵ်ႇယႃႈဢၶျူဝ်ႇဢၼ်လုၵ်ႈၸၢႆးမႂ်းလႆႈမႃးၼၼ်ႉပၼ်ၵဝ်ၵမ်ႈၽွင်ႈသေၵမ်း၊” ဝႃႈၼင်ႇၼႆဢေႃႈ။
လေးဢႃႇ၊ ၵေႃႈတွပ်ႇဝႃႈ၊ “မႂ်းႁိမ်ဢဝ်ၽူဝ်ၵဝ်လႄႈဢမ်ႇပႆႇပေႇၸႂ်ၵူၺ်းဢမ်ႇၵႃး၊ယင်းဢၢင်ႈတေႁိမ်ဢဝ်မၢၵ်ႇယႃႈဢၶျူဝ်ႇလုၵ်ႈၸၢႆးၵဝ်လူးၵွၼ်ႇႁိုဝ်း၊” ဝႃႈၼင်ႇၼႆဢေႃႈ။ ရႃႇၶေႇလႃႉ၊ ၵေႃႈဝႃႈ၊ “ပေႃးမႂ်းဢဝ်မၢၵ်ႇယႃႈဢၶျူဝ်ႇလုၵ်ႈၸၢႆးမႂ်းပၼ်ၵဝ်ၸိုင်၊ၶိုၼ်းၼႆႉၶဝ်ႈၼွၼ်းၸွမ်း ယႃႇၵုပ်ႈ၊ တႃႉ၊” ဝႃႈၼင်ႇၼႆဢေႃႈ။
မိူဝ်ႈဢၼ် ယႃႇၵုပ်ႈ၊ ပွၵ်ႈသေတူင်ႈၼႃးမႃးၶိင်ႇတၢမ်းၶမ်ႈၼၼ်ႉၸိုင်၊ လေးဢႃႇ၊ ၵႂႃႇႁပ်ႉႁူဝ်တၢင်းမၼ်းလႄႈဝႃႈ၊ “ၶိုၼ်းၼႆႉၸဝ်ႈတၵ်းလႆႈၶဝ်ႈၼွၼ်းၸွမ်းၵဝ်ၶႃႈဢေႃႈ။ ၵဝ်ၶႃႈလႆႈဢဝ်မၢၵ်ႇယႃႈဢၶျူဝ်ႇလုၵ်ႈၸၢႆးၵဝ်ၶႃႈၼၼ်ႉၸၢင်ႈငႃဢဝ်မႂ်းဝႆႉဢေႃႈ၊” ဝႃႈၼင်ႇၼႆလႄႈ၊ၶိုၼ်းၼၼ်ႉၼွၼ်းလူၺ်ႈၵၼ်တင်းၽူဝ်မၼ်းဢေႃႈ။
ၽြႃးပဵၼ်ၸဝ်ႈထွမ်ႇဢဝ်ၵႂၢမ်းသူးတွင်း လေးဢႃႇ၊ လႄႈမၼ်းပႃးပတိၵ်ႈသၼ်ႇထေႇသေလႄႈၵိူတ်ႇလဵင်ႉလုၵ်ႈၸၢႆးပၼ်တီႈ ယႃႇၵုပ်ႈ၊ ထူၼ်ႈထိုင်ႁႃႈၵေႃႉသေယဝ်ႉလၢတ်ႈဝႃႈ၊-
“ပိူဝ်ႈဢၼ်ၵဝ်ဢဝ်သၢဝ်ၵူၼ်းၸႂ်ႉၵဝ်ပၼ်ၽူဝ်ၵဝ်လႄႈ၊ၽြႃးပဵၼ်ၸဝ်ႈတႅၼ်းပၼ်သူးလၢပ်ႈတီႈၵဝ်ယဝ်ႉ၊” ဝႃႈၼႆလႄႈ၊ႁွင်ႉႁဵၵ်ႈၸိုဝ်ႈဝႃႈ၊ ဢိသၶႃႇ၊ ဢေႃႈ။-
ဝၢႆးၼၼ်ႉသမ်ႉပႃးပတိၵ်ႈသၼ်ႇထေႇၵိူတ်ႇလဵင်ႉထႅင်ႈလုၵ်ႈၸၢႆးပၼ်တီႈ ယႃႇၵုပ်ႈ၊ ထူၼ်ႈႁူၵ်းၵေႃႉသေယဝ်ႉ၊-
လေးဢႃႇ၊ လၢတ်ႈဝႃႈ၊ “ၽြႃးပဵၼ်ၸဝ်ႈပၼ်လၢၵ်ႈသွင်ႇဢၼ်လီဢၼ်ငၢမ်းယဝ်ႉ။ ၵဝ်လႆႈၵိူတ်ႇလုၵ်ႈပၼ်ၽူဝ်ၵဝ်ႁူၵ်းၵေႃႉယဝ်ႉလႄႈၵမ်းၼႆႉမၼ်းတေယူႇလူၺ်ႈၵဝ်သေႇသေႇဢေႃႈ၊” ဝႃႈၼႆလႄႈႁွင်ႉႁဵၵ်ႈၸိုဝ်ႈလုၵ်ႈၸၢႆးၼၼ်ႉဝႃႈ၊ ၸေႇပုလုၼ်ႇ၊ ဢေႃႈ။-
လိုၼ်းၼၼ်ႉမၼ်းၵိူတ်ႇလဵင်ႉလုၵ်ႈယိင်းမႃးလႄႈႁွင်ႉႁဵၵ်ႈၸိုဝ်ႈဝႃႈ၊ တိၼႃႉ၊ ဢေႃႈ။
မိူဝ်ႈၼၼ်ႉၽြႃးပဵၼ်ၸဝ်ႈၶုၵ်းၸႂ်လႆႈ ရႃႇၶေႇလႃႉ၊ လႄႈထွမ်ႇဢဝ်ၵႂၢမ်းသူးတွင်းမၼ်းလႄႈပၼ်ဢၶႂၢင်ႉႁႂ်ႈမၼ်းၵိူတ်ႇလဵင်ႉလုၵ်ႈလၢင်းဢေႃႈ။-
မၼ်းလႆႈပႃးပတိၵ်ႈသၼ်ႇထေႇလႄႈၵိူတ်ႇလဵင်ႉလုၵ်ႈၸၢႆးမႃးလႄႈလၢတ်ႈဝႃႈ၊ “ၽြႃးပဵၼ်ၸဝ်ႈပႄႇၽဵဝ်ႈပႅတ်ႈတၢင်းဢူၵ်းတၢင်းဢၢႆသေၵႃႈတီႈၵဝ်ယဝ်ႉလႄႈၵဝ်လႆႈၵိူတ်ႇလဵင်ႉလုၵ်ႈၸၢႆးဢေႃႈ၊” ဝႃႈၼင်ႇၼႆလႄႈ၊-
ႁွင်ႉႁဵၵ်ႈၸိုဝ်ႈလုၵ်ႈၸၢႆးၼၼ်ႉဝႃႈ၊ ယူဝ်းသႅပ်ႈ၊ လႄႈသမ်ႉဝႃႈ၊ “ႁႂ်ႈၽြႃးပဵၼ်ၸဝ်ႈပၼ်လုၵ်ႈၸၢႆးထႅင်ႈတၢင်ႇၵေႃႉသေၵမ်းလူၺ်ႈ၊” ဝႃႈၼင်ႇၼႆဢေႃႈ။
ဝၢႆးသေ ယူဝ်းသႅပ်ႈ၊ ၵိူတ်ႇလဵင်ႉယဝ်ႉၼၼ်ႉ ယႃႇၵုပ်ႈ၊ ယွၼ်းဢၶႂၢင်ႉတီႈ လႃႇပၢၼ်ႇ၊ လႄႈဝႃႈ၊ “ယွၼ်းႁႂ်ႈၵဝ်ၶႃႈလႆႈပွၵ်ႈမိူဝ်းဝၢၼ်ႈၵဝ်ႇမိူင်းလင်ၵဝ်ၶႃႈသေၵမ်း။-
ပၼ်ဢၶႂၢင်ႉဢၼ်လႆႈဢဝ်မေးၵဝ်ၶႃႈလႂ်တင်းလုၵ်ႈလၢင်းၵဝ်ၶႃႈတင်းလၢႆၸိူဝ်းဢၼ်ၵဝ်ၶႃႈၶၢမ်ႇႁဵတ်းၵၢၼ်တီႈလုင်းႁဝ်းသေလႄႈလႆႈၸိူဝ်းၼႆႉမိူဝ်းၵႂႃႇသေၵမ်း။ ပေႃႈလုင်းႁဝ်းႁုတၢင်းႁဵတ်းဢၼ်ၵဝ်ၶႃႈႁဵတ်းလီထၼ်ႇႁိုဝ်ၼၼ်ႉယူႇဢေႃႈ၊” ဝႃႈၼင်ႇၼႆဢေႃႈ။
လႃႇပၢၼ်ႇ၊ ၵေႃႈလၢတ်ႈတီႈမၼ်းလႄႈဝႃႈ၊ “ႁႂ်ႈၵဝ်လၢတ်ႈၵႂၢမ်းဢၼ်ထုၵ်ႇၸႂ်မႂ်းသေၵမ်း။ ၵဝ်ႁုသၢႆငၢႆလွင်ႈဢၼ် ထႃႇဝရႃႉၽြႃး၊ ပၼ်တၢင်းလီတီႈၵဝ်ၵွပ်ႈပိူဝ်ႈမႂ်းၼၼ်ႉယဝ်ႉ။-
ယွၼ်းၵႃႈႁႅင်းမႂ်းတႃႉ။ ၵဝ်တၵ်းပၼ်ဢေႃႈ၊” ဝႃႈၼင်ႇၼႆဢေႃႈ။
ယႃႇၵုပ်ႈ၊ ၶိုၼ်းလၢတ်ႈလႄႈဝႃႈ၊ “ပေႃႈလုင်းႁဝ်းႁုလွင်ႈဢၼ်ၵဝ်ၶႃႈႁဵတ်းၵၢၼ်ပုၼ်ႈပေႃႈလုင်းႁဝ်းထၼ်ႇႁိုဝ်၊ဢိၵ်ႇတင်းလွင်ႈဢၼ်ၽုင်သူဝ်းၽုင်ဝူဝ်းပေႃႈလုင်းႁဝ်းယႂ်ႇၼမ်ၵိုၼ်းမႃးၵႃႈၼႂ်းမိုဝ်းၵဝ်ၶႃႈထၼ်ႇႁိုဝ်ၼၼ်ႉယူႇဢေႃႈ။-
ဢုၵ်ႉၸႃႇပေႃႈလုင်းႁဝ်းဢၼ်မီးဢိတ်းဢွၼ်ႇၼိုင်ႈၸူဝ်ႈဢၼ်ၵဝ်ၶႃႈဢမ်ႇပႆႇမႃးၼၼ်ႉ၊မိူဝ်ႈလဵဝ်ဢုၵ်ႉၸႃႇပေႃႈလုင်းႁဝ်းၼမ်ၵိုၼ်းၼႃႇလူင်လၢင်ၶႃႈယဝ်ႉ။ ထႃႇဝရႃႉၽြႃး၊ ပၼ်တၢင်းလီတီႈပေႃႈလုင်းႁဝ်းၼႂ်းၵႃႈဢၼ်ၵဝ်ၶႃႈၵႂႃႇမႃးႁဵတ်းသၢင်ႈၼၼ်ႉၶႃႈယဝ်ႉ။ တေႃႈလဵဝ်ပဵၼ်ၶိင်ႇၵႃႇလႃႉဢၼ်တေလႆႈလုမ်းလႃးပုၼ်ႈတႃႇတူဝ်ၸဝ်ႈၵဝ်ႇၶႃႈယဝ်ႉ၊” ဝႃႈၼင်ႇၼႆဢေႃႈ။
လႃႇပၢၼ်ႇ၊ ၵေႃႈဝႃႈ၊ “ၵဝ်တေလႆႈပၼ်ၵႃႈႁိုဝ်၊” ဝႃႈၼင်ႇၼႆဢေႃႈ။ ယႃႇၵုပ်ႈ၊ ၶိုၼ်းလၢတ်ႈလႄႈဝႃႈ၊ “ၵဝ်ၶႃႈဢမ်ႇဢဝ်ၵႃႈႁႅင်းၵဝ်ၶႃႈလႃးလႃး။ ပေႃးဝႃႈ၊ပေႃႈလုင်းႁဝ်းၽွမ်ႉတၢင်းၵျၢမ်ႇတၢင်းပွင်ၵဝ်ၶႃႈၸိုင်၊ယွၼ်းႁႂ်ႈၵဝ်ၶႃႈလႆႈသိုပ်ႇလဵင်ႉထိင်းသူဝ်း၊ပႄႉ၊ပေႃႈလုင်းႁဝ်းၸိူဝ်းၼၼ်ႉၵႂႃႇထႅင်ႈသေၵမ်း။-
မိူဝ်ႈၼႆႉႁႂ်ႈၵဝ်ၶႃႈလႆႈၵႂႃႇတီႈၽုင်သူဝ်းၽုင်ပႄႉလုင်းႁဝ်းၵူႈတီႈၵူႈလႅၼ်လႄႈလိူၵ်ႈၽႄဢဝ်သူဝ်းဢွၼ်ႇဢၼ်ၵမ်ႇလႂ်၊တင်းပႄႉဢွၼ်ႇဢၼ်လၢႆးဢၼ်လဵၼ်းလႄႈပဵၼ်ၸုမ်ႈပဵၼ်ၵႂၢၵ်ႈၼၼ်ႉႁႂ်ႈပဵၼ်ပုၼ်ႈၵႃႈႁႅင်းၵဝ်ၶႃႈသေၵမ်း။-
မိူဝ်းၼႃႈလုင်းႁဝ်းတေလႆႈႁုလွင်ႈဢၼ်ၵဝ်ၶႃႈမီးသဵတ်ႈၸႃႇၵႃႈႁိုဝ်ၼၼ်ႉဢေႃႈ။ မိူဝ်ႈဢၼ်ပေႃႈလုင်းႁဝ်းမႃးၸႅတ်ႈသေးတူၺ်းၵႃႈႁႅင်းၵဝ်ၶႃႈလႄႈ၊ပေႃးထူပ်းႁၼ်ပႄႉဢၼ်ဢမ်ႇလၢႆးဢမ်ႇလဵၼ်းလႄႈဢမ်ႇပဵၼ်ၸုမ်ႈပဵၼ်ၵႂၢၵ်ႈ၊ဢိၵ်ႇတင်းသူဝ်းဢၼ်ဢမ်ႇၵမ်ႇလႂ်ၸိုင်၊မၢတ်ႈဝႃႈ၊ၵဝ်ၶႃႈလၵ်ႉဢဝ်လႅၼ်ဢဝ်ၵူႈတူဝ်ၶႃႈတႃႉ၊” ဝႃႈၼင်ႇၼႆဢေႃႈ။
လႃႇပၢၼ်ႇ၊ ၵေႃႈဝႃႈ၊ “ၽွမ်ႉယဝ်ႉ။ ႁဝ်းဢွၼ်ၵၼ်ႁဵတ်းၸွမ်းတၢင်းၵျၢမ်ႇတၢင်းပွင်မႂ်းတႃႉႁဝ်း၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊ၼႂ်းဝၼ်းၼၼ်ႉ လႃႇပၢၼ်ႇ၊ လိူၵ်ႈၽႄဢဝ်ပႄႉပေႃႈဢၼ်လဵၼ်းဢၼ်လၢႆးလႂ်၊ပႄႉမႄႈဢၼ်လဵၼ်းဢၼ်လၢႆးလႂ်၊ပႄႉၵႃႈဢၼ်ၽိူၵ်ႇလႂ်၊ဢိၵ်ႇတင်းသူဝ်းဢၼ်ၵမ်ႇလႂ်၊တင်းသဵင်ႈဢွၵ်ႇသေယဝ်ႉ၊ဢၢပ်ႈပၼ်ၼႂ်းမိုဝ်းလုၵ်ႈၸၢႆးမၼ်းၸိူဝ်းၼၼ်ႉသေလႄႈ၊-
ၶိုင်ပွင်ဢဝ်ၽုင်သူဝ်းၽုင်ပႄႉဢၼ်မၼ်းလိူၵ်ႈဢွၵ်ႇၸိူဝ်းၼၼ်ႉတင်းၽုင်သူဝ်းၽုင်ပႄႉမၼ်းၸိူဝ်းဢၼ်ၵိုတ်းၵျၢၼ်ႇယူႇၼႂ်းမိုဝ်း ယႃႇၵုပ်ႈ၊ ၸိူဝ်းၼၼ်ႉယူႇၽၢတ်ႇယၢၼ်ၵႆၵၼ်ၶၢဝ်းတၢင်းသၢမ်ဝၼ်းဢေႃႈ။ ယႃႇၵုပ်ႈ၊ ၵေႃႈလဵင်ႉထိင်းသူဝ်းပႄႉဢၼ်ၵိုတ်းၵျၢၼ်ႇဝႆႉၸိူဝ်းၼၼ်ႉဢေႃႈ။
မိူဝ်ႈၼၼ်ႉ၊ ယႃႇၵုပ်ႈ၊ ဢဝ်ၵိင်ႇမႆႉလိပ်းတႅပ်းႁွမ်းႁဵတ်းၶွၼ်ႉၵွမ်ႈသေၵႃႈတီႈမႆႉမၢၵ်ႇၽွတ်ႈလမ်လႂ်၊မႆႉၵေႃႇလႂ်၊တင်းမႆႉၶႆႉလႂ်သေလႄႈၶႅၼ်ႈႁဵတ်းပဵၼ်ပွင်ႈလွၵ်ႈၼင်ႁႂ်ႈပဵၼ်ပွင်ႈၽိူၵ်ႇပွင်ႈၶဵဝ်လၢႆးလဵၼ်းဝႆႉဢေႃႈ။-
မၼ်းဢဝ်ၶွၼ်ႉၵွမ်ႈၶႅၼ်ႈပွင်ႈလၢႆးလဵၼ်းၸိူဝ်းၼၼ်ႉသဵပ်ႇပၵ်းဝႆႉသိုဝ်ႈၼႃႈသူဝ်းလႂ်၊ပႄႉလႂ်၊တီႈႁိမ်းၵွၵ်းႁၢင်းၼမ်ႉၵိၼ်ၶဝ်ဢေႃႈ။ မၼ်းႁဵတ်းၸိူဝ်ႉၼင်ႇၼၼ်ၵွပ်ႈပိူဝ်ႈသူဝ်းလႂ်ပႄႉလႂ်၊ဝၢင်ၵၼ်မိူဝ်ႈဢၼ်ၶဝ်မႃးၵိၼ်ၼမ်ႉၼၼ်ႉသေယဝ်ႉ၊-
သူဝ်းပႄႉၸိူဝ်းၼၼ်ႉမၢၼ်းမႃးၽၢႆႇၼႃႈၶွၼ်ႉၵွမ်ႈၸိူဝ်းၼၼ်ႉလႄႈၵိူတ်ႇလဵင်ႉမႃးပဵၼ်တူဝ်လၢႆးတူဝ်လဵၼ်းလႂ်၊တူဝ်ဢၼ်ပဵၼ်ၸုမ်ႈပဵၼ်ၵႂၢၵ်ႈလႂ်ဢေႃႈ။
ယႃႇၵုပ်ႈ၊ ၸတ်းၽႄဢဝ်သူဝ်းဢွၼ်ႇပႄႉဢွၼ်ႇၸိူဝ်းၼၼ်ႉဝႆႉတီႈၼိုင်ႈလႄႈ၊ႁႂ်ႈဝၢႆႇၼႃႈၸူးၽုင်သူဝ်းၽုင်ပႄႉ လႃႇပၢၼ်ႇ၊ ၸိူဝ်းဢၼ်လၢႆးဢၼ်လဵၼ်းလႂ်၊ဢၼ်ၵမ်ႇလႂ်ၸိူဝ်းၼၼ်ႉဝႆႉဢေႃႈ။ မၼ်းႁဵတ်းၸိူဝ်ႉၼင်ႇၼႆလုမ်းလႃးၽုင်သူဝ်းပႄႉမၼ်းလႄႈ၊ၸတ်းၽႄၽၢတ်ႇၵၼ်တင်းၽုင်သူဝ်းၽုင်ပႄႉ လႃႇပၢၼ်ႇ၊ ဝႆႉဢေႃႈ။
မိူဝ်ႈဢၼ်သူဝ်းပႄႉၸိူဝ်းဢၼ်ႁႅင်းယႂ်ႇဝၢင်ၵၼ်ၸင်ႇ ယႃႇၵုပ်ႈ၊ ဢဝ်ၶွၼ်ႉၵွမ်ႈဢၼ်ၶႅၼ်ႈပွင်ႈလႂ်ၸိူဝ်းၼၼ်ႉပၵ်းသိုဝ်ႈၼႃႈၶဝ်ၵႃႈတီႈႁၢင်းၼမ်ႉၵွၵ်းၼမ်ႉလႂ်လႄႈ၊ႁႂ်ႈၶဝ်ဝၢင်ၵၼ်ၵိူတ်ႇလဵင်ႉလုၵ်ႈၵႃႈတီႈၶွၼ်ႉၵွမ်ႈလၢႆးလဵၼ်းၸိူဝ်းၼၼ်ႉဢေႃႈ။-
ယၢမ်းမိူဝ်ႈဢၼ်သူဝ်းပႄႉဢၼ်ႁႅင်းဢူၼ်ႈဝၢင်ၵၼ်ၸိုင်၊မၼ်းဢမ်ႇပၵ်းပၼ်ၶွၼ်ႉၵွမ်ႈလၢႆးၸိူဝ်းၼၼ်ႉလႄႈ၊ လႃႇပၢၼ်ႇ၊ လႆႈသူဝ်းပႄႉဢၼ်ႁႅင်းဢူၼ်ႈလႂ်ၵူၺ်းဢေႃႈ။ ယႃႇၵုပ်ႈ၊ ၸမ်ႉ၊လႆႈတူဝ်ဢၼ်ႁႅင်းယႂ်ႇလႂ်ဢေႃႈ။-
ယႃႇၵုပ်ႈ၊ ႁဵတ်းၼင်ႇၼၼ်လႄႈမၢၵ်ႈမီးလီပဵၼ်မႃး၊မီးသူဝ်းပႄႉလႂ်၊ၶႃႈၵူၼ်းၸႂ်ႉလႂ်၊ၵလႃႇဢုၵ်ႈလႂ်၊တင်းမႃႉလီႈလႂ်ၼမ်ၼႃႇဢေႃႈ။
ယႃႇၵုပ်ႈ၊ လႆႈငိၼ်းၵႂၢမ်းဢၼ်လုၵ်ႈၸၢႆး လႃႇပၢၼ်ႇ၊ ၸိူဝ်းၼၼ်ႉဝႃႈ၊ “ ယႃႇၵုပ်ႈ၊ ဢဝ်ဢုၵ်ႉၸႃႇပေႃႈႁဝ်းၵႃႈမီးတင်းသဵင်ႈတင်းလူင်ၵႂႃႇယဝ်ႉ။ ၵွပ်ႈပိူဝ်ႈဢုၵ်ႉၸႃႇပေႃႈႁဝ်းလႄႈမၼ်းမၢၵ်ႈမီးလီပဵၼ်ထၼ်ႇၼႆႉယဝ်ႉ၊” ဝႃႈၼင်ႇၼႆၼၼ်ႉဢေႃႈ။-
မိူဝ်ႈဢၼ် ယႃႇၵုပ်ႈ၊ တူၺ်းၼႃႈ လႃႇပၢၼ်ႇ၊ ၼၼ်ႉၸိုင်၊မၼ်းႁုဝႃႈ၊ လႃႇပၢၼ်ႇ၊ ဢမ်ႇမိူၼ်မိူဝ်ႈဢွၼ်တၢင်းၼၼ်ႉယဝ်ႉ။-
ထႃႇဝရႃႉၽြႃး၊ ၸင်ႇလၢတ်ႈတီႈ ယႃႇၵုပ်ႈ၊ လႄႈဝႃႈ၊ “ၶိုၼ်းမိူဝ်းၸူးတီႈမိူင်းပူႇမိူင်းပေႃႈမႂ်းတီႈဢၼ်ပီႈၼွင်ႉမႂ်းမီးပုၼ်ႉၼၼ်ႉတႃႉ။ ၵဝ်တၵ်းယူႇလူၺ်ႈၵၼ်တင်းမႂ်းဢေႃႈ၊” ဝႃႈၼင်ႇၼႆဢေႃႈ။
မၼ်းၵေႃႈပွႆႇၸႂ်ႉၵူၼ်းၵႂႃႇႁွင်ႉ ရႃႇၶေႇလႃႉ၊ တင်း လေးဢႃႇ၊ ႁႂ်ႈမႃးတီႈမၼ်းၵႃႈတီႈပၢင်ႇယိူဝ်ႈဢၼ်ၽုင်သူဝ်းမၼ်းယူႇၼၼ်ႉသေယဝ်ႉ၊-
လၢတ်ႈတီႈၶဝ်ၼၼ်ႉလႄႈဝႃႈ၊ “ၵဝ်ႁုႁၼ်လွင်ႈဢၼ်ပေႃႈသူဢမ်ႇပၼ်ၼႃႈလီတီႈၵဝ်မိူၼ်မိူဝ်ႈဢွၼ်တၢင်းၼၼ်ႉယဝ်ႉ။ ၵူၺ်းၵႃႈ၊ၽြႃးပဵၼ်ၸဝ်ႈပေႃႈၵဝ်မီးယူႇလူၺ်ႈၵၼ်တင်းၵဝ်ယဝ်ႉဢေႃႈ။-
သူႁုလွင်ႈဢၼ်ၵဝ်ၶတ်းၸႂ်ႁဵတ်းၵၢၼ်ပေႃႈသူၵႃႈၼင်ႇဢၼ်ၵဝ်တၢတ်ႈၼိူင်ႇလႆႈၼၼ်ႉယူႇဢေႃႈ။-
ၵူၺ်းၵႃႈ၊မၼ်းပႅတ်ႉလႅၼ်ၵဝ်လႄႈ၊လႅၵ်ႈလၢႆႈၵႃႈႁႅင်းၵဝ်ပဵၼ်တၢင်ႇမဵဝ်းသိပ်းပွၵ်ႈယဝ်ႉ။ ၼႂ်းဝႃႈၼၼ်သေၵေႃႈၽြႃးပဵၼ်ၸဝ်ႈဢမ်ႇပၼ်ၶႂၢင်ႉႁႂ်ႈမၼ်းႁဵတ်းႁႂ်ႈၵဝ်လႆႈလုသုမ်း။-
မိူဝ်ႈဢၼ်မၼ်းဝႃႈ၊ ‘တူဝ်ဢၼ်ပဵၼ်ၸုမ်ႈပဵၼ်ၵႂၢၵ်ႈၸိူဝ်းၼၼ်ႉႁႂ်ႈပဵၼ်ၵႃႈႁႅင်းမႂ်းတႃႉ၊’ ဝႃႈၸိူဝ်ႉၼင်ႇၼႆၼၼ်ႉ၊သူဝ်းဢွၼ်ႇပႄႉဢွၼ်ႇဢၼ်ၵိူတ်ႇမႃးပဵၼ်ဢၼ်ၸုမ်ႈဢၼ်ၵႂၢၵ်ႈၵူၺ်းၵူၺ်းဢေႃႈ။ မိူဝ်ႈဢၼ်မၼ်းဝႃႈ၊ ‘တူဝ်ဢၼ်လဵၼ်းဢၼ်လၢႆးၸိူဝ်းၼၼ်ႉႁႂ်ႈပဵၼ်ၵႃႈႁႅင်းမႂ်းတႃႉ၊’ ဝႃႈၸိူဝ်ႉၼင်ႇၼႆၼၼ်ႉသူဝ်းဢွၼ်ႇပႄႉဢွၼ်ႇဢၼ်ၵိူတ်ႇမႃးၸိူဝ်းၼၼ်ႉၵေႃႈပဵၼ်ဢၼ်လၢႆးဢၼ်လဵၼ်းလွၼ်ႉလွၼ်ႉဢေႃႈ။-
ၼႆႉၸမ်ႉ၊ပဵၼ်တၢင်းဢၼ်ၽြႃးပဵၼ်ၸဝ်ႈၼုၵ်ႈဢဝ်တရိၵ်ႈသၢၼ်ႇပေႃႈသူသေလႄႈပၼ်ၵဝ်ယဝ်ႉ။
“မိူဝ်ႈဢၼ်တရိၵ်ႈသၢၼ်ႇၸိူဝ်းၼၼ်ႉဝၢင်ၵၼ်ၼၼ်ႉၸိုင်၊ၼႂ်းတၢင်းၼွၼ်းၽၼ်ႁၼ်ၵဝ်ၼၼ်ႉၵဝ်လႆႈႁၼ်လွင်ႈဢၼ်တူဝ်ပေႃႈတင်းလၢႆဢၼ်ၸွမ်းၽွၵ်ႇတူဝ်မႄႈၸိူဝ်းၼၼ်ႉမီးၵွင်ႉငဝ်းဢၼ်လၢႆးဢၼ်လဵၼ်းဢၼ်ပဵၼ်ၸုမ်ႈပဵၼ်ၵႂၢၵ်ႈဝႆႉၼၼ်ႉဢေႃႈ။-
ၼႂ်းတၢင်းၼွၼ်းၽၼ်ႁၼ်ၵဝ်ၼၼ်ႉတမၢၼ်ႇၵၢင်ႁၢဝ်ႁွင်ႉၵဝ်လႄႈဝႃႈ၊ ‘ယႃႇၵုပ်ႈ႟၊’ ဝႃႈၼႆလႄႈ၊ၵဝ်ၶိုၼ်းတွပ်ႇဝႃႈ၊ ‘ဢေႃႈၶႃႈ၊’ ဝႃႈၼင်ႇၼႆဢေႃႈ။-
မၼ်းၸဝ်ႈသိုပ်ႇလၢတ်ႈလႄႈဝႃႈ၊ ‘မုင်ႈတူၺ်းတႃႉ၊တူဝ်ပေႃႈတင်းလၢႆဢၼ်ၸွမ်းၽွၵ်ႇတူဝ်မႄႈၸိူဝ်းၼၼ်ႉမီးၵွင်ႉငဝ်းဢၼ်လၢႆးဢၼ်လဵၼ်းဢၼ်ပဵၼ်ၸုမ်ႈပဵၼ်ၵႂၢၵ်ႈၵူႈတူဝ်ဢေႃႈ။ ၵဝ်ႁဵတ်းၸိူဝ်ႉၼင်ႇၼႆ၊ၵွပ်ႈပိူဝ်ႈၵဝ်ႁၼ်ၵႃႈဢၼ် လႃႇပၢၼ်ႇ၊ ႁဵတ်းတီႈမႂ်းၼၼ်ႉယဝ်ႉ။-
ၵဝ်ၸမ်ႉ၊ပဵၼ်ၽြႃးဢၼ်ပေႃႇမႃးတီႈ ပေႇသလႃႉ၊ တီႈဢၼ်မႂ်းဢဝ်ၼမ်ႉမၼ်းလေႃႇသႂ်ႇၵႃႈၼိူဝ်သဝ်ႁိၼ်တီႈဢၼ်မၢတ်ႈဢၼ်တွင်းလႄႈႁဵတ်းၵတိသဵတ်ႈၸႃႇဝႆႉၼၼ်ႉဢေႃႈ။ တေႃႈလဵဝ်ႁႅၼ်းၶူဝ်းလႄႈၶိုၼ်ႈမိူဝ်းၵႂႃႇၸူးမိူင်းၽင်ႁူၵ်ႉၽင်ႁႄႇမႂ်းပုၼ်ႉတႃႉ၊’ ဝႃႈၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ရႃႇၶေႇလႃႉ၊ တင်း လေးဢႃႇ၊ ၶိုၼ်းလၢတ်ႈတီႈ ယႃႇၵုပ်ႈ၊ လႄႈဝႃႈ၊ “ႁဝ်းၶႃႈဢမ်ႇမီးလွင်ႈဢၼ်တၵ်းၸၢပ်ႈသႅင်ႇၵၼ်တင်းၼႃႈႁိူၼ်းပေႃႈႁဝ်းယဝ်ႉလႄႈ၊ဢမ်ႇမီးတီႈမုင်ႈမွင်းဢမူၺ်ႇသေၸိူဝ်ႉသေပိူင်ၶႃႈယဝ်ႉ။-
မၼ်းမၢတ်ႈႁဝ်းၶႃႈပဵၼ်ၸိူဝ်ႉၼင်ႇၵူၼ်းတၢင်ႇသိုင်ႇတၢင်ႇမိူင်းယဝ်ႉဢေႃႈ။ မၼ်းၶၢႆႁဝ်းၶႃႈပႅတ်ႈယဝ်ႉလႄႈငိုၼ်းဢၼ်လႆႈၵႃႈၶၼ်ႁဝ်းၶႃႈၼၼ်ႉၵေႃႈမၼ်းၸူၵ်းၸၢႆႇပႅတ်ႈသဵင်ႈယဝ်ႉဢေႃႈ။-
ၸေးၸိမ်ႇၵႃႈဢၼ်ၽြႃးပဵၼ်ၸဝ်ႈၼုၵ်ႈဢဝ်သေၵႃႈတီႈပေႃႈႁဝ်းၶႃႈတင်းလူင်ၼၼ်ႉပဵၼ်ဢုၵ်ႉၸႃႇႁဝ်းၶႃႈတင်းလုၵ်ႈလၢင်းႁဝ်းၶႃႈၶႃႈဢေႃႈ။ ပိူဝ်ႈၼႆလႄႈတေႃႈလဵဝ်ႁဵတ်းၸွမ်းၵႃႈၼင်ႇဢၼ်ၽြႃးပဵၼ်ၸဝ်ႈသင်ႇလၢတ်ႈဝႆႉတီႈၸဝ်ႈၼၼ်ႉၵူၺ်းတႃႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ ယႃႇၵုပ်ႈ၊ ႁႅၼ်းၶူဝ်းမၼ်းသေယဝ်ႉ၊ဢဝ်လုၵ်ႈလၢင်းမၼ်းဢိၵ်ႇတင်းမေးမၼ်းတင်းလၢႆၶီႇၵလႃႇဢုၵ်ႈသေလႄႈ၊-
ႁေႃႈၽုင်သူဝ်း၊ၽုင်ပႄႉ၊ၵႃႈဢၼ်မၼ်းမီးတင်းသဵင်ႈတင်းလူင်ဢၼ်ပဵၼ်၊ဢုၵ်ႉၸႃႇတရိၵ်ႈသၢၼ်ႇဢၼ်မၼ်းၸုလႆႈသိမ်းလႆႈၵႃႈတီႈမိူင်း မေႇသူဝ်ႇပူဝ်ႇတေးမီးယႃး၊ ၸိူဝ်းၼၼ်ႉပုၼ်ႈတေမိူဝ်းၵႂႃႇၸူးတီႈပေႃႈမၼ်း ဢိၸၢၵ်ႈ၊ ၵႃႈတီႈမိူင်း ၶႃႇၼၼ်ႇ၊ ၼၼ်ႉဢေႃႈ။-
ယၢမ်းမိူဝ်ႈဢၼ် လႃႇပၢၼ်ႇ၊ ဢွၵ်ႇၵႂႃႇၵႅတ်းႁႆးၶူၼ်သူဝ်းတၢင်ႇတီႈတၢင်ႇလႅၼ်လႄႈဢမ်ႇယူႇႁိူၼ်းၼၼ်ႉ ရႃႇၶေႇလႃႉ၊ လၵ်ႉဢဝ်ႁုၼ်ႇႁၢင်ႈ တေႇရၽိမ်း၊ ဢၼ်ပဵၼ်ၽြႃးႁူဝ်ႁိူၼ်းပေႃႈၶဝ်ၼၼ်ႉၵႂႃႇဢေႃႈ။-
ယႃႇၵုပ်ႈ၊ ႁဵတ်းပရိယႄႇသေယင်းဢမ်ႇမွၵ်ႇဢမ်ႇလၢတ်ႈ လႃႇပၢၼ်ႇ၊ လႄႈလွမ်ဢွၵ်ႇပၢႆႈၵႂႃႇဢေႃႈ။-
မၼ်းပႃးဢဝ်ဢုၵ်ႉၸႃႇၵႃႈဢၼ်မၼ်းမီးၵူႈၸိူဝ်ႉၵူႈပိူင်လႄႈဢွၵ်ႇပၢႆႈၵႂႃႇၶၼ်ၶၼ်ၽႂ်းၽႂ်းသေယဝ်ႉ၊ၶၢမ်ႈၼမ်ႉမႄႈ ဢုၽရတ်ႉ၊ သေဝၢႆႇၼႃႈၵႂႃႇၸူးသဵၼ်ႈတၢင်းဢၼ်ၵႂႃႇတီႈလွႆ ၵိလတ်ႉ၊ ပုၼ်ႉသေဢေႃႈ။
လႆႈသၢမ်ဝၼ်းယဝ်ႉလႄႈ၊ လႃႇပၢၼ်ႇ၊ လႆႈငိၼ်းပိူၼ်ႈလၢတ်ႈဝႃႈ၊ ယႃႇၵုပ်ႈ၊ ပၢႆႈၵႂႃႇၼၼ်ႉသေယဝ်ႉ၊-
ႁွင်ႉဢဝ်ၵူၼ်းမၼ်းတင်းလၢႆလမ်းၸွမ်းၵႂႃႇၶၢဝ်းတၢင်းၸဵတ်းဝၼ်းယဝ်ႉၸင်ႇၶိုတ်းၶဝ်ၵႃႈတီႈလွႆ ၵိလတ်ႉ၊ ဢေႃႈ။-
ၶိုၼ်းၼၼ်ႉ၊ၽြႃးပဵၼ်ၸဝ်ႈမႃးလၢတ်ႈတီႈ လႃႇပၢၼ်ႇ၊ ၼႂ်းတၢင်းၼွၼ်းၽၼ်လႄႈဝႃႈ၊ “လွင်ႈၼင်ႇႁိုဝ်တေဢမ်ႇလၢတ်ႈႁၢႆႉလၢတ်ႈၸႃႉတီႈ ယႃႇၵုပ်ႈ၊ ၸိုင်၊ႁဵတ်းသတိတႃႉ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ ယႃႇၵုပ်ႈ၊ လႆႈတင်ႈသုမ်ႉထဵင်မၼ်းၵႃႈၼိူဝ်လွႆဝႆႉယဝ်ႉလႄႈ၊ လႃႇပၢၼ်ႇ၊ ၵေႃႈၵႂႃႇၶိုတ်းၶဝ်သေယဝ်ႉ၊ၸႂ်ႉၵူၼ်းမၼ်းတင်ႈသုမ်ႉထဵင်ၶဝ်ၵႃႈတီႈလွႆ ၵိလတ်ႉ၊ ဢေႃႈ။
လႃႇပၢၼ်ႇ၊ လၢတ်ႈတီႈ ယႃႇၵုပ်ႈ၊ လႄႈဝႃႈ၊ “မႂ်းႁဵတ်းသင်လႄႈပႅတ်ႉလႅၼ်ၵဝ်သေယဝ်ႉ၊သိမ်းဢဝ်လုၵ်ႈယိင်းၵဝ်တင်းလၢႆၵႂႃႇမိူၼ်ၸိူဝ်ႉၼင်ႇဢၼ်မႄႈယိင်းၸိူဝ်းဢၼ်လႆႈၶၢမ်ႇတိလႆႈၵႃႈၼႂ်းပၢင်တိုၵ်းသိုၵ်းမႃးၼၼ်ႉၸိူဝ်ႉၼင်ႇႁိုဝ်။-
ႁဵတ်းသင်လႄႈပႅတ်ႉလႅၼ်ၵဝ်သေလႄႈလွမ်ပၢႆႈဢွၵ်ႇမႃးတဵတ်ႇတဵတ်ႇၸိူဝ်ႉၼင်ႇႁိုဝ်။ ပေႃးမႂ်းလၢတ်ႈၵဝ်ၸိုင်၊ၵဝ်ယင်းတေလႆႈႁဵတ်းတၢင်းမူၼ်ႈတၢင်းပျေႃႇ၊ႁဵတ်းၵႂၢမ်းႁႆႇၵွင်လဵတ်းတိင်ႇသေလႄႈပွႆႇမႂ်းၵႂႃႇလူးၵွၼ်ႇဢေႃႈ။-
မႂ်းယင်းဢမ်ႇႁႂ်ႈၵဝ်တၼ်းလႆႈၼုၵ်ႈသၢၵ်ႈၸုပ်ႇၼူမ်လုၵ်ႈလၢၼ်ၵဝ်တင်းလၢႆသေဢိတ်း။ မႂ်းပေႉမႃးၸႂ်ႁၢႆႉထၼ်ႇၼႆႉ။-
ၵဝ်ၶႂ်ႈၼိၵ်ႈၸၢၵ်ႈငႅၼ်းသႄးမႂ်းလႆႈယူႇဢေႃႈ။ ၼႂ်းဝႃႈၼၼ်သေၵေႃႈ၊ၶိုၼ်းပူၼ်ႉမႃးၼႆႉၽြႃးပဵၼ်ၸဝ်ႈဢၼ်ပေႃႈမႂ်းၵူဝ်းၵႂၢႆႇၼၼ်ႉႁၢမ်ႈၵဝ်ဝႆႉ ဢမ်ႇႁႂ်ႈၵဝ်လၢတ်ႈၵႂၢမ်းႁၢႆႉတေႃႇမႂ်းဢေႃႈ။-
မႂ်းၸႂ်ထိုင်ႁိူၼ်းပေႃႈမႂ်းလႄႈဢွၵ်ႇမိူဝ်းၵႂႃႇၼႆႉထုၵ်ႇမႅၼ်ႈသေလူးၵွၼ်ႇတႃႉ။ ၵူၺ်းၵႃႈ၊ႁဵတ်းသင်လႄႈမႂ်းလၵ်ႉဢဝ်ႁုၼ်ႇႁၢင်ႈဢၼ်ပဵၼ်ၽြႃးႁူဝ်ႁိူၼ်းၵဝ်ၵႂႃႇၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ယႃႇၵုပ်ႈ၊ ၶိုၼ်းလၢတ်ႈလႄႈဝႃႈ၊ “ၵဝ်ၶႃႈၵူဝ်လႄႈထၢင်ႇဝႃႈ၊လုင်းႁဝ်းတေႁိမ်ဢဝ်လုၵ်ႈယိင်းပေႃႈလုင်းႁဝ်းၸိူဝ်းၼႆႉဝႆႉၶႃႈလႄႈ၊ၸင်ႇလႆႈဢွၵ်ႇပၢႆႈမႃးၶႃႈဢေႃႈ။-
ၽြႃးႁူဝ်ႁိူၼ်းလုင်းႁဝ်းၼၼ်ႉၸမ်ႉ၊ထူပ်းႁၼ်တီႈၽႂ်သေဢမ်ႇဝႃႈ၊ဢဝ်မၼ်းတၢႆတႃႉ။ ႁႂ်ႈၵူၼ်းပေႃႈလုင်းႁဝ်းၸိူဝ်းၼႆႉဝႆႉပဵၼ်သၢၵ်ႈသေႇလႄႈသွၵ်ႈႁႃၶူဝ်းပေႃႈလုင်းႁဝ်းၶႃႈတႃႉ၊” ဝႃႈၼင်ႇၼႆဢေႃႈ။ လွင်ႈဢၼ် ရႃႇၶေႇလႃႉ၊ လၵ်ႉဢဝ်ဝႆႉၼၼ်ႉ ယႃႇၵုပ်ႈ၊ ဢမ်ႇႁု။
လႃႇပၢၼ်ႇ၊ ၶဝ်ႈသွၵ်ႈႁႃၵႃႈၼႂ်းသုမ်ႉထဵင် ယႃႇၵုပ်ႈ၊ သေယဝ်ႉ၊ၶဝ်ႈသွၵ်ႈႁႃၵႃႈၼႂ်းသုမ်ႉထဵင် လေးဢႃႇ၊ တင်းသုမ်ႉထဵင်သၢဝ်ၵူၼ်းၸႂ်ႉသွင်ၵေႃႉၼၼ်ႉသေၵေႃႈဢမ်ႇႁၼ်။ ဝၢႆးၼၼ်ႉမၼ်းၶဝ်ႈသွၵ်ႈႁႃၼႂ်းသုမ်ႉထဵင် ရႃႇၶေႇလႃႉ၊ ဢေႃႈ။-
ရႃႇၶေႇလႃႉ၊ ဢဝ်ႁုၼ်ႇႁၢင်ႈဢၼ်ပဵၼ်ၽြႃးႁူဝ်ႁိူၼ်းၼၼ်ႉ သိူင်ႇဝႆႉၵႃႈၼႂ်းၶိူင်ႈၵွပ်းၵလႃႇဢုၵ်ႈသေယဝ်ႉ၊ၼင်ႈတဵင်ဝႆႉဢေႃႈ။ လႃႇပၢၼ်ႇ၊ သွၵ်ႈႁႃၸွတ်ႇသုမ်ႉၵႂႃႇၵေႃႈဢမ်ႇထူပ်းဢမ်ႇႁၼ်။-
ရႃႇၶေႇလႃႉ၊ လၢတ်ႈတီႈပေႃႈမၼ်းလႄႈဝႃႈ၊ “ယႃႇပေၶႂ်ႈၸႃႉသေၵမ်းၶႃႈပေႃႈ။ ၵဝ်ၶႃႈဢမ်ႇၸၢင်ႈလုၵ်ႉၸုၵ်းၽၢႆႇၼႃႈပေႃႈႁဝ်းၵွပ်ႈပိူဝ်ႈၵဝ်ၶႃႈမီးၼႃႈလိူၼ်ယူႇၶႃႈဢေႃႈ၊” ဝႃႈၼင်ႇၼႆဢေႃႈ။ ၼင်ႇၼၼ်လႄႈ လႃႇပၢၼ်ႇ၊ သွၵ်ႈႁႃႁုၼ်ႇႁၢင်ႈဢၼ်ပဵၼ်ၽြႃးႁူဝ်ႁိူၼ်းမၼ်းၼၼ်ႉဢမ်ႇထူပ်းဢမ်ႇႁၼ်။
မိူဝ်ႈၼၼ်ႉ၊ ယႃႇၵုပ်ႈ၊ ဢွၵ်ႇတေႃးသႃႉလႄႈပွင်ႉမေႃးတီႈ လႃႇပၢၼ်ႇ၊ လႄႈဝႃႈ၊ “ၵဝ်ၶႃႈၽိတ်းသင်လႄႈလုင်းႁဝ်းလိုပ်ႈၸွမ်းလမ်းၸွမ်းၵဝ်ၶႃႈၸိူဝ်ႉၼင်ႇၼႆၶႃႈ။-
လုင်းႁဝ်းသွၵ်ႈႁႃၵႃႈၼႂ်းဢုၵ်ႉၸႃႇၶူဝ်းလဵင်းၵဝ်ၶႃႈပေႃးၸွတ်ႇယဝ်ႉ။ ထူပ်းႁၼ်ဢုၵ်ႉၸႃႇၶူဝ်းႁိူၼ်းလုင်းႁဝ်းၵႃႈသင်ယဝ်ႉ။ ပေႃးထူပ်းႁၼ်ယဝ်ႉၸိုင်၊တမ်းၵႃႈတီႈၼႆႈ၊ၽၢႆႇၼႃႈၵူၼ်းလုင်းႁဝ်းလႄႈၵူၼ်းၵဝ်ၶႃႈၸိူဝ်းၼႆႉႁႂ်ႈၶဝ်ၸီႇယၢင်ႇဝူင်ႈၵၢင်ႁဝ်းၽႂ်ၽိတ်းၽႂ်ထုၵ်ႇၼၼ်ႉတႃႉ။-
ၵဝ်ၶႃႈယူႇလူၺ်ႈလုင်းႁဝ်းသၢဝ်းပီယဝ်ႉ။ သူဝ်းမႄႈပႄႉမႄႈလုင်းႁဝ်းဢၼ်မၢၼ်းၸိူဝ်းၼၼ်ႉဢမ်ႇလုဢမ်ႇတူၵ်း၊သူဝ်းပေႃႈပႄႉပေႃႈလုင်းႁဝ်းၵေႃႈၵဝ်ၶႃႈဢမ်ႇၵိၼ်သေတူဝ်။-
မိူဝ်ႈလႂ်သေဢမ်ႇဝႃႈ၊ပေႃးတူဝ်ထိူၼ်ႇၶူပ်းတၢႆသေတူဝ်သေလႂ်ၵေႃႈၵဝ်ၶႃႈဢမ်ႇဢဝ်မႃးၼႄလုင်းႁဝ်းလႄႈ၊ၵဝ်ၶႃႈၶၢမ်ႇသုမ်းၽၢႆႇလဵဝ်ၵူၺ်းၶႃႈဢေႃႈ။ ပေႃးပိူၼ်ႈလၵ်ႉၶိင်ႇၵၢင်ဝၼ်းလႄႈသင်၊လၵ်ႉၶိင်ႇၵၢင်ၶိုၼ်းလႄႈသင်၊လုင်းႁဝ်းယင်းယွၼ်းဢဝ်တူဝ်တႅၼ်းမၼ်းသေၵႃႈတီႈၵဝ်ၶႃႈၶႃႈဢေႃႈ။-
ၵဝ်ၶႃႈလႆႈၶၢမ်ႇမႆႈၶၢမ်ႇႁွၼ်ႉၶိင်ႇလႅတ်ႇမႆႈလႅတ်ႇလႅင်ႉ၊ဢိၵ်ႇတင်းလႆႈၶၢမ်ႇၵတ်းၶၢမ်ႇလၢင်ႈၶိင်ႇၵၢင်ၶိုၼ်းဢမ်ႇႁုလၢႆပွၵ်ႈယဝ်ႉ။ တႃၼွၼ်းၵေႃႈလႆႈၶၢမ်ႇလုမႃးယဝ်ႉ၊-
ၵဝ်ၶႃႈယူႇၵႃႈတီႈႁိူၼ်းလုင်းႁဝ်းသၢဝ်းပီ လႆႈၶၢမ်ႇတၢင်းၸႂ်ႉတၢင်းသွႆပုၼ်ႈလုၵ်ႈယိင်းလုင်းႁဝ်းသွင်ၵေႃႉၼၼ်ႉသိပ်းသီႇပီ၊ပုၼ်ႈသူဝ်းလႄႈပႄႉလုင်းႁဝ်းၸိူဝ်းၼၼ်ႉ ႁူၵ်းပီမႃးယဝ်ႉ။ လုင်းႁဝ်းတေႃႈယင်းလႅၵ်ႈလၢႆႈၵႃႈႁႅင်းၵဝ်ၶႃႈသိပ်းပွၵ်ႈလူးၵွၼ်ႇဢေႃႈ။-
တေႃႈလဵဝ်ၼႆႉၵေႃႈပေႃးဝႃႈ၊ၽြႃးပဵၼ်ၸဝ်ႈပေႃႈၵဝ်ၶႃႈတင်းၽြႃးပဵၼ်ၸဝ်ႈဢၼ် ဢႃႇပြႃႇႁၢမ်ႇ၊ တင်း ဢိၸၢၵ်ႈ၊ ၵူဝ်းၵႂၢႆႇၼၼ်ႉဢမ်ႇမီးလူၺ်ႈၵၼ်တင်းၵဝ်ၶႃႈၸိုင်၊လုင်းႁဝ်းတေႁဵတ်းႁႂ်ႈၵဝ်ၶႃႈလႆႈဢွၵ်ႇၵႂႃႇတူဝ်လၢႆမိုဝ်းပဝ်ႇဢမၢၼ်ႇဢေႃႈ။ ၽြႃးပဵၼ်ၸဝ်ႈႁၼ်တုၵ်ႉၶႃႉတၢင်းၽၢၼ်ၵဝ်ၶႃႈဢိၵ်ႇတင်းၼမ်ႉတိၼ်လၢႆးမိုဝ်းၵဝ်ၶႃႈၼၼ်ႉလႄႈ၊ၼႂ်းၶိုၼ်းပူၼ်ႉၼႆႉၸင်ႇလႆႈႁၢမ်ႈလုင်းႁဝ်းၸိူဝ်ႉၼင်ႇၼႆဢေႃႈ၊” ဝႃႈၼင်ႇၼႆဢေႃႈ။
လႃႇပၢၼ်ႇ၊ ၶိုၼ်းလၢတ်ႈတီႈ ယႃႇၵုပ်ႈ၊ လႄႈဝႃႈ၊ “လုၵ်ႈယိင်းၸိူဝ်းၼႆႉပဵၼ်လုၵ်ႈယိင်းၵဝ်လႄႈလုၵ်ႈလၢင်းၶဝ်ၵေႃႈၸၢပ်ႈသႅင်ႇၵၼ်တင်းၵဝ်ဢေႃႈ။ ၽုင်သူဝ်းလႄႈပႄႉၸိူဝ်းၼႆႉၵေႃႈပဵၼ်ၶွင်ၵဝ်ဢေႃႈ။ ဢုၵ်ႉၸႃႇၶူဝ်းလဵင်းဢၼ်မႂ်းႁၼ်ၸိူဝ်းၼႆႉပဵၼ်ၶွင်ၵဝ်ဢေႃႈ။ ၼႂ်းဝႃႈၼၼ်သေၵေႃႈ၊ဝၼ်းမိူဝ်ႈၼႆႉၵဝ်ဢမ်ႇၸၢင်ႈႁဵတ်းသင်လႆႈတီႈလုၵ်ႈယိင်းၸိူဝ်းၼႆႉဢိၵ်ႇတင်းလုၵ်ႈၶဝ်လၢင်းၶဝ်ၸိူဝ်းၼႆႉဢေႃႈ။-
ပိူဝ်ႈၼႆလႄႈတေႃႈလဵဝ်ၼႆႉမႂ်းတင်းၵဝ်ႁဵတ်းသဵတ်ႈၸႃႇဝႆႉၵတိတီႈၵၼ်တႃႉႁဝ်း။ ႁႂ်ႈလႆႈပဵၼ်သၢၵ်ႈသေႇၸိုင်၊ႁဵတ်းၵွင်မၢၵ်ႇႁိၼ်ဝႆႉတႃႉႁဝ်း၊” ဝႃႈၼင်ႇၼႆဢေႃႈ။
ယႃႇၵုပ်ႈ၊ ၵေႃႈဢဝ်မၢၵ်ႇႁိၼ်လုၵ်ႈၼိုင်ႈပူၵ်းတင်ႈႁႂ်ႈပဵၼ်သဝ်လၵ်းတီႈမၢတ်ႈတွင်းဝႆႉဢေႃႈ။-
မၼ်းသမ်ႉၸႂ်ႉႁႂ်ႈၵူၼ်းမၼ်းတင်းလၢႆၵဵပ်းမၢၵ်ႇႁိၼ်မႃးႁဵတ်းၵွင်မၢၵ်ႇႁိၼ်သေယဝ်ႉ၊ဢွၼ်ၵၼ်ၵိၼ်ၶူပ်းၵႃႈႁိမ်းၵွင်မၢၵ်ႇႁိၼ်လူင်ၼၼ်ႉဢေႃႈ။-
လႃႇပၢၼ်ႇ၊ ႁွင်ႉႁဵၵ်ႈၸိုဝ်ႈၵွင်မၢၵ်ႇႁိၼ်ၼၼ်ႉဝႃႈ၊ “ ယေႇၵႃႇသႁႃႇတုသႃႉ၊ ” (ဢၼ်ၵႂၢမ်း ဢရေးပီးယႃး၊ ပွင်ႇဝႃႈ၊ၵွင်ႁိၼ်ဢၼ်ၶုၵ်းၸႂ်လႆႈ) ၼႆလႄႈ ယႃႇၵုပ်ႈ၊ သမ်ႉႁွင်ႉႁဵၵ်ႈဝႃႈ၊ “ ၵႃးလိတ်ႉ၊ ” (ၼႂ်းၵႂၢမ်းႁေႇပြႄး) ဢေႃႈ။-
လႃႇပၢၼ်ႇ၊ သမ်ႉလၢတ်ႈတီႈ ယႃႇၵုပ်ႈ၊ လႄႈဝႃႈ၊ “ၵွင်ႁိၼ်ၼႆႉပဵၼ်သၢၵ်ႈသေႇဝူင်ႈၵၢင်မႂ်းတင်းၵဝ်ဢေႃႈ၊” ဝႃႈၼင်ႇၼႆဢေႃႈ။ ပိူဝ်ႈၼႆၸင်ႇႁွင်ႉႁဵၵ်ႈဝႃႈ၊ ၵႃးလိတ်ႉ၊ ဢေႃႈ။-
“ မိၸပႃႇ၊ ” (ဢၼ်ပွင်ႇဝႃႈတီႈဢၼ်ပႂ်ႉထႃႈ) ၼႆၵေႃႈႁွင်ႉႁဵၵ်ႈလူးၵွၼ်ႇဢေႃႈ။ လွင်ႈမၼ်းၸမ်ႉ၊ လႃႇပၢၼ်ႇ၊ ဝႃႈ၊ “ဝၢႆးသေႁဝ်းၵေႃႉၼိုင်ႈလႄႈၵေႃႉၼိုင်ႈၽၢတ်ႇၵၼ်ၼၼ်ႉႁႂ်ႈ ထႃႇဝရႃႉၽြႃး၊ ပႂ်ႉတူၺ်းဝူင်ႈၵၢင်မႂ်းတင်းၵဝ်သေၵမ်းလူၺ်ႈ။-
ပေႃးမႂ်းႁဵတ်းပႄႉႁဵတ်းၼႅင်ႇၵႃႈၼိူဝ်လုၵ်ႈယိင်းၵဝ်ၸိူဝ်းၼႆႉလႄႈသင်၊ဢမ်ႇၼၼ်မႂ်းသမ်ႉဢဝ်မေးတၢင်ႇၵေႃႉထႅင်ႈလႄႈသင်၊ၵႃႈတီႈႁဝ်းၼႆႉဢမ်ႇမီးၵူၼ်းပဵၼ်သၢၵ်ႈသေႇ၊ႁႂ်ႈၽြႃးပဵၼ်ၸဝ်ႈပဵၼ်သၢၵ်ႈသေႇဝူင်ႈၵၢင်မႂ်းတင်းၵဝ်သေၵမ်း၊” ဝႃႈၼင်ႇၼႆဢေႃႈ။-
လႃႇပၢၼ်ႇ၊ သိုပ်ႇလၢတ်ႈလႄႈဝႃႈ၊ “တူၺ်းၵွင်ႁိၼ်ဢိၵ်ႇတင်းသဝ်လၵ်းႁိၼ်တီႈမၢတ်ႈတွင်းဢၼ်ၵဝ်ႁဵတ်းဝႆႉဝူင်ႈၵၢင်မႂ်းတင်းၵဝ်ၼႆႉတႃႉ။-
ၵွင်ႁိၼ်ဢိၵ်ႇတင်းသဝ်လၵ်းႁိၼ်တီႈမၢတ်ႈတွင်းၼႆႉတင်းသွင်ဢၼ်ႁႂ်ႈလႆႈပဵၼ်သၢၵ်ႈသေႇလွင်ႈဢၼ်ဝႃႈ၊ၵဝ်တၵ်းဢမ်ႇၶၢမ်ႈၵႂႃႇႁဵတ်းတၢင်းၽိတ်းသႂ်ႇမႂ်း၊မႂ်းၵေႃႈတေဢမ်ႇၶၢမ်ႈမႃးႁဵတ်းတၢင်းၽိတ်းသႂ်ႇၵဝ်ၼၼ်ႉတႃႉ။-
ႁႂ်ႈၽြႃးပဵၼ်ၸဝ်ႈ ဢႃႇပြႃႇႁၢမ်ႇ၊ ဢိၵ်ႇတင်းၽြႃးပဵၼ်ၸဝ်ႈ ၼႃႇၶေႃႇ၊ ၽြႃးပေႃႈၸဝ်ႈၶဝ်ၼၼ်ႉၸီႇယၢင်ႇၵႃႈၼႂ်းဝူင်ႈၵၢင်ႁဝ်းသေၵမ်း၊” ဝႃႈၼင်ႇၼႆဢေႃႈ။ ယႃႇၵုပ်ႈ၊ ၵေႃႈတိူင်ႇၵၢဝ်ႇၼႂ်းၸိုဝ်ႈသဵင်ၽြႃးဢၼ်ပေႃႈမၼ်း ဢိၸၢၵ်ႈ၊ ၵူဝ်ယမ်ၼၼ်ႉဢေႃႈ။-
မၼ်းႁႅမ်တူဝ်သတ်းသေလႄႈ၊သၢၵ်ႈလူႇတူဝ်တၢင်းလူႇၵႃႈၼိူဝ်လွႆၼၼ်ႉသေယဝ်ႉ၊ၽိတ်ႈပၢင်းၵူၼ်းမၼ်းတင်းလၢႆမႃးၵိၼ်ပွႆးၼၼ်ႉဢေႃႈ၊ၶဝ်ဢွၼ်ၵၼ်ၵိၼ်ပျေႃႇႁႂ်ႈလႆႈပူၼ်ႉၶိုၼ်းၼၼ်ႉဢေႃႈ။-
ထိုင်ၶိင်ႇၵၢင်ၼႂ်ၸဝ်ႉၸဝ်ႉ လႃႇပၢၼ်ႇ၊ ၼုၵ်ႈသၢၵ်ႈၸုပ်ႇၼူမ်လုၵ်ႈလၢၼ်မၼ်းတင်းလၢႆဢိၵ်ႇတင်းလုၵ်ႈယိင်းမၼ်းလႂ်သေယဝ်ႉ၊ပၼ်တၢင်းလီမၢင်ႇၵလႃႇတီႈၶဝ်ယဝ်ႉၸင်ႇပွၵ်ႈၶိုၼ်းမိူဝ်းႁိူၼ်းၵႂႃႇဢေႃႈ။
ယႃႇၵုပ်ႈ၊ ၵေႃႈပႆၸွမ်းတၢင်းၵႂႃႇလႄႈ၊တမၢၼ်ႇၵၢင်ႁၢဝ်ၽြႃးပဵၼ်ၸဝ်ႈတင်းလၢႆႁူပ်ႉထူပ်းမၼ်းဢေႃႈ။-
မၼ်းႁၼ်ၶဝ်လႄႈလၢတ်ႈဝႃႈ၊ “ဢၼ်ၼႆႉပဵၼ်ပၢင်တပ်ႉၽြႃးပဵၼ်ၸဝ်ႈဢေႃႈ၊” ဝႃႈၼင်ႇၼႆသေလႄႈႁွင်ႉႁဵၵ်ႈတီႈၼၼ်ႈၸိုဝ်ႈဝႃႈ၊ “ မႁႃႇၼိမ်ႇ၊ ” ဢေႃႈ။
မိူဝ်ႈၼၼ်ႉ၊ ယႃႇၵုပ်ႈ၊ ပွႆႇၸႂ်ႉၵူၼ်းၵမ်ႈၽွင်ႈၵႂႃႇဢွၼ်တၢင်းမၼ်းၸူးပီႈဢၢႆႈမၼ်း ဢေးသေႃး၊ ၵႃႈတီႈလႅၼ်လိၼ် ၸိရႃႉ၊ မိူင်း ဢေႇတုမ်ႇ၊ ၼၼ်ႉဢေႃႈ။-
မၼ်းသင်ႇၶဝ်ႁႂ်ႈၵႂႃႇလၢတ်ႈဝႃႈ၊ “ ယႃႇၵုပ်ႈ၊ ဢၼ်ပဵၼ်ၶႃႈၸဝ်ႈႁဝ်းၼၼ်ႉလဝ်ႈလၢတ်ႈမႃးလွင်ႈဢၼ်ဝႃႈ၊ၵဝ်ၶႃႈလႆႈသွၼ်ႈပိုင်ႈယူႇတီႈ လႃႇပၢၼ်ႇ၊ လႄႈၼၢၼ်းလႆႈပွၵ်ႈမိူဝ်းတေႃႇထိုင်ႁွတ်ႈမိူဝ်ႈလဵဝ်ၶႃႈယဝ်ႉဢေႃႈ။-
ၵဝ်ၶႃႈမီးဝူဝ်းလႂ်၊မႃႉလီႈလႂ်၊သူဝ်းပႄႉလႂ်ဢိၵ်ႇတင်းၶႃႈၵူၼ်းယိင်းၶႃႈၵူၼ်းၸၢႆးလႂ်တီႈၶႃႈဢေႃႈ။ ၵဝ်ၶႃႈလဝ်ႈလၢတ်ႈၵႂႃႇႁႂ်ႈလႆႈထူပ်းၵျေးၸူးဢၼ်ထုၵ်ႇၸႂ်ၸူမ်းၸႂ်ၸဝ်ႈႁဝ်းၶႃႈဢေႃႈ၊” ဝႃႈၼင်ႇၼႆဢေႃႈ။
ၵူၼ်းၸႂ်ႉၸိူဝ်းၼၼ်ႉၶိုၼ်းမႃးလႄႈမွၵ်ႇလၢတ်ႈတီႈ ယႃႇၵုပ်ႈ၊ လႄႈဝႃႈ၊ “ႁဝ်းၶႃႈႁွတ်ႈထိုင်ၵႂႃႇတီႈပီႈဢၢႆႈၸဝ်ႈႁဝ်း ဢေးသေႃး၊ ၼၼ်ႉမႃးၶႃႈယဝ်ႉ။ မၼ်းၵေႃႈဢွၵ်ႇမႃးပႃးတင်းၵူၼ်းသီႇပၢၵ်ႇႁႂ်ႈလႆႈထူပ်းႁၼ်ၸဝ်ႈႁဝ်းဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ ယႃႇၵုပ်ႈ၊ ၵူဝ်လႄႈမႆႈၸႂ်ၼႃႇဢေႃႈ။ မၼ်းၸင်ႇဢဝ်ၵူၼ်းဢၼ်ပႃးၸွမ်းမၼ်းၸဵမ်သူဝ်း၊ဝူဝ်း၊ပႄႉ၊ၵလႃႇဢုၵ်ႈ၊ၸိူဝ်းၼၼ်ႉတင်းမူတ်းၽႄႁဵတ်းသွင်မုၵ်ႉသွင်ၸိူဝ်းဝႆႉဢေႃႈ။-
မၼ်းဢၢင်ႈဢၢၼ်းဝႃႈ၊ “ပေႃး ဢေးသေႃး၊ တိုၵ်းတေႃးယႃႉပႅတ်ႈမုၵ်ႉၼိုင်ႈၸိုင်၊မုၵ်ႉၼိုင်ႈၸၢင်ႈတၵ်းလွတ်ႈ၊” ဝႃႈၼႆဢေႃႈ။
ၵမ်းၼၼ်ႉ၊ ယႃႇၵုပ်ႈ၊ သူးတွင်းလႄႈဝႃႈ၊ “ၽြႃးပဵၼ်ၸဝ်ႈပူႇၵဝ်ၶႃႈ ဢႃႇပြႃႇႁၢမ်ႇ၊ ၽြႃးပဵၼ်ၸဝ်ႈပေႃႈၵဝ်ၶႃႈ ဢိၸၢၵ်ႈ၊ထႃႇဝရႃႉၽြႃး၊ ဢၼ်လၢတ်ႈတေႃႇၵဝ်ၶႃႈလႄႈဝႃႈ၊ ‘ၶိုၼ်းမိူဝ်းၵႂႃႇၸူးမိူင်းမႂ်းတႃႉ၊ၵဝ်တၵ်းႁဵတ်းၵျေးၸူးတီႈမႂ်းဢေႃႈ၊’ ဝႃႈၼင်ႇၼႆၼၼ်ႉတီႈၶႃႈ႟။-
ၶႃႈၸဝ်ႈဢမ်ႇထိူၵ်ႈၶၢမ်ႇဢဝ်ၵရုၼႃႇဢိၵ်ႇတင်းသဵတ်ႈၸႃႇၵႃႈဢၼ်ၸဝ်ႈႁဝ်းၼႄပျႃးတီႈၶႃႈၸဝ်ႈၼၼ်ႉတီႈၶႃႈ။ မိူဝ်ႈၼၼ်ႉၵဝ်ၶႃႈယိပ်းၵမ်ၶွၼ်ႉတဝ်ႉၵူၺ်းသေလႄႈၶၢမ်ႈၼမ်ႉ ယေႃးတၢၼ်ႇ၊ ၵႂႃႇသေၵေႃႈတေႃႈလဵဝ်ၸမ်ႉ၊လႆႈၽႄပဵၼ်သွင်မုၵ်ႉသွင်ၸိူဝ်းမႃးဢေႃႈ။-
ပိူဝ်ႈၼႆလႄႈတေႃႈလဵဝ်ၼႆႉၵႄႇၼုၵ်ႈဢဝ်ၶႃႈၸဝ်ႈသေၵႃႈၼႂ်းမိုဝ်းပီႈ ဢေးသေႃး၊ သေၵမ်းတီႈၶႃႈ။ ၶႃႈၸဝ်ႈၵူဝ်ႁႄမၼ်းလႄႈမႆႈၸႂ်လူၺ်ႈလွင်ႈဢၼ်မၼ်းတၵ်းတိုၵ်းတေႃးယႃႉပႅတ်ႈၶႃႈၸဝ်ႈႁဝ်းၶဝ်ပေႃႈမႄႈလုၵ်ႈၵူႈၵေႃႉၼၼ်ႉၼႃႇလူင်လၢင်ၶႃႈဢေႃႈ။-
ၵူၺ်းၵႃႈ၊ၸဝ်ႈႁဝ်းလၢတ်ႈဝႆႉဝႃႈ၊ ‘ၵဝ်တၵ်းႁဵတ်းၵျေးၸူးတီႈမႂ်းဢမၢၼ်ႇၶၼ်ပဵၼ်လႄႈႁႂ်ႈၸိူဝ်ႉၶိူဝ်းမႂ်းၼမ်ၵိုၼ်းတၢၼ်ႇမဵတ်ႉသၢႆးၼႂ်းပၢင်ႇႁၢတ်ႇသၢႆးသမ်ႇမုၵ်ႈတြႃႇထၢၼ်ႈပေႃးၼပ်ႉဢၢၼ်ႇဢမ်ႇလႆႈၼၼ်ႉဢေႃႈ၊’ ဝႃႈၼင်ႇၼႆတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
ယႃႇၵုပ်ႈ၊ ယူႇၵႃႈတီႈၼၼ်ႈတေႃႇပေႃးပူၼ်ႉၶိုၼ်းၵႂႃႇသေယဝ်ႉ၊ဢဝ်ၼႂ်းဢုၵ်ႉၸႃႇဢၼ်မၼ်းမီးၼၼ်ႉမၼ်းႁႅၼ်းလၢၵ်ႈသွင်ႇပုၼ်ႈပီႈဢၢႆႈမၼ်း ဢေးသေႃး၊-
ပႄႉမႄႈသွင်ပၢၵ်ႇ၊ပႄႉပေႃႈသၢဝ်းၼိုင်ႈ၊သူဝ်းမႄႈသွင်ပၢၵ်ႇ၊သူဝ်းပေႃႈသၢဝ်းၼိုင်ႈ၊-
ၵလႃႇဢုၵ်ႈမႄႈဢၼ်ႁွတ်ႈၼမ်ႉၼူမ်းတင်းလုၵ်ႈၶဝ်ဢၼ်ၵိၼ်ၼူမ်းသၢမ်သိပ်း၊ဝူဝ်းမႄႈသီႇသိပ်း၊ဝူဝ်းပေႃႈသိပ်းၼိုင်ႈ၊မႃႉလီႈမႄႈသၢဝ်းၼိုင်ႈ၊ဢိၵ်ႇတင်းမႃႉလီႈပေႃႈသိပ်းၼိုင်ႈၸိူဝ်းၼၼ်ႉ၊-
ဝႆႉၶေႃၶေႃၽုင်လႂ်ၽုင်ၼၼ်ႉလႄႈႁႂ်ႈၵႃႈၼႂ်းၶႃႈၵူၼ်းၸႂ်ႉမၼ်းၸိူဝ်းၼၼ်ႉ ယေႈၵေႃႉထိင်းယေႈၽုင်ဢေႃႈ။ မၼ်းသင်ႇလၢတ်ႈတီႈၶဝ်လႄႈဝႃႈ၊ “သူၵႂႃႇဢွၼ်တၢင်းၵဝ်လႄႈႁႂ်ႈၶၢဝ်းတၢင်းၽုင်ၼိုင်ႈလႄႈၽုင်ၼိုင်ႈယၢၼ်ၵၼ်ၵႂႃႇတႃႉ၊” ဝႃႈၼင်ႇၼႆဢေႃႈ။-
မၼ်းသင်ႇတီႈၵေႃႉဢၼ်ၵႂႃႇဢွၼ်တၢင်းပိူၼ်ႈၼၼ်ႉလႄႈဝႃႈ၊ “မိူဝ်ႈဢၼ်ပီႈ ဢေးသေႃး၊ ႁူပ်ႉထူပ်းမႂ်းလႄႈထၢမ်ဝႃႈ၊ ‘မႂ်းပဵၼ်ၵူၼ်းၽႂ်၊တေၵႂႃႇလႂ်၊တရိၵ်ႈသၢၼ်ႇဢၼ်မိူဝ်းၵႂႃႇပႃႈၼႃႈမႂ်းၸိူဝ်းၼၼ်ႉပဵၼ်ၶွင်ၽူႈလႂ်၊’ မိူဝ်ႈဢၼ်ဝႃႈၼင်ႇၼႆၸိုင်၊-
မႂ်းတၵ်းလႆႈၶိုၼ်းတွပ်ႇဝႃႈ၊ ‘ပဵၼ်ဢုၵ်ႉၸႃႇ ယႃႇၵုပ်ႈ၊ ဢၼ်ပဵၼ်ၶႃႈၸဝ်ႈႁဝ်းၼၼ်ႉဢေႃႈ။ ပဵၼ်လၢၵ်ႈသွင်ႇဢၼ်တၵ်းသၢၵ်ႈပၼ်ၸဝ်ႈႁဝ်း ဢေးသေႃး၊ ၶႃႈဢေႃႈ။ တူဝ် ယႃႇၵုပ်ႈ၊ ၸမ်ႉ၊ၸွမ်းမႃးပႃႈလင်ယူႇဢေႃႈ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။-
မၼ်းသင်ႇၵႂၢမ်းၶေႃႈလဵဝ်ၵၼ်တီႈၵေႃႉထူၼ်ႈသွင်၊ၵေႃႉထူၼ်ႈသၢမ်၊ဢိၵ်ႇတင်းၸိူဝ်းဢၼ်ၵႂႃႇၸွမ်းမုၵ်ႉလႂ်မုၵ်ႉၼၼ်ႉၵူႈၵေႃႉလႄႈဝႃႈ၊ “သူတၵ်းလႆႈလဝ်ႈလၢတ်ႈတီႈ ဢေးသေႃး၊ ၸိူဝ်ႉၼင်ႇၼႆမိူဝ်ႈဢၼ်သူႁူပ်ႉထူပ်းမၼ်းၼၼ်ႉဢေႃႈ။-
သမ်ႉလဝ်ႈလၢတ်ႈထႅင်ႈဝႃႈ၊ ‘ၶႃႈၸဝ်ႈႁဝ်း ယႃႇၵုပ်ႈ၊ ၸပ်းၸွမ်းမႃးပႃႈလင်ႁဝ်းယူႇၶႃႈဢေႃႈ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။ မၼ်းၵျၢမ်ႇဢၢင်ႈၼႂ်းၸႂ်လႄႈဝႃႈ၊ “ၵဝ်တၵ်းဢဝ်တင်းလၢၵ်ႈသွင်ႇၸိူဝ်းၼႆႉပျေႇၸႂ်မၼ်းဢေႃႈ။ လိုၼ်းၼၼ်ႉမိူဝ်ႈဢၼ်ၵဝ်ႁူပ်ႉထူပ်းမၼ်းၸိုင်၊ၸၢင်ႈၶႄးမၼ်းတၵ်းပွႆႇလွတ်ႈပၼ်ၵဝ်ဢေႃႈ၊” ဝႃႈၼင်ႇၼႆဢေႃႈ။-
မၼ်းဢဝ်လၢၵ်ႈသွင်ႇၸိူဝ်းၼၼ်ႉသူင်ႇၵႂႃႇဢွၼ်တၢင်းမၼ်းသေလႄႈ၊ၶိုၼ်းၼၼ်ႉမၼ်းၵိုတ်းသဝ်းၵႃႈတီႈပၢင်လိုဝ်ႈႁိူဝ်ႉၵူၼ်းမၼ်းၼၼ်ႉဢေႃႈ။
ၸူဝ်ႈဢၼ်ဢမ်ႇပႆႇပူၼ်ႉၶိုၼ်းၸိုင်၊မၼ်းဢဝ်မေးမၼ်းသွင်ၵေႃႉဢိၵ်ႇတင်းၶႃႈၸႂ်ႉမႄႈယိင်းမၼ်းသွင်ၵေႃႉဢိၵ်ႇတင်းလုၵ်ႈၸၢႆးမၼ်းသိပ်းဢဵတ်းၵေႃႉၸိူဝ်းၼၼ်ႉၶၢမ်ႈတႃႈၼမ်ႉ ယပ်ႉပုၵ်ႉ၊ ဢေႃႈ။-
မၼ်းဢဝ်ၶဝ်ၸိူဝ်းၼၼ်ႉၶၢမ်ႈပူၼ်ႉၼမ်ႉႁွင်ႈသေလႄႈသမ်ႉဢဝ်ဢုၵ်ႉၸႃႇၶူဝ်းလဵင်းမၼ်းၶၢမ်ႈမူတ်းမူတ်းယဝ်ႉလႄႈ။-
မၼ်းၵိုတ်းယူႇၵေႃႉလဵဝ်ၵူၺ်းဢေႃႈ။ မိူဝ်ႈၼၼ်ႉၵူၼ်းၵေႃႉၼိုင်ႈမႃးၵၼ်ႉၵၼ်တင်းမၼ်းတေႃႇထိုင်ႁွတ်ႈမိူင်းလႅင်းဢေႃႈ။-
မိူဝ်ႈဢၼ်ၵေႃႉၼၼ်ႉႁုလွင်ႈဢၼ်မၼ်းဢမ်ႇၵၼ်ႉပႄႉလႆႈၼၼ်ႉလႄႈမၼ်းတိူဝ်ႉထုၵ်ႇသႂ်ႇႁူဝ်လုပ်ႇငဝ်ႈၶႃ ယႃႇၵုပ်ႈ၊ လႄႈငဝ်ႈၶႃၵုမ်ႇမၼ်းလုတ်ႈၵႂႃႇယၢမ်းမိူဝ်ႈဢၼ်ယင်းတိုၵ်ႉၵၼ်ႉၵၼ်ယူႇၼၼ်ႉဢေႃႈ။-
ၵေႃႉၼၼ်ႉလၢတ်ႈလႄႈဝႃႈ၊ “ပွႆႇၵဝ်ၶႃႈသေၵမ်း။ မိူင်းတေလႅင်းယဝ်ႉ၊” ဝႃႈၼင်ႇၼႆဢေႃႈ။ ယႃႇၵုပ်ႈ၊ ၵေႃႈလၢတ်ႈဝႃႈ၊ “ပေႃးယင်းဢမ်ႇပၼ်တၢင်းလီမၢင်ႇၵလႃႇတီႈၵဝ်ၸိုင်၊ၵဝ်ၶႃႈတေဢမ်ႇပွႆႇၵူၺ်း၊” ဝႃႈၼင်ႇၼႆဢေႃႈ။
ၵေႃႉၼၼ်ႉၵေႃႈထၢမ်လႄႈဝႃႈ၊ “မႂ်းၸိုဝ်ႈသင်၊” ယႃႇၵုပ်ႈ၊ ၶိုၼ်းတွပ်ႇဝႃႈ၊ “ၸိုဝ်ႈ ယႃႇၵုပ်ႈ၊ ဢေႃႈ၊” ဝႃႈၼင်ႇၼႆဢေႃႈ။
ၵေႃႉၼၼ်ႉၸင်ႇလၢတ်ႈဝႃႈ၊ “ၸိုဝ်ႈသဵင်မႂ်းၸိုင်၊ၵမ်းလိုၼ်းတေဢမ်ႇလႆႈႁွင်ႉႁဵၵ်ႈဝႃႈ၊ ယႃႇၵုပ်ႈ၊ ယဝ်ႉ။ ပိူဝ်ႈဢၼ်မႂ်းၶဵင်ႇၵၼ်တင်းၽြႃးပဵၼ်ၸဝ်ႈဢိၵ်ႇတင်းၵူၼ်းပႄႉၼႅင်ႇယဝ်ႉလႄႈတၵ်းလႆႈႁွင်ႉႁဵၵ်ႈၸိုဝ်ႈဝႃႈ၊ ဢိသရေး၊ ဢေႃႈ၊ဝႃႈၼင်ႇၼႆဢေႃႈ။”
ယႃႇၵုပ်ႈ၊ ၵေႃႈလၢတ်ႈဝႃႈ၊ “ၶႅၼ်းတေႃႈၸဝ်ႈႁဝ်းမွၵ်ႇလၢတ်ႈၸိုဝ်ႈၸဝ်ႈႁဝ်းသေၵမ်း၊” ဝႃႈၼႆလႄႈ၊ ၵေႃႉၼၼ်ႉလၢတ်ႈဝႃႈ၊ “မႂ်းၶႂ်ႈႁုၸိုဝ်ႈၵဝ်ႁဵတ်းသင်၊” ဝႃႈၼႆသေယဝ်ႉ၊ပၼ်တၢင်းလီတီႈ ယႃႇၵုပ်ႈ၊ ဢေႃႈ။
ယႃႇၵုပ်ႈ၊ လၢတ်ႈလႄႈဝႃႈ၊ “ၵဝ်လႆႈႁူပ်ႉထူပ်းၽြႃးပဵၼ်ၸဝ်ႈၼႃႈတေႃႇၼႃႈယဝ်ႉ။ ဢသၢၵ်ႈၵဝ်ယင်းလႆႈၶျၢမ်းသႃႇယူႇဢေႃႈ၊” ဝႃႈၼင်ႇၼႆသေယဝ်ႉ၊ႁွင်ႉႁဵၵ်ႈတီႈၼၼ်ႈဝႃႈ၊ ပေႇလူၺ်ႇလႃႉ၊ ဢေႃႈ။-
မိူဝ်ႈဢၼ် ယႃႇၵုပ်ႈ၊ ဢွၵ်ႇသေၵႃႈတီႈ ပေႇလူၺ်ႇလႃႉ၊ ၵႂႃႇၼၼ်ႉတႃဝၼ်းၵေႃႈဢွၵ်ႇမႃးယဝ်ႉလႄႈမၼ်းၵေႃႈပႆၶႄႈယႄႈၶႄႈယႄႈၵႂႃႇဢေႃႈ။-
ပိူဝ်ႈဢၼ်မၼ်းၸဝ်ႈလႆႈတိူဝ်ႉထုၵ်ႇသႂ်ႇႁူဝ်လုပ်ႇငဝ်ႈၶႃ ယႃႇၵုပ်ႈ၊ မႅၼ်ႈတီႈဢဵၼ်ႁူဝ်ၶႃၼၼ်ႉလႄႈၵူၼ်းမဵဝ်း ဢိသရေး၊ ၶဝ်လႆႈမီးထုင်းၸၢမ်ႇဢၼ်ဢမ်ႇၵိၼ်ဢဵၼ်လူင်ႁူဝ်လုပ်ႇငဝ်ႈၶႃၼၼ်ႉႁၢၼ်ႉတေႃႇမိူဝ်ႈၼႆႉဢေႃႈ။
မိူဝ်ႈၼၼ်ႉ၊ ယႃႇၵုပ်ႈ၊ မုင်ႈႁၼ်ပီႈဢၢႆႈမၼ်း ဢေးသေႃး၊ ၶိုၼ်ႈမႃးပႃးတင်းၵူၼ်းသီႇပၢၵ်ႇၼၼ်ႉသေယဝ်ႉ၊မၼ်းၸင်ႇၽႄမႅင်ႇလုၵ်ႈၸၢႆးမၼ်းတင်းလၢႆပၼ်တီႈ လေးဢႃႇ၊ ဢိၵ်ႇတင်း ရႃႇၶေႇလႃႉ၊ ဢိၵ်ႇတင်းၶႃႈမႄႈယိင်းသွင်ၵေႃႉၸိူဝ်းၼၼ်ႉဢေႃႈ။-
မၼ်းဢဝ်ၶႃႈမႄႈယိင်းမၼ်းသွင်ၵေႃႉဢိၵ်ႇတင်းလုၵ်ႈၸၢႆးၶဝ်ဝႆႉတၢင်းၼႃႈ၊ႁႂ်ႈ လေးဢႃႇ၊ တင်းလုၵ်ႈၸၢႆးမၼ်းယူႇၶိုင်ႈၵၢင်လႄႈ၊ႁႂ်ႈ ရႃႇၶေႇလႃႉ၊ တင်း ယူဝ်းသႅပ်ႈ၊ ယူႇလိုၼ်းလင်ပိူၼ်ႈဝႆႉဢေႃႈ။-
တူဝ်မၼ်းၸိုင်၊ပူၼ်ႉၵႂႃႇဢွၼ်တၢင်းပိူၼ်ႈလႄႈၵူမ်ႈႁူဝ်ၶုပ်ႉမူပ်ႇထူၼ်ႈၸဵတ်းပွၵ်ႈသေယဝ်ႉ၊ၵႂႃႇၸူးတီႈပီႈဢၢႆႈမၼ်းဢေႃႈ။-
မိူဝ်ႈၼၼ်ႉ၊ ဢေးသေႃး၊ လႅၼ်ႈမႃးႁပ်ႉႁူဝ်တၢင်းလႄႈၵွတ်ႇၶေႃးၸုပ်ႇၼူမ်မၼ်းသေႁႆႈတေႃႇၵၼ်ယူႇဢေႃႈ။-
ၵမ်းၼၼ်ႉ၊ ဢေးသေႃး၊ မုင်ႈႁၼ်မႄႈယိင်းလႂ်တင်းလုၵ်ႈဢွၼ်ႇၶဝ်ၸိူဝ်းၼၼ်ႉလႄႈထၢမ်ဝႃႈ၊ “ၶဝ်ၸိူဝ်းၼႆႉပဵၼ်ၽူႈလႂ်” ဝႃႈၼင်ႇၼႆဢေႃႈ။ ယႃႇၵုပ်ႈ၊ ၵေႃႈၶိုၼ်းလၢတ်ႈဝႃႈ။ “ၶဝ်ၸိူဝ်းၼႆႉပဵၼ်လုၵ်ႈဢွၼ်ႇဢၼ်ၽြႃးပဵၼ်ၸဝ်ႈဢဵတ်းလူပၼ်တီႈၶႃႈၸဝ်ႈဢေႃႈ၊” ဝႃႈၼင်ႇၼႆဢေႃႈ။-
ၶႃႈမႄႈယိင်းၸိူဝ်းၼၼ်ႉတင်းလုၵ်ႈဢွၼ်ႇၶဝ်သုတ်ႉၸူးလႄႈၵူမ်ႈႁူဝ်ပၼ်ဢေႃႈ။-
လေးဢႃႇ၊ တင်းလုၵ်ႈဢွၼ်ႇမၼ်းၸိူဝ်းၼၼ်ႉသုတ်ႉၸူးၵူမ်ႈႁူဝ်ပၼ်သေယဝ်ႉ၊လိုၼ်းၼၼ်ႉ ယူဝ်းသႅပ်ႈ၊ တင်း ရႃႇၶေႇလႃႉ၊ သုတ်ႉၸူးၵူမ်ႈႁူဝ်ပၼ်ဢေႃႈ။
ဢေးသေႃး၊ ထၢမ်ဝႃႈ၊ “မုၵ်ႉၸိူဝ်းၵူၼ်းဢိၵ်ႇတင်းသတ်းဢၼ်ၵဝ်ႁူပ်ႉထူပ်းယဝ်ႉၸိူဝ်းၼၼ်ႉပဵၼ်ပုၼ်ႈဢီႈသင်၊” ဝႃႈၼႆလႄႈ။ ယႃႇၵုပ်ႈ၊ ၶိုၼ်းလၢတ်ႈဝႃႈ၊ “ပဵၼ်ပုၼ်ႈဢၼ်တၵ်းႁႂ်ႈၸဝ်ႈႁဝ်းထုၵ်ႇၸႂ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ဢေးသေႃး၊ ၶိုၼ်းလၢတ်ႈဝႃႈ၊ “ၼွင်ႉၸၢႆးၵဝ်႟။ ၵဝ်မီးၵုမ်ႇၵုမ်ႇလုမ်ႇလုမ်ႇယူႇ။ ၶိုၼ်းဢဝ်ဢုၵ်ႉၸႃႇမႂ်းၸိူဝ်းၼႆႉဝႆႉတႃႉ၊” ဝႃႈၼင်ႇၼႆလႄႈ။
ယႃႇၵုပ်ႈ၊ ၶိုၼ်းလၢတ်ႈဝႃႈ၊ “ယႃႇပေဝႃႈၸိူဝ်ႉၼင်ႇၼၼ်သေၵမ်း။ ပေႃးၵဝ်ၶႃႈႁဵတ်းႁႂ်ႈၸဝ်ႈႁဝ်းထုၵ်ႇၸႂ်ၸိုင်၊ႁပ်ႉဢဝ်လၢၵ်ႈသွင်ႇၸိူဝ်းၼႆႉသေၵမ်း။ လႆႈႁၼ်ၼႃႈၸဝ်ႈႁဝ်းပေႃးတၢၼ်ႇလႆႈႁၼ်ၼႃႈၽြႃးပဵၼ်ၸဝ်ႈၶႃႈဢေႃႈ။ ၸႂ်သၽေႃးၸဝ်ႈႁဝ်းၵေႃႈဢူၼ်ႈဢွၼ်ႇၵႃႈၼိူဝ်ၵဝ်ၶႃႈၶႃႈဢေႃႈ။-
ၶၢမ်ႇဢဝ်လၢၵ်ႈသွင်ႇၶွင်ၽၢၵ်ႇဢၼ်ၶႃႈၸဝ်ႈသၢၵ်ႈပၼ်တီႈၸဝ်ႈႁဝ်းၼႆႉသေၵမ်းၶႃႈ။ ၽြႃးပဵၼ်ၸဝ်ႈဢဵတ်းလူလႄႈႁဵတ်းၵျေးၸူးၼမ်ၼႃႇလူင်လၢင်တီႈၶႃႈၸဝ်ႈယဝ်ႉၶႃႈယဝ်ႉ။ တီႈၶႃႈၸဝ်ႈမီးၵုမ်ႇၵုမ်ႇလုမ်ႇလုမ်ႇယူႇၶႃႈဢေႃႈ၊” ဝႃႈၼင်ႇၼႆတိုၵ်းယူင်းလႄႈ ဢေးသေႃး၊ ၵေႃႈႁပ်ႉၶၢမ်ႇဢဝ်ဢေႃႈ။
မိူဝ်ႈၼၼ်ႉ၊ ဢေးသေႃး၊ လၢတ်ႈလႄႈဝႃႈ၊ “ဢွၼ်ၵၼ်ၵႂႃႇလူၺ်ႈၵၼ်တႃႉႁဝ်း။ ၵဝ်တေၵႂႃႇပႃႈၼႃႈမႂ်းဢေႃႈ၊” ဝႃႈၼင်ႇၼႆလႄႈ။
ယႃႇၵုပ်ႈ၊ ၶိုၼ်းလၢတ်ႈဝႃႈ၊ “ၸဝ်ႈႁဝ်းၵေႃႈႁုယူႇ၊လုၵ်ႈဢွၼ်ႇၸိူဝ်းၼႆႉယင်းလဵၵ်ႉယင်းၼုမ်ႇယူႇလႄႈၶႃႈၸဝ်ႈလူဝ်ႇၶႆႈၸႂ်ပုၼ်ႈၶဝ်ဢိၵ်ႇတင်းပုၼ်ႈၽုင်သူဝ်း၊ၽုင်ပႄႉ၊ၽုင်ဝူဝ်း၊ဢၼ်ပႃးတင်းတူဝ်ဢွၼ်ႇၶဝ်ၸိူဝ်းၼႆႉလႄႈ၊ပေႃးႁေႃႈႁိပ်ႈၼႅတ်ႈႁႅင်းၼႃႇၸူဝ်ႈၶၢဝ်းဝၼ်းၼိုင်ႈၸိုင်၊တၵ်းႁဵတ်းႁႂ်ႈၽုင်သတ်းၸိူဝ်းၼႆႉတၢႆၵႂႃႇလႆႈဢေႃႈ။-
ၵွပ်ႈၼႆလႄႈၸဝ်ႈႁဝ်းၵႂႃႇဢွၼ်တၢင်းသေၵမ်းၶႃႈ။ ၶႃႈၸဝ်ႈတၵ်းၸွမ်းပႃႈလင်မႃးလွႆးလွႆးၶႃႈဢေႃႈ။ ၵႃႈၼင်ႇဢၼ်တၢတ်ႈၼိူင်ႇလႆႈၶႃႈၸဝ်ႈတၵ်းဢွၼ်ၽုင်တရိၵ်ႈသၢၼ်ႇၸိူဝ်းၼႆႉ ဢိၵ်ႇတင်းလုၵ်ႈဢွၼ်ႇၶႃႈၸဝ်ႈၸိူဝ်းၼႆႉမႃးႁႂ်ႈၶိုတ်းၸဝ်ႈႁဝ်းၵႃႈတီႈ ဢေႇတုမ်ႇ၊ ၼၼ်ႉယူႇၶႃႈဢေႃႈ၊” ဝႃႈၼင်ႇၼႆဢေႃႈ။
ဢေးသေႃး၊ ၵေႃႈလၢတ်ႈဝႃႈ၊ “ပေႃးပဵၼ်ၼႆၵဝ်တၵ်းႁႂ်ႈၵူၼ်းၵဝ်ၵမ်ႈၽွင်ႈၸွမ်းမႂ်းမႃးဢေႃႈ၊” ဝႃႈၼင်ႇၼႆလႄႈ။ ယႃႇၵုပ်ႈ၊ ၶိုၼ်းလၢတ်ႈဝႃႈ၊ “ဢမ်ႇလူဝ်ႇၶႃႈ။ ၶႃႈၸဝ်ႈလူဝ်ႇတၢင်းဢၼ်ၸဝ်ႈႁဝ်းထုၵ်ႇၸႂ်တီႈၶႃႈၸဝ်ႈၵူၺ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၼႂ်းဝၼ်းၼၼ်ႉ ဢေးသေႃး၊ ၵႂႃႇၸွမ်းသဵၼ်ႈတၢင်းမိူဝ်းၸူးမိူင်း ဢေႇတုမ်ႇ၊ သေဢေႃႈ။-
ယႃႇၵုပ်ႈ၊ ၸွမ်းတၢင်းၵႂႃႇၸူး သုၵုတ်ႉ၊ လႄႈတီႈၼၼ်ႈမၼ်းႁဵတ်းႁိူၼ်းပုၼ်ႈဢၼ်မၼ်းယူႇဢိၵ်ႇတင်းသုမ်ႉထဵင်လႂ်၊ပုၼ်ႈတရိၵ်ႈသၢၼ်ႇလႂ်တၵ်းယူႇၼၼ်ႉဢေႃႈ။ ပိူဝ်ႈၼႆတီႈၼၼ်ႈမၼ်းႁွင်ႉႁဵၵ်ႈၸိုဝ်ႈဝႃႈ၊ သုၵုတ်ႉ၊ ဢေႃႈ။
ၸဵမ်မိူဝ်ႈဢၼ်မၼ်းဢွၵ်ႇသေမိူင်း မေႇသူဝ်ႇပူဝ်ႇတေးမီးယႃး၊ ၶိုၼ်းမိူဝ်းမႃးၼၼ်ႉမၼ်းလႆႈယူႇလီလွတ်ႈၽေးလႄႈႁွတ်ႈထိုင်တီႈဝဵင်း သေးၶိမ်ႇ၊ မိူင်း ၶႃႇၼၼ်ႇ၊ မႃးသေယဝ်ႉ၊တႄႇတင်ႈပၢင်ယူႇပၢင်သဝ်းၼႂ်းပၢင်ႇႁိမ်းဝဵင်းၼၼ်ႉသေဢေႃႈ။-
မၼ်းလႆႈသိုဝ်ႉဢဝ်ၵႂၢၵ်ႈလိၼ်ၵႃႈတီႈၵေႃႉဢၼ်ပဵၼ်လုၵ်ႈလၢၼ် ႁႃႇမေႃႇ၊ ဢၼ်ပဵၼ်ပေႃႈ သေးၶိမ်ႇ၊ ၼၼ်ႉလူၺ်ႈငိုၼ်းၸွႆႉၼိုင်ႈဢေႃႈ။-
ၵႃႈတီႈၼၼ်ႈၵေႃႈမၼ်းႁဵတ်းၶဵင်ႇတၢင်းလူႇသေယဝ်ႉ၊ႁွင်ႉႁဵၵ်ႈၸိုဝ်ႈဝႃႈ၊ ဢေးလေးလေႃႇႁိဢိသရေး၊ ဢေႃႈ။
ဝၼ်းၼိုင်ႈ တိၼႃႉ၊ လုၵ်ႈယိင်း ယႃႇၵုပ်ႈ၊ တင်း လေးဢႃႇ၊ ၼၼ်ႉဢွၵ်ႇၵႂႃႇလႄႇတူၺ်းမႄႈယိင်း ၶႃႇၼၼိ၊ ၸိူဝ်းၼၼ်ႉဢေႃႈ။-
မိူဝ်ႈဢၼ် သေးၶိမ်ႇ၊ လုၵ်ႈၸၢႆးၶုၼ် ႁႃႇမေႃႇ၊ ၵူၼ်းမဵဝ်း ႁိတ်ႉတိ၊ ဢၼ်ဢုပ်ႉပိူင်ႇမိူင်းၼၼ်ႉႁၼ် တိၼႃႉ၊ ၸိုင်၊မၼ်းဢဝ် တိၼႃႉ၊ ၵႂႃႇတဵၵ်းၵၼ်ႉယႃႉသရေႇမၼ်းဢေႃႈ။-
ၵမ်းၼၼ်ႉ၊မၼ်းမီးၸႂ်ဢၼ်ႁၵ်ႉဢၼ်ပႅင်းၼိူဝ် တိၼႃႉ၊ ဢမ်ႇသုတ်းဢမ်ႇသဵင်ႈလႆႈ၊ႁၵ်ႉပႅင်းယူႇသေႇသေႇလႄႈၶတ်းၸႂ်ၶျေႃးဢဝ် တိၼႃႉ၊ ဢေႃႈ။-
တီႈပေႃႈမၼ်းၵေႃႈမၼ်းလၢတ်ႈဝႃႈ၊ “ထၢမ်ဢဝ်သၢဝ်ဢွၼ်ႇၼႆႉပုၼ်ႈၵဝ်ၶႃႈသေၵမ်း၊” ဝႃႈၼင်ႇၼႆဢေႃႈ။
ယႃႇၵုပ်ႈ၊ လႆႈႁုငိၼ်းလွင်ႈဢၼ် သေးၶိမ်ႇ၊ ယႃႉသရေႇလုၵ်ႈယိင်းမၼ်း တိၼႃႉ၊ ၼၼ်ႉသေၵေႃႈၵွပ်ႈပိူဝ်ႈဢၼ်လုၵ်ႈၸၢႆးမၼ်းၸိူဝ်းၼၼ်ႉမီးယူႇၼႂ်းထိူၼ်ႇလူၺ်ႈၵၼ်တင်းၽုင်တရိၵ်ႈသၢၼ်ႇတင်းလၢႆလႄႈယင်းဢမ်ႇတၵ်ႉသဵင်လႄႈပႂ်ႉထႃႈၶဝ်ယူႇဢေႃႈ။-
မိူဝ်ႈၼၼ်ႉၶုၼ် ႁႃႇမေႃႇ၊ ပေႃႈ သေးၶိမ်ႇ၊ ၼၼ်ႉၵႂႃႇလၢတ်ႈတေႃႇ ယႃႇၵုပ်ႈ၊ ဢေႃႈ။-
လုၵ်ႈၸၢႆး ယႃႇၵုပ်ႈ၊ တင်းလၢႆလႆႈငိၼ်းၶၢဝ်ႇလႄႈႁွတ်ႈထိုင်မႃးမိူဝ်ႈလဵဝ်ၵၼ်ဢေႃႈ။ ၶဝ်ပီႈၼွင်ႉၼၼ်ႉပိူဝ်ႈဢၼ် သေးၶိမ်ႇ၊ ႁဵတ်းဢမုဢၼ်မိူၵ်ႈၼႃႇၼိူဝ်ၵူၼ်းမဵဝ်း ဢိသရေး၊ လႄႈတဵၵ်းၵၼ်ႉလုၵ်ႈယိင်း ယႃႇၵုပ်ႈ၊ ၼၼ်ႉၸိုင်၊ၶဝ်ဢွၵ်ႇတေႃးသႃႉၸႂ်လမ်ၼႃႇဢေႃႈ။-
ၶုၼ် ႁႃႇမေႃႇ၊ ၵေႃႈတၵ်ႉလၢတ်ႈၶဝ်လႄႈဝႃႈ၊ “လုၵ်ႈၸၢႆးၵဝ်ၶႃႈ သေးၶိမ်ႇ၊ ၸပ်းၸွႆးႁၵ်ႉပႅင်းလုၵ်ႈယိင်းသူၼႃႇလူင်လၢင်ဢေႃႈ။ ႁႂ်ႈလုၵ်ႈၸၢႆးၵဝ်ၶႃႈလႆႈသွင်ႇမၢင်ႇၵလႃႇဢဝ်မၼ်းသေၵမ်း။-
ၼင်ႇၼၼ်လႄႈႁဝ်းဢွၼ်ၵၼ်ၽွမ်ႉၸႂ်ၵၼ်သေၼင်ႇၵၼ်ၵၼ်ဢဝ်ပၼ်ၵၼ်တႃႉႁဝ်း။-
သူၸဝ်ႈၵေႃႈယူႇသဝ်းလူၺ်ႈၵၼ်တင်းႁဝ်းၵႃႈၼႂ်းမိူင်းၼႆႉ၊ၵျိူၵ်ႈၸႂ်ၵႃႈတီႈလႂ်ၵေႃႈလိူၵ်ႈယူႇသေလႄႈႁဵတ်းတၢင်းၵႃႉတၢင်းၶၢႆႁႂ်ႈမၢၵ်ႈမီးလီပဵၼ်ၵၼ်တႃႉ၊” ဝႃႈၼင်ႇၼႆဢေႃႈ။
သေးၶိမ်ႇ၊ ၵေႃႈလၢတ်ႈတီႈပေႃႈ တိၼႃႉ၊ တင်းပီႈဢၢႆႈမၼ်းၸိူဝ်းၼၼ်ႉလႄႈဝႃႈ၊ “ႁႂ်ႈၵဝ်ၶႃႈလႆႈႁဵတ်းၵျေးၸူးတၢင်းဢၼ်ထုၵ်ႇၸႂ်သူၸဝ်ႈသေၵမ်း။ ၵႃႈဢၼ်သူၸဝ်ႈယွၼ်းၼၼ်ႉၵဝ်ၶႃႈတၵ်းပၼ်ဢေႃႈ။-
ၶိူင်ႈဢၼ်ၵၼ်ႇတေႃးသေဢမ်ႇဝႃႈ၊ၵႃႈတူဝ်ၵႃႈၶိင်းသေဢမ်ႇဝႃႈ၊ၵေႇႁိုဝ်၊ၼမ်ႁိုဝ်ဢမ်ႇဝႃႈ၊ၵႃႈဢၼ်သူၸဝ်ႈယွၼ်းၼၼ်ႉၵဝ်ၶႃႈတေပၼ်ဢေႃႈ။ ၵူၺ်းၵႃႈ၊ဢဝ်မႄႈယိင်းၵေႃႉၼႆႉပၼ်ၵဝ်ၶႃႈသေၵမ်းၶႃႈ၊” ဝႃႈၼင်ႇၼႆဢေႃႈ။
လုၵ်ႈၸၢႆး ယႃႇၵုပ်ႈ၊ ၸိူဝ်းၼၼ်ႉပိူဝ်ႈဢၼ် သေးၶိမ်ႇ၊ ယႃႉသရေႇၼွင်ႉယိင်းၶဝ် တိၼႃႉ၊ ယဝ်ႉၼၼ်ႉလႄႈၶဝ်ႁဵတ်းႁၢင်ႈလၢတ်ႈတီႈ သေးၶိမ်ႇ၊ တင်းပေႃႈမၼ်း ႁႃႇမေႃႇ၊ လႄႈဝႃႈ၊-
“ႁဝ်းဢမ်ႇပၼ်ဢၶႂၢင်ႉၼွင်ႉယိင်းႁဝ်းသွင်ႇမၢင်ႇၵလႃႇဢဝ်ၵၼ်တင်းၵူၼ်းဢၼ်ဢမ်ႇၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ၼၼ်ႉလႆႈ၊ပေႃးဢမ်ႇၼၼ်ပိူၼ်ႈတေသႄႉသွမ်းႁဝ်းဢေႃႈ။-
မီးလွင်ႈၼိုင်ႈၵူၺ်းဢၼ်ႁဝ်းၽွမ်ႉၸမ်ႉ၊ပေႃးသူၵူၼ်းၸၢႆးတင်းမူတ်းၶၢမ်ႇဢဝ်မၢင်ႇၵလႃႇပၢတ်ႇပၢႆႇၼင်မိူၼ်ၸိူဝ်ႉၼင်ႇႁဝ်းၸိုင်၊-
ႁဝ်းတၵ်းပၼ်လုၵ်ႈယိင်းႁဝ်းတီႈသူၸဝ်ႈလႄႈလုၵ်ႈယိင်းသူၸဝ်ႈၵေႃႈႁဝ်းၶႃႈတေဢဝ်ဢေႃႈ။ ၵမ်းၼၼ်ႉ ႁဝ်းတၵ်းယူႇလူၺ်ႈၵၼ်တင်းသူၸဝ်ႈလႄႈပဵၼ်မဵဝ်းလဵဝ်ၵၼ်ဢေႃႈ။-
ဢမ်ႇၼၼ်ၵေႃႈပေႃးသူၸဝ်ႈဢမ်ႇၽွမ်ႉၵႂၢမ်းႁဝ်းၶႃႈလႄႈဢမ်ႇၶၢမ်ႇဢဝ်မၢင်ႇၵလႃႇပၢတ်ႇပၢႆၼင်လႆႈၸိုင်၊ႁဝ်းတေဢဝ်ၼွင်ႉယိင်းႁဝ်းၶႃႈၵႂႃႇၵူၺ်းယဝ်ႉ၊” ဝႃႈၼင်ႇၼႆဢေႃႈ။
ၵႂၢမ်းၶဝ်ၼၼ်ႉထုၵ်ႇၸႂ်ၵျိူၵ်ႈၸႂ်ၶုၼ် ႁႃႇမေႃႇ၊ တင်းလုၵ်ႈၸၢႆးမၼ်း သေးၶိမ်ႇ၊ လႄႈ၊-
ၵေႃႉဢၼ်ပဵၼ်လုၵ်ႈၸၢႆးၵေႃႈပိူဝ်ႈဢၼ်မၼ်းႁၵ်ႉပႅင်းၸႂ်ၸပ်းလုၵ်ႈယိင်း ယႃႇၵုပ်ႈ၊ ၼႃႇလူင်လၢင်လႄႈယင်းဢမ်ႇႁဵတ်းထိူင်းႁဵတ်းၼၢၼ်းသေၽွမ်ႉၸႂ်ၵမ်းလဵဝ်ဢေႃႈ။ မၼ်းပဵၼ်ၵေႃႉဢၼ်မီးသရေႇတွၼ်းလိူဝ်သေပိူၼ်ႈၵႃႈၼႂ်းၵူၼ်းႁိူၼ်းၶဝ်ၼၼ်ႉဢေႃႈ။
မိူဝ်ႈၼၼ်ႉၶုၼ် ႁႃႇမေႃႇ၊ တင်းလုၵ်ႈၸၢႆးမၼ်း သေးၶိမ်ႇ၊ ၵႂႃႇၶဝ်ႈပၢင်ၵုမ်ၵႃႈတီႈႁူးၽၵ်းတူဝဵင်းသေလႄႈတိူင်ႇပၢင်ႇလၢတ်ႈထိုင်ၵူၼ်းဝဵင်းၶဝ်ၼၼ်ႉလၢတ်ႈလႄႈဝႃႈ၊-
“ၵူၼ်းၸိူဝ်းၼႆႉထုၵ်ႇမေႃၵၼ်တင်းႁဝ်းဢေႃႈ။ ပိူဝ်ႈၼႆလႄႈႁႂ်ႈၶဝ်ယူႇလူၺ်ႈၵၼ်တင်းႁဝ်းၼႂ်းမိူင်းႁဝ်းၼႆႉသေလႄႈႁႂ်ႈၶဝ်ၵႂႃႇမႃးလွတ်ႈလွတ်ႈလႅဝ်းလႅဝ်းတႃႉႁဝ်း။ မိူင်းႁဝ်းၵႂၢင်ႈပုၼ်ႈၶဝ်ပေႃးတေယူႇသဝ်းလႆႈဢေႃႈ။ ဢွၼ်ၵၼ်ဢဝ်လုၵ်ႈယိင်းၶဝ်လႄႈတႄႇၼႃႈႁိူၼ်းတႃယေးလူၺ်ႈၵၼ်တႃႉႁဝ်း။ လုၵ်ႈယိင်းႁဝ်းတင်းလၢႆၵေႃႈပၼ်ႁႂ်ႈၶဝ်ဢဝ်တႃႉ။-
ၵူၺ်းၵႃႈ၊မီးလွင်ႈၼႆႉလွင်ႈလဵဝ်ၵူၺ်းၶဝ်တၵ်းလႆႈၽွမ်ႉႁဝ်းလႄႈယူႇလူၺ်ႈတင်းႁဝ်းသေပဵၼ်မဵဝ်းလဵဝ်ၵၼ်တင်းႁဝ်းၼၼ်ႉယဝ်ႉ၊ၸိူဝ်ႉၼင်ႇဢၼ်ၶဝ်ၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ၼၼ်ႉၵူၼ်းၸၢႆးႁဝ်းၵူႈၵေႃႉတၵ်းလႆႈၶၢမ်ႇဢဝ်မၢင်ႇၵလႃႇဢၼ်ပၢတ်ႇပၢႆၼင်ဢေႃႈ။-
ၸႃႉၸဵမ်ၽုင်သူဝ်းၽုင်ဝူဝ်းၶဝ်၊တရိၵ်ႈသၢၼ်ႇၶဝ်တင်းမူတ်းဢိၵ်ႇတင်းဢုၵ်ႉၸႃႇၶူဝ်းလဵင်းၶဝ်တေပဵၼ်ၶွင်ႁဝ်းဢမ်ႇၸႂ်ႈႁိုဝ်း။ ႁဝ်းဢွၼ်ၵၼ်ၸွမ်းဢလူဝ်ႇၶဝ်လႄႈႁႂ်ႈၶဝ်ယူႇလူၺ်ႈၵၼ်တင်းႁဝ်းတႃႉ၊” ဝႃႈၼင်ႇၼႆဢေႃႈ။-
ၵူၼ်းဝဵင်းၸိူဝ်းဢၼ်ၶဝ်ႈပႃးၼႂ်းပၢင်ၵုမ်ၵူႈၵေႃႉၼၼ်ႉဢွၼ်ၵၼ်ၽွမ်ႉၵႂၢမ်းၶုၼ် ႁႃႇမေႃႇ၊ ၶဝ်ပေႃႈလုၵ်ႈၼၼ်ႉသေယဝ်ႉ၊ၵူၼ်းၸၢႆးၶဝ်ဢွၼ်ၵၼ်ၶၢမ်ႇဢဝ်မၢင်ႇၵလႃႇတၢင်းဢၼ်ပၢတ်ႇပၢႆၼင်ၵူႈၵေႃႉသေဢေႃႈ။
ဝၢႆးသေလႆႈသၢမ်ဝၼ်းယဝ်ႉ၊မိူဝ်ႈဢၼ်ၶဝ်ယင်းတိူၵ်ႈၸဵပ်းၼႃႇၵွပ်ႈပိူဝ်ႈပၢတ်ႇပၢႆၼင်ၼၼ်ႉယူႇၸိုင်၊လုၵ်ႈၸၢႆး ယႃႇၵုပ်ႈ၊ သွင်ၵေႃႉ သိမုၼ်ႇ၊ တင်း လေႇဝိ၊ ပီႈၸၢႆး တိၼႃႉ၊ ၶဝ်ယိပ်းၵမ်လႅဝ်းၵေႃႉမၢၵ်ႈမၢၵ်ႈသေလႄႈၶဝ်ႈၵႂႃႇၵႃႈၼႂ်းဝဵင်းႁတ်းႁတ်းႁၢၼ်ႁၢၼ်သေယဝ်ႉ၊ၽၼ်းၵူၼ်းၸၢႆးတင်းလၢႆတၢႆပႅတ်ႈဢေႃႈ။-
ၶုၼ် ႁႃႇမေႃႇ၊ တင်းလုၵ်ႈၸၢႆးမၼ်း သေးၶိမ်ႇ၊ ၵေႃႈလႆႈတၢႆပႃးဢေႃႈ။ မိူဝ်ႈၼၼ်ႉၶဝ်ၼုၵ်ႈဢဝ်ၼွင်ႉယိင်းၶဝ် တိၼႃႉ၊ သေၵႃႈၼႂ်းႁိူၼ်း သေးၶိမ်ႇ၊ သေလႄႈမိူဝ်းၵႂႃႇဢေႃႈ။-
ဝၢႆးသေလုၵ်ႈၸၢႆး ယႃႇၵုပ်ႈ၊ ၶဝ်ၶႃႈၽၼ်းပိုၼ်းတၢႆယဝ်ႉၼၼ်ႉၶဝ်ပီႈၼွင်ႉဢွၼ်ၵၼ်ၶိုၼ်ႈၵႂႃႇႁိမ်ႁူင်ႇဢဝ်ဝဵင်းၼၼ်ႉၵွပ်ႈပိူဝ်ႈၼွင်ႉယိင်းၶဝ်လႆႈၶၢမ်ႇတၢင်းဢၼ်ယႃႉသရေႇလုၼၼ်ႉဢေႃႈ။-
ၶဝ်သိမ်းဢဝ်ၸႃႉၸဵမ်ၽုင်သူဝ်း၊ၽုင်ပႄႉ၊ၽုင်ဝူဝ်းလႄႈမႃႉလီႈဢိၵ်ႇတင်းဢုၵ်ႉၸႃႇၶူဝ်းလဵင်းဢၼ်မီးၵႃႈၼႂ်းဝဵင်းတင်းၶူဝ်းႁႆႈၶူဝ်းၼႃးတင်းသဵင်ႈတင်းလူင်၊-
ဢိၵ်ႇတင်းၸေးၸိမ်ႇဢုၵ်ႉၸႃႇဢၼ်မီးၵႃႈမီးၶၼ်ၵူႈမဵဝ်း၊မႄႈယႃႈမႄႈယိင်းလုၵ်ႈလၢင်းလုၵ်ႈဢွၼ်ႇလႅင်တင်းလၢႆၵူႈႁိူၼ်းၵူႈယေးၵေႃႈတိၺွပ်းဢဝ်ၵႂႃႇသေဢေႃႈ။
မိူဝ်ႈၼၼ်ႉ၊ ယႃႇၵုပ်ႈ၊ လၢတ်ႈတီႈ သိမုၼ်ႇ၊ တင်း လေႇဝိ၊ လႄႈဝႃႈ၊ “သူပီႈၼွင်ႉဢဝ်တုၵ်ႉၶႃႉၵွင်သႂ်ႇတီႈၵဝ်ယဝ်ႉ။ ၵူၼ်းမဵဝ်း ၶႃႇၼၼိ၊ တင်းၵူၼ်းမဵဝ်း ၽေႇရၸိ၊ ဢိၵ်ႇတင်းၵူၼ်းမိူင်းၼႆႉတင်းသဵင်ႈတင်းလူင်ငိၼ်းၸင်းၵဝ်ယဝ်ႉ။ ႁႅင်းၵဝ်ၼႆႉၵေႇၼႃႇလႄႈပေႃးၶဝ်ၶီႇသိုၵ်းတိုၵ်းတေႃးၵဝ်ၸိုင်၊ၵူၼ်းႁိူၼ်းၵူၼ်းယေးၵဝ်တေလုႁၢႆတၢႆသဵင်ႈယဝ်ႉ၊” ဝႃႈၼင်ႇၼႆဢေႃႈ။
ၶဝ်ပီႈၼွင်ႉၶိုၼ်းလၢတ်ႈဝႃႈ၊ “ဢၼ်ၶဝ်မၢတ်ႈၼွင်ႉယိင်းႁဝ်းပဵၼ်မႄႈမွၵ်ႇယႃႈၼႆႉႁဝ်းဢမ်ႇၶၢမ်ႇလႆႈလႃးလႃး၊” ဝႃႈၼင်ႇၼႆဢေႃႈ။
လိုၼ်းၼၼ်ႉ၊ၽြႃးပဵၼ်ၸဝ်ႈလၢတ်ႈတီႈ ယႃႇၵုပ်ႈ၊ လႄႈဝႃႈ၊ “လုၵ်ႉတႃႉ။ ၶိုၼ်ႈၵႂႃႇၵႃႈတီႈ ပေႇႀလႃႉ၊ လႄႈယူႇသဝ်းၵႃႈတီႈၼၼ်ႈတႃႉ။ ၵႃႈတီႈၼၼ်ႈႁဵတ်းၶဵင်ႇတၢင်းလူႇပုၼ်ႈၵဝ်ၽြႃးဢၼ်ပေႃႇမႃးတီႈမႂ်းမိူဝ်ႈဢၼ်မႂ်းဢွၵ်ႇပၢႆႈပီႈဢၢႆႈမႂ်း ဢေးသေႃး၊ ၼၼ်ႉတႃႉ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ယႃႇၵုပ်ႈ၊ လၢတ်ႈတီႈၵူၼ်းႁိူၼ်းၵူၼ်းယေးမၼ်းဢိၵ်ႇတင်းၶဝ်ၸိူဝ်းဢၼ်ယူႇလူၺ်ႈၵၼ်တင်းမၼ်းၵူႈၵေႃႉၼၼ်ႉလႄႈဝႃႈ၊ “ပႄႇပႅတ်ႈၽြႃးၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်မီးတီႈသူၼၼ်ႉတႃႉ။ ႁႂ်ႈတူဝ်သူမူတ်းၸၢင်ႇလႄႈပုတ်ႈလၢႆႈၶူဝ်းလဵင်းဢၼ်မူတ်းသႂ်တႃႉ။-
ႁဝ်းတၵ်းဢွၼ်ၵၼ်ဢွၵ်ႇသေၵႃႈတီႈၼႆႉလႄႈၵႂႃႇၵႃႈတီႈ ပေႇသလႃႉ၊ ပုၼ်ႉဢေႃႈ။ တီႈၼၼ်ႈၵဝ်တၵ်းလႆႈႁဵတ်းၶဵင်ႇတၢင်းလူႇပုၼ်ႈၽြႃးပဵၼ်ၸဝ်ႈဢၼ်ဢိူဝ်ၵဝ်ၼႂ်းၶိင်ႇၵႃႇလႃႉဢၼ်ၵဝ်လႆႈၶၢမ်ႇတုၵ်ႉၶႃႉတၢင်းၽၢၼ်လႄႈမီးယူႇလူၺ်ႈၵၼ်တင်းၵဝ်ၼႂ်းသဵၼ်ႈတၢင်းဢၼ်ၵဝ်ၵႂႃႇၵူႈတီႈၵူႈလႅၼ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။-
ၶဝ်ၵေႃႈဢွၼ်ၵၼ်ဢဝ်ၽြႃးၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်မီးၵႃႈတီႈၶဝ်တင်းမူတ်းဢိၵ်ႇတင်းၶိူင်ႈပေႇႁူဢၼ်ႁွႆႈယူႇၸိူဝ်းၼၼ်ႉပၼ်တီႈ ယႃႇၵုပ်ႈ၊ လႄႈမၼ်းဢဝ်ၽင်တႂ်ႈတူၼ်ႈမႆႉၼိမ်ႁိမ်းဝဵင်း သေးၶိမ်ႇ၊ ၼၼ်ႉသေဢေႃႈ။
မိူဝ်ႈဢၼ် ယႃႇၵုပ်ႈ၊ တင်းလုၵ်ႈၸၢႆးမၼ်းတင်းလၢႆၶၢႆႉတီႈၵႂႃႇၼၼ်ႉၵူၼ်းဢၼ်ယူႇၼႂ်းဝဵင်းႁိမ်းႁွမ်းၸိူဝ်းၼၼ်ႉၵူဝ်ႁႄ ထႃႇဝရႃႉၽြႃး၊ လႄႈဢမ်ႇႁတ်းလိုပ်ႈလမ်းၸွမ်းၶဝ်။-
ယႃႇၵုပ်ႈ၊ ဢွၼ်ၵူၼ်းမၼ်းတင်းမူတ်းၵႂႃႇၸူးဝဵင်း လုၸႃႉ၊ ဢၼ်ဝႃႈ၊ ပေႇသလႃႉ၊ ၵႃႈၼႂ်းမိူင်း ၶႃႇၼၼ်ႇ၊ ပုၼ်ႉဢေႃႈ။-
တီႈၼၼ်ႈမၼ်းတႄႇႁဵတ်းၶဵင်ႇတၢင်းလူႇသေယဝ်ႉ၊ႁွင်ႉႁဵၵ်ႈၸိုဝ်ႈ ဢေးလႃႉပေႇသလႃႉ၊ တီႈဝႃႈၼႆ၊ၵွပ်ႈပိူဝ်ႈၽြႃးပဵၼ်ၸဝ်ႈပေႃႇမႃးတီႈမၼ်းမိူဝ်ႈဢၼ်မၼ်းဢွၵ်ႇပၢႆႈပီႈဢၢႆႈမၼ်းၼၼ်ႉဢေႃႈ။-
တေႇပေႃးရႃႇ၊ ဢၼ်ပဵၼ်ၼၢႆးဢၼ်လူဢၼ်ထိင်း ရေႇပႅၵ်ႉၵႃႉ၊ ၼၼ်ႉတၢႆလႄႈသၢင်းၵျူဝ်ႇဝႆႉတႂ်ႈတူၼ်ႈမႆႉၼိမ်ၽၢႆႇတၢင်းၸၢၼ်း ပေႇႀလႃႉ၊ သေဢေႃႈ။ တူၼ်ႈၼၼ်ႉၶဝ်ႁွင်ႉႁဵၵ်ႈၸိုဝ်ႈဝႃႈ၊ ဢႃႇလုၼ်ႇပႃႇၵုတ်ႉ၊ (ဢၼ်ပွင်ႇဝႃႈမႆႉၼိမ်ႁႆႈ) ဢေႃႈ။
မိူဝ်ႈဢၼ် ယႃႇၵုပ်ႈ၊ ပွၵ်ႈသေမိူင်း မေႇသူဝ်ႇပူဝ်ႇတေးမီးယႃး၊ ၶိုၼ်းမႃးယဝ်ႉၼၼ်ႉ၊ၽြႃးပဵၼ်ၸဝ်ႈသမ်ႉပေႃႇမႃးတီႈမၼ်းလႄႈပၼ်တၢင်းလီတီႈမၼ်းထႅင်ႈဢေႃႈ။-
ၽြႃးပဵၼ်ၸဝ်ႈလၢတ်ႈတီႈမၼ်းလႄႈဝႃႈ၊ “ၸိုဝ်ႈမႂ်းႁွင်ႉႁဵၵ်ႈဝႃႈ၊ ယႃႇၵုပ်ႈ၊ ဢေႃႈ။ ၵူၺ်းၵႃႈ၊ဢဝ်ၼႆႉၵႂႃႇမိူဝ်းၼႃႈတေလႆႈႁွင်ႉႁဵၵ်ႈဝႃႈ၊ ဢိသရေး၊ ဢေႃႈ၊” ဝႃႈၼင်ႇၼႆလႄႈ၊ၽြႃးပဵၼ်ၸဝ်ႈႁွင်ႉႁဵၵ်ႈၸိုဝ်ႈမၼ်းဝႃႈ၊ ဢိသရေး၊ ဢေႃႈ။-
ၽြႃးပဵၼ်ၸဝ်ႈသမ်ႉလၢတ်ႈတီႈမၼ်းလႄႈဝႃႈ၊ “ၵဝ်ပဵၼ် ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ ဢေႃႈ။ ႁႂ်ႈလုၵ်ႈလၢင်းမႂ်းၼမ်ၵိုၼ်းတႃႉ။ ၵူၼ်းမဵဝ်းၸိူဝ်ႉၶိူဝ်းၼမ်ၼႃႇတၵ်းပေႃႇဢွၵ်ႇမႃးၵႃႈၼႂ်းမႂ်းဢေႃႈ။ ၶုၼ်ႁေႃၶမ်းတင်းလၢႆတၵ်းပေႃႇဢွၵ်ႇပဵၼ်မႃးၵႃႈၼႂ်းၸိူဝ်ႉၶိူဝ်းမႂ်းဢေႃႈ။-
ၵဝ်တၵ်းဢဝ်လိၼ်မိူင်းဢၼ်ၵဝ်ပၼ်တီႈ ဢႃႇပြႃႇႁၢမ်ႇ၊ တင်း ဢိၸၢၵ်ႈ၊ ၼၼ်ႉပၼ်မႂ်းလႄႈ၊ၵႃႈတီႈၸိူဝ်ႉၶိူဝ်းလုၵ်ႈလၢၼ်မႂ်းၵေႃႈၵဝ်တၵ်းသိုပ်ႇပၼ်ဢေႃႈ၊” ဝႃႈၼင်ႇၼႆသေယဝ်ႉ၊-
ၽြႃးပဵၼ်ၸဝ်ႈလုၵ်ႉသေၵႃႈတီႈဢၼ်လၢတ်ႈတေႃႇၵၼ်တင်းမၼ်းၼၼ်ႉသေလႄႈ၊ၶိုၼ်ႈၵႂႃႇၵႃႈၼိူဝ်သေဢေႃႈ။-
ၵႃႈတီႈၼၼ်ႈ၊မၼ်းပူၵ်းတင်ႈမၢၵ်ႇႁိၼ်တီႈမၢတ်ႈတွင်းပုၼ်ႈဢၼ်ၶုၵ်းၸႂ်လႆႈသေယဝ်ႉ၊ဢဝ်တၢင်းလူႇဢၼ်ဢဝ်ၼမ်ႉမၢၵ်ႇၸပိတ်ႉတင်းၼမ်ႉမၼ်းသွၼ်းလေႃႇၵႃႈၼိူဝ်မၢၵ်ႇႁိၼ်ၼၼ်ႉဢေႃႈ။-
တီႈဢၼ်ၽြႃးပဵၼ်ၸဝ်ႈလၢတ်ႈတေႃႇ ယႃႇၵုပ်ႈ၊ ၼၼ်ႉမၼ်းႁွင်ႉႁဵၵ်ႈၸိုဝ်ႈဝႃႈ၊ ပေႇသလႃႉ၊ ဢေႃႈ။
ဝၢႆးၼၼ်ႉ၊ ယႃႇၵုပ်ႈ၊ ဢွၼ်ၵူၼ်းႁိူၼ်းၵူၼ်းယေးမၼ်းဢွၵ်ႇသေ ပေႇသလႃႉ၊ ၵႂႃႇၸွမ်းတၢင်းလႄႈ၊ၸမ်တၵ်းႁွတ်ႈထိုင်ဝဵင်း ဢေႇၽရတ်ႉ၊ လူဝ်ႇထႅင်ႈဢိတ်းၼိုင်ႈၼၼ်ႉၸိုင်၊ ရႃႇၶေႇလႃႉ၊ ႁွတ်ႈထိုင်ၶိင်ႇဢၼ်တၵ်းၵိူတ်ႇလုၵ်ႈလႄႈလႆႈၶၢမ်ႇဝူၺ်ႇတၼႃႇယၢပ်ႇၼႃႇလူင်လၢင်ဢေႃႈ။-
ယၢမ်းမိူဝ်ႈဢၼ်မၼ်းလႆႈၶၢမ်ႇဝူၺ်ႇတၼႃႇယၢပ်ႇၼႃႇလူင်လၢင်ယူႇၼၼ်ႉ၊မႄႈၵဵပ်းလၢတ်ႈလႄႈဝႃႈ၊ “ ရႃႇၶေႇလႃႉ၊ ႟။ ယႃႇပေမႆႈၸႂ်၊ၼႆႉၵေႃႈပဵၼ်လုၵ်ႈၸၢႆးဢွၼ်ႇဢိူဝ်း၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊မၼ်းၸမ်တၵ်းတၢႆလႄႈမိူဝ်ႈဢၼ်ၸႂ်ဝိၺိၺ်ႇမၼ်းၸမ်တၵ်းသဵင်ႈယူႇၼၼ်ႉမၼ်းပၼ်ၸိုဝ်ႈႁွင်ႉႁဵၵ်ႈလုၵ်ႈၸၢႆးမၼ်းဝႃႈ၊ ပိၼ်ႇဢူဝ်းၼိ၊ ဢေႃႈ။ ၼႂ်းဝႃႈၼၼ်သေၵေႃႈပေႃႈမၼ်းႁွင်ႉႁဵၵ်ႈၸိုဝ်ႈဝႃႈ၊ ပိၼ်ႇယႃႇမိၼ်ႇ၊ ဢေႃႈ။
ရႃႇၶေႇလႃႉ၊ တၢႆလႄႈလႆႈၶၢမ်ႇတၢင်းဢၼ်သၢင်းၵျူဝ်ႇတီႈႁိမ်းသဵၼ်ႈတၢင်းဢၼ်ၵႂႃႇၸူးဝဵင်း ဢေႇၽရတ်ႉ၊ ဢၼ်မိူဝ်ႈလဵဝ်ႁွင်ႉဝႃႈ၊ ပႅတ်ႉလႁႅမ်ႇ၊ ၼၼ်ႉဢေႃႈ။-
တီႈၼၼ်ႈၵေႃႈ ယႃႇၵုပ်ႈ၊ ပူၵ်းတင်ႈမၢၵ်ႇႁိၼ်တီႈမၢတ်ႈတွင်းဝႆႉလႄႈပဵၼ်သဝ်သၢင်းၶႅင်း ရႃႇၶေႇလႃႉ၊ ဝႆႉတေႃႇႁၢၼ်ႉမိူဝ်ႈလဵဝ်ဢေႃႈ။-
ဢိသရေး၊ သိုပ်ႇၶၢဝ်းတၢင်းမၼ်းၵႂႃႇလႄႈတႄႇပၢင်သုမ်ႉပၢင်သွင်းၵႃႈတီႈၽၢႆႇပုၼ်ႉသဝ်လၢင်း ဢီးတႃႇ၊ ဢေႃႈ။
ယၢမ်းမိူဝ်ႈဢၼ် ယႃႇၵုပ်ႈ၊ ယင်းယူႇၵႃႈတီႈမိူင်းၼၼ်ႉယူႇၼၼ်ႉၸိုင်၊ ရုပိၼ်ႇ၊ ၶဝ်ႈၼွၼ်းလူၺ်ႈ ပိလႁႃႇ၊ မေးၼွႆႉပေႃႈမၼ်းၼၼ်ႉဢေႃႈ။ ယႃႇၵုပ်ႈ၊ လႆႈငိၼ်းၶၢဝ်ႇလွင်ႈတၢင်းၼၼ်ႉ ဢေႃႈ။-
ယႃႇၵုပ်ႈ၊ မီးလုၵ်ႈၸၢႆးသိပ်းသွင်ၵေႃႉဢေႃႈ။ လုၵ်ႈၸၢႆး လေးဢႃႇ၊ ပဵၼ် ရုပိၼ်ႇ၊ လုၵ်ႈတူၼ်ႈ ယႃႇၵုပ်ႈ၊ တင်း သိမုၼ်ႇ၊လေႇဝိ၊ယုတႃႉ၊ဢိသၶႃႇ၊ၸေႇပုလုၼ်ႇ၊ ဢေႃႈ။-
လုၵ်ႈၸၢႆး ရႃႇၶေႇလႃႉ၊ ပဵၼ် ယူဝ်းသႅပ်ႈ၊ တင်း ပိၼ်ႇယႃႇမိၼ်ႇ၊ ဢေႃႈ။-
လုၵ်ႈၸၢႆး ပိလႁႃႇ၊ ၶႃႈမႄႈယိင်း ရႃႇၶေႇလႃႉ၊ ပဵၼ် တၢၼ်ႇ၊ တင်း ၼပ်ႉထလိ၊ ဢေႃႈ။-
လုၵ်ႈၸၢႆး ၸိလပႃႉ၊ ၶႃႈမႄႈယိင်း လေးဢႃႇ၊ ၼၼ်ႉပဵၼ် ၵၢတ်ႉ၊ တင်း ဢႃႇသျႃႇ၊ ဢေႃႈ။ လုၵ်ႈၸၢႆးၸိူဝ်းၼၼ်ႉၵိူတ်ႇလဵင်ႉၵႃႈတီႈမိူင်း မေႇသူဝ်ႇပူဝ်ႇတေးမီးယႃး၊ ဢေႃႈ။
ယႃႇၵုပ်ႈ၊ ၵႂႃႇၸူးတီႈပေႃႈမၼ်း ဢိၸၢၵ်ႈ၊ ၵႃႈတီႈ မမ်ႇရေႇ၊ ဝဵင်း ၵိရယႃႉသႃႇပႃႉ၊ ဢၼ်ပဵၼ်ဝဵင်း ႁေႇပရုၼ်ႇ၊ တီႈဢၼ် ဢႃႇပြႃႇႁၢမ်ႇ၊ တင်း ဢိၸၢၵ်ႈ၊ သွၼ်ႈပိုင်ႈယူႇသဝ်းၼၼ်ႉဢေႃႈ။-
ဢသၢၵ်ႈ ဢိၸၢၵ်ႈ၊ လႆႈပၢၵ်ႇပၢႆပႅတ်ႇသိပ်းပီသေယဝ်ႉ၊-
တၢႆၵႂႃႇၼႂ်းၸူဝ်ႈဢသၢၵ်ႈဢၼ်ၵႄႇထူၼ်ႈထဝ်ႈၼႃႇၼၼ်ႉသေယဝ်ႉ၊ၸင်ႇလႆႈၶၢမ်ႇသိမ်းဢဝ်ၵႂႃႇၸူးၶိုၼ်းတီႈမဵဝ်းပူႇမွၼ်ႇမၼ်းဢေႃႈ။ လုၵ်ႈၸၢႆးမၼ်း ဢေးသေႃး၊ တင်း ယႃႇၵုပ်ႈ၊ ၵေႃႈဢဝ်မၼ်းသၢင်းၵျူဝ်ႇဢေႃႈ။
ၼႆႉၸမ်ႉ၊ပဵၼ်ၸရၢင်းၸိူဝ်ႉၶိူဝ်း ဢေးသေႃး၊ ဢၼ်လႆႈၸိုဝ်ႈ ဢေႇတုမ်ႇ၊ ၼၼ်ႉဢေႃႈ။-
ဢေးသေႃး၊ ဢဝ်မေးၼႂ်းၽူႈယိင်း ၶႃႇၼၼိ၊ ၶဝ်သွင်ၵေႃႉ ဢႃႇတႃႉ၊ လုၵ်ႈယိင်း ဢေႇလုၼ်ႇ၊ ၸိူဝ်ႉၶိူဝ်းၵူၼ်း ႁိတ်ႉတိ၊ တင်း ဢႁေႃးလိပႃႇမႃႉ၊ လုၵ်ႈယိင်း ဢႃႇၼႃႉ၊ ဢၼ်ပဵၼ်လၢၼ်ယိင်း ၸိၽွင်ႇ၊ ၸိူဝ်ႉၶိူဝ်းၵူၼ်း ႁိဝိ၊-
ဢိၵ်ႇတင်း ပႃႇသမတ်ႉ၊ ၼွင်ႉယိင်း ၼပႃႇယုတ်ႉ၊ ဢၼ်ပဵၼ်လုၵ်ႈယိင်း ဢိသမေႇလႃႉ၊ ၼၼ်ႉထႅင်ႈၵေႃႉၼိုင်ႈဢေႃႈ။-
ဢႃႇတႃႉ၊ ၵိူတ်ႇလဵင်ႉလုၵ်ႈၸၢႆး ဢေးလိၽတ်ႉ၊ ဢေႃႈ။ ပႃႇသမတ်ႉ၊ ၵိူတ်ႇလဵင်ႉလုၵ်ႈၸၢႆး ရုဢေးလႃႉ၊ လႄႈ။-
ဢႁေႃးလိပႃႇမႃႉ၊ ၵိူတ်ႇလဵင်ႉလုၵ်ႈၸၢႆးဢၼ်ပဵၼ် ယုသႃႉ၊ယႃးလၢမ်ႇ၊ တင်း ၵေႃးရႃႉ၊ ဢေႃႈ။ လုၵ်ႈၸၢႆးၸိူဝ်းၼႆႉၵိူတ်ႇလဵင်ႉမႃးတီႈ ဢေးသေႃး၊ ၵႃႈတီႈမိူင်း ၶႃႇၼၼ်ႇ၊ ဢေႃႈ။
လိုၼ်းၼၼ်ႉ၊ ဢေးသေႃး၊ ဢဝ်မေးမၼ်းလႂ်၊လုၵ်ႈလၢင်းမၼ်းလႂ်၊ဢိၵ်ႇတင်းၵူၼ်းႁိူၼ်းၵူၼ်းယေးမၼ်းတင်းမူတ်းဢိၵ်ႇတင်းသူဝ်းဝူဝ်းတရိၵ်ႈသၢၼ်ႇမၼ်းလႂ်၊ဢိၵ်ႇတင်းဢုၵ်ႉၸႃႇၶူဝ်းလဵင်းၵႃႈဢၼ်မၼ်းမၢၵ်ႈမၼ်းမီးၵႃႈတီႈမိူင်း ၶႃႇၼၼ်ႇ၊ တင်းသဵင်ႈတင်းလူင်လႄႈဢွၵ်ႇသေၵႃႈတီႈၼွင်ႉၸၢႆးမၼ်း ယႃႇၵုပ်ႈ၊ ၶၢႆႉၵႂႃႇတၢင်ႇတီႈတၢင်ႇမိူင်းဢေႃႈ။-
မၼ်းႁဵတ်းၼၼ်ၶၢႆႉဢွၵ်ႇၵႂႃႇၵွပ်ႈပိူဝ်ႈဢုၵ်ႉၸႃႇတရိၵ်ႈသၢၼ်ႇၶဝ်ၼမ်ၼႃႇလူၼ်ႉလိူဝ်ၵႂႃႇလႄႈလိၼ်တီႈဢၼ်ၶဝ်ပီႈၼွင်ႉယူႇၼၼ်ႉဢမ်ႇပေႃးဢမ်ႇၵုမ်ႇလႆႈယဝ်ႉလႄႈၶဝ်ဢမ်ႇယူႇၸွမ်းၵၼ်တီႈလဵဝ်ၵၼ်လႆႈယဝ်ႉ။-
ပိူဝ်ႈၼႆ ဢေးသေႃး၊ ဢၼ်လႆႈၸိုဝ်ႈ ဢေႇတုမ်ႇ၊ ၼၼ်ႉယူႇၵႃႈတီႈမိူင်းလွႆ ၸိရႃႉ၊ ဢေႃႈ။
ၼႆႉၸမ်ႉ၊ပဵၼ်ၸရၢင်းၸိူဝ်ႉၶိူဝ်း ဢေးသေႃး၊ ဢၼ်ပဵၼ်ပူႇပေႃႈၵူၼ်းမဵဝ်း ဢေႇတုမ်ႇ၊ ဢေႃႈ။-
မေး ဢေးသေႃး၊ဢႁေႃးလိပႃႇမႃႉ၊ လုၵ်ႈယိင်း ဢႃႇၼႃႉ၊ ဢၼ်ပဵၼ်လၢၼ်ယိင်း ၸိၽွင်ႇ၊ ၼၼ်ႉၵိူတ်ႇလဵင်ႉလုၵ်ႈၸၢႆးသၢမ်ၵေႃႉ ယုသႃႉ၊ယႃးလၢမ်ႇ၊ တင်း ၵေႃးရႃႉ၊ ဢေႃႈ။
ၵမ်းၼႆႉ၊သမ်ႉတေလၢတ်ႈလွင်ႈၸိူဝ်ႉၶိူဝ်းၵူၼ်းမဵဝ်းဢၼ်သိုပ်ႇလူင်းမႃးတီႈ ဢေးသေႃး၊ ၼၼ်ႉလူးၵွၼ်ႇဢေႃႈ။ လုၵ်ႈၸၢႆးတူၼ်ႈ ဢေးသေႃး၊ ဢၼ်ပဵၼ် ဢေးလိၽတ်ႉ၊ ၼၼ်ႉလႆႈပဵၼ်ပူႇပေႃႈၶိူဝ်းႁိူၼ်းၵူၼ်းမဵဝ်း တေႇမၼ်ႇ၊ ၵူၼ်းမဵဝ်း ဢေႃးမရႃႉ၊ ၵူၼ်းမဵဝ်း ၸေႇၽေႃႇ၊ ၵူၼ်းမဵဝ်း ၵေးၼတ်ႉ၊-
ၵူၼ်းမဵဝ်း ၵေႃးရႃႉ၊ ၵူၼ်းမဵဝ်း ၵႃတမ်ႇ၊ ဢိၵ်ႇတင်းၵူၼ်းမဵဝ်း ဢႃႇမလႅၵ်ႉ၊ ဢေႃႈ။ ၸိူဝ်ႉၶိူဝ်းၸိူဝ်းၼႆႉသိုပ်ႇလူင်းမႃးတီႈမေး ဢေးသေႃး၊ဢႃႇတႃႉ၊ ဢေႃႈ။
ရုဢေးလႃႉ၊ လုၵ်ႈၸၢႆး ဢေးသေႃး၊ သမ်ႉပဵၼ်ပူႇပေႃႈၶိူဝ်းႁိူၼ်းၵူၼ်းမဵဝ်း ၼႃႇႁတ်ႉ၊ ၵူၼ်းမဵဝ်း ၸေးရႃႉ၊ ၵူၼ်းမဵဝ်း သၢမ်ႇမႃႇ၊ တင်းၵူၼ်းမဵဝ်း မိတ်ႉၸႃႉ၊ ဢေႃႈ။ ၶိူဝ်းႁိူၼ်းၸိူဝ်းၼႆႉတင်းပူႇပေႃႈၶဝ်သိုပ်ႇလူင်းမႃးတီႈမေး ဢေးသေႃး၊ပႃႇသမတ်ႉ၊ ဢေႃႈ။
ၸိူဝ်ႉၶိူဝ်းဢၼ်သိုပ်ႇလူင်းမႃးတီႈမေး ဢေးသေႃး၊ဢႁေႃးလိပႃႇမႃႉ၊ လုၵ်ႈယိင်း ဢႃႇၼႃႉ၊ ၼၼ်ႉပဵၼ်ၶိူဝ်းႁိူၼ်းၵူၼ်းမဵဝ်း ယုသႃႉ၊ ၵူၼ်းမဵဝ်း ယႃးလၢမ်ႇ၊ တင်းၵူၼ်းမဵဝ်း ၵေႃးရႃႉ၊ ဢေႃႈ။-
ၸိူဝ်ႉၶိူဝ်းၸိူဝ်းၼႆႉတင်းပူႇပေႃႈၶဝ်တင်းသဵင်ႈတင်းလူင်သိုပ်ႇလူင်းမႃးတီႈ ဢေးသေႃး၊ ဢေႃႈ။
လုၵ်ႈၸၢႆး ၸိရႃႉ၊ ၵူၼ်းမဵဝ်း ႁေႃးရိ၊ ဢၼ်ယူႇၵႃႈၼႂ်းမိူင်း ဢေႇတုမ်ႇ၊ ၸိူဝ်းၼၼ်ႉ ပဵၼ် လေႃႇတၼ်ႇ၊သေႃးပလႃႉ၊ၸိၽွင်ႇ၊ဢႃႇၼႃႉ၊-
တိသုၼ်ႇ၊ဢေးၸႃႇ၊ ဢိၵ်ႇတင်း တိသၼ်ႇ၊ ၸိူဝ်းၼႆႉပဵၼ်ပူႇပေႃႈၵူၼ်းမဵဝ်း ႁေႃးရိ၊ ဢေႃႈ။
လုၵ်ႈၸၢႆး လေႃႇတၼ်ႇ၊ တင်းလၢႆပဵၼ် ႁေႃးရိ၊ တင်း ႁေႇမၼ်ႇ၊ ဢေႃႈ။ ၼွင်ႉယိင်း လေႃႇတၼ်ႇ၊ ပဵၼ် တိမ်းၼႃႉ၊ ဢေႃႈ။
လုၵ်ႈၸၢႆး သေႃးပလႃႉ၊ တင်းလၢႆၸမ်ႉ၊ပဵၼ် ဢႃႇလဝၢၼ်ႇ၊မႃႇၼႁတ်ႉ၊ဢေးပႃႇလႃႉ၊သေးၽေႃႇ၊ ဢိၵ်ႇတင်း ဢေႃးၼမ်ႇ၊ ဢေႃႈ။
လုၵ်ႈၸၢႆး ၸိၽွင်ႇ၊ မီးသွင်ၵေႃႉ ဢႃႇယႃႉ၊ ဢိၵ်ႇတင်း ဢႃႇၼႃႉ၊ ဢေႃႈ။ ဢႃႇၼႃႉ၊ ၼႆႉပဵၼ်ၵေႃႉဢၼ်ထူပ်းႁၼ်ၼမ်ႉပုင်ႇမႆႈၵႃႈတီႈထိူၼ်ႇမိူဝ်ႈဢၼ်မၼ်းလဵင်ႉမႃႉလီႈပေႃႈမၼ်း ၸိၽွင်ႇ၊ ယူႇၼၼ်ႉဢေႃႈ။
လုၵ်ႈၸၢႆး ဢႃႇၼႃႉ၊ ပဵၼ် တိသုၼ်ႇ၊ ဢေႃႈ။ ဢႁေႃးလိပႃႇမႃႉ၊ ၵေႃႈပဵၼ်လုၵ်ႈယိင်း ဢႃႇၼႃႉ၊ ၼႆႉဢေႃႈ။
တိသုၼ်ႇ၊ သမ်ႉလႆႈလုၵ်ႈၸၢႆး ႁဵမ်တၼ်ႇ၊ဢေးသပၼ်ႇ၊ဢိသရၼ်ႇ၊ ဢိၵ်ႇတင်း ၶႄးရၼ်ႇ၊ ဢေႃႈ။
လုၵ်ႈၸၢႆး ဢေးၸႃႇ၊ တင်းလၢႆၸမ်ႉ၊ပဵၼ် ပိလႁၼ်ႇ၊ၸႃႇဝၼ်ႇ၊ တင်း ဢႃႇၵၼ်ႇ၊ ဢေႃႈ။
လုၵ်ႈၸၢႆး တိသၼ်ႇ၊ တင်းလၢႆၸမ်ႉ၊ပဵၼ် ဢုၸႃႉ၊ ဢိၵ်ႇတင်း ဢႃႇရၼ်ႇ၊ ဢေႃႈ။
ၼႆႉၸမ်ႉ၊ပဵၼ်ပူႇပေႃႈၸိူဝ်ႉၶိူဝ်းၵူၼ်းမဵဝ်း ႁေႃးရိ၊ ၵႃႈၼႂ်းမိူင်း ဢေႇတုမ်ႇ၊ ဢေႃႈ။-
ၶဝ်ၼၼ်ႉပဵၼ်ပူႇပေႃႈၶိူဝ်းႁိူၼ်းၵူၼ်းမဵဝ်း လေႃႇတၼ်ႇ၊ ၵူၼ်းမဵဝ်း သေႃးပလႃႉ၊ ၵူၼ်းမဵဝ်း ၸိၽွင်ႇ၊ ၵူၼ်းမဵဝ်း ဢႃႇၼႃႉ၊ ၵူၼ်းမဵဝ်း တိသုၼ်ႇ၊ ၵူၼ်းမဵဝ်း ဢေးၸႃႇ၊ တင်းၵူၼ်းမဵဝ်း တိသၼ်ႇ၊ ဢေႃႈ။
ၸူဝ်ႈဢၼ်ၵူၼ်းမဵဝ်း ဢိသရေး၊ ဢမ်ႇပႆႇမီးၶုၼ်ႁေႃၶမ်းသေပႃးၼၼ်ႉၶုၼ်ႁေႃၶမ်းၸိူဝ်းဢၼ်ဢုပ်ႉပိူင်ႇမိူင်း ဢေႇတုမ်ႇ၊ သိုပ်ႇၼိုင်ႈယဝ်ႉသိုပ်ႇၼိုင်ႈၼၼ်ႉၸမ်ႉ၊-
ပေႇလႃႉ၊ ဢၼ်ပဵၼ်လုၵ်ႈၸၢႆး ပေႃးရႃႉ၊ ၼၼ်ႉဢုပ်ႉမိူင်း ဢေႇတုမ်ႇ၊ ဝဵင်း တိၼ်ႇႁႃႇပႃႉ၊ ဢေႃႈ။
ဝၢႆးသေ ပေႇလႃႉ၊ ၼွၼ်းၽႄးယဝ်ႉၼၼ်ႉ၊ ယေႃးပပ်ႉ၊ လုၵ်ႈၸၢႆး ၸေးရႃႉ၊ ၵူၼ်းဝဵင်း ပေႃႇၸရႃႉ၊ လႆႈပဵၼ်ၶုၼ်ႁေႃၶမ်းဢေႃႈ။
ဝၢႆးသေ ယေႃးပပ်ႉ၊ ၼွၼ်းၽႄးယဝ်ႉၼၼ်ႉ၊ ႁုသမ်ႇ၊ ၵူၼ်းမိူင်း တေႇမၼ်ႇ၊ လႆႈပဵၼ်ၶုၼ်ႁေႃၶမ်းဢေႃႈ။
ဝၢႆးသေ ႁုသမ်ႇ၊ ၼွၼ်းၽႄးယဝ်ႉၼၼ်ႉ၊ ႁႃႇတတ်ႉ၊ လုၵ်ႈၸၢႆး ပေးတတ်ႉ၊ ဢၼ်တိုၵ်းပႄႉ၊ ၵူၼ်းမဵဝ်း မိတျၼ်ႇ၊ ၶဝ်ၼႂ်းပၢင်ႇပဵင်း မေႃႇၽႃႉ၊ ၼၼ်ႉလႆႈပဵၼ်ၶုၼ်ႁေႃၶမ်းလႄႈၸိုဝ်ႈဝဵင်းမၼ်းပဵၼ် ဢႃႇဝိတ်ႉ၊ ဢေႃႈ။
ဝၢႆးသေ ႁႃႇတတ်ႉ၊ ၼွၼ်းၽႄးယဝ်ႉၼၼ်ႉ၊ သမ်းလႃႉ၊ ဢၼ်ပဵၼ်ၵူၼ်းဝဵင်း မႃႇသရိၵ်ႉ၊ ၶိုၼ်ႈပဵၼ်ၶုၼ်ႁေႃၶမ်းဢေႃႈ။
ဝၢႆးသေ သမ်းလႃႉ၊ ၼွၼ်းၽႄးယဝ်ႉၼၼ်ႉ၊ သေႃးလႃႉ၊ ၵူၼ်းဝဵင်း ရႁေႃႇၽူတ်ႉ၊ ဢၼ်ယူႇ ၵႃႈႁိမ်းၼမ်ႉမႄႈ ဢုၽရတ်ႉ၊ ၼၼ်ႉႁဵတ်းၶုၼ်ႁေႃၶမ်းဢေႃႈ။
ဝၢႆးသေဢၼ် သေႃးလႃႉ၊ ၼွၼ်းၽႄးယဝ်ႉၼၼ်ႉ ပႃႇလႁႃႇၼၼ်ႇ၊ ဢၼ်ပဵၼ်လုၵ်ႈၸၢႆး ဢႃႇၶပေႃႇ၊ ၼၼ်ႉသိုပ်ႇႁဵတ်းၶုၼ်ႁေႃၶမ်းဢေႃႈ။
ဝၢႆးသေဢၼ် ပႃႇလႁႃႇၼၼ်ႇ၊ ၼွၼ်းၽႄးယဝ်ႉၼၼ်ႉ၊ ႁႃႇတတ်ႉ၊ ၵူၼ်းဝဵင်း ပေႃႇ၊ လႆႈပဵၼ်ၶုၼ်ႁေႃၶမ်းဢေႃႈ။ ၸိုဝ်ႈသဵင်မေးမၼ်းၸမ်ႉ၊ပဵၼ် မႁေႇတႃႉပေႇလႃႉ၊ လုၵ်ႈယိင်း မႃႇတရိၵ်ႉ၊ လႄႈ ပဵၼ်လၢၼ်ယိင်း မေႇၸႁပ်ႉ၊ ဢေႃႈ။
ဢေးသေႃး၊ လႆႈပဵၼ်ပူႇပေႃႈၵူၼ်းမဵဝ်း ဢေႇတုမ်ႇ၊ လႄႈငိူၼ်ႈၸိူဝ်ႉၶိူဝ်းဢၼ်သိုပ်ႇလူင်းမႃးၸမ်ႉ၊ပဵၼ်ၵူၼ်းမဵဝ်း တိမ်းၼႃႉ၊ ၵူၼ်းမဵဝ်း ဢႃႇလဝႃႉ၊ ၵူၼ်းမဵဝ်း ယေႇသိတ်ႉ၊-
ၵူၼ်းမဵဝ်း ဢႃႇႁေႃးလိပႃႇမႃႉ၊ ၵူၼ်းမဵဝ်း ဢေးလႃႇ၊ ၵူၼ်းမဵဝ်း ပိၼုၼ်ႇ၊-
ၵူၼ်းမဵဝ်း ၵေးၼတ်ႉ၊ ၵူၼ်းမဵဝ်း တေႇမၼ်ႇ၊ ၵူၼ်းမဵဝ်း မိပၸႃႇ၊-
ၵူၼ်းမဵဝ်း မႃႇၵတျေႇလႃႉ၊ တင်းၵူၼ်းမဵဝ်း ဢိရမ်ႇ၊ ဢေႃႈ။ ၶဝ်ၸိူဝ်းၼႆႉပဵၼ်ၶုၼ်ဢုပ်ႉမိူင်း ဢေႇတုမ်ႇ၊ ၸွမ်းၼင်ႇတီႈယူႇၽႂ်တီႈယူႇမၼ်း၊ၵႃႈၼႂ်းမိူင်းဢၼ်ၶဝ်ပိူင်ႇၼၼ်ႉဢေႃႈ။ ဢေးသေႃး၊ ၼၼ်ႉပဵၼ်ပေႃႈၵူၼ်းမဵဝ်း ဢေႇတုမ်ႇ၊ ဢေႃႈ။
ယႃႇၵုပ်ႈ၊ သိုပ်ႇယူႇၵႃႈၼႂ်းမိူင်း ၶႃႇၼၼ်ႇ၊ ဢၼ်ပေႃႈမၼ်းသွၼ်ႈပိုင်ႈၼၼ်ႉဢေႃႈ။
ၼႆႉၸမ်ႉ၊ပဵၼ်ပိုၼ်းၸိူဝ်ႉၶိူဝ်း ယႃႇၵုပ်ႈ၊ ဢေႃႈ။ ယူဝ်းသႅပ်ႈ၊ မၢဝ်ႇႁၢႆးဢွၼ်ႇဢၼ်မီးဢသၢၵ်ႈသိပ်းၸဵတ်းပီၼၼ်ႉလဵင်ႉသူဝ်းလဵင်ႉပႄႉၶဝ်လူၺ်ႈၵၼ်တင်းပီႈဢၢႆႈမၼ်းၸိူဝ်းဢၼ်ပဵၼ်လုၵ်ႈၸၢႆးမေးၼွႆႉပေႃႈမၼ်း ပိလႁႃႇ၊ တင်း ၸိလပႃႉ၊ ၼၼ်ႉဢေႃႈ။ မၼ်းၸၢင်ႈၶိုၼ်းမွၵ်ႇၶိုၼ်းၶႆႈဢပျတ်ႈၶဝ်ၼၼ်ႉတီႈပေႃႈၶဝ်ဢေႃႈ။
ယႃႇၵုပ်ႈ၊ ၼၼ်ႉၵွပ်ႈပိူဝ်ႈဢၼ်လႆႈလုၵ်ႈၸၢႆးမၼ်း ယူဝ်းသႅပ်ႈ၊ ယၢမ်းမိူဝ်ႈမၼ်းထဝ်ႈယဝ်ႉၼၼ်ႉလႄႈယဵင်ႈၶႅၼ်းႁၵ်ႉ ယူဝ်းသႅပ်ႈ၊ ၼႃႇသေလုၵ်ႈၸၢႆးတၢင်ႇၵေႃႉၸိူဝ်းၼၼ်ႉဢေႃႈ။ သိူဝ်ႈယၢဝ်းဢၼ်ႁၢင်ႈလီၵေႃႈယဵပ်ႉပၼ်ဢေႃႈ။-
ပီႈဢၢႆႈမၼ်းၸိူဝ်းၼၼ်ႉမိူဝ်ႈၶဝ်ႁုလွင်ႈဢၼ်ပေႃႈၶဝ်ယဵင်ႈၶႅၼ်းႁၵ်ႉမၼ်းၼႃႇသေဢၼ်ႁၵ်ႉၶဝ်ၼၼ်ႉၸိုင်၊ဢွၼ်ၵၼ်ၸင်းမၼ်းလႄႈဢမ်ႇလၢတ်ႈၵႂၢမ်းလီတေႃႇမၼ်း။
ၶိုၼ်းၼိုင်ႈ ယူဝ်းသႅပ်ႈ၊ ၼွၼ်းၽၼ်ႁၼ်ဢေႃႈ။ လွင်ႈတၢင်းၼွၼ်းၽၼ်ႁၼ်ၼၼ်ႉမၼ်းမွၵ်ႇလၢတ်ႈၼႄပီႈဢၢႆႈမၼ်းတင်းလၢႆလႄႈၶဝ်ယဵင်ႈၶႅၼ်းၸင်းမၼ်းဢေႃႈ။-
မၼ်းမွၵ်ႇလၢတ်ႈဝႃႈ၊ “ထွမ်ႇငိၼ်းတၢင်းဢၼ်ၵဝ်ၶႃႈၼွၼ်းၽၼ်ႁၼ်ၼႆႉသေၵမ်း။-
ၼႂ်းမိူဝ်ႈဢၼ်ၵဝ်ၶႃႈမတ်ႉလိုၼ်ႈၶဝ်ႈယူႇၵႃႈၼႂ်းတူင်ႈၼႃးၼၼ်ႉ၊လိုၼ်ႈၶဝ်ႈၵဝ်ၶႃႈလုၵ်ႉၸုၵ်းလႄႈလိုၼ်ႈၶဝ်ႈပီႈႁဝ်းၶဝ်ဢွၼ်ၵၼ်လုၵ်ႈၸုၵ်းလွမ်ႉႁွပ်ႈသေလႄႈဝႆႈလိုၼ်ႈၶဝ်ႈၵဝ်ၶႃႈယူႇဢေႃႈ၊” ဝႃႈၼင်ႇၼႆဢေႃႈ။
ပီႈဢၢႆႈမၼ်းၸိူဝ်းၼၼ်ႉၶိုၼ်းလၢတ်ႈတီႈမၼ်းလႄႈဝႃႈ၊ “မႂ်းထၢင်ႇမႂ်းတေပဵၼ်ၶုၼ်ႁေႃၶမ်းလႄႈဢုပ်ႉပိူင်ႇၵႃႈၼိူဝ်ႁဝ်းဝႃႈၼႆႁိုဝ်း၊” ဝႃႈၼင်ႇၼႆဢေႃႈ။ ၵွပ်ႈပိူဝ်ႈတၢင်းၼွၼ်းၽၼ်ႁၼ်မၼ်းဢိၵ်ႇတင်းၵႂၢမ်းဢၼ်မၼ်းလၢတ်ႈၼၼ်ႉၶဝ်ယဵင်ႈၶႅၼ်းၸင်းမၼ်းဢေႃႈ။
လိုၼ်းၼၼ်ႉ၊မၼ်းသမ်ႉၼွၼ်းၽၼ်ႁၼ်ထႅင်ႈလႄႈမွၵ်ႇလၢတ်ႈတီႈပီႈဢၢႆႈမၼ်းၸိူဝ်းၼၼ်ႉလႄႈဝႃႈ၊ “ၵဝ်ၶႃႈၼွၼ်းၽၼ်ႁၼ်ထႅင်ႈၶႃႈယဝ်ႉ။ ၵဝ်ၶႃႈၼွၼ်းၽၼ်ႁၼ်တႃဝၼ်းလိူၼ်တင်းလၢဝ်သိပ်းဢဵတ်းလုၵ်ႈဢွၼ်ၵၼ်ဝႆႈၵဝ်ၶႃႈ၊ၶႃႈဢေႃႈ၊” ဝႃႈၼင်ႇၼႆဢေႃႈ။
တၢင်းၼွၼ်းၽၼ်ႁၼ်မၼ်းၼၼ်ႉတီႈပေႃႈမၼ်းၵေႃႈမၼ်းၶႆႈၼႄလႄႈပေႃႈမၼ်းၸႃႉလႄႈဝႃႈ၊ “တၢင်းၼွၼ်းၽၼ်ႁၼ်ၵႃႈသင်။ မႂ်းထၢင်ႇၸႃႉၸဵမ်ၵဝ်လႄႈမႄႈမႂ်းတင်းပီႈဢၢႆႈမႂ်းတင်းလၢႆတေလႆႈဢွၼ်ၵၼ်ၵူမ်ႈႁူဝ်ၵွမ်းႁူဝ်ၸူးမႂ်းဝႃႈၼႆႁိုဝ်း၊” ဝႃႈၼင်ႇၼႆဢေႃႈ။-
ပီႈဢၢႆႈမၼ်းၸိူဝ်းၼၼ်ႉသီႈၵေႉႁေႈတႃမၼ်းဢေႃႈ။ ပေႃႈၶဝ်ၸမ်ႉ၊မၢတ်ႈတွင်းလွင်ႈတၢင်းမၼ်းၼၼ်ႉဝႆႉဢေႃႈ။
ဝၼ်းၼိုင်ႈ၊မိူဝ်ႈဢၼ်ပီႈဢၢႆႈမၼ်းၸိူဝ်းၼၼ်ႉၵႂႃႇလဵင်ႉသူဝ်းပေႃႈၶဝ်ယူႇတီႈဝဵင်း သေးၶိမ်ႇ၊ ပုၼ်ႉၼၼ်ႉ၊-
ယႃႇၵုပ်ႈ၊ လၢတ်ႈတီႈ ယူဝ်းသႅပ်ႈ၊ လႄႈဝႃႈ၊ “ၵဝ်ၶႂ်ႈႁႂ်ႈမႂ်းၵႂႃႇတီႈဝဵင်း သေးၶိမ်ႇ၊ ၸူးတီႈဢၼ်ပီႈဢၢႆႈမႂ်းတင်းလၢႆလဵင်ႉသူဝ်းယူႇၼၼ်ႉဢေႃႈ၊” ဝႃႈၼင်ႇၼႆလႄႈ၊မၼ်းၶိုၼ်းလၢတ်ႈဝႃႈ၊ “လႆႈယူႇၶႃႈဢေႃႈ၊” ဝႃႈၼင်ႇၼႆဢေႃႈ။
ပေႃႈမၼ်းသင်ႇလၢတ်ႈတီႈမၼ်းလႄႈဝႃႈ၊ “ၵႂႃႇလူၵႂႃႇတူၺ်းပီႈဢၢႆႈမႂ်းၸိူဝ်းၼၼ်ႉၸွင်ႇၶဝ်ယူႇလီၵိၼ်ဝၢၼ်ယူႇႁိုဝ်း၊သူဝ်းပႄႉတင်းလၢႆၵေႃႈမီးယူႇလီလီငၢမ်းငၢမ်းယူႇႁိုဝ်း၊ၶိုၼ်းမႃးမွၵ်ႇလၢတ်ႈၵဝ်တႃႉ၊” ဝႃႈၼင်ႇၼႆသေယဝ်ႉ၊ပွႆႇၸႂ်ႉမၼ်းဢွၵ်ႇသေပၢင်ႇႁူၺ်ႈ ႁေႇပရုၼ်ႇ၊ ၵႂႃႇဢေႃႈ။ ယူဝ်းသႅပ်ႈ၊ ႁွတ်ႈၵႂႃႇၵႃႈတီႈဝဵင်း သေးၶိမ်ႇ၊ သေလႄႈ၊-
မၼ်းလႄႇသွၵ်ႈႁႃၶဝ်ၵႃႈၼႂ်းတူင်ႈၼႃးယူႇလႄႈမိူဝ်ႈဢၼ်ထူပ်းၺႃးၵူၼ်းၵေႃႉၼိုင်ႈၸိုင်၊ၵေႃႉၼၼ်ႉထၢမ်လႄႈဝႃႈ၊ “မႂ်းႁႃၵႃႈသင်” ဝႃႈၼင်ႇၼႆဢေႃႈ။
မၼ်းၶိုၼ်းလၢတ်ႈဝႃႈ၊ “ၵဝ်မႃးႁႃပီႈဢၢႆႈၵဝ်ၶႃႈၸိူဝ်းဢၼ်လဵင်ႉသူဝ်းယူႇၼၼ်ႉဢေႃႈ။ ၶဝ်မီးတီႈလႂ်ၶႅၼ်းတေႃႈမွၵ်ႇလၢတ်ႈသေၵမ်းၶႃႈ၊” ဝႃႈၼင်ႇၼႆဢေႃႈ။
ၵေႃႉၼၼ်ႉၵေႃႈလၢတ်ႈဝႃႈ၊ “ၶဝ်ၶၢႆႉၵႂႃႇယဝ်ႉ။ ၵဝ်လႆႈငိၼ်းၶဝ်လၢတ်ႈၵၼ်ဝႃႈ၊တေၵႂႃႇတၢင်းဝဵင်း တေႃႇသၼ်ႇ၊ ပုၼ်ႉယဝ်ႉ၊” ဝႃႈၼႆလႄႈ၊ ယူဝ်းသႅပ်ႈ၊ ၵေႃႈၸွမ်းႁႃလႄႈထူပ်းၺႃးၶဝ်ၵႃႈတီႈဝဵင်း တေႃႇသၼ်ႇ၊ ပုၼ်ႉဢေႃႈ။
ပီႈဢၢႆႈမၼ်းၸိူဝ်းၼၼ်ႉႁၼ်မၼ်းၸဵမ်မိူဝ်ႈဢၼ်မၼ်းယင်းမႃးယူႇၵႆၵႆၼၼ်ႉသေယဝ်ႉ၊ၸူဝ်ႈဢၼ်မၼ်းဢမ်ႇပႆႇႁွတ်ႈထိုင်ၼၼ်ႉၸိုင်၊ၶဝ်တိူင်ႇပၢင်ႇၵၼ်ႁႂ်ႈလႆႈဢဝ်မၼ်းတၢႆလႄႈလၢတ်ႈဝႃႈ၊-
“တူၺ်းလူး။ သြႃႇၼွၼ်းၽၼ်ႁၼ်ၼၼ်ႉမႃးယဝ်ႉ၊-
မႃး႟။ ဢဝ်မၼ်းတၢႆသေယဝ်ႉ၊တူဝ်တၢႆမၼ်းၼၼ်ႉဢဝ်ထိမ်ႈပႅတ်ႈသႂ်ႇၵႃႈၼႂ်းၼမ်ႉမေႃႇႁၢမ်းသေတီႈတီႈတႃႉ။ ဢွၼ်ၵၼ်လၢတ်ႈလႄႈဝႃႈ၊ ‘တူဝ်ထိူၼ်ႇႁၢႆႉသေမဵဝ်းမဵဝ်းၶူပ်းၵိၼ်မၼ်းယဝ်ႉ၊’ ဝႃႈၼႆတႃႉႁဝ်း။ ႁဵတ်းၼၼ်လႄႈပႂ်ႉတူၺ်းတၢင်းၼွၼ်းၽၼ်ႁၼ်မၼ်းၸိူဝ်းၼၼ်ႉတေပဵၼ်မႃးၸိူဝ်ႉႁိုဝ်ၼၼ်ႉတႃႉႁဝ်း၊” ဝႃႈၼင်ႇၼႆဢေႃႈ။
ရုပိၼ်ႇ၊ လႆႈငိၼ်းၵႂၢမ်းၶဝ်သေလႄႈႁႃလၢႆးဢၼ်တေၼုၵ်ႈဢဝ် ယူဝ်းသႅပ်ႈ၊ လႄႈလၢတ်ႈဝႃႈ၊ “ယႃႇပေဢဝ်မၼ်းတၢႆသေၵမ်း၊” ဝႃႈၼင်ႇၼႆသေယဝ်ႉ၊-
မၼ်းပၼ်တၢင်းၵျၢမ်ႇတီႈၶဝ်လႄႈဝႃႈ၊ “ယႃႇပေဢဝ်မၼ်းတၢႆ၊ၵူၺ်းဢဝ်တူဝ်မၼ်းထိမ်ႈသႂ်ႇၵႃႈၼႂ်းၼမ်ႉမေႃႇဢၼ်မီးၼႂ်းထိူၼ်ႇၼႆႉတႃႉႁဝ်း၊” ဝႃႈၸိူဝ်ႉၼင်ႇၼႆ၊ၵွပ်ႈပိူဝ်ႈမၼ်းမီးဢၵျၢမ်ႇဢၢင်ႈတၵ်းၵႄႇသႄႇဢဝ် ယူဝ်းသႅပ်ႈ၊ ဢွၵ်ႇသေၵႃႈၼႂ်းမိုဝ်းၶဝ်လႄႈပွႆႇႁႂ်ႈမၼ်းလႆႈပွၵ်ႈမိူဝ်းၸူးတီႈပေႃႈၶဝ်ဢေႃႈ။-
မိူဝ်ႈဢၼ် ယူဝ်းသႅပ်ႈ၊ ႁွတ်ႈထိုင်တီႈပီႈဢၢႆႈမၼ်းၸိူဝ်းၼၼ်ႉမႃးၸိုင်၊ၶဝ်ဢွၼ်ၵၼ်ထွတ်ႇလွၼ်ႈသိူဝ်ႈယၢဝ်းယွင်းဢၼ်ႁၢင်ႈလီၼၼ်ႉသေယဝ်ႉ၊-
တိၵမ်ဢဝ်မၼ်းထိမ်ႈတူၵ်းသႂ်ႇၵႃႈၼႂ်းၼမ်ႉမေႃႇႁၢမ်းသေဢေႃႈ။
လိုၼ်းၼၼ်ႉယၢမ်းမိူဝ်ႈဢၼ်ၶဝ်ဢွၼ်ၵၼ်ၵိၼ်ယူႇၼၼ်ႉ၊ၶဝ်မုင်ႈႁၼ်ၵူၼ်းၵႃႉမဵဝ်း ဢိသမေႇလႃႉ၊ ၸုမ်းၼိုင်ႈလုၵ်ႉသေၵႃႈတီႈမိူင်း ၵိလတ်ႉ၊ ၸွမ်းတၢင်းလူင်းၵႂႃႇၸူးမိူင်း ဢေးၵျိပ်ႉ၊ ၼၼ်ႉမႃးယူႇဢေႃႈ။ ၶဝ်ႁေႃႈၵလႃႇဢုၵ်ႈၸိူဝ်းဢၼ်တၢင်ႇၼၢမ်ႇသႃႇဢိၵ်ႇတင်းယၢင်မုရၼ်ႇလႂ်မႃးဢေႃႈ။-
ၵမ်းၼၼ်ႉ၊ ယုတႃႉ၊ လၢတ်ႈတီႈပီႈၼွင်ႉမၼ်းၸိူဝ်းၼၼ်ႉလႄႈဝႃႈ၊ “ပေႃးႁဝ်းဢဝ်ၼွင်ႉၸၢႆးႁဝ်းတၢႆလႄႈႁူမ်ႇလပ်ႉဢမုဢၼ်ဢဝ်ဢသၢၵ်ႈတၢႆၼႆႉၸိုင်၊တေမီးဢၵျူဝ်းၵႃႈသင်၊-
ၽိူဝ်ႇသေဢဝ်မၼ်းတၢႆၼၼ်ႉတႃႉႁဝ်းဢဝ်မၼ်းၶၢႆတေႃႇၵူၼ်းမဵဝ်း ဢိသမေႇလႃႉ၊ ၸိူဝ်းၼၼ်ႉသေတႃႉ၊ဝႃႈႁိုဝ်ၵေႃႈမၼ်းပဵၼ်ၼွင်ႉၸၢႆးႁဝ်းၼိူဝ်ႉလိူတ်ႈႁဝ်းဢေႃႈ၊” ဝႃႈၼင်ႇၼႆဢေႃႈ။ ပီႈၼွင်ႉမၼ်းၸိူဝ်းၼၼ်ႉၽွမ်ႉၸႂ်ၵၼ်လႄႈ၊-
ၼႂ်းမိူဝ်ႈဢၼ်ၵူၼ်းၵႃႉ မိတျၼ်ႇ၊ ၶဝ်မႃးၸမ်ၼၼ်ႉ၊ၶဝ်ဢွၼ်ၵၼ်တိုတ်ႉၸၼ်ဢဝ် ယူဝ်းသႅပ်ႈ၊ ဢွၵ်ႇသေၼမ်ႉမေႃႇႁၢမ်းမႃးသေယဝ်ႉ၊ဢဝ်ၶၢႆတေႃႇၵူၼ်းမဵဝ်း ဢိသမေႇလႃႉ၊ ၸိူဝ်းၼၼ်ႉလူၺ်ႈငိုၼ်းသၢဝ်းၵျၢပ်ႈလႄႈ၊ၵူၼ်းမဵဝ်း ဢိသမေႇလႃႉ၊ ၶဝ်ဢဝ်မၼ်းၵႂႃႇတၢင်းမိူင်း ဢေးၵျိပ်ႉ၊ ပုၼ်ႉသေဢေႃႈ။
မိူဝ်ႈဢၼ် ရုပိၼ်ႇ၊ ၶိုၼ်းမႃးၸူးတီႈၼမ်ႉမေႃႇလႄႈဢမ်ႇႁၼ် ယူဝ်းသႅပ်ႈ၊ ၼၼ်ႉၸိုင်၊မၼ်းမႆႈၸႂ်ၶီၸႂ်ၼႃႇလႄႈၸၵ်ႉသိၵ်ႇသိူဝ်ႈၶူဝ်းၼုင်ႈမၼ်းဢေႃႈ။-
မၼ်းလႅၼ်ႈၵႂႃႇၵႃႈတီႈၼွင်ႉၸၢႆးမၼ်းတင်းလၢႆလႄႈလၢတ်ႈဝႃႈ၊ “လုၵ်ႈဢွၼ်ႇၼၼ်ႉဢမ်ႇမီးတီႈၼၼ်ႈယဝ်ႉ။ ၵဝ်တေလႆႈႁဵတ်းၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၶဝ်ႁႅမ်ပႄႉဢွၼ်ႇတူဝ်ၼိုင်ႈသေယဝ်ႉ၊ဢဝ်သိူဝ်ႈယၢဝ်း ယူဝ်းသႅပ်ႈ၊ ၸုမ်ႇၼႂ်းလိူတ်ႈပႄႉၼၼ်ႉဢေႃႈ။-
လိုၼ်းၼၼ်ႉ ၶဝ်ဢဝ်သိူဝ်ႈယၢဝ်းၼၼ်ႉၵႂႃႇၸူးၵႃႈတီႈပေႃႈၶဝ်လႄႈလၢတ်ႈဝႃႈ၊ “ႁဝ်းၶႃႈထူပ်းႁၼ်သိူဝ်ႈၽိုၼ်ၼႆႉဢေႃႈ။ ၸွင်ႇၸႂ်ႈသိူဝ်ႈလုၵ်ႈၸၢႆးပေႃႈႁဝ်းၼၼ်ႉၶႃႈႁိုဝ်း၊” ဝႃႈၼင်ႇၼႆဢေႃႈ။
မၼ်းတွင်းသိူဝ်ႈၽိုၼ်ၼၼ်ႉလႄႈလၢတ်ႈဝႃႈ၊ “ပဵၼ်သိူဝ်ႈလုၵ်ႈၸၢႆးၵဝ်တႄႉတႄႉယဝ်ႉ။ တူဝ်ထိူၼ်ႇႁၢႆႉၶူပ်းၵိၼ်မၼ်းယဝ်ႉ။ လုၵ်ႈၸၢႆးၵဝ် ယူဝ်းသႅပ်ႈ၊ လႆႈၶၢမ်ႇတၢင်းဢၼ်တူဝ်ထိူၼ်ႇၶူပ်းယွၵ်းၶူပ်းယွႆႈပႅတ်ႈယဝ်ႉ၊” ဝႃႈၼင်ႇၼႆဢေႃႈ။-
ယႃႇၵုပ်ႈ၊ ၶူမ်ၸႂ်ၶူမ်ၶေႃးၼႃႇလႄႈ၊တိုတ်ႉသိၵ်ႇၶူဝ်းၼုင်ႈမၼ်းသေယဝ်ႉ၊ၼုင်ႈႁူမ်ႇၽႃႈၶူၼ်ၵျၢမ်းယူႇ၊မႆႈၶီလႄႈၸႂ်ဢမ်ႇသႃႇယူႇႁိုင်ၼႃႇဢေႃႈ။
လုၵ်ႈၸၢႆးလုၵ်ႈယိင်းမၼ်းတင်းသဵင်ႈတင်းလူင်ဢွၼ်ၵၼ်မႃးၶျေႃးႁႂ်ႈမၼ်းပျေႇၸႂ်သေၵေႃႈ၊မၼ်းယင်းဢမ်ႇၶၢမ်ႇဢဝ်တၢင်းဢၼ်ၶဝ်ႁဵတ်းႁႂ်ႈမၼ်းပျေႇၸႂ်ၼၼ်ႉလႄႈလၢတ်ႈဝႃႈ၊ “ၵဝ်တၵ်းၶၢင်းၶီၶၢင်းၽၢၼ်ယူႇတေႃႇၵဝ်လူင်းၸူးၵႃႈတီႈမိူင်း မရၼႃႉ၊ ၵႃႈတီႈဢၼ်လုၵ်ႈၸၢႆးၵဝ်မီးပုၼ်ႉဢေႃႈ၊” ဝႃႈၼင်ႇၼႆသေလႄႈ၊သိုပ်ႇႁွင်ႉႁႆႈပုၼ်ႈလုၵ်ႈၸၢႆးမၼ်း ယူဝ်းသႅပ်ႈ၊ ယူႇၶိူဝ်းၶိူဝ်းဢေႃႈ။
ယၢမ်းၼၼ်ႉ ယူဝ်းသႅပ်ႈ၊ ၸမ်ႉ၊ၵူၼ်း မိတျၼ်ႇ၊ ၸိူဝ်းၼၼ်ႉဢဝ်မၼ်းၵႂႃႇႁွတ်ႈထိုင်မိူင်း ဢေးၵျိပ်ႉ၊ လႄႈၶၢႆတေႃႇၶုၼ်လူင်ၼႂ်းႁေႃဢၼ်လႆႈၸိုဝ်ႈ ပေႃးတိၽႃႇ၊ ဢၼ်ပဵၼ်ၶုၼ်သိုၵ်းလူင်ဢၼ်ပႂ်ႉႁေႃၶုၼ်ႁေႃၶမ်းမိူင်း ဢေးၵျိပ်ႉ၊ ၼၼ်ႉဢေႃႈ။
ၽွင်းယၢမ်းၶၢဝ်းၼၼ်ႉ ယုတႃႉ၊ ဢွၵ်ႇသေပၢင်ပီႈၼွင်ႉမၼ်းၸိူဝ်းၼၼ်ႉလႄႈၵႂႃႇယူႇလူၺ်ႈၵူၼ်းဝဵင်း ဢတုလမ်ႇ၊ ၵေႃႉၼိုင်ႈဢၼ်လႆႈၸိုဝ်ႈ ႁိရႃႉ၊ ၼၼ်ႉဢေႃႈ။-
ၵႃႈတီႈၼၼ်ႈမၼ်းထူပ်းၺႃးသၢဝ်ၵူၼ်းမဵဝ်း ၶႃႇၼၼိ၊ ၵေႃႉၼိုင်ႈဢၼ်ပဵၼ်လုၵ်ႈယိင်း သုဢႃႇ၊ ၼၼ်ႉဢေႃႈ။ မၼ်းဢဝ်ၽူႈယိင်းၼၼ်ႉသေယဝ်ႉ၊ႁူမ်ႈပွင်းၵၼ်တင်းမၼ်းဢေႃႈ။-
မႄႈယိင်းၼၼ်ႉပႃးပတိၵ်ႈသၼ်ႇထေႇသေယဝ်ႉ၊ၵိူတ်ႇလဵင်ႉမႃးလုၵ်ႈၸၢႆးၵေႃႉၼိုင်ႈသေလႄႈႁွင်ႉႁဵၵ်ႈၸိုဝ်ႈဝႃႈ၊ ဢေးရႃႉ၊ ဢေႃႈ။-
မႄႈယိင်းၼၼ်ႉသမ်ႉပႃးပတိၵ်ႈသၼ်ႇထေႇထႅင်ႈလႄႈၵိူတ်ႇလဵင်ႉမႃးလုၵ်ႈၸၢႆးထႅင်ႈၵေႃႉၼိုင်ႈသေယဝ်ႉ၊ႁွင်ႉႁဵၵ်ႈၸိုဝ်ႈဝႃႈ၊ ဢေႃးၼၼ်ႇ၊ ဢေႃႈ။-
မၼ်းသမ်ႉၵိူတ်ႇလဵင်ႉထႅင်ႈလုၵ်ႈၸၢႆးၵေႃႉၼိုင်ႈလႄႈႁွင်ႉႁဵၵ်ႈၸိုဝ်ႈဝႃႈ၊ သေးလႃႉ၊ ဢေႃႈ။ မိူဝ်ႈဢၼ်လုၵ်ႈဢွၼ်ႇၵိူတ်ႇလဵင်ႉၼၼ်ႉ ယုတႃႉ၊ မီးယူႇၵႃႈတီႈဝဵင်း ၶေႇသိပ်ႉ၊ ဢေႃႈ။
လိုၼ်းၼၼ်ႉ၊ ယုတႃႉ၊ ဢဝ်မေးပၼ်လုၵ်ႈၸၢႆးတူၼ်ႈမၼ်း ဢေးရႃႉ၊ ဢေႃႈ။ မေး ဢေးရႃႉ၊ မီးၸိုဝ်ႈဝႃႈ၊ တႃႇမႃႇ၊ ဢေႃႈ။-
ဢေးရႃႉ၊ လုၵ်ႈတူၼ်ႈ ယုတႃႉ၊ ၼၼ်ႉႁဵတ်းႁၢႆႉႁဵတ်းမိူၵ်ႈလႄႈဢမ်ႇထုၵ်ႇၸႂ် ထႃႇဝရႃႉၽြႃး၊ ဢေႃႈ။ ပိူဝ်ႈၼႆလႄႈ ထႃႇဝရႃႉၽြႃး၊ ဢဝ်မၼ်းတၢႆသေဢေႃႈ။-
မိူဝ်ႈၼၼ်ႉ၊ ယုတႃႉ၊ လၢတ်ႈတီႈ ဢေႃးၼၼ်ႇ၊ ၼွင်ႉၸၢႆး ဢေးရႃႉ၊ လႄႈဝႃႈ၊ “ၶဝ်ႈၸူးပီႈပႂ်ႉမႂ်းလႄႈသိုပ်ႇၸိူဝ်ႉၶိူဝ်းပီႈဢၢႆႈမႂ်းပၼ်တႃႉ၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊ ဢေႃးၼၼ်ႇ၊ ႁုလွင်ႈဢၼ်ပေႃးမၼ်းမီးလုၵ်ႈမႃးၸိုင်၊ဢမ်ႇလႆႈပဵၼ်ၸိူဝ်ႉၶိူဝ်းတူဝ်ၸဝ်ႈၵဝ်ႇၼၼ်ႉလႄႈမိူဝ်ႈဢၼ်မၼ်းသိူၵ်ႈသမ်ႇၵၼ်တင်းပီႈပႂ်ႉမၼ်းပွၵ်ႈလႂ်သေဢမ်ႇဝႃႈ၊မၼ်းႁႂ်ႈၼမ်ႉသုၵ်ႉတူၵ်းပႅတ်ႈၵႃႈၼိူဝ်လိၼ်ပုၼ်ႈလွင်ႈၼင်ႇႁိုဝ်တေဢမ်ႇလႆႈပၼ်ၸိူဝ်ႉပၼ်ၶိူဝ်းတီႈပီႈဢၢႆႈမၼ်းၼၼ်ႉဢေႃႈ။-
ဢမုဢၼ်မၼ်းႁဵတ်းၼႆႉဢမ်ႇထုၵ်ႇၸႂ် ထႃႇဝရႃႉၽြႃး၊ လႄႈ ထႃႇဝရႃႉၽြႃး၊ ဢဝ်မၼ်းတၢႆပႅတ်ႈသေဢေႃႈ။-
မိူဝ်ႈၼၼ်ႉ၊ ယုတႃႉ၊ လၢတ်ႈတီႈလုၵ်ႈပႂ်ႉမၼ်းလႄႈဝႃႈ၊ “ၸူဝ်ႈဢၼ်လုၵ်ႈၸၢႆးၵဝ် သေးလႃႉ၊ ယင်းဢမ်ႇပႆႇယႂ်ႇမႃးၸိုင်၊ၶိုၼ်းမိူဝ်းၸူးတီႈပေႃႈမႂ်းလႄႈႁဵတ်းမႄႈမၢႆႈပႂ်ႉယူႇၵႂႃႇၵွၼ်ႇတႃႉ၊” ဝႃႈၼင်ႇၼႆဢေႃႈ။ မၼ်းလၢတ်ႈၸိူဝ်ႉၼင်ႇၼႆၵွပ်ႈပိူဝ်ႈၵူဝ် သေးလႃႉ၊ လႆႈတၢႆမိူၼ်ပီႈဢၢႆႈမၼ်းၸိူဝ်းၼၼ်ႉၼၼ်ႉဢေႃႈ။ တႃႇမႃႇ၊ ၵေႃႈမိူဝ်းၵႂႃႇဢေႃႈ။
ဝၢႆးၼၼ်ႉဢမ်ႇႁိုင်ဢမ်ႇၼၢၼ်းမေး ယုတႃႉ၊ ဢၼ်ပဵၼ်လုၵ်ႈယိင်း သုဢႃႇ၊ တၢႆၵႂႃႇဢေႃႈ။ ဝၢႆးသေၶိင်ႇၵႃႇလႃႉဢၼ်ၶီၸႂ်ၶူမ်ၸႂ်ယဝ်ႉယဝ်ႉၼၼ်ႉ၊ ယုတႃႉ၊ ၵႂႃႇၸူးတီႈဝဵင်း တိမ်းၼႃႉ၊ ၵႃႈတီႈဢၼ်ၵူၼ်းၵႅတ်းႁႆးၶူၼ်သူဝ်းမၼ်းတင်းလၢႆမီးၼၼ်ႉလႄႈၵေႃႉသႄႈမၼ်း ႁိရႃႉ၊ ၵူၼ်းဝဵင်း ဢတုလမ်ႇ၊ ၵေႃႈၵႂႃႇၸွမ်းဢေႃႈ။-
မိူဝ်ႈၼၼ်ႉ၊ပိူၼ်ႈမွၵ်ႇလၢတ်ႈတီႈ တႃႇမႃႇ၊ လွင်ႈဢၼ်ပေႃႈၸဝ်ႈမၼ်းၵႂႃႇတီႈဝဵင်း တိမ်းၼႃႉ၊ ႁႂ်ႈလႆႈၵႅတ်းႁႆးၶူၼ်သူဝ်းမၼ်းၼၼ်ႉဢေႃႈ။-
မၼ်းထွတ်ႇလၢႆႈၶူဝ်းမႄႈမၢႆႈမၼ်းၼၼ်ႉသေလႄႈဢဝ်ၽႃႈဝႆႁူမ်ႇၼႃႈမၼ်းဝႆႉသေယဝ်ႉ၊ၵႂႃႇၼင်ႈယူႇၵႃႈတီႈၼႃႈၽၵ်းတူဝဵင်း ဢေးၼိမ်း၊ ဢၼ်မီးၸွမ်းသဵၼ်ႈတၢင်းၵႂႃႇၸူးဝဵင်း တိမ်းၼႃႉ၊ ၼၼ်ႉ၊ၵွပ်ႈပိူဝ်ႈမၼ်းႁုလွင်ႈဢၼ် သေးလႃႉ၊ လုၵ်ႈၸၢႆးၵွႆ ယုတႃႉ၊ သမ်ႉပေႃးယႂ်ႇယဝ်ႉသေၵေႃႈယင်းဢမ်ႇတႄႇၼႃႈႁိူၼ်းပၼ်လူၺ်ႈၵၼ်တင်းမၼ်းၼၼ်ႉလႄႈၸင်ႇႁဵတ်းၸိူဝ်ႉၼင်ႇၼႆဢေႃႈ။
ယုတႃႉ၊ ၼၼ်ႉမိူဝ်ႈဢၼ်ႁၼ် တႃႇမႃႇ၊ ၸိုင်၊ၵွပ်ႈပိူဝ်ႈမၼ်းႁူမ်ႇၼႃႈဝႆႉလႄႈထၢင်ႇပဵၼ်မႄႈမွၵ်ႇယႃႈဢေႃႈ။-
မၼ်းဝႄႈဢွၵ်ႇတၢင်းၵႂႃႇၸူး တႃႇမႃႇ၊ သေယဝ်ႉ၊ပိူဝ်ႈဢၼ်ဢမ်ႇႁုလွင်ႈဢၼ်ဝႃႈ၊ပဵၼ်လုၵ်ႈပႂ်ႉတူဝ်ၸဝ်ႈၵဝ်ႇလႄႈလၢတ်ႈဝႃႈ၊ “ႁႂ်ႈၵဝ်လႆႈၼွၼ်းပျေႃႇလူၺ်ႈၵၼ်တင်းမႂ်းသေၵမ်း၊” ဝႃႈၼင်ႇၼႆလႄႈ တႃႇမႃႇ၊ ထၢမ်ဝႃႈ၊ “ႁႂ်ႈလႆႈၼွၼ်းပျေႃႇလူၺ်ႈၵဝ်ၶႃႈၸိုင်၊ၸဝ်ႈတေပၼ်ၵႃႈသင်တီႈၵဝ်ၶႃႈ၊” ဝႃႈၼင်ႇၼႆဢေႃႈ။
ယုတႃႉ၊ ၶိုၼ်းလၢတ်ႈဝႃႈ၊ “ၵဝ်တၵ်းသူင်ႇပၼ်ပႄႉဢွၼ်ႇတူဝ်ၼိုင်ႈဢေႃႈ၊” ဝႃႈၼင်ႇၼႆဢေႃႈ။ တႃႇမႃႇ၊ ၶိုၼ်းလၢတ်ႈလႄႈဝႃႈ၊ “လီယဝ်ႉ။ ၸူဝ်ႈဢၼ်ဢမ်ႇပႆႇသူင်ႇပႄႉဢွၼ်ႇမႃးပၼ်ၸိုင်၊ၸဝ်ႈတေဢဝ်သင်ပွင်ႇတၢင်ဝႆႉၶႃႈ၊” ဝႃႈၼင်ႇၼႆဢေႃႈ။
ယုတႃႉ၊ ၶိုၼ်းလၢတ်ႈဝႃႈ၊ “တေႁႂ်ႈၵဝ်ဢဝ်ၵႃႈသင်ပွင်ႇတၢင်ဝႆႉ၊” ဝႃႈၼင်ႇၼႆဢေႃႈ။ တႃႇမႃႇ၊ ၶိုၼ်းလၢတ်ႈဝႃႈ၊ “ဢဝ်ၸုမ်ႈတင်းသၢႆၸရွႆႇဢိၵ်ႇတင်းၶွၼ်ႉတဝ်ႉဢၼ်မီးၼႂ်းမိုဝ်းၸဝ်ႈၼၼ်ႉပွင်ႇတၢင်ဝႆႉလႆႈယူႇၶႃႈ၊” မိူဝ်ႈဢၼ်ဝႃႈၼင်ႇၼႆယဝ်ႉၼၼ်ႉ၊မၼ်းဢဝ်ၶူဝ်းၸိူဝ်းၼၼ်ႉပၼ်ဢေႃႈ။ ၶဝ်ၵႂႃႇၼွၼ်းပျေႃႇလူၺ်ႈၵၼ်သေယဝ်ႉ၊ တႃႇမႃႇ၊ ၸပ်းပတိၵ်ႈသၼ်ႇထေႇၵႂႃႇဢေႃႈ။-
တႃႇမႃႇ၊ မိူဝ်းၵႂႃႇလႄႈဢဝ်ၽႃႈဝႆႁူမ်ႇၼႃႈမၼ်းပႅတ်ႈသေယဝ်ႉ၊သမ်ႉၼုင်ႈၶိုၼ်းၶူဝ်းမႄႈမၢႆႈမၼ်းသေဢေႃႈ။
ယုတႃႉ၊ ဢဝ်ပႄႉဢွၼ်ႇဢၢပ်ႈႁႂ်ႈၵေႃႉသႄႈမၼ်း ႁိရႃႉ၊ ဢဝ်ၵႂႃႇထုတ်ႇၶိုၼ်းၶူဝ်းဢၼ်ပွင်ႇတၢင်ဝႆႉတီႈမႄႈယိင်းၼၼ်ႉၶိုၼ်းဢေႃႈ။ ၵူၺ်းၵႃႈ၊ ႁိရႃႉ၊ ဢမ်ႇထူပ်းဢမ်ႇႁၼ်မၼ်း။-
မၼ်းၸင်ႇထၢမ်ၵူၼ်းႁိမ်းႁွမ်းၼၼ်ႉလႄႈဝႃႈ၊ “မႄႈမွၵ်ႇယႃႈဢၼ်ၼင်ႈႁိမ်းသဵၼ်ႈတၢင်းၼႆႉမီးၵႃႈလႂ်ၶႃႈ၊” ဝႃႈၼင်ႇၼႆဢေႃႈ။ ၶဝ်ၸိူဝ်းၼၼ်ႉၶိုၼ်းလၢတ်ႈဝႃႈ၊ “ၵႃႈတီႈၼႆႈဢမ်ႇတွၼ်ႉမီးမႄႈမွၵ်ႇယႃႈၵူၺ်း၊” ဝႃႈၼင်ႇၼႆဢေႃႈ။
ႁိရႃႉ၊ ၶိုၼ်းပွၵ်ႈမိူဝ်းၸူးတီႈ ယုတႃႉ၊ လႄႈလၢတ်ႈဝႃႈ၊ “ၵဝ်ၵႂႃႇႁႃမႄႈယိင်းၼၼ်ႉၵေႃႈဢမ်ႇႁၼ်။ ၵူၼ်းႁိမ်းႁွမ်းၼၼ်ႉဝႃႈ၊ၵႃႈတီႈၼၼ်ႈဢမ်ႇတွၼ်ႉမီးမႄႈမွၵ်ႇယႃႈ၊” ဝႃႈၼင်ႇၼႆဢေႃႈ။
ယုတႃႉ၊ ၵေႃႈဝႃႈ၊ “ၵေႃႈယႃႇမၼ်းတႃႉ။ ၼင်ႇႁိုဝ်ႁဝ်းတေဢမ်ႇလႆႈဢူၵ်းဢၢႆၸိုင်၊ၵဝ်ပေႃးသူင်ႇပႄႉဢွၼ်ႇၼႆႉၵႂႃႇပၼ်ယဝ်ႉ၊ၵူၺ်းၵႃႈ၊မႂ်းႁႃဢမ်ႇထူပ်းမၼ်းလူင်းပႄႇ၊” ဝႃႈၼင်ႇၼႆဢေႃႈ။
ဝၢႆးသေၼၼ်ႉသၢမ်လိူၼ်ပိူၼ်ႈမွၵ်ႇလၢတ်ႈတီႈ ယုတႃႉ၊ လႄႈဝႃႈ၊ “လုၵ်ႈပႂ်ႉမႂ်း တႃႇမႃႇ၊ ႁဵတ်းမႄႈမွၵ်ႇယႃႈလႄႈမိူဝ်ႈလဵဝ်ပႃးတူဝ်ပႃးတွင်ႉၵွပ်ႈလူၺ်ႈတၢင်းဢၼ်ႁဵတ်းမေႇထုင်ႇဢၼ်ဢမ်ႇတြႃးၼၼ်ႉယဝ်ႉ၊” ဝႃႈၼင်ႇၼႆဢေႃႈ။ ယုတႃႉ၊ ၵေႃႈၸီႇယၢင်ႇလႄႈဝႃႈ၊ “ဢဝ်မၼ်းဢွၵ်ႇလႄႈတုတ်ႇၽႆးႁႂ်ႈတၢႆတႃႉ၊” ဝႃႈၼင်ႇၼႆဢေႃႈ။
မိူဝ်ႈဢၼ်ဢဝ်မၼ်းဢွၵ်ႇၼၼ်ႉၸိုင်၊မၼ်းၽၢၵ်ႇၵႂၢမ်းထိုင်တီႈပေႃႈၸဝ်ႈမၼ်းလႄႈဝႃႈ၊ “ၵဝ်ၶႃႈပႃးပတိၵ်ႈသၼ်ႇထေႇလူၺ်ႈၵူၼ်းၸၢႆးၵေႃႉဢၼ်ပိူင်ႇၶူဝ်းၸိူဝ်းၼႆႉဢေႃႈ။ ၶႅၼ်းတေႃႈတူၺ်းၸုမ်ႈၼႆႉဢိၵ်ႇတင်းသၢႆၸရွႆႇဢိၵ်ႇတင်းၶွၼ်ႉတဝ်ႉၼႆႉပဵၼ်ၶူဝ်းၽူႈလႂ်ၼၼ်ႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ယုတႃႉ၊ ႁပ်ႉဢဝ်ၶူဝ်းၸိူဝ်းၼၼ်ႉသေလႄႈလၢတ်ႈဝႃႈ၊ “မၼ်းပဵၼ်ၵေႃႉဢၼ်သိုဝ်ႈတေႃႇၼႃႇသေၵဝ်ယဝ်ႉ။ ၵဝ်လႆႈလုတ်ႈလႆႈႁၢမ်းဝုတ်ႈတြႃးဢၼ်တေလႆႈဢဝ်လုၵ်ႈၸၢႆးၵဝ် သေးလႃႉ၊ ဢၢပ်ႈပၼ်မၼ်းလႄႈယူႇမႅၼ်ႈယဝ်ႉ၊” ဝႃႈၼင်ႇၼႆဢေႃႈ။ လိုၼ်းၼၼ်ႉၶဝ်ယင်းဢမ်ႇမီးတၢင်းဢၼ်သိူၵ်ႈသမ်ႇထႅင်ႈလႄႈယူႇဢေႃႈ။
ဝၢႆးၼၼ်ႉ၊ထိုင်ၶိင်ႇထိုင်ၶႃႇ တႃႇမႃႇ၊ ၸမ်တေၵိူတ်ႇလဵင်ႉလုၵ်ႈယဝ်ႉဢေႃႈ။ လႆႈႁုလွင်ႈဢၼ်ပဵၼ်လုၵ်ႈၽႃၽႄလႄႈ၊-
ၼႂ်းမိူဝ်ႈဢၼ်ယင်းၵိူတ်ႇလဵင်ႉလုၵ်ႈယူႇၼၼ်ႉလုၵ်ႈၵေႃႉၼိုင်ႈဢဝ်မိုဝ်းမၼ်းယိုၼ်ႈဢွၵ်ႇမႃးလႄႈမႄႈၵဵပ်းယိပ်းၵမ်ဢဝ်မိုဝ်းၼၼ်ႉဢဝ်မႆလႅင်မတ်ႉမၢႆဝႆႉလႄႈဝႃႈ၊ “ၵေႃႉၼႆႉတေၵိူတ်ႇလဵင်ႉမႃးဢွၼ်တၢင်းယဝ်ႉ၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊မၼ်းဢဝ်မိုဝ်းမၼ်းၶိုၼ်းႁူတ်းၶဝ်ႈၵႂႃႇလႄႈပီႈဢၢႆႈမၼ်းၵိူတ်ႇလဵင်ႉမႃးဢွၼ်တၢင်းဢေႃႈ။ မႄႈၵဵပ်းမၼ်းလၢတ်ႈဝႃႈ၊ “ဢေႃး၊မႂ်းယင်းမူၼ်ႉဢွၵ်ႇတိုဝ်ဢွၵ်ႇမႃးယူႇၼေႃ။” ၵွပ်ႈပိူဝ်ႈတၢင်းဢၼ်မူၼ်ႉဢွၵ်ႇတိုဝ်ဢွၵ်ႇၼၼ်ႉလႄႈႁွင်ႉႁဵၵ်ႈၸိုဝ်ႈမၼ်းဝႃႈ၊ ၽေးရိတ်ႉ၊ ဢေႃႈ။-
လိုၼ်းၼၼ်ႉၵေႃႉဢၼ်မီးမႆလႅင်မတ်ႉမၢႆဝႆႉတီႈမိုဝ်းမၼ်းၼၼ်ႉၵိူတ်ႇလဵင်ႉမႃးလႄႈႁွင်ႉႁဵၵ်ႈၸိုဝ်ႈဝႃႈ၊ ၸေးရႃႉ၊ ဢေႃႈ။
မိူဝ်ႈၼၼ်ႉ၊ ယူဝ်းသႅပ်ႈ၊ လႆႈၶၢမ်ႇတၢင်းဢၼ်ၵူၼ်းမဵဝ်း ဢိသမေႇလႃႉ၊ ၶဝ်ဢဝ်ၵႂႃႇထိုင်တီႈမိူင်း ဢေးၵျိပ်ႉ၊ လႄႈၶၢႆတေႃႇၶုၼ်လူင်ၼႂ်းႁေႃဢၼ်လႆႈၸိုဝ်ႈ ပေႃးတိၽႃႇ၊ ဢၼ်ပဵၼ်ၶုၼ်သိုၵ်းပႂ်ႉႁေႃၶုၼ်ႁေႃၶမ်းမိူင်း ဢေးၵျိပ်ႉ၊ ၼၼ်ႉဢေႃႈ။-
ထႃႇဝရႃႉၽြႃး၊ မီးလူၺ်ႈၵၼ်တင်း ယူဝ်းသႅပ်ႈ၊ လႄႈႁႂ်ႈမၼ်းဢွင်ႇမႅင်ႇတၢင်းၵျၢမ်ႇတၢင်းပွင်ဢေႃႈ။ မၼ်းယူႇၵႃႈၼႂ်းႁိူၼ်းၸဝ်ႈမၼ်းၵူၼ်းမဵဝ်း ဢေးၵျိပ်ႉ၊ ဢေႃႈ။-
ၸဝ်ႈမၼ်းႁုႁၼ်လွင်ႈဢၼ် ထႃႇဝရႃႉၽြႃး၊ မီးယူႇလူၺ်ႈၵၼ်တင်းမၼ်းလႄႈႁႂ်ႈတၢင်းၵျၢမ်ႇတၢင်းပွင်မၼ်းဢွင်ႇမႅင်ႇၼႂ်းလွင်ႈတၢင်းႁဵတ်းတၢင်းသၢင်ႈမၼ်းၵူႈသမ်ႇၵူႈလွင်ႈၼၼ်ႉဢေႃႈ။-
ၶုၼ်လူင် ပေႃးတိၽႃႇ၊ ထုၵ်ႇၸႂ်ၵျိူၵ်ႈၸႂ်မၼ်းလႄႈဢဝ်ၸႂ်ႉသွႆပၢႆတိၼ်ပၢႆမိုဝ်းမၼ်းသေယဝ်ႉ၊တင်ႈဝႆႉၶၢၼ်းဝႆႉၼႂ်းဢရႃႇၵေႃႉဢၼ်ၵွၼ်းၼႃႈႁိူၼ်းႁႂ်ႈမၼ်းလူတူၺ်းဢုၵ်ႉၸႃႇၶူဝ်းႁိူၼ်းမၼ်းတင်းသဵင်ႈတင်းမူတ်းဢေႃႈ။-
တႄႇဢဝ်မိူဝ်ႈၼၼ်ႉၵႂႃႇၵွပ်ႈပိူဝ်ႈ ယူဝ်းသႅပ်ႈ၊ လႄႈ ထႃႇဝရႃႉၽြႃး၊ ပၼ်တၢင်းလီၵႃႈၼိူဝ်ၼႃႈႁိူၼ်းၵူၼ်း ဢေးၵျိပ်ႉ၊ ၵေႃႉၼၼ်ႉဢိၵ်ႇတင်းၵႃႈၼိူဝ်ဢုၵ်ႉၸႃႇၶူဝ်းႁိူၼ်းဢၼ်မီးၼႂ်းႁိူၼ်းမၼ်းဢိၵ်ႇတင်းဢၼ်မီးၼႂ်းတူင်ႈၼႃးမၼ်းၼၼ်ႉဢေႃႈ။-
ၶုၼ်လူင် ပေႃးတိၽႃႇ၊ ဢဝ်ဢုၵ်ႉၸႃႇၸေးၸိမ်ႇၵႃႈမီးတင်းသဵင်ႈတင်းလူင်ဢၢပ်ႈပၼ်ၼႂ်းမိုဝ်း ယူဝ်းသႅပ်ႈ၊ သေလႄႈလိူဝ်သေတၢင်းၵိၼ်ဢၼ်မၼ်းၵိၼ်ၼၼ်ႉမၼ်းယင်းဢမ်ႇလူဢမ်ႇတူၺ်းဢုၵ်ႉၸႃႇသေၸိူဝ်ႉသေဢၼ်လႄႈယူႇဢေႃႈ။ ယူဝ်းသႅပ်ႈ၊ ၼၼ်ႉတူဝ်ၶိင်းႁၢင်ႈၽၢင်မၼ်းယဵၼ်ႇလီလႄႈၼိူဝ်ႉၼင်ႁၢင်ႈလီဢေႃႈ။-
ယူႇဢမ်ႇပေႃးႁိုင်ပေႃးၼၢၼ်းမေးၸဝ်ႈၶုၼ်မၼ်းၼၼ်ႉဢဝ်တင်းမၢၵ်ႇတႃၵိလေႇသႃႇသေယႅၵ်ႉတူၺ်း ယူဝ်းသႅပ်ႈ၊ လႄႈလၢတ်ႈဝႃႈ၊ “မႃးၼွၼ်းပျေႃႇလူၺ်ႈၵၼ်တင်းၵဝ်သေၵမ်း၊” ဝႃႈၼင်ႇၼႆဢေႃႈ။-
ယူဝ်းသႅပ်ႈ၊ ၵေႃႈထဵင်ပႅတ်ႈလႄႈဝႃႈ၊ “တူၺ်းၶႃႈလူး၊ၸဝ်ႈၵဝ်ၶႃႈယင်းဢမ်ႇလူဝ်ႇလူလူဝ်ႇတူၺ်းဢုၵ်ႉၸႃႇၵႃႈဢၼ်မၼ်းၸဝ်ႈဢၢပ်ႈဝႆႉၼႂ်းမိုဝ်းၵဝ်ၶႃႈၵႃႈမီးၵႃႈၼႂ်းႁိူၼ်းၼႆႉယဝ်ႉ။ မၼ်းၸဝ်ႈဢၢပ်ႈဝႆႉႁႂ်ႈၵဝ်ၶႃႈပႂ်ႉထိင်းဢုၵ်ႉၸႃႇၶူဝ်းႁိူၼ်းမၼ်းၸဝ်ႈတင်းသဵင်ႈတင်းမူတ်းၶႃႈဢေႃႈ။-
ၵဝ်ၶႃႈလႆႈမီးဢႃႇၼႃႇယႂ်ႇသေပိူၼ်ႈၼႂ်းႁိူၼ်းၼႆႉလႄႈလိူဝ်သေၸဝ်ႈၼၢင်းဢၼ်ပဵၼ်မေးမၼ်းၸဝ်ႈလႄႈမၼ်းၸဝ်ႈယင်းဢမ်ႇႁၢမ်ႈဢမ်ႇၶႅၼ်ၵႃႈသင်တီႈၵဝ်ၶႃႈ။ ပိူဝ်ႈၼႆလႄႈၵဝ်ၶႃႈတေၸၢင်ႈႁဵတ်းဢပျတ်ႈဢၼ်ယႂ်ႇထၼ်ႇၼႆႉၸိူဝ်ႉႁိုဝ်လႄႈၽိတ်းပိူင်ႈၽြႃးပဵၼ်ၸဝ်ႈလႆႈၸိူဝ်ႉၼင်ႇႁိုဝ်ၶႃႈ၊” ဝႃႈၼင်ႇၼႆဢေႃႈ။-
ပိၵ်ႉသမ်ႉမၼ်းၼၢင်းၸူဝ်းဢဝ် ယူဝ်းသႅပ်ႈ၊ ၵူႈဝၼ်းသေၵေႃႈမၼ်းယင်းဢမ်ႇၸွမ်းၵႂႃႇလႄႈထဵင်ပႅတ်ႈတၢင်းဢၼ်ၼွၼ်းပျေႃႇလူၺ်ႈၵၼ်တင်းၸဝ်ႈၼၢင်းမၼ်းၼၼ်ႉဢေႃႈ။
ဝၼ်းၼိုင်ႈ ယူဝ်းသႅပ်ႈ၊ ၶဝ်ႈၵႂႃႇၼႂ်းႁိူၼ်းႁႂ်ႈလႆႈႁဵတ်းၵၢၼ်မၼ်းဢေႃႈ။ မိူဝ်ႈၶိင်ႇၼၼ်ႉၶႃႈၵူၼ်းၸႂ်ႉဢမ်ႇမီးတီႈၼၼ်ႈသေၵေႃႉသေၵူၼ်း။-
ၸဝ်ႈၼၢင်းမၼ်းတိုတ်ႉၸၼ်သိူဝ်ႈမၼ်းသေလႄႈၸူဝ်းဢဝ်လႄႈလၢတ်ႈဝႃႈ၊ “မႃးၼွၼ်းပျေႃႇလူၺ်ႈၵၼ်တင်းၵဝ်သေၵမ်း၊” ဝႃႈၼင်ႇၼႆဢေႃႈ။ မၼ်းလွတ်ႈဢွၵ်ႇၼႂ်းမိုဝ်းၸဝ်ႈၼၢင်းမၼ်းသေလႅၼ်ႈပၢႆႈဢွၵ်ႇၵႂႃႇဢေႃႈ။ ၵူၺ်းၵႃႈ၊သိူဝ်ႈမၼ်းထွတ်ႇလွၼ်ႈၵႂႃႇလႄႈမီးယူႇၵႃႈၼႂ်းမိုဝ်းၸဝ်ႈၼၢင်းမၼ်းဝႆႉဢေႃႈ။-
မိူဝ်ႈဢၼ်မၼ်းၼၢင်းႁုႁၼ်လွင်ႈဢၼ် ယူဝ်းသႅပ်ႈ၊ ထွတ်ႇလွၼ်ႈသိူဝ်ႈပႅတ်ႈဝႆႉလႄႈဢွၵ်ႇပၢႆႈၵႂႃႇၼၼ်ႉၸိုင်။-
မၼ်းၼၢင်းႁွင်ႉပၢဝ်ႇၶႃႈၵူၼ်းၸႂ်ႉလႂ်မႃးလႄႈလၢတ်ႈဝႃႈ၊ “တူၺ်းလူး၊ဢၢႆႈ ႁေႇပြႄး၊ ဢၼ်ၽူဝ်ၵဝ်သိုဝ်ႉဢဝ်ဝႆႉၼႆႉမၼ်းႁဵတ်းဢမ်ႇၼပ်ႉဢမ်ႇၶၢၼ်းတီႈႁဝ်းယဝ်ႉ။ မၼ်းၶဝ်ႈမႃးၵႃႈတီႈၼႂ်းတီႈၼွၼ်းၵဝ်ႁႂ်ႈလႆႈၵၼ်ႉၵဝ်ဢေႃႈ။ ၵဝ်ႁိပ်ႈၼႅတ်ႈပၢဝ်ႇသႅၼ်ႇသဵင်ႁႅင်းၼႃႇလူင်လၢင်လႄႈၸင်ႇ၊-
မၼ်းၵူဝ်သဵင်သႅၼ်ႇၵဝ်သေယဝ်ႉ၊ဢမ်ႇတၼ်းဢဝ်သိူဝ်ႈဢၼ်မၼ်းလွၼ်ႈတမ်းႁိမ်းၵဝ်ၼၼ်ႉလႄႈ၊လႅၼ်ႈပၢႆႈဢွၵ်ႇၵႂႃႇယဝ်ႉ၊” ဝႃႈၼင်ႇၼႆဢေႃႈ။
မၼ်းၼၢင်းဢဝ်သိူဝ်ႈၼၼ်ႉဝႆႉတေႃႇႁွတ်ႈၶုၼ်လူင် ပေႃးတိၽႃႇ၊ ၶိုၼ်းပွၵ်ႈမႃးတီႈႁိူၼ်းဢေႃႈ။-
ၵမ်းၼၼ်ႉ မၼ်းၼၢင်းမွၵ်ႇလၢတ်ႈလွင်ႈတၢင်းၼၼ်ႉလႄႈဝႃႈ၊ “ဢၢႆႈ ႁေႇပြႄး၊ ဢၼ်ၸဝ်ႈႁဝ်းသႂၢင်းဝႆႉၵႃႈတီႈၼႆႈၼၼ်ႉၶဝ်ႈမႃးၵႃႈတီႈၼႂ်းႁွင်ႈၼွၼ်းၵဝ်ၶႃႈႁႂ်ႈလႆႈႁဵတ်းဢမ်ႇၼပ်ႉဢမ်ႇၶၢၼ်းတီႈၵဝ်ၶႃႈၶႃႈဢေႃႈ။-
ၵူၺ်းၵႃႈ၊ၵဝ်ၶႃႈပၢဝ်ႇသႅၼ်ႇသဵင်ႁႅင်းၼႃႇလႄႈၸင်ႇမၼ်းလွၼ်ႈပႅတ်ႈသိူဝ်ႈမၼ်းဝႆႉတီႈႁိမ်းၵဝ်ၶႃႈလႄႈလႅၼ်ႈပၢႆႈဢွၵ်ႇၵႂႃႇၶႃႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈမၼ်းလႆႈငိၼ်းၵႂၢမ်းဢၼ်မေးလၢတ်ႈလွင်ႈတၢင်းဢၼ် ယူဝ်းသႅပ်ႈ၊ ႁဵတ်းၸိူဝ်ႉၼင်ႇၼၼ်ၼၼ်ႉလႄႈမၼ်းၸႂ်မႆႈၶႂ်ႈၸႃႉၼႃႇလူင်လၢင်သေယဝ်ႉ၊-
တိဢဝ် ယူဝ်းသႅပ်ႈ၊ သေလႄႈသႂ်ႇဝႆႉၼႂ်းၶွၵ်ႈဢၼ်ၶင်ၵူၼ်းၼႂ်းႁေႃတင်းလၢႆၼၼ်ႉလႄႈလႆႈၶမ်ၶွၵ်ႈဝႆႉဢေႃႈ။-
ၵူၺ်းၵႃႈ၊ ထႃႇဝရႃႉၽြႃး၊ မီးယူႇလူၺ်ႈၵၼ်တင်း ယူဝ်းသႅပ်ႈ၊ သေယဝ်ႉ၊ပၼ်တၢင်းလီတီႈမၼ်းယူႇလႄႈၶုၼ်ထွင်ႇလႆႈထုၵ်ႇၸႂ်ၵျိူၵ်ႈၸႂ်မၼ်းဢေႃႈ။-
မၼ်းၶၢၼ်းႁႂ်ႈ ယူဝ်းသႅပ်ႈ၊ ၵွၼ်းၵူၼ်းထွင်ႇတင်းမူတ်းသေလႄႈ၊ၵၢၼ်ငၢၼ်းထွင်ႇတင်းမူတ်းၵေႃႈဢၢပ်ႈပုၼ်ႈၽွၼ်းပၼ်တီႈမၼ်းဝႆႉသေဢေႃႈ။-
ၶုၼ်ထွင်ႇယင်းဢမ်ႇလူဝ်ႇဝၢႆႇတူၺ်းလွင်ႈၼႃႈၵၢၼ်ၵႃႈဢၼ် ယူဝ်းသႅပ်ႈ၊ သၢင်ႈႁဵတ်းၼၼ်ႉသေဢိတ်းၵွပ်ႈပိူဝ်ႈ ထႃႇဝရႃႉၽြႃး၊ မီးယူႇလူၺ်ႈၵၼ်တင်း ယူဝ်းသႅပ်ႈ၊ လႄႈႁႂ်ႈၵႃႈဢၼ်မၼ်းၵျၢမ်ႇပွင်သၢင်ႈႁဵတ်းၼၼ်ႉဢွင်ႇမႅင်ႇပျေႉၸုမ်ႇဢေႃႈ။
ဝၢႆးၼၼ်ႉဢမ်ႇႁိုင်ဢမ်ႇၼၢၼ်းၵႃႈၼႂ်းႁၢင်ႈၼႂ်းႁေႃမိူင်း ဢေးၵျိပ်ႉ၊ ၼၼ်ႉဝုၼ်ႇသၢၵ်ႈၼမ်ႉမၢၵ်ႇၸပိတ်ႉၸဝ်ႈဢိၵ်ႇတင်းဝုၼ်ႇသၢၵ်ႈတၢင်းၵိၼ်တၢင်းၶူပ်းၸဝ်ႈၶဝ်ၽိတ်းပိူင်ႈမႅၼ်ႈၶုၼ်ႁေႃၶမ်းဢေႃႈ။-
ၶုၼ်ႁေႃၶမ်းၸႂ်မႆႈၶႂ်ႈၸႃႉၼႃႇတေႃႇဝုၼ်ႇသၢၵ်ႈသွင်ၵေႃႉၼၼ်ႉလႄႈ၊-
ဢဝ်ၶဝ်ၶင်ဝႆႉၵႃႈၼႂ်းၶွၵ်ႈတီႈၼႂ်းႁိူၼ်းၶုၼ်လႄႈပဵၼ်ၶွၵ်ႈဢၼ်လဵဝ်ၵၼ်တင်းၶွၵ်ႈဢၼ်ဢဝ် ယူဝ်းသႅပ်ႈ၊ ၶင်ဝႆႉၼၼ်ႉဢေႃႈ။-
ၶုၼ်ၶွၵ်ႈၵေႃႈဢဝ်ၶဝ်ၼၼ်ႉဢၢပ်ႈပၼ်တီႈ ယူဝ်းသႅပ်ႈ၊ ႁႂ်ႈလႆႈလူလႆႈတူၺ်းၶဝ်ဢေႃႈ။ ၶဝ်ၼၼ်ႉလႆႈၶၢမ်ႇတၢင်းဢၼ်ၶင်ဝႆႉႁိုင်ၼႃႇဢေႃႈ။
မီးယူႇၶိုၼ်းၼိုင်ႈၵႃႈၼႂ်းထွင်ႇၼၼ်ႉဝုၼ်ႇသၢၵ်ႈၼမ်ႉမၢၵ်ႇၸပိတ်ႉၸဝ်ႈတင်းဝုၼ်ႇသၢၵ်ႈတၢင်းၵိၼ်တၢင်းၶူပ်းၸဝ်ႈသွင်ၵေႃႉၼၼ်ႉၼွၼ်းၽၼ်ႁၼ်လႄႈတၢင်းၼွၼ်းၽၼ်ႁၼ်ၶဝ်ၼၼ်ႉပဵၼ်လွင်ႈဢၼ်ၸၢပ်ႈသႅင်ႇၵၼ်တင်းတူဝ်ၶဝ်ႁင်းၽႂ်ႁင်းမၼ်းလူၺ်ႈဢၼၢၵ်ႈဢထိၵ်ႈပႄႇဢၼ်ပႅၵ်ႇပိူင်ႈၵၼ်ဝႆႉဢေႃႈ။-
မိူဝ်ႈဢၼ် ယူဝ်းသႅပ်ႈ၊ ၶဝ်ႈၵႂႃႇၸူးၶဝ်ၼႂ်းၶိင်ႇၵၢင်ၼႂ်ၼၼ်ႉၸိုင်၊လႆႈႁၼ်ၼႃႈၶဝ်ငိူဝ်ႈငဝ်ဝႆႉလႄႈ၊ၸင်ႇထၢမ်လႄႈဝႃႈ၊-
“မိူဝ်ႈၼႆႉ၊ပဵၼ်သင်ၶႃႈ။ တူၺ်းၼႃႈသူၸဝ်ႈသင်ပႄႉငိူဝ်ႈငဝ်ဝႆႉၶႃႈ၊” ဝႃႈၼင်ႇၼႆဢေႃႈ။
ၶဝ်ၶိုၼ်းလၢတ်ႈလႄႈဝႃႈ၊ “ႁဝ်းလႆႈၼွၼ်းၽၼ်ႁၼ်လႄႈဢမ်ႇမီးၽူႈလႂ်တေလၢတ်ႈၼႄဢၼၢၵ်ႈဢထိၵ်ႈပႄႇမၼ်းလႆႈ၊” မိူဝ်ႈဢၼ်ဝႃႈၼင်ႇၼႆၸိုင်၊ ယူဝ်းသႅပ်ႈ၊ ၶိုၼ်းလၢတ်ႈလႄႈဝႃႈ၊ “ၽြႃးပဵၼ်ၸဝ်ႈၸၢင်ႈပၼ်တၢင်းႁုပိင်ႇၺႃႇဢၼ်တၵ်းႁေႃးၼႄဢထိၵ်ႈပႄႇတၢင်းၼွၼ်းၽၼ်ႁၼ်ၼၼ်ႉလႆႈဢေႃႈ။ ႁေႃးမွၵ်ႇၼႄတၢင်းၽၼ်ႁၼ်သူၸဝ်ႈသေၵမ်းၶႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉဝုၼ်ႇသၢၵ်ႈၼမ်ႉမၢၵ်ႇၸပိတ်ႉၸဝ်ႈလၢတ်ႈၼႄမၼ်းလႄႈဝႃႈ၊ “ၼႂ်းတၢင်းၼွၼ်းၽၼ်ႁၼ်ၵဝ်ၼၼ်ႉၽၢႆႇၼႃႈၵဝ်မီးၶိူဝ်းမၢၵ်ႇၸပိတ်ႉၶိူဝ်းၼိုင်ႈဢေႃႈ။-
ၵႃႈတီႈၶိူဝ်းမၢၵ်ႇၸပိတ်ႉၼၼ်ႉမီးၵိင်ႇသၢမ်ၵိင်ႇဢေႃႈ။ မိူဝ်ႈဢၼ်ၵိင်ႇၸိူဝ်းၼၼ်ႉပူင်ႇၽိူဝ်မႃးၼၼ်ႉမွၵ်ႇမႃးလႄႈမၢၵ်ႇမၼ်းၵေႃႈမၢၵ်ႇမႃးၸွမ်းၵမ်းလဵဝ်သေယဝ်ႉ၊မၢၵ်ႇၸပိတ်ႉၸိူဝ်းၼၼ်ႉသုၵ်းမႃးဢေႃႈ။-
ၵဝ်ယိပ်းၵမ်ၵွၵ်းၸဝ်ႈမုၼ်ယႂ်ႇၶုၼ်ႁေႃၶမ်းဝႆႉလႄႈၵဝ်ဢဝ်မၢၵ်ႇၸပိတ်ႉၸိူဝ်းၼၼ်ႉမိပ်ႇသႂ်ႇၵွၵ်းသေယဝ်ႉ၊ဢဝ်ၵႂႃႇသၢၵ်ႈပၼ်မၼ်းၸဝ်ႈဢေႃႈ၊” ဝႃႈၼင်ႇၼႆဢေႃႈ။
ယူဝ်းသႅပ်ႈ၊ ၵေႃႈလၢတ်ႈလႄႈဝႃႈ၊ “ဢၼၢၵ်ႈဢထိၵ်ႈပႄႇမီးၸိူဝ်ႉၼင်ႇၼႆဢေႃႈ။ ၵိင်ႇသၢမ်ၵိင်ႇၼၼ်ႉမၼ်းၶႂ်ႈဝႃႈ၊သၢမ်ဝၼ်းဢေႃႈ။-
မိူဝ်ႈထူၼ်ႈသၢမ်ဝၼ်းမႃးၼၼ်ႉၶုၼ်ႁေႃၶမ်းတၵ်းပွႆႇၶႂၢင်းၸဝ်ႈလႄႈၶိုၼ်းဢၢပ်ႈပၼ်ဢရႃႇၸဝ်ႈမိူၼ်မိူဝ်ႈၵွၼ်ႇဢေႃႈ။ ၸဝ်ႈသမ်ႉတေလႆႈၶိုၼ်းထၢမ်းၼႃႈၵၢၼ်ပုၼ်ႈၽွၼ်းဢၼ်သၢၵ်ႈၵွၵ်းၼမ်ႉၶုၼ်ႁေႃၶမ်းမိူၼ်မိူဝ်ႈၵွၼ်ႇဢၼ်ၸဝ်ႈလႆႈပဵၼ်ဝုၼ်ႇသၢၵ်ႈၼမ်ႉမၢၵ်ႇၸပိတ်ႉၸဝ်ႈမႃးၼၼ်ႉဢေႃႈ။-
ပိူဝ်ႈၼႆလႄႈပေႃးၸဝ်ႈလႆႈလီလႆႈပဵၼ်ယဝ်ႉၸိုင်၊ၶႅၼ်းတေႃႈၶုၵ်းၸႂ်လႆႈၵဝ်ၶႃႈလႄႈမိူဝ်ႈဢၼ်ဢလေႉမၼ်းသၢင်ႇထုၵ်ႇၸိုင်၊ၶႅၼ်းတေႃႈႁဵတ်းၵျေးၸူးလဝ်ႈလၢတ်ႈလွင်ႈၵဝ်ၶႃႈထိုင်တီႈၸဝ်ႈမုၼ်ယႂ်ႇၶုၼ်ႁေႃၶမ်းႁႂ်ႈလႆႈထုတ်ႇၼုၵ်ႈဢဝ်ၵဝ်ၶႃႈဢွၵ်ႇၶွၵ်ႈၵႂႃႇသေၵမ်းၶႃႈ။-
ဝႃႈတႄႉမၼ်းၸိုင်၊ၵဝ်ၶႃႈလႆႈၶၢမ်ႇတၢင်းဢၼ်ပိူၼ်ႈလၵ်ႉၶၢႆဢွၵ်ႇသေမိူင်း ႁေႇပြႄး၊ မႃးၶႃႈဢေႃႈ။ ၵႃႈၼႂ်းမိူင်း ဢေးၵျိပ်ႉ၊ ၼႆႉၵေႃႈၵဝ်ၶႃႈယင်းဢမ်ႇမီးဢပျတ်ႈလႄႈလႆႈၶမ်ၶွၵ်ႈယူႇၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်ဝုၼ်ႇသၢၵ်ႈတၢင်းၵိၼ်တၢင်းၶူပ်းၸဝ်ႈလႆႈငိၼ်းလွင်ႈဢၼၢၵ်ႈဢထိၵ်ႈပႄႇတၢင်းၼွၼ်းၽၼ်ႁၼ်ဝုၼ်ႇသၢၵ်ႈၵွၵ်းၼမ်ႉမၢၵ်ႇၸပိတ်ႉၸဝ်ႈၼၼ်ႉပဵၼ်ဢၼ်ထုၵ်ႇၸႂ်ၼႃႇလႄႈၶႆႈၼႄတီႈ ယူဝ်းသႅပ်ႈ၊ လႄႈဝႃႈ၊ “ၵဝ်ၵေႃႈၼွၼ်းၽၼ်ႁၼ်လႄႈဝႃႈ၊ၵဝ်လႆႈဢဝ်ပဵတ်ႈၶဝ်ႈမုၼ်းသၢမ်လုၵ်ႈတဵင်ႇႁူဝ်ၵႂႃႇဢေႃႈ။-
ၵႃႈၼႂ်းပဵတ်ႈဢၼ်သွၼ်ႉတၢင်ႇဝႆႉတၢင်းၼိူဝ်ပိူၼ်ႈၼၼ်ႉသႂ်ႇတဵမ်ဝႆႉတင်းၶဝ်ႈမုၼ်းၼိုင်ႈၵူႈမဵဝ်းမဵဝ်းပုၼ်ႈတႃႇၸဝ်ႈမုၼ်ယႂ်ႇၶုၼ်ႁေႃၶမ်းၼၼ်ႉၼူၵ်ႉတင်းလၢႆဢွၼ်ၵၼ်မႃးသၵ်းၵိၼ်ဢေႃႈ၊” ဝႃႈၼင်ႇၼႆဢေႃႈ။
ယူဝ်းသႅပ်ႈ၊ ၵေႃႈလၢတ်ႈလႄႈဝႃႈ၊ “ဢၼၢၵ်ႈဢထိၵ်ႈပႄႇမၼ်းမီးၸိူဝ်ႉၼင်ႇၼႆဢေႃႈ။ ပဵတ်ႈသၢမ်လုၵ်ႈၼၼ်ႉမၼ်းၶႂ်ႈဝႃႈသၢမ်ဝၼ်းဢေႃႈ။-
မိူဝ်ႈထူၼ်ႈသၢမ်ဝၼ်းမႃးၼၼ်ႉၶုၼ်ႁေႃၶမ်းတၵ်းယူၵ်ႉၵွၵ်းႁူဝ်ၸဝ်ႈႁႂ်ႈၽၢတ်ႇယၢၼ်ၵၼ်တင်းတူဝ်ၸဝ်ႈသေယဝ်ႉ၊ဢဝ်တူဝ်တၢႆၸဝ်ႈၶႅၼ်တီႈသဝ်ဝႆႉလႄႈ၊ၼူၵ်ႉတင်းလၢႆတၵ်းၵိၼ်ၼိူဝ်ႉၸဝ်ႈဢေႃႈ၊” ဝႃႈၼင်ႇၼႆဢေႃႈ။
ဝၢႆးၼၼ်ႉသၢမ်ဝၼ်းၸိုင်၊ပဵၼ်ဝၼ်းၵိူတ်ႇလဵင်ႉၶုၼ်ႁေႃၶမ်းဢေႃႈ။ မၼ်းၸဝ်ႈႁႅၼ်းတႄႇပၢင်ပွႆးပုၼ်ႈၶႃႈ၊ပုၼ်ႈၸဝ်ႈၽွင်းမိူင်းၼႂ်းႁၢင်ႈၼႂ်းႁေႃၵူႈၵေႃႉၵူႈၵူၼ်းလႄႈဢဝ်ဝုၼ်ႇသၢၵ်ႈၵွၵ်းၼမ်ႉမၢၵ်ႇၸပိတ်ႉၸဝ်ႈဢိၵ်ႇတင်းဝုၼ်ႇသၢၵ်ႈတၢင်းၵိၼ်တၢင်းၶူပ်းၸဝ်ႈသွင်ၵေႃႉၼၼ်ႉမႃးၵႃႈတီႈၽၢႆႇၼႃႈၶႃႈလႄႈၸဝ်ႈၽွင်းမိူင်းတင်းလၢႆၼၼ်ႉဢေႃႈ။-
မၼ်းၸဝ်ႈၶၢၼ်းဢရႃႇ၊ဝုၼ်ႇသၢၵ်ႈၼမ်ႉမၢၵ်ႇၸပိတ်ႉၸဝ်ႈၶိုၼ်းမိူၼ်ပၵ်းၵဝ်ႇပိူင်ၵဝ်ႇသေယဝ်ႉ၊-
ဝုၼ်ႇသၢၵ်ႈတၢင်းၵိၼ်တၢင်းၶူပ်းၸဝ်ႈၸမ်ႉ၊လႆႈၶၢမ်ႇတၢင်းဢၼ်ႁွႆႈဝႆႉမႅၼ်ႈၸွမ်းၼင်ႇ ယူဝ်းသႅပ်ႈ၊ ႁေႃးဝႆႉၼၼ်ႉဢေႃႈ။-
ၵူၺ်းၵႃႈ၊ဝုၼ်ႇသၢၵ်ႈၵွၵ်းၼမ်ႉမၢၵ်ႇၸပိတ်ႉၸဝ်ႈၼၼ်ႉယင်းဢမ်ႇၶုၵ်းၸႂ်လႆႈ ယူဝ်းသႅပ်ႈ၊ လႄႈလိုမ်းပႅတ်ႈမၼ်းသေယူႇယူႇဢေႃႈ။
ဝၢႆးသေၼၼ်ႉသွင်ပီၶုၼ်ႁေႃၶမ်းမိူင်း ဢေးၵျိပ်ႉ၊ ၼွၼ်းၽၼ်ႁၼ်ဝႃႈ၊မၼ်းၸဝ်ႈၸုၵ်းယူႇတီႈႁိမ်းၽင်ႇမႄႈၼမ်ႉ ၼၢႆးလ်၊ ယူႇဢေႃႈ။-
မိူဝ်ႈၼၼ်ႉဝူဝ်းဢၼ်ႁၢင်ႈလီပီးမၼ်းၸဵတ်းတူဝ်ဢွၵ်ႇမႃးသေၵႃႈတီႈမႄႈၼမ်ႉသေလႄႈၵိၼ်ယိူဝ်ႈယူႇဢေႃႈ။-
ၵမ်းၼၼ်ႉ မီးဝူဝ်းယွမ်ႁဵဝ်ႇၸဵတ်းတူဝ်သမ်ႉဢွၵ်ႇသေၵႃႈတီႈမႄႈၼမ်ႉမႃးလႄႈၸုၵ်းယူႇၵႃႈၼိူဝ်ၽင်ႇမႄႈၼမ်ႉတီႈႁိမ်းၽုင်ဝူဝ်းဢွၼ်တၢင်းၸိူဝ်းၼၼ်ႉသေယဝ်ႉ၊-
ၶူပ်းဢိုၼ်ၵိၼ်ဝူဝ်းဢၼ်ပီးမၼ်းၸိူဝ်းၼၼ်ႉပႅတ်ႈဢေႃႈ။ ၶုၼ်ႁေႃၶမ်းၵေႃႈတိုၼ်ႇမႃးဢေႃႈ။-
မၼ်းၸဝ်ႈၶိုၼ်းလပ်းၵႂႃႇသေယဝ်ႉ၊သမ်ႉၼွၼ်းၽၼ်ႁၼ်ထႅင်ႈဝႃႈ၊ႁူင်းၶဝ်ႈဢၼ်မဵတ်ႉမၢၵ်ႈလီၼႃႇၸဵတ်းႁူင်းဢွၵ်ႇပဵၼ်မႃးၵႃႈတီႈတူၼ်ႈလဵဝ်ၵူၺ်းဢေႃႈ။-
ၵမ်းၼၼ်ႉ၊ႁူင်းၶဝ်ႈဢၼ်မဵတ်ႉလိပ်ႈၵွပ်ႈပိူဝ်ႈၺႃးလူမ်းမႆႈၽၢႆႇတၢင်းဝၼ်းဢွၵ်ႇၼၼ်ႉၸဵတ်းႁူင်းသမ်ႉဢွၵ်ႇတူၼ်ႈမႃးသေယဝ်ႉ၊-
ဢိုၼ်ၵိၼ်ႁူင်းၶဝ်ႈဢၼ်မၢၵ်ႈလီၸိူဝ်းၼၼ်ႉပႅတ်ႈဢေႃႈ။ ၶုၼ်ႁေႃၶမ်းတိုၼ်ႇမႃးလႄႈႁုႁၼ်ဝႃႈ၊ပဵၼ်တၢင်းၼွၼ်းၽၼ်ႁၼ်ၼၼ်ႉဢေႃႈ။-
မိူဝ်ႈမိူင်းလႅင်းမႃးၼၼ်ႉၸိုင်၊မၼ်းၸဝ်ႈၵႂင်ၸႂ်ယုင်ႈၸႂ်ၼႃႇလႄႈႁွင်ႉဢဝ်သြႃႇမေႃပေႇတၢင်ႇလႂ်၊တင်းသြႃႇမေႃဢတၢတ်ႈပိင်ႇၺႃႇၵႃႈဢၼ်မီးၼႂ်းမိူင်း ဢေးၵျိပ်ႉ၊ မႃးသေလႄႈၶႆႈၼႄလွင်ႈတၢင်းဢၼ်မၼ်းၸဝ်ႈၼွၼ်းၽၼ်ႁၼ်ၼၼ်ႉတီႈၶဝ်သေၵေႃႈဢမ်ႇမီးၽူႈလႂ်ၸၢင်ႈၵႄႈလိတ်ႈႁေႃးလၢတ်ႈဢၼၢၵ်ႈဢထိၵ်ႈပႄႇမၼ်းလႆႈသေၵေႃႉသေၵူၼ်းဢေႃႈ။
မိူဝ်ႈၼၼ်ႉဝုၼ်ႇသၢၵ်ႈၼမ်ႉမၢၵ်ႇၸပိတ်ႉၸဝ်ႈလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “တၢင်ႇလဝ်ႈၸဝ်ႈႁဝ်းတီႈၶႃႈဢေႃႈ။ ဝၼ်းမိူဝ်ႈၼႆႉၵဝ်ၶႃႈႁပ်ႉတုင်းဢဝ်တၢင်းၽိတ်းတီႈၶႃႈယဝ်ႉ။-
ၸဝ်ႈႁဝ်းၸႂ်မႆႈၶႂ်ႈၸႃႉဝုၼ်ႇဢၼ်သၢၵ်ႈတၢင်းၵိၼ်တၢင်းၶူပ်းၸဝ်ႈဢိၵ်ႇတင်းၶႃႈၸဝ်ႈသေလႄႈဢဝ်ၶႃႈၸဝ်ႈႁဝ်းၶဝ်သွင်ၵေႃႉၶင်ဝႆႉၵႃႈၼႂ်းၶွၵ်ႈတီႈႁိူၼ်းၶုၼ်သိုၵ်းပႂ်ႉႁေႃၼၼ်ႉၶႃႈဢေႃႈ။-
မီးၶိုၼ်းၼိုင်ႈၶႃႈၸဝ်ႈႁဝ်းၶဝ်သွင်ၵေႃႉလႆႈၼွၼ်းၽၼ်ႁၼ်ဢၼ်ၸၢပ်ႈသႅင်ႇၵၼ်တင်းတူဝ်ၶႃႈၸဝ်ႈႁဝ်းၶဝ်ႁင်းၽႂ်ႁင်းမၼ်းလူၺ်ႈလွင်ႈတၢင်းဢၼ်ပႅၵ်ႇပိူင်ႈၵၼ်ႁၢင်းၽႂ်ႁၢင်းမၼ်းဢေႃႈ။-
မီးၵူၼ်းၼုမ်ႇ ႁေႇပြႄး၊ ဢၼ်ပဵၼ်ၶႃႈတီႈၶုၼ်သိုၵ်းပႂ်ႉႁေႃၼၼ်ႉလႆႈၶမ်ၶွၵ်ႈႁူမ်ႈလူၺ်ႈၶႃႈၸဝ်ႈႁဝ်းၶဝ်ယူႇဢေႃႈ။ ၶႃႈၸဝ်ႈႁဝ်းၶဝ်ၶႆႈၼႄလွင်ႈတၢင်းၼွၼ်းၽၼ်ႁၼ်ၶႃႈၸဝ်ႈႁဝ်းၶဝ်ပၼ်မၼ်းလႄႈမၼ်းၵႄႈလိတ်ႈဢၼၢၵ်ႈဢထိၵ်ႈပႄႇပၼ်ၶႃႈၸဝ်ႈႁဝ်းၶဝ်ၶႃႈဢေႃႈ။-
ၵႃႈၼင်ႇဢၼ်မၼ်းႁေႃးၼၼ်ႉပဵၼ်မႃးၸွမ်းတႄႉဢေႃႈ။ ၸဝ်ႈႁဝ်းၶိုၼ်းၶၢၼ်းဢရႃႇၶႃႈၸဝ်ႈပၼ်သေယဝ်ႉ၊ဢဝ်ဝုၼ်ႇသၢၵ်ႈတၢင်းၵိၼ်တၢင်းၶူပ်းၸဝ်ႈၼၼ်ႉၶႅၼ်ႁႂ်ႈတၢႆတႄႉဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းပူင်ဢမိင်ႉႁႂ်ႈႁွင်ႉဢဝ် ယူဝ်းသႅပ်ႈ၊ မႃးဝႆးဝႆးလႄႈၶဝ်ၼႅတ်ႈဢဝ်မၼ်းဢွၵ်ႇထွင်ႇမႃးလႄႈမၼ်းထႃၼူတ်ႇ၊ပုတ်ႈလၢႆႈၶူဝ်းမႂ်ႇပၼ်မၼ်းၶၼ်ၶၼ်ၽႂ်းၽႂ်းသေယဝ်ႉ၊ႁႂ်ႈၶဝ်ႈၸူးတီႈမၼ်းၸဝ်ႈဢေႃႈ။-
ၶုၼ်ႁေႃၶမ်းၵေႃႈလၢတ်ႈတီႈ ယူဝ်းသႅပ်ႈ၊ လႄႈဝႃႈ၊ “ၵဝ်လႆႈၼွၼ်းၽၼ်ႁၼ်ဢေႃႈ။ ၽူႈလႂ်ၵေႃႈဢမ်ႇၸၢင်ႈၵႄႈလိတ်ႈဢၼၢၵ်ႈဢထိၵ်ႈပႄႇမၼ်းလႆႈ။ ၵဝ်လႆႈငိၼ်းဝႃႈ၊မႂ်းၸၢင်ႈၵႄႈလိတ်ႈဢၼၢၵ်ႈဢထိၵ်ႈပႄႇတၢင်းၼွၼ်းၽၼ်လႆႈၼၼ်ႉယဝ်ႉ၊” ဝႃႈၼင်ႇၼႆဢေႃႈ။
ယူဝ်းသႅပ်ႈ၊ ၶိုၼ်းလဝ်ႈလၢတ်ႈဝႃႈ၊ “ၸဝ်ႈၶုၼ်ႁေႃၶမ်းတီႈၶႃႈ။ ၶႃႈၸဝ်ႈဢမ်ႇမေႃဢမ်ႇၸၢင်ႈၵႃႈသင်တီႈၶႃႈ။ ၼႂ်းဝႃႈၼၼ်သေၵေႃႈႁႂ်ႈၽြႃးပဵၼ်ၸဝ်ႈၵႄႈလိတ်ႈၵႂၢမ်းမၢင်ႇၵလႃႇပၼ်သေၵမ်းလူၺ်ႈတီႈၶႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းၵေႃႈၶႆႈၼႄမၼ်းလႄႈဝႃႈ၊ “ၵဝ်ၼွၼ်းၽၼ်ႁၼ်ဝႃႈ၊မိူဝ်ႈဢၼ်ၵဝ်ၸုၵ်းတီႈႁိမ်းၽင်ႇမႄႈၼမ်ႉ ၼၢႆးလ်၊ ယူႇၼၼ်ႉ၊-
မီးဝူဝ်းဢၼ်ႁၢင်ႈလီပီးမၼ်းၸဵတ်းတူဝ်ဢွၵ်ႇသေၵႃႈတီႈမႄႈၼမ်ႉမႃးသေလႄႈၵိၼ်ယိူဝ်ႈယူႇဢေႃႈ။-
ၵမ်းၼၼ်ႉ၊မီးဝူဝ်းယွမ်ႁဵဝ်ႇၸဵတ်းတူဝ်သမ်ႉဢွၵ်ႇမႃးဢေႃႈ။ ဝူဝ်းဢၼ်ယွမ်ႁၢင်ႈၸႃႉထၼ်ႇၼၼ်ႉၼႂ်းမိူင်း ဢေးၵျိပ်ႉ၊ ၼႆႉၵႃႈတီႈလႂ်ၵေႃႈၵဝ်ဢမ်ႇတွၼ်ႉႁၼ်သေပွၵ်ႈ။-
ဝူဝ်းယွမ်ႁဵဝ်ႇၸိူဝ်းၼၼ်ႉၶူပ်းဢိုၼ်ၵိၼ်ဝူဝ်းဢၼ်ႁၢင်ႈလီပီးမၼ်းၸိူဝ်းၼၼ်ႉပႅတ်ႈတင်းၸဵတ်းတူဝ်သေဢေႃႈ။-
ပိၵ်ႉသမ်ႉၵိၼ်လူင်းတွင်ႉၵႂႃႇမူတ်းယဝ်ႉသေၵေႃႈ ဢမ်ႇမီးၽူႈလႂ်ႁုႁၼ်ဝႃႈ၊ဝူဝ်းဢၼ်ယွမ်ႇႁဵဝ်ႇဢိုၼ်ၵိၼ်ဝူဝ်းဢၼ်ပီးလီၶဝ်ႈတွင်ႉၵႂႃႇယဝ်ႉၼၼ်ႉ၊ၵွပ်ႈပိူဝ်ႈတူဝ်ၶဝ်ၵေႃႈယင်းႁၢင်ႈၸႃႉယူႇမိူၼ်မိူဝ်ႈဢွၼ်တၢင်းၼၼ်ႉဢေႃႈ။ ၵဝ်ၵေႃႈတိုၼ်ႇမႃးဢေႃႈ။-
ၵဝ်သမ်ႉၼွၼ်းၽၼ်ႁၼ်ထႅင်ႈဝႃႈ၊ႁူင်းၶဝ်ႈဢၼ်မဵတ်ႉမၢၵ်ႈလီၼႃႇၸဵတ်းႁူင်းဢွၵ်ႇပဵၼ်မႃးၵႃႈတီႈတူၼ်ႈလဵဝ်ၵူၺ်းဢေႃႈ။-
ၵမ်းၼၼ်ႉ၊ႁူင်းၶဝ်ႈဢၼ်မဵတ်ႉလိပ်ႈၵွပ်ႈပိူဝ်ႈၺႃးလူမ်းမႆႈၽၢႆႇတၢင်းဝၼ်းဢွၵ်ႇၼၼ်ႉၸဵတ်းႁူင်းသမ်ႉဢွၵ်ႇမႃးသေယဝ်ႉ၊-
ဢိုၼ်ၵိၼ်ပႅတ်ႈႁူင်းၶဝ်ႈဢၼ်မၢၵ်ႈလီၸိူဝ်းၼၼ်ႉဢေႃႈ။ ၵဝ်ၶႆႈၼႄမေႃပေႇတၢင်ႇတင်းလၢႆသေၵေႃႈဢမ်ႇမီးၽူႈလႂ်သေၵေႃႉသေၵူၼ်းၸၢင်ႈၵႄႈလိတ်ႈဢထိၵ်ႈပႄႇမၼ်းပၼ်ၵဝ်လႆႈ၊” ဝႃႈၼင်ႇၼႆဢေႃႈ။
ယူဝ်းသႅပ်ႈ၊ ၶိုၼ်းလဝ်ႈလၢတ်ႈလႄႈဝႃႈ၊ “တၢင်းၼွၼ်းၽၼ်ႁၼ်သွင်ပိူင်ၼႆႉပဵၼ်လွင်ႈဢၼ်လဵဝ်ၵူၺ်းၶႃႈဢေႃႈ။ ၽြႃးပဵၼ်ၸဝ်ႈၼႄပျႃးလွင်ႈဢၼ်မၼ်းၸဝ်ႈတၵ်းႁဵတ်းတီႈၸဝ်ႈၶုၼ်ႁေႃၶမ်းၼၼ်ႉတီႈၶႃႈဢေႃႈ။-
ဝူဝ်းဢၼ်ႁၢင်ႈလီပီးမၼ်းၸဵတ်းတူဝ်ၼၼ်ႉပွင်ႇဝႃႈ၊ၸဵတ်းပီဢေႃႈ။ ႁူင်းၶဝ်ႈဢၼ်မဵတ်ႉမၢၵ်ႈလီၸဵတ်းႁူင်းၼၼ်ႉၵေႃႈပဵၼ်ၸဵတ်းပီၼင်ႇၵဝ်ႇဢေႃႈ။ မၼ်းပွင်ႇဝႃႈ၊ပဵၼ်ဢၼ်လဵဝ်ၵၼ်ၶႃႈဢေႃႈ။-
ဝူဝ်းယွမ်ႁဵဝ်ႇၸဵတ်းတူဝ်ဢၼ်ဢွၵ်ႇမႃးပႃႈလိုၼ်းဢိၵ်ႇတင်းႁူင်းၶဝ်ႈမဵတ်ႉလိပ်ႈၸဵတ်းႁူင်းၵွပ်ႈပိူဝ်ႈၺႃးလူမ်းမႆႈ ၽၢႆႇတၢင်းဝၼ်းဢွၵ်ႇၼၼ်ႉပွင်ႇဝႃႈ၊ၶဝ်ႈတေၵႃႈမၢၵ်ႇတေပႅင်းၸဵတ်းပီဢေႃႈ။-
ၸွမ်းၼင်ႇၵႃႈဢၼ်ၶႃႈၸဝ်ႈတၢင်ႇလဝ်ႈထိုင်တီႈၸဝ်ႈႁဝ်းၼၼ်ႉၽြႃးပဵၼ်ၸဝ်ႈၼႄပျႃးလွင်ႈဢၼ်မၼ်းၸဝ်ႈတၵ်းႁဵတ်းၼၼ်ႉတီႈၸဝ်ႈႁဝ်းတီႈၶႃႈဢေႃႈ။-
ၼႂ်းၸူဝ်ႈၸဵတ်းပီၼႆႉၶဝ်ႈၼမ်ႉတၢင်းၵိၼ်တၵ်းလိူင်ႇၼမ်ၵူႈတီႈၵူႈလႅၼ်ၵႃႈၼႂ်းမိူင်း ဢေးၵျိပ်ႉ၊ ၼႆႉၶႃႈဢေႃႈ။-
ဝၢႆးသေၼၼ်ႉၶဝ်ႈတၵ်းၵႃႈမၢၵ်ႇတၵ်းပႅင်းၸဵတ်းပီလႄႈ၊ၶႃႈဝၢၼ်ႈၵူၼ်းမိူင်းတင်းလၢႆတေဢွၼ်ၵၼ်လိုမ်းပႅတ်ႈလွင်ႈမၢၵ်ႈမီးလီပဵၼ်ၼႂ်းပီမိူင်းဢၼ်ပူၼ်ႉမႃးၸိူဝ်းၼၼ်ႉသေယဝ်ႉ၊သမ်ႉတၵ်းတုၵ်ႉၶႃႉယၢပ်ႇၸႂ်လူၺ်ႈလွင်ႈတၢင်းဢၼ်ၶဝ်ႈၵႃႈမၢၵ်ႇပႅင်းဢၼ်ပဵၼ်မႃးႁႅင်းၼႃႇလူင်လၢင်ၼၼ်ႉဢေႃႈ။-
တုၵ်ႉၶႃႉတၢင်းဢၼ်ယၢၵ်ႈၽၢၼ်လူၺ်ႈၽေးၶဝ်ႈၵႃႈမၢၵ်ႇပႅင်းၼၼ်ႉပဵၼ်ႁႅင်းယႂ်ႇၼႃႇလူင်လၢင်တေႃႇႁွတ်ႈထၢၼ်ႈပေႃးဢမ်ႇၸၢင်ႈၶႆႈၸႂ်ဝူၼ်ႉၸႂ်လူၺ်ႈလွင်ႈမိုဝ်ႉဝၼ်းဢၼ်ၶဝ်ႈၼမ်ႉတၢင်းၵိၼ်လိူင်ႇၼမ်ၼၼ်ႉသေဢိတ်းယဝ်ႉဢေႃႈ။-
တၢင်းဢၼ်ၸဝ်ႈႁဝ်းလႆႈၼွၼ်းၽၼ်ႁၼ်ထၢပ်ႈၵၼ်သွင်ပွၵ်ႈၼႆႉပဵၼ်ဢၼ်ၽြႃးပဵၼ်ၸဝ်ႈႁႂ်ႈလွင်ႈတၢင်းၼႆႉမၼ်ႈၶိူင်ႇၼႅၼ်ႈၼႃလႄႈမၼ်းၸဝ်ႈတၵ်းၸဵဝ်းႁႂ်ႈပဵၼ်မႃးတီႈၶႃႈဢေႃႈ။
“ၸဝ်ႈမုၼ်ယႂ်ႇၶုၼ်ႁေႃၶမ်းတီႈၶႃႈ႟။ ၸဝ်ႈႁဝ်းထုၵ်ႇလီလိူၵ်ႈၵဵပ်းဢဝ်ၵေႃႉဢၼ်မီးၺၢၼ်ႇပိင်ႇၺႃႇလႄႈမီးတၢင်းၶႆႈၸႂ်ၸဵၼ်းၸႃးဢၼ်လီဢၼ်ၸၢင်ႈႁုၸၢင်ႈႁၼ်ၼၼ်ႉၵေႃႉၼိုင်ႈသေလႄႈၶၢၼ်းႁႂ်ႈမၼ်းဢုပ်ႉပိူင်ႇမိူင်း ဢေးၵျိပ်ႉ၊ ၶႃႈတႃႉ။-
ၸဝ်ႈႁဝ်းသမ်ႉလူဝ်ႇၶၢၼ်းၶုၼ်ၼမ်ၼႃႇဝႆႉႁႂ်ႈၶဝ်ၵဵပ်းၸုၵဵပ်းသိမ်းဝႆႉႁႃႈပုၼ်ႈယေႈပုၼ်ႈၵႃႈၼႂ်းၵႃႈဢၼ်မၢၵ်ႇၶဝ်ႈႁူင်းၼမ်ႉလိူင်ႇၼမ်ၼႂ်းၸူဝ်ႈၸဵတ်းပီၼႆႉဢေႃႈ။-
သမ်ႉပူင်ဢမိင်ႉႁႂ်ႈဢွၼ်ၵၼ်ၸုသိမ်းမၢၵ်ႇၶဝ်ႈႁူင်းၶဝ်ႈ၊ၼႂ်းၸူဝ်ႈၸဵတ်းပီဢၼ်လိူင်ႇလီၼမ်လီၼႆႉ ႁႂ်ႈၶဝ်မီးဢႃႇၼႃႇဢၼ်ၸုႁွမ်တွမ်ဝႆႉၵႃႈၼႂ်းဝဵင်းလႂ်သေလႄႈပႂ်ႉၵႅတ်ႇဝႆႉလီလီသေၵမ်း။-
ပေႃးႁဵတ်းၸိူဝ်ႉၼင်ႇၼႆၸိုင်၊ၼႂ်းၸူဝ်ႈၸဵတ်းပီဢၼ်ၶဝ်ႈတေၵႃႈမၢၵ်ႇတေပႅင်းၼၼ်ႉၶဝ်ႈၼမ်ႉတၢင်းၵိၼ်ၸိူဝ်းၼၼ်ႉ တၵ်းပေႃးၵုမ်ႇၵိၼ်ပုၼ်ႈၵူၼ်းမိူင်း ဢေးၵျိပ်ႉ၊ ၼႆႉယူႇၶႃႈဢေႃႈ။ လၢႆးၼႆႉၸိုင်၊ၶႃႈဝၢၼ်ႈၵူၼ်းမိူင်းတင်းလၢႆတေလႆႈလွတ်ႈၽေးဢၼ်ဢိုပ်းဢၼ်ယၢၵ်ႈတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၸႃႉၸဵမ်ၶုၼ်ႁေႃၶမ်းမိူင်း ဢေးၵျိပ်ႉ၊ လႄႈၶႃႈၸဝ်ႈၽွင်းမိူင်းမၼ်းတင်းသဵင်ႈတင်းလူင်ဢွၼ်ၵၼ်ႁပ်ႉၶၢမ်ႇဢဝ်တၢင်းၵျၢမ်ႇတၢင်းပွင် ယူဝ်းသႅပ်ႈ၊ သေလႄႈ၊-
ၶုၼ်ႁေႃၶမ်းလၢတ်ႈတီႈၶဝ်ၸိူဝ်းၼၼ်ႉလႄႈဝႃႈ၊ “ၵူၼ်းဢၼ်ၶိုၵ်ႉၶမ်ႇမိူၼ် ယူဝ်းသႅပ်ႈ၊ ၵေႃႉဢၼ်ဝိၺိၺ်ႇၽြႃးပဵၼ်ၸဝ်ႈၵိင်းဝၢပ်ႈၼႂ်းမၼ်းၼႆႉ၊ႁဝ်းသွၵ်ႈႁႃလႄႈတေထူပ်းႁၼ်ၵူၼ်းၸိူဝ်ႉၼင်ႇၼႆလႆႈႁိုဝ်း၊” ဝႃႈၼင်ႇၼႆဢေႃႈ။-
သမ်ႉလၢတ်ႈတီႈ ယူဝ်းသႅပ်ႈ၊ လႄႈဝႃႈ၊ “ၽြႃးပဵၼ်ၸဝ်ႈလႆႈၼႄပျႃးလွင်ႈတၢင်းတင်းသဵင်ႈတင်းလူင်ၼႆႉတီႈမႂ်းဢေႃႈ။ ပိူဝ်ႈၼႆလႄႈမႂ်းပဵၼ်ၵေႃႉဢၼ်မီးပိင်ႇၺႃႇတင်းၺၢၼ်ႇဢၼ်ႁုၸႅင်ႈသေပိူၼ်ႈတင်းမူတ်းယဝ်ႉ။-
ၵဝ်တၵ်းၶၢၼ်းႁႂ်ႈမႂ်းဢုပ်ႉပိူင်ႇမိူင်းၵဝ်ၼႆႉဢေႃႈ။ ၶႃႈမၼ်းၵူၼ်းမိူင်းတင်းသဵင်ႈတင်းလူင်တၵ်းတေလႆႈထွမ်ႇဢဝ်ၵႂၢမ်းမႂ်းဢေႃႈ။ မႂ်းတၵ်းမီးဢႃႇၼႃႇဢၼ်တၢမ်းၵဝ်ၼၼ်ႉဢေႃႈ။-
တေႃႈလဵဝ်ၼႆႉၵဝ်မၵ်းၶၢၼ်းႁႂ်ႈမႂ်းပဵၼ်ၶုၼ်ၼႂ်းမိူင်း ဢေးၵျိပ်ႉ၊ ဢေႃႈ၊” ဝႃႈၼင်ႇၼႆဢေႃႈ။-
ၶုၼ်ႁေႃၶမ်းထွတ်ႇဢဝ်မွင်းၵူၺ်းဢၼ်ပႃးၸုမ်ႈၵႃႈတီႈမိုဝ်းမၼ်းၸဝ်ႈသေလႄႈတိုဝ်းပၼ်ၵႃႈတီႈၼဵပ်ႉမိုဝ်း ယူဝ်းသႅပ်ႈ၊ သေယဝ်ႉ၊ဢဝ်ၶူဝ်းၽႃႈပၢၼ်ႇၶျေႃးၼုင်ႈပၼ်မၼ်းလႄႈႁွႆႈၸရွႆႇၶမ်းပၼ်ၵႃႈတီႈၶေႃးမၼ်းဢေႃႈ။-
မၼ်းၸဝ်ႈသမ်ႉဢဝ်လေႃႉရထႃးလမ်းတီႈသွင်ၼႂ်းႁေႃၼၼ်ႉဢၢပ်ႈပၼ်ႁႂ်ႈမၼ်းၶီႇဢေႃႈ။ ႁႂ်ႈၵူၼ်းဢၼ်ၵႂႃႇပႃႈၼႃႈမၼ်းၼၼ်ႉပၢဝ်ႇသေႃႇဝႃႈ၊ “ဢွၼ်ၵၼ်ၶုပ်ႉဝႆႈတႃႉ၊ဢွၼ်ၵၼ်ၶုပ်ႉဝႆႈတႃႉ၊” ဝႃႈၼင်ႇၼႆဢေႃႈ။ ၼင်ႇၼၼ်လႄႈ ယူဝ်းသႅပ်ႈ၊ လႆႈပဵၼ်ၶုၼ်ၵႃႈၼိူဝ်မိူင်း ဢေးၵျိပ်ႉ၊ တင်းသဵင်ႈတင်းလူင်သေဢေႃႈ။-
ၶုၼ်ႁေႃၶမ်းၵေႃႈလၢတ်ႈတီႈ ယူဝ်းသႅပ်ႈ၊ လႄႈဝႃႈ၊ “ၵဝ်ပဵၼ်ၶုၼ်ႁေႃၶမ်းဢေႃႈ။ ၼင်ႇၼၼ်လႄႈၶႃႈဝၢၼ်ႈၵူၼ်းမိူင်း ဢေးၵျိပ်ႉ၊ တင်းသဵင်ႈတင်းလူင်ၼႆႉပေႃးယင်းဢမ်ႇလႆႈဢၶႂၢင်ႉတီႈမႂ်းၸိုင်၊ၽူႈလႂ်သေဢမ်ႇဝႃႈ၊တေဢမ်ႇလႆႈယူၵ်ႉတိၼ်ယူၵ်ႉမိုဝ်းမၼ်းၵူၺ်း၊” ဝႃႈၼင်ႇၼႆဢေႃႈ။-
ၶုၼ်ႁေႃၶမ်းတၢင်ႇၸိုဝ်ႈပၼ်သဵင်တီႈ ယူဝ်းသႅပ်ႈ၊ ၼႂ်းၵႂၢမ်း ဢေးၵျိပ်ႉ၊ လႄႈဝႃႈ၊ ၸႃႇၽၼႃႇသၽႃႇၼႃႉ၊ ဝႃႈၼႆသေလႄႈဢဝ် ဢႃႇသၼတ်ႉ၊ လုၵ်ႈယိင်း ပေႃးတိၽေးရႃႉ၊ ယဵၸ်ႈပရေႃးႁဵၵ်ႈ ဝဵင်း ဢေႃးၼႃႉ၊ ၵူပ်ႉၵူႈပၼ်ႁႂ်ႈပဵၼ်မေးၼၢင်းမၼ်းသေဢေႃႈ။
ယူဝ်းသႅပ်ႈ၊ ၼၼ်ႉမိူဝ်ႈဢၼ်မၼ်းၸႃႉတႄႇလႆႈဢုပ်ႉပိူင်ႇထၢမ်းၵၢၼ်ၶုၼ်ႁေႃၶမ်းၼၼ်ႉဢသၢၵ်ႈမၼ်းမီးသၢမ်သိပ်းပီဢေႃႈ။ ယူဝ်းသႅပ်ႈ၊ ၵေႃႈဢွၵ်ႇႁၢင်ႈလူင်းႁေႃၵႂႃႇလႄႇလဵပ်ႈၵႃႈၼႂ်းမိူင်း ဢေးၵျိပ်ႉ၊ ၵူႈတီႈၵူႈလႅၼ်ဢေႃႈ။-
ၼႂ်းၸူဝ်ႈၸဵတ်းပီဢၼ်ၶဝ်ႈၼမ်ႉတၢင်းၵိၼ်လိူင်ႇၼၼ်ႉမၢၵ်ႇၶဝ်ႈၶွၼ်ႇလိၼ်မၢၵ်ႈလီပူင်းလီထၢၼ်ႈပေႃးတဵမ်ၵွပ်ႇတဵမ်ၵမ်ဝႆႉဢေႃႈ။-
မၼ်းဢဝ်တၢင်းၵိၼ်တၢင်းၶူပ်းၵႃႈမီးၵႃႈၼႂ်းမိူင်း ဢေးၵျိပ်ႉ၊ ၼၼ်ႉၸုသိမ်းဢဝ်ၶွၼ်ႈၵၼ်ဝႆႉၵႃႈတီႈဝဵင်းတင်းလၢႆဢေႃႈ။ ၶဝ်ႈပိူၵ်ႇဢၼ်လႆႈၵႃႈတီႈတူင်ႈၼႃးဝဵင်းၽႂ်ဝဵင်းမၼ်းၵေႃႈႁႂ်ႈဢဝ်သိမ်းဝႆႉၵႃႈတီႈဝဵင်းၽႂ်ဝဵင်းမၼ်းဢေႃႈ။-
ၶဝ်ႈၵျုင်ႇၵေႃႈၼမ်ၼႃႇဢႃးလႃးသမ်ႉပေႃးတၢၼ်ႇမဵတ်ႉႁိၼ်မဵတ်ႉသၢႆးၼမ်ႉသမ်ႇမုၵ်ႈတြႃႇထၢၼ်ႈပေႃးဢမ်ႇပႄႉတူင်ပႄႉတႅၵ်ႈလႆႈယဝ်ႉလႄႈ ယူဝ်းသႅပ်ႈ၊ ယင်းဢမ်ႇၼပ်ႉဢမ်ႇဢၢၼ်ႇလႄႈၵဵပ်းသိမ်းဝႆႉဢေႃႈ။
ၼႂ်းၸူဝ်ႈပီဢၼ်ၶဝ်ႈၵႃႈမၢၵ်ႇပႅင်းယင်းဢမ်ႇပႆႇပဵၼ်မႃးၼၼ်ႉ ယူဝ်းသႅပ်ႈ၊ လႆႈလုၵ်ႈၸၢႆးသွင်ၵေႃႉၵႃႈတီႈမေးၼၢင်းမၼ်း ဢႃႇသၼတ်ႉ၊ ယဝ်ႉဢေႃႈ။-
မၼ်းဝႃႈ၊ “ၽြႃးပဵၼ်ၸဝ်ႈႁဵတ်းႁႂ်ႈၵဝ်လႆႈလိုမ်းတုၵ်ႉၶႃႉတၢင်းၽၢၼ်ၵဝ်ဢိၵ်ႇတင်းၵူၼ်းႁိူၼ်းၵူၼ်းယေးပေႃႈၵဝ်ၸိူဝ်းၼၼ်ႉတင်းသဵင်ႈတင်းလူင်ယဝ်ႉ၊” ဝႃႈၼႆလႄႈႁွင်ႉႁဵၵ်ႈလုၵ်ႈတူၼ်ႈမၼ်းၸိုဝ်ႈဝႃႈ၊ မၼႃႇသေႇ၊ ဢေႃႈ။-
မၼ်းသမ်ႉဝႃႈ၊ “ၽြႃးပဵၼ်ၸဝ်ႈပၼ်ႁႂ်ႈၸိူဝ်ႉၶိူဝ်းၵဝ်ၼမ်ၵိုၼ်းမႃးၵႃႈၼႂ်းမိူင်းဢၼ်ၵဝ်လႆႈၶၢမ်ႇတုၵ်ႉၶႃႉၼႆႉယဝ်ႉ၊” ဝႃႈၼႆလႄႈႁွင်ႉႁဵၵ်ႈလုၵ်ႈၸၢႆးၵေႃႉထူၼ်ႈသွင်ၼၼ်ႉၸိုဝ်ႈဝႃႈ၊ ဢေႇၽရိမ်ႇ၊ ဢေႃႈ။
လိုၼ်းၼၼ်ႉၸဵတ်းပီမၢၵ်ႇၶဝ်ႈႁူင်းၼမ်ႉၵွၼ်ႈလီလိူင်ႇလီလႄႈၵူၼ်းမဵဝ်း ဢေးၵျိပ်ႉ၊ ၶဝ်လႆႈမူၼ်ႈပျေႃႇမူၼ်ႈသိူဝ်းၼၼ်ႉသုတ်းသဵင်ႈၵႂႃႇယဝ်ႉဢေႃႈ။-
ပီဢၼ်ၶဝ်ႈၵႃႈမၢၵ်ႇတေပႅင်းၼၼ်ႉတႄႇၸႃႉပဵၼ်မႃးမႅၼ်ႈၸွမ်းၼင်ႇဢၼ် ယူဝ်းသႅပ်ႈ၊ ႁေႃးဝႆႉၼၼ်ႉဢေႃႈ။ ၶဝ်ႈၵႃႈမၢၵ်ႇပႅင်းၸွတ်ႇတူဝ်ႈၵႂႃႇၵူႈသိုင်ႇၵူႈမိူင်းတင်းသဵင်ႈတင်းမူတ်းဢေႃႈ။ ၵူၺ်းၵႃႈ၊မိူင်း ဢေးၵျိပ်ႉ၊ ယင်းမီးၶဝ်ႈၼမ်ႉတၢင်းၵိၼ်ယူႇဢေႃႈ။-
မိူဝ်ႈဢၼ်ၶႃႈဝၢၼ်ႈၵူၼ်းမိူင်း ဢေးၵျိပ်ႉ၊ ၶဝ်ဢိုပ်းယၢၵ်ႈၼၼ်ႉ၊ၶဝ်ဢွၼ်ၵၼ်ၵႂႃႇႁွင်ႉပၢဝ်ႇႁွင်ႉသႅၼ်ႇလႄႈယွၼ်းၵိၼ်ၵႃႈတီႈၶုၼ်ႁေႃၶမ်းမိူင်း ဢေးၵျိပ်ႉ၊ ဢေႃႈ။ မၼ်းၸဝ်ႈၵေႃႈလၢတ်ႈတီႈၶဝ်ၸိူဝ်းၼၼ်ႉလႄႈဝႃႈ၊ “ၵႂႃႇၸူး ယူဝ်းသႅပ်ႈ၊ တႃႉ။ ဢွၼ်ၵၼ်ႁဵတ်းၸွမ်းၵႃႈၼင်ႇဢၼ်မၼ်းၸီႇယၢင်ႇၼၼ်ႉတႃႉ၊” ဝႃႈၼင်ႇၼႆဢေႃႈ။-
တၢင်းဢၼ်ၶဝ်ႈၵႃႈမၢၵ်ႇပႅင်းၼၼ်ႉယဵင်ႈၶႅၼ်းပဵၼ်မႃးႁႅင်းၼႃႇလူင်လၢင်ၵႃႈၼႂ်းမိူင်း ဢေးၵျိပ်ႉ၊ တင်းသဵင်ႈတင်းလူင်လႄႈ ယူဝ်းသႅပ်ႈ၊ ၽုၺ်ႇယေးၶဝ်ႈၵႃႈမီးၸိူဝ်းၼၼ်ႉလႄႈၶၢႆတေႃႇၵူၼ်းမဵဝ်း ဢေးၵျိပ်ႉ၊ ၶဝ်ဢေႃႈ။-
ၵွပ်ႈပိူဝ်ႈဝႃႈၵႃႈၼိူဝ်ၽႅၼ်ႇလိၼ်တင်းသဵင်ႈတင်းလူင်ပဵၼ်ၶဝ်ႈၵႃႈမၢၵ်ႇပႅင်းႁႅင်းၼႃႇဢႃးလႃးလႄႈၵူၼ်းၵူႈဝၢၼ်ႈၵူႈမိူင်းဢွၼ်ၵၼ်မႃးႁွတ်ႈမႃးၽႅဝ်မိူင်း ဢေးၵျိပ်ႉ၊ လႄႈၶဝ်ႈၸူးၵႃႈတီႈ ယူဝ်းသႅပ်ႈ၊ ႁႂ်ႈလႆႈသိုဝ်ႉၶဝ်ႈပိူၵ်ႇၶဝ်ႈၵျုင်ႇလႂ်ဢေႃႈ။
မိူဝ်ႈဢၼ် ယႃႇၵုပ်ႈ၊ လႆႈငိၼ်းၶၢဝ်ႇလွင်ႈဢၼ်ၶဝ်ႈၵျုင်ႇမီးၼႂ်းမိူင်း ဢေးၵျိပ်ႉ၊ ၼၼ်ႉမၼ်းလၢတ်ႈတီႈလုၵ်ႈၸၢႆးမၼ်းၸိူဝ်းၼၼ်ႉလႄႈဝႃႈ၊ “ႁဵတ်းသင်သူတူၺ်းၼႃႈၵၼ်ၵူၺ်းသေလႄႈယူႇလွၵ်ႇလွၵ်ႇလၢႆလၢႆၸိူဝ်ႉၼင်ႇႁိုဝ်။-
ၵဝ်လႆႈငိၼ်းဝႃႈ၊ၶဝ်ႈၵျုင်ႇမီးၼႂ်းမိူင်း ဢေးၵျိပ်ႉ၊ ပုၼ်ႉယဝ်ႉ။ ဢွၼ်ၵၼ်လူင်းၵႂႃႇသိုဝ်ႉမႃးၵိၼ်ႁႂ်ႈႁဝ်းလႆႈလွတ်ႈဢိုပ်းတၢႆၼၼ်ႉတႃႉ၊” ဝႃႈၼင်ႇၼႆဢေႃႈ။-
ပီႈဢၢႆႈ ယူဝ်းသႅပ်ႈ၊ ၶဝ်သိပ်းၵေႃႉၼၼ်ႉၵေႃႈဢွၼ်ၵၼ်လူင်းၵႂႃႇႁႂ်ႈလႆႈသိုဝ်ႉၶဝ်ႈၵျုင်ႇၵႃႈတီႈမိူင်း ဢေးၵျိပ်ႉ၊ ဢေႃႈ။-
ပိၼ်ႇယႃႇမိၼ်ႇ၊ ၼွင်ႉဢွၵ်ႇ ယူဝ်းသႅပ်ႈ၊ ၼၼ်ႉၸမ်ႉ၊ၵူဝ်ဝႃႈၽေးတၵ်းႁွတ်ႈထိုင်တီႈမၼ်းလႄႈ၊ ယႃႇၵုပ်ႈ၊ ယင်းဢမ်ႇပွႆႇၵႂႃႇၸွမ်းပီႈဢၢႆႈမၼ်းၸိူဝ်းၼၼ်ႉဢေႃႈ။
ပိူဝ်ႈဢၼ်ၵႃႈတီႈမိူင်း ၶႃႇၼၼ်ႇ၊ ၵေႃႈၶဝ်ႈၵႃႈမၢၵ်ႇပႅင်းလႄႈလုၵ်ႈၸၢႆး ယႃႇၵုပ်ႈ၊ ၸိူဝ်းၼၼ်ႉႁွတ်ႈၵႂႃႇၽႅဝ်ၵႂႃႇၵႃႈတီႈမိူင်း ဢေးၵျိပ်ႉ၊ မိူၼ်ပိူၼ်ႈႁႂ်ႈလႆႈသိုဝ်ႉၶဝ်ႈၵျုင်ႇၸွမ်းပိူၼ်ႈဢေႃႈ။-
ယူဝ်းသႅပ်ႈ၊ ၸမ်ႉ၊ပိူဝ်ႈဝႃႈပဵၼ်ၶုၼ်မိူင်း ဢေးၵျိပ်ႉ၊ လႄႈဢဝ်ပုၼ်ႈၽွၼ်းဢၼ်ၶၢႆၶဝ်ႈၵျုင်ႇတေႃႇၵူၼ်းဢၼ်လုၵ်ႉသေၵူႈသိုင်ႇၵူႈမိူင်းမႃးသိုဝ်ႉဢဝ်ၸိူဝ်းၼၼ်ႉယူႇဢေႃႈ။ ပီႈဢၢႆႈ ယူဝ်းသႅပ်ႈ၊ ၸိူဝ်းၼၼ်ႉၵေႃႈၶဝ်ႈၸူးမၼ်းလႄႈၶုပ်ႉမူပ်ႇၵူမ်ႈႁူဝ်ၸပ်းလိၼ်တီႈၽၢႆႇၼႃႈမၼ်းဢေႃႈ။-
ယူဝ်းသႅပ်ႈ၊ ႁၼ်ပီႈဢၢႆႈမၼ်းၸိူဝ်းၼၼ်ႉလႄႈႁုၸၵ်းၶဝ်ဢေႃႈ။ ၵူၺ်းၵႃႈ၊မၼ်းႁဵတ်းၸိူဝ်ႉၼင်ႇႁၢင်ႈဢမ်ႇႁုၸၵ်းၶဝ်လႄႈႁိုတ်းႁတ်းတင်းသဵင်ဢၼ်ၵျၢမ်းၼႃႇလႄႈဝႃႈ၊ “သူလုၵ်ႉၵႃႈတီႈလႂ်မႃး၊” ဝႃႈၼႆလႄႈ၊ၶဝ်ၶိုၼ်းလဝ်ႈလၢတ်ႈလႄႈဝႃႈ၊ “လုၵ်ႉတီႈမိူင်း ၶႃႇၼၼ်ႇ၊ မႃးႁႂ်ႈလႆႈသိုဝ်ႉတၢင်းၵိၼ်ၶႃႈဢေႃႈ၊” ဝႃႈၼင်ႇၼႆဢေႃႈ။
ပိၵ်ႉသမ်ႉ ယူဝ်းသႅပ်ႈ၊ တွင်းပီႈဢၢႆႈမၼ်းၸိူဝ်းၼၼ်ႉသေၵေႃႈၶဝ်ဢမ်ႇႁုၸၵ်းမၼ်း။-
မၼ်းၶုၵ်းၸႂ်လႆႈတၢင်းၼွၼ်းၽၼ်ႁၼ်ဢၼ်မၼ်းၽၼ်ႁၼ်လွင်ႈၶဝ်ၼၼ်ႉလႄႈဝႃႈ၊ “သူပဵၼ်ၵူၼ်းသိုပ်ႇၶၢဝ်ႇဢေႃႈ။ သူမႃးႁႂ်ႈလႆႈၸုင်ႇၸၢမ်းတူၺ်းတီႈဢၼ်ႁႅင်းဢူၼ်ႈႁဵင်းၵေႇၵႃႈၼႂ်းမိူင်းႁဝ်းၼႆႉယဝ်ႉ၊” ဝႃႈၼင်ႇၼႆဢေႃႈ။
ၶဝ်ၶိုၼ်းလဝ်ႈလၢတ်ႈလႄႈဝႃႈ၊ “ဢမ်ႇၸႂ်ႈၶႃႈၸဝ်ႈ။ ႁဝ်းၶႃႈမႃးမိူၼ်ၸိူဝ်ႉၼင်ႇၶႃႈၵူၼ်းၸႂ်ႉၸဝ်ႈႁႂ်ႈလႆႈသိုဝ်ႉတၢင်းၵိၼ်တၢင်းယႅမ်ႉတီႈၶႃႈဢေႃႈ။-
ႁဝ်းၶႃႈၸိူဝ်းၼႆႉပဵၼ်ပီႈၼွင်ႉဢွၵ်ႇၵၼ်ၶႃႈဢေႃႈ။ ႁဝ်းၶႃႈဢမ်ႇၸႂ်ႈၵူၼ်းသိုပ်ႇၶၢဝ်ႇၶႃႈ။ ႁဝ်းၶႃႈပဵၼ်ၵူၼ်းသိုဝ်ႈၵူၼ်းယူဝ်းၶႃႈဢေႃႈ၊” ဝႃႈၼင်ႇၼႆဢေႃႈ။
ယူဝ်းသႅပ်ႈ၊ သမ်ႉလၢတ်ႈတီႈၶဝ်လႄႈဝႃႈ၊ “ဢမ်ႇၸႂ်ႈၵူၺ်း။ သူမႃးႁႂ်ႈလႆႈယဵမ်ႈတူၺ်းတီႈဢၼ်ႁႅင်းဢူၼ်ႈႁဵင်းၵေႇၵႃႈၼႂ်းမိူင်းၸဝ်ႈၼႆႉယဝ်ႉ၊” ဝႃႈၼင်ႇၼႆဢေႃႈ။
ၶဝ်ၶိုၼ်းလဝ်ႈလၢတ်ႈလႄႈဝႃႈ၊ “တၢင်ႇလဝ်ႈၸဝ်ႈႁဝ်းတီႈၶႃႈ။ ႁဝ်းၶႃႈတင်းသဵင်ႈမီးသိပ်းသွင်ပီႈၼွင်ႉလႄႈပဵၼ်လုၵ်ႈၸၢႆးတီႈပေႃႈလဵဝ်ၵၼ်ဢၼ်ပဵၼ်ၵူၼ်းမိူင်း ၶႃႇၼၼ်ႇ၊ ၼၼ်ႉဢေႃႈ။ ၼွင်ႉၸၢႆးႁဝ်းၶႃႈၵေႃႉလဵၵ်ႉသေပိူၼ်ႈၼၼ်ႉၵိုတ်းသဝ်းယူႇတီႈပေႃႈႁဝ်းၶႃႈဢေႃႈ။ ၼွင်ႉၸၢႆးႁဝ်းၶႃႈထႅင်ႈၵေႃႉၼိုင်ႈတႄႉသဵင်ႈႁၢႆၵႂႃႇယဝ်ႉၶႃႈဢေႃႈ၊” ဝႃႈၼင်ႇၼႆဢေႃႈ။
ယူဝ်းသႅပ်ႈ၊ ၵေႃႈလၢတ်ႈဝႃႈ၊ “ၵွပ်ႈၼႆႉယဝ်ႉ။ ၵဝ်ၸင်ႇဝႃႈ၊သူပဵၼ်ၵူၼ်းသိုပ်ႇၶၢဝ်ႇၼႆယဝ်ႉ။-
သူတၵ်းလႆႈၶၢမ်ႇတၢင်းဢၼ်ၸႅတ်ႈၸၢမ်းတူၺ်းၸိူဝ်ႉၼင်ႇႁိုဝ်ဝႃႈၼႆၸမ်ႉ၊ပေႃးၼွင်ႉၸၢႆးသူၵေႃႉလဵၵ်ႉသေပိူၼ်ႈၼၼ်ႉဢမ်ႇမႃးၵႃႈတီႈၼႆႈၸိုင်၊ၸူဝ်ႈဢၼ်ၶုၼ်ႁေႃၶမ်းမိူင်း ဢေးၵျိပ်ႉ၊ ယင်းမီးဢသၢၵ်ႈယူႇၼႆႉသူတေဢမ်ႇလႆႈဢွၵ်ႇၵႂႃႇသေၵႃႈတီႈၼႆႈၵႂႃႇ။-
ၼႂ်းသူၼႆႉၵေႃႉၼိုင်ႈၵႂႃႇႁွင်ႉမၼ်းမႃးတႃႉ။ ၸိူဝ်းသူၼႆႉၸမ်ႉ၊တေလႆႈထုၵ်ႇၶင်ဝႆႉတေႃႇႁွတ်ႈၵဝ်ၸႅတ်ႈထၢမ်ၸၢမ်းတူၺ်းလႄႈႁုလွင်ႈဢၼ်ၵႂၢမ်းသူၸႂ်ႈႁိုဝ်း၊ဢမ်ႇၸႂ်ႈႁိုဝ်းၼၼ်ႉဢေႃႈ။ ပေႃးဢမ်ႇၼၼ်ၸိုင်၊ၵႃႈၼင်ႇဢၼ်ၶုၼ်ႁေႃၶမ်းဢသၢၵ်ႈလိပ်းယူႇၼႆႉသူပဵၼ်ၵူၼ်းသိုပ်ႇၶၢဝ်ႇတႄႉယဝ်ႉ၊” ဝႃႈၼင်ႇၼႆသေယဝ်ႉ၊-
ယူဝ်းသႅပ်ႈ၊ ၶင်ၶဝ်ဝႆႉသၢမ်ဝၼ်းဢေႃႈ။
ထူၼ်ႈထိုင်သၢမ်ဝၼ်းလႄႈ ယူဝ်းသႅပ်ႈ၊ လၢတ်ႈတီႈၶဝ်ၸိူဝ်းၼၼ်ႉလႄႈဝႃႈ၊ “ၵဝ်ပဵၼ်ၵေႃႉဢၼ်ၵူဝ်ႁႄၽြႃးပဵၼ်ၸဝ်ႈဢေႃႈ။ ႁႂ်ႈဢသၢၵ်ႈသူပေႃးတေလႆႈၶျၢမ်းသႃႇၸိုင်၊မီးမဵဝ်းၼိုင်ႈၵူၺ်းယဝ်ႉ၊-
ႁႂ်ႈၵဝ်လႆႈႁုလွင်ႈဢၼ်သူၸႂ်သိုဝ်ႈယူဝ်းၸိုင်၊ၼႂ်းသူၼႆႉၵေႃႉၼိုင်ႈတၵ်းလႆႈယူႇၼႂ်းၶွၵ်ႈတီႈၼႆႈသေယဝ်ႉ၊သူၸိူဝ်းဢၼ်လိူဝ်ၼၼ်ႉမိူဝ်းၵႂႃႇတႃႉ။ ဢဝ်ၶဝ်ႈၵျုင်ႇဢၼ်သူသိုဝ်ႉလႆႈၼၼ်ႉမိူဝ်းၵႂႃႇလဵင်ႉလူၵူၼ်းႁိူၼ်းသူဢၼ်ဢိုပ်းယၢၵ်ႈယူႇၸိူဝ်းၼၼ်ႉတႃႉ။-
လိုၼ်းၼၼ်ႉ၊ပႃးဢဝ်ၼွင်ႉၸၢႆးသူၵေႃႉလဵၵ်ႉသေပိူၼ်ႈၼၼ်ႉမႃးတီႈၵဝ်တႃႉ။ ပေႃးႁဵတ်းၼႆၸိုင်၊ၵႂၢမ်းသူၼၼ်ႉၸိုဝ်ႈၸႂ်ႈယဝ်ႉလႄႈ၊ၵဝ်တၵ်းပွႆႇၶႂၢင်းပၼ်ဢသၢၵ်ႈသူဢေႃႈ၊” ဝႃႈၼင်ႇၼႆဢေႃႈ၊ၶဝ်ၵေႃႈၽွမ်ႉလႄႈ၊-
ၼင်ႇၵၼ်ၵၼ်လၢတ်ႈတီႈၵၼ်လႄႈဝႃႈ၊ “ႁဝ်းၸိူဝ်းၼႆႉလႆႈၶၢမ်ႇတၢမ်ႇၼွင်ႉၸၢႆးႁဝ်းယဝ်ႉ။ မိူဝ်ႈဢၼ်မၼ်းလႆႈၶၢမ်ႇတုၵ်ႉၶႃႉၶၢၼ်ၸႂ်ၼၼ်ႉ၊ပိၵ်ႉသမ်ႉမၼ်းတွင်းပၢၼ်ႇသေၵေႃႈႁဝ်းယင်းဢမ်ႇထွမ်ႇ။ ပိူဝ်ႈၼႆၸင်ႇႁဝ်းလႆႈၶၢမ်ႇတၢမ်ႇမၼ်းတေႃႈလဵဝ်ၼႆႉယဝ်ႉ၊” ဝႃႈၼင်ႇၼႆဢေႃႈ။
ရုပိၼ်ႇ၊ ၵေႃႈလၢတ်ႈလႄႈဝႃႈ၊ “ၵဝ်ပေႃးလၢတ်ႈယဝ်ႉ။ ယႃႇပေႁဵတ်းၶဵၼ်တီႈၵေႃႉဢွၼ်ႇၼႆႉဝႃႈၼႆ။ သူဢမ်ႇထွမ်ႇလူင်ပႄႇ၊ၵွပ်ႈၼႆႁဝ်းလႆႈၶၢမ်ႇတၢမ်ႇဢပျတ်ႈတၢင်းတၢႆမၼ်းၼၼ်ႉယဝ်ႉ၊” ဝႃႈၼင်ႇၼႆဢေႃႈ။-
ၶဝ်ဢမ်ႇႁုလွင်ႈဢၼ် ယူဝ်းသႅပ်ႈ၊ ႁုထွမ်ႇၵႂၢမ်းဢၼ်ၶဝ်လၢတ်ႈတေႃႇၼၼ်ႉဢေႃႈ။ လွင်ႈမၼ်းၸမ်ႉ၊မၼ်းဢဝ်တင်းၵူၼ်းပျၢၼ်ႇၵႂၢမ်းလႄႈလၢတ်ႈတေႃႇၵၼ်တင်းၶဝ်ဢေႃႈ။-
ယူဝ်းသႅပ်ႈ၊ ၽၢတ်ႇဢွၵ်ႇတီႈၶဝ်ၵႂႃႇလႄႈၼမ်ႉတႃတူၵ်းဢေႃႈ။ မိူဝ်ႈဢၼ်မၼ်းၵၼ်ႈဝႆႉလႆႈယဝ်ႉၸင်ႇၶိုၼ်းၶဝ်ႈမႃးလႄႈလိူၵ်ႈဢဝ် သိမုၼ်ႇ၊ သေယဝ်ႉ၊မတ်ႉဝႆႉၽၢႆႇၼႃႈၶဝ်တင်းသဵင်ႈဢေႃႈ။
ယူဝ်းသႅပ်ႈ၊ ပၼ်ဢမိင်ႉႁႂ်ႈဢဝ်ၶဝ်ႈၵျုင်ႇသႂ်ႇတဵမ်ထူင်ပီႈဢၢႆႈမၼ်းတင်းလၢႆ၊ႁႂ်ႈဢဝ်ငိုၼ်းၽႂ်ငိုၼ်းမၼ်းၶိုၼ်းသႂ်ႇပၼ်ၼႂ်းထူင်ၽႂ်ထူင်မၼ်းဢိၵ်ႇတင်းပၼ်တၢင်းၵိၼ်ပုၼ်ႈတႃႇတေၵိၼ်ၸွမ်းတၢင်းၼၼ်ႉဢေႃႈ။ ၵႃႈၼင်ႇဢၼ်မၼ်းမီးဢမိင်ႉၼၼ်ႉၶဝ်ႁဵတ်းပၼ်ၵူႈမဵဝ်းဢေႃႈ။-
ၶဝ်ပီႈၼွင်ႉၵေႃႈဢဝ်ၶဝ်ႈၵျုင်ႇတၢင်ႇၼိူဝ်မႃႉလီႈၶဝ်ယဝ်ႉတူဝ်ႈလီငၢမ်းသေလႄႈဢွၵ်ႇမိူဝ်းၵႂႃႇဢေႃႈ။
မိူဝ်ႈဢၼ်ထိုင်တီႈပၢင်လိုဝ်ႈၸိုင်၊ၼႂ်းၶဝ်ပီႈၼွင်ႉၼၼ်ႉၵေႃႉၼိုင်ႈၽုၺ်ႇထူင်မၼ်းႁႂ်ႈလႆႈဢဝ်တၢင်းၵိၼ်ဢွႆႇမႃႉလီႈမၼ်းဢေႃႈ။ မိူဝ်ႈၼၼ်ႉမၼ်းႁၼ်ငိုၼ်းမၼ်းၵႃႈၼိူဝ်ပၢၵ်ႇထူင်မၼ်းလႄႈ၊-
ႁွင်ႉလၢတ်ႈတီႈပီႈၼွင်ႉမၼ်းၸိူဝ်းၼၼ်ႉလႄႈဝႃႈ၊ “ဢလူဝ်း၊ငိုၼ်းၵဝ်ၶႃႈၼၼ်ႉၶိုၼ်းသႂ်ႇပၼ်ဝႆႉၶႃႈဢေႃႈ။ တူၺ်းလူး၊မီးဝႆႉၵႃႈၼႂ်းထူင်ၵဝ်ၶႃႈဢေႃႈ၊” ဝႃႈၼင်ႇၼႆသေယဝ်ႉ၊ၶဝ်တူၵ်းၸႂ်ၵူဝ်ႁႄၼႃႇလူင်လၢင်လႄႈၼင်ႇၵၼ်ၵၼ်ၵေႃႉၼိုင်ႈလႄႈၵေႃႉၼိုင်ႈလၢတ်ႈတီႈၵၼ်လႄႈဝႃႈ၊ “ၽြႃးပဵၼ်ၸဝ်ႈၸီႇယၢင်ႇၸိူဝ်ႉၼင်ႇႁိုဝ်တီႈႁဝ်းယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၶဝ်ၶိုၼ်းႁွတ်ႈၽႅဝ်တီႈပေႃႈၶဝ် ယႃႇၵုပ်ႈ၊ ၼႂ်းမိူင်း ၶႃႇၼၼ်ႇ၊ ၼၼ်ႉၸိုင်၊ၶဝ်ဢွၼ်ၵၼ်မွၵ်ႇလၢတ်ႈၶႆႈထိုင်မၼ်းလွင်ႈတၢင်းဢၼ်ပဵၼ်မႃးၼၼ်ႉတင်းသဵင်ႈတင်းလူင်ၼၼ်ႉလႄႈဝႃႈ၊-
“ၶုၼ်မိူင်း ဢေးၵျိပ်ႉ၊ ၼၼ်ႉလၢတ်ႈၵႂၢမ်းၵျၢမ်းၼႃႇတေႃႇႁဝ်းၶႃႈလႄႈၼႄးဝႃႈ၊ႁဝ်းၶႃႈပဵၼ်ၵူၼ်းသိုပ်ႇၶၢဝ်ႇဢေႃႈ။-
ႁဝ်းၶႃႈၶိုၼ်းလဝ်ႈလၢတ်ႈဝႃႈ၊ ‘ႁဝ်းၶႃႈဢမ်ႇၸႂ်ႈၵူၼ်းသိုပ်ႇၶၢဝ်ႇၶႃႈ။ ႁဝ်းၶႃႈပဵၼ်ၵူၼ်းသိုဝ်ႈၵူၼ်းယူဝ်းၶႃႈဢေႃႈ။-
ႁဝ်းၶႃႈပီႈၼွင်ႉမီးသိပ်းသွင်ၵေႃႉလႄႈပဵၼ်လုၵ်ႈၸၢႆးပေႃႈလဵဝ်ၵၼ်ဢေႃႈ။ ၵေႃႉၼိုင်ႈတၢႆၵႂႃႇယဝ်ႉလႄႈ၊ၼွင်ႉၸၢႆးႁဝ်းၶႃႈၵေႃႉလဵၵ်ႉသေပိူၼ်ႈၼၼ်ႉမီးယူႇလူၺ်ႈၵၼ်တင်းပေႃႈႁဝ်းၶႃႈတီႈမိူင်း ၶႃႇၼၼ်ႇ၊ ပုၼ်ႉဢေႃႈ၊’ ဝႃႈၼင်ႇၼႆဢေႃႈ။-
ၶုၼ်မိူင်းၼၼ်ႉသမ်ႉလၢတ်ႈလႄႈဝႃႈ၊ ‘ႁႂ်ႈၵဝ်လႆႈႁုလွင်ႈဢၼ်သူမီးၸႂ်သိုဝ်ႈယူဝ်းၸိုင်၊ၼႂ်းသူၼႆႉတေလႆႈၵိုတ်းယူႇတီႈၵဝ်ၵေႃႉၼိုင်ႈလႄႈၸိူဝ်းသူၼႆႉဢဝ်တင်းၶဝ်ႈၵျုင်ႇၵႂႃႇလဵင်ႉလူၵူၼ်းႁိူၼ်းသူဢၼ်ဢိုပ်းယၢၵ်ႈၸိူဝ်းၼၼ်ႉတႃႉ၊’ ဝႃႈၼင်ႇၼႆသေယဝ်ႉ၊သမ်ႉလၢတ်ႈဝႃႈ၊-
‘ပႃးဢဝ်ၼွင်ႉၸၢႆးၵွႆသူမႃးတီႈၵဝ်တႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊တေထၢင်ႇသႃးဝႃႈ၊သူဢမ်ႇၸႂ်ႈၵူၼ်းသိုပ်ႇၶၢဝ်ႇသူပဵၼ်ၵူၼ်းသိုဝ်ႈၵူၼ်းယူဝ်းတႄႉယဝ်ႉလႄႈၵဝ်တေၶိုၼ်းပွႆႇပီႈၼွင်ႉသူၵေႃႉၼႆႉသေလႄႈ၊သူတေမီးဢၶႂၢင်ႉဢၼ်ၵိုတ်းသဝ်းၵႃႉၶၢႆၵႃႈတီႈမိူင်းၼႆႉဢေႃႈ၊’ ဝႃႈၼင်ႇၼႆဢေႃႈ။”
ၵမ်းၼၼ်ႉ ၶဝ်ထွၵ်ႇထူင်ၶဝ်ႈၵျုင်ႇၶဝ်လႄႈၶိုၼ်းဢွၼ်ၵၼ်ထူပ်းႁၼ်ႁေႃႇငိုၼ်းၼႂ်းထူင်ၽႂ်ထူင်မၼ်းဢေႃႈ။ မိူဝ်ႈဢၼ်ၶဝ်ထူပ်းႁၼ်ႁေႃႇငိုၼ်းၶိုၼ်းၼၼ်ႉၸိုင်၊ၶဝ်ပေႃႈလုၵ်ႈဢွၼ်ၵၼ်ၵူဝ်ႁႄသမ်ႉပေႃးသၼ်ႇပေႃးသၢႆဢေႃႈ။-
ပေႃႈၶဝ်လၢတ်ႈလႄႈဝႃႈ၊ “သူၶႂ်ႈႁဵတ်းႁႂ်ႈၵဝ်သုမ်းလုၵ်ႈၸၢႆးၵဝ်တင်းလၢႆႁိုဝ်း။ ယူဝ်းသႅပ်ႈ၊ ဢမ်ႇမီးယဝ်ႉ။ သိမုၼ်ႇ၊ ၵေႃႈဢမ်ႇမီးယဝ်ႉ။ တေႃႈလဵဝ်ၼႆႉသူတေဢဝ် ပိၼ်ႇယႃႇမိၼ်ႇ၊ ၵႂႃႇထႅင်ႈယဝ်ႉ။ ႁႂ်ႈၵဝ်ၶၢမ်ႇတုၵ်ႉၶႃႉတၢင်းဢၼ်မႆႈၸႂ်ၼႆႉယဝ်ႉ၊” ဝႃႈၼင်ႇၼႆဢေႃႈ။
ရုပိၼ်ႇ၊ ၵေႃႈလၢတ်ႈတီႈပေႃႈၶဝ်လႄႈဝႃႈ၊ “ပေႃးၵဝ်ၶႃႈဢမ်ႇၶိုၼ်းဢဝ် ပိၼ်ႇယႃႇမိၼ်ႇ၊ မႃးတီႈပေႃႈႁဝ်းလႆႈၸိုင်၊ပေႃႈႁဝ်းဢဝ်လုၵ်ႈၸၢႆးၵဝ်ၶႃႈသွင်ၵေႃႉၼႆႉတၢႆၶႃႈတႃႉ။ ဢဝ်မၼ်းဢၢပ်ႈၼႂ်းမိုဝ်းၵဝ်ၶႃႈၵႂႃႇသေၵမ်း။ ၵဝ်ၶႃႈတေၶိုၼ်းဢွၼ်မၼ်းပွၵ်ႈမႃးယူႇဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ ယႃႇၵုပ်ႈ၊ ၶိုၼ်းလၢတ်ႈလႄႈဝႃႈ၊ “ၵဝ်ဢမ်ႇပွႆႇႁႂ်ႈလုၵ်ႈၸၢႆးၵဝ်ၵႂႃႇၸွမ်းသူလႆႈ။ ပီႈဢၢႆႈမၼ်းတၢႆယဝ်ႉလႄႈမီးမၼ်းၵေႃႉလဵဝ်ၵူၺ်းယဝ်ႉ။ ၵူဝ်ပဵၼ်သေမဵဝ်းမဵဝ်းၵႃႈၼႂ်းၶၢဝ်းတၢင်းဢေႃႈ။ တၢင်းႁဵတ်းသူၼႆႉတေဢဝ်တၢင်းဢၼ်ငိၼ်းၽၢၼ်ထိုင်ၸႂ်ႁႂ်ႈႁူဝ်ႁွၵ်ႇၵဝ်ၼႆႉလူင်းႁွတ်ႈထိုင်တီႈမိူင်းမရၼႃႉပုၼ်ႉယဝ်ႉ၊” ဝႃႈၼင်ႇၼႆဢေႃႈ။
တၢင်းဢၼ်ၶဝ်ႈၵႃႈမၢၵ်ႇပႅင်းၼၼ်ႉပဵၼ်ႁႅင်းၼႃႇလူင်လၢင်ၵႃႈၼႂ်းမိူင်း ၶႃႇၼၼ်ႇ၊ ဢေႃႈ။-
မိူဝ်ႈဢၼ်ၵူၼ်းႁိူၼ်း ယႃႇၵုပ်ႈ၊ ၶဝ်ၵိၼ်ၶဝ်ႈၵျုင်ႇဢၼ်သိုဝ်ႉတီႈမိူင်း ဢေးၵျိပ်ႉ၊ မႃးၼၼ်ႉမူတ်းၵႂႃႇလႄႈ ယႃႇၵုပ်ႈ၊ လၢတ်ႈတီႈလုၵ်ႈၸၢႆးမၼ်းၸိူဝ်းၼၼ်ႉလႄႈဝႃႈ၊ “သမ်ႉၵႂႃႇသိုဝ်ႉတၢင်းၵိၼ်မႃးထႅင်ႈတႃႉ၊” ဝႃႈၼင်ႇၼႆဢေႃႈ။
ယုတႃႉ၊ ၶိုၼ်းလၢတ်ႈလႄႈဝႃႈ၊ “ၵေႃႉၼၼ်ႉပၼ်သတိတီႈႁဝ်းၶႃႈဝႆႉၵျၢမ်းၼႃႇလွင်ႈဢၼ်ဝႃႈ၊ပေႃးႁဝ်းၶႃႈယင်းဢမ်ႇပႃးၼွင်ႉၸၢႆးၵွႆႁဝ်းၶႃႈၵႂႃႇၸိုင်၊ႁဝ်းၶႃႈတေဢမ်ႇလႆႈၶဝ်ႈၸူးၵႃႈတီႈၶုၼ်ၼၼ်ႉဢေႃႈ။-
ပေႃးပေႃႈႁဝ်းၶႃႈပွႆႇၼွင်ႉၸၢႆးႁဝ်းၶႃႈၵေႃႉလဵၵ်ႉသေပိူၼ်ႈၼႆႉၵႂႃႇၸွမ်းၸိုင်၊ႁဝ်းၶႃႈတေလူင်းၵႂႃႇသိုဝ်ႉတၢင်းၵိၼ်တၢင်းၶူပ်းမႃးပၼ်ပေႃႈႁဝ်းယူႇဢေႃႈ။-
ပေႃးပေႃႈႁဝ်းဢမ်ႇၽွမ်ႉၸိုင်၊ႁဝ်းၶႃႈၵေႃႈဢမ်ႇၸၢင်ႈၵႂႃႇၵွပ်ႈပိူဝ်ႈၵေႃႉၼၼ်ႉသင်ႇဝႆႉတီႈႁဝ်းၶႃႈဝႆႉလႄႈဝႃႈ၊ ‘ပေႃးၼွင်ႉၸၢႆးသူၵေႃႉလဵၵ်ႉသေပိူၼ်ႈၼၼ်ႉဢမ်ႇပႃးမႃးၸွမ်းၸိုင်၊သူတေဢမ်ႇလႆႈႁၼ်ၼႃႈၵဝ်၊’ ဝႃႈၼင်ႇၼႆဝႆႉဢေႃႈ၊” ဝႃႈၼင်ႇၼႆဢေႃႈ။
ယႃႇၵုပ်ႈ၊ ၵေႃႈလၢတ်ႈလႄႈဝႃႈ၊ “ႁဵတ်းသင်လႄႈသူမွၵ်ႇဝႃႈ၊သူယင်းမီးၼွင်ႉၸၢႆးထႅင်ႈၵေႃႉၼိုင်ႈၼၼ်ႉ။ ဢၼ်ၼႆႉႁဵတ်းႁႂ်ႈၵဝ်မႆႈၸႂ်တႄႉတႄႉယဝ်ႉ၊” ဝႃႈၼင်ႇၼႆဢေႃႈ။
ၶဝ်ၶိုၼ်းလၢတ်ႈလႄႈဝႃႈ၊ “မၼ်းထၢမ်ၸွတ်ႇထၢမ်ၸေးၶိူဝ်းႁဝ်းၶႃႈယူႇလႄႈဝႃႈ၊ ‘ပေႃႈသူယင်းမီးယူႇႁိုဝ်း။ သူမီးၼွင်ႉၸၢႆးထႅင်ႈလူးၵွၼ်ႇႁိုဝ်း၊’ ဝႃႈၼင်ႇၼႆလႄႈ၊ႁဝ်းၶႃႈတိုၼ်းဢမ်ႇႁုလွင်ႈဢၼ်ဝႃႈ၊မၼ်းတေႁႂ်ႈႁဝ်းၶႃႈႁွင်ႉပႃးၼွင်ႉၸၢႆးၵွႆႁဝ်းၶႃႈၵႂႃႇထႅင်ႈၼၼ်ႉၶႃႈယဝ်ႉ၊” ဝႃႈၼင်ႇၼႆဢေႃႈ။
ယုတႃႉ၊ ၵေႃႈလၢတ်ႈတီႈပေႃႈမၼ်းလႄႈဝႃႈ၊ “ပွႆႇၸၢႆးဢွၼ်ႇၼႆႉၸွမ်းၵဝ်ၶႃႈၵႂႃႇတႃႉ။ ႁဝ်းၶႃႈလူဝ်ႇၵႂႃႇမိူဝ်ႈလဵဝ်ၼႆႉၶႃႈယဝ်ႉ။ ပေႃးဢမ်ႇၼၼ်ၸႃႉၸဵမ်ပေႃႈႁဝ်းဢိၵ်ႇတင်းလုၵ်ႈလၢင်းႁဝ်းတေဢိုပ်းတၢႆသဵင်ႈယဝ်ႉဢေႃႈ။-
ၵဝ်ၶႃႈႁပ်ႉႁွင်းဢႃႇမႃႉၶၢမ်ႇမၼ်းဢေႃႈ။ ဝႆႉႁႂ်ႈပဵၼ်တႃႇဝုၼ်ႇၵဝ်ၶႃႈသေၵမ်း။ ပေႃးၵဝ်ၶႃႈဢမ်ႇၶိုၼ်းဢွၼ်မၼ်းပွၵ်ႈမႃးၶိုၼ်းလူင်ႉလီလွတ်ႈလီၸိုင်၊ႁႂ်ႈဢပျတ်ႈၼၼ်ႉတူၵ်းၵႃႈၼိူဝ်ၵဝ်ၶႃႈတႃႇသေႇတႃႉ။-
သင်ႁဝ်းဢမ်ႇႁဵတ်းထိူင်းႁဵတ်းၼၢၼ်းၸိုင်၊ႁဝ်းပေႃးလႆႈၵႂႃႇလႆႈမႃးထူၼ်ႈထိုင်သွင်ပွၵ်ႈယဝ်ႉ၊” ဝႃႈၼင်ႇၼႆဢေႃႈ။
ပေႃႈၶဝ်ၵေႃႈၸင်ႇလၢတ်ႈလႄႈဝႃႈ၊ “ပေႃးပဵၼ်ၸိူဝ်ႉၼင်ႇၼႆၸိုင်၊ဢမ်ႇၸၢင်ႈႁဵတ်းႁိုဝ်ယဝ်ႉ။ ဢွၼ်ၵၼ်ဢဝ်မဵဝ်းဢၼ်လီဢၼ်မီးၵႃႈၶၼ်သေပိူၼ်ႈဢၼ်ဢွၵ်ႇၼႂ်းမိူင်း ၶႃႇၼၼ်ႇ၊ ဢၼ်ပဵၼ်ယၢင်မၢၵ်ႇၼမ်ႉမၼ်းယႂ်းဢိတ်းၼိုင်ႈ၊ၼမ်ႉၽိုင်ႈဢိတ်းၼိုင်ႈ၊ၼၢမ်ႇသႃႇလႂ်၊ယၢင်မုရၼ်ႇလႂ်၊မၢၵ်ႇတူပ်းတင်းမၢၵ်ႇပႃႇတမ်ႇလႂ်၊သႂ်ႇထူင်သူၵႂႃႇႁႂ်ႈပဵၼ်ၶွင်ၽၢၵ်ႇလၢၵ်ႈသွင်ႇတီႈၸဝ်ႈၼၼ်ႉတႃႉ။-
ပႃးဢဝ်ငိုၼ်းၵႂႃႇသွင်ပုၼ်ႈတႃႉ။ ငိုၼ်းဢၼ်ပႃးၶိုၼ်းမႃးၼႂ်းပၢၵ်ႇထူင်သူၼၼ်ႉၵေႃႈလူဝ်ႇၶိုၼ်းပႃးဢဝ်ၵႂႃႇပၼ်ဢေႃႈ။ ၸၢင်ႈၶႄးၶဝ်ဢမ်ႇဝႆႉသတိလႄႈၸင်ႇပဵၼ်ႁိုဝ်ဢမ်ႇဝႃႈလႆႈ။-
ႁွင်ႉဢဝ်ၼွင်ႉၸၢႆးၵွႆသူလႄႈလူင်းၵႂႃႇၵမ်းလဵဝ်တႃႉ။-
ႁႂ်ႈ ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ ၼၼ်ႉမႄးႁႅၼ်းႁူဝ်ၸႂ်ၵေႃႉၼၼ်ႉႁႂ်ႈမၼ်းဢဵတ်းလူသူသေယဝ်ႉ၊ပွႆႇၶႂၢင်းပၼ်ပီႈဢၢႆႈသူတင်း ပိၼ်ႇယႃႇမိၼ်ႇ၊ လွတ်ႈမႃးသေၵမ်းလူၺ်ႈ။ ၵဝ်ၸမ်ႉ၊ပေႃးလႆႈသုမ်းလုၵ်ႈလၢင်းၵဝ်ၸိူဝ်းၼႆႉၸိုင်၊ၵဝ်တေလႆႈၶၢမ်ႇယူႇၵူၺ်းယဝ်ႉ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈၶဝ်ပီႈၼွင်ႉဢွၼ်ၵၼ်ပႃးဢဝ်လၢၵ်ႈသွင်ႇၼၼ်ႉဢိၵ်ႇတင်းငိုၼ်းသွင်ပုၼ်ႈသေလႄႈလူင်းၵႂႃႇႁူမ်ႈလူၺ်ႈၵၼ်တင်း ပိၼ်ႇယႃႇမိၼ်ႇ၊ ဢေႃႈ။ ၶဝ်ႁွတ်ႈၽႅဝ်ၵႂႃႇလႄႈၶဝ်ႈၸုၵ်းၵႃႈတီႈၽၢႆႇၼႃႈ ယူဝ်းသႅပ်ႈ၊ ဢေႃႈ။-
မိူဝ်ႈဢၼ် ယူဝ်းသႅပ်ႈ၊ ႁၼ် ပိၼ်ႇယႃႇမိၼ်ႇ၊ မီးလူၺ်ႈၶဝ်ၸိူဝ်းၼၼ်ႉၸိုင်၊မၼ်းလၢတ်ႈတီႈၶႃႈဢၼ်ၵွၼ်းႁိူၼ်းမၼ်းၼၼ်ႉလႄႈဝႃႈ၊ “ဢွၼ်ၶဝ်ၸိူဝ်းၼႆႉၵႂႃႇၵႃႈတီႈႁိူၼ်းၵဝ်တႃႉ။ ၶဝ်တေလႆႈၵိၼ်ၶဝ်ႈလူၺ်ႈၵဝ်ၶိင်ႇၵၢင်ဝၼ်းၼႆႉဢေႃႈ။ ၵႂႃႇႁႅမ်တူဝ်သတ်းသေလႄႈႁႅၼ်းၽိူၼ်ၶဝ်ႈပၼ်တႃႉ၊” ဝႃႈၼင်ႇၼႆဢေႃႈ။-
ၶႃႈၼၼ်ႉၵေႃႈႁဵတ်းသေလႄႈႁွင်ႉဢဝ်ၵူၼ်းၸိူဝ်းၼၼ်ႉၵႂႃႇၵႃႈတီႈႁိူၼ်း ယူဝ်းသႅပ်ႈ၊ ဢေႃႈ။
မိူဝ်ႈဢၼ်ၶဝ်ပီႈၼွင်ႉလႆႈၶၢမ်ႇတၢင်းဢၼ်ႁွင်ႉဢဝ်ၵႂႃႇၵႃႈတီႈႁိူၼ်း ယူဝ်းသႅပ်ႈ၊ ၼၼ်ႉၶဝ်ၵူဝ်ႁႄၼႃႇလႄႈထၢင်ႇဝႃႈ၊ “ၵွပ်ႈပိူဝ်ႈငိုၼ်းဢၼ်သႂ်ႇပႃးၼႂ်းထူင်ႁဝ်းပွၵ်ႈဢွၼ်တၢင်းၼၼ်ႉလႄႈ၊ၶဝ်ဢဝ်ႁဝ်းမႃးႁႂ်ႈလႆႈလေႃႇၽၢင်ႈသႂ်ႇႁဝ်းလႄႈသိမ်းဢဝ်မႃႉလီႈႁဝ်းသေယဝ်ႉ၊တေဢဝ်ႁဝ်းႁဵတ်းၶႃႈမၼ်းႁိုဝ်း၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၶဝ်တၵ်ႉလၢတ်ႈတေႃႇၶႃႈဢၼ်ၵွၼ်းႁိူၼ်းၼၼ်ႉၵႃႈတီႈႁိမ်းၽၵ်းတူႁိူၼ်းလႄႈဝႃႈ၊-
“ၸဝ်ႈ၊ၵမ်းဢွၼ်တၢင်းၼၼ်ႉႁဝ်းၶႃႈလူင်းမႃးသိုဝ်ႉတၢင်းၵိၼ်တၢင်းၶူပ်းပွၵ်ႈၼိုင်ႈယဝ်ႉဢေႃႈ။-
မိူဝ်ႈဢၼ်ႁဝ်းၶႃႈၶိုၼ်းမိူဝ်းၵႂႃႇလႄႈႁွတ်ႈထိုင်တီႈပၢင်လိုဝ်ႈသေၽုၺ်ႇထူင်ႁဝ်းၶႃႈၼၼ်ႉႁဝ်းၶႃႈထူပ်းႁၼ်ငိုၼ်းၽႂ်ငိုၼ်းမၼ်းယင်းဢမ်ႇယွမ်းသေဢိတ်းလႄႈမီးဝႆႉၵႃႈတီႈပၢၵ်ႇထူင်ႁဝ်းၶႃႈႁင်းၽႂ်ႁင်းမၼ်းဢေႃႈ။ ၽႂ်သႂ်ႇပၼ်ၵႂႃႇၵေႃႈႁဝ်းၶႃႈဢမ်ႇလႆႈႁုၶႃႈ။ ႁဝ်းၶႃႈဢဝ်ငိုၼ်းၼၼ်ႉၶိုၼ်းမႃးပၼ်ဢေႃႈ။-
ႁဝ်းၶႃႈသမ်ႉဢဝ်ငိုၼ်းပႃးမႃးထႅင်ႈႁႂ်ႈလႆႈသိုဝ်ႉတၢင်းၵိၼ်တၢင်းၶူပ်း ဢိတ်းဢီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၶႃႈၼၼ်ႉၶိုၼ်းလၢတ်ႈဝႃႈ၊ “ယႃႇပေမႆႈၸႂ်၊ယႃႇပေၵူဝ်။ တေပဵၼ်ၽြႃးပဵၼ်ၸဝ်ႈသူ၊ၽြႃးပဵၼ်ၸဝ်ႈပေႃႈသူၼၼ်ႉၶိုၼ်းသႂ်ႇငိုၼ်းသူၸိူဝ်းၼၼ်ႉပၼ်ဢေႃႈ။ ၵဝ်လႆႈႁပ်ႉဢဝ်ၵႃႈၶၼ်တီႈသူယဝ်ႉယဝ်ႉ၊” ဝႃႈၼင်ႇၼႆသေလႄႈဢဝ် သိမုၼ်ႇ၊ ဢွၵ်ႇလႄႈဢၢပ်ႈပၼ်တီႈၶဝ်ဢေႃႈ။
ၶႃႈၼၼ်ႉၸင်ႇႁွင်ႉဢဝ်ၶဝ်ၶဝ်ႈႁိူၼ်းသေယဝ်ႉ၊ဢဝ်ၼမ်ႉပၼ်ႁႂ်ႈၶဝ်သုၵ်ႈတိၼ်ဢေႃႈ။ မႃႉလီႈၶဝ်ၸိူဝ်းၼၼ်ႉၵေႃႈမၼ်းဢွႆႇပၼ်ဢေႃႈ။-
ၶဝ်လႆႈငိၼ်းဝႃႈ ယူဝ်းသႅပ်ႈ၊ တေမႃးၵိၼ်ၶဝ်ႈလူၺ်ႈၶဝ်ဝႃႈၼႆၼၼ်ႉလႄႈ၊ၶဝ်ဢွၼ်ၵၼ်ႁႅၼ်းလၢၵ်ႈသွင်ႇဝႆႉထႃႈႁႂ်ႈလႆႈသၢၵ်ႈပၼ် ယူဝ်းသႅပ်ႈ၊ မိူဝ်ႈဢၼ်မၼ်းမႃးၼၼ်ႉဢေႃႈ။-
မိူဝ်ႈဢၼ် ယူဝ်းသႅပ်ႈ၊ ၶဝ်ႈႁိူၼ်းမႃးၼၼ်ႉၸိုင်၊ၶဝ်ႁွပ်ႇပႃးလၢၵ်ႈသွင်ႇၶဝ်ၵႂႃႇၵႃႈၼႂ်းႁိူၼ်းၸူးတီႈ ယူဝ်းသႅပ်ႈ၊ သေလႄႈၶုပ်ႉမူပ်ႇၵွမ်းႁူဝ်ၵႃႈၼိူဝ်လိၼ်ၽၢႆႇၼႃႈမၼ်းဢေႃႈ။-
မၼ်းတူင်ႉတၵ်ႉၵႂၢမ်းယူႇလီၵိၼ်ဝၢၼ်လႄႈထၢမ်ဝႃႈ၊ “ၵမ်းဢွၼ်တၢင်းၼၼ်ႉသူမွၵ်ႇလၢတ်ႈၵဝ်လွင်ႈပေႃႈၵူၼ်းထဝ်ႈသူဢေႃႈ။ မၼ်းဢသၢၵ်ႈလိပ်းယူႇႁိုဝ်း။ ယူႇလီၵိၼ်ဝၢၼ်ယူႇႁိုဝ်း၊” ဝႃႈၼင်ႇၼႆဢေႃႈ။
ၶဝ်ၵေႃႈဢွၼ်ၵၼ်လၢတ်ႈလႄႈဝႃႈ၊ “ၶႃႈၸဝ်ႈႁဝ်းဢၼ်ပဵၼ်ပေႃႈႁဝ်းၶႃႈၼၼ်ႉဢသၢၵ်ႈလိပ်းယူႇလႄႈ၊ယူႇလီၵိၼ်ဝၢၼ်ယူႇၶႃႈဢေႃႈ၊” ဝႃႈၼင်ႇၼႆသေယဝ်ႉ၊သမ်ႉဢွၼ်ၵၼ်ၶုပ်ႉၶဝ်ႇၵွမ်းႁူဝ်ၶဝ်ၽၢႆႇၼႃႈမၼ်းဢေႃႈ။
မိူဝ်ႈဢၼ် ယူဝ်းသႅပ်ႈ၊ မုင်ႈႁၼ်ၼွင်ႉၸၢႆးဢွၵ်ႇမၼ်း ပိၼ်ႇယႃႇမိၼ်ႇ၊ ၵေႃႉဢၼ်ပဵၼ်လုၵ်ႈၸၢႆးမႄႈမၼ်းၼၼ်ႉၸိုင်၊မၼ်းလၢတ်ႈလႄႈဝႃႈ၊ “ၵေႃႉၼႆႉပဵၼ်ၼွင်ႉၸၢႆးၵွႆသူဢၼ်သူလၢတ်ႈၵဝ်ၵမ်းဢွၼ်တၢင်းၼၼ်ႉႁိုဝ်း။ လုၵ်ႈၸၢႆးၵဝ်႟။ ႁႂ်ႈၽြႃးပဵၼ်ၸဝ်ႈပၼ်တၢင်းလီတီႈမႂ်းသေၵမ်းလူၺ်ႈ၊” ဝႃႈၼင်ႇၼႆဢေႃႈ။-
မိူဝ်ႈဢၼ်မၼ်းလႆႈႁၼ်ၼွင်ႉၸၢႆးဢွၵ်ႇမၼ်းၼၼ်ႉၵွပ်ႈပိူဝ်ႈႁူဝ်ၸႂ်မၼ်းမီးတၢင်းႁၵ်ႉတၢင်းပႅင်းၼွင်ႉမၼ်းယႂ်ႇၼႃႇလူင်လၢင်လႄႈလုၵ်ႉဢွၵ်ႇၵႂႃႇၶဝ်ႈၼႂ်းႁွင်ႈၼွၼ်းမၼ်းၵမ်းလဵဝ်လႄႈၼမ်ႉတႃတူၵ်းယူႇဢေႃႈ။-
မၼ်းၸင်ႇသုၵ်ႈၼႃႈသုၵ်ႈတႃသေယဝ်ႉ၊ၶိုၼ်းဢွၵ်ႇမႃးလႄႈၵၼ်ႈၸႂ်ၵၼ်ႈၶေႃးၶျႃးဢမိင်ႉဝႃႈ၊ “ႁႅၼ်းၽိူၼ်ၶဝ်ႈပၼ်တႃႉ၊” ဝႃႈၼင်ႇၼႆဢေႃႈ။-
ၶဝ်ႁႅၼ်းပၼ်ပုၼ်ႈ ယူဝ်းသႅပ်ႈ၊ ၽိူၼ်ၼိုင်ႈပုၼ်ႈပီႈၼွင်ႉမၼ်းၸိူဝ်းၼၼ်ႉၽိူၼ်ၼိုင်ႈပုၼ်ႈၵူၼ်း ဢေးၵျိပ်ႉ၊ ဢၼ်တေၵိၼ်ၸွမ်းမၼ်းၸိူဝ်းၼၼ်ႉၽိူၼ်ၼိုင်ႈႁင်းၽႂ်ႁင်းမၼ်းဢေႃႈ။ ၶဝ်ႁဵတ်းၸိူဝ်ႉၼင်ႇၼၼ်ၵွပ်ႈပိူဝ်ႈၵူၼ်း ဢေးၵျိပ်ႉ၊ ၶဝ်ထၢင်ႇလဵၵ်ႉတေႃႇၵူၼ်း ႁေႇပြႄး၊ လႄႈၶဝ်ယူၵ်ႉတူဝ်ၸဝ်ႈၵဝ်ႇသုင်လႄႈဢမ်ႇၵိၼ်ၸွမ်းၶဝ်ဢေႃႈ။-
ၶဝ်ပီႈၼွင်ႉလႆႈၼင်ႈတေႃႇၼႃႈၵၼ်တင်း ယူဝ်းသႅပ်ႈ၊ ၼင်ႈတၢမ်းၵၼ်ၸွမ်းၼင်ႇဢသၢၵ်ႈၵေႃႉယႂ်ႇတေႃႇႁွတ်ႈၵေႃႉလဵၵ်ႉသုတ်းဢေႃႈ။ မိူဝ်ႈဢၼ်ၶဝ်ႁုႁၼ်လၢႆးဢၼ်ၶဝ်ၼင်ႈတၢမ်းၵၼ်ၸိူဝ်ႉၼင်ႇၼၼ်ၼၼ်ႉၶဝ်တူၺ်းၼႃႈၵၼ်လႄႈဢၢမ်းဢေႃႈ။-
တၢင်းၵိၼ်ၸိူဝ်းၼၼ်ႉလႆႈဢဝ်ၵႃႈတီႈၽိူၼ် ယူဝ်းသႅပ်ႈ၊ ယိုၼ်ႈပၼ်ၶဝ်လႄႈ ပိၼ်ႇယႃႇမိၼ်ႇ၊ လႆႈၶၢမ်ႇဢဝ်ၼမ်သေပီႈဢၢႆႈမၼ်းၸိူဝ်းၼၼ်ႉႁႃႈပုၼ်ႈဢေႃႈ။ ၶဝ်ဢွၼ်ၵၼ်ၵိၼ်သူတ်ႉလူၺ်ႈ ယူဝ်းသႅပ်ႈ၊ တေႃႇႁွတ်ႈပေႃးမူၼ်ႈပျေႃႇၼႃႇဢေႃႈ။
ယူဝ်းသႅပ်ႈ၊ မီးဢမိင်ႉတီႈၶႃႈဢၼ်ၵွၼ်းႁိူၼ်းၼၼ်ႉလႄႈဝႃႈ၊ “ဢဝ်တၢင်းၵိၼ်ၵႃႈဢၼ်ၶဝ်ဢဝ်ပႄႉလႆႈၼၼ်ႉသႂ်ႇပၼ်ၵႃႈၼႂ်းထူင်ၶဝ်တႃႉ။ ဢဝ်ငိုၼ်းၽႂ်ငိုၼ်းမၼ်းၶိုၼ်းသႂ်ႇပၼ်တီႈပၢၵ်ႇထူင်ၶဝ်တႃႉ။-
ဢဝ်ၵွၵ်းငိုၼ်းၵဝ်ၼၼ်ႉသႂ်ႇပၼ်တီႈပၢၵ်ႇထူင်ၼွင်ႉၸၢႆးၵေႃႉလိုၼ်းၶဝ်၊ႁူမ်ႈလူၺ်ႈၵၼ်တင်းငိုၼ်းပုၼ်ႈၵႃႈၶဝ်ႈၵျုင်ႇမၼ်းၼၼ်ႉတႃႉ၊” ဝႃႈၼင်ႇၼႆလႄႈ၊ၵႃႈဢၼ်သင်ႇလၢတ်ႈၼၼ်ႉၶႃႈမၼ်းၵေႃႈႁဵတ်းၸွမ်းဢေႃႈ။-
ၶိင်ႇၵၢင်ၼႂ်ၸဝ်ႉၸဝ်ႉၶဝ်ပီႈၼွင်ႉလႆႈၶၢမ်ႇတၢင်းဢၼ်ပွႆႇမိူဝ်းၵႂႃႇႁူမ်ႈလူၺ်ႈၵၼ်တင်းမႃႉလီႈၶဝ်ဢေႃႈ။-
မိူဝ်ႈဢၼ်ၶဝ်ဢွၵ်ႇဝဵင်းၵႂႃႇယင်းဢမ်ႇပႆႇႁွတ်ႈၵႆၵႆၼၼ်ႉ ယူဝ်းသႅပ်ႈ၊ လၢတ်ႈတီႈၶႃႈဢၼ်ၵွၼ်းႁိူၼ်းမၼ်းၼၼ်ႉလႄႈဝႃႈ၊ “လိုပ်ႈၸွမ်းၵႂႃႇၽႂ်းၽႂ်းတႃႉ။ မိူဝ်ႈဢၼ်ၶိုတ်းၶဝ်ၼၼ်ႉထၢမ်ၶဝ်လႄႈဝႃႈ၊ ‘ႁဵတ်းသင်လႄႈသူဢဝ်လွင်ႈဢၼ်ဢမ်ႇလီဢမ်ႇငၢမ်းမႃးတႅၼ်းပၼ်ပုၼ်ႈဢၼ်လီဢၼ်ငၢမ်းၸိူဝ်ႉၼင်ႇၼႆ။-
ၵွၵ်းၼၼ်ႉၸဝ်ႈၵဝ်သုင်းတိုဝ်းမိူဝ်ႈဢၼ်မၼ်းၸဝ်ႈၵိၼ်ၼမ်ႉဢိၵ်ႇတင်းမိူဝ်ႈဢၼ်မၼ်းၸဝ်ႈႁဵတ်းတၢင်းဢၼ်တႂၢၵ်ႈဢၼ်ႁေႃးၼၼ်ႉဢေႃႈ။ သူပူၼ်ႉလိူဝ်ဢမုဢၼ်ၼၵ်းၼႃႇၼၼ်ႉယဝ်ႉ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၶႃႈၼၼ်ႉၶိုတ်းၵႂႃႇၸိုင်၊မၼ်းထၢမ်ၶဝ်ၸွမ်းၼင်ႇၵႂၢမ်းဢၼ်သင်ႇလၢတ်ႈဝႆႉၼၼ်ႉဢေႃႈ။-
ၶဝ်ဢွၼ်ၵၼ်ၶိုၼ်းလၢတ်ႈတီႈမၼ်းလႄႈဝႃႈ၊ “ႁဵတ်းသင်ၸဝ်ႈလၢတ်ႈၵႂၢမ်းၸိူဝ်ႉၼင်ႇၼႆၶႃႈ၊ႁဝ်းၶႃႈႁတ်းတိူင်ႇဝႃႈ၊ႁဝ်းၶႃႈဢမ်ႇလႆႈႁဵတ်းလွင်ႈၸိူဝ်ႉၼင်ႇၼႆၶႃႈဢေႃႈ။-
ငိုၼ်းဢၼ်ႁဝ်းၶႃႈထူပ်းႁၼ်တီႈပၢၵ်ႇထူင်ႁဝ်းၵမ်းဢွၼ်တၢင်းၼၼ်ႉႁဝ်းၶႃႈယင်းလုၵ်ႉတီႈမိူင်း ၶႃႇၼၼ်ႇ၊ သေဢဝ်မႃးၶိုၼ်းဢၢပ်ႈပၼ်ၼၼ်ႉၸဝ်ႈႁုယူႇဢေႃႈ။ ပေႃးပဵၼ်ၼႆၸိုင်၊ႁဝ်းၶႃႈတေဢဝ်ငိုၼ်းၶမ်းၵႃႈၼႂ်းႁိူၼ်းၸဝ်ႈႁဝ်းၼၼ်ႉၸိူဝ်ႉၼင်ႇႁိုဝ်ၶႃႈ။-
ၵႃႈၼႂ်းႁဝ်းၶႃႈၸိူဝ်းၼႆႉပေႃးဝႃႈၸဝ်ႈထူပ်းႁၼ်ၵွၵ်းငိုၼ်းၼၼ်ႉၵႃႈတီႈၽႂ်ၵေႃႈဢဝ်မၼ်းတၢႆလႄႈႁဝ်းၶႃႈၸိူဝ်းၼႆႉသမ်ႉတေၶၢမ်ႇႁဵတ်းၶႃႈတီႈၸဝ်ႈႁဝ်းဢေႃႈ၊” ဝႃႈၼင်ႇၼႆဢေႃႈ။
ၵေႃႉၼၼ်ႉၶိုၼ်းလၢတ်ႈလႄႈဝႃႈ၊ “လီယဝ်ႉ။ ၵဝ်ၽွမ်ႉၵႂၢမ်းသူယဝ်ႉ။ ၵူၺ်းၵႃႈ၊ၵေႃႉဢၼ်ဢဝ်ၵွၵ်းၼႆႉၵူၺ်းတေလႆႈပဵၼ်ၶႃႈၵဝ်လႄႈသူၵူႈၵေႃႉၸိုင်၊တေလႆႈၵႂႃႇလွတ်ႈလွတ်ႈလႅဝ်းလႅဝ်းဢေႃႈ၊” ဝႃႈၼင်ႇၼႆဢေႃႈ။-
ႁဵတ်းၼၼ်လႄႈၶဝ်ဢွၼ်ၵၼ်ၼႅတ်ႈပူတ်းလင်မႃႉလီႈၶဝ်သေယဝ်ႉ၊ၽုၺ်ႇထူင်ၽႂ်ထူင်မၼ်းဝႆႉဢေႃႈ။-
ၶႃႈၵူၼ်းၸႂ်ႉ ယူဝ်းသႅပ်ႈ၊ ၼၼ်ႉတႄႇၸႃႉသွၵ်ႈႁႃတီႈထူင်ၵေႃႉယႂ်ႇတေႃႇႁွတ်ႈၵေႃႉလဵၵ်ႉသုတ်းလႄႈထူပ်းႁၼ်ၵွၵ်းၼၼ်ႉၵႃႈၼႂ်းထူင် ပိၼ်ႇယႃႇမိၼ်ႇ၊ ဢေႃႈ။-
မိူဝ်ႈၼၼ်ႉၶဝ်ပီႈၼွင်ႉထိုင်ၶူမ်ၸႂ်ၶူမ်ၶေႃးၼႃႇလႄႈၸၵ်ႉသိၵ်ႇသိူဝ်ႈၶဝ်ဢေႃႈ။ ၶဝ်ဢွၼ်ၵၼ်ၶိုၼ်းႁႅၼ်းၶူဝ်းတၢင်ႇမႃႉလီႈၶဝ်သေယဝ်ႉ၊ၶိုၼ်းၶဝ်ႈဝဵင်းၵႂႃႇဢေႃႈ။
ယၢမ်းမိူဝ်ႈဢၼ် ယုတႃႉ၊ ဢိၵ်ႇတင်းပီႈၼွင်ႉမၼ်းတင်းလၢႆၶိုၼ်းၽႅဝ်ႁိူၼ်း ယူဝ်းသႅပ်ႈ၊ မႃးၼၼ်ႉ၊ ယူဝ်းသႅပ်ႈ၊ ယင်းမီးယူႇၵႃႈၼႂ်းႁိူၼ်းဢေႃႈ။ ၶဝ်ဢွၼ်ၵၼ်ၶုပ်ႉမူပ်ႇၵွမ်းႁူဝ်ၽၢႆႇၼႃႈမၼ်းဢေႃႈ။-
ယူဝ်းသႅပ်ႈ၊ လၢတ်ႈတီႈၶဝ်လႄႈဝႃႈ၊ “သူႁဵတ်းၵႃႈသင်ၼႆႉ၊သူဢမ်ႇႁုလွင်ႈဢၼ်ၵူၼ်းၸၢႆးၸိူဝ်ႉၼင်ႇၵဝ်ၼႆႉမေႃတၢင်းဢၼ်တႂၢၵ်ႈဢၼ်ႁေႃးၼၼ်ႉႁိုဝ်း၊” ဝႃႈၼင်ႇၼႆဢေႃႈ။
ယုတႃႉ၊ ၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈႁဝ်းၶႃႈတီႈၶႃႈ႟။ ၶႃႈၸဝ်ႈႁဝ်းၶဝ်တၵ်းၶိုၼ်းလၢတ်ႈတီႈၸဝ်ႈႁဝ်းၸိူဝ်ႉၼင်ႇႁိုဝ်လႆႈတီႈၶႃႈ။ ၶႃႈၸဝ်ႈႁဝ်းၶဝ်တေႁဵတ်းၸိူဝ်ႉၼင်ႇႁိုဝ်တွပ်ႇထဵင်ၸဝ်ႈႁဝ်းလႆႈတီႈၶႃႈ။ တၵ်းႁဵတ်းၸိူဝ်ႉၼင်ႇႁိုဝ်ႁႂ်ႈလွတ်ႈဢပျတ်ႈလႆႈတီႈၶႃႈ၊ၽြႃးပဵၼ်ၸဝ်ႈထူပ်းႁၼ်ဢပျတ်ႈၶႃႈၸဝ်ႈႁဝ်းၸိူဝ်းၼႆႉယဝ်ႉတီႈၶႃႈယဝ်ႉ။ ၵႃႈတီႈၵေႃႉဢၼ်လႆႈထူပ်းႁၼ်ၵွၵ်းဢိၵ်ႇတင်းၶႃႈၸဝ်ႈႁဝ်းၶဝ်ၸိူဝ်းၼႆႉၵူႈၵေႃႉ၊ပဵၼ်ၶႃႈၸဝ်ႈႁဝ်းယဝ်ႉၶႃႈဢေႃႈ၊” ဝႃႈၼင်ႇၼႆဢေႃႈ။
ယူဝ်းသႅပ်ႈ၊ ၵေႃႈလၢတ်ႈလႄႈဝႃႈ၊ “ဢမ်ႇၸႂ်ႈၸိူဝ်ႉၼင်ႇၼၼ်ၵဝ်တိုၼ်းဢမ်ႇႁဵတ်းမဵဝ်းၼၼ်ႉလႆႈ။ ၵေႃႉဢၼ်ၶႃႈၵဝ်ထူပ်းႁၼ်ၵွၵ်းၵႃႈတီႈမၼ်းၼၼ်ႉၵူၺ်းတေလႆႈပဵၼ်ၶႃႈၵဝ်လႄႈ၊သူၸိူဝ်းၼႆႉမိူဝ်းၵႂႃႇၸူးတီႈပေႃႈသူလွတ်ႈလွတ်ႈလႅဝ်းလႅဝ်းတႃႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ယုတႃႉ၊ သုတ်ႉၶဝ်ႈၸူးတီႈ ယူဝ်းသႅပ်ႈ၊ လႄႈလဝ်ႈလၢတ်ႈဝႃႈ၊ “ၸဝ်ႈႁဝ်းၶႃႈတီႈၶႃႈ။ ႁႂ်ႈၶႃႈၸဝ်ႈလႆႈလဝ်ႈထိုင်ၸဝ်ႈႁဝ်းသေၵမ်းတီႈၶႃႈ၊ယႃႇပေၶႂ်ႈၸႃႉၵဝ်ၶႃႈသေၵမ်းၶႃႈ။ ၸဝ်ႈႁဝ်းပဵၼ်မိူၼ်ၼင်ႇၶုၼ်ႁေႃၶမ်းတီႈၶႃႈယဝ်ႉဢေႃႈ။-
ပွၵ်ႈၼၼ်ႉၸဝ်ႈႁဝ်းထၢမ်လႄႈဝႃႈ၊ ‘ၸွင်ႇသူမီးပေႃႈႁိုဝ်း။ မီးၼွင်ႉၸၢႆးႁိုဝ်း၊’ ဝႃႈၼင်ႇၼႆလႄႈ။-
ၶႃႈၸဝ်ႈႁဝ်းၶဝ်ၶိုၼ်းလၢတ်ႈဝႃႈ၊ ‘မီးပေႃႈၵူၼ်းထဝ်ႈၶႃႈဢေႃႈ။ ၼွင်ႉၸၢႆးၵေႃႉလိုၼ်းႁဝ်းၼႆႉၵိူတ်ႇမိူဝ်ႈဢၼ်ဢသၢၵ်ႈပေႃႈႁဝ်းၶႃႈထဝ်ႈၼႃႇယဝ်ႉၼၼ်ႉၶႃႈဢေႃႈ။ ပီႈဢၢႆႈမၼ်းၼၼ်ႉတၢႆယဝ်ႉလႄႈ၊ၼႂ်းၶဝ်ပီႈၼွင်ႉဢၼ်ႁူမ်ႈမႄႈၵၼ်ၼၼ်ႉၵိုတ်းၵျၢၼ်ႇမၼ်းၵေႃႉလဵဝ်ၵူၺ်းၶႃႈယဝ်ႉ။ ပေႃႈမၼ်းႁၵ်ႉမၼ်းၼႃႇၶႃႈဢေႃႈ၊’ ဝႃႈၼင်ႇၼႆၶႃႈယဝ်ႉ။-
ၸဝ်ႈႁဝ်းၶႃႈသမ်ႉၸႂ်ႉႁႂ်ႈႁဝ်းၶႃႈႁွင်ႉမၼ်းမႃးၼႄၸဝ်ႈႁဝ်းၶႃႈလႄႈ။-
ၶႃႈၸဝ်ႈႁဝ်းၶဝ်တွင်းပၢၼ်ႇတီႈၸဝ်ႈႁဝ်းၶႃႈဝႃႈ၊ ‘မၼ်းဢမ်ႇၽၢတ်ႇပေႃႈမၼ်းလႆႈတီႈၶႃႈ။ ပေႃးၽၢတ်ႇၸိုင်၊ပေႃႈမၼ်းတေတၢႆၵူၺ်းၶႃႈယဝ်ႉ၊’ ဝႃႈၼင်ႇၼႆၶႃႈယဝ်ႉဢေႃႈ။-
ၸဝ်ႈႁဝ်းၶႃႈသမ်ႉလၢတ်ႈဝႃႈ၊ ‘ပေႃးသူယင်းဢမ်ႇႁွင်ႉၼွင်ႉၸၢႆးၵေႃႉလိုၼ်းသူမႃးလႆႈၸိုင်၊သူတေဢမ်ႇမီးဢၶႂၢင်ႉၶဝ်ႈၸူးၵႃႈတီႈၽၢႆႇၼႃႈၵဝ်၊’ ဝႃႈၼင်ႇၼႆၶႃႈဢေႃႈ။
“မိူဝ်ႈဢၼ်ႁဝ်းၶႃႈၶိုၼ်းမိူဝ်းၵႂႃႇထိုင်တီႈပေႃႈၶႃႈၸဝ်ႈႁဝ်းၶဝ်ဢၼ်ပဵၼ်ၶႃႈၸဝ်ႈႁဝ်းၼၼ်ႉၸိုင်၊ၶႃႈၸဝ်ႈႁဝ်းၶဝ်ဢဝ်ၵႂၢမ်းၵႃႈဢၼ်ၸဝ်ႈႁဝ်းၶႃႈမီးဢမိင်ႉၼၼ်ႉမွၵ်ႇလၢတ်ႈထိုင်မၼ်းဢေႃႈ။-
လိုၼ်းၼၼ်ႉမၼ်းသမ်ႉၶိုၼ်းၸႂ်ႉႁႂ်ႈၶႃႈၸဝ်ႈႁဝ်းၶဝ်မႃးသိုဝ်ႉတၢင်းၵိၼ်ထႅင်ႈဢေႃႈ။-
ၶႃႈၸဝ်ႈႁဝ်းၶဝ်ၵေႃႈဝႃႈ၊ ‘ႁဝ်းၶႃႈဢမ်ႇၸၢင်ႈၵႂႃႇၶႃႈ။ ပေႃးယင်းဢမ်ႇပႃးၼွင်ႉၸၢႆးၵေႃႉလိုၼ်းႁဝ်းၶႃႈၵႂႃႇၸိုင်၊တေဢမ်ႇလႆႈၶဝ်ႈၸူးၽၢႆႇၼႃႈၸဝ်ႈၼၼ်ႉၶႃႈ။ မိူဝ်ႈလႂ်ၼွင်ႉၸၢႆးၵေႃႉလိုၼ်းႁဝ်းၶႃႈပႃးၵႂႃႇၸွမ်းၸင်ႇႁဝ်းၶႃႈတေၸၢင်ႈၵႂႃႇၶႃႈဢေႃႈ၊’ ဝႃႈၼင်ႇၼႆဢေႃႈ။-
ပေႃႈၶႃႈၸဝ်ႈႁဝ်းၶဝ်ၵေႃႈလၢတ်ႈလႄႈဝႃႈ၊ ‘ၸွမ်းၵႃႈၼင်ႇဢၼ်သူႁုၼၼ်ႉမေးၵဝ် ရႃႇၶေႇလႃႉ၊ ၵိူတ်ႇလဵင်ႉလုၵ်ႈၸၢႆးပၼ်ၵဝ်သွင်ၵေႃႉၵူၺ်းၼၼ်ႉဢေႃႈ။-
ၵေႃႉၼိုင်ႈဢွၵ်ႇသေၵႃႈတီႈၵဝ်ၵႂႃႇယဝ်ႉ။ မၼ်းလႆႈၶၢမ်ႇတၢင်းဢၼ်တူဝ်ထိူၼ်ႇႁၢႆႉလႂ်ၶူပ်းယွႆႈၶူပ်းၶၢတ်ႇပႅတ်ႈယဝ်ႉ။ ၸႃႉၸဵမ်မိူဝ်ႈၼၼ်ႉလႄႈၵဝ်ဢမ်ႇလႆႈႁၼ်မၼ်းယဝ်ႉ။-
ၵေႃႉၼႆႉၵေႃႈပေႃးသူဢဝ်ၵႂႃႇလႄႈမၼ်းထူပ်းၽေးသေၸိူဝ်ႉသေမဵဝ်းၸိုင်၊ပဵၼ်တၢင်းဢၼ်သူဢဝ်တၢင်းဢၼ်မႆႈၸႂ်ၶီၸႂ်သႂ်ႇတီႈႁူဝ်ႁွၵ်ႇၵဝ်ၼႆႉႁႂ်ႈလူင်းႁွတ်ႈထိုင်မိူင်းမရၼႃႉၵူၺ်းယဝ်ႉ၊’ ဝႃႈၼင်ႇၼႆဢေႃႈ။
“ၸဝ်ႈႁဝ်းတီႈၶႃႈ႟။ တေႃႈလဵဝ်ၼႆႉပေႃးၶႃႈၸဝ်ႈယင်းဢမ်ႇပႃးဢဝ်ၼွင်ႉၸၢႆးဢွၼ်ႇၼႆႉမိူဝ်းၵႂႃႇတီႈပေႃႈၶႃႈၸဝ်ႈႁဝ်းၶဝ်လႄႈ၊မိူဝ်ႈဢၼ်မၼ်းႁုႁၼ်ၼွင်ႉၸၢႆးဢွၼ်ႇဢမ်ႇပႃးၸွမ်းၵႂႃႇၼၼ်ႉၸိုင်၊မၼ်းတေတၢႆၵူၺ်းၶႃႈယဝ်ႉဢေႃႈ။-
ဢသၢၵ်ႈပေႃႈထဝ်ႈၶႃႈၸဝ်ႈႁဝ်းၶဝ်ၸိူဝ်းၼႆႉတႄႇၼိူဝ်ဢသၢၵ်ႈၼွင်ႉၸၢႆးဢွၼ်ႇၼႆႉၵူၺ်းၶႃႈလႄႈၶႃႈၸဝ်ႈႁဝ်းၶဝ်ၸိူဝ်းၼႆႉတေဢဝ်တၢင်းဢၼ်မႆႈၸႂ်ၶီၸႂ်လႄႈႁဵတ်းႁႂ်ႈမၼ်းလူင်းႁွတ်ႈထိုင်မိူင်းမရၼႃႉၵူၺ်းၶႃႈယဝ်ႉ။-
လိူဝ်တွၼ်းၼႃႇသေပိူၼ်ႈ၊ၶႃႈၸဝ်ႈပဵၼ်ၵေႃႉဢၼ်ၶၢမ်ႇဢဝ်တႃႇဝုၼ်ႇပုၼ်ႈၽွၼ်းၼွင်ႉၸၢႆးသေၵႃႈတီႈပေႃႈၶႃႈၸဝ်ႈႁဝ်းၶဝ်မႃးၶႃႈဢေႃႈ။ ၶႃႈၸဝ်ႈဢႃႇမႃႉၶၢမ်ႇႁပ်ႉႁွင်းဝႃႈ၊ပေႃးၼွင်ႉၸၢႆးဢွၼ်ႇႁဝ်းဢမ်ႇႁွတ်ႈထိုင်တီႈမၼ်းၶိုၼ်းၸိုင်၊ႁႂ်ႈပဵၼ်ဢပျတ်ႈတူၵ်းၵႃႈၼိူဝ်ၸူဝ်ႈတႃႇဢသၢၵ်ႈၵဝ်ၶႃႈဢေႃႈ။-
ၸဝ်ႈႁဝ်းတီႈၶႃႈ႟။ တေႃႈလဵဝ်ၼႆႉႁႂ်ႈၶႃႈၸဝ်ႈလႆႈၶၢမ်ႇႁဵတ်းၶႃႈတီႈၸဝ်ႈႁဝ်းတၢင်တူဝ်ၵေႃႉဢွၼ်ႇၼႆႉသေၵမ်းတီႈၶႃႈ။ ပွႆႇႁႂ်ႈမၼ်းမိူဝ်းၵႂႃႇၸွမ်းပီႈဢၢႆႈမၼ်းတင်းလၢႆသေၵမ်းတီႈၶႃႈ။-
ပေႃးၼွင်ႉၸၢႆးဢွၼ်ႇၼႆႉယင်းဢမ်ႇပႃးတင်းၶႃႈၸဝ်ႈၸိုင်၊တေႁဵတ်းႁိုဝ်မိူဝ်းၵႂႃႇၸူးတီႈပေႃႈၶႃႈၸဝ်ႈႁဝ်းၶဝ်လႆႈၶႃႈ။ ၽေးဢုပၢတ်ႈဢၼ်တေတူၵ်းၵႃႈၼိူဝ်ပေႃႈၶႃႈၸဝ်ႈၼၼ်ႉၸိုင်၊ၶႃႈၸဝ်ႈဢမ်ႇတူၺ်းလႆႈတီႈၶႃႈ၊” ဝႃႈၼင်ႇၼႆဢေႃႈ။
ယူဝ်းသႅပ်ႈ၊ ၼၼ်ႉမိူဝ်ႈဢၼ်မၼ်းဢမ်ႇၵၼ်ႈဢမ်ႇၶျုၵ်ႈဢဵင်ႇသရေႇမၼ်းလႆႈၼၼ်ႉၸိုင်၊မၼ်းပၼ်ဢမိင်ႉတီႈၶႃႈၵူၼ်းၸႂ်ႉမၼ်းတင်းမူတ်းဝႃႈ၊ “ႁႂ်ႈၵူၼ်းၵူႈၵေႃႉဢွၵ်ႇၵႂႃႇတႃႉ၊” ဝႃႈၼင်ႇၼႆဢေႃႈ။ မိူဝ်ႈဢၼ်ၵူၼ်းတၢင်ႇၵေႃႉဢမ်ႇမီးသေၵေႃႉယဝ်ႉၼၼ်ႉ မၼ်းမွၵ်ႇလၢတ်ႈလွင်ႈဢၼ်မၼ်းပဵၼ်ၽူႈလႂ်ၼၼ်ႉတီႈပီႈဢၢႆႈမၼ်းတင်းလၢႆဢေႃႈ။-
မၼ်းႁွင်ႉႁႆႈတင်းသဵင်ႁႅင်းၼႃႇလူင်လၢင်တေႃႇထိုင်ႁွတ်ႈၵူၼ်း ဢေးၵျိပ်ႉ၊ လႄႈၶႃႈၸဝ်ႈၽွင်းမိူင်းၼႂ်းႁၢင်ႈၼႂ်းႁေႃၶဝ်လႆႈငိၼ်းမူတ်းဢေႃႈ။-
ယူဝ်းသႅပ်ႈ၊ လၢတ်ႈတီႈပီႈဢၢႆႈမၼ်းၸိူဝ်းၼၼ်ႉလႄႈဝႃႈ၊ “ၵဝ်ၶႃႈပဵၼ် ယူဝ်းသႅပ်ႈ၊ ဢေႃႈ။ ပေႃႈၵဝ်ၶႃႈယင်းဢသၢၵ်ႈလိပ်းယူႇၶႃႈႁိုဝ်း၊” ဝႃႈၼင်ႇၼႆဢေႃႈ။ ၵူၺ်းၵႃႈ၊မိူဝ်ႈဢၼ်ပီႈဢၢႆႈမၼ်းၸိူဝ်းၼၼ်ႉငိၼ်းၸိုင်၊ၶဝ်ၵူဝ်ႁႄၼႃႇထၢၼ်ႈပေႃးဢမ်ႇၸၢင်ႈၶိုၼ်းတွပ်ႇၶိုၼ်းလၢတ်ႈၵႃႈသင်ယဝ်ႉဢေႃႈ။-
ယူဝ်းသႅပ်ႈ၊ ၸင်ႇလၢတ်ႈလႄႈဝႃႈ၊ “သုတ်ႉမႃးၸမ်ၸမ်ၶႃႈတႃႉ၊” ဝႃႈၼင်ႇၼႆလႄႈ၊ၶဝ်ဢွၼ်ၵၼ်သုတ်ႉၸူးၸမ်ၸမ်ဢေႃႈ။ မၼ်းလၢတ်ႈလႄႈဝႃႈ၊ “ၵဝ်ၶႃႈပဵၼ်ၼွင်ႉၸၢႆးသူ ယူဝ်းသႅပ်ႈ၊ ဢၼ်သူၶၢႆၵႂႃႇၵႃႈတီႈမိူင်း ဢေးၵျိပ်ႉ၊ ၼၼ်ႉဢေႃႈ။-
တေႃႈလဵဝ်ၼႆႉယႃႇပေမႆႈၸႂ်လႄႈတၢင်ႇဢပျတ်ႈတီႈတူဝ်ၸဝ်ႈၵဝ်ႇလူၺ်ႈလွင်ႈဢၼ်လႆႈၶၢႆတူဝ်ၵဝ်ၶႃႈထိုင်မႃးၵႃႈတီႈၼႆႈၼၼ်ႉသေၵမ်း။ ႁႂ်ႈလႆႈၸွႆႈထႅမ်ဢသၢၵ်ႈပိူၼ်ႈၸိုင်၊ၽြႃးပဵၼ်ၸဝ်ႈပွႆႇၸႂ်ႉၵဝ်ၶႃႈမႃးဢွၼ်တၢင်းသူဢမၢၼ်ႇၶၼ်ပဵၼ်ဢေႃႈ။-
ပီဢၼ်ၶဝ်ႈၵႃႈမၢၵ်ႇပႅင်းၼၼ်ႉမီးသွင်ပီယဝ်ႉဢေႃႈ။ ပီဢၼ်တေဢမ်ႇၸၢင်ႈႁဵတ်းၼႃးဢမ်ႇၸၢင်ႈလႆႈပၢတ်ႇၶဝ်ႈသိမ်းၶဝ်ႈၼၼ်ႉယင်းတေမီးထႅင်ႈႁႃႈပီလူးၵွၼ်ႇဢေႃႈ။-
ၽြႃးပဵၼ်ၸဝ်ႈသူင်ႇၵဝ်ၶႃႈမႃးဢွၼ်တၢင်းသူၼႆႉပဵၼ်ဢၼ်လၢၵ်ႇလၢႆးလီဢၢမ်းၼႃႇပုၼ်ႈတၵ်းလႆႈၵႄႇသႄႇဢသၢၵ်ႈသူၼင်ႇႁိုဝ်ၸိူဝ်ႉၶိူဝ်းသူတေဢမ်ႇၶၢတ်ႇပႅတ်ႈသေၵႃႈၼိူဝ်လိၼ်မိူင်းၼႆႉၵႂႃႇၼၼ်ႉယဝ်ႉ။-
ပိူဝ်ႈၼႆလႄႈသူပဵၼ်ၵေႃႉသူင်ႇၵဝ်ၶႃႈမႃးၵႃႈတီႈၼႆႈဢမ်ႇၸႂ်ႈၵူၺ်း။ ပဵၼ်ၽြႃးပဵၼ်ၸဝ်ႈသူင်ႇဢေႃႈ။ ၽြႃးပဵၼ်ၸဝ်ႈၶၢၼ်းၵဝ်ဝႆႉမိူၼ်ၼႂ်းဢရႃႇပေႃႈၶုၼ်ႁေႃၶမ်းႁႂ်ႈလႆႈဢုပ်ႉပိူင်ႇၼႂ်းႁၢင်ႈၼႂ်းႁေႃၸဝ်ႈတင်းလူင်လႄႈ၊လႆႈပဵၼ်ၶုၼ်မိူင်း ဢေးၵျိပ်ႉ၊ တင်းမိူင်းဢေႃႈ။
“တေႃႈလဵဝ်ၼႆႉမိူဝ်းၵႂႃႇၵႃႈတီႈပေႃႈၵဝ်ၶႃႈၶၼ်ၶၼ်ၽႂ်းၽႂ်းလႄႈမွၵ်ႇလၢတ်ႈၵႂၢမ်းဢၼ်လုၵ်ႈၸၢႆးမၼ်း ယူဝ်းသႅပ်ႈ၊ သင်ႇလၢတ်ႈမႃးလႄႈဝႃႈ၊ ‘ၽြႃးပဵၼ်ၸဝ်ႈၶၢၼ်းၵဝ်ၶႃႈဝႆႉၼႂ်းဢရႃႇၶုၼ်လူင်ဢၼ်ဢုပ်ႉပိူင်ႇမိူင်း ဢေးၵျိပ်ႉ၊ တင်းမိူင်းၼႆႉယဝ်ႉ။ ယင်းဢမ်ႇႁဵတ်းထိူင်းႁဵတ်းၼၢၼ်းလႄႈမႃးၸူးၵဝ်တီႈၶႃႈသေၵမ်း။-
ပေႃႈႁဝ်းတေလႆႈယူႇၵႃႈတီႈဢိူင်ႇ ၵေႃးသိၼ်း၊ တီႈဢၼ်ၸမ်ၵၼ်တင်းၵဝ်ၶႃႈၼၼ်ႉဢေႃႈ။ ၸႃႉၸဵမ်ပေႃႈႁဝ်းလုၵ်ႈလၢၼ်ပေႃႈႁဝ်း၊ၽုင်သူဝ်းၽုင်ဝူဝ်းပေႃႈႁဝ်းတင်းလၢႆဢိၵ်ႇတင်းဢုၵ်ႉၸႃႇၶူဝ်းၶွင်ငိုၼ်းၶမ်းၵႃႈဢၼ်ပေႃႈႁဝ်းမီးတင်းသဵင်ႈတင်းလူင်ၸိူဝ်းၼၼ်ႉဢဝ်ပႃးမႃးၸွမ်းသေၵမ်း။-
ပေႃး၊ပေႃႈႁဝ်းမႃးယူႇၵႃႈတီႈဢိူင်ႇ ၵေႃးသိၼ်း၊ ၸိုင်၊ၵဝ်ၶႃႈတၵ်းလႆႈလုမ်းလႃးငၢႆႈဢေႃႈ။ တၢင်းဢၼ်ၶဝ်ႈၵႃႈမၢၵ်ႇပႅင်းၼႆႉယင်းမီးထႅင်ႈႁႃႈပီလူးၵွၼ်ႇဢေႃႈ။ ၵဝ်ၶႃႈဢမ်ႇၶႂ်ႈႁႂ်ႈပေႃႈႁဝ်းလႄႈၵူၼ်းႁိူၼ်းၵူၼ်းယေးပေႃႈႁဝ်းဢိၵ်ႇတင်းၵႃႈဢၼ်မီးတီႈပေႃႈႁဝ်းတင်းသဵင်ႈတင်းလူင်လႆႈဢိုပ်းလႆႈယၢၵ်ႈတီႈၶႃႈ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
“တေႃႈလဵဝ်ၼႆႉသူၵူႈၵေႃႉပႃးၸဵမ်ၼွင်ႉၸၢႆးၵဝ်ၶႃႈ ပိၼ်ႇယႃႇမိၼ်ႇ၊ လႆႈႁုလႆႈႁၼ်ၵဝ်ၶႃႈပဵၼ် ယူဝ်းသႅပ်ႈ၊ ဢမၢၼ်ႇတႄႉယဝ်ႉလႄႈ၊-
လွင်ႈဢၼ်ၵဝ်ၶႃႈမီးဢႃႇၼႃႇတၼ်းၶူဝ်းၵႃႈၼႂ်းမိူင်း ဢေးၵျိပ်ႉ၊ ၼႆႉထၼ်ႇႁိုဝ်လႄႈ၊လွင်ႈတၢင်းၵႃႈဢၼ်သူလႆႈႁၼ်ၵႃႈမီးတင်းသဵင်ႈတင်းလူင်ၸိူဝ်းၼႆႉလၢတ်ႈၼႄပေႃႈႁဝ်းသေၵမ်း။ ၵွပ်ႈၼႆလႄႈႁဵတ်းၶၼ်ၶၼ်ၽႂ်းၽႂ်းသေႁွင်ႉဢဝ်ပေႃႈႁဝ်းမႃးၵႃႈတီႈၼႆႈတႃႉ၊” ဝႃႈၼင်ႇၼႆဢေႃႈ။
မၼ်းၸင်ႇၵွတ်ႇၶေႃးၼွင်ႉၸၢႆးမၼ်း ပိၼ်ႇယႃႇမိၼ်ႇ၊ လႄႈႁွင်ႉႁႆႈဢေႃႈ။ ပိၼ်ႇယႃႇမိၼ်ႇ၊ ၵေႃႈၵွတ်ႇမၼ်းသေႁွင်ႉႁႆႈဢေႃႈ။-
ၵမ်းၼၼ်ႉ မၼ်းယင်းတိုၵ်ႉႁႆႈယူႇလႄႈၵွတ်ႇၶေႃးပီႈဢၢႆႈမၼ်းၵေႃႉၼိုင်ႈယဝ်ႉၵေႃႉၼိုင်ႈလႄႈၸုပ်ႇၼူမ်ၶဝ်ဢေႃႈ။ လိုၼ်းၼၼ်ႉ၊ၶဝ်ပီႈၼွင်ႉဢွၼ်ၵၼ်ဢုပ်ႇၵုမ်လၢတ်ႈတေႃႇၵၼ်ဢေႃႈ။
သတၢင်းသဵင်ၶၢဝ်ႇလွင်ႈဢၼ်ပီႈၼွင်ႉ ယူဝ်းသႅပ်ႈ၊ မႃးၼၼ်ႉႁွတ်ႈထိုင်ၵႂႃႇၵႃႈတီႈၶုၼ်ႁေႃၶမ်း ဢိၵ်ႇတင်းၵႃႈတီႈမူးမၢတ်ႈၽွင်းမိူင်းမၼ်းၸဝ်ႈတင်းလၢႆလႄႈၶဝ်ဢွၼ်ၵၼ်ၸူမ်းတွၼ်ႈဢေႃႈ။-
ၶုၼ်ႁေႃၶမ်းမီးဢမိင်ႉတီႈ ယူဝ်းသႅပ်ႈ၊ လႄႈဝႃႈ၊ “လၢတ်ႈႁႂ်ႈပီႈဢၢႆႈမႂ်းတင်းလၢႆႁႅၼ်းၶူဝ်းတၢင်ႇမႃႉလီႈလႂ်လႄႈၶိုၼ်းမိူဝ်းၵႂႃႇၵႃႈတီႈမိူင်း ၶႃႇၼၼ်ႇ၊ လူးၵွၼ်ႇတႃႉ။-
ႁႂ်ႈၶဝ်ၵႂႃႇဢဝ်ပေႃႈသူဢိၵ်ႇတင်းၵူၼ်းႁိူၼ်းၵူၼ်းယေးမၼ်းတင်းလၢႆမႃးၵႃႈတီႈၵဝ်ၼႆႉတႃႉ။ ၵဝ်တၵ်းပၼ်တီႈလိၼ်ဢၼ်လီသေပိူၼ်ႈၵႃႈၼႂ်းမိူင်း ဢေးၵျိပ်ႉ၊ ၼႆႉလႄႈၶဝ်တေလႆႈလီလႆႈပဵၼ်လူၺ်ႈၶွၼ်ႇၼမ်ႉမၼ်းလိၼ်မိူင်းၼႆႉဢေႃႈ။-
ၸႂ်ႉႁႂ်ႈၶဝ်ဢဝ်လေႃႉမႃႉၵႃႈၼႂ်းမိူင်း ဢေးၵျိပ်ႉ၊ ၼႆႉၵႂႃႇႁပ်ႉဢဝ်မေးၶဝ်လုၵ်ႈၶဝ်တင်းသဵင်ႈတင်းလူင်လႄႈပႃးဢဝ်တင်းပေႃႈသူမႃးတႃႉ။-
ယႃႇပေႁႂ်ႈၶဝ်သေလၢႆဢုၵ်ႉၸႃႇၶူဝ်းလဵင်းၶဝ်၊ၶွင်လီၵႃႈၼႂ်းမိူင်း ဢေးၵျိပ်ႉ၊ ၼႆႉတၵ်းပဵၼ်ၶွင်ၶဝ်ဢေႃႈ၊” ဝႃႈၼင်ႇၼႆဢေႃႈ။
လုၵ်ႈၸၢႆး ယႃႇၵုပ်ႈ၊ ၸိူဝ်းၼၼ်ႉဢွၼ်ၵၼ်ႁဵတ်းၸွမ်းၸိူဝ်ႉၼင်ႇၼၼ်လႄႈ၊ ယူဝ်းသႅပ်ႈ၊ ၵေႃႈၵႃႈၼင်ႇဢၼ်ဢမိင်ႉၸဝ်ႈမီးၼၼ်ႉ၊ဢဝ်လေႃႉမႃႉလႂ်၊တင်းၶဝ်ႈၼမ်ႉတၢင်းၵိၼ်ပုၼ်ႈတၵ်းၵိၼ်ၵႂႃႇၸွမ်းတၢင်းၼၼ်ႉသႂ်ႇပၼ်ၵႂႃႇဢေႃႈ။-
လိူဝ်သေၼၼ်ႉမၼ်းဢဝ်ၶူဝ်းၼုင်ႈပုတ်ႈလၢႆႈပၼ်ယေႈၵေႃႉယေႈၸုမ်ႇဢေႃႈ။ တီႈ ပိၼ်ႇယႃႇမိၼ်ႇ၊ သမ်ႉပၼ်ၶူဝ်းၼုင်ႈႁႃႈၸုမ်ႇဢိၵ်ႇတင်းငိုၼ်းသၢမ်ပၢၵ်ႇၵျၢပ်ႈဢေႃႈ။-
တီႈပေႃႈမၼ်းၵေႃႈဢဝ်ၵုၼ်ႇၶူဝ်းဢၼ်လီသေပိူၼ်ႈၼႂ်းမိူင်း ဢေးၵျိပ်ႉ၊ ၼၼ်ႉႁႅၼ်းတၢင်ႇပၼ်မႃႉလီႈသိပ်းလင်ဢိၵ်ႇတင်းၶဝ်ႈၵျုင်ႇသိပ်းလင်ဢိၵ်ႇတင်းၶဝ်ႈမုၼ်းတင်းတၢင်းၵိၼ်ၵူႈၸိူဝ်ႉၵူႈမဵဝ်းပၼ်ၵႂႃႇပုၼ်ႈတႃႇတေၵိၼ်ၵႂႃႇၸွမ်းၼႂ်းၶၢဝ်းတၢင်းၶဝ်ၼၼ်ႉဢေႃႈ။-
မိူဝ်ႈဢၼ်မၼ်းပွႆႇပီႈၼွင်ႉမၼ်းဢွၵ်ႇမိူဝ်းၵႂႃႇၼၼ်ႉမၼ်းသင်ႇလၢတ်ႈဝႃႈ၊ “ယႃႇပေၽိတ်းၵၼ်ၸွမ်းတၢင်းၵႂႃႇသေၵမ်း၊” ဝႃႈၼင်ႇၼႆဢေႃႈ။
ၶဝ်ဢွၼ်ၵၼ်ဢွၵ်ႇသေမိူင်း ဢေးၵျိပ်ႉ၊ လႄႈမိူဝ်းၵႂႃႇၸူးတီႈပေႃႈၶဝ် ယႃႇၵုပ်ႈ၊ ၼႂ်းမိူင်း ၶႃႇၼၼ်ႇ၊ ပုၼ်ႉသေယဝ်ႉ၊-
ၶဝ်ဢွၼ်ၵၼ်ၶႆႈၼႄပေႃႈၶဝ်လႄႈဝႃႈ၊ “ ယူဝ်းသႅပ်ႈ၊ ယင်းဢသၢၵ်ႈလိပ်းယူႇဢေႃႈ။ မၼ်းပဵၼ်ၶုၼ်ၼႂ်းမိူင်း ဢေးၵျိပ်ႉ၊ ယူႇဢေႃႈ၊” ဝႃႈၼင်ႇၼႆဢေႃႈ။ ယႃႇၵုပ်ႈ၊ ၼၼ်ႉႁူဝ်ၸႂ်ၵတ်းၵႂႃႇမူၺ်ႈၵႂႃႇလႄႈဢမ်ႇၸၢင်ႈယုမ်ႇၵႂၢမ်းၶဝ်ၼၼ်ႉလႆႈဢေႃႈ။
ၵူၺ်းၵႃႈ၊မိူဝ်ႈဢၼ်ၶဝ်သမ်ႉမွၵ်ႇလၢတ်ႈၵႂၢမ်းဢၼ် ယူဝ်းသႅပ်ႈ၊ သင်ႇမႃးၸိူဝ်းၼၼ်ႉဢိၵ်ႇတင်းမိူဝ်ႈဢၼ်မၼ်းလႆႈႁၼ်လေႃႉမႃႉဢၼ် ယူဝ်းသႅပ်ႈ၊ ပွႆႇၸႂ်ႉႁႂ်ႈမႃးႁပ်ႉၵႂႃႇယူႇၵႃႈတီႈမိူင်း ဢေးၵျိပ်ႉ၊ ၸိူဝ်းၼၼ်ႉၸိုင်၊ႁူဝ်ၸႂ်မၼ်းၶိုၼ်းၼိမ်လီမႃးဢေႃႈ။-
မၼ်းလၢတ်ႈလႄႈဝႃႈ၊ “ပေႃးၵွၼ်ႇတႃႉ။ လုၵ်ႈၸၢႆးၵဝ် ယူဝ်းသႅပ်ႈ၊ ယင်းဢသၢၵ်ႈလိပ်းယူႇဢေႃႈ။ ဢၼ်ၵဝ်မုင်ႈမွင်းၼႆႉ၊ၸူဝ်ႈဢၼ်ၵဝ်ဢမ်ႇပႆႇတၢႆၸိုင်၊ႁႂ်ႈၵဝ်လႆႈၵႂႃႇထူပ်းႁၼ်မၼ်းသေၵမ်း၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ယႃႇၵုပ်ႈ၊ ႁႅၼ်းၶူဝ်းႁႅၼ်းလဵင်းၵႃႈဢၼ်မၼ်းမီးတင်းသဵင်ႈတင်းလူင်လႄႈဢွၵ်ႇၵႂႃႇၸူးသဵၼ်ႈတၢင်း ပေႇရသေးၽႃႉ၊ သေယဝ်ႉ၊ႁဵတ်းဝၢတ်ႈသၢၵ်ႈၵၢပ်ႈတၢင်းလူႇတီႈၽြႃးပဵၼ်ၸဝ်ႈပေႃႈမၼ်း ဢိၸၢၵ်ႈ၊ ၼၼ်ႉဢေႃႈ။-
ၶိင်ႇၵၢင်ၶိုၼ်းၽြႃးပဵၼ်ၸဝ်ႈလၢတ်ႈတေႃႇမၼ်းၼႂ်းရူႇပႃႇရူင်ႇလႄႈႁွင်ႉမၼ်းလႄႈဝႃႈ၊ “ ယႃႇၵုပ်ႈ၊ ႟၊ ယႃႇၵုပ်ႈ၊ ႟၊” ဝႃႈၼင်ႇၼႆဢေႃႈ။ မၼ်းၵေႃႈတွပ်ႇလႄႈဝႃႈ၊ “ဢေႃႈၶႃႈ။ ၶႃႈၸဝ်ႈမီးယူႇၶႃႈဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၵေႃႈလၢတ်ႈလႄႈဝႃႈ၊ “ၵဝ်ပဵၼ်ၽြႃးပဵၼ်ၸဝ်ႈ၊ၽြႃးပေႃႈမႂ်းၼၼ်ႉဢေႃႈ။ ယႃႇပေၵူဝ်တႃႇတေၵႂႃႇၵႃႈတီႈမိူင်း ဢေးၵျိပ်ႉ၊ ၼၼ်ႉ။ ၵဝ်တၵ်းႁႂ်ႈမႂ်းပဵၼ်ၵူၼ်းမဵဝ်းယႂ်ႇမဵဝ်းလူင်ၵႃႈတီႈၼၼ်ႈဢေႃႈ။-
ၵဝ်တၵ်းၵႂႃႇလူၺ်ႈၵၼ်တင်းမႂ်းၵႃႈတီႈမိူင်း ဢေးၵျိပ်ႉ၊ ဢေႃႈ။ ၵမ်းလိုၼ်းၵဝ်တၵ်းဢဝ်မႂ်းၶိုၼ်းမႃးလူးၵွၼ်ႇဢေႃႈ။ ယူဝ်းသႅပ်ႈ၊ တေလႆႈဢဝ်မိုဝ်းမၼ်းလုပ်ႈတႃမႂ်းမိူဝ်ႈဢၼ်မႂ်းလိုမ်းမိူင်းၵႂႃႇၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ယႃႇၵုပ်ႈ၊ ဢွၵ်ႇသေၵႃႈတီႈ ပေႇရသေးၽႃႉ၊ ၵႂႃႇလႄႈလုၵ်ႈၸၢႆး ယႃႇၵုပ်ႈ၊ ၸိူဝ်းၼၼ်ႉဢွၼ်ၵၼ်ဢဝ်ၸႃႉၸဵမ်ပေႃႈၶဝ်လႄႈလုၵ်ႈဢွၼ်ႇၶဝ်လႂ်၊တင်းမေးၶဝ်လႂ်၊တၢင်ႇၵႃႈၼိူဝ်လေႃႉမႃႉၸိူဝ်းဢၼ်ၶုၼ်ႁေႃၶမ်းမိူင်း ဢေးၵျိပ်ႉ၊ သူင်ႇမႃးပုၼ်ႈတႃႇၶဝ်တေၶီႇၵႂႃႇၼၼ်ႉဢေႃႈ။-
ၶဝ်ဢွၼ်ၵၼ်ဢဝ်တူဝ်သတ်းၶဝ်ဢိၵ်ႇတင်းဢုၵ်ႉၸႃႇၶူဝ်းလဵင်းၶဝ်၊ၵႃႈဢၼ်ၶဝ်မၢၵ်ႈမီးၵႃႈတီႈမိူင်း ၶႃႇၼၼ်ႇ၊ ၼၼ်ႉ၊-
ပႃးၸဵမ်လုၵ်ႈၸၢႆးလုၵ်ႈယိင်းၶဝ်လႂ်၊ဢိၵ်ႇတင်းလၢၼ်ၸၢႆးလၢၼ်ယိင်းၶဝ်လႂ်၊ၸိူဝ်ႉၶိူဝ်းမၼ်းတင်းသဵင်ႈတင်းလူင်သေလႄႈၵႂႃႇၵႃႈတီႈမိူင်း ဢေးၵျိပ်ႉ၊ ဢေႃႈ။
ၸိုဝ်ႈသဵင်လုၵ်ႈလၢၼ် ယႃႇၵုပ်ႈ၊ ဢၼ်ႁွတ်ႈထိုင်ၵႃႈတီႈမိူင်း ဢေးၵျိပ်ႉ၊ ႁူမ်ႈလူၺ်ႈၵၼ်တင်း ယႃႇၵုပ်ႈ၊ ၸမ်ႉ၊လုၵ်ႈၸၢႆးမၼ်း ရုပိၼ်ႇ၊-
ဢိၵ်ႇတင်းလုၵ်ႈၸၢႆး ရုပိၼ်ႇ၊ႁႃႇၼုတ်ႉ၊ၽႃႇလု၊ႁေႇၸရုၼ်ႇ၊ ဢိၵ်ႇတင်း ၵႃႇမိ၊ ဢေႃႈ။-
သိမုၼ်ႇ၊ တင်းလုၵ်ႈၸၢႆးမၼ်း ယေႇမူၺ်ႇလႃႉ၊ယႃႇမိၼ်ႇ၊ဢေႃးႁတ်ႉ၊ယႃႇၶိၼ်ႇ၊ၸေႃးႁႃႇ၊ ဢိၵ်ႇတင်း သေႃးလႃႉ၊ လုၵ်ႈၸၢႆးမႄႈယိင်းမဵဝ်း ၶႃႇၼၼိ၊ ၼၼ်ႉဢေႃႈ။-
လေႇဝိ၊ တင်းလုၵ်ႈၸၢႆးမၼ်း ၵေႇရသုၼ်ႇ၊ၵေႃႇႁတ်ႉ၊ ဢိၵ်ႇတင်း မေႇရႃႇရိ၊ ဢေႃႈ။-
ယုတႃႉ၊ တင်းလုၵ်ႈၸၢႆးမၼ်း ဢေးရႃႉ၊ဢေႃးၼၼ်ႇ၊သေးလႃႉ၊ၽေးရိတ်ႉ၊ ဢိၵ်ႇတင်း ၸေးရႃႉ၊ ဢေႃႈ။ ဢေးရႃႉ၊ ဢိၵ်ႇတင်း ဢေႃးၼၼ်ႇ၊ ၸမ်ႉ၊တၢႆၵႃႈတီႈမိူင်း ၶႃႇၼၼ်ႇ၊ ယဝ်ႉလႄႈ၊ ၽေးရိတ်ႉ၊ မီးလုၵ်ႈၸၢႆး ႁေႇၸရုၼ်ႇ၊ ဢိၵ်ႇတင်း ႁႃႇမုလႃႉ၊ ၵူၺ်းဢေႃႈ။-
ဢိသၶႃႇ၊ တင်းလုၵ်ႈၸၢႆးမၼ်း တေႃးလႃႉ၊ၽုဝႃႇ၊ယေႃးၽႃႉ၊ ဢိၵ်ႇတင်း သိမရုၼ်ႇ၊ ဢေႃႈ။-
ၸေႇပုလုၼ်ႇ၊ တင်းလုၵ်ႈၸၢႆးမၼ်း သရိတ်ႉ၊ဢေႇလုၼ်ႇ၊ ဢိၵ်ႇတင်း ယႃႇလေးလႃႉ၊ ဢေႃႈ။-
ၶဝ်ၸိူဝ်းၼႆႉပဵၼ်လုၵ်ႈၸၢႆးဢၼ်ၵိူတ်ႇလဵင်ႉမႃးတီႈ လေးဢႃႇ၊ လႄႈယင်းမီးထႅင်ႈလုၵ်ႈယိင်းမၼ်း တိၼႃႉ၊ ၵႃႈၼႂ်းမိူင်း မေႇသူဝ်ႇပူဝ်ႇတေးမီးယႃး၊ ၼႆႉ၊ၸဵမ်လုၵ်ႈၸၢႆးလုၵ်ႈယိင်းတင်းလၢၼ်လႂ်၊မီးသၢမ်သိပ်းပၢႆသၢမ်ၵေႃႉဢေႃႈ။
ၵၢတ်ႉ၊ တင်းလုၵ်ႈၸၢႆးမၼ်း ၸိၽျုၼ်ႇ၊ႁၵ်ႉၵိ၊သုၼိ၊ဢေးၸပုၼ်ႇ၊ဢေးရိ၊ဢရေႃးတိ၊ ဢိၵ်ႇတင်း ဢရေးလိတ်ႉ၊ ဢေႃႈ။-
ဢႃႇသျႃႇ၊ တင်းလုၵ်ႈၸၢႆးမၼ်း ဢိမၼႃႉ၊ဢိသွႃႇ၊ဢိသဝီႇ၊ပေႇရိယႃႉ၊ တင်းၼွင်ႉယိင်းၶဝ် ၸေးရႃႉ၊ ဢေႃႈ။ ပေႇရိယႃႉ၊ မီးလုၵ်ႈၸၢႆး ႁေႇပႃႇ၊ ဢိၵ်ႇတင်း ပႃႇလၶျေးလႃႉ၊ ဢေႃႈ။-
ၶဝ်သိပ်းႁူၵ်းၵေႃႉပဵၼ်လုၵ်ႈလၢၼ် ယႃႇၵုပ်ႈ၊ ဢၼ်ၵိူတ်ႇမႃးတီႈ ၸိလပႃႉ၊ ၶႃႈၵူၼ်းယိင်း လေးဢႃႇ၊ ဢၼ်ပေႃႈမၼ်း လႃႇပၢၼ်ႇ၊ ဢၢပ်ႈပၼ်တီႈမၼ်းၼၼ်ႉဢေႃႈ။
ရႃႇၶေႇလႃႉ၊ မေး ယႃႇၵုပ်ႈ၊ ၵိူတ်ႇလဵင်ႉလုၵ်ႈၸၢႆး ယူဝ်းသႅပ်ႈ၊ တင်း ပိၼ်ႇယႃႇမိၼ်ႇ၊ ဢေႃႈ။-
ၵႃႈၼႂ်းမိူင်း ဢေးၵျိပ်ႉ၊ ၼၼ်ႉ၊ ယူဝ်းသႅပ်ႈ၊ မီးလုၵ်ႈၸၢႆးဢၼ်ၵိူတ်ႇလဵင်ႉမႃးတီႈ ဢႃႇသၼတ်ႉ၊ လုၵ်ႈယိင်း ပေႃးတိၽေးရႃႉ၊ ယဵၸ်ႈပရေႃးႁဵၵ်ႈ ဝဵင်း ဢေႃးၼႃႉ၊ ၼၼ်ႉပဵၼ် မၼႃႇသေႇ၊ ဢိၵ်ႇတင်း ဢေႇၽရိမ်ႇ၊ ဢေႃႈ။-
လုၵ်ႈၸၢႆး ပိၼ်ႇယႃႇမိၼ်ႇ၊ ပဵၼ် ပေႇလႃႉ၊ပေႇၶႃႇ၊ဢႃႇသႃႉပေးလႃႉ၊ၵေးရႃႉ၊ၼေႇမၼ်ႇ၊ဢေးႁိ၊ရေႃးသႃႉ၊မုပဵမ်ႇ၊ႁုပိမ်ႇ၊ ဢိၵ်ႇတင်း ဢႃႇရတႃႉ၊ ဢေႃႈ။-
ၶဝ်သိပ်းသီႇၵေႃႉၼႆႉပဵၼ်လုၵ်ႈလၢၼ် ယႃႇၵုပ်ႈ၊ ဢၼ်ၵိူတ်ႇလဵင်ႉမႃးတီႈ ရႃႇၶေႇလႃႉ၊ ဢေႃႈ။
ၶဝ်ၸဵတ်းၵေႃႉၼႆႉပဵၼ်လုၵ်ႈလၢၼ် ယႃႇၵုပ်ႈ၊ ဢၼ်ၵိူတ်ႇလဵင်ႉမႃးတီႈ ပိလႁႃႇ၊ ၶႃႈၵူၼ်းယိင်း ရႃႇၶေႇလႃႉ၊ ဢၼ်ပေႃႈမၼ်း လႃႇပၢၼ်ႇ၊ ဢၢပ်ႈပၼ်တီႈမၼ်းၼၼ်ႉဢေႃႈ။
လုၵ်ႈပႂ်ႉ ယႃႇၵုပ်ႈ၊ ဢၼ်ဢမ်ႇပႆႇလႆႈၼပ်ႉဢၢၼ်ႇပႃးၵႃႈၼႂ်းၸိူဝ်ႉၸိူဝ်းဢၼ်သိုပ်ႇဢွၵ်ႇမႃးတီႈ ယႃႇၵုပ်ႈ၊ လႄႈၵႂႃႇလူၺ်ႈၵၼ်တင်းမၼ်းၵႃႈတီႈမိူင်း ဢေးၵျိပ်ႉ၊ ၼၼ်ႉမီးႁူၵ်းသိပ်းပၢႆႁူၵ်းၵေႃႉဢေႃႈ။-
ယူဝ်းသႅပ်ႈ၊ သမ်ႉမီးလုၵ်ႈၸၢႆးသွင်ၵေႃႉၵႃႈတီႈမိူင်း ဢေးၵျိပ်ႉ၊ လႄႈၸိူဝ်ႉၶိူဝ်း ယႃႇၵုပ်ႈ၊ ဢၼ်ႁွတ်ႈထိုင်မိူင်း ဢေးၵျိပ်ႉ၊ တင်းသဵင်ႈတင်းလူင်မီးၸဵတ်းသိပ်းၵေႃႉတဵမ်တဵမ်ဢေႃႈ။
ယႃႇၵုပ်ႈ၊ ပွႆႇၸႂ်ႉ ယုတႃႉ၊ ၵႂႃႇၸူးတီႈ ယူဝ်းသႅပ်ႈ၊ ဢွၼ်တၢင်းမၼ်းႁႂ်ႈလႆႈၵႂႃႇမွၵ်ႇလၢတ်ႈႁႂ်ႈမၼ်းမႃးႁူပ်ႉထူပ်းၶဝ်တီႈဢိူင်ႇ ၵေႃးသိၼ်း၊ ဢေႃႈ။ ၶဝ်ၵေႃႈႁွတ်ႈထိုင်ၵႂႃႇၵႃႈတီႈဢိူင်ႇ ၵေႃးသိၼ်း၊ လႄႈ၊-
ယူဝ်းသႅပ်ႈ၊ ၵေႃႈၶီႇလေႃႉရထႃးမႃႉမၼ်းၵႂႃႇၸူးတီႈဢိူင်ႇ ၵေႃးသိၼ်း၊ ႁႂ်ႈလႆႈႁူပ်ႉထူပ်းပေႃႈမၼ်းဢေႃႈ။ မိူဝ်ႈဢၼ်ၶဝ်ပေႃႈလုၵ်ႈႁူပ်ႉထူပ်းၵၼ်ၼၼ်ႉၸိုင်၊ ယူဝ်းသႅပ်ႈ၊ ၵွတ်ႇၶေႃးပေႃႈမၼ်းလႄႈႁွင်ႉႁႆႈယူႇႁိုင်ၼႃႇဢေႃႈ။-
ယႃႇၵုပ်ႈ၊ ၵေႃႈလၢတ်ႈတီႈ ယူဝ်းသႅပ်ႈ၊ လႄႈဝႃႈ၊ “ၵမ်းၼႆႉ၊ၵဝ်တၢႆပျေႃႇယဝ်ႉ။ ၵဝ်လႆႈႁၼ်ၼႃႈမႂ်းယဝ်ႉ။ မႂ်းၼႆႉဢသၢၵ်ႈယင်းလိပ်းယူႇဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ယူဝ်းသႅပ်ႈ၊ လၢတ်ႈတီႈပီႈဢၢႆႈမၼ်းတင်းလၢႆဢိၵ်ႇတင်းၵူၼ်းႁိူၼ်းၵူၼ်းယေးပေႃႈမၼ်းၸိူဝ်းၼၼ်ႉလႄႈဝႃႈ၊ “ၵဝ်ၶႃႈတေၵႂႃႇၸူးၵႃႈတီႈၶုၼ်ႁေႃၶမ်းလႄႈလဝ်ႈလၢတ်ႈတီႈမၼ်းၸဝ်ႈလွင်ႈဢၼ်ပီႈဢၢႆႈၵဝ်ၶႃႈတင်းလၢႆဢိၵ်ႇတင်းၵူၼ်းႁိူၼ်းၵူၼ်းယေးၵဝ်ၶႃႈဢၼ်ယူႇတီႈမိူင်း ၶႃႇၼၼ်ႇ၊ ၼၼ်ႉႁွတ်ႈၽႅဝ်မႃးၵႃႈတီႈၵဝ်ၶႃႈယဝ်ႉၼၼ်ႉဢေႃႈ။-
ၵဝ်ၶႃႈတေမွၵ်ႇလၢတ်ႈလွင်ႈဢၼ်သူပဵၼ်ၵူၼ်းလဵင်ႉသူဝ်းလႄႈပဵၼ်ၵူၼ်းဢၼ်ၸၢင်ႈလဵင်ႉတူဝ်တရိၵ်ႈသၢၼ်ႇၵိၼ်ၼၼ်ႉလႄႈသူပႃးဢဝ်ၸႃႉၸဵမ်ၽုင်သူဝ်းၽုင်ဝူဝ်းလႄႈၵႃႈဢၼ်သူမီးတင်းသဵင်ႈတင်းလူင်မႃးယဝ်ႉၼၼ်ႉဢေႃႈ။-
ပေႃးၶုၼ်ႁေႃၶမ်းႁွင်ႉထၢမ်လူၺ်ႈလွင်ႈသူႁဵတ်းၵၢၼ်ငၢၼ်းၵႃႈသင်ၵိၼ်ၼႆၸိုင်၊-
သူတေၶိုၼ်းလႆႈလဝ်ႈလၢတ်ႈလွင်ႈဢၼ်သူပဵၼ်ၵူၼ်းဢၼ်ၸၢင်ႈလဵင်ႉတူဝ်တရိၵ်ႈသၢၼ်ႇလႄႈလဵင်ႉတွင်ႉထူၼ်ႈၸူဝ်ႈဢသၢၵ်ႈမိူၼ်ၸိူဝ်ႉၼင်ႇပူႇပေႃႈသူၼၼ်ႉၵူၺ်းၼၼ်ႉဢေႃႈ။ ပေႃးႁဵတ်းၸိူဝ်ႉၼင်ႇၼႆၸိုင်၊တၵ်းလႆႈဢၶႂၢင်ႉဢၼ်ယူႇၵႃႈတီႈဢိူင်ႇ ၵေႃးသိၼ်း၊ ၼႆႉဢေႃႈ၊” ဝႃႈၼင်ႇၼႆဢေႃႈ။ ယူဝ်းသႅပ်ႈ၊ သင်ႇလၢတ်ႈၸိူဝ်ႉၼင်ႇၼႆ၊ၵွပ်ႈပိူဝ်ႈၵူၼ်းမဵဝ်း ဢေးၵျိပ်ႉ၊ ၶဝ်လီႁင်ႈဢဵတ်ႇသဵတ်ႇၵူၼ်းဢၼ်လဵင်ႉသူဝ်းၼၼ်ႉဢေႃႈ။
ႁဵတ်းၼၼ်လႄႈ ယူဝ်းသႅပ်ႈ၊ ၶဝ်ႈၸူးၽၢႆႇၼႃႈၶုၼ်ႁေႃၶမ်းမိူင်း ဢေးၵျိပ်ႉ၊ လႄႈတၢင်ႇလဝ်ႈဝႃႈ၊ “ပေႃႈၶႃႈၸဝ်ႈဢိၵ်ႇတင်းပီႈဢၢႆႈၶႃႈၸဝ်ႈတင်းလၢႆလုၵ်ႉသေၵႃႈတီႈမိူင်း ၶႃႇၼၼ်ႇ၊ ပႃးဢဝ်တင်းၽုင်သူဝ်းၽုင်ဝူဝ်းဢိၵ်ႇတင်းၵႃႈဢၼ်ၶဝ်မီးတင်းသဵင်ႈတင်းလူင်ႁွတ်ႈမႃးမီးယူႇၵႃႈတီႈဢိူင်ႇ ၵေႃးသိၼ်း၊ တီႈၶႃႈယဝ်ႉဢေႃႈ၊” ဝႃႈၼင်ႇၼႆသေယဝ်ႉ၊-
ဢဝ်ပီႈဢၢႆႈမၼ်းႁႃႈၵေႃႉသႂၢင်းၶဝ်ႈၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။-
ၶုၼ်ႁေႃၶမ်းၵေႃႈထၢမ်ၶဝ်လႄႈဝႃႈ၊ “သူၸၢင်ႈႁဵတ်းၵၢၼ်ငၢၼ်းဢီႈသင်ၵိၼ်၊” ဝႃႈၼင်ႇၼႆလႄႈ၊ၶဝ်ၵေႃႈၶိုၼ်းလဝ်ႈလၢတ်ႈဝႃႈ၊ “ၼေႃႈတီႈၶႃႈၸဝ်ႈ။ ၶႃႈၸဝ်ႈႁဝ်းၶဝ်ပဵၼ်ၵူၼ်းလဵင်ႉသူဝ်းၵိၼ်မိူၼ်ၸိူဝ်ႉၼင်ႇပူႇပေႃႈၶႃႈၸဝ်ႈႁဝ်းၶဝ်ၵူၺ်းတီႈၶႃႈဢေႃႈ၊” ဝႃႈၼင်ႇၼႆလႄႈ၊-
သမ်ႉတၢင်ႇလဝ်ႈထႅင်ႈလႄႈဝႃႈ၊ “ၵွပ်ႈပိူဝ်ႈမိူင်း ၶႃႇၼၼ်ႇ၊ ပဵၼ်ၶဝ်ႈၵႃႈမၢၵ်ႇပႅင်းၼႃႇဢႃးလႃးသေယဝ်ႉ၊ဢမ်ႇမီးပၢင်ႇယိူဝ်ႈပုၼ်ႈၽုင်သူဝ်းၽုင်ဝူဝ်းတၵ်းၵိၼ်ၼၼ်ႉလႄႈၶႃႈၸဝ်ႈႁဝ်းၶဝ်ၸိူဝ်းၼႆႉဢွၼ်ၵၼ်မႃးႁႂ်ႈလႆႈသွၼ်ႈပိုင်ႈၵႃႈၼႂ်းမိူင်းၸဝ်ႈႁဝ်းၶႃႈၼႆႉတီႈၶႃႈယဝ်ႉဢေႃႈ။ ၶႅၼ်းတေႃႈပၼ်ဢၶႂၢင်ႉႁႂ်ႈၶႃႈၸဝ်ႈႁဝ်းၶဝ်၊လႆႈယူႇၵႃႈတီႈဢိူင်ႇ ၵေႃးသိၼ်း၊ သေၵမ်းတီႈၶႃႈ၊” ဝႃႈၼင်ႇၼႆဢေႃႈ။-
ၶုၼ်ႁေႃၶမ်းၵေႃႈလၢတ်ႈတီႈ ယူဝ်းသႅပ်ႈ၊ လႄႈဝႃႈ၊ “ၵမ်းၼႆႉပေႃႈမႂ်းတင်းပီႈဢၢႆႈမႂ်းတင်းလၢႆႁွတ်ႈမႃးၵႃႈတီႈမႂ်းယဝ်ႉ။-
မိူင်း ဢေးၵျိပ်ႉ၊ မီးယူႇၽၢႆႇၼႃႈၶဝ်ယဝ်ႉ။ ႁႂ်ႈၶဝ်ၶျႃးတီႈယူႇၵႃႈတီႈဢိူင်ႇ ၵေႃးသိၼ်း၊ ထႃႇၼႃႉတီႈဢၼ်လိၼ်လီသေပိူၼ်ႈၼၼ်ႉတႃႉ။ ၵႃႈၼႂ်းၶဝ်ၼႆႉပေႃးၶဝ်မီးတၢင်းဢၼ်ၵတ်ႉၶၼ်ၸိုင်၊ၶၢၼ်းႁႂ်ႈၶဝ်ၵွၼ်းၽုင်တရိၵ်ႈသၢၼ်ႇၵဝ်တႃႉ၊” ဝႃႈၼင်ႇၼႆဢေႃႈ။
လိုၼ်းၼၼ်ႉ၊ ယူဝ်းသႅပ်ႈ၊ ႁွင်ႉဢဝ်ပေႃႈမၼ်း ယႃႇၵုပ်ႈ၊ မႃးၶဝ်ႈၸူးၽၢႆႇၼႃႈၶုၼ်ႁေႃၶမ်းလႄႈ ယႃႇၵုပ်ႈ၊ ၵေႃႈပၼ်တၢင်းလီတီႈၶုၼ်ႁေႃၶမ်းဢေႃႈ။-
ၶုၼ်ႁေႃၶမ်းၵေႃႈထၢမ်လႄႈဝႃႈ၊ “ဢသၢၵ်ႈမႂ်းမီးၵႃႈႁိုဝ်ယဝ်ႉ၊” ဝႃႈၼင်ႇၼႆဢေႃႈ။
ယႃႇၵုပ်ႈ၊ ၶိုၼ်းလဝ်ႈလၢတ်ႈဝႃႈ၊ “မိုဝ်ႉဝၼ်းၶူပ်ႇပီဢၼ်ၶႃႈၸဝ်ႈလႆႈလႄႇလၢဝ်းၵႂႃႇမႃးပဵၼ်ၶႅၵ်ႇယူႇၼၼ်ႉမီးပၢၵ်ႇပၢႆသၢမ်သိပ်းပီမိူင်းတီႈၶႃႈယဝ်ႉ။ ၶူပ်ႇၼီႈပီမိူင်းဢၼ်ၶႃႈၸဝ်ႈဢသၢၵ်ႈလိပ်းမႃးယဝ်ႉၼၼ်ႉၵေႇၼႃႇလႄႈၶၢၼ်ၸႂ်ၶႃႈဢေႃႈ။ ဢမ်ႇၶိုတ်းမိူဝ်ႈၸူဝ်ႈပူႇပၢၼ်မွၼ်ႇၶႃႈၸဝ်ႈဢၼ်ၶဝ်လႄႇလၢဝ်းပဵၼ်ၶႅၵ်ႇယူႇၼၼ်ႉလႆႈၶႃႈ၊” ဝႃႈၼင်ႇၼႆဢေႃႈ။-
ယႃႇၵုပ်ႈ၊ တၵ်ႉၼၢႆသူင်ႇၵႂၢမ်းမႅတ်ႈတႃႇပၼ်တၢင်းလီတီႈၶုၼ်ႁေႃၶမ်းသေလႄႈမိူဝ်းၵႂႃႇသေဢေႃႈ။-
ယူဝ်းသႅပ်ႈ၊ ၸင်ႇၶျႃးပၼ်တီႈယူႇတၼ်းသဝ်းပုၼ်ႈပေႃႈမၼ်းတင်းပီႈဢၢႆႈၼွင်ႉၸၢႆးမၼ်းႁႂ်ႈၶဝ်လႆႈပိူင်ႇထႃႇၼႃႉတီႈဢၼ်လိၼ်လီသေပိူၼ်ႈၵႃႈၼႂ်းမိူင်း ဢေးၵျိပ်ႉ၊ ၵႃႈႁိမ်းဝဵင်း ရႃႇမသိတ်ႈ၊ ၸွမ်းၼင်ႇဢမိင်ႉၶုၼ်ႁေႃၶမ်းမီးၼၼ်ႉသေဢေႃႈ။-
သမ်ႉဢဝ်ၶဝ်ႈၼမ်ႉတၢင်းၵိၼ်လဵင်ႉလူလုမ်းလႃးပေႃႈမၼ်း၊ဢိၵ်ႇတင်းပီႈဢၢႆႈၼွင်ႉၸၢႆးမၼ်းတင်းၵူၼ်းႁိူၼ်းၵူၼ်းယေးပေႃႈၶဝ်တင်းသဵင်ႈၸွမ်းၼင်ႇၵူၼ်းႁိူၼ်းမီးႁိူၼ်းၽႂ်ႁိူၼ်းမၼ်းၼၼ်ႉဢေႃႈ။
ၵွပ်ႈပိူဝ်ႈပဵၼ်တၢင်းဢၼ်ၶဝ်ႈၵႃႈမၢၵ်ႇပႅင်းႁႅင်းၼႃႇလူင်လၢင်လႄႈၵူႈတီႈၵူႈလႅၼ်ဢမ်ႇမီးတၢင်းၵိၼ်တၢင်းၶူပ်းလႃးလႃး၊ထၢၼ်ႈပေႃးၵူၼ်းမိူင်း ဢေးၵျိပ်ႉ၊ ဢိၵ်ႇတင်းၵူၼ်းမိူင်း ၶႃႇၼၼ်ႇ၊ ၶဝ်၊ႁႅင်းလႆႈဢူၼ်ႈၵႂႃႇၵွပ်ႈပိူဝ်ႈဢိုပ်းယၢၵ်ႈၼၼ်ႉဢေႃႈ။-
ငိုၼ်းၵႃႈၶဝ်ႈၵျုင်ႇဢၼ်ၵူၼ်းမိူင်းမႃးသိုဝ်ႉတင်းသဵင်ႈတင်းလူင်ၼၼ်ႉ၊ ယူဝ်းသႅပ်ႈ၊ ဢဝ်ၵႂႃႇသႂၢင်းၶဝ်ႈၵႃႈၼႂ်းႁေႃၶုၼ်ႁေႃၶမ်းသေဢေႃႈ။-
မိူဝ်ႈဢၼ်ငိုၼ်းၵႃႈဢၼ်မီးၵႃႈၼႂ်းမိူင်း ဢေးၵျိပ်ႉ၊ ဢိၵ်ႇတင်းမိူင်း ၶႃႇၼၼ်ႇ၊ သဵင်ႈယဝ်ႉၼၼ်ႉ၊ၵူၼ်းမဵဝ်း ဢေးၵျိပ်ႉ၊ ၶဝ်ဢွၼ်ၵၼ်မႃးၵႃႈတီႈ ယူဝ်းသႅပ်ႈ၊ လႄႈလၢတ်ႈဝႃႈ၊ “ၶႅၼ်းတေႃႈပၼ်တၢင်းၵိၼ်သေၵမ်းၶႃႈ။ ယႃႇပေပွႆႇႁဝ်းၶႃႈတၢႆလၢႆလၢႆသေၵမ်းၶႃႈ။ ငိုၼ်းႁဝ်းၶႃႈသဵင်ႈယဝ်ႉသေၵေႃႈႁဵတ်းပၼ်သေၸိူဝ်ႉသေမဵဝ်းသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ယူဝ်းသႅပ်ႈ၊ ၵေႃႈလၢတ်ႈလႄႈဝႃႈ၊ “ဢဝ်တရိၵ်ႈသၢၼ်ႇတူဝ်သတ်းသူမႃးပၼ်တႃႉ။ ပေႃးငိုၼ်းသူသဵင်ႈယဝ်ႉၵေႃႈၵဝ်တၵ်းဢဝ်တၢင်းၵိၼ်တၢင်းၶူပ်းလႅၵ်ႈပၼ်ပုၼ်ႈၵႃႈၶၼ်တူဝ်တရိၵ်ႈသၢၼ်ႇသူယူႇဢေႃႈ၊” ဝႃႈၼင်ႇၼႆဢေႃႈ။-
ၶဝ်ၸင်ႇဢဝ်တရိၵ်ႈသၢၼ်ႇၶဝ်မႃးပၼ် ယူဝ်းသႅပ်ႈ၊ လႄႈမၼ်းၵေႃႈလႅၵ်ႈပၼ်တၢင်းၵိၼ်ပုၼ်ႈၵႃႈၶၼ်မႃႉ၊သူဝ်း၊ပႄႉ၊ဝူဝ်း၊မႃႉလီႈၶဝ်ၼၼ်ႉဢေႃႈ။ ပီၼၼ်ႉမၼ်းဢဝ်တၢင်းၵိၼ်လႅၵ်ႈပုၼ်ႈၵႃႈၶၼ်တရိၵ်ႈသၢၼ်ႇၶဝ်သေလႄႈလဵင်ႉလူၶဝ်ဢေႃႈ။
ႁွတ်ႈထိုင်ပီၼႃႈမႃးၶဝ်ဢွၼ်ၵၼ်မႃးတီႈမၼ်းလႄႈလဝ်ႈလၢတ်ႈဝႃႈ၊ “ၶႃႈၸဝ်ႈႁဝ်းၶဝ်ၸိူဝ်းၼႆႉဢမ်ႇသိူင်ႇဢမ်ႇမႅပ်းလွင်ႈဢၼ်ငိုၼ်းႁဝ်းၶႃႈသဵင်ႈယဝ်ႉမူတ်းယဝ်ႉလႄႈ၊တူဝ်တရိၵ်ႈသၢၼ်ႇၶႃႈၸဝ်ႈႁဝ်းၶဝ်၊ပဵၼ်ၶွင်ၸဝ်ႈႁဝ်းၶႃႈမူတ်းယဝ်ႉတီႈၶႃႈယဝ်ႉ။ လိူဝ်သေတူဝ်ၶၼ်ႇထႃႇဢိၵ်ႇတင်းၵႂၢၵ်ႈလိၼ်ၶႃႈၸဝ်ႈႁဝ်းၶဝ်ၼႆႉ၊ဢမ်ႇမီးၵႃႈသင်ထႅင်ႈသေမဵဝ်းတႃႇတေပၼ်ၸဝ်ႈႁဝ်းတီႈၶႃႈယဝ်ႉ။-
ယႃႇပေပွႆႇႁဝ်းၶႃႈတၢႆလၢႆလၢႆသေၵမ်းတီႈၶႃႈ။ ၶႅၼ်းတေႃႈသိုဝ်ႉဢဝ်တူဝ်ၶႃႈၸဝ်ႈႁဝ်းၶဝ်ဢိၵ်ႇတင်းၵႂၢၵ်ႈလိၼ်ၶႃႈၸဝ်ႈႁဝ်းၶဝ်ႁႂ်ႈပဵၼ်ပုၼ်ႈၶဝ်ႈၼမ်ႉတၢင်းၵိၼ်တၢင်းၶူပ်းသေၵမ်းတီႈၶႃႈ။ ၶႃႈၸဝ်ႈႁဝ်းၶဝ်တေၶၢမ်ႇႁဵတ်းၶႃႈၵူၼ်းၸႂ်ႉတီႈၶုၼ်ႁေႃၶမ်းလႄႈၵႂၢၵ်ႈလိၼ်ၶႃႈၸဝ်ႈႁဝ်းၶဝ်၊တေပဵၼ်ၶွင်ၶုၼ်ႁေႃၶမ်းၶႃႈဢေႃႈ။ ၶႅၼ်းတေႃႈပၼ်ၵိၼ်ၶဝ်ႈၵျုင်ႇႁႂ်ႈၶႃႈၸဝ်ႈႁဝ်းၶဝ်ဢသၢၵ်ႈလိပ်းယူႇၵူၺ်းဢမ်ႇၵႃး၊ၼင်ႇႁိုဝ်မိူင်းၸဝ်ႈတၵ်းဢမ်ႇလႆႈသဵတ်ႇလႆႈငႅဝ်ၸိုင်၊ပၼ်ၸိူဝ်ႉပၼ်ၽၼ်းပုၼ်ႈတူင်ႈႁႆႈတူင်ႈၼႃးတီႈၶႃႈၸဝ်ႈႁဝ်းၶဝ်သေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ယူဝ်းသႅပ်ႈ၊ သိုဝ်ႉဢဝ်ၵႂၢၵ်ႈလိၼ်ၵႃႈဢၼ်မီးတင်းသဵင်ႈတင်းလူင်ၼႂ်းမိူင်း ဢေးၵျိပ်ႉ၊ ပုၼ်ႈၶုၼ်ႁေႃၶမ်းပိူဝ်ႈဢၼ်ၵူၼ်းမိူင်း ဢေးၵျိပ်ႉ၊ တင်းလၢႆ မႃးၶၢႆပၼ်တူင်ႈႁႆႈတူင်ႈၼႃးၶဝ်၊ၵွပ်ႈပိူဝ်ႈၶဝ်ႈၵႃႈမၢၵ်ႇပႅင်းပေႃႇပဵၼ်မႃးႁႅင်းၼႃႇတီႈၶဝ်ၼၼ်ႉလႄႈၵႂၢၵ်ႈလိၼ်ၸိူဝ်းၼၼ်ႉလႆႈပဵၼ်ၽၢၼ်ႇတႃႇၶုၼ်ႁေႃၶမ်းၵႂႃႇဢေႃႈ။-
ၶႃႈဝၢၼ်ႈၵူၼ်းမိူင်းၼၼ်ႉ ယူဝ်းသႅပ်ႈ၊ ႁႂ်ႈၶဝ်ပဵၼ်ၶႃႈၶုၼ်ႁေႃၶမ်းလုၵ်ႉတီႈၶွပ်ႇလႅၼ်လိၼ်ၽၢႆႇၼိုင်ႈတေႃႇထိုင်ႁွတ်ႈၽၢႆႇၼိုင်ႈဢေႃႈ။-
ၵႂၢၵ်ႈလိၼ်ဢၼ်ယဵၸ်ႈပရေႃးႁဵၵ်ႈ လႂ်ပိူင်ႇၼၼ်ႉၵူၺ်းမၼ်းဢမ်ႇသိုဝ်ႉဢဝ်။ ၶဝ်ဢမ်ႇလႆႈၶၢႆၵႂၢၵ်ႈလိၼ်ၶဝ်ၵွပ်ႈပိူဝ်ႈၶုၼ်ႁေႃၶမ်းလႆႈပၼ်ၶဝ်ပုၼ်ႈတႃႇတေယူႇၵိၼ်ၼၼ်ႉဢေႃႈ။-
ယူဝ်းသႅပ်ႈ၊ ၵေႃႈလၢတ်ႈတီႈၵူၼ်းဝၢၼ်ႈၵူၼ်းမိူင်းတင်းလၢႆလႄႈဝႃႈ၊ “ၵမ်းၼႆႉၵဝ်သိုဝ်ႉဢဝ်တူဝ်သူဢိၵ်ႇတင်းၵႂၢၵ်ႈလိၼ်သူပုၼ်ႈၶုၼ်ႁေႃၶမ်းယဝ်ႉ။ ဢဝ်ၸိူဝ်ႉၽၼ်းၸိူဝ်းဢၼ်မီးၵႃႈတီႈၼႆႈလႄႈႁဵတ်းႁႆႈႁဵတ်းၼႃးတႃႉ။-
ပၢတ်ႇဢဝ်သိမ်းဢဝ်ယဝ်ႉလႄႈတၵ်းလႆႈသၢၵ်ႈပၼ်တီႈၶုၼ်ႁေႃၶမ်းႁႃႈပုၼ်ႈပုၼ်ႈၼိုင်ႈဢေႃႈ။ သီႇပုၼ်ႈၼၼ်ႉႁႂ်ႈလႆႈပဵၼ်ပုၼ်ႈသူပုၼ်ႈၸိူဝ်ႉၽၼ်းၵႃႈၼႂ်းႁႆႈၼႂ်းၼႃးသူဢိၵ်ႇတင်းပုၼ်ႈဢၼ်သူတၵ်းၵိၼ်လႄႈလႆႈလဵင်ႉၵူၼ်းႁိူၼ်းၵူၼ်းယေးသူၸိူဝ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၶဝ်ၵေႃႈၶိုၼ်းလၢတ်ႈလႄႈဝႃႈ၊ “ၸဝ်ႈႁဝ်းၵႄႇသႄႇဢဝ်ဢသၢၵ်ႈၶႃႈၸဝ်ႈႁဝ်းၸိူဝ်းၼႆႉယဝ်ႉ။ ႁႂ်ႈမုၼ်ၵုင်ႇၵျေးၸူးၸဝ်ႈႁူမ်ႇၶႃႈၸဝ်ႈႁဝ်းၶဝ်သေၵမ်းၶႃႈ။ ၶႃႈၸဝ်ႈႁဝ်းၸိူဝ်းၼႆႉတၵ်းလႆႈဢွၼ်ၵၼ်ပဵၼ်ၶႃႈၶုၼ်ႁေႃၶမ်းၶႃႈဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ ယူဝ်းသႅပ်ႈ၊ တႄႇတင်ႈဢုပတေႇၵႃႈၼႂ်းမိူင်း ဢေးၵျိပ်ႉ၊ ၼၼ်ႉႁႂ်ႈၶုၼ်ႁေႃၶမ်းပိူင်ႇႁႃႈပုၼ်ႈပုၼ်ႈၼိုင်ႈလႄႈဢုပတေႇၼၼ်ႉယင်းၸႂ်ႉယူႇႁၢၼ်ႉတေႃႇဝၼ်းမိူဝ်ႈလဵဝ်ဢေႃႈ။ ၵႂၢၵ်ႈလိၼ်ယဵၸ်ႈပရေႃးႁဵၵ်ႈလႂ်ၵူၺ်း၊ဢမ်ႇတူၵ်းပဵၼ်ၶွင်ၶုၼ်ႁေႃၶမ်း။
ၵူၼ်းမဵဝ်း ဢိသရေး၊ ၶဝ်ယူႇၵႃႈၼႂ်းမိူင်း ဢေးၵျိပ်ႉ၊ ၵႃႈတီႈဢိူင်ႇ ၵေႃးသိၼ်း၊ ၼၼ်ႉလႄႈၶဝ်လႆႈပိူင်ႇဢဝ်တီႈလိၼ်သေလႄႈ၊လုၵ်ႈလၢၼ်ၶဝ်ၽႄၵိုၼ်းၼမ်မႃးဢေႃႈ။-
ယႃႇၵုပ်ႈ၊ ယူႇသဝ်းၵႃႈၼႂ်းမိူင်း ဢေးၵျိပ်ႉ၊ သိပ်းၸဵတ်းပီလႄႈၶူပ်ႇၼီႈဢသၢၵ်ႈထူၼ်ႈထိုင်ပၢၵ်ႇသီႇသိပ်းပၢႆၸဵတ်းပီဢေႃႈ။-
မိူဝ်ႈဢၼ်ၶိင်ႇဝၼ်းတၢႆမၼ်းၸမ်မႃးၼၼ်ႉမၼ်းႁွင်ႉလုၵ်ႈၸၢႆးမၼ်း ယူဝ်းသႅပ်ႈ၊ မႃးလႄႈသင်ႇလၢတ်ႈဝႆႉလႄႈဝႃႈ၊ “ပေႃးမႂ်းမီးသၽေႃးဢၼ်ၽွမ်ႉၵဝ်ၸိုင်၊ဢဝ်မိုဝ်းမႂ်းသွၼ်ႈဝၢင်ႈၶႃ ၵဝ်ဝႆႉလႄႈတိူင်ႇၵႂၢမ်းသဵတ်ႈၸႃႇၵႃႈတီႈၵဝ်တႃႉ။ ယႃႇပေသၢင်းၵျူဝ်ႇၵဝ်ၵႃႈတီႈမိူင်း ဢေးၵျိပ်ႉ၊ ၼႆႉ။-
ႁႂ်ႈၵဝ်လႆႈဝၢင်းႁူဝ်ၶၢင်းပူႇပေႃႈၵဝ်တင်းလၢႆၸိုင်၊ဢဝ်ၵဝ်ဢွၵ်ႇမိူင်း ဢေးၵျိပ်ႉ၊ ၼႆႉ၊ၵႂႃႇသၢင်းၵျူဝ်ႇၵဝ်ၵႃႈတီႈပႃႇႁဵဝ်ႈပူႇပေႃႈၵဝ်ၼၼ်ႉတႃႉ၊” ဝႃႈၼင်ႇၼႆဢေႃႈ။ ယူဝ်းသႅပ်ႈ၊ ၵေႃႈႁပ်ႉၶၢမ်ႇဢဝ်ၵႂၢမ်းလႄႈဝႃႈ၊ “ၵဝ်ၶႃႈတၵ်းႁဵတ်းၸွမ်းၵႃႈၼင်ႇဢၼ်ပေႃႈႁဝ်းဝႃႈၼၼ်ႉၶႃႈဢေႃႈ၊” ဝႃႈၼင်ႇၼႆဢေႃႈ။
ပေႃႈမၼ်းသမ်ႉလၢတ်ႈလႄႈဝႃႈ၊ “ႁဵတ်းတၢင်းဢၼ်တိူင်ႇဝႃႈၵတိတႃႉ၊” ဝႃႈၼင်ႇၼႆလႄႈ ယူဝ်းသႅပ်ႈ၊ ၵေႃႈတိူင်ႇဝႃႈၵတိတီႈပေႃႈမၼ်းဢေႃႈ။ ယႃႇၵုပ်ႈ၊ ပႃးတင်းၸႂ်ဢၼ်ယွင်ႈယေႃးၵျေးၸူးၽြႃးပဵၼ်ၸဝ်ႈလႄႈႁဵတ်းတၢင်းဢၼ်ၵူမ်ႈၵွမ်းႁူဝ်ၵႃႈၼိူဝ်ႁူဝ်ၵူႇၼွၼ်းမၼ်းဢေႃႈ။
လိုၼ်းၼၼ်ႉပိူၼ်ႈမႃးမွၵ်ႇၶၢဝ်ႇငၢဝ်းတီႈ ယူဝ်းသႅပ်ႈ၊ လွင်ႈဢၼ်ပေႃႈမၼ်းပဵၼ်ၶႆႈပဵၼ်ၼၢဝ်ဢမ်ႇယူႇလီၼၼ်ႉလႄႈမၼ်းႁွင်ႉဢဝ် မၼႃႇသေႇ၊ တင်း ဢေႇၽရိမ်ႇ၊ လုၵ်ႈၸၢႆးမၼ်းသွင်ၵေႃႉၼၼ်ႉၵႂႃႇႁႂ်ႈလႆႈလူလႆႈတူၺ်းပေႃႈမၼ်း ယႃႇၵုပ်ႈ၊ ဢေႃႈ။-
ၵူၼ်းၵေႃႉၼိုင်ႈၶဝ်ႈလႄႈမွၵ်ႇလၢတ်ႈတီႈ ယႃႇၵုပ်ႈ၊ လႄႈဝႃႈ၊ “လုၵ်ႈၸၢႆးၸဝ်ႈႁဝ်း ယူဝ်းသႅပ်ႈ၊ ၼၼ်ႉမႃးၸူးတီႈၸဝ်ႈႁဝ်းယူႇၶႃႈဢေႃႈ၊” ဝႃႈၼႆၼၼ်ႉမၼ်းဢဝ်ႁႅင်းသေလႄႈလုၵ်ႉၼင်ႈၵႃႈၼိူဝ်ၵူႇတီႈၼွၼ်းမၼ်းဢေႃႈ။-
မိူဝ်ႈၼၼ်ႉ၊ ယႃႇၵုပ်ႈ၊ လၢတ်ႈတီႈ ယူဝ်းသႅပ်ႈ၊ လႄႈဝႃႈ၊ “ ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ ပေႃႇမႃးတီႈၵဝ်ၵႃႈၼႂ်းဝဵင်း လုၸႃႉ၊ မိူင်း ၶႃႇၼၼ်ႇ၊ ပုၼ်ႉလႄႈပၼ်တၢင်းလီတီႈၵဝ်လႄႈဝႃႈ၊-
‘ၵဝ်တၵ်းႁႂ်ႈမႂ်းၵိူတ်ႇလဵင်ႉလုၵ်ႈလၢင်းၼမ်ၵိုၼ်းမႃးသေယဝ်ႉ၊ၸိူဝ်ႉၶိူဝ်းမႂ်းတၵ်းလႆႈပဵၼ်ၵူၼ်းမဵဝ်းၼမ်ၼႃႇဢေႃႈ။ ၵဝ်တၵ်းပၼ်မိူင်းၼႆႉတီႈၸိူဝ်ႉၶိူဝ်းမႂ်းႁႂ်ႈၶဝ်လႆႈပိူင်ႇယူႇတႃႇသေႇဢမ်ႇထၢတ်ႇဢေႃႈ၊’ ဝႃႈၼင်ႇၼႆဢေႃႈ။”
သမ်ႉလၢတ်ႈထႅင်ႈလႄႈဝႃႈ၊ “တေႃႈလဵဝ်ၼႆႉလုၵ်ႈၸၢႆးမႂ်းသွင်ၵေႃႉဢၼ်မႂ်းလႆႈၵႃႈတီႈမိူင်း ဢေးၵျိပ်ႉ၊ ဝႆႉၸူဝ်ႈဢၼ်ၵဝ်ဢမ်ႇပႆႇႁွတ်ႈမႃးၼၼ်ႉၸၢပ်ႈသႅင်ႇၵၼ်တင်းၵဝ်ဢေႃႈ။ ဢေႇၽရိမ်ႇ၊ တင်း မၼႃႇသေႇ၊ တၵ်းလႆႈၶဝ်ႈပဵၼ်လုၵ်ႈၸၢႆးၵဝ်မိူၼ်ၸိူဝ်ႉၼင်ႇ ရုပိၼ်ႇ၊ တင်း သိမုၼ်ႇ၊ ၶဝ်ႈပဵၼ်ၼၼ်ႉဢေႃႈ။-
ပေႃးမႂ်းလႆႈလုၵ်ႈၸၢႆးမႃးထႅင်ႈၸိုင်၊တေဢမ်ႇလႆႈၶဝ်ႈပဵၼ်လုၵ်ႈၸၢႆးၵဝ်ယဝ်ႉလႄႈဢမူၺ်ႇၸိုဝ်ႈသဵင်ၶဝ်ၸိုင်၊ႁႂ်ႈၶဝ်သိုပ်ႇၶၢမ်ႇဢဝ်တီႈပီႈဢၢႆႈၶဝ် ဢေႇၽရိမ်ႇ၊ ဢိၵ်ႇတင်း မၼႃႇသေႇ၊ တႃႉ။-
ၵဝ်ႁဵတ်းၸိူဝ်ႉၼင်ႇၼႆၵွပ်ႈလူၺ်ႈမႄႈမႂ်း ရႃႇၶေႇလႃႉ၊ ယဝ်ႉ။ မၼ်းၼၼ်ႉႁႂ်ႈၵဝ်လႆႈၶေႃးၶူမ်ၼႃႇမိူဝ်ႈဢၼ်မၼ်းတၢႆၵႂႃႇၵႃႈတီႈမိူင်း ၶႃႇၼၼ်ႇ၊ ၼႂ်းၶၢဝ်းတၢင်းဢၼ်ၵဝ်ပွၵ်ႈသေၵႃႈတီႈဝဵင်း ပႃႇတမ်ႇ၊ မႃး၊ၸမ်တေၽႅဝ်ဝဵင်း ဢေႇၽရတ်ႉ၊ လူဝ်ႇထႅင်ႈဢိတ်းဢွၼ်ႇၼိုင်ႈၼၼ်ႉသေယဝ်ႉ၊ၵဝ်ဢဝ်မၼ်းသၢင်းၵျူဝ်ႇဝႆႉၵႃႈတီႈၼၼ်ႈၵႃႈႁိမ်းသဵၼ်ႈတၢင်းဢၼ်ၵႂႃႇၸူးဝဵင်း ဢေးၽရတ်ႉ၊ (ဢၼ်လႆႈၸိုဝ်ႈ ဝဵင်းပႅတ်ႉလႁႅမ်ႇ၊ ) ၼၼ်ႉဢေႃႈ။”
မိူဝ်ႈဢၼ် ယႃႇၵုပ်ႈ၊ ႁၼ်လုၵ်ႈၸၢႆး ယူဝ်းသႅပ်ႈ၊ ၸိူဝ်းၼၼ်ႉၸိုင်၊ထၢမ်လႄႈဝႃႈ၊ “ၸၢႆးဢွၼ်ႇၸိူဝ်းၼႆႉပဵၼ်ၽူႈလႂ်၊” ဝႃႈၼင်ႇၼႆဢေႃႈ။
ယူဝ်းသႅပ်ႈ၊ ၶိုၼ်းလၢတ်ႈလႄႈဝႃႈ၊ “ပဵၼ်လုၵ်ႈၸၢႆးၵဝ်ၶႃႈဢၼ်ၽြႃးပဵၼ်ၸဝ်ႈပၼ်တီႈၵဝ်ၶႃႈၵႃႈၼႂ်းမိူင်း ဢေးၵျိပ်ႉ၊ ၼႆႉၶႃႈဢေႃႈ၊” ဝႃႈၼင်ႇၼႆဢေႃႈ။ ယႃႇၵုပ်ႈ၊ ၵေႃႈလၢတ်ႈလႄႈဝႃႈ၊ “ဢဝ်ၶဝ်မႃးၸူးတီႈၵဝ်တႃႉ။ ၵဝ်တၵ်းပၼ်တၢင်းလီတီႈၶဝ်ဢေႃႈ၊” ဝႃႈၼင်ႇၼႆဢေႃႈ။-
ၵွပ်ႈပိူဝ်ႈဢသၢၵ်ႈထဝ်ႈယဝ်ႉၼၼ်ႉ မၢၵ်ႇတႃ ယႃႇၵုပ်ႈ၊ မူဝ်းၵႂႃႇလႄႈဢမ်ႇၸၢင်ႈႁၼ်လီလီယဝ်ႉ။ ယူဝ်းသႅပ်ႈ၊ ၸင်ႇဢဝ်လုၵ်ႈၸၢႆးမၼ်းၼၼ်ႉသုတ်ႉၸူးၸမ်ၸမ် ယႃႇၵုပ်ႈ၊ သေယဝ်ႉ၊မၼ်းဢုမ်ႈၵွတ်ႇၶဝ်လႄႈၸုပ်ႇၼူမ်ၶဝ်ဢေႃႈ။-
ယႃႇၵုပ်ႈ၊ ၵေႃႈလၢတ်ႈတီႈ ယူဝ်းသႅပ်ႈ၊ လႄႈဝႃႈ၊ “ၵဝ်ဢမ်ႇထၢင်ႇၵဝ်တေလႆႈႁၼ်ၼႃႈမႂ်းထႅင်ႈယဝ်ႉ။ ၵူၺ်းၵႃႈ၊တေႃႈလဵဝ်ၼႆႉၽြႃးပဵၼ်ၸဝ်ႈႁႂ်ႈၵဝ်လႆႈႁၼ်ၸဵမ်လုၵ်ႈလၢင်းမႂ်းလူးၵွၼ်ႇဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ ယူဝ်းသႅပ်ႈ၊ ဢဝ်လုၵ်ႈၸၢႆးမၼ်းသွင်ၵေႃႉၼၼ်ႉဢွၵ်ႇသေၵႃႈၼႂ်းတၵ်း ယႃႇၵုပ်ႈ၊ သေလႄႈၵူမ်ႈၵွမ်းႁူဝ်ၵႃႈၼိူဝ်လိၼ်ယူႇဢေႃႈ။
ၵမ်းၼၼ်ႉ၊ ယူဝ်းသႅပ်ႈ၊ ဢဝ်မိုဝ်းၶွၼ်ၶႂႃမၼ်းယိပ်းၵမ် ဢေႇၽရိမ်ႇ၊ သေပၼ်တီႈမိုဝ်းၶွၼ်သၢႆႉ ယႃႇၵုပ်ႈ၊ သေယဝ်ႉ၊သမ်ႉဢဝ်မိုဝ်းၶွၼ်သၢႆႉမၼ်းယိပ်းၵမ် မၼႃႇသေႇ၊ သေပၼ်တီႈမိုဝ်းၶွၼ်ၶႂႃ ယႃႇၵုပ်ႈ၊ လႄႈဢဝ်သုတ်ႉၵႂႃႇၸမ်ၸမ်ဢေႃႈ။-
ၵူၺ်းၵႃႈ၊ ယႃႇၵုပ်ႈ၊ ဢဝ်မိုဝ်းမၼ်းသွင်ၶွၼ်သၢၼ်ၵၼ်လႄႈယိုၼ်ႈမိုဝ်းၶွၼ်ၶႂႃတၢင်ႇၼိူဝ်ႁူဝ် ဢေႇၽရိမ်ႇ၊ ၵေႃႉဢၼ်ဢသၢၵ်ႈလဵၵ်ႉၼၼ်ႉသေလႄႈ၊ယိုၼ်ႈမိုဝ်းၶွၼ်သၢႆႉတၢင်ႇၼိူဝ်ႁူဝ် မၼႃႇသေႇ၊ ၵေႃႉဢၼ်ဢသၢၵ်ႈယႂ်ႇသေယဝ်ႉ၊-
ပၼ်တၢင်းလီတီႈ ယူဝ်းသႅပ်ႈ၊ လႄႈဝႃႈ၊ “ႁႂ်ႈၽြႃးပဵၼ်ၸဝ်ႈ၊ၸဝ်ႈဢၼ်ပေႃႈၵဝ် ဢႃႇပြႃႇႁၢမ်ႇ၊ တင်း ဢိၸၢၵ်ႈ၊ ႁဵတ်းဝၢတ်ႈၵူဝ်းၵႂၢႆႇၼၼ်ႉ၊ ပၼ်တၢင်းလီမၢင်ႇၵလႃႇတီႈလုၵ်ႈဢွၼ်ႇၸၢႆးၸိူဝ်းၼႆႉသေၵမ်းလူၺ်ႈ။ ႁႂ်ႈၽြႃးပဵၼ်ၸဝ်ႈ၊ၸဝ်ႈဢၼ်လဵင်ႉလူၵဝ်ၸူဝ်ႈဢသၢၵ်ႈတေႃႇႁွတ်ႈဝၼ်းမိူဝ်ႈၼႆႉၼၼ်ႉပၼ်တၢင်းလီတီႈၶဝ်သေၵမ်းလူၺ်ႈ။-
ႁႂ်ႈတမၢၼ်ႇၵၢင်ႁၢဝ်ဢၼ်ၵႄႇသႄႇဢဝ်ၵဝ်လွတ်ႈသေၽေးရၢၼ်ႇၼၼ်ႉပၼ်တၢင်းလီမၢင်ႇၵလႃႇၵႃႈၼိူဝ်ၶဝ်သေၵမ်းလူၺ်ႈ။ ႁႂ်ႈၸိုဝ်ႈသဵင်ၵဝ်၊ၸိုဝ်ႈသဵင်ပေႃႈၵဝ် ဢႃႇပြႃႇႁၢမ်ႇ၊ တင်း ဢိၸၢၵ်ႈ၊ ၼၼ်ႉသိုပ်ႇလူင်းၵႂႃႇၵႃႈၼိူဝ်ၶဝ်လႄႈ ႁႂ်ႈၸိူဝ်ႉၶိူဝ်းၶဝ်ၼမ်ၵိုၼ်းမႃးၵႃႈၼိူဝ်လိၼ်မိူင်းၼႆႉသေၵမ်းလူၺ်ႈ၊” ဝႃႈၼင်ႇၼႆဢေႃႈ။
ယူဝ်းသႅပ်ႈ၊ တူၺ်းပေႃႈမၼ်းႁဵတ်းၼင်ႇၼၼ်ဢဝ်မိုဝ်းၶွၼ်ၶႂႃတၢင်ႇၵႃႈၼိူဝ်ႁူဝ် ဢေႇၽရိမ်ႇ၊ ၼၼ်ႉဢမ်ႇၶိုတ်းၸႂ်ပဵင်းၸႂ်မၼ်းလႄႈယိပ်းဢဝ်မိုဝ်းပေႃႈမၼ်းၵႃႈၼိူဝ်ႁူဝ် ဢေႇၽရိမ်ႇ၊ သေလႄႈၶၢႆႉၵႂႃႇတၢင်ႇၵႃႈၼိူဝ်ႁူဝ် မၼႃႇသေႇ၊ သေယဝ်ႉ၊-
လၢတ်ႈတီႈပေႃႈမၼ်းလႄႈဝႃႈ၊ “ဢမ်ႇၸႂ်ႈၶႃႈပေႃႈ႟။ ၵေႃႉၼႆႉပဵၼ်လုၵ်ႈတူၼ်ႈၶႃႈဢေႃႈ။ ဢဝ်မိုဝ်းၶွၼ်ၶႂႃပေႃႈႁဝ်းတၢင်ႇၵႃႈၼိူဝ်ႁူဝ်မၼ်းသေၵမ်းၶႃႈ၊” ဝႃႈၼင်ႇၼႆဢေႃႈ။
ပေႃႈမၼ်းထဵင်ပႅတ်ႈလႄႈဝႃႈ၊ “ၵဝ်ႁုယူႇ၊လုၵ်ႈၸၢႆးပေႃႈ႟။ ၵဝ်ႁုယူႇဢေႃႈ။ မၼႃႇသေႇ၊ တၵ်းပဵၼ်မုၵ်ႉၵူၼ်းၸိူဝ်းၵူၼ်းဢၼ်ယႂ်ႇမျၢတ်ႈၼႃႇဢေႃႈ။ ၵူၺ်းၵႃႈ၊ၼွင်ႉၸၢႆးမၼ်းယဵင်ႈၶႅၼ်းတၵ်းယႂ်ႇမျၢတ်ႈၼႃႇသေမၼ်းဢေႃႈ။ ၸိူဝ်ႉၶိူဝ်းမၼ်းတၵ်းလႆႈပဵၼ်ၵူၼ်းမဵဝ်းၼမ်ၼႃႇဢေႃႈ၊” ဝႃႈၼင်ႇၼႆဢေႃႈ။
ႁဵတ်းၼၼ်လႄႈမၼ်းပၼ်တၢင်းလီမၢင်ႇၵလႃႇတီႈၶဝ်လႄႈဝႃႈ၊ “ၵႃႈၼႂ်းၵူၼ်းမဵဝ်း ဢိသရေး၊ တင်းလၢႆတေဢွၼ်ၵၼ်ဢဝ်တင်းၸိုဝ်ႈသဵင်သူသွင်ၵေႃႉသေလႄႈပၼ်တၢင်းလီမၢင်ႇၵလႃႇတီႈၵၼ်လႄႈဝႃႈ၊ ‘ႁႂ်ႈၽြႃးပဵၼ်ၸဝ်ႈပၼ်ႁႂ်ႈမႂ်းပဵၼ်မိူၼ်ၸိူဝ်ႉၼင်ႇ ဢေႇၽရိမ်ႇ၊ တင်း မၼႃႇသေႇ၊ သေၵမ်းလူၺ်ႈ၊’ ဝႃႈၼင်ႇၼႆဢေႃႈ။” ဝႃႈၼင်ႇၼႆသေယဝ်ႉ၊ဢဝ် ဢေႇၽရိမ်ႇ၊ ၶျႃးလူင်းဢွၼ်တၢင်း မၼႃႇသေႇ၊ ဢေႃႈ။
မိူဝ်ႈၼၼ်ႉ ဢိသရေး၊ လၢတ်ႈတီႈ ယူဝ်းသႅပ်ႈ၊ လႄႈဝႃႈ၊ “ၸွမ်းၵႃႈၼင်ႇဢၼ်မႂ်းႁုယူႇၼၼ်ႉၵဝ်ၸမ်တၵ်းတၢႆယဝ်ႉ။ ၵူၺ်းၵႃႈ၊ၽြႃးပဵၼ်ၸဝ်ႈတၵ်းမီးယူႇလူၺ်ႈၵၼ်တင်းမႂ်းလႄႈသမ်ႉတၵ်းဢဝ်မႂ်းၶိုၼ်းမိူဝ်းၵႂႃႇၸူးတီႈမိူင်းပူႇမိူင်းမွၼ်ႇမႂ်းဢေႃႈ။-
လိူဝ်သေၼၼ်ႉမိူင်း သေးၶိမ်ႇ၊ တီႈလိၼ်ဢၼ်လီၼႃႇဢၼ်ၵဝ်ဢဝ်တင်းလၢပ်ႇတင်းၵၢင်ႇသေလႄႈၼုၵ်ႈဢဝ်ၼႂ်းမိုဝ်းၵူၼ်း ဢႃႇမေႃးရိ၊ ၶဝ်ၼၼ်ႉတၵ်းပၼ်တီႈပီႈဢၢႆႈမႂ်းၸိူဝ်းၼၼ်ႉဢမ်ႇၸႂ်ႈ။ တၵ်းပၼ်တီႈမႂ်းဢေႃႈ၊” ဝႃႈၼင်ႇၼႆဢေႃႈ။
ယႃႇၵုပ်ႈ၊ ႁွင်ႉဢဝ်လုၵ်ႈၸၢႆးမၼ်းတင်းလၢႆမႃးလႄႈလၢတ်ႈဝႃႈ၊ “ဢွၼ်ၵၼ်မႃးၸုတုမ်ၵၼ်တႃႉ။ ၵဝ်တၵ်းသင်ႇလၢတ်ႈလွင်ႈဢီႈသင်တၵ်းပဵၼ်မႃးတီႈသူၼႂ်းဝၼ်းမိူဝ်းၼႃႈၼၼ်ႉဢေႃႈ။
“လုၵ်ႈၸၢႆး ယႃႇၵုပ်ႈ၊ ၶဝ်႟။ ၸုတုမ်ၵၼ်သေလႄႈထွမ်ႇဢဝ်ၵႂၢမ်းပေႃႈသူ ဢိသရေး၊ ၼႆႉတႃႉ။
ရုပိၼ်ႇ၊ လုၵ်ႈတူၼ်ႈၵဝ်႟။ မႂ်းပဵၼ်ႁႅင်းၵဝ်၊ငဝ်ႈၵေႃႇဢဵၼ်ႁႅင်းၵဝ်၊ ပဵၼ်ပၢႆၸိၵ်းၸွမ်မုၼ်ၽုင်းၵဝ်၊ပၢႆၸိၵ်းၸွမ်တၼ်းၶူဝ်းၵဝ်ဢေႃႈ။
မႂ်းတေႃးသႃႉလိူတ်ႇႁွၼ်ႉႁႅင်းမိူၼ်ၼင်ႇၼမ်ႉလႆၸႅဝ်ႈလႄႈ ဢမ်ႇလႆႈႁွတ်ႈထိုင်တီႈဢၼ်လီဢၼ်မျၢတ်ႈလႆႈယဝ်ႉ၊ ၵွပ်ႈပိူဝ်ႈမႂ်းလႆႈၼွၼ်းတီႈၼွၼ်းပေႃႈမႂ်း၊ႁဵတ်းႁႂ်ႈၵူႇၼွၼ်းၼၼ်ႉၵူဝ်ႈၵိူၵ်ႇယဝ်ႉ၊ မႂ်းၶဝ်ႈၵႂႃႇၼႂ်းလုၵ်းၼွၼ်းၵဝ်ယဝ်ႉ။
သိမုၼ်ႇ၊ တင်း လေႇဝိ၊ ပဵၼ်ပီႈၼွင်ႉၵၼ်လႄႈ၊ ယိပ်းတိုဝ်းလၢၵ်ႈၼၢၵ်ႈႁႂ်ႈလႆႈႁဵတ်းႁၢႆႉႁဵတ်းမိူၵ်ႈယဝ်ႉ။
ၵဝ်တၵ်းဢမ်ႇဢုပ်ႇၵုမ်ၸွမ်းၵႃႈၼႂ်းပၢင်ၵုမ်ၶဝ်လႄႈ၊ ၵဝ်တၵ်းဢမ်ႇႁဵတ်းမုၵ်ႉႁဵတ်းၸုမ်းပႃးၸွမ်းၵႃႈၼႂ်းပၢင်တုမ်ၶဝ်။ လွင်ႈမၼ်းၸမ်ႉ၊ၶဝ်ၼၼ်ႉၸႂ်လမ်သႆႈၵမ်ႇလႄႈဢဝ်ဢသၢၵ်ႈၵူၼ်းတင်းလၢႆတၢႆယဝ်ႉ။ ၶဝ်ၽၼ်းဢဵၼ်ၼွင်ႈဝူဝ်းလႄႈႁဵတ်းပဵၼ်တၢင်းလဵၼ်ႈၶဝ်ယဝ်ႉ။
ႁႂ်ႈတၢင်းဢၼ်ၵိၼ်ႇဢၼ်ဝႃႈတူၵ်းႁွတ်ႈၵႃႈၼိူဝ်တၢင်းၸႂ်လမ်သႆႈၵမ်ႇၶဝ်ဢၼ်ႁႅင်းၼႃႇၼၼ်ႉ၊ ဢိၵ်ႇတင်းႁႂ်ႈတၢင်းဢၼ်ၵိၼ်ႇဝႃႈတူၵ်းႁွတ်ႈၵႃႈၼိူဝ်တေႃးသႃႉၶဝ်၊ၵွပ်ႈပိူဝ်ႈၶဝ်လိူင်းၵျၢမ်းၼႃႇၼၼ်ႉသေၵမ်းလူၺ်ႈ။ ၵဝ်တၵ်းႁႂ်ႈၶဝ်ၽၢတ်ႇၽႄၵၼ်ၵႂႃႇၵႃႈၼႂ်းမဵဝ်း ယႃႇၵုပ်ႈ၊ လႄႈႁႂ်ႈၶဝ်ပိဝ်သဵၼ်ၸွတ်ႇၸေးၵႂႃႇၵႃႈၼႂ်းၵူၼ်းမဵဝ်း ဢိသရေး၊ ဢေႃႈ။
ယုတႃႉ၊ ႟။ ပီႈၼွင်ႉမႂ်းတင်းလၢႆ တၵ်းဢွၼ်ၵၼ်ယွင်ႈယေႃးမႂ်းဢေႃႈ။ မိုဝ်းမႂ်းတၵ်းလႆႈတဵၵ်းတဵင်ၶေႃးရၢၼ်ႇသူႇမႂ်းလႄႈပီႈၼွင်ႉမႂ်းတင်းလၢႆတၵ်းလႆႈဢွၼ်ၵၼ်ၵူမ်ႈၵွမ်းႁူဝ်ၸူးမႂ်းဢေႃႈ။
ယုတႃႉ၊ ပဵၼ်မိူၼ်ၼင်ႇသၢင်ႇသီႈၼုမ်ႇ၊ၸၢင်ႈတိဢဝ်လႄႈၵိၼ်ၶူပ်းဢေႃႈ။ လုၵ်ႈၸၢႆးၵဝ်႟။ မႂ်းၸၢင်ႈပွၵ်ႈၶိုၼ်းၸူးတီႈထမ်ႈၸဝ်ႈၵဝ်ႇလႄႈယဵတ်ႇတူဝ်လိူၼ်ႈဢိဝ်ၼွၼ်းယူႇဢေႃႈ။ ဢမ်ႇမီးၽူႈလႂ်ႁတ်းပူၵ်းႁႂ်ႈမၼ်းလုၵ်ႉ။
ၵၼ်းႁွၵ်ႇရႃႇၸႃႉတၵ်းဢမ်ႇလႆႈၽၢတ်ႇဢွၵ်ႇသေၵႃႈၼႂ်းမိုဝ်း ယုတႃႉ၊ လႄႈ ၶွၼ်ႉဢႃႇၼႃႇတၵ်းဢမ်ႇလႆႈၶၢႆႉဢွၵ်ႇသေဝူင်ႈၵၢင်တိၼ်မၼ်းတေႃႇထိုင်ႁွတ်ႈ၊ ဝၢၼ်ႈမိူင်းတင်းလၢႆတူၵ်းမႃးၵႃႈၼႂ်းမိုဝ်းမၼ်းယဝ်ႉ၊ၵမ်းၼၼ်ႉ ၸင်ႇၵူၼ်းမဵဝ်းတင်းလၢႆတေႁပ်ႉတုင်းထွမ်ႇဢဝ်မၼ်းဢေႃႈ။
မၼ်းဢဝ်မႃႉလီႈဢွၼ်ႇမၼ်းလၢမ်ႈဝႆႉၵႃႈတီႈၶိူဝ်းမၢၵ်ႇၸပိတ်ႉ၊ ဢၼ်လီသေပိူၼ်ႈလႄႈ၊တၵ်းဢဝ်သိူဝ်ႈၶူဝ်းမၼ်းသၵ်ႉၵႃႈၼႂ်းၼမ်ႉမၢၵ်ႇၸပိတ်ႉဢၼ်လႅင်မိူၼ်ၼင်ႇလိူတ်ႈၼၼ်ႉဢေႃႈ။
မၢၵ်ႇတႃမၼ်းလႅင်ၸၢင်းႁၢင်းလူၺ်ႈၼမ်ႉမၢၵ်ႇၸပိတ်ႉလႄႈ၊ ၶဵဝ်ႈမၼ်းၽိူၵ်ႇၶၢဝ်လူၺ်ႈၼမ်ႉၼူမ်းဢေႃႈ။
ၸေႇပုလုၼ်ႇ၊ တၵ်းယူႇႁိမ်းသၢပ်ႇပၢင်ႇလၢႆႇလႄႈ၊ ၽင်ႇပၢင်ႇလၢႆႇမၼ်းတေပဵၼ်တႃႈသိူၵ်ႈႁိူဝ်းသၢင်းၽေႃးဢေႃႈ။ သိုင်ႇၸိုင်ႈမိူင်းမၼ်းတၵ်းၵႂၢင်ႈတေႃႇႁွတ်ႈဝဵင်း ၸိတုမ်ႇ၊ ပုၼ်ႉဢေႃႈ။
ဢိသၶႃႇ၊ ပဵၼ်မိူၼ်ၼင်ႇမႃႉလီႈ ဢၼ်ႁႅင်းယႂ်ႇၼႃႇမူပ်ႇၼွၼ်းၵႃႈၼႂ်းၵႄႈၵၢင်ၵွပ်းတၢင်ႇသွင်ၽၢႆႇဢေႃႈ။
မၼ်းလႆႈထူပ်းတီႈယူႇဢၼ်ၵတ်းၸႂ်ယဵၼ်ၸႂ်ပဵၼ်တီႈဢၼ်လိၼ်လီလႄႈသႃႇယႃႇၼၼ်ႉဢေႃႈ။ ပိူဝ်ႈၼႆမၼ်းၵွင်လင်တုင်းဢဝ်ၵွပ်းႁႂ်ႈတၢင်ႇသႂ်ႇသေလႄႈ ၶၢမ်ႇပဵၼ်ၶႃႈဢၼ်ပိူၼ်ႈၸႂ်ႉႁႂ်ႈႁဵတ်းၵၢၼ်ၼၼ်ႉဢေႃႈ။
တၢၼ်ႇ၊ ၼႆႉတၵ်းလႆႈဢုပ်ႉပိူင်ႇၵူၼ်းမဵဝ်းမၼ်း၊ မိူၼ်ၼင်ႇၸိူဝ်ႉၶိူဝ်း ဢိသရေး၊ သေၶိူဝ်းၶိူဝ်းၼၼ်ႉဢေႃႈ။
တၢၼ်ႇ၊ တၵ်းပဵၼ်မိူၼ်ၼင်ႇငူးဢၼ်ယူႇၸွမ်းတႃႈၸွမ်းတၢင်းဢေႃႈ။ ပဵၼ်ငူးႁၢႆႉၸၢင်ႈယူႇႁိမ်းသဵၼ်ႈတၢင်းလႄႈတွတ်ႇတိၼ်မႃႉႁႂ်ႈၵူၼ်းၶီႇမႃႉၼၼ်ႉပိၼ်ႉတူၵ်းဢေႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈမုင်ႈမွင်းပႂ်ႉထႃႈၵျေးၸူးတၢင်းဢၼ်ၸဝ်ႈႁဝ်းၵႄႇၶျွတ်ႈဢဝ်ၼၼ်ႉတီႈၶႃႈဢေႃႈ။
ၵၢတ်ႉ၊ ၸမ်ႉ၊မုၵ်ႉၸုမ်းၵူၼ်းၸူၼ်တၵ်းမႃးလေႃႇၽင်ႈမၼ်းဢေႃႈ။ ၵူၺ်းၵႃႈ၊မၼ်းတၵ်းၶိုၼ်းလေႃႇၽင်ႈလိုပ်ႈႁေႃႈၶဝ်ပႅတ်ႈဢေႃႈ။
ဢႃႇသျႃႇ၊ ၸိုင်၊ဢႁႃႇရႃႉတၢင်းၵိၼ်မၼ်းၼၼ်ႉတၵ်းပဵၼ်ဢၼ်ဝၢၼ်လႄႈ၊ ၶဝ်ႈမုၼ်းမၼ်းၸိူဝ်းၼၼ်ႉတၵ်းၸဵမ်းတၵ်းဝၢၼ်ထၢၼ်ႈပေႃးတေဢဝ်သၢၵ်ႈပၼ်ၶုၼ်ႁေႃၶမ်းၼၼ်ႉဢေႃႈ။
ၼပ်ႉထလိ၊ ပဵၼ်ၸိူဝ်ႉၼင်ႇၽၢၼ်းမႄႈဢၼ်ပွႆႇဝႆႉၼၼ်ႉယဝ်ႉ။ မၼ်းၸၢင်ႈၵိူတ်ႇလဵင်ႉလုၵ်ႈလၢင်းဢၼ်လီႁၵ်ႉလီပႅင်းဢေႃႈ။
ယူဝ်းသႅပ်ႈ၊ ပဵၼ်ၸိူဝ်ႉၼင်ႇမႃႉလီႈထိူၼ်ႇႁိမ်းၼမ်ႉဢွၵ်ႇႁူးလႄႈ၊ မိူၼ်မႃႉလေႃႈထိူၼ်ႇႁိမ်းတႄးလွႆၼၼ်ႉဢေႃႈ။
ၸဝ်ႈၵၢင်ႇၸဝ်ႈၵူင်ၶဝ်ငိၼ်းၸင်းမၼ်းလႄႈ၊ ဢွၼ်ၵၼ်ၼိၵ်ႈၸၢၵ်ႈတဵၵ်းငႅၼ်းမၼ်း၊ပိုတ်းယိုဝ်းသႂ်ႇမၼ်းဢေႃႈ။
ၼႂ်းဝႃႈၼၼ်သေၵေႃႈၵၢင်ႇၵူင်မၼ်းၼၼ်ႉႁႅင်းဢမ်ႇဢူၼ်ႈ၊ၶႅၼ်မိုဝ်းမၼ်းႁႅင်းၵႅၼ်ႇၶႅင်ယူႇ၊ ၵွပ်ႈလူၺ်ႈႁႅင်းတၼ်းၶူဝ်းဢၼၼ်ႇတႃႉၽြႃးပဵၼ်ၸဝ်ႈမဵဝ်း ယႃႇၵုပ်ႈ၊ ၵွပ်ႈလူၺ်ႈၸိုဝ်ႈသဵင်ၸဝ်ႈလဵင်ႉသူဝ်းထိင်းသူဝ်းလူင်၊ၸဝ်ႈဢၼ်ႁႄႉဢၼ်ၶႅၼ်မဵဝ်း ဢိသရေး။
ၵွပ်ႈလူၺ်ႈၽြႃးပဵၼ်ၸဝ်ႈပေႃႈမႂ်းဢၼ်ၸွႆႈထႅမ်မႂ်း၊ ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ ဢၼ်ပၼ်တၢင်းလီ၊ၽူၼ်မၢင်ႇၵလႃႇဢၼ်တူၵ်းသေၵႃႈတီႈၼိူဝ်ၽႃႉၵၢင်ႁၢဝ်၊ မၢင်ႇၵလႃႇဢၼ်မီးၵႃႈတႂ်ႈၼမ်ႉတီႈဢၼ်လိုၵ်ႉဢၼ်လမ်ႇ၊ မၢင်ႇၵလႃႇဢၼ်ၸၢပ်ႈသႅင်ႇၵၼ်တင်းတဝ်ႈၼူမ်းဢိၵ်ႇတင်းတွင်ႉပုမ်ၼၼ်ႉႁွတ်ႈထိုင်ၵႃႈၼိူဝ်မႂ်းသေၵမ်းလူၺ်ႈ။
တၢင်းလီမၢင်ႇၵလႃႇဢၼ်ပေႃႈမႂ်းပၼ်ၼႆႉမျၢတ်ႈလီလိူဝ်တွၼ်းၼႃႇသေ၊ တၢင်းလီမၢင်ႇၵလႃႇဢၼ်ပူႇမွၼ်ႇၵဝ်ပၼ်ၸိူဝ်းၼၼ်ႉတေႃႇထိုင်ႁွတ်ႈတီႈသုတ်းၶွပ်ႇၼမ်ႉလႅၼ်လိၼ်လွႆထႃႇဝရႃႉပုၼ်ႉဢေႃႈ။ ႁႂ်ႈတၢင်းလီမၢင်ႇၵလႃႇၸိူဝ်းၼၼ်ႉတူၵ်းႁွတ်ႈၵႃႈၼိူဝ်ႁူဝ် ယူဝ်းသႅပ်ႈ၊ ၵႃႈၼိူဝ်သီႈမွမ်ႈၸွမ်ႁူဝ်၊ ၵေႃႉဢၼ်ၽၢၵ်ႈယၢၼ်သေပီႈၼွင်ႉမၼ်းတင်းလၢႆၼၼ်ႉသေၵမ်းလူၺ်ႈ။
ပိၼ်ႇယႃႇမိၼ်ႇ၊ ၸမ်ႉ၊တၵ်းပဵၼ်မိူၼ်ၸိူဝ်ႉၼင်ႇမႃၼႆးဢၼ်ၸၢင်ႈၺွပ်းၵိၼ်ၼၼ်ႉဢေႃႈ။ ၶိင်ႇၵၢင်ၼႂ်မၼ်းၸၢင်ႈၵိၼ်ၶူပ်းဢၼ်မၼ်းတိလႆႈၼၼ်ႉလႄႈၶိင်ႇၵၢင်ၶမ်ႈမၼ်းၸၢင်ႈၽႄမႅင်ႇဢၼ်မီးႁိမ်ႁူင်ႇလႆႈမႃးၼၼ်ႉဢေႃႈ။”
ၶဝ်ၸိူဝ်းၼႆႉပဵၼ်ၸိူဝ်ႉၶိူဝ်းသိပ်းသွင်မဵဝ်းၵႃႈတီႈၵူၼ်းမဵဝ်း ဢိသရေး၊ ဢေႃႈ။ ၵႂၢမ်းၸိူဝ်းၼႆႉၵေႃႈပဵၼ်ၵႂၢမ်းဢၼ်ပေႃႈၶဝ်သင်ႇလၢတ်ႈလႄႈ၊ပၼ်တၢင်းလီမၢင်ႇၵလႃႇၵႃႈၼင်ႇဢၼ်ၶဝ်ထိူၵ်ႈၶၢမ်ႇဢဝ်ႁင်းၽႂ်ႁင်းမၼ်းဢၼ်တၵ်ႉလၢတ်ႈတီႈလုၵ်ႈၸၢႆးမၼ်းၵေႃႉလႂ်ၵေႃႉၼၼ်ႉၼၼ်ႉဢေႃႈ။
မိူဝ်ႈၼၼ်ႉ၊ ယႃႇၵုပ်ႈ၊ သမ်ႉသင်ႇလၢတ်ႈတီႈလုၵ်ႈၸၢႆးမၼ်းတင်းလၢႆလႄႈဝႃႈ၊ “ၵမ်းၼႆႉ၊ၵဝ်တၵ်းလႆႈတၢႆလႄႈၵႂႃႇၸုတုမ်လူၺ်ႈၵၼ်တင်းပူႇမွၼ်ႇၵဝ်တင်းလၢႆယဝ်ႉ၊ဢဝ်ၵဝ်ၵႂႃႇသၢင်းၵျူဝ်ႇလူၺ်ႈၵၼ်တင်းပေႃႈၵဝ်ၵႃႈၼႂ်းႁူးထမ်ႈဢၼ်မီးၵႃႈၼႂ်းတူင်ႈ ဢေႇၽရုၼ်ႇ၊ ၵူၼ်းမဵဝ်း ႁိတ်ႉတိ၊-
ၵႃႈၼႂ်းတူင်ႈၼႃး မၵ်ႉပေႇလႃႉ၊ ၽၢႆႇဝၼ်းဢွၵ်ႇ မမ်ႇရေႇ၊ မိူင်း ၶႃႇၼၼ်ႇ၊ ၼၼ်ႉတႃႉ။ ဢႃႇပြႃႇႁၢမ်ႇ၊ သိုဝ်ႉဢဝ်ႁူးထမ်ႈၼၼ်ႉပႃးၸဵမ်တူင်ႈၼႃး ဢေႇၽရုၼ်ႇ၊ ၵူၼ်းမဵဝ်း ႁိတ်ႉတိ၊ ပုၼ်ႈတႃႇပဵၼ်ပႃႇႁဵဝ်ႈဢၼ်မၼ်းပိူင်ႇၼၼ်ႉဢေႃႈ။-
ၵႃႈတီႈၼၼ်ႈၶဝ်သၢင်းၵျူဝ်ႇ ဢႃႇပြႃႇႁၢမ်ႇ၊ တင်းမေးမၼ်း ၸႃႇရႃႇ၊ ယဝ်ႉ။ ၵႃႈတီႈၼၼ်ႈ ဢိၸၢၵ်ႈ၊ တင်းမေးမၼ်း ရေႇပႅၵ်ႉၵႃႉ၊ ၵေႃႈၶဝ်ႈသၢင်းၵျူဝ်ႇဝႆႉယဝ်ႉ။ ၵႃႈတီႈၼၼ်ႈၼင်ႇၵဝ်ႇ၊ၵဝ်သၢင်းၵျူဝ်ႇ လေးဢႃႇ၊ ဝႆႉယဝ်ႉ။-
တူင်ႈၼႃးဢိၵ်ႇတင်းႁူးထမ်ႈဢၼ်မီးၵႃႈၼႂ်းတူင်ႈၼႃးၼၼ်ႉၸိုင်၊ၶဝ်လႆႈသိုဝ်ႉဢဝ်တီႈၵူၼ်းမဵဝ်း ႁိတ်ႉတိ၊ လႂ်ၼၼ်ႉယဝ်ႉ။ ၵႃႈတီႈၼၼ်ႈသၢင်းၵျူဝ်ႇတူဝ်ၵဝ်သေၵမ်း၊” ဝႃႈၼင်ႇၼႆဢေႃႈ။-
ယႃႇၵုပ်ႈ၊ သင်ႇလၢတ်ႈဝႆႉလွင်ႈတင်းသဵင်ႈတင်းမူတ်းတီႈလုၵ်ႈမၼ်းလၢင်းမၼ်းၸိူဝ်ႉၼင်ႇၼၼ်သေယဝ်ႉ၊ယူၵ်ႉတိၼ်မၼ်းတၢင်ႇၼိူဝ်ၵူႇၼွၼ်းမၼ်းသေလႄႈဢသၢၵ်ႈသုတ်းသဵင်ႈၵႂႃႇသေယဝ်ႉ၊လႆႈႁွတ်ႈထိုင်ၵႃႈတီႈဢၼ်ၵူၼ်းမဵဝ်းမၼ်းၸုတုမ်ၵၼ်ၼၼ်ႉဢေႃႈ။
ယူဝ်းသႅပ်ႈ၊ ၵေႃႈၵူမ်ႈလူင်းၵႃႈၼိူဝ်ၼႃႈပေႃႈမၼ်းလႄႈႁွင်ႉႁႆႈယူႇၸုပ်ႇၼူမ်ယူႇဢေႃႈ။-
မိူဝ်ႈၼၼ်ႉ၊မၼ်းပူင်ဢမိင်ႉႁႂ်ႈသြႃႇမေႃယႃတင်းလၢႆဢဝ်ယႃႈယႃမဵဝ်းၼၢမ်ႇသႃႇသႂ်ႇပၼ်တႃးပၼ်တူဝ်တၢႆပေႃႈမၼ်းဢမ်ႇႁႂ်ႈလႆႈတူႇလႆႈၼဝ်ႈၼၼ်ႉဢေႃႈ။-
ၸွမ်းၼင်ႇထုင်းၽိင်ႈမိုဝ်ႉဝၼ်းဢၼ်လုမ်းလႃးတႃးပၼ်တူဝ်တၢႆဢမ်ႇႁႂ်ႈလႆႈတူႇလႆႈၼဝ်ႈထူၼ်ႈတဵမ်သီႇသိပ်းဝၼ်းပူၼ်ႉယဝ်ႉသေၵေႃႈ၊ၵူၼ်း ဢေးၵျိပ်ႉ၊ ၶဝ်ဢွၼ်ၵၼ်မႆႈၶီထိုင်ၸႂ်ပုၼ်ႈမၼ်းၸဵတ်းသိပ်းဝၼ်းဢေႃႈ။
မိူဝ်ႈဢၼ်ဝၼ်းဢၼ်မႆႈၸႂ်ၶီၸႂ်ပူၼ်ႉၵႂႃႇယဝ်ႉၼၼ်ႉ၊ ယူဝ်းသႅပ်ႈ၊ လၢတ်ႈတေႃႇၵူၼ်းၼႂ်းႁၢင်ႈၼႂ်းႁေႃၼၼ်ႉလႄႈဝႃႈ၊ “ၶႅၼ်းတေႃႈလဝ်ႈလၢတ်ႈထိုင်တီႈၶုၼ်ႁေႃၶမ်းလႄႈဝႃႈ၊-
‘မိူဝ်ႈဢၼ်ပေႃႈၵဝ်ၶႃႈၸမ်တၵ်းတၢႆၼၼ်ႉမၼ်းႁႂ်ႈၵဝ်ၶႃႈဝႆႉၵတိသဵတ်ႈၸႃႇလွင်ႈဢၼ်ၵဝ်ၶႃႈတၵ်းလႆႈသၢင်းၵျူဝ်ႇတူဝ်မၼ်းၵႃႈၼႂ်းၶုမ်ပႃႇႁဵဝ်ႈဢၼ်မၼ်းမႄးႁႅၼ်းဝႆႉၵႃႈတီႈမိူင်း ၶႃႇၼၼ်ႇ၊ ပုၼ်ႉဢေႃႈ။ ပိူဝ်ႈၼႆလႄႈၶႅၼ်းတေႃႈပၼ်ဢၶႂၢင်ႉႁႂ်ႈၵဝ်ၶႃႈလႆႈၵႂႃႇသၢင်းၵျူဝ်ႇပေႃႈၵဝ်ၶႃႈသေၵမ်းၶႃႈ၊ပေႃးယဝ်ႉၸင်ႇ၊တေပွၵ်ႈၶိုၼ်းမႃးၵႃႈတီႈၼႆႈယူႇဢေႃႈ၊’ ဝႃႈၼင်ႇၼႆတၢင်ႇလဝ်ႈပၼ်သေၵမ်း၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းမိူင်း ဢေးၵျိပ်ႉ၊ ၵေႃႈမီးဢမိင်ႉလႄႈဝႃႈ၊ “ၵႂႃႇလႄႈသၢင်းၵျူဝ်ႇပေႃႈမႂ်းၸွမ်းၼင်ႇဢၼ်မႂ်းလႆႈဝႆႉၵတိသဵတ်ႈၸႃႇၼၼ်ႉတႃႉ၊” ဝႃႈၼင်ႇၼႆဢေႃႈ။
ယူဝ်းသႅပ်ႈ၊ ၶိုၼ်ႈၵႂႃႇႁႂ်ႈလႆႈသၢင်းၵျူဝ်ႇပေႃႈမၼ်းဢေႃႈ။ ၸႃႉၸဵမ်မူးမၢတ်ႈၽွင်းမိူင်းတင်းသဵင်ႈတင်းလူင်ၵူၼ်းၵႄႇၵူၼ်းႁူဝ်လႂ်တင်းၵႄႇၵၢင်ႉဢိင်မိူင်း၊မိူင်း ဢေးၵျိပ်ႉ၊ တင်းသဵင်ႈတင်းလူင်ဢွၼ်ၵၼ်ၵႂႃႇၸွမ်းသူင်ႇဢေႃႈ။-
ၵူၼ်းႁိူၼ်းၵူၼ်းယေးမၼ်းလႂ်၊ၵူၼ်းႁိူၼ်းၵူၼ်းယေးပီႈဢၢႆႈမၼ်းလႂ်၊ဢိၵ်ႇတင်းၵူၼ်းႁိူၼ်းၵူၼ်းယေးပေႃႈမၼ်းၵႃႈမီးတင်းသဵင်ႈတင်းလူင်ၵေႃႈဢွၼ်ၵၼ်ၸွမ်းသူင်ႇဢေႃႈ။ ၵူၺ်းမီးလုၵ်ႈဢွၼ်ႇလႂ်တင်းၽုင်သူဝ်း၊ၽုင်ဝူဝ်းတရိၵ်ႈသၢၼ်ႇလႂ်၊ၵိုတ်းဝႆႉယူႇတီႈဢိူင်ႇ ၵေႃးသိၼ်း၊ ဢေႃႈ။-
ၼႆႉၵူၺ်းဢမ်ႇၵႃး၊တပ်ႉလေႃႉရထႃးလႂ်၊တင်းတပ်ႉၵူၼ်းၶီႇမႃႉလႂ်ၵေႃႈဢွၼ်ၵၼ်ၸွမ်းသူင်ႇလႄႈပဵၼ်တပ်ႉပဵၼ်တႃႇဢၼ်ယႂ်ႇၼႃႇလူင်လၢင်ဢေႃႈ။
မိူဝ်ႈဢၼ်ၶဝ်ႁွတ်ႈၵႂႃႇထိုင်ၵႃႈတီႈတလၢင်းယဵပ်ႇၶဝ်ႈ ဢႃႇတတ်ႉ၊ ဢၼ်မီးၽၢႆႇဝၼ်းဢွၵ်ႇၼမ်ႉ ယေႃးတၢၼ်ႇ၊ ၼၼ်ႉၸိုင်၊သမ်ႉႁဵတ်းတၢင်းဢၼ်တူပ်းဢူၵ်းႁွင်ႉႁႆႈယႂ်ႇၼႃႇႁိုင်တၢၼ်ႇတၢၼ်ႇဢေႃႈ။ ယူဝ်းသႅပ်ႈ၊ ႁဵတ်းတၢင်းဢၼ်မႆႈၸႂ်ထိုင်ၸႂ်တီႈၼၼ်ႈၸဵတ်းဝၼ်းဢေႃႈ။-
ၶႃႈဝၢၼ်ႈၵူၼ်းမိူင်းမိူင်း ၶႃႇၼၼ်ႇ၊ ၶဝ်လႆႈႁၼ်ၵူၼ်းၸိူဝ်းၼၼ်ႉႁဵတ်းတၢင်းဢၼ်မႆႈၶီထိုင်ၸႂ်ၵႃႈတီႈတလၢင်းယဵပ်ႇၶဝ်ႈ ဢႃႇတတ်ႉ၊ ၼၼ်ႉလႄႈၶဝ်လၢတ်ႈလႄႈဝႃႈ၊ “ၵူၼ်း ဢေးၵျိပ်ႉ၊ ၸိူဝ်းၼႆႉသင်ပႄႉမႃးႁဵတ်းတၢင်းဢၼ်မႆႈၶီထိုင်ၸႂ်ထၼ်ႇၼႆႉ၊” ဝႃႈၼင်ႇၼႆဢေႃႈ။ ပိူဝ်ႈၼႆလႄႈၶဝ်ႁွင်ႉႁဵၵ်ႈတီႈၼၼ်ႈၸိုဝ်ႈဝႃႈ၊ ဢပေးလမိၸရိမ်ႇ၊ ဢေႃႈ။
ၼင်ႇၼၼ်လႄႈလုၵ်ႈၸၢႆး ယႃႇၵုပ်ႈ၊ ၸိူဝ်းၼၼ်ႉ၊ဢွၼ်ၵၼ်ႁဵတ်းၸွမ်းၵႃႈၼင်ႇဢၼ်ပေႃႈၶဝ်သင်ႇလၢတ်ႈဝႆႉၼၼ်ႉဢေႃႈ။-
ၶဝ်ဢွၼ်ၵၼ်ဢဝ်တူဝ်တၢႆမၼ်းၵႂႃႇၵႃႈတီႈမိူင်း ၶႃႇၼၼ်ႇ၊ လႄႈသၢင်းၵျူဝ်ႇၵႃႈၼႂ်းႁူးထမ်ႈဢၼ်မီးၼႂ်းတူင်ႈၼႃး မၵ်ႉပေႇလႃႉ၊ ၽၢႆႇဝၼ်းဢွၵ်ႇ မမ်ႇရေႇ၊ ဢၼ် ဢႃႇပြႃႇႁၢမ်ႇ၊ သိုဝ်ႉဢဝ်ၵႃႈတီႈ ဢေႇၽရုၼ်ႇ၊ ၵူၼ်းမဵဝ်း ႁိတ်ႉတိ၊ ပုၼ်ႈတႃႇႁႂ်ႈပဵၼ်ပႃႇႁဝ်ႈတူဝ်ၸဝ်ႈၵဝ်ႇပိူင်ႇၼၼ်ႉဢေႃႈ။-
ဝၢႆးသေဢၼ် ယူဝ်းသႅပ်ႈ၊ သၢင်းၵျူဝ်ႇပေႃႈမၼ်းယဝ်ႉၼၼ်ႉပႃးဢဝ်ၸဵမ်ပီႈဢၢႆႈၼွင်ႉၸၢႆးမၼ်းဢိၵ်ႇတင်းၶဝ်ၸိူဝ်းဢၼ်ၶိုၼ်ႈၵႂႃႇၸွမ်းသူင်ႇတူဝ်တၢႆ ယႃႇၵုပ်ႈ၊ ၸိူဝ်းၼၼ်ႉတင်းသဵင်ႈတင်းလူင်ၶိုၼ်းမိူဝ်းၵႂႃႇၸူးမိူင်း ဢေးၵျိပ်ႉ၊ ဢေႃႈ။
ဝၢႆးသေပေႃႈၶဝ်တၢႆယဝ်ႉၼၼ်ႉ၊ပီႈဢၢႆႈ ယူဝ်းသႅပ်ႈ၊ ၸိူဝ်းၼၼ်ႉလၢတ်ႈလႄႈဝႃႈ၊ “ၸၢင်ႈၶႄး ယူဝ်းသႅပ်ႈ၊ ယင်းတေၸင်းႁဝ်းလႄႈတၵ်းတွပ်ႇတႅၼ်းပၼ်ၵႃႈဢၼ်ႁဝ်းႁဵတ်းႁုၵ်းႁဵတ်းႁၢႆႉတေႃႇမၼ်းၵမ်းဢွၼ်တၢင်းၼၼ်ႉႁိုဝ်ဢမ်ႇႁု၊” ဝႃႈၼင်ႇၼႆလႄႈ၊-
ပွႆႇၵူၼ်းၵေႃႉၼိုင်ႈၵႂႃႇတီႈ ယူဝ်းသႅပ်ႈ၊ လႄႈလဝ်ႈလၢတ်ႈဝႃႈ၊ “ပေႃႈၸဝ်ႈႁဝ်းၼၼ်ႉၸူဝ်ႈမၼ်းဢမ်ႇပႆႇတၢႆၼၼ်ႉသင်ႇလၢတ်ႈဝႆႉတီႈၶႃႈၸဝ်ႈတင်းလၢႆလႄႈဝႃႈ၊-
‘ၵႂႃႇလၢတ်ႈတီႈ ယူဝ်းသႅပ်ႈ၊ လႄႈဝႃႈ၊ၶႅၼ်းတေႃႈပွႆႇၶႂၢင်းပၼ်တၢင်းၽိတ်းဢၼ်ပီႈဢၢႆႈမႂ်းတင်းလၢႆၽိတ်းပိူင်ႈမႂ်းဝႆႉၼၼ်ႉသေၵမ်း၊’ ဝႃႈၼင်ႇၼႆဝႆႉတီႈၶႃႈဢေႃႈ။ တေႃႈလဵဝ်ၼႆႉၶႅၼ်းတေႃႈပွႆႇၶႂၢင်းပၼ်တၢင်းၽိတ်းဢၼ်ႁဝ်းၶႃႈ၊ၶႃႈၽြႃးပဵၼ်ၸဝ်ႈပေႃႈၸဝ်ႈႁဝ်းၸိူဝ်းၼႆႉၽိတ်းပိူင်ႈၼၼ်ႉသေၵမ်းၶႃႈ၊” ဝႃႈၼင်ႇၼႆဢေႃႈ။ မိူဝ်ႈဢၼ်မၼ်းငိၼ်းၵႂၢမ်းၼၼ်ႉ ယူဝ်းသႅပ်ႈ၊ ၼမ်ႉတႃတူၵ်းဢေႃႈ။
မိူဝ်ႈၼၼ်ႉ၊ပီႈဢၢႆႈမၼ်းၸိူဝ်းၼၼ်ႉမႃးလႄႈဢွၼ်ၵၼ်ၶုပ်ႉမူပ်ႇၵႃႈတီႈၽၢႆႇၼႃႈမၼ်းလႄႈလဝ်ႈလၢတ်ႈဝႃႈ၊ “ႁဝ်းၶႃႈမီးယူႇၵႃႈတီႈၽၢႆႇၼႃႈၸဝ်ႈႁဝ်းၸိူဝ်ႉၼင်ႇၶႃႈၵူၼ်းၸႂ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ယူဝ်းသႅပ်ႈ၊ ၵေႃႈလၢတ်ႈတီႈၶဝ်လႄႈဝႃႈ၊ “ယႃႇပေမႆႈၸႂ်။ ၵဝ်ၶႃႈပဵၼ်ၵေႃႉတၢင်တူဝ်ၽြႃးပဵၼ်ၸဝ်ႈၵေႃႈဢမ်ႇၸႂ်ႈ။-
သူၵျၢမ်ႇပွင်ဢၼ်ႁုၵ်းဢၼ်ႁၢႆႉသႂ်ႇၵဝ်ၶႃႈသေၵေႃႈ၊ၽြႃးပဵၼ်ၸဝ်ႈလႅၵ်ႈလၢႆႈႁႂ်ႈပဵၼ်ဢၵျူဝ်းၵျေးၸူးႁႂ်ႈလႆႈၵႄႇသႄႇဢသၢၵ်ႈၵူၼ်းၼမ်ၼႃႇႁႂ်ႈလႆႈဢသၢၵ်ႈလိပ်းယူႇၸိူဝ်ႉၼင်ႇဢၼ်ပဵၼ်ယူႇဝၼ်းမိူဝ်ႈၼႆႉၼၼ်ႉယဝ်ႉ။-
ပိူဝ်ႈၼႆလႄႈယႃႇပေမႆႈၸႂ်။ ၵဝ်ၶႃႈတၵ်းလဵင်ႉလူသူ၊ဢိၵ်ႇတင်းလုၵ်ႈလၢင်းသူတင်းလၢႆဢေႃႈ၊” ဝႃႈၼင်ႇၼႆလၢတ်ႈၵႂၢမ်းမႅတ်ႈတႃႇတေႃႇၶဝ်ႁႂ်ႈၶဝ်ပျေႇၸႂ်ၼိမ်ၸႂ်ဢေႃႈ။
ႁဵတ်းၼၼ်လႄႈ ယူဝ်းသႅပ်ႈ၊ ယူႇသဝ်းၵႃႈတီႈမိူင်း ဢေးၵျိပ်ႉ၊ ႁူမ်ႈလူၺ်ႈၵၼ်တင်းၵူၼ်းႁိူၼ်းၵူၼ်းယေးပေႃႈမၼ်းၸိူဝ်းၼၼ်ႉယူႇလႄႈဢသၢၵ်ႈၶိုတ်ႈထိုင်ပၢၵ်ႇပၢႆႈသိပ်းပီဢေႃႈ။-
မၼ်းယင်းလႆႈႁၼ်လုၵ်ႈလၢၼ် ဢေႇၽရိမ်ႇ၊ လႄႈလုၵ်ႈလၢင်း မႃႇၶိရႃႉ၊ ဢၼ်ပဵၼ်လုၵ်ႈၸၢႆး မၼႃႇသေႇ၊ ၼၼ်ႉၵေႃႈ လႆႈၵိူတ်ႇလဵင်ႉၵႃႈၼိူဝ်တၵ်းမၼ်းဢေႃႈ။-
ယူဝ်းသႅပ်ႈ၊ ၵေႃႈလၢတ်ႈတီႈပီႈဢၢႆႈမၼ်းတင်းလၢႆလႄႈဝႃႈ၊ “ဝၼ်းတၢႆၵဝ်ၶႃႈၸမ်တၵ်းထိုင်ယဝ်ႉ။ ၽြႃးပဵၼ်ၸဝ်ႈတၵ်းမႃးလူထိင်းသူဢမၢၼ်ႇၶၼ်ပဵၼ်လႄႈတၵ်းဢဝ်သူဢွၵ်ႇသေမိူင်းၼႆႉၶိုၼ်းသူင်ႇသူၸူးတီႈမိူင်းဢၼ်မၼ်းၸဝ်ႈဝႆႉၵတိတီႈ ဢႃႇပြႃႇႁၢမ်ႇ၊ဢိၸၢၵ်ႈ၊ ဢိၵ်ႇတင်း ယႃႇၵုပ်ႈ၊ ၼၼ်ႉဢေႃႈ၊” ဝႃႈၼင်ႇၼႆဢေႃႈ။-
ၵမ်းၼၼ်ႉ၊ ယူဝ်းသႅပ်ႈ၊ ႁႂ်ႈၵူၼ်းမဵဝ်း ဢိသရေး၊ တင်းလၢႆတိူင်ႇဝႃႈၵတိတီႈမၼ်းလႄႈဝႃႈ၊ “မိူဝ်ႈဢၼ်ၽြႃးပဵၼ်ၸဝ်ႈသူင်ႇသူပွၵ်ႈၵႂႃႇၶိုၼ်းတီႈမိူင်းၼၼ်ႉၸိုင်၊ဢဝ်လုပ်ႇၵဝ်ၶႃႈဢွၵ်ႇသေမိူင်းၼႆႉမိူဝ်းၶိုၼ်းၵႂႃႇၸွမ်းသေၵမ်း၊” ဝႃႈၼင်ႇၼႆဢေႃႈ။-
ယူဝ်းသႅပ်ႈ၊ ၵေႃႈဢသၢၵ်ႈလႆႈပၢၵ်ႇသိပ်းပီလႄႈတၢႆၵႂႃႇဢေႃႈ။ ၶဝ်ဢဝ်ယႃႈယႃမဵဝ်းၼၢမ်ႇသႃႇလႂ်သႂ်ႇတူဝ်တၢႆမၼ်းၼင်ႇႁိုဝ်တေဢမ်ႇတူႇဢမ်ႇၼဝ်ႈၼၼ်ႉသေယဝ်ႉ၊သႂ်ႇၵွမ်ႇဝႆႉၵႃႈတီႈမိူင်း ဢေးၵျိပ်ႉ၊ ဝႆႉဢေႃႈ။ ၵျၢမ်းငဝ်ႈၵမ်ႇၽႃႇယဝ်ႉယဝ်ႉဢေႃႈ။
တႄႇၸႃႉဢဝ်ၼႆႉၵႂႃႇပဵၼ်ၸိုဝ်ႈလုၵ်ႈလၢင်း ဢိသရေး၊ ဢၼ်ႁွတ်ႈထိုင်ၵႂႃႇၵႃႈတီႈမိူင်း ဢေးၵျိပ်ႉ၊ လူၺ်ႈၵၼ်တင်း ယႃႇၵုပ်ႈ၊ လႄႈၶဝ်ပႃးၵႃႈၼႂ်းၵူၼ်းႁိူၼ်းၵူၼ်းယေးၽႂ်ၽႂ်မၼ်းမၼ်းဢေႃႈ။-
တၢၼ်ႇ၊ၼပ်ႉထလိ၊ၵၢတ်ႉ၊ တင်း ဢႃႇသျႃႇ၊ ဢေႃႈ။-
ၸိူဝ်ႉၶိူဝ်းလုၵ်ႈလၢင်းဢၼ်သိုပ်ႇဢွၵ်ႇမႃးၵႃႈတီႈ ယႃႇၵုပ်ႈ၊ ၸမ်ႉ၊မီးၸဵတ်းသိပ်းၵေႃႉဢေႃႈ။ ယူဝ်းသႅပ်ႈ၊ ၸမ်ႉ၊မီးယူႇဝႆႉၵႃႈၼႂ်းမိူင်း ဢေးၵျိပ်ႉ၊ ဢွၼ်တၢင်းယဝ်ႉဢေႃႈ။-
ဝၢႆးလိုၼ်းၼၼ်ႉမႃးၸႃႉၸဵမ် ယူဝ်းသႅပ်ႈ၊ လႄႈပီႈဢၢႆႈမၼ်းတင်းလၢႆဢိၵ်ႇတင်းၸိူဝ်ႉၶိူဝ်းၶဝ်တင်းသဵင်ႈတင်းလူင်လႆႈတၢႆၵႂႃႇမူတ်းဢေႃႈ။-
ၵူၺ်းၵႃႈ၊ၵူၼ်းမဵဝ်း ဢိသရေး၊ ၸိူဝ်းၼၼ်ႉၵိူတ်ႇလဵင်ႉလုၵ်ႈလဵင်ႉလၢင်းလႄႈၼမ်ၵိုၼ်းမႃးသေယဝ်ႉ၊ႁႅင်းယႂ်ႇၼႃႇသမ်ႉပေႃးၸွတ်ႇတူဝ်ႈလႄႈတဵမ်မိူင်း ဢေးၵျိပ်ႉ၊ ၵႂႃႇတင်းမိူင်းၵူႈတီႈၵူႈလႅၼ်ဢေႃႈ။
ၵမ်းၼၼ်ႉ ၶုၼ်ႁေႃၶမ်းပႃးမႂ်ႇဢၼ်ဢမ်ႇႁုၸၵ်း ယူဝ်းသႅပ်ႈ၊ ၼၼ်ႉလႆႈဢရႃႇဢၼ်ဢုပ်ႉပိူင်ႇမိူင်း ဢေးၵျိပ်ႉ၊ ဢေႃႈ။-
ၶုၼ်ႁေႃၶမ်းၼၼ်ႉလၢတ်ႈတီႈၶႃႈဝၢၼ်ႈၵူၼ်းမိူင်းမၼ်းလႄႈဝႃႈ၊ “တူၺ်းလူး။ ၵူၼ်းမဵဝ်း ဢိသရေး ၶဝ်ၼႆႉၼမ်ၵိုၼ်းၼႃႇလူင်လၢင်လႄႈႁႅင်းယႂ်ႇၼႃႇသေႁဝ်းယဝ်ႉ။-
ၵမ်းလိုၼ်းပေႃးပဵၼ်သိုၵ်းပဵၼ်သိူဝ်မႃးၸိုင်၊ၵူဝ်ၶဝ်ၽွမ်ႉၽၢႆႇရၢၼ်ႇသူႇႁဝ်းသေလႄႈတိုၵ်းတေႃးႁဝ်းသေယဝ်ႉ၊တၵ်းပၢႆႈလွတ်ႈဢွၵ်ႇမိူင်းႁဝ်းၼႆႉၵႂႃႇဢေႃႈ။ ႁဝ်းတၵ်းလႆႈႁႃလွင်ႈတၢင်းႁႂ်ႈလႆႈႁၢမ်ႈတၢပ်ႈတၢင်းဢၼ်ၶဝ်တၵ်းယႂ်ႇၽႄႈၼမ်ၵိုၼ်းမႃးယူႇၼၼ်ႉဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၵူၼ်းမဵဝ်း ဢေးၵျိပ်ႉ၊ ၶဝ်ၶၢၼ်းဝႆႉၶုၼ်ဢုပ်ႉထိင်းၵူၼ်းမဵဝ်း ဢိသရေး၊ လႄႈတဵၵ်းငႅၼ်းႁႂ်ႈၶဝ်ႁဵတ်းၵၢၼ်ယၢပ်ႇၽိုတ်ႇၼႃႇဢေႃႈ။ ၵူၼ်းမဵဝ်း ဢိသရေး၊ ၶဝ်လႆႈတႄႇႁဵတ်းဝဵင်း ပိတုမ်ႇ၊ တင်းဝဵင်း ရႃႇမသိတ်ႈ၊ ပုၼ်ႈတႃႇၶုၼ်ႁေႃၶမ်းမိူင်း ဢေးၵျိပ်ႉ တၵ်းသိမ်းၽၼ်ႇတႃႇဝႆႉဢေႃႈ။-
ၼႂ်းဝႃႈၼၼ်သေၵေႃႈမိူဝ်ႈဢၼ်ၵူၼ်းမဵဝ်း ဢေးၵျိပ်ႉ၊ ယဵင်ႈၶႅၼ်းတဵၵ်းငႅၼ်းၵူၼ်းမဵဝ်း ဢိသရေး၊ သေၵေႃႈ၊ၶဝ်ၼၼ်ႉယဵင်ႈၶႅၼ်းၼမ်ၵိုၼ်းမႃးလႄႈယဵင်ႈၶႅၼ်းယႂ်ႇၽႄႈၸွတ်ႇတူဝ်ႈၵႂႃႇတိၵ်းတိၵ်းဢေႃႈ။ ၵူၼ်းမဵဝ်း ဢေးၵျိပ်ႉ၊ ၶဝ်လႆႈမႆႈၸႂ်ၵွပ်ႈၵူၼ်းမဵဝ်း ဢိသရေး၊ ဢေႃႈ။-
ၶဝ်ၸင်ႇႁႂ်ႈၵူၼ်းမဵဝ်း ဢိသရေး၊ ၶဝ်ၶၢမ်ႇႁဵတ်းၶႃႈ၊ႁႂ်ႈၶဝ်ယၢပ်ႇၽိုတ်ႇၼႃႇလူင်လၢင်ဢေႃႈ။-
ၶဝ်ၼၼ်ႉႁဵတ်းႁႂ်ႈၵူၼ်းမဵဝ်း ဢိသရေး၊ ၶဝ်၊ၶီၸႂ်ၶူမ်ၸႂ်လူၺ်ႈတၢင်းဢၼ်ၸႂ်ႉႁဵတ်းၵၢၼ်ဢၼ်ယၢပ်ႇယဵၼ်းၼႃႇ၊ႁႂ်ႈၶဝ်တဝ်လိၼ်ၼဵဝ်လႄႈႁဵတ်းမၢၵ်ႇဢုတ်ႇ၊ဢိၵ်ႇတင်းႁႂ်ႈၶဝ်ႁဵတ်းႁႆႈႁဵတ်းၼႃး၊ႁဵတ်းသူၼ်ၵူႈၸိူဝ်ႉၵူႈပိူင်ဢေႃႈ။ ၼႂ်းတၢင်းဢၼ်ၸႂ်ႉႁဵတ်းၵၢၼ်ၶဝ်တင်းလၢႆၼၼ်ႉၶဝ်တဵၵ်းငႅၼ်းႁႂ်ႈၵူၼ်းမဵဝ်း ဢိသရေး၊ ၶဝ်၊ႁဵတ်းၵၢၼ်ဢၼ်ယၢပ်ႇယဵၼ်းၶၢၼ်ၸႂ်ၶၢၼ်ၶေႃးၼႃႇလူင်လၢင်ဢေႃႈ။
မိူဝ်ႈၼၼ်ႉၶုၼ်ႁေႃၶမ်းမိူင်း ဢေးၵျိပ်ႉ၊ လၢတ်ႈတီႈ သိၽရႃႉ၊ ဢိၵ်ႇတင်း ပုဢႃႇ၊ ၸိူဝ်းဢၼ်ပဵၼ်မႄႈၵဵပ်းတီႈမႄႈယိင်းမဵဝ်း ႁေႇပြႄး၊ ၶဝ်ၼၼ်ႉလႄႈဝႃႈ၊-
“မိူဝ်ႈဢၼ်သူၵႂႃႇႁဵတ်းမႄႈၵဵပ်းတီႈမႄႈယိင်းမဵဝ်း ႁေႇပြႄး၊ ၶဝ်ၵိူတ်ႇလဵင်ႉလုၵ်ႈယူႇၼၼ်ႉပေႃးပဵၼ်ၵူၼ်းၸၢႆးဢွၼ်ႇၸိုင်၊သူတၵ်းလႆႈဢဝ်တၢႆပႅတ်ႈဢေႃႈ။ ပေႃးပဵၼ်လုၵ်ႈယိင်းဢွၼ်ႇၸိုင်၊ဝႆႉႁႂ်ႈမၼ်းဢသၢၵ်ႈလိပ်းယူႇတႃႉ၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊မႄႈၵဵပ်းၸိူဝ်းၼၼ်ႉၵူဝ်ႁႄ ထႃႇဝရႃႉၽြႃး၊ လႄႈဢမ်ႇထွမ်ႇဢဝ်ဢမိင်ႉၶုၼ်ႁေႃၶမ်း၊ယင်းပွႆႇႁႂ်ႈၵူၼ်းၸၢႆးဢွၼ်ႇတင်းလၢႆလႆႈလွတ်ႈဢသၢၵ်ႈဢေႃႈ။-
ပိူဝ်ႈၼႆလႄႈၶုၼ်ႁေႃၶမ်းၼၼ်ႉႁွင်ႉဢဝ်မႄႈၵဵပ်းၸိူဝ်းၼၼ်ႉမႃးလႄႈၸႅတ်ႈထၢမ်ဝႃႈ၊ “ႁဵတ်းသင်လႄႈသူႁဵတ်းၸိူဝ်ႉၼင်ႇၼႆ၊ႁဵတ်းသင်လႄႈသူပွႆႇႁႂ်ႈၵူၼ်းၸၢႆးဢွၼ်ႇတင်းလၢႆလႆႈလွတ်ႈဢသၢၵ်ႈၵႂႃႇၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။-
မႄႈၵဵပ်းၸိူဝ်းၼၼ်ႉၵေႃႈၶိုၼ်းလဝ်ႈလၢတ်ႈလႄႈဝႃႈ၊ “မႄႈယိင်းမဵဝ်း ႁေႇပြႄး၊ ၶဝ်၊ဢမ်ႇမိူၼ်ၵၼ်တင်းမႄႈယိင်းမဵဝ်း ဢေးၵျိပ်ႉ၊ တင်းလၢႆတီႈၶႃႈ။ ၶဝ်ၼၼ်ႉၵႅၼ်ႇၶႅင်ၼႃႇလႄႈၶဝ်ၸၢင်ႈၵိူတ်ႇလဵင်ႉလုၵ်ႈဢွၼ်တၢင်းမႄႈၵဵပ်းဢမ်ႇပႆႇႁွတ်ႈထိုင်ၵႂႃႇၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၽြႃးပဵၼ်ၸဝ်ႈႁဵတ်းၵျေးၸူးတီႈမႄႈၵဵပ်းၸိူဝ်းၼၼ်ႉလႄႈၵူၼ်းမဵဝ်း ဢိသရေး၊ ၵေႃႈယႂ်ႇၽႄၼမ်ၵိုၼ်းမႃးလႄႈႁႅင်းယႂ်ႇၼႃႇဢေႃႈ။-
ပိူဝ်ႈဢၼ်မႄႈၵဵပ်းၸိူဝ်းၼၼ်ႉရူဝ်ႇသေႇၵူဝ်ယမ်ၽြႃးပဵၼ်ၸဝ်ႈလႄႈ မၼ်းၸဝ်ႈၸင်ႇလႆႈလုမ်းလႃးၵူၼ်းႁိူၼ်းၵူၼ်းယေးၶဝ်ဢေႃႈ။-
မိူဝ်ႈၼၼ်ႉၶုၼ်ႁေႃၶမ်းပူင်ဢမိင်ႉတီႈၶႃႈဝၢၼ်ႈၵူၼ်းမိူင်းမၼ်းတင်းသဵင်ႈတင်းလူင်ဝႆႉလႄႈဝႃႈ၊ “ၵႃႈပဵၼ်ၵူၼ်းၸၢႆးဢွၼ်ႇဢၼ်ၵိူတ်ႇမႃးတီႈမဵဝ်း ႁေႇပြႄး၊ ၼၼ်ႉတၵ်းလႆႈဢဝ်ထိမ်ႈပႅတ်ႈတူၵ်းၵႃႈၼႂ်းမႄႈၼမ်ႉ ၼၢႆးလ် ဢေႃႈ။ ၽူႈယိင်းဢွၼ်ႇတင်းလၢႆၸမ်ႉ၊တၵ်းလႆႈပွႆႇလွတ်ႈဢသၢၵ်ႈၶဝ်ဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၶိင်ႇၵႃႇလႃႉယၢမ်းၼၼ်ႉမီးၵူၼ်းၸိူဝ်ႉၶိူဝ်း လေႇဝိ၊ ၵေႃႉၼိုင်ႈဢဝ်မေးဢၼ်ပဵၼ်ၽူႈယိင်းၵူၼ်းၸိူဝ်ႉၶိူဝ်းမဵဝ်းလဵဝ်ၵၼ်သေယဝ်ႉ၊-
မႄႈယိင်းၼၼ်ႉၵိူတ်ႇလဵင်ႉလုၵ်ႈၸၢႆးမႃးဢေႃႈ။ မိူဝ်ႈဢၼ်ႁၼ်လုၵ်ႈၸၢႆးဢွၼ်ႇၼၼ်ႉႁၢင်ႈလီၼႃႇၼၼ်ႉၸိုင်၊မၼ်းဢဝ်သိူင်ႇဝႆႉလႆႈသၢမ်လိူၼ်ဢေႃႈ။-
ၵူၺ်းၵႃႈ၊မိူဝ်ႈဢၼ်မၼ်းဢမ်ႇသိူင်ႇဝႆႉလႆႈယဝ်ႉၼၼ်ႉၸိုင်၊မၼ်းဢဝ်တူၼ်ႈၶႅမ်သၢၼ်ႁဵတ်းဢူႇဢၼ်ၼိုင်ႈလႄႈဢဝ်ယၢင်မႆႉတင်းႁၵ်ႉတႃးသေယဝ်ႉ၊ဢဝ်လုၵ်ႈဢွၼ်ႇၼၼ်ႉသႂ်ႇယဝ်ႉၸင်ႇဢဝ်ၵႂႃႇဝႆႉၵႃႈၼႂ်းၵႄႈတူၼ်ႈၶႅမ်ႁိမ်းၽင်ႇမႄႈၼမ်ႉဢေႃႈ။-
ပီႈၼၢင်းလုၵ်ႈဢွၼ်ႇၼၼ်ႉသမ်ႉၸုၵ်းယူႇတီႈဢၼ်ၵႆႁႂ်ႈလႆႈပႂ်ႉတူၺ်းလွင်ႈဢၼ်တၵ်းပဵၼ်မႃးၸိူဝ်ႉၼင်ႇႁိုဝ်တီႈလုၵ်ႈဢွၼ်ႇၼၼ်ႉဢေႃႈ။
မိူဝ်ႈၼၼ်ႉ လုၵ်ႈယိင်းၶုၼ်ႁေႃၶမ်းလူင်းမႃးဢၢပ်ႇၼမ်ႉလႄႈၸိူင်ႉၼၢင်းမၼ်းတင်းလၢႆပႆၵႂႃႇပႆမႃးႁိမ်းၽင်ႇမႄးၼမ်ႉယူႇဢေႃႈ။ မိူဝ်ႈၼၼ်ႉမၼ်းၼၢင်းထူပ်းႁၼ်ဢူႇၵႃႈၼႂ်းၵႄႈတူၼ်ႈၶႅမ်လႄႈၸႂ်ႉၸိူင်ႉၼၢင်းၵေႃႉၼိုင်ႈၵႂႃႇဢဝ်မႃးဢေႃႈ။-
မိူဝ်ႈဢၼ်ၽုၺ်ႇဢူႇၼၼ်ႉၸိုင်၊ထူပ်းႁၼ်လုၵ်ႈဢွၼ်ႇလႅင်ဢေႃႈ။ လုၵ်ႈဢွၼ်ႇလႅင်ၼၼ်ႉႁႆႈယူႇဢေႃႈ။ မၼ်းၼၢင်းဢဵတ်းလူလုၵ်ႈဢွၼ်ႇလႅင်ၼၼ်ႉလႄႈလၢတ်ႈဝႃႈ၊ “မၼ်းၼႆႉၸၢင်ႈၶႄးပဵၼ်လုၵ်ႈဢွၼ်ႇၵူၼ်းမဵဝ်း ႁေႇပြႄး၊ ၶဝ်ဢေႃႈ၊” ဝႃႈၼင်ႇၼႆဢေႃႈ။
ၵမ်းၼၼ်ႉ ပီႈၼၢင်းလုၵ်ႈဢွၼ်ႇၼၼ်ႉလဝ်ႈထၢမ်မၼ်းၼၢင်းလႄႈဝႃႈ၊ “ၵဝ်ၶႃႈတၵ်းလႆႈၵႂႃႇႁွင်ႉပၼ်မႄႈယိင်းၼႂ်းၵူၼ်းမဵဝ်း ႁေႇပြႄး၊ ပုၼ်ႈတႃႇတၵ်းလုမ်းလႃးလုၵ်ႈဢွၼ်ႇၼႆႉပုၼ်ႈၸဝ်ႈၼၢင်းတီႈၶႃႈႁိုဝ်း၊” ဝႃႈၼင်ႇၼႆဢေႃႈ။
ၸဝ်ႈၼၢင်းၼၼ်ႉၵေႃႈလၢတ်ႈလႄႈဝႃႈ၊ “ၵႂႃႇႁွင်ႉမႃးတႃႉ၊” ဝႃႈၼင်ႇၼႆသေယဝ်ႉ၊မႄႈယိင်းဢွၼ်ႇၼၼ်ႉၵေႃႈၵႂႃႇလႄႈႁွင်ႉဢဝ်မႄႈလုၵ်ႈဢွၼ်ႇလႅင်ၼၼ်ႉမႃးဢေႃႈ။-
ၸဝ်ႈၼၢင်းၼၼ်ႉၵေႃႈသင်ႇလၢတ်ႈတီႈမႄႈယိင်းၼၼ်ႉလႄႈဝႃႈ၊ “ဢဝ်လုၵ်ႈဢွၼ်ႇၼႆႉၵႂႃႇလႄႈလုမ်းလႃးပၼ်ပုၼ်ႈၵဝ်တႃႉ။ ၵဝ်တၵ်းပၼ်ၵႃႈႁႅင်းမႂ်းယူႇ၊” ဝႃႈၼင်ႇၼႆလႄႈ၊မႄႈယိင်းၼၼ်ႉၵေႃႈဢဝ်လုၵ်ႈဢွၼ်ႇၼၼ်ႉၵႂႃႇလုမ်းလႃးဝႆႉသေဢေႃႈ။-
မိူဝ်ႈဢၼ်လုၵ်ႈဢွၼ်ႇၼၼ်ႉယႂ်ႇမႃးၼၼ်ႉၸိုင်၊မၼ်းဢဝ်ၵႂႃႇသူင်ႇတီႈလုၵ်ႈယိင်းၶုၼ်ႁေႃၶမ်းလႄႈ၊ၸဝ်ႈၼၢင်းၼၼ်ႉၵေႃႈၵဵပ်းလဵင်ႉဝႆႉၼႂ်းဢရႃႇလုၵ်ႈၸၢႆးသေယဝ်ႉ၊မၼ်းၼၢင်းဝႃႈ၊ “ပိူဝ်ႈဢၼ်ၵဝ်ၼုၵ်ႈဢဝ်မၼ်းဢွၵ်ႇသေၵႃႈၼႂ်းၼမ်ႉမႃးလႄႈၵဝ်ႁွင်ႉႁဵၵ်ႈၸိုဝ်ႈမၼ်းဝႃႈ၊ မူဝ်းသေႇ၊ ဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ် မူဝ်းသေႇ၊ ယႂ်ႇမႃးၼၼ်ႉၸိုင်၊မီးဝၼ်းၼိုင်ႈမၼ်းဢွၵ်ႇၵႂႃႇၸူးတီႈၵူၼ်းမဵဝ်းမၼ်းႁႂ်ႈလႆႈလူတူၺ်းတၢင်းဢၼ်ၶဝ်လႆႈႁဵတ်းၵၢၼ်ယၢပ်ႇၽိုတ်ႇၼႃႇၼၼ်ႉဢေႃႈ။ ၵမ်းၼၼ်ႉ မၼ်းႁၼ်ၵူၼ်းမဵဝ်း ဢေးၵျိပ်ႉ၊ ၵေႃႉၼိုင်ႈပေႃႉယႅၼ်ႉၵူၼ်းမဵဝ်းမၼ်းဢၼ်ပဵၼ်ၵူၼ်း ႁေႇပြႄး၊ ၵေႃႉၼိုင်ႈယူႇၼၼ်ႉဢေႃႈ။-
မၼ်းၵေႃႈဝၢႆႇတူၺ်းသၢႆႉတူၺ်းၶႂႃသေယဝ်ႉ၊ႁုဝႃႈၽူႈလႂ်ဢမ်ႇမီးတီႈၼၼ်ႈသေၵေႃႉလႄႈမၼ်းဢဝ်ၵူၼ်းမဵဝ်း ဢေးၵျိပ်ႉ၊ ၼၼ်ႉတၢႆပႅတ်ႈသေယဝ်ႉ၊ဢဝ်ၽင်ဝႆႉၵႃႈၼႂ်းသၢႆးသေဢေႃႈ။-
ထႅင်ႈဝၼ်းၼိုင်ႈမၼ်းသမ်ႉၵႂႃႇလႄႈလႆႈႁၼ်ၵူၼ်းမဵဝ်း ႁေႇပြႄး၊ ၼင်ႇၵၼ်ပေႃႉယႅၼ်ႉၵၼ်ယူႇၼၼ်ႉဢေႃႈ။ မၼ်းၵေႃႈၵႂႃႇလႄႈလၢတ်ႈတီႈၵေႃႉဢၼ်ႁဵတ်းၽိတ်းၼၼ်ႉလႄႈဝႃႈ၊ “ႁဵတ်းသင်လႄႈမႂ်းပေႃႉယႅၼ်ႉၵူၼ်းမဵဝ်း ႁေႇပြႄး၊ ၼင်ႇၵၼ်ၵၼ်ၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။-
ၵေႃႉၼၼ်ႉသမ်ႉၶိုၼ်းလၢတ်ႈလႄႈဝႃႈ၊ “ၽူႈလႂ်ယုၵ်ႉတၢင်ႇႁႂ်ႈမႂ်းပဵၼ်ၵူၼ်းလူင်ဢၼ်တႅပ်းတတ်းတြႃးၵႃႈၼိူဝ်ႁဝ်းၼႆႉ။ မႂ်းတၵ်းဢဝ်ၵဝ်တၢႆမိူၼ်ၸိူဝ်ႉၼင်ႇဢၼ်မႂ်းဢဝ်ၵူၼ်းမဵဝ်း ဢေးၵျိပ်ႉ၊ တၢႆၼၼ်ႉႁိုဝ်း၊” ဝႃႈၼင်ႇၼႆဢေႃႈ။ မိူဝ်ႈၼၼ်ႉ မူဝ်းသေႇ၊ ၵူဝ်ႁႄလႄႈလၢတ်ႈၼႂ်းၸႂ်မၼ်းလႄႈဝႃႈ၊ “ပိူၼ်ႈႁုလွင်ႈတၢင်းဢၼ်ၵဝ်ႁဵတ်းၼၼ်ႉယဝ်ႉလူင်ပႄႇ၊” ဝႃႈၼင်ႇၼႆဢေႃႈ။-
မိူဝ်ႈဢၼ်ၶုၼ်ႁေႃၶမ်းလႆႈငိၼ်းၶၢဝ်ႇငၢဝ်းၼၼ်ႉၸိုင်၊မၼ်းၵျၢမ်ႇႁႃဢဝ် မူဝ်းသေႇ၊ တၢႆဢေႃႈ။ ၵူၺ်းၵႃႈ၊ မူဝ်းသေႇ၊ ဢွၵ်ႇပၢႆႈၵႂႃႇၸူးမိူင်း မိတျၼ်ႇ၊ လႄႈယူႇသဝ်းၵႃႈတီႈၼၼ်ႈဢေႃႈ။ ဝၼ်းၼိုင်ႈမိူဝ်ႈဢၼ် မူဝ်းသေႇ၊ ၼင်ႈယူႇၵႃႈတီႈႁိမ်းၼမ်ႉမေႃႇမေႃႇၼိုင်ႈယူႇၼၼ်ႉ၊-
လုၵ်ႈယိင်းယဵၸ်ႈပရေႃးႁဵၵ်ႈ မိူင်း မိတျၼ်ႇ၊ ၶဝ်ပီႈၼွင်ႉၸဵတ်းၵေႃႉမႃးတဵၵ်းၼမ်ႉဢေႃႈ။ ၶဝ်ဢွၼ်ၵၼ်တဵၵ်းသႂ်ႇၼႂ်းႁၢင်းၼမ်ႉႁႂ်ႈလႆႈတိုၵ်းၼမ်ႉပၼ်တီႈၽုင်သူဝ်းၽုင်ပႄႉပေႃႈၶဝ်ဢေႃႈ။-
ၵူၺ်းၵႃႈ၊ၵူၼ်းလဵင်ႉသူဝ်းၵမ်ႈၽွင်ႈမႃးလႄႈလိုပ်ႈႁေႃႈလုၵ်ႈယိင်းသၢဝ်ၸိူဝ်းၼၼ်ႉပႅတ်ႈဢေႃႈ။ မိူဝ်ႈၼၼ်ႉ မူဝ်းသေႇ၊ ၵႂႃႇၸွႆႈထႅမ်လုၵ်ႈယိင်းသၢဝ်ၸိူဝ်းၼၼ်ႉသေယဝ်ႉ၊ၸွႆႈတိုၵ်းၼမ်ႉပၼ်တီႈသူဝ်းတင်းပႄႉၶဝ်ဢေႃႈ။-
မိူဝ်ႈဢၼ်ၶဝ်ၶိုၼ်းမိူဝ်းၵႂႃႇၸူးတီႈပေႃႈၶဝ် ယေႇႀရေႃး၊ ၼၼ်ႉၸိုင်၊ပေႃႈၶဝ်ထၢမ်လႄႈဝႃႈ၊ “ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမိူဝ်ႈၼႆႉသူပွၵ်ႈမႃးႁိူၼ်းၸဝ်ႉၼႃႇထၼ်ႇၼႆႉ၊” ဝႃႈၼင်ႇၼႆဢေႃႈ။-
ၶဝ်ၵေႃႈၶိုၼ်းလၢတ်ႈလႄႈဝႃႈ၊ “မီးၵူၼ်းမိူင်း ဢေးၵျိပ်ႉ၊ ၵေႃႉၼိုင်ႈၵႄႇသႄႇဢဝ်ႁဝ်းၶႃႈသေၵႃႈတီႈၵူၼ်းလဵင်ႉသူဝ်းလႂ်ဢေႃႈ။ မၼ်းယင်းၸွႆႈတဵၵ်းၼမ်ႉပၼ်ႁဝ်းၶႃႈလႄႈၸွႆႈတိုၵ်းၼမ်ႉပၼ်တီႈသူဝ်းတင်းပႄႉႁဝ်းၶႃႈၶႃႈဢေႃႈ၊” ဝႃႈၼင်ႇၼႆဢေႃႈ။
မၼ်းၵေႃႈလၢတ်ႈတီႈလုၵ်ႈယိင်းမၼ်းတင်းလၢႆလႄႈဝႃႈ၊ “ၵေႃႉၼၼ်ႉမီးယူႇၵႃႈတီႈလႂ်။ ႁဵတ်းသင်လႄႈသူပႅတ်ႈမၼ်းဝႆႉၵႃႈတီႈၼၼ်ႈ။ ၵႂႃႇႁွင်ႉမၼ်းမႃးၵိၼ်ၶူပ်းလူၺ်ႈၵၼ်တင်းႁဝ်းတႃႉ၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈငိၼ်းပျေႃႇငိၼ်းမူၼ်ႈၶႂ်ႈယူႇလူၺ်ႈၵၼ်တင်းမၼ်းဢေႃႈ။ မၼ်းၵေႃႈဢဝ်လုၵ်ႈယိင်းမၼ်း ၸိပေႃးရႃႉ၊ သွင်ႇမၢင်ႇၵလႃႇပၼ်တီႈ မူဝ်းသေႇ၊ သေဢေႃႈ။-
မၼ်းၼၼ်ႉၵိူတ်ႇလဵင်ႉလုၵ်ႈၸၢႆးမႃးလႄႈ မူဝ်းသေႇ၊ လၢတ်ႈဝႃႈ၊ “ၵွပ်ႈပိူဝ်ႈၵဝ်ပဵၼ်ၶႅၵ်ႇပဵၼ်လိူဝ်ႈပဵၼ်ၵူၼ်းမိူင်းၼွၵ်ႈလႄႈၵဝ်ႁွင်ႉႁဵၵ်ႈၸိုဝ်ႈမၼ်း ၵေႇရသုၼ်ႇ၊ ဢေႃႈ၊” ဝႃႈၼင်ႇၼႆဢေႃႈ။
ပီမိူင်းႁိုင်မႃးလႄႈၶုၼ်ႁေႃၶမ်းမိူင်း ဢေးၵျိပ်ႉ၊ ၵေႃႈၼွၼ်းၽႄးၵႂႃႇယဝ်ႉဢေႃႈ။ ၵူၼ်းမဵဝ်း ဢိသရေး၊ ၶဝ်ယင်းတိုၵ်ႉလႆႈပွင်ႉၶၢင်းယူႇၵွပ်ႈပိူဝ်ႈၶဝ်လႆႈၶၢမ်ႇပဵၼ်ၶႃႈယူႇၼၼ်ႉသေယဝ်ႉ၊ႁွင်ႉသႅၼ်ႇႁွင်ႉႁႆႈပုၼ်ႈဢၼ်တၵ်းလႆႈတၢင်းၸွႆႈတၢင်းထႅမ်ဢေႃႈ။ သဵင်ဢၼ်ၶဝ်ႁွင်ႉသႅၼ်ႇႁွင်ႉႁႆႈၵွပ်ႈပိူဝ်ႈၶဝ်လႆႈၶၢမ်ႇပဵၼ်ၶႃႈယူႇၼၼ်ႉလႆႈငိၼ်းႁွတ်ႈထိုင်ၵႂႃႇၵႃႈတီႈၽြႃးပဵၼ်ၸဝ်ႈဢေႃႈ။-
ၽြႃးပဵၼ်ၸဝ်ႈငိၼ်းသဵင်ပွင်ႉသဵင်ၶၢင်းၶဝ်ၼၼ်ႉသေလႄႈ၊မၼ်းၸဝ်ႈၶုၵ်းၸႂ်လႆႈပတိၺိၺ်ႇသဵတ်ႈၸႃႇဢၼ်လႆႈဝႆႉၵႃႈတီႈ ဢႃႇပြႃႇႁၢမ်ႇ၊ တင်း ဢိၸၢၵ်ႈ၊ တင်း ယႃႇၵုပ်ႈ၊ မႃးၸိူဝ်းၼၼ်ႉဢေႃႈ။-
ၽြႃးပဵၼ်ၸဝ်ႈၵေႃႈလူတူၺ်းၵူၼ်းမဵဝ်း ဢိသရေး၊ ၸိူဝ်းၼၼ်ႉလႄႈႁုလွင်ႈၶဝ်ဢေႃႈ။
မူဝ်းသေႇ၊ ၼၼ်ႉမိူဝ်ႈဢၼ်လဵင်ႉသူဝ်းလဵင်ႉပႄႉပူႇၼၢႆးမၼ်း ယေႇႀရေႃး၊ ယဵၸ်ႈပရေႃးႁဵၵ်ႈ မိူင်း မိတျၼ်ႇ၊ ယူႇၼၼ်ႉၸိုင်၊မၼ်းႁေႃႈၽုင်သူဝ်းၽုင်ပႄႉၼၼ်ႉပူၼ်ႉၵႂႃႇၽၢႆႇတၢင်းလင်ထိူၼ်ႇလႅင်ႉလႄႈႁွတ်ႈၵႂႃႇၵႃႈတီႈလွႆ သိၼႃႉ၊ ဢၼ်ပဵၼ်လွႆၽြႃးပဵၼ်ၸဝ်ႈပုၼ်ႉဢေႃႈ။-
ၵႃႈတီႈၼၼ်ႈတမၢၼ်ႇၵၢင်ႁၢဝ် ထႃႇဝရႃႉၽြႃး၊ ပေႃႇမႃးၵႃႈတီႈမၼ်းၸိူဝ်ႉၼင်ႇပိဝ်ၽႆးဢၼ်မႆႈႁိုင်းယူႇၵႃႈၼႂ်းယုမ်းမႆႉဢေႃႈ။ မူဝ်းသေႇ၊ ၵေႃႈတူၺ်းႁၼ်ၽႆးမႆႈယုမ်းမႆႉယူႇလႄႈယုမ်းမႆႉၼၼ်ႉသမ်ႉဢမ်ႇၶႅမ်ႈဢမ်ႇမႆႈၵႂႃႇ။-
မူဝ်းသေႇ၊ ၶႆႈၸႂ်ၸဵၼ်းၸႃးလႄႈဝႃႈ၊ “ဢၼ်ၼႆႉပဵၼ်ၼိမိၵ်ႈဢၼ်လၢၵ်ႇလၢႆးၼႃႇလူင်လၢင်ဢေႃႈ။ ၵဝ်တၵ်းၵႂႃႇၸမ်ၸမ်လႄႈတူၺ်းယုမ်းမႆႉဢၼ်ၽႆးမႆႈဢမ်ႇၶႅမ်ႈဢမ်ႇမူတ်းၵွပ်ႈသင်ၼၼ်ႉလူးၵွၼ်ႇဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ႁၼ် မူဝ်းသေႇ၊ သုတ်ႉၸမ်မႃးယူႇၼၼ်ႉလႄႈမၼ်းၸဝ်ႈယူႇၵႃႈၼႂ်းယုမ်းမႆႉၼၼ်ႉႁွင်ႉၸိုဝ်ႈမၼ်းလႄႈဝႃႈ၊ “ မူဝ်းသေႇ၊ ႟၊ မူဝ်းသေႇ၊ ႟၊” ဝႃႈၼင်ႇၼႆဢေႃႈ။ မၼ်းၶိုၼ်းလၢတ်ႈလႄႈဝႃႈ၊ “ဢေႃႈၶႃႈ။ ၶႃႈၸဝ်ႈမီးယူႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈၵေႃႈလၢတ်ႈလႄႈဝႃႈ၊ “ယႃႇပေသုတ်ႉမႃးၸမ်။ ထွတ်ႇၶႅပ်းတိၼ်မႂ်းတႃႉ။ လွင်ႈမၼ်းၸမ်ႉ၊တီႈဢၼ်မႂ်းယဵပ်ႇယူႇၼၼ်ႉပဵၼ်လိၼ်ဢၼ်မူတ်းၸၢင်ႇဢေႃႈ၊” ဝႃႈၼင်ႇၼႆဢေႃႈ။-
မၼ်းၸဝ်ႈသမ်ႉလၢတ်ႈထႅင်ႈလႄႈဝႃႈ၊ “ၵဝ်ပဵၼ်ၽြႃးပဵၼ်ၸဝ်ႈပူႇမွၼ်ႇမႂ်း၊ၽြႃး ဢႃႇပြႃႇႁၢမ်ႇ၊ ၽြႃး ဢိၸၢၵ်ႈ၊ ၽြႃး ယႃႇၵုပ်ႈ၊ ၼၼ်ႉယဝ်ႉ၊” ဝႃႈၼင်ႇၼႆဢေႃႈ။ မူဝ်းသေႇ၊ ၸမ်ႉ၊ပိူဝ်ႈဢၼ်ဢမ်ႇႁတ်းတူၺ်းၽြႃးပဵၼ်ၸဝ်ႈလႄႈႁူမ်ႇၼႃႈမၼ်းဝႆႉဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ လၢတ်ႈလႄႈဝႃႈ၊ “ၵဝ်လႆႈႁၼ်တၢင်းဢၼ်ၼိၵ်ႈၸၢၵ်ႈငႅၼ်းသႄးၵႃႈၼိူဝ်ၵူၼ်းၵဝ်တင်းလၢႆဢၼ်မီးၵႃႈၼႂ်းမိူင်း ဢေးၵျိပ်ႉ၊ ပုၼ်ႉၼၼ်ႉယဝ်ႉ။ ၵဝ်လႆႈငိၼ်းသဵင်ၶဝ်ဢၼ်ႁွင်ႉႁႆႈႁွင်ႉသႅၼ်ႇၵွပ်ႈပိူဝ်ႈၽေးဢၼ်ၵူၼ်းဢၼ်ထိင်းၶႃႈတင်းလၢႆႁဵတ်းတီႈၶဝ်ၼၼ်ႉယဝ်ႉ။ ၵဝ်လႆႈႁုႁၼ်တုၵ်ႉၶႃႉတၢင်းၶၢၼ်ၸႂ်ၶဝ်တင်းသဵင်ႈတင်းမူတ်းယဝ်ႉ။-
ပိူဝ်ႈၼႆၵဝ်လူင်းမႃးႁႂ်ႈလႆႈၵႄႇၶျွတ်ႈဢဝ်ၶဝ်ဢွၵ်ႇသေၵႃႈၼႂ်းမိုဝ်းၵူၼ်းမဵဝ်း ဢေးၵျိပ်ႉ၊ သေယဝ်ႉ၊ႁႂ်ႈလႆႈဢဝ်ၶဝ်ဢွၵ်ႇမိူင်း ဢေးၵျိပ်ႉ၊ လႄႈဢဝ်သူင်ႇၵႂႃႇၵႃႈတီႈမိူင်းဢၼ်လီဢၼ်ငၢမ်း၊ဢၼ်ယႂ်ႇဢၼ်ၵႂၢင်ႈ၊မိူင်းဢၼ်မၢၵ်ႈမီးလီပဵၼ်လႄႈၽုၼ်ႇလီလိၼ်လီ လႄႈပဵၼ်မိူင်းၵူၼ်းမဵဝ်း ၶႃႇၼၼိ၊ ၵူၼ်းမဵဝ်း ႁိတ်ႉတိ၊ ၵူၼ်းမဵဝ်း ဢႃႇမေႃးရိ၊ ၵူၼ်းမဵဝ်း ၽေႇရၸိ၊ ၵူၼ်းမဵဝ်း ႁိဝိ၊ ၵူၼ်းမဵဝ်း ယေႇပုသိ၊ ၸိူဝ်းၼၼ်ႉယဝ်ႉ။-
တေႃႈလဵဝ်ၼႆႉသဵင်ဢၼ်ၵူၼ်းၵဝ်မဵဝ်း ဢိသရေး၊ တင်းလၢႆႁွင်ႉႁႆႈႁွင်ႉသႅၼ်ႇၼၼ်ႉလႆႈႁွတ်ႈထိုင်မႃးၵႃႈတီႈၵဝ်ယဝ်ႉ။ ၵဝ်လႆႈႁၼ်တၢင်းဢၼ်ၵူၼ်းမဵဝ်း ဢေးၵျိပ်ႉ၊ တဵၵ်းငႅၼ်းၶဝ်ၼၼ်ႉယဝ်ႉ။-
တေႃႈလဵဝ်ၼႆႉ၊ၵဝ်တၵ်းပွႆႇၸႂ်ႉမႂ်းၵႂႃႇၸူးၶုၼ်ႁေႃၶမ်းမိူင်း ဢေးၵျိပ်ႉ၊ ပုၼ်ႉ၊ႁႂ်ႈမႂ်းလႆႈဢွၼ်ဢဝ်ၵူၼ်းၵဝ်မဵဝ်း ဢိသရေး၊ ဢွၵ်ႇမိူင်း ဢေးၵျိပ်ႉ၊ မႃးဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ မူဝ်းသေႇ၊ ၶိုၼ်းလဝ်ႈလၢတ်ႈတီႈၽြႃးပဵၼ်ၸဝ်ႈလႄႈဝႃႈ၊ “ၶႃႈၸဝ်ႈႁဝ်းၼႆႉပဵၼ်ၵူၼ်းၸိူဝ်ႉၼင်ႇႁိုဝ်လႄႈ ၶႃႈၸဝ်ႈတၵ်းလႆႈၶဝ်ႈၸူးၶုၼ်ႁေႃၶမ်းသေယဝ်ႉ၊သမ်ႉတၵ်းလႆႈဢဝ်ၵူၼ်းမဵဝ်း ဢိသရေး၊ တင်းလၢႆ ဢွၵ်ႇမိူင်း ဢေးၵျိပ်ႉ၊ မႃးတီႈၶႃႈ၊” ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈၵေႃႈလၢတ်ႈလႄႈဝႃႈ၊ “ၵဝ်တၵ်းမီးယူႇလူၺ်ႈၵၼ်တင်းမႂ်းဢမၢၼ်ႇၶၼ်ပဵၼ်ဢေႃႈ။ ၼႂ်းမိူဝ်ႈဢၼ်မႂ်းဢွၼ်ဢဝ်ၵူၼ်းတင်းလၢႆဢွၵ်ႇမိူင်း ဢေးၵျိပ်ႉ၊ မႃးၼၼ်ႉ၊မႂ်းတၵ်းလႆႈမႃးဝႆႈသႃၵူဝ်းၵႂၢႆႇၵဝ်ၵႃႈၼိူဝ်လွႆၼႆႉဢေႃႈ။ ဢၼ်ၼႆႉတၵ်းပဵၼ်လၢၵ်ႈၶၼႃႇသၢၵ်ႈသေႇလွင်ႈဢၼ်ၵဝ်ပွႆႇၸႂ်ႉမႂ်းၵႂႃႇၼၼ်ႉယဝ်ႉ၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈလဝ်ႈထၢမ်တီႈၽြႃးပဵၼ်ၸဝ်ႈလႄႈဝႃႈ၊ “မိူဝ်ႈဢၼ်ၶႃႈၸဝ်ႈႁွတ်ႈၵႂႃႇၵႃႈတီႈၵူၼ်းမဵဝ်း ဢိသရေး၊ ၶဝ်လႄႈလၢတ်ႈတီႈၶဝ်လႄႈဝႃႈ၊ ‘ၽြႃးပဵၼ်ၸဝ်ႈပူႇမွၼ်ႇသူၼၼ်ႉပွႆႇၸႂ်ႉၵဝ်မႃးၸူးသူဢေႃႈ၊’ ဝႃႈၼင်ႇၼႆလႄႈ၊ၶဝ်သမ်ႉတၵ်းထၢမ်ၶိုၼ်းမႃးလႄႈဝႃႈ၊ ‘ၸိုဝ်ႈမၼ်းၸဝ်ႈၼၼ်ႉၸိုဝ်ႈဢီႈသင်၊’ ဝႃႈၼင်ႇၼႆၸိုင်၊ၶႃႈၸဝ်ႈတၵ်းၶိုၼ်းလႆႈလၢတ်ႈၶဝ်ၸိူဝ်ႉၼင်ႇႁိုဝ်တီႈၶႃႈ၊” ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈၶိုၼ်းလၢတ်ႈတီႈ မူဝ်းသေႇ၊ လႄႈဝႃႈ၊ “ ၵဝ်ပဵၼ်ၸဝ်ႈဢၼ်ၵဝ်ပဵၼ်ယူႇ၊ ၼႆႉဢေႃႈ၊” ဝႃႈၼင်ႇၼႆဢေႃႈ။ မၼ်းၸဝ်ႈသမ်ႉလၢတ်ႈထႅင်ႈလႄႈဝႃႈ၊ “ၶိုၼ်းလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈ၊ ‘ၸဝ်ႈဢၼ်မီးၸိုဝ်ႈႁွင်ႉႁဵၵ်ႈဝႃႈ ၵဝ်ပဵၼ်ယူႇ၊ ၼၼ်ႉပွႆႇၸႂ်ႉၵဝ်မႃးၸူးသူဢေႃႈ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။-
ၽြႃးပဵၼ်ၸဝ်ႈသမ်ႉလၢတ်ႈတီႈ မူဝ်းသေႇ၊ ထႅင်ႈလႄႈဝႃႈ၊ “ၶိုၼ်းလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈ၊ ‘ ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇမွၼ်ႇသူ၊ၽြႃး ဢႃႇပြႃႇႁၢမ်ႇ၊ ၽြႃး ဢိၸၢၵ်ႈ၊ ၽြႃး ယႃႇၵုပ်ႈ၊ ၼၼ်ႉပွႆႇၸႂ်ႉၵဝ်မႃးၸူးသူယဝ်ႉ၊’ ဝႃႈၼင်ႇၼႆတႃႉ။ ဢၼ်ၼႆႉပဵၼ်ၸိုဝ်ႈသဵင်ၵဝ်ယဝ်ႉ။ ဢၼ်ၼႆႉပဵၼ်ၸိုဝ်ႈသဵင်ဢၼ်ၸိူဝ်ႉၶိူဝ်းၵူၼ်းသိုပ်ႇသိုပ်ႇတၢမ်တၢမ်တၵ်းလႆႈႁွင်ႉႁဵၵ်ႈၵဝ်ဢေႃႈ။-
ၵႂႃႇတႃႉ။ ႁွင်ႉဢဝ်ၵူၼ်းဢၼ်ပဵၼ်ၵႄႇပဵၼ်ႁူဝ်ၵႃႈၼႂ်းၵူၼ်းမဵဝ်း ဢိသရေး၊ ၶဝ်ၸုတုမ်ၵၼ်သေယဝ်ႉ၊လၢတ်ႈၶဝ်လႄႈဝႃႈ၊ ‘ ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇမွၼ်ႇသူ၊ၽြႃး ဢႃႇပြႃႇႁၢမ်ႇ၊ ၽြႃး ဢိၸၢၵ်ႈ၊ ၽြႃး ယႃႇၵုပ်ႈ၊ ၼၼ်ႉပေႃႇမႃးၵႃႈတီႈၵဝ်လႄႈလၢတ်ႈဝႃႈ၊ “ၵဝ်မႃးလူမႃးတူၺ်းသူလႄႈလႆႈႁၼ်တၢင်းဢၼ်ၵူၼ်းမဵဝ်း ဢေးၵျိပ်ႉ၊ ၶဝ်ႁဵတ်းတီႈသူၼၼ်ႉယဝ်ႉ။-
တေႃႈလဵဝ်ၼႆႉၵဝ်ဝႆႉၵတိဝႃႈ၊ၵဝ်တၵ်းဢဝ်သူဢွၵ်ႇသေၵႃႈၼႂ်းတုၵ်ႉၶႃႉတၢင်းၶၢၼ်ၸႂ်ဢၼ်သူလႆႈၶၢမ်ႇၼႂ်းမိူင်း ဢေးၵျိပ်ႉ၊ ၼၼ်ႉသေယဝ်ႉ၊သူင်ႇၵႂႃႇၵႃႈတီႈမိူင်းဢၼ်မၢၵ်ႈမီးလီပဵၼ်လႄႈၽုၼ်ႇလီလိၼ်လီ ၊ဢၼ်ပဵၼ်မိူင်းၵူၼ်းမဵဝ်း ၶႃႇၼၼိ၊ ၵူၼ်းမဵဝ်း ႁိတ်ႉတိ၊ ၵူၼ်းမဵဝ်း ဢႃႇမေႃးရိ၊ ၵူၼ်းမဵဝ်း ၽေႇရၸိ၊ ၵူၼ်းမဵဝ်း ႁိဝိ၊ ၵူၼ်းမဵဝ်း ယေႇပုသိ၊ ၸိူဝ်းၼၼ်ႉယဝ်ႉ၊” ဝႃႈၼင်ႇၼႆတႃႉ။’
“ၵူၼ်းၵဝ်တင်းလၢႆ တၵ်းထွမ်ႇဢဝ်ၵႂၢမ်းဢၼ်မႂ်းလၢတ်ႈၼၼ်ႉဢေႃႈ။ မိူဝ်ႈၼၼ်ႉၵူၼ်းဢၼ်ပဵၼ်ၵႄႇပဵၼ်ႁူဝ် ဢိသရေး၊ ၶဝ်တၵ်းၸွမ်းမႂ်းၵႂႃႇၶဝ်ႈၸူးတီႈၶုၼ်ႁေႃၶမ်းမိူင်း ဢေးၵျိပ်ႉ၊ သေလႄႈ၊တၵ်းလႆႈလဝ်ႈလၢတ်ႈတီႈမၼ်းလႄႈဝႃႈ၊ ‘ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ႁေႇပြႄး၊ ၼၼ်ႉလႆႈႁူပ်ႉထူပ်းၵၼ်တင်းႁဝ်းၶႃႈၸိူဝ်းၼႆႉတီႈၶႃႈယဝ်ႉ။ တေႃႈလဵဝ်ၼႆႉၶႅၼ်းတေႃႈပၼ်ဢၶႂၢင်ႉႁႂ်ႈႁဝ်းၶႃႈၸိူဝ်းၼႆႉလႆႈၵႂႃႇၵႃႈၼႂ်းထိူၼ်ႇလႅင်ႉၶၢဝ်းတၢင်းႁိုင်ၸူဝ်ႈသၢမ်ဝၼ်းၼၼ်ႉပုၼ်ႈဢၼ်တၵ်းလႆႈသၢၵ်ႈလူႇတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၶႃႈၼၼ်ႉသေၵမ်းတီႈၶႃႈ၊’ ဝႃႈၼင်ႇၼႆဢေႃႈ။-
ၵူၺ်းၵႃႈ၊လွင်ႈဢၼ်ၶုၼ်ႁေႃၶမ်းမိူင်း ဢေးၵျိပ်ႉ၊ ၼၼ်ႉ ပေႃးယင်းဢမ်ႇထူပ်းႁၼ်တၼ်းၶူဝ်းဢၼ်ယႂ်ႇၼႃႇၸိုင်၊မၼ်းတၵ်းဢမ်ႇပွႆႇသူၵႂႃႇၼၼ်ႉၵဝ်ႁုလီလီဢေႃႈ။-
ပိူဝ်ႈၼႆလႄႈၵဝ်တၵ်းဢဝ်တင်းတၢင်းဢၼ်လီဢၢမ်းတင်းလၢႆႁဵတ်းတၢင်းဢၼ်ပၼ်တၢမ်ႇၵႃႈတီႈမိူင်း ဢေးၵျိပ်ႉ၊ ႁႂ်ႈလႆႈၼႄပျႃးတၼ်းၶူဝ်းၵဝ်ဢေႃႈ။ ဝၢႆးၼၼ်ႉမၼ်းတၵ်းပွႆႇသူဢေႃႈ။
“ၵဝ်တၵ်းႁဵတ်းႁႂ်ႈၵူၼ်းမဵဝ်း ဢေးၵျိပ်ႉ၊ တင်းလၢႆရူဝ်ႇသေႇၵူဝ်ယမ်သူသေလႄႈ၊မိူဝ်ႈဢၼ်သူဢွၵ်ႇၵႂႃႇၸိုင်၊သူတၵ်းဢမ်ႇလႆႈၵႂႃႇတိၼ်လၢႆမိုဝ်းပဝ်ႇဢေႃႈ။-
လွင်ႈမၼ်းၸမ်ႉ၊မႄႈယိင်းမဵဝ်း ဢိသရေး၊ ၵူႈၵေႃႉၵူႈၵူၼ်းတၵ်းၵႂႃႇၵႃႈတီႈၵူၼ်းမဵဝ်း ဢေးၵျိပ်ႉ၊ ၸိူဝ်းၼၼ်ႉသေလႄႈယွၼ်းဢဝ်ၶိူင်ႈငိုၼ်းၶိူင်ႈၶမ်း၊ၶူဝ်းၼုင်ႈတၢင်းမႆၵႃႈတီႈၵူၼ်းႁိူၼ်းၸမ်ၵၼ်ဢိၵ်ႇတင်းၶႅၵ်ႇဢၼ်သွၼ်ႈယူႇၼႂ်းႁိူၼ်းၶဝ်တင်းလၢႆဢေႃႈ။ ၵူၼ်းမဵဝ်း ဢိသရေး၊ ၸိူဝ်းၼၼ်ႉတၵ်းဢဝ်ၶိူင်ႈၶူဝ်းၸိူဝ်းၼၼ်ႉႁၢင်ႈၶိူင်ႈပၼ်တီႈလုၵ်ႈယိင်းလုၵ်ႈၸၢႆးၶဝ်သေလႄႈသမ်ႉတၵ်းႁိမ်ႁူင်ႇဢဝ်ဢုၵ်ႉၸႃႇၶူဝ်းလဵင်းၵူၼ်းမဵဝ်း ဢေးၵျိပ်ႉ၊ ၶဝ်တင်းလၢႆဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ သမ်ႉလဝ်ႈလၢတ်ႈတီႈ ထႃႇဝရႃႉၽြႃး၊ လႄႈဝႃႈ၊ “ၵူၺ်းၵႃႈ၊ပေႃးဝႃႈၶဝ်ဢမ်ႇယုမ်ႇၶႃႈၸဝ်ႈ၊ဢမ်ႇထွမ်ႇဢဝ်ၵႂၢမ်းဢၼ်ၶႃႈၸဝ်ႈလၢတ်ႈၸိုင်၊ၶဝ်တၵ်းလၢတ်ႈဝႃႈ၊ ‘ ထႃႇဝရႃႉၽြႃး၊ ဢမ်ႇပေႃႇမႃးၵႃႈတီႈမႂ်းၵူၺ်း၊’ ဝႃႈၼင်ႇၼႆလူးၵွၼ်ႇၶႃႈဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၵေႃႈထၢမ်မၼ်းလႄႈဝႃႈ၊ “မႂ်းယိပ်းၵႃႈသင်ဝႆႉ၊” ဝႃႈၼင်ႇၼႆလႄႈ၊မၼ်းၵေႃႈၶိုၼ်းလၢတ်ႈလႄႈဝႃႈ၊ “ယိပ်းၶွၼ်ႉတဝ်ႉဝႆႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၵေႃႈမီးဢမိင်ႉလႄႈဝႃႈ၊ “ပႅတ်ႈတူၵ်းၵႃႈၼိူဝ်လိၼ်တႃႉ၊” ဝႃႈၼင်ႇၼႆဢေႃႈ။ မူဝ်းသေႇ၊ ၵေႃႈပႅတ်ႈၶွၼ်ႉတဝ်ႉမၼ်းတူၵ်းၵႃႈၼိူဝ်လိၼ်လႄႈၶွၼ်ႉတဝ်ႉၼၼ်ႉပဵၼ်ငူးၵႂႃႇဢေႃႈ။ မူဝ်းသေႇ၊ လႆႈလႅၼ်ႈပၢႆႈသေၵႃႈတီႈငူးၼၼ်ႉဢေႃႈ။-
မိူဝ်ႈၼၼ်ႉ၊ ထႃႇဝရႃႉၽြႃး၊ လၢတ်ႈတီႈ မူဝ်းသေႇ၊ လႄႈဝႃႈ၊ “ယိုၼ်းမိုဝ်းမႂ်းတိဢဝ်ၵႃႈတီႈႁၢင်မၼ်းတႃႉ၊” ဝႃႈၼင်ႇၼႆလႄႈမၼ်းၵေႃႈယိုၼ်းမိုဝ်းတိဢဝ်လႄႈငူးၼၼ်ႉၶိုၼ်းပဵၼ်ၶွၼ်ႉတဝ်ႉမႃးၵႃႈၼႂ်းမိုဝ်းမၼ်းဢေႃႈ။-
ထႃႇဝရႃႉၽြႃး၊ ၵေႃႈလၢတ်ႈလႄႈဝႃႈ၊ “ႁဵတ်းၸိူဝ်ႉၼင်ႇၼႆႁဵတ်းၼႄၵူၼ်းမဵဝ်း ဢိသရေး၊ တင်းလၢႆႁႂ်ႈလႆႈပဵၼ်သၢၵ်ႈသေႇလွင်ႈတၢင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇမွၼ်ႇၶဝ်၊ၽြႃး ဢႃႇပြႃႇႁၢမ်ႇ၊ ၽြႃး ဢိၸၢၵ်ႈ၊ ၽြႃး ယႃႇၵုပ်ႈ၊ ပေႃႇမႃးၵႃႈတီႈမႂ်းၼၼ်ႉတႃႉ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉလၢတ်ႈတီႈ မူဝ်းသေႇ၊ ထႅင်ႈလႄႈဝႃႈ၊ “ဢဝ်မိုဝ်းမႂ်းၸူၵ်းၶဝ်ႈၵႃႈတီႈႁူဝ်ဢူၵ်းမႂ်းတႃႉ၊” ဝႃႈၼင်ႇၼႆဢေႃႈ။ မူဝ်းသေႇ၊ ၵေႃႈဢဝ်မိုဝ်းမၼ်းၸူၵ်းၶဝ်ႈၵႃႈတီႈႁူဝ်ဢူၵ်းမၼ်းလႄႈ မိူဝ်ႈဢၼ်မၼ်းၶိုၼ်းဢဝ်ဢွၵ်ႇမႃးၼၼ်ႉၸိုင်၊မိုဝ်းမၼ်းပဵၼ်တုတ်ႈၵႂႃႇပဵၼ်ၸုမ်ႈပဵၼ်ၵႂၢၵ်ႈၽိူၵ်ႇမိူၼ်မူၺ်ႁႃႇၵႂႃႇဢေႃႈ။-
ၵမ်းၼၼ်ႉ မၼ်းၸဝ်ႈသမ်ႉလၢတ်ႈထႅင်ႈလႄႈဝႃႈ၊ “ဢဝ်မိုဝ်းမႂ်းသမ်ႉၶိုၼ်းၸူၵ်းၵႃႈတီႈႁူဝ်ဢူၵ်းမႂ်းတႃႉ၊” ဝႃႈၼင်ႇၼႆဢေႃႈ။ မၼ်းၵေႃႈသမ်ႉဢဝ်မိုဝ်းမၼ်းၶိုၼ်းၸူၵ်းၶဝ်ႈၵႃႈတီႈႁူဝ်ဢူၵ်းမၼ်းလႄႈမိူဝ်ႈဢၼ်မၼ်းၶိုၼ်းဢဝ်ဢွၵ်ႇမႃးၼၼ်ႉၸိုင်၊ၶိုၼ်းပဵၼ်ၼိူဝ်ႉလီလီမိူၼ်ပၵ်းၵဝ်ႇပိူင်ၵဝ်ႇဢေႃႈ။-
ထႃႇဝရႃႉၽြႃး၊ ၵေႃႈလၢတ်ႈလႄႈဝႃႈ၊ “ပေႃးၶဝ်ဢမ်ႇယုမ်ႇမႂ်းဢမ်ႇထွမ်ႇဢဝ်ၼိမိၵ်ႈၵမ်းဢွၼ်တၢင်းၼၼ်ႉၸိုင်၊ၸၢင်ႈၶႄးၶဝ်တၵ်းယုမ်ႇၼိမိၵ်ႈၵမ်းလိုၼ်းလင်ၼႆႉဢေႃႈ။-
ပိၵ်ႉသမ်ႉလႆႈႁၼ်ၼိမိၵ်ႈတင်းသွင်ပိူင်ၼႆႉသေလႄႈယင်းတိုၵ်ႉဢမ်ႇပႆႇယုမ်ႇမႂ်း၊ဢမ်ႇထွမ်ႇဢဝ်ၵႂၢမ်းမႂ်းယူႇၸိုင်၊ဢဝ်ၼမ်ႉၵႃႈၼႂ်းမႄႈၼမ်ႉ ၼၢႆးလ်၊ မႃးထွၵ်ႇၵႃႈၼိူဝ်လိၼ်တႃႉ။ ၼမ်ႉၼၼ်ႉတၵ်းပဵၼ်လိူတ်ႈၵႂႃႇဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ မူဝ်းသေႇ၊ ၶိုၼ်းလဝ်ႈလၢတ်ႈတီႈ ထႃႇဝရႃႉၽြႃး၊ လႄႈဝႃႈ၊ “ဢူဝ်း၊ၸဝ်ႈၽြႃးၵဝ်ၶႃႈတီႈၶႃႈ။ ၶႃႈၸဝ်ႈဢမ်ႇမီးၼမ်ႉသူပ်းၼမ်ႉၵႂၢမ်းတီႈၶႃႈ။ ၸဵမ်မိူဝ်ႈဢွၼ်တၢင်းၼႆႉလႄႈတေႃႇထိုင်မိူဝ်ႈဢၼ်ၸဝ်ႈႁဝ်းလၢတ်ႈတီႈၶႃႈၸဝ်ႈၼႆႉၶႃႈၸဝ်ႈယင်းဢမ်ႇမီးၼမ်ႉသူပ်းၼမ်ႉၵႂၢမ်းတီႈၶႃႈ။ ၶႃႈၸဝ်ႈပဵၼ်ၵူၼ်းသူပ်းၼၵ်းလႄႈၸၢင်ႈလၢတ်ႈၵႂၢမ်းထိူင်းထိူင်းၵူၺ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၵေႃႈလၢတ်ႈတီႈမၼ်းလႄႈဝႃႈ၊ “ၽူႈလႂ်ႁဵတ်းပဵၼ်သူပ်းၵူၼ်း။ ၽူႈလႂ်ႁဵတ်းႁႂ်ႈၵူၼ်းဢႃႉ၊ႁႂ်ႈၵူၼ်းႁူၼူၵ်ႇ၊ႁႂ်ႈတႃၵူၼ်းႁၼ်၊ဢမ်ႇၼၼ်ႁႂ်ႈတႃၵူၼ်းမွတ်ႇၸိူဝ်းၼၼ်ႉ။ ၵဝ် ထႃႇဝရႃႉၽြႃး၊ ႁဵတ်းပဵၼ်ဢမ်ႇၸႂ်ႈႁိုဝ်း။-
ပိူဝ်ႈၼႆလႄႈတေႃႈလဵဝ်ၼႆႉၵႂႃႇတႃႉ။ ၵဝ်တၵ်းၸွႆႈထႅမ်ႁႂ်ႈမႂ်းမေႃလၢတ်ႈၵႂၢမ်းလႄႈသွၼ်ပၼ်လွင်ႈဢၼ်မႂ်းတၵ်းလႆႈလၢတ်ႈၸိူဝ်ႉၼင်ႇႁိုဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ယင်းၶိုၼ်းလၢတ်ႈလႄႈဝႃႈ၊ “ဢူဝ်း၊ၸဝ်ႈၽြႃးၵဝ်ၶႃႈတီႈၶႃႈ။ ၶႅၼ်းတေႃႈပွႆႇၸႂ်ႉတၢင်ႇၵေႃႉၵႂႃႇသေၵမ်း၊ၶႃႈၸဝ်ႈတွင်းပၢၼ်ႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၸႂ်မႆႈၶႂ်ႈၸႃႉတေႃႇ မူဝ်းသေႇ၊ လႄႈလၢတ်ႈဝႃႈ၊ “ၵူၼ်းမဵဝ်းၶိူဝ်း လေႇဝိ၊ ဢၼ်ပဵၼ်ပီႈဢၢႆႈမႂ်း ဢႃႇရုၼ်ႇ၊ ၼၼ်ႉမီးယူႇဢမ်ႇၸႂ်ႈႁိုဝ်း။ ၵဝ်ႁုလွင်ႈဢၼ်မၼ်းမေႃလၢတ်ႈၵႂၢမ်းလီလီငၢမ်းငၢမ်းၼၼ်ႉယူႇဢေႃႈ။ တူၺ်းလူး။ မၼ်းၼၼ်ႉဢွၵ်ႇမႃးႁႂ်ႈလႆႈႁပ်ႉႁူဝ်တၢင်းမႂ်းယူႇယဝ်ႉ။ မိူဝ်ႈဢၼ်မၼ်းထူပ်းႁၼ်မႂ်းၸိုင်၊မၼ်းတၵ်းၸူမ်းသိူဝ်းမူၼ်ႈပျေႃႇဢေႃႈ။-
မႂ်းတၵ်းလႆႈလၢတ်ႈၵႂၢမ်းတေႃႇမၼ်းလႄႈသႂ်ႇသူပ်းသႂ်ႇၵႂၢမ်းဝႆႉတီႈမၼ်းဢေႃႈ။ ၵဝ်တၵ်းၸွႆႈထႅမ်ႁႂ်ႈသူတင်းသွင်ၵေႃႉမေႃလၢတ်ႈၵႂၢမ်းလႄႈသင်ႇသွၼ်ပၼ်လွင်ႈဢၼ်သူတၵ်းလႆႈႁဵတ်းၸိူဝ်ႉၼင်ႇႁိုဝ်ၼၼ်ႉဢေႃႈ။-
မၼ်းတၵ်းပဵၼ်ၵေႃႉဢၼ်တၢင်တူဝ်မႂ်းသေယဝ်ႉ၊လၢတ်ႈတေႃႇၵူၼ်းတင်းလၢႆလႄႈ၊မႂ်းၸမ်ႉ၊တၵ်းပဵၼ်မိူၼ်ၼင်ႇၽြႃးပဵၼ်ၸဝ်ႈတီႈမၼ်းဢေႃႈ။-
ယိပ်းၶွၼ်ႉတဝ်ႉၼႆႉဝႆႉသေႇသေႇတႃႉ။ လွင်ႈမၼ်းၸမ်ႉ၊မႂ်းတၵ်းလႆႈဢဝ်ၶွၼ်ႉတဝ်ႉၼႆႉႁဵတ်းၼႄၼိမိၵ်ႈသၢၵ်ႈသေႇၸိူဝ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈၶိုၼ်းမိူဝ်းၵႂႃႇၸူးၵႃႈတီႈပူႇၼၢႆးမၼ်း ယေႇႀရေႃး၊ လႄႈလၢတ်ႈဝႃႈ၊ “ၶႅၼ်းတေႃႈပၼ်ဢၶႂၢင်ႉႁႂ်ႈၵဝ်ၶႃႈလႆႈၵႂႃႇသူႇၵႂႃႇၸႂ်းပီႈၼွင်ႉၸိူဝ်ႉၶိူဝ်းၵဝ်ၶႃႈၵႃႈတီႈမိူင်း ဢေးၵျိပ်ႉ၊ ပုၼ်ႉႁႂ်ႈလႆႈလူတူၺ်းလွင်ႈဢၼ်ၶဝ်ဢသၢၵ်ႈယင်းလိပ်းယူႇႁိုဝ်ၼၼ်ႉသေၵမ်းၶႃႈ၊” ဝႃႈၼင်ႇၼႆဢေႃႈ။ ယေႇႀရေႃး၊ ၵေႃႈပၼ်ဢၶႂၢင်ႉလႄႈဝႃႈ၊ “ၵႂႃႇၼိမ်ၼိမ်လီလီတႃႉ၊” ဝႃႈၼင်ႇၼႆဢေႃႈ။
ၼႂ်းမိူဝ်ႈဢၼ် မူဝ်းသေႇ၊ ယင်းမီးယူႇၼႂ်းမိူင်း မိတျၼ်ႇ၊ ၼၼ်ႉ ထႃႇဝရႃႉၽြႃး၊ လၢတ်ႈတီႈ မူဝ်းသေႇ၊ လႄႈဝႃႈ၊ “ၶိုၼ်းမိူဝ်းၵႂႃႇၸူးမိူင်း ဢေးၵျိပ်ႉ၊ တႃႉ။ ၶဝ်ၸိူဝ်းဢၼ်ၵျၢမ်ႇႁႃဢဝ်မႂ်းတၢႆၼၼ်ႉတၢႆမူတ်းယဝ်ႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ မူဝ်းသေႇ၊ ဢဝ်မေးမၼ်းတင်းလုၵ်ႈၸၢႆးမၼ်းၼၼ်ႉတၢင်ႇၵႃႈၼိူဝ်မႃႉလီႈသေလႄႈမိူဝ်းၵႂႃႇၵႃႈတီႈမိူင်း ဢေးၵျိပ်ႉ၊ ပုၼ်ႉသေဢေႃႈ။ ၵႃႈၼႂ်းမိုဝ်းမၼ်းၵေႃႈယိပ်းဝႆႉၶွၼ်ႉတဝ်ႉဢၼ်ၽြႃးပဵၼ်ၸဝ်ႈၸႂ်ႉမၼ်းယိပ်းဝႆႉၼၼ်ႉဢေႃႈ။
ထႃႇဝရႃႉၽြႃး၊ သမ်ႉလၢတ်ႈတီႈ မူဝ်းသေႇ၊ ထႅင်ႈလႄႈဝႃႈ၊ “မိူဝ်ႈဢၼ်မႂ်းၶိုၼ်းမိူဝ်းၵႂႃႇႁွတ်ႈထိုင်ၵႃႈတီႈမိူင်း ဢေးၵျိပ်ႉ၊ ပုၼ်ႉၼၼ်ႉၸိုင်၊ႁဵတ်းၼႄၼိမိၵ်ႈဢၼ်လီဢၢမ်း၊ဢၼ်ၵဝ်ပၼ်တၼ်းၶူဝ်းတီႈမႂ်းဝႆႉတင်းသဵင်ႈတင်းလူင်ၸိူဝ်းၼၼ်ႉၵႃႈတီႈၽၢႆႇၼႃႈၶုၼ်ႁေႃၶမ်းမိူင်း ဢေးၵျိပ်ႉ၊ တႄႉတႄႉတႃႉ။ ပိၵ်ႉသမ်ႉႁဵတ်းၼႄၸိူဝ်ႉၼင်ႇၼၼ်သေၵေႃႈၵဝ်တၵ်းႁႂ်ႈႁူဝ်ၸႂ်မၼ်းၵႅၼ်ႇၶႅင်လႄႈ၊မၼ်းၵေႃႈယင်းဢမ်ႇပွႆႇၵူၼ်း ဢိသရေး၊ တင်းလၢႆလႄႈတၵ်းယူႇဢေႃႈ။-
မိူဝ်ႈၼၼ်ႉ၊မႂ်းတၵ်းလႆႈမွၵ်ႇလၢတ်ႈတီႈၶုၼ်ႁေႃၶမ်းၼၼ်ႉလႄႈဝႃႈ၊ ‘ ထႃႇဝရႃႉၽြႃး၊ မီးဢမိင်ႉၸမ်ႉ၊ “ ဢိသရေး၊ ပဵၼ်လုၵ်ႈၸၢႆးတူၼ်ႈၵဝ်ဢေႃႈ။-
ၵဝ်မီးဢမိင်ႉတီႈမႂ်းၸမ်ႉ၊ပွႆႇလုၵ်ႈၸၢႆးၵဝ်ၵႂႃႇႁႂ်ႈမၼ်းလႆႈဝႆႈသႃၵူဝ်းၵႂၢႆႇၵဝ်တႃႉ။ ပေႃးမႂ်းထဵင်ပႅတ်ႈလႄႈဢမ်ႇပွႆႇမၼ်းၵႂႃႇၸိုင်၊တူၺ်းတႃႉ။ ၵဝ်တၵ်းဢဝ်လုၵ်ႈၸၢႆးတူၼ်ႈမႂ်းၼၼ်ႉတၢႆပႅတ်ႈဢေႃႈ၊” ဝႃႈၼင်ႇၼႆ ထႃႇဝရႃႉၽြႃး၊ မီးဢမိင်ႉဝႆႉယဝ်ႉ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ၵႃႈၼႂ်းၶၢဝ်းတၢင်းၼၼ်ႉ ထႃႇဝရႃႉၽြႃး၊ ထူပ်း မူဝ်းသေႇ၊ ၵႃႈတီႈပၢင်လိုဝ်ႈလႄႈၵျၢမ်ႇႁႃဢဝ်မၼ်းတၢႆဢေႃႈ။-
မိူဝ်ႈၼၼ်ႉမေးမၼ်း ၸိပေႃးရႃႉ၊ ဢဝ်မိတ်ႈမၢၵ်ႇႁိၼ်ထိူဝ်ပၢတ်ႇပၢႆၼင်လုၵ်ႈၸၢႆးမၼ်းသေယဝ်ႉ၊ဢဝ်ဢၼ်ၼၼ်ႉၸမ်ႈသႂ်ႇၵႃႈတီႈတိၼ် မူဝ်းသေႇ၊ သေလႄႈလၢတ်ႈဝႃႈ၊ “တီႈၵဝ်ၶႃႈၼႆႉၸိုင်၊ၸဝ်ႈပဵၼ်ၽူဝ်ဢၼ်ၸၢပ်ႈသႅင်ႇၵၼ်တင်းလိူတ်ႈဢေႃႈ၊” ဝႃႈၼင်ႇၼႆဢေႃႈ။-
ႁဵတ်းၼၼ်လႄႈ ထႃႇဝရႃႉၽြႃး၊ ပွႆႇ မူဝ်းသေႇ၊ လွတ်ႈဢေႃႈ။ ၵွပ်ႈပိူဝ်ႈမၢင်ႇၵလႃႇတၢင်းဢၼ်ပၢတ်ႇပၢႆၼင်လႄႈမေးမၼ်းလၢတ်ႈဝႃႈ၊ “တီႈၵဝ်ၶႃႈၼႆႉၸိုင်၊ၸဝ်ႈပဵၼ်ၽူဝ်ဢၼ်ၸၢပ်ႈသႅင်ႇၵၼ်တင်းလိူတ်ႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ လၢတ်ႈတီႈ ဢႃႇရုၼ်ႇ၊ လႄႈဝႃႈ၊ “ၵႂႃႇၵႃႈတီႈထိူၼ်ႇလႅင်ႉပုၼ်ႉႁႂ်ႈလႆႈႁပ်ႉႁူဝ်တၢင်း မူဝ်းသေႇ၊ တႃႉ၊” ဝႃႈၼင်ႇၼႆဢေႃႈ။ မၼ်းၵေႃႈၵႂႃႇလႄႈႁပ်ႉႁူဝ်တၢင်း မူဝ်းသေႇ၊ ၵႃႈတီႈလွႆၽြႃးပဵၼ်ၸဝ်ႈသေလႄႈၸူမ်းတွၼ်ႈလူၺ်ႈတၢင်းဢၼ်ၸုပ်ႇၼူမ်ၵၼ်ဢေႃႈ။-
မူဝ်းသေႇ၊ ၵေႃႈမွၵ်ႇလၢတ်ႈၵႂၢမ်းဢၼ် ထႃႇဝရႃႉၽြႃး၊ ပွႆႇၸႂ်ႉမၼ်းၶိုၼ်းမႃးၼၼ်ႉၵူႈၶေႃႈၵူႈၵမ်း၊ဢိၵ်ႇတင်းၶႆႈၼႄၼိမိၵ်ႈသၢၵ်ႈသေႇၵႃႈဢၼ်မၼ်းၸဝ်ႈၸႂ်ႉႁဵတ်းၼႄၸိူဝ်းၼၼ်ႉတီႈ ဢႃႇရုၼ်ႇ၊ ဢေႃႈ။-
မူဝ်းသေႇ၊ တင်း ဢႃႇရုၼ်ႇ၊ ၵေႃႈဢွၼ်ၵၼ်ၵႂႃႇလႄႈႁွင်ႉဢဝ်ၵူၼ်းဢၼ်ပဵၼ်ၵႄႇပဵၼ်ႁူဝ်မဵဝ်း ဢိသရေး၊ ၶဝ်မႃးၸုတုမ်ၵၼ်ဢေႃႈ။-
ဢႃႇရုၼ်ႇ၊ ၵေႃႈမွၵ်ႇလၢတ်ႈၼႄၶဝ်လွင်ႈတၢင်းဢၼ် ထႃႇဝရႃႉၽြႃး၊ သင်ႇလၢတ်ႈၵႃႈတီႈ မူဝ်းသေႇ၊ ၼၼ်ႉၵူႈၸိူဝ်ႉၵူႈပိူင်ဢေႃႈ။ မူဝ်းသေႇ၊ ၵေႃႈႁဵတ်းၼႄၼိမိၵ်ႈသၢၵ်ႈသေႇၵူႈမဵဝ်းမဵဝ်းၵႃႈတီႈၽၢႆႇၼႃႈၵူၼ်းၸိူဝ်းၼၼ်ႉဢေႃႈ။-
ၶဝ်ၸိူဝ်းၼၼ်ႉၵေႃႈယုမ်ႇဢေႃႈ။ မိူဝ်ႈဢၼ်ၶဝ်လႆႈငိၼ်းလွင်ႈဢၼ် ထႃႇဝရႃႉၽြႃး၊ မႃးလူမႃးတူၺ်းၵူၼ်းမဵဝ်း ဢိသရေး၊ တင်းလၢႆဢိၵ်ႇတင်းလွင်ႈဢၼ်မၼ်းၸဝ်ႈလႆႈႁုလႆႈႁၼ်တုၵ်ႉၶႃႉတၢင်းၽၢၼ်ဢၼ်ၶဝ်လႆႈၶၢမ်ႇၸိူဝ်းၼၼ်ႉၸိုင်၊ၶဝ်ဢွၼ်ၵၼ်ၵူမ်ႈႁူဝ်လႄႈဝႆႈသႃၵူဝ်းၵႂၢႆႇဢေႃႈ။
လိုၼ်းၼၼ်ႉ၊ မူဝ်းသေႇ၊ တင်း ဢႃႇရုၼ်ႇ၊ ၶဝ်ႈၸူးၶုၼ်ႁေႃၶမ်းမိူင်း ဢေးၵျိပ်ႉ၊ လႄႈလဝ်ႈလၢတ်ႈဝႃႈ၊ “ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ၼၼ်ႉမီးဢမိင်ႉဝႃႈၸမ်ႉ၊ ‘ပွႆႇၵူၼ်းၵဝ်တင်းလၢႆၵႂႃႇႁႂ်ႈၶဝ်လႆႈႁဵတ်းပွႆးဢၼ်ယွင်ႈယေႃးၵဝ်ၵႃႈတီႈၼႂ်းထိူၼ်ႇလႅင်ႉပုၼ်ႉတႃႉ၊’ ဝႃႈၼင်ႇၼႆတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းၵေႃႈလၢတ်ႈလႄႈဝႃႈ၊ “ ထႃႇဝရႃႉၽြႃး၊ ၼၼ်ႉပဵၼ်ၽူႈလႂ်၊ႁႂ်ႈၵဝ်တၵ်းလႆႈထွမ်ႇဢဝ်မၼ်းသေလႄႈပွႆႇၵူၼ်းမဵဝ်း ဢိသရေး၊ တင်းလၢႆၵႂႃႇၼၼ်ႉ။ ၵဝ်ဢမ်ႇႁုၸၵ်းၽြႃးၼၼ်ႉ။ ၵူၼ်းမဵဝ်း ဢိသရေး၊ တင်းလၢႆၵေႃႈၵဝ်ဢမ်ႇပွႆႇၵႂႃႇၵူၺ်း၊” ဝႃႈၼင်ႇၼႆဢေႃႈ။
ၶဝ်ၵေႃႈလၢတ်ႈလႄႈဝႃႈ၊ “ၽြႃးပဵၼ်ၸဝ်ႈၵူၼ်းမဵဝ်း ႁေႇပြႄး၊ ၼၼ်ႉႁူပ်ႉထူပ်းၵၼ်တင်းႁဝ်းၶႃႈသွင်ၵေႃႉၼႆႉတီႈၶႃႈယဝ်ႉ။ ၶႅၼ်းတေႃႈပၼ်ဢၶႂၢင်ႉႁႂ်ႈၶႃႈၸဝ်ႈႁဝ်းၶဝ်လႆႈၵႂႃႇၵႃႈတီႈထိူၼ်ႇလႅင်ႉပုၼ်ႉၸူဝ်ႈၶၢဝ်းတၢင်းသၢမ်ဝၼ်းလႄႈႁဵတ်းတၢင်းဢၼ်သၢၵ်ႈလူႇတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၶႃႈၸဝ်ႈႁဝ်းၶဝ်ၼၼ်ႉသေၵမ်းတီႈၶႃႈ။ ပေႃးဢမ်ႇၼၼ်ၵူဝ်မၼ်းၸဝ်ႈတၵ်းဢဝ်ၽေးၵႃႇလႃႉႁႃႈလႅင်မိူင်း၊ၽေးလၢပ်ႇၽေးလႅဝ်းပၼ်တၢမ်ႇတၢႆတီႈၶႃႈၸဝ်ႈႁဝ်းၶဝ်တီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းၼၼ်ႉၵေႃႈလၢတ်ႈတီႈၶဝ်လႄႈဝႃႈ၊ “ မူဝ်းသေႇ၊ တင်း ဢႃႇရုၼ်ႇ၊ ႟။ ႁဵတ်းသင်လႄႈသူဢွၼ်ၵူၼ်းတင်းလၢႆပၢႆႈၵၢၼ်ပၢႆႈငၢၼ်းၸိူဝ်ႉၼင်ႇႁိုဝ်။ ႁႂ်ႈၶႃႈတင်းလၢႆၶိုၼ်းႁဵတ်းၵၢၼ်ၶဝ်တႃႉ။-
ၵူၼ်းမဵဝ်းသူၼမ်ၵိုၼ်းၼႃႇသေၵူၼ်းမဵဝ်း ဢေးၵျိပ်ႉ၊ မႃးယဝ်ႉလႄႈ၊သူႁဵတ်းႁႂ်ႈၶဝ်ဢမ်ႇၵိုတ်ႉႁၢပ်ႇၵၢၼ်တၢင်းႁဵတ်းၶဝ်ၼၼ်ႉယဝ်ႉလူင်ပႄႇ၊” ဝႃႈၼင်ႇၼႆဢေႃႈ။
ၼႂ်းဝၼ်းၼၼ်ႉၶုၼ်ႁေႃၶမ်းမီးဢမိင်ႉတီႈၵူၼ်းမဵဝ်း ဢေးၵျိပ်ႉ၊ ဢၼ်ပဵၼ်ၶုၼ်ထိင်းၶႃႈတင်းလၢႆဢိၵ်ႇတင်းတီႈၵူၼ်းမဵဝ်း ဢိသရေး၊ ဢၼ်ပဵၼ်ၵူၼ်းဢၼ်သေႃႇဢၼ်ၵျၢပ်ႈတင်းလၢႆလႄႈဝႃႈ၊-
“ယႃႇပေမႅင်ႇပၼ်ၽိူင်းပုၼ်ႈဢၼ်ၶဝ်တၵ်းႁဵတ်းမၢၵ်ႇဢုတ်ႇမိူၼ်ၼင်ႇမိူဝ်ႈဢွၼ်တၢင်းၼၼ်ႉယဝ်ႉ။ ႁႂ်ႈၶဝ်ၵႂႃႇႁႃဢဝ်ၵူၺ်းၶဝ်တႃႉ။-
ၵူၺ်းၵႃႈ၊မၢၵ်ႇဢုတ်ႇၸိုင်၊ၵႃႈဢၼ်ၶဝ်ႁဵတ်းဢွၵ်ႇလႆႈၵႃႈႁိုဝ်မိူၼ်မိူဝ်ႈဢွၼ်တၢင်းၼၼ်ႉယႃႇပေႁႂ်ႈယွမ်းသေဢိတ်း။ ၶဝ်ၼၼ်ႉၶၢၼ်ႉဢိူၼ်ၼႃႇလႄႈၶဝ်ၸၢင်ႈၵမ်းၵမ်းယွၼ်းႁႂ်ႈၵဝ်ပွႆႇၶဝ်ၵႂႃႇသၢၵ်ႈလူႇတီႈၽြႃးၶဝ်ယဝ်ႉ။-
ပိူဝ်ႈၼႆလႄႈပၼ်ၵၢၼ်ငၢၼ်းဢၼ်ယၢပ်ႇၽိုတ်ႇသေဢွၼ်တၢင်းၼၼ်ႉတႃႉ။ ႁဵတ်းၼၼ်ၸင်ႇၶဝ်တေဢမ်ႇမီးဢၶိင်ႇထွမ်ႇဢဝ်ၵႂၢမ်းၵူၼ်းဢၼ်မႃးပႅတ်ႉမႃးလႅၼ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၶုၼ်ထိင်းၶႃႈတင်းလၢႆဢိၵ်ႇတင်းၵူၼ်းဢၼ်သေႃႇဢၼ်ၵျၢပ်ႈၸိူဝ်းၼၼ်ႉဢွၼ်ၵၼ်ဢွၵ်ႇၵႂႃႇလႄႈလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈ၊ “ၶုၼ်ႁေႃၶမ်းလၢတ်ႈဝႃႈ၊မၼ်းၸဝ်ႈတၵ်းဢမ်ႇပၼ်ၽိူင်းတီႈသူယဝ်ႉ။-
မၼ်းၸဝ်ႈဝႃႈ၊သူတၵ်းလႆႈၵႂႃႇႁႃဢဝ်ၵူၺ်းသူတီႈလႂ်တၼ်းလႂ်ဢၼ်သူၸၢင်ႈႁႃလႆႈၼၼ်ႉဢေႃႈ။ ၼႂ်းဝႃႈၼၼ်သေၵေႃႈမၢၵ်ႇဢုတ်ႇဢၼ်သူတေလႆႈႁဵတ်းၵူႈဝၼ်းတေဢမ်ႇႁႂ်ႈလႆႈယွမ်းသေမၢၵ်ႇဢုတ်ႇဢၼ်သူယၢမ်ႈႁဵတ်းဢွၵ်ႇလႆႈမႃးၼၼ်ႉလႃးလႃး၊ဝႃႈၼင်ႇၼႆမႃးယဝ်ႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၵူၼ်းၸိူဝ်းၼၼ်ႉဢွၼ်ၵၼ်ၽႄၵႂႃႇၸွတ်ႇတူဝ်ႈၵႂႃႇၵႃႈၼႂ်းမိူင်း ဢေးၵျိပ်ႉ၊ ၵူႈတီႈၵူႈလႅၼ်ႁႂ်ႈလႆႈသွၵ်ႈႁႃတေႃၽိူင်းမႃးတၢင်ၽိူင်းဢေႃႈ။-
ၶုၼ်ထိင်းၶႃႈၸိူဝ်းၼၼ်ႉၵေႃႈၵျၢပ်ႈထၢပ်ႈလႄႈလၢတ်ႈဝႃႈ၊ “ႁဵတ်းႁႂ်ႈၵၢၼ်သူယဝ်ႉတူဝ်ႈပုၼ်ႈဝၼ်းလႂ်ဝၼ်းၼၼ်ႉမိူၼ်မိူဝ်ႈဢွၼ်တၢင်းဢၼ်လႆႈၽိူင်းၼၼ်ႉတႃႉ၊” ဝႃႈၼင်ႇၼႆဢေႃႈ။-
ၶုၼ်ထိင်းၶႃႈၸိူဝ်းၼၼ်ႉပေႃႉယႅၼ်ႉၵူၼ်းမဵဝ်း ဢိသရေး၊ ဢၼ်ပဵၼ်ၵူၼ်းသေႃႇၵူၼ်းၵျၢပ်ႈၸိူဝ်းဢၼ်လႆႈထိင်းၼႃႈၵၢၼ်ၼၼ်ႉသေလႄႈထၢမ်ၶဝ်လႄႈဝႃႈ၊ “ၵွပ်ႈသင်လႄႈၵူၼ်းသူဢမ်ႇႁဵတ်းဢွၵ်ႇမၢၵ်ႇဢုတ်ႇၼမ်မိူၼ်ဢၼ်သူႁဵတ်းလႆႈမိူဝ်ႈဢွၼ်တၢင်းၼၼ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၵူၼ်းဢၼ်သေႃႇဢၼ်ၵျၢပ်ႈၸိူဝ်းၼၼ်ႉၸူဝ်းၵၼ်ၵႂႃႇႁွင်ႉသႅၼ်ႇတီႈၶုၼ်ႁေႃၶမ်းမိူင်း ဢေးၵျိပ်ႉ၊ လႄႈဝႃႈ၊ “ၵွပ်ႈသင်လႄႈၸဝ်ႈႁဝ်းႁဵတ်းၸိူဝ်ႉၼင်ႇၼႆတီႈၶႃႈၸဝ်ႈႁဝ်းၶဝ်ၼႆႉတီႈၶႃႈ။-
ၽိူင်းၸိုင်၊ယင်းဢမ်ႇပၼ်သေဢိတ်းတီႈၶႃႈလႄႈ၊ၶုၼ်ထိင်းၶႃႈၸိူဝ်းၼၼ်ႉသမ်ႉဝႃႈ ‘ႁဵတ်းမၢၵ်ႇဢုတ်ႇတႃႉ၊’ ဝႃႈၼႆလႄႈ၊ပေႃႉယႅၼ်ႉၶႃႈၸဝ်ႈႁဝ်းၶဝ်ယူႇၶႃႈဢေႃႈ။ ဢပျတ်ႈၸိုင်၊မီးယူႇတီႈၵူၼ်းၸဝ်ႈႁဝ်းၸိူဝ်းၼၼ်ႉၵူၺ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းၵေႃႈလၢတ်ႈလႄႈဝႃႈ၊ “သူၶၢၼ်ႉဢိူၼ်ၼႃႇ။ သူၶၢၼ်ႉဢိူၼ်လႄႈၸင်ႇယွၼ်းဢၶႂၢင်ႉဝႃႈ၊ ‘ႁႂ်ႈႁဝ်းလႆႈၵႂႃႇႁဵတ်းပွႆးသၢၵ်ႈလူႇတီႈ ထႃႇဝရႃႉၽြႃး၊ သေၵမ်း’ ဝႃႈၼႆလူင်ပႄႇ။-
ၵႂႃႇတေႃႈလဵဝ်ၼႆႉလႄႈႁဵတ်းၵၢၼ်သူတႃႉ။ ၽိူင်းၸိုင်ဢမ်ႇပၼ်သူယဝ်ႉ။ ၵူၺ်းၵႃႈ၊ပုၼ်ႈတႃႇမၢၵ်ႇဢုတ်ႇၸိုင်၊သူတၵ်းလႆႈႁဵတ်းပဵင်းၵၼ်တင်းၵူႈပွၵ်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။-
ၼႂ်းမိူဝ်ႈဢၼ်ၶဝ်လႆႈငိၼ်းဢမိင်ႉၸဝ်ႈဝႃႈ၊မၢၵ်ႇဢုတ်ႇဢၼ်တၵ်းလႆႈႁဵတ်းၵူႈဝၼ်းၼၼ်ႉဢမ်ႇလႆႈယွမ်းသေဢိတ်းၼၼ်ႉၸိုင်၊ၵူၼ်းဢၼ်သေႃႇဢၼ်ၵျၢပ်ႈၸိူဝ်းၼၼ်ႉႁုႁၼ်လွင်ႈဢၼ်တုၵ်ႉၶႃႉဢၼ်ၼၵ်းၼႃႇတူၵ်းႁွတ်ႈမႃးၵႃႈၼိူဝ်ၶဝ်ယဝ်ႉၼၼ်ႉဢေႃႈ။
ၶဝ်ဢွၵ်ႇသေၵႃႈတီႈၶုၼ်ႁေႃၶမ်းၶိုၼ်းမိူဝ်းၵႂႃႇလႄႈထူပ်း မူဝ်းသေႇ၊ တင်း ဢႃႇရုၼ်ႇ၊ ဢၼ်ၸုၵ်းပႂ်ႉၶဝ်ယူႇၼၼ်ႉဢေႃႈ။-
ၶဝ်ဢွၼ်ၵၼ်လၢတ်ႈတီႈ မူဝ်းသေႇ၊ တင်း ဢႃႇရုၼ်ႇ၊ လႄႈဝႃႈ၊ “ႁႂ်ႈ ထႃႇဝရႃႉၽြႃး၊ တူၺ်းႁၼ်သူလႄႈပၼ်တၢမ်ႇသေၵမ်းလူၺ်ႈ။ သူႁဵတ်းႁႂ်ႈၶုၼ်ႁေႃၶမ်း ဢိၵ်ႇတင်းမူးမၢတ်ႈၽွင်းမိူင်းၸဝ်ႈတင်းလၢႆၸင်းႁဝ်းယဝ်ႉ။ သူဢဝ်လႅဝ်းသႂ်ႇပၼ်ၼႂ်းမိုဝ်းၶဝ်ပုၼ်ႈတႃႇတၵ်းဢဝ်ႁဝ်းတၢႆယဝ်ႉလူင်ပႄႇ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ မူဝ်းသေႇ၊ ၶိုၼ်းၵႂႃႇၸူးၵႃႈတီႈ ထႃႇဝရႃႉၽြႃး၊ လႄႈလဝ်ႈလၢတ်ႈဝႃႈ၊ “ဢူဝ်း၊ၸဝ်ႈ ထႃႇဝရႃႉၽြႃး၊ တီႈၶႃႈ။ ႁဵတ်းႁိုဝ်လႄႈၸဝ်ႈႁဝ်းၼိၵ်ႈၸၢၵ်ႈငႅၼ်းသႄးၵူၼ်းၸိူဝ်းၼႆႉတီႈၶႃႈ။ ႁဵတ်းႁိုဝ်လႄႈၸဝ်ႈႁဝ်းပွႆႇၸႂ်ႉၶႃႈၸဝ်ႈတီႈၶႃႈ။-
ၸႃႉၸဵမ်ဝၼ်းဢၼ်ၶႃႈၸဝ်ႈၶဝ်ႈၸူးၵႃႈတီႈၶုၼ်ႁေႃၶမ်းႁႂ်ႈလႆႈဢိင်ၼႃႇမႃႉၸိုဝ်ႈသဵင်ၸဝ်ႈႁဝ်းသေလႄႈလဝ်ႈလၢတ်ႈၼၼ်ႉမၼ်းၼိၵ်ႈၸၢၵ်ႈငႅၼ်းသႄးၵူၼ်းၸိူဝ်းၼႆႉၶႃႈဢေႃႈ။ ၸဝ်ႈႁဝ်းၸိုင်၊သမ်ႉဢမ်ႇႁဵတ်းၵႃႈသင်ပုၼ်ႈၵူၼ်းၸဝ်ႈႁဝ်းလႃးလႃးတီႈၶႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၵေႃႈလၢတ်ႈတီႈ မူဝ်းသေႇ၊ လႄႈဝႃႈ၊ “ၵမ်းၼႆႉၵဝ်တၵ်းႁဵတ်းၸိူဝ်ႉၼင်ႇႁိုဝ်တီႈၶုၼ်ႁေႃၶမ်းၼၼ်ႉၸိုင်၊မႂ်းတၵ်းလႆႈႁၼ်ဢေႃႈ။ ၵဝ်တၵ်းတဵၵ်းၸႂ်ႉႁႂ်ႈမၼ်းပွႆႇၵူၼ်းၵဝ်တင်းလၢႆဢေႃႈ။ ၵဝ်တၵ်းတဵၵ်းၸႂ်ႉႁႂ်ႈမၼ်းႁေႃႈၶဝ်ဢွၵ်ႇသေၵႃႈၼႂ်းမိူင်းမၼ်းဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ လၢတ်ႈတေႃႇ မူဝ်းသေႇ၊ လႄႈဝႃႈ၊ “ၵဝ်ပဵၼ် ထႃႇဝရႃႉၽြႃး၊ ဢေႃႈ။-
ၵဝ်ပေႃႇမႃးၵႃႈတီႈ ဢႃႇပြႃႇႁၢမ်ႇ၊ ၵႃႈတီႈ ဢိၸၢၵ်ႈ၊ ၵႃႈတီႈ ယႃႇၵုပ်ႈ၊ ပဵၼ် ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ ဢေႃႈ။ ၵူၺ်းၵႃႈ၊ၸိုဝ်ႈသဵင်ၵဝ်ဢၼ်ဝႃႈ၊ ထႃႇဝရႃႉၽြႃး၊ ၼၼ်ႉၵဝ်ဢမ်ႇႁႂ်ႈၶဝ်ႁုၸၵ်း။-
ၵဝ်သမ်ႉယင်းႁဵတ်းပတိၺိၺ်ႇလူၺ်ႈၵၼ်တင်းၶဝ်လႄႈပၼ်ၵတိဝႃႈ၊ၵဝ်တၵ်းဢဝ်မိူင်း ၶႃႇၼၼ်ႇ၊ မိူင်းဢၼ်ၶဝ်သွၼ်ႈပိုင်ႈယူႇလႄႈပဵၼ်ၶႅၵ်ႇယူႇၼၼ်ႉပၼ်တီႈၶဝ်ဢေႃႈ။-
ၵမ်းၼႆႉၵဝ်လႆႈငိၼ်းသဵင်ဢၼ်ပွင်ႉဢၼ်ၶၢင်းၵူၼ်းမဵဝ်း ဢိသရေး၊ ဢၼ်လႆႈၶၢမ်ႇတၢင်းဢၼ်ၵူၼ်းမဵဝ်း ဢေးၵျိပ်ႉ၊ ၶဝ်၊တဵၵ်းငႅၼ်းႁႂ်ႈပဵၼ်ၶႃႈၶဝ်ၼၼ်ႉယဝ်ႉ။ ၵဝ်ၶိုၼ်းၶုၵ်းၸႂ်လႆႈပတိၺိၺ်ႇၵဝ်ၼၼ်ႉယဝ်ႉ။-
ပိူဝ်ႈၼႆလႄႈမွၵ်ႇလၢတ်ႈၵူၼ်းမဵဝ်း ဢိသရေး၊ တင်းလၢႆ၊လွင်ႈဢၼ်ၵဝ်လၢတ်ႈတီႈၶဝ်လႄႈဝႃႈ၊ ‘ၵဝ်ပဵၼ် ထႃႇဝရႃႉၽြႃး၊ ဢေႃႈ။ ၵဝ်တၵ်းထုတ်ႇၼုၵ်ႈဢဝ်သူဢွၵ်ႇသေတၢင်းဢၼ်ၶၢမ်ႇပဵၼ်ၶႃႈၼႂ်းမိုဝ်းၵူၼ်းမဵဝ်း ဢေးၵျိပ်ႉ၊ ၼၼ်ႉလႄႈပွႆႇသူလွတ်ႈဢေႃႈ။ ၵဝ်တၵ်းယိုၼ်းမိုဝ်းၵဝ်ဢၼ်တၼ်းၶူဝ်းယႂ်ႇၼႃႇၼႆႉႁႂ်ႈလႆႈပၼ်ၽေးတၢမ်ႇဢၼ်ယႂ်ႇၼႃႇတီႈၶဝ်လႄႈသမ်ႉတၵ်းၵႄႇသႄႇဢဝ်သူဢေႃႈ။-
ၵဝ်တၵ်းႁႂ်ႈသူလႆႈပဵၼ်မဵဝ်းၵူၼ်းၵဝ်လႄႈၵဝ်တၵ်းပဵၼ်ၽြႃးပဵၼ်ၸဝ်ႈသူဢေႃႈ။ သူတၵ်းလႆႈႁုဝႃႈ၊ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူၼႂ်းမိူဝ်ႈဢၼ်ၵဝ်ပွႆႇသူလွတ်ႈသေတၢင်းဢၼ်ၶၢမ်ႇပဵၼ်ၶႃႈၵႃႈၼႂ်းမိူင်း ဢေးၵျိပ်ႉ၊ ၼၼ်ႉဢေႃႈ။-
ၵဝ်တၵ်းဢွၼ်သူသူင်ႇၵႂႃႇၵႃႈတီႈမိူင်းဢၼ်ၵဝ်ဝႆႉၵတိႁႂ်ႈလႆႈပၼ်တီႈ ဢႃႇပြႃႇႁၢမ်ႇ၊ဢိၸၢၵ်ႈ၊ယႃႇၵုပ်ႈ၊ ၼၼ်ႉသေလႄႈ၊ပၼ်ပုၼ်ႈဢၼ်သူတၵ်းၶၢမ်ႇဢမူၺ်ႇဢေႃႈ။ ၵဝ်ပဵၼ် ထႃႇဝရႃႉၽြႃး၊ ဢေႃႈ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။-
မူဝ်းသေႇ၊ ၵေႃႈ လၢတ်ႈထိုင်တီႈၵူၼ်းမဵဝ်း ဢိသရေး၊ ၸိူဝ်းၼၼ်ႉဢေႃႈ။ ၵူၺ်းၵႃႈ၊ၵွပ်ႈပိူဝ်ႈၵူၼ်းၸိူဝ်းၼၼ်ႉၸႂ်လုႁႅင်းဢူၼ်ႈ၊ဢိၵ်ႇတင်းၵွပ်ႈပိူဝ်ႈၶဝ်လႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသႄးၵျၢမ်းၼႃႇၼၼ်ႉလႄႈၶဝ်ယင်းဢမ်ႇထွမ်ႇဢမ်ႇဢဝ်ၵႂၢမ်း မူဝ်းသေႇ၊ လႄႈယူႇဢေႃႈ။
ထႃႇဝရႃႉၽြႃး၊ လၢတ်ႈတီႈ မူဝ်းသေႇ၊ ထႅင်ႈလႄႈဝႃႈ၊-
“ၵႂႃႇလၢတ်ႈတီႈၶုၼ်ႁေႃၶမ်းမိူင်း ဢေးၵျိပ်ႉ၊ ၼၼ်ႉလႄႈဝႃႈ၊မၼ်းတၵ်းလႆႈပွႆႇၵူၼ်းမဵဝ်း ဢိသရေး၊ လွတ်ႈသေၵႃႈၼႂ်းမိူင်းမၼ်းၼၼ်ႉတႃႉ၊” ဝႃႈၼင်ႇၼႆဢေႃႈ။
မူဝ်းသေႇ၊ ၶိုၼ်းလၢတ်ႈလႄႈဝႃႈ၊ “တူၺ်းၶႃႈလူး။ ၵူၼ်းမဵဝ်း ဢိသရေး၊ ၶဝ်၊ယင်းဢမ်ႇထွမ်ႇဢမ်ႇဢဝ်ၵႂၢမ်းၶႃႈၸဝ်ႈတီႈၶႃႈလႄႈ၊ၶုၼ်ႁေႃၶမ်းၼၼ်ႉတၵ်းႁဵတ်းၸိူဝ်ႉၼင်ႇႁိုဝ်ထွမ်ႇဢဝ်ၵႂၢမ်းၶႃႈၸဝ်ႈ ဢၼ်ဢမ်ႇမီးတၢင်းၵတ်ႉၼႂ်းတၢင်းဢၼ်လၢတ်ႈၵႂၢမ်းၼႆႉၸိူဝ်ႉၼင်ႇႁိုဝ်ၶႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ပူင်ဢမိင်ႉတီႈ မူဝ်းသေႇ၊ ဢိၵ်ႇတင်း ဢႃႇရုၼ်ႇ၊ လႄႈဝႃႈ၊ “မွၵ်ႇလၢတ်ႈပၼ်ၵူၼ်းမဵဝ်း ဢိသရေး၊ တင်းလၢႆဢိၵ်ႇတင်းၶုၼ်ႁေႃၶမ်းမိူင်း ဢေးၵျိပ်ႉ၊ လွင်ႈဢၼ်ၵဝ်ပွႆႇၸႂ်ႉသူသွင်ၵေႃႉႁႂ်ႈလႆႈဢွၼ်ဢဝ်ၵူၼ်းမဵဝ်း ဢိသရေး၊ ဢွၵ်ႇသေမိူင်း ဢေးၵျိပ်ႉ၊ ၵႂႃႇၼၼ်ႉတႃႉ၊” ဝႃႈၼင်ႇၼႆဢေႃႈ။
ငဝ်ႈႁိူၼ်းၼႂ်းၸိူဝ်ႉၶိူဝ်း ဢိသရေး၊ ၸိူဝ်းၼၼ်ႉၸမ်ႉ၊ ရုပိၼ်ႇ၊ လုၵ်ႈၸၢႆးတူၼ်ႈ ဢိသရေး၊ ၼၼ်ႉမီးလုၵ်ႈၸၢႆးသီႇၵေႃႉဢေႃႈ။ ၶဝ်ၼၼ်ႉပဵၼ် ႁႃႇၼုတ်ႉ၊ၽႃႇလု၊ႁေႇၸရုၼ်ႇ၊ တင်း ၵႃႇမိ၊ ဢေႃႈ။ ၶဝ်ပဵၼ်ပူႇပေႃႈတီႈၶိူဝ်းႁိူၼ်းဢၼ်ႁွင်ႉၸွမ်းၸိုဝ်ႈသဵင်ၶဝ်ႁင်းၽႂ်ႁင်းမၼ်းဢေႃႈ။-
သိမုၼ်ႇ၊ မီးလုၵ်ႈၸၢႆးႁူၵ်းၵေႃႉလႄႈပဵၼ် ယေႇမူၺ်ႇလႃႉ၊ယႃႇမိၼ်ႇ၊ ဢေႃးႁတ်ႉ၊ယႃႇၶိၼ်ႇ၊ၸေႃးႁႃႇ၊ ဢိၵ်ႇတင်း သေႃးလႃႉ၊ ဢၼ်ပဵၼ်လုၵ်ႈၸၢႆးမႄႈယိင်း ၶႃႇၼၼိ၊ ၼၼ်ႉဢေႃႈ။ ၶဝ်ပဵၼ်ပူႇပေႃႈတီႈၶိူဝ်းႁိူၼ်းဢၼ်ႁွင်ႉၸွမ်းၸိုဝ်ႈသဵင်ၶဝ်ႁင်းၽႂ်ႁင်းမၼ်းဢေႃႈ။-
လေႇဝိ၊ မီးလုၵ်ႈၸၢႆးသၢမ်ၵေႃႉဢၼ်ပဵၼ်ပူႇပေႃႈတီႈၶိူဝ်းႁိူၼ်းဢၼ်ႁွင်ႉၸွမ်းၸိုဝ်ႈသဵင်ၶဝ်ႁင်းၽႂ်ႁင်းမၼ်းၸမ်ႉ၊ပဵၼ် ၵေႇရသုၼ်ႇ၊ၵေႃႇႁတ်ႉ၊ ဢိၵ်ႇတင်း မေႇရႃႇရိ၊ ဢေႃႈ။ ဢသၢၵ်ႈ လေႇဝိ၊ ၼၼ်ႉလႆႈပၢၵ်ႇသၢမ်သိပ်းပၢႆၸဵတ်းပီဢေႃႈ။-
ၵေႇရသုၼ်ႇ၊ မီးလုၵ်ႈၸၢႆးသွင်ၵေႃႉဢၼ်ပဵၼ် လိပၼိ၊ တင်း သိမိ၊ ၸွမ်းလူၺ်ႈၸိူဝ်ႉၶိူဝ်းၶဝ်ၸမ်ႉ။-
ၵေႃႇႁတ်ႉ၊ မီးလုၵ်ႈၸၢႆးသီႇၵေႃႉဢၼ်ပဵၼ် ဢႃႇမရမ်ႇ၊ဢိၸႁႃႇ၊ႁေႇပရုၼ်ႇ၊ ဢိၵ်ႇတင်း ဢေႃးၸေးလႃႉ၊ ဢေႃႈ။ ဢသၢၵ်ႈ ၵေႃႇႁတ်ႉ၊ ၼၼ်ႉလႆႈပၢၵ်ႇပၢႆသၢမ်သိပ်းသၢမ်ပီဢေႃႈ။-
မေႇရႃႇရိ၊ မီးလုၵ်ႈၸၢႆးသွင်ၵေႃႉဢၼ်ပဵၼ် မႃႇလိ၊ ဢိၵ်ႇတင်း မုသိ၊ ဢေႃႈ။ ၶဝ်ၸိူဝ်းၼႆႉပဵၼ်ၸိူဝ်ႉၶိူဝ်း လေႇဝိ၊ ၸွမ်းလူၺ်ႈၶိူဝ်းႁိူၼ်းၶဝ်ႁင်းၽႂ်ႁင်းမၼ်းဢေႃႈ။
ဢႃႇမရမ်ႇ၊ ၼၼ်ႉၵူပ်ႉၵူႈပဵၼ်ႁိူၼ်းလူၺ်ႈၵၼ်တင်းမႄႈဢႃမၼ်း ယေႃးၶႄႇပတ်ႉ၊ လႄႈမၼ်းၼၼ်ႉၵိူတ်ႇလဵင်ႉ ဢႃႇရုၼ်ႇ၊ တင်း မူဝ်းသေႇ၊ ဢေႃႈ။ ဢသၢၵ်ႈ ဢႃႇမရမ်ႇ၊ ၼၼ်ႉလႆႈပၢၵ်ႇသၢမ်သိပ်းပၢႆၸဵတ်းပီဢေႃႈ။-
ဢိၸႁႃႇ၊ မီးလုၵ်ႈၸၢႆးသၢမ်ၵေႃႉဢၼ်ပဵၼ် ၵေႃးရႃႉ၊ၼေႇၽႅတ်ႉ၊ ဢိၵ်ႇတင်း ၸိၶရိ၊ ဢေႃႈ။-
ဢေႃးၸေးလႃႉ၊ ၵေႃႈမီးလုၵ်ႈၸၢႆးသၢမ်ၵေႃႉဢၼ်ပဵၼ် မိသေႇလႃႉ၊ဢေႇလၸႃႇၽၢၼ်ႇ၊ ဢိၵ်ႇတင်း သိႀရိ၊ ဢေႃႈ။
ဢႃႇရုၼ်ႇ၊ ၼၼ်ႉၵူပ်ႉၵူႈပဵၼ်ႁိူၼ်းလူၺ်ႈၵၼ်တင်း ဢေးလိသၽႃႇ၊ လုၵ်ႈယိင်း ဢမိၼတပ်ႉ၊ ၼွင်ႉယိင်း ၼႃႇသုၼ်ႇ၊ လႄႈမႄႈယိင်းၼၼ်ႉၵိူတ်ႇလဵင်ႉ ၼႃႇတပ်ႉ၊ ဢၽိႁု၊ဢေးလႃႇၸႃႇ၊ တင်း ဢိႀမႃႇ၊ ဢေႃႈ။-
ၵေႃးရႃႉ၊ မီးလုၵ်ႈၸၢႆးသၢမ်ၵေႃႉဢၼ်ပဵၼ် ဢတ်ႉသိရႃႉ၊ဢေးလႃႉၵႃႇၼႃႉ၊ တင်း ဢပျႃႇသပ်ႉ၊ ဢေႃႈ။ ၶဝ်ၸိူဝ်းၼႆႉပဵၼ်ပူႇပေႃႈတီႈၶိူဝ်းႁိူၼ်းဢၼ်သိုပ်ႇလူင်းမႃးၵႃႈတီႈၸိူဝ်ႉၶိူဝ်း ၵေႃးရႃႉ၊ ၶေႃၶေႃ၊ႁင်းၽႂ်ႁင်းမၼ်းဢေႃႈ။-
ဢေးလႃႇၸႃႇ၊ လုၵ်ႈၸၢႆး ဢႃႇရုၼ်ႇ၊ ၼၼ်ႉၵူပ်ႉၵူႈပဵၼ်ႁိူၼ်းလူၺ်ႈၵၼ်တင်းလုၵ်ႈယိင်း ပုတေႇလႃႉ၊ လႄႈမၼ်းၼၼ်ႉၵိူတ်ႇလဵင်ႉ ၽိၼႁတ်ႉ၊ ဢေႃႈ။ ၶဝ်ၸိူဝ်းၼႆႉပဵၼ်ငဝ်ႈႁိူၼ်းတီႈၶိူဝ်းႁိူၼ်းၽႂ်ၽႂ်မၼ်းမၼ်းဢၼ်သိုပ်ႇလူင်းမႃးတီႈၸိူဝ်ႉၶိူဝ်း လေႇဝိ၊ ဢေႃႈ။
ဢႃႇရုၼ်ႇ၊ တင်း မူဝ်းသေႇ၊ ၼႆႉပဵၼ်ၶဝ်ၸိူဝ်းဢၼ် ထႃႇဝရႃႉၽြႃး၊ လၢတ်ႈတီႈၶဝ်လႄႈဝႃႈ၊ “ဢွၼ်ဢဝ်ၸိူဝ်ႉၶိူဝ်းၵူၼ်းမဵဝ်း ဢိသရေး၊ ဢွၵ်ႇသေမိူင်း ဢေးၵျိပ်ႉ၊ ၵႂႃႇတႃႉ၊” ဝႃႈၼင်ႇၼႆၼၼ်ႉဢေႃႈ။-
ၶဝ်ၸိူဝ်းဢၼ်ၶဝ်ႈလၢတ်ႈတီႈၶုၼ်ႁေႃၶမ်းမိူင်း ဢေးၵျိပ်ႉ၊ ႁႂ်ႈလႆႈပွႆႇၵူၼ်းမဵဝ်း ဢိသရေး၊ တင်းလၢႆၼၼ်ႉပဵၼ် မူဝ်းသေႇ၊ တင်း ဢႃႇရုၼ်ႇ၊ ၼႆႉယဝ်ႉ။
ၼႂ်းဝၼ်းဢၼ် ထႃႇဝရႃႉၽြႃး၊ လၢတ်ႈတေႃႇ မူဝ်းသေႇ၊ ၵႃႈၼႂ်းမိူင်း ဢေးၵျိပ်ႉ၊ ၼၼ်ႉၸိုင်၊-
မၼ်းၸဝ်ႈလၢတ်ႈလႄႈဝႃႈ၊ “ၵဝ်ပဵၼ် ထႃႇဝရႃႉၽြႃး၊ ဢေႃႈ။ ၵႃႈၼင်ႇဢၼ်ၵဝ်သင်ႇလၢတ်ႈမႂ်းဝႆႉၼၼ်ႉမွၵ်ႇလၢတ်ႈပၼ်ၶုၼ်ႁေႃၶမ်းမိူင်း ဢေးၵျိပ်ႉ၊ ၼၼ်ႉတႃႉ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ မူဝ်းသေႇ၊ ၶိုၼ်းလဝ်ႈလၢတ်ႈတီႈ ထႃႇဝရႃႉၽြႃး၊ လႄႈဝႃႈ၊ “တူၺ်းၶႃႈလူး။ ၶႃႈၸဝ်ႈဢမ်ႇမီးတၢင်းၵတ်ႉတၢင်းၶၼ်ၼႂ်းတၢင်းဢၼ်ဢုပ်ႇလၢတ်ႈၵႂၢမ်းၶႃႈ၊ၶုၼ်ႁေႃၶမ်းမိူင်း ဢေးၵျိပ်ႉ၊ တၵ်းႁဵတ်းၸိူဝ်ႉၼင်ႇႁိုဝ်၊ထွမ်ႇဢဝ်ၵႂၢမ်းၶႃႈၸဝ်ႈတီႈၶႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၵေႃႈလၢတ်ႈတီႈ မူဝ်းသေႇ၊ လႄႈဝႃႈ၊ “ၵဝ်တၵ်းယုၵ်ႉတၢင်ႇမႂ်းႁႂ်ႈပဵၼ်ၸိူဝ်ႉၼင်ႇၽြႃးပဵၼ်ၸဝ်ႈတီႈၶုၼ်ႁေႃၶမ်းမိူင်း ဢေးၵျိပ်ႉ၊ ဢေႃႈ။ ပီႈဢၢႆႈမႂ်း ဢႃႇရုၼ်ႇ၊ သမ်ႉတၵ်းလၢတ်ႈၵႂၢမ်းတၢင်တူဝ်မႂ်းၸိူဝ်ႉၼင်ႇပရေႃးၽႅတ်ႈ ဢေႃႈ။-
ၵႃႈၼင်ႇဢၼ်ၵဝ်သင်ႇလၢတ်ႈမႂ်းဝႆႉၼၼ်ႉမွၵ်ႇလၢတ်ႈပၼ် ဢႃႇရုၼ်ႇ၊ တႃႉ။ မၼ်းတၵ်းၶဝ်ႈလဝ်ႈလၢတ်ႈတီႈၶုၼ်ႁေႃၶမ်းႁႂ်ႈလႆႈပွႆႇၵူၼ်းမဵဝ်း ဢိသရေး၊ ဢွၵ်ႇမိူင်းမၼ်းၵႂႃႇဢေႃႈ။-
ၵူၺ်းၵႃႈ၊ၵဝ်တၵ်းႁႂ်ႈႁူဝ်ၸႂ်ၶုၼ်ႁေႃၶမ်းၵႅၼ်ႇၶႅင်လႄႈၵဝ်တၵ်းႁဵတ်းၼႄၼိမိၵ်ႈသၢၵ်ႈသေႇတင်းလၢႆဢိၵ်ႇတင်းတၢင်းဢၼ်လီဢၢမ်းၼမ်ၵိုၼ်းၼႃႇၵႃႈၼႂ်းမိူင်း ဢေးၵျိပ်ႉ၊ ဢေႃႈ။-
ၼႂ်းဝႃႈၼၼ်သေၵေႃႈ ၶုၼ်ႁေႃၶမ်းယင်းတၵ်းဢမ်ႇထွမ်ႇဢမ်ႇဢဝ်ၵႂၢမ်းသူၼၼ်ႉဢေႃႈ။ ၵမ်းၼၼ်ႉ ၵဝ်တၵ်းပၼ်တၢမ်ႇဢၼ်ယႂ်ႇၼႃႇၵႃႈၼိူဝ်ၵူၼ်းမိူင်း ဢေးၵျိပ်ႉ၊ သေလႄႈတၵ်းဢွၼ်ဢဝ်ၵူၼ်းၵဝ်မဵဝ်း ဢိသရေး၊ ဢွၵ်ႇမိူင်းၼၼ်ႉၵႂႃႇဢေႃႈ။-
ၵွပ်ႈပိူဝ်ႈႁဵတ်းၸိူဝ်ႉၼင်ႇၼၼ်လႄႈၵူၼ်းမဵဝ်း ဢေးၵျိပ်ႉ၊ ၶဝ်တၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ၼႂ်းမိူဝ်ႈဢၼ်ၵဝ်ယိုၼ်းမိုဝ်းၵႃႈၼိူဝ်ၶဝ်သေလႄႈဢဝ်ၵူၼ်းမဵဝ်း ဢိသရေး၊ ဢွၵ်ႇမိူင်းၶဝ်ၵႂႃႇၼၼ်ႉဢေႃႈ၊” ဝႃႈၼင်ႇၼႆဢေႃႈ။-
မူဝ်းသေႇ၊ တင်း ဢႃႇရုၼ်ႇ၊ ၵေႃႈႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ ပူင်ဢမိင်ႉဝႆႉၼၼ်ႉဢေႃႈ။-
မိူဝ်ႈဢၼ်ၶဝ်လဝ်ႈလၢတ်ႈတီႈၶုၼ်ႁေႃၶမ်းၼၼ်ႉၸိုင်၊ဢသၢၵ်ႈ မူဝ်းသေႇ၊ လႆႈပႅတ်ႇသိပ်းပီဢေႃႈ။ ဢသၢၵ်ႈ ဢႃႇရုၼ်ႇ၊ သမ်ႉလႆႈပႅတ်ႇသိပ်းပၢႆသၢမ်ပီဢေႃႈ။
ထႃႇဝရႃႉၽြႃး၊ လၢတ်ႈတီႈ မူဝ်းသေႇ၊ တင်း ဢႃႇရုၼ်ႇ၊ လႄႈဝႃႈ၊-
“ပေႃးၶုၼ်ႁေႃၶမ်းယွၼ်းႁႂ်ႈသူႁဵတ်းၼႄၼိမိၵ်ႈသေၸိူဝ်ႉသေပိူင်ပုၼ်ႈသၢၵ်ႈသေႇသူၸိုင်၊မွၵ်ႇလၢတ်ႈႁႂ်ႈ ဢႃႇရုၼ်ႇ၊ ဢဝ်ၶွၼ်ႉတဝ်ႉမၼ်းပႅတ်ႈတူၵ်းၵႃႈတီႈၽၢႆႇၼႃႈၶုၼ်ႁေႃၶမ်းတႃႉ။ ၶွၼ်ႉတဝ်ႉၼၼ်ႉတၵ်းပဵၼ်ငူးၵႂႃႇဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ မူဝ်းသေႇ၊ ဢိၵ်ႇတင်း ဢႃႇရုၼ်ႇ၊ ၶဝ်ႈၸူးၵႃႈတီႈၶုၼ်ႁေႃၶမ်းသေလႄႈႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉၼၼ်ႉဢေႃႈ။ ဢႃႇရုၼ်ႇ၊ ဢဝ်ၶွၼ်ႉတဝ်ႉမၼ်းပႅတ်ႈတူၵ်းၵႃႈတီႈၽၢႆႇၼႃႈၶုၼ်ႁေႃၶမ်းဢိၵ်ႇတင်းမူးမၢတ်ႈၽွင်းမိူင်းမၼ်းတင်းလၢႆလႄႈ၊ၶွၼ်ႉတဝ်ႉၼၼ်ႉပဵၼ်ငူးၵႂႃႇဢေႃႈ။-
ၶုၼ်ႁေႃၶမ်းၵေႃႈႁွင်ႉဢဝ်ၵူၼ်းဢၼ်မီးပိင်ႇၺႃႇမၼ်းတင်းလၢႆဢိၵ်ႇတင်းၵူၼ်းမေႃလဵၼ်ႈဢတၢတ်ႈတင်းလၢႆမႃးလႄႈႁႂ်ႈဢဝ်တင်းဢတၢတ်ႈပိင်ႇၺႃႇၶဝ်ၼၼ်ႉႁဵတ်းမိူၼ်ၸိူဝ်ႉၼင်ႇၼၼ်ဢေႃႈ။-
ၶဝ်ၵေႃႈဢွၼ်ၵၼ်ဢဝ်ၶွၼ်ႉတဝ်ႉၶဝ်ပႅတ်ႈတူၵ်းလႄႈၶွၼ်ႉတဝ်ႉၶဝ်ၸိူဝ်းၼၼ်ႉၵေႃႈပဵၼ်ငူးၵႂႃႇၵူႈလႅမ်ႈဢေႃႈ။ ၵူၺ်းၵႃႈ၊ၶွၼ်ႉတဝ်ႉ ဢႃႇရုၼ်ႇ၊ ၼၼ်ႉဢိုၼ်ၵိၼ်ၶွၼ်ႉတဝ်ႉၶဝ်ၸိူဝ်းၼၼ်ႉပႅတ်ႈသေဢေႃႈ။-
ၶုၼ်ႁေႃၶမ်းၼၼ်ႉႁူဝ်ၸႂ်ယင်းတိုၵ်ႉၵႅၼ်ႇၶႅင်ယူႇမႅၼ်ႈၸွမ်းၼင်ႇဢၼ် ထႃႇဝရႃႉၽြႃး၊ လၢတ်ႈဝႆႉၼၼ်ႉလႄႈ၊မၼ်းယင်းဢမ်ႇထွမ်ႇဢမ်ႇဢဝ်ၵႂၢမ်း မူဝ်းသေႇ၊ တင်းၵႂၢမ်း ဢႃႇရုၼ်ႇ၊ လႄႈယူႇဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ လၢတ်ႈတီႈ မူဝ်းသေႇ၊ လႄႈဝႃႈ၊ “ၶုၼ်ႁေႃၶမ်းၼၼ်ႉၸႂ်ၵႅၼ်ႇၸႂ်ၶႅင်လႄႈယင်းဢမ်ႇပွႆႇၵူၼ်းၸိူဝ်းၼၼ်ႉၵႂႃႇလႃးလႃး၊-
ပိူဝ်ႈၼႆလႄႈၵႂႃႇၸူးမၼ်းၶိင်ႇၵၢင်ၼႂ်မိူဝ်ႈဢၼ်မၼ်းလူင်းၵႂႃႇၵႃႈတီႈတႃႈၼမ်ႉပုၼ်ႉတႃႉ။ ယိပ်းပႃးၶွၼ်ႉတဝ်ႉဢၼ်ယၢမ်ႈပိၼ်ႇပဵၼ်ငူးၼၼ်ႉသေလႄႈ ၸုၵ်းပႂ်ႉယူႇၵႃႈတီႈၽင်ႇမႄႈၼမ်ႉ ၼၢႆးလ်၊ တႃႉ။-
မႂ်းတၵ်းလႆႈလၢတ်ႈတီႈမၼ်းလႄႈဝႃႈ၊ ‘ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ႁေႇပြႄး၊ ၶဝ်ၼၼ်ႉပွႆႇၸႂ်ႉၶႃႈၸဝ်ႈမႃးမွၵ်ႇလၢတ်ႈတီႈၸဝ်ႈႁဝ်းလႄႈဝႃႈ၊ “ပွႆႇၵူၼ်းၵဝ်တင်းလၢႆၵႂႃႇႁႂ်ႈလႆႈႁဵတ်းဝၢတ်ႈၵူဝ်းၵႂၢႆႇတီႈၵဝ်ၵႃႈၼႂ်းထိူၼ်ႇလႅင်ႉပုၼ်ႉတႃႉ။” ဝႃႈၼင်ႇၼႆတီႈၶႃႈယဝ်ႉ။ ၵူၺ်းၵႃႈ၊ႁၢၼ်ႉတေႃႇထိုင်ႁွတ်ႈမိူဝ်ႈလဵဝ်ၼႆႉၵေႃႈၸဝ်ႈႁဝ်းယင်းဢမ်ႇထွမ်ႇဢဝ်လႄႈယူႇလူင်ပႄႇ။-
တေႃႈလဵဝ်ၼႆႉ ထႃႇဝရႃႉၽြႃး၊ မီးဢမိင်ႉလႄႈဝႃႈၸမ်ႉ၊ “မႂ်းတၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ၼၼ်ႉၸိူဝ်ႉၼင်ႇႁိုဝ်၊” ဝႃႈၼႆၸမ်ႉ၊ၵဝ်တၵ်းဢဝ်ၶွၼ်ႉတဝ်ႉၼႆႉပေႃႉၼႃႈၼမ်ႉလႄႈၼမ်ႉတၵ်းပဵၼ်လိူတ်ႈၵႂႃႇဢေႃႈ။-
ပႃတင်းလၢႆဢၼ်မီးၼႂ်းမႄႈၼမ်ႉ ၼၢႆးလ်၊ တၵ်းတၢႆဢေႃႈ။ ၼမ်ႉတၵ်းမဵၼ်ၼဝ်ႈၵႂႃႇလႄႈၵူၼ်းမဵဝ်း ဢေးၵျိပ်ႉ၊ တင်းလၢႆတၵ်းလီႁင်ႈဢဵတ်ႇသဵတ်ႇတႃႇတေၵိၼ်ၼမ်ႉၼၼ်ႉဢေႃႈ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ၵမ်းၼၼ်ႉ၊ ထႃႇဝရႃႉၽြႃး၊ လၢတ်ႈတီႈ မူဝ်းသေႇ၊ လႄႈဝႃႈ၊ “သင်ႇလၢတ်ႈႁႂ်ႈ ဢႃႇရုၼ်ႇ၊ ဢဝ်ၶွၼ်ႉတဝ်ႉမၼ်းယိုၼ်းၵႃႈၼိူဝ်ၼမ်ႉၵႃႈမီးၵႃႈၼႂ်းမိူင်း ဢေးၵျိပ်ႉ၊ ၸႃႉၸဵမ်မႄႈၼမ်ႉလႂ်၊ၼမ်ႉႁွင်ႈၼမ်ႉၵႄးလႂ်၊ၼမ်ႉၼွင်လႂ်ၸိူဝ်းၼၼ်ႉႁႂ်ႈမၼ်းပိၼ်ႇပဵၼ်လိူတ်ႈၵႂႃႇတႃႉ။ ႁဵတ်းၼၼ်လႄႈၵႃႈၼႂ်းမိူင်း ဢေးၵျိပ်ႉ၊ ၵူႈတီႈၵူႈလႅၼ်ၸႃႉၸဵမ်ၵႃႈၼႂ်းၵွၵ်းႁၢင်းမႆႉလႂ်၊မေႃႈမၢၵ်ႇႁိၼ်လႂ်တင်းသဵင်ႈတင်းလူင်တၵ်းပဵၼ်လိူတ်ႈၵႂႃႇဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ တင်း ဢႃႇရုၼ်ႇ၊ ၵေႃႈႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ ပူင်ဢမိင်ႉဝႆႉၼၼ်ႉဢေႃႈ။ ဢႃႇရုၼ်ႇ၊ ဢဝ်ၶွၼ်ႉတဝ်ႉမၼ်းပေႃႉမႄႈၼမ်ႉၵႃႈတီႈၽၢႆႇၼႃႈၶုၼ်ႁေႃၶမ်း ဢိၵ်ႇတင်းမူးမၢတ်ႈၽွင်းမိူင်းမၼ်းတင်းလၢႆလႄႈၼမ်ႉတင်းလၢႆပိၼ်ႇပဵၼ်လိူတ်ႈၵႂႃႇမူတ်းဢေႃႈ။-
ပႃတင်းလၢႆတၢႆလႄႈၼမ်ႉၵေႃႈမဵၼ်တူႇမဵၼ်ၼဝ်ႈၵႂႃႇထၢၼ်ႈပေႃးၵူၼ်းမဵဝ်း ဢေးၵျိပ်ႉ၊ ၶဝ်ဢမ်ႇၵိၼ်ၼမ်ႉၼၼ်ႉလႆႈဢေႃႈ။ ၵႃႈၼႂ်းမိူင်း ဢေးၵျိပ်ႉ၊ ၵေႃႈပဵၼ်လိူတ်ႈၸွတ်ႇတူဝ်ႈၵႂႃႇၵူႈတီႈၵူႈလႅၼ်ဢေႃႈ။-
ၵူၼ်းမေႃလဵၼ်ႈဢတၢတ်ႈပိင်ႇၺႃႇၼႂ်းမိူင်း ဢေးၵျိပ်ႉ၊ ၸိူဝ်းၼၼ်ႉၵေႃႈဢွၼ်ၵၼ်ဢဝ်ဢတၢတ်ႈပိင်ႇၺႃႇၶဝ်၊ႁဵတ်းလႆႈမိူၼ်ၸိူဝ်ႉၼင်ႇၼၼ်ဢေႃႈ။ ၶုၼ်ႁေႃၶမ်းယင်းႁူဝ်ၸႂ်ၵႅၼ်ႇၶႅင်ယူႇမိူၼ်ၵဝ်ႇလႄႈ၊ယင်းဢမ်ႇထွမ်ႇဢဝ်ၵႂၢမ်း မူဝ်းသေႇ၊ တင်းၵႂၢမ်း ဢႃႇရုၼ်ႇ၊ မႅၼ်ႈၼင်ႇဢၼ် ထႃႇဝရႃႉၽြႃး၊ လၢတ်ႈဝႆႉၼၼ်ႉဢေႃႈ။-
ၶုၼ်ႁေႃၶမ်းၼၼ်ႉဝၢႆႇၶိုၼ်းမိူဝ်းၵႂႃႇၵႃႈတီႈႁၢင်ႈႁေႃလႄႈယင်းဢမ်ႇဢဝ်လွင်ႈတၢင်းၼၼ်ႉသႂ်ႇၼႂ်းၸႂ်သေဢိတ်းဢေႃႈ။-
ၵူၼ်းမိူင်း ဢေးၵျိပ်ႉ၊ တင်းသဵင်ႈတင်းလူင်ၵေႃႈ၊ပိူဝ်ႈဢၼ်ၼမ်ႉၵႃႈၼႂ်းမႄႈၼမ်ႉ ၼၢႆးလ်၊ ၼၼ်ႉဢမ်ႇၵိၼ်လႆႈလႃးလႃးလႄႈဢွၼ်ၵၼ်ၶုတ်းၸွမ်းၵႃႈႁိမ်းၽင်ႇႁွင်ႈႁႂ်ႈလႆႈၼမ်ႉၵိၼ်ဢေႃႈ။
ထႃႇဝရႃႉၽြႃး၊ ပၼ်ၽေးတၢမ်ႇၼမ်ႉတေႃႇႁွတ်ႈပူၼ်ႉၸဵတ်းဝၼ်းဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ လၢတ်ႈတီႈ မူဝ်းသေႇ၊ လႄႈဝႃႈ၊ “ၶဝ်ႈၸူးၵႃႈတီႈၶုၼ်ႁေႃၶမ်းလႄႈလၢတ်ႈဝႃႈ၊ ‘ ထႃႇဝရႃႉၽြႃး၊ မီးဢမိင်ႉၸမ်ႉ၊ပွႆႇၵူၼ်းၵဝ်တင်းလၢႆၵႂႃႇႁႂ်ႈလႆႈႁဵတ်းဝၢတ်ႈၵူဝ်းၵႂၢႆႇၵဝ်တႃႉ။-
ပေႃးမႂ်းထဵင်ပႅတ်ႈလႄႈဢမ်ႇပွႆႇၶဝ်ၵႂႃႇၸိုင်၊ၵဝ်တၵ်းဢဝ်ၽေးတၢမ်ႇဢၼ်ပဵၼ်ၶဵတ်ႇၼမ်ၼႃႇလူင်လၢင်တူၵ်းႁွတ်ႈၵႃႈၼိူဝ်မိူင်း ဢေးၵျိပ်ႉ၊ ၵူႈတီႈၵူႈလႅၼ်ဢေႃႈ။-
ၶဵတ်ႇၼမ်ၼႃႇတၵ်းဢွၵ်ႇသေၵႃႈတီႈမႄႈၼမ်ႉ ၼၢႆးလ်၊ လႄႈတၵ်းၶဝ်ႈယူႇၵႃႈၼႂ်းႁေႃၶမ်းမႂ်း၊ၵႃႈၼႂ်းႁွင်ႈၼွၼ်းမႂ်း၊ၵႃႈၼိူဝ်ၵူႇမႂ်း၊ၵႃႈၼႂ်းႁိူၼ်းမူးမၢတ်ႈၽွင်းမိူင်းမႂ်းတင်းလၢႆ၊ၵႃႈၼႂ်းႁိူၼ်းၵူၼ်းဝၢၼ်ႈၵူၼ်းမိူင်းမႂ်းတင်းလၢႆ၊ၵႃႈၼႂ်းၽီးၽႆးမႂ်း၊ၵႃႈၼႂ်းဢၢင်ႇဢၼ်ၼူတ်ႈၶဝ်ႈမုၼ်းမႂ်းၸိူဝ်းၼၼ်ႉဢေႃႈ။-
ၶဵတ်ႇၸိူဝ်းၼၼ်ႉတၵ်းၵျွၵ်းဝႅၼ်ယူႇၵႃႈၼိူဝ်ၸႃႉၸဵမ်တူဝ်မႂ်းလႄႈၵူၼ်းဝၢၼ်ႈၵူၼ်းမိူင်းမႂ်းဢိၵ်ႇတင်းၵႃႈၼိူဝ်မူးမၢတ်ႈၽွင်းမိူင်းမႂ်းၵႃႈမီးတင်းသဵင်ႈတင်းလူင်ဢေႃႈ၊’ လၢတ်ႈဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉလၢတ်ႈတီႈ မူဝ်းသေႇ၊ လႄႈဝႃႈ၊ “သင်ႇလၢတ်ႈႁႂ်ႈ ဢႃႇရုၼ်ႇ၊ ဢဝ်ၶွၼ်ႉတဝ်ႉမၼ်းယိုၼ်းၵႃႈၼိူဝ်ၼမ်ႉၵႃႈမီးၵႃႈၼႂ်းမိူင်း ဢေးၵျိပ်ႉ၊ ၸႃႉၸဵမ်ၼမ်ႉႁွင်ႈလႂ်၊ၼမ်ႉၵႄးလႂ်၊ၼမ်ႉၼွင်ၸိူဝ်းၼၼ်ႉႁႂ်ႈၶဵတ်ႇတင်းလၢႆၶိုၼ်ႈမႃးတဵမ်ၵႃႈၼႂ်းမိူင်း ဢေးၵျိပ်ႉ၊ တႃႉ၊” ဝႃႈၼင်ႇၼႆဢေႃႈ။-
ဢႃႇရုၼ်ႇ၊ ၵေႃႈယိုၼ်းၶွၼ်ႉတဝ်ႉမၼ်းၵႃႈတီႈၼိူဝ်ၼမ်ႉၵႃႈမီးတင်းသဵင်ႈတင်းမူတ်းသေလႄႈၶဵတ်ႇတင်းလၢႆဢွၵ်ႇမႃးတဵမ်ၵႂႃႇၵႃႈၼႂ်းမိူင်း ဢေးၵျိပ်ႉ၊ ဢေႃႈ။-
ၵူၼ်းမေႃလဵၼ်ႈဢတၢတ်ႈၶဝ်ၵေႃႈဢဝ်တင်းဢတၢတ်ႈပိင်ႇၺႃႇၶဝ်ႁဵတ်းႁႂ်ႈၶဵတ်ႇတင်းလၢႆၶိုၼ်ႈမႃးၵႃႈၼိူဝ်လိၼ်ဢေႃႈ။
ၶုၼ်ႁေႃၶမ်းၵေႃႈႁွင်ႉဢဝ် မူဝ်းသေႇ၊ တင်း ဢႃႇရုၼ်ႇ၊ လႄႈလၢတ်ႈဝႃႈ၊ “တွင်းပၢၼ်ႇတီႈ ထႃႇဝရႃႉၽြႃး၊ ႁႂ်ႈႁေႃႈပႅတ်ႈၶဵတ်ႇၸိူဝ်းၼႆႉတႃႉ။ ၵဝ်တၵ်းပွႆႇႁႂ်ႈၵူၼ်းမႂ်းၸိူဝ်းၼၼ်ႉၵႂႃႇႁႂ်ႈလႆႈသၢၵ်ႈလူႇတၢင်းလူႇတီႈ ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈၶိုၼ်းလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “ၶႃႈၸဝ်ႈတၵ်းၸူမ်းတွင်းပၢၼ်ႇပုၼ်ႈၸဝ်ႈႁဝ်းတီႈၶႃႈဢေႃႈ။ လွင်ႈၼင်ႇႁိုဝ်ၶႃႈၸဝ်ႈတၵ်းလႆႈတွင်းပၢၼ်ႇပုၼ်ႈၸဝ်ႈႁဝ်းလႄႈမူးမၢတ်ႈၽွင်းမိူင်းၸဝ်ႈႁဝ်းဢိၵ်ႇတင်းပုၼ်ႈၶႃႈဝၢၼ်ႈၵူၼ်းမိူင်းၸဝ်ႈႁဝ်းၶႃႈၸိုင်၊ၵူၺ်းမၵ်းၶၢၼ်းၶိင်ႇမၼ်းပၼ်သေၵမ်းတီႈၶႃႈ။ လိုၼ်းၼၼ်ႉၸဝ်ႈႁဝ်းတၵ်းလႆႈလွတ်ႈသေၽေးၶဵတ်ႇတင်းလၢႆၵွပ်ႈပိူဝ်ႈၶဵတ်ႇၸိူဝ်းၼၼ်ႉတၵ်းဢမ်ႇၵိုတ်းၵျၢၼ်ႇဝႆႉသေတူဝ်လႄႈၶဝ်တၵ်းယူႇၼႂ်းမႄႈၼမ်ႉ ၼၢႆးလ်၊ ၵူၺ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းၼၼ်ႉၵေႃႈဝႃႈ၊ “တွင်းပၢၼ်ႇပုၼ်ႈၵဝ်ဝၼ်းမိူဝ်ႈၽုၵ်ႈတႃႉ၊” ဝႃႈၼင်ႇၼႆလႄႈ၊ မူဝ်းသေႇ၊ ၵေႃႈလဝ်ႈလၢတ်ႈလႄႈဝႃႈ၊ “ၶႃႈၸဝ်ႈတၵ်းႁဵတ်းၸွမ်းၵႃႈၼင်ႇဢၼ်ဢမိင်ႉၸဝ်ႈမီးၼၼ်ႉဢေႃႈ။ ၼင်ႇၼၼ်လႄႈၸဝ်ႈႁဝ်းတၵ်းလႆႈႁုလွင်ႈဢၼ်ယင်းဢမ်ႇမီးၽြႃးတၢင်ႇသူတၢင်ႇပႃးဢၼ်မိူၼ်ၸိူဝ်ႉၼင်ႇ ထႃႇဝရႃႉၽြႃး၊ ၽြႃးပဵၼ်ၸဝ်ႈၶႃႈၸဝ်ႈႁဝ်းၶဝ်ၼႆႉၼၼ်ႉဢေႃႈ။-
ၽုင်ၶဵတ်ႇလူင်ၼၼ်ႉတၵ်းလႆႈၶၢမ်ႇတၢင်းဢၼ်ဢဝ်ပႅတ်ႈသေၵႃႈတီႈၸဝ်ႈႁဝ်းလႄႈမူးမၢတ်ႈၽွင်းမိူင်းၸဝ်ႈႁဝ်းတင်းၶႃႈဝၢၼ်ႈၵူၼ်းမိူင်းၸဝ်ႈႁဝ်းတၵ်းဢမ်ႇၵိုတ်းၵျၢၼ်ႇဝႆႉသေတူဝ်လႄႈတေမီးယူႇၵႃႈၼႂ်းမႄႈၼမ်ႉ ၼၢႆးလ်၊ ၼၼ်ႉၵူၺ်းဢေႃႈ၊” ဝႃႈၼင်ႇၼႆဢေႃႈ။-
မူဝ်းသေႇ၊ တင်း ဢႃႇရုၼ်ႇ၊ ၵေႃႈ ဢွၵ်ႇသေၵႃႈတီႈၶုၼ်ႁေႃၶမ်းမိူင်း ဢေးၵျိပ်ႉ၊ ၵႂႃႇလႄႈ၊ မူဝ်းသေႇ၊ တွင်းပၢၼ်ႇတီႈ ထႃႇဝရႃႉၽြႃး၊ ႁႂ်ႈဢဝ်ၽေးၶဵတ်ႇဢၼ်မၼ်းၸဝ်ႈႁႂ်ႈတူၵ်းႁွတ်ႈၼိူဝ်ၶုၼ်ႁေႃၶမ်းၼၼ်ႉဝၢႆးႁၢႆၵႂႃႇဢေႃႈ။-
ထႃႇဝရႃႉၽြႃး၊ ႁဵတ်းၸွမ်းၵႃႈၼင်ႇဢၼ် မူဝ်းသေႇ၊ တွင်းပၢၼ်ႇၼၼ်ႉလႄႈၶဵတ်ႇဢၼ်မီးယူႇၼႂ်းႁိူၼ်းလႂ်၊ၵႃႈၼႂ်းပၢင်ႇဝၢင်းလုမ်းလႂ်၊ၵႃႈၼႂ်းတူင်ႈၼႃးတင်းလၢႆလႂ်တၢႆမူတ်းဢေႃႈ။-
ၵူၼ်းမဵဝ်း ဢေးၵျိပ်ႉ၊ ၶဝ်ဢွၼ်ၵၼ်ၵဵပ်းၶဵတ်ႇဢၼ်တၢႆၸိူဝ်းၼၼ်ႉၸုဝႆႉၵွင်ဝႆႉလႄႈမဵၼ်တူႇမဵၼ်ၼဝ်ႈၵႂႃႇတင်းမိူင်းဢေႃႈ။-
ၶုၼ်ႁေႃၶမ်းၵေႃႈ မိူဝ်ႈဢၼ်ႁၼ်ၶဵတ်ႇတၢႆမူတ်းယဝ်ႉၼၼ်ႉႁူဝ်ၸႂ်မၼ်းၵႅၼ်ႇၶႅင်ၶိုၼ်းလႄႈ၊မႅၼ်ႈၼင်ႇဢၼ် ထႃႇဝရႃႉၽြႃး၊ လၢတ်ႈဝႆႉၼၼ်ႉမၼ်းဢမ်ႇထွမ်ႇဢဝ်ၵႂၢမ်း မူဝ်းသေႇ၊ တင်းၵႂၢမ်း ဢႃႇရုၼ်ႇ၊ ထႅင်ႈယဝ်ႉဢေႃႈ။
ထႃႇဝရႃႉၽြႃး၊ ၵေႃႈလၢတ်ႈတီႈ မူဝ်းသေႇ၊ လႄႈဝႃႈ၊ “သင်ႇလၢတ်ႈႁႂ်ႈ ဢႃႇရုၼ်ႇ၊ ဢဝ်ၶွၼ်ႉတဝ်ႉမၼ်းပေႃႉၽတ်ႉမုၼ်ႈလိၼ်တႃႉ။ ႁဵတ်းၼၼ်လႄႈမုၼ်ႈလိၼ်တၵ်းပိၼ်ႇပဵၼ်ႁိၼ်ႉၵႂႃႇတင်းမိူင်း ဢေးၵျိပ်ႉ၊ ဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ ဢႃႇရုၼ်ႇ၊ ဢဝ်ၶွၼ်ႉတဝ်ႉမၼ်းပေႃႉၽတ်ႉမုၼ်ႈလိၼ်လႄႈမုၼ်ႈလိၼ်ၼႂ်းမိူင်း ဢေးၵျိပ်ႉ၊ တင်းသဵင်ႈတင်းလူင်ပဵၼ်ႁိၼ်ႉၵႂႃႇမူတ်းသေယဝ်ႉ၊ၵႂႃႇတွမ်တီႈၵူၼ်းဢိၵ်ႇတင်းၵႃႈတီႈတူဝ်သတ်းလႂ်ဢေႃႈ။-
ၵူၼ်းမေႃလဵၼ်ႈဢတၢတ်ႈၶဝ်ၵေႃႈပိၵ်ႉသမ်ႉဢဝ်တင်းဢတၢတ်ႈပိင်ႇၺႃႇၶဝ်ႁဵတ်းႁႂ်ႈပေႃႇပဵၼ်ႁိၼ်ႉမႃးသေၵေႃႈၶဝ်ဢမ်ႇၸၢင်ႈႁဵတ်းပဵၼ်လႆႈဢေႃႈ။ ၼင်ႇၼၼ်လႄႈႁိၼ်ႉမီးၵႂႃႇၵူႈတီႈၵူႈလႅၼ်ဢေႃႈ။-
ၵူၼ်းမေႃလဵၼ်ႈဢတၢတ်ႈပိင်ႇၺႃႇၸိူဝ်းၼၼ်ႉၵေႃႈဢွၼ်ၵၼ်ၶဝ်ႈလဝ်ႈလၢတ်ႈၵႃႈတီႈၶုၼ်ႁေႃၶမ်းလႄႈဝႃႈ၊ “လွင်ႈတၢင်းၼႆႉၸိုင်၊ပဵၼ်ၼမ်ႉတိၼ်လၢႆးမိုဝ်းၽြႃးပဵၼ်ၸဝ်ႈဢေႃႈ၊” ဝႃႈၼင်ႇၼႆဢေႃႈ။ ၼႂ်းဝႃႈၼၼ်သေၵေႃႈ ၶုၼ်ႁေႃၶမ်းႁူဝ်ၸႂ်ၵႅၼ်ႇၶႅင်လႄႈမႅၼ်ႈၼင်ႇဢၼ် ထႃႇဝရႃႉၽြႃး၊ လၢတ်ႈဝႆႉၼၼ်ႉမၼ်းဢမ်ႇထွမ်ႇဢဝ်ၵႂၢမ်း မူဝ်းသေႇ၊ တင်းၵႂၢမ်း ဢႃႇရုၼ်ႇ၊ လႄႈယူႇဢေႃႈ။
ထႃႇဝရႃႉၽြႃး၊ လၢတ်ႈတီႈ မူဝ်းသေႇ၊ လႄႈဝႃႈ၊ “မိူဝ်ႈၽုၵ်ႈမႂ်းလုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈၵႂႃႇၸုၵ်းပႂ်ႉထႃႈၶုၼ်ႁေႃၶမ်းၼႂ်းမိူဝ်ႈဢၼ်မၼ်းလူင်းၸူးၵႃႈတီႈတႃႈၼမ်ႉၼၼ်ႉတႃႉ။ မွၵ်ႇလၢတ်ႈတီႈမၼ်းလႄႈဝႃႈ၊ ‘ ထႃႇဝရႃႉၽြႃး၊ မီးဢမိင်ႉၸမ်ႉ၊ “ပွႆႇၵူၼ်းၵဝ်တင်းလၢႆၵႂႃႇႁႂ်ႈၶဝ်လႆႈဝႆႈသႃၵူဝ်းၵႂၢႆႇၵဝ်တႃႉ။-
ပေႃးမႂ်းထဵင်ပႅတ်ႈလႄႈယင်းဢမ်ႇပွႆႇၵူၼ်းၵဝ်ၵႂႃႇၸိုင်၊ၵဝ်တၵ်းပွႆႇၸႂ်ႉလိူၵ်ႇၼမ်ၼႃႇၵႂႃႇႁႂ်ႈပဵၼ်ၽေးတၢမ်ႇၸႃႉၸဵမ်တီႈမႂ်းလႄႈမူးမၢတ်ႈၽွင်းမိူင်းမႂ်းဢိၵ်ႇတင်းၶႃႈဝၢၼ်ႈၵူၼ်းမိူင်းမႂ်းတင်းလၢႆဢေႃႈ။ ၼႂ်းႁိူၼ်းၵူၼ်းမဵဝ်း ဢေးၵျိပ်ႉ၊ တင်းလၢႆတၵ်းတဵမ်ဝႆႉတင်းလိူၵ်ႇတင်းလၢႆလႄႈၼႃႈလိၼ်မိူင်းၵေႃႈတၵ်းပဵၼ်လိူၵ်ႇၵႂႃႇၵူႈတီႈၵူႈလႅၼ်ဢေႃႈ။-
ၼႂ်းဝၼ်းၼၼ်ႉၼင်ႇႁိုဝ်မႂ်းတၵ်းႁုဝႃႈ၊ၵဝ်ပဵၼ် ထႃႇဝရႃႉၽြႃး၊ လႄႈၶိုင်ပွင်ၵႃႈၼိူဝ်လိၼ်မိူင်းၼႆႉၼၼ်ႉၸိုင်၊ၵဝ်တၵ်းၸတ်းၽႄဝႆႉဢိူင်ႇ ၵေႃးသိၼ်း၊ ဢၼ်ပဵၼ်တီႈယူႇၵူၼ်းၵဝ်ၸိူဝ်းၼၼ်ႉသေလႄႈဢမ်ႇႁႂ်ႈမီးလိူၵ်ႇသေတူဝ်ၼၼ်ႉဢေႃႈ။-
ၵဝ်တၵ်းႁႂ်ႈၵူၼ်းၵဝ်တင်းၵူၼ်းမႂ်းပႅၵ်ႇပိူင်ႈၵၼ်ဢေႃႈ။ ၼိမိၵ်ႈလၢၵ်ႈၶၼႃႇၼၼ်ႉတၵ်းပဵၼ်မႃးၼႂ်းဝၼ်းမိူဝ်ႈၽုၵ်ႈဢေႃႈ၊” ’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။-
ထႃႇဝရႃႉၽြႃး၊ ၵေႃႈႁဵတ်းၸွမ်းၸိူဝ်ႉၼင်ႇၼၼ်လႄႈလိူၵ်ႇဢၼ်ၵျၢမ်းၼႃႇတင်းလၢႆပေႃႇႁွတ်ႈမႃးၵႃႈတီႈၸႃႉၸဵမ်ႁေႃၶုၼ်ႁေႃၶမ်း ဢိၵ်ႇတင်းၵႃႈတီႈၶႃႈမၼ်းၵူၼ်းမၼ်းၵႃႈၼႂ်းမိူင်း ဢေးၵျိပ်ႉ၊ ၵူႈတီႈၵူႈလႅၼ်လႄႈမိူင်းလုလႅဝ်ၵႂႃႇၵွပ်ႈပိူဝ်ႈလိူၵ်ႇၸိူဝ်းၼၼ်ႉဢေႃႈ။
ၶုၼ်ႁေႃၶမ်းၵေႃႈႁွင်ႉဢဝ် မူဝ်းသေႇ၊ တင်း ဢႃႇရုၼ်ႇ၊ လႄႈလၢတ်ႈဝႃႈ၊ “သူၵႂႃႇႁဵတ်းတၢင်းဢၼ်သၢၵ်ႈလူႇတီႈၽြႃးပဵၼ်ၸဝ်ႈသူၵႃႈတီႈၼႂ်းမိူင်းၼႆႉတႃႉ၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈၶိုၼ်းလဝ်ႈလၢတ်ႈလႄႈဝႃႈ၊ “ဢမ်ႇထုၵ်ႇလီႁဵတ်းၸိူဝ်ႉၼင်ႇၼၼ်တီႈၶႃႈ။ လွင်ႈမၼ်းၸမ်ႉ၊ၼႂ်းတၢင်းဢၼ်ၶႃႈၸဝ်ႈႁဝ်းၶဝ်မႄးႁႅၼ်းတူဝ်တၢင်းလူႇဢၼ်တၵ်းသၢၵ်ႈလူႇတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၶႃႈၸဝ်ႈႁဝ်းၶဝ်ၼၼ်ႉတေပဵၼ်တူဝ်တၢင်းလူႇဢၼ်ၵူၼ်းမဵဝ်း ဢေးၵျိပ်ႉ၊ ၶဝ် လီႁင်ႈတီႈၶႃႈဢေႃႈ။ ပေႃးၶႃႈၸဝ်ႈႁဝ်းၶဝ်ႁႅၼ်းတၢင်းလူႇတူဝ်သတ်းဢၼ်ၵူၼ်းမဵဝ်း ဢေးၵျိပ်ႉ၊ ၶဝ်လီႁင်ႈၼၼ်ႉၸိုင်၊ၶဝ်တၵ်းဢမ်ႇဢဝ်မၢၵ်ႇႁိၼ်ပိုဝ်ႈသႂ်ႇၶႃႈၸဝ်ႈႁဝ်းၶဝ်ၶႃႈႁိုဝ်း။-
ပိူဝ်ႈၼႆလႄႈၶႃႈၸဝ်ႈႁဝ်းၶဝ်လူဝ်ႇလႆႈၵႂႃႇၵႃႈတီႈၼႂ်းထိူၼ်ႇလႅင်ႉၸူဝ်ႈၶၢဝ်းတၢင်းႁိုင်သၢမ်ဝၼ်းလႄႈႁဵတ်းတၢင်းဢၼ်သၢၵ်ႈလူႇတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၶႃႈၸဝ်ႈႁဝ်းၶဝ်ၸွမ်းၵႃႈၼင်ႇဢၼ်မၼ်းၸဝ်ႈတၵ်းပူင်ဢမိင်ႉတီႈၶႃႈၸဝ်ႈႁဝ်းၶဝ်ၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းၵေႃႈလၢတ်ႈလႄႈဝႃႈ၊ “ၵဝ်တၵ်းပွႆႇသူၵႂႃႇႁႂ်ႈလႆႈသၢၵ်ႈလူႇတၢင်းလူႇတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။ ၼႂ်းဝႃႈၼၼ်သေၵေႃႈသူဢမ်ႇလႆႈၵႂႃႇၵႆၼႃႇၽႅဝ်။ တွင်းပၢၼ်ႇပုၼ်ႈၵဝ်တႃႉ၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈၶိုၼ်းလဝ်ႈလၢတ်ႈလႄႈဝႃႈ၊ “ပေႃးၶႃႈၸဝ်ႈဢွၵ်ႇသေၸဝ်ႈႁဝ်းၵႂႃႇၵမ်းလဵဝ်ၵေႃႈၶႃႈၸဝ်ႈတၵ်းတွင်းပၢၼ်ႇတီႈ ထႃႇဝရႃႉၽြႃး၊ ႁႂ်ႈလိူၵ်ႇတင်းလၢႆႁၢႆဝၢႆးၵႂႃႇသေၸႃႉၸဵမ်ၵႃႈတီႈၸဝ်ႈႁဝ်းလႄႈမူးမၢတ်ႈၽွင်းမိူင်းၸဝ်ႈႁဝ်းဢိၵ်ႇတင်းၶႃႈဝၢၼ်ႈၵူၼ်းမိူင်းၸဝ်ႈႁဝ်းတင်းလၢႆၼႂ်းဝၼ်းမိူဝ်ႈၽုၵ်ႈတီႈၶႃႈဢေႃႈ။ ၵူၺ်းၵႃႈ၊ယႃႇပေၶိုၼ်းပႅတ်ႉလႅၼ်ထႅင်ႈလႄႈႁႄႉၶႅၼ်ႁႂ်ႈၵူၼ်း မဵဝ်းဢိသရေး၊ တင်းလၢႆဢမ်ႇလႆႈၵႂႃႇႁဵတ်းတၢင်းဢၼ်သၢၵ်ႈလူႇတီႈ ထႃႇဝရႃႉၽြႃး၊ ၼၼ်ႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ဢွၵ်ႇသေၵႃႈတီႈၶုၼ်ႁေႃၶမ်းၵႂႃႇလႄႈတွင်းပၢၼ်ႇၵႃႈတီႈ ထႃႇဝရႃႉၽြႃး၊ ဢေႃႈ။-
ထႃႇဝရႃႉၽြႃး၊ ၵေႃႈႁဵတ်းၸွမ်းၵႂၢမ်း မူဝ်းသေႇ၊ ဢေႃႈ။ လိူၵ်ႇၸိူဝ်းၼၼ်ႉႁၢႆဝၢႆးၵႂႃႇသေၸႃႉၸဵမ်ၵႃႈတီႈၶုၼ်ႁေႃၶမ်းလႄႈၶႃႈဝၢၼ်ႈၵူၼ်းမိူင်းမၼ်းတင်းလၢႆ သမ်ႉပေႃးဢမ်ႇၵိုတ်းဢမ်ႇၵျၢၼ်ႇသေတူဝ်ဢေႃႈ။-
ပွၵ်ႈၼႆႉၵေႃႈၶုၼ်ႁေႃၶမ်းသမ်ႉႁူဝ်ၸႂ်ၵႅၼ်ႇၶႅင်ထႅင်ႈလႄႈယင်းဢမ်ႇပွႆႇႁႂ်ႈၵူၼ်းမဵဝ်း ဢိသရေး၊ တင်းလၢႆၵႂႃႇဢေႃႈ။
ထႃႇဝရႃႉၽြႃး၊ လၢတ်ႈတီႈ မူဝ်းသေႇ၊ လႄႈဝႃႈ၊ “မႂ်းၶဝ်ႈၸူးၵႃႈတီႈၶုၼ်ႁေႃၶမ်းသေယဝ်ႉ၊မွၵ်ႇလၢတ်ႈတီႈမၼ်းလႄႈဝႃႈ၊ ‘ ထႃႇဝရႃႉၽြႃး၊ ၽြႃးပဵၼ်ၸဝ်ႈမီးဢမိင်ႉတီႈၵူၼ်းမဵဝ်း ႁေႇပြႄး၊ ၶဝ်တင်းလၢႆလႄႈဝႃႈ၊ပွႆႇၵူၼ်းၵဝ်တင်းလၢႆၵႂႃႇႁႂ်ႈလႆႈဝႆႈသႃၵူဝ်းၵႂၢႆႇၵဝ်တႃႉ။-
ပေႃးမႂ်းထဵင်ပႅတ်ႈလႄႈဢမ်ႇပွႆႇၶဝ်ၵႂႃႇသမ်ႉႁၢမ်ႈၶဝ်ဝႆႉထႅင်ႈၸိုင်၊-
ၵဝ်တၵ်းႁႂ်ႈၽေးၵႃႇလႃႉႁႃႈလႅင်မိူင်းၸပ်းၵႃႈတီႈတူဝ်သတ်းတရိၵ်ႈသၢၼ်ႇမႂ်း၊ၸႃႉၸဵမ်မႃႉလႂ်၊မႃႉလီႈလႂ်၊ၵလႃႇဢုၵ်ႈလႂ်၊ၽုင်ဝူဝ်းၽုင်သူဝ်းလႂ်၊ၵႃႈမီးတင်းသဵင်ႈတင်းလူင်ဢေႃႈ။-
ၵဝ်တၵ်းႁႂ်ႈတူဝ်သတ်းတရိၵ်ႈသၢၼ်ႇၵူၼ်းမဵဝ်း ဢိသရေး၊ တင်းလၢႆ၊ဢိၵ်ႇတင်းတူဝ်သတ်းတရိၵ်ႈသၢၼ်ႇၵူၼ်းမဵဝ်း ဢေးၵျိပ်ႉ၊ တင်းလၢႆပႅၵ်ႇပိူင်ႈၵၼ်လႄႈတူဝ်သတ်းတရိၵ်ႈသၢၼ်ႇၵႃႈဢၼ်ၵူၼ်းမဵဝ်း ဢိသရေး၊ ၶဝ်ပိူင်ႇၼၼ်ႉတၵ်းဢမ်ႇလႆႈတၢႆသေတူဝ်ဢေႃႈ။-
ၵဝ် ထႃႇဝရႃႉၽြႃး၊ မၵ်းၶၢၼ်းၶိင်ႇမၼ်းဝႆႉႁႂ်ႈလႆႈပေႃႇပဵၼ်မႃးၼႂ်းဝၼ်းမိူဝ်ႈၽုၵ်ႈဢေႃႈ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ၼႂ်းဝၼ်းမိူဝ်ႈၽုၵ်ႈ ထႃႇဝရႃႉၽြႃး၊ ႁဵတ်းၸွမ်းၸိူဝ်ႉၼင်ႇၼၼ်လႄႈတူဝ်သတ်းတရိၵ်ႈသၢၼ်ႇၵူၼ်းမဵဝ်း ဢေးၵျိပ်ႉ၊ ၶဝ်ၵႃႈမီးတၢႆပႅတ်ႈမူတ်းဢေႃႈ။ တူဝ်သတ်းတရိၵ်ႈသၢၼ်ႇၵူၼ်းမဵဝ်း ဢိသရေး၊ ၶဝ်ၸမ်ႉ၊ဢမ်ႇတၢႆသေတူဝ်ဢေႃႈ။-
ၶုၼ်ႁေႃၶမ်းပွႆႇၵူၼ်းၵႂႃႇထၢမ်တူၺ်းလႄႈလႆႈႁုလွင်ႈဢၼ်တူဝ်သတ်းတရိၵ်ႈသၢၼ်ႇၵူၼ်းမဵဝ်း ဢိသရေး၊ ၶဝ်၊ဢမ်ႇတၢႆသေတူဝ်ၼၼ်ႉဢေႃႈ။ ၼႂ်းဝႃႈၼၼ်သေၵေႃႈၶုၼ်ႁေႃၶမ်းၼၼ်ႉၸႂ်ၵႅၼ်ႇၶႅင်ယူႇလႄႈယင်းဢမ်ႇပွႆႇႁႂ်ႈၵူၼ်းမဵဝ်း ဢိသရေး၊ တင်းလၢႆၵႂႃႇဢေႃႈ။
ၵမ်းၼၼ်ႉ၊ ထႃႇဝရႃႉၽြႃး၊ လၢတ်ႈတီႈ မူဝ်းသေႇ၊ တင်း ဢႃႇရုၼ်ႇ၊ လႄႈဝႃႈ၊ “ဢဝ်မိုဝ်းသူဝၵ်ႉဢဝ်တဝ်ႈၵႃႈၼႂ်းၽီးၽႆးပဵၼ်ၵမ်ပဵၼ်ၵမ်လႄႈႁႂ်ႈ မူဝ်းသေႇ၊ ၵမ်ပိုၼ်ၶိုၼ်ႈၽႃႉၵႂႃႇၵႃႈတီႈၽၢႆႇၼႃႈၶုၼ်ႁေႃၶမ်းတႃႉ။-
တဝ်ႈၼၼ်ႉတၵ်းပဵၼ်ၽွင်မုၼ်ႈဢၼ်ၽႄႈၸွတ်ႇတူဝ်ႈၵႂႃႇၵႃႈၼႂ်းမိူင်း ဢေးၵျိပ်ႉ၊ ၵူႈတီႈၵူႈလႅၼ်လႄႈပဵၼ်တုမ်ႇၽီဢၼ်ယဵၼ်းပဵၼ်ၸဵပ်းလူင်ၵႃႈတီႈၵူၼ်းဢိၵ်ႇတင်းတူဝ်သတ်းတင်းလၢႆဢေႃႈ၊” ဝႃႈၼင်ႇၼႆဢေႃႈ။-
ၶဝ်ဢဝ်မိုဝ်းဝၵ်ႉဢဝ်တဝ်ႈၵႃႈၼႂ်းၽီးၽႆးသေလႄႈၵႂႃႇၸုၵ်းၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။ မူဝ်းသေႇ၊ ၵေႃႈၵမ်ဢဝ်တဝ်ႈပိုၼ်ၶိုၼ်ႈၽႃႉၵႂႃႇလႄႈတဝ်ႈၼၼ်ႉပဵၼ်တုမ်ႇၽီဢၼ်ယဵၼ်းပဵၼ်ၸဵပ်းလူင်၊ၵႃႈတီႈၵူၼ်းဢိၵ်ႇတင်းတူဝ်သတ်းတင်းလၢႆဢေႃႈ။-
ၵူၼ်းမေႃလဵၼ်ႈဢတၢတ်ႈပိင်ႇၺႃႇၶဝ်ဢမ်ႇၸၢင်ႈမႃးၸူး မူဝ်းသေႇ၊ ၵွပ်ႈပိူဝ်ႈၶဝ်ၵေႃႈပဵၼ်တုမ်ႇၽီတင်းတူဝ်တင်းၶိင်းမိူၼ်ၵၼ်တင်းၵူၼ်းမဵဝ်း ဢေးၵျိပ်ႉ၊ တင်းသဵင်ႈတင်းမူတ်းၼၼ်ႉဢေႃႈ။-
ၼႂ်းဝႃႈၼၼ်သေၵေႃႈ ၶုၼ်ႁေႃၶမ်းၼၼ်ႉ ထႃႇဝရႃႉၽြႃး၊ ႁႂ်ႈႁူဝ်ၸႂ်မၼ်းၵႅၼ်ႇၶႅင်မႅၼ်ႈၸွမ်းၼင်ႇဢၼ် ထႃႇဝရႃႉၽြႃး၊ လၢတ်ႈဝႆႉၼၼ်ႉလႄႈမၼ်းယင်းဢမ်ႇထွမ်ႇဢဝ်ၵႂၢမ်း မူဝ်းသေႇ၊ တင်းၵႂၢမ်း ဢႃႇရုၼ်ႇ၊ လႄႈယူႇဢေႃႈ။
ၵမ်းၼၼ်ႉ၊ ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ လႄႈဝႃႈ၊ “မိူဝ်ႈၽုၵ်ႈမႂ်းလုၵ်ႉၶိင်ႇၵၢင်ၼႂ်ၸဝ်ႉၸဝ်ႉသေယဝ်ႉ၊ၶဝ်ႈၸူးၵႃႈတီႈၶုၼ်ႁေႃၶမ်းလႄႈသင်ႇလၢတ်ႈတီႈမၼ်းလႄႈဝႃႈ၊ ‘ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ႁေႇပြႄး၊ ၼၼ်ႉမီးဢမိင်ႉၸမ်ႉ၊ “ပွႆႇၸႂ်ႉၵူၼ်းၵဝ်တင်းလၢႆၵႂႃႇႁႂ်ႈလႆႈဝႆႈသႃၵူဝ်းၵႂၢႆႇၵဝ်တႃႉ။-
ၵမ်းၼႆႉ၊ၵဝ်တၵ်းပၼ်ၽေးတၢမ်ႇဢၼ်ထိုင်ၸႂ်ထိုင်ၶေႃးၼႃႇ၊ၸႃႉၸဵမ်ၵႃႈၼိူဝ်မႂ်းလႄႈမူးမၢတ်ႈၽွင်းမိူင်းမႂ်းဢိၵ်ႇတင်းၶႃႈဝၢၼ်ႈၵူၼ်းမိူင်းမႂ်းတင်းလၢႆဢေႃႈ။ ႁဵတ်းၼၼ်လႄႈမႂ်းတၵ်းလႆႈႁုဝႃႈ၊ၵႃႈၼႂ်းလေႃးၵႃႉၼႆႉဢမ်ႇမီးၽူႈလႂ်ဢၼ်မိူၼ်ၵၼ်တင်းၵဝ်ၼၼ်ႉဢေႃႈ။-
ယၢမ်းမိူဝ်ႈလဵဝ်ၼႆႉ သင်ၵဝ်လႆႈယိုၼ်းမိုဝ်းၵဝ်ဢဝ်တင်းၽေးၵႃႇလႃႉႁႃႈလႅင်မိူင်းပၼ်တၢမ်ႇတီႈမႂ်းဢိၵ်ႇတင်းၶႃႈဝၢၼ်ႈၵူၼ်းမိူင်းမႂ်းၸိုင်၊မႂ်းတၵ်းလႆႈၶၢမ်ႇတၢင်းဢၼ်ယႃႉၽဵဝ်ႈပႅတ်ႈသေၵႃႈတီႈလိၼ်မိူင်းၼႆႉဢေႃႈ။-
ၵူၺ်းၵႃႈ၊ၼင်ႇႁိုဝ်ၵဝ်တၵ်းၼႄပျႃးတၼ်းၶူဝ်းၵဝ်ၸိုင်၊ၵဝ်ႁႂ်ႈမႂ်းဢသၢၵ်ႈလိပ်းယူႇ၊ပုၼ်ႈလွင်ႈၼင်ႇႁိုဝ်ၼႃႇမႃႉၸိုဝ်ႈသဵင်ၵဝ်တၵ်းၸွတ်ႇသႃႇႁူင်ႁၢင်းၵႂႃႇၵႃႈၼႂ်းလေႃးၵႃႉၼႆႉၵူႈတီႈၵူႈလႅၼ်ဢေႃႈ။-
ၼႂ်းဝႃႈၼၼ်သေၵေႃႈမႂ်းယင်းၶတ်းၶႅင်ႁႅင်းတႃႉၶဝ်လႄႈဢမ်ႇပွႆႇၵူၼ်းၵဝ်တင်းလၢႆၵႂႃႇဢေႃႈ။-
ၵဝ်တၵ်းႁႂ်ႈၽေးၽူၼ်မၢၵ်ႇႁဵပ်းဢၼ်ယႂ်ႇၼႃႇလူင်လၢင်မဵဝ်းဢၼ်ယင်းဢမ်ႇပႆႇတွၼ်ႉပဵၼ်ၵႃႈၼႂ်းပိုၼ်းမိူင်း ဢေးၵျိပ်ႉ၊ သေပွၵ်ႈၼၼ်ႉပဵၼ်မႃးၼႂ်းဝၼ်းမိူဝ်ႈၽုၵ်ႈမွၵ်ႈၶိင်ႇၼႆႉၼၼ်ႉဢေႃႈ။-
ပိူဝ်ႈၼႆလႄႈပူင်ဢမိင်ႉႁႂ်ႈသိမ်းဢဝ်ၽုင်သတ်းတရိၵ်ႈသၢၼ်ႇဢိၵ်ႇတင်းၶူဝ်းၶွင်မႂ်းဢၼ်မီးဝႆႉၵႃႈတီႈပၢင်ႇတီႈပိဝ်ၸိူဝ်းၼၼ်ႉမႃးဝႆႉၵႃႈတီႈတႂ်ႈဢၼ်မုင်းဢၼ်ၵင်ႈဝႆႉတႃႉ။ ၸႃႉၸဵမ်ၵူၼ်းလႄႈတူဝ်သတ်းတရိၵ်ႈသၢၼ်ႇၸိူဝ်းဢၼ်ၵိုတ်းၵျၢၼ်ႇဝႆႉ၊ၵႃႈတီႈပၢင်ႇတီႈပိဝ်လႄႈဢမ်ႇဢဝ်မႃးၵႃႈတီႈႁိူၼ်းၼၼ်ႉၽူၼ်မၢၵ်ႇႁဵပ်းတၵ်းတူၵ်းသႂ်ႇၵႃႈၼိူဝ်ၶဝ်လႄႈတၵ်းတၢႆပႅတ်ႈမူတ်းဢေႃႈ၊” ’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။-
မူးမၢတ်ႈၽွင်းမိူင်းၵမ်ႈၽွင်ႈၵူဝ်ႁႄၼုၵ်ႈၵပၢတ်ႈ ထႃႇဝရႃႉၽြႃး၊ လႄႈဢွၼ်ၵၼ်ဢဝ်ၶႃႈၶဝ်တင်းတူဝ်သတ်းတရိၵ်ႈသၢၼ်ႇၶဝ်သိမ်းဝႆႉၵႃႈတႂ်ႈဢၼ်မုင်းဢၼ်ၵင်ႈဝႆႉဢေႃႈ။-
တၢင်ႇၵေႃႉတၢင်ႇၵူၼ်းဢၼ်ႁဵတ်းဢမ်ႇၼပ်ႉဢမ်ႇၶၢၼ်းတီႈၼုၵ်ႈၵပၢတ်ႈ ထႃႇဝရႃႉၽြႃး၊ ၸိူဝ်းၼၼ်ႉပႅတ်ႈဝႆႉၶႃႈၶဝ်တင်းတူဝ်သတ်းတရိၵ်ႈသၢၼ်ႇၶဝ်ယူႇၵႃႈတီႈပၢင်ႇတီႈပိဝ်ဢေႃႈ။
ထႃႇဝရႃႉၽြႃး၊ ၵေႃႈမီးဢမိင်ႉတီႈ မူဝ်းသေႇ၊ လႄႈဝႃႈ၊ “ယုၵ်ႉမိုဝ်းမႂ်းၶိုၼ်ႈၵႃႈၼိူဝ်ၽႃႉၵၢင်ႁၢဝ်တႃႉ။ ၽူၼ်မၢၵ်ႇႁဵပ်းတၵ်းတူၵ်းမႃးၵႃႈၼႂ်းမိူင်း ဢေးၵျိပ်ႉ၊ ၵူႈတီႈၵူႈလႅၼ်လႄႈၸႃႉၸဵမ်ၵႃႈၼိူဝ်ၵူၼ်းဢိၵ်ႇတင်းတီႈတူဝ်သတ်းတရိၵ်ႈသၢၼ်ႇလႂ်၊တူၼ်ႈၵႃႈဢၼ်မီးၵႃႈတီႈပၢင်ႇတီႈပိဝ်လႂ်ဢေႃႈ၊” ဝႃႈၼင်ႇၼႆဢေႃႈ။-
မူဝ်းသေႇ၊ ဢဝ်ၶွၼ်ႉတဝ်ႉမၼ်းယုၵ်ႉၶိုၼ်ႈၵႃႈၼိူဝ်ၽႃႉၵၢင်ႁၢဝ်လႄႈ ထႃႇဝရႃႉၽြႃး၊ ပွႆႇၽႃႉလင်ဢိၵ်ႇတင်းမၢၵ်ႇႁဵပ်းတင်းၽႆးတူၵ်းလူင်းမႃးၵႃႈၼိူဝ်ၼႃႈလိၼ်မိူင်းဢေႃႈ။ ထႃႇဝရႃႉၽြႃး၊ ႁႂ်ႈၽူၼ်မၢၵ်ႇႁဵပ်းတူၵ်းသႂ်ႇၵႃႈၼိူဝ်မိူင်း ဢေးၵျိပ်ႉ၊ လႄႈ၊-
မၢၵ်ႇႁဵပ်းဢၼ်ပႃးလူၺ်ႈတင်းၽႆးၼၼ်ႉၵေႃႈတူၵ်းႁႅင်းၼႃႇဢႃးလႃးလႄႈ၊တႄႇၸႃႉဢဝ်မိူင်း ဢေးၵျိပ်ႉ၊ တင်ႈတႄႇပဵၼ်မိူင်းမႃးၼၼ်ႉဢမ်ႇပႆႇတွၼ်ႉပဵၼ်ၸိူဝ်ႉၼင်ႇၼႆသေပွၵ်ႈဢေႃႈ။-
မၢၵ်ႇႁဵပ်းၼၼ်ႉတူၵ်းၽတ်ႉသႂ်ႇၵႃႈၼိူဝ်ၵူႈၸိူဝ်ႉၵူႈပိူင်ၸႃႉၸဵမ်ၵူၼ်းလႄႈတူဝ်သတ်းတင်းလၢႆ၊ဢၼ်မီးယူႇၵႃႈတီႈပၢင်ႇတီႈပိဝ်ၼႂ်းမိူင်း ဢေးၵျိပ်ႉ၊ ၵူႈတီႈၵူႈလႅၼ်၊ပႃးတင်းတူၼ်ႈယိူဝ်ႈတူၼ်ႈယႃႈၵႃႈၼႂ်းတူင်ႈၼႃးတင်းလၢႆၵေႃႈတူၵ်းၽတ်ႉသႂ်ႇလႄႈႁၵ်းႁိၵ်းတူၼ်ႈမႆႉၵႃႈတီႈပၢင်ႇတီႈပိဝ်တင်းသဵင်ႈတင်းမူတ်းပႅတ်ႈဢေႃႈ။-
ၵႃႈၼႂ်းမိူင်း ၵေႃးသိၼ်း၊ တီႈဢၼ်ၵူၼ်းမဵဝ်း ဢိသရေး၊ ၶဝ်ယူႇၼၼ်ႉၸမ်ႉၽူၼ်မၢၵ်ႇႁဵပ်းဢမ်ႇတူၵ်း။
ၶုၼ်ႁေႃၶမ်းႁွင်ႉဢဝ် မူဝ်းသေႇ၊ တင်း ဢႃႇရုၼ်ႇ၊ သေလႄႈလၢတ်ႈဝႃႈ၊ “ပွၵ်ႈၼႆႉၵဝ်ႁဵတ်းမႅၼ်ႈဢပျတ်ႈယဝ်ႉ။ ထႃႇဝရႃႉၽြႃး၊ သိုဝ်ႈတေႃႇဢေႃႈ။ ၵဝ်ဢိၵ်ႇတင်းၵူၼ်းၵဝ်တင်းလၢႆၸမ်ႉ၊ၽိတ်းပိူင်ႈဢေႃႈ။-
တွင်းပၢၼ်ႇတီႈ ထႃႇဝရႃႉၽြႃး၊ ပုၼ်ႈၵဝ်တႃႉ။ ႁဝ်းဢမ်ႇပႄႉၶၢမ်ႇလႆႈသဵင်ၽႃႉလင်တင်းမၢၵ်ႇႁဵပ်းၼႆႉယဝ်ႉ။ ၵဝ်တၵ်းပွႆႇသူၵႂႃႇယဝ်ႉ။ သူၵေႃႈတၵ်းဢမ်ႇလႆႈၵိုတ်းသဝ်းယူႇသေၸူဝ်ႈသေယၢမ်းၵူၺ်း၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈၶိုၼ်းလဝ်ႈလၢတ်ႈလႄႈဝႃႈ၊ “ပေႃးၶႃႈၸဝ်ႈဢွၵ်ႇသေၵႃႈၼႂ်းဝဵင်းၵႂႃႇၸိုင်၊ၶႃႈၸဝ်ႈတၵ်းယုၵ်ႉမိုဝ်းတင်းသွင်ၶွၼ်သေလႄႈႁဵတ်းသူးတွင်းပထၼႃႇၵမ်းလဵဝ်တီႈ ထႃႇဝရႃႉၽြႃး၊ ၶႃႈဢေႃႈ။ ၽႃႉလင်တၵ်းထၢတ်ႇယဵၼ်လႄႈမၢၵ်ႇႁဵပ်းတၵ်းဢမ်ႇတူၵ်းလႃးလႃးၼၼ်ႉပုၼ်ႈလွင်ႈၼင်ႇႁိုဝ်ၸဝ်ႈႁဝ်းတၵ်းႁုလွင်ႈဢၼ် ထႃႇဝရႃႉၽြႃး၊ ဢုပ်ႉပိူင်ႇၵႃႈၼိူဝ်လိၼ်မိူင်းၼႆႉၼၼ်ႉဢေႃႈ။-
ၵူၺ်းၵႃႈ၊ၶႃႈၸဝ်ႈႁုလွင်ႈဢၼ်ၸဝ်ႈႁဝ်း ဢိၵ်ႇတင်းမူးမၢတ်ႈၽွင်းမိူင်းၸဝ်ႈႁဝ်းတင်းလၢႆယင်းဢမ်ႇပႆႇၵူဝ်ႁႄ ထႃႇဝရႃႉၽြႃး၊ ၽြႃးပဵၼ်ၸဝ်ႈၼၼ်ႉယူႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မၢၵ်ႇႁဵပ်းတူၵ်းၽတ်ႉသႂ်ႇတူၼ်ႈပၢၼ်ႇလႂ်၊ဢိၵ်ႇတင်းတူၼ်ႈၶဝ်ႈမုယေႃးလႂ်၊လုလႅဝ်ၵႂႃႇမူတ်းၵွပ်ႈပိူဝ်ႈႁူင်းၶဝ်ႈမုယေႃးသုၵ်းဝႆႉယဝ်ႉယဝ်ႉလႄႈမွၵ်ႇပၢၼ်ႇၵေႃႈမွၵ်ႇဝႆႉယဝ်ႉယဝ်ႉၼၼ်ႉဢေႃႈ။-
တူၼ်ႈၶဝ်ႈၵျုင်ႇတင်းတူၼ်ႈၶဝ်ႈၸမ်ႉ၊ဢမ်ႇတိူဝ်ႉ၊ၵွပ်ႈပိူဝ်ႈတူၼ်ႈၸိူဝ်းၼၼ်ႉဢမ်ႇပႆႇယႂ်ႇပႆႇထူၼ်ႈဢေႃႈ။
မူဝ်းသေႇ၊ ဢွၵ်ႇသေၵႃႈတီႈၶုၼ်ႁေႃၶမ်းၵႂႃႇၵႃႈၼွၵ်ႈဝဵင်းသေယဝ်ႉ၊ယုၵ်ႉမိုဝ်းမၼ်းၶိုၼ်ႈလႄႈႁဵတ်းသူးတွင်းပထၼႃႇတီႈ ထႃႇဝရႃႉၽြႃး၊ ဢေႃႈ။ ၽႃႉၽႅတ်ႇၽႃႉလင်ဢိၵ်ႇတင်းမၢၵ်ႇႁဵပ်းတင်းၽူၼ်လႂ်ၵေႃႈႁိူတ်ႇၵႂႃႇသေဢေႃႈ။-
မိူဝ်ႈဢၼ်ၶုၼ်ႁေႃၶမ်းႁုႁၼ်လွင်ႈတၢင်းဢၼ်ပဵၼ်မႃးၼၼ်ႉၸိုင်၊မၼ်းသမ်ႉၶိုၼ်းႁဵတ်းဢပျတ်ႈလႄႈမၼ်းဢိၵ်ႇတင်းမီးမၢတ်ႈၽွင်မိူင်းမၼ်းတင်းလၢႆ၊မီးႁူဝ်ၸႂ်ၵႅၼ်ႇၶႅင်မိူၼ်ၵဝ်ႇဢေႃႈ။-
ၼင်ႇၼၼ်လႄႈမႅၼ်ႈၸွမ်းၼင်ႇဢၼ် ထႃႇဝရႃႉၽြႃး၊ လႆႈလၢတ်ႈဝႆႉၵႃႈတီႈ မူဝ်းသေႇ၊ ဢွၼ်တၢင်းၼၼ်ႉလႄႈၶုၼ်ႁေႃၶမ်းၵေႃႈယင်းဢမ်ႇပွႆႇႁႂ်ႈၵူၼ်းမဵဝ်း ဢိသရေး၊ ၶဝ်ၵႂႃႇဢေႃႈ။
ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ လႄႈဝႃႈ၊ “မႂ်းၶဝ်ႈၸူးၵႃႈတီႈၶုၼ်ႁေႃၶမ်းတႃႉ။ ၵဝ်ႁဵတ်းႁႂ်ႈႁူဝ်ၸႂ်မၼ်းဢိၵ်ႇတင်းႁူဝ်ၸႂ်မူးမၢတ်ႈၽွင်းမိူင်းမၼ်းတင်းလၢႆၵႅၼ်ႇၶႅင်ယူႇပုၼ်ႈလွင်ႈၼင်ႇႁိုဝ်ၵဝ်တၵ်းလႆႈႁဵတ်းၼိမိၵ်ႈလၢၵ်ႈၶၼႃႇၸိူဝ်းၼႆႉၵႃႈတီႈၶဝ်၊-
ဢိၵ်ႇတင်းပုၼ်ႈလွင်ႈၼင်ႇႁိုဝ်မႂ်းတၵ်းလႆႈၶႆႈမွၵ်ႇလၢတ်ႈၼႄတီႈလုၵ်ႈလၢၼ်မႂ်း၊လွင်ႈဢၼ်ၵဝ်ႁဵတ်းၸိူဝ်ႉၼင်ႇႁိုဝ်လႄႈဢဝ်တင်းတၢင်းဢၼ်ႁဵတ်းၼႄၼိမိၵ်ႈတင်းလၢႆ ႁဵတ်းႁႂ်ႈၵူၼ်းမဵဝ်း ဢေးၵျိပ်ႉ၊ ၶဝ်၊ပေႃးယွင်ႇပေႃးၵႂင်ၵႂႃႇၸိူဝ်းၼၼ်ႉ၊ဢိၵ်ႇတင်းပုၼ်ႈလွင်ႈၼင်ႇႁိုဝ်၊သူၵႃႈမီးတင်းသဵင်ႈတင်းလူင်တၵ်းလႆႈႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ၼၼ်ႉယဝ်ႉ၊” ဝႃႈၼင်ႇၼႆဢေႃႈ။
ပိူဝ်ႈၼႆၸင်ႇ မူဝ်းသေႇ၊ တင်း ဢႃႇရုၼ်ႇ၊ ၶဝ်ႈၸူးၵႃႈတီႈၶုၼ်ႁေႃၶမ်းလႄႈလဝ်ႈလၢတ်ႈလႄႈဝႃႈ၊ “ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ႁေႇပြႄး၊ ၼၼ်ႉမီးဢမိင်ႉၸမ်ႉ၊ ‘မႂ်းယင်းဢမ်ႇၶၢမ်ႇသုမ်းၵဝ်လႄႈယူႇႁိုင်ၵႃႈႁိုဝ်။ ပွႆႇၵူၼ်းၵဝ်ၵႂႃႇႁႂ်ႈလႆႈဝႆႈသႃၵူဝ်းၵႂၢႆႇၵဝ်တႃႉ။-
ပေႃးမႂ်းယင်းၶဵင်ႇၵဝ်ယူႇၶိူဝ်းၶိူဝ်းၸိုင်၊မိူဝ်ႈၽုၵ်ႈမႃးၵဝ်တၵ်းႁႂ်ႈၽေးၸၵ်းတႅၼ်တူၵ်းႁွတ်ႈၵႃႈၼႂ်းမိူင်းမႂ်းဢေႃႈ။-
ၸၵ်းတႅၼ်ၸိူဝ်းၼၼ်ႉတၵ်းႁူမ်ႇသုမ်ႇလိၼ်မိူင်းၵႂႃႇထၢၼ်ႈပေႃးဢမ်ႇႁၼ်ၼႃႈလိၼ်လႆႈဢေႃႈ။ ၶဝ်တၵ်းၵိၼ်ပႅတ်ႈၵႃႈဢၼ်လွတ်ႈၽေးမၢၵ်ႇႁဵပ်းၼၼ်ႉၵူႈၸိူဝ်ႉၵူႈပိူင်ဢိၵ်ႇတင်းတူၼ်ႈမႆႉၸိူဝ်းဢၼ်ယင်းၵိုတ်းယင်းၵျၢၼ်ႇယူႇၼၼ်ႉဢေႃႈ။-
ၶဝ်တၵ်းတဵမ်ၵႂႃႇၵႃႈၼႂ်းၸႃႉၸဵမ်ၼႂ်းႁၢင်ႈၼႂ်းႁေႃမႂ်းလႄႈႁိူၼ်းမူးမၢတ်ႈၽွင်းမိူင်းမႂ်း၊ဢိၵ်ႇတင်းႁိူၼ်းၶႃႈဝၢၼ်ႈၵူၼ်းမိူင်းမႂ်း၊တင်းသဵင်ႈတင်းလူင်ဢေႃႈ။ တၵ်းႁၢႆႉၵျၢမ်းၼႃႇသေၵႃႈဢၼ်ပူႇမွၼ်ႇမႂ်းတင်းလၢႆယၢမ်ႈထူပ်းယၢမ်ႈၺႃးမႃးၸိူဝ်းၼၼ်ႉဢေႃႈ၊’ ဝႃႈၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။ မၼ်းၵေႃႈဝၢႆႇၼႃႈဢွၵ်ႇၵႂႃႇသေၵႃႈတီႈၶုၼ်ႁေႃၶမ်းသေဢေႃႈ။
မူးမၢတ်ႈၽွင်းမိူင်းၸိူဝ်းၼၼ်ႉၵေႃႈလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “ၵူၼ်းၵေႃႉၼႆႉတၵ်းပၼ်တုၵ်ႉၶႃႉတီႈႁဝ်းၶႃႈယူႇႁိုင်ၵႃႈႁိုဝ်လူးၵွၼ်ႇတီႈၶႃႈ။ ပွႆႇၵူၼ်းၸိူဝ်းၼၼ်ႉၵႂႃႇႁႂ်ႈၶဝ်လႆႈဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်သေၵမ်းတီႈၶႃႈ။ ၸဝ်ႈႁဝ်းယင်းဢမ်ႇပႆႇႁုလွင်ႈဢၼ်မိူင်း ဢေးၵျိပ်ႉ၊ လႆႈလုလႅဝ်ၼၼ်ႉတီႈၶႃႈႁိုဝ်း၊” ဝႃႈၼင်ႇၼႆဢေႃႈ။
ၵမ်းၼၼ်ႉ ၶဝ်သမ်ႉဢဝ် မူဝ်းသေႇ၊ တင်း ဢႃႇရုၼ်ႇ၊ ၶဝ်ႈၸူးၵႃႈတီႈၶုၼ်ႁေႃၶမ်းမိူင်း ဢေးၵျိပ်ႉ၊ လႄႈမၼ်းလၢတ်ႈတီႈၶဝ်ဝႃႈ၊ “သူတၵ်းလႆႈၵႂႃႇလႄႈဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။ ၵူၺ်းၵႃႈ၊ၵူၼ်းၸိူဝ်းဢၼ်လူဝ်ႇလႆႈၵႂႃႇတႄႉတႄႉၼၼ်ႉပဵၼ်ၽူႈလႂ်၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈၶိုၼ်းလဝ်ႈလၢတ်ႈလႄႈဝႃႈ၊ “ၶႃႈၸဝ်ႈႁဝ်းၶဝ်ၵႃႈမီးတင်းသဵင်ႈတင်းမူတ်းတၵ်းပႃးဢဝ်ၸႃႉၸဵမ်လုၵ်ႈဢွၼ်ႇႁဝ်းၶႃႈ၊ၵူၼ်းထဝ်ႈႁဝ်းၶႃႈ၊လုၵ်ႈယိင်းလုၵ်ႈၸၢႆးႁဝ်းၶႃႈ၊ၽုင်သူဝ်းၽုင်ဝူဝ်းၶႃႈၸဝ်ႈႁဝ်းၶဝ်ၼၼ်ႉၵႂႃႇတီႈၶႃႈဢေႃႈ။ လွင်ႈမၼ်းၸမ်ႉ၊ၶႃႈၸဝ်ႈႁဝ်းၶဝ်တၵ်းလႆႈႁဵတ်းပွႆးႁဵတ်းဝၢတ်ႈၵူဝ်းၵႂၢႆႇ ထႃႇဝရႃႉၽြႃး၊ တီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းလၢတ်ႈတီႈၶဝ်လႄႈဝႃႈ၊ “ၵဝ်တိူင်ႇၵၢဝ်ႇဝႆႉၵတိတီႈ ထႃႇဝရႃႉၽြႃး၊ လႄႈဝႃႈ၊ၵဝ်တၵ်းဢမ်ႇပၼ်ဢၶႂၢင်ႉႁႂ်ႈသူဢဝ်မႄႈယိင်းသူဢိၵ်ႇတင်းလုၵ်ႈဢွၼ်ႇသူၵႂႃႇ။ သူၵျၢမ်ႇပွင်ႁႂ်ႈလႆႈလုၵ်ႉၽိုၼ်ႉၼၼ်ႉထၢင်ႇသႃးဝႆႉယဝ်ႉ။-
တၵ်းဢမ်ႇလႆႈပဵၼ်ၸိူဝ်ႉၼင်ႇၼၼ်လႃးလႃး။ ပေႃးသူမီးဢလူဝ်ႇၶႂ်ႈၵႂႃႇတႄႉၸိုင်၊ႁႂ်ႈၵူၼ်းၸၢႆးၵူၺ်းၵႂႃႇလႄႈဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ တႃႉ၊” ဝႃႈၼင်ႇၼႆဢေႃႈ။ ၶဝ်သွင်ၵေႃႉၼၼ်ႉလႆႈၶၢမ်ႇတၢင်းဢၼ်ပိူၼ်ႈႁေႃႈဢွၵ်ႇသေၵႃႈတီႈၶုၼ်ႁေႃၶမ်းသေဢေႃႈ။
ၵမ်းၼၼ်ႉ၊ ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ လႄႈဝႃႈ၊ “ယိုၼ်းမိုဝ်းမႂ်းၶိုၼ်ႈၵႃႈၼိူဝ်မိူင်း ဢေးၵျိပ်ႉ၊ ႁႂ်ႈပဵၼ်ၸၵ်းတႅၼ်တင်းလၢႆမႃးတႃႉ။ ၶဝ်တၵ်းပေႃႇမႃးလႄႈၵိၼ်ပႅတ်ႈတူၼ်ႈၵႃႈမီးၵူႈၸိူဝ်ႉၵူႈမဵဝ်းဢၼ်လွတ်ႈၽေးမၢၵ်ႇႁဵပ်းလႄႈၵိုတ်းၵျၢၼ်ႇဝႆႉၸိူဝ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။-
မူဝ်းသေႇ၊ ဢဝ်ၶွၼ်ႉတဝ်ႉမၼ်းယိုၼ်းၶိုၼ်ႈၵႃႈၼိူဝ်ၽႅၼ်ႇလိၼ်မိူင်း ဢေးၵျိပ်ႉ၊ လႄႈ၊ ထႃႇဝရႃႉၽြႃး၊ ႁႂ်ႈလူမ်းတၢင်းဝၼ်းဢွၵ်ႇပတ်ႉမႃးၵႃႈၼိူဝ်ၽႅၼ်ႇလိၼ်ၼႂ်းဝၼ်းၼၼ်ႉတင်းဝၼ်းဢိၵ်ႇတင်းၼႂ်းၶိုၼ်းၼၼ်ႉတင်းၶိုၼ်းဢေႃႈ။ မိူဝ်ႈႁွတ်ႈထိုင်ၶိင်ႇၵၢင်ၼႂ်မႃးၸိုင်၊လူမ်းၼၼ်ႉပႃးဢဝ်မႅင်းၸၵ်းတႅၼ်တင်းလၢႆမႃးဢေႃႈ။-
ၸၵ်းတႅၼ်ၸိူဝ်းၼၼ်ႉႁွတ်ႈမႃးၵႃႈၼႂ်းမိူင်း ဢေးၵျိပ်ႉ၊ ၵူႈတီႈၵူႈလႅၼ်လႄႈၸပ်းယူႇၼႂ်းၶွပ်ႇၼမ်ႉလႅၼ်လိၼ်မိူင်း ဢေးၵျိပ်ႉ၊ ၸွတ်ႇတူဝ်ႈၵႂႃႇၼမ်ၵိုၼ်းၼႃႇလူင်လၢင်ဢေႃႈ။ ၼမ်ၵိုၼ်းၼႃႇလူင်လၢင်ထၢၼ်ႈပေႃးမိူဝ်ႈဢွၼ်တၢင်းၸိူဝ်းၼၼ်ႉဢမ်ႇတွၼ်ႉပဵၼ်မႃးသေပွၵ်ႈ၊ၵမ်းလိုၼ်းၵေႃႈ တေဢမ်ႇပဵၼ်ထႅင်ႈသေပွၵ်ႈၼၼ်ႉဢေႃႈ။-
မႅင်းၼၼ်ႉႁူမ်ႇလူမ်ႈၼႃႈလိၼ်မိူင်းဝႆႉထၢၼ်ႈပေႃးလမ်မိုတ်ႈၵႂႃႇလႄႈၵိၼ်တူၼ်ႈယိူဝ်ႈတူၼ်ႈၽၵ်းၵႃႈမီးၵႃႈၼိူဝ်လိၼ် ဢိၵ်ႇတင်းမၢၵ်ႇမႆႉမၢၵ်ႇတွၵ်ႇၵႃႈဢၼ်လွတ်ႈၽေးမၢၵ်ႇႁဵပ်းလႄႈၵိုတ်းၵျၢၼ်ႇဝႆႉၸိူဝ်းၼၼ်ႉလႄႈၵႃႈၼႂ်းမိူင်း ဢေးၵျိပ်ႉ၊ တူၼ်ႈမႆႉတင်းတူၼ်ႈယႃႈဢၼ်ၶဵဝ်ဝႆႉဢမ်ႇၵိုတ်းဢမ်ႇၵျၢၼ်ႇသေမဵဝ်းဢေႃႈ။
မိူဝ်ႈၼၼ်ႉၶုၼ်ႁေႃၶမ်းႁိပ်ႈၼႅတ်ႈႁွင်ႉဢဝ် မူဝ်းသေႇ၊ တင်း ဢႃႇရုၼ်ႇ၊ လႄႈလၢတ်ႈဝႃႈ၊ “ၵဝ်လႆႈၽိတ်းပိူင်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢိၵ်ႇတင်းသူယဝ်ႉ။-
တေႃႈလဵဝ်ၼႆႉၶႅၼ်းတေႃႈပွႆႇၶႂၢင်းဢပျတ်ႈၵဝ်ပွၵ်ႈၼႆႉၼၼ်ႉသေၵမ်း။ တွင်းပၢၼ်ႇ ထႃႇဝရႃႉၽြႃး၊ ၽြႃးပဵၼ်ၸဝ်ႈသူၼၼ်ႉတီႈၵေႇမၼ်းႁႂ်ႈမၼ်းၸဝ်ႈဢဝ်ၽေးတၢမ်ႇတၢႆၼႆႉပႅတ်ႈသေၵႃႈတီႈၵဝ်သေၵမ်း၊” ဝႃႈၼင်ႇၼႆဢေႃႈ။-
မူဝ်းသေႇ၊ ဢွၵ်ႇသေၵႃႈတီႈၶုၼ်ႁေႃၶမ်းၵႂႃႇသေယဝ်ႉ၊ၵႂႃႇတွင်းပၢၼ်ႇတီႈ ထႃႇဝရႃႉၽြႃး၊ ဢေႃႈ။-
ထႃႇဝရႃႉၽြႃး၊ ၵေႃႈႁႂ်ႈသၢႆလူမ်းလုၵ်ႉသေတၢင်းဝၼ်းတူၵ်းပတ်ႉမႃးႁႅင်းယႂ်ႇၼႃႇလႄႈ ဢဝ်မႅင်းၸၵ်းတႅၼ်ၸိူဝ်းၼၼ်ႉၵႂႃႇၶျႃးတူၵ်းသႂ်ႇၵႃႈၼႂ်း ပၢင်ႇလၢႆႇလႅင်၊ ပႅတ်ႈသေဢေႃႈ။ ၼင်ႇၼၼ်လႄႈၼႂ်းမိူင်း ဢေးၵျိပ်ႉ၊ ၼၼ်ႉမႅင်းၸၵ်းတႅၼ်ဢမ်ႇၵိုတ်းဢမ်ႇၵျၢၼ်ႇဝႆႉသေတူဝ်ယဝ်ႉဢေႃႈ။-
ၵူၺ်းၵႃႈ၊ ထႃႇဝရႃႉၽြႃး၊ ႁႂ်ႈၶုၼ်ႁေႃၶမ်းၼၼ်ႉႁူဝ်ၸႂ်ၵႅၼ်ႇၶႅင်လႄႈ၊မၼ်းဢမ်ႇပွႆႇႁႂ်ႈၵူၼ်းမဵဝ်း ဢိသရေး၊ ၶဝ်ၵႂႃႇဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ လႄႈဝႃႈ၊ “ဢဝ်မိုဝ်းမႂ်းယိုၼ်းၶိုၼ်ႈၽႃႉၵၢင်ႁၢဝ်တႃႉ။ လပ်းသိင်ႇဢၼ်ၼႃတၼ်ၼႃႇထၢၼ်ႈပေႃးလုပ်ႈၵမ်းလႆႈၼၼ်ႉတၵ်းႁူမ်ႇသုမ်ႇၵႃႈၼိူဝ်လိၼ်မိူင်း ဢေးၵျိပ်ႉ၊ ၵႂႃႇဢေႃႈ၊” ဝႃႈၼင်ႇၼႆဢေႃႈ။-
မူဝ်းသေႇ၊ ယိုၼ်းမိုဝ်းမၼ်းၶိုၼ်ႈၽႃႉလႄႈတၢင်းဢၼ်လပ်းသိင်ႇဢၼ်ၼႃတၼ်ၼႃႇလူင်လၢင်ၼၼ်ႉပဵၼ်မႃးၵႃႈၼႂ်းမိူင်း ဢေးၵျိပ်ႉ၊ သၢမ်ဝၼ်းတဵမ်တဵမ်ဢေႃႈ။-
ၵူၼ်းမဵဝ်း ဢေးၵျိပ်ႉ၊ ၶဝ်ၵေႃႉၼိုင်ႈလႄႈၵေႃႉၼိုင်ႈဢမ်ႇႁၼ်ၵၼ်လႆႈလႄႈ၊ၼႂ်းၸူဝ်ႈၶၢဝ်းၼၼ်ႉဢမ်ႇမီးသေၵေႃႉဢၼ်ၸၢင်ႈဢွၵ်ႇႁိူၼ်းတူဝ်ၸဝ်ႈၵဝ်ႇလႄႈယူႇဢေႃႈ။ ၵူၺ်းၵႃႈ၊ၵူၼ်းမဵဝ်း ဢိသရေး၊ ၶဝ်သမ်ႉလႆႈဢၼ်လႅင်းၵႃႈတီႈဢၼ်ၶဝ်ယူႇသဝ်းၼၼ်ႉဢေႃႈ။
မိူဝ်ႈၼၼ်ႉၶုၼ်ႁေႃၶမ်းႁွင်ႉဢဝ် မူဝ်းသေႇ၊ လႄႈလၢတ်ႈဝႃႈ၊ “သူၵႂႃႇႁႂ်ႈလႆႈဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ တႃႉ။ ဢွၼ်ဢဝ်ၸႃႉၸဵမ်ၽူႈယိင်းသူဢိၵ်ႇတင်းလုၵ်ႈဢွၼ်ႇသူတင်းလၢႆၵႂႃႇတႃႉ။ ၵူၺ်းၵႃႈ၊ၽုင်သူဝ်းၽုင်ဝူဝ်းသူၸမ်ႉ၊ဢဝ်ၵိုတ်းၵျၢၼ်ႇဝႆႉတႃႉ၊” ဝႃႈၼင်ႇၼႆဢေႃႈ။
မူဝ်းသေႇ၊ ၶိုၼ်းလဝ်ႈလၢတ်ႈလႄႈဝႃႈ၊ “ပေႃးပဵၼ်ၼၼ်ၸဝ်ႈႁဝ်းတၵ်းလႆႈပၼ်တူဝ်သတ်းပုၼ်ႈဢၼ်ၶႃႈၸဝ်ႈႁဝ်းၶဝ်တၵ်းလႆႈသၢၵ်ႈလူႇဢိၵ်ႇတင်းတူဝ်တၢင်းလူႇဢၼ်တုတ်ႇၽႆးသၢၵ်ႈလူႇတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၶႃႈၸဝ်ႈႁဝ်းၶဝ်ၼၼ်ႉတီႈၶႃႈဢေႃႈ။-
မၼ်းဢမ်ႇပဵၼ်လႆႈၶႃႈၵူၺ်း။ ၶႃႈၸဝ်ႈႁဝ်းၶဝ်တၵ်းလႆႈပႃးဢဝ်တူဝ်သတ်းၶႃႈၸဝ်ႈႁဝ်းၶဝ်ၵႂႃႇတီႈၶႃႈဢေႃႈ။ တူဝ်ၼိုင်ႈၵေႃႈတၵ်းဢမ်ႇလႆႈၵိုတ်းဝႆႉၵျၢၼ်ႇဝႆႉတၢင်းလင်တီႈၶႃႈ။ ၶႃႈၸဝ်ႈႁဝ်းၶဝ်၊တၵ်းလႆႈလိူၵ်ႈဢဝ်ပုၼ်ႈဢၼ်တၵ်းသၢၵ်ႈလူႇၵႃႈတီႈဢၼ်ၶႃႈၸဝ်ႈႁဝ်းၶဝ်၊ဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၽြႃးပဵၼ်ၸဝ်ႈၶႃႈၸဝ်ႈႁဝ်းၶဝ်ၼၼ်ႉတီႈၶႃႈဢေႃႈ။ ၸူဝ်ႈဢၼ်ဢမ်ႇပႆႇႁွတ်ႈထိုင်ၵႃႈတီႈၼၼ်ႈတေလႆႈဢဝ်တူဝ်သတ်းမဵဝ်းလႂ်သၢၵ်ႈလူႇတီႈမၼ်းၸဝ်ႈဢၼ်ဝႃႈၼၼ်ႉၶႃႈၸဝ်ႈႁဝ်းၶဝ်၊ဢမ်ႇပႆႇလႆႈႁုတီႈၶႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ႁႂ်ႈႁူဝ်ၸႂ်ၶုၼ်ႁေႃၶမ်းၵႅၼ်ႇၶႅင်လႄႈယင်းဢမ်ႇပွႆႇႁႂ်ႈၶဝ်ၵႂႃႇဢေႃႈ။-
မၼ်းၸင်ႇလၢတ်ႈတီႈ မူဝ်းသေႇ၊ လႄႈဝႃႈ၊ “ဢွၵ်ႇသေၵႃႈတီႈၵဝ်ၵႂႃႇတႃႉ၊ယႃႇပေႁႂ်ႈၵဝ်လႆႈႁၼ်ၼႃႈမႂ်းထႅင်ႈ။ ၼႂ်းဝၼ်းဢၼ်ၵဝ်ႁၼ်ၼႃႈမႂ်းၼၼ်ႉမႂ်းတၵ်းလႆႈတၢႆဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈၶိုၼ်းလၢတ်ႈလႄႈဝႃႈ၊ “လီတီႈၶႃႈယဝ်ႉ၊ၸဝ်ႈ။ ၸဝ်ႈႁဝ်းတေဢမ်ႇလႆႈႁၼ်ၼႃႈၶႃႈထႅင်ႈတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ ထႃႇဝရႃႉၽြႃး၊ လၢတ်ႈတီႈ မူဝ်းသေႇ၊ လႄႈဝႃႈ၊ “ၵဝ်တၵ်းပွႆႇၽေးတၢမ်ႇထႅင်ႈမဵဝ်းၼိုင်ႈႁႂ်ႈတူၵ်းႁွတ်ႈၵႃႈၼိူဝ်ၶုၼ်ႁေႃၶမ်းဢိၵ်ႇတင်းၶႃႈဝၢၼ်ႈၵူၼ်းမိူင်းမၼ်းလူးၵွၼ်ႇဢေႃႈ။ ဝၢႆးၼၼ်ႉ မၼ်းတၵ်းပွႆႇသူၵႂႃႇဢေႃႈ။ မၼ်းယင်းတၵ်းလိုပ်ႈႁေႃႈသူဢွၵ်ႇၽွမ်ႉမိူဝ်ႈလဵဝ်ၵၼ်ၵမ်းလဵဝ်ဢေႃႈ။-
ၵမ်းၼႆႉၵႂႃႇသင်ႇလၢတ်ႈႁႂ်ႈၵူၼ်းမဵဝ်း ဢိသရေး၊ တင်းလၢႆၸႃႉၸဵမ်ၵူၼ်းၸၢႆးလႄႈၽူႈယိင်းၵူႈၵေႃႉယွၼ်းယိမ်ၶိူင်ႈငိုၼ်းၶိူင်ႈၶမ်းတီႈၵူၼ်းၸၢႆးၵူၼ်းယိင်းၵူၼ်းဢၼ်ယူႇၸမ်ၵၼ်တင်းၶဝ်ၼၼ်ႉႁင်းၽႂ်ႁင်းမၼ်းတႃႉ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ ထႃႇဝရႃႉၽြႃး၊ ႁႂ်ႈၵူၼ်းမဵဝ်း ဢေးၵျိပ်ႉ၊ တင်းလၢႆ ရူဝ်ႇသေႇၼပ်ႉယမ်ၵူၼ်းမဵဝ်း ဢိသရေး၊ ၶဝ်ဢေႃႈ။ လိူဝ်တွၼ်းၼႃႇသေပိူၼ်ႈ မူဝ်းသေႇ၊ ၼၼ်ႉပဵၼ်ၵေႃႉဢၼ်လႆႈၼႃႈလႆႈတႃဢၼ်ယႂ်ႇၼႃႇၵႃႈၼႂ်းမိူင်း ဢေးၵျိပ်ႉ၊ ၵႃႈတီႈၽၢႆႇၼႃႈမူးမၢတ်ႈၽွင်းမိူင်းတင်းလၢႆ ဢိၵ်ႇတင်းၵူၼ်းဝၢၼ်ႈၵူၼ်းမိူင်းတင်းလၢႆဢေႃႈ။
ၵမ်းၼၼ်ႉ၊ မူဝ်းသေႇ၊ လဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “ ထႃႇဝရႃႉၽြႃး၊ မီးဢမိင်ႉၸမ်ႉ၊ ‘ၶိင်ႇတဵင်ႈၶိုၼ်းၵဝ်တၵ်းဢွၵ်ႇၸူးၵႃႈတီႈမိူင်း ဢေးၵျိပ်ႉ၊ ၵူႈတီႈၵူႈလႅၼ်ဢေႃႈ။-
ၵမ်းၼၼ်ႉ၊ၵႃႈဢၼ်ပဵၼ်လုၵ်ႈတူၼ်ႈၵူႈၵေႃႉဢၼ်မီးၵႃႈၼႂ်းမိူင်း ဢေးၵျိပ်ႉ၊ ၼၼ်ႉတၵ်းလႆႈတၢႆဢေႃႈ။ တႄႇဢဝ်ၸႃႉၸဵမ်လုၵ်ႈတူၼ်ႈၶုၼ်ႁေႃၶမ်း၊လုၵ်ႈတူၼ်ႈဢၼ်တၵ်းသိုပ်ႇၼင်ႈႁၢင်ႈၼင်ႈႁေႃတေႃႇထိုင်ႁွတ်ႈလုၵ်ႈတူၼ်ႈမႄႈယိင်းၶႃႈဢၼ်လူၺ်ၶဝ်ႈၵျုင်ႇယူႇၸိူဝ်းၼၼ်ႉတၵ်းတၢႆဢေႃႈ။ လုၵ်ႈတူၼ်ႈသူဝ်း၊ဝူဝ်း၊ပႄႉတင်းလၢႆၵေႃႈတၵ်းတၢႆၼင်ႇၵဝ်ႇဢေႃႈ။-
သဵင်ဢၼ်ႁွင်ႉႁႆႈဢၼ်ယႂ်ႇၼႃႇတၵ်းၸွတ်ႇတူဝ်ႈၵႃႈၼႂ်းမိူင်း ဢေးၵျိပ်ႉ၊ ၵႂႃႇၵူႈတီႈၵူႈလႅၼ်ဢေႃႈ။ တၢင်းဢၼ်ႁွင်ႉဢၼ်ႁႆႈမဵဝ်းၼၼ်ႉမိူဝ်ႈၵွၼ်ႇဢွၼ်ၼၼ်ႉဢမ်ႇပႆႇတွၼ်ႉပဵၼ်သေပွၵ်ႈ။ ၵမ်းလိုၼ်းၵေႃႈတၵ်းဢမ်ႇပဵၼ်ထႅင်ႈသေပွၵ်ႈဢေႃႈ။-
ၵူၺ်းၵႃႈ၊ၵႃႈတီႈၵူၼ်းမဵဝ်း ဢိသရေး၊ သေဢမ်ႇဝႃႈ၊ၵႃႈတီႈတူဝ်သတ်းၶဝ်သေဢမ်ႇဝႃႈ၊မႃတူဝ်ၼိုင်ႈၵေႃႈတၵ်းဢမ်ႇလႆႈႁဝ်ႇၶဝ်လႃးလႃး။ ႁဵတ်းၼၼ်ႉလႄႈသူတၵ်းလႆႈႁုလွင်ႈဢၼ်ၵဝ် ထႃႇဝရႃႉၽြႃး၊ ႁႂ်ႈၵူၼ်းမဵဝ်း ဢေးၵျိပ်ႉ၊ တင်းလၢႆပႅၵ်ႇပိူင်ႈၵၼ်တင်းၵူၼ်းမဵဝ်း ဢိသရေး၊ တင်းလၢႆဢေႃႈ၊’ ဝႃႈၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။-
မူဝ်းသေႇ၊ သမ်ႉလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “ၵမ်းၼႆႉမူးမၢတ်ႈၽွင်းမိူင်းၸဝ်ႈႁဝ်းတင်းသဵင်ႈတင်းလူင် တၵ်းဢွၼ်ၵၼ်မႃးလႄႈၶုပ်ႉမူပ်ႇၵႃႈတီႈၽၢႆႇၼႃႈၶႃႈၸဝ်ႈသေလႄႈတွင်းပၢၼ်ႇႁႂ်ႈၶႃႈၸဝ်ႈဢဝ်ၵူၼ်းၶႃႈၸဝ်ႈဢွၵ်ႇၵႂႃႇၼၼ်ႉတီႈၶႃႈဢေႃႈ။ လိုၼ်းၼၼ်ႉၸင်ႇၶႃႈၸဝ်ႈတၵ်းဢွၵ်ႇၵႂႃႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။ မူဝ်းသေႇ၊ လၢတ်ႈၸိူဝ်ႉၼင်ႇၼႆသေယဝ်ႉ၊ပႃးတင်းတေႃးသႃႉၶႂ်ႈၸႃႉၼႃႇလူင်လၢင်လႄႈဢွၵ်ႇသေၵႃႈတီႈၶုၼ်ႁေႃၶမ်းၵႂႃႇသေဢေႃႈ။
ထႃႇဝရႃႉၽြႃး၊ လၢတ်ႈတီႈ မူဝ်းသေႇ၊ လႄႈဝႃႈ၊ “ၶုၼ်ႁေႃၶမ်းတၵ်းဢမ်ႇထွမ်ႇဢဝ်ၵႂၢမ်းမႂ်းလႃးလႃး၊ပုၼ်ႈလွင်ႈၼင်ႇႁိုဝ်ၵဝ်တၵ်းယဵင်ႈၶႅၼ်းလႆႈႁဵတ်းၼႄၼိမိၵ်ႈလၢၵ်ႈၶၼႃႇဢၼ်လီဢၢမ်းဢၼ်ၼမ်ၵိုၼ်းၼႃႇၵႃႈၼႂ်းမိူင်း ဢေးၵျိပ်ႉ၊ ၼႆႉဢေႃႈ၊” ဝႃႈၼင်ႇၼႆဢေႃႈ။-
မူဝ်းသေႇ၊ တင်း ဢႃႇရုၼ်ႇ၊ ႁဵတ်းၼႄၼိမိၵ်ႈလၢၵ်ႈၶၼႃႇဢၼ်လီဢၢမ်းၸိူဝ်းၼၼ်ႉတင်းသဵင်ႈတင်းလူင်ၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။ ၵူၺ်းၵႃႈ၊ ထႃႇဝရႃႉၽြႃး၊ ႁႂ်ႈႁူဝ်ၸႂ်မၼ်းၵႅၼ်ႇၶႅင်ယူႇသေလႄႈမၼ်းယင်းဢမ်ႇပွႆႇႁႂ်ႈၵူၼ်းမဵဝ်း ဢိသရေး၊ ၶဝ်ၵႂႃႇဢေႃႈ။
ထႃႇဝရႃႉၽြႃး၊ လၢတ်ႈတီႈ မူဝ်းသေႇ၊ တင်း ဢႃႇရုၼ်ႇ၊ ၵႃႈၼႂ်းမိူင်း ဢေးၵျိပ်ႉ၊ ၼၼ်ႉလႄႈဝႃႈ၊-
“လိူၼ်ၼႆႉတၵ်းလႆႈပဵၼ်ငဝ်ႈလိူၼ်ၵႃႈတီႈသူလႄႈ၊တၵ်းလႆႈပဵၼ်လိူၼ်တီႈၼိုင်ႈၵႂႃႇၵူႈပီၵူႈပီဢေႃႈ။-
သူသွင်ၵေႃႉတၵ်းလႆႈသင်ႇလၢတ်ႈၵႃႈတီႈမူႇၵူၼ်းၸိူဝ်းၵူၼ်းမဵဝ်း ဢိသရေး၊ လႄႈဝႃႈၸမ်ႉ၊ၼႂ်းဝၼ်းတီႈသိပ်းလိူၼ်ၼႆႉၵူၼ်းၸၢႆးၵူႈၵေႃႉတၵ်းလႆႈမႄးႁႅၼ်းဝႆႉသူဝ်းဢွၼ်ႇယေႈတူဝ် ပုၼ်ႈတႃႇၼႃႈႁိူၼ်းၽႂ်ၼႃႈႁိူၼ်းမၼ်းဢေႃႈ။-
ပေႃးၼႃႈႁိူၼ်းလဵၵ်ႉလႄႈၵိၼ်ဢမ်ႇမူတ်းလႆႈသူဝ်းဢွၼ်ႇတူဝ်ၼိုင်ႈၸိုင်၊မၼ်းဢိၵ်ႇတင်းၵူၼ်းႁိူၼ်းၸမ်ၵၼ်တင်းမၼ်းတၵ်းလႆႈႁူမ်ႈပွင်းၵၼ်ဢဝ်သူဝ်းဢွၼ်ႇၸွမ်းလူၺ်ႈၵူၼ်းႁိူၼ်းၶဝ်မီးလၢႆၵေႃႉတၵ်းၵုမ်ႇၵိၼ်တူဝ်ၼိုင်ႈၼၼ်ႉဢေႃႈ။-
သူဝ်းဢွၼ်ႇဢမ်ႇၼၼ်ၵေႃႈ၊ပႄႉဢွၼ်ႇတူဝ်ဢၼ်သူလိူၵ်ႈဢဝ်ၼၼ်ႉတၵ်းလႆႈပဵၼ်တူဝ်ဢၼ်ဢမ်ႇမီးတီႈၸိတီႈၼႄး၊တူဝ်ပေႃႈဢွၼ်ႇဢၼ်ဢမ်ႇပႆႇၶွပ်ႈၶူပ်ႇၼၼ်ႉဢေႃႈ။-
ဢဝ်သူဝ်းဢွၼ်ႇၼႆႉဝႆႉ၊တေႃႇထိုင်ႁွတ်ႈဝၼ်းတီႈသိပ်းသီႇသေယဝ်ႉ၊ၼႂ်းၶမ်ႈၼၼ်ႉမူႇၵူၼ်းၸိူဝ်းၵူၼ်းမဵဝ်း ဢိသရေး၊ တင်းသဵင်ႈတင်းလူင်တၵ်းလႆႈဢွၼ်ၵၼ်ႁႅမ်သူဝ်းဢွၼ်ႇၶဝ်ၼၼ်ႉဢေႃႈ။-
ၶဝ်သမ်ႉတၵ်းလႆႈဢဝ်လိူတ်ႈၵမ်ႈၽွင်ႈၸမ်ႈသႂ်ႇတီႈသဝ်ၽၵ်းတူတင်းသွင်ၽၢႆႇဢိၵ်ႇတင်းၶိုဝ်ႇမၼ်းတီႈႁိူၼ်းဢၼ်ၶဝ်တၵ်းဢွၼ်ၵၼ်ၵိၼ်ၼိူဝ်ႉတူဝ်သတ်းၼၼ်ႉဢေႃႈ။-
ၼႂ်းၶိုၼ်းၼၼ်ႉၶဝ်တၵ်းလႆႈဢဝ်ၼိူဝ်ႉၼၼ်ႉပိင်ႈၽႆးသေလႄႈၵိၼ်ၵပ်းၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈ၊ဢိၵ်ႇတင်းၽၵ်းၶဵဝ်မဵဝ်းဢၼ်ၶူမ်ၼၼ်ႉဢေႃႈ။-
ၼိူဝ်ႉလိပ်းသေဢမ်ႇဝႃႈ၊ၼိူဝ်ႉဢၼ်တူမ်ႈၼမ်ႉသေဢမ်ႇဝႃႈ၊ဢမ်ႇလႆႈၵိၼ်။ တၵ်းလႆႈဢဝ်ၸႃႉၸဵမ်ႁူဝ်ၸဵမ်တိၼ်မၼ်း၊ဢိၵ်ႇတင်းတပ်းပွတ်ႇႁူဝ်ၸႂ်မၼ်းၸိူဝ်းၼၼ်ႉပိင်ႈၽႆးသေလႄႈၵိၼ်ဢေႃႈ။-
ၼိူဝ်ႉၼၼ်ႉၸိုင်၊ယႃႇပေႁႂ်ႈၵိုတ်းၵျၢၼ်ႇဝႆႉတေႃႇထိုင်ၶိင်ႇၵၢင်ၼႂ်။ ပေႃးၵိုတ်းၵျၢၼ်ႇဢိတ်းဢီႈၸိုင်၊တုတ်ႇၽႆးပႅတ်ႈတင်းမူတ်းတႃႉ။-
သူတၵ်းလႆႈႁတ်ႉသၢႆဢႅဝ်ဝႆႉ၊တိုဝ်းသွၵ်းတိၼ်ဝႆႉ၊ယိပ်းၵမ်ၶွၼ်ႉတဝ်ႉဝႆႉသေလႄႈ၊တၵ်းလႆႈၵိၼ်ၼႅတ်ႈၵိၼ်ၽႂ်းဢေႃႈ။ ၼႆႉၸမ်ႉ၊ပဵၼ်ပွႆး ပသၶႃႇ၊ ပုၼ်ႈဢၼ်ရူဝ်ႇသေႇၵူဝ်ယမ်ၵဝ် ထႃႇဝရႃႉၽြႃး၊ ဢေႃႈ။
“ၼႂ်းၶိုၼ်းၼၼ်ႉၵဝ်တၵ်းပႆၽႃႇလတ်းၵႃႈၼႂ်းမိူင်း ဢေးၵျိပ်ႉ၊ ၵူႈတီႈၵူႈလႅၼ်လႄႈဢဝ်တၢႆပႅတ်ႈလုၵ်ႈၸၢႆးတူၼ်ႈၵူၼ်း၊ဢိၵ်ႇတင်းလုၵ်ႈတူၼ်ႈတူဝ်သတ်းၵႃႈမီးတင်းသဵင်ႈတင်းလူင်ၵႃႈၼႂ်းမိူင်း ဢေးၵျိပ်ႉ၊ သေယဝ်ႉ၊တၵ်းၸီႇယၢင်ႇပၼ်တၢမ်ႇတီႈၽြႃးမိူင်း ဢေးၵျိပ်ႉ၊ တင်းလၢႆဢေႃႈ။ ၵဝ်ပဵၼ် ထႃႇဝရႃႉၽြႃး၊ ဢေႃႈ။-
လိူတ်ႈၼၼ်ႉတၵ်းပဵၼ်လၢၵ်ႈၶၼႃႇဢၼ်မၢႆဝႆႉ၊ၵႃႈတီႈႁိူၼ်းဢၼ်သူယူႇသဝ်းၼၼ်ႉဢေႃႈ။ မိူဝ်ႈဢၼ်ၵဝ်ႁၼ်လိူတ်ႈၼၼ်ႉၸိုင်၊ၵဝ်တၵ်းၶၢမ်ႈပူၼ်ႉၵႂႃႇလႄႈ၊တၵ်းဢမ်ႇလႆႈပဵၼ်ၽေးပဵၼ်တၢမ်ႇတီႈသူၼႂ်းမိူဝ်ႈဢၼ်ၵဝ်ၸီႇယၢင်ႇပၼ်တၢမ်ႇတီႈၵူၼ်းမဵဝ်း ဢေးၵျိပ်ႉ၊ ၶဝ်ၼၼ်ႉဢေႃႈ။-
ဝၼ်းမိူဝ်ႈၼႆႉတၵ်းလႆႈပဵၼ်ဝၼ်းဢၼ်သူတၵ်းၶုၵ်းၸႂ်လႆႈၶႆႈၸႂ်ထူပ်းတႃႇသေႇဢေႃႈ။ သူတၵ်းလႆႈႁဵတ်းပွႆး ထႃႇဝရႃႉၽြႃး၊ ၼႆႉသေႇသေႇလႄႈ၊ၸူဝ်ႈလုၵ်ႈပၢၼ်လၢၼ်ႁႂ်ႈပဵၼ်ပိင်းၺၢပ်ႈသိုပ်ႇၵႂႃႇတႃႇသေႇဢေႃႈ။
“ၸဵတ်းဝၼ်းတဵမ်တဵမ်သူတၵ်းဢမ်ႇလႆႈၵိၼ်ၶဝ်ႈမုၼ်းဢၼ်သႂ်ႇၸိူဝ်ႉပႅင်ႈၼၼ်ႉ။ တၵ်းလႆႈၵိၼ်ၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈၼၼ်ႉၵူၺ်းဢေႃႈ။ ၼႂ်းဝၼ်းတီႈၼိုင်ႈၼၼ်ႉသူတၵ်းလႆႈဢဝ်ၸိူဝ်ႉပႅင်ႈဢွၵ်ႇပႅတ်ႈသေၵႃႈၼႂ်းႁိူၼ်းသူဢေႃႈ။ ၼႂ်းၸူဝ်ႈၸဵတ်းဝၼ်းၼႆႉၵေႃႉဢၼ်ၵိၼ်ၶဝ်ႈမုၼ်းဢၼ်သႂ်ႇၸိူဝ်ႉပႅင်ႈၼၼ်ႉတၵ်းလႆႈၶၢမ်ႇပႄႇပႅတ်ႈသေၵႃႈၼႂ်းၸိူဝ်ႉၶိူဝ်း ဢိသရေး၊ ဢေႃႈ။-
ၼႂ်းဝၼ်းတီႈၼိုင်ႈ ဢိၵ်ႇတင်းဝၼ်းတီႈၸဵတ်းၼၼ်ႉသူတၵ်းလႆႈၸုတုမ်ၵၼ်ႁႂ်ႈလႆႈဝႆႈသႃၵူဝ်းၵႂၢႆႇၵဝ်ဢေႃႈ။ ၼႂ်းၸူဝ်ႈၶၢဝ်းၼၼ်ႉလိူဝ်သေတၢင်းဢၼ်ႁႅၼ်းၵိၼ်ႁႅၼ်းၶူပ်းၸိုင်၊သူတၵ်းဢမ်ႇလႆႈႁဵတ်းၵၢၼ်ၵႃႈသင်လႃးလႃး။-
ပႂ်ႉၵမ်ႁဵတ်းၸွမ်းပွႆးၼႆႉၵွပ်ႈပိူဝ်ႈၵဝ်ထုတ်ႇၼုၵ်ႈဢဝ်ၸိူဝ်ႉၶိူဝ်းၵူၼ်းမဵဝ်းသူဢွၵ်ႇမိူင်း ဢေးၵျိပ်ႉ၊ မႃးၼႂ်းမိုဝ်ႉဝၼ်းၼႆႉၼၼ်ႉတႃႉ။ ၵွပ်ႈပိူဝ်ႈလွင်ႈတၢင်းၼႆႉလႄႈသူတၵ်းလႆႈႁဵတ်းပွႆးၼႆႉသေႇသေႇၼႂ်းၸူဝ်ႈလုၵ်ႈပၢၼ်လၢၼ်သူသိုပ်ႇၵႂႃႇႁႂ်ႈလႆႈပဵၼ်ပိင်းၺၢပ်ႈၵႂႃႇသိုပ်ႇသိုပ်ႇတၢမ်တၢမ်ဢေႃႈ။-
ၼႂ်းလိူၼ်တီႈၼိုင်ႈၼႆႉတႄႇဢဝ်ဝၼ်းတီႈသိပ်းသီႇတေႃႇထိုင်ႁွတ်ႈဝၼ်းတီႈသၢဝ်းဢဵတ်းၼၼ်ႉသူတၵ်းလႆႈၵိၼ်ၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈဢေႃႈ။-
ၼႂ်းၸူဝ်ႈၸဵတ်းဝၼ်းၼႆႉယႃႇပေႁႂ်ႈၸိူဝ်ႉပႅင်ႈမီးၵႃႈၼႂ်းႁိူၼ်းသူလႃးလႃး။ ပဵၼ်ၵူၼ်းတၢင်ႇဝၢၼ်ႈတၢင်ႇမိူင်းသေဢမ်ႇဝႃႈ၊ပဵၼ်ၵူၼ်းၼႂ်းဝၢၼ်ႈၼႂ်းမိူင်းသေဢမ်ႇဝႃႈ၊ၵေႃႉဢၼ်ၵိၼ်ၶဝ်ႈမုၼ်းဢၼ်သႂ်ႇၸိူဝ်ႉပႅင်ႈၼၼ်ႉၸိုင်၊တၵ်းလႆႈၶၢမ်ႇပႄႇပႅတ်ႈသေၵႃႈၼႂ်းၸိူဝ်ႉၶိူဝ်း ဢိသရေး၊ ဢေႃႈ။-
ၶဝ်ႈမုၼ်းဢၼ်သႂ်ႇၸိူဝ်ႉပႅင်ႈၼၼ်ႉသူတၵ်းဢမ်ႇလႆႈၵိၼ်လႃးလႃး။ ၵႃႈၼႂ်းတီႈယူႇသူၵူႈတီႈၵူႈလႅၼ်ၼၼ်ႉတၵ်းလႆႈၵိၼ်ၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ မူဝ်းသေႇ၊ ႁွင်ႉဢဝ်ၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်း ဢိသရေး၊ တင်းသဵင်ႈတင်းလူင်လႄႈလၢတ်ႈတီႈၶဝ်လႄႈဝႃႈ၊ “သူတၵ်းလႆႈလိူၵ်ႈဢဝ်သူဝ်းဢွၼ်ႇ၊ဢမ်ႇၼၼ်ၵေႃႈပႄႉဢွၼ်ႇတူဝ်ၼိုင်ႈသေလႄႈႁႅမ်ပုၼ်ႈၼႃႈႁိူၼ်းၽႂ်ၼႃႈႁိူၼ်းမၼ်းတီႈလႂ်တီႈၼၼ်ႈႁႂ်ႈလႆႈႁဵတ်းပွႆး ပသၶႃႇ၊ တႃႉ။-
သူတၵ်းလႆႈဢဝ်ယွတ်ႈတူၼ်ႈယိူဝ်ႈယႃႈႁုတ်ႉသူပ်ႉမတ်ႉၼိုင်ႈၸုမ်ႇလိူတ်ႈဢၼ်မီးၼႂ်းဢၢင်ႇၼၼ်ႉသေယဝ်ႉ၊တႃးဝႆႉတီႈၶိုဝ်ႇၽၵ်းတူတင်းသဝ်မၼ်းသွင်ၽၢႆႇဢေႃႈ။ ၽူႈလႂ်တၵ်းဢမ်ႇလႆႈဢွၵ်ႇၵႂႃႇၵႃႈၼွၵ်ႈႁိူၼ်းလႄႈယူႇတေႃႇထိုင်ႁွတ်ႈၶိင်ႇၵၢင်ၼႂ်။-
ၼႂ်းမိူဝ်ႈဢၼ် ထႃႇဝရႃႉၽြႃး၊ ပႆၽၢတ်ႈၵႂႃႇၵႃႈၼႂ်းမိူင်း ဢေးၵျိပ်ႉ၊ ႁႂ်ႈလႆႈပၼ်ၽေးတၢမ်ႇတၢင်းတၢႆတီႈၵူၼ်းမဵဝ်း ဢေးၵျိပ်ႉ၊ ၶဝ်ၼၼ်ႉၸိုင်၊မၼ်းၸဝ်ႈတၵ်းႁၼ်လိူတ်ႈၵႃႈတီႈၶိုဝ်ႇၽၵ်းတူတင်းသဝ်သွင်ၽၢႆႇသေလႄႈ၊မၼ်းၸဝ်ႈတၵ်းဢမ်ႇပၼ်ဢၶႂၢင်ႉႁႂ်ႈတမၢၼ်ႇၵၢင်ႁၢဝ်ဢၼ်ၸၢင်ႈဢဝ်တၢႆၼၼ်ႉၶဝ်ႈၸူးၵႃႈၼႂ်းႁိူၼ်းသူႁႂ်ႈလႆႈပၼ်ၽေးတၢမ်ႇတၢင်းတၢႆတီႈသူလႄႈမၼ်းၸဝ်ႈတၵ်းပူၼ်ႉၽၵ်းတူၼၼ်ႉၵႂႃႇဢေႃႈ။-
သူဢိၵ်ႇတင်းလုၵ်ႈလၢၼ်သူတင်းလၢႆ တၵ်းလႆႈပႂ်ႉထိင်းလွင်ႈတၢင်းၼႆႉလႄႈႁႂ်ႈပဵၼ်ထုင်းၽိင်ႈတြႃးတႃႇသေႇတႃႉ။-
ၼႂ်းမိူဝ်ႈဢၼ်သူၶဝ်ႈထိုင်ၵႃႈၼႂ်းမိူင်းဢၼ် ထႃႇဝရႃႉၽြႃး၊ ဝႆႉၵတိဝႃႈတေပၼ်သူၼၼ်ႉၸိုင်၊သူတၵ်းလႆႈႁဵတ်းဝၢတ်ႈဢၼ်ၼႆႉဢေႃႈ။-
မိူဝ်ႈဢၼ်လုၵ်ႈလၢင်းသူထၢမ်လႄႈဝႃႈ၊ ‘လွင်ႈဢၼ်ႁဵတ်းဝၢတ်ႈၼႆႉ ပဵၼ်လွင်ႈသင်ၶႃႈ၊’ ဝႃႈၼင်ႇၼႆၸိုင်၊-
သူတၵ်းလႆႈၶိုၼ်းလၢတ်ႈလႄႈဝႃႈ၊ ‘ၼႆႉၸမ်ႉ၊ပဵၼ်ပွႆးဢၼ်သၢၵ်ႈလူႇ ပသၶႃႇ၊ တီႈ ထႃႇဝရႃႉၽြႃး၊ ၵွပ်ႈပိူဝ်ႈမၼ်းၸဝ်ႈပူၼ်ႉသေႁိူၼ်းၵူၼ်းမဵဝ်း ဢိသရေး၊ တင်းလၢႆၵႂႃႇၵႃႈၼႂ်းမိူင်း ဢေးၵျိပ်ႉ၊ ပုၼ်ႉဢေႃႈ။ မၼ်းၸဝ်ႈပၼ်ၽေးတၢမ်ႇတၢင်းတၢႆတီႈၵူၼ်းမဵဝ်း ဢေးၵျိပ်ႉ၊ ၶဝ်လႄႈပၼ်ၵတ်းယဵၼ်ၶျၢမ်းသႃႇတီႈႁဝ်းၼၼ်ႉဢေႃႈ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။ ၵူၼ်းမဵဝ်း ဢိသရေး၊ တင်းလၢႆ ဢွၼ်ၵၼ်ၵူမ်ႈၵွမ်းႁူဝ်လႄႈဝႆႈသႃၵူဝ်းၵႂၢႆႇယူႇဢေႃႈ။-
ၼင်ႇၼၼ်လႄႈၶဝ်မိူဝ်းၵႂႃႇသေယဝ်ႉ၊ႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉတီႈ မူဝ်းသေႇ၊ တင်း ဢႃႇရုၼ်ႇ၊ ၼၼ်ႉဢေႃႈ။
ၶိင်ႇတဵင်ႈၶိုၼ်း ထႃႇဝရႃႉၽြႃး၊ ပၼ်ၽေးတၢမ်ႇတၢႆတီႈလုၵ်ႈတူၼ်ႈၵႃႈမီးၵႃႈၼႂ်းမိူင်း ဢေးၵျိပ်ႉ၊ တင်းသဵင်ႈတင်းလူင်လႄႈတႄႇဢဝ်ၸႃႉၸဵမ်လုၵ်ႈတူၼ်ႈၶုၼ်ႁေႃၶမ်း၊လုၵ်ႈတူၼ်ႈဢၼ်တၵ်းသိုပ်ႇၼင်ႈႁၢင်ႈၼင်ႈႁေႃ တေႃႇထိုင်ႁွတ်ႈလုၵ်ႈတူၼ်ႈၵေႃႉဢၼ်တူၵ်းထွင်ႇယူႇဢိၵ်ႇတင်းလုၵ်ႈတူၼ်ႈတူဝ်သတ်းတင်းသဵင်ႈတင်းလူင်ၼၼ်ႉဢေႃႈ။-
ၼႂ်းၶိုၼ်းၼၼ်ႉၸႃႉၸဵမ်ၶုၼ်ႁေႃၶမ်းလႄႈမူးမၢတ်ႈၽွင်းမိူင်းမၼ်းဢိၵ်ႇတင်းၶႃႈဝၢၼ်ႈၵူၼ်းမိူင်းမိူင်း ဢေးၵျိပ်ႉ၊ ဢွၼ်ၵၼ်တိုၼ်ႇယူႇၵွပ်ႈပိူဝ်ႈဢၼ်ႁိူၼ်းဢၼ်ၵၢင်းလွတ်ႈမီးတူဝ်တၢႆဢမ်ႇမီးသေႁိူၼ်းၼၼ်ႉလႄႈမီးတၢင်းဢၼ်ႁွင်ႉႁႆႈလူၺ်ႈသဵင်ဢၼ်ယႂ်ႇၼႃႇလူင်လၢင်ၸွတ်ႇတူဝ်ႈၵႂႃႇၵႃႈၼႂ်းမိူင်း ဢေးၵျိပ်ႉ၊ ဢေႃႈ။-
ၼႂ်းၶိုၼ်းၼၼ်ႉၵမ်းလဵဝ်ၶုၼ်ႁေႃၶမ်းႁွင်ႉဢဝ် မူဝ်းသေႇ၊ တင်း ဢႃႇရုၼ်ႇ၊ လႄႈလၢတ်ႈဝႃႈ၊ “ၸႃႉၸဵမ်သူသွင်ၵေႃႉလႄႈၵူၼ်းမဵဝ်း ဢိသရေး၊ တင်းလၢႆလုၵ်ႉလႄႈဢွၵ်ႇမိူင်းၵဝ်ၵႂႃႇတႃႉ။ ၵႂႃႇဝႆႈ ထႃႇဝရႃႉၽြႃး၊ ၸွမ်းၵႃႈၼင်ႇဢၼ်သူယွၼ်းၼၼ်ႉတႃႉ။-
ပႃးဢဝ်ၽုင်သူဝ်းၽုင်ဝူဝ်းသူလႄႈဢွၵ်ႇၵႂႃႇတႃႉ။ တီႈၵဝ်ၵေႃႈပၼ်တၢင်းလီမၢင်ႇၵလႃႇသေၵမ်း၊” ဝႃႈၼင်ႇၼႆဢေႃႈ။
ၵူၼ်းမဵဝ်း ဢေးၵျိပ်ႉ၊ ၶဝ်တိုၵ်းယူင်းႁႂ်ႈၵူၼ်းၸိူဝ်းၼၼ်ႉႁိပ်ႈၼႅတ်ႈဢွၵ်ႇၵႂႃႇၶၼ်ၶၼ်ၽႂ်းၽႂ်းသေလႄႈလၢတ်ႈဝႃႈ၊ “ပေႃးသူယင်းဢမ်ႇဢွၵ်ႇၵႂႃႇၸိုင်၊ႁဝ်းတၵ်းတၢႆမူတ်းယဝ်ႉ၊” ဝႃႈၼင်ႇၼႆဢေႃႈ။-
ၵူၼ်းတင်းလၢႆၵေႃႈဢွၼ်ၵၼ်ဢဝ်ၵွၼ်ႈၶဝ်ႈမုၼ်းလိပ်းဢၼ်ဢမ်ႇသႂ်ႇၸိူဝ်ႉပႅင်ႈၼၼ်ႉသႂ်ႇၼႂ်းဢၢင်ႇဢၼ်ၼူတ်ႈၶဝ်ႈမုၼ်းသေယဝ်ႉ၊သမ်ႉဢဝ်ၶူဝ်းလဵင်းပူၵ်ႉႁေႃႇလႄႈမႅၵ်ႇတၢင်ႇၵႃႈၼိူဝ်ႁူဝ်မႃႇၶဝ်ဢေႃႈ။-
ၵူၼ်းမဵဝ်း ဢိသရေး၊ တင်းလၢႆႁဵတ်းၸွမ်းၵႃႈၼင်ႇဢၼ် မူဝ်းသေႇ၊ သင်ႇလၢတ်ႈၼၼ်ႉလႄႈ၊ၶဝ်ဢွၼ်ၵၼ်ယွၼ်းယိမ်ၶိူင်ႈငိုၼ်းၶိူင်ႈၶမ်း၊ၶူဝ်းၼုင်ႈတၢင်းမႆတီႈၵူၼ်းမဵဝ်း ဢေးၵျိပ်ႉ၊ ၶဝ်ဢေႃႈ။-
ထႃႇဝရႃႉၽြႃး၊ ႁႂ်ႈၵူၼ်းမဵဝ်း ဢေးၵျိပ်ႉ၊ ၶဝ်ရူဝ်ႇသေႇၼပ်ႉယမ်ၵူၼ်း ဢိသရေး၊ သေလႄႈပၼ်ၵႃႈဢၼ်ၶဝ်ယွၼ်းၼၼ်ႉဢေႃႈ။ ၼင်ႇၼၼ်လႄႈၵူၼ်းမဵဝ်း ဢိသရေး၊ ၶဝ်ပႃးဢဝ်ဢုၵ်ႉၸႃႇၶူဝ်းၶွင်ၵူၼ်းမဵဝ်း ဢေးၵျိပ်ႉ၊ ၶဝ်ၵႂႃႇဢေႃႈ။
ၵူၼ်းမဵဝ်း ဢိသရေး၊ ၸိူဝ်းၼၼ်ႉဢွၼ်ၵၼ်ဢွၵ်ႇဝဵင်း ရႃႇမသိတ်ႈ၊ သေလႄႈပႆတိၼ်ၸွမ်းတၢင်းၵႂႃႇၸူးဝဵင်း သုၵုတ်ႉ၊ ဢေႃႈ။ ၽူႈယိင်းတင်းလုၵ်ႈဢွၼ်ႇဢမ်ႇၼပ်ႉဢၢၼ်ႇပႃး၊ၵူၼ်းၸၢႆးၵူၺ်းၵူၺ်းမီးႁူၵ်းသႅၼ်ၸမ်ၸမ်ဢေႃႈ။-
ၵူၼ်းတၢင်ႇၸိူဝ်ႉတၢင်ႇမဵဝ်းၼမ်ၼႃႇဢိၵ်ႇတင်းၽုင်သူဝ်းၽုင်ဝူဝ်းလႄႈတူဝ်သတ်းၼမ်ၼႃႇၵေႃႈၵႂႃႇၸွမ်းၵၼ်တင်းၶဝ်ဢေႃႈ။-
ၶဝ်ဢွၼ်ၵၼ်ဢဝ်ၵွၼ်ႈၶဝ်ႈမုၼ်းလိပ်းဢၼ်ၶဝ်ပႃးဢဝ်ၵႃႈတီႈမိူင်း ဢေးၵျိပ်ႉ၊ မႃးၼၼ်ႉၽဝ်ႁဵတ်းၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈလႄႈၵိၼ်ဢေႃႈ။ ၵွပ်ႈပိူဝ်ႈၶဝ်လႆႈၶၢမ်ႇပိူၼ်ႈႁေႃႈဢွၵ်ႇမႃးႁိပ်ႈၼႅတ်ႈၼႃႇၼၼ်ႉလႄႈ၊ၶဝ်ဢမ်ႇမီးဢၶိင်ႇဢၼ်ဢဝ်တၢင်းၵိၼ်တၢင်းၶူပ်းမႃး။ ၶဝ်ႈမုၼ်းဢၼ်လေႃးၸိူဝ်ႉပႅင်ႈၵေႃႈဢမ်ႇတၼ်းလႆႈၼူတ်ႈလႄႈဢဝ်မႃးဢေႃႈ။
ၵူၼ်းမဵဝ်း ဢိသရေး၊ တင်းလၢႆသွၼ်ႈယူႇၵႃႈၼႂ်းမိူင်း ဢေးၵျိပ်ႉ၊ ၼၼ်ႉႁိုင်သီႇပၢၵ်ႇပၢႆသၢမ်သိပ်းပီဢေႃႈ။-
ၼႂ်းဝၼ်းဢၼ်ထူၼ်ႈတဵမ်သီႇပၢၵ်ႇသၢမ်သိပ်းပီၼၼ်ႉၸိုင်၊ၸိူဝ်ႉၶိူဝ်းၵူၼ်းမဵဝ်း ထႃႇဝရႃႉၽြႃး၊ ၵႃႈမီးတင်းသဵင်ႈတင်းလူင်ဢွၼ်ၵၼ်ဢွၵ်ႇမိူင်း ဢေးၵျိပ်ႉ၊ ၵႂႃႇဢေႃႈ။-
ၶိုၼ်းၼၼ်ႉပဵၼ်ၶိုၼ်းဢၼ် ထႃႇဝရႃႉၽြႃး၊ ပႂ်ႉႁႂ်ႈလႆႈဢဝ်ၶဝ်ဢွၵ်ႇမိူင်း ဢေးၵျိပ်ႉ၊ မႃးဢေႃႈ။ ပိူဝ်ႈၼႆလႄႈၶိုၼ်းၼၼ်ႉတၵ်းလႆႈပဵၼ်ၶိုၼ်း ထႃႇဝရႃႉၽြႃး၊ ပုၼ်ႈၵူၼ်းမဵဝ်း ဢိသရေး၊ တၵ်းပႂ်ႉတေႃႇၸူဝ်ႈလုၵ်ႈပၢၼ်လၢၼ်သိုပ်ႇသိုပ်ႇတၢမ်တၢမ်ဢေႃႈ။
ထႃႇဝရႃႉၽြႃး၊ လၢတ်ႈတီႈ မူဝ်းသေႇ၊ ဢိၵ်ႇတင်း ဢႃႇရုၼ်ႇ၊ လႄႈဝႃႈ၊ “ၼႆႉၸမ်ႉ၊ပဵၼ်ထုင်းတြႃးပွႆး ပသၶႃႇ၊ ဢေႃႈ။ ၵူၼ်းတၢင်ႇၸိူဝ်ႉတၢင်ႇၶိူဝ်းတၵ်းဢမ်ႇလႆႈၵိၼ်ပွႆး ပသၶႃႇ။-
ၵူၺ်းၵႃႈ၊ၶႃႈဢၼ်ဢဝ်ငိုၼ်းသိုဝ်ႉဢဝ်ၼၼ်ႉပေႃးၶၢမ်ႇဢဝ်မၢင်ႇၵလႃႇတၢင်းဢၼ်ပၢတ်ႇပၢႆၼင်ယဝ်ႉၸိုင်၊တၵ်းလႆႈၵိၼ်ဢေႃႈ။-
ၶႅၵ်ႇတၢင်ႇဝၢၼ်ႈတၢင်ႇမိူင်းဢိၵ်ႇတင်းၵူၼ်းၵိၼ်ၸၢင်ႈၵိၼ်ငႃတၵ်းဢမ်ႇလႆႈၵိၼ်။-
ၼိူဝ်ႉမၼ်းၸိုင်၊တၵ်းဢမ်ႇလႆႈဢဝ်ဢွၵ်ႇၵႂႃႇၵႃႈၼွၵ်ႈႁိူၼ်း။ တၵ်းလႆႈၵိၼ်ၵႃႈၼႂ်းႁိူၼ်းဢၼ်လႆႈႁဵတ်းဝႆႉၼၼ်ႉမူတ်းမူတ်းဢေႃႈ။ လုပ်ႇမၼ်းၵေႃႈသူဢမ်ႇလႆႈဢဝ်ႁၵ်း။-
မူႇၵူၼ်းၸိူဝ်းၵူၼ်းမဵဝ်း ဢိသရေး၊ တင်းသဵင်ႈတင်းလူင်၊တၵ်းလႆႈႁဵတ်းပွႆး ပသၶႃႇ၊ ဢေႃႈ။-
ၵေႃႉဢၼ်ဢမ်ႇၶၢမ်ႇဢဝ်မၢင်ႇၵလႃႇတၢင်းဢၼ်ပၢတ်ႇပၢႆၼင်ၼၼ်ႉၸိုင်၊ဢမ်ႇလႆႈၵိၼ်။ ပေႃးမီးၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈယူႇၸွမ်းသူၼၼ်ႉမီးဢလူဝ်ႇၶႂ်ႈၵိၼ်ပွႆး ပသၶႃႇ၊ ပုၼ်ႈ ထႃႇဝရႃႉၽြႃး၊ ၸိုင်၊ႁႂ်ႈၵူၼ်းၸၢႆးဢၼ်ပဵၼ်ၵူၼ်းႁိူၼ်းၵူၼ်းယေးမၼ်းတင်းမူတ်းၼၼ်ႉၶၢမ်ႇဢဝ်မၢင်ႇၵလႃႇတၢင်းဢၼ်ပၢတ်ႇပၢႆၼင်တႃႉ။ ႁဵတ်းၼၼ်ၸင်ႇသူတၵ်းလႆႈမၢတ်ႈမၼ်းပဵၼ်ၸိူဝ်ႉၼင်ႇၵူၼ်းဝၢၼ်ႈၵူၼ်းမိူင်းလႄႈႁႂ်ႈမၼ်းၵိၼ်ပွႆးၼၼ်ႉတႃႉ။-
ပုၼ်ႈၵူၼ်းမဵဝ်း ဢိသရေး၊ ဢိၵ်ႇတင်းပုၼ်ႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၸိုင်၊တၵ်းလႆႈႁဵတ်းၸွမ်းထုင်းတြႃးဢၼ်လဵဝ်ၵူၺ်းဢေႃႈ၊” ဝႃႈၼင်ႇၼႆဢေႃႈ။-
ၵူၼ်းမဵဝ်း ဢိသရေး၊ တင်းသဵင်ႈတင်းလူင်ႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈတီႈ မူဝ်းသေႇ၊ တင်း ဢႃႇရုၼ်ႇ၊ ၼၼ်ႉဢေႃႈ။-
ၼႂ်းဝၼ်းၼၼ်ႉၵမ်းလဵဝ် ထႃႇဝရႃႉၽြႃး၊ ဢဝ်ၸိူဝ်ႉၶိူဝ်းၵူၼ်းမဵဝ်း ဢိသရေး၊ တင်းလၢႆဢွၵ်ႇမိူင်း ဢေးၵျိပ်ႉ၊ ၵႂႃႇသေဢေႃႈ။
ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ လႄႈဝႃႈ၊-
“ဢဝ်လုၵ်ႈၸၢႆးတူၼ်ႈၵႃႈမီးတင်းသဵင်ႈတင်းလူင်သၢၵ်ႈၵၢပ်ႈၵဝ်တႃႉ။ လွင်ႈမၼ်းၸမ်ႉ၊ၼႂ်းၵူၼ်းမဵဝ်း ဢိသရေး၊ ၸိူဝ်းၼၼ်ႉၵႃႈဢၼ်ပဵၼ်လုၵ်ႈတူၼ်ႈၵူၼ်းၸၢႆး၊ဢိၵ်ႇတင်းလုၵ်ႈတူၼ်ႈတူဝ်ပေႃႈၼႂ်းတရိၵ်ႈသၢၼ်ႇပဵၼ်ဢုၵ်ႉၸႃႇၵဝ်တင်းမူတ်းဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ လၢတ်ႈတီႈၵူၼ်းတင်းလၢႆလႄႈဝႃႈ၊ “ဢွၼ်ၵၼ်ၶုၵ်းၸႂ်လႆႈဝၼ်းဢၼ်သူလႆႈဢွၵ်ႇမိူင်း ဢေးၵျိပ်ႉ၊ တီႈဢၼ်သူလႆႈၶၢမ်ႇပဵၼ်ၶႃႈမႃးၼၼ်ႉတႃႉ။ ဝၼ်းၼႆႉပဵၼ်ဝၼ်းဢၼ် ထႃႇဝရႃႉၽြႃး၊ ဢဝ်တင်းတၼ်းၶူဝ်းမၼ်းၸဝ်ႈဢၼ်ယႂ်ႇၼႃႇၼၼ်ႉၵႄႇၼုၵ်ႈဢဝ်သူဢွၵ်ႇမႃးယဝ်ႉ။ သူဢမ်ႇလႆႈၵိၼ်ၶဝ်ႈမုၼ်းဢၼ်သႂ်ႇၸိူဝ်ႉပႅင်ႈၼၼ်ႉ။-
သူဢွၵ်ႇမႃးၼႂ်းလိူၼ်ဢပိပႃႉ ၼႂ်းဝၼ်းၼႆႉယဝ်ႉ။-
ထႃႇဝရႃႉၽြႃး၊ ႁဵတ်းၵတိသဵတ်ႈၸႃႇတီႈပူႇမွၼ်ႇသူဝႆႉ၊ႁႂ်ႈလႆႈဢဝ်မိူင်းဢၼ်ၵူၼ်းမဵဝ်း ၶႃႇၼၼိ၊ ၵူၼ်းမဵဝ်း ႁိတ်ႉတိ၊ ၵူၼ်းမဵဝ်း ဢႃႇမေႃးရိ၊ ၵူၼ်းမဵဝ်း ႁိဝိ၊ ၵူၼ်းမဵဝ်း ယေႇပုသိ၊ ၶဝ်ပိူင်ႇၼၼ်ႉပၼ်သူဢေႃႈ။ မိူဝ်ႈဢၼ်မၼ်းၸဝ်ႈဢဝ်သူသူင်ႇထိုင်၊မိူင်းဢၼ်မၢၵ်ႈမီးလီပဵၼ်လႄႈၽုၼ်ႇလီလိၼ်လီ ၼၼ်ႉၵႂႃႇယဝ်ႉၸိုင်၊သူတၵ်းလႆႈႁဵတ်းပွႆးၼႆႉၼႂ်းငဝ်ႈလိူၼ်ၼႆႉၵူႈပီၵူႈပီဢေႃႈ။-
ၼႂ်းၸူဝ်ႈၸဵတ်းဝၼ်းၼႆႉသူတၵ်းလႆႈၵိၼ်ၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈလႄႈ၊ၼႂ်းဝၼ်းတီႈၸဵတ်းၼၼ်ႉသူသမ်ႉတၵ်းလႆႈႁဵတ်းပွႆးပုၼ်ႈ ထႃႇဝရႃႉၽြႃး၊ ဢေႃႈ။-
တၵ်းလႆႈၵိၼ်ၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈတင်းၸဵတ်းဝၼ်းဢေႃႈ။ တီႈသူတေဢမ်ႇလႆႈမီးၶဝ်ႈမုၼ်းဢၼ်သႂ်ႇၸိူဝ်ႉပႅင်ႈၼၼ်ႉလႃးလႃး။ တီႈဢၼ်သူယူႇၵူႈတီႈၵူႈလႅၼ်ၼၼ်ႉၵေႃႈ ဢမ်ႇလႆႈမီးၸိူဝ်ႉပႅင်ႈလႃးလႃး။-
ၼႂ်းဝၼ်းၼၼ်ႉသူတၵ်းလႆႈမွၵ်ႇလၢတ်ႈၼႄလုၵ်ႈလၢၼ်သူလႄႈဝႃႈ၊ ‘ဢၼ်ၼႆႉၸမ်ႉ၊ပဵၼ်ၵွပ်ႈပိူဝ်ႈၵျေးၸူးဢၼ် ထႃႇဝရႃႉၽြႃး၊ ႁဵတ်းပုၼ်ႈႁဝ်းၼႂ်းမိူဝ်ႈဢၼ်ႁဝ်းဢွၵ်ႇမိူင်း ဢေးၵျိပ်ႉ၊ မႃးၼၼ်ႉဢေႃႈ။-
ဢၼ်ၼႆႉတၵ်းလႆႈပဵၼ်လၢၵ်ႈၶၼႃႇဢၼ်ပဵၼ်ၸိူဝ်ႉၼင်ႇသၢၵ်ႈသေႇသေမဵဝ်းမဵဝ်းမတ်ႉၸပ်းတီႈၶႅၼ်ဝႆႉ၊ဢမ်ႇၼၼ်ၵေႃႈတီႈၼႃႈၽၢၵ်ႇဝႆႉလႄႈသူတၵ်းလႆႈလၢတ်ႈတြႃးၽြႃးပဵၼ်ၸဝ်ႈယူႇသေႇသေႇဢေႃႈ။ လွင်ႈမၼ်းၸမ်ႉ၊ ထႃႇဝရႃႉၽြႃး၊ ဢဝ်တင်းတၼ်းၶူဝ်းမၼ်းၸဝ်ႈဢၼ်ယႂ်ႇၼႃႇၼၼ်ႉၵႄႇၼုၵ်ႈဢဝ်သူဢွၵ်ႇသေမိူင်း ဢေးၵျိပ်ႉ၊ မႃးၼၼ်ႉဢေႃႈ။-
ပိူဝ်ႈၼႆလႄႈ၊မိူဝ်ႈဢၼ်ၶွပ်ႈၶူပ်ႇထိုင်ၶိင်ႇမၼ်းၸိုင်၊သူတၵ်းလႆႈႁဵတ်းၸွမ်းထုင်းၽိင်ႈတြႃးၼႆႉၵူႈပီၵူႈပီဢေႃႈ။-
“ ထႃႇဝရႃႉၽြႃး၊ တၵ်းဢွၼ်သူင်ႇသူၶဝ်ႈၼႂ်းမိူင်းၵူၼ်းမဵဝ်း ၶႃႇၼၼိ၊ မႅၼ်ႈၸွမ်းၵႃႈၼင်ႇဢၼ်မၼ်းၸဝ်ႈႁဵတ်းၵတိသဵတ်ႈၸႃႇတီႈသူ၊ဢိၵ်ႇတင်းတီႈပူႇမွၼ်ႇသူပုၼ်ႉဢေႃႈ။ မိူဝ်ႈဢၼ်ဢဝ်မိူင်းၼၼ်ႉပၼ်တီႈသူယဝ်ႉၼၼ်ႉၸိုင်၊-
သူတၵ်းလႆႈၽႄဢဝ်လုၵ်ႈၸၢႆးတူၼ်ႈတင်းသဵင်ႈတင်းလူင်ဢိၵ်ႇတင်းလုၵ်ႈတူၼ်ႈတူဝ်တရိၵ်ႈသၢၼ်ႇဢၼ်မီးတီႈသူတင်းသဵင်ႈတင်းလူင်ၼၼ်ႉဢဝ်ၸတ်းၽႄဝႆႉၶေႃၶေႃ၊ပုၼ်ႈ ထႃႇဝရႃႉၽြႃး၊ ဢေႃႈ။ ၵႃႈဢၼ်ပဵၼ်လုၵ်ႈတူၼ်ႈတူဝ်ပေႃႈတင်းသဵင်ႈတၵ်းလႆႈပဵၼ်ဢုၵ်ႉၸႃႇ ထႃႇဝရႃႉၽြႃး၊ ဢေႃႈ။-
လုၵ်ႈတူၼ်ႈတူဝ်ပေႃႈဢၼ်ၵိူတ်ႇလဵင်ႉမႃးၵႃႈတီႈလီႈမႄႈၼၼ်ႉၸိုင်၊တၵ်းလႆႈဢဝ်သူဝ်းဢွၼ်ႇထုတ်ႇဢဝ်ဢေႃႈ။ ပေႃးဢမ်ႇၶႂ်ႈထုတ်ႇဢဝ်ၸိုင်၊ႁၵ်းၶေႃးလီႈဢွၼ်ႇၼၼ်ႉပႅတ်ႈတႃႉ။ ၵႃႈဢၼ်ပဵၼ်လုၵ်ႈတူၼ်ႈၵူၼ်းၵႃႈၼႂ်းလုၵ်ႈၸၢႆးသူတင်းလၢႆၸိုင်၊သူတၵ်းလႆႈၶိုၼ်းထုတ်ႇဢဝ်ၵူႈၵေႃႉဢေႃႈ။-
ဝၢႆးလိုၼ်းမိူဝ်းၼႃႈမႃးပေႃးလုၵ်ႈလၢၼ်သူထၢမ်လွင်ႈဢၼ်ပႂ်ႉထိင်းထုင်းၽိင်ႈတြႃးၼႆႉပဵၼ်လွင်ႈသင်ဝႃႈၼႆၸိုင်၊သူတၵ်းလႆႈၶိုၼ်းလၢတ်ႈၼႄလႄႈဝႃႈ၊ ‘ ထႃႇဝရႃႉၽြႃး၊ ဢဝ်တင်းတၼ်းၶူဝ်းမၼ်းၸဝ်ႈဢၼ်ယႂ်ႇၼႃႇၼၼ်ႉၵႄႇၼုၵ်ႈဢဝ်ႁဝ်းဢွၵ်ႇမိူင်း ဢေးၵျိပ်ႉ၊ တီႈဢၼ်ႁဝ်းလႆႈၶၢမ်ႇပဵၼ်ၶႃႈမႃးၼၼ်ႉဢေႃႈ။-
မိူဝ်ႈဢၼ်ၶုၼ်ႁေႃၶမ်းဢမ်ႇပွႆႇႁဝ်းငၢႆႈငၢႆႈၸိုင်၊ ထႃႇဝရႃႉၽြႃး၊ ဢဝ်လုၵ်ႈၸၢႆးတူၼ်ႈတင်းသဵင်ႈတင်းလူင်ၸႃႉၸဵမ်လုၵ်ႈတူၼ်ႈၵူၼ်းလႄႈလုၵ်ႈတူၼ်ႈတရိၵ်ႈသၢၼ်ႇဢၼ်မီးၵႃႈၼႂ်းမိူင်း ဢေးၵျိပ်ႉ၊ ၸိူဝ်းၼၼ်ႉတၢႆပႅတ်ႈဢေႃႈ။ ပိူဝ်ႈၼႆလႄႈႁဝ်းလႆႈဢဝ်လုၵ်ႈတူၼ်ႈတူဝ်ပေႃႈသတ်းတရိၵ်ႈသၢၼ်ႇတင်းသဵင်ႈတင်းလူင်သၢၵ်ႈလူႇတီႈ ထႃႇဝရႃႉၽြႃး၊ ယဝ်ႉဢေႃႈ။ ၵူၺ်းၵႃႈ၊ႁဝ်းတၵ်းလႆႈၶိုၼ်းထုတ်ႇဢဝ်လုၵ်ႈတူၼ်ႈႁဝ်းတင်းလၢႆဢေႃႈ။-
ဢၼ်ၼႆႉၸင်ႇလႆႈပဵၼ်လၢၵ်ႈၶၼႃႇဢၼ်ပဵၼ်ၼင်ႇသၢၵ်ႈသေႇသေမဵဝ်းမဵဝ်းဢၼ်မတ်ႉၸပ်းတီႈၶႅၼ်၊ဢမ်ႇၼၼ်ၵေႃႈတီႈၼႃႈၽၢၵ်ႇဝႆႉဢေႃႈ။ တၢင်းဢၼ်ပႂ်ႉထိင်းထုင်းၽိင်ႈတြႃးၼႆႉပဵၼ်တၢင်းဢၼ်ၶုၵ်းၸႂ်လႆႈလွင်ႈဢၼ် ထႃႇဝရႃႉၽြႃး၊ ဢဝ်တင်းတၼ်းၶူဝ်းမၼ်းၸဝ်ႈဢၼ်ယႂ်ႇၼႃႇၼၼ်ႉၵႄႇၼုၵ်ႈဢဝ်ႁဝ်းဢွၵ်ႇမိူင်း ဢေးၵျိပ်ႉ၊ မႃးၼၼ်ႉဢေႃႈ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၶုၼ်ႁေႃၶမ်းပွႆႇၵူၼ်းၸိူဝ်းၼၼ်ႉၵႂႃႇယဝ်ႉၼၼ်ႉ၊ ထႃႇဝရႃႉၽြႃး၊ ယင်းဢမ်ႇဢဝ်ၶဝ်ၵႂႃႇၸွမ်းသဵၼ်ႈတၢင်းဢၼ်လတ်းၶဝ်ႈမိူင်း ၽိလိတ်ႉတိ၊ ၼၼ်ႉ။ ပိၵ်ႉသမ်ႉမၼ်းပဵၼ်တၢင်းလတ်းသေၵေႃႈ ထႃႇဝရႃႉၽြႃး၊ ထၢင်ႇၼႂ်းၸႂ်ဝႃႈ၊ “ၵူၼ်းၸိူဝ်းၼၼ်ႉပေႃးၶဝ်ထူပ်းၼႃႈသိုၵ်းၸိုင်၊ၶဝ်တၵ်းၸႂ်လုလႄႈ၊ၵူဝ်ၶဝ်ၶိုၼ်းပွၵ်ႈမိူဝ်းမိူင်း ဢေးၵျိပ်ႉ၊ ၵႂႃႇဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၽြႃးပဵၼ်ၸဝ်ႈဢွၼ်ၶဝ်လဵပ်ႈၵႂႃႇၼႂ်းတၢင်းထိူၼ်ႇလႅင်ႉ ၸွမ်းႁိမ်း ပၢင်ႇလၢႆႇလႅင်၊ ဢေႃႈ။ ၵူၼ်းမဵဝ်း ဢိသရေး၊ ၸိူဝ်းၼၼ်ႉႁၢင်ႈႁႅၼ်းႁဵတ်းပဵၼ်တပ်ႉပဵၼ်ငႃးသေလႄႈဢွၵ်ႇၵႂႃႇဢေႃႈ။
မူဝ်းသေႇ၊ ဢဝ်လုပ်ႇ ယူဝ်းသႅပ်ႈ၊ ပႃးၸွမ်းမၼ်းၵႂႃႇ၊ၵွပ်ႈပိူဝ်ႈ ယူဝ်းသႅပ်ႈ၊ ႁႂ်ႈၵူၼ်းမဵဝ်း ဢိသရေး၊ တင်းလၢႆတိူင်ႇၵၢဝ်ႇဝႆႉတိတႄႉတႄႉဝႃႈဝႃႈလႄႈဝႃႈ၊ “ၼႂ်းမိူဝ်ႈဢၼ်ၽြႃးပဵၼ်ၸဝ်ႈၵႄႇၼုၵ်ႈဢဝ်ၶဝ်ဢွၵ်ႇၵႂႃႇၸိုင်၊ၶဝ်တၵ်းလႆႈဢဝ်ပႃးလုပ်ႇမၼ်းဢွၵ်ႇသေၵႃႈတီႈၼႆႈၵႂႃႇၸွမ်းၶဝ်ၼၼ်ႉဢေႃႈ၊” ဝႃႈၼင်ႇၼႆဝႆႉၼၼ်ႉဢေႃႈ။
ၵူၼ်းမဵဝ်း ဢိသရေး၊ ၸိူဝ်းၼၼ်ႉဢွၵ်ႇသေၵႃႈတီႈဢိူင်ႇ သုၵုတ်ႉ၊ ၵႂႃႇလႄႈၶျႃးပၢင်ၵႃႈတီႈဝဵင်း ဢေးႀမ်ႇ၊ ၵႃႈႁိမ်းလႅၼ်လိၼ်ထိူၼ်ႇလႅင်ႉဢေႃႈ။-
ထႃႇဝရႃႉၽြႃး၊ ၵေႃႈ၊ၼႂ်းၶိင်ႇၵၢင်ဝၼ်းၸိုင်၊ဢဝ်သဝ်မွၵ်ႇၵုမ်ႈၵႂႃႇပႃႈၼႃႈၶဝ်၊ပုၼ်ႈဢၼ်တၵ်းၼႄတၢင်းၶဝ်ဢေႃႈ။ ၼႂ်းၶိင်ႇၵၢင်ၶိုၼ်းၸမ်ႉ၊ဢဝ်သဝ်ၽႆးၵႂႃႇပႃႈၼႃႈၶဝ်၊ပုၼ်ႈဢၼ်တၵ်းပၼ်ဢၼ်လႅင်းၶဝ်ဢေႃႈ။ ပိူဝ်ႈၼႆလႄႈၶဝ်ၸၢင်ႈၵႂႃႇၼႂ်းၶိင်ႇၵၢင်ဝၼ်းဢိၵ်ႇတင်းၼႂ်းၶိင်ႇၵၢင်ၶိုၼ်းဢေႃႈ။-
သဝ်မွၵ်ႇၵုမ်ႈဢွၼ်ႁူဝ်ၼႄတၢင်းၶဝ်ၼႂ်းၶိင်ႇၵၢင်ဝၼ်းလႄႈ၊သဝ်ၽႆးသမ်ႉဢွၼ်ႁူဝ်ၼႄတၢင်းၶဝ်ၼႂ်းၶိင်ႇၵၢင်ၶိုၼ်းၸိူဝ်ႉၼင်ႇၼႆဢမ်ႇထၢတ်ႇဢမ်ႇသဝ်းသေၵႃႈတီႈၵူၼ်းၸိူဝ်းၼၼ်ႉသေပွၵ်ႈဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ လၢတ်ႈတီႈ မူဝ်းသေႇ၊ လႄႈဝႃႈ၊-
“သင်ႇလၢတ်ႈၵူၼ်းမဵဝ်း ဢိသရေး၊ တင်းလၢႆႁႂ်ႈၶဝ်ဝၢႆႇၶိုၼ်းလႄႈၵႂႃႇၶျႃးပၢင်ၵႃႈတီႈၽၢႆႇၼႃႈဝဵင်း ပိႁႁိရုတ်ႉ၊ ဢၼ်မီးဝူင်ႈၵၢင်ဝဵင်း မိၵတေႃးလႃႉ၊ တင်း ပၢင်ႇလၢႆႇလႅင်၊ ၵႃႈႁိမ်း ပႃႇလႃႇၸေႇၽုၼ်ႇ၊ ၼၼ်ႉတႃႉ။ သူတၵ်းလႆႈၶျႃးပၢင်ၵႃႈႁိမ်းပၢင်ႇလၢႆႇတေႃႇၼႃႈၵၼ်တင်းဝဵင်းၼၼ်ႉဢေႃႈ။-
ၶုၼ်ႁေႃၶမ်းတၵ်းထၢင်ႇၵႃႈၼႂ်းၸႂ်မၼ်းလႄႈဝႃႈ၊ ‘ၵူၼ်းမဵဝ်း ဢိသရေး၊ ၶဝ်ႁွတ်ႈထိုင်ၵႃႈတီႈၵိတ်ႇတီႈၵႅၼ်းယဝ်ႉ။ ထိူၼ်ႇလႅင်ႉၵေႃႈႁႄႉဢိုတ်းၶဝ်ဝႆႉယဝ်ႉ၊’ ဝႃႈၼင်ႇၼႆဢေႃႈ။-
ၵဝ်သမ်ႉတၵ်းႁႂ်ႈႁူဝ်ၸႂ်မၼ်းတိုဝ်တၼ်လႄႈ၊မၼ်းတၵ်းလိုပ်ႈလမ်းၸွမ်းသူဢေႃႈ။ ၼင်ႇၼၼ်လႄႈတၢင်းဢၼ်ၵဝ်ပႄႉၼႅင်ႇၶုၼ်ႁေႃၶမ်းဢိၵ်ႇတင်းၵူၼ်းသိုၵ်းမၼ်းတင်းလၢႆၼၼ်ႉတၵ်းႁဵတ်းႁႂ်ႈမုၼ်ၽုင်းၵဝ်ပေႃႇဢွၵ်ႇထၢင်ႇသႃးဢေႃႈ။ မိူဝ်ႈၼၼ်ႉၵူၼ်းမဵဝ်း ဢေးၵျိပ်ႉ၊ ၶဝ်၊တၵ်းလႆႈႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။ ၵူၼ်းမဵဝ်း ဢိသရေး၊ ၸိူဝ်းၼၼ်ႉၵေႃႈဢွၼ်ၵၼ်ႁဵတ်းၸွမ်းဢေႃႈ။
မိူဝ်ႈပိူၼ်ႈလဝ်ႈလၢတ်ႈတီႈၶုၼ်ႁေႃၶမ်းမိူင်း ဢေးၵျိပ်ႉ၊ လွင်ႈဢၼ်ၵူၼ်းၸိူဝ်းၼၼ်ႉဢွၵ်ႇပၢႆႈလွတ်ႈၵႂႃႇယဝ်ႉၼၼ်ႉၸိုင်၊ၶုၼ်ႁေႃၶမ်းဢိၵ်ႇတင်းမူးမၢတ်ႈၽွင်းမိူင်းမၼ်းၸိူဝ်းၼၼ်ႉၸႂ်ၶဝ်လႆႈပိၼ်ႇလႆႈလႅၵ်ႈလၢႆႈတေႃႇၵူၼ်းၸိူဝ်းၼၼ်ႉသေလႄႈလၢတ်ႈဝႃႈ၊ “ႁဝ်းၼႆႉပဵၼ်ၸိူဝ်ႉႁိုဝ်ၵႂႃႇယဝ်ႉ။ ႁဝ်းပွႆႇႁႂ်ႈၵူၼ်းမဵဝ်း ဢိသရေး၊ ၶဝ်လွတ်ႈၵႂႃႇလႄႈ၊ႁဝ်းလႆႈသုမ်းပႅတ်ႈတၢင်းဢၼ်ႁႂ်ႈၶဝ်မႃးပဵၼ်ၶႃႈႁဝ်းၼၼ်ႉၵႂႃႇယဝ်ႉ၊” ဝႃႈၼင်ႇၼႆဢေႃႈ။-
ၶုၼ်ႁေႃၶမ်းၼၼ်ႉၸင်ႇႁၢင်ႈႁႅၼ်းလေႃႉမႃႉမၼ်းဢိၵ်ႇတင်းတပ်ႉသိုၵ်းမၼ်းဢေႃႈ။-
မၼ်းဢဝ်တပ်ႉလေႃႉမႃႉမၼ်းၵႃႈမီးတင်းသဵင်ႈတင်းလူင်ဢၼ်ၶဝ်ႈပႃးတင်းတပ်ႉလေႃႉမႃႉ ဢၼ်ၵတ်ႉဢၼ်ၶႅၼ်ႇၼႃႇၼၼ်ႉႁူၵ်းပၢၵ်ႇလႄႈႁႂ်ႈၶုၼ်သိုၵ်းၽႂ်ၶုၼ်သိုၵ်းမၼ်းဢုပ်ႉထိင်းသေယဝ်ႉ၊ၶီႇသိုၵ်းၶိုၼ်ႈၵႂႃႇဢေႃႈ။-
ထႃႇဝရႃႉၽြႃး၊ ႁႂ်ႈႁူဝ်ၸႂ်ၶုၼ်ႁေႃၶမ်းၼၼ်ႉတိုဝ်တၼ်လႄႈလိုပ်ႈလမ်းၸွမ်းၵူၼ်းမဵဝ်း ဢိသရေး၊ ၵႂႃႇသေၵေႃႈၵူၼ်းမဵဝ်း ဢိသရေး၊ ၸိူဝ်းၼႆႉၵႂႃႇလူင်ႉလီလွတ်ႈလီယူႇဢေႃႈ။-
တပ်ႉသိုၵ်းၵူၼ်းမဵဝ်း ဢေးၵျိပ်ႉ၊ ၶဝ်ဢၼ်ပႃးၸႃႉၸဵမ်တပ်ႉသိုၵ်းလႄႈတပ်ႉသိုၵ်းမႃႉ၊လေႃႉမႃႉသိုၵ်း၊ဢိၵ်ႇတင်းၵူၼ်းႁေႃႈလေႃႉမႃႉသိုၵ်းၸိူဝ်းၼၼ်ႉလိုပ်ႈလမ်းၸွမ်းၵႂႃႇၶိုတ်းၶဝ်၊တီႈဢၼ်ၶဝ်ၶျႃးပၢင်ယူႇၵႃႈႁိမ်း ပၢင်ႇလၢႆႇလႅင်၊ ႁိမ်းဝဵင်း ပိႁႁိရုတ်ႉ၊ ၵႃႈတီႈၼႃႈဝၼ်းဢွၵ်ႇဝဵင်း ပႃႇလႃႇၸေႇၽုၼ်ႇ၊ ၼၼ်ႉဢေႃႈ။
မိူဝ်ႈဢၼ်ၵူၼ်းမဵဝ်း ဢိသရေး၊ ၶဝ်မုင်ႈႁၼ်ၶုၼ်ႁေႃၶမ်းဢိၵ်ႇတင်းတပ်ႉသိုၵ်းမၼ်းၶီႇသိုၵ်းၶိုၼ်ႈမႃးၸူးၶဝ်ယူႇၼၼ်ႉၸိုင်၊ၶဝ်ၵူဝ်ႁႄၼႃႇလူင်လၢင်လႄႈ ဢွၼ်ၵၼ်ႁွင်ႉသႅၼ်ႇလဝ်ႈယွၼ်းတၢင်းဢၼ်ၸွႆႈဢၼ်ထႅမ်တီႈ ထႃႇဝရႃႉၽြႃး၊ ဢေႃႈ။-
ၶဝ်လၢတ်ႈတီႈ မူဝ်းသေႇ၊ လႄႈဝႃႈ၊ “ၵႃႈၼႂ်းမိူင်း ဢေးၵျိပ်ႉ၊ ၼၼ်ႉဢမ်ႇမီးပႃႇႁဵဝ်ႈလႄႈမႂ်းၸင်ႇဢဝ်ႁဝ်းမႃးႁႂ်ႈလႆႈတၢႆၵႃႈၼႂ်းထိူၼ်ႇလႅင်ႉၼႆႉႁိုဝ်း။ တၢင်းဢၼ်မႂ်းဢဝ်ႁဝ်းဢွၵ်ႇမိူင်း ဢေးၵျိပ်ႉ၊ မႃးၼႆႉပဵၼ်ၸိူဝ်ႉႁိုဝ်ဝႆႉ၊မႂ်းႁၼ်ယဝ်ႉႁိုဝ်း။-
ၸူဝ်ႈဢၼ်ႁဝ်းဢမ်ႇပႆႇဢွၵ်ႇမႃးၼၼ်ႉဢၼ်ႁဝ်းလႆႈလၢတ်ႈတီႈမႂ်းၼၼ်ႉပဵၼ်ဢၼ်ၼႆႉယဝ်ႉ။ ႁဝ်းလၢတ်ႈဝႃႈ၊ ‘ပွႆႇႁဝ်းတႃႉ။ ႁႂ်ႈႁဝ်းလႆႈၶၢမ်ႇပဵၼ်ၶႃႈၵႃႈတီႈၵူၼ်းမိူင်း ဢေးၵျိပ်ႉ၊ ၼႆႉတႃႉ၊’ ဝႃႈၼႆယဝ်ႉဢမ်ႇၸႂ်ႈႁိုဝ်း။ တၢင်းဢၼ်လႆႈၶၢမ်ႇပဵၼ်ၶႃႈၵႃႈတီႈၵူၼ်းမိူင်း ဢေးၵျိပ်ႉ၊ ၼၼ်ႉယဵင်ႈၶႅၼ်းလီၼႃႇသေတၢင်းဢၼ်ႁဝ်းတၵ်းလႆႈတၢႆၼႂ်းထိူၼ်ႇလႅင်ႉၼႆႉဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈၶိုၼ်းလၢတ်ႈတီႈၵူၼ်းၸိူဝ်းၼၼ်ႉလႄႈဝႃႈ၊ “ယႃႇပေၵူဝ်ပေႁႄ။ ဢွၼ်ၵၼ်ဝႆႉၸႂ်ၼိမ်ၼိမ်တႃႉ။ သူတၵ်းလႆႈႁၼ် ထႃႇဝရႃႉၽြႃး၊ ႁဵတ်းၸိူဝ်ႉၼင်ႇႁိုဝ်ၵႄႇၼုၵ်ႈဢဝ်သူၼၼ်ႉၼႂ်းဝၼ်းမိူဝ်ႈၼႆႉဢေႃႈ။ ၵမ်းလိုၼ်း၊သူတၵ်းဢမ်ႇလႆႈႁၼ်ၵူၼ်းမဵဝ်း ဢေးၵျိပ်ႉ၊ ၶဝ်ထႅင်ႈသေပွၵ်ႈယဝ်ႉ။-
ထႃႇဝရႃႉၽြႃး၊ တၵ်းတိုၵ်းသိုၵ်းပုၼ်ႈသူဢေႃႈ။ သူတၵ်းလႆႈဢွၼ်ၵၼ်ယူႇၼိမ်ၼိမ်ဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ လၢတ်ႈတီႈ မူဝ်းသေႇ၊ လႄႈဝႃႈ၊ “ႁဵတ်းသင်လႄႈမႂ်းႁွင်ႉသႅၼ်ႇတီႈၵဝ်ၸိူဝ်ႉၼင်ႇႁိုဝ်။ သင်ႇလၢတ်ႈႁႂ်ႈၶဝ်ၶိုၼ်ႈၵႂႃႇတၢင်းၼႃႈတိၵ်းတိၵ်းတႃႉ။-
ယုၵ်ႉၶွၼ်ႉတဝ်ႉမႂ်းယိုၼ်းၵႃႈၼိူဝ်ၼမ်ႉပၢင်ႇလၢႆႇတႃႉ။ ၼႃႈၼမ်ႉပၢင်ႇလၢႆႇတၵ်းၽႃႇတႅၵ်ႇပဵၼ်သွင်ၽၢၵ်ႇၵႂႃႇလႄႈၵူၼ်းမဵဝ်း ဢိသရေး၊ တင်းလၢႆတၵ်းလႆႈပႆၽႃႇလတ်းပၢင်ႇလၢႆႇၵႂႃႇၵႃႈၼိူဝ်လိၼ်ႁႅင်ႈဢေႃႈ။-
ၵဝ်သမ်ႉတၵ်းႁႂ်ႈႁူဝ်ၸႂ်ၵူၼ်းမဵဝ်း ဢေးၵျိပ်ႉ၊ ၶဝ်တိုဝ်တၼ်လႄႈဢွၼ်ၵၼ်လမ်းၸွမ်းၶဝ်ၵႂႃႇသေယဝ်ႉ၊မုၼ်ၽုင်းၵဝ်တၵ်းပေႃႇဢွၵ်ႇထၢင်ႇသႃးမႃးၵွပ်ႈပိူဝ်ႈၵဝ်လႆႈပႄႉၼႅင်ႇၵႃႈၼိူဝ်ၸႃႉၸဵမ်ၶုၼ်ႁေႃၶမ်းၼၼ်ႉလႄႈတပ်ႉသိုၵ်းမၼ်း၊လေႃႉမႃႉသိုၵ်းမၼ်းတင်းလၢႆ၊ဢိၵ်ႇတင်းၵူၼ်းသိုၵ်းၶီႇမႃႉမၼ်းၸိူဝ်းၼၼ်ႉဢေႃႈ။-
မိူဝ်ႈဢၼ်ၵဝ်ပႄႉၼႅင်ႇၶဝ်ယဝ်ႉၼၼ်ႉၸိုင်၊ၵူၼ်းမဵဝ်း ဢေးၵျိပ်ႉ၊ တင်းလၢႆတၵ်းလႆႈႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈဢၼ်ၵႂႃႇဢွၼ်တၢင်းတပ်ႉသိုၵ်းမဵဝ်း ဢိသရေး၊ ၶဝ်ၼၼ်ႉ၊ၵႂႃႇယူႇၽၢႆႇတၢင်းလင်ၶဝ်သေဢေႃႈ။ သဝ်မွၵ်ႇၵုမ်ႈၼၼ်ႉၵေႃႈၶၢႆႉသေၵႃႈတီႈၽၢႆႇတၢင်းၼႃႈၶဝ်ၵႂႃႇတင်ႈယူႇၽၢႆႇတၢင်းလင်ၶဝ်ၼင်ႇၵဝ်ႇသေယဝ်ႉ၊-
တင်ႈယူႇၵႃႈတီႈဝူင်ႈၵၢင်တပ်ႉၵူၼ်းမဵဝ်း ဢေးၵျိပ်ႉ၊ တင်းတပ်ႉၵူၼ်းမဵဝ်း ဢိသရေး၊ ၶဝ်သေလႄႈ၊ပဵၼ်မွၵ်ႇၵုမ်ႈဢၼ်လပ်းသိင်ႇတီႈၵူၼ်းမဵဝ်း ဢေးၵျိပ်ႉ၊ တင်းလၢႆလႄႈသမ်ႉပၼ်တၢင်းဢၼ်လႅင်းတီႈၵူၼ်းမဵဝ်း ဢိသရေး၊ ၶဝ်ဢေႃႈ။ ႁဵတ်းၼၼ်လႄႈ၊တင်းၶိုၼ်းတပ်ႉၼိုင်ႈလႄႈတပ်ႉၼိုင်ႈဢမ်ႇမႃးၵႂ်ႈမႃးၸမ်ၵၼ်လႆႈဢေႃႈ။
မူဝ်းသေႇ၊ ၵေႃႈယိုၼ်းမိုဝ်းမၼ်းၵႃႈၼိူဝ်ၼမ်ႉပၢင်ႇလၢႆႇလႄႈ၊ ထႃႇဝရႃႉၽြႃး၊ ဢဝ်လူမ်းတၢင်းဝၼ်းဢွၵ်ႇဢၼ်ႁႅင်းယႂ်ႇၼႃႇထူဝ်းပတ်ႉၼမ်ႉပၢင်ႇလၢႆႇတင်းၶိုၼ်းလႄႈႁႂ်ႈၼႃႈၼမ်ႉၽႄတႅၵ်ႇဢႃႈဢွၵ်ႇၵႂႃႇလႄႈလိၼ်ႁႅင်ႈပေႃႇဢွၵ်ႇမႃးၵႃႈၼႂ်းၼမ်ႉပၢင်ႇလၢႆႇဢေႃႈ။-
ၵူၼ်းမဵဝ်း ဢိသရေး၊ တင်းလၢႆ ဢွၼ်ၵၼ်ပႆၽႃႇလတ်းၶဝ်ႈၵႃႈၼႂ်းဝူင်ႈၵၢင်ပၢင်ႇလၢႆႇၵႂႃႇၵႃႈၼိူဝ်လိၼ်ႁႅင်ႈ၊ၼမ်ႉပၢင်ႇလၢႆႇၼၼ်ႉ မိူၼ်ၸိူဝ်ႉၼင်ႇၽႃႁိၼ်ၽၢႆႇသၢႆႉၽၢႆႇၶႂႃတင်းသွင်ၽၢႆႇဢေႃႈ။-
ၵူၼ်းမဵဝ်း ဢေးၵျိပ်ႉ၊ တင်းလၢႆ၊ဢၼ်ပဵၼ်ၸႃႉၸဵမ်တပ်ႉမႃႉၶဝ်လႄႈလေႃႉမႃႉသိုၵ်းဢိၵ်ႇတင်းၵူၼ်းႁေႃႈလေႃႉမႃႉသိုၵ်းၶဝ်တင်းသဵင်ႈတင်းလူင်ဢွၼ်ၵၼ်လိုပ်ႈလမ်းၶဝ်ၶဝ်ႈၸွမ်းၵႃႈၼႂ်းၵႄႈဝူင်ႈၵၢင်ၼမ်ႉပၢင်ႇလၢႆႇၵႂႃႇဢေႃႈ။-
ၶိင်ႇႁူဝ်ၼႂ် ထႃႇဝရႃႉၽြႃး၊ ယူႇၵႃႈတီႈသဝ်ၽႆးမွၵ်ႇၵုမ်ႈၼၼ်ႉသေလႄႈလူတူၺ်းတပ်ႉၵူၼ်းမဵဝ်း ဢေးၵျိပ်ႉ၊ ၶဝ်လႄႈယႃႉယူၵ်ႉၶဝ်ဢေႃႈ။-
မၼ်းၸဝ်ႈႁႂ်ႈမၢၵ်ႇလေႃႉၶဝ်၊လူမ်ႇယူႇၶမ်ယူႇႁႂ်ႈၶဝ်ႁေႃႈလေႃႉမႃႉသိုၵ်းၶဝ်ယၢပ်ႇယဵၼ်းၼႃႇလူင်လၢင်ဢေႃႈ။ ၵူၼ်းမဵဝ်း ဢေးၵျိပ်ႉ၊ ၸိူဝ်းၼၼ်ႉၵေႃႉၼိုင်ႈလႄႈၵေႃႉၼိုင်ႈထၢၼ်ႈပေႃးလၢတ်ႈတီႈၵၼ်လႄႈဝႃႈ၊ “ ထႃႇဝရႃႉၽြႃး၊ ယူႇၽၢႆႇၶဝ်လႄႈတိုၵ်းတေႃးႁဝ်းယဝ်ႉ။ ဢွၵ်ႇပၢႆႈသေၵႃႈတီႈၼႆႈၵႂႃႇတႃႉႁဝ်း၊” ဝႃႈၼင်ႇၼႆဢေႃႈ။
ၵမ်းၼၼ်ႉ၊ ထႃႇဝရႃႉၽြႃး၊ လၢတ်ႈတီႈ မူဝ်းသေႇ၊ လႄႈဝႃႈ၊ “ၶိုၼ်းယိုၼ်းမိုဝ်းမႂ်းၵႃႈၼိူဝ်ပၢင်ႇလၢႆႇတႃႉ။ ၼမ်ႉတၵ်းၶိုၼ်းလုပ်ႇမႃးၵႃႈၼိူဝ်ၵူၼ်းမဵဝ်း ဢေးၵျိပ်ႉ၊ တင်းလၢႆၸႃႉၸဵမ်လေႃႉမႃႉသိုၵ်းၶဝ်လႄႈၵူၼ်းႁေႃႈလေႃႉမႃႉသိုၵ်းၶဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ မူဝ်းသေႇ၊ ယိုၼ်းမိုဝ်းမၼ်းၶိုၼ်ႈၵႃႈၼိူဝ်ပၢင်ႇလၢႆႇသေယဝ်ႉ၊မိူဝ်ႈဢၼ်မိူင်းလႅင်းမႃးၼၼ်ႉၸိုင်၊ၼမ်ႉပၢင်ႇလၢႆႇၶိုၼ်းလုပ်ႇမႃးမိူၼ်ၵဝ်ႇဢေႃႈ။ ၵူၼ်းမဵဝ်း ဢေးၵျိပ်ႉ၊ ၸိူဝ်းၼၼ်ႉဢွၼ်ၵၼ်လႅၼ်ႈပၢႆႈသေၵေႃႈ၊ ထႃႇဝရႃႉၽြႃး၊ ႁဵတ်းႁႂ်ႈၶဝ်လူမ်ႉတူၵ်းပႅတ်ႈၵႃႈၼႂ်းၼမ်ႉပၢင်ႇလၢႆႇသေဢေႃႈ။-
ႁဵတ်းၼၼ်လႄႈ၊ၼမ်ႉပၢင်ႇလၢႆႇၶိုၼ်းလုပ်ႇမႃးလႄႈထူမ်ႈၸႃႉၸဵမ်လေႃႉမႃႉသိုၵ်းလႄႈၵူၼ်းႁေႃႈလေႃႉမႃႉသိုၵ်းတင်းလၢႆဢိၵ်ႇတင်းတပ်ႉသိုၵ်းမဵဝ်း ဢေးၵျိပ်ႉ၊ ၶဝ်ၸိူဝ်းဢၼ်လိုပ်ႈလမ်းၵူၼ်းမဵဝ်း ဢိသရေး၊ လႄႈၶဝ်ႈၸွမ်းၵႂႃႇၵႃႈၼႂ်းၼမ်ႉပၢင်ႇလၢႆႇၼၼ်ႉတင်းသဵင်ႈတင်းမူတ်းတေႃႇထိုင်ႁွတ်ႈဢမ်ႇၵိုတ်းဢမ်ႇၵျၢၼ်ႇသေၵေႃႉသေၵူၼ်းဢေႃႈ။-
ၵူၼ်းမဵဝ်း ဢိသရေး၊ တင်းလၢႆၸမ်ႉ၊ပႆၽႃႇလတ်းပၢင်ႇလၢႆႇၵႂႃႇၵႃႈၼိူဝ်လိၼ်ႁႅင်ႈလႄႈၼမ်ႉပၢင်ႇလၢႆႇၼၼ်ႉပဵၼ်မိူၼ်ၽႃမၢၵ်ႇႁိၼ်ဢၼ်ၵင်ႈယူႇၽၢႆႇတၢင်းသၢႆႉၽၢႆႇတၢင်းၶႂႃၶဝ်ၼၼ်ႉဢေႃႈ။
ၼႂ်းဝၼ်းၼၼ်ႉ၊ ထႃႇဝရႃႉၽြႃး၊ ထုတ်ႇၼုၵ်ႈဢဝ်ၵူၼ်းမဵဝ်း ဢိသရေး၊ လွတ်ႈသေၵႃႈတီႈၵူၼ်းမဵဝ်း ဢေးၵျိပ်ႉ၊ လႄႈ၊ၵူၼ်းမဵဝ်း ဢိသရေး၊ ၸိူဝ်းၼၼ်ႉလႆႈႁၼ်တူဝ်တၢႆၵူၼ်းမဵဝ်း ဢေးၵျိပ်ႉ၊ တင်းလၢႆၵႃႈတီႈႁိမ်းၽင်ႇပၢင်ႇလၢႆႇဢေႃႈ။-
မိူဝ်ႈဢၼ်ၵူၼ်းမဵဝ်း ဢိသရေး၊ ၸိူဝ်းၼၼ်ႉလႆႈႁၼ်တၼ်းၶူဝ်းဢၼ်ယႂ်ႇၼႃႇတၢင်းဢၼ် ထႃႇဝရႃႉၽြႃး၊ ပႄႉၼႅင်ႇၵူၼ်းမဵဝ်း ဢေးၵျိပ်ႉ၊ ၶဝ်ၼၼ်ႉၸိုင်၊ၶဝ်ၵူဝ်ႁႄ ထႃႇဝရႃႉၽြႃး၊ ဢေႃႈ။ ၶဝ်ဢွၼ်ၵၼ်ယုမ်ႇမၢတ်ႈ ထႃႇဝရႃႉၽြႃး၊ ဢိၵ်ႇတင်း မူဝ်းသေႇ၊ ဢၼ်ပဵၼ်ၶႃႈမၼ်းၸဝ်ႈၼၼ်ႉဢေႃႈ။
မိူဝ်ႈၼၼ်ႉ၊ မူဝ်းသေႇ၊ ဢိၵ်ႇတင်းၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ႁဵတ်းၵႂၢမ်းယွင်ႈယေႃးတီႈ ထႃႇဝရႃႉၽြႃး၊ လႄႈဝႃႈၸမ်ႉ၊ “ၵဝ်တၵ်းႁဵတ်းၵႂၢမ်းယွင်ႈယေႃးတီႈ ထႃႇဝရႃႉၽြႃး၊ ၵွပ်ႈပိူဝ်ႈမၼ်းၸဝ်ႈမႃးပႄႉၼႅင်ႇလူၺ်ႈမုၼ်ယႂ်ႇမုၼ်သုင်၊ မၼ်းၸဝ်ႈႁႂ်ႈမႃႉတင်းၵူၼ်းသိုၵ်းၶီႇမႃႉတင်းသဵင်ႈတင်းလူင်၊ၸူမ်ၼမ်ႉတၢႆၼႂ်းပၢင်ႇလၢႆႇဢေႃႈ။
ထႃႇဝရႃႉၽြႃး၊ ပဵၼ်ၸဝ်ႈဢဵၼ်ႁႅင်းဢၼ်ႁႄႉၵင်ႈပၼ်ၵဝ်၊ပဵၼ်ၸဝ်ႈဢၼ်ၵႄႇၶျွတ်ႈၵဝ်ဢေႃႈ။ မၼ်းၸဝ်ႈပဵၼ်ၽြႃးပဵၼ်ၸဝ်ႈၵဝ်လႄႈၵဝ်တၵ်းယွင်ႈယေႃးမၼ်းၸဝ်ႈ၊ မၼ်းၸဝ်ႈပဵၼ်ၽြႃး၊ပဵၼ်ၸဝ်ႈပေႃႈၵဝ်လႄႈၵဝ်တၵ်းႁဵတ်းၵႂၢမ်းယွင်ႈယေႃးလွင်ႈဢၼ်မၼ်းၸဝ်ႈယႂ်ႇမျၢတ်ႈၼၼ်ႉဢေႃႈ။
ထႃႇဝရႃႉၽြႃး၊ ပဵၼ်ႁူဝ်ႁၢၼ်တပ်ႉသိုၵ်းတပ်ႉငႃး၊ ၸိုဝ်ႈသဵင်ႁွင်ႉဝႃႈ၊ ထႃႇဝရႃႉၽြႃး၊ တီႈၶႃႈဢေႃႈ။
မၼ်းၸဝ်ႈတဵၵ်းၸူမ်တပ်ႉသိုၵ်းမဵဝ်း ဢေးၵျိပ်ႉ၊ တင်းလေႃႉမႃႉသိုၵ်းတင်းလၢႆၵႃႈၼႂ်းၼမ်ႉပၢင်ႇလၢႆႇ၊ ၶုၼ်သိုၵ်းႁၢၼ်ဢၼ်ၵတ်ႉၶႅၼ်ႇလႆႈၸူမ်ၼႂ်း ပၢင်ႇလၢႆႇလႅင်၊ တၢႆယဝ်ႉယဝ်ႉ။
ပၢင်ႇလၢႆႇလိုၵ်ႉၼၼ်ႉထူမ်ႈလႄႈဢိုၼ်ၶဝ်ပႅတ်ႈ၊ ၶဝ်လႆႈလူင်းထိုင်ပိုၼ်ႉမိူၼ်မၢၵ်ႇႁိၼ်ဢၼ် ၸူမ်ယဝ်ႉယဝ်ႉ။
ဢူဝ်း၊ ထႃႇဝရႃႉၽြႃး၊ မိုဝ်းၶွၼ်ၶႂႃၸဝ်ႈႁႅင်းယႂ်ႇလႄႈမုၼ်ၽုင်းယႂ်ႇၼႃႇလူင်လၢင်၊ မိုဝ်းၶွၼ်ၶႂႃၸဝ်ႈဢဝ်ရၢၼ်ႇသူႇတင်းလၢႆ ႁၵ်းႁိၵ်းယႃႉလုလႅဝ်တီႈၶႃႈဢေႃႈ။
တီႈရၢၼ်ႇသူႇဢၼ်ၶတ်းၶဵင်ႇႁႅင်းတႃႉၼၼ်ႉ ၸဝ်ႈႁဝ်းဢီးလူမ်ႉလူၺ်ႈမုၼ်တၼ်းၶူဝ်း ဢၼ်ႁိူဝ်ႈႁိူင်း၊ ၸဝ်ႈႁဝ်းပွႆႇတၢင်းၸႂ်မႆႈၶႂ်ႈၸႃႉဢၼ်မိူၼ်ၽႆးမႆႈ ၶဝ်မိူၼ်ၽႆးမႆႈၽိူင်းယဝ်ႉတီႈၶႃႈဢေႃႈ။
လူမ်းၶူႈလင်ၸဝ်ႈပဝ်ႇၼမ်ႉၸိူဝ်းၼၼ်ႉ၊ ႁႂ်ႈပဵၼ်ၵွင်ပဵၼ်ႁွၼ်၊ၼမ်ႉဢၼ်လႆယူႇ ပဵၼ်ၸဵၼ်ပဵၼ်ၸွၼ်၊ ၼမ်ႉဢၼ်လိုၵ်ႉပၢင်ႇလၢႆႇႁႂ်ႈပဵၼ်ၵွၼ်ႈပဵၼ်လွၼ်တီႈၶႃႈဢေႃႈ။
ရၢၼ်ႇသူႇလၢတ်ႈဝႃႈ၊ ‘ၵဝ်တၵ်းလိုပ်ႈလမ်းၸွမ်းၶဝ်လႄႈတၵ်းၶိုတ်းတၵ်းတၼ်းဢေႃႈ။ ၵဝ်တၵ်းၽႄပႅတ်ႈဢုၵ်ႉၸႃႇၶဝ်လႄႈၵႃႈဢၼ်ၵဝ်ၶႂ်ႈလႆႈၵဝ်တၵ်းႁိမ်ႁူင်ႇဢဝ်၊ ၵဝ်တၵ်းထွတ်ႇလၢပ်ႇလႄႈယႃႉၽဵဝ်ႈပႅတ်ႈၵႃႈဢၼ်ၶဝ်မီးၼၼ်ႉဢိူဝ်း၊’ ဝႃႈၼင်ႇၼႆဢေႃႈ။
ၵူၺ်းၵႃႈ၊ ထႃႇဝရႃႉၽြႃး၊ တီႈၶႃႈ၊ၸဝ်ႈႁဝ်းပဝ်ႇလူမ်းသႂ်ႇၶဝ်ငၢႆႈငၢႆႈ၊ ၵူၼ်းမဵဝ်း ဢေးၵျိပ်ႉ၊ တင်းလၢႆလႆႈၸူမ်ၼမ်ႉတၢႆ၊ တူၵ်းလူင်းမိူၼ်ၼင်ႇၸိုၼ်းၵႃႈၼႂ်းၼမ်ႉၸႅဝ်ႈလႄႈၸူမ်ႁၢႆယဝ်ႉယဝ်ႉ။
ထႃႇဝရႃႉၽြႃး၊ တီႈၶႃႈ၊ၼႂ်းၽြႃးတင်းလၢႆမီးၽြႃးသူႇလႂ်မိူၼ်ၸဝ်ႈႁဝ်းလႆႈတီႈၶႃႈ။ မီးၽြႃးသူႇလႂ်မိူၼ်ၸဝ်ႈႁဝ်းလႆႈၼႂ်းမုၼ်တၼ်းၶူဝ်းဢၼ်မူတ်းၸၢင်ႇၼၼ်ႉတီႈၶႃႈ။ မီးၽြႃးသူႇလႂ်ထိူၵ်ႈလႆႈၵူဝ်ႁႄၼႂ်းတၢင်းႁဵတ်းဢၼ်မုၼ်ၽုင်းယႂ်ႇလႄႈ သမ်ႉၸၢင်ႈႁဵတ်းတၢင်းဢၼ်လီဢၢမ်းတင်းလၢႆၼၼ်ႉလႆႈတီႈၶႃႈ။
ၸဝ်ႈႁဝ်းၵူၺ်းဢဝ်တင်းမိုဝ်းၶွၼ်ၶႂႃ ယဵတ်ႇယိုၼ်းလႄႈ၊ ရၢၼ်ႇသူႇတင်းလၢႆလႆႈၶၢမ်ႇလိၼ်မိူင်း ဢိုၼ်ပႅတ်ႈတီႈၶႃႈယဝ်ႉ။
လူၺ်ႈတၢင်းႁၵ်ႉမႅတ်ႈတႃႇၸဝ်ႈႁဝ်းဢၼ် တႄႇမၼ်ႈယူႇ၊ ၸဝ်ႈႁဝ်းဢွၼ်သူင်ႇၵူၼ်းမဵဝ်းဢၼ်ၸဝ်ႈႁဝ်းထုတ်ႇၼုၵ်ႈဢဝ်ဝႆႉၼၼ်ႉသေလႄႈ ဢဝ်တင်းႁႅင်းတၼ်းၶူဝ်းၸဝ်ႈႁဝ်းၸိၼႄတၢင်းၵႂႃႇၸူးတီႈမိူင်းမူတ်းၸၢင်ႇၸဝ်ႈတီႈၶႃႈယဝ်ႉ။
ၵူၼ်းမဵဝ်းတင်းလၢႆလႆႈငိၼ်းၶၢဝ်ႇငၢဝ်းလႄႈတူၵ်းၸႂ်တီႈၶႃႈဢေႃႈ။ ၵူၼ်းမဵဝ်း ၽိလိတ်ႉတိ၊ ၶဝ်ထၢၼ်ႈပေႃးမီးၸႂ်ဢၼ်ၵူဝ်လႄႈသၼ်ႇဝႆယူႇယဝ်ႉဢေႃႈ။
ၶုၼ်လူင်ၵူၼ်း ဢေႇတုမ်ႇ၊ မီးတၢင်းဢၼ် ၸႂ်ၵူဝ်ၸႂ်ႁႄ၊ ၵူၼ်းႁႅင်းလူင်မဵဝ်း မေႃႇၽႃႉ၊ မီးတၢင်းဢၼ် ၸႂ်သၼ်ႇၸႂ်ဝႆ၊ ၵူၼ်းမိူင်းမဵဝ်း ၶႃႇၼၼိ၊ မီးတၢင်းဢၼ်ၸႂ်ၸိူမ်ႈၸႂ်ႁၢႆတီႈၶႃႈဢေႃႈ။
ၶဝ်ၸိူဝ်းၼၼ်ႉလႆႈထိုင်တီႈဢၼ်ၵူဝ်ႁႄလႄႈတၢင်းဢၼ်တူၵ်းၸႂ်လႂ်တိုၼ်ႇတီႈၶႃႈဢေႃႈ။ ဢူဝ်း၊ ထႃႇဝရႃႉၽြႃး။ ၶဝ်လႆႈႁၼ်ႁႅင်းတၼ်းၶူဝ်းၸဝ်ႈႁဝ်းလႄႈ ၶဝ်ဢွၼ်ၵၼ်ယူႇၼိမ်ၼိမ်မိူၼ်ၸိူဝ်ႉၼင်ႇမၢၵ်ႇႁိၼ်ၼၼ်ႉယူႇ၊ တေႃႇထိုင်ႁွတ်ႈၸူဝ်ႈဢၼ်ၵူၼ်းၸဝ်ႈႁဝ်းၸိူဝ်းၼႆႉဢမ်ႇပႆႇလႆႈပူၼ်ႉၵႂႃႇ၊ တေႃႇထိုင်ႁွတ်ႈၸူဝ်ႈဢၼ်ၵူၼ်းဢၼ်ၸဝ်ႈႁဝ်းပွႆႇလွတ်ႈသေတၢင်းဢၼ်ၶၢမ်ႇပဵၼ်ၶႃႈ၊ ၸိူဝ်းၼၼ်ႉဢမ်ႇပႆႇလႆႈပူၼ်ႉၵႂႃႇၼၼ်ႉ တီႈၶႃႈဢေႃႈ။
ၸဝ်ႈႁဝ်းဢဝ်ၶဝ်မႃးတႄႇတင်ႈတႄႇသဝ်းၵႃႈတီႈၼိူဝ်လွႆၸဝ်ႈ၊ တီႈဢၼ်ၸဝ်ႈႁဝ်းၶႃႈ ထႃႇဝရႃႉၽြႃး၊ လိူၵ်ႈဝႆႉႁႂ်ႈပဵၼ်တီႈယူႇတၼ်းသဝ်းၸဝ်ႈ၊ ဢၼ်ဝႃႈ၊ၵျွင်းပိၵ်ႈမၢၼ်ႇၸဝ်ႈဢၼ်တူဝ်ၸဝ်ႈႁဝ်းတႄႇဝႆႉၼၼ်ႉတီႈၶႃႈဢေႃႈ။
ၸဝ်ႈႁဝ်းၶႃႈ ထႃႇဝရႃႉၽြႃး၊ တၵ်းလႆႈ ဢုပ်ႉပိူင်ႇၸၢမ်ႇၸႃး၊ ၵူႈၵၢပ်ႈၵႃႇလႃႉတႃႇသေႇဢမ်ႇထၢတ်ႇဢေႃႈ၊” ဝႃႈၼင်ႇၼႆဢေႃႈ။
ၼႂ်းမိူဝ်ႈဢၼ်လေႃႉမႃႉသိုၵ်းၶုၼ်ႁေႃၶမ်းၸိူဝ်းၼၼ်ႉပႃးၸဵမ်မႃႉလႄႈၵူၼ်းႁေႃႈလေႃႉမႃႉသိုၵ်းမၼ်းတင်းလၢႆ၊ၶဝ်ႈၵႂႃႇၵႃႈၼႂ်းပၢင်ႇလၢႆႇယူႇၼၼ်ႉၸိုင်၊ ထႃႇဝရႃႉၽြႃး၊ ႁႂ်ႈၼမ်ႉပၢင်ႇလၢႆႇလုပ်ႇၶိုၼ်းလႄႈထူမ်ႈၶဝ်ပႅတ်ႈတင်းမူတ်းဢေႃႈ။ ၵူၼ်းမဵဝ်း ဢိသရေး၊ တင်းလၢႆၸမ်ႉ၊လႆႈပႆၽႃႇလတ်းပၢင်ႇလၢႆႇၵႂႃႇၵႃႈၼိူဝ်လိၼ်ႁႅင်ႈဢေႃႈ။
မိူဝ်ႈၼၼ်ႉ၊ မေႇရီႇယမ်ႇ၊ ပရေႃးၽႅတ်ႈမႄႈယိင်း ဢၼ်ပဵၼ်ပီႈၼၢင်း ဢႃႇရုၼ်ႇ၊ ၼၼ်ႉဢဝ်ၵွင်ဢွၼ်ႇယိပ်းၼႂ်းမိုဝ်းမၼ်းလႄႈ၊မႄႈယိင်းတင်းသဵင်ႈတင်းလူင်ၵေႃႈႁႆႇၵွင်ဢွၼ်ႇၶဝ်ၵႃႈၸွမ်းမၼ်းၵႂႃႇဢေႃႈ။-
မေႇရီႇယမ်ႇ၊ ၸင်ႇႁဵတ်းၵႂၢမ်းႁႂ်ႈၶဝ်ထွမ်ႇလႄႈဝႃႈ၊ “ပိူဝ်ႈဢၼ် ထႃႇဝရႃႉၽြႃး၊ ပႄႉၼႅင်ႇလူၺ်ႈမုၼ်ဢၼ်ယႂ်ႇဢၼ်သုင်လႄႈ ဢွၼ်ၵၼ်ႁဵတ်းၵႂၢမ်းတီႈ ထႃႇဝရႃႉၽြႃး၊ တႃႉ။ ၸႃႉၸဵမ်မႃႉလႄႈၵူၼ်းသိုၵ်းၶီႇမႃႉၸိူဝ်းၼၼ်ႉမၼ်းၸဝ်ႈတဵၵ်းၸူမ်ၵႃႈၼႂ်းၼမ်ႉ ပၢင်ႇလၢႆႇပႅတ်ႈ၊ တင်းမူတ်းယဝ်ႉတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
လိုၼ်းၼၼ်ႉ၊ မူဝ်းသေႇ၊ ဢွၼ်ၵူၼ်းမဵဝ်း ဢိသရေး၊ ၸိူဝ်းၼၼ်ႉဢွၵ်ႇသေၵႃႈတီႈ ပၢင်ႇလၢႆႇလႅင်၊ လႄႈပႆၶဝ်ႈၵႂႃႇၵႃႈၼႂ်းထိူၼ်ႇလႅင်ႉ သုရႃႉ၊ ဢေႃႈ။ ၶဝ်ၽႃႇလတ်းၵႂႃႇၵႃႈၼႂ်းထိူၼ်ႇလႅင်ႉၼၼ်ႉၶၢဝ်းတၢင်းသၢမ်ဝၼ်းလႄႈဢမ်ႇထူပ်းဢမ်ႇႁၼ်ၼမ်ႉလႃးလႃးဢေႃႈ။-
ၵမ်းၼၼ်ႉ ၶဝ်ႁွတ်ႈၵႂႃႇတီႈဢၼ်ႁွင်ႉဝႃႈ၊ မႃႇရႃႉ၊ ၼၼ်ႉဢေႃႈ။ ၼမ်ႉၵႃႈတီႈ မႃႇရႃႉ၊ ၼၼ်ႉၶူမ်ၼႃႇလႄႈၶဝ်ဢမ်ႇၵိၼ်လႆႈ။ ပိူဝ်ႈၼႆလႄႈၶဝ်ႁွင်ႉတီႈၼၼ်ႈဝႃႈ၊ မႃႇရႃႉ၊ ဢေႃႈ။-
ၵူၼ်းတင်းလၢႆဢွၼ်ၵၼ်ပွင်ႉၶၢင်းတၢင်ႇဢပျတ်ႈတီႈ မူဝ်းသေႇ၊ လႄႈဝႃႈ၊ “ႁဝ်းတၵ်းလႆႈၵိၼ်ၼမ်ႉဢီႈသင်၊” ဝႃႈၼင်ႇၼႆဢေႃႈ။-
မူဝ်းသေႇ၊ ၵေႃႈပႃးၸႂ်ပႃးၶေႃးလဝ်ႈယွၼ်းတီႈ ထႃႇဝရႃႉၽြႃး၊ လႄႈ၊ ထႃႇဝရႃႉၽြႃး၊ ၼႄပျႃးမၼ်းတူၼ်ႈမႆႉတူၼ်ႈၼိုင်ႈလႄႈ၊မၼ်းဢဝ်ၵႂႃႇထိမ်ႈသႂ်ႇၵႃႈၼႂ်းၼမ်ႉၼၼ်ႉဢေႃႈ။ ၼမ်ႉၼၼ်ႉပဵၼ်ဢၼ်လီၵိၼ်မႃးဢေႃႈ။ ၵႃႈတီႈၼၼ်ႈ ထႃႇဝရႃႉၽြႃး၊ ႁဵတ်းပၼ်ထုင်းၽိင်ႈတြႃးဝႆႉပုၼ်ႈၶဝ်လႄႈၸၢမ်းတူၺ်းၶဝ်လႄႈဝႃႈ၊-
“ပေႃးသူ တၵ်းထွမ်ႇဢဝ်ၵႂၢမ်း ထႃႇဝရႃႉၽြႃး၊ ၽြႃးပဵၼ်ၸဝ်ႈသူၸေးၸေးၸွတ်ႇၸွတ်ႇလႄႈႁဵတ်းၸွမ်းၵႃႈဢၼ်ၵဝ်မၢတ်ႈပဵၼ်ဢၼ်သိုဝ်ႈတေႃႇ၊သမ်ႉတၵ်းပႂ်ႉၵမ်ပႂ်ႉၵျၢင်ႉၸွမ်းပိင်းၺၢပ်ႈတြႃးၵဝ်တင်းလၢႆၸိုင်၊ၵဝ်တၵ်းဢမ်ႇဢဝ်တၢင်းၶႆႈတၢင်းပဵၼ်ဢၼ်ၵဝ်ႁႂ်ႈၸပ်းတီႈၵူၼ်းမဵဝ်း ဢေးၵျိပ်ႉ၊ ၼၼ်ႉလႄႈပၼ်တၢမ်ႇတီႈသူသေၸိူဝ်ႉသေပိူင်။ ၵဝ်ပဵၼ် ထႃႇဝရႃႉၽြႃး၊ ဢၼ်ႁႂ်ႈတၢင်းၶႆႈတၢင်းပဵၼ်သူၸိုၼ်ႈႁၢႆၼၼ်ႉဢေႃႈ၊” ဝႃႈၼင်ႇၼႆဢေႃႈ။
လိုၼ်းၼၼ်ႉၶဝ်ႁွတ်ႈၵႂႃႇၵႃႈတီႈ ဢေးလိမ်း၊ ဢေႃႈ။ ၵႃႈတီႈၼၼ်ႈမီးၼမ်ႉပုၼ်းႁူးသိပ်းသွင်မေႃႇဢိၵ်ႇတင်းတူၼ်ႈထၢၼ်ၸဵတ်းသိပ်းတူၼ်ႈလႄႈ၊ၶဝ်ၶျႃးပၢင်ၵႃႈတီႈႁိမ်းဢၼ်မီးၼမ်ႉၸိူဝ်းၼၼ်ႉဢေႃႈ။
ၵမ်းၼၼ်ႉ မူႇၽုင်ၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢွၼ်ၵၼ်ဢွၵ်ႇသေၵႃႈတီႈ ဢေးလိမ်း၊ လႄႈပႆႁွတ်ႈၵႂႃႇၵႃႈတီႈထိူၼ်ႇလႅင်ႉ သိၼ်း၊ ဢၼ်မီးဝူင်ႈၵၢင် ဢေးလိမ်း၊ တင်းလွႆ သိၼႃႉ၊ ၼၼ်ႉၼႂ်းလိူၼ်တီႈသွင်ဝၼ်းတီႈသိပ်းႁႃႈ၊ဝၢႆးသေၶဝ်ဢွၵ်ႇမိူင်း ဢေးၵျိပ်ႉ၊ မႃးၼၼ်ႉဢေႃႈ။-
ၵႃႈတီႈၼႂ်းထိူၼ်ႇလႅင်ႉၼၼ်ႉၶဝ်ပွင်ႉၶၢင်းတၢင်ႇဢပျတ်ႈတီႈ မူဝ်းသေႇ၊ တင်း ဢႃႇရုၼ်ႇ၊ လႄႈ၊-
လၢတ်ႈဝႃႈ၊ “သင် ထႃႇဝရႃႉၽြႃး၊ ဢဝ်ႁဝ်းတၢႆယၢမ်းမိူဝ်ႈဢၼ်ႁဝ်းလႆႈၼင်ႈယူႇၵႃႈႁိမ်းမေႃႈၼိူဝ်ႉလႄႈလႆႈၵိၼ်ၶဝ်ႈမုၼ်းဢိမ်ႇဢိမ်ႇတဵမ်တဵမ်ယူႇၵႃႈၼႂ်းမိူင်း ဢေးၵျိပ်ႉ၊ ၼၼ်ႉယဝ်ႉၸိုင်၊ယဵင်ႈၶႅၼ်းတၵ်းလီဢေႃႈ။ သူဢဝ်ႁဝ်းမႃးပွႆႇပႅတ်ႈၵႃႈၼႂ်းထိူၼ်ႇလႅင်ႉၼႆႉႁႂ်ႈႁဝ်းလႆႈဢိုပ်းတၢႆယဝ်ႉလူင်ပႄႇ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ လၢတ်ႈတီႈ မူဝ်းသေႇ၊ လႄႈဝႃႈ၊ “ၵမ်းၼႆႉၵဝ်တၵ်းႁႂ်ႈၽူၼ်ၶဝ်ႈမုၼ်းလုၵ်ႉသေၵႃႈၼိူဝ်ၵၢင်ႁၢဝ်တူၵ်းလူင်းမႃးပုၼ်ႈသူတင်းသဵင်ႈတင်းလူင်ဢေႃႈ။ ၵူၼ်းတင်းလၢႆတၵ်းလႆႈဢွၼ်ၵၼ်ဢွၵ်ႇလႄႈၵဵပ်းၸုၵဵပ်းသိမ်းဢဝ်ၵူႈဝၼ်းပုၼ်ႈဢၼ်တၵ်းၵုမ်ႇၵိၼ်ယေႈဝၼ်းယေႈဝၼ်းဢေႃႈ။ ႁဵတ်းၸိူဝ်ႉၼင်ႇၼႆႁႂ်ႈလႆႈၸၢမ်းတူၺ်းၶဝ်ၸွင်ႇၶဝ်တၵ်းႁဵတ်းၸွမ်းၵႂၢမ်းၵဝ်လႆႈႁိုဝ်း၊ဢမ်ႇႁဵတ်းၸွမ်းလႆႈႁိုဝ်းၼၼ်ႉယဝ်ႉ။-
ၼႂ်းဝၼ်းတီႈႁူၵ်းၼၼ်ႉၸမ်ႉ၊ၶဝ်တၵ်းလႆႈၸုသိမ်းဢဝ်သွင်ပုၼ်ႈၸွမ်းၼင်ႇဢၼ်ၶဝ်သိမ်းဢဝ်ၵူႈပွၵ်ႈၼၼ်ႉလႄႈတၵ်းလႆႈမႄးႁႅၼ်းသိမ်းဝႆႉဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ မူဝ်းသေႇ၊ တင်း ဢႃႇရုၼ်ႇ၊ သင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈ၊ “မိူဝ်ႈၼႆႉၶိင်ႇႁူဝ်ၶမ်ႈသူတၵ်းလႆႈႁုလွင်ႈဢၼ်ပဵၼ် ထႃႇဝရႃႉၽြႃး၊ ဢၼ်ထုတ်ႇၼုၵ်ႈဢဝ်သူဢွၵ်ႇမိူင်း ဢေးၵျိပ်ႉ၊ မႃးၼၼ်ႉဢေႃႈ။-
ၶိင်ႇၵၢင်ၼႂ်ၼၼ်ႉသူတၵ်းလႆႈႁၼ်သၢႆလႅင်းမုၼ်ၽုင်း ထႃႇဝရႃႉၽြႃး၊ ဢေႃႈ။ မၼ်းၸဝ်ႈလႆႈငိၼ်းသဵင်ဢၼ်သူပွင်ႉၶၢင်းတၢင်ႇဢပျတ်ႈတီႈ ထႃႇဝရႃႉၽြႃး၊ ၼၼ်ႉယဝ်ႉ။ သူတၢင်ႇဢပျတ်ႈ ထႃႇဝရႃႉၽြႃး၊ တႄႉဢေႃႈ။ လွင်ႈမၼ်းၸမ်ႉ၊ႁဝ်းၼႆႉပဵၼ်ၵေႃႉဢၼ်သင်ႇလၢတ်ႈၵႂၢမ်းဢၼ်မၼ်းၸဝ်ႈၸႂ်ႉလၢတ်ႈၼၼ်ႉၵူၺ်းဢေႃႈ၊” ဝႃႈၼင်ႇၼႆဢေႃႈ။-
မူဝ်းသေႇ၊ သမ်ႉလၢတ်ႈထႅင်ႈလႄႈဝႃႈ၊ “ ထႃႇဝရႃႉၽြႃး၊ တၵ်းပၼ်ၼိူဝ်ႉပုၼ်ႈဢၼ်သူတၵ်းၵိၼ်ၼၼ်ႉၼႂ်းၶိင်ႇႁူဝ်ၶမ်ႈဢိၵ်ႇတင်းၶဝ်ႈမုၼ်းပုၼ်ႈဢၼ်သူတၵ်းပေႃးၵုမ်ႇၵိၼ်ဢိမ်ႇၼၼ်ႉၼႂ်းၶိင်ႇႁူဝ်ၼႂ်ၼၼ်ႉတႄႉတႄႉ၊ၵွပ်ႈပိူဝ်ႈမၼ်းၸဝ်ႈလႆႈငိၼ်းသဵင်ဢၼ်သူပွင်ႉၶၢင်းတၢင်ႇဢပျတ်ႈတီႈမၼ်းၸဝ်ႈၼၼ်ႉယဝ်ႉ။ တၢင်းဢၼ်သူပွင်ႉၶၢင်းတၢင်ႇဢပျတ်ႈတီႈႁဝ်းၼၼ်ႉဢမ်ႇတိူဝ်ႉမႅၼ်ႈႁဝ်း။ တိူဝ်ႉမႅၼ်ႈ ထႃႇဝရႃႉၽြႃး၊ ယဝ်ႉ၊” ဝႃႈၼင်ႇၼႆဢေႃႈ။
ၵမ်းၼၼ်ႉ၊ မူဝ်းသေႇ၊ လၢတ်ႈတီႈ ဢႃႇရုၼ်ႇ၊ လႄႈဝႃႈ၊ “သင်ႇလၢတ်ႈၵႃႈတီႈမူႇၵူၼ်းၸိူဝ်းၵူၼ်းမဵဝ်း ဢိသရေး၊ တင်းသဵင်ႈတင်းမူတ်းလႄႈဝႃႈ၊ ‘ဢွၼ်ၵၼ်မႃးၸုၵ်းယူႇၵႃႈတီႈၽၢႆႇၼႃႈ ထႃႇဝရႃႉၽြႃး၊ တႃႉ။ လွင်ႈမၼ်းၸမ်ႉ၊မၼ်းၸဝ်ႈငိၼ်းသဵင်ဢၼ်သူပွင်ႉၶၢင်းတၢင်ႇဢပျတ်ႈတီႈမၼ်းၸဝ်ႈၼၼ်ႉယဝ်ႉ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။-
မိူဝ်ႈဢၼ် ဢႃႇရုၼ်ႇ၊ ယင်းလၢတ်ႈတေႃႇမူႇၵူၼ်းၸိူဝ်းၵူၼ်းတင်းသဵင်ႈတင်းမူတ်းယူႇၼၼ်ႉၸိုင်၊ၶဝ်ဝၢႆႇတူၺ်းၵႂႃႇတၢင်းထိူၼ်ႇလႅင်ႉလႄႈၶဝ်လႆႈႁၼ်သၢႆလႅင်းမုၼ်ၽုင်း ထႃႇဝရႃႉၽြႃး၊ ၵိုင်ႉၵၢင်ႉၽုတ်းမႃးၵႃႈၼႂ်းမွၵ်ႇၵုမ်ႈမႃးဢေႃႈ။-
ထႃႇဝရႃႉၽြႃး၊ ၵေႃႈလၢတ်ႈတီႈ မူဝ်းသေႇ၊ လႄႈဝႃႈ၊-
“ၵဝ်လႆႈငိၼ်းသဵင်ဢၼ်ၵူၼ်းမဵဝ်း ဢိသရေး၊ ပွင်ႉၶၢင်းတၢင်ႇဢပျတ်ႈၼၼ်ႉယဝ်ႉ။ လၢတ်ႈတီႈၶဝ်လႄႈဝႃႈ၊ ‘ၶိင်ႇဝၼ်းတူၵ်းသူတၵ်းလႆႈၵိၼ်ၼိူဝ်ႉဢေႃႈ။ ၶိင်ႇႁူဝ်ၼႂ်သူတၵ်းလႆႈၵိၼ်ၶဝ်ႈမုၼ်းဢိမ်ႇဢိမ်ႇတဵမ်တဵမ်ဢေႃႈ။ လိုၼ်းၼၼ်ႉ၊သူတၵ်းလႆႈႁုလွင်ႈဢၼ်ၵဝ် ထႃႇဝရႃႉၽြႃး၊ ပဵၼ်ၽြႃးပဵၼ်ၸဝ်ႈသူၼၼ်ႉဢေႃႈ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
မိူဝ်ႈဢၼ်ထိုင်ၶိင်ႇႁူဝ်ၶမ်ႈၸိုင်၊ၽုင်ၼူၵ်ႉၶုမ်ႈဢၼ်ၼမ်ၵိုၼ်းၼႃႇမိၼ်ၶဝ်ႈမႃးထၢၼ်ႈပေႃးႁူမ်ႇသုမ်ႇပၢင်ၶဝ်တင်းပၢင်ဢေႃႈ။ ၶိင်ႇႁူဝ်ၼႂ်ၵေႃႈၼမ်ႉၼၢႆးတူၵ်းႁွပ်ႈၵႃႈတီႈႁိမ်းႁွမ်းပၢင်ၶဝ်ၵူႈတီႈၵူႈလႅၼ်ဢေႃႈ။-
မိူဝ်ႈဢၼ်ၼမ်ႉၼၢႆးၸိူမ်ႈႁၢႆၵႂႃႇယဝ်ႉၼၼ်ႉၸိုင်၊မီးမဵဝ်းၼိုင်ႈဢၼ်သေးသေးမူၼ်းမူၼ်းဢွၼ်ႇဢၼ်မိူၼ်ၸိူဝ်ႉၼင်ႇၵွၼ်ႈမူၺ်ၼၼ်ႉၵိုတ်းဝႆႉၵႃႈၼိူဝ်ၼႃႈလိၼ်ၵႃႈတီႈထိူၼ်ႇလႅင်ႉၼၼ်ႉဢေႃႈ။-
မိူဝ်ႈဢၼ်ၵူၼ်းမဵဝ်း ဢိသရေး၊ ၶဝ်ႁၼ်ၶိူင်ႈပိူင်ၼၼ်ႉၸိုင်၊ၶဝ်ဢမ်ႇႁုလွင်ႈၼၼ်ႉပဵၼ်ၵႃႈသင်ၼၼ်ႉဢေႃႈ။ ၶဝ်ၵေႃႉၼိုင်ႈလႄႈၵေႃႉၼိုင်ႈတွင်ႈထၢမ်ၵၼ်လႄႈဝႃႈ၊ “ဢၼ်ၼႆႉပဵၼ်ၵႃႈသင်၊” ဝႃႈၼင်ႇၼႆဢေႃႈ။ မူဝ်းသေႇ၊ ၸင်ႇမွၵ်ႇလၢတ်ႈၶဝ်လႄႈဝႃႈ၊ “ဢၼ်ၼႆႉပဵၼ်တၢင်းၵိၼ်ဢၼ် ထႃႇဝရႃႉၽြႃး၊ ပၼ်ႁႂ်ႈသူလႆႈၵိၼ်ဢေႃႈ။-
ထႃႇဝရႃႉၽြႃး၊ မီးဢမိင်ႉၸမ်ႉ၊ ‘ဢွၼ်ၵၼ်ၵဵပ်းသိမ်းဢဝ်ႁႂ်ႈပေႃးၵုမ်ႇၵိၼ်ပုၼ်ႈၽႂ်ပုၼ်ႈမၼ်းတႃႉ။ ၸွမ်းၼင်ႇဢၼ်ၵူၼ်းႁိူၼ်းမီးလၢႆၵေႃႉၼၼ်ႉဢွၼ်ၵၼ်သိမ်းဢဝ်ဝႆႉယေႈၵေႃႉၶိုင်ႈပႄႇပုၼ်ႈၵူၼ်းႁိူၼ်းတူဝ်ၸဝ်ႈၵဝ်ႇတႃႉ၊’ ဝႃႈၼင်ႇၼႆဝႆႉယဝ်ႉ၊” ဝႃႈၼင်ႇၼႆဢေႃႈ။
ၵူၼ်းမဵဝ်း ဢိသရေး၊ ၶဝ်ၵေႃႈႁဵတ်းၸွမ်းဢေႃႈ။ မၢင်ၵေႃႉၵဵပ်းသိမ်းဢဝ်ၼမ်ၼမ်လႄႈမၢင်ၵေႃႉၵဵပ်းသိမ်းဢဝ်ၵေႇၵေႇဢေႃႈ။-
မိူဝ်ႈဢၼ်ၶဝ်ဢဝ်ၵွၵ်းပႄႇတူင်တူၺ်းၸိုင်၊ၵေႃႉဢၼ်လႆႈၼမ်ၼမ်ၼၼ်ႉဢမ်ႇလိူဝ်ၵႂႃႇၵေႃႉဢၼ်လႆႈၵေႇၵေႇၵေႃႈဢမ်ႇၸုတ်ႈယွမ်းၵႂႃႇ။ ၶဝ်ဢွၼ်ၵၼ်ၵဵပ်းသိမ်းဢဝ်ဝႆႉပုၼ်ႈဢၼ်တၵ်းၵုမ်ႇၵိၼ်ပုၼ်ႈၽႂ်ပုၼ်ႈမၼ်းၵူႈၵေႃႉၵူႈၵူၼ်းဢေႃႈ။-
မူဝ်းသေႇ၊ လၢတ်ႈတီႈၶဝ်လႄႈဝႃႈ၊ “ယႃႇပေႁႂ်ႈၽူႈလႂ်ၵဵပ်းႁွမ်မၼ်းဝႆႉ၊ပုၼ်ႈတႃႇဝၼ်းမိူဝ်ႈၽုၵ်ႈ၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊ၶဝ်ၵမ်ႈၽွင်ႈဢမ်ႇထွမ်ႇဢဝ်ၵႂၢမ်း မူဝ်းသေႇ၊ လႄႈယင်းၵဵပ်းသိမ်းဝႆႉၵမ်ႈၽွင်ႈဢေႃႈ။ ထိုင်ၶိင်ႇၵၢင်ၼႂ်မႃးၶိူင်ႈပိူင်ၼၼ်ႉပဵၼ်မူင်ႈပဵၼ်မွတ်ႈၵႂႃႇလႄႈမဵၼ်သူမ်ႈၵႂႃႇဢေႃႈ။ မူဝ်းသေႇ၊ ၵေႃႈၶႂ်ႈၸႃႉတေႃႇၶဝ်ဢေႃႈ။-
ၶဝ်ၼၼ်ႉလႆႈၵဵပ်းသိမ်းဢဝ်ပုၼ်ႈတႃႇတၵ်းၵုမ်ႇၵိၼ်ပုၼ်ႈၽႂ်ပုၼ်ႈမၼ်းၶိင်ႇၵၢင်ၼႂ် တႃႇလႂ်တႃႇၼၼ်ႉလႄႈမိူဝ်ႈဢၼ်လႅတ်ႇမႆႈမႃးၸိုင်၊ၸိူဝ်းဢၼ်ၵိုတ်းၵျၢၼ်ႇဝႆႉၵႃႈၼိူဝ်လိၼ်ၼၼ်ႉၸိူမ်ႈႁၢႆၵႂႃႇသေဢေႃႈ။
ၼႂ်းဝၼ်းဢၼ်ထူၼ်ႈထိုင်ႁူၵ်းဝၼ်းၼၼ်ႉၶဝ်လႆႈၵဵပ်းသိမ်းဢဝ်တၢင်းၵိၼ်ၼၼ်ႉၼမ်လိူဝ်သွင်ပုၼ်ႈလႄႈယေႈၵေႃႉလႆႈၵဵပ်းသိမ်းဢဝ်ပႄႇၼိုင်ႈဢေႃႈ။ ၵူၼ်းဢၼ်ပဵၼ်ၵႄႇပဵၼ်ႁူဝ်မူႇၵူၼ်းၸိူဝ်းၼၼ်ႉတင်းသဵင်ႈတင်းလူင်ဢွၼ်ၵၼ်မႃးတိူင်ႇလၢတ်ႈတီႈ မူဝ်းသေႇ၊ ဢေႃႈ။-
မူဝ်းသေႇ၊ ၵေႃႈၶိုၼ်းလၢတ်ႈတီႈၶဝ်လႄႈဝႃႈ၊ “ ထႃႇဝရႃႉၽြႃး၊ မီးဢမိင်ႉၸမ်ႉ၊ ‘မိူဝ်ႈၽုၵ်ႈပဵၼ်ဝၼ်းဢၼ်သူတၵ်းလႆႈၵိုတ်းလိုဝ်ႈၼိမ်ၼိမ်လီလီ၊ဝၼ်းၵမ်သိၼ်ဢၼ်မူတ်းၸၢင်ႇၵႃႈတီႈ ထႃႇဝရႃႉၽြႃး၊ ဢေႃႈ။ ၵႃႈဢၼ်သူၶႂ်ႈၼိုင်ႈၶႂ်ႈတူမ်ႈၼၼ်ႉၼိုင်ႈဝႆႉတူမ်ႈဝႆႉဝၼ်းမိူဝ်ႈၼႆႉတႃႉ။ ၵႃႈဢၼ်လိူဝ်ၼၼ်ႉသိမ်းဝႆႉပုၼ်ႈတႃႇမိူဝ်ႈၽုၵ်ႈတႃႉ၊’ ဝႃႈၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။-
ၵႃႈၼင်ႇဢၼ် မူဝ်းသေႇ၊ သင်ႇလၢတ်ႈၼၼ်ႉၶဝ်ဢွၼ်ၵၼ်ၵဵပ်းသိမ်းဝႆႉၵႃႈဢၼ်လိူဝ်ၼၼ်ႉတေႃႇထိုင်ႁွတ်ႈဝၼ်းမိူဝ်ႈၽုၵ်ႈဢေႃႈ။ ဢၼ်ၼၼ်ႉဢမ်ႇမဵၼ်သူမ်ႈလႄႈဢမ်ႇမီးမူင်ႈမီးမွတ်ႈသေဢိတ်းဢေႃႈ။-
မူဝ်းသေႇ၊ သင်ႇလၢတ်ႈတီႈၶဝ်လႄႈဝႃႈ၊ “ဝၼ်းမိူဝ်ႈၼႆႉဢွၼ်ၵၼ်ၵိၼ်တၢင်းၵိၼ်ၼႆႉတႃႉ။ ဝၼ်းမိူဝ်ႈၼႆႉပဵၼ်ဝၼ်းၵမ်သိၼ်ၵႃႈတီႈ ထႃႇဝရႃႉၽြႃး၊ လႄႈ၊သူတၵ်းဢမ်ႇထူပ်းဢမ်ႇႁၼ်တၢင်းၵိၼ်ၼၼ်ႉၵႃႈတီႈပၢင်သုမ်ႉထဵင်သူၼၼ်ႉ။-
သူတၵ်းလႆႈဢွၼ်ၵၼ်သိမ်းဢဝ်ပုၼ်ႈတႃႇၼႂ်းႁူၵ်းဝၼ်းၼၼ်ႉလႄႈ၊ၼႂ်းဝၼ်းဢၼ်ထူၼ်ႈတီႈၸဵတ်းဝၼ်း၊ဝၼ်းၵမ်သိၼ်ၼၼ်ႉၸိုင်၊တၢင်းၵိၼ်ၼၼ်ႉတေဢမ်ႇမီးလႃးလႃးယဝ်ႉ၊” ဝႃႈၼင်ႇၼႆဢေႃႈ။
ၼႂ်းဝၼ်းဢၼ်ထူၼ်ႈထိုင်ၸဵတ်းဝၼ်းၼၼ်ႉၵူၼ်းၵမ်ႈၽွင်ႈယင်းၵႂႃႇႁႃသိမ်းဢဝ်တၢင်းၵိၼ်ဢေႃႈ။ ၵူၺ်းၵႃႈ၊ၶဝ်ဢမ်ႇထူပ်းဢမ်ႇႁၼ်သေဢိတ်း။-
မိူဝ်ႈၼၼ်ႉ၊ ထႃႇဝရႃႉၽြႃး၊ လၢတ်ႈတီႈ မူဝ်းသေႇ၊ လႄႈဝႃႈ၊ “သူတၵ်းဢွၼ်ၵၼ်ထဵင်ပႅတ်ႈပိင်းၺၢပ်ႈၵဝ်ဢိၵ်ႇတင်းတြႃးၵဝ်ၸိူဝ်းၼၼ်ႉႁိုင်ၵႃႈႁိုဝ်။-
ၵဝ် ထႃႇဝရႃႉၽြႃး၊ ပၼ်ဝၼ်းၵမ်သိၼ်တီႈသူယဝ်ႉၼၼ်ႉၶုၵ်းၸႂ်လႆႈတႃႉ။ ပုၼ်ႈလွင်ႈၼႆႉၸိုင်၊ၼႂ်းဝၼ်းတီႈႁူၵ်းၼၼ်ႉၵဝ်တၵ်းပၼ်တၢင်းၵိၼ်ဢၼ်ပေႃးၵုမ်ႇၵိၼ်ပုၼ်ႈတႃႇသွင်ဝၼ်းတဵမ်တဵမ်ဢေႃႈ။ ၼႂ်းဝၼ်းတီႈၸဵတ်းၼၼ်ႉၸမ်ႉ၊ၵူၼ်းၵူႈၵေႃႉၵူႈၵူၼ်းတၵ်းလႆႈမီးယူႇၵႃႈတီႈ၊တီႈယူႇၽႂ်တီႈယူႇမၼ်းလႄႈ၊ယႃႇပေႁႂ်ႈၽူႈလႂ်ဢွၵ်ႇသုမ်ႉထဵင်မၼ်း၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ၊ၵူၼ်းတင်းလၢႆဢွၼ်ၵၼ်လိုဝ်ႈၼိမ်ၼိမ်လီလီၼႂ်းဝၼ်းဢၼ်ထူၼ်ႈထိုင်ၸဵတ်းဝၼ်းၼၼ်ႉဢေႃႈ။
ၵူၼ်းမဵဝ်း ဢိသရေး၊ ၸိူဝ်းၼၼ်ႉႁွင်ႉႁဵၵ်ႈၸိုဝ်ႈတၢင်းၵိၼ်ၼၼ်ႉဝႃႈ၊ မၼ်ႇၼႃႉ၊ ဢေႃႈ။ မၼ်းပဵၼ်ၸိူဝ်ႉၼင်ႇမဵတ်ႉၽၵ်းၵီးလႄႈၶၢဝ်ဝႆႉ၊ဢရႃႉသႃႇမၼ်းဝၢၼ်မိူၼ်ၶဝ်ႈမုၼ်းၶွပ်ႈဢၼ်လေႃးၼမ်ႉၽိုင်ႈၼၼ်ႉဢေႃႈ။-
ၵမ်းၼၼ်ႉ၊ မူဝ်းသေႇ၊ လၢတ်ႈလႄႈဝႃႈ၊ “ ထႃႇဝရႃႉၽြႃး၊ မီးဢမိင်ႉၸမ်ႉ၊ ‘ဢဝ်ၶဝ်ႈမုၼ်း မၼ်ႇၼႃႉ၊ ၼၼ်ႉသိမ်းဝႆႉၶိုင်ႈပႄႇပုၼ်ႈၸိူဝ်ႉၶိူဝ်းသူသိုပ်ႇသိုပ်ႇတၢမ်တၢမ်ႁႂ်ႈၶဝ်လႆႈႁၼ်တၢင်းၵိၼ်ဢၼ်ၵဝ်လဵင်ႉလူသူၵႃႈၼႂ်းထိူၼ်ႇလႅင်ႉၼႂ်းဝၼ်းဢၼ်ၵဝ်ဢွၼ်သူဢွၵ်ႇမိူင်း ဢေးၵျိပ်ႉ၊ မႃးၼၼ်ႉတႃႉ၊’ ဝႃႈၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။-
မူဝ်းသေႇ၊ ၵေႃႈလၢတ်ႈတီႈ ဢႃႇရုၼ်ႇ၊ လႄႈဝႃႈ၊ “ဢဝ်မေႃႈႁူၺ်ႇၼိုင်ႈလႄႈသႂ်ႇဝႆႉ မၼ်ႇၼႃႉ၊ ၶိုင်ႈပႄႇသေယဝ်ႉ၊ဝၢင်းဝႆႉ၊ၵႃႈတီႈၽၢႆႇၼႃႈ ထႃႇဝရႃႉၽြႃး၊ ႁႂ်ႈလႆႈသိမ်းဝႆႉ၊ပုၼ်ႈၸိူဝ်ႉၶိူဝ်းသူသိုပ်ႇသိုပ်ႇတၢမ်တၢမ်တႃႉ၊” ဝႃႈၼင်ႇၼႆဢေႃႈ။-
ၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ ဝႆႉၼၼ်ႉ၊ ဢႃႇရုၼ်ႇ၊ ဝၢင်းၶဝ်ႈမုၼ်း မၼ်ႇၼႃႉ၊ ၼၼ်ႉဝႆႉၵႃႈတီႈၽၢႆႇၼႃႈတိူၵ်ႈပတိၺိၺ်ႇၸဝ်ႈပုၼ်ႈတေၵဵပ်းသိမ်းဝႆႉဢေႃႈ။-
ၵူၼ်းမဵဝ်း ဢိသရေး၊ ၸိူဝ်းၼၼ်ႉဢွၼ်ၵၼ်ၵိၼ်ၶဝ်ႈမုၼ်း မၼ်ႇၼႃႉ၊ ၼၼ်ႉသီႇသိပ်းပီတဵမ်တဵမ်၊တေႃႇထိုင်ၶဝ်ႁွတ်ႈၽႅဝ်ၵႃႈတီႈဢၼ်ၵူၼ်းယူႇၵႃႈတီႈလႅၼ်လိၼ်မိူင်း ၶႃႇၼၼ်ႇ၊ ပုၼ်ႉဢေႃႈ။-
ယေႈပႄႇၸမ်ႉ၊မီးႁႃႈပုၼ်ႈပုၼ်ႈၼိုင်ႈဢေးၽႃႇ ဢေႃႈ။
ၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢွၼ်ၵၼ်ဢွၵ်ႇသေၵႃႈတီႈထိူၼ်ႇလႅင်ႉ သိၼ်း၊ ၶၢႆႉၵႂႃႇသေၵႃႈတီႈၼိုင်ႈယဝ်ႉတီႈၼိုင်ႈလႄႈတၢမ်းၵၼ်ဢွၵ်ႇတၢင်းၵႂႃႇၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉၼၼ်ႉဢေႃႈ။ ၶဝ်ၶျႃးပၢင်ၵႃႈတီႈ ရေႇၽိတိမ်ႇ၊ လႄႈ၊ၵႃႈတီႈၼၼ်ႈဢမ်ႇမီးၼမ်ႉၵိၼ်လႃးလႃးဢေႃႈ။-
ပိူဝ်ႈၼႆလႄႈၵူၼ်းတင်းလၢႆဢွၼ်ၵၼ်ႁႃတၢင်းၽိတ်း မူဝ်းသေႇ၊ လႄႈဝႃႈ၊ “ပၼ်ၼမ်ႉၵိၼ်တီႈႁဝ်းတႃႉ၊” ဝႃႈၼင်ႇၼႆဢေႃႈ။ မူဝ်းသေႇ၊ ၵေႃႈၶိုၼ်းလၢတ်ႈလႄႈဝႃႈ၊ “ႁဵတ်းသင်လႄႈသူႁႃတၢင်းၽိတ်းတီႈၵဝ်။ ႁဵတ်းသင်လႄႈသူၸၢမ်းတူၺ်း ထႃႇဝရႃႉၽြႃး၊ ၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ၵွပ်ႈပိူဝ်ႈၵူၼ်းတင်းလၢႆယၢၵ်ႇၼမ်ႉၼႃႇလူင်လၢင်လႄႈၶဝ်ပွင်ႉၶၢင်းတၢင်ႇဢပျတ်ႈတီႈ မူဝ်းသေႇ၊ လႄႈဝႃႈ၊ “ႁဵတ်းသင်လႄႈမႂ်းဢဝ်ႁဝ်းဢွၵ်ႇမိူင်း ဢေးၵျိပ်ႉ၊ မႃးၸိူဝ်ႉၼင်ႇႁိုဝ်။ မႂ်းတေဢဝ်ၸႃႉၸဵမ်တူဝ်ႁဝ်းလႄႈလုၵ်ႈလၢင်းႁဝ်းဢိၵ်ႇတင်းသတ်းတရိၵ်ႈသၢၼ်ႇႁဝ်းတၵ်းလႆႈတၢႆလူၺ်ႈတၢင်းဢၼ်ဢိုပ်းၼမ်ႉယဝ်ႉႁိုဝ်း၊” ဝႃႈၼင်ႇၼႆဢေႃႈ။
မူဝ်းသေႇ၊ ႁဵတ်းသူးတွင်းပထၼႃႇတီႈ ထႃႇဝရႃႉၽြႃး၊ လႄႈဝႃႈ၊ “တၵ်းႁႂ်ႈၶႃႈၸဝ်ႈလႆႈႁဵတ်းၸိူဝ်ႉၼင်ႇႁိုဝ်တီႈၵူၼ်းၸိူဝ်းၼႆႉတီႈၶႃႈ။ ၶဝ်ၸမ်တၵ်းဢဝ်မၢၵ်ႇႁိၼ်ထိမ်ႈသႂ်ႇၶႃႈၸဝ်ႈတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ လၢတ်ႈတီႈ မူဝ်းသေႇ၊ လႄႈဝႃႈ၊ “ႁွင်ႉပႃးၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်း ဢိသရေး၊ ၸိူဝ်းၼၼ်ႉလႄႈၵႂႃႇဢွၼ်တၢင်းၵူၼ်းတင်းလၢႆတႃႉ။ ယိပ်းပႃးၶွၼ်ႉတဝ်ႉဢၼ်မႂ်းပေႃႉၽတ်ႉၼမ်ႉမႄႈ ၼၢႆးလ်၊ ၼၼ်ႉၵႂႃႇၸွမ်းတႃႉ။-
ၵဝ်တၵ်းၸုၵ်းထႃႈမႂ်းၵႃႈၼိူဝ်ၽႃႁိၼ်ၵႃႈတီႈလွႆ သိၼႃႉ၊ ပုၼ်ႉဢေႃႈ။ မႂ်းပေႃႉၽႃႁိၼ်ၼၼ်ႉတႃႉ။ ၼမ်ႉတၵ်းလႆဢွၵ်ႇၽႃႁိၼ်ၼၼ်ႉမႃးပုၼ်ႈတႃႇၵူၼ်းတင်းလၢႆတၵ်းၵိၼ်ဢေႃႈ၊” ဝႃႈၼင်ႇၼႆဢေႃႈ။ မူဝ်းသေႇ၊ ၵေႃႈႁဵတ်းၸိူဝ်ႉၼင်ႇၼၼ်ၵႃႈတီႈၽၢႆႇၼႃႈၵူၼ်းဢၼ်ပဵၼ်ၵႄႇပဵၼ်ႁူဝ်ၵူၼ်းမဵဝ်း ဢိသရေး၊ ၸိူဝ်းၼၼ်ႉဢေႃႈ။
မၼ်းႁွင်ႉႁဵၵ်ႈၸိုဝ်ႈတီႈၼၼ်ႈဝႃႈ၊ မတ်ႉသႃႇ၊ တင်း မေႇရိၽႃႉ၊ ဢေႃႈ။ ၵွပ်ႈပိူဝ်ႈၵူၼ်းမဵဝ်း ဢိသရေး၊ ၶဝ်ႁဵတ်းတၢင်းၽိတ်းသေလႄႈၸၢမ်းတူၺ်း ထႃႇဝရႃႉၽြႃး၊ လႄႈဝႃႈ၊ “ ထႃႇဝရႃႉၽြႃး၊ မီးလူၺ်ႈၵၼ်တင်းႁဝ်းယူႇႁိုဝ်၊ဢမ်ႇမီးႁိုဝ်၊” ဝႃႈၼင်ႇၼႆၼၼ်ႉဢေႃႈ။
မိူဝ်ႈၼၼ်ႉၵူၼ်းမဵဝ်း ဢႃႇမလႅၵ်ႉ၊ ၶဝ်မႃးတိုၵ်းတေႃးၵူၼ်းမဵဝ်း ဢိသရေး၊ ၸိူဝ်းၼၼ်ႉၵႃႈတီႈ ရေႇၽိတိမ်ႇ၊ ဢေႃႈ။-
မူဝ်းသေႇ၊ ၵေႃႈလၢတ်ႈတီႈ ယေႃးသု၊ လႄႈဝႃႈ၊ “လိူၵ်ႈဢဝ်ၵူၼ်းပုၼ်ႈဢၼ်တၵ်းၵႂႃႇတိုၵ်းၵူၼ်းမဵဝ်း ဢႃႇမလႅၵ်ႉ၊ ဝၼ်းမိူဝ်ႈၽုၵ်ႈတႃႉ။ ၵဝ်တၵ်းယိပ်းၵမ်ၶွၼ်ႉတဝ်ႉဢၼ်၊ၽြႃးပဵၼ်ၸဝ်ႈၸႂ်ႉၵဝ်ပႃးဢဝ်ၼၼ်ႉသေလႄႈၸုၵ်းယူႇၵႃႈၼိူဝ်ပၢႆလွႆဢေႃႈ၊” ဝႃႈၼင်ႇၼႆဢေႃႈ။-
ယေႃးသု၊ ႁဵတ်းၸွမ်းၵႃႈၼင်ႇဢၼ် မူဝ်းသေႇ၊ သင်ႇမၼ်းဝႆႉၼၼ်ႉသေလႄႈဢွၵ်ႇၵႂႃႇတိုၵ်းၵူၼ်းမဵဝ်း ဢႃႇမလႅၵ်ႉ၊ ၸိူဝ်းၼၼ်ႉဢေႃႈ။ မူဝ်းသေႇ၊ဢႃႇရုၼ်ႇ၊ ဢိၵ်ႇတင်း ႁုရႃႉ၊ ၶိုၼ်ႈၵႂႃႇၵႃႈတီႈၸိၵ်းလွႆဢေႃႈ။-
မိူဝ်ႈဢၼ် မူဝ်းသေႇ၊ ယုၵ်ႉမိုဝ်းမၼ်းၼၼ်ႉၸိုင်၊ၵူၼ်းမဵဝ်း ဢိသရေး၊ ပႄႉဢေႃႈ။ ၵူၺ်းၵႃႈ၊မိူဝ်ႈဢၼ်မၼ်းဢဝ်မိုဝ်းမၼ်းလူင်းၼၼ်ႉၸိုင်၊ၵူၼ်းမဵဝ်း ဢႃႇမလႅၵ်ႉ၊ ၶဝ်သမ်ႉပႄႉဢေႃႈ။-
ပိူဝ်ႈဢၼ် မူဝ်းသေႇ၊ မိုဝ်းၵူၼ်ႉၼႃႇလႄႈ ဢႃႇရုၼ်ႇ၊ တင်း ႁုရႃႉ၊ ဢဝ်မၢၵ်ႇႁိၼ်မႃးဝၢင်းႁႂ်ႈမၼ်းၼင်ႈလႄႈၶဝ်ယူႇယေႈၵေႃႉယေႈၽၢႆႇၵမ်ႉထွၵ်ႈမိုဝ်းမၼ်းဝႆႉဢေႃႈ။ မၼ်းၵေႃႈယုၵ်ႉမိုဝ်းမၼ်းဝႆႉၼိမ်ၼိမ်၊တေႃႇထိုင်ၶိင်ႇၵၢင်ဝၼ်းတူၵ်းဢေႃႈ။-
ၼင်ႇၼၼ်လႄႈ ယေႃးသု၊ လႆႈတိုၵ်းပႄႉၵူၼ်းမဵဝ်း ဢႃႇမလႅၵ်ႉ၊ ၸိူဝ်းၼၼ်ႉဢေႃႈ။
ထႃႇဝရႃႉၽြႃး၊ ၵေႃႈသင်ႇလၢတ်ႈတီႈ မူဝ်းသေႇ၊ လႄႈဝႃႈ၊ “တႅမ်ႈမၢႆလွင်ႈတၢင်းဢၼ်ပႄႉဢၼ်ၼႅင်ႇၼႆႉ၊ဝႆႉၵႃႈၼႂ်းပပ်ႉလိၵ်ႈပုၼ်ႈဢၼ်တၵ်းၶုၵ်းၸႂ်လႆႈၼၼ်ႉတႃႉ။ မွၵ်ႇလၢတ်ႈတီႈ ယေႃးသု၊ လွင်ႈဢၼ်ၵဝ်တၵ်းယႃႉၽဵဝ်ႈပႅတ်ႈၵူၼ်းမဵဝ်း ဢႃႇမလႅၵ်ႉ၊ တင်းသဵင်ႈတင်းမူတ်းသေၵႃႈတႂ်ႈၽႃႉၵၢင်ႁၢဝ်ၼၼ်ႉတႃႉ၊” ဝႃႈၼင်ႇၼႆဢေႃႈ။-
မူဝ်းသေႇ၊ တႄႇႁဵတ်းၶဵင်ႇတၢင်းလူႇဢၼ်ၼိုင်ႈလႄႈႁွင်ႉႁဵၵ်ႈၸိုဝ်ႈဝႃႈ၊ “ ထႃႇဝရႃႉၽြႃး၊ ပဵၼ်လၵ်းတုင်းၵဝ် ဢေႃႈ၊” ဝႃႈၼႆဢေႃႈ။-
မၼ်းသမ်ႉဝႃႈ၊ “ယုၵ်ႉလၵ်းတုင်း ထႃႇဝရႃႉၽြႃး၊ ဝႆႉသုင်သုင်တႃႉ။ ထႃႇဝရႃႉၽြႃး၊ တၵ်းသိုပ်ႇတိုၵ်းၵူၼ်းမဵဝ်း ဢႃႇမလႅၵ်ႉ၊ ၶဝ်တႃႇသေႇဢမ်ႇထၢတ်ႇဢေႃႈ၊” ဝႃႈၼင်ႇၼႆဢေႃႈ။
ယေႇႀရေႃး၊ ယဵၸ်ႈပရေႃးႁဵၵ်ႈ မိူင်း မိတျၼ်ႇ၊ ဢၼ်ပဵၼ်ပေႃႈၼၢႆး မူဝ်းသေႇ၊ ၼၼ်ႉလႆႈငိၼ်းလွင်ႈဢၼ်ၽြႃးပဵၼ်ၸဝ်ႈႁဵတ်းပုၼ်ႈၸႃႉၸဵမ် မူဝ်းသေႇ၊ လႄႈၵူၼ်းမၼ်းၸဝ်ႈၵူၼ်းမဵဝ်း ဢိသရေး၊ ၸိူဝ်းၼၼ်ႉဢိၵ်ႇတင်းလွင်ႈၵူႈၸိူဝ်ႉၵူႈမဵဝ်းဢၼ် ထႃႇဝရႃႉၽြႃး၊ ႁဵတ်းၸိူဝ်ႉၼင်ႇႁိုဝ်ဢွၼ်ၵူၼ်းမဵဝ်း ဢိသရေး၊ တင်းလၢႆဢွၵ်ႇမိူင်း ဢေးၵျိပ်ႉ၊ မႃးၼၼ်ႉဢေႃႈ။-
ပိူဝ်ႈၼႆလႄႈမၼ်းၸင်ႇပႃးဢဝ် ၸိပေႃးရႃႉ၊ မေး မူဝ်းသေႇ၊ ဢၼ်မၼ်းႁႂ်ႈၵိုတ်းဝႆႉတီႈမိူင်း မိတျၼ်ႇ၊ ၼၼ်ႉ၊-
ဢိၵ်ႇတင်းလုၵ်ႈၸၢႆးမၼ်းသွင်ၵေႃႉ၊ဢၼ်ၵေႃႉၼိုင်ႈမၼ်းႁွင်ႉႁဵၵ်ႈၸိုဝ်ႈဝႃႈ၊ ၵေႇရႃႉသုၼ်ႇ၊ ပိူဝ်ႈဢၼ်မၼ်းဝႃႈ၊ “ၵဝ်ၼႆႉပဵၼ်ၶႅၵ်ႇတၢင်ႇတီႈတၢင်ႇမိူင်းယဝ်ႉ” ဝႃႈၼင်ႇၼႆၼၼ်ႉဢေႃႈ။-
ၵေႃႉၼိုင်ႈသမ်ႉမၼ်းႁွင်ႉႁဵၵ်ႈၸိုဝ်ႈဝႃႈ၊ ဢေးလျေႇၸႃႇ၊ ပိူဝ်ႈဢၼ်မၼ်းဝႃႈ၊ “ၽြႃးပဵၼ်ၸဝ်ႈပူႇမွၼ်ႇၵဝ်ၼၼ်ႉၸွႆႈထႅမ်ၵဝ်လႄႈပွႆႇၵဝ်လွတ်ႈၽေးလၢပ်ႇၶုၼ်ႁေႃၶမ်းမိူင်း ဢေးၵျိပ်ႉ၊ ယဝ်ႉ၊” ဝႃႈၼင်ႇၼႆၼၼ်ႉဢေႃႈ။-
ၼင်ႇၼၼ်လႄႈ ယေႇႀရေႃး၊ ပေႃႈၼၢႆး မူဝ်းသေႇ၊ တင်းလုၵ်ႈၸၢႆးမၼ်းသွင်ၵေႃႉဢိၵ်ႇတင်းမေးမၼ်းၸိူဝ်းၼၼ်ႉဢွၼ်ၵၼ်မႃးသူႇမႃးၸႂ်းမၼ်းၵႃႈၼႂ်းထိူၼ်ႇလႅင်ႉတီႈဢၼ်မၼ်းၶျႃးပၢင်ၵႃႈႁိမ်းလွႆၽြႃးပဵၼ်ၸဝ်ႈၼၼ်ႉဢေႃႈ။-
ၵူၼ်းမႃးမွၵ်ႇလၢတ်ႈ မူဝ်းသေႇ၊ လႄႈဝႃႈ၊ “ ယေႇႀရေႃး၊ ပေႃႈၼၢႆးၸဝ်ႈႁဝ်းဢိၵ်ႇတင်းမေးၸဝ်ႈႁဝ်းတင်းလုၵ်ႈၸၢႆးၸဝ်ႈႁဝ်းမႃးတီႈၶႃႈဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ မူဝ်းသေႇ၊ ဢွၵ်ႇၵႂႃႇႁပ်ႉႁူဝ်တၢင်းပေႃႈၼၢႆးမၼ်းသေယဝ်ႉ၊ၵူမ်ႈၵွမ်းႁူဝ်လႄႈၸုပ်ႇၼူမ်မၼ်းဢေႃႈ။ ၶဝ်ၵေႃႉၼိုင်ႈလႄႈၵေႃႉၼိုင်ႈတူင်ႉတၵ်ႉၵႂၢမ်းယူႇလီၵိၼ်ဝၢၼ်တီႈၵၼ်သေယဝ်ႉ၊ဢွၼ်ၵၼ်ၶဝ်ႈသုမ်ႉထဵင် မူဝ်းသေႇ၊ ၵႂႃႇဢေႃႈ။
မူဝ်းသေႇ၊ ၶႆႈၼႄ ယေႇႀရေႃး၊ ၵႃႈဢၼ် ထႃႇဝရႃႉၽြႃး၊ ႁဵတ်းတီႈၶုၼ်ႁေႃၶမ်းဢိၵ်ႇတင်းၵူၼ်းမဵဝ်း ဢေးၵျိပ်ႉ၊ ၶဝ်ပုၼ်ႈတၵ်းၵႄႇသႄႇဢဝ်ၵူၼ်းမဵဝ်း ဢိသရေး၊ တင်းလၢႆၼၼ်ႉဢေႃႈ။ မၼ်းသမ်ႉၶႆႈၼႄလွင်ႈတုၵ်ႉၶႃႉတၢင်းယၢပ်ႇဢၼ်ၶဝ်ထူပ်းၺႃးၸွမ်းတႃႈၸွမ်းတၢင်းမႃးၸိူဝ်းၼၼ်ႉဢိၵ်ႇတင်းလွင်ႈဢၼ် ထႃႇဝရႃႉၽြႃး၊ ႁဵတ်းၸိူဝ်ႉၼင်ႇႁိုဝ်ၸွႆႈထႅမ်ၶဝ်မႃးၸိူဝ်းၼၼ်ႉဢေႃႈ။-
မိူဝ်ႈဢၼ် ယေႇႀရေႃး၊ လႆႈငိၼ်းလွင်ႈတင်းသဵင်ႈတင်းလူင်ၸိူဝ်းၼၼ်ႉယဝ်ႉၸိုင်၊မၼ်းငိၼ်းၸူမ်းငိၼ်းသိူဝ်းၼႃႇလူင်လၢင်ဢေႃႈ။-
မၼ်းလၢတ်ႈလႄႈဝႃႈ၊ “ယွင်ႈယေႃး ထႃႇဝရႃႉၽြႃး၊ ၸဝ်ႈဢၼ်ၵႄႇသႄႇဢဝ်သူ၊လွတ်ႈဢွၵ်ႇမိုဝ်းၶုၼ်ႁေႃၶမ်းတင်းၵူၼ်းမဵဝ်း ဢေးၵျိပ်ႉ၊ မႃးၼၼ်ႉယွင်ႈယေႃးၸဝ်ႈ ထႃႇဝရႃႉၽြႃး၊ ဢၼ်ၵႄႇသႄႇဢဝ်ၵူၼ်းမၼ်းၸဝ်ႈလွတ်ႈသေတၢင်းဢၼ်ပဵၼ်ၶႃႈမႃးၼၼ်ႉ။-
တေႃႈလဵဝ်ၼႆႉၵဝ်ႁုလွင်ႈဢၼ် ထႃႇဝရႃႉၽြႃး၊ ယဵင်ႈၶႅၼ်းယႂ်ႇမျၢတ်ႈသေၽြႃးတၢင်ႇသူႇတၢင်ႇပႃးတင်းသဵင်ႈတင်းလူင်ၼၼ်ႉယဝ်ႉ။ လွင်ႈမၼ်းၸမ်ႉ၊မၼ်းၸဝ်ႈႁဵတ်းၸိူဝ်ႉၼင်ႇၼႆၼႂ်းမိူဝ်ႈဢၼ်ၵူၼ်းမဵဝ်း ဢေးၵျိပ်ႉ၊ ၶဝ်မီးႁူဝ်ၸႂ်ဢၼ်ၽႅၼ်သုင်သေလႄႈ ႁဵတ်းႁၢႆႉတီႈၵူၼ်းမဵဝ်း ဢိသရေး၊ တင်းလၢႆၼၼ်ႉယဝ်ႉ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ ယေႇႀရေႃး၊ ဢဝ်ၶိူင်ႈတၢင်းလူႇဢၼ်ၽဝ်ၽႆးဢၼ်ၼိုင်ႈ၊ဢိၵ်ႇတင်းတၢင်းလူႇတၢင်ႇမဵဝ်းၼမ်ၼႃႇမႃးၵႃႈတီႈၽြႃးပဵၼ်ၸဝ်ႈလႄႈ၊ၸႃႉၸဵမ် ဢႃႇရုၼ်ႇ၊ လႄႈၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်း ဢိသရေး၊ တင်းလၢႆၼၼ်ႉဢွၼ်ၵၼ်ၵႂႃႇလူၺ်ႈၵၼ်တင်း ယေႇႀရေႃး၊ ႁႂ်ႈလႆႈၵိၼ်ပွႆးဢၼ်ႁဵတ်းဝၢတ်ႈၵူဝ်းၵႂၢႆႇၽြႃးပဵၼ်ၸဝ်ႈဢေႃႈ။
ၼႂ်းဝၼ်းမိူဝ်ႈၽုၵ်ႈၼၼ်ႉ မူဝ်းသေႇ၊ ၸီႇယၢင်ႇတြႃးပၼ်ၵူၼ်းတင်းလၢႆဢေႃႈ။ ၵူၼ်းဢၼ်မီးဢမုတင်းလၢႆၵေႃႈၸုၵ်းထႃႈယူႇၵႃႈတီႈႁိမ်း မူဝ်းသေႇ၊ တႄႇဢဝ်ၶဵင်ႇႁူဝ်ၼႂ်တေႃႇထိုင်ၶိင်ႇႁူဝ်ၶမ်ႈဢေႃႈ။-
မိူဝ်ႈဢၼ် ယေႇႀရေႃး၊ ႁၼ်လွင်ႈဢၼ် မူဝ်းသေႇ၊ ႁဵတ်းယူႇၼၼ်ႉၸိုင်၊မၼ်းလၢတ်ႈလႄႈဝႃႈ၊ “လွင်ႈဢၼ်မႂ်းႁဵတ်းတီႈၵူၼ်းတင်းလၢႆၼႆႉပဵၼ်ၸိူဝ်ႉၼင်ႇႁိုဝ်။ ႁဵတ်းသင်လႄႈမႂ်းၵေႃႉလဵဝ်ၵူၺ်းႁဵတ်းယူႇၸိူဝ်ႉၼင်ႇၼႆ၊သမ်ႉႁႂ်ႈၵူၼ်းတင်းလၢႆၸုၵ်းယူႇႁိမ်းမႂ်းတႄႇဢဝ်ၶိင်ႇႁူဝ်ၼႂ်တေႃႇထိုင်ၶိင်ႇႁူဝ်ၶမ်ႈၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈၶိုၼ်းလၢတ်ႈလႄႈဝႃႈ၊ “ၵဝ်ၶႃႈလူဝ်ႇႁဵတ်းၸိူဝ်ႉၼင်ႇၼႆၵွပ်ႈပိူဝ်ႈၵူၼ်းတင်းလၢႆ မႃးၵႃႈတီႈၵဝ်ၶႃႈပုၼ်ႈလွင်ႈတၵ်းႁႃဢဝ်ဢလူဝ်ႇၽြႃးပဵၼ်ၸဝ်ႈတီႈၶႃႈဢေႃႈ။-
ပေႃးၵူၼ်းသွင်ၵေႃႉၽိတ်းၵၼ်လႄႈမႃးၸူးၵဝ်ၶႃႈၸိုင်၊ၵဝ်ၶႃႈလႆႈတႅပ်းတတ်းတြႃးၵႄႈဝူင်ႈၵၢင်ၶဝ်သေယဝ်ႉ၊သမ်ႉလႆႈသွၼ်ထုင်းၽိင်ႈတြႃး၊ၽြႃးပဵၼ်ၸဝ်ႈဢိၵ်ႇတင်းပိင်းၺၢပ်ႈတြႃးမၼ်းၸဝ်ႈၸိူဝ်းၼၼ်ႉပၼ်ၶဝ်ဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ယေႇႀရေႃး၊ လၢတ်ႈတီႈမၼ်းလႄႈဝႃႈ၊ “လွင်ႈတၢင်းဢၼ်မႂ်းႁဵတ်းၼႆႉယင်းဢမ်ႇပႆႇထုၵ်ႇမႅၼ်ႈၵူၺ်း။-
ပေႃးမႂ်းႁဵတ်းၵၢၼ်ၵူၺ်းမႂ်းၸိူဝ်ႉၼင်ႇၼႆၸိုင်၊ၸႃႉၸဵမ်မႂ်းလႄႈၵူၼ်းမႂ်းၸိူဝ်းၼႆႉႁႅင်းတၵ်းဢူၼ်ႈဢွၼ်ႇၵႂႃႇဢေႃႈ။ လွင်ႈတၢင်းၼႆႉပဵၼ်ဢၼ်ၼၵ်းၼႃတီႈမႂ်းလႄႈမႂ်းၵေႃႉလဵဝ်ၵူၺ်းဢမ်ႇတၢတ်ႈၼိူင်ႇလႆႈ။-
တေႃႈလဵဝ်ၼႆႉၵဝ်တၵ်းပၼ်တၢင်းၵျၢမ်ႇတၢင်းပွင်တီႈမႂ်းဢေႃႈ။ ထွမ်ႇလူး။ ၽြႃးပဵၼ်ၸဝ်ႈတၵ်းမီးယူႇလူၺ်ႈၵၼ်တင်းမႂ်းဢေႃႈ။ ၸႂ်ႈယူႇတႄႉ၊မႂ်းပဵၼ်ၵေႃႉဢၼ်တၢင်တူဝ်ၵူၼ်းတင်းလၢႆ ၽၢႆႇၼႃႈၽြႃးပဵၼ်ၸဝ်ႈလႄႈဢဝ်ဢမုၶဝ်ၶဝ်ႈၸူးတီႈမၼ်းၸဝ်ႈဢေႃႈ။-
မႂ်းတၵ်းလႆႈသွၼ်ထုင်းၽိင်ႈတြႃးၸဝ်ႈဢိၵ်ႇတင်းပိင်းၺၢပ်ႈတြႃးၸဝ်ႈတင်းလၢႆပၼ်ၶဝ်လႄႈ၊တၵ်းလႆႈၼႄပျႃးသဵၼ်ႈတၢင်းဢၼ်ၶဝ်ထုၵ်ႇလီယူႇၸိူဝ်ႉၼင်ႇႁိုဝ်၊ႁဵတ်းၸိူဝ်ႉၼင်ႇႁိုဝ်ၼၼ်ႉဢေႃႈ။-
လိူဝ်တွၼ်းၼႃႇသေပိူၼ်ႈၼၼ်ႉ၊မႂ်းတၵ်းလႆႈလိူၵ်ႈၵူၼ်းဢၼ်ႁဵတ်းလႆႈပဵၼ်လႆႈ၊ဢၼ်ၵူဝ်ယမ်ၽြႃးပဵၼ်ၸဝ်ႈ၊ဢၼ်မီးသဵတ်ႈၸႃႇ၊ဢၼ်ဢမ်ႇၵိၼ်သူးၵိၼ်လၢပ်ႈၸိူဝ်းၼၼ်ႉတၢင်ႇပဵၼ်ၵူၼ်းလူင်ဢၼ်ဢုပ်ႉၵူၼ်းယေႈႁဵင်၊ဢုပ်ႉၵူၼ်းယေႈပၢၵ်ႇ၊ဢုပ်ႉၵူၼ်းႁႃႈသိပ်း၊ဢုပ်ႉၵူၼ်းသိပ်းၼိုင်ႈဢေႃႈ။-
ႁႂ်ႈၶဝ်တႅပ်းတတ်းတြႃးတီႈၵူၼ်းတင်းလၢႆၵူႈၶိင်ႇတႃႉ။ ဢမုဢၼ်ယႂ်ႇဢၼ်လူင်ၸင်ႇႁႂ်ႈဢဝ်မႃးၸူးတီႈမႂ်းတႃႉ။ ဢမုဢၼ်လဵၵ်ႉဢၼ်ၼွႆႉၸိုင်၊ႁႂ်ႈၶဝ်တႅပ်းတတ်းႁင်းၽႂ်ႁင်းမၼ်းတႃႉ။ မႂ်းတၵ်းလႆႈသၢၵ်ႈသႃႇၵွပ်ႈပိူဝ်ႈၶဝ်ၽွမ်ႉၵၼ်ၸွႆႈႁၢပ်ႇၼႃႈၵၢၼ်လူၺ်ႈၵၼ်တင်းမႂ်းဢေႃႈ။-
ပေႃးမႂ်းႁဵတ်းၸိူဝ်ႉၼင်ႇၼႆလႄႈၽြႃးပဵၼ်ၸဝ်ႈၵေႃႈပၼ်ဢၶႂၢင်ႉၸိုင်၊မႂ်းတၵ်းႁႅင်းဢမ်ႇဢူၼ်ႈၵႂႃႇလႄႈ၊ၵူၼ်းတင်းသဵင်ႈတင်းလူင်ၸိူဝ်းၼႆႉၵေႃႈတၵ်းလႆႈမိူဝ်းၸူးတီႈဢၼ်ၶဝ်ယူႇၼၼ်ႉၼိမ်ၼိမ်လီလီဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈႁပ်ႉၶၢမ်ႇဢဝ်တၢင်းၵျၢမ်ႇတၢင်းပွင်ဢၼ် ယေႇႀရေႃး၊ ပၼ်ၼၼ်ႉဢေႃႈ။-
မၼ်းၸင်ႇလိူၵ်ႈတၢင်ႇၵူၼ်းလူင်ဢၼ်ဢုပ်ႉၵူၼ်းယေႈႁဵင်၊ဢုပ်ႉၵူၼ်းယေႈပၢၵ်ႇ၊ဢုပ်ႉၵူၼ်းႁႃႈသိပ်း၊ဢုပ်ႉၵူၼ်းသိပ်းၼိုင်ႈဢေႃႈ။-
ၶဝ်ၸိူဝ်းၼၼ်ႉဢွၼ်ၵၼ်တႅပ်းတတ်းတြႃးတီႈၵူၼ်းတင်းလၢႆၵူႈၶိင်ႇဢေႃႈ။ ၵႃႈဢၼ်ပဵၼ်ဢမုဢၼ်ယႂ်ႇဢၼ်လူင်ၸိုင်၊ၶဝ်ဢဝ်မႃးၸူးတီႈ မူဝ်းသေႇ၊ ဢေႃႈ။ ဢမုဢၼ်လဵၵ်ႉဢၼ်ၼွႆႉၸမ်ႉ၊ၶဝ်တႅပ်းတတ်းႁင်းၽႂ်ႁင်းမၼ်းဢေႃႈ။
လိုၼ်းၼၼ်ႉ၊ မူဝ်းသေႇ၊ တၵ်ႉၼၢႆ ယေႇႀရေႃး၊ သေယဝ်ႉ၊ ယေႇႀရေႃး၊ ၵေႃႈၶိုၼ်းမိူဝ်းၵႂႃႇၵႃႈတီႈႁိူၼ်းမၼ်းသေဢေႃႈ။
ၼႂ်းဝၼ်းလိူၼ်မႂ်ႇလိုၼ်းသေဢၼ်ၵူၼ်းမဵဝ်း ဢိသရေး၊ ၶဝ်ဢွၵ်ႇမိူင်း ဢေးၵျိပ်ႉ၊ မႃးလႆႈသၢမ်လိူၼ်ၼၼ်ႉၶဝ်ႁွတ်ႈမႃးၵႃႈတီႈထိူၼ်ႇလႅင်ႉ သိၼႃႉ၊ ဢေႃႈ။-
ၶဝ်ၼၼ်ႉဢွၼ်ၵၼ်ဢွၵ်ႇသေၵႃႈတီႈ ရေႇၽိတိမ်ႇ၊ မႃးသေယဝ်ႉ၊ႁွတ်ႈထိုင်ၵႃႈတီႈထိူၼ်ႇလႅင်ႉ သိၼႃႉ၊ ယဝ်ႉၸင်ႇ၊ၶျႃးပၢင်ၵႃႈႁိမ်းတိၼ်လွႆ သိၼႃႉ၊ ဢေႃႈ။-
မူဝ်းသေႇ၊ ၵေႃႈၶိုၼ်ႈလွႆၵႂႃႇႁႂ်ႈလႆႈႁူပ်ႉထူပ်းၽြႃးပဵၼ်ၸဝ်ႈဢေႃႈ။ ထႃႇဝရႃႉၽြႃး၊ ႁွင်ႉ မူဝ်းသေႇ၊ သေၵႃႈတီႈလွႆသေလႄႈမီးဢမိင်ႉတီႈမၼ်းလႄႈလၢတ်ႈဝႃႈ၊ “မႂ်းတၵ်းလႆႈၶိုၼ်းလၢတ်ႈတီႈၵူၼ်းမဵဝ်း ဢိသရေး၊ လုၵ်ႈလၢၼ် ယႃႇၵုပ်ႈ၊ ၸိူဝ်းၼၼ်ႉလႄႈဝႃႈၸမ်ႉ၊-
‘သူလႆႈႁၼ်လွင်ႈဢၼ်ၵဝ်ႁဵတ်းတီႈၵူၼ်းမဵဝ်း ဢေးၵျိပ်ႉ၊ ၶဝ်ဢိၵ်ႇတင်းလွင်ႈဢၼ်ၵဝ်ဢွၼ်သူဢွၵ်ႇမႃးမိူၼ်ၸိူဝ်ႉၼင်ႇၼူၵ်ႉၶၢင်ႇလေႃႉဢဝ်လုၵ်ႈမၼ်းတၢင်ႇၵႃႈၼိူဝ်ပိၵ်ႇမၼ်းလႄႈဢဝ်သူမႃးတီႈၵဝ်ၼၼ်ႉယဝ်ႉ။-
ပိူဝ်ႈၼႆလႄႈတေႃႈလဵဝ်ၼႆႉပေႃးသူထွမ်ႇဢဝ်ၵႂၢမ်းၵဝ်လႄႈပႂ်ႉၵမ်ပႂ်ႉၵျၢင်ႉပတိၺိၺ်ႇၵဝ်ၸိုင်၊သူတၵ်းပဵၼ်ၵူၼ်းၵဝ် ဢေႃႈ။ လွင်ႈမၼ်းၸမ်ႉ၊လိၼ်မိူင်းၵႃႈမီးတင်းသဵင်ႈတင်းလူင်ပဵၼ်ၶွင်ၵဝ်လႄႈ၊သူၸမ်ႉပဵၼ်မဵဝ်းၵူၼ်းဢၼ်ၵဝ်လိူၵ်ႈၵဵပ်းဢဝ်ဝႆႉၼၼ်ႉဢေႃႈ။-
သူလႆႈပဵၼ်မဵဝ်းၵူၼ်းဢၼ်သၢၵ်ႈၵၢပ်ႈတူဝ်တီႈၵဝ်လႄႈသူတၵ်းလႆႈပဵၼ်ယဵၸ်ႈပရေႃးႁဵၵ်ႈဢၼ်ႁဵတ်းဝၢတ်ႈတီႈၵဝ်ဢေႃႈ။’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈ မူဝ်းသေႇ၊ လူင်းမႃးႁွင်ႉဢဝ်ၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆသေလႄႈၶိုၼ်းမွၵ်ႇလၢတ်ႈၵႂၢမ်းဢၼ် ထႃႇဝရႃႉၽြႃး၊ သင်ႇလၢတ်ႈမၼ်းၼၼ်ႉၵူႈၸိူဝ်ႉၵူႈပိူင်ဢေႃႈ။-
ၵူၼ်းတင်းလၢႆၵေႃႈၽွမ်ႉၵၼ်ၶိုၼ်းလၢတ်ႈလႄႈဝႃႈ၊ “ႁဝ်းၶႃႈတၵ်းဢွၼ်ၵၼ်ႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉၼၼ်ႉၶႃႈဢေႃႈ၊” ဝႃႈၼင်ႇၼႆဢေႃႈ။ မူဝ်းသေႇ၊ သမ်ႉၶိုၼ်းဢဝ်လွင်ႈတၢင်းၼၼ်ႉလဝ်ႈလၢတ်ႈထိုင် ထႃႇဝရႃႉၽြႃး၊ ဢေႃႈ။
ထႃႇဝရႃႉၽြႃး၊ လၢတ်ႈတီႈ မူဝ်းသေႇ၊ လႄႈဝႃႈ၊ “ၵဝ်တၵ်းမႃးတီႈမႂ်းၼႂ်းမွၵ်ႇၵုမ်ႈဢၼ်ၼႃတၼ်ၼႃႇပုၼ်ႈလွင်ႈၼင်ႇႁိုဝ်ၵူၼ်းတင်းလၢႆတၵ်းလႆႈငိၼ်းတၢင်းဢၼ်ၵဝ်လၢတ်ႈတေႃႇမႂ်းယူႇၼၼ်ႉသေလႄႈၶဝ်တၵ်းယုမ်ႇမႂ်းၵႂႃႇမိူဝ်းၼႃႈၼၼ်ႉဢေႃႈ၊” ဝႃႈၼင်ႇၼႆဢေႃႈ။ မူဝ်းသေႇ၊ ၵေႃႈဢဝ်ၵႂၢမ်းဢၼ်ၵူၼ်းတင်းလၢႆၶိုၼ်းလၢတ်ႈၼၼ်ႉမွၵ်ႇလၢတ်ႈတီႈ ထႃႇဝရႃႉၽြႃး၊ ဢေႃႈ။-
ထႃႇဝရႃႉၽြႃး၊ လၢတ်ႈတီႈ မူဝ်းသေႇ၊ လႄႈဝႃႈ၊ “မႂ်းၵႂႃႇၵႃႈတီႈၵူၼ်းတင်းလၢႆလႄႈသင်ႇလၢတ်ႈႁႂ်ႈၶဝ်ႁဵတ်းႁႂ်ႈတူဝ်ၸဝ်ႈၵဝ်ႇမူတ်းသႂ်ၼႂ်းဝၼ်းမိူဝ်ႈၼႆႉတင်းဝၼ်းမိူဝ်ႈၽုၵ်ႈ။ ႁႂ်ႈၶဝ်သၵ်ႉၶူဝ်းသၵ်ႉလဵင်းၶဝ်တႃႉ။-
ႁႂ်ႈၶဝ်တၼ်းဝႆႉၼႂ်းဝၼ်းမိူဝ်ႈႁိုဝ်းၼၼ်ႉတႃႉ။ ၼႂ်းဝၼ်းၼၼ်ႉၵဝ် ထႃႇဝရႃႉၽြႃး၊ တၵ်းလူင်းမႃးၵႃႈၼိူဝ်လွႆ သိၼႃႉ၊ တီႈဢၼ်ၵူၼ်းတင်းသဵင်ႈတင်းလူင်မုင်ႈႁၼ်လႆႈၼၼ်ႉဢေႃႈ။-
မႂ်းတၵ်းလႆႈမၵ်းမၢႆလႅၼ်လိၼ်လွမ်ႉႁွပ်ႈလွႆဝႆႉလႄႈၽူႈလႂ်တၵ်းဢမ်ႇလႆႈၶၢမ်ႈၵႂႃႇၼၼ်ႉဢေႃႈ။ သင်ႇလၢတ်ႈလွင်ႈဢၼ်ၽူႈလႂ်ဢမ်ႇလႆႈၶိုၼ်ႈၵႂႃႇၵႃႈၼိူဝ်လွႆယင်းဢမ်ႇၵႃး၊ယႃႇႁႂ်ႈၶဝ်တိူဝ်ႉမႅၼ်ႈတိၼ်လွႆၼၼ်ႉ။ ပေႃးသေၵေႃႉၵေႃႉယဵပ်ႇမႅၼ်ႈတီႈၼၼ်ႈၸိုင်၊မၼ်းတၵ်းလႆႈတၢႆဢေႃႈ။-
ၽူႈလႂ်သေၵေႃႉသေၵူၼ်းတၵ်းဢမ်ႇလႆႈဢဝ်မၼ်းတၢႆလူၺ်ႈမိုဝ်း။ တၵ်းလႆႈဢဝ်မၢၵ်ႇႁိၼ်ပိုဝ်ႈသႂ်ႇ၊ဢမ်ႇၼၼ်တၵ်းလႆႈဢဝ်ပိုၼ်ၵၢင်ႇပိုတ်းသႂ်ႇၼၼ်ႉဢေႃႈ။ ပဵၼ်ၵူၼ်းသေဢမ်ႇဝႃႈ၊သတ်းသေဢမ်ႇဝႃႈ၊ၶဝ်တၵ်းလႆႈၶၢမ်ႇတၢင်းတၢႆတႄႉဢေႃႈ။ ၵူၺ်းၵႃႈ၊မိူဝ်ႈဢၼ်သဵင်ၼႄးၶရႃႇမေႃးလင်ၼၼ်ႉၸိုင်၊ၶဝ်တင်းလၢႆတၵ်းလႆႈဢွၼ်ၵၼ်ၶိုၼ်ႈၵႂႃႇၵႃႈၼိူဝ်လွႆဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ လူင်းလွႆမႃးသေလႄႈသင်ႇလၢတ်ႈတီႈၵူၼ်းတင်းလၢႆ ႁႂ်ႈၶဝ်မႄးႁႅၼ်းထႃႈပုၼ်ႈတႃႇတၵ်းဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ဢေႃႈ။ ၶဝ်ဢွၼ်ၵၼ်သၵ်ႉၶူဝ်းသၵ်ႉလဵင်းၶဝ်ဢေႃႈ။-
မူဝ်းသေႇ၊ လၢတ်ႈတီႈၶဝ်လႄႈဝႃႈ၊ “ႁႂ်ႈဢွၼ်ၵၼ်တၼ်းဝႆႉၼႂ်းဝၼ်းမိူဝ်ႈႁိုဝ်းၼၼ်ႉတႃႉ။ ၼႂ်းၽွင်းယၢမ်းၼႆႉယႃႇပေသိူၵ်ႈသမ်ႇၼွၼ်းလူၺ်ႈၵၼ်တင်းမေးသူ၊” ဝႃႈၼင်ႇၼႆဢေႃႈ။
ၼႂ်းဝၼ်းထူၼ်ႈထိုင်သၢမ်ဝၼ်းၶိင်ႇၵၢင်ၼႂ်ၼၼ်ႉမီးသဵင်ၽႃႉလင်၊ဢိၵ်ႇတင်းတၢင်းဢၼ်ၽႃႉမႅပ်ႈတင်းမွၵ်ႇၵုမ်ႈဢၼ်ၼႃတၼ်ၼႃႇၵႃႈၼိူဝ်လွႆ၊ဢိၵ်ႇတင်းသဵင်ၼႄးၶရႃႇမေႃးလင်ၼႃႇဢေႃႈ။ ၵူၼ်းၵႃႈဢၼ်မီးၼႂ်းပၢင်တင်းသဵင်ႈတင်းလူင်ၵူဝ်ႁႄလႄႈသၼ်ႇဝႆယူႇဢေႃႈ။-
ၵမ်းၼၼ်ႉ၊ မူဝ်းသေႇ၊ ဢွၼ်ၶဝ်ဢွၵ်ႇပၢင်ၵႂႃႇႁႂ်ႈလႆႈထူပ်းၵၼ်တင်းၽြႃးပဵၼ်ၸဝ်ႈဢေႃႈ။ ၶဝ်ၸိူဝ်းၼၼ်ႉဢွၼ်ၵၼ်ၸုၵ်းယူႇၵႃႈႁိမ်းတိၼ်လွႆဢေႃႈ။-
ၵွပ်ႈပိူဝ်ႈဢၼ် ထႃႇဝရႃႉၽြႃး၊ ပႃးတင်းၽႆးလူင်းမႃးၵႃႈၼိူဝ်လွႆ သိၼႃႉ၊ လႄႈလွႆၼၼ်ႉဢွၵ်ႇၵႂၼ်းၽႆးယူႇတင်းလွႆဢေႃႈ။ ၵႂၼ်းၽႆးၼၼ်ႉၶိုၼ်ႈယူႇမိူၼ်ၸိူဝ်ႉၼင်ႇၵႂၼ်းဢၼ်ဢွၵ်ႇၵႃႈတီႈမုၵ်ႉၽႆးမႃးၼၼ်ႉလႄႈလွႆၵေႃႈသၼ်ႇၶွၼ်းဝႆၼႃႇလူင်လၢင်ယူႇတင်းလွႆ ဢေႃႈ။-
သဵင်ၼႄးၶရႃႇၵေႃႈမေႃးလင်ႁႅင်းၼႃႇ၊ယဵင်ႈၶႅၼ်းႁႅင်းမႃးယူႇတိၵ်းတိၵ်းဢေႃႈ။ မိူဝ်ႈၼၼ်ႉ မူဝ်းသေႇ၊ ႁွင်ႉၵၢဝ်ႇလႄႈၽြႃးပဵၼ်ၸဝ်ႈဢဝ်တင်းသဵင်ၽႃႉလင်ဢိူဝ်ဢေႃႈ။-
ထႃႇဝရႃႉၽြႃး၊ လူင်းမႃးၵႃႈၼိူဝ်ပၢႆၸိၵ်းလွႆ သိၼႃႉ၊ သေလႄႈႁွင်ႉဢဝ် မူဝ်းသေႇ၊ ႁႂ်ႈမၼ်းၶိုၼ်ႈၵႂႃႇၵႃႈၼိူဝ်ပၢႆၸိၵ်းလွႆလႄႈ မူဝ်းသေႇ၊ ၵေႃႈၶိုၼ်ႈၸူးဢေႃႈ။-
ထႃႇဝရႃႉၽြႃး၊ သမ်ႉမီးဢမိင်ႉတီႈမၼ်းလႄႈဝႃႈ၊ “ၵူဝ်ၵူၼ်းတင်းလၢႆတၵ်းၶၢမ်ႈလႅၼ်လိၼ်မႃးၸူးတီႈ ထႃႇဝရႃႉၽြႃး၊ ႁႂ်ႈလႆႈမုင်ႈတူၺ်းၼၼ်ႉလႄႈ၊မႂ်းလူင်းၵႂႃႇပၼ်သတိတီႈၶဝ်တႃႉ။ ပေႃးၶဝ်ၶၢမ်ႈပူၼ်ႉမႃးၸိုင်၊ၵူဝ်ၵူၼ်းၼမ်ၼႃႇတၵ်းတၢႆၼၼ်ႉဢေႃႈ။-
ယဵၸ်ႈပရေႃးႁဵၵ်ႈ ၸိူဝ်းဢၼ်သုတ်ႉၸပ်းသုတ်ႉၸူးတီႈၵဝ် ထႃႇဝရႃႉၽြႃး၊ ၼၼ်ႉၵေႃႈတၵ်းႁဵတ်းႁႂ်ႈတူဝ်ၶဝ်မူတ်းသႂ်ဢေႃႈ။ ပေႃးဢမ်ႇၼၼ်ၵဝ် ထႃႇဝရႃႉၽြႃး၊ တၵ်းပၼ်တၢမ်ႇတီႈၶဝ်ဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈလဝ်ႈလၢတ်ႈတီႈ ထႃႇဝရႃႉၽြႃး၊ လႄႈဝႃႈ၊ “ၵူၼ်းတင်းလၢႆဢမ်ႇၸၢင်ႈၶိုၼ်ႈၵႃႈၼိူဝ်လွႆ သိၼႃႉ၊ မႃးလႆႈတီႈၶႃႈ။ လွင်ႈမၼ်းၸမ်ႉ၊ၸဝ်ႈႁဝ်းပူင်ဢမိင်ႉဝႆႉလႄႈဝႃႈ၊ ‘မၵ်းမၢႆလႅၼ်လိၼ်လွမ်ႉႁွပ်ႈလွႆဝႆႉလႄႈႁႂ်ႈမူတ်းၸၢင်ႇတႃႉ၊’ ဝႃႈၼင်ႇၼႆဝႆႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၵေႃႈမီးဢမိင်ႉတီႈမၼ်းလႄႈဝႃႈ၊ “လူင်းၵႂႃႇလႄႈႁွင်ႉပႃးဢဝ် ဢႃႇရုၼ်ႇ၊ ၶိုၼ်ႈမႃးတႃႉ။ ယႃႇပေႁႂ်ႈယဵၸ်ႈပရေႃးႁဵၵ်ႈတင်းလၢႆဢိၵ်ႇတင်းၵူၼ်းတင်းလၢႆလႆႈၶၢမ်ႈမႃးႁႂ်ႈလႆႈၶိုၼ်ႈၸူးၵႃႈတီႈ ထႃႇဝရႃႉၽြႃး၊ ပေႃးဢမ်ႇၼၼ်မၼ်းၸဝ်ႈတၵ်းပၼ်တၢမ်ႇတီႈၶဝ်ဢေႃႈ၊” ဝႃႈၼင်ႇၼႆဢေႃႈ။-
မူဝ်းသေႇ၊ ၵေႃႈလူင်းၵႂႃႇၸူးၵႃႈတီႈၵူၼ်းတင်းလၢႆလႄႈမွၵ်ႇလၢတ်ႈၵႂၢမ်းဢၼ် ထႃႇဝရႃႉၽြႃး၊ မီးဢမိင်ႉၼၼ်ႉတီႈၶဝ်ဢေႃႈ။
ၽြႃးပဵၼ်ၸဝ်ႈဢဝ်ၵႂၢမ်းတင်းသဵင်ႈတင်းလူင်ၸိူဝ်းၼႆႉလႄႈမီးဢမိင်ႉဝႃႈၸမ်ႉ၊-
“ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢၼ်ဢဝ်သူဢွၵ်ႇသေမိူင်း ဢေးၵျိပ်ႉ၊ တီႈဢၼ်သူလႆႈၶၢမ်ႇပဵၼ်ၶႃႈမႃးၼၼ်ႉဢေႃႈ။
“လိူဝ်သေၵဝ်ၼႆႉယႃႇပေၵူဝ်းၵႂၢႆႇၽြႃးတၢင်ႇသူႇတၢင်ႇပႃး။
“ယႃႇပေႁဵတ်းႁုၼ်ႇႁၢင်ႈသၢင်းထုပုင်ႇႁၢင်ႈၶိူင်ႈပိူင်ဢၼ်မီးၵႃႈၼိူဝ်ၽႃႉၵၢင်ႁၢဝ်၊ဢၼ်မီးၵႃႈၼိူဝ်လိၼ်မိူင်း၊ဢၼ်မီးၵႃႈၼႂ်းၼမ်ႉတႂ်ႈလိၼ်မိူင်းၸိူဝ်းၼၼ်ႉပုၼ်ႈတူဝ်ၸဝ်ႈၵဝ်ႇ။-
ယႃႇပေၵူမ်ႈႁူဝ်ၵွမ်းႁူဝ်ပၼ်ၶဝ်လႄႈဝႆႈၶဝ်။ လွင်ႈမၼ်းၸမ်ႉ၊ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူလႄႈၵဝ်ၶႅၼ်သူဢမ်ႇၶႂ်ႈႁႂ်ႈသူဝႆႈသႃၵူဝ်းၵႂၢႆႇၶိူင်ႈပိူင်ၼၼ်ႉဢေႃႈ။ ၵဝ်ၸီႇယၢင်ႇပၼ်တၢမ်ႇၶဝ်ၸိူဝ်းဢၼ်ၸင်းၵဝ်တင်းလၢႆတေႃႇထိုင်ၸူဝ်ႈလုၵ်ႈပၢၼ်လၢၼ်ၶဝ်သၢမ်သိုပ်ႇ၊သီႇသိုပ်ႇဢေႃႈ။-
ၵဝ်သမ်ႉၼႄပျႃးမႅတ်ႈတႃႇၵရုၼႃႇၵဝ် တီႈၸိူဝ်ႉၶိူဝ်းၶဝ်ၸိူဝ်းဢၼ်ႁၵ်ႉၵဝ်လႄႈၸၢင်ႈၵမ်ၵျၢင်ႉပိင်းၺၢပ်ႈၵဝ်တင်းလၢႆၼၼ်ႉသိုပ်ႇသိုပ်ႇတၢမ်တၢမ်တေႃႇထိုင်ႁွတ်ႈလၢႆႁဵင်သိုပ်ႇဢေႃႈ။
“ယႃႇပေၼပ်ႉတေႃႈဢဝ်ၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ၽြႃးပဵၼ်ၸဝ်ႈသူၼၼ်ႉလၢတ်ႈဝႃႈလၢႆလၢႆလွၵ်ႇလွၵ်ႇ၊လွင်ႈမၼ်းၸမ်ႉ၊ ထႃႇဝရႃႉၽြႃး၊ တၵ်းတႅၼ်းပၼ်တၢမ်ႇဢပျတ်ႈတီႈၵေႃႉဢၼ်ဢဝ်ၼႃႇမႃႉၸိုဝ်ႈသဵင်ၸဝ်ႈလၢတ်ႈဝႃႈလၢႆလၢႆလွၵ်ႇလွၵ်ႇၼၼ်ႉဢေႃႈ။
“ပႂ်ႉဝၼ်းၵမ်သိၼ်ႁႂ်ႈဝၼ်းၼၼ်ႉလႆႈမူတ်းၸၢင်ႇတႃႉ။-
ၼႂ်းႁူၵ်းဝၼ်းၵႆႉၶတ်းၸႂ်လႄႈႁဵတ်းၵၢၼ်ႁဵတ်းငၢၼ်းတူဝ်ၸဝ်ႈၵဝ်ႇတႃႉ။-
ဝၼ်းဢၼ်ထူၼ်ႈၸဵတ်းဝၼ်းၼၼ်ႉပဵၼ်ဝၼ်းၵမ်သိၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။ ၼႂ်းဝၼ်းၼၼ်ႉၸႃႉၸဵမ်သူလႄႈလုၵ်ႈလၢင်းသူ၊ၶႃႈၵူၼ်းယိင်း၊ၶႃႈၵူၼ်းၸၢႆးသူ၊သတ်းတရိၵ်ႈသၢၼ်ႇသူ၊ၶႅၵ်ႇဢၼ်မီးယူႇၼႂ်းဝဵင်းသူၼၼ်ႉဢမ်ႇလႆႈႁဵတ်းၵၢၼ်ႁဵတ်းငၢၼ်းသေၵေႃႉသေၵူၼ်း။-
လွင်ႈမၼ်းၸမ်ႉ၊ၼႂ်းႁူၵ်းဝၼ်းၼႆႉ ထႃႇဝရႃႉၽြႃး၊ ၽၢၼ်ႇသၢင်းႁဵတ်းပဵၼ်ၽႃႉၵၢင်ႁၢဝ်၊လိၼ်မိူင်း၊ၼမ်ႉသမ်ႇမုၵ်ႈတြႃႇ၊ဢိၵ်ႇတင်းၵႃႈဢၼ်မီးၵႃႈၼႂ်းမၼ်းၸိူဝ်းၼၼ်ႉယဝ်ႉသေလႄႈ၊ၼႂ်းဝၼ်းဢၼ်ထူၼ်ႈတီႈၸဵတ်းဝၼ်းၼၼ်ႉမၼ်းၸဝ်ႈလိုဝ်ႈယူႇၼိမ်ၼိမ်လီလီသေဢေႃႈ။ ပိူဝ်ႈၼႆလႄႈ၊ ထႃႇဝရႃႉၽြႃး၊ ပၼ်တၢင်းလီဝၼ်းၵမ်သိၼ်ၼၼ်ႉလႄႈႁႂ်ႈမူတ်းၸၢင်ႇဢေႃႈ။
“ႁဵတ်းရူဝ်ႇသေႇၵူဝ်ယမ်ပေႃႈမႄႈသူတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ဢသၢၵ်ႈသူတၵ်းယိုၼ်းယၢဝ်းၵႃႈၼႂ်းမိူင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူပၼ်တီႈသူၼၼ်ႉဢေႃႈ။
“ယႃႇပေဢဝ်ဢသၢၵ်ႈၵူၼ်းတၢႆ။
“တၵ်းဢမ်ႇလႆႈႁဵတ်းမေႇထုင်ႇဢၼ်ဢမ်ႇတြႃး။
“တၵ်းဢမ်ႇလႆႈလၵ်ႉဢုၵ်ႉၸႃႇၶူဝ်းလဵင်းပိူၼ်ႈ။
“တၵ်းဢမ်ႇလႆႈၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈတီႈၵူၼ်းတၢင်ႇၵေႃႉ။
“ယႃႇပေမီးၸႂ်ဢၼ်ၸပ်းၸွႆးၶႂ်ႈလႆႈၶူဝ်းႁိူၼ်းၶူဝ်းယေးပိူၼ်ႈ။ ယႃႇပေမီးၸႂ်ဢၼ်ၸပ်းၸွႆးၶႂ်ႈလႆႈမေးပိူၼ်ႈ၊ၶႃႈၵူၼ်းယိင်း၊ၶႃႈၵူၼ်းၸၢႆးပိူၼ်ႈ၊ၽုင်သူဝ်းၽုင်မႃႉလီႈပိူၼ်ႈဢိၵ်ႇတင်းၶူဝ်းၶွင်ပိူၼ်ႈသေၸိူဝ်ႉသေမဵဝ်း၊” ဝႃႈၼင်ႇၼႆဢေႃႈ။
ၵမ်းၼၼ်ႉ၊မိူဝ်ႈဢၼ်ၵူၼ်းတင်းလၢႆလႆႈငိၼ်းသဵင်ၽႃႉၽႃႇၽႃႉလင်တင်းသဵင်ၼႄးၶရႃႇမေႃးလင်လႄႈလႆႈႁၼ်တၢင်းဢၼ်ၽႃႉမႅပ်ႈဢိၵ်ႇတင်းလွႆဢွၵ်ႇၵႂၼ်းယူႇၼၼ်ႉၸိုင်၊ၶဝ်ၵူဝ်ႁႄသၼ်ႇဝႆၼႃႇလူင်လၢင်၊သုတ်ႉႁူၼ်ၵႂႃႇၸုၵ်းယူႇတီႈဢၼ်ၵႆၵႆၼၼ်ႉဢေႃႈ။-
ၶဝ်ဢွၼ်ၵၼ်လၢတ်ႈတီႈ မူဝ်းသေႇ၊ လႄႈဝႃႈ၊ “ၸဝ်ႈႁဝ်းၶႅၼ်းတေႃႈလၢတ်ႈတေႃႇႁဝ်းၶႃႈၸိူဝ်းၼႆႉသေၵမ်းတီႈၶႃႈ။ ႁဝ်းၶႃႈတၵ်းထွမ်ႇဢဝ်ၶႃႈဢေႃႈ။ ယႃႇပေႁႂ်ႈၽြႃးပဵၼ်ၸဝ်ႈမီးဢမိင်ႉတီႈႁဝ်းၶႃႈသေၵမ်းတီႈၶႃႈ။ ႁဝ်းၶႃႈၵူဝ်တၵ်းလႆႈတၢႆတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈလၢတ်ႈတီႈၶဝ်လႄႈဝႃႈ၊ “ယႃႇပေၵူဝ်ပေႁႄ။ ၽြႃးပဵၼ်ၸဝ်ႈမႃးၸၢမ်းတူၺ်းသူႁႂ်ႈသူၵူဝ်ႁႄမၼ်းၸဝ်ႈပုၼ်ႈလွင်ႈၼင်ႇႁိုဝ်သူတၵ်းဢမ်ႇႁဵတ်းဢပျတ်ႈမႅၼ်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။-
ၼႂ်းဝႃႈၼၼ်သေၵေႃႈၵူၼ်းတင်းလၢႆၸုၵ်းတီႈဢၼ်ၵႆၵႆယူႇသေလႄႈ၊ မူဝ်းသေႇ၊ ၵေႃႉလဵဝ်ၵူၺ်းၶိုၼ်ႈၸူးၵႃႈတီႈမွၵ်ႇၵုမ်ႈၼႃတၼ်ၼႃႇ၊တီႈဢၼ်ၽြႃးပဵၼ်ၸဝ်ႈမီးယူႇၼၼ်ႉဢေႃႈ။
ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ ႁႂ်ႈလႆႈမွၵ်ႇလၢတ်ႈထိုင်၊ၵူၼ်းမဵဝ်း ဢိသရေး၊ တင်းလၢႆလႄႈဝႃႈ၊ “တူဝ်သူလႆႈႁုႁၼ်လွင်ႈဢၼ်ၵဝ် ထႃႇဝရႃႉၽြႃး၊ ယူႇၵႃႈၼိူဝ်ၽုင်ႇၵၢင်ႁၢဝ်လႄႈလၢတ်ႈတေႃႇသူၸိူဝ်ႉၼင်ႇႁိုဝ်ၼၼ်ႉယဝ်ႉ။-
တေဢမ်ႇလႆႈႁဵတ်းၽြႃးငိုၼ်းၽြႃးၶမ်းဝႆႉတီႈသူလႄႈဝႆႈသႃၵူဝ်းၵႂၢႆႇတၢင်တူဝ်ၵဝ်။-
ဢဝ်တင်းလိၼ်ၵေႃႇႁဵတ်းၶဵင်ႇတၢင်းလူႇပုၼ်ႈၵဝ်တႃႉ။ ဢဝ်သူဝ်း၊ဝူဝ်းသူႁႂ်ႈပဵၼ်တူဝ်တၢင်းလူႇဢၼ်ဢဝ်တုတ်ႇၽႆးဢိၵ်ႇတင်းတၢင်းလူႇမိၵ်ႈသႁႃႇယႃႉၸိူဝ်းၼၼ်ႉသၢၵ်ႈလူႇၵႃႈၼိူဝ်ၶဵင်ႇတၢင်းလူႇၼၼ်ႉတႃႉ။ တီႈလႂ်တၼ်းလႂ်သေဢမ်ႇဝႃႈ၊တီႈဢၼ်ၵဝ်မၵ်းၶၢၼ်းဝႆႉပုၼ်ႈသူတၵ်းဝႆႈသႃၵူဝ်းၵႂၢႆႇၵဝ်ၼၼ်ႉ၊ၵဝ်တၵ်းမႃးတီႈသူလႄႈပၼ်တၢင်းလီဢေႃႈ။-
ပေႃးတေဢဝ်မၢၵ်ႇႁိၼ်ၵေႃႇႁဵတ်းၶဵင်ႇတၢင်းလူႇပုၼ်ႈၵဝ်ၸိုင်၊ယႃႇပေဢဝ်မၢၵ်ႇႁိၼ်ဢၼ်ထၢၵ်ႇဢၼ်သိၼ်ၼၼ်ႉ။ ပေႃးသူဢဝ်သိဝ်ႇတွၵ်ႇမၢၵ်ႇႁိၼ်ၸိုင်၊သူႁဵတ်းႁႂ်ႈမၢၵ်ႇႁိၼ်ၸိူဝ်းၼၼ်ႉဢမ်ႇလီဢမ်ႇထုၵ်ႇပုၼ်ႈၵဝ်ဢေႃႈ။-
ယႃႇပေၵၢႆႇၶူဝ်လႆၵႃႈၼိူဝ်ၶဵင်ႇတၢင်းလူႇၵဝ်။ ယၢမ်းမိူဝ်ႈဢၼ်သူတႆႇၶူဝ်လႆၵႂႃႇၼၼ်ႉၵူဝ်တၵ်းႁၼ်တၢင်းဢၼ်သူပွႆႇတူဝ်ပူၺ်ၼၼ်ႉဢေႃႈ။”
“တေႃႈလဵဝ်ၼႆႉ၊ဢဝ်ထုင်းတြႃးၸိူဝ်းၼႆႉသင်ႇလၢတ်ႈဝႆႉတီႈၵူၼ်းမဵဝ်း ဢိသရေး၊ တင်းလၢႆတႃႉ။-
ပေႃးသူသိုဝ်ႉၶႃႈဢၼ်ပဵၼ်ၵူၼ်းမဵဝ်း ႁေႇပြႄး၊ ၸိုင်၊မၼ်းတၵ်းလႆႈၶၢမ်ႇႁဵတ်းၶႃႈႁူၵ်းပီၵူၺ်းဢေႃႈ။ ပေႃးထိုင်ၸဵတ်းပီၸိုင်၊မၼ်းတၵ်းလႆႈလွတ်ႈဢွၵ်ႇလၢႆလၢႆ၊ဢမ်ႇလူဝ်ႇလႆႈပၼ်ငိုၼ်းလႄႈထႆႇဢဝ်ၶိုၼ်းယဝ်ႉ။-
မိူဝ်ႈဢၼ်မၼ်းတႄႇၸႃႉမႃးၶၢမ်ႇပဵၼ်ၶႃႈၼၼ်ႉပေႃးမၼ်းၶၢမ်ႇၵေႃႉလဵဝ်ၵူၺ်းမၼ်းၸိုင်၊ႁႂ်ႈမၼ်းဢွၵ်ႇၵႂႃႇၵေႃႉလဵဝ်ၵူၺ်းမၼ်းတႃႉ။ ပေႃးမၼ်းပႃးမေးမၼ်းမႃးၸိုင်၊မေးမၼ်းၼၼ်ႉၵေႃႈႁႂ်ႈလွတ်ႈၵႂႃႇၸွမ်းမၼ်းတႃႉ။-
ပေႃးၸဝ်ႈမၼ်းဢဝ်မေးပၼ်မၼ်းလႄႈ၊မေးမၼ်းၵိူတ်ႇလုၵ်ႈၵိူတ်ႇလၢင်းမႃးၸိုင်၊မႄႈယိင်းၼၼ်ႉတင်းလုၵ်ႈလၢင်းမၼ်းတင်းလၢႆတၵ်းလႆႈဝႆႉပဵၼ်ၶႃႈၵိုတ်းယူႇတီႈၸဝ်ႈမၼ်းသေလႄႈႁႂ်ႈၶႃႈၼၼ်ႉလွတ်ႈၵေႃႉလဵဝ်ၵူၺ်းမၼ်းတႃႉ။-
ၵူၺ်းၵႃႈ၊ပေႃးၶႃႈၼၼ်ႉလၢတ်ႈလႅင်းလႅင်းလႄႈဝႃႈ၊ ‘ၵဝ်ၶႃႈႁၵ်ႉၸဝ်ႈၵဝ်ၶႃႈဢိၵ်ႇတင်းမေးတင်းလုၵ်ႈလၢင်းၵဝ်ၶႃႈဢေႃႈ။ ၵဝ်ၶႃႈဢမ်ႇၶႂ်ႈလွတ်ႈၵႂႃႇတီႈၶႃႈ၊’ ဝႃႈၼႆၸိုင်၊-
ၸဝ်ႈမၼ်းတၵ်းလႆႈဢဝ်မၼ်းၵႂႃႇၵႃႈတီႈတီႈဢၼ်ႁဵတ်းဝၢတ်ႈၵူဝ်းၵႂၢႆႇၽြႃးပဵၼ်ၸဝ်ႈသေယဝ်ႉ၊သမ်ႉႁႂ်ႈမၼ်းၸုၵ်းႁိမ်းၽၵ်းတူၵႃႈတီႈသဝ်ၽၵ်းတူလႄႈ၊ၸဝ်ႈမၼ်းတၵ်းလႆႈဢဝ်လဵၵ်းၸီး၊ၸီးတီႈဝၢၼ်ႁူမၼ်းပွင်ႇသေယဝ်ႉ၊ၶႃႈၼၼ်ႉတၵ်းလႆႈၶၢမ်ႇပဵၼ်ၶႃႈယူႇတေႃႇၸူဝ်ႈဢေႃႈ။
“ပေႃးၵူၼ်းသေၵေႃႉၵေႃႉဢဝ်လုၵ်ႈယိင်းသၢဝ်မၼ်းၶၢႆပႅတ်ႈႁႂ်ႈပဵၼ်ၶႃႈၸိုင်၊မႄႈယိင်းသၢဝ်ၼၼ်ႉတၵ်းဢမ်ႇလႆႈလွတ်ႈဢွၵ်ႇမိူၼ်ၸိူဝ်ႉၼင်ႇၶႃႈၵူၼ်းၸၢႆးလႆႈလွတ်ႈၼၼ်ႉ။-
ပေႃးမႄႈယိင်းသၢဝ်ၼၼ်ႉလႆႈၶၢမ်ႇၶၢႆပႅတ်ႈၵႂႃႇတီႈၵေႃႉဢၼ်ဢၢၼ်းဢဝ်ႁဵတ်းမေးမၼ်းလႄႈ၊ၸဝ်ႈမၼ်းသမ်ႉဢမ်ႇထုၵ်ႇၸႂ်မႄႈယိင်းၼၼ်ႉယဝ်ႉၸိုင်၊ၸဝ်ႈမၼ်းတၵ်းလႆႈၶၢႆပၼ်ၶိုၼ်းတီႈပေႃႈမႄႈယိင်းသၢဝ်ၼၼ်ႉဢေႃႈ။ ပိူဝ်ႈဢၼ်ၸဝ်ႈမၼ်းဢမ်ႇမီးသဵတ်ႈၸႃႇၼၼ်ႉလႄႈၸဝ်ႈမၼ်းဢမ်ႇမီးဢၶႂၢင်ႉၶၢႆမၼ်းပၼ်တီႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်း။-
ပေႃးသေၵေႃႉသေၵူၼ်းဢဝ်ၶႃႈမႄႈယိင်းၼၼ်ႉႁႂ်ႈပဵၼ်မေးလုၵ်ႈၸၢႆးမၼ်းၸိုင်၊တၵ်းလႆႈမၢတ်ႈပဵၼ်ၸိူဝ်ႉၼင်ႇလုၵ်ႈယိင်းဢေႃႈ။-
ပေႃးမၼ်းသမ်ႉဢဝ်မေးၼွႆႉထႅင်ႈၸိုင်၊တီႈမေးလူင်မၼ်းၼၼ်ႉၵေႃႈ တၵ်းလႆႈပၼ်ၵိၼ်ပၼ်ၼုင်ႈလႄႈႁဵတ်းပၼ်ဝၢတ်ႈၽူဝ်မေးမိူၼ်ၸိူဝ်ႉၼင်ႇဢွၼ်တၢင်းၼၼ်ႉဢေႃႈ။-
ပေႃးမၼ်းဢမ်ႇႁဵတ်းသၢမ်ပိူင်ၼႆႉၸိုင်၊မေးလူင်ၼၼ်ႉတၵ်းလႆႈလွတ်ႈဢွၵ်ႇလၢႆလၢႆ၊ဢမ်ႇလူဝ်ႇဢဝ်ငိုၼ်းထႆႇပုၼ်ႈတူဝ်မၼ်းယဝ်ႉ။
“ၵေႃႉဢၼ်ပေႃႉယႅၼ်ႉၵူၼ်းတေႃႇပေႃးတၢႆၵႂႃႇၼၼ်ႉတၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၼ်ပဵၼ်ဢေႃႈ။-
ၵူၺ်းၵႃႈ၊ပေႃးမၼ်းယင်းဢမ်ႇလႆႈတင်ႈၸႂ်ဢဝ်တၢႆလႄႈသမ်ႉဢဝ်တၢႆမႅၼ်ႈၸိုင်၊ၵဝ်တၵ်းမၵ်းၶၢၼ်းပၼ်တီႈဢၼ်မၼ်းတၵ်းလႅၼ်ႈပၢႆႈၵႂႃႇသွၼ်ႈယူႇၼၼ်ႉဢေႃႈ။-
ၵေႃႉဢၼ်ႁဵတ်းၵျၢမ်းထၢမ်းၼႃႇတီႈပိူၼ်ႈတၢင်ႇၵေႃႉလႄႈတင်ႈၸႂ်တင်ႈၶေႃးဢဝ်တၢႆပႅတ်ႈၼၼ်ႉၸမ်ႉ၊ပိၵ်ႉသမ်ႉမၼ်းလႅၼ်ႈပၢႆႈၵႂႃႇသွၼ်ႈၵႃႈတီႈၶဵင်ႇတၢင်းလူႇၵဝ်ယူႇသေၵေႃႈ၊တၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၼ်ပဵၼ်ဢေႃႈ။
“ၵေႃႉဢၼ်ပေႃႉယႅၼ်ႉပေႃႈမႄႈမၼ်းၼၼ်ႉတၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၼ်ပဵၼ်ဢေႃႈ။
“ၵေႃႉဢၼ်လၵ်ႉဢဝ်ၵူၼ်းသေယဝ်ႉ၊ဢၢၼ်းၶၢႆၵိၼ်သေဢမ်ႇဝႃႈ၊ဢၢၼ်းၸႂ်ႉႁဵတ်းၶႃႈမၼ်းသေဢမ်ႇဝႃႈ၊တၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၼ်ပဵၼ်ဢေႃႈ။
“ၵေႃႉဢၼ်ၵိၼ်ႇလႃႇပေႃႈမႄႈမၼ်းၼၼ်ႉတၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၼ်ပဵၼ်ဢေႃႈ။
“ပေႃးမီးတၢင်းဢၼ်ၽိတ်းၵၼ်လႄႈ၊ၵေႃႉၼိုင်ႈလႆႈဢဝ်မၢၵ်ႇႁိၼ်ထုပ်ႉသေဢမ်ႇဝႃႈ၊ဢဝ်တႃမိုဝ်းထုပ်ႉသေဢမ်ႇဝႃႈ၊ၵေႃႉဢၼ်လႆႈၶၢမ်ႇထုပ်ႉၶၢမ်ႇပေႃႉၼၼ်ႉယင်းဢမ်ႇတၢႆလႄႈ၊ၵူၺ်းလႆႈၼွၼ်းယူႇၵႃႈၼိူဝ်ၵူႇတီႈၼွၼ်းသေယဝ်ႉ၊-
ပေႃးမၼ်းသမ်ႉလုၵ်ႉလႆႈလႄႈသၵ်းၶွၼ်ႉတဝ်ႉဢွၵ်ႇမႃးလႆႈၸိုင်၊ၵေႃႉဢၼ်ထုပ်ႉပေႃႉပိူၼ်ႈၼၼ်ႉၵေႃႈပူၼ်ႉလွတ်ႈတၢမ်ႇတၢင်းၽိတ်းယဝ်ႉ။ ၵူၺ်းၵႃႈ၊မၼ်းတၵ်းလႆႈဢဝ်ငိုၼ်းယေႃႇပၼ်သေပၼ်ပုၼ်ႈၵေႃႉၼၼ်ႉၵွပ်ႈပိူဝ်ႈလႆႈႁၢမ်းၵၢၼ်ႁၢမ်းငၢၼ်းဢိၵ်ႇတင်းပုၼ်ႈတႃႇတၵ်းယႃပၼ်တၢင်းၸဵပ်းတၢင်းသႅပ်ႇၵေႃႉၼၼ်ႉတေႃႇပေႃးၶႅၼ်းမႃးလီလီၼၼ်ႉဢေႃႈ။
“ပေႃးသေၵေႃႉသေၵူၼ်းဢဝ်တင်းၶွၼ်ႉလႄႈပေႃႉယႅၼ်ႉၶႃႈၵူၼ်းၸၢႆး၊ဢမ်ႇၼၼ်ၶႃႈၵူၼ်းယိင်းမၼ်းတၢႆၵႂႃႇၵမ်းလဵဝ်ၸိုင်၊မၼ်းၼၼ်ႉတၵ်းလႆႈၶၢမ်ႇတၢမ်ႇဢေႃႈ။-
ၵူၺ်းၵႃႈ၊ပေႃးၶႃႈၼၼ်ႉယူႇဝၼ်းၼိုင်ႈ၊သွင်ဝၼ်းဢမ်ႇတၢႆၸိုင်၊ၸဝ်ႈၼၼ်ႉတၵ်းလႆႈၵၢင်းလွတ်ႈတင်းတၢမ်ႇဢေႃႈ။ လွင်ႈမၼ်းၸမ်ႉ၊ၶႃႈၼၼ်ႉပဵၼ်မိူၼ်ငိုၼ်းတွင်းၸဝ်ႈမၼ်းဢေႃႈ။
“ပေႃးၵူၼ်းၸၢႆးၼင်ႇၵၼ်ၵၼ်ၽိတ်းၵၼ်ပေႃႉၵၼ်လႄႈတိူဝ်ႉထုၵ်ႇမႅၼ်ႈမႄႈယိင်းဢၼ်ပႃးတွင်ႉၼၼ်ႉသေယဝ်ႉ၊လုၵ်ႈမၼ်းလုသုမ်းၵႂႃႇလႄႈတူဝ်မၼ်းတႄႉဢမ်ႇပဵၼ်ၶႆႈပဵၼ်ၸဵပ်းၵႃႈသင်ၸိုင်၊ၵေႃႉဢၼ်တိူဝ်ႉမႅၼ်ႈၼၼ်ႉတၵ်းလႆႈၶၢမ်ႇၸွမ်းၵႃႈၼင်ႇဢၼ်ၽူဝ်မႄႈယိင်းၼၼ်ႉတၢပ်ႈတၢမ်ႇၼၼ်ႉဢေႃႈ။ ၸွမ်းၵႃႈၼင်ႇဢၼ်ၶုၼ်ဢၼ်ၸီႇယၢင်ႇတြႃး၊တႅပ်းတတ်းၼၼ်ႉၵေႃႈတၵ်းလႆႈယေႃႇလႆႈသေငိုၼ်းဢေႃႈ။-
ပေႃးဝႃႈမႄႈယိင်းၼၼ်ႉပဵၼ်ၸဵပ်းပဵၼ်ၶႆႈၵႂႃႇၸိုင်၊တၵ်းလႆႈတၢပ်ႈတၢမ်ႇဢသၢၵ်ႈပုၼ်ႈဢသၢၵ်ႈ၊-
မၢၵ်ႇတႃပုၼ်ႈမၢၵ်ႇတႃ၊ၶဵဝ်ႈပုၼ်ႈၶဵဝ်ႈ၊မိုဝ်းပုၼ်ႈမိုဝ်း၊တိၼ်ပုၼ်ႈတိၼ်၊-
တၢင်းဢၼ်ၽႆးမႆႈပုၼ်ႈတၢင်းဢၼ်ၽႆးမႆႈ၊တၢင်းဢၼ်မၢတ်ႇပုၼ်ႈတၢင်းဢၼ်မၢတ်ႇ၊ႁွႆးၸဵပ်းပုၼ်ႈႁွႆးၸဵပ်းဢေႃႈ။
“ပေႃးသေၵေႃႉၵေႃႉပေႃႉယႅၼ်ႉသႂ်ႇမၢၵ်ႇတႃၶႃႈၵူၼ်းၸၢႆးမၼ်း၊ဢမ်ႇၼၼ်၊ၶႃႈၵူၼ်းယိင်းမၼ်းလုၵႂႃႇၸိုင်၊ႁႂ်ႈမၢၵ်ႇတႃဢၼ်လုၼၼ်ႉပဵၼ်ၵႃႈၶၼ်ပုၼ်ႈတူဝ်မၼ်းသေလႄႈၶႃႈၼၼ်ႉတၵ်းလႆႈလွတ်ႈဢွၵ်ႇလၢႆလၢႆဢေႃႈ။-
မိူၼ်ၼင်ႇၼၼ်ပေႃးပေႃႉယႅၼ်ႉသႂ်ႇၶဵဝ်ႈၶႃႈၵူၼ်းၸၢႆးမၼ်း၊ဢမ်ႇၼၼ်၊ၶဵဝ်ႈၶႃႈၵူၼ်းယိင်းမၼ်းႁၵ်းၵႂႃႇၸိုင်၊ႁႂ်ႈၶဵဝ်ႈဢၼ်ႁၵ်းၼၼ်ႉပဵၼ်ၵႃႈၶၼ်ပုၼ်ႈတူဝ်မၼ်းသေလႄႈၶႃႈၼၼ်ႉတၵ်းလႆႈလွတ်ႈဢွၵ်ႇလၢႆလၢႆဢေႃႈ။
“ပေႃးဝူဝ်းတေႃးၵူၼ်းတၢႆၸိုင်၊တၵ်းလႆႈဢဝ်မၢၵ်ႇႁိၼ်ပိုဝ်ႈသႂ်ႇဝူဝ်းၼၼ်ႉႁႂ်ႈတၢႆဢမၢၼ်ႇၶၼ်ပဵၼ်ဢေႃႈ။ ၼိူဝ်ႉမၼ်းၵေႃႈဢမ်ႇလႆႈၵိၼ်။ တီႈၸဝ်ႈဝူဝ်းၼၼ်ႉၸိုင်၊တၵ်းဢမ်ႇလႆႈတၢပ်ႈတၢမ်ႇ။-
ၼႂ်းဝႃႈၼၼ်သေၵေႃႈ၊ပေႃးဝူဝ်းၼၼ်ႉမိူဝ်ႈပူၼ်ႉမႃး၊ယၢမ်ႈတေႃးၵူၼ်းသေလႄႈ၊တီႈၸဝ်ႈမၼ်းၵေႃႈယၢမ်ႈလႆႈပၼ်တိဝႆႉယဝ်ႉ၊ယင်းဢမ်ႇမတ်ႉဢမ်ႇၽုၵ်ႇပွႆႇဝႆႉၵူၺ်း၊ဝူဝ်းၼၼ်ႉသမ်ႉတေႃးၵူၼ်းတၢႆထႅင်ႈၸိုင်၊တၵ်းလႆႈဢဝ်မၢၵ်ႇႁိၼ်ပိုဝ်ႈသႂ်ႇဝူဝ်းၼၼ်ႉႁႂ်ႈတၢႆဢေႃႈ။ ၸဝ်ႈဝူဝ်းၵေႃႈတၵ်းလႆႈၶၢမ်ႇတၢင်းတၢႆဢေႃႈ။-
ဢမ်ႇၼၼ်ၵေႃႈပေႃးပၼ်ဢၶႂၢင်ႉႁႂ်ႈၸဝ်ႈဝူဝ်းၼၼ်ႉယေႃႇငိုၼ်းသေငိုၼ်းၸိုင်၊မၼ်းတၵ်းလႆႈယေႃႇငိုၼ်းသေငိုၼ်းပုၼ်ႈဢၼ်တၵ်းထုတ်ႇဢဝ်ဢသၢၵ်ႈတူဝ်ၸဝ်ႈၵဝ်ႇၼၼ်ႉၸွမ်းၵႃႈၼင်ႇဢၼ်တႅပ်းတတ်းၼၼ်ႉဢေႃႈ။-
ပေႃးဝူဝ်းတေႃးလုၵ်ႈဢွၼ်ႇၸၢႆး၊ဢမ်ႇၼၼ်လုၵ်ႈဢွၼ်ႇယိင်းတၢႆၸိုင်၊တၵ်းလႆႈၸီႇယၢင်ႇၸိူဝ်ႉၼင်ႇၼႆၼင်ႇၵဝ်ႇဢေႃႈ။-
ပေႃးဝူဝ်းတေႃးၶႃႈၵူၼ်းၸၢႆး၊ဢမ်ႇၼၼ်ၶႃႈၵူၼ်းယိင်းတၢႆၸိုင်၊ၸဝ်ႈဝူဝ်းၼၼ်ႉတၵ်းလႆႈသေငိုၼ်းယေႃႇငိုၼ်းသၢမ်သိပ်းၶႅပ်းတီႈၸဝ်ႈၶႃႈၼၼ်ႉဢေႃႈ။ ဝူဝ်းၼၼ်ႉၵေႃႈတၵ်းလႆႈဢဝ်မၢၵ်ႇႁိၼ်ပိုဝ်ႈႁႂ်ႈတၢႆဢေႃႈ။
“ပေႃးသေၵေႃႉၵေႃႉၽုၺ်ႇႁူးၽုၺ်ႇၶုမ်ဝႆႉ၊ဢမ်ႇၼၼ်ၶုတ်းႁူးၶုတ်းၶုမ်ဢမ်ႇႁူမ်ႇဝႆႉလႄႈဝူဝ်းပိူၼ်ႈ၊မႃႉလီႈပိူၼ်ႈ၊တူၵ်းႁူးတူၵ်းၶုမ်လႄႈတၢႆၸိုင်၊-
ၸဝ်ႈႁူးၸဝ်ႈၶုမ်ၼၼ်ႉတၵ်းလႆႈသေပၼ်ငိုၼ်းတီႈၸဝ်ႈဝူဝ်း၊ၸဝ်ႈမႃႉလီႈသေလႄႈ၊မၼ်းတၵ်းလႆႈသိမ်းဢဝ်တူဝ်တၢႆၼၼ်ႉဢေႃႈ။-
ပေႃးဝူဝ်းသေၵေႃႉၵေႃႉ တေႃးဝူဝ်းပိူၼ်ႈတၢႆၸိုင်၊တၵ်းလႆႈၶၢႆဝူဝ်းတူဝ်ဢၼ်ဢသၢၵ်ႈလိပ်းၼၼ်ႉသေ၊ဢဝ်ၵႃႈမၼ်းၶၼ်မၼ်းၽႄမႅင်ႇၵၼ်ဢေႃႈ။ ၼိူဝ်ႉဝူဝ်းတူဝ်တၢႆၼၼ်ႉၵေႃႈ တၵ်းလႆႈၽႄမႅင်ႇၵၼ်ဢေႃႈ။-
ဢမ်ႇၼၼ်ၵေႃႈ၊ပေႃးပိူၼ်ႈဢွၼ်ၵၼ်ၸွမ်းႁုၸွမ်းႁၼ်လွင်ႈဢၼ်ဝူဝ်းၼၼ်ႉမိူဝ်ႈပူၼ်ႉမႃးၼၼ်ႉယၢမ်ႈတေႃးပိူၼ်ႈသေယဝ်ႉ၊ၸဝ်ႈမၼ်းယင်းဢမ်ႇၽုၵ်ႇဝႆႉမတ်ႉဝႆႉၸိုင်၊မၼ်းတၵ်းလႆႈဢဝ်ဝူဝ်းမၼ်းဢၼ်ဢသၢၵ်ႈလိပ်းယူႇၼၼ်ႉယေႃႇပၼ်တႅၼ်းပၼ်ၵေႃႉၼၼ်ႉလႄႈ၊မၼ်းတၵ်းလႆႈသိမ်းဢဝ်ဝူဝ်းဢၼ်တၢႆၼၼ်ႉဢေႃႈ။
“ပေႃးသေၵေႃႉၵေႃႉလၵ်ႉဢဝ်သူဝ်း၊ဝူဝ်း၊ပိူၼ်ႈသေလႄႈႁႅမ်ပႅတ်ႈသေဢမ်ႇဝႃႈ၊ၶၢႆပႅတ်ႈသေဢမ်ႇဝႃႈ၊တၵ်းလႆႈတႅၼ်းပၼ်ဝူဝ်းႁႃႈတူဝ်၊ပုၼ်ႈဝူဝ်းတူဝ်ၼိုင်ႈ၊သူဝ်းသီႇတူဝ်ပုၼ်ႈသူဝ်းတူဝ်ၼိုင်ႈဢေႃႈ။-
“ပေႃးသေၵေႃႉၵေႃႉပွႆႇတရိၵ်ႈသၢၼ်ႇမၼ်းဝႆႉလႄႈၵႂႃႇၵိၼ်ႁႆႈၵိၼ်ၼႃးပိူၼ်ႈ၊လႄႇၵႂႃႇၶဝ်ႈသူၼ်မၢၵ်ႇၸပိတ်ႉပိူၼ်ႈလႄႈၵိၼ်မၢၵ်ႇၶဝ်ႈႁူင်းၼမ်ႉပိူၼ်ႈၸိုင်၊မၼ်းတၵ်းလႆႈဢဝ်ဢၼ်လီသေပိူၼ်ႈၵႃႈၼႂ်းႁႆႈၼႃးမၼ်း၊ၼႂ်းသူၼ်မၢၵ်ႇၸပိတ်ႉမၼ်းၼၼ်ႉတႅၼ်းပၼ်ဢေႃႈ။
“ပေႃးသေၵေႃႉၵေႃႉတုတ်ႇၽႆးႁႆႈမၼ်းလႄႈၽႆးၸပ်းတီႈယိူဝ်ႈယုမ်းမႆႈလၢမ်းၵႂႃႇမႆႈၵွင်ၶဝ်ႈ၊လိုၼ်ႈၶဝ်ႈ၊တူၼ်ႈၶဝ်ႈပိူၼ်ႈၸိုင်၊ၵေႃႉဢၼ်တုတ်ႇၽႆးၼၼ်ႉတၵ်းလႆႈတႅၼ်းပၼ်ဢမၢၼ်ႇၶၼ်ပဵၼ်ဢေႃႈ။
“ပေႃးသေၵေႃႉၵေႃႉလႆႈႁပ်ႉဢဝ်ငိုၼ်းၶမ်း၊ၶူဝ်းၶွင်သေၸိူဝ်ႉသေပိူင်ဢၼ်ပိူၼ်ႈၽၢၵ်ႇဝႆႉၼၼ်ႉ၊ၽူႈလၵ်ႉသမ်ႉမႃးလၵ်ႉဢဝ်ၵႃႈၼႂ်းႁိူၼ်းမၼ်းၵႂႃႇလႄႈ၊ပေႃးတိလႆႈၽူႈလၵ်ႉၼၼ်ႉၸိုင်၊ၽူႈလၵ်ႉၼၼ်ႉတၵ်းလႆႈယေႃႇၶိုၼ်းပၼ်သွင်ပုၼ်ႈဢေႃႈ။-
ၵူၺ်းၵႃႈ၊ပေႃးဢမ်ႇတိလႆႈၽူႈလၵ်ႉၼၼ်ႉၸိုင်၊ၵေႃႉဢၼ်ပိူၼ်ႈၽၢၵ်ႇၶူဝ်းတီႈမၼ်းၼၼ်ႉတၵ်းလႆႈၵႂႃႇၵႃႈတီႈဢၼ်ႁဵတ်းဝၢတ်ႈၵူဝ်းၵႂၢႆႇၽြႃးပဵၼ်ၸဝ်ႈလႄႈတိူင်ႇၵၢဝ်ႇၵတိဝႃႈ၊မၼ်းဢမ်ႇလႆႈလၵ်ႉဢဝ်ၶူဝ်းၶွင်ၵေႃႉၼၼ်ႉဢေႃႈ။
“ၼႂ်းလွင်ႈဢၼ်ၽိတ်းပိူင်ႈလူၺ်ႈဢုၵ်ႉၸႃႇဢၼ်ပိူၼ်ႈၽၢၵ်ႇဝႆႉ၊ပဵၼ်ဝူဝ်း၊မႃႉလီႈ၊သူဝ်း၊ၶူဝ်းၼုင်ႈၶူဝ်းၶွင်သေၸိူဝ်ႉသေပိူင်ႁၢႆၵႂႃႇလႄႈပေႃးသေၵေႃႉသေၵူၼ်းထူပ်းႁၼ်လႄႈဝႃႈ၊ ‘ဢၼ်ၼႆႉပဵၼ်ဢုၵ်ႉၸႃႇၵဝ်ဢေႃႈ၊’ ဝႃႈၼႆၸိုင်၊ဢမုၶဝ်သွင်ၵေႃႉၼၼ်ႉတၵ်းလႆႈႁွတ်ႈထိုင်ၵႃႈတီႈ၊တီႈဢၼ်ႁဵတ်းဝၢတ်ႈၵူဝ်းၵႂၢႆႇၽြႃးပဵၼ်ၸဝ်ႈဢေႃႈ။ ၵေႃႉဢၼ်ၽြႃးပဵၼ်ၸဝ်ႈႁႂ်ႈသုမ်းဢမုၼၼ်ႉ၊တၵ်းလႆႈတႅၼ်းပၼ်သွင်ပုၼ်ႈတီႈတၢင်ႇၵေႃႉၼၼ်ႉဢေႃႈ။
“ပေႃးသေၵေႃႉၵေႃႉၽွမ်ႉၸႂ်ဝႃႈ၊တၵ်းပႂ်ႉထိင်းပၼ်မႃႉလီႈ၊သူဝ်း၊ဝူဝ်း၊ဢမ်ႇၼၼ်သတ်းတရိၵ်ႈသၢၼ်ႇသေမဵဝ်းမဵဝ်းပုၼ်ႈၸဝ်ႈမၼ်းလႄႈတူဝ်ၼၼ်ႉတၢႆၵႂႃႇသေဢမ်ႇဝႃႈ၊တိူဝ်ႉမၢတ်ႇၵႂႃႇသေဢမ်ႇဝႃႈ၊ပိူၼ်ႈတၢင်ႇၵေႃႉႁေႃႈဢဝ်ၵႂႃႇသေဢမ်ႇဝႃႈ၊ပေႃးဢမ်ႇမီးသၢၵ်ႈသေႇၸိုင်၊-
ၵေႃႉၼၼ်ႉတၵ်းလႆႈၵႂႃႇၵႃႈတီႈဢၼ်ႁဵတ်းဝၢတ်ႈၵူဝ်းၵႂၢႆႇၽြႃးပဵၼ်ၸဝ်ႈလႄႈတၵ်းလႆႈတိူင်ႇၵၢဝ်ႇၵႂၢမ်းသဵတ်ႈၸႃႇလွင်ႈဢၼ်မၼ်းဢမ်ႇလႆႈလၵ်ႉဢဝ်ၼၼ်ႉဢေႃႈ။ ပေႃးမၼ်းဢမ်ႇလႆႈလၵ်ႉတႄႉၸိုင်၊ၸဝ်ႈမၼ်းတၵ်းလႆႈၶၢမ်ႇသုမ်းလႄႈ၊ၵေႃႉၼၼ်ႉဢမ်ႇလႆႈယေႃႇလႆႈတႅၼ်းပၼ်။-
ၵူၺ်းၵႃႈ၊ပေႃးမီးၵူၼ်းလၵ်ႉဢဝ်သတ်းၼၼ်ႉၵႂႃႇတႄႉၸိုင်၊မၼ်းတၵ်းလႆႈတႅၼ်းပၼ်တီႈၸဝ်ႈဢုၵ်ႉၸႃႇၼၼ်ႉဢေႃႈ။-
ပေႃးတူဝ်ထိူၼ်ႇၶူပ်းတၢႆၸိုင်၊ႁႂ်ႈၵေႃႉၼၼ်ႉဢဝ်တူဝ်တၢႆၼႄပျႃးႁႂ်ႈပဵၼ်သၢၵ်ႈသေႇတႃႉ။ မၼ်းၼၼ်ႉဢမ်ႇလႆႈယေႃႇလႆႈတႅၼ်းပၼ်ပုၼ်ႈတူဝ်ဢၼ်တူဝ်ထိူၼ်ႇၶူပ်းတၢႆၼၼ်ႉ။
“ပေႃးသေၵေႃႉၵေႃႉယိမ်ဢဝ်တူဝ်သတ်းသေမဵဝ်းမဵဝ်းၵႃႈတီႈတၢင်ႇၵေႃႉတၢင်ႇၵူၼ်းလႄႈ၊ၸဝ်ႈမၼ်းယင်းဢမ်ႇယူႇလႄႈသတ်းတူဝ်ၼၼ်ႉတိူဝ်ႉမၢတ်ႇပဵၼ်ၸဵပ်းပဵၼ်သႅပ်ႇၵႂႃႇ၊ဢမ်ႇၼၼ်တၢႆၵႂႃႇၸိုင်၊ၵေႃႉၼၼ်ႉတၵ်းလႆႈယေႃႇလႆႈသေဢမၢၼ်ႇၶၼ်ပဵၼ်ဢေႃႈ။-
ၵူၺ်းၵႃႈ၊ပေႃးၸဝ်ႈမၼ်းမီးယူႇၸိုင်၊မၼ်းဢမ်ႇလႆႈယေႃႇလႆႈသေ။ ပေႃးပဵၼ်တူဝ်ဢၼ်ဢဝ်ငိုၼ်းၶၢတ်ႈဢဝ်ၸိုင်၊ၵႃႈၶၼ်ဢၼ်ၶၢတ်ႇၼၼ်ႉႁႂ်ႈပျေႇၸႂ်ၸဝ်ႈမၼ်းသေတႃႉ။
“ပေႃးၵူၼ်းၸၢႆးသေၵေႃႉၵေႃႉယႃႉသရေႇၽူႈသၢဝ်ဢၼ်ၽူႈလႂ်ယင်းဢမ်ႇပႆႇလႆႈမၢႆဝႆႉၼၼ်ႉလႄႈၼွၼ်းလူၺ်ႈၵၼ်ယဝ်ႉၸိုင်၊တၵ်းလႆႈပၼ်ငိုၼ်းၵၼ်ႇတေႃးသေလႄႈသွင်ႇမၢင်ႇၵလႃႇဢဝ်ဢေႃႈ။-
ၵူၺ်းၵႃႈပေႃးပေႃႈမၼ်းဢမ်ႇၽွမ်ႉတႃႇတေဢဝ်ပၼ်ၵၼ်ၸိုင်၊မၼ်းတၵ်းလႆႈယေႃႇငိုၼ်းသေငိုၼ်းႁႂ်ႈပဵင်းၵႃႈၼင်ႇဢၼ်တၵ်းလႆႈၵၼ်ႇတေႃးပုၼ်ႈၽူႈသၢဝ်ၼၼ်ႉဢေႃႈ။
“မႄႈၽိူဝ်ႉၸိုင်၊တၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၼ်ပဵၼ်ဢေႃႈ။
“ၵေႃႉဢၼ်သိူၵ်ႈသမ်ႇၵႃႇမၵုင်ႇလူၺ်ႈၵၼ်တင်းသတ်းတရိၵ်ႈသၢၼ်ႇၼၼ်ႉၵေႃႈတၵ်းလႆႈၶၢမ်ႇတၢင်းဢၼ်ဢဝ်တၢႆဢေႃႈ။
“လိူဝ်သေၵဝ် ထႃႇဝရႃႉၽြႃး၊ သူႇလဵဝ်ၵူၺ်းလႄႈပေႃးသေၵေႃႉၵေႃႉသၢၵ်ႈလူႇတၢင်းလူႇတီႈၽြႃးတၢင်ႇသူႇတၢင်ႇပႃးၸိုင်၊ၵေႃႉၼၼ်ႉတၵ်းလႆႈၶၢမ်ႇတၢမ်ႇတၢႆဢေႃႈ။
“ယႃႇပေႁဵတ်းပႄႉႁဵတ်းၼႅင်ႇၶႅၵ်ႇဢၼ်ပဵၼ်ၵူၼ်းတၢင်ႇဝၢၼ်ႈတၢင်ႇမိူင်းၼၼ်ႉ။ ယႃႇပေၼိၵ်ႈၸၢၵ်ႈငႅၼ်းသႄးမၼ်း၊ၶုၵ်းၸႂ်လႆႈလွင်ႈဢၼ်သူယၢမ်ႈလႆႈပဵၼ်ၶႅၵ်ႇၵႃႈၼႂ်းမိူင်း ဢေးၵျိပ်ႉ၊ မႃးယဝ်ႉၼၼ်ႉတႃႉ။
ယႃႇပေႁဵတ်းပႄႉႁဵတ်းၼႅင်ႇၵႃႈၼိူဝ်မႄႈမူၵ်းမႄႈမၢႆႈဢိၵ်ႇတင်းလုၵ်ႈဢွၼ်ႇဢၼ်ၽၢၼ်ပေႃႈၽၢၼ်မႄႈၼၼ်ႉ။-
ပေႃးႁဵတ်းပႄႉႁဵတ်းၼဵင်ႇၸိုင်၊ၵဝ် ထႃႇဝရႃႉၽြႃး၊ တၵ်းထွမ်ႇငိၼ်းဢဝ်သဵင်ဢၼ်ၶဝ်ႁွင်ႉသႅၼ်ႇတီႈၵဝ်၊ယွၼ်းတၢင်းၸွႆႈတၢင်းထႅမ်ၼၼ်ႉသေယဝ်ႉ၊-
ၵဝ်တၵ်းၸႂ်မႆႈၶႂ်ႈၸႃႉလႄႈဢဝ်သူတၢႆလူၺ်ႈၽေးသိုၵ်းၽေးသိူဝ်ဢေႃႈ။ မေးသူတင်းလၢႆတၵ်းဢွၼ်ၵၼ်ပဵၼ်မႄႈမၢႆႈလႄႈလုၵ်ႈဢွၼ်ႇသူတင်းလၢႆၵေႃႈတၵ်းဢွၼ်ၵၼ်ပဵၼ်လုၵ်ႈဢွၼ်ႇဢၼ်ၽၢၼ်ပေႃႈၽၢၼ်မႄႈဢေႃႈ။
“ပေႃးမႂ်းၵူႈပၼ်ယိမ်ပၼ်ငိုၼ်းတီႈၵူၼ်းယၢၵ်ႈၵူၼ်းၽၢၼ်ဢၼ်ပဵၼ်ၵူၼ်းၵဝ်ၼၼ်ႉၸိုင်၊ယႃႇပေႁဵတ်းၸိူဝ်ႉၼင်ႇၸဝ်ႈငိုၼ်းဢၼ်ပွႆႇငိုၼ်းၵူႈၼၼ်ႉလႄႈဢမ်ႇလႆႈယွၼ်းဢဝ်ၶီႈငိုၼ်းၼၼ်ႉတီႈမၼ်း။-
ပေႃးသေၵေႃႉသေၵူၼ်းဢဝ်ၽႃႈမႆမၼ်းပွင်ႇဝႆႉ၊တၢင်ဝႆႉတီႈမႂ်းၸိုင်၊မႂ်းတၵ်းလႆႈပၼ်ၶိုၼ်းၸူဝ်ႈဢၼ်ၵၢင်ဝၼ်းဢမ်ႇပႆႇတူၵ်းဢေႃႈ။-
လွင်ႈမၼ်းၸမ်ႉ၊ဢၼ်ၼၼ်ႉပဵၼ်ပုၼ်ႈဢၼ်မၼ်းတၵ်းမႆမီးယူႇၽိုၼ်လဵဝ်ၵူၺ်းဢေႃႈ။ ၽႃႈမႆၼၼ်ႉပဵၼ်ပုၼ်ႈမၼ်းတၵ်းမႆဢုၼ်ႇၼိူဝ်ႉဢုၼ်ႇၼင်ဢေႃႈ။ ပေႃးဢမ်ႇမီးၽႃႈမႆၼၼ်ႉၸိုင်၊မၼ်းတၵ်းႁဵတ်းၸိူဝ်ႉၼင်ႇႁိုဝ်ၼွၼ်းလႆႈ၊ပေႃးမၼ်းႁွင်ႉသႅၼ်ႇတီႈၵဝ်ယွၼ်းတၢင်းၸွႆႈတၢင်းထႅမ်ၸိုင်၊ၵဝ်တၵ်းထွမ်ႇဢဝ်ငိၼ်းဢဝ်ဢေႃႈ။ ၵဝ်မီးၸႂ်မႅတ်ႈတႃႇဢၼ်ဢဵတ်းလူဢေႃႈ။
“ယႃႇပေဢုပ်ႇလၢတ်ႈၵႂၢမ်းဢၼ်ဝူၺ်ႇဢၼ်ႁင်ႈလွင်ႈၽြႃးပဵၼ်ၸဝ်ႈ၊ယႃႇပေၵိၼ်ႇလႃႇၶုၼ်ဢၼ်ဢုပ်ႉပိူင်ႇၵူၼ်းမဵဝ်းသူၼၼ်ႉ။
“ယင်းဢမ်ႇႁဵတ်းၵွႆႈႁဵတ်းထိူင်းလႄႈတၵ်းလႆႈဢဝ်မၢၵ်ႇဢၼ်သုၵ်းဢွၼ်တၢင်းပိူၼ်ႈဢိၵ်ႇတင်းၼမ်ႉမၢၵ်ႇဢၼ်ဢိတ်ႇဢွၵ်ႇဢွၼ်တၢင်းပိူၼ်ႈၼၼ်ႉသၢၵ်ႈလူႇတီႈၵဝ်တႃႉ။ “လုၵ်ႈၸၢႆးသူဢၼ်ပဵၼ်လုၵ်ႈတူၼ်ႈတင်းလၢႆၵေႃႈတၵ်းလႆႈသၢၵ်ႈလူႇတီႈၵဝ်ဢေႃႈ။-
တူဝ်သူဝ်း၊တူဝ်ဝူဝ်းၵေႃႈသူတၵ်းလႆႈႁဵတ်းၸိူဝ်ႉၼင်ႇၼၼ်ဢေႃႈ။ ၸဵတ်းဝၼ်းတဵမ်တဵမ်ႁႂ်ႈသူဝ်းဢွၼ်ႇဝူဝ်းဢွၼ်ႇၼၼ်ႉယူႇၸွမ်းမႄႈမၼ်းလႄႈ၊ၼႂ်းဝၼ်းဢၼ်ထူၼ်ႈတီႈပႅတ်ႇဝၼ်းၼၼ်ႉၸိုင်၊တၵ်းလႆႈသၢၵ်ႈလူႇတီႈၵဝ်ဢေႃႈ။
“သူတၵ်းလႆႈပဵၼ်ၵူၼ်းမူတ်းၸၢင်ႇၵႃႈတီႈၵဝ်ဢေႃႈ။ ပိူဝ်ႈၼႆလႄႈသူဢမ်ႇလႆႈၵိၼ်ၼိူဝ်ႉဢၼ်တူဝ်ထိူၼ်ႇၶူပ်းတၢႆပႅတ်ႈၵႃႈတီႈထိူၼ်ႇၼၼ်ႉ။ ဢဝ်ဢွႆႇပႅတ်ႈႁႂ်ႈမႃၵိၼ်တႃႉ။
“ယႃႇပေပိုၼ်ၽၢဝ်ႇၶၢဝ်ႇငၢဝ်းဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉ။ ယႃႇပေဢဝ်တင်းသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈလႄႈၸွႆႈလၢတ်ႈထႅမ်လၢတ်ႈပုၼ်ႈၵေႃႉဢၼ်ဢမ်ႇတြႃးၼၼ်ႉ။-
ယႃႇပေယူႇၽၢႆႇၵူၼ်းၼမ်ဢၼ်ႁဵတ်းဢမ်ႇတြႃးၼၼ်ႉ။ ၼႂ်းလွင်ႈတၢင်းဢၼ်လၢတ်ႈဢမုၵေႃႈယႃႇပေယူႇၽၢႆႇၵူၼ်းၼမ်သေလႄႈႁႂ်ႈပိူင်ႈသဵၼ်ႈတၢင်းတြႃးၼၼ်ႉ။-
ယႃႇပေၶဝ်ႈၶၢင်ႈၽၢႆႇၵူၼ်းၽၢၼ်ၼႂ်းလွင်ႈတၢင်းဢၼ်လၢတ်ႈဢမုၶဝ်ၼၼ်ႉ။
“ပေႃးမႂ်းထူပ်းႁၼ်ဝူဝ်း၊မႃႉလီႈ၊ဢၼ်ပဵၼ်ၶွင်ရၢၼ်ႇသူႇမႂ်းၽိတ်းတၢင်းႁၢႆၵႂႃႇၼၼ်ႉၸိုင်၊ဢဝ်သူင်ႇၶိုၼ်းတီႈၸဝ်ႈမၼ်းတႃႉ။-
ပေႃးမႂ်းထူပ်းႁၼ်မႃႉလီႈၵေႃႉဢၼ်ၸင်းမႂ်းၼၼ်ႉလူမ်ႉယူႇၵႃႈတႂ်ႈလင်ၶူဝ်းမၼ်းၼၼ်ႉၸိုင်၊ၽွမ်ႉလူၺ်ႈၵၼ်တင်းမၼ်းလႄႈၸွႆႈပူၵ်းပၼ်မႃႉလီႈၼၼ်ႉတႃႉ။ ယႃႇပေပႆပူၼ်ႉၵႂႃႇလၢႆလၢႆ။
“ယႃႇပေဝႄႈပိူင်ႈသဵၼ်ႈတၢင်းတြႃးဢၼ်သိုဝ်ႈတေႃႇလႄႈၸီႇယၢင်ႇဢမုတီႈၵူၼ်းယၢၵ်ႈၵူၼ်းၽၢၼ်ၼႂ်းလွင်ႈဢၼ်လၢတ်ႈဢမုမၼ်းၼၼ်ႉ။-
ၼႂ်းတၢင်းဢၼ်ၸီႇယၢင်ႇဢမုၼၼ်ႉယႃႇပေႁႂ်ႈလႆႈၽိတ်းလႆႈပိူင်ႈ။ ယႃႇပေႁႂ်ႈလႆႈဢဝ်တၢႆၵေႃႉဢၼ်ဢမ်ႇမီးဢပျတ်ႈလႄႈဢၼ်သိုဝ်ႈတေႃႇၼၼ်ႉ။ လွင်ႈမၼ်းၸမ်ႉ၊ၵေႃႉဢၼ်ႁဵတ်းဢမ်ႇတြႃးၼၼ်ႉၵဝ်ဢမ်ႇပွႆႇႁႂ်ႈဢပျတ်ႈၶဝ်လွတ်ႈလႃးလႃးၵူၺ်း။-
ယႃႇပေၵိၼ်သူးၵိၼ်လၢပ်ႈ။ သူးလၢပ်ႈၸိုင်၊ၸၢင်ႈႁဵတ်းႁႂ်ႈတႃၶုၼ်လုမ်းလပ်းၵႂႃႇမွတ်ႇၵႂႃႇလႄႈ၊ၸၢင်ႈႁႂ်ႈတၢင်းႁဵတ်းၶဝ်ၸိူဝ်းဢၼ်သိုဝ်ႈတေႃႇၼၼ်ႉပိူင်ႈၵႂႃႇၽိတ်းၵႂႃႇဢေႃႈ။
“ယႃႇပေႁဵတ်းပႄႉႁဵတ်းၼႅင်ႇၶႅၵ်ႇဢၼ်ပဵၼ်ၵူၼ်းတၢင်ႇဝၢၼ်ႈတၢင်ႇမိူင်းၼၼ်ႉပိူဝ်ႈဢၼ်သူယၢမ်ႈပဵၼ်ၶႅၵ်ႇၼႂ်းမိူင်း ဢေးၵျိပ်ႉ၊ မႃးယဝ်ႉလႄႈ၊ၸႂ်သၽေႃးၶႅၵ်ႇပဵၼ်ၸိူဝ်ႉၼင်ႇႁိုဝ်သူႁုယူႇဢေႃႈ။
“ၼႂ်းၸူဝ်ႈႁူၵ်းပီၼၼ်ႉဢွၼ်ၵၼ်ႁဵတ်းႁႆႈႁဵတ်းၼႃးလႄႈသိမ်းဢဝ်မၢၵ်ႇဢဝ်ႁူင်းမၼ်းတႃႉ။-
ၵူၺ်းၵႃႈ၊မိူဝ်ႈဢၼ်ထူၼ်ႈပီတီႈၸဵတ်းၼၼ်ႉၸိုင်၊တၵ်းဢမ်ႇလႆႈႁဵတ်းႁႆႈႁဵတ်းၼႃးလႄႈတၵ်းလႆႈပွႆႇႁႆႈပွႆႇၼႃးႁၢမ်းဝႆႉဢေႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ၵူၼ်းယၢၵ်ႈၵူၼ်းၽၢၼ်ၶဝ်တၵ်းလႆႈၵိၼ်ၵႃႈဢၼ်ဢွၵ်ႇမႃးၼႂ်းၼႃးၼၼ်ႉလႄႈ၊တူဝ်ထိူၼ်ႇတင်းလၢႆၵေႃႈတၵ်းလႆႈၵိၼ်ဢၼ်ၵိုတ်းဢၼ်ၵျၢၼ်ႇမၼ်းဢေႃႈ။ သူၼ်မၢၵ်ႇၸပိတ်ႉလႂ်၊သူၼ်မၢၵ်ႇသၢၼ်ႇလုၼ်ႇလႂ်ၸိူဝ်းၼၼ်ႉၵေႃႈတၵ်းလႆႈႁဵတ်းၸိူဝ်ႉၼင်ႇၼၼ်ၼင်ႇၵဝ်ႇဢေႃႈ။
“ၼႂ်းၸူဝ်ႈႁူၵ်းဝၼ်းၼၼ်ႉဢွၼ်ၵၼ်ႁဵတ်းၵၢၼ်ႁဵတ်းငၢၼ်းတႃႉ။ ၵူၺ်းၵႃႈ၊ၼႂ်းဝၼ်းဢၼ်ထူၼ်ႈဝၼ်းတီႈၸဵတ်းၼၼ်ႉၸိုင်၊တၵ်းဢမ်ႇလႆႈႁဵတ်းၵၢၼ်သေၸိူဝ်ႉသေပိူင်လႃးလႃး။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ၶႃႈသူတင်းလၢႆလႄႈၶႅၵ်ႇဢၼ်ႁဵတ်းၵၢၼ်သူတင်းလၢႆ ဢိၵ်ႇတင်းတူဝ်တရိၵ်ႈသၢၼ်ႇသူတင်းလၢႆလႆႈလိုဝ်ႈႁိူဝ်ႉႁွမ်ႁႅင်းဢေႃႈ။
“ၵႃႈဢၼ်ၵဝ် ထႃႇဝရႃႉၽြႃး၊ မီးဢမိင်ႉတီႈသူဝႆႉၵူႈၸိူဝ်ႉၵူႈပိူင်ၼၼ်ႉထွမ်ႇဢဝ်တႃႉ။ ယႃႇပေတိူင်ႇႁႃၵၢဝ်ႇႁႃၽြႃးတၢင်ႇသူႇတၢင်ႇပႃး။ ၸိုဝ်ႈသဵင်ၶဝ်ၵူၺ်းၵေႃႈယႃႇပေလၢတ်ႈဢွၵ်ႇသူပ်းသူ။
“ၼႂ်းယေႈပီတၵ်းလႆႈႁဵတ်းပွႆးလူင်သၢမ်ပွၵ်ႈပုၼ်ႈၵဝ်ဢေႃႈ။-
တၵ်းလႆႈႁဵတ်းပွႆးၵိၼ်ၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈၼႂ်းလိူၼ်ဢပိပႃႉ လိူၼ်ဢၼ်သူဢွၵ်ႇမိူင်း ဢေးၵျိပ်ႉ၊ မႃးၼၼ်ႉဢေႃႈ။ ၸွမ်းၵႃႈၼင်ႇဢၼ်ၵဝ်သင်ႇလၢတ်ႈဝႆႉတီႈသူၼၼ်ႉ၊သူတၵ်းလႆႈၵိၼ်ၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈၸဵတ်းဝၼ်းတဵမ်တဵမ်ဢေႃႈ။ ယင်းဢမ်ႇပႃးၶိူင်ႈတၢင်းလူႇလႄႈၽူႈလႂ်ဢမ်ႇလႆႈမႃးဝႆႈသႃၵူဝ်းၵႂၢႆႇၵဝ်လူၺ်ႈတူဝ်လၢႆမိုဝ်းပဝ်ႇ။
“တၵ်းလႆႈႁဵတ်းပွႆးပၢတ်ႇဢဝ်မၢၵ်ႇဢဝ်ႁူင်းဢၼ်ပဵၼ်မၢၵ်ႇပဵၼ်ႁူင်းဢၼ်မၢၵ်ႇဢွၼ်တၢင်းပိူၼ်ႈၵႃႈၼႂ်းႁႆႈၼႂ်းၼႃးဢၼ်သူၽုၵ်ႇသွမ်ႈၼၼ်ႉဢေႃႈ။ “တၵ်းလႆႈႁဵတ်းပွႆးသုမ်ႉထဵင် ၼႂ်းႁၢင်ပီမိူဝ်ႈဢၼ်သူဢဝ်မၢၵ်ႇဢဝ်ႁူင်းမႃးသိမ်းဝႆႉၼႂ်းယွင်ႈၼႂ်းယေးၼၼ်ႉဢေႃႈ။-
ၼႂ်းပွႆးတင်းသၢမ်ပွၵ်ႈၼႆႉၵႃႈပဵၼ်ၵူၼ်းၸၢႆးတင်းသဵင်ႈတင်းလူင်တၵ်းလႆႈမႃးဝႆႈသႃၵူဝ်းၵႂၢႆႇၵဝ်ဢၼ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူၵူႈပီဢေႃႈ။
“ၼႂ်းမိူဝ်ႈဢၼ်သူသၢၵ်ႈလူႇတူဝ်သတ်းတီႈၵဝ်ၼၼ်ႉယႃႇပေသၢၵ်ႈလူႇလူၺ်ႈၵၼ်တင်းၶဝ်ႈမုၼ်းဢၼ်သႂ်ႇၸိူဝ်ႉပႅင်ႈၼၼ်ႉ။ ၵွၼ်ႈၶႆၵွၼ်ႈမၼ်းတူဝ်တၢင်းလူႇၼၼ်ႉၵေႃႈယႃႇပေႁႂ်ႈၵိုတ်းဝႆႉၵျၢၼ်ႇဝႆႉတေႃႇထိုင်ႁွတ်ႈၶိင်ႇၵၢင်ၼႂ်။
“ဢဝ်မၢၵ်ႇဢဝ်ႁူင်းဢၼ်သူဝိတ်းသူပၢတ်ႇဢွၼ်တၢင်းသုတ်းပိူၼ်ႈၼၼ်ႉမႃးသႂၢင်းသႂ်ႇဝႆႉၵႃႈၼႂ်းႁိူၼ်း ထႃႇဝရႃႉၽြႃး၊ ၽြႃးပဵၼ်ၸဝ်ႈသူတႃႉ။ “တၵ်းဢမ်ႇလႆႈဢဝ်သူဝ်းဢွၼ်ႇပႄႉဢွၼ်ႇတူမ်ႈၼႂ်းၼမ်ႉၼူမ်းမႄႈမၼ်း။
“ၵဝ်တၵ်းပွႆႇၸႂ်ႉတမၢၼ်ႇၵၢင်ႁၢဝ်ပႃးၼိုင်ႈဢွၼ်ႁူဝ်တၢင်းသူၵႂႃႇပုၼ်ႈတႃႇတၵ်းႁႄႉတၵ်းၵင်ႈသူၸွမ်းသဵၼ်ႈတၢင်းသူလႄႈဢွၼ်သူင်ႇသူၵႂႃႇၵႃႈတီႈဢၼ်ၵဝ်မႄးႁႅၼ်းဝႆႉၼၼ်ႉဢေႃႈ။-
ႁဵတ်းသတိလႄႈထွမ်ႇဢဝ်ၵႂၢမ်းမၼ်းတႃႉ။ ယႃႇပေႁဵတ်းၶတ်းႁဵတ်းၶဵင်ႇမၼ်း။ မၼ်းတၵ်းဢမ်ႇပွႆႇဢမ်ႇၶႂၢင်းဢပျတ်ႈဢၼ်သူၽိတ်းပိူင်ႈၼၼ်ႉၵူၺ်း။ ၼႃႇမႃႉၸိုဝ်ႈသဵင်ၵဝ်မီးယူႇၵႃႈၼႂ်းမၼ်းဢေႃႈ။-
ပေႃးသူထွမ်ႇဢဝ်ၵႂၢမ်းမၼ်းလႄႈႁဵတ်းၸွမ်းၵႃႈၼင်ႇဢၼ်ၵဝ်မီးဢမိင်ႉဝႆႉၼၼ်ႉၸိုင်၊ၵဝ်တၵ်းတိုၵ်းတေႃးပႅတ်ႈရၢၼ်ႇသူႇသူ ၵႃႈမီးတင်းသဵင်ႈတင်းလူင်ဢေႃႈ။-
တမၢၼ်ႇၵၢင်ႁၢဝ်ၵဝ်တၵ်းဢွၼ်ႁူဝ်သူၵႂႃႇၶဝ်ႈၸူးၵႃႈၼႂ်းမိူင်းၵူၼ်းမဵဝ်း ဢႃႇမေႃးရိ၊ ၵူၼ်းမဵဝ်း ႁိတ်ႉတိ၊ ၵူၼ်းမဵဝ်း ၽေႇရၸိ၊ ၵူၼ်းမဵဝ်း ၶႃႇၼၼိ၊ ၵူၼ်းမဵဝ်း ႁိဝိ၊ ၵူၼ်းမဵဝ်း ယေႇပုသိ၊ ၸိူဝ်းၼၼ်ႉလႄႈ၊ၵဝ်တၵ်းပႄႇၽဵဝ်ႈၵူၼ်းမဵဝ်းၸိူဝ်းၼၼ်ႉပႅတ်ႈဢေႃႈ။-
သူတၵ်းဢမ်ႇလႆႈၵူမ်ႈႁူဝ်ၵွမ်းႁူဝ်ၸူးလႄႈဝႆႈၽြႃးၶဝ်ၵႃႈမီးၸိူဝ်းၼၼ်ႉ၊တၵ်းဢမ်ႇလႆႈၵမ်ၵျၢင်ႉၸွမ်းထုင်းၸၢမ်ႇၽႃႇသႃႇၶဝ်ၼၼ်ႉ။ တၵ်းလႆႈယႃႉလႅဝ်ၽြႃးၸိူဝ်းၼၼ်ႉပႅတ်ႈလႄႈႁၵ်းႁိၵ်းသဝ်ႁိၼ်ဢၼ်ၶဝ်ဝႆႈသႃၸိူဝ်းၼၼ်ႉပႅတ်ႈမူတ်းမူတ်းသဵင်ႈသဵင်ႈဢေႃႈ။-
သူတၵ်းလႆႈဝႆႈသႃၵူဝ်းၵႂၢႆႇၵဝ် ထႃႇဝရႃႉၽြႃး၊ ဢၼ်ပဵၼ်ၽြႃးပဵၼ်ၸဝ်ႈသူၼၼ်ႉဢေႃႈ။ ၵဝ်တၵ်းပၼ်တၢင်းလီၵႃႈၼိူဝ်ဢႁႃႇရႃႉတၢင်းၵိၼ်သူဢိၵ်ႇတင်းတီႈၼမ်ႉသူဢေႃႈ။ ၵဝ်တၵ်းဢဝ်တၢင်းၶႆႈတၢင်းပဵၼ်သူဢွၵ်ႇပႅတ်ႈဢေႃႈ။-
ၵႃႈၼႂ်းမိူင်းသူၼၼ်ႉမႄႈယိင်းဢၼ်ပတိၵ်ႈသၼ်ႇထေႇလုသေဢမ်ႇဝႃႈ၊မႄႈယိင်းဢၼ်ဢမ်ႇမီးလုၵ်ႈသေဢမ်ႇဝႃႈ၊တေဢမ်ႇမီးလႃးလႃး၊ၵဝ်တၵ်းႁႂ်ႈဢသၢၵ်ႈသူယိုၼ်းယၢဝ်းဢေႃႈ။
“ၵဝ်တၵ်းႁဵတ်းႁႂ်ႈၶဝ်ၸိူဝ်းဢၼ်ၶတ်းၶဵင်ႇၵၼ်တင်းသူၼၼ်ႉၵူဝ်ႁႄၵဝ်ဢေႃႈ။ တီႈၶဝ်ၸိူဝ်းဢၼ်တိုၵ်းတေႃးၵၼ်တင်းသူၼၼ်ႉၵဝ်တၵ်းႁႂ်ႈၶဝ်သုၵ်ႉယုင်ႈၵၼ်ဢေႃႈ။ ရၢၼ်ႇသူႇသူၵႃႈမီးတင်းသဵင်ႈတင်းလူင်ၵေႃႈၵဝ်တၵ်းႁႂ်ႈၶဝ်ဝၢႆႇႁူဝ်လႅၼ်ႈပၢႆႈပႅတ်ႈသူဢေႃႈ။-
ၵဝ်တၵ်းပွႆႇၸႂ်ႉၽေးတေႃႇၽေးတႅၼ်ၵႂႃႇဢွၼ်တၢင်းသူလႄႈၶဝ်တၵ်းႁေႃႈၵူၼ်းမဵဝ်း ႁိဝိ၊ ၵူၼ်းမဵဝ်း ၶႃႇၼၼိ၊ ဢိၵ်ႇတင်းၵူၼ်းမဵဝ်း ႁိတ်ႉတိ၊ ၸိူဝ်းၼၼ်ႉဢွၵ်ႇပၢႆႈသေၵႃႈတီႈၽၢႆႇၼႃႈသူဢေႃႈ။-
ၵဝ်တၵ်းႁေႃႈၵူၼ်းၸိူဝ်းၼၼ်ႉဢွၵ်ႇၼႂ်းတႂၢင်းပီၼိုင်ႈဢမ်ႇၸႂ်ႈၵူၺ်း။ ပေႃးၵဝ်ႁဵတ်းၸိူဝ်ႉၼင်ႇၼၼ်ၸိုင်၊လိၼ်မိူင်းတၵ်းပဵၼ်ထိူၼ်ႇႁၢမ်းၵႂႃႇလႄႈ၊တူဝ်ထိူၼ်ႇႁၢႆႉၵေႃႈတၵ်းၼမ်ၵိုၼ်းၼႃႇလူင်လၢင်တီႈသူဢေႃႈ။-
ၵဝ်တၵ်းႁေႃႈၶဝ်ဢွၵ်ႇယေႈပွၵ်ႈယေႈဢိတ်းတေႃႇထိုင်ႁွတ်ႈသူၼမ်မႃးၵိုၼ်းမႃးထၢၼ်ႈပေႃးၸၢမ်ႇၸႃးမိူင်းတင်းမိူင်းၵႂႃႇၼၼ်ႉဢေႃႈ။-
ၵဝ်တၵ်းမၵ်းမၢႆလႅၼ်လိၼ်ပုၼ်ႈမိူင်းသူတႄႇဢဝ်တီႈ ပၢင်ႇလၢႆႇလႅင်၊ တေႃႇထိုင်ပၢင်ႇလၢႆႇ ၽိလိတ်ႉတိ၊ ဢိၵ်ႇတင်းတႄႇဢဝ်ထိူၼ်ႇလႅင်ႉၼၼ်ႉတေႃႇထိုင်ၼမ်ႉ ဢုၽရတ်ႉ၊ ဢေႃႈ။ ၵဝ်တၵ်းဢဝ်ၵူၼ်းမိူင်းၼၼ်ႉဢၢပ်ႈပၼ်ၼႂ်းမိုဝ်းသူဢေႃႈ။ သူသမ်ႉတၵ်းႁေႃႈၶဝ်ဢွၵ်ႇပႅတ်ႈသေၵႃႈတီႈၽၢႆႇၼႃႈသူဢေႃႈ။-
သူတၵ်းဢမ်ႇလႆႈႁဵတ်းၵေႃႉႁဵတ်းသႄႈတၢင်းဢၼ်ၽွမ်ႉၸႂ်ၵၼ်တင်းၶဝ် ဢိၵ်ႇတင်းၽြႃးၶဝ်တင်းလၢႆၼၼ်ႉ။-
ယႃႇပေႁႂ်ႈၵူၼ်းၸိူဝ်းၼၼ်ႉယူႇၵႃႈၼႂ်းမိူင်းသူ။ ပေႃးသူႁႂ်ႈၶဝ်ယူႇၸိုင်၊ၵူဝ်ၶဝ်ႁဵတ်းႁႂ်ႈသူလႆႈၽိတ်းပိူင်ႈၵဝ်ဢေႃႈ။ ပေႃးသူႁဵတ်းဝၢတ်ႈလႄႈဝႆႈၽြႃးၶဝ်ၸိုင်၊တၵ်းပဵၼ်တူင်ႇႁႅဝ်ႉတူင်ႇၶိုမ်းဢၼ်သူၸၢင်ႈၶမ်လႄႈတၢႆဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ လၢတ်ႈတီႈ မူဝ်းသေႇ၊ လႄႈဝႃႈ၊ “မႂ်းဢိၵ်ႇတင်း ဢႃႇရုၼ်ႇ၊ တင်း ၼႃႇတပ်ႉ၊ တင်း ဢၽိႁု၊ တင်းၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်း ဢိသရေး၊ ၸဵတ်းသိပ်းၵေႃႉၼၼ်ႉဢွၼ်ၵၼ်ၶိုၼ်ႈၸူးၵႃႈတီႈၵဝ် ထႃႇဝရႃႉၽြႃး၊ တႃႉ။ မိူဝ်ႈဢၼ်ယင်းမီးယူႇၵႆၵႆၼၼ်ႉၵူမ်ႈႁူဝ်လႄႈဝႆႈသႃၵူဝ်းၵႂၢႆႇတႃႉ။-
ယင်းဢမ်ႇပႃးၶဝ်ၸိူဝ်းၼၼ်ႉသေၵေႃႉလႄႈမႂ်းၵေႃႉလဵဝ်ၵူၺ်းသုတ်ႉၸပ်းသုတ်းၸူးၵႃႈတီႈၵဝ် ထႃႇဝရႃႉၽြႃး၊ တႃႉ။ ၵူၼ်းတင်းလၢႆၵေႃႈဢမ်ႇလႆႈၶိုၼ်ႈလွႆသေၵေႃႉသေၵူၼ်း၊” ဝႃႈၼင်ႇၼႆဢေႃႈ။
မူဝ်းသေႇ၊ လူင်းၵႂႃႇမွၵ်ႇလၢတ်ႈၵႂၢမ်း ထႃႇဝရႃႉၽြႃး၊ တင်းသဵင်ႈတင်းလူင်ဢိၵ်ႇတင်းထုင်းတြႃးတင်းသဵင်ႈတင်းလူင်ၵႃႈတီႈၵူၼ်းတင်းလၢႆဢေႃႈ။ ၵူၼ်းတင်းသဵင်ႈတင်းလူင်ဢွၼ်ၵၼ်ၽွမ်ႉသဵင်လဵဝ်ၵၼ်ၶိုၼ်းလၢတ်ႈလႄႈဝႃႈ၊ “ႁဝ်းၶႃႈတၵ်းႁဵတ်းၵႃႈဢၼ် ထႃႇဝရႃႉၽြႃး၊ မီးဢမိင်ႉၼၼ်ႉဢေႃႈ၊” ဝႃႈၼင်ႇၼႆဢေႃႈ။-
မူဝ်းသေႇ၊ တႅမ်ႈၵႂၢမ်း ထႃႇဝရႃႉၽြႃး၊ တင်းသဵင်ႈတင်းလူင်ဝႆႉဢေႃႈ။ ၼႂ်းဝၼ်းမိူဝ်ႈၽုၵ်ႈၶိင်ႇၵၢင်ၼႂ်ၸဝ်ႉၸဝ်ႉ၊မၼ်းတႄႇႁဵတ်းၶဵင်ႇတၢင်းလူႇဢၼ်ၼိုင်ႈၵႃႈႁိမ်းတိၼ်လွႆၼၼ်ႉသေလႄႈ၊ပူၵ်းတင်ႈဝႆႉမၢၵ်ႇႁိၼ်သိပ်းသွင်ႁူၺ်ႇၸွမ်းလူၺ်ႈၵူၼ်းမဵဝ်း ဢိသရေး၊ သိပ်းသွင်မဵဝ်းၼၼ်ႉယေႈမဵဝ်းယေႈႁူၺ်ႇဢေႃႈ။-
မၼ်းပွႆႇၸႂ်ႉၽူႈမၢဝ်ႇ ဢိသရေး၊ တင်းလၢႆၵႂႃႇလႄႈ၊ၶဝ်ဢဝ်ၶိူင်ႈတၢင်းလူႇဢၼ်တုတ်ႇၽႆးဢိၵ်ႇတင်းဝူဝ်းသၢၵ်ႈၵၢပ်ႈတီႈ ထႃႇဝရႃႉၽြႃး၊ ႁႂ်ႈပဵၼ်တၢင်းလူႇပုၼ်ႈမိၵ်ႈသႁႃႇယႃႉဢေႃႈ။-
မူဝ်းသေႇ၊ ဢဝ်လိူတ်ႈသတ်းၼၼ်ႉၶိုင်ႈၼိုင်ႈသႂ်ႇဢၢင်ႇဝႆႉလႄႈ၊ဢဝ်ၶိုင်ႈၼိုင်ႈၽႅတ်းသႂ်ႇၵႃႈၼိူဝ်ၶဵင်ႇတၢင်းလူႇဢေႃႈ။-
မၼ်းဢဝ်လိၵ်ႈပတိၺိၺ်ႇၸဝ်ႈၽတ်းဢၢၼ်ႇလူၺ်ႈသဵင်ဢၼ်ယႂ်ႇၼႃႇၵႃႈတီႈၽၢႆႇၼႃႈမူႇၵူၼ်းတင်းလၢႆဢေႃႈ။ ၶဝ်ၼၼ်ႉလၢတ်ႈလႄႈဝႃႈ၊ “ႁဝ်းၶႃႈတၵ်းထွမ်ႇဢဝ်ၵႂၢမ်း ထႃႇဝရႃႉၽြႃး၊ လႄႈႁဵတ်းၸွမ်းၵႃႈၼင်ႇဢၼ်မၼ်းၸဝ်ႈမီးဢမိင်ႉၼၼ်ႉၶႃႈဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ သမ်ႉဢဝ်လိူတ်ႈၽႅတ်းသႂ်ႇၵႃႈၼိူဝ်ၵူၼ်းတင်းလၢႆလႄႈဝႃႈ၊ “လိူတ်ႈၼႆႉၸမ်ႉ၊ပဵၼ်လိူတ်ႈဢၼ်တွၵ်ႇၸုမ်ႈပတိၺိၺ်ႇဢၼ် ထႃႇဝရႃႉၽြႃး၊ ႁဵတ်းလူၺ်ႈၵၼ်တင်းသူၼႂ်းမိူဝ်ႈဢၼ်ပူင်ဢမိင်ႉ ၸိူဝ်းၼႆႉတင်းသဵင်ႈတင်းလူင်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ မူဝ်းသေႇ၊ဢႃႇရုၼ်ႇ၊ၼႃႇတပ်ႉ၊ဢၽိႁု၊ တင်းၵူၼ်းဢၼ်ပဵၼ်ၵႄႇပဵၼ်ႁူဝ်မဵဝ်း ဢိသရေး၊ ၸဵတ်းသိပ်းၵေႃႉၸိူဝ်းၼၼ်ႉဢွၼ်ၵၼ်ၶိုၼ်ႈၸူးၵႃႈၼိူဝ်လွႆလႄႈ၊-
ၶဝ်လႆႈထူပ်းႁၼ်ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ၶဝ်ၼၼ်ႉဢေႃႈ။ ၽၢႆႇတၢင်းတႂ်ႈတိၼ်မၼ်းၸဝ်ႈၼၼ်ႉမိူၼ်ၸိူဝ်ႉၼင်ႇၶိူင်ႈပိူင်ဢၼ်ဢဝ်တင်းသႅင်ၼီႇလႃႇဢၼ်ႁိူဝ်ႈႁိူင်းသိူဝ်ႇဝႆႉလႄႈ ၸိူဝ်ႉၼင်ႇၼႃႈၽႃႉၵၢင်ႁၢဝ်ဢၼ်သႂ်လႅင်းၼၼ်ႉဢေႃႈ။-
ၽြႃးပဵၼ်ၸဝ်ႈဢမ်ႇပၼ်ၽေးဢုပၢတ်ႈတီႈၵူၼ်းၵႄႇၵူၼ်းႁူဝ်မဵဝ်း ဢိသရေး၊ ၸိူဝ်းၼၼ်ႉ။ ၶဝ်လႆႈႁၼ်ၽြႃးပဵၼ်ၸဝ်ႈသေယဝ်ႉ၊ၶဝ်ဢွၼ်ၵၼ်ၵိၼ်ၶူပ်းလူၺ်ႈၵၼ်ဢေႃႈ။
ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ လႄႈဝႃႈ၊ “ၶိုၼ်ႈမႃးၸူးၵဝ်ၵႃႈတီႈၼိူဝ်လွႆတႃႉ။ ယၢမ်းမိူဝ်ႈဢၼ်မႂ်းပႂ်ႉယူႇတီႈၼႆႈၼၼ်ႉၵဝ်တၵ်းပၼ်မႂ်းမၢၵ်ႇႁိၼ်သွင်ၽႅၼ်ႇဢၼ်တႅမ်ႈတြႃးၸဝ်ႈတင်းပိင်းၺၢပ်ႈၸဝ်ႈဝႆႉယဝ်ႉၼၼ်ႉ၊ပုၼ်ႈဢၼ်မႂ်းတၵ်းသင်ႇသွၼ်ပိူၼ်ႈဢေႃႈ၊” ဝႃႈၼင်ႇၼႆဢေႃႈ။-
မူဝ်းသေႇ၊ ဢိၵ်ႇတင်း ယေႃးသု၊ ၵေႃႉဢၼ်ပဵၼ်ၵူၼ်းၵမ်ႉထႅမ်မၼ်းၼၼ်ႉဢွၼ်ၵၼ်လုၵ်ႉလႄႈ၊ မူဝ်းသေႇ၊ ၶိုၼ်ႈၵႂႃႇၵႃႈၼိူဝ်လွႆၽြႃးပဵၼ်ၸဝ်ႈဢေႃႈ။-
မူဝ်းသေႇ၊ လၢတ်ႈဝႆႉတီႈၵူၼ်းဢၼ်ပဵၼ်ၵႄႇပဵၼ်ႁူဝ်ၸိူဝ်းၼၼ်ႉလႄႈဝႃႈ၊ “သူဢွၼ်ၵၼ်ပႂ်ႉယူႇၵႃႈတီႈၼႆႈတေႃႇထိုင်ႁွတ်ႈႁဝ်းၶိုၼ်းမႃးၼၼ်ႉတႃႉ။ ဢႃႇရုၼ်ႇ၊ တင်း ႁုရႃႉ၊ မီးယူႇလူၺ်ႈၵၼ်တင်းသူဢေႃႈ။ ၽူႈလႂ်သေဢမ်ႇဝႃႈ၊ပေႃးမီးဢမုလွင်ႈတၢင်းမဵဝ်းလႂ်ၸိုင်၊ႁႂ်ႈမၼ်းၵႂႃႇၸူးတီႈၶဝ်ၸိူဝ်းၼၼ်ႉတႃႉ၊” ဝႃႈၼင်ႇၼႆဢေႃႈ။
မူဝ်းသေႇ၊ ၶိုၼ်ႈလွႆ သိၼႃႉ၊ ၵႂႃႇလႄႈမွၵ်ႇၵုမ်ႈႁူမ်ႇသုမ်ႇလွႆၸဝ်ႈၼၼ်ႉဝႆႉဢေႃႈ။-
မုၼ်ၽုင်း ထႃႇဝရႃႉၽြႃး၊ တႄႇသဝ်းၵႃႈၼိူဝ်လွႆ သိၼႃႉ၊ ယူႇလႄႈ၊မွၵ်ႇၵုမ်ႈႁူမ်ႇသုမ်ႇလွႆၸဝ်ႈဝႆႉ၊ႁူၵ်းဝၼ်းတဵမ်တဵမ်ဢေႃႈ။ ၼႂ်းဝၼ်းဢၼ်ထူၼ်ႈထိုင်ၸဵတ်းဝၼ်းၼၼ်ႉမၼ်းၸဝ်ႈယူႇၵႃႈၼႂ်းမွၵ်ႇၵုမ်ႈသေလႄႈႁွင်ႉ မူဝ်းသေႇ၊ ဢေႃႈ။-
ၵမ်းၼၼ်ႉ ဢရွင်ႇမုၼ်ၽုင်း ထႃႇဝရႃႉၽြႃး၊ ပဵၼ်ၸိူဝ်ႉၼင်ႇမုၵ်ႉၽႆးဢၼ်မႆႈယူႇၵႃႈၼိူဝ်ပၢႆၸိၵ်းလွႆၸဝ်ႈၼၼ်ႉသိုဝ်ႈၼႃႈတႂ်ႈတႃၵူၼ်းမဵဝ်း ဢိသရေး၊ တင်းလၢႆဢေႃႈ။-
မူဝ်းသေႇ၊ ၵေႃႈၶဝ်ႈၵႂႃႇၵႃႈၼႂ်းမွၵ်ႇၵုမ်ႈၼၼ်ႉလႄႈၶိုၼ်ႈလွႆၸဝ်ႈၼၼ်ႉၵႂႃႇသေဢေႃႈ။ ႁဵတ်းၼၼ်ႉလႄႈ မူဝ်းသေႇ၊ ယူႇၵႃႈၼိူဝ်လွႆၸဝ်ႈၼၼ်ႉသီႇသိပ်းဝၼ်းသီႇသိပ်းၶိုၼ်းတဵမ်တဵမ်ဢေႃႈ။
ၸဝ်ႈ ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ ထႅင်ႈလႄႈဝႃႈ၊-
သင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆႁႂ်ႈဢဝ်ၶိူင်ႈတၢင်းလူႇမႃးတီႈၵဝ်တႃႉ။ ႁပ်ႉၶၢမ်ႇဢဝ်ၶိူင်ႈတၢင်းလူႇဢၼ်ၶဝ်ပႃးၸႂ်ၸေႇတၼႃႇသတ်ႈထႃႇလႄႈမႃးလူႇမႃးတၢၼ်းတီႈၵဝ်ၼၼ်ႉတႃႉ။-
ၶိူင်ႈတၢင်းလူႇဢၼ်မႂ်းတၵ်းလႆႈႁပ်ႉၶၢမ်ႇဢဝ်ၼၼ်ႉၸမ်ႉ၊ပဵၼ်ၶမ်း၊ငိုၼ်း၊တွင်းလိူင်၊-
ၽႃႈပၢၼ်ႇၶျေႃး၊မႆၶူၼ်သူဝ်းဢၼ်ယွမ်ႉသွမ်ႇ၊ယွမ်ႉၵမ်ႇ၊ယွမ်ႉလႅင်ဝႆႉ၊-
ၼင်သူဝ်းဢၼ်ယွမ်ႉလႅင်၊ၼင်သတ်းဢၼ်လီ၊မႆႉပဝ်း ၊-
ၼမ်ႉမၼ်းတႆႈ၊ၼၢမ်ႇသႃႇတႃႇတေႁဵတ်းၼမ်ႉမၼ်းဢၼ်တႃး၊ၼၢမ်ႇသႃႇတႃႇတေႁဵတ်းဢၼ်ႁွမ်ဢၼ်ႁူၺ်းပုၼ်ႈဢၼ်တၵ်းတႆႈၽႆး၊-
သႅင်ၸၢႆးၶႃးယွတ်ႇတင်းသႅင်ပတ်ႈတမျႃးဢၼ်တၵ်းၶပ်ႉၸႅၼ်ႇၵႃႈတီႈၼႃႈသိူဝ်ႈသုပ်းၸဝ်ႈ၊တင်းၵႃႈတီႈၶိူင်ႈတပ်ႉၼႃႈဢူၵ်းမၼ်းၼၼ်ႉဢေႃႈ။-
ႁႂ်ႈၵူၼ်းတင်းလၢႆႁဵတ်းထႃႇၼႃႉတီႈမူတ်းၸၢင်ႇဝႆႉပုၼ်ႈၵဝ်၊ၼင်ႇႁိုဝ်ၵဝ်တၵ်းလႆႈယူႇၼႂ်းၵႄႈၵၢင်ၶဝ်ၼၼ်ႉတႃႉ။-
ပုင်ႇႁၢင်ႈသုမ်ႉထဵင်ၸဝ်ႈတင်းၶိူင်ႈၸႂ်ႉၶိူင်ႈတိုဝ်းမၼ်းတင်းသဵင်ႈတင်းလူင်ၸိူဝ်းၼၼ်ႉမႂ်းတၵ်းလႆႈႁဵတ်းၸွမ်းၵႃႈၼင်ႇဢၼ်ၵဝ်တၵ်းၼႄပျႃးတီႈမႂ်းၼၼ်ႉဢေႃႈ။
“ႁႂ်ႈၶဝ်ဢဝ်မႆႉပဝ်းႁဵတ်းတိူၵ်ႈတႃႇလုၵ်ႈၼိုင်ႈတႃႉ။ တိူၵ်ႈၼၼ်ႉတၵ်းလႆႈမီးၼႃႈယၢဝ်းသွင်သွၵ်ႇၶိုပ်ႈ၊ၼႃႈပွတ်းသွၵ်ႇၶိုပ်ႈ၊တၢင်းသုင်သွၵ်ႇၶိုပ်ႈဢေႃႈ။-
သမ်ႉတၵ်းလႆႈဢဝ်ၶမ်းလွတ်ႈငၢၼ်ႇဢုမ်ႇဝႆႉၸဵမ်ၼွၵ်ႈၸဵမ်ၼႂ်းလႄႈ၊ဢဝ်ၶႅပ်းၶမ်းႁေႃႇၶွပ်ႇတိူၵ်ႈဝႆႉႁွပ်ႈႁွပ်ႈဢေႃႈ။-
လေႃႇႁဵတ်းမွင်ႈၶမ်းသီႇမွင်ႈပုၼ်ႈတႃႇတေဢဝ်တၢပ်ႈသႂ်ႇဝႆႉၵႃႈတီႈတိၼ်တိူၵ်ႈၼၼ်ႉၽၢႆႇၼႆႈသွင်မွင်ႈ၊ၽၢႆႇပုၼ်ႉသွင်မွင်ႈတႃႉ။-
ဢဝ်မႆႉပဝ်းထၢၵ်ႇႁဵတ်းၵၢၼ်းသွင်လႅမ်ႈလႄႈဢဝ်ၶမ်းဢုမ်ႇဝႆႉတႃႉ။-
တၵ်းလႆႈဢဝ်ၵၢၼ်းသွင်လႅမ်ႈၼၼ်ႉ သွတ်ႇသႂ်ႇၵႃႈၼႂ်းမွင်ႈၶမ်းဢၼ်မီးၵႃႈတီႈၼႃႈတိူၵ်ႈၼၼ်ႉဝႆႉပုၼ်ႈဢၼ်တၵ်းႁၢမ်တိူၵ်ႈၼၼ်ႉဢေႃႈ။-
ၵၢၼ်းၸိူဝ်းၼၼ်ႉတၵ်းလႆႈသွတ်ႇသႂ်ႇၵႃႈၼႂ်းမွင်ႈၸိူဝ်းၼၼ်ႉဝႆႉ၊တႃႇသေႇလႄႈတၵ်းဢမ်ႇလႆႈထွတ်ႇဢွၵ်ႇဝႆႉ။-
ႁဵတ်းၼၼ်လႄႈ၊ၵႃႈၼႂ်းတိူၵ်ႈၼၼ်ႉဢဝ်ၶႅပ်းမၢၵ်ႇႁိၼ်သွင်ၶႅပ်းဢၼ်တႅမ်ႈဝႆႉ၊ပိင်းၺၢပ်ႈတြႃးၵဝ်ဢၼ်ၵဝ်တၵ်းပၼ်မႂ်းၼၼ်ႉသႂ်ႇဝႆႉတႃႉ။
“မႂ်းတၵ်းလႆႈဢဝ်ၶမ်းလွတ်ႈငၢၼ်ႇႁဵတ်းပလၢင်ႇပုၼ်ႈဢၼ်ၽေႇဢပျတ်ႈဢၼ်ၼိုင်ႈ၊ၼႃႈယၢဝ်းမၼ်းမီးသွင်သွၵ်ႇၶိုပ်ႈ၊ၼႃႈၵႂၢင်ႈမၼ်းမီးၼိုင်ႈသွၵ်ႇၶိုပ်ႈဢေႃႈ။-
သမ်ႉတၵ်းလႆႈဢဝ်ၶမ်းတွင်ႈႁဵတ်းၶေႇရုၽဵမ်ႇ သွင်ပႃးသေယဝ်ႉ၊-
ႁႂ်ႈၸပ်းယူႇၽၢႆႇၼႃႈပွတ်းပလၢင်ႇပုၼ်ႈဢၼ်ၽေႇဢပျတ်ႈၼၼ်ႉယေႈၽၢႆႇယေႈပႃးဢေႃႈ။ တၵ်းလႆႈႁဵတ်းႁႂ်ႈၶေႇရုၽဵမ်ႇသွင်ပႃးၼၼ်ႉပဵၼ်ၼိူဝ်ႉလဵဝ်ၵၼ်တင်းပလၢင်ႇပုၼ်ႈဢၼ်ၽေႇဢပျတ်ႈၼၼ်ႉဢေႃႈ။-
ၶေႇရုၽဵမ်ႇၸိူဝ်းၼၼ်ႉတၵ်းလႆႈဝၢႆႇၼႃႈတေႃႇၵၼ်ယူႇ၊ဢဝ်ပိၵ်ႇၶဝ်ၵီႈလႄႈမုင်းႁူမ်ႇၵႃႈၼိူဝ်ပလၢင်ႇပုၼ်ႈဢၼ်ၽေႇဢပျတ်ႈၼၼ်ႉသေယဝ်ႉ၊ႁႂ်ႈပႂ်ႉတူၺ်းပလၢင်ႇပုၼ်ႈဢၼ်တၵ်းၽေႇဢပျတ်ႈၼၼ်ႉယူႇတႃႉ။-
ဢဝ်ၶႅပ်းမၢၵ်ႇႁိၼ်သွင်ၶႅပ်းၼၼ်ႉသႂ်ႇဝႆႉၼႂ်းတိူၵ်ႈၼၼ်ႉလႄႈဢဝ်ပလၢင်ႇပုၼ်ႈတၵ်းၽေႇဢပျတ်ႈၼၼ်ႉတၢင်ႇဝႆႉၵႃႈၼိူဝ်တိူၵ်ႈတႃႉ။-
ႁဵတ်းၼၼ်လႄႈၵဝ်တၵ်းထူပ်းၵၼ်တင်းမႂ်းၵႃႈတီႈၼၼ်ႈဢေႃႈ။ ၵဝ်တၵ်းယူႇၵႃႈၼိူဝ်ပလၢင်ႇပုၼ်ႈတၵ်းၽေႇဢပျတ်ႈၵႃႈတီႈဝူင်ႈၵၢင်ၶေႇရုၽဵမ်ႇသွင်ပႃးဢၼ်တၢင်ႇၵႃႈၼိူဝ်တိူၵ်ႈဢၼ်သႂ်ႇပတိၺိၺ်ႇၸဝ်ႈၼၼ်ႉသေလႄႈလၢတ်ႈတေႃႇမႂ်းလွင်ႈၵႃႈဢၼ်ၵဝ်တၵ်းပၼ်တြႃးတင်းပိင်းၺၢပ်ႈၵဝ်တင်းသဵင်ႈတင်းလူင်ၵႃႈတီႈၵူၼ်းမဵဝ်း ဢိသရေး၊ တင်းလၢႆၼၼ်ႉဢေႃႈ။
“ဢဝ်မႆႉပဝ်းႁဵတ်းၽိူၼ်ဢၼ်ၼိုင်ႈတႃႉ။ ၽိူၼ်ၼၼ်ႉၼႃႈယၢဝ်းမၼ်းမီးသွင်သွၵ်ႇ၊ၼႃႈၵႂၢင်ႈမၼ်းသွၵ်ႇၼိုင်ႈ၊တၢင်းသုင်မၼ်းသွၵ်ႇၶိုပ်ႈ။-
တၵ်းလႆႈဢဝ်ၶမ်းလွတ်ႈငၢၼ်ႇဢုမ်ႇဝႆႉလႄႈဢဝ်ၶမ်းႁေႃႇၶွပ်ႇမၼ်းႁွပ်ႈႁွပ်ႈဢေႃႈ။-
တၵ်းလႆႈႁဵတ်းၶႃႇပၢၼ်းမၼ်းၵႂၢင်ႈၽႃႇမိုဝ်းၼိုင်ႈသေလႄႈဢဝ်ၶမ်းႁေႃႇၶွပ်ႇမၼ်းဝႆႉႁွပ်ႈႁွပ်ႈဢေႃႈ။-
လေႃႇႁဵတ်းမွင်ႈၶမ်းသီႇမွင်ႈပုၼ်ႈတႃႇတေဢဝ်ၵၢၼ်းသွတ်ႇသႂ်ႇဝႆႉ၊တီႈတၢင်းၼိူဝ်ၶႃမၼ်းတီႈသီႇၸဵင်ႇတႃႉ။-
မွင်ႈၶမ်းၸိူဝ်းၼၼ်ႉႁႂ်ႈမီးၵႃႈႁိမ်းၶွပ်ႇမၼ်းပုၼ်ႈတႃႇတၵ်းသွတ်ႇၵၢၼ်းပုၼ်ႈဢၼ်တၵ်းႁၢမ်ၽိူၼ်ၼၼ်ႉတႃႉ။-
ၵၢၼ်းၸိူဝ်းၼၼ်ႉၵေႃႈဢဝ်မႆႉပဝ်းထၢၵ်ႇႁဵတ်းလႄႈဢဝ်ၶမ်းလွတ်ႈငၢၼ်ႇဢုမ်ႇႁေႃႇဝႆႉတႃႉ။-
တၵ်းလႆႈႁဵတ်းဝၢၼ်ႇၽႄလႂ်၊ၸေႃႉလႂ်၊ပုၼ်ႈတႃႇတၵ်းၽဝ်ဢၢႆႁွမ်ဢၢႆႁူၺ်း၊ဢိၵ်ႇတင်းၵွၵ်းလႂ်၊ဢၢင်ႇလႂ်၊ပုၼ်ႈတႃႇတၵ်းထွၵ်ႇတၵ်းႁိုဝ်ႈဢၼ်ၸၢပ်ႈသႅင်ႇၵၼ်တင်းမၼ်းလႄႈ၊ၶိူင်ႈတိုဝ်းၸိူဝ်းၼၼ်ႉတၵ်းလႆႈဢဝ်ၶမ်းလွတ်ႈငၢၼ်ႇႁဵတ်းဢေႃႈ။-
တၵ်းလႆႈဢဝ်ၶဝ်ႈမုၼ်းမူတ်းၸၢင်ႇဢၼ်သၢၵ်ႈလူႇတီႈၵဝ်ၼၼ်ႉတၢင်ႇဝႆႉၵႃႈၼိူဝ်ၽိူၼ်ၽၢႆႇၼႃႈၵဝ်သေႇသေႇဢေႃႈ။
“ၶဵင်ႇတီႈတႆႈၽႆးၵေႃႈတၵ်းလႆႈဢဝ်ၶမ်းလွတ်ႈငၢၼ်ႇႁဵတ်းဝႆႉဢၼ်ၼိုင်ႈဢေႃႈ။ တၵ်းလႆႈတွင်ႈႁဵတ်းၸႃႉၸဵမ်တိၼ်မၼ်းတင်းသဝ်မၼ်းဢေႃႈ။ ၵွၵ်းမၼ်း၊တုမ်ႇမၼ်းတင်းမွၵ်ႇမူဝ်မၼ်းၸိူဝ်းၼၼ်ႉတၵ်းလႆႈႁဵတ်းပဵၼ်ၼိူဝ်ႉလဵဝ်ၵၼ်တင်းၶဵင်ႇတီႈတႆႈၽႆးၼၼ်ႉဢေႃႈ။-
တၵ်းလႆႈမီးၵိင်ႇႁူၵ်းၵိင်ႇတႅၵ်ႇဢွၵ်ႇသေၵႃႈတီႈသွင်ၽၢၵ်ႇၶၢင်ႈမၼ်းလႄႈႁႂ်ႈမီးယေႈၽၢႆႇသၢမ်ၵိင်ႇသၢမ်ၵိင်ႇတႃႉ။-
ၼႂ်းၵိင်ႇႁူၵ်းၵိင်ႇၼၼ်ႉယေႈၵိင်ႇတၵ်းလႆႈမီးမွၵ်ႇႁၢင်ႈၶိူင်ႈသၢမ်လူင်ႇလႄႈမိူၼ်ၼင်ႇႁၢင်ႈလူင်ႇမွၵ်ႇမၢၵ်ႇမူၼ်ႇ ဢၼ်ပႃးတင်းတုမ်ႇမၼ်းတင်းမွၵ်ႇမူဝ်မၼ်းႁင်းၽႂ်ႁင်းမၼ်းဢေႃႈ။-
ၵႃႈတီႈသဝ်ၶဵင်ႇတီႈတႆႈၽႆးၼၼ်ႉၵေႃႈ တၵ်းလႆႈမီးမွၵ်ႇႁၢင်ႈၶိူင်ႈသီႇလူင်ႇဢၼ်မိူၼ်ၼင်ႇႁၢင်ႈလူင်ႇမွၵ်ႇမၢၵ်ႇမူၼ်ႇဢၼ်ပႃးတင်းတုမ်ႇမၼ်းတင်းမွၵ်ႇမူဝ်မၼ်းႁင်းၽႂ်ႁင်းမၼ်းဢေႃႈ။-
ၵႃႈတီႈၵိင်ႇမၼ်းသၢမ်ၵူႈၼၼ်ႉၵႃႈတႂ်ႈငၢမ်ႈၵိင်ႇၼိုင်ႈၵူႈတၵ်းလႆႈမီးတုမ်ႇမၼ်းယေႈဢၼ်ၵႃႈတီႈသၢမ်ၵူႈၼၼ်ႉဢေႃႈ။-
ၸႃႉၸဵမ်တုမ်ႇမၼ်းလႂ်လႄႈၵိင်ႇမၼ်းလႂ်၊တင်းၶဵင်ႇတီႈတႆႈၽႆးၸိူဝ်းၼၼ်ႉတၵ်းလႆႈဢဝ်ၶမ်းလွတ်ႈငၢၼ်ႇတွင်ႈႁဵတ်းႁႂ်ႈပဵၼ်ၼိူဝ်ႉလဵဝ်ၵၼ်ဝႆႉဢေႃႈ။-
တၵ်းလႆႈႁဵတ်းဝၢၼ်ႇၽႆးၸဵတ်းလုၵ်ႈလႄႈတႆႈၽႆးဝႆႉ၊ႁႂ်ႈဢၼ်လႅင်းထွင်ႇၵႂႃႇသိုဝ်ႈၽၢႆႇၶဵင်ႇတီႈတႆႈၽႆးၼၼ်ႉဢေႃႈ။-
ၵိမ်းၺၢပ်ႈၽႆးတင်းၵွၵ်းၶၢမ်ႇတဝ်ႈမၼ်းၵေႃႈတၵ်းလႆႈပဵၼ်ၶမ်းလွတ်ႈငၢၼ်ႇဢေႃႈ။-
ဢဝ်ၶမ်းလွတ်ႈငၢၼ်ႇသၢဝ်းၸွႆႉ ႁဵတ်းၶဵင်ႇတီႈတႆႈၽႆးဢိၵ်ႇတင်းၶိူင်ႈမၼ်းတင်းသဵင်ႈတင်းလူင်တႃႉ။-
ဝႆႉသတိလႄႈႁဵတ်းႁႂ်ႈမိူၼ်ၵၼ်ၸွမ်းၵႃႈၼင်ႇဢၼ်ၵဝ်ၼႄပျႃးပုင်ႇႁၢင်ႈမၼ်းတီႈမႂ်းၵႃႈၼိူဝ်လွႆၼၼ်ႉလီလီတႃႉ။
“တၵ်းလႆႈႁဵတ်းသုမ်ႉထဵင်ၸဝ်ႈ၊ဢၼ်တၵ်းလႆႈဢဝ်ၽႃႈၵင်ႈသိပ်းၽိုၼ်ဢၼ်ပဵၼ်ၽႃႈပၢၼ်ႇၶျေႃးဢၼ်သွမ်ႇ၊ဢၼ်ၵမ်ႇတင်းဢၼ်လႅင်သေလႄႈႁႂ်ႈမီးတူဝ်ႁၢင်ႈၶေႇရုၽဵမ်ႇ ႁၢင်ႈၶိူင်ႈဝႆႉဢေႃႈ။-
ၽႃႈၵင်ႈၼၼ်ႉ တၵ်းလႆႈမီးၼႃႈယၢဝ်းသၢဝ်းပႅတ်ႇသွၵ်ႇ၊ၼႃႈၵႂၢင်ႈသီႇသွၵ်ႇလႄႈႁႂ်ႈၼႃႈယၢဝ်းၼႃႈၵႂၢင်ႈမၼ်းပဵင်းၵၼ်ၵူႈၽိုၼ်ဢေႃႈ။-
ယဵပ်ႉၽႃႈၵင်ႈႁႃႈၽိုၼ်ၸပ်းၵၼ်ႁႂ်ႈပဵၼ်ၽိုၼ်လဵဝ်ၵၼ်လႄႈၵိုတ်းယူႇထႅင်ႈႁႃႈၽိုၼ်ၼၼ်ႉၵေႃႈယဵပ်ႉႁႂ်ႈၸပ်းၵၼ်ႁႂ်ႈပဵၼ်ၽိုၼ်လဵဝ်ၵၼ်တႃႉ။-
ဢဝ်ၽႃႈသွမ်ႇႁဵတ်းႁူမၼ်း၊သႂ်ႇၽၢႆႇတၢင်းၼွၵ်ႈၸွမ်းႁိမ်းၽႃႈၵင်ႈလူင်တင်းသွင်ၽိုၼ်ၼၼ်ႉတႃႉ။-
ၵႃႈတီႈၽႃႈၵင်ႈၽိုၼ်ၼိုင်ႈႁဵတ်းသႂ်ႇႁူမၼ်းႁႃႈသိပ်းဢၼ်လႄႈထႅင်ႈၽိုၼ်ၼိုင်ႈၵေႃႈႁဵတ်းႁူမၼ်းသႂ်ႇႁႃႈသိပ်းဢၼ်ႁႂ်ႈႁူမၼ်းဢၼ်ၼိုင်ႈလႄႈဢၼ်ၼိုင်ႈတေႃႇမႅၼ်ႈၵၼ်တႃႉ။-
ႁဵတ်းၶေႃၶမ်းႁႃႈသိပ်းဢၼ်လႄႈဢဝ်ၶေႃၶမ်းၸိူဝ်းၼၼ်ႉၵဵဝ်ႇၽႃႈၵင်ႈတေႃႇၸပ်းၵၼ်ႁႂ်ႈပဵၼ်သုမ်ႉထဵင်ဢၼ်လဵဝ်ၵူၺ်းတႃႉ။
“တၵ်းလႆႈႁဵတ်းၽႃႈၵင်ႈတၢင်ႇၽိုၼ်ပုၼ်ႈတၵ်းမုင်းသုမ်ႉထဵင်ၸဝ်ႈၼၼ်ႉဢေႃႈ။ တၵ်းလႆႈဢဝ်ၶူၼ်ပႄႉႁဵတ်းပဵၼ်သိပ်းဢဵတ်းၽိုၼ်ဢေႃႈ။-
ၽႃႈမုင်းၼၼ်ႉတၵ်းလႆႈမီးၼႃႈယၢဝ်းသၢမ်သိပ်းသွၵ်ႇ၊ၼႃႈၵႂၢင်ႈသီႇသွၵ်ႇလႄႈႁႂ်ႈၼႃႈယၢဝ်းၼႃႈၵႂၢင်ႈမၼ်းမိူၼ်ၵၼ်ၵူႈၽိုၼ်ဢေႃႈ။-
ယဵပ်ႉၽႃႈမုင်းႁႃႈၽိုၼ်ၸပ်းၵၼ်ႁႂ်ႈပဵၼ်ၽိုၼ်လဵဝ်ၵၼ်၊ဢၼ်ၵိုတ်းၵျၢၼ်ႇႁူၵ်းၽိုၼ်ၼၼ်ႉၵေႃႈသမ်ႉယဵပ်ႉႁႂ်ႈပဵၼ်ၽိုၼ်လဵဝ်ၵၼ်တႃႉ။ ၽႃႈမုင်းၽိုၼ်တီႈႁူၵ်းၼၼ်ႉတူပ်ႉၶိုၼ်ႈဝႆႉၵႃႈတီႈၽၢႆႇၼႃႈသုမ်ႉထဵင်ၸဝ်ႈတႃႉ။-
ႁဵတ်းႁူမၼ်းႁႃႈသိပ်းသႂ်ႇၸွမ်းႁိမ်းၽႃႈၵင်ႈၽၢႆႇၼိူဝ်ၽိုၼ်ၼိုင်ႈလႄႈႁဵတ်းႁူႁႃႈသိပ်းသႂ်ႇၸွမ်းႁိမ်းၽႃႈၵင်ႈၽၢႆႇၼိူဝ်ထႅင်ႈၽိုၼ်ၼိုင်ႈၼၼ်ႉတႃႉ။-
ႁဵတ်းၶေႃတွင်းလိူင်ႁႃႈသိပ်းဢၼ်လႄႈဢဝ်ၶေႃတွင်းလိူင်ၸိူဝ်းၼၼ်ႉၵဵဝ်ႇသႂ်ႇၵႃႈတီႈႁူၸိူဝ်းၼၼ်ႉသေယဝ်ႉ၊တၵ်းလႆႈႁႂ်ႈၽႃႈမုင်းၽၢၵ်ႇၼိုင်ႈလႄႈၽၢၵ်ႇၼိုင်ႈတေႃႇၸပ်းၵၼ်ပဵၼ်မုင်းဢၼ်လဵဝ်ၵၼ်ဝႆႉတႃႉ။-
ဢၼ်လိူဝ်ပႅၼ်ၵႂႃႇၶိုင်ႈပၵ်းၼိုင်ႈၼၼ်ႉပွႆႇႁွႆႈတူၵ်းဝႆႉၽၢႆႇတၢင်းလင်သုမ်ႉထဵင်ၸဝ်ႈလႄႈ၊-
ဢၼ်လိူဝ်ပႅၼ်ၵႂႃႇၸွမ်းၼႃႈယၢဝ်းမၼ်းသွင်သွၵ်ႇၼၼ်ႉပွႆႇႁွႆႈတူၵ်းဝႆႉ၊ယေႈၽၢႆႇယေႈသွၵ်ႇပုၼ်ႈဢၼ်တၵ်းႁူမ်ႇသုမ်ႉထဵင်ၸဝ်ႈတႃႉ။
“တၵ်းလႆႈႁဵတ်းၽႃႈမုင်းထႅင်ႈသွင်ၽိုၼ်ဢေႃႈ။ တၵ်းလႆႈဢဝ်ၼင်သူဝ်းဢၼ်ယွမ်ႉလႅင်ႁဵတ်းပဵၼ်ၽိုၼ်ၼိုင်ႈ၊ဢိၵ်ႇတင်းဢဝ်ၼင်သတ်းဢၼ်လီႁဵတ်းၽိုၼ်ၼိုင်ႈႁႂ်ႈပဵၼ်ဢၼ်ႁူမ်ႇၽၢႆႇၼွၵ်ႈမၼ်း ဢေႃႈ။
“တၵ်းလႆႈဢဝ်ပႅၼ်ႈမႆႉပဝ်းပူၵ်းၵင်ႈသုမ်ႉထဵင်ၸဝ်ႈဝႆႉဢေႃႈ။-
ပႅၼ်ႈယေႈၽႅၼ်ႇတၵ်းလႆႈမီးၼႃႈယၢဝ်းသိပ်းသွၵ်ႇ၊ၼႃႈၵႂၢင်ႈသွၵ်ႇၶိုပ်ႈဢေႃႈ။-
ၼင်ႇႁိုဝ်တၵ်းဢဝ်ၶပ်ႉတၢမ်းၵၼ်လႆႈၸိုင်၊ၵႃႈတီႈပႅၼ်ႈယေႈၽႅၼ်ႇတၵ်းလႆႈမီးတိၼ်သွင်ဢၼ်ဢေႃႈ။ ၵႃႈတီႈပႅၼ်ႈတင်းသဵင်ႈတင်းလူင်ၸိူဝ်းၼၼ်ႉတၵ်းလႆႈသႂ်ႇတိၼ်မၼ်းၸိူဝ်ႉၼင်ႇၼၼ်ဢေႃႈ။-
ႁဵတ်းၽႃပႅၼ်ႈပုၼ်ႈၼႃႈတၢင်းၸၢၼ်းၼၼ်ႉသၢဝ်းၽႅၼ်ႇတႃႉ။-
ဢဝ်ငိုၼ်းႁဵတ်းတီႈသုပ်းတိၼ်သီႇသိပ်းဢၼ်၊ပုၼ်ႈဢၼ်တၵ်းသုပ်းတိၼ်တႂ်ႈပႅၼ်ႈယေႈၽႅၼ်ႇသွင်ဢၼ်တႃႉ။-
သမ်ႉႁဵတ်းၽႃပႅၼ်ႈပုၼ်ႈၼႃႈတၢင်းႁွင်ႇၼၼ်ႉသၢဝ်းၼိုင်ႈတႃႉ။-
ႁဵတ်းတီႈသုပ်းတိၼ်ငိုၼ်းသီႇသိပ်းဢၼ်ပုၼ်ႈတၵ်းသုပ်းတိၼ်တႂ်ႈပႅၼ်ႈယေႈၽႅၼ်ႇသွင်ဢၼ်ၼၼ်ႉတႃႉ။-
ၽၢႆႇလင်သုမ်ႉထဵင်ၸဝ်ႈၼႃႈတၢင်းတူၵ်းၼၼ်ႉႁဵတ်းၽႃပႅၼ်ႈႁူၵ်းၽႅၼ်ႇတႃႉ။-
သမ်ႉတၵ်းလႆႈႁဵတ်းၽႃပႅၼ်ႈသွင်ၽႅၼ်ႇပုၼ်ႈၸဵင်ႇမၼ်းၽၢႆႇလင်သုမ်ႉထဵင်ၸဝ်ႈဢေႃႈ။-
ပႅၼ်ႈဢၼ်တူပ်ႉၸဵင်ႇမၼ်းၸိူဝ်းၼၼ်ႉတၵ်းလႆႈတေႃႇၸပ်းၵၼ်ၸႃႉၸဵမ်ၵႃႈတီႈတႂ်ႈလႄႈပဵၼ်ဢၼ်လဵဝ်ၵၼ်ၶိုၼ်ႈၵႂႃႇၸွမ်းၸိူဝ်ႉၼင်ႇၼၼ်တေႃႇထိုင်ႁွတ်ႈပၢႆၸိၵ်းမၼ်းဢေႃႈ။ တၵ်းလႆႈႁဵတ်းၸိူဝ်ႉၼင်ႇၼၼ်သွင်ၸဵင်ႇၼၼ်ႉယေႈၸဵင်ႇသွင်ဢၼ်ဢေႃႈ။-
ၼင်ႇၼၼ်လႄႈ၊တၵ်းလႆႈမီးပႅၼ်ႈပႅတ်ႇၽႅၼ်ႇ၊တီႈသုပ်းတိၼ်ငိုၼ်းသိပ်းႁူၵ်းဢၼ်ပုၼ်ႈတႃႇယေႈၽႅၼ်ႇသွင်ဢၼ်ဢေႃႈ။
“တၵ်းလႆႈဢဝ်မႆႉပဝ်းႁဵတ်းသႄႈမၼ်းႁႃႈလႅမ်ႈပုၼ်ႈၽႃပႅၼ်ႈၸိူဝ်းၼၼ်ႉၵႃႈတီႈသုမ်ႉထဵင်ၸဝ်ႈၼႃႈၼိုင်ႈ၊-
ႁႃႈလႅမ်ႈပုၼ်ႈၽႃပႅၼ်ႈၸိူဝ်းၼၼ်ႉၵႃႈတီႈသုမ်ႉထဵင်ၸဝ်ႈထႅင်ႈၼႃႈၼိုင်ႈ၊ႁႃႈလႅမ်ႈပုၼ်ႈၽႃပႅၼ်ႈၸိူဝ်းၼၼ်ႉၵႃႈတီႈၽၢႆႇလင်သုမ်ႉထဵင်ၸဝ်ႈၼႃႈတၢင်းတူၵ်းၸိူဝ်းၼၼ်ႉဢေႃႈ။-
မႆႉသႄႈလႅမ်ႈၵၢင်ဢၼ်မီးသိုဝ်ႈၶိုင်ႈၵၢင်ၽႃပႅၼ်ႈၸိူဝ်းၼၼ်ႉတၵ်းလႆႈသွတ်ႇတႄႇၸႃႉဢဝ်ၸဵင်ႇၼိုင်ႈႁႂ်ႈသုတ်းတိူၵ်ႉၵႂႃႇၸဵင်ႇၼိုင်ႈဢေႃႈ။-
ၵႃႈတီႈၽႃပႅၼ်ႈၸိူဝ်းၼၼ်ႉတၵ်းလႆႈဢဝ်ၶမ်းဢုမ်ႇဝႆႉလႄႈတၵ်းလႆႈဢဝ်မွင်ႈၶမ်းတၢပ်ႈသႂ်ႇဝႆႉ၊ပုၼ်ႈတီႈဢၼ်သႄႈၸိူဝ်းၼၼ်ႉတၵ်းသွတ်ႇသႂ်ႇဢေႃႈ။ သႄႈၸိူဝ်းၼၼ်ႉၵေႃႈတၵ်းလႆႈဢဝ်ၶမ်းဢုမ်ႇဝႆႉၼင်ႇၵဝ်ႇဢေႃႈ။-
တၵ်းလႆႈႁဵတ်းသုမ်ႉထဵင်ၸဝ်ႈႁႂ်ႈမိူၼ်ၵၼ်ၸွမ်းၵႃႈၼင်ႇဢၼ်ၵဝ်ၼႄပျႃးပုင်ႇႁၢင်ႈမၼ်းတီႈမႂ်းၵႃႈၼိူဝ်လွႆၼၼ်ႉလီလီဢေႃႈ။
“သမ်ႉတၵ်းလႆႈႁဵတ်းၽႃႈၵင်ႈၽိုၼ်ၼိုင်ႈဢၼ်ဢဝ်တင်းၽႃႈပၢၼ်ႇၶျေႃး၊မႆၶူၼ်သူဝ်းဢၼ်ယွမ်ႉသွမ်ႇ၊ယွမ်ႉၵမ်ႇ၊ယွမ်ႉလႅင်ဝႆႉၼၼ်ႉသေလႄႈႁၢင်ႈၶိူင်ႈသႂ်ႇပုင်ႇႁၢင်ႈၶေႇရုၽဵမ်ႇဝႆႉဢေႃႈ။-
ဢဝ်ၽႃႈၵင်ႈၼၼ်ႉႁွႆႈဝႆႉၵႃႈၼိူဝ်သဝ်မႆႉပဝ်းဢၼ်ဢဝ်တင်းၶမ်းတဵၵ်းဝႆႉသီႇလႅမ်ႈၸိူဝ်းဢၼ်ဢဝ်ၶေႃၶမ်းၵဵဝ်ႇလႄႈပူၵ်းတင်ႈဝႆႉၵႃႈၼိူဝ်တီႈသုပ်းတိၼ်ငိုၼ်းသီႇဢၼ်ၼၼ်ႉတႃႉ။-
ဢဝ်ၽႃႈၵင်ႈၼၼ်ႉႁွႆႈဝႆႉၵႃႈတႂ်ႈၶေႃၶမ်းၸိူဝ်းၼၼ်ႉသေလႄႈ ဢဝ်တိူၵ်ႈပတိၺိၺ်ႇၸဝ်ႈဢၼ်သႂ်ႇၶႅပ်းမၢၵ်ႇႁိၼ်သွင်ၶႅပ်း ၼၼ်ႉဝၢင်းဝႆႉၽၢႆႇလင်ၽႃႈၵင်ႈၼၼ်ႉၼၼ်ႉတႃႉ။ ၽႃႈၵင်ႈၼၼ်ႉပဵၼ်တၢင်းဢၼ်ၶၼ်ႈဢၼ်ၶႅၼ်ႈထႃႇၼႃႉတီႈမူတ်းၸၢင်ႇၽၢတ်ႇၵၼ်တင်းထႃႇၼႃႉတီႈမူတ်းၸၢင်ႇသေပိူၼ်ႈၼၼ်ႉဢေႃႈ။-
ဢဝ်ပလၢင်ႇပုၼ်ႈဢၼ်တၵ်းၽေႇဢပျတ်ႈၼၼ်ႉတၢင်ႇဝႆႉၵႃႈၼိူဝ်တိူၵ်ႈပတိၺိၺ်ႇၸဝ်ႈတႃႉ။-
ၵႃႈတီႈၽၢႆႇၼွၵ်ႈထႃႇၼႃႉတီႈမူတ်းၸၢင်ႇသေပိူၼ်ႈၼၼ်ႉၸိုင်၊တၵ်းလႆႈဢဝ်ၽိူၼ်တမ်းဝႆႉ၊ၽၢႆႇတၢင်းႁွင်ႇသုမ်ႉထဵင်ၸဝ်ႈ၊သမ်ႉဢဝ်ၶဵင်ႇတီႈတႆႈၽႆးဝႆႉၽၢႆႇတၢင်းၸၢၼ်းႁႂ်ႈမၼ်းတေႃႇၵၼ်ဝႆႉတႃႉ။
“တၵ်းလႆႈႁဵတ်းၽႃႈၵင်ႈၽိုၼ်ၼိုင်ႈပုၼ်ႈၽၵ်းတူသုမ်ႉထဵင်ၸဝ်ႈဢေႃႈ။ ၽႃႈၵင်ႈၼၼ်ႉတၵ်းလႆႈဢဝ်ၽႃႈပၢၼ်ႇၶျေႃး၊ဢၼ်သွမ်ႇ၊ဢၼ်ၵမ်ႇ၊ဢၼ်လႅင်တေႃးႁဵတ်းၼၼ်ႉႁၢင်ႈၶိူင်ႈဝႆႉဢေႃႈ။-
ပုၼ်ႈၽႃႈၵင်ႈၼႆႉၸိုင်၊တၵ်းလႆႈဢဝ်သဝ်မႆႉပဝ်း၊ႁႃႈလႅမ်ႈဢၼ်ဢဝ်ၶမ်းဢုမ်ႇႁေႃႇဝႆႉၼၼ်ႉဢဝ်ၶေႃၶမ်းၵဵဝ်ႇလႄႈပူၵ်းတင်ႈဝႆႉၵႃႈၼိူဝ်တီႈသုပ်းတိၼ်ဢၼ်ဢဝ်တွင်းလိူင်ႁဵတ်းၼၼ်ႉဢေႃႈ။
“တၵ်းလႆႈႁဵတ်းၶဵင်ႇတၢင်းလူႇဢၼ်ၼိုင်ႈဢၼ်ဢဝ်မႆႉပဝ်းႁဵတ်းလႄႈ၊တၵ်းလႆႈမီးၼႃႈယၢဝ်းၼႃႈၵႂၢင်ႈႁႃႈသွၵ်ႇမိူၼ်ၵၼ်ပဵၼ်သီႇၸဵင်ႇဝႆႉဢေႃႈ။ တၢင်းသုင်မၼ်းတၵ်းလႆႈမီးသၢမ်သွၵ်ႇဢေႃႈ။-
တၵ်းလႆႈႁဵတ်းၶဝ်လႅမ်သႂ်ႇၵႃႈတီႈႁူဝ်ၸဵင်ႇတင်းသီႇၸဵင်ႇမၼ်းယေႈၸဵင်ႇယေႈလႅမ်ႈဢေႃႈ။ ၶဝ်လႅမ်ၸိူဝ်းၼၼ်ႉတၵ်းလႆႈပဵၼ်ၼိူဝ်ႉလဵဝ်ၵၼ်တင်းၶဵင်ႇၼၼ်ႉလႄႈတၵ်းလႆႈဢဝ်တွင်းလိူင်ဢုမ်ႇႁေႃႇဝႆႉဢေႃႈ။-
ၸႃႉၸဵမ်မေႃႈပုၼ်ႈဢၼ်တၵ်းတုင်းတဝ်ႈမၼ်းလႂ်၊ၸေႃႉၽႅပ်ႉမၼ်းလႂ်၊ၵွၵ်းဝၢၼ်ႇမၼ်းလႂ်၊ၶေႃဢၼ်ၵွင်ႉၼိူဝ်ႉမၼ်းလႂ်၊ပၢၼ်ႉမၼ်းလႂ်၊ဢိၵ်ႇတင်းၶိူင်ႈပိူင်ၵႃႈဢၼ်ၸၢပ်ႈသႅင်ႇၵၼ်တင်းၶဵင်ႇၼၼ်ႉတင်းသဵင်ႈတင်းလူင်တၵ်းလႆႈဢဝ်တွင်းလိူင်ႁဵတ်းဢေႃႈ။-
တၵ်းလႆႈႁဵတ်းၶႃႇတွင်းလိူင်ဢၼ်ၼိုင်ႈသေလႄႈႁဵတ်းမွင်ႈတွင်းလိူင်သီႇမွင်ႈသႂ်ႇၵႃႈၼိူဝ်သီႇၸဵင်ႇမၼ်းဢေႃႈ။-
တၵ်းလႆႈဢဝ်ၶႃႇၼၼ်ႉဝႆႉၵႃႈတႂ်ႈၶွပ်ႇဢၼ်လဵပ်ႈႁွပ်ႈၶဵင်ႇတၢင်းလူႇၼၼ်ႉလႄႈႁႂ်ႈၶႃႇၼၼ်ႉၶိုတ်းထိုင်ၵႃႈတီႈၶိုင်ႈၵၢင်ၶဵင်ႇတၢင်းလူႇဢေႃႈ။-
သမ်ႉတၵ်းလႆႈဢဝ်မႆႉပဝ်းထၢၵ်ႇႁဵတ်းၵၢၼ်းလႄႈဢဝ်တွင်းလိူင်ဢုမ်ႇႁေႃႇဝႆႉဢေႃႈ။-
တၵ်းလႆႈဢဝ်ၵၢၼ်းႁၢပ်ႇၸိူဝ်းၼၼ်ႉသွတ်ႇသႂ်ႇမွင်ႈၵၢၼ်းလႄႈ၊ၵၢၼ်းႁၢပ်ႇၸိူဝ်းၼၼ်ႉတၵ်းလႆႈမီးၸွမ်းသွင်ၽၢၵ်ႇၶၢင်ႈၶဵင်ႇတၢင်းလူႇသေယဝ်ႉ၊ပဵၼ်ပုၼ်ႈဢၼ်တၵ်းႁၢမ်မၼ်းဢေႃႈ။-
ၶဵင်ႇတၢင်းလူႇၼၼ်ႉၸိုင်၊တၵ်းလႆႈဢဝ်ပႅၼ်ႈႁဵတ်းႁႂ်ႈၵၢင်မၼ်းၵူင်ဝႆႉ၊ႁႂ်ႈမိူၼ်ၵၼ်လီလီၸွမ်းၵႃႈၼင်ႇဢၼ်ၵဝ်ၼႄပျႃးပုင်ႇႁၢင်ႈမၼ်းတီႈမႂ်းၵႃႈၼိူဝ်လွႆၼၼ်ႉဢေႃႈ။
“တၵ်းလႆႈလွမ်ႉႁူဝ်ႉဝၢင်းသုမ်ႉထဵင်ၸဝ်ႈဢေႃႈ။ တၵ်းလႆႈဢဝ်ၽႃႈပၢၼ်ႇၶျေႃးႁဵတ်းၽႃႈၵင်ႈၼႃႈတၢင်းယၢဝ်းသုမ်ႉထဵင်ၸဝ်ႈဢၼ်မီးပၢၵ်ႇသွၵ်ႇၼၼ်ႉၵင်ႈၽၢႆႇတၢင်းၸၢၼ်းဢေႃႈ။-
ပူၵ်းသဝ်တွင်းလိူင်သၢဝ်းလႅမ်ႈတၢင်ႇၵႃႈၼိူဝ်တီႈသုပ်းတိၼ်တွင်းလိူင်သၢဝ်းဢၼ်သေယဝ်ႉ၊ၶေႃမၼ်းလႂ်တင်းႁၢဝ်းမၼ်းလႂ်ၸမ်ႉ၊တၵ်းလႆႈဢဝ်ငိုၼ်းႁဵတ်းဢေႃႈ။-
မိူၼ်ၼင်ႇၼၼ်ၼႃႈတၢင်းႁွင်ႇသုမ်ႉထဵင်ၸဝ်ႈၼၼ်ႉၵေႃႈတၵ်းလႆႈႁဵတ်းမိူၼ်ၸိူဝ်ႉၼင်ႇၼႆၼင်ႇၵဝ်ႇဢေႃႈ။-
ပုၼ်ႈၼႃႈၵႂၢင်ႈသုမ်ႉထဵင်ၸဝ်ႈၽၢႆႇဝၼ်းတူၵ်းၼၼ်ႉတၵ်းလႆႈႁဵတ်းၽႃႈၵင်ႈဢၼ်ယၢဝ်းႁႃႈသိပ်းသွၵ်ႇ၊ဢိၵ်ႇတင်းသဝ်သိပ်းလႅမ်ႈဢိၵ်ႇတင်းတီႈသုပ်းတိၼ်မၼ်းသိပ်းဢၼ်ဢေႃႈ။-
ပုၼ်ႈၼႃႈၵႂၢင်ႈၽၢႆႇတၢင်းၼႃႈၽၵ်းတူသုမ်ႉထဵင်ၸဝ်ႈဢၼ်ဝၢႆႇၸူးၽၢႆႇဝၼ်းဢွၵ်ႇၼၼ်ႉၵေႃႈတၵ်းလႆႈမီးႁႃႈသိပ်းသွၵ်ႇၼင်ႇၵဝ်ႇဢေႃႈ။-
ၽႃႈၵင်ႈပုၼ်ႈဢၼ်တၵ်းၵင်ႈႁိမ်းၽၵ်းတူၽၢႆႇၼိုင်ႈၼၼ်ႉတၵ်းလႆႈယၢဝ်းသိပ်းႁႃႈသွၵ်ႇ ဢိၵ်ႇတင်းသဝ်သၢမ်လႅမ်ႈပုၵ်းတင်ႈၵႃႈၼိူဝ်တီႈသုပ်းတိၼ်သၢမ်ဢၼ်ဢေႃႈ။-
ၽႃႈၵင်ႈဢၼ်တၵ်းၵင်ႈႁိမ်းၽၵ်းတူထႅင်ႈၽၢႆႇၼိုင်ႈၼၼ်ႉၵေႃႈတၵ်းလႆႈမီးမိူၼ်ၵၼ်ဢေႃႈ။-
ၽႃႈၵင်ႈပုၼ်ႈဢၼ်တၵ်းၵင်ႈႁူဝ်ႉဝၢင်းၼၼ်ႉတၵ်းလႆႈဢဝ်ၽႃႈပၢၼ်ႇၶျေႃး၊မႆၶူၼ်သူဝ်းဢၼ်ယွမ်ႉသွမ်ႇ၊ယွမ်ႉၵမ်ႇ၊ယွမ်ႉလႅင်ဝႆႉၸိူဝ်းၼၼ်ႉတေႃးႁဵတ်းႁၢင်ႈၶိူင်ႈဢေႃႈ။ တၵ်းလႆႈယၢဝ်းသၢဝ်းသွၵ်ႇလႄႈပူၵ်းသဝ်သီႇလႅမ်ႈၵႃႈၼိူဝ်တီႈသုပ်းတိၼ်မၼ်းသီႇဢၼ်ဢေႃႈ။-
သဝ်ဢၼ်ပူၵ်းႁွပ်ႈႁူဝ်ႉဝၢင်းၸိူဝ်းၼၼ်ႉၵႃႈမီးတင်းသဵင်ႈတင်းလူင်တၵ်းလႆႈဢဝ်ႁၢဝ်းငိုၼ်းသိုပ်ႇၸပ်းၵၼ်ဝႆႉလုမ်းလုမ်းလႄႈဢဝ်ၶေႃငိုၼ်းၵဵဝ်ႇဝႆႉဢေႃႈ။ ဢၼ်သုပ်းတိၼ်သဝ်တင်းလၢႆၸမ်ႉ၊တၵ်းလႆႈပဵၼ်တွင်းလိူင်ဢေႃႈ။-
ႁူဝ်ႉဝၢင်းသုမ်ႉထဵင်ၸဝ်ႈၼၼ်ႉတၵ်းလႆႈမီးၼႃႈယၢဝ်းပၢၵ်ႇသွၵ်ႇ၊ၼႃႈၵႂၢင်ႈႁႃႈသိပ်းသွၵ်ႇ၊တၢင်းသုင်ႁႃႈသွၵ်ႇဢေႃႈ။ ၽႃႈၵင်ႈမၼ်းတၵ်းလႆႈဢဝ်ၽႃႈပၢၼ်ႇၶျေႃးႁဵတ်း၊ဢိၵ်ႇတင်းတီႈသုပ်းတိၼ်သဝ်တေလႆႈဢဝ်တွင်းလိူင်ႁဵတ်းဢေႃႈ။-
ၶိူင်ႈယိပ်းၶိူင်ႈၸႂ်ႉၵႃႈမီးတင်းသဵင်ႈတင်းလူင်ဢၼ်တၵ်းလႆႈယိပ်းလႆႈၸႂ်ႉၵႃႈၼႂ်းသုမ်ႉထဵင်ၸဝ်ႈ၊ဢိၵ်ႇတင်းလၵ်းၸိူဝ်းဢၼ်တွၵ်ႇပုၼ်ႈသုမ်ႉထဵင်ၸဝ်ႈတင်းလၵ်းၸိူဝ်းဢၼ်တွၵ်ႇတီႈႁူဝ်ႉဝၢင်းၼၼ်ႉတၵ်းလႆႈပဵၼ်တွင်းလိူင်ဢေႃႈ။
“သင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆႁႂ်ႈၶဝ်ဢဝ်ၼမ်ႉမၼ်းသၢၼ်ႇလုၼ်ႇၸႅတ်ႈၸႅတ်ႈ မႃးပုၼ်ႈတၵ်းတႆႈၽႆးတီႈၶဵင်ႇတႆႈၽႆးဝႆႉ၊သေႇသေႇၼၼ်ႉတႃႉ။-
ၵႃႈၼႂ်းသုမ်ႉထဵင်ၸဝ်ႈတီႈၸုတုမ်ၵၼ်ၵႃႈတီႈၽၢႆႇၼွၵ်ႈၽႃႈၵင်ႈဢၼ်ၵင်ႈဝႆႉၽၢႆႇၼႃႈတိူၵ်ႈပတိၺိၺ်ႇၼၼ်ႉ၊ ဢႃႇရုၼ်ႇ၊ တင်းလုၵ်ႈၸၢႆးမၼ်းတင်းလၢႆ၊တၵ်းလႆႈမႄးႁဵတ်းမႄးႁႅၼ်းၶဵင်ႇတႆႈၽႆးၼၼ်ႉႁႂ်ႈလႆႈတႆႈၽႆးဝႆႉ၊တႄႇဢဝ်ၶိင်ႇႁူဝ်ၶမ်ႈတေႃႇထိုင်ႁွတ်ႈၶိင်ႇၵၢင်ၼႂ်ၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢေႃႈ။ ပိင်းၺၢပ်ႈၼႆႉၵူၼ်းမဵဝ်း ဢိသရေး၊ တၵ်းလႆႈႁဵတ်းၸွမ်းတႃႇသေႇၸူဝ်ႈလုၵ်ႈပၢၼ်လၢၼ်သိုပ်ႇသိုပ်ႇတၢမ်တၢမ်ဢေႃႈ။
“ႁွင်ႉဢဝ်ပီႈဢၢႆႈမႂ်း ဢႃႇရုၼ်ႇ၊ တင်းလုၵ်ႈၸၢႆးမၼ်းဢၼ်ပဵၼ် ၼႃႇတပ်ႉ၊ ဢၽိႁု၊ ဢေးလႃႇၸႃႇ၊ တင်း ဢိႀမႃႇ၊ ၸိူဝ်းၼၼ်ႉၽၢတ်ႇဢွၵ်ႇသေၵႃႈၼႂ်းပၢင်တပ်ႉၵူၼ်းမဵဝ်း ဢိသရေး၊ တင်းလၢႆမႃးႁႂ်ႈၶဝ်လႆႈပွင်ႁဵတ်းၼႃႈၵၢၼ်ယဵၸ်ႈပရေႃးႁဵၵ်ႈ ၵႃႈတီႈၵဝ်တႃႉ။-
ႁဵတ်းသိူဝ်ႈၶူဝ်းမူတ်းၸၢင်ႇပၼ်ပီႈဢၢႆႈမႂ်း ဢႃႇရုၼ်ႇ၊ ပုၼ်ႈဢၼ်တၵ်းပဵၼ်မုၼ်သရေႇတႃႉ။-
ႁွင်ႉဢဝ်ၵူၼ်းဢၼ်မေႃဢၼ်ၸၢင်ႈၸိူဝ်းဢၼ်ၵဝ်ပၼ်ပိင်ႇၺႃႇတၢင်းၵတ်ႉဝႆႉၼၼ်ႉမႃးတင်းသဵင်ႈတင်းလူင်လႄႈ၊ႁႂ်ႈၶဝ်ႁဵတ်းသိူဝ်ႈၶူဝ်းပၼ် ဢႃႇရုၼ်ႇ၊ ႁႂ်ႈမၼ်းလႆႈသၢၵ်ႈၵၢပ်ႈတူဝ်ပုၼ်ႈတၵ်းပွင်ႁဵတ်းၼႃႈၵၢၼ်ယဵၸ်ႈပရေႃးႁဵၵ်ႈၵႃႈတီႈၵဝ်တႃႉ။-
သိူဝ်ႈၶူဝ်းၼၼ်ႉတၵ်းလႆႈႁဵတ်းၸိူဝ်ႉႁိုဝ်ဝႃႈၼႆၸမ်ႉ၊ပဵၼ်ၶိူင်ႈၶူဝ်းထၢပ်ႈၼႃႈဢူၵ်း၊သိူဝ်ႈသုပ်း၊သိူဝ်ႈယၢဝ်း၊သိူဝ်ႈပွတ်းဢၼ်ႁၢင်ႈၶိူင်ႈ၊ၽႃႈၶဵၼ်းႁူဝ်တင်းသၢႆႁတ်ႉဢႅဝ်ဢေႃႈ။ ၶဝ်တၵ်းလႆႈႁဵတ်းသိူဝ်ႈၶူဝ်းပၼ်ပီႈဢၢႆႈမႂ်း ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉႁႂ်ႈၶဝ်လႆႈပွင်ႁဵတ်းၼႃႈၵၢၼ်ယဵၸ်ႈပရေႃးႁဵၵ်ႈၵႃႈတီႈၵဝ်ဢေႃႈ။-
ၵူၼ်းဢၼ်မေႃဢၼ်ၸၢင်ႈၸိူဝ်းၼၼ်ႉတၵ်းလႆႈဢဝ်မႆၶမ်း၊မႆၶူၼ်သူဝ်းဢၼ်ယွမ်ႉသွမ်ႇ၊ယွမ်ႉၵမ်ႇ၊ယွမ်ႉလႅင်ဝႆႉၸိူဝ်းၼၼ်ႉဢိၵ်ႇတင်းၽႃႈပၢၼ်ႇၶျေႃးသေလႄႈယဵပ်ႉႁဵတ်းဢေႃႈ။
“သိူဝ်ႈသုပ်းၸဝ်ႈၼၼ်ႉၵေႃႈၶဝ်တၵ်းလႆႈဢဝ်မႆၶမ်း၊မႆၶူၼ်သူဝ်းဢၼ်ယွမ်ႉသွမ်ႇ၊ယွမ်ႉၵမ်ႇ၊ယွမ်ႉလႅင်ဝႆႉ၊ဢိၵ်ႇတင်းၽႃႈပၢၼ်ႇၶျေႃးသေလႄႈယဵပ်ႉႁၢင်ႈၶိူင်ႈဝႆႉဢေႃႈ။-
တၵ်းလႆႈႁဵတ်းသၢႆႁူဝ်မႃႇသွင်သဵၼ်ႈလႄႈႁဵတ်းႁႂ်ႈႁူဝ်ၸဵင်ႇမၼ်းတင်းသွင်သဵၼ်ႈမတ်ႉၸပ်းၵၼ်လႆႈဢေႃႈ။-
သၢႆႁတ်ႉဢႅဝ်ၼၼ်ႉၵေႃႈတၵ်းလႆႈဢဝ်ၶူဝ်းမဵဝ်းလဵဝ်ၵၼ်တင်းသိူဝ်ႈသုပ်းၼၼ်ႉတေႃးႁႂ်ႈပဵၼ်ၼိူဝ်ႉလဵဝ်ၵၼ်တင်းသိူဝ်ႈသုပ်းၸဝ်ႈၼၼ်ႉဢေႃႈ။-
တၵ်းလႆႈဢဝ်သႅင်ၸၢႆးၶႃးယွတ်ႇသွင်လုၵ်ႈလႄႈၵႃႈၼိူဝ်ၼႃႈသႅင်ၼၼ်ႉၶွၵ်းတႅမ်ႈၸိုဝ်ႈသဵင်လုၵ်ႈၸၢႆး ဢိသရေး၊ သိပ်းသွင်ၵေႃႉၼၼ်ႉဝႆႉတႃႉ။-
ၶွၵ်းတႅမ်ႈၸိုဝ်ႈၸႅၼ်ႇၸွမ်းၼင်ႇဢသၢၵ်ႈၶဝ်ပီႈၼွင်ႉသႂ်ႇၵႃႈၼိူဝ်သႅင်ယေႈလုၵ်ႈႁူၵ်းၸိုဝ်ႈတႃႉ။-
တၵ်းလႆႈဢဝ်တင်းတၢင်းႁဵတ်းဢၼ်မေႃဢၼ်ၸၢင်ႈသေလႄႈၶွၵ်းတႅမ်ႈသႂ်ႇၸိုဝ်ႈသဵင်လုၵ်ႈၸၢႆး ဢိသရေး၊ သိပ်းသွင်ၵေႃႉၼၼ်ႉၵႃႈၼိူဝ်သႅင်သွင်လုၵ်ႈၼၼ်ႉမိူၼ်ၸိူဝ်ႉၼင်ႇၸုမ်ႈသေယဝ်ႉ၊ဢဝ်သႅင်သွင်လုၵ်ႈၼၼ်ႉသႂ်ႇဝႆႉၵႃႈၼႂ်းႁိူၼ်းၶမ်းမၼ်းသွင်ဢၼ်ဢေႃႈ။-
သႅင်သွင်လုၵ်ႈၼၼ်ႉတၵ်းလႆႈၵွပ်ႈၸပ်းသႂ်ႇၵႃႈၼိူဝ်သၢႆႁူဝ်မႃႇၵႃႈတီႈသိူဝ်ႈသုပ်းၸဝ်ႈၼၼ်ႉႁႂ်ႈပဵၼ်သႅင်ပုၼ်ႈဢၼ်တၵ်းၶုၵ်းၸႂ်လႆႈလုၵ်ႈလၢင်းၸိူဝ်ႉၶိူဝ်းၵူၼ်းမဵဝ်း ဢိသရေး၊ ၶဝ်ဢေႃႈ။ ဢႃႇရုၼ်ႇ၊ တၵ်းလႆႈပႃးဢဝ်ၸိုဝ်ႈသဵင်ၶဝ်ၼၼ်ႉဝႆႉၵႃႈၼိူဝ်ႁူဝ်မႃႇမၼ်းပုၼ်ႈလွင်ႈၼင်ႇႁိုဝ်ၵဝ် ထႃႇဝရႃႉၽြႃး၊ တၵ်းၶုၵ်းၸႂ်လႆႈၵူၼ်းၵဝ်တင်းလၢႆဢေႃႈ။-
မႂ်းတၵ်းလႆႈႁဵတ်းႁိူၼ်းၶမ်းဢၼ်မီးလၢႆးသွင်ႁူၺ်ႇဢေႃႈ။-
သမ်ႉဢဝ်ၶမ်းလွတ်ႈငၢၼ်ႇႁဵတ်းသၢႆသွင်သဵၼ်ႈဢၼ်လိမ်ႇၵဵဝ်ႈၵၼ်ဝႆႉၼၼ်ႉႁွႆႈသႂ်ႇၵႃႈတီႈဢုပ်းၶမ်းၸိူဝ်းၼၼ်ႉတႃႉ။
“တၵ်းလႆႈႁဵတ်းၶိူင်ႈၶူဝ်းထၢပ်ႈၼႃႈဢူၵ်းပုၼ်ႈၶုၼ်ယဵၸ်ႈပရေႃးႁဵၵ်ႈလူင်တႃႇတေၼုင်ႈယၢမ်းမိူဝ်ႈဢၼ်တႅပ်းတတ်းတြႃးၼၼ်ႉၽိုၼ်ၼိုင်ႈဢေႃႈ။ တၵ်းလႆႈဢဝ်ၶူဝ်းမဵဝ်းလဵဝ်ၵၼ်တင်းသိူဝ်ႈသုပ်းၸဝ်ႈၼၼ်ႉႁၢင်ႈၶိူင်ႈမိူၼ်မိူၼ်ၵၼ်တင်းသိူဝ်ႈသုပ်းၸဝ်ႈၼၼ်ႉၼင်ႇၵဝ်ႇဢေႃႈ။-
တၵ်းလႆႈတူပ်ႉႁဵတ်းသွင်ထၢပ်ႈလႄႈပဵၼ်သီႇၸဵင်ႇၶိုင်ႈဝႆႉယေႈၼႃႈမီးယေႈၶိုပ်ႈဢေႃႈ။-
ၵႃႈၼိူဝ်ၶိူင်ႈၶူဝ်းထၢပ်ႈၼႃႈဢူၵ်းၼၼ်ႉတၵ်းလႆႈၶပ်ႉသႅင်ႁႂ်ႈပဵၼ်သီႇထႅဝ်ဢေႃႈ။ ထႅဝ်တီႈၼိုင်ႈၼၼ်ႉတၵ်းလႆႈပဵၼ်သႅင်လႅင်၊သႅင်ဢုႀၽယႃး၊တင်းသႅင်မျႃႉဢေႃႈ။-
တီႈထႅဝ်သွင်ၼၼ်ႉတၵ်းလႆႈပဵၼ်သႅင်ပတ်ႈတမျႃး၊သႅင်ၼီႇလႃႇ၊တင်းသႅင်ၸိင်ႇဢေႃႈ။-
ထႅဝ်တီႈသၢမ်ၼၼ်ႉတၵ်းလႆႈပဵၼ်သႅင်ဝႃႇၵိၼ်ႇသု၊သႅင်မႁူႇရႃႇ၊တင်းသႅင်ၵေႃႇမုၵ်ႉဢေႃႈ။-
ထႅဝ်တီႈသီႇၼၼ်ႉတၵ်းလႆႈပဵၼ်သႅင်မႅၵ်ႉရွႆး၊သႅင်ၸၢႆးၶႃးယွတ်ႇ၊တင်းသႅင်ၼၵႃးသွႆႈဢေႃႈ။ သႅင်ၸိူဝ်းၼၼ်ႉတၵ်းလႆႈၶပ်ႉၸႅၼ်ႇသႂ်ႇဝႆႉ၊ၼႂ်းႁိူၼ်းၶမ်းမၼ်းဢေႃႈ။-
ၵႃႈၼိူဝ်သႅင်သိပ်းသွင်လုၵ်ႈၼၼ်ႉတၵ်းလႆႈၶွၵ်းတႅမ်ႈသႂ်ႇၸိုဝ်ႈသဵင်လုၵ်ႈလၢၼ်ၸိူဝ်ႉၶိူဝ်း ဢိသရေး၊ ၶဝ်၊ၼိူဝ်သႅင်ယေႈလုၵ်ႈယေႈၸိုဝ်ႈမိူၼ်ၸိူဝ်ႉၼင်ႇၸုမ်ႈဢၼ်မီးၸိုဝ်ႈသဵင်ၸိူဝ်ႉၶိူဝ်းမဵဝ်း ဢိသရေး၊ ၶဝ်ဢေႃႈ။-
ပုၼ်ႈၶိူင်ႈၶူဝ်းထၢပ်ႈၼႃႈဢူၵ်းၼၼ်ႉတၵ်းလႆႈႁဵတ်းသၢႆၶမ်းလွတ်ႈငၢၼ်ႇဢၼ်လိမ်ႇၵဵဝ်ႈၵၼ်ဝႆႉၼၼ်ႉႁွႆႈဝႆႉဢေႃႈ။-
သမ်ႉတၵ်းလႆႈႁဵတ်းမွင်ႈၶမ်းသွင်မွင်ႈႁွႆႈၸပ်းႁူဝ်ၸဵင်ႇၶိူင်ႈၶူဝ်းထၢပ်ႈၼႃႈဢူၵ်းဝႆႉသေလႄႈ၊-
ဢဝ်သၢႆသွႆႈၶမ်းသွင်သဵၼ်ႈၼၼ်ႉႁွႆႈသႂ်ႇၵႃႈတီႈမွင်ႈၶမ်းၼၼ်ႉတႃႉ။-
သမ်ႉဢဝ်ပၢႆသၢႆသွႆႈသွင်သဵၼ်ႈထႅင်ႈၽၢႆႇၼိုင်ႈၼၼ်ႉမတ်ႉၸပ်းၵႃႈတီႈႁိူၼ်းၶမ်းသွင်ဢၼ်ၼၼ်ႉသေလႄႈဢဝ်သႂ်ႇဝႆႉၵႃႈၼိူဝ်သၢႆႁူဝ်မႃႇသိူဝ်ႈသုပ်းၸဝ်ႈၵႃႈတီႈၽၢႆႇၼႃႈမၼ်းတႃႉ။-
ႁဵတ်းမွင်ႈၶမ်းသွင်မွင်ႈႁွႆႈၸပ်းၸဵင်ႇၶိူင်ႈၶူဝ်းထၢပ်ႈၼႃႈဢူၵ်းၼႃႈတၢင်းတႂ်ႈၽၢႆႇတၢင်းၼႂ်းမၼ်းသေလႄႈႁႂ်ႈယဵပ်ႉၸပ်းၵၼ်တင်းၼႃႈသိူဝ်ႈသုပ်းၸဝ်ႈၼၼ်ႉတႃႉ။-
သမ်ႉတၵ်းလႆႈႁဵတ်းထႅင်ႈမွင်ႈၶမ်းသွင်မွင်ႈႁွႆႈၸပ်းၵႃႈတီႈၽၢႆႇၼႃႈသၢႆႁူဝ်မႃႇသိူဝ်ႈသုပ်းၸဝ်ႈၼၼ်ႉ၊ၵႃႈတီႈဢၼ်သိူဝ်ႈသုပ်းၸဝ်ႈတင်းသၢႆႁတ်ႉဢႅဝ်ဢၼ်ႁၢင်ႈၶိူင်ႈသိုပ်ႇၵၼ်ၼၼ်ႉဢေႃႈ။-
တၵ်းလႆႈဢဝ်မႆသွမ်ႇမတ်ႉမွင်ႈၶမ်းၶိူင်ႈၶူဝ်းထၢပ်ႈၼႃႈဢူၵ်းသွင်မွင်ႈၼၼ်ႉတင်းမွင်ႈၶမ်းသိူဝ်ႈသုပ်းၸဝ်ႈသွင်မွင်ႈၼၼ်ႉတွႆးၸပ်းၵၼ်ဢေႃႈ။ ၼင်ႇၼၼ်လႄႈၶိူင်ႈၶူဝ်းထၢပ်ႈၼႃႈဢူၵ်းၼၼ်ႉတၵ်းႁွႆႈၸပ်းၵႃႈၼိူဝ်သၢႆႁတ်ႉဢႅဝ်ဢၼ်ႁၢင်ႈၶိူင်ႈလႄႈမၼ်းတၵ်းဢမ်ႇလုတ်ႈတူၵ်းသေၵႃႈတီႈသိူဝ်ႈသုပ်းၸဝ်ႈဢေႃႈ။
“မိူဝ်ႈဢၼ် ဢႃႇရုၼ်ႇ၊ ၶဝ်ႈၵႃႈၼႂ်းထႃႇၼႃႉတီႈမူတ်းၸၢင်ႇၸဝ်ႈၼၼ်ႉၸိုင်၊မၼ်းတၵ်းလႆႈၼုင်ႈမႆၶိူင်ႈၶူဝ်းထၢပ်ႈၼႃႈဢူၵ်းဢၼ်ၶွၵ်းတႅမ်ႈၸိုဝ်ႈသဵင်လုၵ်ႈလၢၼ်ၸိူဝ်ႉၶိူဝ်းမဵဝ်း ဢိသရေး၊ တင်းလၢႆၼၼ်ႉဝႆႉၵႃႈတီႈၼိူဝ်ႁူဝ်ၸႂ်မၼ်းပုၼ်ႈလွင်ႈၼင်ႇႁိုဝ် ထႃႇဝရႃႉၽြႃး၊ တၵ်းၶုၵ်းၸႂ်လႆႈၶဝ်ယူႇသေႇသေႇၼၼ်ႉဢေႃႈ။-
တၵ်းလႆႈဢဝ်ဢုရိမ်းဢိၵ်ႇတင်းႀုမိမ်း သႂ်ႇဝႆႉၵႃႈတီႈၶိူင်ႈၶူဝ်းထၢပ်ႈၼႃႈဢူၵ်းၼၼ်ႉပုၼ်ႈဢၼ် ဢႃႇရုၼ်ႇ၊ တၵ်းပႃးဢဝ်ၶဝ်မႃးၼႂ်းမိူဝ်ႈဢၼ်မၼ်းၶဝ်ႈၸူးၵႃႈတီႈၽၢႆႇၼႃႈၵဝ်ၼၼ်ႉဢေႃႈ။ ၼႂ်းမိူဝ်ႈဢၼ်မၼ်းႁဵတ်းၸိူဝ်ႉၼင်ႇၼၼ်ၼၼ်ႉမၼ်းတၵ်းလႆႈၼုင်ႈမႆၶိူင်ႈၶူဝ်းထၢပ်ႈၼႃႈဢူၵ်းၼၼ်ႉသေႇသေႇ၊ပုၼ်ႈဢၼ်မၼ်းတၵ်းႁုလွင်ႈသၽေႃးၵၢင်ၸႂ်ၵဝ် ထႃႇဝရႃႉၽြႃး၊ ပုၼ်ႈၵူၼ်းမဵဝ်း ဢိသရေး၊ တင်းလၢႆၼၼ်ႉဢေႃႈ။
“တၵ်းလႆႈဢဝ်မႆသွမ်ႇၵူၺ်းၵူၺ်းတေႃးႁဵတ်းသိူဝ်ႈယၢဝ်းဢၼ်သွၼ်ႉထၢပ်ႈၼိူဝ်သိူဝ်ႈသုပ်းၸဝ်ႈၼၼ်ႉဢေႃႈ။-
သိူဝ်ႈယၢဝ်းၼၼ်ႉတၵ်းလႆႈမီးႁူးၶေႃးသိူဝ်ႈလႄႈ၊ၵႃႈတီႈႁူးၶေႃးသိူဝ်ႈၼၼ်ႉတၵ်းလႆႈတေႃးၽႃႈလႄႈဢဝ်ယဵပ်ႉသႂ်ႇႁႂ်ႈမၼ်ႈမၼ်ႈ၊ဢမ်ႇႁႂ်ႈမၼ်းလႆႈၸၢၵ်ႇလႆႈသိၵ်ႇၵႂႃႇဢေႃႈ။-
ၵႃႈတီႈတိၼ်သိူဝ်ႈယၢဝ်းဢၼ်တူပ်ႉဝႆႉၼၼ်ႉတၵ်းလႆႈဢဝ်ႁူၺ်ႇမၢၵ်ႇၸင်ႈဢၼ်ဢဝ်မႆၶူၼ်သူဝ်းဢၼ်ယွမ်ႉသွမ်ႇ၊ယွမ်ႉၵမ်ႇ၊ယွမ်ႉလႅင်ဝႆႉလႄႈႁဵတ်းၼၼ်ႉ၊-
ႁွႆႈၸွမ်းၵၼ်တင်းႁိင်ႇၶမ်း၊ႁူၺ်ႇၶႅၼ်ႈႁူၺ်ႇဝႆႉ၊ႁွပ်ႈတိၼ်သိူဝ်ႈယၢဝ်းၼၼ်ႉဢေႃႈ။-
ဢႃႇရုၼ်ႇ၊ တၵ်းလႆႈၼုင်ႈၶူဝ်းယၢဝ်းၼၼ်ႉယၢမ်းမိူဝ်ႈဢၼ်မၼ်းႁဵတ်းၼႃႈၵၢၼ်ယဵၸ်ႈပရေႃးႁဵၵ်ႈ ၼၼ်ႉဢေႃႈ။ မိူဝ်ႈဢၼ်မၼ်းၶဝ်ႈဢွၵ်ႇသေထႃႇၼႃႉတီႈဢၼ်မူတ်းၸၢင်ႇၽၢႆႇၼႃႈ ထႃႇဝရႃႉၽြႃး၊ မႃးၼၼ်ႉၸိုင်၊တၵ်းလႆႈငိၼ်းသဵင်ႁိင်ႇၼၼ်ႉလႄႈၶဝ်တၵ်းဢမ်ႇလႆႈၶၢမ်ႇတၢင်းဢၼ်ဢဝ်တၢႆဢေႃႈ။
“တၵ်းလႆႈဢဝ်ၶမ်းလွတ်ႈငၢၼ်ႇႁဵတ်းၶႅပ်းၶမ်းဢၼ်ၼိုင်ႈလႄႈတႅမ်ႈတူဝ်လိၵ်ႈဢႅၵ်ႉၶရႃႇဢၼ်ဝႃႈ၊ ‘မူတ်းၸၢင်ႇတီႈ ထႃႇဝရႃႉၽြႃး၊ ’ ဢေႃႈ။-
ႁဵတ်းၼၼ်လႄႈဢဝ်တင်းမႆသွမ်ႇသွႆႇၶႅပ်းၶမ်းၼၼ်ႉၸပ်းၵႃႈတီႈၽႃႈၶဵၼ်းႁူဝ်မၼ်းတႃႉ။-
ဢႃႇရုၼ်ႇ၊ တၵ်းလႆႈတိုဝ်းၶႅပ်းၶမ်းၼၼ်ႉၵႃႈတီႈၼႃႈၽၢၵ်ႇမၼ်းဝႆႉ၊ပုၼ်ႈဢၼ်ၵဝ် ထႃႇဝရႃႉၽြႃး၊ တၵ်းႁပ်ႉၶၢမ်ႇဢဝ်တႃႇၼႃႉတၢင်းလူႇၵႃႈဢၼ်ၵူၼ်းမဵဝ်း ဢိသရေး၊ ၶဝ်သၢၵ်ႈလူႇတီႈၵဝ်ၼၼ်ႉဢေႃႈ။ ပိၵ်ႉသမ်ႉၶဝ်ႁဵတ်းဢပျတ်ႈမႅၼ်ႈသေၵေႃႈၵဝ် ထႃႇဝရႃႉၽြႃး၊ ယင်းတၵ်းႁပ်ႉၶၢမ်ႇဢဝ်တၢင်းလူႇၶဝ်ဢေႃႈ။
“ဢဝ်ၽႃႈပၢၼ်ႇၶျေႃးတေႃးႁဵတ်းသိူဝ်ႈပွတ်းတင်းၽႃႈၶဵၼ်းႁူဝ်၊ဢိၵ်ႇတင်းသၢႆႁတ်ႉဢႅဝ်ဢၼ်ႁၢင်ႈၶိူင်ႈၼၼ်ႉပုၼ်ႈ ဢႃႇရုၼ်ႇ၊ တႃႉ။
“ပုၼ်ႈလုၵ်ႈၸၢႆး ဢႃႇရုၼ်ႇ၊ ၸိူဝ်းၼၼ်ႉသမ်ႉတၵ်းလႆႈယဵပ်ႉသိူဝ်ႈပွတ်း၊သၢႆႁတ်ႉဢႅဝ်တင်းမွၵ်ႇႁူဝ်ပၼ်ၶဝ်၊ပုၼ်ႈဢၼ်တၵ်းပဵၼ်မုၼ်ပဵၼ်သရေႇၶဝ်ဢေႃႈ။-
ႁႂ်ႈပီႈဢၢႆႈမႂ်း ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉၼုင်ႈမႆသိူဝ်ႈၶူဝ်းၸိူဝ်းၼၼ်ႉတႃႉ။ ဢဝ်ၼမ်ႉမၼ်းသၢၼ်ႇလုၼ်ႇသွၼ်းလေႃႇၶဝ်သေလႄႈၶၢၼ်းၶဝ်ဝႆႉႁႂ်ႈလႆႈႁဵတ်းၼႃႈၵၢၼ်ယဵၸ်ႈပရေႃးႁဵၵ်ႈ ၵႃႈတီႈၵဝ်တႃႉ။-
တၵ်းလႆႈဢဝ်ၽႃႈပၢၼ်ႇၶျေႃးယဵပ်ႉၵူၼ်ဢၼ်ယၢဝ်းတႄႇဢဝ်ၵႃႈတီႈဢႅဝ်ထိုင်ပၢႆၶႃၼၼ်ႉပၼ်ၶဝ်ႁႂ်ႈလႆႈႁူမ်ႇသုမ်ႇပုၼ်ႈတၢင်းဢၼ်လီဢူၵ်းလီဢၢႆၶဝ်ဢေႃႈ။-
ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉတၵ်းလႆႈၼုင်ႈၶူဝ်းၸိူဝ်ႉၼင်ႇၼၼ်မိူဝ်ႈဢၼ်ၶဝ်ၶဝ်ႈသုမ်ႉထဵင်ၸဝ်ႈတီႈဢၼ်ၸုတုမ်ၵၼ်ဢိၵ်ႇတင်းမိူဝ်ႈဢၼ်သုတ်ႉၸပ်းသုတ်ႉၸူးတီႈၶဵင်ႇတၢင်းလူႇႁႂ်ႈလႆႈႁဵတ်းၼႃႈၵၢၼ်ယဵၸ်ႈပရေႃးႁဵၵ်ႈၵႃႈတီႈထႃႇၼႃႉတီႈမူတ်းၸၢင်ႇၼၼ်ႉဢေႃႈ။ တၵ်းလႆႈၼုင်ႈၸိူဝ်ႉၼင်ႇၼၼ်ႁႂ်ႈၶဝ်ဢမ်ႇလႆႈႁဵတ်းမႅၼ်ႈဢပျတ်ႈလႄႈႁွတ်ႈထိုင်တၢင်းတၢႆဢေႃႈ။ ဢၼ်ၼႆႉၸမ်ႉ၊ပဵၼ်ထုင်းၽိင်ႈၸဝ်ႈပုၼ်ႈ ဢႃႇရုၼ်ႇ၊ တေႃႇထိုင်ႁွတ်ႈၸူဝ်ႈလုၵ်ႈပၢၼ်လၢၼ်မၼ်းတၵ်းလႆႈႁဵတ်းၸွမ်းၵႂႃႇသိုပ်ႇသိုပ်ႇတၢမ်တၢမ်ၼၼ်ႉဢေႃႈ။
“ၼႆႉၸမ်ႉ၊ပဵၼ်လွင်ႈတၢင်းဢၼ်မႂ်းတၵ်းလႆႈသၢၵ်ႈၵၢပ်ႈ ဢႃႇရုၼ်ႇ၊ တင်းလုၵ်ႈၸၢႆးမၼ်းတင်းလၢႆႁႂ်ႈၶဝ်လႆႈပွင်ႁဵတ်းၼႃႈၵၢၼ်ယဵၸ်ႈပရေႃးႁဵၵ်ႈ ၵႃႈၼႂ်းၵၢၼ်ငၢၼ်းၵဝ်ဢေႃႈ။ တၵ်းလႆႈဢဝ်ဝူဝ်းပေႃႈဢွၼ်ႇတူဝ်ၼိုင်ႈတင်းသူဝ်းပေႃႈသွင်တူဝ်ဢၼ်ဢၢင်ႇၵႃႇၸုင်ႇၼၼ်ႉသၢၵ်ႈလူႇတီႈၵဝ်ဢေႃႈ။-
သမ်ႉဢဝ်ၽွင်ၶဝ်ႈၵျုင်ႇဢၼ်လီလီယင်းဢမ်ႇပႃးၸိူဝ်ႉပႅင်ႈလႃးလႃးလႄႈ၊ႁဵတ်းၶဝ်ႈမုၼ်းၵမ်ႈၽွင်ႈဢၼ်ၼူတ်ႈလေႃးၼမ်ႉမၼ်းတင်းၶဝ်ႈမုၼ်းၵမ်ႈၽွင်ႈဢၼ်ဢမ်ႇလေႃးၼမ်ႉမၼ်း၊ဢိၵ်ႇတင်းၶဝ်ႈမုၼ်းၶွပ်ႈဢၼ်တႃးၼမ်ႉမၼ်းၵမ်ႈၽွင်ႈၸိူဝ်းၼၼ်ႉ၊-
သႂ်ႇၼႂ်းပဵတ်ႈႁူၺ်ႇၼိုင်ႈသေယဝ်ႉ၊ဢဝ်မႃးသၢၵ်ႈလူႇတီႈၵဝ်လူၺ်ႈၵၼ်တင်းဝူဝ်းပေႃႈဢွၼ်ႇတင်းသူဝ်းပေႃႈဢွၼ်ႇသွင်တူဝ်တႃႉ။
“တၵ်းလႆႈႁွင်ႉဢဝ် ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉမႃးၵႃႈတီႈၼႃႈၽၵ်းတူသုမ်ႉထဵင်ၸဝ်ႈတီႈဢၼ်ၸုတုမ်ၵၼ်လႄႈဢဝ်ၶဝ်ဢၢပ်ႇၼမ်ႉႁႂ်ႈတူဝ်ၸဝ်ႈၵဝ်ႇမူတ်းသႂ်ဢေႃႈ။-
ၵႃႈတီႈ ဢႃႇရုၼ်ႇ၊ ၼၼ်ႉမႂ်းတၵ်းလႆႈၼုင်ႈပၼ်သိူဝ်ႈၶူဝ်းယဵၸ်ႈပရေႃးႁဵၵ်ႈ ဢၼ်ပဵၼ်သိူဝ်ႈပွတ်းဢၼ်ႁၢင်ႈၶိူင်ႈ၊သိူဝ်ႈသုပ်း၊သိူဝ်ႈယၢဝ်းဢၼ်သွၼ်ႉၼိူဝ်သိူဝ်ႈသုပ်း၊သိူဝ်ႈၶူဝ်းထၢပ်ႈၼႃႈဢူၵ်း၊ဢိၵ်ႇတင်းသၢႆႁတ်ႉဢႅဝ်ၸိူဝ်းၼၼ်ႉဢေႃႈ။-
ဢဝ်ၽႃႈၶဵၼ်းႁူဝ်ၶဵၼ်းပၼ်လႄႈ ဢဝ်ၶႅပ်းၶမ်းမူတ်းၸၢင်ႇဢၼ်တႅမ်ႈတူဝ်လိၵ်ႈဢႅၵ်ႉၶရႃႇဢၼ်ဝႃႈ၊ ‘မူတ်းၸၢင်ႇတီႈ ထႃႇဝရႃႉၽြႃးဢေႃႈ၊ ’ ၼၼ်ႉမတ်ႉႁွႆႈၵႃႈတီႈၽႃႈၶဵၼ်းႁူဝ်မၼ်းတႃႉ။-
ၵမ်းၼၼ်ႉ၊ဢဝ်ၼမ်ႉမၼ်းဢၼ်တၵ်းပၼ်ၽိၵ်ႈသိၵ်ႈၼၼ်ႉလေႃႇသႂ်ႇၵႃႈၼိူဝ်ႁူဝ်မၼ်းသေလႄႈပၼ်ၽိၵ်ႈသိၵ်ႈတီႈမၼ်းတႃႉ။
“သမ်ႉတၵ်းလႆႈႁွင်ႉဢဝ်လုၵ်ႈၸၢႆးမၼ်းၸိူဝ်းၼၼ်ႉမႃးလႄႈၼုင်ႈသိူဝ်ႈပွတ်းပၼ်ဢေႃႈ။-
တၵ်းလႆႈဢဝ်သၢႆႁတ်ႉဢႅဝ်ႁတ်ႉပၼ်သေယဝ်ႉ၊ဢဝ်မွၵ်ႇႁူဝ်တိုဝ်းပၼ်ၶဝ်ဢေႃႈ။ ၼႆႉၸမ်ႉ၊ပဵၼ်ထုင်းၽိင်ႈဢၼ်မႂ်းတၵ်းလႆႈပၼ်ၽိၵ်ႈသိၵ်ႈတီႈ ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉယဝ်ႉ။ ၼင်ႇၼၼ်လႄႈၸႃႉၸဵမ်ၶဝ်လႄႈၸိူဝ်ႉၶိူဝ်းၶဝ်တင်းလၢႆတၵ်းလႆႈပဵၼ်ယဵၸ်ႈပရေႃးႁဵၵ်ႈဢၼ်ႁဵတ်းဝၢတ်ႈတီႈၵဝ်ဢေႃႈ။
“တၵ်းလႆႈဢဝ်ဝူဝ်းပေႃႈတူဝ်ၼိုင်ႈမႃးၵႃႈတီႈၽၢႆႇၼႃႈသုမ်ႉထဵင်ၸဝ်ႈတီႈဢၼ်ၸုတုမ်ၵၼ်လႄႈႁႂ်ႈ ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉဢဝ်မိုဝ်းၶဝ်တၢင်ႇၵႃႈၼိူဝ်ႁူဝ်ဝူဝ်းပေႃႈၼၼ်ႉဢေႃႈ။-
လိုၼ်းၼၼ်ႉ၊ႁႅမ်ဝူဝ်းပေႃႈၼၼ်ႉၵႃႈတီႈၽၢႆႇၼႃႈ ထႃႇဝရႃႉၽြႃး၊ ၵႃႈႁိမ်းၼႃႈၽၵ်းတူသုမ်ႉထဵင်ၸဝ်ႈတီႈဢၼ်ၸုတုမ်ၵၼ်တႃႉ။-
ဢဝ်လိူတ်ႈဝူဝ်းပေႃႈၼၼ်ႉၵမ်ႈၽွင်ႈလႄႈ၊ဢဝ်တင်းၼိဝ်ႉမိုဝ်းမႂ်းၸုမ်ႇလိူတ်ႈၼၼ်ႉသေတႃးၵႃႈတီႈၶဝ်လႅမ်ၶဵင်ႇတၢင်းလူႇၸိူဝ်းၼၼ်ႉသေယဝ်ႉ၊ဢဝ်လိူတ်ႈဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉထွၵ်ႇပႅတ်ႈၵႃႈတီႈတိၼ်ၶဵင်ႇတၢင်းလူႇသေတႃႉ။-
ဝၢႆးၼၼ်ႉ၊ဢဝ်ၵွၼ်ႈၶႆၵွၼ်ႈမၼ်းဢၼ်ႁူမ်ႇၶူင်းၼႂ်းမၼ်းၵႃႈမီးတင်းသဵင်ႈတင်းလူင်၊ဢိၵ်ႇတင်းၽင်ႉၽၢပ်ႇဢၼ်ႁူမ်ႇတပ်းမၼ်း၊မၢၵ်ႇလၼ်းမၼ်းသွင်ႁူၺ်ႇ၊တင်းၵွၼ်ႈၶႆၵွၼ်ႈမၼ်းဢၼ်ႁူမ်ႇမၢၵ်ႇလၼ်းၼၼ်ႉၽဝ်ၽႆးၵႃႈၼိူဝ်ၶဵင်ႇတၢင်းလူႇတႃႉ။-
ၵူၺ်းၵႃႈ၊ၼိူဝ်ႉမၼ်း၊ၼင်မၼ်းဢိၵ်ႇတင်းၶူင်းၼႂ်းမၼ်းၸမ်ႉ၊ဢဝ်ၵႂႃႇတုတ်ႇၽႆးပႅတ်ႈၵႃႈၼွၵ်ႈပၢင်တပ်ႉတႃႉ။ ဢၼ်ၼႆႉၸမ်ႉ၊ပဵၼ်တၢင်းလူႇဢၼ်ၽေႇဢပျတ်ႈဢေႃႈ။
“သမ်ႉတၵ်းလႆႈဢဝ်သူဝ်းပေႃႈတူဝ်ၼိုင်ႈမႃးလႄႈႁႂ်ႈ ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉတၵ်းလႆႈဢဝ်မိုဝ်းၶဝ်တၢင်ႇၵႃႈၼိူဝ်ႁူဝ်သူဝ်းပေႃႈၼၼ်ႉဢေႃႈ။-
ႁႅမ်သူဝ်းပေႃႈၼၼ်ႉသေလႄႈဢဝ်လိူတ်ႈမၼ်းၽႅတ်းသႂ်ႇၶဵင်ႇတၢင်းလူႇၼၼ်ႉႁွပ်ႈႁွပ်ႈတႃႉ။-
တႅပ်းသူဝ်းပေႃႈၼၼ်ႉပဵၼ်ပွတ်းပဵၼ်ပွတ်းသေယဝ်ႉ၊သုၵ်ႈၶူင်းၼႂ်းမၼ်းတင်းတိၼ်မၼ်းၸိူဝ်းၼၼ်ႉသေလႄႈဢဝ်ၵွင်ဝႆႉၵႃႈၼိူဝ်ၵွၼ်ႈၼိူဝ်ႉမၼ်းတင်းႁူဝ်မၼ်းၼၼ်ႉတႃႉ။-
ႁဵတ်းၼၼ်လႄႈဢဝ်သူဝ်းပေႃႈၼၼ်ႉၽဝ်ၽႆးတင်းတူဝ်ၵႃႈၼိူဝ်ၶဵင်ႇတၢင်းလူႇတႃႉ။ ဢၼ်ၼႆႉပဵၼ်တၢင်းလူႇဢၼ်တုတ်ႇၽႆးတီႈ ထႃႇဝရႃႉၽြႃး၊ ဢေႃႈ။ ပဵၼ်ဢၢႆႁွမ်ဢၢႆႁူၺ်းတၢင်းလူႇဢၼ်ဢဝ်ၽႆးတုတ်ႇသေလႄႈသၢၵ်ႈၵၢပ်ႈတီႈ ထႃႇဝရႃႉၽြႃး၊ ဢေႃႈ။
“သမ်ႉတၵ်းလႆႈဢဝ်သူဝ်းပေႃႈထႅင်ႈတူဝ်ၼိုင်ႈၼၼ်ႉမႃးသေလႄႈႁႂ်ႈ ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉဢဝ်မိုဝ်းၶဝ်တၢင်ႇၵႃႈၼိူဝ်ႁူဝ်သူဝ်းပေႃႈၼၼ်ႉတႃႉ။-
ႁႅမ်သူဝ်းပေႃႈၼၼ်ႉသေလႄႈ၊ဢဝ်လိူတ်ႈမၼ်းတႃးသႂ်ႇၵႃႈတီႈဝၢၼ်ႁူၽၢႆႇၶႂႃ ဢႃႇရုၼ်ႇ၊ တင်းဝၢၼ်ႁူၽၢႆႇၶႂႃလုၵ်ႈၸၢႆးမၼ်းၸိူဝ်းၼၼ်ႉ၊ဢိၵ်ႇတင်းၵႃႈတီႈႁူဝ်မႄႈမိုဝ်းၽၢႆႇၶႂႃ၊ဢိၵ်ႇတင်းၵႃႈတီႈႁူဝ်မႄႈတိၼ်ၽၢႆႇၶႂႃၶဝ်သေယဝ်ႉ၊ဢဝ်လိူတ်ႈမၼ်းထွၵ်ႇသႂ်ႇၶဵင်ႇတၢင်းလူႇႁွပ်ႈႁွပ်ႈတႃႉ။-
သမ်ႉဢဝ်လိူတ်ႈဢၼ်မီးၵႃႈၼိူဝ်ၶဵင်ႇတၢင်းလူႇတင်းၼမ်ႉမၼ်းပုၼ်ႈဢၼ်တၵ်းပၼ်ၽိၵ်ႈသိၵ်ႈၼၼ်ႉၽႅတ်းသႂ်ႇၵႃႈၼိူဝ် ဢႃႇရုၼ်ႇ၊ တင်းၶူဝ်းၼုင်ႈမၼ်းဢိၵ်ႇတင်းၵႃႈၼိူဝ်လုၵ်ႈၸၢႆးမၼ်းၸိူဝ်းၼၼ်ႉတင်းၶူဝ်းၼုင်ႈၶဝ်တႃႉ။ ႁဵတ်းၼၼ်လႄႈၸႃႉၸဵမ်မၼ်းလႄႈလုၵ်ႈၸၢႆးမၼ်းတင်းၶူဝ်းၼုင်ႈၶဝ်ၸိူဝ်းၼၼ်ႉတၵ်းႁွတ်ႈထိုင်တၢင်းဢၼ်မူတ်းၸၢင်ႇၵႃႈတီႈၵဝ်ဢေႃႈ။
“ပိူဝ်ႈဢၼ်သူဝ်းပေႃႈၼၼ်ႉပဵၼ်ပုၼ်ႈဢၼ်တၵ်းသၢၵ်ႈလူႇလႄႈတႅပ်းဢဝ်ၵွၼ်ႈၶႆၵွၼ်ႈမၼ်းသူဝ်းပေႃႈၼၼ်ႉ၊ဢိၵ်ႇတင်းႁၢင်မၼ်း၊ၵွၼ်ႈၶႆၵွၼ်ႈမၼ်းဢၼ်ႁူမ်ႇၶူင်းၼႂ်းမၼ်း၊ၽင်ႉၽၢပ်ႇဢၼ်ႁူမ်ႇတပ်းမၼ်း၊မၢၵ်ႇလၼ်းမၼ်းသွင်ႁူၺ်ႇ၊ဢိၵ်ႇတင်းၵွၼ်ႈၶႆၵွၼ်ႈမၼ်းဢၼ်ႁူမ်ႇမၢၵ်ႇလၼ်းၸိူဝ်းၼၼ်ႉ၊တင်းၶႃၼႃႈမၼ်းၽၢႆႇၶႂႃၸိူဝ်းၼၼ်ႉ၊-
ဢိၵ်ႇတင်းဢဝ်ၶဝ်ႈမုၼ်းႁူၺ်ႇၼိုင်ႈ၊ၶဝ်ႈမုၼ်းဢၼ်လေႃးၼမ်ႉမၼ်းသၢၼ်ႇလုၼ်ႇႁူၺ်ႇၼိုင်ႈ၊တင်းၶဝ်ႈမုၼ်းၶွပ်ႈၶႅပ်းၼိုင်ႈ၊ဢၼ်ဢဝ်ဢွၵ်ႇသေၵႃႈၼႂ်းပဵတ်ႈၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈဢၼ်သၢၵ်ႈလူႇၵႃႈတီႈ ထႃႇဝရႃႉၽြႃး၊ ဝႆႉ၊ၸိူဝ်းၼၼ်ႉမႃးဢေႃႈ။-
ဢဝ်တင်းသဵင်ႈတင်းလူင် သႂ်ႇပၼ်ၵႃႈၼႂ်းမိုဝ်း ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉသေယဝ်ႉ၊ႁႂ်ႈၶဝ်သၢၵ်ႈၵၢပ်ႈတီႈ ထႃႇဝရႃႉၽြႃး၊ ပုၼ်ႈတၢင်းလူႇဢၼ်ၶိုၵ်ႉဢၼ်ၶမ်ႇ တႃႉ။-
လိုၼ်းၼၼ်ႉႁပ်ႉၶၢမ်ႇဢဝ်ၸိူဝ်းၼၼ်ႉၵႃႈၼႂ်းမိုဝ်းၶဝ်သေလႄႈၽဝ်ၽႆးၵႃႈၼိူဝ်ၶဵင်ႇတၢင်းလူႇ၊ထၢပ်ႈသႂ်ႇၵႃႈၼိူဝ်ၶိူင်ႈတၢင်းလူႇဢၼ်တုတ်ႇၽႆးပုၼ်ႈဢၼ်တၵ်းပဵၼ်တၢင်းလူႇတီႈ ထႃႇဝရႃႉၽြႃး၊ တႃႉ။ ဢၼ်ၼႆႉပဵၼ်ဢၢႆႁွမ်ဢၢႆႁူၺ်းတၢင်းလူႇဢၼ်ဢဝ်ၽႆးတုတ်ႇသေလႄႈသၢၵ်ႈလူႇတီႈ ထႃႇဝရႃႉၽြႃး၊ ဢေႃႈ။
“တၵ်းလႆႈဢဝ်ႁူဝ်ဢူၵ်းသူဝ်းပေႃႈတူဝ်ၼႆႉလႄႈသၢၵ်ႈလူႇတီႈ ထႃႇဝရႃႉၽြႃး၊ ပုၼ်ႈတၢင်းလူႇဢၼ်ၶိုၵ်ႉဢၼ်ၶမ်ႇဢေႃႈ။ ၼိူဝ်ႉႁူဝ်ဢူၵ်းၼၼ်ႉတၵ်းလႆႈပဵၼ်ပုၼ်ႈမႂ်းဢေႃႈ။
“မိူဝ်ႈဢၼ်ပၼ်ၽိၵ်ႈသိၵ်ႈတီႈယဵၸ်ႈပရေႃးႁဵၵ်ႈ ယဝ်ႉၵႂႃႇၼၼ်ႉၸိုင်၊ႁူဝ်ဢူၵ်းတင်းၶႃၼႃႈသူဝ်းပေႃႈဢၼ်သုင်းပုၼ်ႈလွင်ႈတၢင်းလူႇဢၼ်လူႇမိူဝ်ႈလႆႈပၼ်ၽိၵ်ႈသိၵ်ႈ ၼၼ်ႉၸိူဝ်းၼၼ်ႉတၵ်းလႆႈသၢၵ်ႈလူႇတီႈ ထႃႇဝရႃႉၽြႃး၊ ပုၼ်ႈတၢင်းလူႇဢၼ်ၶိုၵ်ႉဢၼ်ၶမ်ႇဢေႃႈ။ ၵွၼ်ႈၼိူဝ်ႉၸိူဝ်းၼၼ်ႉတၵ်းလႆႈပဵၼ်ပုၼ်ႈ ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉဢေႃႈ။-
ဢၼ်ၼႆႉၸမ်ႉ၊ပဵၼ်ထုင်းၽိင်ႈၵဝ်ဢၼ်ဢမ်ႇလႅၵ်ႈဢမ်ႇလၢႆႈယဝ်ႉ။ မိူဝ်ႈဢၼ်ၵူၼ်းၵဝ်တင်းလၢႆႁဵတ်းတၢင်းလူႇပုၼ်ႈမိၵ်ႈသႁႃႇယႃႉၼၼ်ႉၸိုင်၊ႁူဝ်ဢူၵ်းတင်းၶႃၼႃႈတူဝ်တၢင်းလူႇၼၼ်ႉတၵ်းလႆႈပဵၼ်ပုၼ်ႈယဵၸ်ႈပရေႃးႁဵၵ်ႈ တင်းလၢႆဢေႃႈ။ ဢၼ်ၼႆႉၸမ်ႉ၊ပဵၼ်တၢင်းလူႇဢၼ်ၵူၼ်းတင်းလၢႆသၢၵ်ႈလူႇတီႈၵဝ် ထႃႇဝရႃႉၽြႃး၊ ဢေႃႈ။
“ၶူဝ်းၼုင်ႈတၢင်းမႆယဵၸ်ႈပရေႃးႁဵၵ်ႈဢၼ် ဢႃႇရုၼ်ႇ၊ ၼုင်ႈၼၼ်ႉၸိုင်၊ဝၢႆးသေမၼ်းသဵင်ႈဢသၢၵ်ႈၵႂႃႇယဝ်ႉၼၼ်ႉတၵ်းလႆႈသိုပ်ႇပၼ်တီႈလုၵ်ႈၸၢႆးမၼ်းၸိူဝ်းၼၼ်ႉပုၼ်ႈဢၼ်ၶဝ်တၵ်းၼုင်ႈမိူဝ်ႈဢၼ်ၶဝ်ၶၢမ်ႇဢဝ်မၢင်ႇၵလႃႇၽိၵ်ႈသိၵ်ႈယဝ်ႉၼၼ်ႉဢေႃႈ။-
လုၵ်ႈၸၢႆးမၼ်းၵေႃႉဢၼ်သိုပ်ႇၶၢမ်ႇဢဝ်ဢရႃႇယဵၸ်ႈပရေႃးႁဵၵ်ႈၼၼ်ႉတၵ်းလႆႈၼုင်ႈယၢမ်းမိူဝ်ႈဢၼ်မၼ်းၶဝ်ႈၵႃႈၼႂ်းသုမ်ႉထဵင်ၸဝ်ႈတီႈဢၼ်ၸုတုမ်ၵၼ်ႁႂ်ႈလႆႈပွင်ႁဵတ်းၼႃႈၵၢၼ်ၸဝ်ႈၵႃႈၼႂ်းထႃႇၼႃႉတီႈမူတ်းၸၢင်ႇၸဝ်ႈၼၼ်ႉၸဵတ်းဝၼ်းတဵမ်တဵမ်ဢေႃႈ။
“တၵ်းလႆႈဢဝ်ၼိူဝ်ႉသူဝ်းပေႃႈတူဝ်ဢၼ်သုင်းမိူဝ်ႈလႆႈပၼ်ၽိၵ်ႈသိၵ်ႈတီႈ ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉသေလႄႈတူမ်ႈၵႃႈတီႈထႃႇၼႃႉဢၼ်မူတ်းၸၢင်ႇဢေႃႈ။-
ၶဝ်ပေႃႈလုၵ်ႈတင်းလၢႆတၵ်းလႆႈဢွၼ်ၵၼ်ၵိၼ်ၼိူဝ်ႉတူမ်ႈၼၼ်ႉဢိၵ်ႇတင်းၶဝ်ႈမုၼ်းဢၼ်ၵိုတ်းၵျၢၼ်ႇမီးယူႇၼႂ်းပဵတ်ႈၼၼ်ႉၵႃႈတီႈႁိမ်းၼႃႈၽၵ်းတူသုမ်ႉထဵင်ၸဝ်ႈတီႈဢၼ်ၸုတုမ်ၵၼ်ၼၼ်ႉဢေႃႈ။-
ၶဝ်တၵ်းလႆႈၵိၼ်ၶိူင်ႈပိူင်ဢၼ်သုင်းၵႃႈၼႂ်းတၢင်းဢၼ်ႁဵတ်းမၢင်ႇၵလႃႇတၢင်းဢၼ်ၽေႇဢပျတ်ႈၵႃႈတီႈတၢင်းဢၼ်ပၼ်ၽိၵ်ႈသိၵ်ႈတီႈၶဝ်ၼၼ်ႉဢေႃႈ။ ၵွပ်ႈပိူဝ်ႈၶိူင်ႈပိူင်ၸိူဝ်းၼၼ်ႉမူတ်းၸၢင်ႇယဝ်ႉလႄႈယဵၸ်ႈပရေႃးႁဵၵ်ႈၶဝ်ၵူၺ်းတၵ်းလႆႈၵိၼ်ဢေႃႈ။-
ၼိူဝ်ႉသေဢမ်ႇဝႃႈ၊ၶဝ်ႈမုၼ်းသေဢမ်ႇဝႃႈ၊ပေႃးဢမ်ႇၵိၼ်မူတ်းၸိုင်၊မိူင်းလႅင်းမႃးၵေႃႈတၵ်းလႆႈဢဝ်ဢၼ်ၵိုတ်းဢၼ်ၵျၢၼ်ႇၼၼ်ႉတုတ်ႇၽႆးပႅတ်ႈဢေႃႈ။ ပိူဝ်ႈဢၼ်မူတ်းၸၢင်ႇလႄႈၽူႈလႂ်တေဢမ်ႇလႆႈၵိၼ်။
“ၼင်ႇၼၼ်လႄႈမႂ်းတၵ်းလႆႈႁဵတ်းမၢင်ႇၵလႃႇတၢင်းဢၼ်ပၼ်ၽိၵ်ႈသိၵ်ႈတီႈ ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉၸဵတ်းဝၼ်းတဵမ်တဵမ်လႄႈတၵ်းလႆႈႁဵတ်းမႅၼ်ႈၸွမ်းၵႃႈၼင်ႇဢၼ်ၵဝ်ပိင်းၺၢပ်ႈဝႆႉ၊တီႈမႂ်းၼၼ်ႉၸေးၸေးဢေႃႈ။-
မႂ်းတၵ်းလႆႈဢဝ်ဝူဝ်းပေႃႈႁဵတ်းတၢင်းဢၼ်သၢၵ်ႈလူႇယေႈဝၼ်းယေႈတူဝ်ပုၼ်ႈဢၼ်ၽေႇဢပျတ်ႈဢေႃႈ။ ဢၼ်ၼႆႉၸမ်ႉ၊ပဵၼ်တၢင်းဢၼ်မႂ်းႁဵတ်းႁႂ်ႈၶဵင်ႇတၢင်းလူႇမူတ်းၸၢင်ႇဢေႃႈ။ ပိူဝ်ႈၼႆလႄႈဢဝ်တင်းၼမ်ႉမၼ်းသၢၼ်ႇလုၼ်ႇသွၼ်းလေႃႇႁႂ်ႈမၼ်းမူတ်းၸၢင်ႇတႃႉ။-
ႁဵတ်းၸိူဝ်ႉၼင်ႇၼႆၵူႈဝၼ်းႁႂ်ႈထူၼ်ႈထိုင်ၸဵတ်းဝၼ်းတဵမ်တဵမ်တႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ၶဵင်ႇတၢင်းလူႇတၵ်းပဵၼ်ဢၼ်မူတ်းၸၢင်ႇၼႃႇလူင်လၢင်လႄႈ၊ၶိူင်ႈပိူင်ၵႃႈသင်သေဢမ်ႇဝႃႈ၊ၵႃႈဢၼ်တိူဝ်ႉထုၵ်ႇၶဵင်ႇတၢင်းလူႇၼၼ်ႉတၵ်းပဵၼ်တၢင်းဢၼ်မူတ်းၸၢင်ႇဢေႃႈ။
“ၶိူင်ႈပိူင်ဢၼ်တၵ်းလႆႈသၢၵ်ႈလူႇၵႃႈၼိူဝ်ၶဵင်ႇတၢင်းလူႇၸမ်ႉ၊တၵ်းလႆႈဢဝ်သူဝ်းဢွၼ်ႇဢၼ်ၶွပ်ႈၶူပ်ႇယဝ်ႉသွင်တူဝ်သေလႄႈသၢၵ်ႈလူႇၵူႈဝၼ်းဢမ်ႇထၢတ်ႇဢေႃႈ။-
သၢၵ်ႈလူႇႁူဝ်ၼႂ်တူဝ်ၼိုင်ႈ၊ႁူဝ်ၶမ်ႈတူဝ်ၼိုင်ႈတႃႉ။-
မိူဝ်ႈဢၼ်သၢၵ်ႈလူႇသူဝ်းဢွၼ်ႇတူဝ်ဢွၼ်တၢင်းၼၼ်ႉဢဝ်ၽွင်ၶဝ်ႈၵျုင်ႇမဵဝ်းဢၼ်လီလီႁူၵ်းၶၼ် ၼွၵ်းလေႃးၼမ်ႉမၼ်းသၢၼ်ႇလုၼ်ႇမဵဝ်းဢၼ်ၸႅတ်ႈၸႅတ်ႈတဝ်ႈၼိုင်ႈ သၢၵ်ႈလူႇလူၺ်ႈၵၼ်တင်းၼမ်ႉမၢၵ်ႇၸပိတ်ႉတဝ်ႈၼိုင်ႈလေႃႇသႂ်ႇတႃႉ။-
သူဝ်းဢွၼ်ႇထႅင်ႈတူဝ်ၼိုင်ႈၼၼ်ႉမိူဝ်ႈဢၼ်မႂ်းသၢၵ်ႈလူႇၶိင်ႇႁူဝ်ၶမ်ႈၼၼ်ႉၸိုင်၊မႂ်းတၵ်းလႆႈသၢၵ်ႈလူႇၸွမ်းၼင်ႇဢၼ်တူင်ဢၼ်ၸင်ႈ၊ၽွင်ၶဝ်ႈၵျုင်ႇ၊ၼမ်ႉမၼ်းတင်းၼမ်ႉမၢၵ်ႇၸပိတ်ႉ၊မိူၼ်မိူၼ်ၵၼ်တင်းတၢင်းလူႇႁူဝ်ၼႂ်ၼၼ်ႉဢေႃႈ။ ဢၼ်ၼႆႉပဵၼ်တၢင်းလူႇပုၼ်ႈဢၼ်ဢဝ်တင်းၽႆးသၢၵ်ႈၵၢပ်ႈတီႈၵဝ် ထႃႇဝရႃႉၽြႃး၊ လႄႈ၊ဢၢႆႁွမ်ဢၢႆႁူၺ်းမၼ်းထုၵ်ႇၸႂ်ၵဝ်ဢေႃႈ။-
ၶိင်ႇၵႃႇလႃႉသိုပ်ႇသိုပ်ႇတၢမ်တၢမ်၊တူဝ်တၢင်းလူႇဢၼ်တုတ်ႇၽႆးၼႆႉမႂ်းတၵ်းလႆႈသၢၵ်ႈလူႇၵႃႈတီႈႁိမ်းၼႃႈၽၵ်းတူသုမ်ႉထဵင်ၸဝ်ႈတီႈဢၼ်ၸုတုမ်ၵၼ်ၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢေႃႈ။ ၵႃႈတီႈၼၼ်ႈၵဝ်တၵ်းထူပ်းၵၼ်တင်းမႂ်းလႄႈလၢတ်ႈတေႃႇမႂ်းဢေႃႈ။-
ၵႃႈတီႈၼၼ်ႈၵဝ်တၵ်းထူပ်းၵၼ်တင်းၵူၼ်းၵဝ်မဵဝ်း ဢိသရေး၊ လႄႈ မုၼ်ၽုင်းၵဝ်ဢၼ်ႁိူဝ်ႈႁိူင်းၼၼ်ႉတၵ်းႁဵတ်းႁႂ်ႈသုမ်ႉထဵင်ၸဝ်ႈမူတ်းၸၢင်ႇဢေႃႈ။-
ၵဝ်တၵ်းႁႂ်ႈသုမ်ႉထဵင်ၸဝ်ႈတီႈဢၼ်ၸုတုမ်ၵၼ်ဢိၵ်ႇတင်းၶဵင်ႇတၢင်းလူႇမူတ်းၸၢင်ႇဢေႃႈ။ ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉၵေႃႈၵဝ်တၵ်းဢၢပ်ႈဝၢင်းႁႂ်ႈၶဝ်ပဵၼ်ယဵၸ်ႈပရေႃးႁဵၵ်ႈ ဢၼ်ႁဵတ်းဝၢတ်ႈတီႈၵဝ်ဢေႃႈ။-
ၵဝ်တၵ်းမီးယူႇၵႃႈၼႂ်းဝူင်ႈၵၢင်ၵူၼ်းမဵဝ်း ဢိသရေး၊ တင်းလၢႆလႄႈပဵၼ်ၽြႃးၶဝ်ဢေႃႈ။-
ၶဝ်တၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်ဢၼ်ၵႄႇၼုၵ်ႈဢဝ်ၶဝ်ဢွၵ်ႇမိူင်း ဢေးၵျိပ်ႉ၊ မႃးၼၼ်ႉၼင်ႇႁိုဝ်ၵဝ်တၵ်းယူႇၵႃႈၼႂ်းဝူင်ႈၵၢင်ၶဝ်ၼၼ်ႉဢေႃႈ။ ၵဝ်ၼႆႉပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်ဢေႃႈ။
“တၵ်းလႆႈဢဝ်မႆႉပဝ်းႁဵတ်းၶဵင်ႇတၢင်းလူႇဢၼ်ၼိုင်ႈပုၼ်ႈဢၼ်တၵ်းတုတ်ႇၼၢမ်ႇသႃႇဢေႃႈ။-
ၶဵင်ႇတၢင်းလူႇၼၼ်ႉၼႃႈယၢဝ်းမၼ်းတၵ်းလႆႈမီးသွၵ်ႇၼိုင်ႈ၊ၼႃႈၵႂၢင်ႈသွၵ်ႇၼိုင်ႈပဵၼ်သီႇၸဵင်ႇဝႆႉလႄႈ၊တၢင်းသုင်မၼ်းတၵ်းလႆႈမီးသွင်သွၵ်ႇဢေႃႈ။ ၶဝ်လႅမ်မၼ်းဢၼ်မီးတီႈသီႇၸဵင်ႇၸိူဝ်းၼၼ်ႉတၵ်းလႆႈပဵၼ်ၼိူဝ်ႉလဵဝ်ၵၼ်တင်းမၼ်းဢေႃႈ။-
တၵ်းလႆႈဢဝ်ၶမ်းလွတ်ႈငၢၼ်ႇဢုမ်ႇၼႃႈၼိူဝ်မၼ်း၊ၼႃႈၽႃမၼ်းတင်းသီႇၼႃႈတင်းၶဝ်လႅမ်မၼ်းၸိူဝ်းၼၼ်ႉသေလႄႈ၊တၵ်းလႆႈႁဵတ်းၶႅပ်းၶမ်းတဵၵ်းသႂ်ႇလဵပ်ႈႁွပ်ႈၶွပ်ႇၼႃႈၼိူဝ်မၼ်းဢေႃႈ။-
ႁဵတ်းမွင်ႈၶမ်းသွင်မွင်ႈသႂ်ႇၵႃႈတႂ်ႈၶႅပ်းၶမ်းဢၼ်တဵၵ်းသႂ်ႇလဵပ်ႈႁွပ်ႈၶွပ်ႇမၼ်းၼၼ်ႉယေႈၼႃႈသွင်မွင်ႈပုၼ်ႈမွင်ႈၵၢၼ်းတႃႇတေႁၢမ်ၶဵင်ႇတၢင်းလူႇၼၼ်ႉတႃႉ။-
ၵၢၼ်းၼၼ်ႉၵေႃႈတၵ်းလႆႈဢဝ်မႆႉပဝ်းထၢၵ်ႇႁဵတ်းလႄႈဢဝ်ၶမ်းဢုမ်ႇဝႆႉဢေႃႈ။-
ဢဝ်ၶဵင်ႇတၢင်းလူႇၼႆႉဝၢင်းဝႆႉၽၢႆႇၼွၵ်ႈၽႃႈၵင်ႈဢၼ်ႁွႆႈဝႆႉၽၢႆႇၼႃႈတိူၵ်ႈပတိၺိၺ်ႇၸဝ်ႈ တင်းပလၢင်ႇပုၼ်ႈဢၼ်ၽေႇဢပျတ်ႈတႃႉ။ ၵႃႈတီႈၼၼ်ႈတၵ်းပဵၼ်တီႈဢၼ်ၵဝ်တၵ်းထူပ်းၵၼ်တင်းမႂ်းဢေႃႈ။-
ၵၢင်ၼႂ်မိူဝ်ႈဢၼ် ဢႃႇရုၼ်ႇ၊ မႃးမႄးႁႅၼ်းဝၢၼ်ႇတႆႈၽႆးၸိူဝ်းၼၼ်ႉၸိုင်၊မၼ်းတၵ်းလႆႈတုတ်ႇၽႆးၼၢမ်ႇသႃႇဢၼ်ႁွမ်ဢၼ်ႁူၺ်းၵႃႈၼိူဝ်ၶဵင်ႇတၢင်းလူႇၼၼ်ႉၵူႈၼႂ်ဢေႃႈ။-
မိူဝ်ႈဢၼ်မၼ်းတႆႈၽႆးၸိူဝ်းၼၼ်ႉၵၢင်ၶမ်ႈၵေႃႈမၼ်းတၵ်းလႆႈႁဵတ်းၸိူဝ်ႉၼင်ႇၼၼ်ၼင်ႇၵဝ်ႇဢေႃႈ။ တၢင်းဢၼ်သၢၵ်ႈလူႇၼၢမ်ႇသႃႇတီႈ ထႃႇဝရႃႉၽြႃး၊ ၼႆႉၸိုင်၊တၵ်းလႆႈႁဵတ်းၸူဝ်ႈလုၵ်ႈပၢၼ်လၢၼ်သိုပ်ႇသိုပ်ႇတၢမ်တၢမ်ဢေႃႈ။-
ၵႃႈၼိူဝ်ၶဵင်ႇတၢင်းလူႇၼႆႉၸိုင်၊ၼၢမ်ႇသႃႇတၢင်ႇၸိူဝ်ႉတၢင်ႇမဵဝ်းဢၼ်ဢမ်ႇပၼ်တုတ်ႇၽႆးၼၼ်ႉသေဢမ်ႇဝႃႈ၊တူဝ်တၢင်းလူႇဢၼ်တုတ်ႇၽႆးသေဢမ်ႇဝႃႈ၊တၢင်းလူႇမၢၵ်ႇၶဝ်ႈႁူင်းၶဝ်ႈသေဢမ်ႇဝႃႈ၊ဢမ်ႇလႆႈသၢၵ်ႈလူႇၵႃႈၼိူဝ်မၼ်း။ တၢင်းလူႇဢၼ်သွၼ်းလေႃႇၼမ်ႉမၢၵ်ႇၸပိတ်ႉၵေႃႈတၵ်းဢမ်ႇလႆႈသွၼ်းလေႃႇၵႃႈၼိူဝ်မၼ်း။-
ယေႈပီယေႈပွၵ်ႈ ဢႃႇရုၼ်ႇ၊ သမ်ႉတၵ်းလႆႈႁဵတ်းမၢင်ႇၵလႃႇတၢင်းလူႇပုၼ်ႈဢၼ်ၽေႇဢပျတ်ႈဢေႃႈ။ မၼ်းတၵ်းလႆႈဢဝ်လိူတ်ႈတူဝ်တရိၵ်ႈသၢၼ်ႇဢၼ်သၢၵ်ႈၵၢပ်ႈပုၼ်ႈတၢင်းလူႇဢၼ်ၽေႇတုၸရိူၵ်ႈၼၼ်ႉတႃးသႂ်ႇၵႃႈၼိူဝ်ၶဝ်လႅမ်မၼ်းတင်းသီႇလႅမ်ႈပုၼ်ႈဢၼ်တၵ်းႁႂ်ႈၶဵင်ႇတၢင်းလူႇမူတ်းၸၢင်ႇဢေႃႈ။ တၵ်းလႆႈႁဵတ်းၸိူဝ်ႉၼင်ႇၼႆယေႈပီယေႈပွၵ်ႈၸူဝ်ႈလုၵ်ႈပၢၼ်လၢၼ်သိုပ်ႇသိုပ်ႇတၢမ်တၢမ်ဢေႃႈ။ တၵ်းလႆႈပဵၼ်ၶဵင်ႇတၢင်းလူႇဢၼ်မူတ်းၸၢင်ႇၼႃႇလူင်လၢင်ဢၼ်သၢၵ်ႈၵၢပ်ႈတီႈၵဝ် ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉလၢတ်ႈတီႈ မူဝ်းသေႇ၊ လႄႈဝႃႈ၊-
“မိူဝ်ႈဢၼ်မႂ်းၵဵပ်းၸရၢင်းၵူၼ်းမိူင်းမဵဝ်း ဢိသရေး၊ တင်းလၢႆၼၼ်ႉၵူၼ်းၵူႈၵေႃႉတၵ်းလႆႈပၼ်ၵႃႈၶၼ်ပုၼ်ႈဢၼ်တၵ်းထႆႇဢသၢၵ်ႈတူဝ်ၸဝ်ႈၵဝ်ႇႁင်းၽႂ်ႁင်းမၼ်းတီႈ ထႃႇဝရႃႉၽြႃး၊ ဢေႃႈ။ ႁဵတ်းၼၼ်လႄႈၶဝ်တၵ်းလႆႈၵၢင်းလွတ်ႈတင်းၽေးဢုပၢတ်ႈၼႂ်းၶိင်ႇမိူဝ်ႈဢၼ်ၵဵပ်းၸရၢင်းၵူၼ်းမိူင်းယူႇၼၼ်ႉဢေႃႈ။-
ၵေႃႉဢၼ်လႆႈၶၢမ်ႇတၢင်းဢၼ်ၼပ်ႉဢၢၼ်ႇၶဝ်ႈပႃးၵဵပ်းၸရၢင်းၵူၼ်းမိူင်းၼၼ်ႉယေႈၵေႃႉတၵ်းလႆႈပၼ်ၸွမ်းၼင်ႇၼမ်ႉၼၵ်းငိုၼ်းၸဝ်ႈ ၶိုင်ႈၵျၢပ်ႈဢေႃႈ။ မၼ်းတၵ်းလႆႈပၼ်ငိုၼ်းႁႂ်ႈပဵၼ်ငိုၼ်းလူႇတီႈ ထႃႇဝရႃႉၽြႃး၊ ဢေႃႈ။-
ၶဝ်ၸိူဝ်းဢၼ်လႆႈၶဝ်ႈပႃးၼႂ်းတၢင်းဢၼ်ၵဵပ်းၸရၢင်းၵူၼ်းမိူင်းၸမ်ႉ၊ပဵၼ်ၵေႃႉဢၼ်ဢသၢၵ်ႈလႆႈသၢဝ်းၼိုင်ႈလႄႈဢသၢၵ်ႈလိူဝ်သၢဝ်းၶိုၼ်ႈၵႂႃႇၼၼ်ႉတင်းသဵင်ႈတင်းလူင်၊တၵ်းလႆႈဢွၼ်ၵၼ်သႂ်ႇငိုၼ်းလူႇၼၼ်ႉတီႈ ထႃႇဝရႃႉၽြႃး၊ ဢေႃႈ။-
ၵူၼ်းမၢၵ်ႈၵူၼ်းမီးယင်းဢမ်ႇလႆႈပၼ်လိူဝ်လႄႈ၊ၵူၼ်းယၢၵ်ႈၵူၼ်းၽၢၼ်ၵေႃႈယင်းဢမ်ႇလႆႈပၼ်ယွမ်းၼႂ်းတၢင်းဢၼ်ၶဝ်ပၼ်ၵႃႈၶၼ်ပုၼ်ႈဢၼ်တၵ်းထႆႇဢသၢၵ်ႈတူဝ်ၸဝ်ႈၵဝ်ႇၼၼ်ႉဢေႃႈ။-
ၵဵပ်းၸုၵဵပ်းႁွမ်ဢဝ်ငိုၼ်းၼၼ်ႉ ၵႃႈတီႈၵူၼ်းမဵဝ်း ဢိသရေး၊ တင်းလၢႆသေယဝ်ႉ၊တၵ်းလႆႈသုင်းတိုဝ်းပုၼ်ႈတၢင်းဢၼ်ပႂ်ႉထိင်းသုမ်ႉထဵင်ၸဝ်ႈတီႈဢၼ်ၸုတုမ်ၵၼ်ၼၼ်ႉဢေႃႈ။ ငိုၼ်းၶွၼ်ႇၼႆႉတၵ်းလႆႈပဵၼ်ၵႃႈၶၼ်ပုၼ်ႈဢသၢၵ်ႈၶဝ်လႄႈ၊ၵဝ် ထႃႇဝရႃႉၽြႃး၊ တၵ်းၶုၵ်းၸႂ်လႆႈႁႂ်ႈလႆႈၸွႆႈထႅမ်မႃႉၸႃႉၶဝ်ဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉလၢတ်ႈတီႈ မူဝ်းသေႇ၊ ထႅင်ႈလႄႈဝႃႈ၊-
“ႁဵတ်းဢၢင်ႇတွင်းလိူင်ႁူၺ်ႇၼိုင်ႈဢၼ်မီးတိၼ်တွင်းလိူင်ၼၼ်ႉတႃႉ။ ဢဝ်ဢၢင်ႇၼၼ်ႉတမ်းဝႆႉၵႄႈဝူင်ႈၵၢင်သုမ်ႉထဵင်ၸဝ်ႈတီႈဢၼ်ၸုတုမ်ၵၼ်တင်းၶဵင်ႇတၢင်းလူႇၼၼ်ႉလႄႈသႂ်ႇၼမ်ႉဝႆႉတႃႉ။-
ဢႃႇရုၼ်ႇ၊ တင်းလုၵ်ႈၸၢႆးမၼ်းတင်းလၢႆတၵ်းလႆႈဢဝ်ၼမ်ႉၼၼ်ႉသုၵ်ႈတိၼ်သုၵ်ႈမိုဝ်းၶဝ်၊-
ၸူဝ်ႈဢၼ်ၶဝ်ဢမ်ႇပႆႇၶဝ်ႈၵႃႈၼႂ်းသုမ်ႉထဵင်ၸဝ်ႈဢိၵ်ႇတင်းမိူဝ်ႈဢၼ်ၶဝ်သုတ်ႉၸပ်းသုတ်ႉၸူးၶဵင်ႇတၢင်းလူႇႁႂ်ႈလႆႈသၢၵ်ႈၵၢပ်ႈတၢင်းလူႇဢၼ်တုတ်ႇၽႆးၼၼ်ႉဢေႃႈ။ ႁဵတ်းၼၼ်လႄႈၶဝ်တၵ်းလႆႈၵၢင်းလွတ်ႈတင်းၽေးတၢမ်ႇတၢႆၼၼ်ႉဢေႃႈ။-
ၼင်ႇၼၼ်လႄႈၶဝ်တၵ်းလႆႈသုၵ်ႈတိၼ်သုၵ်ႈမိုဝ်းၶဝ်ႁႂ်ႈၶဝ်လႆႈၵၢင်းလွတ်ႈတင်းၽေးတၢမ်ႇတၢႆၼၼ်ႉဢေႃႈ။ တၵ်းလႆႈပဵၼ်ထုင်းၽိင်ႈတြႃးၸဝ်ႈ၊တီႈၶဝ်ဢိၵ်ႇတင်းၸူဝ်ႈလုၵ်ႈပၢၼ်လၢၼ်ၶဝ်၊တၵ်းလႆႈပႂ်ႉၵမ်ပႂ်ႉၵျၢင်ႉတႃႇသေႇဢမ်ႇထၢတ်ႇဢေႃႈ၊” ဝႃႈၼင်ႇၼႆဢေႃႈ။
လိူဝ်သေၼၼ်ႉ ထႃႇဝရႃႉၽြႃး၊ လၢတ်ႈတီႈ မူဝ်းသေႇ၊ ထႅင်ႈလႄႈဝႃႈ၊-
“တၵ်းလႆႈဢဝ်ၼၢမ်ႇသႃႇဢၼ်လီၼႃႇသေပိူၼ်ႈ၊ၼမ်ႉမုရၼ်ႇႁႃႈၸွႆႉ၊ ၵႅင်းႁွမ်သွင်ၸွႆႉၶိုင်ႈ၊သၢမ်ပူးသွင်ၸွႆႉၶိုင်ႈ၊-
မႆႉႁွမ်ႁိူတ်ႈသွင်ၸွႆႉၸင်ႈၸွမ်းလူၺ်ႈၼမ်ႉၼၵ်းလုၵ်ႈၶၼ်ၸဝ်ႈလႄႈ၊ၼွၵ်းလေႃးတင်းၼမ်ႉမၼ်းသၢၼ်ႇလုၼ်ႇသီႇတဝ်ႈ သေယဝ်ႉ၊-
တၵ်းလႆႈၽေႃႇႁဵတ်းမိူၼ်ၸိူဝ်ႉၼင်ႇႁဵတ်းၼမ်ႉမၼ်းဢၼ်ႁွမ်ဢၼ်ႁူၺ်ႈႁႂ်ႈပဵၼ်ၼမ်ႉမၼ်းၼၢမ်ႇသႃႇဢၼ်မူတ်းၸၢင်ႇပုၼ်ႈဢၼ်တၵ်းသွၼ်းလေႃႇဢေႃႈ။-
တၵ်းလႆႈဢဝ်ၼမ်ႉမၼ်းၼၢမ်ႇသႃႇဢၼ်မူတ်းၸၢင်ႇၼၼ်ႉသွၼ်းလေႃႇသုမ်ႉထဵင်ၸဝ်ႈတီႈဢၼ်ၸုတုမ်ၵၼ်၊တိူၵ်ႈပတိၺိၺ်ႇၸဝ်ႈ၊-
ၽိူၼ်ၸဝ်ႈဢိၵ်ႇတင်းၶိူင်ႈမၼ်းတင်းသဵင်ႈတင်းလူင်၊ၶဵင်ႇတီႈတႆႈၽႆးဢိၵ်ႇတင်းၶိူင်ႈမၼ်းၵႃႈမီး၊ၶဵင်ႇတၢင်းလူႇဢၼ်တုတ်ႇၼၢမ်ႇသႃႇ၊-
ၶဵင်ႇတၢင်းလူႇဢၼ်ၽဝ်တူဝ်တၢင်းလူႇ ဢိၵ်ႇတင်းၶိူင်ႈမၼ်းတင်းသဵင်ႈတင်းလူင်ဢိၵ်ႇတင်းဢၢင်ႇလူင်တင်းတိၼ်မၼ်းၸိူဝ်းၼၼ်ႉဢေႃႈ။-
ၶိူင်ႈၸိူဝ်းၼႆႉတၵ်းလႆႈသၢၵ်ႈၵၢပ်ႈၸိူဝ်ႉၼင်ႇၼႆႁႂ်ႈၸိူဝ်းၼၼ်ႉပဵၼ်ဢၼ်မူတ်းၸၢင်ႇၼႃႇလူင်လၢင်လႄႈ၊ၵူၼ်းၵေႃႉလႂ်သေဢမ်ႇဝႃႈ၊ၶိူင်ႈပိူင်ၵႃႈသင်သေဢမ်ႇဝႃႈ၊ၵႃႈဢၼ်တိူဝ်ႉထုၵ်ႇၶိူင်ႈၸိူဝ်းၼၼ်ႉၵေႃႈတၵ်းပဵၼ်တၢင်းဢၼ်မူတ်းၸၢင်ႇဢေႃႈ။-
လိုၼ်းၼၼ်ႉ၊မႂ်းတၵ်းလႆႈဢဝ်ၼမ်ႉမၼ်းၼၢမ်ႇသႃႇၼၼ်ႉသွၼ်းလေႃႇၵႃႈၼိူဝ် ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉလႄႈၶၢၼ်းၶဝ်ဝႆႉၼႂ်းဢရႃႇယဵၸ်ႈပရေႃးႁဵၵ်ႈ ႁႂ်ႈၶဝ်လႆႈပွင်ႁဵတ်းၼႃႈၵၢၼ်ၵဝ်ဢေႃႈ။-
ႁဵတ်းၼၼ်လႄႈသင်ႇလၢတ်ႈၵူၼ်းမဵဝ်း ဢိသရေး၊ တင်းလၢႆလႄႈဝႃႈ၊ ‘ၼမ်ႉမၼ်းၼၢမ်ႇသႃႇဢၼ်မူတ်းၸၢင်ႇပုၼ်ႈဢၼ်တၵ်းသွၼ်းလေႃႇၼႆႉတၵ်းလႆႈသုင်းလႆႈႁဵတ်းၼႂ်းၼႃႈၵၢၼ်တၢင်းဢၼ်ႁဵတ်းဝၢတ်ႈတီႈၵဝ်တေႃႇထိုင်ၸူဝ်ႈလုၵ်ႈပၢၼ်လၢၼ်သူတႃႇသေႇဢမ်ႇထၢတ်ႇဢေႃႈ။-
ဢမ်ႇလႆႈသွၼ်းလေႃႇၵႃႈၼိူဝ်တူဝ်ၵူၼ်းယူဝ်းယူဝ်း။ ဢမ်ႇလႆႈၽေႃႇလႆႈႁဵတ်းၼမ်ႉမၼ်းတၢင်ႇမဵဝ်းမိူၼ်ၸိူဝ်ႉၼင်ႇႁဵတ်းၼမ်ႉမၼ်းၼၼ်ႉ။ ပဵၼ်ၼမ်ႉမၼ်းဢၼ်မူတ်းၸၢင်ႇလႄႈသူတၵ်းလႆႈမၢတ်ႈပဵၼ်ဢၼ်မူတ်းၸၢင်ႇဢေႃႈ။-
ၽူႈလႂ်သေဢမ်ႇဝႃႈ၊ၵေႃႉဢၼ်ၽေႃႇႁဵတ်းႁႂ်ႈမိူၼ်ၼမ်ႉမၼ်းၼၼ်ႉသေဢမ်ႇဝႃႈ၊ၵေႃႉဢၼ်ဢဝ်သွၼ်းလေႃႇၵႃႈၼိူဝ်ၵူၼ်းဢၼ်ဢမ်ႇၸႂ်ႈယဵၸ်ႈပရေႃးႁဵၵ်ႈ ၼၼ်ႉသေဢမ်ႇဝႃႈ၊ၵေႃႉၼၼ်ႉတၵ်းလႆႈၶၢမ်ႇပႄႇပႅတ်ႈသေတၢင်းဢၼ်ပဵၼ်ၵူၼ်းၵဝ် ဢမၢၼ်ႇၶၼ်ပဵၼ်ဢေႃႈ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ လၢတ်ႈတီႈ မူဝ်းသေႇ လႄႈဝႃႈ၊ “တၵ်းလႆႈဢဝ်ဢၼ်ႁွမ်ဢၼ်ႁူၺ်း၊မဵဝ်းဢၼ်ဝႃႈ၊ယၢင်ၼတပ်ႉ၊ပိူၵ်ႇႁွႆးဢၼ်ႁွမ်၊ယၢင်ၵႃႇလပၢၼ်ႇ၊ဢိၵ်ႇတင်းယၢင်လေႃႇပၢၼ်ႇဢၼ်ၸႅတ်ႈၸႅတ်ႈၸိူဝ်းၼၼ်ႉၸင်ႈႁိဝ်ႈၼမ်ႉၼၵ်းပဵင်းပဵင်းၵၼ်ၵူႈမဵဝ်းသေယဝ်ႉ၊-
တၵ်းလႆႈၽေႃႇႁဵတ်းၼၢမ်ႇသႃႇဢၼ်ႁွမ်ဢၼ်ႁူၺ်း၊ၽေႃႇႁဵတ်းမိူၼ်ၸိူဝ်ႉၼင်ႇၼမ်ႉမၼ်းဢၼ်ႁွမ်ဢၼ်ႁူၺ်းၼၼ်ႉဢေႃႈ။ ဢဝ်ၵိူဝ်သႂ်ႇႁႂ်ႈမၼ်းၸိုၼ်ႈၸၢင်ႇသႂ်လီလႄႈမူတ်းၸၢင်ႇတႃႉ။-
တၵ်းလႆႈဢဝ်ၵမ်ႈၽွင်ႈတမ်ၽွင်သေယဝ်ႉ၊ဢဝ်ၶဝ်ႈၵႃႈၼႂ်းသုမ်ႉထဵင်ၸဝ်ႈတီႈၵဝ်တၵ်းထူပ်းၵၼ်တင်းမႂ်းၼၼ်ႉလႄႈဢဝ်ၽွၵ်းၵႃႈတီႈၽၢႆႇၼႃႈတိူၵ်ႈပတိၺိၺ်ႇၸဝ်ႈတႃႉ။ မၢတ်ႈဝႃႈ၊ယႃဢၼ်ႁွမ်ဢၼ်ႁူၺ်းၼႆႉပဵၼ်ဢၼ်မူတ်းၸၢင်ႇၼႃႇလူင်လၢင်တႃႉ။-
ဢမ်ႇလႆႈၽေႃႇလႆႈႁဵတ်းၸွမ်းၼႄးလၢႆးဢၼ်ၽေႃႇႁဵတ်းယႃၼၼ်ႉလႄႈၸႂ်ႉပုၼ်ႈတူဝ်ၸဝ်ႈၵဝ်ႇတၵ်းလႆႈမၢတ်ႈပဵၼ်ဢၼ်မူတ်းၸၢင်ႇၶိူင်ႈဢၼ်သၢၵ်ႈၵၢပ်ႈတီႈၵဝ်ဢေႃႈ။-
ပေႃးသေၵေႃႉသေၵူၼ်းၽေႃႇႁဵတ်းၸိူဝ်ႉၼင်ႇယႃၼၼ်ႉပုၼ်ႈတူဝ်ၸဝ်ႈၵဝ်ႇတေၸႂ်ႉႁႂ်ႈပဵၼ်ဢၼ်ႁွမ်ဢၼ်ႁူၺ်းၸိုင်၊ၵေႃႉၼၼ်ႉတၵ်းလႆႈၶၢမ်ႇပႄႇပႅတ်ႈသေတၢင်းဢၼ်ပဵၼ်ၵူၼ်းၵဝ်ဢမၢၼ်ႇၶၼ်ပဵၼ်ဢေႃႈ၊” ဝႃႈၼင်ႇၼႆဢေႃႈ။
ၵမ်းၼၼ်ႉ၊ ထႃႇဝရႃႉၽြႃး၊ လၢတ်ႈတီႈ မူဝ်းသေႇ၊ လႄႈဝႃႈ၊-
“ၵဝ်ႁွင်ႉၸွမ်းလူၺ်ႈၸိုဝ်ႈသဵင်ဢၼ်ႁွင်ႉဝႃႈ၊ ပေႇၸလေႇလႃႉ၊ လုၵ်ႈၸၢႆး ဢုရိ၊ ဢၼ်ပဵၼ်လုၵ်ႈၸၢႆး ႁုရႃႉ၊ ၵႃႈၼႂ်းၸိူဝ်ႉၶိူဝ်း ယုတႃႉ၊ ၼၼ်ႉသေယဝ်ႉ၊-
ၵဝ်ႁႂ်ႈမၼ်းတဵမ်ဝႆႉတင်းဝိၺိၺ်ႇၽြႃးပဵၼ်ၸဝ်ႈလႄႈပၼ်ၺၢၼ်ႇပိင်ႇၺႃႇတၢင်းဢၼ်ၵတ်ႉဢၼ်ၶၼ်၊ဢတၢတ်ႈဢၼ်မေႃဢၼ်ၸၢင်ႈၼႂ်းတၢင်းဢၼ်ၸၢင်ႈႁဵတ်းလၢၵ်ႇလၢၵ်ႇလၢႆးလၢႆးၵူႈၸိူဝ်ႉၵူႈမဵဝ်း၊-
ၸၢင်ႈၶႆႈၸႂ်လႄႈႁဵတ်းဢွၵ်ႇပုင်ႇႁၢင်ႈၵူႈၸိူဝ်ႉၵူႈမဵဝ်း၊ဢိၵ်ႇတင်းတၢင်းဢၼ်မေႃၸၢင်ႈၶမ်း၊ၸၢင်ႈငိုၼ်း၊ၸၢင်ႈတွင်းလိူင်၊-
တၢင်းဢၼ်မေႃသူၺ်းသႅင်လႄႈၶပ်ႉၸႅၼ်ႇ၊တၢင်းဢၼ်မေႃတွင်ႈမေႃၶွၵ်းမႆႉ၊တၢင်းဢၼ်မေႃဢၼ်ၸၢင်ႈႁဵတ်းၶိူင်ႈဢၼ်လၢၵ်ႇလၢၵ်ႇလၢႆးလၢႆး တၢင်ႇၸိူဝ်ႉတၢင်ႇမဵဝ်းၸိူဝ်းၼၼ်ႉဝႆႉတီႈမၼ်းဢေႃႈ။-
ဢႁေႃႇလျႃႇၽႃႉ၊ လုၵ်ႈၸၢႆး ဢႁိသမၵ်ႉ၊ ၼႂ်းၸိူဝ်ႉၶိူဝ်း တၢၼ်ႇ၊ ၼၼ်ႉၵေႃႈၵဝ်ၶၢၼ်းဝႆႉလူၺ်ႈၵၼ်တင်းမၼ်းဢေႃႈ။ ၵူၼ်းဢၼ်မေႃဢၼ်ၸၢင်ႈလႄႈၵတ်ႉၶၼ်ၼႃႇတၢင်ႇၵေႃႉတၢင်ႇၵူၼ်းတင်းသဵင်ႈတင်းလူင်ၵေႃႈၵဝ်ပၼ်တၢင်းမေႃၺၢၼ်ႇပိင်ႇၺႃႇဝႆႉ၊ႁႂ်ႈၶဝ်လႆႈႁဵတ်းၵႃႈဢၼ်ၵဝ်သင်ႇလၢတ်ႈဝႆႉတီႈမႂ်း၊-
ဢၼ်ပဵၼ်သုမ်ႉထဵင်ၸဝ်ႈတီႈဢၼ်ၸုတုမ်ၵၼ်၊တိူၵ်ႈပတိၺိၺ်ႇၸဝ်ႈတင်းပလၢင်ႇတီႈဢၼ်ၽေႇဢပျတ်ႈဢိၵ်ႇတင်းၶိူင်ႈပိူင်သုမ်ႉထဵင်ၸဝ်ႈတင်းသဵင်ႈတင်းလူင်၊-
ၽိူၼ်ၸဝ်ႈဢိၵ်ႇတင်းၶိူင်ႈမၼ်းတင်းသဵင်ႈတင်းလူင်၊ၶဵင်ႇတီႈတႆႈၽႆးဢၼ်ဢဝ်ၶမ်းလွတ်ႈငၢၼ်ႇႁဵတ်းဝႆႉ၊ဢိၵ်ႇတင်းၶိူင်ႈမၼ်းတင်းသဵင်ႈတင်းလူင်၊ၶဵင်ႇတၢင်းလူႇဢၼ်ၽဝ်ၼၢမ်ႇသႃႇ၊-
ၶဵင်ႇတၢင်းလူႇပုၼ်ႈတူဝ်တၢင်းလူႇဢၼ်တုတ်ႇၽႆးဢိၵ်ႇတင်းၶိူင်ႈပိူင်မၼ်းတင်းသဵင်ႈတင်းလူင်၊ဢၢင်ႇလူင်ဢိၵ်ႇတင်းႁွင်းတိၼ်မၼ်း၊-
ၶူဝ်းၼုင်ႈၶူဝ်းမႆဢၼ်ၶိုၵ်ႉဢၼ်ၶမ်ႇပုၼ်ႈ ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉၼုင်ႈမႆယၢမ်းမိူဝ်ႈဢၼ်ၶဝ်ပွင်ႁဵတ်းၼႃႈၵၢၼ်ယဵၸ်ႈပရေႃးႁဵၵ်ႈ၊-
ၼမ်ႉမၼ်းပုၼ်ႈဢၼ်တၵ်းသွၼ်းလေႃႇ၊ၼၢမ်ႇသႃႇဢၼ်ႁွမ်ဢၼ်ႁူၺ်းပုၼ်ႈထႃႇၼႃႉတီႈမူတ်းၸၢင်ႇၸိူဝ်းၼၼ်ႉဢေႃႈ။ ၼႂ်းတၢင်းဢၼ်ႁဵတ်းၶိူင်ႈၸိူဝ်းၼႆႉတင်းသဵင်ႈတင်းလူင်ၼၼ်ႉၶဝ်တၵ်းလႆႈဢွၼ်ၵၼ်ႁဵတ်းမႅၼ်ႈၸွမ်းၵႃႈၼင်ႇဢၼ်ၵဝ်သင်ႇလၢတ်ႈဝႆႉတီႈမႂ်းၼၼ်ႉၸေးၸေးဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ လႄႈဝႃႈၸမ်ႉ၊-
“မႂ်းတၵ်းလႆႈသင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆၼၼ်ႉလႄႈဝႃႈ၊ ‘ပႂ်ႉဝၼ်းၵမ်သိၼ်၊ဝၼ်းဢၼ်ၵဝ်ၵိုတ်းလိုဝ်ႈၼၼ်ႉၼိမ်ၼိမ်လီလီတႃႉ။ လွင်ႈမၼ်းၸမ်ႉ၊မၼ်းပဵၼ်လၢၵ်ႈၶၼႃႇသၢၵ်ႈသေႇၵႃႈတီႈဝူင်ႈၵၢင်ၵဝ်တင်းသူၵူႈၵၢပ်ႈၵႃႇလႃႉသိုပ်ႇသိုပ်ႇတၢမ်တၢမ်၊ႁႂ်ႈလႆႈၼႄပျႃးလွင်ႈဢၼ်ၵဝ် ထႃႇဝရႃႉၽြႃး၊ ႁဵတ်းႁႂ်ႈသူမႃးပဵၼ်ၵူၼ်းၵဝ် ဢေႃႈ။-
သူတၵ်းလႆႈပႂ်ႉဝၼ်းၵမ်သိၼ်ၼၼ်ႉၵွပ်ႈပိူဝ်ႈပဵၼ်ဝၼ်းဢၼ်မူတ်းၸၢင်ႇဢေႃႈ။ ၵေႃႉဢၼ်ဢမ်ႇပႂ်ႉဝၼ်းၵမ်သိၼ်လႄႈယင်းႁဵတ်းႁႂ်ႈဝၼ်းၵမ်သိၼ်ၵူဝ်ႈၵိူၵ်ႇၸိုင်၊တၵ်းလႆႈၶၢမ်ႇတၢင်းဢၼ်ဢဝ်တၢႆလႄႈၵေႃႉဢၼ်ႁဵတ်းၵၢၼ်ႁဵတ်းငၢၼ်းၼႂ်းဝၼ်းၵမ်သိၼ်ၸမ်ႉ၊တၵ်းလႆႈၶၢမ်ႇတၢင်းဢၼ်ပႄႇပႅတ်ႈသေၵႃႈၼႂ်းၸိူဝ်ႉၶိူဝ်းမၼ်းဢေႃႈ။-
သူမီးဢၶိင်ႇႁူၵ်းဝၼ်းတဵမ်တဵမ်ပုၼ်ႈဢၼ်တၵ်းႁဵတ်းၵၢၼ်တၢင်းႁဵတ်းတူဝ်ၸဝ်ႈၵဝ်ႇဢေႃႈ။ ၵူၺ်းၵႃႈ၊ဝၼ်းဢၼ်ထူၼ်ႈတီႈၸဵတ်းၼၼ်ႉပဵၼ်ဝၼ်းၵမ်သိၼ်ဢၼ်တၵ်းလႆႈၵိုတ်းလိုဝ်ႈၼိမ်ၼိမ်လီလီလႄႈမူတ်းၸၢင်ႇပုၼ်ႈ ထႃႇဝရႃႉၽြႃး၊ ဢေႃႈ။ ၵေႃႉဢၼ်ႁဵတ်းၵၢၼ်ႁဵတ်းငၢၼ်းၼႂ်းဝၼ်းၵမ်သိၼ်ၼၼ်ႉတၵ်းလႆႈၶၢမ်ႇတၢင်းတၢႆဢမၢၼ်ႇၶၼ်ပဵၼ်ဢေႃႈ။-
ပိူဝ်ႈၼႆလႄႈၵူၼ်းမဵဝ်း ဢိသရေး၊ တင်းလၢႆတၵ်းလႆႈပႂ်ႉဝၼ်းၵမ်သိၼ်ၸူဝ်ႈလုၵ်ႈပၢၼ်လၢၼ်သိုပ်ႇသိုပ်ႇတၢမ်တၢမ်ႁႂ်ႈပဵၼ်လၢၵ်ႈၶၼႃႇသၢၵ်ႈသေႇၵႃႈတီႈပတိၺိၺ်ႇထႃႇဝရႃႉဢေႃႈ။-
ဢၼ်ၼၼ်ႉတၵ်းပဵၼ်လၢၵ်ႈၶၼႃႇသၢၵ်ႈသေႇထႃႇဝရႃႉၵႃႈတီႈဝူင်ႈၵၢင်ၵဝ်တင်းၵူၼ်းမဵဝ်း ဢိသရေး၊ တင်းလၢႆဢေႃႈ။ လွင်ႈမၼ်းၸမ်ႉ၊ၵဝ် ထႃႇဝရႃႉၽြႃး၊ ၽၢၼ်ႇသၢင်းႁဵတ်းပဵၼ်ၽႃႉၵၢင်ႁၢဝ်တင်းလိၼ်မိူင်းၼႂ်းႁူၵ်းဝၼ်းလႄႈ၊ၼႂ်းဝၼ်းဢၼ်ထူၼ်ႈထိုင်ၸဵတ်းဝၼ်းၼၼ်ႉၵဝ်ၵိုတ်းၼႃႈၵၢၼ်တၢင်းႁဵတ်းသေလႄႈလိုဝ်ႈသဝ်းဢေႃႈ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၽြႃးပဵၼ်ၸဝ်ႈလၢတ်ႈတေႃႇ မူဝ်းသေႇ၊ ၵႃႈၼိူဝ်လွႆ သိၼႃႉ၊ ယဝ်ႉတူဝ်ႈယဝ်ႉၼၼ်ႉၸိုင်၊မၼ်းၸဝ်ႈဢဝ်ၶႅပ်းမၢၵ်ႇႁိၼ်သွင်ၽႅၼ်ႇဢၼ်ၵႃႈၼိူဝ်မၼ်းတႅမ်ႈပိင်းၺၢပ်ႈတြႃးဝႆႉလူၺ်ႈၼိဝ်ႉမိုဝ်းမၼ်းၸဝ်ႈၼၼ်ႉပၼ်တီႈမၼ်းဢေႃႈ။
မိူဝ်ႈဢၼ်ၵူၼ်းတင်းလၢႆ၊ႁုႁၼ်လွင်ႈဢၼ် မူဝ်းသေႇ၊ ၼၢၼ်းလူင်းသေၵႃႈၼိူဝ်လွႆမႃးၼၼ်ႉၸိုင်၊ၶဝ်ဢွၼ်ၵၼ်ၸုတုမ်ၵၼ်ၵႃႈတီႈ ဢႃႇရုၼ်ႇ၊ လႄႈလၢတ်ႈတီႈမၼ်းလႄႈဝႃႈ၊ “ မူဝ်းသေႇ၊ ၵေႃႉဢၼ်ဢွၼ်ႁူဝ်ႁဝ်းဢွၵ်ႇမိူင်း ဢေးၵျိပ်ႉ၊ မႃးၼၼ်ႉမၼ်းပဵၼ်ၸိူဝ်ႉၼင်ႇႁိုဝ်ယူႇႁဝ်းၶႃႈဢမ်ႇႁုၶႃႈ။ ပိူဝ်ႈၼႆလႄႈႁဵတ်းၽြႃးဢၼ်တၵ်းဢွၼ်ႁူဝ်ႁဝ်းၶႃႈၵႂႃႇၼၼ်ႉသေၵမ်းၶႃႈ၊” ဝႃႈၼင်ႇၼႆဢေႃႈ။
ဢႃႇရုၼ်ႇ၊ ၵေႃႈလၢတ်ႈတီႈၶဝ်လႄႈဝႃႈ၊ “ဢွၼ်ၵၼ်ဢဝ်ပေႇႁူၶမ်းသူဢၼ်မေးသူလုၵ်ႈၸၢႆးသူ၊လုၵ်ႈယိင်းသူတိုဝ်းယူႇၸိူဝ်းၼၼ်ႉဢဝ်မႃးၵႃႈတီႈၵဝ်တႃႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၵူၼ်းတင်းသဵင်ႈတင်းလူင်ဢွၼ်ၵၼ်ဢဝ်ပေႇႁူၶမ်းၶဝ်လႄႈဢဝ်မႃးပၼ်တီႈ ဢႃႇရုၼ်ႇ၊ ဢေႃႈ။
မၼ်းၵေႃႈဢဝ်ပေႇႁူၶမ်းၸိူဝ်းၼၼ်ႉလေႃႇလွၼ်သေလႄႈႁဵတ်းပဵၼ်ႁုၼ်ႇႁၢင်ႈဝူဝ်းဢွၼ်ႇဢေႃႈ။ ၵူၼ်းတင်းလၢႆဢွၼ်ၵၼ်လၢတ်ႈလႄႈဝႃႈ၊ “မဵဝ်း ဢိသရေး၊ ၼႆႉ႟။ ဢၼ်ၼႆႉပဵၼ်ၽြႃးမႂ်းဢၼ်ဢွၼ်ဢဝ်မႂ်းဢွၵ်ႇမိူင်း ဢေးၵျိပ်ႉ၊ မႃးၼၼ်ႉယဝ်ႉ၊” ဝႃႈၼင်ႇၼႆဢေႃႈ။
လိုၼ်းၼၼ်ႉ၊ ဢႃႇရုၼ်ႇ၊ တႄႇႁဵတ်းၶဵင်ႇတၢင်းလူႇဝႆႉဢၼ်ၼိုင်ႈၽၢႆႇၼႃႈႁုၼ်ႇႁၢင်ႈဝူဝ်းၶမ်းၼၼ်ႉသေယဝ်ႉ၊ႁွင်ႉပၢဝ်ႇႁွင်ႉသေႃႇလႄႈဝႃႈ၊ “ဝၼ်းမိူဝ်ႈၽုၵ်ႈတၵ်းပဵၼ်ဝၼ်းဢၼ်တၵ်းလႆႈႁဵတ်းပွႆးပုၼ်ႈ ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။-
ၼႂ်းဝၼ်းမိူဝ်ႈၽုၵ်ႈၶိင်ႇၵၢင်ၼႂ်ၸဝ်ႉၸဝ်ႉၶဝ်ဢွၼ်ၵၼ်ဢဝ်သတ်းတရိၵ်ႈသၢၼ်ႇၵမ်ႈၽွင်ႈမႃးႁႂ်ႈလႆႈတုတ်ႇၽႆးပုၼ်ႈႁႂ်ႈပဵၼ်တၢင်းလူႇ၊ဢိၵ်ႇတင်းသတ်းတရိၵ်ႈသၢၼ်ႇၵမ်ႈၽွင်ႈပုၼ်ႈတၵ်းၵိၼ်တၵ်းၶူပ်းႁႂ်ႈပဵၼ်တၢင်းလူႇပုၼ်ႈမိၵ်ႈသႁႃႇယႃႉဢေႃႈ။ ၵူၼ်းတင်းလၢႆဢွၼ်ၵၼ်ၼင်ႈလႄႈၵိၼ်ယူႇသူတ်ႉယူႇသေယဝ်ႉ၊ဢွၼ်ၵၼ်ႁဵတ်းတၢင်းဢၼ်ပူၼ်ႉလိူဝ်လႄႈႁဵတ်းတၢင်းဢၼ်ၵႃႈၵႃႈဝႅၼ်ဝႅၼ်ၵၼ်ဢေႃႈ။
ထႃႇဝရႃႉၽြႃး၊ ၸင်ႇလၢတ်ႈတီႈ မူဝ်းသေႇ၊ လႄႈဝႃႈ၊ “ၶိုၼ်းလူင်းၵႂႃႇၵမ်းလဵဝ်တႃႉ။ ၵူၼ်းဢၼ်မႂ်းဢွၼ်ဢွၵ်ႇမိူင်း ဢေးၵျိပ်ႉ၊ မႃးၸိူဝ်းၼၼ်ႉဢွၼ်ၵၼ်ႁဵတ်းဢပျတ်ႈလႄႈပႄႇပႅတ်ႈၵဝ်ယဝ်ႉ။-
ၶဝ်ဢွၼ်ၵၼ်ပိူင်ႈသေၵႃႈၼႂ်းသဵၼ်ႈတၢင်းဢၼ်ၵဝ်သင်ႇလၢတ်ႈဝႆႉၼၼ်ႉၵႂႃႇၶၼ်ၶၼ်ၽႂ်းၽႂ်းယဝ်ႉ။ ၶဝ်လေႃႇႁဵတ်းႁၢင်ႈဝူဝ်းဢွၼ်ႇသေယဝ်ႉ၊ဝႆႈမၼ်းလႄႈသၢၵ်ႈၵၢပ်ႈတၢင်းလူႇၵႃႈတီႈၽၢႆႇၼႃႈမၼ်းလႄႈဝႃႈ၊ ‘မဵဝ်း ဢိသရေး၊ ၼႆႉ႟။ ဢၼ်ၼႆႉပဵၼ်ၽြႃးမႂ်းဢၼ်ဢွၼ်ဢဝ်မႂ်းဢွၵ်ႇသေမိူင်း ဢေးၵျိပ်ႉ၊ မႃးၼၼ်ႉယဝ်ႉ၊’ ဝႃႈၸိူဝ်ႉၼင်ႇၼႆယူႇယဝ်ႉ။-
ၵဝ်ႁုလွင်ႈဢၼ်ႁူဝ်ၸႂ်ၶဝ်တိုဝ်တၼ်ထၼ်ႇႁိုဝ်ၼၼ်ႉယူႇဢေႃႈ။-
တေႃႈလဵဝ်ၼႆႉယႃႇပေႁၢမ်ႈတၢပ်ႈႁႄႉၶႅၼ်ၵဝ်ယဝ်ႉ။ ၵဝ်ၸႂ်မႆႈၶႂ်ႈၸႃႉၼႃႇလူင်လၢင်တေႃႇၶဝ်လႄႈ၊ၵဝ်တၵ်းယႃႉၽဵဝ်ႈပႅတ်ႈၶဝ်ဢေႃႈ။ မႂ်းၸမ်ႉ၊ၵဝ်တၵ်းႁႂ်ႈပဵၼ်မဵဝ်းၵူၼ်းဢၼ်ယႂ်ႇၼႃႇလူင်လၢင်ဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈတွင်းပၢၼ်ႇတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈမၼ်းလႄႈဝႃႈ၊ “ ထႃႇဝရႃႉၽြႃး၊ တီႈၶႃႈ။ ႁဵတ်းသင်လႄႈၸဝ်ႈႁဝ်းၶႂ်ႈၸႃႉၼႃႇလူင်လၢင်တေႃႇၵူၼ်းၸဝ်ႈႁဝ်း၊ဢၼ်ၸဝ်ႈႁဝ်းဢဝ်တင်းမႁႃႇတၼ်းၶူဝ်းဢိၵ်ႇတင်းမိုဝ်းဢၼ်ႁႅင်းယႂ်ႇၼႃႇၼၼ်ႉၵႄႇသႄႇဢဝ်ၶဝ်ဢွၵ်ႇသေမိူင်း ဢေးၵျိပ်ႉ၊ မႃးၸိူဝ်းၼၼ်ႉၸိူဝ်ႉၼင်ႇႁိုဝ်တီႈၶႃႈ။-
ႁဵတ်းသင်လႄႈတၵ်းႁႂ်ႈၵူၼ်းမဵဝ်း ဢေးၵျိပ်ႉ၊ ၶဝ်လၢတ်ႈဝႃႈ၊ ‘မၼ်းၸဝ်ႈမီးဢၵျၢမ်ႇလူၺ်ႈလွင်ႈတၢင်းဢၼ်ဢမ်ႇလီၼၼ်ႉဢွၼ်ဢဝ်ၶဝ်ဢွၵ်ႇၵႂႃႇႁႂ်ႈလႆႈဢဝ်ၶဝ်တၢႆၵႃႈၼႂ်းလွႆလႄႈပႄႇၽဵဝ်ႈၶဝ်ပႅတ်ႈသေၵႃႈၼိူဝ်လိၼ်မိူင်းၼႆႉၵူၺ်းယဝ်ႉ၊’ ဝႃႈၼင်ႇၼႆၸိူဝ်ႉၼင်ႇႁိုဝ်ၶႃႈ။ ယိူၼ်ႉၸႂ်သေၵမ်းတီႈၶႃႈ။ ၶႅၼ်းတေႃႈပိၼ်ႇၸႂ်ၸဝ်ႈႁဝ်းသေလႄႈယႃႇပေႁႂ်ႈၽေးဢုပၢတ်ႈၼၼ်ႉတူၵ်းႁွတ်ႈၵႃႈၼိူဝ်ၵူၼ်းၸဝ်ႈႁဝ်းၸိူဝ်းၼၼ်ႉသေၵမ်းတီႈၶႃႈ။-
ၶႅၼ်းတေႃႈၶုၵ်းၸႂ်လႆႈဢၼ်ပဵၼ်ၶႃႈၸဝ်ႈႁဝ်း ဢႃႇပြႃႇႁၢမ်ႇ၊ဢိၸၢၵ်ႈ၊ တင်း ယႃႇၵုပ်ႈ၊ ၸိူဝ်းၼၼ်ႉသေၵမ်းတီႈၶႃႈ။ ၶႅၼ်းတေႃႈၶုၵ်းၸႂ်လႆႈၵႂၢမ်းၵတိဢၼ်ၸဝ်ႈႁဝ်းတိူင်ႇဝႃႈတီႈၶဝ်လႄႈဝႃႈ၊ ‘ၵဝ်တၵ်းႁႂ်ႈၸိူဝ်ႉၶိူဝ်းသူယႂ်ႇၽႄၼမ်ၵိုၼ်းမႃးမိူၼ်ၸိူဝ်ႉၼင်ႇလၢဝ်ၵၢင်ႁၢဝ်ဢေႃႈ။ ၵဝ်တၵ်းဢဝ်ၽႅၼ်ႇလိၼ်ဢၼ်ၵဝ်ဝႆႉၵတိဝႃႈတၵ်းပၼ်ႁႂ်ႈပဵၼ်ဢမူၺ်ႇပုၼ်ႈၶဝ်ၼၼ်ႉပၼ်တီႈလုၵ်ႈလၢၼ်ၶဝ်သိုပ်ႇသိုပ်ႇတၢမ်တၢမ်ၵႂႃႇဢေႃႈ၊’ ဝႃႈၼင်ႇၼႆမႃးယဝ်ႉၸိူဝ်းၼၼ်ႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ ထႃႇဝရႃႉၽြႃး၊ ၵေႃႈပိၼ်ႇၸႂ်မၼ်းၸဝ်ႈသေယဝ်ႉ၊ဢမ်ႇႁႂ်ႈၽေးဢုပၢတ်ႈတူၵ်းႁွတ်ႈတူၵ်းထိုင်ၵႃႈၼိူဝ်ၵူၼ်းမၼ်းၸဝ်ႈဢေႃႈ။
မူဝ်းသေႇ၊ ပႃးဢဝ်ၶႅပ်းမၢၵ်ႇႁိၼ်သွင်ၶႅပ်းဢၼ်တႅမ်ႈပိင်းၺၢပ်ႈတြႃးၸဝ်ႈဝႆႉတင်းသွင်ၽၢႆႇသွင်ၼႃႈၼၼ်ႉသေလႄႈလူင်းလွႆမိူဝ်းၵႂႃႇဢေႃႈ။-
ၶႅပ်းမၢၵ်ႇႁိၼ်ၸိူဝ်းၼၼ်ႉပဵၼ်မၢၵ်ႇႁိၼ်ဢၼ်ၽြႃးပဵၼ်ၸဝ်ႈႁဵတ်းပဵၼ်သေယဝ်ႉ၊မၼ်းၸဝ်ႈတွင်ႈသႂ်ႇပိင်းၺၢပ်ႈတြႃးၸဝ်ႈတင်းလၢႆဝႆႉၵႃႈၼိူဝ်မၢၵ်ႇႁိၼ်ၼၼ်ႉဢေႃႈ။
ယေႃးသု၊ လႆႈငိၼ်းသဵင်ဢၼ်ၵူၼ်းတင်းလၢႆႁုၼ်ႈမေႃးယူႇၼၼ်ႉသေယဝ်ႉ၊လၢတ်ႈတီႈ မူဝ်းသေႇ၊ လႄႈဝႃႈ၊ “ၵဝ်ၶႃႈလႆႈငိၼ်းသဵင်ဢၼ်တိုၵ်းၵၼ်ယူႇၵႃႈတီႈပၢင်တပ်ႉၶႃႈဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ၶိုၼ်းလၢတ်ႈလႄႈဝႃႈ၊ “သဵင်ၼၼ်ႉၸိုင်၊ပဵၼ်သဵင်ဢၼ်ပႄႉသိုၵ်းလႄႈႁုၼ်ႈမေႃးဢမ်ႇၸႂ်ႈ။ ပဵၼ်သဵင်ဢၼ်သုမ်းသိုၵ်းလႄႈႁွင်ႉႁႆႈၵေႃႈဢမ်ႇၸႂ်ႈ။ ပဵၼ်သဵင်ႁဵတ်းၵႂၢမ်းဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ် မူဝ်းသေႇ၊ ႁွတ်ႈမႃးၸမ်ႁိမ်းပၢင်တပ်ႉလႄႈႁၼ်ႁုၼ်ႇႁၢင်ႈဝူဝ်းဢွၼ်ႇဢိၵ်ႇတင်းၵူၼ်းတင်းလၢႆၵႃႈဝႅၼ်ယူႇၼၼ်ႉၸိုင်၊မၼ်းၸႂ်မႆႈၶႂ်ႈၸႃႉၼႃႇလူင်လၢင်ဢေႃႈ။ မၼ်းဢဝ်ၶႅပ်းမၢၵ်ႇႁိၼ်ၸိူဝ်းၼၼ်ႉထိမ်ႈဢွၵ်ႇၵႂႃႇသေၵႃႈၼႂ်းမိုဝ်းမၼ်းလႄႈႁႂ်ႈတႅၵ်ႇပႅတ်ႈၵႃႈတီႈတိၼ်လွႆၼၼ်ႉသေဢေႃႈ။-
ဝူဝ်းဢွၼ်ႇဢၼ်ၶဝ်ႁဵတ်းၼၼ်ႉၵေႃႈမၼ်းဢဝ်ထိမ်ႈသႂ်ႇၵႃႈၼႂ်းၽႆးႁႂ်ႈၸိူမ်ႈပႅတ်ႈသေဢေႃႈ။ မၼ်းတမ်ၽွင်သေယဝ်ႉ၊ဢဝ်ဢွႆသႂ်ႇၵႃႈၼိူဝ်ၼမ်ႉလႄႈႁႂ်ႈၵူၼ်းမဵဝ်း ဢိသရေး၊ တင်းလၢႆၵိၼ်ဢေႃႈ။-
မၼ်းသမ်ႉထၢမ် ဢႃႇရုၼ်ႇ၊ လႄႈဝႃႈ၊ “ၵူၼ်းၸိူဝ်းၼႆႉလႆႈႁဵတ်းဢီႈသင်ၵႃႈတီႈမႂ်းထၢၼ်ႈပေႃးမႂ်းလႆႈႁဵတ်းဢပျတ်ႈဢၼ်ယႂ်ႇၼႃႇၼႆႉတူၵ်းႁွတ်ႈၵႃႈၼိူဝ်ၶဝ်၊” ဝႃႈၼင်ႇၼႆဢေႃႈ။
ဢႃႇရုၼ်ႇ၊ ၵေႃႈၶိုၼ်းလၢတ်ႈလႄႈဝႃႈ၊ “ယႃႇပေၸႂ်မႆႈၶႂ်ႈၸႃႉတီႈၵဝ်ၶႃႈသေၵမ်း။ ၸဝ်ႈႁဝ်းႁုလွင်ႈဢၼ်ၵူၼ်းၸိူဝ်းၼႆႉမီးၸႂ်ဢၼ်ၶႂ်ႈႁဵတ်းႁၢႆႉထၼ်ႇႁိုဝ်ၼၼ်ႉယူႇဢေႃႈ။-
ၶဝ်ဢွၼ်ၵၼ်လၢတ်ႈတီႈၵဝ်ၶႃႈလႄႈဝႃႈ၊ ‘ မူဝ်းသေႇ၊ ၵေႃႉဢၼ်ဢွၼ်ဢဝ်ႁဝ်းဢွၵ်ႇမိူင်း ဢေးၵျိပ်ႉ၊ မႃးၼၼ်ႉမၼ်းပဵၼ်ၸိူဝ်ႉၼင်ႇႁိုဝ်ၸိုင်၊ႁဝ်းၶႃႈဢမ်ႇႁုၶႃႈ။ ပိူဝ်ႈၼႆလႄႈႁဵတ်းၽြႃးပုၼ်ႈႁဝ်းၶႃႈဢၼ်တၵ်းဢွၼ်ႁူဝ်ႁဝ်းၶႃႈၵႂႃႇၼၼ်ႉသေၵမ်းၶႃႈ၊’ ဝႃႈၼင်ႇၼႆဢေႃႈ။-
ၵဝ်ၶႃႈၵေႃႈဝႃႈ၊ ‘ႁႂ်ႈၵေႃႉဢၼ်မီးၶမ်းၼၼ်ႉထွတ်ႇဢွၵ်ႇတႃႉ၊’ ဝႃႈၼႆလႄႈၶဝ်ဢွၼ်ၵၼ်ဢဝ်ၶမ်းပၼ်တီႈၵဝ်ၶႃႈဢေႃႈ။ ၵဝ်ၶႃႈဢဝ်သႂ်ႇၵႃႈၼႂ်းၽႆးလႄႈဝူဝ်းဢွၼ်ႇၼႆႉဢွၵ်ႇမႃးၶႃႈဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ႁၼ်လွင်ႈဢၼ် ဢႃႇရုၼ်ႇ၊ ႁဵတ်းႁႂ်ႈၵူၼ်းတင်းလၢႆဢုပ်ႉဢမ်ႇလႆႈထိင်းဢမ်ႇလႆႈ သေလႄႈၶဝ်ၵေႃႈဢွၼ်ၵၼ်ယွင်ႇမႃႈယူႇ၊ပဵၼ်လွင်ႈဢၼ်လီဢူၵ်းလီဢၢႆၽၢႆႇၼႃႈရၢၼ်ႇသူႇတင်းလၢႆၼၼ်ႉဢေႃႈ။-
ပိူဝ်ႈၼႆလႄႈမၼ်းၸုၵ်းၵႃႈတီႈၼႃႈၽၵ်းတူပၢင်တပ်ႉသေယဝ်ႉ၊ႁွင်ႉပၢဝ်ႇဝႃႈ၊ “ၽူႈလႂ်ယူႇၽၢႆႇ ထႃႇဝရႃႉၽြႃး၊ မႃးတီႈၵဝ်တႃႉ၊” ဝႃႈၼင်ႇၼႆဢေႃႈ။ မိူဝ်ႈၼၼ်ႉမဵဝ်းၸိူဝ်ႉၶိူဝ်း လေႇဝိ၊ တင်းသဵင်ႈတင်းလူင်ဢွၼ်ၵၼ်မႃးၸုတုမ်ၵၼ်တီႈမၼ်းဢေႃႈ။-
မၼ်းၵေႃႈလၢတ်ႈတီႈၶဝ်လႄႈဝႃႈ၊ “ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ၼၼ်ႉမီးဢမိင်ႉလႄႈဝႃႈၸမ်ႉ၊ ‘ႁႂ်ႈၵူၼ်းၵူႈၵေႃႉဢဝ်ပႃးလၢပ်ႇပႃးလႅဝ်းသေလႄႈပႆၽႃႇလတ်းပၢင်တပ်ႉၵႂႃႇတႄႇဢဝ်ၼႃႈၽၵ်းတူၼႃႈတပ်ႉၽၢႆႇၼႆႉၵႂႃႇသုတ်းၽၢႆႇပုၼ်ႉ၊ၵူႈၵေႃႉဢွၼ်ၵၼ်ၽၼ်းတၢႆပီႈၼွင်ႉၶဝ်၊ၵေႃႉသႄႈၶဝ်၊တင်းၵူၼ်းႁိူၼ်းၸမ်ၵၼ်တင်းၶဝ်ပႅတ်ႈတႃႉ၊’ ဝႃႈၼင်ႇၼႆဝႆႉယဝ်ႉ၊” ဝႃႈၼင်ႇၼႆဢေႃႈ။-
မဵဝ်းၸိူဝ်ႉၶိူဝ်း လေႇဝိ၊ ၸိူဝ်းၼၼ်ႉၵေႃႈဢွၼ်ၵၼ်ႁဵတ်းၸွမ်းလႄႈ၊ၼႂ်းဝၼ်းၼၼ်ႉၵူၼ်းသၢမ်ႁဵင်ၸမ်ၸမ်လႆႈတၢႆၵႂႃႇဢေႃႈ။-
မူဝ်းသေႇ၊ ၵေႃႈလၢတ်ႈတီႈမဵဝ်းၸိူဝ်ႉၶိူဝ်း လေႇဝိ၊ ၸိူဝ်းၼၼ်ႉလႄႈဝႃႈ၊ “ဝၼ်းမိူဝ်ႈၼႆႉသူဢဝ်တူဝ်သူသၢၵ်ႈၵၢပ်ႈႁႂ်ႈပဵၼ်ယဵၸ်ႈပရေႃးႁဵၵ်ႈ ဢၼ်ပွင်ႁဵတ်းၼႃႈၵၢၼ်တီႈ ထႃႇဝရႃႉၽြႃး၊ လူၺ်ႈတၢင်းဢၼ်သူဢဝ်တၢႆလုၵ်ႈလၢင်းသူ၊ပီႈၼွင်ႉသူၼၼ်ႉယဝ်ႉ။ ပိူဝ်ႈၼႆလႄႈ ထႃႇဝရႃႉၽြႃး၊ ဢဝ်တၢင်းလီမၢင်ႇၵလႃႇၸဝ်ႈၼၼ်ႉပၼ်တီႈသူယဝ်ႉဢေႃႈ၊” ဝႃႈၼင်ႇၼႆဢေႃႈ။
ထႅင်ႈဝၼ်းၼိုင်ႈၼၼ်ႉ မူဝ်းသေႇ၊ ၸင်ႇလၢတ်ႈတီႈၵူၼ်းတင်းလၢႆလႄႈဝႃႈ၊ “သူၽိတ်းပိူင်ႈလႄႈႁဵတ်းဢပျတ်ႈဢၼ်ယႂ်ႇၼႃႇလူင်လၢင်ယဝ်ႉ၊ၼႂ်းဝႃႈၼၼ်သေၵေႃႈ၊ၵမ်းၼႆႉ၊ၵဝ်တၵ်းၶိုၼ်းၶိုၼ်ႈၵႂႃႇၸူးၵႃႈတီႈ ထႃႇဝရႃႉၽြႃး၊ လႄႈ၊ၸၢင်ႈၶႄးၵဝ်တၵ်းတွင်းပၢၼ်ႇႁႂ်ႈဢပျတ်ႈသူလႆႈလွတ်ႈဢေႃႈ၊” ဝႃႈၼင်ႇၼႆဢေႃႈ။-
မူဝ်းသေႇ၊ ၸင်ႇၶိုၼ်းၶိုၼ်ႈၵႂႃႇၸူးၵႃႈတီႈ ထႃႇဝရႃႉၽြႃး၊ လႄႈလဝ်ႈလၢတ်ႈလႄႈဝႃႈ၊ “ဢူဝ်းၸဝ်ႈႁဝ်းတီႈၶႃႈ။ ၵူၼ်းၸိူဝ်းၼႆႉၽိတ်းပိူင်ႈလႄႈႁဵတ်းဢပျတ်ႈဢၼ်ယႂ်ႇၼႃႇလူင်လၢင်တီႈၶႃႈယဝ်ႉဢေႃႈ။ ၶဝ်ႁဵတ်းၽြႃးၶမ်းလႄႈဢွၼ်ၵၼ်ဝႆႈတီႈၶႃႈယဝ်ႉ။-
ၵူၺ်းၵႃႈ၊ပေႃးၸဝ်ႈႁဝ်းမီးဢလူဝ်ႇၶႂ်ႈပွႆႇလွတ်ႈဢပျတ်ႈၶဝ်ၸိုင်၊ၶႅၼ်းတေႃႈပွႆႇလွတ်ႈသေၵမ်းတီႈၶႃႈ။ ပေႃးဢမ်ႇၼၼ်ၸိုင်၊ၶႅၼ်းတေႃႈမွတ်ႇပႅတ်ႈၸိုဝ်ႈသဵင်ၶႃႈၸဝ်ႈသေၵႃႈၼႂ်းၸရၢင်းဢၼ်ၸဝ်ႈႁဝ်းတႅမ်ႈမၢႆဝႆႉၼၼ်ႉသေၵမ်းတီႈၶႃႈ၊ၶႃႈၸဝ်ႈတွင်းပၢၼ်ႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၵေႃႈလၢတ်ႈတီႈ မူဝ်းသေႇ၊ လႄႈဝႃႈ၊ “ၽူႈလႂ်သေဢမ်ႇဝႃႈ၊ၵေႃႉဢၼ်ၽိတ်းပိူင်ႈၵဝ်ၼၼ်ႉၸိုင်၊ၵဝ်တၵ်းမွတ်ႇပႅတ်ႈၸိုဝ်ႈသဵင်မၼ်းသေၵႃႈၼႂ်းၸရၢင်းၵဝ်ဢေႃႈ။-
တေႃႈလဵဝ်ၼႆႉ၊ၵႂႃႇလႄႈဢွၼ်ဢဝ်ၵူၼ်းတင်းလၢႆသူင်ႇၵႂႃႇၵႃႈတီႈဢၼ်ၵဝ်သင်ႇလၢတ်ႈဝႆႉၼၼ်ႉတႃႉ။ တမၢၼ်ႇၵၢင်ႁၢဝ်ၵဝ်တၵ်းဢွၼ်ႁူဝ်မႂ်းၵႂႃႇဢေႃႈ။ ၼႂ်းဝႃႈၼၼ်သေၵေႃႈ၊ၶိင်ႇၵႃႇလႃႉဢၼ်ၵဝ်တၵ်းပၼ်တၢမ်ႇတီႈဢပျတ်ႈၵူၼ်းၸိူဝ်းၼႆႉၼၼ်ႉတၵ်းမႃးယူႇဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ထႃႇဝရႃႉၽြႃး၊ ႁႂ်ႈၽေးဢုပၢတ်ႈတူၵ်းႁွတ်ႈၵႃႈၼိူဝ်ၵူၼ်းတင်းလၢႆၵွပ်ႈပိူဝ်ႈၶဝ်ႁႂ်ႈ ဢႃႇရုၼ်ႇ၊ ႁဵတ်းဝူဝ်းၶမ်းၼၼ်ႉဢေႃႈ။
ထႃႇဝရႃႉၽြႃး၊ ပၼ်ဢမိင်ႉတီႈ မူဝ်းသေႇ၊ လႄႈဝႃႈ၊ “ၸႃႉၸဵမ်မႂ်းလႄႈၵူၼ်းၸိူဝ်းဢၼ်မႂ်းဢွၼ်ဢွၵ်ႇသေမိူင်း ဢေးၵျိပ်ႉ၊ မႃးတင်းလၢႆၼၼ်ႉတၵ်းလႆႈဢွၵ်ႇသေၵႃႈတီႈၼႆႈၵႂႃႇၸူးမိူင်းဢၼ်ၵဝ်ဝႆႉၵတိဝႃႈ၊တေပၼ်တီႈ ဢႃႇပြႃႇႁၢမ်ႇ၊ ဢိၸၢၵ်ႈ၊ ဢိၵ်ႇတင်း ယႃႇၵုပ်ႈ၊ ဢိၵ်ႇတင်းၸိူဝ်ႉၶိူဝ်းၶဝ်ၼၼ်ႉဢေႃႈ။-
ၵဝ်တၵ်းပွႆႇၸႂ်ႉတမၢၼ်ႇၵၢင်ႁၢဝ်ၵဝ်ဢွၼ်ႁူဝ်မႂ်းၵႂႃႇလႄႈ၊ၵဝ်တၵ်းႁေႃႈၵူၼ်းမဵဝ်း ၶႃႇၼၼိ၊ ၵူၼ်းမဵဝ်း ဢႃႇမေႃးရိ၊ ၵူၼ်းမဵဝ်း ႁိတ်ႉတိ၊ ၵူၼ်းမဵဝ်း ၽေႇရၸိ၊ ၵူၼ်းမဵဝ်း ႁိဝိ၊ တင်းၵူၼ်းမဵဝ်း ယေႇပုသိ၊ ၸိူဝ်းၼၼ်ႉဢွၵ်ႇပႅတ်ႈဢေႃႈ။-
ၶိုၼ်ႈၵႂႃႇၵႃႈတီႈမိူင်းဢၼ်မၢၵ်ႈမီးလီပဵၼ်လႄႈၽုၼ်ႇလီလိၼ်လီ ၼၼ်ႉတႃႉ။ တူဝ်ၵဝ်တႄႉတေဢမ်ႇၵႂႃႇၸွမ်းသူယဝ်ႉ။ ၵွပ်ႈပိူဝ်ႈသူပဵၼ်မဵဝ်းၵူၼ်းဢၼ်ဝႃႈယၢပ်ႇၶေႃးၶႅင်လႄႈ၊ၵူဝ်ၵဝ်လႆႈယႃႉၽဵဝ်ႈသူပႅတ်ႈယၢမ်းမိူဝ်ႈဢၼ်သူယင်းၵႂႃႇယူႇၼႂ်းၶၢဝ်းတၢင်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၵူၼ်းတင်းလၢႆငိၼ်းသဵင်ၶၢဝ်ႇဢၼ်ဢမ်ႇလီၼၼ်ႉၸိုင်၊ၶဝ်ဢွၼ်ၵၼ်ၶၢင်းၶီၶၢင်းၽၢၼ်ယူႇ၊ယင်းဢမ်ႇႁၢင်ႈၶိူင်ႈႁၢင်ႈၽၢင်သေၵေႃႉသေၵူၼ်းလႄႈယူႇဢေႃႈ။-
လွင်ႈမၼ်းၸမ်ႉ၊ ထႃႇဝရႃႉၽြႃး၊ ပၼ်ဢမိင်ႉတီႈ မူဝ်းသေႇ၊ ႁႂ်ႈမၼ်းသင်ႇလၢတ်ႈၶဝ်လႄႈဝႃႈ၊ “သူၼႆႉပဵၼ်မဵဝ်းၵူၼ်းဢၼ်ဝႃႈယၢပ်ႇၶေႃးၶႅင်ဢေႃႈ။ ပေႃးၵဝ်ၵႂႃႇၸွမ်းသူၸူဝ်ႈၶၢဝ်းၵမ်းဢွၼ်ႇၼိုင်ႈၵူၺ်းၵေႃႈၵဝ်တၵ်းယႃႉၽဵဝ်ႈသူပႅတ်ႈဢေႃႈ။ ပိူဝ်ႈၼႆလႄႈလွင်ႈၼင်ႇႁိုဝ်ၵဝ်တၵ်းႁုလွင်ႈဢၼ်ၵဝ်တၵ်းလႆႈႁဵတ်းၸိူဝ်ႉၼင်ႇႁိုဝ်တီႈသူၼၼ်ႉၸိုင်၊ပူတ်းထွတ်ႇပႅတ်ႈၶိူင်ႈတိုဝ်းသူတႃႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈတႄႇဢဝ်ၸဵမ်မိူဝ်ႈၶဝ်ဢွၵ်ႇသေၵႃႈတီႈလွႆ သိၼႃႉ၊ ၵႂႃႇၼၼ်ႉၵူၼ်းမဵဝ်း ဢိသရေး၊ ၶဝ်ဢမ်ႇႁွႆႈတိုဝ်းၶိူင်ႈၶူဝ်းသႅင်ၶူဝ်းၶမ်းၶဝ်ယဝ်ႉဢေႃႈ။
မိူဝ်ႈလႂ်သေဢမ်ႇဝႃႈ၊မိူဝ်ႈဢၼ်ၵူၼ်းမဵဝ်း ဢိသရေး၊ ၶဝ်ၶျႃးပၢင်တပ်ႉၼၼ်ႉ မူဝ်းသေႇ၊ ဢဝ်သုမ်ႉထဵင်ၸဝ်ႈၵႂႃႇတင်ႈၵႃႈတီႈၼွၵ်ႈပၢင်တပ်ႉတီႈဢၼ်ၵႆၵႆၼၼ်ႉဢေႃႈ။ ဢၼ်ၼၼ်ႉၶဝ်ႁွင်ႉႁဵၵ်ႈၸိုဝ်ႈမၼ်းဝႃႈ၊သုမ်ႉထဵင်ၸဝ်ႈတီႈဢၼ်ၸုတုမ်ၵၼ်ဝႃႈၼႆလႄႈ၊ပေႃးသေၵေႃႉသေၵူၼ်းမီးဢလူဝ်ႇၶႂ်ႈႁႃ ထႃႇဝရႃႉၽြႃး၊ ၸိုင်၊ၶဝ်ဢွၼ်ၵၼ်ၵႂႃႇၵႃႈတီႈၼၼ်ႈဢေႃႈ။-
မိူဝ်ႈလႂ်သေဢမ်ႇဝႃႈ၊ပေႃး မူဝ်းသေႇ၊ ဢွၵ်ႇၵႂႃႇၸူးသုမ်ႉထဵင်ၸဝ်ႈၼၼ်ႉၸိုင်၊ၵူၼ်းတင်းသဵင်ႈတင်းလူင်ဢွၼ်ၵၼ်ၸုၵ်းယူႇၵႃႈတီႈၼႃႈၽၵ်းတူသုမ်ႉထဵင်ၶဝ်ႁင်းၽႂ်ႁင်းမၼ်းလႄႈ၊တူၺ်းၸွမ်းလင် မူဝ်းသေႇ၊ တေႃႇထိုင်ႁွတ်ႈမၼ်းၶဝ်ႈသုမ်ႉထဵင်ၸဝ်ႈၵႂႃႇဢေႃႈ။-
ပေႃးဝႃႈ၊ မူဝ်းသေႇ၊ ၶဝ်ႈၵႃႈၼႂ်းသုမ်ႉထဵင်ၸဝ်ႈယဝ်ႉၸိုင်၊သဝ်မွၵ်ႇၵုမ်ႈလူင်းမႃးပူၵ်းတင်ႈယူႇၵႃႈတီႈၽၵ်းတူသုမ်ႉထဵင်ၸဝ်ႈၼၼ်ႉလႄႈ ထႃႇဝရႃႉၽြႃး၊ လၢတ်ႈတေႃႇ မူဝ်းသေႇ၊ ၵႃႈၼႂ်းမွၵ်ႇၵုမ်ႈဢေႃႈ။-
မိူဝ်ႈဢၼ်ၵူၼ်းတင်းသဵင်ႈတင်းလူင်ႁၼ်သဝ်မွၵ်ႇၵုမ်ႈတင်ႈယူႇၵႃႈတီႈၽၵ်းတူသုမ်ႉထဵင်ၸဝ်ႈၼၼ်ႉၸိုင်၊ၶဝ်ဢွၼ်ၵၼ်ၵူမ်ႈႁူဝ်လႄႈဝႆႈသႃၵူဝ်းၵႂၢႆႇယူႇၵႃႈတီႈသုမ်ႉထဵင်ၶဝ်ၼၼ်ႉႁင်းၽႂ်ႁင်းမၼ်းဢေႃႈ။-
ထႃႇဝရႃႉၽြႃး၊ လၢတ်ႈတေႃႇ မူဝ်းသေႇ၊ ၼႃႈတေႃႇၼႃႈၵၼ်၊မိူၼ်ၸိူဝ်ႉၼင်ႇဢၼ်ၵူၼ်းၵေႃႉၼိုင်ႈလၢတ်ႈတေႃႇၵေႃႉသႄႈမၼ်းၼၼ်ႉဢေႃႈ။ လိုၼ်းၼၼ်ႉၸင်ႇ မူဝ်းသေႇ၊ ၶိုၼ်းမႃးၵႃႈတီႈပၢင်တပ်ႉဢေႃႈ။ ၵူၺ်းၵႃႈ၊ၵေႃႉဢၼ်ၸွႆႈဢၼ်ထႅမ်မၼ်းဢၼ်ပဵၼ် ယေႃးသု၊ လုၵ်ႈၸၢႆး ၼုၼ်ႇ၊ ဢၼ်ပဵၼ်ၵူၼ်းၼုမ်ႇၵူၼ်းၵမ်ၼၼ်ႉယင်းဢမ်ႇဢွၵ်ႇသေၵႃႈၼႂ်းသုမ်ႉထဵင်ၸဝ်ႈၼၼ်ႉလႄႈယူႇဢေႃႈ။
မူဝ်းသေႇ၊ လဝ်ႈလၢတ်ႈတီႈ ထႃႇဝရႃႉၽြႃး၊ လႄႈဝႃႈ၊ “ၸဝ်ႈႁဝ်းမီးဢမိင်ႉတီႈၶႃႈၸဝ်ႈလႄႈဝႃႈ၊ ‘ဢွၼ်ႁူဝ်ၵူၼ်းၸိူဝ်းၼႆႉၵႂႃႇတႃႉ၊’ ဝႃႈၼႆၸႂ်ႈတႄႉယူႇတီႈၶႃႈဢေႃႈ။ ၵူၺ်းၵႃႈ၊ၸဝ်ႈႁဝ်းတၵ်းပွႆႇၸႂ်ႉၽူႈလႂ်ၵႂႃႇလူၺ်ႈၵၼ်တင်းၶႃႈၸဝ်ႈၼၼ်ႉၸဝ်ႈႁဝ်းယင်းဢမ်ႇႁႂ်ႈၶႃႈၸဝ်ႈလႆႈႁုလူင်ပႄႇ။ ၸဝ်ႈႁဝ်းသမ်ႉဝႃႈ၊ ‘ၵဝ်ႁုၸၵ်းမႂ်းဢေႃႈ။ မႂ်းပဵၼ်ၵေႃႉဢၼ်ၵဝ်ၵျိူၵ်ႈၸႂ်ထုၵ်ႇၸႂ်ဢေႃႈ၊’ ဝႃႈၼင်ႇၼႆယဝ်ႉတီႈၶႃႈဢေႃႈ။-
ပေႃးၸႂ်ႈၸိူဝ်ႉၼင်ႇၼႆၸိုင်၊ၶႅၼ်းတေႃႈမွၵ်ႇလၢတ်ႈၼႄလွင်ႈတၢင်းဢၼ်ၸဝ်ႈႁဝ်းၶိုင်ပွင်ဝႆႉၸိူဝ်ႉၼင်ႇႁိုဝ်ၼၼ်ႉၶႃႈၸဝ်ႈတၵ်းလႆႈပွင်ႁဵတ်းပွင်ထၢမ်းၼႃႈၵၢၼ်တၢင်းႁဵတ်းၸဝ်ႈႁဝ်းလႄႈ၊သိုပ်ႇႁဵတ်းႁႂ်ႈထုၵ်ႇၸႂ်ၵျိူၵ်ႈၸႂ်ၸဝ်ႈႁဝ်းသေၵမ်းတီႈၶႃႈ။ ၶႅၼ်းတေႃႈၶႆႈၸႂ်ဝူၼ်ႉၸႂ်လူၺ်ႈလွင်ႈဢၼ်ၸဝ်ႈႁဝ်းလိူၵ်ႈဢဝ်ၵူၼ်းမဵဝ်းၼႆႉႁႂ်ႈလႆႈပဵၼ်ၵူၼ်းၸဝ်ႈႁဝ်းၼၼ်ႉသေၵမ်းတီႈၶႃႈ၊ၶႃႈၸဝ်ႈတွင်းပၢၼ်ႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၵေႃႈလၢတ်ႈလႄႈဝႃႈ၊ “တူဝ်ၵဝ်တၵ်းၵႂႃႇလူၺ်ႈၵၼ်တင်းမႂ်းလႄႈၵဝ်တၵ်းပၼ်တၢင်းဢၼ်ပႄႉၼႅင်ႇတီႈမႂ်းဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈလၢတ်ႈလႄႈဝႃႈ၊ “ပေႃးတူဝ်ၸဝ်ႈႁဝ်းဢမ်ႇၵႂႃႇၸွမ်းၸိုင်၊ၶႅၼ်းတေႃႈယႃႇပေႁႂ်ႈၶႃႈၸဝ်ႈႁဝ်းၶဝ်ဢွၵ်ႇသေၵႃႈတီႈၼႆႈၵႂႃႇသေၵမ်းတီႈၶႃႈ။-
ပေႃးတူဝ်ၸဝ်ႈႁဝ်းဢမ်ႇၵႂႃႇၸွမ်းၸိုင်၊ၽူႈလႂ်တၵ်းႁုလွင်ႈဢၼ်ၸဝ်ႈႁဝ်းထုၵ်ႇၸႂ်ၵျိူၵ်ႈၸႂ်ၶႃႈၸဝ်ႈတင်းၵူၼ်းၸဝ်ႈႁဝ်းတင်းလၢႆလႆႈၸိူဝ်ႉၼင်ႇႁိုဝ်တီႈၶႃႈ။ ပေႃးၸဝ်ႈႁဝ်းၵႂႃႇၸွမ်းၸိုင်၊ၶႃႈၸဝ်ႈဢိၵ်ႇတင်းၵူၼ်းၸဝ်ႈႁဝ်းၸိူဝ်းၼႆႉတၵ်းလႆႈပႅၵ်ႇပိူင်ႈၵၼ်တင်းၵူၼ်းၵႃႈဢၼ်မီးၵႃႈၼိူဝ်လိၼ်မိူင်းၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉလၢတ်ႈတီႈ မူဝ်းသေႇ၊ လႄႈဝႃႈ၊ “ၵဝ်တၵ်းႁဵတ်းၸွမ်းၵႃႈၼင်ႇဢၼ်မႂ်းလဝ်ႈလၢတ်ႈၼၼ်ႉဢေႃႈ။ လွင်ႈမၼ်းၸမ်ႉ၊ၵဝ်ႁုၸၵ်းမၵ်းၸိုဝ်ႈမႂ်းလႄႈမႂ်းပဵၼ်ၵေႃႉဢၼ်ၵဝ်ထုၵ်ႇၸႂ်ၵျိူၵ်ႈၸႂ်ဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈလဝ်ႈယွၼ်းလႄႈဝႃႈ၊ “ၶႅၼ်းတေႃႈပၼ်ႁႂ်ႈၶႃႈၸဝ်ႈလႆႈႁၼ်မုၼ်ၽုင်းႁိူဝ်ႈႁိူင်းၸဝ်ႈႁဝ်းၼၼ်ႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၶိုၼ်းလၢတ်ႈလႄႈဝႃႈ၊ “ၵဝ်တၵ်းႁႂ်ႈတၢင်းဢၼ်လီဢၼ်ငၢမ်းၵဝ်ၵႃႈမီးတင်းသဵင်ႈတင်းလူင်ၵၢႆၽၢႆႇၼႃႈမႂ်းၵႂႃႇသေလႄႈ၊ၵဝ်တၵ်းပၢဝ်ႇသေႃႇၸိုဝ်ႈသဵင်ၵဝ် ‘ ၸဝ်ႈထႃႇဝရႃႉၽြႃး၊ ’ ဢေႃႈ။ ၵဝ်တၵ်းႁဵတ်းၵျေးၸူးတီႈၵေႃႉဢၼ်ၵဝ်ၶႂ်ႈႁဵတ်းၼၼ်ႉဢေႃႈ။ ၵဝ်တၵ်းဢဵတ်းလူတီႈၵေႃႉဢၼ်ၵဝ်ၶႂ်ႈဢဵတ်းလူၼၼ်ႉဢေႃႈ။-
ၵဝ်တၵ်းဢမ်ႇႁႂ်ႈမႂ်းလႆႈႁၼ်ၼႃႈၵဝ်။ လွင်ႈမၼ်းၸမ်ႉ၊ၵေႃႉဢၼ်လႆႈႁၼ်ၼႃႈၵဝ်လႄႈဢသၢၵ်ႈလိပ်းၼၼ်ႉဢမ်ႇမီးသေၵေႃႉသေၵူၼ်း။-
ၵူၺ်းၵႃႈ၊တီႈႁိမ်းၵဝ်ၼႆႉမီးတီႈ၊တီႈၼိုင်ႈလႄႈၵႃႈတီႈၼၼ်ႈမႂ်းတၵ်းလႆႈၸုၵ်းယူႇၵႃႈၼိူဝ်ႁိၼ်ၽႃဢေႃႈ။-
ယၢမ်းမိူဝ်ႈဢၼ်မုၼ်ၽုင်းၵဝ်ယင်းတိုၵ်ႉၵၢႆၵႂႃႇၼၼ်ႉၵဝ်တၵ်းဢဝ်မႂ်းသႂ်ႇဝႆႉ၊ၵႃႈၼႂ်းငၢပ်ႇၽႃႁိၼ်လႄႈဢဝ်မိုဝ်းၵဝ်ႁူမ်ႇမႂ်းဝႆႉ၊တေႃႇထိုင်ႁွတ်ႈၵဝ်ၵၢႆပူၼ်ႉမႂ်းၵႂႃႇၼၼ်ႉဢေႃႈ။-
ၵမ်းၼၼ်ႉ၊ၵဝ်တၵ်းယိုတ်းဢဝ်မိုဝ်းၵဝ်ၶိုၼ်းလႄႈမႂ်းတၵ်းလႆႈႁၼ်လင်ၵဝ်ၵူၺ်းဢေႃႈ၊ၼႃႈၵဝ်ၸိုင်၊မႂ်းဢမ်ႇလႆႈႁၼ်၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ လႄႈဝႃႈ၊ “ထၢၵ်ႇႁဵတ်းၶႅပ်းမၢၵ်ႇႁိၼ်သွင်ၽႅၼ်ႇႁႂ်ႈမိူၼ်ၵၼ်တင်းၶႅပ်းမၢၵ်ႇႁိၼ်ၵမ်းဢွၼ်တၢင်းသွင်ၽႅၼ်ႇၼၼ်ႉတႃႉ။ ၵႃႈၼိူဝ်ၼၼ်ႉၵဝ်တၵ်းတႅမ်ႈၵႂၢမ်းဢၼ်ပႃးၵႃႈတီႈၶႅပ်းမၢၵ်ႇႁိၼ်ၵမ်းဢွၼ်တၢင်းဢၼ်မႂ်းဢဝ်တႅၵ်ႇပႅတ်ႈယဝ်ႉၼၼ်ႉဢေႃႈ။-
မႄးႁႅၼ်းတူဝ်မႂ်းႁႂ်ႈတၼ်းဝႆႉပုၼ်ႈမိူဝ်ႈၽုၵ်ႈၵၢင်ၼႂ်လႄႈ၊ၶိင်ႇၵၢင်ၼႂ်ၼၼ်ႉမႂ်းတၵ်းလႆႈၶိုၼ်ႈလွႆ သိၼႃႉ၊ သေယဝ်ႉ၊ၶဝ်ႈမႃးၵႃႈတီႈၽၢႆႇၼႃႈၵဝ်ၵႃႈၼိူဝ်ပၢႆၸိၵ်းလွႆၼၼ်ႉတႃႉ။-
ၽူႈလႂ်ၵေႃႈတေဢမ်ႇလႆႈၶိုၼ်ႈမႃးလူၺ်ႈၵၼ်တင်းမႂ်း။ တေဢမ်ႇႁႂ်ႈလႆႈႁၼ်ၵူၼ်းသေၵေႃႉသေၵူၼ်းၵႃႈၼိူဝ်လွႆၼႆႉသေတီႈသေလႅၼ်။ တေဢမ်ႇလႆႈလဵင်ႉသူဝ်းလဵင်ႉဝူဝ်းၵႃႈတီႈႁိမ်းတိၼ်လွႆၼႆႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ မူဝ်းသေႇ၊ ၵေႃႈထၢၵ်ႇႁဵတ်းၶႅပ်းမၢၵ်ႇႁိၼ်သွင်ၽႅၼ်ႇဢၼ်မိူၼ်ၵၼ်တင်းၶႅပ်းမၢၵ်ႇႁိၼ်ၵမ်းဢွၼ်တၢင်းၼၼ်ႉသေယဝ်ႉ၊မၼ်းလုၵ်ႉၵၢင်ၼႂ်ၸဝ်ႉၸဝ်ႉ မႅၵ်ႇၶႅပ်းမၢၵ်ႇႁိၼ်သွင်ၽႅၼ်ႇၼၼ်ႉၶိုၼ်ႈလွႆ သိၼႃႉ၊ ၵႂႃႇ၊ၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉၼၼ်ႉဢေႃႈ။
ထႃႇဝရႃႉၽြႃး၊ ယူႇၵႃႈၼႂ်းမွၵ်ႇၵုမ်ႈသေလႄႈၵျွလူင်းမႃးၸုၵ်းယူႇၵႃႈႁိမ်းမၼ်းၵႃႈတီႈၼၼ်ႈယူႇ၊ပၢဝ်ႇသေႃႇၼႃႇမႃႉၸိုဝ်ႈသဵင်မူတ်းၸၢင်ႇ ၸဝ်ႈထႃႇဝရႃႉၽြႃး၊ ယူႇဢေႃႈ။-
ထႃႇဝရႃႉၽြႃး၊ ၵၢႆၽၢႆႇၼႃႈမၼ်းၵႂႃႇလႄႈပၢဝ်ႇသေႃႇဝႃႈ၊ “ ထႃႇဝရႃႉၽြႃး၊ထႃႇဝရႃႉၽြႃး၊ ၽြႃးပဵၼ်ၸဝ်ႈဢၼ်ပျေႉၸုမ်ႇတဵမ်ဝႆႉတင်းမႅတ်ႈတႃႇၵရုၼႃႇဢိၵ်ႇတင်းတၢင်းဢၼ်ဢဵတ်းလူ၊ၸဝ်ႈဢၼ်ဢမ်ႇသူႈဢွၵ်ႇတေႃးသႃႉငၢႆႈငၢႆႈလႄႈၸၢင်ႈၼႄတၢင်းႁၵ်ႉမႅတ်ႈတႃႇဢိၵ်ႇတင်းတၢင်းဢၼ်ပႂ်ႉသဵတ်ႈၸႃႇဢေႃႈ။-
ၵဝ်ပႂ်ႉၵတိၵဝ်တီႈၵူၼ်းပဵၼ်မိုၼ်ႇပဵၼ်သႅၼ်လႄႈသမ်ႉၸၢင်ႈပွႆႇလွတ်ႈတၢင်းဢၼ်ၵမ်ၵျၢင်ႉဢၼ်ႁၢႆႉဢၼ်မိူၵ်ႈဢိၵ်ႇတင်းဢပျတ်ႈဢေႃႈ။ ၵူၺ်းၵႃႈ၊ပွႆႇလွတ်ႈလၢႆလၢႆလွၵ်ႇလွၵ်ႇဢမ်ႇၸႂ်ႈ။ ႁႂ်ႈတၢမ်ႇဢပျတ်ႈဢၼ်ၵဝ်ပၼ်တီႈပေႃႈၶဝ်ၼၼ်ႉသိုပ်ႇၵႂႃႇတီႈၸူဝ်ႈလုၵ်ႈပၢၼ်လၢၼ်ၶဝ်တေႃႇထိုင်ႁွတ်ႈသၢမ်သိုပ်ႇသီႇသိုပ်ႇဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈႁိပ်ႈၼႅတ်ႈၶုပ်ႉမူပ်ႇၵႃႈၼိူဝ်လိၼ်သေလႄႈဝႆႈသႃၵူဝ်းၵႂၢႆႇယူႇဢေႃႈ။-
မၼ်းလဝ်ႈလၢတ်ႈလႄႈဝႃႈ၊ “ဢူဝ်း၊ၸဝ်ႈၽြႃးတီႈၶႃႈ။ ပေႃးၸဝ်ႈႁဝ်းထုၵ်ႇၸႂ်ၵျိူၵ်ႈၸႂ်ၶႃႈၸဝ်ႈတႄႉၸိုင်၊ၶႅၼ်းတေႃႈၵႂႃႇၸွမ်းၶႃႈၸဝ်ႈႁဝ်းၶဝ်သေၵမ်းတီႈၶႃႈ။ ၶႃႈၸဝ်ႈတွင်းပၢၼ်ႇတီႈၶႃႈဢေႃႈ။ ၵူၼ်းၸိူဝ်းၼႆႉၸႂ်တိုဝ်ၸႂ်တၼ်တႄႉတီႈၶႃႈဢေႃႈ။ ၵူၺ်းၵႃႈ၊ၶႅၼ်းတေႃႈပွႆႇလွတ်ႈတၢင်းဢၼ်ၶႃႈၸဝ်ႈႁဝ်းၶဝ်ႁဵတ်းႁၢႆႉႁဵတ်းမိူၵ်ႈၼႆႉဢိၵ်ႇတင်းဢပျတ်ႈၶႃႈၸဝ်ႈႁဝ်းၶဝ်သေယဝ်ႉ၊ႁပ်ႉၶၢမ်ႇဢဝ်ၶႃႈၸဝ်ႈႁဝ်းၶဝ်ပဵၼ်ၵူၼ်းၸဝ်ႈႁဝ်းသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ လၢတ်ႈတီႈ မူဝ်းသေႇ လႄႈဝႃႈ၊ “ၵမ်းၼႆႉၵဝ်ႁဵတ်းပတိၺိၺ်ႇဢေႃႈ။ ၵဝ်တၵ်းႁဵတ်းလွင်ႈတၢင်းဢၼ်လီဢၢမ်းတင်းလၢႆ၊မဵဝ်းဢၼ်ဢမ်ႇတွၼ်ႉႁဵတ်းၵႃႈၼႂ်းမဵဝ်းၵူၼ်းၵႃႈၼိူဝ်လိၼ်မိူင်းၼႆႉသေပွၵ်ႈၼၼ်ႉၵႃႈတီႈၽၢႆႇၼႃႈၵူၼ်းမဵဝ်းမႂ်းတင်းသဵင်ႈတင်းလူင်ဢေႃႈ။ ၵူၼ်းတင်းသဵင်ႈတင်းလူင်တၵ်းလႆႈႁၼ်လွင်ႈဢၼ်ယႂ်ႇမျၢတ်ႈဢၼ်ၵဝ် ထႃႇဝရႃႉၽြႃး၊ တၵ်းႁဵတ်းၼၼ်ႉဢေႃႈ။ လွင်ႈမၼ်းၸမ်ႉ၊လွင်ႈတၢင်းဢၼ်ၵဝ်တၵ်းႁဵတ်းပုၼ်ႈသူၼၼ်ႉပဵၼ်တၢင်းဢၼ်လီၵူဝ်လီႁႄဢေႃႈ။-
ပႂ်ႉၵမ်ပႂ်ႉၸွမ်းပိင်းၺၢပ်ႈတြႃး၊ဢၼ်ၵဝ်တၵ်းပၼ်သူဝၼ်းမိူဝ်ႈၼႆႉၼၼ်ႉတႃႉ။ ၵဝ်တၵ်းႁေႃႈၵူၼ်းမဵဝ်း ဢႃႇမေႃးရိ၊ ၵူၼ်းမဵဝ်း ၶႃႇၼၼိ၊ ၵူၼ်းမဵဝ်း ႁိတ်ႉတိ၊ ၵူၼ်းမဵဝ်း ၽေႇရၸိ၊ ၵူၼ်းမဵဝ်း ႁိဝိ၊ ၵူၼ်းမဵဝ်း ယေႇပုသိ၊ ၸိူဝ်းၼၼ်ႉဢွၵ်ႇသေၵႃႈတီႈၽၢႆႇၼႃႈသူဢေႃႈ။-
ယႃႇပေႁဵတ်းတၢင်းဢၼ်မိုတ်ႈၵိုဝ်းၵၼ်တင်းၵူၼ်းဝၢၼ်ႈၵူၼ်းမိူင်းတီႈဢၼ်သူၵႂႃႇယူႇၼၼ်ႉ။ မၼ်းၸၢင်ႈပဵၼ်တူင်ႇႁႅဝ်ႉတူင်ႇၶိုမ်းတီႈဢၼ်သူတၵ်းၶွင်ႈတၵ်းၶမ်ဢေႃႈ။-
သူတၵ်းလႆႈယႃႉၽဵဝ်ႈပႅတ်ႈၶဵင်ႇၽီၶဝ်ဢိၵ်ႇတင်းသဝ်မၢင်ႇၵလႃႇၶဝ်လႄႈ ထုပ်ႉလႅဝ်ပႅတ်ႈသဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ ၶဝ်ၼၼ်ႉဢေႃႈ။
“တၵ်းဢမ်ႇလႆႈဝႆႈၽြႃးတၢင်ႇသူႇတၢင်ႇပႃး။ လွင်ႈမၼ်းၸမ်ႉ၊ၵဝ် ထႃႇဝရႃႉၽြႃး၊ ပဵၼ်ၸဝ်ႈဢၼ်ၶႅၼ်သူဝႆႉပုၼ်ႈၵဝ်။-
ယႃႇပေႁဵတ်းမိၵ်ႈသႁႃႇယႃႉလူၺ်ႈၵၼ်တင်းၵူၼ်းဝၢၼ်ႈၵူၼ်းမိူင်းၼၼ်ႉ။ ၵူဝ်သူၵိၼ်မႅၼ်ႈတၢင်းၵိၼ်တၢင်းၶူပ်းဢၼ်ၶဝ်သၢၵ်ႈလူႇၽြႃးတင်းလၢႆၶဝ်၊မိူဝ်ႈဢၼ်သူလႆႈၶၢမ်ႇတၢင်းဢၼ်ၽိတ်ႈပၢင်းႁႂ်ႈၶဝ်ႈပွႆးၶဝ်ဢၼ်ၶဝ်ဝႆႈၽြႃးၶဝ်လႄႈႁဵတ်းတၢင်းလူႇတီႈၽြႃးၶဝ်ၸိူဝ်းၼၼ်ႉဢေႃႈ။-
လုၵ်ႈၸၢႆးသူသမ်ႉတၵ်းတႄႇၼႃႈႁိူၼ်းႁူမ်ႈၵၼ်တင်းလုၵ်ႈယိင်းၶဝ်ၸိူဝ်းၼၼ်ႉလႄႈ၊ၵူဝ်လုၵ်ႈယိင်းၶဝ်ၸိူဝ်းၼၼ်ႉတၵ်းႁဵတ်းႁႂ်ႈလုၵ်ႈၸၢႆးသူတင်းလၢႆလႆႈလွင်ႈၸွမ်းၵႂႃႇၼႂ်းတၢင်းဢၼ်ဝႆႈၽြႃးၶဝ်သေယဝ်ႉ၊လုၵ်ႈၸၢႆးသူၸိူဝ်းၼၼ်ႉတၵ်းဢမ်ႇပႂ်ႉသဵတ်ႈၸႃႇတေႃႇၵဝ်ဢေႃႈ။
“တေဢမ်ႇလႆႈလေႃႇႁဵတ်းႁၢင်ႈၽြႃးလႄႈဝႆႈသႃၵူဝ်းၵႂၢႆႇလႃးလႃး။
“သူတၵ်းလႆႈပႂ်ႉလႆႈႁဵတ်းပွႆးၵိၼ်ၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈၼၼ်ႉဢေႃႈ။ ၸဵတ်းဝၼ်းတဵမ်တဵမ်သူတၵ်းလႆႈၵိၼ်ၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈၸွမ်းၵႃႈၼင်ႇဢၼ်ၵဝ်သင်ႇလၢတ်ႈဝႆႉယဝ်ႉၼၼ်ႉ၊ၼႂ်းဝၼ်းဢၼ်ၵဝ်မၵ်းၶၢၼ်းဝႆႉၼႂ်းလိူၼ် ဢပိပႃႉ၊ ၼၼ်ႉဢေႃႈ။ လွင်ႈမၼ်းၸမ်ႉ၊ၼႂ်းလိူၼ်ၼၼ်ႉသူဢွၵ်ႇသေမိူင်း ဢေးၵျိပ်ႉ၊ မႃးဢေႃႈ။
“ၵႃႈဢၼ်ပဵၼ်လုၵ်ႈၸၢႆးတူၼ်ႈ၊ဢိၵ်ႇတင်းသတ်းဢၼ်ပဵၼ်တူဝ်ပေႃႈဢၼ်ၵိူတ်ႇဢွၼ်တၢင်းပိူၼ်ႈၼၼ်ႉတင်းသဵင်ႈတင်းလူင်ပဵၼ်ဢုၵ်ႉၸႃႇၵဝ်ဢေႃႈ။-
ၵူၺ်းၵႃႈ၊မႃႉလီႈပေႃႈဢၼ်ပဵၼ်လုၵ်ႈတူၼ်ႈၼၼ်ႉတၵ်းလႆႈဢဝ်သူဝ်းပေႃႈဢွၼ်ႇၶိုၼ်းသိုဝ်ႉဢဝ်ဢေႃႈ။ ပေႃးဢမ်ႇၶိုၼ်းသိုဝ်ႉဢဝ်ၸိုင်၊ႁၵ်းၶေႃးမၼ်းပႅတ်ႈတႃႉ။ ၵႃႈဢၼ်ပဵၼ်လုၵ်ႈၸၢႆးတူၼ်ႈသူၸမ်ႉ၊တၵ်းလႆႈၶိုၼ်းသိုဝ်ႉဢဝ်ၵူႈၵေႃႉဢေႃႈ။ “ၽူႈလႂ်သေဢမ်ႇဝႃႈ၊ယင်းဢမ်ႇပႃးတၢင်းလူႇလႄႈတၵ်းဢမ်ႇလႆႈၶဝ်ႈၸူးတီႈၵဝ်။
“ၼႂ်းႁူၵ်းဝၼ်းၼၼ်ႉၵႆႉၶတ်းၸႂ်လႄႈႁဵတ်းၵၢၼ်ငၢၼ်းတူဝ်ၸဝ်ႈၵဝ်ႇတႃႉ။ ၵူၺ်းၵႃႈ၊ဝၼ်းဢၼ်ထူၼ်ႈတီႈၸဵတ်းၼၼ်ႉၸမ်ႉ၊တၵ်းလႆႈၵိုတ်းလိုဝ်ႈၼိမ်ၼိမ်လီလီဢေႃႈ။ ၸႃႉၸဵမ်ၶိင်ႇဢၼ်ထႆႁႆႈထႆၼႃးလႄႈၶိင်ႇဢၼ်ပၢတ်ႇၶဝ်ႈသိမ်းၶဝ်ႈတၵ်းလႆႈၵိုတ်းလိုဝ်ႈၼိမ်ၼိမ်လီလီဢေႃႈ။
“တၵ်းလႆႈႁဵတ်းပွႆးဢၼ်ပၢတ်ႇဢဝ်မၢၵ်ႇဢဝ်ႁူင်းမိူဝ်ႈဢၼ်သူတႄႇၸႃႉပၢတ်ႇဢဝ်ႁူင်းဢွၼ်တၢင်းပိူၼ်ႈၼၼ်ႉ၊ဢိၵ်ႇတင်းႁဵတ်းပွႆးသုမ်ႉထဵင်မိူဝ်ႈဢၼ်သူသိမ်းဢဝ်မၢၵ်ႇဢဝ်ႁူင်းၼႂ်းပၢႆပီၼၼ်ႉဢေႃႈ။
“ၵႃႈဢၼ်ပဵၼ်ၵူၼ်းၸၢႆးသူတင်းသဵင်ႈတင်းလူင်တၵ်းလႆႈမႃးဝႆႈသႃၵူဝ်းၵႂၢႆႇၵဝ် ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ၼၼ်ႉယေႈပီသၢမ်ပွၵ်ႈဢေႃႈ။-
ဝၢႆးသေၵဝ်ႁေႃႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းတင်းလၢႆဢွၵ်ႇသေၵႃႈတီႈၽၢႆႇၼႃႈသူၵႂႃႇလႄႈႁႂ်ႈလႅၼ်လိၼ်သူယႂ်ႇလီၵႂၢင်ႈလီၼၼ်ႉၸိုင်၊ၼႂ်းၸူဝ်ႈၶၢဝ်းပွႆးသၢမ်ပွႆးၼၼ်ႉၽူႈလႂ်တၵ်းဢမ်ႇလႆႈၶတ်းၸႂ်ပုၼ်ႈတၵ်းပႄႉၼႅင်ႇၵႃႈၼိူဝ်မိူင်းသူလႃးလႃး။
“တၵ်းဢမ်ႇလႆႈသၢၵ်ႈလူႇၶဝ်ႈမုၼ်းဢၼ်သႂ်ႇၸိူဝ်ႉပႅင်ႈလူၺ်ႈၵၼ်တင်းသတ်းတရိၵ်ႈသၢၼ်ႇဢၼ်သၢၵ်ႈလူႇတီႈၵဝ်ၼၼ်ႉ။ တူဝ်တၢင်းလူႇဢၼ်ၵိုတ်းဢၼ်ၵျၢၼ်ႇၼႂ်းပွႆး ပသၶႃႇ၊ ၼၼ်ႉၵေႃႈတၵ်းဢမ်ႇလႆႈဝႆႉၵိုတ်းဝႆႉၵျၢၼ်ႇတေႃႇထိုင်ႁွတ်ႈၶိင်ႇၵၢင်ၼႂ်။
“တၵ်းလႆႈဢဝ်မၢၵ်ႇဢဝ်ႁူင်းဢၼ်သူဝိတ်းသူပၢတ်ႇဢွၼ်တၢင်းသုတ်းပိူၼ်ႈၼၼ်ႉမႃးသႂၢင်းၵႃႈၼႂ်းႁိူၼ်း ထႃႇဝရႃႉၽြႃး၊ ၽြႃးပဵၼ်ၸဝ်ႈသူၵူႈပီတႃႉ။ “တၵ်းဢမ်ႇလႆႈဢဝ်သူဝ်းဢွၼ်ႇဢမ်ႇၼၼ်ပႄႉဢွၼ်ႇတူမ်ႈႁုင်ၵႃႈၼႂ်းၼမ်ႉၼူမ်းမႄႈမၼ်း၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉလၢတ်ႈတီႈ မူဝ်းသေႇ၊ လႄႈဝႃႈ၊ “တႅမ်ႈၵႂၢမ်းၸိူဝ်းၼႆႉဝႆႉတႃႉ။ လွင်ႈမၼ်းၸမ်ႉ၊ၵဝ်ႁဵတ်းပတိၺိၺ်ႇလူၺ်ႈၵၼ်တင်းမႂ်းဢိၵ်ႇတင်းၵူၼ်းမဵဝ်း ဢိသရေး၊ တင်းလၢႆၸွမ်းၵႃႈၼင်ႇၵႂၢမ်းၸိူဝ်းၼႆႉယဝ်ႉ၊” ဝႃႈၼင်ႇၼႆဢေႃႈ။-
မူဝ်းသေႇ၊ ၵေႃႈယင်းဢမ်ႇၵိၼ်တၢင်းၵိၼ်၊ယင်းဢမ်ႇၵိၼ်ၼမ်ႉလႄႈယူႇလူၺ်ႈၵၼ်တင်း ထႃႇဝရႃႉၽြႃး၊ သီႇသိပ်းဝၼ်းသီႇသိပ်းၶိုၼ်းတဵမ်တဵမ်ဢေႃႈ။ ၼင်ႇၼၼ်လႄႈ၊မၼ်းၸဝ်ႈတႅမ်ႈၵႂၢမ်းပတိၺိၺ်ႇဢၼ်ဝႃႈ၊ပိင်းၺၢပ်ႈၸဝ်ႈသိပ်းပႃးၼၼ်ႉဝႆႉၵႃႈၼိူဝ်ၶႅပ်းမၢၵ်ႇႁိၼ်ၸိူဝ်းၼၼ်ႉဢေႃႈ။
မိူဝ်ႈဢၼ် မူဝ်းသေႇ၊ ႁွပ်ႇဢဝ်ၶႅပ်းမၢၵ်ႇႁိၼ်သွင်ၽႅၼ်ႇဢၼ်တႅမ်ႈပိင်းၺၢပ်ႈၸဝ်ႈသိပ်းပႃးလႄႈလူင်းလွႆ သိၼႃႉ၊ မႃးယူႇၼၼ်ႉၸိုင်၊ၼႃႈမၼ်းႁိူဝ်ႈႁိူင်းပိူင်းသႂ်ယူႇၵွပ်ႈပိူဝ်ႈမၼ်းလႆႈလၢတ်ႈတေႃႇၵၼ်တင်း ထႃႇဝရႃႉၽြႃး၊ ၼၼ်ႉဢေႃႈ။ ၵူၺ်းၵႃႈ၊မၼ်းယင်းဢမ်ႇႁုလွင်ႈဢၼ်ပဵၼ်ၸိူဝ်ႉၼင်ႇၼၼ်ၼၼ်ႉ။-
ၼင်ႇၼၼ်လႄႈမိူဝ်ႈဢၼ် ဢႃႇရုၼ်ႇ၊ တင်းၵူၼ်းမဵဝ်း ဢိသရေး၊ တင်းလၢႆတူၺ်း မူဝ်းသေႇ၊ လႄႈႁၼ်ၼႃႈမၼ်းႁိူဝ်ႈႁိူင်းပိူင်းသႂ်ယူႇၼၼ်ႉၸိုင်၊ၶဝ်ၵူဝ်ႁႄလႄႈဢမ်ႇႁတ်းၵႂႃႇၸမ်မၼ်း။-
မူဝ်းသေႇ၊ ၸင်ႇႁွင်ႉၶဝ်တင်းလၢႆလႄႈ ဢႃႇရုၼ်ႇ၊ ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်မူႇၵူၼ်းၸိူဝ်းၵူၼ်းတင်းလၢႆၵေႃႈၵႂႃႇၸူးတီႈမၼ်းသေယဝ်ႉ၊မၼ်းလၢတ်ႈတေႃႇၶဝ်ဢေႃႈ။-
လိုၼ်းၼၼ်ႉၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢွၼ်ၵၼ်သုတ်ႉၸပ်းသုတ်ႉၸူးလႄႈ၊မၼ်းမွၵ်ႇလၢတ်ႈတြႃးၸဝ်ႈတင်းသဵင်ႈတင်းလူင်ၵႃႈဢၼ် ထႃႇဝရႃႉၽြႃး၊ မီးဢမိင်ႉတီႈမၼ်းဝႆႉ၊ၵႃႈၼိူဝ်လွႆ သိၼႃႉ၊ ၼၼ်ႉဢေႃႈ။-
မူဝ်းသေႇ၊ ၼၼ်ႉမိူဝ်ႈဢၼ်မၼ်းႁေႃးလၢတ်ႈယဝ်ႉတူဝ်ႈၵႂႃႇၼၼ်ႉမၼ်းဢဝ်ၽႃႈႁူမ်ႇၼႃႈမၼ်းဝႆႉဢေႃႈ။-
မိူဝ်ႈလႂ်သေဢမ်ႇဝႃႈ၊ပေႃး မူဝ်းသေႇ၊ ၶဝ်ႈၵႃႈၼႂ်းသုမ်ႉထဵင်ၸဝ်ႈၵႂႃႇႁႂ်ႈလႆႈလၢတ်ႈတေႃႇ ထႃႇဝရႃႉၽြႃး၊ ၼၼ်ႉၸိုင်၊မၼ်းထွတ်ႇၽႃႈႁူမ်ႇၼႃႈၼၼ်ႉဝႆႉဢေႃႈ။ မိူဝ်ႈဢၼ်မၼ်းဢွၵ်ႇမႃးၸိုင်၊မၼ်းမွၵ်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလွင်ႈတၢင်းဢၼ်မၼ်းလႆႈၶၢမ်ႇဢဝ်ဢမိင်ႉၸဝ်ႈၼၼ်ႉဢေႃႈ။-
မိူဝ်ႈဢၼ်ၵူၼ်းတင်းလၢႆႁၼ်ၼႃႈ မူဝ်းသေႇ၊ ပဵၼ်ဢၼ်ႁိူဝ်ႈႁိူင်းပိူင်းသႂ်ဝႆႉၼၼ်ႉၸိုင်၊ မူဝ်းသေႇ၊ သမ်ႉဢဝ်ၽႃႈႁူမ်ႇၼႃႈၼၼ်ႉၶိုၼ်းႁူမ်ႇၼႃႈမၼ်းဝႆႉတေႃႇထိုင်ႁွတ်ႈၵမ်းလိုၼ်းမၼ်းသမ်ႉၶိုၼ်းလႆႈၵႂႃႇလၢတ်ႈတေႃႇ ထႃႇဝရႃႉၽြႃး၊ ထႅင်ႈၼၼ်ႉဢေႃႈ။
မူဝ်းသေႇ၊ ႁွင်ႉဢဝ်မူႇၵူၼ်းၸိူဝ်းၵူၼ်းမဵဝ်း ဢိသရေး၊ တင်းသဵင်ႈတင်းလူင်ၸုတုမ်ၵၼ်သေယဝ်ႉ၊မွၵ်ႇလၢတ်ႈၶဝ်လႄႈဝႃႈ၊ “ပိင်းၺၢပ်ႈတြႃးဢၼ် ထႃႇဝရႃႉၽြႃး၊ မီးဢမိင်ႉဝႆႉ၊ႁႂ်ႈသူလႆႈၵမ်လႆႈၵျၢင်ႉၸမ်ႉ၊-
ၼႂ်းႁူၵ်းဝၼ်းၼၼ်ႉၵႆႉၶတ်းၸႂ်လႄႈႁဵတ်းၵၢၼ်ႁဵတ်းငၢၼ်းတူဝ်ၸဝ်ႈၵဝ်ႇတႃႉ။ ၵူၺ်းၵႃႈ၊ဝၼ်းတီႈၸဵတ်းၼၼ်ႉသူတၵ်းလႆႈႁႂ်ႈပဵၼ်ဝၼ်းဢၼ်မူတ်းၸၢင်ႇ၊ဝၼ်းၵမ်သိၼ်ဢၼ်ၵိုတ်းလိုဝ်ႈၼိမ်ၼိမ်လီလီပုၼ်ႈ ထႃႇဝရႃႉၽြႃး၊ ဢေႃႈ။ ၽူႈလႂ်သေဢမ်ႇဝႃႈ၊ၵေႃႉဢၼ်ႁဵတ်းၵၢၼ်သေၸိူဝ်ႉသေပိူင်ၼၼ်ႉတၵ်းလႆႈၶၢမ်ႇတၢင်းတၢႆဢေႃႈ။-
ၼႂ်းဝၼ်းၵမ်သိၼ်ၼၼ်ႉယင်းဢမ်ႇလႆႈသႂ်ႇၽႆးသုမ်ၽႆးၼႂ်းသုမ်ႉၼႂ်းႁိူၼ်းသူလႄႈယူႇဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ သမ်ႉမွၵ်ႇလၢတ်ႈတီႈၵူၼ်းမဵဝ်း ဢိသရေး၊ တင်းသဵင်ႈတင်းလူင်ၸိူဝ်းၼၼ်ႉလႄႈဝႃႈ၊ “ဢၼ် ထႃႇဝရႃႉၽြႃး၊ မီးဢမိင်ႉၸဝ်ႈဝႆႉၸမ်ႉ၊-
ဢွၼ်ၵၼ်ႁဵတ်းတၢင်းလူႇတၢင်းတၢၼ်းတီႈ ထႃႇဝရႃႉၽြႃး၊ တႃႉ။ ႁႂ်ႈၶဝ်ၸိူဝ်းဢၼ်မီးၸႂ်ၸေႇတၼႃႇၼၼ်ႉဢွၼ်ၵၼ်ဢဝ်မႃးတၢင်းလူႇတၢင်းတၢၼ်းပုၼ်ႈ ထႃႇဝရႃႉၽြႃး၊ ဢၼ်ပဵၼ်ၶမ်း၊ငိုၼ်း၊တွင်းလိူင်၊-
ၽႃႈပၢၼ်ႇၶျေႃး၊ၶူဝ်းဢၼ်သွမ်ႇ၊ၶူဝ်းဢၼ်ၵမ်ႇ၊ၶူဝ်းဢၼ်လႅင်၊ၶူဝ်းဢၼ်ဢဝ်ၶူၼ်ပႄႉတေႃးႁဵတ်း၊-
ၼင်သူဝ်းဢၼ်ယွမ်ႉလႅင်၊ၼင်သတ်းဢၼ်လီ၊မႆၶူၼ်သူဝ်းဢၼ်ယွမ်ႉသွမ်ႇ၊ယွမ်ႉၵမ်ႇ၊ယွမ်ႉလႅင်ဝႆႉ၊ဢိၵ်ႇတင်းမႆႉပဝ်း၊-
ၼမ်ႉမၼ်းတႆႈ၊ၼၢမ်ႇသႃႇဢၼ်ၽေႃႇႁဵတ်းၼမ်ႉမၼ်းဢၼ်သွၼ်းလေႃႇ၊ ၼၢမ်ႇသႃႇဢၼ်ၽေႃႇႁဵတ်းဢၼ်ႁွမ်ဢၼ်ႁူၺ်းပုၼ်ႈဢၼ်တုတ်ႇၽႆး၊-
သႅင်ၸၢႆးၶႃးယွတ်ႇ၊ဢိၵ်ႇတင်းသႅင်ဢၼ်မျၢတ်ႈလီတၢင်ႇၸိူဝ်ႉတၢင်ႇမဵဝ်းပုၼ်ႈဢၼ်တၵ်းၶပ်ႉၸီႇၵႃႈတီႈသိူဝ်ႈသုပ်းဢိၵ်ႇတင်းၶိူင်ႈထၢပ်ႈၼႃႈဢူၵ်းယဵၸ်ႈပရေႃးႁဵၵ်ႈ လူင်ၼၼ်ႉတႃႉ။
“ၼႂ်းသူၼႆႉႁႂ်ႈၶဝ်ၸိူဝ်းဢၼ်မေႃဢၼ်ၸၢင်ႈတင်းသဵင်ႈတင်းလူင်ဢွၼ်ၵၼ်မႃးႁဵတ်းၵႃႈဢၼ် ထႃႇဝရႃႉၽြႃး၊ သင်ႇလၢတ်ႈဝႆႉ၊ၵူႈၸိူဝ်ႉၵူႈပိူင်၊-
ဢၼ်ပဵၼ်သုမ်ႉထဵင်ၸဝ်ႈ၊ၽႃႈၵင်ႈဢၼ်မုင်းမၼ်းတင်းၽႃႈမုင်းဢၼ်ႁူမ်ႇၽၢႆႇၼွၵ်ႈမၼ်း၊ၶေႃမၼ်းလႂ်၊ပႅၼ်ႈမၼ်းလႂ်၊ပႄမၼ်းလႂ်၊သဝ်မၼ်းလႂ်၊တီႈသုပ်းတိၼ်မၼ်းလႂ်ၸိူဝ်းၼၼ်ႉ၊-
တိူၵ်ႈပတိၺိၺ်ႇၸဝ်ႈတင်းၵၢၼ်းႁၢမ်မၼ်း၊ပလၢင်ႇပုၼ်ႈဢၼ်တၵ်းၽေႇဢပျတ်ႈ၊ဢိၵ်ႇတင်းၽႃႈၵင်ႈဢၼ်တၵ်းလႆႈၵင်ႈမၼ်းလႂ်၊-
ဢိၵ်ႇတင်းၽိူၼ်ၸဝ်ႈလႄႈၵၢၼ်းႁၢမ်မၼ်းလႂ်၊တင်းၶိူင်ႈမၼ်းလႂ်၊ဢိၵ်ႇတင်းၶဝ်ႈမုၼ်းဢၼ်သၢၵ်ႈလူႇတီႈ ထႃႇဝရႃႉၽြႃး၊-
ၶဵင်ႇတီႈတႆႈၽႆးပုၼ်ႈဢၼ်တၵ်းတႆႈၽႆးတင်းၶိူင်ႈမၼ်းလႂ်၊ၵွၵ်းၽႆးမၼ်းလႂ်၊ဢိၵ်ႇတင်းၼမ်ႉမၼ်းတႆႈလႂ်၊-
ၶဵင်ႇတၢင်းလူႇပုၼ်ႈဢၼ်ၽဝ်ၽႆးၼၢမ်ႇသႃႇတင်းၵၢၼ်းႁၢမ်မၼ်းလႂ်၊ၼမ်ႉမၼ်းပုၼ်ႈဢၼ်တၵ်းသွၼ်းလေႃႇလႂ်၊ၼၢမ်ႇသႃႇဢၼ်ႁွမ်ဢၼ်ႁူၺ်းလႂ်၊ၽႃႈၵင်ႈပုၼ်ႈဢၼ်တၵ်းၵင်ႈႁူးၽၵ်းတူသုမ်ႉထဵင်ၸဝ်ႈ၊-
ဢိၵ်ႇတင်းၶဵင်ႇတၢင်းလူႇပုၼ်ႈဢၼ်ၽဝ်တူဝ်တၢင်းလူႇ၊ဢိၵ်ႇတင်းၶႃႇတွင်းလိူင်မၼ်း၊ၵၢၼ်းမၼ်းလႂ်၊တင်းၶိူင်ႈမၼ်းလႂ်၊ဢၢင်ႇလူင်တင်းတိၼ်မၼ်း၊-
ၽႃႈၵင်ႈႁူဝ်ႉဝၢင်းသုမ်ႉထဵင်ၸဝ်ႈလႂ်၊သဝ်မၼ်းဢိၵ်ႇတင်းဢၼ်သုပ်းတိၼ်မၼ်းလႂ်၊ၽႃႈၵင်ႈပုၼ်ႈဢၼ်တၵ်းၵင်ႈႁူးၽၵ်းတူဝၢင်း၊-
ဢိၵ်ႇတင်းလၵ်းလႄႈတင်းၸိူၵ်ႈပုၼ်ႈသုမ်ႉထဵင်ၸဝ်ႈတင်းႁူဝ်ႉဝၢင်းမၼ်းလႂ်၊-
ဢိၵ်ႇတင်းၶူဝ်းၼုင်ႈၶူဝ်းမႆဢၼ်ႁၢင်ႈၶိူင်ႈပုၼ်ႈယဵၸ်ႈပရေႃးႁဵၵ်ႈဢၼ်တၵ်းၵိုတ်ႉႁၢပ်ႇၼႃႈၵၢၼ်ၸဝ်ႈၵႃႈတီႈထႃႇၼႃႉတီႈမူတ်းၸၢင်ႇၸဝ်ႈ၊ပုၼ်ႈယဵၸ်ႈပရေႃးႁဵၵ်ႈလူင် ဢႃႇရုၼ်ႇ၊ တင်းလုၵ်ႈၸၢႆးမၼ်းတင်းလၢႆ၊တၵ်းၼုင်ႈတၵ်းမႆတင်းသဵင်ႈတင်းလူင်ဢေႃႈ၊” ဝႃႈၼင်ႇၼႆဢေႃႈ။
မူႇၵူၼ်းၸိူဝ်းၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢွၼ်ၵၼ်ဢွၵ်ႇသေၵႃႈတီႈ မူဝ်းသေႇ၊ ၵႂႃႇသေယဝ်ႉ၊-
ၶဝ်တင်းသဵင်ႈတင်းလူင်၊ၵေႃႉဢၼ်မီးၸႂ်ၸေႇတၼႃႇၶႂ်ႈလူႇၶႂ်ႈတၢၼ်းတင်းလၢႆဢွၼ်ၵၼ်ပႃးဢဝ်တၢင်းလူႇတၢင်းတၢၼ်းပုၼ်ႈဢၼ်တၵ်းသၢၵ်ႈလူႇတီႈ ထႃႇဝရႃႉၽြႃး၊ ပုၼ်ႈဢၼ်တၵ်းႁဵတ်းသုမ်ႉထဵင်ၸဝ်ႈတီႈဢၼ်ၸုတုမ်ၵၼ်၊ပုၼ်ႈတၵ်းသုင်းတၵ်းၸႂ်ႉၼႂ်းတၢင်းဢၼ်ႁဵတ်းၼႃႈၵၢၼ်ၸဝ်ႈ၊ပုၼ်ႈဢၼ်တၵ်းႁဵတ်းၶူဝ်းၼုင်ႈၶူဝ်းမႆယဵၸ်ႈပရေႃးႁဵၵ်ႈၸိူဝ်းၼၼ်ႉဢေႃႈ။-
ၵူၼ်းၸၢႆးၵူၼ်းယိင်းၸိူဝ်းဢၼ်မီးၸႂ်ၸေႇတၼႃႇၼၼ်ႉဢွၼ်ၵၼ်ပႃးဢဝ်ဝႅၼ်၊ပေႇႁူ၊မွင်းၵူၺ်း၊သွႆႈၶေႃး၊ၶိူင်ႈၶမ်းၶိူင်ႈသႅင်ၵူႈမဵဝ်းမဵဝ်းမႃးသၢၵ်ႈလူႇတီႈ ထႃႇဝရႃႉၽြႃး၊ ဢေႃႈ။-
ၶဝ်ၸိူဝ်းဢၼ်မီးမႆၶူၼ်သူဝ်းဢၼ်သွမ်ႇ၊ဢၼ်ၵမ်ႇ၊ဢၼ်လႅင်၊ၽႃႈပၢၼ်ႇၶျေႃး၊ၶူဝ်းဢၼ်ဢဝ်ၶူၼ်ပႄႉတေႃးႁဵတ်း၊ၼင်သူဝ်းဢၼ်ယွမ်ႉလႅင်၊ၼင်သတ်းဢၼ်လီၼၼ်ႉၵေႃႈပႃးဢဝ်မႃးၵူႈၵေႃႉၵူႈၵူၼ်းဢေႃႈ။-
ၶဝ်ၸိူဝ်းဢၼ်တၢတ်ႈၼိူင်ႇလူႇလႆႈငိုၼ်းတင်းတွင်းလိူင်ၼၼ်ႉၵေႃႈဢဝ်မႃးသၢၵ်ႈလူႇတီႈ ထႃႇဝရႃႉၽြႃး၊ ဢေႃႈ။ ၶဝ်ၸိူဝ်းဢၼ်မီးမႆႉပဝ်းပုၼ်ႈဢၼ်တၵ်းသုင်းတၵ်းၸႂ်ႉၼႂ်းၵၢၼ်ၼၼ်ႉသေမဵဝ်းမဵဝ်းၼၼ်ႉၵေႃႈပႃးဢဝ်မႃးဢေႃႈ။-
မႄႈယိင်းၸိူဝ်းဢၼ်ၸၢင်ႈယဵပ်ႉၸၢင်ႈတေႃးၵူႈၵေႃႉၵူႈၵူၼ်းၵေႃႈဢွၼ်ၵၼ်ပႃးဢဝ်ၶူဝ်းၽႃႈပၢၼ်ႇၶျေႃးၶဝ်၊ၶူဝ်းသွမ်ႇ၊ၶူဝ်းၵမ်ႇ၊ၶူဝ်းလႅင်ၶဝ်ၵႃႈဢၼ်ၶဝ်ယဵပ်ႉၶဝ်တေႃးဝႆႉၼၼ်ႉမႃးဢေႃႈ။-
မႄႈယိင်းဢၼ်မီးၸႂ်ၸေႇတၼႃႇလႂ်ၵေႃႈဢွၼ်ၵၼ်ၸႂ်ႉတၢင်းၵတ်ႉတၢင်းၶႅၼ်ႇၶဝ်သေလႄႈတေႃးၶူၼ်ပႄႉဢေႃႈ။-
ၵူၼ်းဢၼ်ပဵၼ်ၵႄႇပဵၼ်ႁူဝ်ၶဝ်ၵေႃႈပႃးဢဝ်သႅင်ၸၢႆးၶႃးယွတ်ႇတင်းသႅင်တၢင်ႇၸိူဝ်ႉတၢင်ႇမဵဝ်းမႃးပုၼ်ႈဢၼ်တၵ်းၶပ်ႉၸႅၼ်ႇတီႈသိူဝ်ႈသုပ်းတင်းၶိူင်ႈထၢပ်ႈၼႃႈဢူၵ်း၊-
ဢိၵ်ႇတင်းၼမ်ႉမၼ်းတႆႈ၊ၼၢမ်ႇသႃႇပုၼ်ႈဢၼ်တၵ်းၽေႃႇႁဵတ်းၼမ်ႉမၼ်းဢၼ်သွၼ်းလေႃႇ၊ၼၢမ်ႇသႃႇပုၼ်ႈတၵ်းၽေႃႇႁဵတ်းဢၼ်ႁွမ်ဢၼ်ႁူၺ်းပုၼ်ႈဢၼ်တုတ်ႇၽႆးၼၼ်ႉမႃးဢေႃႈ။-
ၵူၼ်းမဵဝ်း ဢိသရေး၊ ၵႃႈမီးတင်းသဵင်ႈတင်းလူင်ဢၼ်ပႃးၸႂ်ပႃးၶေႃးလႄႈမႃးလူႇမႃးတၢၼ်းတီႈ ထႃႇဝရႃႉၽြႃး၊ ပုၼ်ႈဢၼ်တၵ်းႁဵတ်းၸွမ်းၵႃႈၼင်ႇဢၼ်မၼ်းၸဝ်ႈသင်ႇလၢတ်ႈဝႆႉတီႈ မူဝ်းသေႇ၊ ၼၼ်ႉၸိူဝ်းၼၼ်ႉၸိုင်၊ၶဝ်သၢၵ်ႈလူႇၸွမ်းၼင်ႇၸႂ်ၸေႇတၼႃႇၶဝ်မီးၼၼ်ႉဢေႃႈ။
မူဝ်းသေႇ၊ သမ်ႉလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈ၊ “ ထႃႇဝရႃႉၽြႃး၊ ႁွင်ႉၸွမ်းၼင်ႇၸိုဝ်ႈသဵင်မၼ်းမီးဝႃႈ၊ ပေႇၸလေႇလႃႉ၊ လုၵ်ႈၸၢႆး ဢုရိ၊ လုၵ်ႈၸၢႆး ႁုရႃႉ၊ ၵႃႈၼႂ်းၸိူဝ်ႉၶိူဝ်း ယုတႃႉ၊ ၼၼ်ႉဝႆႉယဝ်ႉ။-
ၽြႃးပဵၼ်ၸဝ်ႈႁႂ်ႈမၼ်းတဵမ်ဝႆႉတင်းတၼ်းၶူဝ်းမၼ်းၸဝ်ႈသေလႄႈ၊ပၼ်တၢင်းၵတ်ႉတၢင်းၶၼ်ဢတၢတ်ႈဢၼ်ၸၢင်ႈဢၼ်မေႃ၊တင်းၺၢၼ်ႇပိင်ႇၺႃႇဢၼ်ႁုဢၼ်မေႃၼႂ်းတၢင်းဢၼ်ၸၢင်ႈႁဵတ်းၵူႈၸိူဝ်ႉၵူႈပိူင်၊-
တၢင်းဢၼ်ၶႆႈၸႂ်သေႁဵတ်းဢွၵ်ႇပဵၼ်ပုင်ႇပဵၼ်ႁၢင်ႈၵူႈၸိူဝ်ႉၵူႈမဵဝ်း၊ဢိၵ်ႇတင်းတၢင်းမေႃၸၢင်ႈၶမ်း၊ၸၢင်ႈငိုၼ်း၊ၸၢင်ႈတွင်းလိူင်၊-
တၢင်းမေႃဢၼ်သူၺ်းသႅင်လႄႈၶပ်ႉၸႅၼ်ႇ၊တၢင်းမေႃဢၼ်ၸၢင်ႈတွင်ႈၸၢင်ႈၶွၵ်းမႆႉ၊တၢင်းမေႃဢၼ်ၸၢင်ႈႁဵတ်းၶိူင်ႈဢၼ်လၢၵ်ႇလၢၵ်ႇလၢႆးလၢႆးတၢင်ႇၸိူဝ်ႉတၢင်ႇမဵဝ်းၸိူဝ်းၼၼ်ႉဝႆႉတီႈမၼ်းဢေႃႈ။-
ထႃႇဝရႃႉၽြႃး၊ ပၼ်ၺၢၼ်ႇတီႈမၼ်းဢိၵ်ႇတင်းတီႈ ဢႁေႃႇလျႃႇၽႃႉ၊ လုၵ်ႈၸၢႆး ဢႁိသမၵ်ႉ၊ ၼႂ်းၸိူဝ်ႉၶိူဝ်း တၢၼ်ႇ၊ ၼၼ်ႉႁႂ်ႈလႆႈႁဵတ်းသြႃႇသွၼ်ပၼ်တီႈပိူၼ်ႈယဝ်ႉ။-
မၼ်းၸဝ်ႈပၼ်ႁႂ်ႈၶဝ်မီးတၢင်းၵတ်ႉတၢင်းၶၼ်ၼႂ်းလွင်ႈတၢင်းဢၼ်ႁဵတ်းၼႃႈၵၢၼ်ဢၼ်ၸၢင်ႈတွင်ႈၸၢင်ႈၶွၵ်း၊ဢၼ်ၸၢင်ႈၽေႃႇတူဝ်ၽေႃႇႁၢင်ႈ၊ၸၢင်ႈယဵပ်ႉၸၢင်ႈတေႃးၽႃႈပၢၼ်ႇၶျေႃး၊ၶူဝ်းသွမ်ႇ၊ၶူဝ်းၵမ်ႇ၊ၶူဝ်းလႅင်၊ဢိၵ်ႇတင်းၶူဝ်းၼုင်ႈတၢင်ႇၸိူဝ်ႉတၢင်ႇမဵဝ်းဢေႃႈ။ ၶဝ်ၸိူဝ်းၼၼ်ႉမီးတၢင်းမေႃဢၼ်ၸၢင်ႈႁဵတ်းၵူႈၸိူဝ်ႉၵူႈမဵဝ်းလႄႈပဵၼ်ၵူၼ်းဢၼ်ၵတ်ႉဢၼ်ၶၼ်ၼႂ်းတၢင်းဢၼ်ၶႆႈၸႂ်သေလႄႈႁဵတ်းဢွၵ်ႇပဵၼ်ပုင်ႇပဵၼ်ႁၢင်ႈၼၼ်ႉဢေႃႈ။
“ ပေႇၸလေႇလႃႉ၊ ဢိၵ်ႇတင်း ဢႁေႃႇလျႃႇၽႃႉ၊ ဢိၵ်ႇတင်းၵူၼ်းဢၼ်မေႃဢၼ်ၸၢင်ႈတင်းသဵင်ႈတင်းလူင်ၸိူဝ်းဢၼ် ထႃႇဝရႃႉၽြႃး၊ ပၼ်ၺၢၼ်ႇပိင်ႇၺႃႇတၢင်းၵတ်ႉတၢင်းၶၼ်ဝႆႉ၊ၸိူဝ်းဢၼ်ႁုဢၼ်ၸၢင်ႈႁဵတ်းၵူႈၸိူဝ်ႉၵူႈမဵဝ်းပုၼ်ႈဢၼ်တၵ်းပူၵ်းတင်ႈသုမ်ႉထဵင်ၸဝ်ႈဢၼ်မူတ်းၸၢင်ႇၸိူဝ်းၼၼ်ႉ၊ၶဝ်တၵ်းလႆႈဢွၼ်ၵၼ်ႁဵတ်းၵူႈၸိူဝ်ႉၵူႈမဵဝ်းမႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉဝႆႉၼၼ်ႉဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈႁွင်ႉဢဝ် ပေႇၸလေႇလႃႉ၊ ဢႁေႃႇလျႃႇၽႃႉ၊ တင်းၵူၼ်းၵတ်ႉၵူၼ်းၶၼ်ၸိူဝ်းဢၼ် ထႃႇဝရႃႉၽြႃး၊ ပၼ်ဢတၢတ်ႈပိင်ႇၺႃႇဝႆႉ၊ဢိၵ်ႇတင်းၶဝ်ၸိူဝ်းဢၼ်မီးၸႂ်ၸေႇတၼႃႇၶႂ်ႈၸွႆႈၶႂ်ႈႁဵတ်းၼၼ်ႉသေယဝ်ႉ၊ မူဝ်းသေႇ၊ ၸႂ်ႉၶဝ်တႄႇၸႃႉႁဵတ်းၵၢၼ်ဢေႃႈ။-
ၶဝ်ၸိူဝ်းၼၼ်ႉႁပ်ႉၶၢမ်ႇဢဝ်တၢင်းလူႇတၢင်းတၢၼ်းၵႃႈတီႈ မူဝ်းသေႇ၊ ဢၼ်ၵူၼ်းမဵဝ်း ဢိသရေး၊ ၶဝ်ဢဝ်မႃးပုၼ်ႈဢၼ်တၵ်းႁဵတ်းသုမ်ႉထဵင်ၸဝ်ႈဢၼ်မူတ်းၸၢင်ႇၼၼ်ႉဢေႃႈ။ ၵူၼ်းမဵဝ်း ဢိသရေး၊ ၸိူဝ်းၼၼ်ႉယင်းတိုၵ်ႉဢဝ်မႃးလူႇတၢၼ်းတီႈ မူဝ်းသေႇ၊ ထႅင်ႈယူႇၵူႈၼႂ်ဢေႃႈ။-
မိူဝ်ႈၼၼ်ႉ၊ၵူၼ်းၵတ်ႉၵူၼ်းၶၼ်ၸိူဝ်းဢၼ်ႁဵတ်းသုမ်ႉထဵင်ၸဝ်ႈဢၼ်မူတ်းၸၢင်ႇယူႇၼၼ်ႉဢွၼ်ၵၼ်လုၵ်ႉသေၵႃႈတီႈၼႃႈၵၢၼ်တၢင်းႁဵတ်းၶဝ်ႁင်းၽႂ်ႁင်းမၼ်းမႃးတီႈ မူဝ်းသေႇ၊ လႄႈ၊-
မွၵ်ႇလၢတ်ႈဝႃႈ၊ “ၵူၼ်းတင်းလၢႆဢွၼ်ၵၼ်ဢဝ်တၢင်းလူႇမႃးၼမ်ၼႃႇလူင်လၢင်ၼမ်လိူဝ်သေဢၼ်ႁဝ်းၶႃႈလူဝ်ႇၸႂ်ႉလူဝ်ႇသုင်းၵႃႈၼႂ်းၵၢၼ်ငၢၼ်းဢၼ် ထႃႇဝရႃႉၽြႃး၊ သင်ႇလၢတ်ႈဝႆႉ၊ႁႂ်ႈႁဵတ်းၼၼ်ႉတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ မူဝ်းသေႇ၊ ႁႂ်ႈပိုၼ်ၶၢဝ်ႇႁႂ်ႈၸွတ်ႇပၢင်တပ်ႉၵႂႃႇတင်းတပ်ႉလွင်ႈဢၼ်ၽူႈလႂ်သေၵေႃႉသေၵူၼ်းဢမ်ႇလူဝ်ႇမႃးလူႇမႃးတၢၼ်းထႅင်ႈပုၼ်ႈဢၼ်တၵ်းႁဵတ်းႁႂ်ႈသုမ်ႉထဵင်ၸဝ်ႈဢၼ်မူတ်းၸၢင်ႇၼၼ်ႉဢေႃႈ။-
လွင်ႈမၼ်းၸမ်ႉ၊ၶိူင်ႈလူႇၶိူင်ႈတၢၼ်းဢၼ်လႆႈဝႆႉယဝ်ႉၼၼ်ႉပေႃးၵုမ်ႇယဝ်ႉၵူၺ်းဢမ်ႇၵႃး၊လူၼ်ႉလိူဝ်ဝႆႉယဝ်ႉဢေႃႈ။
ၶဝ်ၸိူဝ်းဢၼ်ႁဵတ်းတၢင်းႁဵတ်းၵတ်ႉၶၼ်ၼႃႇတင်းသဵင်ႈတင်းလူင်ၼၼ်ႉဢွၼ်ၵၼ်ႁဵတ်းသုမ်ႉထဵင်ၸဝ်ႈဢေႃႈ။ ၶဝ်ဢဝ်ၽႃႈပၢၼ်ႇၶျေႃးဢၼ်ဢဝ်တင်းမႆသွမ်ႇ၊မႆၵမ်ႇ၊မႆလႅင်၊ၶူၼ်သူဝ်းတေႃးႁဵတ်းၼၼ်ႉႁႂ်ႈပဵၼ်ၽႃႈၵင်ႈသိပ်းၽိုၼ်ဢၼ်ႁၢင်ႈၶိူင်ႈႁဵတ်းပုင်ႇႁၢင်ႈၶေႇရုၽဵမ်ႇ ဝႆႉဢေႃႈ။-
ၽႃႈၵင်ႈၼၼ်ႉမီးၼႃႈယၢဝ်းသၢဝ်းပႅတ်ႇသွၵ်ႇ၊ၼႃႈၵႂၢင်ႈသီႇသွၵ်ႇလႄႈၽိုၼ်ၼိုင်ႈလႄႈၽိုၼ်ၼိုင်ႈၼႃႈယၢဝ်းၼႃႈၵႂၢင်ႈမၼ်းမိူၼ်ၵၼ်ဢေႃႈ။-
ၽႃႈၵင်ႈၸိူဝ်းၼၼ်ႉၶဝ်ဢဝ်ႁႃႈၽိုၼ်၊ႁႃႈၽိုၼ်ယဵပ်ႉၸပ်းၵၼ်ႁႂ်ႈပဵၼ်ၽိုၼ်လူင်သွင်ၽိုၼ်ဢေႃႈ။-
ၶဝ်ဢဝ်ပိၵ်ႈသွမ်ႇႁဵတ်းႁူမၼ်းသႂ်ႇၸွမ်းႁိမ်းမၼ်းၽၢႆႇၼိူဝ်ၽႃႈၵင်ႈၶပ်ႉၸွမ်းၽၢႆႇၼွၵ်ႈမၼ်းတင်းသွင်ၽိုၼ်လူင်ၼၼ်ႉဢေႃႈ။-
ၶဝ်ႁဵတ်းသႂ်ႇႁူၽႃႈၵင်ႈယေႈၽိုၼ်ႁႃႈသိပ်းလႄႈႁူမၼ်းၸိူဝ်းၼၼ်ႉႁူၼိုင်ႈလႄႈႁူၼိုင်ႈတေႃႇမႅၼ်ႈၵၼ်ဝႆႉဢေႃႈ။-
ၶဝ်သမ်ႉႁဵတ်းၶေႃၶမ်းႁႃႈသိပ်းပုၼ်ႈဢၼ်တၵ်းၵဵဝ်ႇၽႃႈၵင်ႈလူင်သွင်ၽိုၼ်ၼၼ်ႉႁႂ်ႈၸပ်းၵၼ်ႁႂ်ႈပဵၼ်သုမ်ႉထဵင်ၸဝ်ႈဢၼ်လဵဝ်ၵၼ်ဢေႃႈ။
မိူဝ်ႈၼၼ်ႉၶဝ်ႁဵတ်းၽႃႈၵင်ႈပုၼ်ႈဢၼ်မုင်းသုမ်ႉထဵင်ၸဝ်ႈဢေႃႈ။ ၶဝ်ဢဝ်ၶူၼ်ပႄႉတေႃးႁဵတ်းပဵၼ်သိပ်းဢဵတ်းၽိုၼ်ဢေႃႈ။-
ၽႃႈၵင်ႈယေႈၽိုၼ်မီးၼႃႈယၢဝ်းသၢမ်သိပ်းသွၵ်ႇ၊ၼႃႈၵႂၢင်ႈသီႇသွၵ်ႇလႄႈတင်းသိပ်းဢဵတ်းၽိုၼ်ၼႃႈယၢဝ်းၼႃႈၵႂၢင်ႈမၼ်းမိူၼ်ၵၼ်ဢေႃႈ။-
ၶဝ်ယဵပ်ႉၽႃႈၵင်ႈႁႃႈၽိုၼ်ၸပ်းၵၼ်လႄႈ၊ထႅင်ႈႁူၵ်းၽိုၼ်ၼၼ်ႉၵေႃႈယဵပ်ႉၸပ်းၵၼ်ႁႂ်ႈပဵၼ်ၽိုၼ်လဵဝ်ဢေႃႈ။-
ၶဝ်ႁဵတ်းႁူမၼ်းႁႃႈသိပ်းသႂ်ႇၸွမ်းႁိမ်းမၼ်းၽၢႆႇၼိူဝ်ၽႃႈၵင်ႈၽိုၼ်လူင်ၼၼ်ႉၽိုၼ်ၼိုင်ႈလႄႈႁဵတ်းႁူႁႃႈသိပ်းသႂ်ႇၸွမ်းႁိမ်းၽၢႆႇၼိုင်ႈၵႃႈတီႈၽႃႈၵင်ႈထႅင်ႈၽိုၼ်ၼိုင်ႈၼၼ်ႉဢေႃႈ။-
ၶဝ်ႁဵတ်းၶေႃတွင်းလိူင်ႁႃႈသိပ်းပုၼ်ႈတၵ်းၵဵဝ်ႇၽႃႈၵင်ႈသွင်ၽိုၼ်လူင်ၼၼ်ႉၸပ်းၵၼ်ႁႂ်ႈပဵၼ်ၽႃႈမုင်းၽိုၼ်လဵဝ်ၵၼ်ဢေႃႈ။-
ၶဝ်သမ်ႉႁဵတ်းၽႃႈမုင်းထႅင်ႈသွင်ၽိုၼ်၊ၽိုၼ်ၼိုင်ႈဢဝ်ၼင်သူဝ်းဢၼ်ယွမ်ႉလႅင်ႁဵတ်းလႄႈထႅင်ႈၽိုၼ်ၼိုင်ႈၸမ်ႉ၊ဢဝ်ၼင်သတ်းဢၼ်လီႁဵတ်းပုၼ်ႈတၵ်းႁူမ်ႇၽၢႆႇၼွၵ်ႈမၼ်းဢေႃႈ။
ၵမ်းၼၼ်ႉၶဝ်ဢဝ်မႆႉပဝ်းႁဵတ်းပႅၼ်ႈဢၼ်ၵင်ႈသုမ်ႉထဵင်ၸဝ်ႈဝႆႉဢေႃႈ။-
ပႅၼ်ႈၼၼ်ႉယေႈၽႅၼ်ႇမီးၼႃႈယၢဝ်းသိပ်းသွၵ်ႇ၊ၼႃႈၵႂၢင်ႈသွၵ်ႇၶိုပ်ႈဢေႃႈ။-
ၼင်ႇႁိုဝ်ပႅၼ်ႈၸိူဝ်းၼၼ်ႉတၵ်းၶပ်ႉတၢမ်းၵၼ်လႆႈၼၼ်ႉၶဝ်ႁဵတ်းတိၼ်သွင်ဢၼ်ပုၼ်ႈပႅၼ်ႈၼိုင်ႈၽႅၼ်ႇဢေႃႈ။ ပႅၼ်ႈတင်းမူတ်းမီးတိၼ်မၼ်းၸိူဝ်ႉၼင်ႇၼႆဢေႃႈ။-
ၶဝ်ႁဵတ်းပႅၼ်ႈဢၼ်ၵင်ႈသုမ်ႉထဵင်ၸဝ်ႈၼႃႈတၢင်းၸၢၼ်းသၢဝ်းၼိုင်ႈသေယဝ်ႉ၊-
ၶဝ်သမ်ႉႁဵတ်းတီႈသုပ်းတိၼ်ဢၼ်ဢဝ်ၶမ်းႁဵတ်းသီႇသိပ်းသုပ်းတီႈတိၼ်ပႅၼ်ႈၼၼ်ႉယေႈၽႅၼ်ႇသွင်ဢၼ်ဢေႃႈ။-
ၶဝ်ႁဵတ်းပႅၼ်ႈဢၼ်ၵင်ႈသုမ်ႉထဵင်ၸဝ်ႈၼႃႈတၢင်းႁွင်ႇသၢဝ်းၼိုင်ႈ၊-
ဢိၵ်ႇတင်းတီႈသုပ်းတိၼ်ၶမ်းသီႇသိပ်း၊သုပ်းတီႈတိၼ်ပႅၼ်ႈၼၼ်ႉယေႈၽႅၼ်ႇသွင်ဢၼ်ဢေႃႈ။-
ၽၢႆႇလင်သုမ်ႉထဵင်ၸဝ်ႈၽၢႆႇတၢင်းတူၵ်းၼၼ်ႉၶဝ်ႁဵတ်းၽႃပႅၼ်ႈႁူၵ်းၽႅၼ်ႇသေယဝ်ႉ၊-
သမ်ႉႁဵတ်းၽႃပႅၼ်ႈသွင်ၽႅၼ်ႇပုၼ်ႈၸဵင်ႇၽၢႆႇတၢင်းလင်သုမ်ႉထဵင်ၸဝ်ႈၼၼ်ႉဢေႃႈ။-
ပႅၼ်ႈတႃႇလူပ်းၸဵင်ႇမၼ်းၸိူဝ်းၼၼ်ႉၶပ်ႉတၢမ်းၵၼ်ၸႃႉၸဵမ်ၵႃႈတီႈတႂ်ႈလႄႈပဵၼ်ဢၼ်လဵဝ်ၵၼ်ၶိုၼ်ႈၵႂႃႇၸွမ်းၸိူဝ်ႉၼင်ႇၼၼ်တေႃႇထိုင်ႁွတ်ႈပၢႆၸိၵ်းမၼ်းဢေႃႈ။ ၶဝ်ႁဵတ်းၸိူဝ်ႉၼင်ႇၼၼ်သွင်ဢၼ်၊သွင်ဢၼ်၊ပုၼ်ႈတႃႇသွင်ၸဵင်ႇဢေႃႈ။-
ၼင်ႇၼၼ်လႄႈမီးပႅၼ်ႈပႅတ်ႇၽႅၼ်ႇ၊တီႈသုပ်းတိၼ်ငိုၼ်းသိပ်းႁူၵ်းဢၼ်၊ယေႈၽႅၼ်ႇသွင်ဢၼ်ဢေႃႈ။
ၶဝ်ဢဝ်မႆႉပဝ်းႁဵတ်းပႄမၼ်းသိပ်းႁႃႈလႅမ်ႈ၊ႁႃႈလႅမ်ႈပုၼ်ႈၼႃႈသုမ်ႉထဵင်ၸဝ်ႈၼႃႈၼိုင်ႈ၊-
ႁႃႈလႅမ်ႈပုၼ်ႈသုမ်ႉထဵင်ၸဝ်ႈထႅင်ႈၼႃႈၼိုင်ႈဢိၵ်ႇတင်းႁႃႈလႅမ်ႈပုၼ်ႈၽၢႆႇလင်ၼႃႈတၢင်းတူၵ်းဢေႃႈ။-
မႆႉပႄလႅမ်ႈၵၢင်ဢၼ်မီးသိုဝ်ႈၶိုင်ႈၵၢင်ၽႃပႅၼ်ႈၸိူဝ်းၼၼ်ႉၶဝ်သွတ်ႇသႂ်ႇၸႃႉတီႈၸဵင်ႇၼိုင်ႈသုမ်ႉထဵင်ၸဝ်ႈတေႃႇထိုင်ႁွတ်ႈၵႂႃႇထႅင်ႈၸဵင်ႇၼိုင်ႈဢေႃႈ။-
ၶဝ်ဢဝ်ၶမ်းဢုမ်ႇၽႃပႅၼ်ႈၸိူဝ်းၼၼ်ႉသေယဝ်ႉ၊ဢဝ်မွင်ႈၶမ်းတၢပ်ႈသႂ်ႇဝႆႉပုၼ်ႈဢၼ်တၵ်းဢဝ်ပႄၸိူဝ်းၼၼ်ႉသွတ်ႇသႂ်ႇဢေႃႈ။ ပႄၸိူဝ်းၼၼ်ႉၵေႃႈဢဝ်ၶမ်းဢုမ်ႇဝႆႉၼင်ႇၵဝ်ႇဢေႃႈ။
ၶဝ်တေႃးႁဵတ်းၽႃႈၵင်ႈၽႃႈပၢၼ်ႇၶျေႃးဢၼ်ဢဝ်မႆသွမ်ႇ၊မႆၵမ်ႇ၊မႆလႅင်၊တေႃးႁဵတ်းသေယဝ်ႉ၊ႁၢင်ႈၶိူင်ႈႁဵတ်းပုင်ႇႁၢင်ႈၶေႇရုၽဵမ်ႇဝႆႉဢေႃႈ။-
ၶဝ်ဢဝ်မႆႉပဝ်းႁဵတ်းသဝ်သီႇလႅမ်ႈတဵၵ်းၶမ်းဝႆႉ၊ပုၼ်ႈဢၼ်တၵ်းႁွႆႈၽႃႈၵင်ႈၼၼ်ႉသေလႄႈဢဝ်ၶေႃၶမ်းၵဵဝ်ႇၸပ်းၵၼ်ဝႆႉဢေႃႈ။ ၶဝ်သမ်ႉႁဵတ်းတီႈသုပ်းတိၼ်ငိုၼ်းသီႇဢၼ်ပုၼ်ႈဢၼ်တၵ်းပူၵ်းသဝ်ၸိူဝ်းၼၼ်ႉဢေႃႈ။
ပုၼ်ႈဢၼ်တၵ်းၵင်ႈႁူးၽၵ်းတူသုမ်ႉထဵင်ၸဝ်ႈၸိုင်၊ၶဝ်ဢဝ်ၽႃႈပၢၼ်ႇၶျေႃးဢၼ်ဢဝ်မႆသွမ်ႇ၊မႆၵမ်ႇ၊မႆလႅင်၊တေႃးႁဵတ်းၼၼ်ႉႁၢင်ႈၶိူင်ႈဝႆႉဢေႃႈ။-
ပုၼ်ႈဢၼ်တၵ်းႁွႆႈၽႃႈၵင်ႈၼၼ်ႉၶဝ်ႁဵတ်းသဝ်ႁႃႈလႅမ်ႈလႄႈဢဝ်ၶေႃၵဵဝ်ႇၸပ်းၵၼ်ဝႆႉ၊ဢိၵ်ႇတင်းဢၼ်ႁူမ်ႇပၢႆသဝ်ဢိၵ်ႇတင်းႁၢဝ်းမၼ်းတင်းလၢႆဢဝ်ၶမ်းဢုမ်ႇႁေႃႇဝႆႉဢေႃႈ။ တီႈသုပ်းတိၼ်မၼ်းႁႃႈဢၼ်ၵေႃႈဢဝ်တွင်းလိူင်ႁဵတ်းဢေႃႈ။
ပေႇၸလေႇလႃႉ၊ ဢဝ်မႆႉပဝ်းႁဵတ်းတိူၵ်ႈပတိၺိၺ်ႇၸဝ်ႈဢၼ်ၼႃႈယၢဝ်းမၼ်းမီးသွင်သွၵ်ႇၶိုပ်ႈ၊ၼႃႈၵႂၢင်ႈမၼ်းသွၵ်ႇၶိုပ်ႈ၊တၢင်းသုင်မၼ်းသွၵ်ႇၶိုပ်ႈဢေႃႈ။-
မၼ်းဢဝ်ၶမ်းလွတ်ႈငၢၼ်ႇဢုမ်ႇႁေႃႇတၢင်းၼွၵ်ႈတၢင်းၼႂ်းသေလႄႈ၊ဢဝ်ၶမ်းႁေႃႇလဵပ်ႈႁွပ်ႈၶွပ်ႇမၼ်းဝႆႉဢေႃႈ။-
မၼ်းလေႃႇႁဵတ်းမွင်ႈၶမ်းသီႇမွင်ႈပုၼ်ႈတိူၵ်ႈၼၼ်ႉလႄႈတွၵ်ႇၸပ်းဝႆႉၵႃႈတီႈတိၼ်တိူၵ်ႈၼၼ်ႉတင်းသီႇၸဵင်ႇ၊ယေႈၸဵင်ႇယေႈမွင်ႈဢေႃႈ။-
မၼ်းဢဝ်မႆႉပဝ်းထၢၵ်ႇႁဵတ်းၵၢၼ်းႁၢမ်သွင်လႅမ်ႈလႄႈဢဝ်ၶမ်းဢုမ်ႇႁေႃႇဝႆႉသေယဝ်ႉ၊-
သွတ်ႇသႂ်ႇဝႆႉၵႃႈၼႂ်းမွင်ႈၶမ်းၸိူဝ်းၼၼ်ႉယေႈၼႃႈယေႈလႅမ်ႈပုၼ်ႈတၵ်းႁၢမ်တိူၵ်ႈၼၼ်ႉဢေႃႈ။-
မၼ်းသမ်ႉဢဝ်ၶမ်းလွတ်ႈငၢၼ်ႇႁဵတ်းပလၢင်ႇပုၼ်ႈဢၼ်တၵ်းၽေႇဢပျတ်ႈဢၼ်ၼိုင်ႈဢၼ်ၼႃႈယၢဝ်းမၼ်းမီးသွင်သွၵ်ႇၶိုပ်ႈ၊ၼႃႈၵႂၢင်ႈသွၵ်ႇၶိုပ်ႈဢေႃႈ။-
မၼ်းသမ်ႉဢဝ်ၶမ်းသေလႄႈတွင်ႈႁဵတ်းႁၢင်ႈၶေႇရုၽဵမ်ႇ သွင်ပႃး၊-
ႁႂ်ႈၸပ်းယူႇၽၢႆႇၼႃႈၵႂၢင်ႈပလၢင်ႇပုၼ်ႈတၵ်းၽေႇဢပျတ်ႈၼၼ်ႉယေႈၽၢႆႇယေႈပႃးဢေႃႈ။ မၼ်းႁဵတ်းၶေႇရုၽဵမ်ႇၸိူဝ်းၼၼ်ႉႁႂ်ႈပဵၼ်ၼိူဝ်ႉလဵဝ်ၵၼ်တင်းၽႃႁူမ်ႇၼၼ်ႉဢေႃႈ။-
ၶေႇရုၽဵမ်ႇသွင်ပႃးၼၼ်ႉဝၢႆႇၼႃႈတေႃႇၵၼ်ယူႇသေယဝ်ႉ၊ဢဝ်ပိၵ်ႇၶဝ်ၵီႈသေလႄႈမုင်းႁူမ်ႇၵႃႈၼိူဝ်ပလၢင်ႇပုၼ်ႈဢၼ်ၽေႇဢပျတ်ႈၼၼ်ႉဢေႃႈ။
ၵမ်းၼၼ်ႉ မၼ်းဢဝ်မႆႉပဝ်းႁဵတ်းၽိူၼ်ဢၼ်ၼႃႈယၢဝ်းမၼ်းမီးသွင်သွၵ်ႇ၊ၼႃႈၵႂၢင်ႈမၼ်းသွၵ်ႇၼိုင်ႈ၊တၢင်းသုင်မၼ်းမီးသွၵ်ႇၶိုပ်ႈဢေႃႈ။-
မၼ်းဢဝ်ၶမ်းလွတ်ႈငၢၼ်ႇဢုမ်ႇႁေႃသေလႄႈ၊ဢဝ်ၶမ်းဢုမ်ႇႁေႃႇၸွမ်းၶွပ်ႇမၼ်းႁွပ်ႈႁွပ်ႈဢေႃႈ။-
မၼ်းႁဵတ်းၶႃႇပၢၼ်းမၼ်းၵႂၢင်ႈမွၵ်ႈၽႃႇမိုဝ်းၼိုင်ႈသေလႄႈဢဝ်ၶမ်းႁေႃႇၶွပ်ႇမၼ်းဝႆႉႁွပ်ႈႁွပ်ႈဢေႃႈ။-
မၼ်းလေႃႇႁဵတ်းမွင်ႈၶမ်းသီႇမွင်ႈသေလႄႈတွၵ်ႇၸပ်းဝႆႉ၊ၵႃႈတီႈတၢင်းၼိူဝ်ၶႃမၼ်းတင်းသီႇၸဵင်ႇဢေႃႈ။-
မွင်ႈတီႈဢၼ်သွတ်ႇၵၢၼ်းၸိူဝ်းၼၼ်ႉမီးၵႃႈႁိမ်းၶွပ်ႇမၼ်းပုၼ်ႈဢၼ်တၵ်းႁၢမ်ၽိူၼ်ၸဝ်ႈၼၼ်ႉဢေႃႈ။-
ၵၢၼ်းႁၢမ်ၼၼ်ႉမၼ်းဢဝ်မႆႉပဝ်းထၢၵ်ႇႁဵတ်းလႄႈသမ်ႉဢဝ်ၶမ်းဢုမ်ႇႁေႃႇဝႆႉဢေႃႈ။-
ၶိူင်ႈၸႂ်ႉၶိူင်ႈတိုဝ်းပုၼ်ႈၽိူၼ်ၸဝ်ႈၼၼ်ႉၵေႃႈမၼ်းဢဝ်ၶမ်းလွတ်ႈငၢၼ်ႇႁဵတ်းဝၢၼ်ႇၽႄလႂ်၊ၵွၵ်းလႂ်၊ၸေႃႉလႂ်၊ဢၢင်ႇလႂ်ၸိူဝ်းၼၼ်ႉပုၼ်ႈဢၼ်တၵ်းထွၵ်ႇတၵ်းႁိုဝ်ႈဢေႃႈ။
မၼ်းဢဝ်တင်းၶမ်းလွတ်ႈငၢၼ်ႇသေလႄႈသမ်ႉႁဵတ်းၶဵင်ႇတီႈတႆႈၽႆးဢေႃႈ။ မၼ်းဢဝ်ၶမ်းတွင်ႈႁဵတ်းၸႃႉၸဵမ်တိၼ်မၼ်းတင်းသဝ်မၼ်းဢေႃႈ။ ၵွၵ်းမၼ်း၊တုမ်ႇမၼ်းတင်းမွၵ်ႇမူဝ်မၼ်းတင်းလၢႆႁႂ်ႈဢွၵ်ႇပဵၼ်ၼိူဝ်ႉလဵဝ်ၵၼ်တင်းမၼ်းဢေႃႈ။-
ၵိင်ႇႁူၵ်းၵိင်ႇတႅၵ်ႇဢွၵ်ႇၵႃႈတီႈသွင်ၽၢၵ်ႇၶၢင်ႈမၼ်းယေႈၽၢႆႇသၢမ်ၵိင်ႇသၢမ်ၵိင်ႇဢေႃႈ။-
ၼႂ်းၵိင်ႇႁူၵ်းၵိင်ႇၼၼ်ႉယေႈၵိင်ႇမီးၵွၵ်းသၢမ်လုၵ်ႈႁၢင်ႈၶိူင်ႈဝႆႉမိူၼ်ၸိူဝ်ႉၼင်ႇလူင်ႇမွၵ်ႇမၢၵ်ႇမူၼ်ႇဢၼ်ပႃးတင်းတုမ်ႇမၼ်းတင်းမွၵ်ႇမူဝ်မၼ်းႁင်းၽႂ်ႁင်းမၼ်းဢေႃႈ။-
ၵႃႈတီႈသဝ်ၶဵင်ႇတီႈတႆႈၽႆးၼၼ်ႉၵေႃႈမီးၵွၵ်းသီႇလုၵ်ႈႁၢင်ႈၶိူင်ႈဝႆႉမိူၼ်ၸိူဝ်ႉၼင်ႇလူင်ႇမွၵ်ႇမၢၵ်ႇမူၼ်ႇဢၼ်ပႃးတင်းတုမ်ႇမၼ်းတင်းမွၵ်ႇမူဝ်မၼ်းႁင်းၽႂ်ႁင်းမၼ်းဢေႃႈ။-
ၵႃႈတီႈၵိင်ႇမၼ်းသၢမ်ၵူႈၼၼ်ႉၵႃႈတီႈငၢမ်ႈၵိင်ႇၼိုင်ႈၵူႈမီးတုမ်ႇမၼ်းယေႈဢၼ်ၵႃႈတီႈသၢမ်ၵူႈၼၼ်ႉဢေႃႈ။-
ၸႃႉၸဵမ်တုမ်ႇမၼ်းလႄႈၵိင်ႇမၼ်းတင်းၶဵင်ႇတီႈတႆႈၽႆးၼၼ်ႉတင်းသဵင်ႈတင်းမူတ်းဢဝ်ၶမ်းလွတ်ႈငၢၼ်ႇတွင်ႈႁဵတ်းပဵၼ်ၼိူဝ်ႉလဵဝ်ၵၼ်ဝႆႉဢေႃႈ။-
ဝၢၼ်ႇၽႆးၸဵတ်းလုၵ်ႈပုၼ်ႈၶဵင်ႇတီႈတႆႈၽႆးဢိၵ်ႇတင်းၵိမ်းၺၢပ်ႈၽႆးမၼ်းတင်းၵွၵ်းၶၢမ်ႇတဝ်ႈမၼ်းတင်းသဵင်ႈတင်းမူတ်းၼၼ်ႉမၼ်းဢဝ်ၶမ်းလွတ်ႈငၢၼ်ႇႁဵတ်းဢေႃႈ။-
ၸႃႉၸဵမ်ၶဵင်ႇတီႈတႆႈၽႆးလႄႈၶိူင်ႈမၼ်းတင်းသဵင်ႈတင်းမူတ်းသဵင်ႈၵႂႃႇၶမ်းလွတ်ႈငၢၼ်ႇသၢဝ်းၸွႆႉဢေႃႈ။
မၼ်းဢဝ်မႆႉပဝ်းႁဵတ်းၶဵင်ႇတၢင်းလူႇဢၼ်ၼိုင်ႈပုၼ်ႈတၵ်းတုတ်ႇၽႆးၼၢမ်ႇသႃႇဢေႃႈ။ ၶဵင်ႇတၢင်းလူႇၼၼ်ႉၼႃႈယၢဝ်း၊ၼႃႈၵႂၢင်ႈမီးယေႈသွၵ်ႇမိူၼ်ၵၼ်လႄႈပဵၼ်သီႇၸဵင်ႇဝႆႉသေယဝ်ႉ၊တၢင်းသုင်မၼ်းမီးသွင်သွၵ်ႇဢေႃႈ။ ၶဝ်လႅမ်မၼ်းတင်းလၢႆဢၼ်မီးၵႃႈတီႈသီႇၸဵင်ႇမၼ်းၼၼ်ႉၵေႃႈပဵၼ်ၼိူဝ်ႉလဵဝ်ၵၼ်တင်းမၼ်းဢေႃႈ။-
မၼ်းဢဝ်ၶမ်းလွတ်ႈငၢၼ်ႇႁေႃႇဢုမ်ႇၵႃႈတီႈပွတ်းတၢင်းၼိူဝ်မၼ်းဢိၵ်ႇတင်းၼႃႈၽႃမၼ်းတင်းသီႇၼႃႈဢိၵ်ႇတင်းၶဝ်လႅမ်မၼ်းၸိူဝ်းၼၼ်ႉလႄႈ၊ႁဵတ်းၶႅပ်းၶမ်းတဵၵ်းသႂ်ႇလဵပ်ႈႁွပ်ႈၶွပ်ႇၵႃႈတီႈပွတ်းတၢင်းၼိူဝ်မၼ်းဢေႃႈ။-
မၼ်းႁဵတ်းမွင်ႈၶမ်းသွင်မွင်ႈတၢပ်ႈသႂ်ႇၶွပ်ႇမၼ်းသွင်ၽၢႆႇၵႃႈတႂ်ႈၶႅပ်းၶမ်းဢၼ်တဵၵ်းသႂ်ႇၼၼ်ႉယေႈၼႃႈသွင်မွင်ႈပုၼ်ႈတႃႇသွတ်ႇၵၢၼ်းဢၼ်တေႁၢမ်ၶဵင်ႇတၢင်းလူႇၼၼ်ႉဢေႃႈ။-
မၼ်းဢဝ်မႆႉပဝ်းထၢၵ်ႇႁဵတ်းၵၢၼ်းႁၢမ်မၼ်းလႄႈဢဝ်ၶမ်းဢုမ်ႇႁေႃႇဝႆႉဢေႃႈ။
မၼ်းသမ်ႉၽေႃႇႁဵတ်းၼမ်ႉမၼ်းဢၼ်မူတ်းၸၢင်ႇပုၼ်ႈတႃႇတေသွၼ်းလေႃႇဢိၵ်ႇတင်းၼၢမ်ႇသႃႇဢၼ်ႁွမ်ဢၼ်ႁူၺ်းပုၼ်ႈဢၼ်တၵ်းတုတ်ႇၽႆးၼၼ်ႉ၊ၽေႃႇႁဵတ်းၸွမ်းၼင်ႇပိင်ႇၺႃႇမေႃယႃၶဝ်ၼၼ်ႉဢေႃႈ။
မၼ်းႁဵတ်းၶဵင်ႇတၢင်းလူႇဢၼ်ၼိုင်ႈပုၼ်ႈတႃႇတေတုတ်ႇတၢင်းလူႇလႄႈမၼ်းဢဝ်မႆႉပဝ်းႁဵတ်းၼင်ႇၵဝ်ႇဢေႃႈ။ ၶဵင်ႇတၢင်းလူႇၼၼ်ႉၼႃႈယၢဝ်းၼႃႈၵႂၢင်ႈမီးႁႃႈသွၵ်ႇမိူၼ်ၵၼ်ပဵၼ်သီႇၸဵင်ႇဝႆႉလႄႈတၢင်းသုင်မၼ်းမီးသၢမ်သွၵ်ႇဢေႃႈ။-
မၼ်းႁဵတ်းၶဝ်လႅမ်သီႇလႅမ်ႈတၢပ်ႈသႂ်ႇၵႃႈတီႈႁူဝ်ၸဵင်ႇတင်းသီႇၸဵင်ႇမၼ်းၼၼ်ႉလႄႈၶဝ်လႅမ်ၸိူဝ်းၼၼ်ႉပဵၼ်ၼိူဝ်ႉလဵဝ်ၵၼ်တင်းမၼ်းဢေႃႈ။ တင်းမူတ်းၼၼ်ႉမၼ်းဢဝ်တွင်းလိူင်ဢုမ်ႇႁေႃႇဝႆႉဢေႃႈ။-
ၶိူင်ႈမၼ်းတင်းသဵင်ႈတင်းမူတ်းဢၼ်ပဵၼ်မေႃႈမၼ်းလႂ်၊ၸေႃႉၽႅပ်ႉမၼ်းလႂ်၊ၵွၵ်းဝၢၼ်ႇမၼ်းလႂ်၊ၶေႃဢၼ်ၵွင်ႉၼိူဝ်ႉမၼ်းလႂ်၊ပၢၼ်ႉသႂ်ႇၽႆးမၼ်းလႂ်ၸိူဝ်းၼၼ်ႉ မၼ်းဢဝ်တွင်းလိူင်ႁဵတ်းၼင်ႇၵဝ်ႇဢေႃႈ။-
မၼ်းႁဵတ်းၶႃႇတွင်းလိူင်ဢၼ်ၼိုင်ႈလႄႈ ဝႆႉၵႃႈတႂ်ႈၶွပ်ႇဢၼ်လဵပ်ႈႁွပ်ႈၶဵင်ႇတၢင်းလူႇၼၼ်ႉႁႂ်ႈၶႃႇၼၼ်ႉၶိုတ်းထိုင်ၵႃႈတီႈၶိုင်ႈၵၢင်မၼ်းဢေႃႈ။-
မၼ်းႁဵတ်းမွင်ႈၵၢၼ်းသီႇမွင်ႈလႄႈတၢပ်ႈသႂ်ႇဝႆႉၵႃႈတီႈသီႇၸဵင်ႇမၼ်းဢေႃႈ။-
မၼ်းသမ်ႉဢဝ်မႆႉပဝ်းထၢၵ်ႇႁဵတ်းၵၢၼ်းႁၢမ်မၼ်းလႄႈဢဝ်တွင်းလိူင်ဢုမ်ႇႁေႃႇဝႆႉဢေႃႈ။-
မၼ်းဢဝ်ၵၢၼ်းၼၼ်ႉသွတ်ႇသႂ်ႇမွင်ႈၵၢၼ်းဢၼ်မီးတီႈသွင်ၽၢၵ်ႇၶၢင်ႈၶဵင်ႇတၢင်းလူႇဢေႃႈ။ ၶဵင်ႇတၢင်းလူႇၼၼ်ႉဢဝ်မႆႉပႅၼ်ႈႁဵတ်းလႄႈၵၢင်မၼ်းၵူင်ဝႆႉဢေႃႈ။
မၼ်းဢဝ်မၢၼ်ႇၸမ်ႈတွင်းလိူင်မႄႈယိင်းၸိူဝ်းဢၼ်မႃးပွင်ႁဵတ်းၼႃႈၵၢၼ်ၵႃႈတီႈသုမ်ႉထဵင်ၸဝ်ႈၼၼ်ႉသေယဝ်ႉ၊မႃးႁဵတ်းပဵၼ်ဢၢင်ႇတွင်းလိူင်ဢၼ်ယႂ်ႇဢိၵ်ႇတင်းဢၼ်ႁွင်းမၼ်းဢေႃႈ။
ပုၼ်ႈတၵ်းၵင်ႈလွမ်ႉႁူဝ်ႉဝၢင်းသုမ်ႉထဵင်ၸဝ်ႈၸိုင်၊မၼ်းဢဝ်ၽႃႈပၢၼ်ႇၶျေႃးႁဵတ်းၽႃႈၵင်ႈမၼ်းပုၼ်ႈၼႃႈတၢင်းၸၢၼ်းယၢဝ်းပၢၵ်ႇသွၵ်ႇဢေႃႈ။-
ပုၼ်ႈၽႃႈၵင်ႈၼၼ်ႉမၼ်းႁဵတ်းသဝ်တွင်းလိူင်သၢဝ်းလႅမ်ႈပူၵ်းတင်ႈၵႃႈၼိူဝ်တီႈသုပ်းတိၼ်သဝ်တွင်းလိူင်သၢဝ်းၼိုင်ႈလႄႈႁဵတ်းၶေႃငိုၼ်းဢိၵ်ႇတင်းႁၢဝ်းငိုၼ်းမၼ်းဝႆႉဢေႃႈ။-
ႁူဝ်ႉဝၢင်းပုၼ်ႈၼႃႈတၢင်းႁွင်ႇၵေႃႈႁဵတ်းမိူၼ်ၸိူဝ်ႉၼင်ႇၼၼ်ၼင်ႇၵဝ်ႇဢေႃႈ။-
ပုၼ်ႈၼႃႈၽၢႆႇတၢင်းတူၵ်းၸိုင်၊ႁူဝ်ႉၽႃႈၵင်ႈမၼ်းယၢဝ်းႁႃႈသိပ်းသွၵ်ႇလႄႈႁဵတ်းသဝ်တွင်းလိူင်သိပ်းလႅမ်ႈပူၵ်းတင်ႈၵႃႈၼိူဝ်ဢၼ်သုပ်းတိၼ်တွင်းလိူင်သိပ်းၼိုင်ႈသေယဝ်ႉ၊ႁဵတ်းၶေႃငိုၼ်းဢိၵ်ႇတင်းႁၢဝ်းငိုၼ်းမၼ်းဝႆႉဢေႃႈ။-
ပုၼ်ႈၼႃႈတၢင်းဢွၵ်ႇဢၼ်မီးႁူးၽၵ်းတူမၼ်းၼၼ်ႉႁူဝ်ႉၽႃႈၵင်ႈမၼ်းယၢဝ်းႁႃႈသိပ်းသွၵ်ႇၼင်ႇၵဝ်ႇဢေႃႈ။-
ၽႃႈၵင်ႈဢၼ်တၵ်းၵင်ႈႁိမ်းၽၵ်းတူၽၢႆႇၼိုင်ႈၼၼ်ႉယၢဝ်းသိပ်းႁႃႈသွၵ်ႇလႄႈမီးသဝ်သၢမ်လႅမ်ႈဢၼ်ပူၵ်းတင်ႈၵႃႈၼိူဝ်တီႈသုပ်းတိၼ်မၼ်းသၢမ်ဢၼ်ဢေႃႈ။-
ႁိမ်းၽၵ်းတူထႅင်ႈၽၢႆႇၼိုင်ႈၼၼ်ႉၵေႃႈ ႁဵတ်းမိူၼ်ၸိူဝ်ႉၼင်ႇၼၼ်ၼင်ႇၵဝ်ႇဢေႃႈ။-
ၽႃႈၵင်ႈဢၼ်ၵင်ႈလွမ်ႉႁူဝ်ႉဝၢင်းၼၼ်ႉၵႃႈမီးတင်းသဵင်ႈတင်းလူင်ပဵၼ်ၽႃႈပၢၼ်ႇၶျေႃးဢေႃႈ။-
ဢၼ်သုပ်းတိၼ်သဝ်ၸိူဝ်းၼၼ်ႉဢဝ်တွင်းလိူင်ႁဵတ်းလႄႈၶေႃမၼ်းလႂ်၊ႁၢဝ်းမၼ်းလႂ်၊တင်းတုမ်ႇပၢႆသဝ်ၸိူဝ်းၼၼ်ႉဢဝ်ငိုၼ်းႁဵတ်းဢေႃႈ။ ႁၢဝ်းသဝ်ႁွပ်ႈႁွပ်ႈသုမ်ႉထဵင်ၸဝ်ႈၼၼ်ႉပဵၼ်ႁၢဝ်းငိုၼ်းတင်းမူတ်းဢေႃႈ။-
ၽႃႈၵင်ႈဢၼ်ၵင်ႈၽၵ်းတူၼၼ်ႉပဵၼ်ၽႃႈပၢၼ်ႇၶျေႃးဢၼ်ဢဝ်တင်းမႆသွမ်ႇ၊မႆၵမ်ႇ၊မႆလႅင်၊တေႃးႁဵတ်းလႄႈႁၢင်ႈၶိူင်ႈဝႆႉဢေႃႈ။ ၼႃႈယၢဝ်းမၼ်းမီးသၢဝ်းသွၵ်ႇ၊တၢင်းသုင်မၼ်းမီးႁႃႈသွၵ်ႇလႄႈပဵၼ်ၼႄးလဵဝ်ၵၼ်တင်းၽႃႈၵင်ႈဢၼ်ၵင်ႈႁူဝ်ႉဝၢင်းၼၼ်ႉဢေႃႈ။-
ၽႃႈၵင်ႈၼၼ်ႉၵွင်ႉႁွႆႈဝႆႉၵႃႈၼိူဝ်သဝ်သီႇလႅမ်ႈဢၼ်ပူၵ်းၵႃႈၼိူဝ်တီႈသုပ်းတိၼ်တွင်းလိူင်သီႇဢၼ်ၼၼ်ႉဢေႃႈ။ ၶေႃမၼ်းလႂ်၊တုမ်ႇပၢႆသဝ်မၼ်းလႂ်၊တင်းႁၢဝ်းမၼ်းၸိူဝ်းၼၼ်ႉဢဝ်ငိုၼ်းႁဵတ်းဢေႃႈ။-
လၵ်းၸိူဝ်းဢၼ်တွၵ်ႇတီႈသုမ်ႉထဵင်ၸဝ်ႈဢိၵ်ႇတင်းလၵ်းၸိူဝ်းဢၼ်တွၵ်ႇၸွမ်းႁိမ်းႁူဝ်ႉဝၢင်းမၼ်းၵႃႈမီးတင်းသဵင်ႈတင်းလူင်ပဵၼ်လၵ်းတွင်းလိူင်ဢေႃႈ။
ၼႆႉၸမ်ႉ၊ပဵၼ်ၸရၢင်းၶိူင်ႈပိူင်ဢၼ်ႁဵတ်းဢၼ်သုင်းတီႈသုမ်ႉထဵင်ၸဝ်ႈတီႈဢၼ်ဝႆႉၶႅပ်းမၢၵ်ႇႁိၼ်သွင်ၽႅၼ်ႇဢၼ်တႅမ်ႈပိင်းၺၢပ်ႈသိပ်းပႃးဝႆႉ ၼၼ်ႉဢေႃႈ။ ဢၼ်ၼႆႉပဵၼ်ၸရၢင်းတၢင်းဢၼ်ၼပ်ႉဢၢၼ်ႇၸွမ်းၼင်ႇဢၼ် မူဝ်းသေႇ၊ ၸီႇယၢင်ႇၶိုင်ပွင်ပၼ်ႁႂ်ႈ ဢိႀမႃႇ၊ လုၵ်ႈၸၢႆးယဵၸ်ႈပရေႃးႁဵၵ်ႈ ဢႃႇရုၼ်ႇ၊ ၸႂ်ႉၵူၼ်းမဵဝ်းၸိူဝ်ႉၶိူဝ်း လေႇဝိ၊ တင်းလၢႆႁဵတ်းၼၼ်ႉဢေႃႈ။
ၵႃႈဢၼ် ထႃႇဝရႃႉၽြႃး၊ သင်ႇလၢတ်ႈတီႈ မူဝ်းသေႇ၊ ၼၼ်ႉၸိုင်၊ ပေႇၸလေႇလႃႉ၊ လုၵ်ႈၸၢႆး ဢုရိ၊ ဢၼ်ပဵၼ်လုၵ်ႈၸၢႆး ႁုရႃႉ၊ ၵႃႈၼႂ်းၸိူဝ်ႉၶိူဝ်း ယုတႃႉ၊ ၼၼ်ႉႁဵတ်းၸွမ်းၵူႈၸိူဝ်ႉၵူႈပိူင်ဢေႃႈ။-
ၵေႃႉဢၼ်ၸွႆႈထႅမ်မၼ်း ဢႁေႃႇလျႃႇၽႃႉ၊ လုၵ်ႈၸၢႆး ဢႁိသမၵ်ႉ၊ ၸိူဝ်ႉၶိူဝ်း တၢၼ်ႇ၊ ၼၼ်ႉပဵၼ်ၵေႃႉဢၼ်ၸၢင်ႈတွင်ႈၸၢင်ႈၶွၵ်း၊ၸၢင်ႈၶႆႈၸႂ်လႄႈႁဵတ်းဢွၵ်ႇပုင်ႇႁၢင်ႈ၊တူဝ်ႁၢင်ႈ၊ၸၢင်ႈတေႃးႁဵတ်းၽႃႈပၢၼ်ႇၶျေႃးဢၼ်ဢဝ်မႆၶူၼ်သူဝ်းဢၼ်သွမ်ႇ၊ဢၼ်ၵမ်ႇ၊ဢၼ်လႅင်၊ႁၢင်ႈၶိူင်ႈၸိူဝ်းၼၼ်ႉဢေႃႈ။
ၶမ်းၵႃႈဢၼ်သၢၵ်ႈလူႇတီႈ ထႃႇဝရႃႉၽြႃး၊ လႄႈဢဝ်ၵႂႃႇႁဵတ်းသုမ်ႉထဵင်ၸဝ်ႈတီႈမူတ်းၸၢင်ႇၼၼ်ႉၸွမ်းလူၺ်ႈမၢၵ်ႇလုၵ်ႈၶၼ်ၸဝ်ႈၸိုင်၊ၼမ်ႉၼၵ်းမၼ်းမီးႁူၵ်းပၢၵ်ႇပၢႆသၢဝ်းၸွႆႉ ဢေႃႈ။-
ငိုၼ်းၵႃႈဢၼ်မူႇၵူၼ်းၸိူဝ်းၵူၼ်းဢၼ်ၶဝ်ႈပႃးၼႂ်းဢၼ်ၵဵပ်းၸရၢင်းၵူၼ်းမိူင်းမႃးလူႇပၼ်ၼၼ်ႉၸွမ်းလူၺ်ႈလုၵ်ႈၶၼ်ၸဝ်ႈၼမ်ႉၼၵ်းမၼ်းမီးၼိုင်ႈႁဵင်ၼိုင်ႈပၢၵ်ႇပၢႆသိပ်းၸွႆႉ ဢေႃႈ။-
ငိုၼ်းလူႇငိုၼ်းတၢၼ်းၼၼ်ႉၸင်ႈၸွမ်းလုၵ်ႈၶၼ်ၸဝ်ႈပဵၼ်တၢင်းလူႇဢၼ်မႃးတီႈမူႇၵူၼ်းၸိူဝ်းၵူၼ်းဢၼ်ၶဝ်ႈပႃးၼႂ်းဢၼ်ၵဵပ်းၸရၢင်း ၵူၼ်းမိူင်းၼၼ်ႉၵူၼ်းၸၢႆးၵူၺ်းၵူၺ်းဢၼ်ဢသၢၵ်ႈလႆႈသၢဝ်းၼိုင်ႈလႄႈသၢဝ်းၶိုၼ်ႈၵႂႃႇၵႃႈမီးတင်းသဵင်ႈတင်းလူင်မီးႁူၵ်းသႅၼ်ပၢႆသၢမ်ႁဵင်ႁႃႈပၢၵ်ႇႁႃႈသိပ်းၵေႃႉဢေႃႈ။-
ၼႂ်းငိုၼ်းၼၼ်ႉ၊သွင်ႁဵင်ပၢႆပၢၵ်ႇၸွႆႉ ပဵၼ်ငိုၼ်းဢၼ်ၸႂ်ႉလေႃႇႁဵတ်းတီႈသုပ်းတိၼ်ပၢၵ်ႇဢၼ်ပုၼ်ႈတႃႇသုမ်ႉထဵင်ၸဝ်ႈတီႈမူတ်းၸၢင်ႇဢိၵ်ႇတင်းတီႈသုပ်းတိၼ်ပုၼ်ႈၽႃႈၵင်ႈၼၼ်ႉ၊တီႈသုပ်းတိၼ်ယေႈဢၼ်သဝ်းဢဵတ်းၸွႆႉဢေႃႈ။-
ငိုၼ်းဢၼ်ၵိုတ်းၵျၢၼ်ႇသိပ်းပႅတ်ႇၸွႆႉ ၼၼ်ႉၸိုင်၊ ပေႇၸလေႇလႃႉ၊ ဢဝ်ႁဵတ်းၶေႃမၼ်းလႂ်၊တင်းႁၢဝ်းသဝ်မၼ်းလႂ်၊ဢိၵ်ႇတင်းတုမ်ႇပၢႆသဝ်လႂ်ဢေႃႈ။-
တွင်းလိူင်ဢၼ်သၢၵ်ႈလူႇတီႈ ထႃႇဝရႃႉၽြႃး၊ ၸမ်ႉ၊မီးၼိုင်ႈႁဵင်ႁႃႈပၢၵ်ႇၸွႆႉ ဢေႃႈ။-
တွင်းလိူင်ၸိူဝ်းၼၼ်ႉၸိုင်၊ဢဝ်ႁဵတ်းတီႈသုပ်းတိၼ်ၽၵ်းတူသုမ်ႉထဵင်ၸဝ်ႈၶဵင်ႇတၢင်းလူႇတွင်းလိူင်တင်းၶႃႇတွင်းလိူင်မၼ်းဢိၵ်ႇတင်းၶိူင်ႈပိူင်ၶဵင်ႇတၢင်းလူႇၼၼ်ႉတင်းသဵင်ႈတင်းလူင်၊-
ဢိၵ်ႇပႃးတင်းတီႈသုပ်းတိၼ်သဝ်ႁူဝ်ႉဢၼ်ၵင်ႈဝၢင်းလႂ်၊တီႈသုပ်းတိၼ်သဝ်ၽၵ်းတူႁူဝ်ႉဝၢင်းလႂ်၊လၵ်းသုမ်ႉထဵင်ၸဝ်ႈလႂ်၊လၵ်းဢၼ်ပၵ်းလွမ်ႉႁူဝ်ႉဝၢင်းၸိူဝ်းၼၼ်ႉၵႃႈမီးတင်းသဵင်ႈတင်းလူင်ဢေႃႈ။
ၶဝ်ဢဝ်မႆၶူၼ်သူဝ်းဢၼ်သွမ်ႇ၊ဢၼ်ၵမ်ႇ၊ဢၼ်လႅင်၊ႁဵတ်းၶူဝ်းၼုင်ႈဢၼ်မီးမုၼ်သရေႇပုၼ်ႈယဵၸ်ႈပရေႃးႁဵၵ်ႈ တႃႇတေၼုင်ႈမိူဝ်ႈဢၼ်ထၢမ်းႁဵတ်းၼႃႈၵၢၼ်ၸဝ်ႈၵႃႈၼႂ်းထႃႇၼႃႉတီႈမူတ်းၸၢင်ႇပုၼ်ႈ ဢႃႇရုၼ်ႇ၊ ၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈ မူဝ်းသေႇ၊ ဝႆႉၼၼ်ႉဢေႃႈ။
ၶဝ်တေႃးႁဵတ်းသိူဝ်ႈသုပ်းဢၼ်ဢဝ်ၽႃႈပၢၼ်ႇၶျေႃးတင်းမႆၶူၼ်သူဝ်းဢၼ်သွမ်ႇ၊ဢၼ်ၵမ်ႇ၊ဢၼ်လႅင်၊တင်းမႆၶမ်းႁဵတ်းၼၼ်ႉဢေႃႈ။-
ၶဝ်ပေႃႉၶဵၼ်ႇႁဵတ်းၶႅပ်းၶမ်းမၢင်မၢင်လႄႈထႅၵ်ႇထိူဝ်ႁဵတ်းမႆၶမ်းသေယဝ်ႉ၊တေႃးသႂ်ႇၼႂ်းၽႃႈပၢၼ်ႇၶျေႃး၊မႆၶူၼ်သူဝ်းဢၼ်သွမ်ႇ၊ဢၼ်ၵမ်ႇ၊ဢၼ်လႅင်၊ၸိူဝ်းၼၼ်ႉဢေႃႈ။-
ၶဝ်ႁဵတ်းသၢႆႁူဝ်မႃႇသွင်သဵၼ်ႈပုၼ်ႈသိူဝ်ႈသုပ်းသေယဝ်ႉ၊ဢဝ်ႁူဝ်ၸဵင်ႇမၼ်းသွင်ၽၢႆႇသွႆႈၸပ်းၵၼ်ႁႂ်ႈလႆႈႁွႆႈၸပ်းဝႆႉမၼ်ႈမၼ်ႈဢေႃႈ။-
သၢႆႁတ်ႉဢႅဝ်ဢၼ်ဢဝ်ၶိူင်ႈပိူင်မဵဝ်းလဵဝ်ၵၼ်တေႃးႁဵတ်းၼၼ်ႉၵေႃႈၶဝ်တေႃးႁဵတ်းပဵၼ်ၼိူဝ်ႉလဵဝ်ၵၼ်တင်းသိူဝ်ႈသုပ်းမႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈတီႈ မူဝ်းသေႇ၊ ဝႆႉၼၼ်ႉဢေႃႈ။-
ၶဝ်ဢဝ်သႅင်ၸၢႆးၶႃးယွတ်ႇသွင်လုၵ်ႈသေယဝ်ႉ၊ၵႃႈၼိူဝ်သႅင်ၼၼ်ႉတႅမ်ႈၸွမ်းၸိုဝ်ႈသဵင်ၵူၼ်းမဵဝ်း ဢိသရေး၊ သိပ်းသွင်မဵဝ်းၼၼ်ႉသေလႄႈသႂ်ႇဝႆႉၵႃႈၼႂ်းႁိူၼ်းၶမ်းမၼ်းဢေႃႈ။-
ၶဝ်ဢဝ်သႅင်ၼၼ်ႉသႂ်ႇဝႆႉၵႃႈၼိူဝ်သၢႆႁူဝ်မႃႇသိူဝ်ႈသုပ်းၼၼ်ႉႁႂ်ႈပဵၼ်သႅင်ဢၼ်တၢင်တူဝ်ၵူၼ်းမဵဝ်း ဢိသရေး၊ တင်းလၢႆဝႆႉ၊ၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈတီႈ မူဝ်းသေႇ၊ ဝႆႉၼၼ်ႉဢေႃႈ။
ၶိူင်ႈၶူဝ်းထၢပ်ႈၼႃႈဢူၵ်းၵေႃႈၶဝ်ဢဝ်ၶိူင်ႈပိူင်မဵဝ်းလဵဝ်ၵၼ်တင်းသိူဝ်ႈသုပ်းၼၼ်ႉတေႃးႁဵတ်းႁၢင်ႈၶိူင်ႈမိူၼ်မိူၼ်ၵၼ်ဝႆႉဢေႃႈ။-
တူပ်ႉႁဵတ်းသွင်ထၢပ်ႈလႄႈၼႃႈယၢဝ်းၼႃႈၵႂၢင်ႈမီးယေႈၼႃႈယေႈၶိုပ်ႈပဵၼ်သီႇၸဵင်ႇဝႆႉဢေႃႈ။-
ၵႃႈၼိူဝ်ၶိူင်ႈၶူဝ်းထၢပ်ႈၼႃႈဢူၵ်းၼၼ်ႉၶဝ်ၸီႇသႅင်ဢၼ်မျၢတ်ႈလီသီႇထႅဝ်ဢေႃႈ။ တီႈထႅဝ်ၼိုင်ႈၼၼ်ႉပဵၼ်သႅင်လႅင်၊သႅင်ဢုႀၽယႃး၊တင်းသႅင်မျႃႉဢေႃႈ။-
တီႈထႅဝ်သွင်ၼၼ်ႉပဵၼ်သႅင်ပတ်ႈတမျႃး၊သႅင်ၼီႇလႃႇတင်းသႅင်ၸိင်ႇဢေႃႈ။-
တီႈထႅဝ်သၢမ်ၼၼ်ႉပဵၼ်၊သႅင်ဝႃႇၵိၼ်ႇသု၊သႅင်မႁူႇရႃႇ၊တင်းသႅင်ၵေႃႇမုၵ်ႉဢေႃႈ။-
တီႈထႅဝ်သီႇၼၼ်ႉပဵၼ်သႅင်မႅၵ်ႉရွႆး၊သႅင်ၸၢႆးၶႃးယွတ်ႇ၊ဢိၵ်ႇတင်းသႅင်ၼၵႃးသွႆႈဢေႃႈ။ သႅင်ၸိူဝ်းၼၼ်ႉၶပ်ႉၸႅၼ်ႇသႂ်ႇဝႆႉၵႃႈၼိူဝ်ႁိူၼ်းၶမ်းမၼ်းဢေႃႈ။-
ၵႃႈၼိူဝ်သႅင်တင်းသိပ်းသွင်လုၵ်ႈၼၼ်ႉယေႈလုၵ်ႈၶွၵ်းတႅမ်ႈသႂ်ႇၸိုဝ်ႈသဵင်ၵူၼ်းမဵဝ်း ဢိသရေး၊ ယေႈမဵဝ်းမိူၼ်ၸိူဝ်ႉၼင်ႇၸုမ်ႈႁႂ်ႈပဵၼ်သႅင်ဢၼ်တၢင်တူဝ်ၵူၼ်းမဵဝ်း ဢိသရေး၊ သိပ်းသွင်မဵဝ်းဢေႃႈ။-
ၵႃႈၼိူဝ်ၶိူင်ႈၶူဝ်းထၢပ်ႈၼႃႈဢူၵ်းၼၼ်ႉၶဝ်ႁဵတ်းသၢႆၶမ်းလွတ်ႈငၢၼ်ႇဢၼ်လိမ်ႇၵဵဝ်ႈၵၼ်ၼၼ်ႉႁွႆႈဝႆႉဢေႃႈ။-
ၶဝ်ႁဵတ်းႁိူၼ်းၶမ်းသွင်ဢၼ်ဢိၵ်ႇတင်းမွင်ႈၶမ်းသွင်မွင်ႈလႄႈဢဝ်မွင်ႈၶမ်းသွင်မွင်ႈၼၼ်ႉသႂ်ႇဝႆႉၵႃႈတီႈၸဵင်ႇၶိူင်ႈၶူဝ်းထၢပ်ႈၼႃႈဢူၵ်းၽၢႆႇတၢင်းၼိူဝ်မၼ်းဝႆႉဢေႃႈ။-
ၶဝ်ဢဝ်သၢႆသွႆႈၶမ်းလွတ်ႈငၢၼ်ႇသွင်သဵၼ်ႈၼၼ်ႉႁွႆႈသႂ်ႇၵႃႈတီႈမွင်ႈၶမ်းသွင်မွင်ႈၼၼ်ႉဝႆႉဢေႃႈ။-
ၶဝ်သမ်ႉဢဝ်ပၢႆသၢႆသွႆႈသွင်သဵၼ်ႈၼၼ်ႉမတ်ႉၸပ်းၵႃႈတီႈႁိူၼ်းၶမ်းသွင်ဢၼ်ၼၼ်ႉသေလႄႈ၊ဢဝ်သႂ်ႇဝႆႉၵႃႈၼိူဝ်သၢႆႁူဝ်မႃႇသိူဝ်ႈသုပ်းၵႃႈတီႈၽၢႆႇတၢင်းၼႃႈမၼ်းဢေႃႈ။-
ၶဝ်ႁဵတ်းမွင်ႈၶမ်းသွင်မွင်ႈႁွႆႈၸပ်းၸဵင်ႇၶိူင်ႈၶူဝ်းထၢပ်ႈၼႃႈဢူၵ်းတၢင်းတႂ်ႈၽၢႆႇတၢင်းၼႂ်းမၼ်းသေလႄႈတေႃးၸပ်းၵၼ်တင်းၼႃႈသိူဝ်ႈသုပ်းဝႆႉဢေႃႈ။-
ၶဝ်သမ်ႉႁဵတ်းထႅင်ႈမွင်ႈၶမ်းသွင်မွင်ႈႁွႆႈၸပ်းၵႃႈတီႈတၢင်းတႂ်ႈၽၢႆႇၼႃႈသၢႆႁူဝ်မႃႇသိူဝ်ႈသုပ်းၼၼ်ႉလႄႈႁႂ်ႈသိူဝ်ႈသုပ်းတင်းသၢႆႁတ်ႉဢႅဝ်ဢၼ်ႁၢင်ႈၶိူင်ႈၼၼ်ႉသိုပ်ႇၵၼ်ဝႆႉဢေႃႈ။-
ၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉတီႈ မူဝ်းသေႇ၊ ၼၼ်ႉၶဝ်ဢဝ်သၢႆသွမ်ႇမတ်ႉမွင်ႈၶမ်းၶိူင်ႈၶူဝ်းထၢပ်ႈၼႃႈဢူၵ်းသွင်မွင်ႈၼၼ်ႉတင်းမွင်ႈၶမ်းသိူဝ်ႈသုပ်းသွင်မွင်ႈၼၼ်ႉတွႆးၸပ်းၵၼ်ဝႆႉဢေႃႈ။ ၼင်ႇၼၼ်လႄႈၶိူင်ႈၶူဝ်းတပ်ႉၼႃႈဢူၵ်းၼၼ်ႉႁွႆႈၸပ်းၵႃႈၼိူဝ်သၢႆႁတ်ႉဢႅဝ်လႄႈဢမ်ႇႁႂ်ႈမၼ်းလုတ်ႈတူၵ်းၵႂႃႇဢေႃႈ။
သိူဝ်ႈယၢဝ်းဢၼ်သွၼ်ႉထၢပ်ႈၼိူဝ်သိူဝ်ႈသုပ်းၼၼ်ႉၼၼ်ႉၸိုင်၊ဢဝ်တင်းမႆၶူၼ်သူဝ်းဢၼ်သွမ်ႇၵူၺ်းၵူၺ်းတေႃးႁဵတ်းဢေႃႈ။-
ၶေႃးသိူဝ်ႈယၢဝ်းၼၼ်ႉတၵ်းဢမ်ႇလႆႈသိၵ်ႇလႆႈၶၢတ်ႇၸိုင်၊တေႃးႁဵတ်းၵူပ်းသႂ်ႇမၼ်ႈမၼ်ႈၵႅၼ်ႇၵႅၼ်ႇဝႆႉဢေႃႈ။-
ၵႃႈတီႈတိၼ်သိူဝ်ႈယၢဝ်းဢၼ်တူပ်ႉဝႆႉၼၼ်ႉၶဝ်ဢဝ်မႆၶူၼ်သူဝ်းဢၼ်သွမ်ႇ၊ဢၼ်ၵမ်ႇ၊ဢၼ်လႅင်၊တင်းၽႃႈပၢၼ်ႇၶျေႃးႁဵတ်းႁူၺ်ႇမၢၵ်ႇၸင်ႈလႄႈႁွႆႈၸပ်းႁွပ်ႈႁွပ်ႈဝႆႉဢေႃႈ။-
ၶဝ်သမ်ႉဢဝ်ၶမ်းလွတ်ႈငၢၼ်ႇႁဵတ်းႁိင်ႇလႄႈဢဝ်ႁိင်ႇၸိူဝ်းၼၼ်ႉႁွႆႈသႂ်ႇတီႈၵႄႈဝူင်ႈၵၢင်မၢၵ်ႇၸင်ႈသေယဝ်ႉ၊-
ၼင်ႇၼၼ်လႄႈၶဝ်ဢဝ်မၢၵ်ႇၸင်ႈတင်းႁိင်ႇၸိူဝ်းၼၼ်ႉႁွႆႈၸပ်းသႂ်ႇႁူၺ်ႇၶႅၼ်ႈႁူၺ်ႇပုၼ်ႈဢၼ်တၵ်းၼုင်ႈ မိူဝ်ႈယၢမ်းဢၼ်ႁဵတ်းၼႃႈၵၢၼ်ၸဝ်ႈမႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈတီႈ မူဝ်းသေႇ၊ ဝႆႉၼၼ်ႉဢေႃႈ။
ၶဝ်သမ်ႉယဵပ်ႉသိူဝ်ႈပွတ်းဢၼ်ဢဝ်ၽႃႈပၢၼ်ႇၶျေႃးတေႃးႁဵတ်းပုၼ်ႈ ဢႃႇရုၼ်ႇ၊ ဢိၵ်ႇတင်းလုၵ်ႈၸၢႆးမၼ်းတင်းလၢႆ၊-
ဢိၵ်ႇတင်းၽႃႈၶဵၼ်းႁူဝ်၊မွၵ်ႇႁူဝ်၊တင်းၵူၼ်ၶႃပွတ်းဢၼ်ဢဝ်ၽႃႈပၢၼ်ႇၶျေႃးယဵပ်ႉဝႆႉ၊-
တင်းသၢႆႁတ်ႉဢႅဝ်ဢၼ်ဢဝ်ၽႃႈပၢၼ်ႇၶျေႃးဢိၵ်ႇတင်းမႆၶူၼ်သူဝ်းဢၼ်သွမ်ႇ၊ဢၼ်ၵမ်ႇ၊ဢၼ်လႅင်၊တေႃးႁဵတ်းလႄႈထူဝ်းလၢႆးႁၢင်ႈၶိူင်ႈဝႆႉ၊မႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈတီႈ မူဝ်းသေႇ၊ ဝႆႉၼၼ်ႉဢေႃႈ။-
ၶဝ်ဢဝ်ၶမ်းလွတ်ႈငၢၼ်ႇႁဵတ်းၶႅပ်းၶမ်းသေလႄႈတႅမ်ႈလိၵ်ႈဝႆႉလႄႈဝႃႈ၊ “မူတ်းၸၢင်ႇတီႈ ထႃႇဝရႃႉၽြႃး၊ ” ဝႃႈၼႆၼၼ်ႉတႅမ်ႈသႂ်ႇဝႆႉမိူၼ်ၸိူဝ်ႉၼင်ႇတၢင်းဢၼ်ၶွၵ်းၸုမ်ႈတၼ်းသိၵ်ႈၼၼ်ႉလႄႈ၊-
ၶဝ်ၸင်ႇဢဝ်မႆသွမ်ႇသွႆႇၸပ်းၵႃႈတီႈၽၢႆႇၼႃႈၽႃႈၶဵၼ်းႁူဝ်မႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈတီႈ မူဝ်းသေႇ၊ ဝႆႉၼၼ်ႉဢေႃႈ။
ၼင်ႇၼၼ်လႄႈတၢင်းဢၼ်သၢင်ႈႁဵတ်းသုမ်ႉထဵင်ၸဝ်ႈၼၼ်ႉယဝ်ႉတူဝ်ႈၵႂႃႇလီငၢမ်းဢေႃႈ။ ၵူၼ်းမဵဝ်း ဢိသရေး၊ တင်းလၢႆႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈတီႈ မူဝ်းသေႇ၊ ၼၼ်ႉၸေးၸေးၸုမ်ႇၸုမ်ႇဢေႃႈ။-
ၶဝ်ဢွၼ်ၵၼ်ဢဝ်ၶိူင်ႈပိူင်ဢၼ်ဝႃႈမႃးၸိူဝ်းၼၼ်ႉ၊မႃးၵႃႈတီႈ မူဝ်းသေႇ၊ ဢေႃႈ။ ၶိူင်ႈပိူင်ဢၼ်ၶဝ်ဢွၼ်ၵၼ်ဢဝ်မႃးၸမ်ႉ၊ပဵၼ်သုမ်ႉထဵင်ၸဝ်ႈဢိၵ်ႇတင်းၶိူင်ႈမၼ်းၵႃႈမီးတင်းသဵင်ႈတင်းလူင်ဢၼ်ပဵၼ်ၶေႃမၼ်း၊ပႅၼ်ႈမၼ်း၊ပႄမၼ်း၊သဝ်မၼ်း၊တီႈသုပ်းတိၼ်မၼ်း၊-
ၼင်သူဝ်းဢၼ်ယွမ်ႉလႅင်ပုၼ်ႈၽႃႈမုင်းမၼ်းဢိၵ်ႇတင်းၼင်သတ်းဢၼ်လီဢိၵ်ႇတင်းၽႃႈၵင်ႈမၼ်း၊-
ဢိၵ်ႇတင်းတိူၵ်ႈပတိၺိၺ်ႇၸဝ်ႈဢၼ်သႂ်ႇၶႅပ်းမၢၵ်ႇႁိၼ်သွင်ၽႅၼ်ႇ ၼၼ်ႉပႃးတင်းၵၢၼ်းႁၢမ်ဢိၵ်ႇတင်းပလၢင်ႇပုၼ်ႈဢၼ်တၵ်းၽေႇဢပျတ်ႈ၊-
ၽိူၼ်ၸဝ်ႈဢိၵ်ႇတင်းၶိူင်ႈမၼ်းတင်းသဵင်ႈတင်းလူင်ပႃးတင်းၶဝ်ႈမုၼ်းဢၼ်သၢၵ်ႈလူႇတီႈ ထႃႇဝရႃႉၽြႃး၊-
ၶဵင်ႇတီႈတႆႈၽႆးဢၼ်ဢဝ်ၶမ်းလွတ်ႈငၢၼ်ႇႁဵတ်းဢိၵ်ႇတင်းၵွၵ်းၽႆးမၼ်း၊တင်းၶိူင်ႈမၼ်းတင်းသဵင်ႈတင်းလူင်ပႃးတင်းၼမ်ႉမၼ်းတႆႈ၊-
ဢိၵ်ႇတင်းၶဵင်ႇတၢင်းလူႇၶမ်းဢိၵ်ႇတင်းၼမ်ႉမၼ်းပုၼ်ႈဢၼ်တၵ်းသွၼ်းလေႃႇ၊ၼၢမ်ႇသႃႇဢၼ်ႁွမ်ဢၼ်ႁူၺ်း၊ၽႃႈၵင်ႈႁူးၽၵ်းတူသုမ်ႉထဵင်ၸဝ်ႈ၊-
ၶဵင်ႇတၢင်းလူႇတွင်းလိူင်ဢၼ်ပႃးတင်းၶႃႇတွင်းလိူင်မၼ်း၊ၵၢၼ်းႁၢမ်မၼ်းတင်းၶိူင်ႈမၼ်းတင်းသဵင်ႈတင်းလူင်၊ဢၢင်ႇလူင်ဢိၵ်ႇတင်းဢၼ်ႁွင်းမၼ်း၊-
ၽႃႈၵင်ႈႁူဝ်ႉဝၢင်းသုမ်ႉထဵင်ၸဝ်ႈဢိၵ်ႇတင်းသဝ်မၼ်းပႃးတင်းတီႈသုပ်းတိၼ်မၼ်း၊ဢိၵ်ႇတင်းၽႃႈၵင်ႈပုၼ်ႈဢၼ်တၵ်းၵင်ႈႁူးၽၵ်းတူႁူဝ်ႉဝၢင်းမၼ်း၊ဢိၵ်ႇတင်းၸိူၵ်ႈမၼ်းပႃးတင်းလၵ်းမၼ်း၊ဢိၵ်ႇတင်းၶိူင်ႈပိူင်ၵႃႈဢၼ်လူဝ်ႇသုင်းလူဝ်ႇၸႂ်ႉၵႃႈၼႂ်းသုမ်ႉထဵင်ၸဝ်ႈ၊-
ဢိၵ်ႇတင်းၶူဝ်းၼုင်ႈၶူဝ်းမႆပုၼ်ႈယဵၸ်ႈပရေႃးႁဵၵ်ႈ တၵ်းၼုင်ႈမိူဝ်ႈယၢမ်းပွင်ႁဵတ်းၼႃႈၵၢၼ်ၵႃႈၼႂ်းထႃႇၼႃႉတီႈမူတ်းၸၢင်ႇ၊ၶူဝ်းၼုင်ႈမူတ်းၸၢင်ႇပုၼ်ႈယဵၸ်ႈပရေႃးႁဵၵ်ႈ ဢႃႇရုၼ်ႇ၊ ဢိၵ်ႇတင်းလုၵ်ႈၸၢႆးမၼ်းၸိူဝ်းၼၼ်ႉတၵ်းၼုင်ႈတၵ်းမႆၼၼ်ႉဢေႃႈ။-
ၵူၼ်းမဵဝ်း ဢိသရေး၊ တင်းလၢႆ ဢွၼ်ၵၼ်ႁဵတ်းယဝ်ႉတူဝ်ႈမႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉတီႈ မူဝ်းသေႇ၊ ၼၼ်ႉဢေႃႈ။-
မူဝ်းသေႇ၊ ၵေႃႈၸႅတ်ႈသေးတူၺ်းၵႃႈမီးတင်းသဵင်ႈတင်းလူင်သေလႄႈ လႆႈႁၼ်လွင်ႈဢၼ်ၶဝ်ႁဵတ်းယဝ်ႉတူဝ်ႈမႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉၼၼ်ႉဢေႃႈ။ ပိူဝ်ႈၼႆလႄႈမၼ်းပၼ်တၢင်းလီမၢင်ႇၵလႃႇတီႈၶဝ်ဢေႃႈ။
ၸဝ်ႈထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ လႄႈဝႃႈ၊-
ဝၼ်းတီႈၼိုင်ႈၼႂ်းလိူၼ်တီႈၼိုင်ႈၼၼ်ႉမႂ်းတၵ်းလႆႈပူၵ်းႁဵတ်းသုမ်ႉထဵင်ၸဝ်ႈဢေႃႈ။-
ၵႃႈၼႂ်းသုမ်ႉထဵင်ၸဝ်ႈၼၼ်ႉဢဝ်တိူၵ်ႈပတိၺိၺ်ႇတြႃးၸဝ်ႈဝၢင်းဝႆႉသေယဝ်ႉ၊ဢဝ်ၽႃႈၵင်ႈ၊ၵင်ႈၽၢႆႇတၢင်းၼႃႈဝႆႉတႃႉ။-
ဢဝ်ၽိူၼ်ၸဝ်ႈၼၼ်ႉတင်ႈဝႆႉသေလႄႈမႄးႁႅၼ်းတမ်းဝႆႉ၊ၶိူင်ႈမၼ်းလီလီငၢမ်းငၢမ်းတႃႉ။ သမ်ႉဢဝ်ၶဵင်ႇတီႈတႆႈၽႆးၼၼ်ႉသႂ်ႇဝႆႉသေလႄႈၵွၵ်းၽႆးမၼ်းၸိူဝ်းၼၼ်ႉၵေႃႈဢဝ်တင်ႈဝႆႉတႃႉ။-
ဢဝ်ၶဵင်ႇတၢင်းလူႇၶမ်းပုၼ်ႈဢၼ်တၵ်းၽဝ်ၽႆးၼၢမ်ႇသႃႇႁွမ်ၼၼ်ႉဝၢင်းဝႆႉၵႃႈတီႈၽၢႆႇၼႃႈတိူၵ်ႈပတိၺိၺ်ႇၸဝ်ႈၼၼ်ႉသေလႄႈဢဝ်ၽႃႈၵင်ႈၵင်ႈဝႆႉၵႃႈတီႈႁူးၽၵ်းတူသုမ်ႉထဵင်ၸဝ်ႈတႃႉ။-
ဢဝ်ၶဵင်ႇတၢင်းလူႇပုၼ်ႈဢၼ်ၽဝ်ၽႆးတူဝ်တၢင်းလူႇၼၼ်ႉဝႆႉၽၢႆႇၼႃႈသုမ်ႉထဵင်ၸဝ်ႈတႃႉ။-
သမ်ႉဢဝ်ဢၢင်ႇလူင်ၼၼ်ႉသႂ်ႇၼမ်ႉတဵမ်တဵမ်လႄႈဝႆႉဝူင်ႈၵၢင်သုမ်ႉထဵင်ၸဝ်ႈတင်းၶဵင်ႇတၢင်းလူႇၼၼ်ႉတႃႉ။-
ဢဝ်ၽႃႈၵင်ႈလွမ်ႉႁူဝ်ႉဝၢင်းႁွပ်ႈႁွပ်ႈလႄႈ၊ၵႃႈတီႈႁူးၽၵ်းတူမၼ်းၼၼ်ႉၵေႃႈဢဝ်ၽႃႈၵင်ႈႁွႆႈၵင်ႈဝႆႉတႃႉ။
“လိုၼ်းၼၼ်ႉဢဝ်ၼမ်ႉမၼ်းပုၼ်ႈဢၼ်တၵ်းသွၼ်းလေႃႇၼၼ်ႉသေလႄႈသွၼ်းလေႃႇသုမ်ႉထဵင်ၸဝ်ႈဢိၵ်ႇတင်းၵႃႈဢၼ်မီးၵႃႈၼႂ်းမၼ်းႁႂ်ႈပဵၼ်တၢင်းဢၼ်သၢၵ်ႈၵၢပ်ႈမၼ်းဢိၵ်ႇတင်းၶိူင်ႈမၼ်းတင်းသဵင်ႈတင်းလူင်တီႈ ထႃႇဝရႃႉၽြႃး၊ တႃႉ။ ၼင်ႇၼၼ်လႄႈမၼ်းတၵ်းပဵၼ်တၢင်းဢၼ်မူတ်းၸၢင်ႇဢေႃႈ။-
ဝၢႆးသေၼၼ်ႉဢဝ်ၼမ်ႉမၼ်းသေလႄႈသွၼ်းလေႃႇႁႂ်ႈပဵၼ်တၢင်းဢၼ်သၢၵ်ႈၵၢပ်ႈၶဵင်ႇတၢင်းလူႇဢိၵ်ႇတင်းၶိူင်ႈမၼ်းတင်းသဵင်ႈတင်းလူင်တႃႉ။ ၶဵင်ႇတၢင်းလူႇၼၼ်ႉတေမူတ်းၸၢင်ႇၼႃႇလူင်လၢင်ဢေႃႈ။-
သမ်ႉသၢၵ်ႈၵၢပ်ႈဢၢင်ႇလူင်ဢိၵ်ႇတင်းဢၼ်ႁွင်းမၼ်းလူၺ်ႈလၢႆးလဵဝ်ၵၼ်တႃႉ။
“ႁွင်ႉဢဝ် ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉမႃးၵႃႈတီႈၽၵ်းတူသုမ်ႉထဵင်ၸဝ်ႈတီႈဢၼ်ၸုတုမ်ၵၼ်သေလႄႈဢၢပ်ႇၼမ်ႉပၼ်ၶဝ်တႃႉ။-
ဢဝ်ၶူဝ်းၼုင်ႈၶူဝ်းမႆယဵၸ်ႈပရေႃးႁဵၵ်ႈ ၼၼ်ႉၼုင်ႈမႆပၼ် ဢႃႇရုၼ်ႇ၊ သေလႄႈဢဝ်ၼမ်ႉမၼ်းသွၼ်းလေႃႇၵႃႈၼိူဝ်မၼ်းႁႂ်ႈပဵၼ်တၢင်းဢၼ်ဢဝ်မၼ်းသၢၵ်ႈၵၢပ်ႈပုၼ်ႈဢၼ်တၵ်းပွင်ႁဵတ်းၼႃႈၵၢၼ်ၵဝ်ၼႂ်းဢရႃႇယဵၸ်ႈပရေႃးႁဵၵ်ႈၼၼ်ႉတႃႉ။-
သမ်ႉႁွင်ႉဢဝ်လုၵ်ႈၸၢႆးမၼ်းၸိူဝ်းၼၼ်ႉမႃးလႄႈၼုင်ႈမႆသိူဝ်ႈပွတ်းပၼ်ၶဝ်တႃႉ။-
လိုၼ်းၼၼ်ႉသွၼ်းလေႃႇၼမ်ႉမၼ်းၵႃႈၼိူဝ်ၶဝ်မိူၼ်ၸိူဝ်ႉၼင်ႇဢၼ်မႂ်းသွၼ်းလေႃႇၼမ်ႉမၼ်းၵႃႈၼိူဝ်ပေႃႈၶဝ်ၼၼ်ႉပုၼ်ႈဢၼ်ၶဝ်တၵ်းပွင်ႁဵတ်းၼႃႈၵၢၼ်ၵဝ်ၼႂ်းဢရႃႇယဵၸ်ႈပရေႃးႁဵၵ်ႈၶဝ်ၼၼ်ႉတႃႉ။ တၢင်းဢၼ်ပၼ်ၽိၵ်ႈသိၵ်ႈဢၼ်သွၼ်းလေႃႇၼမ်ႉမၼ်းတီႈၶဝ်ၼႆႉတၵ်းလႆႈပဵၼ်ပုၼ်ႈဢရႃႇယဵၸ်ႈပရေႃးႁဵၵ်ႈထႃႇဝရႃႉၸူဝ်ႈလုၵ်ႈပၢၼ်လၢၼ်ၶဝ်ၵႂႃႇမိူဝ်းၼႃႈဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈမၼ်းၵႃႈမီးၵူႈၸိူဝ်ႉၵူႈပိူင်ဢေႃႈ။-
ၼင်ႇၼၼ်လႄႈၼႂ်းဝၼ်းတီႈၼိုင်ႈလိူၼ်တီႈၼိုင်ႈဝၢႆးသေဢၼ်ၶဝ်ဢွၵ်ႇမိူင်း ဢေးၵျိပ်ႉ၊ မႃးထူၼ်ႈတဵမ်သွင်ပီယဝ်ႉၼၼ်ႉၶဝ်လႆႈပူၵ်းႁဵတ်းသုမ်ႉထဵင်ၸဝ်ႈဢေႃႈ။-
မိူဝ်ႈဢၼ် မူဝ်းသေႇ၊ ပူၵ်းႁဵတ်းသုမ်ႉထဵင်ၸဝ်ႈၼၼ်ႉမၼ်းဢဝ်တီႈသုပ်းတိၼ်သဝ်မၼ်းတင်းလၢႆတမ်းၶပ်ႉလႄႈပူၵ်းပႅၼ်ႈမၼ်းလႂ်လႄႈ၊သွတ်ႇပႄမၼ်းသေယဝ်ႉ၊ပူၵ်းသဝ်မၼ်းဢေႃႈ။-
မၼ်းဢဝ်ၽႃႈမုင်းၵီႈႁူမ်ႇၵႃႈၼိူဝ်သုမ်ႉထဵင်ၸဝ်ႈသေလႄႈ၊သမ်ႉဢဝ်ၽႃႈမုင်းတၢင်ႇဢၼ်ႁူမ်ႇသွၼ်ႉထႅင်ႈၵႃႈၼိူဝ်မၼ်းမႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉၼၼ်ႉဢေႃႈ။-
လိုၼ်းၼၼ်ႉမၼ်းဢဝ်ၶႅပ်းမၢၵ်ႇႁိၼ်သွင်ၽႅၼ်ႇဢၼ်ပဵၼ်ပိင်းၺၢပ်ႈတြႃးၼၼ်ႉသႂ်ႇဝႆႉၵႃႈၼႂ်းတိူၵ်ႈပတိၺိၺ်ႇၸဝ်ႈ သေဢေႃႈ။ သမ်ႉဢဝ်ၵၢၼ်းႁၢမ်မၼ်းသွတ်ႇသႂ်ႇၵႃႈၼႂ်းမွင်ႈတိူၵ်ႈၼၼ်ႉသေလႄႈဢဝ်ပလၢင်ႇပုၼ်ႈဢၼ်တၵ်းၽေႇဢပျတ်ႈၼၼ်ႉတၢင်ႇဝႆႉသေဢေႃႈ။-
လိုၼ်းၼၼ်ႉမၼ်းဢဝ်တိူၵ်ႈၼၼ်ႉဝႆႉၵႃႈၼႂ်းသုမ်ႉထဵင်ၸဝ်ႈလႄႈဢဝ်ၽႃႈၵင်ႈႁႄႉတိူၵ်ႈၼၼ်ႉဝႆႉဢေႃႈ။ ၼင်ႇၼၼ်လႄႈမၼ်းႁႄႉၵင်ႈတိူၵ်ႈပတိၺိၺ်ႇၸဝ်ႈဝႆႉမႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉၼၼ်ႉဢေႃႈ။
မၼ်းဢဝ်ၽိူၼ်ၸဝ်ႈဝႆႉၵႃႈၼႂ်းသုမ်ႉထဵင်ၸဝ်ႈ ၽၢႆႇတၢင်းႁွင်ႇပႃႈၼွၵ်ႈၽႃႈၵင်ႈၼၼ်ႉဢေႃႈ။-
ၵႃႈၼိူဝ်ၽိူၼ်ၸဝ်ႈၼၼ်ႉဢဝ်ၶဝ်ႈမုၼ်းဢၼ်သၢၵ်ႈလူႇတီႈ ထႃႇဝရႃႉၽြႃး၊ ၼၼ်ႉတၢင်ႇဝႆႉမႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉၼၼ်ႉဢေႃႈ။-
ၶဵင်ႇတီႈတႆႈၽႆးၵေႃႈမၼ်းဢဝ်ဝႆႉၵႃႈၼႂ်းသုမ်ႉထဵင်ၸဝ်ႈၽၢႆႇတၢင်းၸၢၼ်းတေႃႇၼႃႈၵၼ်တင်းၽိူၼ်ၸဝ်ႈဢေႃႈ။-
ၼင်ႇၼၼ်လႄႈၵႃႈတီႈၽၢႆႇၼႃႈ ထႃႇဝရႃႉၽြႃး၊ မၼ်းတႆႈၽႆးဝႆႉမႅၼ်ႈၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉၼၼ်ႉဢေႃႈ။-
မၼ်းသမ်ႉဢဝ်ၶဵင်ႇတၢင်းလူႇၶမ်းဝႆႉၵႃႈၼႂ်းသုမ်ႉထဵင်ၸဝ်ႈၽၢႆႇၼႃႈၽႃႈၵင်ႈသေလႄႈ၊-
ဢဝ်ၼၢမ်ႇသႃႇဢၼ်ႁွမ်ဢၼ်ႁူၺ်းတုတ်ႇၽႆးၵႃႈၼိူဝ်ၶဵင်ႇတၢင်းလူႇၼၼ်ႉမႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉၼၼ်ႉဢေႃႈ။-
မၼ်းသမ်ႉဢဝ်ၽႃႈၵင်ႈႁွႆႈဝႆႉၵႃႈတီႈႁူးၽၵ်းတူသုမ်ႉထဵင်ၸဝ်ႈသေလႄႈ၊-
ၵႃႈတီႈၽၢႆႇၼႃႈၽႃႈၵင်ႈၼၼ်ႉမၼ်းဢဝ်ၶဵင်ႇတၢင်းလူႇပုၼ်ႈဢၼ်တုတ်ႇၽႆးတူဝ်တၢင်းလူႇတမ်းဝႆႉဢေႃႈ။ ၵႃႈၼိူဝ်ၶဵင်ႇတၢင်းလူႇၼၼ်ႉမၼ်းသၢၵ်ႈလူႇတူဝ်တၢင်းလူႇဢၼ်တုတ်ႇၽႆးဢိၵ်ႇတင်းတၢင်းလူႇမၢၵ်ႇၶဝ်ႈႁူင်းၶဝ်ႈမႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉၼၼ်ႉဢေႃႈ။-
မၼ်းဢဝ်ဢၢင်ႇလူင်ၼၼ်ႉသႂ်ႇၼမ်ႉတဵမ်တဵမ်သေလႄႈဢဝ်ဝႆႉၵႃႈတီႈဝူင်ႈၵၢင်သုမ်ႉထဵင်ၸဝ်ႈဢိၵ်ႇတင်းၶဵင်ႇတၢင်းလူႇၼၼ်ႉဢေႃႈ။-
ၸႃႉၸဵမ် မူဝ်းသေႇ၊ လႄႈ ဢႃႇရုၼ်ႇ၊ တင်းလုၵ်ႈၸၢႆးမၼ်းတင်းလၢႆသုၵ်ႈတိၼ်သုၵ်ႈမိုဝ်းၶဝ်ၵႃႈတီႈၼၼ်ႈၵူႈပွၵ်ႈ၊-
ယၢမ်းမိူဝ်ႈဢၼ်ၶဝ်၊ၶဝ်ႈၵႃႈၼႂ်းသုမ်ႉထဵင်ၸဝ်ႈဢိၵ်ႇတင်းသုတ်ႉၸပ်းသုတ်ႉၸူးၵႃႈတီႈၶဵင်ႇတၢင်းလူႇၼၼ်ႉမႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉၼၼ်ႉဢေႃႈ။-
မူဝ်းသေႇ၊ လွမ်ႉႁူဝ်ႉဝၢင်းသုမ်ႉထဵင်ၸဝ်ႈဢိၵ်ႇတင်းၶဵင်ႇတၢင်းလူႇၼၼ်ႉႁွပ်ႈႁွပ်ႈသေလႄႈ၊ဢဝ်ၽႃႈၵင်ႈႁွႆႈၵႃႈတီႈႁူးၽၵ်းတူႁူဝ်ႉဝၢင်းၼၼ်ႉဢေႃႈ။ ၼင်ႇၼၼ်လႄႈမၼ်းႁဵတ်းသုမ်ႉထဵင်ၸဝ်ႈယဝ်ႉတူဝ်ႈလီလီငၢမ်းငၢမ်းဢေႃႈ။
မိူဝ်ႈၼၼ်ႉမွၵ်ႇၵုမ်ႈမုင်းႁူမ်ႇၵႃႈၼိူဝ်သုမ်ႉထဵင်ၸဝ်ႈၼၼ်ႉလႄႈမုၼ်ၽုင်းတၼ်းၶူဝ်း ထႃႇဝရႃႉၽြႃး၊ တဵမ်ဝႆႉၼႂ်းသုမ်ႉထဵင်ၸဝ်ႈဢေႃႈ။-
မူဝ်းသေႇ၊ ဢမ်ႇၸၢင်ႈၶဝ်ႈၵႃႈၼႂ်းသုမ်ႉထဵင်ၸဝ်ႈလႆႈ၊ၵွပ်ႈပိူဝ်ႈမွၵ်ႇၵုမ်ႈမုင်းႁူမ်ႇၵႃႈၼိူဝ်မၼ်းလႄႈမုၼ်ၽုင်းတၼ်းၶူဝ်း ထႃႇဝရႃႉၽြႃး၊ တဵမ်ဝႆႉၵႃႈၼႂ်းသုမ်ႉထဵင်ၸဝ်ႈၼၼ်ႉဢေႃႈ။-
မွၵ်ႇၵုမ်ႈယုၵ်ႉၽၢတ်ႇဢွၵ်ႇသေသုမ်ႉထဵင်ၸဝ်ႈၵႂႃႇမိူဝ်ႈလႂ်ၵေႃႈၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ၶၢႆႉတီႈ၊ဢွၵ်ႇတႃႈပႆတၢင်းၵႂႃႇမိူဝ်ႈၼၼ်ႉဢေႃႈ။-
ပေႃးမွၵ်ႇၵုမ်ႈၼၼ်ႉယင်းတႄႇယူႇသဝ်းယူႇၸိုင်၊ၶဝ်ဢမ်ႇဢွၵ်ႇတႃႈပႆတၢင်းတေႃႇထိုင်ႁွတ်ႈမွၵ်ႇၵုမ်ႈၼၼ်ႉတၵ်းယုၵ်ႉၽၢတ်ႇဢွၵ်ႇၵႂႃႇၼၼ်ႉဢေႃႈ။-
ၼႂ်းၸူဝ်ႈၶၢဝ်းတၢင်းဢၼ်ၶဝ်ၵႂႃႇၶဝ်ပႆၼၼ်ႉၶဝ်လႆႈႁၼ်မွၵ်ႇၵုမ်ႈ ထႃႇဝရႃႉၽြႃး၊ တႄႇယူႇၵႃႈၼိူဝ်သုမ်ႉထဵင်ၸဝ်ႈၶိင်ႇၵၢင်ဝၼ်းလႄႈ၊သမ်ႉႁၼ်ပဵၼ်ပိဝ်ၽႆးယူႇၼႂ်းၶိင်ႇၵၢင်ၶိုၼ်းဢေႃႈ။ ၵျၢမ်းဢၼ်ဢွၵ်ႇၵႂႃႇယဝ်ႉယဝ်ႉဢေႃႈ။
ထႃႇဝရႃႉၽြႃး၊ လုၵ်ႉၵႃႈတီႈသုမ်ႉထဵင်ၸဝ်ႈသေလႄႈမီးဢမိင်ႉတီႈ မူဝ်းသေႇ၊ လႄႈဝႃႈ၊-
“မႂ်းတၵ်းလႆႈလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလႄႈသင်ႇလၢတ်ႈတီႈၶဝ်လႄႈဝႃႈ၊ “မိူဝ်ႈဢၼ်ၵူၼ်းၼႂ်းသူသေၵေႃႉၵေႃႉဢဝ်တၢင်းလူႇမႃးသၢၵ်ႈၵၢပ်ႈတီႈ ထႃႇဝရႃႉၽြႃး၊ ၼၼ်ႉၸိုင်၊ႁႂ်ႈမၼ်းဢဝ်တူဝ်တရိၵ်ႈသၢၼ်ႇၵႃႈၼႂ်းၽုင်ဝူဝ်း၊ၽုင်သူဝ်း၊ၽုင်ပႄႉမႃးသၢၵ်ႈလူႇတႃႉ။-
ပေႃးမၼ်းဢဝ်ဝူဝ်းႁႂ်ႈပဵၼ်ၶိူင်ႈတၢင်းလူႇဢၼ်တုတ်ႇၽႆးၸိုင်၊မၼ်းတၵ်းလႆႈဢဝ်တူဝ်ပေႃႈဢၼ်ဢမ်ႇမီးတီႈၸိတီႈၼႄးၼၼ်ႉမႃးသၢၵ်ႈလူႇဢေႃႈ။ မၼ်းတၵ်းလႆႈသၢၵ်ႈလူႇၵႃႈတီႈၽၢႆႇၼႃႈၽၵ်းတူသုမ်ႉထဵင်ၸဝ်ႈၼၼ်ႉႁႂ်ႈပဵၼ်ဢၼ်ထုၵ်ႇၸႂ်မႅၼ်ႈၸႂ် ထႃႇဝရႃႉၽြႃး၊ ဢေႃႈ။-
ၵူၼ်းၵေႃႉၼၼ်ႉတၵ်းလႆႈဢဝ်မိုဝ်းမၼ်းတၢင်ႇၵႃႈၼိူဝ်ႁူဝ်ဝူဝ်းၼၼ်ႉသေလႄႈ၊တၢင်းလူႇၼၼ်ႉတၵ်းလႆႈၶၢမ်ႇတၢင်းဢၼ် ထႃႇဝရႃႉၽြႃး၊ မၢတ်ႈပဵၼ်တၢင်းလူႇဢၼ်ၽေႇဢပျတ်ႈမၼ်းဢေႃႈ။-
မၼ်းတၵ်းလႆႈႁႅမ်ဝူဝ်းၼၼ်ႉၵႃႈတီႈၼၼ်ႈသေလႄႈလုၵ်ႈၸၢႆး ဢႃႇရုၼ်ႇ၊ ၸိူဝ်းဢၼ်ပဵၼ်ယဵၸ်ႈပရေႃးႁဵၵ်ႈ ၼၼ်ႉတၵ်းလႆႈဢဝ်လိူတ်ႈဝူဝ်းၼၼ်ႉၽႅတ်းသႂ်ႇတီႈၽႃၶဵင်ႇတၢင်းလူႇတၢင်းသီႇၼႃႈဢၼ်မီးၵႃႈႁိမ်းၽၵ်းတူသုမ်ႉထဵင်ၸဝ်ႈၼၼ်ႉဢေႃႈ။-
လိုၼ်းၼၼ်ႉမၼ်းတၵ်းလႆႈလွၵ်ႈဢဝ်ၼင်မၼ်းသေလႄႈတႅပ်းတူဝ်ယဵၸ်ႈပရေႃးႁဵၵ်ႈၼၼ်ႉပဵၼ်ပွတ်းပဵၼ်ပွတ်းဢေႃႈ။-
ယဵၸ်ႈပရေႃးႁဵၵ်ႈတင်းလၢႆတၵ်းလႆႈဢဝ်ၽိုၼ်းတၢင်ႇၵႃႈၼိူဝ်ၶဵင်ႇတၢင်းလူႇသေလႄႈသုမ်ၽႆးတီႈၽိုၼ်းၸိူဝ်းၼၼ်ႉဢေႃႈ။-
ၶဝ်တၵ်းလႆႈဢဝ်ၵွၼ်ႈၼိူဝ်ႉၸိူဝ်းၼၼ်ႉဢိၵ်ႇတင်းႁူဝ်မၼ်းဢိၵ်ႇတင်းၵွၼ်ႈၶႆၵွၼ်ႈမၼ်းတင်းလၢႆၶပ်ႉၵႃႈၼိူဝ်ၵွင်ၽိုၼ်းဢၼ်ၽႆးလုၵ်ႉယူႇၼၼ်ႉဢေႃႈ။-
ၵူၺ်းၵႃႈ၊ၶူင်းၼႂ်းမၼ်းတင်းတိၼ်မၼ်းၸိူဝ်းၼၼ်ႉၸိုင်၊ၵေႃႉၼၼ်ႉတၵ်းလႆႈဢဝ်ၼမ်ႉသုၵ်ႈသေလႄႈ၊ယဵၸ်ႈပရေႃးႁဵၵ်ႈၵေႃႉဢၼ်တူၵ်းပုၼ်ႈၽွၼ်းၼၼ်ႉတၵ်းလႆႈဢဝ်တင်းသဵင်ႈတင်းမူတ်းတုတ်ႇၽႆးသၢၵ်ႈၵၢပ်ႈၵႃႈၼိူဝ်ၶဵင်ႇတၢင်းလူႇဢေႃႈ။ ပဵၼ်တၢင်းလူႇဢၼ်တုတ်ႇၽႆးလႄႈဢၢႆႁွမ်ဢၢႆႁူၺ်းမၼ်းထုၵ်ႇၸႂ်မႅၼ်ႈၸႂ်တီႈ ထႃႇဝရႃႉၽြႃး၊ ဢေႃႈ။
“ပေႃးၵူၼ်းၵေႃႉၼၼ်ႉဢဝ်သူဝ်းဢမ်ႇၼၼ်ပႄႉႁႂ်ႈပဵၼ်တၢင်းလူႇဢၼ်တုတ်ႇၽႆးၸိုင်၊မၼ်းတၵ်းလႆႈဢဝ်တူဝ်ပေႃႈဢၼ်ဢမ်ႇမီးတီႈၸိတီႈၼႄးၼၼ်ႉမႃးသၢၵ်ႈလူႇဢေႃႈ။-
မၼ်းတၵ်းလႆႈႁႅမ်တူဝ်ၼၼ်ႉၵႃႈတီႈၽၢႆႇတၢင်းႁွင်ႇၶဵင်ႇတၢင်းလူႇသေယဝ်ႉ၊ယဵၸ်ႈပရေႃးႁဵၵ်ႈ တင်းလၢႆတၵ်းလႆႈဢဝ်လိူတ်ႈသတ်းၼၼ်ႉၽႅတ်းသႂ်ႇတီႈၽႃၶဵင်ႇတၢင်းလူႇတင်းသီႇၼႃႈဢေႃႈ။-
လိုၼ်းသေဢၼ်ၵေႃႉၼၼ်ႉတႅပ်းပဵၼ်ပွတ်းပဵၼ်ပွတ်းယဝ်ႉၼၼ်ႉၸိုင်၊ယဵၸ်ႈပရေႃးႁဵၵ်ႈၵေႃႉဢၼ်တူၵ်းပုၼ်ႈၽွၼ်းၼၼ်ႉတၵ်းလႆႈဢဝ်ၵွၼ်ႈၼိူဝ်ႉၸိူဝ်းၼၼ်ႉဢိၵ်ႇတင်းႁူဝ်မၼ်းတင်းၵွၼ်ႈၶႆၵွၼ်ႈမၼ်းတင်းလၢႆ၊ၶပ်ႉၵႃႈၼိူဝ်ၵွင်ၽိုၼ်းဢၼ်ၽႆးလုၵ်ႉယူႇၵႃႈၼိူဝ်ၶဵင်ႇတၢင်းလူႇဢေႃႈ။-
ၵူၺ်းၵႃႈ၊ၶူင်းၼႂ်းမၼ်းတင်းတိၼ်မၼ်းၸိူဝ်းၼၼ်ႉၸိုင်၊ၵေႃႉၼၼ်ႉတၵ်းလႆႈဢဝ်ၼမ်ႉသုၵ်ႈသေလႄႈ၊ယဵၸ်ႈပရေႃးႁဵၵ်ႈၼၼ်ႉတၵ်းလႆႈဢဝ်တင်းသဵင်ႈတင်းမူတ်းတုတ်ႇၽႆးသၢၵ်ႈၵၢပ်ႈတီႈ ထႃႇဝရႃႉၽြႃး၊ ၵႃႈၼိူဝ်ၶဵင်ႇတၢင်းလူႇဢေႃႈ။ ပဵၼ်တၢင်းလူႇဢၼ်တုတ်ႇၽႆးလႄႈဢၢႆႁွမ်ဢၢႆႁူၺ်းမၼ်းထုၵ်ႇၸႂ်မႅၼ်ႈၸႂ် ထႃႇဝရႃႉၽြႃး၊ ဢေႃႈ။
“ပေႃးၵေႃႉၼၼ်ႉတေဢဝ်ၼူၵ်ႉႁႂ်ႈပဵၼ်ၶိူင်ႈတၢင်းလူႇဢၼ်တုတ်ႇၽႆးတီႈ ထႃႇဝရႃႉၽြႃး၊ ၸိုင်၊မၼ်းတၵ်းလႆႈပဵၼ်ၼူၵ်ႉတူႈဢမ်ႇၼၼ်ၵႃၵႄမႃးသၢၵ်ႈလူႇဢေႃႈ။-
ယဵၸ်ႈပရေႃးႁဵၵ်ႈၼၼ်ႉတၵ်းလႆႈဢဝ်မႃးၵႃႈႁိမ်းၶဵင်ႇတၢင်းလူႇလႄႈလိမ်ႇၶေႃးမၼ်းၶၢတ်ႇသေယဝ်ႉ၊ဢဝ်ႁူဝ်မၼ်းတုတ်ႇၽႆးၵႃႈၼိူဝ်ၶဵင်ႇတၢင်းလူႇဢေႃႈ။ လိူတ်ႈမၼ်းၸိုင်၊တၵ်းလႆႈဢဝ်မိပ်ႇသႂ်ႇတီႈႁိမ်းၶၢင်ႈၶဵင်ႇတၢင်းလူႇဢေႃႈ။-
မၼ်းတၵ်းလႆႈဢဝ်ၼဵင်မၼ်းဢိၵ်ႇတင်းၵႃႈဢၼ်မီးၵႃႈၼႂ်းၼဵင်မၼ်းၼၼ်ႉႁႂ်ႈဢဝ်ပႅတ်ႈဝႆႉၽၢႆႇတၢင်းဢွၵ်ႇၶဵင်ႇတၢင်းလူႇၵႃႈတီႈဢၼ်ဝႆႉတဝ်ႈၼၼ်ႉဢေႃႈ။-
မၼ်းတၵ်းလႆႈၽႃႇတူဝ်ၼူၵ်ႉဢၼ်ပႃးတင်းပိၵ်ႇမၼ်းၽႄႇၵီႈဢမ်ႇႁႂ်ႈၽၢတ်ႇၵၼ်လႄႈ၊ယဵၸ်ႈပရေႃးႁဵၵ်ႈၼၼ်ႉတၵ်းလႆႈဢဝ်တူဝ်မၼ်းတုတ်ႇၽႆးသၢၵ်ႈၵၢပ်ႈၵႃႈၼိူဝ်ၶဵင်ႇတၢင်းလူႇဢေႃႈ။ ပဵၼ်တၢင်းလူႇဢၼ်တုတ်ႇၽႆးလႄႈဢၢႆႁွမ်ဢၢႆႁူၺ်းမၼ်းထုၵ်ႇၸႂ်မႅၼ်ႈၸႂ် ထႃႇဝရႃႉၽြႃး၊ ဢေႃႈ။
“မိူဝ်ႈဢၼ်သေၵေႃႉၵေႃႉႁဵတ်းတၢင်းလူႇမၢၵ်ႇၶဝ်ႈႁူင်းၶဝ်ႈတီႈ ထႃႇဝရႃႉၽြႃး၊ ၸိုင်၊တၢင်းလူႇမၼ်းၼၼ်ႉတၵ်းလႆႈပဵၼ်ၽွင်ၶဝ်ႈၵျုင်ႇဢေႃႈ။ မၼ်းတၵ်းလႆႈဢဝ်ၼမ်ႉမၼ်းသၢၼ်ႇလုၼ်ႇႁူတ်းလေႃႇလႄႈသမ်ႉဢဝ်လေႃႇပၢၼ်ႇၽွၵ်းသႂ်ႇၵႃႈၼိူဝ်ၽွင်ၶဝ်ႈၵျုင်ႇၼၼ်ႉသေယဝ်ႉ၊-
ဢဝ်မႃးၵႃႈတီႈလုၵ်ႈၸၢႆး ဢႃႇရုၼ်ႇ၊ ၸိူဝ်းဢၼ်ပဵၼ်ယဵၸ်ႈပရေႃးႁဵၵ်ႈၼၼ်ႉဢေႃႈ။ ယဵၸ်ႈပရေႃးႁဵၵ်ႈ ၵေႃႉဢၼ်တူၵ်းတႃႇဝုၼ်ႇၼၼ်ႉတၵ်းလႆႈဢဝ်ၽွင်ၶဝ်ႈၵျုင်ႇဢၼ်လေႃးၼမ်ႉမၼ်းဝၵ်ႉၼိုင်ႈဢိၵ်ႇတင်းလေႃႇပၢၼ်ႇၵႃႈမီးၼၼ်ႉတုတ်ႇၽႆးၵႃႈၼိူဝ်ၶဵင်ႇတၢင်းလူႇႁႂ်ႈပဵၼ်တၢင်းလူႇပုၼ်ႈဢၼ်မၼ်းၸဝ်ႈတၵ်းၶုၵ်းၸႂ်လႆႈဢေႃႈ။ ပဵၼ်တၢင်းလူႇဢၼ်တုတ်ႇၽႆးဢၢႆႁွမ်ဢၢႆႁူၺ်းမၼ်းဢၼ်ထုၵ်ႇၸႂ်မႅၼ်ႈၸႂ် ထႃႇဝရႃႉၽြႃး၊ ၼၼ်ႉဢေႃႈ။-
တၢင်းလူႇမၢၵ်ႇၶဝ်ႈႁူင်းၶဝ်ႈဢၼ်ၵိုတ်းဢၼ်ၵျၢၼ်ႇၼၼ်ႉပဵၼ်ပုၼ်ႈယဵၸ်ႈပရေႃးႁဵၵ်ႈတင်းလၢႆလႄႈ၊ပဵၼ်ဢၼ်မူတ်းၸၢင်ႇၼႃႇလူင်လၢင်ၵွပ်ႈပိူဝ်ႈဢၼ်ဢဝ်ဢွၵ်ႇသေၵႃႈၼႂ်းမၢၵ်ႇၶဝ်ႈႁူင်းၶဝ်ႈဢၼ်သၢၵ်ႈလူႇတီႈ ထႃႇဝရႃႉၽြႃး၊ ၼၼ်ႉဢေႃႈ။
“ပေႃးတၢင်းလူႇမၢၵ်ႇၶဝ်ႈႁူင်းၶဝ်ႈၼၼ်ႉပဵၼ်ၶဝ်ႈမုၼ်းဢၼ်ၽဝ်ၼႂ်းတဝ်ႈၽႆးၸိုင်၊မၼ်းတေဢမ်ႇလႆႈသႂ်ႇၸိူဝ်ႉပႅင်ႈ။ တၵ်းလႆႈပဵၼ်ၶဝ်ႈမုၼ်းၶႅပ်းၼႃၼႃဢၼ်ၼွၵ်းလေႃးၼမ်ႉမၼ်းသၢၼ်ႇလုၼ်ႇ၊ဢမ်ႇၼၼ်ၶဝ်ႈမုၼ်းၶွပ်ႈဢၼ်တႃးၼမ်ႉမၼ်းသၢၼ်ႇလုၼ်ႇၼၼ်ႉဢေႃႈ။
“ပေႃးတၢင်းလူႇမၢၵ်ႇၶဝ်ႈႁူင်းၶဝ်ႈၼၼ်ႉ ပဵၼ်ၶဝ်ႈမုၼ်းၶူဝ်ႈဢၼ်ၶူဝ်ႈၼိူဝ်ၶႅပ်းလဵၵ်းၸိုင်၊တၵ်းလႆႈပဵၼ်ၽွင်ၶဝ်ႈၵျုင်ႇဢၼ်ဢမ်ႇသႂ်ႇၸိူဝ်ႉပႅင်ႈဢၼ်ၼွၵ်းလေႃးၼမ်ႉမၼ်းသၢၼ်ႇလုၼ်ႇဢေႃႈ။-
တၵ်းလႆႈဝိတ်းယွႆႈသေယဝ်ႉ၊ဢဝ်ၼမ်ႉမၼ်းႁူတ်းသေလႄႈသၢၵ်ႈလူႇႁႂ်ႈပဵၼ်တၢင်းလူႇမၢၵ်ႇၶဝ်ႈႁူင်းၶဝ်ႈဢေႃႈ။
“ပေႃးတၢင်းလူႇၼၼ်ႉပဵၼ်ၶဝ်ႈမုၼ်းၶူဝ်ႈဢၼ်ၶူဝ်ႈၼႂ်းမေႃႈၶၢင်ၸိုင်၊တၵ်းလႆႈပဵၼ်ၽွင်ၶဝ်ႈၵျုင်ႇဢၼ်ၼွၵ်းလေႃးၼမ်ႉမၼ်းသၢၼ်ႇလုၼ်ႇၼၼ်ႉဢေႃႈ။-
တၵ်းလႆႈဢဝ်တၢင်းလူႇမၢၵ်ႇၶဝ်ႈႁူင်းၶဝ်ႈမဵဝ်းလႂ်သေဢမ်ႇဝႃႈမႃးတီႈ ထႃႇဝရႃႉၽြႃး၊ သေလႄႈပၼ်ၵႃႈတီႈယဵၸ်ႈပရေႃးႁဵၵ်ႈ၊ ႁႂ်ႈမၼ်းဢဝ်ၵႂႃႇၵႃႈတီႈၶဵင်ႇတၢင်းလူႇဢေႃႈ။-
ယဵၸ်ႈပရေႃးႁဵၵ်ႈၼၼ်ႉတၵ်းဢဝ်ပုၼ်ႈၼိုင်ႈသေလႄႈတုတ်ႇၽႆးၵႃႈၼိူဝ်ၶဵင်ႇတၢင်းလူႇႁႂ်ႈပဵၼ်တၢင်းဢၼ်သၢၵ်ႈၵၢပ်ႈတီႈ ထႃႇဝရႃႉၽြႃး၊ ဢေႃႈ။ ပဵၼ်တၢင်းလူႇဢၼ်တုတ်ႇၽႆးလႄႈဢၢႆႁွမ်ဢၢႆႁူၺ်းမၼ်းထုၵ်ႇၸႂ်မႅၼ်ႈၸႂ် ထႃႇဝရႃႉၽြႃး၊ ဢေႃႈ။-
ဢၼ်ၵိုတ်းဢၼ်ၵျၢၼ်ႇၼႂ်းတၢင်းလူႇမၢၵ်ႇၶဝ်ႈႁူင်းၶဝ်ႈၼၼ်ႉပဵၼ်ပုၼ်ႈယဵၸ်ႈပရေႃးႁဵၵ်ႈ တင်းလၢႆလႄႈပဵၼ်ဢၼ်မူတ်းၸၢင်ႇၼႃႇလူင်လၢင်ၵွပ်ႈပိူဝ်ႈဢၼ်ဢဝ်ဢွၵ်ႇသေၵႃႈၼႂ်းမၢၵ်ႇၶဝ်ႈႁူင်းၶဝ်ႈဢၼ်သၢၵ်ႈလူႇတီႈ ထႃႇဝရႃႉၽြႃး၊ ၼၼ်ႉဢေႃႈ။
“ၵႃႈၼႂ်းတၢင်းလူႇမၢၵ်ႇၶဝ်ႈႁူင်းၶဝ်ႈဢၼ်သူသၢၵ်ႈလူႇတီႈ ထႃႇဝရႃႉၽြႃး၊ ၼၼ်ႉဢမ်ႇလႆႈသႂ်ႇၸိူဝ်ႉပႅင်ႈ။ ၼႂ်းၵႃႈဢၼ်ပဵၼ်တၢင်းၵိၼ်တၢင်းၶူပ်းဢၼ်သၢၵ်ႈလူႇတီႈ ထႃႇဝရႃႉၽြႃး၊ ၼၼ်ႉဢမ်ႇလႆႈသႂ်ႇၸိူဝ်ႉပႅင်ႈသေလႄႈတုတ်ႇၽႆး။ ၼမ်ႉၽိုင်ႈၵေႃႈ၊ဢမ်ႇလႆႈတုတ်ႇၽႆးလႃးလႃး။-
ပေႃးဢဝ်ၸိူဝ်ႉပႅင်ႈတင်းၼမ်ႉၽိုင်ႈသွင်မဵဝ်းၼႆႉႁႂ်ႈပဵၼ်မိူၼ်ၸိူဝ်ႉၼင်ႇမၢၵ်ႇဢၼ်မၢၵ်ႇဢွၼ်တၢင်းပိူၼ်ႈၼၼ်ႉၵေႃႈတၵ်းလႆႈဢဝ်မႃးတီႈ ထႃႇဝရႃႉၽြႃး၊ ဢေႃႈ။ ၵူၺ်းၵႃႈ၊တၵ်းဢမ်ႇလႆႈဢဝ်တၢင်းလူႇၼၼ်ႉတုတ်ႇၽႆးၵႃႈတီႈၼိူဝ်ၶဵင်ႇတၢင်းလူႇ။-
ၵႃႈတီႈတၢင်းလူႇမၢၵ်ႇၶဝ်ႈႁူင်းၶဝ်ႈၼၼ်ႉတၵ်းလႆႈသႂ်ႇၵိူဝ်ဢေႃႈ။ လွင်ႈမၼ်းၸမ်ႉ၊ၵိူဝ်ပဵၼ်ၸိူဝ်ႉၼင်ႇပတိၺိၺ်ႇဢၼ်ဝႆႉဝူင်ႈၵၢင်မႂ်းတင်းၽြႃးပဵၼ်ၸဝ်ႈဢေႃႈ။ ပိူဝ်ႈၼႆလႄႈၵႃႈဢၼ်ပဵၼ်တၢင်းလူႇမႂ်းတင်းသဵင်ႈတင်းလူင်ၼၼ်ႉတၵ်းလႆႈသႂ်ႇၵိူဝ်ဢေႃႈ။
“ပေႃးမႂ်းဢဝ်မၢၵ်ႇဢဝ်ႁူင်းဢၼ်မၢၵ်ႇဢွၼ်တၢင်းၼၼ်ႉႁဵတ်းတၢင်းလူႇမၢၵ်ႇၶဝ်ႈႁူင်းၶဝ်ႈလႄႈသၢၵ်ႈလူႇတီႈ ထႃႇဝရႃႉၽြႃး၊ ၸိုင်၊မႂ်းတၵ်းလႆႈဢဝ်ႁူင်းၶဝ်ႈလိပ်းၶဝ်ႈၶဵဝ်ၼၼ်ႉႁၢင်းၽႆးလႄႈၼူတ်ႈဢဝ်မဵတ်ႉမၼ်းၼၼ်ႉႁဵတ်းတၢင်းလူႇမၢၵ်ႇၶဝ်ႈႁူင်းၶဝ်ႈဢၼ်သၢၵ်ႈလူႇမၢၵ်ႇဢၼ်မၢၵ်ႇဢွၼ်တၢင်းပိူၼ်ႈၼၼ်ႉဢေႃႈ။-
မႂ်းတၵ်းလႆႈဢဝ်ၼမ်ႉမၼ်းသၢၼ်ႇလုၼ်ႇႁူတ်းသႂ်ႇလႄႈဢဝ်လေႃႇပၢၼ်ႇသႂ်ႇပႃးဢေႃႈ။ ဢၼ်ၼၼ်ႉပဵၼ်တၢင်းလူႇမၢၵ်ႇၶဝ်ႈႁူင်းၶဝ်ႈဢေႃႈ။-
ယဵၸ်ႈပရေႃးႁဵၵ်ႈတၵ်းလႆႈဢဝ်မဵတ်ႉၶဝ်ႈဢၼ်ၼူတ်ႈဢဝ်ၼၼ်ႉပုၼ်ႈၼိုင်ႈတင်းၼမ်ႉမၼ်းၵမ်ႈၽွင်ႈဢိၵ်ႇတင်းလေႃႇပၢၼ်ႇၵႃႈမီးၼၼ်ႉတုတ်ႇၽႆးပုၼ်ႈဢၼ်မၼ်းၸဝ်ႈတၵ်းၶုၵ်းၸႂ်လႆႈဢေႃႈ။ ပဵၼ်တၢင်းလူႇဢၼ်ဢဝ်တင်းၽႆးသၢၵ်ႈလူႇတီႈ ထႃႇဝရႃႉၽြႃး၊ ဢေႃႈ။
“ပေႃးသေၵေႃႉသေၵူၼ်းဢဝ်ဝူဝ်းႁဵတ်းတၢင်းလူႇမိၵ်ႈသႁႃႇယႃႉၸိုင်၊မၼ်းတၵ်းလႆႈဢဝ်ဝူဝ်းပေႃႈဢမ်ႇၼၼ်ဝူဝ်းမႄႈသေတူဝ်တူဝ်ဢၼ်ဢမ်ႇမီးတီႈၸိတီႈၼႄးၼၼ်ႉသၢၵ်ႈလူႇတီႈ ထႃႇဝရႃႉၽြႃး၊ ဢေႃႈ။-
ၵေႃႉၼၼ်ႉတၵ်းလႆႈဢဝ်မိုဝ်းမၼ်းတၢင်ႇၵႃႈၼိူဝ်ႁူဝ်ဝူဝ်းဢၼ်မၼ်းသၢၵ်ႈလူႇၼၼ်ႉလႄႈႁႅမ်ၵႃႈတီႈႁိမ်းၽၵ်းတူသုမ်ႉထဵင်ၸဝ်ႈဢေႃႈ။ လုၵ်ႈၸၢႆး ဢႃႇရုၼ်ႇ၊ ၸိူဝ်းဢၼ်ပဵၼ်ယဵၸ်ႈပရေႃးႁဵၵ်ႈ ၼၼ်ႉတၵ်းလႆႈဢဝ်လိူတ်ႈဝူဝ်းၼၼ်ႉၽႅတ်းသႂ်ႇတီႈၽႃၶဵင်ႇတၢင်းလူႇတင်းသီႇၽၢႆႇသီႇၼႃႈသေယဝ်ႉ၊-
တၢင်းလူႇမိၵ်ႈသႁႃႇယႃႉဢၼ်ပဵၼ်တၢင်းလူႇဢၼ်တုတ်ႇၽႆးတီႈ ထႃႇဝရႃႉၽြႃး၊ ၼၼ်ႉပဵၼ်ၵွၼ်ႈၶႆၵွၼ်ႈမၼ်းဢၼ်ၸပ်းၶူင်းၼႂ်းမၼ်း၊-
မၢၵ်ႇလၼ်းမၼ်းသွင်ႁူၺ်ႇတင်းၵွၼ်ႈၶႆၵွၼ်ႈမၼ်းဢိၵ်ႇတင်းတပ်းမၼ်းပွတ်းဢၼ်ၼုမ်ႇလီသေပိူၼ်ႈၸိူဝ်းၼၼ်ႉ၊-
ယဵၸ်ႈပရေႃးႁဵၵ်ႈၶဝ်တၵ်းလႆႈဢဝ်တုတ်ႇၽႆးၵႃႈၼိူဝ်ၶဵင်ႇတၢင်းလူႇႁူမ်ႈလူၺ်ႈၵၼ်တင်းၶိူင်ႈတၢင်းလူႇဢၼ်တုတ်ႇၽႆးၸိူဝ်းၼၼ်ႉဢေႃႈ။ ပဵၼ်တၢင်းလူႇဢၼ်ယူႇၼိူဝ်ၽိုၼ်းၼိူဝ်ၽႆးသေလႄႈဢၢႆႁွမ်ဢၢႆႁူၺ်းမၼ်းထုၵ်ႇၸႂ်မႅၼ်ႈၸႂ် ထႃႇဝရႃႉၽြႃး၊ ဢေႃႈ။
“ပေႃးဢဝ်သူဝ်းဢမ်ႇၼၼ်ပႄႉႁဵတ်းတၢင်းလူႇမိၵ်ႈသႁႃႇယႃႉၸိုင်၊တၵ်းလႆႈပဵၼ်တူဝ်ပေႃႈဢမ်ႇၼၼ်တူဝ်မႄႈဢၼ်ဢမ်ႇမီးတီႈၸိတီႈၼႄးၼၼ်ႉဢေႃႈ။-
ပေႃးၵူၼ်းသေၵေႃႉၵေႃႉသၢၵ်ႈလူႇသူဝ်းၸိုင်၊-
မၼ်းတၵ်းလႆႈဢဝ်မိုဝ်းတၢင်ႇၵႃႈၼိူဝ်ႁူဝ်သူဝ်းၼၼ်ႉသေလႄႈႁႅမ်ၵႃႈတီႈၽၢႆႇၼႃႈသုမ်ႉထဵင်ၸဝ်ႈဢေႃႈ။ ယဵၸ်ႈပရေႃးႁဵၵ်ႈၸိူဝ်းၼၼ်ႉတၵ်းလႆႈဢဝ်လိူတ်ႈသူဝ်းၼၼ်ႉၽႅတ်းသႂ်ႇၵႃႈတီႈၽႃၶဵင်ႇတၢင်းလူႇတင်းသီႇၼႃႈသေယဝ်ႉ၊-
တၢင်းလူႇမိၵ်ႈသႁႃႇယႃႉဢၼ်ပဵၼ်တၢင်းလူႇဢၼ်တုတ်ႇၽႆးတီႈ ထႃႇဝရႃႉၽြႃး၊ ၼၼ်ႉ၊ၵွၼ်ႈၶႆၵွၼ်ႈမၼ်းမၼ်း၊ႁၢင်မၼ်းဢၼ်တႅပ်းၶၢတ်ႇၵႃႈတီႈလုပ်ႇသၼ်လင်၊ဢိၵ်ႇတင်းၵွၼ်ႈၶႆၵွၼ်ႈမၼ်းဢၼ်ၸပ်းၶူင်းၼႂ်းမၼ်း၊-
မၢၵ်ႇလၼ်းမၼ်းသွင်ႁူၺ်ႇတင်းၵွၼ်ႈၶႆၵွၼ်ႈမၼ်း ဢိၵ်ႇတင်းတပ်းမၼ်းပွတ်းဢၼ်ၼုမ်ႇလီသေပိူၼ်ႈၸိူဝ်းၼၼ်ႉ၊-
ယဵၸ်ႈပရေႃးႁဵၵ်ႈၵေႃႉဢၼ်တူၵ်းတႃႇဝုၼ်ႇၼၼ်ႉတၵ်းလႆႈတုတ်ႇၽႆးၵႃႈၼိူဝ်ၶဵင်ႇတၢင်းလူႇပဵၼ်ဢႁႃႇရႃႉတၢင်းၵိၼ်ဢၼ်တုတ်ႇၽႆးတီႈ ထႃႇဝရႃႉၽြႃး၊ ဢေႃႈ။
“ပေႃးဝႃႈမီးသေၵေႃႉသေၵူၼ်းၶႂ်ႈဢဝ်ပႄႉမႃးသၢၵ်ႈလူႇၸိုင်၊-
မၼ်းတၵ်းလႆႈဢဝ်မိုဝ်းတၢင်ႇၵႃႈၼိူဝ်ႁူဝ်ပႄႉၼၼ်ႉသေလႄႈႁႅမ်ၵႃႈတီႈၽၢႆႇၼႃႈသုမ်ႉထဵင်ၸဝ်ႈဢေႃႈ။ ယဵၸ်ႈပရေႃးႁဵၵ်ႈၸိူဝ်းၼၼ်ႉတၵ်းလႆႈဢဝ်လိူတ်ႈပႄႉၼၼ်ႉၽႅတ်းသႂ်ႇၵႃႈတီႈၽႃၶဵင်ႇတၢင်းလူႇတင်းသီႇၼႃႈသေယဝ်ႉ၊-
တၵ်းလႆႈဢဝ်ၵွၼ်ႈမၼ်းဢၼ်ၸပ်းၶူင်းၼႂ်းမၼ်းၵႃႈၼႂ်းတူဝ်တၢင်းလူႇၼၼ်ႉသေလႄႈတုတ်ႇၽႆးတီႈ ထႃႇဝရႃႉၽြႃး၊ ဢေႃႈ။-
တၵ်းလႆႈဢဝ်မၢၵ်ႇလၼ်းမၼ်းသွင်ႁူၺ်ႇတင်းၵွၼ်ႈၶႆၵွၼ်ႈမၼ်း၊ဢိၵ်ႇတင်းတပ်းမၼ်းပွတ်းဢၼ်ၼုမ်ႇလီသေပိူၼ်ႈၸိူဝ်းၼၼ်ႉတုတ်ႇၽႆးတႂ်ႈ ထႃႇဝရႃႉၽြႃး၊ ဢေႃႈ။-
ယဵၸ်ႈပရေႃးႁဵၵ်ႈ ၼၼ်ႉတၵ်းလႆႈတုတ်ႇၽႆးၵႃႈၼိူဝ်ၶဵင်ႇတၢင်းလူႇႁႂ်ႈပဵၼ်တၢင်းလူႇဢႁႃႇရႃႉတၢင်းၵိၼ်ဢၼ်တုတ်ႇၽႆးလႄႈထုၵ်ႇၸႂ်မႅၼ်ႈၸႂ် ထႃႇဝရႃႉၽြႃး၊ ဢေႃႈ။ ၵႃႈဢၼ်ပဵၼ်ၵွၼ်ႈၶႆၵွၼ်ႈမၼ်းတင်းသဵင်ႈတင်းလူင်ၼၼ်ႉပဵၼ်ပုၼ်ႈ ထႃႇဝရႃႉၽြႃး၊ ဢေႃႈ။-
ၵူၼ်းမဵဝ်း ဢိသရေး၊ သေၵေႃႉသေၵူၼ်းၵေႃႈတၵ်းဢမ်ႇလႆႈၵိၼ်ၵွၼ်ႈၶႆၵွၼ်ႈမၼ်းဢိၵ်ႇတင်းလိူတ်ႈမၼ်းလႃးလႃး။ ဢၼ်ၼႆႉပဵၼ်ထုင်းတြႃးဢၼ်တၵ်းလႆႈပႂ်ႉၵမ်ပႂ်ႉၸွမ်းတႃႇသေႇဢမ်ႇထၢတ်ႇတီႈမဵဝ်းၸိူဝ်ႉၶိူဝ်း ဢိသရေး၊ သိုပ်ႇသိုပ်ႇတၢမ်တၢမ်ၵႃႈတီႈဢၼ်ၶဝ်ယူႇၶဝ်သဝ်းၵူႈတီႈၵူႈလႅၼ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉၵႃႈတီႈ မူဝ်းသေႇထႅင်ႈလႄႈ၊-
ႁႂ်ႈမၼ်းမွၵ်ႇလၢတ်ႈၵူၼ်းမဵဝ်း ဢိသရေး၊ တင်းလၢႆလႄႈဝႃႈၸမ်ႉ၊ “လွင်ႈဢၼ်ပေႃးသေၵေႃႉသေၵူၼ်းယင်းဢမ်ႇထၢင်ႇဢမ်ႇထိူမ်လႄႈၽိတ်းပိူင်ႈပူၼ်ႉလိူဝ်ပိင်းၺၢပ်ႈ ထႃႇဝရႃႉၽြႃး၊ သေယဝ်ႉ၊ႁဵတ်းလွင်ႈဢၼ်ဢမ်ႇလီသေၸိူဝ်ႉသေပိူင်မႅၼ်ႈၸိုင်၊တၵ်းလႆႈႁဵတ်းၸွမ်းထုင်းတြႃးၸိူဝ်းၼႆႉဢေႃႈ။
“ပေႃးမၼ်းပဵၼ်ယဵၸ်ႈပရေႃးႁဵၵ်ႈလူင်လႄႈၽိတ်းပိူင်ႈထၢၼ်ႈပေႃးႁႂ်ႈၵူၼ်းတင်းလၢႆထုၵ်ႇဢပျတ်ႈၸိုင်၊ပုၼ်ႈဢပျတ်ႈမၼ်းၼၼ်ႉမၼ်းတၵ်းလႆႈဢဝ်ဝူဝ်းပေႃႈဢွၼ်ႇဢၼ်ယင်းၼုမ်ႇလႄႈဢမ်ႇမီးတီႈၸိတီႈၼႄးၼၼ်ႉတူဝ်ၼိုင်ႈသၢၵ်ႈလူႇတီႈ ထႃႇဝရႃႉၽြႃး၊ ပုၼ်ႈဢၼ်တၵ်းၽေႇဢပျတ်ႈဢေႃႈ။-
မၼ်းတၵ်းလႆႈဢဝ်ဝူဝ်းၼၼ်ႉမႃးတီႈႁိမ်းၽၵ်းတူသုမ်ႉထဵင်ၸဝ်ႈလႄႈ၊ဢဝ်မိုဝ်းမၼ်းတၢင်ႇၵႃႈၼိူဝ်ႁူဝ်ဝူဝ်းၼၼ်ႉသေယဝ်ႉ၊ႁႅမ်ၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢေႃႈ။-
မိူဝ်ႈၼၼ်ႉယဵၸ်ႈပရေႃးႁဵၵ်ႈလူင်ၼၼ်ႉတၵ်းလႆႈဢဝ်လိူတ်ႈဝူဝ်းၼၼ်ႉၵမ်ႈၽွင်ႈပႃးၶဝ်ႈၵႂႃႇၵႃႈၼႂ်းသုမ်ႉထဵင်ၸဝ်ႈဢေႃႈ။-
မၼ်းတၵ်းလႆႈဢဝ်ၼိဝ်ႉၸိမၼ်းၸုမ်ႇသႂ်ႇၵႃႈၼႂ်းလိူတ်ႈၼၼ်ႉသေလႄႈဢဝ်လိူတ်ႈၼၼ်ႉၽႅတ်းသႂ်ႇၵႃႈတီႈၽၢႆႇၼႃႈ ထႃႇဝရႃႉၽြႃး၊ ၽၢႆႇၼႃႈၽႃႈၵင်ႈထႃႇၼႃႉတီႈမူတ်းၸၢင်ႇၼၼ်ႉၸဵတ်းၵမ်းဢေႃႈ။-
ၵမ်းၼၼ်ႉမၼ်းတၵ်းလႆႈဢဝ်လိူတ်ႈၼၼ်ႉၵမ်ႈၽွင်ႈတႃးသႂ်ႇၵႃႈတီႈၶဝ်လႅမ်ၸိူဝ်းဢၼ်မီးၵႃႈတီႈသီႇၸဵင်ႇၶဵင်ႇတၢင်းလူႇတီႈဢၼ်တုတ်ႇၽႆးၼၢမ်ႇသႃႇဢၼ်ႁွမ်ဢၼ်ႁူၺ်းၵႃႈၼႂ်းသုမ်ႉထဵင်ၸဝ်ႈၽၢႆႇၼႃႈ ထႃႇဝရႃႉၽြႃး၊ ၼၼ်ႉဢေႃႈ။ မၼ်းတၵ်းလႆႈဢဝ်လိူတ်ႈဢၼ်ၵိုတ်းဢၼ်ၵျၢၼ်ႇၼၼ်ႉထွၵ်ႇသႂ်ႇတီႈတိၼ်ၶဵင်ႇတၢင်းလူႇတီႈဢၼ်တုတ်ႇၽႆးတူဝ်တၢင်းလူႇဢၼ်မီးၵႃႈတီႈႁိမ်းၽၢႆႇၼႃႈၽၵ်းတူသုမ်ႉထဵင်ၸဝ်ႈၼၼ်ႉဢေႃႈ။-
မၼ်းတၵ်းလႆႈဢဝ်ဢွၵ်ႇၵွၼ်ႈၶႆၵွၼ်ႈမၼ်းဝူဝ်းၼၼ်ႉတင်းမူတ်း၊ဢၼ်ပဵၼ်ၵွၼ်ႈၶႆၵွၼ်ႈမၼ်းဢၼ်ၸပ်းၶူင်းၼႂ်းမၼ်း၊-
မၢၵ်ႇလၼ်းမၼ်းသွင်ႁူၺ်ႇတင်းၵွၼ်ႈၶႆၵွၼ်ႈမၼ်းဢၼ်ၸပ်းမၢၵ်ႇလၼ်းမၼ်းၼၼ်ႉဢိၵ်ႇတင်းတပ်းမၼ်းပွတ်းဢၼ်ၼုမ်ႇလီသေပိူၼ်ႈၸိူဝ်းၼၼ်ႉဢေႃႈ။-
ယဵၸ်ႈပရေႃးႁဵၵ်ႈ ၼၼ်ႉတၵ်းလႆႈဢဝ်ၵွၼ်ႈၶႆၵွၼ်ႈမၼ်းၼၼ်ႉတုတ်ႇၽႆးၵႃႈၼိူဝ်ၶဵင်ႇတၢင်းလူႇတီႈဢၼ်တုတ်ႇၽႆးတူဝ်တၢင်းလူႇၼၼ်ႉမိူၼ်ၸိူဝ်ႉၼင်ႇဢၼ်မၼ်းတုတ်ႇၵွၼ်ႈၶႆၵွၼ်ႈမၼ်းဝူဝ်းဢၼ်ပဵၼ်ၶိူင်ႈတၢင်းလူႇမိၵ်ႈသႁႃႇယႃႉၼၼ်ႉၼင်ႇၵဝ်ႇဢေႃႈ။-
မၼ်းတၵ်းလႆႈဢဝ်ၼင်မၼ်း၊ၼိူဝ်ႉမၼ်းတင်းမူတ်း၊ႁူဝ်မၼ်း၊တိၼ်မၼ်းၸိူဝ်းၼၼ်ႉဢိၵ်ႇတင်းၶူင်းၼႂ်းမၼ်း၊ၶီႈၼုမ်ႇမၼ်း၊-
ဢဝ်ၵႂႃႇၵႃႈၼွၵ်ႈပၢင်တပ်ႉၵႃႈတီႈဢၼ်မူတ်းသႂ်တီႈဢၼ်ထွၵ်ႇတဝ်ႈပႅတ်ႈၼၼ်ႉသေလႄႈ၊ၵႃႈတီႈၼၼ်ႈမၼ်းတၵ်းလႆႈတုတ်ႇၽႆးပႅတ်ႈၵႃႈၼိူဝ်ၽိုၼ်းဢေႃႈ။
“ပေႃးပဵၼ်ၵူၼ်းမဵဝ်း ဢိသရေး၊ တင်းမူႇတင်းၸုမ်းၽိတ်းပိူင်ႈလႄႈၵူၼ်းတင်းသဵင်ႈတင်းလူင်ယင်းဢမ်ႇထၢင်ႇဢမ်ႇထိူမ်လွင်ႈမၼ်းတၢင်းမၼ်းလႄႈလႆႈပူၼ်ႉလိူဝ်ပိင်းၺၢပ်ႈ ထႃႇဝရႃႉၽြႃး၊ သေယဝ်ႉ၊ႁဵတ်းလွင်ႈဢၼ်ဢမ်ႇလီသေၸိူဝ်ႉသေပိူင်မႅၼ်ႈလႄႈႁွတ်ႈထိုင်ဢပျတ်ႈၸိုင်၊-
မိူဝ်ႈဢၼ်ႁုဝႃႈ၊ပဵၼ်ဢပျတ်ႈၼၼ်ႉၵမ်းလဵဝ်ၸိုင်၊မူႇၵူၼ်းၸိူဝ်းၵူၼ်းတင်းလၢႆတၵ်းလႆႈဢဝ်ဝူဝ်းပေႃႈဢွၼ်ႇဢၼ်ယင်းၼုမ်ႇၼၼ်ႉမႃးပုၼ်ႈဢၼ်တၵ်းႁဵတ်းတၢင်းလူႇဢၼ်ၽေႇဢပျတ်ႈဢေႃႈ။ ၶဝ်တၵ်းလႆႈဢဝ်မႃးၵႃႈတီႈသုမ်ႉထဵင်ၸဝ်ႈသေလႄႈ၊-
ၵူၼ်းဢၼ်ပဵၼ်ၵႄႇပဵၼ်ႁူဝ်မူႇၵူၼ်းၸိူဝ်းၼၼ်ႉတၵ်းလႆႈဢဝ်မိုဝ်းၶဝ်တၢင်ႇၵႃႈၼိူဝ်ႁူဝ်ဝူဝ်းၼၼ်ႉသေယဝ်ႉ၊ႁႅမ်ၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢေႃႈ။-
ယဵၸ်ႈပရေႃးႁဵၵ်ႈလူင်တၵ်းလႆႈဢဝ်လိူတ်ႈဝူဝ်းၼၼ်ႉၵမ်ႈၽွင်ႈပႃးၶဝ်ႈၵႂႃႇၵႃႈၼႂ်းသုမ်ႉထဵင်ၸဝ်ႈသေလႄႈ၊-
ဢဝ်ၼိဝ်ႉၸိမၼ်းၸုမ်ႇသႂ်ႇၵႃႈၼႂ်းလိူတ်ႈၼၼ်ႉလႄႈဢဝ်လိူတ်ႈၼၼ်ႉၽႅတ်းသႂ်ႇၵႃႈတီႈၽၢႆႇၼႃႈ ထႃႇဝရႃႉၽြႃး၊ ၽၢႆႇၼႃႈၽႃႈၵင်ႈၼၼ်ႉၸဵတ်းၵမ်းဢေႃႈ။-
မၼ်းတၵ်းလႆႈဢဝ်လိူတ်ႈၼၼ်ႉၵမ်ႈၽွင်ႈတႃးသႂ်ႇၶဝ်လႅမ်ၸိူဝ်းဢၼ်မီးၵႃႈတီႈသီႇၸဵင်ႇၶဵင်ႇတၢင်းလူႇတီႈဢၼ်တုတ်ႇၽႆးၼၢမ်ႇသႃႇဢၼ်ႁွမ်ဢၼ်ႁူၺ်းဢၼ်မီးၵႃႈၼႂ်းသုမ်ႉထဵင်ၸဝ်ႈၽၢႆႇၼႃႈ ထႃႇဝရႃႉၽြႃး၊ ၼၼ်ႉဢေႃႈ။ လိူတ်ႈဢၼ်ၵိုတ်းဢၼ်ၵျၢၼ်ႇၼၼ်ႉၸိုင်၊မၼ်းတၵ်းလႆႈဢဝ်ၵႂႃႇထွၵ်ႇသႂ်ႇတီႈတိၼ်ၶဵင်ႇတၢင်းလူႇတီႈဢၼ်တုတ်ႇၽႆးတူဝ်တၢင်းလူႇဢၼ်မီးၵႃႈႁိမ်းၼႃႈၽၵ်းတူသုမ်ႉထဵင်ၸဝ်ႈၼၼ်ႉဢေႃႈ။-
ၵမ်းၼၼ်ႉ မၼ်းတၵ်းလႆႈဢဝ်ၵွၼ်ႈၶႆၵွၼ်ႈမၼ်းတင်းမူတ်းတုတ်ႇၽႆးၵႃႈတီႈၼိူဝ်ၶဵင်ႇတၢင်းလူႇဢေႃႈ။-
မၼ်းတၵ်းလႆႈသၢၵ်ႈလူႇမိူၼ်ၵၼ်တင်းတၢင်းဢၼ်သၢၵ်ႈလူႇဝူဝ်းဢွၼ်ႇပုၼ်ႈတၢင်းလူႇဢၼ်ၽေႇဢပျတ်ႈၼၼ်ႉၼင်ႇၵဝ်ႇဢေႃႈ။ ၼင်ႇၼၼ်လႄႈမၼ်းတၵ်းလႆႈသၢၵ်ႈလူႇပုၼ်ႈတၵ်းၽေႇဢပျတ်ႈၵူၼ်းတင်းလၢႆသေယဝ်ႉ၊ဢပျတ်ႈၶဝ်ၵေႃႈတၵ်းလွတ်ႈဢေႃႈ။-
ၵမ်းၼၼ်ႉမၼ်းတၵ်းလႆႈဢဝ်ဝူဝ်းၼၼ်ႉၵႂႃႇၵႃႈၼွၵ်ႈပၢင်တပ်ႉလႄႈတုတ်ႇၽႆးပႅတ်ႈမိူၼ်ၸိူဝ်ႉၼင်ႇဢၼ်မၼ်းတုတ်ႇၽႆးပႅတ်ႈဝူဝ်းဢၼ်သၢၵ်ႈလူႇပုၼ်ႈဢပျတ်ႈတူဝ်ၸဝ်ႈၵဝ်ႇၼၼ်ႉၼင်ႇၵဝ်ႇဢေႃႈ။ ဢၼ်ၼႆႉၸိုင်၊ပဵၼ်တၢင်းလူႇဢၼ်ၽေႇဢပျတ်ႈမူႇၵူၼ်းတင်းလၢႆဢေႃႈ။
“ပေႃးမၼ်းပဵၼ်ၸဝ်ႈပဵၼ်ၶုၼ်သေယဝ်ႉ၊ယင်းဢမ်ႇထၢင်ႇဢမ်ႇထိူမ်လႄႈလႆႈပူၼ်ႉလိူဝ်ၽိတ်းပိူင်ႈပိင်းၺၢပ်ႈ ထႃႇဝရႃႉၽြႃး၊ သေယဝ်ႉ၊ႁဵတ်းလွင်ႈဢၼ်ဢမ်ႇလီသေၸိူဝ်ႉသေပိူင်မႅၼ်ႈၸိုင်၊-
မိူဝ်ႈဢၼ်မၼ်းႁုဝႃႈမၼ်းႁဵတ်းမႅၼ်ႈဢပျတ်ႈၼၼ်ႉၵမ်းလဵဝ်ၼၼ်ႉၸိုင်၊မၼ်းတၵ်းလႆႈဢဝ်ပႄႉပေႃႈဢၼ်ဢမ်ႇမီးတီႈၸိတီႈၼႄးၼၼ်ႉတူဝ်ၼိုင်ႈမႃးသၢၵ်ႈလူႇဢေႃႈ။-
မၼ်းတၵ်းလႆႈဢဝ်မိုဝ်းမၼ်းတၢင်ႇၵႃႈၼိူဝ်ႁူဝ်ပႄႉၼၼ်ႉသေလႄႈႁႅမ်ၵႃႈတီႈဢၼ်ၶဝ်ႁႅမ်တူဝ်တၢင်းလူႇဢၼ်တုတ်ႇၽႆးၽၢႆႇၼႃႈ ထႃႇဝရႃႉၽြႃး၊ ၼၼ်ႉဢေႃႈ။ ဢၼ်ၼႆႉပဵၼ်တၢင်းလူႇဢၼ်ၽေႇဢပျတ်ႈဢေႃႈ။-
ယဵၸ်ႈပရေႃးႁဵၵ်ႈ ၼၼ်ႉတၵ်းလႆႈဢဝ်ၼိဝ်ႉၸိမၼ်းၸုမ်ႇၵႃႈၼႂ်းလိူတ်ႈပႄႉၼၼ်ႉလႄႈတႃးသႂ်ႇၶဝ်လႅမ်ၸိူဝ်းဢၼ်မီးၵႃႈတီႈသီႇၸဵင်ႇၶဵင်ႇတၢင်းလူႇၼၼ်ႉသေယဝ်ႉ၊ဢဝ်လိူတ်ႈဢၼ်ၵိုတ်းဢၼ်ၵျၢၼ်ႇၼၼ်ႉထွၵ်ႇသႂ်ႇတီႈတိၼ်ၶဵင်ႇတၢင်းလူႇၼၼ်ႉဢေႃႈ။-
ၵမ်းၼၼ်ႉ၊မၼ်းတၵ်းလႆႈဢဝ်ၵွၼ်ႈၶႆၵွၼ်ႈမၼ်းတင်းမူတ်းတုတ်ႇၵႃႈၼိူဝ်ၶဵင်ႇတၢင်းလူႇမိူၼ်ၸိူဝ်ႉၼင်ႇဢၼ်မၼ်းတုတ်ႇၵွၼ်ႈၶႆၵွၼ်ႈမၼ်းတူဝ်တၢင်းလူႇဢၼ်မၼ်းႁႅမ်ပုၼ်ႈတၢင်းလူႇမိၵ်ႈသႁႃႇယႃႉၼၼ်ႉၼင်ႇၵဝ်ႇဢေႃႈ။ ၼင်ႇၼၼ်လႄႈယဵၸ်ႈပရေႃးႁဵၵ်ႈၼၼ်ႉတၵ်းလႆႈသၢၵ်ႈလူႇပုၼ်ႈတၵ်းၽေႇဢပျတ်ႈၶုၼ်ၼၼ်ႉလႄႈ၊ဢပျတ်ႈမၼ်းၵေႃႈတၵ်းလွတ်ႈဢေႃႈ။
“ပေႃးမၼ်းပဵၼ်ၵူၼ်းဝၢၼ်ႈၵူၼ်းမိူင်းသေၵေႃႉၵေႃႉလႄႈယင်းဢမ်ႇထၢင်ႇဢမ်ႇထိူမ်လႄႈလႆႈပူၼ်ႉလိူဝ်ၽိတ်းပိူင်ႈပိင်းၺၢပ်ႈ ထႃႇဝရႃႉၽြႃး၊ သေယဝ်ႉ၊ႁဵတ်းလွင်ႈဢၼ်ဢမ်ႇလီသေၸိူဝ်ႉသေပိူင်မႅၼ်ႈၸိုင်၊-
မိူဝ်ႈဢၼ်မၼ်းႁုဝႃႈ၊မၼ်းႁဵတ်းမႅၼ်ႈဢပျတ်ႈၼၼ်ႉၵမ်းလဵဝ်ၼၼ်ႉၸိုင်၊မၼ်းတၵ်းလႆႈဢဝ်ပႄႉမႄႈဢၼ်ဢမ်ႇမီးတီႈၸိတီႈၼႄးၼၼ်ႉတူဝ်ၼိုင်ႈမႃးသၢၵ်ႈလူႇဢေႃႈ။-
မၼ်းတၵ်းလႆႈဢဝ်မိုဝ်းမၼ်းတၢင်ႇၵႃႈၼိူဝ်ႁူဝ်ပႄႉဢၼ်ပဵၼ်ၶိူင်ႈတၢင်းလူႇဢၼ်ၽေႇဢပျတ်ႈၼၼ်ႉသေလႄႈႁႅမ်ၵႃႈတီႈဢၼ်ၶဝ်သၢၵ်ႈၵၢပ်ႈတူဝ်တၢင်းလူႇဢၼ်တုတ်ႇၽႆးၼၼ်ႉဢေႃႈ။-
ယဵၸ်ႈပရေႃးႁဵၵ်ႈၼၼ်ႉတၵ်းလႆႈဢဝ်ၼိဝ်ႉၸိမၼ်းၸုမ်ႇၵႃႈၼႂ်းလိူတ်ႈပႄႉၼၼ်ႉလႄႈဢဝ်လိူတ်ႈၼၼ်ႉတႃးသႂ်ႇၶဝ်လႅမ်ၸိူဝ်းဢၼ်မီးၵႃႈတီႈသီႇၸဵင်ႇၶဵင်ႇတၢင်းလူႇၼၼ်ႉသေယဝ်ႉ၊လိူတ်ႈဢၼ်ၵိုတ်းဢၼ်ၵျၢၼ်ႇၼၼ်ႉၸိုင်၊ထွၵ်ႇသႂ်ႇတီႈတိၼ်ၶဵင်ႇတၢင်းလူႇၼၼ်ႉဢေႃႈ။-
ၵမ်းၼၼ်ႉမၼ်းတၵ်းလႆႈဢဝ်ၵွၼ်ႈၶႆၵွၼ်ႈမၼ်းတင်းမူတ်းဢွၵ်ႇမိူၼ်ၸိူဝ်ႉၼင်ႇဢၼ်ဢဝ်ဢွၵ်ႇၵွၼ်ႈၶႆၵွၼ်ႈမၼ်းတူဝ်တၢင်းလူႇဢၼ်ႁႅမ်ပုၼ်ႈတၢင်းလူႇမိၵ်ႈသႁႃႇယႃႉၼၼ်ႉၼင်ႇၵဝ်ႇလႄႈမၼ်းတၵ်းလႆႈဢဝ်ၸိူဝ်းၼၼ်ႉတုတ်ႇၽႆးၵႃႈၼိူဝ်ၶဵင်ႇတၢင်းလူႇႁႂ်ႈပဵၼ်ဢၢႆႁွမ်ဢၢႆႁူၺ်းဢၼ်ထုၵ်ႇၸႂ်မႅၼ်ႈၸႂ် ထႃႇဝရႃႉၽြႃး၊ ဢေႃႈ။ ၼင်ႇၼၼ်လႄႈယဵၸ်ႈပရေႃးႁဵၵ်ႈတၵ်းလႆႈသၢၵ်ႈလူႇပုၼ်ႈတၵ်းၽေႇဢပျတ်ႈၵူၼ်းၵေႃႉၼၼ်ႉလႄႈ၊ဢပျတ်ႈမၼ်းၼၼ်ႉတၵ်းလွတ်ႈဢေႃႈ။
“ပေႃးၵူၼ်းသေၵေႃႉၵေႃႉဢဝ်သူဝ်းဢွၼ်ႇႁဵတ်းတၢင်းလူႇဢၼ်ၽေႇဢပျတ်ႈၸိုင်၊မၼ်းတၵ်းလႆႈပဵၼ်သူဝ်းမႄႈဢွၼ်ႇဢၼ်ဢမ်ႇမီးတီႈၸိတီႈၼႄးဢေႃႈ။-
မၼ်းတၵ်းလႆႈဢဝ်မိုဝ်းမၼ်းတၢင်ႇၵႃႈၼိူဝ်ႁူဝ်သူဝ်းဢၼ်ပဵၼ်တၢင်းလူႇဢၼ်ၽေႇဢပျတ်ႈၼၼ်ႉသေလႄႈႁႅမ်ၵႃႈတီႈဢၼ်ၶဝ်ႁႅမ်တူဝ်တၢင်းလူႇဢၼ်တုတ်ႇၽႆးၼၼ်ႉဢေႃႈ။-
ယဵၸ်ႈပရေႃးႁဵၵ်ႈၼၼ်ႉတၵ်းလႆႈဢဝ်ၼိဝ်ႉၸိမၼ်းၸုမ်ႇၵႃႈၼႂ်းလိူတ်ႈသူဝ်းၼၼ်ႉလႄႈဢဝ်လိူတ်ႈၼၼ်ႉတႃးသႂ်ႇၶဝ်လႅမ်ၸိူဝ်းဢၼ်မီးၵႃႈတီႈသီႇၸဵင်ႇၶဵင်ႇတၢင်းလူႇၼၼ်ႉသေယဝ်ႉ၊လိူတ်ႈဢၼ်ၵိုတ်းဢၼ်ၵျၢၼ်ႇၼၼ်ႉၸိုင်၊ထွၵ်ႇသႂ်ႇတီႈတိၼ်ၶဵင်ႇတၢင်းလူႇၼၼ်ႉဢေႃႈ။-
ၵမ်းၼၼ်ႉမၼ်းတၵ်းလႆႈဢဝ်ၵွၼ်ႈၶႆၵွၼ်ႈမၼ်းတင်းမူတ်းဢွၵ်ႇမိူၼ်ၸိူဝ်ႉၼင်ႇဢၼ်မၼ်းဢဝ်ဢွၵ်ႇၵွၼ်ႈၶႆၵွၼ်ႈမၼ်းတီႈတူဝ်တၢင်းလူႇဢၼ်ႁႅမ်ပုၼ်ႈတၢင်းလူႇမိၵ်ႈသႁႃႇယႃႉၼၼ်ႉၼင်ႇၵဝ်ႇလႄႈ၊မၼ်းတၵ်းလႆႈဢဝ်ၸိူဝ်းၼၼ်ႉတုတ်ႇၽႆးၵႃႈၼိူဝ်ၶဵင်ႇတၢင်းလူႇႁူမ်ႈလူၺ်ႈၵၼ်တင်းတၢင်းလူႇတၢင်ႇမဵဝ်းဢၼ်တုတ်ႇၽႆးၼၼ်သၢၵ်ႈလူႇတီႈ ထႃႇဝရႃႉၽြႃး၊ ဢေႃႈ။ ၼင်ႇၼၼ်လႄႈယဵၸ်ႈပရေႃးႁဵၵ်ႈတၵ်းလႆႈသၢၵ်ႈလူႇပုၼ်ႈတၵ်းၽေႇဢပျတ်ႈၵူၼ်းၵေႃႉၼၼ်ႉလႄႈ၊ဢပျတ်ႈမၼ်းၼၼ်ႉတၵ်းလွတ်ႈဢေႃႈ။”
ဢမုတၢင်းၽိတ်းမဵဝ်းဢၼ်လူဝ်ႇႁဵတ်းတၢင်းလူႇဢၼ်ၽေႇဢပျတ်ႈၼၼ်ႉၸမ်ႉ၊ “ပေႃးသေၵေႃႉၵေႃႉလႆႈၶၢမ်ႇတၢင်းဢၼ်ၽူႈဢၼ်ၸီႇယၢင်ႇတြႃးႁွင်ႉဢဝ်ႁႂ်ႈမၼ်းၶၢမ်ႇသၢၵ်ႈသေႇၼႂ်းလုမ်းသေယဝ်ႉ၊မၼ်းယင်းဢမ်ႇမွၵ်ႇဢမ်ႇလၢတ်ႈလွင်ႈတၢင်းဢၼ်မၼ်းလႆႈႁၼ်၊ဢမ်ႇၼၼ်မၼ်းလႆႈငိၼ်းၼၼ်ႉၸိုင်၊မၼ်းတၵ်းလႆႈၶၢမ်ႇတၢမ်ႇဢပျတ်ႈတုၸရိူၵ်ႈတူဝ်ၸဝ်ႈၵဝ်ႇဢေႃႈ။
“ပေႃးသေၵေႃႉသေၵူၼ်းယင်းဢမ်ႇထၢင်ႇဢမ်ႇထိူမ်လႄႈတိူဝ်ႉမႅၼ်ႈၶိူင်ႈပိူင်ဢၼ်ဢမ်ႇမူတ်းသႂ်ဢၼ်ပဵၼ်တူဝ်တၢႆတရိၵ်ႈသၢၼ်ႇဢၼ်လဵင်ႉဢိၵ်ႇတင်းတရိၵ်ႈသၢၼ်ႇၼႂ်းထိူၼ်ႇဢၼ်ဢမ်ႇမူတ်းသႂ်ၼၼ်ႉသေယဝ်ႉ၊ယင်းဢမ်ႇႁုလွင်ႈမၼ်းလႄႈႁွတ်ႈထိုင်တၢင်းဢၼ်ဢမ်ႇမူတ်းသႂ်ၼၼ်ႉၸိုင်၊မၼ်းၼၼ်ႉမီးဢပျတ်ႈဢေႃႈ။
“ပေႃးသေၵေႃႉသေၵူၼ်းယင်းဢမ်ႇထၢင်ႇဢမ်ႇထိူမ်လႄႈတိူဝ်ႉမႅၼ်ႈမဵဝ်းဢၼ်ဢမ်ႇမူတ်းသႂ်ဢၼ်ၸၢပ်ႈသႅင်ႇၵၼ်တင်းၵူၼ်းသေမဵဝ်းမဵဝ်းဢၼ်ၸပ်းတီႈၵူၼ်းၼၼ်ႉၸိုင်၊ၵမ်းလိုၼ်းမိူဝ်ႈဢၼ်မၼ်းႁုလွင်ႈမၼ်းၼၼ်ႉမၼ်းမီးဢပျတ်ႈဢေႃႈ။
“ပေႃးသေၵေႃႉသေၵူၼ်းယင်းဢမ်ႇႁုဢၵျူဝ်းဢပျတ်ႈလႄႈမဝ်မဝ်မၢင်မၢင်တိူင်ႇၵၢဝ်ႇၵႂၢမ်းၵတိသဵတ်ႈၸႃႇၼႂ်းလွင်ႈမဵဝ်းၵႃႈသင်သေဢမ်ႇဝႃႈ၊ၵမ်းလိုၼ်းမိူဝ်ႈဢၼ်မၼ်းႁုလွင်ႈမၼ်းၼၼ်ႉမၼ်းမီးဢပျတ်ႈဢေႃႈ။
“ပေႃးမၼ်းႁွတ်ႈထိုင်ဢပျတ်ႈဢၼ်ဝႃႈမႃးၸိူဝ်းၼႆႉသေမဵဝ်းမဵဝ်းၸိုင်၊မၼ်းတၵ်းလႆႈတွင်းပၢၼ်ႇပုၼ်ႈဢပျတ်ႈတၢင်းၽိတ်းမၼ်းဢေႃႈ။-
ပုၼ်ႈဢၼ်တၵ်းၽေႇဢပျတ်ႈမၼ်းၸိုင်၊မၼ်းတၵ်းလႆႈဢဝ်သူဝ်းမႄႈဢမ်ႇၼၼ်ပႄႉမႄႈသၢၵ်ႈလူႇတီႈ ထႃႇဝရႃႉၽြႃး၊ ဢေႃႈ။ ယဵၸ်ႈပရေႃးႁဵၵ်ႈ ၼၼ်ႉတၵ်းလႆႈႁဵတ်းတၢင်းလူႇဢၼ်ၽေႇဢပျတ်ႈပုၼ်ႈမၼ်းဢေႃႈ။
“ၵူၺ်းၵႃႈ၊ပေႃးၵေႃႉၼၼ်ႉဢမ်ႇတၢတ်ႈၼိူင်ႇသၢၵ်ႈလူႇသူဝ်းလႆႈၸိုင်၊မၼ်းတၵ်းလႆႈဢဝ်ၼူၵ်ႉတူႈသွင်တူဝ်၊ဢမ်ႇၼၼ်ၵႃၵႄသွင်တူဝ်ပုၼ်ႈဢၼ်တၵ်းၽေႇဢပျတ်ႈမၼ်းတီႈ ထႃႇဝရႃႉၽြႃး၊ ဢေႃႈ။ ၼူၵ်ႉၼၼ်ႉတူဝ်ၼိုင်ႈပဵၼ်တၢင်းလူႇပုၼ်ႈတၵ်းၽေႇဢပျတ်ႈလႄႈတူဝ်ၼိုင်ႈပုၼ်ႈတူဝ်တၢင်းလူႇဢၼ်တုတ်ႇၽႆးဢေႃႈ။-
မၼ်းတၵ်းလႆႈဢဝ်ၼူၵ်ႉၸိူဝ်းၼၼ်ႉမႃးတီႈယဵၸ်ႈပရေႃးႁဵၵ်ႈလႄႈယဵၸ်ႈပရေႃးႁဵၵ်ႈတၵ်းလႆႈႁဵတ်းတၢင်းလူႇဢၼ်ၽေႇဢပျတ်ႈဢွၼ်တၢင်းဢေႃႈ။ မၼ်းတၵ်းလႆႈလိမ်ႇႁၵ်းၶေႃးၼူၵ်ႉၼၼ်ႉၵူၺ်း၊တၵ်းဢမ်ႇႁႂ်ႈႁူဝ်မၼ်းလႆႈၶၢတ်ႇသေလႄႈ၊-
ဢဝ်လိူတ်ႈမၼ်းၵမ်ႈၽွင်ႈၽႅတ်းသႂ်ႇတီႈၽႃၶဵင်ႇတၢင်းလူႇဢေႃႈ။ လိူတ်ႈဢၼ်ၵိုတ်းဢၼ်ၵျၢၼ်ႇၼၼ်ႉတၵ်းလႆႈမိပ်ႇသႂ်ႇတီႈတိၼ်ၶဵင်ႇတၢင်းလူႇဢေႃႈ။ ဢၼ်ၼႆႉပဵၼ်တၢင်းလူႇဢၼ်ၽေႇဢပျတ်ႈဢေႃႈ။-
ၼူၵ်ႉတူႈထႅင်ႈတူဝ်ၼိုင်ႈၼၼ်ႉ မၼ်းတၵ်းလႆႈႁဵတ်းတၢင်းလူႇဢၼ်တုတ်ႇၽႆးၸွမ်းၼင်ႇထုင်းၽိင်ႈမၼ်းမီးၼၼ်ႉဢေႃႈ။ ၼင်ႇၼၼ်လႄႈယဵၸ်ႈပရေႃးႁဵၵ်ႈတၵ်းလႆႈသၢၵ်ႈလူႇပုၼ်ႈတၵ်းၽေႇဢပျတ်ႈၵူၼ်းၵေႃႉၼၼ်ႉလႄႈ၊ဢပျတ်ႈမၼ်းၼၼ်ႉၵေႃႈတၵ်းလွတ်ႈဢေႃႈ။
“ပေႃးမၼ်းယင်းဢမ်ႇတၢတ်ႈၼိူင်ႇသၢၵ်ႈလူႇၼူၵ်ႉတူႈသွင်တူဝ်ဢမ်ႇၼၼ်ၵႃၵႄသွင်တူဝ်လႆႈၸိုင်၊မၼ်းတၵ်းလႆႈဢဝ်ၽွင်ၶဝ်ႈၵျုင်ႇၸဵတ်းၵွၵ်း မႃးႁဵတ်းတၢင်းလူႇဢၼ်ၽေႇဢပျတ်ႈဢေႃႈ။ ဢမ်ႇလႆႈဢဝ်ၼမ်ႉမၼ်းသၢၼ်ႇလုၼ်ႇႁူတ်းသႂ်ႇ။ လေႃႇပၢၼ်ႇၵေႃႈဢမ်ႇလႆႈၽွၵ်းသႂ်ႇၵႃႈၼိူဝ်မၼ်း။ လွင်ႈမၼ်းၸမ်ႉ၊လွင်ႈၼႆႉပဵၼ်တၢင်းလူႇဢၼ်ၽေႇဢပျတ်ႈဢေႃႈ။ မၼ်းပဵၼ်တၢင်းလူႇမၢၵ်ႇၶဝ်ႈႁူင်းၶဝ်ႈဢမ်ႇၸႂ်ႈ။-
မၼ်းတၵ်းလႆႈဢဝ်မႃးတီႈယဵၸ်ႈပရေႃးႁဵၵ်ႈလႄႈယဵၸ်ႈပရေႃးႁဵၵ်ႈၼၼ်ႉတၵ်းလႆႈဢဝ်ၽွင်ၶဝ်ႈၵျုင်ႇဝၵ်ႉၼိုင်ႈပုၼ်ႈဢၼ်မၼ်းၸဝ်ႈတၵ်းၶုၵ်းၸႂ်လႆႈလႄႈတုတ်ႇၽႆးၵႃႈၼိူဝ်ၶဵင်ႇတၢင်းလူႇႁူမ်ႈလူၺ်ႈၵၼ်တင်းၶိူင်ႈတၢင်းလူႇဢၼ်တုတ်ႇၽႆးဢေႃႈ။ ဢၼ်ၼႆႉပဵၼ်တၢင်းလူႇဢၼ်ၽေႇဢပျတ်ႈဢေႃႈ။-
ၼင်ႇၼၼ်လႄႈယဵၸ်ႈပရေႃးႁဵၵ်ႈတၵ်းလႆႈသၢၵ်ႈလူႇပုၼ်ႈတၵ်းၽေႇဢပျတ်ႈၵေႃႉၼၼ်ႉဢေႃႈ။ ၽွင်ၶဝ်ႈၵျုင်ႇဢၼ်ၵိုတ်းဢၼ်ၵျၢၼ်ႇၼၼ်ႉပဵၼ်ပုၼ်ႈယဵၸ်ႈပရေႃးႁဵၵ်ႈမိူၼ်ၸိူဝ်ႉၼင်ႇမိူဝ်ႈဢၼ်ႁဵတ်းတၢင်းလူႇမၢၵ်ႇၶဝ်ႈႁူင်းၶဝ်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ ထႅင်ႈလႄႈဝႃႈၸမ်ႉ၊-
“ပေႃးသေၵေႃႉသေၵူၼ်းယင်းဢမ်ႇထၢင်ႇဢမ်ႇထိူမ်လႄႈၽိတ်းပိူင်ႈပူၼ်ႉလိူဝ်လွင်ႈတၢင်းဢၼ်ဢမ်ႇလူႇၶိူင်ႈပိူင်ဢၼ်မူတ်းၸၢင်ႇတီႈ ထႃႇဝရႃႉၽြႃး၊ ၼၼ်ႉၸိုင်၊မၼ်းတၵ်းလႆႈႁဵတ်းတၢင်းလူႇဢၼ်ၽေႇတုၸရိူၵ်ႈတီႈ ထႃႇဝရႃႉၽြႃး၊ ဢေႃႈ။ ပုၼ်ႈတၢင်းလူႇၼၼ်ႉမၼ်းတၵ်းလႆႈဢဝ်သူဝ်းပေႃႈဢွၼ်ႇဢမ်ႇၼၼ်ပႄႉပေႃႈဢၼ်ဢမ်ႇမီးတီႈၸိတီႈၼႄးဢၼ်ၵႃႈၶၼ်မၼ်းမႅၼ်ႈၼင်ႇငိုၼ်းၼမ်ႉၼၵ်းမၼ်းၸွမ်းလူၺ်ႈမၢၵ်ႇလုၵ်ႈၶၼ်ၸဝ်ႈၼၼ်ႉဢေႃႈ။-
မၼ်းတၵ်းလႆႈၶိုၼ်းတႅၼ်းပၼ်ပုၼ်ႈၶိူင်ႈပိူင်ဢၼ်မူတ်းၸၢင်ႇဢၼ်မၼ်းဢမ်ႇလႆႈပၼ်ၼၼ်ႉသေယဝ်ႉ၊တၵ်းလႆႈဢဝ်ၵႃႈၶၼ်ႁႃႈပုၼ်ႈပုၼ်ႈၼိုင်ႈၵႃႈၼႂ်းၵႃႈၶၼ်ဢၼ်ဢမ်ႇလႆႈပၼ်ၼၼ်ႉထၢပ်ႈထႅင်ႈလူးၵွၼ်ႇဢေႃႈ။ မၼ်းတၵ်းလႆႈဢဝ်ပၼ်တီႈယဵၸ်ႈပရေႃးႁဵၵ်ႈ လႄႈယဵၸ်ႈပရေႃးႁဵၵ်ႈၼၼ်ႉတၵ်းလႆႈသၢၵ်ႈလူႇတူဝ်သတ်းၼၼ်ႉပဵၼ်ပုၼ်ႈတၢင်းလူႇၽေႇဢပျတ်ႈၵေႃႉၼၼ်ႉဢေႃႈ။ ဢပျတ်ႈမၼ်းၼၼ်ႉတၵ်းလွတ်ႈဢေႃႈ။
“ပေႃးသေၵေႃႉသေၵူၼ်းယင်းဢမ်ႇထၢင်ႇဢမ်ႇထိူမ်လႄႈၽိတ်းပိူင်ႈပူၼ်ႉလိူဝ်ပိင်းၺၢပ်ႈတြႃး ထႃႇဝရႃႉၽြႃး၊ ၸိုင်၊ပိၵ်ႉသမ်ႉမၼ်းဢမ်ႇႁုလွင်ႈတၢင်းမၼ်းသေၵေႃႈ မၼ်းမီးဢပျတ်ႈယဝ်ႉလႄႈတၵ်းလႆႈၶၢမ်ႇတၢမ်ႇဢပျတ်ႈမၼ်းဢေႃႈ။-
မၼ်းတၵ်းလႆႈဢဝ်တၢင်းလူႇမႃးတီႈယဵၸ်ႈပရေႃးႁဵၵ်ႈပဵၼ်တၢင်းလူႇဢၼ်ၽေႇတုၸရိူၵ်ႈ၊ဢၼ်ဝႃႈသူဝ်းပေႃႈဢမ်ႇၼၼ်ပႄႉပေႃႈဢၼ်ဢမ်ႇမီးတီႈၸိတီႈၼႄးဢၼ်ၵႃႈၶၼ်မၼ်းတႅပ်းတတ်းမႅၼ်ႈၼင်ႇငိုၼ်းၼမ်ႉၼၵ်းမၼ်းၸွမ်းလူၺ်ႈမၢၵ်ႇလုၵ်ႈၶၼ်ၸဝ်ႈဢေႃႈ။ ယဵၸ်ႈပရေႃးႁဵၵ်ႈတၵ်းလႆႈသၢၵ်ႈလူႇပုၼ်ႈတၵ်းၽေႇဢပျတ်ႈၵေႃႉၼၼ်ႉလႄႈဢပျတ်ႈမၼ်းၼၼ်ႉတၵ်းလွတ်ႈဢေႃႈ။-
ဢၼ်ၼႆႉပဵၼ်တၢင်းလူႇဢၼ်ၽေႇတုၸရိူၵ်ႈပုၼ်ႈဢပျတ်ႈဢၼ်မၼ်းလႆႈၽိတ်းပိူင်ႈပူၼ်ႉလိူဝ် ထႃႇဝရႃႉၽြႃး၊ ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ ထႅင်ႈလႄႈဝႃႈၸမ်ႉ၊-
“ပေႃးသေၵေႃႉသေၵူၼ်းၽိတ်းပိူင်ႈပူၼ်ႉလိူဝ် ထႃႇဝရႃႉၽြႃး၊ ၼႂ်းတၢင်းဢၼ်ထဵင်ပႅတ်ႈႁႂ်ႈဢမ်ႇလႆႈၶိုၼ်းပၼ်ဢုၵ်ႉၸႃႇၶူဝ်းလဵင်းဢၼ်ၵူၼ်းမဵဝ်း ဢိသရေး၊ ၼင်ႇၵၼ်ယုမ်ႇယမ်ၵၼ်လႄႈဢဝ်ဢၢပ်ႈဝႆႉသေဢမ်ႇဝႃႈ၊ဢုၵ်ႉၸႃႇၶူဝ်းလဵင်းဢၼ်ပွင်ႇဝႆႉသေဢမ်ႇဝႃႈ၊ႁိမ်ႁူင်ႇဢဝ်သေဢမ်ႇဝႃႈ၊မၢပ်ႇဢဝ်မႂ်ဢဝ်သေဢမ်ႇဝႃႈ၊-
သမ်ႉထူပ်းႁၼ်ဢုၵ်ႉၸႃႇၶူဝ်းလဵင်းဢၼ်တူၵ်းႁၢႆၼၼ်ႉယင်းတိူင်ႇဝႃႈမၼ်းဢမ်ႇလႆႈႁၼ်လႄႈသင်၊-
ပေႃးႁဵတ်းမႅၼ်ႈတုၸရိူၵ်ႈဢၼ်ဝႃႈမႃးၸိူဝ်းၼႆႉသေမဵဝ်းမဵဝ်းၸိုင်၊ဢုၵ်ႉၸႃႇၶူဝ်းလဵင်းၼၼ်ႉလႆႈဢဝ်ဝႆႉၸိူဝ်ႉၼင်ႇႁိုဝ်သေၵေႃႈ၊-
မၼ်းတၵ်းလႆႈတႅၼ်းပၼ်ၶိုၼ်းဢုၵ်ႉၸႃႇၶူဝ်းလဵင်းဢၼ်ယင်းဢမ်ႇမီးသဵတ်ႈၸႃႇလႄႈဢဝ်ဝႆႉၼၼ်ႉတင်းသဵင်ႈတင်းလူင်ဢေႃႈ။ ၼႂ်းဝၼ်းဢၼ်ႁုဝႃႈမၼ်းၽိတ်းၼၼ်ႉတၵ်းလႆႈၶိုၼ်းတႅၼ်းပၼ်ၸဝ်ႈမၼ်းၵုမ်ႇၵုမ်ႇၵူၺ်းဢမ်ႇၵႃး၊ၼႂ်းႁႃႈပုၼ်ႈၼၼ်ႉတၵ်းလႆႈဢဝ်ထၢပ်ႈထႅင်ႈပုၼ်ႈၼိုင်ႈဢေႃႈ။-
မၼ်းတၵ်းလႆႈဢဝ်တၢင်းလူႇမႃးတီႈယဵၸ်ႈပရေႃးႁဵၵ်ႈ လႄႈႁဵတ်းတၢင်းလူႇဢၼ်ၽေႇတုၸရိူၵ်ႈတီႈ ထႃႇဝရႃႉၽြႃး၊ ဢေႃႈ။ ပုၼ်ႈတၢင်းလူႇၼၼ်ႉမၼ်းတၵ်းလႆႈဢဝ်သူဝ်းပေႃႈဢမ်ႇၼၼ်ပႄႉပေႃႈဢၼ်ဢမ်ႇမီးတီႈၸိတီႈၼႄးဢၼ်ၵႃႈၶၼ်မၼ်းတႅပ်းတတ်းမႅၼ်ႈၼင်ႇငိုၼ်းၼမ်ႉၼၵ်းမၼ်းၸွမ်းလူၺ်ႈမၢၵ်ႇလုၵ်ႈၶၼ်ၸဝ်ႈၼၼ်ႉဢေႃႈ။-
ယဵၸ်ႈပရေႃးႁဵၵ်ႈတၵ်းလႆႈသၢၵ်ႈလူႇပုၼ်ႈတၵ်းၽေႇဢပျတ်ႈၵေႃႉၼၼ်ႉၵႃႈတီႈၽၢႆႇၼႃႈ ထႃႇဝရႃႉၽြႃး၊ လႄႈဢပျတ်ႈမၼ်းၼၼ်ႉတၵ်းလွတ်ႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ ထႅင်ႈလႄႈဝႃႈ၊-
“သင်ႇလၢတ်ႈတီႈ ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉလႄႈဝႃႈ၊ ‘ဢၼ်ၼႆႉပဵၼ်ထုင်းၽိင်ႈတြႃးတၢင်းဢၼ်ႁဵတ်းတၢင်းလူႇဢၼ်တုတ်ႇၽႆးဢေႃႈ။ တူဝ်တၢင်းလူႇဢၼ်တုတ်ႇၽႆးၼၼ်ႉတၵ်းလႆႈဢဝ်ဝႆႉၵႃႈၼိူဝ်ၶဵင်ႇတၢင်းလူႇယူႇတင်းၶိုၼ်းလႄႈပွႆႇႁႂ်ႈၽႆးမႆႈႁိုင်းဝႆႉယူႇသေႇသေႇဢေႃႈ။-
မိူဝ်ႈၼၼ်ႉယဵၸ်ႈပရေႃးႁဵၵ်ႈတၵ်းလႆႈ ၼုင်ႈသိူဝ်ႈၽႃႈပၢၼ်ႇၵူၼ်ၽႃႈပၢၼ်ႇသေလႄႈဢဝ်တဝ်ႈတူဝ်တၢင်းလူႇဢၼ်တုတ်ႇၽႆးၵႃႈၼိူဝ်ၶဵင်ႇတၢင်းလူႇၼၼ်ႉသေယဝ်ႉ၊ၵွင်ဝႆႉႁိမ်းၶဵင်ႇတၢင်းလူႇၼၼ်ႉဢေႃႈ။-
ၵမ်းၼၼ်ႉမၼ်းတၵ်းလႆႈပုတ်ႈလၢႆႈၶူဝ်းၼုင်ႈမၼ်းသေယဝ်ႉ၊ဢဝ်တဝ်ႈၼၼ်ႉၵႂႃႇၵႃႈၼွၵ်ႈပၢင်တပ်ႉၵႃႈတီႈဢၼ်မူတ်းၸၢင်ႇၼၼ်ႉဢေႃႈ။-
ၽႆးၵႃႈၼိူဝ်ၶဵင်ႇတၢင်းလူႇၼၼ်ႉတၵ်းလႆႈလုၵ်ႉႁိုင်းဝႆႉယူႇဢမ်ႇႁႂ်ႈလႆႈမွတ်ႇဢေႃႈ။ ယဵၸ်ႈပရေႃးႁဵၵ်ႈတၵ်းလႆႈသႂ်ႇၽိုၼ်းသုမ်ၽႆးၵူႈၼႂ်လႄႈမႄးႁႅၼ်းၶပ်ႉၸႅၼ်ႇတူဝ်တၢင်းလူႇဢၼ်တုတ်ႇၽႆးၵႃႈၼိူဝ်ၶဵင်ႇတၢင်းလူႇၼၼ်ႉသေယဝ်ႉ၊တုတ်ႇၵွၼ်ႈၶႆၵွၼ်ႈမၼ်းတူဝ်တၢင်းလူႇမိၵ်ႈသႁႃႇယႃႉၼၼ်ႉဢေႃႈ။-
ၽႆးတၵ်းလႆႈလုၵ်ႉႁိုင်းယူႇၵႃႈၼိူဝ်ၶဵင်ႇတၢင်းလူႇဝႆႉသေႇသေႇဢေႃႈ။ ဢမ်ႇႁႂ်ႈၽႆးလႆႈမွတ်ႇလႃးလႃး။
“‘ဢၼ်ၼႆႉသမ်ႉပဵၼ်ထုင်းတြႃးတၢင်းလူႇမၢၵ်ႇၶဝ်ႈႁူင်းၶဝ်ႈဢေႃႈ။ ၼႂ်းလုၵ်ႈၸၢႆး ဢႃႇရုၼ်ႇ၊ ၸိူဝ်းၼၼ်ႉၵေႃႉၼိုင်ႈတၵ်းလႆႈသၢၵ်ႈလူႇတၢင်းလူႇမၢၵ်ႇၶဝ်ႈႁူင်းၶဝ်ႈတီႈ ထႃႇဝရႃႉၽြႃး၊ ၵႃႈၼိူဝ်ၶဵင်ႇတၢင်းလူႇဢေႃႈ။-
မၼ်းတၵ်းလႆႈဢဝ်ၽွင်ၶဝ်ႈၵျုင်ႇဝၵ်ႉၼိုင်ႈတင်းၼမ်ႉမၼ်းဢိၵ်ႇတင်းလေႃႇပၢၼ်ႇတင်းမူတ်းတုတ်ႇၽႆးၵႃႈၼိူဝ်ၶဵင်ႇတၢင်းလူႇပုၼ်ႈဢၼ် ထႃႇဝရႃႉၽြႃး၊ တၵ်းၶုၵ်းၸႂ်လႆႈလႄႈပဵၼ်ဢၼ်ႁွမ်ဢၼ်ႁူၺ်းတီႈ ထႃႇဝရႃႉၽြႃး၊ ဢေႃႈ။-
ယဵၸ်ႈပရေႃးႁဵၵ်ႈ တင်းလၢႆတၵ်းလႆႈၵိၼ်ဢၼ်ၵိုတ်းဢၼ်ၵျၢၼ်ႇမၼ်းဢေႃႈ။ ယင်းဢမ်ႇသႂ်ႇၸိူဝ်ႉပႅင်ႈလႄႈၶဝ်တၵ်းလႆႈၽဝ်ႁဵတ်းၶဝ်ႈမုၼ်းသေယဝ်ႉ၊ဢွၼ်ၵၼ်ၵိၼ်ၶူပ်းၵႃႈၼႂ်းထႃႇၼႃႉတီႈမူတ်းၸၢင်ႇၵႃႈၼႂ်းပၢင်ႇဝၢင်းသုမ်ႉထဵင်ၸဝ်ႈၼၼ်ႉဢေႃႈ။-
ၵဝ်ဢဝ်ၼႂ်းတၢင်းလူႇမၢၵ်ႇၶဝ်ႈႁူင်းၶဝ်ႈၼႆႉပၼ်ႁႂ်ႈပဵၼ်ပုၼ်ႈတႃႇယဵၸ်ႈပရေႃးႁဵၵ်ႈၸိူဝ်းၼၼ်ႉယဝ်ႉ။ ပဵၼ်ဢၼ်မူတ်းၸၢင်ႇၼႃႇလူင်လၢင်မိူၼ်ၸိူဝ်ႉၼင်ႇတၢင်းလူႇဢၼ်ၽေႇဢပျတ်ႈတင်းတၢင်းလူႇဢၼ်ၽေႇတုၸရိူၵ်ႈၼၼ်ႉဢေႃႈ။-
ဢဝ်ၼႆႉၵႂႃႇဝၼ်းလိုၼ်းမိူဝ်းၼႃႈၵူၼ်းၸၢႆးၸိူဝ်ႉၶိူဝ်း ဢႃႇရုၼ်ႇ၊ ၵေႃႉလႂ်သေဢမ်ႇဝႃႈ၊တၵ်းဢွၼ်ၵၼ်ဢဝ်ၵိၼ်လႆႈၼႂ်းတၢင်းလူႇမၢၵ်ႇၶဝ်ႈႁူင်းၶဝ်ႈ ထႃႇဝရႃႉၽြႃး၊ ဢေႃႈ။ ၵေႃႉဢၼ်တိူဝ်ႉထုၵ်ႇၶိူင်ႈတၢင်းလူႇၸိူဝ်းၼၼ်ႉ၊တၵ်းလႆႈႁွတ်ႈထိုင်တၢင်းဢၼ်မူတ်းၸၢင်ႇဢေႃႈ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ ထႅင်ႈလႄႈဝႃႈၸမ်ႉ၊-
“ၼႂ်းဝၼ်းဢၼ် ဢႃႇရုၼ်ႇ၊ ၶၢမ်ႇဢဝ်ၽိၵ်ႈသိၵ်ႈၼၼ်ႉတူဝ်မၼ်းတင်းလုၵ်ႈၸၢႆးမၼ်းၸိူဝ်းၼၼ်ႉတၵ်းလႆႈႁဵတ်းတၢင်းလူႇဢၼ်ဢဝ်ၽွင်ၶဝ်ႈၵျုင်ႇၸဵတ်းၵွၵ်းၸွမ်းၼင်ႇဢၼ်တၵ်းလႆႈႁဵတ်းတၢင်းလူႇမၢၵ်ႇၶဝ်ႈႁူင်းၶဝ်ႈတႃႇသေႇၼၼ်ႉၵၢင်ၼႂ်ၶိုင်ႈၼိုင်ႈ၊ၵၢင်ၶမ်ႈၶိုင်ႈၼိုင်ႈဢေႃႈ။-
တၵ်းလႆႈၼွၵ်းလေႃးၼမ်ႉမၼ်းလႄႈၶူဝ်ႈၵႃႈၼိူဝ်ၶႅပ်းလဵၵ်းသေယဝ်ႉ၊ဝိတ်းယွႆႈသေသၢၵ်ႈလူႇၼၼ်ႉပဵၼ်တၢင်းလူႇမၢၵ်ႇၶဝ်ႈႁူင်းၶဝ်ႈႁႂ်ႈဢၢႆႁွမ်ဢၢႆႁူၺ်းမၼ်းထုၵ်ႇၸႂ်မႅၼ်ႈၸႂ် ထႃႇဝရႃႉၽြႃး၊ ဢေႃႈ။-
ဢဝ်ၼႆႉၵႂႃႇဝၼ်းလိုၼ်းမိူဝ်းၼႃႈလုၵ်ႈၸၢႆး ဢႃႇရုၼ်ႇ၊ ဢၼ်ၶၢမ်ႇဢဝ်ၽိၵ်ႈသိၵ်ႈဢရႃႇယဵၸ်ႈပရေႃးႁဵၵ်ႈလူင်ၼၼ်ႉတၵ်းလႆႈႁဵတ်းတၢင်းလူႇၼႆႉတႃႇသေႇဢေႃႈ။ တၵ်းလႆႈတုတ်ႇၽႆးတင်းမူတ်းဢေႃႈ။-
တၢင်းလူႇမၢၵ်ႇၶဝ်ႈႁူင်းၶဝ်ႈဢၼ်ယဵၸ်ႈပရေႃးႁဵၵ်ႈလူႇၼၼ်ႉဢမ်ႇလႆႈၵိၼ်လႃးလႃး။ တၵ်းလႆႈတုတ်ႇၽႆးပႅတ်ႈတင်းမူတ်းဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉၵႃႈတီႈ မူဝ်းသေႇ၊ လႄႈဝႃႈၸမ်ႉ၊-
“ၵႂႃႇလၢတ်ႈတီႈ ဢႃႇရုၼ်ႇ၊ တင်းလုၵ်ႈၸၢႆးမၼ်းလႄႈဝႃႈ၊ ‘ၼႆႉၸမ်ႉ၊ပဵၼ်ထုင်းၽိင်ႈတြႃးဢၼ်ႁဵတ်းတၢင်းလူႇဢၼ်ၽေႇဢပျတ်ႈဢေႃႈ။ တၵ်းလႆႈဢဝ်တူဝ်တၢင်းလူႇဢၼ်ၽေႇဢပျတ်ႈၼၼ်ႉႁႅမ်ၵႃႈတီႈဢၼ်ၶဝ်ႁႅမ်တူဝ်တၢင်းလူႇဢေႃႈ။ လွင်ႈၼႆႉၸိုင်၊ပဵၼ်ဢၼ်မူတ်းၸၢင်ႇၼႃႇလူင်လၢင်ဢေႃႈ။
ယဵၸ်ႈပရေႃးႁဵၵ်ႈၵေႃႉဢၼ်သၢၵ်ႈလူႇတၢင်းလူႇၼၼ်ႉတၵ်းလႆႈၵိၼ်ၼိူဝ်ႉသတ်းၼၼ်ႉၵႃႈၼႂ်းထႃႇၼႃႉတီႈမူတ်းၸၢင်ႇၵႃႈၼႂ်းပၢင်ႇဝၢင်းသုမ်ႉထဵင်ၸဝ်ႈၼၼ်ႉဢေႃႈ။-
ၵူၼ်းတၢင်ႇၵေႃႉၽူႈလႂ်သေဢမ်ႇဝႃႈ၊ဢမ်ႇၼၼ်ဢီႈသင်သေဢမ်ႇဝႃႈ၊ပေႃးတိူဝ်ႉထုၵ်ႇၼိူဝ်ႉတူဝ်သတ်းၼၼ်ႉတၵ်းလႆႈႁွတ်ႈထိုင်တၢင်းဢၼ်မူတ်းၸၢင်ႇဢေႃႈ။ ပေႃးလိူတ်ႈတူဝ်သတ်းၼၼ်ႉလႆႈၽႅတ်းသႂ်ႇမႅၼ်ႈၶူဝ်းၼုင်ႈၸိုင်၊တၵ်းလႆႈဢဝ်ၶူဝ်းၼုင်ႈၼၼ်ႉ၊သၵ်ႉသၢႆႇၵႃႈၼႂ်းထႃႇၼႃႉတီႈမူတ်းၸၢင်ႇဢေႃႈ။-
မေႃႈလိၼ်ဢၼ်တူမ်ႈၼိူဝ်ႉၼၼ်ႉႁူၺ်ႇလႂ်သေဢမ်ႇဝႃႈ၊တၵ်းလႆႈပေႃႉလႅဝ်ပႅတ်ႈဢေႃႈ။ ပေႃးတူမ်ႈၼႂ်းမေႃႈတွင်းလိူင်ၸိုင်၊တၵ်းလႆႈပွတ်ႈလႄႈလၢင်ႉပႅတ်ႈဢေႃႈ။-
ၵူၼ်းၸၢႆးၵႃႈဢၼ်ပဵၼ်ယဵၸ်ႈပရေႃးႁဵၵ်ႈတၵ်းလႆႈဢွၼ်ၵၼ်ၵိၼ်ၼိူဝ်ႉၼၼ်ႉၵူႈၵေႃႉၵူႈၵူၼ်းဢေႃႈ။ ဢၼ်ၼႆႉပဵၼ်ဢၼ်မူတ်းၸၢင်ႇၼႃႇလူင်လၢင်ဢေႃႈ။-
ၵူၺ်းၵႃႈ၊ပေႃးဢဝ်လိူတ်ႈသတ်းၼၼ်ႉၶဝ်ႈၵႂႃႇၵႃႈၼႂ်းသုမ်ႉထဵင်ၸဝ်ႈႁႂ်ႈလႆႈႁဵတ်းတၢင်းလူႇပုၼ်ႈဢၼ်ပွႆႇလွတ်ႈဢပျတ်ႈၸိုင်၊ဢမ်ႇလႆႈၵိၼ်ၼိူဝ်ႉၼၼ်ႉလႃးလႃး။ တၵ်းလႆႈတုတ်ႇၽႆးပႅတ်ႈတင်းမူတ်းဢေႃႈ။
“‘ဢၼ်ၼႆႉၸမ်ႉ၊ပဵၼ်ထုင်းတြႃးလွင်ႈဢၼ်ႁဵတ်းတၢင်းလူႇဢၼ်ၽေႇတုၸရိူၵ်ႈဢၼ်ပဵၼ်တၢင်းဢၼ်မူတ်းၸၢင်ႇၼႃႇလူင်လၢင်ဢေႃႈ။-
ၶဝ်တၵ်းလႆႈဢဝ်တူဝ်တၢင်းလူႇဢၼ်ၽေႇတုၸရိူၵ်ႈၼၼ်ႉႁႅမ်ၵႃႈတီႈဢၼ်ၶဝ်ႁႅမ်တူဝ်တၢင်းလူႇဢၼ်တုတ်ႇၽႆးၼၼ်ႉသေလႄႈဢဝ်လိူတ်ႈမၼ်းၽႅတ်းသႂ်ႇလဵပ်ႈႁွပ်ႈၵႃႈၼိူဝ်ၶဵင်ႇတၢင်းလူႇတင်းသီႇၼႃႈဢေႃႈ။-
တၵ်းလႆႈဢဝ်ၵွၼ်ႈၶႆၵွၼ်ႈမၼ်းတင်းမူတ်းဢွၵ်ႇလႄႈသၢၵ်ႈလူႇၵႃႈၼိူဝ်ၶဵင်ႇတၢင်းလူႇဢေႃႈ။ ၸႃႉၸဵမ်ႁၢင်မၼ်းလႄႈၵွၼ်ႈၶႆၵွၼ်ႈမၼ်းဢၼ်ၸပ်းၶူင်းၼႂ်းမၼ်း၊-
မၢၵ်ႇလၼ်းမၼ်းသွင်ႁူၺ်ႇဢိၵ်ႇတင်းၵွၼ်ႈၶႆၵွၼ်ႈမၼ်း၊ဢိၵ်ႇတင်းတပ်းမၼ်းပွတ်းဢၼ်ၼုမ်ႇလီသေပိူၼ်ႈၸိူဝ်းၼၼ်ႉတၵ်းလႆႈဢဝ်ဢွၵ်ႇလႄႈ၊-
ယဵၸ်ႈပရေႃးႁဵၵ်ႈ တၵ်းလႆႈဢဝ်ၵွၼ်ႈၶႆၵွၼ်ႈမၼ်းၸိူဝ်းၼၼ်ႉတင်းမူတ်းတုတ်ႇၽႆးလႄႈႁဵတ်းတၢင်းလူႇတီႈ ထႃႇဝရႃႉၽြႃး၊ ဢေႃႈ။ ဢၼ်ၼႆႉပဵၼ်တၢင်းလူႇဢၼ်ၽေႇတုၸရိူၵ်ႈဢေႃႈ။-
ၵူၼ်းၸၢႆးၵႃႈဢၼ်ပဵၼ်ယဵၸ်ႈပရေႃးႁဵၵ်ႈ ဢွၼ်ၵၼ်ၵိၼ်ၼိူဝ်ႉၼၼ်ႉလႆႈၵူႈၵေႃႉၵူႈၵူၼ်းဢေႃႈ။ တၵ်းလႆႈၵိၼ်ၶူပ်းၵႃႈၼႂ်းထႃႇၼႃႉတီႈမူတ်းၸၢင်ႇၵွပ်ႈပိူဝ်ႈပဵၼ်ဢၼ်မူတ်းၸၢင်ႇၼႃႇလူင်လၢင်ၼၼ်ႉဢေႃႈ။
“‘ဢၼ်ၼႆႉသမ်ႉပဵၼ်ထုင်းတြႃးဢၼ်လဵဝ်ၵၼ်ပုၼ်ႈတၢင်းလူႇဢၼ်ၽေႇဢပျတ်ႈဢိၵ်ႇတင်းတၢင်းလူႇဢၼ်ၽေႇတုၸရိူၵ်ႈၼၼ်ႉတင်းသွင်မဵဝ်းဢေႃႈ။ ၼိူဝ်ႉမၼ်းၸိုင်၊ပဵၼ်ပုၼ်ႈယဵၸ်ႈပရေႃးႁဵၵ်ႈၵေႃႉဢၼ်သၢၵ်ႈၵၢပ်ႈတၢင်းလူႇၼၼ်ႉဢေႃႈ။-
ယဵၸ်ႈပရေႃးႁဵၵ်ႈၵေႃႉဢၼ်လႆႈသၢၵ်ႈၵၢပ်ႈၶိူင်ႈတၢင်းလူႇဢၼ်တုတ်ႇၽႆးပုၼ်ႈၽူႈလႂ်သေဢမ်ႇဝႃႈ၊ယဵၸ်ႈပရေႃးႁဵၵ်ႈၵေႃႉၼၼ်ႉတေလႆႈၼင်တူဝ်တၢင်းလူႇဢၼ်တုတ်ႇၽႆးၼၼ်ႉဢေႃႈ။-
တၢင်းလူႇမၢၵ်ႇၶဝ်ႈႁူင်းၶဝ်ႈဢၼ်ဢုပ်းႁႅင်ႈၵႃႈၼႂ်းတဝ်ႈၽႆးဢိၵ်ႇတင်းၶိူင်ႈတၢင်းလူႇတင်းမူတ်းဢၼ်ၶူဝ်ႈၵႃႈၼႂ်းမေႃႈၶၢင်၊ဢမ်ႇၼၼ်ၵႃႈၼိူဝ်ၶႅပ်းလဵၵ်းၵႃႈမီးၸိူဝ်းၼၼ်ႉၸိုင်၊ယဵၸ်ႈပရေႃးႁဵၵ်ႈၵေႃႉဢၼ်ဢဝ်သၢၵ်ႈလူႇၼၼ်ႉတၵ်းလႆႈဢဝ်ပုၼ်ႈမၼ်းဢေႃႈ။-
ၵူၺ်းၵႃႈ၊တၢင်းလူႇမၢၵ်ႇၶဝ်ႈႁူင်းၶဝ်ႈတင်းမူတ်းဢၼ်ဢမ်ႇလႆႈတူမ်ႈႁႂ်ႈသုၵ်းၼၼ်ႉၼွၵ်းလေႃးၼမ်ႉမၼ်းသေဢမ်ႇဝႃႈ၊ဢမ်ႇၼွၵ်းလေႃးၼမ်ႉမၼ်းသေဢမ်ႇဝႃႈ၊ပဵၼ်ပုၼ်ႈလုၵ်ႈၸၢႆး ဢႃႇရုၼ်ႇ ၸိူဝ်းဢၼ်ပဵၼ်ယဵၸ်ႈပရေႃးႁဵၵ်ႈၼၼ်ႉလႄႈတၵ်းလႆႈမႅင်ႇၵၼ်ဢဝ်ၽဵင်ႇၽဵင်ႇဢေႃႈ။
“‘ဢၼ်ၼႆႉပဵၼ်ထုင်းတြႃးပုၼ်ႈတၢင်းလူႇမိၵ်ႈသႁႃႇယႃႉဢၼ်တၵ်းလႆႈသၢၵ်ႈလူႇတီႈ ထႃႇဝရႃႉၽြႃး၊ ဢေႃႈ။-
ပေႃးသေၵေႃႉသေၵူၼ်းသၢၵ်ႈၵၢပ်ႈတၢင်းလူႇဢၼ်တၢင်ႇၵျေးၸူးၽြႃးပဵၼ်ၸဝ်ႈၸိုင်၊မၼ်းတၵ်းလႆႈသၢၵ်ႈလူႇတၢင်းလူႇၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈဢၼ်ပဵၼ်ၶႅပ်းၶဝ်ႈမုၼ်းၼႃဢၼ်ဢဝ်ၽွင်ၶဝ်ႈၵျုင်ႇၼွၵ်းလေႃးၼမ်ႉမၼ်းသၢၼ်ႇလုၼ်ႇ၊ဢမ်ႇၼၼ်ၵေႃႈၶဝ်ႈမုၼ်းၶွပ်ႈဢၼ်ဢဝ်ၼမ်ႉမၼ်းတႃး၊ဢမ်ႇၼၼ်ၶဝ်ႈမုၼ်းၶႅပ်းဢၼ်ဢဝ်ၽွင်ၶဝ်ႈၵျုင်ႇၼွၵ်းလေႃးၼမ်ႉမၼ်းသၢၼ်ႇလုၼ်ႇမဵဝ်းၼၼ်ႉသေမဵဝ်းမဵဝ်းႁူမ်ႈလူၺ်ႈၵၼ်တင်းတူဝ်တၢင်းလူႇဢၼ်သၢၵ်ႈၵၢပ်ႈၼၼ်ႉဢေႃႈ။-
လိူဝ်သေၼၼ်ႉမၼ်းတၵ်းလႆႈထၢပ်ႈထႅင်ႈလႄႈသၢၵ်ႈလူႇၶဝ်ႈမုၼ်းဢၼ်သႂ်ႇၸိူဝ်ႉပႅင်ႈဢေႃႈ။-
မၼ်းတၵ်းလႆႈဢဝ်ၶဝ်ႈမုၼ်းၼၼ်ႉယေႈမဵဝ်းယေႈပုၼ်ႈသၢၵ်ႈလူႇႁႂ်ႈပဵၼ်တၢင်းလူႇတီႈ ထႃႇဝရႃႉၽြႃး၊ လႄႈ၊ပဵၼ်ပုၼ်ႈယဵၸ်ႈပရေႃးႁဵၵ်ႈၵေႃႉဢၼ်ဢဝ်လိူတ်ႈတူဝ်တၢင်းလူႇၼၼ်ႉၽႅတ်းသႂ်ႇတီႈၶဵင်ႇတၢင်းလူႇၼၼ်ႉဢေႃႈ။-
ၼိူဝ်ႉတူဝ်တၢင်းလူႇၼၼ်ႉတၵ်းလႆႈၵိၼ်ၼႂ်းဝၼ်းဢၼ်သၢၵ်ႈလူႇၼၼ်ႉၵမ်းလဵဝ်လႄႈ၊ဢမ်ႇလႆႈႁႂ်ႈၵိုတ်းၵျၢၼ်ႇဝႆႉတေႃႇထိုင်ႁွတ်ႈၶဵင်ႇၵၢင်ၼႂ်။
“‘ပေႃးသေၵေႃႉသေၵူၼ်းႁဵတ်းတၢင်းလူႇမိၵ်ႈသႁႃႇယႃႉၵွပ်ႈပိူဝ်ႈပဵၼ်တၢင်းဢၼ်ႁဵတ်းၵတိသဵတ်ႈၸႃႇလႄႈသၢၵ်ႈလူႇသေဢမ်ႇဝႃႈ၊ပဵၼ်တၢင်းဢၼ်ၸွမ်းဢလူဝ်ႇၵၢင်ၸႂ်မၼ်းလႄႈသၢၵ်ႈလူႇသေဢမ်ႇဝႃႈ၊ပေႃးဢမ်ႇလႆႈၵိၼ်ၼႂ်းဝၼ်းဢၼ်သၢၵ်ႈလူႇၼၼ်ႉတင်းမူတ်း၊ဢၼ်ၵိုတ်းဢၼ်ၵျၢၼ်ႇၼၼ်ႉတၵ်းလႆႈၵိၼ်ၼႂ်းဝၼ်းမိူဝ်ႈၽုၵ်ႈဢေႃႈ။-
ၼိူဝ်ႉတူဝ်တၢင်းလူႇဢၼ်ယင်းၵိုတ်းယင်းၵျၢၼ်ႇတေႃႇထိုင်ႁွတ်ႈဝၼ်းမိူဝ်ႈႁိုဝ်းၼၼ်ႉၸိုင်၊တၵ်းလႆႈဢဝ်တုတ်ႇၽႆးပႅတ်ႈဢေႃႈ။-
ပေႃးၵိၼ်မႅၼ်ႈသေဢိတ်းသေဢီႈၼႂ်းဝၼ်းမိူဝ်ႈႁိုဝ်းၼၼ်ႉၸိုင်၊ၽြႃးပဵၼ်ၸဝ်ႈဢမ်ႇႁပ်ႉဢဝ်တၢင်းလူႇၵေႃႉၼၼ်ႉယဝ်ႉလႄႈ၊ဢမ်ႇမၢတ်ႈပဵၼ်တၢင်းဢၼ်မီးဢၵျူဝ်းပုၼ်ႈၵေႃႉဢၼ်သၢၵ်ႈလူႇၼၼ်ႉယဝ်ႉ။ မၢတ်ႈပဵၼ်ဢၼ်လီႁင်ႈဢဵတ်ႇသဵတ်ႇသေယဝ်ႉ၊ၵေႃႉဢၼ်ၵိၼ်ၼၼ်ႉတၵ်းလႆႈၶၢမ်ႇဢပျတ်ႈတူဝ်ၸဝ်ႈၵဝ်ႇဢေႃႈ။-
ၼိူဝ်ႉတၢင်းလူႇဢၼ်တိူဝ်ႉထုၵ်ႇမႅၼ်ႈလွင်ႈတၢင်းဢၼ်ဢမ်ႇမူတ်းသႂ်သေၸိူဝ်ႉသေပိူင်ၼၼ်ႉၸိုင်၊ဢမ်ႇလႆႈၵိၼ်၊တၵ်းလႆႈဢဝ်တုတ်ႇၽႆးဢေႃႈ။ “‘ၽူႈလႂ်သေဢမ်ႇဝႃႈ၊ၵေႃႉဢၼ်မူတ်းၸၢင်ႇၵူႈၵေႃႉၵူႈၵူၼ်းၼၼ်ႉၵိၼ်ၼိူဝ်ႉတၢင်းလူႇၼၼ်ႉလႆႈဢေႃႈ။-
ပေႃးဝႃႈၵေႃႉဢၼ်ဢမ်ႇမူတ်းသႂ်ၼၼ်ႉသမ်ႉၵိၼ်ၸိုင်၊တၵ်းဢမ်ႇလႆႈၶၢမ်ႇမၢတ်ႈပဵၼ်ၵူၼ်းၽြႃးပဵၼ်ၸဝ်ႈထႅင်ႈလႃးလႃး။-
ၼႆႉၵူၺ်းဢမ်ႇၵႃး၊ၵေႃႉဢၼ်ၵိၼ်ၼိူဝ်ႉတၢင်းလူႇၼၼ်ႉလိုၼ်းသေတၢင်းဢၼ်မၼ်းလႆႈတိူဝ်ႉထုၵ်ႇမႅၼ်ႈမဵဝ်းဢၼ်ဢမ်ႇမူတ်းသႂ်သေၸိူဝ်ႉသေပိူင်ဢၼ်ၸၢပ်ႈသႅင်ႇၵၼ်တင်းၵူၼ်းသေဢမ်ႇဝႃႈ၊ဢၼ်ၸၢပ်ႈသႅင်ႇၵၼ်တင်းတူဝ်သတ်းသေဢမ်ႇဝႃႈ၊ၵေႃႉၼၼ်ႉၵေႃႈတၵ်းဢမ်ႇလႆႈၶၢမ်ႇမၢတ်ႈပဵၼ်ၵူၼ်းၽြႃးပဵၼ်ၸဝ်ႈထႅင်ႈလႃးလႃးၼင်ႇၵဝ်ႇဢေႃႈ၊’” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ပၼ်ထုင်းတြႃးၸိူဝ်ႉၼင်ႇၼႆတီႈ မူဝ်းသေႇ၊-
ပုၼ်ႈၵူၼ်းမဵဝ်း ဢိသရေး၊ ၶဝ်တၵ်းပႂ်ႉၵမ်ပႂ်ႉၸွမ်းဢေႃႈ။ “ၵွၼ်ႈၶႆၵွၼ်ႈမၼ်းဝူဝ်း၊သူဝ်း၊ပႄႉၸိုင်၊သူဢမ်ႇလႆႈၵိၼ်လႃးလႃး။-
ၵွၼ်ႈၶႆၵွၼ်ႈမၼ်းတူဝ်သတ်းဢၼ်တၢႆၵူၺ်းမၼ်းၼၼ်ႉသေဢမ်ႇဝႃႈ၊ဢၼ်တူဝ်ထိူၼ်ႇႁၢႆႉၶူပ်းတၢႆၼၼ်ႉသေဢမ်ႇဝႃႈ၊သူဢမ်ႇလႆႈၵိၼ်လႃးလႃး။ ၵူၺ်းၵႃႈ၊ပေႃးဢဝ်သုင်းဢဝ်ႁဵတ်းသေၸိူဝ်ႉသေပိူင်ၸိုင်၊လႆႈယူႇဢေႃႈ။-
ၽူႈလႂ်သေဢမ်ႇဝႃႈ၊ၵေႃႉဢၼ်ၵိၼ်ၵွၼ်ႈၶႆၵွၼ်ႈမၼ်းတူဝ်တၢင်းလူႇဢၼ်သၢၵ်ႈလူႇႁႂ်ႈပဵၼ်တၢင်းလူႇဢၼ်တုတ်ႇၽႆးတီႈ ထႃႇဝရႃႉၽြႃး၊ ၼၼ်ႉၵေႃႉၼၼ်ႉတၵ်းဢမ်ႇလႆႈၶၢမ်ႇမၢတ်ႈပဵၼ်ၵူၼ်းၽြႃးပဵၼ်ၸဝ်ႈထႅင်ႈလႃးလႃး။-
တီႈဢၼ်ၵူၼ်းမဵဝ်း ဢိသရေး၊ ယူႇသဝ်းၼၼ်ႉတီႈလႂ်တၼ်းလႂ်သေဢမ်ႇဝႃႈ၊ၶဝ်တၵ်းဢမ်ႇလႆႈၵိၼ်လိူတ်ႈၼူၵ်ႉလိူတ်ႈတူဝ်သတ်းသေၸိူဝ်ႉသေမဵဝ်း။-
ၽူႈလႂ်ၽႂ်သေဢမ်ႇဝႃႈ၊ၵေႃႉဢၼ်ၽိတ်းပိူင်ႈပူၼ်ႉလိူဝ်ထုင်းတြႃးၼႆႉမႅၼ်ႈၸိုင်၊ၵေႃႉၼၼ်ႉတၵ်းဢမ်ႇလႆႈၶၢမ်ႇမၢတ်ႈပဵၼ်ၵူၼ်းၽြႃးပဵၼ်ၸဝ်ႈထႅင်ႈလႃးလႃး၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ပၼ်ထုင်းတြႃးၸိူဝ်ႉၼင်ႇၼႆတီႈ မူဝ်းသေႇ၊-
ပုၼ်ႈၵူၼ်းမဵဝ်း ဢိသရေး၊ ၶဝ်တၵ်းပႂ်ႉၵမ်ပႂ်ႉၸွမ်းဢေႃႈ။ “ၽူႈလႂ်သေဢမ်ႇဝႃႈ၊ၵေႃႉဢၼ်ႁဵတ်းတၢင်းလူႇမိၵ်ႈသႁႃႇယႃႉၼၼ်ႉမၼ်းတၵ်းလႆႈဢဝ်တၢင်းလူႇပုၼ်ႈၼိုင်ႈမႃးသၢၵ်ႈလူႇႁႂ်ႈပဵၼ်တၢင်းလူႇဢၼ်ၶိုၵ်ႉဢၼ်ၶမ်ႇ တီႈ ထႃႇဝရႃႉၽြႃး၊ ဢေႃႈ။-
တူဝ်ၸဝ်ႈၵဝ်ႇမၼ်းတၵ်းလႆႈဢဝ်တၢင်းလူႇၼၼ်ႉမႃးသၢၵ်ႈလူႇႁႂ်ႈပဵၼ်တၢင်းလူႇဢၼ်တုတ်ႇၽႆးဢေႃႈ။ မၼ်းတၵ်းလႆႈဢဝ်ၵွၼ်ႈၶႆၵွၼ်ႈမၼ်းတူဝ်တၢင်းလူႇၼၼ်ႉဢိၵ်ႇတင်းဢူၵ်းမၼ်းမႃးသၢၵ်ႈလူႇႁႂ်ႈပဵၼ်တၢင်းလူႇဢၼ်ၶိုၵ်ႉဢၼ်ၶမ်ႇတီႈ ထႃႇဝရႃႉၽြႃး၊ ဢေႃႈ။-
ယဵၸ်ႈပရေႃးႁဵၵ်ႈ တၵ်းလႆႈဢဝ်ၵွၼ်ႈၶႆၵွၼ်ႈမၼ်းတုတ်ႇၽႆးၵႃႈၼိူဝ်ၶဵင်ႇတၢင်းလူႇဢေႃႈ။ ၵူၺ်းၵႃႈ၊ဢူၵ်းမၼ်းတၵ်းလႆႈပဵၼ်ပုၼ်ႈယဵၸ်ႈပရေႃးႁဵၵ်ႈတင်းလၢႆဢေႃႈ။-
ၶႃလင်မၼ်းၶွၼ်ၶႂႃၼၼ်ႉတၵ်းလႆႈသၢၵ်ႈလူႇႁႂ်ႈပဵၼ်တႃႇၼႃႉတၢင်းလူႇ၊-
ပုၼ်ႈလုၵ်ႈၸၢႆး ဢႃႇရုၼ်ႇ၊ ၵေႃႉဢၼ်သၢၵ်ႈလူႇလိူတ်ႈတင်းၵွၼ်ႈၶႆၵွၼ်ႈမၼ်းတူဝ်တၢင်းလူႇမိၵ်ႈသႁႃႇယႃႉၼၼ်ႉဢေႃႈ။-
ဢူၵ်းမၼ်းဢၼ်ပဵၼ်တၢင်းလူႇဢၼ်ၶိုၵ်ႉဢၼ်ၶမ်ႇလႄႈ၊ၶႃလင်မၼ်းၶွၼ်ၶႂႃသမ်ႉပဵၼ်တၢင်းလူႇဢၼ် ထႃႇဝရႃႉၽြႃး၊ ဢဝ်တီႈၵူၼ်းမဵဝ်း ဢိသရေး၊ တင်းလၢႆသေယဝ်ႉ၊ပၼ်တီႈယဵၸ်ႈပရေႃးႁဵၵ်ႈတင်းလၢႆဢေႃႈ။ ဢၼ်ၼႆႉၸမ်ႉ၊ပဵၼ်ဝုတ်ႈတြႃးတၢင်းဢၼ်ၵူၼ်းမဵဝ်း ဢိသရေး၊ တင်းလၢႆတၵ်းလႆႈပၼ်ယဵၸ်ႈပရေႃးႁဵၵ်ႈၵႂႃႇၸိူဝ်ႉၼင်ႇၼႆဝၼ်းလိုၼ်းမိူဝ်းၼႃႈသိုပ်ႇသိုပ်ႇတၢမ်တၢမ်ဢေႃႈ။-
ဢၼ်ၼႆႉပဵၼ်ပုၼ်ႈဢၼ်ဢဝ်ဢွၵ်ႇသေၵႃႈၼႂ်းတၢင်းလူႇဢၼ်တုတ်ႇၽႆးဢၼ်သၢၵ်ႈလူႇတီႈ ထႃႇဝရႃႉၽြႃး၊ လႄႈပဵၼ်ပုၼ်ႈတႃႇတေပၼ် ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉၼႂ်းဝၼ်းဢၼ်မၼ်းၸဝ်ႈပၼ်ၽိၵ်ႈသိၵ်ႈၼႂ်းဢရႃႇယဵၸ်ႈပရေႃးႁဵၵ်ႈၼၼ်ႉဢေႃႈ။-
ၼႂ်းဝၼ်းဢၼ်မၼ်းၸဝ်ႈပၼ်ၽိၵ်ႈသိၵ်ႈတီႈၶဝ်ၼၼ်ႉ ထႃႇဝရႃႉၽြႃး၊ မီးဢမိင်ႉႁႂ်ႈၵူၼ်းမဵဝ်း ဢိသရေး၊ တင်းလၢႆဢဝ်ပုၼ်ႈဢၼ်ၼုၵ်ႈဢဝ်ၼႂ်းတၢင်းလူႇၼၼ်ႉသေလႄႈပၼ်တီႈၶဝ်ဢေႃႈ။ ဢၼ်ၼႆႉၸမ်ႉ၊ပဵၼ်ဝုတ်ႈတြႃးတၢင်းဢၼ်ၵူၼ်းမဵဝ်း ဢိသရေး၊ တင်းလၢႆတၵ်းလႆႈပႂ်ႉၵမ်ပႂ်ႉၸွမ်းၵႂႃႇဝၼ်းလိုၼ်းမိူဝ်းၼႃႈသိုပ်ႇသိုပ်ႇတၢမ်တၢမ်ဢေႃႈ၊” ဝႃႈၼင်ႇၼႆဢေႃႈ။
လွင်ႈတင်းမူတ်းၸိူဝ်းၼႆႉၸမ်ႉ၊ပဵၼ်ထုင်းၽိင်ႈတြႃးတၢင်းလူႇဢၼ်တုတ်ႇၽႆး၊တၢင်းလူႇမၢၵ်ႇၶဝ်ႈႁူင်းၶဝ်ႈ၊တၢင်းလူႇဢၼ်ၽေႇဢပျတ်ႈ၊တၢင်းလူႇဢၼ်ၽေႇတုၸရိူၵ်ႈ၊တၢင်းလူႇဢၼ်ပၼ်ၽိၵ်ႈသိၵ်ႈ၊တၢင်းလူႇမိၵ်ႈသႁႃႇယႃႉဢေႃႈ။-
ထႃႇဝရႃႉၽြႃး၊ မီးဢမိင်ႉၸိူဝ်းၼႆႉတီႈ မူဝ်းသေႇ၊ ၼႂ်းဝၼ်းဢၼ်မၼ်းၸဝ်ႈသင်ႇလၢတ်ႈႁႂ်ႈၵူၼ်းမဵဝ်း ဢိသရေး၊ တင်းလၢႆႁဵတ်းတၢင်းလူႇၸိူဝ်းၼႆႉတီႈ ထႃႇဝရႃႉၽြႃး၊ ၵႃႈၼႂ်းထိူၼ်ႇလႅင်ႉလွႆ သိၼႃႉ၊ ၼၼ်ႉဢေႃႈ။
ၸဝ်ႈထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ ထႅင်ႈလႄႈဝႃႈ၊-
“ႁွင်ႉဢဝ် ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉမႃးၵႃႈတီႈႁိမ်းၽၵ်းတူသုမ်ႉထဵင်ၸဝ်ႈတီႈဢၼ်ၸုတုမ်ၵၼ်ၼၼ်ႉတႃႉ။ ဢဝ်ၶူဝ်းၼုင်ႈယဵၸ်ႈပရေႃးႁဵၵ်ႈ လႂ်၊ၼမ်ႉမၼ်းဢၼ်တၵ်းသွၼ်းလေႃႇတင်းဝူဝ်းပေႃႈဢွၼ်ႇပုၼ်ႈတၢင်းလူႇဢၼ်ၽေႇဢပျတ်ႈ၊သူဝ်းပေႃႈသွင်တူဝ်ဢိၵ်ႇတင်းၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈပဵတ်ႈၼိုင်ႈသေလႄႈ၊-
ႁွင်ႉဢဝ်မူႇၵူၼ်းၸိူဝ်းၵူၼ်းတင်းလၢႆမႃးၸုတုမ်ၵၼ်ၵႃႈတီႈၽၵ်းတူသုမ်ႉထဵင်ၸဝ်ႈၼၼ်ႉတႃႉ၊” ဝႃႈၼင်ႇၼႆဢေႃႈ။
မူဝ်းသေႇ၊ ႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉဝႆႉၼၼ်ႉသေယဝ်ႉ၊မိူဝ်ႈဢၼ်မူႇၵူၼ်းၸိူဝ်းၵူၼ်းတင်းလၢႆမႃးၸုတုမ်ၵၼ်ၼၼ်ႉ၊-
မၼ်းလၢတ်ႈတီႈၶဝ်လႄႈဝႃႈ၊ “လွင်ႈတၢင်းၼႆႉပဵၼ်လွင်ႈတၢင်းဢၼ် ထႃႇဝရႃႉၽြႃး၊ သင်ႇလၢတ်ႈႁႂ်ႈႁဵတ်းယဝ်ႉတူဝ်ႈၵႂႃႇလီလီငၢမ်းငၢမ်းဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈႁွင်ႉဢဝ် ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉမႃးသေယဝ်ႉ၊ၸႂ်ႉႁႂ်ႈၶဝ်ႁဵတ်းမၢင်ႇၵလႃႇတၢင်းဢၼ်ဢၢပ်ႇၼမ်ႉဢေႃႈ။-
မၼ်းၸင်ႇဢဝ်သိူဝ်ႈပွတ်းတင်းသိူဝ်ႈယၢဝ်းၼုင်ႈပၼ် ဢႃႇရုၼ်ႇ၊ သေလႄႈဢဝ်သၢႆဢႅဝ်ႁတ်ႉပၼ်ဢေႃႈ။ သမ်ႉဢဝ်သိူဝ်ႈသုပ်းၼုင်ႈပၼ်လႄႈၸင်ႇဢဝ်သၢႆႁတ်ႉဢႅဝ်မၼ်းဢၼ်ႁၢင်ႈၶိူင်ႈၼၼ်ႉႁတ်ႉပၼ်ၵႃႈၼိူဝ်သိူဝ်ႈသုပ်းၼၼ်ႉဢေႃႈ။-
ၶိူင်ႈၶူဝ်းထၢပ်ႈၼႃႈဢူၵ်းၵေႃႈမၼ်းဢဝ်သႂ်ႇပၼ်သေယဝ်ႉ၊ဢဝ်ဢုရိမ်းတင်းႀုမိမ်း သႂ်ႇဝႆႉဢေႃႈ။-
မၼ်းသမ်ႉဢဝ်ၽႃႈၶဵၼ်းႁူဝ်ၶဵၼ်းပၼ်သေယဝ်ႉ၊ၵႃႈတီႈၽၢႆႇၼႃႈၶဵၼ်းႁူဝ်ၼၼ်ႉမၼ်းဢဝ်ၶႅပ်းၶမ်းဢၼ်ပဵၼ်ၶိူင်ႈမူတ်းၸၢင်ႇဢၼ်ၼႄလွင်ႈဢၼ် ဢႃႇရုၼ်ႇ၊ သၢၵ်ႈၵၢပ်ႈတူဝ်တီႈ ထႃႇဝရႃႉၽြႃး၊ ၼၼ်ႉသႂ်ႇၸပ်းဝႆႉမႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈမၼ်းဝႆႉၼၼ်ႉဢေႃႈ။
မိူဝ်ႈၼၼ်ႉ၊ မူဝ်းသေႇ၊ ဢဝ်ၼမ်ႉမၼ်းဢၼ်တၵ်းသွၼ်းလေႃႇၼၼ်ႉသွၼ်းလေႃႇသုမ်ႉထဵင်ၸဝ်ႈဢိၵ်ႇတင်းၵႃႈဢၼ်မီးၵႃႈၼႂ်းမၼ်းၸိူဝ်းၼၼ်ႉသေလႄႈသၢၵ်ႈၵၢပ်ႈတင်းသဵင်ႈတင်းလူင်တီႈ ထႃႇဝရႃႉၽြႃး၊ ဢေႃႈ။-
မၼ်းဢဝ်ၼမ်ႉမၼ်းၼၼ်ႉၵမ်ႈၽွင်ႈၽႅတ်းသႂ်ႇၸဵတ်းၵမ်းၵႃႈတီႈၶဵင်ႇတၢင်းလူႇတင်းၶိူင်ႈမၼ်းတင်းမူတ်းဢိၵ်ႇတင်းဢၢင်ႇလူင်တင်းတိၼ်မၼ်းႁႂ်ႈပဵၼ်တၢင်းဢၼ်သၢၵ်ႈၵၢပ်ႈတီႈ ထႃႇဝရႃႉၽြႃး၊ ဢေႃႈ။-
မၼ်းဢဝ်ၼမ်ႉမၼ်းဢၼ်တၵ်းသွၼ်းလေႃႇၼၼ်ႉလေႃႇသႂ်ႇႁူဝ် ဢႃႇရုၼ်ႇ၊ ႁႂ်ႈပဵၼ်တၢင်းဢၼ်ပၼ်ၽိၵ်ႈသိၵ်ႈဢေႃႈ။-
လိုၼ်းၼၼ်ႉမၼ်းသမ်ႉဢဝ်လုၵ်ႈၸၢႆး ဢႃႇရုၼ်ႇ၊ ၸိူဝ်းၼၼ်ႉမႃးလႄႈၼုင်ႈသိူဝ်ႈပၼ်ၶဝ်၊ဢဝ်သၢႆႁတ်ႉဢႅဝ်ႁတ်ႉပၼ်သေယဝ်ႉ၊ဢဝ်မွၵ်ႇႁူဝ်တိုဝ်းပၼ်မႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉၼၼ်ႉဢေႃႈ။
မိူဝ်ႈၼၼ်ႉ၊ မူဝ်းသေႇ၊ ဢဝ်ဝူဝ်းပေႃႈဢွၼ်ႇပုၼ်ႈတၢင်းလူႇဢၼ်ၽေႇဢပျတ်ႈၼၼ်ႉမႃးလႄႈ ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉဢဝ်မိုဝ်းၶဝ်တၢင်ႇၵႃႈၼိူဝ်ႁူဝ်ဝူဝ်းၼၼ်ႉဢေႃႈ။-
မူဝ်းသေႇ၊ ႁႅမ်ဝူဝ်းၼၼ်ႉသေယဝ်ႉ၊ဢဝ်လိူတ်ႈမၼ်းၵမ်ႈၽွင်ႈဢဝ်ၼိဝ်ႉၸိမၼ်းၸုမ်ႇလိူတ်ႈသေလႄႈတႃးတီႈၶဝ်လႅမ်ၸိူဝ်းဢၼ်မီးၵႃႈတီႈၸဵင်ႇၶဵင်ႇတၢင်းလူႇၼၼ်ႉႁႂ်ႈၶဵင်ႇတၢင်းလူႇၼၼ်ႉမူတ်းၸၢင်ႇသေလႄႈဢဝ်လိူတ်ႈၼၼ်ႉထွၵ်ႇသႂ်ႇတိၼ်ၶဵင်ႇတၢင်းလူႇႁႂ်ႈမၼ်းလႆႈမူတ်းၸၢင်ႇပုၼ်ႈၼင်ႇႁိုဝ်တၵ်းလႆႈႁဵတ်းတၢင်းဢၼ်ၽေႇဢပျတ်ႈၵႃႈၼိူဝ်ၶဵင်ႇတၢင်းလူႇၼၼ်ႉဢေႃႈ။-
မူဝ်းသေႇ၊ ဢဝ်ၵွၼ်ႈၶႆၵွၼ်ႈမၼ်းဢၼ်ၸပ်းၶူင်းၼႂ်းမၼ်းတင်းမူတ်း၊တပ်းမၼ်းပွတ်းဢၼ်ၼုမ်ႇလီသေပိူၼ်ႈဢိၵ်ႇတင်းမၢၵ်ႇလၼ်းမၼ်းတင်းသွင်ႁူၺ်ႇတင်းၵွၼ်ႈၶႆၵွၼ်ႈမၼ်းဢၼ်ၸပ်းမၢၵ်ႇလၼ်းမၼ်းသေလႄႈဢဝ်တုတ်ႇၽႆးၵႃႈၼိူဝ်ၶဵင်ႇတၢင်းလူႇဢေႃႈ။-
မၼ်းသမ်ႉဢဝ်တူဝ်မၼ်းဢၼ်ၵိုတ်းယူႇဢိၵ်ႇတင်းၼင်မၼ်းဢိၵ်ႇတင်းၼိူဝ်ႉမၼ်းတင်းၶီႈၼုမ်ႇမၼ်းၵႂႃႇၵႃႈၼွၵ်ႈပၢင်တပ်ႉလႄႈတုတ်ႇၽႆးပႅတ်ႈမႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉၼၼ်ႉဢေႃႈ။
လိုၼ်းၼၼ်ႉ၊ မူဝ်းသေႇ၊ ဢဝ်သူဝ်းပေႃႈပုၼ်ႈတၢင်းလူႇဢၼ်တၵ်းတုတ်ႇၽႆးၼၼ်ႉမႃးလႄႈ ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉဢဝ်မိုဝ်းၶဝ်တၢင်ႇၵႃႈၼိူဝ်ႁူဝ်သူဝ်းၼၼ်ႉဢေႃႈ။-
မူဝ်းသေႇ၊ ႁႅမ်သူဝ်းၼၼ်ႉသေယဝ်ႉ၊ဢဝ်လိူတ်ႈမၼ်းထွၵ်ႇသႂ်ႇၵႃႈတီႈၽႃၶဵင်ႇတၢင်းလူႇတင်းသီႇၼႃႈဢေႃႈ။-
မိူဝ်ႈဢဝ်သူဝ်းပေႃႈၼၼ်ႉတႅပ်းပဵၼ်ပွတ်းပဵၼ်ပွတ်းယဝ်ႉၼၼ်ႉ မူဝ်းသေႇ၊ ဢဝ်ႁူဝ်မၼ်း၊ၵွၼ်ႈၼိူဝ်ႉမၼ်းတင်းၵွၼ်ႈၶႆၵွၼ်ႈမၼ်းၼၼ်ႉတုတ်ႇၽႆးဢေႃႈ။-
မိူဝ်ႈဢၼ်သုၵ်ႈၶူင်းၼႂ်းမၼ်းတင်းတိၼ်မၼ်းၸိူဝ်းၼၼ်ႉယဝ်ႉၸိုင်၊ မူဝ်းသေႇ၊ ဢဝ်သူဝ်းၼၼ်ႉတင်းတူဝ်တုတ်ႇၽႆးၵႃႈၼိူဝ်ၶဵင်ႇတၢင်းလူႇမႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈၼၼ်ႉဢေႃႈ။ ပဵၼ်တၢင်းလူႇဢၼ်တုတ်ႇၽႆးတီႈ ထႃႇဝရႃႉၽြႃး၊ လႄႈဢၢႆႁွမ်ဢၢႆႁူၺ်းမၼ်းထုၵ်ႇၸႂ်မႅၼ်ႈၸႂ် ထႃႇဝရႃႉၽြႃး၊ ဢေႃႈ။
မိူဝ်ႈၼၼ်ႉ မူဝ်းသေႇ၊ ဢဝ်သူဝ်းပေႃႈတူဝ်တီႈသွင်ဢၼ်ပဵၼ်ပုၼ်ႈတႃႇပၼ်ၽိၵ်ႈသိၵ်ႈတီႈယဵၸ်ႈပရေႃးႁဵၵ်ႈ ၼၼ်ႉမႃးလႄႈ ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉဢဝ်မိုဝ်းၶဝ်တၢင်ႇၵႃႈၼိူဝ်ႁူဝ်သူဝ်းၼၼ်ႉဢေႃႈ။-
မူဝ်းသေႇ၊ ႁႅမ်သူဝ်းၼၼ်ႉသေယဝ်ႉ၊ဢဝ်လိူတ်ႈမၼ်းၵမ်ႈၽွင်ႈယွတ်ႇသႂ်ႇၵႃႈတီႈဝၢၼ်ႁူၶွၼ်ၶႂႃ ဢႃႇရုၼ်ႇ၊ ႁူဝ်မႄႈမိုဝ်းၶွၼ်ၶႂႃဢိၵ်ႇတင်းႁူဝ်မႄႈတိၼ်ၶွၼ်ၶႂႃမၼ်းဢေႃႈ။-
လိုၼ်းၼၼ်ႉမၼ်းဢဝ်လုၵ်ႈၸၢႆး ဢႃႇရုၼ်ႇ၊ ၸိူဝ်းၼၼ်ႉမႃးလႄႈဢဝ်လိူတ်ႈၼၼ်ႉယွတ်ႇသႂ်ႇဝၢၼ်ႁူၶွၼ်ၶႂႃ၊ႁူဝ်မႄႈမိုဝ်းၶွၼ်ၶႂႃဢိၵ်ႇတင်းႁူဝ်မႄႈတိၼ်ၶွၼ်ၶႂႃၶဝ်ဢေႃႈ။ လိူတ်ႈဢၼ်ၵိုတ်းဢၼ်ၵျၢၼ်ႇၼၼ်ႉမၼ်းဢဝ်ထွၵ်ႇသႂ်ႇၽႃၶဵင်ႇတၢင်းလူႇတင်းသီႇၼႃႈဢေႃႈ။-
မၼ်းသမ်ႉဢဝ်ၵွၼ်ႈၶႆၵွၼ်ႈမၼ်း၊ႁၢင်မၼ်း၊ၵွၼ်ႈၶႆၵွၼ်ႈမၼ်းဢၼ်ၸပ်းၶူင်းၼႂ်းမၼ်းတင်းမူတ်း၊တပ်းမၼ်းပွတ်းဢၼ်ၼုမ်ႇလီသေပိူၼ်ႈ၊မၢၵ်ႇလၼ်းမၼ်းသွင်ႁူၺ်ႇတင်းၵွၼ်ႈၶႆၵွၼ်ႈမၼ်းဢိၵ်ႇတင်းတင်းၶႃလင်ၶွၼ်ၶႂႃမၼ်းၸိူဝ်းၼၼ်ႉ၊-
သမ်ႉဢဝ်ၶဝ်ႈမုၼ်းႁူၺ်ႇၼိုင်ႈသေၵႃႈၼႂ်းပဵတ်ႈၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈပုၼ်ႈဢၼ်တၵ်းသၢၵ်ႈလူႇပၼ်တီႈ ထႃႇဝရႃႉၽြႃး၊ ၼၼ်ႉ၊ဢိၵ်ႇတင်းၶဝ်ႈမုၼ်းဢၼ်သႂ်ႇၼမ်ႉမၼ်းႁူၺ်ႇၼိုင်ႈတင်းၶဝ်ႈမုၼ်းၶွပ်ႈႁူၺ်ႇၼိုင်ႈတၢင်ႇသႂ်ႇၵႃႈၼိူဝ်ၵွၼ်ႈၶႆၵွၼ်ႈမၼ်းတင်းၶႃလင်ၶွၼ်ၶႂႃမၼ်းၼၼ်ႉဢေႃႈ။-
မၼ်းဢဝ်တၢင်းလူႇၸိူဝ်းၼႆႉတင်းမူတ်းသႂ်ႇပၼ်ၵႃႈၼႂ်းမိုဝ်း ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉသေလႄႈၶဝ်ၵေႃႈဢွၼ်ၵၼ်သၢၵ်ႈလူႇႁႂ်ႈပဵၼ်တၢင်းလူႇဢၼ်ၶိုၵ်ႉဢၼ်ၶမ်ႇ တီႈ ထႃႇဝရႃႉၽြႃး၊ ဢေႃႈ။-
လိုၼ်းၼၼ်ႉ၊ မူဝ်းသေႇ၊ ၶိုၼ်းဢဝ်ၶိူင်ႈတၢင်းလူႇၸိူဝ်းၼၼ်ႉသေၵႃႈၼႂ်းမိုဝ်းၶဝ်လႄႈဢဝ်တုတ်ႇၽႆးၵႃႈၼိူဝ်ၶဵင်ႇတၢင်းလူႇလူၺ်ႈၵၼ်တင်းၶိူင်ႈတၢင်းလူႇဢၼ်တုတ်ႇၽႆးၸိူဝ်းၼၼ်ႉႁႂ်ႈပဵၼ်တၢင်းလူႇဢၼ်ပၼ်ၽိၵ်ႈသိၵ်ႈဢေႃႈ။ ဢၼ်ၼႆႉၸမ်ႉ၊ပဵၼ်လွင်ႈတၢင်းလူႇဢၼ်တုတ်ႇၽႆးဢၼ်ဢၢႆႁွမ်ဢၢႆႁူၺ်းမၼ်းထုၵ်ႇၸႂ်မႅၼ်ႈၸႂ် ထႃႇဝရႃႉၽြႃး၊ ဢေႃႈ။-
မိူဝ်ႈၼၼ်ႉ၊ မူဝ်းသေႇ၊ ဢဝ်ဢူၵ်းသူဝ်းပေႃႈၼၼ်ႉသၢၵ်ႈလူႇႁႂ်ႈပဵၼ်တၢင်းလူႇဢၼ်ၶိုၵ်ႉဢၼ်ၶမ်ႇတီႈ ထႃႇဝရႃႉၽြႃး၊ ဢေႃႈ။ ၼႂ်းသူဝ်းပေႃႈဢၼ်ပဵၼ်တၢင်းလူႇဢၼ်ပၼ်ၽိၵ်ႈသိၵ်ႈၼႆႉဢူၵ်းမၼ်းပဵၼ်ပုၼ်ႈ မူဝ်းသေႇ၊ ဢေႃႈ။ မူဝ်းသေႇ၊ ႁဵတ်းၵူႈၸိူဝ်ႉၵူႈမဵဝ်းမႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈၼၼ်ႉဢေႃႈ။
မူဝ်းသေႇ၊ ဢဝ်ၼမ်ႉမၼ်းဢၼ်တၵ်းသွၼ်းလေႃႇၵမ်ႈၽွင်ႈတင်းလိူတ်ႈၵမ်ႈၽွင်ႈဢၼ်မီးၵႃႈၼိူဝ်ၶဵင်ႇတၢင်းလူႇၼၼ်ႉ ၽႅတ်းသႂ်ႇ ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉဢိၵ်ႇတင်းသိူဝ်ႈၶူဝ်းၶဝ်ဢေႃႈ။ ဢၼ်ၼႆႉၸမ်ႉ၊ပဵၼ်လွင်ႈတၢင်းဢၼ်မၼ်းဢဝ်ၶဝ်ဢိၵ်ႇတင်းသိူဝ်ႈၶူဝ်းၶဝ်သၢၵ်ႈၵၢပ်ႈတီႈ ထႃႇဝရႃႉၽြႃး၊ ဢေႃႈ။
မူဝ်းသေႇ၊ လၢတ်ႈတီႈ ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉလႄႈဝႃႈ၊ “ဢဝ်ၼိူဝ်ႉၼၼ်ႉၵႂႃႇၵႃႈႁိမ်းၽၵ်းတူသုမ်ႉထဵင်ၸဝ်ႈသေလႄႈ၊ၵႃႈတီႈၼၼ်ႈသူတၵ်းလႆႈတူမ်ႈၵိၼ်ၼိူဝ်ႉၼၼ်ႉလူၺ်ႈၶဝ်ႈမုၼ်းဢၼ်မီးၼႂ်းပဵတ်ႈတၢင်းလူႇဢၼ်ပၼ်ၽိၵ်ႈသိၵ်ႈၼၼ်ႉမႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉၼၼ်ႉဢေႃႈ။-
သူတၵ်းလႆႈဢဝ်ၼိူဝ်ႉတင်းၶဝ်ႈမုၼ်းဢၼ်ၵိုတ်းဢၼ်ၵျၢၼ်ႇၼၼ်ႉၽဝ်ၽႆးပႅတ်ႈဢေႃႈ။-
ၼႂ်းၸူဝ်ႈၸဵတ်းဝၼ်းတဵမ်တဵမ်သူတၵ်းဢမ်ႇလႆႈဢွၵ်ႇသေၵႃႈတီႈသုမ်ႉထဵင်ၸဝ်ႈလႃးလႃး။ လွင်ႈမၼ်းၸမ်ႉ၊တၢင်းဢၼ်ပၼ်ၽိၵ်ႈသိၵ်ႈတီႈသူၼၼ်ႉႁိုင်ၸဵတ်းဝၼ်းဢေႃႈ။-
ထႃႇဝရႃႉၽြႃး၊ မီးဢမိင်ႉဝႆႉႁႂ်ႈႁဝ်းႁဵတ်းၸိူဝ်ႉၼင်ႇဢၼ်ႁဝ်းႁဵတ်းၼႂ်းဝၼ်းမိူဝ်ႈၼႆႉပုၼ်ႈလွင်ႈၼင်ႇႁိုဝ်တၵ်းၽေႇဢပျတ်ႈသူဢေႃႈ။-
သူတၵ်းလႆႈမီးယူႇၼႂ်းၽၵ်းတူသုမ်ႉထဵင်ၸဝ်ႈဝၼ်းဝၼ်းၶိုၼ်းၶိုၼ်းၸဵတ်းဝၼ်းတဵမ်တဵမ်လႄႈ ႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉၼၼ်ႉဢေႃႈ။ ပေႃးသူဢမ်ႇႁဵတ်းၸွမ်းၸိုင်၊တၵ်းလႆႈတၢႆဢေႃႈ။ ဢၼ်ၼႆႉၸမ်ႉ၊ပဵၼ်တၢင်းဢၼ် ထႃႇဝရႃႉၽြႃး၊ သင်ႇလၢတ်ႈၵဝ်ဝႆႉဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈတီႈ မူဝ်းသေႇ၊ ဝႆႉၼၼ်ႉဢေႃႈ။
ဝၼ်းဢၼ်ထူၼ်ႈထိုင်ပႅတ်ႇဝၼ်းၼၼ်ႉ မူဝ်းသေႇ၊ ႁွင်ႉဢဝ် ဢႃႇရုၼ်ႇ၊ တင်းလုၵ်ႈၸၢႆးမၼ်းတင်းလၢႆဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်မဵဝ်း ဢိသရေး၊ တင်းလၢႆသေယဝ်ႉ၊-
လၢတ်ႈတီႈ ဢႃႇရုၼ်ႇ၊ လႄႈဝႃႈ၊ “ဢဝ်ဝူဝ်းပေႃႈဢွၼ်ႇတူဝ်ၼိုင်ႈပုၼ်ႈတၢင်းလူႇဢၼ်ၽေႇဢပျတ်ႈဢိၵ်ႇတင်းသူဝ်းပေႃႈဢွၼ်ႇတူဝ်ၼိုင်ႈပုၼ်ႈၶိူင်ႈတၢင်းလူႇဢၼ်တုတ်ႇၽႆး၊တင်းသွင်တူဝ်တၵ်းဢမ်ႇလႆႈမီးတီႈၸိတီႈၼႄးၼၼ်ႉမႃးသၢၵ်ႈလူႇတီႈ ထႃႇဝရႃႉၽြႃး၊ တႃႉ။-
သမ်ႉလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈ၊ ‘သူဢဝ်ပႄႉပေႃႈဢွၼ်ႇတူဝ်ၼိုင်ႈပုၼ်ႈတၢင်းလူႇဢၼ်ၽေႇဢပျတ်ႈ၊ဝူဝ်းဢွၼ်ႇတူဝ်ၼိုင်ႈတင်းသူဝ်းဢွၼ်ႇတူဝ်ၼိုင်ႈ၊ဢၼ်ဢမ်ႇမီးတီႈၸိတီႈၼႄးလႄႈဢမ်ႇပႆႇၶွပ်ႈၶူပ်ႇဢၼ်ပဵၼ်ပုၼ်ႈၶိူင်ႈတၢင်းလူႇဢၼ်တုတ်ႇၽႆး၊-
ဢိၵ်ႇတင်းဝူဝ်းပေႃႈတူဝ်ၼိုင်ႈတင်းသူဝ်းပေႃႈတူဝ်ၼိုင်ႈပုၼ်ႈတၢင်းလူႇမိၵ်ႈသႁႃႇယႃႉမႃးသၢၵ်ႈလူႇတီႈ ထႃႇဝရႃႉၽြႃး၊ ႁူမ်ႈလူၺ်ႈၵၼ်တင်းတၢင်းလူႇမၢၵ်ႇၶဝ်ႈႁူင်းၶဝ်ႈဢၼ်သႂ်ႇလေႃးၼမ်ႉမၼ်းၼၼ်ႉတႃႉ။ လွင်ႈမၼ်းၸမ်ႉ၊ ထႃႇဝရႃႉၽြႃး၊ တၵ်းပေႃႇမႃးထၢင်ႇသႃးတီႈသူဝၼ်းမိူဝ်ႈၼႆႉဢေႃႈ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ၶဝ်ဢွၼ်ၵၼ်ဢဝ်ၸိူဝ်းဢၼ် မူဝ်းသေႇ၊ သင်ႇလၢတ်ႈဝႆႉႁႂ်ႈဢဝ်မႃးၵႃႈတီႈၽၢႆႇၼႃႈသုမ်ႉထဵင်ၸဝ်ႈၼၼ်ႉလႄႈမူႇၵူၼ်းၸိူဝ်းၵူၼ်းတင်းလၢႆၵေႃႈၸုတုမ်ၵၼ်ဝႆႉႁႂ်ႈလႆႈဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ဢေႃႈ။-
မူဝ်းသေႇ၊ ၵေႃႈလၢတ်ႈလႄႈဝႃႈ၊ “ ထႃႇဝရႃႉၽြႃး၊ မီးဢမိင်ႉႁႂ်ႈသူႁဵတ်းၸိူဝ်ႉၼင်ႇၼႆယဝ်ႉလႄႈ၊မုၼ်ၽုင်းဢၼ်ႁိူဝ်ႈလႅင်းမၼ်းၸဝ်ႈတၵ်းပေႃႇမႃးထၢင်ႇသႃးၵႃႈတီႈသူဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ မူဝ်းသေႇ၊ လၢတ်ႈတီႈ ဢႃႇရုၼ်ႇ၊ လႄႈဝႃႈ၊ “မႂ်းၵႂႃႇၵႃႈတီႈၶဵင်ႇတၢင်းလူႇလႄႈသၢၵ်ႈလူႇတၢင်းလူႇဢၼ်ၽေႇဢပျတ်ႈ၊ဢဝ်ၶိူင်ႈတၢင်းလူႇဢၼ်တုတ်ႇၽႆးႁႂ်ႈလႆႈၽေႇဢပျတ်ႈမႂ်း ဢိၵ်ႇတင်းၵူၼ်းတင်းလၢႆတႃႉ။ ၶိူင်ႈတၢင်းလူႇဢၼ်ၵူၼ်းတင်းလၢႆပႃးမႃးၼၼ်ႉၵေႃႈ ဢဝ်သၢၵ်ႈလူႇပၼ်ႁႂ်ႈလႆႈၽေႇဢပျတ်ႈၶဝ်မႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉၼၼ်ႉတႃႉ၊” ဝႃႈၼင်ႇၼႆဢေႃႈ။
ဢႃႇရုၼ်ႇ၊ ၵေႃႈၵႂႃႇတီႈၶဵင်ႇတၢင်းလူႇလႄႈႁႅမ်ဝူဝ်းပေႃႈဢွၼ်ႇဢၼ်ပဵၼ်ပုၼ်ႈတၢင်းလူႇဢၼ်ၽေႇဢပျတ်ႈမၼ်းၼၼ်ႉဢေႃႈ။-
လုၵ်ႈၸၢႆးမၼ်းၸိူဝ်းၼၼ်ႉဢဝ်လိူတ်ႈမႃးၵႃႈတီႈမၼ်းလႄႈမၼ်းဢဝ်ၼိဝ်ႉၸိၸုမ်ႇၵႃႈၼႂ်းလိူတ်ႈၼၼ်ႉသေယဝ်ႉ၊ဢဝ်တႃးတီႈၶဝ်လႅမ်ဢၼ်မီးၵႃႈတီႈသီႇၸဵင်ႇၶဵင်ႇတၢင်းလူႇၼၼ်ႉသေယဝ်ႉ၊ဢဝ်လိူတ်ႈဢၼ်ၵိုတ်းဢၼ်ၵျၢၼ်ႇၼၼ်ႉထွၵ်ႇသႂ်ႇတီႈတိၼ်ၶဵင်ႇတၢင်းလူႇၼၼ်ႉဢေႃႈ။-
မၼ်းသမ်ႉဢဝ်ၵွၼ်ႈၶႆၵွၼ်ႈမၼ်း၊မၢၵ်ႇလၼ်းမၼ်းတင်းတပ်းမၼ်းပွတ်းဢၼ်ၼုမ်ႇလီသေပိူၼ်ႈၸိူဝ်းၼၼ်ႉဢဝ်တုတ်ႇၽႆးၵႃႈၼိူဝ်ၶဵင်ႇတၢင်းလူႇမႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈ မူဝ်းသေႇ၊ ဝႆႉၼၼ်ႉဢေႃႈ။-
ၼိူဝ်ႉမၼ်းတင်းၼင်မၼ်းၸိုင်၊မၼ်းဢဝ်တုတ်ႇၽႆးပႅတ်ႈၵႃႈၼွၵ်ႈပၢင်တပ်ႉဢေႃႈ။
မၼ်းသမ်ႉႁႅမ်တူဝ်တၢင်းလူႇဢၼ်ပဵၼ်ပုၼ်ႈၶိူင်ႈတၢင်းလူႇဢၼ်တုတ်ႇၽႆးပုၼ်ႈမၼ်းၼၼ်ႉဢေႃႈ။ လုၵ်ႈၸၢႆးမၼ်းၸိူဝ်းၼၼ်ႉဢဝ်လိူတ်ႈမႃးၵႃႈတီႈမၼ်းလႄႈမၼ်းဢဝ်ထွၵ်ႇသႂ်ႇတီႈၽႃၶဵင်ႇတၢင်းလူႇတင်းသီႇၼႃႈဢေႃႈ။-
ၶဝ်ၼၼ်ႉဢဝ်ၵွၼ်ႈၼိူဝ်ႉတူဝ်တၢင်းလူႇၼၼ်ႉယိုၼ်ႈပၼ်မၼ်းၵွၼ်ႈၼိုင်ႈယဝ်ႉၵွၼ်ႈၼိုင်ႈဢိၵ်ႇတင်းၵွၵ်းႁူဝ်မၼ်းလႄႈမၼ်းၵေႃႈဢဝ်တုတ်ႇၽႆးၵႃႈၼိူဝ်ၶဵင်ႇတၢင်းလူႇဢေႃႈ။-
မၼ်းသမ်ႉသုၵ်ႈၶူင်းၼႂ်းမၼ်းတင်းၶႃလင်မၼ်းၸိူဝ်းၼၼ်ႉသေယဝ်ႉ၊ဢဝ်တုတ်ႇၽႆးၵႃႈၼိူဝ်တူဝ်တၢင်းလူႇဢၼ်ယင်းတိုၵ်ႉတုတ်ႇၽႆးယူႇၵႃႈၼိူဝ်ၶဵင်ႇတၢင်းလူႇၼၼ်ႉဢေႃႈ။
လိုၼ်းၼၼ်ႉမၼ်းသၢၵ်ႈလူႇတၢင်းလူႇပုၼ်ႈၵူၼ်းတင်းလၢႆဢေႃႈ။ မၼ်းဢဝ်ပႄႉတူဝ်ဢၼ်ပဵၼ်ပုၼ်ႈတၢင်းလူႇဢၼ်ၽေႇဢပျတ်ႈၵူၼ်းတင်းလၢႆၼၼ်ႉႁႅမ်လႄႈသၢၵ်ႈလူႇမိူၼ်ၸိူဝ်ႉၼင်ႇမၼ်းႁဵတ်းပုၼ်ႈတူဝ်ၸဝ်ႈၵဝ်ႇၼၼ်ႉဢေႃႈ။-
မၼ်းသမ်ႉဢဝ်တူဝ်တၢင်းလူႇပုၼ်ႈဢၼ်တုတ်ႇၽႆးၼၼ်ႉသၢၵ်ႈလူႇၸွမ်းၼင်ႇထုင်းတြႃးမီးၼၼ်ႉဢေႃႈ။-
မၼ်းႁဵတ်းတၢင်းလူႇမၢၵ်ႇၶဝ်ႈႁူင်းၶဝ်ႈလႄႈဢဝ်ၽွင်ၶဝ်ႈၵျုင်ႇဝၵ်ႉၼိုင်ႈသေယဝ်ႉ၊တုတ်ႇၽႆးၵႃႈၼိူဝ်ၶဵင်ႇတၢင်းလူႇဢေႃႈ။ မၢၵ်ႇၶဝ်ႈႁူင်းၶဝ်ႈၼႆႉၸိုင်၊ပဵၼ်တၢင်းလူႇဢၼ်ထႅင်ႈၼႂ်းတၢင်းလူႇဢၼ်တုတ်ႇၽႆးၵူႈဝၼ်းၼၼ်ႉဢေႃႈ။-
မၼ်းသမ်ႉႁႅမ်ဝူဝ်းပေႃႈတင်းသူဝ်းပေႃႈႁႂ်ႈပဵၼ်တၢင်းလူႇမိၵ်ႈသႁႃႇယႃႉ ပုၼ်ႈၵူၼ်းတင်းလၢႆဢေႃႈ။ လုၵ်ႈၸၢႆးမၼ်းၸိူဝ်းၼၼ်ႉဢဝ်လိူတ်ႈမႃးၵႃႈတီႈမၼ်းလႄႈမၼ်းဢဝ်ထွၵ်ႇသႂ်ႇတီႈၽႃၶဵင်ႇတၢင်းလူႇတင်းသီႇၼႃႈဢေႃႈ။-
ဢႃႇရုၼ်ႇ၊ ဢဝ်ၵွၼ်ႈၶႆၵွၼ်ႈမၼ်းဢၼ်လီၵႃႈၼႂ်းဝူဝ်းပေႃႈတင်းသူဝ်းပေႃႈၼၼ်ႉ၊-
ၵွင်သႂ်ႇၵႃႈၼိူဝ်ဢူၵ်းတူဝ်တၢင်းလူႇၸိူဝ်းၼၼ်ႉသေယဝ်ႉ၊ဢဝ်ၸိူဝ်းၼၼ်ႉတင်းမူတ်းတင်းသဵင်ႈမႃးၵႃႈတီႈၶဵင်ႇတၢင်းလူႇဢေႃႈ။ မၼ်းၵေႃႈဢဝ်ၵွၼ်ႈၶႆၵွၼ်ႈမၼ်းၸိူဝ်းၼၼ်ႉတုတ်ႇၽႆးၵႃႈၼိူဝ်ၶဵင်ႇတၢင်းလူႇသေယဝ်ႉ၊-
သမ်ႉဢဝ်ဢူၵ်းမၼ်းတင်းၶႃလင်ၶွၼ်ၶႂႃၸိူဝ်းၼၼ်ႉသၢၵ်ႈလူႇႁႂ်ႈပဵၼ်တၢင်းလူႇဢၼ်ၶိုၵ်ႉဢၼ်ၶမ်ႇ တီႈ ထႃႇဝရႃႉၽြႃး၊ ပုၼ်ႈယဵၸ်ႈပရေႃးႁဵၵ်ႈ တင်းလၢႆမႅၼ်ႈၸွမ်းၵႃႈၼင်ႇဢၼ် မူဝ်းသေႇ၊ သင်ႇလၢတ်ႈၼၼ်ႉဢေႃႈ။
လိုၼ်းၼၼ်ႉ၊ ဢႃႇရုၼ်ႇ၊ ယုၵ်ႉမိုဝ်းမၼ်းၵႃႈၼိူဝ်ၵူၼ်းတင်းလၢႆသေယဝ်ႉ၊ပၼ်တၢင်းလီတီႈၶဝ်လႄႈလူင်းသေၵႃႈတီႈတၢင်းဢၼ်သၢၵ်ႈလူႇၶိူင်ႈတၢင်းလူႇဢၼ်ၽေႇဢပျတ်ႈ၊ၶိူင်ႈတၢင်းလူႇဢၼ်ၽဝ်ၽႆး၊ဢိၵ်ႇတင်းၶိူင်ႈတၢင်းလူႇပုၼ်ႈမိၵ်ႈသႁႃႇယႃႉၸိူဝ်းၼၼ်ႉဢေႃႈ။-
မူဝ်းသေႇ၊ တင်း ဢႃႇရုၼ်ႇ၊ ၶဝ်ႈၵႂႃႇၵႃႈၼႂ်းသုမ်ႉထဵင်ၸဝ်ႈသေယဝ်ႉ၊မိူဝ်ႈဢၼ်ၶဝ်ဢွၵ်ႇမႃးၼၼ်ႉၸိုင်၊ၶဝ်ပၼ်တၢင်းလီတီႈၵူၼ်းတင်းလၢႆလႄႈမုၼ်ၽုင်း ထႃႇဝရႃႉၽြႃး၊ ထၢင်ႇသႃးမႃးၵႃႈတီႈၵူၼ်းတင်းလၢႆဢေႃႈ။-
ထႃႇဝရႃႉၽြႃး၊ ပွႆႇၽႆးမႃးမႆႈတူဝ်ဢၼ်ပဵၼ်ၶိူင်ႈတၢင်းလူႇဢၼ်တုတ်ႇၽႆးဢိၵ်ႇတင်းၵွၼ်ႈၶႆၵွၼ်ႈမၼ်းၵႃႈၼိူဝ်ၶဵင်ႇတၢင်းလူႇၼၼ်ႉဢေႃႈ။ မိူဝ်ႈဢၼ်ၵူၼ်းတင်းလၢႆႁၼ်လွင်ႈတၢင်းၼၼ်ႉၸိုင်၊ၶဝ်ႁွင်ႉသႅၼ်ႇလႄႈဢွၼ်ၵၼ်ၶုပ်ႉမူပ်ႇယူႇဢေႃႈ။
လုၵ်ႈၸၢႆး ဢႃႇရုၼ်ႇ၊ ဢၼ်လႆႈၸိုဝ်ႈဝႃႈ၊ ၼႃႇတပ်ႉ၊ ဢိၵ်ႇတင်း ဢၽိႁု၊ ၼၼ်ႉဢွၼ်ၵၼ်ဢဝ်ၽၢင်ၽႆးၶဝ်ႁင်းၽႂ်ႁင်းမၼ်းလႄႈဢဝ်ၽႆးသႂ်ႇသေယဝ်ႉ၊ဢဝ်ၼၢမ်ႇသႃႇတၢင်ႇၵႃႈၼိူဝ်ၽႆးႁႂ်ႈလႆႈသၢၵ်ႈလူႇတီႈ ထႃႇဝရႃႉၽြႃး၊ လူၺ်ႈၽႆးဢၼ်မၼ်းၸဝ်ႈဢမ်ႇလႆႈသင်ႇႁႂ်ႈသၢၵ်ႈလူႇၼၼ်ႉဢေႃႈ။-
ထႃႇဝရႃႉၽြႃး၊ ၵေႃႈပွႆႇၽႆးမႃးႁုပ်ႈမႆႈၶဝ်တၢႆၵႃႈတီႈၽၢႆႇၼႃႈ ထႃႇဝရႃႉၽြႃး၊ ၵမ်းလဵဝ်ဢေႃႈ။-
မိူဝ်ႈၼၼ်ႉ၊ မူဝ်းသေႇ၊ လၢတ်ႈတီႈ ဢႃႇရုၼ်ႇ၊ လႄႈဝႃႈ၊ “ဢၼ်ၼႆႉယဝ်ႉ၊တိုၼ်းပဵၼ်လွင်ႈတၢင်းဢၼ် ထႃႇဝရႃႉၽြႃး၊ မီးဢမိင်ႉလႄႈဝႃႈ၊ ‘ၶဝ်ၸိူဝ်းဢၼ်ပွင်ႁဵတ်းၼႃႈၵၢၼ်ၵဝ်တင်းမူတ်းတင်းသဵင်ႈၼၼ်ႉတၵ်းလႆႈရူဝ်ႇသေႇတၢင်းမူတ်းၸၢင်ႇၵဝ်ဢေႃႈ။ ၵဝ်တၵ်းႁႂ်ႈမုၼ်ၽုင်းၵဝ်ထၢင်ႇသႃးၵႃႈတီႈၽၢႆႇၼႃႈၵူၼ်းၵဝ်တင်းလၢႆဢေႃႈ၊’ ဝႃႈၼင်ႇၼႆၼၼ်ႉယဝ်ႉ၊” ဝႃႈၼင်ႇၼႆဢေႃႈ။ ဢႃႇရုၼ်ႇ၊ ၵေႃႈယူႇတဵတ်ႇတဵတ်ႇယူႇဢေႃႈ။
မူဝ်းသေႇ၊ ႁွင်ႉဢဝ် မိသေႇလႃႉ၊ တင်း ဢေႇလၸႃႇၽၢၼ်ႇ၊ ဢၼ်ပဵၼ်လုၵ်ႈၸၢႆး ဢေႃးၸေးလႃႉ၊ ပေႃႈလုင်း ဢႃႇရုၼ်ႇ၊ ၼၼ်ႉသေလႄႈလၢတ်ႈဝႃႈ၊ “မႃးတႃႉ။ ဢဝ်တူဝ်တၢႆပီႈၼွင်ႉၸိူဝ်ႉၶိူဝ်းသူၼႆႉဢွၵ်ႇသေၵႃႈတီႈၽၢႆႇၼႃႈထႃႇၼႃႉတီႈမူတ်းၸၢင်ႇၼႆႉၵႂႃႇၵႃႈၼွၵ်ႈပၢင်တပ်ႉပုၼ်ႉတႃႉ၊” ဝႃႈၼင်ႇၼႆဢေႃႈ။-
ၶဝ်ၼၼ်ႉမႃးလႄႈယိပ်းၵမ်တီႈသိူဝ်ႈပွတ်းၶဝ်သေယဝ်ႉ၊ႁၢမ်ဢဝ်တူဝ်တၢႆၶဝ်ဢွၵ်ႇၼွၵ်ႈပၢင်တပ်ႉၵႂႃႇမႅၼ်ႈၸွမ်းၵႃႈၼင်ႇဢၼ် မူဝ်းသေႇ၊ သင်ႇလၢတ်ႈၼၼ်ႉဢေႃႈ။
မိူဝ်ႈၼၼ်ႉ၊ မူဝ်းသေႇ၊ လၢတ်ႈတီႈ ဢႃႇရုၼ်ႇ၊ တင်းလုၵ်ႈၸၢႆးမၼ်း ဢေးလႃႇၸႃႇ၊ တင်း ဢိႀမႃႇ၊ ၸိူဝ်းၼၼ်ႉလႄႈဝႃႈ၊ “ယႃႇပေၼႄပျႃးတၢင်းဢၼ်သူမႆႈၸႂ်ၶီၸႂ်ၼၼ်ႉယင်းဢမ်ႇဝီႁူဝ်လႄႈယႃႇပေယူႇ။ ယႃႇပေသိၵ်ႇၶူဝ်းၼုင်ႈသူ။ ပေႃးႁဵတ်းၸိူဝ်ႉၼင်ႇၼၼ်ႉၸိုင်၊ၵူဝ်သူတၵ်းတၢႆလႄႈ၊ၵူဝ် ထႃႇဝရႃႉၽြႃး၊ တၵ်းၸႂ်မႆႈၶႂ်ႈၸႃႉမူႇၵူၼ်းၸိူဝ်းၵူၼ်းတင်းလၢႆဢေႃႈ။ ၵူၺ်းၵႃႈ၊ၵႃႈဢၼ်ပဵၼ်ပီႈပဵၼ်ၼွင်ႉၵူၼ်းမဵဝ်း ဢိသရေး၊ ၶဝ်တၵ်းမီးဢၶႂၢင်ႉဢၼ်မႆႈၸႂ်ၶီၸႂ်လူၺ်ႈတၢင်းတၢႆဢၼ် ထႃႇဝရႃႉၽြႃး၊ ပွႆႇၽႆးမႃးမႆႈသွင်ၵေႃႉၼၼ်ႉတၢႆၼၼ်ႉယူႇဢေႃႈ။-
သူယႃႇပေဢွၵ်ႇၽၵ်းတူသုမ်ႉထဵင်ၸဝ်ႈၵႂႃႇလႃးလႃး၊ၵူဝ်သူတၵ်းတၢႆဢေႃႈ။ လွင်ႈမၼ်းၸမ်ႉ၊သူလႆႈၶၢမ်ႇဢဝ်ၽိၵ်ႈသိၵ်ႈ ထႃႇဝရႃႉၽြႃး၊ တၢင်းဢၼ်ဢဝ်ၼမ်ႉမၼ်းသွၼ်းလေႃႇၼၼ်ႉဢေႃႈ၊” ဝႃႈၼင်ႇၼႆဢေႃႈ။ ၶဝ်ၵေႃႈႁဵတ်းၸွမ်းၵႃႈၼင်ႇဢၼ် မူဝ်းသေႇ၊ သင်ႇလၢတ်ႈၼၼ်ႉဢေႃႈ။
ၸဝ်ႈထႃႇဝရႃႉၽြႃး၊ သမ်ႉမီးဢမိင်ႉတီႈ ဢႃႇရုၼ်ႇ၊ လႄႈဝႃႈၸမ်ႉ၊-
“မႂ်းဢိၵ်ႇတင်းလုၵ်ႈၸၢႆးမႂ်းၸိူဝ်းၼၼ်ႉတၵ်းတေဢမ်ႇလႆႈၶဝ်ႈၵႃႈၼႂ်းသုမ်ႉထဵင်ၸဝ်ႈဝၢႆးသေၵိၼ်ၼမ်ႉလဝ်ႈမၢၵ်ႇၸပိတ်ႉ၊ဢမ်ႇၼၼ်ၼမ်ႉလဝ်ႈတၢင်ႇမဵဝ်းယဝ်ႉၼၼ်ႉ။ ပေႃးဢမ်ႇၼၼ်သူတၵ်းလႆႈတၢႆဢေႃႈ။ ဢၼ်ၼႆႉပဵၼ်ထုင်းတြႃးဢၼ်တၵ်းလႆႈပႂ်ႉၵမ်ပႂ်ႉၸွမ်းတႃႇသေႇၸူဝ်ႈလုၵ်ႈပၢၼ်လၢၼ်သိုပ်ႇသိုပ်ႇတၢမ်တၢမ်ဢေႃႈ။-
သူတၵ်းလႆႈမေႃၸၵ်းၽႄဢၼ်လႂ်ပဵၼ်ပုၼ်ႈၽြႃးပဵၼ်ၸဝ်ႈလႄႈဢၼ်လႂ်ပဵၼ်ပုၼ်ႈယူဝ်းယူဝ်းပၢၼ်ၵၢင်ဢိၵ်ႇတင်းဢၼ်လႂ်မီးမၢင်ႇၵလႃႇဢၼ်မူတ်းသႂ်လႄႈဢၼ်လႂ်ဢမ်ႇမူတ်းသႂ်ၼၼ်ႉဢေႃႈ။-
ထုင်းတြႃးၵႃႈဢၼ်ၵဝ်ပၼ်တီႈ မူဝ်းသေႇ၊ ႁႂ်ႈသင်ႇလၢတ်ႈတီႈသူၼႆႉတင်းသဵင်ႈတင်းလူင်သူတၵ်းလႆႈသင်ႇသွၼ်ပၼ်တီႈၵူၼ်းမဵဝ်း ဢိသရေး၊ တင်းလၢႆဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈလၢတ်ႈတီႈ ဢႃႇရုၼ်ႇ၊ တင်းလုၵ်ႈၸၢႆးမၼ်းဢၼ်ယင်းၵိုတ်းၵျၢၼ်ႇယူႇသွင်ၵေႃႉဢၼ်ပဵၼ် ဢေးလႃႇၸႃႇ၊ တင်း ဢိႀမႃႇ၊ လႄႈဝႃႈ၊ “ဢဝ်တၢင်းလူႇမၢၵ်ႇၶဝ်ႈႁူင်းၶဝ်ႈဢၼ်ၵိုတ်းဢၼ်ၵျၢၼ်ႇတီႈတၢင်းလူႇဢၼ်ၽဝ်ၽႆးသၢၵ်ႈလူႇတီႈ ထႃႇဝရႃႉၽြႃး၊ ၼၼ်ႉမႃးႁဵတ်းၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈသေလႄႈၵိၼ်ၵႃႈႁိမ်းၶဵင်ႇတၢင်းလူႇတႃႉ။ တၢင်းလူႇၼၼ်ႉပဵၼ်ဢၼ်မူတ်းၸၢင်ႇၼႃႇလူင်လၢင်ဢေႃႈ။-
ဢဝ်ၵိၼ်ၵႃႈၼႂ်းထႃႇၼႃႉတီႈမူတ်းၸၢင်ႇၵွပ်ႈပိူဝ်ႈဢၼ်ပဵၼ်ပုၼ်ႈမႂ်းတင်းလုၵ်ႈၸၢႆးမႂ်းတင်းလၢႆထိူၵ်ႈၶၢမ်ႇဢဝ်ၵႃႈၼႂ်းတၢင်းလူႇဢၼ်ၽဝ်ၽႆးသၢၵ်ႈလူႇတီႈ ထႃႇဝရႃႉၽြႃး၊ ၼၼ်ႉဢေႃႈ။ ဢၼ်ၼႆႉပဵၼ်လွင်ႈတၢင်းဢၼ် ထႃႇဝရႃႉၽြႃး၊ သင်ႇလၢတ်ႈၵဝ်ဝႆႉၼၼ်ႉဢေႃႈ။-
ဢူၵ်းဢိၵ်ႇတင်းၶႃလင်ဢၼ်ပဵၼ်တၢင်းလူႇဢၼ်ၶိုၵ်ႉဢၼ်ၶမ်ႇ တီႈ ထႃႇဝရႃႉၽြႃး၊ ပုၼ်ႈယဵၸ်ႈပရေႃးႁဵၵ်ႈ တင်းလၢႆၼၼ်ႉပဵၼ်ပုၼ်ႈမႂ်းဢိၵ်ႇတင်းပုၼ်ႈလုၵ်ႈၸၢႆးလုၵ်ႈယိင်းမႂ်းတင်းလၢႆဢေႃႈ။ သူတၵ်းလႆႈဢွၼ်ၵၼ်ၵိၼ်ၵႃႈတီႈဢၼ်မူတ်းၸၢင်ႇသေတီႈတီႈဢေႃႈ။ လွင်ႈမၼ်းၸမ်ႉ၊တၢင်းလူႇၼႆႉဢဝ်ဢွၵ်ႇသေၵႃႈၼႂ်းတၢင်းလူႇမိၵ်ႈသႁႃႇယႃႉဢၼ်ၵူၼ်းမဵဝ်း ဢိသရေး၊ တင်းလၢႆသၢၵ်ႈလူႇၼၼ်ႉမႃးပဵၼ်ပုၼ်ႈပဵၼ်တႃႇမႂ်းဢိၵ်ႇတင်းလုၵ်ႈလၢၼ်မႂ်းတင်းလၢႆဢေႃႈ။-
မိူဝ်ႈလႂ်သေဢမ်ႇဝႃႈ၊ၶႃလင်မၼ်း၊ဢူၵ်းမၼ်းတင်းၵွၼ်ႈၶႆၵွၼ်ႈမၼ်းၸိူဝ်းဢၼ်သၢၵ်ႈလူႇႁႂ်ႈပဵၼ်တၢင်းလူႇဢၼ်တုတ်ႇၽႆးတီႈ ထႃႇဝရႃႉၽြႃး၊ ၼၼ်ႉပဵၼ်တၢင်းလူႇဢၼ်မႂ်းဢိၵ်ႇတင်းလုၵ်ႈလၢၼ်မႂ်းထိူၵ်ႈပိူင်ႇဢဝ်တႃႇသေႇမႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵမ်းၼၼ်ႉ၊ မူဝ်းသေႇ၊ ထၢမ်ႁႃလွင်ႈပႄႉဢၼ်ပဵၼ်တၢင်းလူႇပုၼ်ႈဢၼ်ၽေႇဢပျတ်ႈၼၼ်ႉသေလႄႈလႆႈႁုလွင်ႈဢၼ်လႆႈၽဝ်ၽႆးပႅတ်ႈမူတ်းယဝ်ႉၼၼ်ႉဢေႃႈ။ လွင်ႈတၢင်းၼၼ်ႉႁဵတ်းႁႂ်ႈမၼ်းၸႂ်မႆႈၶႂ်ႈၸႃႉ ဢေးလႃႇၸႃႇ၊ တင်း ဢိႀမႃႇ၊ သေယဝ်ႉ၊မၼ်းလၢတ်ႈလႄႈဝႃႈ၊-
“ႁဵတ်းသင်လႄႈသူဢမ်ႇၵိၼ်တၢင်းလူႇဢၼ်ၽေႇဢပျတ်ႈၼၼ်ႉၵႃႈၼႂ်းထႃႇၼႃႉတီႈမူတ်းၸၢင်ႇၼၼ်ႉၼင်ႇႁိုဝ်။ ပဵၼ်ဢၼ်မူတ်းၸၢင်ႇၼႃႇလူင်လၢင်လႄႈ၊ ထႃႇဝရႃႉၽြႃး၊ ပၼ်ၶိူင်ႈတၢင်းလူႇၼၼ်ႉတီႈသူပုၼ်ႈလွင်ႈၼင်ႇႁိုဝ်တၵ်းပွႆႇလွတ်ႈဢပျတ်ႈမူႇၵူၼ်းၸိူဝ်းၵူၼ်းတင်းလၢႆယဝ်ႉဢေႃႈ။-
ပိူဝ်ႈဝႃႈလိူတ်ႈမၼ်းၵေႃႈဢမ်ႇလႆႈဢဝ်ၶဝ်ႈၵႂႃႇၵႃႈတီႈလုၵ်းတၢင်းၼႂ်းသုမ်ႉထဵင်ၸဝ်ႈတီႈမူတ်းၸၢင်ႇလႄႈ၊သူလီလႆႈၵိၼ်ၶိူင်ႈတၢင်းလူႇၼၼ်ႉၵႃႈတီႈၼၼ်ႈၸွမ်းၵႃႈၼင်ႇဢၼ်ၵဝ်သင်ႇလၢတ်ႈဝႆႉယဝ်ႉၼၼ်ႉဢေႃႈ၊” ဝႃႈၼင်ႇၼႆဢေႃႈ။
ဢႃႇရုၼ်ႇ၊ ၶိုၼ်းလၢတ်ႈတီႈ မူဝ်းသေႇ၊ လႄႈဝႃႈ၊ “ဝၼ်းမိူဝ်ႈၼႆႉၵူၼ်းတင်းလၢႆဢွၼ်ၵၼ်သၢၵ်ႈလူႇတၢင်းလူႇဢၼ်ၽေႇဢပျတ်ႈ ဢိၵ်ႇတင်းၶိူင်ႈတၢင်းလူႇဢၼ်တုတ်ႇၽႆးတီႈ ထႃႇဝရႃႉၽြႃး၊ ယဝ်ႉၶႃႈယဝ်ႉ။ ၼႂ်းဝႃႈၼၼ်သေၵေႃႈလွင်ႈတၢင်းဢၼ်ယၢပ်ႇၸိူဝ်ႉၼင်ႇၼႆၼၼ်ႉယင်းႁွတ်ႈထိုင်ၵႃႈတီႈၵဝ်ၶႃႈယဝ်ႉၶႃႈဢေႃႈ။ ပေႃးၵဝ်ၶႃႈၵိၼ်မႅၼ်ႈတၢင်းလူႇဢၼ်ၽေႇဢပျတ်ႈဝၼ်းမိူဝ်ႈၼႆႉၸိုင်၊ၸွင်ႇတၵ်းႁဵတ်းႁႂ်ႈ ထႃႇဝရႃႉၽြႃး၊ ထုၵ်ႇၸႂ်မႅၼ်ႈၸႂ်ယူႇၶႃႈႁိုဝ်း၊” ဝႃႈၼင်ႇၼႆဢေႃႈ။-
မူဝ်းသေႇ၊ ငိၼ်းၵႂၢမ်းၼၼ်ႉယဝ်ႉၸင်ႇပျေႇၸႂ်ၵႂႃႇဢေႃႈ။
ထႃႇဝရႃႉၽြႃး၊ သမ်ႉပၼ်ထုင်းတြႃးထႅင်ႈတီႈ မူဝ်းသေႇ၊ တင်း ဢႃႇရုၼ်ႇ၊-
ပုၼ်ႈၵူၼ်းမဵဝ်း ဢိသရေး၊ ၶဝ်တၵ်းပႂ်ႉၵမ်ပႂ်ႉၸွမ်းလႄႈဝႃႈၸမ်ႉ၊ “တူဝ်သတ်းဢၼ်သူၵိၼ်လႆႈၵႃႈၼႂ်းတူဝ်သီႇတိၼ်ဢၼ်မီးၵႃႈၼိူဝ်လိၼ်မိူင်းၼႆႉၸမ်ႉ၊-
ၼႂ်းတူဝ်သီႇတိၼ်တင်းလၢႆၼၼ်ႉတူဝ်ၵႃႈဢၼ်ၵိပ်ႈတႅၵ်ႇလႄႈတိၼ်ပဵၼ်ငၢမ်ႈဝႆႉ၊သမ်ႉၵဵဝ်ႉဢိူင်ႈယူႇတင်းသဵင်ႈတင်းလူင်ၼၼ်ႉသူၵိၼ်လႆႈဢေႃႈ။-
ၼႂ်းဝႃႈၼၼ်သေၵေႃႈတူဝ်ဢၼ်ၵဵဝ်ႉဢိူင်ႈလႄႈၵိပ်ႈဢမ်ႇတႅၵ်ႇၼၼ်ႉသူဢမ်ႇလီၵိၼ်။ ၵလႃႇဢုၵ်ႈၸိုင်၊ၵဵဝ်ႉဢိူင်ႈသေၵေႃႈၵိပ်ႈဢမ်ႇတႅၵ်ႇလႄႈဢမ်ႇမူတ်းသႂ်တီႈသူ။-
ပၢင်တၢႆးသၽၢၼ်ႇၵေႃႈၵဵဝ်ႉဢိူင်ႈသေၵေႃႈၵိပ်ႈဢမ်ႇတႅၵ်ႇလႄႈဢမ်ႇမူတ်းသႂ်တီႈသူဢေႃႈ။-
ပၢင်တၢႆးၵေႃႈပိူဝ်ႈဢၼ်ၵဵဝ်ႉဢိူင်ႈသေၵေႃႈၵိပ်ႈဢမ်ႇတႅၵ်ႇလႄႈဢမ်ႇမူတ်းသႂ်တီႈသူၼင်ႇၵဝ်ႇဢေႃႈ။-
မူၸိုင်၊ၵိပ်ႈတႅၵ်ႇသေၵေႃႈဢမ်ႇၵဵဝ်ႉဢိူင်ႈၼၼ်ႉပဵၼ်ဢၼ်ဢမ်ႇမူတ်းသႂ်လႄႈယႃႇပေၵိၼ်။-
ၼိူဝ်ႉတူဝ်သတ်းၸိူဝ်းၼႆႉၸိုင်၊သူဢမ်ႇလႆႈၵိၼ်။ တူဝ်တၢႆၶဝ်ၵေႃႈယႃႇပေတိူဝ်ႉပေထုၵ်ႇ။ ပဵၼ်ဢၼ်ဢမ်ႇမူတ်းသႂ်ဢေႃႈ။
“ပႃမဵဝ်းလႂ်သေၵေႃႈမဵဝ်းဢၼ်မီးပိၵ်ႇဝီးတင်းၵဵတ်းၼၼ်ႉလီၵိၼ်ၵူႈမဵဝ်းဢေႃႈ။-
တူဝ်ၵႃႈဢၼ်ဢသၢၵ်ႈလိပ်းယူႇလႄႈတူင်ႉယူႇၼိုင်ယူႇၵႃႈၼႂ်းၼမ်ႉဢၼ်ဢမ်ႇမီးပိၵ်ႇဝီးတင်းၵဵတ်းၼၼ်ႉတၵ်းပဵၼ်တီႈဢၼ်လီႁင်ႈဢဵတ်ႇသဵတ်ႇတီႈသူ။-
သူတၵ်းလႆႈမၢတ်ႈပဵၼ်ဢၼ်ဢမ်ႇမူတ်းသႂ်ဢေႃႈ။ သူဢမ်ႇလီၵိၼ်ၼိူဝ်ႉၶဝ်။ တူဝ်တၢႆၶဝ်ၵေႃႈသူဢမ်ႇလီတိူဝ်ႉလီထုၵ်ႇလႃးလႃး။-
တူဝ်ဢၼ်ဢသၢၵ်ႈလိပ်းယူႇၵႃႈၼႂ်းၼမ်ႉလႄႈဢမ်ႇမီးပိၵ်ႇဝီးတင်းၵဵတ်းၼၼ်ႉသူဢမ်ႇလီၵိၼ်သေမဵဝ်း။
“တူဝ်ဢၼ်မီးပိၵ်ႇယူႇလႄႈၸၢင်ႈဢဝ်တိၼ်သီႇၶွၼ်ၵၢၼ်းၵႂႃႇတင်းသဵင်ႈတင်းလူင်ၼၼ်ႉပဵၼ်ဢၼ်လီႁင်ႈဢဵတ်ႇသဵတ်ႇတီႈသူဢေႃႈ။-
ၵူၺ်းၵႃႈ၊တူဝ်ဢၼ်မီးပိၵ်ႇလႄႈဢဝ်တိၼ်သီႇၶွၼ်ဢၼ်မီးမၢၵ်ႇၵၢဝ်ႈမၢၵ်ႇၶႃၵျွၵ်းဝႅၼ်လႆႈၸိူဝ်းၼၼ်ႉၵိၼ်လႆႈယူႇ၊-
ၸႃႉဢဝ်မႅင်းၸၵ်းတႅၼ်၊ယႆး၊ၸၵ်းၶႆႇၼႃး၊ၸၵ်းၸႃႈၸိူဝ်းၼၼ်ႉၵေႃႈၵိၼ်လႆႈဢေႃႈ။-
ၵူၺ်းၵႃႈ၊မႅင်းဢွၼ်ႇဢၼ်မီးပိၵ်ႇယူႇလႄႈဢဝ်တိၼ်သီႇၶွၼ်ၵၢၼ်းၵႂႃႇၵူႈမဵဝ်းၼၼ်ႉတၵ်းပဵၼ်ဢၼ်လီႁင်ႈဢဵတ်ႇသဵတ်ႇတီႈသူဢေႃႈ။
“ၵွပ်ႈပိူဝ်ႈတူဝ်သတ်းၸိူဝ်းဢၼ်ဝႃႈမႃးၼႆႉလႄႈသူၸၢင်ႈႁွတ်ႈထိုင်တၢင်းဢၼ်ဢမ်ႇမူတ်းသႂ်ၵႂႃႇဢေႃႈ။ ၵေႃႉဢၼ်တိူဝ်ႉထုၵ်ႇတူဝ်တၢႆသတ်းၸိူဝ်းၼႆႉၵေႃႈဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။-
ၵေႃႉဢၼ်ႁွပ်ႇဢဝ်တူဝ်တၢႆသတ်းၸိူဝ်းၼႆႉၵေႃႈတၵ်းလႆႈသၵ်ႉၶူဝ်းၼုင်ႈမၼ်းပႅတ်ႈဢေႃႈ။ မၼ်းၵေႃႈဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။-
တူဝ်သတ်းဢၼ်ၵိပ်ႈတႅၵ်ႇယူႇလႄႈတိၼ်ဢမ်ႇပဵၼ်ငၢမ်ႈဝႆႉ၊ဢမ်ႇၵဵဝ်ႉဢိူင်ႈၸိုင်၊ဢမ်ႇမူတ်းသႂ်တီႈသူဢေႃႈ။ ၵေႃႉဢၼ်တိူဝ်ႉထုၵ်ႇတူဝ်တၢႆၶဝ်ၵေႃႈဢမ်ႇမူတ်းသႂ်။-
ၼႂ်းတူဝ်ဢၼ်မီးတိၼ်သီႇၶွၼ်လႄႈဢဝ်ၽႃႇတိၼ်ယဵပ်ႇၵႂႃႇၼၼ်ႉဢမ်ႇမူတ်းသႂ်။ ၵေႃႉဢၼ်တိူဝ်ႉထုၵ်ႇတူဝ်တၢႆသတ်းၸိူဝ်းၼၼ်ႉၵေႃႈဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။-
ၵေႃႉဢၼ်ႁွပ်ႇဢဝ်တူဝ်တၢႆသတ်းၸိူဝ်းၼၼ်ႉၵေႃႈတၵ်းလႆႈသၵ်ႉၶူဝ်းၼုင်ႈမၼ်းပႅတ်ႈဢေႃႈ။ မၼ်းၵေႃႈဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။ တူဝ်သတ်းၸိူဝ်းၼၼ်ႉဢမ်ႇမူတ်းသႂ်တီႈသူဢေႃႈ။
“တူဝ်ဢၼ်ၵၢၼ်းၵႃႈၼိူဝ်လိၼ်ဢၼ်ဢမ်ႇမူတ်းသႂ်တီႈသူၸမ်ႉ၊ဢၼ်ပဵၼ်တွၼ်ႇ၊ၼူ၊ၸိူင်ႉႁိူၼ်း၊ၸိူဝ်းၼၼ်ႉလႄႈသင်၊-
တွၵ်ႉၵႄႉ၊လႅၼ်းလဝ်း၊ဢၢၵ်ႇလိူၼ်း၊လႅၼ်း၊ဢၢၵ်ႇၶၢင်ၸိူဝ်းၼၼ်ႉဢေႃႈ။-
တူဝ်ဢၼ်ၵၢၼ်းတင်းသဵင်ႈတင်းလူင်ၼၼ်ႉဢမ်ႇမူတ်းသႂ်တီႈသူ၊ၵေႃႉဢၼ်တိူဝ်ႉထုၵ်ႇတူဝ်တၢႆသတ်းၸိူဝ်းၼၼ်ႉဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။-
ပေႃးတူဝ်တၢႆၸိူဝ်းၼၼ်ႉတူၵ်းသႂ်ႇၵႃႈၼိူဝ်သေၸိူဝ်ႉသေပိူင်ၸိုင်၊ၶိူင်ႈပိူင်ၼၼ်ႉဢမ်ႇမူတ်းသႂ်ယဝ်ႉဢေႃႈ။ ပဵၼ်ၵွၵ်းမႆႉသေဢမ်ႇဝႃႈ၊ၶူဝ်းၼုင်ႈသေဢမ်ႇဝႃႈ၊ၼင်သေဢမ်ႇဝႃႈ၊ထူင်သေဢမ်ႇဝႃႈ၊ၶိူင်ႈပိူင်ဢၼ်သုင်းပုၼ်ႈသေၸိူဝ်ႉသေပိူင်သေဢမ်ႇဝႃႈ၊ပဵၼ်ဢၼ်ဢမ်ႇမူတ်းသႂ်ယဝ်ႉလႄႈတၵ်းလႆႈဢဝ်ၸုမ်ႇၼမ်ႉဢေႃႈ။ ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။ လိုၼ်းၼၼ်ႉတၵ်းမူတ်းသႂ်ဢေႃႈ။-
ပေႃးတူဝ်တၢႆၸိူဝ်းၼၼ်ႉတူၵ်းသႂ်ႇၼႂ်းမေႃႈဝၢၼ်ႇလိၼ်ၸိုင်၊ၵႃႈဢၼ်မီးၵႃႈၼႂ်းမေႃႈၼၼ်ႉဢမ်ႇမူတ်းသႂ်လႄႈတၵ်းလႆႈပေႃႉလႅဝ်ပႅတ်ႈဢေႃႈ။-
တၢင်းၵိၼ်တၢင်းၶူပ်းဢၼ်လီၵိၼ်ၼၼ်ႉပေႃးဢဝ်ၼမ်ႉၼႂ်းမေႃႈဝၢၼ်ႇၼၼ်ႉထွၵ်ႇသႂ်ႇမႅၼ်ႈၸိုင်၊တၢင်းၵိၼ်တၢင်းၶူပ်းၼၼ်ႉဢမ်ႇမူတ်းသႂ်ဢေႃႈ။ ၼမ်ႉၵိၼ်ၵႃႈၼႂ်းမေႃႈဝၢၼ်ႇၼၼ်ႉၵေႃႈဢမ်ႇမူတ်းသႂ်ယဝ်ႉဢေႃႈ။-
ၶိူင်ႈပိူင်ဢၼ်တူဝ်တၢႆၼၼ်ႉတူၵ်းသႂ်ႇၼၼ်ႉၸိုင်၊ဢမ်ႇမူတ်းသႂ်ယဝ်ႉလႄႈ၊ပဵၼ်ၽီးၽႆးသေဢမ်ႇဝႃႈ၊ပဵၼ်တဝ်ႈၽႆးသေဢမ်ႇဝႃႈ၊ပဵၼ်ဢၼ်ဢမ်ႇမူတ်းသႂ်ယဝ်ႉ။ တၵ်းလႆႈယႃႉပႅတ်ႈသေဢေႃႈ။ မၼ်းဢမ်ႇမူတ်းသႂ်တီႈသူဢေႃႈ။-
ၼႂ်းဝႃႈၼၼ်သေၵေႃႈၼမ်ႉဢွၵ်ႇႁူး၊ဢမ်ႇၼၼ်ၼမ်ႉမေႃႇၼၼ်ႉမူတ်းသႂ်ယူႇဢေႃႈ။ ၵႃႈဢၼ်တိူဝ်ႉထုၵ်ႇတူဝ်တၢႆၼၼ်ႉၵူၺ်းဢမ်ႇမူတ်းသႂ်ဢေႃႈ။-
ပေႃးတူဝ်တၢႆလႂ်တူၵ်းသႂ်ႇၵႃႈၼိူဝ်ၸိူဝ်ႉၽၼ်းဢၼ်တၵ်းဝၢၼ်ႇတၵ်းပိုၼ်ၼၼ်ႉၸိုင်၊ၸိူဝ်ႉၽၼ်းၼၼ်ႉမူတ်းသႂ်ယူႇဢေႃႈ။-
ၵူၺ်းၵႃႈ၊ပေႃးတူဝ်တၢႆလႂ်တူၵ်းသႂ်ႇၵႃႈၼိူဝ်ၸိူဝ်ႉၽၼ်းဢၼ်ၸႄႈၼမ်ႉဝႆႉယဝ်ႉၼၼ်ႉၸိုင်၊ၸိူဝ်ႉၽၼ်းၼၼ်ႉဢမ်ႇမူတ်းသႂ်ယဝ်ႉ။
“ပေႃးတူဝ်သတ်းမဵဝ်းဢၼ်သူၵိၼ်လႆႈယူႇၼၼ်ႉတၢႆၸိုင်၊ၵေႃႉဢၼ်တိူဝ်ႉထုၵ်ႇတူဝ်တၢႆမၼ်းၼၼ်ႉဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။-
ၵေႃႉဢၼ်ၵိၼ်ၼိူဝ်ႉတူဝ်တၢႆၼၼ်ႉတၵ်းလႆႈသၵ်ႉၶူဝ်းၼုင်ႈမၼ်းပႅတ်ႈသေလႄႈ၊တူဝ်မၼ်းၸိုင်၊ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။ ၵေႃႉဢၼ်ဢဝ်တူဝ်တၢႆၼၼ်ႉၵႂႃႇၵေႃႈတၵ်းလႆႈသၵ်ႉၶူဝ်းၼုင်ႈမၼ်းပႅတ်ႈသေလႄႈတူဝ်မၼ်းၵေႃႈဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။
“တူဝ်မူင်ႈတူဝ်မႅင်းဢၼ်ၸၢင်ႈၵႂႃႇမႃးယူႇၵႃႈၼိူဝ်လိၼ်ၵႃႈမီးၼၼ်ႉပဵၼ်ဢၼ်လီႁင်ႈဢဵတ်ႇသဵတ်ႇလႄႈဢမ်ႇလီၵိၼ်၊-
တူဝ်ဢၼ်လိူၼ်ႈၵႂႃႇၵၢၼ်းၵႂႃႇသေဢမ်ႇဝႃႈ၊ဢၼ်ဢဝ်တိၼ်သီႇၶွၼ်ပႆသေဢမ်ႇဝႃႈ၊ဢၼ်ဢဝ်တိၼ်ၼမ်ၼႃႇပႆသေဢမ်ႇဝႃႈ၊သူဢမ်ႇလီၵိၼ်။ ပဵၼ်ဢၼ်လီႁင်ႈဢဵတ်ႇသဵတ်ႇဢေႃႈ။-
ယႃႇပေၵိၼ်ႁႂ်ႈတူဝ်ၸဝ်ႈၵဝ်ႇပဵၼ်ဢၼ်လီႁင်ႈဢဵတ်ႇသဵတ်ႇလူၺ်ႈတူဝ်မူင်ႈတူဝ်မႅင်းၸိူဝ်းၼၼ်ႉသေၸိူဝ်ႉသေမဵဝ်း။-
လွင်ႈမၼ်းၸမ်ႉ၊ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။ ပိူဝ်ႈၼႆလႄႈသၢၵ်ႈၵၢပ်ႈတူဝ်သူႁႂ်ႈမူတ်းၸၢင်ႇတႃႉ။ လွင်ႈမၼ်းၸမ်ႉ၊ၵဝ်မူတ်းၸၢင်ႇဢေႃႈ။-
ၵဝ်ပဵၼ် ထႃႇဝရႃႉၽြႃး၊ ဢၼ်ထုတ်ႇၼုၵ်ႈဢဝ်သူဢွၵ်ႇမိူင်း ဢေးၵျိပ်ႉ၊ မႃးပုၼ်ႈတၵ်းလႆႈပဵၼ်ၽြႃးပဵၼ်ၸဝ်ႈသူဢေႃႈ။ ၵွပ်ႈပိူဝ်ႈၵဝ်မူတ်းၸၢင်ႇလႄႈသူတၵ်းလႆႈမူတ်းၸၢင်ႇဢေႃႈ၊” ဝႃႈၼင်ႇၼႆဢေႃႈ။
ဢၼ်ၼႆႉၸမ်ႉ၊ပဵၼ်ထုင်းတြႃးဢၼ်ၵပ်းၵၢႆႇၵၼ်တင်းတူဝ်သတ်း၊ၼူၵ်ႉ၊တင်းတူဝ်ဢၼ်ဢသၢၵ်ႈလိပ်းယူႇဢၼ်မီးၼႂ်းၼမ်ႉလႄႈၼိူဝ်ၵွင်းၵႃႈမီးၸိူဝ်းၼၼ်ႉဢေႃႈ။-
သူတၵ်းလႆႈမေႃၸၵ်ႉၽႄႁုလွင်ႈဢၼ်တူဝ်မဵဝ်းလႂ်မူတ်းသႂ်၊မဵဝ်းလႂ်ဢမ်ႇမူတ်းသႂ်၊မဵဝ်းလႂ်လီၵိၼ်၊မဵဝ်းလႂ်ဢမ်ႇလီၵိၼ်ၸိူဝ်းၼၼ်ႉဢေႃႈ။
ၸဝ်ႈထႃႇဝရႃႉၽြႃး၊ သမ်ႉပၼ်ထုင်းတြႃးၵႃႈတီႈ မူဝ်းသေႇ၊ လႄႈ၊-
ႁႂ်ႈမၼ်းသင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈၸမ်ႉ၊ “ပေႃးမႄႈယိင်းပႃးပတိၵ်ႈသၼ်ႇထေႇလႄႈၵိူတ်ႇလဵင်ႉမႃးလုၵ်ႈၸၢႆးၸိုင်၊မၼ်းဢမ်ႇမူတ်းၸၢင်ႇၸဵတ်းဝၼ်း၊မိူၼ်ၸိူဝ်ႉၼင်ႇဢၼ်မၼ်းဢမ်ႇမူတ်းၸၢင်ႇၸူဝ်ႈၶၢဝ်းၼႃႈလိူၼ်မၼ်းႁွတ်ႈထိုင်ၼၼ်ႉဢေႃႈ။-
ၼႂ်းဝၼ်းဢၼ်ထူၼ်ႈထိုင်ပႅတ်ႇဝၼ်းၼၼ်ႉတၵ်းလႆႈႁဵတ်းမၢင်ႇၵလႃႇတၢင်းဢၼ်ပၢတ်ႇပၢႆၼင်တီႈလုၵ်ႈၸၢႆးၼၼ်ႉဢေႃႈ။-
မၼ်းတၵ်းလႆႈယူႇလိူၼ်သၢမ်သိပ်းပၢႆသၢမ်ဝၼ်းတဵမ်တဵမ်၊ၼႂ်းတၢင်းဢၼ်မၼ်းထွၵ်ႇၼိူဝ်ႉထွၵ်ႇလိူတ်ႈၼၼ်ႉတၵ်းၶိုၼ်းမူတ်းသႂ်ဢေႃႈ။ မၼ်းဢမ်ႇလႆႈယိပ်းလႆႈၵမ်ၶိူင်ႈပိူင်ဢၼ်မူတ်းသႂ်၊ဢမ်ႇလႆႈၵႂႃႇၵႃႈတီႈသုမ်ႉထဵင်ၸဝ်ႈတီႈမူတ်းၸၢင်ႇတေႃႇထိုင်ႁွတ်ႈၶိင်ႇဢၼ်မၼ်းၶိုၼ်းမူတ်းၸၢင်ႇၸေးဝၼ်းမၼ်းၼၼ်ႉဢေႃႈ။
“ပေႃးမၼ်းၵိူတ်ႇလဵင်ႉလုၵ်ႈယိင်းၸိုင်၊မၼ်းဢမ်ႇမူတ်းသႂ်သိပ်းသီႇဝၼ်း၊မိူၼ်ၸိူဝ်ႉၼင်ႇဢၼ်မၼ်းဢမ်ႇမူတ်းသႂ်ၸူဝ်ႈၶၢဝ်းၼႃႈလိူၼ်မၼ်းႁွတ်ႈထိုင်ၼၼ်ႉဢေႃႈ။ မၼ်းတၵ်းလႆႈယူႇလိူၼ်ႁူၵ်းသိပ်းပၢႆႁူၵ်းဝၼ်းတဵမ်တဵမ်ၼႂ်းတၢင်းဢၼ်မၼ်းထွၵ်ႇၼိူဝ်ႉထွၵ်ႇလိူတ်ႈၼၼ်ႉတၵ်းၶိုၼ်းမူတ်းသႂ်ဢေႃႈ။
“မိူဝ်ႈဝၼ်းဢၼ်ႁႂ်ႈတၢင်းဢၼ်မူတ်းသႂ်ပုၼ်ႈလုၵ်ႈၸၢႆး၊ဢမ်ႇၼၼ်ပုၼ်ႈလုၵ်ႈယိင်းၸေးဝၼ်းမၼ်းယဝ်ႉၸိုင်၊မၼ်းတၵ်းလႆႈဢဝ်သူဝ်းဢွၼ်ႇဢၼ်ဢမ်ႇပႆႇၶွပ်ႈၶူပ်ႇတူဝ်ၼိုင်ႈပုၼ်ႈၶိူင်ႈတၢင်းလူႇဢၼ်တုတ်ႇၽႆး၊ဢိၵ်ႇတင်းၵႃၵႄတူဝ်ၼိုင်ႈ၊ဢမ်ႇၼၼ်ၼူၵ်ႉတူႈတူဝ်ၼိုင်ႈ၊ပုၼ်ႈတၢင်းလူႇဢၼ်ၽေႇဢပျတ်ႈၼၼ်ႉမႃးၵႃႈတီႈယဵၸ်ႈပရေႃးႁဵၵ်ႈ ၸူးၵႃႈတီႈၽၵ်းတူသုမ်ႉထဵင်ၸဝ်ႈဢေႃႈ။-
ယဵၸ်ႈပရေႃးႁဵၵ်ႈၼၼ်ႉတၵ်းလႆႈဢဝ်တၢင်းလူႇမႄႈယိင်းၼၼ်ႉသၢၵ်ႈလူႇတီႈ ထႃႇဝရႃႉၽြႃး၊ လႄႈႁဵတ်းတၢင်းလူႇပုၼ်ႈဢၼ်သုၵ်ႈပွတ်ႈတၢင်းၵူဝ်ႈၵိူၵ်ႇမႄႈယိင်းၼၼ်ႉဢေႃႈ။ ၵမ်းၼၼ်ႉမၼ်းတၵ်းမူတ်းသႂ်ဢေႃႈ။ ဢၼ်ၼႆႉၸမ်ႉ၊ပဵၼ်ထုင်းတြႃးဢၼ်ၵပ်းၵၢႆႇလူၺ်ႈၵၼ်တင်းမႄႈယိင်းဢၼ်ၵိူတ်ႇလဵင်ႉလုၵ်ႈဢေႃႈ။
“ပေႃးမႄႈယိင်းၼၼ်ႉဢမ်ႇတၢတ်ႈၼိူင်ႇသူဝ်းဢွၼ်ႇလႆႈၸိုင်၊မၼ်းတၵ်းလႆႈဢဝ်ၼူၵ်ႉတူႈသွင်တူဝ်၊ဢမ်ႇၼၼ်ၵႃၵႄသွင်တူဝ်ပုၼ်ႈၶိူင်ႈတၢင်းလူႇဢၼ်တုတ်ႇၽႆးတူဝ်ၼိုင်ႈ၊ပုၼ်ႈတၢင်းလူႇဢၼ်ၽေႇဢပျတ်ႈတူဝ်ၼိုင်ႈမႃးသေလႄႈ၊ယဵၸ်ႈပရေႃးႁဵၵ်ႈ တၵ်းလႆႈႁဵတ်းတၢင်းလူႇဢၼ်သုၵ်ႈပွတ်ႈတၢင်းဢၼ်ၵူဝ်ႈၵိူၵ်ႇမႄႈယိင်းၼၼ်ႉဢေႃႈ။ ၵမ်းၼၼ်ႉမၼ်းတၵ်းမူတ်းသႂ်ဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ပၼ်ထုင်းတြႃးၸိူဝ်းၼႆႉတီႈ မူဝ်းသေႇ၊ တင်း ဢႃႇရုၼ်ႇ၊ လႄႈဝႃႈၸမ်ႉ၊-
“ပေႃးၵူၼ်းသေၵေႃႉၵေႃႉမီးတုမ်ႇၽီ၊ဢမ်ႇၼၼ်ႁဝ်ႈ၊ဢမ်ႇၼၼ်ၵႂၢၵ်ႈၵႃႈတီႈၽိဝ်ၼင်မၼ်းလႄႈၶႂ်ႈပဵၼ်ၼင်ႇႁၢင်ႈပဵၼ်ယေႃးၵႃႇဢၼ်ၸၢင်ႈၽႄႈၸၢင်ႈၸပ်းမႃးၸိုင်၊တၵ်းလႆႈႁွင်ႉဢဝ်ၵေႃႉၼၼ်ႉၵႂႃႇၸူးၵႃႈတီႈ ဢႃႇရုၼ်ႇ၊ ဢမ်ႇၼၼ်လုၵ်ႈၸၢႆးမၼ်းၵေႃႉဢၼ်ပဵၼ်ယဵၸ်ႈပရေႃးႁဵၵ်ႈ ၼၼ်ႉသေၵေႃႉၵေႃႉဢေႃႈ။-
ယဵၸ်ႈပရေႃးႁဵၵ်ႈၼၼ်ႉတၵ်းလႆႈၸႅတ်ႈသေးတူၺ်းတၢင်းပဵၼ်ဢၼ်ပေႃႇဢွၵ်ႇတီႈၽိဝ်ၼင်မၼ်းၼၼ်ႉလႄႈ၊ပေႃးၶူၼ်ဢၼ်မီးၵႃႈတီႈတၢင်းပဵၼ်ဢၼ်ပေႃႇဢွၵ်ႇၼၼ်ႉၽိူၵ်ႇဝႆႉလႄႈတူၺ်းမိူၼ်ဝႃႈပေႃႇဢွၵ်ႇယူႇတႂ်ႈၽိဝ်ၼင်ဝႆႉၸိုင်၊ဢၼ်ၼၼ်ႉပဵၼ်ယေႃးၵႃႇဢၼ်ၸၢင်ႈၽႄႈၸၢင်ႈၸပ်းဢေႃႈ။ ယဵၸ်ႈပရေႃးႁဵၵ်ႈၼၼ်ႉတၵ်းလႆႈၸီႇယၢင်ႇဝႃႈ၊မၼ်းဢမ်ႇမူတ်းသႂ်ဢေႃႈ။-
ပေႃးၵႂၢၵ်ႈၼၼ်ႉၽိူၵ်ႇဝႆႉၵႃႈတီႈၽိဝ်ၼင်မၼ်းလႄႈ၊ဢမ်ႇမိူၼ်ၼင်ႇႁၢင်ႈပဵၼ်ၵႃႈတႂ်ႈၽိဝ်ၼင်ဢမ်ႇၵႃး၊ၶူၼ်ၵေႃႈဢမ်ႇၽိူၵ်ႇၵႂႃႇၸိုင်၊ယဵၸ်ႈပရေႃးႁဵၵ်ႈတၵ်းလႆႈဢဝ်ၵေႃႉၼၼ်ႉၶင်ဝႆႉယူႇၵူၺ်းမၼ်းၸဵတ်းဝၼ်းတဵမ်တဵမ်ဢေႃႈ။-
မိူဝ်ႈဢၼ်ထူၼ်ႈၸဵတ်းဝၼ်းၸိုင်၊ယဵၸ်ႈပရေႃးႁဵၵ်ႈၼၼ်ႉတၵ်းလႆႈၶိုၼ်းၸႅတ်ႈသေးတူၺ်းလႄႈပေႃးတၢင်းပဵၼ်ဢၼ်ပေႃႇဢွၵ်ႇၼၼ်ႉဢမ်ႇယႂ်ႇၽႄႈၼမ်မႃး၊ဢမ်ႇယွမ်းၵႂႃႇလႄႈယူႇၸိုင်၊တၵ်းလႆႈဢဝ်မၼ်းၶင်ဝႆႉထႅင်ႈၸဵတ်းဝၼ်းတဵမ်တဵမ်ဢေႃႈ။-
မိူဝ်ႈဢၼ်ထူၼ်ႈၸဵတ်းဝၼ်းၸိုင်၊ယဵၸ်ႈပရေႃးႁဵၵ်ႈၼၼ်ႉတၵ်းလႆႈၶိုၼ်းၸႅတ်ႈသေးတူၺ်းထႅင်ႈလႄႈပေႃးတၢင်းပဵၼ်ဢၼ်ပေႃႇဢွၵ်ႇၼၼ်ႉႁူမ်ႇၶၢပ်ႈမႃး၊ဢမ်ႇၼၼ်ဢမ်ႇယႂ်ႇၽႄႈမႃးလႄႈယူႇၸိုင်၊ယဵၸ်ႈပရေႃးႁဵၵ်ႈၼၼ်ႉတၵ်းလႆႈၸီႇယၢင်ႇဝႃႈ၊မၼ်းမူတ်းသႂ်ယူႇ၊ပဵၼ်ႁဝ်ႈၵူၺ်းဢေႃႈ။ ၵေႃႉၼၼ်ႉတၵ်းလႆႈသၵ်ႉၶူဝ်းၼုင်ႈမၼ်းႁႂ်ႈလႆႈမူတ်းသႂ်ဢေႃႈ။-
ၵူၺ်းၵႃႈ၊ဝၢႆးသေဢၼ်ယဵၸ်ႈပရေႃးႁဵၵ်ႈၸီႇယၢင်ႇဝႃႈ၊ၵေႃႉၼၼ်ႉမူတ်းသႂ်ယဝ်ႉ၊ပေႃးႁဝ်ႈမၼ်းၶိုၼ်းယႂ်ႇၽႄႈမႃးၸိုင်၊တၵ်းလႆႈၵႂႃႇၼႄတူဝ်မၼ်းတီႈယဵၸ်ႈပရေႃးႁဵၵ်ႈထႅင်ႈဢေႃႈ။-
ယဵၸ်ႈပရေႃးႁဵၵ်ႈၼၼ်ႉၵေႃႈၶိုၼ်းၸႅတ်ႈသေးတူၺ်းသေယဝ်ႉ၊ပေႃးႁဝ်ႈၼၼ်ႉယႂ်ႇၽႄႈၼမ်မႃးၸိုင်၊မၼ်းတၵ်းလႆႈၸီႇယၢင်ႇဝႃႈၵေႃႉၼၼ်ႉဢမ်ႇမူတ်းသႂ်၊ပဵၼ်ယေႃးၵႃႇဢၼ်ၸၢင်ႈၽႄႈၸၢင်ႈၸပ်းဢေႃႈ။
“ပေႃးသေၵေႃႉၵေႃႉပေႃႇပဵၼ်မႃးယေႃးၵႃႇၽိဝ်ၼင်ၸိုင်၊တၵ်းလႆႈႁွင်ႉဢဝ်မၼ်းၵႂႃႇၸူးတီႈယဵၸ်ႈပရေႃးႁဵၵ်ႈဢေႃႈ။-
ယဵၸ်ႈပရေႃးႁဵၵ်ႈၼၼ်ႉတၵ်းလႆႈၸႅတ်ႈသေးတူၺ်းလႄႈ၊ပေႃးတုမ်ႇၽိူၵ်ႇၼၼ်ႉႁႂ်ႈၶူၼ်မၼ်းၽိူၵ်ႇၵႂႃႇလႄႈပေႃႇၼိူဝ်ႉလႅင်ၶၼ်ၽႂ်းၼႃႇၸိုင်၊-
ဢၼ်ၼၼ်ႉပဵၼ်ယေႃးၵႃႇဢၼ်ၸၢင်ႈၽႄႈၸၢင်ႈၸပ်းၼၼ်ႉယဝ်ႉ၊ယဵၸ်ႈပရေႃးႁဵၵ်ႈၼၼ်ႉ တၵ်းလႆႈၸီႇယၢင်ႇဝႃႈ၊မၼ်းဢမ်ႇမူတ်းသႂ်ဢေႃႈ။ ဢမ်ႇလူဝ်ႇဢဝ်မၼ်းၶင်ဝႆႉ၊ၵွပ်ႈပိူဝ်ႈမၼ်းပဵၼ်ဢၼ်ဢမ်ႇမူတ်းသႂ်ၼၼ်ႉဢေႃႈ။-
ပေႃးယေႃးၵႃႇၼၼ်ႉယႂ်ႇၽႄႈၼမ်မႃးၸွတ်ႇၵႂႃႇၵႃႈၼိူဝ်တူဝ်မၼ်းၸႃႉၸဵမ်ၸိၵ်းႁူဝ်တေႃႇၽႃႇတိၼ်ၸိုင်၊-
ယဵၸ်ႈပရေႃးႁဵၵ်ႈတၵ်းလႆႈၶိုၼ်းၸႅတ်ႈသေးတူၺ်းထႅင်ႈဢေႃႈ။ ပေႃးႁၼ်လွင်ႈဢၼ်ယေႃးၵႃႇၼၼ်ႉၸွတ်ႇၵႂႃႇတင်းတူဝ်တင်းၶိင်းယဝ်ႉ၊တၵ်းလႆႈၸီႇယၢင်ႇၵေႃႉၼၼ်ႉဝႃႈမၼ်းမူတ်းသႂ်ဢေႃႈ။ ၵွပ်ႈပိူဝ်ႈၼင်မၼ်းၽိူၵ်ႇၵႂႃႇတင်းတူဝ်တင်းၶိင်းလႄႈမၼ်းမူတ်းသႂ်ယူႇဢေႃႈ။-
ၵူၺ်းၵႃႈ၊ပေႃးတုမ်ႇမၼ်းၵီႈလႄႈပေႃႇၼိူဝ်ႉလႅင်မႃးၸိုင်၊မၼ်းဢမ်ႇမူတ်းသႂ်။-
ယဵၸ်ႈပရေႃးႁဵၵ်ႈတၵ်းလႆႈၶိုၼ်းၸႅတ်ႈသေးတူၺ်းထႅင်ႈလႄႈ၊ပေႃးႁုဝႃႈတုမ်ႇမၼ်းၵီႈလႄႈပေႃႇၼိူဝ်ႉလႅင်ၸိုင်၊ယဵၸ်ႈပရေႃးႁဵၵ်ႈတၵ်းလႆႈၸီႇယၢင်ႇဝႃႈမၼ်းဢမ်ႇမူတ်းသႂ်ဢေႃႈ။ တၢင်းဢၼ်တုမ်ႇၸဵပ်းၵီႈလႄႈပေႃႇၼိူဝ်ႉလႅင်ၼၼ်ႉပဵၼ်ယေႃးၵႃႇဢၼ်ၸၢင်ႈၽႄႈၸၢင်ႈၸပ်းလႄႈဢမ်ႇမူတ်းသႂ်။-
ၵူၺ်းၵႃႈ၊ပေႃးၼိူဝ်ႉလႅင်ႁၢႆလႄႈသမ်ႉၶိုၼ်းၽိူၵ်ႇၵႂႃႇၸိုင်၊မၼ်းတၵ်းလႆႈၵႂႃႇၸူးတီႈယဵၸ်ႈပရေႃးႁဵၵ်ႈဢေႃႈ။-
ယဵၸ်ႈပရေႃးႁဵၵ်ႈၼၼ်ႉတၵ်းလႆႈၸႅတ်ႈသေးတူၺ်းထႅင်ႈလႄႈ၊ပေႃးတုမ်ႇၸဵပ်းမၼ်းၶိုၼ်းၽိူၵ်ႇၵႂႃႇယဝ်ႉၸိုင်၊မၼ်းမူတ်းသႂ်ယဝ်ႉလႄႈ၊ယဵၸ်ႈပရေႃးႁဵၵ်ႈတၵ်းလႆႈၸီႇယၢင်ႇဝႃႈ၊ၵေႃႉၼၼ်ႉမူတ်းသႂ်ဢေႃႈ။
“ပေႃးသေၵေႃႉသေၵူၼ်းပဵၼ်တုမ်ႇၽီလႄႈႁၢႆသေယဝ်ႉ၊-
ဝၢႆးလိုၼ်းႁွႆးၸဵပ်းၼၼ်ႉယဵၼ်းပဵၼ်တုမ်ႇၽိူၵ်ႇမႃး၊ဢမ်ႇၼၼ်ပဵၼ်ၵႂၢၵ်ႈဢၼ်ၽိူၵ်ႇလႅင်ဝႆႉၸိုင်၊မၼ်းတၵ်းလႆႈၵႂႃႇၸူးတီႈယဵၸ်ႈပရေႃးႁဵၵ်ႈ ဢေႃႈ။-
ယဵၸ်ႈပရေႃးႁဵၵ်ႈၼၼ်ႉတၵ်းလႆႈၸႅတ်ႈသေးတူၺ်းဝႃႈ၊ပေႃးၵႂၢၵ်ႈၼၼ်ႉမိူၼ်ၼင်ႇႁၢင်ႈပဵၼ်ယူႇတႂ်ႈၽိဝ်ၼင်လႄႈၶူၼ်မၼ်းၽိူၵ်ႇယူႇၸိုင်၊မၼ်းတၵ်းလႆႈၸီႇယၢင်ႇဝႃႈ၊ဢမ်ႇမူတ်းသႂ်ဢေႃႈ။ ပဵၼ်ယေႃးၵႃႇဢၼ်ၸၢင်ႈၽႄႈၸၢင်ႈၸပ်းဢၼ်ဢွၵ်ႇၵႃႈၼႂ်းတုမ်ႇၽီဢေႃႈ။-
ၵူၺ်းၵႃႈ၊ပေႃးယဵၸ်ႈပရေႃးႁဵၵ်ႈၼၼ်ႉၸႅတ်ႈသေးတူၺ်းလႄႈႁုလွင်ႈဢၼ်ၶူၼ်မၼ်းဢမ်ႇၽိူၵ်ႇၵႂႃႇ၊သမ်ႉဢမ်ႇပဵၼ်တႂ်ႈၽိဝ်ၼင်လႄႈႁမ်ႉလမ်လမ်ဝႆႉၸိုင်၊မၼ်းတၵ်းလႆႈဢဝ်ၵေႃႉၼၼ်ႉၶင်ဝႆႉယူႇၸဵတ်းဝၼ်းတဵမ်တဵမ်ဢေႃႈ။-
ပေႃးၵႂၢၵ်ႈၼၼ်ႉယႂ်ႇၽႄႈၼမ်မႃးၸိုင်၊ယဵၸ်ႈပရေႃးႁဵၵ်ႈတၵ်းလႆႈၸီႇယၢင်ႇဝႃႈ၊ၵေႃႉၼၼ်ႉဢမ်ႇမူတ်းသႂ်လႄႈပဵၼ်ယေႃးၵႃႇဢၼ်ၸၢင်ႈၽႄႈၸၢင်ႈၸပ်းဢေႃႈ။-
ၵူၺ်းၵႃႈ၊ပေႃးၵႂၢၵ်ႈၼၼ်ႉဢမ်ႇမီးတၢင်းဢၼ်ပႅၵ်ႇဢၼ်ပိူင်ႈ၊ဢမ်ႇယႂ်ႇၽႄႈၼမ်မႃးၸိုင်၊ပဵၼ်ႁွႆးၸဵပ်းၵူၺ်းဢေႃႈ။ ယဵၸ်ႈပရေႃးႁဵၵ်ႈၼၼ်ႉတၵ်းလႆႈၸီႇယၢင်ႇဝႃႈၵေႃႉၼၼ်ႉမူတ်းသႂ်ဢေႃႈ။
“ဢမ်ႇၼၼ်ၵေႃႈ၊ပေႃးသေၵေႃႉၵေႃႉမီးႁွႆးၸဵပ်းၽႆးမႆႈၵႃႈတီႈၽိဝ်ၼင်လႄႈၼိူဝ်ႉလႅင်မၼ်းၼၼ်ႉပဵၼ်ၵႂၢၵ်ႈဢၼ်ၽိူၵ်ႇ၊ဢမ်ႇၼၼ်ပဵၼ်ၵႂၢၵ်ႈဢၼ်ၽိူၵ်ႇလႅင်မႃးၸိုင်၊-
ယဵၸ်ႈပရေႃးႁဵၵ်ႈတၵ်းလႆႈၸႅတ်ႈသေးတူၺ်းဢေႃႈ။ ပေႃးၶူၼ်ၵႂၢၵ်ႈၼၼ်ႉၽိူၵ်ႇၵႂႃႇလႄႈမိူၼ်ၼင်ႇႁၢင်ႈပဵၼ်ယူႇတႂ်ႈၽိဝ်ၼင်ၼၼ်ႉၸိုင်၊ပဵၼ်ယေႃးၵႃႇဢၼ်ၸၢင်ႈၽႄႈၸၢင်ႈၸပ်းဢၼ်ဢွၵ်ႇၵႃႈၼႂ်းႁွႆးၸဵပ်းၽႆးမႆႈဢေႃႈ။ ယဵၸ်ႈပရေႃးႁဵၵ်ႈတၵ်းလႆႈၸီႇယၢင်ႇဝႃႈ၊ၵေႃႉၼၼ်ႉဢမ်ႇမူတ်းသႂ်ဢေႃႈ။-
ၵူၺ်းၵႃႈ၊ပေႃးၶူၼ်ၵႂၢၵ်ႈၼၼ်ႉဢမ်ႇၽိူၵ်ႇၵႂႃႇသမ်ႉဢမ်ႇယူႇတႂ်ႈၽိဝ်ၼင်လႄႈပဵၼ်ႁမ်ႉလမ်လမ်ဝႆႉၸိုင်၊ယဵၸ်ႈပရေႃးႁဵၵ်ႈတၵ်းလႆႈဢဝ်မၼ်းၶင်ဝႆႉၸဵတ်းဝၼ်းတဵမ်တဵမ်ဢေႃႈ။-
မိူဝ်ႈဢၼ်ထူၼ်ႈၸဵတ်းဝၼ်းၼၼ်ႉၸိုင်၊ယဵၸ်ႈပရေႃးႁဵၵ်ႈၼၼ်ႉတၵ်းလႆႈၶိုၼ်းၸႅတ်ႈသေးတူၺ်းထႅင်ႈလႄႈပေႃးႁုဝႃႈၵႂၢၵ်ႈၼၼ်ႉယႂ်ႇမႃးၸိုင်၊မၼ်းတၵ်းလႆႈၸီႇယၢင်ႇဝႃႈ၊ၵေႃႉၼၼ်ႉဢမ်ႇမူတ်းသႂ်ဢေႃႈ။-
ၵူၺ်းၵႃႈ၊ပေႃးၵႂၢၵ်ႈၼၼ်ႉဢမ်ႇမီးတၢင်းဢၼ်ပႅၵ်ႇဢၼ်ပိူင်ႈ၊ဢမ်ႇယႂ်ႇၽႄႈမႃး၊ယင်းပဵၼ်လမ်လမ်ဝႆႉၸိုင်၊မၼ်းဢမ်ႇၸႂ်ႈယေႃးၵႃႇဢၼ်ၸၢင်ႈၽႄႈၸၢင်ႈၸပ်း၊ယဵၸ်ႈပရေႃးႁဵၵ်ႈၼၼ်ႉတၵ်းလႆႈၸီႇယၢင်ႇဝႃႈ၊မၼ်းမူတ်းသႂ်ၵွပ်ႈပိူဝ်ႈမၼ်းပဵၼ်ႁွႆးၸဵပ်းၽႆးမႆႈၵူၺ်းဢေႃႈ။
“ပေႃးၵူၼ်းၸၢႆးဢမ်ႇၼၼ်ၽူႈယိင်းသေၵေႃႉၵေႃႉပဵၼ်ၸဵပ်းၵႃႈတီႈႁူဝ်မၼ်း၊ဢမ်ႇၼၼ်ၵႃႈတီႈၵၢင်းမၼ်းၸိုင်၊-
ယဵၸ်ႈပရေႃးႁဵၵ်ႈတၵ်းလႆႈၸႅတ်ႈသေးတူၺ်းဢေႃႈ။ ပေႃးမိူၼ်ၼင်ႇႁၢင်ႈပဵၼ်ယူႇတႂ်ႈၽိဝ်ၼင်သေယဝ်ႉ၊ၶူၼ်ၵႂၢၵ်ႈၼၼ်ႉပဵၼ်လိူင်လိူင်လႄႈႁၢင်ႇႁၢင်ႇဝႆႉၸိုင်၊ပဵၼ်ယေႃးၵႃႇဢၼ်ၸၢင်ႈၽႄႈၸၢင်ႈၸပ်းဢေႃႈ။ မၼ်းတၵ်းလႆႈၸီႇယၢင်ႇဝႃႈ၊ၵေႃႉၼၼ်ႉဢမ်ႇမူတ်းသႂ်ဢေႃႈ။-
ပေႃးဝႃႈမိူဝ်ႈဢၼ်ယဵၸ်ႈပရေႃးႁဵၵ်ႈၸႅတ်ႈသေးတူၺ်းၵႂၢၵ်ႈၼၼ်ႉလႄႈႁုဝႃႈ၊မၼ်းဢမ်ႇယူႇတႂ်ႈၽိဝ်ၼင်လႄႈဢမ်ႇမီးၶူၼ်လမ်ၸိုင်၊မၼ်းတၵ်းလႆႈဢဝ်ၵေႃႉၼၼ်ႉၶင်ဝႆႉၸဵတ်းဝၼ်းတဵမ်တဵမ်ဢေႃႈ။-
မိူဝ်ႈဢၼ်ထူၼ်ႈၸဵတ်းဝၼ်းၸိုင်၊ယဵၸ်ႈပရေႃးႁဵၵ်ႈၼၼ်ႉတၵ်းလႆႈၶိုၼ်းၸႅတ်ႈသေးတူၺ်းလႄႈ၊ပေႃးၵႂၢၵ်ႈၼၼ်ႉဢမ်ႇယႂ်ႇၽႄႈမႃး၊ဢမ်ႇမီးၶူၼ်လိူင်ဝႆႉ၊သမ်ႉမိူၼ်ၼင်ႇႁၢင်ႈဢမ်ႇပဵၼ်တႂ်ႈၽိဝ်ၼင်လႄႈယူႇၸိုင်၊-
တၵ်းလႆႈထႃၶူၼ်ဢၼ်ႁွပ်ႈႁွပ်ႈၵႂၢၵ်ႈၼၼ်ႉပႅတ်ႈသေယဝ်ႉ၊ယဵၸ်ႈပရေႃးႁဵၵ်ႈၼၼ်ႉတၵ်းလႆႈဢဝ်မၼ်းၶင်ဝႆႉယူႇထႅင်ႈၸဵတ်းဝၼ်းတဵမ်တဵမ်ဢေႃႈ။-
မိူဝ်ႈဢၼ်ထူၼ်ႈၸဵတ်းဝၼ်းၸိုင်၊ယဵၸ်ႈပရေႃးႁဵၵ်ႈတၵ်းလႆႈၶိုၼ်းၸႅတ်ႈသေးတူၺ်းတၢင်းၸဵပ်းဢၼ်ပဵၼ်ၵႂၢၵ်ႈမၼ်းထႅင်ႈလႄႈပေႃးဢမ်ႇယႂ်ႇၽႄႈမႃး၊ယင်းဢမ်ႇမိူၼ်ၼင်ႇႁၢင်ႈပဵၼ်တႂ်ႈၽိဝ်ၼင်ၸိုင်၊မၼ်းတၵ်းလႆႈၸီႇယၢင်ႇဝႃႈ၊ၵေႃႉၼၼ်ႉမူတ်းသႂ်ဢေႃႈ။-
ၵူၺ်းၵႃႈ၊ဝၢႆးသေဢၼ်ယဵၸ်ႈပရေႃးႁဵၵ်ႈၸီႇယၢင်ႇဝႃႈ၊ၵေႃႉၼၼ်ႉမူတ်းသႂ်ယဝ်ႉ၊ပေႃးတၢင်းၸဵပ်းမၼ်းၼၼ်ႉသမ်ႉၶိုၼ်းယႂ်ႇၽႄႈၼမ်မႃးၸိုင်၊-
ယဵၸ်ႈပရေႃးႁဵၵ်ႈတၵ်းလႆႈၶိုၼ်းၸႅတ်ႈသေးတူၺ်းထႅင်ႈဢေႃႈ။ ပေႃးႁုဝႃႈတၢင်းၸဵပ်းမၼ်းၼၼ်ႉယႂ်ႇၽႄႈမႃးၸိုင်၊ယင်းဢမ်ႇလူဝ်ႇႁႃတူၺ်းၶူၼ်လိူင်မၼ်းလႄႈၸီႇယၢင်ႇဝႃႈ၊ၵေႃႉၼၼ်ႉဢမ်ႇမူတ်းသႂ်လုမ်းလုမ်းယဝ်ႉဢေႃႈ။-
ၵူၺ်းၵႃႈ၊ပေႃးယဵၸ်ႈပရေႃးႁဵၵ်ႈၼၼ်ႉထၢင်ႇဝႃႈ၊တၢင်းၸဵပ်းမၼ်းဢမ်ႇယႂ်ႇၽႄႈမႃး၊ၶူၼ်လမ်မၼ်းယင်းဢွၵ်ႇမႃးယူႇၸိုင်၊တၢင်းၸဵပ်းၼၼ်ႉႁၢႆယဝ်ႉလႄႈ၊ယဵၸ်ႈပရေႃးႁဵၵ်ႈတၵ်းလႆႈၸီႇယၢင်ႇဝႃႈ၊ၵေႃႉၼၼ်ႉမူတ်းသႂ်ဢေႃႈ။
“ပေႃးၵူၼ်းၸၢႆး၊ဢမ်ႇၼၼ်ၽူႈယိင်းသေၵေႃႉၵေႃႉပဵၼ်ၵႂၢၵ်ႈၽိူၵ်ႇၵႃႈတီႈၽိဝ်ၼင်မၼ်းၸိုင်၊-
ယဵၸ်ႈပရေႃးႁဵၵ်ႈတၵ်းလႆႈၸႅတ်ႈသေးတူၺ်းဢေႃႈ။ ပေႃးၵႂၢၵ်ႈၼၼ်ႉပဵၼ်ၼင်ႇႁၢင်ႈမူၼ်ႇမူၼ်ႇဝႆႉၸိုင်၊ပဵၼ်လၢင်ႇလႄႈၵေႃႉၼၼ်ႉမူတ်းသႂ်ယူႇဢေႃႈ။
“ပေႃးၵူၼ်းသေၵေႃႉၵေႃႉၶူၼ်ႁူဝ်ႁူင်ႈလႄႈပဵၼ်ႁူဝ်လၢၼ်ႉသေၵေႃႈမၼ်းၼၼ်ႉမူတ်းသႂ်ယူႇဢေႃႈ။-
ပေႃးၶူၼ်ႁူဝ်ၼႃႈၽၢၵ်ႇတၢင်းၽၢႆႇသီႈမွမ်ႈႁူင်ႈၸိုင်၊ပဵၼ်ႁူဝ်လၢၼ်ႉသေၵေႃႈမၼ်းၼၼ်ႉမူတ်းသႂ်ယူႇဢေႃႈ။-
ၵူၺ်းၵႃႈ၊ပေႃးၵႂၢၵ်ႈၸဵပ်းဢၼ်ၽိူၵ်ႇလႅင်ဢွၵ်ႇမႃးတီႈႁူဝ်ဢၼ်ၵဵင်ႈယူႇၼၼ်ႉၸိုင်၊ပဵၼ်ယေႃးၵႃႇဢၼ်ၸၢင်ႈၽႄႈၸၢင်ႈၸပ်းဢၼ်ဢွၵ်ႇတီႈႁူဝ်လၢၼ်ႉဢေႃႈ။-
မိူဝ်ႈၼၼ်ႉယဵၸ်ႈပရေႃးႁဵၵ်ႈ တၵ်းလႆႈၸႅတ်ႈသေးတူၺ်းလႄႈပေႃးမီးၵႂၢၵ်ႈၸဵပ်းဢၼ်ၽိူၵ်ႇလႅင်တီႈႁူဝ်ဢၼ်ၵဵင်ႈဢမ်ႇၼၼ်တီႈၼႃႈၽၢၵ်ႇမိူၼ်ၸိူဝ်ႉၼင်ႇယေႃးၵႃႇၽိဝ်ၼင်ႇတၢင်ႇတီႈၼၼ်ႉၸိုင်၊-
ယဵၸ်ႈပရေႃးႁဵၵ်ႈတၵ်းလႆႈၸီႇယၢင်ႇဝႃႈ၊ၵေႃႉၼၼ်ႉဢမ်ႇမူတ်းသႂ်ၵွပ်ႈပိူဝ်ႈမၼ်းပဵၼ်ယေႃးၵႃႇဢၼ်ၸၢင်ႈၽႄႈၸၢင်ႈၸပ်းၼၼ်ႉဢေႃႈ။
“ၵူၼ်းဢၼ်ပဵၼ်ယေႃးၵႃႇၽိဝ်ၼင်ဢၼ်ၸၢင်ႈၽႄႈၸၢင်ႈၸပ်းၼၼ်ႉတၵ်းလႆႈၼုင်ႈၶူဝ်းယွၵ်းၶူဝ်းၶၢတ်ႇလႄႈ၊တၵ်းလႆႈၽႄႇၶူၼ်ႁူဝ်မၼ်းဝႆႉဢေႃႈ။ မၼ်းတၵ်းလႆႈႁူမ်ႇၼႃႈမၼ်းပွတ်းတႂ်ႈဝႆႉသေယဝ်ႉႁွင်ႉသႅၼ်ႇဝႃႈ၊ ‘ဢမ်ႇမူတ်းသႂ်။ ဢမ်ႇမူတ်းသႂ်၊’ ဝႃႈၼင်ႇၼႆဢေႃႈ။-
မၼ်းတၵ်းလႆႈပဵၼ်ၵေႃႉဢၼ်ဢမ်ႇမူတ်းသႂ်ယူႇၸူဝ်ႈဢၼ်မၼ်းမီးယေႃးၵႃႇယူႇၼၼ်ႉဢေႃႈ။ မၼ်းတၵ်းလႆႈယူႇၵေႃႉလဵဝ်ၵူၺ်းမၼ်း၊ၼႂ်းထဵင်ၵႃႈၼွၵ်ႈပၢင်တပ်ႉဢေႃႈ။
“မိူဝ်ႈဢၼ်ၶူဝ်းၼုင်ႈဢၼ်သႃးၼၼ်ႉပဵၼ်သိူဝ်ႈၶူဝ်းၶူၼ်သူဝ်းသေဢမ်ႇဝႃႈ၊ပဵၼ်သိူဝ်ႈၶူဝ်းၽႃႈပၢၼ်ႇသေဢမ်ႇဝႃႈ၊-
ပဵၼ်သၢႆႁုၵ်ႇဢမ်ႇၼၼ်မႆဢၼ်တၵ်းတေႃးႁဵတ်းၽႃႈပၢၼ်ႇသေဢမ်ႇဝႃႈ၊ၽႃႈၶူၼ်သူဝ်းသေဢမ်ႇဝႃႈ၊ပဵၼ်ၼင်သတ်းသေဢမ်ႇဝႃႈ၊ပဵၼ်ၶိူင်ႈဢၼ်ဢဝ်ၼင်ႁဵတ်းသေဢမ်ႇဝႃႈ၊-
ပေႃးတၢင်းဢၼ်ပေႃႇဢွၵ်ႇမႃးၼၼ်ႉပဵၼ်ႁမ်ႉၶဵဝ်ၶဵဝ်၊ဢမ်ႇၼၼ်ႁမ်ႉလႅင်လႅင်ဝႆႉၵႃႈတီႈၶူဝ်းၼုင်ႈၸိူဝ်းၼၼ်ႉၸိုင်၊ပဵၼ်ယေႃးၵႃႇသႃးလႄႈတၵ်းလႆႈဢဝ်ၵႂႃႇၼႄပျႃးတီႈယဵၸ်ႈပရေႃးႁဵၵ်ႈဢေႃႈ။-
ယဵၸ်ႈပရေႃးႁဵၵ်ႈၼၼ်ႉတၵ်းလႆႈၸႅတ်ႈသေးတူၺ်းလႄႈဢဝ်ၶူဝ်းၼုင်ႈဢၼ်သႃးၼၼ်ႉသိမ်းဝႆႉၸဵတ်းဝၼ်းတဵမ်တဵမ်ဢေႃႈ။-
မိူဝ်ႈဢၼ်ထူၼ်ႈၸဵတ်းဝၼ်းၸိုင်၊ယဵၸ်ႈပရေႃးႁဵၵ်ႈၼၼ်ႉတၵ်းလႆႈၶိုၼ်းၸႅတ်ႈသေးတူၺ်းထႅင်ႈလႄႈပေႃးဢၼ်သႃးၼၼ်ႉယႂ်ႇၽႄၼမ်မႃးၸိုင်၊ၶူဝ်းၼုင်ႈၼၼ်ႉဢမ်ႇမူတ်းသႂ်။-
ယဵၸ်ႈပရေႃးႁဵၵ်ႈၼၼ်ႉတၵ်းလႆႈဢဝ်ၶူဝ်းၼုင်ႈၼၼ်ႉတုတ်ႇၽႆးပႅတ်ႈၵွပ်ႈပိူဝ်ႈၶူဝ်းၼုင်ႈၼၼ်ႉမီးယေႃးၵႃႇသႃးဢၼ်ၸၢင်ႈၽႄႈၸၢင်ႈၸပ်းဢေႃႈ။
“ပေႃးဝႃႈယဵၸ်ႈပရေႃးႁဵၵ်ႈၸႅတ်ႈသေးတူၺ်းလႄႈလႆႈႁုဝႃႈ၊ယေႃးၵႃႇသႃးၼၼ်ႉဢမ်ႇၽႄႈမႃးၵႃႈတီႈၶူဝ်းၼုင်ႈ၊ဢမ်ႇၼၼ်တီႈၶိူင်ႈဢၼ်ဢဝ်ၼင်ႁဵတ်းၼၼ်ႉၸိုင်၊-
ယဵၸ်ႈပရေႃးႁဵၵ်ႈတၵ်းလႆႈပၼ်ဢမိင်ႉႁႂ်ႈၶဝ်သၵ်ႉၶူဝ်းၼုင်ႈၼၼ်ႉသေယဝ်ႉ၊သမ်ႉသိမ်းဝႆႉထႅင်ႈၸဵတ်းဝၼ်းဢေႃႈ။-
ၵမ်းၼၼ်ႉယဵၸ်ႈပရေႃးႁဵၵ်ႈတၵ်းလႆႈၶိုၼ်းၸႅတ်ႈသေးတူၺ်းလႄႈ၊လႆႈႁုဝႃႈၵႂၢၵ်ႈသႃးၼၼ်ႉႁၢင်ႈၽၢင်မၼ်းဢမ်ႇပႅၵ်ႇဢမ်ႇပိူင်ႈ၊ဢမ်ႇယႂ်ႇမႃးသေၵေႃႈ ၶူဝ်းၼုင်ႈၼၼ်ႉဢမ်ႇမူတ်းသႂ်၊ၶူဝ်းၼုင်ႈၼၼ်ႉၵႂၢၵ်ႈသႃးမီးယူႇတၢင်းၼႃႈမၼ်းသေဢမ်ႇဝႃႈ၊ၽၢႆႇလင်မၼ်းသေဢမ်ႇဝႃႈ၊တၵ်းလႆႈတုတ်ႇၽႆးပႅတ်ႈဢေႃႈ။
“ၵူၺ်းၵႃႈ၊မိူဝ်ႈဢၼ်ယဵၸ်ႈပရေႃးႁဵၵ်ႈၸႅတ်ႈသေးတူၺ်းၼၼ်ႉႁုဝႃႈ၊ၵႂၢၵ်ႈသႃးၼၼ်ႉပဵၼ်ႁမ်ႉလမ်လမ်ဝႆႉဝၢႆးသေဢၼ်သၵ်ႉယဝ်ႉၼၼ်ႉၸိုင်၊တၵ်းလႆႈသိၵ်ႇၵႂၢၵ်ႈသႃးၼၼ်ႉပႅတ်ႈသေၵႃႈတီႈၶူဝ်းၼုင်ႈၼၼ်ႉဢေႃႈ။-
မိူဝ်ႈၼၼ်ႉပေႃးၵႂၢၵ်ႈသႃးၼၼ်ႉၶိုၼ်းပေႃႇဢွၵ်ႇမႃးလႄႈသမ်ႉယႂ်ႇၽႄႈမႃးၸိုင်၊ၸဝ်ႈမၼ်းတၵ်းလႆႈဢဝ်ၶူဝ်းၼုင်ႈၼၼ်ႉတုတ်ႇၽႆးပႅတ်ႈဢေႃႈ။-
ၵူၺ်းၵႃႈ၊မိူဝ်ႈဢၼ်မၼ်းသၵ်ႉၶူဝ်းၼၼ်ႉယဝ်ႉလႄႈယေႃးၵႃႇသႃးႁၢႆၵႂႃႇၸိုင်၊မၼ်းတၵ်းလႆႈၶိုၼ်းသၵ်ႉထႅင်ႈပွၵ်ႈၼိုင်ႈဢေႃႈ။ ၶူဝ်းၼုင်ႈၼၼ်ႉမူတ်းသႂ်ဢေႃႈ။
“ဢၼ်ၼႆႉၸိုင်၊ပဵၼ်ထုင်းတြႃးဢၼ်ၵပ်းၵၢႆႇလူၺ်ႈၵၼ်တင်းယေႃးၵႃႇသႃးဢၼ်ပေႃႇပဵၼ်မႃးၵႃႈတီႈသိူဝ်ႈၶူဝ်းၶူၼ်သူဝ်းသေဢမ်ႇဝႃႈ၊ၽႃႈပၢၼ်ႇသေဢမ်ႇဝႃႈ၊သမ်ႉပဵၼ်မႃးၵႃႈတီႈသၢႆႁုၵ်ႇ၊ဢမ်ႇၼၼ်မႆတမ်ႇဢၼ်တေႃးႁဵတ်းၼၼ်ႉသေဢမ်ႇဝႃႈ၊ၵႃႈတီႈၶိူင်ႈဢၼ်ဢဝ်ၼင်ႁဵတ်းၼၼ်ႉသေဢမ်ႇဝႃႈ၊ႁႂ်ႈလႆႈတႅပ်းတတ်းဝႃႈမၼ်းမူတ်းသႂ်၊ဢမ်ႇမူတ်းသႂ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ ထႅင်ႈလႄႈဝႃႈၸမ်ႉ၊-
“ဢၼ်ၼႆႉပဵၼ်ထုင်းတြႃးဢၼ်ၵပ်းၵၢႆႇၵၼ်တင်းၵူၼ်းဢၼ်ပဵၼ်ယေႃးၵႃႇဢၼ်ၸၢင်ႈၽႄႈၸၢင်ႈၸပ်းၼႂ်းဝၼ်းဢၼ်ႁဵတ်းႁႂ်ႈမၼ်းမူတ်းသႂ်ၼၼ်ႉဢေႃႈ။ တၵ်းလႆႈဢဝ်မၼ်းၼၼ်ႉၵႂႃႇၸူးတီႈယဵၸ်ႈပရေႃးႁဵၵ်ႈ လႄႈ၊-
ယဵၸ်ႈပရေႃးႁဵၵ်ႈၼၼ်ႉတၵ်းလႆႈဢဝ်မၼ်းဢွၵ်ႇၸူးၵႃႈၼွၵ်ႈပၢင်တပ်ႉသေလႄႈၸႅတ်ႈသေးတူၺ်းမၼ်းၼၼ်ႉဢေႃႈ။ ပေႃးယေႃးၵႃႇမၼ်းႁၢႆယဝ်ႉၸိုင်၊-
ယဵၸ်ႈပရေႃးႁဵၵ်ႈတၵ်းလႆႈၸႂ်ႉႁႂ်ႈဢဝ်ၼူၵ်ႉဢၼ်ဢသၢၵ်ႈလိပ်းယူႇလႄႈမူတ်းသႂ်ၼၼ်ႉသွင်တူဝ်၊ၼိူဝ်ႉမႆႉဢႃႇရိတ်ႉ၊ၸိူၵ်ႈဢၼ်လႅင်ၵမ်ႇတင်းယွတ်ႈတူၼ်ႈယိူဝ်ႈယႃႈႁုတ်ႉသူပ်ႉပုၼ်ႈၵေႃႉၼၼ်ႉဢေႃႈ။-
ယဵၸ်ႈပရေႃးႁဵၵ်ႈသမ်ႉတၵ်းလႆႈသင်ႇႁႂ်ႈႁႅမ်ၼူၵ်ႉၼၼ်ႉတူဝ်ၼိုင်ႈၵႃႈၼိူဝ်မေႃႈလိၼ်ဢၼ်ဢဝ်ၼမ်ႉသႂ်သႂ်ဢၼ်လႆႈၵႃႈတီႈၼမ်ႉၵႄးမႃးသႂ်ႇဝႆႉၼၼ်ႉဢေႃႈ။-
ယဵၸ်ႈပရေႃးႁဵၵ်ႈၼၼ်ႉၸင်ႇဢဝ်ၼူၵ်ႉတူဝ်ဢၼ်ဢသၢၵ်ႈယင်းလိပ်းယူႇထႅင်ႈတူဝ်ၼိုင်ႈ၊ဢိၵ်ႇတင်းၼိူဝ်ႉမႆႉဢႃႇရိတ်ႉ၊ၸိူၵ်ႈဢၼ်လႅင်ၵမ်ႇတင်းယွတ်ႈတူၼ်ႈယိူဝ်ႈယႃႈႁုတ်ႉသူပ်ႉၸုမ်ႇသႂ်ႇၵႃႈၼႂ်းလိူတ်ႈၼူၵ်ႉဢၼ်ႁႅမ်တၢႆၼၼ်ႉသေယဝ်ႉ၊-
ဢဝ်လိူတ်ႈၼၼ်ႉၽႅတ်းသႂ်ႇၵေႃႉဢၼ်လႆႈၶၢမ်ႇတၢင်းဢၼ်ႁဵတ်းႁႂ်ႈမူတ်းသႂ်ၼၼ်ႉၸဵတ်းၵမ်းသေယဝ်ႉ၊တၵ်းလႆႈၸီႇယၢင်ႇဝႃႈ၊ၵေႃႉၼၼ်ႉမူတ်းသႂ်ဢေႃႈ။ ၼူၵ်ႉဢၼ်ဢသၢၵ်ႈလိပ်းၼၼ်ႉၸိုင်၊မၼ်းတၵ်းလႆႈပွႆႇႁႂ်ႈမိၼ်ပၢႆႈၵႂႃႇၵႃႈတီႈၵၢင်ပၢင်ႇဢေႃႈ။-
ၵေႃႉၼၼ်ႉတၵ်းလႆႈသၵ်ႉၶူဝ်းၼုင်ႈမၼ်း၊ထႃၶူၼ်ႁူဝ်မၼ်းတင်းသဵင်ႈတင်းမူတ်းသေယဝ်ႉ၊ဢၢပ်ႇၼမ်ႉသေလႄႈတၵ်းလႆႈမူတ်းသႂ်ဢေႃႈ။ လိုၼ်းၼၼ်ႉမၼ်းတၵ်းလႆႈၶဝ်ႈၵႃႈၼႂ်းပၢင်တပ်ႉဢေႃႈ။ ၵူၺ်းၵႃႈ၊မၼ်းတၵ်းလႆႈယူႇၵႃႈၼွၵ်ႈသုမ်ႉထဵင်မၼ်းၸဵတ်းဝၼ်းဢေႃႈ။-
ၼႂ်းဝၼ်းဢၼ်ထူၼ်ႈၸဵတ်းဝၼ်းၼၼ်ႉမၼ်းသမ်ႉတၵ်းလႆႈထႃၶူၼ်ႁူဝ်၊ၶူၼ်ၼူတ်ႇ၊ၶူၼ်တႃဢိၵ်ႇတင်းၶူၼ်မၼ်းၵႃႈမီးၼၼ်ႉသေယဝ်ႉ၊ဢၢပ်ႇၼမ်ႉႁႂ်ႈမူတ်းသႂ်ဢေႃႈ။
“မိူဝ်ႈဢၼ်ထူၼ်ႈပႅတ်ႇဝၼ်းၼၼ်ႉမၼ်းတၵ်းလႆႈဢဝ်သူဝ်းပေႃႈဢွၼ်ႇသွင်တူဝ်ဢၼ်ဢမ်ႇမီးတီႈၸိတီႈၼႄးတင်းသူဝ်းမႄႈဢွၼ်ႇဢမ်ႇပႆႇၶွပ်ႈၶူပ်ႇဢၼ်ဢမ်ႇမီးတီႈၸိတီႈၼႄးၼၼ်ႉတူဝ်ၼိုင်ႈဢိၵ်ႇတင်းၽွင်ၶဝ်ႈၵျုင်ႇၸွႆႉၼိုင်ႈ ဢၼ်ၼွၵ်းလေႃးၼမ်ႉမၼ်းသၢၼ်ႇလုၼ်ႇၼၼ်ႉဢိၵ်ႇတင်းၼမ်ႉမၼ်းသၢၼ်ႇလုၼ်ႇၶၼ်ၼိုင်ႈၸိူဝ်းၼၼ်ႉမႃးၵႃႈတီႈယဵၸ်ႈပရေႃးႁဵၵ်ႈဢေႃႈ။-
ယဵၸ်ႈပရေႃးႁဵၵ်ႈၼၼ်ႉတၵ်းလႆႈႁွင်ႉဢဝ်ၵေႃႉၼၼ်ႉလႄႈပႃးဢဝ်ၶိူင်ႈတၢင်းလူႇၸိူဝ်းၼၼ်ႉၵႂႃႇၵႃႈတီႈၽၵ်းတူသုမ်ႉထဵင်ၸဝ်ႈဢေႃႈ။-
ၵမ်းၼၼ်ႉယဵၸ်ႈပရေႃးႁဵၵ်ႈတၵ်းလႆႈဢဝ်သူဝ်းပေႃႈဢွၼ်ႇၼၼ်ႉတူဝ်ၼိုင်ႈဢိၵ်ႇတင်းၼမ်ႉမၼ်းသၢၼ်ႇလုၼ်ႇၶၼ်ၼိုင်ႈၼၼ်ႉသၢၵ်ႈၵၢပ်ႈပုၼ်ႈတၢင်းလူႇဢၼ်ၽေႇတုၸရိူၵ်ႈတီႈ ထႃႇဝရႃႉၽြႃး၊ ဢေႃႈ။ မၼ်းတၵ်းလႆႈသၢၵ်ႈၵၢပ်ႈၸိူဝ်ႉၼင်ႇတၢင်းလူႇဢၼ်ၶိုၵ်ႉဢၼ်ၶမ်ႇတီႈ ထႃႇဝရႃႉၽြႃး၊ ပုၼ်ႈယဵၸ်ႈပရေႃးႁဵၵ်ႈဢေႃႈ။-
မၼ်းတၵ်းလႆႈႁႅမ်သူဝ်းဢွၼ်ႇၼၼ်ႉၼႂ်းထႃႇၼႃႉတီႈမူတ်းၸၢင်ႇတီႈဢၼ်ႁႅမ်တူဝ်တၢင်းလူႇပုၼ်ႈတၢင်းလူႇဢၼ်ၽေႇဢပျတ်ႈဢိၵ်ႇတင်းတူဝ်တၢင်းလူႇဢၼ်တုတ်ႇၽႆးၼၼ်ႉဢေႃႈ။ မၼ်းတၵ်းလႆႈႁဵတ်းၸိူဝ်ႉၼင်ႇၼႆၵွပ်ႈပိူဝ်ႈတၢင်းလူႇဢၼ်ၽေႇတုၸရိူၵ်ႈၼၼ်ႉပဵၼ်ပုၼ်ႈယဵၸ်ႈပရေႃးႁဵၵ်ႈမိူၼ်ၵၼ်တင်းတၢင်းလူႇဢၼ်ၽေႇဢပျတ်ႈၼၼ်ႉဢေႃႈ။ ပဵၼ်ဢၼ်မူတ်းၸၢင်ႇၼႃႇလူင်လၢင်ဢေႃႈ။-
ယဵၸ်ႈပရေႃးႁဵၵ်ႈတၵ်းလႆႈဢဝ်လိူတ်ႈသူဝ်းဢွၼ်ႇၼၼ်ႉၵမ်ႈၽွင်ႈယွတ်ႇသႂ်ႇၵႃႈတီႈဝၢၼ်ႁူၶွၼ်ၶႂႃ၊တင်းႁူဝ်မႄႈမိုဝ်းၶွၼ်ၶႂႃ၊ဢိၵ်ႇတင်းႁူဝ်မႄႈတိၼ်ၶွၼ်ၶႂႃတီႈၵေႃႉဢၼ်လႆႈၶၢမ်ႇတၢင်းဢၼ်ႁႂ်ႈမူတ်းသႂ်ၼၼ်ႉဢေႃႈ။-
ယဵၸ်ႈပရေႃးႁဵၵ်ႈၼၼ်ႉတၵ်းလႆႈဢဝ်ၼမ်ႉမၼ်းသၢၼ်ႇလုၼ်ႇၶၼ်ၼိုင်ႈၼၼ်ႉၵမ်ႈၽွင်ႈထွၵ်ႇသႂ်ႇၽႃႇမိုဝ်းၶွၼ်သၢႆႉတူဝ်ၸဝ်ႈၵဝ်ႇသေယဝ်ႉ၊-
ဢဝ်ၼိဝ်ႉၸိမၼ်းၶွၼ်ၶႂႃၸုမ်ႇသႂ်ႇၵႃႈၼႂ်းၼမ်ႉမၼ်းဢၼ်မီးၼႂ်းၽႃႇမိုဝ်းမၼ်းၼၼ်ႉသေလႄႈၽႅတ်းသႂ်ႇၵႃႈတီႈၽၢႆႇၼႃႈ ထႃႇဝရႃႉၽြႃး၊ ၸဵတ်းၵမ်းဢေႃႈ။-
မၼ်းသမ်ႉတၵ်းလႆႈဢဝ်ၼမ်ႉမၼ်းဢၼ်မီးၼႂ်းၽႃႇမိုဝ်းမၼ်းၼၼ်ႉၵမ်ႈၽွင်ႈဢိၵ်ႇတင်းလိူတ်ႈသူဝ်းဢွၼ်ႇၼၼ်ႉၵမ်ႈၽွင်ႈယွတ်ႇသႂ်ႇၵႃႈတီႈဝၢၼ်ႁူၶွၼ်ၶႂႃ၊တင်းႁူဝ်မႄႈမိုဝ်းၶွၼ်ၶႂႃ၊ဢိၵ်ႇတင်းႁူဝ်မႄႈတိၼ်ၶွၼ်ၶႂႃၵေႃႉဢၼ်လႆႈၶၢမ်ႇတၢင်းဢၼ်ႁဵတ်းႁႂ်ႈမူတ်းသႂ်ၼၼ်ႉဢေႃႈ။-
ၼမ်ႉမၼ်းဢၼ်ယင်းၵိုတ်းယင်းၵျၢၼ်ႇၼႂ်းၽႃႇမိုဝ်းမၼ်းၼၼ်ႉမၼ်းတၵ်းလႆႈထွၵ်ႇသႂ်ႇၵႃႈၼိူဝ်ႁူဝ်ၵေႃႉၼၼ်ႉဢေႃႈ။ ယဵၸ်ႈပရေႃးႁဵၵ်ႈတၵ်းလႆႈႁဵတ်းၸိူဝ်ႉၼင်ႇၼႆၽေႇဢပျတ်ႈပုၼ်ႈၵေႃႉၼၼ်ႉၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢေႃႈ။
“မိူဝ်ႈၼၼ်ႉယဵၸ်ႈပရေႃးႁဵၵ်ႈတၵ်းလႆႈသၢၵ်ႈၵၢပ်ႈတၢင်းလူႇဢၼ်ၽေႇဢပျတ်ႈလႄႈႁဵတ်းမၢင်ႇၵလႃႇဢၼ်ႁႂ်ႈမူတ်းၸၢင်ႇပုၼ်ႈၵေႃႉဢၼ်ဢမ်ႇမူတ်းၸၢင်ႇၼၼ်ႉဢေႃႈ။ လိုၼ်းၼၼ်ႉမၼ်းတၵ်းလႆႈႁႅမ်တူဝ်တၢင်းလူႇပုၼ်ႈၶိူင်ႈတၢင်းလူႇဢၼ်တုတ်ႇၽႆးသေယဝ်ႉ၊-
သၢၵ်ႈၵၢပ်ႈတၢင်းလူႇၼၼ်ႉလူၺ်ႈၵၼ်တင်းတၢင်းလူႇမၢၵ်ႇၶဝ်ႈႁူင်းၶဝ်ႈၵႃႈၼိူဝ်ၶဵင်ႇတၢင်းလူႇဢေႃႈ။ ယဵၸ်ႈပရေႃးႁဵၵ်ႈတၵ်းလႆႈႁဵတ်းၸိူဝ်ႉၼင်ႇၼႆၽေႇဢပျတ်ႈပုၼ်ႈၵေႃႉၼၼ်ႉလႄႈၵေႃႉၼၼ်ႉတၵ်းလႆႈႁွတ်ႈထိုင်တၢင်းဢၼ်မူတ်းသႂ်ဢေႃႈ။
“ၵူၺ်းၵႃႈ၊ပေႃးၵူၼ်းၵေႃႉၼၼ်ႉၽၢၼ်လႄႈဢမ်ႇတၢတ်ႈၼိူင်ႇလႆႈပုၼ်ႈတေသၢၵ်ႈလူႇတင်းမူတ်းၼၼ်ႉၸိုင်၊ပုၼ်ႈဢၼ်တၵ်းႁဵတ်းႁႂ်ႈမူတ်းသႂ်ၼၼ်ႉႁႂ်ႈမၼ်းဢဝ်သူဝ်းပေႃႈဢွၼ်ႇတူဝ်ၼိုင်ႈၵူၺ်းမႃးပဵၼ်တၢင်းလူႇဢၼ်ၽေႇတုၸရိူၵ်ႈပုၼ်ႈမၼ်းႁႂ်ႈပဵၼ်တၢင်းလူႇဢၼ်ၶိုၵ်ႉဢၼ်ၶမ်ႇတီႈ ထႃႇဝရႃႉၽြႃး၊ ပုၼ်ႈယဵၸ်ႈပရေႃးႁဵၵ်ႈ ဢိၵ်ႇတင်းၽွင်ၶဝ်ႈၵျုင်ႇသၢမ်ၶၼ်ဢၼ်ၼွၵ်းလေႃးၼမ်ႉမၼ်းသၢၼ်ႇလုၼ်ႇၵူၺ်း ပုၼ်ႈတၢင်းလူႇမၢၵ်ႇၶဝ်ႈႁူင်းၶဝ်ႈဢိၵ်ႇတင်းၼမ်ႉမၼ်းသၢၼ်ႇလုၼ်ႇၶၼ်ၼိုင်ႈတႃႉ။-
သမ်ႉႁႂ်ႈမၼ်းဢဝ်ၼူၵ်ႉတူႈသွင်တူဝ်၊ဢမ်ႇၼၼ်ၵႃၵႄသွင်တူဝ်မႃးပုၼ်ႈတၢင်းလူႇဢၼ်ၽေႇဢပျတ်ႈတူဝ်ၼိုင်ႈ၊ဢိၵ်ႇတင်းၶိူင်ႈတၢင်းလူႇဢၼ်တုတ်ႇၽႆးတူဝ်ၼိုင်ႈတႃႉ။-
မိူဝ်ႈဢၼ်ထူၼ်ႈဝၼ်းတီႈပႅတ်ႇ၊ဝၼ်းဢၼ်တၵ်းႁဵတ်းႁႂ်ႈမၼ်းမူတ်းသႂ်ၼၼ်ႉမၼ်းတၵ်းလႆႈဢဝ်ၸိူဝ်းၼၼ်ႉမႃးတီႈယဵၸ်ႈပရေႃးႁဵၵ်ႈၵႃႈတီႈၽၢႆႇၼႃႈၽၵ်းတူသုမ်ႉထဵင်ၸဝ်ႈဢေႃႈ။-
ယဵၸ်ႈပရေႃးႁဵၵ်ႈတၵ်းလႆႈဢဝ်သူဝ်းဢွၼ်ႇၼၼ်ႉတင်းၼမ်ႉမၼ်းသၢၼ်ႇလုၼ်ႇၼၼ်ႉသၢၵ်ႈလူႇႁႂ်ႈပဵၼ်တၢင်းလူႇဢၼ်ၶိုၵ်ႉဢၼ်ၶမ်ႇတီႈ ထႃႇဝရႃႉၽြႃး၊ ဢေႃႈ။-
မၼ်းတၵ်းလႆႈႁႅမ်သူဝ်းဢွၼ်ႇတူဝ်ၼၼ်ႉသေလႄႈဢဝ်လိူတ်ႈမၼ်းၵမ်ႈၽွင်ႈယွတ်ႇသႂ်ႇၵႃႈတီႈဝၢၼ်ႁူၶွၼ်ၶႂႃ၊တင်းႁူဝ်မႄႈမိုဝ်းၶွၼ်ၶႂႃ၊ဢိၵ်ႇတင်းႁူဝ်မႄႈတိၼ်ၶွၼ်ၶႂႃၵေႃႉၼၼ်ႉဢေႃႈ။-
ယဵၸ်ႈပရေႃးႁဵၵ်ႈၼၼ်ႉတၵ်းလႆႈဢဝ်ၼမ်ႉမၼ်းၵမ်ႈၽွင်ႈထွၵ်ႇသႂ်ႇၽႃႇမိုဝ်းၶွၼ်သၢႆႉတူဝ်ၸဝ်ႈၵဝ်ႇသေယဝ်ႉ၊-
ဢဝ်ၼိဝ်ႉၸိမၼ်းၶွၼ်ၶႂႃၸုမ်ႇသႂ်ႇၵႃႈၼႂ်းၼမ်ႉမၼ်းဢၼ်မီးၼႂ်းၽႃႇမိုဝ်းမၼ်းၼၼ်ႉလႄႈၽႅတ်းသႂ်ႇၵႃႈတီႈၽၢႆႇၼႃႈ ထႃႇဝရႃႉၽြႃး၊ ၸဵတ်းၵမ်းဢေႃႈ။-
မၼ်းတၵ်းလႆႈဢဝ်ၼမ်ႉမၼ်းၵမ်ႈၽွင်ႈယွတ်ႇသႂ်ႇၵႃႈတီႈဝၢၼ်ႁူၶွၼ်ၶႂႃ၊တင်းႁူဝ်မႄႈမိုဝ်းၶွၼ်ၶႂႃ၊ဢိၵ်ႇတင်းတီႈႁူဝ်မႄႈတိၼ်ၶွၼ်ၶႂႃၵေႃႉဢၼ်လႆႈၶၢမ်ႇတၢင်းဢၼ်ႁႂ်ႈမူတ်းသႂ်ၼၼ်ႉဢေႃႈ။-
ၼမ်ႉမၼ်းဢၼ်ယင်းၵိုတ်းယင်းၵျၢၼ်ႇၼႂ်းၽႃႇမိုဝ်းမၼ်းၼၼ်ႉမၼ်းတၵ်းလႆႈထွၵ်ႇသႂ်ႇၵႃႈၼိူဝ်ႁူဝ်ၵေႃႉၼၼ်ႉလႄႈႁဵတ်းၸိူဝ်ႉၼင်ႇၼႆၽေႇဢပျတ်ႈပုၼ်ႈၵေႃႉၼၼ်ႉၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢေႃႈ။-
ၵေႃႉၼၼ်ႉတၵ်းလႆႈဢဝ်ၼူၵ်ႉတူႈလႂ်၊ဢမ်ႇၼၼ်ၵႃၵႄလႂ်၊ၵႃႈဢၼ်မၼ်းတၢတ်ႈၼိူင်ႇလႆႈၼၼ်ႉမႃးသၢၵ်ႈၵၢပ်ႈ၊-
ႁႂ်ႈပဵၼ်တၢင်းလူႇဢၼ်ၽေႇဢပျတ်ႈတူဝ်ၼိုင်ႈ၊ဢိၵ်ႇတင်းတူဝ်တၢင်းလူႇဢၼ်တုတ်ႇၽႆးတူဝ်ၼိုင်ႈလူၺ်ႈၵၼ်တင်းတၢင်းလူႇမၢၵ်ႇၶဝ်ႈႁူင်းၶဝ်ႈဢေႃႈ။ ယဵၸ်ႈပရေႃးႁဵၵ်ႈတၵ်းလႆႈႁဵတ်းၸိူဝ်ႉၼင်ႇၼႆၽေႇဢပျတ်ႈပုၼ်ႈၵေႃႉၼၼ်ႉဢေႃႈ။-
ဢၼ်ၼႆႉၸမ်ႉ၊ပဵၼ်ထုင်းတြႃးဢၼ်ၵပ်းၵၢႆႇၵၼ်တင်းၵေႃႉဢၼ်ပဵၼ်ယေႃးၵႃႇၽိဝ်ၼင်ဢၼ်ၸၢင်ႈၽႄႈၸၢင်ႈၸပ်းလႄႈဢမ်ႇတၢတ်ႈၼိူင်ႇလႆႈပုၼ်ႈဢၼ်တၵ်းသၢၵ်ႈလူႇဢၼ်လူဝ်ႇႁဵတ်းႁႂ်ႈတူဝ်ၸဝ်ႈၵဝ်ႇမူတ်းသႂ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉပၼ်ထုင်းတြႃးတီႈ မူဝ်းသေႇ၊ တင်း ဢႃႇရုၼ်ႇ၊-
လူၺ်ႈလွင်ႈယေႃးၵႃႇသႃး ၼႂ်းႁိူၼ်းလႄႈဝႃႈၸမ်ႉ၊ “ထုင်းတြႃးၼႆႉပဵၼ်ပုၼ်ႈၵူၼ်းမဵဝ်း ဢိသရေး၊ တင်းလၢႆတၵ်းလႆႈပႂ်ႉၵမ်ႁဵတ်းၸွမ်းမိူဝ်ႈဢၼ်လႆႈၶဝ်ႈယူႇၼႂ်းမိူင်း ၶႃႇၼၼ်ႇ၊ မိူင်းဢၼ် ထႃႇဝရႃႉၽြႃး၊ ပၼ်ပုၼ်ႈၶဝ်တၵ်းပိူင်ႇၼၼ်ႉဢေႃႈ။-
ပေႃးၵူၼ်းသေၵေႃႉၵေႃႉႁၼ်ယေႃးၵႃႇသႃးပေႃႇပဵၼ်မႃးၸပ်းၵႃႈတီႈႁိူၼ်းမၼ်းၸိုင်၊ၸဝ်ႈႁိူၼ်းၼၼ်ႉတၵ်းလႆႈၵႂႃႇမွၵ်ႇလၢတ်ႈလွင်ႈတၢင်းၼၼ်ႉၵႃႈတီႈယဵၸ်ႈပရေႃးႁဵၵ်ႈဢေႃႈ။-
ယဵၸ်ႈပရေႃးႁဵၵ်ႈၼၼ်ႉတၵ်းလႆႈၸႂ်ႉႁႂ်ႈၶၢႆႉၶူဝ်းလဵင်းဢွၵ်ႇသေၵႃႈၼႂ်းႁိူၼ်းတင်းမူတ်းၸူဝ်ႈဢၼ်မၼ်းဢမ်ႇပႆႇၵႂႃႇၸႅတ်ႈသေးတူၺ်းယေႃးၵႃႇသႃးဢၼ်ပေႃႇပဵၼ်မႃးၼၼ်ႉဢေႃႈ။ ပေႃးဢမ်ႇၼၼ်ၶူဝ်းလဵင်းၵႃႈၼႂ်းႁိူၼ်းၼၼ်ႉတင်းမူတ်းတၵ်းပဵၼ်ဢၼ်ဢမ်ႇမူတ်းသႂ်ၵႂႃႇဢေႃႈ။ လိုၼ်းၼၼ်ႉမၼ်းတၵ်းလႆႈၶဝ်ႈၵႃႈၼႂ်းႁိူၼ်းသေလႄႈ၊-
ၸႅတ်ႈသေးတူၺ်းယေႃးၵႃႇသႃးဢၼ်ပေႃႇပဵၼ်မႃးၼၼ်ႉဢေႃႈ။ ပေႃးၵႂၢၵ်ႈသႃးဢၼ်ပေႃႇပဵၼ်မႃးၵႃႈတီႈၽႃႁိူၼ်းၼၼ်ႉပဵၼ်ႁမ်ႉၶဵဝ်ၶဵဝ်လႅင်လႅင်ဝႆႉလႄႈမိူၼ်ၼင်ႇႁၢင်ႈၵိၼ်ၶဝ်ႈၼႂ်းၼိူဝ်ႉၽႃၵႂႃႇၸိုင်၊-
ယဵၸ်ႈပရေႃးႁဵၵ်ႈၼၼ်ႉတၵ်းလႆႈဢွၵ်ႇႁိူၼ်းၼၼ်ႉသေယဝ်ႉ၊ၶတ်းသေႃးၽၵ်းတူဝႆႉၸဵတ်းဝၼ်းဢေႃႈ။-
မိူဝ်ႈဢၼ်ထူၼ်ႈၸဵတ်းဝၼ်းၸိုင်၊မၼ်းတၵ်းလႆႈၶိုၼ်းၸႅတ်ႈသေးတူၺ်းထႅင်ႈဢေႃႈ။ ပေႃးၵႂၢၵ်ႈသႃးၼၼ်ႉယႂ်ႇၽႄႈၼမ်မႃးၸိုင်၊-
မၼ်းတၵ်းလႆႈၸႂ်ႉႁႂ်ႈၶွၵ်းဢဝ်မၢၵ်ႇႁိၼ်တီႈၽႃဢၼ်မီးယေႃးၵႃႇသႃးၼၼ်ႉသေလႄႈပႅတ်ႈၵႃႈတီႈဢၼ်ဢမ်ႇမူတ်းသႂ်ၵႃႈၼွၵ်ႈဝဵင်းဢေႃႈ။-
လိုၼ်းၼၼ်ႉတၵ်းလႆႈႁႂ်ႈၶဝ်ၶုတ်ႇပႅတ်ႈမုၼ်ႈၽႃႁိူၼ်းၽၢႆႇတၢင်းၼႂ်းႁွပ်ႈႁွပ်ႈလႄႈမုၼ်ႈဢၼ်ၶုတ်ႇဢွၵ်ႇၼၼ်ႉတၵ်းလႆႈထွၵ်ႇပႅတ်ႈၵႃႈတီႈဢၼ်ဢမ်ႇမူတ်းသႂ်ၵႃႈၼွၵ်ႈဝဵင်းဢေႃႈ။-
ၵမ်းၼၼ်ႉၸင်ႇႁႂ်ႈဢဝ်မၢၵ်ႇႁိၼ်ဢၼ်မႂ်ႇၶိုၼ်းပုတ်ႈလၢႆႈသႂ်ႇၶိုၼ်းတီႈဢၼ်ပဝ်ႇလၢပ်ႈဝႆႉၸိူဝ်းၼၼ်ႉသေလႄႈႁႂ်ႈဢဝ်ဢၢင်းၵတေႇဢၼ်မႂ်ႇၶိုၼ်းတႃးၽႃတင်းမူတ်းဢေႃႈ။
“ပေႃးဝႃႈယေႃးၵႃႇသႃးသမ်ႉယင်းပေႃႇပဵၼ်မႃးၵႃႈတီႈၽႃႁိူၼ်းဢၼ်ပုတ်ႈလၢႆႈပႅတ်ႈမၢၵ်ႇႁိၼ်ဢၼ်မႂ်ႇလႄႈတႃးဢၢင်းၵတေႇဢၼ်မႂ်ႇၼၼ်ႉထႅင်ႈၸိုင်၊-
ယဵၸ်ႈပရေႃးႁဵၵ်ႈတၵ်းလႆႈၵႂႃႇလူၵႂႃႇတူၺ်းဢေႃႈ။ ပေႃးၵႂၢၵ်ႈသႃးၼၼ်ႉယႂ်ႇၽေးၼမ်မႃးၸိုင်၊ႁိူၼ်းၼၼ်ႉဢမ်ႇမူတ်းသႂ်။-
တၵ်းလႆႈၵိူၼ်ႇယႃႉပႅတ်ႈမၢၵ်ႇႁိၼ်မၼ်း၊မႆႉမၼ်း၊ဢၢင်းၵတေႇမၼ်းၵႃႈဢၼ်ပဵၼ်ႁိူၼ်းၼၼ်ႉသေလႄႈဢဝ်ပႅတ်ႈၵႃႈတီႈဢၼ်ဢမ်ႇမူတ်းသႂ်ၵႃႈတီႈၼွၵ်ႈဝဵင်းဢေႃႈ။-
ၼႂ်းၸူဝ်ႈၶၢဝ်းဢၼ်ဢိုတ်းႁပ်းႁိူၼ်းၼၼ်ႉဝႆႉယူႇၼၼ်ႉၽူႈလႂ်သေဢမ်ႇဝႃႈ၊ၵေႃႉဢၼ်ၶဝ်ႈမႅၼ်ႈႁိူၼ်းၼၼ်ႉဢမ်ႇမူတ်းသႂ်တေႃႇထိုင်ၶိင်ႇႁူဝ်ၶမ်ႈဢေႃႈ။-
ၵေႃႉဢၼ်ၼွၼ်းၼႂ်းႁိူၼ်းၼၼ်ႉ၊ဢမ်ႇၼၼ်ၵိၼ်တၢင်းၵိၼ်ၼႂ်းႁိူၼ်းၼၼ်ႉ၊တၵ်းလႆႈသၵ်ႉၶူဝ်းၼုင်ႈမၼ်းဢေႃႈ။
“ၵူၺ်းၵႃႈ၊ပေႃးယဵၸ်ႈပရေႃးႁဵၵ်ႈ မႃးၸႅတ်ႈသေးတူၺ်းလႄႈၵႂၢၵ်ႈသႃးဢၼ်ပေႃႇပဵၼ်မႃးၵႃႈတီႈႁိူၼ်းၼၼ်ႉဢမ်ႇယႂ်ႇၽေးမႃးၵႃႈတီႈဢၢင်းၵတေႇဢၼ်ၶိုၼ်းတႃးမႂ်ႇမႂ်ႇၼၼ်ႉၸိုင်၊ၵွပ်ႈပိူဝ်ႈၵႂၢၵ်ႈသႃးၼၼ်ႉႁၢႆယဝ်ႉလႄႈ၊မၼ်းတၵ်းလႆႈၸီႇယၢင်ႇဝႃႈႁိူၼ်းၼၼ်ႉမူတ်းသႂ်ဢေႃႈ။-
ပုၼ်ႈဢၼ်တၵ်းႁႂ်ႈႁိူၼ်းၼၼ်ႉမူတ်းသႂ်ၸိုင်၊မၼ်းတၵ်းလႆႈဢဝ်ၼူၵ်ႉသွင်တူဝ်၊ၼိူဝ်ႉမႆႉဢႃႇရိတ်ႉ၊ၸိူၵ်ႈဢၼ်လႅင်ၵမ်ႇ၊ယွတ်ႈတူၼ်ႈယိူဝ်ႈယႃႈႁုတ်ႉသူပ်ႉၸိူဝ်းၼၼ်ႉမႃးလႄႈ၊-
ဢဝ်ၼူၵ်ႉတူဝ်ၼိုင်ႈၼႂ်းၼူၵ်ႉၸိူဝ်းၼၼ်ႉတူဝ်ၼိုင်ႈသေလႄႈႁႅမ်ၵႃႈၼိူဝ်မေႃႈလိၼ်ဢၼ်ဢဝ်ၼမ်ႉသႂ်သႂ်ဢၼ်လႆႈၵႃႈတီႈၼမ်ႉၵႄးမႃးသႂ်ႇဝႆႉၼၼ်ႉဢေႃႈ။-
မိူဝ်ႈၼၼ်ႉမၼ်းတၵ်းလႆႈဢဝ်ၼိူဝ်ႉမႆႉဢႃႇရိတ်ႉ၊ၸိူၵ်ႈဢၼ်လႅင်ၵမ်ႇ၊ယွတ်ႈတူၼ်ႈယိူဝ်ႈယႃႈႁုတ်ႉသူပ်ႉတင်းၼူၵ်ႉဢၼ်ယင်းဢသၢၵ်ႈလိပ်းယူႇထႅင်ႈတူဝ်ၼိုင်ႈၼၼ်ႉၸုမ်ႇၵႃႈၼႂ်းလိူတ်ႈၼူၵ်ႉတူဝ်ဢၼ်ႁႅမ်တၢႆၼၼ်ႉဢိၵ်ႇတင်းၵႃႈၼႂ်းၼမ်ႉသႂ်သႂ်ၼၼ်ႉသေယဝ်ႉ၊ၽႅတ်းသႂ်ႇႁိူၼ်းၼၼ်ႉၸဵတ်းၵမ်းဢေႃႈ။-
မၼ်းတၵ်းလႆႈႁဵတ်းၸိူဝ်ႉၼင်ႇၼႆဢဝ်လိူတ်ႈၼူၵ်ႉ၊ၼမ်ႉသႂ်သႂ်၊ၼူၵ်ႉဢၼ်ယင်းဢသၢၵ်ႈလိပ်းယူႇ၊ၼိူဝ်ႉမႆႉဢႃႇရိတ်ႉ၊ယွတ်ႈတူၼ်ႈယိူဝ်ႈယႃႈႁုတ်ႉသူပ်ႉ၊ၸိူၵ်ႈဢၼ်လႅင်ၵမ်ႇၸိူဝ်းၼၼ်ႉႁဵတ်းႁႂ်ႈႁိူၼ်းၼၼ်ႉမူတ်းသႂ်ဢေႃႈ။-
လိုၼ်းၼၼ်ႉမၼ်းတၵ်းလႆႈပွႆႇႁႂ်ႈၼူၵ်ႉဢၼ်သၢၵ်ႈလိပ်းယူႇၼၼ်ႉမိၼ်ၵႂႃႇၵႃႈၼွၵ်ႈဝဵင်းၵႃႈတီႈၵၢင်ပၢင်ႇဢေႃႈ။ ယဵၸ်ႈပရေႃးႁဵၵ်ႈတင်းလၢႆႁဵတ်းၸိူဝ်ႉၼင်ႇၼႆၽေႇဢပျတ်ႈပုၼ်ႈႁိူၼ်းၼၼ်ႉလႄႈႁိူၼ်းၼၼ်ႉႁွတ်ႈထိုင်တၢင်းဢၼ်မူတ်းသႂ်ဢေႃႈ၊” ဝႃႈၼင်ႇၼႆဢေႃႈ။
ဢၼ်ၼႆႉၸမ်ႉ၊ပဵၼ်ထုင်းတြႃးဢၼ်ၵပ်းၵၢႆႇၵၼ်တင်းယေႃးၵႃႇၽိဝ်ၼင်ဢၼ်ၸၢင်ႈၽႄႈၸၢင်ႈၸပ်းၵူႈၸိူဝ်ႉၵူႈမဵဝ်း၊တၢင်းၸဵပ်းဢၼ်ပဵၼ်ၵႂၢၵ်ႈ၊-
ယေႃးၵႃႇသႃးဢၼ်ၸပ်းၵႃႈတီႈၶူဝ်းၼုင်ႈ၊ယေႃးၵႃႇသႃးဢၼ်ၸပ်းၵႃႈတီႈႁိူၼ်း၊-
ထႃႇဝရႃႉၽြႃး၊ ပၼ်ထုင်းတြႃးတီႈ မူဝ်းသေႇ၊ တင်း ဢႃႇရုၼ်ႇ၊-
ပုၼ်ႈၵူၼ်းမဵဝ်း ဢိသရေး၊ တင်းလၢႆလႄႈဝႃႈၸမ်ႉ၊ “ပေႃးၵူၼ်းၸၢႆးပဵၼ်တၢင်းဢၼ်ႁူဝ်ႈၸိုမ်းဢွၵ်ႇယူႇၵႃႈတီႈၶွင်မၼ်းၸိုင်၊တၢင်းဢၼ်ႁူဝ်ႈၸိုမ်းဢွၵ်ႇၼၼ်ႉပဵၼ်ဢၼ်ဢမ်ႇမူတ်းသႂ်။-
တၢင်းဢၼ်ႁူဝ်ႈၸိုမ်းဢွၵ်ႇယူႇၼၼ်ႉပဵၼ်ဢၼ်ယွတ်ႇႁူဝ်ႈဢွၵ်ႇယူႇၵႃႈတီႈၶွင်မၼ်းသေဢမ်ႇဝႃႈ၊ပဵၼ်ဢၼ်ထၢတ်ႇယိုတ်းယူႇတီႈၶွင်မၼ်းသေဢမ်ႇဝႃႈ၊ၵေႃႉၼၼ်ႉဢမ်ႇမူတ်းၸၢင်ႇ။-
ၵူႇၵႃႈဢၼ်မၼ်းၼွၼ်း၊မၼ်းၼင်ႈတီႈလႂ်တၼ်းလႂ်သေဢမ်ႇဝႃႈ၊ပဵၼ်ဢၼ်ဢမ်ႇမူတ်းသႂ်ဢေႃႈ။-
ၵေႃႉဢၼ်တိူဝ်ႉထုၵ်ႇၵူႇတီႈၼွၼ်းမၼ်းတၵ်းလႆႈသၵ်ႉၶူဝ်းၼုင်ႈမၼ်းလႄႈဢၢပ်ႇၼမ်ႉဢေႃႈ။ ဢမ်ႇမူတ်းသႂ်တေႃႇႁွတ်ႈၶိင်ႇႁူဝ်ၶမ်ႈဢေႃႈ၊-
ဢမ်ႇၼၼ်တီႈၼင်ႈဢၼ်ၵေႃႉၼၼ်ႉလႆႈၼင်ႈယဝ်ႉၼၼ်ႉတၵ်းလႆႈသၵ်ႉၶူဝ်းၼုင်ႈမၼ်းသေလႄႈဢၢပ်ႇၼမ်ႉဢေႃႈ။ ပဵၼ်ဢၼ်ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။-
ၵေႃႉဢၼ်တိူဝ်ႉထုၵ်ႇတူဝ်ၵူၼ်းၵေႃႉဢၼ်ပဵၼ်တၢင်းဢၼ်ႁူဝ်ႈၸိုမ်းဢွၵ်ႇယူႇၼၼ်ႉတၵ်းလႆႈသၵ်ႉၶူဝ်းၼုင်ႈမၼ်းသေလႄႈဢၢပ်ႇၼမ်ႉဢေႃႈ။ ပဵၼ်ဢၼ်ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။-
ပေႃးၵေႃႉဢၼ်ပဵၼ်တၢင်းဢၼ်ႁူဝ်ႈၸိုမ်းဢွၵ်ႇယူႇၼၼ်ႉထူမ်ႇၼမ်ႉလၢႆးတိူဝ်ႉမႅၼ်ႈၵေႃႉဢၼ်မူတ်းၸၢင်ႇၼၼ်ႉၸိုင်၊မၼ်းၼၼ်ႉတၵ်းလႆႈသၵ်ႉၶူဝ်းၼုင်ႈမၼ်းသေလႄႈဢၢပ်ႇၼမ်ႉဢေႃႈ။ ပဵၼ်ဢၼ်ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။-
ၵွပ်းၶီႇၵွပ်းၼင်ႈၵေႃႉဢၼ်ပဵၼ်တၢင်းဢၼ်ႁူဝ်ႈၸိုမ်းဢွၵ်ႇလႆႈၶီႇလႆႈၼင်ႈယဝ်ႉၼၼ်ႉပဵၼ်ဢၼ်ဢမ်ႇမူတ်းသႂ်။-
ၵေႃႉဢၼ်တိူဝ်ႉထုၵ်ႇၶိူင်ႈပိူင်ဢၼ်လႆႈမီးတႂ်ႈမၼ်းယဝ်ႉ၊ပဵၼ်မဵဝ်းသင်သေဢမ်ႇဝႃႈ၊မၼ်းဢမ်ႇမူတ်းၸၢင်ႇတေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။ ၵေႃႉဢၼ်တေႃႉဢဝ်ၶိူင်ႈပိူင်ၸိူဝ်းၼၼ်ႉၵႂႃႇၼၼ်ႉၵေႃႈတၵ်းလႆႈသၵ်ႉၶူဝ်းၼုင်ႈမၼ်းသေလႄႈဢၢပ်ႇၼမ်ႉဢေႃႈ။ ပဵၼ်ဢၼ်ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။-
ပေႃးၵေႃႉဢၼ်ပဵၼ်တၢင်းဢၼ်ႁူဝ်ႈၸိုမ်းဢွၵ်ႇယူႇၼၼ်ႉယင်းဢမ်ႇသုၵ်ႈမိုဝ်းလႄႈယိပ်းၵမ်ပိူၼ်ႈတၢင်ႇၵေႃႉမႅၼ်ႈၸိုင်၊ၵူၼ်းၵေႃႉၼၼ်ႉတၵ်းလႆႈသၵ်ႉၶူဝ်းၼုင်ႈမၼ်းသေလႄႈဢၢပ်ႇၼမ်ႉဢေႃႈ။ ပဵၼ်ဢၼ်ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။-
မေႃႈလိၼ်ႁူၺ်ႇလႂ်သေဢမ်ႇဝႃႈ၊ပေႃးမၼ်းတိူဝ်ႉထုၵ်ႇမႅၼ်ႈၸိုင်၊တၵ်းလႆႈပေႃႉလႅဝ်ဢေႃႈ။ ဢၢင်ႇမႆႉဢၼ်မၼ်းတိူဝ်ႉထုၵ်ႇမႅၼ်ႈၼၼ်ႉႁူၺ်ႇလႂ်သေဢမ်ႇဝႃႈ၊တၵ်းလႆႈသုၵ်ႈလၢင်ႉပႅတ်ႈဢေႃႈ။
“ဝၢႆးသေၵေႃႉဢၼ်ပဵၼ်တၢင်းဢၼ်ႁူဝ်ႈၸိုမ်းဢွၵ်ႇၼၼ်ႉယေႃးၵႃႇမၼ်းႁၢႆယဝ်ႉၸိုင်၊မၼ်းတၵ်းလႆႈပႂ်ႉထႃႈယူႇၸဵတ်းဝၼ်းသေယဝ်ႉ၊ၵမ်းၼၼ်ႉမၼ်းတၵ်းလႆႈသၵ်ႉၶူဝ်းၼုင်ႈမၼ်းသေလႄႈဢၢပ်ႇၵႃႈၼႂ်းၼမ်ႉၵႄးဢၼ်လႆယူႇၼၼ်ႉဢေႃႈ။ မၼ်းတၵ်းႁွတ်ႈထိုင်တၢင်းဢၼ်မူတ်းသႂ်ဢေႃႈ။-
မိူဝ်ႈဢၼ်ထူၼ်ႈပႅတ်ႇဝၼ်းၸိုင်၊မၼ်းတၵ်းလႆႈဢဝ်ၼူၵ်ႉတူႈသွင်တူဝ်၊ဢမ်ႇၼၼ်ၵႃၵႄသွင်တူဝ်မႃးၵႃႈတီႈ ထႃႇဝရႃႉၽြႃး၊ ၵႃႈတီႈၽၵ်းတူသုမ်ႉထဵင်ၸဝ်ႈလႄႈပၼ်တီႈယဵၸ်ႈပရေႃးႁဵၵ်ႈ ဢေႃႈ။-
ယဵၸ်ႈပရေႃးႁဵၵ်ႈတၵ်းလႆႈဢဝ်ၼူၵ်ႉတူႈၼႂ်းသွင်တူဝ်ၼၼ်ႉတူဝ်ၼိုင်ႈသၢၵ်ႈလူႇႁႂ်ႈပဵၼ်တၢင်းလူႇဢၼ်ၽေႇဢပျတ်ႈ၊သမ်ႉသၢၵ်ႈလူႇတူဝ်ၼိုင်ႈပဵၼ်တၢင်းလူႇဢၼ်တုတ်ႇၽႆးဢေႃႈ။ ယဵၸ်ႈပရေႃးႁဵၵ်ႈၼၼ်ႉတၵ်းလႆႈႁဵတ်းၸိူဝ်ႉၼင်ႇၼႆၽေႇဢပျတ်ႈပုၼ်ႈၵေႃႉၼၼ်ႉၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢေႃႈ။
“ပေႃးၵူၼ်းၸၢႆးၵေႃႉလႂ်ၼမ်ႉသုၵ်ႉမၼ်းဢွၵ်ႇၸိုင်၊မၼ်းတၵ်းလႆႈဢၢပ်ႇၼမ်ႉတင်းတူဝ်တင်းၶိင်းဢေႃႈ။ ပဵၼ်ဢၼ်ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။-
ၶူဝ်းလဵင်းဢၼ်ပဵၼ်ပိၵ်ႈ၊ဢမ်ႇၼၼ်ပဵၼ်ၼင်ဢၼ်ၼမ်ႉသုၵ်ႉဢိူၵ်ႇသႂ်ႇၼၼ်ႉတၵ်းလႆႈသၵ်ႉပႅတ်ႈဢေႃႈ။ ပဵၼ်ဢၼ်ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။-
ဝၢႆးသေၵူၼ်းၸၢႆးတင်းၵူၼ်းယိင်းၼွၼ်းလူၺ်ႈၵၼ်ယဝ်ႉၼၼ်ႉၸိုင်၊တင်းသွင်ၵေႃႉတၵ်းလႆႈဢၢပ်ႇၼမ်ႉဢေႃႈ။ ပဵၼ်ဢၼ်ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။
“ပေႃးမႄႈယိင်းပဵၼ်တၢင်းဢၼ်ႁူဝ်ႈၸိုမ်းဢွၵ်ႇလိူတ်ႈယူႇဢၼ်ယၢမ်ႈပဵၼ်ၼႃႈလိူၼ်ၵူႈလိူၼ်ၼၼ်ႉၸိုင်၊မၼ်းဢမ်ႇမူတ်းသႂ်ၸူဝ်ႈၸဵတ်းဝၼ်းဢေႃႈ။ ၵေႃႉဢၼ်တိူဝ်ႉထုၵ်ႇမၼ်းၼၼ်ႉၵေႃႈဢမ်ႇမူတ်းၸၢင်ႇတေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။-
ၶိူင်ႈပိူင်ၵႃႈဢၼ်မၼ်းၼင်ႈသႂ်ႇၼွၼ်းသႂ်ႇၼႂ်းၸူဝ်ႈဢၼ်ၼႃႈလိူၼ်မၼ်းမႃးယူႇၼၼ်ႉၵေႃႈပဵၼ်ဢၼ်ဢမ်ႇမူတ်းသႂ်ဢေႃႈ။-
ၵေႃႉဢၼ်တိူဝ်ႉထုၵ်ႇၵူႇတီႈၼွၼ်းမၼ်း၊-
ဢမ်ႇၼၼ်တီႈၼင်ႈမၼ်းလႆႈၼင်ႈယဝ်ႉၼၼ်ႉတၵ်းလႆႈသၵ်ႉၶူဝ်းၼုင်ႈမၼ်းသေလႄႈဢၢပ်ႇၼမ်ႉဢေႃႈ။ ပဵၼ်ဢၼ်ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။-
ၵူႇဢၼ်မၼ်းၼွၼ်းၼၼ်ႉ၊ဢမ်ႇၼၼ်တင်ႇဢၼ်မၼ်းၼင်ႈမဵဝ်းလႂ်သေဢမ်ႇဝႃႈ၊ၵေႃႉဢၼ်တိူဝ်ႉထုၵ်ႇၼၼ်ႉဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။-
ပေႃးၵူၼ်းၸၢႆးၼွၼ်းလူၺ်ႈၵၼ်တင်းမႄႈယိင်းဢၼ်ၼႃႈလိူၼ်မၼ်းမႃးယူႇၼၼ်ႉၸိုင်၊တၢင်းဢၼ်ဢမ်ႇမူတ်းၸၢင်ႇမႄႈယိင်းၼၼ်ႉၸပ်းတီႈၵူၼ်းၸၢႆးသေယဝ်ႉ၊မၼ်းဢမ်ႇမူတ်းသႂ်ၸဵတ်းဝၼ်းလႄႈၵူႇၼွၼ်းဢၼ်လႂ်သေဢမ်ႇဝႃႈ၊ပေႃးမၼ်းၼွၼ်းမႅၼ်ႈၸိုင်၊ဢမ်ႇမူတ်းသႂ်ယဝ်ႉဢေႃႈ။
“ပေႃးမႄႈယိင်းပဵၼ်တၢင်းဢၼ်ႁူဝ်ႈၸိုမ်းဢွၵ်ႇလိူတ်ႈယူႇႁိုင်ၼႃႇၼႂ်းၶိင်ႇမိူဝ်ႈဢၼ်ဢမ်ႇၸႂ်ႈၼႃႈလိူၼ်မၼ်း၊ဢမ်ႇၼၼ်ၵေႃႈပေႃးမၼ်းပဵၼ်တၢင်းဢၼ်ႁူဝ်ႈၸိုမ်းဢွၵ်ႇပူၼ်ႉလိူဝ်သေၶိင်ႇမိူဝ်ႈဢၼ်ပဵၼ်ၼႃႈလိူၼ်မၼ်းၼၼ်ႉၸိုင်၊မၼ်းဢမ်ႇမူတ်းသႂ်ယူႇၸူဝ်ႈဢၼ်ႁူဝ်ႈၸိုမ်းဢွၵ်ႇယူႇၼၼ်ႉလႄႈတၵ်းလႆႈပဵၼ်ဢၼ်ဢမ်ႇမူတ်းၸၢင်ႇမိူၼ်ၸိူဝ်ႉၼင်ႇဢၼ်ၼႃႈလိူၼ်မႃးယူႇၼၼ်ႉဢေႃႈ။-
ၵူႇၵႃႈဢၼ်မၼ်းၼွၼ်း၊တင်ႇၵႃႈဢၼ်မၼ်းၼင်ႈၼႂ်းၸူဝ်ႈဢၼ်ယင်းႁူဝ်ႈၸိုမ်းဢွၵ်ႇယူႇၼၼ်ႉဢမ်ႇမူတ်းသႂ်။-
ၵေႃႉဢၼ်တိူဝ်ႉထုၵ်ႇၶိူင်ႈပိူင်ၸိူဝ်းၼၼ်ႉၵေႃႈဢမ်ႇမူတ်းသႂ်။ တၵ်းလႆႈသၵ်ႉၶူဝ်းၼုင်ႈမၼ်းသေလႄႈဢၢပ်ႇၼမ်ႉဢေႃႈ။ ပဵၼ်ဢၼ်ဢမ်ႇမူတ်းၸၢင်ႇယူႇတေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။-
ဝၢႆးသေတၢင်းဢၼ်ႁူဝ်ႈၸိုမ်းဢွၵ်ႇၼၼ်ႉထၢတ်ႇယိုတ်းၵႂႃႇၸိုင်၊မၼ်းတၵ်းလႆႈပႂ်ႉထႃႈယူႇၸဵတ်းဝၼ်းသေယဝ်ႉၸင်ႇ၊မၼ်းႁွတ်ႈထိုင်တၢင်းဢၼ်မူတ်းသႂ်ဢေႃႈ။-
မိူဝ်ႈဢၼ်ထူၼ်ႈပႅတ်ႇဝၼ်းၸိုင်၊မၼ်းတၵ်းလႆႈဢဝ်ၼူၵ်ႉတူႈသွင်တူဝ်၊ဢမ်ႇၼၼ်ၵႃၵႄသွင်တူဝ်မႃးၸူးတီႈယဵၸ်ႈပရေႃးႁဵၵ်ႈ ၵႃႈတီႈၽၵ်းတူသုမ်ႉထဵင်ၸဝ်ႈဢေႃႈ။-
ယဵၸ်ႈပရေႃးႁဵၵ်ႈၼၼ်ႉတၵ်းလႆႈဢဝ်ၼူၵ်ႉတူႈၸိူဝ်းၼၼ်ႉသၢၵ်ႈလူႇႁႂ်ႈပဵၼ်တၢင်းလူႇဢၼ်ၽေႇဢပျတ်ႈတူဝ်ၼိုင်ႈ၊သမ်ႉသၢၵ်ႈလူႇႁႂ်ႈပဵၼ်ၶိူင်ႈတၢင်းလူႇဢၼ်တုတ်ႇၽႆးတူဝ်ၼိုင်ႈဢေႃႈ။ ယဵၸ်ႈပရေႃးႁဵၵ်ႈတၵ်းလႆႈႁဵတ်းၸိူဝ်ႉၼင်ႇၼႆၽေႇဢပျတ်ႈပုၼ်ႈမႄႈယိင်းၼၼ်ႉၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢေႃႈ။
“ၼင်ႇၼၼ်လႄႈသူတၵ်းလႆႈဢဝ်ၵူၼ်းမဵဝ်း ဢိသရေး၊ တင်းလၢႆႁႂ်ႈၵၢင်းလွတ်ႈတင်းတၢင်းဢၼ်ဢမ်ႇမူတ်းသႂ်ပုၼ်ႈလွင်ႈၼင်ႇႁိုဝ်ၶဝ်တၵ်းဢမ်ႇႁဵတ်းႁႂ်ႈသုမ်ႉထဵင်ၸဝ်ႈဢၼ်မီးယူႇၼႂ်းပၢင်တပ်ႉလႆႈၵူဝ်ႈၵိူၵ်ႇၵႂႃႇဢေႃႈ။ ပေႃးဢမ်ႇၼၼ်ၶဝ်တၵ်းလႆႈၶၢမ်ႇတၢႆဢေႃႈ၊” ဝႃႈၼင်ႇၼႆဢေႃႈ။
ၸိူဝ်းၼႆႉပဵၼ်ထုင်းတြႃးဢၼ်ၵပ်းၵၢႆႇလူၺ်ႈၵၼ်တင်းၵူၼ်းၸၢႆးဢၼ်ပဵၼ်တၢင်းဢၼ်ႁူဝ်ႈၸိုမ်းဢွၵ်ႇ၊ၵေႃႉဢၼ်ၼမ်ႉသုၵ်ႉမၼ်းဢွၵ်ႇယူႇ၊-
ဢိၵ်ႇတင်းမႄႈယိင်းဢၼ်ၼႃႈလိူၼ်မၼ်းမႃးယူႇ၊ဢိၵ်ႇတင်းၵူၼ်းၸၢႆးဢၼ်ၼွၼ်းလူၺ်ႈၵၼ်တင်းမႄႈယိင်းဢၼ်ဢမ်ႇမူတ်းသႂ်ၵွပ်ႈပိူဝ်ႈလိူတ်ႈႁူဝ်ႈၸိုမ်းဢွၵ်ႇယူႇၸိူဝ်းၼၼ်ႉဢေႃႈ။
လိုၼ်းသေလုၵ်ႈၸၢႆး ဢႃႇရုၼ်ႇ၊ သွင်ၵေႃႉလႆႈတၢႆၼႂ်းမိူဝ်ႈဢၼ်ၶဝ်သၢၵ်ႈလူႇၽႆးဢၼ်ဢမ်ႇမူတ်းၸၢင်ႇတီႈ ထႃႇဝရႃႉၽြႃး၊ ၼၼ်ႉၸိုင်၊ ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ လႄႈဝႃႈ၊-
“သင်ႇလၢတ်ႈတီႈပီႈဢၢႆႈမႂ်း ဢႃႇရုၼ်ႇ၊ ႁႂ်ႈမၼ်းၶဝ်ႈၸူးၵႃႈတီႈၽၢႆႇလင်ၽႃႈၵင်ႈထိုင်ၵႃႈၼႂ်းထႃႇၼႃႉတီႈမူတ်းၸၢင်ႇသေပိူၼ်ႈၼႂ်းၶိင်ႇဢၼ်သၢင်ႇထုၵ်ႇၼၼ်ႉၵူၺ်းတႃႉ။ လွင်ႈမၼ်းၸမ်ႉ၊တီႈၼၼ်ႈပဵၼ်တီႈဢၼ်ၵဝ်တၵ်းပေႃႇဢွၵ်ႇမႃးၵႃႈၼႂ်းမွၵ်ႇၵုမ်ႈၵႃႈတီႈပလၢင်ႇဢၼ်ၽေႇဢပျတ်ႈၵႃႈၼိူဝ်တိူၵ်ႈပတိၺိၺ်ႇၸဝ်ႈၼၼ်ႉဢေႃႈ။ ပေႃးမၼ်းဢမ်ႇထွမ်ႇဢဝ်ၸိုင်၊မၼ်းတၵ်းလႆႈတၢႆဢေႃႈ။-
မၼ်းတၵ်းလႆႈၶဝ်ႈထိုင်ၵႃႈၼႂ်းထႃႇၼႃႉတီႈမူတ်းၸၢင်ႇသေပိူၼ်ႈၼၼ်ႉဝၢႆးသေဢၼ်မၼ်းပႃးဢဝ်တင်းဝူဝ်းပေႃႈဢွၼ်ႇဢၼ်ဢသၢၵ်ႈယင်းၼုမ်ႇပုၼ်ႈတၢင်းလူႇဢၼ်ၽေႇဢပျတ်ႈဢိၵ်ႇတင်းသူဝ်းပေႃႈပုၼ်ႈတၢင်းလူႇဢၼ်တုတ်ႇၽႆးၼၼ်ႉၵူၺ်းဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ သမ်ႉသင်ႇလၢတ်ႈထႅင်ႈလႄႈဝႃႈ၊ “ၸူဝ်ႈဢၼ် ဢႃႇရုၼ်ႇ၊ ဢမ်ႇပႆႇၶဝ်ႈထိုင်ၵႃႈၼႂ်းထႃႇၼႃႉတီႈမူတ်းၸၢင်ႇသေပိူၼ်ႈၼၼ်ႉၸိုင်၊မၼ်းတၵ်းလႆႈဢၢပ်ႇၼမ်ႉသေယဝ်ႉ၊ၼုင်ႈမႆၶူဝ်းၼုင်ႈယဵၸ်ႈပရေႃးႁဵၵ်ႈ ဢၼ်ပဵၼ်၊သိူဝ်ႈၽႃႈပၢၼ်ႇ၊ၵူၼ်ၽႃႈပၢၼ်ႇ၊သၢႆႁတ်ႉဢႅဝ်၊ၽႃႈၶဵၼ်းႁူဝ်ၸိူဝ်းၼၼ်ႉဢေႃႈ။
“မူႇၵူၼ်းၸိူဝ်းၵူၼ်း ဢိသရေး၊ တင်းလၢႆတၵ်းလႆႈပၼ်ပႄႉသွင်တူဝ်တီႈ ဢႃႇရုၼ်ႇ၊ ပုၼ်ႈတၢင်းလူႇဢၼ်ၽေႇဢပျတ်ႈ၊ဢိၵ်ႇတင်းသူဝ်းပေႃႈတူဝ်ၼိုင်ႈပုၼ်ႈတၢင်းလူႇဢၼ်တုတ်ႇၽႆးဢေႃႈ။-
မၼ်းတၵ်းလႆႈသၢၵ်ႈလူႇဝူဝ်းပေႃႈတူဝ်ၼိုင်ႈႁႂ်ႈပဵၼ်တၢင်းလူႇဢၼ်ၽေႇဢပျတ်ႈပုၼ်ႈဢပျတ်ႈတူဝ်ၸဝ်ႈၵဝ်ႇတင်းဢပျတ်ႈၵူၼ်းႁိူၼ်းၵူၼ်းယေးမၼ်းဢေႃႈ။-
လိုၼ်းၼၼ်ႉၸင်ႇမၼ်းတၵ်းလႆႈဢဝ်ပႄႉပေႃႈသွင်တူဝ်ၼၼ်ႉမႃးၵႃႈတီႈ ထႃႇဝရႃႉၽြႃး၊ ၵႃႈတီႈၽၵ်းတူသုမ်ႉထဵင်ၸဝ်ႈဢေႃႈ။-
ၵႃႈတီႈၼၼ်ႈမၼ်းတၵ်းလႆႈဢဝ်မၢၵ်ႇႁိၼ်သွင်ႁူၺ်ႇတူၵ်းၸႃႇၵွၵ်ႈ၊ႁူၺ်ႇၼိုင်ႈမၢႆဝႆႉဝႃႈ၊ ‘ပုၼ်ႈ ထႃႇဝရႃႉၽြႃး၊ ’ ႁူၺ်ႇၼိုင်ႈသမ်ႉမၢႆဝႆႉဝႃႈ၊ ‘ပုၼ်ႈ ဢၸႃႇၸေးလႃႉ၊ ’ ဢေႃႈ။-
ဢႃႇရုၼ်ႇ၊ တၵ်းလႆႈဢဝ်ပႄႉပေႃႈဢၼ်တူၵ်းၸႃႇၵွၵ်ႈလႄႈပဵၼ်ပုၼ်ႈ ထႃႇဝရႃႉၽြႃး၊ ၼၼ်ႉသၢၵ်ႈလူႇတီႈ ထႃႇဝရႃႉၽြႃး၊ ပဵၼ်ပုၼ်ႈတၢင်းလူႇဢၼ်ၽေႇဢပျတ်ႈဢေႃႈ။-
ပႄႉပေႃႈဢၼ်တူၵ်းၸႃႇၵွၵ်ႈလႄႈပဵၼ်ပုၼ်ႈ ဢၸႃႇၸေးလႃႉ၊ ၼၼ်ႉ၊တၵ်းလႆႈႁႂ်ႈဢသၢၵ်ႈလိပ်းယူႇသေလႄႈဢဝ်သၢၵ်ႈၵၢပ်ႈၵႃႈတီႈၽၢႆႇၼႃႈ ထႃႇဝရႃႉၽြႃး၊ သေယဝ်ႉ၊ပွႆႇၸႂ်ႉပႄႉၼၼ်ႉၵႂႃႇၵႃႈၼႂ်းထိူၼ်ႇလႅင်ႉ၊ၵႂႃႇၸူး ဢၸႃႇၸေးလႃႉ၊ ပုၼ်ႈတႃႇတၵ်းပႃးဢဝ်ဢပျတ်ႈၵူၼ်းတင်းလၢႆၵႂႃႇဢေႃႈ။
“ၼႂ်းမိူဝ်ႈဢၼ် ဢႃႇရုၼ်ႇ၊ သၢၵ်ႈလူႇဝူဝ်းပေႃႈႁႂ်ႈပဵၼ်တၢင်းလူႇဢၼ်ၽေႇဢပျတ်ႈပုၼ်ႈမၼ်းတင်းၵူၼ်းႁိူၼ်းၵူၼ်းယေးမၼ်းၼၼ်ႉ၊-
မၼ်းတၵ်းလႆႈဢဝ်ၽၢင်ၽႆးဢၼ်သႂ်ႇထၢၼ်ႇၽႆးလႅင်တဵမ်တဵမ်ဝႆႉဢၼ်မီးၵႃႈၼိူဝ်ၶဵင်ႇတၢင်းလူႇယူႇၼၼ်ႉ၊ဢိၵ်ႇတင်းမုၼ်ႈၽွင်ၼၢမ်ႇသႃႇႁွမ်ဢၼ်ဢွၼ်ႇလီၽွင်လီၼၼ်ႉၵွပ်ႇမိုဝ်းၼိုင်ႈတဵမ်တဵမ်သေလႄႈဢဝ်မႃးၵႃႈတီႈထႃႇၼႃႉတီႈဢၼ်မူတ်းၸၢင်ႇသေပိူၼ်ႈဢေႃႈ။-
ၵႃႈတီႈၽၢႆႇၼႃႈ ထႃႇဝရႃႉၽြႃး၊ ၼၼ်ႉမၼ်းတၵ်းလႆႈဢဝ်ၼၢမ်ႇသႃႇႁွမ်ၼၼ်ႉသႂ်ႇၵႃႈၼႂ်းၽႆးသေလႄႈ၊ဢၢႆၵႂၼ်းၼၢမ်ႇသႃႇတၵ်းႁူမ်ႇသုမ်ႇလပ်ႉပလၢင်ႇဢၼ်ၽေႇဢပျတ်ႈတိူၵ်ႈပတိၺိၺ်ႇၸဝ်ႈပုၼ်ႈလွင်ႈၼင်ႇႁိုဝ်မၼ်းတၵ်းဢမ်ႇႁၼ်ပလၢင်ႇၼၼ်ႉလႄႈလႆႈၵၢင်းလွတ်ႈတင်းတၢင်းတၢႆဢေႃႈ။-
မၼ်းတၵ်းလႆႈဢဝ်လိူတ်ႈဝူဝ်းၼၼ်ႉၵမ်ႈၽွင်ႈလႄႈဢဝ်ၼိဝ်ႉၸိမၼ်းၸုမ်ႇၽႅတ်းသႂ်ႇၼႃႈပလၢင်ႇပုၼ်ႈဢၼ်ၽေႇဢပျတ်ႈၼၼ်ႉသေယဝ်ႉ၊သမ်ႉတၵ်းလႆႈၽႅတ်းသႂ်ႇၽၢႆႇၼႃႈတိူၵ်ႈပတိၺိၺ်ႇၸဝ်ႈၼၼ်ႉၸဵတ်းၵမ်းဢေႃႈ။
“လိုၼ်းၼၼ်ႉမၼ်းတၵ်းလႆႈႁႅမ်ပႄႉတူဝ်ဢၼ်ပဵၼ်ပုၼ်ႈတၢင်းလူႇဢၼ်ၽေႇဢပျတ်ႈပုၼ်ႈၵူၼ်းတင်းလၢႆၼၼ်ႉသေယဝ်ႉ၊ဢဝ်လိူတ်ႈမႃးၵႃႈၼႂ်းထႃႇၼႃႉတီႈမူတ်းၸၢင်ႇသေပိူၼ်ႈလႄႈၽႅတ်းသႂ်ႇၵႃႈၼိူဝ်ပလၢင်ႇပုၼ်ႈဢၼ်ၽေႇဢပျတ်ႈဢိၵ်ႇတင်းၵႃႈတီႈၽၢႆႇၼႃႈတိူၵ်ႈပတိၺိၺ်ႇၸဝ်ႈမိူၼ်ၸိူဝ်ႉၼင်ႇဢၼ်မၼ်းဢဝ်လိူတ်ႈဝူဝ်းၽႅတ်းသႂ်ႇၼၼ်ႉဢေႃႈ။-
ၼင်ႇၼၼ်လႄႈမၼ်းတၵ်းလႆႈႁဵတ်းႁႂ်ႈထႃႇၼႃႉတီႈမူတ်းၸၢင်ႇသေပိူၼ်ႈၼၼ်ႉမူတ်းၸၢင်ႇမႃး၊ၵွပ်ႈပိူဝ်ႈတၢင်းဢၼ်ၵူၼ်းမဵဝ်း ဢိသရေး၊ ၶဝ်ဢမ်ႇမူတ်းၸၢင်ႇ၊ၶဝ်ၽိတ်းပိူင်ႈပူၼ်ႉလိူဝ်လႄႈမီးဢပျတ်ႈၼၼ်ႉဢေႃႈ။ သုမ်ႉထဵင်ၸဝ်ႈၵေႃႈ၊ၵွပ်ႈပိူဝ်ႈဢၼ်မီးယူႇၼႂ်းၵၢင်ပၢင်ႇတပ်ႉတီႈဢၼ်ဢမ်ႇမူတ်းၸၢင်ႇၼၼ်ႉလႄႈတၵ်းလႆႈႁဵတ်းႁႂ်ႈမူတ်းၸၢင်ႇမႃးၼင်ႇၵဝ်ႇဢေႃႈ။-
တႄႇဢဝ်ၶိင်ႇဢၼ် ဢႃႇရုၼ်ႇ၊ ၶဝ်ႈၵႃႈၼႂ်းထႃႇၼႃႉတီႈမူတ်းၸၢင်ႇသေပိူၼ်ႈၵႂႃႇႁႂ်ႈလႆႈႁဵတ်းမၢင်ႇၵလႃႇတၢင်းဢၼ်ႁႂ်ႈမူတ်းၸၢင်ႇတေႃႇထိုင်ႁွတ်ႈၶိင်ႇဢၼ်မၼ်းဢွၵ်ႇမႃးၼၼ်ႉၽူႈလႂ်ဢမ်ႇလႆႈယူႇၵႃႈၼႂ်းသုမ်ႉထဵင်ၸဝ်ႈသေၵေႃႉသေၵူၼ်း။ မိူဝ်ႈဢၼ်မၼ်းႁဵတ်းမၢင်ႇၵလႃႇဢၼ်ႁႂ်ႈမူတ်းၸၢင်ႇပုၼ်ႈမၼ်း၊ပုၼ်ႈၵူၼ်းႁိူၼ်းၵူၼ်းယေးမၼ်းတင်းပုၼ်ႈမူႇၵူၼ်းၸိူဝ်းၵူၼ်းတင်းလၢႆယဝ်ႉတူဝ်ႈယဝ်ႉၼၼ်ႉၸိုင်၊-
မၼ်းတၵ်းလႆႈဢွၵ်ႇၵႂႃႇၸူးၵႃႈတီႈၶဵင်ႇတၢင်းလူႇဢၼ်မီးၵႃႈတီႈၽၢႆႇၼႃႈ ထႃႇဝရႃႉၽြႃး၊ ၼၼ်ႉႁႂ်ႈလႆႈႁဵတ်းႁႂ်ႈၶဵင်ႇတၢင်းလူႇၼၼ်ႉမူတ်းၸၢင်ႇဢေႃႈ။ မၼ်းတၵ်းလႆႈဢဝ်လိူတ်ႈဝူဝ်း၊လိူတ်ႈပႄႉၵမ်ႈၽွင်ႈတႃးၵႃႈတီႈၶဝ်လႅမ်ၸိူဝ်းဢၼ်မီးႁွပ်ႈႁွပ်ႈၵႃႈတီႈၸဵင်ႇၶဵင်ႇတၢင်းလူႇၼၼ်ႉဢေႃႈ။-
မၼ်းတၵ်းလႆႈဢဝ်ၼိဝ်ႉၸိမၼ်းၸုမ်ႇလိူတ်ႈသေလႄႈၽႅတ်းသႂ်ႇတီႈၶဵင်ႇတၢင်းလူႇၼၼ်ႉၸဵတ်းၵမ်းဢေႃႈ။ ၼင်ႇၼၼ်လႄႈမၼ်းတၵ်းလႆႈႁဵတ်းႁႂ်ႈၶဵင်ႇတၢင်းလူႇမူတ်းၸၢင်ႇဢၼ်လွတ်ႈသေဢပျတ်ႈၵူၼ်းမဵဝ်း ဢိသရေး၊ တင်းလၢႆဢေႃႈ။
“ၵမ်းၼၼ်ႉ၊မိူဝ်ႈဢၼ်မၼ်းႁဵတ်းမၢင်ႇၵလႃႇတၢင်းဢၼ်ႁႂ်ႈမူတ်းၸၢင်ႇပုၼ်ႈထႃႇၼႃႉတီႈမူတ်းၸၢင်ႇသေပိူၼ်ႈ၊ပုၼ်ႈသုမ်ႉထဵင်ၸဝ်ႈပုၼ်ႈၶဵင်ႇတၢင်းလူႇၸိူဝ်းၼၼ်ႉယဝ်ႉတူဝ်ႈလီငၢမ်းယဝ်ႉၼၼ်ႉၸိုင်၊မၼ်းတၵ်းလႆႈဢဝ်ပႄႉတူဝ်ဢၼ်ဢသၢၵ်ႈလိပ်းတူဝ်ဢၼ်တူၵ်းၸႃႇၵွၵ်ႈႁႂ်ႈပဵၼ်ပုၼ်ႈ ဢၸႃႇၸေးလႃႉ၊ ၼၼ်ႉသၢၵ်ႈၵၢပ်ႈတီႈ ထႃႇဝရႃႉၽြႃး၊ ဢေႃႈ။-
မၼ်းတၵ်းလႆႈဢဝ်မိုဝ်းမၼ်းသွင်ၶွၼ်တၢင်ႇသႂ်ႇၵႃႈၼိူဝ်ႁူဝ်ပႄႉၼၼ်ႉသေလႄႈၽုၺ်ႇဢွၵ်ႇၼႄပျႃးတုၸရိူၵ်ႈဢပျတ်ႈၵႃႈဢၼ်ၵူၼ်းမဵဝ်း ဢိသရေး၊ ၶဝ်ၽိတ်းပိူင်ႈပူၼ်ႉလိူဝ်ၵူႈၸိူဝ်ႉၵူႈပိူင်ၼၼ်ႉပုတ်ႈတၢင်ႇသႂ်ႇၵႃႈၼိူဝ်ႁူဝ်ပႄႉၼၼ်ႉဢေႃႈ။ မိူဝ်ႈၼၼ်ႉတၵ်းလႆႈၸႂ်ႉၵူၼ်းၵေႃႉၼိုင်ႈဢၼ်လိူၵ်ႈဢဝ်ဝႆႉၼၼ်ႉႁႂ်ႈႁေႃႈပႄႉၼၼ်ႉၵႂႃႇပွႆႇပႅတ်ႈၵႃႈၼႂ်းထိူၼ်ႇလႅင်ႉသေဢေႃႈ။-
ပႄႉၼၼ်ႉတၵ်းတေပႃးဢဝ်တုၸရိူၵ်ႈဢပျတ်ႈၶဝ်ၵႃႈမီးၼၼ်ႉလႄႈၵႂႃႇၸူးၵႃႈတီႈဢၼ်ၵူၼ်းဢမ်ႇယူႇၼၼ်ႉဢေႃႈ။
“မိူဝ်ႈၼၼ်ႉ၊ ဢႃႇရုၼ်ႇ၊ တၵ်းလႆႈၶဝ်ႈၵႃႈၼႂ်းသုမ်ႉထဵင်ၸဝ်ႈလႄႈထွတ်ႇၶူဝ်းၼုင်ႈမၼ်းဢၼ်မၼ်းၼုင်ႈၶဝ်ႈၵႂႃႇၵႃႈၼႂ်းထႃႇၼႃႉတီႈမူတ်းၸၢင်ႇသေပိူၼ်ႈၼၼ်ႉသေလႄႈဝႆႉၵႃႈတီႈၼၼ်ႈဢေႃႈ။-
မၼ်းတၵ်းလႆႈဢၢပ်ႇၼမ်ႉၵႃႈၼႂ်းထႃႇၼႃႉတီႈဢၼ်မူတ်းၸၢင်ႇၼၼ်ႉလႄႈၶိုၼ်းၼုင်ႈၶူဝ်းၵဝ်ႇမၼ်းသေယဝ်ႉ၊သမ်ႉဢွၵ်ႇမႃးသၢၵ်ႈလူႇၶိူင်ႈတၢင်းလူႇဢၼ်တုတ်ႇၽႆးပုၼ်ႈဢၼ်တၵ်းၽေႇဢပျတ်ႈမၼ်းတင်းဢပျတ်ႈၵူၼ်းတင်းလၢႆဢေႃႈ။-
မၼ်းတၵ်းလႆႈဢဝ်ၵွၼ်ႈၶႆၵွၼ်ႈမၼ်းတူဝ်တၢင်းလူႇၼၼ်ႉတုတ်ႇၽႆးၵႃႈၼိူဝ်ၶဵင်ႇတၢင်းလူႇႁႂ်ႈပဵၼ်ပုၼ်ႈတၢင်းလူႇဢၼ်ၽေႇဢပျတ်ႈဢေႃႈ။-
ၵူၼ်းၵေႃႉဢၼ်ႁေႃႈပႄႉၵႂႃႇပွႆႇပႅတ်ႈၵႃႈၼႂ်းထိူၼ်ႇႁႂ်ႈၵႂႃႇၸူးၵႃႈတီႈ ဢၸႃႇၸေးလႃႉ၊ ၼၼ်ႉတၵ်းလႆႈသၵ်ႉၶူဝ်းၼုင်ႈမၼ်းလႄႈဢၢပ်ႇၼမ်ႉယဝ်ႉၸင်ႇမၼ်းတၵ်းလႆႈၶိုၼ်းၶဝ်ႈၵႃႈၼႂ်းပၢင်တပ်ႉဢေႃႈ။-
ဝူဝ်းပေႃႈတင်းပႄႉပေႃႈတူဝ်ဢၼ်ပဵၼ်တၢင်းလူႇဢၼ်ၽေႇဢပျတ်ႈ၊ဢၼ်လိူတ်ႈၶဝ်လႆႈၶၢမ်ႇတၢင်းဢၼ်ဢဝ်ၶဝ်ႈၵႂႃႇၵႃႈၼႂ်းထႃႇၼႃႉတီႈမူတ်းၸၢင်ႇသေပိူၼ်ႈႁႂ်ႈလႆႈႁဵတ်းတၢင်းဢၼ်ၽေႇဢပျတ်ႈၼၼ်ႉၸမ်ႉ၊တၵ်းလႆႈဢဝ်ဢွၵ်ႇၵႂႃႇၵႃႈၼွၵ်ႈပၢင်တပ်ႉလႄႈဢဝ်ၼင်ၶဝ်၊ၼိူဝ်ႉၶဝ်၊ၶီႈၼုမ်ႇၶဝ်တုတ်ႇၽႆးပႅတ်ႈတင်းမူတ်းဢေႃႈ။-
ၵူၼ်းၵေႃႉဢၼ်တုတ်ႇၽႆးၼၼ်ႉတၵ်းလႆႈသၵ်ႉၶူဝ်းၼုင်ႈမၼ်းလႄႈဢၢပ်ႇၼမ်ႉယဝ်ႉၸင်ႇမၼ်းတၵ်းလႆႈၶိုၼ်းၶဝ်ႈၵႃႈၼႂ်းပၢင်တပ်ႉဢေႃႈ။
“ထုင်းတြႃးၸိူဝ်းဢၼ်သူတၵ်းလႆႈပႂ်ႉၵမ်ပႂ်ႉၸွမ်းဝၼ်းလိုၼ်းမိူဝ်းၼႃႈတႃႇသေႇဢမ်ႇထၢတ်ႇၸမ်ႉ၊ၼႂ်းဝၼ်းလိူၼ်ၸဵတ်းလႆႈသၢဝ်းဝၼ်းၼၼ်ႉသူၵူၼ်းမဵဝ်း ဢိသရေး၊ ဢိၵ်ႇတင်းၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈပိုင်ႈယူႇၸွမ်းသူတၵ်းလႆႈဢွၼ်ၵၼ်ၵမ်သိၼ်ၶႅင်ၶႅင်ယူႇလႄႈဢမ်ႇလႆႈႁဵတ်းၵႃႈသင်လႃးလႃး။-
လွင်ႈမၼ်းၸမ်ႉ၊ၼႂ်းဝၼ်းၼၼ်ႉယဵၸ်ႈပရေႃးႁဵၵ်ႈတၵ်းႁဵတ်းတၢင်းဢၼ်ၽေႇဢပျတ်ႈႁႂ်ႈသူလႆႈမူတ်းၸၢင်ႇဢေႃႈ။ သူတၵ်းလႆႈၵၢင်းလွတ်ႈတင်းဢပျတ်ႈၵႃႈမီး၊ၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢေႃႈ။-
ဝၼ်းၼၼ်ႉပဵၼ်ဝၼ်းၵမ်သိၼ်ပုၼ်ႈဢၼ်သူတၵ်းလႆႈလိုဝ်ႈယူႇၼိမ်ၼိမ်လီလီလႄႈဢွၼ်ၵၼ်ၵမ်သိၼ်ၶႅင်ၶႅင်ယူႇဢေႃႈ။ ပဵၼ်ထုင်းဢၼ်တၵ်းလႆႈပႂ်ႉၵမ်ပႂ်ႉၸွမ်းဝၼ်းလိုၼ်းမိူဝ်းၼႃႈတႃႇသေႇဢမ်ႇထၢတ်ႇဢေႃႈ။-
ၵေႃႉဢၼ်ပဵၼ်ၶုၼ်ယဵၸ်ႈပရေႃးႁဵၵ်ႈ ဢၼ်ၶၢမ်ႇဢဝ်ၽိၵ်ႈသိၵ်ႈၼႂ်းဢရႃႇပေႃႈမၼ်းၼၼ်ႉတၵ်းလႆႈဢွၼ်ႁူဝ်သေႁဵတ်းမၢင်ႇၵလႃႇဢၼ်ၽေႇဢပျတ်ႈၼႆႉဢေႃႈ။ မၼ်းတၵ်းလႆႈၼုင်ႈမႆၶူဝ်းၼုင်ႈယဵၸ်ႈပရေႃးႁဵၵ်ႈသေလႄႈ၊-
ႁဵတ်းမၢင်ႇၵလႃႇဢၼ်ႁႂ်ႈမူတ်းၸၢင်ႇပုၼ်ႈထႃႇၼႃႉတီႈမူတ်းၸၢင်ႇသေပိူၼ်ႈ၊ပုၼ်ႈသုမ်ႉထဵင်ၸဝ်ႈ၊ပုၼ်ႈၶဵင်ႇတၢင်းလူႇ၊ပုၼ်ႈယဵၸ်ႈပရေႃးႁဵၵ်ႈတင်းလၢႆဢိၵ်ႇတင်းပုၼ်ႈမူႇၵူၼ်းၸိူဝ်းၵူၼ်းတင်းသဵင်ႈတင်းမူတ်းဢေႃႈ။-
ထုင်းတြႃးၸိူဝ်းၼႆႉတၵ်းလႆႈပႂ်ႉၵမ်ပႂ်ႉၸွမ်းဝၼ်းလိုၼ်းမိူဝ်းၼႃႈတႃႇသေႇဢမ်ႇထၢတ်ႇဢေႃႈ။ မၢင်ႇၵလႃႇတၢင်းဢၼ်ၽေႇဢပျတ်ႈၼႆႉၵေႃႈတၵ်းလႆႈႁဵတ်းယေႈပီယေႈပွၵ်ႈႁႂ်ႈၵူၼ်းမဵဝ်း ဢိသရေး၊ တင်းလၢႆလႆႈမူတ်းၸၢင်ႇလႄႈၵၢင်းလွတ်ႈတင်းဢပျတ်ႈတုၸရိူၵ်ႈၶဝ်ၵႃႈမီးဢေႃႈ၊” ဝႃႈၼင်ႇၼႆဢေႃႈ။ မူဝ်းသေႇ၊ ၵေႃႈႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈမၼ်းဝႆႉၼၼ်ႉဢေႃႈ။
ၸဝ်ႈထႃႇဝရႃႉၽြႃး၊ ပၼ်ထုင်းတြႃးၸိူဝ်းၼႆႉၵႃႈတီႈ မူဝ်းသေႇ၊-
ႁႂ်ႈမၼ်းသင်ႇလၢတ်ႈတီႈ ဢႃႇရုၼ်ႇ၊ တင်းလုၵ်ႈၸၢႆးမၼ်းတင်းလၢႆဢိၵ်ႇတင်းၵူၼ်းမဵဝ်း ဢိသရေး၊ တင်းလၢႆလႄႈဝႃႈၸမ်ႉ၊-
“ပေႃးၼႂ်းၵူၼ်းမဵဝ်း ဢိသရေး၊ သေၵေႃႉၵေႃႉႁႅမ်ဝူဝ်း၊ပႄႉ၊သူဝ်း၊ၵႃႈၼႂ်းပၢင်တပ်ႉ၊ဢမ်ႇၼၼ်ႁႅမ်ၵႃႈၼွၵ်ႈပၢင်တပ်ႉသေလႄႈ၊-
ယင်းဢမ်ႇဢဝ်မႃးၵႃႈတီႈၽၵ်းတူသုမ်ႉထဵင်ၸဝ်ႈႁႂ်ႈလႆႈသၢၵ်ႈလူႇတီႈ ထႃႇဝရႃႉၽြႃး၊ ၵႃႈတီႈၽၢႆႇၼႃႈသုမ်ႉထဵင်ၸဝ်ႈ ထႃႇဝရႃႉၽြႃး၊ ၼၼ်ႉၸိုင်၊ၵေႃႉၼၼ်ႉၽိတ်းပိူင်ႈပူၼ်ႉလိူဝ်တြႃးၸဝ်ႈယဝ်ႉဢေႃႈ။ မၼ်းလႆႈထွၵ်ႇလိူတ်ႈထွၵ်ႇယၢင်ယဝ်ႉလႄႈ၊တၵ်းလႆႈပႄႇမၼ်းၼၼ်ႉပႅတ်ႈသေတၢင်းဢၼ်ပဵၼ်ၵူၼ်းၽြႃးပဵၼ်ၸဝ်ႈဢေႃႈ။-
ဢမိင်ႉၸဝ်ႈၼႆႉၶႂ်ႈဝႃႈ၊ၵႃႈဢၼ်ၵူၼ်းမဵဝ်း ဢိသရေး၊ ၶဝ်ယၢမ်ႈႁဵတ်းတၢင်းလူႇၵႃႈတီႈၵၢင်ပၢင်ႇၵၢင်ပိဝ်ၼၼ်ႉဢဝ်ၼႆႉၵႂႃႇမိူဝ်းၼႃႈၶဝ်တၵ်းလႆႈဢဝ်တူဝ်တၢင်းလူႇၼၼ်ႉမႃးၸူးတီႈယဵၸ်ႈပရေႃးႁဵၵ်ႈ လႄႈသၢၵ်ႈလူႇတီႈ ထႃႇဝရႃႉၽြႃး၊ ၵႃႈတီႈၽၢႆႇၼႃႈၽၵ်းတူသုမ်ႉထဵင်ၸဝ်ႈႁႂ်ႈပဵၼ်တၢင်းလူႇမိၵ်ႈသႁႃႇယႃႉဢေႃႈ။-
ယဵၸ်ႈပရေႃးႁဵၵ်ႈၼၼ်ႉတၵ်းလႆႈဢဝ်လိူတ်ႈသတ်းၼၼ်ႉၽႅတ်းသႂ်ႇၽႃၶဵင်ႇတၢင်းလူႇဢၼ်မီးၵႃႈႁိမ်းၽၵ်းတူသုမ်ႉထဵင်ၸဝ်ႈလႄႈဢဝ်ၵွၼ်ႈၶႆၵွၼ်ႈမၼ်းတုတ်ႇၽႆးႁႂ်ႈပဵၼ်ဢၢႆႁွမ်ဢၢႆႁူၺ်းဢၼ်ထုၵ်ႇၸႂ်မႅၼ်ႈၸႂ် ထႃႇဝရႃႉၽြႃး၊ ဢေႃႈ။-
ၶဝ်ၼၼ်ႉတၵ်းဢမ်ႇလႆႈသဵတ်ႈၸႃႇလုတီႈ ထႃႇဝရႃႉၽြႃး၊ လူၺ်ႈတၢင်းဢၼ်ႁႅမ်တူဝ်တၢင်းလူႇၶဝ်ၵႃႈတီႈၵၢင်ပၢင်ႇၵၢင်ပိဝ်လႄႈသၢၵ်ႈလူႇတီႈၽီႁၢႆႉမိူၼ်ၸိူဝ်ႉၼင်ႇဢၼ်ၽိတ်းပိူင်ႈမႃးယဝ်ႉဢွၼ်တၢင်းၸိူဝ်းၼၼ်ႉ။ ဢဝ်ၼႆႉၵႂႃႇဝၼ်းလိုၼ်းမိူဝ်းၼႃႈၵူၼ်းမဵဝ်း ဢိသရေး၊ တင်းလၢႆတၵ်းလႆႈပႂ်ႉၵမ်ပႂ်ႉၸွမ်းထုင်းတြႃးၼႆႉၵႂႃႇတႃႇသေႇသိုပ်ႇသိုပ်ႇတၢမ်တၢမ်ဢေႃႈ။
“ၵူၼ်းမဵဝ်း ဢိသရေး၊ သေဢမ်ႇဝႃႈ၊ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈပိုင်ႈယူႇၸွမ်းၼႂ်းသူသေဢမ်ႇဝႃႈ၊ၵေႃႉဢၼ်သၢၵ်ႈလူႇၶိူင်ႈတၢင်းလူႇဢၼ်တုတ်ႇၽႆး၊ဢမ်ႇၼၼ်တၢင်းလူႇတၢင်ႇၸိူဝ်ႉတၢင်ႇမဵဝ်းသေတီႈသေလႅၼ်လႄႈ၊-
ယင်းဢမ်ႇဢဝ်မႃးၵႃႈတီႈႁိမ်းၽၵ်းတူသုမ်ႉထဵင်ၸဝ်ႈႁႂ်ႈလႆႈသၢၵ်ႈလူႇတီႈ ထႃႇဝရႃႉၽြႃး၊ ၸိုင်၊တၵ်းလႆႈပႄႇမၼ်းပႅတ်ႈသေတၢင်းဢၼ်ပဵၼ်ၵူၼ်းၽြႃးပဵၼ်ၸဝ်ႈဢေႃႈ။
“ၵူၼ်းမဵဝ်း ဢိသရေး၊ သေဢမ်ႇဝႃႈ၊ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈပိုင်ႈယူႇၸွမ်းသူသေဢမ်ႇဝႃႈ၊ပေႃးမၼ်းၵိၼ်လိူတ်ႈသေမဵဝ်းမဵဝ်းၸိုင်၊ၵဝ်တၵ်းဝၢႆႇၼႃႈပႅတ်ႈမၼ်းလႄႈပႄႇမၼ်းပႅတ်ႈသေတၢင်းဢၼ်ပဵၼ်ၵူၼ်းၽြႃးပဵၼ်ၸဝ်ႈဢေႃႈ။-
လွင်ႈမၼ်းၸမ်ႉ၊ဢသၢၵ်ႈတူဝ်ၶၼ်ႇထႃႇတႄႇယူႇၵႃႈတီႈလိူတ်ႈဢေႃႈ။ ၵွပ်ႈပိူဝ်ႈၸိူဝ်ႉၼင်ႇၼႆၸင်ႇၵဝ်ပၼ်ဢမိင်ႉႁႂ်ႈသူဢဝ်လိူတ်ႈၵႃႈမီးထွၵ်ႇၵႃႈၼိူဝ်ၶဵင်ႇတၢင်းလူႇႁႂ်ႈပဵၼ်လွင်ႈတၢင်းဢၼ်တၵ်းပႃးဢဝ်ဢပျတ်ႈၵူၼ်းတင်းလၢႆၵႂႃႇမူတ်းမူတ်းဢေႃႈ။ လိူတ်ႈၸိုင်၊ပဵၼ်ဢသၢၵ်ႈလႄႈၽေႇဢပျတ်ႈဢေႃႈ။-
ၵွပ်ႈပိူဝ်ႈလွင်ႈတၢင်းၼႆႉလႄႈၵဝ်မီးဢမိင်ႉတီႈၵူၼ်းမဵဝ်း ဢိသရေး၊ တင်းလၢႆဢိၵ်ႇတင်းၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈပိုင်ႈယူႇၸွမ်းၼႂ်းသူၼၼ်ႉလႄႈဝႃႈ၊သူတၵ်းဢမ်ႇလႆႈၵိၼ်လိူတ်ႈဢေႃႈ။
“ၵူၼ်းမဵဝ်း ဢိသရေး၊ သေဢမ်ႇဝႃႈ၊ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈပိုင်ႈယူႇၸွမ်းသူသေဢမ်ႇဝႃႈ၊ပေႃးၵႂႃႇလႃႈထိူၼ်ႇလႄႈယိုဝ်းလႆႈတူဝ်ထိူၼ်ႇ၊ဢမ်ႇၼၼ်လႆႈၼူၵ်ႉမဵဝ်းဢၼ်ၵိၼ်လႆႈၼၼ်ႉၸိုင်၊တၵ်းလႆႈထွၵ်ႇလိူတ်ႈမၼ်းပႅတ်ႈလႄႈဢဝ်လိၼ်ၵူမ်ပႅတ်ႈဢေႃႈ။-
လွင်ႈမၼ်းၸမ်ႉ၊လိူတ်ႈၸိုင်ပဵၼ်ဢသၢၵ်ႈၵႃႈတီႈသတ်ႉတဝႃႇၵႃႈမီးတင်းသဵင်ႈတင်းလူင်ဢေႃႈ။ ၵွပ်ႈပိူဝ်ႈလွင်ႈတၢင်းၼႆႉလႄႈၵဝ်မီးဢမိင်ႉတီႈၵူၼ်းမဵဝ်း ဢိသရေး၊ တင်းလၢႆတၵ်းဢမ်ႇလႆႈၵိၼ်လိူတ်ႈဢေႃႈ။ ၵေႃႉဢၼ်ၵိၼ်ၼၼ်ႉၸမ်ႉ၊တၵ်းလႆႈပႄႇမၼ်းပႅတ်ႈသေတၢင်းဢၼ်ပဵၼ်ၵူၼ်းၽြႃးပဵၼ်ၸဝ်ႈဢေႃႈ။
“ၵူၼ်းမဵဝ်း ဢိသရေး၊ သေဢမ်ႇဝႃႈ၊ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈပိုင်ႈယူႇၸွမ်းၼႂ်းသူသေဢမ်ႇဝႃႈ၊ပေႃးသေၵေႃႉၵေႃႉၵိၼ်ၼိူဝ်ႉတူဝ်ဢၼ်တၢႆၵူၺ်းမၼ်း၊ဢမ်ႇၼၼ်တူဝ်ဢၼ်တူဝ်သတ်းႁၢႆႉၶူပ်းတၢႆၼၼ်ႉၸိုင်၊မၼ်းတၵ်းလႆႈသၵ်ႉၶူဝ်းၼုင်ႈမၼ်းလႄႈဢၢပ်ႇၼမ်ႉသေယဝ်ႉ၊ပဵၼ်ဢၼ်ဢမ်ႇမူတ်းသႂ်ယူႇတေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။ လိုၼ်းၼၼ်ႉမၼ်းတၵ်းမူတ်းသႂ်ဢေႃႈ။-
ပေႃးယင်းဢမ်ႇသၵ်ႉၶူဝ်းၼုင်ႈမၼ်းလႄႈဢမ်ႇဢၢပ်ႇၼမ်ႉၸိုင်၊တၵ်းလႆႈၶၢမ်ႇတၢမ်ႇဢပျတ်ႈတူဝ်ၸဝ်ႈၵဝ်ႇဢေႃႈ၊” ဝႃႈၼင်ႇၼႆဢေႃႈ။
ၸဝ်ႈထႃႇဝရႃႉၽြႃး၊ သမ်ႉမီးဢမိင်ႉၵႃႈတီႈ မူဝ်းသေႇ၊ ထႅင်ႈလႄႈ၊-
ႁႂ်ႈမၼ်းသင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈၸမ်ႉ၊ “ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။-
သူတၵ်းဢမ်ႇလႆႈၵမ်ၵျၢင်ႉၸွမ်းတၢင်းၵမ်တၢင်းၵျၢင်ႉၵူၼ်းမဵဝ်း ဢေးၵျိပ်ႉ၊ ၶဝ်၊တီႈဢၼ်သူယူႇမႃးၼၼ်ႉ။ သမ်ႉတၵ်းဢမ်ႇလႆႈၵမ်ၵျၢင်ႉၸွမ်းတၢင်းၵမ်တၢင်းၵျၢင်ႉၵူၼ်းမဵဝ်း ၶႃႇၼၼ်ႇ၊ တီႈဢၼ်ၵဝ်တိုၵ်ႉဢဝ်သူသူင်ႇၵႂႃႇယူႇၼၼ်ႉ။-
ပႂ်ႉၵမ်ပႂ်ႉၸွမ်းတြႃးၵဝ်လႄႈၵမ်ၵျၢင်ႉၸွမ်းပိင်းၺၢပ်ႈၵဝ်တႃႉ၊ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။-
ၵမ်ၵျၢင်ႉၸွမ်းႁႂ်ႈၶိုတ်းထုင်းၽိင်ႈတြႃးဢိၵ်ႇတင်းတြႃးၸိူဝ်းဢၼ်ၵဝ်ပၼ်ဝႆႉတီႈသူၼၼ်ႉတႃႉ။ ၵေႃႉဢၼ်ၵမ်ၵျၢင်ႉၸွမ်းႁႂ်ႈၶိုတ်းၼၼ်ႉၸိုင်၊မၼ်းတၵ်းထုတ်ႇဢဝ်ဢသၢၵ်ႈတူဝ်ၸဝ်ႈၵဝ်ႇဢေႃႈ။ ၵဝ်ပဵၼ် ထႃႇဝရႃႉၽြႃး၊ ဢေႃႈ။
“ၼႂ်းသူၼၼ်ႉၽူႈလႂ်ၵေႃႈတေဢမ်ႇလႆႈႁဵတ်းမေႇထုင်ႇလူၺ်ႈၵၼ်တင်းပီႈၼွင်ႉၸိူဝ်ႉၶိူဝ်းတူဝ်ၸဝ်ႈၵဝ်ႇဢေႃႈ။ ၵဝ်ပဵၼ် ထႃႇဝရႃႉၽြႃး၊ ဢေႃႈ။-
တၵ်းဢမ်ႇလႆႈႁဵတ်းႁႂ်ႈပေႃႈမႂ်းလႆႈဢူၵ်းဢၢႆလူၺ်ႈတၢင်းဢၼ်မႂ်းႁဵတ်းမေႇထုင်ႇလူၺ်ႈၵၼ်တင်းမႄႈမႂ်းၼၼ်ႉ။ မႂ်းတၵ်းဢမ်ႇလႆႈႁဵတ်းႁႂ်ႈမႄႈမႂ်းလႆႈဢူၵ်းဢၢႆဢေႃႈ။-
တၵ်းဢမ်ႇလႆႈႁဵတ်းႁႂ်ႈပေႃႈမႂ်းလႆႈဢူၵ်းလႆႈဢၢႆလူၺ်ႈတၢင်းဢၼ်ႁဵတ်းမေႇထုင်ႇလူၺ်ႈၵၼ်တင်းမေးပေႃႈမႂ်းတၢင်ႇၵေႃႉၸိူဝ်းၼၼ်ႉ။-
တၵ်းဢမ်ႇလႆႈႁဵတ်းမေႇထုင်ႇလူၺ်ႈၵၼ်တင်းပီႈၼၢင်းမႂ်း၊ၼွင်ႉယိင်းမႂ်း၊ဢမ်ႇၼၼ်ပီႈၼၢင်းသိုပ်ႇမႂ်းတင်းၼွင်ႉယိင်းသိုပ်ႇမႂ်းဢၼ်ၸွမ်းမႄႈဢၼ်ၵိူတ်ႇလဵင်ႉႁိူၼ်းလဵဝ်ၵၼ်သေဢမ်ႇဝႃႈ၊ဢၼ်ၵိူတ်ႇလဵင်ႉတၢင်ႇတီႈတၢင်ႇလႅၼ်သေဢမ်ႇဝႃႈၼၼ်ႉ။-
မႂ်းတၵ်းဢမ်ႇလႆႈႁဵတ်းမေႇထုင်ႇလူၺ်ႈၵၼ်တင်းလၢၼ်ယိင်းမႂ်း။ ပဵၼ်တၢင်းဢၼ်လီဢူၵ်းဢၢႆပုၼ်ႈမႂ်းဢေႃႈ။-
တၵ်းဢမ်ႇလႆႈႁဵတ်းမေႇထုင်ႇလူၺ်ႈၵၼ်တင်းပီႈၼၢင်းသိုပ်ႇမႂ်း၊ၼွင်ႉယိင်းသိုပ်ႇမႂ်းဢၼ်ႁူမ်ႈပေႃႈဢမ်ႇႁူမ်ႈမႄႈၼၼ်ႉ။ မၼ်းပဵၼ်ပီႈၼၢင်းမႂ်း၊ၼွင်ႉယိင်းမႂ်းၼင်ႇၵဝ်ႇဢေႃႈ။-
တၵ်းဢမ်ႇလႆႈႁဵတ်းမေႇထုင်ႇလူၺ်ႈၵၼ်တင်းမႄႈဢႃမႄႈပႃႈမႂ်းၼၼ်ႉ။ မၼ်းပဵၼ်ပီႈၼွင်ႉဢွၵ်ႇပေႃႈမႂ်းဢေႃႈ။-
တၵ်းဢမ်ႇလႆႈႁဵတ်းမေႇထုင်ႇလူၺ်ႈၵၼ်တင်းမႄႈၼႃႉ၊မႄႈပႃႈမႂ်းၼၼ်ႉ။ မၼ်းပဵၼ်ပီႈၼွင်ႉမႄႈမႂ်းဢေႃႈ။-
တၵ်းဢမ်ႇလႆႈႁဵတ်းမေႇထုင်ႇလူၺ်ႈၵၼ်တင်းမေးပေႃႈဢၢဝ်မႂ်း၊ဢမ်ႇၼၼ်မေးၼႃႉမႂ်းၼၼ်ႉ။ မၼ်းပဵၼ်ဢႃပဵၼ်ၼႃႉမႂ်းၼင်ႇၵဝ်ႇဢေႃႈ။-
တၵ်းဢမ်ႇလႆႈႁဵတ်းမေႇထုင်ႇလူၺ်ႈလုၵ်ႈပႂ်ႉမႂ်း။ မၼ်းပဵၼ်မေးလုၵ်ႈၸၢႆးမႂ်းဢေႃႈ။ တၵ်းဢမ်ႇလႆႈႁဵတ်းႁႂ်ႈမၼ်းလႆႈဢူၵ်းဢၢႆဢေႃႈ။-
တၵ်းဢမ်ႇလႆႈႁဵတ်းမေႇထုင်ႇလူၺ်ႈၵၼ်တင်းပီႈပႂ်ႉမႂ်း၊ဢမ်ႇၼၼ်ၼွင်ႉပႂ်ႉမႂ်းၼၼ်ႉ။-
တၵ်းဢမ်ႇလႆႈႁဵတ်းမေႇထုင်ႇလူၺ်ႈၵၼ်တင်းလုၵ်ႈယိင်းၸွမ်းၽၢႆႇမေးမႂ်း၊ဢမ်ႇၼၼ်လၢၼ်ယိင်းမၼ်းဢၼ်ၵိူတ်ႇမႃးတီႈလုၵ်ႈၸၢႆးမၼ်းသေဢမ်ႇဝႃႈ၊လၢၼ်ယိင်းမၼ်းဢၼ်ၵိူတ်ႇမႃးတီႈလုၵ်ႈယိင်းမၼ်းသေဢမ်ႇဝႃႈၼၼ်ႉ။ ပဵၼ်လုၵ်ႈဢွၵ်ႇလၢၼ်ဢွၵ်ႇၽူႈယိင်းမႂ်းလႄႈပေႃးႁဵတ်းၸိုင်၊ပဵၼ်ဢၼ်ႁၢႆႉမိူၵ်ႈဢေႃႈ။-
ၸူဝ်ႈဢၼ်မေးမႂ်းယင်းဢသၢၵ်ႈလိပ်းယူႇၼၼ်ႉမႂ်းဢမ်ႇလႆႈဢဝ်ပီႈၼၢင်း၊ၼွင်ႉယိင်းမေးမႂ်းမႃးပဵၼ်မေးၼွႆႉမႂ်း။
“တၵ်းဢမ်ႇလႆႈႁဵတ်းမေႇထုင်ႇလူၺ်ႈၵၼ်တင်းမႄႈယိင်းဢၼ်ၼႃႈလိူၼ်မၼ်းယင်းတိုၵ်ႉမႃးယူႇလႄႈဢမ်ႇမူတ်းသႂ်ၼၼ်ႉ။-
တၵ်းဢမ်ႇလႆႈႁဵတ်းမေႇထုင်ႇလူၺ်ႈၵၼ်တင်းမေးပိူၼ်ႈႁဵတ်းႁႂ်ႈတူဝ်ၸဝ်ႈၵဝ်ႇလႆႈၵူဝ်ႈၵိူၵ်ႇ။-
တၵ်းဢမ်ႇလႆႈႁႂ်ႈလုၵ်ႈလၢင်းၸိူဝ်ႉၶိူဝ်းမႂ်းသေၵေႃႉသေၵူၼ်းႁႂ်ႈပဵၼ်ၶိူင်ႈတၢင်းလူႇၵူဝ်းၵႂၢႆႇဝႆႈၽြႃး မူးလွၵ်ႉ၊ လွင်ႈမၼ်းၸမ်ႉ၊ဢၼ်ၼၼ်ႉႁဵတ်းႁႂ်ႈၼႃႇမႃႉၸိုဝ်ႈသဵင်ၽြႃးပဵၼ်ၸဝ်ႈလႆႈတူၵ်းတီႈတႅမ်ႇဢေႃႈ။ ၵဝ်ပဵၼ် ထႃႇဝရႃႉၽြႃး၊ ဢေႃႈ။-
တၵ်းဢမ်ႇလႆႈႁဵတ်းမေႇထုင်ႇလူၺ်ႈၵၼ်တင်းၵူၼ်းၸၢႆးၼင်ႇၵၼ်မိူၼ်ၸိူဝ်ႉၼင်ႇဢၼ်မႂ်းႁဵတ်းမေႇထုင်ႇလူၺ်ႈၵၼ်တင်းမႄႈယိင်းၼၼ်ႉ။ ၽြႃးပဵၼ်ၸဝ်ႈၸင်းတၢင်းႁဵတ်းမဵဝ်းၼၼ်ႉၼႃႇလူင်လၢင်ဢေႃႈ။-
ၵူၼ်းၸၢႆးသေဢမ်ႇဝႃႈ၊ၽူႈယိင်းသေဢမ်ႇဝႃႈ၊တၵ်းဢမ်ႇလႆႈႁဵတ်းမေႇထုင်ႇဢၼ်သိူၵ်ႈသမ်ႇလူၺ်ႈၵၼ်တင်းတူဝ်သတ်း။ ပဵၼ်တၢင်းဢၼ်ၽိတ်းသၽႃႇဝႃႉ၊ဢၼ်လီႁင်ႈဢဵတ်ႇသဵတ်ႇၼႃႇဢေႃႈ။
“တၵ်းဢမ်ႇလႆႈႁႂ်ႈတူဝ်ၸဝ်ႈၵဝ်ႇလႆႈၵူဝ်ႈၵိူၵ်ႇၵွပ်ႈပိူဝ်ႈတၢင်းႁဵတ်းၸိူဝ်းၼၼ်ႉ။ ၵူၼ်းမဵဝ်းဢၼ်ၵဝ်တၵ်းႁေႃႈဢွၵ်ႇပႅတ်ႈသေၵႃႈတီႈၽၢႆႇၼႃႈသူၵႂႃႇၼၼ်ႉၸၢင်ႈႁဵတ်းလွင်ႈၸိူဝ်းၼၼ်ႉၵူႈမဵဝ်းႁႂ်ႈတူဝ်ၸဝ်ႈၵဝ်ႇလႆႈၵူဝ်ႈၵိူၵ်ႇဢေႃႈ။-
တၢင်းႁဵတ်းၶဝ်ႁႂ်ႈမိူင်းၶဝ်ၵူဝ်ႈၵိူၵ်ႇယဝ်ႉ။ ပိူဝ်ႈၼႆလႄႈၵဝ်ပၼ်တၢမ်ႇလူၺ်ႈတၢင်းဢၼ်ႁေႃႈၶဝ်တင်းလၢႆဢွၵ်ႇႁႂ်ႈမိူင်းၶဝ်ပဵၼ်မိူင်းႁၢမ်းဢေႃႈ။-
သူၸမ်ႉ၊ပဵၼ်ၵူၼ်းမဵဝ်း ဢိသရေး၊ သေဢမ်ႇဝႃႈ၊ပဵၼ်ၵူၼ်းတၢင်ႇသိုင်ႇတၢင်ႇမိူင်းဢၼ်သွၼ်ႈပိုင်ႈယူႇၸွမ်းၼႂ်းသူသေဢမ်ႇဝႃႈ၊တၵ်းလႆႈပႂ်ႉၵမ်ပႂ်ႉၸွမ်းထုင်းတြႃးၵဝ်ဢိၵ်ႇတင်းပိင်းၺၢပ်ႈတြႃးၵဝ်တင်းလၢႆသေလႄႈ၊တၵ်းဢမ်ႇလႆႈႁဵတ်းတၢင်းဢၼ်လီႁင်ႈဢဵတ်ႇသဵတ်ႇၸိူဝ်းၼၼ်ႉဢေႃႈ။-
ၵူၼ်းမိူင်းၸိူဝ်းဢၼ်ယူႇသဝ်းဢွၼ်တၢင်းသူၼၼ်ႉႁဵတ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇၸိူဝ်းၼၼ်ႉလႄႈႁႂ်ႈလိၼ်မိူင်းၵူဝ်ႈၵိူၵ်ႇယဝ်ႉ။-
ပုၼ်ႈလွင်ႈၼင်ႇႁိုဝ်လိၼ်မိူင်းတၵ်းဢမ်ႇႁေႃႈသူဢွၵ်ႇပႅတ်ႈႁႂ်ႈမိူင်းသူပဵၼ်မိူင်းႁၢမ်းၵႂႃႇၵွပ်ႈပိူဝ်ႈသူႁဵတ်းႁႂ်ႈမၼ်းၵူဝ်ႈၵိူၵ်ႇ၊မိူၼ်ၸိူဝ်ႉၼင်ႇႁေႃႈဢွၵ်ႇၵူၼ်းမိူင်းဢၼ်ယူႇမႃးဢွၼ်တၢင်းသူၼၼ်ႉၸိုင်၊ႁဵတ်းသတိတႃႉ။-
ၽူႈလႂ်သေဢမ်ႇဝႃႈ၊ၵေႃႉဢၼ်ႁဵတ်းတၢင်းဢၼ်လီႁင်ႈဢဵတ်ႇသဵတ်ႇၼၼ်ႉၸိုင်၊တၵ်းလႆႈၶၢမ်ႇပႄႇပႅတ်ႈသေတၢင်းဢၼ်ပဵၼ်ၵူၼ်းၽြႃးပဵၼ်ၸဝ်ႈဢေႃႈ။
“ပိူဝ်ႈၼႆလႄႈပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၵဝ်တႃႉ။ ယႃႇပေႁဵတ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇမဵဝ်းဢၼ်ၵူၼ်းမိူင်းဢၼ်ယူႇသဝ်းဢွၼ်တၢင်းသူႁဵတ်းၵႂႃႇယဝ်ႉၼၼ်ႉ။ ယႃႇပေႁဵတ်းႁႂ်ႈတူဝ်ၸဝ်ႈၵဝ်ႇၵူဝ်ႈၵိူၵ်ႇၵွပ်ႈပိူဝ်ႈလွင်ႈတၢင်းၸိူဝ်းၼၼ်ႉလႃးလႃး၊ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ၊” ဝႃႈၼင်ႇၼႆဢေႃႈ။
ၸဝ်ႈထႃႇဝရႃႉၽြႃး၊ သမ်ႉမီးဢမိင်ႉၵႃႈတီႈ မူဝ်းသေႇ၊ ထႅင်ႈလႄႈ၊-
ႁႂ်ႈမၼ်းသင်ႇလၢတ်ႈတီႈမူႇၵူၼ်းၸိူဝ်းၵူၼ်းမဵဝ်း ဢိသရေး၊ တင်းလၢႆလႄႈဝႃႈၸမ်ႉ၊ “သူတၵ်းလႆႈမူတ်းၸၢင်ႇၵွပ်ႈပိူဝ်ႈၵဝ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူမူတ်းၸၢင်ႇၼၼ်ႉဢေႃႈ။
သူၵူႈၵေႃႉၵူႈၵူၼ်းတၵ်းလႆႈဢွၼ်ၵၼ်ရူဝ်ႇသေႇၵူဝ်ယမ်ပေႃႈမႄႈသူဢေႃႈ။ တၵ်းလႆႈဢွၼ်ၵၼ်ပႂ်ႉဝၼ်းၵမ်သိၼ်ၸွမ်းၼင်ႇဢၼ်ၵဝ်မီးဢမိင်ႉၼၼ်ႉဢေႃႈ။ ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။
“သူတၵ်းဢမ်ႇလႆႈဝၢႆႇၸူးႁုၼ်ႇႁၢင်ႈသၢင်းထု။ တၵ်းဢမ်ႇလႆႈလေႃႇႁဵတ်းၽြႃးပုၼ်ႈတူဝ်ၸဝ်ႈၵဝ်ႇ။ ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။
“မိူဝ်ႈဢၼ်သူႁႅမ်တူဝ်တၢင်းလူႇပုၼ်ႈတႃႇႁႂ်ႈပဵၼ်တၢင်းလူႇမိၵ်ႈသႁႃႇယႃႉၸိုင်၊ႁဵတ်းၸွမ်းထုင်းတြႃးဢၼ်ၵဝ်သင်ႇလၢတ်ႈသူဝႆႉၼၼ်ႉတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ၵဝ်တၵ်းႁပ်ႉၶၢမ်ႇဢဝ်တၢင်းလူႇသူၼၼ်ႉဢေႃႈ။-
ၼိူဝ်ႉတၢင်းလူႇၼၼ်ႉသူတၵ်းလႆႈၵိၼ်ၼႂ်းဝၼ်းဢၼ်သၢၵ်ႈလူႇဢိၵ်ႇတင်းၼႂ်းဝၼ်းမိူဝ်ႈၽုၵ်ႈဢေႃႈ။ ၼိူဝ်ႉဢၼ်ၵိုတ်းၵျၢၼ်ႇသိုပ်ႇၵႂႃႇဝၼ်းမိူဝ်ႈႁိုဝ်းၼၼ်ႉၸိုင်၊တၵ်းလႆႈတုတ်ႇၽႆးပႅတ်ႈဢေႃႈ။-
ၸိူဝ်းၼၼ်ႉပဵၼ်ဢၼ်ဢမ်ႇမူတ်းၸၢင်ႇယဝ်ႉ။ ပေႃးသေၵေႃႉၵေႃႉၵိၼ်ၼႂ်းဝၼ်းမိူဝ်ႈႁိုဝ်းၼၼ်ႉၸိုင်၊ၵဝ်တၵ်းဢမ်ႇႁပ်ႉၶၢမ်ႇဢဝ်တၢင်းလူႇၼၼ်ႉယဝ်ႉ။-
ၵေႃႉဢၼ်ၵိၼ်ၼၼ်ႉမၼ်းတၵ်းလႆႈၶၢမ်ႇဢပျတ်ႈတူဝ်ၸဝ်ႈၵဝ်ႇၵွပ်ႈပိူဝ်ႈမၼ်းႁဵတ်းႁႂ်ႈၶိူင်ႈမူတ်းၸၢင်ႇၽြႃးပဵၼ်ၸဝ်ႈလႆႈၵူဝ်ႈၵိူၵ်ႇၼၼ်ႉဢေႃႈ။ ၵေႃႉၼၼ်ႉတၵ်းလႆႈၶၢမ်ႇတၢင်းဢၼ်ပႄႇပႅတ်ႈသေတၢင်းဢၼ်ပဵၼ်ၵူၼ်းၵဝ်ဢေႃႈ။
“မိူဝ်ႈဢၼ်သူပၢတ်ႇၶဝ်ႈၼႂ်းၼႃးသူၼၼ်ႉယႃႇပေပၢတ်ႇဢဝ်ၵႃႈတီႈၸွၵ်ႉတီႈၸဵင်ႇၼႃးႁႂ်ႈမူတ်းမူတ်းသဵင်ႈသဵင်ႈ။ ယႃႇပေၶိုၼ်းၵႂႃႇပၢတ်ႇဢဝ်တူၼ်ႈၶဝ်ႈဢၼ်ၵိုတ်းၵျၢၼ်ႇဝႆႉၸိူဝ်းၼၼ်ႉ။-
ယႃႇပေၶိုၼ်းၵႂႃႇဝိတ်းဢဝ်ပၢတ်ႇဢဝ်မၢၵ်ႇၸပိတ်ႉဢၼ်ဢမ်ႇလႆႈဝိတ်းမႅၼ်ႈၸိူဝ်းၼၼ်ႉမူတ်းမူတ်းသဵင်ႈသဵင်ႈ။ ယႃႇပေၵဵပ်းဢဝ်မၢၵ်ႇဢၼ်ႁူင်ႈဢၼ်တူၵ်းၼၼ်ႉ။ ဝႆႉႁႂ်ႈမၼ်းၵိုတ်းၵျၢၼ်ႇယူႇပုၼ်ႈၵူၼ်းယၢၵ်ႈၵူၼ်းၽၢၼ်တင်းလၢႆတင်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆတႃႉ။ ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။
“တၵ်းဢမ်ႇလႆႈလၵ်ႉၶူဝ်းၶွင်ငိုၼ်းၶမ်းပိူၼ်ႈ။ ယႃႇပေပႅတ်ႉလႅၼ်ပိူၼ်ႈ။ တၵ်းဢမ်ႇလႆႈလၢတ်ႈၵႂၢမ်းမုသႃႇတေႃႇၵၼ်။-
တၵ်းဢမ်ႇလႆႈဢဝ်ၼႃႇမႃႉၸိုဝ်ႈသဵင်ၵဝ်လႄႈတိူင်ႇဝႃႈပုၼ်ႈလွင်ႈဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ပဵၼ်တၢင်းဢၼ်ႁဵတ်းႁႂ်ႈၼႃႇမႃႉၸိုဝ်ႈသဵင်ၵဝ်လႆႈတူၵ်းတီႈတႅမ်ႇဢေႃႈ။ ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။
“မႂ်းဢမ်ႇလႆႈတဵၵ်းငႅၼ်းမႂ်ၵိၼ်ၵေႃႉဢၼ်ၸၢပ်ႈသႅင်ႇၵၼ်တင်းမႂ်းၼၼ်ႉ။ မႂ်းတၵ်းဢမ်ႇလႆႈႁဵတ်းပႄႉႁဵတ်းၼႅင်ႇႁိမ်ဢဝ်ၶူဝ်းၶွင်မၼ်း။ ၵႃႈၸၢင်ႈၶၼ်ငႃဢၼ်ၵူၼ်းၵိၼ်ၸၢင်ႈၵိၼ်ငႃလူဝ်ႇလႆႈၼၼ်ႉယင်းဢမ်ႇပၼ်လႄႈယႃႇပေႁႂ်ႈပူၼ်ႉၶမ်ႈပူၼ်ႉၶိုၼ်း။
“မႂ်းတၵ်းဢမ်ႇလႆႈလႃႇလင်တီႈၵူၼ်းႁူၼူၵ်ႇ။ တၵ်းဢမ်ႇလႆႈဢဝ်မဵဝ်းဢၼ်ၸၢင်ႈတိူဝ်ႉၸၢင်ႈၶီႈလိုတ်းၼၼ်ႉဝႆႉၵႃႈတီႈၽၢႆႇတၢင်းၼႃႈၵူၼ်းတႃမွတ်ႇ။ ၵူဝ်ႁႄၵဝ်တႃႉ။ ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။
“ၼႂ်းတၢင်းဢၼ်ၸီႇယၢင်ႇဢမုၼၼ်ႉတႅပ်းတတ်းၸွမ်းတြႃးသိုဝ်ႈသိုဝ်ႈတႃႉ။ တၵ်းဢမ်ႇလႆႈတူၺ်းၼႃႈလဵၵ်ႉၼႃႈယႂ်ႇတီႈၵူၼ်းယၢၵ်ႈၵူၼ်းၽၢၼ်တင်းလၢႆလႄႈ၊ယႃႇပေထွၵ်ႈလူၺ်ႈၼႃႈၵူၼ်းယႂ်ႇၵူၼ်းလူင်ၼၼ်ႉ။-
မႂ်းတေဢမ်ႇလႆႈပဵၼ်ၵေႃႉဢၼ်ၵႂႃႇႁိူၼ်းတႂ်ႈႁိူၼ်းၼိူဝ်လႄႈၶႃႉၸိုဝ်ႈၶၢႆသဵင်ၵူၼ်းမဵဝ်းတူဝ်ၸဝ်ႈၵဝ်ႇ။ မိူဝ်ႈဢၼ်သေၵေႃႉသေၵူၼ်းမီးဢမုထိုင်တၢမ်ႇတၢႆၼၼ်ႉပေႃးမႂ်းမီးသၢၵ်ႈသေႇဢၼ်တေၵႄႇသႄႇဢဝ်မၼ်းလႆႈၸိုင်၊ၸွႆႈလၢတ်ႈပၼ်တႃႉ။ ၵဝ်ပဵၼ် ထႃႇဝရႃႉၽြႃး၊ ဢေႃႈ။
“တၵ်းဢမ်ႇလႆႈမီးၸႂ်မူမ်ႇတၢင်းၽိတ်းဝႆႉတီႈသေၵေႃႉသေၵူၼ်း။ ပုၼ်ႈလွင်ႈၼင်ႇႁိုဝ်မႂ်းတၵ်းဢမ်ႇလႆႈၶၢမ်ႇဢပျတ်ႈၵွပ်ႈပိူဝ်ႈမၼ်းၸိုင်၊ႁဵတ်းတၢင်းဢၼ်ထၢတ်ႇယဵၼ်ၵၼ်ၵႃႈၼႂ်းၵႄႈဝူင်ႈၵၢင်သူတႃႉ။-
တၵ်းဢမ်ႇလႆႈၶိုၼ်းတွပ်ႇတႅၼ်းတၢင်းၽိတ်းတီႈသေၵေႃႉသေၵူၼ်း။ မႂ်းဢမ်ႇလႆႈဝႆႉၸႂ်တီႈမၼ်း။ ၸိူဝ်ႉၼင်ႇဢၼ်မႂ်းႁၵ်ႉတူဝ်ၸဝ်ႈၵဝ်ႇၼၼ်ႉႁၵ်ႉၵေႃႉဢၼ်ၸၢပ်ႈသႅင်ႇၵၼ်တင်းမႂ်းတႃႉ။ ၵဝ်ပဵၼ် ထႃႇဝရႃႉၽြႃး၊ ဢေႃႈ။
“ပႂ်ႉၵမ်ပႂ်ႉၸွမ်းပိင်းၺၢပ်ႈၵဝ်တင်းလၢႆတႃႉ။ ယႃႇပေႁႂ်ႈတရိၵ်ႈသၢၼ်ႇမႂ်းဢၼ်မဵဝ်းပႅၵ်ႇပိူင်ႈၵၼ်ၼၼ်ႉလႆႈၸၢပ်ႈၸိူဝ်ႉၽၼ်းၵၼ်။ ယႃႇပေဝၢၼ်ႇၸိူဝ်ႉၽၼ်းဢၼ်ပႅၵ်ႇၵၼ်ၼၼ်ႉလူၺ်ႈၵၼ်ၵႃႈၼႂ်းႁႆႈၼႂ်းၼႃးမႂ်း။ ယႃႇပေၼုင်ႈသိူဝ်ႈၶူဝ်းဢၼ်ဢဝ်ၽႃႈသွင်ၸိူဝ်ႉသွင်မဵဝ်းလေႃးၵၼ်လႄႈတေႃးႁဵတ်းၼၼ်ႉ။
“ပေႃးၵူၼ်းသေၵေႃႉၵေႃႉႁဵတ်းမေႇထုင်ႇလူၺ်ႈၵၼ်တင်းၶႃႈမႄႈယိင်းမၼ်းဢၼ်ပိူၼ်ႈမၢႆဝႆႉလႄႈယင်းဢမ်ႇပႆႇလႆႈထုတ်ႇဢဝ်ၸိုင်၊ၶဝ်ၼၼ်ႉဢမ်ႇထိုင်တၢမ်ႇတၢႆ၊ၵူၺ်းၵႃႈ၊ၶဝ်တၵ်းလႆႈၶၢမ်ႇတၢမ်ႇဢပျတ်ႈဢေႃႈ။ ၵွပ်ႈပိူဝ်ႈယိင်းသၢဝ်ၼၼ်ႉယင်းပဵၼ်ၶႃႈမၼ်းယူႇၼၼ်ႉဢေႃႈ။-
ၵူၼ်းၵေႃႉၼၼ်ႉတၵ်းလႆႈဢဝ်သူဝ်းပေႃႈတူဝ်ၼိုင်ႈမႃးၵႃႈႁိမ်းၽၵ်းတူသုမ်ႉထဵင်ၸဝ်ႈၼၼ်ႉသေလႄႈသၢၵ်ႈလူႇႁႂ်ႈပဵၼ်တၢင်းလူႇဢၼ်ၽေႇဢပျတ်ႈတီႈ ထႃႇဝရႃႉၽြႃး၊ ဢေႃႈ။-
ယဵၸ်ႈပရေႃးႁဵၵ်ႈ တၵ်းလႆႈဢဝ်တူဝ်တၢင်းလူႇၼၼ်ႉႁဵတ်းတၢင်းဢၼ်ၽေႇဢပျတ်ႈၵေႃႉၼၼ်ႉဢေႃႈ။ ၽြႃးပဵၼ်ၸဝ်ႈတၵ်းပွႆႇလွတ်ႈဢပျတ်ႈတၢင်းၽိတ်းမၼ်းၼၼ်ႉဢေႃႈ။
“မိူဝ်ႈဢၼ်သူၶဝ်ႈထိုင်ၵႃႈၼႂ်းမိူင်း ၶႃႇၼၼ်ႇ၊ လႄႈၽုၵ်ႇသွမ်ႈတူၼ်ႈမၢၵ်ႇၵူႈမဵဝ်းမဵဝ်းပုၼ်ႈဢၼ်သူတၵ်းၵိၼ်ၼၼ်ႉၸိုင်၊သူတၵ်းလႆႈမၢတ်ႈပဵၼ်မၢၵ်ႇဢၼ်ဢမ်ႇမူတ်းၸၢင်ႇယူႇသၢမ်ပီဢေႃႈ။ ၸူဝ်ႈၶၢဝ်းၼၼ်ႉသူဢမ်ႇလႆႈၵိၼ်မၢၵ်ႇၼၼ်ႉလႃးလႃး။-
မိူဝ်ႈဢၼ်ထူၼ်ႈသီႇပီၼၼ်ႉၸိုင်၊တၵ်းလႆႈဢဝ်မၢၵ်ႇဢၼ်မၢၵ်ႇမႃးၸိူဝ်းၼၼ်ႉသၢၵ်ႈၵၢပ်ႈႁႂ်ႈပဵၼ်တၢင်းလူႇပုၼ်ႈဢၼ်တၵ်းယွင်ႈယေႃးတၢင်ႇၵျေးၸူးၽြႃးပဵၼ်ၸဝ်ႈဢေႃႈ။-
ၼႂ်းပီဢၼ်ထူၼ်ႈႁႃႈပီၼၼ်ႉၸင်ႇ၊သူတၵ်းလႆႈၵိၼ်မၢၵ်ႇမၼ်းဢေႃႈ။ ပေႃးသူႁဵတ်းၸိူဝ်ႉၼင်ႇၼၼ်ၸိုင်၊တူၼ်ႈၸိူဝ်းၼၼ်ႉတၵ်းယဵင်ႈၶႅၼ်းမၢၵ်ႇၼမ်ၼႃႇဢေႃႈ။ ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။
“သူတၵ်းဢမ်ႇလႆႈၵိၼ်ၼိူဝ်ႉဢၼ်ပႃးလိူတ်ႈၼၼ်ႉ။ သူတၵ်းဢမ်ႇလႆႈႁဵတ်းဢတၢတ်ႈၽီမေႃႇ၊တၵ်းဢမ်ႇလႆႈတူၺ်းပေႇတၢင်ႇၵႃႇလႃး။-
သူတၵ်းဢမ်ႇလႆႈထႃၶူၼ်ႁူဝ်ႁွပ်ႈတိၼ်ၶူၼ်ႁူဝ်ႁႂ်ႈမၼ်းၵဵင်ႈဝႆႉ။ တၵ်းဢမ်ႇလႆႈထႃၼူတ်ႇၵၢင်းႁဵတ်းႁႂ်ႈမၼ်းမူၼ်းဝႆႉ။-
ၵွပ်ႈပိူဝ်ႈမႆႈၸႂ်လူၺ်ႈၵူၼ်းတၢႆလႄႈသူတၵ်းဢမ်ႇလႆႈထိူဝ်လႆႈယၢႆးလႆႈၶၢၼ်ႇၼိူဝ်ႉသူၼင်သူ။ တၵ်းဢမ်ႇလႆႈသမ်းလဵၼ်းသမ်းလၢႆး။ ၵဝ်ပဵၼ် ထႃႇဝရႃႉၽြႃး၊ ဢေႃႈ။
“မႂ်းတၵ်းဢမ်ႇလႆႈယႃႉသရေႇလုၵ်ႈယိင်းမႂ်းလူၺ်ႈတၢင်းဢၼ်ႁႂ်ႈမၼ်းပဵၼ်မႄႈမွၵ်ႇယႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊တင်းဝၢၼ်ႈတင်းမိူင်းတၵ်းဢွၼ်ၵၼ်ၸွမ်းမေႇထုင်ႇဢၼ်ဢမ်ႇတြႃးလႄႈတဵမ်ဝႆႉတင်းတၢင်းဢၼ်ဢမ်ႇတြႃးဢေႃႈ။
သူတၵ်းလႆႈပႂ်ႉဝၼ်းၵမ်သိၼ်လႄႈတၵ်းလႆႈရူဝ်ႇသေႇၵူဝ်ယမ်ထႃႇၼႃႉတီႈဢၼ်သူဝႆႈသႃၵူဝ်းၵႂၢႆႇၵဝ်ၼၼ်ႉဢေႃႈ။ ၵဝ်ပဵၼ် ထႃႇဝရႃႉၽြႃး၊ ဢေႃႈ။
“သူတၵ်းဢမ်ႇလႆႈၵႂႃႇထၢမ်မေႃၽီ။ တၵ်းဢမ်ႇလႆႈၵႂႃႇႁႃၵေႃႉဢၼ်ႁဵတ်းဢတၢတ်ႈၼၼ်ႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊သူႁဵတ်းႁႂ်ႈတူဝ်သူၵူဝ်ႈၵိူၵ်ႇဢေႃႈ။ ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။
“သူတၵ်းလႆႈလုၵ်ႉၸုၵ်းၽၢႆႇၼႃႈၵူၼ်းထဝ်ႈၵူၼ်းၵႄႇလႄႈႁဵတ်းရူဝ်ႇသေႇၵူဝ်ယမ်ၶဝ်ဢေႃႈ။ တၵ်းလႆႈၵူဝ်ႁႄၽြႃးပဵၼ်ၸဝ်ႈသူဢေႃႈ။ ၵဝ်ပဵၼ် ထႃႇဝရႃႉၽြႃး၊ ဢေႃႈ။
“သူတၵ်းဢမ်ႇလႆႈႁဵတ်းပႄႉႁဵတ်းၼႅင်ႇတီႈၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈပိုင်ႈယူႇၵႃႈၼႂ်းမိူင်းသူၼၼ်ႉ၊-
ႁဵတ်းၵေႃႉႁဵတ်းသႄႈၶဝ်မိူၼ်ၸိူဝ်ႉၼင်ႇသူပဵၼ်ၵူၼ်းမဵဝ်းလဵဝ်ၵၼ်ၼၼ်ႉတႃႉ။ ႁၵ်ႉၶဝ်မိူၼ်ၸိူဝ်ႉၼင်ႇႁၵ်ႉတူဝ်ၸဝ်ႈၵဝ်ႇၼၼ်ႉတႃႉ။ ၶုၵ်းၸႂ်လႆႈလွင်ႈတၢင်းဢၼ်သူယၢမ်ႈပဵၼ်ၶႅၵ်ႇၵႃႈၼႂ်းမိူင်း ဢေးၵျိပ်ႉ၊ မႃးၼၼ်ႉတႃႉ။ ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။
“သူတၵ်းဢမ်ႇလႆႈလႅၼ်ၵိၼ်ပိူၼ်ႈၼႂ်းတၢင်းဢၼ်တႅၵ်ႈဢၼ်ၶိုပ်ႈ၊တၢင်းဢၼ်ၸင်ႈဢၼ်ႁိဝ်ႈ၊တၢင်းဢၼ်တူင်ဢၼ်ၵၢတ်ႇၼၼ်ႉ။-
သူတၵ်းလႆႈယိပ်းလႆႈသုင်းတိုဝ်းယႃႇၸူႇယွႆးဢၼ်မၢၼ်ႇဢၼ်မႅၼ်ႈ၊လုၵ်ႈၶၼ်ဢၼ်မၢၼ်ႇဢၼ်မႅၼ်ႈ၊ၵွၵ်းပႄႇၵွၵ်းတၢင်ဢၼ်မၢၼ်ႇဢၼ်မႅၼ်ႈၸိူဝ်းၼၼ်ႉဢေႃႈ။ ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢၼ်ဢွၼ်ဢဝ်သူဢွၵ်ႇသေမိူင်း ဢေးၵျိပ်ႉ၊ မႃးၼၼ်ႉဢေႃႈ။-
ဢွၼ်ၵၼ်ပႂ်ႉၵမ်ပႂ်ႉၸွမ်းထုင်းတြႃးၵဝ်ဢိၵ်ႇတင်းပိင်းၺၢပ်ႈတြႃးၵဝ်တင်းလၢႆတႃႉ။ ၵဝ်ပဵၼ် ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။
ၸဝ်ႈထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ ထႅင်ႈလႄႈ၊-
ႁႂ်ႈမၼ်းသင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈၸမ်ႉ၊ “ၵူၼ်းမဵဝ်းသူသေဢမ်ႇဝႃႈ၊ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈပိုင်ႈယူႇၸွမ်းသူသေဢမ်ႇဝႃႈ၊ၵေႃႉဢၼ်ဢဝ်လုၵ်ႈလၢင်းမၼ်းသၢၵ်ႈၵၢပ်ႈတီႈၽြႃး မူးလွၵ်ႉ၊ ၸိုင်၊တၵ်းလႆႈၶၢမ်ႇတၢင်းဢၼ်ဢဝ်တၢႆဢေႃႈ။ မူႇၵူၼ်းၸိူဝ်းၵူၼ်းတင်းလၢႆတၵ်းလႆႈဢွၼ်ၵၼ်ဢဝ်မၢၵ်ႇႁိၼ်သိုင်းသႂ်ႇမၼ်းဢေႃႈ။-
ပေႃးသေၵေႃႉသေၵူၼ်းဢဝ်လုၵ်ႈလၢင်းမၼ်းယေႈၵေႃႉယေႈလႂ်ဢၢပ်ႈပၼ်တီႈၽြႃး မူးလွၵ်ႉ၊ လႄႈႁဵတ်းႁႂ်ႈသုမ်ႉထဵင်ၸဝ်ႈဢၼ်မူတ်းၸၢင်ႇၼၼ်ႉလႆႈၵူဝ်ႈၵိူၵ်ႇ၊သမ်ႉႁဵတ်းႁႂ်ႈၼႃႇမႃႉၸိုဝ်ႈသဵင်ၵဝ်လႆႈတူၵ်းတီႈတႅမ်ႇၸိုင်၊ၵဝ်တၵ်းဝၢႆႇၼႃႈၵဝ်ပႅတ်ႈမၼ်းသေလႄႈ၊ၵဝ်တၵ်းဢမ်ႇမၢတ်ႈမၼ်းပဵၼ်ၵူၼ်းၵဝ်လႃးလႃးဢေႃႈ။-
ပေႃးဝႃႈမူႇၵူၼ်းၸိူဝ်းၵူၼ်းတင်းလၢႆယင်းဢမ်ႇဝႆႉဢယေးတီႈလွင်ႈတၢင်းဢၼ်မၼ်းၽိတ်းပိူင်ႈၼၼ်ႉသေလႄႈဢမ်ႇဢဝ်တၢႆၸိုင်၊-
ၵဝ်တၵ်းဝၢႆႇၼႃႈၵဝ်ပႅတ်ႈသေၵေႃႉၼၼ်ႉတင်းၵူၼ်းႁိူၼ်းၵူၼ်းယေးမၼ်းတင်းမူတ်း၊ဢိၵ်ႇတင်းၶဝ်ၸိူဝ်းဢၼ်ႁဵတ်းၸွမ်းမၼ်းၼၼ်ႉသေလႄႈဢမ်ႇပႂ်ႉသဵတ်ႈၸႃႇတေႃႇၵဝ်လႄႈဝႆႈၽြႃး မူးလွၵ်ႉ၊ ယူႇၸိူဝ်းၼၼ်ႉ၊ၵဝ်တၵ်းဢမ်ႇမၢတ်ႈၶဝ်ပဵၼ်ၵူၼ်းၵဝ်လႃးလႃးဢေႃႈ။
“ပေႃးသေၵေႃႉၵေႃႉၵႂႃႇထၢမ်မေႃၽီ၊ၵႂႃႇႁႃၵေႃႉဢၼ်ႁဵတ်းဢတၢတ်ႈၼၼ်ႉၸိုင်၊ၵဝ်တၵ်းဝၢႆႇၼႃႈၵဝ်ပႅတ်ႈမၼ်းလႄႈတၵ်းဢမ်ႇမၢတ်ႈမၼ်းပဵၼ်ၵူၼ်းၵဝ်လႃးလႃး။-
သူႁႂ်ႈတူဝ်ၸဝ်ႈၵဝ်ႇမူတ်းၸၢင်ႇယူႇၵွပ်ႈပိူဝ်ႈၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူၼၼ်ႉတႃႉ။-
ဢွၼ်ၵၼ်ပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၵဝ်တင်းလၢႆတႃႉ။ ၵဝ်ပဵၼ် ထႃႇဝရႃႉၽြႃး၊ ဢၼ်ႁႂ်ႈသူမူတ်းၸၢင်ႇဢေႃႈ။
“ၵေႃႉဢၼ်ၵိၼ်ႇလႃႇပေႃႈမႄႈမၼ်းၼၼ်ႉတၵ်းလႆႈၶၢမ်ႇတၢင်းဢၼ်ဢဝ်တၢႆဢေႃႈ။ တၢင်းဢၼ်လႆႈၶၢမ်ႇတၢႆၼၼ်ႉပဵၼ်ၵွပ်ႈပိူဝ်ႈတၢင်းၽိတ်းတူဝ်မၼ်းဢေႃႈ။
“ၵေႃႉဢၼ်ၽိတ်းၵႃႇမေႇသုလူၺ်ႈမေးပိူၼ်ႈဢၼ်ပဵၼ်ၵူၼ်းမဵဝ်း ဢိသရေး၊ ၼင်ႇၵၼ်ၼၼ်ႉသူတၵ်းလႆႈဢဝ်မၼ်းတင်းမႄႈယိင်းၼၼ်ႉတၢႆတင်းသွင်ၵေႃႉဢေႃႈ။-
ၵေႃႉဢၼ်ႁဵတ်းမေႇထုင်ႇလူၺ်ႈၵၼ်တင်းမေးပေႃႈမၼ်းၼၼ်ႉႁဵတ်းႁႂ်ႈပေႃႈမၼ်းလႆႈဢူၵ်းလႆႈဢၢႆလႄႈသူတၵ်းလႆႈဢဝ်မၼ်းတင်းမႄႈယိင်းၼၼ်ႉတၢႆဢေႃႈ။ တၢင်းဢၼ်ၶဝ်လႆႈၶၢမ်ႇတၢႆၼၼ်ႉပဵၼ်ၵွပ်ႈပိူဝ်ႈဢပျတ်ႈတၢင်းၽိတ်းတူဝ်ၶဝ်ဢေႃႈ။-
ပေႃးသေၵေႃႉၵေႃႉႁဵတ်းမေႇထုင်ႇလူၺ်ႈၵၼ်တင်းလုၵ်ႈပႂ်ႉမၼ်းၸိုင်၊သူတၵ်းလႆႈဢဝ်တၢႆပႅတ်ႈတင်းသွင်ၵေႃႉဢမၢၼ်ႇၶၼ်ပဵၼ်ဢေႃႈ။ ၶဝ်ၽိတ်းၵႃႇမေႇသုလူၺ်ႈၵၼ်တင်းပီႈၼွင်ႉၶဝ်လႄႈတၢင်းဢၼ်ၶဝ်လႆႈၶၢမ်ႇတၢႆၼၼ်ႉပဵၼ်ၵွပ်ႈပိူဝ်ႈတၢင်းၽိတ်းတူဝ်ၶဝ်ဢေႃႈ။-
ပေႃးၵူၼ်းၸၢႆးၼင်ႇၵၼ်ႁဵတ်းမေႇထုင်ႇလူၺ်ႈၵၼ်ၸိုင်၊ၶဝ်ၼၼ်ႉႁဵတ်းတၢင်းဢၼ်လီႁင်ႈဢဵတ်ႇသဵတ်ႇလႄႈသူတၵ်းလႆႈဢဝ်တၢႆပႅတ်ႈတင်းသွင်ၵေႃႉဢေႃႈ။ တၢင်းဢၼ်ၶဝ်လႆႈၶၢမ်ႇတၢႆၼၼ်ႉပဵၼ်ၵွပ်ႈပိူဝ်ႈတၢင်းၽိတ်းတူဝ်ၶဝ်ဢေႃႈ။-
ပေႃးသေၵေႃႉၵေႃႉဢဝ်ၸဵမ်မႄႈၸဵမ်လုၵ်ႈႁဵတ်းမေးမၼ်းၸိုင်၊ပဵၼ်တၢင်းဢၼ်ႁၢႆႉမိူၵ်ႈလႄႈသူတၵ်းလႆႈဢဝ်ၽႆးတုတ်ႇၶဝ်တၢႆပႅတ်ႈတင်းသၢမ်ၵေႃႉဢေႃႈ။ လွင်ႈတၢင်းမဵဝ်းၼႆႉတၵ်းဢမ်ႇႁႂ်ႈလႆႈမီးၵႃႈၼႂ်းသူ။-
ပေႃးၵူၼ်းၸၢႆးႁဵတ်းမေႇထုင်ႇဢၼ်သိူၵ်ႈသမ်ႇၵၼ်တင်းတရိၵ်ႈသၢၼ်ႇၸိုင်၊တၵ်းလႆႈဢဝ်မၼ်းတင်းတရိၵ်ႈသၢၼ်ႇၼၼ်ႉတၢႆပႅတ်ႈဢေႃႈ။-
ပေႃးမႄႈယိင်းသုတ်ႉၸပ်းသုတ်ႉၸူးတရိၵ်ႈသၢၼ်ႇလႄႈႁဵတ်းမေႇထုင်ႇလူၺ်ႈၵၼ်တင်းမၼ်းၸိုင်၊သူတၵ်းလႆႈဢဝ်မႄႈယိင်းၼၼ်ႉတင်းတရိၵ်ႈသၢၼ်ႇၼၼ်ႉတၢႆပႅတ်ႈဢေႃႈ။
“ပေႃးသေၵေႃႉၵေႃႉဢဝ်ပီႈၼၢင်းဢွၵ်ႇမၼ်း၊ဢမ်ႇၼၼ်ၼွင်ႉယိင်းဢွၵ်ႇမၼ်း၊ဢမ်ႇၼၼ်ပီႈၼၢင်းၼွင်ႉယိင်းသိုပ်ႇမၼ်းမႃးပဵၼ်မေးမၼ်းၸိုင်၊ပဵၼ်တၢင်းဢၼ်လီဢူၵ်းလီဢၢႆလီသႄႉလီသွမ်းဢေႃႈ။ ၶဝ်ၼၼ်ႉတၵ်းလႆႈၶၢမ်ႇတၢင်းဢၼ်ပႄႇပႅတ်ႈသေၵႃႈၼႂ်းၵူၼ်းမဵဝ်းၸိူဝ်ႉၶိူဝ်းတူဝ်ၸဝ်ႈၵဝ်ႇဢေႃႈ။ မၼ်းၼၼ်ႉၵွပ်ႈပိူဝ်ႈႁဵတ်းမေႇထုင်ႇလူၺ်ႈၵၼ်တင်းပီႈၼၢင်းတူဝ်ၸဝ်ႈၵဝ်ႇ၊ၼွင်ႉယိင်းတူဝ်ၸဝ်ႈၵဝ်ႇလႄႈမၼ်းတၵ်းလႆႈၶၢမ်ႇတၢမ်ႇဢပျတ်ႈတူဝ်ၸဝ်ႈၵဝ်ႇဢေႃႈ။-
ပေႃးၵူၼ်းၸၢႆးႁဵတ်းမေႇထုင်ႇလူၺ်ႈၵၼ်တင်းမႄႈယိင်းဢၼ်လိူတ်ႈၼႃႈလိူၼ်မၼ်းမႃးယူႇၼၼ်ႉၸိုင်၊ၶဝ်သွင်ၵေႃႉၼၼ်ႉတၵ်းလႆႈၶၢမ်ႇတၢင်းဢၼ်ပႄႇပႅတ်ႈသေၵႃႈၼႂ်းၵူၼ်းမဵဝ်းၸိူဝ်ႉၶိူဝ်းတူဝ်ၸဝ်ႈၵဝ်ႇဢေႃႈ။ ၶဝ်ၼၼ်ႉၽိတ်းပိူင်ႈပူၼ်ႉလိူဝ်ထုင်းတြႃးဢၼ်ၸၢပ်ႈလူၺ်ႈၵၼ်တင်းတၢင်းဢၼ်ဢမ်ႇမူတ်းသႂ်ၼၼ်ႉယဝ်ႉ။
“ပေႃးသေၵေႃႉၵေႃႉႁဵတ်းမေႇထုင်ႇလူၺ်ႈၵၼ်တင်းဢႃမၼ်း၊ပႃႈမၼ်း၊ဢမ်ႇၼၼ်ၼႃႉမၼ်းၸိုင်၊ပဵၼ်ဢၼ်ၽိတ်းၵႃႇမေႇသုလူၺ်ႈပီႈၼွင်ႉဢွၵ်ႇၵၼ်ၼၼ်ႉလႄႈ၊ၶဝ်ၼၼ်ႉတၵ်းလႆႈၶၢမ်ႇဢပျတ်ႈတူဝ်ၸဝ်ႈၵဝ်ႇဢေႃႈ။-
ပေႃးသေၵေႃႉၵေႃႉႁဵတ်းမေႇထုင်ႇလူၺ်ႈၵၼ်တင်းမေးပီႈၸၢႆးပေႃႈ၊မေးၼွင်ႉၸၢႆးပေႃႈ၊ဢမ်ႇၼၼ်မေးပီႈဢၢႆႈမႄႈ၊မေးၼွင်ႉၸၢႆးမႄႈၸိုင်၊ပဵၼ်ဢၼ်ႁႂ်ႈဢၢဝ်၊ႁႂ်ႈလုင်း၊ဢမ်ႇၼၼ်ၼႃႉမၼ်းလႆႈဢူၵ်းလႆႈဢၢႆလႄႈၶဝ်ၼၼ်ႉတၵ်းလႆႈၶၢမ်ႇတၢမ်ႇဢပျတ်ႈတူဝ်ၸဝ်ႈၵဝ်ႇလႄႈ၊ၸူဝ်ႈဢသၢၵ်ႈၶဝ်တေဢမ်ႇလႆႈလုၵ်ႈလႆႈလၢင်းလႄႈယူႇဢေႃႈ။-
ပေႃးသေၵေႃႉသေၵူၼ်းသိမ်းဢဝ်မေးပီႈၸၢႆးမၼ်း၊မေးၼွင်ႉၸၢႆးမၼ်းၸိုင်၊ပဵၼ်ဢၼ်ၵူဝ်ႈၵိူၵ်ႇဢေႃႈ။ ၵွပ်ႈပိူဝ်ႈပဵၼ်ဢၼ်ႁႂ်ႈပီႈၸၢႆးၼွင်ႉၸၢႆးမၼ်းလႆႈဢူၵ်းဢၢႆလႄႈၶဝ်ၼၼ်ႉတေဢမ်ႇလႆႈလုၵ်ႈလႆႈလၢင်းလႄႈယူႇဢေႃႈ။
“ပုၼ်ႈလွင်ႈၼင်ႇႁိုဝ်မိူင်း ၶႃႇၼၼ်ႇ၊ ဢၼ်ၵဝ်ဢွၼ်ဢဝ်သူၶဝ်ႈထိုင်ၼၼ်ႉတၵ်းဢမ်ႇလႆႈႁေႃႈသူဢွၵ်ႇပႅတ်ႈႁႂ်ႈမိူင်းၼၼ်ႉပဵၼ်မိူင်းႁၢမ်းၸိုင်၊သူဢွၼ်ၵၼ်ပႂ်ႉၵမ်ပႂ်ႉၸွမ်းထုင်းတြႃးၵဝ်ဢိၵ်ႇတင်းပိင်းၺၢပ်ႈတြႃးၵဝ်တင်းလၢႆတႃႉ။-
သူဢမ်ႇလႆႈႁဵတ်းၸွမ်းၽႃႇသႃႇထုင်းၽိင်ႈၵူၼ်းမဵဝ်းဢၼ်ၵဝ်ႁေႃႈၶဝ်ဢွၵ်ႇပႅတ်ႈသေၵႃႈတီႈၽၢႆႇၼႃႈသူၼၼ်ႉ။ ၵွပ်ႈပိူဝ်ႈၶဝ်ႁဵတ်းလွင်ႈတၢင်းၸိူဝ်းၼၼ်ႉလႄႈၵဝ်လီႁင်ႈဢဵတ်ႇသဵတ်ႇဢေႃႈ။-
ၵဝ်လႆႈဝႆႉၵတိဝႃႈ၊ၵဝ်တၵ်းႁႂ်ႈသူလႆႈၶၢမ်ႇဢဝ်ဢမူၺ်ႇမိူင်းဢၼ်မၢၵ်ႈမီးလိၼ်လီပဵၼ်လႄႈၽုၼ်ႇလီလိၼ်လီ ယဝ်ႉလႄႈ၊ၵဝ်တၵ်းပၼ်ႁႂ်ႈသူလႆႈဢုပ်ႉပိူင်ႇဢေႃႈ။ ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢၼ်ၽႄဢဝ်သူၽၢတ်ႇယၢၼ်ၵၼ်တင်းၵူၼ်းတၢင်ႇၸိူဝ်ႉတၢင်ႇမဵဝ်းၸိူဝ်းၼၼ်ႉဢေႃႈ။-
ၵွပ်ႈပိူဝ်ႈလွင်ႈတၢင်းၼၼ်ႉလႄႈသူတၵ်းလႆႈမေႃၸၵ်းၽႄလႄႈႁုလွင်ႈဢၼ်တရိၵ်ႈသၢၼ်ႇမဵဝ်းလႂ်၊ၼူၵ်ႉမဵဝ်းလႂ်မူတ်းသႂ်၊မဵဝ်းလႂ်ဢမ်ႇမူတ်းသႂ်ၼၼ်ႉဢေႃႈ။ သူဢမ်ႇလီၵိၼ်ၼိူဝ်ႉတရိၵ်ႈသၢၼ်ႇတင်းၼူၵ်ႉဢၼ်ဢမ်ႇမူတ်းသႂ်ၼၼ်ႉ။ ၵဝ်ၸီႇယၢင်ႇႁႂ်ႈၶဝ်ပဵၼ်မဵဝ်းဢၼ်ဢမ်ႇမူတ်းသႂ်ယဝ်ႉလႄႈ၊ပေႃးၵိၼ်ၼိူဝ်ႉမဵဝ်းၼၼ်ႉၸိုင်၊သူတၵ်းဢမ်ႇမူတ်းသႂ်ဢေႃႈ။-
သူတၵ်းလႆႈႁႂ်ႈတူဝ်သူမူတ်းၸၢင်ႇလႄႈတၵ်းလႆႈပဵၼ်ၵူၼ်းၵဝ်ၵူၺ်း၊ၵွပ်ႈပိူဝ်ႈၵဝ်ပဵၼ် ထႃႇဝရႃႉၽြႃး၊ လႄႈပဵၼ်ၽြႃးပဵၼ်ၸဝ်ႈဢၼ်မူတ်းၸၢင်ႇဢေႃႈ။ ၵဝ်လႆႈဢဝ်သူၽႄဢွၵ်ႇၽၢတ်ႇယၢၼ်ၵၼ်တင်းၵူၼ်းတၢင်ႇၸိူဝ်ႉတၢင်ႇမဵဝ်းႁႂ်ႈသူလႆႈပဵၼ်ၵူၼ်းၵဝ်ၵူၺ်းဢေႃႈ။
“ၵူၼ်းၸၢႆးသေဢမ်ႇဝႃႈ၊ၽူႈယိင်းသေဢမ်ႇဝႃႈ၊ၵေႃႉဢၼ်ႁဵတ်းမေႃၽီ၊ဢမ်ႇၼၼ်ႁဵတ်းဢတၢတ်ႈၼၼ်ႉတၵ်းလႆႈၶၢမ်ႇတၢင်းဢၼ်ဢဝ်မၢၵ်ႇႁိၼ်သိုင်းတၢႆဢေႃႈ။ ၵေႃႉဢၼ်ႁဵတ်းမေႃၽီ၊ဢမ်ႇၼၼ်ႁဵတ်းဢတၢတ်ႈၼၼ်ႉတၵ်းလႆႈၶၢမ်ႇတၢႆၵွပ်ႈပိူဝ်ႈတၢင်းၽိတ်းတူဝ်မၼ်းၼၼ်ႉဢေႃႈ။”
ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ ႁႂ်ႈမၼ်းသင်ႇလၢတ်ႈတီႈလုၵ်ႈၸၢႆး ဢႃႇရုၼ်ႇ၊ ၸိူဝ်းဢၼ်ပဵၼ်ယဵၸ်ႈပရေႃးႁဵၵ်ႈ တင်းလၢႆလႄႈဝႃႈၸမ်ႉ၊ “ယဵၸ်ႈပရေႃးႁဵၵ်ႈၵေႃႉလႂ်သေဢမ်ႇဝႃႈ၊ဢမ်ႇလီႁႂ်ႈတူဝ်ၸဝ်ႈၵဝ်ႇၵူဝ်ႈၵိူၵ်ႇလူၺ်ႈတူဝ်တၢႆၵူၼ်းမဵဝ်းမၼ်းၼၼ်ႉ။-
ၼႂ်းဝႃႈၼၼ်သေၵေႃႈပေႃးပဵၼ်ပီႈၼွင်ႉဢွၵ်ႇၵၼ်ဢၼ်ဝႃႈ၊ပေႃႈ၊မႄႈ၊လုၵ်ႈၸၢႆး၊လုၵ်ႈယိင်း၊ပီႈၸၢႆး၊ၼွင်ႉၸၢႆး၊-
ပီႈၼၢင်းၼွင်ႉယိင်းဢၼ်ပဵၼ်သၢဝ်ၵၼ်ႇၺႃႇလႄႈယူႇၼႂ်းႁိူၼ်းယဵၸ်ႈပရေႃးႁဵၵ်ႈၼၼ်ႉၵူၺ်းၸင်ႇမီးဢၶႂၢင်ႉၶၢမ်ႇတၢင်းဢၼ်ၵူဝ်ႈၵိူၵ်ႇဢေႃႈ။-
ပေႃးတူဝ်တၢႆၼၼ်ႉပဵၼ်ပီႈၼွင်ႉၸိူဝ်ႉၶိူဝ်းၽၢႆႇမေး မၼ်းယႃႇပေႁႂ်ႈတူဝ်ၸဝ်ႈၵဝ်ႇလႆႈၵူဝ်ႈၵိူၵ်ႇ။-
“ၶဝ်တၵ်းဢမ်ႇလႆႈထႃၶူၼ်ႁူဝ်၊တၵ်းဢမ်ႇလႆႈထႃၼူတ်ႇၵၢင်းၶဝ်။ တၵ်းဢမ်ႇလႆႈထိူဝ်ၼိူဝ်ႉၼင်ၶဝ်ပုၼ်ႈဢၼ်ၼႄပျႃးတၢင်းဢၼ်မႆႈၸႂ်လူၺ်ႈလွင်ႈၵူၼ်းတၢႆၼၼ်ႉ။-
ၶဝ်တၵ်းလႆႈမူတ်းၸၢင်ႇပုၼ်ႈၽြႃးပဵၼ်ၸဝ်ႈၶဝ်ဢေႃႈ။ တေဢမ်ႇလႆႈႁဵတ်းႁႂ်ႈၼႃႇမႃႉၸိုဝ်ႈသဵင်ၽြႃးပဵၼ်ၸဝ်ႈၶဝ်လႆႈတူၵ်းတီႈတႅမ်ႇ။ ၵွပ်ႈပိူဝ်ႈၶဝ်လႆႈသၢၵ်ႈလူႇတၢင်းလူႇဢၼ်တုတ်ႇၽႆးတီႈ ထႃႇဝရႃႉၽြႃး၊ လႄႈၶဝ်တၵ်းလႆႈမူတ်းၸၢင်ႇဢေႃႈ။-
ၶဝ်တၵ်းဢမ်ႇလႆႈဢဝ်မေးဢၼ်ယၢမ်ႈႁဵတ်းမႄႈမွၵ်ႇယႃႈဢမ်ႇၼၼ်ၵေႃႈဢမ်ႇပဵၼ်သၢဝ်ၸႅတ်ႈ၊ဢမ်ႇၼၼ်ပဵၼ်မႄႈႁၢင်ႉၼၼ်ႉ၊ၵွပ်ႈပိူဝ်ႈၶဝ်ပဵၼ်ယဵၸ်ႈပရေႃးႁဵၵ်ႈ ဢၼ်မူတ်းၸၢင်ႇပုၼ်ႈၽြႃးပဵၼ်ၸဝ်ႈၶဝ်ဢေႃႈ။-
ၵူၼ်းတင်းလၢႆတၵ်းလႆႈမၢတ်ႈယဵၸ်ႈပရေႃးႁဵၵ်ႈမူတ်းၸၢင်ႇၵွပ်ႈပိူဝ်ႈမၼ်းသၢၵ်ႈၵၢပ်ႈတၢင်းလူႇမၢၵ်ႇၶဝ်ႈႁူင်းၶဝ်ႈတီႈၵဝ်ဢေႃႈ။ လွင်ႈမၼ်းၸမ်ႉ၊ၵဝ်ပဵၼ် ထႃႇဝရႃႉၽြႃး၊ ဢၼ်မူတ်းၸၢင်ႇႁဵတ်းႁႂ်ႈၵူၼ်းၵဝ်မူတ်းၸၢင်ႇဢေႃႈ။-
ပေႃးလုၵ်ႈယိင်းယဵၸ်ႈပရေႃးႁဵၵ်ႈႁဵတ်းမႄႈမွၵ်ႇယႃႈၸိုင်၊မၼ်းယႃႉသရေႇပေႃႈမၼ်းယဝ်ႉလႄႈတၵ်းလႆႈဢဝ်မၼ်းတုတ်ႇၽႆးႁႂ်ႈတၢႆဢေႃႈ။
“ၶုၼ်ယဵၸ်ႈပရေႃးႁဵၵ်ႈၸိုင်၊ပဵၼ်ၵေႃႉဢၼ်လႆႈၶၢမ်ႇဢဝ်ၽိၵ်ႈသိၵ်ႈတၢင်းဢၼ်ဢဝ်ၼမ်ႉမၼ်းသွၼ်းလေႃႇၵႃႈၼိူဝ်ႁူဝ်မၼ်းၼၼ်ႉလႄႈ၊လႆႈၶၢၼ်းဝႆႉၼႂ်းဢရႃႇဢၼ်ၼုင်ႈႁၢင်ႈၶိူင်ႈႁၢင်ႈၶူဝ်းၼၼ်ႉယဝ်ႉ၊ပိူဝ်ႈၼႆလႄႈတၵ်းဢမ်ႇလႆႈပွႆႇၶူၼ်ႁူဝ်မၼ်းယုင်ႈဝႆႉ၊တၵ်းဢမ်ႇလႆႈသိၵ်ႇၶူဝ်းၼုင်ႈမၼ်းပုၼ်ႈဢၼ်ၼႄပျႃးတၢင်းဢၼ်မႆႈၸႂ်ၶီၸႂ်လွင်ႈၵူၼ်းတၢႆၼၼ်ႉ။-
မၼ်းတၵ်းဢမ်ႇလႆႈၵႂႃႇၸူးတီႈတူဝ်တၢႆ၊ပိၵ်ႉသမ်ႉဝႃႈပဵၼ်ပေႃႈမႄႈမၼ်းသေၵေႃႈမၼ်းတၵ်းဢမ်ႇလႆႈႁဵတ်းႁႂ်ႈတူဝ်မၼ်းၵူဝ်ႈၵိူၵ်ႇ။-
ၵွပ်ႈပိူဝ်ႈၶုၼ်ယဵၸ်ႈပရေႃးႁဵၵ်ႈသၢၵ်ႈၵၢပ်ႈတူဝ်တီႈၽြႃးပဵၼ်ၸဝ်ႈမၼ်းယဝ်ႉလႄႈမၼ်းတေဢမ်ႇလႆႈဢွၵ်ႇသေၵႃႈၼႂ်းထႃႇၼႃႉဢၼ်မူတ်းၸၢင်ႇၵႂႃႇၸူးၵူၼ်းတၢႆလႄႈႁဵတ်းႁႂ်ႈထႃႇၼႃႉတီႈမူတ်းၸၢင်ႇၸဝ်ႈလႆႈၵူဝ်ႈၵိူၵ်ႇၼၼ်ႉ။ ၵဝ်ပဵၼ် ထႃႇဝရႃႉၽြႃး၊ ဢေႃႈ။-
မၼ်းတၵ်းတၵ်းလႆႈဢဝ်မေးဢၼ်ပဵၼ်သၢဝ်ၵၼ်ႇၺႃႇၸႅတ်ႈၸႅတ်ႈၵူၺ်းဢေႃႈ။-
မၼ်းဢမ်ႇလႆႈဢဝ်မႄႈမၢႆႈ၊မႄႈႁၢင်ႉ၊မႄႈယိင်းဢၼ်ဢမ်ႇပဵၼ်သၢဝ်ၸႅတ်ႈ၊မႄႈမွၵ်ႇယႃႈ။ မၼ်းတၵ်းလႆႈဢဝ်သၢဝ်ၵၼ်ႇၺႃႇၸႅတ်ႈၸႅတ်ႈၼႂ်းမဵဝ်းၸိူဝ်ႉၶိူဝ်းလဵဝ်ၵၼ်တင်းမၼ်းဢေႃႈ။-
ပေႃးဢမ်ႇၼၼ်လုၵ်ႈလၢင်းမၼ်းၸိူဝ်းဢၼ်ထုၵ်ႇလီမူတ်းၸၢင်ႇၼၼ်ႉတၵ်းပဵၼ်ဢၼ်ဢမ်ႇမူတ်းၸၢင်ႇဢေႃႈ။ ၵဝ်ပဵၼ် ထႃႇဝရႃႉၽြႃး၊ ဢၼ်ၶၢၼ်းမၼ်းဝႆႉႁႂ်ႈပဵၼ်ယဵၸ်ႈပရေႃးႁဵၵ်ႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈထႃႇဝရႃႉၽြႃး၊ သမ်ႉမီးဢမိင်ႉၵႃႈတီႈ မူဝ်းသေႇ၊ ထႅင်ႈလႄႈ၊-
ႁႂ်ႈမၼ်းသင်ႇလၢတ်ႈတီႈ ဢႃႇရုၼ်ႇ၊ လႄႈဝႃႈၸမ်ႉ၊ “ၼႂ်းလုၵ်ႈလၢင်းဢၼ်သိုပ်ႇလူင်းၵႂႃႇၼႂ်းၸိူဝ်ႉၶိူဝ်းမႂ်းသိုပ်ႇသိုပ်ႇတၢမ်တၢမ်ၼၼ်ႉၵေႃႉဢၼ်တူဝ်ၶၼ်ႇထႃႇမၼ်းလုၼၼ်ႉဢမ်ႇလႆႈသၢၵ်ႈၵၢပ်ႈတၢင်းလူႇဢႁႃႇယႃႉတၢင်းၵိၼ်တီႈၵဝ်။-
ၵေႃႉဢၼ်တူဝ်ၶၼ်ႇထႃႇမၼ်းလုဢၼ်ဝႃႈ၊ၵေႃႉဢၼ်တႃမွတ်ႇ၊ၵေႃႉဢၼ်ၶႃၶႄႉ၊ၵေႃႉဢၼ်မီးၼႃႇတႃဢမ်ႇပျေႉၸုမ်ႇ၊ၵေႃႉဢၼ်မီးဢၢင်ႇၵႃႇပူၼ်ႉလိူဝ်၊-
ၵေႃႉဢၼ်တိၼ်ႁၵ်း၊ၵေႃႉဢၼ်မိုဝ်းႁၵ်း၊-
ၵေႃႉဢၼ်လင်ၵွမ်း၊ၵေႃႉဢၼ်ဢႅၵ်း၊ၵေႃႉဢၼ်ပဵၼ်တႃတေႃႈ၊ၵေႃႉဢၼ်ပဵၼ်ႁိတ်း၊ၵေႃႉဢၼ်ပဵၼ်ႁဝ်ႈ၊ၵေႃႉဢၼ်ၶၢမ်ႇတၢင်းဢၼ်တွၼ်ၶႆႇႁမ်ၸိူဝ်းၼႆႉဢမ်ႇလႆႈသၢၵ်ႈၵၢပ်ႈတၢင်းလူႇ။-
ၼႂ်းမဵဝ်းၸိူဝ်ႉၶိူဝ်းယဵၸ်ႈပရေႃးႁဵၵ်ႈ ဢႃႇရုၼ်ႇ၊ ၼၼ်ႉၵေႃႉဢၼ်တူဝ်ၶၼ်ႇထႃႇလုၼၼ်ႉၸိုင်၊ဢမ်ႇလႆႈသၢၵ်ႈၵၢပ်ႈတၢင်းလူႇဢၼ်တုတ်ႇၽႆးတီႈၵဝ်သေၵေႃႉသေၵူၼ်း။-
ၵေႃႉဢၼ်ပဵၼ်ၸိူဝ်ႉၼင်ႇၼႆၼၼ်ႉတၵ်းလႆႈၵိၼ်တၢင်းၵိၼ်တၢင်းၶူပ်းဢၼ်သၢၵ်ႈလူႇတီႈၵဝ်၊ဢၼ်ပဵၼ်တၢင်းလူႇဢၼ်တုတ်ႇၽႆးဢၼ်မူတ်းၸၢင်ႇဢိၵ်ႇတင်းတၢင်းလူႇဢေႃႇၸႃႇတၢင်းၵိၼ်ဢၼ်မူတ်းၸၢင်ႇၼႃႇၸိူဝ်းၼၼ်ႉယူႇဢေႃႈ။-
ၵူၺ်းၵႃႈ၊ၵွပ်ႈပိူဝ်ႈမၼ်းမီးတၢင်းဢၼ်တူဝ်ၶၼ်ႇထႃႇလုလႄႈမၼ်းဢမ်ႇလႆႈမႃးၸမ်ၽႃႈၵင်ႈဢၼ်မူတ်းၸၢင်ႇ၊ဢမ်ႇလႆႈသုတ်ႉၸပ်းသုတ်ႉၸူးတီႈၶဵင်ႇတၢင်းလူႇ။ မၼ်းဢမ်ႇႁႂ်ႈလႆႈၶိူင်ႈပိူင်ဢၼ်မူတ်းၸၢင်ႇၸိူဝ်းၼႆႉလႆႈၵူဝ်ႈၵိူၵ်ႇတူၵ်းတႅမ်ႇ။ ၵဝ်ပဵၼ် ထႃႇဝရႃႉၽြႃး၊ ဢၼ်ႁႂ်ႈၸိူဝ်းၼႆႉမူတ်းၸၢင်ႇဢေႃႈ၊” ဝႃႈၼင်ႇၼႆဢေႃႈ။
ၼင်ႇၼၼ်လႄႈ မူဝ်းသေႇ၊ ၵေႃႈသင်ႇလၢတ်ႈတီႈ ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉဢိၵ်ႇတင်းတီႈၵူၼ်းမဵဝ်း ဢိသရေး၊ တင်းသဵင်ႈတင်းမူတ်းဢေႃႈ။
ၸဝ်ႈထႃႇဝရႃႉၽြႃး၊ သမ်ႉမီးဢမိင်ႉၵႃႈတီႈ မူဝ်းသေႇ၊ ထႅင်ႈလႄႈ၊-
ႁႂ်ႈမၼ်းသင်ႇလၢတ်ႈ ဢႃႇရုၼ်ႇ၊ တင်းလုၵ်ႈၸၢႆးမၼ်းတင်းလၢႆလႄႈဝႃႈၸမ်ႉ၊ “သူတၵ်းဢမ်ႇလႆႈႁဵတ်းႁႂ်ႈၼႃႇမႃႉၸိုဝ်ႈသဵင်ၵဝ်လႆႈတူၵ်းတီႈတႅမ်ႇ။ ႁႂ်ႈၶဝ်ယူႇႁၢင်ႇၵၼ်တင်းတၢင်းလူႇဢၼ်မူတ်းၸၢင်ႇၸိူဝ်းဢၼ်ၵူၼ်းမဵဝ်း ဢိသရေး၊ တင်းလၢႆသၢၵ်ႈၵၢပ်ႈတီႈၵဝ်ၼၼ်ႉတႃႉ။ ၵဝ်ပဵၼ် ထႃႇဝရႃႉၽြႃး၊ ဢေႃႈ။-
ပေႃးၼႂ်းၸိူဝ်ႉၶိူဝ်းမႂ်းသေၵေႃႉၵေႃႉမီးတၢင်းဢၼ်ဢမ်ႇမူတ်းၸၢင်ႇလႄႈလႆႈမႃးၸမ်ႁိမ်းတၢင်းလူႇဢၼ်မူတ်းၸၢင်ႇဢၼ်ၵူၼ်းမဵဝ်း ဢိသရေး၊ တင်းလၢႆသၢၵ်ႈၵၢပ်ႈဝႆႉတီႈၵဝ်ၼၼ်ႉၸိုင်၊ၵေႃႉၼၼ်ႉတၵ်းဢမ်ႇလႆႈႁဵတ်းတၢင်းဢၼ်သၢၵ်ႈၵၢပ်ႈၵႃႈတီႈၶဵင်ႇတၢင်းလူႇထႅင်ႈသေပွၵ်ႈ။ လွင်ႈၼႆႉၸိုင်၊တၵ်းလႆႈပႂ်ႉၵမ်ပႂ်ႉၸွမ်းၼႂ်းဝၼ်းလိုၼ်းမိူဝ်းၼႃႈသိုပ်ႇသိုပ်ႇတၢမ်တၢမ်ၵႂႃႇဢေႃႈ။ ၵဝ်ပဵၼ် ထႃႇဝရႃႉၽြႃး၊ ဢေႃႈ။-
“ၼႂ်းလုၵ်ႈလၢၼ်ၸိူဝ်ႉၶိူဝ်း ဢႃႇရုၼ်ႇ၊ ၵေႃႉဢၼ်ပဵၼ်ယေႃးၵႃႇဢၼ်ၸၢင်ႈၽႄႈၸၢင်ႈၸပ်း၊ဢမ်ႇၼၼ်ပဵၼ်တၢင်းဢၼ်ႁူဝ်ႈၸိုမ်းဢွၵ်ႇယူႇလႄႈၸူဝ်ႈဢၼ်ယင်းဢမ်ႇပႆႇႁွတ်ႈထိုင်တၢင်းဢၼ်မူတ်းသႂ်ၸိုင်၊ဢမ်ႇလႆႈၵိၼ်တၢင်းၵိၼ်ဢၼ်မူတ်းသႂ်။ ယဵၸ်ႈပရေႃးႁဵၵ်ႈ ဢၼ်တိူဝ်ႉထုၵ်ႇမဵဝ်းဢၼ်ဢမ်ႇမူတ်းသႂ်ဢၼ်ဝႃႈတူဝ်တၢႆ၊ဢမ်ႇၼၼ်ပေႃးၼမ်ႉသုၵ်ႉမၼ်းလႆဢွၵ်ႇ၊-
ဢမ်ႇၼၼ်ၵေႃႈပေႃးမၼ်းတိူဝ်ႉထုၵ်ႇတရိၵ်ႈသၢၼ်ႇဢၼ်ၸၢင်ႈလိုၼ်ႈၸၢင်ႈၵၢၼ်းၸိုင်၊ႁဵတ်းႁႂ်ႈမၼ်းၵူဝ်ႈၵိူၵ်ႇ၊ဢမ်ႇၼၼ်သေၵေႃႉၵေႃႉဢၼ်ႁဵတ်းႁႂ်ႈမၼ်းၵူဝ်ႈၵိူၵ်ႇလႄႈမၼ်းၼၼ်ႉပဵၼ်ၵေႃႉဢၼ်ဢမ်ႇမူတ်းသႂ်ဢေႃႈ။-
ယဵၸ်ႈပရေႃးႁဵၵ်ႈၵေႃႉဢၼ်ႁွတ်ႈထိုင်တၢင်းဢၼ်ဢမ်ႇမူတ်းသႂ်ၼၼ်ႉဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။ ပေႃးမၼ်းယင်းဢမ်ႇဢၢပ်ႇၼမ်ႉလႄႈယူႇၸိုင်၊မၼ်းဢမ်ႇလႆႈၵိၼ်ၶိူင်ႈတၢင်းလူႇဢၼ်မူတ်းသႂ်ၸိူဝ်းၼၼ်ႉဢေႃႈ။-
လိုၼ်းသေၵၢင်ဝၼ်းတူၵ်းယဝ်ႉၸင်ႇ၊တၵ်းႁွတ်ႈထိုင်တၢင်းဢၼ်မူတ်းသႂ်ဢေႃႈ။ ၵမ်းၼၼ်ႉ ၸင်ႇမၼ်းတၵ်းလႆႈၵိၼ်ၶိူင်ႈတၢင်းလူႇဢၼ်မူတ်းၸၢင်ႇဢၼ်ပဵၼ်တၢင်းၵိၼ်တၢင်းၶူပ်းပုၼ်ႈမၼ်းၼၼ်ႉဢေႃႈ။-
မၼ်းတၵ်းဢမ်ႇလႆႈၵိၼ်ၼိူဝ်ႉတူဝ်ဢၼ်တၢႆၵူၺ်းမၼ်း၊ဢမ်ႇၼၼ်တူဝ်ဢၼ်တူဝ်ထိူၼ်ႇႁၢႆႉၶူပ်းတၢႆၼၼ်ႉ။ ဢၼ်ၼႆႉတၵ်းႁဵတ်းႁႂ်ႈမၼ်းၵူဝ်ႈၵိူၵ်ႇဢေႃႈ။ ၵဝ်ပဵၼ် ထႃႇဝရႃႉၽြႃး၊ ဢေႃႈ။-
“ယဵၸ်ႈပရေႃးႁဵၵ်ႈၵႃႈမီးတင်းသဵင်ႈတင်းမူတ်းတၵ်းလႆႈပႂ်ႉထိင်းတြႃးဢၼ်ၵဝ်ပၼ်ဝႆႉၸိူဝ်းၼၼ်ႉဢေႃႈ။ ပေႃးဢမ်ႇၼၼ်ၶဝ်တၵ်းထူပ်းဢပျတ်ႈလႄႈလႆႈတၢႆၵႂႃႇၵွပ်ႈပိူဝ်ႈၶဝ်ယႃႉပႅတ်ႈပိင်းၺၢပ်ႈတြႃးၵဝ်ဢေႃႈ။ ၵဝ်ပဵၼ် ထႃႇဝရႃႉၽြႃး၊ ဢၼ်ႁႂ်ႈၶဝ်မူတ်းၸၢင်ႇဢေႃႈ။
“ၵူၼ်းႁိူၼ်းၵူၼ်းယေးယဵၸ်ႈပရေႃးႁဵၵ်ႈၵူၺ်းမီးဢၶႂၢင်ႉဢၼ်လႆႈၵိၼ်ၶိူင်ႈတၢင်းလူႇဢၼ်မူတ်းၸၢင်ႇဢေႃႈ။ ၵူၼ်းဢၼ်သွၼ်ႈပိုင်ႈယူႇၸွမ်းယဵၸ်ႈပရေႃးႁဵၵ်ႈသေဢမ်ႇဝႃႈ၊ၵူၼ်းဢၼ်ၵိၼ်ၸၢင်ႈၵိၼ်ငႃသေဢမ်ႇဝႃႈ၊ၽူႈလႂ်ၵေႃႈတၵ်းဢမ်ႇလႆႈၵိၼ်သေၵေႃႉသေၵူၼ်း။-
ၶႃႈဢၼ်ယဵၸ်ႈပရေႃးႁဵၵ်ႈဢဝ်ငိုၼ်းသိုဝ်ႉဢဝ်တင်းၶႃႈဢၼ်ၵိူတ်ႇလဵင်ႉၵႃႈၼႂ်းႁိူၼ်းမၼ်းၼၼ်ႉၸိုင်၊တၵ်းလႆႈၵိၼ်တၢင်းၵိၼ်မၼ်းဢေႃႈ။-
လုၵ်ႈယိင်းယဵၸ်ႈပရေႃးႁဵၵ်ႈဢၼ်ပဵၼ်မေးၵူၼ်းဢၼ်ဢမ်ႇၸႂ်ႈယဵၸ်ႈပရေႃးႁဵၵ်ႈၼၼ်ႉဢမ်ႇမီးဢၶႂၢင်ႉၵိၼ်ၶိူင်ႈတၢင်းလူႇဢၼ်မူတ်းၸၢင်ႇၸိူဝ်းၼၼ်ႉ။-
ၵူၺ်းၵႃႈ၊ပေႃးလုၵ်ႈယိင်းၼၼ်ႉပဵၼ်မႄႈမၢႆႈၵႂႃႇ၊ပဵၼ်မႄႈႁၢင်ႉၵႂႃႇယဝ်ႉ၊သမ်ႉဢမ်ႇမီးလုၵ်ႈမီးလၢင်းသေၵေႃႉလႄႈၶိုၼ်းမႃးယူႇတီႈႁိူၼ်းပေႃႈမၼ်းလႄႈယူႇမိူၼ်ၸိူဝ်ႉၼင်ႇမိူဝ်ႈဢၼ်မၼ်းယင်းတိုၵ်ႉပဵၼ်လုၵ်ႈဢွၼ်ႇယူႇၼၼ်ႉၸိုင်၊မၼ်းၼၼ်ႉမီးဢၶႂၢင်ႉဢၼ်ၵိၼ်တၢင်းၵိၼ်တၢင်းၶူပ်းဢၼ်ပေႃႈမၼ်းႁဵတ်းယဵၸ်ႈပရေႃးႁဵၵ်ႈ လႄႈလႆႈမႃးၼၼ်ႉဢေႃႈ။ ၵူၼ်းႁိူၼ်းယဵၸ်ႈပရေႃးႁဵၵ်ႈၵူၺ်းမီးဢၶႂၢင်ႉဢၼ်လႆႈၵိၼ်ၶိူင်ႈတၢင်းလူႇၸိူဝ်းၼၼ်ႉဢေႃႈ။
“ပေႃးၵူၼ်းသေၵေႃႉၵေႃႉဢၼ်ဢမ်ႇၸႂ်ႈၵူၼ်းႁိူၼ်းၵူၼ်းယေးယဵၸ်ႈပရေႃးႁဵၵ်ႈၼၼ်ႉယင်းဢမ်ႇႁုလႄႈၵိၼ်ၶိူင်ႈတၢင်းလူႇဢၼ်မူတ်းၸၢင်ႇမႅၼ်ႈၸိုင်၊မၼ်းၼၼ်ႉတၵ်းလႆႈတႅၼ်းၶိုၼ်းၵႃႈၶၼ်ၶိူင်ႈတၢင်းလူႇၼၼ်ႉတဵမ်တဵမ်ၵူၺ်းဢမ်ႇၵႃး၊တၵ်းလႆႈထၢပ်ႈထႅင်ႈႁႃႈပုၼ်ႈပုၼ်ႈၼိုင်ႈပၼ်ယဵၸ်ႈပရေႃးႁဵၵ်ႈဢေႃႈ။-
ယဵၸ်ႈပရေႃးႁဵၵ်ႈတင်းလၢႆတၵ်းဢမ်ႇလႆႈႁဵတ်းတၢင်းဢၼ်လူလၢႆတီႈၶိူင်ႈတၢင်းလူႇဢၼ်မူတ်းၸၢင်ႇဢၼ်ၵူၼ်းမဵဝ်း ဢိသရေး၊ ၶဝ်သၢၵ်ႈလူႇတီႈ ထႃႇဝရႃႉၽြႃး၊ ၼၼ်ႉလႃးလႃး။-
တၵ်းဢမ်ႇလႆႈပၼ်ၵေႃႉဢၼ်ဢမ်ႇမီးဢၶႂၢင်ႉၼၼ်ႉၵိၼ်မႅၼ်ႈလႄႈႁႂ်ႈမၼ်းလႆႈထုၵ်ႇဢပျတ်ႈ။ ၵေႃႉဢၼ်ၵိၼ်မႅၼ်ႈၼၼ်ႉတၵ်းမီးဢပျတ်ႈလႄႈတၵ်းလႆႈၶၢမ်ႇတၢမ်ႇဢပျတ်ႈဢေႃႈ။ လွင်ႈမၼ်းၸမ်ႉ၊ၵဝ်ပဵၼ် ထႃႇဝရႃႉၽြႃး၊ ဢၼ်ႁႂ်ႈၶိူင်ႈတၢင်းလူႇတင်းလၢႆမူတ်းၸၢင်ႇဢေႃႈ၊” ဝႃႈၼင်ႇၼႆဢေႃႈ။
ၸဝ်ႈထႃႇဝရႃႉၽြႃး၊ သမ်ႉၶိုၼ်းမီးဢမိင်ႉတီႈ မူဝ်းသေႇ၊ ထႅင်ႈလႄႈ၊-
ႁႂ်ႈမၼ်းသင်ႇလၢတ်ႈတီႈ ဢႃႇရုၼ်ႇ၊ တင်းလုၵ်ႈၸၢႆးမၼ်းတင်းလၢႆဢိၵ်ႇတင်းၵူၼ်းမဵဝ်း ဢိသရေး၊ တင်းလၢႆလႄႈဝႃႈၸမ်ႉ၊ “ၼႂ်းမိူဝ်ႈဢၼ်ၵူၼ်းမဵဝ်း ဢိသရေး၊ သေဢမ်ႇဝႃႈ၊ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈပိုင်ႈယူႇၸွမ်းၵူၼ်းမဵဝ်း ဢိသရေး၊ သေဢမ်ႇဝႃႈ၊ၵေႃႉဢၼ်သၢၵ်ႈလူႇၶိူင်ႈတၢင်းလူႇဢၼ်တုတ်ႇၽႆးဢၼ်ႁဵတ်းတၢင်းလူႇပုၼ်ႈတၢင်းလူႇၵတိသဵတ်ႈၸႃႇလႄႈသင်၊ပုၼ်ႈတၢင်းလူႇဢၼ်ၸွမ်းၼင်ႇဢလူဝ်ႇၵၢင်ၸႂ်မၼ်းလႄႈသင်၊တူဝ်တၢင်းလူႇမၼ်းၼၼ်ႉတၵ်းလႆႈပဵၼ်တူဝ်ဢၼ်ဢမ်ႇမီးတီႈၸိတီႈၼႄးဢေႃႈ။-
မၼ်းတၵ်းလႆႈဢဝ်ဝူဝ်းပေႃႈ၊သူဝ်းပေႃႈ၊ပႄႉပေႃႈဢၼ်ဢၢင်ႇၵႃႇၸုင်ႇၼၼ်ႉသၢၵ်ႈလူႇႁႂ်ႈထုၵ်ႇၸႂ်ၵျိူၵ်ႈၸႂ်မၼ်းၸဝ်ႈဢေႃႈ။-
သူဢမ်ႇလႆႈဢဝ်တူဝ်ဢၼ်မီးတီႈၸိတီႈၼႄးၼၼ်ႉသၢၵ်ႈလူႇ၊ ထႃႇဝရႃႉၽြႃး၊ ဢမ်ႇထုၵ်ႇၸႂ်ၵျိူၵ်ႈၸႂ်တူဝ်မဵဝ်းၼၼ်ႉ။-
ၼႂ်းမိူဝ်ႈဢၼ်သေၵေႃႉၵေႃႉသၢၵ်ႈလူႇတၢင်းလူႇမိၵ်ႈသႁႃႇယႃႉတီႈ ထႃႇဝရႃႉၽြႃး၊ ပုၼ်ႈတၢင်းလူႇၵတိသဵတ်ႈၸႃႇလႄႈသင်၊ပုၼ်ႈတၢင်းလူႇဢၼ်ၸွမ်းၼင်ႇဢလူဝ်ႇၵၢင်ၸႂ်မၼ်းလႄႈသင်၊မၼ်းတၵ်းလႆႈသၢၵ်ႈလူႇတူဝ်ဢၼ်ဢမ်ႇမီးတီႈၸိတီႈၼႄးလႄႈႁႂ်ႈထုၵ်ႇၸႂ်ၵျိူၵ်ႈၸႂ်မၼ်းၸဝ်ႈဢေႃႈ။-
သူဢမ်ႇလႆႈဢဝ်တူဝ်ဢၼ်တႃမွတ်ႇ၊တူဝ်ဢၼ်ၶႃၶႄႉ၊တူဝ်ဢၼ်ဢင်ႇၵႃႇလု၊တူဝ်ဢၼ်မီးတုမ်ႇၸဵပ်း၊တူဝ်ဢၼ်မီးႁိတ်းမီးႁဝ်ႈမဵဝ်းၼၼ်ႉသၢၵ်ႈလူႇတီႈ ထႃႇဝရႃႉၽြႃး၊ တၵ်းဢမ်ႇလႆႈဢဝ်တူဝ်ၸိူဝ်ႉၼင်ႇၼၼ်သေတူဝ်သေလႂ်သၢၵ်ႈလူႇၵႃႈၼိူဝ်ၶဵင်ႇတၢင်းလူႇႁႂ်ႈပဵၼ်တၢင်းလူႇဢၼ်တုတ်ႇၽႆးၼၼ်ႉလႃးလႃး။-
ပုၼ်ႈတၢင်းလူႇဢၼ်ၸွမ်းၼင်ႇဢလူဝ်ႇၵၢင်ၸႂ်တူဝ်ၸဝ်ႈၵဝ်ႇၼၼ်ႉၸိုင်၊တူဝ်ဢၼ်ဢင်ႇၵႃႇပူၼ်ႉလိူဝ်ၵႂႃႇ၊ဢမ်ႇၼၼ်တူဝ်ဢၼ်ဢင်ႇၵႃႇသုတ်ႉယွမ်းၵႂႃႇမဵဝ်းၼၼ်ႉသၢၵ်ႈလူႇလႆႈယူႇဢေႃႈ။ ၼႂ်းဝႃႈၼၼ်သေၵေႃႈပုၼ်ႈတၢင်းလူႇၵတိသဵတ်ႈၸႃႇၸမ်ႉ၊တူဝ်မဵဝ်းၼၼ်ႉဢမ်ႇထုၵ်ႇၸႂ်ၵျိူၵ်ႈၸႂ်မၼ်းၸဝ်ႈ။-
တူဝ်ဢၼ်တွၼ်ပႅတ်ႈၶႆႇႁမ်မၼ်း၊ဢမ်ႇၼၼ်လိမ်ႇလႅဝ်မိပ်ႇလႅဝ်၊ဢမ်ႇၼၼ်ပေႃႉထုပ်ႉႁႂ်ႈလႅဝ်၊ဢမ်ႇၼၼ်ထိူဝ်ၶၢတ်ႇပၢတ်ႇပႅတ်ႈၸိူဝ်းၼၼ်ႉဢမ်ႇလႆႈဢဝ်မႃးသၢၵ်ႈလူႇတီႈ ထႃႇဝရႃႉၽြႃး၊ သေတူဝ်သေလႂ်၊တူဝ်တၢင်းလူႇမဵဝ်းၼၼ်ႉတၵ်းဢမ်ႇလႆႈႁဵတ်းၵႃႈၼႂ်းမိူင်းသူ။
“တူဝ်ဢၼ်သူလႆႈၵႃႈတီႈၵူၼ်းတၢင်ႇၸိူဝ်ႉတၢင်ႇၶိူဝ်းမႃးၼၼ်ႉၵေႃႈသူတၵ်းဢမ်ႇလႆႈဢဝ်သၢၵ်ႈလူႇႁႂ်ႈပဵၼ်တၢင်းလူႇဢၼ်တုတ်ႇၽႆးတီႈၽြႃးပဵၼ်ၸဝ်ႈသူ။ တူဝ်ၸိူဝ်ႉၼင်ႇၼၼ်ၼၼ်ႉမၢတ်ႈပဵၼ်တူဝ်ဢၼ်လုဢၼ်လႅဝ်လႄႈပဵၼ်ဢၼ်ဢမ်ႇထုၵ်ႇၸႂ်ၵျိူၵ်ႈၸႂ်မၼ်းၸဝ်ႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ လႄႈဝႃႈ၊-
“မိူဝ်ႈဢၼ်သူဝ်း၊ပႄႉ၊ဝူဝ်း၊ၵိူတ်ႇမႃးၼၼ်ႉတၵ်းလႆႈယူႇၸွမ်းမႄႈမၼ်းၸဵတ်းဝၼ်းတဵမ်တဵမ်ဢေႃႈ။ လိုၼ်းသေၼၼ်ႉယဝ်ႉၸင်ႇ၊ပဵၼ်ဢၼ်ထုၵ်ႇဢၼ်လီပုၼ်ႈဢၼ်တၵ်းသၢၵ်ႈလူႇတီႈ ထႃႇဝရႃႉၽြႃး၊ ႁႂ်ႈပဵၼ်တၢင်းလူႇဢၼ်တုတ်ႇၽႆးဢေႃႈ။-
ပဵၼ်သူဝ်း၊ဝူဝ်း၊ပႄႉ၊မဵဝ်းလႂ်သေဢမ်ႇဝႃႈ၊တၵ်းဢမ်ႇလႆႈဢဝ်မႄႈလုၵ်ႈတင်းသွင်တူဝ်သၢၵ်ႈလူႇၼႂ်းဝၼ်းလဵဝ်ၵၼ်။-
ၼႂ်းမိူဝ်ႈဢၼ်သူသၢၵ်ႈလူႇတၢင်းလူႇဢၼ်တၢင်ႇၵျေးၸူးၽြႃးပဵၼ်ၸဝ်ႈၼၼ်ႉၸိုင်၊ႁဵတ်းၸွမ်းထုင်းတြႃးႁႂ်ႈထုၵ်ႇၸႂ်ၵျိူၵ်ႈၸႂ်မၼ်းၸဝ်ႈတႃႉ။-
တၵ်းလႆႈၵိၼ်ၶိူင်ႈတၢင်းလူႇၼႂ်းဝၼ်းဢၼ်သၢၵ်ႈလူႇၼၼ်ႉဢေႃႈ။ ယႃႇပေႁႂ်ႈၵိုတ်းႁႂ်ႈၵျၢၼ်ႇတေႃႇထိုင်ႁွတ်ႈဝၼ်းမိူဝ်ႈၽုၵ်ႈၼၼ်ႉ။ ၵဝ်ပဵၼ် ထႃႇဝရႃႉၽြႃး၊ ဢေႃႈ။
“ပႂ်ႉၵမ်ပႂ်ႉၸွမ်းပိင်းၺၢပ်ႈၵဝ်တင်းလၢႆတႃႉ။ ၵဝ်ပဵၼ် ထႃႇဝရႃႉၽြႃး၊ ဢေႃႈ။-
တၵ်းဢမ်ႇလႆႈဢဝ်ၼႃႇမႃႉၸိုဝ်ႈသဵင်ၵဝ်ဢၼ်မူတ်းၸၢင်ႇၼၼ်ႉၶျႃးတူၵ်းတီႈတႅမ်ႇ။ ၵူၼ်းမဵဝ်း ဢိသရေး၊ ၵႃႈမီးတင်းသဵင်ႈတင်းလူင်တၵ်းလႆႈမၢတ်ႈၵဝ်ပဵၼ်ဢၼ်မူတ်းၸၢင်ႇဢေႃႈ။-
ၵဝ်ပဵၼ် ထႃႇဝရႃႉၽြႃး၊ ဢၼ်ႁဵတ်းႁႂ်ႈသူမူတ်းၸၢင်ႇလႄႈထုတ်ႇၼုၵ်ႈဢဝ်သူဢွၵ်ႇသေမိူင်း ဢေးၵျိပ်ႉ၊ မႃးႁႂ်ႈလႆႈပဵၼ်ၽြႃးပဵၼ်ၸဝ်ႈသူဢေႃႈ။ ၵဝ်ပဵၼ် ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ပၼ်ထုင်းတြႃးတီႈ မူဝ်းသေႇ၊ ဢၼ်ၵပ်းၵၢႆႇလူၺ်ႈပွႆးထမ်ႇမႃႉဢၼ်မၵ်းၶၢၼ်းဝႆႉပုၼ်ႈၵူၼ်းမဵဝ်း ဢိသရေး၊ တင်းလၢႆ၊-
တၵ်းလႆႈၸုတုမ်ၵၼ်ႁႂ်ႈလႆႈဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၼၼ်ႉလႄႈဝႃႈၸမ်ႉ၊-
“သူတၵ်းလႆႈႁဵတ်းၵၢၼ်ႁဵတ်းငၢၼ်းႁူၵ်းဝၼ်းဢေႃႈ။ ၵူၺ်းၵႃႈ၊တၵ်းလႆႈၶုၵ်းၸႂ်လႆႈဝၼ်းဢၼ်ထူၼ်ႈထိုင်ၸဵတ်းဝၼ်းၼၼ်ႉပဵၼ်ဝၼ်းၵမ်သိၼ်၊ဝၼ်းဢၼ်ၵိုတ်းလိုဝ်ႈၼိမ်ၼိမ်လီလီဢေႃႈ။ ၼႂ်းဝၼ်းၼၼ်ႉတၵ်းဢမ်ႇလႆႈႁဵတ်းၵၢၼ်ႁဵတ်းငၢၼ်း၊တၵ်းလႆႈၸုတုမ်ၵၼ်ဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၵူၺ်းဢေႃႈ။ ဝၼ်းၵမ်သိၼ်ပဵၼ်ဝၼ်း ထႃႇဝရႃႉၽြႃး၊ ၵႃႈၼႂ်းတီႈဢၼ်သူယူႇသူသဝ်းၵူႈတီႈၵူႈလႅၼ်ၼၼ်ႉဢေႃႈ။
ဢၼ်ၼႆႉပဵၼ်ပွႆးထမ်ႇမႃႉၸိူဝ်းဢၼ်သူတၵ်းလႆႈႁဵတ်းၸွမ်းၵႃႈၼင်ႇဢၼ်ၶိင်ႇမၼ်းၶႃႇမၼ်းမၵ်းၶၢၼ်းမီးဝႆႉၼၼ်ႉဢေႃႈ။-
“ပွႆး ပသၶႃႇ၊ ၸိုင်၊ပဵၼ်ပွႆးဢၼ်ယုၵ်ႉယွင်ႈ ထႃႇဝရႃႉၽြႃး၊ လႄႈၼႂ်းလိူၼ်တီႈၼိုင်ႈသိပ်းသီႇဝၼ်းၶိင်ႇႁူဝ်ၶမ်ႈၼၼ်ႉပဵၼ်ဝၼ်းတင်ႈပွႆးဢေႃႈ။-
ဝၼ်းတီႈသိပ်းႁႃႈၼၼ်ႉပဵၼ်ဝၼ်းပွႆးၵိၼ်ၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈလႄႈ၊ၸဵတ်းဝၼ်းတဵမ်တဵမ်သူတၵ်းဢမ်ႇလႆႈၵိၼ်ၶဝ်ႈမုၼ်းဢၼ်သႂ်ႇၸိူဝ်ႉပႅင်ႈၼၼ်ႉ။-
ၼႂ်းဝၼ်းတီႈၼိုင်ႈဝၼ်းပွႆးၼၼ်ႉသူတၵ်းလႆႈၸုတုမ်ၵၼ်သေယဝ်ႉ၊ဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၵူၺ်းလႄႈဢမ်ႇလႆႈႁဵတ်းၵၢၼ်ၼႃႈႁိူၼ်းလႃးလႃး။-
သူတၵ်းလႆႈသၢၵ်ႈလူႇတၢင်းလူႇဢၼ်တုတ်ႇၽႆးၸဵတ်းဝၼ်းတဵမ်တဵမ်ဢေႃႈ။ ဝၼ်းဢၼ်ထူၼ်ႈထိုင်ၸဵတ်းဝၼ်းၼၼ်ႉသူသမ်ႉတၵ်းလႆႈၸုတုမ်ၵၼ်သေယဝ်ႉ၊ဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ထႅင်ႈလႄႈဢမ်ႇလႆႈႁဵတ်းၵၢၼ်လႃးလႃး၊” ဝႃႈၼင်ႇၼႆဢေႃႈ။
ၸဝ်ႈထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ ထႅင်ႈလႄႈ၊-
ႁႂ်ႈမၼ်းသင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈၸမ်ႉ၊ “မိူဝ်ႈဢၼ်သူႁွတ်ႈထိုင်မိူင်းဢၼ်ၵဝ်တၵ်းပၼ်သူၼၼ်ႉလႄႈပၢတ်ႇၶဝ်ႈၼၼ်ႉၸိုင်၊မတ်ႉလိုၼ်ႈၶဝ်ႈဢၼ်ပဵၼ်ႁူင်းဢွၼ်တၢင်းပိူၼ်ႈၼၼ်ႉသူတၵ်းလႆႈဢဝ်မႃးတီႈယဵၸ်ႈပရေႃးႁဵၵ်ႈ ဢေႃႈ။-
မၼ်းတၵ်းလႆႈဢဝ်လိုၼ်ႈၶဝ်ႈၼၼ်ႉသၢၵ်ႈလူႇပဵၼ်ပုၼ်ႈတၢင်းလူႇဢၼ်ၶိုၵ်ႉဢၼ်ၶမ်ႇတီႈ ထႃႇဝရႃႉၽြႃး၊ ႁႂ်ႈထုၵ်ႇၸႂ်ၵျိူၵ်ႈၸႂ်မၼ်းၸဝ်ႈဢေႃႈ။ ယဵၸ်ႈပရေႃးႁဵၵ်ႈၼၼ်ႉတၵ်းလႆႈသၢၵ်ႈလူႇၼႂ်းဝၼ်းဝၢႆးၵမ်သိၼ်ဝၼ်းၼိုင်ႈၼၼ်ႉဢေႃႈ။-
ၵႃႈၼႂ်းဝၼ်းဢၼ်သူသၢၵ်ႈလူႇလိုၼ်ႈၶဝ်ႈၼၼ်ႉသူတၵ်းလႆႈဢဝ်သူဝ်းပေႃႈဢွၼ်ႇဢၼ်ဢမ်ႇပႆႇၶွပ်ႈၶူပ်ႇ၊တူဝ်ဢၼ်ဢမ်ႇမီးတီႈၸိတီႈၼႄးၼၼ်ႉသၢၵ်ႈလူႇၸွမ်းႁႂ်ႈပဵၼ်ပုၼ်ႈၶိူင်ႈတၢင်းလူႇဢၼ်တုတ်ႇၽႆးတီႈ ထႃႇဝရႃႉၽြႃး၊ ဢေႃႈ။-
တၵ်းလႆႈဢဝ်ၽွင်ၶဝ်ႈၵျုင်ႇႁူၵ်းၶၼ်ၼွၵ်းလေႃးတင်းၼမ်ႉမၼ်းသၢၼ်ႇလုၼ်ႇသေလႄႈသၢၵ်ႈလူႇၸွမ်းႁႂ်ႈပဵၼ်ပုၼ်ႈၶိူင်ႈတၢင်းလူႇဢၼ်တုတ်ႇၽႆးဢေႃႈ။ ဢၢႆႁွမ်ဢၢႆႁူၺ်းတၢင်းလူႇၼၼ်ႉပဵၼ်ဢၼ်ထုၵ်ႇၸႂ်ၵျိူၵ်ႈၸႂ် ထႃႇဝရႃႉၽြႃး၊ ဢေႃႈ။ သူတၵ်းလႆႈဢဝ်တင်းၼမ်ႉမၢၵ်ႇၸပိတ်ႉတဝ်ႈၼိုင်ႈသၢၵ်ႈလူႇၸွမ်းဢေႃႈ။-
မၢၵ်ႇၶဝ်ႈႁူင်းၶဝ်ႈဢၼ်မႂ်ႇ၊ဢၼ်ပဵၼ်မၢၵ်ႇလိပ်းႁူင်းလိပ်းသေဢမ်ႇဝႃႈ၊ၽဝ်ႁဵတ်းၶဝ်ႈမုၼ်းသေဢမ်ႇဝႃႈ၊သူတၵ်းဢမ်ႇလႆႈၵိၼ်တေႃႇထိုင်ႁွတ်ႈဝၼ်းဢၼ်သူဢဝ်မႃးသၢၵ်ႈလူႇတီႈ ထႃႇဝရႃႉၽြႃး၊ ယဝ်ႉၼၼ်ႉ။ ပဵၼ်ထုင်းတြႃးဢၼ်ၸူဝ်ႈလုၵ်ႈပၢၼ်လၢၼ်သူတၵ်းလႆႈပႂ်ႉၵမ်ပႂ်ႉၸွမ်းသိုပ်ႇၵႂႃႇတႃႇသေႇဢေႃႈ။
“တႄႇဢဝ်ဝၼ်းဝၢႆးဝၼ်းၵမ်သိၼ်ဢၼ်သူဢဝ်လိုၼ်ႈၶဝ်ႈသၢၵ်ႈလူႇတီႈ ထႃႇဝရႃႉၽြႃး၊ ယဝ်ႉၼၼ်ႉၼပ်ႉဢၢၼ်ႇၵႂႃႇထိုင်ၸဵတ်းသိၼ်တဵမ်တဵမ်တႃႉ။-
ၼႂ်းဝၼ်းဢၼ်ထူၼ်ႈတဵမ်ႁႃႈသိပ်းဝၼ်း၊ဝၼ်းဢၼ်ပူၼ်ႉဝၼ်းၵမ်သိၼ်ဢၼ်ပဵၼ်သဵၼ်တီႈၸဵတ်းၼၼ်ႉၸိုင်၊သူသမ်ႉတၵ်းလႆႈသၢၵ်ႈလူႇလိုၼ်ႈၶဝ်ႈဢၼ်မႂ်ႇတီႈ ထႃႇဝရႃႉၽြႃး၊ ဢေႃႈ။-
ႁိူၼ်းၵူၼ်းယေႈႁိူၼ်းတၵ်းလႆႈဢဝ်မႃးၶဝ်ႈမုၼ်းသွင်ႁူၺ်ႇလႄႈသၢၵ်ႈလူႇတီႈ ထႃႇဝရႃႉၽြႃး၊ ႁႂ်ႈပဵၼ်ပုၼ်ႈတၢင်းလူႇဢၼ်ၶိုၵ်ႉဢၼ်ၶမ်ႇဢေႃႈ။ ၶဝ်ႈမုၼ်းယေႈႁူၺ်ႇၼၼ်ႉတၵ်းလႆႈဢဝ်ၽွင်ၶဝ်ႈၵျုင်ႇႁူၵ်းၶၼ်သႂ်ႇပႃးၸိူဝ်ႉပႅင်ႈသေယဝ်ႉ၊ၽဝ်ႁဵတ်းလႄႈသၢၵ်ႈလူႇတီႈ ထႃႇဝရႃႉၽြႃး၊ ႁႂ်ႈပဵၼ်ပုၼ်ႈတၢင်းလူႇမၢၵ်ႇၶဝ်ႈႁူင်းၶဝ်ႈဢၼ်ပၢတ်ႇသိမ်းဢွၼ်တၢင်းပိူၼ်ႈၼၼ်ႉဢေႃႈ။-
ၵမ်းၼၼ်ႉမူႇၵူၼ်းၸိူဝ်းၵူၼ်းတင်းလၢႆတၵ်းလႆႈဢဝ်သူဝ်းဢွၼ်ႇဢၼ်ဢမ်ႇပႆႇၶွပ်ႈၶူပ်ႇ၊တူဝ်ဢၼ်ဢမ်ႇမီးတီႈၸိတီႈၼႄးၸဵတ်းတူဝ်၊ဝူဝ်းပေႃႈဢွၼ်ႇတူဝ်ၼိုင်ႈ၊ပႄႉပေႃႈသွင်တူဝ်၊သၢၵ်ႈလူႇလူၺ်ႈၵၼ်တင်းၶဝ်ႈမုၼ်းၼၼ်ႉဢေႃႈ။ ၶဝ်တၵ်းလႆႈသၢၵ်ႈလူႇႁႂ်ႈပဵၼ်ပုၼ်ႈၶိူင်ႈတၢင်းလူႇဢၼ်တုတ်ႇၽႆးလႄႈသၢၵ်ႈလူႇတီႈ ထႃႇဝရႃႉၽြႃး၊ ႁူမ်ႈလူၺ်ႈၵၼ်တင်းတၢင်းလူႇမၢၵ်ႇၶဝ်ႈႁူင်းၶဝ်ႈဢိၵ်ႇတင်းတၢင်းလူႇၼမ်ႉမၢၵ်ႇၸပိတ်ႉဢေႃႈ။ ဢၢႆႁွမ်ဢၢႆႁူၺ်းတၢင်းလူႇၼၼ်ႉပဵၼ်ဢၼ်ထုၵ်ႇၸႂ်ၵျိူၵ်ႈၸႂ် ထႃႇဝရႃႉၽြႃး၊ ဢေႃႈ။-
သူတၵ်းလႆႈဢဝ်ပႄႉပေႃႈဢွၼ်ႇတူဝ်ၼိုင်ႈသၢၵ်ႈလူႇႁႂ်ႈပဵၼ်ပုၼ်ႈတၢင်းလူႇဢၼ်ၽေႇဢပျတ်ႈ ဢိၵ်ႇတင်းသူဝ်းပေႃႈဢွၼ်ႇဢၼ်ဢမ်ႇပႆႇၶွပ်ႈၶူပ်ႇသွင်တူဝ်ႁႂ်ႈပဵၼ်ပုၼ်ႈတၢင်းလူႇမိၵ်ႈသႁႃႇယႃႉဢေႃႈ။-
ယဵၸ်ႈပရေႃးႁဵၵ်ႈ တၵ်းလႆႈသၢၵ်ႈလူႇၶဝ်ႈမုၼ်းလူၺ်ႈၵၼ်တင်းသူဝ်းပေႃႈဢွၼ်ႇသွင်တူဝ်ႁႂ်ႈပဵၼ်ပုၼ်ႈတၢင်းလူႇဢၼ်ၶိုၵ်ႉဢၼ်ၶမ်ႇတီႈ ထႃႇဝရႃႉၽြႃး၊ ပုၼ်ႈယဵၸ်ႈပရေႃးႁဵၵ်ႈဢေႃႈ။ တၢင်းလူႇၸိူဝ်းၼၼ်ႉပဵၼ်ဢၼ်မူတ်းၸၢင်ႇၼႃႇဢေႃႈ။-
ၼႂ်းဝၼ်းၼၼ်ႉသူတၵ်းဢမ်ႇလႆႈႁဵတ်းၵၢၼ်ၼႃႈႁိူၼ်းလႄႈတၵ်းလႆႈၸုတုမ်ၵၼ်သေလႄႈဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၵူၺ်းဢေႃႈ။ ပဵၼ်ထုင်းတြႃးဢၼ်ၸူဝ်ႈလုၵ်ႈပၢၼ်လၢၼ်သူတၵ်းလႆႈပႂ်ႉၵမ်ပႂ်ႉၸွမ်းသိုပ်ႇသိုပ်ႇတၢမ်တၢမ်တႃႇသေႇၵႃႈၼႂ်းတီႈဢၼ်သူယူႇသူသဝ်းၵူႈတီႈၵူႈလႅၼ်ၼၼ်ႉဢေႃႈ။
“မိူဝ်ႈဢၼ်သူပၢတ်ႇၶဝ်ႈၵႃႈတီႈလွၵ်းၼႃးသူၼၼ်ႉတၵ်းဢမ်ႇလႆႈပၢတ်ႇၵႃႈတီႈၸွၵ်ႉၼႃးၸဵင်ႇၼႃးႁႂ်ႈမူတ်းမူတ်းႁႂ်ႈသဵင်ႈ။ သူတၵ်းဢမ်ႇလႆႈၶိုၼ်းပွၵ်ႈၵႂႃႇပၢတ်ႇဢဝ်တူၼ်ႈဢၼ်ၵိုတ်းၵျၢၼ်ႇဢၼ်ယူႇၽၢႆႇတၢင်းလင်သူၼၼ်ႉ။ တၵ်းလႆႈႁႂ်ႈၵိုတ်းၵျၢၼ်ႇဝႆႉပုၼ်ႈၵူၼ်းယၢၵ်ႈၵူၼ်းၽၢၼ်ဢိၵ်ႇတင်းၵူၼ်းတၢင်ႇၸိူဝ်ႉတၢင်ႇၶိူဝ်းဢေႃႈ။ ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉၵႃႈတီႈ မူဝ်းသေႇ၊ ထႅင်ႈလႄႈ၊-
ႁႂ်ႈမၼ်းသင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈၸမ်ႉ၊ “ၼႂ်းလိူၼ်ၸဵတ်းဝၼ်းတီႈၼိုင်ႈၼၼ်ႉတၵ်းလႆႈပႂ်ႉၵမ်ႁႂ်ႈဝၼ်းၼၼ်ႉပဵၼ်ဝၼ်းဢၼ်ၵိုတ်းလိုဝ်ႈယူႇၼိမ်ၼိမ်လီလီလႄႈတၵ်းလႆႈဢွၼ်ၵၼ်မႃးၸုတုမ်ၵၼ်သေလႄႈဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ယၢမ်းမိူဝ်ႈဢၼ်လႆႈငိၼ်းသဵင်ပဝ်ႇၼႄးၶရႃႇၼၼ်ႉဢေႃႈ။-
တၵ်းလႆႈဢွၼ်ၵၼ်ႁဵတ်းတၢင်းလူႇဢၼ်တုတ်ႇၽႆးတီႈ ထႃႇဝရႃႉၽြႃး၊ ၵူၺ်းလႄႈ၊သူဢမ်ႇလႆႈႁဵတ်းၵၢၼ်ၼႃႈႁိူၼ်းလႃးလႃး၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ ထႅင်ႈလႄႈဝႃႈ၊-
“ၼႂ်းလိူၼ်ၸဵတ်းလႆႈသိပ်းဝၼ်းၼၼ်ႉပဵၼ်ဝၼ်းဢၼ်ၽေႇဢပျတ်ႈပုၼ်ႈၵူၼ်းတင်းလၢႆဢေႃႈ။ ၼႂ်းဝၼ်းၼၼ်ႉသူတၵ်းလႆႈၵမ်သိၼ်ဢမ်ႇၵိၼ်တၢင်းၵိၼ်ၵႃႈသင်၊တၵ်းလႆႈဢွၼ်ၵၼ်ၸုတုမ်ၵၼ်သေဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၵူၺ်းလႄႈႁဵတ်းတၢင်းလူႇဢၼ်တုတ်ႇၽႆးတီႈ ထႃႇဝရႃႉၽြႃး၊ ဢေႃႈ။-
ၼႂ်းဝၼ်းၼၼ်ႉသူဢမ်ႇလႆႈႁဵတ်းၵၢၼ်ၵႃႈသင်လႃးလႃး၊ၵွပ်ႈပိူဝ်ႈဝၼ်းၼၼ်ႉပဵၼ်ဝၼ်းဢၼ်ၽေႇဢပျတ်ႈသူၵႃႈတီႈၽၢႆႇၼႃႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။-
ၵေႃႉဢၼ်ၵိၼ်တၢင်းၵိၼ်ၼႂ်းဝၼ်းၼၼ်ႉတၵ်းဢမ်ႇလႆႈမၢတ်ႈပဵၼ်ၵူၼ်းၽြႃးပဵၼ်ၸဝ်ႈလႃးလႃးဢေႃႈ။-
ၼင်ႇၼၼ်ႉလႄႈၵေႃႉဢၼ်ႁဵတ်းၵၢၼ်သေၸိူဝ်ႉသေပိူင်ၼႂ်းဝၼ်းၼၼ်ႉၵဝ် ထႃႇဝရႃႉၽြႃး၊ တၵ်းယႃႉၽဵဝ်ႈပႅတ်ႈမၼ်းဢေႃႈ။-
ပဵၼ်ထုင်းတြႃးဢၼ်ၸူဝ်ႈလုၵ်ႈပၢၼ်လၢၼ်သူတၵ်းလႆႈပႂ်ႉၵမ်ပႂ်ႉၸွမ်းသိုပ်ႇသိုပ်ႇတၢမ်တၢမ်တႃႇသေႇၵႃႈတီႈၵႃႈဢၼ်သူယူႇသူသဝ်းၵူႈတီႈၵူႈလႅၼ်ၼၼ်ႉဢေႃႈ။-
တႄႇဢဝ်ႁူဝ်ၶမ်ႈဝၼ်းတီႈၵဝ်ႈတေႃႇထိုင်ႁွတ်ႈႁူဝ်ၶမ်ႈဝၼ်းတီႈသိပ်းၼႂ်းလိူၼ်ၼၼ်ႉပဵၼ်ဝၼ်းၵမ်သိၼ်ဢၼ်သူတၵ်းလႆႈၵိုတ်းယူႇၼိမ်ၼိမ်လီလီလႄႈၵမ်သိၼ်ဢမ်ႇလႆႈၵိၼ်တၢင်းၵိၼ်ဢေႃႈ၊” ဝႃႈၼင်ႇၼႆဢေႃႈ။
ၸဝ်ႈထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ ထႅင်ႈလႄႈ၊-
ႁႂ်ႈမၼ်းသင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈၸမ်ႉ၊ “ဝၼ်းပွႆးသုမ်ႉထဵင်ၸိုင်၊ၸႃႉတႄႇတင်ႈၼႂ်းလိူၼ်ၸဵတ်းလႆႈသိပ်းႁႃႈဝၼ်းၼၼ်ႉလႄႈတၵ်းလႆႈသိုပ်ႇႁဵတ်းၵႂႃႇၸဵတ်းဝၼ်းတဵမ်တဵမ်ဢေႃႈ။-
ၼႂ်းဝၼ်းဢၼ်တင်ႈပွႆးၼၼ်ႉတၵ်းလႆႈဢွၼ်ၵၼ်ၸုတုမ်ၵၼ်ဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၵူၺ်းလႄႈသူဢမ်ႇလႆႈႁဵတ်းၵၢၼ်ၼႃႈႁိူၼ်းလႃးလႃး။-
ၼႂ်းၸဵတ်းဝၼ်းၼၼ်ႉတၵ်းလႆႈႁဵတ်းတၢင်းလူႇဢၼ်တုတ်ႇၽႆးတီႈ ထႃႇဝရႃႉၽြႃး၊ ၵူႈဝၼ်းဢေႃႈ။ ဝၼ်းဢၼ်ထူၼ်ႈတီႈပႅတ်ႇၼၼ်ႉတၵ်းလႆႈဢွၼ်ၵၼ်ၸုတုမ်ၵၼ်ထႅင်ႈႁႂ်ႈလႆႈဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ လႄႈသမ်ႉႁဵတ်းတၢင်းလူႇဢၼ်တုတ်ႇၽႆးတီႈ ထႃႇဝရႃႉၽြႃး၊ ဢေႃႈ။ ပဵၼ်ဝၼ်းဢၼ်ၸုတုမ်ၵၼ်ဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၵူၺ်းလႄႈသူဢမ်ႇလႆႈႁဵတ်းၵၢၼ်ၵႃႈသင်လႃးလႃး။
“ၸိူဝ်းၼႆႉၸိုင်၊ပဵၼ်ပွႆးထမ်ႇမႃႉဢၼ်သူတၵ်းလႆႈယုၵ်ႉယွင်ႈ ထႃႇဝရႃႉၽြႃး၊ ၼႂ်းတၢင်းဢၼ်ၸုတုမ်ၵၼ်ဝႆႈသႃၵူဝ်းၵႂၢႆႇမၼ်းၸဝ်ႈယူႇ၊သၢၵ်ႈၵၢပ်ႈတၢင်းလူႇလူၺ်ႈၽႆး၊ၶိူင်ႈတၢင်းလူႇဢၼ်တုတ်ႇၽႆး၊တူဝ်တၢင်းလူႇဢၼ်တုတ်ႇၽႆးလႂ်၊ၶိူင်ႈတၢင်းလူႇမၢၵ်ႇၶဝ်ႈႁူင်းၶဝ်ႈလႂ်၊တၢင်းလူႇၼမ်ႉမၢၵ်ႇၸပိတ်ႉလႂ်၊ႁႂ်ႈမႅၼ်ႈၸွမ်းၼင်ႇဝၼ်းဢၼ်မၵ်းၶၢၼ်းဝႆႉဝၼ်းလႂ်ဝၼ်းၼၼ်ႉႁင်းၽႂ်ႁင်းမၼ်းတႃႉ။-
ၼွၵ်ႈသေဝၼ်းၵမ်သိၼ် ထႃႇဝရႃႉၽြႃး၊ လႂ်တင်းတႃႇၼႃႉတၢင်းလူႇသူလႂ်ၼၼ်ႉသူတၵ်းလႆႈသၢၵ်ႈၵၢပ်ႈတၢင်းလူႇဢၼ်ႁဵတ်းၸွမ်းၵတိသဵတ်ႈၸႃႇလႂ်၊ဢိၵ်ႇတင်းတၢင်းလူႇဢၼ်ၸွမ်းၼင်ႇဢလူဝ်ႇၵၢင်ၸႂ်သူလႂ်ၸိူဝ်းၼၼ်ႉထၢပ်ႈသႂ်ႇထႅင်ႈတီႈဢၼ်သူလူႇ ထႃႇဝရႃႉၽြႃး၊ ၼၼ်ႉဢေႃႈ။
“တႄႇဢဝ်လိူၼ်ၸဵတ်းလႆႈသိပ်းႁႃႈဝၼ်းၼၼ်ႉ၊မိူဝ်ႈဢၼ်သူပၢတ်ႇဢဝ်မၢၵ်ႇဢဝ်ႁူင်းယဝ်ႉၸိုင်၊ဢွၼ်ၵၼ်ႁဵတ်းပွႆးၼႆႉတီႈ ထႃႇဝရႃႉၽြႃး၊ ၸဵတ်းဝၼ်းတဵမ်တဵမ်တႃႉ။ ဝၼ်းတီႈၼိုင်ႈၼၼ်ႉတၵ်းလႆႈၵိုတ်းလိုဝ်ႈယူႇသဝ်းၼိမ်ၼိမ်လီလီဢေႃႈ။ ဝၼ်းဢၼ်ထူၼ်ႈပႅတ်ႇဝၼ်းၼၼ်ႉၵေႃႈတၵ်းလႆႈၵိုတ်းလိုဝ်ႈယူႇသဝ်းၼိမ်ၼိမ်လီလီၼင်ႇၵဝ်ႇဢေႃႈ။-
ဝၼ်းတီႈၼိုင်ႈၼၼ်ႉသူတၵ်းလႆႈဢဝ်မၢၵ်ႇမႆႉမၢၵ်ႇတွၵ်ႇဢၼ်ႁၢင်ႈလီႁၢင်ႈငၢမ်းလႂ်၊ၵိင်ႇမႆႉဢၼ်ပူင်ႇၽိူဝ်လီလႂ်၊တင်းတူၼ်ႈမႆႉၶႆႉဢၼ်မီးၵႃႈတီႈႁိမ်းၼမ်ႉႁွင်ႈၼမ်ႉၵႄးလႂ်ၸိူဝ်းၼၼ်ႉမႃးလႄႈႁဵတ်းပွႆးဢၼ်ယုၵ်ႉယွင်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။-
သူတၵ်းလႆႈႁဵတ်းပွႆးထမ်ႇမႃႉၼၼ်ႉယေႈပီၸဵတ်းဝၼ်းတဵမ်တဵမ်ဢေႃႈ။ ပဵၼ်ထုင်းတြႃးဢၼ်သူတၵ်းလႆႈပႂ်ႉၵမ်ပႂ်ႉၸွမ်းသိုပ်ႇၵႂႃႇတီႈၸူဝ်ႈလုၵ်ႈပၢၼ်လၢၼ်သူတႃႇသေႇဢေႃႈ။-
ၵူၼ်းမဵဝ်း ဢိသရေး၊ တင်းလၢႆတၵ်းလႆႈယူႇၵႃႈၼႂ်းသုမ်ႉၼႂ်းထဵင်ယူႇၸဵတ်းဝၼ်းတဵမ်တဵမ်ဢေႃႈ။-
ႁဵတ်းၸိူဝ်ႉၼင်ႇၼၼ်ၸင်ႇ၊မဵဝ်းၸိူဝ်ႉၶိူဝ်းသူသိုပ်ႇတၢမ်ၵႂႃႇၼၼ်ႉ တၵ်းလႆႈႁုလႆႈမၢတ်ႈလွင်ႈဢၼ် ထႃႇဝရႃႉၽြႃး၊ ႁႂ်ႈၵူၼ်းမဵဝ်း ဢိသရေး၊ တင်းလၢႆလႆႈယူႇလႆႈသဝ်းၼိမ်ၼိမ်ၵႃႈၼႂ်းသုမ်ႉထဵင်ၼႂ်းမိူဝ်ႈဢၼ်မၼ်းၸဝ်ႈဢွၼ်ဢဝ်ၶဝ်ဢွၵ်ႇသေမိူင်း ဢေးၵျိပ်ႉ၊ မႃးၼၼ်ႉဢေႃႈ။ မၼ်းၸဝ်ႈပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈပၢဝ်ႇသေႃႇလွင်ႈပွႆး ထႃႇဝရႃႉၽြႃး၊ ဢၼ်မၵ်းၶၢၼ်းဝႆႉၸိူဝ်းၼၼ်ႉတီႈၵူၼ်းမဵဝ်း ဢိသရေး၊ တင်းလၢႆဢေႃႈ။
ၸဝ်ႈထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ ထႅင်ႈလႄႈ၊-
ႁႂ်ႈမၼ်းသင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈၸမ်ႉ၊ “တၵ်းလႆႈဢဝ်မႃးၼမ်ႉမၼ်းသၢၼ်ႇလုၼ်ႇၸႅတ်ႈၸႅတ်ႈဢၼ်လီသေပိူၼ်ႈၼၼ်ႉပုၼ်ႈၵွၵ်းၽႆးဢၼ်မီးၼႂ်းသုမ်ႉထဵင်ၸဝ်ႈႁႂ်ႈလႆႈတႆႈလႅင်းယူႇသေႇသေႇဢေႃႈ။-
ဢႃႇရုၼ်ႇ၊ တၵ်းလႆႈတႆႈၽႆးၼၼ်ႉဝႆႉၵႃႈၼွၵ်ႈၽႃႈၵင်ႈ၊ၽၢႆႇၼႃႈတိူၵ်ႈပတိၺိၺ်ႇဢၼ်မီးယူႇၵႃႈၼႂ်းထႃႇၼႃႉတီႈမူတ်းၸၢင်ႇသေပိူၼ်ႈၼၼ် တႄႇဢဝ်ႁူဝ်ၶမ်ႈတေႃႇမိူင်းလႅင်းၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢေႃႈ။ ပဵၼ်ထုင်းတြႃးဢၼ်တၵ်းလႆႈပႂ်ႉၵမ်ႁဵတ်းၸွမ်းတႃႇသေႇဢမ်ႇထၢတ်ႇဢေႃႈ။-
ဢႃႇရုၼ်ႇ၊ တၵ်းလႆႈမႄးႁဵတ်းမႄးႁႅၼ်းၵွၵ်းၽႆးၵႃႈတီႈၶဵင်ႇတီႈတႆႈၽႆးဢၼ်ဢဝ်ၶမ်းလွတ်ႈငၢၼ်ႇႁဵတ်းဝႆႉၼၼ်ႉလႄႈႁႂ်ႈၽႆးလုၵ်ႉႁိူင်းယူႇသေႇသေႇၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢေႃႈ။
“မႂ်းတၵ်းလႆႈဢဝ်ၽွင်ၶဝ်ႈၵျုင်ႇမဵဝ်းဢၼ်လီလီၼၼ်ႉၼိုင်ႈပႄႇသေလႄႈႁဵတ်းၶဝ်ႈမုၼ်းသိပ်းသွင်ႁူၺ်ႇဢၼ်ၽဝ်ၽႆးၼၼ်ႉဢေႃႈ။-
တၵ်းလႆႈၶပ်ႉႁဵတ်းသွင်ထႅဝ်၊ၼိုင်ႈထႅဝ်ႁူၵ်းႁူၺ်ႇၼင်ႇၵၼ်ဝႆႉၵႃႈၼိူဝ်ၽိူၼ်ဢၼ်ဢဝ်ၶမ်းလွတ်ႈငၢၼ်ႇႁဵတ်းဝႆႉဢၼ်မီးၵႃႈတီႈၽၢႆႇၼႃႈ ထႃႇဝရႃႉၽြႃး၊ ၼၼ်ႉဢေႃႈ။-
တၵ်းလႆႈဢဝ်ၼၢမ်ႇသႃႇ၊လေႃႇပၢၼ်ႇ၊ဢၼ်ၸႅတ်ႈသႂ်ႇဝႆႉၵႃႈၼိူဝ်မၼ်းတင်းသွင်ထႅဝ်ႁႂ်ႈလႆႈပဵၼ်တၢင်းလူႇဢၼ်ၽဝ်ၽႆးဢၼ်သၢၵ်ႈလူႇတီႈ ထႃႇဝရႃႉၽြႃး၊ ဢေႃႈ။-
ဢဝ်ၼႆႉၵႂႃႇဝၼ်းလိုၼ်းမိူဝ်းၼႃႈတၵ်းလႆႈဢဝ်ၶဝ်ႈမုၼ်းသၢၵ်ႈလူႇၵႃႈတီႈၽၢႆႇၼႃႈ ထႃႇဝရႃႉၽြႃး၊ ၼႂ်းဝၼ်းၵမ်သိၼ်ၵူႈသိၼ်ဢေႃႈ။ ပဵၼ်ထုင်းတြႃးပုၼ်ႈၵူၼ်းမဵဝ်း ဢိသရေး၊ တႃႇသေႇဢမ်ႇထၢတ်ႇဢေႃႈ။-
ၶဝ်ႈမုၼ်းၼၼ်ႉတၵ်းလႆႈပဵၼ်ပုၼ်ႈ ဢႃႇရုၼ်ႇ၊ တင်းလုၵ်ႈလၢၼ်မၼ်းတင်းလၢႆလႄႈၶဝ်တၵ်းလႆႈၵိၼ်ၵႃႈၼႂ်းထႃႇၼႃႉတီႈမူတ်းၸၢင်ႇၸဝ်ႈဢေႃႈ။ ပဵၼ်ၶဝ်ႈမုၼ်းဢၼ်မူတ်းၸၢင်ႇၼႃႇသေပိူၼ်ႈၼႂ်းတၢင်းၵိၼ်တၢင်းၶူပ်းဢၼ်သၢၵ်ႈလူႇတီႈ ထႃႇဝရႃႉၽြႃး၊ ၸိူဝ်းၼၼ်ႉလႄႈပဵၼ်ပုၼ်ႈယဵၸ်ႈပရေႃးႁဵၵ်ႈ တင်းလၢႆဢေႃႈ၊” ဝႃႈၼင်ႇၼႆဢေႃႈ။
ၶဝ်ဢဝ်မၼ်းၶင်ဝႆႉလႄႈပႂ်ႉထႃႈဢလူဝ်ႇ ထႃႇဝရႃႉၽြႃး၊ တၵ်းၸႂ်ႉႁႂ်ႈၶဝ်ႁဵတ်းတီႈမၼ်းၸိူဝ်ႉၼင်ႇႁိုဝ်ၼၼ်ႉဢေႃႈ။
ၸဝ်ႈထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ လႄႈဝႃႈ၊-
“ဢဝ်ၵေႃႉၼၼ်ႉဢွၵ်ႇၵႂႃႇၵႃႈၼွၵ်ႈပၢင်တပ်ႉလႄႈ၊ႁႂ်ႈၶဝ်ၸိူဝ်းဢၼ်ငိၼ်းၵႂၢမ်းမၼ်းဢၼ်ၵိၼ်ႇလႃႇၼၼ်ႉၵူႈၵေႃႉဢွၼ်ၵၼ်ဢဝ်မိုဝ်းၶဝ်တၢင်ႇသႂ်ႇၵႃႈၼိူဝ်ႁူဝ်မၼ်းသေယဝ်ႉ၊ႁႂ်ႈမူႇၵူၼ်းၸိူဝ်းၵူၼ်းတင်းလၢႆဢဝ်မၢၵ်ႇႁိၼ်ပိုဝ်ႈသႂ်ႇမၼ်းႁႂ်ႈတၢႆတႃႉ။-
ႁဵတ်းၼၼ်ႉလႄႈသင်ႇလၢတ်ႈၵူၼ်းမဵဝ်း ဢိသရေး၊ တင်းလၢႆလွင်ႈဢၼ်ဝႃႈ၊ၵေႃႉဢၼ်ၵိၼ်ႇလႃႇၽြႃးပဵၼ်ၸဝ်ႈမၼ်းၼၼ်ႉတၵ်းလႆႈၶၢမ်ႇတၢမ်ႇဢပျတ်ႈတူဝ်ၸဝ်ႈၵဝ်ႇဢေႃႈ။-
ၵေႃႉဢၼ်သႄႉသွမ်းၼႃႇမႃႉၸိုဝ်ႈသဵင်ၸဝ်ႈၽြႃးၼၼ်ႉတၵ်းလႆႈၶၢမ်ႇဢဝ်တၢႆဢေႃႈ။ ၵူၼ်းမဵဝ်း ဢိသရေး၊ သေဢမ်ႇဝႃႈ၊ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈပိုင်ႈယူႇၸွမ်းၵူၼ်းမဵဝ်း ဢိသရေး၊ သေဢမ်ႇဝႃႈ၊ၵေႃႉဢၼ်သႄႉသွမ်းၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ၸိုင်၊မူႇၵူၼ်းၸိူဝ်းၵူၼ်းတင်းလၢႆတၵ်းလႆႈဢဝ်မၢၵ်ႇႁိၼ်ပိုဝ်ႈသႂ်ႇႁႂ်ႈမၼ်းတၢႆဢမၢၼ်ႇၶၼ်ပဵၼ်ဢေႃႈ။
“ၵေႃႉဢၼ်ဢဝ်ဢသၢၵ်ႈၵူၼ်းတၢႆၼၼ်ႉတၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၼ်ပဵၼ်ဢေႃႈ။-
ၵေႃႉဢၼ်ဢဝ်တူဝ်သတ်းပိူၼ်ႈတၢႆတူဝ်ၼိုင်ႈၼၼ်ႉၵေႃႈတၵ်းလႆႈၶိုၼ်းတႅၼ်းပၼ်တူဝ်ၼိုင်ႈဢေႃႈ။ ပဵၼ်မၢႆမီႈဢၼ်ဢဝ်ဢသၢၵ်ႈၶိုၼ်းတႅၼ်းပုၼ်ႈဢသၢၵ်ႈဢေႃႈ။
“ပေႃးသေၵေႃႉၵေႃႉႁဵတ်းႁႂ်ႈပိူၼ်ႈတၢင်ႇၵေႃႉၸဵပ်းၸိုင်၊ၸိူဝ်ႉၼင်ႇဢၼ်မၼ်းႁႂ်ႈပိူၼ်ႈၸဵပ်းၼၼ်ႉမၼ်းတၵ်းလႆႈၶၢမ်ႇၸိူဝ်ႉၼင်ႇၼၼ်ဢေႃႈ။-
တၢင်းဢၼ်လုပ်ႇႁၵ်းပုၼ်ႈတၢင်းဢၼ်လုပ်ႇႁၵ်း၊တႃမွတ်ႇပုၼ်ႈတႃမွတ်ႇ၊ၶဵဝ်ႈပုၼ်ႈၶဵဝ်ႈ၊ၸိူဝ်ႉၼင်ႇဢၼ်မၼ်းႁဵတ်းႁႂ်ႈပိူၼ်ႈတၢင်ႇၵေႃႉၸဵပ်းၼၼ်ႉမၼ်းတၵ်းၶိုၼ်းလႆႈၶၢမ်ႇဢဝ်တၢင်းဢၼ်ၸဵပ်းဢေႃႈ။-
ၵေႃႉဢၼ်ဢဝ်တူဝ်သတ်းပိူၼ်ႈတၢႆၼၼ်ႉတၵ်းလႆႈၶိုၼ်းတႅၼ်းပၼ်တူဝ်ၼိုင်ႈပုၼ်ႈတူဝ်ၼိုင်ႈဢေႃႈ။ ၵေႃႉဢၼ်ဢဝ်ဢသၢၵ်ႈၵူၼ်းတၢႆၸမ်ႉ၊တၵ်းလႆႈၶၢမ်ႇတၢင်းဢၼ်ဢဝ်တၢႆဢေႃႈ။-
ပဵၼ်ၵူၼ်းမဵဝ်း ဢိသရေး၊ သေဢမ်ႇဝႃႈ၊ပဵၼ်ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းသေဢမ်ႇဝႃႈ၊တၵ်းလႆႈၶၢမ်ႇတၢင်းဢၼ်ၸီႇယၢင်ႇၸွမ်းတြႃးပႃးလဵဝ်ၼႆႉၵူၺ်းဢေႃႈ။ လွင်ႈမၼ်းၸမ်ႉ၊ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ် မူဝ်းသေႇ၊ သင်ႇလၢတ်ႈလွင်ႈတၢင်းၼႆႉတီႈၵူၼ်းမဵဝ်း ဢိသရေး၊ ၶဝ်ယဝ်ႉၼၼ်ႉၸိုင်၊ၶဝ်ဢဝ်ၵေႃႉဢၼ်ၵိၼ်ႇလႃႇၼၼ်ႉဢွၵ်ႇပၢင်တပ်ႉၵႂႃႇသေလႄႈဢဝ်မၢၵ်ႇႁိၼ်ပိုဝ်ႈသႂ်ႇမၼ်းႁႂ်ႈတၢႆသေဢေႃႈ။ ၼင်ႇၼၼ်လႄႈၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈတီႈ မူဝ်းသေႇ၊ ၼၼ်ႉဢေႃႈ။
ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ ၵႃႈၼိူဝ်လွႆ သိၼႃႉ၊ ၼၼ်ႉလႄႈ၊-
ႁႂ်ႈမၼ်းသင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈၸမ်ႉ၊ “မိူဝ်ႈဢၼ်သူၶဝ်ႈထိုင်ၵႃႈတီႈမိူင်းဢၼ်ၵဝ်တၵ်းပၼ်ၼၼ်ႉၸိုင်၊လိၼ်မိူင်းတၵ်းလႆႈၵမ်သိၼ်ပုၼ်ႈ ထႃႇဝရႃႉၽြႃး၊ ဢေႃႈ။-
ၼႂ်းႁူၵ်းပီတဵမ်တဵမ်သူတၵ်းလႆႈႁဵတ်းႁႆႈႁဵတ်းၼႃးသူ၊တၵ်းလႆႈတႅပ်းလႆႈလၢၼ်းတူၼ်ႈမၢၵ်ႇၸပိတ်ႉသူ၊တၵ်းလႆႈသိမ်းဢဝ်မၢၵ်ႇဢဝ်ႁူင်းသူဢေႃႈ။-
ၵူၺ်းၵႃႈ၊ၼႂ်းပီဢၼ်ထူၼ်ႈထိုင်ၸဵတ်းပီၼၼ်ႉတၵ်းလႆႈပဵၼ်ပီဢၼ်ၵမ်သိၼ်လႄႈလိၼ်မိူင်းတၵ်းလႆႈၵိုတ်းလိုဝ်ႈယူႇၼိမ်ၼိမ်လီလီ၊ပီၵမ်သိၼ်ပုၼ်ႈ ထႃႇဝရႃႉၽြႃး၊ ဢေႃႈ။ ဢမ်ႇလႆႈႁဵတ်းႁႆႈႁဵတ်းၼႃး၊ဢမ်ႇလႆႈတႅပ်းလႆႈလၢၼ်းတူၼ်ႈမၢၵ်ႇၸပိတ်ႉသူ။-
မၢၵ်ႇႁူင်းဢၼ်ဢွၵ်ႇပဵၼ်မႃးၵူၺ်းမၼ်းၵႃႈတီႈႁႆႈတီႈၼႃးၼၼ်ႉၵေႃႈဢမ်ႇလႆႈပၢတ်ႇလႆႈထိူဝ်၊မၢၵ်ႇၸပိတ်ႉဢၼ်ဢမ်ႇလႆႈတႅပ်းလႆႈလၢၼ်းၵိင်ႇမၼ်းလႄႈသမ်ႉဢွၵ်ႇမၢၵ်ႇမႃးၼၼ်ႉၵေႃႈဢမ်ႇလႆႈဝိတ်းဢဝ်သိမ်းဢဝ်။ ပဵၼ်ပီဢၼ်လိၼ်မိူင်းတၵ်းလႆႈၵိုတ်းလိုဝ်ႈယူႇၼိမ်ၼိမ်လီလီဢေႃႈ။-
ပိၵ်ႉသမ်ႉတင်းဝၢၼ်ႈတင်းမိူင်းဢမ်ႇႁဵတ်းႁႆႈႁဵတ်းၼႃးၼႂ်းပီၼၼ်ႉတင်းပီသေၵေႃႈ၊ၵႃႈၼႂ်းႁႆႈၼႃးသူၼၼ်ႉတၵ်းဢွၵ်ႇပဵၼ်တၢင်းၵိၼ်တၢင်းၶူပ်းမႃးပုၼ်ႈသူတင်းၶႃႈသူ၊ၵူၼ်းဢၼ်ၵိၼ်ၸၢင်ႈၵိၼ်ငႃသူ၊ၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈပိုင်ႈယူႇၸွမ်းသူ၊-
တူဝ်တရိၵ်ႈသၢၼ်ႇသူ၊ဢိၵ်ႇတင်းတူဝ်ထိူၼ်ႇတင်းလၢႆတၵ်းလႆႈၵိၼ်ၵႃႈဢၼ်ဢွၵ်ႇပဵၼ်မႃးၵူႈၸိူဝ်ႉၵူႈပိူင်ၼၼ်ႉယူႇဢေႃႈ။
“တၵ်းလႆႈၼပ်ႉဢၢၼ်ႇပီဢၼ်ၵမ်သိၼ်ၸဵတ်းပီ၊ၼပ်ႉဢၢၼ်ႇၸဵတ်းပွၵ်ႈလႄႈတင်းမူတ်းပဵၼ်သီႇသိပ်းပၢႆၵဝ်ႈပီမိူင်းႁႂ်ႈပဵၼ်ပုၼ်ႈသူဢေႃႈ။-
ၵမ်းၼၼ်ႉ ၼႂ်းလိူၼ်ၸဵတ်းလႆႈသိပ်းဝၼ်း၊ပဵၼ်ဝၼ်းဢၼ်ၽေႇဢပျတ်ႈၼၼ်ႉတၵ်းလႆႈပွႆႇၸႂ်ႉၵူၼ်းၵေႃႉၼိုင်ႈၵႂႃႇပဝ်ႇတိုင်ႈၼႄးၶရႃႇႁႂ်ႈၸွတ်ႇတူဝ်ႈၵႂႃႇတင်းမိူင်းဢေႃႈ။-
တၵ်းလႆႈႁႂ်ႈပီဢၼ်ထူၼ်ႈထိုင်ႁႃႈသိပ်းပီၼၼ်ႉမူတ်းၸၢင်ႇလႄႈႁွင်ႉသေႃႇမွၵ်ႇလၢတ်ႈတၢင်းဢၼ်လႆႈလွတ်ႈလႅဝ်းၼၼ်ႉတီႈၵူၼ်းဝၢၼ်ႈၵူၼ်းမိူင်းၵူႈတီႈၵူႈလႅၼ်ဢေႃႈ။ တၵ်းလႆႈပဵၼ်ပီဢၼ်သူတၵ်းလႆႈပၼ်ၶိုၼ်းလႄႈလိၼ်ဢၼ်လႆႈၶၢႆပၼ်သူၼၼ်ႉသူတၵ်းလႆႈပၼ်ၶိုၼ်းတီႈၸဝ်ႈၵဝ်ႇမၼ်း၊ၵေႃႉဢၼ်လႆႈၶၢမ်ႇတၢင်းဢၼ်ၶၢႆပဵၼ်ၶႃႈၵႂႃႇၼၼ်ႉၵေႃႈတၵ်းလႆႈၶိုၼ်းမိူဝ်းၸူးၵႃႈတီႈၵူၼ်းႁိူၼ်းၵူၼ်းယေးမၼ်းဢေႃႈ။-
ပီဢၼ်ပၼ်ၶိုၼ်းဢၼ်ၶွပ်ႈၶူပ်ႇႁႃႈသိပ်းပီၼၼ်ႉတၵ်းလႆႈပဵၼ်ပုၼ်ႈသူလႄႈ၊ၼႂ်းပီၼၼ်ႉသူတၵ်းဢမ်ႇလႆႈဝၢၼ်ႇၸိူဝ်ႉဝၢၼ်ႇၽၼ်း၊မၢၵ်ႇႁူင်းဢၼ်တူၼ်ႈမၼ်းဢွၵ်ႇပဵၼ်မႃးၵူၺ်းမၼ်းၼၼ်ႉၵေႃႈဢမ်ႇလႆႈပၢတ်ႇလႆႈထိူဝ်၊မၢၵ်ႇၸပိတ်ႉဢၼ်သူဢမ်ႇလႆႈတႅပ်းလႆႈလၢၼ်းၶိူဝ်းမၼ်းလႄႈသမ်ႉဢွၵ်ႇမၢၵ်ႇမႃးၼၼ်ႉၵေႃႈတၵ်းဢမ်ႇလႆႈဝိတ်းဢဝ်သိမ်းဢဝ်။-
ပိူဝ်ႈဢၼ်ပဵၼ်ပီဢၼ်သူတၵ်းလႆႈပၼ်ၶိုၼ်းလႄႈပဵၼ်ပီဢၼ်မူတ်းၸၢင်ႇတင်းပီဢေႃႈ။ သူတၵ်းလႆႈၵိၼ်မၢၵ်ႇႁူင်းဢၼ်ဢွၵ်ႇပဵၼ်မႃးၵူၺ်းမၼ်းၵႃႈတီႈႁႆႈတီႈၼႃးသူၼၼ်ႉၵူၺ်းဢေႃႈ။
“ၼႂ်းပီဢၼ်ပၼ်ၶိုၼ်းၼၼ်ႉလိၼ်ဢၼ်လႆႈသိုဝ်ႉဝႆႉၼၼ်ႉတၵ်းလႆႈၶိုၼ်းဢၢပ်ႈပၼ်တီႈၸဝ်ႈၵဝ်ႇမၼ်းဢေႃႈ။-
ၼင်ႇၼၼ်လႄႈပေႃးသူလႆႈၶၢႆလိၼ်ပၼ်တီႈၵူၼ်းမဵဝ်း ဢိသရေး၊ ၼင်ႇၵၼ်၊ဢမ်ႇၼၼ်လႆႈသိုဝ်ႉဢဝ်တီႈမၼ်းၸိုင်၊သူၵေႃႉၼိုင်ႈလႄႈၵေႃႉၼိုင်ႈယႃႇပေႁဵတ်းဢၼ်ဢမ်ႇတြႃးတီႈၵၼ်။-
ၵႃႈၶၼ်ဢၼ်သိုဝ်ႉၶၢႆၸိုင်၊တၵ်းလႆႈမၵ်းၶၢၼ်းၸွမ်းၼင်ႇဢၼ်လိၼ်ၼၼ်ႉလႆႈပၼ်မၢၵ်ႇပၼ်ႁူင်းမႃးလၢႆပီဢွၼ်တၢင်းပီဢၼ်ပၼ်ၶိုၼ်းၼၼ်ႉၼၼ်ႉဢေႃႈ။-
ပေႃးပီမိူင်းၼမ်ၸိုင်၊ၵႃႈၶၼ်မၼ်းတၵ်းၶိုၼ်ႈဢေႃႈ။ ပေႃးပီမိူင်းၵေႇၸမ်ႉ၊ၵႃႈၶၼ်မၼ်းတၵ်းယွမ်းဢေႃႈ။ လွင်ႈမၼ်းၸမ်ႉ၊မၼ်းၸွမ်းလူၺ်ႈတၢင်းဢၼ်လိၼ်ၼၼ်ႉတၵ်းမၢၵ်ႇမၢၵ်ႇမၼ်းႁူင်းမၼ်းဢွၵ်ႇၼၼ်ႉလႄႈသိုဝ်ႉၶၢႆၵၼ်ဢေႃႈ။-
သူၵေႃႉၼိုင်ႈလႄႈၵေႃႉၼိုင်ႈယႃႇပေပႅတ်ႉလႅၼ်ၵၼ်။ ၵူဝ်ႁႄၽြႃးပဵၼ်ၸဝ်ႈသူၵူၺ်းတႃႉ။ ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။
“ပိူဝ်ႈၼႆလႄႈသူတၵ်းလႆႈၵမ်ၵျၢင်ႉၸွမ်းပိင်းၺၢပ်ႈတြႃးၵဝ်၊ဢိၵ်ႇတင်းၵႃႈဢၼ်ၵဝ်ၸီႇယၢင်ႇၶိုင်ပွင်ဝႆႉၼၼ်ႉဢေႃႈ။ ၼင်ႇၼၼ်လႄႈသူတၵ်းလႆႈယူႇလီလွတ်ႈၽေးၵႃႈတီႈမိူင်းၼၼ်ႉဢေႃႈ။-
လိၼ်ၵေႃႈတၵ်းႁႂ်ႈမီးမၢၵ်ႇမီးႁူင်းမႃးလႄႈသူတၵ်းလႆႈၵိၼ်ဢိမ်ႇၵိၼ်တဵမ်သေယဝ်ႉ၊လႆႈယူႇလီလွတ်ႈၽေးဢေႃႈ။
“သေၵေႃႉၵေႃႉၸၢင်ႈတၵ်းလၢတ်ႈလႄႈဝႃႈ၊ ‘ၼႂ်းပီဢၼ်ထူၼ်ႈၸဵတ်းပီၼၼ်ႉႁဝ်းတေႁဵတ်းၸိူင်ႉႁိုဝ်လႆႈၵိၼ်။ ႁဝ်းဢမ်ႇလႆႈဝၢၼ်ႇၸိူဝ်ႉဝၢၼ်ႇၽၼ်း၊ဢမ်ႇလႆႈသိမ်းမၢၵ်ႇသိမ်းႁူင်းလူင်ပႄႇ၊’ ဝႃႈၼင်ႇၼႆဢေႃႈ။-
ထႃႇဝရႃႉၽြႃး၊ တၵ်းပၼ်တၢင်းလီၼႂ်းပီဢၼ်ထူၼ်ႈထိုင်ပီတီႈႁူၵ်းၼၼ်ႉ၊ႁႂ်ႈလိၼ်ဢွၵ်ႇမၢၵ်ႇဢွၵ်ႇႁူင်းမႃးပေႃးၵုမ်ႇၵိၼ်ပုၼ်ႈတႃႇသၢမ်ပီဢေႃႈ။-
ယၢမ်းမိူဝ်ႈဢၼ်သူႁဵတ်းႁႆႈႁဵတ်းၼႃးသူၼႂ်းပီတီႈပႅတ်ႇၼၼ်ႉသူတၵ်းလႆႈၵိၼ်မၢၵ်ႇႁူင်းဢၼ်ၵဝ်ႇၼၼ်ႉယူႇတေႃႇထိုင်ပီတီႈၵဝ်ႈၼၼ်ႉလူးၵွၼ်ႇဢေႃႈ။
“လိၼ်ၸိုင်၊သူဢမ်ႇလႆႈၶၢႆပၼ်တီႈပိူၼ်ႈတၢင်ႇၵေႃႉႁႂ်ႈလႆႈပိူင်ႇဢဝ်သေႇသေႇ။ လိၼ်ၼၼ်ႉပဵၼ်ၶွင်ၵဝ်ဢေႃႈ။ သူပဵၼ်ၸိူဝ်ႉၼင်ႇၶႅၵ်ႇဢႃႇၵၼ်ႇတုဢၼ်သွၼ်ႈပိုင်ႈယူႇတီႈၵဝ်ဢေႃႈ။
“လိၼ်ဢၼ်ၶၢႆယဝ်ႉၼၼ်ႉ တၵ်းလႆႈပၼ်ဢၶႂၢင်ႉႁႂ်ႈၸဝ်ႈမၼ်းၵေႃႉၵဝ်ႇၼၼ်ႉၶိုၼ်းထုတ်ႇဢဝ်ဢေႃႈ။-
ပေႃးၼႂ်းၵူၼ်း ဢိသရေး၊ သေၵေႃႉၵေႃႉယၢၵ်ႈၽၢၼ်ၵႂႃႇလႄႈ ၶၢႆပႅတ်ႈလိၼ်တူဝ်ၸဝ်ႈၵဝ်ႇၵႂႃႇၸိုင်၊ပီႈၼွင်ႉမၼ်းဢၼ်ၸမ်ၵၼ်တင်းမၼ်းသေပိူၼ်ႈၼၼ်ႉ တၵ်းလႆႈမႃးထုတ်ႇဢဝ်လိၼ်ၼၼ်ႉဢေႃႈ။-
ပေႃးၵေႃႉၼၼ်ႉဢမ်ႇမီးပီႈၼွင်ႉဢၼ်ထုတ်ႇဢဝ်လိၼ်ၼၼ်ႉလႄႈ ဝၢႆးမႃးမၼ်းသမ်ႉမၢၵ်ႈမီးမႃးၸိုင်၊ႁႂ်ႈမၼ်းၶိုၼ်းထုတ်ႇဢဝ်တႃႉ။-
ႁႂ်ႈမၼ်းၼပ်ႉဢၢၼ်ႇပီမိူင်းဢၼ်ယင်းၵိုတ်းယင်းၵျၢၼ်ႇၸူဝ်ႈဢၼ်ဢမ်ႇပႆႇထိုင်ပီဢၼ်ပၼ်ၶိုၼ်းၼၼ်ႉသေလႄႈပၼ်ၵႃႈၶၼ်ပုၼ်ႈပီမိူင်းၸိူဝ်းၼၼ်ႉလႄႈထုတ်ႇဢဝ်ၶိုၼ်းတႃႉ။-
ပေႃးမၼ်းဢမ်ႇမီးငိုၼ်းတႃႇတေၶိုၼ်းထုတ်ႇဢဝ်လႆႈၸိုင်၊ႁႂ်ႈၵေႃႉဢၼ်သိုဝ်ႉဢဝ်ၼၼ်ႉပိူင်ႇတေႃႇထိုင်ႁွတ်ႈပီဢၼ်ပၼ်ၶိုၼ်းတႃႉ။ ၼႂ်းပီၼၼ်ႉၸိုင်၊လိၼ်ၼၼ်ႉတၵ်းလႆႈၶိုၼ်းပၼ်တီႈၸဝ်ႈမၼ်းၵေႃႉၵဝ်ႇၼၼ်ႉဢေႃႈ။
“ပေႃးသေၵေႃႉသေၵူၼ်းၶၢႆႁိူၼ်းဢၼ်မီးၼႂ်းဝဵင်းလူင်ဢၼ်လမ်းဝဵင်းလွမ်ႉဝႆႉၼၼ်ႉၸိုင်၊မၼ်းမီးဢၶႂၢင်ႉဢၼ်လႆႈထုတ်ႇဢဝ်ၶိုၼ်းၼႂ်းၸူဝ်ႈပီႈၼိုင်ႈၼၼ်ႉၵူၺ်း၊တႄႇၸႃႉၼပ်ႉဢဝ်ဝၼ်းဢၼ်သိုဝ်ႉၶၢႆၼၼ်ႉဢေႃႈ။-
ပေႃးဝႃႈမၼ်းဢမ်ႇၶိုၼ်းထုတ်ႇဢဝ်ၼႂ်းပီၼၼ်ႉၸိုင်၊မၼ်းသုမ်းဢၶႂၢင်ႉဢၼ်တၵ်းလႆႈထုတ်ႇဢဝ်ၶိုၼ်းၼၼ်ႉယဝ်ႉလႄႈ၊ႁိူၼ်းၼၼ်ႉပဵၼ်ႁိူၼ်းၵေႃႉဢၼ်သိုဝ်ႉဢဝ်ၼၼ်ႉတၵ်းပိူင်ႇၵႂႃႇတႃႇသေႇၸူဝ်ႈလုၵ်ႈပၢၼ်လၢၼ်မၼ်းယဝ်ႉဢေႃႈ။ ပိၵ်ႉသမ်ႉထိုင်ပီဢၼ်ပၼ်ၶိုၼ်းသေၵေႃႈဢမ်ႇလူဝ်ႇပၼ်ၶိုၼ်းယဝ်ႉဢေႃႈ။-
ၵူၺ်းၵႃႈ၊ႁိူၼ်းဢၼ်မီးၼႂ်းဝၢၼ်ႈဢၼ်ဢမ်ႇမီးလမ်းဝဵင်းၸိူဝ်းၼၼ်ႉၸိုင်၊ၸဝ်ႈမၼ်းၵေႃႉၵဝ်ႇၼၼ်ႉတၵ်းလႆႈမီးဢၶႂၢင်ႉဢၼ်ထုတ်ႇဢဝ်ၶိုၼ်းမိူၼ်ၸိူဝ်ႉၼင်ႇႁႆႈၼင်ႇၼႃးၼၼ်ႉဢေႃႈ။ ၼႂ်းပီဢၼ်ပၼ်ၶိုၼ်းၼၼ်ႉတၵ်းလႆႈၶိုၼ်းဢၢပ်ႈပၼ်တီႈၸဝ်ႈမၼ်းၵေႃႉၵဝ်ႇၼၼ်ႉဢေႃႈ။-
ၼႂ်းဝႃႈၼၼ်သေၵေႃႈ ၸိူဝ်ႉၶိူဝ်း လေႇဝိ၊ ၶဝ်မီးဢၶႂၢင်ႉတႃႇသေႇ၊ပုၼ်ႈတႃႇတၵ်းၶိုၼ်းထုတ်ႇဢဝ်ႁိူၼ်းၶဝ်လႆႈၼႂ်းဝဵင်းဢၼ်ၶဝ်ပိူင်ႇၼၼ်ႉဢေႃႈ။-
ပေႃးၵူၼ်း လေႇဝိ၊ သေၵေႃႉၵေႃႉၶၢႆႁိူၼ်းဢၼ်မီးၼႂ်းဝဵင်းၸိူဝ်းၼၼ်ႉယဝ်ႉလႄႈယင်းဢမ်ႇၶိုၼ်းထုတ်ႇဢဝ်လႆႈၸိုင်၊ႁိူၼ်းၼၼ်ႉတၵ်းလႆႈၶိုၼ်းဢၢပ်ႈပၼ်ၼႂ်းပီဢၼ်ပၼ်ၶိုၼ်းၼၼ်ႉဢေႃႈ။ လွင်ႈမၼ်းၸမ်ႉ၊ႁိူၼ်းၸိူဝ်းဢၼ်ၵူၼ်း လေႇဝိ၊ ၶဝ်ပိူင်ႇၵႃႈၼႂ်းဝဵင်းၶဝ်ၼၼ်ႉပဵၼ်ႁိူၼ်းဢၼ်ၶဝ်လႆႈပိူင်ႇဢဝ်သေႇသေႇၵႃႈၼႂ်းၵူၼ်းမဵဝ်း ဢိသရေး၊ တင်းလၢႆဢေႃႈ။-
ၼႂ်းဝႃႈၼၼ်သေၵေႃႈႁႆႈၼႃးဢၼ်မီးႁိမ်းႁွမ်းဝဵင်းၶဝ်ၸိူဝ်းၼၼ်ႉၸိုင်၊တေဢမ်ႇလႆႈၶၢႆလႃးလႃး။ ပဵၼ်ၶွင်ဢၼ်ၶဝ်ပိူင်ႇသေႇသေႇဢေႃႈ။
“ပေႃးၵူၼ်းမဵဝ်း ဢိသရေး၊ ၼင်ႇၵၼ်ဢၼ်ယူႇၸမ်ၵၼ်တင်းမႂ်းၼၼ်ႉယၢၵ်ႈၵႂႃႇၽၢၼ်ၵႂႃႇလႄႈဢမ်ႇၸွႆႈတူဝ်ၸဝ်ႈၵဝ်ႇလႆႈယဝ်ႉၼၼ်ႉၸိုင်၊မႂ်းတၵ်းလႆႈၸွႆႈထႅမ်မႃႉၸႃႉမၼ်း၊ၸႂ်ႉမၼ်းႁဵတ်းလုၵ်ႈၸၢင်ႈလုၵ်ႈငႃလႄႈ၊ႁႂ်ႈမၼ်းသိုပ်ႇယူႇလႆႈၵႂႃႇၵႃႈတီႈႁိမ်းမႂ်းတႃႉ။-
တၵ်းဢမ်ႇလႆႈဢဝ်ငိုၼ်းၶီႈငိုၼ်းတူဝ်းတီႈမၼ်း၊ၵူဝ်ႁႄ ထႃႇဝရႃႉၽြႃး၊ လႄႈပၼ်ႁႂ်ႈၵူၼ်းမဵဝ်း ဢိသရေး၊ ၼင်ႇၵၼ်လႆႈယူႇႁိမ်းမႂ်းတႃႉ။-
မႂ်းတၵ်းဢမ်ႇလႆႈဢဝ်ၶီႈငိုၼ်းၵႃႈၼိူဝ်ငိုၼ်းဢၼ်မႂ်းပၼ်ႁႂ်ႈမၼ်းၵူႈယိမ်ၼၼ်ႉ။ တၵ်းဢမ်ႇလႆႈဢဝ်ၼမ်ႉမျၢတ်ႈၵႃႈၼိူဝ်တၢင်းၵိၼ်တၢင်းၶူပ်းဢၼ်မႂ်းၶၢႆပၼ်မၼ်းၼၼ်ႉ။-
ဢၼ်ၼႆႉၸမ်ႉ၊ပဵၼ်ဢမိင်ႉ ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢၼ်ထုတ်ႇဢဝ်သူဢွၵ်ႇသေမိူင်း ဢေးၵျိပ်ႉ၊ မႃးသေယဝ်ႉ၊လႆႈဢဝ်မိူင်း ၶႃႇၼၼ်ႇ၊ ဢၢပ်ႈပၼ်သူလႄႈ၊ႁႂ်ႈလႆႈပဵၼ်ၽြႃးပဵၼ်ၸဝ်ႈသူဢေႃႈ။
“ပေႃးၵူၼ်းမဵဝ်း ဢိသရေး၊ ၼင်ႇၵၼ်ယူႇၸမ်ၵၼ်တင်းမႂ်းတူၵ်းၽၢၼ်ၵႂႃႇလႄႈလႆႈၶၢႆတူဝ်ၸဝ်ႈၵဝ်ႇႁႂ်ႈပဵၼ်ၶႃႈတီႈမႂ်းၸိုင်၊မႂ်းဢမ်ႇလႆႈၸႂ်ႉမၼ်းႁဵတ်းၵၢၼ်ထၢၼ်ႈပေႃးတၢၼ်ႇၶႃႈၼၼ်ႉ။-
မၼ်းတၵ်းလႆႈယူႇလူၺ်ႈၵၼ်တင်းမႂ်းမိူၼ်ၸိူဝ်ႉၼင်ႇၵူၼ်းၵိၼ်ၸၢင်ႈၵိၼ်ငႃလႄႈၶၢမ်ႇတၢင်းၸႂ်ႉတၢင်းသွႆတီႈမႂ်းတေႃႇထိုင်ႁွတ်ႈပီဢၼ်ပၼ်ၶိုၼ်းၼၼ်ႉဢေႃႈ။-
မိူဝ်ႈယၢမ်းၼၼ်ႉမၼ်းဢိၵ်ႇလူၺ်ႈၵၼ်တင်းလုၵ်ႈလၢင်းမၼ်းတင်းလၢႆတၵ်းလႆႈဢွၵ်ႇသေၵႃႈတီႈမႂ်းလႄႈၶိုၼ်းမိူဝ်းၵႂႃႇၸူးၵႃႈတီႈၵူၼ်းႁိူၼ်းၵူၼ်းယေးမၼ်းဢိၵ်ႇတင်းၵႃႈတီႈလိၼ်ဢၼ်ပူႇမွၼ်ႇမၼ်းပိူင်ႇၼၼ်ႉဢေႃႈ။-
ၵူၼ်းမဵဝ်း ဢိသရေး၊ ၸိုင်၊ပဵၼ်ၶႃႈ ထႃႇဝရႃႉၽြႃး၊ ဢၼ်မၼ်းၸဝ်ႈဢွၼ်ဢဝ်ၶဝ်ဢွၵ်ႇသေမိူင်း ဢေးၵျိပ်ႉ၊ မႃးယဝ်ႉ၊ၶဝ်တၵ်းဢမ်ႇလႆႈၶၢမ်ႇတၢင်းဢၼ်ၶၢႆႁႂ်ႈပဵၼ်ၶႃႈလႃးလႃး။-
မႂ်းဢမ်ႇလႆႈၸႂ်ႉၵိၼ်မၼ်းႁႂ်ႈမၼ်းယၢပ်ႇယဵၼ်းၼႃႇလူင်လၢင်။ ၵူဝ်ႁႄ ထႃႇဝရႃႉၽြႃး၊ မႂ်းတႃႉ။-
ပေႃးသူလူဝ်ႇၶႃႈၸိုင်၊ၵႂႃႇသိုဝ်ႉဢဝ်ၶႃႈတင်းလၢႆၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ယူႇႁိမ်းႁွမ်းသူၸိူဝ်းၼၼ်ႉမႃးတႃႉ။-
လုၵ်ႈလၢင်းၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈပိုင်ႈယူႇၸွမ်းသူၼၼ်ႉၵေႃႈသူသိုဝ်ႉဢဝ်လႆႈယူႇၼင်ႇၵဝ်ႇဢေႃႈ။ လုၵ်ႈလၢၼ်ၶဝ်ဢၼ်ၵိူတ်ႇလဵင်ႉမႃးၵႃႈၼႂ်းမိူင်းသူၸိူဝ်းၼၼ်ႉၵေႃႈပဵၼ်ၶႃႈၸႂ်ႉၶႃႈသွႆသူသေႇသေႇဢေႃႈ။-
သူမီးဢၶႂၢင်ႉဢၼ်ဢဝ်ၶဝ်ဝႆႉႁႂ်ႈပဵၼ်ဢမူၺ်ႇပုၼ်ႈလုၵ်ႈသူလၢၼ်သူသေႇသေႇလႄႈ၊ၶဝ်တၵ်းလႆႈၶၢမ်ႇတၢင်းဢၼ်ၸႂ်ႉဢၼ်သွႆယူႇၸူဝ်ႈဢၼ်ၶဝ်ဢသၢၵ်ႈလိပ်းယူႇၼၼ်ႉဢေႃႈ။ တီႈၵူၼ်းမဵဝ်း ဢိသရေး၊ ၼင်ႇၵၼ်ၼၼ်ႉၸမ်ႉ၊သူဢမ်ႇလႆႈၸႂ်ႉၵိၼ်မၼ်းႁႂ်ႈမၼ်းယၢပ်ႇယဵၼ်းၼႃႇလူင်လၢင်။
“ပေႃးဝႃႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈပိုင်ႈယူႇၸွမ်းသူၼၼ်ႉမၢၵ်ႇမီးလီပဵၼ်မႃးလႄႈ၊ၵူၼ်းမဵဝ်း ဢိသရေး၊ သူၼင်ႇၵၼ်သေၵေႃႉၵေႃႉသမ်ႉတူၵ်းၽၢၼ်ၵႂႃႇတေႃႇထိုင်ႁွတ်ႈသမ်ႉပေႃးလႆႈၶၢႆတူဝ်ၸဝ်ႈၵဝ်ႇႁႂ်ႈပဵၼ်ၶႃႈတီႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၼၼ်ႉ၊ဢမ်ႇၼၼ်တီႈလုၵ်ႈလၢၼ်ၵူၼ်းတၢင်ႇၸိူဝ်ႉတၢင်ႇၶိူဝ်းၼၼ်ႉၸိုင်၊-
လိုၼ်းသေမၼ်းၶၢႆတူဝ်ၸဝ်ႈၵဝ်ႇယဝ်ႉၼၼ်ႉမၼ်းမီးဢၶႂၢင်ႉဢၼ်ၶိုၼ်းထုတ်ႇဢဝ်တူဝ်ၸဝ်ႈၵဝ်ႇဢေႃႈ။ ပီႈဢၢႆႈၼွင်ႉၸၢႆးမၼ်းသေၵေႃႉၵေႃႉတၵ်းလႆႈၶိုၼ်းထုတ်ႇဢဝ်မၼ်းဢေႃႈ။-
ဢမ်ႇၼၼ်ၵေႃႈၼႃႉမၼ်း၊ဢၢဝ်မၼ်း၊ဢမ်ႇၼၼ်လုၵ်ႈပီႈလုၵ်ႈၼွင်ႉမၼ်း၊ဢမ်ႇၼၼ်ၼႂ်းပီႈၼွင်ႉၸိူဝ်ႉၶိူဝ်းၸမ်ၵၼ်တင်းမၼ်းၼၼ်ႉတၵ်းလႆႈၶိုၼ်းထုတ်ႇဢဝ်မၼ်းဢေႃႈ။-
မၼ်းတၵ်းလႆႈၶိုင်ပွင်လူၺ်ႈၵၼ်တင်းၵေႃႉဢၼ်သိုဝ်ႉဢဝ်မၼ်းၼၼ်ႉသေလႄႈၶဝ်တၵ်းလႆႈၼပ်ႉဢၢၼ်ႇပီဢၼ်ၸႃႉတႄႇဢဝ်ၸဵမ်မိူဝ်ႈမၼ်းဢဝ်တူဝ်မၼ်းၶၢႆပၼ်ၼၼ်ႉတေႃႇထိုင်ႁွတ်ႈပီဢၼ်ပၼ်ၶိုၼ်းသေယဝ်ႉ၊မၵ်းၶၢၼ်းၵႃႈၶၼ်ပုၼ်ႈဢၼ်တၵ်းပွႆႇမၼ်းၸွမ်းလူၺ်ႈၵႃႈႁႅင်းၵူၼ်းၵိၼ်ၸၢင်ႈၵိၼ်ငႃၼၼ်ႉဢေႃႈ။-
ၸွမ်းလူၺ်ႈပီဢၼ်ၵိုတ်းၼမ်ၵိုတ်းၵေႇၸူဝ်ႈဢၼ်ဢမ်ႇပႆႇႁွတ်ႈထိုင်ပီဢၼ်ပၼ်ၶိုၼ်းၼၼ်ႉလႄႈ၊-
ပုၼ်ႈတၵ်းထုတ်ႇဢဝ်ၶိုၼ်းတူဝ်မၼ်းၼၼ်ႉတၵ်းလႆႈဢဝ်ငိုၼ်းၵႃႈၼႂ်းငိုၼ်းဢၼ်မၼ်းလႆႈၵႃႈႁႅင်းၼၼ်ႉသေလႄႈပၼ်ၶိုၼ်းဢေႃႈ။-
ၸဝ်ႈမၼ်းၼၼ်ႉဢမ်ႇလႆႈၸႂ်ႉၵိၼ်မၼ်းႁႂ်ႈမၼ်းလႆႈယၢပ်ႇယဵၼ်းၼႃႇလူင်လၢင်။-
ပေႃးမၼ်းယင်းဢမ်ႇလႆႈၶိုၼ်းထုတ်ႇဢဝ်လႄႈ ဢမ်ႇလႆႈလွတ်ႈၸိူဝ်ႉၼင်ႇၼၼ်လႄႈယူႇၸိုင်၊မၼ်းဢိၵ်ႇတင်းလုၵ်ႈလၢင်းမၼ်းတၵ်းလႆႈလွတ်ႈလႅဝ်းမိူဝ်ႈဢၼ်ႁွတ်ႈထိုင်ပီဢၼ်ပၼ်ၶိုၼ်းၼၼ်ႉဢေႃႈ။-
ၵူၼ်းမဵဝ်း ဢိသရေး၊ သေၵေႃႉသေၵူၼ်းတၵ်းဢမ်ႇလႆႈပဵၼ်ၶႃႈယူႇသေႇသေႇ။ လွင်ႈမၼ်းၸမ်ႉ၊ၵူၼ်းမဵဝ်း ဢိသရေး၊ တင်းလၢႆပဵၼ်ၶႃႈ ထႃႇဝရႃႉၽြႃး၊ ဢေႃႈ။ မၼ်းၸဝ်ႈဢွၼ်ဢဝ်ၶဝ်ဢွၵ်ႇသေမိူင်း ဢေးၵျိပ်ႉ၊ မႃးလႄႈ၊မၼ်းၸဝ်ႈပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်ဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “သူဢမ်ႇလႆႈႁဵတ်းႁုၼ်ႇႁၢင်ႈသၢင်းထု၊ဢမ်ႇလႆႈပူၵ်းတင်ႈႁၢင်ႈဢၼ်တွင်ႈႁဵတ်းၶွၵ်းႁဵတ်း၊ဢမ်ႇလႆႈပၵ်းဝႆႉသဝ်လႂ်၊မၢၵ်ႇႁိၼ်ဢၼ်တွင်ႈႁဵတ်းလႂ်၊ပုၼ်ႈဢၼ်တၵ်းဝႆႈၼၼ်ႉလႃးလႃး။ ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။
သူတၵ်းလႆႈပႂ်ႉဝၼ်းၵမ်သိၼ်ၵဝ်တင်းလၢႆလႄႈရူဝ်ႇသေႇၵူဝ်ယမ်ထႃႇၼႃႉတီႈဢၼ်မူတ်းၸၢင်ႇၵဝ်ဢေႃႈ။ ၵဝ်ပဵၼ် ထႃႇဝရႃႉၽြႃး၊ ဢေႃႈ။
“ပေႃးသူႁဵတ်းၸွမ်းသဵၼ်ႈတၢင်းထုင်းၽိင်ႈတြႃးၵဝ်လႄႈၵမ်ၵျၢင်ႉၸွမ်းပိင်းၺၢပ်ႈတြႃးၵဝ်ၸိုင်၊-
ၵဝ်တၵ်းႁႂ်ႈၽူၼ်တူၵ်းပုၼ်ႈသူၼႂ်းၶိင်ႇမၼ်းဢၼ်သၢင်ႇထုၵ်ႇပုၼ်ႈလွင်ႈၼင်ႇႁိုဝ်လိၼ်တၵ်းႁႂ်ႈမၢၵ်ႇႁူင်းဢွၵ်ႇမႃးလႄႈတူၼ်ႈမႆႉတူၼ်ႈတွၵ်ႇတၵ်းမၢၵ်ႇမၢၵ်ႇမႃးဢေႃႈ။-
မၢၵ်ႇၶဝ်ႈႁူင်းၶဝ်ႈသူတၵ်းလိူင်ႇၼမ်မၢၵ်ႈမီးၼႃႇတေႃႇထိုင်ႁွတ်ႈထၢၼ်ႈပေႃးၶိင်ႇတၢင်းဢၼ်ယဵပ်ႇၶဝ်ႈပေႃႉၶဝ်ႈတၵ်းႁိုင်ဢွၵ်ႇၵႂႃႇထိုင်ၶိင်ႇဢၼ်ဝိတ်းမၢၵ်ႇၸပိတ်ႉလႄႈၶိင်ႇတၢင်းဢၼ်ဝိတ်းမၢၵ်ႇၸပိတ်ႉသမ်ႉတၵ်းႁိုင်ဢွၵ်ႇၵႂႃႇထိုင်ၶိင်ႇဢၼ်ဝၢၼ်ႇၸိူဝ်ႉဝၢၼ်ႇၽၼ်းဢေႃႈ။ သူတၵ်းလႆႈၵိၼ်ဢိမ်ႇၵိၼ်တဵမ်လႄႈယူႇလူင်ႉလီလွတ်ႈၽေးၵႃႈတီႈမိူင်းတူဝ်ၸဝ်ႈၵဝ်ႇယူႇဢေႃႈ။
“ၵဝ်တၵ်းႁႂ်ႈတၢင်းဢၼ်ပဵၼ်သိုၵ်းပဵၼ်သိူဝ်ထၢတ်ႇယဵၼ်ၵႃႈၼႂ်းမိူင်းသူ၊တၵ်းဢမ်ႇမီးၵေႃႉဢၼ်လွၵ်ႇဢၼ်ငိုတ်ႈသူလႄႈသူတၵ်းလႆႈၼွၼ်းလပ်းလီဢေႃႈ။ တူဝ်ထိူၼ်ႇၵေႃႈၵဝ်တၵ်းပႄႇၽဵဝ်ႈပႅတ်ႈသေၵႃႈၼႂ်းမိူင်းသူလႄႈမိူင်းသူတၵ်းၵၢင်းလွတ်ႈတင်းတၢင်းဢၼ်တိုၵ်းၵၼ်ၽၼ်းၵၼ်ဢေႃႈ။-
သူတၵ်းလႆႈပႄႉၼႅင်ႇရၢၼ်ႇသူႇသူတင်းလၢႆဢေႃႈ။-
ၵူၼ်းသူႁႃႈၵေႃႉၵူၺ်းတၵ်းပႄႉၼႅင်ႇၵူၼ်းပၢၵ်ႇၼိုင်ႈလႆႈလႄႈ၊ၵူၼ်းသူပၢၵ်ႇၼိုင်ႈတၵ်းပႄႉၼႅင်ႇၵူၼ်းမိုၼ်ႇၼိုင်ႈလႆႈဢေႃႈ။-
ၵဝ်တၵ်းပၼ်မၢင်ႇၵလႃႇႁႂ်ႈလုၵ်ႈလၢၼ်ၸိူဝ်ႉၶိူဝ်းသူယႂ်ႇၽႄႈၼမ်ၵိုၼ်းလႄႈ၊ႁႂ်ႈပတိၺိၺ်ႇၵဝ်မၼ်ႈၶိူင်ႇတီႈသူဢေႃႈ။-
ၶဝ်ႈပိူၵ်ႇသူတၵ်းလိူင်ႇၼမ်လူၼ်ႉလိူဝ်ၼႃႇပုၼ်ႈတင်းပီၵူၺ်းဢမ်ႇၵႃး၊ယင်းတေလႆႈဢဝ်ၶဝ်ႈပိူၵ်ႇၵဝ်ႇဢွၵ်ႇပႅတ်ႈပုၼ်ႈဢၼ်တၵ်းသႂ်ႇၶဝ်ႈပိူၵ်ႇမႂ်ႇဢေႃႈ။-
ၵဝ်တၵ်းယူႇလူၺ်ႈၵၼ်တင်းသူၵႃႈၼႂ်းသုမ်ႉထဵင်ၸဝ်ႈဢၼ်မူတ်းၸၢင်ႇၵဝ်သေယဝ်ႉ၊ၵဝ်တၵ်းဢမ်ႇဝၢႆႇၼႃႈပႅတ်ႈသူလႃးလႃး။-
ၵဝ်တၵ်းယူႇလူၺ်ႈၵၼ်တင်းသူလႄႈၵဝ်တၵ်းပဵၼ်ၽြႃးပဵၼ်ၸဝ်ႈသူဢေႃႈ။ သူၵေႃႈတၵ်းပဵၼ်ၵူၼ်းၵဝ်ဢေႃႈ။-
ၵဝ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူၼႆႉဢွၼ်ဢဝ်သူဢွၵ်ႇသေမိူင်း ဢေးၵျိပ်ႉ၊ မႃးပုၼ်ႈလွင်ႈၼင်ႇႁိုဝ်သူတၵ်းဢမ်ႇၶိုၼ်းပဵၼ်ၶႃႈပိူၼ်ႈၼၼ်ႉဢေႃႈ။ ၵဝ်ယႃႉလႅဝ်တၼ်းၶူဝ်းဢၼ်တဵၵ်းငႅၼ်းသူၼၼ်ႉပႅတ်ႈယဝ်ႉလႄႈႁႂ်ႈၶေႃးသူလႆႈၶႅင်ႁူဝ်သူလႆႈတင်ႈယူႇၼၼ်ႉဢေႃႈ။
“ပေႃးသူဢမ်ႇထွမ်ႇဢဝ်ပိင်းၺၢပ်ႈတြႃးၵဝ်ၸိုင်၊သူတၵ်းလႆႈၶၢမ်ႇတၢမ်ႇဢၼ်ၸီႇယၢင်ႇဢပျတ်ႈဢေႃႈ။-
ပေႃးသူထဵင်ပႅတ်ႈပုၼ်ႈတၵ်းထွမ်ႇဢဝ်ထုင်းတြႃးၵဝ်တင်းပိင်းၺၢပ်ႈတြႃးၵဝ်လႄႈၽိတ်းပိူင်ႈပတိၺိၺ်ႇၵဝ်ၼၼ်ႉၸိုင်၊-
ၵဝ်တၵ်းၸီႇယၢင်ႇပၼ်တၢမ်ႇတီႈသူဢေႃႈ။ ၵဝ်တၵ်းႁႂ်ႈသူလႆႈတူၵ်းၸႂ်ၵူဝ်ႁႄလႄႈပဵၼ်တူႇလႃႇ၊ၶႆႈၼၢဝ်ဢၼ်ႁႂ်ႈမၢၵ်ႇတႃလုလႄႈႁႂ်ႈႁူဝ်ၸႂ်သူဢူၼ်ႈၵႂႃႇဢွၼ်ႇၵႂႃႇဢေႃႈ။ သူတၵ်းဝၢၼ်ႇၸိူဝ်ႉဝၢၼ်ႇၽၼ်းဝႆႉသေၵေႃႈ၊တၵ်းပႅတ်ႈလၢႆၵႂႃႇၵွပ်ႈပိူဝ်ႈရၢၼ်ႇသူႇသူမႃးပႄႉၵိၼ်သူၼၼ်ႉဢေႃႈ။-
ၵဝ်တၵ်းဝၢႆႇၼႃႈၵဝ်ပႅတ်ႈသူလႄႈႁႂ်ႈသူတူၵ်းသုမ်းၵႂႃႇတႂ်ႈမိုဝ်းပိူၼ်ႈသေယဝ်ႉ၊ၶဝ်ၸိူဝ်းဢၼ်ၸင်းသူၼၼ်ႉတၵ်းလႆႈဢုပ်ႉပိူင်ႇသူဢေႃႈ။ ၽူႈလႂ်ယင်းဢမ်ႇလိုပ်ႈဢမ်ႇလမ်းသူလႄႈသူတၵ်းလႆႈပၢႆႈဢေႃႈ။
“တေႃႇပေႃးပဵၼ်ထၢၼ်ႇၼႆႉသေၵေႃႈ၊ပေႃးသူယင်းဢမ်ႇထွမ်ႇဢဝ်ၵႂၢမ်းၵဝ်လႄႈယူႇၸိုင်၊ၵဝ်သမ်ႉတၵ်းထၢပ်ႈထႅင်ႈပၼ်တၢမ်ႇၸဵတ်းပုၼ်ႈၵွပ်ႈပိူဝ်ႈဢပျတ်ႈသူလူးၵွၼ်ႇဢေႃႈ။-
ၵဝ်တၵ်းႁၵ်းမႃႇၼႃႉၸႂ်ၽႅၼ်သုင်သူၼၼ်ႉပႅတ်ႈဢေႃႈ။ ၵဝ်တၵ်းဢမ်ႇႁႂ်ႈၽူၼ်တူၵ်းၵႃႈၼိူဝ်သူသေဢိတ်းသေယဝ်ႉ၊လိၼ်တၵ်းႁႅင်ႈလႄႈၵႅၼ်ႇမိူၼ်လဵၵ်းဢေႃႈ။-
တၢင်းဢၼ်သူၶတ်းၸႂ်ႁဵတ်းၼၼ်ႉတၵ်းဢမ်ႇပွင်ႇလွင်ႈၵႃႈသင်လႄႈပဵၼ်ဢၼ်ႁဵတ်းလၢႆလၢႆလွၵ်ႇလွၵ်ႇဢေႃႈ။ လိၼ်သူတၵ်းဢမ်ႇဢွၵ်ႇမၢၵ်ႇဢွၵ်ႇႁူင်းလႄႈတူၼ်ႈမႆႉသူၵေႃႈဢမ်ႇမၢၵ်ႇမၢၵ်ႇဢေႃႈ။
“ပေႃးသူယင်းသိုပ်ႇႁဵတ်းတင်းဢၼ်ၶတ်းၶႅင်ၵဝ်ယူႇ၊ဢမ်ႇထွမ်ႇဢဝ်ၵႂၢမ်းၵဝ်ၸိုင်၊ၵဝ်တၵ်းထၢပ်ႈထႅင်ႈပၼ်တၢမ်ႇၸဵတ်းပုၼ်ႈလူးၵွၼ်ႇဢေႃႈ။-
ၵဝ်တၵ်းပွႆႇတူဝ်ထိူၼ်ႇႁၢႆႉၶဝ်ႈၵႃႈၼႂ်းၵႄႈသူလႄႈၶူပ်းလုၵ်ႈလၢင်းသူတၢႆ၊ယႃႉပႅတ်ႈၽုင်တရိၵ်ႈသၢၼ်ႇသူလႄႈႁႂ်ႈၵူၼ်းသူၵေႇၵႂႃႇယွမ်းၵႂႃႇႁႂ်ႈၶူၼ်တၢင်းသူပဵၼ်သဵၼ်ႈတၢင်းႁၢမ်းၵႂႃႇဢေႃႈ။
“တေႃႇပေႃးလႆႈၶၢမ်ႇထၢၼ်ႇၼႆႉလႄႈယင်းဢမ်ႇထွမ်ႇဢဝ်ၵႂၢမ်းၵဝ်၊ယင်းသိုပ်ႇလႄႈႁဵတ်းတၢင်းဢၼ်ၶတ်းၶႅင်တီႈၵဝ်ယူႇၵူၺ်းၸိုင်၊-
ၵဝ်တၵ်းၶိုၼ်းႁဵတ်းၶတ်းတေႃႇသူလႄႈပၼ်တၢမ်ႇဢၼ်လိူဝ်တွၼ်းၼႃႇသေၵမ်းဢွၼ်တၢင်းၼၼ်ႉထႅင်ႈၸဵတ်းပုၼ်ႈဢေႃႈ။-
ၵဝ်တၵ်းႁႂ်ႈၽေးသိုၵ်းၽေးသိူဝ်တူၵ်းႁွတ်ႈၵႃႈၼိူဝ်သူၵွပ်ႈပိူဝ်ႈသူယႃႉပႅတ်ႈပတိၺိၺ်ႇဢၼ်ႁဵတ်းဝႆႉၵႃႈၼႂ်းဝူင်ႈၵၢင်သူတင်းၵဝ်ၼၼ်ႉဢေႃႈ။ မိူဝ်ႈဢၼ်သူလႆႈၸုတုမ်ယူႇၵႃႈၼႂ်းဝဵင်းသူပုၼ်ႈတေႁႂ်ႈလႆႈလွတ်ႈၽေးၼၼ်ႉ၊ၵဝ်တၵ်းပွႆႇၸႂ်ႉၽေးၵႃႇလႃႉႁႃႈလႅင်မိူင်းတူၵ်းႁွတ်ႈၵႃႈၼိူဝ်သူလႄႈ၊ႁႂ်ႈသူလႆႈတူၵ်းသုမ်းထိုင်ၵႃႈၼႂ်းမိုဝ်းရၢၼ်ႇသူႇသူဢေႃႈ။-
ၵဝ်တၵ်းယႃႉပႅတ်ႈသဵၼ်ႈတၢင်းၶဝ်ႈၼမ်ႉတၢင်းၵိၼ်ၶၢတ်ႇပႅတ်ႈတေႃႇထိုင်ႁွတ်ႈမႄႈယိင်းသိပ်းၵေႃႉတၵ်းၸႂ်ႉၽီးၽႆးဢၼ်လဵဝ်ၵၼ်ၵူၺ်းပုၼ်ႈဢၼ်တၵ်းၸီႇတၵ်းၽဝ်ၶဝ်ႈမုၼ်းၶဝ်ဢေႃႈ။ ၶဝ်တၵ်းၸင်ႈႁိဝ်ႈၶဝ်ႈမုၼ်းၸိူဝ်းၼၼ်ႉမႅင်ႇပၼ်သူလႄႈသူတၵ်းဢမ်ႇလႆႈၵိၼ်ဢိမ်ႇ။
“တေႃႇသူပေႃးလႆႈၶၢမ်ႇတၢမ်ႇထၢၼ်ႇၼႆႉလႄႈယင်းသိုပ်ႇႁဵတ်းၶတ်းၵဝ်ယူႇ၊ဢမ်ႇထွမ်ႇဢဝ်ၵႂၢမ်းၵဝ်လႄႈယူႇယူႇၸိုင်၊-
ၵမ်းၼၼ်ႉ ၵဝ်တၵ်းဢွၵ်ႇတေႃးသႃႉလႄႈၶိုၼ်းႁဵတ်းၶတ်းတေႃႇသူ၊ပၼ်တၢမ်ႇဢၼ်ၵျၢမ်းၼႃႇဢၼ်လိူဝ်တွၼ်းၼႃႇသေၵမ်းဢွၼ်တၢင်းၼၼ်ႉထႅင်ႈၸဵတ်းပုၼ်ႈလူးၵွၼ်ႇဢေႃႈ။-
သူတၵ်းတွင်ႉမႆႈၼႃႇလူင်လၢင်ထၢၼ်ႈပေႃးႁႅမ်ၵိၼ်ၼိူဝ်ႉလုၵ်ႈလၢင်းတူဝ်ၸဝ်ႈၵဝ်ႇဢေႃႈ။-
ၵဝ်တၵ်းယႃႉၽဵဝ်ႈထႃႇၼႃႉတီႈဢၼ်ဝႆႈၽြႃးသူဢၼ်မီးၵႃႈၼိူဝ်လွႆၼၼ်ႉပႅတ်ႈ၊ယႃႉၶဵင်ႇၽီတီႈဢၼ်တုတ်ႇဢၢႆႁွမ်ဢၢႆႁူၺ်းသူၼၼ်ႉပႅတ်ႈလႄႈသမ်ႉဢဝ်တူဝ်တၢႆသူပႅတ်ႈၵွင်သႂ်ႇၵႃႈၼိူဝ်ႁုၼ်ႇႁၢင်ႈသၢင်းထုဢၼ်ႁၵ်းဢၼ်ႁိၵ်းၸိူဝ်းၼၼ်ႉလႄႈၵဝ်တၵ်းလီႁင်ႈဢဵတ်ႇသဵတ်ႇသူဢေႃႈ။-
ၵဝ်တၵ်းယႃႉပႅတ်ႈဝဵင်းသူ၊ယႃႉၽဵဝ်ႈပႅတ်ႈထႃႇၼႃႉတီႈဢၼ်ဝႆႈၽြႃးသူလႄႈ၊တၵ်းဢမ်ႇသုတ်ႇဢမ်ႇၼူမ်ဢၢႆႁွမ်ၼၢမ်ႇသႃႇဢၼ်သူတုတ်ႇၽႆးလႄႈႁဵတ်းတၢင်းလူႇၼၼ်ႉဢေႃႈ။-
ၵဝ်တၵ်းယႃႉပႅတ်ႈမိူင်းသူႁႂ်ႈမၼ်းႁၢမ်းပႅတ်ႈတေႃႇထိုင်ႁွတ်ႈရၢၼ်ႇသူႇသူဢၼ်သိမ်းဢဝ်မိူင်းသူၼၼ်ႉပေႃးဢၢမ်းၼႃႇလူင်လၢင်ဢေႃႈ။-
ၵဝ်တၵ်းႁႂ်ႈပဵၼ်သိုၵ်းပဵၼ်သိူဝ်ၵႃႈတီႈသူလႄႈႁႂ်ႈသူၽၢတ်ႇၽႄၵၼ်ၵႂႃႇယူႇၵႃႈၼႂ်းပႃႇၽိူင်းမိူင်းပိူၼ်ႈဢေႃႈ။ လိၼ်သူတၵ်းႁၢမ်းၵႂႃႇလႄႈဝဵင်းသူတင်းလၢႆတၵ်းလုလႅဝ်ၵႂႃႇဢေႃႈ။-
ၼင်ႇၼၼ်လႄႈယၢမ်းမိူဝ်ႈဢၼ်မိူင်းႁၢမ်းယူႇၼၼ်ႉမိူင်းၼၼ်ႉတၵ်းမူၼ်ႈပျေႃႇလူၺ်ႈဝၼ်းၵမ်သိၼ်မၼ်းယၢမ်းမိူဝ်ႈဢၼ်သူလႆႈယူႇၵႃႈၼႂ်းမိူင်းရၢၼ်ႇသူႇသူၼၼ်ႉလႄႈလိၼ်မိူင်းၼၼ်ႉတၵ်းလႆႈၵိုတ်းလိုဝ်ႈႁိူဝ်ႉလႄႈမူၼ်ႈပျေႃႇလူၺ်ႈဝၼ်းၵမ်သိၼ်မၼ်းဢေႃႈ။-
ယၢမ်းဢၼ်မိူင်းသူႁၢမ်းယူႇၼၼ်ႉၸိုင်၊မၼ်းတၵ်းလႆႈၵိုတ်းလိုဝ်ႈႁိူဝ်ႉယူႇၼိမ်ၼိမ်လီလီ၊ၼႂ်းမိူဝ်ႈဢၼ်သူႇလႆႈၶၢမ်ႇတၢင်းတူၵ်းၵႅၼ်းယူႇၵႃႈၼႂ်းမိုဝ်းရၢၼ်ႇသူႇသူၼၼ်ႉဢေႃႈ။
“သူၸိူဝ်းဢၼ်လႆႈၶၢမ်ႇတူၵ်းၵႅၼ်းယူႇၼႂ်းပႃႇၽိူင်းမိူင်းပိူၼ်ႈၼၼ်ႉၵဝ်တၵ်းႁႂ်ႈသူတူၵ်းၸႂ်ယူႇထၢၼ်ႈပေႃးသဵင်မႂ်မႆႉဢၼ်ၽႅတ်းမေႃးယူႇၼႂ်းလူမ်းၼၼ်ႉတၵ်းၸွမ်းလွၵ်ႇႁႂ်ႈသူတိုၼ်ႇပၢႆႈမိူၼ်ၸိူဝ်ႉၼင်ႇဢၼ်လႅၼ်ႈပၢႆႈၽေးသိုၵ်းၼၼ်ႉဢေႃႈ။ ရၢၼ်ႇသူႇယင်းဢမ်ႇမီးႁိမ်းသူသေၵေႃႉသေၵူၼ်းၵေႃႈသူတၵ်းလူမ်ႉဢေႃႈ။-
ၽူႈလႂ်ယင်းဢမ်ႇလိုပ်ႈဢမ်ႇလမ်းသေၵေႃႈသူတၵ်းပၢႆႈမိူၼ်ၸိူဝ်ႉၼင်ႇပၢႆႈၽေးလၢပ်ႇၽေးလႅဝ်၊တၵ်းယဵပ်ႇၶၢမ်ႈၵၼ်ၵႂႃႇလႄႈတၵ်းဢမ်ႇမီးႁႅင်းတၼ်းၶူဝ်းဢၼ်ၶိုၼ်းႁႄႉတိုၵ်းရၢၼ်ႇသူႇသူလႆႈလႃးလႃး။-
သူတၵ်းလႆႈတၢႆၵႃႈၼႂ်းမိူင်းဢၼ်သူတူၵ်းၵႅၼ်းၼၼ်ႉလႄႈလိၼ်မိူင်းရၢၼ်ႇသူႇသူၼၼ်ႉတၵ်းဢိုၼ်ၵိၼ်သူဢေႃႈ။-
သူၸိူဝ်းဢၼ်ယင်းၵိုတ်းယင်းၵျၢၼ်ႇယူႇဢိတ်းဢီႈၼိုင်ႈၵႃႈၼႂ်းမိူင်းရၢၼ်ႇသူႇသူၼၼ်ႉတၵ်းႁႅင်းဢူၼ်ႈၵႂႃႇၵွပ်ႈပိူဝ်ႈဢပျတ်ႈသူဢိၵ်ႇတင်းၵွပ်ႈပိူဝ်ႈဢပျတ်ႈပူႇမွၼ်ႇသူၼၼ်ႉဢေႃႈ။
“ၼႂ်းဝႃႈၼၼ်သေၵေႃႈ၊ပေႃးလုၵ်ႈလၢၼ်ၸိူဝ်ႉၶိူဝ်းသူတၵ်းယိုၼ်ႈၶၢမ်ႇတွင်းပၢၼ်ႇပုၼ်ႈဢပျတ်ႈၶဝ်၊ပုၼ်ႈဢပျတ်ႈပူႇမွၼ်ႇၶဝ်၊ၵႃႈဢၼ်ၶဝ်ၽိတ်းပိူင်ႈလႄႈႁဵတ်းၶတ်းၵၼ်တင်းၵဝ်မႃး၊-
ဢိၵ်ႇတင်းတၢင်းဢၼ်ၶဝ်ႁဵတ်းႁႂ်ႈၵဝ်ၶတ်းၵၼ်တင်းၶဝ်လႄႈႁႂ်ႈၵဝ်သူင်ႇၶဝ်ၶဝ်ႈၼႂ်းမိူင်းရၢၼ်ႇသူႇၶဝ်ၼၼ်ႉ၊ပေႃးလုၵ်ႈလၢၼ်ၸိူဝ်ႉၶိူဝ်းသူၸိူဝ်းၼၼ်ႉႁူဝ်ၸႂ်ၶဝ်ၶျႃးတႅမ်ႇလႄႈႁပ်ႉၶၢမ်ႇဢဝ်တၢမ်ႇပုၼ်ႈဢပျတ်ႈၶဝ်ဢၼ်ၶတ်းၵၼ်တင်းၵဝ်ၼၼ်ႉၸိုင်၊-
ၵဝ်တၵ်းၶိုၼ်းၶုၵ်းၸႂ်လႆႈပတိၺိၺ်ႇၵတိဢၼ်ၵဝ်လႆႈႁဵတ်းဝႆႉတီႈ ယႃႇၵုပ်ႈ၊ဢိၸၢၵ်ႈ၊ဢႃႇပြႃႇႁၢမ်ႇ၊ ၼၼ်ႉသေလႄႈ၊ၵဝ်တၵ်းၶိုၼ်းပၼ်ၵႂၢမ်းၵတိဝႃႈ၊တေဢဝ်မိူင်းၼၼ်ႉပၼ်တီႈၵူၼ်းၵဝ်တင်းလၢႆဢေႃႈ။-
ဢွၼ်တၢင်းသေပိူၼ်ႈမိူင်းၼၼ်ႉတၵ်းလွတ်ႈသေၵႃႈၼႂ်းမိုဝ်းၵူၼ်းမၼ်းလႄႈ၊ယၢမ်းမိူဝ်ႈဢၼ်မၼ်းပဵၼ်မိူင်းႁၢမ်းယူႇၼၼ်ႉမၼ်းတၵ်းလႆႈဢၶႂၢင်ႉဢၼ်မူၼ်ႈပျေႃႇၼႂ်းပီၵမ်သိၼ်မၼ်းလီလီငၢမ်းငၢမ်းဢေႃႈ။ ၵူၼ်းၸိူဝ်းၼၼ်ႉၵေႃႈတၵ်းလႆႈၶၢမ်ႇဢဝ်တၢမ်ႇဢပျတ်ႈဢၼ်ၶဝ်လႆႈၽိတ်းပိူင်ႈထုင်းတြႃးၵဝ်တင်းလၢႆ၊ဢိၵ်ႇတင်းတၢင်းဢၼ်ၶဝ်ဢမ်ႇထွမ်ႇဢဝ်ပိင်းၺၢပ်ႈတြႃးၵဝ်တင်းလၢႆၼၼ်ႉဢေႃႈ။-
မိူဝ်ႈယၢမ်းၼၼ်ႉပိၵ်ႉသမ်ႉၶဝ်ယင်းမီးယူႇၵႃႈၼႂ်းမိူင်းရၢၼ်ႇသူႇၶဝ်သေၵေႃႈၵဝ်တၵ်းဢမ်ႇၸုၼ်ႉပႅတ်ႈၶဝ်၊တၵ်းဢမ်ႇယႃႉပႅတ်ႈၶဝ်လႃးလႃး။ ပေႃးႁဵတ်းၸိူဝ်ႉၼင်ႇၼၼ်တႄႉၸိုင်၊တၵ်းပဵၼ်တၢင်းဢၼ်ၵဝ်ယႃႉပႅတ်ႈသဵတ်ႈၸႃႇပတိၺိၺ်ႇဢၼ်ၵဝ်ႁဵတ်းဝႆႉလူၺ်ႈၵၼ်တင်းၶဝ်ၼၼ်ႉဢေႃႈ။ ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်ဢေႃႈ။-
ၵဝ်တၵ်းၶိုၼ်းၶုၵ်းၸႂ်လႆႈပတိၺိၺ်ႇၵတိဢၼ်ၵဝ်ႁဵတ်းဝႆႉလူၺ်ႈၵၼ်တီႈပူႇမွၼ်ႇၶဝ်၊ၸိူဝ်းဢၼ်ၵဝ်ဢွၼ်ဢဝ်ၶဝ်ဢွၵ်ႇသေမိူင်း ဢေးၵျိပ်ႉ၊ မႃးသိုဝ်ႈၼႃႈတႂ်ႈတႃၵူၼ်းတၢင်ႇၸိူဝ်ႉတၢင်ႇၶိူဝ်းပုၼ်ႈလွင်ႈၼင်ႇႁိုဝ်ၵဝ်တၵ်းလႆႈပဵၼ်ၽြႃးပဵၼ်ၸဝ်ႈၶဝ်ၼၼ်ႉဢေႃႈ။ ၵဝ်ပဵၼ် ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။
ၸိူဝ်းၼႆႉၸမ်ႉ၊ပဵၼ်ထုင်းတြႃးဢိၵ်ႇတင်းပိင်းၺၢပ်ႈတြႃးဢၼ် ထႃႇဝရႃႉၽြႃး၊ ပၼ်တီႈ မူဝ်းသေႇ၊ ၵႃႈၼိူဝ်လွႆ သိၼႃႉ၊ ပုၼ်ႈၵူၼ်းမဵဝ်း ဢိသရေး၊ တင်းလၢႆဢေႃႈ။
ၸဝ်ႈထႃႇဝရႃႉၽြႃး၊ သမ်ႉမီးဢမိင်ႉၵႃႈတီႈ မူဝ်းသေႇ၊ လႄႈ၊-
ႁႂ်ႈမၼ်းသင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈၸမ်ႉ၊ “ပေႃးၵူၼ်းသေၵေႃႉၵေႃႉႁဵတ်းၵတိသဵတ်ႈၸႃႇတေသၢၵ်ႈလူႇတူဝ်မၼ်းတီႈ ထႃႇဝရႃႉၽြႃး၊ ၸိုင်၊မၼ်းတၵ်းလႆႈထုတ်ႇဢဝ်ၸွမ်းၵႃႈၶၼ်ဢၼ်မႂ်းမၵ်းၶၢၼ်းဝႆႉၼၼ်ႉဢေႃႈ။
“မႂ်းတၵ်းလႆႈမၵ်းၶၢၼ်းပၼ်ၵႃႈၶၼ်မၼ်း ၸွမ်းၼင်ႇၼမ်ႉၼၵ်းလုၵ်ႈၶၼ်ၸဝ်ႈၵႃႈႁိုဝ် ဝႃႈၼႆၼၼ်ႉၸမ်ႉ၊ ၵူၼ်းၸၢႆးဢၼ်ဢသၢၵ်ႈသၢဝ်းပီ တေႃႇႁူၵ်းသိပ်းပီၼၼ်ႉႁႂ်ႈမၼ်းလူႇငိုၼ်း ႁႃႈသိပ်းၵျၢပ်ႈတႃႉ။
ပေႃးပဵၼ်မႄႈယိင်းၸိုင်၊ႁႂ်ႈမၼ်းလူႇငိုၼ်း သၢမ်သိပ်းၵျၢပ်ႈတႃႉ။
ၵေႃႉဢၼ်မီးဢသၢၵ်ႈႁႃႈပီတေႃႇသၢဝ်းၼိုင်ႈ၊ပေႃးပဵၼ်ၵူၼ်းၸၢႆးၸိုင်၊ႁႂ်ႈမၼ်းလူႇငိုၼ်းသၢဝ်းၵျၢပ်ႈလႄႈ၊ ပေႃးပဵၼ်ၽူႈယိင်းဢွၼ်ႇၸိုင်၊ႁႂ်ႈမၼ်းလူႇငိုၼ်းသိပ်းၵျၢပ်ႈတႃႉ။
လုၵ်ႈဢွၼ်ႇဢၼ်မီးဢသၢၵ်ႈၼိုင်ႈလိူၼ်တေႃႇထိုင်ႁႃႈပီ၊ပေႃးပဵၼ်ၵူၼ်းၸၢႆးၸိုင်၊ ႁႂ်ႈလူႇငိုၼ်းႁႃႈၵျၢပ်ႈလႄႈ၊ ပေႃးပဵၼ်ၽူႈယိင်းၸိုင်၊ႁႂ်ႈလူႇငိုၼ်း သၢမ်ၵျၢပ်ႈတႃႉ။
ၵူၼ်းဢၼ်ဢသၢၵ်ႈႁူၵ်းသိပ်းၶိုၼ်ႈၼိူဝ်၊ၵူၼ်းၸၢႆးၸိုင်၊ႁႂ်ႈလူႇငိုၼ်းသိပ်းႁႃႈၵျၢပ်ႈလႄႈ ပေႃးပဵၼ်ၽူႈယိင်းၸိုင်၊ႁႂ်ႈလူႇငိုၼ်းသိပ်းၵျၢပ်ႈလႄႈမၵ်းၶၢၼ်းၸွမ်းၸိူဝ်ႉၼင်ႇၼႆလႄႈ ႁႂ်ႈၶဝ်လူႇတႃႉ။
“ပေႃးၵေႃႉဢၼ်ယၢၵ်ႈၽၢၼ်လႄႈဢမ်ႇတၢတ်ႈၼိူင်ႇလႆႈၵႃႈဢၼ်မႂ်းမၵ်းၶၢၼ်းၵႃႈၶၼ်မၼ်းပုၼ်ႈတၢင်းလူႇဢၼ်ႁဵတ်းၵတိသဵတ်ႈၸႃႇၼၼ်ႉၸိုင်၊ႁႂ်ႈမၼ်းၵႂႃႇၸူးၵႃႈတီႈယဵၸ်ႈပရေႃးႁဵၵ်ႈ တႃႉ။ ႁႂ်ႈယဵၸ်ႈပရေႃးႁဵၵ်ႈမၵ်းၶၢၼ်းပၼ်ၸွမ်းၼင်ႇၵႃႈၶၼ်ဢၼ်မၼ်းတၢတ်ႈၼိူင်ႇလႆႈၼၼ်ႉတႃႉ။
“ပေႃးတၢင်းလူႇဢၼ်ႁဵတ်းၵတိသဵတ်ႈၸႃႇၼၼ်ႉပဵၼ်တူဝ်တရိၵ်ႈသၢၼ်ႇဢၼ်ထုၵ်ႇဢၼ်လီပုၼ်ႈတၢင်းလူႇတီႈ ထႃႇဝရႃႉၽြႃး၊ ၸိုင်၊မၢတ်ႈဝႃႈတူဝ်တၢင်းလူႇၼၼ်ႉပဵၼ်ဢၼ်မူတ်းၸၢင်ႇတီႈ ထႃႇဝရႃႉၽြႃး၊ ယဝ်ႉဢေႃႈ။-
တူဝ်ဢၼ်လီသေဢမ်ႇဝႃႈ၊တူဝ်ဢၼ်ဢမ်ႇလီသေဢမ်ႇဝႃႈ၊ၵေႃႉၼၼ်ႉတေဢမ်ႇလႆႈဢဝ်တရိၵ်ႈသၢၼ်ႇတၢင်ႇတူဝ်မႃးလႅၵ်ႈလၢႆႈတူဝ်ၼၼ်ႉ။ ပေႃးမၼ်းလႅၵ်ႈလၢႆႈၸိုင်၊တူဝ်ၼၼ်ႉတင်းတူဝ်ဢၼ်ၶၢမ်ႇတၢင်းဢၼ်လႅၵ်ႈလၢႆႈၼၼ်ႉတၵ်းလႆႈပဵၼ်တူဝ်ဢၼ်မူတ်းၸၢင်ႇတီႈ ထႃႇဝရႃႉၽြႃး၊ တင်းသွင်တူဝ်ဢေႃႈ။-
ပေႃးပဵၼ်တရိၵ်ႈသၢၼ်ႇဢၼ်ဢမ်ႇမူတ်းၸၢင်ႇ၊ဢၼ်ဢမ်ႇထုၵ်ႇဢမ်ႇလီပုၼ်ႈတၢင်းလူႇတီႈ ထႃႇဝရႃႉၽြႃး၊ ၸိုင်၊မၼ်းတၵ်းလႆႈဢဝ်တရိၵ်ႈသၢၼ်ႇတူဝ်ၼၼ်ႉမႃးၸူးတီႈယဵၸ်ႈပရေႃးႁဵၵ်ႈဢေႃႈ။-
ယဵၸ်ႈပရေႃးႁဵၵ်ႈၼၼ်ႉတၵ်းလႆႈမၵ်းၶၢၼ်းၵႃႈၶၼ်တရိၵ်ႈသၢၼ်ႇမၼ်းၸွမ်းလူၺ်ႈတၢင်းဢၼ်လီဢၼ်ဢမ်ႇလီတရိၵ်ႈသၢၼ်ႇၼၼ်ႉလႄႈၵႃႈၶၼ်ၼၼ်ႉတၵ်းလႆႈတႄႇမၼ်ႈဢေႃႈ။-
ပေႃးၵေႃႉၼၼ်ႉလႆႈၶိုၼ်းသိုဝ်ႉဢဝ်ၸိုင်၊မၼ်းတၵ်းလႆႈပၼ်ၵႃႈၶၼ်ဢၼ်မၵ်းၶၢၼ်းဝႆႉၼၼ်ႉဢိၵ်ႇတင်းတၵ်းလႆႈထၢပ်ႈထႅင်ႈငိုၼ်းႁႃႈပုၼ်ႈပုၼ်ႈၼိုင်ႈၵႃႈၼိူဝ်ၵႃႈၶၼ်ဢၼ်မၵ်းၶၢၼ်းဝႆႉၼၼ်ႉဢေႃႈ။
“ပေႃးၵူၼ်းသေၵေႃႉၵေႃႉၶႂ်ႈဢဝ်ႁိူၼ်းမၼ်းသၢၵ်ႈလူႇႁႂ်ႈမူတ်းၸၢင်ႇပုၼ်ႈ ထႃႇဝရႃႉၽြႃး၊ ၸိုင်၊ယဵၸ်ႈပရေႃးႁဵၵ်ႈတၵ်းလႆႈမၵ်းၶၢၼ်းၵႃႈၶၼ်မၼ်းၸွမ်းလူၺ်ႈႁိူၼ်းၼၼ်ႉလီဢမ်ႇလီၼၼ်ႉလႄႈၵႃႈၶၼ်ၼၼ်ႉတၵ်းလႆႈတႄႇမၼ်ႈဢေႃႈ။-
ပေႃးၵေႃႉဢၼ်သၢၵ်ႈလူႇႁိူၼ်းၼၼ်ႉသမ်ႉၶႂ်ႈသိုဝ်ႉဢဝ်ၶိုၼ်းၸိုင်၊မၼ်းတၵ်းလႆႈပၼ်ၵႃႈၶၼ်ဢၼ်မၵ်းၶၢၼ်းဝႆႉၼၼ်ႉဢိၵ်ႇတင်းတၵ်းလႆႈထၢပ်ႈထႅင်ႈငိုၼ်းႁႃႈပုၼ်ႈပုၼ်ႈၼိုင်ႈၵႃႈၼိူဝ်ၵႃႈၶၼ်ဢၼ်မၵ်းၶၢၼ်းဝႆႉၼၼ်ႉဢေႃႈ။
“ပေႃးၵူၼ်းသေၵေႃႉၵေႃႉၶႂ်ႈဢဝ်ႁႆႈၼႃးမၼ်းၵမ်ႈၽွင်ႈသၢၵ်ႈလူႇႁႂ်ႈမူတ်းၸၢင်ႇပုၼ်ႈ ထႃႇဝရႃႉၽြႃး၊ ၸိုင်၊တၵ်းလႆႈမၵ်းၶၢၼ်းၵႃႈၶၼ်မၼ်းၸွမ်းၵႃႈၼင်ႇဢၼ်လႆႈဝၢၼ်ႇၸိူဝ်ႉဝၢၼ်ႇၽၼ်းမၼ်းမီးၵႃႈႁိုဝ်ၼၼ်ႉဢေႃႈ။ ၸိူဝ်ႉၽၼ်းၶဝ်ႈမုယေႃးႁႃႈတၢင်ၸိုင်၊တၵ်းလႆႈမၵ်းၶၢၼ်းၵႃႈၶၼ်မၼ်းငိုၼ်းႁႃႈသိပ်းၵျၢပ်ႈဢေႃႈ။-
ပေႃးမၼ်းသၢၵ်ႈလူႇႁႆႈၼႃးမၼ်းၼႂ်းပီဢၼ်ပၼ်ၶိုၼ်းၼၼ်ႉၸိုင်၊ၵႃႈၶၼ်မၼ်းၵႃႈဢၼ်မၵ်းၶၢၼ်းၼၼ်ႉတၵ်းလႆႈတႄႇမၼ်ႈဝႆႉတဵမ်တဵမ်ဢေႃႈ။-
ပေႃးမၼ်းသၢၵ်ႈလူႇၼႂ်းပီဢၼ်ဝၢႆးသေပီဢၼ်ပၼ်ၶိုၼ်းၼၼ်ႉၸိုင်၊ယဵၸ်ႈပရေႃးႁဵၵ်ႈတၵ်းလႆႈၼပ်ႉဢၢၼ်ႇပီဢၼ်ၵိုတ်းၵျၢၼ်ႇယူႇတေႃႇထိုင်ႁွတ်ႈပီဢၼ်ပၼ်ၶိုၼ်းဢၼ်တေမႃးၼၼ်ႉသေယဝ်ႉ၊မၵ်းၶၢၼ်းပၼ်ၵႃႈၶၼ်ဢၼ်ယွမ်းပၼ်မၼ်းဢေႃႈ။-
ပေႃးၵေႃႉဢၼ်သၢၵ်ႈလူႇႁႆႈၼႃးမၼ်းၼၼ်ႉၶႂ်ႈၶိုၼ်းသိုဝ်ႉဢဝ်ၸိုင်၊မၼ်းတၵ်းလႆႈပၼ်ၵႃႈၶၼ်ဢၼ်မၵ်းၶၢၼ်းဝႆႉၼၼ်ႉဢိၵ်ႇတင်းတၵ်းလႆႈထၢပ်ႈထႅင်ႈငိုၼ်းႁႃႈပုၼ်ႈပုၼ်ႈၼိုင်ႈၵႃႈၼိူဝ်ၵႃႈၶၼ်ဢၼ်မၵ်းၶၢၼ်းဝႆႉၼၼ်ႉဢေႃႈ။-
ပေႃးၵေႃႉၼၼ်ႉၶၢႆပႅတ်ႈႁႆႈၼႃးမၼ်းတီႈပိူၼ်ႈတၢင်ႇၵေႃႉၸူဝ်ႈဢၼ်မၼ်းယင်းဢမ်ႇပႆႇၶိုၼ်းလႆႈသိုဝ်ႉဢဝ်တီႈ ထႃႇဝရႃႉၽြႃး၊ ယဝ်ႉၸိုင်၊ၵမ်းလိုၼ်းမၼ်းၶိုၼ်းသိုဝ်ႉဢဝ်ဢမ်ႇလႆႈ။-
ဝၢႆးသေပီဢၼ်ပၼ်ၶိုၼ်းၵမ်းလိုၼ်းၼၼ်ႉၸိုင်၊ႁႆႈၼႃးၼၼ်ႉပဵၼ်ဢၼ်မူတ်းၸၢင်ႇပုၼ်ႈ ထႃႇဝရႃႉၽြႃး၊ လုမ်းလုမ်းယဝ်ႉလႄႈပဵၼ်ႁႆႈၼႃးယဵၸ်ႈပရေႃးႁဵၵ်ႈ ဢေႃႈ။
“ပေႃးၵူၼ်းသေၵေႃႉၵေႃႉဢဝ်ႁႆႈၼႃးဢၼ်ဢမ်ႇၸႂ်ႈၼႃးဢၼ်မၼ်းပိူင်ႇၵဝ်ႇၵဝ်ႇဢၼ်မၼ်းသိုဝ်ႉဢဝ်ၼၼ်ႉမႃးသၢၵ်ႈလူႇတီႈ ထႃႇဝရႃႉၽြႃး၊ ၸိုင်၊-
ယဵၸ်ႈပရေႃးႁဵၵ်ႈတၵ်းလႆႈၼပ်ႉဢၢၼ်ႇပီဢၼ်ၵိုတ်းၵျၢၼ်ႇယူႇတေႃႇထိုင်ႁွတ်ႈပီဢၼ်ပၼ်ၶိုၼ်းဢၼ်တေမႃးၼၼ်ႉသေယဝ်ႉ၊တေလႆႈမၵ်းၶၢၼ်းပၼ်ၵႃႈၶၼ်မၼ်းဢေႃႈ။ ၵေႃႉၼၼ်ႉၵေႃႈတၵ်းလႆႈပၼ်ၵႃႈမၼ်းၶၼ်မၼ်းၼႂ်းဝၼ်းၼၼ်ႉဢေႃႈ။ ငိုၼ်းၼၼ်ႉပဵၼ်ငိုၼ်း ထႃႇဝရႃႉၽြႃး၊ ဢေႃႈ။-
မိူဝ်ႈဢၼ်ႁွတ်ႈထိုင်ပီဢၼ်ပၼ်ၶိုၼ်းၸိုင်၊ႁႆႈၼႃးၼၼ်ႉတၵ်းလႆႈၶိုၼ်းဢၢပ်ႈပၼ်ၼႂ်းမိုဝ်းၸဝ်ႈမၼ်းၵေႃႉၵဝ်ႇၼၼ်ႉ၊ဢမ်ႇၼၼ်ၵေႃႈဢၢပ်ႈပၼ်တီႈလုၵ်ႈလၢၼ်ၸိူဝ်ႉၶိူဝ်းၸဝ်ႈမၼ်းၼၼ်ႉဢေႃႈ။
“ၵႃႈၶၼ်ၵႃႈမီးၸိူဝ်းၼၼ်ႉတၵ်းလႆႈမၵ်းၶၢၼ်းၸွမ်းလူၺ်ႈၼမ်ႉၼၵ်းလုၵ်ႈၶၼ်ၸဝ်ႈဢေႃႈ။
“တရိၵ်ႈသၢၼ်ႇဢၼ်ပဵၼ်လုၵ်ႈတူၼ်ႈၼၼ်ႉပဵၼ်ၶွင် ထႃႇဝရႃႉၽြႃး၊ ပိူင်ႇဢေႃႈ။ ၽူႈလႂ်ဢမ်ႇလူဝ်ႇသၢၵ်ႈလူႇ ထႃႇဝရႃႉၽြႃး၊ ၸိူဝ်ႉၼင်ႇတၢင်းလူႇဢၼ်ၸွမ်းၼင်ႇၵၢင်ၸႂ်တူဝ်ၸဝ်ႈၵဝ်ႇၼၼ်ႉ။ ဝူဝ်း၊သူဝ်း၊ပႄႉၸိူဝ်းၼႆႉပဵၼ်ဢုၵ်ႉၸႃႇ ထႃႇဝရႃႉၽြႃး၊ ဢေႃႈ။-
ပေႃးပဵၼ်လုၵ်ႈတူၼ်ႈတရိၵ်ႈသၢၼ်ႇဢၼ်ဢမ်ႇမူတ်းသႂ်ၸိုင်၊တၵ်းလႆႈၶိုၼ်းသိုဝ်ႉဢဝ်ၸွမ်းၼင်ႇၵႃႈၶၼ်ၼမ်ႉၼၵ်းလုၵ်ႈၶၼ်ၸဝ်ႈဢိၵ်ႇတင်းတၵ်းလႆႈထၢပ်ႈထႅင်ႈငိုၼ်းႁႃႈပုၼ်ႈပုၼ်ႈၼိုင်ႈၵႃႈၼိူဝ်ၵႃႈၶၼ်ဢၼ်မၵ်းၶၢၼ်းဝႆႉၼၼ်ႉဢေႃႈ။ ပေႃးယင်းဢမ်ႇၶိုၼ်းသိုဝ်ႉဢဝ်ၸိုင်၊တၵ်းလႆႈၶၢႆပၼ်တီႈသေၵေႃႉၵေႃႉၸွမ်းၼင်ႇၵႃႈၶၼ်ၼမ်ႉၼၵ်းလုၵ်ႈၶၼ်ၸဝ်ႈၼၼ်ႉဢေႃႈ။
“ၼႂ်းၵႃႈဢၼ်ၵေႃႉၼိုင်ႈပိူင်ႇၼၼ်ႉပဵၼ်ၵူၼ်းသေဢမ်ႇဝႃႈ၊ပဵၼ်တရိၵ်ႈသၢၼ်ႇသေဢမ်ႇဝႃႈ၊ပဵၼ်ႁႆႈၼႃးသေဢမ်ႇဝႃႈ၊ပေႃးမၼ်းတိူင်ႇဝႃႈၵတိသေသၢၵ်ႈလူႇတီႈ ထႃႇဝရႃႉၽြႃး၊ ၸိုင်၊ဢမ်ႇလႆႈၶၢႆ၊ဢမ်ႇလႆႈၶိုၼ်းသိုဝ်ႉဢဝ်၊ၵႃႈဢၼ်တိူင်ႇဝႃႈၵတိသေသၢၵ်ႈလူႇၸိူဝ်းၼၼ်ႉတၵ်းလႆႈမူတ်းၸၢင်ႇၼႃႇလူင်လၢင်တီႈ ထႃႇဝရႃႉၽြႃး၊ ဢေႃႈ။-
ပိၵ်ႉသမ်ႉပဵၼ်ၵူၼ်းသေဢမ်ႇဝႃႈ၊ပေႃးတိူင်ႇဝႃႈၵတိသေသၢၵ်ႈလူႇပုၼ်ႈတၵ်းႁႂ်ႈလုလႅဝ်သေၵႃႈၼႂ်းမဵဝ်းၵူၼ်းၼၼ်ႉ၊ၵမ်းလိုၼ်းဢမ်ႇလႆႈၶိုၼ်းသိုဝ်ႉဢဝ်၊တၵ်းလႆႈဢဝ်မၼ်းတၢႆဢေႃႈ။
“ၵႃႈဢၼ်ဢွၵ်ႇပဵၼ်မႃးၵႃႈတီႈလိၼ်၊ပဵၼ်မဵတ်ႉသေဢမ်ႇဝႃႈ၊ပဵၼ်မၢၵ်ႇသေဢမ်ႇဝႃႈ၊ၵႃႈဢၼ်မီးၼၼ်ႉသိပ်းပုၼ်ႈ၊ပုၼ်ႈၼိုင်ႈၼၼ်ႉပဵၼ်ပုၼ်ႈ ထႃႇဝရႃႉၽြႃး၊ ဢေႃႈ။-
ပေႃးၵူၼ်းသေၵေႃႉၵေႃႉၶႂ်ႈသိုဝ်ႉဢဝ်ဢၼ်ပဵၼ်ပုၼ်ႈၼိုင်ႈၼၼ်ႉၸိုင်၊မၼ်းတၵ်းလႆႈပၼ်ၵႃႈၶၼ်ၸွမ်းလူၺ်ႈၼမ်ႉၼၵ်းလုၵ်ႈၶၼ်ၸဝ်ႈဢိၵ်ႇတင်းတၵ်းလႆႈထၢပ်ႈထႅင်ႈငိုၼ်းႁႃႈပုၼ်ႈပုၼ်ႈၼိုင်ႈၵႃႈၼိူဝ်ၵႃႈၶၼ်မၼ်းၼၼ်ႉဢေႃႈ။-
မိူဝ်ႈဢၼ်လႆႈၼပ်ႉဢၢၼ်ႇတရိၵ်ႈသၢၼ်ႇဢၼ်လႆႈလဵင်ႉဝႆႉၸိူဝ်းၼၼ်ႉၼႂ်းသိပ်းတူဝ်၊တူဝ်ၼိုင်ႈၼၼ်ႉပဵၼ်ပုၼ်ႈ ထႃႇဝရႃႉၽြႃး၊ ဢေႃႈ။-
ၸဝ်ႈမၼ်းဢမ်ႇလႆႈၸႅတ်ႈသေးတူၺ်းတရိၵ်ႈသၢၼ်ႇၸိူဝ်းၼၼ်ႉသေလႄႈလိူၵ်ႈပၼ်တူဝ်ဢၼ်ဢမ်ႇလီၼၼ်ႉ၊မၼ်းဢမ်ႇလႆႈဢဝ်တၢင်ႇတူဝ်သေလႄႈလႅၵ်ႈလၢႆႈတူဝ်ၼၼ်ႉ။ ပေႃးမၼ်းဢဝ်တၢင်ႇတူဝ်လႅၵ်ႈလၢႆႈတူဝ်ၼၼ်ႉၸိုင်၊တူဝ်ၼၼ်ႉတင်းတူဝ်ဢၼ်လႆႈၶၢမ်ႇလႅၵ်ႈလၢႆႈၼၼ်ႉတၵ်းလႆႈပဵၼ်ၶွင် ထႃႇဝရႃႉၽြႃး၊ တင်းသွင်တူဝ်ဢေႃႈ။ ဢမ်ႇလႆႈၶိုၼ်းသိုဝ်ႉဢဝ်လႃးလႃး၊” ဝႃႈၼင်ႇၼႆဢေႃႈ။
ၸိူဝ်းၼႆႉၸမ်ႉ၊ပဵၼ်ပိင်းၺၢပ်ႈၸဝ်ႈတင်းလၢႆဢၼ် ထႃႇဝရႃႉၽြႃး၊ သင်ႇလၢတ်ႈတီႈ မူဝ်းသေႇ၊ ၵႃႈၼိူဝ်လွႆ သိၼႃႉ၊ ပုၼ်ႈၵူၼ်းမဵဝ်း ဢိသရေး၊ တင်းလၢႆဢေႃႈ။ ၵျၢမ်းဢၼ်ႁဵတ်းဝၢတ်ႈယဝ်ႉယဝ်ႉဢေႃႈ။
ဝၢႆးသေၵူၼ်းမဵဝ်း ဢိသရေး၊ ၶဝ်ဢွၵ်ႇမိူင်း ဢေးၵျိပ်ႉ၊ မႃးလႆႈသွင်ပီတဵမ်တဵမ်၊ၼႂ်းလိူၼ်တီႈသွင်ဝၼ်းတီႈၼိုင်ႈၼၼ်ႉ ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ ၵႃႈၼႂ်းသုမ်ႉထဵင်ၸဝ်ႈတီႈဢၼ် ထႃႇဝရႃႉၽြႃး၊ မႃးၸူးၶဝ်ၵႃႈတီႈထိူၼ်ႇ သိၼႃႉ၊ ၼၼ်ႉလႄႈဝႃႈၸမ်ႉ၊-
“မႂ်းတင်း ဢႃႇရုၼ်ႇ၊ တၵ်းလႆႈႁဵတ်းတၢင်းဢၼ်ၵဵပ်းၸရၢင်းၵူၼ်းမိူင်းၵႃႈၼိူဝ်မဵဝ်း ဢိသရေး၊ တင်းလၢႆၸွမ်းလူၺ်ႈမဵဝ်းပီႈမဵဝ်းၼွင်ႉၶိူဝ်းႁိူၼ်းၽႂ်ၶိူဝ်းႁိူၼ်းမၼ်းဢေႃႈ။ ၵဵပ်းၸရၢင်းၸိုဝ်ႈသဵင်ၵူၼ်းၸၢႆးၶဝ်တင်းလၢႆ၊-
ဢၼ်ၸႃႉၸဵမ်ဢသၢၵ်ႈလႆႈသၢဝ်းပီလႄႈသၢဝ်းပီၶိုၼ်ႈၼိူဝ်ၸိူဝ်းဢၼ်တိုၵ်းသိုၵ်းလႆႈတင်းသဵင်ႈတင်းလူင်တႃႉ။-
သမ်ႉၸႂ်ႉႁႂ်ႈၵူၼ်းၸၢႆးဢၼ်ပဵၼ်ႁူဝ်ၼႂ်းၸိူဝ်ႉၶိူဝ်းႁိူၼ်းၽႂ်ႁိူၼ်းမၼ်းယေႈၸိူဝ်ႉၶိူဝ်းယေႈၵေႃႉမႃးၶဝ်ႈပႃးၸွႆႈထႅမ်မႂ်းတႃႉ။-”
မူဝ်းသေႇ၊ တင်း ဢႃႇရုၼ်ႇ၊ ၵေႃႈဢဝ်တၢင်းဢၼ်ၸွႆႈထႅမ်တီႈၶဝ်သိပ်းသွင်ၵေႃႉဢၼ်မၼ်းၸဝ်ႈလိူၵ်ႈဢဝ်ၸိူဝ်းၼႆႉသေလႄႈ၊-
ႁွင်ႉဢဝ်မူႇၵူၼ်းၸိူဝ်းၵူၼ်းတင်းလၢႆ ႁႂ်ႈၸုတုမ်ၵၼ်ၼႂ်းလိူၼ်တီႈသွင်ဝၼ်းတီႈၼိုင်ႈၼၼ်ႉသေယဝ်ႉ၊ၵဵပ်းဢဝ်ၸရၢင်းၸိုဝ်ႈသဵင်ၵူၼ်းတင်းသဵင်ႈတင်းလူင် ၸွမ်းလူၺ်ႈမဵဝ်းပီႈမဵဝ်းၼွင်ႉၶိူဝ်းႁိူၼ်းၶဝ်ႁင်းၽႂ်ႁင်းမၼ်းဢေႃႈ။ ၸိုဝ်ႈသဵင်ၵူၼ်းၸၢႆးဢၼ်ၸႃႉၸဵမ်ဢသၢၵ်ႈလႆႈသၢဝ်းပီလႄႈသၢဝ်းပီၶိုၼ်ႈၼိူဝ်တင်းသဵင်ႈတင်းလူင်ၼၼ်ႉၶဝ်ၼပ်ႉဢၢၼ်ႇမၢတ်ႈမၢႆဢဝ်ၵူႈၵေႃႉၵူႈၵူၼ်းဢေႃႈ။-
ၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ ၼၼ်ႉမၼ်းၼပ်ႉဢၢၼ်ႇၶဝ်ၵႃႈၼႂ်းထိူၼ်ႇ သိၼႃႉ၊ ဢေႃႈ။-
ၵူၼ်းမဵဝ်းၶိူဝ်းႁိူၼ်း လေႇဝိ၊ တင်းလၢႆၸိုင်၊ဢမ်ႇလႆႈၶၢမ်ႇတၢင်းဢၼ်ၼပ်ႉဢၢၼ်ႇၶဝ်ႈပႃးၼႂ်းၸရၢင်းၼၼ်ႉ။-
လွင်ႈမၼ်းၸမ်ႉ၊ ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ ဝႆႉယဝ်ႉလႄႈဝႃႈၸမ်ႉ၊-
“မိူဝ်ႈဢၼ်မႂ်းၵဵပ်းၸရၢင်းၵူၼ်းမိူင်းဢၼ်ပဵၼ်ၵူၼ်းၸၢႆးလႄႈတိုၵ်းသိုၵ်းလႆႈၸိူဝ်းၼၼ်ႉဢမ်ႇလႆႈၼပ်ႉဢၢၼ်ႇႁႂ်ႈၵူၼ်းမဵဝ်းၶိူဝ်းႁိူၼ်း လေႇဝိ၊ လႆႈၶဝ်ႈပႃးၼႂ်းၸရၢင်းၼၼ်ႉ။-
မႂ်းတၵ်းလႆႈယုၵ်ႉတၢင်ႇၵူၼ်းမဵဝ်း လေႇဝိ၊ ၸိူဝ်းၼၼ်ႉႁႂ်ႈၶဝ်ပႂ်ႉထိင်းသုမ်ႉထဵင်ၸဝ်ႈလႄႈႁႂ်ႈၶဝ်ႁၢမ်သုမ်ႉထဵင်ၸဝ်ႈ၊ဢိၵ်ႇတင်းၶိူင်ႈပိူင်မၼ်းသေလႄႈပွင်ႁဵတ်းၼႃႈၵၢၼ်သုမ်ႉထဵင်ၸဝ်ႈဢေႃႈ။ ႁႂ်ႈၶဝ်ၶျႃးပၢင်တပ်ႉၶဝ်ယူႇလဵပ်ႈႁွပ်ႈသုမ်ႉထဵင်ၸဝ်ႈတႃႉ။-
ၼႂ်းမိူဝ်ႈဢၼ်ထိုင်ၶိင်ႇၶၢႆႉပၢင်တပ်ႉမိူဝ်ႈလႂ်တၼ်းလႂ်သေဢမ်ႇဝႃႈ၊ၵူၼ်းမဵဝ်း လေႇဝိ၊ ၸိူဝ်းၼၼ်ႉတၵ်းလႆႈၵူႈလႆႈသိမ်းသုမ်ႉထဵင်ၸဝ်ႈလႄႈၶိုၼ်းတင်ႈၶိုၼ်းပူၵ်းၵႃႈတီႈပၢင်တပ်ႉမႂ်ႇမႂ်ႇၼၼ်ႉၵူႈပွၵ်ႈဢေႃႈ။ ၵေႃႉဢၼ်ပဵၼ်ၵူၼ်းၶိူဝ်းတၢင်ႇၸိူဝ်ႉတၢင်ႇမဵဝ်းၼၼ်ႉပေႃးသုတ်ႉၸပ်းသုတ်ႉၸူးတီႈသုမ်ႉထဵင်ၸဝ်ႈၸိုင်၊တၵ်းလႆႈၶၢမ်ႇတၢင်းဢၼ်ဢဝ်တၢႆဢေႃႈ။-
ၵူၼ်းမဵဝ်း ဢိသရေး၊ ဢၼ်ပဵၼ်ၶိူဝ်းႁိူၼ်းတၢင်ႇမဵဝ်းၸိူဝ်းၼၼ်ႉတၵ်းလႆႈၶျႃးပၢင်တပ်ႉၶဝ်ပဵၼ်မူႇၽႂ်မူႇမၼ်းၸွမ်းလူၺ်ႈၶိူဝ်းႁိူၼ်းၶဝ်ႁင်းၽႂ်ႁင်းမၼ်းၵႃႈႁိမ်းလၢမ်ႇတပ်ႉဢၼ်ၸၢပ်ႈသႅင်ႇၵၼ်တင်းတူဝ်ၸဝ်ႈၵဝ်ႇႁင်းၽႂ်ႁင်းမၼ်းဢေႃႈ။-
ၵူၺ်းၵႃႈ၊ၵူၼ်းမဵဝ်း လေႇဝိ၊ ၸိူဝ်းၼၼ်ႉတၵ်းလႆႈၶျႃးပၢင်တပ်ႉလဵပ်ႈႁွပ်ႈသုမ်ႉထဵင်ၸဝ်ႈႁႂ်ႈလႆႈႁႄႉၶႅၼ်သုမ်ႉထဵင်ၸဝ်ႈ၊ပုၼ်ႈလွင်ႈၼင်ႇႁိုဝ်ၽူႈလႂ်သေၵေႃႉသေၵူၼ်းတၵ်းဢမ်ႇလႆႈသုတ်ႉၸပ်းသုတ်ႉၸူးမႃးလႄႈႁဵတ်းႁႂ်ႈတၢင်းၸႂ်မႆႈၶႂ်ႈၸႃႉၸဝ်ႈဢွၵ်ႇသေယဝ်ႉ၊ပၼ်ၽေးဢုပၢတ်ႈတီႈၵူၼ်းမဵဝ်း ဢိသရေး၊ ၼၼ်ႉဢေႃႈ။-”
ၼင်ႇၼၼ်လႄႈၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉတီႈ မူဝ်းသေႇ၊ ၼၼ်ႉဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ တင်း ဢႃႇရုၼ်ႇ၊ လႄႈဝႃႈၸမ်ႉ၊-
မိူဝ်ႈဢၼ်ၵူၼ်းမဵဝ်း ဢိသရေး၊ တင်းလၢႆၶျႃးပၢင်တပ်ႉၶဝ်ၼၼ်ႉၵူၼ်းၵေႃႉလႂ်ၵေႃႉၼၼ်ႉတၵ်းလႆႈၶျႃးတီႈယူႇႁင်းၽႂ်ႁင်းမၼ်းၵႃႈႁိမ်းလၢမ်ႇတပ်ႉဢၼ်ၸၢပ်ႈသႅင်ႇၵၼ်တင်းမုၵ်ႉၸုမ်းတူဝ်ၸဝ်ႈၵဝ်ႇ၊ၵႃႈႁိမ်းတပ်ႉလၢမ်ႇၶိူဝ်းႁိူၼ်းတူဝ်ၸဝ်ႈၵဝ်ႇႁင်းၽႂ်ႁင်းမၼ်းဢေႃႈ။ တၵ်းလႆႈႁႂ်ႈပၢင်တပ်ႉၶဝ်ဝၢႆႇၼႃႈတေႃႇသုမ်ႉထဵင်ၸဝ်ႈယူႇၵူႈၽၢႆႇၵူႈပႃႈဢေႃႈ။
ၼင်ႇၼၼ်လႄႈ၊ၵူၼ်း လေႇဝိ၊ ၸိူဝ်းၼၼ်ႉတၵ်းလႆႈတေႃႉဢဝ်သုမ်ႉထဵင်ၸဝ်ႈလႄႈဢွၵ်ႇၸွမ်းၵႂႃႇယူႇၼႂ်းဝူင်ႈၵၢင်သွင်တပ်ႉပႃႈၼႃႈဢိၵ်ႇတင်းသွင်တပ်ႉပႃႈလင်ဢေႃႈ။ မုၵ်ႉၸုမ်းလႂ်မုၵ်ႉၸုမ်းၼၼ်ႉတၵ်းလႆႈၶပ်ႉၵၼ်ယႆၵၼ်ၵႂႃႇၸိူဝ်ႉၼင်ႇဢၼ်ၶဝ်ၶျႃးတီႈယူႇၵႃႈႁိမ်းလၢမ်ႇၶဝ်ႁင်းၽႂ်ႁင်းမၼ်းဢေႃႈ။
ၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢၼ်ၼပ်ႉဢၢၼ်ႇၸွမ်းလူၺ်ႈၶိူဝ်းႁိူၼ်းၶဝ်ႁင်းၽႂ်ႁင်းမၼ်းၵႃႈၼႂ်းတပ်ႉၸုမ်းတင်းမူတ်းမီးႁူၵ်းသႅၼ်သၢမ်ႁဵင်ႁႃႈပၢၵ်ႇပၢႆႁႃႈသိပ်းၵေႃႉဢေႃႈ။-
ၵူၺ်းၵႃႈ၊ၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉတီႈ မူဝ်းသေႇ၊ ၼၼ်ႉၵူၼ်းမဵဝ်း လေႇဝိ၊ တင်းလၢႆဢမ်ႇလႆႈၼပ်ႉဢၢၼ်ႇၶဝ်ႈပႃးၼႂ်းၸရၢင်းလူၺ်ႈၵၼ်တင်းၵူၼ်းမဵဝ်း ဢိသရေး၊ တင်းလၢႆၼၼ်ႉ။
ၼင်ႇၼၼ်လႄႈၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉတီႈ မူဝ်းသေႇ၊ ၼၼ်ႉဢေႃႈ။ ၶဝ်ဢွၼ်ၵၼ်ၶျႃးတီႈယူႇၶဝ်ၵႃႈႁိမ်းလၢမ်ႇၶဝ်ၽႂ်ၽႂ်မၼ်းမၼ်းလႄႈသမ်ႉဢွၼ်ၵၼ်ၵႂႃႇၸွမ်းလူၺ်ႈၶိူဝ်းႁိူၼ်းၶဝ်ႁင်းၽႂ်ႁင်းမၼ်းဢေႃႈ။
ဢၼ်ၼႆႉသမ်ႉပဵၼ်ၸိူဝ်ႉၶိူဝ်း ဢႃႇရုၼ်ႇ၊ တင်း မူဝ်းသေႇ၊ ၼႂ်းမိုဝ်ႉဝၼ်းဢၼ် ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ ၵႃႈၼိူဝ်လွႆ သိၼႃႉ၊ ၼၼ်ႉဢေႃႈ။-
လုၵ်ႈၸၢႆး ဢႃႇရုၼ်ႇ၊ ပဵၼ် ၼႃႇတပ်ႉ၊ ဢၼ်ပဵၼ်လုၵ်ႈၸၢႆးတူၼ်ႈ၊ဢိၵ်ႇတင်း ဢၽိႁု၊ဢေးလႃႇၸႃႇ၊ တင်း ဢိႀမႃႇ၊ ဢေႃႈ။-
ၶဝ်ၸိူဝ်းၼႆႉလႆႈၶၢမ်ႇဢဝ်ၽိၵ်ႈသိၵ်ႈလႄႈယုၵ်ႉတၢင်ႇဝႆႉၼႂ်းဢရႃႇယဵၸ်ႈပရေႃးႁဵၵ်ႈ ဢေႃႈ။-
ၼႃႇတပ်ႉ၊ တင်း ဢၽိႁု၊ ၼၼ်ႉ ပိူဝ်ႈဢၼ်ႁဵတ်းတၢင်းလူႇလူၺ်ႈၽႆးဢၼ်ဢမ်ႇမူတ်းၸၢင်ႇတီႈ ထႃႇဝရႃႉၽြႃး၊ ၼၼ်ႉလႄႈလႆႈတၢႆၵႂႃႇၵႃႈၼႂ်းထိူၼ်ႇ သိၼႃႉ၊ ယဝ်ႉ။ ၵႃႈတီႈၶဝ်သွင်ၵေႃႉၼၼ်ႉဢမ်ႇမီးလုၵ်ႈမီးလၢင်းလႄႈ၊ ဢေးလႃႇၸႃႇ၊ တင်း ဢိႀမႃႇ၊ ပွင်ႁဵတ်းၼႃႈၵၢၼ်ယဵၸ်ႈပရေႃးႁဵၵ်ႈၵႃႈၼႂ်းၸူဝ်ႈပၢၼ်ပေႃႈၶဝ် ဢႃႇရုၼ်ႇ၊ ဢေႃႈ။
ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ လႄႈဝႃႈၸမ်ႉ၊-
“ႁွင်ႉဢဝ်ၸိူဝ်ႉၶိူဝ်းၵူၼ်း လေႇဝိ၊ မႃးသေလႄႈယုၵ်ႉတၢင်ႇပၼ်ၶဝ်ႁႂ်ႈၶဝ်ၸွႆႈႁဵတ်းၸွႆႈသၢင်ႈၵၢၼ်ငၢၼ်း ဢႃႇရုၼ်ႇ၊ ဢၼ်ပဵၼ်ယဵၸ်ႈပရေႃးႁဵၵ်ႈၼၼ်ႉတႃႉ။-
ၶဝ်တၵ်းလႆႈၵိုတ်ႉႁၢပ်ႇၼႃႈၵၢၼ်သုမ်ႉထဵင်ၸဝ်ႈၼၼ်ႉဢိၵ်ႇတင်းၸွႆႈႁဵတ်းၸွႆႈပွင်ၼႃႈၵၢၼ်ပုၼ်ႈယဵၸ်ႈပရေႃးႁဵၵ်ႈတင်းလၢႆ၊ဢိၵ်ႇတင်းၼႃႈၵၢၼ်မူႇၵူၼ်းၸိူဝ်းၵူၼ်းတင်းလၢႆဢေႃႈ။-
ၶဝ်တၵ်းလႆႈပွင်ထၢမ်းၼႃႈၵၢၼ်ဢၼ်လုမ်းလႃးၶိူင်ႈပိူင်သုမ်ႉထဵင်ၸဝ်ႈ၊ပႂ်ႉၸွႆႈပႂ်ႉထႅမ်ၼႃႈၵၢၼ်ပုၼ်ႈၵူၼ်းမဵဝ်း ဢိသရေး၊ တင်းလၢႆဢေႃႈ။-
ၵူၼ်းမဵဝ်း လေႇဝိ၊ ၸိုင်၊မီးပုၼ်ႈၽွၼ်းဢၼ်တၵ်းလႆႈၸွႆႈႁဵတ်းၸွႆႈသၢင်ႈ ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉပိူင်လဵဝ်ၵူၺ်းဢေႃႈ။-
မႂ်းတၵ်းလႆႈယုၵ်ႉတၢင်ႇ ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉၵိုတ်ႉႁၢပ်ႇၼႃႈၵၢၼ်ယဵၸ်ႈပရေႃးႁဵၵ်ႈ ဢေႃႈ။ တၢင်ႇၵေႃႉတၢင်ႇၵူၼ်းဢၼ်မႃးႁိမ်ႁဵတ်းၼၼ်ႉတၵ်းလႆႈၶၢမ်ႇတၢင်းဢၼ်ဢဝ်တၢႆဢေႃႈ၊” ဝႃႈၼင်ႇၼႆဢေႃႈ။
ၸဝ်ႈထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ ထႅင်ႈလႄႈဝႃႈ၊-
“တူၺ်းလူး။ ၵဝ်လိူၵ်ႈဢဝ်ၵူၼ်းမဵဝ်း လေႇဝိ၊ ၸိူဝ်းၼၼ်ႉဢွၵ်ႇသေၵႃႈၼႂ်းၵူၼ်းမဵဝ်း ဢိသရေး၊ တင်းလၢႆပုၼ်ႈတၢင်တူဝ်လုၵ်ႈတူၼ်ႈဢၼ်ၵိူတ်ႇလဵင်ႉမႃးဢွၼ်တၢင်းၵႃႈတီႈၵူၼ်းမဵဝ်း ဢိသရေး၊ တင်းလၢႆယဝ်ႉ။ ပိူဝ်ႈၼႆလႄႈၵူၼ်းမဵဝ်း လေႇဝိ၊ ၸိုင်၊ပဵၼ်ၵူၼ်းၵဝ်ဢေႃႈ။-
လွင်ႈမၼ်းၸမ်ႉ၊လုၵ်ႈၸၢႆးတူၼ်ႈတင်းလၢႆပဵၼ်ၵူၼ်းၵဝ်ဢေႃႈ။ ၼႂ်းဝၼ်းဢၼ်ၵဝ်ဢဝ်တၢႆလုၵ်ႈၸၢႆးတူၼ်ႈၵႃႈမီးၵႃႈၼႂ်းမိူင်း ဢေးၵျိပ်ႉ၊ ၼၼ်ႉၸိုင်၊ၵဝ်ဢဝ်ၵႃႈၼႂ်းၵူၼ်းမဵဝ်း ဢိသရေး၊ တင်းလၢႆၸႃႉၸဵမ်ၵူၼ်းလႄႈတရိၵ်ႈသၢၼ်ႇဢၼ်ပဵၼ်လုၵ်ႈတူၼ်ႈတင်းလၢႆႁႂ်ႈသၢၵ်ႈၵၢပ်ႈဝႆႉပုၼ်ႈၵဝ်ယဝ်ႉ။ ၶဝ်ပဵၼ်ဢုၵ်ႉၸႃႇၵဝ်ဢေႃႈ။ ၵဝ်ပဵၼ် ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ ၵႃႈၼႂ်းထိူၼ်ႇ သိၼႃႉ၊ လႄႈဝႃႈ၊-
“ၼပ်ႉဢၢၼ်ႇလုၵ်ႈလၢင်းၵူၼ်းမဵဝ်း လေႇဝိ၊ တင်းလၢႆၸွမ်းလူၺ်ႈမဵဝ်းပီႈမဵဝ်းၼွင်ႉၸိူဝ်ႉၶိူဝ်းႁိူၼ်းၶဝ်ႁင်းၽႂ်ႁင်းမၼ်းတႃႉ။ ဢဝ်ၸရၢင်းၵူၼ်းၸၢႆးဢၼ်ၸႃႉၸဵမ်ဢသၢၵ်ႈလႆႈလိူၼ်ၼိုင်ႈလႄႈလိူၼ်ၼိုင်ႈၶိုၼ်ႈၼိူဝ်တႃႉ၊” ဝႃႈၼင်ႇၼႆဢေႃႈ။-
မူဝ်းသေႇ၊ ၵေႃႈၸွမ်းၼင်ႇၵႂၢမ်း ထႃႇဝရႃႉၽြႃး၊ ၼၼ်ႉမၼ်းၼပ်ႉဢၢၼ်ႇၶဝ်ၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉၼၼ်ႉဢေႃႈ။-
လေႇဝိ၊ မီးလုၵ်ႈၸၢႆးသၢမ်ၵေႃႉ၊ဢၼ်ပဵၼ် ၵေႇရသုၼ်ႇ၊ၵေႃႇႁတ်ႉ၊ တင်း မေႇရႃႇရိ၊ ဢေႃႈ။-
ၸိုဝ်ႈသဵင်လုၵ်ႈၸၢႆး ၵေႇရသုၼ်ႇ၊ ဢၼ်ၸွမ်းလူၺ်ႈၶိူဝ်းႁိူၼ်းၶဝ်ၼၼ်ႉပဵၼ် လိပၼိ၊ တင်း သိမိ၊ ဢေႃႈ။-
ၸိုဝ်ႈသဵင်လုၵ်ႈၸၢႆး ၵေႃႇႁတ်ႉ၊ ဢၼ်ၸွမ်းလူၺ်ႈၶိူဝ်းႁိူၼ်းၶဝ်ၼၼ်ႉပဵၼ် ဢႃႇမရမ်ႇ၊ဢိၸႁႃႇ၊ႁေႇပရုၼ်ႇ၊ တင်း ဢေႃးၸေးလႃႉ၊ ဢေႃႈ။-
ၸိုဝ်ႈသဵင်လုၵ်ႈၸၢႆး မေႇရႃႇရိ၊ ဢၼ်ၸွမ်းလူၺ်ႈၶိူဝ်းႁိူၼ်းၶဝ်ၼၼ်ႉပဵၼ် မႃႇလိ၊ တင်း မုသိ၊ ဢေႃႈ။ ၶဝ်ၸိူဝ်းၼႆႉပဵၼ်ပူႇပေႃႈၶိူဝ်းႁိူၼ်းၶဝ်ၸွမ်းၼင်ႇၸိုဝ်ႈသဵင်ၶဝ်ဢေႃႈ။
ၵူၼ်းၶိူဝ်းႁိူၼ်း ၵေႇရသုၼ်ႇ၊ ၼၼ်ႉဢွၵ်ႇပဵၼ်မႃးၶိူဝ်းႁိူၼ်း လိပၼိ၊ တင်းၶိူဝ်းႁိူၼ်း သိမိ၊ ဢေႃႈ။-
ၵူၼ်းၸၢႆးၸိူဝ်းဢၼ်လႆႈဢသၢၵ်ႈလိူၼ်ၼိုင်ႈလႄႈလိူၼ်ၼိုင်ႈၶိုၼ်ႈၼိူဝ်ၵႃႈဢၼ်လႆႈၶၢမ်ႇတၢင်းဢၼ်ၼပ်ႉဢၢၼ်ႇၸိူဝ်းၼၼ်ႉမီးၸဵတ်းႁဵင်ပၢႆႁႃႈပၢၵ်ႇၵေႃႉဢေႃႈ။-
ၵူၼ်းၶိူဝ်းႁိူၼ်းၸိူဝ်းၼႆႉတၵ်းလႆႈၶျႃးတီႈယူႇၽၢႆႇတၢင်းလင်သုမ်ႉထဵင်ၸဝ်ႈၵႃႈတီႈၼႃႈဝၼ်းတူၵ်းဢေႃႈ။-
ဢေးလျႃႇသပ်ႉ၊ လုၵ်ႈၸၢႆး လေးလႃႉ၊ ၼၼ်ႉတၵ်းလႆႈပဵၼ်ၵႄႇပဵၼ်ႁူဝ်ၶိူဝ်းႁိူၼ်းၶဝ်ၼၼ်ႉဢေႃႈ။-
ပုၼ်ႈၽွၼ်းၶိူဝ်းႁိူၼ်း ၵေႇရသုၼ်ႇ၊ ၸိုင်၊ၶဝ်တၵ်းလႆႈလုမ်းလႃးသုမ်ႉထဵင်ၸဝ်ႈ၊ၽႃႈမုင်းမၼ်းၸၼ်ႉၼႂ်း၊ၽႃႈမုင်းမၼ်းၸၼ်ႉၼွၵ်ႈ၊ၽႃႈၵင်ႈၽၵ်းတူသုမ်ႉထဵင်ၸဝ်ႈ၊-
ၽႃႈၵင်ႈႁူဝ်ႉဝၢင်းဢၼ်လွမ်ႉႁွပ်ႈသုမ်ႉထဵင်ၸဝ်ႈ၊တင်းၶဵင်ႇတၢင်းလူႇ၊ဢိၵ်ႇတင်းၽႃႈၵင်ႈၽၵ်းတူႁူဝ်ႈဝၢင်းတင်းၸိူၵ်ႈတင်းလၢႆၼၼ်ႉဢေႃႈ။ ၶဝ်တူၵ်းပုၼ်ႈၽွၼ်းတႃႇတေလုမ်းလႃးၶိူင်ႈပိူင်တင်းလၢႆၸိူဝ်းၼႆႉဢေႃႈ။
ၵူၼ်းၶိူဝ်းႁိူၼ်း ၵေႃႇႁတ်ႉ၊ ၼၼ်ႉဢွၵ်ႇပဵၼ်မႃးၶိူဝ်းႁိူၼ်း ဢႃႇမရမ်ႇ၊ ၶိူဝ်းႁိူၼ်း ဢိၸႁႃႇ၊ ၶိူဝ်းႁိူၼ်း ႁေႇပရုၼ်ႇ၊ တင်းၶိူဝ်းႁိူၼ်း ဢေႃးၸေးလႃႉ၊ ဢေႃႈ။-
ၵူၼ်းၸၢႆးဢၼ်ဢသၢၵ်ႈလႆႈလိူၼ်ၼိုင်ႈလႄႈလိူၼ်ၼိုင်ႈၶိုၼ်ႈၼိူဝ်ၵႃႈဢၼ်လႆႈၶၢမ်ႇတၢင်းဢၼ်ၼပ်ႉဢၢၼ်ႇၸိူဝ်းၼၼ်ႉမီးပႅတ်ႇႁဵင်ပၢႆႁူၵ်းပၢၵ်ႇၵေႃႉဢေႃႈ။-
ၵူၼ်းၶိူဝ်းႁိူၼ်းၸိူဝ်းၼႆႉတၵ်းလႆႈၶျႃးတီႈယူႇၽၢႆႇတၢင်းၸၢၼ်းသုမ်ႉထဵင်ၸဝ်ႈဢေႃႈ။-
ဢေးလိၸႃႇၽၢၼ်ႇ၊ လုၵ်ႈၸၢႆး ဢေႃးၸေးလႃႉ၊ ၼၼ်ႉတၵ်းလႆႈပဵၼ်ၵႄႇပဵၼ်ႁူဝ်ၶိူဝ်းႁိူၼ်းၶဝ်ဢေႃႈ။-
ပုၼ်ႈၽွၼ်းပုၼ်ႈၶဝ်ၸိုင်၊ၶဝ်တၵ်းလႆႈလုမ်းလႃးတိူၵ်ႈပတိၺိၺ်ႇၸဝ်ႈ၊ၽိူၼ်ၸဝ်ႈ၊ၶဵင်ႇတီႈတႆႈၽႆး၊ၶဵင်ႇတၢင်းလူႇတင်းလၢႆ၊ၶိူင်ႈပိူင်ဢၼ်ယိပ်းတိုဝ်းၼႂ်းထႃႇၼႃႉတီႈမူတ်းၸၢင်ႇၸဝ်ႈ၊တင်းၽႃႈၵင်ႈၽၵ်းတူထႃႇၼႃႉတီႈမူတ်းၸၢင်ႇသေပိူၼ်ႈဢေႃႈ။ ၶဝ်တူၵ်းပုၼ်ႈၽွၼ်းတႃႇတေလုမ်းလႃးၶိူင်ႈပိူင်တင်းလၢႆၸိူဝ်းၼႆႉဢေႃႈ။
ၶုၼ်လူင်ဢၼ်ဢုပ်ႉၵႃႈၼိူဝ်ၵူၼ်းၵႄႇၵူၼ်းႁူဝ်ၸိူဝ်ႉၶိူဝ်းႁိူၼ်း လေႇဝိ၊ တင်းလၢႆၼၼ်ႉပဵၼ် ဢေးလႃႇၸႃႇ၊ လုၵ်ႈၸၢႆးယဵၸ်ႈပရေႃးႁဵၵ်ႈ ဢႃႇရုၼ်ႇ၊ ဢေႃႈ။ မၼ်းတၵ်းလႆႈလူတူၺ်းၸီႇယၢင်ႇၶဝ်ၸိူဝ်းဢၼ်ပွင်ႁဵတ်းလုမ်းလႃးထႃႇၼႃႉတီႈမူတ်းၸၢင်ႇၸဝ်ႈဢေႃႈ။
ၵူၼ်းၶိူဝ်းႁိူၼ်း မေႇရႃႇရိ၊ ၼၼ်ႉဢွၵ်ႇပဵၼ်မႃးၶိူဝ်းႁိူၼ်း မႃႇလိ၊ တင်းၶိူဝ်းႁိူၼ်း မုသိ၊ ဢေႃႈ။-
ၵူၼ်းၸၢႆးဢၼ်ဢသၢၵ်ႈလႆႈလိူၼ်ၼိုင်ႈလႄႈလိူၼ်ၼိုင်ႈၶိုၼ်ႈၼိူဝ်ၵႃႈဢၼ်လႆႈၶၢမ်ႇတၢင်းဢၼ်ၼပ်ႉဢၢၼ်ႇၸိူဝ်းၼၼ်ႉမီးႁူၵ်းႁဵင်ပၢႆသွင်ပၢၵ်ႇၵေႃႉဢေႃႈ။-
ၵူၼ်းၶိူဝ်းႁိူၼ်းၸိူဝ်းၼႆႉတၵ်းလႆႈၶျႃးတီႈယူႇၽၢႆႇတၢင်းႁွင်ႇသုမ်ႉထဵင်ၸဝ်ႈဢေႃႈ။ ၸုရေးလႃႉ၊ လုၵ်ႈၸၢႆး ဢၽိႁေးလႃႉ၊ ၼၼ်ႉတၵ်းလႆႈပဵၼ်ၵႄႇပဵၼ်ႁူဝ်ၶိူဝ်းႁိူၼ်းၶဝ်ဢေႃႈ။-
ပုၼ်ႈၽွၼ်းပုၼ်ႈၶဝ်ၸိုင်၊တၵ်းလႆႈလုမ်းလႃးပႅၼ်ႈသုမ်ႉထဵင်ၸဝ်ႈလႂ်၊ပႄမၼ်းလႂ်၊သဝ်မၼ်းလႂ်၊တီႈသုပ်းတိၼ်မၼ်းလႂ်၊ဢိၵ်ႇတင်းလိမ်ႈၸိမ်မၼ်းတင်းလၢႆဢေႃႈ။ ၶဝ်တူၵ်းပုၼ်ႈၽွၼ်းတႃႇတေလုမ်းလႃးၶိူင်ႈပိူင်ၸိူဝ်းၼႆႉဢေႃႈ။-
သဝ်ႁူဝ်ႉဝၢင်းဢၼ်လွမ်ႉႁွပ်ႈၼၼ်ႉလႂ်၊တီႈသုပ်းတိၼ်သဝ်လႂ်၊လၵ်းမၼ်းလႂ်တင်းၸိူၵ်ႈမၼ်းတင်းလၢႆၵေႃႈပဵၼ်ပုၼ်ႈၽွၼ်းၶဝ်တႃတေလုမ်းလႃးဢေႃႈ။
မူဝ်းသေႇ၊ ဢိၵ်ႇတင်း ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉတၵ်းလႆႈၶျႃးတီႈၽၢႆႇဝၼ်းဢွၵ်ႇၵႃႈတီႈၽၢႆႇၼႃႈသုမ်ႉထဵင်ၸဝ်ႈဢေႃႈ။ ၶဝ်တူၵ်းပုၼ်ႈၽွၼ်းဢၼ်ပွင်ႁဵတ်းၼႃႈၵၢၼ်ၸွမ်းထုင်းတြႃးၵႃႈၼႂ်းထႃႇၼႃႉတီႈမူတ်းၸၢင်ႇၸဝ်ႈပုၼ်ႈၵူၼ်းမဵဝ်း ဢိသရေး၊ ဢေႃႈ။ တၢင်ႇၵေႃႉတၢင်ႇၵူၼ်းဢၼ်မႃးႁိမ်ႁဵတ်းၼၼ်ႉတၵ်းလႆႈၶၢမ်ႇတၢင်းဢၼ်ဢဝ်တၢႆဢေႃႈ။-
ၵူၼ်းၸၢႆးမဵဝ်း လေႇဝိ၊ ၵႃႈဢၼ်ဢသၢၵ်ႈလႆႈလိူၼ်ၼိုင်ႈလႄႈလိူၼ်ၼိုင်ႈၶိုၼ်ႈၼိူဝ်ဢၼ် မူဝ်းသေႇ၊ ၼပ်ႉဢၢၼ်ႇၵႃႈမီးတင်းသဵင်ႈတင်းလူင်ၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉၼၼ်ႉမီးသွင်မိုၼ်ႇပၢႆသွင်ႁဵင်ၵေႃႉဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ လႄႈဝႃႈ၊ “ၼပ်ႉဢၢၼ်ႇလုၵ်ႈၸၢႆးတူၼ်ႈဢၼ်ဢသၢၵ်ႈလႆႈလိူၼ်ၼိုင်ႈလႄႈလိူၼ်ၼိုင်ႈၶိုၼ်ႈၼိူဝ်ၵႃႈၼႂ်းၵူၼ်းမဵဝ်း ဢိသရေး၊ တင်းလၢႆလႄႈဢဝ်ၸရၢင်းတႃႉ။-
ဢဝ်ၵူၼ်း လေႇဝိ၊ ၸိူဝ်းၼၼ်ႉတၢင်တူဝ်လုၵ်ႈၸၢႆးတူၼ်ႈၵူၼ်းမဵဝ်း ဢိသရေး၊ တင်းလၢႆပုၼ်ႈၵဝ်တႃႉ။ သမ်ႉဢဝ်တရိၵ်ႈသၢၼ်ႇဢၼ်မီးၵႃႈတီႈၵူၼ်း လေႇဝိ၊ ၸိူဝ်းၼၼ်ႉတၢင်တူဝ်တရိၵ်ႈသၢၼ်ႇဢၼ်ၵိူတ်ႇဢွၼ်တၢင်းပိူၼ်ႈဢၼ်မီးၵႃႈတီႈၵူၼ်းမဵဝ်း ဢိသရေး၊ တင်းလၢႆတႃႉ။ ၵဝ်ပဵၼ် ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။-
မူဝ်းသေႇ၊ ၼပ်ႉဢၢၼ်ႇလုၵ်ႈၸၢႆးတူၼ်ႈၵူၼ်းမဵဝ်း ဢိသရေး၊ တင်းလၢႆၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉၼၼ်ႉ၊-
ၸႃႉၸဵမ်ဢသၢၵ်ႈလႆႈလိူၼ်ၼိုင်ႈလႄႈလိူၼ်ၼိုင်ႈၶိုၼ်ႈၼိူဝ်တင်းသဵင်ႈတင်းလူင်မီးသွင်မိုၼ်ႇသွင်ႁဵင်သွင်ပၢၵ်ႇၸဵတ်းသိပ်းပၢႆသၢမ်ၵေႃႉဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ လႄႈဝႃႈ၊-
“ဢဝ်ၵူၼ်း လေႇဝိ၊ တင်းလၢႆတၢင်တူဝ်လုၵ်ႈၸၢႆးတူၼ်ႈၵူၼ်းမဵဝ်း ဢိသရေး၊ တင်းသဵင်ႈတင်းလူင်၊သမ်ႉဢဝ်တရိၵ်ႈသၢၼ်ႇဢၼ်မီးၵႃႈတီႈၵူၼ်း လေႇဝိ၊ တင်းလၢႆတၢင်တူဝ်တရိၵ်ႈသၢၼ်ႇဢၼ်ၵိူတ်ႇဢွၼ်တၢင်းပိူၼ်ႈဢၼ်ၵႃႈဢၼ်မီးၵႃႈတီႈၵူၼ်းမဵဝ်း ဢိသရေး၊ တင်းလၢႆၼၼ်ႉတႃႉ။-
ၸွမ်းၼင်ႇလုၵ်ႈၸၢႆးတူၼ်ႈၵူၼ်းမဵဝ်း ဢိသရေး၊ တင်းလၢႆၼမ်လိူဝ်တွၼ်းသေမဵဝ်း လေႇဝိ၊ ၵႂႃႇသွင်ပၢၵ်ႇၸဵတ်းသိပ်းပၢႆသၢမ်ၵေႃႉၼၼ်ႉလႄႈမႂ်းတၵ်းလႆႈထုတ်ႇဢဝ်လုၵ်ႈၸၢႆးတူၼ်ႈဢၼ်ၼမ်လိူဝ်ၵႂႃႇၸိူဝ်းၼၼ်ႉဢေႃႈ။-
မႂ်းတၵ်းလႆႈဢဝ်ငိုၼ်းႁႃႈၵျၢပ်ႈဢၼ်ၸွမ်းလူၺ်ႈၼမ်ႉၼၵ်းလုၵ်ႈၶၼ်ၸဝ်ႈၼၼ်ႉလႄႈထုတ်ႇဢဝ်ပုၼ်ႈလုၵ်ႈၸၢႆးတူၼ်ႈယေႈၵေႃႉဢေႃႈ။-
သမ်ႉဢဝ်ငိုၼ်းၼၼ်ႉပၼ်တီႈ ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉတႃႉ၊” ဝႃႈၼင်ႇၼႆဢေႃႈ။-
မူဝ်းသေႇ၊ ၵေႃႈႁဵတ်းၸွမ်းၵႂၢမ်း ထႃႇဝရႃႉၽြႃး၊ ၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈၼၼ်ႉသေလႄႈ၊-
ဢဝ်ငိုၼ်းၵႃႈၶၼ်ဢၼ်ထုတ်ႇဢဝ်လႄႈလႆႈငိုၼ်းႁဵင်သၢမ်ပၢၵ်ႇႁူၵ်းသိပ်းပၢႆႁႃႈၵျၢပ်ႈၼၼ်ႉ၊-
ပၼ်တီႈ ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉဢေႃႈ။
ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ တင်း ဢႃႇရုၼ်ႇ၊ လႄႈဝႃႈ၊-
“ၵဵပ်းၸရၢင်းၵူၼ်းမိူင်းၵႃႈၼႂ်းၵူၼ်းမဵဝ်း လေႇဝိ၊ ၶိူဝ်းႁိူၼ်း ၵေႃႇႁတ်ႉ၊ ဢၼ်ၸွမ်းလူၺ်ႈမဵဝ်းပီႈမဵဝ်းၼွင်ႉလႄႈၶိူဝ်းႁိူၼ်းၶဝ်ႁင်းၽႂ်ႁင်းမၼ်းတႃႉ။-
ဢဝ်ၸရၢင်းၵူၼ်းတင်းလၢႆဢၼ်မီးဢသၢၵ်ႈဝူင်ႈၵၢင်သၢမ် သိပ်းပီတေႃႇႁႃႈသိပ်းပီၸိူဝ်းဢၼ်ပွင်ပဵၼ်လႆႈတႃႇတေၵိုတ်ႉႁၢပ်ႇၼႃႈၵၢၼ်ၵႃႈၼႂ်းသုမ်ႉထဵင်ၸဝ်ႈၼၼ်ႉတႃႉ။-
ၵၢၼ်ငၢၼ်းဢၼ်ၶဝ်ၵိုတ်ႉႁၢပ်ႇၼၼ်ႉၸၢပ်ႈသႅင်ႇၵၼ်တင်းၶိူင်ႈပိူင်ဢၼ်မူတ်းၸၢင်ႇၼႃႇလူင်လၢင်ဢေႃႈ။
“မိူဝ်ႈဢၼ်ထိုင်ၶိင်ႇဢၼ်ၶၢႆႉပၢင်တပ်ႉၼၼ်ႉၸိုင်၊ ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉတၵ်းလႆႈၶဝ်ႈၵႃႈၼႂ်းသုမ်ႉထဵင်ၸဝ်ႈလႄႈပူတ်းဢဝ်ၽႃႈၵင်ႈဢၼ်ၵင်ႈဝႆႉၽၢႆႇၼႃႈတိူၵ်ႈပတိၺိၺ်ႇၸဝ်ႈသေယဝ်ႉ၊ႁူမ်ႇသုမ်ႇတိူၵ်ႈတႃႇၼၼ်ႉဢေႃႈ။-
သမ်ႉတၵ်းလႆႈဢဝ်ၼင်သတ်းဢၼ်လီႁူမ်ႇသုမ်ႇလႄႈဢဝ်ၽႃႈဢၼ်သွမ်ႇႁူမ်ႇသုမ်ႇၵႃႈၼိူဝ်ၼင်ၼၼ်ႉယဝ်ႉၸင်ႇဢဝ်ၵၢၼ်းသွတ်ႇသႂ်ႇဝႆႉဢေႃႈ။
“ၵႃႈၼိူဝ်ၽိူၼ်ၸဝ်ႈပုၼ်ႈဢၼ်တၵ်းဢဝ်ၶဝ်ႈမုၼ်းသၢၵ်ႈလူႇတီႈ ထႃႇဝရႃႉၽြႃး၊ ၼၼ်ႉၵေႃႈၶဝ်တၵ်းလႆႈဢဝ်ၽႃႈဢၼ်သွမ်ႇသိူဝ်ႇဝႆႉလႄႈၵႃႈၼိူဝ်မၼ်းၼၼ်ႉတၵ်းလႆႈဢဝ်ဢၢင်ႇလႂ်၊ၵွၵ်းပုၼ်ႈၼၢမ်ႇသႃႇလႂ်၊ၵွၵ်းပုၼ်ႈဢၼ်သၢၵ်ႈလူႇလႂ်၊ဢႅင်ႇပုၼ်ႈဢၼ်သွၼ်းလေႃႇၼမ်ႉၸပိတ်ႉလႂ်ၸိူဝ်းၼၼ်ႉတၢင်ႇဝႆႉဢေႃႈ။ ၵႃႈၼိူဝ်ၽိူၼ်ၸဝ်ႈၼၼ်ႉတၵ်းလႆႈဢဝ်ၶဝ်ႈမုၼ်းတၢင်ႇဝႆႉတႃႇသေႇဢေႃႈ။-
ၶဝ်တၵ်းလႆႈဢဝ်ၽႃႈဢၼ်လႅင်ႁူမ်ႇသုမ်ႇၶိူင်ႈပိူင်ၸိူဝ်းၸဝ်ႈၼၼ်ႉတင်းမူတ်းဝႆႉဢေႃႈ။ သမ်ႉတၵ်းလႆႈဢဝ်ၼင်သတ်းဢၼ်လီႁူမ်ႇသုမ်ႇၵႃႈၼိူဝ်မၼ်းယဝ်ႉၸင်ႇဢဝ်ၵၢၼ်းသွတ်ႇသႂ်ႇဝႆႉဢေႃႈ။
“ၵႃႈၼိူဝ်ၶဵင်ႇတီႈတႆႈၽႆးၼၼ်ႉၵေႃႈၶဝ်တၵ်းလႆႈဢဝ်ၽႃႈဢၼ်သွမ်ႇႁူမ်ႇသုမ်ႇပႃးလူၺ်ႈၸႃႉၸဵမ်ၵွၵ်းၽႆးမၼ်းလႂ်၊ၵိမ်းၺၢပ်ႈမၼ်းလႂ်၊ၵွၵ်းတုင်းတဝ်ႈမၼ်းလႂ်တင်းမူၵ်ႇၼမ်ႉမၼ်းမၼ်းတင်းမူတ်းဝႆႉဢေႃႈ။-
ၶဝ်တၵ်းလႆႈဢဝ်ၶဵင်ႇတီႈတႆႈၽႆးဢိၵ်ႇတင်းၶိူင်ႈပိူင်မၼ်းတင်းသဵင်ႈတင်းလူင်သႂ်ႇၼႂ်းထူင်ၼင်သတ်းဢၼ်လီယဝ်ႉၸင်ႇဢဝ်တၢင်ႇဝႆႉၵႃႈၼိူဝ်ၶဵင်ႇဢၼ်ႁၢမ်မၼ်းၼၼ်ႉဢေႃႈ။
“ၵႃႈၼိူဝ်ၶဵင်ႇတၢင်းလူႇၶမ်းၵေႃႈၶဝ်တၵ်းလႆႈဢဝ်ၽႃႈဢၼ်သွမ်ႇသိူဝ်ႇဝႆႉလႄႈဢဝ်ၼင်သတ်းဢၼ်လီႁူမ်ႇသုမ်ႇၵႃႈၼိူဝ်မၼ်းယဝ်ႉၸင်ႇဢဝ်ၵၢၼ်းသွတ်ႇသႂ်ႇဝႆႉဢေႃႈ။-
ၶိူင်ႈပိူင်ဢၼ်ယိပ်းဢၼ်တိုဝ်းၵႃႈၼႂ်းထႃႇၼႃႉတီႈမူတ်းၸၢင်ႇၸဝ်ႈတင်းမူတ်းၸိုင်၊ၶဝ်တၵ်းလႆႈဢဝ်သႂ်ႇၼႂ်းထူင်ၽႃႈဢၼ်သွမ်ႇဝႆႉလႄႈဢဝ်ၼင်သတ်းဢၼ်လီႁူမ်ႇသုမ်ႇယဝ်ႉၸင်ႇဢဝ်တၢင်ႇဝႆႉၵႃႈၼိူဝ်ၶဵင်ႇဢၼ်ႁၢမ်မၼ်းဢေႃႈ။-
ၶဵင်ႇတၢင်းလူႇၼၼ်ႉၸိုင်၊ၶဝ်တၵ်းလႆႈဢဝ်တဝ်ႈၵႃႈၼိူဝ်မၼ်းပႅတ်ႈမူတ်းမူတ်းလႄႈ ဢဝ်ၽႃႈဢၼ်လႅင်ၵမ်ႇသိူဝ်ႇဝႆႉၵႃႈၼိူဝ်မၼ်းဢေႃႈ။-
ၶဝ်သမ်ႉတၵ်းလႆႈဢဝ်ၶိူင်ႈပိူင်ဢၼ်ယိပ်းဢၼ်တိုဝ်းၼႂ်းၼႃႈၵၢၼ်တီႈၶဵင်ႇတၢင်းလူႇဢၼ်ပဵၼ်ပၢၼ်ႉလႂ်၊ၶေႃဢၼ်ၵွင်ႉၼိူဝ်ႉလႂ်၊ၸေႃႉၽႅပ်ႉလႂ်၊ၵွၵ်းဝၢၼ်ႇလႂ်ၸိူဝ်းၼၼ်ႉတၢင်ႇသႂ်ႇၵႃႈၼိူဝ်မၼ်းလႄႈဢဝ်ၼင်သတ်းဢၼ်လီႁူမ်ႇသုမ်ႇၵႃႈၼိူဝ်မၼ်းယဝ်ႉၸင်ႇဢဝ်ၵၢၼ်းသွတ်ႇသႂ်ႇဝႆႉဢေႃႈ။-
မိူဝ်ႈဢၼ် ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉႁူမ်ႇသုမ်ႇထႃႇၼႃႉတီႈမူတ်းၸၢင်ႇၸဝ်ႈတင်းၶိူင်ႈပိူင်ဢၼ်ၸၢပ်ႈသႅင်ႇၵၼ်တင်းထႃႇၼႃႉတီႈမူတ်းၸၢင်ႇၸဝ်ႈၸိူဝ်းၼၼ်ႉယဝ်ႉတူဝ်ႈလီငၢမ်းလႄႈ၊မိူဝ်ႈလႂ်ထိုင်ၶိင်ႇတေဢွၵ်ႇၵႂႃႇၼၼ်ၸင်ႇ၊ၵူၼ်းၶိူဝ်းႁိူၼ်း ၵေႃႇႁတ်ႉ၊ တင်းလၢႆတၵ်းလႆႈဢွၼ်ၵၼ်သုတ်ႉၸူးႁႂ်ႈလႆႈႁၢမ်ၵႂႃႇဢေႃႈ။ ၵူၼ်းၶိူဝ်းႁိူၼ်း ၵေႃႇႁတ်ႉ၊ ၸိူဝ်းၼၼ်ႉၵေႃႉၼိုင်ႈၵေႃႈဢမ်ႇလႆႈတိူဝ်ႉလႆႈယိပ်းၶိူင်ႈပိူင်ဢၼ်မူတ်းၸၢင်ႇၸိူဝ်းၼၼ်ႉ။ ပေႃးလႆႈတိူဝ်ႉလႆႈယိပ်းမႅၼ်ႈၸိုင်၊တၵ်းလႆႈတၢႆဢေႃႈ။ “ဢၼ်ၸိူဝ်းၼႆႉၸမ်ႉ၊ပဵၼ်ပုၼ်ႈၽွၼ်းၵူၼ်းၶိူဝ်းႁိူၼ်း ၵေႃႇႁတ်ႉ၊ တင်းလၢႆ တၵ်းလႆႈၵိုတ်ႉႁၢပ်ႇမိူဝ်ႈဢၼ်ၶၢႆႉပၢင်တပ်ႉၵူႈပွၵ်ႈၼၼ်ႉဢေႃႈ။
“ ဢေးလႃႇၸႃႇ၊ လုၵ်ႈၸၢႆးယဵၸ်ႈပရေႃးႁဵၵ်ႈ ဢႃႇရုၼ်ႇ၊ ၼၼ်ႉတူၵ်းပုၼ်ႈၽွၼ်းတႃႇတေလူတူၺ်းလုမ်းလႃးသုမ်ႉထဵင်ၸဝ်ႈတင်းသဵင်ႈတင်းလူင်ဢိၵ်ႇတင်းၼမ်ႉမၼ်းပုၼ်ႈဢၼ်တၵ်းတႆႈၽႆး၊ၼၢမ်ႇသႃႇဢၼ်ႁွမ်ဢၼ်ႁူၺ်းပုၼ်ႈဢၼ်တၵ်းၽဝ်ၽႆး၊ၶိူင်ႈတၢင်းလူႇမၢၵ်ႇၶဝ်ႈႁူင်းၶဝ်ႈဢၼ်သၢၵ်ႈၵၢပ်ႈၵူႈဝၼ်း၊ၼမ်ႉမၼ်းပုၼ်ႈဢၼ်တၵ်းသွၼ်းလေႃႇဢိၵ်ႇတင်းၶိူင်ႈပိူင်ၵႃႈမီးဢၼ်သၢၵ်ႈၵၢပ်ႈႁႂ်ႈမူတ်းၸၢင်ႇတီႈ ထႃႇဝရႃႉၽြႃး၊ ၸိူဝ်းဢၼ်မီးၵႃႈၼႂ်းသုမ်ႉထဵင်ၸဝ်ႈတင်းမူတ်းၼၼ်ႉ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ တင်း ဢႃႇရုၼ်ႇ၊ လႄႈဝႃႈ၊-
“ယႃႇပေႁႂ်ႈၶိူဝ်းႁိူၼ်း ၵေႃႇႁတ်ႉ၊ လႆႈၶၢမ်ႇတၢင်းဢၼ်ယႃႉၽဵဝ်ႈပႅတ်ႈသေၵႃႈၼႂ်းမုၵ်ႉၼႂ်းၸိူဝ်း လေႇဝိ၊-
လွင်ႈၼင်ႇႁိုဝ်ၶဝ်တၵ်းၵၢင်းလွတ်ႈတၢင်းတၢႆယၢမ်းမိူဝ်ႈဢၼ်ၶဝ်ၶဝ်ႈၸူးၸမ်ၵႃႈႁိမ်းၶိူင်ႈပိူင်ဢၼ်မူတ်းၸၢင်ႇၼႃႇလူင်လၢင်ၸိူဝ်းၼၼ်ႉၸိုင်၊ႁႂ်ႈ ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉၶဝ်ႈၵႂႃႇဢွၼ်တၢင်းလႄႈၽႄမႅင်ႇၶၢၼ်းပၼ်ၼႃႈၵၢၼ်တီႈၵေႃႉလႂ်တၵ်းလႆႈႁဵတ်းဢၼ်လႂ်ဢိၵ်ႇတင်းၵေႃႉလႂ်တၵ်းလႆႈႁၢပ်ႇလႆႈပႃးၶူဝ်းဢၼ်လႂ်ၼၼ်ႉတႃႉ။-
ၵူၺ်းၵႃႈ၊ၶဝ်ဢမ်ႇလႆႈၶဝ်ႈၵႂႃႇလႄႈတူၺ်းၶိူင်ႈပိူင်ဢၼ်မူတ်းၸၢင်ႇၸဝ်ႈၼၼ်ႉသေၵႅပ်ႉသေၵမ်း။ ပေႃးတူၺ်းၸိုင်၊တေလႆႈၶၢမ်ႇတၢင်းဢၼ်ဢဝ်တၢႆဢေႃႈ၊” ဝႃႈၼင်ႇၼႆဢေႃႈ။
ၸဝ်ႈထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ ထႅင်ႈလႄႈဝႃႈၸမ်ႉ၊-
“ၵဵပ်းၸရၢင်းၵူၼ်းမိူင်းၼႂ်းမဵဝ်း လေႇဝိ၊ ၶိူဝ်းႁိူၼ်း ၵေႇရသုၼ်ႇ၊ ဢၼ်ၸွမ်းလူၺ်ႈမဵဝ်းပီႈမဵဝ်းၼွင်ႉၶိူဝ်းႁိူၼ်းၶဝ်ႁင်းၽႂ်ႁင်းမၼ်းတႃႉ။-
ဢဝ်ၸရၢင်းၵူၼ်းၸၢႆးတင်းလၢႆဢၼ်မီးဢသၢၵ်ႈဝူင်ႈၵၢင်သၢမ်သိပ်းပီတေႃႇႁႃႈသိပ်းပီ၊ၸိူဝ်းဢၼ်ပွင်ပဵၼ်လႆႈတႃႇတေၵိုတ်ႉႁၢပ်ႇၼႃႈၵၢၼ်ၵႃႈၼႂ်းသုမ်ႉထဵင်ၸဝ်ႈၼၼ်ႉတႃႉ။-
ပုၼ်ႈၽွၼ်းဢၼ်ၶဝ်တၵ်းလႆႈပႂ်ႉလူပႂ်ႉတူၺ်းဢိၵ်ႇတင်းၶူဝ်းဢၼ်ၶဝ်တၵ်းလႆႈႁၢပ်ႇလႆႈပႃးတင်းလၢႆၸမ်ႉ၊-
ပဵၼ်သုမ်ႉထဵင်ၸဝ်ႈ၊ၽႃႈမုင်းမၼ်းၸၼ်ႉၼႂ်း၊ၽႃႈမုင်းမၼ်းၸၼ်ႉၼွၵ်ႈ၊ၼင်သတ်းဢၼ်လီဢၼ်ႁူမ်ႇၽၢႆႇၼွၵ်ႈၽႃႈၵင်ႈၽၵ်းတူသုမ်ႉထဵင်ၸဝ်ႈ၊-
ၽႃႈၵင်ႈႁူဝ်ႉဝၢင်းဢၼ်လွမ်ႉႁွပ်ႈသုမ်ႉထဵင်ၸဝ်ႈတင်းၶဵင်ႇတၢင်းလူႇလႄႈၽႃႈၵင်ႈၽၵ်းတူႁူဝ်ႉဝၢင်းတင်းၸိူၵ်ႈမၼ်းတင်းလၢႆဢိၵ်ႇတင်းလိမ်ႈၸိမ်မၼ်းတင်းလၢႆဢေႃႈ။ ၶဝ်တၵ်းလႆႈၵိုတ်ႉႁၢပ်ႇၼႃႈၵၢၼ်ဢၼ်လူဝ်ႇႁဵတ်းလူဝ်ႇပွင်ဢၼ်ၸၢပ်ႈသႅင်ႇၵၼ်တင်းလွင်ႈတၢင်းၸိူဝ်းၼႆႉဢေႃႈ။-
မူဝ်းသေႇ၊ တင်း ဢႃႇရုၼ်ႇ၊ တၵ်းလႆႈလူတူၺ်းၼႂ်းၵႃႈဢၼ်ၵူၼ်းၸိူဝ်ႉၶိူဝ်းႁိူၼ်း ၵေႇရသုၼ်ႇ၊ ပွင်ႁဵတ်းတင်းမူတ်းၸွမ်းၵႃႈၼင်ႇဢၼ် ဢႃႇရုၼ်ႇ၊ တင်းလုၵ်ႈၸၢႆးမၼ်းၸႂ်ႉႁဵတ်းၼၼ်ႉဢေႃႈ။-
ဢၼ်ၸိူဝ်းၼႆႉၸမ်ႉ၊ပဵၼ်ပုၼ်ႈၽွၼ်းၵူၼ်းၶိူဝ်းႁိူၼ်း ၵေႇရသုၼ်ႇ၊ တင်းလၢႆၵိုတ်ႉႁၢပ်ႇၵႃႈၼႂ်းသုမ်ႉထဵင်ၸဝ်ႈၼၼ်ႉဢေႃႈ။ ၶဝ်တၵ်းလႆႈၵိုတ်ႉႁၢပ်ႇႁဵတ်းၸွမ်းၵႃႈၼင်ႇဢၼ် ဢိႀမႃႇ၊ လုၵ်ႈၸၢႆးယဵၸ်ႈပရေႃးႁဵၵ်ႈ ဢႃႇရုၼ်ႇ၊ ၸႂ်ႉႁဵတ်းၼၼ်ႉဢေႃႈ။
“ၵဵပ်းၸရၢင်းၵူၼ်းမိူင်းၼႂ်းၸိူဝ်ႉၶိူဝ်း မေႇရႃႇရိ၊ တင်းလၢႆ၊ၸွမ်းလူၺ်ႈမဵဝ်းပီႈမဵဝ်းၼွင်ႉၸိူဝ်ႉၶိူဝ်းၶဝ်ႁင်းၽႂ်ႁင်းမၼ်းတႃႉ။-
ဢဝ်ၸရၢင်းၵူၼ်းၸၢႆးတင်းလၢႆဢၼ်မီးဢသၢၵ်ႈဝူင်ႈၵၢင်သၢမ်သိပ်းပီတေႃႇႁႃႈသိပ်းပီၸိူဝ်းဢၼ်ပွင်ပဵၼ်လႆႈတႃႇတေၵိုတ်ႉႁၢပ်ႇၼႃႈၵၢၼ်ၵႃႈၼႂ်းသုမ်ႉထဵင်ၸဝ်ႈၼၼ်ႉတႃႉ။-
ပုၼ်ႈၽွၼ်းဢၼ်ၶဝ်တၵ်းလႆႈႁၢပ်ႇလႆႈပႃးၸွမ်းလူၺ်ႈတၢင်းဢၼ်ၶဝ်လႆႈၵိုတ်ႉႁၢပ်ႇၼႃႈၵၢၼ်ၵႃႈၼႂ်းသုမ်ႉထဵင်ၸဝ်ႈၼၼ်ႉၸမ်ႉ၊ပဵၼ်ပႅၼ်ႈသုမ်ႉထဵင်ၸဝ်ႈလႂ်၊သႄႈမၼ်းလႂ်၊သဝ်မၼ်းလႂ်၊တင်းတီႈသုပ်းတိၼ်မၼ်းလႂ်၊-
ဢိၵ်ႇတင်းသဝ်လႂ်၊တီႈသုပ်းတိၼ်လႂ်၊လၵ်းလႂ်တင်းၸိူၵ်ႈလႂ်၊ဢၼ်ပဵၼ်ႁူဝ်ႉဝၢင်းဢၼ်လွမ်ႉႁွပ်ႈသုမ်ႉထဵင်ၸဝ်ႈ၊ပႃးလူၺ်ႈလိမ်ႈၸိမ်မၼ်းတင်းလၢႆဢေႃႈ။ မႂ်းတၵ်းလႆႈမၢတ်ႈမၢႆၸိုဝ်ႈသဵင်ၶိူင်ႈပိူင်ဢၼ်ၶဝ်တၵ်းလႆႈလုမ်းလႃးလႄႈႁၢပ်ႇၵႂႃႇဢေႃႈ။-
ဢၼ်ၸိူဝ်းၼႆႉၸမ်ႉ၊ပဵၼ်ပုၼ်ႈၽွၼ်းၵူၼ်းၶိူဝ်းႁိူၼ်း မေႇရႃႇရိ၊ တင်းလၢႆၵိုတ်ႉႁၢပ်ႇၼႃႈၵၢၼ်သုမ်ႉထဵင်ၸဝ်ႈဢေႃႈ။ ၶဝ်ၸိူဝ်းၼႆႉၵေႃႈ တၵ်းလႆႈၵိုတ်ႉႁၢပ်ႇႁဵတ်းၸွမ်းၵႃႈၼင်ႇဢၼ် ဢိႀမႃႇ၊ လုၵ်ႈၸၢႆးယဵၸ်ႈပရေႃးႁဵၵ်ႈ ဢႃႇရုၼ်ႇ၊ ၸႂ်ႉႁဵတ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၸွမ်းၼင်ႇဢၼ် ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ ၼၼ်ႉ၊ၵူၼ်းၵေႃႉလႂ်တူၵ်းပုၼ်ႈၽွၼ်းတႃႇတေၵိုတ်ႉႁၢပ်ႇၼႃႈၵၢၼ်ဢၼ်လႂ်၊ၵေႃႉလႂ်တၵ်းလႆႈႁၢပ်ႇဢဝ်ပႃးဢဝ်ၶူဝ်းဢၼ်လႂ်ၼၼ်ႉၸိုင်၊မၵ်းၶၢၼ်းဝႆႉတီႈၽႂ်တီႈမၼ်းဢေႃႈ။ ၼင်ႇၼၼ်လႄႈၶဝ်လႆႈၶၢမ်ႇတၢင်းဢၼ် မူဝ်းသေႇ၊ ၼပ်ႉဢၢၼ်ႇဢဝ်ၸရၢင်းဝႆႉၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉတီႈမၼ်းၼၼ်ႉဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ လႄႈဝႃႈ၊-
“သင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆႁႂ်ႈၶဝ်ႁေႃႈပႅတ်ႈၵူၼ်းဢၼ်ပဵၼ်ယေႃးၵႃႇဢၼ်ၸၢင်ႈၽႄႈၸၢင်ႈၸပ်း၊ၵူၼ်းဢၼ်ပဵၼ်တၢင်းဢၼ်ႁူဝ်ႈၸိုမ်းဢွၵ်ႇ၊ ၵူၼ်းၵေႃႉဢၼ်တိူဝ်ႉမႅၼ်ႈတူဝ်တၢႆလႄႈဢမ်ႇမူတ်းသႂ်ၸိူဝ်းၼၼ်ႉဢွၵ်ႇသေၵႃႈၼႂ်းပၢင်တပ်ႉတႃႉ။-
သူတၵ်းလႆႈဢဝ်ၸဵမ်ယိင်းၸဵမ်ၸၢႆးဢၼ်ဢမ်ႇမူတ်းသႂ်ၸိူဝ်းၼၼ်ႉၵႂႃႇၶျႃးပၼ်တီႈယူႇဝႆႉၵႃႈၼွၵ်ႈပၢင်တပ်ႉ၊ပုၼ်ႈလွင်ႈၼင်ႇႁိုဝ်ၶဝ်တၵ်းဢမ်ႇႁႂ်ႈပၢင်တပ်ႉတီႈဢၼ်ၵဝ်ယူႇၼႂ်းၵႄႈၶဝ်လႆႈၵူဝ်ႈၵိူၵ်ႇဢေႃႈ၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ႁဵတ်းၸွမ်းလႄႈ၊ႁေႃႈၶဝ်ဢွၵ်ႇၵႂႃႇၶျႃးပၢင်ယူႇၵႃႈတီႈၼွၵ်ႈပၢင်တပ်ႉၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ ၼၼ်ႉဢေႃႈ။
ၸဝ်ႈထႃႇဝရႃႉၽြႃး၊ သမ်ႉမီးဢမိင်ႉၵႃႈတီႈ မူဝ်းသေႇ၊ လႄႈ၊-
ႁႂ်ႈမၼ်းသင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈၸမ်ႉ၊ “ၵူၼ်းသေၵေႃႉၵေႃႉပဵၼ်ယိင်းသေဢမ်ႇဝႃႈ၊ၸၢႆးသေဢမ်ႇဝႃႈ၊ပေႃးမၼ်းၽွၵ်ႈသဵတ်ႈၸႃႇတီႈ ထႃႇဝရႃႉၽြႃး၊ လႄႈႁဵတ်းမႅၼ်ႈတၢင်းၽိတ်းတီႈတၢင်ႇၵေႃႉတၢင်ႇၵူၼ်းၸိုင်၊-
မၼ်းတၵ်းလႆႈၽုၺ်ႇဢွၵ်ႇၼႄတၢင်းၽိတ်းမၼ်းလႄႈတွင်းပၢၼ်ႇဢေႃႈ။ မၼ်းတၵ်းလႆႈၶိုၼ်းတႅၼ်းပၼ်ပုၼ်ႈဢၼ်မၼ်းၽိတ်းပိူင်ႈၼၼ်ႉၵုမ်ႇၵုမ်ႇၵူၺ်းဢမ်ႇၵႃး၊တၵ်းလႆႈဢဝ်ႁႃႈပုၼ်ႈပုၼ်ႈၼိုင်ႈထၢပ်ႈထႅင်ႈၶိုၼ်းယေႃႇပၼ်တီႈၵေႃႉဢၼ်လႆႈၶၢမ်ႇတၢင်းဢၼ်မၼ်းၽိတ်းပိူင်ႈၼၼ်ႉဢေႃႈ။-
ၵူၺ်းၵႃႈ၊ပေႃးၵေႃႉၼၼ်ႉတၢႆၵႂႃႇလႄႈသမ်ႉဢမ်ႇမီးပီႈၼွင်ႉၸိူဝ်ႉၶိူဝ်းၸမ်ၵၼ်တႃႇတေထိူၵ်ႈၶၢမ်ႇႁပ်ႉဢဝ်ဢုၵ်ႉၸႃႇဢၼ်ၶိုၼ်းတႅၼ်းပၼ်ၼၼ်ႉၸိုင်၊တၢင်းဢၼ်တႅၼ်းပၼ်ၼၼ်ႉတၵ်းလႆႈသၢၵ်ႈလူႇတီႈ ထႃႇဝရႃႉၽြႃး၊ ပုၼ်ႈယဵၸ်ႈပရေႃးႁဵၵ်ႈ ဢေႃႈ။ ၼွၵ်ႈသေၼၼ်ႉတၵ်းလႆႈဢဝ်သူဝ်းပေႃႈတူဝ်ၼိုင်ႈထၢပ်ႈထႅင်ႈလႄႈသၢၵ်ႈလူႇပုၼ်ႈဢၼ်တၵ်းၽေႇဢပျတ်ႈမၼ်းဢေႃႈ။-
ၵႃႈဢၼ်ၵူၼ်းမဵဝ်း ဢိသရေး၊ သၢၵ်ႈၵၢပ်ႈတီႈ ထႃႇဝရႃႉၽြႃး၊ ၼၼ်ႉပဵၼ်မဵဝ်းလႂ်သေဢမ်ႇဝႃႈ၊ပဵၼ်ပုၼ်ႈယဵၸ်ႈပရေႃးႁဵၵ်ႈၵေႃႉဢၼ်ႁပ်ႉဢဝ်ၼၼ်ႉဢေႃႈ။-
ယဵၸ်ႈပရေႃးႁဵၵ်ႈၼၼ်ႉၵေႃႈတၵ်းလႆႈႁပ်ႉတုင်းဢဝ်တၢင်းလူႇဢၼ်ၶဝ်မႃးလူႇၼၼ်ႉပုၼ်ႈတူဝ်ၸဝ်ႈၵဝ်ႇဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ ထႅင်ႈလႄႈ၊-
ႁႂ်ႈမၼ်းသင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈၸမ်ႉ၊ “ပေႃးမႄႈယိင်းဢၼ်မီးၽူဝ်ၼၼ်ႉယႃႉသဵတ်ႈၸႃႇၵႃႈၼိူဝ်ၽူဝ်မၼ်းလႄႈလဵၼ်ႈၵၼ်တင်းၵူၼ်းၸၢႆးတၢင်ႇၵေႃႉလႄႈ၊-
ႁဵတ်းမေႇထုင်ႇဢၼ်ဢမ်ႇတြႃးလူၺ်ႈၵၼ်တင်းမၼ်းသေယဝ်ႉ၊ၽူဝ်မၼ်းဢမ်ႇႁုဢမ်ႇႁၼ်၊ပိူဝ်ႈဢၼ်မၼ်းသိူင်ႇဝႆႉမူမ်ႇဝႆႉတၢင်းၽိတ်းမၼ်းၼၼ်ႉ၊သဵတ်ႈၸႃႇလုယူႇလႄႈသၢၵ်ႈသေႇဢမ်ႇမီး၊ၽူႈလႂ်ဢမ်ႇႁၼ်မႅၼ်ႈမၼ်းယၢမ်းမိူဝ်ႈဢၼ်မၼ်းတိုၵ်ႉလဵၼ်ႈၵၼ်ၼၼ်ႉ။-
ဢမ်ႇၼၼ်ၵေႃႈ၊ပဵၼ်ဢၼ်ၽူဝ်မၼ်းထၢင်ႇၽိတ်းၵႃႈၼိူဝ်မေးမၼ်းလူၺ်ႈလွင်ႈဢၼ်မေးမၼ်းသဵတ်ႈၸႃႇလုသေဢမ်ႇဝႃႈ၊ဢမ်ႇလုသေဢမ်ႇဝႃႈ၊ၽူဝ်မၼ်းၶႅၼ်မေးမၼ်း။-
ၼႂ်းသွင်မဵဝ်းၼႆႉပေႃႇပဵၼ်မႃးမိူဝ်ႈလႂ်သေဢမ်ႇဝႃႈ၊ၽူဝ်မၼ်းတၵ်းလႆႈႁွင်ႉဢဝ်မေးမၼ်းၵႂႃႇၸူးတီႈယဵၸ်ႈပရေႃးႁဵၵ်ႈဢေႃႈ။ မၼ်းတၵ်းလႆႈပႃးဢဝ်ၽွင်ၶဝ်ႈမုၼ်းမုယေႃးၸဵတ်းၵွၵ်း ဢၼ်လူဝ်ႇလႆႈသၢၵ်ႈလူႇပုၼ်ႈတၢင်းလူႇမေးမၼ်းၼၼ်ႉဢေႃႈ။ ဢမ်ႇလႆႈဢဝ်ၼမ်ႉမၼ်းႁူတ်းၵႃႈၼိူဝ်ၽွင်ၶဝ်ႈမုၼ်းၼၼ်ႉ၊ဢမ်ႇလႆႈဢဝ်လေႃႇပၢၼ်ႇတၢင်ႇသႂ်ႇ။ ပဵၼ်ၶိူင်ႈတၢင်းလူႇဢၼ်ၽူဝ်ထၢင်ႇၽိတ်းၵႃႈၼိူဝ်မေးမၼ်း၊ၶိူင်ႈတၢင်းလူႇပုၼ်ႈတၢင်းဢၼ်မၢၼ်ႇမႅၼ်ႈၸိုဝ်ႈၸႂ်ႈတၵ်းပေႃႇဢွၵ်ႇလႅင်းလႅင်းဢေႃႈ။
“ယဵၸ်ႈပရေႃးႁဵၵ်ႈတၵ်းလႆႈႁွင်ႉဢဝ်မႄႈယိင်းၼၼ်ႉၵႂႃႇႁႂ်ႈမၼ်းၸုၵ်းယူႇတီႈၽၢႆႇၼႃႈ ထႃႇဝရႃႉၽြႃး၊ ဢေႃႈ။-
ယဵၸ်ႈပရေႃးႁဵၵ်ႈ ၼၼ်ႉတၵ်းလႆႈဢဝ်ၼမ်ႉဢၼ်မူတ်းၸၢင်ႇထွၵ်ႇသႂ်ႇၵႃႈၼႂ်းမေႃႈလိၼ်လႄႈဢဝ်မုၼ်ႈလိၼ်ဢၼ်မီးၵႃႈတီႈပိုၼ်ႉသုမ်ႉထဵင်ၸဝ်ႈၼၼ်ႉသႂ်ႇၵႃႈၼႂ်းၼမ်ႉၼၼ်ႉႁႂ်ႈမၼ်းၶူမ်ဢေႃႈ။-
ယဵၸ်ႈပရေႃးႁဵၵ်ႈၼၼ်ႉတၵ်းလႆႈၽႄႇၶူၼ်ႁူဝ်မႄႈယိင်းၼၼ်ႉသေယဝ်ႉ၊ႁႂ်ႈမၼ်းယိပ်းဝႆႉၶိူင်ႈတၢင်းလူႇဢၼ်ပဵၼ်ၽွင်ၶဝ်ႈမုၼ်းၼၼ်ႉၵႃႈၼႂ်းမိုဝ်းမၼ်းလႄႈ၊ယဵၸ်ႈပရေႃးႁဵၵ်ႈၼၼ်ႉသမ်ႉတၵ်းလႆႈယိပ်းဝႆႉၼမ်ႉၶူမ်ၼၼ်ႉၵႃႈၼႂ်းမိုဝ်းတူဝ်ၸဝ်ႈၵဝ်ႇဢၼ်ႁႂ်ႈၽေးတၢင်းဢၼ်ၵိၼ်ႇဢၼ်ဝႃႈၼၼ်ႉပဵၼ်မႃးဢေႃႈ။-
ၵမ်းၼၼ်ႉ ယဵၸ်ႈပရေႃးႁဵၵ်ႈတၵ်းလႆႈႁႂ်ႈမႄႈယိင်းၼၼ်ႉဝႃႈၸွမ်းၵႂၢမ်းဢၼ်ယဵၸ်ႈပရေႃးႁဵၵ်ႈတိူင်ႇၵၢဝ်ႇၵတိဝႃႈ၊ ‘ပေႃးမႂ်းဢမ်ႇလႆႈၽိတ်းၵႃႇမေႇသုၸိုင်၊ႁႂ်ႈမႂ်းၵၢင်းလွတ်ႈတင်းၼမ်ႉၶူမ်ဢၼ်ႁႂ်ႈၽေးတၢင်းဢၼ်ၵိၼ်ႇဢၼ်ဝႃႈပဵၼ်ၼႆႉသေၵမ်းလူၺ်ႈ။-
ၵူၺ်းၵႃႈ၊ပေႃးမႂ်းလႆႈၽိတ်းၵႃႇမေႇသုတၢင်းဢၼ်လဵၼ်ႈၵၼ်တင်းၵူၼ်းၸၢႆးတၢင်ႇၵေႃႉလႄႈႁဵတ်းမေႇထုင်ႇဢၼ်ဢမ်ႇတြႃးလူၺ်ႈၵၼ်ၸိုင်၊-
ႁႂ်ႈ ထႃႇဝရႃႉၽြႃး၊ ၸီႇယၢင်ႇမႂ်းပဵၼ်ၵေႃႉဢၼ်လႆႈထုၵ်ႇၵိၼ်ႇလႃႇၵႃႈၼႂ်းၵႄႈၵၢင်ၵူၼ်းမဵဝ်းမႂ်းသေၵမ်း။ ႁႂ်ႈမၼ်းၸဝ်ႈပၼ်ဢႃႉမၢင်ႇၵလႃႇတီႈဢၢင်ႇၵႃႇမႄႈယိင်းမႂ်းႁဵဝ်ႇႁႅင်ႈလႄႈပုမ်မႂ်းပွင်းသေၵမ်း။-
ႁႂ်ႈၼမ်ႉၼႆႉၶဝ်ႈၵႃႈၼႂ်းတွင်ႉမႂ်းသေလႄႈႁႂ်ႈပဵၼ်တၢင်းဢၼ်ပုမ်ၵႂ်ႈပုမ်ပွင်း၊တၢင်းဢၼ်ဢၢင်ႇၵႃႇမႄႈယိင်းမႂ်းႁဵဝ်ႇႁႅင်ႈသေၵမ်း၊’ ဝႃႈၼင်ႇၼႆဢေႃႈ။ မႄႈယိင်းၼၼ်ႉၵေႃႈတၵ်းလႆႈၶိုၼ်းလၢတ်ႈလႄႈဝႃႈ၊ “‘ၵဝ်ၶႃႈၽွမ်ႉၸႂ်ၶႃႈဢေႃႈ။ ႁႂ်ႈ ထႃႇဝရႃႉၽြႃး၊ ႁဵတ်းၸိူဝ်ႉၼင်ႇၼၼ်သေၵမ်းလူၺ်ႈ၊’ ဝႃႈၼင်ႇၼႆဢေႃႈ။
“မိူဝ်ႈၼၼ်ႉယဵၸ်ႈပရေႃးႁဵၵ်ႈၼၼ်ႉတၵ်းလႆႈတႅမ်ႈၵႂၢမ်းဢၼ်ၵိၼ်ႇဢၼ်ဝႃႈၼၼ်ႉသႂ်ႇၵႃႈၼႂ်းပပ်ႉသေလႄႈသမ်ႉဢဝ်ၼမ်ႉၶူမ်ၼၼ်ႉသုၵ်ႈလၢင်ႉမွတ်ႇပႅတ်ႈၵႃႈၼႂ်းဢၢင်ႇၼမ်ႉၶူမ်ၼၼ်ႉဢေႃႈ။-
ၸူဝ်ႈဢၼ်ဢမ်ႇပႆႇႁႂ်ႈမႄႈယိင်းၼၼ်ႉၵိၼ်ၼမ်ႉၶူမ် ဢၼ်ႁႂ်ႈပဵၼ်ၽေးဢၼ်ၶူမ်ၼႃႇလူင်လၢင်ၼၼ်ႉၸိုင်၊-
ယဵၸ်ႈပရေႃးႁဵၵ်ႈၼၼ်ႉတၵ်းလႆႈၶိုၼ်းဢဝ်ၶိူင်ႈတၢင်းလူႇဢၼ်ပဵၼ်ၽွင်ၶဝ်ႈမုၼ်းဢၼ်မီးယူႇၼႂ်းမိုဝ်းမႄႈယိင်းၼၼ်ႉလႄႈယုၵ်ႉၶိုၼ်ႈသုင်ႁႂ်ႈလႆႈသၢၵ်ႈၵၢပ်ႈတီႈ ထႃႇဝရႃႉၽြႃး၊ ယဝ်ႉၸင်ႇသၢၵ်ႈလူႇၵႃႈၼိူဝ်ၶဵင်ႇတၢင်းလူႇဢေႃႈ။-
ၵမ်းၼၼ်ႉ၊သမ်ႉတၵ်းလႆႈဢဝ်ၵႃႈၼႂ်းၶိူင်ႈတၢင်းလူႇၽွင်ၶဝ်ႈမုၼ်းၼၼ်ႉဝၵ်ႉၼိုင်ႈႁႂ်ႈလႆႈႁဵတ်းတၢင်းလူႇပုၼ်ႈတၢင်းဢၼ်ၶုၵ်းၸႂ်လႆႈၶႆႈၸႂ်ထူပ်းၼၼ်ႉဢဝ်ၽဝ်ၽႆးၵႃႈၼိူဝ်ၶဵင်ႇတၢင်းလူႇဢေႃႈ။ လိုၼ်းၼၼ်ႉၸင်ႇမၼ်းတၵ်းလႆႈဢဝ်ၼမ်ႉၶူမ်ၼၼ်ႉႁႂ်ႈမႄႈယိင်းၼၼ်ႉၵိၼ်ဢေႃႈ။-
ပေႃးမႄႈယိင်းၼၼ်ႉၽိတ်းပိူင်ႈၵႃႇမေႇသုၸိုင်၊ၼမ်ႉၼၼ်ႉတၵ်းႁႂ်ႈပဵၼ်ၽေးဢၼ်ၶူမ်ၼႃႇလူင်လၢင်ဢေႃႈ။ ပုမ်မၼ်းတၵ်းၵႂ်ႈတၵ်းပွင်းလႄႈဢၢင်ႇၵႃႇမႄႈယိင်းမၼ်းတၵ်းႁဵဝ်ႇႁႅင်ႈၵႂႃႇဢေႃႈ။ ၸိုဝ်ႈသဵင်မၼ်းတၵ်းပဵၼ်ဢႃႉမၢင်ႇၵလႃႇၵႃႈၼႂ်းၵႄႈၵၢင်ၵူၼ်းမၼ်းတင်းလၢႆဢေႃႈ။-
ၵူၺ်းၵႃႈ၊ပေႃးမႄႈယိင်းၼၼ်ႉယင်းဢမ်ႇၽိတ်းဢမ်ႇပိူင်ႈၸိုင်၊မၼ်းတၵ်းၵၢင်းလွတ်ႈတင်းၽေးလႄႈ မီးဢၶႂၢင်ႉဢၼ်လႆႈၵိူတ်ႇလႆႈလဵင်ႉလုၵ်ႈလၢင်းဢေႃႈ။
“ဢၼ်ၼႆႉၸမ်ႉ၊ပဵၼ်ထုင်းတြႃးဢၼ်ၶႅၼ်မေးလႄႈ၊ၽူဝ်ထၢင်ႇၽိတ်းၵႃႈၼိူဝ်မေးမၼ်းဝႃႈ၊မေးမၼ်းၽိတ်းပိူင်ႈၵႃႇမေႇသုဢၼ်လဵၼ်ႈၵၼ်တင်းၵူၼ်းၸၢႆးတၢင်ႇၵေႃႉၼၼ်ႉဢေႃႈ။-
ပေႃးပဵၼ်ဢမုၸိူဝ်ႉၼင်ႇၼၼ်ၸိုင်၊တၵ်းလႆႈၸႂ်ႉႁႂ်ႈမႄႈယိင်းၵေႃႉၼၼ်ႉၸုၵ်းယူႇၵႃႈတီႈၽၢႆႇၼႃႈ ထႃႇဝရႃႉၽြႃး၊ သေယဝ်ႉ၊ယဵၸ်ႈပရေႃးႁဵၵ်ႈတၵ်းလႆႈၸီႇယၢင်ႇၸွမ်းၼင်ႇထုင်းတြႃးၼႆႉဢေႃႈ။-
ၵူၼ်းၸၢႆးၼၼ်ႉတၵ်းလႆႈၵၢင်းလွတ်ႈတင်းဢပျတ်ႈလႄႈ၊မႄႈယိင်းၼၼ်ႉၸမ်ႉ၊ပေႃးမၼ်းၽိတ်းပိူင်ႈတႄႉၸိုင်၊တၵ်းလႆႈၶၢမ်ႇဢပျတ်ႈမၼ်းဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ ထႅင်ႈလႄႈ၊-
ႁႂ်ႈမၼ်းသင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈ၊ “ပဵၼ်ၵူၼ်းၸၢႆးသေဢမ်ႇဝႃႈ၊ပဵၼ်ၵူၼ်းယိင်းသေဢမ်ႇဝႃႈ၊မိူဝ်ႈဢၼ်မၼ်းႁဵတ်းၵတိသဵတ်ႈၸႃႇႁႂ်ႈတူဝ်ၸဝ်ႈၵဝ်ႇပဵၼ်ၵူၼ်းၵိူင်း ၼႃႇၸရိ၊ သေလႄႈသၢၵ်ႈၵၢပ်ႈတူဝ်တီႈ ထႃႇဝရႃႉၽြႃး၊ ၸိုင်၊-
မၼ်းတၵ်းလႆႈဝႄႈပႅတ်ႈၼမ်ႉမၢၵ်ႇၸပိတ်ႉတင်းၼမ်ႉလဝ်ႈဢေႃႈ။ ၼမ်ႉမၢၵ်ႇၸပိတ်ႉသူမ်ႈတင်းလဝ်ႈသူမ်ႈၵေႃႈမၼ်းတၵ်းဢမ်ႇလႆႈၵိၼ်။ ၼမ်ႉဢၼ်ဢဝ်မၢၵ်ႇၸပိတ်ႉႁဵတ်းၼၼ်ႉၸိုင်၊မၼ်းတၵ်းဢမ်ႇလႆႈၵိၼ်လႆႈသူတ်ႉလႃးလႃး။ မၢၵ်ႇၸပိတ်ႉဢၼ်လိပ်း၊ဢၼ်ႁႅင်ႈၵေႃႈဢမ်ႇလႆႈၵိၼ်လႆႈၶူပ်း။-
ၸူဝ်ႈၶၢဝ်းဢၼ်မၼ်းပဵၼ်ၵူၼ်းၵိူင်း ၼႃႇၸရိ၊ ယူႇၼၼ်ႉမၼ်းတၵ်းဢမ်ႇလႆႈၵိၼ်ၵႃႈဢၼ်ဢဝ်တီႈတူၼ်ႈမၢၵ်ႇၸပိတ်ႉလႄႈႁဵတ်းပဵၼ်မႃး၊ၸႃႉၸဵမ်မဵတ်ႉၼႂ်းမၼ်းလႄႈပိူၵ်ႇမၼ်းၵေႃႈတၵ်းဢမ်ႇလႆႈၵိၼ်။
“ၸူဝ်ႈၶၢဝ်းဢၼ်မၼ်းၶၢမ်ႇဢဝ်ၵတိသဵတ်ႈၸႃႇၵိူင်း ၼႃႇၸရိ၊ ယူႇၼၼ်ႉမၼ်းဢမ်ႇလႆႈၵႅတ်းလႆႈထႃၶူၼ်ႁူဝ်။ ၵတိသဵတ်ႈၸႃႇဢၼ်မၼ်းတိူင်ႇဝႆႉတီႈ ထႃႇဝရႃႉၽြႃး၊ ၼၼ်ႉမတ်ႉၽုၵ်ႇမၼ်းဝႆႉႁႂ်ႈမူတ်းၸၢင်ႇလႄႈ၊မၼ်းလႆႈလုမ်းလႃးလႄႈၵွၼ်းၶူၼ်ႁူဝ်မၼ်းတင်းၼူတ်ႇၵၢင်းမၼ်းဝႆႉဢေႃႈ။
“ၸူဝ်ႈၶၢဝ်းဢၼ်မၼ်းသၢၵ်ႈၵၢပ်ႈတူဝ်ၸဝ်ႈၵဝ်ႇဝႆႉတီႈ ထႃႇဝရႃႉၽြႃး၊ ယူႇၼၼ်ႉမၼ်းတၵ်းဢမ်ႇလႆႈၵႂႃႇၸမ်တီႈတူဝ်တၢႆ။-
ပိၵ်ႉသမ်ႉပဵၼ်ပေႃႈပဵၼ်မႄႈမၼ်း၊ပဵၼ်ပီႈၸၢႆးၼွင်ႉၸၢႆး၊ပီႈၼၢင်းၼွင်ႉယိင်းမၼ်းဢွၵ်ႇဢွၵ်ႇသေၵေႃႈတၵ်းဢမ်ႇလႆႈၵႂႃႇၸမ်မိူဝ်ႈဢၼ်ၶဝ်တၢႆၼၼ်ႉ။ ပေႃးၵႂႃႇၸမ်ၸိုင်၊မၼ်းတၵ်းႁွတ်ႈထိုင်တၢင်းဢၼ်ၵူဝ်ႈၵိူၵ်ႇဢေႃႈ။ လွင်ႈမၼ်းၸမ်ႉ၊တၢင်းဢၼ်မၼ်းၵွၼ်းၶူၼ်ႁူဝ်မၼ်းဝႆႉၼၼ်ႉပဵၼ်လၢၵ်ႈၶၼႃႇတၢင်းဢၼ်မၼ်းသၢၵ်ႈၵၢပ်ႈတူဝ်တီႈ ထႃႇဝရႃႉၽြႃး၊ ဢေႃႈ။-
ၸူဝ်ႈၶၢဝ်းဢၼ်မၼ်းပဵၼ်ၵူၼ်းၵိူင်း ၼႃႇၸရိ၊ ယူႇၼၼ်ႉၸိုင်၊မၼ်းပဵၼ်ၵေႃႉဢၼ်မူတ်းၸၢင်ႇယူႇတီႈ ထႃႇဝရႃႉၽြႃး၊ ဢေႃႈ။
“ပေႃးဝႃႈၵူၼ်းသေၵေႃႉၵေႃႉၵိုင်ႉၵၢင်ႉတၢႆၵႂႃႇႁိမ်းမၼ်းလႄႈႁႂ်ႈႁူဝ်မၼ်းဢၼ်သၢၵ်ႈၵၢပ်ႈဝႆႉၼၼ်ႉလႆႈၵူဝ်ႈၵိူၵ်ႇမႅၼ်ႈၸိုင်၊မၼ်းတၵ်းလႆႈယိူၼ်ႉထႃႈၸဵတ်းဝၼ်းတဵမ်တဵမ်ယဝ်ႉၸင်ႇလႆႈထႃၶူၼ်ႁူဝ်မၼ်းတင်းၼူတ်ႇၵၢင်းမၼ်းပႅတ်ႈဢေႃႈ။-
ၼႂ်းမိူဝ်ႈဢၼ်ထူၼ်ႈဝၼ်းတီႈပႅတ်ႇၼၼ်ႉမၼ်းတၵ်းလႆႈဢဝ်ၼူၵ်ႉတူႈသွင်တူဝ်၊ဢမ်ႇၼၼ်ၵေႃႈၵႃၵႄဢွၼ်ႇသွင်တူဝ်မႃးၸူးတီႈယဵၸ်ႈပရေႃးႁဵၵ်ႈ ၵႃႈတီႈၽၢႆႇၼႃႈၽၵ်းတူသုမ်ႉထဵင်ၸဝ်ႈဢေႃႈ။-
ယဵၸ်ႈပရေႃးႁဵၵ်ႈတၵ်းလႆႈဢဝ်သၢၵ်ႈလူႇပုၼ်ႈတၢင်းလူႇဢၼ်ၽေႇဢပျတ်ႈတူဝ်ၼိုင်ႈ၊ပုၼ်ႈတၢင်းလူႇဢၼ်တုတ်ႇၽႆးတူဝ်ၼိုင်ႈသေလႄႈႁဵတ်းတၢင်းဢၼ်ၽေႇဢပျတ်ႈဢၼ်ႁွတ်ႈထိုင်ၵႃႈတီႈမၼ်းၵွပ်ႈပိူဝ်ႈတူဝ်တၢႆၼၼ်ႉသေယဝ်ႉ၊ႁႂ်ႈႁူဝ်မၼ်းမူတ်းၸၢင်ႇၼႂ်းဝၼ်းၼၼ်ႉၵမ်းလဵဝ်ဢေႃႈ။-
သမ်ႉၶိုၼ်းသၢၵ်ႈၵၢပ်ႈတူဝ်ၸဝ်ႈၵဝ်ႇတီႈ ထႃႇဝရႃႉၽြႃး၊ ႁႂ်ႈပဵၼ်ၵူၼ်းၵိူင်း ၼႃႇၸရိ၊ ဢေႃႈ။ ၵွပ်ႈပိူဝ်ႈတၢင်းဢၼ်မၼ်းသၢၵ်ႈၵၢပ်ႈၶူၼ်ႁူဝ်မၼ်းၵမ်းဢွၼ်တၢင်းၼၼ်ႉ လႆႈလုၵႂႃႇယဝ်ႉလႄႈ၊ၸူဝ်ႈၶၢဝ်းဢၼ်ပူၼ်ႉမႃးၼၼ်ႉဢမ်ႇသွၼ်ႇဢမ်ႇမၢတ်ႈယဝ်ႉ။ ပုၼ်ႈဢၼ်တၵ်းပဵၼ်တၢင်းလူႇဢၼ်ၽေႇတုၸရိူၵ်ႈၸိုင်၊မၼ်းတၵ်းလႆႈသၢၵ်ႈလူႇသူဝ်းပေႃႈဢွၼ်ႇဢၼ်လႆႈၶူပ်ႇၼိုင်ႈၼၼ်ႉဢေႃႈ။
“ၵမ်းၼႆႉၸမ်ႉ၊ပဵၼ်ပိင်းၺၢပ်ႈတြႃးၵူၼ်းၵိူင်း ၼႃႇၸရိ၊ မိူဝ်ႈဢၼ်ၶိင်ႇၵႃႇလႃႉဢၼ်မၼ်းႁဵတ်းၵတိသဵတ်ႈၸႃႇၼၼ်ႉထူၼ်ႈတဵမ်ယဝ်ႉၼၼ်ႉဢေႃႈ။ တူဝ်မၼ်းတၵ်းလႆႈၵႂႃႇၵႃႈတီႈၽၢႆႇၼႃႈၽၵ်းတူသုမ်ႉထဵင်ၸဝ်ႈလႄႈ၊-
မၼ်းတၵ်းလႆႈသၢၵ်ႈလူႇတရိၵ်ႈသၢၼ်ႇသၢမ်တူဝ်ဢၼ်ဢမ်ႇမီးတီႈၸိတီႈၼႄး၊ဢၼ်ပဵၼ်သူဝ်းပေႃႈဢွၼ်ႇဢၼ်လႆႈၶူပ်ႇၼိုင်ႈၼၼ်ႉတူဝ်ၼိုင်ႈပုၼ်ႈတၢင်းလူႇဢၼ်တုတ်ႇၽႆး၊သူဝ်းမႄႈဢွၼ်ႇဢၼ်လႆႈၶူပ်ႇၼိုင်ႈၼၼ်ႉတူဝ်ၼိုင်ႈပုၼ်ႈတၢင်းလူႇဢၼ်ၽေႇဢပျတ်ႈ၊တင်းပႄႉပေႃႈတူဝ်ၼိုင်ႈပုၼ်ႈတၢင်းလူႇမိၵ်ႈသႁႃႇယႃႉၼၼ်ႉသၢၵ်ႈလူႇတီႈ ထႃႇဝရႃႉၽြႃး၊ ဢေႃႈ။-
မၼ်းတၵ်းလႆႈသၢၵ်ႈလူႇပႃးတင်းၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈၼၼ်ႉပဵတ်ႈၼိုင်ႈဢၼ်ပဵၼ်ၶဝ်ႈမုၼ်းၶႅပ်းဢၼ်ဢဝ်ၽွင်ၶဝ်ႈၵျုင်ႇၼွၵ်းလေႃးၼမ်ႉမၼ်းလႄႈၽဝ်ႁဵတ်း၊တင်းၶဝ်ႈမုၼ်းၶွပ်ႈဢၼ်ဢဝ်ၼမ်ႉမၼ်းတႃး၊ဢိၵ်ႇတင်းတၢင်းလူႇမၢၵ်ႇၶဝ်ႈႁူင်းၶဝ်ႈတင်းတၢင်းလူႇဢၼ်သွၼ်းလေႃႇၼမ်ႉမၢၵ်ႇၸပိတ်ႉၸိူဝ်းၼၼ်ႉဢေႃႈ။
“ယဵၸ်ႈပရေႃးႁဵၵ်ႈတၵ်းလႆႈဢဝ်ၶိူင်ႈတၢင်းလူႇတင်းမူတ်းၸိူဝ်းၼၼ်ႉၶဝ်ႈၸူးတီႈ ထႃႇဝရႃႉၽြႃး၊ သေယဝ်ႉ၊သၢၵ်ႈၵၢပ်ႈတၢင်းလူႇဢၼ်ၽေႇဢပျတ်ႈဢိၵ်ႇတင်းတၢင်းလူႇဢၼ်တုတ်ႇၽႆးဢေႃႈ။-
မၼ်းတၵ်းလႆႈဢဝ်ပႄႉပေႃႈၼၼ်ႉသၢၵ်ႈၵၢပ်ႈတီႈ ထႃႇဝရႃႉၽြႃး၊ ႁႂ်ႈပဵၼ်တၢင်းလူႇမိၵ်ႈသႁႃႇယႃႉ၊ႁူမ်ႈလူၺ်ႈၵၼ်တင်းၶဝ်ႈမုၼ်းပဵတ်ႈၼိုင်ႈၼၼ်ႉဢေႃႈ။ တၢင်းလူႇမၢၵ်ႇၶဝ်ႈႁူင်းၶဝ်ႈဢိၵ်ႇတင်းတၢင်းလူႇဢၼ်သွၼ်းလေႃႇၼမ်ႉမၢၵ်ႇၸပိတ်ႉၼၼ်ႉၵေႃႈမၼ်းတၵ်းလႆႈသၢၵ်ႈလူႇၸွမ်းဢေႃႈ။-
ၵူၼ်းၵိူင်း ၼႃႇၸရိ၊ ၼၼ်ႉတၵ်းလႆႈထႃၶူၼ်ႁူဝ်မၼ်းၵႃႈတီႈၽၢႆႇၼႃႈၽၵ်းတူသုမ်ႉထဵင်ၸဝ်ႈလႄႈဢဝ်ၶူၼ်ႁူဝ်မၼ်းၼၼ်ႉသႂ်ႇၵႃႈၼႂ်းၽႆးဢၼ်ၽဝ်တၢင်းလူႇမိၵ်ႈသႁႃႇယႃႉယူႇၼၼ်ႉဢေႃႈ။
“လိုၼ်းၼၼ်ႉ၊မိူဝ်ႈဢၼ်တူမ်ႈႁူဝ်မႃႇပႄႉပေႃႈၼၼ်ႉသုၵ်းယဝ်ႉၸိုင်၊ယဵၸ်ႈပရေႃးႁဵၵ်ႈတၵ်းလႆႈဢဝ်ဢၼ်ၼၼ်ႉ၊ဢိၵ်ႇတင်းၶဝ်ႈမုၼ်းၽႅၼ်ႇၶႅပ်းၼိုင်ႈ၊ၶဝ်ႈမုၼ်းၶွပ်ႈၶႅပ်းၼိုင်ႈသေၵႃႈတီႈၼႂ်းပဵတ်ႈၼၼ်ႉသေလႄႈသႂ်ႇပၼ်ၼႂ်းမိုဝ်းၵူၼ်းၵိူင်း ၼႃႇၸရိ၊ ၼၼ်ႉဢေႃႈ ။-
လိူဝ်သေၼၼ်ႉယဵၸ်ႈပရေႃးႁဵၵ်ႈတၵ်းလႆႈဢဝ်ၸိူဝ်းၼၼ်ႉယုၵ်ႉယွင်ႈသၢၵ်ႈၵၢပ်ႈႁႂ်ႈပဵၼ်တၢင်းလူႇဢၼ်ၶိုၵ်ႉဢၼ်ၶမ်ႇ တီႈ ထႃႇဝရႃႉၽြႃး၊ ဢေႃႈ။ ဢၼ်ၸိူဝ်းၼၼ်ႉပဵၼ်ၶိူင်ႈတၢင်းလူႇဢၼ်မူတ်းၸၢင်ႇပုၼ်ႈယဵၸ်ႈပရေႃးႁဵၵ်ႈလႄႈ၊ႁူဝ်ဢူၵ်းပႄႉပေႃႈတင်းႁူဝ်မႃႇမၼ်းၼၼ်ႉၵေႃႈပဵၼ်ပုၼ်ႈယဵၸ်ႈပရေႃးႁဵၵ်ႈၼၼ်ႉပိူင်ႇဢဝ်ဢေႃႈ။ လိုၼ်းၼၼ်ႉၸင်ႇ၊ၵူၼ်းၵိူင်း ၼႃႇၸရိ၊ ၼၼ်ႉမီးဢၶႂၢင်ႉဢၼ်ၵိၼ်ၼမ်ႉမၢၵ်ႇၸပိတ်ႉဢေႃႈ။
“ဢၼ်ၸိူဝ်းၼႆႉၸမ်ႉ၊ပဵၼ်ထုင်းတြႃးၵူၼ်းၵိူင်း ၼႃႇၸရိ၊ တၵ်းလႆႈၵမ်ၵျၢင်ႉဢေႃႈ။ ၵူၺ်းၵႃႈ၊ပေႃးၵူၼ်းၵိူင်း ၼႃႇၸရိ၊ ၼၼ်ႉသမ်ႉဝႆႉၵတိတေလူႇၼမ်လိူဝ်သေထုင်းတြႃးၼႆႉၸိုင်၊မၼ်းတၵ်းလႆႈႁဵတ်းမႅၼ်ႈၸွမ်းၵႃႈၼင်ႇဢၼ်မၼ်းႁဵတ်းၵတိသဵတ်ႈၸႃႇၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ ထႅင်ႈလႄႈ၊-
ႁႂ်ႈမၼ်းမွၵ်ႇလၢတ်ႈ ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉလႄႈဝႃႈၸမ်ႉ၊ “ၵႂၢမ်းဢၼ်သူတၵ်းလႆႈပၼ်တၢင်းလီမၢင်ႇၵလႃႇတီႈၵူၼ်းမဵဝ်း ဢိသရေး၊ တင်းလၢႆၼၼ်ႉ၊သူတၵ်းလႆႈဢွၵ်ႇသူပ်းလႄႈဝႃႈၸမ်ႉ။
“‘ႁႂ်ႈ ထႃႇဝရႃႉၽြႃး၊ ပၼ်တၢင်းလီမၢင်ႇၵလႃႇတီႈသူလႄႈပႂ်ႉလူပႂ်ႉတူၺ်းယူႇသေၵမ်းလူၺ်ႈ။
ႁႂ်ႈ ထႃႇဝရႃႉၽြႃး၊ မီးၸႂ်မႅတ်ႈတႃႇၵရုၼႃႇတီႈသူလႄႈ ႁဵတ်းၵျေးၸူးတီႈသူသေၵမ်းလူၺ်ႈ။-
ႁႂ်ႈ ထႃႇဝရႃႉၽြႃး၊ မုင်ႈတူၺ်းသူလႄႈပၼ်ၵတ်းယဵၼ်ၶျၢမ်းသႃႇတီႈသူသေၵမ်းလူၺ်ႈ၊’ ဝႃႈၼင်ႇၼႆတႃႉ။
ပေႃးၶဝ်ၵၢဝ်ႇတိူင်ႇၼႃႇမႃႉၸိုဝ်ႈသဵင်ၵဝ်ပၼ် တၢင်းလီမၢင်ႇၵလႃႇၵႃႈၼိူဝ်ၵူၼ်းမဵဝ်း ဢိသရေး၊ တင်းလၢႆၸိူဝ်ႉၼင်ႇၼၼ်ၸိုင်၊ ၵဝ်တၵ်းပၼ်တၢင်းလီမၢင်ႇၵလႃႇတီႈ ၶဝ်ဢေႃႈ၊” ဝႃႈၼင်ႇၼႆဢေႃႈ။
ၼႂ်းဝၼ်းဢၼ် မူဝ်းသေႇ၊ ပူၵ်းတင်ႈသုမ်ႉထဵင်ၸဝ်ႈယဝ်ႉတူဝ်ႈၼၼ်ႉၸိုင်၊မၼ်းဢဝ်ၼမ်ႉမၼ်းသွၼ်းလေႃႇသေလႄႈသၢၵ်ႈၵၢပ်ႈသုမ်ႉထဵင်ၸဝ်ႈတင်းၶိူင်ႈပိူင်မၼ်းတင်းသဵင်ႈတင်းမူတ်း၊ဢိၵ်ႇတင်းၶဵင်ႇတၢင်းလူႇတင်းၶိူင်ႈဢၼ်သုင်းဢၼ်တိုဝ်းမၼ်းတင်းသဵင်ႈတင်းမူတ်းႁႂ်ႈလႆႈမူတ်းၸၢင်ႇဢေႃႈ။-
မိူဝ်ႈၼၼ်ႉၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ၼႂ်းၶိူဝ်းႁိူၼ်းၵူၼ်းမဵဝ်း ဢိသရေး၊ လႄႈ လႆႈဢုပ်ႉပိူင်ႇၼိူဝ်ၵူၼ်းၸိူဝ်းဢၼ်ၶဝ်ႈပႃးၼႂ်းၸရၢင်းတင်းလၢႆၸိူဝ်းၼၼ်ႉ၊-
ဢွၼ်ၵၼ်ဢဝ်ၶိူင်ႈတၢင်းလူႇဢၼ်ပဵၼ်လေႃႉဝူဝ်းဢၼ်မီးမုင်းႁူၵ်းလမ်းဢိၵ်ႇတင်းဝူဝ်းသိပ်းသွင်တူဝ်၊လေႃႉဝူဝ်းယေႈလမ်းပုၼ်ႈၵူၼ်းဢၼ်ပဵၼ်ၵႄႇပဵၼ်ႁူဝ်သွင်ၵေႃႉလႄႈ၊ဝူဝ်းယေႈတူဝ်ပုၼ်ႈၵူၼ်းဢၼ်ပဵၼ်ၵႄႇပဵၼ်ႁူဝ်ယေႈၵေႃႉမႃးသၢၵ်ႈလူႇတီႈ ထႃႇဝရႃႉၽြႃး၊ ၵႃႈတီႈၽၢႆႇၼႃႈသုမ်ႉထဵင်ၸဝ်ႈဢေႃႈ။-
လိုၼ်းၼၼ်ႉ ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ လႄႈဝႃႈ၊-
“မႂ်းႁပ်ႉၶၢမ်ႇဢဝ်ၶိူင်ႈတၢင်းလူႇၸိူဝ်းၼၼ်ႉပုၼ်ႈဢၼ်တၵ်းသုင်းတၵ်းၸႂ်ႉၼႂ်းၼႃႈၵၢၼ်သုမ်ႉထဵင်ၸဝ်ႈလႄႈ၊ဢၢပ်ႈပၼ်တီႈၵူၼ်း လေႇဝိ၊ ၸွမ်းၼင်ႇၼႃႈၵၢၼ်ၶဝ်တၵ်းလႆႈပွင်ႁဵတ်းႁင်းၽႂ်ႁင်းမၼ်းၼၼ်ႉတႃႉ၊” ဝႃႈၼင်ႇၼႆဢေႃႈ။-
မူဝ်းသေႇ၊ ၵေႃႈဢဝ်လေႃႉတင်းလၢႆတင်းဝူဝ်းၸိူဝ်းၼၼ်ႉဢၢပ်ႈပၼ်တီႈၵူၼ်း လေႇဝိ၊ ၶဝ်သေဢေႃႈ။-
မၼ်းဢဝ်လေႃႉသွင်လမ်းတင်းဝူဝ်းသီႇတူဝ်ဢၢပ်ႈပၼ်တီႈၵူၼ်းၶိူဝ်းႁိူၼ်း ၵေႇရသုၼ်ႇ၊ လႄႈ၊-
သမ်ႉဢဝ်လေႃႉသီႇလမ်းတင်းဝူဝ်းပႅတ်ႇတူဝ်ဢၢပ်ႈပၼ်တီႈၵူၼ်းၶိူဝ်းႁိူၼ်း မေႇရႃႇရိ၊ ဢေႃႈ။ ၼႃႈၵၢၼ်ၶဝ်တင်းသဵင်ႈတင်းလူင်တၵ်းလႆႈယူႇတႂ်ႈတၢင်းဢၼ် ဢိႀမႃႇ၊ လုၵ်ႈၸၢႆး ဢႃႇရုၼ်ႇ၊ ဢုပ်ႉပိူင်ႇၼၼ်ႉဢေႃႈ။-
တီႈၵူၼ်းၶိူဝ်းႁိူၼ်း ၵေႃႇႁတ်ႉ၊ ၸိုင်၊ မူဝ်းသေႇ၊ ဢမ်ႇပၼ်လေႃႉ၊ဢမ်ႇပၼ်ဝူဝ်းသေမဵဝ်း။ လွင်ႈမၼ်းၸမ်ႉ၊ၶိူင်ႈပိူင်ဢၼ်မူတ်းၸၢင်ႇၸိူဝ်းဢၼ်ၶဝ်လႆႈလူတူၺ်းလုမ်းလႃးၼၼ်ႉၶဝ်တၵ်းလႆႈမႅၵ်ႇတၢင်ႇမႃႇၵႂႃႇဢေႃႈ။
ၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆၵေႃႈ ဢွၼ်ၵၼ်ဢဝ်ၶိူင်ႈတၢင်းလူႇတင်းလၢႆမႃးႁႂ်ႈလႆႈႁဵတ်းမၢင်ႇၵလႃႇတၢင်းဢၼ်သၢၵ်ႈၵၢပ်ႈၶဵင်ႇတၢင်းလူႇ ဢေႃႈ။ ယၢမ်းမိူဝ်ႈဢၼ်ၶဝ်တၼ်းဝႆႉတႃႇတေသၢၵ်ႈလူႇၶိူင်ႈတၢင်းလူႇၶဝ်ၼၼ်ႉ၊-
ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ လႄႈဝႃႈ၊ “ႁႂ်ႈၵူၼ်းဢၼ်ပဵၼ်ၵႄႇပဵၼ်ႁူဝ်ၸိူဝ်းၼၼ်ႉယေႈၵေႃႉသၢၵ်ႈလူႇၶိူင်ႈတၢင်းလူႇမၼ်းယေႈဝၼ်းပုၼ်ႈဢၼ်တၵ်းႁဵတ်းမၢင်ႇၵလႃႇတၢင်းဢၼ်သၢၵ်ႈၵၢပ်ႈၶဵင်ႇတၢင်းလူႇၼၼ်ႉႁင်းၽႂ်ႁင်းမၼ်းတႃႉ၊” ဝႃႈၼင်ႇၼႆဢေႃႈ။
မိူဝ်ႈဢၼ် မူဝ်းသေႇ၊ ၶဝ်ႈၵႃႈၼႂ်းသုမ်ႉထဵင်ၸဝ်ႈၵႂႃႇႁႂ်ႈလႆႈလဝ်ႈလၢတ်ႈတီႈ ထႃႇဝရႃႉၽြႃး၊ ၼၼ်ႉၸိုင်၊မၼ်းလႆႈငိၼ်းသဵင်ၸဝ်ႈလၢတ်ႈဢွၵ်ႇမႃးၵႃႈၼိူဝ်ပလၢင်ႇတီႈဢၼ်ၽေႇဢပျတ်ႈဢၼ်မီးၵႃႈၼိူဝ်တိူၵ်ႈပတိၺိၺ်ႇၸဝ်ႈ၊ၵႃႈတီႈၵႄႈဝူင်ႈၵၢင် ၶေႇရုၽဵမ်ႇ၊ သွင်တူဝ်ၼၼ်ႉလႄႈလၢတ်ႈတေႃႇၵၼ်တင်းမၼ်းဢေႃႈ။
ၸဝ်ႈထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ လႄႈဝႃႈ၊-
“မႂ်းတၵ်းလႆႈသင်ႇလၢတ်ႈတီႈ ဢႃႇရုၼ်ႇ၊ လႄႈဝႃႈၸမ်ႉ၊ ‘မိူဝ်ႈဢၼ်မႂ်းဢဝ်ဝၢၼ်ႇၽႆးၸဵတ်းလုၵ်ႈတမ်းဝၢင်းၵႃႈၼိူဝ်ၶဵင်ႇတီႈတႆႈၽႆးၼၼ်ႉၸိုင်၊မႂ်းတၵ်းလႆႈတမ်းဝၢင်းႁႂ်ႈဢၼ်လႅင်းထွင်ႇၵႂႃႇပႃႈၼႃႈတႃႉ၊’ သင်ႇလၢတ်ႈၸိူဝ်ႉၼင်ႇၼႆတႃႉ၊” ဝႃႈၼင်ႇၼႆဢေႃႈ။-
ဢႃႇရုၼ်ႇ၊ ႁဵတ်းၸွမ်းၸိူဝ်ႉၼင်ႇၼၼ်လႄႈတႆႈဝၢၼ်ႇၽႆးႁႂ်ႈလႅင်းၵႂႃႇၽၢႆႇၼႃႈၶဵင်ႇတီႈတႆႈၽႆးၸိူဝ်ႉၼင်ႇဢၼ် ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ ၼၼ်ႉဢေႃႈ။-
ၶဵင်ႇတီႈတႆႈၽႆးၼၼ်ႉဢဝ်ၶမ်းတွင်ႈႁဵတ်းဢေႃႈ။ ၸႃႉၸဵမ်တိၼ်မၼ်းတေႃႇႁွတ်ႈမွၵ်ႇမူဝ်မၼ်းဢဝ်ၶမ်းတွင်ႈႁဵတ်းပဵၼ်ၼိူဝ်ႉလဵဝ်ၵၼ်ဝႆႉဢေႃႈ။ မႅၼ်ႈၸွမ်းၼင်ႇပုင်ႇဢၼ် ထႃႇဝရႃႉၽြႃး၊ ၼႄပျႃးတီႈ မူဝ်းသေႇ၊ ၼၼ်ႉမၼ်းႁဵတ်းၶဵင်ႇတီႈတႆႈၽႆးၸိူဝ်ႉၼင်ႇၼၼ်ဢေႃႈ။
ၸဝ်ႈထႃႇဝရႃႉၽြႃး၊ မီးဢမိင်ႉၵႃႈတီႈ မူဝ်းသေႇ၊ လႄႈဝႃႈ၊-
“လိူၵ်ႈဢဝ်ၵူၼ်း လေႇဝိ၊ တင်းလၢႆၽၢတ်ႇဢွၵ်ႇသေၵႃႈၼႂ်းၵူၼ်းမဵဝ်း ဢိသရေး၊ တင်းလၢႆလႄႈႁဵတ်းႁႂ်ႈၶဝ်မူတ်းၸၢင်ႇတႃႉ။-
လွင်ႈတၢင်းဢၼ်တၵ်းလႆႈႁဵတ်းတီႈၶဝ်ႁႂ်ႈမူတ်းၸၢင်ႇၸမ်ႉ၊ဢဝ်ၼမ်ႉမၢင်ႇၵလႃႇတၢင်းဢၼ်မူတ်းၸၢင်ႇၼၼ်ႉ ၽႅတ်းသႂ်ႇၵႃႈၼိူဝ်ၶဝ်လႄႈႁႂ်ႈၶဝ်ထႃၶူၼ်တင်းတူဝ်တင်းၶိင်းလႄႈသၵ်ႉၶူဝ်းသၵ်ႉလဵင်းၶဝ်တႃႉ။ ၶဝ်တၵ်းႁွတ်ႈထိုင်တၢင်းဢၼ်မူတ်းၸၢင်ႇဢေႃႈ။-
မိူဝ်ႈၼၼ်ႉၶဝ်တၵ်းလႆႈဢဝ်ဝူဝ်းပေႃႈဢၼ်ဢသၢၵ်ႈၼုမ်ႇတူဝ်ၼိုင်ႈတင်းတၢင်းလူႇမၢၵ်ႇၶဝ်ႈႁူင်းၶဝ်ႈဢၼ်ဝႃႈ၊ၽွင်ၶဝ်ႈၵျုင်ႇဢၼ်ၼွၵ်းလေႃးၼမ်ႉမၼ်းသၢၼ်ႇလုၼ်ႇၼၼ်ႉ၊ဢိၵ်ႇတင်းမႂ်းသမ်ႉတၵ်းလႆႈဢဝ်ဝူဝ်းပေႃႈၼုမ်ႇတၢင်ႇတူဝ်မႃးထႅင်ႈပုၼ်ႈတၢင်းလူႇဢၼ်ၽေႇဢပျတ်ႈဢေႃႈ။-
ႁႂ်ႈၵူၼ်း လေႇဝိ၊ တင်းလၢႆၸုၵ်းယူႇၵႃႈတီႈၽၢႆႇၼႃႈသုမ်ႉထဵင်ၸဝ်ႈၼၼ်ႉသေလႄႈ၊ႁွင်ႉဢဝ်မူႇၵူၼ်းၸိူဝ်းၵူၼ်းမဵဝ်း ဢိသရေး၊ တင်းလၢႆမႃးၸုၵၼ်တုမ်ၵၼ်တႃႉ။-
မိူဝ်ႈဢၼ်မႂ်းဢဝ်ၵူၼ်း လေႇဝိ၊ ၸိူဝ်းၼၼ်ႉႁွတ်ႈထိုင်ၽၢႆႇၼႃႈ ထႃႇဝရႃႉၽြႃး၊ ယဝ်ႉၸိုင်၊ႁႂ်ႈၵူၼ်းမဵဝ်း ဢိသရေး၊ တင်းလၢႆဢဝ်မိုဝ်းၶဝ်တၢင်ႇၵႃႈၼိူဝ်ၵူၼ်း လေႇဝိ၊ ၸိူဝ်းၼၼ်ႉတႃႉ။-
မိူဝ်ႈၼၼ်ႉ ဢႃႇရုၼ်ႇ၊ တၵ်းလႆႈသၢၵ်ႈၵၢပ်ႈၵူၼ်း လေႇဝိ၊ ၸိူဝ်းၼၼ်ႉတီႈၵဝ်ပဵၼ်တၢင်းလူႇဢၼ်ၶိုၵ်ႉဢၼ်ၶမ်ႇ ပုၼ်ႈလွင်ႈၼင်ႇႁိုဝ်ၶဝ်တၵ်းလႆႈၵိုတ်ႉႁၢပ်ႇၼႃႈၵၢၼ်ၵဝ် ထႃႇဝရႃႉၽြႃး၊ တႃႉ။-
ၵမ်းၼၼ်ႉ ႁႂ်ႈၵူၼ်း လေႇဝိ၊ ၸိူဝ်းၼၼ်ႉဢဝ်မိုဝ်းၶဝ်တၢင်ႇၵႃႈၼိူဝ်ႁူဝ်ဝူဝ်းသွင်တူဝ်ၼၼ်ႉလႄႈ၊မႂ်းတၵ်းလႆႈဢဝ်တူဝ်ၼိုင်ႈႁဵတ်းတၢင်းလူႇဢၼ်ၽေႇဢပျတ်ႈ။ ထႅင်ႈတူဝ်ၼိုင်ႈၼၼ်ႉႁဵတ်းတၢင်းလူႇဢၼ်တုတ်ႇၽႆးတီႈ ထႃႇဝရႃႉၽြႃး၊ ပုၼ်ႈလွင်ႈၼင်ႇႁိုဝ်တၵ်းႁဵတ်းမၢင်ႇၵလႃႇတၢင်းဢၼ်မူတ်းၸၢင်ႇတီႈၵူၼ်း လေႇဝိ၊ ၸိူဝ်းၼၼ်ႉတႃႉ။
“ဢဝ်ၵူၼ်း လေႇဝိ၊ ၸိူဝ်းၼၼ်ႉသၢၵ်ႈၵၢပ်ႈတီႈၵဝ်ပဵၼ်တၢင်းလူႇဢၼ်ၶိုၵ်ႉဢၼ်ၶမ်ႇတီႈၵဝ်လႄႈယုၵ်ႉတၢင်ႇႁႂ်ႈ ဢႃႇရုၼ်ႇ၊ တင်းလုၵ်ႈၸၢႆးမၼ်းတင်းလၢႆႁႂ်ႈလူတူၺ်းၶဝ်တႃႉ။-
ၼင်ႇၼၼ်လႄႈလိူၵ်ႈဢဝ်ၵူၼ်း လေႇဝိ၊ တင်းလၢႆၽၢတ်ႇဢွၵ်ႇၵႃႈၼႂ်းၵူၼ်းမဵဝ်း ဢိသရေး၊ တင်းလၢႆႁႂ်ႈၶဝ်ပဵၼ်ၵူၼ်းၵဝ်တႃႉ။-
ဝၢႆးသေဢၼ်မႂ်းႁဵတ်းႁႂ်ႈၶဝ်မူတ်းသႂ်လႄႈသၢၵ်ႈၵၢပ်ႈၶဝ်ယဝ်ႉၸင်ႇၶဝ်တၵ်းမီးဢၶႂၢင်ႉဢၼ်ၵိုတ်ႉႁၢပ်ႇၼႃႈၵၢၼ်ၵႃႈၼႂ်းသုမ်ႉထဵင်ၸဝ်ႈဢေႃႈ။-
ၵဝ်ဢဝ်ၶဝ်ႁဵတ်းပုၼ်ႈတၢင်တူဝ်လုၵ်ႈၸၢႆးတူၼ်ႈၵူၼ်းမဵဝ်း ဢိသရေး၊ တင်းလၢႆလႄႈ သိမ်းဢဝ်ပဵၼ်ၵူၼ်းၵဝ်လုမ်းလုမ်းဢေႃႈ။-
လွင်ႈမၼ်းၸမ်ႉ၊ၼႂ်းမိူဝ်ႈဢၼ်ၵဝ်ပၼ်ၽေးတၢမ်ႇတီႈလုၵ်ႈၸၢႆးတူၼ်ႈၵူၼ်းမဵဝ်း ဢေးၵျိပ်ႉ၊ ၶဝ်ၼၼ်ႉၵဝ်လႆႈသၢၵ်ႈၵၢပ်ႈၵႃႈဢၼ်ပဵၼ်လုၵ်ႈၸၢႆးတူၼ်ႈၵႃႈၼႂ်းၵူၼ်းမဵဝ်း ဢိသရေး၊ ၵူႈၵေႃႉဢိၵ်ႇတင်းလုၵ်ႈတူၼ်ႈတူဝ်တရိၵ်ႈသၢၼ်ႇၶဝ်ၵူႈတူဝ် ႁႂ်ႈၶဝ်မူတ်းၸၢင်ႇပုၼ်ႈၵဝ်ဢေႃႈ။-
ၵမ်းၼႆႉ ၵဝ်ဢဝ်ၵူၼ်း လေႇဝိ၊ ၸိူဝ်းၼၼ်ႉတၢင်တူဝ်လုၵ်ႈၸၢႆးတူၼ်ႈၵူၼ်းမဵဝ်း ဢိသရေး၊ တင်းလၢႆဢေႃႈ။-
ၵဝ်ယုၵ်ႉတၢင်ႇႁႂ်ႈၵူၼ်း လေႇဝိ၊ ပဵၼ်ၸိူဝ်ႉၼင်ႇၶွင်ၽၢၵ်ႇလၢၵ်ႈသွင်ႇဢၼ်ၵူၼ်းမဵဝ်း ဢိသရေး၊ တင်းလၢႆပၼ်တီႈ ဢႃႇရုၼ်ႇ၊ တင်းလုၵ်ႈၸၢႆးမၼ်းတင်းလၢႆ၊ႁႂ်ႈၶဝ်လႆႈၵိုတ်ႉႁၢပ်ႇၼႃႈၵၢၼ်ၵႃႈၼႂ်းသုမ်ႉထဵင်ၸဝ်ႈပုၼ်ႈၵူၼ်းမဵဝ်း ဢိသရေး၊ တင်းလၢႆ၊ဢိၵ်ႇတင်းႁႂ်ႈၶဝ်လႆႈၵႅတ်ႇၶႄၽေးတၢမ်ႇဢၼ်ၸၢင်ႈတူၵ်းထိုင်မႃးၵႃႈၼိူဝ်ၵူၼ်းမဵဝ်း ဢိသရေး၊ တင်းလၢႆၼႂ်းမိူဝ်ႈဢၼ်ၶဝ်သုတ်ႉၸမ်ထႃႇၼႃႉတီႈမူတ်းၸၢင်ႇၸဝ်ႈၼႃႇၽႅဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ မူဝ်းသေႇ၊ တင်း ဢႃႇရုၼ်ႇ၊ ဢိၵ်ႇတင်းမူႇၵူၼ်းၸိူဝ်းၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်သၢၵ်ႈၵၢပ်ႈၵူၼ်းမဵဝ်း လေႇဝိ၊ ၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ ၼၼ်ႉဢေႃႈ။-
ၵူၼ်း လေႇဝိ၊ ၸိူဝ်းၼၼ်ႉႁဵတ်းႁႂ်ႈတူဝ်ၸဝ်ႈၵဝ်ႇမူတ်းသႂ်လႄႈသၵ်ႉၶူဝ်းသၵ်ႉလဵင်းၶဝ်ဢေႃႈ။ ဢႃႇရုၼ်ႇ၊ ဢဝ်ၶဝ်သၢၵ်ႈၵၢပ်ႈတီႈ ထႃႇဝရႃႉၽြႃး၊ ႁႂ်ႈပဵၼ်တၢင်းလူႇဢၼ်ၶိုၵ်ႉဢၼ်ၶမ်ႇသေလႄႈ၊ႁဵတ်းတၢင်းဢၼ်ၽေႇဢပျတ်ႈၶဝ်ႁႂ်ႈၶဝ်မူတ်းၸၢင်ႇဢေႃႈ။-
ၵူၼ်းတင်းလၢႆဢွၼ်ၵၼ်ႁဵတ်းတီႈၵူၼ်း လေႇဝိ၊ ၸိူဝ်းၼၼ်ႉမႅၼ်ႈၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉတီႈ မူဝ်းသေႇ၊ ၵူႈၸိူဝ်ႉၵူႈပိူင်ဢေႃႈ။ ၼင်ႇၼၼ်လႄႈ၊ၵူၼ်း လေႇဝိ၊ ၸိူဝ်းၼၼ်ႉမီးဢၶႂၢင်ႉဢၼ်လႆႈၵိုတ်ႉႁၢပ်ႇၼႃႈၵၢၼ်ၵႃႈၼႂ်းသုမ်ႉထဵင်ၸဝ်ႈတႂ်ႈမိုဝ်း ဢႃႇရုၼ်ႇ၊ တင်းလုၵ်ႈၸၢႆးမၼ်းၸိူဝ်းၼၼ်ႉဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ လႄႈဝႃႈ၊-
“ၵူၼ်း လေႇဝိ၊ ၵေႃႉလႂ်သေဢမ်ႇဝႃႈတႄႇဢဝ်ဢသၢၵ်ႈလႆႈသၢဝ်းႁႃႈၶိုၼ်ႈၼိူဝ်ၵႂႃႇတၵ်းလႆႈၵိုတ်ႉႁၢပ်ႇၼႃႈၵၢၼ်ၵႃႈၼႂ်းသုမ်ႉထဵင်ၸဝ်ႈၼၼ်ႉသေယဝ်ႉ၊-
မိူဝ်ႈဢၼ်ဢသၢၵ်ႈထူၼ်ႈထိုင်ႁႃႈသိပ်းယဝ်ႉၸိုင်၊တၵ်းလႆႈၵိုတ်းလိုဝ်ႈၼႃႈၵၢၼ်တၢင်းႁဵတ်းမၼ်းဢေႃႈ။-
လိုၼ်းၼၼ်ႉမၼ်းဢမ်ႇလႆႈပွင်ႁဵတ်းၼႃႈၵၢၼ်ၸဝ်ႈၼၼ်ႉၵူၺ်းၶေႃမၼ်းယဝ်ႉလႄႈ၊ၵူၺ်းမီးဢၶႂၢင်ႉဢၼ်ၸွႆႈႁဵတ်းၸွႆႈသၢင်ႈလူၺ်ႈၵၼ်တင်းပီႈၼွင်ႉၶဝ်ဢေႃႈ။ ဢၼ်ၼႆႉၸိုင်၊ပဵၼ်တၢင်းဢၼ်မႂ်းတၵ်းလႆႈပႂ်ႉတူၺ်းၶၢၼ်းပၼ်ၼႃႈၵၢၼ်တင်းလၢႆ တီႈၵူၼ်း လေႇဝိ၊ တင်းလၢႆဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ ၵႃႈၼႂ်းထိူၼ်ႇ သိၼႃႉ၊ လိုၼ်းသေၶဝ်ဢွၵ်ႇမိူင်း ဢေးၵျိပ်ႉ၊ မႃးလႆႈသွင်ပီၼႂ်းလိူၼ်တီႈၼိုင်ႈၼၼ်ႉလႄႈဝႃႈ၊-
“ၵူၼ်းမဵဝ်း ဢိသရေး၊ တင်းလၢႆ တၵ်းလႆႈႁဵတ်းပွႆး ပသၶႃႇ၊ ၼႂ်းၶိင်ႇၵႃႇလႃႉဢၼ်မၵ်းၶၢၼ်းဝႆႉၼၼ်ႉဢေႃႈ။-
ၼႂ်းလိူၼ်ၼႆႉဝၼ်းတီႈသိပ်းသီႇတႄႇဢဝ်ၶိင်ႇႁူဝ်ၶမ်ႈသူတၵ်းလႆႈဢွၼ်ၵၼ်ႁဵတ်းပွႆး ပသၶႃႇ၊ မႅၼ်ႈၸွမ်းၼင်ႇထုင်းၽိင်ႈတြႃးၵႃႈမီး၊ဢိၵ်ႇတင်းၵႃႈဢၼ်ၸီႇယၢင်ႇဝႆႉလွင်ႈမၼ်းၵႃႈမီးၸိူဝ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ မူဝ်းသေႇ၊ သင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆႁႂ်ႈၶဝ်ႁဵတ်းပွႆး ပသၶႃႇ၊ ဢေႃႈ။-
ၼင်ႇၼၼ်လႄႈၼႂ်းလိူၼ်တီႈၼိုင်ႈသိပ်းသီႇဝၼ်းၶိင်ႇႁူဝ်ၶမ်ႈၼၼ်ႉၶဝ်ဢွၼ်ၵၼ်ႁဵတ်းပွႆးၼၼ်ႉၵႃႈၼႂ်းထိူၼ်ႇ သိၼႃႉ၊ ဢေႃႈ။ ၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈ မူဝ်းသေႇ၊ ဝႆႉၼၼ်ႉၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ႁဵတ်းၸိူဝ်ႉၼင်ႇၼၼ်ဢေႃႈ။
ၵူၺ်းၵႃႈ၊မီးၵူၼ်းၵမ်ႈၽွင်ႈႁွတ်ႈတၢင်းဢၼ်ၵူဝ်ႈၵိူၵ်ႇၵွပ်ႈပိူဝ်ႈၶဝ်လႆႈတိူဝ်ႉမႅၼ်ႈတူဝ်ၵူၼ်းတၢႆၼၼ်ႉလႄႈၶဝ်ဢမ်ႇၶဝ်ႈပွႆး ပသၶႃႇ၊ ၼႂ်းဝၼ်းၼၼ်ႉလႆႈဢေႃႈ။ ၶဝ်ၸင်ႇၶဝ်ႈၸူးတီႈ မူဝ်းသေႇ၊ တင်း ဢႃႇရုၼ်ႇ၊ သေလႄႈ၊-
လဝ်ႈထၢမ်လႄႈဝႃႈ၊ “ႁဝ်းၶႃႈႁွတ်ႈတၢင်းဢၼ်ၵူဝ်ႈၵိူၵ်ႇၵွပ်ႈပိူဝ်ႈလႆႈတိူဝ်ႉမႅၼ်ႈတူဝ်တၢႆၵူၼ်းၼၼ်ႉဢေႃႈ။ ၵွပ်ႈသင်လႄႈႁႄႉၶႅၼ်ႁဝ်းၶႃႈႁႂ်ႈႁဝ်းၶႃႈဢမ်ႇလႆႈၶဝ်ႈပႃးၸွမ်းၵၼ်တင်းၵူၼ်းမဵဝ်း ဢိသရေး၊ တင်းလၢႆၼႂ်းတၢင်းဢၼ်ႁဵတ်းတၢင်းလူႇတီႈ ထႃႇဝရႃႉၽြႃး၊ ၼၼ်ႉၶႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ၶိုၼ်းလၢတ်ႈလႄႈဝႃႈ၊ “ပႂ်ႉထႃႈလူးၵွၼ်ႇ။ ႁႂ်ႈၵဝ်ပႂ်ႉၵႂၢမ်း ထႃႇဝရႃႉၽြႃး၊ တၵ်းမီးဢမိင်ႉၸိူဝ်ႉၼင်ႇႁိုဝ်မႃးပုၼ်ႈသူၼၼ်ႉသေၵမ်း၊” ဝႃႈၼင်ႇၼႆဢေႃႈ။
မႂ်းမီးဢၶႂၢင်ႉဢၼ်တၵ်းႁဵတ်းပွႆးၼၼ်ႉၼႂ်းလိူၼ်ဢၼ်တေမႃးၼၼ်ႉဢေႃႈ။ ၼႂ်းလိူၼ်တီႈသွင်သိပ်းသီႇဝၼ်းၶိင်ႇႁူဝ်ၶမ်ႈၼၼ်ႉႁႂ်ႈၶဝ်ဢွၼ်ၵၼ်ၶဝ်ႈပွႆးၼၼ်ႉလႄႈၵိၼ်ၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈတင်းၽၵ်းၶဵဝ်မဵဝ်းဢၼ်ၶူမ်ၼၼ်ႉတႃႉ။-
ယႃႇပေႁႂ်ႈတၢင်းၵိၼ်တၢင်းၶူပ်းၵိုတ်းလိူဝ်ဝႆႉတေႃႇထိုင်ၶိင်ႇၵၢင်ၼႂ်သေၸိူဝ်ႉသေမဵဝ်း။ လုပ်ႇတူဝ်သတ်းၵေႃႈၶဝ်တေဢမ်ႇလႆႈႁၵ်းပႅတ်ႈသေပွတ်း။ ႁဵတ်းပွႆးၼၼ်ႉႁႂ်ႈမၼ်းမႅၼ်ႈၸွမ်းၼင်ႇထုင်းၽိင်ႈတြႃးပွႆး ပသၶႃႇ၊ ဢၼ်မီးတင်းသဵင်ႈတင်းလူင်ၼၼ်ႉတႃႉ။-
ၵေႃႉဢၼ်မီးတၢင်းမူတ်းၸၢင်ႇယူႇ၊ဢမ်ႇဢွၵ်ႇတႃႈဢွၵ်ႇတၢင်းလႄႈသမ်ႉယင်းဢမ်ႇၶဝ်ႈပွႆး ပသၶႃႇ၊ လႄႈယူႇၸိုင်၊ၵေႃႉၼၼ်ႉတၵ်းဢမ်ႇလႆႈမၢတ်ႈဝႃႈပဵၼ်ၵူၼ်းၵဝ်။ ၵွပ်ႈပိူဝ်ႈၵေႃႉၼၼ်ႉဢမ်ႇသၢၵ်ႈၵၢပ်ႈတၢင်းလူႇတီႈၵဝ်ၼႂ်းၶိင်ႇၶႃႇဢၼ်မၵ်းၶၢၼ်းၼၼ်ႉလႄႈမၼ်းတၵ်းလႆႈၶၢမ်ႇတၢမ်ႇဢပျတ်ႈတူဝ်ၸဝ်ႈၵဝ်ႇဢေႃႈ။
“ပေႃးၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ယူႇၸွမ်းသူၼၼ်ႉၶႂ်ႈၶဝ်ႈပွႆး ပသၶႃႇ၊ ၸွမ်းၸိုင်၊ႁႂ်ႈမၼ်းႁဵတ်းၸွမ်းမႅၼ်ႈၼင်ႇထုင်းၽိင်ႈတြႃးၵႃႈမီး၊ဢိၵ်ႇတင်းၵႃႈဢၼ်ၸီႇယၢင်ႇဝႆႉလွင်ႈမၼ်းၵႃႈမီးၼၼ်ႉတႃႉ။ ၶႅၵ်ႇသေဢမ်ႇဝႃႈ၊ၵူၼ်းမဵဝ်းၸဝ်ႈၵဝ်ႇသေဢမ်ႇဝႃႈ၊တၵ်းလႆႈမီးထုင်းၽိင်ႈတြႃးပိူင်လဵဝ်ၵူၺ်းဢေႃႈ၊” ဝႃႈၼင်ႇၼႆဢေႃႈ။
ၼႂ်းဝၼ်းဢၼ်ပူၵ်းတင်ႈသုမ်ႉထဵင်ၸဝ်ႈယဝ်ႉၵႂႃႇၼၼ်ႉ၊မွၵ်ႇၵုမ်ႈလူင်းမႃးႁူမ်ႇသုမ်ႇသုမ်ႉထဵင်ၸဝ်ႈၼၼ်ႉဝႆႉဢေႃႈ။ တႄႇဢဝ်ၸဵမ်ၶိင်ႇႁူဝ်ၶမ်ႈမွၵ်ႇၵုမ်ႈၼၼ်ႉပဵၼ်ၼင်ႇႁၢင်ႈၽႆးဝႆႉတေႃႇထိုင်ၶိင်ႇႁူဝ်ၼႂ်ဢေႃႈ။-
ၶိင်ႇၵၢင်ဝၼ်းမွၵ်ႇၵုမ်ႈႁူမ်ႇသုမ်ႇယူႇ၊ၶိင်ႇၵၢင်ၶိုၼ်းပဵၼ်ၼင်ႇႁၢင်ႈၽႆးယူႇ၊ပဵၼ်ၸိူဝ်ႉၼင်ႇၼႆယူႇတႃႇသေႇဢေႃႈ။-
မိူဝ်ႈလႂ်သေဢမ်ႇဝႃႈ၊ပေႃးမွၵ်ႇၵုမ်ႈယုၵ်ႉၽၢတ်ႇသုမ်ႉထဵင်ၸဝ်ႈၸိုင်၊ၵူၼ်းမဵဝ်း ဢိသရေး၊ ၵူႈသိမ်းဢဝ်သုမ်ႉထဵင်ၶဝ်လႄႈၵႂႃႇၸွမ်းဢေႃႈ။ တီႈလႂ်တၼ်းလႂ်ဢၼ်မွၵ်ႇၵုမ်ႈတႄႇသဝ်းယူႇၼၼ်ႉ၊ၶဝ်ဢွၼ်ၵၼ်ၶျႃးပၢင်လႄႈပူၵ်းတင်ႈသုမ်ႉထဵင်ၶဝ်ယူႇဢေႃႈ။-
ၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉၼၼ်ႉၵူၼ်းတင်းလၢႆၶၢႆႉပၢင်တပ်ႉလႄႈ၊ၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉၼၼ်ႉၶဝ်သမ်ႉၶျႃးပၢင်တပ်ႉလႄႈယူႇဢေႃႈ။ ၶိင်ႇၸူဝ်ႈဢၼ်မွၵ်ႇၵုမ်ႈတႄႇသဝ်းယူႇၵႃႈတီႈသုမ်ႉထဵင်ၸဝ်ႈၼၼ်ႉၶဝ်သွၼ်ႈယူႇၼႂ်းသုမ်ႉထဵင်ၶဝ်ဢေႃႈ။-
မိူဝ်ႈဢၼ်မွၵ်ႇၵုမ်ႈယင်းတႄႇယူႇၵႃႈၼိူဝ်သုမ်ႉထဵင်ၸဝ်ႈမိုဝ်ႉဝၼ်းႁိုင်ၼႃႇၸိုင်၊ၶဝ်ဢွၼ်ၵၼ်ပႂ်ႉယူႇသွၼ်ႈယူႇၵႃႈၼႂ်းသုမ်ႉထဵင်ၶဝ်ႁိုင်ၼႃႇဢေႃႈ။ ၶဝ်ထွမ်ႇဢဝ်ဢမိင်ႉ ထႃႇဝရႃႉၽြႃး၊ လႄႈၶဝ်ဢမ်ႇၶၢႆႉပၢင်တပ်ႉလႄႈယူႇဢေႃႈ။-
မၢင်ၽဝ်ႇမၢင်ပွၵ်ႈမွၵ်ႇၵုမ်ႈတႄႇယူႇၵႃႈၼိူဝ်သုမ်ႉထဵင်ၸဝ်ႈမိုဝ်ႉဝၼ်းၵေႇၼႃႇၵူၺ်းဢေႃႈ။ ပဵၼ်ၸိူဝ်ႉၼင်ႇႁိုဝ်မႃးသေၵေႃႈ၊ၶဝ်ၶျႃးပၢင်တပ်ႉလႄႈယူႇယူႇ၊ဢိၵ်ႇတင်းၶဝ်ၶၢႆႉပၢင်တပ်ႉလႄႈၵႂႃႇယူႇၸွမ်းၼင်ႇဢၼ် ထႃႇဝရႃႉၽြႃး၊ မီးဢမိင်ႉၼၼ်ႉဢေႃႈ။-
မၢင်ၽဝ်ႇမၢင်ပွၵ်ႈမွၵ်ႇၵုမ်ႈတႄႇသဝ်းယူႇတႄႇၸႃႉၶိင်ႇႁူဝ်ၶမ်ႈတေႃႇႁွတ်ႈၶိင်ႇႁူဝ်ၼႂ်ၵူၺ်းလႄႈ၊ၶဝ်ၵေႃႈၶၢႆႉပၢင်ၸွမ်းၵႂႃႇၼႂ်းၶိင်ႇဢၼ်မွၵ်ႇၵုမ်ႈၶိုၼ်ႈၵႂႃႇၵမ်းလဵဝ်ၼၼ်ႉဢေႃႈ။ မွၵ်ႇၵုမ်ႈယုၵ်ႉၶိုၼ်ႈမိူဝ်ႈလႂ်ၵေႃႈၶဝ်ၶၢႆႉပၢင်ၵႂႃႇၸွမ်းမိူဝ်ႈၼၼ်ႉဢေႃႈ။-
ပဵၼ်သွင်ဝၼ်းၵေႃႈလီ၊ပဵၼ်လိူၼ်ၵေႃႈလီ၊ပဵၼ်ပီၵေႃႈလီ၊သမ်ႉႁိုင်သေၼၼ်ႉၵႂႃႇၵေႃႈလီၶိင်ႇၸူဝ်ႈဢၼ်မွၵ်ႇၵုမ်ႈတႄႇသဝ်းယူႇၵႃႈၼိူဝ်သုမ်ႉထဵင်ၸဝ်ႈၼၼ်ႉၶဝ်ၵေႃႈဢမ်ႇၶၢႆႉပၢင်ၶဝ်။ မိူဝ်ႈဢၼ်မွၵ်ႇၵုမ်ႈယုၵ်ႉၶိုၼ်ႈၼၼ်ႉၶဝ်ၸင်ႇၶၢႆႉပၢင်တပ်ႉၶဝ်ဢေႃႈ။-
ၶဝ်ထွမ်ႇဢဝ်ဢမိင်ႉၸဝ်ႈသေၶျႃးပၢင်တပ်ႉလႄႈယူႇယူႇ၊ဢိၵ်ႇတင်းၶဝ်ၶၢႆႉပၢင်တပ်ႉလႄႈၵႂႃႇယူႇၸွမ်းၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉတီႈ မူဝ်းသေႇ၊ ၼၼ်ႉဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉၵႃႈတီႈ မူဝ်းသေႇ၊ လႄႈဝႃႈၸမ်ႉ၊-
“မႂ်းဢဝ်တင်းငိုၼ်းသေလႄႈတွင်ႈႁဵတ်းၼႄးၶရႃႇသွင်လုၵ်ႈတႃႉ။ ပဵၼ်ပုၼ်ႈတႃႇတၵ်းႁွင်ႉၵူၼ်းတင်းလၢႆၸုတုမ်ၵၼ်၊ဢိၵ်ႇတင်းပုၼ်ႈဢၼ်တၵ်းၶၢႆႉပၢင်တပ်ႉဢေႃႈ။-
မိူဝ်ႈဢၼ်ၶဝ်ပဝ်ႇၼႄးၶရႃႇတင်းသွင်လုၵ်ႈသဵင်ယၢဝ်းယၢဝ်းၼၼ်ႉၸိုင်၊ပဵၼ်ပုၼ်ႈဢၼ်ႁႂ်ႈမူႇၵူၼ်းၸိူဝ်းၵူၼ်းတင်းလၢႆၸုတုမ်ၵၼ်ၵႃႈတီႈမႂ်း၊ၵႃႈတီႈၽၢႆႇၼႃႈၽၵ်းတူသုမ်ႉထဵင်ၸဝ်ႈၼၼ်ႉဢေႃႈ။-
မိူဝ်ႈဢၼ်ၶဝ်ပဝ်ႇၼႄးၶရႃႇလုၵ်ႈၼိုင်ႈၵူၺ်းၸိုင်၊ပဵၼ်ပုၼ်ႈဢၼ်ၵူၼ်းဢၼ်ပဵၼ်ၵႄႇပဵၼ်ႁူဝ်ဢၼ်ဢုပ်ႉၶိူဝ်းႁိူၼ်းၽႂ်ႁိူၼ်းမၼ်းၼၼ်ႉၵူၺ်းတၵ်းလႆႈၸုတုမ်ၵၼ်ၵႃႈတီႈမႂ်းဢေႃႈ။-
မိူဝ်ႈဢၼ်ၶဝ်ပဝ်ႇၼႄးၶရႃႇသဵင်ပွတ်းပွတ်းၼၼ်ႉၸိုင်၊ပဵၼ်ပုၼ်ႈဢၼ်တပ်ႉၵူၼ်းၸိူဝ်ႉၶိူဝ်းဢၼ်မီးၽၢႆႇတၢင်းဝၼ်းဢွၵ်ႇၸိူဝ်းၼၼ်ႉတၵ်းလႆႈဢွၵ်ႇၵႂႃႇဢေႃႈ။-
မိူဝ်ႈဢၼ်သဵင်ၼႄးၶရႃႇပွတ်းပွတ်းဢွၵ်ႇမႃးပွၵ်ႈတီႈသွင်ၼၼ်ႉၸိုင်၊ပဵၼ်ပုၼ်ႈဢၼ်တပ်ႉၵူၼ်းၸိူဝ်ႉၶိူဝ်းဢၼ်မီးတၢင်းၸၢၼ်းၸိူဝ်းၼၼ်ႉတၵ်းလႆႈဢွၵ်ႇၵႂႃႇဢေႃႈ။ ၼင်ႇၼၼ်လႄႈတၵ်းလႆႈတိုင်ႈသဵင်ၼႄးၶရႃႇပွတ်းပွတ်းပုၼ်ႈဢၼ်တၵ်းၶၢႆႉပၢင်တပ်ႉ၊-
ဢိၵ်ႇတင်းတၵ်းလႆႈတိုင်ႈသဵင်ၼႄးၶရႃႇယၢဝ်းယၢဝ်းပုၼ်ႈဢၼ်တၵ်းႁွင်ႉဢဝ်မူႇၵူၼ်းၸိူဝ်းၵူၼ်းတင်းလၢႆၸုတုမ်ၵၼ်ဢေႃႈ။-
ယဵၸ်ႈပရေႃးႁဵၵ်ႈ တင်းလၢႆဢၼ်ပဵၼ်လုၵ်ႈၸၢႆး ဢႃႇရုၼ်ႇ၊ ၸိူဝ်းၼၼ်ႉတၵ်းလႆႈပဝ်ႇၼႄးၶရႃႇၼၼ်ႉဢေႃႈ။ “ဢၼ်ၼႆႉၸမ်ႉ၊ပဵၼ်ထုင်းၽိင်ႈဢၼ်တၵ်းလႆႈႁဵတ်းၸွမ်းၸူဝ်ႈလုၵ်ႈပၢၼ်လၢၼ်သူသိုပ်ႇသိုပ်ႇတၢမ်တၢမ်ဢေႃႈ။-
မိူဝ်ႈဢၼ်သူလႆႈႁဵတ်းသိုၵ်းၵႃႈၼႂ်းမိူင်းသူ၊ႁႂ်ႈလႆႈႁႄႉၵင်ႈရၢၼ်ႇသူႇဢၼ်မႃးတိုၵ်းၼၼ်ႉၸိုင်၊သူတၵ်းလႆႈပဝ်ႇၼႄးၶရႃႇပၼ်သတိပုၼ်ႈတၵ်းတိုၵ်းသိုၵ်းဢေႃႈ။ ၵဝ်၊ ထႃႇဝရႃႉၽြႃး၊ ၽြႃးပဵၼ်ၸဝ်ႈသူၼႆႉတၵ်းၸွႆႈထႅမ်ၶျွတ်ႈဢဝ်သူဢွၵ်ႇသေၵႃႈၼႂ်းမိုဝ်းရၢၼ်ႇသူႇသူဢေႃႈ။-
ဝၼ်းဢၼ်သူႁဵတ်းဢၼ်သႂၢင်ႇဢၼ်သိူဝ်းဝၼ်းပွႆးလိူၼ်မႂ်ႇလႄႈဝၼ်းပွႆးထမ်ႇမႃႉၸိူဝ်းၼၼ်ႉသူတၵ်းလႆႈပဝ်ႇၼႄးၶရႃႇမိူဝ်ႈဢၼ်သူသၢၵ်ႈလူႇတၢင်းလူႇဢၼ်တုတ်ႇၽႆး၊ဢိၵ်ႇတင်းတၢင်းလူႇမိၵ်ႈသႁႃႇယႃႉၸိူဝ်းၼၼ်ႉဢေႃႈ။ မိူဝ်ႈၼၼ်ႉ၊ၵဝ်တၵ်းၸွႆႈထႅမ်သူဢေႃႈ။ ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။”
ဝၢႆးသေဢၼ်ၵူၼ်းမဵဝ်း ဢိသရေး၊ တင်းလၢႆဢွၵ်ႇမိူင်း ဢေးၵျိပ်ႉ၊ ၵႂႃႇလႆႈသွင်ပီ၊ၼႂ်းလိူၼ်တီႈသွင်လႆႈသၢဝ်းဝၼ်းၼၼ်ႉၸိုင်၊မွၵ်ႇၵုမ်ႈယုၵ်ႉၽၢတ်ႇသေၵႃႈၼိူဝ်သုမ်ႉထဵင်ၸဝ်ႈဢေႃႈ။-
ၵူၼ်းမဵဝ်း ဢိသရေး၊ တင်းလၢႆၵေႃႈဢွၼ်ၵၼ်ဢွၵ်ႇသေၵႃႈတီႈထိူၼ်ႇ သိၼႃႉ၊ လႄႈၵႂႃႇဢေႃႈ။ မွၵ်ႇၵုမ်ႈၼၼ်ႉၵႂႃႇလႄႈၵိုတ်းသဝ်းယူႇၵႃႈတီႈထိူၼ်ႇ ပႃႇရၼ်ႇ၊ ဢေႃႈ။
ၶဝ်ဢွၼ်ၵၼ်ဢွၵ်ႇၵႂႃႇၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉတီႈ မူဝ်းသေႇ၊ ပဵၼ်ၵမ်းဢွၼ်တၢင်းသေပိူၼ်ႈဢေႃႈ။-
ႁဵတ်းၼၼ်လႄႈၶဝ်ဢွၵ်ႇၵႂႃႇပွၵ်ႈလႂ်သေဢမ်ႇဝႃႈ၊ၶဝ်ၶပ်ႉၸွမ်းၵႂႃႇမိူၼ်မိူၼ်ၵၼ်ၵူႈပွၵ်ႈဢေႃႈ။ ၵႃႈတႂ်ႈလၢမ်ႇတပ်ႉဢၼ်ၸၢပ်ႈသႅင်ႇၵၼ်တင်းမုၵ်ႉၸုမ်း ယုတႃႉ၊ ၼၼ်ႉ၊ၸွမ်းၼင်ႇၶိူဝ်းႁိူၼ်းၽႂ်ၶိူဝ်းႁိူၼ်းမၼ်းၶပ်ႉၵၼ်ၵႂႃႇဢေႃႈ။ ၼႃႇသုၼ်ႇ၊ လုၵ်ႈၸၢႆး ဢမိၼတပ်ႉ၊ ပဵၼ်ၽူႈဢွၼ်ႁူဝ်ၸိူဝ်ႉၶိူဝ်း ယုတႃႉ၊ လႄႈဢွၵ်ႇၵႂႃႇဢွၼ်တၢင်းပိူၼ်ႈဢေႃႈ။-
ၼႃႇႀၼေႇလႃႉ၊ လုၵ်ႈၸၢႆး ၸုဢႃႇ၊ ဢွၼ်ႁူဝ်ၸိူဝ်ႉၶိူဝ်း ဢိသၶႃႇ၊ လႄႈ၊-
ဢေးလျႃႇၽႃႉ၊ လုၵ်ႈၸၢႆး ႁေႇလုၼ်ႇ၊ ဢွၼ်ႁူဝ်ၸိူဝ်ႉၶိူဝ်း ၸေႇပုလုၼ်ႇ၊ ၵႂႃႇဢေႃႈ။
ပူတ်းၶျႃးသုမ်ႉထဵင်ၸဝ်ႈလူင်းသေလႄႈ၊လုၵ်ႈလၢၼ်ၶိူဝ်းႁိူၼ်း ၵေႇရသုၼ်ႇ၊ တင်းၶိူဝ်းႁိူၼ်း မေႇရႃႇရိ၊ ၸိူဝ်းၼၼ်ႉမႅၵ်ႇဢဝ်ပႃးဢဝ်သုမ်ႉထဵင်ၸဝ်ႈလႄႈဢွၵ်ႇၵႂႃႇဢေႃႈ။
လိုၼ်းၼၼ်ႉ၊ၵႃႈတႂ်ႈလၢမ်ႇတပ်ႉဢၼ်ၸၢပ်ႈသႅင်ႇၵၼ်တင်းမုၵ်ႉၸုမ်း ရုပိၼ်ႇ၊ ၼၼ်ႉၸွမ်းၼင်ႇၶိူဝ်းႁိူၼ်းၽႂ်ၶိူဝ်းႁိူၼ်းမၼ်းတၢမ်းၵၼ်ၵႂႃႇဢေႃႈ။ ဢေးလိၸုရႃႉ၊ လုၵ်ႈၸၢႆး သေႇတုရႃႉ၊ ဢွၼ်ႁူဝ်ၸိူဝ်ႉၶိူဝ်း ရုပိၼ်ႇ၊ ဢွၵ်ႇၵႂႃႇလႄႈ၊-
သေႇလုမျေးလႃႉ၊ လုၵ်ႈၸၢႆး ၸုရိသတ်ႉတေႇ၊ ဢွၼ်ႁူဝ်ၸိူဝ်ႉၶိူဝ်း သိမုၼ်ႇ၊ လႄႈ၊-
ဢေးလျႃႇသပ်ႉ၊ လုၵ်ႈၸၢႆး တုၺ်းလႃႉ၊ ဢွၼ်ႁူဝ်ၸိူဝ်ႉၶိူဝ်း ၵၢတ်ႉ၊ ဢေႃႈ။
မိူဝ်ႈၼၼ်ႉ၊ၵူၼ်း လေႇဝိ၊ ၶိူဝ်းႁိူၼ်း ၵေႃႇႁတ်ႉ၊ ၸိူဝ်းၼၼ်ႉႁၢမ်ဢဝ်ၶိူင်ႈပိူင်ဢၼ်မူတ်းၸၢင်ႇၸဝ်ႈသေလႄႈဢွၵ်ႇၵႂႃႇဢေႃႈ။ ၸူဝ်ႈဢၼ်ၶဝ်ဢမ်ႇပႆႇႁွတ်ႈပႆႇၽႅဝ်ၼၼ်ႉၸိုင်၊ၶဝ်ၸိူဝ်းဢၼ်ၵႂႃႇဢွၼ်တၢင်းၸိူဝ်းၼၼ်ႉပူၵ်းတင်ႈသုမ်ႉထဵင်ၸဝ်ႈပႂ်ႉထႃႈဝႆႉဢေႃႈ။
လိုၼ်းၼၼ်ႉ၊ၵႃႈတႂ်ႈလၢမ်ႇတပ်ႉဢၼ်ၸၢပ်ႈသႅင်ႇၵၼ်တင်းမုၵ်ႉၸုမ်း ဢေႇၽရိမ်ႇ၊ ၼၼ်ႉၵေႃႈၸွမ်းၼင်ႇၶိူဝ်းႁိူၼ်းၽႂ်ၶိူဝ်းႁိူၼ်းမၼ်းတၢမ်းၵၼ်ၵႂႃႇဢေႃႈ။ ဢေးလိသမႃႇ၊ လုၵ်ႈၸၢႆး ဢမိႁုတ်ႉ၊ ဢွၼ်ႁူဝ်ၸိူဝ်ႉၶိူဝ်း ဢေႇၽရိမ်ႇ၊ ဢွၵ်ႇၵႂႃႇလႄႈ၊-
ၵႃႇမလျေးလႃႉ၊ လုၵ်ႈၸၢႆး ပေႇတႃႉၸုရႃႉ၊ ဢွၼ်ႁူဝ်ၸိူဝ်ႉၶိူဝ်း မၼႃႇသေႇ၊ လႄႈ၊-
ဢၽိတၼ်ႇ၊ လုၵ်ႈၸၢႆး ၵိတေႃးၼိ၊ ဢွၼ်ႁူဝ်ၶိူဝ်းႁိူၼ်း ပိၼ်ႇယႃႇမိၼ်ႇ၊ ဢေႃႈ။
လိုၼ်းလင်သုတ်းပိူၼ်ႈၵႃႈတႂ်ႈလၢမ်ႇတပ်ႉဢၼ်ၸၢပ်ႈသႅင်ႇၵၼ်တင်းမုၵ်ႉၸုမ်း တၢၼ်ႇ၊ ၼၼ်ႉၵိုတ်ႉႁၢပ်ႇၼႃႈၵၢၼ်တၢင်းဢၼ်ႁႄႉၵင်ႈၼၼ်ႉပႃႈလင်လႄႈၸွမ်းၼင်ႇၶိူဝ်းႁိူၼ်းၽႂ်ၶိူဝ်းႁိူၼ်းမၼ်းတၢမ်းၸွမ်းၵၼ်ၵႂႃႇဢေႃႈ။ ဢႁေႇၸႃႇ၊ လုၵ်ႈၸၢႆး ဢမိသတ်ႉတေႇ၊ ဢွၼ်ႁူဝ်ၸိူဝ်ႉၶိူဝ်း တၢၼ်ႇ၊ ဢွၵ်ႇၵႂႃႇလႄႈ၊-
ပႃႇၵျေႇလႃႉ၊ လုၵ်ႈၸၢႆး ဢွၵ်ႉရၼ်ႇ၊ ဢွၼ်ႁူဝ်ၸိူဝ်ႉၶိူဝ်း ဢႃႇသျႃႇ၊ လႄႈ၊-
ဢႁိရႃႉ၊ လုၵ်ႈၸၢႆး ဢေႇၼၼ်ႇ၊ ဢွၼ်ႁူဝ်ၸိူဝ်ႉၶိူဝ်း ၼပ်ႉထလိ၊ ဢေႃႈ။-
ၼင်ႇၼၼ်လႄႈဢၼ်ၼႆႉပဵၼ်တၢင်းဢၼ်ၵူၼ်းမဵဝ်း ဢိသရေး၊ တင်းလၢႆၶၢႆႉပၢင်တပ်ႉလႄႈၶပ်ႉၵၼ်ၵႂႃႇၸွမ်းလူၺ်ႈမုၵ်ႉၸုမ်းၶဝ်ႁင်းၽႂ်ႁင်းမၼ်းဢွၵ်ႇၵႂႃႇၼၼ်ႉဢေႃႈ။
မူဝ်းသေႇ၊ လၢတ်ႈတီႈ ႁေႃးပပ်ႉ၊ လုၵ်ႈၸၢႆး ယေႇႀရေႃး၊ ၵူၼ်းမဵဝ်း မိတျၼ်ႇ၊ ဢၼ်ပဵၼ်ပေႃးဢွၵ်ႇၼၢႆးမၼ်းၼၼ်ႉလႄႈဝႃႈ၊ “ႁဝ်းၼႆႉၸမ်ႉ၊တၵ်းဢွၵ်ႇလႄႈၵႂႃႇၸူးတီႈဢၼ် ထႃႇဝရႃႉၽြႃး၊ ဝႆႉၵတိဝႃႈ၊မၼ်းၸဝ်ႈတၵ်းပၼ်တီႈႁဝ်းၼၼ်ႉယဝ်ႉ။ မၼ်းၸဝ်ႈပၼ်ၵတိဢၼ်တၵ်းႁႂ်ႈႁဝ်းၶိုၼ်ႈယႂ်ႇမႂ်ႇသုင်ဢေႃႈ။ မႃးၸွမ်းႁဝ်းတႃႉ၊ႁဝ်းတၵ်းမႅင်ႇပၼ်ဢမူၺ်ႇဢုၵ်ႉၸႃႇၼၼ်ႉတီႈမႂ်းဢေႃႈ၊” ဝႃႈၼင်ႇၼႆဢေႃႈ။
ႁေႃးပပ်ႉ၊ ၶိုၼ်းလၢတ်ႈလႄႈဝႃႈ၊ “ၵဝ်ဢမ်ႇၵႂႃႇၸွမ်းယဝ်ႉ။ ၵဝ်တၵ်းၶိုၼ်းမိူဝ်းၸူးဝၢၼ်ႈၵဝ်ႇမိူင်းလင်ၵဝ်၊တီႈဢၼ်ပီႈၼွင်ႉၸိူဝ်ႉၶိူဝ်းၵဝ်ယူႇၼၼ်ႉဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ သမ်ႉလၢတ်ႈလႄႈဝႃႈ၊ “ယႃႇပေၸုၼ်ႉပႅတ်ႈႁဝ်းၵႂႃႇသေၵမ်း။ မႂ်းႁုလွင်ႈဢၼ်ႁဝ်းတၵ်းၶျႃးပၢင်တပ်ႉၵႃႈၼႂ်းထိူၼ်ႇၵႃႈတီႈလႂ်ၼၼ်ႉဢေႃႈ။ မႂ်းၸၢင်ႈၼႄတၢင်းပၼ်ႁဝ်းလႆႈဢေႃႈ။-
ပေႃးမႂ်းမႃးၸွမ်းႁဝ်းၸိုင်၊ၵႃႈၼင်ႇဢၼ် ထႃႇဝရႃႉၽြႃး၊ ပၼ်တၢင်းလီတီႈႁဝ်းၼၼ်ႉႁဝ်းတၵ်းမႅင်ႇပၼ်မႂ်းဢေႃႈ၊” ဝႃႈၼင်ႇၼႆဢေႃႈ။
ၵူၼ်းမဵဝ်း ဢိသရေး၊ တင်းလၢႆဢွၵ်ႇသေၵႃႈတီႈလွႆ ထႃႇဝရႃႉၽြႃး၊ ဢၼ်ဝႃႈလွႆ သိၼႃႉ၊ လႄႈၵႂႃႇၶၢဝ်းတၢင်းသၢမ်ဝၼ်းဢေႃႈ။ တိူၵ်ႈပတိၺိၺ်ႇ ထႃႇဝရႃႉၽြႃး၊ ၼၼ်ႉဢွၼ်ႁူဝ်ၶဝ်ၵႂႃႇတႃႇသေႇႁႂ်ႈလႆႈႁႃတီႈပုၼ်ႈဢၼ်ၶဝ်တၵ်းၶျႃးပၢင်တပ်ႉဢေႃႈ။-
ယၢမ်းမိူဝ်ႈဢၼ်ၶဝ်ယင်းတိုၵ်ႉဢွၵ်ႇၵႂႃႇယူႇၼၼ်ႉမွၵ်ႇၵုမ်ႈ ထႃႇဝရႃႉၽြႃး၊ ၼၼ်ႉမီးၵႃႈၼိူဝ်ၶဝ်ၶိင်ႇၵၢင်ဝၼ်းဢေႃႈ။
မိူဝ်ႈဢၼ်တႄႇၸႃႉဢဝ်တိူၵ်ႈပတိၺိၺ်ႇၸဝ်ႈၵႂႃႇၼၼ်ႉၸိုင်၊ မူဝ်းသေႇ၊ လဝ်ႈလၢတ်ႈလႄႈဝႃႈ၊ “ဢူဝ်း၊ ထႃႇဝရႃႉၽြႃး၊ တီႈၶႃႈ။ လုၵ်ႉသေၵမ်းတီႈၶႃႈ။ ႁႂ်ႈရၢၼ်ႇသူႇၸဝ်ႈႁဝ်းတႅၵ်ႇယၢႆႈၽၢတ်ႇၽႄၵႂႃႇသေၵမ်းတီႈၶႃႈ။ ႁႂ်ႈၶဝ်ၸိူဝ်းဢၼ်ၸင်းၸဝ်ႈႁဝ်းၼၼ်ႉဢွၵ်ႇပၢႆႈသေၵႃႈတီႈၸဝ်ႈႁဝ်းၵႂႃႇသေၵမ်းတီႈၶႃႈ၊” ဝႃႈၼင်ႇၼႆဢေႃႈ။-
မိူဝ်ႈဢၼ်တိူၵ်ႈပတိၺိၺ်ႇၸဝ်ႈၵိုတ်းသဝ်းၼၼ်ႉၸိုင်၊ မူဝ်းသေႇ၊ လၢတ်ႈလႄႈဝႃႈ၊ “ဢူဝ်း၊ ထႃႇဝရႃႉၽြႃး၊ ၶိုၼ်းမႃးၵႃႈတီႈဢၼ်ၵူၼ်းမဵဝ်း ဢိသရေး၊ မီးယူႇပဵၼ်မိုၼ်ႇပဵၼ်သႅၼ်ၼႆႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၵူၼ်းတင်းလၢႆတႄႇၸႃႉပွင်ႉမိုၼ်ႇပွင်ႉဝႃႈလူၺ်ႈလွင်ႈတုၵ်ႉၶႃႉတၢင်းယၢပ်ႇၶဝ်တီႈ ထႃႇဝရႃႉၽြႃး၊ ဢေႃႈ။ မိူဝ်ႈဢၼ် ထႃႇဝရႃႉၽြႃး၊ လႆႈငိၼ်းၵႂၢမ်းၶဝ်ၼၼ်ႉလႄႈ၊မၼ်းၸဝ်ႈၸႂ်မႆႈၶႂ်ႈၸႃႉၶဝ်ၼႃႇလူင်လၢင်သေယဝ်ႉ၊ၽႆး ထႃႇဝရႃႉၽြႃး၊ မႆႈၼႂ်းၵၢင်ၶဝ်လႄႈယႃႉပႅတ်ႈၵႃႈတီႈႁိမ်းလႅၼ်သုတ်းပၢင်တပ်ႉၶဝ်ဢေႃႈ။-
ၵမ်းၼၼ်ႉ၊ၵူၼ်းတင်းလၢႆဢွၼ်ၵၼ်ႁွင်ႉသႅၼ်ႇတီႈ မူဝ်းသေႇ၊ ပုၼ်ႈတၢင်းၸွႆႈတၢင်းထႅမ်သေလႄႈ၊ မူဝ်းသေႇ၊ သူးတွင်းတီႈ ထႃႇဝရႃႉၽြႃး၊ သေယဝ်ႉ၊ၽႆးၼၼ်ႉယဵၼ်ၵႂႃႇဢေႃႈ။-
ၵွပ်ႈပိူဝ်ႈၽႆး ထႃႇဝရႃႉၽြႃး၊ မႆႈၼႂ်းၵၢင်ၶဝ်ၼၼ်ႉလႄႈ၊တီႈၼၼ်ႈလႆႈမီးၸိုဝ်ႈဢၼ်ႁွင်ႉဝႃႈ၊ တပေႇရႃႉ၊ ဢေႃႈ။
ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းဢၼ်ပႃးလူၺ်ႈၵၼ်တင်းၵူၼ်းမဵဝ်း ဢိသရေး၊ ၶဝ်မႃးၸိူဝ်းၼၼ်ႉမီးၸႂ်ဢၼ်ၸပ်းၸွႆးၶႂ်ႈၵိၼ်ၼိူဝ်ႉဢေႃႈ။ ၵူၼ်းမဵဝ်း ဢိသရေး၊ ၶဝ်ၵေႃႈယင်းပွင်ႉၶၢင်းလႄႈဝႃႈ၊ “ႁဝ်းသမ်ႉပႄႉမႃးဢိုပ်းၼိူဝ်ႉထၼ်ႇၼႆႉ။-
ၵႃႈၼႂ်းမိူင်း ဢေးၵျိပ်ႉ၊ ၼၼ်ႉႁဝ်းလႆႈၵိၼ်ၼိူဝ်ႉၵိၼ်ပႃဢၼ်ယင်းဢမ်ႇလူဝ်ႇပၼ်ၵႃႈပၼ်ၶၼ်ၼၼ်ႉဢိမ်ႇဢိမ်ႇဢေႃႈ။ ၶုၵ်းၸႂ်လႆႈတႅင်၊တႅင်ၸမ်ႈပူႇ၊တင်းၽၵ်းမီႇၶၢဝ်ၽၵ်းမီႇလႅင်ၸိူဝ်းၼၼ်ႉတႄႉဢေႃႈ။-
တေႃႈလဵဝ်ၼႆႉဢဵၼ်ႁႅင်းႁဝ်းဢူၼ်ႈၵႂႃႇၸွပ်ႈၵႂႃႇယဝ်ႉ။ တႃႇတေၵိၼ်ၸိုင်၊ဢမ်ႇမီးၵႃႈသင်လႃးလႃး။ ၵူႈမိုဝ်ႉၵူႈဝၼ်းၼွၵ်ႈသေၶဝ်ႈမုၼ်း မၼ်ႇၼႃႉ၊ ၼႆႉဢမ်ႇမီးသေၸိူဝ်ႉသေမဵဝ်းယဝ်ႉ၊” ဝႃႈၼင်ႇၼႆဢေႃႈ။
ၶဝ်ႈမုၼ်း မၼ်ႇၼႃႉ၊ ၼၼ်ႉမိူၼ်ၸိူဝ်ႉၼင်ႇမဵတ်ႉၽၼ်းၽၵ်းၵီးလႄႈမီးငဝ်းဢၼ်လိူင်ၽိူၵ်ႇဝႆႉဢေႃႈ။-
ၵူၼ်းတင်းလၢႆဢွၼ်ၵၼ်လႄႇလဵပ်ႈၵႂႃႇၵဵပ်းသိမ်းဢဝ်မႃးလႄႈၶိုတ်ႈၵႃႈၼႂ်းလူၺ်၊ဢမ်ႇၼၼ်ၵေႃႈတမ်ၵႃႈၼႂ်းၶူၵ်ႉမိုဝ်းသေယဝ်ႉ၊တူမ်ႈၵႃႈၼႂ်းမေႃႈလႄႈၵိၼ်ဢေႃႈ။ ၶဝ်ႈမုၼ်းၶႅပ်းၵေႃႈႁဵတ်းၵိၼ်ဢေႃႈ။ ဢရႃႉသႃႇမၼ်းမိူၼ်ၸိူဝ်ႉၼင်ႇၶဝ်ႈမုၼ်းၶူဝ်ႈၼမ်ႉမၼ်းၼၼ်ႉဢေႃႈ။-
ၶဝ်ႈမုၼ်း မၼ်ႇၼႃႉ၊ ၼၼ်ႉတူၵ်းမႃးၵႃႈတီႈပၢင်တပ်ႉၶိင်ႇၵၢင်ၶိုၼ်း၊တူၵ်းမႃးၸွမ်းလူၺ်ႈၵၼ်တင်းၼမ်ႉၼၢႆးဢေႃႈ။
မူဝ်းသေႇ၊ လႆႈငိၼ်းတၢင်းဢၼ်ၵူၼ်းႁိူၼ်းၵူၼ်းယေးၶဝ်ၸုၵ်းယူႇပဵၼ်မူႇပဵၼ်မူႇလႄႈပွင်ႉမိုၼ်ႇပွင်ႉၶၢင်းယူႇၵႃႈတီႈၽၢႆႇၼႃႈၽၵ်းတူသုမ်ႉထဵင်ၶဝ်ႁင်းၽႂ်ႁင်းမၼ်းၼၼ်ႉဢေႃႈ။ မူဝ်းသေႇ၊ မီးတၢင်းဢၼ်ၸႂ်လဵၵ်ႉၼႃႇလူင်လၢင်ၵွပ်ႈပိူဝ်ႈ ထႃႇဝရႃႉၽြႃး၊ ၸႂ်မႆႈၶႂ်ႈၸႃႉၶဝ်ယူႇၼၼ်ႉဢေႃႈ။-
မၼ်းၸင်ႇလဝ်ႈလၢတ်ႈတီႈ ထႃႇဝရႃႉၽြႃး၊ လႄႈဝႃႈ၊ “ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းၼိၵ်ႈၸၢၵ်ႈငႅၼ်းသႄးၶႃႈၸဝ်ႈႁဝ်းထၢၼ်ႇၼႆႉၼင်ႇႁိုဝ်တီႈၶႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းပၼ်ပုၼ်ႈၽွၼ်းႁႂ်ႈၶႃႈၸဝ်ႈႁဝ်းဢွၼ်ႁူဝ်ၵူၼ်းၸိူဝ်းၼႆႉတီႈၶႃႈ။-
ၶႃႈၸဝ်ႈႁဝ်းၼႆႉဢမ်ႇလႆႈႁဵတ်းႁႂ်ႈၶဝ်ၵိူတ်ႇပဵၼ်မႃး။ ဢမ်ႇလႆႈပႃးတွင်ႉလႄႈၵိူတ်ႇပဵၼ်ၶဝ်ၸိူဝ်းၼႆႉမႃးတီႈၶႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းႁႂ်ႈၶႃႈၸဝ်ႈႁဝ်းၼႆႉဢုမ်ႈႁွပ်ႇဢဝ်ၶဝ်ၵႃႈၼႂ်းတၵ်းမိူၼ်ၸိူဝ်ႉၼင်ႇၵူၼ်းလုမ်းလႃးလုၵ်ႈဢွၼ်ႇသေလႄႈဢွၼ်ဢဝ်ၶဝ်ၵႂႃႇၸူးတီႈမိူင်းဢၼ်ၸဝ်ႈႁဝ်းဝႆႉၵတိတီႈပူႇမွၼ်ႇၶဝ်ၼၼ်ႉတီႈၶႃႈ။-
ၶႃႈၸဝ်ႈႁဝ်းၼႆႉတၵ်းလႆႈၼိူဝ်ႉၵႃႈတီႈလႂ်မႃးပုၼ်ႈဢၼ်တၵ်းလဵင်ႉၵူၼ်းၸိူဝ်းၼႆႉတီႈၶႃႈ။ ၶဝ်ဢွၼ်ၵၼ်ၶႂ်ႈၵိၼ်ၼိူဝ်ႉလႄႈယွၼ်းၵိၼ်ယူႇတီႈၶႃႈယဝ်ႉ။-
ၶႃႈၸဝ်ႈႁဝ်းၵေႃႉလဵဝ်ၵူၺ်းဢမ်ႇပႄႉၵိုတ်ႉႁၢပ်ႇပုၼ်ႈၽွၼ်းပုၼ်ႈၵူၼ်းၸိူဝ်းၼႆႉတီႈၶႃႈ။ ပဵၼ်ဢၼ်ၼၵ်းၼႃလိူဝ်တွၼ်းၼႃႇတီႈၶႃႈဢေႃႈ။-
ပေႃးၸဝ်ႈႁဝ်းယင်းႁဵတ်းၸိူဝ်ႉၼင်ႇၼႆတီႈၶႃႈၸဝ်ႈႁဝ်းယူႇၸိုင်၊ၶႅၼ်းတေႃႈဢဵတ်းလူလႄႈဢဝ်ၶႃႈၸဝ်ႈႁဝ်းတၢႆၶၼ်ၶၼ်ၽႂ်းၽႂ်းသေၵမ်းတီႈၶႃႈ။ ယႃႇပေႁႂ်ႈၶႃႈၸဝ်ႈႁဝ်းလႆႈႁၼ်တုၵ်ႉၶႃႉၶၢၼ်ၸႂ်ၼႆႉသေၵမ်းၶႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၵေႃႈမီးဢမိင်ႉတီႈ မူဝ်းသေႇ၊ လႄႈဝႃႈ၊ “ႁွင်ႉဢဝ်ၵူၼ်းဢၼ်မီးသရေႇၼႃႈတႃၸဵတ်းသိပ်းၵေႃႉ၊ဢၼ်ၵူၼ်းတင်းလၢႆမၢတ်ႈပဵၼ်ၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်း ဢိသရေး၊ ၸိူဝ်းၼၼ်ႉမႃးၸုၵၼ်တုမ်ၵၼ်ၵႃႈတီႈသုမ်ႉထဵင်ၸဝ်ႈၼၼ်ႉသေလႄႈႁႂ်ႈၶဝ်ၸုၵ်းယူႇလူၺ်ႈၵၼ်တင်းမႂ်းတႃႉ။-
ၵဝ်တၵ်းလူင်းမႃးလၢတ်ႈတေႃႇၵၼ်တင်းမႂ်းၵႃႈတီႈၼၼ်ႈဢေႃႈ။ ၵဝ်တၵ်းဢဝ်ဝိၺိၺ်ႇဢၼ်ၵဝ်ပၼ်မႂ်းဝႆႉၼၼ်ႉၵမ်ႈၽွင်ႈလႄႈပၼ်တီႈၶဝ်၊ႁႂ်ႈၶဝ်လႆႈၸွႆႈမႂ်းၵိုတ်ႉႁၢပ်ႇပုၼ်ႈၽွၼ်းပုၼ်ႈၵူၼ်းတင်းလၢႆလႄႈ၊မႂ်းဢမ်ႇလႆႈၵိုတ်ႉႁၢပ်ႇၵေႃႉလဵဝ်ၵူၺ်းယဝ်ႉ။-
ၵမ်းၼႆႉ၊သင်ႇလၢတ်ႈၵူၼ်းတင်းလၢႆလႄႈဝႃႈ၊ ‘ႁႂ်ႈတူဝ်သူမူတ်းၸၢင်ႇပုၼ်ႈဝၼ်းမိူဝ်ႈၽုၵ်ႈတႃႉ။ သူတၵ်းလႆႈၵိၼ်ၼိူဝ်ႉဢေႃႈ။ ထႃႇဝရႃႉၽြႃး၊ လႆႈငိၼ်းတၢင်းဢၼ်သူဢေႁႃလႄႈယွၼ်းၼိူဝ်ႉပုၼ်ႈတၢင်းၵိၼ်၊ဢိၵ်ႇတင်းလွင်ႈဢၼ်သူဝႃႈသူလႆႈလီလႆႈပဵၼ်ၵႃႈၼႂ်းမိူင်း ဢေးၵျိပ်ႉ၊ ၼၼ်ႉယဝ်ႉဢေႃႈ။ ပိူဝ်ႈၼႆလႄႈ၊ ထႃႇဝရႃႉၽြႃး၊ တၵ်းပၼ်ၼိူဝ်ႉတီႈသူလႄႈသူတေလႆႈၵိၼ်ယဝ်ႉ။-
သူတၵ်းလႆႈၵိၼ်ဝၼ်းၼိုင်ႈ၊သွင်ဝၼ်းၵူၺ်း၊ဢမ်ႇၼၼ်ႁႃႈဝၼ်း၊သိပ်းဝၼ်း၊သၢဝ်းဝၼ်းၵူၺ်းဢမ်ႇၸႂ်ႈ။-
သူတၵ်းလႆႈၵိၼ်လိူၼ်ၼိုင်ႈတဵမ်တဵမ်တေႃႇထိုင်ႁွတ်ႈထၢၼ်ႈပေႃးဢိမ်ႇပေႃးမိူဝ်ႇလႄႈ၊ပဵၼ်ဢၼ်လီႁင်ႈဢဵတ်ႇသဵတ်ႇတီႈသူဢေႃႈ။ တၵ်းပဵၼ်မႃးၸိူဝ်ႉၼင်ႇၼႆၵွပ်ႈပိူဝ်ႈသူထဵင်ပႅတ်ႈ ထႃႇဝရႃႉၽြႃး၊ ဢၼ်မီးယူႇၵႃႈၼႂ်းသူဢိၵ်ႇတင်းၵွပ်ႈပိူဝ်ႈသူႁွင်ႉႁႆႈၵႃႈတီႈၽၢႆႇၼႃႈမၼ်းၸဝ်ႈလႄႈဝႃႈ၊ “သင်ႁဝ်းဢမ်ႇလႆႈဢွၵ်ႇမိူင်း ဢေးၵျိပ်ႉ၊ မႃးၸိုင်၊ယဵင်ႈၶႅၼ်းတေလီဢေႃႈ၊” သူဝႃႈၼင်ႇၼႆယဝ်ႉ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈၶိုၼ်းလဝ်ႈလၢတ်ႈတီႈ ထႃႇဝရႃႉၽြႃး၊ လႄႈဝႃႈ၊ “ၵူၼ်းၵႃႈဢၼ်ၶႃႈၸဝ်ႈႁဝ်းဢွၼ်ၵႂႃႇဢွၼ်ပႆယူႇၼႆႉမီးႁူၵ်းသႅၼ်ၵေႃႉတီႈၶႃႈဢေႃႈ။ ၸဝ်ႈႁဝ်းသမ်ႉယင်းဝႃႈ၊ ‘ၵဝ်တၵ်းပၼ်ၼိူဝ်ႉပုၼ်ႈတႃႇတေၵိၼ်ၵုမ်ႇလိူၼ်ၼိုင်ႈ၊’ ဝႃႈၼင်ႇၼႆတီႈၶႃႈယဝ်ႉ။-
တၵ်းလႆႈဢဝ်ၽုင်ဝူဝ်း၊ၽုင်သူဝ်း၊ၽုင်ပႄႉတင်းလၢႆႁႅမ်လဵင်ႉၶဝ်ဢိမ်ႇဢိမ်ႇတဵမ်တဵမ်လႆႈတီႈၶႃႈႁိုဝ်း၊ဢမ်ႇၼၼ်လႄႈတၵ်းလႆႈဢဝ်ပႃပၢင်ႇလၢႆႇၵႃႈမီးၸုၵၼ်တုမ်ၵၼ်ႁႂ်ႈလႆႈလဵင်ႉပၼ်ၶဝ်ဢိမ်ႇဢိမ်ႇတဵမ်တဵမ်တီႈၶႃႈႁိုဝ်း၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၶိုၼ်းလၢတ်ႈလႄႈဝႃႈ၊ “ၸွင်ႇတၼ်းၶူဝ်းၵဝ်မီးတီႈတိူၵ်ႈတီႈသုတ်းႁိုဝ်း။ တၢင်းဢၼ်ၵဝ်ဝႃႈၵႂႃႇၼၼ်ႉတၵ်းပဵၼ်လႆႈႁိုဝ်၊တၵ်းဢမ်ႇပဵၼ်လႆႈႁိုဝ်ၼၼ်ႉ၊မႂ်းတၵ်းၸဵဝ်းလႆႈႁၼ်ဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈဢွၵ်ႇၵႂႃႇလႄႈဢဝ်ၵႂၢမ်း ထႃႇဝရႃႉၽြႃး၊ ၼၼ်ႉသင်ႇလၢတ်ႈတီႈၵူၼ်းတင်းလၢႆဢေႃႈ။ မၼ်းၸႂ်ႉႁႂ်ႈၵူၼ်းဢၼ်ပဵၼ်ၵႄႇပဵၼ်ႁူဝ်ၸဵတ်းသိပ်းၵေႃႉၼၼ်ႉၸုတုမ်ၵၼ်လဵပ်ႈႁွပ်ႈသုမ်ႉထဵင်ၸဝ်ႈဢေႃႈ။-
ထႃႇဝရႃႉၽြႃး၊ ယူႇၵႃႈၼႂ်းမွၵ်ႇၵုမ်ႈလူင်းမႃးလၢတ်ႈတေႃႇမၼ်းဢေႃႈ။ မၼ်းၸဝ်ႈဢဝ်ဝိၺိၺ်ႇဢၼ်မီးၵႃႈၼိူဝ် မူဝ်းသေႇ၊ ၼၼ်ႉၵမ်ႈၽွင်ႈပၼ်တီႈၵူၼ်းဢၼ်ပဵၼ်ၵႄႇပဵၼ်ႁူဝ်ၸဵတ်းသိပ်းၵေႃႉၼၼ်ႉဢေႃႈ။ မိူဝ်ႈဢၼ်ဝိၺိၺ်ႇတႄႇယူႇၵႃႈၼႂ်းၶဝ်ၼၼ်ႉၸိုင်၊ၶဝ်မေႃလၢတ်ႈၵႂၢမ်းၸိူဝ်ႉၼင်ႇပရေႃးၽႅတ်ႈ ဢေႃႈ။ ၵူၺ်းၵႃႈ၊ပဵၼ်ၸိူဝ်ႉၼင်ႇၼၼ်ႁိုင်ၼႃႇတႄႉဢမ်ႇၸႂ်ႈဢေႃႈ။
ၼႂ်းၶဝ်ၸဵတ်းသိပ်းၵေႃႉၼၼ်ႉမီးၵူၼ်းသွင်ၵေႃႉဢၼ်ပဵၼ် ဢေးလတတ်ႉ၊ တင်း မေႇတတ်ႉ၊ ၼၼ်ႉဝိၺိၺ်ႇယင်းတိုၵ်ႉတႄႇယူႇၵႃႈၼႂ်းၶဝ်လႄႈၶဝ်ယင်းဢမ်ႇၵႂႃႇၵႃႈတီႈသုမ်ႉထဵင်ၸဝ်ႈ၊ယင်းၵိုတ်းၵျၢၼ်ႇယူႇၵႃႈၼႂ်းပၢင်တပ်ႉလႄႈႁဵတ်းပရေႃးၽႅတ်ႈယူႇၵႃႈၼႂ်းပၢင်တပ်ႉဝႆႉဢေႃႈ။-
ၵူၼ်းၼုမ်ႇၵေႃႉၼိုင်ႈလႅၼ်ႈၵႂႃႇမွၵ်ႇလၢတ်ႈတီႈ မူဝ်းသေႇ၊ လွင်ႈတၢင်းဢၼ် ဢေးလတတ်ႉ၊ တင်း မေႇတတ်ႉ၊ ႁဵတ်းပရေႃးၽႅတ်ႈယူႇၼၼ်ႉဢေႃႈ။
ယေႃးသု၊ လုၵ်ႈၸၢႆး ၼုၼ်ႇ၊ ၵေႃႉဢၼ်ပဵၼ်ၵူၼ်းၸွႆႈၵူၼ်းထႅမ် မူဝ်းသေႇ၊ မႃးၸဵမ်မိူဝ်ႈယင်းၼုမ်ႇၼၼ်ႉလၢတ်ႈတီႈ မူဝ်းသေႇ၊ လႄႈဝႃႈ၊ “ၸဝ်ႈႁဝ်း မူဝ်းသေႇ၊ ႟။ ႁၢမ်ႈတၢပ်ႈၶဝ်ပႅတ်ႈသေၵမ်းၶႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈလၢတ်ႈလႄႈဝႃႈ၊ “မႂ်းၼႆႉသီႈၵေႉႁေႈတႃပုၼ်ႈၵဝ်ႁိုဝ်း။ ၵဝ်ၶႂ်ႈႁႂ်ႈၵူၼ်း ထႃႇဝရႃႉၽြႃး၊ တင်းလၢႆပဵၼ်ပရေႃးၽႅတ်ႈဢေႃႈ။ ဢိၵ်ႇတင်းၶႂ်ႈယွၼ်းႁႂ်ႈမၼ်းၸဝ်ႈ၊ဢဝ်ဝိၺိၺ်ႇမၼ်းၸဝ်ႈတၢင်ႇသႂ်ႇပၼ်ၵႃႈၼိူဝ်ၶဝ်သေၵမ်းၶႃႈ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ မူဝ်းသေႇ၊ တင်းၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်း ဢိသရေး၊ ၶဝ်ၸဵတ်းသိပ်းၵေႃႉၼၼ်ႉဢွၼ်ၵၼ်ၶိုၼ်းမိူဝ်းၵႂႃႇၵႃႈတီႈပၢင်တပ်ႉသေဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ ႁႂ်ႈပဵၼ်လူမ်းလူင်လုၵ်ႉသေၵႃႈတီႈပၢင်ႇလၢႆႇထူဝ်းပတ်ႉမႃးလႄႈပႃးဢဝ်ၼူၵ်ႉၶုမ်ႈတင်းလၢႆမိၼ်မႃးတူၵ်းၵႃႈၼိူဝ်ၼႃႈလိၼ်လဵပ်ႈႁွပ်ႈၵႃႈတီႈပၢင်တပ်ႉၸူဝ်ႈတႃႇၶၢဝ်းတၢင်းဝၼ်းၼိုင်ႈၵူႈၽၢႆႇၵူႈပႃႈသမ်ႉပေႃးၼႃၶိုၼ်ႈသွင်သွၵ်ႇဢေႃႈ။-
ၵူၼ်းတင်းလၢႆဢွၼ်ၵၼ်ၵဵပ်းဢဝ်ၼူၵ်ႉၶုမ်ႈၸိူဝ်းၼၼ်ႉတင်းဝၼ်းတင်းၶိုၼ်း၊ဝၼ်းမိူဝ်ႈၽုၵ်ႈၵေႃႈတင်းဝၼ်းဢေႃႈ။ ၵေႃႉဢၼ်ၵဵပ်းလႆႈၵေႇသေပိူၼ်ႈၼၼ်ႉယင်းလႆႈႁႃႈသိပ်းတၢင်ဢေႃႈ။ ၶဝ်ဢွၼ်ၵၼ်ၽႄႇတၢၵ်ႇဝႆႉႁွပ်ႈပၢင်တပ်ႉၵႂႃႇၵူႈတီႈၵူႈလႅၼ်ဢေႃႈ။-
ၵူၺ်းၵႃႈ၊ယၢမ်းမိူဝ်ႈဢၼ်ၼိူဝ်ႉယင်းတိုၵ်ႉမီးယူႇၼမ်ၼႃႇလူင်လၢင်ၼၼ်ႉၸိုင်၊ ထႃႇဝရႃႉၽြႃး၊ ၸႂ်မႆႈၶႂ်ႈၸႃႉၶဝ်လႄႈႁႂ်ႈၽေးဢုပၢတ်ႈတူၵ်းႁွတ်ႈၵႃႈၼိူဝ်ၶဝ်ဢေႃႈ။-
တီႈၼၼ်ႈၸိုင်၊မီးၸိုဝ်ႈဢၼ်ႁွင်ႉဝႃႈ၊ ၵိပရုတ်ႉႁတ်ႉတဝႃႇ၊ ၵွပ်ႈပိူဝ်ႈပဵၼ်တီႈဢၼ်သၢင်းၵျူဝ်ႇၶဝ်ၸိူဝ်းဢၼ်ဢေႁႃၶႂ်ႈၵိၼ်ၼိူဝ်ႉၼႃႇၽႅဝ်ၼၼ်ႉဢေႃႈ။
လုၵ်ႉသေၵႃႈတီႈၼၼ်ႈလႄႈၵူၼ်းတင်းလၢႆၶၢႆႉၵႂႃႇၸူးၵႃႈတီႈ ႁႃႇၸရုတ်ႉ၊ ပဵၼ်တီႈဢၼ်ၶဝ်ပူၵ်းတင်ႈပၢင်တပ်ႉၶဝ်ၼၼ်ႉဢေႃႈ။
မူဝ်းသေႇ၊ ၼၼ်ႉပိူဝ်ႈဢၼ်ပဵၼ်ႁိူၼ်းႁူမ်ႈၵၼ်တင်းမႄႈယိင်းၵူၼ်းမဵဝ်း ဢေႇတီႇဢူဝ်းပီးယႃး၊ ၵေႃႉၼိုင်ႈလႄႈ၊ မေႇရီႇယမ်ႇ၊ တင်း ဢႃႇရုၼ်ႇ၊ တၢင်ႇဢပျတ်ႈမၼ်းလူၺ်ႈလွင်ႈၼၼ်ႉဢေႃႈ။-
ၶဝ်သွင်ၵေႃႉၼၼ်ႉလၢတ်ႈလႄႈဝႃႈ၊ “ ထႃႇဝရႃႉၽြႃး၊ ပၼ်ပျႃႇတိၵ်ႈၸဝ်ႈမႃးတီႈ မူဝ်းသေႇ၊ သၢင်ႉၼိုင်ႈၵူၺ်းႁိုဝ်း။ ထႃႇဝရႃႉၽြႃး၊ တိုၼ်းဢမ်ႇပၼ်ပျႃႇတိၵ်ႈၸဝ်ႈၵႃႈတီႈႁဝ်းသၢင်ႉၼိုင်ႈႁိုဝ်း၊” ဝႃႈၼင်ႇၼႆဢေႃႈ။ ထႃႇဝရႃႉၽြႃး၊ ငိၼ်းၵႂၢမ်းၶဝ်ၼၼ်ႉဢေႃႈ။-
မူဝ်းသေႇ၊ ၼၼ်ႉပဵၼ်ၵေႃႉဢၼ်ယဵင်ႈၶႅၼ်းဢူၼ်ႈဢွၼ်ႇၶျႃးတႅမ်ႇၼႃႇသေၵူၼ်းၵႃႈမီးၵႃႈၼိူဝ်လိၼ်မိူင်းၼႆႉတင်းသဵင်ႈတင်းမူတ်းဢေႃႈ။
မိူဝ်ႈၼၼ်ႉၵမ်းလဵဝ် ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ ဢိၵ်ႇတင်းတီႈ ဢႃႇရုၼ်ႇ၊ တင်း မေႇရီႇယမ်ႇ၊ လႄႈဝႃႈ၊ “သူဢွၼ်ၵၼ်ဢွၵ်ႇမႃးၸူးၵႃႈတီႈသုမ်ႉထဵင်ၸဝ်ႈၼၼ်ႉတင်းသၢမ်ၵေႃႉတႃႉ၊” ဝႃႈၼင်ႇၼႆဢေႃႈ။ ၶဝ်ၵေႃႈၵႂႃႇလႄႈ၊-
ထႃႇဝရႃႉၽြႃး၊ ယူႇၼႂ်းသဝ်မွၵ်ႇၵုမ်ႈလူင်းမႃးၸုၵ်းယူႇၵႃႈတီႈႁူးၽၵ်းတူသုမ်ႉထဵင်ၸဝ်ႈသေယဝ်ႉႁွင်ႉလႄႈဝႃႈ၊ “ ဢႃႇရုၼ်ႇ၊ တင်း မေႇရီႇယမ်ႇ၊ ” ဝႃႈၼင်ႇၼႆလႄႈ၊ၶဝ်ၵေႃႈဢွၼ်ၵၼ်သုတ်ႉၸူးဢေႃႈ။-
ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ထွမ်ႇၵႂၢမ်းၵဝ်တႃႉ၊မိူဝ်ႈဢၼ်ပရေႃးၽႅတ်ႈ မႃးမီးၵႃႈၼႂ်းသူၸိုင်၊ၵဝ်ႁႂ်ႈတူဝ်ၵဝ်ပေႃႇမႃးတီႈမၼ်းၼႂ်းရူႇပႃႇရူင်ႇ၊ဢိၵ်ႇတင်းပၼ်ပျႃႇတိၵ်ႈတီႈမၼ်းၼႂ်းတၢင်းၼွၼ်းၽၼ်ႁၼ်ဢေႃႈ။-
မိူဝ်ႈဢၼ်ၵဝ်ပၼ်ပျႃႇတိၵ်ႈတီႈၶႃႈၵဝ် မူဝ်းသေႇ၊ ၸိုင်၊ၵဝ်ဢမ်ႇႁဵတ်းၸိူဝ်ႉၼင်ႇၼၼ်။ ၵဝ်ဢဝ်ၵူၼ်းမဵဝ်း ဢိသရေး၊ ၵဝ်တင်းမူတ်းဢၢပ်ႈဝႆႉၵႃႈၼႂ်းမိုဝ်းမၼ်းဢေႃႈ။-
ပိူဝ်ႈၼႆလႄႈၵဝ်လၢတ်ႈတေႃႇမၼ်းၼႃႈတေႃႇၼႃႈ၊ပၼ်ပျႃႇတိၵ်ႈတီႈမၼ်းသၢင်းသၢင်းလၢင်းလၢင်းဢေႃႈ။ ဢမ်ႇဢဝ်တင်းၵႂၢမ်းဢၼ်လိုၵ်ႉဢၼ်လမ်ႇပၼ်။ မၼ်းလႆႈဢၶႂၢင်ႉဢၼ်ႁၼ်ပုင်ႇႁၢင်ႈ ထႃႇဝရႃႉၽြႃး၊ ဢေႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈသူႁတ်းလၢတ်ႈၶတ်းၵၼ်တင်းၶႃႈၵဝ် မူဝ်းသေႇ၊ ၼၼ်ႉ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၸႂ်မႆႈၶႂ်ႈၸႃႉတေႃႇၶဝ်လႄႈဢွၵ်ႇသေၵႃႈတီႈၶဝ်ၵႂႃႇသေယဝ်ႉ၊-
မွၵ်ႇၵုမ်ႈၵေႃႈယုၵ်ႉၽၢတ်ႇသေၵႃႈၼိူဝ်သုမ်ႉထဵင်ၸဝ်ႈၵႂႃႇဢေႃႈ။ မေႇရီႇယမ်ႇ၊ ၵေႃႈပဵၼ်တုတ်ႈၵႂႃႇၽိူၵ်ႇဝႆႉထၢၼ်ႇမူၺ်ႁႃႇဢေႃႈ။ မိူဝ်ႈဢၼ် ဢႃႇရုၼ်ႇ၊ တူၺ်းႁၼ် မေႇရီႇယမ်ႇ၊ ပဵၼ်တုတ်ႈၵႂႃႇၼၼ်ႉၸိုင်၊-
မၼ်းလၢတ်ႈတီႈ မူဝ်းသေႇ၊ လႄႈဝႃႈ၊ “ၸဝ်ႈ႟။ ၶႅၼ်းတေႃႈယႃႇပေႁႂ်ႈႁဝ်းၶႃႈလႆႈထူပ်းၽေးတၢမ်ႇပုၼ်ႈဢပျတ်ႈဢၼ်ႁဝ်းၶႃႈၽိတ်းပိူင်ႈၼႆႉသေၵမ်းၶႃႈ။-
ယႃႇပေႁႂ်ႈမၼ်းလႆႈပဵၼ်မိူၼ်ၸိူဝ်ႉၼင်ႇတူဝ်တၢႆဢၼ်ၵိူတ်ႇလဵင်ႉမႃးဢၼ်ၼိူဝ်ႉလၢၼ်ႈၵႂႃႇၽၢၵ်ႇၼိုင်ႈယဝ်ႉၼၼ်ႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ႁွင်ႉသႅၼ်ႇတီႈ ထႃႇဝရႃႉၽြႃး၊ လႄႈဝႃႈ၊ “ဢူဝ်း၊ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈႁႂ်ႈတၢင်းပဵၼ်မၼ်းႁၢႆသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၶိုၼ်းလၢတ်ႈတီႈ မူဝ်းသေႇ၊ လႄႈဝႃႈ၊ “ပေႃးပေႃႈမၼ်းထူမ်ႇၼမ်ႉလၢႆးသႂ်ႇၼႃႈမၼ်းၵူၺ်းၵေႃႈမၼ်းယင်းတၵ်းလႆႈဢူၵ်းလႆႈဢၢႆၸဵတ်းဝၼ်းတဵမ်တဵမ်လူးၵွၼ်ႇဢမ်ႇၸႂ်ႈႁိုဝ်း။ လွင်ႈၼႆႉၵေႃႈႁေႃႈမၼ်းဢွၵ်ႇလႄႈႁႂ်ႈမၼ်းယူႇၼွၵ်ႈပၢင်တပ်ႉၸဵတ်းဝၼ်းတဵမ်တဵမ်တႃႉ။ လိုၼ်းၼၼ်ႉၸင်ႇႁႂ်ႈမၼ်းၶိုၼ်းၶဝ်ႈပၢင်တပ်ႉတႃႉ၊” ဝႃႈၼင်ႇၼႆဢေႃႈ။-
မေႇရီႇယမ်ႇ၊ လႆႈၶၢမ်ႇတၢင်းဢၼ်ႁေႃႈဢွၵ်ႇလႄႈယူႇၼွၵ်ႈပၢင်တပ်ႉၸဵတ်းဝၼ်းတဵမ်တဵမ်ဢေႃႈ။ ၵူၼ်းတင်းလၢႆၵေႃႈဢမ်ႇၶၢႆႉပၢင်တပ်ႉတေႃႇထိုင်ႁွတ်ႈလႆႈဢဝ် မေႇရီႇယမ်ႇ၊ ၶိုၼ်းၶဝ်ႈပၢင်တပ်ႉဢေႃႈ။-
လိုၼ်းၼၼ်ႉ၊ၵူၼ်းတင်းလၢႆၵေႃႈဢွၵ်ႇသေၵႃႈတီႈ ႁႃႇၸရုတ်ႉ၊ လႄႈၵႂႃႇပူၵ်းတင်ႈပၢင်တပ်ႉၵႃႈၼႂ်းထိူၼ်ႇ ပႃႇရၼ်ႇ၊ ဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ လႄႈဝႃႈ၊-
“မႂ်းလိူၵ်ႈဢဝ်ၵူၼ်းဢၼ်ပဵၼ်ၵႄႇပဵၼ်ႁူဝ်ၵႃႈၼႂ်းၵူၼ်းမဵဝ်း ဢိသရေး၊ သိပ်းသွင်မဵဝ်းၼၼ်ႉယေႈမဵဝ်းယေႈၵေႃႉသေလႄႈပွႆႇၸႂ်ႉၶဝ်ၵႂႃႇလူတူၺ်းလွမ်တူၺ်းမိူင်း ၶႃႇၼၼ်ႇ၊ ဢၼ်ၵဝ်တၵ်းပၼ်တီႈၵူၼ်းမဵဝ်း ဢိသရေး၊ တင်းလၢႆၼၼ်ႉတႃႉ၊” ဝႃႈၼင်ႇၼႆဢေႃႈ။-
ၶဝ်ၸိူဝ်းၼႆႉၸမ်ႉ၊ပဵၼ်ၽူႈသွပ်ႇၶၢဝ်ႇဢၼ် မူဝ်းသေႇ၊ ပွႆႇၸႂ်ႉၵႂႃႇလူလွမ်တူၺ်းမိူင်း ၶႃႇၼၼ်ႇ၊ ဢေႃႈ။ ႁူဝ်းသေႇ၊ ဢၼ်ပဵၼ်လုၵ်ႈၸၢႆး ၼုၼ်ႇ၊ ၼၼ်ႉ မူဝ်းသေႇ၊ လႅၵ်ႈလၢႆႈပၼ်ၸိုဝ်ႈသဵင်မၼ်းႁႂ်ႈႁွင်ႉဝႃႈ၊ ယေႃးသု၊ ဢေႃႈ။
မိူဝ်ႈဢၼ် မူဝ်းသေႇ၊ ပွႆႇၸႂ်ႉၶဝ်ၵႂႃႇၼၼ်ႉမၼ်းသင်ႇလၢတ်ႈတီႈၶဝ်လႄႈဝႃႈ၊ “သူဢွၼ်ၵၼ်ဢွၵ်ႇၵႂႃႇၸွမ်းသဵၼ်ႈတၢင်းၽၢႆႇတၢင်းႁွင်ႇၼႆႉၵႂႃႇလႄႈၶဝ်ႈၸူးပွတ်းတၢင်းၸၢၼ်းမိူင်း ၶႃႇၼၼ်ႇ၊ သေလႄႈၶိုၼ်ႈၵႂႃႇၵႃႈၼိူဝ်လွႆပုၼ်ႉတႃႉ။-
ၵႂႃႇလႄႈလူလွမ်တူၺ်းႁႂ်ႈလႆႈႁုလွင်ႈဢၼ်မိူင်းၼၼ်ႉပဵၼ်ၸိူဝ်ႉၼင်ႇႁိုဝ်။ ၵူၼ်းဢၼ်ယူႇမိူင်းၼၼ်ႉၼမ်ၵႃႈႁိုဝ်လႄႈႁႅင်းယႂ်ႇၵႃႈႁိုဝ်ၼၼ်ႉတႃႉ။-
လူလွမ်တူၺ်းႁႂ်ႈလႆႈႁုလွင်ႈဢၼ်လိၼ်မိူင်းၼၼ်ႉလီႁိုဝ်း၊ဢမ်ႇလီႁိုဝ်းဢိၵ်ႇတင်းလွင်ႈဢၼ်ၵူၼ်းမိူင်းၼၼ်ႉယူႇၼႂ်းဝၢၼ်ႈၼႂ်းဝဵင်းဢၼ်လွမ်ႉၶူးဝဵင်းလမ်းဝဵင်းႁိုဝ်း၊ဢမ်ႇလွမ်ႉႁိုဝ်းၼၼ်ႉတႃႉ။-
လူလွမ်တူၺ်းႁႂ်ႈလႆႈႁုလွင်ႈဢၼ်ၽုၼ်ႇၼမ်ႉမၼ်းလိၼ်လီႁိုဝ်း၊ဢမ်ႇလီႁိုဝ်း။ မီးတူၼ်ႈမႆႉတူၼ်ႈတွၵ်ႇႁိုဝ်း၊ဢမ်ႇမီးႁိုဝ်းၼၼ်ႉတႃႉ။ ဢွၼ်ၵၼ်မီးၸႂ်ႁတ်းႁၢၼ်ဢဝ်မၢၵ်ႇမႆႉမၢၵ်ႇတွၵ်ႇမိူင်းၼၼ်ႉမႃးၵမ်ႈၽွင်ႈတႃႉ၊” ဝႃႈၼင်ႇၼႆဢေႃႈ။ မိူဝ်ႈၶိင်ႇၼၼ်ႉပဵၼ်ၶိင်ႇဢၼ်မၢၵ်ႇၸပိတ်ႉတႄႇၸႃႉသုၵ်းၼၼ်ႉဢေႃႈ။
ၶဝ်ၼၼ်ႉဢွၼ်ၵၼ်ၸွမ်းတၢင်းၽၢႆႇတၢင်းႁွင်ႇၵႂႃႇလႄႈလူလွမ်တူၺ်းတႄႇၸႃႉၵႃႈတီႈထိူၼ်ႇလႅင်ႉ ၸိၼႃႉ၊ ဢၼ်မီးယူႇမိူင်းပွတ်းၸၢၼ်းမိူင်း ၶႃႇၼၼ်ႇ၊ ၸွမ်းတၢင်းၵႂႃႇၸူးဝဵင်း ရေးႁွပ်ႉ၊ ၵႂႃႇတေႃႇထိုင်ႁွတ်ႈသဵၼ်ႈတၢင်းဢၼ်ၵႂႃႇၸူးဝဵင်း ႁႃႇမတ်ႉ၊ ဢၼ်မီးပွတ်းႁွင်ႇပုၼ်ႉဢေႃႈ။-
ၶဝ်ပႆၸွမ်းသဵၼ်ႈတၢင်းပွတ်းတၢင်းၸၢၼ်းၵႂႃႇလႄႈႁွတ်ႈၽႅဝ်ၵႃႈတီႈဝဵင်း ႁေႇပရုၼ်ႇ၊ တီႈဢၼ်ၶိူဝ်းႁိူၼ်း ဢႁိမၼ်ႇ၊ ၶိူဝ်းႁိူၼ်း သေးသေး၊ တင်းၶိူဝ်းႁိူၼ်း တႃႇလမေး၊ ဢၼ်ပဵၼ်လုၵ်ႈလၢၼ်ၸိူဝ်ႉၶိူဝ်းၵူၼ်းမဵဝ်း ဢႃႇၼၵ်ႉ၊ ဢၼ်ပဵၼ်ၵူၼ်းတူဝ်ယႂ်ႇႁႅင်းလူင်ၸိူဝ်းၼၼ်ႉယူႇသဝ်းၼၼ်ႉဢေႃႈ။ ဝဵင်း ႁေႇပရုၼ်ႇ၊ ၼၼ်ႉတႄႇတင်ႈဢွၼ်တၢင်းဝဵင်း ၸေႃးၼႃႉ၊ ဢၼ်မီးၵႃႈၼႂ်းမိူင်း ဢေးၵျိပ်ႉ၊ ၼၼ်ႉၸဵတ်းပီဢေႃႈ။-
ၶဝ်ႁွတ်ႈထိုင်ၵႃႈတီႈထူင်ႉႁူၺ်ႈ ဢေႇသႃႉၵေႃးလႃႉ၊ သေယဝ်ႉ၊တႅပ်းၽၼ်းဢဝ်ၵိင်ႇၶိူဝ်းမၢၵ်ႇၸပိတ်ႉၵိင်ႇၼိုင်ႈဢၼ်ပႃးမၢၵ်ႇမၼ်းပုၵ်ႉၼိုင်ႈလႄႈၵူၼ်းသွင်ၵေႃႉဢဝ်ၵၢၼ်းႁၢမ်ဢေႃႈ။ မၢၵ်ႇၸင်ႈလႂ်တင်းမၢၵ်ႇလိူဝ်ႇလႂ်ၵေႃႈၶဝ်ဢဝ်မႃးဢေႃႈ။-
တီႈၼၼ်ႈမီးၸိုဝ်ႈသဵင်ဢၼ်ႁွင်ႉဝႃႈ၊ထူင်ႉႁူၺ်ႈ ဢေႇသႃႉၵေႃးလႃႉ၊ ၸွမ်းလူၺ်ႈပုၵ်ႉမၢၵ်ႇၸပိတ်ႉဢၼ်ၵူၼ်းမဵဝ်း ဢိသရေး၊ ၶဝ်တႅပ်းဢဝ်မႃးၼၼ်ႉဢေႃႈ။
မိူဝ်ႈဢၼ်ထူၼ်ႈတဵမ်သီႇသိပ်းဝၼ်းယဝ်ႉၼၼ်ႉၸိုင်၊ၶဝ်ပွၵ်ႈမႃးၶိုၼ်းသေၵႃႈတီႈတၢင်းဢၼ်လူလွမ်တူၺ်းမိူင်းၼၼ်ႉဢေႃႈ။-
ၶဝ်ၶိုၼ်းႁွတ်ႈထိုင်ၵႃႈတီႈ မူဝ်းသေႇ၊ တင်း ဢႃႇရုၼ်ႇ၊ ဢိၵ်ႇတင်းမူႇၵူၼ်းၸိူဝ်းၵူၼ်းမဵဝ်း ဢိသရေး၊ တင်းလၢႆတီႈ ၵႃႇတေးသႃႉ၊ ၵႃႈၼႂ်းထိူၼ်ႇ ပႃႇရၼ်ႇ၊ သေလႄႈမွၵ်ႇလၢတ်ႈၼႄလွင်ႈတၢင်းဢၼ်ၶဝ်လႆႈႁုလႆႈႁၼ်မႃးၸိူဝ်းၼၼ်ႉလႄႈ၊ဢဝ်မၢၵ်ႇဢၼ်ၶဝ်လႆႈမႃးၸိူဝ်းၼၼ်ႉၼႄပျႃးတီႈၵူၼ်းတင်းလၢႆဢေႃႈ။-
ၶဝ်လၢတ်ႈတီႈ မူဝ်းသေႇ၊ လႄႈဝႃႈ၊ “ႁဝ်းၶႃႈလႆႈၵႂႃႇလူလွမ်တူၺ်းမိူင်းၼၼ်ႉလီလီယဝ်ႉလႄႈ၊လႆႈႁုလွင်ႈဢၼ်မိူင်းၼၼ်ႉပဵၼ်မိူင်းဢၼ်မၢၵ်ႈမီးလီပဵၼ်၊မိူင်းဢၼ်မၢၵ်ႈမီးလီပဵၼ်လႄႈၽုၼ်ႇလီလိၼ်လီ ၼႃႇဢေႃႈ။ မၢၵ်ႇၸိူဝ်းၼႆႉပဵၼ်မၢၵ်ႇဢၼ်မၢၵ်ႇၵႃႈတီႈမိူင်းၼၼ်ႉၶႃႈဢေႃႈ။-
ၼႂ်းဝႃႈၼၼ်သေၵေႃႈ၊ၵူၼ်းဝၢၼ်ႈၵူၼ်းမိူင်းၸိူဝ်းၼၼ်ႉႁႅင်းယႂ်ႇၼႃႇၶႃႈဢေႃႈ။ ဝဵင်းၸိူဝ်းၼၼ်ႉၵေႃႈပဵၼ်ဝဵင်းယႂ်ႇဝဵင်းလူင်၊ဝဵင်းဢၼ်မီးလမ်းဝဵင်းလွမ်ႉဝႆႉၶႃႈဢေႃႈ။ လိူဝ်သေၼၼ်ႉႁဝ်းၶႃႈႁၼ်လုၵ်ႈလၢၼ်ၸိူဝ်ႉၶိူဝ်းၵူၼ်းမဵဝ်း ဢႃႇၼၵ်ႉ၊ ဢၼ်ပဵၼ်ၵူၼ်းတူဝ်ယႂ်ႇႁႅင်းလူင်ၶႃႈဢေႃႈ။-
ၵူၼ်းမဵဝ်း ဢႃႇမလႅၵ်ႉ၊ တင်းလၢႆယူႇၵႃႈတီႈပွတ်းတၢင်းၸၢၼ်းသေလႄႈ၊ၵူၼ်းမဵဝ်း ႁိတ်ႉတိ၊ ၵူၼ်းမဵဝ်း ယေႇပုသိ၊ ၵူၼ်းမဵဝ်း ဢႃႇမေႃးရိ၊ တင်းလၢႆသမ်ႉယူႇၵႃႈၼိူဝ်လွႆ၊ၵူၼ်းမဵဝ်း ၶႃႇၼၼိ၊ တင်းလၢႆသမ်ႉယူႇႁိမ်းၽင်ႇပၢင်ႇလၢႆႇ မေႇတိထေးရီးယၼ်း၊ ဢိၵ်ႇတင်းယူႇၸွမ်းႁိမ်းၼမ်ႉ ယေႃးတၢၼ်ႇ၊ ၶႃႈဢေႃႈ၊” ဝႃႈၼင်ႇၼႆဢေႃႈ။
ၵႃႇလႅပ်ႉ၊ ၵေႃႈႁႂ်ႈၵူၼ်းတင်းလၢႆဢၼ်ယူႇၽၢႆႇၼႃႈ မူဝ်းသေႇ၊ ၸိူဝ်းၼၼ်ႉယူႇတဵတ်ႇတဵတ်ႇသေလႄႈဝႃႈ၊ “ႁဝ်းဢွၼ်ၵၼ်ၶီႇသိုၵ်းၵႂႃႇတိုၵ်းတေႃးၵမ်းလဵဝ်သေယဝ်ႉ၊သိမ်းဢဝ်မိူင်းၼၼ်ႉတႃႉႁဝ်း။ ႁဝ်းတၢတ်ႈၼိူင်ႇပႄႉၼႅင်ႇလႆႈယူႇဢမၢၼ်ႇၶၼ်ပဵၼ်ဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ၶဝ်ၸိူဝ်းဢၼ်ၸွမ်းလူၺ်ႈၵၼ်တင်းမၼ်းၵႂႃႇၼၼ်ႉဢွၼ်ၵၼ်လၢတ်ႈလႄႈဝႃႈ၊ “ႁဝ်းဢမ်ႇတၢတ်ႈၼိူင်ႇတိုၵ်းပႄႉၵူၼ်းမိူင်းၸိူဝ်းၼၼ်ႉလႆႈ။ ၶဝ်ၼၼ်ႉယဵင်ႈၶႅၼ်းႁႅင်းယႂ်ႇၼႃႇသေႁဝ်းဢေႃႈ၊” ဝႃႈၼင်ႇၼႆဢေႃႈ။-
ႁဵတ်းၼၼ်လႄႈၶဝ်ဢွၼ်ၵၼ်မွၵ်ႇလၢတ်ႈၶၢဝ်ႇငၢဝ်းဢၼ်ဢမ်ႇမၢၼ်ႇဢမ်ႇမႅၼ်ႈလူၺ်ႈလွင်ႈမိူင်းဢၼ်ၶဝ်လူလွမ်တူၺ်းမႃးၼၼ်ႉတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈ၊ “တီႈၼႂ်းမိူင်းၼၼ်ႉၶဝ်ႈၼမ်ႉတၢင်းၵိၼ်ယင်းဢမ်ႇပေႃးၵုမ်ႇၵိၼ်ပုၼ်ႈၵူၼ်းဝၢၼ်ႈၵူၼ်းမိူင်းလူင်ပႄႇ။ ၵူၼ်းဝၢၼ်ႈၵူၼ်းမိူင်းၵႃႈဢၼ်ႁဝ်းထူပ်းႁၼ်ၼၼ်ႉၵေႃႈပဵၼ်ၵူၼ်းသုင်ၵူၼ်းယႂ်ႇဢေႃႈ။-
ႁဝ်းလႆႈထူပ်းႁၼ်ၵူၼ်းတူဝ်ယႂ်ႇႁႅင်းလူင်ဢၼ်ပဵၼ်ၸိူဝ်ႉၶိူဝ်းလုၵ်ႈလၢၼ်မဵဝ်း ဢႃႇၼၵ်ႉ၊ ၼၼ်ႉၵႃႈတီႈၼၼ်ႈမႃးယဝ်ႉ။ ႁဝ်းၼႆႉပဵၼ်ၵူၼ်းလဵၵ်ႉၵူၼ်းၼွႆႉမိူၼ်ၸိူဝ်ႉၼင်ႇၸၵ်းတႅၼ်လႄႈ၊ၸွမ်းၼင်ႇတႃၶဝ်ႁၼ်ႁဝ်းၵေႃႈပဵၼ်ၸိူဝ်ႉၼင်ႇၼၼ်ယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၵူၼ်းတင်းလၢႆၸႂ်လဵၵ်ႉၸႂ်ဢူၼ်ႈၼႃႇလႄႈဢွၼ်ၵၼ်ႁွင်ႉႁႆႈယူႇတင်းၶိုၼ်းဢေႃႈ။-
ၶဝ်တၢင်ႇဢပျတ်ႈပွင်ႉၶၢင်းပွင်ႉမိုၼ်ႇတီႈ မူဝ်းသေႇ၊ တင်း ဢႃႇရုၼ်ႇ၊ လႄႈဝႃႈ၊ “ႁဝ်းၼႆႉပေႃးတၢႆၵႃႈၼႂ်းမိူင်း ဢေးၵျိပ်ႉ၊ ဢမ်ႇၼၼ်တၢႆၵႃႈၼႂ်းထိူၼ်ႇလႅင်ႉၼႆႉယင်းတေလီဢေႃႈ။-
ႁဵတ်းသင်လႄႈ ထႃႇဝရႃႉၽြႃး၊ ဢဝ်ႁဝ်းမႃးတီႈမိူင်းၼႆႉ။ ႁဝ်းတၵ်းလႆႈတၢႆၼႂ်းၼႃႈသိုၵ်းယဝ်ႉ။ လုၵ်ႈႁဝ်းမေးႁဝ်းၸိုင်၊တၵ်းလႆႈၶၢမ်ႇတူၵ်းၵႅၼ်းယဝ်ႉ။ ပေႃးႁဝ်းမိူဝ်းၵႂႃႇၵႃႈတီႈမိူင်း ဢေးၵျိပ်ႉ၊ ၶိုၼ်းၸိုင်၊တေယဵင်ႈၶႅၼ်းလီႁိုဝ်း၊” ဝႃႈၼင်ႇၼႆဢေႃႈ။-
ႁဵတ်းၼၼ်လႄႈၶဝ်ၵေႃႉၼိုင်ႈလႄႈၵေႃႉၼိုင်ႈလၢတ်ႈတီႈၵၼ်လႄႈဝႃႈ၊ “ဢွၼ်ၵၼ်လိူၵ်ႈဢဝ်ၵူၼ်းသေၵေႃႉၵေႃႉလႄႈႁႂ်ႈမၼ်းဢွၼ်ႁူဝ်ႁဝ်းၶိုၼ်းမိူဝ်းၵႂႃႇၵႃႈတီႈမိူင်း ဢေးၵျိပ်ႉ၊ တႃႉႁဝ်း၊” ဝႃႈၼင်ႇၼႆဢေႃႈ။
မူဝ်းသေႇ၊ တင်း ဢႃႇရုၼ်ႇ၊ ၶုပ်ႉမူပ်ႇၵႃႈတီႈၽၢႆႇၼႃႈၵူၼ်းဢၼ်ၸုဢၼ်တုမ်တင်းလၢႆယူႇဢေႃႈ။-
ယေႃးသု၊ လုၵ်ႈၸၢႆး ၼုၼ်ႇ၊ တင်း ၵႃႇလႅပ်ႉ၊ လုၵ်ႈၸၢႆး ယေႇၽုၼ်ႇၼႃႉ၊ ဢၼ်ၶဝ်ႈပႃးၼႂ်းၵူၼ်းသွပ်ႇၶၢဝ်ႇၸိူဝ်းၼၼ်ႉၵေႃႈမီးၸႂ်ဢၼ်မႆႈၸႂ်ၶီၸႂ်လႄႈၸၵ်ႉသိၵ်ႇၶူဝ်းၼုင်ႈၶဝ်လႄႈ၊-
လၢတ်ႈတီႈၵူၼ်းတင်းလၢႆလႄႈဝႃႈ၊ “မိူင်းဢၼ်ႁဝ်းၵႂႃႇလူလွမ်တူၺ်းမႃးၼႆႉပဵၼ်မိူင်းဢၼ်လီၼႃႇလူင်လၢင်ဢေႃႈ။-
ပေႃး ထႃႇဝရႃႉၽြႃး၊ ထုၵ်ႇၸႂ်မႅၼ်ႈၸႂ်ႁဝ်းၸိုင်၊မၼ်းၸဝ်ႈတၵ်းဢဝ်ႁဝ်းသူင်ႇႁွတ်ႈၵႃႈတီႈမိူင်းဢၼ်မၢၵ်ႈမီးလီပဵၼ်လႄႈၽုၼ်ႇလီလိၼ်လီ ၼႃႇၼၼ်ႉလႄႈပၼ်ႁဝ်းပိူင်ႇဢေႃႈ။-
ယႃႇပေလုၵ်ႉၽိုၼ်ႉ ထႃႇဝရႃႉၽြႃး။ ယႃႇပေၵူဝ်ႁႄၵူၼ်းမိူင်းၼၼ်ႉ။ ႁဝ်းတၵ်းပႄႉၼႅင်ႇၶဝ်ငၢႆႈငၢႆႈ ဢေႃႈ။ ထႃႇဝရႃႉၽြႃး၊ မီးယူႇၽၢႆႇႁဝ်းသေယဝ်ႉ၊ပႄႉၼႅင်ႇၽြႃးဢၼ်ၵႅတ်ႇၶႄႁႄႉၵင်ႈၶဝ်ၼၼ်ႉယဝ်ႉဢေႃႈ။ ယႃႇပေၵူဝ်ပေႁႄၶဝ်သေၵမ်း၊” ဝႃႈၼင်ႇၼႆဢေႃႈ။-
မူႇၵူၼ်းၸိူဝ်းၵူၼ်းတင်းသဵင်ႈတင်းမူတ်းဢွၼ်ၵၼ်ၶိုင်ပွင်ႁႂ်ႈလႆႈဢဝ်မၢၵ်ႇႁိၼ်ပိုဝ်ႈသႂ်ႇႁႂ်ႈၶဝ်တၢႆဢေႃႈ။ မိူဝ်ႈၼၼ်ႉၵမ်းလဵဝ်ဢၼ်လႅင်းမုၼ်ၽုင်း ထႃႇဝရႃႉၽြႃး၊ ႁိူဝ်ႈမႃးၵႃႈၼိူဝ်သုမ်ႉထဵင်ၸဝ်ႈဢေႃႈ။
ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ လႄႈဝႃႈ၊ “ၵူၼ်းမဵဝ်းၼႆႉတၵ်းႁဵတ်းတၢင်းဢၼ်ဢမ်ႇရူဝ်ႇသေႇၵူဝ်ယမ်ၵဝ်ယူႇၶိင်ႇၵႃႇလႃႉႁိုင်ၵႃႈႁိုဝ်။ ပိၵ်ႉသမ်ႉၵဝ်ႁဵတ်းၼႄၼိမိၵ်ႈလၢၵ်ႈၶၼႃႇဢၼ်လၢၵ်ႇဢၼ်လၢႆးတီႈၶဝ်မႃးယဝ်ႉၼမ်ၼႃႇသေၵေႃႈ၊ၶဝ်ယင်းဢမ်ႇယုမ်ႇၵဝ်လႄႈတၵ်းယူႇၶိင်ႇၵႃႇလႃႉႁိုင်ၵႃႈႁိုဝ်။-
ၵဝ်တၵ်းဢဝ်တင်းတၢင်းပဵၼ်ၵႃႇလႃႉႁႃႈလႅင်မိူင်းပၼ်တၢမ်ႇၶဝ်လႄႈယိုတ်းပႅတ်ႈဢၶႂၢင်ႉဢၼ်ၶဝ်တၵ်းလႆႈၶၢမ်ႇဢမူၺ်ႇၼၼ်ႉဢေႃႈ။ တၵ်းႁႂ်ႈမႂ်းပဵၼ်ၵူၼ်းမဵဝ်းဢၼ်ယဵင်ႈၶႅၼ်းၼမ်ၵိုၼ်း၊မဵဝ်းဢၼ်တၼ်းၶူဝ်းယဵင်ႈၶႅၼ်းယႂ်ႇသေၶဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈလဝ်ႈလၢတ်ႈတီႈ ထႃႇဝရႃႉၽြႃး၊ လႄႈဝႃႈ၊ “ၸဝ်ႈႁဝ်းဢဝ်တင်းတၼ်းၶူဝ်းၸဝ်ႈႁဝ်းၼုၵ်ႈဢဝ်ၵူၼ်းမဵဝ်းၼႆႉဢွၵ်ႇမိူင်း ဢေးၵျိပ်ႉ၊ မႃးတီႈၶႃႈယဝ်ႉ။ ၵူၼ်းမဵဝ်း ဢေးၵျိပ်ႉ၊ တင်းလၢႆလႆႈငိၼ်းလွင်ႈဢၼ်ၸဝ်ႈႁဝ်းႁဵတ်းၸိူဝ်ႉၼင်ႇႁိုဝ်ဢွၼ်ၶဝ်မႃးၼၼ်ႉသေလႄႈ၊-
ၶဝ်လႆႈမွၵ်ႇလၢတ်ႈတီႈၵူၼ်းၸိူဝ်းဢၼ်ယူႇၵႃႈၼႂ်းမိူင်းၼႆႉၼၼ်ႉယဝ်ႉတီႈၶႃႈဢေႃႈ။ ၵူၼ်းတင်းလၢႆၵေႃႈလႆႈငိၼ်းလွင်ႈဢၼ်ၸဝ်ႈႁဝ်း ထႃႇဝရႃႉၽြႃး၊ မီးယူႇလူၺ်ႈၵၼ်တင်းၶႃႈၸဝ်ႈႁဝ်းၶဝ်၊လွင်ႈဢၼ်ၸဝ်ႈႁဝ်း ထႃႇဝရႃႉၽြႃး၊ ပေႃႇမႃးထၢင်ႇသႃးၼႃႈတေႃႇၼႃႈၵၼ်တင်းၶႃႈၸဝ်ႈႁဝ်းၶဝ်၊လွင်ႈဢၼ်မွၵ်ႇၵုမ်ႈၸဝ်ႈႁဝ်း ထႃႇဝရႃႉၽြႃး၊ တႄႇယူႇၵႃႈၼိူဝ်ၶႃႈၸဝ်ႈႁဝ်းၶဝ်လႄႈပဵၼ်သဝ်မွၵ်ႇၵုမ်ႈၶိင်ႇၵၢင်ဝၼ်း၊သမ်ႉပဵၼ်သဝ်ၽႆးၶိင်ႇၵၢင်ၶိုၼ်းသေလႄႈဢွၼ်ႁူဝ်ၶႃႈၸဝ်ႈႁဝ်းၶဝ်ၵႂႃႇၼၼ်ႉတီႈၶႃႈယဝ်ႉ။-
မိူဝ်ႈလဵဝ်ၼႆႉပေႃႈၸဝ်ႈႁဝ်းမၢတ်ႈၵူၼ်းမဵဝ်းၼႆႉပဵၼ်ၸိူဝ်ႉၼင်ႇၵူၼ်းၵေႃႉလဵဝ်ၵူၺ်းသေလႄႈဢဝ်တၢႆပႅတ်ႈသဵင်ႈသဵင်ႈၸိုင်၊ၵူၼ်းၵူႈၸိူဝ်ႉၵူႈမဵဝ်းဢၼ်ယၢမ်ႈလႆႈငိၼ်းၶၢဝ်ႇဢၼ်ႁူင်ႁၢင်းၸဝ်ႈႁဝ်းၼၼ်ႉၸိူဝ်းၼၼ်ႉတၵ်းဢွၼ်ၵၼ်လၢတ်ႈလႄႈဝႃႈ၊-
‘ ထႃႇဝရႃႉၽြႃး၊ ၼၼ်ႉ၊ၵွပ်ႈပိူဝ်ႈဢမ်ႇတၢတ်ႈၼိူင်ႇႁႂ်ႈလႆႈဢွၼ်ဢဝ်ၶဝ်သူင်ႇႁွတ်ႈၵႃႈတီႈမိူင်းဢၼ်တူဝ်မၼ်းၸဝ်ႈပၼ်ၵတိဝႃႈတၵ်းပၼ်ၼၼ်ႉလႄႈ၊မၼ်းၸဝ်ႈဢဝ်ၶဝ်တၢႆပႅတ်ႈသေၵႃႈၼႂ်းထိူၼ်ႇၼႆႉယဝ်ႉ၊’ ဝႃႈၼင်ႇၼႆတီႈၶႃႈဢေႃႈ။-
ပိူဝ်ႈၼႆလႄႈ၊ ထႃႇဝရႃႉၽြႃး၊ တီႈၶႃႈ၊တေႃႈလဵဝ်ၼႆႉၶႃႈၸဝ်ႈႁဝ်းယွၼ်းသူးတွင်းတီႈၸဝ်ႈႁဝ်းၶႅၼ်းတေႃႈၼႄပျႃးတၼ်းၶူဝ်းၸဝ်ႈႁဝ်းသေလႄႈ၊ၶႅၼ်းတေႃႈႁဵတ်းၸွမ်းၼင်ႇၵတိၸဝ်ႈႁဝ်းဢၼ်ၸဝ်ႈႁဝ်းလၢတ်ႈဝႆႉဝႃႈ၊-
‘ၵဝ် ထႃႇဝရႃႉၽြႃး၊ ၼႆႉဢမ်ႇသူႈဢွၵ်ႇတေႃးသႃႉတၢင်းဢၼ်ၸႂ်မႆႈၶႂ်ႈၸႃႉငၢႆႈငၢႆႈ၊ပဵၼ် ထႃႇဝရႃႉၽြႃး၊ ဢၼ်တဵမ်ဝႆႉတင်းတၢင်းဢၼ်ႁၵ်ႉပႅင်းဢဵတ်းလူ၊တၢင်းဢၼ်မီးသဵတ်ႈၸႃႇ ဢိၵ်ႇတင်းတၢင်းဢၼ်ပွႆႇလွတ်ႈဢပျတ်ႈတင်းတၢင်းဢၼ်ပွႆႇၶႂၢင်းပၼ်တၢင်းဢၼ်လုၵ်ႉၽိုၼ်ႉၸိူဝ်းၼၼ်ႉဢေႃႈ။ ၼႂ်းဝႃႈၼၼ်သေၵေႃႈၵဝ်တၵ်းဢမ်ႇလုတ်ႈဢမ်ႇႁၢမ်းတၢင်းဢၼ်တႅၼ်းပၼ်ဢပျတ်ႈတီႈလုၵ်ႈလၢင်းတင်းလၢႆတေႃႇထိုင်ႁွတ်ႈၸူဝ်ႈလုၵ်ႈပၢၼ်လၢၼ်ထူၼ်ႈတီႈသၢမ်သိုပ်ႇသီႇသိုပ်ႇပုၼ်ႈဢပျတ်ႈတၢင်းၽိတ်းပေႃႈၶဝ်ၼၼ်ႉဢေႃႈ၊’ ဝႃႈၼင်ႇၼႆၼၼ်ႉသေၵမ်းလူၺ်ႈတီႈၶႃႈ။-
ၵွပ်ႈပိူဝ်ႈၸိူဝ်ႉၼင်ႇၼႆလႄႈ၊ ထႃႇဝရႃႉၽြႃး၊ တီႈၶႃႈ၊ၸွမ်းလူၺ်ႈမႅတ်ႈတႃႇၸဝ်ႈႁဝ်းဢမ်ႇၶၢႆႉပုတ်ႈဢမ်ႇလႅၵ်ႈလၢႆႈၼၼ်ႉၶႅၼ်းတေႃႈပွႆႇလွတ်ႈဢပျတ်ႈၵူၼ်းမဵဝ်းၼႆႉၸိူဝ်ႉၼင်ႇဢၼ်ၸဝ်ႈႁဝ်းပွႆႇလွတ်ႈဢပျတ်ႈၶဝ်ၸႃႉၸဵမ်ဝၼ်းဢၼ်ဢွၵ်ႇမိူင်း ဢေးၵျိပ်ႉ၊ မႃးၼၼ်ႉသေၵမ်းတီႈၶႃႈ၊ၶႃႈၸဝ်ႈယွၼ်းတွင်းပၢၼ်ႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ ထႃႇဝရႃႉၽြႃး၊ လၢတ်ႈလႄႈဝႃႈ၊ “ၵဝ်ပွႆႇလွတ်ႈဢပျတ်ႈၶဝ်ၸွမ်းၼင်ႇဢၼ်မႂ်းတွင်းပၢၼ်ႇၼၼ်ႉယဝ်ႉ။-
ၵႃႈၼင်ႇဢၼ်ၵဝ်ဢသၢၵ်ႈလိပ်းယူႇ၊ၵႃႈၼင်ႇဢၼ်မုၼ်ၽုင်း ထႃႇဝရႃႉၽြႃး၊ ၸွတ်ႇတူဝ်ႈၵႂႃႇၵႃႈၼိူဝ်လိၼ်မိူင်းတင်းသဵင်ႈတင်းမူတ်းၼၼ်ႉ၊-
ၵူၼ်းၸိူဝ်းၼႆႉတၵ်းဢမ်ႇလႆႈၶဝ်ႈလႄႈၸၢမ်ႇၸႃးၵႃႈၼႂ်းမိူင်းၼၼ်ႉသေၵေႃႉသေၵူၼ်း။ ၶဝ်ၼၼ်ႉလႆႈႁၼ်ဢၼ်လႅင်းမုၼ်ၽုင်းၵဝ်ယူႇ၊လႆႈႁၼ်ၼိမိၵ်ႈလၢၵ်ႈၶၼႃႇဢၼ်လၢၵ်ႇဢၼ်လၢႆးဢၼ်ၵဝ်ႁဵတ်းၼႄၶဝ်ၵႃႈတီႈမိူင်း ဢေးၵျိပ်ႉ၊ တင်းၵႃႈတီႈၼႂ်းထိူၼ်ႇၸိူဝ်းၼၼ်ႉယဝ်ႉ။ ၵူၺ်းၵႃႈ၊ၶဝ်ယင်းၸၢမ်းတူၺ်းတီႈတၢင်းဢၼ်ၵဝ်ၸႂ်ယႂ်ႇၸႂ်ယၢဝ်းၼၼ်ႉပွၵ်ႈၼိုင်ႈယဝ်ႉပွၵ်ႈၼိုင်ႈ။ ၶဝ်ယင်းဢမ်ႇထွမ်ႇဢဝ်ၵႂၢမ်းၵဝ်လႄႈယူႇဢေႃႈ။-
ၶဝ်ၼၼ်ႉတၵ်းဢမ်ႇလႆႈၶဝ်ႈၵႃႈၼႂ်းမိူင်းဢၼ်ၵဝ်ဝႆႉၵတိတီႈပူႇပေႃႈၶဝ်ဝႆႉၼၼ်ႉသေပွၵ်ႈ။ ၶဝ်ၸိူဝ်းဢၼ်ပႄႇပႅတ်ႈၵဝ်ၼၼ်ႉတၵ်းဢမ်ႇလႆႈၶဝ်ႈၵႃႈၼႂ်းမိူင်းၼၼ်ႉသေၵေႃႉသေၵူၼ်း။-
ၵူၺ်းၵႃႈ၊ၶႃႈၵဝ် ၵႃႇလႅပ်ႉ၊ ၸမ်ႉ၊ၵွပ်ႈပိူဝ်ႈဢၼ်မီးသၽေႃးဢၼ်ပႅၵ်ႇပိူင်ႈၵၼ်တင်းၶဝ်လႄႈၸွမ်းလင်ၵဝ်လုမ်းလုမ်းၼၼ်ႉၵဝ်တၵ်းဢွၼ်မၼ်းသူင်ႇႁွတ်ႈၶဝ်ႈထိုင်မိူင်းဢၼ်မၼ်းၵႂႃႇလူလွမ်တူၺ်းမႃးယဝ်ႉၼၼ်ႉသေလႄႈၸိူဝ်ႉၶိူဝ်းမၼ်းတၵ်းလႆႈပိူင်ႇမိူင်းၼၼ်ႉဢေႃႈ။-
ၵွပ်ႈပိူဝ်ႈၵူၼ်းမဵဝ်း ဢႃႇမလႅၵ်ႉ၊ တင်းၵူၼ်းမဵဝ်း ၶႃႇၼၼိ၊ ၶဝ်မီးယူႇၵႃႈၼႂ်းထူင်ႉႁူၺ်ႈၸိူဝ်းၼၼ်ႉလႄႈ၊ဝၼ်းမိူဝ်ႈၽုၵ်ႈသူဝၢႆႇၶိုၼ်းၵႂႃႇလႄႈၸွမ်းသဵၼ်ႈတၢင်း ပၢင်ႇလၢႆႇလႅင်၊ ၵႂႃႇၸူးၵႃႈတီႈထိူၼ်ႇသေတႃႉ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ တင်း ဢႃႇရုၼ်ႇ၊ လႄႈဝႃႈ၊-
“ၵူၼ်းဢၼ်ႁုၵ်းဢၼ်ႁၢႆႉၸိူဝ်းၼႆႉတၵ်းတၢင်ႇဢပျတ်ႈပွင်ႉၶၢင်းပွင်ႉမိုၼ်ႇတီႈၵဝ်ယူႇၶိင်ႇၵႃႇလႃႉႁိုင်ၵႃႈႁိုဝ်လူးၵွၼ်ႇ။ ၵႂၢမ်းဢၼ်ၶဝ်ပွင်ႉၶၢင်းပွင်ႉမိုၼ်ႇၸိူဝ်းၼၼ်ႉဢိမ်ႇႁူဢိမ်ႇၸႂ်ၵဝ်ၼႃႇယဝ်ႉ။-
မႂ်းသင်ႇလၢတ်ႈတီႈၶဝ်လႄႈဝႃႈ၊ ထႃႇဝရႃႉၽြႃး၊ မီးဢမိင်ႉလႄႈဝႃႈၸမ်ႉ၊ ‘ၵႃႈၼင်ႇဢၼ်ၵဝ်ဢသၢၵ်ႈလိပ်းယူႇၼႆႉ၊ၵဝ်တၵ်းႁဵတ်းတီႈသူၸွမ်းၵႃႈၼင်ႇၵႂၢမ်းဢၼ်သူလၢတ်ႈထိုင်ႁူၵဝ်ၼၼ်ႉဢေႃႈ။-
သူတၵ်းလႆႈတၢႆလႄႈတူဝ်တၢႆသူတၵ်းလႆႈမၢၵ်ႇမိူဝ်ဝႆႉၵႃႈၼႂ်းထိူၼ်ႇၼႆႉဢေႃႈ။ ၵွပ်ႈပိူဝ်ႈသူတၢင်ႇဢပျတ်ႈပွင်ႉၶၢင်းပွင်ႉမိုၼ်ႇတီႈၵဝ်လႄႈ၊ၼႂ်းသူၼႆႉၸႃႉၸဵမ်ၵေႃႉဢၼ်ဢသၢၵ်ႈလႆႈသၢဝ်းပီလႄႈသၢဝ်းပီၶိုၼ်ႈၼိူဝ်တၵ်းဢမ်ႇလႆႈၶဝ်ႈၵႃႈၼႂ်းမိူင်းၼၼ်ႉသေၵေႃႉသေၵူၼ်း။-
ၵဝ်ဝႆႉၵတိဝႃႈ၊ၵဝ်တၵ်းႁႂ်ႈသူလႆႈၶဝ်ႈၸၢမ်ႇၸႃးၵႃႈၼႂ်းမိူင်းၼၼ်ႉဝႃႈၼႆယဝ်ႉ။ ၵူၺ်းၵႃႈ၊ၼွၵ်ႈသေ ၵႃႇလႅပ်ႉ၊ တင်း ယေႃးသု၊ ၼၼ်ႉသူတေဢမ်ႇလႆႈၶဝ်ႈၸၢမ်ႇၸႃးသေၵေႃႉသေၵူၼ်း၊-
သူဝႃႈ၊လုၵ်ႈဢွၼ်ႇလၢင်းဢွၼ်ႇသူတၵ်းလႆႈၶၢမ်ႇတၢင်းဢၼ်တူၵ်းၵႅၼ်းဝႃႈၼင်ႇၼႆသေၵေႃႈ၊ၵဝ်တၵ်းဢွၼ်ၶဝ်သူင်ႇႁွတ်ႈၶဝ်ႈထိုင်မိူင်းဢၼ်သူပႄႇပႅတ်ႈၼၼ်ႉလႄႈႁႂ်ႈမိူင်းၼၼ်ႉပဵၼ်မိူင်းဢၼ်ၶဝ်ပိူင်ႇဢေႃႈ။-
သူၼႆႉၸမ်ႉ၊တၵ်းလႆႈတၢႆၵႃႈၼႂ်းထိူၼ်ႇၼႆႉဢေႃႈ။-
လုၵ်ႈလၢင်းသူတၵ်းလႆႈလႄႇၵႂႃႇလႄႇမႃးယူႇၵႃႈၼႂ်းထိူၼ်ႇၼႆႉသီႇသိပ်းပီတဵမ်တဵမ်လႄႈႁၢပ်ႇဢပျတ်ႈတၢင်းဢၼ်သူၽိတ်းပိူင်ႈၸိူဝ်းၼၼ်ႉၵႂႃႇတေႃႇထိုင်ႁွတ်ႈသူတၵ်းလႆႈတၢႆၵႃႈၼႂ်းထိူၼ်ႇၼၼ်ႉၵူႈၵေႃႉဢေႃႈ။-
ၸွမ်းၼင်ႇဢၼ်သူၵႂႃႇလူလွမ်တူၺ်းမိူင်းၼၼ်ႉသီႇသိပ်းဝၼ်းတဵမ်တဵမ်ၼၼ်ႉ၊ယေႈဝၼ်းႁႂ်ႈပဵၼ်ပုၼ်ႈယေႈပီလႄႈသူတၵ်းလႆႈႁၢပ်ႇဢပျတ်ႈသူၵႂႃႇသီႇသိပ်းပီတဵမ်တဵမ်ဢေႃႈ။ ၼင်ႇၼၼ်လႄႈသူတၵ်းလႆႈႁုတၢင်းဢၼ်ၵဝ်ၸုၼ်ႉပႅတ်ႈသူၼၼ်ႉဢေႃႈ။-
ၵဝ်လၢတ်ႈဝႃႈ၊ၵဝ်တၵ်းႁဵတ်းၸိူဝ်ႉၼင်ႇၼႆတီႈသူဢၼ်ပဵၼ်ၵူၼ်းဢၼ်ႁုၵ်းဢၼ်ႁၢႆႉၸိူဝ်းဢၼ်ၸုၵၼ်တုမ်ၵၼ်လႄႈ ႁဵတ်းၶတ်းၵၼ်တင်းၵဝ်ၼၼ်ႉဢေႃႈ။ သူၵႃႈမီးတင်းမူတ်းတၵ်းလႆႈတၢႆၵႃႈတီႈၼႂ်းထိူၼ်ႇၼႆႉၵူႈၵေႃႉၵူႈၵူၼ်းဢေႃႈ။ ၵဝ် ထႃႇဝရႃႉၽြႃး၊ မီးဢမိင်ႉဝႆႉယဝ်ႉ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ၶဝ်ၸိူဝ်းဢၼ် မူဝ်းသေႇ၊ ပွႆႇၸႂ်ႉၵႂႃႇလူလွမ်တူၺ်းမိူင်းၼၼ်ႉၶိုၼ်းမႃးလႄႈမွၵ်ႇလၢတ်ႈၶၢဝ်ႇဢၼ်ဢမ်ႇမၢၼ်ႇဢမ်ႇမႅၼ်ႈၼၼ်ႉႁဵတ်းႁႂ်ႈၵူၼ်းတင်းလၢႆပွင်ႉၶၢင်းပွင်ႉမိုၼ်ႇတီႈ ထႃႇဝရႃႉၽြႃး၊ ဢေႃႈ။-
ပိူဝ်ႈၼႆလႄႈ ထႃႇဝရႃႉၽြႃး၊ ႁႂ်ႈၽေးတၢမ်ႇၵႃႇလႃႉႁႃႈလႅင်မိူင်းတူၵ်းထိုင်ၵႃႈၼိူဝ်ၶဝ်လႄႈၶဝ်လႆႈတၢႆဢေႃႈ။-
ၼႂ်းၵူၼ်းသွပ်ႇၶၢဝ်ႇသိပ်းသွင်ၵေႃႉၼၼ်ႉ ယေႃးသု၊ တင်း ၵႃႇလႅပ်ႉ၊ ၵူၺ်းလႆႈဢသၢၵ်ႈလိပ်းလႄႈၵတ်းယဵၼ်ၶျၢမ်းသႃႇဢေႃႈ။
မူဝ်းသေႇ၊ ဢဝ်ၵႂၢမ်း ထႃႇဝရႃႉၽြႃး၊ ၼၼ်ႉမွၵ်ႇလၢတ်ႈတီႈၵူၼ်းမဵဝ်း ဢိသရေး၊ ၶဝ်တင်းသဵင်ႈတင်းလူင်လႄႈၶဝ်ဢွၼ်ၵၼ်ၶၢင်းၶီၶၢင်းၽၢၼ်ၼႃႇလူင်လၢင်ဢေႃႈ။-
ၼႂ်းဝၼ်းမိူဝ်ႈၽုၵ်ႈၶိင်ႇၵၢင်ၼႂ်ၸဝ်ႉၸဝ်ႉၶဝ်ဢွၼ်ၵၼ်လုၵ်ႉႁႂ်ႈလႆႈၵႂႃႇတိုၵ်းဢဝ်မိူင်းလွႆပုၼ်ႉလႄႈလၢတ်ႈဝႃႈ၊ “ယေႃႈ၊ၵမ်းၼႆႉႁဝ်းတၵ်းၶိုၼ်ႈၵႂႃႇၵႃႈတီႈမိူင်းဢၼ် ထႃႇဝရႃႉၽြႃး၊ ဝႆႉၵတိၼၼ်ႉၶႃႈဢေႃႈ။ လွင်ႈမၼ်းၸမ်ႉ၊ႁဝ်းၽိတ်းပိူင်ႈယဝ်ႉ၊” ဝႃႈၼင်ႇၼႆဢေႃႈ။
ၼႂ်းဝႃႈၼၼ်သေၵေႃႈ၊ မူဝ်းသေႇ၊ လၢတ်ႈလႄႈဝႃႈ၊ “ႁဵတ်းသင်လႄႈသူပူၼ်ႉလိူဝ်ဢမိင်ႉ ထႃႇဝရႃႉၽြႃး၊ ၼင်ႇႁိုဝ်။ တၢင်းၵျၢမ်ႇတၢင်းပွင်သူၼၼ်ႉဢမ်ႇပဵၼ်လႆႈ။-
ယႃႇပေၵႂႃႇသေၵမ်း။ ထႃႇဝရႃႉၽြႃး၊ ဢမ်ႇမီးၸွမ်းသူ။ ရၢၼ်ႇသူႇသူတၵ်းတိုၵ်းပႄႉသူဢေႃႈ။-
မိူဝ်ႈဢၼ်သူထူပ်းၵၼ်တင်းၵူၼ်းမဵဝ်း ဢႃႇမလႅၵ်ႉ၊ တင်းၵူၼ်းမဵဝ်း ၶႃႇၼၼိ၊ ၸိုင်၊သူတၵ်းတၢႆၵႃႈၼႂ်းသိုၵ်းဢေႃႈ။ ၵွပ်ႈပိူဝ်ႈသူဝႄႈပႅတ်ႈသေ ထႃႇဝရႃႉၽြႃး၊ လႄႈ ထႃႇဝရႃႉၽြႃး၊ ဢမ်ႇမီးၸွမ်းသူယဝ်ႉ၊” ဝႃႈၼင်ႇၼႆဢေႃႈ။
ၼႂ်းဝႃႈၼၼ်သေၵေႃႈ၊ပိၵ်ႉသမ်ႉတိူၵ်ႈပတိၺိၺ်ႇၸဝ်ႈတင်း မူဝ်းသေႇ၊ ယင်းဢမ်ႇဢွၵ်ႇဢမ်ႇၵႂႃႇၵႃႈတီႈၼွၵ်ႈပၢင်တပ်ႉသေၵေႃႈၶဝ်ၼၼ်ႉယင်းတိုဝ်လႄႈဢွၼ်ၵၼ်ၶိုၼ်ႈၵႂႃႇၵႃႈတီႈမိူင်းလွႆၼၼ်ႉဢေႃႈ။-
မိူဝ်ႈၼၼ်ႉၵူၼ်းမဵဝ်း ဢႃႇမလႅၵ်ႉ၊ တင်းၵူၼ်းမဵဝ်း ၶႃႇၼၼိ၊ ၸိူဝ်းဢၼ်ယူႇၵႃႈတီႈၼၼ်ႈၼၼ်ႉတိုၵ်းတေႃးပႄႉၼႅင်ႇၶဝ်သေယဝ်ႉ၊လိုပ်ႈလမ်းၸွမ်းၶဝ်တေႃႇထိုင်ႁွတ်ႈဝဵင်း ႁေႃႇမႃႇ၊ ဢေႃႈ။
ၸဝ်ႈထႃႇဝရႃႉၽြႃး၊ သမ်ႉမီးဢမိင်ႉၵႃႈတီႈ မူဝ်းသေႇ၊ ထႅင်ႈလႄႈ၊-
ႁႂ်ႈမၼ်းသင်ႇလၢတ်ႈတီႈၵူၼ်းမဵဝ်းတင်းလၢႆလႄႈဝႃႈၸမ်ႉ၊ “မိူဝ်ႈဢၼ်သူၶဝ်ႈထိုင်ၵႃႈၼႂ်းမိူင်းဢၼ်ၵဝ်တၵ်းပၼ်သူႁႂ်ႈပဵၼ်ဢမူၺ်ႇသူၼၼ်ႉၸိုင်၊-
တၵ်းလႆႈဢဝ်ဝူဝ်း၊ဢမ်ႇၼၼ်သူဝ်းသၢၵ်ႈၵၢပ်ႈတီႈ ထႃႇဝရႃႉၽြႃး၊ ႁႂ်ႈပဵၼ်ၶိူင်ႈတၢင်းလူႇဢၼ်တုတ်ႇၽႆး၊ဢမ်ႇၼၼ်တၢင်းလူႇဢၼ်ႁဵတ်းၵတိသဵတ်ႈၸႃႇ၊ဢမ်ႇၼၼ်တၢင်းလူႇဢၼ်ၸွမ်းၼင်ႇဢလူဝ်ႇၵၢင်ၸႂ်၊ဢမ်ႇၼၼ်ႁဵတ်းတၢင်းလူႇဢၼ်ၶၢမ်ႇပွႆးထမ်ႇမႃႉဢေႃႈ။ ဢၢႆႁွမ်ဢၢႆႁူၺ်းတၢင်းလူႇၸိူဝ်းၼႆႉတၵ်းထုၵ်ႇၸႂ်မႅၼ်ႈၸႂ် ထႃႇဝရႃႉၽြႃး၊ ဢေႃႈ။-
ၵေႃႉဢၼ်ဢဝ်သူဝ်းသၢၵ်ႈၵၢပ်ႈတီႈ ထႃႇဝရႃႉၽြႃး၊ ႁႂ်ႈပဵၼ်ၶိူင်ႈတၢင်းလူႇဢၼ်တုတ်ႇၽႆးၼၼ်ႉၸိုင်၊ပုၼ်ႈတႃႇတရိၵ်ႈသၢၼ်ႇယေႈတူဝ်ၼၼ်ႉမၼ်းတၵ်းလႆႈပႃးတင်းၽွင်ၶဝ်ႈၵျုင်ႇသၢမ်ၶၼ်၊-
ၼွၵ်းလေႃးၼမ်ႉမၼ်း သၢၼ်ႇလုၼ်ႇ၊ တဝ်ႈၼိုင်ႈ သၢၵ်ႈလူႇႁႂ်ႈပဵၼ်တၢင်းလူႇမၢၵ်ႇၶဝ်ႈႁူင်းၶဝ်ႈ၊သွၼ်းလေႃႇႁူမ်ႈလူၺ်ႈၵၼ်တင်းၼမ်ႉမၢၵ်ႇၸပိတ်ႉတဝ်ႈၼိုင်ႈဢေႃႈ။-
ပေႃးဢဝ်သူဝ်းပေႃႈသၢၵ်ႈၵၢပ်ႈၸိုင်၊တၵ်းလႆႈဢဝ်ၽွင်ၶဝ်ႈၵျုင်ႇႁူၵ်းၶၼ် ၼွၵ်းလေႃးၼမ်ႉမၼ်းသၢၼ်ႇလုၼ်ႇတဝ်ႈပၢႆၶိုင်ႈ သၢၵ်ႈလူႇႁႂ်ႈပဵၼ်တၢင်းလူႇမၢၵ်ႇၶဝ်ႈႁူင်းၶဝ်ႈ၊-
သွၼ်းလေႃႇႁူမ်ႈလူၺ်ႈၵၼ်တင်းၼမ်ႉမၢၵ်ႇၸပိတ်ႉတဝ်ႈပၢႆၶိုင်ႈဢေႃႈ။ ဢၢႆႁွမ်ဢၢႆႁူၺ်းတၢင်းလူႇၸိူဝ်းၼႆႉပဵၼ်ဢၼ်ထုၵ်ႇၸႂ်မႅၼ်ႈၸႂ် ထႃႇဝရႃႉၽြႃး၊ ဢေႃႈ။-
ပေႃးဢဝ်ဝူဝ်းပေႃႈသၢၵ်ႈလူႇတီႈ ထႃႇဝရႃႉၽြႃး၊ ႁႂ်ႈပဵၼ်တၢင်းလူႇဢၼ်တုတ်ႇၽႆး၊ဢမ်ႇၼၼ်တၢင်းလူႇဢၼ်ႁဵတ်းၵတိသဵတ်ႈၸႃႇ၊ဢမ်ႇၼၼ်တၢင်းလူႇမိၵ်ႈသႁႃႇယႃႉၸိုင်၊-
တၢင်းလူႇမၢၵ်ႇၶဝ်ႈႁူင်းၶဝ်ႈဢၼ်ပဵၼ်ၽွင်ၶဝ်ႈၵျုင်ႇၵဝ်ႈၶၼ် ၼွၵ်းလေႃးၼမ်ႉမၼ်းမၢၵ်ႇသၢၼ်ႇလုၼ်ႇသွင်တဝ်ႈ လႄႈသၢၵ်ႈလူႇလူၺ်ႈၵၼ်တင်းဝူဝ်းၼၼ်ႉ၊-
သွၼ်းလေႃႇပႃးတင်းၼမ်ႉမၢၵ်ႇၸပိတ်ႉသွင်တဝ်ႈဢေႃႈ။ ဢၢႆႁွမ်ဢၢႆႁူၺ်းတၢင်းလူႇၼႆႉထုၵ်ႇၸႂ်မႅၼ်ႈၸႂ် ထႃႇဝရႃႉၽြႃး၊ ဢေႃႈ။
“ဢၼ်ၼႆႉၸမ်ႉ၊ပဵၼ်ဢၼ်တၵ်းလႆႈသၢၵ်ႈလူႇၸိူဝ်ႉၼင်ႇၼႆမိူဝ်ႈဢၼ်သၢၵ်ႈလူႇဝူဝ်းပေႃႈယေႈတူဝ်၊ဢမ်ႇၼၼ်သူဝ်းပေႃႈယေႈတူဝ်၊ဢမ်ႇၼၼ်သူဝ်းဢွၼ်ႇယေႈတူဝ်၊ဢမ်ႇၼၼ်ပႄႉပေႃႈယေႈတူဝ်ဢေႃႈ။-
ပေႃးသၢၵ်ႈလူႇတရိၵ်ႈသၢၼ်ႇဢၼ်ၼမ်သေတူဝ်ၼိုင်ႈၵႂႃႇၸိုင်၊ၸွမ်းၵႃႈၼင်ႇဢၼ်ၼပ်ႉဢၢၼ်ႇၼၼ်ႉထၢပ်ႈသႂ်ႇၶိူင်ႈတၢင်းလူႇၸွမ်းၵႃႈၼင်ႇဢၼ်ၼပ်ႉဢၢၼ်ႇၼၼ်ႉတႃႉ။-
ၵူၼ်းမဵဝ်း ဢိသရေး၊ ၵူႈၵေႃႉတၵ်းလႆႈႁဵတ်းၸိူဝ်ႉၼင်ႇၼႆၼႂ်းမိူဝ်ႈဢၼ်ၶဝ်သၢၵ်ႈလူႇတၢင်းလူႇဢၼ်တုတ်ႇၽႆးဢၼ်ဢၢႆႁွမ်ဢၢႆႁူၺ်းမၼ်းထုၵ်ႇၸႂ်မႅၼ်ႈၸႂ် ထႃႇဝရႃႉၽြႃး၊ ၼၼ်ႉဢေႃႈ။-
ၼႂ်းၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈပိုင်ႈယူႇၸွမ်းသူၼၼ်ႉယေႈမိူဝ်ႈယေႈပွၵ်ႈၵူၺ်းသေဢမ်ႇဝႃႈ၊ယူႇသေႇသေႇသေဢမ်ႇဝႃႈ၊ပေႃးမီးဢလူဝ်ႇၶႂ်ႈသၢၵ်ႈလူႇတၢင်းလူႇဢၼ်တုတ်ႇၽႆးဢၼ်ဢၢႆႁွမ်ဢၢႆႁူၺ်းမၼ်းထုၵ်ႇၸႂ်မႅၼ်ႈၸႂ် ထႃႇဝရႃႉၽြႃး၊ ၼၼ်ႉၸိုင်၊ႁႂ်ႈမၼ်းႁဵတ်းၸွမ်းမိူၼ်ၼင်ႇဢၼ်သူႁဵတ်းၼၼ်ႉၼင်ႇၵဝ်ႇတႃႉ။-
ဢဝ်ၼႆႉၵႂႃႇဝၼ်းလိုၼ်းမိူဝ်းၼႃႈၸူဝ်ႈလုၵ်ႈပၢၼ်လၢၼ်သူသိုပ်ႇသိုပ်ႇတၢမ်တၢမ်ထုင်းတြႃးပိူင်လဵဝ်ၵူၺ်းတၵ်းလႆႈပဵၼ်ပုၼ်ႈသူဢိၵ်ႇတင်းၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈယူႇၸွမ်းသူၼၼ်ႉဢေႃႈ။ သူတင်းၶဝ်ၸိူဝ်းၼၼ်ႉပဵၼ်ဢၼ်မိူၼ်မိူၼ်ၵၼ်ၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢေႃႈ။-
တြႃးဢၼ်လဵဝ်၊ထုင်းၽိင်ႈဢၼ်လဵဝ်ၵူၺ်းတၵ်းလႆႈမီးပုၼ်ႈသူဢိၵ်ႇတင်းၶဝ်ၸိူဝ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၸဝ်ႈထႃႇဝရႃႉၽြႃး၊ သမ်ႉပၼ်ထုင်းၽိင်ႈတြႃးတီႈ မူဝ်းသေႇ၊-
ပုၼ်ႈၵူၼ်းမဵဝ်း ဢိသရေး၊ တင်းလၢႆလႄႈဝႃႈၸမ်ႉ၊ “မိူဝ်ႈဢၼ်သူတၵ်းၶဝ်ႈထိုင်မိူင်းဢၼ်ၵဝ်တေဢွၼ်သူင်ႇသူၵႂႃႇၼၼ်ႉ၊-
မိူဝ်ႈဢၼ်သူလႆႈၵိၼ်တၢင်းၵိၼ်တၢင်းၶူပ်းဢၼ်လႆႈၵႃႈတီႈမိူင်းၼၼ်ႉၸိုင်၊သူတၵ်းလႆႈဢဝ်ၵမ်ႈၽွင်ႈလႄႈႁဵတ်းတၢင်းလူႇဢၼ်ယုၵ်ႉယွင်ႈတီႈ ထႃႇဝရႃႉၽြႃး၊ ဢေႃႈ။-
မိူဝ်ႈဢၼ်သူၽဝ်ႁဵတ်းၶဝ်ႈမုၼ်းလူၺ်ႈၽွင်ၶဝ်ႈမုယေႃးဢၼ်လႆႈဢွၼ်တၢင်းသေပိူၼ်ႈၼၼ်ႉၸိုင်၊ဢဝ်ၶဝ်ႈမုၼ်းၼၼ်ႉၶႅပ်းၼိုင်ႈႁဵတ်းတၢင်းလူႇဢၼ်ယုၵ်ႉယွင်ႈတီႈ ထႃႇဝရႃႉၽြႃး၊ တႃႉ။ ၸိူဝ်ႉၼင်ႇဢၼ်ႁဵတ်းတၢင်းလူႇဢၼ်ယုၵ်ႉယွင်ႈၵႃႈၼႂ်းတလၢင်းယဵပ်ႇၶဝ်ႈၼၼ်ႉဢေႃႈ။-
သူတၵ်းလႆႈဢဝ်ၵႃႈၼႂ်းၽွင်ၶဝ်ႈမုယေႃးဢၼ်လႆႈဢွၼ်တၢင်းၼၼ်ႉႁဵတ်းတၢင်းလူႇဢၼ်ယုၵ်ႉယွင်ႈလႄႈသၢၵ်ႈၵၢပ်ႈတီႈ ထႃႇဝရႃႉၽြႃး၊ တႃႇသေႇၸူဝ်ႈလုၵ်ႈပၢၼ်လၢၼ်သူသိုပ်ႇသိုပ်ႇတၢမ်တၢမ်ဢေႃႈ။
“ပေႃးဝႃႈသေၵေႃႉၵေႃႉဢမ်ႇထၢင်ႇဢမ်ႇထိူမ်လႄႈဢမ်ႇပႂ်ႉဢမ်ႇၸွမ်းမႅၼ်ႈထုင်းတြႃးၸိူဝ်းဢၼ် ထႃႇဝရႃႉၽြႃး၊ သင်ႇလၢတ်ႈ မူဝ်းသေႇ၊ ဝႆႉၼႆႉသေဢမ်ႇဝႃႈ၊-
ပေႃးသမ်ႉဝႃႈမိူဝ်းၼႃႈထႃႈလိုၼ်းမူႇၵူၼ်းၸိူဝ်းၵူၼ်းတင်းလၢႆဢမ်ႇပႂ်ႉဢမ်ႇၸွမ်းမႅၼ်ႈထုင်းတြႃးၸိူဝ်းဢၼ် ထႃႇဝရႃႉၽြႃး၊ သင်ႇလၢတ်ႈတီႈ မူဝ်းသေႇ၊ ဝႆႉၸိူဝ်းၼၼ်ႉၵူႈၸိူဝ်ႉၵူႈပိူင်သေဢမ်ႇဝႃႈ၊-
ပေႃးပရိၵ်ႈသၢတ်ႈဢမ်ႇႁုလွင်ႈမၼ်းတၢင်းမၼ်းလႄႈႁဵတ်းၽိတ်းႁဵတ်းပိူင်ႈမႅၼ်ႈၵႂႃႇၸိုင်၊ၶဝ်တၵ်းလႆႈဢဝ်ဝူဝ်းပေႃႈတူဝ်ၼိုင်ႈသၢၵ်ႈလူႇႁႂ်ႈပဵၼ်တၢင်းလူႇဢၼ်တုတ်ႇၽႆးဢၼ်ဢၢႆႁွမ်ဢၢႆႁူၺ်းမၼ်းထုၵ်ႇၸႂ်မႅၼ်ႈၸႂ် ထႃႇဝရႃႉၽြႃး၊ ၼၼ်ႉ ႁူမ်ႈလူၺ်ႈၵၼ်တင်းတၢင်းလူႇမၢၵ်ႇၶဝ်ႈႁူင်းၶဝ်ႈဢၼ်သွၼ်းလေႃႇၼမ်ႉမၢၵ်ႇၸပိတ်ႉၼၼ်ႉဢေႃႈ။ ၶဝ်တၵ်းလႆႈဢဝ်ပႄႉပေႃႈတူဝ်ၼိုင်ႈထၢပ်ႈသႂ်ႇသၢၵ်ႈလူႇႁႂ်ႈပဵၼ်တၢင်းလူႇဢၼ်ၽေႇဢပျတ်ႈထႅင်ႈဢေႃႈ။-
ယဵၸ်ႈပရေႃးႁဵၵ်ႈ တၵ်းလႆႈႁဵတ်းပၼ်မၢင်ႇၵလႃႇတၢင်းဢၼ်မူတ်းၸၢင်ႇပုၼ်ႈမူႇၵူၼ်းၸိူဝ်းၵူၼ်းတင်းလၢႆဢေႃႈ။ ၼင်ႇၼၼ်လႄႈၶဝ်တၵ်းၵၢင်းလွတ်ႈတင်းဢပျတ်ႈၼၼ်ႉၵွပ်ႈပိူဝ်ႈၶဝ်ယင်းဢမ်ႇႁုလွင်ႈမၼ်းတၢင်းမၼ်းလႄႈၽိတ်းပိူင်ႈမႅၼ်ႈၼၼ်ႉဢေႃႈ။ ၶဝ်ၼၼ်ႉၵွပ်ႈပိူဝ်ႈဢပျတ်ႈဢၼ်လိုမ်းတူဝ်လႄႈတၵ်းလႆႈႁဵတ်းတၢင်းလူႇဢၼ်တုတ်ႇၽႆးလႄႈတၢင်းလူႇဢၼ်ၽေႇဢပျတ်ႈတီႈ ထႃႇဝရႃႉၽြႃး၊ ဢေႃႈ။-
ပေႃးႁဵတ်းၸိူဝ်ႉၼင်ႇၼၼ်ၸိုင်၊မူႇၵူၼ်းၸိူဝ်းၵူၼ်းမဵဝ်း ဢိသရေး၊ တင်းလၢႆဢိၵ်ႇတင်းၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈယူႇၸွမ်းၶဝ်ၼၼ်ႉတၵ်းၵၢင်းလွတ်ႈတင်းဢပျတ်ႈဢေႃႈ။ လွင်ႈမၼ်းၸမ်ႉ၊ၶဝ်တင်းသဵင်ႈတင်းမူတ်းယင်းဢမ်ႇႁုလွင်ႈႁုတၢင်းလႄႈၽိတ်းပိူင်ႈမႅၼ်ႈဢေႃႈ။
“ပေႃးသေၵေႃႉသေၵူၼ်းယင်းဢမ်ႇထၢင်ႇဢမ်ႇထိူမ်လႄႈၽိတ်းပိူင်ႈမႅၼ်ႈၸိုင်၊မၼ်းတၵ်းလႆႈသၢၵ်ႈလူႇပႄႉမႄႈတူဝ်ၼိုင်ႈဢၼ်ၶွပ်ႈၶူပ်ႇလႆႈၼိုင်ႈပီပဵၼ်တၢင်းလူႇဢၼ်ၽေႇဢပျတ်ႈဢေႃႈ။-
ယဵၸ်ႈပရေႃးႁဵၵ်ႈတၵ်းလႆႈႁဵတ်းပၼ်မၢင်ႇၵလႃႇတၢင်းဢၼ်မူတ်းၸၢင်ႇႁႂ်ႈၵေႃႉၼၼ်ႉလႆႈၵၢင်းလွတ်ႈတင်းဢပျတ်ႈမၼ်းၼၼ်ႉၵႃႈတီႈၶဵင်ႇတၢင်းလူႇလႄႈ၊ဢပျတ်ႈၵေႃႉၼၼ်ႉၵေႃႈလႆႈလွတ်ႈဢေႃႈ။-
သူတၵ်းလႆႈမီးထုင်းတြႃးပိူင်လဵဝ်ၵူၺ်းပုၼ်ႈၵေႃႉဢၼ်ဢမ်ႇထၢင်ႇဢမ်ႇထိူမ်လႄႈၽိတ်းပိူင်ႈမႅၼ်ႈၵႂႃႇၵႃႈၼႂ်းၵူၼ်းမဵဝ်းသူ၊ဢမ်ႇၼၼ်ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈပိုင်ႈယူႇၸွမ်းသူၼၼ်ႉဢေႃႈ။
“ၼႂ်းဝႃႈၼၼ်သေၵေႃႈ၊ၵေႃႉလႂ်ၵူၼ်းလႂ်သေဢမ်ႇဝႃႈ၊သမ်ႉပဵၼ်ၵူၼ်းမဵဝ်းသူသေဢမ်ႇဝႃႈ၊ပဵၼ်ၵူၼ်းမဵဝ်းပိူၼ်ႈသေဢမ်ႇဝႃႈ၊ပေႃးတင်ႈၸႂ်တင်ႈၶေႃးႁဵတ်းၽိတ်းႁဵတ်းပိူင်ႈၸိုင်၊မၼ်းဢမ်ႇၼပ်ႉဢမ်ႇၶၢၼ်း ထႃႇဝရႃႉၽြႃး၊ လႄႈ၊တၵ်းလႆႈပႄႇပႅတ်ႈမၼ်းသေၵႃႈၼႂ်းၸိူဝ်ႉၶိူဝ်းသူဢေႃႈ။-
ၵွပ်ႈပိူဝ်ႈမၼ်းႁဵတ်းဢမ်ႇပေႃးၼင်ႇႁိုဝ်တီႈၵႂၢမ်း ထႃႇဝရႃႉၽြႃး၊ လႄႈပူၼ်ႉလိူဝ်ပိင်းၺၢပ်ႈမၼ်းၸဝ်ႈဢေႃႈ။ မၼ်းၼၼ်ႉတၵ်းလႆႈၶၢမ်ႇတၢင်းဢၼ်ပႄႇပႅတ်ႈပုတ်းပုတ်းၶၢတ်ႇၶၢတ်ႇဢေႃႈ။ မၼ်းတၵ်းလႆႈၶၢမ်ႇတၢမ်ႇဢပျတ်ႈတူဝ်ၸဝ်ႈၵဝ်ႇဢေႃႈ။”
ၽဝ်ႇၼိုင်ႈ၊မိူဝ်ႈဢၼ်ၵူၼ်းမဵဝ်း ဢိသရေး၊ တင်းလၢႆယင်းမီးယူႇၵႃႈၼႂ်းထိူၼ်ႇၼၼ်ႉၸိုင်၊ၶဝ်ထူပ်းႁၼ်ၵူၼ်းၵေႃႉၼိုင်ႈဢၼ်ႁႃၽိုၼ်းၼႂ်းဝၼ်းၵမ်သိၼ်ၼၼ်ႉဢေႃႈ။-
ၶဝ်ၼၼ်ႉႁွင်ႉဢဝ်ၵေႃႉၼၼ်ႉမႃးၵႃႈတီႈ မူဝ်းသေႇ၊ တင်း ဢႃႇရုၼ်ႇ၊ ဢိၵ်ႇတင်းၵႃႈတီႈမူႇၵူၼ်းၸိူဝ်းၵူၼ်းတင်းလၢႆဢေႃႈ။-
ၶဝ်ၸိူဝ်းၼၼ်ႉဢဝ်မၼ်းၶျုၵ်ႈဝႆႉၵွပ်ႈပိူဝ်ႈဢမ်ႇပႆႇလႆႈႁုလွင်ႈဢၼ်တၵ်းလႆႈႁဵတ်းၸိူဝ်ႉၼင်ႇႁိုဝ်ၸီႇယၢင်ႇတီႈမၼ်းၼၼ်ႉဢေႃႈ။-
ထႃႇဝရႃႉၽြႃး၊ ၵေႃႈမီးဢမိင်ႉတီႈ မူဝ်းသေႇ၊ လႄႈဝႃႈ၊ “ၵူၼ်းၵေႃႉၼၼ်ႉတၵ်းလႆႈၶၢမ်ႇတၢင်းဢၼ်ဢဝ်တၢႆပႅတ်ႈဢေႃႈ။ မူႇၵူၼ်းၸိူဝ်းၵူၼ်းတင်းမူတ်းတၵ်းလႆႈဢဝ်မၢၵ်ႇႁိၼ်ပိုဝ်ႈသႂ်ႇမၼ်းၵႃႈၼွၵ်ႈပၢင်တပ်ႉဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ၊မူႇၵူၼ်းၸိူဝ်းၵူၼ်းတင်းလၢႆဢွၼ်ၵၼ်ဢဝ်မၼ်းဢွၵ်ႇၵႃႈၼွၵ်ႈပၢင်တပ်ႉလႄႈဢဝ်မၢၵ်ႇႁိၼ်ပိုဝ်ႈသႂ်ႇမၼ်းတၢႆပႅတ်ႈမႅၼ်ႈၸွမ်းၼင်ႇဢၼ် ထႃႇဝရႃႉၽြႃး၊ မီးဢမိင်ႉၼၼ်ႉဢေႃႈ။
ၸဝ်ႈထႃႇဝရႃႉၽြႃး၊ သမ်ႉမီးဢမိင်ႉၵႃႈတီႈ မူဝ်းသေႇ၊ ထႅင်ႈလႄႈ၊-
ႁႂ်ႈမၼ်းသင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆသေလႄႈဝႃႈ၊ “သူတၵ်းလႆႈႁဵတ်းၸၢမ်းပူႁွႆႈၵႃႈတီႈၸဵင်ႇၶူဝ်းၼုင်ႈသူလႄႈဢဝ်တင်းသၢႆသွမ်ႇမတ်ႉႁွႆႈဝႆႉဢေႃႈ။ တၵ်းလႆႈသိုပ်ႇႁဵတ်းၵႂႃႇတေႃႇထိုင်ႁွတ်ႈၸူဝ်ႈလုၵ်ႈပၢၼ်လၢၼ်သူတႃႇသေႇသိုပ်ႇသိုပ်ႇတၢမ်တၢမ်ဢေႃႈ။-
ၸၢမ်းပူၼၼ်ႉပဵၼ်ပုၼ်ႈဢၼ်သူတၵ်းတူၺ်းႁၼ်လႄႈၶုၵ်းၸႂ်လႆႈပိင်းၺၢပ်ႈ ထႃႇဝရႃႉၽြႃး၊ ၵႃႈမီးတင်းသဵင်ႈတင်းလူင်လႄႈၵမ်ၵျၢင်ႉၸွမ်းဢိၵ်ႇတင်းပဵၼ်ပုၼ်ႈဢၼ်သူတၵ်းဢမ်ႇလႆႈဝႄႈပၢႆႈသေၵႃႈတီႈၵဝ်လႄႈၸွမ်းဢလူဝ်ႇၵၢင်ၸႂ်သူၵႂႃႇၼၼ်ႉဢေႃႈ။-
ၸၢမ်းပူၼၼ်ႉတၵ်းပၼ်သတိတီႈသူႁႂ်ႈသူၵမ်ၵျၢင်ႉပိင်းၺၢပ်ႈၵဝ်ဢိၵ်ႇတင်းႁႂ်ႈသူပဵၼ်ၵူၼ်းၵဝ်လုမ်းလုမ်းဢေႃႈ။-
ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢၼ်ထုတ်ႇၼုၵ်ႈဢဝ်သူဢွၵ်ႇမိူင်း ဢေးၵျိပ်ႉ၊ မႃးႁႂ်ႈလႆႈပဵၼ်ၽြႃးပဵၼ်ၸဝ်ႈသူဢေႃႈ။ ၵဝ်ပဵၼ် ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။
ၵေႃးရႃႉ၊ လုၵ်ႈၸၢႆး ဢိၸႁႃႇ၊ ဢၼ်ပဵၼ်ၵူၼ်း လေႇဝိ၊ ၼႂ်းၶိူဝ်းႁိူၼ်း ၵေႃႇႁတ်ႉ၊ ၼၼ်ႉၽွမ်ႉၵၼ်တင်းၵူၼ်းၸိူဝ်ႉၶိူဝ်း ရုပိၼ်ႇ၊ သၢမ်ၵေႃႉ၊ တႃႇႀၼ်ႇ၊ တင်း ဢၽိရမ်ႇ၊ လုၵ်ႈၸၢႆး ဢေးလျႃႇၽႃႉ၊ တင်း ဢေႃးၼႃႉ၊ လုၵ်ႈၸၢႆး ပေးလိတ်ႉ၊ ၼၼ်ႉလုၵ်ႉၽိုၼ်ႉ မူဝ်းသေႇ၊ ဢေႃႈ။-
ၶဝ်ၸူဝ်းဢဝ်လႆႈၵူၼ်းမဵဝ်း ဢိသရေး၊ သွင်ပၢၵ်ႇႁႃႈသိပ်း၊ဢၼ်ႁဵတ်းၵူၼ်းၵႄႇၵူၼ်းႁူဝ်ဢၼ်ၸိုဝ်ႈဢွၵ်ႇသဵင်ဢွၵ်ႇ၊ၸိူဝ်းဢၼ်မူႇၵူၼ်းၸိူဝ်းၵူၼ်းၽွမ်ႉၵၼ်လိူၵ်ႈတၢင်ႇဝႆႉၼၼ်ႉဢေႃႈ။-
ၶဝ်ဢွၼ်ၵၼ်ၸုတုမ်ယူႇၵႃႈတီႈၽၢႆႇၼႃႈ မူဝ်းသေႇ၊ တင်း ဢႃႇရုၼ်ႇ၊ သေယဝ်ႉလၢတ်ႈတီႈၶဝ်လႄႈဝႃႈ၊ “သူႁဵတ်းပူၼ်ႉႁဵတ်းလိူဝ်ၼႃႇၽႅဝ်ယဝ်ႉ။ ၵူၼ်းဢၼ်ၶဝ်ႈပႃးၼႂ်းမူႇၵူၼ်းၸိူဝ်းၵူၼ်းတင်းလၢႆပဵၼ်ၵူၼ်း ထႃႇဝရႃႉၽြႃး၊ ၵူႈၵေႃႉၵူႈၵူၼ်းဢေႃႈ။ ထႃႇဝရႃႉၽြႃး၊ ၵေႃႈမီးယူႇလူၺ်ႈၵၼ်တင်းႁဝ်းတင်းသဵင်ႈတင်းလူင်ဢေႃႈ။ ပိူဝ်ႈၼႆလႄႈ မူဝ်းသေႇ၊ ႟။ ၵွပ်ႈပိူဝ်ႈသင်လႄႈမႂ်းယုၵ်ႉယွင်ႈတူဝ်ၸဝ်ႈၵဝ်ႇၵႃႈၼိူဝ်မူႇၵူၼ်းၸိူဝ်းၵူၼ်း ထႃႇဝရႃႉၽြႃး၊ ၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
မူဝ်းသေႇ၊ ငိၼ်းၵႂၢမ်းၼၼ်ႉသေယဝ်ႉ၊ၶုပ်ႉမူပ်ႇလႄႈသူးတွင်းဢေႃႈ။-
မၼ်းလၢတ်ႈတီႈ ၵေႃးရႃႉ၊ ဢိၵ်ႇတင်းမူႇၵူၼ်းၽုင်ၵူၼ်းမၼ်းၼၼ်ႉလႄႈဝႃႈ၊ “မိူဝ်ႈၽုၵ်ႈၵၢင်ၼႂ် ထႃႇဝရႃႉၽြႃး၊ တၵ်းၼႄပျႃးႁဝ်းလွင်ႈဢၼ်ၽူႈလႂ်ပဵၼ်ၵူၼ်းမၼ်းၸဝ်ႈ၊ၽူႈလႂ်မူတ်းၸၢင်ႇ၊တၵ်းႁႂ်ႈၽူႈလႂ်သုတ်ႉၸမ်မၼ်းၸဝ်ႈၼၼ်ႉဢေႃႈ။ မၼ်းၸဝ်ႈတၵ်းႁႂ်ႈၵေႃႉဢၼ်မၼ်းၸဝ်ႈလိူၵ်ႈဢဝ်ၼၼ်ႉသုတ်ႉၸမ်မၼ်းၸဝ်ႈတီႈၶဵင်ႇတၢင်းလူႇဢေႃႈ။-
မိူဝ်ႈၽုၵ်ႈၵၢင်ၼႂ်မႂ်းဢိၵ်ႇတင်းၵူၼ်းၸွမ်းမႂ်းၸိူဝ်းၼၼ်ႉဢဝ်ၽၢင်ၽႆးလႄႈသႂ်ႇထၢၼ်ႇလႅင်သေယဝ်ႉ၊ဢဝ်ၼၢမ်ႇသႃႇတၢင်ႇၵႃႈၼိူဝ်ထၢၼ်ႇၽႆးလႅင်လႄႈမႃးတီႈၶဵင်ႇတၢင်းလူႇတႃႉ။-
မိူဝ်ႈၼၼ်ႉႁဝ်းတၵ်းလႆႈႁုလွင်ႈဢၼ် ထႃႇဝရႃႉၽြႃး၊ လိူၵ်ႈဢဝ်ႁဝ်းၵေႃႉလႂ်ၼၼ်ႉဢေႃႈ။ သူဢၼ်ပဵၼ်ၵူၼ်း လေႇဝိ၊ တင်းလၢႆၵူၺ်းႁဵတ်းပူၼ်ႉႁဵတ်းလိူဝ်ၼႃႇဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ သမ်ႉသိုပ်ႇလၢတ်ႈတီႈ ၵေႃးရႃႉ၊ လႄႈဝႃႈ၊ “သူဢၼ်ပဵၼ်ၵူၼ်း လေႇဝိ၊ ၶဝ်႟။ ဢွၼ်ၵၼ်ထွမ်ႇငိၼ်းတႃႉ။-
သူႁဵတ်းဢမ်ႇပေႃးၼင်ႇႁိုဝ်တီႈၵျေးၸူးတၢင်းဢၼ်ၽြႃးပဵၼ်ၸဝ်ႈၽႄဢဝ်သူဢွၵ်ႇသေၵႃႈၼႂ်းမူႇၵူၼ်းၸိူဝ်းၵူၼ်းမဵဝ်း ဢိသရေး၊ လႄႈပၼ်ၶႂၢင်ႉဢၼ်လႆႈသုတ်ႉၸမ်မၼ်းၸဝ်ႈႁႂ်ႈသူလႆႈၵိုတ်ႉႁၢပ်ႇၼႃႈၵၢၼ် ထႃႇဝရႃႉၽြႃး၊ ၵႃႈၼႂ်းသုမ်ႉထဵင်ၸဝ်ႈပုၼ်ႈဢၼ်တၵ်းပွင်ထၢမ်းၼႃႈၵၢၼ်ၽၢႆႇၼႃႈမူႇၵူၼ်းၸိူဝ်းၵူၼ်းတင်းလၢႆသေယဝ်ႉ၊ပႂ်ႉဢမုၶဝ်ၼၼ်ႉလူင်ပႄႇ။-
မၼ်းၸဝ်ႈပၼ်ဢၶႂၢင်ႉတီႈမႂ်းဢိၵ်ႇတင်းပီႈၼွင်ႉမႂ်းၵူၼ်း လေႇဝိ၊ တင်းလၢႆႁႂ်ႈမီးၵုင်ႇသရေႇၸိူဝ်ႉၼင်ႇၼႆယဝ်ႉ။ ၵူၺ်းၵႃႈ၊မႂ်းမီးၸႂ်ဢၼ်ၶႂ်ႈႁိမ်ဢဝ်ဢရႃႇယဵၸ်ႈပရေႃးႁဵၵ်ႈ လူင်ပႄႇ။-
လွင်ႈတၢင်းဢၼ်သူတၢင်ႇဢပျတ်ႈပွင်ႉၶၢင်းပွင်ႉမိုၼ်ႇတီႈ ဢႃႇရုၼ်ႇ၊ ၼၼ်ႉပဵၼ်တၢင်းဢၼ်မႂ်းဢိၵ်ႇတင်းမူႇၵူၼ်းၽုင်ၵူၼ်းမႂ်းလုၵ်ႉၽိုၼ်ႉ ထႃႇဝရႃႉၽြႃး၊ တႄႉယဝ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ မူဝ်းသေႇ၊ ပွႆႇၸႂ်ႉၵႂႃႇႁႂ်ႈလႆႈႁွင်ႉဢဝ် တႃႇႀၼ်ႇ၊ တင်း ဢၽိရမ်ႇ၊ လုၵ်ႈၸၢႆး ဢေးလျႃႇၽႃႉ၊ ၸိူဝ်းၼၼ်ႉမႃးဢေႃႈ။ ၵူၺ်းၵႃႈ၊ၶဝ်သွင်ၵေႃႉၼၼ်ႉဝႃႈ၊ “ႁဝ်းဢမ်ႇမႃး။-
မႂ်းၼႆႉဢွၼ်ဢဝ်ႁဝ်းဢွၵ်ႇမိူင်း ဢေးၵျိပ်ႉ၊ ဢၼ်ၽုၼ်ႇၼမ်ႉမၼ်းလိၼ်လီၼႃႇၼၼ်ႉမႃးႁႂ်ႈလႆႈဢဝ်ႁဝ်းတၢႆၵႃႈတီႈၼႂ်းထိူၼ်ႇၼႆႉယင်းဢမ်ႇပႆႇပႄႇၸႂ်လူးၵွၼ်ႇႁိုဝ်း။ မႂ်းသမ်ႉယင်းၶႂ်ႈႁဵတ်းၶုၼ်ၵႃႈၼိူဝ်ႁဝ်းၼႆႉလူးၵွၼ်ႇႁိုဝ်း။-
လိူဝ်သေၼၼ်ႉမႂ်းဢမ်ႇဢွၼ်ႁဝ်းၵႂႃႇသူင်ႇၵႃႈတီႈမိူင်းဢၼ်ၽုၼ်ႇၼမ်ႉမၼ်းလိၼ်လီၼႃႇၼၼ်ႉ၊ယင်းဢမ်ႇပၼ်ႁႆႈၼႃး၊သူၼ်မၢၵ်ႇၸပိတ်ႉတင်းလၢႆပုၼ်ႈဢၼ်ႁဝ်းတၵ်းလႆႈပိူင်ႇၼၼ်ႉလႄႈမႂ်းၵူၺ်းၶႂ်ႈၶွၵ်းမၢၵ်ႇတႃၵူၼ်းၸိူဝ်းၼႆႉပႅတ်ႈဢေႃႈ။ ႁဝ်းဢမ်ႇမႃးၵႃႈတီႈမႂ်း၊” ဝႃႈၼင်ႇၼႆဢေႃႈ။
မူဝ်းသေႇ၊ ဢွၵ်ႇတေႃးသႃႉတင်းၸႂ်မႆႈၶႂ်ႈၸႃႉသေလႄႈလဝ်ႈလၢတ်ႈတီႈ ထႃႇဝရႃႉၽြႃး၊ လႄႈဝႃႈ၊ “ယႃႇပေႁပ်ႉဢဝ်ၶၢမ်ႇဢဝ်ၶိူင်ႈတၢင်းလူႇဢၼ်ၶဝ်သၢၵ်ႈလူႇၼၼ်ႉသေၵမ်းတီႈၶႃႈ၊ၶႃႈၸဝ်ႈႁဝ်းဢမ်ႇလႆႈၽိတ်းပိူင်ႈၵၼ်တင်းၶဝ်သေၵေႃႉတီႈၶႃႈ။ ၶႃႈၸဝ်ႈႁဝ်းယင်းဢမ်ႇလႆႈသိမ်းလႆႈဢဝ်မႃႉလီႈၶဝ်သေတူဝ်တီႈၶႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ လၢတ်ႈတီႈ ၵေႃးရႃႉ၊ လႄႈဝႃႈ၊ “ဝၼ်းမိူဝ်ႈၽုၵ်ႈမႂ်းတင်းၵူၼ်းမႂ်းတင်းသွင်ပၢၵ်ႇႁႃႈသိပ်းၼၼ်ႉဢွၼ်ၵၼ်မႃးၵႃႈတီႈသုမ်ႉထဵင်ၸဝ်ႈတႃႉ။ ဢႃႇရုၼ်ႇ၊ တၵ်းမီးယူႇၵႃႈတီႈၼၼ်ႈၼင်ႇၵဝ်ႇဢေႃႈ။-
သူၵူႈၵေႃႉတၵ်းလႆႈဢဝ်ၽၢင်ၽႆးမႃးလႄႈသႂ်ႇၼၢမ်ႇသႃႇဝႆႉႁင်းၽႂ်ႁင်းမၼ်းသေယဝ်ႉ၊သၢၵ်ႈလူႇတီႈၶဵင်ႇတၢင်းလူႇဢေႃႈ၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈၶဝ်ဢွၼ်ၵၼ်ပႃးဢဝ်ၽၢင်ၽႆးတူဝ်ၸဝ်ႈၵဝ်ႇႁင်းၽႂ်ႁင်းမၼ်းလႄႈဢဝ်သႂ်ႇထၢၼ်ႇလႅင်တင်းၼၢမ်ႇသႃႇသေယဝ်ႉ၊ဢွၼ်ၵၼ်ၸုၵ်းယူႇၵႃႈတီႈၽၵ်းတူသုမ်ႉထဵင်ၸဝ်ႈႁူမ်ႈလူၺ်ႈၵၼ်တင်း မူဝ်းသေႇ၊ တင်း ဢႃႇရုၼ်ႇ၊ ဢေႃႈ။-
ၵေႃးရႃႉ၊ ႁွင်ႉၸုႁွင်ႉတုမ်မူႇၵူၼ်းၸိူဝ်းၵူၼ်းတင်းသဵင်ႈတင်းလူင်ၸုၵ်းတေႃႇၼႃႈၵၼ်တင်း မူဝ်းသေႇ၊ တင်း ဢႃႇရုၼ်ႇ၊ ယူႇၵႃႈတီႈၽၵ်းတူသုမ်ႉထဵင်ၸဝ်ႈဢေႃႈ။ မိူဝ်ႈၼၼ်ႉၵမ်းလဵဝ်မုၼ်ၽုင်းဢၼ်လႅင်း ထႃႇဝရႃႉၽြႃး၊ ပေႃႇမႃးထၢင်ႇသႃးၵႃႈတီႈမူႇၵူၼ်းၸိူဝ်းၵူၼ်းတင်းသဵင်ႈတင်းလူင်ဢေႃႈ။-
ၶဝ်ၵေႃႈၶုပ်ႉမူပ်ႇလႄႈလဝ်ႈလၢတ်ႈဝႃႈ၊ “ဢူဝ်းၽြႃးပဵၼ်ၸဝ်ႈတီႈၶႃႈ။ ၸဝ်ႈႁဝ်းပဵၼ်ၽြႃးပဵၼ်ၸဝ်ႈဢၼ်ဢုပ်ႉပိူင်ႇဢသၢၵ်ႈဝိၺိၺ်ႇသတ်ႉတဝႃႇတင်းသဵင်ႈတင်းလူင်တီႈၶႃႈဢေႃႈ။ ၵွပ်ႈပိူဝ်ႈၵူၼ်းၵေႃႉၼိုင်ႈၽိတ်းပိူင်ႈလႄႈၸဝ်ႈႁဝ်းဢွၵ်ႇတေႃးသႃႉတၢင်းၸႂ်မႆႈၶႂ်ႈၸႃႉတီႈမူႇၵူၼ်းၸိူဝ်းၵူၼ်းတင်းသဵင်ႈတင်းလူင်တီႈၶႃႈႁိုဝ်း၊” ဝႃႈၼင်ႇၼႆဢေႃႈ။
ၸဝ်ႈထႃႇဝရႃႉၽြႃး၊ သမ်ႉမီးဢမိင်ႉၵႃႈတီႈ မူဝ်းသေႇ၊ ထႅင်ႈလႄႈဝႃႈ၊-
“သင်ႇလၢတ်ႈၵူၼ်းတင်းလၢႆႁႂ်ႈၶဝ်ၶၢႆႉဝႄႈပၢႆႈသေၵႃႈတီႈသုမ်ႉထဵင် ၵေႃးရႃႉ၊တႃႇႀၼ်ႇ၊ တင်း ဢၽိရမ်ႇ၊ တႃႉ၊” ဝႃႈၼင်ႇၼႆဢေႃႈ။
မူဝ်းသေႇ၊ လုၵ်ႉၵႂႃႇၸူးၵႃႈတီႈသုမ်ႉထဵင် တႃႇႀၼ်ႇ၊ တင်းသုမ်ႉထဵင် ဢၽိရမ်ႇ၊ ၼၼ်ႉလႄႈၵူၼ်းဢၼ်ပဵၼ်ၵႄႇပဵၼ်ႁူဝ်မဵဝ်း ဢိသရေး၊ ၶဝ်ၵေႃႈဢွၼ်ၵၼ်ၸွမ်းမၼ်းၵႂႃႇဢေႃႈ။-
မၼ်းၵေႃႈလၢတ်ႈတီႈၵူၼ်းတင်းလၢႆလႄႈဝႃႈ၊ “သူဢွၼ်ၵၼ်ၶၢႆႉဝႄႈပၢႆႈသေၵႃႈတီႈသုမ်ႉထဵင်ၵူၼ်းႁၢႆႉၸိူဝ်းၼႆႉသေလႄႈယူႇတႃႉ။ ယႃႇပေတိူဝ်ႉပေယိပ်းၶူဝ်းၶွင်ၶဝ်သေၸိူဝ်ႉသေပိူင်။ ပေႃးဢမ်ႇၼၼ်သူတၵ်းႁွတ်ႈထိုင်တၢင်းလုတၢင်းလႅဝ်ၵွပ်ႈပိူဝ်ႈဢပျတ်ႈၶဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၶဝ်ဢွၼ်ၵၼ်ၶၢႆႉဝႄႈပၢႆႈသေၵႃႈတီႈသုမ်ႉထဵင် ၵေႃးရႃႉ၊ ဢိၵ်ႇတင်း တႃႇႀၼ်ႇ၊ တင်း ဢၽိရမ်ႇ၊ ၸိူဝ်းၼၼ်ႉသေလႄႈယူႇဢေႃႈ။ တႃႇႀၼ်ႇ၊ တင်း ဢၽိရမ်ႇ၊ ၵေႃႈဢွၵ်ႇမႃးႁူမ်ႈလူၺ်ႈၵၼ်တင်းမေးၶဝ်တင်းလုၵ်ႈဢွၼ်ႇၶဝ်လႄႈၸုၵ်းယူႇၵႃႈတီႈႁူးၽၵ်းတူသုမ်ႉထဵင်ၶဝ်ဢေႃႈ။-
မူဝ်းသေႇ၊ ၸင်ႇလၢတ်ႈတီႈၵူၼ်းတင်းလၢႆလႄႈဝႃႈ၊ “သူတၵ်းလႆႈႁုလွင်ႈဢၼ် ထႃႇဝရႃႉၽြႃး၊ ပွႆႇၸႂ်ႉၵဝ်ႁႂ်ႈၵဝ်လႆႈႁဵတ်းလွင်ႈတၢင်းၵူႈၸိူဝ်ႉၵူႈပိူင်ၸိူဝ်းၼႆႉလႄႈတၵ်းလႆႈႁုလွင်ႈဢၼ်ၵဝ်ယင်းဢမ်ႇႁဵတ်းၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇၼၼ်ႉဢေႃႈ။-
ပေႃးၵူၼ်းၸိူဝ်းၼႆႉယင်းဢမ်ႇလႆႈတၢႆၵွပ်ႈပိူဝ်ႈဢၼ် ထႃႇဝရႃႉၽြႃး၊ ပၼ်တၢမ်ႇတၢႆလႄႈလႆႈတၢႆၸွမ်းသၽႃႇဝႃႉတၢင်းတၢႆၸိုင်၊ ထႃႇဝရႃႉၽြႃး၊ ဢမ်ႇပွႆႇၸႂ်ႉၵဝ်မႃး။-
ၵူၺ်းၵႃႈ၊ပေႃး ထႃႇဝရႃႉၽြႃး၊ ႁဵတ်းပဵၼ်မဵဝ်းဢၼ်ၵူၼ်းဢမ်ႇတွၼ်ႉငိၼ်းသေပွၵ်ႈ၊ဢၼ်ပဵၼ်တၢင်းဢၼ်လိၼ်မိူင်းတႅၵ်ႇဢႃႈလႄႈဢိုၼ်ၶဝ်ၸိူဝ်းၼႆႉဢိၵ်ႇတင်းဢုၵ်ႉၸႃႇဢၼ်ပဵၼ်ၶူဝ်းၶွင်ၶဝ်ၼၼ်ႉပႅတ်ႈ၊လႄႈၶဝ်လႆႈလူင်းၵႂႃႇၵႃႈတီႈမိူင်း မရၼႃႉ၊ မိူဝ်ႈဢၼ်ယင်းဢသၢၵ်ႈလိပ်းယူႇၼၼ်ႉၸိုင်၊သူတၵ်းလႆႈႁုၸႅင်ႈလွင်ႈဢၼ်ၵူၼ်းၸိူဝ်းၼႆႉလႆႈထဵင်ပႅတ်ႈ ထႃႇဝရႃႉၽြႃး၊ ယဝ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်မၼ်းလၢတ်ႈဝႃႈၸိူဝ်ႉၼင်ႇၼႆသုတ်းယဝ်ႉၼၼ်ႉၵမ်းလဵဝ်၊လိၼ်မိူင်းတီႈဢၼ်ၶဝ်ယဵပ်ႇၼၼ်ႉတႅၵ်ႇဢႃႈမႃးလႄႈ၊-
ဢိုၼ်ၶဝ်ဢိၵ်ႇတင်းၵူၼ်းႁိူၼ်းၵူၼ်းယေးၶဝ်ႁူမ်ႈလူၺ်ႈၵၼ်တင်းမူႇၵူၼ်းၽုင်ၵူၼ်း ၵေႃးရႃႉ၊ တင်းသဵင်ႈတင်းမူတ်းပႃးတင်းဢုၵ်ႉၸႃႇၶဝ်ၵႃႈမီးၸိူဝ်းၼၼ်ႉပႅတ်ႈဢေႃႈ။-
ၼင်ႇၼၼ်လႄႈၶဝ်ၸိူဝ်းၼၼ်ႉလူင်းၵႂႃႇၵႃႈတီႈမိူင်းမရၼႃႉတင်းလိပ်းႁူမ်ႈလူၺ်ႈၵၼ်တင်းဢုၵ်ႉၸႃႇၶဝ်သေဢေႃႈ။ လိၼ်မိူင်းၶိုၼ်းႁုပ်ႇငီႇငႅၼ်ႇၵၼ်ၵႃႈၼိူဝ်ၶဝ်ၼၼ်ႉသေလႄႈ၊ၶဝ်ၵေႃႈလႆႈႁၢႆလၢႆၵႂႃႇဢေႃႈ။-
ၵူၼ်းမဵဝ်း ဢိသရေး၊ တင်းသဵင်ႈတင်းလူင်လႆႈငိၼ်းသဵင်ဢၼ်ၶဝ်ႁွင်ႉသႅၼ်ႇၼၼ်ႉလႄႈဢွၼ်ၵၼ်လႅၼ်ႈပၢႆႈဢေႃႈ။ ၶဝ်ဝႃႈ၊ “လႅၼ်ႈတႃႉ။ ၵူဝ်လိၼ်မိူင်းဢိုၼ်ပႃးႁဝ်းၵႂႃႇဢေႃႈ၊” ဝႃႈၼင်ႇၼႆဢေႃႈ။
လိုၼ်းၼၼ်ႉ၊ ထႃႇဝရႃႉၽြႃး၊ ပွႆႇၸႂ်ႉမုၵ်ႉၽႆးမႃးမႆႈပႅတ်ႈၵူၼ်းသွင်ပၢၵ်ႇပၢႆႁႃႈသိပ်းၵေႃႉဢၼ်ဢဝ်ၼၢမ်ႇသႃႇတုတ်ႇၽႆးသေလႄႈႁဵတ်းတၢင်းလူႇၼၼ်ႉဢေႃႈ။
ၸဝ်ႈထႃႇဝရႃႉၽြႃး၊ သမ်ႉမီးဢမိင်ႉၵႃႈတီႈ မူဝ်းသေႇ၊ လႄႈဝႃႈ၊-
“သင်ႇလၢတ်ႈတီႈ ဢေးလႃႇၸႃႇ၊ လုၵ်ႈၸၢႆးယဵၸ်ႈပရေႃးႁဵၵ်ႈ ဢႃႇရုၼ်ႇ၊ ႁႂ်ႈမၼ်းၵဵပ်းဢဝ်ၽၢင်ၽႆးတွင်းလိူင်တင်းလၢႆဢၼ်ၵိုတ်းၵျၢၼ်ႇဝႆႉသေၵႃႈတီႈၵူၼ်းၸိူဝ်းဢၼ်ၽႆးမႆႈပႅတ်ႈယဝ်ႉၼၼ်ႉသေယဝ်ႉ၊ႁႂ်ႈမၼ်းဢဝ်ထၢၼ်ႇၽႆးၵႃႈတီႈၽၢင်ၽႆးၸိူဝ်းၼၼ်ႉၵႂႃႇပႅတ်ႈတီႈဢၼ်ၵႆၵႆၼၼ်ႉတႃႉ။ လွင်ႈမၼ်းၸမ်ႉ၊ပၢၼ်ႉဢၼ်သႂ်ႇၽႆးၸိူဝ်းၼၼ်ႉပဵၼ်ဢၼ်မူတ်းၸၢင်ႇဢေႃႈ။-
ၽၢင်ၽႆးၸိူဝ်းၼၼ်ႉလႆႈပဵၼ်တၢင်းဢၼ်မူတ်းၸၢင်ႇၵွပ်ႈပိူဝ်ႈၶဝ်ဢဝ်သၢၵ်ႈလူႇၵႃႈတီႈၶဵင်ႇတၢင်းလူႇ ထႃႇဝရႃႉၽြႃး၊ ၼၼ်ႉယဝ်ႉ။ ပိူဝ်ႈၼႆလႄႈၵဵပ်းဢဝ်ၽၢင်ၽႆးတင်းလၢႆၵႃႈတီႈၵူၼ်းၸိူဝ်းဢၼ်လႆႈတၢႆၵွပ်ႈပိူဝ်ႈဢပျတ်ႈၶဝ်ၼၼ်ႉသေယဝ်ႉ၊ပေႃႉႁဵတ်းၶႅပ်းပုၼ်ႈဢၼ်တၵ်းပဵၼ်ၽႃႁူမ်ႇၶဵင်ႇတၢင်းလူႇတႃႉ။ ၽႃႁူမ်ႇၶဵင်ႇတၢင်းလူႇၼၼ်ႉတၵ်းလႆႈပဵၼ်တၢင်းဢၼ်ပၼ်သတိတီႈၵူၼ်းမဵဝ်း ဢိသရေး၊ တင်းလၢႆဢေႃႈ၊” ဝႃႈၼင်ႇၼႆဢေႃႈ။-
ယဵၸ်ႈပရေႃးႁဵၵ်ႈ ဢေးလႃႇၸႃႇ၊ ၵေႃႈၵဵပ်းဢဝ်ၽၢင်ၽႆးတင်းလၢႆသေလႄႈပေႃႉႁဵတ်းၶႅပ်းပုၼ်ႈဢၼ်တၵ်းပဵၼ်ၽႃႁူမ်ႇၶဵင်ႇတၢင်းလူႇသေဢေႃႈ။-
ဢၼ်ၼႆႉၸမ်ႉ၊ပဵၼ်တီႈဢၼ်ၵူၼ်းမဵဝ်း ဢိသရေး၊ တင်းလၢႆတၵ်းၶုၵ်းၸႂ်လႆႈလွင်ႈဢၼ်ဝႃႈ၊ၵူၼ်းဢၼ်ဢမ်ႇၸႂ်ႈၸိူဝ်ႉၶိူဝ်းလုၵ်ႈလၢၼ် ဢႃႇရုၼ်ႇ၊ ၼၼ်ႉဢမ်ႇလႆႈသုတ်ႉမႃးၸမ်တီႈၶဵင်ႇတၢင်းလူႇပုၼ်ႈဢၼ်တၵ်းၽဝ်ၼၢမ်ႇသႃႇတီႈ ထႃႇဝရႃႉၽြႃး၊ ၼၼ်ႉဢေႃႈ။ ပေႃးဢမ်ႇၼၼ်မၼ်းတၵ်းလႆႈၶၢမ်ႇတၢင်းဢၼ်ယႃႉပႅတ်ႈမိူၼ်ၸိူဝ်ႉၼင်ႇ ၵေႃးရႃႉ၊ ဢိၵ်ႇတင်းမူႇၵူၼ်းၽုင်ၵူၼ်းမၼ်းတင်းလၢႆၼၼ်ႉဢေႃႈ။ ဢေးလႃႇၸႃႇ၊ ႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉတီႈ မူဝ်းသေႇ၊ ၵႃႈမီးတင်းသဵင်ႈတင်းလူင်ၼၼ်ႉဢေႃႈ။
ၼႂ်းဝၼ်းမိူဝ်ႈၽုၵ်ႈၼၼ်ႉမူႇၵူၼ်းၸိူဝ်းၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢွၼ်ၵၼ်တၢင်ႇဢပျတ်ႈပွင်ႉၶၢင်းပွင်ႉမိုၼ်ႇတီႈ မူဝ်းသေႇ၊ တင်း ဢႃႇရုၼ်ႇ၊ လႄႈဝႃႈ၊ “သူၼႆႉဢဝ်ၵူၼ်း ထႃႇဝရႃႉၽြႃး၊ တင်းလၢႆတၢႆဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈဢၼ်ၶဝ်တင်းမူတ်းဢွၼ်ၵၼ်ၸုတုမ်မႃးႁႂ်ႈလႆႈထဵင်ၵၼ်တင်း မူဝ်းသေႇ၊ တင်း ဢႃႇရုၼ်ႇ၊ ၼၼ်ႉၸိုင်၊ၶဝ်ဝၢႆႇတူၺ်းသုမ်ႉထဵင်ၸဝ်ႈလႄႈလႆႈႁၼ်မွၵ်ႇၵုမ်ႈႁူမ်ႇသုမ်ႇသုမ်ႉထဵင်ၸဝ်ႈယူႇလႄႈမုၼ်ၽုင်းဢၼ်လႅင်း ထႃႇဝရႃႉၽြႃး၊ ၼၼ်ႉပေႃႇမႃးထၢင်ႇသႃးဢေႃႈ။-
မူဝ်းသေႇ၊ တင်း ဢႃႇရုၼ်ႇ၊ ဢွၼ်ၵၼ်ၵႂႃႇသေယဝ်ႉ၊ၸုၵ်းၵႃႈတီႈၽၢႆႇၼႃႈသုမ်ႉထဵင်ၸဝ်ႈယူႇဢေႃႈ။-
ၸဝ်ႈထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ လႄႈဝႃႈ၊-
“သုတ်ႉႁူၼ်ၽၢတ်ႇဢွၵ်ႇသေၵႃႈတီႈၵူၼ်းၸိူဝ်းၼႆႉသေလႄႈယူႇတႃႉ။ ၵဝ်တၵ်းယႃႉပႅတ်ႈၶဝ်ၵမ်းလဵဝ်ဢေႃႈ၊” ဝႃႈၼင်ႇၼႆဢေႃႈ။ ၶဝ်သွင်ၵေႃႉၵေႃႈဢွၼ်ၵၼ်ၶုပ်ႉမူပ်ႇဢဝ်ၼႃႈၶဝ်ငူပ်ႉၸပ်းလိၼ်ယူႇသေဢေႃႈ။-
မိူဝ်ႈၼၼ်ႉ မူဝ်းသေႇ၊ လၢတ်ႈတီႈ ဢႃႇရုၼ်ႇ၊ လႄႈဝႃႈ၊ “မႂ်းယိပ်းဢဝ်ပၢၼ်ႇဢၼ်ၽႆးမႂ်းသေလႄႈဢဝ်ၽႆးၵႃႈၼိူဝ်ၶဵင်ႇတၢင်းလူႇၼၼ်ႉသႂ်ႇသေယဝ်ႉ၊ဢဝ်ၼၢမ်ႇသႃႇတၢင်ႇသႂ်ႇၵႃႈၼိူဝ်ထၢၼ်ႇၽႆးၼၼ်ႉတႃႉ။ ႁဵတ်းၼၼ်လႄႈပႃးဢဝ်ပၢၼ်ႉဢၼ်သႂ်ၽႆးၼၼ်ႉလႅၼ်ႈၸူးၵႃႈတီႈၵူၼ်းတင်းလၢႆၶၼ်ၶၼ်ၽႂ်းၽႂ်းသေလႄႈႁဵတ်းမၢင်ႇၵလႃႇတၢင်းဢၼ်ၽေႇဢပျတ်ႈပုၼ်ႈၶဝ်တႃႉ။ ႁဵတ်းၶၼ်ႁဵတ်းၽႂ်းတႃႉ။ တေႃးသႃႉတၢင်းၸႂ်မႆႈၶႂ်ႈၸႃႉၽြႃးပဵၼ်ၸဝ်ႈဢွၵ်ႇယူႇယဝ်ႉလႄႈၽေးတၢမ်ႇၵႃႇလႃႉႁႃႈလႅင်မိူင်းၵေႃႈတူၵ်းႁွတ်ႈမႃးယူႇယဝ်ႉ၊” ဝႃႈၼင်ႇၼႆဢေႃႈ။-
ဢႃႇရုၼ်ႇ၊ ႁဵတ်းၸွမ်းၵမ်းလဵဝ်ဢေႃႈ။ မၼ်းဢဝ်ပၢၼ်ႉဢၼ်သႂ်ႇၽႆးမၼ်းသေလႄႈလႅၼ်ႈၶဝ်ႈၵႃႈၼႂ်းၵၢင်မူႇၵူၼ်းၸိူဝ်းၵူၼ်းတင်းလၢႆဢေႃႈ။ မိူဝ်ႈဢၼ်မၼ်းႁၼ်ၽေးဢုပၢတ်ႈႁွတ်ႈမႃးယူႇယဝ်ႉၼၼ်ႉၸိုင်၊မၼ်းဢဝ်ၼၢမ်ႇသႃႇတၢင်ႇသႂ်ႇၵႃႈၼိူဝ်ထၢၼ်ႇၽႆးလႅင်သေလႄႈႁဵတ်းမၢင်ႇၵလႃႇတၢင်းဢၼ်ၽေႇဢပျတ်ႈပုၼ်ႈၵူၼ်းတင်းလၢႆဢေႃႈ။-
ၽေးဢုပၢတ်ႈၵေႃႈထၢတ်ႇယဵၼ်ယဝ်ႉလႄႈ၊မၼ်းၵိုတ်းၵျၢၼ်ႇၸုၵ်းယူႇၵႃႈၼႂ်းၵႄႈဝူင်ႈၵၢင်ၶဝ်ၸိူဝ်းဢၼ်ဢသၢၵ်ႈလိပ်းယူႇဢိၵ်ႇတင်းၶဝ်ၸိူဝ်းဢၼ်တၢႆယဝ်ႉၸိူဝ်းၼၼ်ႉဢေႃႈ။-
ယင်းဢမ်ႇၼပ်ႉဢၢၼ်ႇပႃးၵူၼ်းၸိူဝ်းဢၼ်တၢႆၵွပ်ႈပိူဝ်ႈတၢင်းၽိတ်း ၵေႃးရႃႉ၊ ၼၼ်ႉ၊ၵူၼ်းဢၼ်တၢႆလူၺ်ႈၽေးဢုပၢတ်ႈၼၼ်ႉတင်းသဵင်ႈတင်းလူင်မီးမိုၼ်ႇသီႇႁဵင်ပၢႆၸဵတ်းပၢၵ်ႇၵေႃႉဢေႃႈ။-
မိူဝ်ႈဢၼ်ၽေးဢုပၢတ်ႈထၢတ်ႇယဵၼ်ၵႂႃႇယဝ်ႉၼၼ်ႉ ဢႃႇရုၼ်ႇ၊ ၶိုၼ်းမႃးၸူးၵႃႈတီႈ မူဝ်းသေႇ၊ ၵႃႈတီႈႁူးၽၵ်းတူသုမ်ႉထဵင်ၸဝ်ႈပုၼ်ႉဢေႃႈ။
ၸဝ်ႈထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ ထႅင်ႈလႄႈဝႃႈၸမ်ႉ၊-
“မႂ်းသင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆႁႂ်ႈၶဝ်ဢဝ်ၶွၼ်ႉတဝ်ႉမႃးသိပ်းသွင်လႅမ်ႈ၊ၵႃႈၼႂ်းၵူၼ်းဢၼ်ပဵၼ်ၵႄႇပဵၼ်ႁူဝ်ၸိူဝ်ႉၶိူဝ်းၶဝ်ၸိူဝ်းၼၼ်ႉယေႈၵေႃႉယေႈလႅမ်ႈတႃႉ။ တႅမ်ႈၸိုဝ်ႈသဵင်ၶဝ်သႂ်ႇၵႃႈတီႈၶွၼ်ႉတဝ်ႉၽႂ်ၶွၼ်ႉတဝ်ႉမၼ်းဝႆႉတႃႉ။-
ၸိုဝ်ႈသဵင် ဢႃႇရုၼ်ႇ၊ ၸိုင်၊တႅမ်ႈသႂ်ႇဝႆႉၵႃႈတီႈၶွၼ်ႉတဝ်ႉဢၼ်တၢင်တူဝ်ၵူၼ်း လေႇဝိ၊ တႃႉ။ တၵ်းလႆႈမီးၶွၼ်ႉတဝ်ႉယေႈလႅမ်ႈပုၼ်ႈၵူၼ်းဢၼ်ပဵၼ်ၵႄႇပဵၼ်ႁူဝ်ၸိူဝ်ႉၶိူဝ်းယေႈမဵဝ်းႁင်းၽႂ်ႁင်းမၼ်းဢေႃႈ။-
ဢဝ်ၶွၼ်ႉတဝ်ႉၸိူဝ်းၼၼ်ႉၶဝ်ႈၵႃႈၼႂ်းသုမ်ႉထဵင်ၸဝ်ႈၼၼ်ႉလႄႈဝႆႉၵႃႈတီႈၽၢႆႇၼႃႈတိူၵ်ႈပတိၺိၺ်ႇၸဝ်ႈတီႈဢၼ်ၵဝ်ထူပ်းၵၼ်တင်းမႂ်းၼၼ်ႉတႃႉ။-
ၶွၼ်ႉတဝ်ႉၶွင်ၵေႃႉဢၼ်ၵဝ်လိူၵ်ႈၵဵပ်းၼၼ်ႉတၵ်းပူင်ႇၽိူဝ်မႃးဢေႃႈ။ လူၺ်ႈလွင်ႈၼႆႉလႄႈတၵ်းႁဵတ်းႁႂ်ႈတၢင်းဢၼ်ၵူၼ်းမဵဝ်း ဢိသရေး၊ တင်းလၢႆတၢင်ႇဢပျတ်ႈပွင်ႉၶၢင်းပွင်ႉမိုၼ်ႇဢၼ်ၶဝ်ႁဵတ်းၶတ်းၵၼ်တင်းမႂ်းၼၼ်ႉထၢတ်ႇယဵၼ်ၵႂႃႇဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈသင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆသေယဝ်ႉ၊ၵူၼ်းဢၼ်ပဵၼ်ၵႄႇပဵၼ်ႁူဝ်ၸိူဝ်းၼၼ်ႉၸွမ်းလူၺ်ႈၸိူဝ်ႉၶိူဝ်းၽႂ်ၸိူဝ်ႉၶိူဝ်းမၼ်းဢွၼ်ၵၼ်ဢဝ်ၶွၼ်ႉတဝ်ႉမႃးယေႈၵေႃႉယေႈလႅမ်ႈပၼ်တီႈမၼ်းတင်းမူတ်းသိပ်းသွင်လႅမ်ႈဢေႃႈ။ ၶွၼ်ႉတဝ်ႉ ဢႃႇရုၼ်ႇ၊ ၵေႃႈၶဝ်ႈပႃးလူၺ်ႈၵၼ်တင်းၶွၼ်ႉတဝ်ႉၸိူဝ်းၼၼ်ႉဢေႃႈ။-
မူဝ်းသေႇ၊ ၵေႃႈဢဝ်ၶွၼ်ႉတဝ်ႉၸိူဝ်းၼၼ်ႉၶဝ်ႈၵႃႈၼႂ်းသုမ်ႉထဵင်ၸဝ်ႈသေယဝ်ႉ၊ဝႆႉၵႃႈတီႈၽၢႆႇၼႃႈတိူၵ်ႈပတိၺိၺ်ႇၸဝ်ႈသေဢေႃႈ။
ၼႂ်းဝၼ်းမိူဝ်ႈၽုၵ်ႈၼၼ်ႉ မူဝ်းသေႇ၊ ၶဝ်ႈၵႃႈၼႂ်းသုမ်ႉထဵင်ၸဝ်ႈလႄႈထူပ်းႁၼ်ၶွၼ်ႉတဝ်ႉ ဢႃႇရုၼ်ႇ၊ ဢၼ်တၢင်တူဝ်ၵူၼ်း လေႇဝိ၊ ၼၼ်ႉပူင်ႇၽိူဝ်ယူႇ၊တုမ်ႇယူႇ၊မၢၵ်ႇမၢၵ်ႇ ပႃႇတမ်ႇ၊ ယူႇဢေႃႈ။-
မူဝ်းသေႇ၊ ဢဝ်ၶွၼ်ႉတဝ်ႉၵႃႈမီးဢွၵ်ႇသေၵႃႈတီႈၽၢႆႇၼႃႈ ထႃႇဝရႃႉၽြႃး၊ မႃးၼႄပျႃးတီႈၵူၼ်းမဵဝ်း ဢိသရေး၊ တင်းလၢႆဢေႃႈ။ ၶဝ်လႆႈႁၼ်ၵႃႈဢၼ်ပဵၼ်မႃးယဝ်ႉၼၼ်ႉသေလႄႈ၊ဢွၼ်ၵၼ်ဢဝ်ၶိုၼ်းၶွၼ်ႉတဝ်ႉတူဝ်ၸဝ်ႈၵဝ်ႇၵူႈၵေႃႉဢေႃႈ။
ၸဝ်ႈထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ လႄႈဝႃႈ၊ “ဢဝ်ၶွၼ်ႉတဝ်ႉ ဢႃႇရုၼ်ႇ၊ ၶိုၼ်းဝႆႉၵႃႈတီႈၽၢႆႇၼႃႈတိူၵ်ႈပတိၺိၺ်ႇၸဝ်ႈတႃႉ။ တၵ်းလႆႈသိမ်းဝႆႉသေႇသေႇပုၼ်ႈဢၼ်တၵ်းပဵၼ်သၢၵ်ႈသေႇယူႇၽၢႆႇၼိုင်ႈတင်းၵူၼ်းမဵဝ်း ဢိသရေး၊ ၸိူဝ်းဢၼ်လုၵ်ႉၽိုၼ်ႉၵဝ်ၼၼ်ႉဢေႃႈ။ ပေႃးတၢင်းဢၼ်ၶဝ်တၢင်ႇဢပျတ်ႈပွင်ႉၶၢင်းပွင်ႉမိုၼ်ႇတီႈၵဝ်ၼၼ်ႉယင်းဢမ်ႇသုတ်းဢမ်ႇယဝ်ႉၸိုင်၊ၶဝ်တၵ်းလႆႈထူပ်းၽေးတၢင်းတၢႆဢေႃႈ။-”
မူဝ်းသေႇ၊ ၵေႃႈႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈမၼ်းဝႆႉၼၼ်ႉဢေႃႈ။
ၵူၼ်းမဵဝ်း ဢိသရေး၊ တင်းလၢႆလၢတ်ႈတီႈ မူဝ်းသေႇ၊ လႄႈဝႃႈ၊-
“ႁဝ်းၶႃႈၼႆႉတၢႆသဵင်ႈယဝ်ႉၶႃႈယဝ်ႉ။ ႁဝ်းၶႃႈလုလႅဝ်ၶႃႈယဝ်ႉ။ ႁဝ်းၶႃႈတင်းသဵင်ႈတင်းလူင်လုလႅဝ်ၶႃႈယဝ်ႉဢေႃႈ။ ၵူၼ်းၵူႈၵေႃႉဢၼ်သုတ်ႉၸပ်းသုတ်ႉၸူးၵႃႈတီႈသုမ်ႉထဵင်ၸဝ်ႈ ထႃႇဝရႃႉၽြႃး၊ ၼၼ်ႉတၵ်းလႆႈတၢႆၶႃႈဢေႃႈ။ ႁဝ်းၶႃႈၵႃႈမီးတင်းသဵင်ႈတင်းလူင်ၼႆႉၵေႃႈတၵ်းထူပ်းၽေးတၢင်းတၢႆၸွမ်းလူးၵွၼ်ႇၶႃႈႁိုဝ်း၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉတီႈ ဢႃႇရုၼ်ႇ၊ လႄႈဝႃႈ၊ “မႂ်းဢိၵ်ႇတင်းလုၵ်ႈၸၢႆးမႂ်းတင်းလၢႆတင်းၵူၼ်း လေႇဝိ၊ ၸိူဝ်းၼၼ်ႉတၵ်းလႆႈၶၢမ်ႇတၢမ်ႇဢပျတ်ႈတၢင်းဢၼ်ၽိတ်းၼႂ်းမိူဝ်ႈဢၼ်ၵိုတ်ႉႁၢပ်ႇၼႃႈၵၢၼ်ၵႃႈၼႂ်းသုမ်ႉထဵင်ၸဝ်ႈၼၼ်ႉဢေႃႈ။ ၼႂ်းဝႃႈၼၼ်သေၵေႃႈမႂ်းဢိၵ်ႇတင်းလုၵ်ႈၸၢႆးမႂ်းတင်းလၢႆၵူၺ်းတၵ်းလႆႈၶၢမ်ႇတၢမ်ႇဢပျတ်ႈဢၼ်ႁဵတ်းၽိတ်းၼႂ်းဢရႃႇယဵၸ်ႈပရေႃးႁဵၵ်ႈ ၼၼ်ႉဢေႃႈ။-
ႁွင်ႉဢဝ်ပီႈၼွင်ႉမႂ်းၵူၼ်း လေႇဝိ၊ ၸိူဝ်းၼၼ်ႉမႃးႁႂ်ႈၶဝ်ပွင်ႁဵတ်းလူၺ်ႈၵၼ်တင်းမႂ်းလႄႈၸွႆႈထႅမ်မႂ်းယၢမ်းမိူဝ်ႈဢၼ်မႂ်းဢိၵ်ႇတင်းလုၵ်ႈၸၢႆးမႂ်းတင်းလၢႆၵိုတ်ႉႁၢပ်ႇၼႃႈၵၢၼ်သုမ်ႉထဵင်ၸဝ်ႈၼၼ်ႉတႃႉ။-
ၶဝ်ၼၼ်ႉတၵ်းလႆႈဢွၼ်ၵၼ်ႁဵတ်းတၢင်းဢၼ်လူတူၺ်းလုမ်းလႃးသူဢိၵ်ႇတင်းတၢင်းဢၼ်လူတူၺ်းလုမ်းလႃးသုမ်ႉထဵင်ၸဝ်ႈဢေႃႈ။ ၼႂ်းဝႃႈၼၼ်သေၵေႃႈၶဝ်တၵ်းဢမ်ႇလႆႈမီးတၢင်းဢၼ်ၸၢပ်ႈသႅင်ႇၵၼ်တင်းၶိူင်ႈပိူင်ဢၼ်မူတ်းၸၢင်ႇဢၼ်မီးၵႃႈၼႂ်းထႃႇၼႃႉတီႈမူတ်းၸၢင်ႇၸဝ်ႈတီႈၶဵင်ႇတၢင်းလူႇၸိူဝ်းၼၼ်ႉလႃးလႃး။ ပေႃးၶဝ်ႁဵတ်းၸိုင်၊ၶဝ်ဢိၵ်ႇတင်းသူတၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၼ်ပဵၼ်ဢေႃႈ။-
ၶဝ်ၼၼ်ႉ တၵ်းလႆႈပွင်ႁဵတ်းလူၺ်ႈၵၼ်တင်းသူလႄႈတၵ်းလႆႈလူတူၺ်းလုမ်းလႃးၼႃႈၵၢၼ်ဢၼ်လူဝ်ႇႁဵတ်းၵႃႈၼႂ်းသုမ်ႉထဵင်ၸဝ်ႈၵႃႈမီးၸိူဝ်းၼၼ်ႉဢေႃႈ။ ၵေႃႉဢၼ်ဢမ်ႇၸၢပ်ႈဢမ်ႇသႅင်ႇၼၼ်ႉဢမ်ႇလႆႈပွင်ႁဵတ်းလူၺ်ႈၵၼ်တင်းသူ။-
မႂ်းဢိၵ်ႇတင်းလုၵ်ႈၸၢႆးမႂ်းတင်းလၢႆၵူၺ်းတၵ်းလႆႈႁဵတ်းတၢင်းဢၼ်လူတူၺ်းလုမ်းလႃးထႃႇၼႃႉတီႈမူတ်းၸၢင်ႇၸဝ်ႈဢိၵ်ႇတင်းတၢင်းဢၼ်လူတူၺ်းလုမ်းလႃးၶဵင်ႇတၢင်းလူႇၼၼ်ႉပုၼ်ႈလွင်ႈၼင်ႇႁိုဝ်ၵမ်းလိုၼ်းတေႃးသႃႉတၢင်းၸႂ်မႆႈၶႂ်ႈၸႃႉၵဝ်တၵ်းဢမ်ႇဢွၵ်ႇလႄႈႁွတ်ႈထိုင်ၵႃႈတီႈၵူၼ်းမဵဝ်း ဢိသရေး၊ တင်းလၢႆဢေႃႈ။-
ၵဝ်ပဵၼ်ၸဝ်ႈဢၼ်လိူၵ်ႈဢဝ်ၸိူဝ်ႉၶိူဝ်းမႂ်းမဵဝ်း လေႇဝိ၊ တင်းလၢႆဢွၵ်ႇသေၵႃႈၼႂ်းၵူၼ်းမဵဝ်း ဢိသရေး၊ တင်းလၢႆသေလႄႈပၼ်တီႈသူ၊ၶဝ်လႆႈသၢၵ်ႈၵၢပ်ႈတူဝ်တီႈၵဝ်ယဝ်ႉလႄႈၶဝ်ၸင်ႇၵိုတ်ႉႁၢပ်ႇၼႃႈၵၢၼ်ၵႃႈၼႂ်းသုမ်ႉထဵင်ၸဝ်ႈလႆႈဢေႃႈ။-
ၵူၺ်းၵႃႈ၊မႂ်းဢိၵ်ႇတင်းလုၵ်ႈၸၢႆးမႂ်းတင်းလၢႆၵူၺ်းတၵ်းလႆႈႁဵတ်းယဵၸ်ႈပရေႃးႁဵၵ်ႈ ၵႃႈတီႈလွင်ႈတၢင်းဢၼ်ၵပ်းၵၢႆႇၵၼ်တင်းၶဵင်ႇတၢင်းလူႇတင်းၼႃႈၵၢၼ်ဢၼ်လီပွင်ႁဵတ်းၵႃႈၼႂ်းထႃႇၼႃႉတီႈမူတ်းၸၢင်ႇသေပိူၼ်ႈၼၼ်ႉဢေႃႈ။ လွင်ႈတၢင်းၸိူဝ်းၼႆႉပဵၼ်ပုၼ်ႈၽွၼ်းသူတၵ်းလႆႈလူတူၺ်းလုမ်းလႃးၵွပ်ႈပိူဝ်ႈၵဝ်လႆႈႁဵတ်းၵျေးၸူးလႄႈပၼ်ဢရႃႇယဵၸ်ႈပရေႃးႁဵၵ်ႈတီႈသူဢေႃႈ။ ၵေႃႉဢၼ်ဢမ်ႇၸၢပ်ႈဢမ်ႇသႅင်ႇလႄႈသုတ်ႉၸမ်ၶိူင်ႈပိူင်ဢၼ်မူတ်းၸၢင်ႇၸဝ်ႈတင်းလၢႆၼၼ်ႉတၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၼ်ပဵၼ်ဢေႃႈ၊” ဝႃႈၼင်ႇၼႆဢေႃႈ။
တူဝ်ၵဝ် ထႃႇဝရႃႉၽြႃး၊ သမ်ႉမီးဢမိင်ႉတီႈ ဢႃႇရုၼ်ႇ၊ လႄႈဝႃႈ၊ “တူဝ်ၵဝ်ဢဝ်ၶိူင်ႈတၢင်းလူႇဢၼ်မူတ်းၸၢင်ႇၸိူဝ်းဢၼ်ပုၼ်ႈတႃႇယုၵ်ႉယွင်ႈၵဝ်ဢၼ်ၵူၼ်းမဵဝ်း ဢိသရေး၊ တင်းလၢႆသၢၵ်ႈၵၢပ်ႈၵႃႈၼိူဝ်ၶဵင်ႇတၢင်းလူႇတင်းသဵင်ႈတင်းမူတ်းၼၼ်ႉဢၢပ်ႈပၼ်တီႈမႂ်းဢေႃႈ။ ၵဝ်ႁႂ်ႈပဵၼ်ထုင်းၽိင်ႈတြႃးပုၼ်ႈမႂ်းဢိၵ်ႇတင်းၸိူဝ်ႉၶိူဝ်းလုၵ်ႈလၢၼ်မႂ်းၵႂႃႇတႃႇသေႇဢေႃႈ။-
ၵႃႈပဵၼ်ၶိူင်ႈပိူင်ဢၼ်ဢမ်ႇတုတ်ႇၽႆးလႄႈသၢၵ်ႈလူႇၵႃႈၼိူဝ်ၶဵင်ႇတၢင်းလူႇၸိူဝ်းဢၼ်ပဵၼ်ပုၼ်ႈမႂ်းၸမ်ႉ၊ၶိူင်ႈတၢင်းလူႇမၢၵ်ႇၶဝ်ႈႁူင်းၶဝ်ႈလႂ်၊ၶိူင်ႈတၢင်းလူႇဢၼ်ၽေႇဢပျတ်ႈလႂ်၊ၶိူင်ႈတၢင်းလူႇဢၼ်ၽေႇတုၸရိူၵ်ႈလႂ်ၸိူဝ်းၼၼ်ႉဢေႃႈ။ ၵႃႈဢၼ်သၢၵ်ႈလူႇတီႈၵဝ်ႁႂ်ႈပဵၼ်တၢင်းလူႇဢၼ်မူတ်းၸၢင်ႇၼၼ်ႉပဵၼ်ပုၼ်ႈမႂ်းဢိၵ်ႇတင်းလုၵ်ႈၸၢႆးမႂ်းၸိူဝ်းၼၼ်ႉဢေႃႈ။-
တၵ်းလႆႈၵိၼ်ၵႃႈၼႂ်းတီႈဢၼ်မူတ်းၸၢင်ႇဢေႃႈ။ ၵူၼ်းၸၢႆးတင်းလၢႆၵူၺ်းတၵ်းလႆႈၵိၼ်ဢေႃႈ။ မၢတ်ႈပဵၼ်ၶိူင်ႈပိူင်ဢၼ်မူတ်းၸၢင်ႇတႃႉ။
“ၶိူင်ႈပိူင်တၢင်ႇမဵဝ်းဢၼ်ၵူၼ်းမဵဝ်း ဢိသရေး၊ တင်းလၢႆသၢၵ်ႈၵၢပ်ႈႁႂ်ႈပဵၼ်တၢင်းလူႇဢၼ်ၶိုၵ်ႉဢၼ်ၶမ်ႇတီႈၵဝ်ၼၼ်ႉတၵ်းလႆႈပဵၼ်ပုၼ်ႈမႂ်းဢေႃႈ။ ၵဝ်ႁႂ်ႈပဵၼ်ထုင်းၽိင်ႈတြႃးပုၼ်ႈမႂ်း၊လုၵ်ႈၸၢႆးလုၵ်ႈယိင်းမႂ်းတင်းလၢႆသေႇသေႇဢေႃႈ။ ၵူၼ်းႁိူၼ်းမႂ်းၵႃႈဢၼ်မူတ်းသႂ်ၼၼ်ႉမီးဢၶႂၢင်ႉဢၼ်လႆႈၵိၼ်ဢေႃႈ။
“ၼမ်ႉမၼ်းမၢၵ်ႇသၢၼ်ႇလုၼ်ႇဢၼ်လီသေပိူၼ်ႈ၊ၼမ်ႉမၢၵ်ႇၸပိတ်ႉဢၼ်လီသေပိူၼ်ႈ၊ၶဝ်ႈၵျုင်ႇဢၼ်လီသေပိူၼ်ႈၵႃႈဢၼ်ပဵၼ်မႃးဢွၼ်တၢင်းလႄႈၶဝ်သၢၵ်ႈလူႇတီႈၵဝ်ယေႈပီယေႈပွၵ်ႈၼၼ်ႉၵဝ်ဢဝ်ပၼ်တီႈမႂ်းယဝ်ႉ။-
မၢၵ်ႇဢၼ်မၢၵ်ႇဢွၼ်တၢင်းဢၼ် ၶဝ်ဢဝ်မႃးတီႈ ထႃႇဝရႃႉၽြႃး၊ ၼၼ်ႉပဵၼ်ပုၼ်ႈမႂ်းဢေႃႈ။ ၵူၼ်းႁိူၼ်းမႂ်းၵႃႈဢၼ်မူတ်းသႂ်ၼၼ်ႉမီးဢၶႂၢင်ႉဢၼ်လႆႈၵိၼ်ဢေႃႈ။
“ၵႃႈဢၼ်ၵူၼ်းမဵဝ်း ဢိသရေး၊ တင်းလၢႆတိူင်ႇၵၢဝ်ႇၵတိသဵတ်ႈၸႃႇလႄႈသၢၵ်ႈလူႇၼၼ်ႉၵေႃႈပဵၼ်ပုၼ်ႈဢၼ်မႂ်းပိူင်ႇဢေႃႈ။
“ၵႃႈဢၼ်ပဵၼ်လုၵ်ႈတူၼ်ႈဢၼ်ၵိူတ်ႇလဵင်ႉမႃးတီႈၵူၼ်းသေဢမ်ႇဝႃႈ၊တီႈတရိၵ်ႈသၢၼ်ႇသေဢမ်ႇဝႃႈ၊ၸိူဝ်းဢၼ်ၵူၼ်းမဵဝ်း ဢိသရေး၊ တင်းလၢႆသၢၵ်ႈလူႇတီႈၵဝ်ၼၼ်ႉပဵၼ်ပုၼ်ႈဢၼ်မႂ်းပိူင်ႇဢေႃႈ။ ၼႂ်းဝႃႈၼၼ်သေၵေႃႈ၊လုၵ်ႈတူၼ်ႈၵူၼ်းၸိုင်၊မႂ်းတၵ်းလႆႈႁပ်ႉၶၢမ်ႇဢဝ်ၵႃႈၶၼ်ဢၼ်ၶိုၼ်းထုတ်ႇဢဝ်ၼၼ်ႉဢေႃႈ။ လုၵ်ႈတူၼ်ႈတရိၵ်ႈသၢၼ်ႇဢၼ်ဢမ်ႇမူတ်းသႂ်ၼၼ်ႉၵေႃႈ မႂ်းတၵ်းလႆႈႁပ်ႉၶၢမ်ႇဢဝ်ၵႃႈၶၼ်ဢၼ်ၶိုၼ်းထုတ်ႇဢဝ်ၼၼ်ႉဢေႃႈ။-
လုၵ်ႈတူၼ်ႈၵူၼ်းၸိုင်၊တၵ်းလႆႈၶိုၼ်းထုတ်ႇဢဝ်မိူဝ်ႈဢၼ်ဢသၢၵ်ႈလႆႈလိူၼ်ၼိုင်ႈၼၼ်ႉလႄႈတၵ်းလႆႈမၵ်းၶၢၼ်းၵႃႈမၼ်းၶၼ်မၼ်းငိုၼ်းႁႃႈၵျၢပ်ႈဢၼ်ၸွမ်းလူၺ်ႈၼမ်ႉၼၵ်းလုၵ်ႈၶၼ်ၸဝ်ႈဢေႃႈ။-
ၵူၺ်းၵႃႈ၊လုၵ်ႈတူၼ်ႈဝူဝ်း၊လုၵ်ႈတူၼ်ႈသူဝ်း၊လုၵ်ႈတူၼ်ႈပႄႉဢၼ်ပဵၼ်တူဝ်ပေႃႈတင်းလၢႆၸိုင်၊တၵ်းဢမ်ႇလႆႈႁႂ်ႈၶိုၼ်းထုတ်ႇဢဝ်။ ၶဝ်ပဵၼ်ဢၼ်ၵဝ်ပိူင်ႇလုမ်းလုမ်းလႄႈမႂ်းတၵ်းလႆႈဢဝ်ႁဵတ်းတၢင်းလူႇဢေႃႈ။ ဢဝ်လိူတ်ႈၶဝ်ၽႅတ်းသႂ်ႇၶဵင်ႇတၢင်းလူႇသေလႄႈဢဝ်ၵွၼ်ႈၶႆၵွၼ်ႈမၼ်းၶဝ်တုတ်ႇၽႆးႁႂ်ႈပဵၼ်တၢင်းလူႇဢၼ်တုတ်ႇၽႆးလႄႈပဵၼ်ဢၢႆဢၼ်ႁွမ်ဢၼ်ႁူၺ်းပုၼ်ႈ ထႃႇဝရႃႉၽြႃး၊ တႃႉ။-
ၼိူဝ်ႉမၼ်းၸမ်ႉ၊တၵ်းလႆႈပဵၼ်ပုၼ်ႈမႂ်းမိူၼ်မိူၼ်ၵၼ်တင်းႁူဝ်ဢူၵ်းတင်းတၢပ်ႇၶႃၶွၼ်လင်ၽၢႆႇၶႂႃမၼ်းဢၼ်ႁဵတ်းတၢင်းလူႇဢၼ်ၶိုၵ်ႉဢၼ်ၶမ်ႇ ၼၼ်ႉဢေႃႈ။
“ၶိူင်ႈပိူင်ဢၼ်မူတ်းၸၢင်ႇဢၼ်ၵူၼ်းမဵဝ်း ဢိသရေး၊ တင်းလၢႆသၢၵ်ႈၵၢပ်ႈတီႈၵဝ်တင်းမူတ်းတင်းသဵင်ႈၸိူဝ်းၼၼ်ႉၸိုင်၊ၵဝ်ပၼ်တီႈမႂ်းႁႂ်ႈပဵၼ်ထုင်းၽိင်ႈတြႃးပုၼ်ႈမႂ်း၊လုၵ်ႈယိင်းလုၵ်ႈၸၢႆးမႂ်းတင်းလၢႆသေႇသေႇဢေႃႈ။ ပဵၼ်ပတိၺိၺ်ႇဢၼ်တႄႇယူႇ တႃႇသေႇဢၼ်ၵဝ်ဝႆႉတီႈမႂ်းဢိၵ်ႇတင်းၸိူဝ်ႉၶိူဝ်းမႂ်းဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉတီႈ ဢႃႇရုၼ်ႇ၊ လႄႈဝႃႈ၊ “မႂ်းဢမ်ႇလႆႈမီးဢုၵ်ႉၸႃႇဢၼ်တေလႆႈသိုပ်ႇၶၢမ်ႇဢမူၺ်ႇၼၼ်ႉသေၸိူဝ်ႉသေမဵဝ်း။ ၵႂၢၵ်ႈလိၼ်ၵႃႈၼႂ်းမိူင်း ဢိသရေး၊ ၼၼ်ႉၵေႃႈတေဢမ်ႇလႆႈႁႂ်ႈမႂ်းပိူင်ႇသေတီႈသေလႅၼ်။ ထႃႇဝရႃႉၽြႃး၊ ပဵၼ်ပုၼ်ႈပဵၼ်တႃႇၵႃႈဢၼ်မႂ်းလူဝ်ႇၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ၵႃႈဢၼ်ၵူၼ်းမဵဝ်း ဢိသရေး၊ တင်းလၢႆဢဝ်ဢုၵ်ႉၸႃႇၶဝ်သိပ်းပုၼ်ႈပုၼ်ႈၼိုင်ႈလူႇတၢၼ်းတီႈၵဝ်ၼၼ်ႉၵဝ်ဢဝ်ပၼ်တီႈၵူၼ်း လေႇဝိ၊ တင်းလၢႆ၊ၵွပ်ႈပိူဝ်ႈဢၼ်ၶဝ်ပွင်ႁဵတ်းလုမ်းလႃးၵႃႈၼႂ်းသုမ်ႉထဵင်ၸဝ်ႈၼၼ်ႉယဝ်ႉ။-
ၼင်ႇၼၼ်လႄႈၸႃႉၸဵမ်မိူဝ်ႈလဵဝ်ၼႆႉၵႂႃႇၵူၼ်းမဵဝ်း ဢိသရေး၊ တင်းလၢႆဢမ်ႇလူဝ်ႇသုတ်ႉၸပ်းသုတ်ႉၸူးၵႃႈတီႈသုမ်ႉထဵင်ၸဝ်ႈၼင်ႇႁိုဝ်ၶဝ်တၵ်းဢမ်ႇလႆႈၶၢမ်ႇတၢမ်ႇဢပျတ်ႈဢၼ်ပဵၼ်ၽေးတၢင်းတၢႆၼၼ်ႉဢေႃႈ။-
ၸႃႉၸဵမ်တေႃႈလဵဝ်ၼႆႉၵႂႃႇမိူဝ်းၼႃႈၵူၼ်း လေႇဝိ၊ ၵူၺ်းတၵ်းပွင်ႁဵတ်းလုမ်းလႃးသုမ်ႉထဵင်ၸဝ်ႈလႄႈၵိုတ်ႉႁၢပ်ႇၼႃႈၵၢၼ်မၼ်းတင်းလၢႆဢေႃႈ။ ဢၼ်ၼႆႉတၵ်းလႆႈပဵၼ်ထုင်းၽိင်ႈတြႃးဢၼ်လႆႈပႂ်ႉၵမ်ၸွမ်းၸူဝ်ႈလုၵ်ႈပၢၼ်လၢၼ်သူသိုပ်ႇသိုပ်ႇတၢမ်တၢမ်ဢေႃႈ။ ၵူၼ်း လေႇဝိ၊ တင်းလၢႆၵေႃႈဢမ်ႇလႆႈမီးဢုၵ်ႉၸႃႇဢၼ်ၶဝ်လႆႈပိူင်ႇသေႇသေႇၼၼ်ႉၵႃႈၼႂ်းၵူၼ်းမဵဝ်း ဢိသရေး၊ တင်းလၢႆဢေႃႈ။-
လွင်ႈမၼ်းၸမ်ႉ၊ၵဝ်ဢဝ်ဢုၵ်ႉၸႃႇသိပ်းပုၼ်ႈပုၼ်ႈၼိုင်ႈဢၼ်ၵူၼ်းမဵဝ်း ဢိသရေး၊ တင်းလၢႆလူႇတၢၼ်းတီႈၵဝ်ႁႂ်ႈပဵၼ်တၢင်းလူႇဢၼ်ၶိုၵ်ႉဢၼ်ၶမ်ႇၸိူဝ်းၼၼ်ႉပၼ်တီႈၵူၼ်းမဵဝ်း လေႇဝိ၊ ၶဝ်ယဝ်ႉ။ ၵွပ်ႈပိူဝ်ႈၸိူဝ်ႉၼင်ႇၼႆလႄႈၵဝ်ဝႃႈၶဝ်ဢမ်ႇလႆႈမီးဢုၵ်ႉၸႃႇဢၼ်ၶဝ်လႆႈပိူင်ႇသေႇသေႇၵႃႈၼႂ်းၵူၼ်းမဵဝ်း ဢိသရေး၊ တင်းလၢႆၼၼ်ႉဝႃႈၼႆယဝ်ႉ၊” ဝႃႈၼင်ႇၼႆဢေႃႈ။
ၸဝ်ႈထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ ထႅင်ႈလႄႈ၊-
ႁႂ်ႈမၼ်းသင်ႇလၢတ်ႈတီႈၵူၼ်း လေႇဝိ၊ တင်းလၢႆလႄႈဝႃႈၸမ်ႉ၊ “မိူဝ်ႈဢၼ်သူလႆႈႁပ်ႉၶၢမ်ႇဢဝ်တၢင်းလူႇသိပ်းပုၼ်ႈပုၼ်ႈၼိုင်ႈတီႈၵူၼ်းမဵဝ်း ဢိသရေး၊ တင်းလၢႆဢၼ် ထႃႇဝရႃႉၽြႃး၊ ပၼ်ႁႂ်ႈသူလႆႈပိူင်ႇၼၼ်ႉၸိုင်၊သူသမ်ႉတၵ်းလႆႈဢဝ်ၼႂ်းပုၼ်ႈၼိုင်ႈၼၼ်ႉၶိုၼ်းႁဵတ်းသိပ်းပုၼ်ႈလႄႈဢဝ်ပုၼ်ႈၼိုင်ႈသၢၵ်ႈလူႇႁႂ်ႈပဵၼ်တၢင်းလူႇဢၼ်ၶိုၵ်ႉဢၼ်ၶမ်ႇတီႈ ထႃႇဝရႃႉၽြႃး၊ ဢေႃႈ။-
တၢင်းလူႇဢၼ်ၶိုၵ်ႉဢၼ်ၶမ်ႇၼႆႉၸိုင်၊တၵ်းလႆႈမၢတ်ႈပဵၼ်မိူၼ်မိူၼ်ၵၼ်တင်းၸဝ်ႈႁႆႈၸဝ်ႈၼႃးသၢၵ်ႈလူႇၶဝ်ႈမႂ်ႇမၼ်းဢိၵ်ႇတင်းၼမ်ႉမၢၵ်ႇၸပိတ်ႉမၼ်းၼၼ်ႉဢေႃႈ။-
ၼင်ႇၼၼ်လႄႈသူၵေႃႈတၵ်းလႆႈဢဝ်ၵႃႈၼႂ်းသိပ်းပုၼ်ႈပုၼ်ႈၼိုင်ႈဢၼ်သူလႆႈႁပ်ႉၶၢမ်ႇဢဝ်ၵႃႈတီႈၵူၼ်းမဵဝ်း ဢိသရေး၊ တင်းလၢႆၼၼ်ႉႁဵတ်းတၢင်းလူႇဢၼ်ၶိုၵ်ႉဢၼ်ၶမ်ႇတီႈ ထႃႇဝရႃႉၽြႃး၊ ဢေႃႈ။ တၵ်းလႆႈဢဝ်တၢင်းလူႇဢၼ်ၶိုၵ်ႉဢၼ်ၶမ်ႇတီႈ ထႃႇဝရႃႉၽြႃး၊ ၼၼ်ႉ လူႇပၼ်တီႈယဵၸ်ႈပရေႃးႁဵၵ်ႈ ဢႃႇရုၼ်ႇ၊ ဢေႃႈ။-
သူတၵ်းလႆႈဢဝ်ဢၼ်လီသေပိူၼ်ႈၵႃႈၼႂ်းဢၼ်သူလႆႈႁပ်ႉၶၢမ်ႇဢဝ်ၼၼ်ႉလႄႈပၼ်ဢေႃႈ။-
မိူဝ်ႈဢၼ်သူဢဝ်ပုၼ်ႈဢၼ်လီသေပိူၼ်ႈသၢၵ်ႈလူႇယဝ်ႉၸင်ႇဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉၸိုင်၊သူလႆႈသိမ်းဢဝ်မိူၼ်မိူၼ်ၵၼ်တင်းၸဝ်ႈႁႆႈၸဝ်ႈၼႃးသိမ်းဢဝ်ဢၼ်ၵိုတ်းဢၼ်ၵျၢၼ်ႇလိုၼ်းသေဢၼ်မၼ်းဢဝ်ၼႂ်းဢုၵ်ႉၸႃႇမၼ်းႁဵတ်းတၢင်းလူႇယဝ်ႉၼၼ်ႉဢေႃႈ။-
ၵႃႈတီႈလႂ်သေဢမ်ႇဝႃႈ၊ဢၼ်ၵိုတ်းဢၼ်ၵျၢၼ်ႇၼၼ်ႉၸိုင်၊သူဢိၵ်ႇတင်းၵူၼ်းႁိူၼ်းၵူၼ်းယေးသူမီးဢၶႂၢင်ႉဢၼ်လႆႈၵိၼ်ဢႃႈ။ ပဵၼ်ၵႃႈႁႅင်းပုၼ်ႈဢၼ်သူၵိုတ်ႉႁၢပ်ႇၼႃႈၵၢၼ်ၵႃႈၼႂ်းသုမ်ႉထဵင်ၸဝ်ႈၼၼ်ႉဢေႃႈ။-
သူဢမ်ႇမီးဢပျတ်ႈမိူဝ်ႈဢၼ်သူဢဝ်ပုၼ်ႈဢၼ်လီသေပိူၼ်ႈၼၼ်ႉသၢၵ်ႈလူႇတီႈ ထႃႇဝရႃႉၽြႃး၊ ယဝ်ႉၼၼ်ႉ၊ၵူၺ်းၵႃႈ၊ယႃႇပေႁႂ်ႈတၢင်းလူႇဢၼ်မူတ်းၸၢင်ႇၵူၼ်းမဵဝ်း ဢိသရေး၊ ၼၼ်ႉၵူဝ်ႈၵိူၵ်ႇလူၺ်ႈဢၼ်သူၵိၼ်မိူဝ်ႈဢၼ်ယင်းဢမ်ႇပႆႇဢဝ်ဢၼ်လီသေပိူၼ်ႈသၢၵ်ႈလူႇၼၼ်ႉ၊ပေႃးသူႁႂ်ႈမၼ်းၵူဝ်ႈၵိူၵ်ႇၵႂႃႇၸိုင်၊သူတၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၼ်ပဵၼ်ဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ ဢိၵ်ႇတင်း ဢႃႇရုၼ်ႇ၊-
ႁႂ်ႈၶဝ်ဢဝ်ထုင်းၽိင်ႈတြႃးၸိူဝ်းၼႆႉလႄႈသင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈၸမ်ႉ၊ “ႁႂ်ႈၵူၼ်းမဵဝ်း ဢိသရေး၊ တင်းလၢႆဢဝ်ဝူဝ်းမႄႈလႅင်တူဝ်ၼိုင်ႈဢၼ်လွတ်ႈသေတၢင်းဢၼ်ၸိၼႄးလႄႈဢၼ်ဢမ်ႇတွၼ်ႉလႆႈဢဝ်ၵၢၼ်းတၢင်ႇသေပွၵ်ႈၼၼ်ႉမႃးတီႈသူတႃႉ။-
သူတၵ်းလႆႈဢဝ်မၼ်းပၼ်တီႈယဵၸ်ႈပရေႃးႁဵၵ်ႈ ဢေးလႃႇၸႃႇ၊ လႄႈ၊မၼ်းတၵ်းလႆႈဢဝ်ဝူဝ်းမႄႈၼၼ်ႉဢွၵ်ႇၵႂႃႇၵႃႈၼွၵ်ႈပၢင်တပ်ႉသေယဝ်ႉ၊ၸႂ်ႉႁႂ်ႈၵူၼ်းၵေႃႉၼိုင်ႈႁႅမ်ၵႃႈတီႈၽၢႆႇၼႃႈမၼ်းဢေႃႈ။-
မိူဝ်ႈၼၼ်ႉ ဢေးလႃႇၸႃႇ၊ တၵ်းလႆႈၵွပ်ႇဢဝ်လိူတ်ႈၼၼ်ႉလႄႈဢဝ်ၼိဝ်ႉမိုဝ်းမၼ်းၽႅတ်းလိူတ်ႈၼၼ်ႉၽၢႆႇတၢင်းၼႃႈသုမ်ႉထဵင်ၸဝ်ႈၸဵတ်းၵမ်းဢေႃႈ။-
ၵူၼ်းၵေႃႉၼၼ်ႉသမ်ႉတၵ်းလႆႈဢဝ်ဝူဝ်းမႄႈၼၼ်ႉတင်းတူဝ်၊ပႃးၸဵမ်ၼင်မၼ်း၊ၼိူဝ်ႉမၼ်း၊လိူတ်ႈမၼ်းတင်းၶီႈၼုမ်ႇမၼ်းတုတ်ႇၽႆးၵႃႈတီႈၽၢႆႇၼႃႈယဵၸ်ႈပရေႃးႁဵၵ်ႈဢေႃႈ။-
ယဵၸ်ႈပရေႃးႁဵၵ်ႈသမ်ႉတၵ်းလႆႈဢဝ်ၼိူဝ်ႉမႆႉဢႃႇရိတ်ႉ၊ယွတ်ႈတူၼ်ႈယိူဝ်ႈယႃႈႁုတ်ႉသူပ်ႉတင်းၶူဝ်းဢၼ်လႅင်ၵမ်ႇသေလႄႈပႅတ်ႈသႂ်ႇၼႂ်းမုၵ်ႉၽႆးၼၼ်ႉဢေႃႈ။-
လိုၼ်းၼၼ်ႉမၼ်းတၵ်းလႆႈဢဝ်ၶူဝ်းၼုင်ႈမၼ်းသၵ်ႉသေယဝ်ႉ၊ဢၢပ်ႇၼမ်ႉဢေႃႈ။ ၵမ်းၼၼ်ႉ မၼ်းတၵ်းလႆႈၶဝ်ႈၵႃႈၼႂ်းပၢင်တပ်ႉလႄႈပဵၼ်ဢၼ်ဢမ်ႇမူတ်းသႂ်တေႃႇထိုင်ၶိင်ႇႁူဝ်ၶမ်ႈဢေႃႈ။-
ၵူၼ်းၵေႃႉဢၼ်ဢဝ်ဝူဝ်းမႄႈတုတ်ႇၽႆးၼၼ်ႉၵေႃႈတၵ်းလႆႈသၵ်ႉၶူဝ်းၼုင်ႈမၼ်းသေလႄႈဢၢပ်ႇၼမ်ႉဢေႃႈ။ မၼ်းၵေႃႈပဵၼ်ဢၼ်ဢမ်ႇမူတ်းသႂ်တေႃႇထိုင်ၶိင်ႇႁူဝ်ၶမ်ႈဢေႃႈ။-
ၵမ်းၼၼ်ႉ ၵူၼ်းၵေႃႉဢၼ်မူတ်းသႂ်ၼၼ်ႉၵေႃႉၼိုင်ႈတၵ်းလႆႈၸုသိမ်းဢဝ်တဝ်ႈဝူဝ်းမႄႈၼၼ်ႉလႄႈဢဝ်ဝႆႉၵႃႈတီႈဢၼ်ၵဵင်ႈသႂ်ၵႃႈၼွၵ်ႈပၢင်တပ်ႉဢေႃႈ။ တၵ်းလႆႈဢဝ်တဝ်ႈၼၼ်ႉသိမ်းဝႆႉပုၼ်ႈဢၼ်တၵ်းၽေႃႇၼမ်ႉဢၼ်ႁႂ်ႈမူတ်းသႂ်ပုၼ်ႈမူႇၵူၼ်းၸိူဝ်းၵူၼ်းမဵဝ်း ဢိသရေး၊ တင်းလၢႆဢေႃႈ။ ပဵၼ်ပုၼ်ႈဢၼ်တၵ်းႁဵတ်းမၢင်ႇၵလႃႇတၢင်းဢၼ်ၽေႇဢပျတ်ႈဢေႃႈ။-
ၵူၼ်းၵေႃႉဢၼ်ၸုသိမ်းဢဝ်တဝ်ႈဝူဝ်းမႄႈၼၼ်ႉၵေႃႈတၵ်းလႆႈသၵ်ႉၶူဝ်းမၼ်းသေလႄႈပဵၼ်ဢၼ်ဢမ်ႇမူတ်းသႂ်တေႃႇထိုင်ၶိင်ႇႁူဝ်ၶမ်ႈဢေႃႈ။ ဢၼ်ၼႆႉၸမ်ႉ၊ပဵၼ်ထုင်းၽိင်ႈတြႃးဢၼ်တႄႇယူႇတႃႇသေႇတီႈၵူၼ်းမဵဝ်း ဢိသရေး၊ တင်းလၢႆဢိၵ်ႇတင်းၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈပိုင်ႈယူႇၸွမ်းၶဝ်ၼၼ်ႉဢေႃႈ။
“ၵေႃႉဢၼ်တိူဝ်ႉထုၵ်ႇတူဝ်တၢႆၵူၼ်းၼၼ်ႉပဵၼ်ဢၼ်ဢမ်ႇမူတ်းသႂ်ၸဵတ်းဝၼ်းတဵမ်တဵမ်ဢေႃႈ။-
မၼ်းတၵ်းလႆႈႁဵတ်းႁႂ်ႈတူဝ်မၼ်းမူတ်းသႂ်လူၺ်ႈၼမ်ႉၼၼ်ႉၵႃႈၼႂ်းဝၼ်းဢၼ်ထူၼ်ႈသၢမ်ဝၼ်းဢိၵ်ႇတင်းဝၼ်းဢၼ်ထူၼ်ႈၸဵတ်းဝၼ်းၼၼ်ႉဢေႃႈ။ ႁဵတ်းၼၼ်ၸင်ႇမၼ်းတၵ်းမူတ်းသႂ်ဢေႃႈ။ ပေႃးမၼ်းယင်းဢမ်ႇႁဵတ်းႁႂ်ႈတူဝ်မၼ်းမူတ်းသႂ်ၼႂ်းဝၼ်းဢၼ်ထူၼ်ႈတီႈသၢမ်ဢိၵ်ႇတင်းဝၼ်းဢၼ်ထူၼ်ႈတီႈၸဵတ်းၼၼ်ႉၸိုင်၊မၼ်းဢမ်ႇလႆႈမူတ်းသႂ်လႃးလႃး။-
ၵေႃႉဢၼ်တိူဝ်ႉထုၵ်ႇတူဝ်တၢႆၵူၼ်းလႄႈယင်းဢမ်ႇႁဵတ်းႁႂ်ႈတူဝ်မၼ်းမူတ်းသႂ်ၼၼ်ႉယင်းတိုၵ်ႉဢမ်ႇမူတ်းသႂ်ယူႇၵွပ်ႈပိူဝ်ႈဢၼ်မၼ်းဢမ်ႇၶၢမ်ႇဢဝ်တၢင်းဢၼ်ဢဝ်ၼမ်ႉဢၼ်ႁႂ်ႈမူတ်းသႂ်ၼၼ်ႉၽႅတ်းသႂ်ႇသေလႄႈ၊မၼ်းႁႂ်ႈသုမ်ႉထဵင်ၸဝ်ႈ ထႃႇဝရႃႉၽြႃး၊ ၵူဝ်ႈၵိူၵ်ႇဢေႃႈ။ ၵေႃႉၼၼ်ႉၸိုင်၊တၵ်းဢမ်ႇလႆႈမၢတ်ႈမၼ်းပဵၼ်ၵူၼ်းၽြႃးပဵၼ်ၸဝ်ႈယဝ်ႉဢေႃႈ။
“ပေႃးသေၵေႃႉသေၵူၼ်းတၢႆၵႂႃႇၵႃႈၼႂ်းသုမ်ႉထဵင်လႄႈ၊ၵေႃႉဢၼ်မီးယူႇၵႃႈၼႂ်းသုမ်ႉဢိၵ်ႇတင်းၵေႃႉဢၼ်ၶဝ်ႈၵႂႃႇၵႃႈၼႂ်းၼၼ်ႉတင်းသဵင်ႈတင်းလူင်၊ပဵၼ်ဢၼ်ဢမ်ႇမူတ်းသႂ်ၸဵတ်းဝၼ်းတဵမ်တဵမ်ဢေႃႈ။-
ၸဵမ်မေႃႈၸဵမ်ဢၢင်ႇဢၼ်ဢမ်ႇဢဝ်ၽႃမၼ်းႁူမ်ႇလႄႈမတ်ႉဝႆႉၼၼ်ႉၵေႃႈပဵၼ်ဢၼ်ဢမ်ႇမူတ်းသႂ်ဢေႃႈ။
ၶဝ်ၸိူဝ်းဢၼ်တိူဝ်ႉထုၵ်ႇတူဝ်ၵူၼ်းတၢႆဢၼ်ပိူၼ်ႈဢဝ်တၢႆ၊ၵူၼ်းတၢႆၵွပ်ႈတၢင်းၶႆႈတၢင်းပဵၼ်၊လုပ်ႇၵူၼ်းတၢႆ၊ၶုမ်ၵူၼ်းတၢႆ၊တီႈၼွၵ်ႈတီႈပၢင်ႇၼၼ်ႉပဵၼ်ဢၼ်ဢမ်ႇမူတ်းသႂ်ၸဵတ်းဝၼ်းတဵမ်တဵမ်ဢေႃႈ။
“ပုၼ်ႈၵေႃႉဢၼ်ဢမ်ႇမူတ်းသႂ်ၼၼ်ႉတၵ်းလႆႈဢဝ်တဝ်ႈဝူဝ်းမႄႈလႅင်ဢၼ်တုတ်ႇၽႆးပုၼ်ႈဢၼ်တၵ်းၽေႇဢပျတ်ႈၼၼ်ႉၵမ်ႈၽွင်ႈသႂ်ႇၵႃႈၼႂ်းမေႃႈလႄႈဢဝ်ၼမ်ႉဢၼ်သႂ်ထွၵ်ႇသႂ်ႇဢေႃႈ။-
တီႈလွင်ႈတၢင်းဢၼ်ၵူၼ်းတၢႆၵႂႃႇၵႃႈၼႂ်းသုမ်ႉထဵင်ၼၼ်ႉၸိုင်၊ၵေႃႉဢၼ်မူတ်းသႂ်ၼၼ်ႉတၵ်းလႆႈဢဝ်ယွတ်ႈတူၼ်ႈယိူဝ်ႈယႃႈႁုတ်ႉသူပ်ႉၸုမ်ႇၵႃႈၼႂ်းၼမ်ႉၼၼ်ႉလႄႈၽႅတ်းသႂ်ႇၵႃႈၼိူဝ်သုမ်ႉထဵင်၊ဢိၵ်ႇတင်းၶိူင်ႈပိူင်ဢၼ်မီးၵႃႈၼႂ်းမၼ်းတင်းမူတ်းတင်းၵူၼ်းၸိူဝ်းဢၼ်မီးၵႃႈၼႂ်းမၼ်း ဢိၵ်ႇတင်းၵေႃႉဢၼ်တိူဝ်ႉထုၵ်ႇလုပ်ႇၵူၼ်းတၢႆ၊တူဝ်ၵူၼ်းတၢႆ၊ၶုမ်ၵူၼ်းတၢႆၼၼ်ႉၸိူဝ်းၼၼ်ႉဢေႃႈ။-
ၵေႃႉဢၼ်မူတ်းသႂ်ၼၼ်ႉတၵ်းလႆႈဢဝ်ၼမ်ႉၼၼ်ႉၽႅတ်းသႂ်ႇၵႃႈတီႈၵေႃႉဢၼ်ဢမ်ႇမူတ်းသႂ်ၼၼ်ႉၼႂ်းဝၼ်းဢၼ်ထူၼ်ႈတီႈသၢမ်ဝၼ်းဢိၵ်ႇတင်းဝၼ်းဢၼ်ထူၼ်ႈတီႈၸဵတ်းဝၼ်းၼၼ်ႉဢေႃႈ။ ၼႂ်းဝၼ်းဢၼ်ထူၼ်ႈတီႈၸဵတ်းဝၼ်းၼၼ်ႉမၼ်းတၵ်းလႆႈႁႂ်ႈၵေႃႉၼၼ်ႉမူတ်းသႂ်လႄႈ၊ၵေႃႉၼၼ်ႉတၵ်းလႆႈသၵ်ႉၶူဝ်းၼုင်ႈမၼ်းလႄႈဢၢပ်ႇၼမ်ႉသေယဝ်ႉ၊တၵ်းလႆႈမူတ်းသႂ်ၼႂ်းၶိင်ႇႁူဝ်ၶမ်ႈၼၼ်ႉဢေႃႈ။
“ၵေႃႉဢၼ်ဢမ်ႇမူတ်းသႂ်ၼၼ်ႉပေႃးမၼ်းယင်းဢမ်ႇႁဵတ်းႁႂ်ႈတူဝ်မၼ်းမူတ်းသႂ်ၸိုင်၊မၼ်းၼၼ်ႉယင်းတိုၵ်ႉဢမ်ႇမူတ်းၸၢင်ႇယူႇ၊ၵွပ်ႈပိူဝ်ႈမၼ်းဢမ်ႇၶၢမ်ႇဢဝ်တၢင်းဢၼ်ဢဝ်ၼမ်ႉဢၼ်ႁႂ်ႈမူတ်းသႂ်ၼၼ်ႉၽႅတ်းသႂ်ႇသေလႄႈမၼ်းႁႂ်ႈသုမ်ႉထဵင်ၸဝ်ႈ ထႃႇဝရႃႉၽြႃး၊ ၵူဝ်ႈၵိူၵ်ႇဢေႃႈ။ ၵေႃႉၼၼ်ႉၸိုင်၊တၵ်းဢမ်ႇလႆႈမၢတ်ႈမၼ်းပဵၼ်ၵူၼ်းၽြႃးပဵၼ်ၸဝ်ႈယဝ်ႉဢေႃႈ။-
ထုင်းၽိင်ႈတြႃးဢၼ်သူတၵ်းလႆႈပႂ်ႉၵမ်ၸွမ်းၸူဝ်ႈလုၵ်ႈပၢၼ်လၢၼ်သူသိုပ်ႇသိုပ်ႇတၢမ်တၢမ်ၸမ်ႉ၊ၵေႃႉဢၼ်ဢဝ်ၼမ်ႉၽႅတ်းသႂ်ႇႁႂ်ႈမူတ်းၸၢင်ႇၼၼ်ႉတၵ်းလႆႈသၵ်ႉၶူဝ်းၼုင်ႈမၼ်းၼင်ႇၵဝ်ႇဢေႃႈ။ ၵေႃႉဢၼ်တိူဝ်ႉထုၵ်ႇၼမ်ႉၼၼ်ႉၵေႃႈပဵၼ်ဢၼ်ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။-
ၶိူင်ႈပိူင်ၵႃႈဢၼ်ၵေႃႉဢၼ်ဢမ်ႇမူတ်းသႂ်တိူဝ်ႉထုၵ်ႇၼၼ်ႉၵေႃႈပဵၼ်ဢၼ်ဢမ်ႇမူတ်းသႂ်ဢေႃႈ။ ၵေႃႉဢၼ်သမ်ႉတိူဝ်ႉထုၵ်ႇဢၼ်ၼၼ်ႉၵေႃႈပဵၼ်ဢၼ်ဢမ်ႇမူတ်းသႂ်တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ၊” ဝႃႈၼင်ႇၼႆဢေႃႈ။
ၼႂ်းလိူၼ်တီႈၼိုင်ႈၼၼ်ႉမူႇၵူၼ်းၸိူဝ်းၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢွၼ်ၵၼ်ႁွတ်ႈထိုင်ၵႃႈတီႈထိူၼ်ႇလႅင်ႉ ၸိၼႃႉ၊ လႄႈၶျႃးပၢင်တပ်ႉၶဝ်ၵႃႈတီႈ ၵႃႇတေးသႃႉ၊ ဢေႃႈ။ ၵႃႈတီႈၼၼ်ႈ မေႇရီႇယမ်ႇ၊ တၢႆလႄႈၶဝ်ဢဝ်ၵႂႃႇသၢင်းၵျူဝ်ႇသေဢေႃႈ။
ၵႃႈတီႈၶဝ်ၶျႃးပၢင်တပ်ႉၼၼ်ႉၸိုင်၊ၵွပ်ႈပိူဝ်ႈဢမ်ႇမီးၼမ်ႉၵိၼ်လႄႈၵူၼ်းတင်းလၢႆၸုတုမ်ၵၼ်သေႁဵတ်းၶတ်းၵၼ်တင်း မူဝ်းသေႇ၊ တင်း ဢႃႇရုၼ်ႇ၊ ဢေႃႈ။-
ၶဝ်တၢင်ႇဢပျတ်ႈပွင်ႉၶၢင်းပွင်ႉမိုၼ်ႇလႄႈဝႃႈ၊ “ႁဵတ်းသင်လႄႈႁဝ်းဢမ်ႇတၢႆၸွမ်းပီႈၼွင်ႉႁဝ်းတင်းလၢႆၸိူဝ်းဢၼ်တၢႆၵႃႈတီႈၽၢႆႇၼႃႈသုမ်ႉထဵင်ၸဝ်ႈၼၼ်ႉ။-
ႁဵတ်းသင်လႄႈသူဢဝ်ႁဝ်းမႃးၵႃႈၼႂ်းထိူၼ်ႇလႅင်ႉၼႆႉႁႂ်ႈႁဝ်းဢိၵ်ႇတင်းတရိၵ်ႈသၢၼ်ႇႁဝ်းလႆႈတၢႆၵႃႈတီႈၼႆႈၸိူဝ်ႉၼင်ႇႁိုဝ်။-
ႁဵတ်းသင်လႄႈႁႂ်ႈႁဝ်းဢွၵ်ႇမိူင်း ဢေးၵျိပ်ႉ၊ မႃးၵႃႈတီႈဢၼ်ႁၢႆႉဢၼ်ႁုၵ်းၼႆႉၸိူဝ်ႉၼင်ႇႁိုဝ်။ ၵႃႈတီႈၼႆႈဝၢၼ်ႇၸိူဝ်ႉၽၼ်းၵိၼ်ဢမ်ႇလႆႈ။ ၽုၵ်ႇတူၼ်ႈမၢၵ်ႇလိူဝ်ႇ၊တူၼ်ႈၶိူဝ်းမၢၵ်ႇၸပိတ်ႉ၊တူၼ်ႈမၢၵ်ႇၸင်ႈၵေႃႈဢမ်ႇလႆႈ။ ၼမ်ႉၵိၼ်ၵေႃႈဢမ်ႇမီးလႃးလႃး၊” ဝႃႈၼင်ႇၼႆဢေႃႈ။-
မူဝ်းသေႇ၊ တင်း ဢႃႇရုၼ်ႇ၊ ႁူၼ်လင်ဢွၵ်ႇသေၵႃႈတီႈၵူၼ်းတင်းလၢႆၵႂႃႇသေၸုၵ်းၵႃႈတီႈႁူးၽၵ်းတူသုမ်ႉထဵင်ၸဝ်ႈသေယဝ်ႉ၊ၶုပ်ႉမူပ်ႇၸပ်းလိၼ်ယူႇလႄႈမုၼ်ၽုင်းဢၼ်လႅင်း ထႃႇဝရႃႉၽြႃး၊ ပေႃႇမႃးထၢင်ႇသႃးမႃးၵႃႈတီႈၶဝ်ဢေႃႈ။
ၸဝ်ႈထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ လႄႈဝႃႈ၊-
“ယိပ်းဢဝ်ၶွၼ်ႉတဝ်ႉဢၼ်မီးၵႃႈတီႈၽၢႆႇၼႃႈတိူၵ်ႈပတိၺိၺ်ႇၸဝ်ႈလႄႈ၊မႂ်းတင်း ဢႃႇရုၼ်ႇ၊ ၵႂႃႇႁႂ်ႈမူႇၵူၼ်းၸိူဝ်းၵူၼ်းတင်းလၢႆၸုၵၼ်တုမ်ၵၼ်လႄႈၵႃႈတီႈၽၢႆႇၼႃႈၵူၼ်းတင်းလၢႆၼၼ်ႉသင်ႇလၢတ်ႈတီႈမၢၵ်ႇႁိၼ်လူင်ဢၼ်မီးၵႃႈတီႈၼၼ်ႈႁႂ်ႈၼမ်ႉလႆဢွၵ်ႇမႃးတႃႉ။ ၼမ်ႉတၵ်းဢွၵ်ႇၵႃႈၼႂ်းၼၼ်ႉမႃးလႄႈဢဝ်ၼမ်ႉပၼ်တီႈၵူၼ်းတင်းလၢႆဢိၵ်ႇတင်းတရိၵ်ႈသၢၼ်ႇတင်းလၢႆႁႂ်ႈၵိၼ်တႃႉ၊” ဝႃႈၼင်ႇၼႆဢေႃႈ။-
မူဝ်းသေႇ၊ ၵႂႃႇလႄႈဢဝ်ၶွၼ်ႉတဝ်ႉၼၼ်ႉသေယဝ်ႉ၊ႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈၼၼ်ႉဢေႃႈ။
မၼ်းတင်း ဢႃႇရုၼ်ႇ၊ ႁႂ်ႈမူႇၵူၼ်းၸိူဝ်းၵူၼ်းတင်းသဵင်ႈတင်းမူတ်းၸုၵၼ်တုမ်ၵၼ်ၵႃႈတီႈၽၢႆႇၼႃႈမၢၵ်ႇႁိၼ်လူင်ၼၼ်ႉသေယဝ်ႉ၊ မူဝ်းသေႇ၊ လၢတ်ႈလႄႈဝႃႈ၊ “ၵူၼ်းဢၼ်လုၵ်ႉၽိုၼ်ႉၶဝ်႟။ ဢွၼ်ၵၼ်ထွမ်ႇငိၼ်းတႃႉ။ တၵ်းႁႂ်ႈႁဝ်းဢဝ်ၼမ်ႉၼႂ်းမၢၵ်ႇႁိၼ်လူင်ၼႆႉဢွၵ်ႇမႃးပၼ်ပုၼ်ႈသူႁိုဝ်း၊” ဝႃႈၼင်ႇၼႆသေယဝ်ႉ၊-
မူဝ်းသေႇ၊ ယုၵ်ႉၶွၼ်ႉတဝ်ႉပေႃႉမၢၵ်ႇႁိၼ်လူင်ၼၼ်ႉသွင်ၵမ်းဢေႃႈ။ ၼမ်ႉလႆဢွၵ်ႇမႃးၵႄးယႂ်ႇၼႃႇလႄႈၵူၼ်းတင်းလၢႆဢိၵ်ႇတင်းတရိၵ်ႈသၢၼ်ႇတင်းမူတ်းဢွၼ်ၵၼ်ၵိၼ်ဢေႃႈ။
ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ တင်း ဢႃႇရုၼ်ႇ၊ လႄႈဝႃႈ၊ “ၵွပ်ႈပိူဝ်ႈသူယင်းဢမ်ႇမီးၸႂ်ဢၼ်ယုမ်ႇမၢတ်ႈၵဝ်ပိူဝ်ႈတေႁႂ်ႈတၼ်းၶူဝ်းၵဝ်ဢၼ်မူတ်းၸၢင်ႇၼၼ်ႉထၢင်ႇသႃးသိုဝ်ႈၼႃႈတႂ်ႈတႃၵူၼ်းမဵဝ်း ဢိသရေး၊ တင်းလၢႆၼၼ်ႉလႄႈ၊သူတၵ်းဢမ်ႇလႆႈဢၶႂၢင်ႉဢၼ်လႆႈဢွၼ်ၶဝ်ၸိူဝ်းၼႆႉသူင်ႇၶဝ်ႈၵႂႃႇၵႃႈၼႂ်းမိူင်းဢၼ်ၵဝ်တၵ်းပၼ်တီႈၶဝ်ၼၼ်ႉယဝ်ႉ၊” ဝႃႈၼင်ႇၼႆဢေႃႈ။
လွင်ႈၼၼ်ႉပဵၼ်ၵႃႈတီႈ မေႇရိၽႃႉ၊ တီႈဢၼ်ၵူၼ်းမဵဝ်း ဢိသရေး၊ တင်းလၢႆတၢင်ႇဢပျတ်ႈပွင်ႉၶၢင်းပွင်ႉမိုၼ်ႇတီႈ ထႃႇဝရႃႉၽြႃး၊ လႄႈမၼ်းၸဝ်ႈၼႄပျႃးတၢင်းဢၼ်မၼ်းၸဝ်ႈမူတ်းၸၢင်ႇၼၼ်ႉတီႈၶဝ်ၵႃႈတီႈၼၼ်ႈဢေႃႈ။
မူဝ်းသေႇ၊ ပွႆႇၸႂ်ႉၽူႈတၢင်တူဝ်မၼ်းလုၵ်ႉသေၵႃႈတီႈ ၵႃႇတေႇသႃႉ၊ ၵႂႃႇၸူးၶုၼ်ႁေႃၶမ်းမိူင်း ဢေႇတုမ်ႇ၊ ဢေႃႈ။ ၶဝ်ၵႂႃႇလဝ်ႈလၢတ်ႈလႄႈဝႃႈ၊ “ႁဝ်းၶႃႈပႃးမႃးၶၢဝ်ႇသတၢင်းၼွင်ႉၸၢႆးၸဝ်ႈႁဝ်းၸိူဝ်ႉၶိူဝ်းၵူၼ်းမဵဝ်း ဢိသရေး၊ တီႈၶႃႈဢေႃႈ။ ၸဝ်ႈႁဝ်းႁုတုၵ်ႉၶႃႉတၢင်းၽၢၼ်ဢၼ်ႁဝ်းၶႃႈလႆႈၶၢမ်ႇၼၼ်ႉ၊-
လွင်ႈဢၼ်ပူႇမွၼ်ႇႁဝ်းၶႃႈလူင်းၵႂႃႇၵႃႈတီႈမိူင်း ဢေးၵျိပ်ႉ၊ လႄႈယူႇၵႃႈၼႂ်းမိူင်းၼၼ်ႉႁိုင်ၼႃႇၼၼ်ႉဢေႃႈ။ ၵူၼ်းမဵဝ်း ဢေးၵျိပ်ႉ၊ ၶဝ်ႁဵတ်းပႄႉႁဵတ်းၼႅင်ႇပူႇပေႃႈႁဝ်းၶႃႈတင်းႁဝ်းၶႃႈၸိူဝ်းၼႆႉသေလႄႈ၊-
မိူဝ်ႈဢၼ်ႁဝ်းၶႃႈႁွင်ႉသႅၼ်ႇတီႈ ထႃႇဝရႃႉၽြႃး၊ ၼၼ်ႉမၼ်းၸဝ်ႈငိၼ်းလႄႈပွႆႇၸႂ်ႉတမၢၼ်ႇၵၢင်ႁၢဝ်မၼ်းၸဝ်ႈမႃးဢွၼ်ဢဝ်ႁဝ်းၶႃႈဢွၵ်ႇမိူင်း ဢေးၵျိပ်ႉ၊ မႃးဢေႃႈ။ မိူဝ်ႈလဵဝ်ၼႆႉႁဝ်းၶႃႈမႃးမီးယူႇၵႃႈတီႈ ၵႃႇတေႇသႃႉ၊ ဝဵင်းဢၼ်မီးႁိမ်းလႅၼ်လိၼ်မိူင်းၸဝ်ႈႁဝ်းၼၼ်ႉၸဝ်ႈႁဝ်းႁုယူႇတီႈၶႃႈဢေႃႈ။-
ႁႂ်ႈႁဝ်းၶႃႈလႆႈပႆၽႃႇလတ်းၵႃႈၼႂ်းၵၢင်မိူင်းၸဝ်ႈႁဝ်းၵႂႃႇသေၵမ်း။ ႁဝ်းၶႃႈဢိၵ်ႇတင်းတရိၵ်ႈသၢၼ်ႇႁဝ်းၶႃႈတင်းလၢႆတၵ်းတေဢမ်ႇဝႄႈဢွၵ်ႇလူင်းတၢင်း၊တၵ်းဢမ်ႇယဵပ်ႇဢမ်ႇၶၢမ်ႈႁႆႈၼႃးသူၼ်မၢၵ်ႇၸပိတ်ႉတင်းလၢႆၶႃႈ။ ႁဝ်းၶႃႈတၵ်းဢမ်ႇၵိၼ်ၼမ်ႉၵႃႈၼႂ်းၼမ်ႉမေႃႇၶႃႈ။ ႁဝ်းၶႃႈတၵ်းတႆႇၸွမ်းပႆၸွမ်းသဵၼ်ႈတၢင်းလူင်ၵႂႃႇတေႃႇထိုင်ႁွတ်ႈႁႂ်ႈပူၼ်ႉလႅၼ်လိၼ်မိူင်းၸဝ်ႈႁဝ်းၼၼ်ႉၶႃႈဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ၶုၼ်ႁေႃၶမ်းမိူင်း ဢေႇတုမ်ႇ၊ ၶိုၼ်းလၢတ်ႈလႄႈဝႃႈ၊ “မႂ်းဢမ်ႇလႆႈပႆၽႃႇလတ်းၵႃႈၼႂ်းၵၢင်မိူင်းၵဝ်ၵႂႃႇ၊ပေႃးၽႃႇလတ်းၵႂႃႇၸိုင်၊ႁဝ်းတၵ်းၶီႇသိုၵ်းလႄႈတိုၵ်းမႂ်းဢေႃႈ၊” ဝႃႈၼင်ႇၼႆဢေႃႈ။
ၵူၼ်းမဵဝ်း ဢိသရေး၊ တင်းလၢႆၵေႃႈလၢတ်ႈလႄႈဝႃႈ၊ “ႁဝ်းၶႃႈတၵ်းတႆႇၸွမ်းပႆၸွမ်းသဵၼ်ႈတၢင်းလူင်ၵႂႃႇၵူၺ်းတီႈၶႃႈဢေႃႈ။ ပေႃးႁဝ်းၶႃႈဢိၵ်ႇတင်းတရိၵ်ႈသၢၼ်ႇႁဝ်းၶႃႈတင်းလၢႆလႆႈၵိၼ်ၼမ်ႉၸဝ်ႈႁဝ်းၸိုင်၊ႁဝ်းၶႃႈတၵ်းပၼ်ၵႃႈမၼ်းၶၼ်မၼ်းတီႈၶႃႈဢေႃႈ။ ပၼ်ႁႂ်ႈႁဝ်းၶႃႈလႆႈပႆၽႃႇလတ်းၵႂႃႇသေၵမ်း။ ႁဝ်းၶႃႈတၵ်းဢမ်ႇႁဵတ်းၵႃႈသင်တီႈၶႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းမိူင်း ဢေႇတုမ်ႇ၊ သမ်ႉလၢတ်ႈလႄႈဝႃႈ၊ “သူဢမ်ႇလႆႈပႆၽႃႇလတ်းၵႂႃႇ၊” ဝႃႈၼင်ႇၼႆသေယဝ်ႉ၊ၶီႇသိုၵ်းဢၼ်ႁႅင်းယႂ်ႇၼႃႇလႄႈတိုၵ်းတေႃးၵူၼ်းမဵဝ်း ဢိသရေး၊ ၶဝ်ဢေႃႈ။-
ၵွပ်ႈပိူဝ်ႈၵူၼ်းမဵဝ်း ဢေႇတုမ်ႇ၊ ဢမ်ႇပၼ်ႁႂ်ႈၵူၼ်းမဵဝ်း ဢိသရေး၊ ၶဝ်ပႆၽႃႇလတ်းမိူင်းၶဝ်ၼၼ်ႉလႄႈ၊ၵူၼ်းမဵဝ်း ဢိသရေး၊ ၼၼ်ႉဝႄႈၵႂႃႇၸွမ်းတၢင်းတၢင်ႇသဵၼ်ႈသေဢေႃႈ။
မူႇၵူၼ်းၸိူဝ်းၵူၼ်းမဵဝ်း ဢိသရေး၊ တင်းလၢႆဢွၵ်ႇသေၵႃႈတီႈ ၵႃႇတေးသႃႉ၊ ၵႂႃႇလႄႈႁွတ်ႈထိုင်ၵႃႈတီႈလွႆ ႁေႃးရႃႉ၊-
ၵႃႈတီႈႁိမ်းလႅၼ်လိၼ်မိူင်း ဢေႇတုမ်ႇ၊ ဢေႃႈ။ ၵႃႈတီႈၼၼ်ႈ ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ တင်း ဢႃႇရုၼ်ႇ၊ လႄႈဝႃႈ၊-
“ ဢႃႇရုၼ်ႇ၊ တၵ်းဢမ်ႇလႆႈၶဝ်ႈထိုင်ၵႃႈတီႈမိူင်းဢၼ်ၵဝ်ဝႆႉၵတိတၵ်းပၼ်တီႈၵူၼ်းမဵဝ်း ဢိသရေး၊ ၼၼ်ႉ။ ၵွပ်ႈပိူဝ်ႈသူၶတ်းၵႂၢမ်းၵဝ်ၵႃႈတီႈႁိမ်းၼမ်ႉဢွၵ်ႇႁူး မေႇရိၽႃႉ၊ ၼၼ်ႉလႄႈမၼ်းတၵ်းလႆႈတၢႆဢေႃႈ။-
ပိူဝ်ႈၼႆလႄႈႁွင်ႉဢဝ် ဢႃႇရုၼ်ႇ၊ တင်းလုၵ်ႈၸၢႆးမၼ်း ဢေးလႃႇၸႃႇ၊ လႄႈၶိုၼ်ႈလွႆ ႁေႃးရႃႉ၊ ၵႂႃႇတႃႉ။-
ထွတ်ႇဢဝ်ၶူဝ်းၼုင်ႈယဵၸ်ႈပရေႃးႁဵၵ်ႈ ဢႃႇရုၼ်ႇ၊ လႄႈၼုင်ႈပၼ်လုၵ်ႈၸၢႆးမၼ်း ဢေးလႃႇၸႃႇ၊ တႃႉ။ ဢႃႇရုၼ်ႇ၊ တၵ်းလႆႈတၢႆၵႃႈတီႈၼၼ်ႈလႄႈတၵ်းလႆႈၵႂႃႇယူႇတီႈဢၼ်ၵူၼ်းမဵဝ်းမၼ်းယူႇၼၼ်ႉဢေႃႈ၊” ဝႃႈၼင်ႇၼႆဢေႃႈ။-
မူဝ်းသေႇ၊ ၵေႃႈႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈၼၼ်ႉဢေႃႈ။ ၶဝ်ဢွၼ်ၵၼ်ၶိုၼ်ႈလွႆ ႁေႃးရႃႉ၊ ၵႂႃႇသိုဝ်ႈၼႃႈတႂ်ႈတႃမူႇၵူၼ်းၸိူဝ်းၵူၼ်းတင်းသဵင်ႈတင်းလူင်လႄႈ၊-
မၼ်းထွတ်ႇဢဝ်ၶူဝ်းၼုင်ႈယဵၸ်ႈပရေႃးႁဵၵ်ႈ ဢႃႇရုၼ်ႇ၊ ၼၼ်ႉသေလႄႈၼုင်ႈပၼ်လုၵ်ႈၸၢႆးမၼ်း ဢေးလႃႇၸႃႇ၊ သေယဝ်ႉ၊ ဢႃႇရုၼ်ႇ၊ တၢႆၵႃႈၼိူဝ်ၸိၵ်းလွႆၼၼ်ႉသေဢေႃႈ။ မူဝ်းသေႇ၊ တင်း ဢေးလႃႇၸႃႇ၊ ၵေႃႈလူင်းလွႆမႃးသေဢေႃႈ။-
မူႇၵူၼ်းၸိူဝ်းၵူၼ်းတင်းလၢႆႁုႁၼ်လွင်ႈဢၼ် ဢႃႇရုၼ်ႇ၊ တၢႆယဝ်ႉၼၼ်ႉလႄႈၶဝ်ၵႃႈမီးတင်းသဵင်ႈတင်းလူင်ႁွင်ႉႁႆႈၶၢင်းၶီၶၢင်းၽၢၼ်ပုၼ်ႈ ဢႃႇရုၼ်ႇ၊ သၢမ်သိပ်းဝၼ်းတဵမ်တဵမ်ဢေႃႈ။
မိူဝ်ႈဢၼ်ၶုၼ်ႁေႃၶမ်းဝဵင်း ဢႃႇရတ်ႉ၊ မဵဝ်း ၶႃႇၼၼိ၊ ဢၼ်ယူႇၵႃႈတီႈပွတ်းတၢင်းၸၢၼ်းမိူင်း ၶႃႇၼၼ်ႇ၊ လႆႈငိၼ်းၶၢဝ်ႇဝႃႈ၊ၵူၼ်းမဵဝ်း ဢိသရေး၊ တင်းလၢႆၸွမ်းသဵၼ်ႈတၢင်း ဢသရိမ်ႇ၊ မႃးၼၼ်ႉသေယဝ်ႉ၊မၼ်းၶီႇသိုၵ်းၵႂႃႇတိုၵ်းၶဝ်လႄႈတိလႆႈသိမ်းလႆႈၵူၼ်းၵမ်ႈၽွင်ႈဢေႃႈ။-
ၵူၼ်းမဵဝ်း ဢိသရေး၊ ၵေႃႈႁဵတ်းၵတိသဵတ်ႈၸႃႇၵႃႈတီႈ ထႃႇဝရႃႉၽြႃး၊ လႄႈဝႃႈ၊ “ပေႃးၸဝ်ႈႁဝ်းပၼ်ဢၶႂၢင်ႉဢၼ်ႁႂ်ႈၶႃႈၸဝ်ႈႁဝ်းၶဝ်ပႄႉၼႅင်ႇဝဵင်းၼႆႉၸိုင်၊ၶႃႈၸဝ်ႈႁဝ်းၶဝ်တၵ်းယႃႉပႅတ်ႈဝဵင်းၶဝ်မူတ်းမူတ်းသဵင်ႈသဵင်ႈတီႈၶႃႈဢေႃႈ၊” ဝႃႈၼင်ႇၼႆဢေႃႈ။-
ထႃႇဝရႃႉၽြႃး၊ ၵေႃႈထွမ်ႇဢဝ်ၵႂၢမ်းၵူၼ်းမဵဝ်း ဢိသရေး၊ လႄႈၽွမ်ႉၽၢႆႇၶဝ်ႁႂ်ႈလႆႈပႄႉၼႅင်ႇၵူၼ်းမဵဝ်း ၶႃႇၼၼိ၊ ဢေႃႈ။ ပိူဝ်ႈၼႆလႄႈၶဝ်ဢွၼ်ၵၼ်ယႃႉဝဵင်းၼၼ်ႉဢိၵ်ႇတင်းၵူၼ်းဝဵင်းတင်းလၢႆပႅတ်ႈလုမ်းလုမ်းသေယဝ်ႉ၊ႁွင်ႉႁဵၵ်ႈၸိုဝ်ႈတီႈၼၼ်ႈဝႃႈ၊ ႁေႃႇမႃႇ၊ ဢေႃႈ။
ၵူၼ်းမဵဝ်း ဢိသရေး၊ တင်းလၢႆဢွၵ်ႇသေၵႃႈတီႈလွႆ ႁေႃးရႃႉ၊ ၵႂႃႇၸွမ်းသဵၼ်ႈတၢင်းငွၵ်းလူင် ပၢင်ႇလၢႆႇလႅင်၊ ႁႂ်ႈလႆႈလဵပ်ႈမိူင်း ဢေႇတုမ်ႇ၊ ၵႂႃႇဢေႃႈ။ ၵွပ်ႈပိူဝ်ႈဢၼ်သဵၼ်ႈတၢင်းၼၼ်ႉယၢပ်ႇၼႃႇလႄႈၵူၼ်းတင်းလၢႆၸႂ်လုႁႅင်းဢူၼ်ႈလႄႈ၊-
ဢွၼ်ၵၼ်လၢတ်ႈၶတ်းၽြႃးပဵၼ်ၸဝ်ႈတင်း မူဝ်းသေႇ၊ လႄႈဝႃႈ၊ “ႁဵတ်းသင်လႄႈသူဢွၼ်ဢဝ်ႁဝ်းဢွၵ်ႇမိူင်း ဢေးၵျိပ်ႉ၊ မႃးႁႂ်ႈႁဝ်းလႆႈတၢႆၵႃႈတီႈထိူၼ်ႇလႅင်ႉဢၼ်ဢမ်ႇမီးၶဝ်ႈမီးၼမ်ႉၼႆႉၸိူဝ်ႉၼင်ႇႁိုဝ်။ တၢင်းၵိၼ်ဢၼ်ၸၢင်ဢၼ်ၸိုတ်ႇၼႆႉၵေႃႈႁဝ်းမိူဝ်ႇၼႃႇယဝ်ႉ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ ထႃႇဝရႃႉၽြႃး၊ ပွႆႇၸႂ်ႉငူးၽႆးမႃးၵႃႈတီႈၵူၼ်းတင်းလၢႆလႄႈတွတ်ႇၵူၼ်းမဵဝ်း ဢိသရေး၊ တင်းလၢႆတၢႆၼမ်ၼႃႇဢေႃႈ။-
ပိူဝ်ႈၼႆလႄႈၵူၼ်းတင်းလၢႆဢွၼ်ၵၼ်မႃးၵႃႈတီႈ မူဝ်းသေႇ၊ လႄႈလၢတ်ႈဝႃႈ၊ “ၵွပ်ႈပိူဝ်ႈဢၼ်ႁဝ်းလၢတ်ႈၶတ်း ထႃႇဝရႃႉၽြႃး၊ တင်းၸဝ်ႈႁဝ်းလႄႈႁဝ်းၶႃႈမီးဢပျတ်ႈယဝ်ႉဢေႃႈ။ ၶႅၼ်းတေႃႈသူးတွင်းတီႈ ထႃႇဝရႃႉၽြႃး၊ ႁႂ်ႈမၼ်းၸဝ်ႈဢဝ်ပႅတ်ႈငူးၸိူဝ်းၼႆႉသေၵမ်းၶႃႈ၊” ဝႃႈၼင်ႇၼႆဢေႃႈ။ ပိူဝ်ႈၼႆလႄႈ မူဝ်းသေႇ၊ သူးတွင်းပုၼ်ႈၵူၼ်းတင်းလၢႆလႄႈ၊-
ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ လႄႈဝႃႈ၊ “ႁဵတ်းငူးၽႆးတူဝ်ၼိုင်ႈသေလႄႈယုၵ်ႉတၢင်ႇဝႆႉၵႃႈၼိူဝ်သဝ်တႃႉ။ ၵူၼ်းၵူႈၵေႃႉဢၼ်လႆႈၶၢမ်ႇငူးတွတ်ႇၼၼ်ႉပေႃးမၼ်းႁႅၼ်တူၺ်းၸိုင်၊တၵ်းလႆႈဢသၢၵ်ႈၶျၢမ်းသႃႇဢေႃႈ၊” ဝႃႈၼင်ႇၼႆဢေႃႈ။-
မူဝ်းသေႇ၊ ၵေႃႈဢဝ်တွင်းလိူင်ႁဵတ်းငူးသေလႄႈဢဝ်ယုၵ်ႉတၢင်ႇဝႆႉၵႃႈၼိူဝ်သဝ်ဢေႃႈ။ ၵေႃႉဢၼ်လႆႈၶၢမ်ႇငူးတွတ်ႇၼၼ်ႉမိူဝ်ႈဢၼ်မၼ်းႁႅၼ်တူၺ်းငူးတွင်းလိူင်ၼၼ်ႉၸိုင်၊လႆႈဢသၢၵ်ႈၶျၢမ်းသႃႇဢေႃႈ။
ၵူၼ်းမဵဝ်း ဢိသရေး၊ တင်းလၢႆသမ်ႉဢွၼ်ၵၼ်ၶၢႆႉပၢင်လႄႈၵႂႃႇၶျႃးတပ်ႉၵႃႈတီႈ ဢေႃးပုတ်ႉ၊ ဢေႃႈ။-
ၶဝ်သမ်ႉလုၵ်ႉသေၵႃႈတီႈၼၼ်ႈၶၢႆႉၵႂႃႇၶျႃးပၢင်တပ်ႉၵႃႈတီႈ ဢိယႃႉဢပႃႇရိမ်ႇ၊ ၵႃႈၼႂ်းထိူၼ်ႇၽၢႆႇတၢင်းဢွၵ်ႇမိူင်း မေႃႇၽႃႉ၊ ဢေႃႈ။-
လိုၼ်းၼၼ်ႉၶဝ်သမ်ႉၶၢႆႉၵႂႃႇၶျႃးပၢင်တပ်ႉၶဝ်ၵႃႈတီႈထူင်ႉ ၸႃႇရိတ်ႉ၊ ဢေႃႈ။-
လိုၼ်းၼၼ်ႉၶဝ်သမ်ႉၶၢႆႉၵႂႃႇထႅင်ႈလႄႈၶျႃးပၢင်တပ်ႉၵႃႈတီႈၽၢႆႇတၢင်းႁွင်ႇၼမ်ႉ ဢႃႇၼုၼ်ႇ၊ ၵႃႈတီႈၼႂ်းထိူၼ်ႇဢၼ်ၸပ်းၵၼ်တင်းမိူင်း ဢႃႇမေႃးရိ၊ ၼၼ်ႉဢေႃႈ။ ၼမ်ႉ ဢႃႇၼုၼ်ႇ၊ ၼၼ်ႉပဵၼ်ဢၼ်ၶၼ်ႈဢၼ်ၶႅၼ်ႈဝူင်ႈၵၢင်မိူင်း မေႃႇၽႃႉ၊ တင်းမိူင်း ဢႃႇမေႃးရိ၊ ဢေႃႈ။-
ၵွပ်ႈပိူဝ်ႈၸိူဝ်ႉၼင်ႇၼႆၸင်ႇၵႃႈၼႂ်း လိၵ်ႈတိုၵ်းသိုၵ်းထႃႇဝရႃႉၽြႃး၊ တႅမ်ႈဝႆႉလႄႈဝႃႈ၊ “ဝဵင်း ဝႃႇႁိမ်ႉ၊ ၵႃႈၼႂ်းထူင်ႉ သုၽႃႉ၊ ၵႃႈတီႈႁူၺ်ႈတင်းလၢႆၸွမ်းၼမ်ႉ ဢႃႇၼုၼ်ႇ၊-
တၢပ်ႈႁူၺ်ႈတင်းလၢႆဢၼ်ယၢဝ်းလူင်းၵႂႃႇၸူးၵႃႈတီႈဝဵင်း ဢႃႇရႃႉ၊ လႄႈ၊လႆၸွမ်းလႅၼ်လိၼ်မိူင်း မေႃႇၽႃႉ၊ ဢေႃႈ၊” ဝႃႈၼင်ႇၼႆဢေႃႈ။
လုၵ်ႉၵႃႈတီႈၼၼ်ႈလႄႈၶဝ်ၶၢႆႉၵႂႃႇၵႃႈတီႈဢၼ်ႁွင်ႉဝႃႈ၊ၼမ်ႉမေႃႇ ပေႇရႃႉ၊ တီႈဢၼ် ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ လႄႈဝႃႈ၊ “ႁႂ်ႈၵူၼ်းတင်းလၢႆၸုတုမ်ၵၼ်တႃႉ။ ၵဝ်တၵ်းပၼ်ၼမ်ႉတီႈၶဝ်ဢေႃႈ၊” ဝႃႈၼင်ႇၼႆၼၼ်ႉဢေႃႈ။
မိူဝ်ႈယၢမ်းၼၼ်ႉၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ႁဵတ်းၵႂၢမ်းလႄႈဝႃႈ၊ “ၼမ်ႉမေႃႇ႟။ ပုၼ်းဢွၵ်ႇတႃႉ။ ႁဝ်းတၵ်းႁဵတ်းၵႂၢမ်းယုၵ်ႉယွင်ႈဢေႃႈ။
ၼမ်ႉမေႃႇဢၼ်မူးမၢတ်ႈၽွင်းမိူင်းတင်းလၢႆဢွၼ်ၵၼ်ၶုတ်း၊ဢိၵ်ႇတင်း ၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆဢွၼ်ၵၼ် ဢဝ်တင်းၵၼ်းႁွၵ်ႇၶုၼ်၊ဢိၵ်ႇတင်းၶွၼ်ႉတဝ်ႉၶဝ်ၼၼ်ႉၶုတ်းဢေႃႈ၊” ဝႃႈၼင်ႇၼႆဢေႃႈ။ ၶဝ်ၶၢႆႉသေၵႃႈတီႈထိူၼ်ႇၼၼ်ႉၵႂႃႇၸူးၵႃႈတီႈ မတ်ႉထၼႃႇ၊ ၼၼ်ႉသေယဝ်ႉ၊-
သမ်ႉလုၵ်ႉသေၵႃႈတီႈ မတ်ႉထၼႃႇ၊ ၵႂႃႇၸူးၵႃႈတီႈ ၼႁႃႇလျေးလႃႉ၊ လုၵ်ႉသေၵႃႈတီႈ ၼႁႃႇလျေးလႃႉ၊ သမ်ႉၵႂႃႇၸူးၵႃႈတီႈ ပႃႇမုတ်ႉ၊-
သမ်ႉလုၵ်ႉသေၵႃႈတီႈ ပႃႇမုတ်ႉ၊ ၵႂႃႇၸူးၵႃႈတီႈထူင်ႉမိူင်း မေႃႇၽႃႉ၊ တီႈပၢႆလွႆ ပိသၵႃႇ၊ ဢၼ်ဝၢႆႇၼႃႈတေႃႇထိူၼ်ႇ ယေႇသိမုၼ်ႇ၊ ၼၼ်ႉဢေႃႈ။
မိူဝ်ႈၼၼ်ႉၵူၼ်းမဵဝ်း ဢိသရေး၊ ပွႆႇၸႂ်ႉၽူႈတၢင်တူဝ်တင်းလၢႆၵႂႃႇၸူးၵႃႈတီႈၶုၼ်ႁေႃၶမ်း သိႁုၼ်ႇ၊ မဵဝ်း ဢႃႇမေႃးရိ၊ သေယဝ်ႉယွၼ်းဢၶႂၢင်ႉလႄႈဝႃႈ၊-
“ႁႂ်ႈႁဝ်းလႆႈပႆၽႃႇလတ်းၵႂႃႇၵႃႈၼႂ်းၵၢင်မိူင်းၸဝ်ႈႁဝ်းသေၵမ်း။ ႁဝ်းၶႃႈဢိၵ်ႇတင်းတရိၵ်ႈသၢၼ်ႇႁဝ်းၶႃႈတင်းလၢႆတၵ်းတေဢမ်ႇဝႄႈဢွၵ်ႇလူင်းတၢင်း၊တၵ်းဢမ်ႇယဵပ်ႇဢမ်ႇၶၢမ်ႈႁႆႈၼႃး၊သူၼ်မၢၵ်ႇၸပိတ်ႉတင်းလၢႆၶႃႈ။ ႁဝ်းၶႃႈတၵ်းဢမ်ႇၵိၼ်ၼမ်ႉဢၼ်လႆႈမႃးၵႃႈတီႈၼမ်ႉမေႃႇၸဝ်ႈႁဝ်းၶႃႈ။ ႁဝ်းၶႃႈတၵ်းတႆႇၸွမ်းပႆၸွမ်းသဵၼ်ႈတၢင်းလူင်းၵႂႃႇတေႃႇထိုင်ႁွတ်ႈပူၼ်ႉလႅၼ်လိၼ်မိူင်းၸဝ်ႈႁဝ်းၼၼ်ႉၶႃႈဢေႃႈ၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊ၶုၼ်ႁေႃၶမ်း သိႁုၼ်ႇ၊ ဢမ်ႇပၼ်ဢၶႂၢင်ႉႁႂ်ႈၵူၼ်းမဵဝ်း ဢိသရေး၊ တင်းလၢႆပႆၽႃႇလတ်းၵႂႃႇၵႃႈၼႂ်းၵၢင်မိူင်းမၼ်းၼၼ်ႉ။ မၼ်းယင်းၸုဢဝ်တပ်ႉသိုၵ်းမၼ်းလႄႈၶီႇသိုၵ်းၵႂႃႇၸူးၵႃႈတီႈ ယႃႇႁတ်ႉ၊ တီႈၼႂ်းထိူၼ်ႇသေလႄႈတိုၵ်းတေႃးၵူၼ်းမဵဝ်း ဢိသရေး၊ ၶဝ်ဢေႃႈ။-
ၵူၺ်းၵႃႈ၊ၵူၼ်းမဵဝ်း ဢိသရေး၊ တင်းလၢႆဢဝ်ရၢၼ်ႇသူႇၶဝ်တၢႆၼမ်ၼႃႇလႄႈသိမ်းဢဝ်လိၼ်ၶဝ်၊ဢဝ်ၵႃႈတီႈၸႃႉၸဵမ်ၼမ်ႉ ဢႃႇၼုၼ်ႇ၊ တေႃႇထိုင်ႁွတ်ႈၼမ်ႉ ယပ်ႉပုၵ်ႉ၊ ဢၼ်ပဵၼ်လႅၼ်လိၼ်ၵူၼ်းမဵဝ်း ဢမ်ႇမုၼ်ႇ၊ ၼၼ်ႉဢေႃႈ။ လွင်ႈမၼ်းၸမ်ႉ၊ၵႃႈတီႈလႅၼ်လိၼ် ဢမ်ႇမုၼ်ႇ၊ ၼၼ်ႉႁႄႉတိုၵ်းၶဝ်ႁႅင်းၼႃႇလူင်လၢင်ဢေႃႈ။-
ၼင်ႇၼၼ်လႄႈၵူၼ်းမဵဝ်း ဢိသရေး၊ တင်းလၢႆသိမ်းဢဝ်ဝဵင်းလူင် ဢႃႇမေႃးရိ၊ ၶဝ်တင်းသဵင်ႈတင်းလူင်ပႃးၸဵမ်ဝဵင်းလူင် ႁေႇသၽုၼ်ႇ၊ ဢိၵ်ႇတင်းဝဵင်းလဵၵ်ႉဝဵင်းၼွႆႉမၼ်းၵႃႈမီးသေယဝ်ႉ၊ၶဝ်ဢွၼ်ၵၼ်ယူႇၵႃႈၼႂ်းဝဵင်းၸိူဝ်းၼၼ်ႉသေဢေႃႈ။-
ဝဵင်းလူင် ႁေႇသၽုၼ်ႇ၊ ၼၼ်ႉပဵၼ်ဝဵင်းၶုၼ်ႁေႃၶမ်း သိႁုၼ်ႇ၊ မဵဝ်း ဢႃႇမေႃးရိ၊ ဢၼ်တိုၵ်းသိုၵ်းၵၼ်တင်းၶုၼ်ႁေႃၶမ်းဢၼ်ဢုပ်ႉပိူင်ႇမိူင်း မေႃႇၽႃႉ၊ မိူဝ်ႈဢွၼ်တၢင်းၼၼ်ႉလႄႈ၊ႁိမ်ဢဝ်မိူင်းမၼ်းတင်းသဵင်ႈတင်းလူင်တေႃႇထိုင်ႁွတ်ႈၼမ်ႉ ဢႃႇၼုၼ်ႇ၊ ၼၼ်ႉဢေႃႈ။-
ၵွပ်ႈပိူဝ်ႈလွင်ႈတၢင်းၼၼ်ႉလႄႈသြႃႇလၢင်ႇၵႃႇၶဝ်ၸၢပ်ႈဝႆႉဝႃႈ၊ “မႃးၵႃႈတီႈဝဵင်း ႁေႇသၽုၼ်ႇ၊ လႄႈၸူးၵႃႈတီႈဝဵင်းလူင်ၶုၼ်ႁေႃၶမ်း သိႁုၼ်ႇ၊ တႃႉ။ ႁဝ်းၶႂ်ႈႁၼ်ဝဵင်းၼၼ်ႉၶိုၼ်းမႄးၵုမ်းမႄးႁဵတ်းလႄႈႁႂ်ႈမၼ်းသမ်ႉၶိုၼ်းတႄႇပဵၼ်ဢေႃႈ။
ပိဝ်ၽႆးဢွၵ်ႇသေၵႃႈၼႂ်းဝဵင်း ႁေႇသၽုၼ်ႇ၊ မုၵ်ႉၽႆးလုၵ်ႉယူႇၵႃႈၼႂ်းဝဵင်းၶုၼ် သိႁုၼ်ႇ၊ မႆႈပႅတ်ႈဝဵင်း ဢႃႇရႃႉ၊ မိူင်း မေႃႇၽႃႉ၊ ဢိၵ်ႇတင်းၶုၼ်ၸိူဝ်းဢၼ်ဢုပ်ႉပိူင်ႇၵႃႈတီႈၼိူဝ်လွႆ၊ ပွတ်းတၢင်းၼိူဝ်ၼမ်ႉ ဢႃႇၼုၼ်ႇ၊ ၼၼ်ႉယဝ်ႉ။
မိူင်း မေႃႇၽႃႉ၊ ႟။ မႂ်းမီးဢႃႉမၢင်ႇၵလႃႇဢေႃႈ။ တပႄး ၶႄးမုသႃႉ၊ ၶဝ်႟။ ဢၵျူဝ်းသူလုယဝ်ႉ။ ၽြႃးသူၼၼ်ႉႁႂ်ႈၵူၼ်းၸၢႆးသူပဵၼ်ၵူၼ်းဢၼ်ပၢႆႈသွၼ်ႈသိုၵ်းယဝ်ႉ။ ႁႂ်ႈၵူၼ်းယိင်းသူပဵၼ်ၶဝ်ၸိူဝ်းဢၼ်တူၵ်းၵႅၼ်း ၵႃႈၼႂ်းမိုဝ်းၶုၼ်ႁေႃၶမ်းမဵဝ်း ဢႃႇမေႃးရိ၊ ယဝ်ႉ။
ၵမ်းၼႆႉၸိုင်၊ၸိူဝ်ႉၶဝ်ၶိူဝ်းၶဝ်လုယဝ်ႉ။ ႁဝ်းပႄႇၽဵဝ်ႈပႅတ်ႈၶဝ်တႄႇဢဝ်ၵႃႈတီႈဝဵင်း ႁေႇသၽုၼ်ႇ၊ တေႃႇထိုင်ႁွတ်ႈဝဵင်း တိၽုၼ်ႇ၊ တႄႇဢဝ်ဝဵင်း ၼႃႇသိမ်း၊ တေႃႇထိုင်ဝဵင်း ၼေႃႇၽႃႉ၊ ဢၼ်ၸပ်းႁိမ်းဝဵင်း မေႇတေႇၽႃႉ၊ ယဝ်ႉ၊” ဝႃႈၼင်ႇၼႆဢေႃႈ။
ၼင်ႇၼၼ်လႄႈၵူၼ်းမဵဝ်း ဢိသရေး၊ တင်းလၢႆလႆႈယူႇၵႃႈၼႂ်းမိူင်း ဢႃႇမေႃးရိ၊ ဢေႃႈ။-
မူဝ်းသေႇ၊ ၵေႃႈပွႆႇၸႂ်ႉၵူၼ်းၵႂႃႇလူလွမ်တူၺ်းလၢႆးဢၼ်လီသေပိူၼ်ႈပုၼ်ႈဢၼ်တၵ်းတိုၵ်းတေႃးဝဵင်း ယႃႇၸႃႇ၊ သေယဝ်ႉ၊ၶဝ်သိမ်းဢဝ်ဝဵင်းၼၼ်ႉဢိၵ်ႇတင်းဝၢၼ်ႈလဵၵ်ႉဝဵင်းၼွႆႉတင်းလၢႆသေလႄႈ၊ႁေႃႈၵူၼ်းမဵဝ်း ဢႃႇမေႃးရိ၊ ဢၼ်ယူႇၵႃႈၼႂ်းမိူင်းၼၼ်ႉၸိူဝ်းၼၼ်ႉဢွၵ်ႇပႅတ်ႈဢေႃႈ။
ၶဝ်ဢွၼ်ၵၼ်ငႅၵ်းလႄႈၸွမ်းသဵၼ်ႈတၢင်းၵႂႃႇၸူးမိူင်း ပႃႇသၢၼ်ႇ၊ ဢေႃႈ။ ၶုၼ်ႁေႃၶမ်း ဢေႃႇၶႃႉ၊ မိူင်း ပႃႇသၢၼ်ႇ၊ ၼၼ်ႉဢဝ်တပ်ႉသိုၵ်းမၼ်းၶီႇၵႂႃႇတိုၵ်းတေႃးၶဝ်ၵႃႈတီႈဝဵင်း ဢေႇတရိ၊ ဢေႃႈ။-
ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ လႄႈဝႃႈ၊ “ယႃႇပေၵူဝ်မၼ်း။ ၵဝ်တၵ်းႁႂ်ႈမႂ်းပႄႉၼႅင်ႇမၼ်းဢိၵ်ႇတင်းၵူၼ်းမၼ်းတင်းသဵင်ႈတင်းလူင်ဢိၵ်ႇတင်းလိၼ်မၼ်းဢေႃႈ။ မႂ်းတၵ်းလႆႈႁဵတ်းတီႈမၼ်းမိူၼ်ၸိူဝ်ႉၼင်ႇဢၼ်မႂ်းႁဵတ်းတီႈၶုၼ်ႁေႃၶမ်း သိႁုၼ်ႇ၊ မိူင်း ဢႃႇမေႃးရိ၊ ဢၼ်ဢုပ်ႉပိူင်ႇဝဵင်း ႁေႇသၽုၼ်ႇ၊ ၼၼ်ႉဢေႃႈ၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈၵူၼ်းမဵဝ်း ဢိသရေး၊ ၸိူဝ်းၼၼ်ႉဢဝ်တၢႆၶုၼ်ႁေႃၶမ်း ဢေႃႇၶႃႉ၊ တင်းလုၵ်ႈၸၢႆးမၼ်းတင်းလၢႆဢိၵ်ႇတင်းၵူၼ်းမၼ်းတင်းလၢႆတေႃႇထိုင်ႁွတ်ႈဢမ်ႇၵိုတ်းဢမ်ႇၵျၢၼ်ႇဝႆႉသေၵေႃႉသေၵူၼ်းလႄႈသိမ်းဢဝ်မိူင်းမၼ်းဢေႃႈ။
ၵူၼ်းမဵဝ်း ဢိသရေး၊ တင်းလၢႆသမ်ႉၶၢႆႉၵႂႃႇလႄႈၶျႃးပၢင်တပ်ႉၵႃႈၼႂ်းပၢင်ႇပဵင်းမိူင်း မေႃႇၽႃႉ၊ ၽၢႆႇဝၼ်းဢွၵ်ႇၼမ်ႉ ယေႃးတၢၼ်ႇ၊ သိုဝ်ႈၵၼ်တင်းဝဵင်း ယေႇရိၶူဝ်း၊ ဢေႃႈ။
မိူဝ်ႈဢၼ်ၶုၼ်ႁေႃၶမ်း ပႃႇလၵ်ႉ၊ မိူင်း မေႃႇၽႃႉ၊ ဢၼ်ပဵၼ်လုၵ်ႈၸၢႆး ၸိၽေႃႇ၊ ႁုငိၼ်းလွင်ႈဢၼ်ၵူၼ်းမဵဝ်း ဢိသရေး၊ ၶဝ်ႁဵတ်းတီႈၵူၼ်းမိူင်း ဢႃႇမေႃးရိ၊ ၸိူဝ်ႉၼင်ႇႁိုဝ်မႃးယဝ်ႉ၊ဢိၵ်ႇတင်းလွင်ႈဢၼ်ၶဝ်ၼမ်ၵိုၼ်းမႃးထၢၼ်ႇႁိုဝ်ၼၼ်ႉသေလႄႈ၊-
မၼ်းဢိၵ်ႇတင်းၵူၼ်းမိူင်းမၼ်းၵႃႈမီးၵူဝ်ႁႄသၼ်ႇဝႆယူႇဢေႃႈ။-
ၶုၼ်မိူင်း မေႃႇၽႃႉ၊ လၢတ်ႈတီႈၵူၼ်းဢၼ်ပဵၼ်ၵႄႇပဵၼ်ႁူဝ်မိူင်း မိတျၼ်ႇ၊ တင်းလၢႆလႄႈဝႃႈ၊ “ၵူၼ်းဢၼ်မုၵ်ႉယႂ်ႇမုၵ်ႉလူင်ၼႆႉတၵ်းတေၸဵဝ်းမႃးယႃႉပႅတ်ႈၵႃႈမီးတင်းသဵင်ႈတင်းလူင်ဢၼ်မီးလဵပ်ႈႁွပ်ႈႁိမ်းႁွမ်းႁဝ်းၼႆႉ၊မိူၼ်ၸိူဝ်ႉၼင်ႇဝူဝ်းၵိၼ်ပႅတ်ႈပၢင်ႇယိူဝ်ႈယႃႈၼၼ်ႉယဝ်ႉ၊” ဝႃႈၼင်ႇၼႆဢေႃႈ။ ပိူဝ်ႈၼႆလႄႈၶုၼ်ႁေႃၶမ်း ပႃႇလၵ်ႉ၊ လုၵ်ႈၸၢႆး ၸိၽေႃႇ၊ ဢၼ်ဢုပ်ႉပိူင်ႇမိူင်း မေႃႇၽႃႉ၊ ၼႂ်းၶိင်ႇၵႃႇလႃႉမိူဝ်ႈၼၼ်ႉၼၼ်ႉ၊-
ပွႆႇၸႂ်ႉၽူႈတၢင်တူဝ်တင်းလၢႆၵႂႃႇၸူးၵႃႈတီႈ ပႃႇလၢမ်ႇ၊ လုၵ်ႈၸၢႆး ပေႃးရႃႉ၊ ဢၼ်ယူႇၵႃႈတီႈဝဵင်း ပေႇသေႃႇ၊ ဢၼ်မီးၵႃႈႁိမ်းၼမ်ႉ ဢုၽရတ်ႉ၊ ၵႃႈၼႂ်းမိူင်း ဢမေႃႇ၊ လႄႈႁႂ်ႈလႆႈႁွင်ႉပၢင်းဢဝ်မၼ်းမႃးလႄႈသင်ႇလၢတ်ႈဝႃႈ၊ “တေႃႈလဵဝ်ၼႆႉၵူၼ်းမဵဝ်းၼိုင်ႈဢွၵ်ႇသေၵႃႈတီႈမိူင်း ဢေးၵျိပ်ႉ၊ ႁွတ်ႈမႃးႁူမ်ႇသုမ်ႇၼႃႈလိၼ်မိူင်းလႄႈၶျႃးတီႈယူႇၶဝ်တေႃႇၼႃႈၵၼ်တင်းၵဝ်ဝႆႉယဝ်ႉ။-
ၶဝ်ႁႅင်းယႂ်ႇၼႃႇလိူဝ်တွၼ်းသေၵဝ်ၶႃႈဢေႃႈ။ ပိူဝ်ႈၼႆလႄႈၶႅၼ်းတေႃႈမႃးၵိၼ်ႇလႃႇၶဝ်ပုၼ်ႈၵဝ်ၶႃႈသေၵမ်း။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ၵဝ်ၶႃႈတၵ်းတၢတ်ႈၼိူင်ႇတိုၵ်းႁႂ်ႈပႄႉၶဝ်လႆႈလႄႈတၵ်းႁေႃႈၶဝ်ဢွၵ်ႇပႅတ်ႈသေၵႃႈၼႂ်းမိူင်းၵဝ်ၶႃႈၵႂႃႇလႆႈဢေႃႈ။ ၵဝ်ၶႃႈႁုလွင်ႈၵေႃႉဢၼ်ၸဝ်ႈႁဝ်းပၼ်တၢင်းလီၼၼ်ႉမၼ်းလႆႈမၢင်ႇၵလႃႇလႄႈၵေႃႉဢၼ်ၸဝ်ႈႁဝ်းၵိၼ်ႇလႃႇၼၼ်ႉ မၼ်းလႆႈၶၢမ်ႇဢဝ်တၢင်းၵိၼ်ႇတၢင်းလႃႇၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၼင်ႇၼၼ်လႄႈ ၵူၼ်းဢၼ်ပဵၼ်ၵႄႇပဵၼ်ႁူဝ်ၵူၼ်းမိူင်း မေႃႇၽႃႉ၊ တင်းၵူၼ်းဢၼ်ပဵၼ်ၵႄႇပဵၼ်ႁူဝ်မဵဝ်း မိတျၼ်ႇ၊ တင်းလၢႆဢွၼ်ၵၼ်ပႃးဢဝ်လၢၵ်ႈသွင်ႇပုၼ်ႈၵႃႈၶၼ်ဢၼ်တၵ်းၵိၼ်ႇလႃႇၸိူဝ်းၼၼ်ႉသေလႄႈၵႂႃႇၸူးၵႃႈတီႈ ပႃႇလၢမ်ႇ၊ သေယဝ်ႉ၊ဢဝ်ၵႂၢမ်းၶုၼ် ပႃႇလၵ်ႉ၊ ၼၼ်ႉလၢတ်ႈတီႈမၼ်းဢေႃႈ။-
ပႃႇလၢမ်ႇ၊ ၵေႃႈလၢတ်ႈတီႈၶဝ်လႄႈဝႃႈ၊ “သူဢွၼ်ၵၼ်လိုဝ်ႈၼွၼ်းၵႃႈတီႈၼႆႈၶိုၼ်းၼိုင်ႈလူးၵွၼ်ႇတႃႉ။ မိူဝ်ႈၽုၵ်ႈၵၢင်ၼႂ်ၵဝ်တၵ်းၶိုၼ်းလၢတ်ႈတီႈသူၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉတီႈၵဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။ မူးမၢတ်ႈၽွင်းမိူင်း မေႃႇၽႃႉ၊ ၸိူဝ်းၼၼ်ႉၵေႃႈယူႇၵႃႈတီႈ ပႃႇလၢမ်ႇ၊ ၼၼ်ႉဢေႃႈ။
ၽြႃးပဵၼ်ၸဝ်ႈမႃးတီႈ ပႃႇလၢမ်ႇ၊ လႄႈထၢမ်ဝႃႈ၊ “ၵူၼ်းၸိူဝ်းဢၼ်မႃးမီးယူႇၵႃႈတီႈမႂ်းၼႆႉပဵၼ်ၽူႈလႂ်၊” ဝႃႈၼင်ႇၼႆဢေႃႈ။
ပႃႇလၢမ်ႇ၊ ၶိုၼ်းလဝ်ႈလၢတ်ႈလႄႈဝႃႈ၊ “ၶုၼ်ႁေႃၶမ်း ပႃႇလၵ်ႉ၊ မိူင်း မေႃႇၽႃႉ၊ ၼၼ်ႉပွႆႇၸႂ်ႉၵူၼ်းမႃးၵႃႈတီႈၶႃႈၸဝ်ႈလႄႈလၢတ်ႈဝႃႈ၊-
‘ၵူၼ်းမဵဝ်းၼိုင်ႈလုၵ်ႉသေၵႃႈတီႈမိူင်း ဢေးၵျိပ်ႉ၊ ႁွတ်ႈမႃးလႄႈႁူမ်ႇသုမ်ႇၼႃႈလိၼ်မိူင်းဝႆႉယဝ်ႉ။ မၼ်းၶႂ်ႈႁႂ်ႈၶႃႈၸဝ်ႈၵိၼ်ႇလႃႇၶဝ်ၼၼ်ႉပုၼ်ႈမၼ်းလွင်ႈၼင်ႇႁိုဝ်မၼ်းတၵ်းတိုၵ်းပႄႉၶဝ်လႆႈလႄႈႁေႃႈၶဝ်ဢွၵ်ႇပႅတ်ႈလႆႈၼၼ်ႉၶႃႈဢေႃႈ၊’ ဝႃႈၼင်ႇၼႆတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈသမ်ႉမီးဢမိင်ႉတီႈ ပႃႇလၢမ်ႇ၊ လႄႈဝႃႈ၊ “မႂ်းဢမ်ႇလႆႈၸွမ်းၶဝ်ၵႂႃႇၵူၺ်း။ မႂ်းဢမ်ႇလႆႈၵိၼ်ႇလႃႇၵိၼ်ႇဝႃႈၵူၼ်းမဵဝ်းၼၼ်ႉ။ ၶဝ်ပဵၼ်ၵူၼ်းမဵဝ်းဢၼ်လႆႈၶၢမ်ႇတၢင်းလီမၢင်ႇၵလႃႇၵဝ်ဢေႃႈ၊” ဝႃႈၼင်ႇၼႆဢေႃႈ။
ၼႂ်းဝၼ်းမိူဝ်ႈၽုၵ်ႈၶိင်ႇၵၢင်ၼႂ် ပႃႇလၢမ်ႇ၊ လုၵ်ႉလႄႈမွၵ်ႇလၢတ်ႈတီႈမူးမၢတ်ႈၽွင်းမိူင်းၶုၼ် ပႃႇလၵ်ႉ၊ ၸိူဝ်းၼၼ်ႉလႄႈဝႃႈ၊ “သူၶိုၼ်းမိူဝ်းၵႂႃႇၵႃႈတီႈမိူင်းသူတႃႉ။ ထႃႇဝရႃႉၽြႃး၊ ဢမ်ႇပၼ်ဢၶႂၢင်ႉႁႂ်ႈၵဝ်လႆႈၸွမ်းသူၵႂႃႇ၊” ဝႃႈၼင်ႇၼႆဢေႃႈ။-
မူးမၢတ်ႈၽွင်းမိူင်းၸိူဝ်းၼၼ်ႉၶိုၼ်းမိူဝ်းၵႂႃႇၸူးၵႃႈတီႈၶုၼ် ပႃႇလၵ်ႉ၊ လႄႈလဝ်ႈလၢတ်ႈလွင်ႈဢၼ် ပႃႇလၢမ်ႇ၊ ထဵင်ပႅတ်ႈလႄႈဢမ်ႇၸွမ်းၶဝ်မႃးၼၼ်ႉဢေႃႈ။
ၶုၼ် ပႃႇလၵ်ႉ၊ သမ်ႉပွႆႇၸႂ်ႉၽူႈတၢင်တူဝ်ဢၼ်ယဵင်ႈၶႅၼ်းၼမ်ၼႃႇ၊ဢၼ်ဢရႃႇယဵင်ႈၶႅၼ်းယႂ်ႇၼႃႇသေၶဝ်ၸိူဝ်းဢွၼ်တၢင်းၼၼ်ႉၵႂႃႇထႅင်ႈဢေႃႈ။-
ၶဝ်ၼၼ်ႉႁွတ်ႈၵႂႃႇလႄႈဢဝ်ၵႂၢမ်းၶုၼ် ပႃႇလၵ်ႉ၊ ၼၼ်ႉလၢတ်ႈတီႈ ပႃႇလၢမ်ႇ၊ လႄႈဝႃႈ၊ “ၶႅၼ်းတေႃႈယႃႇပေႁႂ်ႈဢၼ်လႂ်လႆႈႁႄႉလႆႈၶႅၼ်တၢင်းဢၼ်ၸဝ်ႈႁဝ်းတၵ်းမႃးၵႃႈတီႈၵဝ်ၶႃႈၼႆႉသေၵမ်း။-
ၵဝ်ၶႃႈတၵ်းပၼ်သူးပၼ်လၢပ်ႈၼမ်ၼႃႇဢေႃႈ။ ၵဝ်ၶႃႈတၵ်းပၼ်ၵႃႈဢၼ်ၸဝ်ႈႁဝ်းယွၼ်းၼၼ်ႉဢေႃႈ။ ၶႅၼ်းတေႃႈမႃးလႄႈၵိၼ်ႇလႃႇၵိၼ်ႇဝႃႈၵူၼ်းမဵဝ်းၼႆႉပုၼ်ႈၵဝ်ၶႃႈသေၵမ်း၊” ဝႃႈၼင်ႇၼႆဢေႃႈ။
ပႃႇလၢမ်ႇ၊ ၶိုၼ်းလၢတ်ႈလႄႈဝႃႈ၊ “ပိၵ်ႉသမ်ႉၶုၼ် ပႃႇလၵ်ႉ၊ ဢဝ်ႁေႃဢၼ်တဵမ်ဝႆႉတင်းငိုၼ်းၶမ်းၼၼ်ႉပၼ်ၵဝ်သေၵေႃႈၵဝ်ဢမ်ႇပူၼ်ႉဢမ်ႇလိူဝ်ၵႂၢမ်း ထႃႇဝရႃႉၽြႃး၊ ၽြႃးပဵၼ်ၸဝ်ႈၵဝ်ၼၼ်ႉသေလႄႈတၵ်းႁဵတ်းလွင်ႈတၢင်းဢၼ်လဵၵ်ႉဢၼ်ယႂ်ႇသေၸိူဝ်ႉသေပိူင်လႆႈလႃးလႃး။-
ၼႂ်းဝႃႈၼၼ်သေၵေႃႈ၊လွင်ႈၼင်ႇႁိုဝ်ၵဝ်တၵ်းႁုလွင်ႈဢၼ် ထႃႇဝရႃႉၽြႃး၊ တၵ်းထၢပ်ႈထႅင်ႈလႄႈမီးဢမိင်ႉတီႈၵဝ်ၸိူဝ်ႉၼင်ႇႁိုဝ်ၼၼ်ႉၸိုင်၊ၶိုၼ်းၼႆႉသူၵေႃႈဢွၼ်ၵၼ်လိုဝ်ႈႁိူဝ်ႉၵႃႈတီႈၼႆႈလူးၵွၼ်ႇတႃႉ၊” ဝႃႈၼင်ႇၼႆဢေႃႈ။
ၶိင်ႇၵၢင်ၶိုၼ်းၽြႃးပဵၼ်ၸဝ်ႈမႃးတီႈ ပႃႇလၢမ်ႇ၊ လႄႈမီးဢမိင်ႉဝႃႈ၊ “ပေႃးၵူၼ်းၸိူဝ်းၼႆႉမႃးႁႂ်ႈလႆႈႁွင်ႉမႂ်းၸိုင်၊မႄးႁႅၼ်းလႄႈၵႂႃႇၸွမ်းတႃႉ။ ၵူၺ်းၵႃႈ၊မႂ်းတၵ်းလႆႈႁဵတ်းၵႃႈဢၼ်ၵဝ်သင်ႇလၢတ်ႈမႂ်းၼၼ်ႉၵူၺ်းဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၶိင်ႇၵၢင်ၼႂ် ပႃႇလၢမ်ႇ၊ လုၵ်ႉလႄႈႁႅၼ်းၵွပ်းမႃႉလီႈမၼ်းသေယဝ်ႉ၊ၵႂႃႇၸွမ်းလူၺ်ႈၵၼ်တင်းမူးမၢတ်ႈၽွင်းမိူင်း မေႃႇၽႃႉ၊ ၸိူဝ်းၼၼ်ႉဢေႃႈ။
ၽြႃးပဵၼ်ၸဝ်ႈၸႂ်မႆႈၶႂ်ႈၸႃႉတီႈတၢင်းဢၼ် ပႃႇလၢမ်ႇ၊ ၸွမ်းၵႂႃႇၸိူဝ်ႉၼင်ႇၼၼ်လႄႈမိူဝ်ႈဢၼ်မၼ်းယင်းၶီႇမႃႉလီႈမၼ်းၵႂႃႇလူၺ်ႈၵၼ်တင်းၶႃႈမၼ်းသွင်ၵေႃႉယူႇၼၼ်ႉတမၢၼ်ႇၵၢင်ႁၢဝ် ထႃႇဝရႃႉၽြႃး၊ ၸုၵ်းယူႇၵႃႈၼႂ်းသဵၼ်ႈတၢင်းလႄႈႁႂ်ႈလႆႈႁႄႉသဵၼ်ႈတၢင်းမၼ်းဢေႃႈ။-
မႃႉလီႈၼၼ်ႉႁၼ်တမၢၼ်ႇၵၢင်ႁၢဝ်ထွတ်ႇလၢပ်ႇၸုၵ်းႁႄႉတၢင်းယူႇၼၼ်ႉလႄႈ၊ငႅၵ်းဢွၵ်ႇသဵၼ်ႈတၢင်းၶဝ်ႈၵႂႃႇၵႃႈၼႂ်းတူင်ႈႁႆႈတူင်ႈၼႃးသေဢေႃႈ။ ပႃႇလၢမ်ႇ၊ ၵေႃႈပေႃႉယႅၼ်ႉမႃႉလီႈၼၼ်ႉႁႂ်ႈမၼ်းၶိုၼ်းမႃးၶဝ်ႈၸွမ်းသဵၼ်ႈတၢင်းဢေႃႈ။-
တမၢၼ်ႇၵၢင်ႁၢဝ်ၼၼ်ႉသမ်ႉမႃးၸုၵ်းၵႃႈတီႈသဵၼ်ႈတၢင်းဢၼ်ၵိဝ်ႇၵႅပ်ႉၵႃႈၼႂ်းဝူင်ႈၵၢင်ႁူဝ်ႉသူၼ်မၢၵ်ႇၸပိတ်ႉသွင်သူၼ်ၼၼ်ႉဢေႃႈ။-
မႃႉလီႈၼၼ်ႉသမ်ႉႁၼ်တမၢၼ်ႇၵၢင်ႁၢဝ်ၼၼ်ႉထႅင်ႈသေယဝ်ႉ၊ဢဝ်တူဝ်မၼ်းဢီးၸပ်းႁူဝ်ႉၽၢႆႇၼိုင်ႈလႄႈႁိပ်ႇတိၼ် ပႃႇလၢမ်ႇ၊ ၸပ်းႁူဝ်ႉၼၼ်ႉဢေႃႈ။ ပႃႇလၢမ်ႇ၊ ၵေႃႈသမ်ႉပေႃႉယႅၼ်ႉထႅင်ႈဢေႃႈ။-
တမၢၼ်ႇၵၢင်ႁၢဝ်ၼၼ်ႉသမ်ႉပူၼ်ႉၵႂႃႇပႃႈၼႃႈသေယဝ်ႉ၊ၸုၵ်းၵႃႈတီႈဢၼ်ၵိဝ်ႇၵႅပ်ႉၼႃႇထၢၼ်ႈပေႃးဢမ်ႇမီးတီႈငႅၵ်းတီႈဝႄႈသေၽၢႆႇသေပႃႈလႃးလႃးၼၼ်ႉဢေႃႈ။-
ပွၵ်ႈၼႆႉမိူဝ်ႈဢၼ်မႃႉလီႈၼၼ်ႉႁၼ်တမၢၼ်ႇၵၢင်ႁၢဝ်ၼၼ်ႉၸိုင်၊မၼ်းၼွၼ်းမူပ်ႇၵႂႃႇသေဢေႃႈ။ ပႃႇလၢမ်ႇ၊ ဢွၵ်ႇတေႃးသႃႉတၢင်းၸႂ်မႆႈၶႂ်ႈၸႃႉၼႃႇလူင်လၢင်လႄႈဢဝ်ၶွၼ်ႉမၼ်းပေႃႉယႅၼ်ႉမႃႉလီႈၼၼ်ႉဢေႃႈ။-
မိူဝ်ႈၼၼ်ႉ ထႃႇဝရႃႉၽြႃး၊ ပၼ်ႁႂ်ႈမႃႉလီႈၼၼ်ႉမေႃလၢတ်ႈၵႂၢမ်းမႃးလႄႈမႃႉလီႈၼၼ်ႉလၢတ်ႈတီႈ ပႃႇလၢမ်ႇ၊ လႄႈဝႃႈ၊ “ၵဝ်လႆႈႁဵတ်းၸိူဝ်ႉၼင်ႇႁိုဝ်တီႈမႂ်းႁႂ်ႈမႂ်းလႆႈပေႃႉယႅၼ်ႉၵဝ်တေႃႇထိုင်သၢမ်ပွၵ်ႈၼႆႉ၊” ဝႃႈၼင်ႇၼႆဢေႃႈ။
ပႃႇလၢမ်ႇ၊ ၶိုၼ်းလၢတ်ႈတီႈမႃႉလီႈၼၼ်ႉလႄႈဝႃႈ၊ “မႂ်းယွၵ်ႇယဝ်ႈၵဝ်လူင်ပႄႇ။ ၶႂ်ႈႁႂ်ႈလၢပ်ႇမီးၵႃႈၼႂ်းမိုဝ်းၵဝ်ၵူၺ်းယဝ်ႉ။ ပေႃးမီးၸိုင်၊တေႃႈလဵဝ်ၼႆႉၵဝ်တၵ်းဢဝ်မႂ်းတၢႆဢေႃႈ၊” ဝႃႈၼင်ႇၼႆဢေႃႈ။
မႃႉလီႈၼၼ်ႉၶိုၼ်းလၢတ်ႈလႄႈဝႃႈ၊ “ၵဝ်ၼႆႉပဵၼ်မႃႉလီႈမႂ်းဢၼ်မႂ်းၶီႇသေႇသေႇတေႃႇထိုင်ႁွတ်ႈဝၼ်းမိူဝ်ႈၼႆႉဢမ်ႇၸႂ်ႈႁိုဝ်း။ ၵဝ်ယၢမ်ႈႁဵတ်းၸိူဝ်ႉၼင်ႇၼႆတီႈမႂ်းသေပွၵ်ႈသေလႂ်ႁိုဝ်း၊” ဝႃႈၼင်ႇၼႆဢေႃႈ။ မၼ်းၵေႃႈၶိုၼ်းလၢတ်ႈလႄႈဝႃႈ၊ “ဢမ်ႇတွၼ်ႉႁဵတ်း” ဝႃႈၼင်ႇၼႆဢေႃႈ။
မိူဝ်ႈၼၼ်ႉ ထႃႇဝရႃႉၽြႃး၊ ပၼ်ဢၶႂၢင်ႉႁႂ်ႈ ပႃႇလၢမ်ႇ၊ လႆႈႁၼ်တမၢၼ်ႇၵၢင်ႁၢဝ်ဢၼ်ထွတ်ႇလၢပ်ႇၸုၵ်းယူႇၼၼ်ႉလႄႈ၊မၼ်းၶုပ်ႉမူပ်ႇၸပ်းလိၼ်ယူႇဢေႃႈ။-
တမၢၼ်ႇၵၢင်ႁၢဝ်ၼၼ်ႉၵေႃႈလၢတ်ႈလႄႈဝႃႈ၊ “ၵွပ်ႈသင်လႄႈမႂ်းပေႃႉယႅၼ်ႉမႃႉလီႈမႂ်းတေႃႇထိုင်ႁွတ်ႈသၢမ်ပွၵ်ႈၼၼ်ႉၸိူဝ်ႉၼင်ႇႁိုဝ်။ ၵဝ်မႃးတပ်ႉတၢင်းမႂ်းၵွပ်ႈပိူဝ်ႈဢၼ်မႂ်းဢမ်ႇထုၵ်ႇလီၵႂႃႇၸွမ်းတၢင်းဢၼ်မႂ်းဢွၵ်ႇတၢင်းပွၵ်ႈၼႆႉၼၼ်ႉဢေႃႈ။-
မႃႉလီႈၼၼ်ႉႁၼ်ၵဝ်လႄႈဝႄႈဢွၵ်ႇသေၵႃႈတီႈၵဝ်ၵႂႃႇတင်းသၢမ်ပွၵ်ႈယဝ်ႉ။ ပေႃးဢမ်ႇဝႄႈၵႂႃႇၸိုင်၊ၵဝ်လႆႈဢဝ်မႂ်းတၢႆယဝ်ႉလႄႈပၼ်ဢသၢၵ်ႈမႃႉလီႈၵူၺ်းတၵ်းလႆႈၶျၢမ်းသႃႇယဝ်ႉ၊” ဝႃႈၼင်ႇၼႆဢေႃႈ။
ပႃႇလၢမ်ႇ၊ ၵေႃႈလၢတ်ႈလႄႈဝႃႈ၊ “ၵဝ်ၶႃႈၽိတ်းပိူင်ႈၶႃႈယဝ်ႉ။ ၵဝ်ၶႃႈဢမ်ႇႁုလွင်ႈဢၼ်ၸဝ်ႈႁဝ်းၸုၵ်းၶႂၢင်တၢင်းၵဝ်ၶႃႈၼၼ်ႉၶႃႈ။ တေႃႈလဵဝ်ၼႆႉပေႃးဝႃႈတၢင်းဢၼ်ၵဝ်ၶႃႈသိုပ်ႇၵႂႃႇဢမ်ႇထုၵ်ႇဢမ်ႇလီၸိုင်၊ၵဝ်ၶႃႈတၵ်းၶိုၼ်းမိူဝ်းၵႂႃႇၶႃႈဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊တမၢၼ်ႇၵၢင်ႁၢဝ်ၶိုၼ်းလၢတ်ႈလႄႈဝႃႈ၊ “ၵႂႃႇၸွမ်းၵူၼ်းၸိူဝ်းၼႆႉတႃႉ။ ၵူၺ်းၵႃႈ၊မႂ်းတၵ်းလႆႈႁေႃးလၢတ်ႈၵႂၢမ်းဢၼ်ၵဝ်ၸႂ်ႉမႂ်းလၢတ်ႈၼၼ်ႉၵူၺ်းဢေႃႈ၊” ဝႃႈၼင်ႇၼႆသေယဝ်ႉ၊ ပႃႇလၢမ်ႇ၊ ၵႂႃႇၸွမ်းၶဝ်ဢေႃႈ။
မိူဝ်ႈဢၼ်ၶုၼ် ပႃႇလၵ်ႉ၊ ငိၼ်းလွင်ႈဢၼ် ပႃႇလၢမ်ႇ၊ မႃးယူႇၼၼ်ႉၸိုင်၊ဢွၵ်ႇၵႂႃႇႁႂ်ႈလႆႈႁပ်ႉႁူဝ်တၢင်းမၼ်းၵႃႈတီႈဝဵင်း ဢႃႇရႃႉ၊ ဝဵင်းဢၼ်မီးၵႃႈႁိမ်းၼမ်ႉ ဢႃႇၼုၼ်ႇ၊ ၵႃႈတီႈၶွပ်ႇလႅၼ်လိၼ်မိူင်း မေႃႇၽႃႉ၊ ၼၼ်ႉဢေႃႈ။-
ၶုၼ် ပႃႇလၵ်ႉ၊ ၵေႃႈလၢတ်ႈတီႈ ပႃႇလၢမ်ႇ၊ လႄႈဝႃႈ၊ “ၵဝ်ၶႃႈပွႆႇၸႂ်ႉၵႂႃႇၶိူဝ်းၶိူဝ်းယႂ်းယႂ်းႁႂ်ႈလႆႈႁွင်ႉပၢင်းဢဝ်ၸဝ်ႈမႃးဢမ်ႇၸႂ်ႈႁိုဝ်း။ ႁဵတ်းသင်လႄႈၸဝ်ႈဢမ်ႇမႃး။ ၸဝ်ႈထၢင်ႇဝႃႈၵဝ်ၶႃႈဢမ်ႇတၢတ်ႈၼိူင်ႇပၼ်လၢၵ်ႈသွင်ႇတီႈၸဝ်ႈလႆႈႁိုဝ်း၊” ဝႃႈၼင်ႇၼႆဢေႃႈ။
ပႃႇလၢမ်ႇ၊ ၶိုၼ်းလၢတ်ႈလႄႈဝႃႈ၊ “ၵဝ်မႃးယဝ်ႉဢမ်ႇၸႂ်ႈႁိုဝ်း။ ၵူၺ်းၵႃႈ၊ၸွင်ႇၵဝ်တေလၢတ်ႈၵႂၢမ်းသေၶေႃႈသေၵမ်းလႆႈႁိုဝ်း။ ၵဝ်တၵ်းလႆႈလၢတ်ႈၵႂၢမ်းဢၼ်ၽြႃးပဵၼ်ၸဝ်ႈၸႂ်ႉၵဝ်လၢတ်ႈၼၼ်ႉၵူၺ်းဢေႃႈ၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈ ပႃႇလၢမ်ႇ၊ ၸွမ်း ပႃႇလၵ်ႉ၊ ၵႂႃႇၵႃႈတီႈဝဵင်း ၵိရႁတ်ႉႁုၸုတ်ႉ၊ ၼၼ်ႉသေဢေႃႈ။-
ၵႃႈတီႈၼၼ်ႈၶုၼ် ပႃႇလၵ်ႉ၊ ႁႅမ်ဝူဝ်းႁႅမ်သူဝ်းလႄႈႁဵတ်းတၢင်းလူႇသေယဝ်ႉ၊ဢဝ်ၼိူဝ်ႉၵမ်ႈၽွင်ႈပၼ်ၵႂႃႇၵႃႈတီႈ ပႃႇလၢမ်ႇ၊ ဢိၵ်ႇတင်းမူးမၢတ်ႈၽွင်းမိူင်းမၼ်းဢၼ်မီးယူႇလူၺ်ႈၵၼ်တင်းမၼ်းၼၼ်ႉဢေႃႈ။
ဝၼ်းမိူဝ်ႈၽုၵ်ႈၶိင်ႇၵၢင်ၼႂ်ၶုၼ် ပႃႇလၵ်ႉ၊ ႁွင်ႉဢဝ် ပႃႇလၢမ်ႇ၊ ၵႂႃႇႁွတ်ႈထိုင်ၵႃႈတီႈသၼ်လွႆ ပႃႇမုတ်ႉပႃႇလႃႉ၊ တီႈဢၼ် ပႃႇလၢမ်ႇ၊ မုင်ႈႁၼ်ၵူၼ်းမဵဝ်း ဢိသရေး၊ ၵမ်ႈၽွင်ႈလႆႈၼၼ်ႉဢေႃႈ။
ပႃႇလၢမ်ႇ၊ လၢတ်ႈတီႈၶုၼ် ပႃႇလၵ်ႉ၊ လႄႈဝႃႈ၊ “တႄႇႁဵတ်းၶဵင်ႇတၢင်းလူႇၸဵတ်းဢၼ်ၵႃႈတီႈၼႆႈပုၼ်ႈၵဝ်တႃႉ။ ၶိုင်ပွင်ပၼ်ဝူဝ်းပေႃႈၸဵတ်းတူဝ်တင်းသူဝ်းပေႃႈၸဵတ်းတူဝ်ပုၼ်ႈၵဝ်တႃႉ၊” ဝႃႈၼင်ႇၼႆဢေႃႈ။
ၶုၼ် ပႃႇလၵ်ႉ၊ ႁဵတ်းၸွမ်းၵႃႈၼင်ႇဢၼ် ပႃႇလၢမ်ႇ၊ ဝႃႈၼၼ်ႉသေယဝ်ႉ၊ၶဝ်ဢဝ်ဝူဝ်းဢိၵ်ႇတင်းသူဝ်းယေႈမဵဝ်းယေႈတူဝ်ႈႁဵတ်းတၢင်းလူႇၵႃႈၼိူဝ်ၶဵင်ႇတၢင်းလူႇၵူႈဢၼ်ဢေႃႈ။-
ၵမ်းၼၼ်ႉ ပႃႇလၢမ်ႇ၊ လၢတ်ႈတီႈၶုၼ် ပႃႇလၵ်ႉ၊ လႄႈဝႃႈ၊ “ၸုၵ်းယူႇၵႃႈတီႈႁိမ်းၶိူင်ႈတၢင်းလူႇဢၼ်တုတ်ႇၽႆးၼႆႉတႃႉ။ ၵဝ်တၵ်းၵႂႃႇႁႂ်ႈလႆႈႁုႁၼ်လွင်ႈဢၼ် ထႃႇဝရႃႉၽြႃး၊ တၵ်းမႃးထူပ်းၵဝ်ႁိုဝ်၊ဢမ်ႇထူပ်းႁိုဝ်ၼၼ်ႉဢေႃႈ။ ၵဝ်တၵ်းၶိုၼ်းမွၵ်ႇလၢတ်ႈၵႃႈဢၼ်မၼ်းၸဝ်ႈၽုၺ်ႇဢွၵ်ႇၼႄပျႃးၵဝ်ၼၼ်ႉတီႈၶုၼ်လူင်ယူႇဢေႃႈ၊” ဝႃႈၼင်ႇၼႆသေယဝ်ႉ၊ၶိုၼ်ႈၵႂႃႇယူႇၵႃႈၼိူဝ်လွႆဢုၼ်ႈလုၵ်ႈၼိုင်ႈဢေႃႈ။-
ၽြႃးပဵၼ်ၸဝ်ႈမႃးထူပ်းမၼ်းလႄႈ၊မၼ်းၵေႃႈလဝ်ႈလၢတ်ႈတီႈၽြႃးပဵၼ်ၸဝ်ႈလႄႈဝႃႈ၊ “ၶႃႈၸဝ်ႈမႄႈႁႅၼ်းၶဵင်ႇတၢင်းလူႇၸဵတ်းဢၼ်သေယဝ်ႉ၊ဢဝ်ဝူဝ်းတင်းသူဝ်းယေႈမဵဝ်းယေႈတူဝ်ႁဵတ်းတၢင်းလူႇၵႃႈၼိူဝ်ၶဵင်ႇတၢင်းလူႇၵူႈဢၼ်တီႈၶႃႈယဝ်ႉ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ဢဝ်ၵႂၢမ်းသႂ်ႇသူပ်း ပႃႇလၢမ်ႇ၊ သေလႄႈမီးဢမိင်ႉဝႃႈ၊ “မႂ်းၶိုၼ်းလူင်းၸူးတီႈၶုၼ် ပႃႇလၵ်ႉ၊ လႄႈလၢတ်ႈၸိူဝ်ႉၼင်ႇၼႆတႃႉ၊” ဝႃႈၼင်ႇၼႆဢေႃႈ။-
မၼ်းၵေႃႈၶိုၼ်းလူင်းၸူးၵႃႈတီႈၶုၼ် ပႃႇလၵ်ႉ၊ လႄႈထူပ်းႁၼ်မၼ်းယင်းတိုၵ်ႉၸုၵ်းယူႇၵႃႈႁိမ်းၶိူင်ႈတၢင်းလူႇဢၼ်တုတ်ႇၽႆးၼၼ်ႉႁူမ်ႈလူၺ်ႈၵၼ်တင်းမူးမၢတ်ႈၽွင်းမိူင်း မေႃႇၽႃႉ၊ ၸိူဝ်းၼၼ်ႉဢေႃႈ။
ပႃႇလၢမ်ႇ၊ ဢဝ်တင်းၵႂၢမ်းပရေႃးၽႅတ်ႈ သေလႄႈလၢတ်ႈဝႃႈၸမ်ႉ၊ “ၶုၼ် ပႃႇလၵ်ႉ၊ ႁွင်ႉဢဝ်ၵဝ်သေၵႃႈတီႈ မိူင်း သီးရီးယႃး၊ ၶုၼ်ႁေႃၶမ်းမိူင်း မေႃႇၽႃႉ၊ ႁွင်ႉဢဝ်ၵဝ်သေ ၵႃႈတီႈလွႆတင်းလၢႆဢၼ်မီးၽၢႆႇ ဝၼ်းဢွၵ်ႇၼၼ်ႉဝႃႈ၊ ‘မႃးလႄႈၵိၼ်ႇလႃႇၵိၼ်ႇဝႃႈတီႈမဵဝ်း ယႃႇၵုပ်ႈ၊ ပုၼ်ႈၵဝ်သေၵမ်း။ မႃးလႄႈလၢတ်ႈၵႂၢမ်းသႄႉသွမ်းမဵဝ်း ဢိသရေး၊ သေၵမ်း၊’ ဝႃႈၼင်ႇၼႆဢေႃႈ။
ၵဝ်တၵ်းၵိၼ်ႇလႃႇၵိၼ်ႇဝႃႈၵေႃႉဢၼ်ၽြႃးပဵၼ်ၸဝ်ႈဢမ်ႇၵိၼ်ႇလႃႇၵိၼ်ႇဝႃႈၼၼ်ႉ လႆႈၸိူဝ်ႉၼင်ႇႁိုဝ်။ ၵဝ်တၵ်းသႄႉသွမ်းၵေႃႉဢၼ် ထႃႇဝရႃႉၽြႃး၊ ဢမ်ႇသႄႉသွမ်းမၼ်းၼၼ်ႉလႆႈၸိူဝ်ႉၼင်ႇႁိုဝ်။
ၵဝ်ယူႇၵႃႈတီႈၼိူဝ်ၸိၵ်းလွႆမၢၵ်ႇႁိၼ်မၢၵ်ႇၽႃလႄႈႁၼ်ၶဝ်ဢေႃႈ။ ၵဝ်ယူႇၵႃႈတီႈၼိူဝ်ၵွင်းလွႆလႄႈလူတူၺ်း ၶဝ်ဢေႃႈ။ ၶဝ်ပဵၼ်ၵူၼ်းဢၼ်ယူႇၶေႃၶေႃမဵဝ်းလဵဝ်ၵူၺ်း ၶဝ်ဢေႃႈ။ ၶဝ်ဢမ်ႇလႆႈလေႃးလႄးၵၼ်တင်းၵူၼ်း တၢင်ႇၸိူဝ်ႉတၢင်ႇၶိူဝ်း။
ၸိူဝ်ႉၶိူဝ်းၵူၼ်းမဵဝ်း ဢိသရေး၊ ၼၼ်ႉၼမ်ထၼ်ႇမုၼ်ႈလိၼ်လႄႈ၊ ၵူၼ်းၶဝ်သီႇပုၼ်ႈပုၼ်ႈၼိုင်ႈၵူၺ်းၵေႃႈယင်းဢမ်ႇပႄႉၼပ်ႉဢၢၼ်ႇလႆႈဢေႃႈ။ ႁႂ်ႈၵဝ်လႆႈတၢႆမိူၼ်ၸိူဝ်ႉၼင်ႇၼႂ်းၵူၼ်းၽြႃးပဵၼ်ၸဝ်ႈၵေႃႉၼိုင်ႈၼၼ်ႉသေၵမ်းၶႃႈ။ ႁႂ်ႈၵဝ်လႆႈတၢႆၵႂႃႇၼိမ်ၼိမ်လီလီမိူၼ်ၸိူဝ်ႉၼင်ႇၵေႃႉဢၼ်သိုဝ်ႈတေႃႇၼၼ်ႉသေၵမ်းၶႃႈ၊” ဝႃႈၼင်ႇၼႆဢေႃႈ။
ၶုၼ် ပႃႇလၵ်ႉ၊ ၵေႃႈလၢတ်ႈတီႈ ပႃႇလၢမ်ႇ၊ လႄႈဝႃႈ၊ “ၸဝ်ႈႁဵတ်းၸိူဝ်ႉၼင်ႇႁိုဝ်တီႈၵဝ်ၶႃႈ။ ၵဝ်ၶႃႈႁွင်ႉၸဝ်ႈမႃးႁႂ်ႈၸဝ်ႈၵိၼ်ႇလႃႇၵိၼ်ႇဝႃႈရၢၼ်ႇသူႇၵဝ်ၶႃႈၼၼ်ႉယဝ်ႉ။ ၵူၺ်းၵႃႈ၊ၵႃႈဢၼ်ၸဝ်ႈႁဵတ်းတင်းသဵင်ႈတင်းလူင်ၼႆႉၸဝ်ႈပၼ်တၢင်းလီတီႈၶဝ်လုမ်းလုမ်းလူင်ပႄႇ၊” ဝႃႈၼင်ႇၼႆဢေႃႈ။
မၼ်းၶိုၼ်းလၢတ်ႈလႄႈဝႃႈ၊ “ၵဝ်လႆႈလၢတ်ႈၵႂၢမ်းဢၼ် ထႃႇဝရႃႉၽြႃး၊ ၸႂ်ႉၵဝ်လၢတ်ႈၼၼ်ႉၵူၺ်းဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၶုၼ် ပႃႇလၵ်ႉ၊ လၢတ်ႈတီႈ ပႃႇလၢမ်ႇ၊ လႄႈဝႃႈ၊ “ၸွမ်းလူၺ်ႈၵၼ်တင်းၵဝ်ၶႃႈၵႂႃႇတၢင်ႇတီႈ၊တီႈဢၼ်ၸဝ်ႈႁဝ်းႁၼ်ၵူၼ်းမဵဝ်း ဢိသရေး၊ ၵမ်ႈၽွင်ႈလႆႈၼၼ်ႉသေၵမ်း။ ၵိၼ်ႇလႃႇၵိၼ်ႇဝႃႈၶဝ်ၵႃႈတီႈၼၼ်ႈပုၼ်ႈၵဝ်ၶႃႈတႃႉ၊” ဝႃႈၼင်ႇၼႆသေလႄႈ၊-
ဢွၼ်ဢဝ်မၼ်းၵႂႃႇၵႃႈတီႈပၢင်ႇပဵင်း ၸေႃးၽိမ်ႇ၊ ၵႃႈၼိူဝ်ပၢႆလွႆ ပိသၵႃႇ၊ ဢေႃႈ။ ၵႃႈတီႈၼၼ်ႈၵေႃႈမၼ်းတႄႇႁဵတ်းၶဵင်ႇတၢင်းလူႇၸဵတ်းဢၼ်သေယဝ်ႉ၊ဢဝ်ဝူဝ်းတင်းသူဝ်းယေႈမဵဝ်းယေႈတူဝ်ႁဵတ်းတၢင်းလူႇၵႃႈၼိူဝ်ၶဵင်ႇတၢင်းလူႇၵူႈဢၼ်ဢေႃႈ။
ပႃႇလၢမ်ႇ၊ လၢတ်ႈတီႈၶုၼ် ပႃႇလၵ်ႉ၊ လႄႈဝႃႈ၊ “ၸုၵ်းယူႇၵႃႈႁိမ်းၶိူင်ႈတၢင်းလူႇဢၼ်တုတ်ႇၽႆးၼႆႉတႃႉ။ ၵဝ်တၵ်းၵႂႃႇႁႂ်ႈလႆႈထူပ်းၵၼ်တင်း ထႃႇဝရႃႉၽြႃး၊ ၵႃႈတီႈပုၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မႃးထူပ်း ပႃႇလၢမ်ႇ၊ လႄႈဢဝ်ၵႂၢမ်းသႂ်ႇသူပ်းမၼ်းသေယဝ်ႉမီးဢမိင်ႉလႄႈဝႃႈ၊ “မႂ်းၶိုၼ်းလူင်းၸူးတီႈၶုၼ် ပႃႇလၵ်ႉ၊ လႄႈလၢတ်ႈၸိူဝ်ႉၼင်ႇၼႆတႃႉ၊” ဝႃႈၼင်ႇၼႆဢေႃႈ။-
မၼ်းၵေႃႈၶိုၼ်းလူင်းၸူးတီႈၶုၼ် ပႃႇလၵ်ႉ၊ လႄႈထူပ်းႁၼ်မၼ်းယင်းတိုၵ်ႉၸုၵ်းယူႇၵႃႈႁိမ်းတၢင်းလူႇဢၼ်တုတ်ႇၽႆးၼၼ်ႉႁူမ်ႈလူၺ်ႈၵၼ်တင်းမူးမၢတ်ႈၽွင်းမိူင်း မေႃႇၽႃႉ၊ ၸိူဝ်းၼၼ်ႉဢေႃႈ။ ၶုၼ် ပႃႇလၵ်ႉ၊ ၵေႃႈထၢမ်လႄႈဝႃႈ၊ “ ထႃႇဝရႃႉၽြႃး၊ မီးဢမိင်ႉၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။-
ပႃႇလၢမ်ႇ၊ ၵေႃႈဢဝ်တင်းၵႂၢမ်းပရေႃးၽႅတ်ႈသေလႄႈႁေႃးလၢတ်ႈဝႃႈၸမ်ႉ၊ “ ပႃႇလၵ်ႉ၊ လုၵ်ႈၸၢႆး ၸိၽေႃႇ၊ ႟။ မႃးတႃႉ။ မႃးထွမ်ႇဢဝ်ၵႂၢမ်းၵဝ်တႃႉ။
ၽြႃးပဵၼ်ၸဝ်ႈဢမ်ႇမိူၼ်ၵူၼ်းဢၼ် လၢတ်ႈၵႂၢမ်းမုသႃႇၼၼ်ႉ။ မၼ်းၸဝ်ႈဢမ်ႇၸႂ်ႈမဵဝ်းၵူၼ်းဢၼ် ပိၼ်ႇၸႂ်ၶၢႆႉၸႂ်ၼၼ်ႉ။ ၵႃႈၼင်ႇဢၼ်မၼ်းၸဝ်ႈဝႆႉၵတိၼၼ်ႉ ႁဵတ်းၸွမ်းဢေႃႈ။ ဢၼ်မၼ်းၸဝ်ႈမီးဢမိင်ႉၼၼ်ႉႁဵတ်း ႁႂ်ႈယဝ်ႉႁႂ်ႈတူဝ်ႈဢေႃႈ။
ၵဝ်လႆႈၶၢမ်ႇဢဝ်ဢမိင်ႉၸဝ်ႈႁႂ်ႈလႆႈ ပၼ်တၢင်းလီဢေႃႈ။ မၼ်းၸဝ်ႈပၼ်တၢင်းလီယဝ်ႉ။ ၵဝ်ဢမ်ႇယုၵ်ႉသိမ်းဢဝ်ၶိုၼ်းတၢင်းလီၼၼ်ႉလႆႈ။
ၵဝ်ႁၼ်ထႃႈဝႆႉလွင်ႈၵူၼ်းမဵဝ်း ဢိသရေး၊ ၶဝ် မိူဝ်းၼႃႈတၵ်းလႆႈထူပ်းၺႃးၽေး၊ တၢင်းၸႂ်လုႁႅင်းဢူၼ်ႈဢိၵ်ႇတင်းၽေးဢၼ် ၶတ်းၶႅင်ႁႅင်းတႃႉဢမ်ႇၸႂ်ႈ။ ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်ၼၼ်ႉ မီးယူႇလူၺ်ႈၵၼ်တင်းၶဝ်ဢေႃႈ။ ၶဝ်ပၢဝ်ႇသေႃႇဝႃႈမၼ်းၸဝ်ႈပဵၼ်ၶုၼ်ႁေႃၶမ်း ၶဝ်ဢေႃႈ။
ၽြႃးပဵၼ်ၸဝ်ႈဢွၼ်ဢဝ်ၶဝ်ဢွၵ်ႇမိူင်း ဢေးၵျိပ်ႉ၊ မႃးယဝ်ႉ။ မၼ်းၸဝ်ႈၸွႆႈတိုၵ်းပုၼ်ႈၶဝ်မိူၼ်ၸိူဝ်ႉၼင်ႇဝူဝ်းထိူၼ်ႇဢၼ်ႁႅင်းယႂ်ႇၼႃႇၼၼ်ႉဢေႃႈ။
ဢမ်ႇမီးဢတၢတ်ႈပိင်ႇၺႃႇၵႃႇထႃႇဢိၵ်ႇတင်း ဢမ်ႇမီးဢတၢတ်ႈပိင်ႇၺႃႇၽီမေႃႇသေလႄႈပႄႉၼႅင်ႇမဵဝ်း ဢိသရေး၊ လႆႈ။ ၵူၼ်းလေႃးၵီႇတင်းလၢႆတၵ်းဢွၼ်ၵၼ်လၢတ်ႈလူၺ်ႈလွင်ႈမဵဝ်း ဢိသရေး၊ လႄႈဝႃႈ၊ ‘တူၺ်းလူး။ ၽြႃးပဵၼ်ၸဝ်ႈႁဵတ်းၸိူဝ်ႉၼင်ႇႁိုဝ်ယဝ်ႉ၊’ ဝႃႈၼင်ႇၼႆဢေႃႈ။-
မဵဝ်း ဢိသရေး၊ ၼႆႉမိူၼ်သၢင်ႇသီႈဢၼ်ႁႅင်းယႂ်ႇၼႃႇၼၼ်ႉဢေႃႈ။ မၼ်းယုၵ်ႉတူဝ်ၼႄၽုင်းမၼ်းတေႃႇထိုင်ႁွတ်ႈမၼ်းၸၵ်ႉသိၵ်ႇလႄႈၵိၼ်ၼိူဝ်ႉတူဝ်ဢၼ် တိလႆႈလႄႈ၊ ၸူဝ်ႈဢၼ်မၼ်းဢမ်ႇပႆႇၸုပ်ႇၵိၼ်လိူတ်ႈတူဝ်ဢၼ်မၼ်းဢဝ်တၢႆၼၼ်ႉယဝ်ႉတူဝ်ႈၸိုင်၊ မၼ်းဢမ်ႇၶိုၼ်းမူပ်ႇၶိုၼ်းၼွၼ်းလႃးလႃး၊” ဝႃႈၼင်ႇၼႆဢေႃႈ။
ၶုၼ် ပႃႇလၵ်ႉ၊ လၢတ်ႈတီႈ ပႃႇလၢမ်ႇ၊ လႄႈဝႃႈ၊ “ၸဝ်ႈဢမ်ႇၵိၼ်ႇလႃႇၵိၼ်ႇဝႃႈတီႈၵူၼ်းမဵဝ်း ဢိသရေး၊ သေၵေႃႈ၊ယႃႇပေပၼ်တၢင်းလီတီႈၶဝ်လႃးလႃးသေၵမ်း၊” ဝႃႈၼင်ႇၼႆဢေႃႈ။
ပႃႇလၢမ်ႇ၊ ၵေႃႈလၢတ်ႈလႄႈဝႃႈ၊ “ၵဝ်တၵ်းလႆႈႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ ၸႂ်ႉၵဝ်ႁဵတ်းၼၼ်ႉၵူၺ်းဢေႃႈ။ ဝႃႈၼႆၵဝ်လႆႈလၢတ်ႈတီႈၶုၼ်လူင်မႃးယဝ်ႉဢမ်ႇၸႂ်ႈႁိုဝ်း၊” ဝႃႈၼင်ႇၼႆဢေႃႈ။
ၶုၼ် ပႃႇလၵ်ႉ၊ သမ်ႉလၢတ်ႈတီႈ ပႃႇလၢမ်ႇ၊ လႄႈဝႃႈ၊ “မႃးၸွမ်းၵဝ်ၶႃႈသေၵမ်း။ ၵဝ်ၶႃႈတၵ်းဢွၼ်ၸဝ်ႈၵႂႃႇတၢင်ႇတီႈတၢင်ႇလႅၼ်ဢေႃႈ။ ယူဝ်ၽြႃးပဵၼ်ၸဝ်ႈတၵ်းမီးဢလူဝ်ႇႁႂ်ႈလႆႈၵိၼ်ႇလႃႇၵိၼ်ႇဝႃႈၶဝ်ပုၼ်ႈၵဝ်ၶႃႈၵႃႈတီႈၼၼ်ႈဢေႃႈ၊” ဝႃႈၼင်ႇၼႆလႄႈ၊-
ဢွၼ်ဢဝ်မၼ်းၵႂႃႇၵႃႈတီႈပၢႆၸိၵ်းလွႆ ပေႇဢုရႃႉ၊ တီႈဢၼ်မုင်ႈႁၼ်ထိူၼ်ႇလႅင်ႉ ယေႇသိမုၼ်ႇ၊ ၼၼ်ႉဢေႃႈ။-
ပႃႇလၢမ်ႇ၊ လၢတ်ႈတီႈၶုၼ် ပႃႇလၵ်ႉ၊ လႄႈဝႃႈ၊ “တႄႇႁဵတ်းၶဵင်ႇတၢင်းလူႇၸဵတ်းဢၼ်ၵႃႈတီႈၼႆႈပုၼ်ႈၵဝ်တႃႉ။ မႄးႁႅၼ်းပၼ်ဝူဝ်းပေႃႈၸဵတ်းတူဝ်တင်းသူဝ်းပေႃႈၸဵတ်းတူဝ်တႃႉ၊” ဝႃႈၼင်ႇၼႆသေလႄႈ၊-
ၶုၼ် ပႃႇလၵ်ႉ၊ ႁဵတ်းၸွမ်းၵႃႈၼင်ႇဢၼ် ပႃႇလၢမ်ႇ၊ ဝႃႈၼၼ်ႉသေယဝ်ႉ၊ဢဝ်ဝူဝ်းတင်းသူဝ်းယေႈမဵဝ်းယေႈတူဝ်ႁဵတ်းတၢင်းလူႇၵႃႈၼိူဝ်ၶဵင်ႇတၢင်းလူႇၵူႈဢၼ်ဢေႃႈ။
ၵမ်းၼႆႉၸိုင်၊ ပႃႇလၢမ်ႇ၊ ႁုႁၼ်လွင်ႈဢၼ် ထႃႇဝရႃႉၽြႃး၊ မီးဢလူဝ်ႇၶႂ်ႈပၼ်တၢင်းလီတီႈၵူၼ်းမဵဝ်း ဢိသရေး၊ တင်းလၢႆၼၼ်ႉယဝ်ႉလႄႈ၊မၼ်းဢမ်ႇၵႂႃႇႁႂ်ႈလႆႈဢဝ်ဢတၢတ်ႈပိင်ႇၺႃႇမိူၼ်ၸိူဝ်ႉၼင်ႇပွၵ်ႈဢွၼ်တၢင်းၼၼ်ႉယဝ်ႉ၊မၼ်းဝၢႆႇၼႃႈၵႂႃႇၸူးၵႃႈတီႈထိူၼ်ႇလႅင်ႉၼၼ်ႉသေလႄႈ၊-
မုင်ႈႁၼ်ၵူၼ်းမဵဝ်း ဢိသရေး၊ ၶဝ်ၶျႃးပၢင်တပ်ႉယူႇၸွမ်းၵူၼ်းၶိူဝ်းႁိူၼ်းၶဝ်ႁင်းၽႂ်ႁင်းမၼ်းၼၼ်ႉဢေႃႈ။ ဝိၺိၺ်ႇၽြႃးပဵၼ်ၸဝ်ႈလူင်းႁွတ်ႈထိုင်ၵႃႈၼိူဝ်မၼ်းလႄႈ၊-
မၼ်းဢဝ်တင်းၵႂၢမ်းပရေႃးၽႅတ်ႈ ႁေႃးလၢတ်ႈဝႃႈၸမ်ႉ၊ “ၵႂၢမ်း ပႃႇလၢမ်ႇ၊ လုၵ်ႈၸၢႆး ပေႃးရႃႉ၊ ၼၼ်ႉပဵၼ်ၵႂၢမ်းဢၼ်ၵူၼ်းဢမ်ႇၸၢင်ႈႁုပွင်ႇငၢႆႈငၢႆႈ။
ၶေႃႈၵႂၢမ်းၵေႃႉဢၼ်ငိၼ်းဢမိင်ႉၽြႃးပဵၼ်ၸဝ်ႈ၊ ၵေႃႉဢၼ်ၶုပ်ႉမူပ်ႇယူႇ၊မၢၵ်ႇတႃပိုတ်ႇၵီႈယူႇလႄႈၸၢင်ႈႁၼ်၊ ရူႇပႃႇရူင်ႇ ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ ၼၼ်ႉၸမ်ႉ။
သုမ်ႉထဵင်ၵူၼ်းမဵဝ်း ဢိသရေး၊ တင်းလၢႆႁၢင်ႈလီႁၢင်ႈငၢမ်းၼႃႇလူင်ပႄႇ။
မိူၼ်ၸိူဝ်ႉၼင်ႇတူၼ်ႈထၢၼ်ဢၼ်ပဵၼ်ထႅဝ်ယၢဝ်းၼႃႇတင်းလၢႆ၊ မိူၼ်ၸိူဝ်ႉၼင်ႇသူၼ်ဢူးယဵၼ်ႇဢၼ်မီးၵႃႈႁိမ်းၼမ်ႉႁွင်ႈၼမ်ႉၵႄး၊ မိူၼ်ၸိူဝ်ႉၼင်ႇတူၼ်ႈဢၵျေႃႇဢၼ် ထႃႇဝရႃႉၽြႃး၊ ၽုၵ်ႇဝႆႉသွမ်ႈဝႆႉ၊ မိူၼ်ၸိူဝ်ႉၼင်ႇတူၼ်ႈဢႃႇရိတ်ႉဢွၵ်ႇမႃးၵႃႈႁိမ်းၼမ်ႉႁိမ်းၼွင်တင်းလၢႆၼၼ်ႉလူင်ပႄႇ။
ၶဝ်တၵ်းလႆႈၼမ်ႉၽူၼ်ၼမ်ၵိုၼ်းၼႃႇလူင်လၢင်လႄႈ တၵ်းလႆႈဝၢၼ်ႇၸိူဝ်ႉဝၢၼ်ႇၽၼ်းၵႃႈၼႂ်းၼႃးဢၼ်ၼမ်ႉလိူင်ႇၼမ်ႉၵိုၼ်းၼၼ်ႉဢေႃႈ။ ၶုၼ်ႁေႃၶမ်းၶဝ်တၵ်းမုၼ်ယႂ်ႇမုၼ်သုင်ၼႃႇသေၶုၼ် ဢႃႇၵၵ်ႉ၊ လႄႈ သိုင်ႇၸိုင်ႈဝၢၼ်ႈမိူင်းၶဝ်တၵ်းလႆႈၶၢမ်ႇတၢင်းဢၼ်ယုၵ်ႉယွင်ႈဢေႃႈ။
ၽြႃးပဵၼ်ၸဝ်ႈဢွၼ်ဢဝ်ၶဝ်ဢွၵ်ႇသေမိူင်း ဢေးၵျိပ်ႉ၊ မႃးယဝ်ႉ၊ မၼ်းၸဝ်ႈၸွႆႈတိုၵ်းပုၼ်ႈၶဝ်မီးႁႅင်းယႂ်ႇၼႃႇ မိူၼ်ၸိူဝ်ႉၼင်ႇဝူဝ်းထိူၼ်ႇၼၼ်ႉဢေႃႈ။ ၶဝ်တၵ်းပႄႉၼႅင်ႇလႄႈႁဵတ်းၶုၼ်ၵႃႈၼိူဝ်ရၢၼ်ႇသူႇၶဝ်သေယဝ်ႉ၊ႁၵ်းလုပ်ႇၶဝ်ပႅတ်ႈဢေႃႈ။ ၶဝ်တၵ်းဢဝ်ပိုၼ်ၵၢင်ႇၶဝ်ယိုဝ်းထၢၼ်ႈပေႃးလူင်ႉပေႃးပွင်ႇဢေႃႈ။
ၶဝ်ပဵၼ်မဵဝ်းၵူၼ်းဢၼ်မိူၼ်သၢင်ႇသီႈ ဢၼ်ႁႅင်းယႂ်ႇၼႃႇၼၼ်ႉလႄႈ မိူဝ်ႈဢၼ်မၼ်းမူပ်ႇလိုၼ်ႈဢႅဝ်ၼွၼ်းလပ်းယူႇၼၼ်ႉၽူႈလႂ်ဢမ်ႇႁတ်းပူၵ်းမၼ်း။ ၵေႃႉဢၼ်ပၼ်တၢင်းလီၵူၼ်းမဵဝ်း ဢိသရေး၊ ၼၼ်ႉမီးမၢင်ႇၵလႃႇဢေႃႈ။ ၵေႃႉဢၼ်ၵိၼ်ႇလႃႇၵိၼ်ႇဝႃႈၵူၼ်းမဵဝ်း ဢိသရေး၊ ၼၼ်ႉလႆႈၶၢမ်ႇတၢင်းဢၼ်ၵိၼ်ႇလႃႇၵိၼ်ႇဝႃႈဢေႃႈ၊” ဝႃႈၼင်ႇၼႆဢေႃႈ။
ၶုၼ် ပႃႇလၵ်ႉ၊ ၸႂ်မႆႈၶႂ်ႈၸႃႉၼႃႇလႄႈဢဝ်တႃမိုဝ်းမၼ်းၼင်ႇၵၼ်ထုပ်ႉသႂ်ႇၵၼ်လႄႈလၢတ်ႈတီႈ ပႃႇလၢမ်ႇ၊ လႄႈဝႃႈ၊ “ၵဝ်ၶႃႈႁွင်ႉၸဝ်ႈမႃးႁႂ်ႈလႆႈၵိၼ်ႇလႃႇၵိၼ်ႇဝႃႈတီႈရၢၼ်ႇသူႇၵဝ်ၶႃႈတင်းလၢႆဢေႃႈ။ ၵူၺ်းၵႃႈ၊ၸဝ်ႈသမ်ႉပၼ်တၢင်းလီတီႈၶဝ်ၵူၺ်းၵူၺ်းထူၼ်ႈထိုင်သၢမ်ပွၵ်ႈယဝ်ႉလူင်ပႄႇ။-
ပိူဝ်ႈၼႆလႄႈၶိုၼ်းမိူဝ်းႁိူၼ်းၸဝ်ႈၵႂႃႇတေႃႈလဵဝ်ၼႆႉတႃႉ။ ၵဝ်ၶႃႈဝႆႉၵတိဢၼ်တၵ်းပၼ်သူးလၢပ်ႈတီႈၸဝ်ႈယဝ်ႉ။ ၵူၺ်းၵႃႈ၊ ထႃႇဝရႃႉၽြႃး၊ ယုၵ်ႉသိမ်းဢဝ်သူးလၢပ်ႈၼၼ်ႉသေၵႃႈတီႈၸဝ်ႈယဝ်ႉ၊” ဝႃႈၼင်ႇၼႆဢေႃႈ။
ပႃႇလၢမ်ႇ၊ ၶိုၼ်းလၢတ်ႈလႄႈဝႃႈ၊ “ၵဝ်လႆႈလၢတ်ႈတီႈၽူႈတၢင်တူဝ်ၸိူဝ်းဢၼ်ၶုၼ်လူင်ပွႆႇၸႂ်ႉၵႂႃႇၼၼ်ႉလႄႈဝႃႈ၊-
‘ပိၵ်ႉသမ်ႉၶုၼ် ပႃႇလၵ်ႉ၊ ဢဝ်ႁေႃၶမ်းမၼ်းဢၼ်တဵမ်ဝႆႉတင်းငိုၼ်းၶမ်းၼၼ်ႉပၼ်တီႈၵဝ်သေၵေႃႈ၊ၵဝ်ဢမ်ႇပူၼ်ႉဢမ်ႇလိူဝ်ၵႂၢမ်း ထႃႇဝရႃႉၽြႃး၊ ႁႂ်ႈလႆႈႁဵတ်းသေၸိူဝ်ႉသေပိူင်ဢၼ်ၸွမ်းဢလူဝ်ႇတူဝ်ၸဝ်ႈၵဝ်ႇၼၼ်ႉလႆႈ။ ၵဝ်တၵ်းလၢတ်ႈၵႂၢမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉၼၼ်ႉၵူၺ်းဢေႃႈ၊’ ဝႃႈၼႆမႃးယဝ်ႉဢမ်ႇၸႂ်ႈႁိုဝ်း၊” ဝႃႈၼင်ႇၼႆဢေႃႈ။
ပႃႇလၢမ်ႇ၊ သမ်ႉလၢတ်ႈတီႈၶုၼ် ပႃႇလၵ်ႉ၊ ထႅင်ႈလႄႈဝႃႈ၊ “မိူဝ်ႈလဵဝ်ၼႆႉၸမ်ႉ၊ၵဝ်တၵ်းၶိုၼ်းၵႂႃႇၸူးၵႃႈတီႈၵူၼ်းမဵဝ်းၸိူဝ်ႉၶိူဝ်းၵဝ်ဢေႃႈ။ တေႃႈလဵဝ်ၼႆႉၵဝ်တၵ်းလၢတ်ႈလွင်ႈၵူၼ်းမဵဝ်း ဢိသရေး၊ တင်းလၢႆတၵ်းႁဵတ်းၸိူဝ်ႉၼင်ႇႁိုဝ်ၵႃႈတီႈၵူၼ်းမဵဝ်းၸဝ်ႈႁဝ်းတင်းလၢႆၵႃႈၼႂ်းၶိင်ႇၵႃႇလႃႉၵမ်းလိုၼ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။-
ပႃႇလၢမ်ႇ၊ ဢဝ်တင်းၵႂၢမ်းပရေႃးၽႅတ်ႈ ႁေႃးလၢတ်ႈဝႃႈၸမ်ႉ၊ “ၵႂၢမ်း ပႃႇလၢမ်ႇ၊ လုၵ်ႈၸၢႆး ပေႃးရႃႉ၊ ၼၼ်ႉပဵၼ်ၵႂၢမ်းဢၼ်ၵူၼ်းဢမ်ႇၸၢင်ႈႁုပွင်ႇငၢႆႈငၢႆႈ။
ၶေႃႈၵႂၢမ်းၵေႃႉဢၼ်ငိၼ်းဢမိင်ႉၽြႃး ပဵၼ်ၸဝ်ႈလႄႈ လႆႈၺၢၼ်ႇဢၼ်ပဵၼ်မႃးၵႃႈတီႈၽြႃးဢၼ် သုင်ၼႃႇသေပိူၼ်ႈ၊ ၵေႃႉဢၼ်ၶုပ်ႉမူပ်ႇယူႇ၊မၢၵ်ႇတႃပိုတ်ႇၵီႈ ယူႇလႄႈၸၢင်ႈႁၼ်၊ ရူႇပႃႇရူင်ႇ ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ ၼၼ်ႉၸမ်ႉ။
ၵဝ်တူၺ်းႁၼ်ၶိင်ႇၵႃႇလႃႉၵမ်းလိုၼ်းလႄႈ ႁၼ်ၵူၼ်းမဵဝ်း ဢိသရေး၊ ဢေႃႈ။ ၶုၼ်ႁေႃၶမ်းပႃးၼိုင်ႈဢၼ်မိူၼ်ၸိူဝ်ႉၼင်ႇ လၢဝ်လႅင်း၊ တၵ်းပေႃႇပဵၼ်မႃးၵႃႈၼႂ်းၵူၼ်းမဵဝ်းၼႆႉဢေႃႈ။ တၵ်းမိူၼ်ၸိူဝ်ႉၼင်ႇလၢဝ်မီးႁၢင်ပေႃႇမႃးၵႃႈၼႂ်းၵူၼ်းမဵဝ်း ဢိသရေး၊ ဢေႃႈ။ မၼ်းတၵ်းပေႃႉယႅၼ်ႉၼႃႈၽၢၵ်ႇမူးမၢတ်ႈၽွင်းမိူင်း မေႃႇၽႃႉ၊ တင်းလၢႆလႄႈ တၵ်းယႃႉၽဵဝ်ႈပႅတ်ႈၶဝ်ၸိူဝ်းဢၼ်ႁူဝ်ၸႂ်ၽႅၼ်သုင်လႄႈႁၢႆႉမိူၵ်ႈတင်းလၢႆဢေႃႈ။
မၼ်းတၵ်းတိုၵ်းပႄႉရၢၼ်ႇသူႇမၼ်းတင်းလၢႆ ၵႃႈၼႂ်းမိူင်း ဢေႇတုမ်ႇ၊ လႄႈ မိူင်း ၸိရႃႉ၊ တၵ်းပဵၼ်မိူင်းဢၼ်မၼ်းပိူင်ႇဢေႃႈ။ ၵူၼ်းမဵဝ်း ဢိသရေး၊ ၼၼ်ႉတၵ်းႁတ်းႁၢၼ်ၼႃႇလူင်လၢင်ဢေႃႈ။
ၵူၼ်းမဵဝ်း ဢိသရေး၊ ၼၼ်ႉတၵ်းယဵပ်ႇတၵ်း ၼူတ်ႈၶဝ်ၼၼ်ႉပႅတ်ႈလႄႈ တၵ်းယႃႉၽဵဝ်ႈပႅတ်ႈၵူၼ်းဢၼ်ၵိုတ်းဢၼ်ၵျၢၼ်ႇၵႃႈၼႂ်းဝၢၼ်ႈၼႂ်းမိူင်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵႃႈၼႂ်းရူႇပႃႇရူင်ႇမၼ်းၼၼ်ႉ ပႃႇလၢမ်ႇ၊ ႁၼ်ၵူၼ်းမဵဝ်း ဢႃႇမလႅၵ်ႉ၊ တင်းလၢႆလႄႈ၊မၼ်းဢဝ်တင်းၵႂၢမ်းပရေႃးၽႅတ်ႈ ႁေႃးလၢတ်ႈဝႃႈၸမ်ႉ၊ “ၵူၼ်းမဵဝ်း ဢႃႇမလႅၵ်ႉ၊ ယၢမ်ႈလႆႈပဵၼ်ၸိၵ်းပဵၼ်ၸွမ်ၵႃႈၼိူဝ်မဵဝ်းၵူၼ်းတင်းလၢႆဢေႃႈ။ ၵူၺ်းၵႃႈ၊တီႈသုတ်းတီႈၵွႆမၼ်းတၵ်းလႆႈႁွတ်ႈထိုင်တၢင်းလုတၢင်းလႅဝ်မူတ်းမူတ်းသဵင်ႈသဵင်ႈဢေႃႈ၊” ဝႃႈၼင်ႇၼႆဢေႃႈ။
ၵႃႈၼႂ်းရူႇပႃႇရူင်ႇမၼ်းၼၼ်ႉမၼ်းသမ်ႉႁၼ်ၵူၼ်းမဵဝ်း ၵိၼိ၊ လႄႈမၼ်းဢဝ်တင်းၵႂၢမ်းပရေႃးၽႅတ်ႈႁေႃးလၢတ်ႈဝႃႈၸမ်ႉ၊ “တီႈယူႇမႂ်းမၼ်ႈၶိူင်ႇၼႅၼ်ႈၼႃၼႃႇဢေႃႈ။ လွတ်ႈၽေးလွတ်ႈရၢၼ်ႇမိူၼ်ၸိူဝ်ႉၼင်ႇႁင်းဢၼ်ၸပ်းၵႃႈၼိူဝ်ၽႃမၢၵ်ႇႁိၼ်ၼၼ်ႉဢေႃႈ။
ၵူၺ်းၵႃႈ၊ၵူၼ်းမဵဝ်း ၵိၼိ၊ တၵ်းလႆႈၶၢမ်ႇတၢင်းဢၼ်ယႃႉပႅတ်ႈၽဵဝ်ႈပႅတ်ႈ၊ ယၢမ်းမိူဝ်ႈဢၼ်ၶုၼ် ဢႃႇသီးရီးယႃး၊ သိမ်းဢဝ်မႂ်းၵႂႃႇၼၼ်ႉဢေႃႈ၊” ဝႃႈၼင်ႇၼႆဢေႃႈ။
ပႃႇလၢမ်ႇ၊ သမ်ႉဢဝ်တင်းၵႂၢမ်းပရေႃးၽႅတ်ႈ ႁေႃးလၢတ်ႈထႅင်ႈၸမ်ႉ၊ “ဢလူဝ်း။ ဢလူဝ်း။ ၽူႈလႂ်တၵ်းဢသၢၵ်ႈ ၶျၢမ်းသႃႇလႆႈ၊ ၼႂ်းမိူဝ်ႈဢၼ်ၽြႃးပဵၼ်ၸဝ်ႈႁဵတ်းလွင်ႈတၢင်းၸိူဝ်းၼႆႉၼၼ်ႉ။-
ၵူၼ်းဢၼ်တိုၵ်းဢဝ်မိူင်းပိူၼ်ႈတင်းလၢႆၼၼ်ႉတၵ်းၶီႇႁိူဝ်းသၢင်းၽေႃးဢွၵ်ႇသေမိူင်း သၢႆးပရၢတ်ႈ၊ မႃးလႄႈ ၶဝ်တၵ်းတိုၵ်းပႄႉမိူင်း ဢႃႇသီးရီးယႃး၊ တင်းမိူင်း ဢေးပႃႉ၊ ဢေႃႈ။ ၵူၺ်းၵႃႈ၊ၶဝ်ၼၼ်ႉၵေႃႈတၵ်းလုလႅဝ်မူတ်းမူတ်းသဵင်ႈသဵင်ႈဢေႃႈ၊” ဝႃႈၼင်ႇၼႆဢေႃႈ။
ပႃႇလၢမ်ႇ၊ ၵေႃႈလုၵ်ႉလႄႈၶိုၼ်းမိူဝ်းၵႂႃႇတီႈႁိူၼ်းမၼ်းသေဢေႃႈ။ ၶုၼ် ပႃႇလၵ်ႉ၊ ၵေႃႈၶိုၼ်းမိူဝ်းၵႂႃႇၸွမ်းတၢင်းတူဝ်ၸဝ်ႈၵဝ်ႇသေဢေႃႈ။
မိူဝ်ႈဢၼ်ၵူၼ်းမဵဝ်း ဢိသရေး၊ တင်းလၢႆၶျႃးပၢင်တပ်ႉယူႇၵႃႈတီႈထူင်ႉ ဢၵႃႇသိ၊ ၼၼ်ႉၸိုင်၊ၵူၼ်းၸၢႆးၶဝ်ၸႃႉႁဵတ်းမေႇထုင်ႇတၢင်းဢၼ်ဢမ်ႇတြႃးလူၺ်ႈၵၼ်တင်းမႄႈယိင်း မေႃႇၽႃႉ၊ ၶဝ်ဢေႃႈ။-
မႄႈယိင်းၸိူဝ်းၼၼ်ႉၸူဝ်းဢဝ်ၵူၼ်းၸၢႆးၶဝ်ၵႂႃႇၵႃႈတီႈပွႆးၽြႃးၶဝ်လႄႈ၊ၵူၼ်းမဵဝ်း ဢိသရေး၊ ၼမ်ၼႃႇၵိၼ်ၼိူဝ်ႉဢၼ်သၢၵ်ႈလူႇယဝ်ႉၸိူဝ်းၼၼ်ႉဢိၵ်ႇတင်းဢွၼ်ၵၼ်ဝႆႈၽြႃးၶဝ်၊-
ဢၼ်ဝႃႈၽြႃး ပႃႇလႃႉပေႇဢုရႃႉ၊ ၼၼ်ႉဢေႃႈ။ ပိူဝ်ႈၼႆလႄႈ ထႃႇဝရႃႉၽြႃး၊ ဢွၵ်ႇတေႃးသႃႉၸႂ်မႆႈၶႂ်ႈၸႃႉတေႃႇၵူၼ်းမဵဝ်း ဢိသရေး၊ ၶဝ်ၼႃႇလူင်လၢင်လႄႈ၊-
လၢတ်ႈတီႈ မူဝ်းသေႇ၊ လႄႈဝႃႈ၊ “ႁႂ်ႈဢဝ်ၵူၼ်းဢၼ်ပဵၼ်ၵႄႇပဵၼ်ႁူဝ်ၵူၼ်းမဵဝ်း ဢိသရေး၊ တင်းသဵင်ႈတင်းလူင်ၼၼ်ႉႁွႆႈၶႅၼ်တၢၵ်ႇလႅတ်ႇတၢႆတႃႉ။ ပေႃးႁဵတ်းၸိူဝ်ႉၼင်ႇၼႆၸိုင်၊ၵဝ်တၵ်းဢမ်ႇဢွၵ်ႇတေႃးသႃႉၸႂ်မႆႈၶႂ်ႈၸႃႉတေႃႇၵူၼ်းမဵဝ်း ဢိသရေး၊ တင်းလၢႆယဝ်ႉ၊” ဝႃႈၼင်ႇၼႆဢေႃႈ။-
မူဝ်းသေႇ၊ ၵေႃႈသင်ႇလၢတ်ႈတီႈၶုၼ်ဢၼ်ၸီႇယၢင်ႇတြႃး ဢိသရေး၊ တင်းလၢႆလႄႈဝႃႈ၊ “သူတၵ်းလႆႈဢွၼ်ၵၼ်ဢဝ်တၢႆၵူၼ်းမဵဝ်းၸိူဝ်ႉၶိူဝ်းၽႂ်ၸိူဝ်ႉၶိူဝ်းမၼ်းၸိူဝ်းဢၼ်ၵူဝ်းၵႂၢႆႇဝႆႈၽြႃး ပႃႇလႃႉပေႇဢုရႃႉ၊ ၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၵူၼ်းမဵဝ်း ဢိသရေး၊ ၵေႃႉၼိုင်ႈဢဝ်မႄႈယိင်း မိတျၼ်ႇ၊ ၵေႃႉၼိုင်ႈၶဝ်ႈၵႃႈၼႂ်းသုမ်ႉထဵင်မၼ်းၽၢႆႇၼႃႈၽၢႆႇတႃ မူဝ်းသေႇ၊ ဢိၵ်ႇတင်းမူႇၵူၼ်းၸိူဝ်းၵူၼ်းတင်းလၢႆယၢမ်းမိူဝ်ႈဢၼ်ၶဝ်ယင်းဢွၼ်ၵၼ်ႁွင်ႉႁႆႈၶၢင်းၶီၶၢင်းၽၢၼ်ယူႇၵႃႈတီႈႁိမ်းၽၵ်းတူသုမ်ႉထဵင်ၸဝ်ႈယူႇၼၼ်ႉဢေႃႈ။-
ၵမ်းၼၼ်ႉ ၽိၼႁတ်ႉ၊ လုၵ်ႈၸၢႆး ဢေးလႃႇၸႃႇ၊ ဢၼ်ပဵၼ်လၢၼ်ၸၢႆးယဵၸ်ႈပရေႃးႁဵၵ်ႈ ဢႃႇရုၼ်ႇ၊ ၼၼ်ႉႁၼ်သေယဝ်ႉ၊လုၵ်ႉလႄႈဢွၵ်ႇသေၵႃႈတီႈပၢင်ၵူၼ်းဢၼ်ၸုတုမ်ၼၼ်ႉၵႂႃႇဢေႃႈ။ မၼ်းဢဝ်ႁွၵ်ႇမၼ်းသေယဝ်ႉ၊-
ၸွမ်းၵူၼ်းၵေႃႉၼၼ်ႉတင်းမႄႈယိင်းၼၼ်ႉၶဝ်ႈၵႂႃႇၵႃႈၼႂ်းသုမ်ႉထဵင်ၼၼ်ႉလႄႈတႅင်းသႂ်ႇၶဝ်ပွင်ႇပိဝ်ၵႂႃႇၵူပ်ႉၵၼ်တင်းသွင်ၵေႃႉဢေႃႈ။ ၵွပ်ႈပိူဝ်ႈဢၼ်ႁဵတ်းၸိူဝ်ႉၼင်ႇၼၼ်လႄႈၽေးဢုပၢတ်ႈထၢတ်ႇယဵၼ်သေၼႂ်းၵူၼ်းမဵဝ်း ဢိသရေး၊ တင်းလၢႆၵႂႃႇဢေႃႈ။-
ၵူၺ်းၵႃႈ၊ၵူၼ်းဢၼ်တၢႆလူၺ်ႈၽေးၼၼ်ႉမီးသွင်မိုၼ်ႇပၢႆသီႇႁဵင်ၵေႃႉယဝ်ႉဢေႃႈ။
ပိူဝ်ႈၼႆလႄႈမႂ်းတၵ်းလႆႈလၢတ်ႈတီႈမၼ်းလႄႈဝႃႈၸမ်ႉ၊ၵဝ်ပၼ်ပတိၺိၺ်ႇၵတ်းယဵၼ်ၶျၢမ်းသႃႇၵဝ်တီႈမၼ်းဢေႃႈ။-
မၼ်းဢိၵ်ႇတင်းၸူဝ်ႈလုၵ်ႈပၢၼ်လၢၼ်ၸိူဝ်ႉၶိူဝ်းမၼ်းတင်းလၢႆတၵ်းလႆႈပဵၼ်ယဵၸ်ႈပရေႃးႁဵၵ်ႈတႃႇသေႇသိုပ်ႇသိုပ်ႇတၢမ်တၢမ်ၵွပ်ႈပိူဝ်ႈမၼ်းဢမ်ႇယိူၼ်ႉၶၢမ်ႇတၢင်းဢၼ်ႁဵတ်းၶတ်းၵၼ်တင်းၵဝ်ဢိၵ်ႇတင်းၵွပ်ႈပိူဝ်ႈမၼ်းႁဵတ်းတၢင်းဢၼ်ၽေႇဢပျတ်ႈပုၼ်ႈၵူၼ်းမဵဝ်း ဢိသရေး၊ တင်းလၢႆၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၸိုဝ်ႈသဵင်ၵူၼ်းမဵဝ်း ဢိသရေး၊ ဢၼ်လႆႈၶၢမ်ႇတၢင်းဢၼ်ဢဝ်တၢႆလူၺ်ႈၵၼ်တင်းမႄႈယိင်း မိတျၼ်ႇ၊ ၼၼ်ႉပဵၼ် ၸိမရိ၊ လုၵ်ႈၸၢႆး သႃႇလု၊ ၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၸိူဝ်ႉၶိူဝ်း သိမုၼ်ႇ၊ ၼၼ်ႉဢေႃႈ။-
ၸိုဝ်ႈသဵင်မႄႈယိင်း မိတျၼ်ႇ၊ ၼၼ်ႉပဵၼ် ၵေႃႇၸၽိ၊ ဢေႃႈ။ ပေႃႈမၼ်း ၸုရႃႉ၊ ၵေႃႈပဵၼ်ၵႄႇပဵၼ်ႁူဝ်ၼႂ်းၶိူဝ်းႁိူၼ်းမဵဝ်းၼိုင်ႈၵႃႈၼႂ်းၵူၼ်းမဵဝ်း မိတျၼ်ႇ၊ ဢေႃႈ။
ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ ထႅင်ႈလႄႈဝႃႈၸမ်ႉ၊-
“ၶီႇသိုၵ်းလႄႈတိုၵ်းတေႃးယႃႉၽဵဝ်ႈပႅတ်ႈၵူၼ်းမဵဝ်း မိတျၼ်ႇ၊ တင်းလၢႆတႃႉ။-
လွင်ႈမၼ်းၸမ်ႉ၊ၶဝ်ဢဝ်ပရိယႄႇလႄႈပႅတ်ႉလႅၼ်ႁႂ်ႈသူၸပ်းၸွမ်းၽြႃး ပေႇဢုရႃႉ၊ ဢိၵ်ႇတင်းၵွပ်ႈပိူဝ်ႈ ၵေႃႇၸၽိ၊ ဢၼ်လႆႈၶၢမ်ႇတၢင်းဢၼ်ဢဝ်တၢႆၼႂ်းဝၼ်းဢၼ်ၽေးဢုပၢတ်ႈႁွတ်ႈထိုင်ၵွပ်ႈပိူဝ်ႈတၢင်းယႃႉယူၵ်ႉၵႃႈတီႈ ပေႇဢုရႃႉ၊ ၼၼ်ႉဢေႃႈ၊” ဝႃႈၼင်ႇၼႆဢေႃႈ။
လိုၼ်းသေၽေးၼၼ်ႉယဵၼ်ယဝ်ႉၼၼ်ႉ ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ တင်း ဢေးလႃႇၸႃႇ၊ လုၵ်ႈၸၢႆး ဢႃႇရုၼ်ႇ၊ ၼၼ်ႉလႄႈဝႃႈ၊-
“ၸွမ်းလူၺ်ႈၸိူဝ်ႉၶိူဝ်းႁိူၼ်းၶဝ်ႁင်းၽႂ်ႁင်းမၼ်းၼၼ်ႉၵဵပ်းၸရၢင်းၵူၼ်းမိူင်းၵႃႈၼႂ်းၵူၼ်းမဵဝ်း ဢိသရေး၊ တင်းလၢႆဢၼ်ဢသၢၵ်ႈလႆႈသၢဝ်းပီလႄႈသၢဝ်းပီၶိုၼ်ႈၼိူဝ်ၸိူဝ်းဢၼ်တိုၵ်းသိုၵ်းလႆႈတင်းသဵင်ႈတင်းလူင်ၼၼ်ႉတႃႉ၊” ဝႃႈၼင်ႇၼႆဢေႃႈ။-
မူဝ်းသေႇ၊ တင်းယဵၸ်ႈပရေႃးႁဵၵ်ႈ ဢေးလႃႇၸႃႇ၊ ၵေႃႈသင်ႇလၢတ်ႈတီႈၶဝ်ၵႃႈၼႂ်းပၢင်ႇပဵင်း မေႃႇၽႃႉ၊ ဢၼ်မီးႁိမ်းၼမ်ႉ ယေႃးတၢၼ်ႇ၊ သိုဝ်ႈဝဵင်း ယေႇရိၶူဝ်း၊ ၼၼ်ႉလႄႈဝႃႈ၊-
“တၵ်းလႆႈဢဝ်ၸရၢင်းၶဝ်ၸိူဝ်းဢၼ်ဢသၢၵ်ႈလႆႈသၢဝ်းပီလႄႈသၢဝ်းပီၶိုၼ်ႈၼိူဝ်ၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ ၼၼ်ႉဢေႃႈ၊” ဝႃႈၼင်ႇၼႆဢေႃႈ။ ဢၼ်ၸိူဝ်းၼႆႉၸမ်ႉ၊ပဵၼ်ၵူၼ်းမဵဝ်း ဢိသရေး၊ တင်းလၢႆဢၼ်ဢွၵ်ႇမိူင်း ဢေးၵျိပ်ႉ၊ မႃးၸိူဝ်းၼၼ်ႉဢေႃႈ။
ၸိူဝ်ႉၶိူဝ်း ရုပိၼ်ႇ၊ ဢၼ်ပဵၼ်လုၵ်ႈၸၢႆးတူၼ်ႈ ဢိသရေး၊ ၼၼ်ႉၸမ်ႉ၊ၶဝ်ႈပႃးၼႂ်းၶိူဝ်းႁိူၼ်း ႁႃႇၼေႃႉၶိ၊ ၶိူဝ်းႁိူၼ်း ၽႃႇလုဝိတ်ႉ၊-
ၶိူဝ်းႁိူၼ်း ႁေႇၸရေႃးၼိ၊ တင်းၼႂ်းၶိူဝ်းႁိူၼ်း ၵႃႇမိတ်ႉ၊ ဢေႃႈ။-
ၶိူဝ်းႁိူၼ်းၸိူဝ်းၼႆႉ ၼပ်ႉဢၢၼ်ႇၶဝ်ႈပႃးၸရၢင်းမီးသီႇမိုၼ်ႇသၢမ်ႁဵင်ၸဵတ်းပၢၵ်ႇပၢႆသၢမ်သိပ်းၵေႃႉဢေႃႈ။-
လိၼ်မိူင်းတႅၵ်ႇဢႃႈလႄႈဢိုၼ်ၵိၼ်ၶဝ်လႄႈၶဝ်လႆႈတၢႆလူၺ်ႈၵၼ်တင်း ၵေႃးရႃႉ၊ ဢိၵ်ႇတင်းမုၵ်ႉၵူၼ်းၸိူဝ်းၵူၼ်းမၼ်းယၢမ်းမိူဝ်ႈဢၼ်ၽႆးမႆႈပႅတ်ႈၵူၼ်းသွင်ပၢၵ်ႇပၢႆႁႃႈသိပ်းသေယဝ်ႉ၊လွင်ႈၶဝ်ၼၼ်ႉပဵၼ်သၢၵ်ႈသေႇဢၼ်ပၼ်သတိၵူၼ်းတင်းလၢႆဢေႃႈ။-
ၵူၺ်းၵႃႈ၊လုၵ်ႈလၢင်း ၵေႃးရႃႉ၊ ၸိူဝ်းၼၼ်ႉဢမ်ႇလႆႈတၢႆ။
ၸိူဝ်ႉၶိူဝ်း သိမုၼ်ႇ၊ ၸမ်ႉ၊ၶဝ်ႈပႃးၶိူဝ်းႁိူၼ်း ၼေႇမုၺ်ႇလိ၊ ၶိူဝ်းႁိူၼ်း ယႃႇမိၼိ၊ ၶိူဝ်းႁိူၼ်း ယႃႇၶိၼိ၊-
ၶိူဝ်းႁိူၼ်း ၸေးရႃႇႁိ၊ တင်းၶိူဝ်းႁိူၼ်း သေႃးလိ၊ ဢေႃႈ။-
ၵူၼ်းၶိူဝ်းႁိူၼ်းၸိူဝ်းၼႆႉမီးသွင်မိုၼ်ႇသွင်ႁဵင်ပၢႆသွင်ပၢၵ်ႇဢေႃႈ။
ၸိူဝ်ႉၶိူဝ်း ၵၢတ်ႉ၊ ၸမ်ႉ၊ၶဝ်ႈပႃးၶိူဝ်းႁိူၼ်း ၸေႇၽေႃႇၼိ၊ ၶိူဝ်းႁိူၼ်း ႁၵ်ႉၵိတ်ႉ၊ ၶိူဝ်းႁိူၼ်း သုၼိတ်ႉ၊-
ၶိူဝ်းႁိူၼ်း ဢေႃႇၸၼိတ်ႉ၊ ၶိူဝ်းႁိူၼ်း ဢေႇရိတ်ႉ၊-
ၶိူဝ်းႁိူၼ်း ဢႃႇရေႃးတိ၊ တင်းၶိူဝ်းႁိူၼ်း ဢရေးလိတ်ႉ၊ ဢေႃႈ။-
ၵူၼ်းၶိူဝ်းႁိူၼ်းၸိူဝ်းၼႆႉမီးသီႇမိုၼ်ႇပၢႆႁႃႈပၢၵ်ႇဢေႃႈ။
ၸိူဝ်ႉၶိူဝ်း ယုတႃႉ၊ ၸမ်ႉ၊ ယုတႃႉ၊ မီးလုၵ်ႈၸၢႆးသွင်ၵေႃႉဢၼ်ပဵၼ် ဢေးရႃႉ၊ တင်း ဢေႃးၼၼ်ႇ၊ ဢၼ်လႆႈတၢႆၵႃႈတီႈမိူင်း ၶႃႇၼၼ်ႇ၊ ၼၼ်ႉဢေႃႈ။-
ၸိူဝ်ႉၶိူဝ်း ယုတႃႉ၊ ၼၼ်ႉၶဝ်ႈပႃးၶိူဝ်းႁိူၼ်း သေးလႃႇၼိ၊ ၶိူဝ်းႁိူၼ်း ၽႃႇရၸိ၊ ၶိူဝ်းႁိူၼ်း ၸႃးရႃႇႁိ၊-
ၶိူဝ်းႁိူၼ်း ႁေႇၸၸေႃးၼိ၊ တင်းၶိူဝ်းႁိူၼ်း ႁႃႇမုလိ၊ ဢေႃႈ။-
ၵူၼ်းၶိူဝ်းႁိူၼ်းၸိူဝ်းၼႆႉမီးၸဵတ်းမိုၼ်ႇႁူၵ်းႁဵင်ပၢႆႁႃႈပၢၵ်ႇၵေႃႉဢေႃႈ။
ၸိူဝ်ႉၶိူဝ်း ဢိသၶႃႇ၊ ၸမ်ႉ၊ၶဝ်ႈပႃးၶိူဝ်းႁိူၼ်း တေႃးလိ၊ ၶိူဝ်းႁိူၼ်း ၽုဝၼိ၊-
ၶိူဝ်းႁိူၼ်း ယႃႇသုၽိ၊ တင်းၶိူဝ်းႁိူၼ်း သိမရုၼ်ႇ၊ ဢေႃႈ။-
ၵူၼ်းၶိူဝ်းႁိူၼ်းၸိူဝ်းၼႆႉမီးႁူၵ်းမိုၼ်ႇသီႇႁဵင်ပၢႆသၢမ်ပၢၵ်ႇဢေႃႈ။
ၸိူဝ်ႉၶိူဝ်း ၸေႇပုလုၼ်ႇ၊ ၸမ်ႉ၊ၶဝ်ႈပႃးၶိူဝ်းႁိူၼ်း သရတိ၊ ၶိူဝ်းႁိူၼ်း ဢေႇလေႃးၼိ၊ တင်းၶိူဝ်းႁိူၼ်း ယႃႇလေးလိ၊ ဢေႃႈ။-
ၵူၼ်းၶိူဝ်းႁိူၼ်းၸိူဝ်းၼႆႉမီးႁူၵ်းမိုၼ်ႇပၢႆႁႃႈပၢၵ်ႇဢေႃႈ။
ၸိူဝ်ႉၶိူဝ်း ယူဝ်းသႅပ်ႈ၊ ၸမ်ႉ၊ ယူဝ်းသႅပ်ႈ၊ မီးလုၵ်ႈၸၢႆးသွင်ၵေႃႉဢၼ်ပဵၼ် မၼႃႇသေႇ၊ တင်း ဢေႇၽရိမ်ႇ၊ ဢေႃႈ။
ၸိူဝ်ႉၶိူဝ်း မၼႃႇသေႇ၊ ၸမ်ႉ၊ၶဝ်ႈပႃးၶိူဝ်းႁိူၼ်း ၵိလတိ၊ ဢၼ်ဢဝ်ၸွမ်းၸိုဝ်ႈသဵင်ပူႇမွၼ်ႇၶဝ် ၵိလတ်ႉ၊ လုၵ်ႈၸၢႆး မႃႇၶိရႃႉ၊ ဢၼ်ပဵၼ်လုၵ်ႈၸၢႆး မၼႃႇသေႇ၊ ၼၼ်ႉဢေႃႈ။-
ၸိူဝ်ႉၶိူဝ်း ၵိလတ်ႉ၊ သမ်ႉၶဝ်ႈပႃးၶိူဝ်းႁိူၼ်း ယေႇၸေႇရိ၊ ၶိူဝ်းႁိူၼ်း ႁေႇလၵိ၊-
ဢိၵ်ႇတင်းၶဝ်ႈပႃးၶိူဝ်းႁိူၼ်း ဢႃႇသရေးလိ၊ ၶိူဝ်းႁိူၼ်း သေႇၶေးမိ၊-
ၶိူဝ်းႁိူၼ်း သမိတိ၊ တင်းၶိူဝ်းႁိူၼ်း ႁေႇၽေးရိ၊ ဢေႃႈ။-
လုၵ်ႈၸၢႆး ႁေႇၽႃႇ၊ ဢၼ်ပဵၼ် ၸလေႃးၽတ်ႉ၊ ၼၼ်ႉဢမ်ႇမီးလုၵ်ႈၸၢႆး၊မီးလုၵ်ႈယိင်းၵူၺ်းၵူၺ်းလႄႈလုၵ်ႈယိင်းၸိူဝ်းၼၼ်ႉပဵၼ် မႃႇလႃႇ၊ၼေႃႇဢႃႇ၊ႁေႃႇၵလႃႇ၊မိလၶႃႇ၊ တင်း တိရၸႃႉ၊ ဢေႃႈ။-
ၵူၼ်းၶိူဝ်းႁိူၼ်းၸိူဝ်းၼႆႉမီးႁႃႈမိုၼ်ႇသွင်ႁဵင်ပၢႆၸဵတ်းပၢၵ်ႇၵေႃႉဢေႃႈ။
ၸိူဝ်ႉၶိူဝ်း ဢေႇၽရိမ်ႇ၊ ၸမ်ႉ၊ၶဝ်ႈပႃးၶိူဝ်းႁိူၼ်း သုသလိ၊ ၶိူဝ်းႁိူၼ်း ပေႇၶရိ၊ တင်းၶိူဝ်းႁိူၼ်း တႃႇႁၼိ၊ ဢေႃႈ။-
ၶိူဝ်းႁိူၼ်း ဢေးရၼိ၊ သမ်ႉသိုပ်ႇလူင်းမႃးၵႃႈတီႈၶိူဝ်းႁိူၼ်း သုသလိ၊ ဢေႃႈ။-
ၸိူဝ်ႉၶိူဝ်းႁိူၼ်းၸိူဝ်းၼႆႉမီးသၢမ်မိုၼ်ႇသွင်ႁဵင်ပၢႆႁႃႈပၢၵ်ႇဢေႃႈ။ ၵူၼ်းၶိူဝ်းႁိူၼ်းၸိူဝ်းၼႆႉပဵၼ်ၸိူဝ်ႉၶိူဝ်းလုၵ်ႈလၢၼ် ယူဝ်းသႅပ်ႈ၊ ဢေႃႈ။
ၸိူဝ်ႉၶိူဝ်း ပိၼ်ႇယႃႇမိၼ်ႇ၊ ၸမ်ႉ၊ၶဝ်ႈပႃးၶိူဝ်းႁိူၼ်း ပေႇလႃႉ၊ ၶိူဝ်းႁိူၼ်း ဢႃႇသပေႇလိ၊ ၶိူဝ်းႁိူၼ်း ဢႁိရမိ၊-
ၶိူဝ်းႁိူၼ်း သုၽမိ၊ တင်းၶိူဝ်းႁိူၼ်း ႁုၽမိ၊ ဢေႃႈ။-
ၶိူဝ်းႁိူၼ်း ဢႃႇရတိ၊ တင်းၶိူဝ်းႁိူၼ်း ၼေမၼိ၊ ၸမ်ႉ၊သိုပ်ႇလူင်းမႃးၵႃႈတီႈလုၵ်ႈလၢၼ်ၶိူဝ်းႁိူၼ်း ပေႇလႃႉ၊ ဢေႃႈ။-
ၵူၼ်းၶိူဝ်းႁိူၼ်းၸိူဝ်းၼႆႉ မီးသီႇမိုၼ်ႇႁႃႈႁဵင်ပၢႆႁူၵ်းပၢၵ်ႇဢေႃႈ။
ၵႃႈၼႂ်းၸိူဝ်ႉၶိူဝ်း တၢၼ်ႇ၊ ၸမ်ႉ၊မီးၶိူဝ်းႁိူၼ်း သုႁမိ၊ ဢေႃႈ။-
ၵူၼ်းၶိူဝ်းႁိူၼ်းၼႆႉမီးႁူၵ်းမိုၼ်ႇသီႇႁဵင်ပၢႆသီႇပၢၵ်ႇဢေႃႈ။
ၸိူဝ်ႉၶိူဝ်း ဢႃႇသျႃႇ၊ ၸမ်ႉ၊ၶဝ်ႈပႃးၶိူဝ်းႁိူၼ်း ယိမၼိ၊ ၶိူဝ်းႁိူၼ်း ယေႇသဝိတ်ႉ၊ တင်းၶိူဝ်းႁိူၼ်း ပေႇရိတ်ႉ၊ ဢေႃႈ။-
ၶိူဝ်းႁိူၼ်း ႁေႇပေႇရိ၊ တင်းၶိူဝ်းႁိူၼ်း မႃႇလၶျေးလိ၊ ၸိူဝ်းၼႆႉသမ်ႉသိုပ်ႇလူင်းမႃးၵႃႈတီႈလုၵ်ႈလၢၼ်ၶိူဝ်းႁိူၼ်း ပေႇရိတ်ႉ၊ ဢေႃႈ။-
ဢႃႇသျႃႇ၊ ယင်းမီးလုၵ်ႈယိင်းၵေႃႉၼိုင်ႈႁွင်ႉႁဵၵ်ႈၸိုဝ်ႈ ၸေးရႃႉ၊ ဢေႃႈ။-
ၵူၼ်းၶိူဝ်းႁိူၼ်းၸိူဝ်းၼႆႉမီးႁႃႈမိုၼ်ႇသၢမ်ႁဵင်ပၢႆသီႇပၢၵ်ႇၵေႃႉဢေႃႈ။
ၸိူဝ်ႉၶိူဝ်း ၼပ်ႉထလိ၊ ၸမ်ႉ၊ၶဝ်ႈပႃးၶိူဝ်းႁိူၼ်း ယႃႇၸေႇလိ၊ ၶိူဝ်းႁိူၼ်း ၵုၼိ၊-
ၶိူဝ်းႁိူၼ်း ယေႇၸေႇရိ၊ တင်းၶိူဝ်းႁိူၼ်း သိလမိ၊ ဢေႃႈ။-
ၵူၼ်းၶိူဝ်းႁိူၼ်းၸိူဝ်းၼႆႉမီးသီႇမိုၼ်ႇႁႃႈႁဵင်ပၢႆသီႇပၢၵ်ႇဢေႃႈ။
ၼင်ႇၼၼ်လႄႈၵူၼ်းၸၢႆးမဵဝ်း ဢိသရေး၊ တင်းလၢႆမီးႁူၵ်းသႅၼ်ပၢႆၼိုင်ႈႁဵင်ၸဵတ်းပၢၵ်ႇပၢႆသၢမ်သိပ်းဢေႃႈ။
ၵူၼ်း လေႇဝိ၊ ၼၼ်ႉၶဝ်ႈပႃးၶိူဝ်းႁိူၼ်း ၵေႇရသေႃးၼိ၊ ၶိူဝ်းႁိူၼ်း ၵေႃႇႁထိ၊ တင်းၶိူဝ်းႁိူၼ်း မေႇရႃႇရိတ်ႉ၊ ဢေႃႈ။-
ဢၼ်ၶဝ်ႈပႃးၼႂ်းၶိူဝ်းႁိူၼ်းလုၵ်ႈလၢၼ်ၶဝ်ဢၼ်ပဵၼ်ၶိူဝ်းႁိူၼ်း လိပၼိ၊ ၶိူဝ်းႁိူၼ်း ႁေႇပျေႃႇၼိ၊ ၶိူဝ်းႁိူၼ်း မႁႃႇလိ၊ ၶိူဝ်းႁိူၼ်း မုသိ၊ တင်းၶိူဝ်းႁိူၼ်း ၵေႃႇရႁိတ်ႉ၊ ဢေႃႈ။ ၵေႃႇႁတ်ႉ၊ မီးလုၵ်ႈၸၢႆး ဢႃႇမရမ်ႇ၊-
ၵေႃႉဢၼ်ဢဝ် ယေႃးၶႄႇပတ်ႉ၊ လုၵ်ႈယိင်း လေႇဝိ၊ ဢၼ်ၵိူတ်ႇလဵင်ႉမႃးတီႈမိူင်း ဢေးၵျိပ်ႉ၊ ၼၼ်ႉဢေႃႈ။ မႄႈယိင်းၼၼ်ႉၵိူတ်ႇလဵင်ႉ ဢႃႇရုၼ်ႇ၊မူဝ်းသေႇ၊ တင်းပီႈၼၢင်းၶဝ် မေႇရီႇယမ်ႇ၊ ဢေႃႈ။-
ဢႃႇရုၼ်ႇ၊ မီးလုၵ်ႈၸၢႆးသီႇၵေႃႉဢၼ်ပဵၼ် ၼႃႇတပ်ႉ၊ဢၽိႁု၊ဢေးလႃႇၸႃႇ၊ တင်း ဢိႀမႃႇ၊ ဢေႃႈ။-
ၼႃႇတပ်ႉ၊ တင်း ဢၽိႁု၊ ၸိုင်၊တၢႆယၢမ်းမိူဝ်ႈဢၼ်ၶဝ်ဢဝ်ၽႆးဢၼ်ဢမ်ႇမူတ်းၸၢင်ႇၼၼ်ႉႁဵတ်းတၢင်းလူႇၵႃႈတီႈၽၢႆႇၼႃႈ ထႃႇဝရႃႉၽြႃး၊ ၼၼ်ႉယဝ်ႉဢေႃႈ။-
ၵူၼ်းၸၢႆးၼႂ်းၵူၼ်း လေႇဝိ၊ ၸိူဝ်းဢၼ်ၼပ်ႉဢၢၼ်ႇဢၼ်ဢသၢၵ်ႈလႆႈလိူၼ်ၼိုင်ႈလႄႈလိူၼ်ၼိုင်ႈၶိုၼ်ႈၼိူဝ်မီးသွင်မိုၼ်ႇပၢႆသၢမ်ႁဵင်ဢေႃႈ။ ၸရၢင်းၶဝ်ၼပ်ႉဢၢၼ်ႇဝႆႉၶေႃၶေႃၵႃႈၼႂ်းၵူၼ်းမဵဝ်း ဢိသရေး၊ တင်းလၢႆၵွပ်ႈပိူဝ်ႈဢၼ်ဢမ်ႇႁႂ်ႈၶဝ်လႆႈၶၢမ်ႇဢမူၺ်ႇလူၺ်ႈၵၼ်တင်းမဵဝ်း ဢိသရေး၊ ၼၼ်ႉဢေႃႈ။
ၵူၼ်းၶိူဝ်းႁိူၼ်းၸိူဝ်းၼႆႉတင်းသဵင်ႈတင်းလူင်ၼႆႉၸိုင်၊ မူဝ်းသေႇ၊ တင်း ဢေးလႃႇၸႃႇ၊ ႁဵတ်းၸရၢင်းဝႆႉၼႂ်းမိူဝ်ႈဢၼ်ၶဝ်ၵဵပ်းၸရၢင်းၵူၼ်းမိူင်းၵႃႈၼႂ်းမဵဝ်း ဢိသရေး၊ ၵႃႈတီႈပၢင်ႇပဵင်း မေႃႇၽႃႉ၊ ဢၼ်မီးႁိမ်းၼမ်ႉ ယေႃးတၢၼ်ႇ၊ သိုဝ်ႈဝဵင်း ယေႇရိၶူဝ်း၊ ၼၼ်ႉဢေႃႈ။-
ၼႂ်းၵူၼ်းၸိူဝ်းၼႆႉမိူဝ်ႈဢၼ် မူဝ်းသေႇ၊ တင်းယဵၸ်ႈပရေႃးႁဵၵ်ႈ ဢႃႇရုၼ်ႇ၊ ႁဵတ်းတၢင်းဢၼ်ၵဵပ်းၸရၢင်းၵူၼ်းမိူင်းၵႃႈၼႂ်းထိူၼ်ႇလႅင်ႉ သိၼႃႉ၊ ၼၼ်ႉဢမ်ႇပႃးသေၵေႃႉသေၵူၼ်းယဝ်ႉ။-
လွင်ႈမၼ်းၸမ်ႉ၊ ထႃႇဝရႃႉၽြႃး၊ မီးဢမိင်ႉဝႆႉဝႃႈ၊ “ၶဝ်ၸိူဝ်းၼၼ်ႉတၵ်းလႆႈတၢႆၵႃႈၼႂ်းထိူၼ်ႇဢမၢၼ်ႇၶၼ်ပဵၼ်ဢေႃႈ၊” ဝႃႈၼင်ႇၼႆဝႆႉၼၼ်ႉ၊ၼွၵ်ႈသေ ၵႃႇလႅပ်ႉ၊ လုၵ်ႈၸၢႆး ယေႇၽုၼ်ႇၼႃႉ၊ တင်း ယေႃးသု၊ လုၵ်ႈၸၢႆး ၼုၼ်ႇ၊ ၼၼ်ႉဢမ်ႇၵိုတ်းဢမ်ႇၵျၢၼ်ႇသေၵေႃႉသေၵူၼ်း။
မႃႇလႃႇ၊ၼေႃႇဢႃႇ၊ႁေႃႇၵလႃႇ၊မိလၶႃႇ၊ တင်း တိရၸႃႉ၊ ပဵၼ်လုၵ်ႈယိင်း ၸလေႃးၽတ်ႉ၊ ဢၼ်ပဵၼ်လုၵ်ႈၸၢႆး ႁေႇၽႃႇ၊ လုၵ်ႈၸၢႆး ၵိလတ်ႉ၊ လုၵ်ႈၸၢႆး မႃႇၶိရႃႉ၊ လုၵ်ႈၸၢႆး မၼႃႇသေႇ၊ လုၵ်ႈၸၢႆး ယူဝ်းသႅပ်ႈ၊ ၼၼ်ႉဢေႃႈ။-
လုၵ်ႈယိင်းမၼ်းၼၼ်ႉဢွၼ်ၵၼ်ၵႂႃႇၸုၵ်းၵႃႈတီႈၽၢႆႇၼႃႈ မူဝ်းသေႇ၊ ဢိၵ်ႇတင်းယဵၸ်ႈပရေႃးႁဵၵ်ႈ ဢေးလႃႇၸႃႇ၊ တင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆ ဢိၵ်ႇတင်းၽၢႆႇၼႃႈမူႇၵူၼ်းၸိူဝ်းၵူၼ်းတင်းသဵင်ႈတင်းလူင်ၵႃႈႁိမ်းႁူးၽၵ်းတူသုမ်ႉထဵင်ၸဝ်ႈၼၼ်ႉသေလႄႈလဝ်ႈလၢတ်ႈလႄႈဝႃႈ၊-
“ပေႃႈႁဝ်းၶႃႈတၢႆၵႃႈၼႂ်းထိူၼ်ႇၶႃႈဢေႃႈ။ မၼ်းဢမ်ႇၶဝ်ႈပႃးၵႃႈၼႂ်းမုၵ်ႉၵူၼ်းၸိူဝ်းၵူၼ်းဢၼ်ၸွမ်းလင် ၵေႃးရႃႉ၊ ဢၼ်ၶတ်းၵၼ်တင်း ထႃႇဝရႃႉၽြႃး၊ ၼၼ်ႉတီႈၶႃႈ။ မၼ်းတၢႆၵွပ်ႈပိူဝ်ႈဢပျတ်ႈမၼ်းၶႃႈဢေႃႈ။ မၼ်းဢမ်ႇမီးလုၵ်ႈၸၢႆးၶႃႈ။-
ၵွပ်ႈပိူဝ်ႈပေႃႈႁဝ်းၶႃႈဢမ်ႇမီးလုၵ်ႈၸၢႆးလႄႈၸိုဝ်ႈသဵင်ပေႃႈႁဝ်းၶႃႈတၵ်းတေႁၢႆသေၵႃႈၼႂ်းမဵဝ်း ဢိသရေး၊ ၼႆႉၵႂႃႇၸိူဝ်ႉၼင်ႇႁိုဝ်ၶႃႈ။ ပၼ်ဢမူၺ်ႇတီႈႁဝ်းၶႃႈလူၺ်ႈၵၼ်တင်းပီႈၸၢႆးၼွင်ႉၸၢႆးပေႃႈႁဝ်းၶႃႈတင်းလၢႆၼၼ်ႉသေၵမ်းၶႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ဢဝ်ဢမုၶဝ်ၼၼ်ႉတၢင်ႇပျႃးတီႈၽၢႆႇၼႃႈ ထႃႇဝရႃႉၽြႃး၊ သေယဝ်ႉ၊-
ထႃႇဝရႃႉၽြႃး၊ မီးဢမိင်ႉတီႈမၼ်းလႄႈဝႃႈ၊-
“ဢၼ်လုၵ်ႈယိင်း ၸလေႃးၽတ်ႉ၊ ၸိူဝ်းၼၼ်ႉယွၼ်းထိုင်မႃးၼႆႉမၢၼ်ႇမႅၼ်ႈၸိုဝ်ႈၸႂ်ႈဢေႃႈ။ ၶဝ်လီမီးဢၶႂၢင်ႉဢၼ်လႆႈၶၢမ်ႇဢဝ်ဢမူၺ်ႇလူၺ်ႈၵၼ်တင်းပီႈၸၢႆးၼွင်ႉၸၢႆးပေႃႈၶဝ်ၸိူဝ်းၼၼ်ႉဢေႃႈ။ ဢဝ်ဢမူၺ်ႇဢုၵ်ႉၸႃႇပေႃႈၶဝ်ၼၼ်ႉပၼ်ထိုင်ၵႃႈၼႂ်းမိုဝ်းၶဝ်တႃႉ။-
ၼင်ႇၼၼ်လႄႈ၊သင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈ၊ ‘ပေႃးၵူၼ်းယင်းဢမ်ႇမီးလုၵ်ႈၸၢႆးလႄႈတၢႆၵႂႃႇၸိုင်၊သူတၵ်းလႆႈဢဝ်ဢမူၺ်ႇဢုၵ်ႉၸႃႇမၼ်းဢၢပ်ႈပၼ်ၵႃႈၼႂ်းမိုဝ်းလုၵ်ႈယိင်းမၼ်းဢေႃႈ။-
ပေႃးမၼ်းဢမ်ႇမီးလုၵ်ႈယိင်းၸိုင်၊ဢဝ်ဢမူၺ်ႇဢုၵ်ႉၸႃႇမၼ်းပၼ်တီႈပီႈၸၢႆးၼွင်ႉၸၢႆးမၼ်းတႃႉ။-
ပေႃးမၼ်းဢမ်ႇမီးပီႈၸၢႆးၼွင်ႉၸၢႆးၸိုင်၊ႁႂ်ႈပီႈၸၢႆးၼွင်ႉၸၢႆးပေႃႈမၼ်းၶၢမ်ႇဢဝ်ဢမူၺ်ႇမၼ်းတႃႉ။-
ပေႃးပေႃႈမၼ်းဢမ်ႇမီးပီႈၸၢႆးၼွင်ႉၸၢႆးၸိုင်၊သူတၵ်းလႆႈဢဝ်ဢမူၺ်ႇဢုၵ်ႉၸႃႇမၼ်းပၼ်တီႈပီႈၼွင်ႉဢၼ်ၸမ်ၵၼ်သေပိူၼ်ႈၼၼ်ႉလႄႈၵေႃႉၼၼ်ႉတၵ်းလႆႈပိူင်ႇဢဝ်ဢေႃႈ။ ၵူၼ်းမဵဝ်း ဢိသရေး၊ တင်းလၢႆတၵ်းလႆႈပႂ်ႉၵမ်ၸွမ်းထုင်းၽိင်ႈတြႃးၸွမ်းၼင်ႇဢၼ်ၵဝ် ထႃႇဝရႃႉၽြႃး၊ မီးဢမိင်ႉဝႆႉၼၼ်ႉဢေႃႈ၊’” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ လႄႈဝႃႈ၊ “ၶိုၼ်ႈၵႂႃႇၵႃႈၼိူဝ်လွႆ ဢပႃႇရိမ်ႇ၊ ၼႆႉတႃႉ။ မုင်ႈတူၺ်းမိူင်းဢၼ်ၵဝ်ပၼ်တီႈၵူၼ်းမဵဝ်း ဢိသရေး၊ ၼၼ်ႉတႃႉ။-
မႂ်းႁၼ်ယဝ်ႉလႄႈမႂ်းတၵ်းလႆႈတၢႆမိူၼ်ၸိူဝ်ႉၼင်ႇပီႈၸၢႆးမႂ်း ဢႃႇရုၼ်ႇ၊ ၼၼ်ႉဢေႃႈ။-
လွင်ႈမၼ်းၸမ်ႉ၊သူၶတ်းၵႂၢမ်းၵဝ်ၵႃႈတီႈၼႂ်းထိူၼ်ႇလႅင်ႉ ၸိၼႃႉ၊ ၼၼ်ႉယဝ်ႉ။ ယၢမ်းမိူဝ်ႈဢၼ်မူႇၵူၼ်းၸိူဝ်းၵူၼ်းတင်းလၢႆတၢင်ႇဢပျတ်ႈပွင်ႉမိုၼ်ႇပွင်ႉၶၢင်းတီႈၵဝ်ၼၼ်ႉသူဢမ်ႇႁႂ်ႈတၼ်းၶူဝ်းဢၼ်မူတ်းၸၢင်ႇၵဝ်ၼၼ်ႉထၢင်ႇသႃးသိုဝ်ႈၼႃႈတႂ်ႈတႃၵူၼ်းမဵဝ်း ဢိသရေး၊ တင်းလၢႆၵႃႈႁိမ်းၼမ်ႉဢွၵ်ႇႁူးၼၼ်ႉမႃးယဝ်ႉ၊” ၼမ်ႉၼၼ်ႉပဵၼ်ၼမ်ႉဢွၵ်ႇႁူး မေႇရိၽႃႉ၊ ၵႃႈတီႈ ၵႃႇတေးသႃႉ၊ ၼႂ်းထိူၼ်ႇလႅင်ႉ ၸိၼႃႉ၊ ၼၼ်ႉဢေႃႈ။
မူဝ်းသေႇ၊ သမ်ႉသူးတွင်းတီႈ ထႃႇဝရႃႉၽြႃး၊ လႄႈဝႃႈၸမ်ႉ၊-
“ ထႃႇဝရႃႉၽြႃး၊ ၽြႃးပဵၼ်ၸဝ်ႈ၊ၸဝ်ႈဢၼ်ဢုပ်ႉပိူင်ႇဢသၢၵ်ႈဝိၺိၺ်ႇသတ်ႉတဝႃႇတင်းလၢႆတီႈၶႃႈ။ ၶႃႈၸဝ်ႈႁဝ်းသူးတွင်းတီႈၶႃႈဢေႃႈ။ ၶႅၼ်းတေႃႈပၼ်ပုၼ်ႈၽွၼ်းၵေႃႉဢၼ်တၵ်းဢွၼ်သူင်ႇၵူၼ်းတင်းလၢႆလႆႈ၊-
သမ်ႉတၵ်းဢွၼ်ႁူဝ်သေလႄႈၶဝ်ၵႃႈၼႂ်းၼႃႈသိုၵ်းလႆႈၼၼ်ႉသေၵေႃႉၵေႃႉပုၼ်ႈမုၵ်ႉၵူၼ်းၸိူဝ်းၵူၼ်းၸဝ်ႈႁဝ်းၸိူဝ်းၼႆႉတၵ်းဢမ်ႇလႆႈပဵၼ်ၸိူဝ်ႉၼင်ႇသူဝ်းဢၼ်ဢမ်ႇမီးၵေႃႉလဵင်ႉၵေႃႉထိင်းၼၼ်ႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ လႄႈဝႃႈ၊ “ႁွင်ႉဢဝ် ယေႃးသု၊ လုၵ်ႈၸၢႆး ၼုၼ်ႇ၊ ၼၼ်ႉတႃႉ။ မၼ်းပဵၼ်ၵေႃႉဢၼ်လႆႈဝိၺိၺ်ႇၸဝ်ႈလႄႈဢဝ်မိုဝ်းမႂ်းတၢင်ႇၵႃႈၼိူဝ်မၼ်းတႃႉ။-
ႁႂ်ႈမၼ်းၸုၵ်းၵႃႈတီႈၽၢႆႇၼႃႈယဵၸ်ႈပရေႃးႁဵၵ်ႈ ဢေးလႃႇၸႃႇ၊ ဢိၵ်ႇတင်းမူႇၵူၼ်းၸိူဝ်းၵူၼ်းတင်းလၢႆသေယဝ်ႉ၊သင်ႇလၢတ်ႈလွင်ႈဢၼ်မၼ်းလႆႈၶၢမ်ႇဢဝ်ဢရႃႇၼၼ်ႉႁႂ်ႈၶဝ်တင်းသဵင်ႈတင်းလူင်ႁုငိၼ်းတႃႉ။-
ဢဝ်မုၼ်ၽုင်းမႂ်းၵမ်ႈၽွင်ႈသႂ်ႇပၼ်မၼ်းႁႂ်ႈမူႇၵူၼ်းၸိူဝ်းၵူၼ်းမဵဝ်း ဢိသရေး၊ တင်းလၢႆထွမ်ႇဢဝ်ၵႂၢမ်းမၼ်းတႃႉ။-
မၼ်းတၵ်းလႆႈဢိင်ပိုင်ႈယဵၸ်ႈပရေႃးႁဵၵ်ႈ ဢေးလႃႇၸႃႇ၊ ဢေႃႈ။ ယဵၸ်ႈပရေႃးႁဵၵ်ႈ ဢေးလႃႇၸႃႇ၊ သမ်ႉတၵ်းလႆႈၸႂ်ႉဢုရိမ်းတင်းႀုမိမ်း ႁႂ်ႈလႆႈႁုဢလူဝ်ႇ ထႃႇဝရႃႉၽြႃး၊ ဢေႃႈ။ ၼင်ႇၼၼ်လႄႈ ဢေးလႃႇၸႃႇ၊ တၵ်းၸီႇယၢင်ႇၶိုင်ပွင်ၵႃႈၼိူဝ် ယေႃးသု၊ ဢိၵ်ႇတင်းမူႇၵူၼ်းၸိူဝ်းၵူၼ်းမဵဝ်း ဢိသရေး၊ တင်းလၢႆၼႂ်းလွင်ႈတၢင်းဢၼ်ၶဝ်တၵ်းလႆႈႁဵတ်း၊တၵ်းလႆႈၵႂႃႇလႆႈပႆၵႃႈမီးၸိူဝ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။-
မူဝ်းသေႇ၊ ႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉတီႈမၼ်းၼၼ်ႉဢေႃႈ။ မၼ်းႁႂ်ႈ ယေႃးသု၊ ၸုၵ်းယူႇၵႃႈတီႈၽၢႆႇၼႃႈယဵၸ်ႈပရေႃးႁဵၵ်ႈ ဢေးလႃႇၸႃႇ၊ ဢိၵ်ႇတင်းမူႇၵူၼ်းၸိူဝ်းၵူၼ်းတင်းလၢႆဢေႃႈ။-
ၸိူဝ်ႉၼင်ႇဢၼ် ထႃႇဝရႃႉၽြႃး၊ မီးဢမိင်ႉၼၼ်ႉမၼ်းဢဝ်မိုဝ်းတၢင်ႇၵႃႈၼိူဝ်ႁူဝ် ယေႃးသု၊ သေယဝ်ႉ၊သင်ႇလၢတ်ႈလွင်ႈဢၼ် ယေႃးသု၊ လႆႈၶၢမ်ႇဢဝ်ဢရႃႇမၼ်းၼၼ်ႉဢေႃႈ။
ၸဝ်ႈထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ လႄႈဝႃႈၸမ်ႉ၊-
“မႂ်းတေလႆႈသင်ႇလၢတ်ႈတီႈၵူၼ်းမဵဝ်း ဢိသရေး၊ လႄႈဝႃႈ၊ ‘ၶိူင်ႈတၢင်းလူႇ၊ဢေႃႇၸႃႇတၢင်းၵိၼ်၊ပုၼ်ႈဢၼ်တၵ်းဢဝ်ၽႆးတုတ်ႇသေယဝ်ႉ၊သၢၵ်ႈလူႇတီႈၵဝ်လႄႈမီးဢၢႆႁွမ်ဢၢႆႁူၺ်းပုၼ်ႈၵဝ်ၼၼ်ႉၸိုင်၊သူတၵ်းလႆႈသၢၵ်ႈလူႇၸွမ်းၶိင်ႇၸွမ်းၶႃႇမၼ်းဢေႃႈ။’
“တၢင်းလူႇဢၼ်သူတၵ်းလႆႈသၢၵ်ႈလူႇတီႈ ထႃႇဝရႃႉၽြႃး၊ ၸိူဝ်းၼၼ်ႉၸမ်ႉ၊ပုၼ်ႈတၢင်းလူႇဢၼ်တုတ်ႇၽႆးၸိုင်၊တၵ်းလႆႈပဵၼ်သူဝ်းပေႃႈဢွၼ်ႇဢၼ်ဢသၢၵ်ႈလႆႈၶူပ်ႇၼိုင်ႈဢၼ်လွတ်ႈသေတၢင်းဢၼ်ၸိၼႄးၼၼ်ႉသေလႄႈႁဵတ်းတၢင်းလူႇယေႈဝၼ်းသွင်တူဝ်ၵူႈဝၼ်းတႃႇသေႇဢမ်ႇထၢတ်ႇဢေႃႈ။-
ဢဝ်သူဝ်းဢွၼ်ႇတူဝ်ၼိုင်ႈႁဵတ်းတၢင်းလူႇမိူဝ်ႈၶိင်ႇႁူဝ်ၼႂ်လႄႈသမ်ႉဢဝ်သူဝ်းဢွၼ်ႇထႅင်ႈတူဝ်ၼိုင်ႈႁဵတ်းတၢင်းလူႇမိူဝ်ႈၶိင်ႇႁူဝ်ၶမ်ႈတႃႉ။-
သမ်ႉတၵ်းလႆႈသၢၵ်ႈလူႇပႃးၽွင်ၶဝ်ႈၵျုင်ႇၸဵတ်းၵွၵ်းသေယဝ်ႉ၊ၼွၵ်းလေႃးတင်းၼမ်ႉမၼ်းမၢၵ်ႇသၢၼ်ႇလုၼ်ႇဢၼ်လီလီၼၼ်ႉတဝ်ႈၼိုင်ႈသေလႄႈႁဵတ်းတၢင်းလူႇမၢၵ်ႇၶဝ်ႈႁူင်းၶဝ်ႈလူၺ်ႈၵၼ်ၵူႈပွၵ်ႈဢေႃႈ။-
ဢၼ်ၼႆႉၸမ်ႉ၊ပဵၼ်တၢင်းလူႇဢၼ်တုတ်ႇၽႆးဢၼ်လႆႈသၢၵ်ႈလူႇၵူႈဝၼ်းတႃႇသေႇဢၼ်မၼ်းၸဝ်ႈၸီႇယၢင်ႇၶိုင်ပွင်ဝႆႉၵႃႈၼိူဝ်လွႆ သိၼႃႉ၊ ပုၼ်ႈဢၢႆႁွမ်ဢၢႆႁူၺ်းတီႈ ထႃႇဝရႃႉၽြႃး၊ ၼၼ်ႉဢေႃႈ။-
ပုၼ်ႈတႃႇတၢင်းလူႇဢၼ်သွၼ်းလေႃႇၼမ်ႉမၢၵ်ႇၸပိတ်ႉတဝ်ႈၼိုင်ႈလူၺ်ႈၵၼ်တင်းသူဝ်းဢွၼ်ႇတူဝ်ၼိုင်ႈၸမ်ႉ၊ဢဝ်ၼမ်ႉမၢၵ်ႇၸပိတ်ႉၼၼ်ႉသွၼ်းလေႃႇၵႃႈတီႈထႃႇၼႃႉဢၼ်မူတ်းၸၢင်ႇၸဝ်ႈၼၼ်ႉတႃႉ။-
ၶိင်ႇႁူဝ်ၶမ်ႈၵေႃႈသၢၵ်ႈလူႇသူဝ်းပေႃႈဢွၼ်ႇတူဝ်တီႈသွင်မိူၼ်မိူၼ်ၵၼ်တင်းႁဵတ်းတၢင်းဢၼ်သၢၵ်ႈလူႇမိူဝ်ႈၶဵင်ႇၵၢင်ၼႂ်ၼၼ်ႉလူၺ်ႈၵၼ်တင်းတၢင်းလူႇဢၼ်သွၼ်းလေႃႇၼမ်ႉမၢၵ်ႇၸပိတ်ႉၼင်ႇၵဝ်ႇတႃႉ။ ဢၼ်ၼႆႉၵေႃႈ ပဵၼ်တၢင်းလူႇဢေႃႇၸႃႇတၢင်းၵိၼ်ဢၼ်ဢၢႆႁွမ်ဢၢႆႁူၺ်းမၼ်းထုၵ်ႇၸႂ်မႅၼ်ႈၸႂ် ထႃႇဝရႃႉၽြႃး၊ ၼၼ်ႉဢေႃႈ။
“ၼႂ်းဝၼ်းၵမ်သိၼ်တၵ်းလႆႈဢဝ်သူဝ်းပေႃႈဢွၼ်ႇသွင်တူဝ်ဢၼ်ဢသၢၵ်ႈလႆႈပီၼိုင်ႈဢၼ်ဢၢင်ႇၵႃႇၸုင်ႇဢိၵ်ႇတင်းၽွင်ၶဝ်ႈၵျုင်ႇႁူၵ်းၶၼ်ဢၼ်ၼွၵ်းလေႃးၼမ်ႉမၼ်းမၢၵ်ႇသၢၼ်ႇလုၼ်ႇၼၼ်ႉသၢၵ်ႈလူႇႁႂ်ႈပဵၼ်တၢင်းလူႇမၢၵ်ႇၶဝ်ႈႁူင်းၶဝ်ႈလူၺ်ႈၵၼ်တင်းတၢင်းလူႇဢၼ်သွၼ်းလေႃႇၼမ်ႉမၢၵ်ႇၸပိတ်ႉၼၼ်ႉတႃႉ။-
ဢၼ်ၼႆႉၸမ်ႉ၊ပဵၼ်တၢင်းလူႇဢၼ်တုတ်ႇၽႆးဢၼ်တၵ်းလႆႈသၢၵ်ႈလူႇၼႂ်းဝၼ်းၵမ်သိၼ်ၵူႈဝၼ်းၼွၵ်ႈသေၶိူင်ႈတၢင်းလူႇဢၼ်တုတ်ႇၽႆးဢၼ်သၢၵ်ႈလူႇၵူႈဝၼ်းတႃႇသေႇဢမ်ႇထၢတ်ႇလူၺ်ႈၵၼ်တင်းတၢင်းလူႇဢၼ်သွၼ်းလေႃႇၼမ်ႉမၢၵ်ႇၸပိတ်ႉမၼ်းၼၼ်ႉထၢပ်ႈထႅင်ႈဢေႃႈ။
“ၼႂ်းဝၼ်းလိူၼ်မႂ်ႇဝၼ်းၼိုင်ႈၼၼ်ႉသူတၵ်းလႆႈသၢၵ်ႈလူႇတၢင်းလူႇဢၼ်တုတ်ႇၽႆးတီႈ ထႃႇဝရႃႉၽြႃး၊ ၵူႈလိူၼ်ဢေႃႈ။ သူတၵ်းလႆႈဢဝ်ဝူဝ်းပေႃႈဢၼ်ယင်းၼုမ်ႇသွင်တူဝ်၊သူဝ်းပေႃႈတူဝ်ၼိုင်ႈ၊သူဝ်းပေႃႈဢွၼ်ႇဢၼ်ဢသၢၵ်ႈလႆႈပီၼိုင်ႈဢၼ်ဢၢင်ႇၵႃႇၸုင်ႇၼၼ်ႉၸဵတ်းတူဝ်သေလႄႈသၢၵ်ႈလူႇဢေႃႈ။-
ပုၼ်ႈတႃႇတၢင်းလူႇမၢၵ်ႇၶဝ်ႈႁူင်းၶဝ်ႈၸမ်ႉ၊တၵ်းလႆႈသၢၵ်ႈလူႇၽွင်ၶဝ်ႈၵျုင်ႇဢၼ်ၼွၵ်းလေႃးၼမ်ႉမၼ်းမၢၵ်ႇသၢၼ်ႇလုၼ်ႇ၊ပုၼ်ႈဝူဝ်းယေႈတူဝ်ၼၼ်ႉၽွင်ၶဝ်ႈၵျုင်ႇၵဝ်ႈၶၼ်။ ပုၼ်ႈသူဝ်းပေႃႈတူဝ်ၼိုင်ႈၼၼ်ႉၽွင်ၶဝ်ႈၵျုင်ႇႁူၵ်းၶၼ်။-
ဢိၵ်ႇတင်းပုၼ်ႈသူဝ်းပေႃႈဢွၼ်ႇယေႈတူဝ်ၼၼ်ႉၽွင်ၶဝ်ႈၵျုင်ႇသၢမ်ၶၼ်ႁႂ်ႈမိူၼ်မိူၼ်ၵၼ်ဢေႃႈ။ တၢင်းလူႇဢၼ်တုတ်ႇၽႆးၼႆႉပဵၼ်တၢင်းလူႇမၢၵ်ႇၶဝ်ႈႁူင်းၶဝ်ႈဢၼ်ဢၢႆႁွမ်ဢၢႆႁူၺ်းမၼ်းထုၵ်ႇၸႂ်မႅၼ်ႈၸႂ် ထႃႇဝရႃႉၽြႃး၊ ဢေႃႈ။-
ပုၼ်ႈၶိူင်ႈတၢင်းလူႇဢၼ်သွၼ်းလေႃႇၼမ်ႉမၢၵ်ႇၸပိတ်ႉၸမ်ႉ၊တၵ်းလႆႈသၢၵ်ႈလူႇၼမ်ႉမၢၵ်ႇၸပိတ်ႉသွင်တဝ်ႈပုၼ်ႈဝူဝ်းယေႈတူဝ်။ တဝ်ႈပၢႆၶိုင်ႈပုၼ်ႈသူဝ်းပေႃႈတူဝ်ၼိုင်ႈၼၼ်ႉဢိၵ်ႇတင်းၼမ်ႉမၢၵ်ႇၸပိတ်ႉတဝ်ႈၼိုင်ႈပုၼ်ႈသူဝ်းပေႃႈဢွၼ်ႇယေႈတူဝ်ယေႈတူဝ်ဢေႃႈ။ ဢၼ်ၼႆႉပဵၼ်ထုင်းတြႃးပုၼ်ႈတၢင်းလူႇဢၼ်တုတ်ႇၽႆးၼႂ်းဝၼ်းလိူၼ်မႂ်ႇၼၼ်ႉၵူႈလိူၼ်ပုၼ်ႈတင်းပီဢေႃႈ။-
ၼွၵ်ႈသေတၢင်းလူႇဢၼ်တုတ်ႇၽႆးလႄႈသၢၵ်ႈလူႇလူၺ်ႈၵၼ်တင်းတၢင်းလူႇဢၼ်သွၼ်းလေႃႇၼမ်ႉမၢၵ်ႇၸပိတ်ႉၼၼ်ႉတၵ်းလႆႈႁဵတ်းတၢင်းလူႇဢၼ်ၽေႇဢပျတ်ႈဢၼ်ဢဝ်ပႄႉပေႃႈတူဝ်ၼိုင်ႈသၢၵ်ႈလူႇတီႈ ထႃႇဝရႃႉၽြႃး၊ ၼၼ်ႉၵေႃႈတၵ်းလႆႈဢဝ်ထၢပ်ႈထႅင်ႈလႄႈသၢၵ်ႈလူႇဢေႃႈ။
“လိူၼ်တီႈၼိုင်ႈဝၼ်းတီႈသိပ်းသီႇဝၼ်းၼၼ်ႉပဵၼ်ဝၼ်းပွႆး ပသၶႃႇထႃႇဝရႃႉၽြႃး၊ ဢေႃႈ။-
ပွႆးၵိၼ်ၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈၼၼ်ႉတႄႇတင်ႈမိူဝ်ႈဝၼ်းတီႈသိပ်းႁႃႈလႄႈတၵ်းလႆႈႁဵတ်းပွႆးၼၼ်ႉၸဵတ်းဝၼ်းတဵမ်တဵမ်ဢေႃႈ။-
ၼႂ်းဝၼ်းဢၼ်တင်ႈပွႆးၼၼ်ႉသူတၵ်းလႆႈၸုတုမ်ၵၼ်ဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ လႄႈ၊ၼႂ်းဝၼ်းၼၼ်ႉဢမ်ႇလႆႈႁဵတ်းၵၢၼ်ႁဵတ်းငၢၼ်းလႃးလႃး။-
သူတၵ်းလႆႈသၢၵ်ႈလူႇတၢင်းလူႇဢၼ်ႁဵတ်းလူၺ်ႈၽႆးၼၼ်ႉသၢၵ်ႈလူႇတီႈ ထႃႇဝရႃႉၽြႃး၊ ဢၼ်ဝႃႈ၊ဝူဝ်းပေႃႈဢၼ်ဢသၢၵ်ႈၼုမ်ႇသွင်တူဝ်၊သူဝ်းပေႃႈတူဝ်ၼိုင်ႈဢိၵ်ႇတင်းသူဝ်းပေႃႈဢွၼ်ႇဢၼ်ဢသၢၵ်ႈလႆႈပီၼိုင်ႈလႄႈလွတ်ႈတၢင်းဢၼ်ၸိဢၼ်ၼႄးၼၼ်ႉၸဵတ်းတူဝ်ဢေႃႈ။-
ပုၼ်ႈတႃႇတၢင်းလူႇမၢၵ်ႇၶဝ်ႈႁူင်းၶဝ်ႈၸမ်ႉ၊တၵ်းလႆႈသၢၵ်ႈလူႇၽွင်ၶဝ်ႈၵျုင်ႇဢၼ်ၼွၵ်းလေႃးၼမ်ႉမၼ်းမၢၵ်ႇသၢၼ်ႇလုၼ်ႇပုၼ်ႈဝူဝ်းယေႈတူဝ်ၼၼ်ႉၽွင်ၶဝ်ႈၵျုင်ႇၵဝ်ႈၶၼ်၊ပုၼ်ႈသူဝ်းပေႃႈတူဝ်ၼိုင်ႈၼၼ်ႉၽွင်ၶဝ်ႈၵျုင်ႇႁူၵ်းၶၼ်၊-
ဢိၵ်ႇတင်းပုၼ်ႈသူဝ်းပေႃႈဢွၼ်ႇယေႈတူဝ်ၼၼ်ႉၽွင်ၶဝ်ႈၵျုင်ႇသၢမ်ၶၼ်မိူၼ်မိူၼ်ၵၼ်ဢေႃႈ။-
သမ်ႉဢဝ်ပႄႉပေႃႈတူဝ်ၼိုင်ႈသၢၵ်ႈလူႇႁႂ်ႈပဵၼ်တၢင်းလူႇဢၼ်ၽေႇဢပျတ်ႈ၊ႁႂ်ႈပဵၼ်တၢင်းဢၼ်ပွႆႇလွတ်ႈဢပျတ်ႈၵူၼ်းတင်းလၢႆတႃႉ။-
ၼွၵ်ႈသေတၢင်းလူႇဢၼ်တုတ်ႇၽႆးဢၼ်သၢၵ်ႈလူႇၵူႈၼႂ်တႃႇသေႇဢမ်ႇထၢတ်ႇၼၼ်ႉတၵ်းလႆႈဢဝ်ၶိူင်ႈတၢင်းလူႇၸိူဝ်းၼႆႉထၢပ်ႈထႅင်ႈလႄႈသၢၵ်ႈလူႇတႃႉ။-
မိူၼ်ၸိူဝ်ႉၼင်ႇၼၼ်ႉႁဵတ်းတၢင်းလူႇဢေႃႇၸႃႇတၢင်းၵိၼ်တီႈ ထႃႇဝရႃႉၽြႃး၊ ၼၼ်ႉတင်းၸဵတ်းဝၼ်းတႃႉ။ ဢၢႆႁွမ်ဢၢႆႁူၺ်းမၼ်းပဵၼ်ဢၼ်ထုၵ်ႇၸႂ်မႅၼ်ႈၸႂ်မၼ်းၸဝ်ႈဢေႃႈ။ ဢဝ်တၢင်းလူႇၼႆႉထၢပ်ႈထႅင်ႈတီႈတၢင်းလူႇဢၼ်တုတ်ႇၽႆးလူၺ်ႈၵၼ်တင်းတၢင်းလူႇဢၼ်သွၼ်းလေႃႇၼမ်ႉမၢၵ်ႇၸပိတ်ႉၼၼ်ႉတႃႉ။-
ၼႂ်းဝၼ်းဢၼ်ထူၼ်ႈတီႈၸဵတ်းဝၼ်းၼၼ်ႉၵေႃႈမႃးၸုတုမ်ၵၼ်ႁႂ်ႈလႆႈဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ လႄႈၼႂ်းဝၼ်းၼၼ်ႉဢမ်ႇလႆႈႁဵတ်းၵၢၼ်ငၢၼ်းလႃးလႃး။
“ၼႂ်းဝၼ်းတင်ႈပွႆးပၢတ်ႇဢဝ်မၢၵ်ႇဢဝ်ႁူင်းၼၼ်ႉ၊မိူဝ်ႈဢၼ်သူသၢၵ်ႈလူႇမၢၵ်ႇဢၼ်မၢၵ်ႇဢွၼ်တၢင်းသုတ်းတီႈ ထႃႇဝရႃႉၽြႃး၊ ၸိုင်၊သူတၵ်းလႆႈၸုတုမ်ၵၼ်သေဝႆႈသႃၵူဝ်းၵႂၢႆႇတီႈ ထႃႇဝရႃႉၽြႃး၊ လႄႈၼႂ်းဝၼ်းၼၼ်ႉဢမ်ႇလႆႈႁဵတ်းၵၢၼ်ႁဵတ်းငၢၼ်းလႃးလႃး။-
သၢၵ်ႈလူႇတၢင်းလူႇဢၼ်တုတ်ႇၽႆးႁႂ်ႈပဵၼ်ဢၢႆႁွမ်ဢၢႆႁူၺ်းဢၼ်ထုၵ်ႇၸႂ်မႅၼ်ႈၸႂ် ထႃႇဝရႃႉၽြႃး၊ ၼၼ်ႉတႃႉ။ တၵ်းလႆႈသၢၵ်ႈလူႇဝူဝ်းပေႃႈဢွၼ်ႇဢၼ်ယင်းၼုမ်ႇသွင်တူဝ်၊သူဝ်းပေႃႈတူဝ်ၼိုင်ႈတင်းသူဝ်းပေႃႈဢွၼ်ႇဢၼ်ဢသၢၵ်ႈလႆႈပီၼိုင်ႈဢၼ်လွတ်ႈသေတၢင်းဢၼ်ၸိဢၼ်ၼႄးၼၼ်ႉၸဵတ်းတူဝ်ဢေႃႈ။-
ပုၼ်ႈတႃႇတၢင်းလူႇမၢၵ်ႇၶဝ်ႈႁူင်းၶဝ်ႈၸမ်ႉ၊တၵ်းလႆႈသၢၵ်ႈလူႇၽွင်ၶဝ်ႈၵျုင်ႇဢၼ်ၼွၵ်းလေႃးၼမ်ႉမၼ်းမၢၵ်ႇသၢၼ်ႇလုၼ်ႇပုၼ်ႈဝူဝ်းယေႈတူဝ်ၼၼ်ႉၽွင်ၶဝ်ႈၵျုင်ႇၵဝ်ႈၶၼ်၊ပုၼ်ႈသူဝ်းပေႃႈယေႈတူဝ်ၼၼ်ႉၽွင်ၶဝ်ႈၵျုင်ႇႁူၵ်းၶၼ်၊-
ဢိၵ်ႇတင်းပုၼ်ႈသူဝ်းဢွၼ်ႇယေႈတူဝ်ၼၼ်ႉၽွင်ၶဝ်ႈၵျုင်ႇသၢမ်ၶၼ်ႁႂ်ႈမိူၼ်မိူၼ်ၵၼ်ဢေႃႈ။-
သမ်ႉဢဝ်ပႄႉပေႃႈတူဝ်ၼိုင်ႈသၢၵ်ႈလူႇႁႂ်ႈပဵၼ်တၢင်းလူႇဢၼ်ၽေႇဢပျတ်ႈႁႂ်ႈပဵၼ်တၢင်းဢၼ်ပွႆႇလွတ်ႈဢပျတ်ႈပုၼ်ႈၵူၼ်းတင်းလၢႆတႃႉ။-
ဢဝ်ၶိူင်ႈတၢင်းလူႇၸိူဝ်းၼႆႉဢိၵ်ႇတင်းတၢင်းလူႇဢၼ်သွၼ်းလေႃႇၼမ်ႉမၢၵ်ႇၸပိတ်ႉၼၼ်ႉထၢပ်ႈထႅင်ႈတီႈတၢင်းလူႇဢၼ်တုတ်ႇၽႆးဢိၵ်ႇတင်းတၢင်းလူႇမၢၵ်ႇၶဝ်ႈႁူင်းၶဝ်ႈဢၼ်သၢၵ်ႈလူႇၵူႈဝၼ်းၸိူဝ်းၼၼ်ႉတႃႉ။
“ၼႂ်းဝၼ်းလိူၼ်ၸဵတ်းမႂ်ႇဝၼ်းၼိုင်ႈၼၼ်ႉသူတၵ်းလႆႈၸုတုမ်ၵၼ်လႄႈဝႆႈသႃၵူဝ်းၵႂၢႆႇၽြႃးပဵၼ်ၸဝ်ႈဢေႃႈ။ ၼႂ်းဝၼ်းၼၼ်ႉသူဢမ်ႇလႆႈႁဵတ်းၵၢၼ်ငၢၼ်းၵႃႈသင်လႃးလႃး။ ပဵၼ်ဝၼ်းဢၼ်တၵ်းလႆႈပဝ်ႇၼႄးၶရႃႇဢေႃႈ။-
သူတၵ်းလႆႈႁဵတ်းတၢင်းလူႇဢၼ်တုတ်ႇၽႆးၵႃႈတီႈ ထႃႇဝရႃႉၽြႃး၊ ပုၼ်ႈဢၢႆႁွမ်ဢၢႆႁူၺ်းမၼ်းထုၵ်ႇၸႂ်မႅၼ်ႈၸႂ်မၼ်းၸဝ်ႈ၊ဢၼ်ဢဝ်ဝူဝ်းပေႃႈဢွၼ်ႇဢၼ်ဢသၢၵ်ႈယင်းၼုမ်ႇၼၼ်ႉတူဝ်ၼိုင်ႈ၊သူဝ်းပေႃႈတူဝ်ၼိုင်ႈတင်းသူဝ်းပေႃႈဢွၼ်ႇဢၼ်ဢသၢၵ်ႈလႆႈပီၼိုင်ႈဢၼ်ဢၢင်ႇၵႃႇၸုင်ႇၸဵတ်းတူဝ်ၼၼ်ႉတႃႉ။-
သမ်ႉတၵ်းလႆႈႁဵတ်းတၢင်းလူႇမၢၵ်ႇၶဝ်ႈႁူင်းၶဝ်ႈဢၼ်ဝႃႈၽွင်ၶဝ်ႈၵျုင်ႇႁူၵ်းၶၼ်ၼွၵ်းလေႃးၼမ်ႉမၼ်းမၢၵ်ႇသၢၼ်ႇလုၼ်ႇၼၼ်ႉသၢၵ်ႈလူႇလူၺ်ႈၵၼ်တင်းဝူဝ်းပေႃႈၼၼ်ႉဢိၵ်ႇတင်းၽွင်ၶဝ်ႈၵျုင်ႇႁူၵ်းၶၼ်လူၺ်ႈၵၼ်တင်းသူဝ်းပေႃႈၼၼ်ႉ၊-
တင်းၽွင်ၶဝ်ႈၵျုင်ႇသၢမ်ၶၼ်လူၺ်ႈၵၼ်တင်းသူဝ်းပေႃႈဢွၼ်ႇၼၼ်ႉယေႈတူဝ်ႁႂ်ႈမိူၼ်မိူၼ်ၵၼ်ဢေႃႈ။-
ပႄႉပေႃႈတူဝ်ၼိုင်ႈၵေႃႈ တၵ်းလႆႈသၢၵ်ႈလူႇႁႂ်ႈပဵၼ်တၢင်းလူႇဢၼ်ၽေႇဢပျတ်ႈပုၼ်ႈတၵ်းပဵၼ်တၢင်းဢၼ်ပွႆႇလွတ်ႈဢပျတ်ႈၵူၼ်းတင်းလၢႆဢေႃႈ။-
တၵ်းလႆႈဢဝ်တၢင်းလူႇၸိူဝ်းၼႆႉထၢပ်ႈထႅင်ႈၵႃႈတီႈတၢင်းလူႇဢၼ်တုတ်ႇၽႆးဢၼ်သၢၵ်ႈလူႇၼႂ်းဝၼ်းလိူၼ်မႂ်ႇႁူမ်ႈလူၺ်ႈၵၼ်တင်းတၢင်းလူႇမၢၵ်ႇၶဝ်ႈႁူင်းၶဝ်ႈဢၼ်ႁဵတ်းယူႇသေႇသေႇ၊ဢိၵ်ႇတင်းတၢင်းလူႇဢၼ်တုတ်ႇၽႆးဢၼ်ႁဵတ်းယူႇၵူႈဝၼ်းႁူမ်ႈလူၺ်ႈၵၼ်တင်းတၢင်းလူႇမၢၵ်ႇၶဝ်ႈႁူင်းၶဝ်ႈမၼ်းတင်းတၢင်းလူႇဢၼ်သွၼ်းလေႃႇၼမ်ႉမၢၵ်ႇၸပိတ်ႉမၼ်းၼၼ်ႉဢေႃႈ။ တၢင်းလူႇဢၼ်ႁဵတ်းလူၺ်ႈၽႆးၸိူဝ်းၼႆႉပဵၼ်ဢၢႆႁွမ်ဢၢႆႁူၺ်းဢၼ်ထုၵ်ႇၸႂ်မႅၼ်ႈၸႂ် ထႃႇဝရႃႉၽြႃး၊ ဢေႃႈ။
“ၼႂ်းလိူၼ်ၸဵတ်းလႆႈသိပ်းဝၼ်းၼၼ်ႉသူတၵ်းလႆႈၸုတုမ်ၵၼ်ဝႆႈသႃၵူဝ်းၵႂၢႆႇၽြႃးပဵၼ်ၸဝ်ႈဢေႃႈ။ တၵ်းဢမ်ႇလႆႈၵိၼ်တၢင်းၵိၼ်လႄႈဢမ်ႇလႆႈႁဵတ်းၵၢၼ်ႁဵတ်းငၢၼ်းၵႃႈသင်လႃးလႃး။-
သူတၵ်းလႆႈႁဵတ်းတၢင်းလူႇဢၼ်တုတ်ႇၽႆးတီႈ ထႃႇဝရႃႉၽြႃး၊ ဢၼ်ဢၢႆႁွမ်ဢၢႆႁူၺ်းမၼ်းထုၵ်ႇၸႂ်မႅၼ်ႈၸႂ်မၼ်းၸဝ်ႈ၊ဢၼ်ဢဝ်ဝူဝ်းပေႃႈဢွၼ်ႇဢသၢၵ်ႈယင်းၼုမ်ႇၼၼ်ႉတူဝ်ၼိုင်ႈ၊သူဝ်းပေႃႈတူဝ်ၼိုင်ႈတင်းသူဝ်းပေႃႈဢွၼ်ႇဢၼ်ဢသၢၵ်ႈလႆႈပီၼိုင်ႈဢၼ်ဢၢင်ႇၵႃႇၸုင်ႇၸဵတ်းတူဝ်ၼၼ်ႉဢေႃႈ။-
သမ်ႉတၵ်းလႆႈႁဵတ်းတၢင်းလူႇမၢၵ်ႇၶဝ်ႈႁူင်းၶဝ်ႈဢၼ်ဝႃႈ၊ၽွင်ၶဝ်ႈၵျုင်ႇၵဝ်ႈၶၼ်ၼွၵ်းလေႃးၼမ်ႉမၼ်းမၢၵ်ႇသၢၼ်ႇလုၼ်ႇၼၼ်ႉသၢၵ်ႈလူႇလူၺ်ႈၵၼ်တင်းဝူဝ်းပေႃႈၼၼ်ႉ၊ဢိၵ်ႇတင်းၽွင်ၶဝ်ႈၵျုင်ႇႁူၵ်းၶၼ်လူၺ်ႈၵၼ်တင်းသူဝ်းပေႃႈ၊-
တင်းၽွင်ၶဝ်ႈၵျုင်ႇသၢမ်ၶၼ်လူၺ်ႈၵၼ်တင်းသူဝ်းပေႃႈဢွၼ်ႇၼၼ်ႉယေႈတူဝ်ႁႂ်ႈမိူၼ်မိူၼ်ၵၼ်တႃႉ။-
ပႄႉပေႃႈတူဝ်ၼိုင်ႈၵေႃႈတၵ်းလႆႈသၢၵ်ႈလူႇႁႂ်ႈပဵၼ်တၢင်းလူႇဢၼ်ၽေႇဢပျတ်ႈၼၼ်ႉထၢပ်ႈထႅင်ႈၵႃႈတီႈတၢင်းလူႇဢၼ်ပွႆႇလွတ်ႈဢပျတ်ႈၵူၼ်းတင်းလၢႆၼၼ်ႉ၊ဢိၵ်ႇတင်းတၢင်းလူႇဢၼ်တုတ်ႇၽႆးဢၼ်ႁဵတ်းယူႇၵူႈဝၼ်းႁူမ်ႈလူၺ်ႈၵၼ်တင်းတၢင်းလူႇမၢၵ်ႇၶဝ်ႈႁူင်းၶဝ်ႈဢိၵ်ႇတင်းတၢင်းလူႇဢၼ်သွၼ်းလေႃႇၼမ်ႉမၢၵ်ႇၸပိတ်ႉၼၼ်ႉတႃႉ။
“တႄႇဢဝ်ၼႂ်းလိူၼ်ၸဵတ်းလႆႈသိပ်းႁႃႈဝၼ်းလႄႈသူတၵ်းလႆႈၸုတုမ်ၵၼ်ဝႆႈသႃၵူဝ်းၵႂၢႆႇၽြႃးပဵၼ်ၸဝ်ႈယူႇလႄႈႁဵတ်းပွႆးထမ်ႇမႃႉပုၼ်ႈ ထႃႇဝရႃႉၽြႃး၊ ၸဵတ်းဝၼ်းတဵမ်တဵမ်ဢေႃႈ။ သူဢမ်ႇလႆႈႁဵတ်းၵၢၼ်ႁဵတ်းငၢၼ်းၵႃႈသင်လႃးလႃး။-
ၼႂ်းဝၼ်းဢွၼ်တၢင်းၼၼ်ႉသူတၵ်းလႆႈသၢၵ်ႈလူႇတၢင်းလူႇဢၼ်တုတ်ႇၽႆးဢၼ်ဢၢႆႁွမ်ဢၢႆႁူၺ်းမၼ်းထုၵ်ႇၸႂ်မႅၼ်ႈၸႂ် ထႃႇဝရႃႉၽြႃး၊ ဢၼ်ဢဝ်ဝူဝ်းပေႃႈဢွၼ်ႇဢသၢၵ်ႈယင်းၼုမ်ႇၼၼ်ႉသိပ်းသၢမ်တူဝ်၊သူဝ်းပေႃႈသွင်တူဝ်တင်းသူဝ်းပေႃႈဢွၼ်ႇဢၼ်ဢသၢၵ်ႈလႆႈပီၼိုင်ႈဢၼ်လွတ်ႈသေတၢင်းဢၼ်ၸိဢၼ်ၼႄးသိပ်းသီႇတူဝ်ၼၼ်ႉတႃႉ။-
သမ်ႉတၵ်းလႆႈႁဵတ်းတၢင်းလူႇမၢၵ်ႇၶဝ်ႈႁူင်းၶဝ်ႈဢၼ်ဝႃႈ၊ၽွင်ၶဝ်ႈၵျုင်ႇၵဝ်ႈၶၼ်ၼွၵ်းလေႃးၼမ်ႉမၼ်းမၢၵ်ႇသၢၼ်ႇလုၼ်ႇၼၼ်ႉသၢၵ်ႈလူႇလူၺ်ႈၵၼ်တင်းဝူဝ်းပေႃႈယေႈတူဝ်၊ဢိၵ်ႇတင်းၽွင်ၶဝ်ႈၵျုင်ႇႁူၵ်းၶၼ်လူၺ်ႈၵၼ်တင်းသူဝ်းပေႃႈယေႈတူဝ်၊-
တင်းၽွင်ၶဝ်ႈၵျုင်ႇသၢမ်ၶၼ်ဢိၵ်ႇတင်းသူဝ်းပေႃႈဢွၼ်ႇယေႈတူဝ်ဢဝ်သၢၵ်ႈလူႇႁူမ်ႈလူၺ်ႈၵၼ်တင်းတၢင်းလူႇဢၼ်သွၼ်းလေႃႇၼမ်ႉမၢၵ်ႇၸပိတ်ႉၼၼ်ႉတႃႉ။-
ပႄႉပေႃႈတူဝ်ၼိုင်ႈၵေႃႈသမ်ႉတၵ်းလႆႈသၢၵ်ႈလူႇႁႂ်ႈပဵၼ်တၢင်းလူႇဢၼ်ၽေႇဢပျတ်ႈဢေႃႈ။ သၢၵ်ႈလူႇတၢင်းလူႇၸိူဝ်းၼႆႉထၢပ်ႈထႅင်ႈၵႃႈတီႈတၢင်းလူႇဢၼ်တုတ်ႇၽႆးဢၼ်ႁဵတ်းယူႇၵူႈဝၼ်းႁူမ်ႈလူၺ်ႈၵၼ်တင်းတၢင်းလူႇမၢၵ်ႇၶဝ်ႈႁူင်းၶဝ်ႈဢိၵ်ႇတင်းတၢင်းလူႇဢၼ်သွၼ်းလေႃႇၼမ်ႉမၢၵ်ႇၸပိတ်ႉမၼ်းၼၼ်ႉတႃႉ။
“ၼႂ်းဝၼ်းတီႈသွင်ၼၼ်ႉတၵ်းလႆႈသၢၵ်ႈလူႇဝူဝ်းပေႃႈဢွၼ်ႇဢၼ်ဢသၢၵ်ႈယင်းၼုမ်ႇၼၼ်ႉသိပ်းသွင်တူဝ်၊သူဝ်းပေႃႈသွင်တူဝ်တင်းသူဝ်းပေႃႈဢွၼ်ႇဢၼ်ဢသၢၵ်ႈလႆႈပီၼိုင်ႈဢၼ်လွတ်ႈသေတၢင်းဢၼ်ၸိဢၼ်ၼႄးသိပ်းသီႇတူဝ်လႄႈ။-
“ၼႂ်းဝၼ်းတီႈသၢမ်ၼၼ်ႉတၵ်းလႆႈသၢၵ်ႈလူႇဝူဝ်းပေႃႈဢွၼ်ႇဢသၢၵ်ႈယင်းၼုမ်ႇၼၼ်ႉသိပ်းဢဵတ်းတူဝ်၊သူဝ်းပေႃႈသွင်တူဝ်တင်းသူဝ်းပေႃႈဢွၼ်ႇဢၼ်ဢသၢၵ်ႈလႆႈပီၼိုင်ႈလႄႈလွတ်ႈသေတၢင်းဢၼ်ၸိၼႄးၼၼ်ႉသိပ်းသီႇတူဝ်ဢေႃႈ။-
“ၼႂ်းဝၼ်းတီႈသီႇၼၼ်ႉတၵ်းလႆႈသၢၵ်ႈလူႇဝူဝ်းပေႃႈဢွၼ်ႇဢၼ်ဢသၢၵ်ႈယင်းၼုမ်ႇၼၼ်ႉသိပ်းတူဝ်၊သူဝ်းပေႃႈသွင်တူဝ်ဢိၵ်ႇတင်းသူဝ်းပေႃႈဢွၼ်ႇဢၼ်ဢသၢၵ်ႈလႆႈပီၼိုင်ႈလႄႈလွတ်ႈသေတၢင်းဢၼ်ၸိဢၼ်ၼႄးၼၼ်ႉသိပ်းသီႇတူဝ်လႄႈ။-
“ၼႂ်းဝၼ်းတီႈႁႃႈၼၼ်ႉတၵ်းလႆႈသၢၵ်ႈလူႇဝူဝ်းပေႃႈဢွၼ်ႇဢၼ်ဢသၢၵ်ႈယင်းၼုမ်ႇၼၼ်ႉၵဝ်ႈတူဝ်၊သူဝ်းပေႃႈသွင်တူဝ်တင်းသူဝ်းပေႃႈဢွၼ်ႇဢၼ်ဢသၢၵ်ႈလႆႈပီၼိုင်ႈလႄႈလွတ်ႈသေတၢင်းဢၼ်ၸိဢၼ်ၼႄးၼၼ်ႉသိပ်းသီႇတူဝ်လႄႈ။-
“ၼႂ်းဝၼ်းတီႈႁူၵ်းၼၼ်ႉတၵ်းလႆႈသၢၵ်ႈလူႇဝူဝ်းပေႃႈဢွၼ်ႇဢၼ်ဢသၢၵ်ႈယင်းၼုမ်ႇၼၼ်ႉပႅတ်ႇတူဝ်၊သူဝ်းပေႃႈသွင်တူဝ်ဢိၵ်ႇတင်းသူဝ်းပေႃႈဢွၼ်ႇဢၼ်ဢသၢၵ်ႈလႆႈပီၼိုင်ႈလႄႈလွတ်ႈသေတၢင်းဢၼ်ၸိဢၼ်ၼႄးၼၼ်ႉသိပ်းသီႇတူဝ်လႄႈ။-
“ၼႂ်းဝၼ်းတီႈၸဵတ်းၼၼ်ႉတၵ်းလႆႈသၢၵ်ႈလူႇဝူဝ်းပေႃႈဢွၼ်ႇဢၼ်ဢသၢၵ်ႈယင်းၼုမ်ႇၼၼ်ႉၸဵတ်းတူဝ်၊သူဝ်းပေႃႈသွင်တူဝ်တင်းသူဝ်းပေႃႈဢွၼ်ႇဢၼ်ဢသၢၵ်ႈလႆႈပီၼိုင်ႈလႄႈလွတ်ႈသေတၢင်းဢၼ်ၸိဢၼ်ၼႄးၼၼ်ႉသိပ်းသီႇတူဝ်လႄႈ။-
“ၼႂ်းဝၼ်းတီႈပႅတ်ႇၼၼ်ႉသူတၵ်းလႆႈၸုတုမ်ၵၼ်ဝႆႈသႃၵူဝ်းၵႂၢႆႇၽြႃးပဵၼ်ၸဝ်ႈလႄႈ၊ဢမ်ႇလႆႈႁဵတ်းၵၢၼ်ႁဵတ်းငၢၼ်းၵႃႈသင်လႃးလႃး။-
သူတၵ်းလႆႈႁဵတ်းတၢင်းလူႇဢၼ်တုတ်ႇၽႆးဢၢႆႁွမ်ဢၢႆႁူၺ်းဢၼ်ထုၵ်ႇၸႂ်မႅၼ်ႈၸႂ် ထႃႇဝရႃႉၽြႃး၊ ဢၼ်တေလႆႈဢဝ်ဝူဝ်းပေႃႈဢွၼ်ႇဢၼ်ဢသၢၵ်ႈယင်းၼုမ်ႇၼၼ်ႉတူဝ်ၼိုင်ႈ၊သူဝ်းပေႃႈတူဝ်ၼိုင်ႈတင်းသူဝ်းပေႃႈဢွၼ်ႇဢၼ်ဢသၢၵ်ႈလႆႈပီၼိုင်ႈလႄႈလွတ်ႈသေတၢင်းဢၼ်ၸိၼႄးၼၼ်ႉၸဵတ်းတူဝ်လႄႈ။-
“ၶိူင်ႈတၢင်းလူႇၸိူဝ်းၼႆႉၸိုင်၊သူတၵ်းလႆႈသၢၵ်ႈလူႇတီႈ ထႃႇဝရႃႉၽြႃး၊ ၼႂ်းပွႆးဢၼ်မၵ်းၶၢၼ်းၶိင်ႇမၼ်းၶႃႇမၼ်းဝႆႉၸိူဝ်းၼၼ်ႉထၢပ်ႈထႅင်ႈၵႃႈတီႈတၢင်းလူႇဢၼ်ႁဵတ်းၵတိသဵတ်ႈၸႃႇဢိၵ်ႇတင်းတၢင်းလူႇဢၼ်ႁဵတ်းၸွမ်းဢလူဝ်ႇၵၢင်ၸႂ်သူၸိူဝ်းၼၼ်ႉပုၼ်ႈတၢင်းလူႇဢၼ်တုတ်ႇၽႆးဢိၵ်ႇတင်းတၢင်းလူႇမၢၵ်ႇၶဝ်ႈႁူင်းၶဝ်ႈဢိၵ်ႇတင်းတၢင်းလူႇဢၼ်သွၼ်းလေႃႇၼမ်ႉမၢၵ်ႇၸပိတ်ႉဢိၵ်ႇတင်းတၢင်းလူႇမိၵ်ႈသႁႃႇယႃႉမၼ်းၸိူဝ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈသင်ႇလၢတ်ႈၵူၼ်းမဵဝ်း ဢိသရေး၊ တင်းလၢႆၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉတီႈမၼ်းၼၼ်ႉဢေႃႈ။
မူဝ်းသေႇ၊ သင်ႇလၢတ်ႈတီႈၵူၼ်းဢၼ်ပဵၼ်ၵႄႇပဵၼ်ႁူဝ်ၶိူဝ်းႁိူၼ်းတင်းလၢႆၵႃႈၼႂ်းၵူၼ်းမဵဝ်း ဢိသရေး၊ ၸိူဝ်းၼၼ်ႉလႄႈဝႃႈ၊ “ၵႂၢမ်းၼႆႉၸမ်ႉ၊ပဵၼ်ဢမိင်ႉဢၼ် ထႃႇဝရႃႉၽြႃး၊ သင်ႇလၢတ်ႈဢေႃႈ။-
ပေႃးၵူၼ်းၸၢႆးတိူင်ႇၵၢဝ်ႇဝႆႉၵတိဝႃႈ၊တေပၼ်သေၸိူဝ်ႉသေမဵဝ်းတီႈ ထႃႇဝရႃႉၽြႃး၊ ဢမ်ႇၼၼ်မၼ်းတိူင်ႇၵၢဝ်ႇၵႂၢမ်းသဵတ်ႈၸႃႇဝႃႈ၊တေငိူင်ႉဝႄႈသေၸိူဝ်ႉသေပိူင်ဝႃႈၼႆၸိုင်၊ယင်းဢမ်ႇႁႂ်ႈၵႂၢမ်းၵတိသဵတ်ႈၸႃႇမၼ်းလႆႈလုလႄႈမၼ်းတၵ်းလႆႈႁဵတ်းၸွမ်းၵႃႈၼင်ႇဢၼ်မၼ်းလၢတ်ႈဝႆႉၼၼ်ႉဢေႃႈ။
“မိူဝ်ႈဢၼ်မႄႈယိင်းဢသၢၵ်ႈယင်းၼုမ်ႇ၊ယင်းမီးယူႇၵႃႈတီႈႁိူၼ်းပေႃႈမၼ်းၼၼ်ႉမၼ်းသမ်ႉတိူင်ႇၵၢဝ်ႇၵႂၢမ်းသဵတ်ႈၸႃႇဝႃႈတေပၼ်သေၸိူဝ်ႉသေမဵဝ်းတီႈ ထႃႇဝရႃႉၽြႃး၊ ဢမ်ႇၼၼ်မၼ်းတိူင်ႇၵၢဝ်ႇၵႂၢမ်းသဵတ်ႈၸႃႇဝႃႈ၊တေငိူင်ႉဝႄႈသေၸိူဝ်ႉသေပိူင်ဝႃႈၼႆလႄႈ၊-
ပိၵ်ႉသမ်ႉပေႃႈမၼ်းလႆႈငိၼ်းလွင်ႈတၢင်းၼၼ်ႉသေၵေႃႈယင်းဢမ်ႇႁၢမ်ႈဢမ်ႇၶႅၼ်လႄႈယူႇၸိုင်၊မၼ်းတၵ်းလႆႈႁဵတ်းၸွမ်းၵႃႈဢၼ်မၼ်းတိူင်ႇၵၢဝ်ႇၵႂၢမ်းသဵတ်ႈၸႃႇဝႆႉၼၼ်ႉၵူႈၸိူဝ်ႉၵူႈပိူင်ဢေႃႈ။-
ၵူၺ်းၵႃႈ၊မိူဝ်ႈဢၼ်ပေႃႈမၼ်းလႆႈငိၼ်းသေယဝ်ႉ၊ႁၢမ်ႈမၼ်းၶႅၼ်မၼ်းၸိုင်၊မၼ်းဢမ်ႇလူဝ်ႇပႂ်ႉၸွမ်းၵႂၢမ်းၵတိသဵတ်ႈၸႃႇမၼ်းယဝ်ႉ။ ထႃႇဝရႃႉၽြႃး၊ တၵ်းပွႆႇၶႂၢင်းပၼ်မၼ်းၵွပ်ႈပိူဝ်ႈပေႃႈမၼ်းႁၢမ်ႈဝႆႉၼၼ်ႉဢေႃႈ။
“ပေႃးမႄႈယိင်းဢၼ်ဢမ်ႇမီးၽူဝ်ႁဵတ်းတၢင်းဢၼ်တိူင်ႇၵၢဝ်ႇၵႂၢမ်းသဵတ်ႈၸႃႇတႄႉတႄႉဝႃႈဝႃႈလႄႈ၊ယင်းဢမ်ႇၶႆႈၸႂ်ၸဵၼ်းၸႃးလီလီလႄႈလၢတ်ႈဝႃႈ၊တေငိူင်ႉဝႄႈဝႃႈၼႆသေၵေႃႈသမ်ႉဢဝ်ၽူဝ်လႄႈ၊-
ပိၵ်ႉသမ်ႉၽူဝ်မၼ်းလႆႈငိၼ်းလွင်ႈတၢင်းၼၼ်ႉသေၵေႃႈယင်းဢမ်ႇႁၢမ်ႈဢမ်ႇၶႅၼ်လႄႈယူႇၸိုင်၊မၼ်းတၵ်းလႆႈႁဵတ်းၸွမ်းၵႃႈဢၼ်မၼ်းတိူင်ႇၵၢဝ်ႇၵႂၢမ်းသဵတ်ႈၸႃႇဝႆႉၼၼ်ႉၵူႈၸိူဝ်ႉၵူႈပိူင်ဢေႃႈ။-
ၵူၺ်းၵႃႈ၊မိူဝ်ႈဢၼ်ၽူဝ်မၼ်းလႆႈငိၼ်းလွင်ႈတၢင်းၼၼ်ႉသေလႄႈႁၢမ်ႈမၼ်းၶႅၼ်မၼ်းၸိုင်၊မၼ်းဢမ်ႇလူဝ်ႇပႂ်ႉၸွမ်းၵႂၢမ်းၵတိသဵတ်ႈၸႃႇမၼ်းယဝ်ႉ။ ထႃႇဝရႃႉၽြႃး၊ တၵ်းပွႆႇၶႂၢင်းပၼ်မၼ်းဢေႃႈ။
“မႄႈမၢႆႈဢမ်ႇၼၼ်မႄႈႁၢင်ႉၸိုင်၊တၵ်းလႆႈႁဵတ်းၸွမ်းၵႃႈဢၼ်မၼ်းတိူင်ႇၵၢဝ်ႇၵႂၢမ်းၵတိသဵတ်ႈၸႃႇဝႆႉဢိၵ်ႇတင်းၵႃႈဢၼ်မၼ်းဝႆႉၵတိသဵတ်ႈၸႃႇဝႃႈ၊တေငိူင်ႉဝႄႈၵူႈၸိူဝ်ႉၵူႈပိူင်ဢေႃႈ။
“ပေႃးမႄႈယိင်းဢၼ်မီးၽူဝ်ႁဵတ်းတၢင်းဢၼ်တိူင်ႇၵၢဝ်ႇသဵတ်ႈၸႃႇဢမ်ႇၼၼ်ဝႆႉၵတိဝႃႈ၊တေငိူင်ႉဝႄႈသေၸိူဝ်ႉသေပိူင်ၸိုင်၊-
ပိၵ်ႉသမ်ႉ၊ၽူဝ်မၼ်းလႆႈငိၼ်းလွင်ႈတၢင်းၼၼ်ႉသေၵေႃႈယင်းဢမ်ႇႁၢမ်ႈဢမ်ႇၶႅၼ်လႄႈယူႇၸိုင်၊မၼ်းတၵ်းလႆႈႁဵတ်းၸွမ်းၵႃႈဢၼ်မၼ်းတိူင်ႇဝႃႈဝႆႉၼၼ်ႉၵူႈၸိူဝ်ႉၵူႈပိူင်ဢေႃႈ။-
ၵူၺ်းၵႃႈ၊မိူဝ်ႈဢၼ်ၽူဝ်မၼ်းလႆႈငိၼ်းလွင်ႈတၢင်းၼၼ်ႉလႄႈႁၢမ်ႈမၼ်းၶႅၼ်မၼ်းၸိုင်၊မၼ်းဢမ်ႇလူဝ်ႇပႂ်ႉၵႂၢမ်းၵတိသဵတ်ႈၸႃႇမၼ်းယဝ်ႉ။ ထႃႇဝရႃႉၽြႃး၊ တၵ်းပွႆႇၶႂၢင်းပၼ်မၼ်းၵွပ်ႈပိူဝ်ႈၽူဝ်မၼ်းႁႄႉၶႅၼ်ဝႆႉၼၼ်ႉဢေႃႈ။-
ၵႃႈဢၼ်မၼ်းတိူင်ႇမၼ်းၵၢဝ်ႇၵႂၢမ်းၵတိသဵတ်ႈၸႃႇမဵဝ်းလႂ်သေဢမ်ႇဝႃႈ၊ၽူဝ်မၼ်းမီးဢၶႂၢင်ႉႁႂ်ႈမၼ်းႁဵတ်းၸွမ်း၊ဢမ်ႇၼၼ်မီးဢၶႂၢင်ႉႁႂ်ႈမၼ်းပႄႇပႅတ်ႈၵူႈၸိူဝ်ႉၵူႈမဵဝ်းလႆႈဢေႃႈ။-
ၵူၺ်းၵႃႈ၊တႄႇဢဝ်ၸဵမ်ဝၼ်းဢၼ်ၽူဝ်မၼ်းလႆႈငိၼ်းလွင်ႈတၢင်းဢၼ်မၼ်းတိူင်ႇဝႃႈၵႂၢမ်းသဵတ်ႈၸႃႇၼၼ်ႉလႄႈယင်းဢမ်ႇႁၢမ်ႈဢမ်ႇၶႅၼ်လႄႈယူႇၸိုင်၊မၼ်းတၵ်းလႆႈႁဵတ်းၸွမ်းၵႃႈဢၼ်မၼ်းတိူင်ႇဝႃႈဝႆႉၼၼ်ႉၵူႈၸိူဝ်ႉၵူႈပိူင်ဢေႃႈ။ ၽူဝ်မၼ်းႁႂ်ႈၵႂၢမ်းၵတိၼၼ်ႉတႄႇမၼ်ႈၵွပ်ႈပိူဝ်ႈဢၼ်တူဝ်ၸဝ်ႈၵဝ်ႇဢမ်ႇႁၢမ်ႈမၼ်းၼႂ်းဝၼ်းဢၼ်လႆႈငိၼ်းၼၼ်ႉဢေႃႈ။-
ၵူၺ်းၵႃႈ၊လိုၼ်းသေဝၼ်းဢၼ်လႆႈငိၼ်းၵႂၢမ်းၼၼ်ႉယဝ်ႉၸင်ႇ၊ပေႃးၽူဝ်မၼ်းသမ်ႉႁဵတ်းႁႂ်ႈမၼ်းပႄႇပႅတ်ႈၸိုင်၊ၽူဝ်မၼ်းတၵ်းလႆႈၶၢမ်ႇဢပျတ်ႈဢၼ်ဢမ်ႇလႆႈႁဵတ်းၸွမ်းၵတိမၼ်းၼၼ်ႉယဝ်ႉ၊ဝႃႈၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။
ၸိူဝ်းၼႆႉၸိုင်၊ပဵၼ်ထုင်းၽိင်ႈတြႃးဢၼ် ထႃႇဝရႃႉၽြႃး၊ သင်ႇလၢတ်ႈဝႆႉတီႈ မူဝ်းသေႇ၊ လူၺ်ႈတၢင်းဢၼ်တိူင်ႇၵၢဝ်ႇၵတိသဵတ်ႈၸႃႇၵႃႈတီႈၵႄႈဝူင်ႈၵၢင်ၽူဝ်တင်းမေး၊ၵႃႈတီႈၵႄႈဝူင်ႈၵၢင်ပေႃႈတင်းလုၵ်ႈယိင်းဢၼ်ယင်းၼုမ်ႇလႄႈယင်းမီးယူႇၵႃႈတီႈႁိူၼ်းပေႃႈမၼ်းၼၼ်ႉဢေႃႈ။
ၸဝ်ႈထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ လႄႈဝႃႈ၊-
“တွပ်ႇတႅၼ်းၶိုၼ်းဢပျတ်ႈတီႈၵူၼ်းမဵဝ်း မိတျၼ်ႇ၊ တင်းလၢႆပုၼ်ႈဢၼ်ၶဝ်ႁဵတ်းၵႃႈတီႈၵူၼ်းမဵဝ်း ဢိသရေး၊ ၼၼ်ႉတႃႉ။ ဝၢႆးသေဢၼ်မႂ်းႁဵတ်းယဝ်ႉၼၼ်ႉၸိုင်၊မႂ်းတၵ်းလႆႈတၢႆဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈလၢတ်ႈတီႈၵူၼ်းတင်းလၢႆလႄႈဝႃႈ၊ “ႁႅၼ်းတပ်ႉသိုၵ်းပုၼ်ႈဢၼ်တၵ်းၵႂႃႇတိုၵ်းတေႃးၵူၼ်းမဵဝ်း မိတျၼ်ႇ၊ ၶဝ်ႁႂ်ႈလႆႈတွပ်ႇတႅၼ်းၶိုၼ်းဢပျတ်ႈဢၼ်ၶဝ်ႁဵတ်းၽိတ်းတီႈ ထႃႇဝရႃႉၽြႃး၊ ၼၼ်ႉတႃႉႁဝ်း။-
ၼႂ်းၶိူဝ်းႁိူၼ်းၵႃႈၼႂ်းၵူၼ်းမဵဝ်း ဢိသရေး၊ တင်းမူတ်းၼၼ်ႉတၵ်းလႆႈပွႆႇၸႂ်ႉၵူၼ်းသိုၵ်းမႃးယေႈမဵဝ်းယေႈႁဵင်ၵေႃႉဢေႃႈ၊” ဝႃႈၼင်ႇၼႆဢေႃႈ။
ၼႂ်းၵူၼ်းမဵဝ်း ဢိသရေး၊ ဢၼ်ပဵၼ်မိုၼ်ႇပဵၼ်သႅၼ်ၼၼ်ႉၶဝ်လိူၵ်ႈဢဝ်ၵူၼ်းသိုၵ်းၼႂ်းၶိူဝ်းႁိူၼ်းယေႈမဵဝ်းယေႈႁဵင်လႄႈ၊ၵူၼ်းသိုၵ်းဢၼ်ယိပ်းလၢၵ်ႈၼၢၵ်ႈႁႅၼ်းဝႆႉပုၼ်ႈၼႃႈသိုၵ်းၼၼ်ႉတင်းသဵင်ႈတင်းမူတ်းမီးမိုၼ်ႇပၢႆသွင်ႁဵင်ၵေႃႉဢေႃႈ။-
မူဝ်းသေႇ၊ ပွႆႇၸႂ်ႉတပ်ႉသိုၵ်းၸိူဝ်းၼၼ်ႉၵႂႃႇတႂ်ႈမိုဝ်း ၽိၼႁတ်ႉ၊ လုၵ်ႈၸၢႆးယဵၸ်ႈပရေႃးႁဵၵ်ႈ ဢေးလႃႇၸႃႇ၊ ၼၼ်ႉႁဵတ်းၶုၼ်သိုၵ်းၶဝ်ဢေႃႈ။ ၽိၼႁတ်ႉ၊ ၼၼ်ႉပဵၼ်ၵေႃႉဢၼ်ၵွၼ်းၶိူင်ႈပိူင်ထႃႇၼႃႉတီႈမူတ်းၸၢင်ႇတင်းလၢႆဢိၵ်ႇတင်းၼႄးၶရႃႇဢၼ်တၵ်းပဝ်ႇၼၼ်ႉဢေႃႈ။-
ၶဝ်တိုၵ်းတေႃးၵူၼ်းမဵဝ်း မိတျၼ်ႇ၊ ၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉတီႈ မူဝ်းသေႇ၊ ၼၼ်ႉသေယဝ်ႉ၊ဢဝ်ၵူၼ်းၸၢႆးတင်းသဵင်ႈတင်းလူင်တၢႆဢေႃႈ။-
ၶဝ်ဢဝ်တၢႆပႃးၶုၼ်လူင် မိတျၼ်ႇ၊ ၶဝ်ႁႃႈပႃးဢၼ်ပဵၼ်ၶုၼ်လူင် ဢေးဝိ၊ ၶုၼ်လူင် ရေႇၵိမ်ႇ၊ ၶုၼ်လူင် ၸုရႃႉ၊ ၶုၼ်လူင် ႁုရႃႉ၊ တင်းၶုၼ်လူင် ရေးၽႃႉ၊ ဢေႃႈ။ ပႃႇလၢမ်ႇ၊ လုၵ်ႈၸၢႆး ပေႃးရႃႉ၊ ၼၼ်ႉၵေႃႈၶဝ်ဢဝ်လႅဝ်းၽၼ်းတၢႆဢေႃႈ။
ၵူၼ်းမဵဝ်း ဢိသရေး၊ ၸိူဝ်းၼၼ်ႉတိလႆႈမႄႈယိင်း မိတျၼ်ႇ၊ ၶဝ်ဢိၵ်ႇတင်းလုၵ်ႈဢွၼ်ႇလၢင်းဢွၼ်ႇၶဝ်သေလႄႈသိမ်းဢဝ်တရိၵ်ႈသၢၼ်ႇၶဝ်၊ၽုင်သူဝ်းၽုင်ပႄႉၶဝ်၊ဢုၵ်ႉၸႃႇၶူဝ်းလဵင်းၶဝ်ၵႃႈမီးတင်းသဵင်ႈတင်းလူင်ဢေႃႈ။-
ၶဝ်ဢဝ်ၽႆးၽဝ်ဝဵင်းတင်းလၢႆတင်းပၢင်တပ်ႉတင်းလၢႆပႅတ်ႈသေဢေႃႈ။-
ၶဝ်သိမ်းဢဝ်ဢုၵ်ႉၸႃႇဢၼ်ႁိမ်ႁူင်ႇလႆႈၵႃႈမီးဢိၵ်ႇတင်းၵႃႈဢၼ်တိလႆႈၸႃႉၸဵမ်ၵူၼ်းတင်းတရိၵ်ႈသၢၼ်ႇတင်းလၢႆသေလႄႈ၊-
ဢဝ်ၸိူဝ်းၼၼ်ႉမႃးၵႃႈတီႈ မူဝ်းသေႇ၊ တင်း ဢေးလႃႇၸႃႇ၊ ဢိၵ်ႇတင်းမူႇၵူၼ်းၸိူဝ်းၵူၼ်း ဢိသရေး၊ တင်းလၢႆၸိူဝ်းဢၼ်မီးဝႆႉယူႇၵႃႈၼႂ်းပၢင်တပ်ႉၵႃႈတီႈပၢင်ႇပဵင်းမိူင်း မေႃႇၽႃႉ၊ ၽၢႆႇၼႆႉၽင်ႇၼမ်ႉ ယေႃးတၢၼ်ႇ၊ သိုဝ်ႈဝဵင်း ယေႇရိၶူဝ်း၊ ၼၼ်ႉဢေႃႈ။
မူဝ်းသေႇ၊ တင်း ဢေးလႃႇၸႃႇ၊ ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ပရိၵ်ႈသၢတ်ႈတင်းလၢႆဢွၼ်ၵၼ်ဢွၵ်ႇပၢင်တပ်ႉၵႂႃႇႁပ်ႉႁူဝ်တၢင်းတပ်ႉသိုၵ်းၼၼ်ႉဢေႃႈ။-
မူဝ်းသေႇ၊ ၸႂ်မႆႈၶႂ်ႈၸႃႉတီႈၽူႈၵွၼ်းတပ်ႉသိုၵ်းတင်းလၢႆဢၼ်ဝႃႈ၊ၸဝ်ႈႁၢၼ်လူင်ဢၼ်ဢုပ်ႉၵူၼ်းသိုၵ်းယေႈႁဵင်၊ၶုၼ်သိုၵ်းဢၼ်ဢုပ်ႉၵူၼ်းသိုၵ်းယေႈပၢၵ်ႇ၊ၸိူဝ်းဢၼ်ပွၵ်ႈသေၵႃႈတီႈၼႃႈသိုၵ်းၶိုၼ်းမႃးၼၼ်ႉဢေႃႈ။-
မူဝ်းသေႇ၊ လၢတ်ႈလႄႈဝႃႈ၊ “ႁဵတ်းသင်လႄႈသူဝႆႉၵိုတ်းမႄႈယိင်းတင်းလၢႆဢသၢၵ်ႈၵတ်းယဵၼ်ၶျၢမ်းသႃႇယူႇၸိူဝ်ႉၼင်ႇႁိုဝ်။-
ၶႆႈၸႂ်တူၺ်းလူး။ မႄႈယိင်းၸိူဝ်းၼႆႉႁဵတ်းၸွမ်းတၢင်းၵျၢမ်ႇတၢင်းပွင် ပႃႇလၢမ်ႇ၊ လူၺ်ႈၽြႃး ပေႇဢုရႃႉ၊ သေလႄႈႁႂ်ႈၵူၼ်းမဵဝ်း ဢိသရေး၊ တင်းလၢႆၽိတ်းပိူင်ႈ ထႃႇဝရႃႉၽြႃး၊ ယဝ်ႉ။ ၵွပ်ႈပိူဝ်ႈၼႆလႄႈၽေးဢုပၢတ်ႈႁွတ်ႈထိုင်ၵႃႈတီႈၵူၼ်း ထႃႇဝရႃႉၽြႃး၊ ယဝ်ႉဢေႃႈ။-
ပိူဝ်ႈၼႆလႄႈတေႃႈလဵဝ်ၼႆႉဢဝ်တၢႆပႅတ်ႈၵူၼ်းၸၢႆးဢွၼ်ႇတင်းလၢႆဢိၵ်ႇတင်းမႄႈယိင်းဢၼ်ယၢမ်ႈသိူၵ်ႈသမ်ႇၵၼ်တင်းၵူၼ်းၸၢႆးတင်းသဵင်ႈတင်းမူတ်းၸိူဝ်းၼၼ်ႉတႃႉ။-
ၵူၺ်းၵႃႈ၊မႄႈယိင်းဢၼ်ဢမ်ႇယၢမ်ႈသိူၵ်ႈသမ်ႇၵၼ်တင်းၵူၼ်းၸၢႆးတင်းသဵင်ႈတင်းလူင်ၼၼ်ႉၸိုင်၊ဝႆႉပၼ်ဢသၢၵ်ႈၶဝ်ၵတ်းယဵၼ်ၶျၢမ်းသႃႇပုၼ်ႈတူဝ်သူတႃႉ။-
ၼင်ႇၼၼ်လႄႈၵေႃႉဢၼ်ဢဝ်ၵူၼ်းတၢႆ၊ၵေႃႉဢၼ်တိူဝ်ႉထုၵ်ႇတူဝ်တၢႆၼၼ်ႉတင်းသဵင်ႈတင်းလူင်တၵ်းလႆႈယူႇၵႃႈၼွၵ်ႈပၢင်တပ်ႉၸဵတ်းဝၼ်းတဵမ်တဵမ်ဢေႃႈ။ ၼႂ်းဝၼ်းတီႈသၢမ် ဢိၵ်ႇတင်းဝၼ်းတီႈၸဵတ်းၼၼ်ႉႁႂ်ႈတူဝ်သူဢိၵ်ႇတင်းမႄႈယိင်းၸိူဝ်းဢၼ်သူတိလႆႈၼၼ်ႉမူတ်းသႂ်တႃႉ။-
ႁႂ်ႈၶူဝ်းၼုင်ႈသူၵႃႈမီး၊ၶိူင်ႈၶူဝ်းၼင်ၵႃႈမီး၊ၶိူင်ႈပိူင်ဢၼ်ဢဝ်ၶူၼ်ပႄႉတေႃးႁဵတ်းၵႃႈမီး၊ၶိူင်ႈပိူင်ဢၼ်ဢဝ်မႆႉဢဝ်တွၵ်ႇႁဵတ်းၵႃႈမီးၸိူဝ်းၼၼ်ႉမူတ်းသႂ်တႃႉ၊” ဝႃႈၼင်ႇၼႆဢေႃႈ။
ယဵၸ်ႈပရေႃးႁဵၵ်ႈ ဢေးလႃႇၸႃႇ၊ ၵေႃႈသင်ႇလၢတ်ႈတီႈၵူၼ်းသိုၵ်းၸိူဝ်းဢၼ်ပွၵ်ႈၶိုၼ်းမႃးၼၼ်ႉလႄႈဝႃႈ၊ “ထုင်းၽိင်ႈတြႃးဢၼ် ထႃႇဝရႃႉၽြႃး၊ မီးဢမိင်ႉဝႆႉတီႈ မူဝ်းသေႇ၊ လႄႈဝႃႈၸမ်ႉ၊-
ၼႂ်းဝၼ်းထူၼ်ႈတီႈၸဵတ်းၼၼ်ႉသူတၵ်းလႆႈသၵ်ႉၶူဝ်းၼုင်ႈသူဢေႃႈ။ ႁဵတ်းၸိူဝ်ႉၼင်ႇၼၼ်ယဝ်ႉၸင်ႇသူတၵ်းမူတ်းသႂ်လႄႈမီးဢၶႂၢင်ႉဢၼ်လႆႈၶဝ်ႈၵႃႈၼႂ်းပၢင်တပ်ႉဢေႃႈ၊” ဝႃႈၼင်ႇၼႆဢေႃႈ။
ၸဝ်ႈထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ လႄႈဝႃႈ၊-
“မႂ်းတင်းယဵၸ်ႈပရေႃးႁဵၵ်ႈ ဢေးလႃႇၸႃႇ၊ ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ပရိၵ်ႈသၢတ်ႈတင်းလၢႆတၵ်းလႆႈၼပ်ႉဢၢၼ်ႇၵႃႈဢၼ်တိလႆႈသိမ်းဢဝ်မႃးၼၼ်ႉၸႃႉၸဵမ်ၵူၼ်းဢိၵ်ႇတင်းတရိၵ်ႈသၢၼ်ႇတင်းလၢႆဢေႃႈ။-
ၽႄႁဵတ်းသွင်ပုၼ်ႈၽဵင်ႇၽဵင်ႇမႅင်ႇပၼ်ၵူၼ်းသိုၵ်းၸိူဝ်းၼၼ်ႉပုၼ်ႈၼိုင်ႈ၊ပၼ်ပရိၵ်ႈသၢတ်ႈတင်းလၢႆပုၼ်ႈၼိုင်ႈတႃႉ။-
ၵႃႈၼႂ်းပုၼ်ႈဢၼ်ပၼ်တီႈၵူၼ်းသိုၵ်းတင်းလၢႆၼၼ်ႉၸိုင်၊ၽႃႇၵဵပ်းဢဝ်ၶွၼ်ႇမၼ်းပၼ်တီႈ ထႃႇဝရႃႉၽြႃး၊ ၵႃႈၼႂ်းၵူၼ်းႁႃႈပၢၵ်ႇၼၼ်ႉတၵ်းလႆႈဢဝ်ၵေႃႉၼိုင်ႈ၊ဢိၵ်ႇတင်းၵႃႈၼႂ်းဝူဝ်း၊မႃႉလီႈ၊သူဝ်းတင်းပႄႉယေႈမဵဝ်းႁႃႈပၢၵ်ႇၼၼ်ႉတၵ်းလႆႈဢဝ်ယေႈတူဝ်ဢေႃႈ။-
ဢဝ်ၶွၼ်ႇၸိူဝ်းၼၼ်ႉပၼ်တီႈယဵၸ်ႈပရေႃးႁဵၵ်ႈ ဢေးလႃႇၸႃႇ၊ ပုၼ်ႈဢၼ်တၵ်းႁဵတ်းတၢင်းလူႇဢၼ်ယုၵ်ႉယွင်ႈတီႈ ထႃႇဝရႃႉၽြႃး၊ တႃႉ။-
ၵႃႈၼႂ်းပုၼ်ႈဢၼ်ပၼ်တီႈၵူၼ်းမဵဝ်း ဢိသရေး၊ တင်းလၢႆၼၼ်ႉၵေႃႈဢဝ်ၵႃႈၼႂ်းၵူၼ်းႁႃႈသိပ်းၼၼ်ႉတၵ်းလႆႈဢဝ်ယေႈၵေႃႉဢိၵ်ႇတင်းၵႃႈၼႂ်းဝူဝ်း၊မႃႉလီႈ၊ၽုင်သူဝ်း၊ၽုင်ပႄႉတရိၵ်ႈသၢၼ်ႇတင်းသဵင်ႈတင်းလူင်ၼၼ်ႉၵေႃႈႁႂ်ႈမၼ်းမိူၼ်မိူၼ်ၵၼ်တႃႉ။ သမ်ႉဢဝ်ၸိူဝ်းၼၼ်ႉပၼ်တီႈၵူၼ်း လေႇဝိ၊ ဢၼ်လုမ်းလႃးသုမ်ႉထဵင်ၸဝ်ႈ ထႃႇဝရႃႉၽြႃး၊ ၸိူဝ်းၼၼ်ႉတႃႉ၊” ဝႃႈၼင်ႇၼႆဢေႃႈ။-
မူဝ်းသေႇ၊ တင်းယဵၸ်ႈပရေႃးႁဵၵ်ႈ ဢေးလႃႇၸႃႇ၊ ႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈတီႈ မူဝ်းသေႇ၊ ဝႆႉၼၼ်ႉဢေႃႈ။
ၵႃႈဢၼ်ၵူၼ်းသိုၵ်းတင်းလၢႆလႆႈႁပ်ႉဢဝ်ၶိုင်ႈၼိုင်ႈၼၼ်ႉသမ်ႉမီးသူဝ်းတင်းပႄႉသၢမ်သႅၼ်သၢမ်မိုၼ်ႇၸဵတ်းႁဵင်ပၢႆႁႃႈပၢၵ်ႇတူဝ်လႄႈ၊-
ႁူၵ်းပၢၵ်ႇၸဵတ်းသိပ်းပၢႆႁႃႈတူဝ်ပဵၼ်ၶွၼ်ႇဢၼ်ထၢမ်းပၼ်တီႈ ထႃႇဝရႃႉၽြႃး၊ ဢေႃႈ။-
မီးဝူဝ်းသၢမ်မိုၼ်ႇပၢႆႁူၵ်းႁဵင်တူဝ်လႄႈ၊ၸဵတ်းသိပ်းပၢႆသွင်တူဝ်ပဵၼ်ၶွၼ်ႇဢၼ်ထၢမ်းပၼ်တီႈ ထႃႇဝရႃႉၽြႃး၊ ဢေႃႈ။-
မႃႉလီႈမီးသၢမ်မိုၼ်ႇပၢႆႁႃႈပၢၵ်ႇတူဝ်လႄႈ၊ႁူၵ်းသိပ်းဢဵတ်းတူဝ်ပဵၼ်ၶွၼ်ႇဢၼ်ထၢမ်းပၼ်တီႈ ထႃႇဝရႃႉၽြႃး၊ ဢေႃႈ။-
မႄႈယိင်းသၢဝ်ပုၼ်ႈၵူၼ်းသိုၵ်းၸိူဝ်းၼၼ်ႉမီးမိုၼ်ႇပၢႆႁူၵ်းႁဵင်ၵေႃႉလႄႈ၊သၢမ်သိပ်းပၢႆသွင်ၵေႃႉပဵၼ်ၶွၼ်ႇဢၼ်ထၢမ်းပၼ်တီႈ ထႃႇဝရႃႉၽြႃး၊ ဢေႃႈ။-
မူဝ်းသေႇ၊ ၵေႃႈဢဝ်ၶွၼ်ႇဢၼ်ပဵၼ်တၢင်းလူႇဢၼ်ယုၵ်ႉယွင်ႈပုၼ်ႈ ထႃႇဝရႃႉၽြႃး၊ ၼၼ်ႉဢၢပ်ႈပၼ်တီႈယဵၸ်ႈပရေႃးႁဵၵ်ႈ ဢေးလႃႇၸႃႇ၊ ၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈ မူဝ်းသေႇ၊ ဝႆႉၼၼ်ႉဢေႃႈ။
ၵႃႈၼႂ်းဢၼ်ၶဝ်လႆႈတင်းသဵင်ႈတင်းမူတ်းဢၼ်ၸႃႉၸဵမ်ၵူၼ်းတင်းတရိၵ်ႈသၢၼ်ႇၸိူဝ်းၼၼ်ႉ မူဝ်းသေႇ၊ ဢဝ်ႁႃႈသိပ်းပုၼ်ႈပုၼ်ႈၼိုင်ႈပၼ်တီႈၵူၼ်း လေႇဝိ၊ ဢၼ်လုမ်းလႃးသုမ်ႉထဵင်ၸဝ်ႈ ထႃႇဝရႃႉၽြႃး၊ ၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉၼၼ်ႉဢေႃႈ။
မိူဝ်ႈၼၼ်ႉၽူႈၵွၼ်းသိုၵ်းတင်းလၢႆဢၼ်ဝႃႈ၊ၶုၼ်သိုၵ်းလူင်ဢၼ်ဢုပ်ႉၵူၼ်းသိုၵ်းယေႈႁဵင်၊ၶုၼ်သိုၵ်းဢၼ်ဢုပ်ႉၵူၼ်းသိုၵ်းယေႈပၢၵ်ႇၸိူဝ်းၼၼ်ႉဢွၼ်ၵၼ်ၶဝ်ႈၸူးၵႃႈတီႈ မူဝ်းသေႇ၊ သေလႄႈ၊-
လၢတ်ႈလႄႈဝႃႈ၊ “ၸဝ်ႈႁဝ်းတီႈၶႃႈ။ ၶႃႈၸဝ်ႈႁဝ်းၶဝ်ဢွၼ်ၵၼ်ၶိုၼ်းၼပ်ႉဢၢၼ်ႇၵူၼ်းသိုၵ်းၸိူဝ်းဢၼ်ၶႃႈၸဝ်ႈႁဝ်းၶဝ်ဢုပ်ႉၼၼ်ႉလႄႈဢမ်ႇယွမ်းသေၵေႃႉသေၵူၼ်းတီႈၶႃႈ။-
ပိူဝ်ႈၼႆလႄႈၶႃႈၸဝ်ႈႁဝ်းၶဝ်ဢွၼ်ၵၼ်ဢဝ်ၶိူင်ႈၶမ်းလႂ်၊ဝႅၼ်လႂ်၊မွင်းၵူၺ်းလႂ်၊ပေႇႁူလႂ်၊သၢႆၶေႃးလႂ်ၸိူဝ်းဢၼ်ႁဝ်းၶႃႈလႆႈႁင်းၽႂ်ႁင်းမၼ်းၼၼ်ႉမႃးတီႈၶႃႈဢေႃႈ။ ၶႃႈၸဝ်ႈႁဝ်းၶဝ်သၢၵ်ႈလူႇၸိူဝ်းၼႆႉတီႈ ထႃႇဝရႃႉၽြႃး၊ ပုၼ်ႈတၢင်းလူႇဢၼ်တၵ်းၽေႇဝူတ်ႈဢပျတ်ႈၶႃႈၸဝ်ႈႁဝ်းၶဝ်တီႈၶႃႈဢေႃႈ၊” ဝႃႈၼင်ႇၼႆဢေႃႈ။-
မူဝ်းသေႇ၊ တင်းယဵၸ်ႈပရေႃးႁဵၵ်ႈ ဢေးလႃႇၸႃႇ၊ ႁပ်ႉဢဝ်ၶမ်းၸိူဝ်းဢၼ်ႁဵတ်းၶိူင်ႈၶူဝ်းယဝ်ႉၸိူဝ်းၼၼ်ႉၵႃႈမီးတင်းသဵင်ႈတင်းလူင်ဢေႃႈ။-
ၶိူင်ႈလူႇၶိူင်ႈတၢၼ်းဢၼ်ၽူႈၵွၼ်းသိုၵ်းတင်းလၢႆလူႇတၢၼ်းၼၼ်ႉမီးၼမ်ႉၼၵ်းႁူၵ်းသိပ်းပၢႆၸဵတ်းၸွႆႉ ၸမ်ၸမ်ဢေႃႈ။-
ၵူၼ်းသိုၵ်းတင်းလၢႆၸမ်ႉ၊သမ်ႉဢဝ်ဢၼ်ၶဝ်သိမ်းလႆႈမႃးၼၼ်ႉပဵၼ်ပုၼ်ႈတူဝ်ၸဝ်ႈၵဝ်ႇႁင်းၽႂ်ႁင်းမၼ်းဢေႃႈ။-
ပိူဝ်ႈၼႆလႄႈ မူဝ်းသေႇ၊ တင်းယဵၸ်ႈပရေႃးႁဵၵ်ႈ ဢေးလႃႇၸႃႇ၊ ဢဝ်ၶမ်းၸိူဝ်းၼၼ်ႉသႂၢင်းဝႆႉၵႃႈၼႂ်းသုမ်ႉထဵင်ၸဝ်ႈပုၼ်ႈတႃႇ ထႃႇဝရႃႉၽြႃး၊ တၵ်းၶုၵ်းၸႂ်လႆႈၶႆႈၸႂ်ထူပ်းၵူၼ်းမဵဝ်း ဢိသရေး၊ တင်းလၢႆဢေႃႈ။
ၸိူဝ်ႉၶိူဝ်း ရုပိၼ်ႇ၊ တင်းၸိူဝ်ႉၶိူဝ်း ၵၢတ်ႉ၊ ၸိူဝ်းၼၼ်ႉမီးတရိၵ်ႈသၢၼ်ႇၼမ်ၼႃႇဢေႃႈ။ မိူဝ်ႈဢၼ်ၶဝ်ႁၼ်မိူင်း ယႃႇၸႃႇ၊ တင်းမိူင်း ၵိလတ်ႉ၊ ပဵၼ်တီႈဢၼ်လီၼႃႇပုၼ်ႈတရိၵ်ႈသၢၼ်ႇၼၼ်ႉၸိုင်၊-
ၶဝ်ဢွၼ်ၵၼ်ၶဝ်ႈၸူးၵႃႈတီႈ မူဝ်းသေႇ၊ တင်းယဵၸ်ႈပရေႃးႁဵၵ်ႈ ဢေးလႃႇၸႃႇ၊ ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ပရိၵ်ႈသၢတ်ႈတင်းလၢႆၼၼ်ႉလႄႈလဝ်ႈလၢတ်ႈလႄႈဝႃႈ၊-
“ဝဵင်း ဢႃႇတရုတ်ႉ၊ ဝဵင်း တိၽုၼ်ႇ၊ ဝဵင်း ယႃႇၸႃႇ၊ ဝဵင်း ၼိမရႃႉ၊ ဝဵင်း ႁေႇသၽုၼ်ႇ၊ ဝဵင်း ဢေးလႃႇလေး၊ ဝဵင်း သေးၽမ်ႇ၊ ဝဵင်း ၼေႇပေႃႇ၊ တင်းဝဵင်း ပေႃးၼႃႉ၊-
မိူင်းၸိူဝ်းဢၼ် ထႃႇဝရႃႉၽြႃး၊ တိုၵ်းတေႃးယႃႉပႅတ်ႈဢၼ်ႁႂ်ႈၵူၼ်းမဵဝ်း ဢိသရေး၊ လႆႈပိူင်ႇၼႆႉၸိုင်၊ထုၵ်ႇမႅၼ်ႈလီပုၼ်ႈတရိၵ်ႈသၢၼ်ႇႁဝ်းၶႃႈဢေႃႈ။ ၶႃႈၸဝ်ႈႁဝ်းၶဝ်ၸိူဝ်းၼႆႉၵေႃႈမီးတရိၵ်ႈသၢၼ်ႇၼမ်ၼႃႇဢေႃႈ။-
ၶႅၼ်းတေႃႈဢဝ်မိူင်းၼႆႉပၼ်ႁႂ်ႈၶႃႈၸဝ်ႈႁဝ်းၶဝ်ၸိူဝ်းၼႆႉလႆႈပိူင်ႇသေၵမ်းတီႈၶႃႈ။ ယႃႇပေဢဝ်ၶႃႈၸဝ်ႈႁဝ်းၶဝ်ၸိူဝ်းၼႆႉၵႂႃႇၽၢႆႇပုၼ်ႉၼမ်ႉ ယေႃးတၢၼ်ႇ၊ သေၵမ်းတီႈၶႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ၶိုၼ်းလၢတ်ႈလႄႈဝႃႈ၊ “ပီႈၼွင်ႉသူၸိူဝ်းၼႆႉတၵ်းလႆႈၵႂႃႇတိုၵ်းသိုၵ်းလႄႈသူၸမ်ႉ၊တၵ်းၵိုတ်းသဝ်းယူႇၵႃႈတီႈၼႆႈႁိုဝ်း။-
ႁဵတ်းသင်လႄႈသူယႃႉၸႂ်ၵူၼ်းမဵဝ်း ဢိသရေး၊ တင်းလၢႆႁႂ်ႈၶဝ်ဢမ်ႇၶၢမ်ႈၼမ်ႉ ယေႃးတၢၼ်ႇ၊ လႄႈဢမ်ႇၵႂႃႇၵႃႈတီႈမိူင်းဢၼ် ထႃႇဝရႃႉၽြႃး၊ ပၼ်ၼၼ်ႉၸိူဝ်ႉၼင်ႇႁိုဝ်။-
ပေႃႈသူၸိူဝ်းၼၼ်ႉႁဵတ်းၸိူဝ်ႉၼင်ႇၼႆၼႂ်းမိူဝ်ႈဢၼ်ၵဝ်ပွႆႇၸႂ်ႉၶဝ်လုၵ်ႉသေၵႃႈတီႈ ၵႃႇတေႇသပႃႇၼႃႉ၊ ၵႂႃႇႁႂ်ႈလႆႈလူလွမ်လႄႇပၢတ်ႈတူၺ်းမိူင်းၸဝ်ႈၼၼ်ႉဢေႃႈ။-
ၶဝ်ၵႂႃႇႁွတ်ႈထိုင်ပၢင်ႇႁူၺ်ႈ ဢေႇသၵေႃးလႃႉ၊ လႄႈႁၼ်မိူင်းၼၼ်ႉသေယဝ်ႉ၊မႃးယႃႉၸႂ်ၵူၼ်းမဵဝ်း ဢိသရေး၊ တင်းလၢႆ ႁဵတ်းႁႂ်ႈၶဝ်ဢမ်ႇၵႂႃႇၶဝ်ႈမိူင်းဢၼ် ထႃႇဝရႃႉၽြႃး၊ ပၼ်ၼၼ်ႉဢေႃႈ။-
လိူဝ်သေ ၵႃႇလႅပ်ႉ၊ လုၵ်ႈၸၢႆး ယေႇၽုၼ်ႇၼႃႉ၊ ၵူၼ်းမဵဝ်း ၵေးၼိတ်ႉ၊ တင်း ယေႃးသု၊ လုၵ်ႈၸၢႆး ၼုၼ်ႇ၊ ၼၼ်ႉၵွပ်ႈပိူဝ်ႈၶဝ်သွင်ၵေႃႉပႂ်ႉသဵတ်ႈၸႃႇတေႃႇ ထႃႇဝရႃႉၽြႃး၊ ယူႇၼၼ်ႉဢေႃႈ၊’ ဝႃႈၼင်ႇၼႆဢေႃႈ။-
ၼင်ႇၼၼ်လႄႈ ထႃႇဝရႃႉၽြႃး၊ ၸႂ်မႆႈၶႂ်ႈၸႃႉတေႃႇၵူၼ်းတင်းလၢႆလႄႈႁႂ်ႈၶဝ်လႄႇၵႂႃႇလႄႇမႃးယူႇၵႃႈၼႂ်းထိူၼ်ႇလႅင်ႉသီႇသိပ်းပီတဵမ်တဵမ်တေႃႇထိုင်ႁွတ်ႈၵူၼ်းၵႃႈဢၼ်ႁဵတ်းႁၢႆႉႁဵတ်းယုတ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ၸိူဝ်းၼၼ်ႉထၢၼ်ႈပေႃးတၢႆမူတ်းဢေႃႈ။-
တေႃႈလဵဝ်ၼႆႉၵေႃႈသူပဵၼ်ၸိူဝ်ႉၶိူဝ်းဢၼ်မႂ်ႇပေႃႇမႃးတၢင်တူဝ်ပေႃႈသူၸိူဝ်းၼၼ်ႉလႄႈယဵင်ႈၶႅၼ်းႁၢႆႉယုတ်ႈၼႃႇႁႂ်ႈတၢင်းၸႂ်မႆႈၶႂ်ႈၸႃႉ ထႃႇဝရႃႉၽြႃး၊ ယဵင်ႈၶႅၼ်းဢွၵ်ႇၵႃႈၼိူဝ်ၵူၼ်းမဵဝ်း ဢိသရေး၊ တင်းလၢႆယဝ်ႉ။-
ပေႃးသူဝႄႈပိူင်ႈလႄႈဢမ်ႇၸွမ်းမၼ်းၸဝ်ႈၵႂႃႇၸိုင်၊မၼ်းၸဝ်ႈတၵ်းၸုၼ်ႉပႅတ်ႈၵူၼ်းမဵဝ်းၵႃႈမီးတင်းသဵင်ႈတင်းလူင်ထႅင်ႈပွၵ်ႈၼိုင်ႈၵႃႈၼႂ်းထိူၼ်ႇလႄႈတၢင်းဢၼ်ၶဝ်ၸိူဝ်းၼႆႉလႆႈလုသုမ်းၼၼ်ႉပဵၼ်ၵွပ်ႈပိူဝ်ႈသူဢေႃႈ၊” ဝႃႈၼင်ႇၼႆဢေႃႈ။
ၶဝ်ဢွၼ်ၵၼ်သုတ်ႉၸပ်းသုတ်ႉၸူးတီႈ မူဝ်းသေႇ၊ လႄႈလဝ်ႈလၢတ်ႈဝႃႈ၊ “ၶႅၼ်းတေႃႈပၼ်ဢၶႂၢင်ႉႁႂ်ႈၶႃႈၸဝ်ႈႁဝ်းၸိူဝ်းၼႆႉတႄႇႁဵတ်းၶွၵ်ႈသူဝ်းတင်းလၢႆပုၼ်ႈသူဝ်းၶႃႈၸဝ်ႈႁဝ်းၶဝ်ဢိၵ်ႇတင်းဝဵင်းပုၼ်ႈလုၵ်ႈဢွၼ်ႇလၢင်းဢွၼ်ႇၶႃႈၸဝ်ႈႁဝ်းၸိူဝ်းၼႆႉဝႆႉၵႃႈတီႈၼႆႈဢွၼ်တၢင်းသေၵမ်းတီႈၶႃႈ။-
ပေႃးႁဵတ်းယဝ်ႉႁဝ်းၶႃႈတၵ်းတေၵႂႃႇလူၺ်ႈၵၼ်တင်းပီႈၼွင်ႉမဵဝ်း ဢိသရေး၊ ၶႃႈၸဝ်ႈႁဝ်းၶဝ်သေလႄႈဢွၼ်ႁူဝ်တိုၵ်းတေႃးတေႃႇထိုင်ႁွတ်ႈၶႃႈၸဝ်ႈႁဝ်းၸိူဝ်းၼႆႉထၢၼ်ႈပေႃးလႆႈဢဝ်ၶဝ်တႄႇသဝ်းၵႃႈၼႂ်းမိူင်းဢၼ်ၶဝ်တၵ်းပိူင်ႇၼၼ်ႉတီႈၶႃႈဢေႃႈ။ ၼႂ်းမိူဝ်ႈယၢမ်းၼၼ်ႉလုၵ်ႈဢွၼ်ႇလၢင်းဢွၼ်ႇၶႃႈၸဝ်ႈႁဝ်းၶဝ်တင်းလၢႆၼၼ်ႉတၵ်းလႆႈယူႇၵႃႈၼႂ်းဝဵင်းဢၼ်မၼ်ႈဢၼ်ၶိူင်ႇလႄႈတၵ်းလႆႈလွတ်ႈၽေးၵူၼ်းမိူင်းၼႆႉၼၼ်ႉဢေႃႈ။-
ၶႃႈၸဝ်ႈႁဝ်းၸိူဝ်းၼႆႉတၵ်းဢမ်ႇၶိုၼ်းမႃးၵႃႈတီႈႁိူၼ်းတူဝ်ၸဝ်ႈၵဝ်ႇတေႃႇထိုင်ႁွတ်ႈၵူၼ်းမဵဝ်း ဢိသရေး၊ တင်းလၢႆထၢၼ်ႈပေႃးလႆႈပိူင်ႇမိူင်းဢၼ်ပဵၼ်ဢမူၺ်ႇပုၼ်ႈၶဝ်ၼၼ်ႉတီႈၶႃႈဢေႃႈ။-
ၶႃႈၸဝ်ႈႁဝ်းၸိူဝ်းၼႆႉတၵ်းဢမ်ႇၶၢမ်ႇဢမ်ႇဢဝ်ဢမူၺ်ႇလူၺ်ႈၵၼ်တင်းၶဝ်ၵႃႈတီႈၽၢႆႇပုၼ်ႉၼမ်ႉ ယေႃးတၢၼ်ႇ၊ သေဢိတ်းသေဢီႈ၊ၵွပ်ႈပိူဝ်ႈၶႃႈၸဝ်ႈႁဝ်းၸိူဝ်းၼႆႉလႆႈၶၢမ်ႇဢဝ်ဢမူၺ်ႇၵႃႈတီႈၽၢႆႇၼႆႉၼမ်ႉ ယေႃးတၢၼ်ႇ၊ ၽၢႆႇတၢင်းဝၼ်းဢွၵ်ႇၼမ်ႉၼႆႉယဝ်ႉဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ၶိုၼ်းလၢတ်ႈလႄႈဝႃႈ၊ “ပေႃးသူတၵ်းႁဵတ်းၸိူဝ်ႉၼင်ႇဢၼ်သူဝႃႈၼၼ်ႉၸိုင်၊ယၢမ်းလဵဝ်ၼႆႉမႄးႁႅၼ်းႁႂ်ႈလႆႈၵႂႃႇတိုၵ်းသိုၵ်းၵႃႈတီႈၽၢႆႇၼႃႈ ထႃႇဝရႃႉၽြႃး၊ တႃႉ။-
ၵူၼ်းသိုၵ်းသူၵႃႈမီးတၵ်းလႆႈၶၢမ်ႈၵႂႃႇၽၢႆႇပုၼ်ႉၼမ်ႉ ယေႃးတၢၼ်ႇ၊ လႄႈၶဝ်တၵ်းလႆႈတိုၵ်းတေႃးရၢၼ်ႇသူႇႁဝ်းၵႃႈတီႈတႂ်ႈမိုဝ်း ထႃႇဝရႃႉၽြႃး၊ တေႃႇထိုင်ႁွတ်ႈ ထႃႇဝရႃႉၽြႃး၊ ထၢၼ်ႈပေႃးပႄႉၼႅင်ႇသေယဝ်ႉ၊-
လႆႈဢုပ်ႉပိူင်ႇမိူင်းၼၼ်ႉဢေႃႈ။ လိုၼ်းၼၼ်ႉသူတၵ်းလႆႈဢၶႂၢင်ႉဢၼ်ၶိုၼ်းမႃးၵွပ်ႈပိူဝ်ႈသူႁဵတ်းႁႂ်ႈပုၼ်ႈၽွၼ်းသူယဝ်ႉတူဝ်ႈလီငၢမ်းပုၼ်ႈ ထႃႇဝရႃႉၽြႃး၊ ဢိၵ်ႇတင်းပီႈၼွင်ႉမဵဝ်း ဢိသရေး၊ သူၼင်ႇၵၼ်ၼၼ်ႉဢေႃႈ။ မိူဝ်ႈၼၼ်ႉၽၢႆႇဝၼ်းဢွၵ်ႇၼမ်ႉ ယေႃးတၢၼ်ႇ၊ တၵ်းတေပဵၼ်မိူင်းဢၼ်သူလႆႈဢၶႂၢင်ႉတီႈ ထႃႇဝရႃႉၽြႃး၊ သေလႄႈလႆႈပိူင်ႇဢေႃႈ။-
ၵူၺ်းၵႃႈ၊ပေႃးသူယင်းဢမ်ႇႁဵတ်းၸွမ်းၼင်ႇၵတိသူၸိုင်၊သူတၵ်းႁဵတ်းၽိတ်းပိူင်ႈ ထႃႇဝရႃႉၽြႃး၊ ဢေႃႈ။ ႁႂ်ႈသူႁုၸႅင်ႈလွင်ႈဢၼ်ဢပျတ်ႈသူၼၼ်ႉတၵ်းၸွမ်းလႄႈၶိုတ်းသူၼၼ်ႉတႃႉ။ ထႃႇဝရႃႉၽြႃး၊ တၵ်းပၼ်တၢမ်ႇဢပျတ်ႈတီႈသူဢေႃႈ။-
ပိူဝ်ႈၼႆလႄႈဢွၼ်ၵၼ်တႄႇႁဵတ်းဝဵင်းတင်းလၢႆဢိၵ်ႇတင်းၶွၵ်ႈသူဝ်းသူတင်းလၢႆတႃႉ။ ဢွၼ်ၵၼ်ႁဵတ်းၸွမ်းၵတိသူတႃႉ၊” ဝႃႈၼင်ႇၼႆဢေႃႈ။
ၵူၼ်းမဵဝ်း ၵၢတ်ႉ၊ တင်းၵူၼ်းမဵဝ်း ရုပိၼ်ႇ၊ တင်းလၢႆၵေႃႈ လဝ်ႈလၢတ်ႈလႄႈဝႃႈ၊ “ၸဝ်ႈႁဝ်းတီႈၶႃႈ။ ၶႃႈၸဝ်ႈႁဝ်းၸိူဝ်းၼႆႉတၵ်းႁဵတ်းၸွမ်းဢမိင်ႉၸဝ်ႈႁဝ်းတီႈၶႃႈဢေႃႈ။-
မေးဢိၵ်ႇတင်းလုၵ်ႈဢွၼ်ႇလၢင်းဢွၼ်ႇၶႃႈၸဝ်ႈႁဝ်းတင်းလၢႆ ဢိၵ်ႇတင်းၽုင်သူဝ်းၽုင်ဝူဝ်းၶႃႈၸဝ်ႈႁဝ်းၸိူဝ်းၼႆႉတၵ်းဝႆႉၵိုတ်းၵႃႈတီႈၼႆႈၼႂ်းဝဵင်းတင်းလၢႆၼႂ်းမိူင်း ၵိလတ်ႉ၊ ၼႆႉတီႈၶႃႈဢေႃႈ။-
ၶႃႈၸဝ်ႈႁဝ်းၸိူဝ်းၼႆႉၸမ်ႉ၊တၵ်းဢွၼ်ၵၼ်ၵႂႃႇတိုၵ်းသိုၵ်းၵႃႈတီႈၽၢႆႇၼႃႈ ထႃႇဝရႃႉၽြႃး၊ တီႈၶႃႈဢေႃႈ။ ၶႃႈၸဝ်ႈႁဝ်းၸိူဝ်းၼႆႉတၵ်းၶၢမ်ႈၵႂႃႇၽၢႆႇပုၼ်ႉၼမ်ႉ ယေႃးတၢၼ်ႇ၊ လႄႈတိုၵ်းတေႃးၸွမ်းၵႃႈၼင်ႇဢၼ်ၸဝ်ႈႁဝ်းမီးဢမိင်ႉၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆၸင်ႇ မူဝ်းသေႇ၊ သင်ႇလၢတ်ႈတီႈယဵၸ်ႈပရေႃးႁဵၵ်ႈ ဢေးလႃႇၸႃႇ၊ တင်း ယေႃးသု၊ ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်း ဢိသရေး၊ ၼၼ်ႉလႄႈဝႃႈ၊-
“ပေႃးၵူၼ်းမဵဝ်း ၵၢတ်ႉ၊ တင်းၵူၼ်းမဵဝ်း ရုပိၼ်ႇ၊ တင်းလၢႆ ၶၢမ်ႈၵႂႃႇၽၢႆႇပုၼ်ႉၼမ်ႉ ယေႃးတၢၼ်ႇ၊ သေလႄႈတိုၵ်းတေႃးၽၢႆႇၼႃႈ ထႃႇဝရႃႉၽြႃး၊ ၼၼ်ႉၵွပ်ႈပိူဝ်ႈၶဝ်ၸွႆႈထႅမ်သူတိုၵ်းတေႃးလႄႈပေႃးသူပႄႉၼႅင်ႇမိူင်းၼၼ်ႉယဝ်ႉၵႂႃႇၸိုင်၊သူတၵ်းလႆႈဢဝ်မိူင်း ၵိလတ်ႉ၊ ပၼ်တီႈၶဝ်ႁႂ်ႈၶဝ်လႆႈပိူင်ႇဢေႃႈ။-
ၵူၺ်းၵႃႈ၊ပေႃးၶဝ်ဢမ်ႇၶၢမ်ႈၵႂႃႇၽၢႆႇပုၼ်ႉၼမ်ႉ ယေႃးတၢၼ်ႇ၊ ဢမ်ႇၵႂႃႇတိုၵ်းသိုၵ်းလူၺ်ႈၵၼ်တင်းသူၸိုင်၊ၶဝ်တၵ်းလႆႈၶၢမ်ႇဢဝ်ဢမူၺ်ႇပုၼ်ႈၶဝ်ၵႃႈၼႂ်းမိူင်း ၶႃႇၼၼ်ႇ၊ မိူၼ်သူဢေႃႈ၊” ဝႃႈၼင်ႇၼႆဢေႃႈ။
ၵူၼ်းမဵဝ်း ၵၢတ်ႉ၊ တင်းၵူၼ်းမဵဝ်း ရုပိၼ်ႇ၊ ၸိူဝ်းၼၼ်ႉဢွၼ်ၵၼ်လၢတ်ႈလႄႈဝႃႈ၊ “ၶႃႈၸဝ်ႈႁဝ်းၸိူဝ်းၼႆႉတၵ်းႁဵတ်းၸွမ်းဢမိင်ႉ ထႃႇဝရႃႉၽြႃး၊ တီႈၶႃႈဢေႃႈ။-
ၶႃႈၸဝ်ႈႁဝ်းၸိူဝ်းၼႆႉတၵ်းၶၢမ်ႈၵႂႃႇၽၢႆႇပုၼ်ႉၼမ်ႉ ယေႃးတၢၼ်ႇ၊ လႄႈတိုၵ်းသိုၵ်းၵႃႈတီႈၽၢႆႇၼႃႈ ထႃႇဝရႃႉၽြႃး၊ ပုၼ်ႈၼင်ႇႁိုဝ်ၶႃႈၸဝ်ႈႁဝ်းတင်းလၢႆတၵ်းတေလႆႈပိူင်ႇဢမူၺ်ႇၵႃႈတီႈၼႆႈၽၢႆႇတၢင်းဝၼ်းဢွၵ်ႇၼမ်ႉ ယေႃးတၢၼ်ႇ၊ တီႈၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ မူဝ်းသေႇ၊ ဢဝ်သိုင်ႇၸိုင်ႈဝၢၼ်ႈမိူင်း သိႁုၼ်ႇ၊ ဢၼ်ပဵၼ်ၶုၼ်ႁေႃၶမ်းမိူင်း ဢႃႇမေႃးရိ၊ သိုင်ႇၸိုင်ႈဝၢၼ်ႈမိူင်း ဢေႃႇၶႃႉ၊ ဢၼ်ပဵၼ်ၶုၼ်ႁေႃၶမ်းမိူင်း ပႃႇသၢၼ်ႇ၊ ဢၼ်ပႃးၸဵမ်ဝဵင်းမၼ်းတင်းလၢႆ၊ဝၢၼ်ႈၼွၵ်ႈၼႃးပၢင်ႇမၼ်းတင်းလၢႆၸိူဝ်းဢၼ်မီးႁိမ်းႁွမ်းၼၼ်ႉဢဝ်ဢၢပ်ႈပၼ်တီႈၵူၼ်းမဵဝ်း ၵၢတ်ႉ၊ တင်းၵူၼ်းမဵဝ်း ရုပိၼ်ႇ၊ ဢိၵ်ႇတင်းၵူၼ်းမဵဝ်း မၼႃႇသေႇ၊ ၶိုင်ႈၼိုင်ႈၼၼ်ႉၸိူဝ်းၼၼ်ႉဢေႃႈ။-
ၵူၼ်းမဵဝ်း ၵၢတ်ႉ၊ ၸိူဝ်းၼၼ်ႉဢွၼ်ၵၼ်တႄႇႁဵတ်းဝဵင်းဢၼ်မၼ်ႈလီၶိူင်ႇလီဢၼ်ပဵၼ်ဝဵင်း တိၽုၼ်ႇ၊ ဝဵင်း ဢႃႇတရုတ်ႉ၊ ဝဵင်း ဢႃႇႁေႃႇ၊-
ဝဵင်း ဢႃႇတရုတ်ႉသေႃႇၽၢၼ်ႇ၊ ဝဵင်း ယႃႇၸႃႇ၊ ဝဵင်း ယူဝ်းၽေႇႁႃႉ၊-
ဝဵင်း ပႅတ်ႉၼိမရႃႉ၊ တင်းဝဵင်း ပႅတ်ႉႁႃႇရၼ်ႇ၊ ၸိူဝ်းၼၼ်ႉဢေႃႈ။-
ၵူၼ်းမဵဝ်း ရုပိၼ်ႇ၊ ၸိူဝ်းၼၼ်ႉသမ်ႉဢွၼ်ၵၼ်တႄႇႁဵတ်းဝဵင်း ႁေႇသၽုၼ်ႇ၊ ဝဵင်း ဢေးလႃႇလေး၊ ဝဵင်း ၵိရိယသိမ်း၊-
ဝဵင်း ၼေႇပေႃႇ၊ ဝဵင်း ပႃႇလႃႉမွင်ႇ၊ (ဢၼ်ၸိုဝ်ႈဝဵင်းၼႆႉလၢႆႈၸိုဝ်ႈမႂ်ႇယဝ်ႉ) တင်းဝဵင်း သိပမႃႉ၊ ၸိူဝ်းၼၼ်ႉဢေႃႈ။ ၶဝ်ပၼ်ၸိုဝ်ႈမႂ်ႇသဵင်မႂ်ႇတီႈဝဵင်းဢၼ်ၶဝ်ၶိုၼ်းတႄႇၶိုၼ်းႁဵတ်းၸိူဝ်းၼၼ်ႉဢေႃႈ။
ၵူၼ်းၶိူဝ်းႁိူၼ်း မႃႇၶိရႃႉ၊ ဢၼ်ပဵၼ်လုၵ်ႈၸၢႆး မၼႃႇသေႇ၊ ၸိူဝ်းၼၼ်ႉၵႂႃႇတိုၵ်းဝဵင်း ၵိလတ်ႉ၊ လႄႈသိမ်းဢဝ်သေယဝ်ႉ၊ႁေႃႈၵူၼ်းမဵဝ်း ဢႃႇမေႃးရိ၊ ဢၼ်မီးယူႇၵႃႈၼႂ်းမိူင်းၼၼ်ႉၸိူဝ်းၼၼ်ႉဢွၵ်ႇပႅတ်ႈဢေႃႈ။
မူဝ်းသေႇ၊ ၵေႃႈဢဝ်မိူင်းၸိူဝ်းၼၼ်ႉဢၢပ်ႈပၼ်တီႈၵူၼ်းၶိူဝ်းႁိူၼ်း မႃႇၶိရႃႉ၊ ၸိူဝ်းၼၼ်ႉလႄႈၶဝ်ၼၼ်ႉယူႇၵႃႈတီႈၼၼ်ႈဢေႃႈ။-
ၵူၼ်းၶိူဝ်းႁိူၼ်း ယႃႇဢိရႃႉ၊ ၵူၼ်းမဵဝ်း မၼႃႇသေႇ၊ ၼၼ်ႉသမ်ႉၵႂႃႇတိုၵ်းလႄႈသိမ်းဢဝ်ဝၢၼ်ႈၵမ်ႈၽွင်ႈသေယဝ်ႉ၊ႁွင်ႉႁဵၵ်ႈၸိုဝ်ႈဝႃႈ၊ “ ႁႃႇဝုတ်ႉယႃႇဢိရႃႉ၊” ဢေႃႈ။-
ၼေႃႇပႃႉ၊ သမ်ႉၵႂႃႇတိုၵ်းလႄႈသိမ်းဢဝ်ဝဵင်း ၵေးၼတ်ႉ၊ ဢိၵ်ႇတင်းဝၢၼ်ႈမၼ်းတင်းလၢႆသေယဝ်ႉ၊ႁွင်ႉႁဵၵ်ႈၸွမ်းၼင်ႇၸိုဝ်ႈသဵင်တူဝ်ၸဝ်ႈၵဝ်ႇလႄႈဝႃႈ၊ဝဵင်း ၼေႃႇပႃႉ၊ ဢေႃႈ။
ၸိုဝ်ႈပႃႈတႂ်ႈၸိူဝ်းၼႆႉပဵၼ်ၸိုဝ်ႈတီႈဢၼ်ၵူၼ်းမဵဝ်း ဢိသရေး၊ တင်းလၢႆလႆႈၶျႃးပၢင်တပ်ႉၸွမ်းလူၺ်ႈမုၵ်ႉၸုမ်းၸိူဝ်ႉၶိူဝ်းၽႂ်ၸိူဝ်ႉၶိူဝ်းမၼ်းၸွမ်းၶၢဝ်းတၢင်းဢၼ် မူဝ်းသေႇ၊ တင်း ဢႃႇရုၼ်ႇ၊ ဢွၼ်ႁူဝ်ၶဝ်ဢွၵ်ႇမိူင်း ဢေးၵျိပ်ႉ၊ မႃးၼၼ်ႉဢေႃႈ။-
ၸွမ်းၼင်ႇဢမိင်ႉ ထႃႇဝရႃႉၽြႃး၊ မီးၼၼ်ႉ မူဝ်းသေႇ၊ တႅမ်ႈမၢႆဝႆႉၸိုဝ်ႈတီႈဢၼ်ၶဝ်ၶျႃးပၢင်တပ်ႉပွၵ်ႈလႂ်ပွၵ်ႈၼၼ်ႉဢေႃႈ။
ၵူၼ်းမဵဝ်း ဢိသရေး၊ တင်းလၢႆလႆႈဢွၵ်ႇမိူင်း ဢေးၵျိပ်ႉ၊ မႃးၼႂ်းလိူၼ်တီႈၼိုင်ႈလႆႈသိပ်းႁႃႈဝၼ်း၊ပူၼ်ႉဝၼ်းပွႆး ပသၶႃႇ၊ ဝၼ်းၼိုင်ႈၼၼ်ႉဢေႃႈ။ ၶဝ်လႆႈဢွၵ်ႇဝဵင်း ရႃႇမသိတ်ႈ၊ မႃးႁတ်းႁတ်းႁၢၼ်ႁၢၼ်ၽၢႆႇၼႃႈၵူၼ်းမဵဝ်း ဢေးၵျိပ်ႉ၊ တင်းလၢႆ၊-
ယၢမ်းမိူဝ်ႈဢၼ်ၶဝ်ယင်းသၢင်းၵျူဝ်ႇလုၵ်ႈၸၢႆးတူၼ်ႈၶဝ်ဢၼ် ထႃႇဝရႃႉၽြႃး၊ ပၼ်တၢမ်ႇတၢႆၸိူဝ်းၼၼ်ႉယူႇၼၼ်ႉဢေႃႈ။ လွင်ႈတၢင်းဢၼ်ႁဵတ်းၸိူဝ်ႉၼင်ႇၼၼ်ၼၼ်ႉ ထႃႇဝရႃႉၽြႃး၊ ၼႄပျႃးတၢင်းဢၼ်မၼ်းၸဝ်ႈမီးတၼ်းၶူဝ်းဢၼ်ယဵင်ႈၶႅၼ်းယႂ်ႇၼႃႇသေၽြႃးတင်းလၢႆၼႂ်းမိူင်း ဢေးၵျိပ်ႉ၊ ၼၼ်ႉဢေႃႈ။
ၵူၼ်းမဵဝ်း ဢိသရေး၊ တင်းလၢႆဢွၵ်ႇဝဵင်း ရႃႇမသိတ်ႈ၊ မႃးလႄႈၶျႃးပၢင်တပ်ႉၵႃႈတီႈဝဵင်း သုၵုတ်ႉ၊ ဢေႃႈ။-
ၶဝ်သမ်ႉသိုပ်ႇလႄႈၵႂႃႇၶျႃးပၢင်တပ်ႉၵႃႈတီႈဝဵင်း ဢေးႀမ်ႇ၊ ဢၼ်မီးႁိမ်းထိူၼ်ႇလႅင်ႉၼၼ်ႉဢေႃႈ။-
လုၵ်ႉသေၵႃႈတီႈၼၼ်ႈလႄႈၶဝ်ၶိုၼ်းဝၢႆႇႁူဝ်မိူဝ်းၸူးဝဵင်း ပိႁႁိရုတ်ႉ၊ ဢၼ်မီးၽၢႆႇဝၼ်းဢွၵ်ႇဝဵင်း ပႃႇလႃႉၸေႇၽုၼ်ႇ၊ ၼၼ်ႉသေလႄႈၶျႃးပၢင်တပ်ႉႁိမ်းဝဵင်း မိၵတေႃးလႃႉ၊ ဢေႃႈ။-
ၶဝ်သမ်ႉဢွၵ်ႇသေၵႃႈတီႈဝဵင်း ပိႁႁိရုတ်ႉ၊ လႄႈၽႃႇလတ်းၵႃႈၼႂ်းၵၢင် ပၢင်ႇလၢႆႇလႅင်၊ ၵႂႃႇသေယဝ်ႉ၊ပႆၸွမ်းတၢင်းၵႃႈၼႂ်းထိူၼ်ႇလႅင်ႉ သုရႃႉ၊ ၵႂႃႇသၢမ်ဝၼ်းလႄႈၶျႃးပၢင်တပ်ႉၵႃႈတီႈ မႃႇရႃႉ၊ ဢေႃႈ။-
ၶဝ်သမ်ႉလုၵ်ႉသေၵႃႈတီႈၼၼ်ႈၶၢႆႉၵႂႃႇၸူးတီႈ ဢေးလိမ်း၊ ပိူဝ်ႈဢၼ်ၵႃႈတီႈၼၼ်ႈမီးၼမ်ႉမေႃႇသိပ်းသွင်မေႃႇတင်းတူၼ်ႈထၢၼ်ၸဵတ်းသိပ်းတူၼ်ႈဢေႃႈ။
ၶဝ်ဢွၵ်ႇသေၵႃႈတီႈ ဢေးလိမ်း၊ လႄႈၵႂႃႇၶျႃးပၢင်တပ်ႉၵႃႈႁိမ်းၵူတ်ႉလူင် ပၢင်ႇလၢႆႇလႅင်၊ ဢေႃႈ။-
လိုၼ်းၼၼ်ႉၶဝ်ၵႂႃႇၶျႃးပၢင်တပ်ႉၵႃႈတီႈထိူၼ်ႇလႅင်ႉ သိၼ်း၊ ဢေႃႈ။-
လိုၼ်းၼၼ်ႉၶဝ်ၶျႃးပၢင်တပ်ႉၵႃႈတီႈ တေႃးၽၵႃႇ၊-
လိုၼ်းသေၵူၼ်းမဵဝ်း ဢိသရေး၊ တင်းလၢႆဢွၵ်ႇမိူင်း ဢေးၵျိပ်ႉ၊ မႃးလႆႈသီႇသိပ်းပီ၊ၼႂ်းလိူၼ်ႁႃႈမႂ်ႇဝၼ်းၼိုင်ႈၼၼ်ႉ၊ယဵၸ်ႈပရေႃးႁဵၵ်ႈ ဢႃႇရုၼ်ႇ၊ ၶိုၼ်ႈၵႂႃႇၵႃႈၼိူဝ်လွႆ ႁေႃးရႃႉ၊ ၸွမ်းၼင်ႇဢမိင်ႉ ထႃႇဝရႃႉၽြႃး၊ မီးၼၼ်ႉလႄႈလႆႈသဵင်ႈၵၢမ်ႇၵႂႃႇဢေႃႈ။-
မိူဝ်ႈယၢမ်းၼၼ်ႉဢသၢၵ်ႈမၼ်းမီးပၢၵ်ႇပၢႆသၢဝ်းသၢမ်ပီဢေႃႈ။
လႆႈငိၼ်းလွင်ႈဢၼ်ၵူၼ်းမဵဝ်း ဢိသရေး၊ တင်းလၢႆႁွတ်ႈထိုင်မႃးၼၼ်ႉဢေႃႈ။ ၶုၼ်ႁေႃၶမ်း ဢႃႇရတ်ႉ၊ မဵဝ်း ၶႃႇၼၼိ၊ ဢၼ်ယူႇပွတ်းတၢင်းၸၢၼ်းၵႃႈၼႂ်းမိူင်း ၶႃႇၼၼ်ႇ၊ ၼၼ်ႉ။
ၵႃႈတီႈၼႂ်းပၢင်ႇပဵင်းမိူင်း မေႃႇၽႃႉ၊ ၵႃႈႁိမ်းၼမ်ႉ ယေႃးတၢၼ်ႇ၊ သိုဝ်ႈဝဵင်း ယေႇရိၶူဝ်း၊ ၼၼ်ႉ ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊-
ႁႂ်ႈမၼ်းသင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈၸမ်ႉ၊ “မိူဝ်ႈဢၼ်သူၶၢမ်ႈၼမ်ႉ ယေႃးတၢၼ်ႇ၊ လႄႈႁွတ်ႈထိုင်ၵႃႈၼႂ်းမိူင်း ၶႃႇၼၼ်ႇ၊ ၼၼ်ႉၸိုင်၊-
သူတၵ်းလႆႈႁေႃႈၵူၼ်းဝၢၼ်ႈၵူၼ်းမိူင်းဢၼ်မီးဝႆႉတင်းသဵင်ႈတင်းလူင်ဢွၵ်ႇပႅတ်ႈဢေႃႈ။ ယႃႉၽဵဝ်ႈမၢၵ်ႇႁိၼ်ဢၼ်ၶဝ်တွင်ႈႁဵတ်းၵႃႈမီး၊ယႃႉၽဵဝ်ႈႁုၼ်ႇႁၢင်ႈသၢင်းထုဢၼ်ၶဝ်လေႃႇႁဵတ်းၵႃႈမီးပႅတ်ႈလႄႈၵိူၼ်ႇလူမ်ႉထႃႇၼႃႉတီႈဢၼ်ၶဝ်ဝႆႈၽြႃးၶဝ်ၵႃႈမီးပႅတ်ႈတႃႉ။-
ၵွပ်ႈပိူဝ်ႈဢၼ်ၵဝ်ဢဝ်မိူင်းၼၼ်ႉပၼ်သူပိူင်ႇလႄႈတူဝ်သူတၵ်းလႆႈသိမ်းဢဝ်လႄႈယူႇၵႃႈၼႂ်းမိူင်းၼၼ်ႉဢေႃႈ။-
သူတၵ်းလႆႈတူၵ်းၸႃႇၵွၵ်ႈသေလႄႈၽႄမႅင်ႇပၼ်လိၼ်ၼၼ်ႉၸွမ်းလူၺ်ႈၸိူဝ်ႉၶိူဝ်းမဵဝ်းၽႂ်မဵဝ်းမၼ်းဢေႃႈ။ ပေႃးၵူၼ်းၼမ်ၸိုင်၊ၽႄမႅင်ႇပၼ်ဢၼ်ၼမ်၊ပေႃးၵူၼ်းၵေႇၸိုင်၊ၽႄမႅင်ႇပၼ်ဢၼ်ၵေႇတႃႉ။-
ပေႃးသူဢမ်ႇႁေႃႈၵူၼ်းဝၢၼ်ႈၵူၼ်းမိူင်းဢၼ်မီးၸိူဝ်းၼၼ်ႉဢွၵ်ႇပႅတ်ႈတင်းသဵင်ႈတင်းလူင်ၸိုင်၊ၶဝ်ၸိူဝ်းဢၼ်ၵိုတ်းၵျၢၼ်ႇဝႆႉၼၼ်ႉတၵ်းပဵၼ်ၸိူဝ်ႉၼင်ႇသဵၼ်ႈဢၼ်တမ်တႃသူဢိၵ်ႇတင်းၸိူဝ်ႉၼင်ႇၼၢမ်သဵပ်ႇပဵမ်ႉသူလႄႈ၊ၶဝ်တၵ်းပၼ်တုၵ်ႉၶႃႉတီႈသူဢေႃႈ။-
ၵႃႈၼင်ႇဢၼ်ၵဝ်ၵျၢမ်ႇပွင်ႁဵတ်းတီႈၶဝ်ၼၼ်ႉၵဝ်တၵ်းႁဵတ်းတီႈသူဢေႃႈ၊” ဝႃႈၼင်ႇၼႆဢေႃႈ။
ၸဝ်ႈထႃႇဝရႃႉၽြႃး၊ သမ်ႉမီးဢမိင်ႉၵႃႈတီႈ မူဝ်းသေႇ၊ လႄႈ၊-
ႁႂ်ႈမၼ်းသင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈၸမ်ႉ၊ “မိူဝ်ႈဢၼ်သူၶဝ်ႈထိုင်ၵႃႈၼႂ်းမိူင်း ၶႃႇၼၼ်ႇ၊ ၸိုင်၊ၶွပ်ႇၼမ်ႉလႅၼ်လိၼ်မိူင်းဢၼ်သူတၵ်းလႆႈပိူင်ႇၼၼ်ႉၸမ်ႉ၊-
ၼႃႈတၢင်းၸၢၼ်းၼၼ်ႉတႄႇဢဝ်သေၵႃႈတီႈထိူၼ်ႇလႅင်ႉ ၸိၼႃႉ၊ ၸွမ်းလႅၼ်လိၼ်မိူင်း ဢေႇတုမ်ႇ၊ ဢေႃႈ။ ၶွပ်ႇလႅၼ်လိၼ်ၽၢႆႇတၢင်းၸၢၼ်းၼၼ်ႉတၵ်းလႆႈတႄႇဢဝ်ၵႃႈတီႈပၢႆသုတ်းၽၢႆႇတၢင်းဝၼ်းဢွၵ်ႇ ပၢင်ႇလၢႆႇတၢႆ၊ ၼၼ်ႉလႄႈ၊-
လဵပ်ႈၵႃႈတီႈၼႃႈတၢင်းၸၢၼ်းၵႂႃႇၸွမ်းသဵၼ်ႈတၢင်း ဢႃႇၵႃႇရိပ်ႉပိမ်း၊ လႄႈၵႂႃႇၸူးၵႃႈတီႈထိူၼ်ႇလႅင်ႉ ၸိၼႃႉ၊ ၵႂႃႇတေႃႇထိုင်ႁွတ်ႈၵႃႈတီႈၽၢႆႇတၢင်းၸၢၼ်း ၵႃႇတေႇသပႃႇၼႃႉ၊ ဢေႃႈ။ သမ်ႉငႅၵ်းၸွမ်းၽၢႆႇႁွင်ႇဝၼ်းတူၵ်းၵႂႃႇၸူးၵႃႈတီႈ ႁႃႇၸႃႇရုတ်ႉတႃႉ၊ သေယဝ်ႉ၊သမ်ႉၵႂႃႇၸူးၵႃႈတီႈ ဢႃႇၸမုၼ်ႇ၊ ဢေႃႈ။-
တႄႇဢဝ်တီႈၼၼ်ႈသမ်ႉငႅၵ်းၵႂႃႇၸူးပၢင်ႇႁူၺ်ႈၵႃႈတီႈလႅၼ်လိၼ်မိူင်း ဢေးၵျိပ်ႉ၊ လႄႈတိူၵ်ႈၵႃႈတီႈပၢင်ႇလၢႆႇ မေႇတိထေးရီးယၼ်း၊ ဢေႃႈ။
“ၶွပ်ႇၼမ်ႉလႅၼ်လိၼ်ၽၢႆႇဝၼ်းတူၵ်းၸမ်ႉ၊တၵ်းလႆႈပဵၼ်ပၢင်ႇလၢႆႇ မေႇတိထေးရီးယၼ်း၊ တင်းၽင်ႇမၼ်းလိၼ်မၼ်းဢေႃႈ။
“ၶွပ်ႇၼမ်ႉလႅၼ်လိၼ်ၽၢႆႇတၢင်းႁွင်ႇၼၼ်ႉသူတၵ်းလႆႈၸႃႉၵႃႈတီႈပၢင်ႇလၢႆႇ မေႇတိထေးရီးယၼ်း၊ ၵႂႃႇတေႃႇလွႆ ႁေႃးရႃႉ၊ သေလႄႈ၊-
ၵႂႃႇႁွတ်ႈထိုင်သဵၼ်ႈတၢင်း ႁႃႇမတ်ႉ၊ ဢေႃႈ။ သမ်ႉတၵ်းလႆႈသိုပ်ႇၵႂႃႇၵႃႈတီႈဝၢၼ်ႈ ၸေႇတတ်ႉ၊ သေယဝ်ႉ၊-
ၵႂႃႇၸူးၵႃႈတီႈဝဵင်း ၸိပြၢၼ်ႇ၊ လႄႈသုတ်းတိူၵ်ႉၵႃႈတီႈ ႁႃႇၸႃႇရေးၼၼ်ႇ၊ ဢေႃႈ။
“ၶွပ်ႇၼမ်ႉလႅၼ်လိၼ်ၽၢႆႇတၢင်းဢွၵ်ႇၼၼ်ႉသူတၵ်းလႆႈၸႃႉၵႃႈတီႈ ႁႃႇၸႃႇရေးၼၼ်ႇ၊ တေႃႇ သေးၽမ်ႇ၊ ဢေႃႈ။-
လႅၼ်လိၼ်မၼ်းတၵ်းလႆႈၵႂႃႇၸွမ်းပွတ်းတၢင်းၸၢၼ်းၸူး ႁႃႇရႃႉပေႇလႃႉ၊ ဢၼ်ယူႇၽၢႆႇဝၼ်းဢွၵ်ႇဝဵင်း ဢႃႇဢိၼ်ႇ၊ လႄႈၵႂႃႇႁွတ်ႈထိုင်ၵုင်းလွႆၽၢႆႇဝၼ်းဢွၵ်ႇၽင်ႇၼွင် ၵႃႇလိလႄး၊ ၸိူဝ်းၼၼ်ႉသေယဝ်ႉ၊-
ၸွမ်းၽၢႆႇပွတ်းၸၢၼ်းၼမ်ႉ ယေႃးတၢၼ်ႇ၊ ၵႂႃႇသုတ်းတိူၵ်ႈၵႃႈတီႈ ပၢင်ႇလၢႆႇတၢႆ၊ ဢေႃႈ။ “ၸိူဝ်းၼႆႉတၵ်းလႆႈပဵၼ်ၶွပ်ႇၼမ်ႉလႅၼ်လိၼ်တင်းသီႇၽၢႆႇသီႇၼႃႈမိူင်းသူၼၼ်ႉဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ မူဝ်းသေႇ၊ သင်ႇလၢတ်ႈၵႃႈတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈ၊ “ဢၼ်ၼႆႉၸမ်ႉ၊ပဵၼ်မိူင်းဢၼ်သူတၵ်းလႆႈတူၵ်းၸႃႇၵွၵ်ႈလႄႈၽႄမႅင်ႇၵၼ်ဢဝ်မိူင်းဢၼ် ထႃႇဝရႃႉၽြႃး၊ ဢၢပ်ႈပၼ်တီႈမဵဝ်းၵူၼ်းၵဝ်ႈမဵဝ်းပၢႆၶိုင်ႈၼိုင်ႈၼၼ်ႉဢေႃႈ။-
လွင်ႈမၼ်းၸမ်ႉ၊ၵူၼ်းမဵဝ်း မၼႃႇသေႇ၊ ၶိုင်ႈၼိုင်ႈဢိၵ်ႇတင်းၵူၼ်းမဵဝ်း ရုပိၼ်ႇ၊ ဢိၵ်ႇတင်းၵူၼ်းမဵဝ်း ၵၢတ်ႉ၊ ၸိူဝ်းၼၼ်ႉလႆႈႁပ်ႉဢဝ်လိၼ်မိူင်းၶဝ်ဢၼ်ၽႄမႅင်ႇပၼ်ၸွမ်းၼင်ႇၸိူဝ်ႉၶိူဝ်းႁိူၼ်းၽႂ်ႁိူၼ်းမၼ်း၊-
ၽၢႆႇဝၼ်းဢွၵ်ႇၼမ်ႉ ယေႃးတၢၼ်ႇ၊ သိုဝ်ႈၵၼ်တင်းဝဵင်း ယေႇရိၶူဝ်း၊ ၼၼ်ႉယဝ်ႉ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ ထႅင်ႈလႄႈဝႃႈၸမ်ႉ၊-
“ယဵၸ်ႈပရေႃးႁဵၵ်ႈ ဢေးလႃႇၸႃႇ၊ တင်း ယေႃးသု၊ လုၵ်ႈၸၢႆး ၼုၼ်ႇ၊ ၼၼ်ႉတၵ်းလႆႈဢဝ်လိၼ်မိူင်းၼၼ်ႉၽႄမႅင်ႇပၼ်ၵူၼ်းတင်းလၢႆဢေႃႈ။-
လိူဝ်သေၼၼ်ႉသမ်ႉတၵ်းလႆႈလိူၵ်ႈဢဝ်ၵႃႈၼႂ်းၸိူဝ်ႉၶိူဝ်းၵူၼ်းယေႈမဵဝ်းၽူႈဢွၼ်ႁူဝ်ယေႈၵေႃႉႁႂ်ႈလႆႈၸွႆႈထႅမ်ၶဝ်ဢေႃႈ။-
ၶဝ်ၸိူဝ်းၼႆႉပဵၼ်ၵေႃႉဢၼ် ထႃႇဝရႃႉၽြႃး၊ ၸႂ်ႉႁႂ်ႈၶဝ်ၽႄမႅင်ႇလိၼ်မိူင်း ၶႃႇၼၼ်ႇ၊ ၼၼ်ႉပၼ်တီႈၵူၼ်းမဵဝ်း ဢိသရေး၊ တင်းလၢႆဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉတီႈ မူဝ်းသေႇ၊ ၵႃႈတီႈပၢင်ႇပဵင်းမိူင်း မေႃႇၽႃႉ၊ ၵႃႈႁိမ်းၼမ်ႉ ယေႃးတၢၼ်ႇ၊ သိုဝ်ႈဝဵင်း ယေႇရိၶူဝ်း၊ ၼၼ်ႉလႄႈဝႃႈ၊-
“မႂ်းတၵ်းလႆႈသင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလွင်ႈဢၼ်ၶဝ်တၵ်းလႆႈဢဝ်ဝဵင်းၵမ်ႈၽွင်ႈၵႃႈၼႂ်းလိၼ်မိူင်းဢၼ်ၶဝ်လႆႈၶၢမ်ႇဢမူၺ်ႇလႄႈပိူင်ႇၼၼ်ႉပၼ်တီႈၵူၼ်း လေႇဝိ၊ ပုၼ်ႈဢၼ်ၶဝ်တၵ်းယူႇဢိၵ်ႇတင်းလိၼ်ဢၼ်မီးႁွပ်ႈဝဵင်းၸိူဝ်းၼၼ်ႉပၼ်ပုၼ်ႈတီႈဢၼ်တၵ်းလဵင်ႉသူဝ်းလဵင်ႉဝူဝ်းၶဝ်ဢေႃႈ။-
ဝဵင်းၸိူဝ်းၼၼ်ႉတၵ်းလႆႈပဵၼ်ဝဵင်းဢၼ်ၶဝ်ပိူင်ႇလႄႈယူႇသဝ်းဢေႃႈ။ ပၢင်ႇယိူဝ်ႈဢၼ်မီးႁွပ်ႈဝဵင်းၶဝ်ၼၼ်ႉၵေႃႈ တၵ်းလႆႈပဵၼ်ပၢင်ႇလဵင်ႉသူဝ်းလဵင်ႉဝူဝ်း ဢိၵ်ႇတင်းတရိၵ်ႈသၢၼ်ႇၶဝ်တၢင်ႇမဵဝ်းဢေႃႈ။-
ပၢင်ႇယိူဝ်ႈၼၼ်ႉတၵ်းလႆႈလဵပ်ႈႁွပ်ႈၸပ်းၸွမ်းၼွၵ်ႈလမ်းဝဵင်းၵႂၢင်ႈသွင်ပၢၵ်ႇႁႃႈသိပ်းဝႃးဢေႃႈ။-
ပိူဝ်ႈၼႆလႄႈတၢင်းၵႂၢင်ႈပႃႈၼွၵ်ႈဝဵင်းၸိုင်၊တၵ်းမီးတၢင်းၵႂၢင်ႈမၼ်းယေႈၼႃႈႁႃႈပၢၵ်ႇဝႃးပဵၼ်သီႇၸဵင်ႇပဵင်းၵၼ်ဝႆႉဢေႃႈ။-
ၼႂ်းၵႃႈဝဵင်းၸိူဝ်းဢၼ်ပၼ်တီႈမဵဝ်း လေႇဝိ၊ ၼၼ်ႉတၵ်းလႆႈမီးဝဵင်းတီႈဢၼ်တၵ်းပၢႆႈၵႂႃႇသွၼ်ႈပိုင်ႈလႆႈႁူၵ်းဝဵင်းပုၼ်ႈၵူၼ်းဢၼ်ဢမ်ႇလႆႈတင်ႈၸႂ်ဝႆႉၸႂ်လႄႈလႆႈဢဝ်ၵူၼ်းတၢႆမႅၼ်ႈၼၼ်ႉဢေႃႈ။ လိူဝ်သေၼၼ်ႉတၵ်းလႆႈပၼ်ဝဵင်းပုၼ်ႈဢၼ်ၶဝ်တၵ်းယူႇသီႇသိပ်းပၢႆသွင်ဝဵင်းဢေႃႈ။-
ၼင်ႇၼၼ်လႄႈဝဵင်းပုၼ်ႈၵူၼ်း လေႇဝိ၊ ၶဝ်မီးသီႇသိပ်းပၢႆပႅတ်ႇဝဵင်းပႃးတင်းပၢင်ႇယိူဝ်ႈဢၼ်ႁွပ်ႈဝဵင်းၸိူဝ်းၼၼ်ႉဢေႃႈ။-
ၵႃႈၼႂ်းလိၼ်ဢၼ်ၵူၼ်းမဵဝ်း ဢိသရေး၊ တင်းလၢႆလႆႈပိူင်ႇၼၼ်ႉ၊ၵႃႈတီႈၶဝ်ၸိူဝ်းဢၼ်လႆႈလိၼ်ၼမ်ၼၼ်ႉတၵ်းလႆႈဢဝ်ဝဵင်းဢၼ်ၼမ်၊ၵႃႈတီႈၶဝ်ၸိူဝ်းဢၼ်လႆႈလိၼ်ဢၼ်ၵေႇၼၼ်ႉတၵ်းလႆႈဢဝ်ဝဵင်းဢၼ်ၵေႇသေလႄႈပၼ်ႁႂ်ႈပဵၼ်ဝဵင်းၵူၼ်း လေႇဝိ၊ တင်းလၢႆဢေႃႈ။”
ၸဝ်ႈထႃႇဝရႃႉၽြႃး၊ သမ်ႉမီးဢမိင်ႉၵႃႈတီႈ မူဝ်းသေႇ၊ ထႅင်ႈလႄႈ။-
ႁႂ်ႈမၼ်းသင်ႇသွၼ်ၵူၼ်းမဵဝ်း ဢိသရေး၊ တင်းလၢႆလႄႈဝႃႈၸမ်ႉ၊ “မိူဝ်ႈဢၼ်သူၶၢမ်ႈၼမ်ႉ ယေႃးတၢၼ်ႇ၊ လႄႈၶဝ်ႈထိုင်ၵႃႈၼႂ်းမိူင်း ၶႃႇၼၼ်ႇ၊ ၼၼ်ႉၸိုင်၊-
သူတၵ်းလႆႈလိူၵ်ႈဝႆႉဝဵင်းတီႈဢၼ်တၵ်းပၢႆႈတဵတ်ႇပၢႆႈသွၼ်ႈပုၼ်ႈၵေႃႉဢၼ်ဢမ်ႇလႆႈတင်ႈၸႂ်ဝႆႉၸႂ်လႄႈလႆႈဢဝ်ၵူၼ်းတၢႆမႅၼ်ႈၼၼ်ႉဢေႃႈ။-
ၵႃႈတီႈဝဵင်းၼၼ်ႉ ၵေႃႉၼၼ်ႉတၵ်းလႆႈၵၢင်းလွတ်ႈၽေးတၢင်းဢၼ်ပီႈၼွင်ႉၸိူဝ်ႉၶိူဝ်းၵေႃႉဢၼ်တၢႆၼၼ်ႉတၵ်းတွပ်ႇတႅၼ်းၼၼ်ႉဢေႃႈ။ လွင်ႈမၼ်းၸမ်ႉ၊ၵေႃႉဢၼ်လႆႈဢဝ်ၵူၼ်းတၢႆမႅၼ်ႈၼၼ်ႉဢမ်ႇလႆႈတၢႆတေႃႇထိုင်ႁွတ်ႈၸူဝ်ႈဢၼ်မၼ်းဢမ်ႇပႆႇၽႅဝ်ႁွတ်ႈတၢင်းဢၼ်ၸီႇယၢင်ႇတြႃးၵႃႈတီႈၽၢႆႇၼႃႈပရိၵ်ႈသၢတ်ႈၼၼ်ႉဢေႃႈ။-
ဝဵင်းႁူၵ်းဝဵင်းၼႆႉတၵ်းလႆႈပဵၼ်တီႈဢၼ်ပၢႆႈတဵတ်ႇပၢႆႈသွၼ်ႈပုၼ်ႈၵူၼ်းမဵဝ်း ဢိသရေး၊ ဢိၵ်ႇတင်းၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းဢၼ်ပဵၼ်ၶႅၵ်ႇသူဢၼ်ဢမ်ႇလႆႈတင်ႈၸႂ်ဝႆႉၸႂ်လႄႈလႆႈဢဝ်ၵူၼ်းတၢႆမႅၼ်ႈၼၼ်ႉၵႂႃႇတဵတ်ႇၵႂႃႇသွၼ်ႈသေဝဵင်းဝဵင်းဢေႃႈ။
ပီႈၼွင်ႉၸမ်ၵၼ်တင်းၵေႃႉဢၼ်တၢႆၼၼ်ႉမီးဢၶႂၢင်ႉဢၼ်တၵ်းဢဝ်ၵေႃႉဢၼ်ဢဝ်ဢသၢၵ်ႈၵူၼ်းတၢႆၼၼ်ႉတၢႆဢေႃႈ။ မိူဝ်ႈဢၼ်မၼ်းထူပ်းႁၼ်ၵေႃႉၼၼ်ႉၸိုင်၊မၼ်းတၵ်းလႆႈဢဝ်ၵေႃႉၼၼ်ႉတၢႆဢေႃႈ။
“ပေႃးၵူၼ်းသေၵေႃႉၵေႃႉဝႆႉၸႂ်တီႈပိူၼ်ႈလႄႈဢီးႁႂ်ႈမၼ်းတူၵ်းတၢႆ၊ဢမ်ႇၼၼ်လွမ်ပႂ်ႉယူႇလႄႈဢဝ်သေမဵဝ်းမဵဝ်းပိုဝ်ႈသႂ်ႇထၢၼ်ႈပေႃးတၢႆ၊-
ဢမ်ႇၼၼ်ၵေႃႈ ဢဝ်တႃမိုဝ်းပေႃႉထုပ်ႉထၢၼ်ႈပေႃးတၢႆၸိုင်၊ၵေႃႉဢၼ်ပေႃႉယႅၼ်ႉၼၼ်ႉမီးဢပျတ်ႈဢၼ်ဢဝ်ဢသၢၵ်ႈၵူၼ်းတၢႆယဝ်ႉလႄႈ၊တၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၼ်ပဵၼ်ဢေႃႈ။ ပီႈၼွင်ႉၸမ်ၵၼ်တင်းၵေႃႉဢၼ်တၢႆၼၼ်ႉမီးဢၶႂၢင်ႉဢၼ်တၵ်းဢဝ်ၵေႃႉၼၼ်ႉတၢႆဢေႃႈ။ မိူဝ်ႈဢၼ်မၼ်းထူပ်းႁၼ်ၵေႃႉၼၼ်ႉၸိုင်၊မၼ်းတၵ်းလႆႈဢဝ်ၵေႃႉၼၼ်ႉတၢႆဢေႃႈ။
“ဢမ်ႇၼၼ်ၵေႃႈပေႃးၵူၼ်းသေၵေႃႉၵေႃႉယင်းဢမ်ႇတင်ႈၸႂ်ဝႆႉၸႂ်လႄႈဢဝ်ပိူၼ်ႈတၢင်ႇၵေႃႉဢၼ်မၼ်းဢမ်ႇလႆႈၸင်းၼၼ်ႉဢီးတူၵ်းမႅၼ်ႈလႄႈ၊ဢမ်ႇၼၼ်ယင်းဢမ်ႇလွမ်ပႂ်ႉယူႇလႄႈဢဝ်သေမဵဝ်းမဵဝ်းပိုဝ်ႈသႂ်ႇမႅၼ်ႈလႄႈတၢႆ၊-
ဢမ်ႇၼၼ်ယင်းဢမ်ႇၸႂ်ႈရၢၼ်ႇသူႇမၼ်း၊ဢမ်ႇမီးၸႂ်ဢၼ်ၸင်းမၼ်း၊ယင်းဢမ်ႇႁၼ်မၼ်းလႄႈသမ်ႉလႆႈဢဝ်မၢၵ်ႇႁိၼ်ဢၼ်ႁႂ်ႈၵူၼ်းတၢႆလႆႈၼၼ်ႉထိမ်ႈမႅၼ်ႈလႄႈၵူၼ်းတၢႆၵႂႃႇၸိုင်၊-
ပရိၵ်ႈသၢတ်ႈတင်းလၢႆတၵ်းဢမ်ႇလႆႈယူႇၽၢႆႇပီႈၼွင်ႉၵေႃႉဢၼ်တၢႆလႄႈၶႂ်ႈၶိုၼ်းတွပ်ႇတႅၼ်းၼၼ်ႉ။ တၵ်းလႆႈယူႇၽၢႆႇၵေႃႉဢၼ်ဢမ်ႇလႆႈတင်ႈၸႂ်ဝႆႉၸႂ်လႄႈဢဝ်ၵူၼ်းတၢႆမႅၼ်ႈၼၼ်ႉသေလႄႈၸီႇယၢင်ႇတြႃးဢေႃႈ။-
ပရိၵ်ႈသၢတ်ႈတင်းလၢႆတၵ်းလႆႈၵႄႇသႄႇဢဝ်ၵေႃႉဢၼ်ဢဝ်ၵူၼ်းတၢႆမႅၼ်ႈၼၼ်ႉသေၵႃႈတီႈမိုဝ်းပီႈၼွင်ႉၵေႃႉဢၼ်တၢႆၼၼ်ႉသေလႄႈ၊ၶဝ်တၵ်းလႆႈဢဝ်မၼ်းၶိုၼ်းသူင်ႇၵႂႃႇဝႆႉၵႃႈတီႈဝဵင်းဢၼ်မၼ်းပၢႆႈတဵတ်ႇပၢႆႈသွၼ်ႈမႃးၼၼ်ႉဢေႃႈ။ မၼ်းၼၼ်ႉၵေႃႈတၵ်းလႆႈတဵတ်ႇယူႇသွၼ်ႈယူႇၵႃႈတီႈၼၼ်ႈတေႃႇထိုင်ႁွတ်ႈၵေႃႉဢၼ်ပဵၼ်ၶုၼ်ယဵၸ်ႈပရေႃးႁဵၵ်ႈ တၢႆၼၼ်ႉဢေႃႈ။-
ပေႃးၵေႃႉဢၼ်ဢဝ်ဢသၢၵ်ႈၵူၼ်းတၢႆမႅၼ်ႈၼၼ်ႉဢွၵ်ႇပူၼ်ႉလႅၼ်လိၼ်ဝဵင်းဢၼ်မၼ်းတဵတ်ႇယူႇသွၼ်ႈယူႇသေယဝ်ႉ၊-
ပေႃးပီႈၼွင်ႉၵေႃႉဢၼ်တၢႆၼၼ်ႉႁၼ်မၼ်းလႄႈဢဝ်မၼ်းတၢႆၸိုင်၊လွင်ႈတၢင်းဢၼ်တွပ်ႇဢၼ်တႅၼ်းၼၼ်ႉဢမ်ႇမီးဢပျတ်ႈဢၼ်ဢဝ်ဢသၢၵ်ႈၵူၼ်းတၢႆ။-
လွင်ႈမၼ်းၸမ်ႉ၊ၵေႃႉၼၼ်ႉထုၵ်ႇလီတဵတ်ႇယူႇသွၼ်ႈယူႇၵႃႈၼႂ်းဝဵင်းဢၼ်မၼ်းပၢႆႈတဵတ်ႇပၢႆႈသွၼ်ႈၼၼ်ႉတေႃႇထိုင်ႁွတ်ႈၶုၼ်ယဵၸ်ႈပရေႃးႁဵၵ်ႈၼၼ်ႉတၢႆၼၼ်ႉဢေႃႈ။ လိုၼ်းသေၶုၼ်ယဵၸ်ႈပရေႃးႁဵၵ်ႈတၢႆၼၼ်ႉမၼ်းမီးဢၶႂၢင်ႉဢၼ်ၶိုၼ်းမႃးၵႃႈတီႈလိၼ်ဢၼ်မၼ်းပိူင်ႇၼၼ်ႉဢေႃႈ။-
ဢၼ်ၼႆႉၸမ်ႉ၊တၵ်းလႆႈပဵၼ်ထုင်းတြႃးတီႈသူၸူဝ်ႈလုၵ်ႈပၢၼ်လၢၼ်သိုပ်ႇသိုပ်ႇတၢမ်တၢမ်ၵႃႈတီႈဢၼ်သူယူႇၵူႈတီႈၵူႈလႅၼ်ၼၼ်ႉဢေႃႈ။
“ပေႃးၵူၼ်းသေၵေႃႉၵေႃႉဢဝ်ပိူၼ်ႈတၢႆၸိုင်၊ၵေႃႉဢၼ်ဢဝ်ဢသၢၵ်ႈၵူၼ်းတၢႆၼၼ်ႉတၵ်းလႆႈၶၢမ်ႇတၢင်းဢၼ်ဢဝ်တၢႆၸွမ်းၼင်ႇၵႂၢမ်းၵူၼ်းဢၼ်လႆႈၶၢမ်ႇသၢၵ်ႈသေႇၼၼ်ႉဢေႃႈ။ ၼႂ်းဝႃႈၼၼ်သေၵေႃႈ၊ပေႃးမီးၵူၼ်းဢၼ်ၶၢမ်ႇသၢၵ်ႈသေႇၵေႃႉလဵဝ်ၵူၺ်းၸိုင်၊ဢမ်ႇလႆႈဢဝ်မၼ်းတၢႆ။-
လိူဝ်သေၼၼ်ႉသူဢမ်ႇလႆႈႁပ်ႉဢဝ်ငိုၼ်းဢၼ်ထုတ်ႇဢဝ်ဢသၢၵ်ႈၵေႃႉဢၼ်ဢဝ်ၵူၼ်းတၢႆဢၼ်ထိူၵ်ႈလႆႈၶၢမ်ႇတၢင်းတၢႆၼၼ်ႉ။ မၼ်းတၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၼ်ပဵၼ်ဢေႃႈ။-
ၵေႃႉဢၼ်လႆႈပၢႆႈၵႂႃႇတဵတ်ႇၵႂႃႇသွၼ်ႈၵႃႈတီႈဝဵင်းၼၼ်ႉ၊သူတၵ်းဢမ်ႇလႆႈႁပ်ႉဢဝ်ငိုၼ်းပုၼ်ႈဢၼ်ထုတ်ႇဢဝ်ႁႂ်ႈမၼ်းလႆႈၶိုၼ်းမႃးယူႇၵႃႈတီႈတီႈယူႇၵဝ်ႇၵဝ်ႇမၼ်းၸူဝ်ႈဢၼ်ၶုၼ်ယဵၸ်ႈပရေႃးႁဵၵ်ႈဢမ်ႇပႆႇတၢႆၼၼ်ႉ။-
ပေႃးသူႁပ်ႉငိုၼ်းဢၼ်ထုတ်ႇဢဝ်ၸိုင်၊သူႁဵတ်းႁႂ်ႈမိူင်းဢၼ်သူယူႇၼၼ်ႉၵူဝ်ႈၵိူၵ်ႇဢေႃႈ။ တၢင်းဢၼ်ဢဝ်ဢသၢၵ်ႈၵူၼ်းတၢႆၼၼ်ႉၸၢင်ႈႁႂ်ႈမိူင်းၵူဝ်ႈၵိူၵ်ႇဢေႃႈ။ လိူဝ်သေတၢင်းဢၼ်ဢဝ်တၢႆၵေႃႉဢၼ်ဢဝ်ဢသၢၵ်ႈၵူၼ်းတၢႆၼၼ်ႉလႄႈဢမ်ႇမီးၵႃႈသင်တေႁဵတ်းႁႂ်ႈမိူင်းၼၼ်ႉမူတ်းသႂ်လႄႈၵၢင်းလွတ်ႈတင်းတၢင်းဢၼ်ၵူၼ်းတၢႆၼႂ်းမၼ်း။-
ယႃႇပေႁႂ်ႈမိူင်းဢၼ်သူယူႇၼၼ်ႉလႆႈၵူဝ်ႈၵိူၵ်ႇ။ လွင်ႈမၼ်းၸမ်ႉ၊ၵဝ်ပဵၼ် ထႃႇဝရႃႉၽြႃး၊ ဢၼ်ၵိင်းဝၢပ်ႈယူႇၵႃႈၼႂ်းၵၢင်ၵူၼ်းမဵဝ်း ဢိသရေး၊ တင်းလၢႆဢေႃႈ၊” ဝႃႈၼင်ႇၼႆဢေႃႈ။
ၵူၼ်းဢၼ်ပဵၼ်ၵႄႇပဵၼ်ႁူဝ်ၵႃႈၼႂ်းၶိူဝ်းႁိူၼ်း ၵိလတ်ႉ၊ လုၵ်ႈၸၢႆး မႃႇၶိရႃႉ၊ ဢၼ်ပဵၼ်လၢၼ် မၼႃႇသေႇ၊ လုၵ်ႈၸၢႆး ယူဝ်းသႅပ်ႈ၊ ၸိူဝ်းၼၼ်ႉဢွၼ်ၵၼ်ၶဝ်ႈၸူးၵႃႈတီႈ မူဝ်းသေႇ၊ ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်း ဢိသရေး၊ တင်းလၢႆလႄႈလဝ်ႈလၢတ်ႈဝႃႈ၊-
“ ထႃႇဝရႃႉၽြႃး၊ မီးဢမိင်ႉႁႂ်ႈၸဝ်ႈႁဝ်းၶႃႈတူၵ်းၸႃႇၵွၵ်ႈသေလႄႈၽႄမႅင်ႇဢမူၺ်ႇလိၼ်ပၼ်တီႈၵူၼ်းမဵဝ်း ဢိသရေး၊ တင်းလၢႆတီႈၶႃႈယဝ်ႉ။ မၼ်းၸဝ်ႈသမ်ႉမီးဢမိင်ႉႁႂ်ႈၸဝ်ႈႁဝ်းၶႃႈဢဝ်လိၼ်ဢမူၺ်ႇပီႈၸၢႆးႁဝ်းၶႃႈ ၸလေႃးၽတ်ႉ၊ ၼၼ်ႉပၼ်တီႈလုၵ်ႈယိင်းမၼ်းတင်းလၢႆတီႈၶႃႈဢေႃႈ။-
ၵူၺ်းၵႃႈ၊ပေႃးၶဝ်တႄႇၼႃႈႁိူၼ်းလူၺ်ႈၵၼ်တင်းၵူၼ်းမဵဝ်း ဢိသရေး၊ တၢင်ႇၶိူဝ်းၸိုင်၊လိၼ်ဢမူၺ်ႇၶဝ်ၼၼ်ႉ၊ၽူဝ်ၶဝ်ဢၼ်ပဵၼ်ၵူၼ်းတၢင်ႇၸိူဝ်ႉတၢင်ႇၶိူဝ်းၼၼ်ႉတၵ်းပိူင်ႇၶႃႈဢေႃႈ။ ၼင်ႇၼၼ်လႄႈလိၼ်ဢမူၺ်ႇၶႃႈၸဝ်ႈႁဝ်းၸိူဝ်းၼႆႉတၵ်းယွမ်းၵႂႃႇၶႃႈဢေႃႈ။-
မိူဝ်ႈဢၼ်ႁွတ်ႈထိုင်ပီဢၼ်ပၼ်ၶိုၼ်းၸိုင်၊လိၼ်ဢမူၺ်ႇဢၼ်ၶဝ်ပႃးၵႂႃႇၼၼ်ႉတၵ်းတႄႇယူႇသေႇသေႇၵႃႈၼႂ်းဢမူၺ်ႇၽူဝ်ၶဝ်ဢၼ်ပဵၼ်ၵူၼ်းတၢင်ႇၶိူဝ်းလႄႈ၊လိၼ်ဢမူၺ်ႇၼႂ်းၵူၼ်းမဵဝ်းၶႃႈၸဝ်ႈႁဝ်းၸိူဝ်းၼႆႉတၵ်းသုမ်းႁၢႆၵႂႃႇၶႃႈဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ မူဝ်းသေႇ၊ သင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆၸွမ်းၼင်ႇဢမိင်ႉ ထႃႇဝရႃႉၽြႃး၊ မီးၼၼ်ႉလႄႈဝႃႈ၊ “ၵႂၢမ်းဢၼ်ၵူၼ်းၸိူဝ်ႉၶိူဝ်း မၼႃႇသေႇ၊ လၢတ်ႈၼႆႉၸိုဝ်ႈၸႂ်ႈဢေႃႈ။-
ထႃႇဝရႃႉၽြႃး၊ မီးဢမိင်ႉလူၺ်ႈလွင်ႈလုၵ်ႈယိင်း ၸလေႃးၽတ်ႉ၊ ၸိူဝ်းၼၼ်ႉၸမ်ႉ၊ ‘ႁႂ်ႈၶဝ်ဢဝ်ၵၼ်တင်းၵေႃႉဢၼ်ၶဝ်ၵျိူၵ်ႈၼၼ်ႉတႃႉ။ ၼႂ်းဝႃႈၼၼ်သေၵေႃႈႁႂ်ႈၶဝ်ဢဝ်ၵၼ်တင်းၵူၼ်းၸိူဝ်ႉၶိူဝ်းမဵဝ်းလဵဝ်ၵၼ်ၵူၺ်းတႃႉ။-
ၼင်ႇၼၼ်လႄႈလိၼ်ဢမူၺ်ႇၵူၼ်းမဵဝ်း ဢိသရေး၊ ၸိူဝ်းၼၼ်ႉတင်းသဵင်ႈတင်းလူင်တၵ်းတႄႇယူႇၼႂ်းမိုဝ်းၵူၼ်းၸိူဝ်ႉၶိူဝ်းၽႂ်ၸိူဝ်ႉၶိူဝ်းမၼ်းဢေႃႈ။-
မႄႈယိင်းဢၼ်မီးလိၼ်ဢမူၺ်ႇၵႃႈၼႂ်းၵူၼ်းမဵဝ်း ဢိသရေး၊ သေၸိူဝ်ႉသေၶိူဝ်းၼၼ်ႉတၵ်းလႆႈဢဝ်ၵၼ်တင်းၵူၼ်းၸိူဝ်ႉၶိူဝ်းလဵဝ်ၵၼ်တင်းမၼ်းၼၼ်ႉဢေႃႈ။ ႁဵတ်းၸိူဝ်ႉၼင်ႇၼႆၸင်ႇၸိူဝ်ႉၶိူဝ်းၵူၼ်းမဵဝ်း ဢိသရေး၊ ၼၼ်ႉတၵ်းလႆႈၸၢမ်ႇၸႃးလိၼ်ဢမူၺ်ႇမဵဝ်းပူႇမဵဝ်းပေႃႈၶဝ်ႁင်းၽႂ်ႁင်းမၼ်းဢေႃႈ။-
ၼင်ႇၼၼ်လႄႈလိၼ်ဢမူၺ်ႇဢမ်ႇလႆႈၶၢႆႉသေၵႃႈတီႈၶိူဝ်းၼိုင်ႈၵႂႃႇယူႇၵႃႈတီႈၶိူဝ်းၼိုင်ႈဢေႃႈ။ လွင်ႈမၼ်းၸမ်ႉ၊ၵူၼ်းမဵဝ်း ဢိသရေး၊ တင်းလၢႆတၵ်းလႆႈယူႇၵႃႈတီႈလိၼ်ဢမူၺ်ႇၶဝ်ႁင်းၽႂ်ႁင်းမၼ်းဢေႃႈ၊’ ” ဝႃႈၼင်ႇၼႆဢေႃႈ။
ပိူဝ်ႈၼႆလႄႈၸွမ်းၼင်ႇဢမိင်ႉ ထႃႇဝရႃႉၽြႃး၊ မီးတီႈ မူဝ်းသေႇ၊ ၼၼ်ႉလုၵ်ႈယိင်း ၸလေႃးၽတ်ႉ၊ ၸိူဝ်းၼၼ်ႉႁဵတ်းၸွမ်းလႄႈ၊-
မႃႇလႃႇ၊တိရၸႃႉ၊ႁေႃႇၵလႃႇ၊မိလၶႃႇ၊ၼေႃႇဢႃႇ၊ ၸိူဝ်းၼၼ်ႉဢွၼ်ၵၼ်ဢဝ်ၵၼ်တင်းလုၵ်ႈၸၢႆးပေႃႈဢၢဝ်ၶဝ်ပေႃႈလုင်းၶဝ်ဢေႃႈ။-
ၶဝ်ႁဵတ်းၸိူဝ်ႉၼင်ႇၼၼ်ဢဝ်ၵၼ်တင်းၵူၼ်းၸိူဝ်ႉၶိူဝ်းႁိူၼ်းလဵဝ်ၵၼ်ၵႃႈၼႂ်းၸိူဝ်ႉၶိူဝ်း မၼႃႇသေႇ၊ လုၵ်ႈၸၢႆး ယူဝ်းသႅပ်ႈ၊ ၼၼ်ႉလႄႈလိၼ်ဢမူၺ်ႇၶဝ်ၼၼ်ႉတႄႇယူႇၼႂ်းမိုဝ်းမဵဝ်းပူႇမဵဝ်းပေႃႈၶဝ်ဢေႃႈ။
ဢၼ်ၸိူဝ်းၼႆႉပဵၼ်ထုင်းတြႃးဢိၵ်ႇတင်းပိင်းၺၢပ်ႈတင်းလၢႆဢၼ် ထႃႇဝရႃႉၽြႃး၊ ပိင်းၺၢပ်ႈဝႆႉတီႈၵူၼ်းမဵဝ်း ဢိသရေး၊ တင်းလၢႆလူၺ်ႈ မူဝ်းသေႇ၊ ၵႃႈၼႂ်းပၢင်ႇပဵင်းမိူင်း မေႃႇၽႃႉ၊ ၵႃႈႁိမ်းၼမ်ႉ ယေႃးတၢၼ်ႇ၊ သိုဝ်ႈဝဵင်း ယေႇရိၶူဝ်း၊ ၼၼ်ႉဢေႃႈ။ ၵျၢမ်းဢၼ်ယူႇၼႂ်းထိူၼ်ႇယဝ်ႉယဝ်ႉဢေႃႈ။
ၽိုၼ်လိၵ်ႈၼႆႉပဵၼ်ၶေႃႈၵႂၢမ်းဢၼ် မူဝ်းသေႇ၊ သင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆယၢမ်းမိူဝ်ႈဢၼ်ၶဝ်ယင်းမီးယူႇၵႃႈၼႂ်းထိူၼ်ႇဢၼ်ႁႅင်ႈႁွင်ၽၢႆႇဝၼ်းဢွၵ်ႇၼမ်ႉ ယေႃးတၢၼ်ႇ၊ ပုၼ်ႉၼၼ်ႉဢေႃႈ။ ၶဝ်မႃးမီးယူႇၵႃႈတီႈထူင်ႉ ယေႃးတၢၼ်ႇ၊ ၵႃႈတီႈႁိမ်းဝဵင်း သုၽႃႉ၊ ဝူင်ႈၵၢင်ဝဵင်း ပႃႇရၼ်ႇ၊ မီးၽၢႆႇၼိုင်ႈလႄႈဝဵင်း တေႃႇၽေးလႃႉ၊ ဝဵင်း လႃႇပၢၼ်ႇ၊ ဝဵင်း ႁႃႇၸရုတ်ႉ၊ တင်းဝဵင်း တိၸႁပ်ႉ၊ သမ်ႉမီးတၢင်ႇၽၢႆႇၼၼ်ႉဢေႃႈ။-
လုၵ်ႉသေၵႃႈတီႈလွႆ သိၼႃႉ၊ ၵႂႃႇၸွမ်းသဵၼ်ႈတၢင်းလွႆမိူင်း ဢေႇတုမ်ႇ၊ တေႃႇထိုင်ႁွတ်ႈဝဵင်း ၵႃႇတေႇသပႃႇၼႃႉ၊ ၼၼ်ႉၶၢဝ်းတၢင်းယၢၼ်ၵၼ်သိပ်းဢဵတ်းဝၼ်းဢေႃႈ။-
ၶဝ်ဢွၵ်ႇသေမိူင်း ဢေးၵျိပ်ႉ၊ မႃးလႆႈသီႇသိပ်းပီတဵမ်၊ၼႂ်းလိူၼ်သိပ်းဢဵတ်းမႂ်ႇဝၼ်းၼိုင်ႈၼၼ်ႉ၊ မူဝ်းသေႇ၊ ႁေႃးလၢတ်ႈတီႈၵူၼ်းမဵဝ်း ဢိသရေး၊ တင်းလၢႆၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉႁႂ်ႈမၼ်းသင်ႇလၢတ်ႈၶဝ်ၼၼ်ႉဢေႃႈ။-
ပဵၼ်မိူဝ်ႈဢၼ်ဝၢႆးသေ ထႃႇဝရႃႉၽြႃး၊ တိုၵ်းတေႃးယႃႉပႅတ်ႈၶုၼ်ႁေႃၶမ်း သိႁုၼ်ႇ၊ ၵူၼ်းမဵဝ်း ဢႃႇမေႃးရိ၊ ဢၼ်ဢုပ်ႉဝဵင်း ႁေႇသၽုၼ်ႇ၊ ဢိၵ်ႇတင်းၶုၼ်ႁေႃၶမ်း ဢေႃႇၶႃႉ၊ ၵူၼ်းမဵဝ်း ပႃႇသၢၼ်ႇ၊ ဢၼ်ဢုပ်ႉဝဵင်း ဢႃႇသတႃႇရုတ်ႉ၊ တင်းဝဵင်း ဢေႇတရိ၊ ယဝ်ႉၼၼ်ႉဢေႃႈ။-
မူဝ်းသေႇ၊ ၸႃႉႁေႃးလၢတ်ႈတြႃးၼႆႉၵႃႈႁိမ်းၼမ်ႉ ယေႃးတၢၼ်ႇ၊ ၵႃႈၼႂ်းမိူင်း မေႃႇၽႃႉ၊ လႄႈဝႃႈၸမ်ႉ။
“မိူဝ်ႈဢၼ်ႁဝ်းယင်းမီးယူႇၵႃႈတီႈလွႆ သိၼႃႉ၊ ၼၼ်ႉ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းမီးဢမိင်ႉတီႈႁဝ်းၸမ်ႉ၊ ‘သူယူႇၵႃႈတီႈလွႆၼႆႉႁိုင်ၼႃႇယဝ်ႉ။-
ယႃႉသုမ်ႉထဵင်လႄႈသိုပ်ႇၶၢဝ်းတၢင်းၵႂႃႇတႃႉ။ ဢွၼ်ၵၼ်ၶိုၼ်ႈၵႂႃႇတၢင်းလွႆမိူင်းၵူၼ်း ဢႃႇမေႃးရိ၊ ၶဝ်ဢိၵ်ႇတင်းဢိူင်ႇဢၼ်မီးႁိမ်းႁွမ်းၶဝ်၊ၵႂႃႇၸူးၵႃႈတီႈထူင်ႉ ယေႃးတၢၼ်ႇ၊ ၸူးၵႃႈတီႈၼိူဝ်လွႆၼိူဝ်ၵွင်း၊ၵႂႃႇၸူးၵႃႈတီႈႁူၺ်ႈတီႈႁွင်ႈ၊ၵႂႃႇၸူးၵႃႈတီႈမိူင်းပွတ်းတၢင်းၸၢၼ်း၊ထိုင်ၵႃႈတီႈၽင်ႇပၢင်ႇလၢႆႇ မေႇတိထေးရီးယၼ်း၊ ဢိၵ်ႇတင်းလိၼ်မိူင်း ၶႃႇၼၼိ၊ ၶဝ်တေႃႇထိုင်ႁွတ်ႈၽၢႆႇပုၼ်ႉလွႆ လေႇပၼုၼ်ႇ၊ ၽႅဝ်ၵႂႃႇတီႈၼမ်ႉ ဢုၽရတ်ႉ၊ ၼၼ်ႉတႃႉ။-
မိူင်းၸိူဝ်းၼႆႉတင်းမူတ်းၸိုင်၊ၵဝ် ထႃႇဝရႃႉၽြႃး၊ ဝႆႉၵတိဝႃႈ၊တၵ်းတေပၼ်တီႈပူႇပေႃႈသူ ဢႃႇပြႃႇႁၢမ်ႇ၊ဢိၸၢၵ်ႈ၊ယႃႇၵုပ်ႈ၊ ဢိၵ်ႇတင်းၸူဝ်ႈလုၵ်ႈပၢၼ်လၢၼ်ၶဝ်ဝႆႉယဝ်ႉယဝ်ႉ။ ၵႂႃႇလႄႈသိမ်းဢဝ်တႃႉ၊’” ဝႃႈၼင်ႇၼႆယဝ်ႉ။
“မိူဝ်ႈယၢမ်းၼၼ်ႉ၊ၵဝ်ဝႃႈ၊ ‘ၵဝ်ၵေႃႉလဵဝ်ၵူၺ်းၼႆႉဢမ်ႇပႄႉဢွၼ်ႁူဝ်သူၵႂႃႇလႆႈ။-
ထႃႇဝရႃႉၽြႃး၊ ၽြႃးပဵၼ်ၸဝ်ႈသူၼၼ်ႉႁႂ်ႈသူၼမ်ၵိုၼ်းမႃးၼႃႇလူင်လၢင်ထၢၼ်ႈပေႃးတၢၼ်ႇလၢဝ်ၵၢင်ႁၢဝ်ၼၼ်ႉယဝ်ႉဢေႃႈ။-
ႁႂ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇပေႃႈသူၼၼ်ႉႁႂ်ႈသူၼမ်ၵိုၼ်းထႅင်ႈႁဵင်ပုၼ်ႈလႄႈႁႂ်ႈသူၶိုၼ်ႈယႂ်ႇမႂ်ႇသုင်ၸိူဝ်ႉၼင်ႇဢၼ်ၵတိမၼ်းၸဝ်ႈမီးၼၼ်ႉသေၵမ်းလူၺ်ႈ။-
ၵဝ်ၵေႃႉလဵဝ်ၵူၺ်းတၵ်းႁဵတ်းၸိူဝ်ႉၼင်ႇႁိုဝ် ၵိုတ်ႉႁၢပ်ႇပုၼ်ႈၽွၼ်းဢၼ်ၼၵ်းၼႃႇဢိၵ်ႇတင်းတၢင်းဢၼ်သူၽိတ်းၵၼ်ထဵင်ၵၼ်ၼၼ်ႉလႆႈ။-
လိူၵ်ႈဢဝ်ၵူၼ်းဢၼ်မီးပိင်ႇၺႃႇ၊ၵူၼ်းဢၼ်တၢင်းႁုၼမ်တၢင်းႁၼ်ၵႂၢင်ႈၵႃႈၼႂ်းသူၸွမ်းလူၺ်ႈၸိူဝ်ႉၶိူဝ်းမဵဝ်းၽႂ်မဵဝ်းမၼ်းတႃႉ။ ၵဝ်တၵ်းၶၢၼ်းၶဝ်ပဵၼ်ၵူၼ်းဢၼ်ပဵၼ်ၵႄႇပဵၼ်ႁူဝ်သူဢေႃႈ၊’ ဝႃႈၼႆၵဝ်လၢတ်ႈတီႈသူဢေႃႈ။-”
သူၵေႃႈဢွၼ်ၵၼ်ၽွမ်ႉၸႂ်ၵၼ်ဝႃႈ၊လွင်ႈၼႆႉပဵၼ်ဢၼ်ထုၵ်ႇဢၼ်လီဢေႃႈ။-
ပိူဝ်ႈၼႆလႄႈၵဝ်လိူၵ်ႈဢဝ်ၵူၼ်းဢၼ်မီးပိင်ႇၺႃႇ၊ၵူၼ်းဢၼ်တၢင်းႁုၼမ်တၢင်းႁၼ်ၵႂၢင်ႈတင်းလၢႆ ၵႃႈၼႂ်းၵူၼ်းၸိူဝ်ႉၶိူဝ်းသူႁင်းၽႂ်ႁင်းမၼ်းလႄႈၶၢၼ်းႁႂ်ႈၶဝ်ဢုပ်ႉပိူင်ႇသူဢေႃႈ။ ၶဝ်ၵေႃႈလႆႈႁပ်ႉပုၼ်ႈၽွၼ်းဢၼ်ပဵၼ်ၵူၼ်းလူင်ဢၼ်ဢုပ်ႉၵႃႈၼိူဝ်ၵူၼ်းယေႈႁဵင်၊ဢုပ်ႉၵႃႈၼိူဝ်ၵူၼ်းယေႈပၢၵ်ႇ၊ဢုပ်ႉၵႃႈၼိူဝ်ၵူၼ်းႁႃႈသိပ်း၊ဢုပ်ႉၵႃႈၼိူဝ်ၵူၼ်းသိပ်းၼိုင်ႈတင်းလၢႆယဝ်ႉဢေႃႈ။ ၵဝ်သမ်ႉၶၢၼ်းၵူၼ်းဢၼ်ၸႅတ်ႈသေးၵၢၼ်ငၢၼ်းတင်းလၢႆၵႃႈၼိူဝ်ၸိူဝ်ႉၶိူဝ်းၵူႈမဵဝ်းယဝ်ႉဢေႃႈ။
“မိူဝ်ႈၼၼ်ႉ၊ၵဝ်သင်ႇလၢတ်ႈဝႆႉတီႈၶဝ်ၸိူဝ်းၼၼ်ႉလႄႈဝႃႈ၊ ‘ထွမ်ႇငိၼ်းဢမုဢၼ်ပဵၼ်မႃးၼၼ်ႉလီလီသေလႄႈ၊ပီႈၼွင်ႉၼင်ႇၵၼ်ၵၼ်ပဵၼ်ဢမုၵၼ်သေဢမ်ႇဝႃႈ၊ပေႃးပဵၼ်ဢမုၵၼ်တင်းၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈပိုင်ႈယူႇၸွမ်းသူသေဢမ်ႇဝႃႈ၊တႅပ်းတတ်းႁႂ်ႈၽဵင်ႇၽဵင်ႇတႃႉ။-
ယႃႇပေထွၵ်ႈတေႃႇၼႃႈၽူႈလႂ် ၼႂ်းတၢင်းဢၼ်သူတႅပ်းတတ်းၼၼ်ႉ။ ပဵၼ်ၵူၼ်းဢွၼ်ႇသေဢမ်ႇဝႃႈ၊ပဵၼ်ၵူၼ်းလူင်သေဢမ်ႇဝႃႈ၊ၸီႇယၢင်ႇသိုဝ်ႈသိုဝ်ႈတႃႉ။ သူတၵ်းဢမ်ႇလႆႈၵူဝ်လႆႈႁႄၽူႈလႂ်လႃးလႃး။ လွင်ႈမၼ်းၸမ်ႉ၊တၢင်းဢၼ်ၸီႇယၢင်ႇတြႃးၼၼ်ႉပဵၼ်မႃးၵႃႈတီႈၽြႃးပဵၼ်ၸဝ်ႈဢေႃႈ။ ပေႃးပဵၼ်ဢမုဢၼ်သူဢမ်ႇၸီႇယၢင်ႇလႆႈၼၼ်ႉၸိုင်၊မႃးၸူးၵႃႈတီႈၵဝ်တႃႉ။ ၵဝ်တၵ်းတႅပ်းတတ်းဢေႃႈ၊’ ဝႃႈၼႆၵဝ်လၢတ်ႈတီႈသူဢေႃႈ။-
လွင်ႈတၢင်းၵႃႈဢၼ်သူတၵ်းလႆႈႁဵတ်းၼၼ်ႉၵေႃႈၵဝ်လႆႈသင်ႇလၢတ်ႈဝႆႉမိူဝ်ႈၼၼ်ႉမႃးယဝ်ႉဢေႃႈ။
“ႁဝ်းဢွၼ်ၵၼ်ႁဵတ်းၵႃႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းမီးဢမိင်ႉတီႈႁဝ်းၼၼ်ႉယဝ်ႉ။ ႁဝ်းဢွၵ်ႇသေၵႃႈတီႈလွႆ သိၼႃႉ၊ လႄႈၽႃႇလတ်းၵႃႈၼႂ်းၵၢင်ထိူၼ်ႇလူင်ဢၼ်လီၵူဝ်လီႁႄသေၵႂႃႇၸူးၵႃႈတီႈမိူင်းလွႆၵူၼ်း ဢႃႇမေႃးရိ၊ ၶဝ်ၼၼ်ႉမႃးယဝ်ႉ။ မိူဝ်ႈဢၼ်ႁဝ်းႁွတ်ႈထိုင်ၵႃႈတီႈ ၵႃႇတေႇသပႃႇၼႃႉ၊ ၼၼ်ႉၸိုင်၊-
“ၵူၺ်းၵႃႈ၊သူဢွၼ်ၵၼ်မႃးတီႈၵဝ်လႄႈလဝ်ႈလၢတ်ႈဝႃႈ၊ ‘ႁဝ်းပွႆႇၸႂ်ႉၵူၼ်းၵမ်ႈၽွင်ႈၵႂႃႇဢွၼ်တၢင်းႁဝ်း၊ႁႂ်ႈၶဝ်လွမ်တူၺ်းမိူင်းၼၼ်ႉသေလႄႈမႃးမွၵ်ႇလၢတ်ႈလွင်ႈဢၼ်ႁဝ်းထုၵ်ႇလီၵႂႃႇသဵၼ်ႈတၢင်းသဵၼ်ႈလႂ်ဢိၵ်ႇတင်းဝဵင်းဢၼ်မီးၵႃႈတီႈၼၼ်ႈပဵၼ်ဝဵင်းၸိူဝ်ႉၼင်ႇႁိုဝ်ၼၼ်ႉၵၼ်တႃႉႁဝ်း၊’ ဝႃႈၼႆဢေႃႈ။
“ၵႂၢမ်းၼၼ်ႉၵဝ်ႁၼ်ဝႃႈထုၵ်ႇလီႁဵတ်းၸွမ်းလႄႈ၊ၵဝ်လိူၵ်ႈဢဝ်ၵူၼ်းသိပ်းသွင်ၵေႃႉၵႃႈၼႂ်းသူယေႈၸိူဝ်ႉၶိူဝ်းယေႈၵေႃႉဢေႃႈ။-
ၶဝ်ၼၼ်ႉ၊ဢွၼ်ၵၼ်လဵပ်ႈၶိုၼ်ႈၵႂႃႇၵႃႈတီႈမိူင်းလွႆတေႃႇထိုင်ႁွတ်ႈထူင်ႉ ဢေႇသၵေႃးလႃႉ၊ လႄႈလွမ်တူၺ်းမိူင်းၼၼ်ႉဢေႃႈ။-
ၶဝ်ပႃးဢဝ်မၢၵ်ႇမႆႉဢၼ်ၶဝ်ထူပ်းႁၼ်ၵႃႈၼႂ်းမိူင်းၼၼ်ႉမႃးၵမ်ႈၽွင်ႈသေလႄႈ၊မွၵ်ႇလၢတ်ႈလွင်ႈမိူင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းတၵ်းပၼ်ႁဝ်းၼၼ်ႉပဵၼ်မိူင်းဢၼ်ၽုၼ်ႇလီလိၼ်လီဢေႃႈ။
“ၵူၺ်းၵႃႈ၊သူယင်းဢမ်ႇၵႂႃႇလႄႈယင်းႁဵတ်းၶတ်းၵၼ်တင်းဢမိင်ႉ ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။-
သူသမ်ႉယင်းပွင်ႉၶၢင်းပွင်ႉမိုၼ်ႇတေႃႇၵၼ်လႄႈဝႃႈ၊ ‘ ထႃႇဝရႃႉၽြႃး၊ ၸင်းႁဝ်းဢေႃႈ။ မၼ်းၸဝ်ႈဢွၼ်ႁဝ်းဢွၵ်ႇမိူင်း ဢေးၵျိပ်ႉ၊ မႃးလႄႈ၊ဢဝ်ႁဝ်းဢၢပ်ႈပၼ်ၼႂ်းမိုဝ်းၵူၼ်း ဢႃႇမေႃးရိ၊ ႁႂ်ႈၶဝ်ဢဝ်ႁဝ်းတၢႆဢေႃႈ။-
ႁဝ်းတေၵႂႃႇၵႃႈတီႈၼၼ်ႈႁဵတ်းသင်။ ႁဝ်းၵူဝ်ႁႄၼႃႇဢေႃႈ။ ၵူၼ်းၸိူဝ်းဢၼ်ႁဝ်းပွႆႇၸႂ်ႉၵႂႃႇၼၼ်ႉမႃးမွၵ်ႇလၢတ်ႈႁဝ်းလွင်ႈဢၼ်ၵူၼ်းမိူင်းၼၼ်ႉယဵင်ႈၶႅၼ်းႁႅင်းၼႃႇ၊ယဵင်ႈၶႅၼ်းသုင်ၼႃႇသေႁဝ်းဢိၵ်ႇတင်းၶဝ်ပဵၼ်ၵူၼ်းမိူင်းဢၼ်ယူႇသဝ်းၵႃႈၼႂ်းဝဵင်းလူင်ဢၼ်လမ်းဝဵင်းမၼ်းသုင်ပဵင်းၽႃႉပဵင်းမွၵ်ႇၼၼ်ႉဢေႃႈ။ ၶဝ်လႆႈႁၼ်ၵူၼ်းမဵဝ်းတူဝ်ယႂ်ႇႁႅင်းလူင်တင်းလၢႆၵႃႈတီႈၼၼ်ႈဢေႃႈ၊’ ဝႃႈၼႆယဝ်ႉဢေႃႈ။
“ၵူၺ်းၵႃႈ၊ၵဝ်လၢတ်ႈလႄႈဝႃႈ၊ ‘ယႃႇပေတူၵ်းၸႂ်၊ယႃႇပေၵူဝ်ပေႁႄၶဝ်ၼၼ်ႉ။-
ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းဢွၼ်ႁူဝ်သူလႄႈတၵ်းၸွႆႈသိုၵ်းထႅမ်သိုၵ်းသူမိူၼ်ၸိူဝ်ႉၼင်ႇဢၼ်သူႁၼ်မၼ်းၸဝ်ႈၸွႆႈႁဵတ်းၸွႆႈသၢင်ႈပုၼ်ႈသူၵႃႈၼႂ်းမိူင်း ဢေးၵျိပ်ႉ၊ ၼၼ်ႉ၊-
ဢိၵ်ႇတင်းၵႃႈၼႂ်းထိူၼ်ႇလႅင်ႉၼၼ်ႉဢေႃႈ။ သူလႆႈႁၼ်မၼ်းၸဝ်ႈႁဵတ်းၸိူဝ်ႉၼင်ႇႁိုဝ်ဢွၼ်သူင်ႇသူႁွတ်ႈထိုင်မႃးၵႃႈတီႈၼႆႈလီလီၼၼ်ႉ၊မိူၼ်ၸိူဝ်ႉၼင်ႇပေႃႈဢုမ်ႈလုၵ်ႈမၼ်းၼၼ်ႉယူႇဢေႃႈ၊’ ဝႃႈၼင်ႇၼႆယဝ်ႉဢေႃႈ။-
ၵဝ်လၢတ်ႈဝႃႈထၼ်ႇၼၼ်ႉသေၵေႃႈသူဢမ်ႇယုမ်ႇ ထႃႇဝရႃႉၽြႃး၊ လႄႈယူႇဢေႃႈ။-
မၼ်းၸဝ်ႈၼၼ်ႉဢွၼ်ႁူဝ်သူၵႂႃႇသွၵ်ႈႁႃတီႈပၢင်တပ်ႉပၼ်သူဢေႃႈ။ ပုၼ်ႈဢၼ်တၵ်းၼႄပၼ်သဵၼ်ႈတၢင်းသူၸိုင်၊မၼ်းၸဝ်ႈဢဝ်သဝ်ၽႆးပုၼ်ႈၶိင်ႇၵၢင်ၶိုၼ်းလႄႈသဝ်မွၵ်ႇၵုမ်ႈပုၼ်ႈၶိင်ႇၵၢင်ဝၼ်းဢွၼ်ႁူဝ်ၼႄတၢင်းသူဢေႃႈ။
“ ထႃႇဝရႃႉၽြႃး၊ လႆႈငိၼ်းၵႂၢမ်းဢၼ်သူပွင်ႉၶၢင်းပွင်ႉမိုၼ်ႇလႄႈၸႂ်မႆႈၶႂ်ႈၸႃႉသေယဝ်ႉ၊လၢတ်ႈၵႂၢမ်းဢၼ်ၼၵ်းၼႅၼ်ႈလႄႈဝႃႈ၊-
‘ၵူၼ်းမဵဝ်းဢၼ်ႁၢႆႉယုတ်ႈၼင်ႇသူၼႆႉၵေႃႉလႂ်ၵေႃႈတၵ်းဢမ်ႇလႆႈၶဝ်ႈၸူးၵႃႈၼႂ်းမိူင်းလီမိူင်းငၢမ်းဢၼ်ၵဝ်ဝႆႉၵတိဝႃႈ၊တၵ်းပၼ်တီႈပူႇပေႃႈသူၼၼ်ႉသေၵေႃႉသေၵူၼ်း။-
ၵႃႇလႅပ်ႉ၊ လုၵ်ႈၸၢႆး ယေႇၽုၼ်ႇၼႃႉ၊ ၵေႃႉလဵဝ်ၵူၺ်းတၵ်းတေလႆႈၶဝ်ႈဢေႃႈ။ မၼ်းၼၼ်ႉပႂ်ႉသဵတ်ႈၸႃႇတေႃႇၵဝ်လုမ်းလုမ်းလႄႈၵဝ်တၵ်းဢဝ်မိူင်းဢၼ်မၼ်းလႆႈလႄႇတူၺ်းမႃးၼၼ်ႉဢၢပ်ႈပၼ်မၼ်းဢိၵ်ႇတင်းၸူဝ်ႈလုၵ်ႈပၢၼ်လၢၼ်မၼ်းဢေႃႈ၊’ ဝႃႈၼႆယဝ်ႉဢေႃႈ။-
ၵွပ်ႈပိူဝ်ႈသူလႄႈ ထႃႇဝရႃႉၽြႃး၊ ၸႂ်မႆႈၶႂ်ႈၸႃႉတေႃႇၵဝ်သေယဝ်ႉ၊မီးဢမိင်ႉဝႃႈ၊ ‘မႂ်းၵေႃႈဢမ်ႇလႆႈၶဝ်ႈၵႃႈၼႂ်းမိူင်းၼၼ်ႉ။-
မႂ်းတၵ်းလႆႈပၼ်ႁႅင်းတီႈ ယေႃးသု၊ လုၵ်ႈၸၢႆး ၼုၼ်ႇ၊ ဢၼ်ပဵၼ်ၵူၼ်းၸွႆႈၵူၼ်းထႅမ်မႂ်းၼၼ်ႉဢေႃႈ။ မၼ်းတၵ်းဢွၼ်သူင်ႇၵူၼ်းမဵဝ်း ဢိသရေး၊ ၶဝ်ၵႂႃႇသိမ်းဢဝ်မိူင်းၼၼ်ႉဢေႃႈ၊’ ဝႃႈၼင်ႇၼႆဢေႃႈ။
“ ထႃႇဝရႃႉၽြႃး၊ သမ်ႉမီးဢမိင်ႉတီႈႁဝ်းတင်းသဵင်ႈတင်းလူင်လႄႈဝႃႈ၊ ‘လုၵ်ႈဢွၼ်ႇသူၸိူဝ်းဢၼ်ယင်းလဵၵ်ႉယင်းၼွႆႉဢမ်ႇပႆႇၸၢင်ႈႁုလွင်ႈလီလွင်ႈၸႃႉဢၼ်သူဝႃႈ၊ပိူၼ်ႈတၵ်းတေတိဢဝ်သိမ်းဢဝ်ၶဝ်ၵႂႃႇၸိူဝ်းၼၼ်ႉတၵ်းတေလႆႈၶဝ်ႈၼႂ်းမိူင်းၼၼ်ႉဢေႃႈ။ ၵဝ်တၵ်းဢဝ်မိူင်းၼၼ်ႉဢၢပ်ႈပၼ်တီႈၶဝ်ဢေႃႈ။ ၶဝ်ၵေႃႈတၵ်းသိမ်းဢဝ်ပိူင်ႇဢဝ်ဢေႃႈ။-
သူၸမ်ႉ၊ဢွၼ်ၵၼ်ဝၢႆႇၶိုၼ်းလႄႈပႆၵႂႃႇၼႂ်းထိူၼ်ႇလႅင်ႉၵႂႃႇၸွမ်းသဵၼ်ႈတၢင်း ပၢင်ႇလၢႆႇလႅင်၊ တႃႉ၊’ ဝႃႈၼႆယဝ်ႉဢေႃႈ။
“မိူဝ်ႈၼၼ်ႉ၊သူဢွၼ်ၵၼ်ၶိုၼ်းလဝ်ႈလၢတ်ႈလႄႈဝႃႈ၊ ‘ မူဝ်းသေႇ၊ ႟။ ႁဝ်းၶႃႈၽိတ်းပိူင်ႈ ထႃႇဝရႃႉၽြႃး၊ ၶႃႈယဝ်ႉ။ ႁဝ်းၶႃႈတၵ်းတေတိုၵ်းတေႃးၸွမ်းၵႃႈၼင်ႇဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းသင်ႇလၢတ်ႈဝႆႉၼၼ်ႉၶႃႈဢေႃႈ၊’ ဝႃႈၼႆယဝ်ႉဢေႃႈ။ သူၵေႃႈဢွၼ်ၵၼ်ယိပ်းၵမ်လၢၵ်ႈၼၢၵ်ႈလႄႈမႄးႁႅၼ်းဝႆႉလီလီပုၼ်ႈတၵ်းလႆႈၶိုၼ်ႈတိုၵ်းၵႃႈၼိူဝ်လွႆလႆႈငၢႆႈငၢႆႈၼၼ်ႉဢေႃႈ။
“ၵူၺ်းၵႃႈ၊ ထႃႇဝရႃႉၽြႃး၊ မီးဢမိင်ႉတီႈၵဝ်လႄႈဝႃႈ၊ ‘ယႃႇပေႁႂ်ႈၶဝ်ၶိုၼ်ႈတိုၵ်း။ ၵဝ်ဢမ်ႇမီးယူႇလူၺ်ႈၵၼ်တင်းၶဝ်လႄႈၶဝ်တၵ်းတူၵ်းသုမ်းၼႂ်းမိုဝ်းရၢၼ်ႇသူႇၶဝ်ဢေႃႈ၊’ ဝႃႈၼင်ႇၼႆဢေႃႈ။-
ၵဝ်မွၵ်ႇလၢတ်ႈတီႈသူသေၵေႃႈသူဢမ်ႇထွမ်ႇဢမ်ႇဢဝ်။ သူထဵင်ပႅတ်ႈဢမိင်ႉ ထႃႇဝရႃႉၽြႃး၊ လႄႈဢွၼ်ၵၼ်မီးၸႂ်ဢၼ်ႁတ်းႁၢၼ်လိူဝ်တွၼ်းၼႃႇလူင်လၢင်သေလႄႈၶိုၼ်ႈၵႂႃႇတိုၵ်းၵႃႈၼိူဝ်လွႆဢေႃႈ။-
မိူဝ်ႈၼၼ်ႉ၊ၵူၼ်း ဢႃႇမေႃးရိ၊ ၶဝ်ဢၼ်ယူႇၵႃႈၼိူဝ်လွႆၼၼ်ႉဢွၵ်ႇမႃးႁႄႉတိုၵ်းသူမိူၼ်ၸိူဝ်ႉၼင်ႇၽုင်ၽိုင်ႈဢုမ်ႇလႄႈလိုပ်ႈလမ်းၸွမ်းသူတေႃႇထိုင်ႁွတ်ႈဝဵင်း ႁေႃႇမႃႇ၊ သေလႄႈယႃႉၽဵဝ်ႈသူပႅတ်ႈၵႃႈတီႈၼၼ်ႈၵႃႈၼႂ်းမိူင်းလွႆ ဢေႇတုမ်ႇ၊ ဢေႃႈ။-
သူၵေႃႈၶိုၼ်းမႃးႁွင်ႉႁႆႈၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢေႃႈ။ ၵူၺ်းၵႃႈ၊ ထႃႇဝရႃႉၽြႃး၊ ဢမ်ႇထွမ်ႇငိၼ်းဢဝ်ၵႂၢမ်းသူ။ ဢမ်ႇဝႆႉဢယေးသူ။-
ပိူဝ်ႈၼႆလႄႈသူသမ်ႉၶိုၼ်းလႆႈယူႇၵႃႈတီႈ ၵႃႇတေႇသႃႉ၊ မိုဝ်ႉဝၼ်းႁိုင်ၼႃႇလူင်လၢင်ဢေႃႈ။
“ႁဝ်းၵေႃႈဢွၼ်ၵၼ်ဝၢႆႇၶိုၼ်းလႄႈပႆတၢင်းၵႂႃႇၵႃႈၼႂ်းထိူၼ်ႇလႅင်ႉၵႂႃႇၸွမ်းသဵၼ်ႈတၢင်း ပၢင်ႇလၢႆႇလႅင်၊ ၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉတီႈၵဝ်ၼၼ်ႉဢေႃႈ။ ႁဝ်းလႄႇၵႂႃႇလႄႇမႃးၵႃႈၼႂ်းမိူင်းလွႆ ဢေႇတုမ်ႇ၊ ၼၼ်ႉမိုဝ်ႉဝၼ်းႁိုင်ၼႃႇဢေႃႈ။
မႂ်းသင်ႇလၢတ်ႈၵႃႈတီႈၵူၼ်းတင်းလၢႆတႃႉ။ သူၸမ်တၵ်းလႆႈပႆၽႃႇလတ်းၵႂႃႇၵႃႈၼႂ်းဢိူင်ႇပီႈၼွင်ႉသူၵူၼ်းမဵဝ်း ဢေးသေႃး၊ ဢၼ်ယူႇသဝ်းၵႃႈၼႂ်းမိူင်း ဢေႇတုမ်ႇ၊ ၼၼ်ႉလႄႈၶဝ်ၼၼ်ႉတၵ်းၵူဝ်ႁႄသူဢေႃႈ။ ပိူဝ်ႈၼႆလႄႈသူဢွၼ်ၵၼ်ဝႆႉသတိတႃႉ။-
သူတၵ်းဢမ်ႇလႆႈတိုၵ်းတေႃးၶဝ်လႃးလႃး။ လိၼ်ၶဝ်ၼၼ်ႉၶိုပ်ႈၼိုင်ႈၵူၺ်းၵေႃႈၵဝ်ဢမ်ႇပၼ်တီႈသူၵူၺ်း။ လွင်ႈမၼ်းၸမ်ႉ၊ၵဝ်ဢဝ်မိူင်းလွႆ ဢေႇတုမ်ႇ၊ ဢၢပ်ႈပၼ်ႁႂ်ႈၵူၼ်းၸိူဝ်ႉၶိူဝ်း ဢေးသေႃး၊ ပိူင်ႇယဝ်ႉဢေႃႈ။-
သူတၵ်းလႆႈဢဝ်ငိုၼ်းသူသိုဝ်ႉဢဝ်ၶဝ်ႈၼမ်ႉတၢင်းၵိၼ်ၵႃႈတီႈၶဝ်ဢေႃႈ။’
“သူထုၵ်ႇလီၶုၵ်းၸႂ်လႆႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူပၼ်တၢင်းလီၼႂ်းလွင်ႈတၢင်းသူႁဵတ်းသၢင်ႈၵူႈသမ်ႇၵူႈပိူင်ယဝ်ႉ။ မၼ်းၸဝ်ႈပႂ်ႉလူပႂ်ႉတူၺ်းသူၸွမ်းၵႃႈၼႂ်းၶၢဝ်းတၢင်းထိူၼ်ႇလူင်ၼႆႉယဝ်ႉ။ ၼႂ်းၸူဝ်ႈသီႇသိပ်းပီတဵမ်တဵမ်ၼႆႉမၼ်းၸဝ်ႈမီးယူႇလူၺ်ႈၵၼ်တင်းသူလႄႈသူလႆႈၵႃႈၼင်ႇဢၼ်သူလူဝ်ႇၼၼ်ႉယဝ်ႉဢေႃႈ၊ဝႃႈၼင်ႇၼႆတႃႉ၊ ဝႃႈၼႆယဝ်ႉဢေႃႈ။
“ပိူဝ်ႈၼႆလႄႈႁဝ်းဢွၼ်ၵၼ်ပႆငိူင်ႉဢွၵ်ႇဝႄႈဢွၵ်ႇသဵၼ်ႈတၢင်းဢၼ်ဢွၵ်ႇသေၵႃႈတီႈဝဵင်း ဢေးလတ်ႉ၊ တင်းဝဵင်း ဢေးၸယုၼ်းၵႃႇပႃႇ၊ ၵႂႃႇၸူးၵႃႈတီႈ ပၢင်ႇလၢႆႇတၢႆ၊ သေယဝ်ႉ၊ႁဝ်းဝၢႆႇၶိုၼ်ႈၵႂႃႇၽၢႆႇတၢင်းၸဵင်ႇႁွင်ႇဝၼ်းဢွၵ်ႇၵႂႃႇၸူးမိူင်း မေႃႇၽႃႉ၊ ဢေႃႈ။-
ထႃႇဝရႃႉၽြႃး၊ ၵေႃႈမီးဢမိင်ႉတီႈၵဝ်လႄႈဝႃႈ၊ ‘ယႃႇပေယႃႉယုၵ်ႉၵူၼ်းမဵဝ်း မေႃႇၽႃႉ၊ ဢၼ်ပဵၼ်ၸိူဝ်ႉၶိူဝ်းလုၵ်ႈလၢၼ် လေႃးတႃႉ၊ ၼႆႉ။ ယႃႇပေႁဵတ်းသိုၵ်းတေႃႇၶဝ်။ ၵဝ်လႆႈဢဝ်ဝဵင်းလူင် ဢႃႇရႃႉ၊ ပၼ်တီႈၵူၼ်းမဵဝ်း လေႃးတႃႉ၊ ႁႂ်ႈၶဝ်ပိူင်ႇယဝ်ႉ။ ၵဝ်တၵ်းဢမ်ႇဢဝ်မိူင်းၶဝ်ၼၼ်ႉပၼ်တီႈသူ၊’ ဝႃႈၼႆယဝ်ႉ။”
(ၵူၼ်းမဵဝ်းဢၼ်တူဝ်ယႂ်ႇႁႅင်းလူင်ဢၼ်ႁွင်ႉဝႃႈ၊ၵူၼ်းမဵဝ်း ဢေႇမိမ်ႇ၊ ၼၼ်ႉယၢမ်ႈယူႇမႃးၵႃႈၼႂ်းဝဵင်းလူင် ဢႃႇရႃႉ၊ ဢေႃႈ။ ၶဝ်ၼၼ်ႉပဵၼ်ၵူၼ်းယႂ်ႇၵူၼ်းသုင်မိူၼ်ၵူၼ်းမဵဝ်း ဢႃႇၼၵႃႉ၊ ၼၼ်ႉဢေႃႈ။-
ပိူၼ်ႈမၢတ်ႈၶဝ်ပဵၼ်ၵူၼ်းဢၼ်ၶဝ်ႈပႃးၵႃႈၼႂ်းၵူၼ်းမဵဝ်း ရေႇၽိမ်ႇ၊ မိူၼ်ၼင်ႇၵူၼ်းမဵဝ်း ဢႃႇၼၵႃႉ၊ ၼင်ႇၵဝ်ဢေႃႈ။ ၵူၼ်းမဵဝ်း မေႃႇၽႃႉ၊ ႁွင်ႉၶဝ်ဝႃႈ၊ၵူၼ်းမဵဝ်း ဢေႇမိမ်ႇ၊ ဢေႃႈ။-
မိူဝ်ႈဢွၼ်တၢင်းၼၼ်ႉၵူၼ်းမဵဝ်း ႁေႃးရိ၊ ၵေႃႈယၢမ်ႈယူႇၵႃႈၼႂ်းမိူင်း ဢေႇတုမ်ႇ၊ ဢေႃႈ။ ၵူၺ်းၵႃႈ၊ၵူၼ်းမဵဝ်း ဢေးသေႃး၊ ႁေႃႈၶဝ်ၼၼ်ႉဢွၵ်ႇလႄႈယႃႉၽဵဝ်ႈၶဝ်ပႅတ်ႈသေယဝ်ႉ၊ယူႇသဝ်းၵႃႈတီႈၼၼ်ႈမိူၼ်ၸိူဝ်ႉၼင်ႇဢၼ်ၵူၼ်းမဵဝ်း ဢိသရေး၊ လႆႈလိုပ်ႈႁေႃႈရၢၼ်ႇသူႇၶဝ်ဢွၵ်ႇမိူင်းဢၼ် ထႃႇဝရႃႉၽြႃး၊ ပၼ်မဵဝ်း ဢိသရေး၊ ၶဝ်ပိူင်ႇၼၼ်ႉဢေႃႈ။)
“လိုၼ်းၼၼ်ႉ၊ႁဝ်းဢွၼ်ၵၼ်ၶၢမ်ႈၼမ်ႉ ၸႃႇရိတ်ႉ၊ ၸွမ်းၵႃႈၼင်ႇဢၼ်ဢမိင်ႉ ထႃႇဝရႃႉၽြႃး၊ မီးၼၼ်ႉဢေႃႈ။-
လွင်ႈတၢင်းၼႆႉပဵၼ်ဝၢႆးသေဢၼ်ႁဝ်းဢွၵ်ႇသေၵႃႈတီႈ ၵႃႇတေႇသပႃႇၼႃႉ၊ သၢမ်သိပ်းပၢႆပႅတ်ႇပီယဝ်ႉၼၼ်ႉဢေႃႈ။ ၵူၼ်းဢၼ်တိုၵ်းသိုၵ်းလႆႈၵႃႈၼႂ်းမုၵ်ႉၵူၼ်းၸိူဝ်းၵူၼ်းၸုမ်းဢွၼ်တၢင်းၸိူဝ်းၼၼ်ႉၵေႃႈလႆႈလုႁၢႆတၢႆၵႂႃႇမူတ်းယဝ်ႉ၊ၸွမ်းၵႃႈၼင်ႇဢၼ် ထႃႇဝရႃႉၽြႃး၊ လႆႈတိူင်ႇၵၢဝ်ႇဝႆႉၵတိၵႃႈတီႈၶဝ်ၼၼ်ႉဢေႃႈ။-
မိုဝ်း ထႃႇဝရႃႉၽြႃး၊ တိုၵ်းတေႃးၶဝ်ယူႇတေႃႇထိုင်ႁွတ်ႈၶဝ်ထၢၼ်ႈပေႃးလုႁၢႆတၢႆၵႂႃႇမူတ်းဢေႃႈ။
“လိုၼ်းသေၶဝ်တင်းမူတ်းလႆႈလုႁၢႆတၢႆၵႂႃႇယဝ်ႉၼၼ်ႉၸိုင်၊-
ထႃႇဝရႃႉၽြႃး၊ မီးဢမိင်ႉတီႈႁဝ်းလႄႈဝႃႈၸမ်ႉ၊-
‘ဝၼ်းမိူဝ်ႈၼႆႉသူတၵ်းလႆႈၽႃႇလတ်းမိူင်း မေႃႇၽႃႉ၊ ၸွမ်းသဵၼ်ႈတၢင်းဢၼ်ၵႂႃႇဝဵင်းလူင် ဢႃႇရႃႉ၊ ပုၼ်ႉဢေႃႈ။-
မိူဝ်ႈၼၼ်ႉ၊သူတၵ်းတေလႆႈပႆၵၢႆၵႂႃႇၵႃႈတီႈႁိမ်းလႅၼ်လိၼ်ၵူၼ်းမဵဝ်း ဢမ်ႇမုၼ်ႇ၊ ၸိူဝ်ႉၶိူဝ်းလုၵ်ႈလၢၼ် လေႃးတႃႉ၊ ၼၼ်ႉဢေႃႈ။ ယႃႇပေယႃႉယူၵ်ႉၶဝ်။ ဢမ်ႇလႆႈႁဵတ်းသိုၵ်းတေႃႇၶဝ်။ လွင်ႈမၼ်းၸမ်ႉ၊ၵဝ်တၵ်းဢမ်ႇဢဝ်လိၼ်မိူင်းဢၼ်ၵဝ်ပၼ်ၶဝ်ပိူင်ႇၼၼ်ႉပၼ်တီႈသူလႃးလႃး၊’ ဝႃႈၼႆယဝ်ႉဢေႃႈ။”
(မိူင်းၼၼ်ႉၵေႃႈပိူၼ်ႈႁွင်ႉပဵၼ်မိူင်းၵူၼ်းမဵဝ်း ရေႇၽိမ်ႇ၊ ၵွပ်ႈပိူဝ်ႈၵူၼ်းမဵဝ်းၼၼ်ႉယၢမ်ႈယူႇၵႃႈတီႈၼၼ်ႈဢေႃႈ။ ၵူၼ်းမဵဝ်း ဢမ်ႇမုၼ်ႇ၊ ႁွင်ႉၶဝ်ဝႃႈ၊ၵူၼ်းမဵဝ်း ၸမ်ႇၸုၼ်ႇမိမ်း၊ ဢေႃႈ။-
ၶဝ်ၼၼ်ႉမီးၼမ်ၼႃႇလႄႈပဵၼ်ၵူၼ်းမဵဝ်းဢၼ်ယႂ်ႇဢၼ်သုင်မိူၼ်ၸိူဝ်ႉၼင်ႇၵူၼ်းမဵဝ်း ဢႃႇၼၵႃႉ၊ ဢေႃႈ။ ၵူၺ်းၵႃႈ၊ ထႃႇဝရႃႉၽြႃး၊ ယႃႉၽဵဝ်ႈၶဝ်ပႅတ်ႈသေယဝ်ႉ၊ဢၢပ်ႈပၼ်ႁႂ်ႈၵူၼ်းမဵဝ်း ဢမ်ႇမုၼ်ႇ၊ ပိူင်ႇသေယဝ်ႉ၊ယူႇသဝ်းၵႃႈၼႂ်းမိူင်းၶဝ်ၼၼ်ႉဢေႃႈ။-
ထႃႇဝရႃႉၽြႃး၊ ႁဵတ်းပုၼ်ႈၵူၼ်းမဵဝ်းၸိူဝ်ႉၶိူဝ်းလုၵ်ႈလၢၼ် ဢေးသေႃး၊ ဢၼ်ယူႇသဝ်းတီႈမိူင်းလွႆ ဢေႇတုမ်ႇ၊ ၸိူဝ်ႉၼင်ႇၼၼ်ၼင်ႇၵဝ်ႇဢေႃႈ။ မၼ်းၸဝ်ႈယႃႉၽဵဝ်ႈၵူၼ်းမဵဝ်း ႁေႃးရိ၊ ပႅတ်ႈ၊ပုၼ်ႈဢၼ်ၵူၼ်းမဵဝ်း ဢေႇတုမ်ႇ၊ တၵ်းတေလႆႈသိမ်းဢဝ်လႄႈယူႇသဝ်းၵႃႈတီႈၼၼ်ႈတေႃႇထိုင်ႁွတ်ႈမိူဝ်ႈလဵဝ်ဢေႃႈ။-
မိူၼ်ၼင်ႇၼၼ်မိူင်းဢၼ်မီးၸွမ်းၽင်ႇပၢင်ႇလၢႆႇ မေႇတိထေးရီးယၼ်း၊ ၼၼ်ႉ ၵူၼ်းမဵဝ်း ဢႃႇဝိမ်ႇ၊ ယၢမ်ႈယူႇၵႃႈၼႂ်းဝၢၼ်ႈတင်းလၢႆတေႃႇထိုင်ႁွတ်ႈဝဵင်း ၵႃႇၸႃႉ၊ ဢေႃႈ။ ၵူၺ်းၵႃႈ၊ၵူၼ်းမဵဝ်း ၵပ်ႉတေႃးရိမ်ႇ၊ ဢၼ်လုၵ်ႉသေၵႃႈတီႈဝဵင်း ၵပ်ႉတေႃး၊ မႃးၸိူဝ်းၼၼ်ႉဢွၼ်ၵၼ်ယႃႉပႅတ်ႈလႄႈယူႇၵႃႈၼႂ်းတီႈယူႇၶဝ်ၼၼ်ႉဢေႃႈ။)
“လိုၼ်းသေဢၼ်ႁဝ်းၽႃႇလတ်းပူၼ်ႉမိူင်း မေႃႇၽႃႉ၊ ၵႂႃႇယဝ်ႉၼၼ်ႉၸိုင်၊ ထႃႇဝရႃႉၽြႃး၊ မီးဢမိင်ႉတီႈႁဝ်းလႄႈဝႃႈၸမ်ႉ၊ ‘ၵမ်းၼႆႉ၊သူဢွၼ်ၵၼ်ဢွၵ်ႇပႆၵႂႃႇလႄႈၶၢမ်ႈၼမ်ႉ ဢႃႇၼုၼ်ႇ၊ တႃႉ။ ၵဝ်တၵ်းဢဝ်ၶုၼ်ႁေႃၶမ်း သိႁုၼ်ႇ၊ ၵူၼ်းမဵဝ်း ဢႃႇမေႃးရိ၊ ဢၼ်ဢုပ်ႉပိူင်ႇမိူင်း ႁေႇသၽုၼ်ႇ၊ ဢိၵ်ႇတင်းလိၼ်မၼ်းဢၢပ်ႈပၼ်ၵႃႈၼႂ်းမိုဝ်းသူယဝ်ႉ။ တိုၵ်းၵၼ်တင်းမၼ်းလႄႈဢွၼ်ၵၼ်ၶဝ်ႈသိမ်းဢဝ်လိၼ်မၼ်းတႃႉ။-
တႄႇဢဝ်ဝၼ်းမိူဝ်ႈၼႆႉၵႂႃႇၵဝ်တၵ်းတေႁႂ်ႈၵူၼ်းၵူႈတီႈၵူႈလႅၼ်ၵူဝ်ႁႄသူဢေႃႈ။ ၽူႈလႂ်သေဢမ်ႇဝႃႈ၊ပေႃးလႆႈငိၼ်းၸိုဝ်ႈသဵင်သူၵူၺ်းၵေႃႈတၵ်းဢွၼ်ၵၼ်တူၵ်းၸႂ်ၵူဝ်ႁႄၼႃႇလူင်လၢင်ဢေႃႈ၊’ ဝႃႈၼင်ႇၼႆယဝ်ႉဢေႃႈ။
“မိူဝ်ႈၼၼ်ႉ၊ၵဝ်ပွႆႇၸႂ်ႉသၢၼ်ႇတမၢၼ်ႇတင်းလၢႆဢွၵ်ႇသေၵႃႈတီႈထိူၼ်ႇလႅင်ႉ ၵေႇတမုတ်ႉ၊ ၵႂႃႇသေလႄႈလဝ်ႈယွၼ်းတီႈၶုၼ်ႁေႃၶမ်း သိႁုၼ်ႇ၊ မိူင်း ႁေႇသၽုၼ်ႇ၊ လူၺ်ႈၵႂၢမ်းမိၵ်ႈသႁႃႇယႃႉလႄႈဝႃႈ၊-
‘ႁႂ်ႈႁဝ်းၶႃႈလႆႈၽႃႇလတ်းမိူင်းၸဝ်ႈၶုၼ်လူင်ႁဝ်းၵႂႃႇသေၵမ်းၶႃႈ။ ႁဝ်းၶႃႈတၵ်းၵႂႃႇၸွမ်းသဵၼ်ႈတၢင်းလူင်ၵူၺ်းလႄႈတေဢမ်ႇဝႄႉလူင်းသေသဵၼ်ႈတၢင်းလႃးလႃးတီႈၶႃႈ။-
ႁဝ်းၶႃႈတၵ်းဢဝ်ငိုၼ်းသိုဝ်ႉဢဝ်ၶဝ်ႈၼမ်ႉတၢင်းၵိၼ်ပုၼ်ႈႁဝ်းၶႃႈဢေႃႈ။ ၵူၺ်းပၼ်ဢၶႂၢင်ႉႁႂ်ႈႁဝ်းၶႃႈလႆႈပႆၽႃႇလတ်းၶဝ်ႈမိူင်းၸဝ်ႈၶုၼ်လူင်ႁဝ်းၵႂႃႇ၊-
တေႃႇထိုင်ႁွတ်ႈႁဝ်းၶႃႈၶၢမ်ႈပူၼ်ႉၼမ်ႉ ယေႃးတၢၼ်ႇ၊ သေလႄႈၶဝ်ႈထိုင်ၵႃႈၼႂ်းမိူင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၶႃႈတၵ်းပၼ်ႁဝ်းၶႃႈၼၼ်ႉသေၵမ်းၶႃႈ။ ၸိူဝ်ႉၶိူဝ်းလုၵ်ႈလၢၼ် ဢေးသေႃး၊ ဢၼ်ယူႇၼႂ်းမိူင်း ဢေႇတုမ်ႇ၊ ဢိၵ်ႇတင်းၵူၼ်းမဵဝ်း မေႃႇၽႃႉ၊ ဢၼ်ယူႇၼႂ်းဝဵင်းလူင် ဢႃႇရႃႉ၊ ၸိူဝ်းၼၼ်ႉပၼ်ဢၶႂၢင်ႉႁႂ်ႈႁဝ်းၶႃႈပႆၽႃႇလတ်းပူၼ်ႉမႃးၸိူဝ်ႉၼင်ႇၼႆတီႈၶႃႈယဝ်ႉ၊’ ဝႃႈၼင်ႇၼႆဢေႃႈ။
“ၵူၺ်းၵႃႈ၊ၶုၼ်ႁေႃၶမ်း သိႁုၼ်ႇ၊ ဢမ်ႇပၼ်ဢၶႂၢင်ႉႁႂ်ႈႁဝ်းၽႃႇလတ်းၶဝ်ႈၵႂႃႇၵႃႈၼႂ်းမိူင်းမၼ်း။ လွင်ႈမၼ်းၸမ်ႉ၊ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းႁဵတ်းႁႂ်ႈမၼ်းၶေႃးၶႅင်ၸႂ်ၶႅင်၊ႁႂ်ႈႁူဝ်ၸႂ်မၼ်းႁၢဝ်ႈၵျၢမ်းၼၼ်ႉႁဝ်းတၵ်းလႆႈတိုၵ်းပႄႉမၼ်းလႄႈႁႂ်ႈႁဝ်းလႆႈသိမ်းဢဝ်မိူင်းမၼ်းၼၼ်ႉယဝ်ႉ။ ႁဝ်းၵေႃႈလႆႈပိူင်ႇဢဝ်မိူဝ်ႈလဵဝ်ၼႆႉယဝ်ႉဢေႃႈ။
“မိူဝ်ႈၼၼ်ႉ၊ ထႃႇဝရႃႉၽြႃး၊ မီးဢမိင်ႉတီႈၵဝ်လႄႈဝႃႈ၊ ‘တူၺ်းလူး။ ၵဝ်ဢဝ်ၶုၼ်ႁေႃၶမ်း သိႁုၼ်ႇ၊ တင်းမိူင်းမၼ်းဢၢပ်ႈပၼ်ၵႃႈၼႂ်းမိုဝ်းမႂ်းယဝ်ႉ။ ၶဝ်ႈသိမ်းဢဝ်မိူင်းမၼ်းလႄႈပိူင်ႇဢဝ်တႃႉ၊’ ဝႃႈၼင်ႇၼႆယဝ်ႉ။-
ၶုၼ်ႁေႃၶမ်း သိႁုၼ်ႇ၊ တင်းၵူၼ်းသိုၵ်းမၼ်းတင်းလၢႆၵေႃႈဢွၼ်ၵၼ်ဢွၵ်ႇမႃးတိုၵ်းတေႃးႁဝ်းၵႃႈႁိမ်းဝဵင်း ယႃႇႁတ်ႉ၊ ဢေႃႈ။-
ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းဢဝ်မၼ်းဢၢပ်ႈပၼ်တီႈႁဝ်းလႄႈႁဝ်းတိုၵ်းတေႃးဢဝ်တၢႆပႅတ်ႈၸႃႉၸဵမ်မၼ်းဢိၵ်ႇတင်းလုၵ်ႈၸၢႆးမၼ်းတင်းလၢႆဢိၵ်ႇတင်းၵူၼ်းမၼ်းတင်းလၢႆယဝ်ႉ။-
ယၢမ်းလဵဝ်ၵၼ်ၼၼ်ႉႁဝ်းတိုၵ်းတေႃးယႃႉၽဵဝ်ႈပႅတ်ႈဝဵင်းမၼ်းလႄႈဢဝ်တၢႆပႅတ်ႈၵူၼ်းတင်းလၢႆၸႃႉၸဵမ်ၵူၼ်းၸၢႆး၊ၵူၼ်းယိင်းဢိၵ်ႇတင်းလုၵ်ႈဢွၼ်ႇတင်းသဵင်ႈတင်းမူတ်းထၢၼ်ႈပေႃးဢမ်ႇၵိုတ်းဢမ်ႇၵျၢၼ်ႇဝႆႉသေၵေႃႉသေၵူၼ်းယဝ်ႉ။-
တရိၵ်ႈသၢၼ်ႇဢိၵ်ႇတင်းဢုၵ်ႉၸႃႇဢၼ်ႁိမ်လႆႈမႃးၵႃႈတီႈဝၢၼ်ႈဝဵင်းဢၼ်ႁဝ်းတိုၵ်းပႄႉၸိူဝ်းၼၼ်ႉၵူၺ်း၊ႁဝ်းသိမ်းဢဝ်ပဵၼ်ပုၼ်ႈတူဝ်ၸဝ်ႈၵဝ်ႇဢေႃႈ။-
ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းႁႂ်ႈႁဝ်းတိုၵ်းပႄႉသိမ်းဢဝ်ဝဵင်းတင်းမူတ်း၊ၸႃႉဢဝ်ဝဵင်း ဢႃႇရေႃႇ၊ ဢၼ်မီးၵႃႈတီႈႁူဝ်ၸဵင်ႇပၢင်ႇထူင်ႉ ဢႃႇၼုၼ်ႇ၊ ဢိၵ်ႇတင်းဝဵင်းဢၼ်မီးၵႃႈတီႈၵၢင်ထူင်ႉၼၼ်ႉၸွမ်းလူင်းၵႂႃႇတေႃႇထိုင်ႁွတ်ႈမိူင်း ၵိလတ်ႉ၊ ယဝ်ႉ။ ဝဵင်းဢၼ်လမ်းဝဵင်းမၼ်းမၼ်ႈၶိူင်ႇထၢၼ်ႈပေႃးႁဝ်းဢမ်ႇပႄႉလႆႈၼၼ်ႉဢမ်ႇမီးသေဝဵင်း။-
ၼႂ်းဝႃႈၼၼ်သေၵေႃႈ ႁဝ်းယင်းဢမ်ႇၵႂႃႇၸမ်ၵႃႈႁိမ်းမိူင်းၵူၼ်းမဵဝ်း ဢမ်ႇမုၼ်ႇ၊ ၶဝ်၊ၵႃႈႁိမ်းၽင်ႇၼမ်ႉ ယပ်ႉပုၵ်ႉ၊ ၵႃႈႁိမ်းဝဵင်းၸိူဝ်းဢၼ်မီးၵႃႈၼိူဝ်လွႆတင်းလၢႆၼၼ်ႉလႃးလႃး၊ဢိၵ်ႇတင်းၵႃႈႁိမ်းဝဵင်းၵႃႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းႁႄႉၶႅၼ်ႁဝ်းဝႆႉၸိူဝ်းၼၼ်ႉဢေႃႈ။
“လိုၼ်းၼၼ်ႉ၊ႁဝ်းၶိုၼ်ႈၵႂႃႇၽၢႆႇတၢင်းႁွင်ႇၸူးတီႈမိူင်း ပႃႇသၢၼ်ႇ၊ ဢေႃႈ။ မိူဝ်ႈၼၼ်ႉၶုၼ်ႁေႃၶမ်း ဢေႃႇၶႃႉ၊ ဢိၵ်ႇတင်းၵူၼ်းသိုၵ်းမၼ်းတင်းသဵင်ႈတင်းလူင်ဢွၼ်ၵၼ်ဢွၵ်ႇမႃးတိုၵ်းတေႃးႁဝ်းၵႃႈႁိမ်းဝဵင်း ဢေႇတရိ၊ ဢေႃႈ။-
ထႃႇဝရႃႉၽြႃး၊ ၵေႃႈမီးဢမိင်ႉတီႈၵဝ်လႄႈဝႃႈ၊ ‘ယႃႇပေၵူဝ်ႁႄမၼ်း။ ၵဝ်တၵ်းဢဝ်မၼ်းဢိၵ်ႇတင်းၵူၼ်းမၼ်းတင်းလၢႆ ဢိၵ်ႇတင်းမိူင်းမၼ်းဢၢပ်ႈပၼ်ၵႃႈၼႂ်းမိုဝ်းမႂ်းဢေႃႈ။ ႁဵတ်းတီႈမၼ်းမိူၼ်ၸိူဝ်ႉၼင်ႇဢၼ်မႂ်းႁဵတ်းတီႈၶုၼ်ႁေႃၶမ်း သိႁုၼ်ႇ၊ ၵူၼ်းမဵဝ်း ဢႃႇမေႃးရိ၊ ဢၼ်ဢုပ်ႉပိူင်ႇမိူင်း ႁေႇသၽုၼ်ႇ၊ ၼၼ်ႉတႃႉ၊’ ဝႃႈၼင်ႇၼႆယဝ်ႉ။
“ပိူဝ်ႈၼႆလႄႈ ထႃႇဝရႃႉၽြႃး၊ ဢဝ်ၶုၼ်ႁေႃၶမ်း ဢေႃႇၶႃႉ၊ ဢိၵ်ႇတင်းၵူၼ်းမၼ်းတင်းလၢႆဢၢပ်ႈပၼ်ၵႃႈၼႂ်းမိုဝ်းႁဝ်းသေလႄႈႁဝ်းၵေႃႈယႃႉၽဵဝ်ႈပႅတ်ႈၶဝ်မူတ်းမူတ်းသဵင်ႈသဵင်ႈယဝ်ႉ။-
ယၢမ်းလဵဝ်ၵၼ်ၼၼ်ႉႁဝ်းတိုၵ်းဢဝ်ဝဵင်းမၼ်းတင်းသဵင်ႈတင်းမူတ်းလႄႈဝဵင်းဢၼ်ႁဝ်းဢမ်ႇတိုၵ်းဢမ်ႇသိမ်းဢဝ်ၼၼ်ႉဢမ်ႇၵိုတ်းၵျၢၼ်ႇသေဝဵင်း၊ဝဵင်းဢၼ်ႁဝ်းတိုၵ်းဢဝ်ၸိူဝ်းၼၼ်ႉမီးႁူၵ်းသိပ်းဝဵင်းဢၼ်ပဵၼ်သိုင်ႇတိူင်းမိူင်း ဢႃႇၵေႃႇၽႃႉ၊ ဢၼ်ၶုၼ်ႁေႃၶမ်း ဢေႃႇၶႃႉ၊ မိူင်း ပႃႇသၢၼ်ႇ၊ ပိူင်ႇၼၼ်ႉဢေႃႈ။-
ဝဵင်းၸိူဝ်းၼၼ်ႉပဵၼ်ဝဵင်းဢၼ်မၼ်ႈၶိူင်ႇဝႆႉတင်းလမ်းဝဵင်းဢၼ်သုင်ဢိၵ်ႇတင်းၽၵ်းတူဝဵင်းတင်းၵိူၼ်ႇၽၵ်းတူ၊ၼွၵ်ႈသေၼၼ်ႉယင်းလႆႈသိမ်းဢဝ်ဝၢၼ်ႈဢၼ်ဢမ်ႇလွမ်ႉႁူဝ်ႉၸိူဝ်းၼၼ်ႉၼမ်ၼႃႇဢေႃႈ။-
ႁဝ်းယႃႉၽဵဝ်ႈၸိူဝ်းၼၼ်ႉပႅတ်ႈမူတ်းမူတ်းသဵင်ႈသဵင်ႈလႄႈဢဝ်တၢႆပႅတ်ႈၵူၼ်းၸၢႆး၊ၽူႈယိင်းတင်းလုၵ်ႈဢွၼ်ႇၶဝ်တင်းမူတ်းမိူၼ်ၸိူဝ်ႉၼင်ႇဢၼ်ႁဝ်းႁဵတ်းတီႈဝဵင်းၶုၼ်ႁေႃၶမ်း သိႁုၼ်ႇ၊ မိူင်း ႁေႇသၽုၼ်ႇ၊ ၼၼ်ႉယဝ်ႉ၊-
သတ်းတရိၵ်ႈသၢၼ်ႇဢိၵ်ႇတင်းဢုၵ်ႉၸႃႇၵႃႈဢၼ်ႁိမ်လႆႈၵႃႈၼႂ်းဝဵင်းၸိူဝ်းၼၼ်ႉၵူၺ်းႁဝ်းသိမ်းဢဝ်ႁႂ်ႈပဵၼ်ပုၼ်ႈတူဝ်ၸဝ်ႈၵဝ်ႇဢေႃႈ။
“မိူဝ်ႈယၢမ်းၼၼ်ႉႁဝ်းတိုၵ်းပႄႉၶုၼ်ႁေႃၶမ်းမိူင်း ဢႃႇမေႃးရိ၊ သွင်ပႃးၼၼ်ႉသေယဝ်ႉ၊သိမ်းဢဝ်လိၼ်ဢၼ်မီးၽၢႆႇတၢင်းဝၼ်းဢွၵ်ႇၼမ်ႉ ယေႃးတၢၼ်ႇ၊ တႄႇဢဝ်ၼမ်ႉ ဢႃႇၼုၼ်ႇ၊ ၵႂႃႇတေႃႇထိုင်ႁွတ်ႈလွႆ ႁေႇရမုၼ်ႇ၊ ဢေႃႈ။-
(လွႆ ႁေႇရမုၼ်ႇ၊ ၼၼ်ႉၵူၼ်း ၸိတုမ်ႇ၊ ႁွင်ႉဝႃႈ၊လွႆ ၸိရုၼ်ႇ၊ လႄႈ၊ၵူၼ်းမဵဝ်း ဢႃႇမေႃးရိ၊ သမ်ႉႁွင်ႉဝႃႈ၊လွႆ ၸိၼိရႃႉ၊ ဢေႃႈ။-)
ႁဝ်းလႆႈသိမ်းဢဝ်ဝဵင်းၵႃႈဢၼ်မီးၵႃႈၼိူဝ်ၵွင်းပဵင်းလႅၼ်လိၼ်မိူင်း ၵိလတ်ႉ၊ ဢိၵ်ႇတင်းမိူင်း ပႃႇသၢၼ်ႇ၊ တေႃႇထိုင်ႁွတ်ႈတူင်ႇဝၼ်းဢွၵ်ႇဢၼ်ပဵၼ်ဝဵင်း သႃႇလၵႃႇ၊ တင်းဝဵင်း ဢေႇတရိ၊ ဢၼ်ၶဝ်ႈပႃးၵႃႈၼႂ်းမိူင်းဢၼ်ၶုၼ်ႁေႃၶမ်း ဢေႃႇၶႃႉ၊ မိူင်း ပႃႇသၢၼ်ႇ၊ ပိူင်ႇၼၼ်ႉဢေႃႈ။”
(ၶုၼ်ႁေႃၶမ်း ဢေႃႇၶႃႉ၊ ၸမ်ႉ၊ပဵၼ်ၶုၼ်ဢၼ်သိုပ်ႇလူင်းမႃးလိုၼ်းလင်သုတ်းပိူၼ်ႈၼႂ်းၵူၼ်းမဵဝ်း ရေႇၽိမ်ႇ၊ ဢေႃႈ။ ၵွမ်ႇမၼ်းၸဝ်ႈ ၼၼ်ႉဢဝ်မၢၵ်ႇႁိၼ်ႁဵတ်းလႄႈၸွမ်းလူၺ်ႈသွၵ်ႇၵူၼ်းၼၼ်ႉၼႃႈယၢဝ်းမၼ်းမီးၵဝ်ႈသွၵ်ႇ၊ၼႃႈပွတ်းမၼ်းမီးသီႇသွၵ်ႇဢေႃႈ။ ၵွမ်ႇႁိၼ်ၼၼ်ႉယင်းမီးယူႇၼႂ်းဝဵင်းလူင်ၵူၼ်းမဵဝ်း ဢမ်ႇမုၼ်ႇ၊ မိူင်း ရပ်ႉပႃႇ၊ ၼၼ်ႉဢေႃႈ။)
“မိူဝ်ႈဢၼ်ႁဝ်းသိမ်းဢဝ်လိၼ်ၼၼ်ႉယဝ်ႉၸိုင်၊ၵဝ်ဢဝ်သိုင်ႇတိူင်းၸႃႉၸဵမ်ဝဵင်း ဢႃႇရေႃႇ၊ ဢၼ်မီးႁိမ်းႁူဝ်ၸဵင်ႇထူင်ႉလူင် ဢႃႇၼုၼ်ႇ၊ ဢိၵ်ႇတင်းမိူင်းလွႆ ၵိလတ်ႉ၊ ၶိုင်ႈၼိုင်ႈပႃးတင်းဝဵင်းမၼ်းတင်းလၢႆဢၢပ်ႈပၼ်တီႈၸိူဝ်ႉၶိူဝ်း ရုပိၼ်ႇ၊ တင်းၸိူဝ်ႉၶိူဝ်း ၵၢတ်ႉ၊ ဢေႃႈ။-
ဢၼ်ယင်းၵိုတ်းၵျၢၼ်ႇယူႇၵႃႈတီႈမိူင်းလွႆ ၵိလတ်ႉ၊ ဢိၵ်ႇတင်းၵႃႈတီႈမိူင်း ပႃႇသၢၼ်ႇ၊ မိူင်းဢၼ်ၶုၼ်ႁေႃၶမ်း ဢေႃႇၶႃႉ၊ ဢုပ်ႉပိူင်ႇဢၼ်ဝႃႈ၊သိုင်ႇတိူင်းမိူင်း ဢႃႇၵေႃႇၽႃႉ၊ ၼၼ်ႉၸိုင်၊ၵဝ်ဢၢပ်ႈပၼ်ၸိူဝ်ႉၶိူဝ်း မၼႃႇသေႇ၊ ၶိုင်ႈၼိုင်ႈဢေႃႈ။” (မိူင်း ပႃႇသၢၼ်ႇ၊ တင်းမိူင်းၼၼ်ႉပိူၼ်ႈႁွင်ႉပဵၼ်မိူင်း ရေႇၽိမ်ႇ၊ ဢေႃႈ။-
ၶိူဝ်းႁိူၼ်း ယႃႇဢိရႃႉ၊ ဢၼ်သိုပ်ႇလူင်းမႃးသေၵႃႈတီႈၸိူဝ်ႉၶိူဝ်း မၼႃႇသေႇ၊ ၼၼ်ႉၶဝ်သိမ်းဢဝ်သိုင်ႇတိူင်းမိူင်း ဢႃႇၵေႃႇၽႃႉ၊ ဢၼ်ပဵၼ်လႅၼ်လိၼ်မိူင်း ပႃႇသၢၼ်ႇ၊ ၼၼ်ႉတေႃႇထိုင်ႁွတ်ႈလႅၼ်လိၼ်မိူင်း ၵေႇသုရႃႉ၊ တင်းမိူင်း မႃႇၶႃႇ၊ သေလႄႈႁွင်ႉႁဵၵ်ႈၸိုဝ်ႈဝၢၼ်ႈၸိူဝ်းၼၼ်ႉၸွမ်းၼင်ႇၸိုဝ်ႈသဵင်မၼ်းလႄႈဝႃႈ ႁႃႇဝုတ်ႉယႃႇဢိရႃႉ၊ တေႃႇႁွတ်ႈဝၼ်းမိူဝ်ႈၼႆႉဢေႃႈ။)
“မိူင်း ၵိလတ်ႉ၊ ၸမ်ႉ၊ၵဝ်ဢၢပ်ႈပၼ်တီႈၶိူဝ်းႁိူၼ်း မႃႇၶိရႃႉ၊ ဢၼ်သိုပ်ႇလူင်းမႃးတီႈၸိူဝ်ႉၶိူဝ်း မၼႃႇသေႇ၊ ၼၼ်ႉဢေႃႈ။-
တီႈၸိူဝ်ႉၶိူဝ်း ရုပိၼ်ႇ၊ တင်းၸိူဝ်ႉၶိူဝ်း ၵၢတ်ႉ၊ ၸိုင်၊ၵဝ်ဢဝ်ဢၢပ်ႈပၼ်ၸႃႉၸဵမ်မိူင်း ၵိလတ်ႉ၊ တေႃႇထိုင်ႁွတ်ႈၼမ်ႉ ဢႃႇၼုၼ်ႇ၊ ဢေႃႈ။ ႁႂ်ႈၶိုင်ႈၵၢင်ၼမ်ႉၼၼ်ႉပဵၼ်လႅၼ်လိၼ်ၽၢႆႇတၢင်းၸၢၼ်းလႄႈ၊လႅၼ်လိၼ်ၽၢႆႇတၢင်းႁွင်ႇၸမ်ႉ၊ပဵၼ်ၼမ်ႉ ယပ်ႉပုၵ်ႉ၊ ဢၼ်ပဵၼ်လႅၼ်လိၼ်မိူင်း ဢမ်ႇမုၼ်ႇ၊ ၶဝ်ဢေႃႈ။-
ၽၢႆႇတၢင်းဝၼ်းတူၵ်းၸိုင်၊သိုင်ႇတိူင်းမၼ်းၵႂၢင်ႈထိုင်ၼမ်ႉ ယေႃးတၢၼ်ႇ၊ လႄႈတႄႇဢဝ်ၼွင်လူင် ၵႃႇလိလႄး၊ ၽၢႆႇတၢင်းႁွင်ႇလူင်းၵႂႃႇထိုင် ပၢင်ႇလၢႆႇတၢႆ၊ ၽၢႆႇတၢင်းၸၢၼ်းဢိၵ်ႇတင်းတၢပ်ႈလွႆ ပိသၵႃႇ၊ ၽၢႆႇတၢင်းဝၼ်းဢွၵ်ႇဢေႃႈ။
“ယၢမ်းလဵဝ်ၵၼ်ၼၼ်ႉၵဝ်သင်ႇလၢတ်ႈတီႈၶဝ်လႄႈဝႃႈ၊ ‘ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းဢဝ်မိူင်းဢၼ်မီးၽၢႆႇဝၼ်းဢွၵ်ႇၼမ်ႉ ယေႃးတၢၼ်ႇ၊ ၼၼ်ႉဢၢပ်ႈပၼ်တီႈသူယဝ်ႉ။ ၵမ်းၼႆႉၵူၼ်းသူၵႃႈဢၼ်တိုၵ်းသိုၵ်းလႆႈၼၼ်ႉတၵ်းလႆႈယိပ်းၵမ်လၢၵ်ႈၼၢၵ်ႈသေလႄႈဢွၼ်ၵၼ်ၶၢမ်ႈၵႂႃႇတၢင်းၼႃႈပီႈၼွင်ႉသူၵူၼ်းမဵဝ်း ဢိသရေး၊ ႁႂ်ႈလႆႈၸွႆႈထႅမ်ၶဝ်သိမ်းဢဝ်လိၼ်ၶဝ်ဢေႃႈ။-
မေးသူ၊လုၵ်ႈလၢင်းသူတင်းတရိၵ်ႈသၢၼ်ႇသူၵူၺ်း၊ (ၵွပ်ႈပိူဝ်ႈၵဝ်ႁုလွင်ႈဢၼ်သူမီးတရိၵ်ႈသၢၼ်ႇၼမ်ၼႃႇၼၼ်ႉလႄႈ) တၵ်းလႆႈယူႇၵႃႈၼႂ်းဝဵင်းဢၼ်ၵဝ်ပၼ်သူဝႆႉၸိူဝ်းၼၼ်ႉဢေႃႈ။-
ၸွႆႈထႅမ်ပီႈၼွင်ႉသူၵူၼ်းမဵဝ်း ဢိသရေး၊ တင်းလၢႆတေႃႇထိုင်ႁွတ်ႈၶဝ်လႆႈသိမ်းဢဝ်မိူင်းဢၼ် ထႃႇဝရႃႉၽြႃး၊ ပၼ်ၶဝ်ၽၢႆႇဝၼ်းတူၵ်းၼမ်ႉ ယေႃးတၢၼ်ႇ၊ ယဝ်ႉတူဝ်ႈ၊ဢိၵ်ႇတင်းတေႃႇထိုင်ႁွတ်ႈ ထႃႇဝရႃႉၽြႃး၊ ပၼ်ႁႂ်ႈၶဝ်လႆႈယူႇၵတ်းယဵၼ်ၼိမ်လီမိူၼ်ၸိူဝ်ႉၼင်ႇဢၼ်မၼ်းၸဝ်ႈပၼ်သူၵႃႈတီႈၼႆႈၼၼ်ႉတႃႉ။ ဢၼ်ၼၼ်ႉယဝ်ႉတူဝ်ႈသေယဝ်ႉ၊သူတၵ်းလႆႈဢွၼ်ၵၼ်ၶိုၼ်းမႃးၵႃႈတီႈမိူင်းဢၼ်ၵဝ်ပၼ်ဝႆႉၼၼ်ႉႁင်းၽႂ်ႁင်းမၼ်းဢေႃႈ၊’ ဝႃႈၼင်ႇၼႆဢေႃႈ။
“ၵဝ်သမ်ႉသင်ႇလၢတ်ႈတီႈ ယေႃးသု၊ လႄႈဝႃႈ၊ ‘လွင်ႈတၢင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈမႂ်းႁဵတ်းတီႈၶုၼ်ႁေႃၶမ်းသွင်ပႃးဢၼ်ပဵၼ် သိႁုၼ်ႇ၊ ဢိၵ်ႇတင်း ဢေႃႇၶႃႉ၊ ၵူႈၸိူဝ်ႉၵူႈမဵဝ်းၼၼ်ႉၸိုင်၊မၢၵ်ႇတႃမႂ်းလႆႈႁၼ်ယဝ်ႉ။ မိူၼ်ၼင်ၼၼ် ထႃႇဝရႃႉၽြႃး၊ တၵ်းႁဵတ်းတီႈမိူင်းၵႃႈဢၼ်မႂ်းယဵပ်ႇၶၢမ်ႈၶဝ်ႈၵႂႃႇၵူႈမိူင်းၼၼ်ႉဢေႃႈ။-
ယႃႇပေၵူဝ်ႁႄၶဝ်။ ထႃႇဝရႃႉၽြႃး၊ ၽြႃးပဵၼ်ၸဝ်ႈမႂ်းတၵ်းတေတိုၵ်းပုၼ်ႈမႂ်းဢေႃႈ၊’ ဝႃႈၼင်ႇၼႆဢေႃႈ။
“မိူဝ်ႈၼၼ်ႉ၊ၵဝ်ယွၼ်းတွင်းပၢၼ်ႇတီႈ ထႃႇဝရႃႉၽြႃး၊ လႄႈဝႃႈ၊-
‘ဢူဝ်း၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈႁုလွင်ႈဢၼ်ၸဝ်ႈႁဝ်းၵူၺ်းၼႄပျႃးတၼ်းၶူဝ်းဢႃႇၼုၽေႃႇၸဝ်ႈႁဝ်း၊ဢိၵ်ႇတင်းႁႅင်းမိုဝ်းၸဝ်ႈႁဝ်းဢၼ်ႁဵတ်းတၢင်းဢၼ်လီဢၢမ်းၼႃႇၼၼ်ႉတီႈၶႃႈဢေႃႈ။ ၵႃႈၼင်ႇဢၼ်ၸဝ်ႈႁဝ်းႁဵတ်းဝႆႉလႄႈၼႄပျႃးတၼ်းၶူဝ်းၸဝ်ႈႁဝ်းဝႆႉၼၼ်ႉ၊ၵႃႈၼိူဝ်ၵၢင်ႁၢဝ်ဢိၵ်ႇတင်းၵႃႈၼိူဝ်လိၼ်မိူင်းၼႆႉဢမ်ႇမီးၽြႃးသေသူႇသေပႃးဢၼ်မိူၼ်ၸဝ်ႈႁဝ်းလႆႈတီႈၶႃႈ။-
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈပၼ်ဢၶႂၢင်ႉႁႂ်ႈၶႃႈၸဝ်ႈႁဝ်းလႆႈၶၢမ်ႈၼမ်ႉ ယေႃးတၢၼ်ႇ၊ ၵႂႃႇသေလႄႈလႆႈလူတူၺ်းလိၼ်ဢၼ်လီဢၼ်ငၢမ်းဢၼ်မီးၵႃႈတီႈၽၢႆႇပုၼ်ႉၼမ်ႉ၊ဢိၵ်ႇတင်းမိူင်းလွႆဢၼ်ႁၢင်ႈလီႁၢင်ႈငၢမ်းဢိၵ်ႇတင်းလွႆ လေႇပၼုၼ်ႇ၊ သေၵမ်းတီႈၶႃႈ၊’ ဝႃႈၼႆဢေႃႈ။
“ပိၵ်ႉသမ်ႉဝႃႈၼၼ်သေၵေႃႈ၊ၵွပ်ႈပိူဝ်ႈသူလႄႈ ထႃႇဝရႃႉၽြႃး၊ ၸႂ်မႆႈၶႂ်ႈၸႃႉၵဝ်ၼႃႇလူင်လၢင်လႄႈဢမ်ႇထွမ်ႇဢမ်ႇဢဝ်ၵႂၢမ်းၵဝ်။ ထႃႇဝရႃႉၽြႃး၊ သမ်ႉယင်းမီးဢမိင်ႉလႄႈဝႃႈ၊ ‘ပေႃးတႃႉ။ ယႃႇပေလၢတ်ႈလွင်ႈၼႆႉထႅင်ႈ။-
မႂ်းၶိုၼ်ႈၵႃႈၼိူဝ်ပၢႆၸိၵ်းလွႆ ပိသၵႃႇ၊ သေလႄႈမုင်ႈတူၺ်းၽၢႆႇတၢင်းဝၼ်းတူၵ်းဝၼ်းဢွၵ်ႇ၊ၽၢႆႇႁွင်ႇၽၢႆႇၸၢၼ်းလႄႈလူတူၺ်းၵႃႈဢၼ်မႂ်းႁၼ်လႆႈၼၼ်ႉတႃႉ။ လွင်ႈမၼ်းၸမ်ႉ၊မႂ်းဢမ်ႇလႆႈၶၢမ်ႈၼမ်ႉ ယေႃးတၢၼ်ႇ၊ ၼႆႉၵႂႃႇ။-
ဢၼ်မႂ်းတၵ်းလႆႈႁဵတ်းၸမ်ႉ၊သင်ႇလၢတ်ႈတီႈ ယေႃးသု၊ လႄႈထႅင်ႈႁႅင်းပၼ်ႁႅင်းတီႈမၼ်းတႃႉ။ မၼ်းတၵ်းလႆႈဢွၼ်ႁူဝ်ၵူၼ်းၸိူဝ်းၼႆႉၶၢမ်ႈၵႂႃႇသိမ်းဢဝ်လိၼ်ဢၼ်မႂ်းလႆႈႁၼ်ၼၼ်ႉဢေႃႈ၊’ ဝႃႈၼင်ႇၼႆဢေႃႈ။
“ပိူဝ်ႈၼႆလႄႈႁဝ်းလႆႈၵိုတ်းသဝ်းယူႇၵႃႈတီႈထူင်ႉပၢင်ႇပဵင်းဢၼ်သိုဝ်ႈၵၼ်တင်းဝဵင်း ပႅတ်ႉပေႇဢုရႃႉ၊ ၼၼ်ႉဢေႃႈ။
“တေႃႈလဵဝ်ၼႆႉၵူၼ်းမဵဝ်း ဢိသရေး၊ ၶဝ်႟။ ဢွၼ်ၵၼ်ထွမ်ႇဢဝ်ပိင်းၺၢပ်ႈတြႃးဢိၵ်ႇတင်းလွင်ႈတၢင်းဢၼ်ၵဝ်သင်ႇသွၼ်သူဝႆႉၸိူဝ်းၼၼ်ႉသေလႄႈၵမ်ၵျၢင်ႉၸွမ်းတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊သူတၵ်းလႆႈဢသၢၵ်ႈလိပ်းလႄႈၶဝ်ႈၸၢမ်ႇၸႃးမိူင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇပေႃႈသူတၵ်းပၼ်တီႈသူၼၼ်ႉဢေႃႈ။-
တီႈၵႂၢမ်းဢၼ်ၵဝ်သင်ႇလၢတ်ႈဝႆႉၼၼ်ႉယႃႇပေထၢပ်ႈသႂ်ႇထႅင်ႈသေဢိတ်း။ ယႃႇပေၼုၵ်ႈဢွၵ်ႇပႅတ်ႈလႃးလႃး။ ဢွၼ်ၵၼ်ထွမ်ႇဢဝ်ပိင်းၺၢပ်ႈတြႃး ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢၼ်ၵဝ်သင်ႇလၢတ်ႈဝႆႉတီႈသူၼၼ်ႉတႃႉ။-
တူဝ်သူလႆႈႁၼ်လွင်ႈတၢင်းဢၼ် ထႃႇဝရႃႉၽြႃး၊ ႁဵတ်းၵႃႈတီႈလွႆ ပေႇဢုရႃႉ၊ ၼၼ်ႉယဝ်ႉ။ မၼ်းၸဝ်ႈပႄႇၽဵဝ်ႈပႅတ်ႈၶဝ်ၸိူဝ်းဢၼ်ဝႆႈၽြႃး ပႃႇလႃႉ၊ ၼၼ်ႉၵူႈၵေႃႉၵူႈၵူၼ်းယဝ်ႉ။-
သူၸိူဝ်းဢၼ်ပႂ်ႉသဵတ်ႈၸႃႇတေႃႇ ထႃႇဝရႃႉၽြႃး၊ ၽြႃးပဵၼ်ၸဝ်ႈသူၼၼ်ႉၸမ်ႉ၊ဢသၢၵ်ႈလႆႈလိပ်းယူႇတေႃႇထိုင်မိူဝ်ႈလဵဝ်ဢေႃႈ။
“ပိင်းၺၢပ်ႈတြႃးၵႃႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈၵဝ်သင်ႇလၢတ်ႈဝႆႉတီႈၵဝ်ၼၼ်ႉၵဝ်ၵေႃႈသင်ႇသွၼ်ပၼ်သူတင်းသဵင်ႈတင်းလူင်ယဝ်ႉ။ ပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၸိူဝ်းၼၼ်ႉၼႂ်းမိူင်းဢၼ်သူတၵ်းၵႂႃႇလႄႈၸၢမ်ႇၸႃးၼၼ်ႉတႃႉ။-
ပႃးတင်းသဵတ်ႈၸႃႇလႄႈပႂ်ႉၵမ်ပႂ်ႉၸွမ်းတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊တၵ်းပဵၼ်တၢင်းဢၼ်ၼႄပျႃးတီႈၵူၼ်းမဵဝ်းတၢင်ႇမဵဝ်းၼမ်ၼႃႇလွင်ႈဢၼ်သူမီးၺၢၼ်ႇပိင်ႇၺႃႇၼၼ်ႉဢေႃႈ။ မိူဝ်ႈဢၼ်ၶဝ်လႆႈငိၼ်းထုင်းၽိင်ႈတြႃးၸိူဝ်းၼၼ်ႉၸိုင်၊ၶဝ်တၵ်းတေဢွၼ်ၵၼ်ဝႃႈ၊ ‘ၵူၼ်းမဵဝ်းဢၼ်ယႂ်ႇလူင်ၼႃႇၼႆႉမီးၺၢၼ်ႇပိင်ႇၺႃႇတၢင်းႁုၼမ်တၢင်းႁၼ်ၵႂၢင်ႈၼႃႇတႄႉယဝ်ႉ၊’ ဝႃႈၼႆဢေႃႈ။
“တီႈၵူၼ်းမဵဝ်းတၢင်ႇမဵဝ်းၼၼ်ႉပိၵ်ႉသမ်ႉယႂ်ႇလူင်ထၢၼ်ႇႁိုဝ်သေၵေႃႈ၊ၶဝ်ဢမ်ႇမီးၽြႃးဢၼ်ယူႇၸမ်ၶဝ်မိူဝ်ႈဢၼ်ၶဝ်လူဝ်ႇမိူၼ်ၸိူဝ်ႉၼင်ႇဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းယူႇၸမ်ၼၼ်ႉ။ ထႃႇဝရႃႉၽြႃး၊ ၸိုင်၊မိူဝ်ႈဢၼ်ႁဝ်းသူးတွင်းလဝ်ႈယွၼ်းတီႈမၼ်းၸဝ်ႈၼၼ်ႉမၼ်းၸဝ်ႈထွမ်ႇဢဝ်ၵူႈပွၵ်ႈဢေႃႈ။-
တီႈၵူၼ်းမဵဝ်းတၢင်ႇမဵဝ်းၼၼ်ႉပိၵ်ႉသမ်ႉယႂ်ႇလူင်ထၢၼ်ႇႁိုဝ်သေၵေႃႈ၊ၶဝ်ဢမ်ႇမီးပိင်းၺၢပ်ႈတြႃးဢၼ်မိူၼ်ၸိူဝ်ႉၼင်ႇဢၼ်ၵဝ်သင်ႇသွၼ်ပၼ်တီႈသူဝၼ်းမိူဝ်ႈၼႆႉၼၼ်ႉဢေႃႈ။-
ၸူဝ်ႈတႃႇဢၼ်သူဢသၢၵ်ႈယင်းလိပ်းယူႇၼႆႉၼင်ႇႁိုဝ်သူတၵ်းတေဢမ်ႇလူင်ဢမ်ႇလိုမ်းလွင်ႈတၢင်းဢၼ်တူဝ်သူလႆႈႁၼ်မႃးၸိူဝ်းၼၼ်ႉၸိုင်၊ဝႆႉသတိတႃႉ။ ႁဵတ်းသတိတီႈတူဝ်ၸဝ်ႈၵဝ်ႇတႃႉ။ ဢဝ်လွင်ႈတၢင်းၸိူဝ်းၼၼ်ႉသင်ႇသွၼ်ပၼ်တီႈလုၵ်ႈလၢၼ်သူတႃႉ။-
လၢတ်ႈၼႄလွင်ႈမိုဝ်ႉဝၼ်းဢၼ်သူလႆႈၸုၵ်းယူႇၵႃႈတီႈၽၢႆႇၼႃႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူၵႃႈတီႈလွႆ သိၼႃႉ၊ ယၢမ်းမိူဝ်ႈဢၼ်မၼ်းၸဝ်ႈမီးဢမိင်ႉတီႈၵဝ်လႄႈဝႃႈ၊ ‘ႁႂ်ႈၵူၼ်းတင်းလၢႆၸုတုမ်ၵၼ်တႃႉ။ ၵဝ်တၵ်းႁႂ်ႈၶဝ်ငိၼ်းၵႂၢမ်းၵဝ်၊ပုၼ်ႈလွင်ႈၼင်ႇႁိုဝ်ၶဝ်တၵ်းသွၼ်ဢဝ်တၢင်းဢၼ်ထွမ်ႇဢဝ်ၵႂၢမ်းၵဝ်ၼႂ်းၸူဝ်ႈၵၢပ်ႈၵႃႇလႃႉဢၼ်ၶဝ်ဢသၢၵ်ႈယင်းလိပ်းယူႇၼႆႉ၊ဢိၵ်ႇတင်းႁႂ်ႈလႆႈသင်ႇသွၼ်ပၼ်လုၵ်ႈလၢင်းၶဝ်လွင်ႈဢၼ်တၵ်းလႆႈၵူဝ်ႁႄၵဝ်ၼၼ်ႉဢေႃႈ။’
“မွၵ်ႇလၢတ်ႈတီႈလုၵ်ႈလၢင်းသူလွင်ႈဢၼ်သူလႆႈဢွၼ်ၵၼ်ၵႂႃႇၸုၵ်းယူႇၵႃႈတီႈတိၼ်လွႆဢၼ်မွၵ်ႇၵုမ်ႈဢၼ်ၵၢမ်ႈလမ်ၼႃႇႁူမ်ႇသုမ်ႇမၼ်းဝႆႉလႄႈသမ်ႉမီးမုၵ်ႉၽႆးလုၵ်ႉယူႇႁွတ်ႈထိုင်ၵႃႈၼိူဝ်ၽႃႉၵၢင်ႁၢဝ်ၼၼ်ႉတႃႉ။-
မွၵ်ႇလၢတ်ႈၼႄၶဝ်လွင်ႈဢၼ် ထႃႇဝရႃႉၽြႃး၊ ယူႇၵႃႈၼႂ်းမုၵ်ႉၽႆးၼၼ်ႉလၢတ်ႈၵႂၢမ်းယူႇလႄႈသူၵေႃႈလႆႈငိၼ်းဢမိင်ႉမၼ်းၸဝ်ႈယူႇ၊ၵူၺ်းၵႃႈ၊သူယင်းဢမ်ႇလႆႈႁၼ်ႁၢင်ႈႁၼ်ငဝ်းမၼ်းၸဝ်ႈသေဢိတ်းၼၼ်ႉတႃႉ။-
မၼ်းၸဝ်ႈမီးဢမိင်ႉႁႂ်ႈသူပႂ်ႉပတိၺိၺ်ႇဢၼ်မၼ်းၸဝ်ႈဝႆႉတီႈသူၼၼ်ႉ၊ႁႂ်ႈသူပႂ်ႉၵမ်ပႂ်ႉၵျၢင်ႉပိင်းၺၢပ်ႈတြႃးၸဝ်ႈသိပ်းပႃးဢၼ်မၼ်းၸဝ်ႈတႅမ်ႈဝႆႉၵႃႈၼိူဝ်ၶႅပ်းမၢၵ်ႇႁိၼ်သွင်ၽႅၼ်ႇၼၼ်ႉဢေႃႈ။-
ထႃႇဝရႃႉၽြႃး၊ မီးဢမိင်ႉတီႈၵဝ်ႁႂ်ႈၵဝ်သင်ႇသွၼ်ပိင်းၺၢပ်ႈတြႃးၵႃႈမီးၼၼ်ႉပၼ်တီႈသူႁႂ်ႈသူၵမ်ၵျၢင်ႉၸွမ်းၵႃႈၼႂ်းမိူင်းဢၼ်သူတၵ်းလႆႈၶဝ်ႈၸၢမ်ႇၸႃးၼၼ်ႉဢေႃႈ။
“မိူဝ်ႈဢၼ်သဵင် ထႃႇဝရႃႉၽြႃး၊ ဢွၵ်ႇမႃးသေၵႃႈၼႂ်းမုၵ်ႉၽႆးလႄႈလၢတ်ႈတေႃႇသူၵႃႈတီႈလွႆ သိၼႃႉ၊ ၼၼ်ႉၸိုင်၊သူဢမ်ႇလႆႈႁၼ်ႁၢင်ႈႁၼ်ငဝ်းမၼ်းၸဝ်ႈသေဢိတ်း။ ပိူဝ်ႈၼႆလႄႈပုၼ်ႈဢၼ်တၵ်းပဵၼ်တၢင်းလီတီႈတူဝ်ၸဝ်ႈၵဝ်ႇၸိုင်၊-
ၼင်ႇႁိုဝ်သူတၵ်းဢမ်ႇလႆႈႁဵတ်းဢပျတ်ႈၵွပ်ႈပိူဝ်ႈတၢင်းဢၼ်ႁဵတ်းႁုၼ်ႇႁၢင်ႈသၢင်းထုလႄႈဝႆႈၼၼ်ႉဝႆႉသတိတႃႉ။ ဢမ်ႇလႆႈႁဵတ်းပုင်ႇႁၢင်ႈၵူၼ်းၸၢႆး၊ၵူၼ်းယိင်း၊-
ပုင်ႇႁၢင်ႈတူဝ်သတ်းတရိၵ်ႈသၢၼ်ႇ၊တူဝ်ၼူၵ်ႉ၊-
ပုင်ႇႁၢင်ႈတူဝ်ဢၼ်ၸၢင်ႈၵႂႃႇၸၢင်ႈၵၢၼ်း၊ၸၢင်ႈလိူၼ်ႈၵႂႃႇၵႃႈၼိူဝ်လိၼ်၊ဢိၵ်ႇတင်းပုင်ႇႁၢင်ႈပႃၸိူဝ်းၼၼ်ႉ။-
ယႃႇပေႁႂ်ႈလႆႈပႃးၸွမ်းၼႂ်းတၢင်းဢၼ်ပိူၼ်ႈတိုၵ်းသူၼ်းၸူဝ်းဢဝ်လႄႈႁဵတ်းဝၢတ်ႈဝႆႈသႃၶိူင်ႈပိူင်ဢၼ်သူႁၼ်ၵႃႈၼိူဝ်ၼႃႈၽႃႉၵၢင်ႁၢဝ်၊ဢၼ်ဝႃႈ၊လိူၼ်၊လၢဝ်၊တႃဝၼ်းၸိူဝ်းၼၼ်ႉလႃးလႃး။ ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢဝ်ၶိူင်ႈပိူင်ၸိူဝ်းၼၼ်ႉဝႆႉပၼ်ၵူၼ်းတင်းသဵင်ႈတင်းလူင်တႂ်ႈၽႃႉၵၢင်ႁၢဝ်ဢေႃႈ။-
သူၸမ်ႉ၊ပဵၼ်ၵူၼ်းမဵဝ်းဢၼ်မၼ်းၸဝ်ႈၼုၵ်ႈဢဝ်ဢွၵ်ႇသေတဝ်ႈၽႆးလဵၵ်းဢၼ်မႆႈၼႃႇဢၼ်ဝႃႈမိူင်း ဢေးၵျိပ်ႉ၊ ၼၼ်ႉယဝ်ႉယဝ်ႉ။ မၼ်းၸဝ်ႈထုတ်ႇၼုၵ်ႈဢဝ်သူဢွၵ်ႇမႃးႁႂ်ႈလႆႈပဵၼ်ၵူၼ်းမၼ်းၸဝ်ႈၵႃႈၼင်ႇဢၼ်သူပဵၼ်ယူႇဝၼ်းမိူဝ်ႈၼႆႉၼၼ်ႉယဝ်ႉ။-
ၵွပ်ႈပိူဝ်ႈသူလႄႈ ထႃႇဝရႃႉၽြႃး၊ ၸႂ်မႆႈၶႂ်ႈၸႃႉတေႃႇၵဝ်သေယဝ်ႉ၊လၢတ်ႈၵႂၢမ်းဢၼ်မၼ်ႈၶိူင်ႇလႄႈဝႃႈ၊ၵဝ်တၵ်းဢမ်ႇလႆႈၶၢမ်ႈၼမ်ႉ ယေႃးတၢၼ်ႇ၊ ၵႂႃႇ၊ဢိၵ်ႇတင်းဢမ်ႇႁႂ်ႈၵဝ်လႆႈၶဝ်ႈၸၢမ်ႇၸႃးၵႃႈၼႂ်းမိူင်းဢၼ်မျၢတ်ႈလီဢၼ်မၼ်းၸဝ်ႈပၼ်ႁႂ်ႈသူၸၢမ်ႇၸႃးၼၼ်ႉဢေႃႈ။-
ပိူဝ်ႈဢၼ်ဝႃႈၵဝ်တၵ်းလႆႈတၢႆၵႃႈတီႈမိူင်းၼႆႉလႄႈၵဝ်ဢမ်ႇလႆႈၶၢမ်ႈၼမ်ႉ ယေႃးတၢၼ်ႇ၊ သူၸမ်ႉ၊ၸမ်တၵ်းလႆႈဢွၼ်ၵၼ်ၶၢမ်ႈၵႂႃႇလႄႈသိမ်းဢဝ်မိူင်းဢၼ်မျၢတ်ႈလီၼၼ်ႉယဝ်ႉ။-
တူဝ်သူႁဵတ်းသတိပုၼ်ႈလွင်ႈၼင်ႇႁိုဝ်သူတၵ်းဢမ်ႇလူင်လိုမ်းပတိၺိၺ်ႇဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဝႆႉၵႃႈတီႈသူၼၼ်ႉ၊ဢိၵ်ႇတင်းသူတၵ်းဢမ်ႇႁဵတ်းႁုၼ်ႇႁၢင်ႈသၢင်းထုဢၼ်မီးပုင်ႇႁၢင်ႈၶိူင်ႈပိူင်ဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူႁၢမ်ႈတၢပ်ႈႁႄႉၶႅၼ်သူၼၼ်ႉတႃႉ။-
လွင်ႈမၼ်းၸမ်ႉ၊ ထႃႇဝရႃႉၽြႃး၊ ၽြႃးပဵၼ်ၸဝ်ႈသူၼၼ်ႉပဵၼ်ၸိူဝ်ႉၼင်ႇမုၵ်ႉၽႆးဢၼ်မႆႈ၊ပဵၼ်ၽြႃးဢၼ်ၶႅၼ်ဢၼ်ႁၢမ်ႈၼၼ်ႉဢေႃႈ။
“ပိၵ်ႉသမ်ႉသူလႆႈယူႇၼႂ်းမိူင်းၼၼ်ႉႁိုင်ၼႃႇတေႃႇထိုင်ႁွတ်ႈလႆႈလုၵ်ႈလႆႈလၢၼ်ယဝ်ႉသေၵေႃႈ၊ယႃႇပေႁဵတ်းဢပျတ်ႈတၢင်းဢၼ်ႁဵတ်းႁုၼ်ႇႁၢင်ႈသၢင်းထုဢၼ်မီးပုင်ႇႁၢင်ႈၶိူင်ႈပိူင်သေၸိူဝ်ႉသေပိူင်ၼၼ်ႉလႃးလႃး။ ဢၼ်ၼႆႉၸိုင်၊ပဵၼ်တုၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ လႄႈဢၼ်ၼၼ်ႉတၵ်းႁႂ်ႈလႆႈတိုၵ်းယူင်းတၢင်းဢၼ်ၸႂ်မႆႈၶႂ်ႈၸႃႉမၼ်းၸဝ်ႈဢေႃႈ။-
ၵဝ်ႁႂ်ႈၵၢင်ႁၢဝ်တင်းလိၼ်မိူင်းပဵၼ်သၢၵ်ႈသေႇၽၢႆႇၼိုင်ႈတင်းသူၼႂ်းဝၼ်းမိူဝ်ႈၼႆႉၸမ်ႉ၊ပေႃးသူဢမ်ႇထွမ်ႇဢဝ်ၵႂၢမ်းၵဝ်ၸိုင်၊သူတၵ်းလႆႈၸဵဝ်းလုႁၢႆသေၵႃႈတီႈမိူင်းၼၼ်ႉဢေႃႈ။ သူတၵ်းဢမ်ႇလႆႈယူႇႁိုင်ႁိုင်ၵႃႈၼႂ်းမိူင်းၽၢႆႇပုၼ်ႉၼမ်ႉ ယေႃးတၢၼ်ႇ၊ ဢၼ်သူတၵ်းလႆႈၶဝ်ႈၸၢမ်ႇၸႃးၼၼ်ႉ။ သူတၵ်းလႆႈႁွတ်ႈထိုင်တၢင်းဢၼ်လုလႅဝ်ၵႂႃႇလုမ်းလုမ်းဢေႃႈ။-
ထႃႇဝရႃႉၽြႃး၊ တၵ်းႁႂ်ႈသူၽၢတ်ႇၽႄၵၼ်ၵႂႃႇၵႃႈၼႂ်းၵူၼ်းမဵဝ်းတၢင်ႇမဵဝ်းတင်းလၢႆလႄႈတီႈၼၼ်ႈသူတၵ်းလႆႈၵိုတ်းၵျၢၼ်ႇဝႆႉဢိတ်းဢွၼ်ႇၼိုင်ႈၵူၺ်းယဝ်ႉ။-
ၵႃႈတီႈၼၼ်ႈသူတၵ်းလႆႈဝႆႈၽြႃးဢၼ်ဢဝ်တင်းမိုဝ်းၵူၼ်းႁဵတ်းတင်းလၢႆဢၼ်ဝႃႈၽြႃးမႆႉ၊ၽြႃးႁိၼ်၊ၽြႃးဢၼ်ဢမ်ႇၸၢင်ႈႁၼ်လႆႈ၊ဢမ်ႇၸၢင်ႈငိၼ်းလႆႈ၊ဢမ်ႇၸၢင်ႈၵိၼ်လႆႈ၊ဢမ်ႇၸၢင်ႈၼူမ်လႆႈၸိူဝ်းၼၼ်ႉဢေႃႈ။-
ၼႂ်းဝႃႈၼၼ်သေၵေႃႈ၊မိူဝ်ႈဢၼ်သူယူႇၵႃႈတီႈၼၼ်ႈလႄႈပႃးတင်းႁူဝ်ၸႂ်သဵင်ႈသဵင်ႈၵၢဝ်ႇႁႃဢေႁႃ ထႃႇဝရႃႉၽြႃး၊ ၽြႃးပဵၼ်ၸဝ်ႈသူၸိုင်၊သူတၵ်းလႆႈထူပ်းဢေႃႈ။-
မိူဝ်ႈဢၼ်သူႁွတ်ႈတုၵ်ႉၶႃႉလႄႈလွင်ႈတၢင်းၵူႈၸိူဝ်ႉၵူႈပိူင်ၸိူဝ်းၼႆႉပဵၼ်မႃးတီႈသူယဝ်ႉၸင်ႇ၊သူတၵ်းၶိုၼ်းမႃးၸူးတီႈ ထႃႇဝရႃႉၽြႃး၊ သေလႄႈထွမ်ႇဢဝ်ၵႂၢမ်းမၼ်းၸဝ်ႈဢေႃႈ။-
မၼ်းၸဝ်ႈၸမ်ႉ၊ပဵၼ်ၽြႃးဢၼ်ၸၢင်ႈဢဵတ်းလူဢေႃႈ။ မၼ်းၸဝ်ႈတေဢမ်ႇၸုၼ်ႉသူပႅတ်ႈ၊ဢမ်ႇယႃႉသူပႅတ်ႈ၊ဢမ်ႇလူင်လိုမ်းပႅတ်ႈပတိၺိၺ်ႇတြႃးဢၼ်တူဝ်မၼ်းၸဝ်ႈႁဵတ်းဝႆႉလူၺ်ႈၵၼ်တင်းပူႇပေႃႈသူၼၼ်ႉ။
“တွင်ႈထၢမ်ႁႃတူၺ်းၶိင်ႇၶႃႇဢၼ်ပူၼ်ႉမႃးယဝ်ႉ၊ၸူဝ်ႈဢၼ်သူဢမ်ႇပႆႇပဵၼ်ပႆႇမီး၊ၸႃႉၸဵမ်မိုဝ်ႉဝၼ်းဢၼ်ၽြႃးပဵၼ်ၸဝ်ႈၽၢၼ်ႇသၢင်းႁဵတ်းပဵၼ်ၵူၼ်းၵႃႈၼိူဝ်လိၼ်မိူင်းၼႆႉၼၼ်ႉလူး။ တွင်ႈထၢမ်ႁႃတူၺ်းၵႃႈတီႈလိၼ်မိူင်းၼႆႉၸွတ်ႇၸွတ်ႇလူး။ လွင်ႈတၢင်းဢၼ်ၶိုၵ်ႉၶမ်ႇၼႃႇထၼ်ႇၼႆႉယၢမ်ႈလႆႈပဵၼ်ႁိုဝ်း၊ဢမ်ႇပဵၼ်ႁိုဝ်း။ လွင်ႈတၢင်းဢၼ်ပဵၼ်ၸိူဝ်ႉၼင်ႇၼႆၼၼ်ႉယၢမ်ႈလႆႈငိၼ်းၶၢဝ်ႇမၼ်းယဝ်ႉႁိုဝ်း။-
ၵူၼ်းသေၸိူဝ်ႉသေမဵဝ်းယၢမ်ႈလႆႈငိၼ်းသဵင်ၽြႃးဢၼ်လၢတ်ႈဢွၵ်ႇသေၵႃႈၼႂ်းမုၵ်ႉၽႆးမိူၼ်ၸိူဝ်ႉၼင်ႇဢၼ်သူလႆႈငိၼ်းၼၼ်ႉသေယဝ်ႉ၊ဢသၢၵ်ႈလႆႈၵတ်းယဵၼ်ၶျၢမ်းသႃႇၼၼ်ႉႁိုဝ်း။-
ၽြႃးသေသူႇသေပႃးၸွင်ႇယၢမ်ႈႁတ်းၵႂႃႇထုတ်ႇၼုၵ်ႈဢဝ်ၵူၼ်းသေၸိူဝ်ႉသေမဵဝ်းၵႃႈၼႂ်းမိူင်းၵူၼ်းတၢင်ႇၸိူဝ်ႉတၢင်ႇမဵဝ်းမႃးပုၼ်ႈမၼ်းၸဝ်ႈ မိူၼ်ၸိူဝ်ႉၼင်ႇဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူႁဵတ်းပုၼ်ႈသူၵႃႈၼႂ်းမိူင်း ဢေးၵျိပ်ႉ၊ ၼၼ်ႉႁိုဝ်း။ မၼ်းၸဝ်ႈၼၼ်ႉဢဝ်တင်းမုၼ်ၽုင်းဢႃႇၼုၽေႃႇဢိၵ်ႇတင်းႁႅင်းတၼ်းၶူဝ်းမၼ်းၸဝ်ႈသေလႄႈပၼ်ၽေးဢုပၢတ်ႈတင်းၽေးသိုၵ်းႁႂ်ႈႁွတ်ႈထိုင်လႄႈႁဵတ်းၼႄၼိမိၵ်ႈလၢၵ်ႈၶၼႃႇဢၼ်လၢၵ်ႇဢၼ်လၢႆးဢိၵ်ႇတင်းလွင်ႈတၢင်းဢၼ်လီဢၢမ်းလႄႈ၊ႁဵတ်းႁႂ်ႈလွင်ႈတၢင်းဢၼ်လီၵူဝ်လီႁႄပေႃႇပဵၼ်မႃးသိုဝ်ႈၼႃႈတႂ်ႈတႃသူယဝ်ႉ။-
ထႃႇဝရႃႉၽြႃး၊ ႁဵတ်းၸိူဝ်ႉၼင်ႇၼႆၼႄပျႃးသူႁႂ်ႈလႆႈပဵၼ်သၢၵ်ႈသေႇတီႈသူ၊လွင်ႈဢၼ်ဝႃႈမၼ်းၸဝ်ႈသူလဵဝ်ပႃးလဵဝ်ၵူၺ်းပဵၼ်ၽြႃးပဵၼ်ၸဝ်ႈ၊ဢိၵ်ႇတင်းလွင်ႈဢၼ်ဝႃႈ၊ဢမ်ႇမီးၽြႃးတၢင်ႇသူႇတၢင်ႇပႃးယဝ်ႉၼၼ်ႉဢေႃႈ။-
မၼ်းၸဝ်ႈႁႂ်ႈသူလႆႈငိၼ်းသဵင်ၸဝ်ႈဢွၵ်ႇသေၵႃႈၼႂ်းၵၢင်ႁၢဝ်ႁႂ်ႈလႆႈသင်ႇသွၼ်ပၼ်သူဢေႃႈ။ ၵႃႈၼိူဝ်လိၼ်မိူင်းၼႆႉၵေႃႈမၼ်းၸဝ်ႈႁႂ်ႈသူလႆႈႁၼ်ၽႆးမူတ်းၸၢင်ႇၸဝ်ႈလႄႈမၼ်းၸဝ်ႈယူႇၵႃႈၼႂ်းၽႆးၼၼ်ႉသေလႄႈလၢတ်ႈတေႃႇသူဢေႃႈ။-
ၵွပ်ႈပိူဝ်ႈမၼ်းၸဝ်ႈႁၵ်ႉပူႇမွၼ်ႇသူၸိူဝ်းၼၼ်ႉလႄႈမၼ်းၸဝ်ႈလိူၵ်ႈဢဝ်သူယဝ်ႉ။ မၼ်းၸဝ်ႈဢဝ်တင်းမႁႃႇတၼ်းၶူဝ်းၸဝ်ႈသေလႄႈဢွၼ်ဢဝ်သူဢွၵ်ႇသေမိူင်း ဢေးၵျိပ်ႉ၊ မႃးယဝ်ႉ။-
မိူဝ်ႈဢၼ်သူယဵပ်ႇၶၢမ်ႈၶဝ်ႈၵႂႃႇၵႃႈၼႂ်းမိူင်းပိူၼ်ႈၼၼ်ႉ၊ပိၵ်ႉသမ်ႉၶဝ်ၼမ်ၵိုၼ်းႁႅင်းယႂ်ႇသေသူသေၵေႃႈ၊မၼ်းၸဝ်ႈႁေႃႈပႅတ်ႈၵူၼ်းမဵဝ်းၼႂ်းမိူင်းၼၼ်ႉသေယဝ်ႉ၊သမ်ႉဢဝ်သူသႂၢင်းသႂ်ႇၵႃႈၼႂ်းမိူင်းၶဝ်လႄႈ သူလႆႈပိူင်ႇဢဝ်ၸိူဝ်ႉၼင်ႇဢၼ်သူပဵၼ်ယူႇဝၼ်းမိူဝ်ႈၼႆႉၼၼ်ႉ။-
ၵွပ်ႈပိူဝ်ႈၸိူဝ်ႉၼင်ႇၼႆလႄႈဝၼ်းမိူဝ်ႈၼႆႉၶုၵ်းၸႂ်လႆႈတႃႉ။ ယႃႇပေလူင်လိုမ်းလႃးလႃး။ ထႃႇဝရႃႉၽြႃး၊ ပဵၼ်ၽြႃးပဵၼ်ၸဝ်ႈဢၼ်မီးၵႃႈၼိူဝ်ၵၢင်ႁၢဝ်လႄႈၵႃႈတီႈလိၼ်မိူင်းၼႆႉဢေႃႈ။ ဢမ်ႇမီးၽြႃးတၢင်ႇသူႇတၢင်ႇပႃးဢေႃႈ။-
ပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၸဝ်ႈၵႃႈဢၼ်ၵဝ်သင်ႇလၢတ်ႈဝႆႉတီႈသူဝၼ်းမိူဝ်ႈၼႆႉၼၼ်ႉတႃႉ။ ႁႂ်ႈသူဢိၵ်ႇတင်းလုၵ်ႈလၢၼ်သူလႆႈလီလႆႈပဵၼ်တႃႉ။ ၼင်ႇၼၼ်လႄႈသူတၵ်းဢသၢၵ်ႈယိုၼ်းယၢဝ်းယူႇတႃႇသေႇၵႃႈၼႂ်းမိူင်းဢၼ် ထႃႇဝရႃႉၽြႃး၊ ပၼ်တီႈသူၼၼ်ႉသေယဝ်ႉ၊ပဵၼ်မိူင်းဢၼ်သူလႆႈပိူင်ႇတႃႇသေႇဢမ်ႇထၢတ်ႇဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ မူဝ်းသေႇ၊ မၵ်းၶၢၼ်းဝႆႉဝဵင်းသၢမ်ဝဵင်းၵႃႈတီႈၽၢႆႇတၢင်းဝၼ်းဢွၵ်ႇၼမ်ႉ ယေႃးတၢၼ်ႇ၊-
ပုၼ်ႈၵေႃႉဢၼ်ဢမ်ႇထၢင်ႇဢမ်ႇထိူမ်လႆႈဢဝ်ၵေႃႉဢၼ်ဢမ်ႇၸႂ်ႈရၢၼ်ႇသူႇမၼ်းတၢႆမႅၼ်ႈၼၼ်ႉတၵ်းတေလႆႈဢွၵ်ႇပၢႆႈတဵတ်ႇပၢႆႈသွၼ်ႈလႄႈလႆႈၵတ်းယဵၼ်ၶျၢမ်းသႃႇၼႂ်းဝဵင်းၼၼ်ႉဢေႃႈ။-
ပုၼ်ႈၸိူဝ်ႉၶိူဝ်း ရုပိၼ်ႇ၊ တၵ်းပၢႆႈတဵတ်ႇပၢႆႈသွၼ်ႈၼၼ်ႉပဵၼ်ဝဵင်း ပေႇၸႃႇ၊ ဢၼ်မီးၵႃႈၼိူဝ်ၵွင်းပဵင်းၼႂ်းထိူၼ်ႇၼၼ်ႉသေယဝ်ႉ၊ပုၼ်ႈၸိူဝ်ႉၶိူဝ်း ၵၢတ်ႉ၊ ပဵၼ်ဝဵင်း ရႃႇမုတ်ႉ၊ ၵႃႈၼႂ်းမိူင်း ၵိလတ်ႉ၊ ဢိၵ်ႇတင်းပုၼ်ႈၸိူဝ်ႉၶိူဝ်း မၼႃႇသေႇ၊ သမ်ႉပဵၼ်ဝဵင်း ၵေႃႇလၼ်ႇ၊ ၵႃႈၼႂ်းမိူင်း ပႃႇသၢၼ်ႇ၊ ဢေႃႈ။
ဢၼ်ၼႆႉၸမ်ႉ၊ပဵၼ်ပိင်းၺၢပ်ႈတြႃး၊ၽြႃးပဵၼ်ၸဝ်ႈဢၼ် မူဝ်းသေႇ၊ ပၼ်တီႈၵူၼ်းမဵဝ်း ဢိသရေး၊ တင်းလၢႆဢေႃႈ။-
ဢၼ်ၸိူဝ်းၼႆႉယဝ်ႉပဵၼ်ၵႂၢမ်းသၢၵ်ႈသေႇ၊ပိင်းၺၢပ်ႈၸဝ်ႈဢိၵ်ႇတင်းပိင်းၺၢပ်ႈတြႃးဢၼ် မူဝ်းသေႇ၊ ႁေႃးလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလိုၼ်းသေဢၼ်ၶဝ်ဢွၵ်ႇမိူင်း ဢေးၵျိပ်ႉ၊ မႃးၼၼ်ႉဢေႃႈ။-
ပဵၼ်ၵႃႈတီႈထူင်ႉလူင်ၽၢႆႇဝၼ်းဢွၵ်ႇၼမ်ႉ ယေႃးတၢၼ်ႇ၊ သိုဝ်ႈၵၼ်တင်းဝဵင်း ပႅတ်ႉပေႇဢုရႃႉ၊ ၵႃႈၼႂ်းမိူင်းဢၼ်ၶုၼ်ႁေႃၶမ်း သိႁုၼ်ႇ၊ ၵူၼ်းမဵဝ်း ဢႃႇမေႃးရိ၊ ဢုပ်ႉပိူင်ႇယူႇၼႂ်းဝဵင်း ႁေႇသၽုၼ်ႇ၊ ၼၼ်ႉဢေႃႈ။ သိုင်ႇတိူင်းမိူင်းၼၼ်ႉၸိုင်၊ မူဝ်းသေႇ၊ ဢိၵ်ႇလူၺ်ႈၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်တိုၵ်းတေႃးယႃႉၽဵဝ်ႈပႅတ်ႈလိုၼ်းသေဢၼ်ၶဝ်ဢွၵ်ႇမိူင်း ဢေးၵျိပ်ႉ၊ မႃးၼၼ်ႉဢေႃႈ။-
ၶဝ်သိမ်းဢဝ်မိူင်းမၼ်းဢိၵ်ႇတင်းမိူင်းဢၼ်ၶုၼ်ႁေႃၶမ်း ဢေႃႇၶႃႉ၊ မိူင်း ပႃႇသၢၼ်ႇ၊ ဢၼ်ပဵၼ်ၶုၼ်ႁေႃၶမ်းၵူၼ်းမဵဝ်း ဢႃႇမေႃးရိ၊ တၢင်ႇပႃးဢုပ်ႉပိူင်ႇဢၼ်မီးၽၢႆႇတၢင်းဝၼ်းဢွၵ်ႇၼမ်ႉ ယေႃးတၢၼ်ႇ၊ ၼၼ်ႉဢေႃႈ။-
မိူင်းၼၼ်ႉၸမ်ႉ၊တႄႇဢဝ်ဝဵင်း ဢႃႇရေႃႇ၊ ဢၼ်မီးၵႃႈတီႈႁူဝ်ၸဵင်ႇပၢင်ႇထူင်ႉၼမ်ႉ ဢႃႇၼုၼ်ႇ၊ ၸွမ်းၵႂႃႇၽၢႆႇတၢင်းႁွင်ႇတေႃႇထိုင်ႁွတ်ႈလွႆ ၸိရုၼ်ႇ၊ ဢၼ်ဝႃႈ၊လွႆ ႁေႇရမုၼ်ႇ၊ ဢေႃႈ။-
ဢိၵ်ႇတင်းတႄႇဢဝ်ၵႃႈတီႈပၢင်ႇပဵင်း ဢႃႇရပႃႇ၊ ၵႃႈတီႈၽၢႆႇတၢင်းဝၼ်းဢွၵ်ႇၼမ်ႉ ယေႃးတၢၼ်ႇ၊ တင်းသဵင်ႈတင်းလူင်ၵႂႃႇၽၢႆႇတၢင်းၸၢၼ်းမၼ်းတေႃႇထိုင်ႁွတ်ႈ ပၢင်ႇလၢႆႇတၢႆ၊ ဢိၵ်ႇတင်းၽၢႆႇဝၼ်းဢွၵ်ႇတိၼ်လွႆ ပိသၵႃႇ၊ ၼၼ်ႉဢေႃႈ။
မူဝ်းသေႇ၊ သမ်ႉႁွင်ႉဢဝ်ၵူၼ်းမဵဝ်း ဢိသရေး၊ တင်းလၢႆၸုတုမ်ၵၼ်သေယဝ်ႉလၢတ်ႈဝႃႈ၊ “ပီႈၼွင်ႉမဵဝ်း ဢိသရေး၊ ၶဝ်႟။ ဢွၼ်ၵၼ်ထွမ်ႇဢဝ်ထုင်းၽိင်ႈတြႃးဢၼ်ၵဝ်ပၼ်သူဝၼ်းမိူဝ်ႈၼႆႉၼၼ်ႉတႃႉ။ ဢွၼ်ၵၼ်သွၼ်ဢဝ်လႄႈၵမ်ၵျၢင်ႉၸွမ်းတႄႉတႄႉဝႃႈဝႃႈတႃႉ။-
ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၼၼ်ႉႁဵတ်းပတိၺိၺ်ႇလူၺ်ႈၵၼ်တင်းႁဝ်းၵႃႈတီႈလွႆ သိၼႃႉ၊ ၼၼ်ႉယဝ်ႉ။-
မၼ်းၸဝ်ႈႁဵတ်းပတိၺိၺ်ႇလူၺ်ႈၵၼ်တင်းပူႇမွၼ်ႇႁဝ်းၵူၺ်းဢမ်ႇၸႂ်ႈ။ မၼ်းၸဝ်ႈႁဵတ်းပတိၺိၺ်ႇလူၺ်ႈၵၼ်တင်းႁဝ်းၵႃႈမီးၸိူဝ်းဢၼ်ဢသၢၵ်ႈလိပ်းယူႇၼႂ်းဝၼ်းမိူဝ်ႈၼႆႉၼၼ်ႉတင်းသဵင်ႈတင်းမူတ်းဢေႃႈ။-
ၵႃႈၼိူဝ်လွႆၼၼ်ႉ ထႃႇဝရႃႉၽြႃး၊ တေႃႇၼႃႈၵၼ်တင်းသူသေလႄႈသဵင်မၼ်းၸဝ်ႈလုၵ်ႉသေၵႃႈၼႂ်းၽႆးၼၼ်ႉလၢတ်ႈတေႃႇသူမႃးဢေႃႈ။-
ၵဝ်လႆႈၸုၵ်းဝူင်ႈၵၢင် ထႃႇဝရႃႉၽြႃး၊ တင်းသူႁႂ်ႈလႆႈဢဝ်ဢမိင်ႉ ထႃႇဝရႃႉၽြႃး၊ ၶိုၼ်းမွၵ်ႇလၢတ်ႈၼႄသူၵွပ်ႈပိူဝ်ႈသူၵူဝ်ၽႆးၼၼ်ႉလႄႈဢမ်ႇႁတ်းၶိုၼ်ႈၵႂႃႇၵႃႈၼိူဝ်လွႆၼၼ်ႉဢေႃႈ။ “ ထႃႇဝရႃႉၽြႃး၊ မီးဢမိင်ႉလႄႈဝႃႈၸမ်ႉ၊-
‘ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢၼ်ၵႄႇသႄႇသူဢွၵ်ႇသေမိူင်း ဢေးၵျိပ်ႉ၊ မိူင်းဢၼ်သူလႆႈၶၢမ်ႇႁဵတ်းၶႃႈၼၼ်ႉဢေႃႈ။
“‘လိူဝ်သေၵဝ်ၼႆႉယႃႇပေဝႆႈသႃၵူဝ်းၵႂၢႆႇၽြႃးတၢင်ႇသူႇတၢင်ႇပႃး။
“‘ယႃႇပေႁဵတ်းႁုၼ်ႇႁၢင်ႈသၢင်းထု၊ပုင်ႇႁၢင်ႈၶိူင်ႈပိူင်ဢၼ်မီးၵႃႈၼိူဝ်ၽႃႉၵၢင်ႁၢဝ်၊ဢၼ်မီးၵႃႈတီႈလိၼ်မိူင်း၊ဢိၵ်ႇတင်းဢၼ်မီးၵႃႈၼႂ်းၼမ်ႉတႂ်ႈလိၼ်မိူင်းၸိူဝ်းၼၼ်ႉပုၼ်ႈတူဝ်ၸဝ်ႈၵဝ်ႇ။-
ယႃႇပေၵူမ်ႈႁူဝ်ၵွမ်းႁူဝ်တီႈၶဝ်လႄႈဝႆႈၶဝ်။ ယႃႇပေႁဵတ်းဝၢတ်ႈတီႈၶဝ်။ လွင်ႈမၼ်းၸမ်ႉ၊ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူလႄႈၶႅၼ်သူဝႆႉၼၼ်ႉဢေႃႈ။ ၵဝ်ၸီႇယၢင်ႇတႅၼ်းပၼ်ဢပျတ်ႈတီႈၶဝ်ၸိူဝ်းဢၼ်ၸင်းၵဝ်ၼၼ်ႉသိုပ်ႇသိုပ်ႇတၢမ်တၢမ်တေႃႇထိုင်ႁွတ်ႈသၢမ်သိုပ်ႇ၊သီႇသိုပ်ႇဢေႃႈ။-
ၵဝ်သမ်ႉၼႄပျႃးတၢင်းႁၵ်ႉမႅတ်ႈတႃႇၵဝ်တီႈၶဝ်ၸိူဝ်းဢၼ်ႁၵ်ႉၵဝ်လႄႈၵမ်ၵျၢင်ႉၸွမ်းပိင်းၺၢပ်ႈတြႃးၵဝ်ၼၼ်ႉသိုပ်ႇသိုပ်ႇတၢမ်တၢမ်တေႃႇထိုင်ႁွတ်ႈႁဵင်သိုပ်ႇမိုၼ်ႇသိုပ်ႇဢေႃႈ။
“‘ယႃႇပေၼပ်ႉတေႃႈဢဝ်ၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ၽြႃးပဵၼ်ၸဝ်ႈသူလၢတ်ႈဝႃႈလၢႆလၢႆလွၵ်ႇလွၵ်ႇ။ လွင်ႈမၼ်းၸမ်ႉ၊ၵဝ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းတႅၼ်းပၼ်ဢပျတ်ႈတၢမ်ႇတီႈၶဝ်ၸိူဝ်းဢၼ်ဢဝ်ၼႃႇမႃႉၸိုဝ်ႈသဵင်ၵဝ်လၢတ်ႈဝႃႈလၢႆလၢႆလွၵ်ႇလွၵ်ႇၼၼ်ႉဢေႃႈ။
“‘ပႂ်ႉဝၼ်းၵမ်သိၼ်ႁႂ်ႈဝၼ်းၼၼ်ႉမူတ်းၸၢင်ႇၸွမ်းၵႃႈၼင်ႇဢၼ်ၵဝ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူသင်ႇလၢတ်ႈဝႆႉတီႈသူၼၼ်ႉတႃႉ။-
ဢွၼ်ၵၼ်ၵႆႉၶတ်းၸႂ်ႁဵတ်းၵၢၼ်တၢင်းႁဵတ်းၵူႈၸိူဝ်ႉၵူႈပိူင်ၼႂ်းႁူၵ်းဝၼ်းၼၼ်ႉတႃႉ။-
ဝၼ်းဢၼ်ထူၼ်ႈတီႈၸဵတ်းဝၼ်းၼၼ်ႉပဵၼ်ဝၼ်းဢၼ်ၵိုတ်းလိုဝ်ႈယူႇၼိမ်ၼိမ်လႄႈသၢၵ်ႈၵၢပ်ႈဝႆႉပုၼ်ႈၵဝ်ဢေႃႈ။ ၼႂ်းဝၼ်းၼၼ်ႉၸႃႉၸဵမ်သူလႄႈလုၵ်ႈလၢင်းသူ၊ၶႃႈသူ၊တူဝ်တရိၵ်ႈသၢၼ်ႇသူ၊ဢိၵ်ႇတင်းၶႅၵ်ႇဢၼ်ယူႇၵႃႈၼႂ်းႁိူၼ်းသူၸိူဝ်းၼၼ်ႉဢမ်ႇလႆႈႁဵတ်းၵၢၼ်ၵႃႈသင်လႃးလႃး။ ၸိူဝ်ႉၼင်ႇဢၼ်သူလိုဝ်ႈသဝ်းယူႇၼိမ်ၼိမ်လီလီၼၼ်ႉၶႃႈသူတင်းလၢႆၵေႃႈ၊တၵ်းလႆႈလိုဝ်ႈသဝ်းယူႇၼိမ်ၼိမ်လီလီဢေႃႈ။-
ၶုၵ်းၸႂ်လႆႈလွင်ႈဢၼ်သူလႆႈၶၢမ်ႇႁဵတ်းၶႃႈၵႃႈၼႂ်းမိူင်း ဢေးၵျိပ်ႉ၊ ၼၼ်ႉဢိၵ်ႇတင်းလွင်ႈဢၼ်ၵဝ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢဝ်တင်းမုၼ်ၽုင်းဢႃႇၼုၽေႃႇတင်းႁႅင်းတၼ်းၶူဝ်းလႄႈၵႄႇသႄႇၼုၵ်ႈဢဝ်သူဢွၵ်ႇမႃးၼၼ်ႉတႃႉ။ ၵွပ်ႈပိူဝ်ႈလွင်ႈတၢင်းၼၼ်ႉလႄႈၵဝ်မီးဢမိင်ႉႁႂ်ႈသူပႂ်ႉဝၼ်းၵမ်သိၼ်ဢေႃႈ။
“‘ရူဝ်ႇသေႇၵူဝ်ယမ်ပေႃႈမႄႈသူၸွမ်းၵႃႈၼင်ႇဢၼ်ၵဝ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူသင်ႇလၢတ်ႈဝႆႉၼၼ်ႉတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊သူတၵ်းလႆႈလီလႆႈပဵၼ်လႄႈဢသၢၵ်ႈသူတၵ်းယၢဝ်းယိုၼ်းၵႃႈၼႂ်းမိူင်းဢၼ်ၵဝ်တၵ်းပၼ်သူၼၼ်ႉဢေႃႈ။
“‘ယႃႇပေဢဝ်ဢသၢၵ်ႈၵူၼ်းတၢႆ။
“‘ယႃႇပေၽိတ်းပိူင်ႈၵႃႇမေႇသု ။
“‘ယႃႇပေလၵ်ႉဢုၵ်ႉၸႃႇၶူဝ်းလဵင်းပိူၼ်ႈ။
“‘ယႃႇပေၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈတီႈၵူၼ်းတၢင်ႇၵေႃႉၼၼ်ႉ။
“‘ယႃႇပေမီးၸႂ်ဢၼ်ၸပ်းၸွႆးၶႂ်ႈလႆႈမေးပိူၼ်ႈ။ ယႃႇပေမီးၸႂ်ဢၼ်ၸပ်းၸွႆးၶႂ်ႈလႆႈၸႃႉၸဵမ်ႁိူၼ်းပိူၼ်ႈ၊လိၼ်ပိူၼ်ႈ၊ၶႃႈပိူၼ်ႈ၊ဝူဝ်းပိူၼ်ႈ၊မႃႉလီႈပိူၼ်ႈ၊ၶူဝ်းၶွင်ပိူၼ်ႈသေၸိူဝ်ႉသေပိူင်၊’ ဝႃႈၼင်ႇၼႆဢေႃႈ။
“ဢၼ်ၸိူဝ်းၼႆႉပဵၼ်ပိင်းၺၢပ်ႈၸဝ်ႈဢၼ် ထႃႇဝရႃႉၽြႃး၊ ပၼ်တီႈသူၵႃႈမီးတင်းသဵင်ႈတင်းလူင်ယၢမ်းမိူဝ်ႈဢၼ်သူၸုတုမ်ၵၼ်ယူႇၵႃႈၼိူဝ်လွႆၼၼ်ႉယဝ်ႉ။ ယၢမ်းမိူဝ်ႈဢၼ်မၼ်းၸဝ်ႈဢဝ်တင်းသဵင်ဢၼ်ယႂ်ႇၼႃႇလူင်လၢင်မီးဢမိင်ႉဢွၵ်ႇသေၵႃႈၼႂ်းၽႆး၊ဢွၵ်ႇသေၵႃႈၼႂ်းၽႃႉၽူၼ်ဢၼ်ၵၢမ်ႈမိုတ်ႈၼႃႇတၼ်ၼႃႇၼၼ်ႉလိူဝ်သေပိင်းၺၢပ်ႈၸဝ်ႈၼႆႉလႄႈမၼ်းၸဝ်ႈဢမ်ႇထၢပ်ႈသႂ်ႇဢမိင်ႉထႅင်ႈသေၶေႃႈသေၵမ်း။ မၼ်းၸဝ်ႈသမ်ႉတႅမ်ႈၵႂၢမ်းမၼ်းၸဝ်ႈဝႆႉၵႃႈၼိူဝ်မၢၵ်ႇႁိၼ်သွင်ၽႅၼ်ႇသေယဝ်ႉ၊ဢဝ်ဢၢပ်ႈပၼ်တီႈၵဝ်ဢေႃႈ။
“မိူဝ်ႈဢၼ်ၵႃႈၼိူဝ်ပၢႆႈၸိၵ်းလွႆၼၼ်ႉၽႆးမႆႈယူႇတင်းလွႆလႄႈသူသမ်ႉလႆႈငိၼ်းသဵင်ဢွၵ်ႇသေၵႃႈၼႂ်းတီႈလပ်းသိင်ႇဢၼ်ၼႃတၼ်ၼႃႇၼၼ်ႉၵူၼ်းဢၼ်ပဵၼ်ၵႄႇပဵၼ်ႁူဝ်သူတင်းလၢႆဢိၵ်ႇတင်းၶုၼ်ဢၼ်ဢုပ်ႉပိူင်ႇၸိူဝ်ႉၶိူဝ်းသူတင်းလၢႆဢွၼ်ၵၼ်မႃးတီႈၵဝ်သေလႄႈ၊-
လၢတ်ႈဝႃႈ၊ ‘ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၼႄပျႃးမုၼ်ၽုင်းဢႃႇၼုၽေႃႇဢိၵ်ႇတင်းတၢင်းဢၼ်ယႂ်ႇမျၢတ်ႈမၼ်းၸဝ်ႈတီႈႁဝ်းၶႃႈၶႃႈယဝ်ႉ။ ႁဝ်းၶႃႈလႆႈငိၼ်းသဵင်မၼ်းၸဝ်ႈဢွၵ်ႇၵႃႈတီႈၽႆးမႃးၼၼ်ႉၶႃႈယဝ်ႉ။ ဝၼ်းမိူဝ်ႈၼႆႉႁဝ်းၶႃႈလႆႈႁုလွင်ႈဢၼ်ၽြႃးပဵၼ်ၸဝ်ႈလၢတ်ႈတေႃႇၵူၼ်းသေၵေႃႈ၊ၵူၼ်းယင်းဢသၢၵ်ႈလိပ်းယူႇၼၼ်ႉၶႃႈယဝ်ႉ။-
ၵူၺ်းၵႃႈ၊ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈႁဝ်းၶႃႈတၵ်းလႆႈတၢႆမိူဝ်ႈလဵဝ်ၼႆႉတီႈၶႃႈ။ ၽႆးဢၼ်မႆႈႁွၼ်ႉၼႃႇၼႆႉတၵ်းတေမႆႈႁဝ်းၶႃႈပႅတ်ႈၶႃႈဢေႃႈ။ ပေႃးႁဝ်းၶႃႈလႆႈငိၼ်းသဵင်ဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းလၢတ်ႈတေႃႇႁဝ်းၶႃႈထႅင်ႈၸိုင်၊ႁဝ်းၶႃႈတၵ်းလႆႈတၢႆဢမၢၼ်ႇၶၼ်ပဵၼ်ၶႃႈဢေႃႈ။-
ၸွင်ႇမီးၵူၼ်းသေၵေႃႉသေၵူၼ်းဢၼ်ဝၢႆးသေၶဝ်လႆႈငိၼ်းသဵင်ၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇလႄႈလၢတ်ႈဢွၵ်ႇသေၵႃႈၼႂ်းၽႆးမႃးၼၼ်ႉယင်းမီးဢသၢၵ်ႈလိပ်းယူႇႁိုဝ်း။-
ၸဝ်ႈႁဝ်း မူဝ်းသေႇ၊ ၶႃႈ။ ၶႅၼ်းတေႃႈၶိုၼ်ႈၵႂႃႇၸမ်ၸမ်လႄႈထွမ်ႇဢဝ်ၵႃႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းမီးဢမိင်ႉၼၼ်ႉသေၵမ်းၶႃႈ။ ၵႃႈၼင်ႇဢၼ်မၼ်းၸဝ်ႈမီးဢမိင်ႉတီႈၸဝ်ႈႁဝ်းၼၼ်ႉၶိုၼ်းမႃးသင်ႇလၢတ်ႈတီႈႁဝ်းၶႃႈသေၵမ်းၶႃႈ။ ႁဝ်းၶႃႈတၵ်းဢွၼ်ၵၼ်ထွမ်ႇဢဝ်လႄႈႁဵတ်းၸွမ်းဢေႃႈ၊’ ဝႃႈၼင်ႇၼႆဢေႃႈ။
“မိူဝ်ႈဢၼ် ထႃႇဝရႃႉၽြႃး၊ လႆႈငိၼ်းလွင်ႈတၢင်းၼၼ်ႉၸိုင်၊မၼ်းၸဝ်ႈမီးဢမိင်ႉတီႈၵဝ်လႄႈဝႃႈ၊ ‘ၵဝ်လႆႈငိၼ်းလွင်ႈတၢင်းဢၼ်ၵူၼ်းတင်းလၢႆလၢတ်ႈၼၼ်ႉယဝ်ႉ၊ဢၼ်ၶဝ်ဝႃႈၼၼ်ႉၸိုဝ်ႈၸႂ်ႈဢေႃႈ။-
ပေႃးၶဝ်မီးၸႂ်ၸိူဝ်ႉၼင်ႇၼၼ်တႃႇသေႇယူႇၸိုင်၊လီတႄႉတႄႉယဝ်ႉ။ ပေႃးဝႃႈၶဝ်ရူဝ်ႇသေႇၵူဝ်ယမ်ၵဝ်လႄႈပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၵဝ်သေႇသေႇၸိုင်၊ၶဝ်ဢိၵ်ႇတင်းၸူဝ်ႈလုၵ်ႈပၢၼ်လၢၼ်ၶဝ်သိုပ်ႇသိုပ်ႇတၢမ်တၢမ်တၵ်းလႆႈလီလႆႈပဵၼ်ဢေႃႈ။-
မႂ်းၵႂႃႇလႄႈသင်ႇလၢတ်ႈႁႂ်ႈၶဝ်ပွၵ်ႈမိူဝ်းၵႂႃႇၸူးသုမ်ႉထဵင်ၶဝ်တႃႉ။-
မႂ်းၸမ်ႉ၊ယူႇၵႃႈတီႈႁိမ်းၵဝ်ၼႆႉတႃႉ။ ၵဝ်တၵ်းဢဝ်ပိင်းၺၢပ်ႈတြႃးဢိၵ်ႇတင်းပိင်းၺၢပ်ႈၸဝ်ႈၵႃႈမီးတင်းသဵင်ႈတင်းလူင်ပၼ်တီႈမႂ်းဢေႃႈ။ မႂ်းသမ်ႉဢဝ်ၵျၢမ်းပိင်းၺၢပ်ႈၸိူဝ်းၼၼ်ႉသင်ႇသွၼ်ပၼ်ၵူၼ်းတင်းလၢႆႁႂ်ႈၶဝ်လႆႈပႂ်ႉၵမ်ပႂ်ႉၸွမ်းၵႃႈၼႂ်းမိူင်းဢၼ်ၵဝ်တၵ်းပၼ်ၶဝ်ၼၼ်ႉတႃႉ၊’ ဝႃႈၼင်ႇၼႆဢေႃႈ။
“ၵူၼ်းမဵဝ်း ဢိသရေး၊ ၶဝ်႟။ ၵႃႈၼင်ႇဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူပိင်းၺၢပ်ႈဝႆႉတီႈသူၼၼ်ႉဢွၼ်ၵၼ်ၵမ်ၵျၢင်ႉႁဵတ်းၸွမ်းတႃႉ။ ယႃႇပေႁႂ်ႈလႆႈလုတ်ႈလႆႈႁၢမ်းသေၶေႃႈသေၵမ်း။-
ၵမ်ၵျၢင်ႉၸွမ်းပိင်းၺၢပ်ႈတြႃးတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊သူတၵ်းလႆႈလီလႆႈပဵၼ်လႄႈသူတၵ်းဢသၢၵ်ႈယၢဝ်းယိုၼ်းၵႃႈၼႂ်းမိူင်းဢၼ်သူတၵ်းၶဝ်ႈၵႂႃႇၸၢမ်ႇၸႃးၼၼ်ႉဢေႃႈ။
“ဢၼ်ၸိူဝ်းၼႆႉၸိုင်၊ပဵၼ်ပိင်းၺၢပ်ႈတြႃးၵႃႈမီးတင်းသဵင်ႈတင်းလူင်ဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူပိင်းၺၢပ်ႈဝႆႉႁႂ်ႈၵဝ်သင်ႇသွၼ်ပၼ်သူၼၼ်ႉယဝ်ႉ။ ၵမ်ၵျၢင်ႉႁဵတ်းၸွမ်းၵႃႈၼႂ်းမိူင်းဢၼ်သူတၵ်းၶဝ်ႈၵႂႃႇၸၢမ်ႇၸႃးၼၼ်ႉတႃႉ။-
ၸူဝ်ႈဢသၢၵ်ႈသူၼၼ်ႉသူဢိၵ်ႇတင်းၸူဝ်ႈလုၵ်ႈပၢၼ်လၢၼ်သူတၵ်းလႆႈရူဝ်ႇသေႇၵူဝ်ယမ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူသေလႄႈပႂ်ႉၵမ်ပႂ်ႉၵျၢင်ႉပိင်းၺၢပ်ႈတြႃးမၼ်းၸဝ်ႈၵႃႈဢၼ်ၵဝ်သင်ႇလၢတ်ႈတီႈသူဝႆႉၼၼ်ႉၼင်ႇႁိုဝ်ဢသၢၵ်ႈသူတၵ်းယိုၼ်းယၢဝ်းၵႃႈၼႂ်းမိူင်းၼၼ်ႉဢေႃႈ။-
ၵူၼ်းမဵဝ်း ဢိသရေး၊ ၶဝ်႟။ ဢွၼ်ၵၼ်ထွမ်ႇဢဝ်လႄႈၵမ်ၵျၢင်ႉၸွမ်းပိင်းၺၢပ်ႈတြႃးတင်းလၢႆၼႆႉတႃႉ။ သူတၵ်းလႆႈလီလႆႈပဵၼ်၊တၵ်းတေလႆႈပဵၼ်ၵူၼ်းမဵဝ်းဢၼ်ႁႅင်းယႂ်ႇလႄႈလႆႈယူႇၵႃႈၼႂ်းမိူင်းဢၼ်မၢၵ်ႈမီးလီပဵၼ်လႄႈၽုၼ်ႇလီလိၼ်လီ ၼႃႇၼၼ်ႉၸွမ်းၵႃႈၼင်ႇဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇမွၼ်ႇသူမီးၵတိဝႆႉၼၼ်ႉဢေႃႈ။
“ၵူၼ်းမဵဝ်း ဢိသရေး၊ ၶဝ်႟။ ဢွၼ်ၵၼ်ထွမ်ႇငိၼ်းတႃႉ။ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းပဵၼ် ထႃႇဝရႃႉၽြႃး၊ သူႇလဵဝ်ၵူၺ်းဢေႃႈ။-
ထႃႇဝရႃႉၽြႃး၊ ၽြႃးပဵၼ်ၸဝ်ႈသူၸိုင်၊သူတၵ်းလႆႈပႃးတင်းၸႂ်သဵင်ႈသဵင်ႈ၊တင်းႁူဝ်ၸႂ်သဵင်ႈသဵင်ႈဢိၵ်ႇတင်းတၢင်းဢၼ်ၵတ်ႉဢၼ်ၶၼ်ၵႃႈမီးသေလႄႈႁၵ်ႉဢေႃႈ။-
ယႃႇပေလူင်လိုမ်းတြႃးဢၼ်ၵဝ်ပၼ်တီႈသူဝၼ်းမိူဝ်ႈၼႆႉၼၼ်ႉလႃးလႃး။-
ဢဝ်တြႃးၸိူဝ်းၼၼ်ႉသွၼ်ပၼ်တီႈလုၵ်ႈလၢင်းသူတႃႉ။ မိူဝ်ႈဢၼ်ၼင်ႈယူႇၵႃႈၼႂ်းႁိူၼ်းသေဢမ်ႇဝႃႈ၊ၵႂႃႇတႃႈပႆတၢင်းသေဢမ်ႇဝႃႈ၊လိုဝ်ႈႁိူဝ်ႉယူႇသေဢမ်ႇဝႃႈ၊ႁဵတ်းၵၢၼ်ယူႇသေဢမ်ႇဝႃႈ၊လၢတ်ႈလွင်ႈတြႃးၸိူဝ်းၼၼ်ႉယူႇတႃႉ။-
ဢဝ်တြႃးၸိူဝ်းၼၼ်ႉမတ်ႉၸပ်းၶႅၼ်မိုဝ်းသူ၊ဢိၵ်ႇတင်းတိုဝ်းဝႆႉၵႃႈတီႈၼႃႈၽၢၵ်ႇသူ ႁႂ်ႈပဵၼ်တၢင်းဢၼ်ပၼ်သတိသူယူႇသေႇသေႇတႃႉ။-
တႅမ်ႈတြႃးၸိူဝ်းၼၼ်ႉဝႆႉၵႃႈၼိူဝ်သဝ်ၽၵ်းတူႁိူၼ်းသူဢိၵ်ႇတင်းသဝ်ၽၵ်းတူဝဵင်းသူတႃႉ။
“မႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဝႆႉၵတိတီႈပူႇမွၼ်ႇသူ ဢႃႇပြႃႇႁၢမ်ႇ၊ဢိၸၢၵ်ႈ၊ယႃႇၵုပ်ႈ၊ ၼၼ်ႉမၼ်းၸဝ်ႈတၵ်းပၼ်မိူင်းဢၼ်မီးဝဵင်းဢၼ်ၶိုၼ်ႈယႂ်ႇမႂ်ႇသုင်ဢၼ်သူဢမ်ႇလႆႈတႄႇလႆႈႁဵတ်းတင်းလၢႆၼၼ်ႉတီႈသူဢေႃႈ။-
ႁိူၼ်းဢၼ်တဵမ်ဝႆႉတင်းၶိူင်ႈပိူင်ဢၼ်လီဢၼ်ငၢမ်းဢၼ်သူယင်းဢမ်ႇလႆႈဢဝ်သႂ်ႇဝႆႉသႂၢင်းဝႆႉ၊ၼမ်ႉမေႃႇဢၼ်သူဢမ်ႇလႆႈၶုတ်းလႆႈႁဵတ်း၊သူၼ်မၢၵ်ႇၸပိတ်ႉတင်းတူၼ်ႈမၢၵ်ႇသၢၼ်ႇလုၼ်ႇဢၼ်သူဢမ်ႇလႆႈၽုၵ်ႇလႆႈသွမ်ႈၸိူဝ်းၼၼ်ႉဢေႃႈ။ မိူဝ်ႈဢၼ် ထႃႇဝရႃႉၽြႃး၊ ဢဝ်သူသႂၢင်းၶဝ်ႈၵႃႈၼႂ်းမိူင်းၼၼ်ႉလႄႈ၊သူလႆႈၵိၼ်ဢိမ်ႇၵိၼ်တဵမ်။-
သူႁဵတ်းသတိလႄႈယႃႇပေလူင်လိုမ်း ထႃႇဝရႃႉၽြႃး၊ ဢၼ်ၵႄႇသႄႇဢဝ်သူဢွၵ်ႇသေမိူင်း ဢေးၵျိပ်ႉ၊ မိူင်းဢၼ်သူလႆႈၶၢမ်ႇႁဵတ်းၶႃႈပိူၼ်ႈမႃးၼၼ်ႉတႃႉ။-
ၵူဝ်ႁႄ ထႃႇဝရႃႉၽြႃး၊ ၽြႃးပဵၼ်ၸဝ်ႈသူၼၼ်ႉလႄႈဝႆႈသႃၵူဝ်းၵႂၢႆႇမၼ်းၸဝ်ႈသူႇလဵဝ်ပႃးလဵဝ်ၵူၺ်းတႃႉ။ တိူင်ႇၵၢဝ်ႇၵတိၼႂ်းၼႃႇမႃႉၸိုဝ်ႈသဵင်မၼ်းၸဝ်ႈၵူၺ်းတႃႉ။-
ယႃႇပေဝႆႈၽြႃးတၢင်ႇသူႇတၢင်ႇပႃးဢၼ်ၵူၼ်းမဵဝ်းဢၼ်ယူႇႁိမ်းႁွမ်းသူဝႆႈၸိူဝ်းၼၼ်ႉလႃးလႃး။-
ပေႃးသူဝႆႈၽြႃးတၢင်ႇသူႇတၢင်ႇပႃးၸိူဝ်းၼၼ်ႉၸိုင်၊ၵွပ်ႈပိူဝ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢၼ်မီးယူႇလူၺ်ႈၵၼ်တင်းသူၼၼ်ႉၶႅၼ်သူဝႆႉလႄႈၵူဝ်တၢင်းၸႂ်မႆႈၶႂ်ႈၸႃႉ ထႃႇဝရႃႉၽြႃး၊ တၵ်းတူၵ်းႁွတ်ႈၵႃႈၼိူဝ်သူမိူၼ်ၸိူဝ်ႉၼင်ႇၽႆးလႄႈပႄႇၽဵဝ်ႈသူပႅတ်ႈလုမ်းလုမ်းဢေႃႈ။
“သူယႃႇပေႁဵတ်းတၢင်းဢၼ်ၸၢမ်းတူၺ်း ထႃႇဝရႃႉၽြႃး၊ ၽြႃးပဵၼ်ၸဝ်ႈသူမိူၼ်ၸိူဝ်ႉၼင်ႇဢၼ်သူၸၢမ်းတူၺ်းမၼ်းၸဝ်ႈၵႃႈတီႈဝဵင်း မတ်ႉသႃႇ၊ ၼၼ်ႉ။-
သူတၵ်းလႆႈၶတ်းၸႂ်ပႂ်ႉၵမ်ၵျၢင်ႉၸွမ်းပိင်းၺၢပ်ႈတြႃးၵႃႈဢၼ်မၼ်းၸဝ်ႈပၼ်ဝႆႉတီႈသူၸိူဝ်းၼၼ်ႉၸေးၸေးဢေႃႈ။-
သူဢွၼ်ၵၼ်ႁဵတ်းၸွမ်းၵႃႈဢၼ် ထႃႇဝရႃႉၽြႃး၊ သင်ႇလၢတ်ႈဝႃႈပဵၼ်ဢၼ်သိုဝ်ႈဢၼ်တေႃႇဢၼ်လီဢၼ်ငၢမ်းၸိူဝ်းၼၼ်ႉတႃႉ။ သူတၵ်းလႆႈလီလႆႈပဵၼ်ဢေႃႈ။ သူတၵ်းလႆႈၶဝ်ႈၸၢမ်ႇၸႃးမိူင်းဢၼ်မျၢတ်ႈဢၼ်လီဢၼ် ထႃႇဝရႃႉၽြႃး၊ ဝႆႉၵတိတီႈပူႇမွၼ်ႇသူၼၼ်ႉသေလႄႈ၊-
သူတေလႆႈႁေႃႈရၢၼ်ႇသူႇသူတင်းလၢႆဢွၵ်ႇပႅတ်ႈၸွမ်းၼင်ႇဢၼ်မၼ်းၸဝ်ႈဝႆႉၵတိၼၼ်ႉဢေႃႈ။
“ဝၼ်းလိုၼ်းမိူဝ်းၼႃႈမႃးလုၵ်ႈလၢင်းသူတၵ်းတေထၢမ်သူလႄႈဝႃႈ၊ ‘ၵွပ်ႈပိူဝ်ႈလွင်ႈတၢင်းၸိူဝ်ႉၼင်ႇႁိုဝ်လႄႈ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းပိင်းၺၢပ်ႈဝႆႉႁႂ်ႈႁဝ်းၵမ်ၵျၢင်ႉၸွမ်းပိင်းၺၢပ်ႈတြႃးၸဝ်ႈၸေးၸေးၸိူဝ်ႉၼင်ႇၼႆ၊’ ဝႃႈၼင်ႇၼႆဢေႃႈ။-
သူတၵ်းလႆႈၶိုၼ်းလၢတ်ႈတီႈၶဝ်လႄႈဝႃႈ၊ ‘ႁဝ်းလႆႈပဵၼ်ၶႃႈၶုၼ်ႁေႃၶမ်းမိူင်း ဢေးၵျိပ်ႉ၊ လႄႈ ထႃႇဝရႃႉၽြႃး၊ ဢဝ်တင်းမုၼ်ၽုင်းတၼ်းၶူဝ်းဢၼ်ယႂ်ႇၼႃႇၼၼ်ႉၵႄႇသႄႇဢဝ်ႁဝ်းဢွၵ်ႇမႃးဢေႃႈ။-
ထႃႇဝရႃႉၽြႃး၊ ႁဵတ်းၼိမိၵ်ႈလၢၵ်ႈၶၼႃႇလွင်ႈတၢင်းဢၼ်လီဢၢမ်းဢၼ်ယႂ်ႇၼႃႇ၊ဢိၵ်ႇတင်းဢၼ်ႁၢဝ်ႈၵျၢမ်းၼႃႇၵႃႈၼိူဝ်ၵူၼ်းမိူင်း ဢေးၵျိပ်ႉ၊ ဢိၵ်ႇတင်းၵႃႈၼိူဝ်ၶုၼ်ႁေႃၶမ်းၶဝ်တင်းမူးမၢတ်ႈၽွင်းမိူင်းၶဝ်တင်းသဵင်ႈတင်းလူင်သိုဝ်ႈၼႃႈတႂ်ႈတႃႁဝ်းၼၼ်ႉဢေႃႈ။-
မၼ်းၸဝ်ႈပွႆႇႁႂ်ႈႁဝ်းလွတ်ႈဢွၵ်ႇသေမိူင်း ဢေးၵျိပ်ႉ၊ ႁႂ်ႈလႆႈဢွၼ်ႁဝ်းမႃးၵႃႈတီႈၼႆႈသေယဝ်ႉ၊ပၼ်လိၼ်ၼႆႉၵႃႈတီႈႁဝ်းၸွမ်းၵႃႈၼင်ႇဢၼ်မၼ်းၸဝ်ႈဝႆႉၵတိတီႈပူႇမွၼ်ႇႁဝ်းတင်းလၢႆဝႃႈ၊တၵ်းတေပၼ်ၶဝ်ၼၼ်ႉဢေႃႈ။-
ပိူဝ်ႈၼႆလႄႈ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းပိင်းၺၢပ်ႈဝႆႉႁႂ်ႈႁဝ်းပႂ်ႉၵမ်ၵျၢင်ႉၸွမ်းပိင်းၺၢပ်ႈတြႃးၸဝ်ႈၸေးၸေးၸွတ်ႇၸွတ်ႇလႄႈႁႂ်ႈႁဝ်းဢွၼ်ၵၼ်ၵူဝ်ယမ်မၼ်းၸဝ်ႈႁႂ်ႈပဵၼ်ဢၵျူဝ်းပုၼ်ႈႁဝ်းလႄႈႁႂ်ႈမၼ်းၸဝ်ႈပႂ်ႉလူပႂ်ႉတူၺ်းဢသၢၵ်ႈႁဝ်းမိူၼ်ၸိူဝ်ႉၼင်ႇဝၼ်းမိူဝ်ႈၼႆႉဢေႃႈ။-
ပေႃးႁဝ်းပႃးတင်းသဵတ်ႈၸႃႇလႄႈၵမ်ၵျၢင်ႉၸွမ်းၵႃႈဢၼ်ၽြႃးပဵၼ်ၸဝ်ႈပိင်းၺၢပ်ႈဝႆႉတီႈႁဝ်းၼၼ်ႉၸိုင်၊မၼ်းၸဝ်ႈတၵ်းမီးတၢင်းဢၼ်ထုၵ်ႇၸႂ်မႅၼ်ႈၸႂ်ႁဝ်းဢေႃႈ၊’ ဝႃႈၼင်ႇၼႆတႃႉ။
“ ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းတေဢွၼ်သူသူင်ႇၶဝ်ႈၵႃႈၼႂ်းမိူင်းဢၼ်သူတၵ်းၵႂႃႇလႄႈၶဝ်ႈၸၢမ်ႇၸႃးၼၼ်ႉဢေႃႈ။ မၼ်းၸဝ်ႈတၵ်းတေႁေႃႈဢွၵ်ႇပႅတ်ႈၵူၼ်းမဵဝ်းၼမ်ၼႃႇၸိူဝ်းဢၼ်ယဵင်ႈၶႅၼ်းႁႅင်းယႂ်ႇၼႃႇသေသူၸဵတ်းမဵဝ်းဢၼ်ပဵၼ်ၵူၼ်းမဵဝ်း ႁိတ်ႉတိ၊ ၵူၼ်းမဵဝ်း ၵိရၵႃႇသိ၊ ၵူၼ်းမဵဝ်း ဢႃႇမေႃးရိ၊ ၵူၼ်းမဵဝ်း ၶႃႇၼၼိ၊ ၵူၼ်းမဵဝ်း ၽေႇရၸိ၊ ၵူၼ်းမဵဝ်း ႁိဝိ၊ ဢိၵ်ႇတင်းၵူၼ်းမဵဝ်း ယေႇပုသိ၊ ဢေႃႈ။-
မိူဝ်ႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢဝ်ၵူၼ်းၸိူဝ်းၼၼ်ႉဢၢပ်ႈၼႂ်းမိုဝ်းသူၸိုင်၊သူတၵ်းလႆႈဢဝ်ၶဝ်တၢႆပႅတ်ႈမူတ်းမူတ်းဢေႃႈ။ ယႃႇပေႁဵတ်းမိၵ်ႈသႁႃႇယႃႉလူၺ်ႈၵၼ်တင်းၶဝ်လႃးလႃး။ ယႃႇပေမီးၸႂ်မႅတ်ႈတႃႇၵရုၼႃႇတေႃႇၶဝ်။-
ယႃႇပေတႄႇၼႃႈႁိူၼ်းလူၺ်ႈၵၼ်တင်းၶဝ်။ ယႃႇပေႁႂ်ႈလုၵ်ႈလၢင်းသူဢဝ်ၵၼ်တင်းလုၵ်ႈလၢင်းၶဝ်။-
ၵူဝ်ၶဝ်ဢွၼ်ဢဝ်လုၵ်ႈလၢင်းသူဝႄႈပိူင်ႈသေၵႃႈတီႈ ထႃႇဝရႃႉၽြႃး၊ လႄႈၵႂႃႇဝႆႈၽြႃးၶဝ်ဢေႃႈ။ ပေႃးပဵၼ်ၸိူဝ်ႉၼင်ႇၼၼ်မႃးၸိုင်၊ ထႃႇဝရႃႉၽြႃး၊ တၵ်းတေၸႂ်မႆႈၶႂ်ႈၸႃႉတေႃႇသူလႄႈယႃႉၽဵဝ်ႈသူပႅတ်ႈၵမ်းလဵဝ်ဢေႃႈ။-
ၵွပ်ႈပိူဝ်ႈၸိူဝ်ႉၼင်ႇၼႆလႄႈၵိူၼ်ႇယႃႉပႅတ်ႈၶဵင်ႇၽြႃးၶဝ်ႁႂ်ႈပဵၼ်ပွတ်းပဵၼ်တွၼ်ႈ၊ယႃႉပႅတ်ႈသဝ်မျၢတ်ႈဢၼ်ၶဝ်ၵူဝ်းၵႂၢႆႇ၊သဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ ၼၼ်ႉႁႂ်ႈလူမ်ႉပႅတ်ႈဢိၵ်ႇတင်းဢဝ်ၽႆးတုတ်ႇႁုၼ်ႇႁၢင်ႈသၢင်းထုၶဝ်ပႅတ်ႈတႃႉ။-
သူတၵ်းလႆႈႁဵတ်းၸိူဝ်ႉၼင်ႇၼႆၵွပ်ႈပိူဝ်ႈသူပဵၼ်ၵူၼ်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူပိူင်ႇဢေႃႈ။ ၼႂ်းၵူၼ်းလေႃးၵီႇၵႃႈမီးတင်းသဵင်ႈတင်းလူင်ၼႆႉ ထႃႇဝရႃႉၽြႃး၊ လိူၵ်ႈဢဝ်သူႁႂ်ႈသူလႆႈပဵၼ်ၵူၼ်းမဵဝ်းဢၼ်မၼ်းၸဝ်ႈဝႆႉပဵၼ်ၵူၼ်းဢၼ်လီသေပိူၼ်ႈပုၼ်ႈမၼ်းၸဝ်ႈဢေႃႈ။
“ၵွပ်ႈပိူဝ်ႈသူယဵင်ႈၶႅၼ်းၼမ်ၵိုၼ်းၼႃႇသေၵူၼ်းမဵဝ်းတၢင်ႇၸိူဝ်ႉတၢင်ႇမဵဝ်းလႄႈ ထႃႇဝရႃႉၽြႃး၊ ႁၵ်ႉပႅင်းသူလႄႈလိူၵ်ႈဢဝ်သူဢမ်ႇၸႂ်ႈ။ သူပဵၼ်ၵူၼ်းမဵဝ်းဢၼ်ယဵင်ႈၶႅၼ်းၵေႇသေပိူၼ်ႈၵႃႈၼႂ်းၵူၼ်းမဵဝ်းတင်းသဵင်ႈတင်းလူင်ၼႆႉဢေႃႈ။-
ၵွပ်ႈပိူဝ်ႈ ထႃႇဝရႃႉၽြႃး၊ ႁၵ်ႉသူ၊ဢိၵ်ႇတင်းၵွပ်ႈပိူဝ်ႈမၼ်းၸဝ်ႈၶႂ်ႈႁႂ်ႈသဵတ်ႈၸႃႇၵတိၸဝ်ႈဢၼ်လႆႈႁဵတ်းဝႆႉၵႃႈတီႈပူႇမွၼ်ႇသူၼၼ်ႉတႄႇပဵၼ်လႄႈမၼ်းၸဝ်ႈၸင်ႇဢဝ်တင်းတၼ်းၶူဝ်းဢၼ်ယႂ်ႇၼႃႇၼၼ်ႉထုတ်ႇၼုၵ်ႈဢဝ်သူဢွၵ်ႇသေတၢင်းဢၼ်ပဵၼ်ၶႃႈတီႈၶုၼ်ႁေႃၶမ်းမိူင်း ဢေးၵျိပ်ႉ၊ ၼၼ်ႉဢေႃႈ။-
ပိူဝ်ႈၼႆလႄႈႁုမၢတ်ႈလွင်ႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူပဵၼ်ၽြႃးသူႇလဵဝ်တူၼ်လဵဝ်လႄႈပဵၼ်ၽြႃးဢၼ်ပႂ်ႉသဵတ်ႈၸႃႇဢေႃႈ။ မၼ်းၸဝ်ႈပႂ်ႉပတိၺိၺ်ႇမၼ်းၸဝ်ႈ ဢိၵ်ႇတင်းၼႄပျႃးတၢင်းႁၵ်ႉၸဝ်ႈတီႈၶဝ်ၸိူဝ်းဢၼ်ႁၵ်ႉမၼ်းၸဝ်ႈလႄႈပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၸဝ်ႈယူႇသိုပ်ႇသိုပ်ႇတၢမ်တၢမ်တေႃႇထိုင်ႁွတ်ႈႁဵင်သိုပ်ႇမိုၼ်ႇသိုပ်ႇဢေႃႈ။-
ၵူၺ်းၵႃႈ၊မၼ်းၸဝ်ႈဢမ်ႇထိူင်းဢမ်ႇၼၢၼ်းတၵ်းတႅၼ်းပၼ်ဢပျတ်ႈတၢမ်ႇတီႈၶဝ်ၸိူဝ်းဢၼ်ၸင်းမၼ်းၸဝ်ႈၼၼ်ႉဢေႃႈ။-
ပိူဝ်ႈၼႆလႄႈတေႃႈလဵဝ်ၼႆႉထွမ်ႇဢဝ်ၵႂၢမ်းၵႃႈဢၼ်ၵဝ်သင်ႇသွၼ်ပၼ်တီႈသူၼၼ်ႉသေလႄႈပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၵႃႈဢၼ်ၵဝ်ပၼ်သူဝၼ်းမိူဝ်ႈၼႆႉၸိူဝ်းၼၼ်ႉတႃႉ။
“ပေႃးသူထွမ်ႇဢဝ်ပိင်းၺၢပ်ႈတြႃးၸိူဝ်းၼႆႉလႄႈပႃးသဵတ်ႈၸႃႇပႂ်ႉၵမ်ပႂ်ႉၸွမ်းၸိုင်၊ ထႃႇဝရႃႉၽြႃး၊ ၽြႃးပဵၼ်ၸဝ်ႈသူၼၼ်ႉတၵ်းႁႂ်ႈပတိၺိၺ်ႇၸဝ်ႈ၊ဢိၵ်ႇတင်းၵရုၼႃႇၸဝ်ႈဢၼ်မၼ်းၸဝ်ႈတိူင်ႇၵၢဝ်ႇဝႆႉၵတိတီႈပူႇမွၼ်ႇသူၸိူဝ်းၼၼ်ႉတႄႇမၼ်ႈၵႃႈတီႈသူဢေႃႈ။-
မၼ်းၸဝ်ႈတၵ်းႁၵ်ႉသူလႄႈပၼ်တၢင်းလီတီႈသူႁႂ်ႈသူယႂ်ႇၽႄႈၼမ်ၵိုၼ်းမႃးလႄႈပၼ်တၢင်းလီတီႈလုၵ်ႈလၢၼ်သူ၊တီႈႁႆႈၼႃးသူႁႂ်ႈသူလႆႈၶဝ်ႈပိူၵ်ႇၶဝ်ႈသၢၼ်၊လႆႈၼမ်ႉမၢၵ်ႇၸပိတ်ႉ၊လႆႈၼမ်ႉမၼ်းမၢၵ်ႇသၢၼ်ႇလုၼ်ႇ၊ဢိၵ်ႇတင်းမၼ်းၸဝ်ႈတၵ်းပၼ်တၢင်းလီတီႈတူဝ်ဝူဝ်း၊ဢိၵ်ႇတင်းၽုင်သူဝ်းသူတင်းလၢႆဢေႃႈ။ မၼ်းၸဝ်ႈတၵ်းပၼ်တၢင်းလီမၢင်ႇၵလႃႇၸိူဝ်းၼႆႉၵႃႈၼႂ်းမိူင်းဢၼ်မၼ်းၸဝ်ႈဝႆႉၵတိတႃႇတေပၼ်တီႈပူႇမွၼ်ႇသူ၊မိူင်းဢၼ်သူတေလႆႈၶဝ်ႈၵႂႃႇၸၢမ်ႇၸႃးၼၼ်ႉဢေႃႈ။-
ၼႂ်းၵူၼ်းလေႃးၵႃႉၵႃႈမီးတင်းသဵင်ႈတင်းလူင်ၼႆႉဢၼ်တေလႆႈၶၢမ်ႇဢဝ်တၢင်းလီလႄႈမၢၵ်ႈမီးလီပဵၼ်မိူၼ်သူၸိုင်၊ဢမ်ႇမီးသေမဵဝ်း။ ၸႃႉၸဵမ်သူလႄႈတူဝ်တရိၵ်ႈသၢၼ်ႇသူတေဢမ်ႇပဵၼ်မၼ်လႃးလႃး။-
ထႃႇဝရႃႉၽြႃး၊ တေၵႅတ်ႇၶႄႁႄႉၵင်ႈၽေးတၢင်းၶႆႈတၢင်းပဵၼ်ၵူႈၸိူဝ်ႉၵူႈပိူင်တီႈသူဢေႃႈ။ မၼ်းၸဝ်ႈတၵ်းဢမ်ႇႁႂ်ႈၽေးတၢင်းၶႆႈတၢင်းပဵၼ်ဢၼ်ႁၢႆႉႁႅင်းဢၼ်သူယၢမ်ႈလႆႈႁၼ်တီႈမိူင်း ဢေးၵျိပ်ႉ၊ ၼၼ်ႉတူၵ်းႁွတ်ႈတူၵ်းထိုင်ၵႃႈၼိူဝ်သူလႃးလႃး။ ၽေးတၢင်းၶႆႈတၢင်းပဵၼ်ၸိူဝ်းၼၼ်ႉၸိုင်၊မၼ်းၸဝ်ႈတေႁႂ်ႈတူၵ်းႁွတ်ႈၵႃႈၼိူဝ်ရၢၼ်ႇသူႇသူတင်းလၢႆဢေႃႈ။-
သူတၵ်းလႆႈယႃႉၽဵဝ်ႈပႅတ်ႈၵူၼ်းမဵဝ်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢၢပ်ႈပၼ်ၼႂ်းမိုဝ်းသူၼၼ်ႉတင်းသဵင်ႈတင်းလူင်ဢေႃႈ။ သူတၵ်းဢမ်ႇလႆႈဢဵတ်းလူၶဝ်။ ဢမ်ႇလႆႈဝႆႈၽြႃးၶဝ်။ လွင်ႈမၼ်းၸမ်ႉ၊လွင်ႈတၢင်းၼၼ်ႉၸၢင်ႈပဵၼ်တူင်ႇႁႅဝ်ႉတူင်ႇၶိုမ်းတီႈသူဢေႃႈ။
“သူယႃႇပေထၢင်ႇၼႂ်းၸႂ်ဝႃႈ၊ၵူၼ်းၸိူဝ်းၼၼ်ႉယဵင်ႈၶႅၼ်းၼမ်ၵိုၼ်းၼႃႇသေသူလႄႈသူဢမ်ႇၸၢင်ႈႁေႃႈၶဝ်ဢွၵ်ႇပႅတ်ႈလႆႈၼၼ်ႉ။-
ယႃႇပေၵူဝ်ႁႄၶဝ်။ ၶုၵ်းၸႂ်လႆႈလွင်ႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူႁဵတ်းတီႈၶုၼ်ႁေႃၶမ်းမိူင်း ဢေးၵျိပ်ႉ၊ တင်းၵူၼ်းမိူင်းမၼ်းၸိူဝ်ႉၼင်ႇႁိုဝ်ၼၼ်ႉတႃႉ။-
ၶုၵ်းၸႂ်လႆႈၽေးဢုပၢတ်ႈဢၼ်ယႂ်ႇၼႃႇဢၼ်မၢၵ်ႇတႃသူလႆႈႁၼ်ၸိူဝ်းၼၼ်ႉဢိၵ်ႇတင်းၼိမိၵ်ႈလၢၵ်ႈၶၼႃႇ၊လွင်ႈတၢင်းဢၼ်လီဢၢမ်း၊ဢိၵ်ႇတင်းမုၼ်ၽုင်းလႄႈႁႅင်းတၼ်းၶူဝ်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူပွႆႇႁႂ်ႈသူလွတ်ႈမႃးၼၼ်ႉတႃႉ။ ၸိူဝ်ႉၼင်ႇဢၼ်မၼ်းၸဝ်ႈယႃႉၽဵဝ်ႈၵူၼ်းမဵဝ်း ဢေးၵျိပ်ႉ၊ ပႅတ်ႈၼၼ်ႉမၼ်းၸဝ်ႈတၵ်းယႃႉၽဵဝ်ႈပႅတ်ႈၵူၼ်းတင်းလၢႆၸိူဝ်းဢၼ်သူလီၵူဝ်လီႁႄၼၼ်ႉၼင်ႇၵဝ်ႇဢေႃႈ။-
လိူဝ်သေၼၼ်ႉဢမ်ႇၵႃး၊ ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းပွႆႇၸႂ်ႉတေႃႇၸႂ်ႉတႅၼ်ၵႂႃႇၵႃႈတီႈၶဝ်သေလႄႈယႃႉပႅတ်ႈၶဝ်ၸိူဝ်းဢၼ်ပၢႆႈလွတ်ႈၵႂႃႇလႄႈပၢႆႈတဵတ်ႇပၢႆႈမႅပ်းယူႇၸိူဝ်းၼၼ်ႉဢေႃႈ။-
ပိူဝ်ႈၼႆလႄႈသူဢမ်ႇလႆႈၵူဝ်လႆႈႁႄၵူၼ်းၸိူဝ်းၼၼ်ႉ။ ထႃႇဝရႃႉၽြႃး၊ ၽြႃးပဵၼ်ၸဝ်ႈသူမီးယူႇလူၺ်ႈၵၼ်တင်းသူဢေႃႈ။ မၼ်းၸဝ်ႈပဵၼ်ၽြႃးပဵၼ်ၸဝ်ႈဢၼ်တၼ်းၶူဝ်းယႂ်ႇၼႃႇလႄႈထိူၵ်ႈလီၵူဝ်ယမ်ဢေႃႈ။-
မၼ်းၸဝ်ႈတၵ်းႁေႃႈပႅတ်ႈၵူၼ်းမဵဝ်းဢၼ်သူယဵပ်ႇၶဝ်ႈၵႂႃႇၵႃႈၼႂ်းမိူင်းၶဝ်ၸိူဝ်းၼၼ်ႉယေႈပွၵ်ႈယေႈဢိတ်းဢေႃႈ။ သူဢမ်ႇလႆႈပႄႇၽဵဝ်ႈၶဝ်ပႅတ်ႈၵမ်းလဵဝ်။ လွင်ႈမၼ်းၸမ်ႉ၊ပေႃးသူႁဵတ်းၸိူဝ်ႉၼင်ႇၼၼ်ၸိုင်၊ၵူဝ်တူဝ်ထိူၼ်ႇႁၢႆႉတၵ်းယႂ်ႇၽႄႈၼမ်ၵိုၼ်းမႃးလႄႈပဵၼ်ၽေးတီႈသူဢေႃႈ။-
ထႃႇဝရႃႉၽြႃး၊ တၵ်းဢဝ်ရၢၼ်ႇသူႇသူတင်းလၢႆဢၢပ်ႈပၼ်ၵႃႈၼႂ်းမိုဝ်းသူသေလႄႈတၵ်းဢဝ်ၽေးတၢင်းဢၼ်တူၵ်းၸႂ်လႂ်တိုၼ်ႇတူၵ်းႁွတ်ႈၵႃႈၼိူဝ်ၶဝ်တေႃႇထိုင်ႁွတ်ႈၶဝ်လုလႅဝ်ၵႂႃႇလုမ်းလုမ်းဢေႃႈ။-
မၼ်းၸဝ်ႈတၵ်းဢဝ်ၶုၼ်ႁေႃၶမ်းၶဝ်တင်းလၢႆ ဢၢပ်ႈပၼ်ၵႃႈၼႂ်းမိုဝ်းသူဢေႃႈ။ သူတၵ်းဢဝ်ၶဝ်တၢႆပႅတ်ႈလႄႈပိူၼ်ႈတၵ်းလိုမ်းၶဝ်ပႅတ်ႈဢေႃႈ။ ၽူႈလႂ်ၵေႃႈတၵ်းဢမ်ႇႁႄႉဢမ်ႇႁၢမ်ႈသူလႆႈလႃးလႃး။ သူတၵ်းယႃႉၽဵဝ်ႈပႅတ်ႈၵူႈၵေႃႉၵူႈၵူၼ်းဢေႃႈ။-
ဢဝ်ႁုၼ်ႇႁၢင်ႈသၢင်းထုၶဝ်တင်းလၢႆတုတ်ႇၽႆးပႅတ်ႈတႃႉ။ သူဢမ်ႇလႆႈမီးၸႂ်ဢၼ်ၸပ်းၸွႆးၶႂ်ႈလႆႈငိုၼ်းၶမ်းဢၼ်ဢုမ်ႇႁေႃႇႁုၼ်ႇႁၢင်ႈသၢင်းထုၸိူဝ်းၼၼ်ႉ။ ဢမ်ႇလႆႈသိမ်းဢဝ်ပုၼ်ႈတူဝ်ၸဝ်ႈၵဝ်ႇ။ ပေႃးသူႁဵတ်းၸိူဝ်ႉၼင်ႇၼၼ်ၸိုင်၊ၵူဝ်သူၶမ်တူင်ႇႁႅဝ်ႉတူင်ႇၶိုမ်းၼၼ်ႉဢေႃႈ။ လွင်ႈၸိူဝ်းၼၼ်ႉပဵၼ်လွင်ႈဢၼ် ထႃႇဝရႃႉၽြႃး၊ လီႁင်ႈဢဵတ်ႇသဵတ်ႇဢေႃႈ။-
သူဢမ်ႇလႆႈဢဝ်ႁုၼ်ႇႁၢင်ႈသၢင်းထုသေၸိူဝ်ႉသေမဵဝ်းၶဝ်ႈၵႃႈၼႂ်းႁိူၼ်းသူ။ ပေႃးသူဢဝ်ၶဝ်ႈၸိုင်၊တၢင်းဢၼ်ၵိၼ်ႇဢၼ်ဝႃႈၼၼ်ႉတၵ်းတူၵ်းႁွတ်ႈၵႃႈၼိူဝ်သူမိူၼ်ၸိူဝ်ႉၼင်ႇဢၼ်တူၵ်းႁွတ်ႈၵႃႈၼိူဝ်ႁုၼ်ႇႁၢင်ႈသၢင်းထုၸိူဝ်းၼၼ်ႉဢေႃႈ။ သူတၵ်းလႆႈလီႁင်ႈဢဵတ်ႇသဵတ်ႇႁုၼ်ႇႁၢင်ႈသၢင်းထုၸိူဝ်းၼၼ်ႉ၊မူတ်းမူတ်းသဵင်ႈသဵင်ႈဢေႃႈ။ လွင်ႈမၼ်းၸမ်ႉ၊ ထႃႇဝရႃႉၽြႃး၊ ၵိၼ်ႇဝႃႈမၼ်းဝႆႉဢေႃႈ။
“လွင်ႈၼင်ႇႁိုဝ်ဢသၢၵ်ႈသူတၵ်းလိပ်းလႄႈတၵ်းယႂ်ႇၽႄႈၼမ်ၵိုၼ်းမႃးဢိၵ်ႇတင်းတေလႆႈၶဝ်ႈၸၢမ်ႇၸႃးမိူင်းဢၼ် ထႃႇဝရႃႉၽြႃး၊ ဝႆႉၵတိတႃႇတေပၼ်တီႈပူႇမွၼ်ႇသူၸိူဝ်းၼၼ်ႉၼၼ်ႉၸိုင်၊သူတၵ်းလႆႈပႃးတင်းသဵတ်ႈၸႃႇလႄႈပႂ်ႉၵမ်ၵျၢင်ႉၸွမ်းပိင်းၺၢပ်ႈတြႃးၵႃႈဢၼ်ၵဝ်ပၼ်တီႈသူဝၼ်းမိူဝ်ႈၼႆႉၼၼ်ႉဢေႃႈ။-
ၶုၵ်းၸႂ်လႆႈလွင်ႈတၢင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢွၼ်သူသူင်ႇၵႂႃႇၵႃႈၼႂ်းၶၢဝ်းတၢင်းယၢဝ်းဢၼ်ၽႃႇလတ်းၵႂႃႇၵႃႈၼႂ်းထိူၼ်ႇလႅင်ႉသီႇသိပ်းပီဢၼ်ပူၼ်ႉမႃးယဝ်ႉၼၼ်ႉ၊မၼ်းၸဝ်ႈဢဝ်တုၵ်ႉၶႃႉတၢင်းယၢပ်ႇၽိုတ်ႇၼမ်ၼႃႇၸၢမ်းတူၺ်းႁူဝ်ၸႂ်သူႁႂ်ႈလႆႈႁုလွင်ႈဢၼ်ဝႃႈ၊သူမီးၸႂ်ဢၼ်ၶႂ်ႈပႂ်ႉၵမ်ၵျၢင်ႉၸွမ်းပိင်းၺၢပ်ႈမၼ်းၸဝ်ႈတင်းလၢႆႁိုဝ်း၊ဢမ်ႇမီးႁိုဝ်းၼၼ်ႉဢေႃႈ။-
မၼ်းၸဝ်ႈႁႂ်ႈသူလႆႈဢိုပ်းလႆႈယၢၵ်ႈယဝ်ႉယဝ်ႉၸင်ႇ၊ဢဝ်ၶဝ်ႈမုၼ်းမၼ်ႇၼႃႉဢၼ်သူဢမ်ႇႁု၊ဢၼ်ပူႇမွၼ်ႇသူဢမ်ႇတွၼ်ႉႁုၼၼ်ႉလဵင်ႉလူသူႁႂ်ႈသူလႆႈႁုလွင်ႈဢၼ်ၵူၼ်းၸိုင်၊တၵ်းလႆႈဢဝ်ၶဝ်ႈမုၼ်းၵူၺ်းလဵင်ႉၸႂ်ဢမ်ႇၸႂ်ႈ။ တၵ်းလႆႈဢဝ်တင်းၵႃႈဢၼ် ထႃႇဝရႃႉၽြႃး၊ လၢတ်ႈဝႆႉၸိူဝ်းၼၼ်ႉလဵင်ႉၸႂ်ဢေႃႈ။-
ၼႂ်းၸူဝ်ႈသီႇသိပ်းပီၼႆႉသိူဝ်ႈၶူဝ်းသူဢမ်ႇၵဝ်ႇဢမ်ႇမွင်၊တိၼ်သူၵေႃႈဢမ်ႇၵႂ်ႈဢမ်ႇပွင်း။-
သူတၵ်းလႆႈႁုၼႂ်းၸႂ်ဝႆႉဝႃႈ၊လွင်ႈတၢင်းဢၼ်ၽြႃးပဵၼ်ၸဝ်ႈမႄးပၼ်တၢင်းၵျၢမ်ႇတၢင်းပွင်သူဢိၵ်ႇတင်းပၼ်တၢမ်ႇတီႈသူၼၼ်ႉပဵၼ်မိူၼ်ၸိူဝ်ႉၼင်ႇပေႃႈသင်ႇသွၼ်သုင်းမႃႉလုၵ်ႈလၢင်းမၼ်းၼၼ်ႉဢေႃႈ။-
ၵွပ်ႈပိူဝ်ႈလွင်ႈတၢင်းၼႆႉလႄႈပႂ်ႉၵမ်ၵျၢင်ႉၸွမ်းၵႃႈၼင်ႇဢၼ် ထႃႇဝရႃႉၽြႃး၊ ပိင်းၺၢပ်ႈတီႈသူဝႆႉၼၼ်ႉတႃႉ။ ၵမ်ၵျၢင်ႉပိင်းၺၢပ်ႈတြႃးမၼ်းၸဝ်ႈတင်းလၢႆလႄႈၵူဝ်ယမ်မၼ်းၸဝ်ႈယူႇတႃႉ။-
ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းဢဝ်သူသူင်ႇႁႂ်ႈသူလႆႈၶဝ်ႈၵႃႈၼႂ်းမိူင်းဢၼ်ၽုၼ်ႇၼမ်ႉမၼ်းလိၼ်လီ၊မိူင်းဢၼ်မီးၼမ်ႉႁွင်ႈၼမ်ႉၵႄး၊မီးၼမ်ႉဢွၵ်ႇႁူးလႆယူႇၸွမ်းႁူဝ်ႁူၺ်ႈႁၢဝ်းလွႆ၊-
မိူင်းဢၼ်မီးၶဝ်ႈၵျုင်ႇ၊ၶဝ်ႈမုယေႃး၊တူၼ်ႈမၢၵ်ႇၸပိတ်ႉ၊တူၼ်ႈမၢၵ်ႇလိူဝ်ႇ၊တူၼ်ႈမၢၵ်ႇၸင်ႈ၊မီးတူၼ်ႈမၢၵ်ႇသၢၼ်ႇလုၼ်ႇတင်းၼမ်ႉၽိုင်ႈလိူင်ႇၼမ်ၼႃႇၼၼ်ႉဢေႃႈ။-
ၵႃႈၼႂ်းမိူင်းၼၼ်ႉသူယင်းဢမ်ႇလူဝ်ႇၵႃႈသင်ထႅင်ႈလႃးလႃးလႄႈလႆႈၵိၼ်ဢိမ်ႇၵိၼ်တဵမ်ဢေႃႈ။ ၵႃႈၼႂ်းမၢၵ်ႇႁိၼ်တၵ်းမီးလဵၵ်းလႄႈသူတၵ်းတေလႆႈၶုတ်းဢဝ်တွင်းလႅင်ၵႃႈၼႂ်းလွႆမိူင်းၼၼ်ႉဢေႃႈ။-
သူတၵ်းလႆႈၵိၼ်ဢိမ်ႇၵိၼ်တဵမ်လႄႈယွင်ႈယေႃးတၢင်ႇၵျေးၸူး ထႃႇဝရႃႉၽြႃး၊ ၽြႃးပဵၼ်ၸဝ်ႈသူယူႇၵွပ်ႈပိူဝ်ႈမိူင်းဢၼ်ၽုၼ်ႇၼမ်ႉမၼ်းလိၼ်လီဢၼ်မၼ်းၸဝ်ႈဢဵတ်းလူပၼ်တီႈသူၼၼ်ႉဢေႃႈ။
“ႁဵတ်းသတိလႄႈၼင်ႇႁိုဝ်သူတၵ်းဢမ်ႇလူင်လိုမ်း ထႃႇဝရႃႉၽြႃး၊ ၽြႃးပဵၼ်ၸဝ်ႈသူၼၼ်ႉတႃႉ။ ယႃႇပေဝႄႈပႅတ်ႈတၢင်းဢၼ်ပႂ်ႉၵမ်ၵျၢင်ႉၸွမ်းပိင်းၺၢပ်ႈတြႃးၸိူဝ်းဢၼ်ၵဝ်ပၼ်သူဝၼ်းမိူဝ်ႈၼႆႉၼၼ်ႉတႃႉ။-
ၼႂ်းမိူဝ်ႈဢၼ်သူလႆႈၵိၼ်ဢိမ်ႇၵိၼ်တဵမ်လႄႈလႆႈႁဵတ်းႁိူၼ်းႁဵတ်းယေးဢၼ်လီဢၼ်ငၢမ်းယဝ်ႉၼၼ်ႉ၊-
ဢိၵ်ႇတင်းၼႂ်းမိူဝ်ႈဢၼ်ၽုင်ဝူဝ်းၽုင်သူဝ်းသူ၊ငိုၼ်းၶမ်းသူ၊ဢုၵ်ႉၸႃႇၶူဝ်းလဵင်းသူမၢၵ်ႈမီးၼမ်ၵိုၼ်းမႃးၼၼ်ႉၸိုင်၊-
ႁဵတ်းသတိတႃႉ။ ၼင်ႇႁိုဝ်ႁူဝ်ၸႂ်သူတၵ်းဢမ်ႇၽႅၼ်သုင်လႄႈလူင်လိုမ်းပႅတ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢၼ်ၵႄႇသႄႇဢဝ်သူဢွၵ်ႇသေမိူင်း ဢေးၵျိပ်ႉ၊ တီႈဢၼ်သူလႆႈၶၢမ်ႇႁဵတ်းၶႃႈပိူၼ်ႈမႃးၼၼ်ႉတႃႉ။-
မၼ်းၸဝ်ႈဢွၼ်ဢဝ်သူၽႃႇလတ်းထိူၼ်ႇလႅင်ႉလူင်ဢၼ်လီငႅဝ်ၼႃႇ၊တီႈဢၼ်မီးငူးၽႆးဢိၵ်ႇတင်းမႅင်းငေႃးဢၼ်ၵွင်ႉမၼ်းႁႅင်းၼႃႇၼၼ်ႉ၊ပဵၼ်လိၼ်ႁႅင်ႈယင်းဢမ်ႇမီးၼမ်ႉမီးၼၢႆးလႄႈမၼ်းၸဝ်ႈႁႂ်ႈၼမ်ႉလႆဢွၵ်ႇမႃးတီႈၽႃႁိၼ်လူင်ပုၼ်ႈသူဢေႃႈ။-
ၵႃႈၼႂ်းထိူၼ်ႇလႅင်ႉၼၼ်ႉမၼ်းၸဝ်ႈဢဝ်ၶဝ်ႈမုၼ်းမၼ်ႇၼႃႉ၊တၢင်းၵိၼ်ဢၼ်ပူႇမွၼ်ႇသူဢမ်ႇတွၼ်ႉလႆႈၵိၼ်ၼၼ်ႉလဵင်ႉလူသူမႃးယဝ်ႉဢေႃႈ။ မၼ်းၸဝ်ႈဢဝ်တုၵ်ႉၶႃႉတၢင်းဢၼ်ယၢပ်ႇၽိုတ်ႇၼႃႇၸၢမ်းတူၺ်းႁူဝ်ၸႂ်သူႁႂ်ႈသူမီးႁူဝ်ၸႂ်ၶျႃးတႅမ်ႇၼင်ႇႁိုဝ်မၼ်းၸဝ်ႈတၵ်းဢဝ်တၢင်းဢၼ်လီပၼ်တီႈသူမိူဝ်ႈၶဵင်ႇဢၼ်ႁွတ်ႈထိုင်တီႈသုတ်းၼၼ်ႉဢေႃႈ။-
ၵွပ်ႈပိူဝ်ႈလွင်ႈတၢင်းၼႆႉလႄႈ၊သူဢမ်ႇလႆႈထၢင်ႇၼႂ်းၸႂ်ဝႃႈသူလႆႈလီလႆႈပဵၼ်ၼၼ်ႉပဵၼ်ၵွပ်ႈပိူဝ်ႈတၢင်းၵတ်ႉတၢင်းၶၼ်တူဝ်ၸဝ်ႈၵဝ်ႇလႃးလႃး။-
ၶုၵ်းၸႂ်လႆႈဝႃႈ၊ၵွပ်ႈပိူဝ်ႈတၼ်းၶူဝ်း ထႃႇဝရႃႉၽြႃး၊ ၽြႃးပဵၼ်ၸဝ်ႈသူလႄႈသူလႆႈမၢၵ်ႈမီးလီပဵၼ်ၼၼ်ႉတႃႉ။ မၼ်းၸဝ်ႈႁဵတ်းၸိူဝ်ႉၼင်ႇၼႆၵွပ်ႈပိူဝ်ႈမၼ်းၸဝ်ႈပႂ်ႉသဵတ်ႈၸႃႇၵႃႈၼိူဝ်ပတိၺိၺ်ႇဢၼ်လႆႈႁဵတ်းဝႆႉတီႈပူႇမွၼ်ႇသူၼၼ်ႉတေႃႇႁွတ်ႈဝၼ်းမိူဝ်ႈၼႆႉၼၼ်ႉဢေႃႈ။-
ယႃႇပေလူင်လိုမ်း ထႃႇဝရႃႉၽြႃး၊ ၽြႃးပဵၼ်ၸဝ်ႈသူၼၼ်ႉလႃးလႃး။ ယႃႇပေၸွမ်းလင်ၽြႃးတၢင်ႇသူႇတၢင်ႇပႃးလႄႈႁဵတ်းဝၢတ်ႈဝႆႈသႃၶဝ်။ ပေႃးသူႁဵတ်းၸိူဝ်ႉၼင်ႇၼႆၸိုင်၊ဝၼ်းမိူဝ်ႈၼႆႉၵဝ်ပၼ်သတိတီႈသူၸမ်ႉ၊သူတၵ်းလႆႈၶၢမ်ႇတၢင်းဢၼ်ယႃႉလုလႅဝ်ဢမၢၼ်ႇၶၼ်ပဵၼ်ဢေႃႈ။-
ပေႃးသူယင်းဢမ်ႇထွမ်ႇဢမ်ႇဢဝ်ၵႂၢမ်း ထႃႇဝရႃႉၽြႃး၊ ၸိုင်၊မၼ်းၸဝ်ႈတၵ်းယႃႉၽဵဝ်ႈသူပႅတ်ႈမိူၼ်ၸိူဝ်ႉၼင်ႇၵူၼ်းတၢင်ႇၸိူဝ်ႉတၢင်ႇမဵဝ်းၸိူဝ်းဢၼ်မၼ်းၸဝ်ႈတၵ်းယႃႉၽဵဝ်ႈပႅတ်ႈၵႃႈတီႈၽၢႆႇၼႃႈသူ၊မိူဝ်ႈဢၼ်သူၶဝ်ႈၵႂႃႇၵႃႈၼႂ်းမိူင်းၶဝ်ၼၼ်ႉဢေႃႈ။
“ၵူၼ်းမဵဝ်း ဢိသရေး၊ ၶဝ်႟။ ထွမ်ႇငိၼ်းတႃႉ။ ဝၼ်းမိူဝ်ႈၼႆႉသူၸမ်တၵ်းလႆႈၶၢမ်ႈၼမ်ႉ ယေႃးတၢၼ်ႇ၊ ၵႂႃႇ ႁႂ်ႈလႆႈသိမ်းဢဝ်မိူင်းၵူၼ်းမဵဝ်းဢၼ်ယဵင်ႈၶႅၼ်းႁႅင်းယႂ်ႇၼႃႇသေသူလႄႈၵူၼ်းၼမ်ၼႃႇသေသူၼၼ်ႉယဝ်ႉ။ ဝဵင်းလူင်ၶဝ်တင်းလၢႆၼၼ်ႉယႂ်ႇၼႃႇလႄႈလမ်းဝဵင်းၶဝ်သုင်ပဵင်းၽႃႉပဵင်းမွၵ်ႇဢေႃႈ။-
ၵူၼ်းမဵဝ်းၶဝ်ၼၼ်ႉၵေႃႈသုင်ၼႃႇ၊ႁႅင်းယႂ်ႇလႄႈဢၼ်ပဵၼ်ၵူၼ်းမဵဝ်း ဢႃႇၼၵႃႉ၊ ဢၼ်သူယၢမ်ႈငိၼ်းဝႃႈ၊ၽူႈလႂ်ဢမ်ႇၸုၵ်းၶၢမ်ႇၽၢႆႇၼႃႈၶဝ်လႆႈၼၼ်ႉယဝ်ႉ။-
ၵမ်းၼႆႉတူဝ်သူတေလႆႈႁၼ်တႂ်ႈတႃသူလွင်ႈတၢင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းၵႂႃႇဢွၼ်တၢင်းသူမိူၼ်ၸိူဝ်ႉၼင်ႇၽႆးဢၼ်မႆႈယူႇၼၼ်ႉဢေႃႈ။ မိူဝ်ႈဢၼ်သူၶဝ်ႈမိူင်းၶဝ်ၵႂႃႇၼၼ်ႉမၼ်းၸဝ်ႈတၵ်းတိုၵ်းတေႃးယႃႉပႅတ်ႈၶဝ်၊ပုၼ်ႈလွင်ႈၼင်ႇႁိုဝ်သူတေႁေႃႈၶဝ်ဢွၵ်ႇလႄႈယႃႉၽဵဝ်ႈၶဝ်ပႅတ်ႈၶၼ်ၶၼ်ၽႂ်းၽႂ်းၸွမ်းၵႃႈၼင်ႇဢၼ်မၼ်းၸဝ်ႈဝႆႉၵတိၼၼ်ႉဢေႃႈ။
“လိုၼ်းသေ ထႃႇဝရႃႉၽြႃး၊ ၽြႃးပဵၼ်ၸဝ်ႈသူႁေႃႈၶဝ်ဢွၵ်ႇပူၼ်ႉသေၵႃႈတီႈသူၵႂႃႇယဝ်ႉၼၼ်ႉၸိုင်၊ယႃႇပေထၢင်ႇၵႃႈၼႂ်းၸႂ်သူလႄႈဝႃႈ၊ ‘ၵွပ်ႈပိူဝ်ႈႁဝ်းထိူၵ်ႈတၢၼ်ႇလႄႈမၼ်းၸဝ်ႈဢဝ်ႁဝ်းသူင်ႇမႃးႁႂ်ႈႁဝ်းၸၢမ်ႇၸႃးလိၼ်ၼႆႉယဝ်ႉ၊’ ဝႃႈၼင်ႇၼႆလႃးလႃး။ ဢမ်ႇၸႂ်ႈၸိူဝ်ႉၼင်ႇၼၼ်။ ထႃႇဝရႃႉၽြႃး၊ တၵ်းတေႁေႃႈၶဝ်ဢွၵ်ႇသေၵႃႈတီႈသူၵွပ်ႈပိူဝ်ႈၶဝ်ၼၼ်ႉႁၢႆႉႁုၵ်းၼႃႇဢေႃႈ။-
ၵွပ်ႈပိူဝ်ႈသူပဵၼ်ၵူၼ်းလီၵူၼ်းငၢမ်း၊ၵူၼ်းသိုဝ်ႈၵူၼ်းတေႃႇလႄႈ ထႃႇဝရႃႉၽြႃး၊ ႁႂ်ႈသူၸၢမ်ႇၸႃးမိူင်းၼၼ်ႉဢမ်ႇၸႂ်ႈ။ မၼ်းၸဝ်ႈတၵ်းတေႁေႃႈၶဝ်ၼၼ်ႉပႅတ်ႈၵွပ်ႈပိူဝ်ႈၶဝ်ပဵၼ်ၵူၼ်းႁၢႆႉၵူၼ်းႁုၵ်း၊ဢိၵ်ႇတင်းၵွပ်ႈပိူဝ်ႈမၼ်းၸဝ်ႈၶႂ်ႈႁႂ်ႈၵတိဢၼ်မၼ်းၸဝ်ႈဝႆႉတီႈပူႇမွၼ်ႇသူ ဢႃႇပြႃႇႁၢမ်ႇ၊ဢိၸၢၵ်ႈ၊ယႃႇၵုပ်ႈ၊ ၼၼ်ႉတႄႇပဵၼ်ဢေႃႈ။-
ပိူဝ်ႈၼႆလႄႈၵွပ်ႈပိူဝ်ႈသူထိူၵ်ႈတၢၼ်ႇလႄႈ ထႃႇဝရႃႉၽြႃး၊ ႁႂ်ႈသူၸၢမ်ႇၸႃးမိူင်းဢၼ်ၽုၼ်ႇၼမ်ႉမၼ်းလိၼ်လီၼႆႉဢမ်ႇၸႂ်ႈၼၼ်ႉၸိုင်၊ႁုမၢတ်ႈဢဝ်တႃႉ။ ဢမ်ႇၸႂ်ႈၸိူဝ်ႉၼင်ႇၼၼ်။ သူပဵၼ်ၵူၼ်းမဵဝ်းဢၼ်ဝႃႈယၢပ်ႇၶေႃးၶႅင်ဢေႃႈ။
“ၶုၵ်းၸႂ်လႆႈၶႆႈၸႂ်ထူပ်းတႃႉ။ ယႃႇပေလူင်လိုမ်းလွင်ႈဢၼ်သူႁဵတ်းႁႂ်ႈတၢင်းၸႂ်မႆႈၶႂ်ႈၸႃႉ ထႃႇဝရႃႉၽြႃး၊ ၽြႃးပဵၼ်ၸဝ်ႈသူလႆႈဢွၵ်ႇၵႃႈၼႂ်းထိူၼ်ႇလႅင်ႉၼၼ်ႉ။ တႄႇဢဝ်ၸဵမ်မိူဝ်ႈဢၼ်သူဢွၵ်ႇမိူင်း ဢေးၵျိပ်ႉ၊ မႃးတေႃႇထိုင်ႁွတ်ႈဝၼ်းဢၼ်သူႁွတ်ႈၽႅဝ်ၵႃႈတီႈၼႆႈမႃးၼၼ်ႉသူလုၵ်ႉၽိုၼ်ႉမၼ်းၸဝ်ႈယဝ်ႉ။-
ၵႃႈတီႈလွႆ သိၼႃႉ၊ ၼၼ်ႉၵေႃႈသူႁႂ်ႈတၢင်းၸႂ်မႆႈၶႂ်ႈၸႃႉ ထႃႇဝရႃႉၽြႃး၊ ဢွၵ်ႇထၢၼ်ႈပေႃးၸမ်တၵ်းယႃႉၽဵဝ်ႈသူပႅတ်ႈဢေႃႈ။-
ၵဝ်ၶိုၼ်ႈၵႂႃႇၵႃႈၼိူဝ်လွႆႁႂ်ႈလႆႈႁပ်ႉဢဝ်ၶႅပ်းမၢၵ်ႇႁိၼ်ဢၼ်ဢဝ်ပတိၺိၺ်ႇတြႃးတႅမ်ႈသႂ်ႇဝႆႉဢၼ် ထႃႇဝရႃႉၽြႃး၊ ႁဵတ်းလူၺ်ႈၵၼ်တင်းသူၼၼ်ႉဢေႃႈ။ ၵဝ်ယူႇၵႃႈတီႈၼၼ်ႈသီႇသိပ်းဝၼ်းသီႇသိပ်းၶိုၼ်းတဵမ်တဵမ်၊ယင်းဢမ်ႇၵိၼ်တၢင်းၵိၼ်ၵႃႈသင်၊ယင်းဢမ်ႇၵိၼ်ၼမ်ႉသေဢိတ်းဢေႃႈ။-
မိူဝ်ႈၼၼ်ႉ၊ ထႃႇဝရႃႉၽြႃး၊ ဢဝ်ၶႅပ်းမၢၵ်ႇႁိၼ်သွင်ၽႅၼ်ႇဢၼ်တူဝ်မၼ်းၸဝ်ႈဢဝ်တင်းမိုဝ်းမၼ်းၸဝ်ႈတႅမ်ႈသႂ်ႇၼၼ်ႉဢၢပ်ႈပၼ်တီႈၵဝ်ဢေႃႈ။ ၵႃႈၼိူဝ်ႁိၼ်သွင်ၽႅၼ်ႇၼၼ်ႉတႅမ်ႈသႂ်ႇဝႆႉၵႂၢမ်းမၼ်းၸဝ်ႈဢၼ်လုၵ်ႉသေၵႃႈၼႂ်းၽႆးသေလႄႈလၢတ်ႈတီႈသူၼႂ်းဝၼ်းဢၼ်သူၸုတုမ်ၵၼ်ၵႃႈတီႈလွႆၼၼ်ႉၼၼ်ႉဢေႃႈ။-
ၼႂ်းဝၼ်းဢၼ်ထူၼ်ႈတဵမ်သီႇသိပ်းဝၼ်းသီႇသိပ်းၶိုၼ်းယဝ်ႉၼၼ်ႉၵမ်းလဵဝ်၊ ထႃႇဝရႃႉၽြႃး၊ ဢဝ်ၶႅပ်းမၢၵ်ႇႁိၼ်သွင်ၽႅၼ်ႇဢၼ်တႅမ်ႈသႂ်ႇပတိၺိၺ်ႇၸဝ်ႈၼၼ်ႉဢၢပ်ႈပၼ်ၵႃႈၼႂ်းမိုဝ်းၵဝ်ဢေႃႈ။
“ ထႃႇဝရႃႉၽြႃး၊ ၵေႃႈမီးဢမိင်ႉတီႈၵဝ်လႄႈဝႃႈ၊ ‘လူင်းလွႆၵႂႃႇၵမ်းလဵဝ်တႃႉ။ လွင်ႈမၼ်းၸမ်ႉ၊ၵူၼ်းမႂ်းၸိူဝ်းဢၼ်မႂ်းဢွၼ်ဢွၵ်ႇမိူင်း ဢေးၵျိပ်ႉ၊ မႃးၼၼ်ႉၽိတ်းပိူင်ႈတၢင်းၵႂႃႇယဝ်ႉလႄႈႁဵတ်းႁၢႆႉႁဵတ်းႁုၵ်းယူႇဢေႃႈ။ ၶဝ်ပေႃးဝၢႆႇပႅတ်ႈသေသဵၼ်ႈတၢင်းဢၼ်ၵဝ်ပိင်းၺၢပ်ႈဝႆႉႁႂ်ႈၶဝ်ၵမ်ၵျၢင်ႉၸွမ်းၼၼ်ႉသေယဝ်ႉ၊လေႃႇႁဵတ်းႁုၼ်ႇႁၢင်ႈသၢင်းထုပုၼ်ႈၶဝ်ယဝ်ႉယဝ်ႉ၊’ ဝႃႈၼင်ႇၼႆဢေႃႈ။
“ ထႃႇဝရႃႉၽြႃး၊ သမ်ႉမီးဢမိင်ႉတီႈၵဝ်ထႅင်ႈလႄႈဝႃႈ၊ ‘ၵဝ်လႆႈႁၼ်လွင်ႈဢၼ်ၵူၼ်းၸိူဝ်းၼႆႉဝႃႈယၢပ်ႇၶေႃးၶႅင်ၼႃႇၼၼ်ႉယဝ်ႉ။-
ယႃႇပေၶတ်းၸႂ်ႁႂ်ႈလႆႈႁၢမ်ႈၵဝ်ယဝ်ႉ။ ၵဝ်တၵ်းယႃႉၽဵဝ်ႈပႅတ်ႈၶဝ်ဢမ်ႇႁႂ်ႈၽူႈလႂ်ၶုၵ်းၸႂ်လႆႈၶဝ်သေဢိတ်းဢေႃႈ။ မႂ်းၸမ်ႉ၊ၵဝ်တၵ်းႁႂ်ႈပဵၼ်မဵဝ်းၵူၼ်းဢၼ်ႁႅင်းယႂ်ႇၼႃႇလႄႈၼမ်ၵိုၼ်းသေၶဝ်ဢေႃႈ၊’ ဝႃႈၼႆဢေႃႈ။
“မိူဝ်ႈၼၼ်ႉ၊ၵဝ်ဝၢႆႇၶိုၼ်းလႄႈမႅၵ်ႇဢဝ်ၶႅပ်းမၢၵ်ႇႁိၼ်ပတိၺိၺ်ႇသွင်ၽႅၼ်ႇၼၼ်ႉလူင်းလွႆမႃးဢေႃႈ။ ၽႆးၵေႃႈမႆႈၵႃႈတီႈလွႆၼၼ်ႉယူႇဢေႃႈ။-
ၵဝ်လႆႈႁၼ်လွင်ႈဢၼ်သူသမ်ႉပေႃးဢွၼ်ၵၼ်ပႄႇပႅတ်ႈပိင်းၺၢပ်ႈတြႃးဢၼ် ထႃႇဝရႃႉၽြႃး၊ ပၼ်သူၼၼ်ႉသေယဝ်ႉ၊ၽိတ်းပိူင်ႈမၼ်းၸဝ်ႈၼႂ်းတၢင်းဢၼ်လေႃႇႁဵတ်းႁုၼ်ႇႁၢင်ႈဝူဝ်းသေလႄႈဝႆႈယူႇယဝ်ႉ။-
ပိူဝ်ႈၼႆလႄႈၵဝ်ဢဝ်ၶႅပ်းမၢၵ်ႇႁိၼ်သွင်ၽႅၼ်ႇၼၼ်ႉထိမ်ႈတူၵ်းလႄႈတႅၵ်ႇယၢႆႈၵႂႃႇသိုဝ်ႈၼႃႈတႂ်ႈတႃသူဢေႃႈ။-
ၵဝ်သမ်ႉလႆႈၶုပ်ႉမူပ်ႇယူႇၵႃႈတီႈၽၢႆႇၼႃႈ ထႃႇဝရႃႉၽြႃး၊ ထႅင်ႈသီႇသိပ်းဝၼ်းသီႇသိပ်းၶိုၼ်းမိူၼ်ၸိူဝ်ႉၼင်ႇၵမ်းဢွၼ်တၢင်းၼၼ်ႉယင်းဢမ်ႇၵိၼ်တၢင်းၵိၼ်၊ယင်းဢမ်ႇၵိၼ်ၼမ်ႉလႄႈယူႇဢေႃႈ။ ၵဝ်လႆႈႁဵတ်းၸိူဝ်ႉၼင်ႇၼႆၵွပ်ႈပိူဝ်ႈဢပျတ်ႈၵႃႈဢၼ်သူၽိတ်းပိူင်ႈၵႃႈတီႈ ထႃႇဝရႃႉၽြႃး၊ လႄႈမၼ်းၸဝ်ႈလႆႈၸႂ်မႆႈၶႂ်ႈၸႃႉတေႃႇသူၼၼ်ႉယဝ်ႉ။-
ၵဝ်လီၵူဝ်လီႁႄတၢင်းဢၼ် ထႃႇဝရႃႉၽြႃး၊ ၸႂ်မႆႈၶႂ်ႈၸႃႉႁႅင်းယႂ်ႇၼႃႇလူင်လၢင်ထၢၼ်ႈပေႃးၸမ်တၵ်းယႃႉၽဵဝ်ႈသူပႅတ်ႈလုမ်းလုမ်းၼၼ်ႉဢေႃႈ။ ၵူၺ်းၵႃႈ၊ ထႃႇဝရႃႉၽြႃး၊ သမ်ႉထွမ်ႇဢဝ်ၵႂၢမ်းၵဝ်ထႅင်ႈပွၵ်ႈၼိုင်ႈဢေႃႈ။-
တီႈ ဢႃႇရုၼ်ႇ၊ ၵေႃႈ ထႃႇဝရႃႉၽြႃး၊ ၸႂ်မႆႈၶႂ်ႈၸႃႉမၼ်းႁႅင်းၼႃႇဢၢင်ႈတၵ်းဢဝ်မၼ်းတၢႆၼင်ႇၵဝ်ႇဢေႃႈ။ ပုၼ်ႈမၼ်းၵေႃႈၵဝ်သူးတွင်းၶိင်ႇမိူဝ်ႈလဵဝ်ၵၼ်ၼၼ်ႉဢေႃႈ။-
ၵဝ်ဢဝ်ၶိူင်ႈပိူင်တုၸရိူၵ်ႈဢၼ်ဝႃႈ၊ဝူဝ်းဢၼ်သူႁဵတ်းၼၼ်ႉတုတ်ႇၽႆးပႅတ်ႈသေယဝ်ႉ၊ထုပ်ႉလႅဝ်လႄႈတမ်ႁႂ်ႈပဵၼ်မုၼ်ႈပဵၼ်ၽွင်ယဝ်ႉၸင်ႇဢဝ်မုၼ်ႈၽွင်ၼၼ်ႉပႅတ်ႈတူၵ်းၵႃႈၼႂ်းၼမ်ႉဢၼ်လႆလူင်းလွႆမႃးၼၼ်ႉဢေႃႈ။
“မိူဝ်ႈဢၼ်သူမီးယူႇၵႃႈတီႈ တပေႇရႃႉ၊ ဢိၵ်ႇတင်းၵႃႈတီႈ မတ်ႉသႃႇ၊ တင်းၵႃႈတီႈ ၵိပရုတ်ႉႁတ်ႉတဝႃႇ၊ ၼၼ်ႉၵေႃႈသူဢွၼ်ၵၼ်ႁဵတ်းႁႂ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူလႆႈၸႂ်မႆႈၶႂ်ႈၸႃႉတီႈသူဢေႃႈ။-
မိူဝ်ႈဢၼ်မၼ်းၸဝ်ႈဢွၼ်ဢဝ်သူဢွၵ်ႇမႃးသေၵႃႈတီႈ ၵႃႇတေႇသပႃႇၼႃႉ၊ လႄႈမီးဢမိင်ႉႁႂ်ႈသူၶိုၼ်ႈၵႂႃႇသိမ်းဢဝ်မိူင်းဢၼ်မၼ်းၸဝ်ႈတၵ်းပၼ်တီႈသူၼၼ်ႉၵေႃႈ၊သူဢွၼ်ၵၼ်တွပ်ႇထဵင်ဢမိင်ႉ ထႃႇဝရႃႉၽြႃး၊ ၽြႃးပဵၼ်ၸဝ်ႈသူပႅတ်ႈဢေႃႈ။ သူယင်းဢမ်ႇယုမ်ႇမၼ်းၸဝ်ႈ၊ယင်းဢမ်ႇထွမ်ႇဢမ်ႇဢဝ်ၵႂၢမ်းမၼ်းၸဝ်ႈလႄႈယူႇဢေႃႈ။-
တႄႇဢဝ်ၸဵမ်မိူဝ်ႈၵဝ်ႁုၸၵ်းသူၼၼ်ႉသူၶတ်းၶႅင်ႁႅင်းတႃႉၵၼ်တင်း ထႃႇဝရႃႉၽြႃး၊ မႃးယဝ်ႉ။
“ၼင်ႇၼၼ်လႄႈၵဝ်လႆႈၶုပ်ႉမူပ်ႇၵႃႈတီႈၽၢႆႇၼႃႈ ထႃႇဝရႃႉၽြႃး၊ ယူႇသီႇသိပ်းဝၼ်းသီႇသိပ်းၶိုၼ်းၵွပ်ႈပိူဝ်ႈၵဝ်လႆႈႁုလွင်ႈဢၼ်မၼ်းၸဝ်ႈတႅပ်းတတ်းဝႃႈ၊တၵ်းယႃႉၽဵဝ်ႈသူပႅတ်ႈၼၼ်ႉဢေႃႈ။-
ၵဝ်ၸင်ႇသူးတွင်းလႄႈဝႃႈ၊ ‘ဢူဝ်း၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈယႃႇပေယႃႉၽဵဝ်ႈပႅတ်ႈၵူၼ်းမဵဝ်းၸဝ်ႈႁဝ်း၊ဢၼ်တူဝ်ၸဝ်ႈႁဝ်းဢဝ်တင်းမုၼ်ၽုင်းတၼ်းၶူဝ်းၸဝ်ႈႁဝ်းသေလႄႈ ၼုၵ်ႈဢဝ်ဢွၵ်ႇသေမိူင်း ဢေးၵျိပ်ႉ၊ မႃးၼၼ်ႉသေၵမ်းတီႈၶႃႈ။-
ၶႅၼ်းတေႃႈၶုၵ်းၸႂ်လႆႈၶႃႈၸဝ်ႈႁဝ်း ဢႃႇပြႃႇႁၢမ်ႇ၊ဢိၸၢၵ်ႈ၊ယႃႇၵုပ်ႈ၊ ၸိူဝ်းၼၼ်ႉသေၵမ်းတီႈၶႃႈ။ ၶႅၼ်းတေႃႈယႃႇပေတူၺ်းမၢတ်ႈတၢင်းဢၼ်ၵူၼ်းမဵဝ်းၼႆႉဝႃႈယၢပ်ႇၶေႃးၶႅင်၊တၢင်းဢၼ်ၶဝ်ၽိတ်းပိူင်ႈတုၸရိူၵ်ႈဢပျတ်ႈၶဝ်ၼၼ်ႉသေၵမ်းတီႈၶႃႈ။-
ၵူဝ်ၵူၼ်းမဵဝ်း ဢေးၵျိပ်ႉ၊ ၶဝ်တၵ်းလၢတ်ႈဝႃႈ၊ “ၵွပ်ႈပိူဝ်ႈ ထႃႇဝရႃႉၽြႃး၊ ဢမ်ႇတၢတ်ႈၼိူင်ႇပုၼ်ႈတၵ်းဢဝ်ၶဝ်သႂၢင်းၶဝ်ႈၵႃႈၼႂ်းမိူင်းဢၼ်မၼ်းၸဝ်ႈမီးၵတိဝႆႉတီႈၶဝ်ၼၼ်ႉ၊ဢိၵ်ႇတင်းၵွပ်ႈပိူဝ်ႈမၼ်းၸဝ်ႈၸင်းၶဝ်လႄႈမၼ်းၸဝ်ႈဢဝ်ၶဝ်ၵႂႃႇႁႂ်ႈလႆႈဢဝ်တၢႆၵႃႈတီႈထိူၼ်ႇလႅင်ႉယဝ်ႉ၊” ဝႃႈၼႆၶႃႈဢေႃႈ။-
ၵူၼ်းမဵဝ်းၼႆႉၸမ်ႉ၊ပဵၼ်ၶဝ်ၸိူဝ်းဢၼ်ၸဝ်ႈႁဝ်းလိူၵ်ႈဢဝ်ႁႂ်ႈလႆႈပဵၼ်ၵူၼ်းဢၼ်ၸဝ်ႈႁဝ်းပိူင်ႇ၊ဢၼ်ၸဝ်ႈႁဝ်းဢဝ်မႁႃႇမုၼ်ၽုင်း ဢိၵ်ႇတင်းႁႅင်းတၼ်းၶူဝ်းၸဝ်ႈႁဝ်းသေလႄႈဢွၼ်ၶဝ်ဢွၵ်ႇမိူင်း ဢေးၵျိပ်ႉ၊ မႃးတီႈၶႃႈဢေႃႈ၊’ ဝႃႈၼင်ႇၼႆဢေႃႈ။
“မိူဝ်ႈၼၼ်ႉ၊ ထႃႇဝရႃႉၽြႃး၊ မီးဢမိင်ႉတီႈၵဝ်လႄႈဝႃႈ၊ ‘ထၢၵ်ႇႁဵတ်းၶႅပ်းမၢၵ်ႇႁိၼ်သွင်ၽႅၼ်ႇဢၼ်မိူၼ်ၵၼ်တင်းၶႅပ်းမၢၵ်ႇႁိၼ်ၵမ်းဢွၼ်တၢင်းၼၼ်ႉထႅင်ႈဢိၵ်ႇတင်းတိူၵ်ႈတႃႇမႆႉလုၵ်ႈၼိုင်ႈပုၼ်ႈတႃႇတေသႂ်ႇၶႅပ်းမၢၵ်ႇႁိၼ်ၼၼ်ႉသေလႄႈၶိုၼ်ႈမႃးၸူးၵႃႈတီႈၵဝ်ၵႃႈၼိူဝ်လွႆထႅင်ႈလူးၵွၼ်ႇတႃႉ။-
ၵႂၢမ်းဢၼ်ၵဝ်တႅမ်ႈသႂ်ႇဝႆႉၵႃႈၼိူဝ်ၶႅပ်းမၢၵ်ႇႁိၼ်ၵမ်းဢွၼ်တၢင်းဢၼ်မႂ်းထိမ်ႈႁႂ်ႈလုလႅဝ်ယဝ်ႉၼၼ်ႉ၊ၵဝ်သမ်ႉတၵ်းတႅမ်ႈပၼ်ၵႃႈၼိူဝ်ၶႅပ်းမၢၵ်ႇႁိၼ်ၼႆႉၼင်ႇၵဝ်လႄႈ၊မႂ်းဢဝ်သႂ်ႇဝႆႉၵႃႈၼႂ်းတိူၵ်ႈတႃႇၼၼ်ႉတႃႉ၊’ ဝႃႈၼင်ႇၼႆဢေႃႈ။
“ၵဝ်ၵေႃႈဢဝ်မႆႉပဝ်းႁဵတ်းတိူၵ်ႈတႃႇသေလႄႈသမ်ႉဢဝ်မၢၵ်ႇႁိၼ်ထၢၵ်ႇႁဵတ်းႁိၼ်သွင်ၽႅၼ်ႇဢၼ်မိူၼ်ၵၼ်တင်းဢွၼ်တၢင်းၼၼ်ႉသေယဝ်ႉ၊ဢဝ်ၶိုၼ်ႈၵႂႃႇၵႃႈၼိူဝ်လွႆဢေႃႈ။-
ထႃႇဝရႃႉၽြႃး၊ ဢဝ်ပိင်းၺၢပ်ႈၸဝ်ႈသိပ်းပႃးတႅမ်ႈသႂ်ႇဝႆႉၵႃႈၼိူဝ်ၶႅပ်းမၢၵ်ႇႁိၼ်မိူၼ်ၵမ်းဢွၼ်တၢင်းမိူဝ်ႈဢၼ်မၼ်းၸဝ်ႈလၢတ်ႈသေၵႃႈၼႂ်းၽႆးဢွၵ်ႇမႃးၼႂ်းဝၼ်းဢၼ်သူၸုတုမ်ၵၼ်ၵႃႈတီႈလွႆၼၼ်ႉဢေႃႈ။ ၵမ်းၼၼ်ႉ ၸင်ႇမၼ်းၸဝ်ႈဢဝ်ၶႅပ်းမၢၵ်ႇႁိၼ်ၼၼ်ႉဢၢပ်ႈပၼ်ၵႃႈတီႈၵဝ်ဢေႃႈ။-
ၵဝ်ၵေႃႈဝၢႆႇၼႃႈလူင်းလွႆမႃးၶိုၼ်းဢေႃႈ။ ၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉၼၼ်ႉၵဝ်ဢဝ်သႂ်ႇဝႆႉၵႃႈၼႂ်းတိူၵ်ႈတႃႇဢၼ်ၵဝ်ႁဵတ်းဝႆႉၼၼ်ႉလႄႈမီးဝႆႉၵႃႈတီႈၼႆႈယူႇယဝ်ႉ။
“(ၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်လုၵ်ႉသေၵႃႈတီႈၼမ်ႉမေႃႇဢၼ်ၵူၼ်း ယႃႇၵၼ်ႇ၊ ၶဝ်ပိူင်ႇၼၼ်ႉသေလႄႈ၊ဢွၵ်ႇၵႂႃႇၸူးၵႃႈတီႈ မူဝ်းသရႃႉ၊ ဢေႃႈ။ ၵႃႈတီႈၼၼ်ႈ ဢႃႇရုၼ်ႇ၊ သဵင်ႈဢသၢၵ်ႈၵႂႃႇလႄႈၶဝ်ဢဝ်မၼ်းသၢင်းၵျူဝ်ႇဢေႃႈ။ လုၵ်ႈၸၢႆးမၼ်း ဢေးလႃႇၸႃႇ၊ သိုပ်ႇၶၢမ်ႇဢဝ်ဢရႃႇယဵၸ်ႈပရေႃးႁဵၵ်ႈ မၼ်းၼၼ်ႉဢေႃႈ။-
ၶဝ်သမ်ႉလုၵ်ႉသေၵႃႈတီႈၼၼ်ႈဢွၵ်ႇၵႂႃႇၸူးၵႃႈတီႈ ၵုတ်ႉၵူဝ်းတႃႉ၊ ဢေႃႈ။ ၶဝ်သမ်ႉသိုပ်ႇၵႂႃႇၸူးတီႈ ယုတ်ႉၽႃႇသႃႉ၊ တီႈဢၼ်မီးၼမ်ႉႁွင်ႈၼမ်ႉၵႄးၼၼ်ႉဢေႃႈ။-
မိူဝ်ႈယၢမ်းၼၼ်ႉ၊ ထႃႇဝရႃႉၽြႃး၊ ၸတ်းဢဝ်ၵူၼ်း လေႇဝိ၊ တင်းလၢႆဝႆႉႁႂ်ႈၶဝ်လႆႈႁၢမ်တိူၵ်ႈပတိၺိၺ်ႇ ထႃႇဝရႃႉၽြႃး၊ ဢိၵ်ႇတင်းႁႂ်ႈၶဝ်လႆႈပဵၼ်ယဵၸ်ႈပရေႃးႁဵၵ်ႈတင်းလၢႆဢၼ်ပွင်ႁဵတ်းၼႃႈၵၢၼ်မၼ်းၸဝ်ႈဢိၵ်ႇတင်းႁႂ်ႈၶဝ်လႆႈဢဝ်ၼႃႇမႃႉၸိုဝ်ႈသဵင်မၼ်းၸဝ်ႈလႄႈပၼ်တၢင်းလီယူႇတေႃႇထိုင်ႁွတ်ႈဝၼ်းမိူဝ်ႈလဵဝ်ၼႆႉဢေႃႈ။-
ၵွပ်ႈပိူဝ်ႈၸိူဝ်ႉၼင်ႇၼၼ်လႄႈၵူၼ်းၸိူဝ်ႉၶိူဝ်း လေႇဝိ၊ ၶဝ်ဢမ်ႇလႆႈၶၢမ်ႇဢဝ်ဢမူၺ်ႇလိၼ်မိူၼ်ၸိူဝ်ႉၼင်ႇၵူၼ်းၸိူဝ်ႉၶိူဝ်းတၢင်ႇမဵဝ်းလႆႈမီးၼၼ်ႉ၊ဢမူၺ်ႇၶဝ်ၸမ်ႉ၊ပဵၼ်ဢၶႂၢင်ႉၵျေးၸူးဢၼ်လႆႈပဵၼ်ယဵၸ်ႈပရေႃးႁဵၵ်ႈ ထႃႇဝရႃႉၽြႃး၊ ၸွမ်းၵႃႈၼင်ႇဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဝႆႉၵတိၼၼ်ႉဢေႃႈ။)
“ၵဝ်ယူႇၵႃႈၼိူဝ်လွႆၼၼ်ႉသီႇသိပ်းဝၼ်းသီႇသိပ်းၶိုၼ်းမိူၼ်ၵမ်းဢွၼ်တၢင်းၼၼ်ႉဢေႃႈ။ မိူဝ်ႈၼၼ်ႉ ထႃႇဝရႃႉၽြႃး၊ ထွမ်ႇဢဝ်ၵႂၢမ်းၵဝ်လႄႈၸင်ႇဢမ်ႇယႃႉၽဵဝ်ႈသူပႅတ်ႈဢေႃႈ။-
ထႃႇဝရႃႉၽြႃး၊ ၵေႃႈမီးဢမိင်ႉတီႈၵဝ်၊ႁႂ်ႈၵဝ်ၵႂႃႇလႄႈဢွၼ်ႁူဝ်သူပုၼ်ႈဢၼ်သူတၵ်းလႆႈၶဝ်ႈၸၢမ်ႇၸႃးၵႃႈၼႂ်းမိူင်းဢၼ်မၼ်းၸဝ်ႈတိူင်ႇဝႃႈဝႆႉၵႃႈတီႈပူႇမွၼ်ႇသူႁႂ်ႈလႆႈပၼ်ၶဝ်ၼၼ်ႉဢေႃႈ။
“ၵူၼ်းမဵဝ်း ဢိသရေး၊ ႟။ လွင်ႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူယွၼ်းဢဝ်လွင်ႈဢၼ်လႂ်တီႈသူၼၼ်ႉၸိုင်၊ဢွၼ်ၵၼ်ထွမ်ႇငိၼ်းလူးၵွၼ်ႇတႃႉ။ ဢၼ်ၽြႃးပဵၼ်ၸဝ်ႈယွၼ်းဢဝ်ၸမ်ႉ၊ၵူဝ်းၵႂၢႆႇ ထႃႇဝရႃႉၽြႃး၊ လႄႈၵမ်ၵျၢင်ႉၸွမ်းၵႃႈၼင်ႇဢၼ်မၼ်းၸဝ်ႈပိင်းၺၢပ်ႈဝႆႉတင်းလၢႆၼၼ်ႉတႃႉ။ ႁၵ်ႉမၼ်းၸဝ်ႈလႄႈပႃးၸႂ်ပႃးၶေႃးသဵင်ႈသဵင်ႈသေပွင်ႁဵတ်းဢမုတီႈမၼ်းၸဝ်ႈတႃႉ။-
ပႂ်ႉၵမ်ၵျၢင်ႉၸွမ်းပိင်းၺၢပ်ႈၸဝ်ႈတင်းလၢႆဢိၵ်ႇတင်းထုင်းတြႃးၸဝ်ႈတင်းလၢႆ ဢၼ်ၵဝ်ထွၵ်ႈလူၺ်ႈဢၵျူဝ်းသူသေလႄႈသင်ႇလၢတ်ႈဝႆႉၼႂ်းဝၼ်းမိူဝ်ႈၼႆႉၸိူဝ်းၼၼ်ႉတႃႉ။-
ၽႃႉၵၢင်ႁၢဝ်ဢိၵ်ႇတင်းၵႃႈၼိူဝ်ၸိၵ်းၸွမ်ၽႃႉၵၢင်ႁၢဝ်၊လိၼ်မိူင်းဢိၵ်ႇတင်းၵႃႈဢၼ်မီးၵႃႈၼႂ်းမၼ်းၸိူဝ်းၼၼ်ႉပဵၼ်ဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူပိူင်ႇဢေႃႈ။-
ၼႂ်းဝႃႈၼၼ်သေၵေႃႈတၢင်းႁၵ်ႉမႅတ်ႈတႃႇဢၼ် ထႃႇဝရႃႉၽြႃး၊ ႁၵ်ႉပႅင်းပူႇမွၼ်ႇသူၼၼ်ႉယႂ်ႇၼႃႇလူင်လၢင်လႄႈမၼ်းၸဝ်ႈယင်းဢမ်ႇလိူၵ်ႈဢဝ်ၵူၼ်းတၢင်ႇၸိူဝ်ႉတၢင်ႇမဵဝ်း၊ၵူၺ်းလိူၵ်ႈဢဝ်သူၸိူဝ်းၼႆႉယဝ်ႉၸင်ႇသူလႆႈပဵၼ်ၵူၼ်းမဵဝ်းဢၼ်မၼ်းၸဝ်ႈလိူၵ်ႈဢဝ်ဝႆႉတေႃႇႁွတ်ႈဝၼ်းမိူဝ်ႈၼႆႉယဝ်ႉ။-
ပိူဝ်ႈၼႆလႄႈတႄႇဢဝ်ၸဵမ်မိူဝ်ႈလဵဝ်ၼႆႉၵႂႃႇ၊ဢွၼ်ၵၼ်ပဵၼ်ၶဝ်ၸိူဝ်းဢၼ်ထွမ်ႇဢဝ်ၵႂၢမ်း ထႃႇဝရႃႉၽြႃး၊ တႃႉ။ ယႃႇပေပဵၼ်ၶဝ်ၸိူဝ်းဢၼ်ဝႃႈယၢပ်ႇၶေႃးၶႅင်ၼၼ်ႉယဝ်ႉ။-
လွင်ႈမၼ်းၸမ်ႉ၊ ထႃႇဝရႃႉၽြႃး၊ ၽြႃးပဵၼ်ၸဝ်ႈသူပဵၼ်ၽြႃးၼိူဝ်ၽြႃးတင်းလၢႆ၊ၸဝ်ႈၼိူဝ်ၸဝ်ႈတင်းလၢႆ၊ပဵၼ်ၽြႃးဢၼ်ယႂ်ႇမျၢတ်ႈ၊ၽြႃးဢၼ်မီးႁႅင်းတၼ်းၶူဝ်း၊ၽြႃးဢၼ်လီၵူဝ်ယမ်ဢေႃႈ။ မၼ်းၸဝ်ႈယင်းဢမ်ႇတူၺ်းၼႃႈလဵၵ်ႉၼႃႈယႂ်ႇ၊ယင်းဢမ်ႇၵိၼ်သူးၵိၼ်လၢပ်ႈၼၼ်ႉဢေႃႈ။-
မၼ်းၸဝ်ႈယူႇၽၢႆႇလုၵ်ႈဢွၼ်ႇဢၼ်ၽၢၼ်ပေႃႈၽၢၼ်မႄႈတင်းလၢႆဢိၵ်ႇတင်းမႄႈမၢႆႈတင်းလၢႆလႄႈၸီႇယၢင်ႇတြႃးဢေႃႈ။ မၼ်းၸဝ်ႈႁၵ်ႉၵူၼ်းၶႅၵ်ႇၸိူဝ်းဢၼ်သွၼ်ႈယူႇၸွမ်းသူၼၼ်ႉလႄႈပၼ်ၶဝ်ႁႂ်ႈလႆႈၵိၼ်လႆႈၼုင်ႈဢေႃႈ။-
ပိူဝ်ႈၼႆလႄႈႁၵ်ႉၶႅၵ်ႇၸိူဝ်းၼၼ်ႉတႃႉ။ လွင်ႈမၼ်းၸမ်ႉ၊သူယၢမ်ႈပဵၼ်ၶႅၵ်ႇၼႂ်းမိူင်း ဢေးၵျိပ်ႉ၊ မႃးဢေႃႈ။-
ဢွၼ်ၵၼ်ထွမ်ႇဢဝ်ၵႂၢမ်း ထႃႇဝရႃႉၽြႃး၊ ၽြႃးပဵၼ်ၸဝ်ႈသူလႄႈဝႆႈသႃၵူဝ်းၵႂၢႆႇမၼ်းၸဝ်ႈသူႇလဵဝ်ပႃးလဵဝ်ၵူၺ်းတႃႉ။ ဢွၼ်ၵၼ်ပႂ်ႉသဵတ်ႈၸႃႇတေႃႇမၼ်းၸဝ်ႈလႄႈ၊ႁဵတ်းၵတိသဵတ်ႈၸႃႇၵႃႈၼႂ်းၼႃႇမႃႉၸိုဝ်ႈသဵင်မၼ်းၸဝ်ႈၵူၺ်းတႃႉ။-
မၼ်းၸဝ်ႈပဵၼ်ၽြႃးဢၼ်သူထိူၵ်ႈယွင်ႈယေႃးဢေႃႈ။ ပဵၼ်ၽြႃးပဵၼ်ၸဝ်ႈသူလႄႈ ႁဵတ်းလွင်ႈတၢင်းဢၼ်ယႂ်ႇလူင်၊လွင်ႈတၢင်းဢၼ်လီၵူဝ်လီဢၢမ်းတင်းလၢႆဢၼ်မၢၵ်ႇတႃသူလႆႈႁၼ်မႃးယဝ်ႉၼၼ်ႉဢေႃႈ။-
မိူဝ်ႈဢၼ်ပူႇမွၼ်ႇသူလူင်းၵႂႃႇၵႃႈတီႈမိူင်း ဢေးၵျိပ်ႉ၊ ၼၼ်ႉၶဝ်မီးၸဵတ်းသိပ်းၵေႃႉၵူၺ်းလႄႈ၊တေႃႈလဵဝ်ၼႆႉၸမ်ႉ၊ ထႃႇဝရႃႉၽြႃး၊ ၽြႃးပဵၼ်ၸဝ်ႈသူႁႂ်ႈသူၼမ်ၵိုၼ်းမႃးထၢၼ်ႈပေႃးတၢၼ်ႇလၢဝ်ၵၢင်ႁၢဝ်ယဝ်ႉ၊” ဝႃႈၼင်ႇၼႆဢေႃႈ။
“ဢွၼ်ၵၼ်ႁၵ်ႉ ထႃႇဝရႃႉၽြႃး၊ ၽြႃးပဵၼ်ၸဝ်ႈသူလႄႈပႂ်ႉၵမ်ၵျၢင်ႉၸွမ်းပိင်းၺၢပ်ႈတြႃးမၼ်းၸဝ်ႈၵႃႈမီးတင်းသဵင်ႈတင်းလူင်ယူႇသေႇသေႇတႃႉ။-
ဝၼ်းမိူဝ်ႈၼႆႉဢွၼ်ၵၼ်ၶုၵ်းၸႂ်လႆႈတၢင်းဢၼ် ထႃႇဝရႃႉၽြႃး၊ သင်ႇသွၼ်သုင်းမႃႉပၼ်ၸွမ်းၼင်ႇဢၼ်သူလႆႈထူပ်းလႆႈႁၼ်မႃးၼၼ်ႉတႃႉ။ (ၶဝ်ၸိူဝ်းဢၼ်လႆႈထူပ်းလႆႈႁၼ်မႃးၼၼ်ႉပဵၼ်လုၵ်ႈလၢင်းသူဢမ်ႇၸႂ်ႈ။ ပဵၼ်တူဝ်သူဢေႃႈ။) တူဝ်သူလႆႈႁၼ်မုၼ်ဢႃႇၼုၽေႃႇမၼ်းၸဝ်ႈ၊တၼ်းၶူဝ်းမၼ်းၸဝ်ႈ၊တၢင်းဢၼ်ၶႅၼ်မိုဝ်းမၼ်းၸဝ်ႈႁႅင်းယႂ်ႇ၊-
ဢိၵ်ႇတင်းၼိမိၵ်ႈလၢၵ်ႈၶၼႃႇမၼ်းၸဝ်ႈတင်းလၢႆမႃးယဝ်ႉ။ သူလႆႈႁၼ်တၢင်းဢၼ်မၼ်းၸဝ်ႈႁဵတ်းတီႈၶုၼ်ႁေႃၶမ်းမိူင်း ဢေးၵျိပ်ႉ၊ ဢိၵ်ႇတင်းသိုင်ႇၸိုင်ႈဝၢၼ်ႈမိူင်းမၼ်းတင်းသဵင်ႈတင်းလူင်ၼၼ်ႉမႃးယဝ်ႉ။-
သူလႆႈႁၼ်တၢင်းဢၼ် ထႃႇဝရႃႉၽြႃး၊ ယႃႉၽဵဝ်ႈပႅတ်ႈတပ်ႉသိုၵ်းမဵဝ်း ဢေးၵျိပ်ႉ၊ ၶဝ်၊ဢိၵ်ႇတင်းမႃႉၶဝ်၊လေႃႉမႃႉၶဝ်၊ၵႃႈၼႂ်း ပၢင်ႇလၢႆႇလႅင်၊ ယၢမ်ႈမိူဝ်ႈဢၼ်ၶဝ်လိုပ်ႈၸွမ်းလမ်းၸွမ်းသူၼၼ်ႉမႃးယဝ်ႉ၊-
သူႁုလွင်ႈတၢင်းဢၼ် ထႃႇဝရႃႉၽြႃး၊ ႁဵတ်းတီႈသူၸိူဝ်ႉၼင်ႇႁိုဝ်တေႃႇထိုင်ႁွတ်ႈၶိင်ႇဢၼ်သူႁွတ်ႈထိုင်မႃးၵႃႈတီႈၼႆႈၼၼ်ႉယဝ်ႉ။-
သူၶႆႈၸႂ်ထူပ်းတၢင်းဢၼ်မၼ်းၸဝ်ႈႁဵတ်းတီႈ တႃႇႀၼ်ႇ၊ ဢိၵ်ႇတင်း ဢၽိရမ်ႇ၊ လုၵ်ႈၸၢႆး ဢေးလျႃႇၽႃႉ၊ ၸိူဝ်ႉၶိူဝ်း ရုပိၼ်ႇ၊ ယူႇဢေႃႈ။ ၵႃႈတီႈသိုဝ်ႈၼႃႈတႂ်ႈတႃသူၵူႈၵေႃႉၼၼ်ႉလိၼ်တႅၵ်ႇဢႃႈသေလႄႈဢိုၼ်ၵိၼ်ၶဝ်ဢိၵ်ႇတင်းၵူၼ်းႁိူၼ်းၵူၼ်းယေးၶဝ်၊သုမ်ႉထဵင်ၶဝ်၊ဢိၵ်ႇတင်းၶႃႈၶဝ်တင်းတူဝ်တရိၵ်ႈသၢၼ်ႇၶဝ်တင်းသဵင်ႈတၢင်းမူတ်းၼၼ်ႉဢေႃႈ။-
သူၸိူဝ်းၼႆႉတိုၼ်းပဵၼ်ၶဝ်ၸိူဝ်းဢၼ်လႆႈႁၼ်လွင်ႈတၢင်းဢၼ်ယႂ်ႇၼႃႇဢၼ် ထႃႇဝရႃႉၽြႃး၊ ႁဵတ်းၵႃႈမီးတင်းသဵင်ႈတင်းလူင်ၼၼ်ႉမႃးယဝ်ႉ။
“ဢွၼ်ၵၼ်ပႂ်ႉၵမ်ၵျၢင်ႉၸွမ်းပိင်းၺၢပ်ႈၸဝ်ႈၵႃႈဢၼ်ၵဝ်ပၼ်တီႈသူဝၼ်းမိူဝ်ႈၼႆႉၼၼ်ႉတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊သူတၵ်းမီးဢဵၼ်ႁႅင်းတႃႇတေလႆႈၶဝ်ႈသိမ်းဢဝ်မိူင်းဢၼ်သူတၵ်းၶဝ်ႈၵႂႃႇၼၼ်ႉဢေႃႈ။-
သူတၵ်းဢသၢၵ်ႈယၢဝ်းယိုၼ်းၵႃႈၼႂ်းမိူင်းဢၼ်မၢၵ်ႈမီးလီပဵၼ်လႄႈၽုၼ်ႇလီလိၼ်လီ ၼႃႇ၊မိူင်းဢၼ် ထႃႇဝရႃႉၽြႃး၊ တိူင်ႇၵၢဝ်ႇၵတိဝႆႉတီႈပူႇမွၼ်ႇသူဝႃႈတၵ်းတေပၼ်တီႈၶဝ်၊ဢိၵ်ႇတင်းမဵဝ်းၸိူဝ်ႉၶိူဝ်းၶဝ်ၼၼ်ႉဢေႃႈ။-
မိူင်းဢၼ်သူတၵ်းၶဝ်ႈၵႂႃႇသိမ်းဢဝ်ၼၼ်ႉမၼ်းဢမ်ႇမိူၼ်ၵၼ်တင်းမိူင်း ဢေးၵျိပ်ႉ၊ ဢၼ်သူလႆႈယူႇပူၼ်ႉမႃးၼၼ်ႉ။ မိူင်းၼၼ်ႉၸိုင်၊မိူဝ်ႈဢၼ်သူဝၢၼ်ႇၸိူဝ်ႉဝၢၼ်ႇၽၼ်းၼၼ်ႉသူလႆႈၶုတ်းႁွင်ႈၼမ်ႉသႂ်ႇသူၼ်သႂ်ႇႁႆႈသူယၢပ်ႇၽိုတ်ႇၼႃႇဢေႃႈ။-
မိူင်းဢၼ်သူတၵ်းၶဝ်ႈၵႂႃႇၸၢမ်ႇၸႃးၼၼ်ႉၸမ်ႉ၊ပဵၼ်ႁူၺ်ႈပဵၼ်လွႆ၊ပဵၼ်လိၼ်ဢၼ်တုင်းဢဝ်ၼမ်ႉၽႃႉၼမ်ႉၽူၼ်ဢေႃႈ။-
ထႃႇဝရႃႉၽြႃး၊ ၽြႃးပဵၼ်ၸဝ်ႈသူလုမ်းလႃးလိၼ်ၼၼ်ႉလႄႈလူတူၺ်းယူႇၸႃႉၸဵမ်ၽူၼ်ႁူဝ်ပီတေႃႇၽူၼ်ႁၢင်ပီဢေႃႈ။
“ပိူဝ်ႈၼႆလႄႈထွမ်ႇဢဝ်ပိင်းၺၢပ်ႈတြႃးၸိူဝ်းဢၼ်ၵဝ်ပၼ်တီႈသူဝၼ်းမိူဝ်ႈၼႆႉၼၼ်ႉၸေးၸေးၸွတ်ႇၸွတ်ႇတႃႉ။ ဢွၼ်ၵၼ်ပႃးတင်းႁူဝ်ၸႂ်သဵင်ႈသဵင်ႈလႄႈႁၵ်ႉ ထႃႇဝရႃႉၽြႃး၊ ၽြႃးပဵၼ်ၸဝ်ႈသူသေယဝ်ႉ၊ပွင်ႁဵတ်းဢမုမၼ်းၸဝ်ႈတႃႉ။-
ပေႃးသူႁဵတ်းၸိူဝ်ႉၼင်ႇၼၼ်ၸိုင်၊မၼ်းၸဝ်ႈတၵ်းပၼ်ၼမ်ႉၽူၼ်ယၢမ်းမိူဝ်ႈဢၼ်သူလူဝ်ႇပုၼ်ႈလိၼ်သူ ဢၼ်ဝႃႈၽူၼ်ႁူဝ်ပီ၊ၽူၼ်ႁၢင်ပီၸိူဝ်းၼၼ်ႉႁႂ်ႈသူလႆႈသိမ်းဢဝ်ၶဝ်ႈပိူၵ်ႇသူ၊ၼမ်ႉမၢၵ်ႇၸပိတ်ႉသူဢိၵ်ႇတင်းၼမ်ႉမၼ်းမၢၵ်ႇသၢၼ်ႇလုၼ်ႇသူဢေႃႈ။-
မၼ်းၸဝ်ႈတၵ်းႁႂ်ႈတူၼ်ႈယိူဝ်ႈတူၼ်ႈယႃႈဢွၵ်ႇၵႃႈတီႈပၢင်ႇတီႈပဵင်းပုၼ်ႈတရိၵ်ႈသၢၼ်ႇသူဢေႃႈ။ သူတၵ်းတေလႆႈၵိၼ်ဢိမ်ႇၵိၼ်တဵမ်ဢေႃႈ။-
ယႃႇပေႁႂ်ႈတူဝ်သူလႆႈၶၢမ်ႇတၢင်းဢၼ်ဢွၼ်ဢွၵ်ႇသေၵႃႈတီႈ ထႃႇဝရႃႉၽြႃး၊ ၵႂႃႇႁႂ်ႈလႆႈၵႂႃႇဝႆႈလႄႈႁဵတ်းဝၢတ်ႈတီႈၽြႃးတၢင်ႇသူႇတၢင်ႇပႃးၼၼ်ႉ။-
ပေႃးႁဵတ်းၸိူဝ်ႉၼင်ႇၼၼ်ၸိုင်၊ ထႃႇဝရႃႉၽြႃး၊ တၵ်းၸႂ်မႆႈၶႂ်ႈၸႃႉတေႃႇသူဢေႃႈ။ မၼ်းၸဝ်ႈတၵ်းယုၵ်ႉသိမ်းဢဝ်ၼမ်ႉၽူၼ်လႄႈလိၼ်သူတၵ်းႁႅင်ႈတႅၵ်ႇၶၢပ်ႇ၊ဢမ်ႇၽုၵ်ႇၵိၼ်သွမ်ႈၵိၼ်ၵႃႈသင်လႆႈဢေႃႈ။ သူတၵ်းဢွၼ်ၵၼ်ၸဵဝ်းလုၸဵဝ်းလႅဝ်ၵႃႈၼႂ်းမိူင်းဢၼ်လီဢၼ်ငၢမ်းဢၼ် ထႃႇဝရႃႉၽြႃး၊ ပၼ်တီႈသူၼၼ်ႉဢေႃႈ။
“သူတၵ်းလႆႈဢဝ်ၵႂၢမ်းၵဝ်ၸိူဝ်းၼႆႉသႂၢင်းသႂ်ႇဝႆႉၵႃႈၼႂ်းႁူဝ်ၸႂ်သူဢေႃႈ။ ဢဝ်တြႃးၸိူဝ်းၼၼ်ႉ မတ်ႉၸပ်းၶႅၼ်မိုဝ်းသူဢိၵ်ႇတင်းၵႃႈတီႈၼႃႈၽၢၵ်ႇသူႁႂ်ႈပဵၼ်တၢင်းဢၼ်ပၼ်သတိယူႇၼၼ်ႉတႃႉ။-
ဢဝ်တြႃးၸိူဝ်းၼၼ်ႉသင်ႇသွၼ်ပၼ်တီႈလုၵ်ႈလၢင်းသူတႃႉ။ မိူဝ်ႈဢၼ်ၼင်ႈယူႇၵႃႈၼႂ်းႁိူၼ်းသေဢမ်ႇဝႃႈ၊ၵႂႃႇတႃႈပႆတၢင်းယူႇသေဢမ်ႇဝႃႈ၊လိုဝ်ႈႁိူဝ်ႉယူႇသေဢမ်ႇဝႃႈ၊ႁဵတ်းၵၢၼ်ယူႇသေဢမ်ႇဝႃႈ လၢတ်ႈလွင်ႈတြႃးၸိူဝ်းၼၼ်ႉယူႇတႃႉ။-
တႅမ်ႈတြႃးၸိူဝ်းၼၼ်ႉဝႆႉတီႈသဝ်ၽၵ်းတူႁိူၼ်းသူဢိၵ်ႇတင်းသဝ်ၽၵ်းတူဝဵင်းသူတႃႉ၊-
ပေႃးႁဵတ်းၸိူဝ်ႉၼင်ႇၼၼ်ၸိုင်၊ၸူဝ်ႈသူဢိၵ်ႇတင်းၸူဝ်ႈလုၵ်ႈပၢၼ်လၢၼ်သူ ဢသၢၵ်ႈတၵ်းယၢဝ်းယိုၼ်းၵႃႈၼႂ်းမိူင်းဢၼ် ထႃႇဝရႃႉၽြႃး၊ ဝႆႉၵတိဝႃႈတၵ်းပၼ်တီႈပူႇမွၼ်ႇသူၼၼ်ႉဢေႃႈ။ ၸူဝ်ႈဢၼ်တွင်ႉၽႃႉယင်းႁူမ်ႇလိၼ်မိူင်းယူႇၼႆႉသူၵေႃႈဢသၢၵ်ႈတၵ်းယၢဝ်းယိုၼ်းဢေႃႈ။
“ပႃးတင်းသဵတ်ႈၸႃႇလႄႈပႂ်ႉၵမ်ၵျၢင်ႉၸွမ်းပိင်းၺၢပ်ႈၸဝ်ႈၵႃႈဢၼ်ၵဝ်ပၼ်တီႈသူၼၼ်ႉတင်းသဵင်ႈတင်းလူင်တႃႉ။ ဢွၼ်ၵၼ်ႁၵ်ႉ ထႃႇဝရႃႉၽြႃး၊ ၽြႃးပဵၼ်ၸဝ်ႈသူသေလႄႈၵမ်ၵျၢင်ႉၸွမ်းၵႃႈဢၼ်မၼ်းၸဝ်ႈပိင်းၺၢပ်ႈဝႆႉၵူႈၸိူဝ်ႉၵူႈပိူင်လႄႈၸႂ်ၸပ်းၸွမ်းတႄႇယူႇၼႂ်းမၼ်းၸဝ်ႈတႃႉ။-
မိူဝ်ႈၼၼ်ႉ၊ ထႃႇဝရႃႉၽြႃး၊ တၵ်းႁေႃႈၵူၼ်းမဵဝ်းၸိူဝ်းၼၼ်ႉပႅတ်ႈၸွမ်းၼင်ႇဢၼ်သူယဵပ်ႇၶၢမ်ႈၶဝ်ႈမိူင်းၶဝ်ၵႂႃႇသေယဝ်ႉ၊သူတၵ်းသိမ်းဢဝ်မိူင်းၵူၼ်းမဵဝ်းဢၼ်ႁႅင်းယႂ်ႇၼႃႇလႄႈၼမ်ၵိုၼ်းၼႃႇသေသူၼၼ်ႉဢေႃႈ။-
လိၼ်ၵႃႈဢၼ်သူယဵပ်ႇၶၢမ်ႈၶဝ်ႈၵႂႃႇၼၼ်ႉသူတၵ်းတေလႆႈပိူင်ႇဢဝ်ဢေႃႈ။ သိုင်ႇၸိုင်ႈ၊ဝၢၼ်ႈမိူင်းသူတၵ်းၵႂၢင်ႈဢွၵ်ႇတႄႇဢဝ်ထိူၼ်ႇလႅင်ႉၽၢႆႇတၢင်းၸၢၼ်းၶိုၼ်ႈၵႂႃႇတေႃႇထိုင်ႁွတ်ႈလွႆ လေႇပၼုၼ်ႇ၊ ၽၢႆႇတၢင်းႁွင်ႇပုၼ်ႉဢိၵ်ႇတင်းတႄႇဢဝ်ၼမ်ႉ ဢုၽရတ်ႉ၊ ၽၢႆႇတၢင်းဝၼ်းဢွၵ်ႇတေႃႇထိုင်ႁွတ်ႈပၢင်ႇလၢႆႇ မေႇတိထေးရီးယၼ်း၊ ၽၢႆႇတၢင်းဝၼ်းတူၵ်းပုၼ်ႉဢေႃႈ။-
ၼႂ်းမိူင်းၼၼ်ႉၸိုင်၊သူႁွတ်ႈၵႂႃႇထိုင်ၵႂႃႇၵႃႈတီႈလႂ်ၵေႃႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းႁႂ်ႈၵူၼ်းတင်းလၢႆၵူဝ်ႁႄသူလႄႈၸွမ်းၵႃႈၼင်ႇဢၼ်မၼ်းၸဝ်ႈဝႆႉၵတိၼၼ်ႉၽူႈလႂ်တၵ်းဢမ်ႇႁႄႉဢမ်ႇၵင်ႈသူလႆႈသေၵေႃႉသေၵူၼ်း။
“ဝၼ်းမိူဝ်ႈၼႆႉၵဝ်ဢဝ်တၢင်းလီဢိၵ်ႇတင်းတၢင်းဢၼ်ၵိၼ်ႇဝႃႈဝႆႈၵႃႈတီႈၽၢႆႇၼႃႈသူဢေႃႈ။-
ပေႃးသူထွမ်ႇဢဝ်ပိင်းၺၢပ်ႈတြႃး ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢၼ်ၵဝ်ပၼ်သူဝၼ်းမိူဝ်ႈၼႆႉၼၼ်ႉၸိုင်၊သူတၵ်းလႆႈတၢင်းလီဢေႃႈ။-
ပေႃးသူဢမ်ႇထွမ်ႇဢမ်ႇဢဝ်ပိင်းၺၢပ်ႈၸဝ်ႈတင်းလၢႆလႄႈဝႄႈပိူင်ႈသေသဵၼ်ႈတၢင်းတြႃးၼႆႉၵႂႃႇ ႁႂ်ႈလႆႈဝႆႈၽြႃးတၢင်ႇသူႇတၢင်ႇပႃးဢၼ်သူဢမ်ႇပႆႇတွၼ်ႉဝႆႈသေပွၵ်ႈၼၼ်ႉၸမ်ႉ၊သူၵေႃႈတၵ်းလႆႈၶၢမ်ႇတၢင်းဢၼ်ၵိၼ်ႇဝႃႈဝႆႉၼၼ်ႉဢေႃႈ။-
မိူဝ်ႈဢၼ် ထႃႇဝရႃႉၽြႃး၊ ဢွၼ်ဢဝ်သူၶဝ်ႈၵႂႃႇလႄႈၸၢမ်ႇၸႃးၵႃႈၼႂ်းမိူင်းၼၼ်ႉယဝ်ႉၼၼ်ႉၸိုင်၊သူတၵ်းလႆႈဢဝ်တၢင်းလီၼၼ်ႉတၢင်ႇဝႆႉၵႃႈၼိူဝ်လွႆ ၵေႇရၸိမ်ႇ၊ လႄႈ၊ဢဝ်တၢင်းဢၼ်ၵိၼ်ႇဝႃႈၼၼ်ႉသမ်ႉတၢင်ႇဝႆႉၵႃႈၼိူဝ်လွႆ ဢေးပႃႇလႃႉ၊ ဢေႃႈ။-
(လွႆသွင်လုၵ်ႈၼႆႉမီးၽၢႆႇဝၼ်းတူၵ်းၼမ်ႉ ယေႃးတၢၼ်ႇ၊ ၵႃႈၼႂ်းဢိူင်ႇၵူၼ်းမဵဝ်း ၶႃႇၼၼိ၊ ၶဝ်ၸိူဝ်းဢၼ်ယူႇၵႃႈၼႂ်းထူင်ႉပၢင်ႇပဵင်းၼမ်ႉ ယေႃးတၢၼ်ႇ၊ ဢေႃႈ။ လွႆၸိူဝ်းၼၼ်ႉသႄႇလူင်းၵႂႃႇၽၢႆႇတၢင်းဝၼ်းတူၵ်းပုၼ်ႉလႄႈဢမ်ႇပေႃးယၢၼ်ၵႆၵၼ်တင်းတူၼ်ႈမႆႉၼိမ် မေႃႇရေး၊ ၵႃႈႁိမ်းဝဵင်း ၵိလႃႉၵႃႇလႃႉ၊ ၼၼ်ႉဢေႃႈ။)-
သူၸမ်တၵ်းတေလႆႈၶၢမ်ႈၼမ်ႉ ယေႃးတၢၼ်ႇ၊ ၵႂႃႇလႄႈသိမ်းဢဝ်မိူင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူပၼ်တီႈသူၼၼ်ႉယဝ်ႉ။ မိူဝ်ႈဢၼ်သူလႆႈၶဝ်ႈၸၢမ်ႇၸႃးမိူင်းၼၼ်ႉၼၼ်ႉၸိုင်၊-
သူတၵ်းလႆႈႁဵတ်းသတိလႄႈပႂ်ႉၵမ်ၵျၢင်ႉၸွမ်းပိင်းၺၢပ်ႈတြႃးၵႃႈဢၼ်ၵဝ်ပၼ်တီႈသူဝၼ်းမိူဝ်ႈၼႆႉၼၼ်ႉဢေႃႈ။
“ဢၼ်ၸိူဝ်းၼႆႉပဵၼ်ပိင်းၺၢပ်ႈတြႃးဢၼ်သူတၵ်းလႆႈၵမ်ၵျၢင်ႉၵႃႈၼႂ်းမိူင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇမွၼ်ႇသူပၼ်ႁႂ်ႈသူလႆႈၸၢမ်ႇၸႃးၶိင်ႇၵႃႇလႃႉမိုဝ်ႉဝၼ်းဢၼ်သူဢသၢၵ်ႈလိပ်းယူႇၵႃႈၼိူဝ်လိၼ်မိူင်းၼႆႉၸိူဝ်းၼၼ်ႉဢေႃႈ။-
ၵႃႈၼႂ်းမိူင်းဢၼ်သူတၵ်းၶဝ်ႈၵႂႃႇသိမ်းဢဝ်ၼၼ်ႉၸိုင်၊သူတၵ်းလႆႈယႃႉၽဵဝ်ႈပႅတ်ႈတီႈဢၼ်ၵူၼ်းတင်းလၢႆဝႆႈၽြႃးၶဝ်ၵႃႈတီႈၼိူဝ်လွႆလႂ်၊ၵွင်းလႂ်၊ၵႃႈတီႈတူၼ်ႈမႆႉဢၼ်ၶဵဝ်လႂ်ၸိူဝ်းၼၼ်ႉမူတ်းမူတ်းသဵင်ႈသဵင်ႈဢေႃႈ။-
တၵ်းလႆႈၵိူၼ်ႇယႃႉပႅတ်ႈၶဵင်ႇတၢင်းလူႇၶဝ်၊တၵ်းလႆႈပေႃႉထုပ်ႉသဝ်ဢၼ်ၶဝ်ၵူဝ်းၵႂၢႆႇၼၼ်ႉပႅတ်ႈဢေႃႈ။ ဢဝ်သဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ ၼၼ်ႉတုတ်ႇၽႆးပႅတ်ႈသေလႄႈၵိူၼ်ႇယႃႉပႅတ်ႈႁုၼ်ႇႁၢင်ႈသၢင်းထုၶဝ်လူမ်ႉပႅတ်ႈတႃႉ။ ယႃႇပေႁႂ်ႈၸိူဝ်းၼၼ်ႉၶိုၼ်းပဵၼ်တီႈဢၼ်ဝႆႈသႃၵူဝ်းၵႂၢႆႇထႅင်ႈသေပွၵ်ႈ။
“သူတေဢမ်ႇလႆႈဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၽြႃးပဵၼ်ၸဝ်ႈသူၸွမ်းၼင်ႇလၢႆးဢၼ်ၶဝ်ႁဵတ်းၼၼ်ႉ။-
ၵႃႈၼႂ်းသိုင်ႇၸိုင်ႈဝၢၼ်ႈမိူင်းဢၼ်ၸိူဝ်ႉၶိူဝ်းၵူၼ်းမဵဝ်းသူယူႇသဝ်းၵႃႈမီးတင်းသဵင်ႈတင်းလူင်ၼၼ်ႉ ထႃႇဝရႃႉၽြႃး၊ တၵ်းတေလိူၵ်ႈဢဝ်တီႈၼိုင်ႈပုၼ်ႈဢၼ်ၵူၼ်းတင်းလၢႆတၵ်းဢွၼ်ၵၼ်မႃးၵႃႈတီႈၽၢႆႇၼႃႈမၼ်းၸဝ်ႈႁႂ်ႈလႆႈဝႆႈသႃၵူဝ်းၵႂၢႆႇမၼ်းၸဝ်ႈၼၼ်ႉဢေႃႈ။-
သူတၵ်းလႆႈဢွၼ်ၵၼ်မႃးသၢၵ်ႈလူႇ၊ၸႃႉၸဵမ်တၢင်းလူႇဢၼ်ၽဝ်ၽႆးလႂ်၊တၢင်းလူႇၵူႈၸိူဝ်ႉၵူႈပိူင်လႂ်၊တၢင်းလူႇသိပ်းပုၼ်ႈပုၼ်ႈၼိုင်ႈလႂ်၊တၢင်းလူႇဢၼ်ၸၢပ်ႈသႅင်ႇၵၼ်တင်းၵတိသဵတ်ႈၸႃႇလႂ်၊တၢင်းလူႇဢၼ်ၸွမ်းၼင်ႇဢလူဝ်ႇၵၢင်ၸႂ်ၼၼ်ႉလႂ်၊ဢိၵ်ႇတင်းတၢင်းလူႇတူဝ်ပေႃႈဢၼ်ၵိူတ်ႇဢွၼ်တၢင်းပိူၼ်ႈၵႃႈၼႂ်းၽုင်သူဝ်းၽုင်ဝူဝ်းသူၸိူဝ်းၼၼ်ႉမႃးၸူးၵႃႈတီႈၼၼ်ႈဢေႃႈ။
ၵႃႈတီႈၼၼ်ႈၸိုင်၊ၸႃႉၸဵမ်သူလႄႈၵူၼ်းႁိူၼ်းၵူၼ်းယေးသူတၵ်းလႆႈဢွၼ်ၵၼ်ၵိၼ်မူၼ်ႈၵိၼ်ပျေႃႇၵႃႈဢၼ်မိုဝ်းသူႁဵတ်းဢွၵ်ႇမႃးၼၼ်ႉၵႃႈတီႈၽၢႆႇၼႃႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢၼ်ပၼ်တၢင်းလီတီႈသူၼၼ်ႉဢေႃႈ။
“မိူဝ်ႈဢၼ်ႁွတ်ႈထိုင်ၶိင်ႇၶႃႇယၢမ်းမၼ်းၼၼ်ႉၸိုင်၊သူတၵ်းဢမ်ႇလႆႈႁဵတ်းၸွမ်းၵႃႈဢၼ်ႁဵတ်းယူႇဝၼ်းမိူဝ်ႈၼႆႉ၊ဢၼ်ပဵၼ်တၢင်းႁဵတ်းဢၼ်ၵူၼ်းၵူႈၵေႃႉၵူႈၵူၼ်းႁဵတ်းၸွမ်းၵႃႈဢၼ်ထုၵ်ႇၸႂ်တူဝ်ၸဝ်ႈၵဝ်ႇႁင်းၽႂ်ႁင်းမၼ်းၼၼ်ႉ။-
ၵွပ်ႈပိူဝ်ႈသူဢမ်ႇပႆႇလႆႈၶဝ်ႈလိုဝ်ႈလႄႈဢမ်ႇပႆႇလႆႈၶၢမ်ႇဢဝ်ဢမူၺ်ႇမိူင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းတေပၼ်တီႈသူၼၼ်ႉဢေႃႈ။-
မိူဝ်ႈဢၼ်သူၶၢမ်ႈၼမ်ႉ ယေႃးတၢၼ်ႇ၊ ၵႂႃႇယူႇသဝ်းၵႃႈတီႈမိူင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူပၼ်ဢမူၺ်ႇႁႂ်ႈသူၶၢမ်ႇဢဝ်လႄႈလႆႈၵၢင်းလွတ်ႈသေၵႃႈတီႈၽေးရၢၼ်ႇသူႇသူ၊ႁႂ်ႈသူလႆႈယူႇလူင်ႉလီလွတ်ႈလီယဝ်ႉၼၼ်ႉၸမ်ႉ၊-
ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းတေလိူၵ်ႈဢဝ်တီႈၼိုင်ႈၶေႃၶေႃပုၼ်ႈဢၼ်သူတၵ်းတေလႆႈဝႆႈသႃမၼ်းၸဝ်ႈဢေႃႈ။ ၵႃႈတီႈၼၼ်ႈၼၼ်ႉသူတၵ်းလႆႈဢွၼ်ၵၼ်ဢဝ်မႃးၵႃႈဢၼ်ၵဝ်သင်ႇလၢတ်ႈဝႆႉဢၼ်ဝႃႈ၊ၶိူင်ႈတၢင်းလူႇဢၼ်ၽဝ်ၽႆးလႂ်၊တၢင်းလူသိပ်းပုၼ်ႈပုၼ်ႈၼိုင်ႈလႂ်၊ဢိၵ်ႇတင်းၶိူင်ႈတၢင်းလူႇဢၼ်ႁဵတ်းၵတိသဵတ်ႈၸႃႇဝႆႉတီႈ ထႃႇဝရႃႉၽြႃး၊ ၸိူဝ်းၼၼ်ႉဢေႃႈ။-
ၵႃႈတီႈၼၼ်ႈသူဢွၼ်ၵၼ်ႁဵတ်းတၢင်းဢၼ်သႂၢင်ႇသိူဝ်းမူၼ်ႈပျေႃႇၵႃႈတီႈၽၢႆႇၼႃႈ ထႃႇဝရႃႉၽြႃး၊ ႁူမ်ႈလူၺ်ႈၵၼ်တင်းလုၵ်ႈလၢင်းသူတင်းၶႃႈသူတင်းလၢႆဢိၵ်ႇတင်းၵူၼ်း လေႇဝိ၊ ၸိူဝ်းဢၼ်ယူႇသဝ်းၵႃႈၼႂ်းဝဵင်းသူ၊ဢၼ်ဢမ်ႇလႆႈၶၢမ်ႇတၢင်းဢၼ်မႅင်ႇပၼ်၊ဢိၵ်ႇတင်းဢမ်ႇလႆႈဢမူၺ်ႇလႄႈသွၼ်ႈပိုင်ႈယူႇၸွမ်းသူၸိူဝ်းၼၼ်ႉတႃႉ။-
သူတၵ်းဢမ်ႇလႆႈသၢၵ်ႈလူႇၶိူင်ႈတၢင်းလူႇသူၵႃႈတီႈဢၼ်သူလိူၵ်ႈဢဝ်ၵူၺ်းၼၼ်ႉ။-
သူတၵ်းလႆႈဢဝ်ၶိူင်ႈတၢင်းလူႇၸိူဝ်းၼၼ်ႉသၢၵ်ႈလူႇတီႈၼိုင်ႈၶေႃၶေႃ၊တီႈဢၼ် ထႃႇဝရႃႉၽြႃး၊ တၵ်းလိူၵ်ႈဢဝ်တီႈၼိုင်ႈၵႃႈၼႂ်းဢိူင်ႇၸိူဝ်ႉၶိူဝ်းသူၸိူဝ်ႉၶိူဝ်းၼိုင်ႈၼၼ်ႉဢေႃႈ။ ၵႃႈတီႈၼၼ်ႈတီႈလဵဝ်ၵူၺ်းသူတၵ်းလႆႈႁဵတ်းတၢင်းလူႇဢၼ်ၽဝ်ၽႆးတင်းလၢႆ၊ဢိၵ်ႇတင်းတၢင်းလူႇတၢင်ႇၸိူဝ်ႉတၢင်ႇဢၼ်ၸိူဝ်းဢၼ်ၵဝ်သင်ႇလၢတ်ႈတီႈသူၼၼ်ႉဢေႃႈ။
“ၼႂ်းဝႃႈၼၼ်သေၵေႃႈသူမီးဢၶႂၢင်ႉဢၼ်လႆႈႁႅမ်ၵိၼ်ၼိူဝ်ႉၵႃႈတီႈၼႂ်းဝဵင်းဢၼ်သူယူႇၵူႈတီႈၵူႈလႅၼ်ၼၼ်ႉဢေႃႈ။ ၸွမ်းၵႃႈၼင်ႇဢၼ် ထႃႇဝရႃႉၽြႃး၊ ပၼ်တၢင်းလီတီႈသူၼၼ်ႉၵႃႈဢၼ်သူၵိၼ်လႆႈၼၼ်ႉၵိၼ်တႃႉ။ သူၵႃႈမီးတင်းသဵင်ႈတင်းလူင်၊ၵေႃႉဢၼ်မူတ်းသႂ်၊ၵေႃႉဢၼ်ဢမ်ႇမူတ်းသႂ်၊မီးဢၶႂၢင်ႉဢၼ်ၵိၼ်ၼိူဝ်ႉၼၼ်ႉမိူၼ်ၸိူဝ်ႉၼင်ႇဢၼ်သူၵိၼ်ၼိူဝ်ႉယိူင်းၼိူဝ်ႉၵႂၢင်ၼၼ်ႉဢေႃႈ။-
ၵူၺ်းၵႃႈ၊သူဢမ်ႇလႆႈၵိၼ်လိူတ်ႈမၼ်း။ တၵ်းလႆႈထွၵ်ႇပႅတ်ႈၵႃႈၼိူဝ်လိၼ်မိူၼ်ၸိူဝ်ႉၼင်ႇဢၼ်ထွၵ်ႇၼမ်ႉၼၼ်ႉဢေႃႈ။-
ၶိူင်ႈတၢင်းလူႇသေၸိူဝ်ႉသေပိူင်ဢၼ်သၢၵ်ႈလူႇတီႈ ထႃႇဝရႃႉၽြႃး၊ ယဝ်ႉၼၼ်ႉၸမ်ႉ၊ဢမ်ႇလႆႈၵိၼ်ၵႃႈတီႈဢၼ်သူယူႇသဝ်းၼၼ်ႉ။ ပဵၼ်ၶဝ်ႈပိူၵ်ႇ၊ၼမ်ႉမၢၵ်ႇၸပိတ်ႉ၊ၼမ်ႉမၼ်းဢၼ်ပဵၼ်သိပ်းပုၼ်ႈပုၼ်ႈၼိုင်ႈသေဢမ်ႇဝႃႈ၊တူဝ်ပေႃႈဢၼ်ၵိူတ်ႇဢွၼ်တၢင်းပိူၼ်ႈၵႃႈတီႈသူဝ်း၊ဝူဝ်းသူသေဢမ်ႇဝႃႈ၊ၶိူင်ႈတၢင်းလူႇဢၼ်ႁဵတ်းၵတိသဵတ်ႈၸႃႇတီႈ ထႃႇဝရႃႉၽြႃး၊ ၸိူဝ်းၼၼ်ႉသေဢမ်ႇဝႃႈ၊တၢင်းလူႇဢၼ်ၸွမ်းၼင်ႇဢလူဝ်ႇၵၢင်ၸႂ်သေဢမ်ႇဝႃႈ၊ဢမ်ႇၼၼ်တၢင်းလူႇတၢင်ႇၸိူဝ်ႉတၢင်ႇပိူင်ၸိူဝ်းၼၼ်ႉသေဢမ်ႇဝႃႈ၊-
ၸႃႉၸဵမ်သူလႄႈလုၵ်ႈလၢင်းသူ၊ႁူမ်ႈလူၺ်ႈၵၼ်တင်းၶႃႈသူတင်းလၢႆ၊ဢိၵ်ႇတင်းၵူၼ်း လေႇဝိ၊ ဢၼ်သွၼ်ႈပိုင်ႈယူႇၼႂ်းဝဵင်းသူတၵ်းလႆႈဢွၼ်ၵၼ်ၵိၼ်ၶိူင်ႈတၢင်းလူႇၸိူဝ်းၼၼ်ႉလႄႈသႂၢင်ႇသိူဝ်းမူၼ်ႈပျေႃႇၵႃႈတီႈၽၢႆႇၼႃႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူၵႃႈၼႂ်းလွင်ႈတၢင်းဢၼ်သူႁဵတ်းၵူႈၸိူဝ်ႉၵူႈပိူင်ၼၼ်ႉဢေႃႈ။-
ႁဵတ်းသတိလွင်ႈၼင်ႇႁိုဝ်သူတေဢမ်ႇလူင်ဢမ်ႇလိုမ်းၵူၼ်း လေႇဝိ၊ ၵႃႈၸူဝ်ႈဢၼ်သူယင်းဢသၢၵ်ႈလိပ်းယူႇၵႃႈၼိူဝ်လိၼ်မိူင်းၼႆႉၼၼ်ႉတႃႉ။
“မိူဝ်ႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူၶႂၢၵ်ႈဢိူင်ႇၶႂၢၵ်ႈလႅၼ်လိၼ်သူၵႂၢင်ႈမႃးၸွမ်းၵႃႈၼင်ႇဢၼ်မၼ်းၸဝ်ႈဝႆႉၵတိၼၼ်ႉ၊သူတေဝႃႈ၊ ‘ၵဝ်ၶႂ်ႈၵိၼ်ၼိူဝ်ႉ’ ဝႃႈၼႆၵွပ်ႈပိူဝ်ႈသူမၵ်ႉၼိူဝ်ႉၼၼ်ႉလႄႈၵႃႈဢၼ်သူၵိၼ်လႆႈၼၼ်ႉၵိၼ်တႃႉ။-
ပေႃးတီႈဢၼ်မၵ်းၶၢၼ်းဝႆႉတႃႇတေဝႆႈသႃၵူဝ်းၵႂၢႆႇၽြႃးပဵၼ်ၸဝ်ႈၼၼ်ႉၵႆၼႃႇၸိုင်၊မိူဝ်ႈဢၼ်သူမီးဢလူဝ်ႇမိူဝ်ႈလႂ်သေဢမ်ႇဝႃႈ၊သူမီးဢၶႂၢင်ႉဢၼ်တၵ်းႁႅမ်ဝူဝ်း၊ဢမ်ႇၼၼ်သူဝ်းသူဢၼ် ထႃႇဝရႃႉၽြႃး၊ ပၼ်တီႈသူဝႆႉၼၼ်ႉသေလႄႈၵိၼ်ၵႃႈတီႈႁိူၼ်းသူၸွမ်းၵႃႈၼင်ႇဢၼ်ၵဝ်သင်ႇလၢတ်ႈသူၼၼ်ႉတႃႉ။-
ၵေႃႉဢၼ်မူတ်းသႂ်၊ၵေႃႉဢၼ်ဢမ်ႇမူတ်းသႂ်၊ၵေႃႉလႂ်သေဢမ်ႇဝႃႈ၊တၵ်းလႆႈၵိၼ်ၼိူဝ်ႉၼၼ်ႉမိူၼ်ၸိူဝ်ႉၼင်ႇဢၼ်ၵိၼ်ၼိူဝ်ႉယိူင်းၼိူဝ်ႉၵႂၢင်ၼၼ်ႉဢေႃႈ။-
ၵူၺ်းၵႃႈ၊ဢမ်ႇလႆႈၵိၼ်လိူတ်ႈမၼ်းၼၼ်ႉ။ လိူတ်ႈၸမ်ႉ၊ပဵၼ်ဢသၢၵ်ႈဢေႃႈ။ သူဢမ်ႇလႆႈၵိၼ်ဢသၢၵ်ႈလူၺ်ႈၵၼ်တင်းၼိူဝ်ႉမၼ်းၼၼ်ႉ။-
ဢမ်ႇလႆႈၵိၼ်လိူတ်ႈ။ တၵ်းလႆႈထွၵ်ႇပႅတ်ႈၵႃႈၼိူဝ်လိၼ်မိူၼ်ၸိူဝ်ႉၼင်ႇဢၼ်ထွၵ်ႇၼမ်ႉၼၼ်ႉဢေႃႈ။-
ပေႃးသူထွမ်ႇဢဝ်ပိင်းၺၢပ်ႈတြႃးၼႆႉၸိုင်၊တၵ်းပဵၼ်တၢင်းဢၼ်ထုၵ်ႇၸႂ် ထႃႇဝရႃႉၽြႃး၊ လႄႈၸႃႉၸဵမ်သူလႄႈလုၵ်ႈလၢင်းသူတၵ်းလႆႈလီလႆႈပဵၼ်ဢေႃႈ။-
ဢဝ်ၶိူင်ႈတၢင်းလူႇသူ ဢိၵ်ႇတင်းၶိူင်ႈပိူင်ဢၼ်ႁဵတ်းၵတိသဵတ်ႈၸႃႇတီႈ ထႃႇဝရႃႉၽြႃး၊ ၼၼ်ႉၵႂႃႇၵႃႈတီႈဢၼ်မၵ်းၶၢၼ်းဝႆႉတႃႇတေဝႆႈသႃၵူဝ်းၵႂၢႆႇၽြႃးပဵၼ်ၸဝ်ႈၼၼ်ႉတႃႉ။-
တၵ်းလႆႈသၢၵ်ႈလူႇၶိူင်ႈတၢင်းလူႇဢၼ်တုတ်ႇၽႆးၵႃႈၼိူဝ်ၶဵင်ႇတၢင်းလူႇ ထႃႇဝရႃႉၽြႃး၊ ဢေႃႈ။ လိူတ်ႈတူဝ်တၢင်းလူႇၸိုင်၊သူတၵ်းလႆႈဢဝ်လေႃႇသႂ်ႇၵႃႈၼိူဝ်ၶဵင်ႇတၢင်းလူႇ ထႃႇဝရႃႉၽြႃး၊ ၽြႃးပဵၼ်ၸဝ်ႈသူလႄႈ၊ၼိူဝ်ႉမၼ်းၸမ်ႉ၊သူတၵ်းလႆႈဢဝ်ၵိၼ်ဢေႃႈ။-
ပႃးတင်းသဵတ်ႈၸႃႇလႄႈထွမ်ႇဢဝ်ၵႃႈဢၼ်ၵဝ်ပိင်းၺၢပ်ႈဝႆႉတီႈသူၼၼ်ႉၵူႈၸိူဝ်ႉၵူႈပိူင်တႃႉ။ တၵ်းပဵၼ်တၢင်းဢၼ်လႆႈလီလႆႈပဵၼ်ပုၼ်ႈသူဢိၵ်ႇတင်းလုၵ်ႈလၢၼ်သူတႃႇသေႇ၊ၵွပ်ႈပိူဝ်ႈသူတၵ်းဢွၼ်ၵၼ်ႁဵတ်းၵႃႈဢၼ်လီဢၼ်ထုၵ်ႇဢိၵ်ႇတင်းၵႃႈဢၼ်ထုၵ်ႇၸႂ်မႅၼ်ႈၸႂ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။
“ ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းယႃႉၽဵဝ်ႈပႅတ်ႈၵူၼ်းမဵဝ်းဢၼ်သူယဵပ်ႇၶၢမ်ႈၶဝ်ႈမိူင်းၶဝ်ၵႂႃႇၼၼ်ႉသေလႄႈသူၵေႃႈတၵ်းတေလႆႈသိမ်းဢဝ်လႄႈၸၢမ်ႇၸႃးၵႃႈၼႂ်းမိူင်းၼၼ်ႉဢေႃႈ။-
လိုၼ်းသေဢၼ် ထႃႇဝရႃႉၽြႃး၊ ယႃႉၽဵဝ်ႈပႅတ်ႈၵူၼ်းမဵဝ်းၸိူဝ်းၼၼ်ႉယဝ်ႉၼၼ်ႉၸိုင်၊ယႃႇပေလွင်ႈၵႂႃႇၸွမ်းၵႂႃႇၼႂ်းၽႃႇသႃႇတြႃးၶဝ်။ လွင်ႈတၢင်းၼၼ်ႉၸၢင်ႈပဵၼ်တူင်ႇႁႅဝ်ႉတူင်ႇၶိုမ်းတီႈသူဢေႃႈ။ ဢမ်ႇလႆႈတွင်ႈထၢမ်တူၺ်းလွင်ႈတၢင်းဢၼ်ၶဝ်ႁဵတ်းၸိူဝ်ႉၼင်ႇႁိုဝ်ဝႆႈၽြႃးၶဝ်ပုၼ်ႈဢၼ်သူတၵ်းယိူင်ႈၸွမ်းၼၼ်ႉ၊-
ယႃႇပေယိူင်ႈၸွမ်းလၢႆးၶဝ်လႄႈဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၽြႃးပဵၼ်ၸဝ်ႈသူ။ ၶဝ်ၼၼ်ႉႁဵတ်းၵႃႈဢၼ် ထႃႇဝရႃႉၽြႃး၊ လီႁင်ႈဢဵတ်ႇသဵတ်ႇၼၼ်ႉတီႈၽြႃးၶဝ်ၸိူဝ်းၼၼ်ႉယဝ်ႉ။ လုၵ်ႈၸၢႆးၶဝ်၊လုၵ်ႈယိင်းၶဝ်ၵေႃႈယင်းဢဝ်တုတ်ႇၽႆးလႄႈသၢၵ်ႈလူႇတီႈၽြႃးၶဝ်ဢေႃႈ။
“ဢွၼ်ၵၼ်ပႂ်ႉၵမ်ပႂ်ႉၸွမ်းၵႃႈၼင်ႇဢၼ်ၵဝ်ပိင်းၺၢပ်ႈဝႆႉတီႈသူၼၼ်ႉၵူႈၸိူဝ်ႉၵူႈပိူင်တႃႉ။ ဢမ်ႇလႆႈထၢပ်ႈသႂ်ႇထႅင်ႈ၊ဢမ်ႇလႆႈၼုၵ်ႈဢွၵ်ႇပႅတ်ႈသေၵႃႈၼႂ်းပိင်းၺၢပ်ႈၸဝ်ႈၸိူဝ်းၼၼ်ႉလႃးလႃး။
“ပေႃးပရေႃးၽႅတ်ႈ သေၵေႃႉၵေႃႉ၊ဢမ်ႇၼၼ်ၵေႃႈၵေႃႉဢၼ်ၸၢင်ႈၼွၼ်းၽၼ်ႁၼ်ၼၼ်ႉပေႃႇမႃးလႄႈ၊ႁဵတ်းၼႄၼိမိၵ်ႈလၢၵ်ႈၶၼႃႇလွင်ႈတၢင်းဢၼ်လီဢၢမ်းသေၸိူဝ်ႉသေပိူင်သေယဝ်ႉလၢတ်ႈတီႈသူလႄႈဝႃႈ၊-
‘ဢွၼ်ၵၼ်ၵႂႃႇဝႆႈၽြႃးတၢင်ႇသူႇတၢင်ႇပႃးတႃႉႁဝ်း။ ဢွၼ်ၵၼ်ႁဵတ်းဝၢတ်ႈတီႈၶဝ်တႃႉႁဝ်း၊’ ဝႃႈၼႆႁႂ်ႈသူၸွမ်းလင်ၽြႃးဢၼ်သူဢမ်ႇႁုၼၼ်ႉလႄႈၼိမိၵ်ႈလၢၵ်ႈၶၼႃႇၶဝ်ၼၼ်ႉပဵၼ်မႃးၸွမ်းတႄႉတႄႉသေၵေႃႈ၊-
ယႃႇပေထွမ်ႇဢဝ်ၵႂၢမ်းၶဝ်ၸိူဝ်းၼၼ်ႉ။ ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢဝ်ၶဝ်ၸိူဝ်းၼၼ်ႉၸၢမ်းတူၺ်းႁႂ်ႈလႆႈႁုလွင်ႈဢၼ်သူပႃးၸႂ်ပႃးၶေႃးႁၵ်ႉ ထႃႇဝရႃႉၽြႃး၊ ၽြႃးပဵၼ်ၸဝ်ႈသူႁိုဝ်း၊ဢမ်ႇႁၵ်ႉႁိုဝ်းၼၼ်ႉဢေႃႈ။-
ၸွမ်းလင် ထႃႇဝရႃႉၽြႃး၊ လႄႈၵူဝ်ႁႄမၼ်းၸဝ်ႈတႃႉ။ ထွမ်ႇဢဝ်ၵႂၢမ်းမၼ်းၸဝ်ႈလႄႈပႂ်ႉၵမ်ပႂ်ႉၸွမ်းပိင်းၺၢပ်ႈမၼ်းၸဝ်ႈတႃႉ။ ပႃးတင်းသဵတ်ႈၸႃႇလႄႈၵူဝ်းၵႂၢႆႇမၼ်းၸဝ်ႈတႃႉ။-
ၵေႃႉဢၼ်ႁဵတ်းပရေႃးၽႅတ်ႈ တင်းၵေႃႉဢၼ်ၸၢင်ႈၼွၼ်းၽၼ်ႁၼ်ၼၼ်ႉသူတၵ်းလႆႈဢဝ်တၢႆပႅတ်ႈ၊ၵွပ်ႈပိူဝ်ႈဢၼ်မၼ်းၸူဝ်းဢဝ်သူၶတ်းၶႅင်ႁႅင်းတႃႉတေႃႇ ထႃႇဝရႃႉၽြႃး၊ ၽြႃးပဵၼ်ၸဝ်ႈဢၼ်ၵႄႇသႄႇဢဝ်သူဢွၵ်ႇမိူင်း ဢေးၵျိပ်ႉ၊ တီႈဢၼ်သူလႆႈၶၢမ်ႇႁဵတ်းၶႃႈပိူၼ်ႈမႃးၼၼ်ႉဢေႃႈ။ ၵူၼ်းၸိူဝ်ႉၼင်ႇၼႆႁၢႆႉမိူၵ်ႈလႄႈၶတ်းၸႂ်ဢွၼ်ႁူဝ်သူႁႂ်ႈသူလႆႈဢွၵ်ႇသေၵႃႈၼႂ်းသဵၼ်ႈတၢင်းတြႃးဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူသင်ႇလၢတ်ႈဝႆႉပုၼ်ႈဢၼ်တၵ်းၸွမ်းၼၼ်ႉဢေႃႈ။ မၼ်းၼၼ်ႉတၵ်းလႆႈၶၢမ်ႇတၢင်းဢၼ်ဢဝ်တၢႆပႅတ်ႈပုၼ်ႈလွင်ႈၼင်ႇႁိုဝ်သူတၵ်းပႄႇၽဵဝ်ႈတုၸရိူၵ်ႈပႅတ်ႈသေၵႃႈၼႂ်းသူဢေႃႈ။
“ပိၵ်ႉသမ်ႉပီႈဢၢႆႈၼွင်ႉၸၢႆးသူ၊လုၵ်ႈၸၢႆးလုၵ်ႈယိင်းသူ၊မေးသူဢၼ်ႁၵ်ႉၼႃႇ၊ၵေႃႉသႄႈဢၼ်ၸမ်ၸႂ်သူ၊လွမ်တိုၵ်းယူင်းၸူဝ်းဢဝ်သူလႄႈဝႃႈ၊ ‘ဢွၼ်ၵၼ်ၵႂႃႇဝႆႈၽြႃးတၢင်ႇသူႇတၢင်ႇပႃးလႄႈႁဵတ်းဝၢတ်ႈတီႈၶဝ်တႃႉႁဝ်း၊’ ဝႃႈၼႆလွင်ႈၽြႃးဢၼ်သူဢမ်ႇႁု၊ပူႇမွၼ်ႇသူၵေႃႈဢမ်ႇႁုၼၼ်ႉ။-
ၼႂ်းၶဝ်ၼၼ်ႉသေၵေႃႉၵေႃႉတၵ်းပၼ်ႁႅင်းႁႂ်ႈသူဝႆႈၽြႃးတင်းလၢႆ၊ဢၼ်မီးတီႈၸမ်တီႈၵႆၸိူဝ်ႉၼင်ႇၼၼ်ၸိုင်၊-
ယႃႇပေပၼ်ဢၶႂၢင်ႉႁႂ်ႈမၼ်းၸူဝ်းဢဝ်သူ။ ယင်းဢမ်ႇထွမ်ႇဢဝ်ၵႂၢမ်းမၼ်းလႄႈယူႇတႃႉ။ ယႃႇပေဢဵတ်းလူမၼ်း။ ယႃႇပေသေလၢႆမၼ်း။-
ဢဝ်မၼ်းတၢႆပႅတ်ႈတႃႉ။ မႂ်းတၵ်းလႆႈပဵၼ်ၵေႃႉဢၼ်ဢဝ်မၢၵ်ႇႁိၼ်ပိုဝ်ႈသႂ်ႇဢွၼ်တၢင်းသေပိူၼ်ႈသေလႄႈ၊သမ်ႉႁႂ်ႈၵူၼ်းတင်းသဵင်ႈဢဝ်မၢၵ်ႇႁိၼ်ပိုဝ်ႈသႂ်ႇမၼ်းတႃႉ။-
ပိုဝ်ႈသႂ်ႇႁႂ်ႈမၼ်းတၢႆတႃႉ။ လွင်ႈမၼ်းၸမ်ႉ၊မၼ်းပဵၼ်ၵေႃႉဢၼ်ၶတ်းၸႂ်ဢွၼ်ႁူဝ်ႁႂ်ႈသူလႆႈပိူင်ႈဢွၵ်ႇသေၵႃႈၼႂ်းသဵၼ်ႈတၢင်းတြႃး ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢၼ်ၵႄႇသႄႇဢဝ်သူဢွၵ်ႇမိူင်း ဢေးၵျိပ်ႉ၊ တီႈဢၼ်သူလႆႈၶၢမ်ႇႁဵတ်းၶႃႈပိူၼ်ႈမႃးၼၼ်ႉဢေႃႈ။-
ၵမ်းၼၼ်ႉ ၸင်ႇၵူၼ်းမဵဝ်း ဢိသရေး၊ တင်းသဵင်ႈတင်းလူင်တၵ်းလႆႈငိၼ်းလွင်ႈတၢင်းဢၼ်ပဵၼ်ၼၼ်ႉလႄႈၶဝ်တေဢွၼ်ၵၼ်ၵူဝ်ႁႄသေယဝ်ႉ၊ၽူႈလႂ်ဢမ်ႇႁတ်းႁဵတ်းႁၢႆႉႁဵတ်းႁုၵ်းၸိူဝ်ႉၼင်ႇၼၼ်ထႅင်ႈသေၵေႃႉသေၵူၼ်းဢေႃႈ။
“မိူဝ်ႈဢၼ်သူၵႂႃႇမီးယူႇၼႂ်းဝဵင်းၸိူဝ်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူပၼ်တီႈသူယဝ်ႉၼၼ်ႉသူတၵ်းတေလႆႈငိၼ်းဝႃႈ၊-
ၵူၼ်းဢၼ်ဢမ်ႇပွင်ႇလွင်ႈၵမ်ႈၽွင်ႈဢွၵ်ႇသေၵႃႈၼႂ်းၵူၼ်းမဵဝ်းသူမႃးလႄႈတိုၵ်းယူင်းၸူဝ်းဢဝ်ၵူၼ်းဝဵင်းၶဝ်ၼၼ်ႉလႄႈဝႃႈ၊ ‘ဢွၼ်ၵၼ်ၵႂႃႇဝႆႈၽြႃးတၢင်ႇသူႇတၢင်ႇပႃးတႃႉႁဝ်း၊’ ဝႃႈၼႆႁႂ်ႈၸွမ်းလင်ၽြႃးဢၼ်သူဢမ်ႇႁုၼၼ်ႉဢေႃႈ။-
ပေႃးသူလႆႈငိၼ်းဝႃႈၸိူဝ်ႉၼင်ႇၼႆၸိုင်၊သူတၵ်းလႆႈတွင်ႈထၢမ်သပ်းႁႃလွင်ႈတၢင်းၼၼ်ႉၸေးၸေးၸွတ်ႇၸွတ်ႇဢေႃႈ။ ပေႃးလွင်ႈတၢင်းဢၼ်လီႁင်ႈဢဵတ်ႇသဵတ်ႇၼၼ်ႉပဵၼ်မႃးတႄႉဢမၢၼ်ႇၶၼ်ပဵၼ်ၸိုင်၊-
သူတၵ်းလႆႈၶႃႈၽၼ်းၵူၼ်းဝဵင်းၸိူဝ်းၼၼ်ႉတၢႆတင်းသဵင်ႈတင်းမူတ်းႁူမ်ႈလူၺ်ႈၵၼ်တင်းတူဝ်တရိၵ်ႈသၢၼ်ႇၶဝ်တင်းမူတ်းဢေႃႈ။ သူတၵ်းလႆႈယႃႉၽဵဝ်ႈဝဵင်းၼၼ်ႉပႅတ်ႈတင်းသဵင်ႈတင်းမူတ်းဢေႃႈ။-
တၵ်းလႆႈဢဝ်ဢုၵ်ႉၸႃႇၶူဝ်းလဵင်းၵႃႈဢၼ်ပဵၼ်ဢုၵ်ႉၸႃႇၶူဝ်းလဵင်းၶဝ်တင်းသဵင်ႈတင်းလူင်ၼၼ်ႉၸုၵွင်ဝႆႉၵႃႈတီႈၵၢင်ပၢင်ႇၼႂ်းဝဵင်းသေလႄႈဢဝ်ၽႆးၽဝ်ပႅတ်ႈဝဵင်းၼၼ်ႉဢိၵ်ႇတင်းဢုၵ်ႉၸႃႇၼၼ်ႉႁႂ်ႈပဵၼ်တၢင်းလူႇဢၼ်တုတ်ႇၽႆးတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူတႃႉ။ သမ်ႉတၵ်းလႆႈပွႆႇဝဵင်းႁၢမ်းဝႆႉသေႇသေႇ၊ဢမ်ႇလႆႈၶိုၼ်းတႄႇၶိုၼ်းႁဵတ်း။-
ဢုၵ်ႉၸႃႇဢၼ်ထုၵ်ႇတၢင်းဢၼ်ၵိၼ်ႇဝႃႈႁႂ်ႈလုႁႂ်ႈလႅဝ်ယဝ်ႉၼၼ်ႉယႃႇႁႂ်ႈမီးဝႆႉပုၼ်ႈသူသေၸိူဝ်ႉသေဢိတ်း။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ ထႃႇဝရႃႉၽြႃး၊ တၵ်းႁႂ်ႈတၢင်းၸႂ်မႆႈၶႂ်ႈၸႃႉမၼ်းၸဝ်ႈဢၼ်ႁၢဝ်ႈၵျၢမ်းၼႃႇၼၼ်ႉထၢတ်ႇယဵၼ်သေလႄႈတၵ်းဢဵတ်းလူသူဢေႃႈ။ မၼ်းၸဝ်ႈတၵ်းမီးၵရုၼႃႇတီႈသူလႄႈႁႂ်ႈသူယႂ်ႇၽႄႈၼမ်ၵိုၼ်းၸွမ်းၵႃႈၼင်ႇဢၼ်မၼ်းၸဝ်ႈဝႆႉၵတိတီႈပူႇမွၼ်ႇသူၼၼ်ႉ။-
ၼႂ်းမိူဝ်ႈဢၼ်သူထွမ်ႇဢဝ်ၵႂၢမ်း ထႃႇဝရႃႉၽြႃး၊ ၽြႃးပဵၼ်ၸဝ်ႈသူၵႃႈဢၼ်ၵဝ်ပၼ်တီႈသူဝၼ်းမိူဝ်ႈၼႆႉလႄႈ၊ပႂ်ႉၵမ်ပႂ်ႉၸွမ်းပိင်းၺၢပ်ႈမၼ်းၸဝ်ႈတင်းသဵင်ႈတင်းမူတ်းႁႂ်ႈထုၵ်ႇမႅၼ်ႈတႃ ၸဝ်ႈထႃႇဝရႃႉၽြႃး၊ သူၼၼ်ႉ၊” ဝႃႈၼင်ႇၼႆဢေႃႈ။
“သူပဵၼ်ၵူၼ်း ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။ ပိူဝ်ႈၼႆလႄႈမိူဝ်ႈဢၼ်သူႁႆႈႁွင်ႉပွင်ႉၶၢင်းပုၼ်ႈၵူၼ်းတၢႆၼၼ်ႉၸိုင်၊သူတၵ်းဢမ်ႇလႆႈထိူဝ်လႆႈပၢတ်ႇၼိူဝ်ႉသူ။ ဢမ်ႇလႆႈထႃၶူၼ်ၼႃႈၽၢၵ်ႇသူႁႂ်ႈမၼ်းလၢၼ်ႉဝႆႉမိူၼ်ၸိူဝ်ႉၼင်ႇပိူၼ်ႈတၢင်ႇၵေႃႉႁဵတ်းၼၼ်ႉ။-
လွင်ႈမၼ်းၸမ်ႉ၊သူပဵၼ်ၵူၼ်းမူတ်းၸၢင်ႇတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။ ထႃႇဝရႃႉၽြႃး၊ လိူၵ်ႈဢဝ်သူဢွၵ်ႇသေၵႃႈၼႂ်းၵူၼ်းလေႃးၵီႇတင်းလၢႆမႃးႁႂ်ႈသူပဵၼ်ၵူၼ်းမဵဝ်းဢၼ်မၼ်းၸဝ်ႈပိူင်ႇဢေႃႈ။
“သူတၵ်းဢမ်ႇလႆႈၵိၼ်မဵဝ်းဢၼ် ထႃႇဝရႃႉၽြႃး၊ ဝႃႈဢမ်ႇမူတ်းသႂ်ၼၼ်ႉသေၸိူဝ်ႉသေပိူင်။-
တရိၵ်ႈသၢၼ်ႇမဵဝ်းဢၼ်သူၵိၼ်လႆႈၸမ်ႉ၊ပဵၼ်ဝူဝ်း၊သူဝ်း၊ပႄႉ၊-
တိုင်ႈ၊ၵႂၢင်၊ယိူင်း၊ၽၢၼ်း၊ယီး၊ပႄႉၽႃ၊ၸၢတ်ႇၶၢႆးၸိူဝ်းၼႆႉ၊-
ဢၼ်ပဵၼ်တရိၵ်ႈသၢၼ်ႇၵႃႈဢၼ်ၵိပ်ႈတႅၵ်ႇလႄႈတိၼ်ပဵၼ်ငၢမ်ႈဝႆႉသေယဝ်ႉ၊သမ်ႉၵဵဝ်ႉဢိူင်ႈၼၼ်ႉဢေႃႈ။-
ၼႂ်းဝႃႈၼၼ်သေၵေႃႈ၊တရိၵ်ႈသၢၼ်ႇဢၼ်ၵိပ်ႈဢမ်ႇတႅၵ်ႇ၊တိၼ်ဢမ်ႇပဵၼ်ငၢမ်ႈ၊သမ်ႉဢမ်ႇၵဵဝ်ႉဢိူင်ႈၼၼ်ႉတၵ်းဢမ်ႇလႆႈၵိၼ်လႃးလႃး။ တၵ်းဢမ်ႇလႆႈၵိၼ်ၵလႃႇဢုၵ်ႈ၊ပၢင်တၢႆး၊ပၢင်တၢႆးသၽၢၼ်ႇၸိူဝ်းၼၼ်ႉ။ ၶဝ်ၵဵဝ်ႉဢိူင်ႈသေၵေႃႈၵိပ်ႈဢမ်ႇတႅၵ်ႇ၊တိၼ်ဢမ်ႇပဵၼ်ငၢမ်ႈဝႆႉ။ တၵ်းလႆႈမၢတ်ႈပဵၼ်တူဝ်ဢၼ်ဢမ်ႇမူတ်းသႂ်ဢေႃႈ။-
သူတၵ်းဢမ်ႇလႆႈၵိၼ်မူ။ ပိၵ်ႉသမ်ႉၵိပ်ႈတႅၵ်ႇသေၵေႃႈ၊ၶဝ်ဢမ်ႇၵဵဝ်ႉဢိူင်ႈ။ တၵ်းလႆႈမၢတ်ႈပဵၼ်တူဝ်ဢၼ်ဢမ်ႇမူတ်းသႂ်ဢေႃႈ။ သူဢမ်ႇလႆႈၵိၼ်ၼိူဝ်ႉတူဝ်သတ်းၸိူဝ်းၼၼ်ႉ။ တူဝ်တၢႆၶဝ်ၵေႃႈဢမ်ႇလႆႈတိူဝ်ႉလႆႈထုၵ်ႇ။
“ပႃမဵဝ်းလႂ်သေဢမ်ႇဝႃႈ၊ပႃဢၼ်မီးပိၵ်ႇဝီးဢိၵ်ႇတင်းမီးၵဵတ်းၼၼ်ႉသူၵိၼ်လႆႈၵူႈမဵဝ်းဢေႃႈ။-
ၵူၺ်းၵႃႈ၊တူဝ်သတ်းဢၼ်ဢသၢၵ်ႈလိပ်းၼႂ်းၼမ်ႉလႄႈဢမ်ႇမီးပိၵ်ႇဝီးဢိၵ်ႇတင်းၵဵတ်းၸိုင်၊သူတၵ်းဢမ်ႇလႆႈၵိၼ်။ တၵ်းလႆႈမၢတ်ႈပဵၼ်တူဝ်ဢၼ်ဢမ်ႇမူတ်းသႂ်ဢေႃႈ။
“ၼူၵ်ႉဢၼ်မူတ်းသႂ်ၵူႈၸိူဝ်ႉၵူႈမဵဝ်းၸိုင်၊သူၵိၼ်လႆႈယူႇဢေႃႈ။-
ၼူၵ်ႉဢၼ်သူဢမ်ႇၵိၼ်လႆႈၼၼ်ႉၸမ်ႉ၊ပဵၼ်ၶၢင်ႇလေႃႉ၊လၢင်းတႃႉ၊ယဵဝ်ႈ၊-
ၵွၼ်ႇ၊ၵႃဢိုဝ်ႈၵူႈမဵဝ်းမဵဝ်း၊မၢင်ႇၵူးလေႃးတင်းဝိင်ႇၸိူဝ်းၼၼ်ႉ။
“မႅင်းဢၼ်မီးပိၵ်ႇၵူႈၸိူဝ်ႉၵူႈပိူင်ပဵၼ်ဢၼ်ဢမ်ႇမူတ်းသႂ်လႄႈသူတၵ်းဢမ်ႇလႆႈၵိၼ်သေမဵဝ်း။-
မႅင်းဢၼ်မူတ်းသႂ်ၸိုင်၊သူၵိၼ်လႆႈဢေႃႈ။
“တူဝ်တရိၵ်ႈသၢၼ်ႇဢၼ်တၢႆၵူၺ်းမၼ်းၼၼ်ႉသူဢမ်ႇလႆႈၵိၼ်။ သူမီးဢၶႂၢင်ႉပုၼ်ႈတၵ်းလႆႈပၼ်တီႈၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈယူႇၸွမ်းသူၼၼ်ႉႁႂ်ႈၶဝ်ၵိၼ်ဢေႃႈ။ ဢမ်ႇၼၼ်ၵေႃႈသူမီးဢၶႂၢင်ႉပုၼ်ႈတၵ်းလႆႈၶၢႆပၼ်တီႈၵူၼ်းတၢင်ႇဝၢၼ်ႈတၢင်ႇမိူင်းဢေႃႈ။ လွင်ႈမၼ်းၸမ်ႉ၊သူပဵၼ်ၵူၼ်းမူတ်းၸၢင်ႇတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။ “တၵ်းဢမ်ႇလႆႈဢဝ်ၼိူဝ်ႉသူဝ်းဢွၼ်ႇပႄႉဢွၼ်ႇတူမ်ႈၼႂ်းၼမ်ႉၼူမ်းမႄႈမၼ်း။
“ၵႃႈဢၼ်ယႂ်ႇၽႄႈတူဝ်းတွၼ်းဢွၵ်ႇပဵၼ်မႃးၵႃႈၼႂ်းႁႆႈၼႂ်းၼႃးသူၵူႈပီၵူႈပီၼၼ်ႉၸိုင်၊သူတၵ်းလႆႈၽႄဢွၵ်ႇဝႆႉသိပ်းပုၼ်ႈပုၼ်ႈၼိုင်ႈဢမၢၼ်ႇၶၼ်ပဵၼ်ဢေႃႈ။-
ၼင်ႇၼၼ်လႄႈၵႂႃႇၵႃႈတီႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူလိူၵ်ႈဝႆႉပုၼ်ႈတၵ်းဝႆႈသႃၵူဝ်းၵႂၢႆႇမၼ်းၸဝ်ႈၼၼ်ႉသေလႄႈ၊ၵႃႈတီႈၼၼ်ႈသူတၵ်းလႆႈဢွၼ်ၵၼ်ၵိၼ်ၵႃႈတီႈၽၢႆႇၼႃႈ ထႃႇဝရႃႉၽြႃး၊ ၼႂ်းသိပ်းပုၼ်ႈပုၼ်ႈၼိုင်ႈ၊ဢၼ်ပဵၼ်ၶဝ်ႈပိူၵ်ႇသူ၊ၼမ်ႉမၢၵ်ႇၸပိတ်ႉသူ၊ၼမ်ႉမၼ်းမၢၵ်ႇသၢၼ်ႇလုၼ်ႇသူ၊သူဝ်း၊ဝူဝ်းတူဝ်ပေႃႈၸိူဝ်းဢၼ်ၵိူတ်ႇဢွၼ်တၢင်းပိူၼ်ႈၼၼ်ႉဢေႃႈ။ သူတၵ်းလႆႈႁဵတ်းၸိူဝ်ႉၼင်ႇၼႆႁႂ်ႈလႆႈသွၼ်ဢဝ်လွင်ႈတၢင်းဢၼ်တၵ်းလႆႈရူဝ်ႇသေႇၵူဝ်ယမ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူၼၼ်ႉဢေႃႈ။-
ပေႃးတီႈဢၼ်မၵ်းၶၢၼ်းဝႆႉတႃႇတေဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၼၼ်ႉၵႆၼႃႇလူင်လၢင်လႄႈၶၢဝ်းတၢင်းယၢပ်ႇၼႃႇထၢၼ်ႈပေႃးသူဢမ်ႇပႄႉဢဝ်ၶိူင်ႈပိူင်ၼႂ်းသိပ်းပုၼ်ႈပုၼ်ႈၼိုင်ႈဢၼ် ထႃႇဝရႃႉၽြႃး၊ ပၼ်တၢင်းလီလႄႈလႆႈမႃးၸိူဝ်းၼၼ်ႉၸိုင်၊သူဢွၼ်ၵၼ်ႁဵတ်းၸိူဝ်ႉၼင်ႇၼႆတႃႉ။-
သူဢွၼ်ၵၼ်ဢဝ်ဢုၵ်ႉၸႃႇသူၼၼ်ႉၶၢႆသေလႄႈဢဝ်ငိုၼ်းၸိူဝ်းၼၼ်ႉပႃးၵႂႃႇၸူးၵႃႈတီႈဢၼ်မၵ်းၶၢၼ်းဝႆႉတႃႇတေဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၼၼ်ႉယဝ်ႉၸင်ႇ၊-
သိုဝ်ႉဢဝ်ၵႃႈဢၼ်ၸႂ်သူမီးဢလူဝ်ႇၶႂ်ႈၵိၼ်ၼိူဝ်ႉဝူဝ်း၊ၼိူဝ်ႉသူဝ်း၊ၼမ်ႉမၢၵ်ႇၸပိတ်ႉ၊ၼမ်ႉလဝ်ႈဢၼ်သူၶႂ်ႈၵိၼ်ၵႃႈတီႈၼၼ်ႈသေယဝ်ႉ၊ၸႃႉၸဵမ်သူ၊ဢိၵ်ႇတင်းၵူၼ်းႁိူၼ်းၵူၼ်းယေးသူဢွၼ်ၵၼ်ၵိၼ်ၽၢႆႇၼႃႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူမူၼ်ႈမူၼ်ႈပျေႃႇပျေႃႇတႃႉ။
“ၵူၼ်း လေႇဝိ၊ ၸိူဝ်းဢၼ်မီးယူႇၼႂ်းဝဵင်းလဵဝ်ၵၼ်တင်းသူၼၼ်ႉသူတၵ်းဢမ်ႇလႆပႄႇလႆႈပႅတ်ႈၶဝ်။ ၶဝ်ၼၼ်ႉၸိုင်၊ဢမ်ႇလႆႈပုၼ်ႈလႆႈတႃႇ၊ဢမ်ႇလႆႈဢမူၺ်ႇမိူၼ်ၵၼ်တင်းသူ။-
မိူဝ်ႈဢၼ်သုတ်းသၢမ်ပီယေႈပွၵ်ႈၼၼ်ႉသူတၵ်းလႆႈဢဝ်ဢၵျူဝ်းတၢင်းလီသူၼႂ်းသိပ်းပုၼ်ႈပုၼ်ႈၼိုင်ႈၼၼ်ႉဢွၵ်ႇမႃးၸုသိမ်းဝႆႉၵႃႈၼႂ်းဝဵင်းသူဢေႃႈ။-
တၢင်းၵိၼ်ၸိူဝ်းၼၼ်ႉတၵ်းလႆႈပဵၼ်ပုၼ်ႈၵူၼ်း လေႇဝိ၊ ၶဝ်ဢၼ်ၶဝ်ဢမ်ႇလႆႈၶၢမ်ႇဢမူၺ်ႇ၊ဢိၵ်ႇတင်းပုၼ်ႈၵူၼ်းတၢင်ႇဝၢၼ်ႈတၢင်ႇမိူင်း၊ပုၼ်ႈလုၵ်ႈဢွၼ်ႇၸိူဝ်းဢၼ်ၽၢၼ်ပေႃႈၽၢၼ်မႄႈ၊တင်းမႄႈမၢႆႈဢၼ်ယူႇၵႃႈၼႂ်းဝဵင်းသူၼၼ်ႉဢေႃႈ။ ၶဝ်တၵ်းလႆႈမႃးဢဝ်ၵိၼ်ဢိမ်ႇဢိမ်ႇတဵမ်တဵမ်ဢေႃႈ။ ဢွၼ်ၵၼ်ႁဵတ်းၸိူဝ်ႉၼင်ႇၼႆတႃႉ။ ပေႃးႁဵတ်းၸိုင်၊ ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းတေပၼ်တၢင်းလီၵႃႈၼိူဝ်ၵႃႈဢၼ်သူႁဵတ်းသၢင်ႈၵူႈၸိူဝ်ႉၵူႈပိူင်ၼၼ်ႉဢေႃႈ။
“မိူဝ်ႈထူၼ်ႈထိုင်ၸဵတ်းပီယေႈပွၵ်ႈသူတၵ်းလႆႈႁဵတ်းတၢင်းဢၼ်ပွႆႇၶႂၢင်းပၼ်ၼီႈဢေႃႈ။-
တြႃးတၢင်းဢၼ်ပွႆႇၶႂၢင်းပၼ်ၸမ်ႉ၊ၸဝ်ႈၼီႈၵူႈၵေႃႉတၵ်းလႆႈပွႆႇၶႂၢင်းၵႃႈဢၼ်မၼ်းၵူႈပၼ်ယိမ်ပၼ်တီႈၵူၼ်းမဵဝ်း ဢိသရေး၊ ၼင်ႇၵၼ်ၵၼ်ၼၼ်ႉဢေႃႈ။ မၼ်းဢမ်ႇလႆႈယွၼ်းၼီႈၼၼ်ႉလႃးလႃး။ လွင်ႈမၼ်းၸမ်ႉ၊ ထႃႇဝရႃႉၽြႃး၊ ပၢဝ်ႇသေႃႇလွင်ႈတၢင်းဢၼ်ပွႆႇၶႂၢင်းၼီႈၼၼ်ႉဢေႃႈ။-
သူမီးဢၶႂၢင်ႉဢၼ်လႆႈယွၼ်းဢဝ်ၼီႈတီႈၵူၼ်းတၢင်ႇဝၢၼ်ႈတၢင်ႇမိူင်းဢေႃႈ။ ဢုၵ်ႉၸႃႇၵႃႈဢၼ်ၵူၼ်းမဵဝ်းတူဝ်ၸဝ်ႈၵဝ်ႇၵူႈဝႆႉယိမ်ဝႆႉမဵဝ်းလႂ်သေၵေႃႈဢမ်ႇလႆႈၶိုၼ်းယွၼ်းဢဝ်၊တၵ်းလႆႈၶႂၢင်းလွတ်ႈပၼ်ဢေႃႈ။
“ၵူၼ်းယၢၵ်ႈၵူၼ်းၽၢၼ်တေဢမ်ႇမီးသေၵေႃႉသေၵူၼ်းတီႈၼႂ်းသူ (ၵွပ်ႈပိူဝ်ႈ ထႃႇဝရႃႉၽြႃး၊ တၵ်းပၼ်တၢင်းလီတီႈသူၵႃႈၼႂ်းမိူင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူပၼ်ႁႂ်ႈသူလႆႈၶဝ်ႈလႄႈၶၢမ်ႇဢဝ်ဢမူၺ်ႇၼၼ်ႉဢေႃႈ။)-
သူၸမ်ႉ၊ၵူၺ်းလူဝ်ႇထွမ်ႇဢဝ်သဵင်ၵႂၢမ်း ထႃႇဝရႃႉၽြႃး၊ ၽြႃးပဵၼ်ၸဝ်ႈသူလႄႈပႂ်ႉၵမ်ပႂ်ႉၸွမ်းပိင်းၺၢပ်ႈၵႃႈဢၼ်ၵဝ်ပၼ်တီႈသူဝၼ်းမိူဝ်ႈၼႆႉၼၼ်ႉၸေးၸေးၸွတ်ႇၸွတ်ႇတႃႉ။-
ထႃႇဝရႃႉၽြႃး၊ သူတၵ်းပၼ်တၢင်းလီတီႈသူၸွမ်းၵႃႈၼင်ႇဢၼ်မၼ်းၸဝ်ႈဝႆႉၵတိတီႈသူၼၼ်ႉသေယဝ်ႉ၊သူတၵ်းၵူႈပၼ်ယိမ်ပၼ်တီႈၵူၼ်းမဵဝ်းၼမ်ၼႃႇလႄႈဢမ်ႇလူဝ်ႇၵူႈဢဝ်ယိမ်ဢဝ်တီႈၽူႈလႂ်။ သူတၵ်းတေလႆႈဢုပ်ႉပိူင်ႇၵူၼ်းမဵဝ်းၼမ်ၼႃႇလႄႈ ဢမ်ႇမီးၵူၼ်းမဵဝ်းလႂ်တေလႆႈဢုပ်ႉပိူင်ႇသူလႃးလႃး။
“ၵႃႈၼႂ်းဝဵင်းသေဝဵင်းဝဵင်းၵႃႈၼႂ်းမိူင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူပၼ်တီႈသူၼၼ်ႉပေႃးမီးၵူၼ်းမဵဝ်း ဢိသရေး၊ ဢၼ်ယၢၵ်ႈၽၢၼ်သေၵေႃႉၵေႃႉၸိုင်၊ယႃႇပေထီႇပေၼဵဝ်၊ယႃႇပေငိူင်ႉဝႄႈတၢင်းဢၼ်တၵ်းၸွႆႈထႅမ်တီႈမၼ်းၼၼ်ႉ။-
တၵ်းလႆႈပႃးၸႂ်ၸေႇတၼႃႇဢၼ်ယႂ်ႇဢၼ်ၵႂၢင်ႈလႄႈၵူႈပၼ်ယိမ်ပၼ်ၵႃႈဢၼ်မၼ်းလူဝ်ႇၼၼ်ႉၵုမ်ႇၵုမ်ႇဢေႃႈ။-
ၵွပ်ႈပိူဝ်ႈပီဢၼ်ၶႂၢင်းလွတ်ႈပၼ်ၼီႈၼၼ်ႉၸမ်မႃးယဝ်ႉလႄႈယႃႇပေႁႂ်ႈမီးၸႂ်ဢၼ်ဢမ်ႇၶႂ်ႈၵူႈပၼ်ယိမ်ပၼ်ၼၼ်ႉ။ ယႃႇပေႁႂ်ႈၸႂ်သၽေႃးဢၼ်ၵူဝ်ႈၵိူၵ်ႇၼၼ်ႉလႆႈၶဝ်ႈၵႃႈၼႂ်းႁူဝ်ၸႂ်သူ။ ပေႃးသူၵိုဝ်ႁူၵိုဝ်တႃၸူးမၼ်းလႄႈယင်းဢမ်ႇပၼ်ၵူႈပၼ်ယိမ်ၵႃႈသင်သေယဝ်ႉ၊မၼ်းႁွင်ႉသႅၼ်ႇတီႈ ထႃႇဝရႃႉၽြႃး၊ ယူႇၶတ်းၵၼ်တင်းသူၸိုင်၊သူတၵ်းထူပ်းဢပျတ်ႈဢေႃႈ။-
ယင်းဢမ်ႇသွၼ်ႇဢမ်ႇတႂၢၵ်ႈ၊ယင်းဢမ်ႇသေလၢႆလႄႈပၼ်တႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းပၼ်တၢင်းလီမၢင်ႇၵလႃႇတီႈသူၼႂ်းၵၢၼ်ငၢၼ်းဢၼ်သူႁဵတ်းသၢင်ႈတင်းသဵင်ႈတင်းလူင်ၼၼ်ႉဢေႃႈ။-
ၵူၼ်းယၢၵ်ႈၵူၼ်းၽၢၼ်ဢိၵ်ႇတင်းၵေႃႉဢၼ်ၸုတ်ႈဢၼ်လုတ်ႈၵႃႈၼႂ်းၵူၼ်းမဵဝ်း ဢိသရေး၊ ၸၢင်ႈတၵ်းမီးယူႇသေႇသေႇဢေႃႈ။ ပိူဝ်ႈၼႆလႄႈၵဝ်ပိင်းၺၢပ်ႈဝႆႉတီႈသူႁႂ်ႈသူမီးၸႂ်ၸေႇတၼႃႇတီႈၶဝ်ဢေႃႈ။
“ပေႃးၼႂ်းၵူၼ်းမဵဝ်း ဢိသရေး၊ ၼင်ႇၵၼ်ၵူၼ်းၸၢႆးဢမ်ႇဝႃႈ၊ၵူၼ်းယိင်းဢမ်ႇဝႃႈ၊လႆႈၶၢႆတူဝ်ၸဝ်ႈၵဝ်ႇႁႂ်ႈပဵၼ်ၶႃႈသူၸိုင်၊လိုၼ်းသေဢၼ်မၼ်းလႆႈၶၢမ်ႇတၢင်းၸႂ်ႉတၢင်းသွႆယဝ်ႉႁူၵ်းပီလႄႈၶဝ်ႈၸဵတ်းပီမႃးၼၼ်ႉတၵ်းလႆႈပွႆႇမၼ်းလွတ်ႈသေဢေႃႈ။-
မိူဝ်ႈဢၼ်သူပွႆႇမၼ်းလွတ်ႈၼၼ်ႉယႃႇပေႁႂ်ႈမၼ်းလႆႈၵႂႃႇတူဝ်လၢႆမိုဝ်းပဝ်ႇ။-
ၼႂ်းၵႃႈဢၼ် ထႃႇဝရႃႉၽြႃး၊ ပၼ်တၢင်းလီဢၼ်ပဵၼ်ၽုင်သူဝ်းသူ၊ၶဝ်ႈပိူၵ်ႇသူ၊ၼမ်ႉမၢၵ်ႇၸပိတ်ႉသူၸိူဝ်းၼၼ်ႉတၵ်းလႆႈပႃးတင်းၸႂ်ၸေႇတၼႃႇလႄႈပၼ်မၼ်းၵႂႃႇဢေႃႈ။-
သူတၵ်းလႆႈၶုၵ်းၸႂ်လႆႈၶႆႈၸႂ်ထိုင်လွင်ႈဢၼ်သူယၢမ်ႈလႆႈၶၢမ်ႇႁဵတ်းၶႃႈၵႃႈၼႂ်းမိူင်း ဢေးၵျိပ်ႉ၊ မႃးဢိၵ်ႇတင်းလွင်ႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူၵႄႇသႄႇဢဝ်သူဢွၵ်ႇမႃးယဝ်ႉၼၼ်ႉဢေႃႈ။ ၵွပ်ႈပိူဝ်ႈၸိူဝ်ႉၼင်ႇၼႆလႄႈၵဝ်ပၼ်ပိင်းၺၢပ်ႈတြႃးၼႆႉတီႈသူဝၼ်းမိူဝ်ႈၼႆႉဢေႃႈ။
“ၵူၺ်းၵႃႈ၊ပေႃးၶႃႈၼၼ်ႉဢမ်ႇၶႂ်ႈဢွၵ်ႇၶႂ်ႈၵႂႃႇလႄႈမၼ်းႁၵ်ႉသူဢိၵ်ႇတင်းၵူၼ်းႁိူၼ်းၵူၼ်းယေးသူလႄႈမူၼ်ႈပျေႃႇယူႇၸိုင်၊-
ဢဝ်မၼ်းၵႂႃႇႁိမ်းၽၵ်းတူႁိူၼ်းသူလႄႈဢဝ်လဵၵ်းၸီးမွင်ႇဝၢၼ်ႁူမၼ်းတႃႉ။ မၼ်းၼၼ်ႉတၵ်းလႆႈပဵၼ်ၶႃႈသူတေႃႇၸူဝ်ႈဢသၢၵ်ႈဢေႃႈ။ မိူၼ်ၼင်ႇၼၼ်တီႈၶႃႈၽူႈယိင်းၵေႃႈႁဵတ်းၸိူဝ်ႉၼင်ႇၼၼ်တႃႉ။-
မိူဝ်ႈဢၼ်သူပွႆႇမၼ်းလွတ်ႈၼၼ်ႉၸိုင်၊ယႃႇပေႁႂ်ႈမီးၸႂ်ဢၼ်သေလၢႆ။ လွင်ႈမၼ်းၸမ်ႉ၊မၼ်းလႆႈၶၢမ်ႇတၢင်းၸႂ်ႉတၢင်းသွႆႁူၵ်းပီတဵမ်တဵမ်ဢၼ်တၢၼ်ႇၶိုင်ႈၼိုင်ႈၵႃႈႁႅင်းဢၼ်ၸၢင်ႈဢၼ်ငႃၼၼ်ႉယဝ်ႉ။ ႁဵတ်းၸိူဝ်ႉၼင်ႇၼႆတႃႉ။ ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းပၼ်တၢင်းလီမၢင်ႇၵလႃႇတီႈသူၼႂ်းၵၢၼ်ငၢၼ်းဢၼ်သူႁဵတ်းသၢင်ႈၵူႈၸိူဝ်ႉၵူႈပိူင်ၼၼ်ႉဢေႃႈ။
“ၽုင်သူဝ်းၽုင်ဝူဝ်းသူၼၼ်ႉတူဝ်ပေႃႈဢၼ်ၵိူတ်ႇလဵင်ႉမႃးဢွၼ်တၢင်းပိူၼ်ႈၵႃႈမီးၼၼ်ႉ တၵ်းလႆႈၽႄဝႆႉပုၼ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။ ဝူဝ်းပေႃႈဢွၼ်ႇၼၼ်ႉသူဢမ်ႇလႆႈဢဝ်ၸႂ်ႉၵၢၼ်ၸႂ်ႉငၢၼ်း။ သူဝ်းပေႃႈဢွၼ်ႇၼၼ်ႉၵေႃႈဢမ်ႇလႆႈၵႅတ်းႁႆးၶူၼ်ၶဝ်။-
သူဢိၵ်ႇတင်းၵူၼ်းႁိူၼ်းၵူၼ်းယေးသူတၵ်းလႆႈဢဝ်သူဝ်း၊ဝူဝ်းၸိူဝ်းၼၼ်ႉၵႂႃႇႁႅမ်ၵိၼ်ၽၢႆႇၼႃႈ ထႃႇဝရႃႉၽြႃး၊ ၵႃႈတီႈဢၼ်မၵ်းၶၢၼ်းဝႆႉတႃႇတေဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၼၼ်ႉၵူႈပီၵူႈပီဢေႃႈ။-
ၵူၺ်းၵႃႈ၊ပေႃးသူဝ်း၊ဝူဝ်းၸိူဝ်းၼၼ်ႉဢၢင်ႇၵႃႇဢမ်ႇၸုင်ႇ၊သမ်ႉပေႃးတိၼ်ၵႅင်ႉတိၼ်ၵူတ်ႉ၊ဢမ်ႇၼၼ်တႃမွတ်ႇတႃၵႅၵ်းလႄႈဢၢင်ႇၵႃႇသေဢၼ်ဢၼ်လုၸိုင်၊ဢမ်ႇလႆႈဢဝ်သၢၵ်ႈလူႇတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူ။-
တူဝ်ၸိူဝ်ႉၼင်ႇၼၼ်ၼၼ်ႉသူမီးဢၶႂၢင်ႉဢၼ်ႁႅမ်ၵိၼ်ၵႃႈတီႈႁိူၼ်းဢေႃႈ။ သူၵႃႈမီးတင်းသဵင်ႈတင်းလူင်ၵေႃႉဢၼ်မူတ်းသႂ်၊ၵေႃႉဢၼ်ဢမ်ႇမူတ်းသႂ် မီးဢၶႂၢင်ႉဢၼ်ၵိၼ်ၼိူဝ်ႉၼၼ်ႉမိူၼ်ၸိူဝ်ႉၼင်ႇဢၼ်သူၵိၼ်ၼိူဝ်ႉယိူင်းၼိူဝ်ႉၵႂၢင်ၼၼ်ႉဢေႃႈ။-
ၵူၺ်းၵႃႈ၊ဢမ်ႇလႆႈၵိၼ်လိူတ်ႈမၼ်း။ တၵ်းလႆႈဢဝ်ထွၵ်ႇပႅတ်ႈၵႃႈၼိူဝ်လိၼ်မိူၼ်ၸိူဝ်ႉၼင်ႇဢၼ်ထွၵ်ႇၼမ်ႉၼၼ်ႉဢေႃႈ။
“ယုၵ်ႉယွင်ႈၵုင်ႇသရေႇ ထႃႇဝရႃႉၽြႃး၊ ၽြႃးပဵၼ်ၸဝ်ႈသူၼႂ်းတၢင်းဢၼ်ႁဵတ်းပွႆး ပသၶႃႇ၊ ၼႂ်းလိူၼ် ဢပိပႃႉ၊ ၼၼ်ႉတႃႉ။ လွင်ႈမၼ်းၸမ်ႉ၊မၼ်းၸဝ်ႈၵႄႇသႄႇဢဝ်သူၶိင်ႇၵၢင်ၶိုၼ်းၼႂ်းလိူၼ်ၼၼ်ႉ ဢွၵ်ႇသေမိူင်း ဢေးၵျိပ်ႉ၊ မႃးဢေႃႈ။-
သူတၵ်းလႆႈၵႂႃႇၵႃႈတီႈတီႈၼိုင်ႈဢၼ်မၵ်းၶၢၼ်းဝႆႉတႃႇတေဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၼၼ်ႉသေလႄႈ၊ႁႅမ်သူဝ်း၊ဢမ်ႇၼၼ်ဝူဝ်းပုၼ်ႈပွႆး ပသၶႃႇ၊ ႁႂ်ႈလႆႈယုၵ်ႉယွင်ႈၵုင်ႇသရေႇ ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။-
မိူဝ်ႈဢၼ်သူၵိၼ်ၼိူဝ်ႉပွႆးၼၼ်ႉယႃႇပေၵိၼ်ၵပ်းၶဝ်ႈမုၼ်းဢၼ်သႂ်ႇၸိူဝ်ႉပႅင်ႈၼၼ်ႉ။ ၸဵတ်းဝၼ်းတဵမ်တဵမ်သူတၵ်းလႆႈၵိၼ်ၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈဢၼ်ဝႃႈ၊ၶဝ်ႈမုၼ်းတုၵ်ႉၶႃႉ၊ ပိူဝ်ႈဢၼ်သူႁိပ်ႈၼႅတ်ႈဢွၵ်ႇမိူင်း ဢေးၵျိပ်ႉ၊ မႃးၼၼ်ႉဢေႃႈ။ ၼႂ်းၸူဝ်ႈဢသၢၵ်ႈသူၼၼ်ႉသူတၵ်းလႆႈၶုၵ်းၸႂ်လႆႈၶႆႈၸႂ်ထူပ်းဝၼ်းဢၼ်သူဢွၵ်ႇမိူင်း ဢေးၵျိပ်ႉ၊ မိူင်းဢၼ်သူလႆႈၶၢမ်ႇတုၵ်ႉၶႃႉမႃးၼၼ်ႉဢေႃႈ။-
ၼႂ်းၸဵတ်းဝၼ်းတဵမ်တဵမ်ၼၼ်ႉတၵ်းဢမ်ႇလႆႈမီးၸိူဝ်ႉပႅင်ႈတီႈႁိူၼ်းၽူႈလႂ်တင်းမိူင်းၼၼ်ႉလႃးလႃး။ ၼိူဝ်ႉဢၼ်သၢၵ်ႈလူႇၼႂ်းၶိင်ႇႁူဝ်ၶမ်ႈဝၼ်းတီႈၼိုင်ႈၼၼ်ႉယႃႇႁႂ်ႈလႆႈၵိုတ်းၵျၢၼ်ႇဝႆႉ၊တင်းၶိုၼ်းတေႃႇထိုင်ႁွတ်ႈၶိင်ႇၵၢင်ၼႂ်တၵ်းလႆႈၵိၼ်ႁႂ်ႈမူတ်းၼႂ်းၶိုၼ်းၼၼ်ႉၵမ်းလဵဝ်ဢေႃႈ။
“သူဢမ်ႇမီးဢၶႂၢင်ႉဢၼ်လႆႈႁႅမ်တူဝ်တရိၵ်ႈသၢၼ်ႇပွႆး ပသၶႃႇ၊ ၵႃႈတီႈတၢင်ႇတီႈတၢင်ႇလႅၼ်ၼႂ်းမိူင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူပၼ်သူၼၼ်ႉ။-
သူတၵ်းလႆႈႁႅမ်ၵႃႈတီႈဢၼ်မၵ်းၶၢၼ်းဝႆႉတႃႇတေဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၼၼ်ႉၵူၺ်းဢေႃႈ။ ႁႅမ်ၶိင်ႇႁူဝ်ၶမ်ႈမိူဝ်ႈဢၼ်ၵၢင်ဝၼ်းတူၵ်း၊ၶိင်ႇဢၼ်သူဢွၵ်ႇမိူင်း ဢေးၵျိပ်ႉ၊ မႃးၼၼ်ႉတႃႉ။-
ဢဝ်ၼိူဝ်ႉဢၼ်ႁႅမ်ပုၼ်ႈပွႆးၼၼ်ႉတူမ်ႈၵိၼ်ၵႃႈတီႈဢၼ်မၵ်းၶၢၼ်းဝႆႉတႃႇတေဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၼၼ်ႉတႃႉ။ ၶိင်ႇၵၢင်ၼႂ်မႃးၶိုၼ်းမိူဝ်းႁိူၼ်းသူတႃႉ။-
တႃႇႁူၵ်းဝၼ်းတဵမ်တဵမ်သူတၵ်းလႆႈၵိၼ်ၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈဢေႃႈ။ ဝၼ်းဢၼ်ထူၼ်ႈထိုင်ၸဵတ်းဝၼ်းၼၼ်ႉၸိုင်၊သူတၵ်းလႆႈၸုတုမ်ၵၼ်ဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။ ၼႂ်းဝၼ်းၼၼ်ႉဢမ်ႇလႆႈႁဵတ်းၵၢၼ်ငၢၼ်းၵႃႈသင်လႃးလႃး။
“တႄႇၸႃႉဝၼ်းဢၼ်သူဢဝ်ၶဵဝ်းပၢတ်ႇၶဝ်ႈၼၼ်ႉလႄႈၼပ်ႉဢၢၼ်ႇၵႂႃႇၸဵတ်းပၢတ်ႈတႃႉ။-
ၵမ်းၼၼ်ႉ သူတၵ်းလႆႈႁဵတ်းပွႆးပၢတ်ႇဢဝ်မၢၵ်ႇဢဝ်ႁူင်းႁႂ်ႈလႆႈယုၵ်ႉယွင်ႈၵုင်ႇသရေႇ ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။ တၵ်းလႆႈဢဝ်တၢင်းလူႇဢၼ်ၸွမ်းၼင်ႇဢလူဝ်ႇၵၢင်ၸႂ်ၼၼ်ႉမႃးသၢၵ်ႈလူႇမႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ ပၼ်တၢင်းလီတီႈသူၼမ်ၼမ်ၵေႇၵေႇၼၼ်ႉဢေႃႈ။-
သူတၵ်းလႆႈဢွၼ်ၵၼ်ႁဵတ်းတၢင်းဢၼ်သႂၢင်ႇသိူဝ်းမူၼ်ႈပျေႃႇတီႈၽၢႆႇၼႃႈ ထႃႇဝရႃႉၽြႃး၊ ႁူမ်ႈလူၺ်ႈၵၼ်တင်းလုၵ်ႈလၢင်းသူတင်းလၢႆ၊ၶႃႈသူတင်းလၢႆဢိၵ်ႇတင်းၵူၼ်း လေႇဝိ၊ တင်းလၢႆ၊ၵူၼ်းတၢင်ႇဝၢၼ်ႈတၢင်ႇမိူင်းတင်းလၢႆ၊လုၵ်ႈဢွၼ်ႇဢၼ်ၽၢၼ်ပေႃႈၽၢၼ်မႄႈတင်းလၢႆ၊ဢိၵ်ႇတင်းမႄႈမၢႆႈတင်းလၢႆၸိူဝ်းဢၼ်မီးယူႇၼႂ်းဝဵင်းသူၼၼ်ႉဢေႃႈ။ သူတၵ်းလႆႈႁဵတ်းၵႃႈတီႈဢၼ်မၵ်းၶၢၼ်းဝႆႉတႃႇတေဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၼၼ်ႉဢေႃႈ။-
သူတၵ်းလႆႈၶုၵ်းၸႂ်လႆႈၶႆႈၸႂ်ထူပ်းလွင်ႈဢၼ်သူယၢမ်ႈလႆႈၶၢမ်ႇႁဵတ်းၶႃႈတီႈၼႂ်းမိူင်း ဢေးၵျိပ်ႉ၊ မႃးၼၼ်ႉဢေႃႈ။ ႁဵတ်းသတိႁႂ်ႈလႆႈၵမ်ၵျၢင်ႉၸွမ်းပိင်းၺၢပ်ႈတြႃးၸိူဝ်းၼႆႉတႃႉ။
“လိုၼ်းသေဢၼ်ယဵပ်ႇၶဝ်ႈယဝ်ႉ၊ဢိၵ်ႇတင်းဢိတ်ႇၼမ်ႉမၢၵ်ႇၸပိတ်ႉယဝ်ႉတူဝ်ႈယဝ်ႉၼၼ်ႉၸိုင်၊သူတၵ်းလႆႈၶၢမ်ႇပွႆးသုမ်ႉထဵင်ၸဵတ်းဝၼ်းတဵမ်တဵမ်ဢေႃႈ။-
သူတၵ်းလႆႈႁဵတ်းတၢင်းဢၼ်သႂၢင်ႇသိူဝ်းမူၼ်ႈပျေႃႇႁူမ်ႈလူၺ်ႈၵၼ်တင်းလုၵ်ႈလၢင်းသူတင်းလၢႆ၊ဢိၵ်ႇတင်းၵူၼ်း လေႇဝိ၊ တင်းလၢႆ၊ၵူၼ်းတၢင်ႇဝၢၼ်ႈတၢင်ႇမိူင်းတင်းလၢႆ၊လုၵ်ႈဢွၼ်ႇၽၢၼ်ပေႃႈၽၢၼ်မႄႈတင်းလၢႆ၊ဢိၵ်ႇတင်းမႄႈမၢႆႈတင်းလၢႆၸိူဝ်းဢၼ်ယူႇၵႃႈၼႂ်းဝဵင်းသူၼၼ်ႉဢေႃႈ။-
ယုၵ်ႉယွင်ႈၵုင်ႇသရေႇ ထႃႇဝရႃႉၽြႃး၊ ၽြႃးပဵၼ်ၸဝ်ႈသူၼႂ်းတၢင်းဢၼ်ၶၢမ်ႇပွႆးႁဵတ်းသုမ်ႉထဵင်ၸဵတ်းဝၼ်းတဵမ်တဵမ်ၵႃႈတီႈဢၼ်မၵ်းၶၢၼ်းဝႆႉတႃႇတေဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၼၼ်ႉတႃႉ။ ဢွၼ်ၵၼ်မီးတၢင်းဢၼ်သႂၢင်ႇသိူဝ်းမူၼ်ႈပျေႃႇတႃႉ။ လွင်ႈမၼ်းၸမ်ႉ၊ ထႃႇဝရႃႉၽြႃး၊ ပၼ်တၢင်းလီမၢင်ႇၵလႃႇတီႈမၢၵ်ႇၶဝ်ႈႁူင်းၼမ်ႉသူဢိၵ်ႇတင်းတီႈၵၢၼ်ငၢၼ်းသူဢေႃႈ။
“ၼႂ်းၵူၼ်းမဵဝ်းသူၼႆႉၵႃႈဢၼ်ပဵၼ်ၵူၼ်းၸၢႆးတင်းသဵင်ႈတင်းလူင်တၵ်းလႆႈမႃးဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ယေႈပီသၢမ်ပွၵ်ႈၵႃႈတီႈဢၼ်မၵ်းၶၢၼ်းဝႆႉတႃႇတေဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၼၼ်ႉဢေႃႈ။ ပွႆးသၢမ်ပွၵ်ႈၼၼ်ႉၸမ်ႉ၊ပဵၼ်ပွႆးပသၶႃႇ၊ပွႆးပၢတ်ႇဢဝ်မၢၵ်ႇဢဝ်ႁူင်း၊ဢိၵ်ႇတင်းပွႆးသုမ်ႉထဵင်ဢေႃႈ။ ၶဝ်ဢမ်ႇလႆႈၶဝ်ႈၸူးၽၢႆႇၼႃႈ ထႃႇဝရႃႉၽြႃး၊ တူဝ်လၢႆမိုဝ်းပဝ်ႇ။-
ၵူၼ်းၵူႈၵေႃႉတၵ်းလႆႈသၢၵ်ႈလူႇၵႃႈၼင်ႇဢၼ်မၼ်းတၢတ်ႈၼိူင်ႇလႆႈမႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ ပၼ်တၢင်းလီတီႈသူၼမ်ၼမ်ၵေႇၵေႇၼၼ်ႉဢေႃႈ။
“သူတၵ်းလႆႈယုၵ်ႉတၢင်ႇၵူၼ်းဢၼ်ၸီႇယၢင်ႇတြႃးတင်းလၢႆ၊ဢိၵ်ႇတင်းၶုၼ်လုမ်းတင်းလၢႆဝႆႉၵႃႈၼႂ်းဝဵင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူပၼ်တီႈသူၼၼ်ႉၵူႈဝဵင်းၵူႈဝဵင်းဢေႃႈ။ ၶုၼ်ၸိူဝ်းၼၼ်ႉတၵ်းလႆႈၸီႇယၢင်ႇတြႃးသိုဝ်ႈသိုဝ်ႈတေႃႇတေႃႇတီႈၵူၼ်းတင်းလၢႆဢေႃႈ။-
ၶဝ်ဢမ်ႇလႆႈမီးၸႂ်ၵူတ်ႉလႄႈၸီႇယၢင်ႇ။ ဢမ်ႇလႆႈထွၵ်ႈလူၺ်ႈၼႃႈၵူၼ်း။ ဢမ်ႇလႆႈၵိၼ်သူးၵိၼ်လၢပ်ႈ။ သူးလၢပ်ႈၸၢင်ႈလပ်ႉမၢၵ်ႇတႃၶဝ်ၸိူဝ်းဢၼ်မီးပိင်ႇၺႃႇတင်းၶဝ်ၸိူဝ်းဢၼ်သိုဝ်ႈတေႃႇတင်းလၢႆလႄႈၸၢင်ႈႁႂ်ႈတၢင်းဢၼ်ၶဝ်တႅပ်းတတ်းၽိတ်းၵႂႃႇဢေႃႈ။-
လွင်ႈၼင်ႇႁိုဝ်သူတၵ်းဢသၢၵ်ႈလႆႈလိပ်းလႄႈၶၢမ်ႇဢဝ်ဢမူၺ်ႇမိူင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူပၼ်တီႈသူၼၼ်ႉၸိုင်၊သူတၵ်းလႆႈတႅပ်းတတ်းၽဵင်ႇၽဵင်ႇလႄႈတႅပ်းတတ်းၸွမ်းၼင်ႇတြႃးသိုဝ်ႈသိုဝ်ႈတေႃႇတေႃႇဢေႃႈ။
“မိူဝ်ႈဢၼ်သူတႄႇႁဵတ်းၶဵင်ႇတၢင်းလူႇပုၼ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူၼၼ်ႉၸိုင်၊ယႃႇပေပူၵ်းပေတင်ႈသဝ်မႆႉႁုၼ်ႇႁၢင်ႈၼၢင်းၽီ ဢႃႇသရႃႉ၊ ၵႃႈႁိမ်းၶဵင်ႇတၢင်းလူႇၼၼ်ႉ။-
ယႃႇပေတႄႇပေပူၵ်းသဝ်ႁိၼ်ပုၼ်ႈႁုၼ်ႇႁၢင်ႈသၢင်းထုတႃႇတေဝႆႈၼၼ်ႉ။ ထႃႇဝရႃႉၽြႃး၊ ၽြႃးပဵၼ်ၸဝ်ႈၸင်းၸိူဝ်းၼၼ်ႉဢေႃႈ။
“သူဢမ်ႇလႆႈဢဝ်သူဝ်း၊ဝူဝ်းဢၼ်ဢၢင်ႇၵႃႇလု၊ဢၼ်ဢၢင်ႇၵႃႇဢမ်ႇၸုင်ႇၼၼ်ႉႁဵတ်းတၢင်းလူႇတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူ။ ၶိူင်ႈတၢင်းလူႇၸိူဝ်ႉၼင်ႇၼၼ်ၼၼ်ႉမၼ်းၸဝ်ႈလီႁင်ႈဢဵတ်ႇသဵတ်ႇဢေႃႈ။
“ပေႃးဝႃႈမႂ်းလႆႈငိၼ်းလွင်ႈဢၼ်ၼႂ်းၵူၼ်းဝဵင်းသေဝဵင်းဝဵင်းမီးၵူၼ်းၸၢႆး၊ဢမ်ႇၼၼ်ၽူႈယိင်းသေၵေႃႉၵေႃႉႁဵတ်းတုၸရိူၵ်ႈၵႃႈတီႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ လႄႈပူၼ်ႉလိူဝ်ပတိၺိၺ်ႇတြႃးၸဝ်ႈ၊-
ၼႂ်းတၢင်းဢၼ်ၵႂႃႇႁဵတ်းဝၢတ်ႈတီႈၽြႃးတၢင်ႇသူႇတၢင်ႇပႃးလႄႈဝႆႈၽြႃးတင်းလၢႆဢၼ်ဝႃႈတႃဝၼ်း၊လိူၼ်၊လၢဝ်၊ဢၼ်သၢၼ်ၶတ်းၵၼ်တင်းပိင်းၺၢပ်ႈတြႃး ထႃႇဝရႃႉၽြႃး၊ သေယဝ်ႉ၊-
ပိူၼ်ႈလၢတ်ႈတီႈသူလႄႈသူလႆႈငိၼ်းလွင်ႈမၼ်းတၢင်းမၼ်းၸိုင်၊သူတၵ်းလႆႈတွင်ႈထၢမ်ၸႅတ်ႈတူၺ်းၸေးၸေးဢေႃႈ။ ပေႃးသူႁၼ်လွင်ႈၼၼ်ႉပဵၼ်ဢၼ်ၸိုဝ်ႈဢၼ်ၸႂ်ႈလႄႈလွင်ႈတၢင်းဢၼ်ႁုၵ်းႁၢႆႉပဵၼ်ယူႇၼႂ်းမဵဝ်း ဢိသရေး၊ တႄႉၸိုင်၊-
သူတၵ်းလႆႈလၢၵ်ႈဢဝ်ၵေႃႉၼၼ်ႉဢွၵ်ႇၵႂႃႇၵႃႈၼွၵ်ႈဝဵင်းသေလႄႈဢဝ်မၢၵ်ႇႁိၼ်ပိုဝ်ႈသႂ်ႇမၼ်းထၢၼ်ႈပေႃးႁႂ်ႈတၢႆဢေႃႈ။-
ၼႂ်းဝႃႈၼၼ်သေၵေႃႈတၵ်းလႆႈမီးၵူၼ်းၶၢမ်ႇသၢၵ်ႈသေႇသွင်ၵေႃႉ၊သၢမ်ၵေႃႉၸင်ႇတေလႆႈဢဝ်တၢႆဢေႃႈ။ ပေႃးမီးသၢၵ်ႈသေႇၵေႃႉလဵဝ်ၵူၺ်းၸိုင်၊တေဢမ်ႇလႆႈဢဝ်တၢႆ။-
ၶဝ်ၸိူဝ်းဢၼ်ပဵၼ်သၢၵ်ႈသေႇၼၼ်ႉတၵ်းလႆႈဢဝ်မၢၵ်ႇႁိၼ်ပိုဝ်ႈသႂ်ႇၵေႃႉၼၼ်ႉဢွၼ်တၢင်းပိူၼ်ႈလႄႈၵူၼ်းတင်းသဵင်ႈတင်းလူင်တၵ်းလႆႈႁဵတ်းၸွမ်းဢေႃႈ။ ၼင်ႇၼၼ်လႄႈပဵၼ်တၢင်းဢၼ်ဢဝ်တုၸရိူၵ်ႈဢွၵ်ႇပႅတ်ႈသေၵႃႈၼႂ်းသူဢေႃႈ။
“မၢင်ၽဝ်ႇ၊ၸၢင်ႈၶႄးတေမီးဢမုဢၼ်ဢမ်ႇၸၢင်ႈၸီႇယၢင်ႇတႅပ်းတတ်းလႆႈ၊ဢၼ်ပဵၼ်ဢမုတၢင်းဢၼ်ဢဝ်ဢသၢၵ်ႈၵူၼ်းတၢႆလႄႈသင်၊တၢင်းဢၼ်ႁိမ်ဢမူၺ်ႇၵၼ်လႄႈသင်၊တၢင်းဢၼ်ပေႃႉၵၼ်ႁႅမ်ၵၼ်ၸိူဝ်းၼၼ်ႉဢေႃႈ။ ပေႃးပဵၼ်ဢမုၸိူဝ်ႉၼင်ႇၼၼ်ၸိုင်၊သူတၵ်းလႆႈဢွၼ်ၵၼ်ၵႂႃႇၸူးၵႃႈတီႈဢၼ်မၵ်းၶၢၼ်းဝႆႉတႃႇတေဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ပုၼ်ႉဢေႃႈ။-
ဢဝ်ဢမုၼၼ်ႉတၢင်ႇထိုင်တီႈယဵၸ်ႈပရေႃးႁဵၵ်ႈ ၵူၼ်း လေႇဝိ၊ တင်းလၢႆဢိၵ်ႇတင်းၵေႃႉဢၼ်ႁဵတ်းၵူၼ်းဢၼ်ၸီႇယၢင်ႇတြႃးယူႇယၢမ်းမိူဝ်ႈၼၼ်ႉသေလႄႈႁႂ်ႈၶဝ်တႅပ်းတတ်းတႃႉ။-
ၶဝ်တၵ်းတႅပ်းတတ်းပၼ်ဢေႃႈ။ သူသမ်ႉတၵ်းလႆႈႁဵတ်းၸွမ်းၵႃႈၼင်ႇဢၼ်ၶဝ်တႅပ်းတတ်းၼၼ်ႉဢေႃႈ။-
သူတၵ်းလႆႈႁပ်ႉၶၢမ်ႇဢဝ်တၢင်းဢၼ်ၶဝ်တႅပ်းတတ်းပၼ်ၼၼ်ႉသေလႄႈတၵ်းလႆႈႁဵတ်းၸွမ်းၵႃႈၼင်ႇဢၼ်ၶဝ်သင်ႇလၢတ်ႈၼၼ်ႉၸေးၸေးၸွတ်ႇၸွတ်ႇဢေႃႈ။-
ၽူႈလႂ်သေဢမ်ႇဝႃႈ၊ၵေႃႉဢၼ်ႁတ်းထဵင်ပႅတ်ႈၵႂၢမ်းယဵၸ်ႈပရေႃးႁဵၵ်ႈ၊ဢမ်ႇၼၼ်ၵႂၢမ်းၵေႃႉဢၼ်ႁဵတ်း၊ၵူၼ်းဢၼ်ၸီႇယၢင်ႇတြႃးၼၼ်ႉၸိုင်၊ၵေႃႉၼၼ်ႉတၵ်းလႆႈၶၢမ်ႇတၢင်းဢၼ်ဢဝ်တၢႆဢေႃႈ။ ၼင်ႇၼၼ်လႄႈပဵၼ်တင်းဢၼ်ဢဝ်ပႅတ်ႈတုၸရိူၵ်ႈဢွၵ်ႇပႅတ်ႈသေၵႃႈၼႂ်းၵူၼ်းမဵဝ်း ဢိသရေး၊ ဢေႃႈ။-
ၵူၼ်းတင်းသဵင်ႈတင်းလူင်တၵ်းငိၼ်းလႄႈမီးၸႂ်ဢၼ်ၵူဝ်ဢၼ်ႁႄယူႇသေလႄႈၵမ်းလိုၼ်းယင်းဢမ်ႇႁတ်းႁဵတ်းၸိူဝ်ႉၼင်ႇၼၼ်ဢေႃႈ။
“ဝၢႆးသေသူလႆႈၶဝ်ႈထိုင်ၵႃႈၼႂ်းမိူင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းပၼ်တီႈသူၼၼ်ႉယဝ်ႉလႄႈလႆႈၸၢမ်ႇၸႃးယူႇလီလီငၢမ်းငၢမ်းၸိုင်၊မိူဝ်ႈၼၼ်ႉသူတၵ်းလႆႈဢွၼ်ၵၼ်မီးၸႂ်ဢၼ်ၶႂ်ႈလႆႈၶုၼ်ႁေႃၶမ်းမိူၼ်ၸိူဝ်ႉၼင်ႇဢၼ်ၵူၼ်းတၢင်ႇၸိူဝ်ႉတၢင်ႇမဵဝ်းႁိမ်းႁွမ်းသူမီးၶုၼ်ႁေႃၶမ်းၼၼ်ႉဢေႃႈ။-
ၼင်ႇႁိုဝ်သူတၵ်းယုၵ်ႉတၢင်ႇမႅၼ်ႈၸွမ်းၵေႃႉဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူလိူၵ်ႈဝႆႉပၼ်ၼၼ်ႉၸိုင်၊ႁဵတ်းသတိတႃႉ။ မၼ်းၼၼ်ႉတၵ်းလႆႈပဵၼ်ၵူၼ်းမဵဝ်း ဢိသရေး၊ ဢေႃႈ။ ဢမ်ႇလႆႈယုၵ်ႉတၢင်ႇၵူၼ်းတၢင်ႇၸိူဝ်ႉတၢင်ႇမဵဝ်းပဵၼ်ၶုၼ်ႁေႃၶမ်းသူ။-
ၶုၼ်ႁေႃၶမ်းၼၼ်ႉတၵ်းဢမ်ႇလႆႈလဵင်ႉမႃႉၼမ်ၼႃႇလူင်လၢင်ပုၼ်ႈတပ်ႉသိုၵ်းမၼ်း။ မၼ်းဢမ်ႇလႆႈပွႆႇၸႂ်ႉၵူၼ်းႁႂ်ႈၵႂႃႇသိုဝ်ႉဢဝ်မႃႉၵႃႈတီႈမိူင်း ဢေးၵျိပ်ႉ၊ မႃး။ လွင်ႈမၼ်းၸမ်ႉ၊ ထႃႇဝရႃႉၽြႃး၊ မီးဢမိင်ႉဝႆႉတီႈၵူၼ်းမၼ်းၸဝ်ႈတင်းလၢႆလႄႈဝႃႈ၊ ‘သူဢမ်ႇလႆႈၶိုၼ်းမိူဝ်းမိူင်းၼၼ်ႉထႅင်ႈသေပွၵ်ႈ၊’ ဝႃႈၼင်ႇၼႆယဝ်ႉ။-
ၶုၼ်ႁေႃၶမ်းၼၼ်ႉတၵ်းဢမ်ႇလႆႈဢဝ်မေးၼမ်။ မၼ်းၸၢင်ႈႁႂ်ႈတူဝ်ၸဝ်ႈၵဝ်ႇၽွၵ်ႈပျၢၼ်ႇၵႂႃႇဢေႃႈ။ ငိုၼ်းၶမ်းၵေႃႈဢမ်ႇလႆႈၸုလႆႈႁွမ်ၼမ်ၼႃႇလူင်လၢင်။-
မိူဝ်ႈဢၼ်မၼ်းၼင်ႈႁၢင်ႈၼင်ႈႁေႃၼၼ်ႉၸိုင်၊မၼ်းတၵ်းလႆႈတႅမ်ႈဢဝ်မၢႆဢဝ်လိၵ်ႈပိင်းၺၢပ်ႈတြႃးၼႆႉဢွၵ်ႇသေၵႃႈၼႂ်းလိၵ်ႈဢၼ်မီးဝႆႉၵႃႈတီႈယဵၸ်ႈပရေႃးႁဵၵ်ႈ ၵူၼ်းမဵဝ်း လေႇဝိ၊ ၸိူဝ်းၼၼ်ႉလႄႈ၊-
ၽိုၼ်လိၵ်ႈၼၼ်ႉတၵ်းလႆႈမီးႁိမ်းမၼ်းသေႇသေႇလႄႈ၊မၼ်းၵေႃႈတၵ်းလႆႈၽတ်းဢၢၼ်ႇပုၼ်ႈၸူဝ်ႈတႃႇဢသၢၵ်ႈမၼ်းဢေႃႈ။ ႁဵတ်းၸိူဝ်ႉၼင်ႇၼၼ်ၸင်ႇမၼ်းတေလႆႈသွၼ်ဢဝ်လွင်ႈတၢင်းဢၼ်ၵူဝ်ယမ်ၸဝ်ႈ ထႃႇဝရႃႉၽြႃး၊ သေယဝ်ႉ၊တူဝ်ၸဝ်ႈၵဝ်ႇတၵ်းၸၢင်ႈပႂ်ႉၸွမ်းပိင်းၺၢပ်ႈတြႃးၼႆႉၸေးၸေးၸွတ်ႇၸွတ်ႇဢေႃႈ။-
တြႃးၸဝ်ႈၼၼ်ႉတၵ်းပႂ်ႉထိင်းမၼ်းၼင်ႇႁိုဝ်ႁူဝ်ၸႂ်မၼ်းတၵ်းဢမ်ႇလႆႈမႃႇၼႃႉပူၵ်းပႅၼ်ၵႃႈၼိူဝ်ပီႈၼွင်ႉမၼ်းၼင်ႇၵၼ်၊ဢိၵ်ႇတင်းၼင်ႇႁိုဝ်မၼ်းတေဢမ်ႇဝႄႈပိူင်ႈသေၵႃႈတီႈသဵၼ်ႈတၢင်းတြႃးၸဝ်ႈၵႂႃႇဢေႃႈ။ ၼင်ႇၼၼ်လႄႈမၼ်းတေလႆႈမၢင်ႇၵလႃႇတၢင်းဢၼ်ဢုပ်ႉႁၢင်ႈဢုပ်ႉႁေႃပီမိူင်းႁိုင်ၼႃႇ၊ဢိၵ်ႇတင်းလုၵ်ႈလၢၼ်ၸိူဝ်ႉၶိူဝ်းမၼ်းတေလႆႈဢုပ်ႉၵႃႈၼိူဝ်မဵဝ်း ဢိသရေး၊ လၢႆသိုပ်ႇလၢႆၸူဝ်ႈဢေႃႈ။
“ၵူၼ်းၸိူဝ်ႉၶိူဝ်း လေႇဝိ၊ ၸိူဝ်းဢၼ်လႆႈဢရႃႇယဵၸ်ႈပရေႃးႁဵၵ်ႈ ၼၼ်ႉဢမ်ႇမီးဢၶႂၢင်ႉဢၼ်လႆႈၶၢမ်ႇတၢင်းဢၼ်မႅင်ႇပၼ်ၵႂၢၵ်ႈလိၼ်ပုၼ်ႈၶဝ်ၵႃႈၼႂ်းၵူၼ်းမဵဝ်း ဢိသရေး၊ ၶဝ်တၵ်းလႆႈၸႂ်ႉလႆႈၵိၼ်ၶိူင်ႈတၢင်းလူႇတင်းလၢႆ၊ဢိၵ်ႇတင်းၶိူင်ႈဢၼ်သၢၵ်ႈလူႇတီႈ ထႃႇဝရႃႉၽြႃး၊ ၸိူဝ်းၼၼ်ႉဢေႃႈ။-
ၶဝ်ဢမ်ႇလႆႈပိူင်ႇၵႂၢၵ်ႈလိၼ်မိူၼ်ၸိူဝ်ႉၼင်ႇၵူၼ်းၸိူဝ်ႉၶိူဝ်းတၢင်ႇမဵဝ်းလႆႈပိူင်ႇၼၼ်ႉ။ ဢမူၺ်ႇပုၼ်ႈတႃႇၶဝ်ၸမ်ႉ၊ပဵၼ်ဢၶႂၢင်ႉတၢင်းဢၼ်လႆႈႁဵတ်းယဵၸ်ႈပရေႃးႁဵၵ်ႈတီႈ ထႃႇဝရႃႉၽြႃး၊ ၼၼ်ႉၸွမ်းၵႃႈၼင်ႇဢၼ် ထႃႇဝရႃႉၽြႃး၊ ဝႆႉၵတိတီႈၶဝ်ၼၼ်ႉဢေႃႈ။
“မိူဝ်ႈလႂ်ယၢမ်းလႂ်သေဢမ်ႇဝႃႈ၊သူဝ်း၊ဝူဝ်းဢၼ်သၢၵ်ႈလူႇၼၼ်ႉတၵ်းလႆႈဢဝ်ႁူဝ်မႃႇမၼ်းၽၢၵ်ႇၼိုင်ႈ၊ဢိၵ်ႇတင်းၼိူဝ်ႉၵႅမ်ႈမၼ်းတင်းသွင်ၽၢၵ်ႇတင်းၼိူဝ်ႉပုမ်မၼ်းလူႇတၢၼ်းတီႈၶဝ်ဢေႃႈ။-
ၵႃႈဢၼ်ပဵၼ်ၶဝ်ႈပိူၵ်ႇ၊ၼမ်ႉမၢၵ်ႇၸပိတ်ႉ၊ၼမ်ႉမၼ်းမၢၵ်ႇသၢၼ်ႇလုၼ်ႇဢၼ်လႆႈဢွၼ်တၢင်းပိူၼ်ႈ၊ၶူၼ်သူဝ်းၸိူဝ်းဢၼ်ၵႅတ်းႁႆးဢဝ်ဢွၼ်တၢင်းပိူၼ်ႈၼၼ်ႉတၵ်းလႆႈဢဝ်လူႇဢဝ်တၢၼ်းတီႈၶဝ်ဢေႃႈ။-
လွင်ႈမၼ်းၸမ်ႉ၊ၵႃႈၼႂ်းၵႃႈဢၼ်ပဵၼ်ၸိူဝ်ႉၶိူဝ်းသူတင်းသဵင်ႈတင်းလူင်ၼၼ်ႉ ထႃႇဝရႃႉၽြႃး၊ လိူၵ်ႈဢဝ်ၵူၼ်းၸိူဝ်ႉၶိူဝ်း လေႇဝိ၊ ႁႂ်ႈလႆႈပွင်ႁဵတ်းပွင်ထၢမ်းၼႃႈၵၢၼ်ယဵၸ်ႈပရေႃးႁဵၵ်ႈ ယူႇတႃႇသေႇဢေႃႈ။
“ၵူၼ်းၸိူဝ်ႉၶိူဝ်း လေႇဝိ၊ ၵေႃႉလႂ်သေဢမ်ႇဝႃႈ၊ပေႃးမၼ်းမီးၸႂ်ၸေႇတၼႃႇၶႂ်ႈၵႂႃႇၸူးၵႃႈတီႈဢၼ်မၵ်းၶၢၼ်းဝႆႉတႃႇတေဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၼၼ်ႉၸိုင်၊မၼ်းယူႇၵႃႈတီႈဝၢၼ်ႈလႂ်ဝဵင်းလႂ်ၵႃႈၼႂ်းမိူင်း ဢိသရေး၊ သေၵေႃႈမၼ်းမီးဢၶႂၢင်ႉဢၼ်လႆႈၵႂႃႇလႄႈ၊-
ၵိုတ်ႉႁၢပ်ႇၼႃႈၵၢၼ်ယဵၸ်ႈပရေႃးႁဵၵ်ႈတီႈ ထႃႇဝရႃႉၽြႃး၊ မၼ်းမိူၼ်မိူၼ်ၵၼ်တင်းၵူၼ်း လေႇဝိ၊ တၢင်ႇၵေႃႉတၢင်ႇၵူၼ်းၸိူဝ်းၼၼ်ႉဢေႃႈ။-
မၼ်းမီးဢၶႂၢင်ႉဢၼ်လႆႈၶၢမ်ႇဢဝ်တၢင်းၵိၼ်တၢင်းၶူပ်းပဵင်းၵၼ်တင်းယဵၸ်ႈပရေႃးႁဵၵ်ႈတၢင်ႇၵေႃႉၸိူဝ်းၼၼ်ႉၵူၺ်းဢမ်ႇၵႃး၊မၼ်းမီးဢၶႂၢင်ႉဢၼ်ၶၢႆၵိၼ်ဢမူၺ်ႇဢၼ်မၼ်းလႆႈၼၼ်ႉဢေႃႈ။
“မိူဝ်ႈဢၼ်သူၶဝ်ႈၸၢမ်ႇၸႃးၵႃႈၼႂ်းမိူင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းပၼ်တီႈသူယဝ်ႉၼၼ်ႉၸိုင်၊ယႃႇပေႁဵတ်းၸွမ်းတၢင်းႁဵတ်းဢၼ်လီႁင်ႈဢဵတ်ႇသဵတ်ႇၵူၼ်းတၢင်ႇၸိူဝ်ႉတၢင်ႇမဵဝ်းၸိူဝ်းဢၼ်မီးယူႇၵႃႈၼႂ်းမိူင်းၼၼ်ႉ။-
တၵ်းဢမ်ႇလႆႈဢဝ်လုၵ်ႈဢဝ်လၢင်းသူသၢၵ်ႈလူႇၽဝ်ၽႆးၵႃႈၼိူဝ်ၶဵင်ႇတၢင်းလူႇသူ။ သူတၵ်းဢမ်ႇလႆႈပၼ်ဢၶႂၢင်ႉ ႁႂ်ႈၵူၼ်းသူလႆႈႁဵတ်းတၢင်းဢၼ်ဢဝ်တင်းၺၢၼ်ႇႁေႃးလၢတ်ႈလွင်ႈဢၼ်တၵ်းပဵၼ်မႃး၊တၢင်းဢၼ်တူၺ်းပေႇတၢင်ႇၶိင်ႇၵႃႇလႃႉ၊တၢင်းဢၼ်ႁဵတ်းၽီမေႃႇ၊တၢင်းဢၼ်ႁဵတ်းဢတၢတ်ႈဝိၵ်ႉၸႃႇ၊-
တၢင်းဢၼ်ႁဵတ်းဢတၢတ်ႈၵႃႇထႃႇ၊တၢင်းဢၼ်ႁဵတ်းၽိူဝ်ႉႁဵတ်းၽီ၊တၢင်းဢၼ်ႁဵတ်းမႄႈမူတ်ႉ၊တၢင်းဢၼ်ႁဵတ်းသြႃႇႁွင်ႉၶွၼ်ၵူၼ်းတၢႆမႃးတွင်ႈထၢမ်ၸိူဝ်းၼၼ်ႉလႃးလႃး။-
ထႃႇဝရႃႉၽြႃး၊ ၽြႃးပဵၼ်ၸဝ်ႈသူလီႁင်ႈဢဵတ်ႇသဵတ်ႇၶဝ်ၸိူဝ်းဢၼ်ၸၢင်ႈႁဵတ်းဢတၢတ်ႈၸိူဝ်ႉၼင်ႇၼၼ်ၼၼ်ႉဢေႃႈ။ ၵွပ်ႈပိူဝ်ႈၸိူဝ်ႉၼင်ႇၼႆလႄႈမၼ်းၸဝ်ႈႁေႃႈၵူၼ်းမဵဝ်းၸိူဝ်းၼၼ်ႉဢွၵ်ႇပႅတ်ႈသေၵႃႈၼႂ်းမိူင်းဢၼ်သူတၵ်းယဵပ်ႇၶၢမ်ႈၶဝ်ႈၵႂႃႇယူႇၼၼ်ႉဢေႃႈ။-
သူတၵ်းပဵၼ်ၶဝ်ၸိူဝ်းဢၼ်ပႂ်ႉသဵတ်ႈၸႃႇၵႃႈတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူလူၺ်ႈႁူဝ်ၸႂ်သဵင်ႈသဵင်ႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ မူဝ်းသေႇ၊ လၢတ်ႈလႄႈဝႃႈ၊ “ၵူၼ်းမဵဝ်းဢၼ်မီးၵႃႈၼႂ်းမိူင်းဢၼ်သူတၵ်းၶဝ်ႈၵႂႃႇသိမ်းဢဝ်ၸိူဝ်းၼၼ်ႉၸၢင်ႈႁဵတ်းၸွမ်းၵႂၢမ်းၶဝ်ၸိူဝ်းဢၼ်ဢဝ်တင်းၺၢၼ်ႇႁေႃးလၢတ်ႈလွင်ႈဢၼ်တၵ်းပဵၼ်မႃး၊ဢိၵ်ႇတင်းႁေႃးပေႇတၢင်ႇၶိင်ႇၵႃႇလႃႉၸိူဝ်းၼၼ်ႉဢေႃႈ။ သူၸမ်ႉ၊ ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢမ်ႇပၼ်ဢၶႂၢင်ႉဢၼ်ႁဵတ်းၸိူဝ်ႉၼင်ႇၼၼ်ၼၼ်ႉ။-
ပုၼ်ႈသူၸိုင်၊မၼ်းၸဝ်ႈတၵ်းဢဝ်ပရေႃးၽႅတ်ႈ ပႃးၼိုင်ႈသေၵႃႈၼႂ်းၵူၼ်းမဵဝ်းသူဢၼ်မိူၼ်ၵဝ်ၼၼ်ႉသူင်ႇမႃးပၼ်တီႈသူဢေႃႈ။ သူတၵ်းလႆႈဢွၼ်ၵၼ်ထွမ်ႇဢဝ်ၵႂၢမ်းပရေႃးၽႅတ်ႈၵေႃႉၼၼ်ႉဢေႃႈ။
“ၼႂ်းဝၼ်းဢၼ်သူၸုတုမ်ၵၼ်ၵႃႈတီႈလွႆ သိၼႃႉ၊ ၵမ်းၼၼ်ႉ၊သူဢွၼ်ၵၼ်တွင်းပၢၼ်ႇၼင်ႇႁိုဝ်တေဢမ်ႇလႆႈငိၼ်းသဵင်ဢၼ် ထႃႇဝရႃႉၽြႃး၊ မီးဢမိင်ႉၼၼ်ႉထႅင်ႈ၊ဢိၵ်ႇတင်းတေဢမ်ႇလႆႈႁၼ်ၽႆးဢၼ်ယႂ်ႇၼႃႇၼၼ်ႉထႅင်ႈသေပွၵ်ႈ၊ၵွပ်ႈပိူဝ်ႈသူၵူဝ်ဝႃႈ၊သူတၵ်းတၢႆၼၼ်ႉယဝ်ႉ။-
ပိူဝ်ႈၼႆလႄႈ ထႃႇဝရႃႉၽြႃး၊ မီးဢမိင်ႉတီႈၵဝ်လႄႈဝႃႈ၊ ‘ၵႂၢမ်းဢၼ်ၶဝ်လၢတ်ႈဝႃႈၼၼ်ႉပဵၼ်ဢၼ်ထုၵ်ႇဢၼ်လီဢေႃႈ။-
ၵဝ်တၵ်းဢဝ်ပရေႃးၽႅတ်ႈပႃးၼိုင်ႈသေၵႃႈၼႂ်းၵူၼ်းမဵဝ်းၶဝ်ဢၼ်မိူၼ်ၵၼ်တင်းမႂ်းသေလႄႈသူင်ႇမႃးပၼ်တီႈၶဝ်ဢေႃႈ။ ၵဝ်တၵ်းသင်ႇလၢတ်ႈၵႂၢမ်းဢၼ်လူဝ်ႇလၢတ်ႈလူဝ်ႇဝႃႈၼၼ်ႉတီႈမၼ်းလႄႈ၊မၼ်းသမ်ႉတၵ်းဢဝ်ဢမိင်ႉၵႃႈဢၼ်ၵဝ်သင်ႇလၢတ်ႈၼၼ်ႉၶိုၼ်းလၢတ်ႈၼႄၵူၼ်းတင်းလၢႆဢေႃႈ။-
မၼ်းတၵ်းႁေႃးလၢတ်ႈၼႂ်းၼႃႇမႃႉၸိုဝ်ႈသဵင်ၵဝ်ဢေႃႈ။ ၽူႈလႂ်သေဢမ်ႇဝႃႈ၊ၵေႃႉဢၼ်ယင်းဢမ်ႇထွမ်ႇဢဝ်ၵႂၢမ်းပရေႃးၽႅတ်ႈၼၼ်ႉၸိုင်၊ၵဝ်တၵ်းပၼ်တၢမ်ႇတီႈၵေႃႉၼၼ်ႉဢေႃႈ။-
ပေႃးသမ်ႉမီးပရေႃးၽႅတ်ႈသေၵေႃႉၵေႃႉဢၼ်ၵဝ်ယင်းဢမ်ႇပၼ်ဢၶႂၢင်ႉလႄႈ ႁေႃးလၢတ်ႈႁတ်းႁတ်းႁၢၼ်ႁၢၼ်ၵႃႈၼႂ်းၼႃႇမႃႉၸိုဝ်ႈသဵင်ၵဝ်၊ဢမ်ႇၼၼ်ၵေႃႈႁေႃးလၢတ်ႈၵႃႈၼႂ်းၼႃႇမႃႉၸိုဝ်ႈသဵင်ၽြႃးတၢင်ႇသူႇတၢင်ႇပႃးၸိုင်၊ၵေႃႉၼၼ်ႉတၵ်းလႆႈၶၢမ်ႇတၢင်းဢၼ်ဢဝ်တၢႆဢေႃႈ၊’ ဝႃႈၼင်ႇၼႆဢေႃႈ။
“ပေႃးသူလၢတ်ႈၼႂ်းၸႂ်လႄႈဝႃႈ၊ ‘ႁဝ်းတၵ်းႁဵတ်းၸိူဝ်ႉၼင်ႇႁိုဝ်ႁုလွင်ႈဢၼ်ၵႂၢမ်းပရေႃးၽႅတ်ႈၼၼ်ႉပဵၼ်ဢမိင်ႉ ထႃႇဝရႃႉၽြႃး၊ ႁိုဝ်း၊ဢမ်ႇၸႂ်ႈႁိုဝ်းၼၼ်ႉလႆႈ၊’ ဝႃႈၼင်ႇၼႆၸိုင်၊-
မိူဝ်ႈဢၼ်ပရေႃးၽႅတ်ႈႁေႃးလၢတ်ႈၵႃႈၼႂ်းၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ၼၼ်ႉပေႃးလွင်ႈတၢင်းၼၼ်ႉဢမ်ႇပဵၼ်ၸွမ်း၊ဢမ်ႇပျေႉၸုမ်ႇမႃးၸိုင်၊လွင်ႈတၢင်းၼၼ်ႉဢမ်ႇၸႂ်ႈဢမိင်ႉ ထႃႇဝရႃႉၽြႃး၊ ယဝ်ႉ။ ပရေႃးၽႅတ်ႈၼၼ်ႉႁေႃးလၢတ်ႈၵူၺ်းမၼ်းဢေႃႈ။ သူဢမ်ႇလူဝ်ႇၵူဝ်ႁႄမၼ်းၼၼ်ႉ။
“လိုၼ်းသေဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူယႃႉၽဵဝ်ႈၵူၼ်းမဵဝ်းဢၼ်ယူႇၵႃႈၼႂ်းမိူင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းပၼ်တီႈသူၼၼ်ႉ၊မိူဝ်ႈဢၼ်သူလႆႈၶဝ်ႈၸၢမ်ႇၸႃးလႄႈယူႇၵႃႈၼႂ်းဝဵင်းၶဝ်၊ၼႂ်းႁိူၼ်းယေးၶဝ်ၼၼ်ႉယဝ်ႉၸိုင်၊-
သူတၵ်းလႆႈၽႄမႅင်ႇဝႆႉဝဵင်းသၢမ်ဝဵင်းပုၼ်ႈသူၼႂ်းမိူင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢၢင်ႈတၵ်းပၼ်ႁႂ်ႈသူပိူင်ႇၼၼ်ႉဢေႃႈ။-
သူတၵ်းလႆႈၽႄႁဵတ်းသၢမ်ပွတ်းဝႆႉလႄႈမႄးသဵၼ်ႈတၢင်းဝႆႉလီလီပုၼ်ႈလွင်ႈၼင်ႇႁိုဝ်ၵေႃႉဢၼ်ဢဝ်ဢသၢၵ်ႈၵူၼ်းတၢႆမႅၼ်ႈၼၼ်ႉၵူႈၵေႃႉတၵ်းပၢႆႈၵႂႃႇတဵတ်ႇယူႇမႅပ်းယူႇႁႂ်ႈဢသၢၵ်ႈမၼ်းလႆႈၶျၢမ်းသႃႇဢေႃႈ။-
ပေႃးၵူၼ်းၵေႃႉၼိုင်ႈယင်းဢမ်ႇထၢင်ႇဢမ်ႇထိူမ်လႄႈလႆႈဢဝ်တၢႆမႅၼ်ႈသေၵေႃႉၵေႃႉဢၼ်ယင်းဢမ်ႇမီးတၢင်းၽိတ်းတီႈၵၼ်ၼၼ်ႉၵေႃႉၼၼ်ႉမီးဢၶႂၢင်ႉဢၼ်ပၢႆႈၵႂႃႇသွၼ်ႈယူႇတဵတ်ႇယူႇၼႂ်းဝဵင်းၸိူဝ်းၼၼ်ႉသေဝဵင်းဝဵင်းႁႂ်ႈဢသၢၵ်ႈမၼ်းလႆႈၶျၢမ်းသႃႇဢေႃႈ။-
ဢုပမႃႇၸမ်ႉ၊ပေႃးၵူၼ်းသွင်ၵေႃႉၶဝ်ႈထိူၼ်ႇၵႂႃႇႁႂ်ႈလႆႈတႅပ်းၽိုၼ်းႁွၼ်းၽိုၼ်းလႄႈ၊ၼႂ်းၶဝ်ၼၼ်ႉၵေႃႉၼိုင်ႈဢဝ်တႃမၢတ်ႇပွမ်ႈတူၼ်ႈမႆႉယူႇဢေႃႈ။ တႃမၢတ်ႇၼၼ်ႉသွၼ်ႇဢွၵ်ႇၵၼ်းသေယဝ်ႉ၊တိူဝ်ႉထုၵ်ႇၵေႃႉသႄႈမၼ်းမႅၼ်ႈလႄႈတၢႆၵႂႃႇဢေႃႈ။ မၼ်းၼၼ်ႉမီးဢၶႂၢင်ႉဢၼ်ပၢႆႈၵႂႃႇသွၼ်ႈယူႇတဵတ်ႇယူႇၼႂ်းဝဵင်းၸိူဝ်းၼၼ်ႉသေဝဵင်းဝဵင်းႁႂ်ႈဢသၢၵ်ႈမၼ်းလႆႈၶျၢမ်းသႃႇဢေႃႈ။-
ပေႃးမီးဝဵင်းလဵဝ်ၵူၺ်းလႄႈၶၢဝ်းတၢင်းမၼ်းယၢၼ်ၵႆၼႃႇၸိုင်၊ၵူဝ်ပီႈမၼ်းၼွင်ႉမၼ်းၸိူဝ်းဢၼ်ထိူၵ်ႈတွပ်ႇတႅၼ်းဢဝ်မၼ်းတၢႆၼၼ်ႉတၵ်းလိုပ်ႈၸွမ်းၼႂ်းမိူဝ်ႈဢၼ်ယင်းတိုၵ်ႉမႆႈယူႇလိူတ်ႇယူႇၼႃႇၼၼ်ႉလႄႈဢဝ်တၢႆမႅၼ်ႈၵေႃႉဢၼ်ဢမ်ႇထိူၵ်ႈတၢႆၼၼ်ႉဢေႃႈ။ လွင်ႈမၼ်းၸမ်ႉ၊ပိူဝ်ႈဢၼ်ပဵၼ်တၢင်းဢၼ်ဢမ်ႇထၢင်ႇဢမ်ႇထိူမ်လႄႈလႆႈဢဝ်တၢႆမႅၼ်ႈၵေႃႉဢၼ်ယင်းဢမ်ႇမီးတၢင်းၽိတ်းတီႈၵၼ်လႃးလႃးၼၼ်ႉဢေႃႈ။-
ပိူဝ်ႈၼႆလႄႈၵဝ်မီးဢမိင်ႉတီႈသူႁႂ်ႈသူၸတ်းၽႄဝဵင်းသၢမ်ဝဵင်းၼႆႉဢေႃႈ။
“မိူဝ်ႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူ၊ၶႂၢၵ်ႈလိၼ်မိူင်းသူယႂ်ႇၵႂၢင်ႈၸွမ်းၵႃႈၼင်ႇဢၼ်မၼ်းၸဝ်ႈတိူင်ႇဝႃႈဝႆႉတီႈပူႇမွၼ်ႇသူၼၼ်ႉလႄႈပၼ်မိူင်းၵႃႈဢၼ်မၼ်းၸဝ်ႈဝႆႉၵတိၼၼ်ႉယဝ်ႉၸိုင်၊-
သူတၵ်းလႆႈလိူၵ်ႈဢဝ်ဝဵင်းတၢင်ႇဝဵင်းလႄႈၸတ်းဝႆႉထႅင်ႈသၢမ်ဝဵင်းဢေႃႈ။ ပေႃးသူပႂ်ႉၵမ်ပႂ်ႉၸွမ်းၵႃႈဢၼ်ၵဝ်ပိင်းၺၢပ်ႈဝႆႉတီႈသူဝၼ်းမိူဝ်ႈၼႆႉၼၼ်ႉသေယဝ်ႉ၊မီးၸႂ်ဢၼ်ႁၵ်ႉ ထႃႇဝရႃႉၽြႃး၊ ၽြႃးပဵၼ်ၸဝ်ႈသူလႄႈယူႇၸွမ်းၵႃႈၼင်ႇဢၼ်မၼ်းၸဝ်ႈသင်ႇသွၼ်ဝႆႉၸိူဝ်းၼၼ်ႉၸိုင်၊-
သူတၵ်းလႆႈႁဵတ်းၸိူဝ်ႉၼင်ႇၼႆပုၼ်ႈလွင်ႈၼင်ႇႁိုဝ်ၵေႃႉဢၼ်ဢမ်ႇထိူၵ်ႈၶၢမ်ႇတၢႆၼၼ်ႉဢမ်ႇလႆႈတၢႆၵႃႈၼႂ်းမိူင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူပၼ်ႁႂ်ႈသူပိူင်ႇ၊ဢိၵ်ႇတင်းသူၵေႃႈတၵ်းဢမ်ႇမီးဢပျတ်ႈၵွပ်ႈလူၺ်ႈဢၼ်ဢဝ်ဢသၢၵ်ႈၵူၼ်းတၢႆၼၼ်ႉဢေႃႈ။
“ၵူၺ်းၵႃႈ၊ပေႃးၵူၼ်းၵေႃႉၼိုင်ႈတင်ႈၸႂ်တင်ႈၶေႃးဢဝ်တၢႆၵေႃႉဢၼ်မၼ်းဝႆႉတၢင်းၽိတ်းတီႈၵၼ်ၼၼ်ႉသေယဝ်ႉ၊လႅၼ်ႈပၢႆႈၵႂႃႇသွၼ်ႈယူႇတဵတ်ႇယူႇၼႂ်းဝဵင်းၸိူဝ်းၼၼ်ႉသေဝဵင်းဝဵင်းၸိုင်၊-
ၶုၼ်တီႈဝဵင်းဢၼ်မၼ်းယူႇၼၼ်ႉၸိူဝ်းၼၼ်ႉတၵ်းပွႆႇၸႂ်ႉၵူၼ်းၵႂႃႇတိဢဝ်မၼ်းဢွၵ်ႇသေၵႃႈတီႈၼၼ်ႈမႃးသေယဝ်ႉ၊ဢဝ်မၼ်းဢၢပ်ႈပၼ်ၵႃႈၼႂ်းမိုဝ်းပီႈၼွင်ႉၸိူဝ်းဢၼ်ထိူၵ်ႈတွပ်ႇတႅၼ်းဢဝ်တၢႆမၼ်းၼၼ်ႉႁႂ်ႈမၼ်းလႆႈၶၢမ်ႇတၢင်းဢၼ်ဢဝ်တၢႆဢေႃႈ။-
သူဢမ်ႇလူဝ်ႇမီးၸႂ်ဢဵတ်းလူမၼ်း။ သူတၵ်းလႆႈပႄႇၽဵဝ်ႈၵေႃႉဢၼ်ထိူၵ်ႈၶၢမ်ႇတၢင်းတၢႆၼၼ်ႉပႅတ်ႈသေၵႃႈၼႂ်းၵူၼ်းမဵဝ်း ဢိသရေး၊ ပုၼ်ႈလွင်ႈၼင်ႇႁိုဝ်သူတၵ်းတေလႆႈလီလႆႈပဵၼ်ၵတ်းယဵၼ်ၶျၢမ်းသႃႇဢေႃႈ။
“ယႃႇပေၶၢႆႉသဝ်လၵ်းဢၼ်မၵ်းမၼ်ႈလႅၼ်လိၼ်ၵူၼ်းႁိူၼ်းၸမ်ၵၼ်တင်းသူဢၼ်ၵူၼ်းမိူဝ်ႈၵွၼ်ႇဢွၼ်ၼႆႉၸိူဝ်းၼၼ်ႉပၵ်းဝႆႉၵႃႈၼႂ်းလိၼ်ဢၼ်သူလႆႈၶၢမ်ႇဢမူၺ်ႇမိူင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူပၼ်ႁႂ်ႈသူပိူင်ႇၼၼ်ႉ။
“ပေႃးမီးၵူၼ်းၶၢမ်ႇသၢၵ်ႈသေႇၵေႃႉလဵဝ်ၵူၺ်းၸိုင်၊တၵ်းႁႂ်ႈၸီႇယၢင်ႇဢမုတုၸရိူၵ်ႈပိူၼ်ႈၸွမ်းၵႂၢမ်းသၢၵ်ႈသေႇမၼ်းၼၼ်ႉဢမ်ႇပဵၼ်လႆႈ။ ပေႃးမီးၵူၼ်းၶၢမ်ႇသၢၵ်ႈသေႇသွင်ၵေႃႉ၊ဢမ်ႇၼၼ်သၢမ်ၵေႃႉၵူၺ်းၸင်ႇတၵ်းၸီႇယၢင်ႇဢမုပိူၼ်ႈလႆႈဢေႃႈ။-
ပေႃးမီးၵူၼ်းသေၵေႃႉၵေႃႉၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈလွင်ႈၵူၼ်းတၢင်ႇၵေႃႉႁဵတ်းတုၸရိူၵ်ႈၸိုင်၊-
ၶဝ်သွင်ၵေႃႉၼၼ်ႉတၵ်းလႆႈၵႂႃႇၵႃႈတီႈဢၼ်မၵ်းၶၢၼ်းဝႆႉတႃႇတေဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၼၼ်ႉႁႂ်ႈလႆႈၶၢမ်ႇတၢင်းဢၼ်ယဵၸ်ႈပရေႃးႁဵၵ်ႈ တင်းလၢႆ၊ဢိၵ်ႇတင်းၶုၼ်ဢၼ်ၸီႇယၢင်ႇတြႃးတင်းလၢႆ၊ဢၼ်မီးယူႇၸူဝ်ႈပၢၼ်ၼၼ်ႉၸီႇယၢင်ႇတြႃးဢေႃႈ။-
ၶုၼ်ဢၼ်ၸီႇယၢင်ႇတြႃးၸိူဝ်းၼၼ်ႉတၵ်းလႆႈၸႅတ်ႈသေးၸေးၸေးၸွတ်ႇၸွတ်ႇလႄႈ၊ပေႃးၵေႃႉၼၼ်ႉၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈယူႇၽၢႆႇၼိုင်ႈတင်းပီႈၼွင်ႉမၼ်းၵူၼ်းမဵဝ်း ဢိသရေး၊ ၼင်ႇၵၼ်ၵၼ်ၸိုင်၊-
မၼ်းၼၼ်ႉတၵ်းလႆႈၶၢမ်ႇတၢမ်ႇဢၼ်မၼ်းၶႂ်ႈႁႂ်ႈပိူၼ်ႈလႆႈၶၢမ်ႇၼၼ်ႉၼင်ႇၵဝ်ႇဢေႃႈ။ ၼင်ႇၼၼ်ၸင်ႇတၵ်းပဵၼ်တၢင်းဢၼ်ဢဝ်ပႅတ်ႈတုၸရိူၵ်ႈဢပျတ်ႈသေၵႃႈၼႂ်းသူဢေႃႈ။-
ၵမ်းၼၼ်ႉ၊ပိူၼ်ႈတၵ်းငိၼ်းလွင်ႈဢၼ်ပဵၼ်ၼၼ်ႉၵူႈၵေႃႉၵူႈၵူၼ်းသေယဝ်ႉ၊တၵ်းဢွၼ်ၵၼ်ၵူဝ်လႄႈၽူႈလႂ်တၵ်းဢမ်ႇႁတ်းႁဵတ်းတုၸရိူၵ်ႈၸိူဝ်ႉၼင်ႇၼၼ်ဢေႃႈ။-
ၼႂ်းလွင်ႈဢမုၸိူဝ်ႉၼင်ႇၼႆၸိုင်၊ယႃႇပေမီးၸႂ်ဢဵတ်းလူ။ သူတၵ်းလႆႈၸီႇယၢင်ႇဢပျတ်ႈတၢမ်ႇဢသၢၵ်ႈပုၼ်ႈဢသၢၵ်ႈ၊မၢၵ်ႇတႃပုၼ်ႈမၢၵ်ႇတႃ၊ၶဵဝ်ႈပုၼ်ႈၶဵဝ်ႈ၊မိုဝ်းပုၼ်ႈမိုဝ်း၊တိၼ်ပုၼ်ႈတိၼ်ဢေႃႈ။
“မိူဝ်ႈဢၼ်ၶိုၼ်ႈတိုၵ်းသိုၵ်းၵၼ်တင်းရၢၼ်ႇသူႇသူလႄႈႁၼ်မႃႉလႂ်၊လေႃႉမႃႉလႂ်၊တပ်ႉသိုၵ်းဢၼ်ယဵင်ႈၶႅၼ်းၼမ်ၼႃႇသေသူၼၼ်ႉၸိုင်၊ယႃႇပေၵူဝ်ၶဝ်။ လွင်ႈမၼ်းၸမ်ႉ၊ ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢၼ်ၵႄႇၼုၵ်ႈဢဝ်သူဢွၵ်ႇမိူင်း ဢေးၵျိပ်ႉ၊ မႃးၼၼ်ႉမီးယူႇလူၺ်ႈၵၼ်တင်းသူဢေႃႈ။-
ၸူဝ်ႈဢၼ်ဢမ်ႇပႆႇတိုၵ်းသိုၵ်းၼၼ်ႉၸိုင်၊ယဵၸ်ႈပရေႃးႁဵၵ်ႈ တၵ်းလႆႈသုတ်ႉၶိုၼ်ႈလႄႈလၢတ်ႈတီႈၵူၼ်းသိုၵ်းတင်းလၢႆလႄႈဝႃႈ၊-
‘မဵဝ်း ဢိသရေး၊ ႟။ ထွမ်ႇငိၼ်းတႃႉ။ မိူဝ်ႈၼႆႉသူတၵ်းဢွၼ်ၵၼ်ၶိုၼ်ႈတိုၵ်းသိုၵ်းဢေႃႈ။ သူယႃႇပေၵူဝ်ရၢၼ်ႇသူႇသူၼၼ်ႉ။ ယႃႇပေၸႂ်လု။ ယႃႇပေသၼ်ႇပေဝႆ။ ယႃႇပေတူၵ်းၸႂ်လႂ်တိုၼ်ႇၵွပ်ႈပိူဝ်ႈၶဝ်ၼၼ်ႉ။-
လွင်ႈမၼ်းၸမ်ႉ၊ ထႃႇဝရႃႉၽြႃး၊ ၽြႃးပဵၼ်ၸဝ်ႈသူၼၼ်ႉၵႂႃႇၸွမ်းလူၺ်ႈၵၼ်တင်းသူယူႇလႄႈမၼ်းၸဝ်ႈတၵ်းႁႂ်ႈသူလႆႈဢွင်ႇမႅင်ႇဢေႃႈ၊’ ဝႃႈၼင်ႇၼႆဢေႃႈ။
“မိူဝ်ႈၼၼ်ႉၶုၼ်သိုၵ်းၶဝ်ၵေႃႈတၵ်းလႆႈလၢတ်ႈတီႈၵူၼ်းသိုၵ်းတင်းလၢႆလႄႈဝႃႈ၊ ‘ၵႃႈတီႈၼႆႈၸွင်ႇမီးၵူၼ်းသေၵေႃႉၵေႃႉဢၼ်ႁဵတ်းႁိူၼ်းမႂ်ႇလႄႈဢမ်ႇပႆႇၶိုၼ်ႈႁိူၼ်းမႂ်ႇၼၼ်ႉႁိုဝ်း။ ပေႃးမီးၸိုင်၊ႁႂ်ႈမၼ်းၶိုၼ်းမိူဝ်းႁိူၼ်းသေ။ ပေႃးဢမ်ႇၼၼ်ၵူဝ်မၼ်းတၢႆပႅတ်ႈၼႂ်းၼႃႈသိုၵ်းလႄႈပိူၼ်ႈတၢင်ႇၵေႃႉတၵ်းၶိုၼ်ႈႁိူၼ်းမႂ်ႇမၼ်းၼၼ်ႉဢေႃႈ။-
ၵႃႈတီႈၼႆႈၸွင်ႇမီးၵူၼ်းသေၵေႃႉၵေႃႉဢၼ်ၽုၵ်ႇသူၼ်မၢၵ်ႇၸပိတ်ႉလႄႈဢမ်ႇပႆႇလႆႈၵိၼ်မၢၵ်ႇမၼ်းၼၼ်ႉႁိုဝ်း။ ပေႃးမီးၸိုင်၊ႁႂ်ႈမၼ်းၶိုၼ်းမိူဝ်းသေ။ ပေႃးဢမ်ႇၼၼ်ၵူဝ်မၼ်းတၢႆပႅတ်ႈၼႂ်းၼႃႈသိုၵ်းလႄႈ ပိူၼ်ႈတၢင်ႇၵေႃႉတၵ်းၵိၼ်မၢၵ်ႇမၼ်းဢေႃႈ။-
ၵႃႈတီႈၼႆႈၸွင်ႇမီးၵူၼ်းသေၵေႃႉၵေႃႉဢၼ်မၼ်ႈမၢႆၵၼ်တင်းမႄႈယိင်းလႄႈဢမ်ႇပႆႇလႆႈပဵၼ်ၵူႈပဵၼ်ႁိူၼ်းလူၺ်ႈၵၼ်ၼၼ်ႉႁိုဝ်း။ ပေႃးမီးၸိုင်၊ႁႂ်ႈမၼ်းၶိုၼ်းမိူဝ်းသေ။ ပေႃးဢမ်ႇၼၼ်ၵူဝ်မၼ်းတၢႆပႅတ်ႈၼႂ်းၼႃႈသိုၵ်းလႄႈပိူၼ်ႈတၢင်ႇၵေႃႉတၵ်းပဵၼ်ၵူႈပဵၼ်ႁိူၼ်းလူၺ်ႈၵၼ်တင်းမႄႈယိင်းဢၼ်မၼ်ႈမၢႆၵၼ်တင်းမၼ်းဝႆႉၼၼ်ႉဢေႃႈ၊’ ဝႃႈၼင်ႇၼႆဢေႃႈ။
“ၶုၼ်သိုၵ်းၸိူဝ်းၼၼ်ႉသမ်ႉတၵ်းလႆႈလၢတ်ႈတီႈၵူၼ်းသိုၵ်းတင်းလၢႆထႅင်ႈလႄႈဝႃႈ၊ ‘ၵႃႈတီႈၼႆႈၸွင်ႇမီးၵူၼ်းသေၵေႃႉၵေႃႉမီးၸႂ်ဢၼ်ၵူဝ်ဢၼ်ႁႄလႄႈၸႂ်လုၼၼ်ႉႁိုဝ်း။ ပေႃးမီးၸိုင်၊ႁႂ်ႈမၼ်းၶိုၼ်းမိူဝ်းသေ။ ပေႃးဢမ်ႇၼၼ်ၵူဝ်ၵူၼ်းတၢင်ႇၵေႃႉတၢင်ႇၵူၼ်းတၵ်းၸႂ်လုၵႂႃႇမိူၼ်ၼင်ႇၸႂ်မၼ်းၼၼ်ႉဢေႃႈ၊’ ဝႃႈၼင်ႇၼႆဢေႃႈ။-
မိူဝ်ႈဢၼ်ၶုၼ်သိုၵ်းၸိူဝ်းၼၼ်ႉလၢတ်ႈတီႈၵူၼ်းသိုၵ်းတင်းလၢႆယဝ်ႉတူဝ်ႈယဝ်ႉၸင်ႇဢွၼ်ၵၼ်ယုၵ်ႉတၢင်ႇၸဝ်ႈသိုၵ်းႁႂ်ႈၵွၼ်းတပ်ႉထိင်းတပ်ႉၶဝ်ၼၼ်ႉဢေႃႈ။
“မိူဝ်ႈဢၼ်သူၶိုၼ်ႈၸူးဝဵင်းသေဝဵင်းဝဵင်းႁႂ်ႈလႆႈတိုၵ်းသိုၵ်းၼၼ်ႉၸိုင်၊ပၼ်ဢၶႂၢင်ႉႁႂ်ႈၵူၼ်းဝဵင်းၼၼ်ႉၶၢမ်ႇသုမ်းသိုၵ်းဢွၼ်တၢင်းတႃႉ။-
ပေႃးၶဝ်ၶၢမ်ႇသုမ်းသိုၵ်းဢွၼ်တၢင်းလႄႈၽုၺ်ႇၽၵ်းတူဝဵင်းပၼ်သူၸိုင်၊ၵူၼ်းဝဵင်းၸိူဝ်းၼၼ်ႉတင်းသဵင်ႈတင်းမူတ်းတၵ်းလႆႈသၢၵ်ႈၶွၼ်ႇပၼ်ၶွၼ်ႇတီႈသူလႄႈ၊ၵိုတ်ႉႁၢပ်ႇၼႃႈၵၢၼ်သူဢေႃႈ။-
ပေႃးဝဵင်းၼၼ်ႉဢမ်ႇၶၢမ်ႇၼွမ်း၊ယင်းႁပ်ႉတိုၵ်းသူၸိုင်၊ဢဝ်တပ်ႉသိုၵ်းသူလွမ်ႉႁွပ်ႈဝဵင်းၼၼ်ႉဝႆႉတႃႉ။-
မိူဝ်ႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းသူယဝ်ႉၼၼ်ႉၸိုင်၊ၶႃႈၽၼ်းၵူၼ်းၸၢႆးၵႃႈဢၼ်မီးၼႂ်းဝဵင်းၼၼ်ႉတၢႆတႃႉ။-
မႄႈယိင်းလႂ်၊လုၵ်ႈဢွၼ်ႇလႂ်၊တူဝ်သတ်းလႂ်၊ဢိၵ်ႇတင်းဢုၵ်ႉၸႃႇၵႃႈဢၼ်မီးၼႂ်းဝဵင်းၼၼ်ႉၸိုင်၊သိမ်းဢဝ်ပုၼ်ႈသူတႃႉ။ ဢုၵ်ႉၸႃႇၵႃႈဢၼ်သူႁိမ်ဢဝ်လႆႈတီႈရၢၼ်ႇသူႇသူၸိူဝ်းၼၼ်ႉသူမီးဢၶႂၢင်ႉဢၼ်ဢဝ်သုင်းဢဝ်တိုဝ်းၵူႈၸိူဝ်ႉၵူႈပိူင်ဢေႃႈ။-
လွင်ႈၼႆႉၸိုင်၊သူတၵ်းလႆႈႁဵတ်းတီႈဝဵင်းၸိူဝ်းဢၼ်ၵႆၵၼ်တင်းလႅၼ်လိၼ်ဢၼ်သူတၵ်းၶဝ်ႈပိူင်ႇၸိူဝ်းၼၼ်ႉဢေႃႈ။
“မိူဝ်ႈဢၼ်သူတိုၵ်းတေႃးသိမ်းဢဝ်ဝဵင်းၸိူဝ်းဢၼ်မီးၼႂ်းမိူင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢၢင်ႈတၵ်းပၼ်ႁႂ်ႈသူပိူင်ႇၼၼ်ႉၸိုင်၊သူဢမ်ႇလႆႈႁႂ်ႈၵူၼ်းသတ်ႉတဝႃႇဢၼ်ထူၺ်ႈၸႂ်ယူႇၸိူဝ်းၼၼ်ႉဢသၢၵ်ႈလႆႈလိပ်းယူႇသေၵေႃႉသေၵူၼ်း။-
သူတၵ်းလႆႈယႃႉၽဵဝ်ႈပႅတ်ႈၵူၼ်းမဵဝ်းဢၼ်ဝႃႈ၊ၵူၼ်းမဵဝ်း ႁိတ်ႉတိ၊ ၵူၼ်းမဵဝ်း ဢႃႇမေႃးရိ၊ ၵူၼ်းမဵဝ်း ၶႃႇၼၼိ၊ ၵူၼ်းမဵဝ်း ၽေႇရၸိ၊ ၵူၼ်းမဵဝ်း ႁိဝိ၊ ၵူၼ်းမဵဝ်း ယေႇပုသိ၊ ၸိူဝ်းၼၼ်ႉမူတ်းမူတ်းသဵင်ႈသဵင်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူသင်ႇလၢတ်ႈဝႆႉတီႈသူၼၼ်ႉဢေႃႈ။-
သူတၵ်းလႆႈဢဝ်ၶဝ်တၢႆပုၼ်ႈလွင်ႈၼင်ႇႁိုဝ်ၶဝ်ဢမ်ႇလႆႈသွၼ်ပၼ်ႁႂ်ႈသူႁဵတ်းလွင်ႈတၢင်းဢၼ်ၶတ်းၵၼ်တင်း ထႃႇဝရႃႉၽြႃး၊ လႄႈႁဵတ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇမဵဝ်းဢၼ်ၶဝ်ႁဵတ်း၊မိူဝ်ႈဢၼ်ၶဝ်ဝႆႈၽြႃးၶဝ်ၼၼ်ႉဢေႃႈ။
“မိူဝ်ႈဢၼ်သူလွမ်ႉဝႅတ်ႉဝဵင်းသေဝဵင်းဝဵင်းယူႇႁိုင်ၼႃႇႁႂ်ႈလႆႈတိုၵ်းဢဝ်ၼၼ်ႉၸိုင်၊ယႃႇပေပွမ်ႈပႅတ်ႈတူၼ်ႈမၢၵ်ႇတင်းလၢႆ။ သူလူဝ်ႇၵိၼ်မၢၵ်ႇမၼ်းလႄႈဢမ်ႇလႆႈပွမ်ႈမၼ်းလူမ်ႉပႅတ်ႈ။ တူၼ်ႈမႆႉတင်းလၢႆပဵၼ်ရၢၼ်ႇသူႇသူဢမ်ႇၸႂ်ႈ။-
တူၼ်ႈမႆႉၸိူဝ်းဢၼ်သူႁုလွင်ႈဢၼ်ဢမ်ႇမီးဢီႈသင်ၵိၼ်လႆႈၼၼ်ႉၸိုင်၊သူမီးဢၶႂၢင်ႉဢၼ်လႆႈပွမ်ႈလူမ်ႉသေလႄႈႁဵတ်းၶိူင်ႈပိူင်ပုၼ်ႈဢၼ်တိုၵ်းသိုၵ်းတေႃႇဝဵင်းဢၼ်တိုၵ်းသိုၵ်းၵၼ်တင်းသူၼၼ်ႉတေႃႇထိုင်ႁွတ်ႈသူသိမ်းဢဝ်ဝဵင်းၼၼ်ႉလႆႈၼၼ်ႉဢေႃႈ။
“ၵႃႈၼႂ်းမိူင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူပၼ်ႁႂ်ႈသူပိူင်ႇၼၼ်ႉပေႃးထူပ်းႁၼ်တူဝ်တၢႆၵူၼ်းၵႃႈတီႈၼွၵ်ႈတီႈပၢင်ႇလႄႈဢမ်ႇႁုလွင်ႈဢၼ်ၽူႈလႂ်ဢဝ်မၼ်းတၢႆၸိုင်၊-
ၵူၼ်းသူၸိူဝ်းဢၼ်ပဵၼ်ၵႄႇပဵၼ်ႁူဝ်ဢိၵ်ႇတင်းၶုၼ်ဢၼ်ၸီႇယၢင်ႇတြႃးတင်းလၢႆတၵ်းလႆႈဢွၼ်ၵၼ်ဢွၵ်ႇမႃးလႄႈတႅၵ်ႈတူၺ်းတီႈဢၼ်ထူပ်းႁၼ်ၵူၼ်းတၢႆၼၼ်ႉတေႃႇထိုင်ႁွတ်ႈဝဵင်းၸိူဝ်းဢၼ်မီးၸမ်ႁိမ်းႁွမ်းၼၼ်ႉၵူႈဝဵင်းဢေႃႈ။-
မိူဝ်ႈၼၼ်ႉၵူၼ်းၸိူဝ်းဢၼ်ပဵၼ်ၵႄႇပဵၼ်ႁူဝ်ၵႃႈၼႂ်းဝဵင်းဢၼ်ၸမ်ၵၼ်တင်းတူဝ်တၢႆသေပိူၼ်ႈၼၼ်ႉတၵ်းလႆႈဢဝ်ဝူဝ်းမႄႈဢွၼ်ႇတူဝ်ၼိုင်ႈဢၼ်ဢမ်ႇပႆႇတွၼ်ႉယၢမ်ႈဢဝ်ၵၢၼ်းတၢင်ႇ၊ဢမ်ႇပႆႇတွၼ်ႉၸႂ်ႉၵၢၼ်သေပွၵ်ႈၼၼ်ႉမႃးလႄႈ။-
တၵ်းလႆႈဢဝ်ဝူဝ်းမႄႈဢွၼ်ႇၼၼ်ႉၵႂႃႇၵႃႈတီႈႁူၺ်ႈဢၼ်မီးၼမ်ႉႁွင်ႈဢၼ်ၼမ်ႉဢမ်ႇတွၼ်ႉႁႅင်ႈ၊တီႈလိၼ်ဢၼ်ဢမ်ႇတွၼ်ႉလႆႈထႆ၊ဢမ်ႇတွၼ်ႉလႆႈၽုၵ်ႇလႆႈသွမ်ႈသေပွၵ်ႈၼၼ်ႉသေယဝ်ႉ၊ႁၵ်းၶေႃးမၼ်းၵႃႈတီႈၼၼ်ႈတႃႉ။-
ယဵၸ်ႈပရေႃးႁဵၵ်ႈ ၵူၼ်းမဵဝ်း လေႇဝိ၊ ၶဝ်ၵေႃႈတၵ်းလႆႈၵႂႃႇၵႃႈတီႈၼၼ်ႈၼင်ႇၵဝ်ႇ၊ၵွပ်ႈပိူဝ်ႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူလိူၵ်ႈဢဝ်ၶဝ်ႁႂ်ႈၶဝ်လႆႈပွင်ႁဵတ်းၼႃႈၵၢၼ်မၼ်းၸဝ်ႈဢိၵ်ႇတင်းႁႂ်ႈၶဝ်လႆႈပၼ်တၢင်းလီၼႂ်းၼႃႇမႃႉၸိုဝ်ႈသဵင်မၼ်းၸဝ်ႈလႄႈၶဝ်တၵ်းလႆႈတႅပ်းတတ်းဢမုဢၼ်ႁၢဝ်ႈဢၼ်ၵျၢမ်းၼၼ်ႉဢေႃႈ။-
ၵမ်းၼၼ်ႉ ၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆၵႃႈၼႂ်းဝဵင်းဢၼ်ၸမ်ၵၼ်တင်းတူဝ်တၢႆသေပိူၼ်ႈၼၼ်ႉတၵ်းလႆႈဢွၼ်ၵၼ်သုၵ်ႈမိုဝ်းၶဝ်ၵႃႈၼိူဝ်တူဝ်ဝူဝ်းမႄႈဢွၼ်ႇဢၼ်လႆႈၶၢမ်ႇႁၵ်းၶေႃးတၢႆၼၼ်ႉသေယဝ်ႉ၊-
တၵ်းလႆႈဢွၼ်ၵၼ်မွၵ်ႇလၢတ်ႈလႄႈဝႃႈ၊ ‘ႁဝ်းဢမ်ႇလႆႈဢဝ်ဢသၢၵ်ႈမၼ်းၼႆႉတၢႆ။ ၽူႈလႂ်ဢဝ်တၢႆဝႆႉၵေႃႈႁဝ်းဢမ်ႇလႆႈႁုလႆႈႁၼ်။-
ဢူဝ်း၊ ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈပွႆႇလွတ်ႈဢပျတ်ႈၵူၼ်းၸဝ်ႈႁဝ်းမဵဝ်း ဢိသရေး၊ ဢၼ်ၸဝ်ႈႁဝ်းၵႄႇၼုၵ်ႈဢဝ်ဢွၵ်ႇသေမိူင်း ဢေးၵျိပ်ႉ၊ မႃးၼၼ်ႉသေၵမ်းတီႈၶႃႈ။ ပွႆႇလွတ်ႈဢပျတ်ႈၶႃႈၸဝ်ႈႁဝ်းၶဝ်လႄႈၶႅၼ်းတေႃႈယႃႇပေႁႂ်ႈၶႃႈၸဝ်ႈႁဝ်းၶဝ်ထုၵ်ႇဢပျတ်ႈၵွပ်ႈပိူဝ်ႈဢသၢၵ်ႈၵေႃႉဢၼ်ဢမ်ႇထုၵ်ႇတၢႆၼၼ်ႉသေၵမ်းတီႈၶႃႈ၊’ ဝႃႈၼင်ႇၼႆဢေႃႈ။-
ၼင်ႇၼၼ်လႄႈၵွပ်ႈလူၺ်ႈတၢင်းဢၼ်ႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢလူဝ်ႇၼၼ်ႉသူတၵ်းဢမ်ႇမီးတႃႇဝုၼ်ႇပုၼ်ႈၽွၼ်းၼႂ်းဢမုၵူၼ်းတၢႆၼၼ်ႉဢေႃႈ။
“မိူဝ်ႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈမႂ်းပၼ်ႁႂ်ႈမႂ်းဢွင်ႇသိုၵ်းယဝ်ႉလႄႈ၊မႂ်းတိဢဝ်ၵူၼ်းဢၼ်သုမ်းသိုၵ်းတင်းလၢႆမႃးသေလႄႈ၊-
မႂ်းႁၼ်မႄႈယိင်းဢၼ်ႁၢင်ႈလီၼႂ်းၶဝ်ၸိူဝ်းၼၼ်ႉလႄႈမီးဢလူဝ်ႇၶႂ်ႈဢဝ်မႃးႁဵတ်းမေးၸိုင်၊-
မႂ်းတၵ်းလႆႈဢဝ်မၼ်းမႃးၵႃႈတီႈႁိူၼ်းမႂ်းဢေႃႈ။ ၵမ်းၼၼ်ႉ မၼ်းတၵ်းလႆႈႁဵတ်းတၢင်းဢၼ်ထႃႁူဝ်တင်းၵႅတ်းၼဵပ်ႉမိုဝ်းလႄႈ၊-
ပုတ်ႈလၢႆႈၶူဝ်းၼုင်ႈမၼ်းလႄႈ၊ႁႂ်ႈမၼ်းယူႇၵႃႈၼႂ်းႁိူၼ်းသူသေယဝ်ႉ၊မၼ်းတၵ်းလႆႈၶၢင်းၶီၶၢင်းၽၢၼ်ပုၼ်ႈလွင်ႈပေႃႈမႄႈမၼ်းယူႇလိူၼ်ၼိုင်ႈတဵမ်တဵမ်ယဝ်ႉၸင်ႇ၊မႂ်းမီးဢၶႂၢင်ႉဢၼ်တၵ်းလႆႈၵူပ်ႉၵူႈပဵၼ်ႁိူၼ်းလူၺ်ႈၵၼ်တင်းမၼ်းဢေႃႈ။-
ၵမ်းလိုၼ်းပေႃးမႂ်းဢမ်ႇမီးၸႂ်ဢၼ်မူၼ်ႈဢၼ်ပျေႃႇလူၺ်ႈၵၼ်တင်းမၼ်းၸိုင်၊မႂ်းတၵ်းလႆႈပွႆႇမၼ်းၵႂႃႇလွတ်ႈလွတ်ႈလႅဝ်းလႅဝ်းဢေႃႈ။ ၵွပ်ႈပိူဝ်ႈဢၼ်မႂ်းႁႂ်ႈပၢၼ်သၢဝ်မၼ်းလုသုမ်းၵႂႃႇယဝ်ႉၼၼ်ႉလႄႈမႂ်းဢမ်ႇလႆႈၶၢႆဢဝ်ငိုၼ်းလႃးလႃး။ မႂ်းဢမ်ႇလႆႈသိူၵ်ႈသမ်ႇမၼ်းမိူၼ်ၸိူဝ်ႉၼင်ႇၶႃႈ။
“ပေႃးၵူၼ်းၵေႃႉၼိုင်ႈမီးမေးသွင်ၵေႃႉလႄႈၶဝ်ၼၼ်ႉၵိူတ်ႇလဵင်ႉပၼ်လုၵ်ႈၸၢႆးမႃးတင်းသွင်ၵေႃႉသေၵေႃႈ၊လုၵ်ႈၸၢႆးတူၼ်ႈၼၼ်ႉပဵၼ်လုၵ်ႈၸၢႆးမေးၵေႃႉဢၼ်မၼ်းဢမ်ႇႁၵ်ႉၼၼ်ႉဢေႃႈ။-
မိူဝ်ႈဢၼ်မၼ်းတၵ်းၽႄမႅင်ႇပၼ်ဢမူၺ်ႇတီႈလုၵ်ႈၸၢႆးမၼ်းတင်းသွင်ၼၼ်ႉၸိုင်၊မၼ်းတၵ်းဢမ်ႇလႆႈယူႇၽၢႆႇလုၵ်ႈၸၢႆးမေးဢၼ်မၼ်းႁၵ်ႉၼၼ်ႉလႄႈၽႄမႅင်ႇပၼ်ဢမူၺ်ႇၼႂ်းဢရႃႇဢၼ်ပဵၼ်လုၵ်ႈၸၢႆးတူၼ်ႈၼၼ်ႉ။-
မၼ်းတၵ်းလႆႈမၢတ်ႈလွင်ႈတၢင်းဢၼ်လုၵ်ႈၸၢႆးမေးဢၼ်မၼ်းဢမ်ႇႁၵ်ႉၼၼ်ႉပဵၼ်လုၵ်ႈၸၢႆးတူၼ်ႈသေလႄႈတေလႆႈမႅင်ႇပၼ်ဢမူၺ်ႇဢုၵ်ႉၸႃႇသွင်ပုၼ်ႈတီႈမၼ်းဢေႃႈ။ လွင်ႈမၼ်းၸမ်ႉ၊မၼ်းပဵၼ်ဢဵၼ်ႁႅင်းႁူဝ်ပိုင်းပေႃႈမၼ်းဢေႃႈ။ ဢၶႂၢင်ႉဢရႃႇလုၵ်ႈၸၢႆးတူၼ်ႈၵေႃႈၸၢပ်ႈသႅင်ႇၵၼ်တင်းမၼ်းဢေႃႈ။
“ပေႃးၵူၼ်းၵေႃႉၼိုင်ႈမီးလုၵ်ႈၸၢႆးဢၼ်တိုဝ်ၼႃႇလႄႈမီးၸႂ်သၽေႃးဢၼ်လိူင်းၵျၢမ်းၼႃႇ၊ပိၵ်ႉသမ်ႉပေႃႈမႄႈမၼ်းသုင်းမႃႉပၼ်တၢမ်ႇသေၵေႃႈဢမ်ႇထွမ်ႇဢမ်ႇဢဝ်ၵႂၢမ်းပေႃႈၵႂၢမ်းမႄႈၼၼ်ႉၸိုင်၊-
ပေႃႈမႄႈမၼ်းတၵ်းလႆႈဢဝ်မၼ်းၵႂႃႇၵႃႈတီႈၽၢႆႇၼႃႈၵူၼ်းဢၼ်ပဵၼ်ၵႄႇပဵၼ်ႁူဝ်ၵႃႈၼႂ်းဝဵင်းၶဝ်ၼၼ်ႉႁႂ်ႈၶဝ်ၸႅတ်ႈထၢမ်မၼ်းဢေႃႈ။-
ၶဝ်တၵ်းလႆႈမွၵ်ႇလၢတ်ႈတီႈၵူၼ်းဢၼ်ပဵၼ်ၵႄႇပဵၼ်ႁူဝ်ၸိူဝ်းၼၼ်ႉလႄႈဝႃႈ၊ ‘လုၵ်ႈၸၢႆးႁဝ်းၶႃႈၼႆႉပဵၼ်ဢၼ်တိုဝ်ၼႃႇ၊မီးၸႂ်သၽေႃးဢၼ်လိူင်းၵျၢမ်းၼႃႇလႄႈဢမ်ႇထွမ်ႇဢမ်ႇဢဝ်ၵႂၢမ်းႁဝ်းၶႃႈ။ မၼ်းၸၢႆႇငိုၼ်းပႅတ်ႈၼမ်ၼႃႇလႄႈမဝ်းလဝ်ႈမဝ်းၵမ်ယူႇၶႃႈဢေႃႈ၊’ ဝႃႈၼင်ႇၼႆဢေႃႈ။-
ၵူၼ်းၸၢႆးဝဵင်းၼၼ်ႉတင်းသဵင်ႈတင်းလူင်တၵ်းလႆႈဢွၼ်ၵၼ်ဢဝ်မၢၵ်ႇႁိၼ်ပိုဝ်ႈသႂ်ႇမၼ်းထၢၼ်ႈပေႃးတၢႆဢေႃႈ။ ၼင်ႇၼၼ်လႄႈပဵၼ်တၢင်းဢၼ်ဢဝ်ပႅတ်ႈတုၸရိူၵ်ႈဢပျတ်ႈဢွၵ်ႇသေၵႃႈၼႂ်းမႂ်းဢေႃႈ။ ၵူၼ်းမဵဝ်း ဢိသရေး၊ တင်းလၢႆတၵ်းလႆႈငိၼ်းလွင်ႈၼႆႉလႄႈမီးၸႂ်ဢၼ်ၵူဝ်ဢၼ်ႁႄဢေႃႈ။
“ပေႃးမီးၵူၼ်းၵေႃႉဢၼ်ထုၵ်ႇလႆႈၶၢမ်ႇတၢင်းဢၼ်ဢဝ်တၢႆၵွပ်ႈပိူဝ်ႈဢပျတ်ႈဢၼ်ထိူၵ်ႈၶၢမ်ႇတၢႆၼၼ်ႉလႄႈဢဝ်ႁွႆႈဝႆႉၵႃႈၼိူဝ်သဝ်ၸိုင်၊-
တူဝ်တၢႆမၼ်းၼၼ်ႉဢမ်ႇလႆႈမီးယူႇၵႃႈၼိူဝ်သဝ်လၵ်းတင်းၶိုၼ်း။ သူတၵ်းလႆႈဢဝ်ၽင်လိၼ်ပႅတ်ႈၼႂ်းဝၼ်းၼၼ်ႉၵမ်းလဵဝ်၊ၵွပ်ႈပိူဝ်ႈၵေႃႉဢၼ်လႆႈၶၢမ်ႇႁွႆႈတၢႆၵႃႈၼိူဝ်သဝ်ၼၼ်ႉပဵၼ်တၢင်းဢၼ်ၽြႃးပဵၼ်ၸဝ်ႈၵိၼ်ႇဝႃႈၼၼ်ႉဢေႃႈ။ လွင်ႈၼင်ႇႁိုဝ်မိူင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူပၼ်ႁႂ်ႈသူပိူင်ႇၼၼ်ႉတၵ်းဢမ်ႇလႆႈၵူဝ်ႈၵိူၵ်ႇၸိုင်၊ဢဝ်ၽင်လိၼ်ပႅတ်ႈၵမ်းလဵဝ်တႃႉ။
“ပေႃးသူႁၼ်သူဝ်း၊ဝူဝ်းပီႈၼွင်ႉၵူၼ်းမဵဝ်း ဢိသရေး၊ သူၽိတ်းတၢင်းပိူင်ႈတၢင်းၸိုင်၊မႂ်းဢမ်ႇလႆႈယူႇတဵတ်ႇတဵတ်ႇယူႇ။ သူတၵ်းလႆႈဢဝ်သူင်ႇၶိုၼ်းထိုင်ၸဝ်ႈမၼ်းဢေႃႈ။-
ပေႃးၸဝ်ႈမၼ်းယူႇၵႆၵၼ်တင်းသူ၊ဢမ်ႇၼၼ်သူဢမ်ႇႁုၸဝ်ႈမၼ်းပဵၼ်ၽႂ်ၼၼ်ႉၸိုင်၊ဢဝ်သူဝ်း၊ဝူဝ်းၼၼ်ႉမႃးၵႃႈတီႈႁိူၼ်းသူတႃႉ။ မိူဝ်ႈဢၼ်ၸဝ်ႈမၼ်းၶႆႈၸွမ်းမႃးၼၼ်ႉၸိုင်၊ဢၢပ်ႈပၼ်ၶိုၼ်းမၼ်းတႃႉ။-
ပိူင်လဵဝ်ၵၼ်၊ပေႃးသူႁၼ်မႃႉလီႈသေဢမ်ႇဝႃႈ၊ၶူဝ်းလဵင်းသေဢမ်ႇဝႃႈ၊ဢုၵ်ႉၸႃႇပီႈၼွင်ႉၵူၼ်းမဵဝ်း ဢိသရေး၊ သူႁၢႆၵႂႃႇၸိုင်၊ႁဵတ်းၸွမ်းၸိူဝ်ႉၼင်ႇၼၼ်ၼင်ႇၵဝ်ႇတႃႉ။
“ပေႃးသူႁၼ်မႃႉလီႈ၊ဢမ်ႇၼၼ်ဝူဝ်းပီႈၼွင်ႉၵူၼ်းမဵဝ်း ဢိသရေး၊ သူၼင်ႇၵၼ်လူမ်ႉယူႇၵႃႈတီႈၵၢင်တၢင်းၸိုင်၊သူဢမ်ႇလႆႈယူႇတဵတ်ႇတဵတ်ႇယူႇ။ သူတၵ်းလႆႈၸွႆႈပူၵ်းႁႂ်ႈမၼ်းလုၵ်ႉဢေႃႈ။
“မႄႈယိင်းတၵ်းဢမ်ႇလႆႈၼုင်ႈၶူဝ်းၵူၼ်းၸၢႆး။ ၵူၼ်းၸၢႆးၵေႃႈတၵ်းဢမ်ႇလႆႈၼုင်ႈၶူဝ်းမႄႈယိင်း။ ထႃႇဝရႃႉၽြႃး၊ ၽြႃးပဵၼ်ၸဝ်ႈသူလီႁင်ႈဢဵတ်ႇသဵတ်ႇၶဝ်ၸိူဝ်းဢၼ်ၼုင်ႈၸိူဝ်ႉၼင်ႇၼၼ်ၼၼ်ႉဢေႃႈ။
“ပေႃးသူထူပ်းႁၼ်ႁင်းၼူၵ်ႉဢၼ်မႄႈမၼ်းငွမ်းလုၵ်ႈဢွၼ်ႇမၼ်းယူႇ၊ဢမ်ႇၼၼ်ငွမ်းၶႆႇမၼ်းယူႇၵႃႈၼိူဝ်တူၼ်ႈမႆႉ၊ဢမ်ႇၼၼ်ၵႃႈၼိူဝ်လိၼ်ၸိုင်၊သူတၵ်းဢမ်ႇလႆႈဢဝ်ၼူၵ်ႉမႄႈၼၼ်ႉ။-
သူတၵ်းလႆႈပွႆႇၼူၵ်ႉမႄႈၼၼ်ႉပႅတ်ႈသေလႄႈသိမ်းဢဝ်လုၵ်ႈဢွၼ်ႇမၼ်းၵူၺ်း၊ႁႂ်ႈသူလႆႈလီလႆႈပဵၼ်လႄႈၸူဝ်ႈဢသၢၵ်ႈသူတၵ်းယၢဝ်းယိုၼ်းဢေႃႈ။
“မိူဝ်ႈဢၼ်သူႁဵတ်းႁိူၼ်းမႂ်ႇၼၼ်ႉသူတၵ်းလႆႈႁဵတ်းဢၼ်ႁႄႉဢၼ်ၵင်ႈလဵပ်ႈႁွပ်ႈၸွမ်းႁိမ်းၸွမ်ႁိူၼ်းဢေႃႈ။ ၼင်ႇၼၼ်ၸင်ႇသူတၵ်းၵၢင်းလွတ်ႈတင်းဢပျတ်ႈမိူဝ်ႈဢၼ်သေၵေႃႉသေၵူၼ်းတူၵ်းတၢႆၼၼ်ႉဢေႃႈ။
“သူဢမ်ႇလႆႈဢဝ်ၸိူဝ်ႉၽၼ်းတၢင်ႇမဵဝ်းဝၢၼ်ႇၸွမ်းၵၼ်ၵႃႈၼႂ်းသူၼ်မၢၵ်ႇၸပိတ်ႉသူ။ ပေႃးဝၢၼ်ႇၸိူဝ်ႉၼင်ႇၼၼ်ၸိုင်၊သူဢမ်ႇမီးဢၶႂၢင်ႉဢၼ်လႆႈသိမ်းဢဝ်မၢၵ်ႇၸပိတ်ႉဢိၵ်ႇလူၺ်ႈၵၼ်တင်းမၢၵ်ႇဢၼ်လႆႈၵႃႈတီႈၸိူဝ်ႉၽၼ်းဢၼ်သူဝၢၼ်ႇဝႆႉတၢင်ႇမဵဝ်းၼၼ်ႉ။
“သူဢမ်ႇလႆႈဢဝ်ဝူဝ်းၵိုၵ်းၵၼ်တင်းမႃႉလီႈသေလႄႈထႆၼႃး။
“သူဢမ်ႇလႆႈၼုင်ႈၶူဝ်းဢၼ်ဢဝ်ၵုၺ်တင်းၶူၼ်သူဝ်းလေႃးၵၼ်သေလႄႈတေႃးႁဵတ်းၼၼ်ႉ။
“သူတေလႆႈယဵပ်ႉၸၢမ်းပူႁွႆႈသႂ်ႇၵႃႈတီႈႁိမ်းၶွပ်ႇၸဵင်ႇၶူဝ်းၼုင်ႈသူတင်းသီႇၽၢႆႇဢေႃႈ။
“ပေႃးၵူၼ်းၸၢႆးသေၵေႃႉၵေႃႉဢဝ်မေးသေယဝ်ႉ၊ဝၢႆးလိုၼ်းသမ်ႉငိၼ်းၸင်းမေးမၼ်းလႄႈ၊-
မၼ်းတၢင်ႇဢပျတ်ႈလွင်ႈဢၼ်ဢမ်ႇၸိုဝ်ႈဢမ်ႇၸႂ်ႈ၊သႄႉသွမ်းမေးမၼ်းလႄႈဝႃႈ၊ ‘မိူဝ်ႈဢၼ်ၵဝ်သိူၵ်ႈသမ်ႇလူၺ်ႈၵၼ်တင်းမၼ်းၼၼ်ႉဢမ်ႇထူပ်းလၢၵ်ႈၶၼႃႇသၢၵ်ႈသေႇဢၼ်ပဵၼ်ၵၼ်ႇၺႃႇသၢဝ်ၸႅတ်ႈၼၼ်ႉ၊’ ဝႃႈၼႆၸိုင်။
“ပေႃႈမႄႈၽူႈယိင်းၼၼ်ႉတၵ်းလႆႈဢဝ်မဵဝ်းဢၼ်ပဵၼ်လၢၵ်ႈၶၼႃႇသၢၵ်ႈသေႇၵၼ်ႇၺႃႇသၢဝ်ၸႅတ်ႈၼၼ်ႉၵႂႃႇၸူးၵႃႈတီႈၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းဝဵင်းၵႃႈတီႈလုမ်းဢေႃႈ။-
ပေႃႈၽူႈယိင်းၼၼ်ႉတၵ်းလႆႈမွၵ်ႇလၢတ်ႈလႄႈဝႃႈ၊ ‘ၵဝ်ၶႃႈဢဝ်လုၵ်ႈယိင်းၵဝ်ၶႃႈၼႆႉပၼ်တီႈၵူၼ်းၸၢႆးၼႆႉၶႃႈယဝ်ႉ။ မၼ်းၼၼ်ႉၸင်းလုၵ်ႈယိင်းၵဝ်ၶႃႈလႄႈ၊-
တၢင်ႇဢပျတ်ႈလွင်ႈဢၼ်ဢမ်ႇၸိုဝ်ႈဢမ်ႇၸႂ်ႈလႄႈသႄႉသွမ်းဝႃႈ၊ “ၵဝ်ဢမ်ႇထူပ်းလၢၵ်ႈၶၼႃႇသၢၵ်ႈသေႇၵၼ်ႇၺႃႇသၢဝ်ၸႅတ်ႈတီႈလုၵ်ႈယိင်းမႂ်းၼၼ်ႉ၊” ဝႃႈၼႆဢေႃႈ။ ၵူၺ်းၵႃႈ၊တူၺ်းသေၵမ်းၶႃႈ။ ဢၼ်ၼႆႉပဵၼ်သၢၵ်ႈသေႇပုၼ်ႈလုၵ်ႈယိင်းၵဝ်ၶႃႈဢၼ်ပဵၼ်ၵၼ်ႇၺႃႇသၢဝ်ၸႅတ်ႈၼၼ်ႉဢေႃႈ၊’ ဝႃႈၼႆဢေႃႈ။-
မိူဝ်ႈၼၼ်ႉၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆၵႃႈၼႂ်းဝဵင်းၼၼ်ႉတၵ်းလႆႈဢဝ်ၵေႃႉၼၼ်ႉသေလႄႈပေႃႉယႅၼ်ႉဢေႃႈ။-
ၶဝ်သမ်ႉတၵ်းလႆႈမႂ်ၵေႃႉၼၼ်ႉငိုၼ်းပၢၵ်ႇၵျၢပ်ႈသေယဝ်ႉ၊ဢဝ်ငိုၼ်းၼၼ်ႉပၼ်တီႈပေႃႈမႄႈၽူႈယိင်းၼၼ်ႉဢေႃႈ။ လွင်ႈမၼ်းၸမ်ႉ၊ၵေႃႉၼၼ်ႉယႃႉသရေႇၵၼ်ႇၺႃႇသၢဝ်ၸႅတ်ႈၵူၼ်းမဵဝ်း ဢိသရေး၊ ဢေႃႈ။ လိူဝ်သေၼၼ်ႉဢမ်ႇၵႃး၊ၽူႈယိင်းၼၼ်ႉတၵ်းလႆႈပဵၼ်မေးမၼ်းလႄႈ၊ၸူဝ်ႈဢသၢၵ်ႈမၼ်းတေဢမ်ႇလႆႈပႅတ်ႈၵၼ်တင်းၽူႈယိင်းၼၼ်ႉ။
“ၵူၺ်းၵႃႈ၊ပေႃးၵႂၢမ်းၽူဝ်မၼ်းၸိုဝ်ႈၸႂ်ႈလႄႈလၢၵ်ႈၶၼႃႇသၢၵ်ႈသေႇၵၼ်ႇၺႃႇသၢဝ်ၸႅတ်ႈဢမ်ႇမီးတီႈၽူႈယိင်းၼၼ်ႉတႄႉၸိုင်၊-
ၶဝ်တၵ်းလႆႈဢဝ်ၽူႈယိင်းၼၼ်ႉဢွၵ်ႇဝႆႉၵႃႈတီႈႁူးၽၵ်းတူႁိူၼ်းပေႃႈမၼ်းသေယဝ်ႉ၊ၵူၼ်းၸၢႆးတင်းလၢႆၼႂ်းဝဵင်းၼၼ်ႉတၵ်းလႆႈဢွၼ်ၵၼ်ဢဝ်မၢၵ်ႇႁိၼ်ပိုဝ်ႈသႂ်ႇမၼ်းထၢၼ်ႈပေႃးတၢႆဢေႃႈ။ လွင်ႈမၼ်းၸမ်ႉ၊ၼႂ်းမိူဝ်ႈဢၼ်မၼ်းယင်းမီးယူႇၼႂ်းႁိူၼ်းပေႃႈမၼ်းၼၼ်ႉမၼ်းႁဵတ်းမေႇထုင်ႇဢၼ်ဢမ်ႇတြႃးလႄႈဢမုဢၼ်ႁၢႆႉမိူၵ်ႈၼႂ်းၵူၼ်းမဵဝ်း ဢိသရေး၊ ယဝ်ႉ။ ၼင်ႇၼၼ်လႄႈပဵၼ်လွင်ႈတၢင်းဢၼ်ဢဝ်ပႅတ်ႈတုၸရိူၵ်ႈဢပျတ်ႈဢွၵ်ႇသေၵႃႈၼႂ်းသူဢေႃႈ။
“ပေႃးထူပ်းႁၼ်မႅၼ်ႈၵူၼ်းၸၢႆးတၢင်ႇၵေႃႉႁဵတ်းမေႇထုင်ႇဢၼ်ဢမ်ႇတြႃးလူၺ်ႈၵၼ်တင်းမႄႈယိင်းဢၼ်မီးၽူဝ်ယဝ်ႉၼၼ်ႉၸိုင်၊တၵ်းလႆႈၶၢမ်ႇတၢင်းဢၼ်ဢဝ်တၢႆတင်းသွင်ၵေႃႉဢေႃႈ။ ၼင်ႇၼၼ်လႄႈပဵၼ်လွင်ႈတၢင်းဢၼ်ဢဝ်ပႅတ်ႈတုၸရိူၵ်ႈဢပျတ်ႈဢွၵ်ႇသေၵႃႈၼႂ်းသူဢေႃႈ။
“ပေႃးထူပ်းႁၼ်မႅၼ်ႈၽူႈယိင်းသၢဝ်ဢၼ်လႆႈမၢႆမၼ်ႈဝႆႉၵၼ်တင်းၵူၼ်းၸၢႆးယဝ်ႉၼၼ်ႉလႄႈ၊မီးၵူၼ်းၸၢႆးတၢင်ႇၵေႃႉထူပ်းႁၼ်မၼ်းၵႃႈၼႂ်းဝဵင်းလႄႈသမ်ႉလႆႈႁဵတ်းမေႇထုင်ႇဢၼ်ဢမ်ႇတြႃးလူၺ်ႈၵၼ်တင်းမၼ်းၸိုင်၊-
သူတၵ်းလႆႈဢဝ်ၶဝ်သွင်ၵေႃႉၼၼ်ႉဢွၵ်ႇၵႃႈၼွၵ်ႈဝဵင်းသေလႄႈဢဝ်မၢၵ်ႇႁိၼ်ပိုဝ်ႈသႂ်ႇႁႂ်ႈထၢၼ်ႈပေႃးတၢႆတင်းသွင်ၵေႃႉဢေႃႈ။ ၽူႈသၢဝ်ၼၼ်ႉထိူၵ်ႈလႆႈတၢႆၵွပ်ႈပိူဝ်ႈဢၼ်မၼ်းမီးယူႇၼႂ်းဝဵင်းသေၵေႃႈဢမ်ႇႁွင်ႉသႅၼ်ႇပုၼ်ႈတၢင်းၸွႆႈထႅမ်၊ဢိၵ်ႇတင်းၵူၼ်းၸၢႆးၼၼ်ႉထိူၵ်ႈလႆႈတၢႆၵွပ်ႈပိူဝ်ႈဢၼ်မၼ်းယႃႉသရေႇၵၼ်ႇၺႃႇၽူႈသၢဝ်ဢၼ်ပိူၼ်ႈမၢႆဝႆႉၼၼ်ႉဢေႃႈ။ ၼင်ႇၼၼ်လႄႈပဵၼ်လွင်ႈတၢင်းဢၼ်ဢဝ်ပႅတ်ႈတုၸရိူၵ်ႈဢွၵ်ႇသေၵႃႈၼႂ်းသူဢေႃႈ။
“ပေႃးၵူၼ်းၸၢႆးသေၵေႃႉၵေႃႉႁဵတ်းပႄႉႁဵတ်းၼႅင်ႇလႄႈတဵၵ်းၵၼ်ႉၽူႈသၢဝ်ဢၼ်ပိူၼ်ႈမၢႆမၼ်ႈဝႆႉယဝ်ႉၼၼ်ႉၵႃႈၼႂ်းထိူၼ်ႇၸိုင်၊ၵူၼ်းၸၢႆးၼၼ်ႉၵူၺ်းတၵ်းလႆႈၶၢမ်ႇတၢင်းဢၼ်ဢဝ်တၢႆဢေႃႈ။-
တီႈၽူႈသၢဝ်ၼၼ်ႉၸမ်ႉ၊သူဢမ်ႇလႆႈႁဵတ်းၵႃႈသင်လႃးလႃး။ ၽူႈသၢဝ်ၼၼ်ႉဢမ်ႇထိူၵ်ႈလႆႈၶၢမ်ႇတၢမ်ႇတၢႆ။ လွင်ႈတၢင်းၼႆႉမိူၼ်ၵၼ်တင်းဢမုဢၼ်ၵူၼ်းၵေႃႉၼိုင်ႈႁဵတ်းပႄႉႁဵတ်းၼႅင်ႇတီႈၵူၼ်းတၢင်ႇၵေႃႉသေလႄႈဢဝ်မၼ်းတၢႆၼၼ်ႉၼင်ႇၵဝ်ႇဢေႃႈ။-
တၢင်းဢၼ်ၵူၼ်းၸၢႆးတဵၵ်းၵၼ်ႉမႄႈယိင်းၵႃႈတီႈၼႂ်းထိူၼ်ႇၼၼ်ႉပိၵ်ႉသမ်ႉမႄႈယိင်းႁွင်ႉသႅၼ်ႇပုၼ်ႈတၢင်းၸွႆႈထႅမ်သေၵေႃႈဢမ်ႇမီးၵေႃႉဢၼ်ၸွႆႈဢၼ်ထႅမ်မၼ်း။
“ပေႃးထူပ်းႁၼ်မႅၼ်ႈၵူၼ်းၸၢႆးသေၵေႃႉၵေႃႉတဵၵ်းၵၼ်ႉၽူႈသၢဝ်ဢၼ်ယင်းဢမ်ႇပႆႇမီးၽူႈလႂ်မၢႆမၼ်ႈဝႆႉၼၼ်ႉၸိုင်၊-
ၵူၼ်းၸၢႆးၼၼ်ႉတၵ်းလႆႈယေႃႇငိုၼ်းႁႃႈသိပ်းၶႅပ်းတီႈပေႃႈၽူႈသၢဝ်ၼၼ်ႉဢေႃႈ။ ၽူႈသၢဝ်ၼၼ်ႉၵေႃႈတၵ်းလႆႈပဵၼ်မေးမၼ်း၊ၵွပ်ႈပိူဝ်ႈမၼ်းႁဵတ်းပႄႉႁဵတ်းၼႅင်ႇလႄႈတေႃႇၸူဝ်ႈဢသၢၵ်ႈမၼ်းတေဢမ်ႇလႆႈပႅတ်ႈမေးမၼ်းၼၼ်ႉ။
“ၵူၼ်းၵေႃႉလႂ်သေဢမ်ႇဝႃႈ၊ဢမ်ႇလႆႈဢဝ်မေးပေႃႈမၼ်း၊ဢမ်ႇလႆႈႁဵတ်းႁႂ်ႈပေႃႈမၼ်းလႆႈဢူၵ်းလႆႈဢၢႆ။
“ၵေႃႉဢၼ်တွၼ်ပႅတ်ႈၶႆႇႁမ်မၼ်းသေဢမ်ႇဝႃႈ၊ၵေႃႉဢၼ်တႅပ်းပႅတ်ႈဢၢင်ႇၵႃႇၵူၼ်းၸၢႆးမၼ်းၼၼ်ႉသေဢမ်ႇဝႃႈ၊ဢမ်ႇလႆႈၶဝ်ႈပႃးၵႃႈၼႂ်းမူႇၵူၼ်းၸိူဝ်းၵူၼ်း ထႃႇဝရႃႉၽြႃး။
“လုၵ်ႈမႄႈယိင်းဢၼ်မၢၼ်းလၢႆၼၼ်ႉဢမ်ႇလႆႈၶဝ်ႈပႃးၵႃႈၼႂ်းမူႇၵူၼ်းၸိူဝ်းၵူၼ်း ထႃႇဝရႃႉၽြႃး၊ တေႃႇထိုင်ၸိူဝ်ႉၶိူဝ်းလုၵ်ႈလၢၼ်ၶဝ်ဢၼ်သိုပ်ႇတၢမ်လၢမ်းၵႂႃႇႁႂ်ႈထၢၼ်ႈပေႃးထူၼ်ႈထိုင်သိပ်းသိုပ်ႇဢေႃႈ။
“ၵူၼ်းမဵဝ်း ဢမ်ႇမုၼ်ႇ၊ တင်းၵူၼ်းမဵဝ်း မေႃႇၽႃႉ၊ ဢမ်ႇလႆႈၶဝ်ႈပႃးၵႃႈၼႂ်းမူႇၵူၼ်းၸိူဝ်းၵူၼ်း ထႃႇဝရႃႉၽြႃး၊ တေႃႇထိုင်ၸိူဝ်ႉၶိူဝ်းလုၵ်ႈလၢၼ်ၶဝ်ဢၼ်သိုပ်ႇတၢမ်လၢမ်းၵႂႃႇႁႂ်ႈထၢၼ်ႈပေႃးထူၼ်ႈထိုင်သိပ်းသိုပ်ႇဢေႃႈ။-
လွင်ႈမၼ်းၸမ်ႉ၊မိူဝ်ႈဢၼ်သူဢွၵ်ႇမိူင်း ဢေးၵျိပ်ႉ၊ မႃးၼၼ်ႉၶဝ်ဢမ်ႇဢဝ်ၶဝ်ႈမုၼ်းတင်းၼမ်ႉႁပ်ႉႁူဝ်တၢင်းသူ။ ၶဝ်ယင်းၸၢင်ႈငႃဢဝ် ပႃႇလၢမ်ႇ၊ လုၵ်ႈၸၢႆး ပေႃးရႃႉ၊ ဢၼ်ယူႇၼႂ်းဝဵင်း ပေႇသေႃႇ၊ မိူင်း မေႇသူဝ်ႇပူဝ်ႇတေးမီးယႃး၊ ၼၼ်ႉမႃးႁႂ်ႈလႆႈၵိၼ်ႇဝႃႈသူဢေႃႈ။-
ၼႂ်းဝႃႈၼၼ်သေၵေႃႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢမ်ႇထွမ်ႇဢမ်ႇဢဝ်ၵႂၢမ်း ပႃႇလၢမ်ႇ၊ ၼၼ်ႉမၼ်းၸဝ်ႈယင်းဢဝ်တၢင်းဢၼ်ၵိၼ်ႇဝႃႈၼၼ်ႉပိၼ်ႇပဵၼ်တၢင်းလီမၢင်ႇၵလႃႇပုၼ်ႈသူၵွပ်ႈပိူဝ်ႈမၼ်းၸဝ်ႈႁၵ်ႉသူၼၼ်ႉဢေႃႈ။-
ၼႂ်းၸူဝ်ႈဢသၢၵ်ႈသူၼၼ်ႉယႃႇပေၸွႆႈထႅမ်ၵူၼ်းမဵဝ်းၸိူဝ်းၼၼ်ႉႁႂ်ႈၶဝ်လႆႈလီလႆႈပဵၼ်လႃးလႃး။
“ၵူၼ်းမဵဝ်း ဢေႇတုမ်ႇ၊ ၸမ်ႉ၊သူတေဢမ်ႇလႆႈၸင်း။ မၼ်းပဵၼ်ပီႈသူၼွင်ႉသူဢေႃႈ။ ၵူၼ်းမဵဝ်း ဢေးၵျိပ်ႉ၊ ၵေႃႈသူဢမ်ႇလႆႈၸင်း။ သူယၢမ်ႈပဵၼ်ၶႅၵ်ႇဢၼ်လိုဝ်ႈသဝ်းၼႂ်းမိူင်းမၼ်းမႃးယဝ်ႉ။-
ၸိူဝ်ႉၶိူဝ်းၶဝ်ဢၼ်သိုပ်ႇတၢမ်မႃးထိုင်သၢမ်သိုပ်ႇၼၼ်ႉမီးဢၶႂၢင်ႉလႆႈၶဝ်ႈပႃးၵႃႈၼႂ်းမူႇၵူၼ်းၸိူဝ်းၵူၼ်း ထႃႇဝရႃႉၽြႃး၊ ဢေႃႈ။
“မိူဝ်ႈဢၼ်သူမီးယူႇၼႂ်းပၢင်တပ်ႉ၊ၶိင်ႇယၢမ်းဢၼ်တိုၵ်းသိုၵ်းယူႇၼၼ်ႉၸိုင်၊ဝႄႈပႅတ်ႈလွင်ႈတၢင်းဢၼ်ဢမ်ႇတြႃးၵႃႈမီးတႃႉ။-
ပေႃးၵူၼ်းၸၢႆးသေၵေႃႉၵေႃႉႁွတ်ႈထိုင်တၢင်းဢၼ်ဢမ်ႇမူတ်းသႂ်ၵွပ်ႈပိူဝ်ႈလွင်ႈဢၼ်ၸၢင်ႈႁွတ်ႈထိုင်ၼႂ်းၶိင်ႇၵၢင်ၶိုၼ်းၼၼ်ႉႁႂ်ႈမၼ်းဢွၵ်ႇၵႂႃႇယူႇၼွၵ်ႈပၢင်တပ်ႉတႃႉ။-
မိူဝ်ႈဢၼ်ၵၢင်ဝၼ်းဢမ်ႇပႆႇတူၵ်းၼၼ်ႉမၼ်းတၵ်းလႆႈဢၢပ်ႇၼမ်ႉလႄႈမိူဝ်ႈထိုင်ၵၢင်ဝၼ်းတူၵ်းယဝ်ႉၸင်ႇတၵ်းလႆႈၶိုၼ်းၶဝ်ႈၵႃႈၼႂ်းပၢင်တပ်ႉဢေႃႈ။
“သူတၵ်းလႆႈမီးတီႈတီႈၼိုင်ႈၵႃႈၼွၵ်ႈပၢင်တပ်ႉပုၼ်ႈဢၼ်တၵ်းဢွၵ်ႇၽၢႆႈလူင်ဢေႃႈ။-
သူတၵ်းလႆႈပႃးမႆႉလႅမ်ပုၼ်ႈၶိူင်ႈမိုဝ်းသူႁႂ်ႈလႆႈၶုတ်းလိၼ်မိူဝ်ႈဢၼ်ၽၢႆႈယဝ်ႉၼၼ်ႉတၵ်းလႆႈၶိုၼ်းထူမ်ပႅတ်ႈဢေႃႈ။-
ၵွပ်ႈပိူဝ်ႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူမီးယူႇလူၺ်ႈၵၼ်တင်းသူၵႃႈၼႂ်းပၢင်တပ်ႉမႂ်း၊ႁႂ်ႈလႆႈမႃႉၸႃႉၸွႆႈထႅမ်သူ၊ဢိၵ်ႇတင်းႁႂ်ႈသူလႆႈဢွင်ႇသိုၵ်းၵႃႈၼိူဝ်ရၢၼ်ႇသူႇယူႇၼၼ်ႉၸိုင်၊တပ်ႉသူတၵ်းလႆႈမူတ်းၸၢင်ႇဝႆႉဢေႃႈ။ လွင်ႈၼင်ႇႁိုဝ်မၼ်းၸဝ်ႈတၵ်းဢမ်ႇဝၢႆႇပႅတ်ႈသေၵႃႈတီႈသူၸိုင်၊ယႃႇပေႁႂ်ႈမၼ်းၸဝ်ႈႁၼ်လွင်ႈတၢင်းဢၼ်ဢမ်ႇမူတ်းသႂ်သေၸိူဝ်ႉသေပိူင်ၵႃႈၼႂ်းသူ။
“ၶႃႈဢၼ်ပၢႆႈဢွၵ်ႇသေၵႃႈတီႈၸဝ်ႈမၼ်းလႄႈႁွတ်ႈထိုင်မႃးၵႃႈတီႈသူၼၼ်ႉသူတၵ်းဢမ်ႇလႆႈဢဝ်ၶိုၼ်းသူင်ႇတီႈၸဝ်ႈမၼ်း။-
မၼ်းမီးဢၶႂၢင်ႉဢၼ်တေလိူၵ်ႈတီႈယူႇၵႃႈၼႂ်းဝဵင်းသေဝဵင်းဝဵင်းၵမ်ၸႂ်မၼ်းလႄႈသူတၵ်းဢမ်ႇလႆႈၼိၵ်ႈၸၢၵ်ႈငႅၼ်းသႄးမၼ်း။
“ၵႃႈၼႂ်းၵူၼ်းမဵဝ်း ဢိသရေး၊ တင်းလၢႆၽူႈယိင်းတၵ်းဢမ်ႇလႆႈႁဵတ်းမႄႈမွၵ်ႇယႃႈ၊ၵူၼ်းၸၢႆးတၵ်းဢမ်ႇလႆႈၸွမ်းဢလူဝ်ႇၽူႈၸၢႆးၼင်ႇၵၼ်ၵၼ်။-
ငိုၼ်းဢၼ်ႁဵတ်းမႄႈမွၵ်ႇယႃႈလႄႈလႆႈမႃးၼၼ်ႉသူတၵ်းဢမ်ႇလႆႈဢဝ်သႂၢင်းၶဝ်ႈၵႃႈၼႂ်းႁိူၼ်း ထႃႇဝရႃႉၽြႃး၊ ၽြႃးပဵၼ်ၸဝ်ႈသူႁႂ်ႈလႆႈၽေႇၵတိသဵတ်ႈၸႃႇ။ ထႃႇဝရႃႉၽြႃး၊ ၸင်းတၢင်းႁဵတ်းဢၼ်ဢမ်ႇလီဢမ်ႇငၢမ်းၼႆႉဢေႃႈ။
“မိူဝ်ႈဢၼ်သူၵူႈပၼ်ယိမ်ပၼ်ငိုၼ်း၊ဢမ်ႇၼၼ်တၢင်းၵိၼ်တၢင်းၶူပ်း၊ဢမ်ႇၼၼ်ၶိူင်ႈပိူင်သေၸိူဝ်ႉသေပိူင်တီႈပီႈၼွင်ႉၵူၼ်းမဵဝ်း ဢိသရေး၊ ၼင်ႇၵၼ်ၵၼ်ၼၼ်ႉယႃႇပေဢဝ်ၶီႈမၼ်းလႃးလႃး။-
တီႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၸမ်ႉ၊သူဢဝ်ၶီႈမၼ်းၵႃႈဢၼ်သူၵူႈပၼ်ယိမ်ပၼ်ၼၼ်ႉလႆႈယူႇဢေႃႈ။ လွင်ႈၼင်ႇႁိုဝ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းပၼ်တၢင်းလီတီႈလွင်ႈတၢင်းဢၼ်သူဢဝ်မိုဝ်းသူႁဵတ်းၵူႈၸိူဝ်ႉၵူႈပိူင်ၼၼ်ႉၵႃႈၼႂ်းမိူင်းဢၼ်သူတၵ်းၵႂႃႇလႄႈၶဝ်ႈၸၢမ်ႇၸႃးၼၼ်ႉၸိုင်၊သူဢမ်ႇလႆႈဢဝ်ၶီႈမၼ်းၵႃႈဢၼ်သူပၼ်ၵူႈပၼ်ယိမ်တီႈပီႈၼွင်ႉၵူၼ်းမဵဝ်း ဢိသရေး၊ ၼင်ႇၵၼ်ၵၼ်ၼၼ်ႉ။
“မိူဝ်ႈဢၼ်မႂ်းဝႆႉၵတိသဵတ်ႈၸႃႇတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈမႂ်းၸိုင်၊ယႃႇပေႁဵတ်းမဝ်ႁဵတ်းမၢင်။ လွင်ႈမၼ်းၸမ်ႉ၊ပေႃးမႂ်းဢမ်ႇႁဵတ်းၸွမ်းၸိုင်၊ ထႃႇဝရႃႉၽြႃး၊ တၵ်းယွၼ်းဢဝ်တီႈမႂ်းဢမၢၼ်ႇၶၼ်ပဵၼ်ဢေႃႈ။ တၵ်းပဵၼ်ဢပျတ်ႈတီႈမႂ်းဢေႃႈ။-
ပေႃးမႂ်းယင်းဢမ်ႇဝႆႉၵတိသဵတ်ႈၸႃႇတီႈ ထႃႇဝရႃႉၽြႃး၊ ၸိုင်၊ဢမ်ႇပဵၼ်ဢပျတ်ႈတီႈမႂ်း။-
ၵူၺ်းၵႃႈ၊ပေႃးမႂ်းဢွၵ်ႇသူပ်းဝႆႉၵတိသဵတ်ႈၸႃႇတီႈ ထႃႇဝရႃႉၽြႃး၊ ယဝ်ႉၸိုင်၊မႂ်းတၵ်းလႆႈပႂ်ႉၸွမ်းႁဵတ်းၸွမ်းဢမၢၼ်ႇၶၼ်ပဵၼ်ဢေႃႈ။
“မိူဝ်ႈဢၼ်မႂ်းပႆၽႃႇလတ်းၵႃႈၼႂ်းသူၼ်မၢၵ်ႇၸပိတ်ႉပိူၼ်ႈၵႂႃႇယူႇၼၼ်ႉၸိုင်၊မႂ်းမီးဢၶႂၢင်ႉဢၼ်လႆႈၵိၼ်မၢၵ်ႇၸပိတ်ႉဢိမ်ႇဢိမ်ႇတဵမ်တဵမ်ဢေႃႈ။ ၵူၺ်းၵႃႈ၊ဢမ်ႇလႆႈၵဵပ်းႁွမ်သႂ်ႇသႃႉသႂ်ႇသွင်းၵႂႃႇ။-
မိူဝ်ႈဢၼ်ပႆၽႃႇလတ်းၵႃႈၼႂ်းၼႃးပိူၼ်ႈၵႂႃႇယူႇၼၼ်ႉၸိုင်၊မႂ်းမီးဢၶႂၢင်ႉဢၼ်ဢဝ်မိုဝ်းယၵ်းဝိတ်းဢဝ်ႁူင်းၶဝ်ႈသေလႄႈၵိၼ်ဢေႃႈ။ ၵူၺ်းၵႃႈ၊ဢမ်ႇလႆႈဢဝ်ၶဵဝ်းပၢတ်ႇဢဝ်။
“မိူဝ်ႈဢၼ်ၵူၼ်းၸၢႆးသေၵေႃႉၵေႃႉဢဝ်မေးလႄႈယူႇလူၺ်ႈၼွၼ်းလူၺ်ႈသေယဝ်ႉ၊မၼ်းဢမ်ႇထုၵ်ႇၸႂ်မေးမၼ်းၵွပ်ႈပိူဝ်ႈမၼ်းႁၼ်တီႈဢၼ်တၢင်ႇဢပျတ်ႈၼၼ်ႉၸိုင်၊မၼ်းတၵ်းလႆႈတႅမ်ႈလိၵ်ႈဢၼ်ပႅတ်ႈၵၼ်ၶၢတ်ႇၶၢတ်ႇလႄႈဢၢပ်ႈပၼ်ၵႃႈၼႂ်းမိုဝ်းမေးမၼ်းႁႂ်ႈဢွၵ်ႇႁိူၼ်းမၼ်းၵႂႃႇဢေႃႈ။-
မႄႈယိင်းၼၼ်ႉသမ်ႉဢဝ်ၽူဝ်တၢင်ႇၵေႃႉထႅင်ႈသေယဝ်ႉ၊-
ၽူဝ်ၵေႃႉလိုၼ်းလင်ၼၼ်ႉၸင်းမၼ်းလႄႈတႅမ်ႈလိၵ်ႈဢၼ်ပႅတ်ႈၶၢတ်ႇၶၢတ်ႇဢၢပ်ႈပၼ်ၵႃႈၼႂ်းမိုဝ်းမၼ်းႁႂ်ႈဢွၵ်ႇသေၵႃႈတီႈႁိူၼ်းၵႂႃႇ၊ဢမ်ႇၼၼ်ပေႃးၽူဝ်ၵေႃႉလိုၼ်းလင်ၼၼ်ႉတၢႆၵႂႃႇၸိုင်၊-
ၽူဝ်ၵဝ်ႇမၼ်းၼၼ်ႉၵမ်းလိုၼ်းသမ်ႉတၵ်းဢမ်ႇလႆႈၶိုၼ်းသိမ်းဢဝ်မေးမၼ်းဝၢႆးသေဢၼ်မၼ်းလႆႈႁဵတ်းတၢင်းဢၼ်ၵူဝ်ႈၵိူၵ်ႇယဝ်ႉၼၼ်ႉဢေႃႈ။ ထႃႇဝရႃႉၽြႃး၊ လီႁင်ႈဢဵတ်ႇသဵတ်ႇဢမုၼၼ်ႉလႄႈ၊သူတၵ်းဢမ်ႇလႆႈႁဵတ်းႁႂ်ႈဢပျတ်ႈႁွတ်ႈထိုင်ၵႃႈတီႈမိူင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈမႂ်းတၵ်းပၼ်တီႈသူႁႂ်ႈသူပိူင်ႇၼၼ်ႉဢေႃႈ။
“ပေႃးမီးၵူၼ်းၸၢႆးဢၼ်တိုၵ်ႉႁႃဢဝ်မေးယဝ်ႉလႄႈယင်းမႂ်ႇယူႇၸိုင်၊မၼ်းဢမ်ႇလႆႈၵႂႃႇတိုၵ်းသိုၵ်း။ ဢမ်ႇလႆႈပွင်ႁဵတ်းၼႃႈၵၢၼ်ၵူၼ်းမိူင်း။ မၼ်းတၵ်းလႆႈလွတ်ႈၵၢင်းၼႃႈၵၢၼ်ယူႇတင်းပီလႄႈႁႂ်ႈမေးမၼ်းလႆႈပျေႃႇၸႂ်မူၼ်ႈၸႂ်ယူႇဢေႃႈ။
“မိူဝ်ႈဢၼ်သူၵူႈပၼ်ယိမ်ပၼ်သေၸိူဝ်ႉသေပိူင်တီႈပိူၼ်ႈတၢင်ႇၵေႃႉၼၼ်ႉသူဢမ်ႇလႆႈဢဝ်မၢၵ်ႇႁိၼ်လူၺ်မၼ်းဝႆႉပဵၼ်ပုၼ်ႈဢၼ်ပွင်ႇဢၼ်တၢင်မၼ်း။ လွင်ႈမၼ်းၸမ်ႉ၊ပဵၼ်တၢင်းဢၼ်သူဢဝ်ဢသၢၵ်ႈမၼ်းပွင်ႇဝႆႉတၢင်ဝႆႉယဝ်ႉဢေႃႈ။
“ပေႃးထူပ်းႁၼ်ၵူၼ်းသေၵေႃႉၵေႃႉလၵ်ႉဢဝ်ၵူၼ်းမဵဝ်း ဢိသရေး၊ ၼင်ႇၵၼ်မႃးၸႂ်ႉႁဵတ်းၶႃႈမၼ်းသေဢမ်ႇဝႃႈ၊ၶၢႆပႅတ်ႈႁႂ်ႈပဵၼ်ၶႃႈပိူၼ်ႈသေဢမ်ႇဝႃႈ၊ၽူႈလၵ်ႉၼၼ်ႉတၵ်းလႆႈၶၢမ်ႇတၢင်းဢၼ်ဢဝ်တၢႆဢေႃႈ။ ၼင်ႇၼၼ်လႄႈပဵၼ်တၢင်းဢၼ်ဢဝ်ပႅတ်ႈတုၸရိူၵ်ႈဢပျတ်ႈဢွၵ်ႇသေၵႃႈၼႂ်းသူဢေႃႈ။
“ယၢမ်းမိူဝ်ႈဢၼ်ပဵၼ်ယေႃးၵႃႇၽိဝ်ၼင်ဢၼ်ၸၢင်ႈၽႄႈၸၢင်ႈၸပ်းၸိုင်၊ႁဵတ်းသတိလႄႈပႂ်ႉၸွမ်းၵႃႈၼင်ႇဢၼ်ယဵၸ်ႈပရေႃးႁဵၵ်ႈ ၵူၼ်းမဵဝ်း လေႇဝိ၊ တင်းလၢႆသင်ႇလၢတ်ႈတီႈသူၼၼ်ႉၸေးၸေးၸွတ်ႇၸွတ်ႇတႃႉ။ သူတၵ်းလႆႈဢွၼ်ၵၼ်ၵမ်ၵျၢင်ႉႁဵတ်းၸွမ်းၵႃႈၼင်ႇဢၼ်ၵဝ်သင်ႇလၢတ်ႈဝႆႉတီႈၶဝ်ၼၼ်ႉဢေႃႈ။-
ၶႆႈၸႂ်ထူပ်းလွင်ႈတၢင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူႁဵတ်းတီႈ မေႇရီႇယမ်ႇ၊ ၼႂ်းၶၢဝ်းတၢင်းမိူဝ်ႈဢၼ်သူဢွၵ်ႇမိူင်း ဢေးၵျိပ်ႉ၊ မႃးၼၼ်ႉတႃႉ။
“မိူဝ်ႈဢၼ်သူၵူႈပၼ်ယိမ်ပၼ်သေၸိူဝ်ႉသေပိူင်တီႈပိူၼ်ႈတၢင်ႇၵေႃႉၸိုင်၊သူတၵ်းဢမ်ႇလႆႈၶဝ်ႈၵႃႈၼႂ်းႁိူၼ်းမၼ်းႁႂ်ႈလႆႈဢဝ်ၶူဝ်းလဵင်းပုၼ်ႈဢၼ်တၵ်းပွင်ႇတၵ်းတၢင်ၼၼ်ႉ။-
သူတၵ်းလႆႈၸုၵ်းပႂ်ႉထႃႈယူႇၵႃႈၼွၵ်ႈႁိူၼ်းလႄႈႁႂ်ႈမၼ်းဢဝ်ၶူဝ်းလဵင်းပုၼ်ႈဢၼ်တၵ်းပွင်ႇတၵ်းတၢင်ၼၼ်ႉမႃးပၼ်သူၵႃႈၼွၵ်ႈဢေႃႈ။-
ပေႃးၵေႃႉၼၼ်ႉပဵၼ်ၵူၼ်းယၢၵ်ႈၵူၼ်းၽၢၼ်ၸိုင်၊ယႃႇပေသိမ်းဢဝ်ဝႆႉၶူဝ်းလဵင်းၼၼ်ႉႁႂ်ႈပူၼ်ႉၶိုၼ်း။-
မိူဝ်ႈဢၼ်ၵၢင်ဝၼ်းတူၵ်းၼၼ်ႉဢဝ်ပၼ်ၶိုၼ်းတီႈမၼ်းၵူႈဝၼ်းႁႂ်ႈမၼ်းလႆႈႁူမ်ႇမႆၼွၼ်းလပ်းတႃ။ ပေႃးႁဵတ်းၼၼ်ၸိုင်၊မၼ်းတၵ်းမီးၸႂ်ဢၼ်တၢင်ႇၵျေးၸူးတီႈသူလႄႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းထုၵ်ႇၸႂ်ၵျိူၵ်ႈၸႂ်ဢေႃႈ။
“ၵူၼ်းၵိၼ်ၸၢင်ႈၵိၼ်ငႃဢၼ်ယၢၵ်ႈဢၼ်ၽၢၼ်ဢၼ်ၸုတ်ႈဢၼ်လုတ်ႈၼၼ်ႉပဵၼ်ၵူၼ်းမဵဝ်း ဢိသရေး၊ ၼင်ႇၵဝ်ႇလႄႈသင်၊ပဵၼ်ၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈယူႇၸွမ်းၼႂ်းမိူင်းသူလႄႈသင်၊သူတၵ်းဢမ်ႇလႆႈလႅၼ်ၵိၼ်ၶဝ်။-
ၸူဝ်ႈဢၼ်ၵၢင်ဝၼ်းဢမ်ႇပႆႇတၼ်းတူၵ်းၼၼ်ႉပၼ်ၵႃႈၸၢင်ႈၵႃႈႁႅင်းမၼ်းၵူႈဝၼ်းတႃႉ။ မၼ်းၽၢၼ်ၼႃႇလႄႈမၼ်းလူဝ်ႇလႆႈငိုၼ်းၸၢႆႇဢေႃႈ။ ပေႃးဢမ်ႇၼၼ်ၵူဝ်မၼ်းတၵ်းတၢင်ႇဢပျတ်ႈလႄႈႁွင်ႉသႅၼ်ႇတီႈ ထႃႇဝရႃႉၽြႃး၊ သေယဝ်ႉ၊ဢပျတ်ႈတၵ်းႁွတ်ႈထိုင်တီႈသူဢေႃႈ။
“ၵေႃႉပဵၼ်ပေႃႈဢမ်ႇလႆႈၶၢမ်ႇတၢႆတၢင်လုၵ်ႈလၢင်း။ လုၵ်ႈလၢင်းၵေႃႈဢမ်ႇလႆႈၶၢမ်ႇတၢႆတၢင်ပေႃႈ။ ၵူၼ်းၵူႈၵေႃႉတၵ်းလႆႈၶၢမ်ႇတၢႆၵွပ်ႈပိူဝ်ႈဢပျတ်ႈတူဝ်ၸဝ်ႈၵဝ်ႇၵူၺ်းဢေႃႈ။
“ၼႂ်းမိူဝ်ႈဢၼ်ပဵၼ်ဢမုၵၼ်ၼၼ်ႉသူတေဢမ်ႇလႆႈဝႄႈပိူင်ႈသဵၼ်ႈတၢင်းတြႃးသေလႄႈၸီႇယၢင်ႇတီႈၵူၼ်းတၢင်ႇၸိူဝ်ႉတၢင်ႇၶိူဝ်း၊ဢိၵ်ႇတင်းလုၵ်ႈဢွၼ်ႇဢၼ်ၽၢၼ်ပေႃႈၽၢၼ်မႄႈၼၼ်ႉ။ ဢမ်ႇလႆႈႁပ်ႉဢဝ်ၶူဝ်းၼုင်ႈတၢင်းမႆမႄႈမူၵ်းမႄႈမၢႆႈဢၼ်မႃးပွင်ႇမႃးတၢင်ၼၼ်ႉ။-
ၶႆႈၸႂ်ထူပ်းလွင်ႈဢၼ်သူယၢမ်ႈပဵၼ်ၶႃႈၵႃႈၼႂ်းမိူင်း ဢေးၵျိပ်ႉ၊ မႃးၼၼ်ႉဢိၵ်ႇတင်းလွင်ႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူပွႆႇႁႂ်ႈသူလွတ်ႈၼၼ်ႉတႃႉ။ ၵွပ်ႈပိူဝ်ႈၼႆလႄႈၵဝ်ၸင်ႇပိင်းၺၢပ်ႈဝႆႉတီႈသူၸိူဝ်ႉၼင်ႇၼႆယဝ်ႉ။
“မိူဝ်ႈဢၼ်သူပၢတ်ႇၶဝ်ႈၼၼ်ႉပေႃးသူလိုမ်းလိုၼ်ႈၶဝ်ႈလႄႈဢမ်ႇႁွပ်ႇဢဝ်မႅၼ်ႈသေလိုၼ်ႈလိုၼ်ႈၼၼ်ႉၸိုင်၊ယႃႇပေၶိုၼ်းၵႂႃႇဢဝ်။ လိုၼ်ႈၶဝ်ႈၼၼ်ႉတၵ်းလႆႈဝႆႉပုၼ်ႈၵူၼ်းတၢင်ႇၸိူဝ်ႉတၢင်ႇၶိူဝ်းလႂ်၊လုၵ်ႈဢွၼ်ႇဢၼ်ၽၢၼ်ပေႃႈၽၢၼ်မႄႈလႂ်၊ဢိၵ်ႇတင်းမႄႈမၢႆႈလႂ်၊ပုၼ်ႈလွင်ႈၼင်ႇႁိုဝ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းပၼ်တၢင်းလီတီႈသူၼႂ်းလွင်ႈတၢင်းၵႃႈဢၼ်သူဢဝ်မိုဝ်းႁဵတ်းၼၼ်ႉဢေႃႈ။
မိူဝ်ႈဢၼ်သူဢဝ်မၢၵ်ႇသၢၼ်ႇလုၼ်ႇယဝ်ႉၵႂႃႇပွၵ်ႈၼိုင်ႈၼၼ်ႉၸိုင်၊တၵ်းဢမ်ႇလႆႈပွၵ်ႈၶိုၼ်းၵႂႃႇဢဝ်ဢၼ်ၵိုတ်းဢၼ်ၵျၢၼ်ႇၼၼ်ႉထႅင်ႈ။ တၵ်းလႆႈဝႆႉပုၼ်ႈၵူၼ်းတၢင်ႇၸိူဝ်ႉတၢင်ႇၶိူဝ်းလႂ်၊လုၵ်ႈဢွၼ်ႇဢၼ်ၽၢၼ်ပေႃႈၽၢၼ်မႄႈလႂ်၊ဢိၵ်ႇတင်းမႄႈမၢႆႈလႂ်ဢေႃႈ။
မိူဝ်ႈဢၼ်သူဝိတ်းဢဝ်မၢၵ်ႇၸပိတ်ႉပွၵ်ႈၼိုင်ႈယဝ်ႉၸိုင်၊သူတေဢမ်ႇလႆႈၶိုၼ်းဝိတ်းဢဝ်ထႅင်ႈပွၵ်ႈၼိုင်ႈ။ မၢၵ်ႇၸပိတ်ႉဢၼ်ၵိုတ်းဢၼ်ၵျၢၼ်ႇၼၼ်ႉတၵ်းလႆႈဝႆႉပုၼ်ႈၵူၼ်းတၢင်ႇၸိူဝ်ႉတၢင်ႇၶိူဝ်းလႂ်၊လုၵ်ႈဢွၼ်ႇဢၼ်ၽၢၼ်ပေႃႈၽၢၼ်မႄႈလႂ်၊ဢိၵ်ႇတင်းမႄႈမၢႆႈလႂ်ဢေႃႈ။-
ယႃႇပေလူင်လိုမ်းလွင်ႈတၢင်းဢၼ်သူယၢမ်ႈလႆႈပဵၼ်ၶႃႈၵႃႈၼႂ်းမိူင်း ဢေးၵျိပ်ႉ၊ မႃးၼၼ်ႉ။ ပိူဝ်ႈၼႆလႄႈၵဝ်ၸင်ႇဝႆႉပိင်းၺၢပ်ႈတီႈသူၸိူဝ်ႉၼင်ႇၼႆယဝ်ႉ။
“မိူဝ်ႈဢၼ်ၵူၼ်းမဵဝ်း ဢိသရေး၊ ၼင်ႇၵၼ်ၵၼ်မီးဢမုတီႈၵၼ်လႄႈၶိုၼ်ႈလုမ်းၸိုင်၊ၶုၼ်လုမ်းတၵ်းတႅပ်းတတ်းႁႂ်ႈၵေႃႉဢၼ်သိုဝ်ႈတေႃႇၼၼ်ႉလွတ်ႈဢပျတ်ႈသေယဝ်ႉ၊ႁႂ်ႈၵေႃႉဢၼ်မီးဢပျတ်ႈၼၼ်ႉသုမ်းဢမုဢေႃႈ။-
ပေႃးၵေႃႉဢၼ်မီးဢပျတ်ႈၼၼ်ႉထိူၵ်ႈၶၢမ်ႇတၢင်းဢၼ်ပေႃႉယႅၼ်ႉၸိုင်၊ၶုၼ်လုမ်းၼၼ်ႉတၵ်းလႆႈႁႂ်ႈၵေႃႉၼၼ်ႉၼွၼ်းဢူပ်ႇပူပ်ႇၸပ်းလိၼ်ယူႇသေလႄႈဢဝ်ၶွၼ်ႉပေႃႉယႅၼ်ႉမၼ်းဢေႃႈ။ တၢမ်ႇၶွၼ်ႉဢၼ်တၵ်းလႆႈပေႃႉလၢႆၵမ်းၼၼ်ႉ ၸိုင်၊တႄႇၵႃႈၼိူဝ်ဢပျတ်ႈဢၼ်မၼ်းၽိတ်းပိူင်ႈၵႃႈႁိုဝ်ၼၼ်ႉဢေႃႈ။-
မၼ်းတေလႆႈၶၢမ်ႇတၢမ်ႇၶွၼ်ႉဢၼ်ၼမ်လိူဝ်ပိူၼ်ႈသီႇသိပ်းၵမ်းၵူၺ်းလႄႈဢမ်ႇလႆႈၼမ်ပူၼ်ႉသေၼႆႉ။ ပေႃးၼမ်ပူၼ်ႉၼမ်လိူဝ်ၵႂႃႇၸိုင်၊ပဵၼ်တၢင်းဢၼ်ၶျႃးမၼ်းတူၵ်းတႅမ်ႇၵႃႈတီႈၽၢႆႇၼႃႈၵူၼ်းတင်းလၢႆဢေႃႈ။
“သူတေဢမ်ႇလႆႈမတ်ႉသူပ်းဝူဝ်းဢၼ်ယဵပ်ႇၶဝ်ႈၼၼ်ႉဝႆႉ။
“ပေႃးပီႈဢၢႆႈၼွင်ႉၸၢႆးၵၼ်ဢၼ်ယူႇလူၺ်ႈၵၼ်ၼၼ်ႉၵေႃႉၼိုင်ႈတၢႆၵႂႃႇလႄႈယင်းဢမ်ႇမီးလုၵ်ႈမီးလၢင်းၸိုင်၊မႄႈမၢႆႈၼၼ်ႉတၵ်းဢမ်ႇလႆႈဢဝ်ၵၼ်တင်းၵူၼ်းၼွၵ်ႈပီႈၼွင်ႉၽူဝ်မၼ်း။ ပီႈၼွင်ႉၽူဝ်မၼ်းၼၼ်ႉမီးပုၼ်ႈၽွၼ်းဢၼ်တၵ်းလႆႈသိုပ်ႇဢဝ်မၼ်းဢေႃႈ။-
လုၵ်ႈၸၢႆးဢၼ်မၼ်းၵိူတ်ႇလဵင်ႉဢွၼ်တၢင်းပိူၼ်ႈၼၼ်ႉတၵ်းလႆႈမၢတ်ႈပဵၼ်လုၵ်ႈၸၢႆးၵေႃႉဢၼ်တၢႆၵႂႃႇၼၼ်ႉပုၼ်ႈလွင်ႈၼင်ႇႁိုဝ်ၶိူဝ်းႁိူၼ်းမၼ်းတၵ်းဢမ်ႇႁၢႆၵႂႃႇၵႃႈၼႂ်းၵူၼ်းမဵဝ်း ဢိသရေး၊ ၼၼ်ႉဢေႃႈ။-
ပေႃးၵူၼ်းၸၢႆးၼၼ်ႉဢမ်ႇမီးၸႂ်ၶႂ်ႈဢဝ်မႄႈမၢႆႈၼၼ်ႉၸိုင်၊မႄႈမၢႆႈၼၼ်ႉတၵ်းလႆႈၵႂႃႇၵႃႈတီႈၽၢႆႇၼႃႈၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းဝဵင်းၼၼ်ႉၸိူဝ်းၼၼ်ႉသေလႄႈလၢတ်ႈဝႃႈ၊ ‘ၼွင်ႉၸၢႆးၽူဝ်ၵဝ်ၶႃႈဢမ်ႇမီးဢလူဝ်ႇၶႂ်ႈႁႂ်ႈၸိုဝ်ႈသဵင်ပီႈဢၢႆႈမၼ်းတႄႇယူႇၼႂ်းၵူၼ်းမဵဝ်း ဢိသရေး၊ ၼႆႉၶႃႈ။ မၼ်းထဵင်ပႅတ်ႈပုၼ်ႈၽွၼ်းဢၼ်ၼွင်ႉၸၢႆးထုၵ်ႇလီႁဵတ်းတီႈၵဝ်ၶႃႈၼၼ်ႉၶႃႈဢေႃႈ၊’ ဝႃႈၼင်ႇၼႆတႃႉ။-
မိူဝ်ႈၼၼ်ႉၵူၼ်းဢၼ်ပဵၼ်ၵႄႇပဵၼ်ႁူဝ်ဝဵင်းၼၼ်ႉၸိူဝ်းၼၼ်ႉတၵ်းလႆႈႁွင်ႉဢဝ်ၵေႃႉၼၼ်ႉမႃးလႄႈတွင်ႈထၢမ်ဢေႃႈ။ ပေႃးမၼ်းယင်းထဵင်ပႅတ်ႈတႃႇတေဢဝ်မႄႈမၢႆႈၼၼ်ႉယူႇၶိူဝ်းၶိူဝ်းၸိုင်၊-
မႄႈမၢႆႈၼၼ်ႉတၵ်းလႆႈသုတ်ႉၸူးတီႈမၼ်းၽၢႆႇၼႃႈၵူၼ်းၵႄႇၵူၼ်းႁူဝ်တင်းလၢႆၼႂ်းဝဵင်းၼၼ်ႉသေယဝ်ႉ၊ထွတ်ႇဢဝ်ၶႅပ်းတိၼ်မၼ်းၶွၼ်ၼိုင်ႈသေလႄႈ၊ထူမ်ႇၼမ်ႉလၢႆးသႂ်ႇၵႃႈတီႈၼႃႈမၼ်းလႄႈသမ်ႉလၢတ်ႈတီႈမၼ်းၼၼ်ႉလႄႈဝႃႈ၊ ‘ထုၵ်ႇလီႁဵတ်းၸိူဝ်ႉၼင်ႇၼႆတီႈၵေႃႉဢၼ်ဢမ်ႇၶႂ်ႈတႄႇႁဵတ်းၶိူဝ်းႁိူၼ်းပီႈဢၢႆႈတူဝ်ၸဝ်ႈၵဝ်ႇၼၼ်ႉဢေႃႈ၊’ ဝႃႈၼင်ႇၼႆဢေႃႈ။-
ဝၢႆးမႃးၶိူဝ်းႁိူၼ်းမၼ်းတၵ်းလႆႈၶၢမ်ႇတၢင်းဢၼ်ႁွင်ႉႁဵၵ်ႈၵႃႈၼႂ်းၵူၼ်းမဵဝ်း ဢိသရေး၊ လႄႈဝႃႈ၊ ‘ၶိူဝ်းႁိူၼ်းၵေႃႉဢၼ်လႆႈၶၢမ်ႇတၢင်းဢၼ်ထွတ်ႇၶႅပ်းတိၼ်၊’ ဢေႃႈ၊ဝႃႈၼင်ႇၼႆဢေႃႈ။
“ၼႂ်းမိူဝ်ႈဢၼ်ၵူၼ်းၸၢႆးသွင်ၵေႃႉၽိတ်းၵၼ်ယူႇၼၼ်ႉ၊ပေႃးမေးၵေႃႉၼိုင်ႈၵႂႃႇၸွႆႈၶႄၽူဝ်မၼ်းလႄႈသမ်ႉလႆႈဢဝ်မိုဝ်းမၼ်းယိပ်းၵမ်မႅၼ်ႈဢၢင်ႇၵႃႇၵူၼ်းၸၢႆးဢၼ်ဢမ်ႇၸႂ်ႈၽူဝ်မၼ်းၼၼ်ႉၸိုင်၊-
သူဢမ်ႇလႆႈဢဵတ်းလူမႄႈယိင်းၼၼ်ႉ။ တၵ်းလႆႈတႅပ်းမိုဝ်းမၼ်းပႅတ်ႈဢေႃႈ။
“ၵႃႈၼႂ်းထူင်သူၼၼ်ႉတၵ်းဢမ်ႇလႆႈမီးမၢၵ်ႇလုၵ်ႈၶၼ်ဢၼ်ယႂ်ႇဢၼ်လဵၵ်ႉလူၺ်ႈၵၼ်သွင်မဵဝ်း။-
ၵႃႈၼႂ်းႁိူၼ်းသူၼၼ်ႉတၵ်းဢမ်ႇလႆႈမီးၵွၵ်းပေႇၵွၵ်းတၢင်ဢၼ်ယႂ်ႇဢၼ်လဵၵ်ႉလူၺ်ႈၵၼ်သွင်မဵဝ်း။-
ၼင်ႇႁိုဝ်ဢသၢၵ်ႈသူတၵ်းယၢဝ်းယိုၼ်းၵႃႈၼႂ်းမိူင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းပၼ်ႁႂ်ႈသူပိူင်ႇၼၼ်ႉၸိုင်၊သုင်းတိုဝ်းမၢၵ်ႇလုၵ်ႈၶၼ်တင်းၵွၵ်းပေႇၵွၵ်းတၢင်ဢၼ်မၢၼ်ႇဢၼ်မႅၼ်ႈၼၼ်ႉတႃႉ။-
ထႃႇဝရႃႉၽြႃး၊ လီႁင်ႈဢဵတ်ႇသဵတ်ႇၶဝ်ၸိူဝ်းဢၼ်ႁဵတ်းဢမ်ႇတြႃးၼၼ်ႉဢေႃႈ။
“ၶုၵ်းၸႂ်လႆႈလွင်ႈဢၼ်ၵူၼ်းမဵဝ်း ဢႃႇမလႅၵ်ႉ၊ ၶဝ်ႁဵတ်းတီႈသူၵႃႈတီႈၵၢင်တၢင်းမိူဝ်ႈဢၼ်သူဢွၵ်ႇမိူင်း ဢေးၵျိပ်ႉ၊ မႃးယူႇၼၼ်ႉတႃႉ။-
ၶဝ်ဢမ်ႇၵူဝ်ဢမ်ႇႁႄၽြႃးပဵၼ်ၸဝ်ႈလႄႈၶဝ်ႁႄႉႁပ်ႉတိုၵ်းတေႃးၵူၼ်းသူၸိူဝ်းဢၼ်မီးၽၢႆႇလင်သုတ်းၼႂ်းမိူဝ်ႈဢၼ်သူယင်းတိုၵ်ႉႁိူဝ်ႉၼူၼ်းႁႅင်းဢူၼ်ႈယူႇၼၼ်ႉသေလႄႈဢဝ်တၢႆပႅတ်ႈၶဝ်ၸိူဝ်းဢၼ်ယူႇၽၢႆႇတၢင်းလင်ၼၼ်ႉတင်းသဵင်ႈတင်းမူတ်းယဝ်ႉ။-
ပိူဝ်ႈၼႆလႄႈမိူဝ်ႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူပၼ်ႁႂ်ႈသူဢုပ်ႉပိူင်ႇမိူင်းၼၼ်ႉသေယဝ်ႉ၊ႁႂ်ႈသူၵၢင်းလွတ်ႈသေၽေးရၢၼ်ႇသူႇမႂ်းတင်းလၢႆဢၼ်မီးလဵပ်ႈႁွပ်ႈသူၸိူဝ်းၼၼ်ႉယဝ်ႉတူဝ်ႈလီငၢမ်းယဝ်ႉၼၼ်ႉၸိုင်၊ယႃႉၽဵဝ်ႈပႅတ်ႈၵူၼ်းမဵဝ်း ဢႃႇမလႅၵ်ႉ၊ ၵႃႈမီးတင်းသဵင်ႈတင်းလူင်ႁႂ်ႈပိူၼ်ႈတၢင်ႇၵေႃႉတေဢမ်ႇၶုၵ်းၸႂ်လႆႈၶဝ်ထႅင်ႈသေဢိတ်းၼၼ်ႉတႃႉ။ ယႃႇပေလိုမ်းလႃးလႃး။
“ဝၢႆးသေဢၼ်သူၶဝ်ႈလႄႈဢုပ်ႉပိူင်ႇၸၢမ်ႇၸႃးမိူင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူပၼ်သူၼၼ်ႉယဝ်ႉလႄႈယူႇသဝ်းၵႃႈၼႂ်းမိူင်းၼၼ်ႉၸိုင်၊-
သူတၵ်းလႆႈဢဝ်မၢၵ်ႇၶဝ်ႈႁူင်းၼမ်ႉဢၼ်သူပၢတ်ႇဢဝ်ၵဵပ်းဢဝ်ဢွၼ်တၢင်းသုတ်းပိူၼ်ႈၼၼ်ႉၵမ်ႈၽွင်ႈသႂ်ႇၼႂ်းပဵတ်ႈသေယဝ်ႉ၊ၵႂႃႇၸူးၵႃႈတီႈဢၼ်မၵ်းၶၢၼ်းဝႆႉတႃႇတေဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၼၼ်ႉသေလႄႈ၊-
ၵႂႃႇၸူးၵႃႈတီႈယဵၸ်ႈပရေႃးႁဵၵ်ႈ ဢၼ်တူၵ်းပုၼ်ႈၽွၼ်းမိူဝ်ႈယၢမ်းၼၼ်ႉသေလႄႈလၢတ်ႈတီႈမၼ်းလႄႈဝႃႈ၊ ‘ဝၼ်းမိူဝ်ႈၼႆႉၵဝ်ၶႃႈၽုၺ်ႇမွၵ်ႇလၢတ်ႈၼႄတီႈ ထႃႇဝရႃႉၽြႃး၊ ၽြႃးၵဝ်ၶႃႈလွင်ႈဢၼ်ၵဝ်ၶႃႈလႆႈၶဝ်ႈႁွတ်ႈၽႅဝ်ထိုင်တီႈမိူင်းဢၼ် ထႃႇဝရႃႉၽြႃး၊ တိူင်ႇၵၢဝ်ႇဝႆႉၵတိတီႈပူႇမွၼ်ႇႁဝ်းၶႃႈ ႁႂ်ႈလႆႈပၼ်တီႈႁဝ်းၶႃႈၼၼ်ႉယဝ်ႉတီႈၶႃႈဢေႃႈ၊’ ဝႃႈၼႆဢေႃႈ။
“ယဵၸ်ႈပရေႃးႁဵၵ်ႈၼၼ်ႉတၵ်းဢဝ်ပဵတ်ႈသူၼၼ်ႉသေလႄႈၵႂႃႇဝၢင်းဝႆႉၵႃႈတီႈၽၢႆႇၼႃႈၶဵင်ႇတၢင်းလူႇ ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။-
မိူဝ်ႈၼၼ်ႉ၊သူတၵ်းလႆႈလဝ်ႈလၢတ်ႈၵႃႈတီႈၽၢႆႇၼႃႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူလႄႈဝႃႈ၊ ‘ပူႇပေႃႈၶႃႈၸဝ်ႈပဵၼ်ၵူၼ်းမဵဝ်း ဢႃႇရမိၼ်ႉ၊ ဢၼ်လႄႇလၢဝ်းယူႇ၊ဢမ်ႇမီးႁိူၼ်းမီးယေးလႄႈဢဝ်ၵူၼ်းႁိူၼ်းၵူၼ်းယေးမၼ်းၵႂႃႇၸူးမိူင်း ဢေးၵျိပ်ႉ၊ ပုၼ်ႉၼၼ်ႉဢေႃႈ။ မိူဝ်ႈဢၼ်ၶဝ်လူင်းၵႂႃႇၼၼ်ႉယင်းတိုၵ်ႉပဵၼ်ၵူၼ်းဢၼ်ၵေႇၼႃႇသေၵေႃႈ၊ၶဝ်ပဵၼ်ၵူၼ်းဢၼ်ၼမ်ၵိုၼ်းလႄႈတၼ်းၶူဝ်းယႂ်ႇမႃးလူင်လၢင်တီႈၶႃႈဢေႃႈ။-
ၵူၼ်းမဵဝ်း ဢေးၵျိပ်ႉ၊ ၶဝ်တဵၵ်းငႅၼ်းၶႃႈၸဝ်ႈႁဝ်းၶဝ်လႄႈႁႂ်ႈႁဵတ်းယၢပ်ႇႁဵတ်းယဵၼ်းသေလႄႈႁႂ်ႈၶၢမ်ႇႁဵတ်းၶႃႈဢၼ်ၵိတ်ႇၸႂ်ၵိၼ်းၸႂ်ၼႃႇလူင်လၢင်တီႈၶႃႈဢေႃႈ။-
ၶႃႈၸဝ်ႈႁဝ်းၶဝ်ဢွၼ်ၵၼ်ႁွင်ႉသႅၼ်ႇလဝ်ႈယွၼ်းတၢင်းဢၼ်ၸွႆႈဢၼ်ထႅမ်တီႈ ထႃႇဝရႃႉၽြႃး၊ ဢၼ်ဝႃႈ၊ၽြႃးပဵၼ်ၸဝ်ႈပူႇပေႃႈႁဝ်းၶဝ်ၸိူဝ်းၼၼ်ႉသေယဝ်ႉ၊မၼ်းၸဝ်ႈထွမ်ႇငိၼ်းသဵင်ၶႃႈၸဝ်ႈႁဝ်းၶဝ်လႄႈလူႁၼ်တုၵ်ႉၶႃႉတၢင်းၽၢၼ်၊ဢိၵ်ႇတင်းတၢင်းဢၼ်ႁဵတ်းယၢပ်ႇႁဵတ်းယဵၼ်းဢိၵ်ႇတင်းတၢင်းဢၼ်ၸႂ်လုၸႂ်ဢူၼ်ႈၶႃႈၸဝ်ႈႁဝ်းၶဝ်ၼၼ်ႉတီႈၶႃႈဢေႃႈ။-
မိူဝ်ႈၼၼ်ႉမၼ်းၸဝ်ႈဢဝ်တင်းႁႅင်းတၼ်းၶူဝ်းၸဝ်ႈဢၼ်ယႂ်ႇၼႃႇၼၼ်ႉၵႄႇၼုၵ်ႈဢဝ်ၶႃႈၸဝ်ႈႁဝ်းၶဝ်ဢွၵ်ႇသေမိူင်း ဢေးၵျိပ်ႉ၊ မႃးတီႈၶႃႈဢေႃႈ။ မၼ်းၸဝ်ႈလႆႈႁဵတ်းၼိမိၵ်ႈလၢၵ်ႈၶၼႃႇလွင်ႈတၢင်းဢၼ်လၢၵ်ႇဢၼ်လၢႆး၊တၢင်းဢၼ်လီဢၢမ်းတင်းလၢႆ၊ဢိၵ်ႇတင်းႁဵတ်းႁႂ်ႈလွင်ႈတၢင်းဢၼ်လီၵူဝ်လီႁႄဢၼ်ယႂ်ႇၼႃႇတင်းလၢႆပဵၼ်မႃးဢေႃႈ။-
မၼ်းၸဝ်ႈၸင်ႇဢဝ်ၶႃႈၸဝ်ႈႁဝ်းၶဝ်မႃးၵႃႈတီႈၼႆႈသေယဝ်ႉ၊ဢဵတ်းလူပၼ်မိူင်းဢၼ်မၢၵ်ႈမီးလီပဵၼ်လႄႈၽုၼ်ႇလီလိၼ်လီ ၼႆႉတီႈၶႃႈၸဝ်ႈႁဝ်းၶဝ်တီႈၶႃႈဢေႃႈ။-
ပိူဝ်ႈၼႆလႄႈ တေႃႈလဵဝ်ၼႆႉၶႃႈၸဝ်ႈဢဝ်မၢၵ်ႇဢဝ်ႁူင်းဢၼ်လႆႈဢွၼ်တၢင်းသုတ်းပိူၼ်ႈၵႃႈတီႈလိၼ်ဢၼ်ၸဝ်ႈႁဝ်း ထႃႇဝရႃႉၽြႃး၊ ဢဵတ်းလူပၼ်တီႈၶႃႈၸဝ်ႈၼၼ်ႉမႃးတီႈၶႃႈယဝ်ႉ၊’ ဝႃႈၼင်ႇၼႆဢေႃႈ။ “ၵမ်းၼၼ်ႉ ဢဝ်ပဵတ်ႈသူၼၼ်ႉဝၢင်းၵႃႈတီႈၽၢႆႇၼႃႈ ထႃႇဝရႃႉၽြႃး၊ သေလႄႈဝႆႈသႃၵူဝ်းၵႂၢႆႇမၼ်းၸဝ်ႈၵႃႈတီႈၼၼ်ႈတႃႉ။-
မီးတၢင်းဢၼ်ယွင်ႈယေႃးတၢင်ႇၵျေးၸူးပုၼ်ႈတၢင်းလီဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူပၼ်တီႈသူဢိၵ်ႇတင်းၵူၼ်းႁိူၼ်းၵူၼ်းယေးသူတင်းလၢႆတႃႉ။ ႁႂ်ႈၸႃႉၸဵမ်ၵူၼ်းမဵဝ်း လေႇဝိ၊ ဢိၵ်ႇတင်းၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈယူႇလူၺ်ႈၵၼ်တင်းသူၸိူဝ်းၼၼ်ႉၶဝ်ႈလႄႈမူၼ်ႈပျေႃႇၸူမ်းသိူဝ်းလူၺ်ႈၵၼ်တင်းသူတႃႉ။
“မိူဝ်ႈဢၼ်ထူၼ်ႈထိုင်သၢမ်ပီယေႈပွၵ်ႈ၊ပီဢၼ်လူႇသိပ်းပုၼ်ႈပုၼ်ႈၼိုင်ႈၼၼ်ႉ၊ၼႂ်းၵႃႈဢၼ်ယႂ်ႇၽႄႈတူဝ်းတွၼ်းမႃးတီႈသူသိပ်းပုၼ်ႈၼၼ်ႉဢဝ်ပုၼ်ႈၼိုင်ႈသၢၵ်ႈလူႇသေယဝ်ႉ၊ဢဝ်လဵင်ႉလူၵူၼ်းမဵဝ်း လေႇဝိ၊ လႂ်၊ၵူၼ်းတၢင်ႇၸိူဝ်ႉတၢင်ႇၶိူဝ်းလႂ်၊လုၵ်ႈဢွၼ်ႇဢၼ်ၽၢၼ်ပေႃႈၽၢၼ်မႄႈလႂ်၊ဢိၵ်ႇတင်းမႄႈမၢႆႈတင်းလၢႆႁႂ်ႈၶဝ်လႆႈၵိၼ်ဢိမ်ႇၵိၼ်တဵမ်တႃႉ။-
မိူဝ်ႈဢၼ်ယဝ်ႉတူဝ်ႈယဝ်ႉၼၼ်ႉၸိုင်၊သူတၵ်းလႆႈလဝ်ႈလၢတ်ႈတီႈ ထႃႇဝရႃႉၽြႃး၊ လႄႈဝႃႈ၊ ‘ၶိူင်ႈတၢင်းလူႇသိပ်းပုၼ်ႈပုၼ်ႈၼိုင်ႈဢၼ်မူတ်းၸၢင်ႇၼၼ်ႉဢမ်ႇၵိုတ်းဢမ်ႇလိူဝ်ၵႃႈၼႂ်းႁိူၼ်းၶႃႈၸဝ်ႈသေဢိတ်းတီႈၶႃႈယဝ်ႉ။ ၶႃႈၸဝ်ႈပၼ်တီႈၵူၼ်းမဵဝ်း လေႇဝိ၊ လႂ်၊ၵူၼ်းတၢင်ႇၸိူဝ်ႉတၢင်ႇၶိူဝ်းလႂ်၊လုၵ်ႈဢွၼ်ႇဢၼ်ၽၢၼ်ပေႃႈၽၢၼ်မႄႈလႂ်၊ဢိၵ်ႇတင်းမႄႈမၢႆႈတင်းလၢႆ ၸွမ်းၵႃႈၼင်ႇဢၼ်ၸဝ်ႈႁဝ်းသင်ႇလၢတ်ႈဝႆႉႁႂ်ႈၶႃႈၸဝ်ႈႁဵတ်းၼၼ်ႉတီႈၶႃႈယဝ်ႉ။ ၶႃႈၸဝ်ႈဢမ်ႇပူၼ်ႉဢမ်ႇလိူဝ်၊ဢမ်ႇလူင်ဢမ်ႇလိုမ်းၵႃႈဢၼ်ၸဝ်ႈႁဝ်းပိင်းၺၢပ်ႈဝႆႉ၊လူၺ်ႈလွင်ႈတၢင်းလူႇသိပ်းပုၼ်ႈပုၼ်ႈၼိုင်ႈၼၼ်ႉတီႈၶႃႈဢေႃႈ။-
ၶႃႈၸဝ်ႈဢမ်ႇဢဝ်ၼႂ်းဢုၵ်ႉၸႃႇၼၼ်ႉၵိၼ်ၼႂ်းမိူဝ်ႈဢၼ်ၶႃႈၸဝ်ႈၶၢင်းၶီၶၢင်းၽၢၼ်ယူႇၼၼ်ႉတီႈၶႃႈ။ ၶႃႈၸဝ်ႈဢမ်ႇဢဝ်ၵႃႈၼႂ်းမၼ်းၵႂႃႇၼႂ်းမိူဝ်ႈဢၼ်ၶႃႈၸဝ်ႈဢမ်ႇမူတ်းသႂ်ၼၼ်ႉသေဢိတ်းတီႈၶႃႈ။ ၶႃႈၸဝ်ႈဢမ်ႇဢဝ်ၵႃႈၼႂ်းမၼ်းပၼ်ပုၼ်ႈၵေႃႉဢၼ်တၢႆၼၼ်ႉတီႈၶႃႈ။ ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈထွမ်ႇဢဝ်ၵႂၢမ်းၸဝ်ႈႁဝ်းတီႈၶႃႈယဝ်ႉ။ ၶႃႈၸဝ်ႈႁဵတ်းၸွမ်းၵႃႈၼင်ႇဢၼ်ၸဝ်ႈႁဝ်းပိင်းၺၢပ်ႈဝႆႉလူၺ်ႈလွင်ႈတၢင်းလူႇသိပ်းပုၼ်ႈပုၼ်ႈၼိုင်ႈတီႈၶႃႈၸဝ်ႈၼၼ်ႉတီႈၶႃႈယဝ်ႉ။-
ၶႅၼ်းတေႃႈယူႇၵႃႈၼိူဝ်ၽုင်ႇၵၢင်ႁၢဝ်တီႈယူႇဢၼ်မူတ်းၸၢင်ႇၸဝ်ႈႁဝ်းၼၼ်ႉသေလႄႈၵူမ်ႈတူၺ်းလႄႈပၼ်တၢင်းလီတီႈၵူၼ်းၸဝ်ႈႁဝ်းမဵဝ်း ဢိသရေး၊ တင်းလၢႆ၊ဢိၵ်ႇတင်းတီႈမိူင်းဢၼ်မၢၵ်ႈမီးလီပဵၼ်လႄႈၽုၼ်ႇလီလိၼ်လီၼႃႇဢၼ်ၸဝ်ႈႁဝ်းဢၢပ်ႈပၼ်တီႈၶႃႈၸဝ်ႈႁဝ်းၶဝ်ၸွမ်းၵႃႈၼင်ႇဢၼ်ၸဝ်ႈႁဝ်းတိူင်ႇၵၢဝ်ႇၵတိဝႆႉတီႈပူႇပေႃႈၶႃႈၸဝ်ႈႁဝ်းၶဝ်ၼၼ်ႉသေၵမ်းတီႈၶႃႈ၊’ ဝႃႈၼင်ႇၼႆဢေႃႈ။
“ဝၼ်းမိူဝ်ႈၼႆႉ ထႃႇဝရႃႉၽြႃး၊ ၽြႃးပဵၼ်ၸဝ်ႈသူပိင်းၺၢပ်ႈတီႈသူဝႆႉႁႂ်ႈသူထွမ်ႇဢဝ်ပိင်းၺၢပ်ႈတြႃးမၼ်းၸဝ်ႈၵႃႈမီးတင်းသဵင်ႈတင်းလူင်ယဝ်ႉ။ ပိူဝ်ႈၼႆလႄႈသူတၵ်းလႆႈပႃးၸႂ်ပႃးၶေႃးတင်းႁူဝ်ၸႂ်သဵင်ႈသဵင်ႈလႄႈပႂ်ႉၵမ်ပႂ်ႉၸွမ်းဢေႃႈ။-
ဝၼ်းမိူဝ်ႈၼႆႉသူႁပ်ႉတုင်းဢဝ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူယဝ်ႉ။ မႂ်းဝႆႉၵတိသဵတ်ႈၸႃႇႁႂ်ႈလႆႈထွမ်ႇဢဝ်ၵႂၢမ်းမၼ်းၸဝ်ႈ၊ႁႂ်ႈလႆႈပႂ်ႉၵမ်ပႂ်ႉၸွမ်းထုင်းၽိင်ႈတြႃးမၼ်းၸဝ်ႈဢိၵ်ႇတင်းႁႂ်ႈလႆႈၵမ်ၵျၢင်ႉၸွမ်းၵႃႈၼင်ႇဢၼ်မၼ်းၸဝ်ႈပိင်းၺၢပ်ႈဝႆႉၸိူဝ်းၼၼ်ႉယဝ်ႉ။-
ဝၼ်းမိူဝ်ႈၼႆႉ ထႃႇဝရႃႉၽြႃး၊ ႁပ်ႉတုင်းဢဝ်သူႁႂ်ႈပဵၼ်ၵူၼ်းမၼ်းၸဝ်ႈတႄႉတႄႉဝႃႈဝႃႈ၊ၸွမ်းၵႃႈၼင်ႇဢၼ်မၼ်းၸဝ်ႈဝႆႉၵတိၼၼ်ႉသေယဝ်ႉ၊မၼ်းၸဝ်ႈပိင်းၺၢပ်ႈတီႈသူဝႆႉႁႂ်ႈသူပႂ်ႉၵမ်ပႂ်ႉၸွမ်းထုင်းၽိင်ႈတြႃးမၼ်းၸဝ်ႈၵႃႈမီးတင်းသဵင်ႈတင်းလူင်ယဝ်ႉ။-
မၼ်းၸဝ်ႈတၵ်းႁႂ်ႈသူမီးမုၼ်သရေႇယႂ်ႇလိူဝ်တွၼ်းသေမဵဝ်းၵူၼ်းတင်းလၢႆဢၼ်မၼ်းၸဝ်ႈၽၢၼ်ႇသၢင်းႁဵတ်းပဵၼ်ၼၼ်ႉ၊ၼႂ်းတၢင်းဢၼ်ပိူၼ်ႈယွင်ႈယေႃး၊ၼႂ်းတၢင်းဢၼ်ၸိုဝ်ႈသဵင်သူဢွၵ်ႇ၊ဢိၵ်ႇတင်းၼႂ်းတၢင်းဢၼ်ပိူၼ်ႈရူဝ်ႇသေႇလေႇမၢတ်ႈ၊ဢိၵ်ႇတင်းသူတၵ်းပဵၼ်ၵူၼ်းမူတ်းၸၢင်ႇတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူၸွမ်းၵႃႈၼင်ႇဢၼ်ၵတိၸဝ်ႈမီးၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ မူဝ်းသေႇ၊ ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၵႃႈၼႂ်းၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်သင်ႇလၢတ်ႈတီႈၵူၼ်းတင်းလၢႆလႄႈဝႃႈ၊ “ပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၵႃႈဢၼ်ၵဝ်ပိင်းၺၢပ်ႈဝႆႉတီႈသူဝၼ်းမိူဝ်ႈၼႆႉၸိူဝ်းၼၼ်ႉတႃႉ။-
ၼႂ်းဝၼ်းဢၼ်သူၶၢမ်ႈၼမ်ႉ ယေႃးတၢၼ်ႇ၊ လႄႈၶဝ်ႈထိုင်ၼႂ်းမိူင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူပၼ်တီႈသူၼၼ်ႉၸိုင်၊သူတၵ်းလႆႈဢဝ်မၢၵ်ႇႁိၼ်လူင်တင်းလၢႆပူၵ်းတင်ႈဝႆႉသေလႄႈဢဝ်ဢၢင်းၵတေႇႁၢင်ႈၶိူင်ႈတႃးဝႆႉသေယဝ်ႉ၊-
ဢဝ်တြႃးၸဝ်ႈဢိၵ်ႇတင်းၵႂၢမ်းဢေႃးဝႃႇတႃႉၵႃႈမီးတင်းသဵင်ႈတင်းလူင်တႅမ်ႈဝႆႉၵႃႈၼိူဝ်မၢၵ်ႇႁိၼ်ၸိူဝ်းၼၼ်ႉဢေႃႈ။ မိူဝ်ႈဢၼ်သူၶဝ်ႈႁွတ်ႈၵႃႈၼႂ်းမိူင်းဢၼ်မၢၵ်ႈမီးလီပဵၼ်လႄႈၽုၼ်ႇလီလိၼ်လီ ဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇမွၼ်ႇသူဝႆႉၵတိတီႈသူၼၼ်ႉသေလႄႈ၊-
မိူဝ်ႈဢၼ်သူလႆႈႁွတ်ႈထိုင်ၵႃႈတီႈၽၢႆႇပုၼ်ႉၼမ်ႉ ယေႃးတၢၼ်ႇ၊ ယဝ်ႉၼၼ်ႉၸိုင်၊သူတၵ်းလႆႈဢဝ်မၢၵ်ႇႁိၼ်ၸိူဝ်းၼၼ်ႉပူၵ်းတင်ႈဝႆႉၵႃႈၼိူဝ်လွႆ ဢေးပႃႇလႃႉ၊ လႄႈဢဝ်ဢၢင်းၵတေႇႁၢင်ႈၶိူင်ႈတႃးဝႆႉၸွမ်းၵႃႈၼင်ႇဢၼ်ၵဝ်သင်ႇလၢတ်ႈဝႆႉတီႈသူဝၼ်းမိူဝ်ႈၼႆႉၼၼ်ႉဢေႃႈ။-
ၵႃႈတီႈၼၼ်ႈ သူတၵ်းလႆႈတႄႇႁဵတ်းၶဵင်ႇတၢင်းလူႇဢၼ်ဢဝ်မၢၵ်ႇႁိၼ်တႄႇႁဵတ်းၼၼ်ႉပုၼ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။ တၵ်းဢမ်ႇလႆႈၸႂ်ႉၶိူင်ႈလဵၵ်းထၢၵ်ႇမၢၵ်ႇႁိၼ်ၼၼ်ႉလႃးလႃး၊-
ၵွပ်ႈပိူဝ်ႈၶဵင်ႇတၢင်းလူႇဢၼ်သူတႄႇႁဵတ်းပုၼ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢၼ်လႂ်သေဢမ်ႇဝႃႈ၊တၵ်းလႆႈဢဝ်တင်းမၢၵ်ႇႁိၼ်ဢၼ်ဢမ်ႇထၢၵ်ႇဢမ်ႇမႄးၼၼ်ႉတႄႇႁဵတ်းဢေႃႈ။ ၵႃႈတီႈၼၼ်ႈသူတၵ်းလႆႈသၢၵ်ႈလူႇၶိူင်ႈတၢင်းလူႇဢၼ်တုတ်ႇၽႆး၊-
ဢိၵ်ႇတင်းတၵ်းလႆႈဢွၼ်ၵၼ်သၢၵ်ႈလူႇလႄႈၵိၼ်ၶိူင်ႈတၢင်းလူႇမိၵ်ႈသႁႃႇယႃႉၸူမ်းၸူမ်းသိူဝ်းသိူဝ်းမူၼ်ႈမူၼ်ႈပျေႃႇပျေႃႇၵႃႈတီႈၽၢႆႇၼႃႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။-
သူတၵ်းလႆႈဢဝ်ၵႂၢမ်းတြႃးၵူႈၶေႃႈၵူႈၵမ်းတႅမ်ႈသႂ်ႇဝႆႉၵႃႈၼိူဝ်မၢၵ်ႇႁိၼ်ၸိူဝ်းဢၼ်တႃးဢၢင်းၵတေႇဝႆႉၼၼ်ႉလီလီငၢမ်းငၢမ်းဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ဢိၵ်ႇတင်းယဵၸ်ႈပရေႃးႁဵၵ်ႈ ၵူၼ်းမဵဝ်း လေႇဝိ၊ တင်းလၢႆ၊သမ်ႉလၢတ်ႈတီႈၵူၼ်းမဵဝ်း ဢိသရေး၊ တင်းသဵင်ႈတင်းလူင်လႄႈဝႃႈ၊ၵူၼ်း “မဵဝ်း ဢိသရေး၊ ၶဝ်႟။ ဢွၼ်ၵၼ်ယူႇတဵတ်ႇတဵတ်ႇလႄႈထွမ်ႇငိၼ်းတႃႉ။ ဝၼ်းမိူဝ်ႈၼႆႉသူလႆႈပဵၼ်ၵူၼ်း ထႃႇဝရႃႉၽြႃး၊ ၽြႃးပဵၼ်ၸဝ်ႈသူယဝ်ႉ။-
ပိူဝ်ႈၼႆလႄႈထွမ်ႇဢဝ်ၵႂၢမ်း ထႃႇဝရႃႉၽြႃး၊ လႄႈၵမ်ၵျၢင်ႉပိင်းၺၢပ်ႈတြႃးမၼ်းၸဝ်ႈဢၼ်ၵဝ်သင်ႇလၢတ်ႈသူဝၼ်းမိူဝ်ႈၼႆႉၸိူဝ်းၼၼ်ႉတႃႉ၊” ဝႃႈၼင်ႇၼႆဢေႃႈ။
ၼႂ်းဝၼ်းၼၼ်ႉ၊ မူဝ်းသေႇ၊ သမ်ႉသင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈ၊-
“လိုၼ်းသေဢၼ်သူၶၢမ်ႈၼမ်ႉ ယေႃးတၢၼ်ႇ၊ ၵႂႃႇယဝ်ႉၼၼ်ႉၸိူဝ်ႉၶိူဝ်းဢၼ်တၵ်းလႆႈၸုၵ်းယူႇၵႃႈၼိူဝ်လွႆ ၵေႇရၸိမ်ႇ၊ ၼႂ်းမိူဝ်ႈဢၼ်ပၼ်မၢင်ႇၵလႃႇတၢင်းလီၵႃႈၼိူဝ်ၵူၼ်းတင်းလၢႆယူႇၼၼ်ႉၸမ်ႉ၊ပဵၼ် သိမုၼ်ႇ၊လေႇဝိ၊ယုတႃႉ၊ဢိသၶႃႇ၊ယူဝ်းသႅပ်ႈ၊ ဢိၵ်ႇတင်း ပိၼ်ႇယႃႇမိၼ်ႇ၊ ဢေႃႈ။-
ၸိူဝ်ႉၶိူဝ်းၸိူဝ်းဢၼ်တၵ်းလႆႈၸုၵ်းယူႇၵႃႈၼိူဝ်လွႆ ဢေးပႃႇလႃႉ၊ ၼႂ်းမိူဝ်ႈဢၼ်လၢတ်ႈၵႂၢမ်းဢႃႉမၢင်ႇၵလႃႇၵိၼ်ႇဝႃႈယူႇၼၼ်ႉၸမ်ႉ၊ပဵၼ် ရုပိၼ်ႇ၊ၵၢတ်ႉ၊ဢႃႇသျႃႇ၊ၸေႇပုလုၼ်ႇ၊တၢၼ်ႇ၊ ဢိၵ်ႇတင်း ၼပ်ႉထလိ၊ ဢေႃႈ။-
ၵႂၢမ်းဢၼ်ၵူၼ်းမဵဝ်း လေႇဝိ၊ တင်းလၢႆတၵ်းလႆႈႁွင်ႉမွၵ်ႇႁွင်ႉလၢတ်ႈတင်းသဵင်ဢၼ်ယႂ်ႇၼႃႇၵႃႈတီႈၵူၼ်းမဵဝ်း ဢိသရေး၊ တင်းသဵင်ႈတင်းလူင်လႄႈဝႃႈၸမ်ႉ။
“‘ႁႂ်ႈၵေႃႉဢၼ်ဢဝ်တင်းမၢၵ်ႇႁိၼ်လႂ်၊မႆႉလႂ်၊ၶိူင်ႈလဵၵ်းၶိူင်ႈတွင်းလႂ်၊ႁဵတ်းႁုၼ်ႇႁၢင်ႈသၢင်းထုသေဢၼ်ဢၼ်လႄႈလၵ်ႉလွမ်ဝႆႈၼၼ်ႉမီးဢႃႉမၢင်ႇၵလႃႇသေၵမ်းလူၺ်ႈ။ လွင်ႈမၼ်းၸမ်ႉ၊ ထႃႇဝရႃႉၽြႃး၊ ၸင်းတၢင်းဢၼ်ဝႆႈႁုၼ်ႇႁၢင်ႈသၢင်းထုဢေႃႈ၊’ ဝႃႈၼင်ႇၼႆဢေႃႈ။ “မိူဝ်ႈၼၼ်ႉၵူၼ်းၵႃႈမီးတင်းသဵင်ႈတင်းလူင်တၵ်းလႆႈဢွၼ်ၵၼ်ႁပ်ႉတုင်းဢဝ်သေလႄႈလၢတ်ႈဝႃႈ၊ ‘ဢႃမိၼ်ႈ’ ဝႃႈၼင်ႇၼႆဢေႃႈ။
“‘ႁႂ်ႈၵေႃႉဢၼ်ႁဵတ်းဢမ်ႇရူဝ်ႇသေႇၵူဝ်ယမ်ပေႃႈမႄႈမၼ်းၼၼ်ႉမီးဢႃႉမၢင်ႇၵလႃႇသေၵမ်းလူၺ်ႈ၊’ ဝႃႈၼင်ႇၼႆသေယဝ်ႉ။ “ၵူၼ်းၵႃႈမီးတင်းသဵင်ႈတင်းလူင်တၵ်းလႆႈဢွၼ်ၵၼ်ႁပ်ႉတုင်းဢဝ်သေလႄႈလၢတ်ႈဝႃႈ၊ ‘ဢႃမိၼ်ႈ’ ဝႃႈၼင်ႇၼႆဢေႃႈ။
“‘ႁႂ်ႈၵေႃႉဢၼ်ၶၢႆႉသဝ်လၵ်းဢၼ်မၵ်းမၼ်ႈလႅၼ်လိၼ်ၵူၼ်းႁိူၼ်းၸမ်ၵၼ်တင်းမၼ်းၼၼ်ႉမီးဢႃႉမၢင်ႇၵလႃႇသေၵမ်းလူၺ်ႈ၊’ ဝႃႈၼင်ႇၼႆသေယဝ်ႉ။ “ၵူၼ်းၵႃႈမီးတင်းသဵင်ႈတင်းလူင်တၵ်းလႆႈဢွၼ်ၵၼ်ႁပ်ႉတုင်းဢဝ်သေလႄႈလၢတ်ႈဝႃႈ၊ ‘ဢႃမိၼ်ႈ’ ဝႃႈၼင်ႇၼႆဢေႃႈ။
“‘ႁႂ်ႈၵေႃႉဢၼ်ဢွၼ်ၵူၼ်းတႃမွတ်ႇၽိတ်းတၢင်းပိူင်ႈတၢင်းၼၼ်ႉမီးဢႃႉမၢင်ႇၵလႃႇသေၵမ်းလူၺ်ႈ၊’ ဝႃႈၼင်ႇၼႆသေယဝ်ႉ။ “ၵူၼ်းၵႃႈမီးတင်းသဵင်ႈတင်းလူင်တၵ်းလႆႈဢွၼ်ၵၼ်ႁပ်ႉတုင်းဢဝ်သေလႄႈလၢတ်ႈဝႃႈ၊ ‘ဢႃမိၼ်ႈ’ ဝႃႈၼင်ႇၼႆဢေႃႈ။
“‘ႁႂ်ႈၵေႃႉဢၼ်ဝႄႈပိူင်ႈသဵၼ်ႈတၢင်းတြႃးသေလႄႈၸီႇယၢင်ႇတီႈၵူၼ်းတၢင်ႇၸိူဝ်ႉတၢင်ႇၶိူဝ်းဢိၵ်ႇတင်းလုၵ်ႈဢွၼ်ႇဢၼ်ၽၢၼ်ပေႃႈၽၢၼ်မႄႈဢိၵ်ႇတင်းမႄႈမၢႆႈၼၼ်ႉမီးဢႃႉမၢင်ႇၵလႃႇသေၵမ်းလူၺ်ႈ၊’ ဝႃႈၼင်ႇၼႆသေယဝ်ႉ။ “ၵူၼ်းၵႃႈမီးတင်းသဵင်ႈတင်းလူင်တၵ်းလႆႈဢွၼ်ၵၼ်ႁပ်ႉတုင်းဢဝ်သေလႄႈလၢတ်ႈဝႃႈ၊ ‘ဢႃမိၼ်ႈ’ ဝႃႈၼင်ႇၼႆဢေႃႈ။
“‘ႁႂ်ႈၵေႃႉဢၼ်ႁဵတ်းမေႇထုင်ႇလူၺ်ႈမေးပေႃႈမၼ်း၊ႁႂ်ႈပေႃႈမၼ်းလႆႈဢူၵ်းလႆႈဢၢႆၼၼ်ႉမီးဢႃႉမၢင်ႇၵလႃႇသေၵမ်းလူၺ်ႈ၊’ ဝႃႈၼင်ႇၼႆသေယဝ်ႉ။ “ၵူၼ်းၵႃႈမီးတင်းသဵင်ႈတင်းလူင်တေလႆႈဢွၼ်ၵၼ်ႁပ်ႉတုင်းဢဝ်သေလႄႈလၢတ်ႈဝႃႈ၊ ‘ဢႃမိၼ်ႈ’ ဝႃႈၼင်ႇၼႆဢေႃႈ။
“‘ႁႂ်ႈၵေႃႉဢၼ်သိူၵ်ႈသမ်ႇၵႃႇမႃႉလူၺ်ႈၵၼ်တင်းတူဝ်သတ်းသေမဵဝ်းမဵဝ်းၼၼ်ႉမီးဢႃႉမၢင်ႇၵလႃႇသေၵမ်းလူၺ်ႈ၊’ ဝႃႈၼင်ႇၼႆသေယဝ်ႉ။ “ၵူၼ်းၵႃႈမီးတင်းသဵင်ႈတင်းလူင်တၵ်းလႆႈဢွၼ်ၵၼ်ႁပ်ႉတုင်းဢဝ်သေလႄႈလၢတ်ႈဝႃႈ၊ ‘ဢႃမိၼ်ႈ’ ဝႃႈၼင်ႇၼႆဢေႃႈ။
“‘ႁႂ်ႈၵေႃႉဢၼ်ႁဵတ်းမေႇထုင်ႇလူၺ်ႈၵၼ်တင်းပီႈၼၢင်းမၼ်းဢမ်ႇၼၼ်ၼွင်ႉယိင်းမၼ်း၊ဢမ်ႇၼၼ်ၼွင်ႉယိင်းဢိၵ်ႇတင်းပီႈၼၢင်းဢၼ်ၸွမ်းၽၢႆႇပေႃႈၽၢႆႇမႄႈမၼ်းၼၼ်ႉ၊မီးဢႃႉမၢင်ႇၵလႃႇသေၵမ်းလူၺ်ႈ၊’ ဝႃႈၼင်ႇၼႆသေယဝ်ႉ။ “ၵူၼ်းၵႃႈမီးတင်းသဵင်ႈတင်းလူင်တၵ်းလႆႈဢွၼ်ၵၼ်ႁပ်ႉတုင်းဢဝ်သေလႄႈလၢတ်ႈဝႃႈ၊ ‘ဢႃမိၼ်ႈ’ ဝႃႈၼင်ႇၼႆဢေႃႈ။
“‘ႁႂ်ႈၵေႃႉဢၼ်ႁဵတ်းမေႇထုင်ႇလူၺ်ႈၵၼ်တင်းမႄႈၽၢႆႇမေးမၼ်းၼၼ်ႉမီးဢႃႉမၢင်ႇၵလႃႇသေၵမ်းလူၺ်ႈ၊’ ဝႃႈၼင်ႇၼႆသေယဝ်ႉ။ “ၵူၼ်းၵႃႈမီးတင်းသဵင်ႈတင်းလူင်တၵ်းလႆႈဢွၼ်ၵၼ်ႁပ်ႉတုင်းဢဝ်သေလႄႈလၢတ်ႈဝႃႈ၊ ‘ဢႃမိၼ်ႈ’ ဝႃႈၼင်ႇၼႆဢေႃႈ။
“‘ႁႂ်ႈၵေႃႉဢၼ်လွမ်တဵတ်ႇလွမ်မႅပ်းဢဝ်ဢသၢၵ်ႈၵူၼ်းတၢႆၼၼ်ႉမီးဢႃႉမၢင်ႇၵလႃႇသေၵမ်းလူၺ်ႈ၊’ ဝႃႈၼင်ႇၼႆသေယဝ်ႉ။ “ၵူၼ်းၵႃႈမီးတင်းသဵင်ႈတင်းလူင် တၵ်းလႆႈဢွၼ်ၵၼ်ႁပ်ႉတုင်းဢဝ်သေလႄႈလၢတ်ႈဝႃႈ၊ ‘ဢႃမိၼ်ႈ’ ဝႃႈၼင်ႇၼႆဢေႃႈ။
“‘ႁႂ်ႈၵေႃႉဢၼ်ႁပ်ႉဢဝ်ငိုၼ်းၵႃႈၸၢင်ႈႁႂ်ႈလႆႈဢဝ်တၢႆၵူၼ်းဢၼ်ဢမ်ႇမီးဢပျတ်ႈၼၼ်ႉ၊မီးဢႃႉမၢင်ႇၵလႃႇသေၵမ်းလူၺ်ႈ၊’ ဝႃႈၼင်ႇၼႆသေယဝ်ႉ။ “ၵူၼ်းၵႃႈမီးတင်းသဵင်ႈတင်းလူင်တၵ်းလႆႈဢွၼ်ၵၼ်ႁပ်ႉတုင်းဢဝ်သေလႄႈလၢတ်ႈဝႃႈ၊ ‘ဢႃမိၼ်ႈ’ ဝႃႈၼင်ႇၼႆဢေႃႈ။
“‘ႁႂ်ႈၵေႃႉဢၼ်ဢမ်ႇထွမ်ႇဢမ်ႇၵမ်ၵျၢင်ႉပိင်းၺၢပ်ႈတြႃးၸိူဝ်းၼႆႉ မီးဢႃႉမၢင်ႇၵလႃႇသေၵမ်းလူၺ်ႈ၊’ ဝႃႈၼင်ႇၼႆသေယဝ်ႉ။ “ၵူၼ်းၵႃႈမီးတင်းသဵင်ႈတင်းလူင်တၵ်းလႆႈဢွၼ်ၵၼ်ႁပ်ႉတုင်းဢဝ်သေလႄႈလၢတ်ႈဝႃႈ၊ ‘ဢႃမိၼ်ႈ’ ဝႃႈၼင်ႇၼႆဢေႃႈ။
“ပေႃးသူထွမ်ႇဢဝ်ၵႂၢမ်း ထႃႇဝရႃႉၽြႃး၊ ၽြႃးပဵၼ်ၸဝ်ႈသူၸေးၸေးၸွတ်ႇၸွတ်ႇႁႂ်ႈလႆႈပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၸဝ်ႈဢၼ်ၵဝ်သင်ႇလၢတ်ႈဝႆႉတီႈသူဝၼ်းမိူဝ်ႈၼႆႉတင်းသဵင်ႈတင်းလူင်ၼၼ်ႉၸိုင်၊မၼ်းၸဝ်ႈတၵ်းယုၵ်ႉယွင်ႈသူလိူဝ်တွၼ်းၼႃႇသေၵူၼ်းမဵဝ်းၵႃႈၼိူဝ်လိၼ်မိူင်းတင်းသဵင်ႈတင်းလူင်ဢေႃႈ။-
ထွမ်ႇဢဝ်ၵႂၢမ်း ထႃႇဝရႃႉၽြႃး၊ ၽြႃးပဵၼ်ၸဝ်ႈသူတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊တၢင်းလီမၢင်ႇၵလႃႇၸိူဝ်းၼႆႉတၵ်းတူၵ်းႁွတ်ႈၵႃႈၼိူဝ်သူဢေႃႈ။
“ ထႃႇဝရႃႉၽြႃး၊ တၵ်းပၼ်တၢင်းလီမၢင်ႇၵလႃႇၵႃႈတီႈၼႂ်းဝၢၼ်ႈၼႂ်းဝဵင်းသူဢိၵ်ႇတင်းၼႂ်းႁႆႈၼႂ်းၼႃးသူဢေႃႈ။
“ ထႃႇဝရႃႉၽြႃး၊ တၵ်းပၼ်တၢင်းလီမၢင်ႇၵလႃႇႁႂ်ႈသူမီးလုၵ်ႈမီးလၢင်းၼမ်ၼႃႇ၊ႁႂ်ႈမၢၵ်ႇၶဝ်ႈႁူင်းၼမ်ႉသူလိူင်ႇၼမ်လႄႈႁႂ်ႈၽုင်သူဝ်း၊ၽုင်ဝူဝ်းသူယႂ်ႇၽႄႈၼမ်ၵိုၼ်းမႃးဢေႃႈ။
“ ထႃႇဝရႃႉၽြႃး၊ တၵ်းပၼ်တၢင်းလီမၢင်ႇၵလႃႇတီႈပဵတ်ႈသူၵူၺ်သူ၊တီႈၵွၵ်းဢၼ်ၼူတ်ႈၶဝ်ႈမုၼ်းသူဢေႃႈ။
“ ထႃႇဝရႃႉၽြႃး၊ တၵ်းပၼ်တၢင်းလီမၢင်ႇၵလႃႇမိူဝ်ႈဢၼ်သူၶဝ်ႈႁိူၼ်းဢွၵ်ႇႁိူၼ်းၼၼ်ႉဢေႃႈ။
“ ထႃႇဝရႃႉၽြႃး၊ တၵ်းတိုၵ်းပႄႉရၢၼ်ႇသူႇသူမိူဝ်ႈဢၼ်ၶဝ်တိုၵ်းတေႃးသူၼၼ်ႉဢေႃႈ။ ၶဝ်တၵ်းၶိုၼ်ႈတိုၵ်းသူၽၢႆႇလဵဝ်ၵူၺ်းသေၵေႃႈ၊တၵ်းဢွၼ်ၵၼ်ၼီပၢႆႈသေၵႃႈတီႈသူၵႂႃႇသီႇၸဵင်ႇပႅတ်ႇၼႃႈဢေႃႈ။
“ ထႃႇဝရႃႉၽြႃး၊ တၵ်းပၼ်တၢင်းလီမၢင်ႇၵလႃႇတီႈတၢင်းဢၼ်မိုဝ်းသူႁဵတ်းၼၼ်ႉဢိၵ်ႇတင်းတီႈယွင်ၶဝ်ႈယေးၶဝ်ႈသူဢေႃႈ။ မၼ်းၸဝ်ႈတၵ်းပၼ်တၢင်းလီမၢင်ႇၵလႃႇတီႈမိူင်းဢၼ်မၼ်းၸဝ်ႈပၼ်ႁႂ်ႈသူပိူင်ႇၼၼ်ႉဢေႃႈ။
“ပေႃးသူပႂ်ႉၵမ်ပႂ်ႉၵျၢင်ႉၸွမ်းပိင်းၺၢပ်ႈၸဝ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူၸိုင်၊မၼ်းၸဝ်ႈတၵ်းႁႂ်ႈသူပဵၼ်ၵူၼ်းဢၼ်မူတ်းၸၢင်ႇမၼ်းၸဝ်ႈၸွမ်းၼင်ႇဢၼ်မၼ်းၸဝ်ႈဝႆႉၵတိၼၼ်ႉဢေႃႈ။-
မိူဝ်ႈၼၼ်ႉၵူၼ်းမဵဝ်းၵႃႈၼိူဝ်လိၼ်မိူင်းတင်းသဵင်ႈတင်းလူင်တၵ်းႁၼ်လွင်ႈတၢင်းဢၼ် ထႃႇဝရႃႉၽြႃး၊ ႁွင်ႉဢဝ်ႁႂ်ႈသူပဵၼ်ၵူၼ်းမၼ်းၸဝ်ႈၼၼ်ႉသေယဝ်ႉ၊ၶဝ်တၵ်းဢွၼ်ၵၼ်ၵူဝ်ႁႄသူဢေႃႈ။-
ထႃႇဝရႃႉၽြႃး၊ တၵ်းပၼ်ႁႂ်ႈလုၵ်ႈလၢင်းသူၼမ်ၵိုၼ်းၼႃႇ၊ႁႂ်ႈသူဝ်း၊ႁႂ်ႈဝူဝ်းသူယႂ်ႇၽႄႈၼမ်ၵိုၼ်းၼႃႇဢိၵ်ႇတင်းႁႂ်ႈမၢၵ်ႇၶဝ်ႈႁူင်းၼမ်ႉသူလိူင်ႇၼမ်မၢၵ်ႈမီးၼႃႇၵႃႈၼႂ်းမိူင်းဢၼ်မၼ်းၸဝ်ႈဝႆႉၵတိတီႈပူႇမွၼ်ႇသူႁႂ်ႈလႆႈဢၢပ်ႈပၼ်တီႈသူၼၼ်ႉဢေႃႈ။-
မၼ်းၸဝ်ႈတၵ်းၽုၺ်ႇတိူၵ်ႈၽၢၼ်ႇတႃႇဢၼ်မီးၵႃႈၼိူဝ်ၽႃႉၵၢင်ႁၢဝ်ၼၼ်ႉႁႂ်ႈၽူၼ်တူၵ်းၼႂ်းၶိင်ႇဢၼ်သၢင်ႇထုၵ်ႇလႄႈပၼ်တၢင်းလီမၢင်ႇၵလႃႇတီႈသူႁႂ်ႈသူလႆႈၵူႈပၼ်ယိမ်ပၼ်တီႈမဵဝ်းၵူၼ်းတင်းလၢႆဢေႃႈ။ တၵ်းဢမ်ႇႁႂ်ႈသူလႆႈၵူႈလႆႈယိမ်ဢဝ်။-
ထႃႇဝရႃႉၽြႃး၊ တၵ်းဢမ်ႇႁႂ်ႈသူလႆႈပဵၼ်ၵူၼ်းဢၼ်ၸွမ်းလင်ပိူၼ်ႈလႄႈတၵ်းႁႂ်ႈသူဢွၼ်ႁူဝ်မဵဝ်းၵူၼ်းတင်းလၢႆဢေႃႈ။ သူတၵ်းဢမ်ႇလႆႈသုမ်းလႄႈတၵ်းတေလႆႈလီလႆႈပဵၼ်ဢေႃႈ။ ပေႃးသူထွမ်ႇဢဝ်ပိင်းၺၢပ်ႈၸဝ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢၼ်ၵဝ်သင်ႇလၢတ်ႈတီႈသူဝၼ်းမိူဝ်ႈၼႆႉၸိူဝ်းၼၼ်ႉႁႂ်ႈလႆႈပႂ်ႉၵမ်ပႂ်ႉၵျၢင်ႉလႄႈ၊-
ပေႃးသူယင်းဢမ်ႇဝႄႈပိူင်ႈပႅတ်ႈသေၶေႃႈသေၵမ်း၊ယင်းဢမ်ႇႁဵတ်းဝၢတ်ႈၵူဝ်းၵႂၢႆႇတီႈၽြႃးတၢင်ႇသူႇတၢင်ႇပႃးၸိုင်၊သူတၵ်းတေလႆႈၶၢမ်ႇတၢင်းလီၸိူဝ်းၼႆႉဢေႃႈ။
“ၵူၺ်းၵႃႈ၊ပေႃးသူဢမ်ႇထွမ်ႇဢမ်ႇဢဝ်ၵႂၢမ်း ထႃႇဝရႃႉၽြႃး၊ ၽြႃးပဵၼ်ၸဝ်ႈသူႁႂ်ႈလႆႈပႂ်ႉၵမ်ပႂ်ႉၵျၢင်ႉပိင်းၺၢပ်ႈၸဝ်ႈ၊ဢိၵ်ႇတင်းထုင်းတြႃးမၼ်းၸဝ်ႈၵႃႈဢၼ်ၵဝ်သင်ႇလၢတ်ႈတီႈသူဝၼ်းမိူဝ်ႈၼႆႉၼၼ်ႉၸိုင်၊ဢႃႉမၢင်ႇၵလႃႇဢၼ်တၵ်းတူၵ်းႁွတ်ႈၵႃႈၼိူဝ်သူၸိူဝ်းၼၼ်ႉၸမ်ႉ။
“ ထႃႇဝရႃႉၽြႃး၊ တၵ်းပၼ်ဢႃႉမၢင်ႇၵလႃႇၵႃႈတီႈၼႂ်းဝၢၼ်ႈၼႂ်းဝဵင်းသူဢိၵ်ႇတင်းၼႂ်းႁႆႈၼႂ်းၼႃးသူဢေႃႈ။
“ ထႃႇဝရႃႉၽြႃး၊ တၵ်းပၼ်ဢႃႉမၢင်ႇၵလႃႇတီႈပဵတ်ႈတီႈၵူၺ်သူ၊တီႈၵွၵ်းဢၼ်ၼူတ်ႈၶဝ်ႈမုၼ်းသူဢေႃႈ။
“ ထႃႇဝရႃႉၽြႃး၊ တၵ်းပၼ်ဢႃႉမၢင်ႇၵလႃႇႁႂ်ႈသူမီးလုၵ်ႈလၢင်းၵေႇၼႃႇ၊ႁႂ်ႈမၢၵ်ႇၶဝ်ႈႁူင်းၼမ်ႉသူလဵၵ်ႉၵေႇၼႃႇ၊ႁႂ်ႈသူဝ်း၊ဝူဝ်းသူၵေႇမၢင်ၼႃႇဢေႃႈ။
“ ထႃႇဝရႃႉၽြႃး၊ တၵ်းပၼ်ဢႃႉမၢင်ႇၵလႃႇမိူဝ်ႈဢၼ်သူၶဝ်ႈႁိူၼ်းဢွၵ်ႇႁိူၼ်းၼၼ်ႉဢေႃႈ။
“ပေႃးသူႁဵတ်းဢပျတ်ႈတုၸရိူၵ်ႈသေလႄႈၸုၼ်ႉပႅတ်ႈ ထႃႇဝရႃႉၽြႃး၊ ၸိုင်၊မၼ်းၸဝ်ႈတၵ်းႁႂ်ႈတၢင်းဢၼ်ၵိၼ်ႇလႃႇ၊တၢင်းဢၼ်ယႃႉဢၼ်ယူၵ်ႉ၊တၢင်းဢၼ်သႄႉသွမ်းတူၵ်းႁွတ်ႈၵႃႈၼိူဝ်သူၼႂ်းလွင်ႈတၢင်းဢၼ်သူဢဝ်မိုဝ်းႁဵတ်းၵူႈၸိူဝ်ႉၵူႈပိူင်တေႃႇထိုင်ႁွတ်ႈသူထၢၼ်ႈပေႃးလုလႅဝ်လႄႈသုမ်းၸွမ်းၶၼ်ၽႂ်းၼႃႇဢေႃႈ။-
မၼ်းၸဝ်ႈတၵ်းႁႂ်ႈၵႃႇလႃႉႁႃႈလႅင်မိူင်းတူၵ်းႁွတ်ႈၵႃႈၼိူဝ်သူမဵဝ်းၼိုင်ႈယဝ်ႉမဵဝ်းၼိုင်ႈတေႃႇထိုင်ႁွတ်ႈထၢၼ်ႈပေႃးပႄႇပႅတ်ႈသူဢမ်ႇၵိုတ်းဢမ်ႇၵျၢၼ်ႇသေၵေႃႉၵႃႈၼႂ်းမိူင်းဢၼ်သူၸမ်တၵ်းၶဝ်ႈၸၢမ်ႇၸႃးၼၼ်ႉဢေႃႈ။-
ထႃႇဝရႃႉၽြႃး၊ တၵ်းဢဝ်တင်းတူႇလႃႇတၢင်းဢၼ်ၶႆႈၼၢဝ်၊တၢင်းၶႆႈတၢင်းပဵၼ်ဢၼ်ၼိူဝ်ႉမႆႈၼိူဝ်ႉလိူတ်ႇ၊ဢၼ်ၵႂ်ႈဢၼ်ပွင်းႁႂ်ႈပဵၼ်တီႈသူၵူၺ်းဢမ်ႇၵႃး၊တၵ်းႁႂ်ႈပဵၼ်ၽႃႉလႅင်ႉဢိၵ်ႇတင်းလူမ်းၽႆး တိူဝ်ႉထုၵ်ႇသႂ်ႇမၢၵ်ႇၶဝ်ႈႁူင်းၼမ်ႉသူႁႂ်ႈမၼ်းသႃးၵႂႃႇၼဝ်ႈၵႂႃႇၼၼ်ႉပၼ်တၢမ်ႇတီႈသူလႄႈႁႂ်ႈၽေးဢုပၢတ်ႈၸိူဝ်းၼၼ်ႉမီးယူႇတီႈသူတေႃႇထိုင်ႁွတ်ႈသူထၢၼ်ႈပေႃးလုလႅဝ်ဢေႃႈ။-
မၼ်းၸဝ်ႈတၵ်းဢမ်ႇႁႂ်ႈၽူၼ်တူၵ်းလႄႈႁႂ်ႈလိၼ်သူၵႅၼ်ႇမိူၼ်ၸိူဝ်ႉၼင်ႇလဵၵ်းဢေႃႈ။-
မၼ်းၸဝ်ႈယင်းဢမ်ႇႁႂ်ႈၽူၼ်တူၵ်းလႄႈတၵ်းႁႂ်ႈလူမ်းဢၼ်ပႃးမုၼ်ႈလိၼ်တင်းလူမ်းဢၼ်ပႃးၽုၼ်ႇမုၵ်ႉထူဝ်းမႃးတူၵ်းသႂ်ႇၵႃႈၼိူဝ်သူတေႃႇထိုင်ႁွတ်ႈသူထၢၼ်ႈပေႃးလုလႅဝ်ဢေႃႈ။
“ ထႃႇဝရႃႉၽြႃး၊ တၵ်းႁႂ်ႈရၢၼ်ႇသူႇသူတိုၵ်းပႄႉသူပႅတ်ႈဢေႃႈ။ သူၶိုၼ်ႈတိုၵ်းၽၢႆႇလဵဝ်ၵူၺ်းသေၵေႃႈ၊သူတၵ်းဢွၼ်ၵၼ်လႆႈၼီပၢႆႈသေၵႃႈတီႈၶဝ်ၵႂႃႇသီႇၸဵင်ႇပႅတ်ႇၼႃႈဢေႃႈ။ မိူဝ်ႈၵူၼ်းလေႃးၵီႇတင်းလၢႆႁၼ်တၢင်းဢၼ်သူပဵၼ်ၸိူဝ်ႉၼင်ႇၼၼ်ၼၼ်ႉၸိုင်၊ၶဝ်တၵ်းဢွၼ်ၵၼ်တူၵ်းၸႂ်လႂ်တိုၼ်ႇဢေႃႈ။-
တူဝ်တၢႆသူၼၼ်ႉၼူၵ်ႉတင်းလၢႆ၊ဢိၵ်ႇတင်းတူဝ်ထိူၼ်ႇတင်းလၢႆ၊တၵ်းၵိၼ်တၵ်းၶူပ်းလႄႈတေဢမ်ႇမီးၵေႃႉဢၼ်လိုပ်ႈႁေႃႈတူဝ်သတ်းၸိူဝ်းၼၼ်ႉပႅတ်ႈသေၵေႃႉသေၵူၼ်း။-
ထႃႇဝရႃႉၽြႃး၊ တၵ်းႁႂ်ႈသူပဵၼ်တုမ်ႇၸဵပ်းမဵဝ်းဢၼ်ပဵၼ်တီႈၵူၼ်းမဵဝ်း ဢေးၵျိပ်ႉ၊ ၼၼ်ႉၸပ်းတီႈသူဢေႃႈ။ မၼ်းၸဝ်ႈတၵ်းႁႂ်ႈတူဝ်ၶၼ်ႇထႃႇသူပဵၼ်ၸဵပ်းလၢၼ်ႈတင်းတူဝ်တင်းၶိင်းဢိၵ်ႇတင်းတၢင်းဢၼ်ပဵၼ်ႁိတ်းပဵၼ်ႁဝ်ႈဢၼ်ဢမ်ႇႁၢႆလႆႈၼၼ်ႉဢေႃႈ။-
ထႃႇဝရႃႉၽြႃး၊ တၵ်းဢဝ်တၢင်းပဵၼ်ဢၼ်ယွင်ႇဢၼ်မႃႈ၊တၢင်းၶႆႈတၢင်းပဵၼ်ဢၼ်တႃမွတ်ႇဢိၵ်ႇတင်းတၢင်းပဵၼ်ဢၼ်ၵႂင်ၸႂ်ယုင်ႈၸႂ်ၼၼ်ႉပၼ်တၢမ်ႇတီႈသူဢေႃႈ။-
တၵ်းႁႂ်ႈသူပဵၼ်တၢင်းဢၼ်ၵုမ်းၵီႈၵုမ်းၵမ်းၼႂ်းၶိင်ႇလႅတ်ႇမႆႈၵၢင်ဝၼ်းမိူၼ်ၸိူဝ်ႉၼင်ႇၵူၼ်းတႃမွတ်ႇလႄႈသူတၵ်းဢမ်ႇၸၢင်ႈႁၼ်တၢင်းၵႂႃႇတၢင်းပႆသူၼၼ်ႉ၊သူဢမ်ႇလႆႈလီလႆႈပဵၼ်ၼႂ်းၵႃႈဢၼ်သူႁဵတ်းသူသၢင်ႈၼၼ်ႉ။ သူတၵ်းတေလႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသႄး၊တၵ်းလႆႈၶၢမ်ႇတၢင်းဢၼ်ႁိမ်ဢဝ်ႁူင်ႇဢဝ်ယူႇသေႇသေႇလႄႈ၊တၵ်းတေဢမ်ႇမီးၵေႃႉဢၼ်ၸွႆႈထႅမ်မႃႉၸႃႉသူသေၵေႃႉသေၵူၼ်းဢေႃႈ။
“သူမၢႆဝႆႉၵၼ်တင်းမႄႈယိင်းသေၵေႃႈပိူၼ်ႈတၵ်းႁဵတ်းဢထမ်ႇမႃႉတဵၵ်းၵၼ်ႉမၼ်းဢေႃႈ။ သူႁဵတ်းႁိူၼ်းဝႆႉသေၵေႃႈဢမ်ႇလႆႈယူႇ။ သူၽုၵ်ႇသူၼ်မၢၵ်ႇၸပိတ်ႉဝႆႉသေၵေႃႈဢမ်ႇလႆႈၵိၼ်မၢၵ်ႇမၼ်းဢေႃႈ။-
ဝူဝ်းသူလႆႈၶၢမ်ႇတၢင်းဢၼ်ပိူၼ်ႈႁႅမ်သိုဝ်ႈၼႃႈတႂ်ႈတႃသူသေၵေႃႈသူဢမ်ႇလႆႈၵိၼ်ၼိူဝ်ႉမၼ်း။ မႃႉလီႈသူၵေႃႈယၢမ်းမိူဝ်ႈဢၼ်လဵင်ႉလူယူႇၼၼ်ႉတၵ်းတေလႆႈၶၢမ်ႇတၢင်းဢၼ်ပိူၼ်ႈၸုင်ဢဝ်ၵႂႃႇလႄႈၵမ်းလိုၼ်းဢမ်ႇၸၢင်ႈလႆႈၶိုၼ်းသေပွၵ်ႈ။ သူဝ်းသူၼၼ်ႉတၵ်းတေလႆႈဢၢပ်ႈပၼ်ၼႂ်းမိုဝ်းရၢၼ်ႇသူႇသူသေလႄႈဢမ်ႇမီးၵေႃႉဢၼ်ၸွႆႈထႅမ်မႃႉၸႃႉသူသေၵေႃႉသေၵူၼ်းဢေႃႈ။-
လုၵ်ႈၸၢႆးလုၵ်ႈယိင်းသူတၵ်းတေလႆႈၶၢမ်ႇတၢင်းဢၼ်ဢၢပ်ႈပၼ်ႁႂ်ႈပဵၼ်ၶႃႈၵူၼ်းတၢင်ႇၸိူဝ်ႉတၢင်ႇၶိူဝ်းၵႂႃႇယၢမ်းမိူဝ်ႈဢၼ်သူလႆႈႁၼ်ယူႇၼၼ်ႉဢေႃႈ။ မၢၵ်ႇတႃသူတၵ်းၽိူမ်ၵႂႃႇမူဝ်းၵႂႃႇၵွပ်ႈလူၺ်ႈဢၼ်မုင်ႈတူၺ်းယူႇၵူႈဝၼ်းၵူႈဝၼ်း၊ပုၼ်ႈတႃႇၶဝ်တေပွၵ်ႈမႃးၼၼ်ႉသေၵေႃႈ တၵ်းပဵၼ်ဢၼ်လၢႆလၢႆၵူၺ်းဢေႃႈ။-
ၵူၼ်းမဵဝ်းဢၼ်သူဢမ်ႇႁုၸၵ်းမိုတ်ႈၵိုဝ်းၼၼ်ႉတၵ်းဢဝ်ၵိၼ်မၢၵ်ႇၶဝ်ႈႁူင်းၼမ်ႉဢၼ်သူႁဵတ်းယၢပ်ႇႁဵတ်းယဵၼ်းလႄႈလႆႈမႃးၼၼ်ႉယဝ်ႉ၊ယင်းဢမ်ႇလႆႈၵႃႈမၼ်းၶၼ်မၼ်းၵူၺ်းဢမ်ႇၵႃး၊ယင်းတေလႆႈၶၢမ်ႇတၢင်းဢၼ်တဵၵ်းငႅၼ်းတင်းတၢင်းဢၼ်ၶိုတ်ႈလႅဝ်ၼူတ်ႈလႅဝ်ယူႇတႃႇသေႇဢမ်ႇထၢတ်ႇဢေႃႈ။-
တုၵ်ႉၶႃႉတၢင်းၶၢၼ်ၸႂ်ၸိူဝ်းၼၼ်ႉတၵ်းႁႂ်ႈႁူဝ်ၸႂ်သူယွင်ႇမႃႈယူႇသေႇသေႇဢေႃႈ။-
ထႃႇဝရႃႉၽြႃး၊ တၵ်းဢဝ်တုမ်ႇၸဵပ်းတုမ်ႇၽီဢၼ်ယႃဢမ်ႇႁၢႆလႆႈၼၼ်ႉပၼ်တၢမ်ႇတီႈႁူဝ်ၶဝ်ႇသူတင်းတိၼ်သူၵူၺ်းဢမ်ႇၵႃး၊တၵ်းႁႂ်ႈပဵၼ်တီႈၸႃႉၸဵမ်ၸိၵ်းႁူဝ်တေႃႇပၢႆတိၼ်သူဢေႃႈ။
“ ထႃႇဝရႃႉၽြႃး၊ တၵ်းဢဝ်သူတင်းၶုၼ်ႁေႃၶမ်းသူၵႂႃႇၵႃႈတီႈမိူင်းဢၼ် သူတင်းပူႇမွၼ်ႇသူတင်းလၢႆဢမ်ႇတွၼ်ႉႁုၸၵ်းမိုတ်ႈၵိုဝ်းၼၼ်ႉသေလႄႈ၊ၵႃႈတီႈၼၼ်ႈသူတၵ်းတေလႆႈဝႆႈၽြႃးတင်းလၢႆဢၼ်ဢဝ်မႆႉဢဝ်မၢၵ်ႇႁိၼ်ႁဵတ်းဝႆႉၸိူဝ်းၼၼ်ႉဢေႃႈ။-
ၵႃႈၼႂ်းမိူင်းဢၼ် ထႃႇဝရႃႉၽြႃး၊ တၵ်းဢဝ်သူၵႂႃႇၸၢတ်ႇၽႄၽူင်ႉၽၢင်ႈယူႇၼၼ်ႉၵူၼ်းၵူႈၸိူဝ်ႉၵူႈၶိူဝ်းၼႂ်းမိူင်းၼၼ်ႉတၵ်းဢွၼ်ၵၼ်တူၵ်းၸႂ်လႂ်တိုၼ်ႇတီႈလွင်ႈတၢင်းဢၼ်ပဵၼ်မႃးတီႈသူၼၼ်ႉသေယဝ်ႉ၊ပိူၼ်ႈတၵ်းဢွၼ်ၵၼ်သႄႉသွမ်းသူဢေႃႈ။
“သူတၵ်းတေဝၢၼ်ႇၸိူဝ်ႉဝၢၼ်ႇၽၼ်းၼမ်ၼႃႇသေၵေႃႈတၵ်းတေလႆႈပၢတ်ႇဢဝ်ဢိတ်းဢွၼ်ႇၼိုင်ႈၵူၺ်း၊ၵွပ်ႈပိူဝ်ႈဢၼ်ၸၵ်းတႅၼ်လူင်ၶူပ်းၵိၼ်ၼၼ်ႉဢေႃႈ။-
သူတၵ်းတေၽုၵ်ႇတူၼ်ႈၶိူဝ်းမၢၵ်ႇၸပိတ်ႉၼမ်ၼႃႇလႄႈလုမ်းလႃးလီလီသေၵေႃႈဢမ်ႇလႆႈဝိတ်းၵိၼ်မၢၵ်ႇမၼ်း၊ဢမ်ႇလႆႈၵိၼ်ၼမ်ႉမၢၵ်ႇၸပိတ်ႉမၼ်း၊ၵွပ်ႈပိူဝ်ႈဢၼ်မူင်ႈၶူပ်းၵိၼ်ၼၼ်ႉဢေႃႈ။-
တူၼ်ႈမၢၵ်ႇသၢၼ်ႇလုၼ်ႇတၵ်းမီးၼမ်ၼႃႇၵူႈတီႈၵူႈလႅၼ်ၵႃႈၼႂ်းမိူင်းသူသေၵေႃႈ သူဢမ်ႇလႆႈၵိၼ်ၼမ်ႉမၼ်းမၢၵ်ႇသၢၼ်ႇလုၼ်ႇ၊ၵွပ်ႈပိူဝ်ႈဢၼ်မၢၵ်ႇမၼ်းဢမ်ႇတၼ်းသုၵ်းလႄႈႁူင်ႈတူၵ်းၼၼ်ႉဢေႃႈ။-
သူတၵ်းတေၵိူတ်ႇလဵင်ႉလုၵ်ႈၸၢႆးလုၵ်ႈယိင်းၼမ်ၼႃႇသေၵေႃႈဢမ်ႇလႆႈမူၼ်ႈလႆႈပျေႃႇလူၺ်ႈၵၼ်တင်းၶဝ်ၵွပ်ႈပိူဝ်ႈဢၼ်ၶဝ်လႆႈၶၢမ်ႇတူၵ်းၵႅၼ်းၼႂ်းမိုဝ်းရၢၼ်ႇသူႇၼၼ်ႉဢေႃႈ။-
ၸၵ်းတႅၼ်လူင်တၵ်းၶူပ်းတၵ်းယႃႉတူၼ်ႈမႆႉတူၼ်ႈတွၵ်ႇတူၼ်ႈမွၵ်ႇတူၼ်ႈမၢၵ်ႇၵႃႈမီးတင်းသဵင်ႈတင်းမူတ်းဢေႃႈ။
“ၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈယူႇၵႃႈၼႂ်းမိူင်းသူၼၼ်ႉတၵ်းၶိုၼ်ႈယႂ်ႇမႂ်ႇသုင်မႃးလႄႈသူၸမ်ႉ၊တၵ်းတႅမ်ႇယေႃႈၵႂႃႇဢေႃႈ။-
ၶဝ်ၼၼ်ႉတၵ်းမီးငိုၼ်းတႃႇတေၵူႈပၼ်ယိမ်ပၼ်တီႈသူလႄႈသူၸမ်ႉ၊တၵ်းဢမ်ႇမီးတႃႇတေၵူႈပၼ်ယိမ်ပၼ်တီႈၶဝ်လႃးလႃး။ တီႈသုတ်းမၼ်းၸိုင်၊ၶဝ်တၵ်းပဵၼ်ၶုၼ်ဢၼ်ဢုပ်ႉပိူင်ႇသူဢေႃႈ။
“ၽေးဢုပၢတ်ႈၸိူဝ်းၼႆႉတင်းသဵင်ႈတင်းလူင်တၵ်းတူၵ်းႁွတ်ႈၵႃႈၼိူဝ်သူလႄႈတၵ်းမီးယူႇတီႈသူတေႃႇထိုင်ႁွတ်ႈသူထၢၼ်ႈပေႃးလုလႅဝ်မူတ်း၊ၵွပ်ႈပိူဝ်ႈဢၼ်သူဢမ်ႇထွမ်ႇဢမ်ႇဢဝ်ၵႂၢမ်း ထႃႇဝရႃႉၽြႃး၊ ၽြႃးပဵၼ်ၸဝ်ႈသူ၊ဢမ်ႇပႂ်ႉၵမ်ပႂ်ႉၸွမ်းပိင်းၺၢပ်ႈၸဝ်ႈဢိၵ်ႇတင်းထုင်းတြႃးဢၼ်မၼ်းၸဝ်ႈသင်ႇလၢတ်ႈတီႈသူဝႆႉၸိူဝ်းၼၼ်ႉဢေႃႈ။-
ဢၼ်ၸိူဝ်းၼႆႉတၵ်းပဵၼ်သၢၵ်ႈသေႇထၢင်ႇထၢင်ႇသႃးသႃးလွင်ႈတၢင်းဢၼ်ၽြႃးပဵၼ်ၸဝ်ႈတၵ်းၸီႇယၢင်ႇတြႃးၼိူဝ်သူဢိၵ်ႇတင်းၸူဝ်ႈလုၵ်ႈပၢၼ်လၢၼ်သူတႃႇသေႇဢမ်ႇထၢတ်ႇၼၼ်ႉဢေႃႈ။-
ထႃႇဝရႃႉၽြႃး၊ ပၼ်တၢင်းလီမၢင်ႇၵလႃႇၼႂ်းလွင်ႈတၢင်းၵူႈၸိူဝ်ႉၵူႈပိူင်တီႈသူယဝ်ႉ။ ၵူၺ်းၵႃႈ၊သူဢမ်ႇပႃးတင်းၸႂ်ဢၼ်ၸူမ်းသိူဝ်းဢိၵ်ႇတင်းၸႂ်ဢၼ်မူၼ်ႈပျေႃႇသေလႄႈႁဵတ်းဝၢတ်ႈတီႈမၼ်းၸဝ်ႈလူင်ပႄႇ။-
ၵွပ်ႈၼႆလႄႈသူတၵ်းလႆႈႁဵတ်းဝၢတ်ႈတီႈရၢၼ်ႇသူႇဢၼ် ထႃႇဝရႃႉၽြႃး၊ ပွႆႇၸႂ်ႉမႃးတိုၵ်းတေႃးသူလူၺ်ႈတၢင်းဢၼ်တွင်ႉမႆႈသႆႈလိူတ်ႇ၊တၢင်းဢၼ်ယၢၵ်ႇၼမ်ႉ၊တၢင်းဢၼ်ယူႇတူဝ်ပူၺ်ဢိၵ်ႇတင်းတၢင်းဢၼ်ယၢၵ်ႈၽၢၼ်ၵူႈၸိူဝ်ႉၵူႈမဵဝ်းၼၼ်ႉလႄႈမၼ်းၸဝ်ႈတၵ်းဢဝ်ၵၢၼ်းလဵၵ်းတၢင်ႇသႂ်ႇဝႆႉၵႃႈၼိူဝ်ၶေႃးသူတေႃႇထိုင်ႁွတ်ႈမၼ်းၸဝ်ႈတၵ်းယႃႉၽဵဝ်ႈသူပႅတ်ႈၼၼ်ႉဢေႃႈ။-
ထႃႇဝရႃႉၽြႃး၊ တၵ်းဢဝ်ၵူၼ်းမဵဝ်းၼိုင်ႈဢၼ်လုၵ်ႉသေၵႃႈတီႈလႅၼ်လိၼ်သုတ်းၽၢႆႇၼိုင်ႈၼၼ်ႉ၊ဢၼ်ပဵၼ်ၵူၼ်းဢၼ်သူဢမ်ႇၸၢင်ႈႁုၵႂၢမ်းၶဝ်ၼၼ်ႉမႃးဢေႃႈ။ ၶဝ်တၵ်းလေႃႇလူင်းမႃးၸူးသူၶၼ်ၽႂ်းၼႃႇမိူၼ်ၸိူဝ်ႉၼင်ႇၼူၵ်ႉၶၢင်ႇလေႃႉလူင်းမႃးၼၼ်ႉဢေႃႈ။-
ၶဝ်မီးၸႂ်ဢၼ်ၵျၢမ်းၼႃႇ၊ဢမ်ႇၸၢင်ႈရူဝ်ႇသေႇၵူဝ်ယမ်ၵူၼ်းထဝ်ႈၵူၼ်းၵႄႇ၊ဢမ်ႇၸၢင်ႈဢဵတ်းလူၵူၼ်းၼုမ်ႇၵူၼ်းၵမ်ဢေႃႈ။-
ၶဝ်တၵ်းၵိၼ်တူဝ်တရိၵ်ႈသၢၼ်ႇသူ၊မၢၵ်ႇၶဝ်ႈႁူင်းၼမ်ႉသူတေႃႇထိုင်ႁွတ်ႈသူထၢၼ်ႈပေႃးဢိုပ်းတၢႆဢေႃႈ။ ၶဝ်တၵ်းဢမ်ႇဝႆႉၵိုတ်းဝႆႉၵျၢၼ်ႇၶဝ်ႈပိူၵ်ႇၶဝ်ႈသၢၼ်၊ၼမ်ႉမၢၵ်ႇၸပိတ်ႉ၊ၼမ်ႉမၼ်းမၢၵ်ႇသၢၼ်ႇလုၼ်ႇ၊ၽုင်သူဝ်းၽုင်ဝူဝ်း၊ၽုင်ပႄႉသူလႃးလႃး၊ႁႂ်ႈသူလုလႅဝ်ဢေႃႈ။-
ၶဝ်တၵ်းတိုၵ်းပႄႉဝဵင်းၵူႈဝဵင်းဝဵင်းဢၼ်မီးၵႃႈၼႂ်းမိူင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူပၼ်ႁႂ်ႈသူလႆႈပိူင်ႇၼၼ်ႉသေလႄႈလမ်းဝဵင်းဢၼ်သုင်ဢၼ်ၶိူင်ႇၶမ်ႉၸိူဝ်းဢၼ်သူဝႆႉၸႂ်တမ်းၸႂ်ၼၼ်ႉၶဝ်ႁႂ်ႈလူမ်ႉပင်းဢေႃႈ။
“မိူဝ်ႈဢၼ်ရၢၼ်ႇသူႇတင်းလၢႆၶျႃးတပ်ႉလွမ်ႉႁွပ်ႈဝဵင်းသူတင်းလၢႆယူႇၼၼ်ႉသူတၵ်းယၢၵ်ႈၽၢၼ်ၶၢၼ်ၸႂ်လူၺ်ႈလွင်ႈတၢင်းၵိၼ်တၢင်းၶူပ်းသူၼႃႇလူင်လၢင်တေႃႇထိုင်ႁွတ်ႈသူထၢၼ်ႈပေႃးလႆႈၵိၼ်ၼိူဝ်ႉလုၵ်ႈၸၢႆးလုၵ်ႈယိင်းသူဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူပၼ်တီႈသူၸိူဝ်းၼၼ်ႉဢေႃႈ။-
ပိၵ်ႉသမ်ႉၵူၼ်းဢၼ်ယဵၼ်ႇငႄႈလီၵႃႈၼႂ်းၸိူဝ်ႉယႂ်ႇၶိူဝ်းလူင်ယင်းတၵ်းယၢၵ်ႈၽၢၼ်ၶၢၼ်ၸႂ်လူၺ်ႈလွင်ႈတၢင်းၵိၼ်တၢင်းၶူပ်းၼႃႇလူင်လၢင်ၼႂ်းၶိင်ႇယၢမ်းဢၼ်ရၢၼ်ႇသူႇလွမ်ႉႁွပ်ႈဝႆႉၼၼ်ႉသေၵေႃႈဢမ်ႇၸၢင်ႈႁဵတ်းၸိူဝ်ႉၼင်ႇႁိုဝ်ဢဵတ်းလူပီႈၼွင်ႉမၼ်းဢိၵ်ႇတင်းမေးမၼ်းဢၼ်မီးယူႇၼႂ်းဝၢင်ႈႁူဝ်ဢူၵ်းမၼ်းဢိၵ်ႇတင်းလုၵ်ႈမၼ်းၸိူဝ်းဢၼ်ယင်းၵိုတ်းယင်းၵျၢၼ်ႇဝႆႉတီႈမၼ်းၼၼ်ႉယဝ်ႉ။-
တေႃႇထိုင်ႁွတ်ႈမၼ်းထၢၼ်ႈပေႃးဢမ်ႇမႅင်ႇပၼ်ၽႄပၼ်ၼိူဝ်ႉလုၵ်ႈမၼ်းလၢင်းမၼ်းဢၼ်မၼ်းၵိၼ်ယူႇၼၼ်ႉၵွပ်ႈပိူဝ်ႈတၢင်းၵိၼ်တၢင်းၶူပ်းဢမ်ႇၵိုတ်းဢမ်ႇၵျၢၼ်ႇတီႈမၼ်းလႃးလႃးၼၼ်ႉဢေႃႈ။-
ပိၵ်ႉသမ်ႉမႄႈယိင်းဢၼ်ယဵၼ်ႇငႄႈလီၵႃႈၼႂ်းၸိူဝ်ႉယႂ်ႇၶိူဝ်းလူင်၊မၢၵ်ႇမီးၼႃႇထၢၼ်ႈပေႃးဢမ်ႇႁတ်းယဵပ်ႇၼိူဝ်လိၼ်ၵွပ်ႈပိူဝ်ႈဢၼ်ၽႃႇတိၼ်မၼ်းဢူၼ်ႈဢွၼ်ႇလီၼၼ်ႉ၊ယင်းတၵ်းမီးၸႂ်မိူၼ်ၸိူဝ်ႉၼင်ႇၼၼ်ဢေႃႈ။ မိူဝ်ႈဢၼ်ရၢၼ်ႇသူႇလွမ်ႉႁွပ်ႈဝဵင်းမၼ်းယူႇၼၼ်ႉမၼ်းတၵ်းယၢၵ်ႈၽၢၼ်ၶၢၼ်ၸႂ်လူၺ်ႈလွင်ႈတၢင်းၵိၼ်တၢင်းၶူပ်းၼႃႇလူင်လၢင်သေလႄႈ၊ဢမ်ႇၸၢင်ႈဢဵတ်းလူၽူဝ်မၼ်းဢၼ်မီးယူႇၼႂ်းဝၢင်ႈႁူဝ်ဢူၵ်းမၼ်းတင်းလုၵ်ႈလၢင်းမၼ်းၼၼ်ႉယဝ်ႉ။-
တေႃႇထိုင်ႁွတ်ႈမၼ်းထၢၼ်ႈပေႃးဢမ်ႇမႅင်ႇပၼ်ၽႄပၼ်ႁႄႇဢၼ်ဢွၵ်ႇသေၵႃႈၼႂ်းဝၢင်ႈၶႃမၼ်းတင်းလုၵ်ႈဢွၼ်ႇမၼ်းဢၼ်ၸင်ႇၵိူတ်ႇလဵင်ႉမႃးၼၼ်ႉသေလႄႈလၵ်ႉလွမ်ၵိၼ်တဵတ်ႇတဵတ်ႇၵူၺ်းမၼ်းၵွပ်ႈပိူဝ်ႈတၢင်းၵိၼ်တၢင်းၶူပ်းဢမ်ႇၵိုတ်းဢမ်ႇၵျၢၼ်ႇတီႈမၼ်းလႃးလႃးၼၼ်ႉဢေႃႈ။
“ပေႃးသူယင်းဢမ်ႇပႃးတင်းသဵတ်ႈၸႃႇလႄႈပႂ်ႉၵမ်ပႂ်ႉၸွမ်းတြႃးၼႆႉၵူႈၸိူဝ်ႉၵူႈပိူင်ဢၼ်တႅမ်ႈဝႆႉၵႃႈၼႂ်းၵျၢမ်းလိၵ်ႈၼႆႉၼၼ်ႉ၊သမ်ႉယင်းဢမ်ႇရူဝ်ႇသေႇၵူဝ်ယမ်ၼႃႇမႃႉၸိုဝ်ႈသဵင်ဢၼ်မုၼ်ယႂ်ႇၼႃႇလႄႈလီဢၢမ်းၼႃႇဢၼ်ဝႃႈ၊ ထႃႇဝရႃႉၽြႃး၊ ၽြႃးပဵၼ်ၸဝ်ႈသူၼၼ်ႉၸိုင်၊-
မၼ်းၸဝ်ႈတၵ်းႁႂ်ႈသူဢိၵ်ႇတင်းလုၵ်ႈလၢၼ်ၸိူဝ်ႉၶိူဝ်းသူတင်းလၢႆလႆႈၶၢမ်ႇၽေးတၢင်းၶႆႈတၢင်းပဵၼ်ဢၼ်ယႃဢမ်ႇႁၢႆလႆႈဢိၵ်ႇတင်းၽေးဝူၺ်ႇတၼႃႇၵႃႇလႃႉႁႃႈလႅင်မိူင်းၼၼ်ႉပဵၼ်ယူႇၶိူဝ်းၶိူဝ်းတီႈသူဢေႃႈ။-
လိူဝ်သေၼၼ်ႉမၼ်းၸဝ်ႈတၵ်းႁႂ်ႈၽေးဢုပၢတ်ႈတၢင်းၶႆႈတၢင်းပဵၼ်ဢၼ်သူယၢမ်ႈႁၼ်တီႈမိူင်း ဢေးၵျိပ်ႉ၊ ၼၼ်ႉပဵၼ်တီႈသူလႄႈဢမ်ႇႁႂ်ႈႁၢႆသေပွၵ်ႈဢေႃႈ။-
လိူဝ်သေၼၼ်ႉမၼ်းၸဝ်ႈတၵ်းႁႂ်ႈၽေးဢုပၢတ်ႈတၢင်းၶႆႈတၢင်းပဵၼ်ၵူႈၸိူဝ်ႉၵူႈပိူင်ဢိၵ်ႇတင်းၽေးဝူၺ်ႇတၼႃႇၵႃႇလႃႉႁႃႈလႅင်မိူင်းဢၼ်ဢမ်ႇတႅမ်ႈသႂ်ႇဝႆႉၵႃႈၼႂ်းၵျၢမ်းပိင်းၺၢပ်ႈၼႆႉၵႃႈမီးၸိူဝ်းၼၼ်ႉတူၵ်းႁွတ်ႈၵႃႈၼိူဝ်သူတေႃႇႁွတ်ႈသူထၢၼ်ႈပေႃးလုလႅဝ်ဢေႃႈ။-
ပိၵ်ႉသမ်ႉသူၼမ်ၵိုၼ်းတၢၼ်ႇလၢဝ်ၵၢင်ႁၢဝ်သေၵေႃႈ တၵ်းပဵၼ်ဢၼ်ၵေႇၼႃႇၵွပ်ႈပိူဝ်ႈဢၼ်သူဢမ်ႇထွမ်ႇဢမ်ႇဢဝ်ၵႂၢမ်း ထႃႇဝရႃႉၽြႃး၊ ၽြႃးပဵၼ်ၸဝ်ႈသူၼၼ်ႉဢေႃႈ။-
မိူၼ်ၸိူဝ်ႉၼင်ႇဢၼ် ထႃႇဝရႃႉၽြႃး၊ ၸူမ်းသိူဝ်းၵႃႈၼႂ်းလွင်ႈတၢင်းဢၼ်ႁဵတ်းၵျေးၸူးတီႈသူႁႂ်ႈသူယႂ်ႇၽႄႈၼမ်ၵိုၼ်းၼၼ်ႉ၊မၼ်းၸဝ်ႈတၵ်းသမ်ႉၸူမ်းသိူဝ်းၵႃႈၼႂ်းလွင်ႈတၢင်းဢၼ်ယႃႉၽဵဝ်ႈသူပႅတ်ႈ ႁႂ်ႈဢၵျူဝ်းသူလုၼၼ်ႉသေလႄႈသူတၵ်းတေလႆႈႁွတ်ႈထိုင်တၢင်းဢၼ်ၸၵ်ႉဢွၵ်ႇသေၵႃႈၼႂ်းမိူင်းဢၼ်သူတၵ်းၵႂႃႇလႄႈၶဝ်ႈၸၢမ်ႇၸႃးၼၼ်ႉဢေႃႈ။
“ ထႃႇဝရႃႉၽြႃး၊ တၵ်းဢဝ်သူၸၢတ်ႇပိုၼ်ပႅတ်ႈၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းၸႃႉၸဵမ်လႅၼ်လိၼ်မိူင်းၽၢၵ်ႇၼိုင်ႈတေႃႇထိုင်ႁွတ်ႈတၢင်ႇၽၢႆႇၼၼ်ႉသေလႄႈသူတၵ်းတေလႆႈဝႆႈၽြႃးတင်းလၢႆဢၼ်ဝႃႈၽြႃးမႆႉ၊ၽြႃးမၢၵ်ႇႁိၼ်ၽြႃးဢၼ်ပူႇမွၼ်ႇသူဢမ်ႇတွၼ်ႉလႆႈဝႆႈသေပွၵ်ႈၼၼ်ႉဢေႃႈ။-
သူတၵ်းဢမ်ႇမီးတၢင်းဢၼ်သၢၵ်ႈသႃႇသေတီႈသေလႅၼ်၊ဢမ်ႇမီးတီႈဢၼ်သူပိူင်ႇ။ ထႃႇဝရႃႉၽြႃး၊ တၵ်းၸီႇယၢင်ႇပၼ်ၸႂ်ႁွၼ်ႉၸႂ်မႆႈ၊ၸႂ်ဢၼ်ဢမ်ႇမီးတီႈမုင်ႈမွင်း၊ဢိၵ်ႇတင်းတၢင်းဢၼ်ငိၼ်းၽၢၼ်ၶၢၼ်ၸႂ်ၸိူဝ်းၼၼ်ႉတီႈသူဢေႃႈ။-
ၼႂ်းဢသၢၵ်ႈတၢၼ်းသူၼၼ်ႉသူတၵ်းမီးၽေးရၢၼ်ႇဢၢၼ်ႇတရေႇယူႇသေႇသေႇလႄႈ၊တၵ်းမီးတၢင်းဢၼ်တူၵ်းၸႂ်လႂ်တိုၼ်ႇယူႇဝၼ်းဝၼ်းၶိုၼ်းၶိုၼ်း၊လႆႈၵူဝ်ၽေးတၢင်းတၢႆလႄႈယူႇယူႇဢေႃႈ။-
ႁူဝ်ၸႂ်သူမီးတၢင်းၵူဝ်ႁႄယူႇတီႈလွင်ႈတၢင်းဢၼ်မၢၵ်ႇတႃသူတူၺ်းႁၼ်ၼၼ်ႉသေလႄႈ၊မိူဝ်ႈၶိင်ႇၵၢင်ၼႂ်သူတၵ်းသူးတွင်းႁႂ်ႈဝၼ်းၶမ်ႈယူႇ၊ၶိင်ႇၵၢင်ၶမ်ႈသမ်ႉတၵ်းသူးတွင်းႁႂ်ႈႁွတ်ႈထိုင်ၶိင်ႇၵၢင်ၼႂ်ယူႇၵူႈၸဝ်ႉၼႂ်ဝၼ်းၶမ်ႈဢေႃႈ။-
ထႃႇဝရႃႉၽြႃး၊ တၵ်းဢဝ်တင်းႁိူဝ်းသၢင်းၽေႃးဢဝ်သူသူင်ႇၶိုၼ်းၵႂႃႇတီႈမိူင်း ဢေးၵျိပ်ႉ၊ ပိၵ်ႉသမ်ႉမၼ်းၸဝ်ႈဝႆႉၵတိဝႃႈ၊ဢမ်ႇႁႂ်ႈသူလႆႈၶိုၼ်ႈၵႂႃႇႁွတ်ႈထႅင်ႈသေပွၵ်ႈၼၼ်ႉဢေႃႈ။ ၵႃႈတီႈၼၼ်ႈသူတၵ်းၶတ်းၸႂ်ဢဝ်တူဝ်သူၶၢႆပၼ်တီႈရၢၼ်ႇသူႇသူႁႂ်ႈလႆႈႁဵတ်းၶႃႈၶဝ်သေၵေႃႈၽူႈလႂ်သေၵေႃႉသေၵူၼ်းတၵ်းဢမ်ႇမီးဢလူဝ်ႇၶႂ်ႈသိုဝ်ႉဢဝ်သူ၊” ဝႃႈၼင်ႇၼႆဢေႃႈ။
ဢၼ်ၸိူဝ်းၼႆႉၸမ်ႉ၊ပဵၼ်ၵႂၢမ်းပတိၺိၺ်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉတီႈ မူဝ်းသေႇ၊ ႁႂ်ႈမၼ်းႁဵတ်းလူၺ်ႈၵၼ်တင်းၵူၼ်းမဵဝ်း ဢိသရေး၊ တင်းလၢႆ ၵႃႈၼႂ်းမိူင်း မေႃႇၽႃႉ၊ ဢေႃႈ။ ၵႂၢမ်းပတိၺိၺ်ႇၸိူဝ်းၼႆႉ ထႃႇဝရႃႉၽြႃး၊ ထၢပ်ႈသႂ်ႇထႅင်ႈၵႃႈၼႂ်းပတိၺိၺ်ႇဢၼ်ႁဵတ်းဝႆႉၵႃႈတီႈလွႆ သိၼႃႉ၊ ၼၼ်ႉဢေႃႈ။
မူဝ်းသေႇ၊ ၸင်ႇႁွင်ႉဢဝ်ၵူၼ်းမဵဝ်း ဢိသရေး၊ တင်းသဵင်ႈတင်းလူင်သေလၢတ်ႈတီႈၶဝ်လႄႈဝႃႈ၊ “တူဝ်သူလႆႈႁၼ်ၵႃႈဢၼ် ထႃႇဝရႃႉၽြႃး၊ ႁဵတ်းတီႈၶုၼ်ႁေႃၶမ်းမိူင်း ဢေးၵျိပ်ႉ၊ တီႈမူးမၢတ်ႈၽွင်းမိူင်းမၼ်းတင်းလၢႆ၊ဢိၵ်ႇတင်းၵႃႈတီႈမိူင်းမၼ်းတင်းမိူင်းၼၼ်ႉယဝ်ႉ။-
သူလႆႈႁၼ်ၵႃႈဢၼ် ထႃႇဝရႃႉၽြႃး၊ ႁဵတ်းၼႄၽေးဢုပၢတ်ႈဢၼ်လီၵူဝ်လီႁႄလႂ်၊ၼိမိၵ်ႈလၢၵ်ႈၶၼႃႇလႂ်၊တၼ်းၶူဝ်းဢၼ်လၢၵ်ႇဢၼ်လၢႆးဢၼ်ယႂ်ႇၼႃႇလူင်လၢင်တင်းလၢႆၸိူဝ်းၼၼ်ႉမႃးယဝ်ႉ။-
ၼႂ်းဝႃႈၼၼ်သေၵေႃႈ၊ ထႃႇဝရႃႉၽြႃး၊ ယင်းဢမ်ႇပၼ်ႁႂ်ႈသူႁူပွင်ႇတႃလႅင်းလွင်ႈဢၼ်သူယၢမ်ႈထူပ်းၺႃးၼၼ်ႉတေႃႇထိုင်ႁွတ်ႈဝၼ်းမိူဝ်ႈၼႆႉယဝ်ႉ။-
သီႇသိပ်းပီမိူင်းၼႆႉ ထႃႇဝရႃႉၽြႃး၊ ဢဝ်သူင်ႇသူၵႂႃႇၵႃႈၼႂ်းထိူၼ်ႇလႅင်ႉလႄႈၶူဝ်းၼုင်ႈသူတင်းၶႅပ်းတိၼ်သူယင်းဢမ်ႇၵဝ်ႇဢမ်ႇမွင်ၵႂႃႇ။-
သူဢမ်ႇမီးၶဝ်ႈမုၼ်းတႃႇတေၵိၼ်၊ဢမ်ႇမီးၼမ်ႉမၢၵ်ႇၸပိတ်ႉ၊ဢမ်ႇမီးၼမ်ႉလဝ်ႈတႃႇတေသူတ်ႉ။ ၵူၺ်းၵႃႈ၊ ထႃႇဝရႃႉၽြႃး၊ ပၼ်ၵႃႈဢၼ်သူလူဝ်ႇၼၼ်ႉႁႂ်ႈသူလႆႈႁုၸၵ်းလွင်ႈဢၼ်မၼ်းၸဝ်ႈပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူၼၼ်ႉဢေႃႈ။-
မိူဝ်ႈဢၼ်ႁဝ်းႁွတ်ႈထိုင်မႃးၵႃႈတီႈၼႆႈၼၼ်ႉၶုၼ်ႁေႃၶမ်း သိႁုၼ်ႇ၊ မိူင်း ႁေႇသၽုၼ်ႇ၊ ဢိၵ်ႇတင်းၶုၼ်ႁေႃၶမ်း ဢေႃႇၶႃႉ၊ မိူင်း ပႃႇသၢၼ်ႇ၊ ၸိူဝ်းၼၼ်ႉဢွၼ်ၵၼ်ဢွၵ်ႇတိုၵ်းတေႃးႁဝ်းဢေႃႈ။ ၵူၺ်းၵႃႈ၊ႁဝ်းတိုၵ်းပႄႉၶဝ်သေယဝ်ႉ၊-
သိမ်းဢဝ်မိူင်းၶဝ်လႄႈၽႄမႅင်ႇပၼ်တီႈၵူၼ်းမဵဝ်း ရုပိၼ်ႇ၊ ၵူၼ်းမဵဝ်း ၵၢတ်ႉ၊ တင်းၵူၼ်းမဵဝ်း မၼႃႇသေႇ၊ ၶဝ်ၶိုင်ႈၼိုင်ႈယဝ်ႉ။-
ပိူဝ်ႈၼႆလႄႈဢွၼ်ၵၼ်ပႂ်ႉၸွမ်းၵႂၢမ်းပတိၺိၺ်ႇၼႆႉသေလႄႈၵမ်ၵျၢင်ႉႁႂ်ႈလႆႈလီလႆႈပဵၼ်ၵႃႈၼႂ်းၵႃႈဢၼ်သူႁဵတ်းၼၼ်ႉတႃႉ။
“ဝၼ်းမိူဝ်ႈၼႆႉသူၵႃႈမီးတင်းသဵင်ႈတင်းလူင်ၸႃႉၸဵမ်ၵူၼ်းဢၼ်ပဵၼ်ၵႄႇပဵၼ်ႁူဝ်သူလႂ်၊မူးမၢတ်ႈၽွင်းမိူင်းသူလႂ်၊ၵူၼ်းၸၢႆးမဵဝ်း ဢိသရေး၊ ၵႃႈမီး၊-
ဢိၵ်ႇတင်းမေးသူ၊လုၵ်ႈလၢင်းသူဢိၵ်ႇတင်းၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈယူႇလူၺ်ႈၵၼ်တင်းသူ၊ၸႃႉဢဝ်ၵေႃႉဢၼ်ၽၼ်းၽိုၼ်းတင်းၵေႃႉဢၼ်တဵၵ်းၼမ်ႉပုၼ်ႈသူၼၼ်ႉဢွၼ်ၵၼ်ၸုၵ်းၵႃႈတီႈၽၢႆႇၼႃႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူယူႇယဝ်ႉ။-
သူဢွၼ်ၵၼ်မီးယူႇၵႃႈတီႈၼႆႈႁႂ်ႈလႆႈၶဝ်ႈပႃးၼႂ်းပတိၺိၺ်ႇၸဝ်ႈဢိၵ်ႇတင်းၵတိသဵတ်ႈၸႃႇဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူႁဵတ်းလူၺ်ႈၵၼ်တင်းသူဝၼ်းမိူဝ်ႈၼႆႉယဝ်ႉ။-
ၼင်ႇၼၼ်လႄႈ ထႃႇဝရႃႉၽြႃး၊ တၵ်းဢဝ်သူမၵ်းမၼ်ႈဝႆႉၵႃႈၼႂ်းဢရႃႇမဵဝ်းၵူၼ်းမၼ်းၸဝ်ႈဢိၵ်ႇတင်းမၼ်းၸဝ်ႈတၵ်းပဵၼ်ၽြႃးပဵၼ်ၸဝ်ႈသူၸွမ်းၵႃႈၼင်ႇဢၼ်မၼ်းၸဝ်ႈဝႆႉၵတိတီႈသူမႃးယဝ်ႉၼၼ်ႉ၊ဢၼ်တိူင်ႇဝႃႈဝႆႉတီႈပူႇမွၼ်ႇသူ ဢႃႇပြႃႇႁၢမ်ႇ၊ဢိၸၢၵ်ႈ၊ယႃႇၵုပ်ႈ၊ ၸိူဝ်းၼၼ်ႉဢေႃႈ။-
လိူဝ်သေၼၼ်ႉ၊ ထႃႇဝရႃႉၽြႃး၊ ႁဵတ်းပတိၺိၺ်ႇသဵတ်ႈၸႃႇၼႆႉလူၺ်ႈၵၼ်တင်းသူၵူၺ်းဢမ်ႇၵႃး၊-
မၼ်းၸဝ်ႈႁဵတ်းပတိၺိၺ်ႇသဵတ်ႈၸႃႇလူၺ်ႈၵၼ်တင်းႁဝ်းၸိူဝ်းဢၼ်ၸုၵ်းယူႇၵႃႈတီႈၼႆႈၵႃႈတီႈၽၢႆႇၼႃႈ ထႃႇဝရႃႉၽြႃး၊ ႁဝ်းဝၼ်းမိူဝ်ႈၼႆႉလူၺ်ႈၵၼ်တင်းလုၵ်ႈလၢၼ်ၸိူဝ်ႉၶိူဝ်းႁဝ်းဢၼ်ယင်းဢမ်ႇပႆႇၵိူတ်ႇလဵင်ႉမႃးၼၼ်ႉဢေႃႈ။
“သူၶႆႈၸႂ်ထူပ်းဢသၢၵ်ႈတၢၼ်းႁဝ်းဢၼ်ယူႇၼႂ်းမိူင်း ဢေးၵျိပ်ႉ၊ ဢိၵ်ႇတင်းတၢင်းဢၼ်ႁဝ်းၸွမ်းတၢင်းၽႃႇလတ်းၵႃႈၼႂ်းၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းတင်းလၢႆဢၼ်ႁဝ်းပႆပူၼ်ႉမႃးယဝ်ႉၼၼ်ႉယူႇဢေႃႈ။-
သူလႆႈႁၼ်ၶိူင်ႈပိူင်ဢၼ်လီႁင်ႈဢဵတ်ႇသဵတ်ႇၶဝ်ဢၼ်ဝႃႈ၊ႁုၼ်ႇႁၢင်ႈသၢင်းထုဢၼ်ဢဝ်မႆႉႁဵတ်း၊ဢဝ်မၢၵ်ႇႁိၼ်ႁဵတ်း၊ဢဝ်ငိုၼ်းႁဵတ်း၊ဢဝ်ၶမ်းႁဵတ်းၸိူဝ်းၼၼ်ႉမႃးယဝ်ႉ။-
လွင်ႈၼင်ႇႁိုဝ်ၵူၼ်းဢၼ်ၸုၵ်းယူႇၵႃႈတီႈၼႆႈဝၼ်းမိူဝ်ႈၼႆႉၼၼ်ႉၸဵမ်ၵူၼ်းၸၢႆး၊ၽူႈယိင်း၊ၵူၼ်းႁိူၼ်းၵူၼ်းယေး၊ဢမ်ႇၼၼ်ၸိူဝ်ႉၶိူဝ်းသူသေၵေႃႉသေၵူၼ်းတၵ်းဢမ်ႇၸုၼ်ႉပႅတ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူသေလႄႈၵႂႃႇဝႆႈၽြႃးတင်းလၢႆဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်းၶဝ်ၵူဝ်းၵႂၢႆႇၼၼ်ႉၸိုင်၊ဝႆႉသတိတႃႉ။ ၵူဝ်မၼ်းပဵၼ်ႁၢၵ်ႈတူၼ်ႈဢၼ်ၸၢင်ႈမၢၵ်ႇမၢၵ်ႇဢၼ်ၶူမ်ၼႃႇဢိၵ်ႇတင်းမၢၵ်ႇဢၼ်မီးၵွင်ႉၼၼ်ႉဢေႃႈ။-
လွင်ႈၼင်ႇႁိုဝ်သူၸိူဝ်းဢၼ်မီးယူႇၵႃႈတီႈၼႆႈလႄႈလႆႈငိၼ်းၵႂၢမ်းဢၼ်တိူင်ႇဝႃႈဝႆႉဝၼ်းမိူဝ်ႈၼႆႉ၊တၵ်းဢမ်ႇယုမ်ႇယမ်တမ်းၸႂ်လွင်ႈဢၼ်တူဝ်သူတၵ်းလႆႈလီလႆႈပဵၼ်ၼၼ်ႉ၊ပိၵ်ႉသမ်ႉႁူဝ်ၸႂ်သူတိုဝ်တၼ်ၼႃႇလႄႈလွင်ႈၵႂႃႇၸွမ်းၵႂႃႇၵႃႈၼႂ်းဢလူဝ်ႇၵၢင်ၸႂ်တူဝ်ၸဝ်ႈၵဝ်ႇၼၼ်ႉဝႆႉသတိတႃႉ။ ဢၼ်ၸိူဝ်းၼႆႉတၵ်းႁႂ်ႈသူလုလႅဝ်ၵႂႃႇၸဵမ်ဢၼ်လီဢၼ်ၸႃႉမိူၼ်မိူၼ်ၵၼ်ဢေႃႈ။-
ထႃႇဝရႃႉၽြႃး၊ တၵ်းဢမ်ႇပွႆႇလွတ်ႈဢပျတ်ႈတီႈၵေႃႉၸိူဝ်ႉၼင်ႇၼၼ်ၼၼ်ႉၵူၺ်းဢမ်ႇၵႃး၊ယင်းတၵ်းဢဝ်တၢင်းဢၼ်ၸႂ်မႆႈၶႂ်ႈၸႃႉ ထႃႇဝရႃႉၽြႃး၊ ဢၼ်မႆႈႁွၼ်ႉၼႃႇၼၼ်ႉႁုပ်ႇမႆႈပႅတ်ႈမၼ်း၊ဢိၵ်ႇတင်းႁႂ်ႈဢႃႉမၢင်ႇၵလႃႇဢၼ်တႅမ်ႈဝႆႉၵႃႈၼႂ်းၵျၢမ်းလိၵ်ႈၼႆႉတင်းသဵင်ႈတင်းလူင်တူၵ်းႁွတ်ႈၵႃႈၼိူဝ်မၼ်းတေႃႇထိုင်ႁွတ်ႈမၼ်းထၢၼ်ႈပေႃးလုလႅဝ်ၵႂႃႇလုမ်းလုမ်းၼၼ်ႉဢေႃႈ။-
ထႃႇဝရႃႉၽြႃး၊ တၵ်းႁႂ်ႈမၼ်းပဵၼ်ပုင်ႇတႅၵ်ႈၵႃႈတီႈၽၢႆႇၼႃႈၸိူဝ်ႉၶိူဝ်းၵူၼ်းမဵဝ်း ဢိသရေး၊ တင်းသဵင်ႈတင်းလူင်သေလႄႈဝႆႉပုၼ်ႈဢၼ်တၵ်းပၼ်တၢမ်ႇဢပျတ်ႈၸွမ်းၼင်ႇၵႂၢမ်းဢႃႉမၢင်ႇၵလႃႇၼႂ်းပတိၺိၺ်ႇဢၼ်တႅမ်ႈသႂ်ႇဝႆႉၵႃႈၼႂ်းၵျၢမ်းပိင်းၺၢပ်ႈၼႆႉၸိူဝ်းၼၼ်ႉဢေႃႈ။
“လုၵ်ႈလၢၼ်သူဢၼ်တၵ်းသိုပ်ႇပဵၼ်မႃးလိုၼ်းသူဢိၵ်ႇတင်းၵူၼ်းတၢင်ႇၸိူဝ်ႉတၢင်ႇမဵဝ်းဢၼ်လုၵ်ႉသေၵႃႈတီႈမိူင်းၵႆမႃးၼၼ်ႉၸိူဝ်းၼၼ်ႉတၵ်းဢွၼ်ၵၼ်ႁၼ်လႄႈတွင်ႈထၢမ်လွင်ႈဢႃႉမၢင်ႇၵလႃႇတင်းၽေးဢုပၢတ်ႈဢၼ် ထႃႇဝရႃႉၽြႃး၊ ႁႂ်ႈတူၵ်းႁွတ်ႈၵႃႈၼိူဝ်မိူင်းသူၼၼ်ႉဢေႃႈ။-
လွင်ႈမၼ်းၸမ်ႉ၊လွၵ်းႁႆႈတိူၵ်ႇၼႃးတင်းလၢႆတၵ်းပဵၼ်ၵၢၼ်ႉတင်းၵိူဝ်ၵူၺ်းၵူၺ်းလႄႈႁၢမ်းဝႆႉ၊ဢမ်ႇၸၢင်ႈၽုၵ်ႇၸၢင်ႈသွမ်ႈ၊ယိူဝ်ႈယႃႈယင်းဢမ်ႇဢွၵ်ႇလႆႈဢေႃႈ။ မိူင်းသူၼၼ်ႉတၵ်းပဵၼ်ၸိူဝ်ႉၼင်ႇတၢင်းဢၼ်ၵိူၼ်ႇပင်းလုလႅဝ်မိူၼ်ဝဵင်း သေႃးတုမ်ႇ၊ ဝဵင်း ၵေႃးမေႃးရႃႉ၊ ဝဵင်း ဢႃႇတမႃႇ၊ ဝဵင်း ၸေႇပူဝ်းဢိမ်း၊ ဢၼ် ထႃႇဝရႃႉၽြႃး၊ ပႃးၸႂ်မႆႈၶႂ်ႈၸႃႉသေလႄႈၶွမ်ႈပိၼ်ႈပႅတ်ႈၼၼ်ႉဢေႃႈ။-
မိူဝ်ႈၼၼ်ႉၵူၼ်းမိူင်းတင်းမိူင်းတၵ်းဢွၼ်ၵၼ်တွင်ႈထၢမ်လႄႈဝႃႈ၊ ‘ၵွပ်ႈသင်လႄႈ ထႃႇဝရႃႉၽြႃး၊ ႁဵတ်းၸိူဝ်ႉၼင်ႇၼႆ။ ၵွပ်ႈပိူဝ်ႈလွင်ႈတၢင်းၸိူဝ်ႉၼင်ႇႁိုဝ်လႄႈမၼ်းၸဝ်ႈၸႂ်မႆႈၶႂ်ႈၸႃႉၶဝ်ထၢၼ်ႇၼႆႉၼင်ႇႁိုဝ်၊’ ဝႃႈၼႆဢေႃႈ။-
ပိူၼ်ႈတၵ်းၶိုၼ်းလၢတ်ႈလႄႈဝႃႈ၊ ‘ပဵၼ်ၵွပ်ႈပိူဝ်ႈဢၼ်ၵူၼ်း ထႃႇဝရႃႉၽြႃး၊ ၸိူဝ်းၼၼ်ႉပူၼ်ႉလိူဝ်ပတိၺိၺ်ႇဢၼ်ၶဝ်ႁဵတ်းလူၺ်ႈၵၼ်တင်း ထႃႇဝရႃႉၽြႃး၊ ဢၼ်ဝႃႈ၊ၽြႃးပဵၼ်ၸဝ်ႈပူႇမွၼ်ႇၶဝ်ၼႂ်းမိူဝ်ႈဢၼ်မၼ်းၸဝ်ႈၼုၵ်ႈဢဝ်ၶဝ်ဢွၵ်ႇမိူင်း ဢေးၵျိပ်ႉ၊ မႃးၼၼ်ႉဢေႃႈ။-
ၶဝ်သမ်ႉႁဵတ်းဝၢတ်ႈတီႈၽြႃးတင်းလၢႆဢၼ်ၶဝ်ဢမ်ႇတွၼ်ႉဝႆႈသေပွၵ်ႈ၊ၽြႃးၸိူဝ်းဢၼ် ထႃႇဝရႃႉၽြႃး၊ ဢမ်ႇပၼ်ႁႂ်ႈၶဝ်ဝႆႈၼၼ်ႉဢေႃႈ။-
ပိူဝ်ႈၼႆၸင်ႇ ထႃႇဝရႃႉၽြႃး၊ ဢွၵ်ႇတေႃးသႃႉသေလႄႈ ႁႂ်ႈဢႃႉမၢင်ႇၵလႃႇၸိူဝ်းဢၼ်တႅမ်ႈဝႆႉၵႃႈၼႂ်းၵျၢမ်းလိၵ်ႈၼၼ်ႉတူၵ်းႁွတ်ႈၵႃႈၼိူဝ်ၶဝ်ဢေႃႈ။-
ထႃႇဝရႃႉၽြႃး၊ ဢွၵ်ႇတေႃးသႃႉႁႅင်းၼႃႇပႃးတင်းၸႂ်မႆႈၸႂ်လိူတ်ႇဢၼ်ႁၢဝ်ႈၵျၢမ်းၼႃႇလႄႈထူၺ်ႈပႅတ်ႈၸႃႉၸဵမ်ငဝ်ႈၸဵမ်ႁၢၵ်ႈၶဝ်ဢွၵ်ႇသေၵႃႈၼႂ်းမိူင်းၶဝ်သေယဝ်ႉ၊ဢဝ်ၶဝ်ထိမ်ႈပႅတ်ႈၵႃႈၼႂ်းမိူင်းတၢင်ႇတီႈတၢင်ႇလႅၼ်ၸိူဝ်ႉၼင်ႇဢၼ်ၶဝ်ပဵၼ်ယူႇဝၼ်းမိူဝ်ႈၼႆႉၼၼ်ႉယဝ်ႉ၊’ ဝႃႈၼင်ႇၼႆဢေႃႈ။
“ယင်းမီးလွင်ႈတၢင်းၵမ်ႈၽွင်ႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းသိူင်ႇဝႆႉလပ်ႉဝႆႉၼၼ်ႉဢေႃႈ။ ၼႂ်းဝႃႈၼၼ်သေၵေႃႈမၼ်းၸဝ်ႈၽုၺ်ႇဢွၵ်ႇၼႄပျႃးပိင်းၺၢပ်ႈတြႃးမၼ်းၸဝ်ႈဝႆႉပုၼ်ႈတႃႇႁဝ်းဢိၵ်ႇတင်းလုၵ်ႈလၢၼ်ၸိူဝ်ႉၶိူဝ်းႁဝ်းတၵ်းဢွၼ်ၵၼ်ပႂ်ႉၵမ်ပႂ်ႉၸွမ်းယူႇတႃႇသေႇဢမ်ႇထၢတ်ႇၼၼ်ႉဢေႃႈ။
“တေႃႈလဵဝ်ၸိုင်၊ၵဝ်ပၼ်ဢၶႂၢင်ႉတၢင်းဢၼ်သူတၵ်းလိူၵ်ႈဢဝ်ၼႂ်းလွင်ႈတၢင်းလီမၢင်ႇၵလႃႇဢိၵ်ႇတင်းဢႃႉမၢင်ႇၵလႃႇဢၼ်ၵိၼ်ႇဝႃႈသွင်မဵဝ်းၼႆႉဢေႃႈ။ ၼႂ်းမိူဝ်ႈဢၼ်လွင်ႈတၢင်းၸိူဝ်းၼႆႉပဵၼ်မႃးတီႈသူ၊ဢိၵ်ႇတင်းသူလႆႈမီးယူႇၵႃႈၼႂ်းမဵဝ်းၵူၼ်းတၢင်ႇၸိူဝ်ႉတၢင်ႇၶိူဝ်းတီႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢဝ်သူၸၢတ်ႇပိုၼ်ၽၢတ်ႇၽႄယူႇဝႆႉၼၼ်ႉၸိုင်၊သူတၵ်းဢွၼ်ၵၼ်ၶုၵ်းၸႂ်လႆႈဢၶႂၢင်ႉတၢင်းဢၼ်ၵဝ်ႁႂ်ႈသူလိူၵ်ႈဢဝ်ၼၼ်ႉဢေႃႈ။-
ပေႃးသူဢိၵ်ႇတင်းလုၵ်ႈလၢၼ်ၸိူဝ်ႉၶိူဝ်းသူၶိုၼ်းပိၼ်ႇၸႂ်ၸူးတီႈ ထႃႇဝရႃႉၽြႃး၊ သေလႄႈပႃးတင်းႁူဝ်ၸႂ်သဵင်ႈသဵင်ႈထွမ်ႇဢဝ်ၵႂၢမ်းမၼ်းၸဝ်ႈဢၼ်ၵဝ်သင်ႇလၢတ်ႈဝႆႉတီႈသူဝၼ်းမိူဝ်ႈၼႆႉယဝ်ႉၼၼ်ႉၸိုင်၊-
ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းဢဵတ်းလူသူဢေႃႈ။ မၼ်းၸဝ်ႈတၵ်းၶိုၼ်းသိမ်းဢဝ်သူသေၵႃႈၼႂ်းမဵဝ်းၵူၼ်းတၢင်ႇၸိူဝ်ႉတၢင်ႇၶိူဝ်းတီႈဢၼ်မၼ်းၸဝ်ႈဢဝ်သူၸၢတ်ႇပိုၼ်ၽၢတ်ႇၽႄယူႇဝႆႉၼၼ်ႉသေယဝ်ႉ၊တၵ်းႁဵတ်းႁႂ်ႈသူၶိုၼ်ႈယႂ်ႇမႂ်ႇသုင်မႃးၶိုၼ်းဢေႃႈ။-
ပိၵ်ႉသမ်ႉသူလႆႈၶၢမ်ႇတၢင်းဢၼ်ၸၢတ်ႇပိုၼ်တူၵ်းတီႈၸွၵ်ႉတီႈၸဵင်ႇလႅၼ်လိၼ်မိူင်းဢၼ်ယၢၼ်ၵႆၼႃႇၼၼ်ႉသေၵေႃႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းၶိုၼ်းသိမ်းဢဝ်သူမႃးၸုတုမ်ၵၼ်ထႅင်ႈဢေႃႈ။-
ၼင်ႇၼၼ်လႄႈသူတၵ်းလႆႈဢၶႂၢင်ႉဢၼ်ၶိုၼ်းၶဝ်ႈၸၢမ်ႇၸႃးၵႃႈၼႂ်းမိူင်းဢၼ်ပူႇမွၼ်ႇသူၸၢမ်ႇၸႃးၵႂႃႇၼၼ်ႉဢေႃႈ။ ၼင်ႇၼၼ်လႄႈသူတၵ်းတေယဵင်ႈၶႅၼ်းၶိုၼ်ႈယႂ်ႇမႂ်ႇသုင်လႄႈၼမ်ၵိုၼ်းမႃးလိူဝ်တွၼ်းၼႃႇသေပူႇသူမွၼ်ႇသူၼၼ်ႉဢေႃႈ။-
ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းပၼ်ႁူဝ်ၸႂ်ဢၼ်ၸၢင်ႈထွမ်ႇသူပ်းဢဝ်ၵႂၢမ်းၼၼ်ႉတီႈသူ၊ဢိၵ်ႇတင်းၸူဝ်ႈလုၵ်ႈပၢၼ်လၢၼ်သူႁႂ်ႈလႆႈႁၵ်ႉမၼ်းၸဝ်ႈလူၺ်ႈႁူဝ်ၸႂ်သဵင်ႈသဵင်ႈသေယဝ်ႉ၊ႁႂ်ႈသူလႆႈဢသၢၵ်ႈလိပ်းယူႇၼႂ်းမိူင်းၼၼ်ႉဢေႃႈ။-
မၼ်းၸဝ်ႈတၵ်းပိၼ်ႇဢႃႉမၢင်ႇၵလႃႇဢၼ်ၵိၼ်ႇဢၼ်ဝႃႈၵႃႈမီးၸိူဝ်းၼႆႉႁႂ်ႈတူၵ်းႁွတ်ႈၵႃႈၼိူဝ်ရၢၼ်ႇသူႇသူၸိူဝ်းဢၼ်ၸင်းသူလႄႈတဵၵ်းငႅၼ်းသူၼၼ်ႉဢေႃႈ။-
ၵမ်းၼၼ်ႉ၊သူတၵ်းၶိုၼ်းထွမ်ႇဢဝ်ၵႂၢမ်းမၼ်းၸဝ်ႈသေလႄႈပႂ်ႉၵမ်ၵျၢင်ႉၸွမ်းပိင်းၺၢပ်ႈၸဝ်ႈၵႃႈဢၼ်ၵဝ်သင်ႇလၢတ်ႈတီႈသူဝႆႉၼႂ်းဝၼ်းမိူဝ်ႈၼႆႉၼၼ်ႉဢေႃႈ။-
ထႃႇဝရႃႉၽြႃး၊ တၵ်းႁႂ်ႈသူၶိုၼ်ႈယႂ်ႇမႂ်ႇသုင်ၼႂ်းတၢင်းဢၼ်ဢဝ်မိုဝ်းသူႁဵတ်းၼၼ်ႉသေယဝ်ႉ၊သူတၵ်းၵိူတ်ႇလဵင်ႉလုၵ်ႈလၢင်းၼမ်ၵိုၼ်းၼႃႇ၊ၽုင်သူဝ်းၽုင်ဝူဝ်းသူတၵ်းယႂ်ႇၽႄႈၼမ်ၵိုၼ်းၼႃႇလႄႈႁႆႈၼႃးသူတၵ်းဢွၵ်ႇမၢၵ်ႇၶဝ်ႈႁူင်းၼမ်ႉၼမ်ၼႃႇဢေႃႈ။ မၼ်းၸဝ်ႈတၵ်းမီးၸႂ်ဢၼ်ၸူမ်းသိူဝ်းၼႂ်းမိူဝ်ႈဢၼ်သူၶိုၼ်းယႂ်ႇမႂ်ႇသုင်ၼၼ်ႉမိူၼ်ၸိူဝ်ႉၼင်ႇဢၼ်မၼ်းၸဝ်ႈၸူမ်းသိူဝ်းမိူဝ်ႈဢၼ်ပူႇမွၼ်ႇသူၶိုၼ်းယႂ်ႇမႂ်ႇသုင်ၼၼ်ႉဢေႃႈ။-
ၵူၺ်းၵႃႈ၊သူတၵ်းလႆႈထွမ်ႇဢဝ်ၵႂၢမ်းမၼ်းၸဝ်ႈလႄႈပႂ်ႉၵမ်ပႂ်ႉၸွမ်းပိင်းၺၢပ်ႈတြႃးဢၼ်တႅမ်ႈသႂ်ႇဝႆႉၵႃႈၼႂ်းၵျၢမ်းပိင်းၺၢပ်ႈၼႆႉၸိူဝ်းၼၼ်ႉဢေႃႈ။ သူတၵ်းလႆႈပႃးၸႂ်ပႃးၶေႃးပိၼ်ႇၸႂ်ၶိုၼ်းၸူးတီႈမၼ်းၸဝ်ႈဢေႃႈ။
“ပိင်းၺၢပ်ႈၸဝ်ႈဢၼ်ၵဝ်သင်ႇလၢတ်ႈဝႆႉတီႈသူဝၼ်းမိူဝ်ႈၼႆႉၼၼ်ႉပဵၼ်တြႃးဢၼ်ယၢပ်ႇၼႃႇပုၼ်ႈသူဢမ်ႇၸႂ်ႈ။ ပဵၼ်တြႃးဢၼ်သူဢမ်ႇၶိုတ်းထိုင်လႆႈၵေႃႈဢမ်ႇၸႂ်ႈ။-
ပဵၼ်တြႃးဢၼ်မီးသုင်ၼႃႇၵႃႈၼႂ်းၽႃႉၵၢင်ႁၢဝ်ၼၼ်ႉၵေႃႈဢမ်ႇၸႂ်ႈ။ သူဢမ်ႇလူဝ်ႇတွင်ႈထၢမ်လႄႈဝႃႈ၊ ‘ၽူႈလႂ်တၵ်းၶိုၼ်ႈၵၢင်ႁၢဝ်ၵႂႃႇလႄႈဢဝ်တြႃးၼၼ်ႉလူင်းမႃးပၼ်ႁႂ်ႈႁဝ်းလႆႈထွမ်ႇဢဝ်လႄႈပႂ်ႉၵမ်ၵျၢင်ႉၸွမ်း၊’ ဝႃႈၼင်ႇၼႆၼၼ်ႉ။-
တြႃးၼၼ်ႉမီးၽၢႆႇပုၼ်ႉပၢင်ႇလၢႆႇဢမ်ႇၸႂ်ႈ။ သူဢမ်ႇလူဝ်ႇတွင်ႈထၢမ်လႄႈဝႃႈ၊ ‘ၽူႈလႂ်တၵ်းၶၢမ်ႈပၢင်ႇလၢႆႇၵႂႃႇလႄႈဢဝ်တြႃးၼၼ်ႉမႃးပၼ်ႁႂ်ႈႁဝ်းလႆႈထွမ်ႇဢဝ်လႄႈပႂ်ႉၵမ်ၵျၢင်ႉၸွမ်း၊’ ဝႃႈၼင်ႇၼႆၼၼ်ႉ။-
တြႃးၸဝ်ႈၼၼ်ႉမီးၸမ်ႁိမ်းသူၼႃႇလူင်လၢင်ဢေႃႈ။ သူႁုၸႅင်ႈလႄႈၽတ်းဢၢၼ်ႇလႆႈယူႇၵူၺ်းဢေႃႈ။ ဢွၼ်ၵၼ်ထွမ်ႇဢဝ်လႄႈပႂ်ႉၵမ်ပႂ်ႉၸွမ်းတႃႉ။
“တေႃႈလဵဝ်ၸိုင်၊ၵဝ်ပၼ်ဢၶႂၢင်ႉတၢင်းဢၼ်သူတၵ်းလိူၵ်ႈဢဝ်ၼႂ်းလွင်ႈလီလွင်ႈၸႃႉ၊ဢိၵ်ႇတင်းၼႂ်းလွင်ႈတၢင်းဢၼ်ဢသၢၵ်ႈလိပ်းတင်းလွင်ႈတၢင်းတၢႆဝႆႉယဝ်ႉ။-
ပေႃးသူပႂ်ႉၵမ်ၵျၢင်ႉၸွမ်းပိင်းၺၢပ်ႈၸဝ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူၸိူဝ်းဢၼ်ၵဝ်သင်ႇလၢတ်ႈသူဝႆႉဝၼ်းမိူဝ်ႈၼႆႉၼၼ်ႉ၊ပေႃးသူႁၵ်ႉမၼ်းၸဝ်ႈ၊ထွမ်ႇဢဝ်ၵႂၢမ်းမၼ်းၸဝ်ႈ၊ပႂ်ႉၵမ်ၵျၢင်ႉၸွမ်းပိင်းၺၢပ်ႈတြႃးမၼ်းၸဝ်ႈၸိူဝ်းၼၼ်ႉၸိုင်၊သူတၵ်းပဵၼ်မဵဝ်းၵူၼ်းဢၼ်ၶိုၼ်ႈယႂ်ႇမႂ်ႇသုင်ၼႂ်းၵူၼ်းတင်းလၢႆဢေႃႈ။ ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းပၼ်တၢင်းလီမၢင်ႇၵလႃႇတီႈသူၵႃႈၼႂ်းမိူင်းဢၼ်သူတေလႆႈၶဝ်ႈပိူင်ႇၸၢမ်ႇၸႃးၼၼ်ႉဢေႃႈ။-
ပေႃးဢမ်ႇၼၼ်၊ပေႃးႁူဝ်ၸႂ်သူပိူင်ႈၵႂႃႇသေလႄႈသူဢမ်ႇထွမ်ႇဢမ်ႇဢဝ်ၵူၺ်းဢမ်ႇၵႃး၊ယင်းၸွမ်းတၢင်းဢၼ်ပိူၼ်ႈတိုၵ်းယူင်းၸူဝ်းဢဝ်ၼၼ်ႉသေယဝ်ႉ၊ႁဵတ်းဝၢတ်ႈၵူဝ်းၵႂၢႆႇတီႈၽြႃးတၢင်ႇသူတၢင်ႇပႃးၸိုင်၊-
ၵဝ်ပၼ်သတိတီႈသူဝၼ်းမိူဝ်ႈၼႆႉလွင်ႈဢၼ်သူတၵ်းႁွတ်ႈထိုင်တၢင်းဢၼ်လုလႅဝ်ဢမၢၼ်ႇၶၼ်ပဵၼ်လႄႈၸူဝ်ႈဢသၢၵ်ႈသူတၵ်းဢမ်ႇယၢဝ်းယိုၼ်းၵႃႈၼႂ်းမိူင်းဢၼ်သူတၵ်းၶၢမ်ႈၼမ်ႉ ယေႃးတၢၼ်ႇ၊ ၵႂႃႇသေယဝ်ႉ၊ဢုပ်ႉပိူင်ႇၸၢမ်ႇၸႃးၼၼ်ႉဢေႃႈ။-
တေႃႈလဵဝ်ၼႆႉၵဝ်ပၼ်ဢၶႂၢင်ႉတၢင်းဢၼ်သူတၵ်းလိူၵ်ႈဢဝ်ၼႂ်းလွင်ႈတၢင်းဢၼ်ဢသၢၵ်ႈလိပ်းဢိၵ်ႇတင်းလွင်ႈတၢင်းတၢႆ၊ၼႂ်းတၢင်းဢၼ်ၽြႃးပဵၼ်ၸဝ်ႈပၼ်တၢင်းလီမၢင်ႇၵလႃႇ၊ဢိၵ်ႇတင်းတၢင်းဢၼ်ၽြႃးပဵၼ်ၸဝ်ႈၵိၼ်ႇဝႃႈၼၼ်ႉသေယဝ်ႉ၊ၵဝ်တိူင်ႇၵၢင်ႁၢဝ်တင်းလိၼ်မိူင်းႁႂ်ႈပဵၼ်သၢၵ်ႈသေႇလွင်ႈတၢင်းဢၼ်သူလိူၵ်ႈဢဝ်ၼၼ်ႉဢေႃႈ။ ပိူဝ်ႈၼႆလႄႈသူလိူၵ်ႈဢဝ်တၢင်းဢၼ်ဢသၢၵ်ႈလိပ်းၼၼ်ႉတႃႉ။-
ပုၼ်ႈတႃႇသူဢိၵ်ႇတင်းလုၵ်ႈလၢၼ်ၸိူဝ်ႉၶိူဝ်းသူတၵ်းတေဢသၢၵ်ႈယၢဝ်းယိုၼ်းယူႇၵႃႈၼႂ်းမိူင်းဢၼ် ထႃႇဝရႃႉၽြႃး၊ တိူင်ႇဝႃႈဝႆႉတီႈပူႇမွၼ်ႇသူ ဢႃႇပြႃႇႁၢမ်ႇ၊ဢိၸၢၵ်ႈ၊ယႃႇၵုပ်ႈ၊ ၸိူဝ်းၼၼ်ႉလႄႈဝႃႈ၊ ‘တၵ်းပၼ်တီႈသူဢေႃႈ၊’ ဝႃႈၼႆၼၼ်ႉၼၼ်ႉၸိုင်၊သူဢွၼ်ၵၼ်ႁၵ်ႉ ထႃႇဝရႃႉၽြႃး၊ ၽြႃးပဵၼ်ၸဝ်ႈသူ၊ထွမ်ႇဢဝ်ၵႂၢမ်းမၼ်းၸဝ်ႈလႄႈသုတ်ႉၸပ်းသုတ်ႉၸူးယူႇတီႈမၼ်းၸဝ်ႈတႃႉ၊” ဝႃႈၼင်ႇၼႆဢေႃႈ။
မူဝ်းသေႇ၊ သိုပ်ႇႁေႃးလၢတ်ႈတီႈၵူၼ်းမဵဝ်း ဢိသရေး၊ တင်းလၢႆထႅင်ႈလႄႈလၢတ်ႈဝႃႈ၊-
“ၵဝ်ၼႆႉဢသၢၵ်ႈတဵမ်ပၢၵ်ႇသၢဝ်းပီဝၼ်းမိူဝ်ႈၼႆႉယဝ်ႉ။ ၵမ်းလိုၼ်းၵဝ်ဢမ်ႇတၢတ်ႈၼိူင်ႇလႆႈပုၼ်ႈတေဢွၼ်ႁူဝ်သူၵႂႃႇထႅင်ႈယဝ်ႉ။ လိူဝ်သေၼၼ်ႉ ထႃႇဝရႃႉၽြႃး၊ မီးဢမိင်ႉတီႈၵဝ်လႄႈဝႃႈ၊ ‘မႂ်းဢမ်ႇလႆႈၶၢမ်ႈၼမ်ႉ ယေႃးတၢၼ်ႇ၊ ၼႆႉ၊’ ဝႃႈၼႆဝႆႉယဝ်ႉ။-
ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းဢွၼ်ႁူဝ်သူၵႂႃႇႁႂ်ႈလႆႈယႃႉၵူၼ်းမဵဝ်းၸိူဝ်းဢၼ်မီးၵႃႈတီႈၼၼ်ႈပုၼ်ႈလွင်ႈၼင်ႇႁိုဝ်သူတၵ်းလႆႈဢုပ်ႉပိူင်ႇၸၢမ်ႇၸႃးဢေႃႈ။ ယေႃးသု၊ တၵ်းဢွၼ်ႁူဝ်သူၵႂႃႇၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉဝႆႉၼၼ်ႉဢေႃႈ။-
ထႃႇဝရႃႉၽြႃး၊ တၵ်းယႃႉပႅတ်ႈၵူၼ်းၸိူဝ်းၼၼ်ႉမိူၼ်ၸိူဝ်ႉၼင်ႇဢၼ်မၼ်းၸဝ်ႈႁဵတ်းတီႈ သိႁုၼ်ႇ၊ တင်း ဢေႃႇၶႃႉ၊ ၶုၼ်ႁေႃၶမ်း ဢႃႇမေႃးရိ၊ ၸိူဝ်းၼၼ်ႉဢိၵ်ႇတင်းတီႈမိူင်းၶဝ်ၼၼ်ႉဢေႃႈ။-
ထႃႇဝရႃႉၽြႃး၊ တၵ်းႁႂ်ႈသူဢွင်ႇသိုၵ်းၵႃႈၼိူဝ်ၶဝ်လႄႈသူတၵ်းတေလႆႈႁဵတ်းတီႈၶဝ်ၸွမ်းၵႃႈၼင်ႇဢၼ်ၵဝ်သင်ႇလၢတ်ႈဝႆႉၼၼ်ႉထူၼ်ႈထူၼ်ႈတဵမ်တဵမ်ဢေႃႈ။-
ဢဝ်ႁႅင်းလႄႈမီးတၢင်းဢၼ်ႁတ်းႁၢၼ်တႃႉ။ ယႃႇပေၵူဝ်ႁႄၶဝ်။ ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းၵႂႃႇလူၺ်ႈၵၼ်တင်းသူဢေႃႈ။ မၼ်းၸဝ်ႈတၵ်းဢမ်ႇၸုၼ်ႉပႅတ်ႈသူ၊တၵ်းဢမ်ႇပႄႇပႅတ်ႈသူဝႆႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ မူဝ်းသေႇ၊ ႁွင်ႉဢဝ် ယေႃးသု၊ သေယဝ်ႉ၊လၢတ်ႈတေႃႇမၼ်းၵႃႈတီႈၽၢႆႇၼႃႈၵူၼ်းမဵဝ်း ဢိသရေး၊ တင်းသဵင်ႈတင်းလူင်လႄႈဝႃႈ၊ “ဢဝ်ႁႅင်းလႄႈမီးတၢင်းဢၼ်ႁတ်းႁၢၼ်တႃႉ။ မႂ်းၼႆႉပဵၼ်ၵေႃႉဢၼ်တၵ်းဢွၼ်ႁူဝ်ၵူၼ်းၸိူဝ်းၼႆႉၵႂႃႇၶဝ်ႈဢုပ်ႉပိူင်ႇၸၢမ်ႇၸႃးမိူင်းဢၼ် ထႃႇဝရႃႉၽြႃး၊ တိူင်ႇၵၢဝ်ႇၵတိဝႆႉတီႈပူႇမွၼ်ႇၶဝ်လႄႈဝႃႈ၊ ‘တၵ်းပၼ်တီႈၶဝ်ဢေႃႈ၊’ ဝႃႈၼႆၼၼ်ႉဢေႃႈ။-
ထႃႇဝရႃႉၽြႃး၊ တၵ်းဢွၼ်ႁူဝ်မႂ်းၵႂႃႇလႄႈတၵ်းမီးလူၺ်ႈၵၼ်တင်းမႂ်းဢေႃႈ။ မၼ်းၸဝ်ႈတၵ်းဢမ်ႇႁႂ်ႈမႂ်းလူမ်ႉပင်းၵႂႃႇ၊တၵ်းဢမ်ႇၸုၼ်ႉပႅတ်ႈမႂ်းဝႆႉ။ ယႃႇပေမႆႈၸႂ်။ ယႃႇပေၸႂ်လု၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ မူဝ်းသေႇ၊ တႅမ်ႈတြႃးၸဝ်ႈဝႆႉသေလႄႈဢဝ်ဢၢပ်ႈပၼ်တီႈယဵၸ်ႈပရေႃးႁဵၵ်ႈ ၵူၼ်းမဵဝ်း လေႇဝိ၊ ၸိူဝ်းဢၼ်မီးပုၼ်ႈၽွၼ်းႁၢမ်တိူၵ်ႈပတိၺိၺ်ႇ ထႃႇဝရႃႉၽြႃး၊ ဢိၵ်ႇတင်းတီႈၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်း ဢိသရေး၊ တင်းလၢႆၼၼ်ႉဢေႃႈ။-
မၼ်းၸင်ႇသင်ႇလၢတ်ႈတီႈၶဝ်လႄႈဝႃႈ၊ “ၼႂ်းတီႈသုတ်းပီဢၼ်ထူၼ်ႈၸဵတ်းပီ၊မိူဝ်ႈပီဢၼ်ၶႂၢင်းလွတ်ႈပွႆႇပၼ်ႁွတ်ႈထိုင်မႃးၵူႈပွၵ်ႈၵူႈပွၵ်ႈၼၼ်ႉ၊ၽတ်းဢၢၼ်ႇတြႃးၸဝ်ႈၼႆႉလူၺ်ႈသဵင်ဢၼ်လင်ၵႃႈၼႂ်းပၢင်ပွႆးသုမ်ႉထဵင်ၼၼ်ႉတႃႉ။-
ၽတ်းဢၢၼ်ႇတြႃးၸဝ်ႈၼႆႉတီႈၵူၼ်းမဵဝ်း ဢိသရေး၊ တင်းလၢႆ မိူဝ်ႈဢၼ်ၶဝ်ဢွၼ်ၵၼ်မႃးႁဵတ်းဝၢတ်ႈၵူဝ်းၵႂၢႆႇတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူၵႃႈတီႈဢၼ်မၵ်းၶၢၼ်းဝႆႉတႃႇတေဝႆႈသႃၵူဝ်းၵႂၢႆႇၽြႃးပဵၼ်ၸဝ်ႈၼၼ်ႉတႃႉ။-
ႁွင်ႉဢဝ်ၵႃႈဢၼ်ပဵၼ်ၵူၼ်းၸၢႆး၊ၽူႈယိင်းတင်းလုၵ်ႈဢွၼ်ႇဢိၵ်ႇတင်းၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈယူႇၵႃႈၼႂ်းဝဵင်းသူတင်းလၢႆမႃးၸုတုမ်ၵၼ်ႁႂ်ႈၶဝ်လႆႈဢၶႂၢင်ႉဢၼ်ထွမ်ႇငိၼ်းတြႃးၸဝ်ႈၼႆႉၵူႈၵေႃႉၵူႈၵူၼ်းသေလႄႈသွၼ်ဢဝ်ႁႂ်ႈရူဝ်ႇသေႇၵူဝ်ယမ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူသေယဝ်ႉ၊ႁႂ်ႈပႃးတင်းသဵတ်ႈၸႃႇပႂ်ႉၵမ်ပႂ်ႉၸွမ်းပိင်းၺၢပ်ႈၸဝ်ႈတင်းသဵင်ႈတင်းမူတ်းၼႆႉတႃႉ။-
ပေႃးႁဵတ်းၸိူဝ်ႉၼင်ႇၼၼ်ၸိုင်၊လုၵ်ႈလၢၼ်ၸိူဝ်ႉၶိူဝ်းသူဢၼ်ဢမ်ႇပႆႇတွၼ်ႉငိၼ်းတြႃးၸဝ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူၸိူဝ်းၼၼ်ႉတၵ်းတေဢွၼ်ၵၼ်လႆႈငိၼ်းဢေႃႈ။ ၼင်ႇၼၼ်လႄႈၶဝ်တၵ်းမီးဢၶႂၢင်ႉဢၼ်သွၼ်ဢဝ်သေလႄႈထွမ်ႇဢဝ်မၼ်းၸဝ်ႈယူႇၸူဝ်ႈဢၼ်ၶဝ်ယင်းယူႇၵႃႈၼႂ်းမိူင်းဢၼ်သူၸမ်တၵ်းၶၢမ်ႈၼမ်ႉ ယေႃးတၢၼ်ႇ၊ ၵႂႃႇလႄႈဢုပ်ႉပိူင်ႇၸၢမ်ႇၸႃးၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ လႄႈဝႃႈ၊ “မႂ်းတေဢမ်ႇလႆႈယူႇထႅင်ႈႁိုင်ႁိုင်ယဝ်ႉ။ ႁွင်ႉဢဝ် ယေႃးသု၊ လႄႈဢွၼ်ၵၼ်မႃးၵႃႈတီႈသုမ်ႉထဵင်ၸဝ်ႈၼၼ်ႉတင်းသွင်ၵေႃႉႁႂ်ႈၵဝ်လႆႈသင်ႇလၢတ်ႈၼႄပၼ်တီႈမၼ်းတႃႉ၊” ဝႃႈၼင်ႇၼႆဢေႃႈ။ မူဝ်းသေႇ၊ တင်း ယေႃးသု၊ ၵေႃႈၵႂႃႇၵႃႈတီႈသုမ်ႉထဵင်ၸဝ်ႈၼၼ်ႉဢေႃႈ။-
ထႃႇဝရႃႉၽြႃး၊ ထၢင်ႇသႃးပေႃႇမႃးၵႃႈတီႈၶဝ်သွင်ၵေႃႉ ၵႃႈၼႂ်းသဝ်မွၵ်ႇၵုမ်ႈဢၼ်တႄႇယူႇၵႃႈၼိူဝ်ၽၵ်းတူသုမ်ႉထဵင်ၸဝ်ႈၼၼ်ႉဢေႃႈ။
ထႃႇဝရႃႉၽြႃး၊ ၵေႃႈမီးဢမိင်ႉတီႈ မူဝ်းသေႇ၊ လႄႈဝႃႈ၊ “မႂ်းၸမ်တၵ်းၼွၼ်းလပ်းလူၺ်ႈၵၼ်တင်းပူႇပေႃႈမႂ်းၸိူဝ်းၼၼ်ႉယဝ်ႉ။ လိုၼ်းသေဢၼ်မႂ်းတၢႆၵႂႃႇယဝ်ႉၼၼ်ႉၸိုင်၊ၵူၼ်းၸိူဝ်းၼႆႉတၵ်းဢမ်ႇပႂ်ႉသဵတ်ႈၸႃႇတေႃႇၵဝ်သေလႄႈပႄႇပႅတ်ႈပတိၺိၺ်ႇဢၼ်ၵဝ်ႁဵတ်းဝႆႉလူၺ်ႈၵၼ်တင်းၶဝ်ၼၼ်ႉဢေႃႈ။ ၶဝ်တၵ်းၸုၼ်ႉပႅတ်ႈၵဝ်သေလႄႈၵူဝ်းၵႂၢႆႇၽြႃးတင်းလၢႆၵႃႈၼႂ်းမိူင်းဢၼ်ၶဝ်တၵ်းၶဝ်ႈၵႂႃႇဢုပ်ႉပိူင်ႇၸၢမ်ႇၸႃးၼၼ်ႉဢေႃႈ။-
မိူဝ်ႈဢၼ်လွင်ႈတၢင်းၸိူဝ်းၼၼ်ႉပဵၼ်မႃးၸိုင်၊ၵဝ်တၵ်းၸႂ်မႆႈၶႂ်ႈၸႃႉတေႃႇၶဝ်လႄႈၸုၼ်ႉပႅတ်ႈၶဝ်ဢေႃႈ။ ၶဝ်တၵ်းႁွတ်ႈတၢင်းလုတၢင်းလႅဝ်လႄႈၽေးဢႃႉမၢင်ႇၵလႃႇဢၼ်လီၵူဝ်လီႁႄၼမ်ၼႃႇတၵ်းတူၵ်းႁွတ်ႈၵႃႈၼိူဝ်ၶဝ်ဢေႃႈ။ မိူဝ်ႈၼၼ်ႉၶဝ်တၵ်းၶႆႈၸႂ်ထူပ်းလွင်ႈဢၼ်ဝႃႈ၊လွင်ႈတၢင်းၸိူဝ်းၼႆႉပဵၼ်မႃးတီႈၶဝ်ၵွပ်ႈပိူဝ်ႈၵဝ်ဢၼ်ပဵၼ်ၽြႃးပဵၼ်ၸဝ်ႈၶဝ်ၼႆႉဢမ်ႇမီးလူၺ်ႈၵၼ်တင်းၶဝ်ၼၼ်ႉဢေႃႈ။-
မိူဝ်ႈယၢမ်းၼၼ်ႉၵဝ်တၵ်းထဵင်ပႅတ်ႈတၢင်းဢၼ်တၵ်းၸွႆႈထႅမ်ၶဝ်ၼၼ်ႉၵွပ်ႈပိူဝ်ႈဢၼ်ၶဝ်ႁဵတ်းတုၸရိူၵ်ႈလႄႈၵႂႃႇဝႆႈၽြႃးတၢင်ႇသူႇတၢင်ႇပႃးတင်းလၢႆၼၼ်ႉဢေႃႈ။
“တေႃႈလဵဝ်ၼႆႉတႅမ်ႈလိၵ်ႈႁဵတ်းၵႂၢမ်းၼႆႉဝႆႉသေလႄႈဢဝ်သွၼ်ပၼ်တီႈၵူၼ်းမဵဝ်း ဢိသရေး၊ တင်းလၢႆတႃႉ။ ၵႂၢမ်းဢၼ်ႁဵတ်းၼႆႉၸိုင်၊သွၼ်ႁႂ်ႈၶဝ်ဢူမ်သူပ်းဝႆႉႁႂ်ႈလႆႈပဵၼ်သၢၵ်ႈသေႇပုၼ်ႈၵဝ်လွင်ႈဢပျတ်ႈၵူၼ်းမဵဝ်း ဢိသရေး၊ တင်းလၢႆတႃႉ။-
ၵဝ်တၵ်းဢဝ်ၶဝ်ၶဝ်ႈထိုင်ၵႃႈၼႂ်းမိူင်းဢၼ်မၢၵ်ႈမီးလီပဵၼ်လႄႈၽုၼ်ႇလီလိၼ်လီ ၼၼ်ႉၸွမ်းၵႃႈၼင်ႇဢၼ်ၵဝ်တိူင်ႇဝႃႈၵတိဝႆႉတီႈပူႇမွၼ်ႇၶဝ်ၼၼ်ႉဢေႃႈ။ ၵႃႈတီႈၼၼ်ႈၶဝ်တေလႆႈၵိၼ်ဢိမ်ႇၵိၼ်တဵမ်သေယဝ်ႉ၊ယူႇလီပီးမၼ်းယူႇဢေႃႈ။ ၵူၺ်းၵႃႈ၊ၶဝ်တၵ်းဝၢႆႇၼႃႈပႅတ်ႈသေၵႃႈတီႈၵဝ်လႄႈဝႆႈၽြႃးတၢင်ႇသူႇတၢင်ႇပႃးတင်းလၢႆဢေႃႈ။ ၶဝ်တၵ်းၸုၼ်ႉပႅတ်ႈၵဝ်လႄႈယႃႉပတိၺိၺ်ႇတြႃးၵဝ်ပႅတ်ႈဢေႃႈ။-
ၵမ်းၼၼ်ႉ၊ၽေးဢႃႉမၢင်ႇၵလႃႇဢၼ်လီၵူဝ်လီႁႄၼမ်ၼႃႇတၵ်းတူၵ်းႁွတ်ႈၵႃႈၼိူဝ်ၶဝ်ဢေႃႈ။ ၵူၺ်းၵႃႈ၊တၵ်းတေလႆႈႁဵတ်းလိၵ်ႈႁဵတ်းၵႂၢမ်းၼႆႉယူႇႁႂ်ႈလႆႈပဵၼ်သၢၵ်ႈသေႇပုၼ်ႈၵဝ်လွင်ႈဢပျတ်ႈၶဝ်ဢေႃႈ။ ပိၵ်ႉသမ်ႉယၢမ်းမိူဝ်ႈလဵဝ်ၼႆႉၸဵမ်မိူဝ်ႈၸူဝ်ႈဢၼ်ၵဝ်ဢမ်ႇပႆႇဢွၼ်ၶဝ်ၶဝ်ႈၵႂႃႇၵႃႈၼႂ်းမိူင်းဢၼ်ၵဝ်တိူင်ႇဝႃႈၵတိဝႆႉၼၼ်ႉၸိုင်၊ၵဝ်ႁုတၢင်းဢၼ်ၶဝ်ၵျၢမ်ႇပွင်ၸိူဝ်ႉၼင်ႇႁိုဝ်ၼၼ်ႉဝႆႉယဝ်ႉ၊” ဝႃႈၼင်ႇၼႆဢေႃႈ။
မူဝ်းသေႇ၊ တႅမ်ႈလိၵ်ႈႁဵတ်းၵႂၢမ်းၼၼ်ႉၼႂ်းဝၼ်းၼၼ်ႉၵမ်းလဵဝ်လႄႈသွၼ်ပၼ်တီႈၵူၼ်းမဵဝ်း ဢိသရေး၊ တင်းလၢႆဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ သမ်ႉသင်ႇလၢတ်ႈတီႈ ယေႃးသု၊ လုၵ်ႈၸၢႆး ၼုၼ်ႇ၊ ၼၼ်ႉလႄႈဝႃႈ၊ “ဢဝ်ႁႅင်းလႄႈမီးတၢင်းဢၼ်ႁတ်းႁၢၼ်တႃႉ။ မႂ်းတၵ်းတေလႆႈဢွၼ်ဢဝ်ၵူၼ်းမဵဝ်း ဢိသရေး၊ တင်းလၢႆၶဝ်ႈၸၢမ်ႇၸႃးၵႃႈၼႂ်းမိူင်းဢၼ်ၵဝ်တိူင်ႇဝႃႈၵတိဝႆႉၼၼ်ႉဢေႃႈ။ ၵဝ်တၵ်းမီးယူႇလူၺ်ႈၵၼ်တင်းမႂ်းဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ ၵေႃႈတႅမ်ႈၵႂၢမ်းပိင်းၺၢပ်ႈတြႃး၊ၽြႃးပဵၼ်ၸဝ်ႈဝႆႉၵႃႈၼႂ်းၽိုၼ်လိၵ်ႈလႄႈဝႆႉသတိၼင်ႇႁိုဝ်တၵ်းဢမ်ႇတူၵ်းဢမ်ႇႁူင်ႈသေၶေႃႈသေၵမ်းၼၼ်ႉ ဢေႃႈ။-
မိူဝ်ႈဢၼ်တႅမ်ႈယဝ်ႉတူဝ်ႈလီငၢမ်းယဝ်ႉၸိုင်၊မၼ်းသင်ႇလၢတ်ႈတီႈယဵၸ်ႈပရေႃးႁဵၵ်ႈ ၵူၼ်းမဵဝ်း လေႇဝိ၊ ၸိူဝ်းဢၼ်ပႂ်ႉထိင်းတိူၵ်ႈပတိၺိၺ်ႇ ထႃႇဝရႃႉၽြႃး၊ ၼၼ်ႉလႄႈဝႃႈ၊-
“ဢဝ်ၽိုၼ်လိၵ်ႈပိင်းၺၢပ်ႈတြႃး ထႃႇဝရႃႉၽြႃး၊ ၼႆႉတၢင်ႇဝႆႉၵႃႈႁိမ်းတိူၵ်ႈပတိၺိၺ်ႇ ထႃႇဝရႃႉၽြႃး၊ ၽြႃးပဵၼ်ၸဝ်ႈသူႁႂ်ႈပဵၼ်သၢၵ်ႈသေႇလွင်ႈဢပျတ်ႈၵူၼ်းမၼ်းၸဝ်ႈၼၼ်ႉတႃႉ။-
ၵဝ်ႁုလွင်ႈတၢင်းဢၼ်ၶဝ်မီးၸႂ်တိုဝ်ၸႂ်တၼ်ၵႃႈႁိုဝ်ဢိၵ်ႇတင်းလွင်ႈဢၼ်ၶဝ်မီးၸႂ်ဢၼ်လုၵ်ႉၽိုၼ်ႉၵႃႈႁိုဝ်ၼၼ်ႉယူႇဢေႃႈ။ ၶဝ်လုၵ်ႉၽိုၼ်ႉ ထႃႇဝရႃႉၽြႃး၊ ယူႇၼႂ်းၸူဝ်ႈပၢၼ်ၵဝ်ၼႆႉၵူၺ်းဢမ်ႇၵႃး၊ဝၢႆးသေၵဝ်တၢႆၵႂႃႇယဝ်ႉၼၼ်ႉၶဝ်ယင်းတၵ်းယဵင်ႈၶႅၼ်းလုၵ်ႉၽိုၼ်ႉယူႇလိူဝ်တွၼ်းၼႃႇသေၼၼ်ႉလူးၵွၼ်ႇဢေႃႈ။-
ႁႂ်ႈၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ၼႂ်းၸိူဝ်ႉၶိူဝ်းသူၵူႈမဵဝ်းဢိၵ်ႇတင်းမူးမၢတ်ႈၽွင်းမိူင်းသူတင်းသဵင်ႈတင်းလူင်ၸုတုမ်ၵၼ်ၵႃႈတီႈၵဝ်ၼႆႉႁႂ်ႈၵဝ်လႆႈဢဝ်ၵႂၢမ်းၸိူဝ်းၼႆႉႁေႃးလၢတ်ႈထိုင်ႁူၶဝ်တႃႉ။ ၵဝ်တၵ်းၵၢဝ်ႇတိူင်ႇၵၢင်ႁၢဝ်တင်းလိၼ်မိူင်းႁႂ်ႈလႆႈပဵၼ်သၢၵ်ႈသေႇပုၼ်ႈၵဝ်လွင်ႈဢပျတ်ႈၶဝ်ၼၼ်ႉဢေႃႈ။-
ၵဝ်ႁုလွင်ႈဝၢႆးသေၵဝ်တၢႆယဝ်ႉၼၼ်ႉၵူၼ်းတင်းလၢႆတၵ်းႁၢႆႉယုတ်ႈၼႃႇလႄႈပႄႇပႅတ်ႈတြႃးဢၼ်ၵဝ်သင်ႇလၢတ်ႈဝႆႉတီႈၶဝ်ၼၼ်ႉဢေႃႈ။ ၼင်ႇၼၼ်လႄႈၼႂ်းၶိင်ႇၵႃႇလႃႉမိုဝ်ႉဝၼ်းၵမ်းလိုၼ်းၼၼ်ႉၶဝ်တၵ်းထူပ်းႁၼ်ၽေးဢႃႉမၢင်ႇၵလႃႇ ၵွပ်ႈပိူဝ်ႈဢၼ်ၶဝ်ႁဵတ်းတုၸရိူၵ်ႈဢပျတ်ႈလႄႈဢဝ်လွင်ႈတၢင်းဢၼ်ၶဝ်ႁဵတ်းၼၼ်ႉတိုၵ်းယူင်းတၢင်းၸႂ်မႆႈၶႂ်ႈၸႃႉ ထႃႇဝရႃႉၽြႃး၊ ၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ မူဝ်းသေႇ၊ ဢဝ်လိၵ်ႈႁဵတ်းၵႂၢမ်းၼၼ်ႉၵူႈၶေႃႈႁဵတ်းၼႄၵူၼ်းမဵဝ်း ဢိသရေး၊ တင်းသဵင်ႈတင်းလူင်ယၢမ်းမိူဝ်ႈဢၼ်ၶဝ်ဢွၼ်ၵၼ်ထွမ်ႇငိၼ်းယူႇၼၼ်ႉလႄႈဝႃႈၸမ်ႉ။
“ၽႃႉၵၢင်ႁၢဝ်႟။ ႁေႈႁူၸူးၵဝ်တႃႉ။ ၵဝ်တၵ်းလၢတ်ႈဢေႃႈ။ လိၼ်မိူင်း႟။ ထွမ်ႇငိၼ်းၵႂၢမ်းဢၼ်ၵဝ် ဝႃႈဢွၵ်ႇသူပ်းၼႆႉတႃႉ။
တေႇသၼႃႇၵဝ်တၵ်းယွတ်ႇတူၵ်းယူႇမိူၼ် ၸိူဝ်ႉၼင်ႇၼမ်ႉၽူၼ်လႄႈ တၵ်းဢွႆတူၵ်းယူႇမိူၼ်ၸိူဝ်ႉၼင်ႇ ၼမ်ႉၼၢႆးဢေႃႈ။ ၵႂၢမ်းၵဝ်တၵ်းပဵၼ်ၸိူဝ်ႉၼင်ႇၽူၼ်ၽွင်ဢၼ် ႁူတ်းသႂ်ႇတူၼ်ႈၵႃႈလႄႈ တၵ်းပဵၼ်ၸိူဝ်ႉၼင်ႇႁႃႇၽူၼ်ၵႃႈၼိူဝ်တူၼ်ႈယိူဝ်ႈယႃႈဢၼ်ၼူၼ်းလီၼၼ်ႉဢေႃႈ။
ၵဝ်တၵ်းယွင်ႈယေႃးၼႃႇမႃႉၸိုဝ်ႈသဵင် ထႃႇဝရႃႉၽြႃး၊ လႄႈ ၵူၼ်းမၼ်းၸဝ်ႈတၵ်းဢွၼ်ၵၼ်လၢတ်ႈလွင်ႈမုၼ်ၽုင်းဢႃႇၼုၽေႃႇမၼ်းၸဝ်ႈဢေႃႈ။
ထႃႇဝရႃႉၽြႃး၊ ပဵၼ်တီႈဢၼ်ႁႄႉဢၼ်ၵင်ႈ ယႂ်ႇၼႃႇလူင်လၢင်ပုၼ်ႈသူလႄႈ ပဵၼ်ဢၼ်ၸေးၸုမ်ႇသိုဝ်ႈတေႃႇၼႂ်းလွင်ႈတၢင်းၵူႈၸိူဝ်ႉၵူႈပိူင်ဢေႃႈ။ ၽြႃးပဵၼ်ၸဝ်ႈသူမီးသဵတ်ႈၸႃႇမၢၼ်ႇမႅၼ်ႈ ၸိုဝ်ႈၸႂ်ႈလႄႈ ႁဵတ်းတၢင်းဢၼ်သိုဝ်ႈတေႃႇလႄႈႁဵတ်းတြႃးဢၼ်မၢၼ်ႇဢေႃႈ။
သူၸမ်ႉ၊ဢမ်ႇပႂ်ႉသဵတ်ႈၸႃႇ၊ဢမ်ႇၵိုင်ႇထိူၵ်ႈ ပဵၼ်ၵူၼ်းမၼ်းၸဝ်ႈ၊ ပဵၼ်မဵဝ်းၵူၼ်းဢၼ်မီးဢပျတ်ႈဢၼ် ၸၢင်ႈပႅတ်ႉၸၢင်ႈလႅၼ်ဢေႃႈ။
ၵူၼ်းမိူၵ်ႈဢၼ်ဢမ်ႇလၵ်းလႅမ်ၶဝ်႟။ သူႁႂ်ႈ လွင်ႈတၢင်းၼႆႉပဵၼ်၊ တၢင်းဢၼ်တွပ်ႇၵျေးၸူး ထႃႇဝရႃႉၽြႃး၊ ယဝ်ႉႁိုဝ်း။ မၼ်းၸဝ်ႈပဵၼ်ပေႃႈသူ၊ၸဝ်ႈဢၼ်ၽၢၼ်ႇသၢင်းႁဵတ်းပဵၼ်သူလႄႈ မၼ်းၸဝ်ႈႁဵတ်းႁႂ်ႈသူပဵၼ်မဵဝ်းၵူၼ်းမဵဝ်းၼိုင်ႈယဝ်ႉဢမ်ႇၸႂ်ႈႁိုဝ်း။
ၶႆႈၸႂ်ထူပ်းလွင်ႈမိုဝ်ႉၵဝ်ႇဝၼ်းလင်၊ၶူပ်ႇပီဢၼ်ပူၼ်ႉမႃးၸိူဝ်းၼၼ်ႉတႃႉ။ တွင်ႈထၢမ်တီႈပေႃႈသူတႃႉ။ ၶဝ်တၵ်းၽုၺ်ႇဢွၵ်ႇၼႄပျႃးတီႈသူဢေႃႈ။ တွင်ႈထၢမ်တီႈၵူၼ်းထဝ်ႈၵူၼ်းၵႄႇတင်းလၢႆတႃႉ။ ၶဝ်တၵ်းမွၵ်ႇလၢတ်ႈတီႈသူဢေႃႈ။
ၽြႃးဢၼ်သုင်ၼႃႇသေပိူၼ်ႈၼၼ်ႉမၵ်းမၼ်ႈၽႄမႅင်ႇပၼ်လိၼ်ဢမူၺ်ႇတီႈမဵဝ်းၵူၼ်းတင်းလၢႆလႄႈ ၶၼ်ႈၶႅၼ်ႈပၼ်တီႈယူႇပုၼ်ႈၵူၼ်းမဵဝ်းလႂ်မဵဝ်းၼၼ်ႉတၵ်းယူႇသဝ်းဢေႃႈ။ မၼ်းၸဝ်ႈၸီႇယၢင်ႇပၼ်တီႈယူႇၵူၼ်းၵူႈၸိူဝ်ႉၵူႈမဵဝ်းၸွမ်းလူၺ်ႈတၢင်းဢၼ်ၼပ်ႉဢၢၼ်ႇ ၵူၼ်းမဵဝ်း ဢိသရေး၊ တင်းလၢႆ။
ၵူၺ်းၵႃႈ၊ၸိူဝ်ႉၶိူဝ်း ယႃႇၵုပ်ႈ၊ ၸမ်ႉ၊မၼ်းၸဝ်ႈလိူၵ်ႈဝႆႉပုၼ်ႈမၼ်းၸဝ်ႈဢေႃႈ။
မၼ်းၸဝ်ႈထူပ်းႁၼ်ၶဝ်လႄႇၵႂႃႇလႄႇမႃးယူႇၵႃႈၼႂ်းထိူၼ်ႇႁႅင်ႈထိူၼ်ႇႁွင်၊ ထိူၼ်ႇလႅင်ႉဢၼ်သဵတ်ႇၵူၼ်းငႅဝ်ၵူၼ်း၊ဢၼ်တူဝ်ထိူၼ်ႇႁွင်ႉယူႇၶၢင်းယူႇၼၼ်ႉဢေႃႈ။ မၼ်းၸဝ်ႈၵႅတ်ႇၶႄမႃႉၸႃႉၶဝ်လႄႈလုမ်းလႃး ပႂ်ႉထိင်းၶဝ်၊ မိူၼ်ၸိူဝ်ႉၼင်ႇမၼ်းၸဝ်ႈၵႅတ်ႇၶႄ မၢၵ်ႇတႃၼၼ်ႉဢေႃႈ။
မိူၼ်ၼင်ႇဢၼ်ၼူၵ်ႉၶၢင်ႇလေႃႉသွၼ်လုၵ်ႈဢွၼ်ႇမၼ်းမိၼ်လႄႈ ဢဝ်ပိၵ်ႇမၼ်းၵီႈႁွင်းလႄႈဢုမ်ႈဢဝ်လုၵ်ႈမၼ်းၵႂႃႇၼၼ်ႉ ထႃႇဝရႃႉၽြႃး၊ ႁွပ်ႇဢုမ်ႈမဵဝ်း ဢိသရေး၊ ဝႆႉဢမ်ႇႁႂ်ႈလႆႈတူၵ်းသုမ်းဢေႃႈ။
ထႃႇဝရႃႉၽြႃး၊ သူႇလဵဝ်ၵူၺ်းဢွၼ်သူင်ႇ ၵူၼ်းမၼ်းၸဝ်ႈၵႂႃႇလႄႈ ၽြႃးတၢင်ႇသူႇတၢင်ႇပႃးဢမ်ႇယူႇလူၺ်ႈ ၵၼ်တင်းၶဝ်။
မၼ်းၸဝ်ႈပၼ်ႁႂ်ႈၶဝ်ပိူင်ႇၵႃႈတီႈမိူင်းႁၢၼ်ႉ လွႆသုင်တင်းလၢႆ၊ ႁႂ်ႈၶဝ်လႆႈၵိၼ်ဢၼ်ယႂ်ႇၽႄႈမႃးၵႃႈတီႈႁႆႈ တီႈၼႃးဢေႃႈ။ ႁႂ်ႈၶဝ်လႆႈထူပ်းႁၼ်ၼမ်ႉၽိုင်ႈၵႃႈၼႂ်း ငၢပ်ႇႁိၼ်ငၢပ်ႇၽႃ၊ ဢိၵ်ႇတင်းၼမ်ႉမၼ်းၵႃႈတီႈမၢၵ်ႇႁိၼ်ဢေႃႈ။
ဝူဝ်းမႄႈတင်းပႄႉမႄႈၸၢင်ႈပၼ်ၼမ်ႉၼူမ်း လိူင်ႇၼမ်ၼႃႇလႄႈ ႁႂ်ႈမီးသူဝ်း၊ပႄႉ၊ဝူဝ်းမဵဝ်းဢၼ်လီၼႃႇတင်းလၢႆဢိၵ်ႇတင်းၶဝ်ႈၵျုင်ႇမဵဝ်းဢၼ်လီၼႃႇတင်းၼမ်ႉမၢၵ်ႇၸပိတ်ႉဢၼ်ၸႅတ်ႈဢေႃႈ။
ၵူၼ်း ထႃႇဝရႃႉၽြႃး၊ ၸိူဝ်းၼၼ်ႉမၢၵ်ႇမီးလီပဵၼ်မႃးသေလႄႈ မီးၸႂ်ဢၼ်လုၵ်ႉၽိုၼ်ႉၶိုၼ်းဢေႃႈ။ ၶဝ်ယူႇလီပီးမၼ်းမႃး၊ပျေႉၸုမ်ႇတင်းၵွၼ်ႈၶႆ ၵွၼ်ႈမၼ်းမႃးသေလႄႈ ၸုၼ်ႉပႅတ်ႈၽြႃးပဵၼ်ၸဝ်ႈ၊ၸဝ်ႈဢၼ်ၽၢၼ်ႇသၢင်းႁဵတ်းပဵၼ်ၶဝ်၊ထဵင်ပႅတ်ႈၸဝ်ႈၵႄႇၶျွတ်ႈဢၼ်မျၢတ်ႈၼႃႇၼၼ်ႉဢေႃႈ။
ၶဝ်ဢဝ်ၽြႃးတၢင်ႇသူႇတၢင်ႇပႃးလႄႈႁဵတ်းႁႂ်ႈ ထႃႇဝရႃႉၽြႃး၊ ၽိတ်းၸႂ်ဢေႃႈ။ ၶဝ်ဢဝ်တုၸရိူၵ်ႈတိုၵ်းယူင်းတၢင်းၸႂ်မႆႈၶႂ်ႈၸႃႉမၼ်းၸဝ်ႈဢေႃႈ။
ၶဝ်ႁဵတ်းတၢင်းလူႇဢၼ်သၢၵ်ႈၵၢပ်ႈတီႈၽီႁၢႆႉ ၸိူဝ်းဢၼ်ဢမ်ႇၸႂ်ႈၽြႃး၊ ၽြႃးမႂ်ႇၸိူဝ်းဢၼ်ပူႇမွၼ်ႇၶဝ်ဢမ်ႇတွၼ်ႉႁုၸၵ်း၊ၽြႃးၸိူဝ်းဢၼ်မဵဝ်း ဢိသရေး၊ ဢမ်ႇတွၼ်ႉဝႆႈၼၼ်ႉသေလႄႈ
ၶဝ်လူင်လိုမ်းၽြႃးပဵၼ်ၸဝ်ႈၶဝ်၊ၸဝ်ႈၵႄႇၶျွတ်ႈၶဝ်ဢၼ်မျၢတ်ႈၼႃႇ၊ ၸဝ်ႈဢၼ်ပၼ်ႁႂ်ႈၶဝ်ဢသၢၵ်ႈလိပ်းယူႇ ၼၼ်ႉဢေႃႈ။
ထႃႇဝရႃႉၽြႃး၊ ႁၼ်လွင်ႈတၢင်းၼၼ်ႉသေယဝ်ႉ၊ၸုၼ်ႉပႅတ်ႈၶဝ်၊ ၵွပ်ႈပိူဝ်ႈလုၵ်ႈၸၢႆးလုၵ်ႈယိင်းမၼ်းၸဝ်ႈၸိူဝ်းၼၼ်ႉႁႂ်ႈမၼ်းၸဝ်ႈၸႂ်မႆႈၶႂ်ႈၸႃႉၼၼ်ႉဢေႃႈ။
မၼ်းၸဝ်ႈမီးဢမိင်ႉလႄႈဝႃႈ၊ ‘ၵဝ်တၵ်းဢမ်ႇ ၸွႆႈထႅမ်ၶဝ်သေပွၵ်ႈယဝ်ႉ။ ၵဝ်တၵ်းပႂ်ႉတူၺ်းၶဝ်တၵ်းပဵၼ်ၸိူဝ်ႉၼင်ႇႁိုဝ်မႃးၼၼ်ႉဢေႃႈ။ ၶဝ်ပဵၼ်မဵဝ်းဢၼ်ၸႂ်တိုဝ်ၸႂ်တၼ်၊ၵူၼ်းဢၼ်ဢမ်ႇပႂ်ႉသဵတ်ႈၸႃႇဢေႃႈ။
ၶဝ်ဢဝ်မဵဝ်းဢၼ်ဢမ်ႇၸႂ်ႈၽြႃးၼၼ်ႉလႄႈႁဵတ်းႁႂ်ႈၵဝ်ၽိတ်းၸႂ်ယဝ်ႉ။ ၶဝ်ဢဝ်လွင်ႈတၢင်းဢၼ်လၢႆလၢႆဢမ်ႇပွင်ႇလွင်ႈၵႃႈသင်ၼၼ်ႉ၊ တိုၵ်းယူင်းတၢင်းၸႂ်မႆႈၶႂ်ႈၸႃႉၵဝ်ယဝ်ႉ။ ပိူဝ်ႈၼႆလႄႈၵဝ်တၵ်းဢဝ်ၵူၼ်းမဵဝ်းဢၼ်မီးၸိူဝ်ႉၸၢတ်ႈၼၼ်ႉ၊ႁဵတ်းႁႂ်ႈၶဝ်ၽိတ်းၸႂ်ဢေႃႈ။ ၵဝ်တၵ်းဢဝ်ၵူၼ်းမဵဝ်းဢၼ်ငိူဝ်ႈငႃႉၼၼ်ႉ ႁဵတ်းႁႂ်ႈၶဝ်ၸႂ်မႆႈၶႂ်ႈၸႃႉဢေႃႈ။
တၢင်းၸႂ်မႆႈၶႂ်ႈၸႃႉၵဝ်တၵ်းလုၵ်ႉမိူၼ်ၸိူဝ်ႉၼင်ႇမုၵ်ႉၽႆးလႄႈ မႆႈပႅတ်ႈၶိူင်ႈပိူင်ၵႃႈၼိူဝ်လိၼ်မိူင်းၼႆႉၵူႈမဵဝ်းတေႃႇထိုင်ႁွတ်ႈတီႈလိုၵ်ႉပိုၼ်ႉမိူင်းမရၼႃႉ၊ ဢိၵ်ႇတင်းတၵ်းၽဝ်ႁၢၵ်ႈလွႆတိၼ်လွႆတင်းလၢႆ ၶႅမ်ႈပႅတ်ႈဢေႃႈ။
ၵဝ်တၵ်းဢဝ်ၽေးဢႃႉမၢင်ႇၵလႃႇတင်းလၢႆ ၸုၵွင်ဝႆႉၵႃႈၼိူဝ်ၶဝ်၊ တၵ်းဢဝ်ပိုၼ်ၵၢင်ႇၵဝ်ၵႃႈမီးပိုတ်းယိုဝ်း သႂ်ႇၶဝ်ဢေႃႈ။
ၶဝ်တၵ်းတေတၢႆလူၺ်ႈၽေးဢၼ်ဢိုပ်းယၢၵ်ႈဢိၵ်ႇတင်း လူၺ်ႈၽေးဢၼ်ၼိူဝ်ႉမႆႈၼိူဝ်ႉလိူတ်ႇဢေႃႈ။ ၶဝ်တၵ်းတေတၢႆလူၺ်ႈၽေးၵႃႇလႃႉ ႁႃႈလႅင်မိူင်းဢေႃႈ။ ၵဝ်တၵ်းပွႆႇၸႂ်ႉတူဝ်ထိူၼ်ႇႁၢႆႉတင်းလၢႆယႃႉယူၵ်ႉၶဝ်ဢိၵ်ႇတင်း ငူးဢၼ်ၵွင်ႉၶိုၼ်ႇၼႃႇတင်းလၢႆတွတ်ႇ ၶဝ်ဢေႃႈ။
ၽေးသိုၵ်းၽေးသိူဝ်ၵႃႈတီႈၼွၵ်ႈႁိူၼ်း၊ ၽေးဢၼ်လီၵူဝ်လီႁႄၵႃႈတီႈၼႂ်းႁိူၼ်းတၵ်းယႃႉၽဵဝ်ႈၶဝ်ဢေႃႈ။ ၽူႈမၢဝ်ႇၽူႈသၢဝ်တင်းလၢႆတၵ်းတၢႆလႄႈ ၸႃႉၸဵမ်လုၵ်ႈဢွၼ်ႇတင်းၵူၼ်းထဝ်ႈၵေႃႈ ယင်းတေဢမ်ႇလွတ်ႈဢေႃႈ။
ၵဝ်ထုၵ်ႇလီယႃႉၽဵဝ်ႈၶဝ်ပႅတ်ႈလုမ်းလုမ်း တေႃႇထိုင်ႁွတ်ႈ၊ ၵူၼ်းလေႃးၵီႇထၢၼ်ႈပေႃးဢမ်ႇၶုၵ်းၸႂ်လႆႈ ၶဝ်ၼၼ်ႉယဝ်ႉ။
ၵူၺ်းၵႃႈ၊ၵဝ်ဢမ်ႇၶႂ်ႈႁႂ်ႈရၢၼ်ႇသူႇၶဝ်တင်းလၢႆ လႆႈဢုပ်ႇဝၢဝ်းလႄႈဝႃႈ၊ ၶဝ်တိုၵ်းပႄႉၵူၼ်းၵဝ်တင်းလၢႆပႅတ်ႈယဝ်ႉဝႃႈၼႆမိူဝ်ႈဢၼ်တူဝ်ၵဝ်ယႃႉၽဵဝ်ႈၼူတ်ႈပႅတ်ႈၵူၼ်းၵဝ်ၼၼ်ႉဢေႃႈ၊’ ဝႃႈၼင်ႇၼႆဢေႃႈ။
လွင်ႈမၼ်းၸမ်ႉ၊မဵဝ်း ဢိသရေး၊ ၼႆႉပဵၼ် ၵူၼ်းဢၼ်ဢမ်ႇမီးၺၢၼ်ႇ၊ ၶဝ်ဢမ်ႇမီးပိင်ႇၺႃႇလႃးလႃးဢေႃႈ။
ၶဝ်ဢမ်ႇၸၢင်ႈႁၼ်ၵွပ်ႈပိူဝ်ႈလွင်ႈသင်လႄႈ ၶဝ်လႆႈလုလႆႈသုမ်း၊ ၶဝ်ဢမ်ႇၸၢင်ႈႁုၸႅင်ႈလွင်ႈတၢင်းဢၼ်ပဵၼ်မႃးတီႈၶဝ်ၸိူဝ်းၼၼ်ႉ။
ၵွပ်ႈသင်လႄႈပိူၼ်ႈၵေႃႉလဵဝ်တိုၵ်းပႄႉၶဝ် ပဵၼ်ႁဵင်လႆႈ။ ၵွပ်ႈသင်လႄႈပိူၼ်ႈသွင်ၵေႃႉၵူၺ်းတိုၵ်းပႄႉၶဝ်ပဵၼ်မိုၼ်ႇလႆႈဝႃႈၼႆၸမ်ႉ၊ ပဵၼ်ၵွပ်ႈပိူဝ်ႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်ၸုၼ်ႉပႅတ်ႈၶဝ်၊ ၽြႃးပဵၼ်ၸဝ်ႈၶဝ်ဢၼ်ယႂ်ႇမျၢတ်ႈၼၼ်ႉ ဢဝ်ၶဝ်ဢၢပ်ႈပၼ်တီႈပိူၼ်ႈယဝ်ႉဢေႃႈ။
ရၢၼ်ႇသူႇၶဝ်ၸိူဝ်းၼၼ်ႉႁုဝႃႈ၊ၽြႃးၶဝ် ႁႅင်းလဵၵ်ႉႁႅင်းၵေႇ၊ ဢမ်ႇမီးတၼ်းၶူဝ်းမိူၼ်ၽြႃးပဵၼ်ၸဝ်ႈမဵဝ်း ဢိသရေး၊ ၼၼ်ႉယူႇဢေႃႈ။
လွင်ႈမၼ်းၸမ်ႉ၊ရၢၼ်ႇသူႇၶဝ်ၸိူဝ်းၼၼ်ႉႁၢႆႉႁုၵ်း၊ မိူၼ်ဝဵင်း သေႃးတုမ်ႇ၊ တင်းဝဵင်း ၵေႃးမေႃးရႃႉ၊ လႆႈပဵၼ်မိူၼ်ၸိူဝ်ႉၼင်ႇၶိူဝ်းမၢၵ်ႇၸပိတ်ႉဢၼ်မၢၵ်ႇမၢၵ်ႇဢၼ်ၶူမ်လႄႈ မၢၵ်ႇၸပိတ်ႉၶဝ်ပဵၼ်ၵွင်ႉၵႂႃႇလႄႈ၊
သမ်ႉလႆႈပဵၼ်မိူၼ်ၼမ်ႉမၢၵ်ႇၸပိတ်ႉဢၼ်ဢဝ်တင်းၵွင်ႉငူးႁဝ်ႇႁဵတ်းၼၼ်ႉဢေႃႈ။
ထႃႇဝရႃႉၽြႃး၊ ၶုၵ်းၸႂ်လႆႈၵႃႈဢၼ်ရၢၼ်ႇသူႇၶဝ်ႁဵတ်းၼၼ်ႉယူႇလႄႈ မၼ်းၸဝ်ႈပႂ်ႉထႃႈၶိင်ႇဢၼ်သၢင်ႇထုၵ်ႇ တႃႇတေပၼ်တၢမ်ႇဢပျတ်ႈတီႈၶဝ်ၼၼ်ႉ ယူႇဢေႃႈ။
ထႃႇဝရႃႉၽြႃး၊ တၵ်းၶိုၼ်းတွပ်ႇတႅၼ်းလႄႈ ပၼ်တၢမ်ႇဢပျတ်ႈတီႈၶဝ်၊ ၶိင်ႇဢၼ်ၶဝ်လူမ်ႉၼၼ်ႉတၵ်းႁွတ်ႈမႃးဢေႃႈ။ ၶိင်ႇၶႃႇဢၼ်ၽေးတၵ်းႁွတ်ႈထိုင်တီႈၶဝ်ၼၼ်ႉၸမ်မႃးယဝ်ႉ။ ၽေးၼၼ်ႉတၵ်းၸဵဝ်းၽႅဝ်မႃးၶၼ်ၽႂ်းၼႃႇဢေႃႈ။
ထႃႇဝရႃႉၽြႃး၊ တၵ်းၵႄႇၼုၵ်ႈဢဝ်ၵူၼ်းမၼ်းၸဝ်ႈတင်းလၢႆ၊ၼႂ်းမိူဝ်ႈဢၼ်မၼ်းၸဝ်ႈႁၼ်ၶဝ်ႁႅင်းဢူၼ်ႈၵႂႃႇလႄႈ မၼ်းၸဝ်ႈတၵ်းႁဵတ်းၵျေးၸူးတီႈၶႃႈမၼ်းၸဝ်ႈၸိူဝ်းဢၼ်ႁဵတ်းဝၢတ်ႈမၼ်းၸဝ်ႈ၊ ၼႂ်းမိူဝ်ႈဢၼ်မၼ်းၸဝ်ႈႁၼ်ၶဝ်ဢမ်ႇမီး ၵေႃႉၸွႆႈၵေႃႉထႅမ်ဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ တၵ်းထၢမ်တူၺ်း ၵူၼ်းမၼ်းၸဝ်ႈၸိူဝ်းၼၼ်ႉလႄႈဝႃႈ၊ ‘ၽြႃးထွတ်ႈၽြႃးမျၢတ်ႈၸိူဝ်းဢၼ်သူ သွၼ်ႈပိုင်ႈၼၼ်ႉမီးတီႈလႂ်။
သူဢဝ်ၵွၼ်ႈၶႆၵွၼ်ႈမၼ်းသူသၢၵ်ႈလူႇလဵင်ႉပၼ်တီႈၶဝ်ယဝ်ႉ၊ ဢဝ်ၼမ်ႉမၢၵ်ႇၸပိတ်ႉသူသၢၵ်ႈလူႇတိုၵ်းပၼ် ႁႂ်ႈၶဝ်သူတ်ႉယဝ်ႉ။ ႁႂ်ႈၶဝ်မႃးၸွႆႈထႅမ်သူတေႃႈလဵဝ်ၼႆႉတႃႉ။ ႁႂ်ႈၶဝ်လႅၼ်ႈမႃးၵႄႇၼုၵ်ႈဢဝ်သူတႃႉ။
ၵဝ်၊သူႇလဵဝ်ပႃးလဵဝ်ၵူၺ်းပဵၼ်ၽြႃး ပဵၼ်ၸဝ်ႈဢေႃႈ။ ၽြႃးတၢင်ႇသူႇတၢင်ႇပႃးဢမ်ႇၸႂ်ႈၽြႃးၸႅတ်ႈ။ ၵဝ်ၼႆႉႁႂ်ႈဢသၢၵ်ႈတၢႆဢေႃႈ။ ၵဝ်ၼႆႉႁႂ်ႈဢသၢၵ်ႈလိပ်းဢေႃႈ။ ၵဝ်ၼႆႉႁႂ်ႈပဵၼ်ႁွႆးၸဵပ်းဢေႃႈ။ ၵဝ်ၼႆႉယႃႁႂ်ႈႁၢႆဢေႃႈ။ ၽူႈလႂ်ဢမ်ႇၵႄႇသႄႇၼုၵ်ႈဢဝ်ၵႃႈၼႂ်းမိုဝ်းၵဝ်လႆႈသေၵေႃႉသေၵူၼ်း။
ၵႃႈၸူဝ်ႈဢၼ်ၵဝ်ပဵၼ်ၽြႃးပဵၼ်ၸဝ်ႈဢၼ် ဢသၢၵ်ႈလိပ်းယူႇၼႆႉၼၼ်ႉ၊ ၵဝ်ယူၵ်ႉမိုဝ်းၵဝ်သေလႄႈတိူင်ႇဝႃႈ၊
ၵဝ်တၵ်းလပ်ႉလၢပ်ႇၵဝ်ဢၼ်သွင်ႇႁိူဝ်ႈၼၼ်ႉ သေလႄႈ ပႂ်ႉတူၺ်းႁႂ်ႈမီးတၢင်းဢၼ်ၸီႇယၢင်ႇၸွမ်းၼင်ႇ တြႃးၼၼ်ႉဢေႃႈ။ ၵဝ်တၵ်းၶိုၼ်းတွပ်ႇတႅၼ်းတီႈရၢၼ်ႇသူႇၵဝ် တင်းလၢႆသေလႄႈ ၸီႇယၢင်ႇပၼ်တၢမ်ႇတီႈၶဝ်ၸိူဝ်းဢၼ် ၸင်းၵဝ်ၼၼ်ႉဢေႃႈ။
ပိုၼ်ၵၢင်ႇၵဝ်တင်းလၢႆ တၵ်းၸုမ်ႇသႂ်ႇၼႂ်းလိူတ်ႈၶဝ်၊ လၢပ်ႇၵဝ်တၵ်းၽၼ်းၶဝ်ၸိူဝ်းဢၼ်သၢၼ်ၶတ်းၵၼ်တင်းၵဝ်ၼၼ်ႉတၢႆဢေႃႈ။ ၵဝ်တၵ်းဢမ်ႇသေလၢႆၶဝ်ၸိူဝ်းဢၼ်တိုၵ်းတေႃးၵၼ်တင်းၵဝ်၊ ၸႃႉၸဵမ်ၵူၼ်းၸိူဝ်းဢၼ်ၸဵပ်းဢၼ်မၢတ်ႇလႂ်၊ဢိၵ်ႇတင်းၵူၼ်းဢၼ်လႆႈၶၢမ်ႇတၢင်းဢၼ်တိဢဝ်လႂ်၊ယင်းတၵ်းတေတၢႆဢေႃႈ၊’ ဝႃႈၼင်ႇၼႆဢေႃႈ။
ၵူၼ်းတၢင်ႇၸိူဝ်ႉတၢင်ႇၶိူဝ်းၶဝ်႟။ သူတၵ်းလႆႈဢွၼ်ၵၼ်ယွင်ႈယေႃးၵူၼ်း ထႃႇဝရႃႉၽြႃး၊ တင်းလၢႆၵွပ်ႈပိူဝ်ႈဢၼ် မၼ်းၸဝ်ႈၸီႇယၢင်ႇပၼ်တၢမ်ႇၶဝ်တင်းမူတ်းဢၼ်ဢဝ်ၵူၼ်းမၼ်းၸဝ်ႈတၢႆၼၼ်ႉဢေႃႈ။ မၼ်းၸဝ်ႈၶိုၼ်းတွပ်ႇၶိုၼ်းတႅၼ်းတီႈရၢၼ်ႇသူႇမၼ်းၸဝ်ႈၸိူဝ်းၼၼ်ႉလႄႈ ပွႆႇၶႂၢင်းဢပျတ်ႈၵူၼ်းမၼ်းၸဝ်ႈဢေႃႈ၊” ဝႃႈၼင်ႇၼႆဢေႃႈ။
မူဝ်းသေႇ၊ တင်း ယေႃးသု၊ လုၵ်ႈၸၢႆး ၼုၼ်ႇ၊ ၼၼ်ႉဢွၼ်ၵၼ်ႁဵတ်းလိၵ်ႈႁဵတ်းၵႂၢမ်းၼႆႉပုၼ်ႈလွင်ႈၼင်ႇႁိုဝ်ၵူၼ်းမဵဝ်း ဢိသရေး၊ တင်းလၢႆတၵ်းထွမ်ႇငိၼ်းဢေႃႈ။
မိူဝ်ႈဢၼ် မူဝ်းသေႇ၊ ဢဝ်ၵႂၢမ်းၽြႃးပဵၼ်ၸဝ်ႈၵႃႈမီးၸိူဝ်းၼၼ်ႉမွၵ်ႇလၢတ်ႈၵူၼ်းမဵဝ်း ဢိသရေး၊ တင်းလၢႆယဝ်ႉတူဝ်ႈယဝ်ႉၼၼ်ႉၸိုင်၊-
မၼ်းလၢတ်ႈတီႈၶဝ်လႄႈဝႃႈ၊ “ၼင်ႇႁိုဝ်သူတၵ်းပႂ်ႉၵမ်ပႂ်ႉၸွမ်းၵႂၢမ်းပိင်းၺၢပ်ႈၸဝ်ႈၵႃႈမီးဢၼ်ၵဝ်သင်ႇလၢတ်ႈသူဝၼ်းမိူဝ်ႈၼႆႉၼၼ်ႉၸိုင်၊ႁဵတ်းသတိတႃႉ။ သမ်ႉဢဝ်ၵႂၢမ်းၼႆႉသင်ႇလၢတ်ႈထိုင်တီႈလုၵ်ႈလၢင်းသူတင်းလၢႆပုၼ်ႈလွင်ႈၼင်ႇႁိုဝ်ၶဝ်ၵေႃႈတၵ်းဢွၼ်ၵၼ်ပႃးတင်းသဵတ်ႈၸႃႇလႄႈပႂ်ႉၵမ်ပႂ်ႉၸွမ်းပိင်းၺၢပ်ႈၸဝ်ႈတင်းလၢႆၼၼ်ႉတႃႉ။-
ၵႂၢမ်းၸိူဝ်းၼႆႉပဵၼ်ၵႂၢမ်းပဝ်ႇၵႂၢမ်းလၢႆဢမ်ႇၸႂ်ႈ။ ပဵၼ်ဢသၢၵ်ႈသူဢေႃႈ။ ပေႃးသူပႂ်ႉၵမ်ပႂ်ႉၸွမ်းၸိုင်၊ၸူဝ်ႈဢသၢၵ်ႈသူတၵ်းယိုၼ်းယၢဝ်းၵႃႈၼႂ်းမိူင်းဢၼ်သူတၵ်းၶၢမ်ႈၼမ်ႉ ယေႃးတၢၼ်ႇ၊ လႄႈၶဝ်ႈဢုပ်ႉပိူင်ႇၸၢမ်ႇၸႃးၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၼႂ်းဝၼ်းၼၼ်ႉၵမ်းလဵဝ် ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ လႄႈဝႃႈ၊-
“မႂ်းၵႂႃႇၸူးတီႈလွႆၶိူဝ်း ဢပႃႇရိမ်ႇ၊ ၸိူဝ်းဢၼ်မီးၵႃႈၼႂ်းမိူင်း မေႃႇၽႃႉ၊ ဢၼ်တေႃႇၼႃႈၵၼ်တင်းဝဵင်း ယေႇရိၶူဝ်း၊ ပုၼ်ႉသေယဝ်ႉ၊ၶိုၼ်ႈၵႃႈၼိူဝ်လွႆ ၼေႇပေႃႇ၊ လႄႈ မုင်ႈတူၺ်းမိူင်း ၶႃႇၼၼ်ႇ၊ ဢၼ်ၵဝ်တၵ်းပၼ်တီႈၵူၼ်းမဵဝ်း ဢိသရေး၊ တင်းလၢႆႁႂ်ႈၶဝ်ပိူင်ႇၼၼ်ႉတႃႉ။-
မႂ်းတၵ်းတၢႆၵႃႈၼိူဝ်လွႆၼၼ်ႉမိူၼ်ၸိူဝ်ႉၼင်ႇဢၼ်ပီႈဢၢႆႈမႂ်း ဢႃႇရုၼ်ႇ၊ တၢႆၵႂႃႇၵႃႈတီႈၼိူဝ်လွႆ ႁေႃးရႃႉ၊ ၼၼ်ႉဢေႃႈ။-
လွင်ႈမၼ်းၸမ်ႉ၊သူသွင်ၵေႃႉဢမ်ႇပႂ်ႉသဵတ်ႈၸႃႇတေႃႇၵဝ်ၵႃႈၼႂ်းၶိုင်ႈၵၢင်ၵူၼ်းမဵဝ်း ဢိသရေး၊ တင်းလၢႆၵႃႈတီႈၼမ်ႉဢွၵ်ႇႁူး မေႇရိၽႃႉ၊ ဝၢၼ်ႈ ၵႃႇတေႇသႃႉ၊ ထိူၼ်ႇလႅင်ႉ ၸိၼႃႉ၊ ၼၼ်ႉလႄႈဢမ်ႇလႆႈၼႄပျႃးတၢင်းဢၼ်ၵဝ်မူတ်းၸၢင်ႇၵႃႈၼႂ်းၶိုင်ႈၵၢင်ၵူၼ်းမဵဝ်း ဢိသရေး၊ တင်းလၢႆၼၼ်ႉယဝ်ႉ။-
မႂ်းတၵ်းတေလႆႈယူႇတီႈဢၼ်ၵႆၼႃႇလႄႈမုင်ႈႁၼ်မိူင်းၼၼ်ႉဢေႃႈ။ ၵူၺ်းၵႃႈ၊မႂ်းတၵ်းတေဢမ်ႇလႆႈၶဝ်ႈၵႃႈၼႂ်းမိူင်းဢၼ်ၵဝ်တၵ်းပၼ်တီႈၵူၼ်းမဵဝ်း ဢိသရေး၊ တင်းလၢႆၼၼ်ႉ၊” ဝႃႈၼင်ႇၼႆဢေႃႈ။
ၵႂၢမ်းၸိူဝ်းၼႆႉၸမ်ႉ၊ပဵၼ်ၵႂၢမ်းမၢင်ႇၵလႃႇဢၼ် မူဝ်းသေႇ၊ ၵေႃႉဢၼ်ပဵၼ်ၵူၼ်းၽြႃးပဵၼ်ၸဝ်ႈပၼ်တၢင်းလီတီႈၵူၼ်းမဵဝ်း ဢိသရေး၊ တင်းလၢႆၸူဝ်ႈဢၼ်မၼ်းဢမ်ႇပႆႇတၢႆၼၼ်ႉဢေႃႈ။
ထႃႇဝရႃႉၽြႃး၊ လုၵ်ႉသေၵႃႈတီႈလွႆ သိၼႃႉ၊ မႃးလႄႈ မၼ်းၸဝ်ႈၵျွမႃးမိူၼ်ၸိူဝ်ႉၼင်ႇၵၢင်ဝၼ်းဢွၵ်ႇမႃးၵႃႈၼိူဝ်မိူင်း ဢေႇတုမ်ႇ၊ ၼၼ်ႉသေယဝ်ႉ၊ လုၵ်ႉသေၵႃႈတီႈလွႆ ပႃႇရၼ်ႇ၊ ႁိူဝ်ႈလႅင်းၵႃႈၼိူဝ်ၵူၼ်းမၼ်းၸဝ်ႈဢေႃႈ။ တမၢၼ်ႇၵၢင်ႁၢဝ်ပဵၼ်ႁဵင်ပဵၼ်မိုၼ်ႇမႃးလူၺ်ႈ မၼ်းၸဝ်ႈလႄႈ ၽႆးထမ်ႇမႃႉတြႃးလုၵ်ႉႁိူဝ်ႈယူႇၵႃႈတီႈ မိုဝ်းၶွၼ်ၶႂႃၸဝ်ႈဢေႃႈ။
ထႃႇဝရႃႉၽြႃး၊ ႁၵ်ႉၵူၼ်းတင်းလၢႆလႄႈ ၸွႆႈႁႄႉၸွႆႈၶႅၼ်ၶဝ်ၸိူဝ်းဢၼ်ပဵၼ်ၵူၼ်း မၼ်းၸဝ်ႈယူႇဢေႃႈ။ ပိူဝ်ႈၼႆလႄႈႁဝ်းဢွၼ်ၵၼ်ၵူမ်ႈၵွမ်းယူႇ ၵႃႈတီႈႁိမ်းတိၼ်မၼ်းၸဝ်ႈလႄႈ ႁပ်ႉထွမ်ႇဢဝ်ၵႂၢမ်းမၼ်းၸဝ်ႈယူႇဢေႃႈ။
ႁဝ်းႁပ်ႉထွမ်ႇဢဝ်ပိင်းၺၢပ်ႈတြႃးၸဝ်ႈဢၼ် မူဝ်းသေႇ၊ သင်ႇလၢတ်ႈတီႈႁဝ်း၊ ဢၼ်ဝႃႈဢမူၺ်ႇၸေးၸိမ်ႇဢၼ်ယႂ်ႇမျၢတ်ႈပုၼ်ႈၵူၼ်းမဵဝ်းႁဝ်းၼႆႉဢေႃႈ။
ထႃႇဝရႃႉၽြႃး၊ ပဵၼ်ၶုၼ်ႁေႃၶမ်းၵႃႈၼိူဝ်ၵူၼ်းမၼ်းၸဝ်ႈမဵဝ်း ဢိသရေး၊ ၼႂ်းမိူဝ်ႈဢၼ်ၵူၼ်းၸိူဝ်ႉၶိူဝ်းၶဝ်တင်းၵူၼ်းဢၼ်ပဵၼ်ၵႄႇပဵၼ်ႁူဝ်ၶဝ်ဢွၼ်ၵၼ်ႁဵတ်းမုၵ်ႉႁဵတ်းၸိူဝ်းၸုတုမ်ၵၼ်ယူႇၼၼ်ႉဢေႃႈ။
ၵႂၢမ်းမၢင်ႇၵလႃႇပုၼ်ႈၸိူဝ်ႉၶိူဝ်း ရုပိၼ်ႇ၊ ၸမ်ႉ ပိၵ်ႉသမ်ႉၵူၼ်းမဵဝ်းမၼ်းလဵၵ်ႉၵေႇဢေႇမၢင် သေၵေႃႈ၊ ယႃႇပေႁႂ်ႈၸိူဝ်ႉၶိူဝ်း ရုပိၼ်ႇ၊ ၼၼ်ႉတၢႆၵႂႃႇႁၢႆၵႂႃႇလႄႈႁႂ်ႈတႄႇယူႇသေၵမ်းလူၺ်ႈ။
ၵႂၢမ်းမၢင်ႇၵလႃႇပုၼ်ႈၸိူဝ်ႉၶိူဝ်း ယုတႃႉ၊ ၸမ်ႉ ထႃႇဝရႃႉၽြႃး၊ တီႈၶႃႈ။ ထွမ်ႇဢဝ်သဵင်ၵႂၢမ်း ယုတႃႉ၊ သေလႄႈ ႁႂ်ႈၶဝ်ၶိုၼ်းလီၵၼ်တင်းၵူၼ်းမဵဝ်းလဵဝ်ၵၼ်တင်းမၼ်းသေၵမ်းတီႈၶႃႈ။ ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈယူႇၽၢႆႇၶဝ်သေလႄႈတိုၵ်းတေႃးပၼ်သေၵမ်းၶႃႈ။ ၸွႆႈထႅမ်ႁႂ်ႈၶဝ်ၶတ်းၶဵင်ႇပႄႉရၢၼ်ႇသူႇ ၶဝ်သေၵမ်းတီႈၶႃႈ။
ၵႂၢမ်းမၢင်ႇၵလႃႇပုၼ်ႈၸိူဝ်ႉၶိူဝ်း လေႇဝိ၊ ၸမ်ႉ ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းဢဝ်တင်းၵူၼ်းၸိူဝ်ႉၶိူဝ်း လေႇဝိ၊ ၶႃႈဢၼ်ပႂ်ႉသဵတ်ႈၸႃႇတီႈၸဝ်ႈႁဝ်းၼၼ်ႉ၊ ၽုၺ်ႇၼႄဢလူဝ်ႇၸဝ်ႈႁဝ်းလူၺ်ႈႀုမိမ်းတင်း ဢုရိမ်း တီႈၶႃႈဢေႃႈ။ ၸဝ်ႈႁဝ်းၸၢမ်းတူၺ်းၸႂ်ၶဝ်ၵႃႈတီႈပၢင်ႇ မတ်ႉသႃႇ၊ သေလႄႈ ႁပ်ႉတုင်းဢဝ်လွင်ႈဢၼ်ၶဝ်မၢၼ်ႇမႅၼ်ႈၸိုဝ်ႈၸႂ်ႈၵႃႈတီႈၼမ်ႉဢွၵ်ႇႁူး မေႇရိၽႃႉ၊ ဢေႃႈ။
ၶဝ်ၼႄပျႃးလွင်ႈဢၼ်ၶဝ်ယဵင်ႈၶႅၼ်းရူဝ်ႇသေႇၵူဝ်ယမ်ၸဝ်ႈႁဝ်း၊ လိူဝ်တွၼ်းသေပေႃႈမႄႈ၊ပီႈၼွင်ႉ၊လုၵ်ႈလၢင်းၶဝ်ၼၼ်ႉဢေႃႈ။ ၶဝ်ပႂ်ႉၵမ်ပႂ်ႉၸွမ်း၊ပိင်းၺၢပ်ႈတြႃးၸဝ်ႈႁဝ်း တင်းလၢႆလႄႈ ပႂ်ႉသဵတ်ႈၸႃႇၵႃႈတီႈပတိၺိၺ်ႇၸဝ်ႈႁဝ်းၼၼ်ႉတီႈၶႃႈဢေႃႈ။
ၶဝ်တၵ်းဢွၼ်ၵၼ်သင်ႇသွၼ်ပၼ်တီႈလုၵ်ႈလၢင်းၸဝ်ႈႁဝ်းတင်းလၢႆ၊ ႁႂ်ႈၶဝ်ပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၸဝ်ႈႁဝ်း တီႈၶႃႈဢေႃႈ။ ၶဝ်တၵ်းဢွၼ်ၵၼ်ႁဵတ်းတၢင်းလူႇသၢၵ်ႈၵၢပ်ႈ၊ ၵႃႈၼိူဝ်ၶဵင်ႇတၢင်းလူႇၸဝ်ႈႁဝ်းတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈၸွႆႈထႅမ်ႁႂ်ႈၸိူဝ်ႉၶိူဝ်းၶဝ်ၶိုၼ်ႈယႂ်ႇမႂ်ႇသုင်သေၵမ်းတီႈၶႃႈ။ ၶႅၼ်းတေႃႈမီးတၢင်းဢၼ်ထုၵ်ႇၸႂ်ၵျိူၵ်ႈၸႂ် လွင်ႈတၢင်းဢၼ်ၶဝ်ႁဵတ်းၶဝ်သၢင်ႈၼၼ်ႉ သေၵမ်းတီႈၶႃႈ။ ၶႅၼ်းတေႃႈၶိုတ်ႈၼူတ်ႈရၢၼ်ႇသူႇၶဝ် တင်းလၢႆႁႂ်ႈလုလႅဝ်ၵႂႃႇလႄႈ ဢမ်ႇလုၵ်ႉလႆႈထႅင်ႈသေပွၵ်ႈၼၼ်ႉ သေၵမ်းတီႈၶႃႈ။
ၵႂၢမ်းမၢင်ႇၵလႃႇပုၼ်ႈၸိူဝ်ႉၶိူဝ်း ပိၼ်ႇယႃႇမိၼ်ႇ၊ ၸမ်ႉ၊ ၸိူဝ်ႉၶိူဝ်းၼႆႉၸမ်ႉ၊ ထႃႇဝရႃႉၽြႃး၊ ႁၵ်ႉလႄႈ ႁႄႉၶႅၼ်မႃႉၸႃႉတီႈၶႃႈဢေႃႈ။ မၼ်းၸဝ်ႈပႂ်ႉႁႄႉပႂ်ႉၶႅၼ်ၶဝ်တင်းဝၼ်း တင်းဝၼ်းလႄႈ မီးယူႇလူၺ်ႈၵႃႈၼႂ်းၵႄႈဝူင်ႈၵၢင်ၶဝ်တီႈၶႃႈဢေႃႈ။
ၵႂၢမ်းမၢင်ႇၵလႃႇပုၼ်ႈၸိူဝ်ႉၶိူဝ်း ယူဝ်းသႅပ်ႈ၊ ၸမ်ႉ ႁႂ်ႈ ထႃႇဝရႃႉၽြႃး၊ ပၼ်တၢင်းလီတီႈမိူင်းၶဝ် လူၺ်ႈၼမ်ႉၽူၼ်၊ တင်းၼမ်ႉဢၼ်ဢွၵ်ႇၵႃႈတီႈတႂ်ႈလိၼ် သေၵမ်းလူၺ်ႈ။
ႁႂ်ႈမၢင်ႇၵလႃႇတၢင်းဢၼ်ၵၢင်ဝၼ်းႁဵတ်းႁႂ်ႈ မၢၵ်ႇမႆႉသုၵ်းမႃးဢိၵ်ႇတင်း၊ ႁႂ်ႈမၢၵ်ႇမႆႉမၢၵ်ႇတွၵ်ႇလိူင်ႇၼမ်ၸွမ်းၼင်ႇ ဢုတုယႃႇသီႇသေၵမ်းလူၺ်ႈ။
ႁႂ်ႈလွႆမိူင်းၶဝ်ဢၼ်ပဵၼ်ဝႆႉမီးဝႆႉၸဵမ် မိူဝ်ႈၵွၼ်ႇဢွၼ်ၼႆႉ၊ တေႃႇထိုင်ႁွတ်ႈၶိင်ႇၵႃႇလႃႉသိုပ်ႇသိုပ်ႇ တၢမ်တၢမ်ၼၼ်ႉ၊ ႁူမ်ႇသုမ်ႇဝႆႉတင်းမၢၵ်ႇဢၼ်လီဢၼ်မျၢတ်ႈ သေၵမ်းလူၺ်ႈ။
ႁႂ်ႈမိူင်းၶဝ်တဵမ်ဝႆႉတင်းၽၼ်ႇတႃႇဢၼ်လီ ဢၼ်မျၢတ်ႈသေၵမ်းလူၺ်ႈ။ ႁႂ်ႈတၢင်းဢၼ်မျၢတ်ႈလီ ထႃႇဝရႃႉၽြႃး၊ ဢၼ်လၢတ်ႈဢွၵ်ႇၵႃႈတီႈ၊ ယုမ်းၽႆးမႆႈၼၼ်ႉပၼ်မၢင်ႇၵလႃႇသေၵမ်းလူၺ်ႈ။ ႁႂ်ႈမၢင်ႇၵလႃႇၸိူဝ်းၼႆႉတူၵ်းႁွတ်ႈၵႃႈၼိူဝ် ၸိူဝ်ႉၶိူဝ်း ယူဝ်းသႅပ်ႈ၊ ၵွပ်ႈပိူဝ်ႈဢၼ်မၼ်းပဵၼ်ၵူၼ်းတူၼ်ႈၵူၼ်းႁူဝ်ၼႂ်း၊ ပီႈၼွင်ႉမၼ်းတင်းလၢႆၼၼ်ႉသေၵမ်းလူၺ်ႈ။
ယူဝ်းသႅပ်ႈ၊ မီးဢဵၼ်ႁႅင်းဝူဝ်းငၢၼ်လူင်ဢုၵ်ႉသၽႃႉလႄႈမီးၶဝ်လႅမ်ၸူင်ဢေႃႈ။ ၶဝ်လႅမ်ၸိူဝ်းၼၼ်ႉပဵၼ်မဵဝ်း မၼႃႇသေႇ၊ ပဵၼ်ႁဵင်ပဵၼ်ႁဵင်၊ ဢိၵ်ႇတင်းပဵၼ်မဵဝ်း ဢေႇၽရိမ်ႇ၊ ပဵၼ်မိုၼ်ႇ ပဵၼ်မိုၼ်ႇလႄႈ မၼ်းၸဝ်ႈဢဝ်ၶဝ်လႅမ်ၸိူဝ်းၼၼ်ႉပတ်ႉသၢႆႇ တႅင်းသႂ်ႇၵူၼ်းၵူႈၶိူဝ်းၶိူဝ်းလႄႈ တမ်တေႃးၶဝ်ၵႂႃႇတေႃႇထိုင်ႁွတ်ႈတီႈသုတ်း လိၼ်မိူင်းဢေႃႈ။
ၵႂၢမ်းမၢင်ႇၵလႃႇပုၼ်ႈၸိူဝ်ႉၶိူဝ်း ၸေႇပုလုၼ်ႇ၊ တင်း ဢိသၶႃႇ၊ ၸမ်ႉ ႁႂ်ႈမဵဝ်း ၸေႇပုလုၼ်ႇ၊ လႆႈလီလႆႈပဵၼ်ၼႂ်းတၢင်းဢၼ်ၶဝ်ၵႃႉၶၢႆၸွမ်းၶၢဝ်းတၢင်းပၢင်ႇလၢႆႇၼၼ်ႉသေၵမ်းလူၺ်ႈ။ ႁႂ်ႈမဵဝ်း ဢိသၶႃႇ၊ မၢၵ်ႈမီးလီပဵၼ်ယူႇတီႈႁိူၼ်းတီႈယေးၶဝ်သေၵမ်းလူၺ်ႈ။
ၶဝ်ၽိတ်ႈႁွင်ႉၵူၼ်းတၢင်ႇၸိူဝ်ႉတၢင်ႇၶိူဝ်းၼမ်ၼႃႇမႃးၵႃႈတီႈလွႆၸဝ်ႈလႄႈ ၶဝ်ဢွၼ်ၵၼ်ႁဵတ်းတၢင်းလူႇလႄႈသၢၵ်ႈၵၢပ်ႈ ၸွမ်းၼင်ႇတြႃးၵႃႈတီႈၼၼ်ႈဢေႃႈ။ ၶဝ်လႆႈၸေးၸိမ်ႇဢုၵ်ႉၸႃႇမႃးၵႃႈတီႈပၢင်ႇလၢႆႇဢိၵ်ႇတင်းၵႃႈတီႈႁၢတ်ႇသၢႆးၸွမ်းၽင်ႇပၢင်ႇလၢႆႇဢေႃႈ။
ၵႂၢမ်းမၢင်ႇၵလႃႇပုၼ်ႈၸိူဝ်ႉၶိူဝ်း ၵၢတ်ႉ၊ ၸမ်ႉ၊ႁႂ်ႈၽြႃးပဵၼ်ၸဝ်ႈဢၼ်ႁႂ်ႈမဵဝ်း ၵၢတ်ႉ၊ ၶိုၼ်ႈယႂ်ႇမႂ်ႇသုင်ၼၼ်ႉမီးမၢင်ႇၵလႃႇသေၵမ်းလူၺ်ႈ။ မဵဝ်း ၵၢတ်ႉ၊ ပႂ်ႉယူႇမိူၼ်ၸိူဝ်ႉၼင်ႇသၢင်ႇသီႈႁႂ်ႈလႆႈၸၵ်ႉသိၵ်ႇၶႅၼ်မိုဝ်းတင်းၸိၵ်းႁူဝ်ပႅတ်ႈဢေႃႈ။
ၶဝ်သိမ်းဢဝ်တီႈလိၼ်ဢၼ်လီသေပိူၼ်ႈၼၼ်ႉ ဝႆႉပုၼ်ႈတူဝ်ၸဝ်ႈၵဝ်ႇ၊ ၵွပ်ႈပိူဝ်ႈဢၼ်ပုၼ်ႈတႃႇၵူၼ်းတူၼ်ႈၵူၼ်းႁူဝ်ၼၼ်ႉၸတ်းၽႄဝႆႉပုၼ်ႈၶဝ်ယဝ်ႉ။ ၶဝ်ၼၼ်ႉပႂ်ႉၵမ်ပႂ်ႉၸွမ်းပိင်းၺၢပ်ႈၸဝ်ႈတင်း ထုင်းတြႃး ထႃႇဝရႃႉၽြႃး၊ တင်းလၢႆ၊ ၼႂ်းမိူဝ်ႈဢၼ်ၵူၼ်းတူၼ်ႈၵူၼ်းႁူဝ်မဵဝ်း ဢိသရေး၊ ႁဵတ်းမုၵ်ႉႁဵတ်းၸိူဝ်းၸုတုမ်ၵၼ်ၼၼ်ႉဢေႃႈ။
ၵႂၢမ်းမၢင်ႇၵလႃႇပုၼ်ႈၸိူဝ်ႉၶိူဝ်း တၢၼ်ႇ၊ ၸမ်ႉ မဵဝ်း တၢၼ်ႇ၊ ပဵၼ်သၢင်ႇသီႈၼုမ်ႇဢၼ်ၵျွၵ်းဝႅၼ်ဢွၵ်ႇဝဵင်း ပႃႇသၢၼ်ႇ၊ မႃးၼၼ်ႉဢေႃႈ။
ၵႂၢမ်းမၢင်ႇၵလႃႇပုၼ်ႈၸိူဝ်ႉၶိူဝ်း ၼပ်ႉထလိ၊ ၸမ်ႉ၊ မဵဝ်း ၼပ်ႉထလိ၊ လႆႈႁပ်ႉၶၢမ်ႇတုင်းဢဝ်မၢင်ႇၵလႃႇတၢင်းဢၼ် ထႃႇဝရႃႉၽြႃး၊ ႁဵတ်းၵျေးၸူးပၼ်ၼၼ်ႉယဝ်ႉ။ ၶဝ်လႆႈၸၢမ်ႇၸႃးမိူင်းပွတ်းတၢင်းၸၢၼ်းၶိုၼ်ႈထိုင်ပၢင်ႇလၢႆႇ ၵႃႇလိလႄး၊ ယဝ်ႉ။
ၵႂၢမ်းမၢင်ႇၵလႃႇပုၼ်ႈၸိူဝ်ႉၶိူဝ်း ဢႃႇသျႃႇ၊ ၸမ်ႉ၊ ဢႃႇသျႃႇ၊ လႆႈႁပ်ႉၶၢမ်ႇတုင်းဢဝ်မၢင်ႇၵလႃႇ၊ လိူဝ်တွၼ်းၼႃႇသေၸိူဝ်ႉၶိူဝ်းတၢင်ႇၸိူဝ်ႉတၢင်ႇၶိူဝ်းၼၼ်ႉဢေႃႈ။ မၼ်းထုၵ်ႇၸႂ်ၵျိူၵ်ႈၸႂ်ပီႈၼွင်ႉမၼ်းလႄႈႁႂ်ႈမိူင်းမၼ်းမၢၵ်ႈမီးလူၺ်ႈတူၼ်ႈမႆႉသၢၼ်ႇလုၼ်ႇ သေၵမ်းလူၺ်ႈ။
ႁႂ်ႈၵၢၼ်းၵိူၼ်ႇၽၵ်းတူဝဵင်းမၼ်းတၵ်းပဵၼ်လဵၵ်း ပဵၼ်တွင်းလိူင်လႄႈ ႁႂ်ႈမၼ်းလႆႈယူႇလူင်ႉလီလွတ်ႈလီတႃႇသေႇ သေၵမ်းလူၺ်ႈ။
ၵူၼ်းမဵဝ်း ဢိသရေး၊ ၶဝ်႟။ ၽြႃးတၢင်ႇသူႇ တၢင်ႇပႃးဢၼ်၊ မိူၼ်ၵၼ်တင်းၽြႃးပဵၼ်ၸဝ်ႈသူဢၼ်၊ ပႃးတင်းမုၼ်ၽုင်းဢႃႇၼုၽေႃႇၶီႇၽႃႉၵၢင်ႁၢဝ်၊ၶီႇမွၵ်ႇၵုမ်ႈလူင်းမႃးႁႂ်ႈလႆႈၸွႆႈထႅမ်သူၼၼ်ႉဢမ်ႇမီးလႃးလႃး။
ၽြႃးပဵၼ်ၸဝ်ႈ ပဵၼ်တီႈဢၼ်သူသွၼ်ႈပိုင်ႈ ယူႇသေႇသေႇလႄႈ ၶႅၼ်မိုဝ်းၸဝ်ႈၼၼ်ႉႁႄႉၶႅၼ်ပၼ်ယူႇတႃႇသေႇလႄႈႁေႃႈပႅတ်ႈရၢၼ်ႇသူႇသူႁႂ်ႈၼီပၢႆႈၼႂ်းမိူဝ်ႈဢၼ်သူၶီႇသိုၵ်းၶိုၼ်ႈလႄႈ ပၼ်ဢၶႂၢင်ႉလႄႈဝႃႈ၊ “ယႃႉၽဵဝ်ႈၶဝ်ပႅတ်ႈတႃႉ” ဝႃႈၼႆဢေႃႈ။
ပိူဝ်ႈၼႆလႄႈၵူၼ်းမဵဝ်း ဢိသရေး၊ လႆႈယူႇ သဵတ်ႇလီၼိမ်လီ၊ လႆႈယူႇလူင်ႉလီလွတ်ႈလီၵႃႈၼႂ်းမိူင်းဢၼ်တဵမ်ဝႆႉတင်းၶဝ်ႈပိူၵ်ႇတင်းၼမ်ႉမၢၵ်ႇၸပိတ်ႉ၊ တီႈဢၼ်ၼမ်ႉၼၢႆးၵၢင်ႁၢဝ်ဢွႆသႂ်ႇၵႃႈၼိူဝ်လိၼ်ၼၼ်ႉဢေႃႈ။
ၵူၼ်းမဵဝ်း ဢိသရေး၊ ႟။ သူမီးမၢင်ႇၵလႃႇဢေႃႈ။ မဵဝ်းဢၼ် ထႃႇဝရႃႉၽြႃး၊ ၵႄႇၶျွတ်ႈဢဝ်႟။ ၽူႈလႂ်ဢမ်ႇမိူၼ်ၵၼ်တင်းသူ၊ တူဝ် ထႃႇဝရႃႉၽြႃး၊ ပဵၼ်ၶႅပ်းႁႄႉလၢၵ်ႈၼၢၵ်ႈသူ၊ပဵၼ်လၢပ်ႇပဵၼ်လႅဝ်းႁႂ်ႈလႆႈႁႄႉၵင်ႈသူလႄႈႁႂ်ႈသူလႆႈဢွင်ႇသိုၵ်းဢေႃႈ။ ရၢၼ်ႇသူႇသူတၵ်းဢွၼ်ၵၼ်မႃးၵူမ်ႈၵွမ်းၼွမ်းၶၢမ်ႇသူလႄႈသူတၵ်းယဵပ်ႇယမ်ႈၶဝ်ဢေႃႈ။
မူဝ်းသေႇ၊ လုၵ်ႉသေၵႃႈတီႈပၢင်ႇပဵင်း မေႃႇၽႃႉ၊ ၵႂႃႇၵႃႈၼိူဝ်လွႆ ၼေႇပေႃႇ၊ လႄႈၶိုၼ်းၸူးၵႃႈတီႈၸိၵ်းလွႆ ပိသၵႃႇ၊ ၽၢႆႇဝၼ်းဢွၵ်ႇဝဵင်း ယေႇရိၶူဝ်း၊ သေယဝ်ႉ၊ ထႃႇဝရႃႉၽြႃး၊ ၼႄပျႃးမိူင်းတင်းမိူင်း၊တႄႇဢဝ်မိူင်း ၵိလတ်ႉ၊ တေႃႇထိုင်ႁွတ်ႈဝဵင်း တၢၼ်ႇ၊-
မိူင်း ၼပ်ႉထလိ၊ တင်းမိူင်း၊မိူင်း ဢေႇၽရိမ်ႇ၊ မိူင်း မၼႃႇသေႇ၊ မိူင်း ယုတႃႉ၊ တင်းသဵင်ႈတင်းလူင်တေႃႇထိုင်ႁွတ်ႈပၢင်ႇလၢႆႇ မေႇတိထေးရီးယၼ်း၊-
မိူင်း ယုတႃႉ၊ ပွတ်းၸၢၼ်းဢိၵ်ႇတင်းပၢင်ႇပဵင်းၵႄႈလွႆဝဵင်း ယေႇရိၶူဝ်း၊ ဢၼ်ဝႃႈ၊ ဝဵင်းတူၼ်ႈထၢၼ်၊ တေႃႇထိုင်ႁွတ်ႈဝဵင်း ၸေႃႇရႃႉ၊ ၸိူဝ်းၼၼ်ႉတီႈမၼ်းဢေႃႈ။-
ထႃႇဝရႃႉၽြႃး၊ ၵေႃႈမီးဢမိင်ႉတီႈ မူဝ်းသေႇ၊ လႄႈဝႃႈ၊ “မိူင်းၼႆႉပဵၼ်မိူင်းဢၼ်ၵဝ်တိူင်ႇဝႃႈၵတိဝႆႉတီႈ ဢႃႇပြႃႇႁၢမ်ႇ၊ ဢိၵ်ႇတင်း ဢိၸၢၵ်ႈ၊ ဢိၵ်ႇတင်း ယႃႇၵုပ်ႈ၊ လႄႈဝႃႈ၊ ‘ၵဝ်တၵ်းပၼ်တီႈၸိူဝ်ႉၶိူဝ်းသူဢေႃႈ၊’ ဝႃႈၼႆၼၼ်ႉယဝ်ႉ။ ၵဝ်ပၼ်ဢၶႂၢင်ႉဢၼ်မႂ်းလႆႈမုင်ႈႁၼ်ယဝ်ႉ။ ၵူၺ်းၵႃႈ၊ၵဝ်ဢမ်ႇပၼ်ဢၶႂၢင်ႉႁႂ်ႈမႂ်းလႆႈၶဝ်ႈၵႂႃႇၵႃႈတီႈၼၼ်ႈ၊” ဝႃႈၼင်ႇၼႆဢေႃႈ။
ၼင်ႇၼၼ်လႄႈ မူဝ်းသေႇ၊ ၵေႃႉဢၼ်ပဵၼ်ၶႃႈ ထႃႇဝရႃႉၽြႃး၊ ၼၼ်ႉလႆႈသဵင်ႈၵၢမ်ႇၵႂႃႇၵႃႈတီႈၼၼ်ႈၵႃႈၼႂ်းမိူင်း မေႃႇၽႃႉ၊ ၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉဝႆႉၼၼ်ႉဢေႃႈ။-
ထႃႇဝရႃႉၽြႃး၊ ဢဝ်မၼ်းသၢင်းၵျူဝ်ႇၵႃႈၼႂ်းပၢင်ႇႁူၺ်ႈတီႈၼိုင်ႈၵႃႈၼႂ်းမိူင်း မေႃႇၽႃႉ၊ တီႈဢၼ်တေႃႇၼႃႈၵၼ်တင်းဝဵင်း ပႅတ်ႉပေႇဢုရႃႉ၊ ၼၼ်ႉဢေႃႈ။ ၼႂ်းဝႃႈၼၼ်သေၵေႃႈၵေႃႉဢၼ်ႁုႁၼ်ပႃႇႁဵဝ်ႈသၢင်းၶႅင်းမၼ်းၼၼ်ႉဢမ်ႇမီးသေၵေႃႉသေၵူၼ်းႁၢၼ်ႉတေႃႇႁွတ်ႈဝၼ်းမိူဝ်ႈၼႆႉဢေႃႈ။
မိူဝ်ႈဢၼ် မူဝ်းသေႇ၊ ႁွတ်ႈၼိၵ်ႈၸႃႉၼၼ်ႉၸိုင်၊ဢသၢၵ်ႈမၼ်းလႆႈပၢၵ်ႇပၢႆသၢဝ်းပီဢေႃႈ။ မၼ်းယင်းတိုၵ်ႉမီးႁႅင်းယူႇမိူၼ်ပၵ်းၵဝ်ႇပိူင်ၵဝ်ႇလႄႈတႃမၼ်းၵေႃႈဢမ်ႇပႆႇမူဝ်းဢေႃႈ။
ၵူၼ်းမဵဝ်း ဢိသရေး၊ ၶဝ်ဢွၼ်ၵၼ်ႁဵတ်းတၢင်းဢၼ်ထိုင်ၸႂ်ႁွင်ႉႁႆႈပုၼ်ႈ မူဝ်းသေႇ၊ သၢမ်သိပ်းဝၼ်းတဵမ်တဵမ်ၵႃႈၼႂ်းပၢင်ႇပဵင်းမိူင်း မေႃႇၽႃႉ၊ ဢေႃႈ။
ယေႃးသု၊ လုၵ်ႈၸၢႆး ၼုၼ်ႇ၊ ၼၼ်ႉပျေႉၸုမ်ႇဝႆႉတင်းၺၢၼ်ႇပိင်ႇၺႃႇၵွပ်ႈပိူဝ်ႈဢၼ် မူဝ်းသေႇ၊ ဢဝ်မိုဝ်းတၢင်ႇၵႃႈၼိူဝ်မၼ်းႁႂ်ႈလႆႈပုတ်ႈဢဝ်ဢရႃႇမၼ်းဢေႃႈ။ ၵူၼ်းမဵဝ်း ဢိသရေး၊ တင်းလၢႆၵေႃႈဢွၼ်ၵၼ်ထွမ်ႇဢဝ်ၵႂၢမ်း ယေႃးသု၊ သေလႄႈပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၵႃႈဢၼ် ထႃႇဝရႃႉၽြႃး၊ သင်ႇလၢတ်ႈဝႆႉတီႈ မူဝ်းသေႇ၊ ၼၼ်ႉဢေႃႈ။
လိုၼ်းၼၼ်ႉပရေႃးၽႅတ်ႈ ဢၼ်မိူၼ်ၵၼ်တင်း မူဝ်းသေႇ၊ ဢၼ် ထႃႇဝရႃႉၽြႃး၊ လၢတ်ႈတေႃႇမၼ်းၼႃႈတေႃႇၼႃႈၼၼ်ႉဢမ်ႇမီးထႅင်ႈသေၵေႃႉသေၵူၼ်း။-
ပရေႃးၽႅတ်ႈဢၼ်ႁဵတ်းၼႄၼိမိၵ်ႈလၢၵ်ႈၶၼႃႇလႂ်၊ဢိၵ်ႇတင်းလွင်ႈတၢင်းဢၼ်လီဢၢမ်းၵႃႈဢၼ် ထႃႇဝရႃႉၽြႃး၊ ပွႆႇၸႂ်ႉမၼ်းၵႂႃႇႁဵတ်းၵႃႈၼႂ်းမိူင်း ဢေးၵျိပ်ႉ၊ ၵႃႈတီႈၶုၼ်ႁေႃၶမ်းၶဝ်၊မူးမၢတ်ႈၽွင်းမိူင်းၶဝ်တင်းမိူင်းၶဝ်တင်းသဵင်ႈတင်းလူင်ၼၼ်ႉဢမ်ႇမီးထႅင်ႈသေၵေႃႉသေၵူၼ်း။-
ပရေႃးၽႅတ်ႈဢၼ်တၢတ်ႈၼိူင်ႇႁဵတ်းလွင်ႈတၢင်းဢၼ်ယႂ်ႇၼႃႇ၊ဢၼ်လီၵူဝ်လီႁႄၼႃႇမဵဝ်းဢၼ် မူဝ်းသေႇ၊ ႁဵတ်းၼႄသိုဝ်ႈၼႃႈတႂ်ႈတႃၵူၼ်းမဵဝ်း ဢိသရေး၊ တင်းလၢႆလႆႈၼၼ်ႉၵေႃႈဢမ်ႇမီးထႅင်ႈသေၵေႃႉသေၵူၼ်း။ ၵျၢမ်းဢၼ်ႁေႃးတြႃးယဝ်ႉယဝ်ႉဢေႃႈ။
ဝၢႆးသေ မူဝ်းသေႇ၊ ၶႃႈ ထႃႇဝရႃႉၽြႃး၊ သဵင်ႈဢသၢၵ်ႈယဝ်ႉၼၼ်ႉ၊ ထႃႇဝရႃႉၽြႃး၊ မီးဢမိင်ႉတီႈၵေႃႉဢၼ်ၸွႆႈထႅမ် မူဝ်းသေႇ၊ ဢၼ်ပဵၼ် ယေႃးသု၊ လုၵ်ႈၸၢႆး ၼုၼ်ႇ၊ ၼၼ်ႉလႄႈဝႃႈ၊-
“ၶႃႈၵဝ် မူဝ်းသေႇ၊ သဵင်ႈဢသၢၵ်ႈယဝ်ႉ။ မႂ်းဢိၵ်ႇတင်းၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢွၼ်ၵၼ်လုၵ်ႉတေႃႈလဵဝ်ၼႆႉလႄႈၶၢမ်ႈၼမ်ႉ ယေႃးတၢၼ်ႇ၊ ၵႂႃႇၶဝ်ႈၵႃႈၼႂ်းမိူင်းဢၼ်ၵဝ်တၵ်းပၼ်တီႈၶဝ်ပုၼ်ႉတႃႉ။-
လိၼ်ၵႃႈဢၼ်တိၼ်သူလႆႈယဵပ်ႇၼၼ်ႉၸိုင်၊ၵဝ်တၵ်းပၼ်တီႈသူၸွမ်းၵႃႈၼင်ႇဢၼ်ၵဝ်ဝႆႉၵတိတီႈ မူဝ်းသေႇ၊ ၼၼ်ႉဢေႃႈ။-
ၶွပ်ႇၼမ်ႉလႅၼ်လိၼ်သူၸိုင်၊တႄႇဢဝ်သေၵႃႈတီႈထိူၼ်ႇလႅင်ႉၽၢႆႇတၢင်းၸၢၼ်းၶိုၼ်ႈၵႂႃႇတေႃႇထိုင်ႁွတ်ႈလွႆ လေႇပၼုၼ်ႇ၊ ၽၢႆႇတၢင်းႁွင်ႇ၊ဢိၵ်ႇတင်းတႄႇဢဝ်သေၵႃႈတီႈၼမ်ႉလူင် ဢုၽရတ်ႉ၊ ၽၢႆႇတၢင်းဝၼ်းဢွၵ်ႇလတ်းလူင်းမိူင်း ႁိတ်ႉတိ၊ ၵႂႃႇတေႃႇထိုင်ႁွတ်ႈပၢင်ႇလၢႆႇ မေႇတိထေးရီးယၼ်း၊ ၽၢႆႇတၢင်းဝၼ်းတူၵ်းပုၼ်ႉဢေႃႈ။-
ယေႃးသု၊ ႟။ ၸူဝ်ႈဢသၢၵ်ႈမႂ်းၼႆႉၽူႈလႂ်တၵ်းဢမ်ႇၸုၵ်းဢမ်ႇၶၢမ်ႇမႂ်းလႆႈသေၵေႃႉသေၵူၼ်း။ ၵဝ်တၵ်းမီးယူႇလူၺ်ႈၵၼ်တင်းမႂ်းမိူၼ်ၸိူဝ်ႉၼင်ႇဢၼ်ၵဝ်မီးယူႇလူၺ်ႈၵၼ်တင်း မူဝ်းသေႇ၊ ၼၼ်ႉဢေႃႈ။ ၵဝ်တၵ်းမီးယူႇလူၺ်ႈၵၼ်တင်းမႂ်းတႃႇသေႇလႄႈၵဝ်တၵ်းဢမ်ႇၸုၼ်ႉပႅတ်ႈမႂ်းလႃးလႃး။-
ဢဝ်ႁႅင်းလႄႈမီးတၢင်းဢၼ်ႁတ်းႁၢၼ်တႃႉ။ လွင်ႈမၼ်းၸမ်ႉ၊မႂ်းတၵ်းတေလႆႈႁဵတ်းႁႂ်ႈၵူၼ်းတင်းလၢႆလႆႈၶၢမ်ႇဢမူၺ်ႇမိူင်းဢၼ်ၵဝ်ဝႆႉၵတိတီႈပူႇမွၼ်ႇၶဝ်ဝႆႉၼၼ်ႉဢေႃႈ။-
ၵူၺ်းဢဝ်ႁႅင်းလႄႈမီးတၢင်းဢၼ်ႁတ်းႁၢၼ်သေယဝ်ႉ၊ဝႆႉၸႂ်ပႂ်ႉၵမ်ၵျၢင်ႉၸွမ်းၵႃႈၼင်ႇတြႃးဢၼ်ၶႃႈၵဝ် မူဝ်းသေႇ၊ သင်ႇလၢတ်ႈဝႆႉၼၼ်ႉတႃႉ။ ယႃႇပေႁႂ်ႈလွတ်ႈႁၢမ်းသေၶေႃႈသေၵမ်း။ ပေႃးႁဵတ်းၸိူဝ်ႉၼင်ႇၼၼ်ၸိုင်၊မႂ်းတၵ်းပႄႉၼႅင်ႇၵႃႈတီႈဢၼ်မႂ်းၵႂႃႇမႂ်းပႆၼၼ်ႉဢေႃႈ။-
ပုၼ်ႈလွင်ႈၼင်ႇႁိုဝ်တၵ်းတေၽတ်းဢၢၼ်ႇၵျၢမ်းလိၵ်ႈတြႃးၼႆႉသေႇသေႇၸိုင်၊ဝႆႉဢယေးလီလီတႃႉ။ ၶႆႈၸႂ်ဝူၼ်ႉၸႂ်လူၺ်ႈၵႃႈဢၼ်တႅမ်ႈဝႆႉၵႃႈၼႂ်းပိင်းၺၢပ်ႈတြႃးၼႆႉၵူႈဝၼ်းၵူႈၶိုၼ်းလႄႈဝႆႉၸႂ်ၵမ်ၵျၢင်ႉၸွမ်းလီလီတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊မႂ်းတၵ်းၶိုၼ်ႈယႂ်ႇမႂ်ႇသုင်လႄႈပႄႉၼႅင်ႇဢေႃႈ။-
ၶုၵ်းၸႂ်လႆႈလွင်ႈဢၼ်ၵဝ်မီးဢမိင်ႉတီႈမႂ်းဢၼ်ဝႃႈ၊ႁႂ်ႈမႂ်းဢဝ်ႁႅင်းလႄႈမီးတၢင်းဢၼ်ႁတ်းႁၢၼ်ၼၼ်ႉတႃႉ။ ယႃႇပေၵူဝ်ႁႄ။ ယႃႇပေၸႂ်လု။ လွင်ႈမၼ်းၸမ်ႉ၊ၵဝ် ထႃႇဝရႃႉၽြႃး၊ ဢၼ်ဝႃႈ၊ၽြႃးပဵၼ်ၸဝ်ႈမႂ်းၼၼ်ႉမီးယူႇလူၺ်ႈၵၼ်တင်းမႂ်းၵႃႈတီႈဢၼ်မႂ်းၵႂႃႇမႂ်းပႆၸိူဝ်းၼၼ်ႉယူႇဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ယေႃးသု၊ ပၼ်ဢမိင်ႉတီႈၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆႁႂ်ႈၶဝ်ၶဝ်ႈၵႃႈၼႂ်းပၢင်တပ်ႉသေလႄႈ၊-
သင်ႇလၢတ်ႈတီႈၵူၼ်းတင်းလၢႆလႄႈဝႃႈ၊ “ဢွၼ်ၵၼ်မႄးႁႅၼ်းဝႆႉတၢင်းၵိၼ်တၢင်းၶူပ်း၊ၵွပ်ႈပိူဝ်ႈမိူဝ်ႈဢၼ်ထူၼ်ႈသၢမ်ဝၼ်းၸိုင်၊သူတၵ်းတေလႆႈဢွၼ်ၵၼ်ၶၢမ်ႈၼမ်ႉ ယေႃးတၢၼ်ႇ၊ ၵႂႃႇႁႂ်ႈလႆႈသိမ်းဢဝ်မိူင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းပၼ်တီႈသူၼၼ်ႉဢေႃႈ၊” ဝႃႈၼင်ႇၼႆဢေႃႈ။
ယေႃးသု၊ လၢတ်ႈတီႈၸိူဝ်ႉၶိူဝ်း ရုပိၼ်ႇ၊ ၸိူဝ်ႉၶိူဝ်း ၵၢတ်ႉ၊ တင်းၸိူဝ်ႉၶိူဝ်း မၼႃႇသေႇ၊ ၶိုင်ႈၼိုင်ႈၸိူဝ်းၼၼ်ႉလႄႈဝႃႈ၊-
“သူဢွၼ်ၵၼ်ၶုၵ်းၸႂ်လႆႈၵႂၢမ်းဢၼ် မူဝ်းသေႇ၊ ၶႃႈ ထႃႇဝရႃႉၽြႃး၊ ၼၼ်ႉသင်ႇလၢတ်ႈဝႆႉတီႈသူလႄႈဝႃႈ၊ ‘ ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းပၼ်လိၼ်မိူင်းၽၢႆႇဝၼ်းဢွၵ်ႇၼမ်ႉ ယေႃးတၢၼ်ႇ၊ ၼႆႉႁႂ်ႈပဵၼ်တီႈယူႇသူဢေႃႈ၊’ ဝႃႈၼင်ႇၼႆၼၼ်ႉတႃႉ။-
မေးသူ၊လုၵ်ႈဢွၼ်ႇသူတင်းတူဝ်တရိၵ်ႈသၢၼ်ႇသူတင်းလၢႆတၵ်းလႆႈၵိုတ်းယူႇၵႃႈတီႈၼႆႈသေလႄႈ၊ၵူၼ်းသိုၵ်းသူတင်းလၢႆၸမ်ႉ၊တၵ်းလႆႈယိပ်းၵမ်လၢၵ်ႈၼၢၵ်ႈသေယဝ်ႉ၊ဢွၼ်ႁူဝ်ပီႈၼွင်ႉသူၶၢမ်ႈၵႂႃႇၸွႆႈထႅမ်ၶဝ်၊-
တေႃႇထိုင်ႁွတ်ႈသူလႆႈသိမ်းဢဝ်မိူင်းၽၢႆႇဝၼ်းတူၵ်းၼမ်ႉ ယေႃးတၢၼ်ႇ၊ ဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူပၼ်ၼၼ်ႉတႃႉ။ မိူဝ်ႈဢၼ်မၼ်းၸဝ်ႈပၼ်ႁႂ်ႈၸိူဝ်ႉၶိူဝ်းမဵဝ်း ဢိသရေး၊ တင်းသဵင်ႈတင်းလူင်လႆႈယူႇလူင်ႉလီလွတ်ႈလီယဝ်ႉၸင်ႇ၊သူတၵ်းလႆႈၶိုၼ်းမႃးတီႈမိူင်းဢၼ်သူပိူင်ႇၼႆႉၶဝ်ႈၸၢမ်ႇၸႃးမိူင်းၽၢႆႇတၢင်းဝၼ်းဢွၵ်ႇၼမ်ႉ ယေႃးတၢၼ်ႇ၊ ဢၼ် မူဝ်းသေႇ၊ ၶႃႈ ထႃႇဝရႃႉၽြႃး၊ ပၼ်တီႈသူၼႆႉတႃႉ၊” ဝႃႈၼင်ႇၼႆဢေႃႈ။
ၶဝ်ၵေႃႈဢွၼ်ၵၼ်ၶိုၼ်းလၢတ်ႈတီႈ ယေႃးသု၊ လႄႈဝႃႈ၊ “ႁဝ်းၶႃႈတၵ်းႁဵတ်းၸွမ်းၵႃႈၼင်ႇဢၼ်ၸဝ်ႈသင်ႇလၢတ်ႈၼၼ်ႉၶႃႈဢေႃႈ။ ႁဝ်းၶႃႈတၵ်းၵႂႃႇၵႃႈတီႈၵႃႈဢၼ်ၸဝ်ႈပွႆႇၸႂ်ႉၵႂႃႇၼၼ်ႉၶႃႈဢေႃႈ။-
ႁဝ်းၶႃႈတၵ်းထွမ်ႇဢဝ်ၵႂၢမ်းၸဝ်ႈမိူၼ်ၸိူဝ်ႉၼင်ႇဢၼ်ႁဝ်းၶႃႈထွမ်ႇဢဝ်ၵႂၢမ်း မူဝ်းသေႇ၊ တႃႇသေႇၼၼ်ႉၶႃႈဢေႃႈ။ ၵူၺ်းႁႂ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းမီးယူႇလူၺ်ႈၵၼ်တင်းၸဝ်ႈမိူၼ်ၸိူဝ်ႉၼင်ႇဢၼ်မၼ်းၸဝ်ႈမီးယူႇလူၺ်ႈၵၼ်တင်း မူဝ်းသေႇ၊ ၼၼ်ႉသေၵမ်းလူၺ်ႈ။-
ၵေႃႉဢၼ်ၶိုၼ်းတွပ်ႇဢမိင်ႉၸဝ်ႈႁဝ်း၊ဢမ်ႇၼၼ်ၵေႃႉဢၼ်ဢမ်ႇထွမ်ႇဢဝ်ၵႂၢမ်းၸဝ်ႈၼၼ်ႉတၵ်းလႆၶၢမ်ႇတၢင်းဢၼ်ဢဝ်တၢႆၶႃႈဢေႃႈ။ ၵူၺ်းႁႂ်ႈဢဝ်ဢဵၼ်ႁႅင်းလႄႈႁႂ်ႈမီးတၢင်းဢၼ်ႁတ်းႁၢၼ်သေၵမ်းၶႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ယေႃးသု၊ ပွႆႇၸႂ်ႉၵူၼ်းသွပ်ႇၶၢဝ်ႇသွင်ၵေႃႉဢွၵ်ႇသေၵႃႈတီႈဝဵင်း သိတ်ႉတိမ်ႇ၊ ၵႂႃႇႁႂ်ႈလႆႈလူလွမ်တူၺ်းမိူင်း ၶႃႇၼၼ်ႇ၊ တင်းဝဵင်း ယေႇရိၶူဝ်း၊ လီလီဢေႃႈ။ မိူဝ်ႈဢၼ်ၶဝ်သွင်ၵေႃႉၶဝ်ႈဝဵင်းၵႂႃႇၼႂ်းၶိုၼ်းၼၼ်ႉၶဝ်ၵႂႃႇသဝ်းၵႃႈၼႂ်းႁိူၼ်းမႄႈမွၵ်ႇယႃႈဢၼ်လႆႈၸိုဝ်ႈ ရႃႇၶပ်ႉ၊ ၼၼ်ႉဢေႃႈ။-
ၶုၼ်ႁေႃၶမ်းဝဵင်း ယေႇရိၶူဝ်း၊ လႆႈငိၼ်းၶၢဝ်ႇဢၼ်ဝႃႈ၊ၵူၼ်းမဵဝ်း ဢိသရေး၊ ၵမ်ႈၽွင်ႈႁွတ်ႈၽႅဝ်မႃးၼႂ်းၶိုၼ်းၼၼ်ႉႁႂ်ႈလႆႈလူလွမ်တူၺ်းမိူင်းၶဝ်ၼၼ်ႉသေလႄႈ၊-
ၶုၼ်ႁေႃၶမ်းၼၼ်ႉပူင်ဢမိင်ႉၵႂႃႇၵႃႈတီႈ ရႃႇၶပ်ႉ၊ လႄႈဝႃႈ၊ “ၵူၼ်းၸိူဝ်းဢၼ်မီးယူႇၵႃႈၼႂ်းႁိူၼ်းမႂ်းၼႆႉႁွတ်ႈမႃးႁႂ်ႈလႆႈလူလွမ်တူၺ်းမိူင်းႁဝ်းတင်းမိူင်းဢေႃႈ။ ဢဝ်ၶဝ်ဢွၵ်ႇမႃးတႃႉ၊” ဝႃႈၼင်ႇၼႆဢေႃႈ။
မႄႈယိင်းၼၼ်ႉၶိုၼ်းလၢတ်ႈလႄႈဝႃႈ၊ “ၸႂ်ႈတႄႉ။ ၵူၼ်းႁွတ်ႈမႃးတီႈၵဝ်ၶႃႈၶႃႈဢေႃႈ။ ၵူၺ်းၵႃႈ၊ၵဝ်ၶႃႈဢမ်ႇႁုလွင်ႈဢၼ်ၶဝ်လုၵ်ႉသေၵႃႈတီႈလႂ်မႃးၼၼ်ႉၶႃႈ။-
မိူဝ်ႈဢၼ်ၵၢင်ဝၼ်းတူၵ်းလႄႈၸူဝ်ႈဢၼ်ၽၵ်းတူဝဵင်းဢမ်ႇပႆႇဢိုတ်းၼၼ်ႉၶဝ်ဢွၵ်ႇၵႂႃႇယဝ်ႉၶႃႈ။ ၶဝ်ဢွၵ်ႇၵႂႃႇတၢင်းလႂ်ယဝ်ႉၼၼ်ႉၵဝ်ၶႃႈဢမ်ႇႁုၶႃႈ။ လိုပ်ႈလမ်းၸွမ်းၵႂႃႇၶၼ်ၶၼ်ၽႂ်းၽႂ်းၶႃႈတႃႉ။ ၸၢင်ႈၶႄးတၵ်းၶိုတ်းၶႃႈဢေႃႈ၊” ဝႃႈၼင်ႇၼႆဢေႃႈ။-
ပိၵ်ႉသမ်ႉဝႃႈၼၼ်သေၵေႃႈ မႄႈယိင်းၼၼ်ႉလႆႈဢဝ်ၶဝ်သွင်ၵေႃႉၶိုၼ်ႈၵႂႃႇသိူင်ႇဝႆႉမူၵ်းဝႆႉၵႃႈၼႂ်းၵၢၼ်ႈတူၼ်ႈပၢၼ်ႇဢၼ်ၽႄႇသိူဝ်ႇဝႆႉၵႃႈၼိူဝ်လင်ၶႃးႁိူၼ်းၼၼ်ႉယဝ်ႉဢေႃႈ။-
ၵူၼ်းၶုၼ်ႁေႃၶမ်းၸိူဝ်းၼၼ်ႉဢွၵ်ႇဝဵင်းၵႂႃႇယဝ်ႉလႄႈၽၵ်းတူဝဵင်းၵေႃႈဢိုတ်းႁပ်းသေဢေႃႈ။ ၶဝ်ၸိူဝ်းၼၼ်ႉလိုပ်ႈၸွမ်းလမ်းၸွမ်းသဵၼ်ႈတၢင်းဢၼ်ၵႂႃႇၸူးၼမ်ႉ ယေႃးတၢၼ်ႇ၊ တေႃႇထိုင်ႁွတ်ႈတႃႈၶၢမ်ႈပုၼ်ႉဢေႃႈ။
ၸူဝ်ႈဢၼ်ၶဝ်သွင်ၵေႃႉၼၼ်ႉဢမ်ႇပႆႇၼွၼ်းၸိုင်၊ ရႃႇၶပ်ႉ၊ ၵႂႃႇၸူးတီႈၶဝ်ၵႃႈၼိူဝ်လင်ၶႃးႁိူၼ်းၼၼ်ႉသေလႄႈ၊-
လၢတ်ႈလႄႈဝႃႈ၊ “ၵဝ်ၶႃႈႁုလွင်ႈဢၼ် ထႃႇဝရႃႉၽြႃး၊ ဢဝ်မိူင်းၼႆႉဢၢပ်ႈပၼ်တီႈသူၸဝ်ႈယဝ်ႉၼၼ်ႉဢေႃႈ။ ၵူၼ်းမိူင်းၵူႈၵေႃႉၵူႈၵူၼ်းမီးတၢင်းဢၼ်ၵူဝ်ႁႄသူၸဝ်ႈၼႃႇလူင်လၢင်ယဝ်ႉဢေႃႈ။-
ႁဝ်းၶႃႈလႆႈငိၼ်းလွင်ႈဢၼ် ထႃႇဝရႃႉၽြႃး၊ ႁႂ်ႈ ပၢင်ႇလၢႆႇလႅင်၊ ယူတ်းႁႅင်ႈၵႂႃႇၵႃႈတီႈၽၢႆႇၼႃႈသူၸဝ်ႈၼႂ်းမိူဝ်ႈဢၼ်သူၸဝ်ႈဢွၵ်ႇမိူင်း ဢေးၵျိပ်ႉ၊ မႃးၼၼ်ႉဢေႃႈ။ ႁဝ်းၶႃႈယင်းလႆႈငိၼ်းလွင်ႈဢၼ်သူၸဝ်ႈႁဵတ်းၸိူဝ်ႉၼင်ႇႁိုဝ်ဢဝ်တၢႆၶုၼ်ႁေႃၶမ်း ဢႃႇမေႃးရိ၊ သွင်ပႃးဢၼ်ဝႃႈ၊ၶုၼ် သိႁုၼ်ႇ၊ တင်းၶုၼ် ဢေႃႇၶႃႉ၊ ၼၼ်ႉဢေႃႈ။-
မိူဝ်ႈဢၼ်ႁဝ်းၶႃႈငိၼ်းလွင်ႈမၼ်းတၢင်းမၼ်းၼၼ်ႉၸိုင်၊ႁဝ်းၶႃႈဢွၼ်ၵၼ်ၵူဝ်ႁႄၼႃႇလူင်လၢင်ဢေႃႈ။ တၢင်းၵတ်ႉၶၼ်ႁတ်းႁၢၼ်ႁဝ်းၶႃႈၼၼ်ႉၸိူမ်ႈႁၢႆၵႂႃႇမူတ်းမူတ်းၵွပ်ႈပိူဝ်ႈသူၸဝ်ႈဢေႃႈ။ ထႃႇဝရႃႉၽြႃး၊ ၽြႃးပဵၼ်ၸဝ်ႈသူၸဝ်ႈၼၼ်ႉပဵၼ်ၽြႃးၵႃႈၼိူဝ်ၽုင်ႇၵၢင်ႁၢဝ်ၵႃႈၼိူဝ်၊ဢိၵ်ႇတင်းပဵၼ်ၽြႃးၵႃႈၼိူဝ်လိၼ်မိူင်းၼႆႉၶႃႈဢေႃႈ။-
ပိူဝ်ႈၼႆလႄႈၶႅၼ်းတေႃႈတိူင်ႇဝႃႈဝႆႉၵတိၵႃႈၼႂ်းမၼ်းၸဝ်ႈလွင်ႈဢၼ်သူသွင်ၸဝ်ႈတၵ်းႁဵတ်းၵျေးၸူးတီႈၵူၼ်းႁိူၼ်းၵူၼ်းယေးၵဝ်ၶႃႈမိူၼ်ၸိူဝ်ႉၼင်ႇဢၼ်ၵဝ်ၶႃႈႁဵတ်းၵျေးၸူးတီႈသူသွင်ၸဝ်ႈၼႆႉသေၵမ်း။ ၶႅၼ်းတေႃႈဝႆႉပၼ်လၢၵ်ႈၶၼႃႇသၢၵ်ႈသေႇသေမဵဝ်းမဵဝ်းႁႂ်ႈၵဝ်ၶႃႈလႆႈတမ်းၸႂ်သေၵမ်း။-
ၶႅၼ်းတေႃႈဝႆႉၵတိလွင်ႈဢၼ်သူသွင်ၸဝ်ႈတၵ်းၵႄႇသႄႇဢဝ်ပေႃႈမႄႈၵဝ်ၶႃႈ၊ပီႈဢၢႆႈၼွင်ႉၸၢႆးတင်းပီႈၼၢင်းၼွင်ႉယိင်းၵဝ်ၶႃႈဢိၵ်ႇတင်းၵူၼ်းႁိူၼ်းၵူၼ်းယေးၶဝ်ၼၼ်ႉသေၵမ်း။ ၶႅၼ်းတေႃႈယႃႇပေဢဝ်ၶႃႈၸဝ်ႈႁဝ်းၶဝ်တၢႆပႅတ်ႈသေၵမ်းၶႃႈ၊” ဝႃႈၼင်ႇၼႆဢေႃႈ။
ၶဝ်သွင်ၵေႃႉၼၼ်ႉၶိုၼ်းလၢတ်ႈလႄႈဝႃႈ၊ “ပေႃးႁဝ်းသွင်ၵေႃႉဢမ်ႇႁဵတ်းၸွမ်းၵႂၢမ်းတူဝ်ၸဝ်ႈၵဝ်ႇၸိုင်၊ႁႂ်ႈၽြႃးပဵၼ်ၸဝ်ႈဢဝ်ဢသၢၵ်ႈႁဝ်းၼႆႉတႅၼ်းပုၼ်ႈဢသၢၵ်ႈသူတင်းႁိူၼ်းတႃႉ။ ပေႃးမႂ်းဢမ်ႇၽုၺ်ႇမွၵ်ႇၼႄပျႃးလွင်ႈၼႆႉတီႈပိူၼ်ႈၸိုင်၊မိူဝ်ႈဢၼ် ထႃႇဝရႃႉၽြႃး၊ ဢဝ်မိူင်းၼႆႉပၼ်တီႈႁဝ်းၼၼ်ႉၸိုင်၊ႁဝ်းတၵ်းႁဵတ်းၵျေးၸူးတီႈမႂ်းဝႃႈၼႆႁဝ်းဝႆႉၵတိဢေႃႈ၊” ဝႃႈၼင်ႇၼႆဢေႃႈ။
ၵွပ်ႈပိူဝ်ႈႁိူၼ်း ရႃႇၶပ်ႉ၊ ႁဵတ်းၵွပ်ႈၸပ်းလမ်းဝဵင်း ၼၼ်ႉလႄႈမၼ်းဢဝ်ၸိူၵ်ႈယွၼ်ႇတူၵ်းႁူးလၢင်းတဵၼ်ပုၼ်ႈၶဝ်တၵ်းလူင်းၵႂႃႇၼၼ်ႉဢေႃႈ။-
မၼ်းသင်ႇလၢတ်ႈလႄႈဝႃႈ၊ “ပၢႆႈၵႂႃႇၸူးၵႃႈၼိူဝ်လွႆပုၼ်ႉတႃႉ။ ၵူဝ်ၵူၼ်းၶုၼ်ႁေႃၶမ်းၸိူဝ်းၼၼ်ႉထူပ်းႁၼ်သူသွင်ၸဝ်ႈဢေႃႈ။ တဵတ်ႇမႅပ်းယူႇၵႃႈတီႈၼၼ်ႈသေသၢမ်ဝၼ်းတေႃႇထိုင်ႁွတ်ႈၶဝ်ၸိူဝ်းၼၼ်ႉပွၵ်ႈမႃးယဝ်ႉၼၼ်ႉသေၵမ်း။ လိုၼ်းၼၼ်ႉၸင်ႇၵႂႃႇသေၵမ်း၊” ဝႃႈၼင်ႇၼႆဢေႃႈ။
ၶဝ်သွင်ၵေႃႉၼၼ်ႉလၢတ်ႈလႄႈဝႃႈ၊ “ၵႂၢမ်းသဵတ်ႈၸႃႇဢၼ်မႂ်းႁႂ်ႈႁဝ်းတိူင်ႇဝႃႈၵတိၼၼ်ႉႁဝ်းဝႆႉၵတိဢေႃႈ။-
ဢၼ်မႂ်းတၵ်းလႆႈႁဵတ်းဝႆႉၸမ်ႉ၊မိူဝ်ႈဢၼ်ႁဝ်းတိုၵ်းဝဵင်းၼႆႉၼၼ်ႉဢဝ်သၢႆၸိူၵ်ႈလႅင်သဵၼ်ႈၼႆႉမတ်ႉၸပ်းႁူးလၢင်းတဵၼ်ဢၼ်မႂ်းဢဝ်ႁဝ်းယွၼ်ႇတူၵ်းၼႆႉဝႆႉတႃႉ။ ႁွင်ႉဢဝ်ပေႃႈမႄႈမႂ်း၊ပီႈဢၢႆႈၼွင်ႉၸၢႆးမႂ်းဢိၵ်ႇတင်းၵူၼ်းႁိူၼ်းၵူၼ်းယေးမႂ်းတင်းလၢႆဝႆႉၵႃႈၼႂ်းႁိူၼ်းမႂ်းတႃႉ။-
ၵူၺ်းၵႃႈ၊ၵေႃႉဢၼ်ဢွၵ်ႇႁိူၼ်းမႂ်းလႄႈၵႂႃႇၵႃႈတီႈၵၢင်တၢင်းၼၼ်ႉၸမ်ႉ၊ႁႂ်ႈမၼ်းလႆႈၶၢမ်ႇတၢင်းဢၼ်ဢဝ်တၢႆၸွမ်းၼင်ႇတၢင်းၽိတ်းမၼ်းၼၼ်ႉတႃႉ။ ၵေႃႉဢၼ်မီးယူႇလူၺ်ႈၵၼ်တင်းမႂ်းၵႃႈၼႂ်းႁိူၼ်းမႂ်းၼၼ်ႉၸမ်ႉ၊ပေႃးမၼ်းလႆႈၶၢမ်ႇၸိုင်၊ႁႂ်ႈဢပျတ်ႈတူၵ်းႁွတ်ႈၵႃႈၼိူဝ်ႁဝ်းတႃႉ။-
ၼႂ်းဝႃႈၼၼ်သေၵေႃႈ၊ပေႃးမႂ်းၽုၺ်ႇမွၵ်ႇၼႄပျႃးလွင်ႈၼႆႉတီႈပိူၼ်ႈၸိုင်၊ႁဝ်းၵေႃႈတၵ်းၵၢင်းလွတ်ႈတင်းသဵတ်ႈၸႃႇဢၼ်မႂ်းႁႂ်ႈႁဝ်းတိူင်ႇဝႃႈဝႆႉၵတိၼႆႉဢေႃႈ၊” ဝႃႈၼင်ႇၼႆဢေႃႈ။-
မၼ်းၵေႃႈလၢတ်ႈလႄႈဝႃႈ၊ “ႁႂ်ႈပဵၼ်ၸွမ်းၵႂၢမ်းသူသွင်ၸဝ်ႈၼၼ်ႉသေၵမ်းတႃႉ၊” ဝႃႈၼင်ႇၼႆသေယဝ်ႉ၊ပွႆႇၶဝ်ၵႂႃႇသေဢေႃႈ။ မိူဝ်ႈဢၼ်ၶဝ်ၵႂႃႇယဝ်ႉၸိုင်၊မၼ်းဢဝ်သၢႆမႆလႅင်ၼၼ်ႉမတ်ႉဝႆႉၵႃႈတီႈႁူးလၢင်းတဵၼ်ၼၼ်ႉသေဢေႃႈ။
ၶဝ်သွင်ၵေႃႉၼၼ်ႉၵႂႃႇၵႃႈၼိူဝ်လွႆလႄႈတဵတ်ႇမႅပ်းယူႇဢေႃႈ။ ၵူၼ်းၶုၼ်ႁေႃၶမ်းၸိူဝ်းၼၼ်ႉသွၵ်ႈႁႃၶဝ်သွင်ၵေႃႉၵႃႈၼႂ်းမိူင်းၵူႈတီႈၵူႈလႅၼ်သၢမ်ဝၼ်းယဝ်ႉၸင်ႇ၊ဢမ်ႇထူပ်းဢမ်ႇႁၼ်ၶဝ်လႄႈၶိုၼ်းမိူဝ်းၵႂႃႇၵႃႈၼႂ်းဝဵင်း ယေႇရိၶူဝ်း၊ သေဢေႃႈ။-
ၶဝ်သွင်ၵေႃႉၼၼ်ႉၵေႃႈ လူင်းလွႆမႃးလႄႈၶၢမ်ႈၼမ်ႉ ယေႃးတၢၼ်ႇ၊ လႄႈမိူဝ်းၵႂႃႇၸူးတီႈ ယေႃးသု၊ သေယဝ်ႉ၊ဢွၼ်ၵၼ်လဝ်ႈလၢတ်ႈၵႃႈဢၼ်ပဵၼ်မႃးတီႈၶဝ်သွင်ၵေႃႉၼၼ်ႉဢေႃႈ။
ၶဝ်ၼၼ်ႉလဝ်ႈလၢတ်ႈတီႈ ယေႃးသု၊ လႄႈဝႃႈ၊ “ ထႃႇဝရႃႉၽြႃး၊ ဢဝ်မိူင်းၼၼ်ႉတင်းမိူင်းဢၢပ်ႈပၼ်တီႈႁဝ်းၶႃႈဢမၢၼ်ႇၶၼ်ပဵၼ်ၶႃႈယဝ်ႉ။ ၵူၼ်းမိူင်းၼၼ်ႉၵႃႈမီးတင်းသဵင်ႈတင်းလူင်ၵူဝ်ႁႄႁဝ်းၶႃႈၼႃႇလူင်လၢင်တႄႉတႄႉၶႃႈဢေႃႈ၊” ဝႃႈၼင်ႇၼႆဢေႃႈ။
ၼႂ်းဝၼ်းမိူဝ်ႈၽုၵ်ႈၵၢင်ၼႂ်ၼၼ်ႉ၊ ယေႃးသု၊ ဢိၵ်ႇတင်းၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢွၼ်ၵၼ်လုၵ်ႉၸဝ်ႉၸဝ်ႉလႄႈဢွၵ်ႇၵႂႃႇသေၵႃႈတီႈပၢင်တပ်ႉဝဵင်း သိတ်ႉတိမ်ႇ၊ လႄႈၵႂႃႇၵႃႈတီႈၼမ်ႉ ယေႃးတၢၼ်ႇ၊ သေယဝ်ႉ၊ၶျႃးပၢင်တပ်ႉယူႇၸူဝ်ႈဢၼ်ၶဝ်ဢမ်ႇပႆႇၶၢမ်ႈၼမ်ႉၵႂႃႇၼၼ်ႉဢေႃႈ။-
မိူဝ်ႈဢၼ်ထူၼ်ႈသၢမ်ဝၼ်းယဝ်ႉၼၼ်ႉၸိုင်၊ၶုၼ်သိုၵ်းတင်းလၢႆဢွၼ်ၵၼ်လႄႇၵႂႃႇၵႃႈၼႂ်းပၢင်တပ်ႉၵူႈတီႈၵူႈတၢင်းလႄႈ၊-
သင်ႇလၢတ်ႈတီႈၵူၼ်းတင်းလၢႆလႄႈဝႃႈ၊ “မိူဝ်ႈဢၼ်သူႁၼ်ယဵၸ်ႈပရေႃးႁဵၵ်ႈ ၵူၼ်း လေႇဝိ၊ ႁၢမ်တိူၵ်ႈပတိၺိၺ်ႇ ထႃႇဝရႃႉၽြႃး၊ ၽြႃးပဵၼ်ၸဝ်ႈသူၵႂႃႇၼၼ်ႉၸိုင်၊သူဢွၼ်ၵၼ်ယုၵ်ႉၶၢႆႉပၢင်တပ်ႉလႄႈၸွမ်းၶဝ်ၵႂႃႇတႃႉ။-
သူဢမ်ႇပႆႇယၢမ်ႈလႆႈၽႅဝ်ၵႂႃႇၵႃႈတီႈၼၼ်ႈသေၽဝ်ႇသေပွၵ်ႈလႄႈၶဝ်တၵ်းဢွၼ်ႁူဝ်ၼႄတၢင်းသူၵႂႃႇဢေႃႈ။ ယႃႇပေၵႂႃႇၸမ်တိူၵ်ႈပတိၺိၺ်ႇၸဝ်ႈၼၼ်ႉ။ ယူႇယၢၼ်ၵၼ်သေသွင်ႁဵင်သွၵ်ႇတႃႉ၊” ဝႃႈၼင်ႇၼႆဢေႃႈ။
ယေႃးသု၊ သင်ႇလၢတ်ႈတီႈၵူၼ်းတင်းလၢႆလႄႈဝႃႈ၊ “ဢွၼ်ၵၼ်ႁႂ်ႈတူဝ်သူမူတ်းၸၢင်ႇတႃႉ။ လွင်ႈမၼ်းၸမ်ႉ၊ၼႂ်းဝၼ်းမိူဝ်ႈၽုၵ်ႈ ထႃႇဝရႃႉၽြႃး၊ တၵ်းႁဵတ်းၼႄတၢင်းဢၼ်လၢၵ်ႇလၢႆးၵႃႈၼႂ်းသူဢေႃႈ၊” ဝႃႈၼင်ႇၼႆဢေႃႈ။-
ဝၢႆးၼၼ်ႉ၊ ယေႃးသု၊ သင်ႇလၢတ်ႈတီႈယဵၸ်ႈပရေႃးႁဵၵ်ႈတင်းလၢႆလႄႈဝႃႈ၊ “သူဢွၼ်ၵၼ်ႁၢမ်တိူၵ်ႈပတိၺိၺ်ႇၸဝ်ႈသေလႄႈဢွၼ်ႁူဝ်ၵူၼ်းတင်းလၢႆၵႂႃႇတႃႉ၊” ဝႃႈၼင်ႇၼႆလႄႈၶဝ်ဢွၼ်ၵၼ်ႁဵတ်းၸွမ်းဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉတီႈ ယေႃးသု၊ လႄႈဝႃႈ၊ “ဝၼ်းမိူဝ်ႈၼႆႉၵဝ်တၵ်းၸႃႉႁဵတ်းတၢင်းဢၼ်ယုၵ်ႉယွင်ႈမႂ်းသိုဝ်ႈၼႃႈတႂ်ႈတႃၵူၼ်းမဵဝ်း ဢိသရေး၊ တင်းသဵင်ႈတင်းလူင်ႁႂ်ႈၶဝ်လႆႈႁုလွင်ႈဢၼ်ၵဝ်မီးယူႇလူၺ်ႈၵၼ်တင်းမႂ်းမိူၼ်ၸိူဝ်ႉၼင်ႇဢၼ်ၵဝ်မီးယူႇလူၺ်ႈၵၼ်တင်း မူဝ်းသေႇ၊ မႃးၼၼ်ႉဢေႃႈ။-
မႂ်းသင်ႇလၢတ်ႈတီႈယဵၸ်ႈပရေႃးႁဵၵ်ႈၸိူဝ်းဢၼ်ႁၢမ်တိူၵ်ႈပတိၺိၺ်ႇၸဝ်ႈၼၼ်ႉလႄႈဝႃႈ၊ ‘မိူဝ်ႈဢၼ်သူႁွတ်ႈထိုင်ၵႃႈတီႈႁိမ်းၽင်ႇၼမ်ႉ ယေႃးတၢၼ်ႇ၊ ၼၼ်ႉၸိုင်၊သူတၵ်းလႆႈၸုၵ်းသဝ်းယူႇၵႃႈၼႂ်းၼမ်ႉ ယေႃးတၢၼ်ႇ၊ ဢေႃႈ၊’ ဝႃႈၼႆတႃႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ယေႃးသု၊ လၢတ်ႈတီႈၵူၼ်းတင်းလၢႆလႄႈဝႃႈ၊ “ဢွၼ်ၵၼ်မႃးထွမ်ႇဢဝ်ၵႂၢမ်း ထႃႇဝရႃႉၽြႃး၊ ၽြႃးပဵၼ်ၸဝ်ႈသူတႃႉ။-
သူတၵ်းလႆႈႁုလွင်ႈဢၼ်ၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉမီးယူႇၵႃႈၼႂ်းသူလႄႈတၵ်းဢမ်ႇသုမ်း၊ယင်းတေႁေႃႈၵူၼ်း ၶႃႇၼၼိ၊ ၵူၼ်း ႁိတ်ႉတိ၊ ၵူၼ်း ႁိဝိ၊ ၵူၼ်း ၽေႇရၸိ၊ ၵူၼ်း ၵိရၵႃႇသိ၊ ၵူၼ်း ဢႃႇမေႃးရိ၊ ၵူၼ်း ယေႇပုသိ၊ ၸိူဝ်းၼၼ်ႉဢွၵ်ႇပႅတ်ႈသေၵႃႈတီႈၽၢႆႇၼႃႈသူဢမၢၼ်ႇၶၼ်ပဵၼ်ဢေႃႈ။-
တူၺ်းလူး။ တိူၵ်ႈပတိၺိၺ်ႇ ထႃႇဝရႃႉၽြႃး၊ ဢၼ်ဢုပ်ႉပိူင်ႇလိၼ်မိူင်းတင်းသဵင်ႈတင်းမူတ်းၼၼ်ႉတၵ်းဢွၼ်ႁူဝ်သူၶၢမ်ႈၼမ်ႉ ယေႃးတၢၼ်ႇ၊ ဢေႃႈ။-
ပိူဝ်ႈၼႆလႄႈဢွၼ်ၵၼ်လိူၵ်ႈဢဝ်ၵူၼ်းသိပ်းသွင်ၵေႃႉၵႃႈၼႂ်းမဵဝ်း ဢိသရေး၊ ၵူႈၸိူဝ်ႉၶိူဝ်းယေႈမဵဝ်းယေႈၵေႃႉတႃႉ။-
မိူဝ်ႈဢၼ်ယဵၸ်ႈပရေႃးႁဵၵ်ႈၸိူဝ်းဢၼ်ႁၢမ်တိူၵ်ႈပတိၺိၺ်ႇ ထႃႇဝရႃႉၽြႃး၊ ဢၼ်ဢုပ်ႉပိူင်ႇလိၼ်မိူင်းတင်းသဵင်ႈတင်းမူတ်းၼၼ်ႉဢဝ်တိၼ်ၶဝ်ယဵပ်ႇၶဝ်ႈၼမ်ႉၵႂႃႇၵမ်းလဵဝ်ၼၼ်ႉ၊ၵႄးၼမ်ႉ ယေႃးတၢၼ်ႇ၊ တၵ်းၵိုတ်းသေတၢင်းဢၼ်လႆၵႂႃႇလႄႈၼမ်ႉဢၼ်လႆလူင်းမႃးၽၢႆႇႁူဝ်ၼမ်ႉၸိူဝ်းၼၼ်ႉတၵ်းမီးတၢင်းဢၼ်သူတ်ႇလူၼ်ႉယူႇဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈၵူၼ်းတင်းလၢႆဢွၼ်ၵၼ်လုၵ်ႉဢွၵ်ႇသေၵႃႈတီႈပၢင်တပ်ႉၶဝ်ႁႂ်ႈလႆႈၶၢမ်ႈၼမ်ႉ ယေႃးတၢၼ်ႇ၊ ၼၼ်ႉလႄႈယဵၸ်ႈပရေႃးႁဵၵ်ႈၸိူဝ်းဢၼ်ႁၢမ်တိူၵ်ႈပတိၺိၺ်ႇၸဝ်ႈဢွၼ်ႁူဝ်ၵူၼ်းတင်းလၢႆၵႂႃႇဢေႃႈ။-
ၶိင်ႇၼၼ်ႉပဵၼ်ၶိင်ႇပၢတ်ႇၶဝ်ႈလႄႈၼမ်ႉ ယေႃးတၢၼ်ႇ၊ ၼွင်းယူႇလူၼ်ႉၽင်ႇယူႇသေၵေႃႈ၊မိူဝ်ႈဢၼ်ယဵၸ်ႈပရေႃးႁဵၵ်ႈၸိူဝ်းဢၼ်ႁၢမ်တိူၵ်ႈပတိၺိၺ်ႇၸဝ်ႈၼၼ်ႉဢဝ်တိၼ်ၶဝ်ၸုမ်ႇၶဝ်ႈၵႂႃႇၵႃႈၼႂ်းၼမ်ႉၼၼ်ႉၸိုင်၊-
ၵႄးၼမ်ႉဢၼ်လႆႈယူႇၼၼ်ႉၵိုတ်းလႆၵႂႃႇၵမ်းလဵဝ်လႄႈ၊ၼမ်ႉဢၼ်လႆလူင်းမႃးၽၢႆႇႁူဝ်ၼမ်ႉၸိူဝ်းၼၼ်ႉသူတ်ႇလူၼ်ႉၶိုၼ်ႈၵႂႃႇၵႆၼႃႇတေႃႇထိုင်ႁွတ်ႈဝဵင်း ဢႃႇတမ်ႇ၊ ဢၼ်မီးၵႃႈႁိမ်းဝဵင်း ၸႃႇရတၼ်ႇ၊ ပုၼ်ႉဢေႃႈ။ ၽၢႆႇတၢင်းႁၢင်ၼမ်ႉဢၼ်လႆလူင်းၵႂႃႇၸူး ပၢင်ႇလၢႆႇတၢႆ၊ ၼၼ်ႉၵေႃႈ ႁႅင်ႈၶၢတ်ႇၶေႃးၵႂႃႇလုမ်းလုမ်းလႄႈၵူၼ်းတင်းလၢႆဢွၼ်ၵၼ်ၶၢမ်ႈသိုဝ်ႈၵႂႃႇတီႈဝဵင်း ယေႇရိၶူဝ်း၊ ဢေႃႈ။-
ယၢမ်းမိူဝ်ႈဢၼ်ၵူၼ်းတင်းလၢႆ ယင်းပႆၶၢမ်ႈၵႂႃႇၵႃႈၼိူဝ်လိၼ်ႁႅင်ႈယူႇၼၼ်ႉယဵၸ်ႈပရေႃးႁဵၵ်ႈၸိူဝ်းဢၼ်ႁၢမ်တိူၵ်ႈပတိၺိၺ်ႇ ထႃႇဝရႃႉၽြႃး၊ ၼၼ်ႉၸုၵ်းယူႇၵႃႈၼိူဝ်လိၼ်ႁႅင်ႈၵႃႈၼႂ်းၵၢင်ၼမ်ႉ ယေႃးတၢၼ်ႇ၊ တေႃႇထိုင်ႁွတ်ႈၵူၼ်းတင်းသဵင်ႈတင်းမူတ်းၶၢမ်ႈပူၼ်ႉၵႂႃႇဢေႃႈ။
မိူဝ်ႈဢၼ်ၵူၼ်းမဵဝ်းတင်းသဵင်ႈတင်းလူင်ၶၢမ်ႈပူၼ်ႉၼမ်ႉ ယေႃးတၢၼ်ႇ၊ ၵႂႃႇမူတ်းမူတ်းသဵင်ႈသဵင်ႈယဝ်ႉၼၼ်ႉၸိုင်၊ ထႃႇဝရႃႉၽြႃး၊ မီးဢမိင်ႉတီႈ ယေႃးသု၊ လႄႈဝႃႈ၊-
“လိူၵ်ႈဢဝ်ၵူၼ်းသိပ်းသွင်ၵေႃႉၵႃႈၼႂ်းမဵဝ်း ဢိသရေး၊ ၵူႈၸိူဝ်ႉၶိူဝ်း၊ယေႈၸိူဝ်ႉၶိူဝ်းယေႈၵေႃႉလႄႈ၊-
ၸႂ်ႉႁႂ်ႈၶဝ်ဢဝ်မၢၵ်ႇႁိၼ်သိပ်းသွင်လုၵ်ႈၵႃႈၼႂ်းၵၢင်ၼမ်ႉ ယေႃးတၢၼ်ႇ၊ တီႈဢၼ်တိၼ်ယဵၸ်ႈပရေႃးႁဵၵ်ႈ ၸိူဝ်းၼၼ်ႉယဵပ်ႇယူႇၼၼ်ႉတႃႉ။ သင်ႇလၢတ်ႈႁႂ်ႈၶဝ်မႅၵ်ႇဢဝ်မၢၵ်ႇႁိၼ်ၸိူဝ်းၼႆႉၵႂႃႇဝႆႉၵႃႈတီႈဢၼ်သူတၵ်းၶျႃးပၢင်တပ်ႉမိူဝ်ႈၶိုၼ်းၼႆႉၼၼ်ႉတႃႉ၊” ဝႃႈၼင်ႇၼႆဢေႃႈ။
ယေႃးသု၊ ၵေႃႈႁွင်ႉဢဝ်ၵူၼ်းသိပ်းသွင်ၵေႃႉဢၼ်မၼ်းလိူၵ်ႈဝႆႉထႃႈၼၼ်ႉသေယဝ်ႉ၊-
လၢတ်ႈလႄႈဝႃႈ၊ “ၶၢမ်ႈၵႂႃႇၵႃႈတီႈၽၢႆႇၼႃႈတိူၵ်ႈပတိၺိၺ်ႇ ထႃႇဝရႃႉၽြႃး၊ ၽြႃးပဵၼ်ၸဝ်ႈသူလႄႈဢဝ်မၢၵ်ႇႁိၼ်မႅၵ်ႇတၢင်ႇမႃႇသူမႃး၊ယေႈၵေႃႉယေႈလုၵ်ႈပုၼ်ႈၸိူဝ်ႉၶိူဝ်းမဵဝ်း ဢိသရေး၊ ယေႈမဵဝ်းတႃႉ။-
မၢၵ်ႇႁိၼ်ၸိူဝ်းၼႆႉတၵ်းပဵၼ်ဢၼ်ပၼ်သတိႁႂ်ႈၵူၼ်းတင်းလၢႆၶုၵ်းၸႂ်လႆႈလွင်ႈဢၼ် ထႃႇဝရႃႉၽြႃး၊ ႁဵတ်းၸိူဝ်ႉၼင်ႇႁိုဝ်မႃးယဝ်ႉၼၼ်ႉဢေႃႈ။ မိူဝ်ႈဢၼ်လုၵ်ႈလၢင်းသူတွင်ႈထၢမ်ၼႂ်းၶိင်ႇၵႃႇလႃႉၵမ်းလိုၼ်းပုၼ်ႉလႄႈဝႃႈ၊ ‘မၢၵ်ႇႁိၼ်ၸိူဝ်းၼႆႉၶႂ်ႈဝႃႈၸိူဝ်ႉၼင်ႇႁိုဝ်၊’ ဝႃႈၼင်ႇၼႆၼၼ်ႉ၊-
သူၸၢင်ႈတၵ်းၶိုၼ်းလၢတ်ႈလႄႈဝႃႈ၊ ‘ၵႄးၼမ်ႉ ယေႃးတၢၼ်ႇ၊ ၶၢတ်ႇႁႅင်ႈၵႂႃႇယၢမ်းမိူဝ်ႈဢၼ်တိူၵ်ႈပတိၺိၺ်ႇ ထႃႇဝရႃႉၽြႃး၊ ၶၢမ်ႈၼမ်ႉ ယေႃးတၢၼ်ႇ၊ ၵႂႃႇၼၼ်ႉဢေႃႈ၊’ ဝႃႈၼင်ႇၼႆဢေႃႈ။ ပိူဝ်ႈၼႆလႄႈမၢၵ်ႇႁိၼ်ၸိူဝ်းၼႆႉတၵ်းပဵၼ်တၢင်းဢၼ်ပၼ်သတိႁႂ်ႈၵူၼ်းမဵဝ်း ဢိသရေး၊ တင်းလၢႆၶုၵ်းၸႂ်လႆႈလွင်ႈဢၼ်ပဵၼ်မႃးၵႃႈတီႈၼႆႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ႁဵတ်းၸွမ်းၵႃႈၼင်ႇဢၼ် ယေႃးသု၊ သင်ႇလၢတ်ႈၼၼ်ႉဢေႃႈ။ မႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉတီႈ ယေႃးသု၊ ၼၼ်ႉ ၶဝ်ဢဝ်မၢၵ်ႇႁိၼ်သိပ်းသွင်လုၵ်ႈသေၵႃႈၼႂ်းၵၢင်ၼမ်ႉ ယေႃးတၢၼ်ႇ၊ ပုၼ်ႈၸိူဝ်ႉၶိူဝ်းၵူၼ်းမဵဝ်း ဢိသရေး၊ သိပ်းသွင်မဵဝ်းၼၼ်ႉဢဝ်ၵႂႃႇၸူးတီႈဢၼ်တၵ်းၶျႃးပၢင်တပ်ႉၼၼ်ႉလႄႈၶျႃးဝႆႉၵႃႈတီႈၼၼ်ႈဢေႃႈ။-
ယေႃးသု၊ ၵေႃႈဢဝ်မၢၵ်ႇႁိၼ်သိပ်းသွင်လုၵ်ႈပူၵ်းတင်ႈဝႆႉၵႃႈၼႂ်းၵၢင်ၼမ်ႉ ယေႃးတၢၼ်ႇ၊ တီႈဢၼ်တိၼ်ယဵၸ်ႈပရေႃးႁဵၵ်ႈၸိူဝ်းဢၼ်ႁၢမ်တိူၵ်ႈပတိၺိၺ်ႇၸဝ်ႈယဵပ်ႇၵႂႃႇၼၼ်ႉၼင်ႇၵဝ်ႇဢေႃႈ။ (မၢၵ်ႇႁိၼ်ၸိူဝ်းၼႆႉယင်းမီးယူႇၵႃႈတီႈၼၼ်ႈတေႃႇထိုင်ႁွတ်ႈဝၼ်းမိူဝ်ႈၼႆႉလူးၵွၼ်ႇဢေႃႈ။)-
ယဵၸ်ႈပရေႃးႁဵၵ်ႈၸိူဝ်းၼၼ်ႉၸုၵ်းယူႇၵႃႈၼႂ်းၵၢင်ၼမ်ႉ ယေႃးတၢၼ်ႇ၊ တေႃႇထိုင်ႁွတ်ႈၵႃႈဢၼ် ထႃႇဝရႃႉၽြႃး၊ မီးဢမိင်ႉတီႈ ယေႃးသု၊ ႁႂ်ႈလႆႈသင်ႇလၢတ်ႈဝႆႉတီႈၵူၼ်းတင်းလၢႆၼၼ်ႉထၢၼ်ႈပေႃးယဝ်ႉတူဝ်ႈၵႂႃႇတင်းသဵင်ႈတင်းမူတ်းဢေႃႈ။ ၼႆႉၸမ်ႉပဵၼ်ၵႃႈၼင်ႇဢၼ် မူဝ်းသေႇ၊ သင်ႇလၢတ်ႈဝႆႉၼၼ်ႉဢေႃႈ။ ၵူၼ်းတင်းလၢႆဢွၼ်ၵၼ်ႁိပ်ႈၼႅတ်ႈၶၢမ်ႈၵႂႃႇၶၼ်ၶၼ်ၽႂ်းၽႂ်းဢေႃႈ။-
မိူဝ်ႈဢၼ်ၶဝ်ၶၢမ်ႈပူၼ်ႉၵႂႃႇယဝ်ႉတင်းသဵင်ႈတင်းလူင်ၼၼ်ႉၸိုင်၊တိူၵ်ႈပတိၺိၺ်ႇၸဝ်ႈဢိၵ်ႇတင်းယဵၸ်ႈပရေႃးႁဵၵ်ႈၸိူဝ်းၼၼ်ႉၵႂႃႇဢွၼ်တၢင်းၽၢႆႇၼႃႈၵူၼ်းတင်းလၢႆဢေႃႈ။-
ၸိူဝ်ႉၶိူဝ်း ရုပိၼ်ႇ၊ ၸိူဝ်ႉၶိူဝ်း ၵၢတ်ႉ၊ တင်းၸိူဝ်ႉၶိူဝ်း မၼႃႇသေႇ၊ ၶိုင်ႈၼိုင်ႈဢၼ်ယိပ်းၵမ်လၢၵ်ႈၼၢၵ်ႈၸိူဝ်းၼၼ်ႉဢွၼ်ႁူဝ်ၵူၼ်းမဵဝ်း ဢိသရေး၊ တင်းလၢႆၶၢမ်ႈၵႂႃႇၸွမ်းၵႃႈၼင်ႇဢၼ် မူဝ်းသေႇ၊ သင်ႇလၢတ်ႈဝႆႉၼၼ်ႉဢေႃႈ။-
ၵႃႈတီႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ၼၼ်ႉၵူၼ်းသိုၵ်းသီႇမိုၼ်ႇၸမ်ၸမ်ဢၼ်မႄးႁႅၼ်းဝႆႉႁႂ်ႈလႆႈတိုၵ်းသိုၵ်းၼၼ်ႉၶၢမ်ႈၵႂႃႇၸူးတီႈပၢင်ႇပဵင်းႁိမ်းဝဵင်း ယေႇရိၶူဝ်း၊ ပုၼ်ႉဢေႃႈ။-
ၵႃႈဢၼ် ထႃႇဝရႃႉၽြႃး၊ ႁဵတ်းၼႂ်းဝၼ်းၼၼ်ႉၸိုင်၊ႁဵတ်းႁႂ်ႈၵူၼ်းမဵဝ်း ဢိသရေး၊ တင်းလၢႆမၢတ်ႈ ယေႃးသု၊ ပဵၼ်ၵေႃႉဢၼ်ၽုင်းယႂ်ႇၼႃႇဢေႃႈ။ ၶဝ်ဢွၼ်ၵၼ်ရူဝ်ႇသေႇၵူဝ်ယမ်မၼ်းထူၼ်ႈၸူဝ်ႈဢသၢၵ်ႈမၼ်းမိူၼ်ၸိူဝ်ႉၼင်ႇဢၼ်ၶဝ်ရူဝ်ႇသေႇၵူဝ်ယမ် မူဝ်းသေႇ၊ ၼၼ်ႉဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ လၢတ်ႈတီႈ ယေႃးသု၊ လႄႈဝႃႈ၊-
“ပူင်ဢမိင်ႉႁႂ်ႈယဵၸ်ႈပရေႃးႁဵၵ်ႈ ၸိူဝ်းဢၼ်ႁၢမ်တိူၵ်ႈပတိၺိၺ်ႇၸဝ်ႈၼၼ်ႉဢွၵ်ႇသေၵႃႈၼႂ်းၼမ်ႉ ယေႃးတၢၼ်ႇ၊ ၶိုၼ်ႈမႃးတႃႉ၊” ဝႃႈၼင်ႇၼႆဢေႃႈ။-
ယေႃးသု၊ ၵေႃႈပူင်ဢမိင်ႉသေလႄႈ၊-
ယၢမ်းမိူဝ်ႈဢၼ်ယဵၸ်ႈပရေႃးႁဵၵ်ႈၸိူဝ်းၼၼ်ႉၶိုၼ်ႈၽင်ႇၼမ်ႉယဝ်ႉၼၼ်ႉၸိုင်၊ၵႄးၼမ်ႉ ယေႃးတၢၼ်ႇ၊ ၶိုၼ်းလႆမိူၼ်ပၵ်းၵဝ်ႇပိူင်ၵဝ်ႇလႄႈၼမ်ႉၼွင်းလူၼ်ႉၽင်ႇၶိုၼ်းဢေႃႈ။
ၵူၼ်းတင်းလၢႆပႆၶၢမ်ႈၼမ်ႉ ယေႃးတၢၼ်ႇ၊ ၼႂ်းလိူၼ်တီႈၼိုင်ႈလႆႈသိပ်းဝၼ်းၼၼ်ႉသေလႄႈၶျႃးပၢင်တပ်ႉၶဝ်ၵႃႈတီႈ ၵိလႃႉၵႃႇလႃႉ၊ ၵႃႈတီႈလႅၼ်လိၼ်ၽၢႆႇဝၼ်းဢွၵ်ႇဝဵင်း ယေႇရိၶူဝ်း၊ ၼၼ်ႉဢေႃႈ။-
မၢၵ်ႇႁိၼ်သိပ်းသွင်လုၵ်ႈဢၼ်ၶဝ်ဢဝ်ဢွၵ်ႇသေၵႃႈတီႈၼမ်ႉ ယေႃးတၢၼ်ႇ၊ မႃးၸိူဝ်းၼၼ်ႉၸိုင်၊ ယေႃးသု၊ ဢဝ်ပူၵ်းတင်ႈဝႆႉၵႃႈတီႈၼၼ်ႈဢေႃႈ။-
တီႈၵူၼ်းမဵဝ်း ဢိသရေး၊ တင်းလၢႆၵေႃႈ မၼ်းလၢတ်ႈလႄႈဝႃႈ၊ “မိူဝ်ႈဢၼ်လုၵ်ႈလၢင်းသူတွင်ႈထၢမ်သူၼႂ်းၶိင်ႇၵႃႇလႃႉၵမ်းလိုၼ်းၼၼ်ႉလႄႈဝႃႈ၊ ‘မၢၵ်ႇႁိၼ်ၸိူဝ်းၼႆႉၶႂ်ႈဝႃႈၸိူဝ်ႉၼင်ႇႁိုဝ်၊’ ဝႃႈၼႆၸိုင်၊-
သူၸၢင်ႈတၵ်းၶိုၼ်းမွၵ်ႇလၢတ်ႈၶဝ်လွင်ႈၶိင်ႇၵႃႇလႃႉမိူဝ်ႈဢၼ်ၵူၼ်းမဵဝ်း ဢိသရေး၊ ၶၢမ်ႈၼမ်ႉ ယေႃးတၢၼ်ႇ၊ ၵႃႈၼိူဝ်လိၼ်ႁႅင်ႈၼၼ်ႉဢေႃႈ။-
မွၵ်ႇလၢတ်ႈၼႄလွင်ႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူႁဵတ်းႁႂ်ႈၼမ်ႉ ယေႃးတၢၼ်ႇ၊ ႁႅင်ႈၶၢတ်ႇၵႂႃႇပုၼ်ႈသူထၢၼ်ႈပေႃးလႆႈပႆၶၢမ်ႈပူၼ်ႉၵႂႃႇလီလီမိူၼ်ၸိူဝ်ႉၼင်ႇဢၼ်မၼ်းၸဝ်ႈႁႂ်ႈ ပၢင်ႇလၢႆႇလႅင်၊ ႁႅင်ႈၵႂႃႇပုၼ်ႈႁဝ်းၼၼ်ႉတႃႉ။-
ၵွပ်ႈပိူဝ်ႈလွင်ႈတၢင်းၼႆႉလႄႈႁႂ်ႈၵူၼ်းၼိူဝ်လိၼ်မိူင်းတင်းသဵင်ႈတင်းလူင်လႆႈႁုလွင်ႈဢၼ်ႁႅင်းတၼ်းၶူဝ်း ထႃႇဝရႃႉၽြႃး၊ ယႂ်ႇၼႃႇထၼ်ႇႁိုဝ်ၼၼ်ႉ၊ဢိၵ်ႇတင်းႁႂ်ႈသူလႆႈရူဝ်ႇသေႇၵူဝ်ယမ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူယူႇတႃႇသေႇဢမ်ႇထၢတ်ႇၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵႃႈဢၼ်ပဵၼ်ၶုၼ်ႁေႃၶမ်းၵူၼ်းမဵဝ်း ဢႃႇမေႃးရိ၊ ဢၼ်ယူႇၽၢႆႇဝၼ်းတူၵ်းၼမ်ႉ ယေႃးတၢၼ်ႇ၊ ဢိၵ်ႇတင်းၵႃႈဢၼ်ပဵၼ်ၶုၼ်ႁေႃၶမ်းၵူၼ်းမဵဝ်း ၶႃႇၼၼိ၊ ၸွမ်းသၢပ်ႇပၢင်ႇလၢႆႇ မေႇတိထေးရီးယၼ်း၊ ၸိူဝ်းၼၼ်ႉတင်းသဵင်ႈတင်းလူင်ႁုငိၼ်းလွင်ႈဢၼ် ထႃႇဝရႃႉၽြႃး၊ ႁႂ်ႈၼမ်ႉ ယေႃးတၢၼ်ႇ၊ ယူတ်းႁႅင်ႈၵႂႃႇတေႃႇထိုင်ႁွတ်ႈၵူၼ်းမဵဝ်း ဢိသရေး၊ တင်းလၢႆထၢၼ်ႈပေႃးၶၢမ်ႈပူၼ်ႉမႃးၼၼ်ႉၸိုင်၊ၶဝ်ဢွၼ်ၵၼ်ၵူဝ်ႁႄၼႃႇလူင်လၢင်ၵႂႃႇလႄႈတၢင်းဢၼ်ၵတ်ႉၶၼ်ႁတ်းႁၢၼ်ၶဝ်သုမ်းႁၢႆၵႂႃႇၵွပ်ႈပိူဝ်ႈၵူၼ်းမဵဝ်း ဢိသရေး၊ ၶဝ်ၼၼ်ႉဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ မီးဢမိင်ႉတီႈ ယေႃးသု၊ လႄႈဝႃႈ၊ “ဢဝ်မၢၵ်ႇႁိၼ်ပၢႆႇႁဵတ်းမိတ်ႈသေလႄႈႁဵတ်းမၢင်ႇၵလႃႇပၢတ်ႇပၢႆၼင်တီႈၵူၼ်းမဵဝ်း ဢိသရေး၊ တင်းလၢႆထႅင်ႈပွၵ်ႈၼိုင်ႈတႃႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ ယေႃးသု၊ ႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉၼၼ်ႉလႄႈႁဵတ်းမၢင်ႇၵလႃႇပၢတ်ႇပၢႆၼင်တီႈၵူၼ်းမဵဝ်း ဢိသရေး၊ တင်းလၢႆၵႃႈတီႈလွႆ ၵိပတ်ႉႁႃႇရလွတ်ႉ၊ ၼၼ်ႉဢေႃႈ။-
လွင်ႈဢၼ် ယေႃးသု၊ လႆႈႁဵတ်းမၢင်ႇၵလႃႇပၢတ်ႇပၢႆၼင်ၸမ်ႉ၊ၵႃႈပဵၼ်ၵူၼ်းၸၢႆးဢၼ်ပဵၼ်ၵူၼ်းသိုၵ်းၸိူဝ်းဢၼ်ဢွၵ်ႇမိူင်း ဢေးၵျိပ်ႉ၊ မႃးၼၼ်ႉလႆႈတၢႆသဵင်ႈမူတ်းၵႃႈၼႂ်းထိူၼ်ႇၸွမ်းတႃႈၸွမ်းတၢင်းဝၢႆးသေဢၼ်ၶဝ်ဢွၵ်ႇမိူင်း ဢေးၵျိပ်ႉ၊ မႃးၼၼ်ႉဢေႃႈ။-
ပိၵ်ႉသမ်ႉၶဝ်ၸိူဝ်းဢၼ်ဢွၵ်ႇမိူင်း ဢေးၵျိပ်ႉ၊ မႃးၼၼ်ႉလႆႈၶၢမ်ႇမၢင်ႇၵလႃႇပၢတ်ႇပၢႆၼင်ယဝ်ႉသေၵေႃႈ၊ၶဝ်ၸိူဝ်းဢၼ်ၵိူတ်ႇလဵင်ႉၵႃႈၼႂ်းထိူၼ်ႇၸွမ်းတႃႈၸွမ်းတၢင်းတင်းသဵင်ႈတင်းလူင်ၼၼ်ႉၸမ်ႉ၊ဢမ်ႇပႆႇလႆႈၶၢမ်ႇမၢင်ႇၵလႃႇပၢတ်ႇပၢႆၼင်။-
လွင်ႈမၼ်းၸမ်ႉ၊ၵူၼ်းမဵဝ်း ဢိသရေး၊ တင်းလၢႆလႆႈပႆၶၢဝ်းတၢင်းၼႂ်းထိူၼ်ႇသီႇသိပ်းပီတဵမ်တဵမ်တေႃႇထိုင်ႁွတ်ႈၵူၼ်းမဵဝ်းၼၼ်ႉတင်းသဵင်ႈတင်းမူတ်းဢၼ်ပဵၼ်ၵူၼ်းသိုၵ်းၸိူဝ်းၼၼ်ႉထၢၼ်ႈပေႃးတၢႆၵွပ်ႈပိူဝ်ႈၶဝ်ဢမ်ႇထွမ်ႇဢမ်ႇဢဝ်ၵႂၢမ်း ထႃႇဝရႃႉၽြႃး၊ ဢေႃႈ။ ၸွမ်းၼင်ႇဢၼ် ထႃႇဝရႃႉၽြႃး၊ တိူင်ႇဝႃႈဝႆႉၵတိယဝ်ႉၼၼ်ႉၶဝ်ဢမ်ႇမီးဢၶႂၢင်ႉဢၼ်လႆႈႁၼ်မိူင်းဢၼ်မၢၵ်ႈမီးလီပဵၼ်လႄႈၽုၼ်ႇလီလိၼ်လီ ၼႃႇလူင်လၢင်ဢၼ်မၼ်းၸဝ်ႈဝႆႉၵတိဝႃႈတၵ်းပၼ်တီႈပူႇမွၼ်ႇၶဝ်ၼၼ်ႉ။-
လုၵ်ႈလၢင်းၶဝ်ၸိူဝ်းၼႆႉၸမ်ႉ၊ဢမ်ႇပႆႇလႆႈၶၢမ်ႇမၢင်ႇၵလႃႇပၢတ်ႇပၢႆၼင်လႄႈ ယေႃးသု၊ ၸင်ႇလႆႈႁဵတ်းမၢင်ႇၵလႃႇပၢတ်ႇပၢႆၼင်ပၼ်ၶဝ်ၵွပ်ႈပိူဝ်ႈဢၼ်ၶဝ်ပဵၼ်လုၵ်ႈလၢၼ်ၸိူဝ်ႉၶိူဝ်းဢၼ်သိုပ်ႇမႃးမႂ်ႇမႂ်ႇၼၼ်ႉဢေႃႈ။
လိုၼ်းသေဢၼ်ႁဵတ်းမၢင်ႇၵလႃႇပၢတ်ႇပၢႆၼင်ယဝ်ႉတူဝ်ႈယဝ်ႉၼၼ်ႉၸိုင်၊ၵူၼ်းမဵဝ်းၼၼ်ႉတင်းသဵင်ႈတင်းမူတ်းယူႇၵႃႈၼႂ်းပၢင်တပ်ႉယူႇတေႃႇထိုင်ႁွတ်ႈတၢင်းၸဵပ်းၶဝ်ထၢၼ်ႈပေႃးႁၢႆဢေႃႈ။-
ထႃႇဝရႃႉၽြႃး၊ ၵေႃႈလၢတ်ႈတီႈ ယေႃးသု၊ လႄႈဝႃႈ၊ “ဝၼ်းမိူဝ်ႈၼႆႉၵဝ်ၽဵဝ်ႈပႅတ်ႈလွင်ႈတၢင်းဢၼ်လီသႄႉသွမ်းဢၼ်လႆႈၶၢမ်ႇပဵၼ်ၶႃႈၼႂ်းမိူင်း ဢေးၵျိပ်ႉ၊ ၼၼ်ႉသေၵႃႈတီႈသူယဝ်ႉ၊” ဝႃႈၼင်ႇၼႆဢေႃႈ။ ပိူဝ်ႈၼႆလႄႈၵႃႈတီႈၼၼ်ႈလႆႈၶၢမ်ႇတၢင်းဢၼ်ႁွင်ႉႁဵၵ်ႈၸိုဝ်ႈ ၵိလႃႉၵႃႇလႃႉ၊ ႁၢၼ်ႉတေႃႇမိူဝ်ႈလဵဝ်ဢေႃႈ။
ယၢမ်းမိူဝ်ႈဢၼ်ၵူၼ်းမဵဝ်း ဢိသရေး၊ ၶဝ်ၶျႃးပၢင်တပ်ႉယူႇၵႃႈတီႈ ၵိလႃႉၵႃႇလႃႉ၊ ၼၼ်ႉၶဝ်ႁဵတ်းပွႆး ပသၶႃႇ၊ ၵႃႈၼႂ်းပၢင်ႇပဵင်းႁိမ်းဝဵင်း ယေႇရိၶူဝ်း၊ ၼႂ်းလိူၼ်ၼၼ်ႉလႆႈသိပ်းသီႇဝၼ်းၼၼ်ႉဢေႃႈ။-
ပွႆး ပသၶႃႇ၊ ဝၢႆးယဝ်ႉလႄႈဝၼ်းမိူဝ်ႈၽုၵ်ႈၼၼ်ႉၶဝ်လႆႈၵိၼ်ၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈတင်းၶဝ်ႈတႅၵ်ႇဢၼ်ဢဝ်ၶဝ်ႈမိူင်းၼၼ်ႉႁဵတ်းၼၼ်ႉပဵၼ်ပွၵ်ႈဢွၼ်တၢင်းပိူၼ်ႈဢေႃႈ။-
ၼႂ်းဝၼ်းၼၼ်ႉၶဝ်ႈမုၼ်းမၼ်ႇၼႃႉထၢတ်ႇၵိုတ်းၵႂႃႇသေလႄႈၵမ်းလိုၼ်းၵူၼ်းမဵဝ်း ဢိသရေး၊ ၶဝ်ဢမ်ႇလႆႈမၼ်ႇၼႃႉၼၼ်ႉထႅင်ႈသေပွၵ်ႈယဝ်ႉ။ တႄႇၸႃႉဢဝ်မိူဝ်ႈၼၼ်ႉၵႂႃႇၶဝ်ၵိၼ်မၢၵ်ႇၶဝ်ႈႁူင်းၼမ်ႉဢၼ်ဢွၵ်ႇၵႃႈတီႈမိူင်း ၶႃႇၼၼ်ႇ၊ ၼၼ်ႉဢေႃႈ။
ယၢမ်းမိူဝ်ႈဢၼ် ယေႃးသု၊ ယင်းတိုၵ်ႉမီးယူႇႁိမ်းဝဵင်း ယေႇရိၶူဝ်း၊ ၼၼ်ႉၸိုင်၊မၼ်းမုင်ႈတူၺ်းလႄႈလႆႈႁၼ်ၵူၼ်းၵေႃႉၼိုင်ႈယိပ်းၵမ်လၢပ်ႇယူႇသေလႄႈၸုၵ်းၶႂၢင်တၢင်းမၼ်းယူႇၼၼ်ႉဢေႃႈ။ ယေႃးသု၊ ၵေႃႈၵႂႃႇၸူးတီႈမၼ်းၼၼ်ႉသေလႄႈထၢမ်ဝႃႈ၊ “မႂ်းပဵၼ်ၵူၼ်းၽၢႆႇႁဝ်းႁိုဝ်း၊ဢမ်ႇၼၼ်ပဵၼ်ၵူၼ်းၽၢႆႇရၢၼ်ႇသူႇႁဝ်းႁိုဝ်း၊” ဝႃႈၼင်ႇၼႆဢေႃႈ။
ၵေႃႉၼၼ်ႉၶိုၼ်းလၢတ်ႈလႄႈဝႃႈ၊ “ဢမ်ႇၸႂ်ႈၸိူဝ်ႉၼင်ႇၼၼ်။ ၵဝ်ပဵၼ်ၸဝ်ႈၵွၼ်းတပ်ႉသိုၵ်းလူင်ဢၼ်ဢုပ်ႉပိူင်ႇတပ်ႉသိုၵ်း ထႃႇဝရႃႉၽြႃး၊ လႄႈမႃးၸူးတီႈၼႆႈဢေႃႈ၊” ဝႃႈၼင်ႇၼႆဢေႃႈ။ ယေႃးသု၊ ၵေႃႈမူပ်ႇယူႇၵႃႈၼိူဝ်လိၼ်သေလႄႈၵူဝ်းၵႂၢႆႇယူႇသေယဝ်ႉ၊လဝ်ႈထၢမ်လႄႈဝႃႈ၊ “ၸဝ်ႈႁဝ်းတၵ်းမီးဢမိင်ႉတီႈၶႃႈၸဝ်ႈၼႆႉၸိူဝ်ႉၼင်ႇႁိုဝ်ၶႃႈ၊” မိူဝ်ႈဢၼ်ဝႃႈၸိူဝ်ႉၼင်ႇၼႆၸိုင်။
ၸဝ်ႈၵွၼ်းတပ်ႉသိုၵ်းလူင် ထႃႇဝရႃႉၽြႃး၊ ၼၼ်ႉၵေႃႈလၢတ်ႈလႄႈဝႃႈ၊ “ထွတ်ႇၶႅပ်းတိၼ်မႂ်းတႃႉ။ တီႈဢၼ်မႂ်းယဵပ်ႇယူႇၼၼ်ႉပဵၼ်တီႈဢၼ်မူတ်းၸၢင်ႇဢေႃႈ၊” ဝႃႈၼင်ႇၼႆလႄႈ၊ ယေႃးသု၊ ႁဵတ်းၸွမ်းၵႂၢမ်းမၼ်းၼၼ်ႉဢေႃႈ။
မိူဝ်ႈၼၼ်ႉၽၵ်းတူဝဵင်း ယေႇရိၶူဝ်း၊ တင်းလၢႆဢိုတ်းႁပ်းဝႆႉလႄႈပႂ်ႉတႃႈပႂ်ႉၵၢင်ဝႆႉလီလီငၢမ်းငၢမ်းၼင်ႇႁိုဝ်ၵူၼ်းမဵဝ်း ဢိသရေး၊ ၶဝ်တၵ်းဢမ်ႇၶဝ်ႈလႆႈၼၼ်ႉဢေႃႈ။ ၵူၼ်းၶဝ်ႈၵူၼ်းဢွၵ်ႇဢမ်ႇမီးသေၵေႃႉသေၵူၼ်း။-
ထႃႇဝရႃႉၽြႃး၊ လၢတ်ႈတီႈ ယေႃးသု၊ လႄႈဝႃႈ၊ “တူၺ်းလူး။ ၵဝ်ဢဝ်ဝဵင်း ယေႇရိၶူဝ်း၊ ဢိၵ်ႇတင်းၶုၼ်ႁေႃၶမ်းမၼ်းတင်းၵူၼ်းသိုၵ်းဢၼ်ႁႅင်းယႂ်ႇၸိူဝ်းၼၼ်ႉဢၢပ်ႈပၼ်ၵႃႈၼႂ်းမိုဝ်းမႂ်းယဝ်ႉ။-
မႂ်းဢိၵ်ႇတင်းၵူၼ်းသိုၵ်းမႂ်းတင်းလၢႆတၵ်းလႆႈပႆပၼ်ႇႁွပ်ႈဝဵင်းၼၼ်ႉယေႈဝၼ်းယေႈႁွပ်ႈႁႂ်ႈထူၼ်ႈထိုင်ႁူၵ်းဝၼ်းဢေႃႈ။-
ယဵၸ်ႈပရေႃးႁဵၵ်ႈ ၸဵတ်းၵေႃႉတၵ်းလႆႈဢဝ်တုတ်ႈဢၼ်ဢဝ်ၶဝ်သူဝ်းပေႃႈႁဵတ်းၼၼ်ႉ ယေႈၵေႃႉယေႈဢၼ်သေလႄႈဢွၼ်ႁူဝ်တိူၵ်ႈပတိၺိၺ်ႇၸဝ်ႈၵႂႃႇဢေႃႈ။ ၼႂ်းဝၼ်းဢၼ်ထူၼ်ႈတီႈၸဵတ်းဝၼ်းၼၼ်ႉမႂ်းဢိၵ်ႇတင်းၵူၼ်းသိုၵ်းမႂ်းတင်းလၢႆတၵ်းလႆႈပႆလဵပ်ႈႁွပ်ႈဝဵင်းၼၼ်ႉၸဵတ်းႁွပ်ႈလႄႈယဵၸ်ႈပရေႃးႁဵၵ်ႈၸိူဝ်းၼၼ်ႉတၵ်းလႆႈပဝ်ႇတိုင်ႈတုတ်ႈၶဝ်သူဝ်းပေႃႈၼၼ်ႉဢေႃႈ။-
ၵမ်းၼၼ်ႉၶဝ်တၵ်းလႆႈပဝ်ႇတိုင်ႈသဵင်တုတ်ႈဢၼ်ယၢဝ်းၼႃႇၼၼ်ႉဢေႃႈ။ မိူဝ်ႈဢၼ်သူလႆႈငိၼ်းသဵင်ၼၼ်ႉၸိုင်၊ၵူၼ်းၵႃႈမီးတင်းသဵင်ႈတင်းလူင်တၵ်းလႆႈဢွၼ်ၵၼ်ပၢဝ်ႇသႅၼ်ႇလူၺ်ႈသဵင်ဢၼ်ယႂ်ႇၼႃႇလူင်လၢင်လႄႈလမ်းဝဵင်းၼၼ်ႉတၵ်းလူမ်ႉပင်းၵႂႃႇမူတ်းမူတ်းဢေႃႈ။ မိူဝ်ႈၼၼ်ႉၵူၼ်းတင်းလၢႆတၵ်းလႆႈၶိုၼ်ႈၸူးသိုဝ်ႈၽႂ်တၼ်းမၼ်းၵူႈၵေႃႉၵူႈၵူၼ်းဢေႃႈ၊” ဝႃႈၼင်ႇၼႆဢေႃႈ။
ယေႃးသု၊ ၵေႃႈႁွင်ႉဢဝ်ယဵၸ်ႈပရေႃးႁဵၵ်ႈတင်းလၢႆသေလႄႈလၢတ်ႈတီႈၶဝ်လႄႈဝႃႈ၊ “သူဢွၼ်ၵၼ်ႁၢမ်တိူၵ်ႈပတိၺိၺ်ႇၸဝ်ႈၵႂႃႇလႄႈႁႂ်ႈယဵၸ်ႈပရေႃးႁဵၵ်ႈၸဵတ်းၵေႃႉဢဝ်တုတ်ႈၶဝ်သူဝ်းပေႃႈယေႈၵေႃႉယေႈဢၼ်ဢွၼ်ႁူဝ်တိူၵ်ႈပတိၺိၺ်ႇၸဝ်ႈၼၼ်ႉၵႂႃႇတႃႉ၊” ဝႃႈၼင်ႇၼႆဢေႃႈ။-
တီႈၵူၼ်းမၼ်းတင်းလၢႆၼၼ်ႉမၼ်းပူင်ဢမိင်ႉႁႂ်ႈပႆလဵပ်ႈႁွပ်ႈဝဵင်းၼၼ်ႉလႄႈ၊ၸႂ်ႉၵူၼ်းဢၼ်ယိပ်းလၢၵ်ႈၼၢၵ်ႈဢွၼ်ႁူဝ်ထူဝ်းၼႃႈတိူၵ်ႈပတိၺိၺ်ႇ ထႃႇဝရႃႉၽြႃး၊ ၵႂႃႇဢေႃႈ။
ၸွမ်းၼင်ႇဢၼ် ယေႃးသု၊ ပူင်ဢမိင်ႉတီႈၵူၼ်းတၢင်းလၢႆဝႆႉၼၼ်ႉ၊ယဵၸ်ႈပရေႃးႁဵၵ်ႈၸဵတ်းၵေႃႉဢၼ်ပႃးတုတ်ႈၶဝ်သူဝ်းပေႃႈၸဵတ်းဢၼ်ၵႂႃႇယူႇၽၢႆႇၼႃႈ ထႃႇဝရႃႉၽြႃး၊ ၼၼ်ႉပဝ်ႇတိုင်ႈတုတ်ႈသေလႄႈၵႂႃႇဢေႃႈ။ တိူၵ်ႈပတိၺိၺ်ႇ ထႃႇဝရႃႉၽြႃး၊ ၼၼ်ႉၸွမ်းလင်ၶဝ်ၵႂႃႇဢေႃႈ။-
ၽၢႆႇၼႃႈယဵၸ်ႈပရေႃးႁဵၵ်ႈဢၼ်ပဝ်ႇတုတ်ႈၸိူဝ်းၼၼ်ႉၸမ်ႉ၊ၵူၼ်းဢၼ်ယိပ်းၵမ်လၢၵ်ႈၼၢၵ်ႈတင်းလၢႆပႆၵႅတ်ႇၶႄၵႂႃႇဢွၼ်တၢင်းဢေႃႈ။ ၵူၼ်းသိုၵ်းတႃႇၵႅတ်ႇၶႄတၢင်းလင်ၸိူဝ်းၼၼ်ႉသမ်ႉၸွမ်းလင်တိူၵ်ႈပတိၺိၺ်ႇၸဝ်ႈၵႂႃႇဢေႃႈ။-
ယေႃးသု၊ သမ်ႉပေႃးလႆႈသင်ႇလၢတ်ႈဝႆႉတီႈၵူၼ်းတင်းလၢႆဝႆႉလႄႈဝႃႈ၊ “ၸူဝ်ႈဢၼ်ဢမ်ႇပႆႇထိုင်ဝၼ်းဢၼ်ၵဝ်ႁႂ်ႈသူပၢဝ်ႇသႅၼ်ႇၼၼ်ႉၸိုင်၊သူဢမ်ႇလႆႈပၢဝ်ႇသႅၼ်ႇလႃးလႃး။ ဢမ်ႇလႆႈလၢတ်ႈၵႂၢမ်းလႃးလႃး၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈမၼ်းႁႂ်ႈႁၢမ်တိူၵ်ႈပတိၺိၺ်ႇ ထႃႇဝရႃႉၽြႃး၊ လဵပ်ႈႁွပ်ႈဝဵင်းၼၼ်ႉႁွပ်ႈၼိုင်ႈဢေႃႈ။ ၶဝ်ဢွၼ်ၵၼ်ၶိုၼ်းၶဝ်ႈပၢင်တပ်ႉယူႇၶိုၼ်းၼိုင်ႈသေဢေႃႈ။
ၼႂ်းဝၼ်းတီႈသွင်ၼႆႉၵေႃႈၶဝ်ပႆလဵပ်ႈႁွပ်ႈဝဵင်းၼၼ်ႉထႅင်ႈႁွပ်ႈၼိုင်ႈၵူၺ်းၼင်ႇၵဝ်ႇလႄႈၶိုၼ်းၶဝ်ႈပၢင်တပ်ႉမႃးဢေႃႈ။ ၶဝ်ႁဵတ်းၸိူဝ်ႉၼင်ႇၼႆႁူၵ်းဝၼ်းဢေႃႈ။
ၼႂ်းဝၼ်းဢၼ်ထူၼ်ႈထိုင်ၸဵတ်းဝၼ်းၼၼ်ႉၶဝ်လုၵ်ႉၶိင်ႇၵၢင်ၼႂ်ၸဝ်ႉၸဝ်ႉၸဵမ်မိူဝ်ႈမိူင်းၸႃႉလႅင်းမႃးၼၼ်ႉလႄႈပႆလဵပ်ႈႁွပ်ႈဝဵင်းမိူၼ်ၸိူဝ်ႉၼင်ႇၵူႈပွၵ်ႈၼၼ်ႉၸဵတ်းႁွပ်ႈဢေႃႈ။ ၼႂ်းဝၼ်းၼၼ်ႉၵူၺ်းၶဝ်လႆႈပႆလဵပ်ႈႁွပ်ႈဝဵင်းၼၼ်ႉတေႃႇထိုင်ႁွတ်ႈၸဵတ်းႁွပ်ႈဢေႃႈ။-
ၼႂ်းႁွပ်ႈဢၼ်ထူၼ်ႈၸဵတ်းႁွပ်ႈမိူဝ်ႈဢၼ်ယဵၸ်ႈပရေႃးႁဵၵ်ႈ ၸိူဝ်းၼၼ်ႉၸမ်တၵ်းပဝ်ႇတိုင်ႈတုတ်ႈၼၼ်ႉၸိုင်၊ ယေႃးသု၊ ပူင်ဢမိင်ႉတီႈၵူၼ်းတင်းလၢႆလႄႈလၢတ်ႈဝႃႈ၊ “ဢွၼ်ၵၼ်ႁွင်ႉသႅၼ်ႇတႃႉ။ ထႃႇဝရႃႉၽြႃး၊ ပၼ်ဝဵင်းၼၼ်ႉတီႈသူယဝ်ႉ။-
ဝဵင်းဢိၵ်ႇတင်းၵႃႈဢၼ်မီးၼႂ်းမၼ်းၼၼ်ႉတၵ်းလႆႈယႃႉၽဵဝ်ႈပႅတ်ႈလုမ်းလုမ်းၸိူဝ်ႉၼင်ႇၶိူင်ႈတၢင်းလူႇတီႈ ထႃႇဝရႃႉၽြႃး၊ ဢေႃႈ။ ၵူၺ်းၵႃႈ၊မႄႈမွၵ်ႇယႃႈ ရႃႇၶပ်ႉ၊ ဢိၵ်ႇတင်းၵူၼ်းႁိူၼ်းၵူၼ်းယေးမၼ်းတင်းလၢႆၼၼ်ႉတၵ်းလႆႈဝႆႉဢသၢၵ်ႈၶဝ်ႁႂ်ႈလႆႈၶျၢမ်းသႃႇ၊ၵွပ်ႈပိူဝ်ႈမၼ်းၸွႆႈသိူင်ႇပၼ်ၵူၼ်းသွပ်ႇၶၢဝ်ႇႁဝ်းၼၼ်ႉဢေႃႈ။-
သူတၵ်းဢမ်ႇလႆႈသိမ်းဢဝ်ၶိူင်ႈဢၼ်တၵ်းလႆႈယႃႉၽဵဝ်ႈပႅတ်ႈမဵဝ်းၼၼ်ႉဝႆႉသေမဵဝ်း။ ပေႃးသူသိမ်းဢဝ်ဝႆႉၸိုင်၊သူတၵ်းပႃးဢဝ်ၽေးတုၵ်ႉၶႃႉဢိၵ်ႇတင်းၽေးတၢင်းလုတၢင်းလႅဝ်ႁွတ်ႈထိုင်ၵႃႈၼိူဝ်ပၢင်တပ်ႉ ဢိသရေး၊ ဢေႃႈ။-
ၶိူင်ႈငိုၼ်း၊ၶိူင်ႈၶမ်း၊ၶိူင်ႈတွင်းလိူင်၊ၶိူင်ႈလဵၵ်းၵႃႈမီးၼၼ်ႉၸမ်ႉ၊ပဵၼ်ဢၼ်မူတ်းၸၢင်ႇပုၼ်ႈ ထႃႇဝရႃႉၽြႃး၊ လႄႈတၵ်းလႆႈဢဝ်သႂၢင်းသႂ်ႇဝႆႉၵႃႈၼႂ်းၽၼ်ႇတႃႇၸဝ်ႈဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈယဵၸ်ႈပရေႃးႁဵၵ်ႈၸိူဝ်းၼၼ်ႉပဝ်ႇတိုင်ႈတုတ်ႇၶဝ်ဢေႃႈ။ မိူဝ်ႈဢၼ်ၵူၼ်းတင်းလၢႆလႆႈငိၼ်းသဵင်ၼၼ်ႉၸိုင်၊ၶဝ်ႁဵတ်းသဵင်ဢၼ်ယႂ်ႇၼႃႇႁွင်ႉသႅၼ်ႇၵမ်းလဵဝ်လႄႈလမ်းဝဵင်းၼၼ်ႉလူမ်ႉပင်းၵႂႃႇဢေႃႈ။ မိူဝ်ႈၼၼ်ႉတပ်ႉသိုၵ်းတင်းသဵင်ႈတင်းလူင်ဢွၼ်ၵၼ်ၶိုၼ်ႈၵႂႃႇသိုဝ်ႈၽႂ်တၼ်းမၼ်းၶဝ်ႈၵႂႃႇၵႃႈၼႂ်းဝဵင်းလႄႈသိမ်းဢဝ်ဝဵင်းၼၼ်ႉဢေႃႈ။-
ၶဝ်ဢဝ်လၢပ်ႇၶဝ်လႅဝ်းၶဝ်ၽၼ်းၵူၼ်းၵႃႈၼႂ်းဝဵင်းၼၼ်ႉၸဵမ်ယိင်းၸဵမ်ၸၢႆး၊ၸဵမ်ၼုမ်ႇၸဵမ်ထဝ်ႈတၢႆပႅတ်ႈၵူႈၵေႃႉၵူႈၵူၼ်းမူတ်းမူတ်းသဵင်ႈသဵင်ႈဢေႃႈ။ ၶဝ်ယင်းဢဝ်တၢႆဝူဝ်း၊သူဝ်း၊ဢိၵ်ႇတင်းမႃႉလီႈလႂ်ဢေႃႈ။
မိူဝ်ႈၼၼ်ႉ၊ ယေႃးသု၊ လၢတ်ႈတီႈၶဝ်သွင်ၵေႃႉဢၼ်ၵႂႃႇလွမ်သိုပ်ႇလွမ်တူၺ်းမိူင်းၼၼ်ႉလႄႈဝႃႈ၊ “ၵႂႃႇၵႃႈတီႈႁိူၼ်းမႄႈမွၵ်ႇယႃႈၼၼ်ႉသေလႄႈႁွင်ႉဢဝ်မႄႈယိင်းၼၼ်ႉဢိၵ်ႇတင်းၵူၼ်းႁိူၼ်းၵူၼ်းယေးမၼ်းတင်းလၢႆဢွၵ်ႇမႃးၸွမ်းၵႃႈၼင်ႇဢၼ်သူဝႆႉၵတိတီႈမၼ်းၼၼ်ႉတႃႉ၊” ဝႃႈၼင်ႇၼႆဢေႃႈ။-
ၶဝ်သွင်ၵေႃႉၼၼ်ႉၵေႃႈၵႂႃႇႁွင်ႉဢဝ် ရႃႇၶပ်ႉ၊ တင်းပေႃႈမႄႈ၊ပီႈဢၢႆႈၼွင်ႉၸၢႆးမၼ်းတင်းၵူၼ်းႁိူၼ်းၵူၼ်းယေးမၼ်းတင်းလၢႆဢွၵ်ႇမႃးဢေႃႈ။ ၸႃႉၸဵမ်ၵူၼ်းႁိူၼ်းၵူၼ်းယေးမၼ်းတင်းလၢႆဢိၵ်ႇတင်းၶႃႈၶဝ်ၸိူဝ်းၼၼ်ႉၶဝ်ဢဝ်ၵႂႃႇဝႆႉၵႃႈတီႈတီႈဢၼ်လူင်ႉလွတ်ႈလီ ၵႃႈႁိမ်းပၢင်တပ်ႉ ဢိသရေး၊ ၶဝ်ဢေႃႈ။-
လိုၼ်းၼၼ်ႉၶဝ်ဢဝ်ၽႆးတုတ်ႇဝဵင်းဢိၵ်ႇတင်းၵႃႈဢၼ်မီးၵႃႈၼႂ်းဝဵင်းၼၼ်ႉပႅတ်ႈဢေႃႈ။ ၵူၺ်းၵႃႈ၊ၶိူင်ႈငိုၼ်းၶိူင်ႈၶမ်း၊ၶိူင်ႈတွင်းလိူင်၊ၶိူင်ႈလဵၵ်းၸိူဝ်းၼၼ်ႉၸမ်ႉ၊ၶဝ်ဢဝ်သႂၢင်းသႂ်ႇဝႆႉၵႃႈၼႂ်းၽၼ်ႇတႃႇ ထႃႇဝရႃႉၽြႃး၊ ဢေႃႈ။-
ၵႃႈတီႈမႄႈမွၵ်ႇယႃႈ ရႃႇၶပ်ႉ၊ တင်းပီႈၼွင်ႉၸိူဝ်ႉၶိူဝ်းမၼ်းၸိုင်၊ ယေႃးသု၊ ပၼ်ႁႂ်ႈၶဝ်ဢသၢၵ်ႈၵတ်းယဵၼ်ၶျၢမ်းသႃႇၵွပ်ႈပိူဝ်ႈဢၼ်မၼ်းၼၼ်ႉလႆႈဢဝ်ၵူၼ်းသွပ်ႇၶၢဝ်ႇၼႂ်းသွင်ၵေႃႉဢၼ်ၵႂႃႇလွမ်သိုပ်ႇလွမ်တူၺ်းဝဵင်း ယေႇရိၶူဝ်း၊ ၼၼ်ႉသိူင်ႇမႅပ်းပၼ်ၼၼ်ႉဢေႃႈ။ (ၸိူဝ်ႉၶိူဝ်းမႄႈယိင်းၼၼ်ႉလႆႈဢၶႂၢင်ႉဢၼ်ယူႇၵႃႈၼႂ်းၵူၼ်းမဵဝ်း ဢိသရေး၊ တင်းလၢႆတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။)
မိူဝ်ႈၼၼ်ႉ၊ ယေႃးသု၊ တိူင်ႇၵၢဝ်ႇၵႃႈတီႈၶဝ်တင်းလၢႆလႄႈဝႃႈ၊ “ႁႂ်ႈၵေႃႉဢၼ်ၶိုၼ်းတႄႇႁဵတ်းဝဵင်း ယေႇရိၶူဝ်း၊ ၼၼ်ႉလႆႈၶၢမ်ႇတၢင်းဢၼ်ၵိၼ်ႇဝႃႈၵႃႈတီႈၽၢႆႇၼႃႈ ထႃႇဝရႃႉၽြႃး၊ သေၵမ်းလူၺ်ႈ။ “ႁႂ်ႈၵေႃႉဢၼ်တႄႇငဝ်ႈႁၢၵ်ႈဝဵင်းၼၼ်ႉလႆႈသုမ်းလုၵ်ႈၸၢႆးတူၼ်ႈမၼ်းသေၵမ်းလူၺ်ႈ။ ႁႂ်ႈၵေႃႉဢၼ်ပူၵ်းသဝ်ၽၵ်းတူဝဵင်းၼၼ်ႉသမ်ႉလႆႈသုမ်းလုၵ်ႈၸၢႆးလိုၼ်းမၼ်းသေၵမ်းလူၺ်ႈ၊” ဝႃႈၼင်ႇၼႆဢေႃႈ။
ၼင်ႇၼၼ်လႄႈ ထႃႇဝရႃႉၽြႃး၊ မီးယူႇလူၺ်ႈၵၼ်တင်း ယေႃးသု၊ လႄႈသတၢင်းသဵင်ၶၢဝ်ႇမၼ်းၼၼ်ႉႁူင်ႁၢင်းၸွတ်ႇတူဝ်ႈၵႂႃႇတင်းဝၢၼ်ႈတင်းမိူင်းဢေႃႈ။
တၢင်းဢၼ် ထႃႇဝရႃႉၽြႃး၊ မီးဢမိင်ႉတီႈၵူၼ်းမဵဝ်း ဢိသရေး၊ ၶဝ်ဢၼ်ဝႃႈဢမ်ႇႁႂ်ႈသိမ်းဢဝ်ၶိူင်ႈဢၼ်တၵ်းလႆႈယႃႉၽဵဝ်ႈပႅတ်ႈသေၸိူဝ်ႉသေမဵဝ်းၼၼ်ႉၶဝ်ဢမ်ႇထွမ်ႇဢမ်ႇဢဝ်။ လွင်ႈမၼ်းၸမ်ႉ၊မီးၵူၼ်းၵေႃႉၼိုင်ႈဢၼ်လႆႈၸိုဝ်ႈ ဢႃႇၶၼ်ႇ၊ ဢၼ်ပဵၼ်လုၵ်ႈၸၢႆး ၵႃႇမိ၊ လႄႈပဵၼ်လၢၼ် ၸႃႇပတိ၊ ၵႃႈၼႂ်းၶိူဝ်းႁိူၼ်း ၸေးရႃႉ၊ ၸိူဝ်ႉၶိူဝ်းမဵဝ်း ယုတႃႉ၊ ၼၼ်ႉ ပူၼ်ႉလိူဝ်ဢမိင်ႉၸဝ်ႈလႄႈ ထႃႇဝရႃႉၽြႃး၊ မီးတၢင်းဢၼ်ၸႂ်မႆႈၶႂ်ႈၸႃႉတေႃႇၵူၼ်းမဵဝ်း ဢိသရေး၊ ဢေႃႈ။
ယေႃးသု၊ ၵေႃႈပွႆႇၸႂ်ႉၵူၼ်းၵမ်ႈၽွင်ႈဢွၵ်ႇသေၵႃႈတီႈဝဵင်း ယေႇရိၶူဝ်း၊ ၵႂႃႇႁႂ်ႈလူလွမ်တူၺ်းဝဵင်း ဢႃႇဢိ၊ ဝဵင်းဢၼ်မီးၽၢႆႇဝၼ်းဢွၵ်ႇဝဵင်း ပေႇသလႃႉ၊ ၵႃႈႁိမ်းဝဵင်း ပႅတ်ႉဢႃႇဝႅၼ်ႇ၊ ဢေႃႈ။ ၵူၼ်းၸိူဝ်းၼၼ်ႉဢွၼ်ၵၼ်လွမ်သိုပ်ႇလွမ်တူၺ်းမႃးလႄႈ၊-
ၶိုၼ်းမႃးမွၵ်ႇလၢတ်ႈတီႈ ယေႃးသု၊ လႄႈဝႃႈ၊ “ယင်းဢမ်ႇလူဝ်ႇႁႂ်ႈၵူၼ်းတင်းမူတ်းၶိုၼ်းတိုၵ်းဝဵင်း ဢႃႇဢိ၊ တီႈၶႃႈ။ ႁႂ်ႈၵူၼ်းသေသွင်ႁဵင်သၢမ်ႁဵင်ၶိုၼ်ႈတိုၵ်းၵူၺ်းၵေႃႈလႆႈယူႇတီႈၶႃႈ။ ယႃႇပေပၼ်တၢင်းယၢပ်ႇတီႈၵူၼ်းတင်းသဵင်ႈတင်းလူင်သေၵမ်းၶႃႈ။ ၶဝ်ၼၼ်ႉမီးၵေႇၼႃႇၶႃႈဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၵူၼ်းမဵဝ်း ဢိသရေး၊ ၶဝ်သၢမ်ႁဵင်ၵူၺ်းဢွၼ်ၵၼ်ၶီႇၶိုၼ်ႈၵႂႃႇလႄႈၶဝ်လႆႈဢွၵ်ႇပၢႆႈၶိုၼ်းတၢင်းလၢင်ဢေႃႈ။-
ၵူၼ်းဝဵင်း ဢႃႇဢိ၊ ၶဝ်ၵေႃႈလိုပ်ႈလမ်းၸွမ်းၶဝ်ၸႃႉၸဵမ်ၽၵ်းတူဝဵင်းၵႂႃႇထိုင်တီႈ သေႇပရိမ်ႇ၊ လႄႈဢဝ်တၢႆပႅတ်ႈၵူၼ်းသၢမ်သိပ်းပၢႆႁူၵ်းၵေႃႉၸွမ်းတႃႈၸွမ်းတၢင်းဢၼ်လမ်းၸွမ်းလူင်းလွႆၵႂႃႇၼၼ်ႉဢေႃႈ။ မိူဝ်ႈၼၼ်ႉၵူၼ်းမဵဝ်း ဢိသရေး၊ ၸႂ်ႁႅင်းဢူၼ်ႈၵႂႃႇလႄႈဢွၼ်ၵၼ်မီးၸႂ်ဢၼ်ၵူဝ်ဢၼ်ႁႄၼႃႇဢေႃႈ။
မိူဝ်ႈၼၼ်ႉ၊ ယေႃးသု၊ တင်းၵူၼ်းဢၼ်ပဵၼ်ၵႄႇပဵၼ်ႁူဝ်မဵဝ်း ဢိသရေး၊ ၶဝ်ဢွၼ်ၵၼ်သိၵ်ႇၶူဝ်းၼုင်ႈၶဝ်ၼႄလွင်ႈဢၼ်ၶဝ်မႆႈၸႂ်ၶီၸႂ်လႄႈဢွၼ်ၵၼ်ဢဝ်မုၼ်ႈလိၼ်ၽၢဝ်ႇသႂ်ႇႁူဝ်ၶဝ်၊ထူမူပ်ႇၵႃႈၼိူဝ်လိၼ်ယူႇၽၢႆႇၼႃႈတိူၵ်ႈပတိၺိၺ်ႇ ထႃႇဝရႃႉၽြႃး၊ တေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။-
ယေႃးသု၊ လဝ်ႈလၢတ်ႈလႄႈဝႃႈ၊ “ဢူဝ်း။ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တီႈၶႃႈ။ ၵွပ်ႈပိူဝ်ႈသင်လႄႈၸဝ်ႈႁဝ်းဢဝ်ၵူၼ်းတင်းလၢႆၼႆႉၶၢမ်ႈၼမ်ႉ ယေႃးတၢၼ်ႇ၊ မႃးႁႂ်ႈလႆႈဢၢပ်ႈပၼ်ၵႃႈၼႂ်းမိုဝ်းၵူၼ်းမဵဝ်း ဢႃႇမေႃးရိ၊ ၸိူဝ်းၼႆႉလႄႈႁႂ်ႈၶၢမ်ႇတၢင်းဢၼ်ယႃႉၽဵဝ်ႈပႅတ်ႈၸိူဝ်ႉၼင်ႇႁိုဝ်တီႈၶႃႈ။ ပေႃးၶႃႈၸဝ်ႈႁဝ်းၶဝ်လႆႈမီးၸႂ်ဢၼ်တဵတ်ႇလီၼိမ်လီသေလႄႈယူႇၵႃႈတီႈၽၢႆႇပုၼ်ႉၼမ်ႉ ယေႃးတၢၼ်ႇ၊ ၸိုင်၊ယဵင်ႈၶႅၼ်းတၵ်းလီတီႈၶႃႈဢေႃႈ။-
ဢူဝ်း၊ ထႃႇဝရႃႉၽြႃး၊ တီႈၶႃႈ။ တၢင်းဢၼ်မဵဝ်း ဢိသရေး၊ တူၵ်းသုမ်းၵႃႈတီႈရၢၼ်ႇသူႇၼႆႉၼၼ်ႉၶႃႈၸဝ်ႈတၵ်းလႆႈလဝ်ႈလၢတ်ႈၸိူဝ်ႉၼင်ႇႁိုဝ်တီႈၶႃႈ။-
မဵဝ်း ၶႃႇၼၼိ၊ ဢိၵ်ႇတင်းၵူၼ်းဝၢၼ်ႈၵူၼ်းမိူင်းၼႆႉတင်းသဵင်ႈတင်းလူင်တၵ်းငိၼ်းလွင်ႈတၢင်းၼႆႉသေယဝ်ႉ၊ၶဝ်တၵ်းဢွၼ်ၵၼ်လွမ်ႉႁွပ်ႈၶႃႈၸဝ်ႈႁဝ်းၶဝ်လႄႈဢဝ်ၶႃႈၸဝ်ႈႁဝ်းၶဝ်တၢႆပႅတ်ႈတင်းသဵင်ႈတင်းမူတ်းတီႈၶႃႈယဝ်ႉ။ ပုၼ်ႈၼႃႇမႃႉၸိုဝ်ႈသဵင်ၸဝ်ႈႁဝ်းဢၼ်ယႂ်ႇမျၢတ်ႈၼႃႇၼၼ်ႉ၊ၸဝ်ႈႁဝ်းတၵ်းႁဵတ်းၸိူဝ်ႉႁိုဝ်ႁႄႉၶႅၼ်တီႈၶႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၵေႃႈမီးဢမိင်ႉတီႈ ယေႃးသု၊ လႄႈဝႃႈ၊ “လုၵ်ႉတႃႉ။ ႁဵတ်းသင်လႄႈမႂ်းထူမူပ်ႇၵႃႈၼိူဝ်လိၼ်ယူႇၸိူဝ်ႉၼင်ႇၼႆ။-
ၵူၼ်းမဵဝ်း ဢိသရေး၊ ၶဝ်လႆႈၽိတ်းပိူင်ႈယဝ်ႉ။ ၶဝ်ပူၼ်ႉလိူဝ်ၵႂၢမ်းပတိၺိၺ်ႇတြႃးၵဝ်ဢၼ်ၵဝ်သင်ႇလၢတ်ႈဝႆႉတီႈၶဝ်ၼၼ်ႉယဝ်ႉ။ ၶဝ်လႆႈလၵ်ႉဢဝ်ၶိူင်ႈပိူင်ဢၼ်တၵ်းလႆႈယႃႉၽဵဝ်ႈပႅတ်ႈလႄႈပႅတ်ႉလႅၼ်သေယဝ်ႉ၊ဢဝ်ဝႆႉၵႃႈၼႂ်းဢုၵ်ႉၸႃႇၶူဝ်းလဵင်းၶဝ်ယဝ်ႉ။-
ၵွပ်ႈပိူဝ်ႈလွင်ႈတၢင်းၼႆႉလႄႈမဵဝ်း ဢိသရေး၊ ၶဝ်ဢမ်ႇၸုၵ်းဢမ်ႇၶၢမ်ႇရၢၼ်ႇသူႇၶဝ်လႆႈဢေႃႈ။ ၶဝ်လႆႈတူၵ်းသုမ်းၵႃႈတႂ်ႈရၢၼ်ႇသူႇၶဝ်ၵွပ်ႈပိူဝ်ႈတူဝ်ၶဝ်ပဵၼ်ၵေႃႉဢၼ်ထိူၵ်ႈၶၢမ်ႇယႃႉၽဵဝ်ႈပႅတ်ႈၼၼ်ႉဢေႃႈ။ ပေႃးမႂ်းယင်းဢမ်ႇပႄႇၽဵဝ်ႈပႅတ်ႈၶိူင်ႈပိူင်ဢၼ်ဝႃႈထုၵ်ႇလီယႃႉၽဵဝ်ႈပႅတ်ႈၼၼ်ႉၸိူဝ်းၼၼ်ႉၸိုင်၊ၵဝ်တၵ်းဢမ်ႇမီးယူႇလူၺ်ႈၵၼ်တင်းသူလႃးလႃး။-
လုၵ်ႉတႃႉ။ ႁႂ်ႈၵူၼ်းတင်းလၢႆမူတ်းၸၢင်ႇလႄႈႁႂ်ႈၶဝ်မႄးႁႅၼ်းတူဝ်ပုၼ်ႈဢၼ်တၵ်းမႃးၵႃႈတီႈၽၢႆႇၼႃႈၵဝ်တႃႉ။ သင်ႇလၢတ်ႈႁႂ်ႈၶဝ်မႄးႁႅၼ်းတၼ်းဝႆႉၼႂ်းဝၼ်းမိူဝ်ႈၽုၵ်ႈ၊ၵွပ်ႈပိူဝ်ႈၵဝ် ထႃႇဝရႃႉၽြႃး၊ၽြႃးပဵၼ်ၸဝ်ႈ၊ မဵဝ်း ဢိသရေး၊ ၼႆႉမီးလွင်ႈတၵ်းလၢတ်ႈတေႃႇၶဝ်လႄႈဝႃႈၸမ်ႉ၊ ‘မဵဝ်း ဢိသရေး၊ ႟။ ၶိူင်ႈပိူင်ဢၼ်ၵဝ်မီးဢမိင်ႉဝႆႉႁႂ်ႈသူယႃႉၽဵဝ်ႈပႅတ်ႈၼၼ်ႉသေမဵဝ်းမဵဝ်းမီးၵႃႈၼႂ်းၶူဝ်းဢၼ်ပိူင်ႇၼၼ်ႉဢေႃႈ။ ၸူဝ်ႈဢၼ်သူယင်းဢမ်ႇပႆႇပႄႇၽဵဝ်ႈပႅတ်ႈၶိူင်ႈပိူင်ၸိူဝ်းၼၼ်ႉၸိုင်၊သူဢမ်ႇၸုၵ်းဢမ်ႇၶၢမ်ႇရၢၼ်ႇသူႇသူလႆႈလႃးလႃး၊’ ဝႃႈၼင်ႇၼႆဢေႃႈ။-
ပိူဝ်ႈၼႆလႄႈမွၵ်ႇလၢတ်ႈပၼ်ႁႂ်ႈၶဝ်ၶိုၼ်ႈမႃးမိူဝ်ႈၽုၵ်ႈၵၢင်ၼႂ်ၸွမ်းလူၺ်ႈၸိူဝ်ႉၶိူဝ်းၽႂ်ၸိူဝ်ႉၶိူဝ်းမၼ်းတႃႉ။ ၸိူဝ်ႉၶိူဝ်းဢၼ်ၵဝ်လိူၵ်ႈဢဝ်ၼၼ်ႉတၵ်းလႆႈၶိုၼ်ႈမႃးၸွမ်းလူၺ်ႈၶိူဝ်းႁိူၼ်းၽႂ်ၶိူဝ်းႁိူၼ်းမၼ်းဢေႃႈ။ ၶိူဝ်းႁိူၼ်းဢၼ်ၵဝ်လိူၵ်ႈဢဝ်ၼၼ်ႉသမ်ႉတၵ်းလႆႈၶိုၼ်ႈမႃးၸွမ်းလူၺ်ႈၵူၼ်းႁိူၼ်းၵူၼ်းယေးၽႂ်ၽႂ်မၼ်းမၼ်းဢေႃႈ။ ၵူၼ်းႁိူၼ်းၵူၼ်းယေးဢၼ်ၵဝ်လိူၵ်ႈဢဝ်ၼၼ်ႉသမ်ႉတၵ်းလႆႈၶိုၼ်ႈမႃးၵေႃႉၼိုင်ႈယဝ်ႉၵေႃႉၼိုင်ႈဢေႃႈ။-
ပေႃးထူပ်းႁၼ်ၶိူင်ႈၶူဝ်းဢၼ်လႆႈၶၢမ်ႇတၢင်းဢၼ်ၵိၼ်ႇဝႃႈၼၼ်ႉၵႃႈတီႈၵေႃႉဢၼ်ၵဝ်လိူၵ်ႈဢဝ်ၼၼ်ႉၸိုင်၊တၵ်းလႆႈဢဝ်တူဝ်မၼ်းတုတ်ႇၽႆးပႅတ်ႈပႃးၸဵမ်ၵူၼ်းႁိူၼ်းၵူၼ်းယေးမၼ်းဢိၵ်ႇတင်းဢုၵ်ႉၸႃႇၶူဝ်းၶွင်မၼ်းၵူႈၸိူဝ်ႉၵူႈပိူင်ၼၼ်ႉၸွမ်းလူၺ်ႈၵၼ်တင်းမၼ်းဢေႃႈ။ လွင်ႈမၼ်းၸမ်ႉ၊ၵေႃႉၼၼ်ႉပူၼ်ႉလိူဝ်ပတိၺိၺ်ႇတြႃးၵဝ်လႄႈႁဵတ်းႁႂ်ႈတၢင်းဢၼ်လီဢူၵ်းလီဢၢႆတူၵ်းႁွတ်ႈၵႃႈၼိူဝ်ၵူၼ်းမဵဝ်း ဢိသရေး၊ ဢေႃႈ၊” ဝႃႈၼင်ႇၼႆဢေႃႈ။
ၼင်ႇၼၼ်လႄႈမိူဝ်ႈၽုၵ်ႈၵၢင်ၼႂ်ၸဝ်ႉၸဝ်ႉ၊ ယေႃးသု၊ ဢဝ်မဵဝ်း ဢိသရေး၊ ၶိုၼ်ႈၵႂႃႇၸွမ်းလူၺ်ႈၸိူဝ်ႉၶိူဝ်းၽႂ်ၸိူဝ်ႉၶိူဝ်းမၼ်းသေလႄႈမၼ်းၸဝ်ႈလိူၵ်ႈဢဝ်ၸိူဝ်ႉၶိူဝ်း ယုတႃႉ၊ ဢေႃႈ။-
မၼ်းၵေႃႈဢဝ်ၸိူဝ်ႉၶိူဝ်း ယုတႃႉ၊ ႁႂ်ႈၶိုၼ်ႈၸွမ်းလူၺ်ႈၶိူဝ်းႁိူၼ်းၽႂ်ၶိူဝ်းႁိူၼ်းမၼ်းသေလႄႈမၼ်းၸဝ်ႈသမ်ႉလိူၵ်ႈဢဝ်ၶိူဝ်းႁိူၼ်း ၸေးရႃႉ၊ ဢေႃႈ။ မိူဝ်ႈၼၼ်ႉမၼ်းဢဝ် ၸေးရႃႉ၊ ၶိုၼ်ႈၸွမ်းလူၺ်ႈၵူၼ်းႁိူၼ်းၵူၼ်းယေးၽႂ်ၽႂ်မၼ်းမၼ်းသေလႄႈမၼ်းၸဝ်ႈလိူၵ်ႈဢဝ်ၵူၼ်းႁိူၼ်းၵူၼ်းယေး ၸႃႇပတိ၊ ဢေႃႈ။-
ၵမ်းၼၼ်ႉ မၼ်းဢဝ်ၵူၼ်းႁိူၼ်းၵူၼ်းယေး ၸႃႇပတိ၊ ၶိုၼ်ႈမႃးၵေႃႉၼိုင်ႈယဝ်ႉၵေႃႉၼိုင်ႈလႄႈမၼ်းၸဝ်ႈလိူၵ်ႈဢဝ် ဢႃႇၶၼ်ႇ၊ ဢၼ်ပဵၼ်လုၵ်ႈၸၢႆး ၵႃႇမိ၊ လႄႈပဵၼ်လၢၼ်ၸၢႆး ၸႃႇပတိ၊ ၼၼ်ႉဢေႃႈ။
ယေႃးသု၊ ၵေႃႈလၢတ်ႈတီႈ ဢႃႇၶၼ်ႇ၊ လႄႈဝႃႈ၊ “လုၵ်ႈၸၢႆးၵဝ်႟။ ၵႃႈတီႈၽၢႆႇၼႃႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ၼႆႉလၢတ်ႈသိုဝ်ႈသိုဝ်ႈလႄႈႁပ်ႉၶၢမ်ႇဢဝ်ဢပျတ်ႈမႂ်းတႃႉ။ မွၵ်ႇလၢတ်ႈလွင်ႈတၢင်းဢၼ်မႂ်းႁဵတ်းမႅၼ်ႈၼၼ်ႉတီႈၵဝ်တႃႉ။ ယႃႇပေသိူင်ႇဝႆႉဢမ်ဝႆႉ၊” ဝႃႈၼင်ႇၼႆဢေႃႈ။
ဢႃႇၶၼ်ႇ၊ ၶိုၼ်းလဝ်ႈလၢတ်ႈတီႈ ယေႃးသု၊ လႄႈဝႃႈ၊ “ၸႂ်ႈၶႃႈယဝ်ႉ။ ၵဝ်ၶႃႈၽိတ်းပိူင်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ၶႃႈယဝ်ႉ။ လွင်ႈတၢင်းဢၼ်ၵဝ်ၶႃႈႁဵတ်းမႅၼ်ႈၼၼ်ႉၸမ်ႉ၊-
ၵႃႈၼႂ်းဢုၵ်ႉၸႃႇၶူဝ်းလဵင်းဢၼ်ႁဝ်းႁိမ်ဢဝ်လႆႈမႃးၸိူဝ်းၼၼ်ႉၵဝ်ၶႃႈႁၼ်သိူဝ်ႈယၢဝ်း ပႃႇပုလုၼ်ႇ၊ ဢၼ်လီဢၼ်မျၢတ်ႈၽိုၼ်ၼိုင်ႈ၊ငိုၼ်းသွင်ၸွႆႉတင်းတႅင်ႈၶမ်းဢၼ်မီးၼမ်ႉၼၵ်းႁႃႈၶၼ်ၼၼ်ႉၶႃႈဢေႃႈ။ ၵဝ်ၶႃႈၸႂ်ၸပ်းၸႂ်ၸွႆးလႄႈသိမ်းဢဝ်မႅၼ်ႈၶႃႈယဝ်ႉ။ ၵဝ်ၶႃႈၽင်ဝႆႉၵႃႈၼႂ်းသုမ်ႉထဵင်ၵဝ်ၶႃႈလႄႈဢဝ်ငိုၼ်းၼၼ်ႉၽင်ဝႆႉၵႃႈတႂ်ႈပိုၼ်ႉသုတ်းဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ယေႃးသု၊ ပွႆႇၸႂ်ႉၵူၼ်းၵမ်ႈၽွင်ႈၵႂႃႇလႄႈၶဝ်ဢွၼ်ၵၼ်လႅၼ်ႈၶဝ်ႈၵႂႃႇၵႃႈၼႂ်းသုမ်ႉထဵင်မၼ်းသေယဝ်ႉ၊ထူပ်းႁၼ်ၶိူင်ႈပိူင်ၸိူဝ်းဢၼ်ၶၢမ်ႇတၢင်းဢၼ်ၵိၼ်ႇဝႃႈၼၼ်ႉၽင်ဝႆႉလူၺ်ႈတင်းငိုၼ်းဢၼ်ဢဝ်ဝႆႉၵႃႈတႂ်ႈသုတ်းပိူၼ်ႈၼၼ်ႉဢေႃႈ။-
ၶဝ်ဢဝ်ဢွၵ်ႇသေၵႃႈၼႂ်းသုမ်ႉထဵင်သေယဝ်ႉ၊ၵႂႃႇၸူးတီႈ ယေႃးသု၊ ဢိၵ်ႇတင်းတီႈၵူၼ်းမဵဝ်း ဢိသရေး၊ တင်းသဵင်ႈတင်းမူတ်းၼၼ်ႉသေလႄႈဢဝ်ဝႆႉၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢေႃႈ။-
ယေႃးသု၊ ဢိၵ်ႇတင်းၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢွၼ်ၵၼ်တိဢဝ် ဢႃႇၶၼ်ႇ၊ ဢိၵ်ႇတင်းငိုၼ်း၊သိူဝ်ႈယၢဝ်း၊ဢိၵ်ႇတင်းတႅင်ႈၶမ်းၼၼ်ႉလူၺ်ႈၵၼ်တင်းလုၵ်ႈၸၢႆးမၼ်းလုၵ်ႈယိင်းမၼ်း၊သူဝ်း၊ဝူဝ်း၊မႃႉလီႈမၼ်း၊သုမ်ႉထဵင်မၼ်းပႃးၸဵမ်ၶူဝ်းၶွင်ၵႃႈဢၼ်မၼ်းပိူင်ႇၼၼ်ႉ ၵႂႃႇၵႃႈတီႈၶူင်ႈႁူၺ်ႈ ဢႃႇၶေႃႇ၊ ပုၼ်ႉဢေႃႈ။-
ယေႃးသု၊ လၢတ်ႈလႄႈဝႃႈ၊ “ႁဵတ်းသင်လႄႈမႂ်းယႃႉယူၵ်ႉႁဝ်းၸိူဝ်ႉၼင်ႇႁိုဝ်။ တေႃႈလဵဝ်ၼႆႉ ထႃႇဝရႃႉၽြႃး၊ တၵ်းယႃႉယူၵ်ႉမႂ်းဢေႃႈ” ဝႃႈၼင်ႇၼႆဢေႃႈ။ ၵူၼ်းတင်းသဵင်ႈတင်းလူင်ၵေႃႈဢွၼ်ၵၼ်ဢဝ်မၢၵ်ႇႁိၼ်ပိုဝ်ႈသႂ်ႇမၼ်းႁႂ်ႈတၢႆသေယဝ်ႉ၊သမ်ႉဢွၼ်ၵၼ်ဢဝ်ပိုဝ်ႈသႂ်ႇၵူၼ်းႁိူၼ်းၵူၼ်းယေးမၼ်းၸိူဝ်းၼၼ်ႉတၢႆသေလႄႈတုတ်ႇၽႆးပႅတ်ႈၸႃႉၸဵမ်ဢုၵ်ႉၸႃႇမၼ်းၸိူဝ်းၼၼ်ႉသေဢေႃႈ။-
သမ်ႉဢွၼ်ၵၼ်ဢဝ်မၢၵ်ႇႁိၼ်ၼမ်ၼႃႇၵွင်ဝႆႉၵႃႈၼိူဝ်မၼ်းလႄႈမီးယူႇတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။ ၸွမ်းလူၺ်ႈလွင်ႈၼၼ်ႉလႄႈၶူင်ႈႁူၺ်ႈၼၼ်ႉလႆႈႁွင်ႉႁဵၵ်ႈဝႃႈ၊ၶူင်ႈႁူၺ်ႈ ဢႃႇၶေႃႇ၊ ယဝ်ႉဢေႃႈ။ ထႃႇဝရႃႉၽြႃး၊ ၵေႃႈထၢတ်ႇယဵၼ်သေတၢင်းဢၼ်ၸႂ်မႆႈၶႂ်ႈၸႃႉမၼ်းၸဝ်ႈယဝ်ႉဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉတီႈ ယေႃးသု၊ လႄႈဝႃႈ၊ “ယႃႇပေၵူဝ်ပေႁႄ။ ယႃႇပေၸႂ်လု။ ႁွင်ႉဢဝ်ၵူၼ်းသိုၵ်းမႂ်းၵႃႈမီးတင်းသဵင်ႈတင်းလူင်ပႃးလူၺ်ႈၵၼ်တင်းမႂ်းသေလႄႈၶီႇၶိုၼ်ႈၵႂႃႇၸူးဝဵင်း ဢႃႇဢိ၊ တႃႉ။ ၵဝ်တၵ်းပၼ်ႁႂ်ႈမႂ်းပႄႉၼႅင်ႇၶုၼ်ႁေႃၶမ်း ဢႃႇဢိ၊ သေလႄႈၵူၼ်းမၼ်း၊ဝဵင်းမၼ်း၊လိၼ်မၼ်းၸိူဝ်းၼၼ်ႉတၵ်းပဵၼ်ၶွင်မႂ်းဢေႃႈ။-
မႂ်းတၵ်းတေလႆႈႁဵတ်းတီႈဝဵင်း ဢႃႇဢိ၊ တင်းၶုၼ်လူင်မၼ်းမိူၼ်ၸိူဝ်ႉၼင်ႇဢၼ်မႂ်းႁဵတ်းတီႈဝဵင်း ယေႇရိၶူဝ်း၊ တင်းၶုၼ်လူင်မၼ်းၼၼ်ႉဢေႃႈ။ ပွၵ်ႈၼႆႉၸိုင်၊သူမီးဢၶႂၢင်ႉဢၼ်တၵ်းသိမ်းဢဝ်ဢုၵ်ႉၸႃႇၶဝ် ဢိၵ်ႇတင်းတရိၵ်ႈသၢၼ်ႇၶဝ်ပုၼ်ႈသူဢေႃႈ။ မႄးႁႅၼ်းတပ်ႉသိုၵ်းမူၵ်းႁႂ်ႈလႆႈတိုၵ်းၽၢႆႇတၢင်းလင်တႃႉ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈႁႂ်ႈလႆႈၵႂႃႇတိုၵ်းဝဵင်း ဢႃႇဢိ၊ ၸိုင်၊ ယေႃးသု၊ တင်းၵူၼ်းသိုၵ်းမၼ်းတင်းသဵင်ႈတင်းလူင်မႄးႁႅၼ်းၼႃႈသိုၵ်းသေလႄႈ၊လိူၵ်ႈဢဝ်ၵူၼ်းသိုၵ်းဢၼ်ၵတ်ႉၶႅၼ်ႇသေပိူၼ်ႈသၢမ်မိုၼ်ႇသေယဝ်ႉ၊ပွႆႇၸႂ်ႉၵႂႃႇၶိင်ႇၵၢင်ၶိုၼ်းၼၼ်ႉဢေႃႈ။-
မၼ်းသင်ႇလၢတ်ႈတီႈၶဝ်ၵႂႃႇလႄႈဝႃႈ၊ “သူၵႂႃႇမူၵ်းယူႇၽၢႆႇပုၼ်ႉဝဵင်းၼၼ်ႉ၊ယူႇဢမ်ႇပေႃးၵႆပေႃးယၢၼ်သေလႄႈႁႂ်ႈတၼ်းဝႆႉပုၼ်ႈတႃႇတေလႆႈတိုၵ်းတေႃးတႃႉ။-
ၵဝ်ဢိၵ်ႇတင်းၵူၼ်းဢၼ်ပႃးလူၺ်ႈၵၼ်တင်းၵဝ်ၸိူဝ်းၼႆႉတၵ်းသုတ်ႉၸပ်းသုတ်ႉၸူးတီႈဝဵင်းၼၼ်ႉဢေႃႈ။ မိူဝ်ႈဢၼ်ၵူၼ်းဝဵင်း ဢႃႇဢိ၊ ၶဝ်ဢွၵ်ႇမႃးတိုၵ်းႁဝ်းၼၼ်ႉၸိုင်၊ႁဝ်းတၵ်းၼီပၢႆႈၶိုၼ်းတၢင်းလင်မိူၼ်ၸိူဝ်ႉၼင်ႇၵမ်းဢွၼ်တၢင်းၼၼ်ႉဢေႃႈ။-
ၶဝ်တၵ်းဢွၼ်ၵၼ်လိုပ်ႈလမ်းၸွမ်းႁဝ်းတေႃႇထိုင်ႁွတ်ႈႁဝ်းဢွၼ်ၶဝ်ၽၢတ်ႇယၢၼ်ၵၼ်တင်းဝဵင်းဢေႃႈ။ ၶဝ်တၵ်းထၢင်ႇဝႃႈႁဝ်းၼီပၢႆႈၶဝ်မိူၼ်ၸိူဝ်ႉၼင်ႇၵမ်းဢွၼ်တၢင်းၼၼ်ႉဢေႃႈ။-
မိူဝ်ႈၼၼ်ႉသူတၵ်းလႆႈဢွၵ်ႇမႃးလႄႈတိုၵ်းသိမ်းဢဝ်ဝဵင်းၼၼ်ႉဢေႃႈ။ လွင်ႈမၼ်းၸမ်ႉ၊ ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းဢဝ်ဝဵင်းၼၼ်ႉဢၢပ်ႈပၼ်တီႈသူဢေႃႈ။-
မိူဝ်ႈဢၼ်သူတိုၵ်းပႄႉလႄႈလႆႈယဝ်ႉၼၼ်ႉသူတၵ်းလႆႈဢဝ်ၽႆးတုတ်ႇဝဵင်းပႅတ်ႈမႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉဝႆႉၼၼ်ႉဢေႃႈ။ ၵဝ်သင်ႇလၢတ်ႈဝႆႉတီႈသူယဝ်ႉ၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈ ယေႃးသု၊ ပွႆႇၸႂ်ႉၶဝ်ၵႂႃႇလႄႈၶဝ်ၵေႃႈဢွၼ်ၵၼ်ၵႂႃႇႁႂ်ႈလႆႈႁဵတ်းသိုၵ်းမူၵ်းယူႇၽၢႆႇတၢင်းဝၼ်းတူၵ်း ဢႃႇဢိ၊ ဝူင်ႈၵၢင်ဝဵင်း ဢႃႇဢိ၊ တင်းဝဵင်း ပေႇသလႃႉ၊ ၼၼ်ႉဢေႃႈ။ ယေႃးသု၊ ၸမ်ႉ၊ပႂ်ႉထႃႈယူႇၵႃႈၼႂ်းပၢင်တပ်ႉၶိုၼ်းၼိုင်ႈဢေႃႈ။
ၶိင်ႇၵၢင်ၼႂ်ၸဝ်ႉၸဝ်ႉ ယေႃးသု၊ လုၵ်ႉလႄႈႁွင်ႉဢဝ်ၵူၼ်းသိုၵ်းတင်းလၢႆမႃးၸုၵၼ်သေယဝ်ႉ၊တူဝ်မၼ်းဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်မဵဝ်း ဢိသရေး၊ ၸိူဝ်းၼၼ်ႉဢွၼ်ႁူဝ်ၶီႇသိုၵ်းၶိုၼ်ႈၸူးတီႈဝဵင်း ဢႃႇဢိ၊ ဢေႃႈ။-
ၵူၼ်းသိုၵ်းဢၼ်ပႃးလူၺ်ႈၵၼ်တင်းမၼ်းၼၼ်ႉဢွၼ်ၵၼ်ၶီႇသိုၵ်းၵႂႃႇသိုဝ်ႈၼႃႈၽၵ်းတူဝဵင်းၼၼ်ႉသေလႄႈ ၶျႃးပၢင်တပ်ႉယူႇၽၢႆႇတၢင်းႁွင်ႇဝဵင်းၼၼ်ႉဢေႃႈ။ ဝူင်ႈၵၢင်ၶဝ်တင်းဝဵင်း ဢႃႇဢိ၊ ၼၼ်ႉမီးၶူင်ႈႁူၺ်ႈဢၼ်ၼိုင်ႈဢေႃႈ။
မၼ်းသမ်ႉဢဝ်ၵူၼ်းႁႃႈႁဵင်ႁဵတ်းသိုၵ်းမူၵ်းယူႇၽၢႆႇတၢင်းႁွင်ႇဝဵင်းၼႂ်းဝူင်ႈၵၢင်ဝဵင်းၼၼ်ႉတင်းဝဵင်း ပေႇသလႃႉ၊ ဢေႃႈ။-
ၶဝ်မႄးႁႅၼ်းၼႃႈသိုၵ်းလူင်မီးဝႆႉၽၢႆႇတၢင်းႁွင်ႇဝဵင်းသေလႄႈသမ်ႉႁႅၼ်းဝႆႉသိုၵ်းမူၵ်းၽၢႆႇတၢင်းဝၼ်းတူၵ်းဝဵင်းဢေႃႈ။ ယေႃးသု၊ ၸမ်ႉ၊ၵိုတ်းထႃႈယူႇပူၼ်ႉၶိုၼ်းၵႃႈၼႂ်းၶူင်ႈႁူၺ်ႈဢေႃႈ။-
မိူဝ်ႈဢၼ်ၶုၼ်ႁေႃၶမ်း ဢႃႇဢိ၊ ႁၼ်ၵူၼ်း ယေႃးသု၊ ၼၼ်ႉၸိုင်၊မၼ်းဢိၵ်ႇတင်းၵူၼ်းမၼ်းတင်းမူတ်းဢွၼ်ၵၼ်ႁိပ်ႈၼႅတ်ႈၶီႇသိုၵ်းလူင်းၵႂႃႇၸူးတီႈပၢင်ႇႁူၺ်ႈၼမ်ႉ ယေႃးတၢၼ်ႇ၊ ႁႂ်ႈလႆႈတိုၵ်းတေႃးၵူၼ်းမဵဝ်း ဢိသရေး၊ ၶဝ်ၵႃႈတီႈပၢင်သိုၵ်းဢၼ်ၶဝ်တိုၵ်းၵၼ်ၵမ်းဢွၼ်တၢင်းမႃးၼၼ်ႉဢေႃႈ။ ၵူၺ်းၵႃႈ၊မၼ်းဢမ်ႇႁုလွင်ႈဢၼ်တပ်ႉသိုၵ်းမူၵ်းမီးယူႇတၢင်းလင်ၼၼ်ႉ။-
ယေႃးသု၊ ဢိၵ်ႇတင်းၵူၼ်းမၼ်းတင်းလၢႆႁဵတ်းၸိူဝ်ႉၼင်ႇႁၢင်ႈသုမ်းသေလႄႈဢွၼ်ၵၼ်ၼီပၢႆႈၵႂႃႇၸူးတီႈပၢင်ႇလွႆဢိုၼ်ႈၸိူဝ်းၼၼ်ႉဢေႃႈ။-
ၵူၼ်းၸၢႆးၵႃႈဢၼ်မီးၵႃႈၼႂ်းဝဵင်းၼၼ်ႉလႆႈၶၢမ်ႇတၢင်းဢၼ်ႁွင်ႉဢဝ်ႁႂ်ႈလႆႈလိုပ်ႈၸွမ်းၶဝ်လႄႈၶဝ်ၵေႃႈဢွၼ်ၵၼ်လိုပ်ႈလမ်းၸွမ်း ယေႃးသု၊ ၵႂႃႇယၢၼ်ၵႆၵၼ်တင်းဝဵင်းဢေႃႈ။-
ၵူၼ်းၸၢႆးဝဵင်း ဢႃႇဢိ၊ တင်း ပေႇသလႃႉ၊ ဢၼ်ဢမ်ႇလႆႈလိုပ်ႈၸွမ်းၵူၼ်းမဵဝ်း ဢိသရေး၊ ၵႂႃႇၼၼ်ႉယင်းဢမ်ႇၵိုတ်းယူႇသေၵေႃႉသေၵူၼ်းလႄႈၶဝ်ပွႆႇဝဵင်းႁႂ်ႈပဝ်ႇဝႆႉလႄႈဢမ်ႇမီးၵေႃႉဢၼ်တၵ်းၵႅတ်ႇၶႄဝဵင်းၼၼ်ႉသေၵေႃႉသေၵူၼ်း။
မိူဝ်ႈၼၼ်ႉ၊ ထႃႇဝရႃႉၽြႃး၊ မီးဢမိင်ႉတီႈ ယေႃးသု၊ လႄႈဝႃႈ၊ “ဢဝ်ႁွၵ်ႇမႂ်းယဵင်းငႃသႂ်ႇဝဵင်း ဢႃႇဢိ၊ တႃႉ။ ၵဝ်တၵ်းဢဝ်ဝဵင်းၼၼ်ႉဢၢပ်ႈပၼ်မႂ်းဢေႃႈ၊” ဝႃႈၼင်ႇၼႆလႄႈ၊ ယေႃးသု၊ ၵေႃႈႁဵတ်းၸွမ်းဢမိင်ႉၸဝ်ႈဢေႃႈ။-
မိူဝ်ႈဢၼ်မၼ်းယိုၼ်းမိုဝ်းမၼ်းၼၼ်ႉၸိုင်၊တပ်ႉသိုၵ်းမူၵ်းၼၼ်ႉလုၵ်ႉသေၵႃႈတီႈဢၼ်ၶဝ်တဵတ်ႇယူႇၼၼ်ႉၵမ်းလဵဝ်လႄႈလႅၼ်ႈၶဝ်ႈၵႃႈၼႂ်းဝဵင်းၼၼ်ႉသေလႄႈသိမ်းဢဝ်ၵမ်းလဵဝ်ဢေႃႈ။ ၶဝ်ႁိပ်ႈၼႅတ်ႈဢဝ်ၽႆးတုတ်ႇပႅတ်ႈဢေႃႈ။-
မိူဝ်ႈဢၼ်ၵူၼ်း ဢႃႇဢိ၊ ၸိူဝ်းၼၼ်ႉဝၢႆႇတူၺ်းၼၼ်ႉၸိုင်၊ၶဝ်ႁၼ်ၵႂၼ်းၽႆးၶိုၼ်ႈၽႃႉယူႇသေၵေႃႈၶဝ်ဢမ်ႇၸၢင်ႈႁဵတ်းၸိူဝ်ႉၼင်ႇႁိုဝ်ပၢႆႈလွတ်ႈလႆႈယဝ်ႉ။ ၵွပ်ႈပိူဝ်ႈၵူၼ်းမဵဝ်း ဢိသရေး၊ ၸိူဝ်းၼၼ်ႉတေႃႈလဵဝ်ၶိုၼ်းဝၢႆႇႁူဝ်မႃးတိုၵ်းတေႃးၶဝ်ၼၼ်ႉယူႇဢေႃႈ။-
လွင်ႈမၼ်းၸမ်ႉ၊မိူဝ်ႈဢၼ် ယေႃးသု၊ ဢိၵ်ႇတင်းၵူၼ်းမၼ်းတင်းလၢႆႁၼ်လွင်ႈတၢင်းဢၼ်တပ်းသိုၵ်းမူၵ်းၼၼ်ႉသိမ်းဢဝ်ဝဵင်းၼၼ်ႉယဝ်ႉလႄႈၵႂၼ်းၽႆးၶိုၼ်ႈယူႇၵႃႈၼိူဝ်ဝဵင်းၼၼ်ႉၸိုင်၊ၶဝ်ဢွၼ်ၵၼ်ဝၢႆႇႁူဝ်ၶိုၼ်းမႃးတိုၵ်းတေႃးလႄႈဢဝ်ၵူၼ်းဝဵင်း ဢႃႇဢိ၊ ၸိူဝ်းၼၼ်ႉတၢႆဢေႃႈ။-
ၵူၼ်းမဵဝ်း ဢိသရေး၊ ဢၼ်မီးၵႃႈၼႂ်းဝဵင်းၼၼ်ႉၸိူဝ်းၼၼ်ႉသမ်ႉၶီႇသိုၵ်းလူင်းမႃးၸွႆႈတိုၵ်းဢေႃႈ။ ပိူဝ်ႈၼႆလႄႈၵူၼ်းဝဵင်း ဢႃႇဢိ၊ ၸိူဝ်းၼၼ်ႉထူပ်းႁၼ်လွင်ႈတၢင်းဢၼ်ၵူၼ်းမဵဝ်း ဢိသရေး၊ ၶဝ်လွမ်ႉတိုၵ်းၶဝ်ႁွပ်ႈႁွပ်ႈယူႇသေယဝ်ႉ၊ၶဝ်လႆႈၶၢမ်ႇတၢင်းဢၼ်ဢဝ်တၢႆပႅတ်ႈမူတ်းမူတ်းသဵင်ႈသဵင်ႈတေႃႇထိုင်ႁွတ်ႈထၢၼ်ႈပေႃးဢမ်ႇၵိုတ်းသေၵေႃႉသေၵူၼ်းဢေႃႈ။-
ၶုၼ်ႁေႃၶမ်းဝဵင်း ဢႃႇဢိ၊ ၸမ်ႉ၊ၶဝ်တိလႆႈတူဝ်လိပ်းမၼ်းလႄႈဢဝ်မႃးၸူးတီႈ ယေႃးသု၊ ဢေႃႈ။
ၵူၼ်းမဵဝ်း ဢိသရေး၊ ၸိူဝ်းၼၼ်ႉဢဝ်ရၢၼ်ႇသူႇၶဝ်တၢႆပႅတ်ႈၵူႈၵေႃႉၵူႈၵူၼ်းၵႃႈၼႂ်းပၢင်ႇလွႆဢိုၼ်ႈတီႈဢၼ်ၶဝ်လိုပ်ႈလမ်းၸွမ်းမႃးၼၼ်ႉယဝ်ႉတူဝ်ႈသေယဝ်ႉ၊ၶဝ်သမ်ႉၶိုၼ်းၶဝ်ႈၵႂႃႇၵႃႈၼႂ်းဝဵင်း ဢႃႇဢိ၊ သေလႄႈယႃႉၽဵဝ်ႈၶဝ်ပႅတ်ႈလူၺ်ႈၶူမ်းလၢပ်ႇၶူမ်းလႅဝ်းၶဝ်ဢေႃႈ။-
ၵူၼ်းဝဵင်း ဢႃႇဢိ၊ ဢၼ်လႆႈတၢႆၼႂ်းဝၼ်းၼၼ်ႉၸဵမ်ယိင်းၸဵမ်ၸၢႆးမီးသေမိုၼ်ႇပၢႆသွင်ႁဵင်ၵေႃႉဢေႃႈ။-
ယေႃးသု၊ ၼၼ်ႉယင်းဢမ်ႇၵူႈဢမ်ႇယိုတ်းမိုဝ်းဢၼ်မၼ်းဢဝ်ႁွၵ်ႇယဵင်းငႃယူႇၼၼ်ႉတေႃႇထိုင်ႁွတ်ႈထၢၼ်ႈပေႃးမၼ်းယႃႉၽဵဝ်ႈၵူၼ်းဝဵင်း ဢႃႇဢိ၊ ၵႃႈမီးၼၼ်ႉပႅတ်ႈမူတ်းမူတ်းသဵင်ႈသဵင်ႈၼၼ်ႉဢေႃႈ။-
ၵူၺ်းၵႃႈ၊တူဝ်သတ်းလႂ်ဢိၵ်ႇတင်းဢုၵ်ႉၸႃႇၵႃႈဢၼ်သိမ်းလႆႈၵႃႈၼႂ်းဝဵင်းၼၼ်ႉၵူၺ်းၶဝ်ဢဝ်ဝႆႉပုၼ်ႈတူဝ်ၸဝ်ႈၵဝ်ႇၸွမ်းၼင်ႇၵႂၢမ်းဢၼ် ထႃႇဝရႃႉၽြႃး၊ မီးဢမိင်ႉဝႆႉတီႈ ယေႃးသု၊ ၼၼ်ႉဢေႃႈ။-
ယေႃးသု၊ ဢဝ်ၽႆးတုတ်ႇဝဵင်း ဢႃႇဢိ၊ သေလႄႈပႅတ်ႈႁၢမ်းယူႇၸိူဝ်ႉၼင်ႇၼႆတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။-
မၼ်းဢဝ်တူဝ်ၶုၼ်ႁေႃၶမ်းဝဵင်း ဢႃႇဢိ၊ ၼၼ်ႉႁွႆႈယူႇၵႃႈတီႈတူၼ်ႈမႆႉတေႃႇထိုင်ၶိင်ႇႁူဝ်ၶမ်ႈဢေႃႈ။ မိူဝ်ႈဢၼ်ထိုင်ၶိင်ႇၵၢင်ဝၼ်းတူၵ်းၸိုင်၊မၼ်းပူင်ဢမိင်ႉႁႂ်ႈၶဝ်ဢဝ်တူဝ်တၢႆမၼ်းၶျႃးလူင်းသေယဝ်ႉ၊ဢဝ်ပႅတ်ႈဝႆႉၵႃႈတီႈႁူးၽၵ်းတူဝဵင်းၼၼ်ႉဢေႃႈ။ ၶဝ်ဢဝ်မၢၵ်ႇႁိၼ်ၵွင်သႂ်ႇၵႃးၼိူဝ်မၼ်းၵွင်ယႂ်ႇၼႃႇလူင်လၢင်ထၢၼ်ႈပေႃးမီးယူႇတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
မိူဝ်ႈၼၼ်ႉ၊ ယေႃးသု၊ တႄႇႁဵတ်းၶဵင်ႇတၢင်းလူႇပုၼ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ ၶဝ်ၵႃႈၼိူဝ်လွႆ ဢေးပႃႇလႃႉ၊ ဢေႃႈ။-
မၼ်းတႄႇႁဵတ်းၸွမ်းၵႃႈၼင်ႇဢၼ် မူဝ်းသေႇ၊ ၶႃႈ ထႃႇဝရႃႉၽြႃး၊ သင်ႇလၢတ်ႈဝႆႉတီႈၵူၼ်းမဵဝ်း ဢိသရေး၊ မႅၼ်ႈၵႃႈၼင်ႇဢၼ်တႅမ်ႈဝႆႉၵႃႈၼႂ်းၵျၢမ်းပိင်းၺၢပ်ႈတြႃး မူဝ်းသေႇ၊ ဢၼ်ဝႃႈ၊ “ၶဵင်ႇတၢင်းလူႇမၢၵ်ႇႁိၼ်ဢၼ်ယင်းဢမ်ႇလႆႈဢဝ်တင်းၶိူင်ႈမိုဝ်းလဵၵ်းသေလႄႈထၢၵ်ႇႁဵတ်း” ၼၼ်ႉဢေႃႈ။ ၶဝ်ဢွၼ်ၵၼ်သၢၵ်ႈၵၢပ်ႈတၢင်းလူႇဢၼ်တုတ်ႇၽႆးပုၼ်ႈ ထႃႇဝရႃႉၽြႃး၊ လႄႈသမ်ႉႁဵတ်းတၢင်းလူႇမိၵ်ႈသႁႃႇယႃႉၵႃႈၼိူဝ်ၶဵင်ႇတၢင်းလူႇၼၼ်ႉဢေႃႈ။-
ၵႃႈၼိူဝ်မၢၵ်ႇႁိၼ်ၸိူဝ်းၼၼ်ႉ ယေႃးသု၊ တႅမ်ႈမၢႆၸွမ်းပိင်းၺၢပ်ႈတြႃး မူဝ်းသေႇ၊ ဢၼ်မၼ်းတႅမ်ႈဝႆႉသိုဝ်ႈၼႃႈတႂ်ႈတႃၵူၼ်းမဵဝ်း ဢိသရေး၊ တင်းလၢႆၼၼ်ႉဢေႃႈ။-
ၵူၼ်းမဵဝ်း ဢိသရေး၊ တင်းသဵင်ႈတင်းလူင်ပႃးၸဵမ်ၵူၼ်းဢၼ်ပဵၼ်ၵႄႇပဵၼ်ႁူဝ်ၶဝ်၊ၶုၼ်သိုၵ်းၸဝ်ႈသိုၵ်းၶဝ်၊ၶုၼ်ဢၼ်ၸီႇယၢင်ႇတြႃးၶဝ်ၸိူဝ်းဢၼ်ပဵၼ်ၵူၼ်းမဵဝ်းၶဝ်ၸႅတ်ႈၸႅတ်ႈဢိၵ်ႇတင်းၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ယူႇလူၺ်ႈၵၼ်တင်းၶဝ်ဢွၼ်ၵၼ်ၸုၵ်းသွင်ၽၢႆႇၶၢင်ႈတိူၵ်ႈပတိၺိၺ်ႇ ထႃႇဝရႃႉၽြႃး၊ သေလႄႈဝၢႆႇၼႃႈၸူးတီႈယဵၸ်ႈပရေႃးႁဵၵ်ႈ ၸိူဝ်းဢၼ်ႁၢမ်တိူၵ်ႈပတိၺိၺ်ႇၸဝ်ႈယူႇၼၼ်ႉဢေႃႈ။ ၵူၼ်းၶဝ်ၶိုင်ႈၼိုင်ႈၸုၵ်းယူႇဢဝ်လင်ဝၢႆႇၸူးတီႈလွႆ ၵေႇရၸိမ်ႇ၊ လႄႈ၊ၶိုင်ႈၼိုင်ႈသမ်ႉၸုၵ်းလႄႈဢဝ်လင်ဝၢႆႇၸူးတီႈလွႆ ဢေးပႃႇလႃႉ၊ ဢေႃႈ။ မူဝ်းသေႇ၊ ၶႃႈ ထႃႇဝရႃႉၽြႃး၊ မီးဢမိင်ႉတီႈၶဝ်ႁႂ်ႈၶဝ်ႁဵတ်းၸိူဝ်ႉၼင်ႇၼႆပုၼ်ႈဢၼ်တၵ်းၶၢမ်ႇဢဝ်တၢင်းလီမၢင်ႇၵလႃႇၼႂ်းမိူဝ်ႈဢၼ်ၶိင်ႇမၼ်းထုၵ်ႇၼၼ်ႉဢေႃႈ။-
မိူဝ်ႈၼၼ်ႉ၊ ယေႃးသု၊ ၽတ်းဢၢၼ်ႇပိင်းၺၢပ်ႈတြႃးၸဝ်ႈၵႃႈမီးဢၼ်ၶဝ်ႈပႃးၸႃႉၸဵမ်တၢင်းလီမၢင်ႇၵလႃႇဢိၵ်ႇတင်းတၢင်းဢၼ်ၵိၼ်ႇဢၼ်ဝႃႈ၊ဢႃႉမၢင်ႇၵလႃႇၸွမ်းၵႃႈၼင်ႇဢၼ်တႅမ်ႈသႂ်ႇဝႆႉၵႃႈၼႂ်းၵျၢမ်းပိင်းၺၢပ်ႈတြႃးၼၼ်ႉဢေႃႈ။-
ၵျၢမ်းပိင်းၺၢပ်ႈတြႃး မူဝ်းသေႇ၊ ၵႃႈမီးၸိူဝ်းၼၼ်ႉ ယေႃးသု၊ ၽတ်းဢၢၼ်ႇၵူႈၶေႃႈၵူႈၵမ်းတီႈမူႇၸုမ်းၸိူဝ်းၵူၼ်းတင်းသဵင်ႈတင်းလူင်ဢၼ်ၶဝ်ႈပႃးၸႃႉၸဵမ်ၽူႈယိင်း၊လုၵ်ႈဢွၼ်ႇဢိၵ်ႇတင်းၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ယူႇလူၺ်ႈၵၼ်တင်းၶဝ်ၼၼ်ႉဢေႃႈ။
လွင်ႈတၢင်းဢၼ်ၵူၼ်းမဵဝ်း ဢိသရေး၊ ၶဝ်ဢွင်ႇသိုၵ်းၼၼ်ႉၸွတ်ႇသႃႇႁူင်ႁၢင်းၵႂႃႇၵႃႈတီႈၶုၼ်ႁေႃၶမ်းၸိူဝ်းဢၼ်မီးၽၢႆႇတၢင်းဝၼ်းတူၵ်းၼမ်ႉ ယေႃးတၢၼ်ႇ၊ ၵႃႈၼိူဝ်လွႆ၊ၵႃႈတီႈပၢင်ႇပဵင်းဢိၵ်ႇတင်းၸွမ်းသၢပ်ႇပၢင်ႇလၢႆႇ မေႇတိထေးရီးယၼ်း၊ တေႃႇထိုင်ႁွတ်ႈမိူင်း လေႇပၼုၼ်ႇ၊ ၽၢႆႇတၢင်းႁွင်ႇဢေႃႈ။ ၶုၼ်ႁေႃၶမ်းၸိူဝ်းၼၼ်ႉၸမ်ႉ၊ပဵၼ်ၶုၼ်လူင်မဵဝ်း ႁိတ်ႉတိ၊ မဵဝ်း ဢႃႇမေႃးရိ၊ မဵဝ်း ၶႃႇၼၼိ၊ မဵဝ်း ၽေႇရၸိ၊ မဵဝ်း ႁိဝိ၊ မဵဝ်း ယေႇပုသိ၊ ဢေႃႈ။-
ၶဝ်ဢွၼ်ၵၼ်ၽွမ်ႉၵၼ်ၸုတုမ်ၵၼ်မႃးတိုၵ်းတေႃး ယေႃးသု၊ ဢိၵ်ႇတင်းၵူၼ်းမဵဝ်း ဢိသရေး၊ ဢေႃႈ။
ၵူၺ်းၵႃႈ၊ၵူၼ်းဝဵင်း ၵိပွင်ႇ၊ ဢၼ်ပဵၼ်ၵူၼ်းမဵဝ်း ႁိဝိ၊ ၸိူဝ်းၼၼ်ႉလႆႈငိၼ်းၶၢဝ်ႇလွင်ႈတၢင်းဢၼ် ယေႃးသု၊ ႁဵတ်းတီႈဝဵင်း ယေႇရိၶူဝ်း၊ တင်းဝဵင်း ဢႃႇဢိ၊ ၼၼ်ႉသေယဝ်ႉ၊-
ၶဝ်ၶိုင်ပွင်ႁဵတ်းပရိယႄႇတီႈ ယေႃးသု၊ ဢေႃႈ။ ၶဝ်ဢဝ်တၢင်းၵိၼ်တၢင်းၶူပ်းသႂ်ႇၼႂ်းထူင်ဢၼ်ၵဝ်ႇဢၼ်မွင်၊ဢဝ်ၼမ်ႉမၢၵ်ႇၸပိတ်ႉသႂ်ႇၼႂ်းထူင်ၼင်ဢၼ်ၵဝ်ႇဢၼ်မွင်ဢၼ်ယွၵ်းၶၢတ်ႇလႄႈၽုင်ၵုပ်းဝႆႉၼၼ်ႉတၢင်ႇမႃႉလီႈၶဝ်သေ၊-
ၼုင်ႈမႆၶူဝ်းၼုင်ႈဢၼ်ၵဝ်ႇမွင်၊တိုဝ်းသွၵ်းတိၼ်ဢၼ်ၵဝ်ႇမွင်ၽုင်ၵုပ်းၼၼ်ႉသေလႄႈၵႂႃႇဢေႃႈ။ တၢင်းၵိၼ်တၢင်းၶူပ်းၶဝ်ၼၼ်ႉႁႅင်ႈဝႆႉသႃးဝႆႉဢေႃႈ။-
ၶဝ်ၵႂႃႇၵႃႈတီႈပၢင်တပ်ႉ ၵိလႃႉၵႃႇလႃႉ၊ သေလႄႈၶဝ်ႈၸူးတီႈၽၢႆႇၼႃႈ ယေႃးသု၊ သေလႄႈလဝ်ႈလၢတ်ႈတီႈ ယေႃးသု၊ တင်းၵူၼ်းမဵဝ်း ဢိသရေး၊ တင်းလၢႆလႄႈဝႃႈ၊ “ႁဝ်းၶႃႈလုၵ်ႉသေၵႃႈတီႈမိူင်းဢၼ်ၵႆပုၼ်ႉႁွတ်ႈမႃးတီႈၶႃႈဢေႃႈ။ ႁဝ်းၶႃႈမႃးယွၼ်းႁဵတ်းမိၵ်ႈသႁႃႇယႃႉတၢင်းဢၼ်ထုၵ်ႇၵၼ်တင်းသူၸဝ်ႈတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၵူၼ်းမဵဝ်း ဢိသရေး၊ ၼၼ်ႉၶိုၼ်းလၢတ်ႈလႄႈဝႃႈ၊ “ႁဝ်းတၵ်းၸၢင်ႈႁဵတ်းမိၵ်ႈသႁႃႇယႃႉတၢင်းဢၼ်ထုၵ်ႇၵၼ်လူၺ်ႈၵၼ်တင်းသူလႆႈၸိူဝ်ႉၼင်ႇႁိုဝ်။ သူယူႇႁိမ်းႁွမ်းႁဝ်းၼႆႉႁိုဝ်း၊ဢမ်ႇယူႇႁိုဝ်းႁဝ်းဢမ်ႇႁု၊” ဝႃႈၼင်ႇၼႆဢေႃႈ။
ၶဝ်ၵေႃႈလၢတ်ႈတီႈ ယေႃးသု၊ လႄႈဝႃႈ၊ “ႁဝ်းၶႃႈပဵၼ်ၶႃႈဝၢၼ်ႈၵူၼ်းမိူင်းၸဝ်ႈႁဝ်းတီႈၶႃႈဢေႃႈ၊” ဝႃႈၼင်ႇၼႆလႄႈ၊ ယေႃးသု၊ ထၢမ်လႄႈဝႃႈ၊ “သူပဵၼ်ၽူႈလႂ်။ သူလုၵ်ႉသေၵႃႈတီႈလႂ်မႃး၊” ဝႃႈၼင်ႇၼႆဢေႃႈ။
ၶဝ်ၶိုၼ်းလဝ်ႈလၢတ်ႈလွင်ႈတၢင်းၶဝ်တီႈ ယေႃးသု၊ လႄႈဝႃႈ၊ “ႁဝ်းၶႃႈလုၵ်ႉသေၵႃႈတီႈမိူင်းဢၼ်ၵႆၼႃႇၼၼ်ႉမႃး၊ၵွပ်ႈပိူဝ်ႈႁဝ်းၶႃႈငိၼ်းလွင်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူၸဝ်ႈၼၼ်ႉဢေႃႈ။ ႁဝ်းၶႃႈငိၼ်းၶၢဝ်ႇမၼ်းၸဝ်ႈၵူႈၸိူဝ်ႉၵူႈမဵဝ်းဢၼ်မၼ်းၸဝ်ႈႁဵတ်းၵႃႈတီႈမိူင်း ဢေးၵျိပ်ႉ၊ -
ဢိၵ်ႇတင်းၶၢဝ်ႇဢၼ်မၼ်းၸဝ်ႈႁဵတ်းတီႈၶုၼ်ႁေႃၶမ်း ဢႃႇမေႃးရိ၊ သွင်ပႃး ၽၢႆႇတၢင်းဝၼ်းဢွၵ်ႇၼမ်ႉ ယေႃးတၢၼ်ႇ၊ ဢၼ်ဝႃႈ၊ၶုၼ်ႁေႃၶမ်း သိႁုၼ်ႇ၊ မိူင်း ႁေႇသၽုၼ်ႇ၊ တင်းၶုၼ်ႁေႃၶမ်း ဢေႃႇၶႃႉ၊ မိူင်း ပႃႇသၢၼ်ႇ၊ ဢၼ်ယူႇၼႂ်းဝဵင်း ဢႃႇသတႃႇရုတ်ႉ၊ ၼၼ်ႉယဝ်ႉတီႈၶႃႈယဝ်ႉ။-
ပိူဝ်ႈၼႆလႄႈၵူၼ်းဢၼ်ပဵၼ်ၵႄႇပဵၼ်ႁူဝ်ၶႃႈၸဝ်ႈႁဝ်းၶဝ်ဢိၵ်ႇတင်းၵူၼ်းဝၢၼ်ႈၵူၼ်းမိူင်းၶႃႈၸဝ်ႈႁဝ်းၶဝ်တင်းသဵင်ႈတင်းလူင်ၼၼ်ႉသင်ႇလၢတ်ႈတီႈၶႃႈၸဝ်ႈႁဝ်းၶဝ်လႄႈဝႃႈ၊ ‘ပႃးဢဝ်ၶဝ်ႈၼမ်ႉတၢင်းၵိၼ်ပုၼ်ႈၶၢဝ်းတၢင်းသူသေလႄႈ ၵႂႃႇႁႂ်ႈလႆႈႁူပ်ႉထူပ်းၶဝ်တႃႉ။ တွင်းပၢၼ်ႇတီႈၶဝ်ႁႂ်ႈလႆႈပဵၼ်ၶႃႈဝၢၼ်ႈၵူၼ်းမိူင်းၶဝ်သေလႄႈယွၼ်းႁဵတ်းမိၵ်ႈသႁႃႇယႃႉတၢင်းဢၼ်ထုၵ်ႇၵၼ်တင်းၶဝ်တႃႉ၊’ ဝႃႈၼႆတီႈၶႃႈဢေႃႈ။-
တူၺ်းၶဝ်ႈမုၼ်းၶႃႈၸဝ်ႈႁဝ်းၶဝ်ၼႆႉသေၵမ်း။ မိူဝ်ႈဢၼ်ၶႃႈၸဝ်ႈႁဝ်းၶဝ်ဢွၵ်ႇႁိူၼ်းမႃးႁႂ်ႈလႆႈထူပ်းသူၸဝ်ႈၼၼ်ႉၸိုင်၊ၶဝ်ႈမုၼ်းၼႆႉယင်းဢုၼ်ႇယင်းမႆႈယူႇဢေႃႈ။ မိူဝ်ႈလဵဝ်ၼႆႉၸမ်ႉ၊မီးတၢင်းဢၼ်ႁႅင်ႈၵႂႃႇသႃးၵႂႃႇယဝ်ႉတီႈၶႃႈဢေႃႈ။-
ထူင်ၼင်ၸိူဝ်းၼႆႉၵေႃႈမိူဝ်ႈဢၼ်ၶႃႈၸဝ်ႈႁဝ်းၶဝ်ဢဝ်ၼမ်ႉမၢၵ်ႇၸပိတ်ႉသႂ်ႇတဵမ်ဝႆႉၼၼ်ႉပဵၼ်ဢၼ်မႂ်ႇတီႈၶႃႈဢေႃႈ။ တူၺ်းၶႃႈလူး။ မီးတၢင်းဢၼ်ယွၵ်းၵႂႃႇသိၵ်ႇၵႂႃႇယဝ်ႉတီႈၶႃႈဢေႃႈ။ ၶူဝ်းၼုင်ႈတၢင်းမႆၸိူဝ်းၼႆႉ၊ၶႅပ်းတိၼ်ၸိူဝ်းၼႆႉၵေႃႈၵဝ်ႇမွင်ၵႂႃႇၼႂ်းၶၢဝ်းတၢင်းဢၼ်ၵႆၼႃႇလူင်လၢင်ၼႆႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၵူၼ်းမဵဝ်း ဢိသရေး၊ ၸိူဝ်းၼၼ်ႉယင်းဢမ်ႇလဝ်ႈဢမ်ႇထၢမ် ထႃႇဝရႃႉၽြႃး၊ လႄႈဢဝ်တၢင်းၵိၼ်တၢင်းၶူပ်းၶဝ်ၼၼ်ႉၵိၼ်ဢေႃႈ။-
ယေႃးသု၊ ၵေႃႈႁဵတ်းမိၵ်ႈသႁႃႇယႃႉတၢင်းဢၼ်ထုၵ်ႇၵၼ်တင်းၵူၼ်းဝဵင်း ၵိပွင်ႇ၊ ၸိူဝ်းၼၼ်ႉသေလႄႈပၼ်ဢၶႂၢင်ႉႁႂ်ႈၶဝ်လႆႈၶျၢမ်းသႃႇသေဢေႃႈ။ ၶုၼ်ၼႂ်းမူႇၼႂ်းၸိူဝ်း ဢိသရေး၊ တင်းလၢႆၵေႃႈႁဵတ်းသဵတ်ႈၸႃႇတၢင်းဢၼ်ထုၵ်ႇၵၼ်တင်းၶဝ်ၸိူဝ်းၼၼ်ႉဢေႃႈ။
လိုၼ်းသေဢၼ်ၶဝ်ႁဵတ်းမိၵ်ႈသႁႃႇယႃႉတၢင်းဢၼ်ထုၵ်ႇၵၼ်တင်းၶဝ်ၼၼ်ႉလႆႈသၢမ်ဝၼ်းၸိုင်၊ၵူၼ်းမဵဝ်း ဢိသရေး၊ ၶဝ်လႆႈႁုလွင်ႈဢၼ်ၵူၼ်းၸိူဝ်းၼၼ်ႉပဵၼ်ၵူၼ်းဢၼ်မီးႁိမ်းႁွမ်းၶဝ်ၵူၺ်းၼၼ်ႉဢေႃႈ။-
ပိူဝ်ႈၼႆလႄႈၵူၼ်းမဵဝ်း ဢိသရေး၊ တင်းလၢႆၶီႇသိုၵ်းၶိုၼ်ႈလႄႈၼႂ်းဝၼ်းဢၼ်ထူၼ်ႈသၢမ်ဝၼ်းၼၼ်ႉႁွတ်ႈထိုင်ၵႂႃႇၵႃႈတီႈဝဵင်းၶဝ်ၼၼ်ႉဢေႃႈ။ ဝဵင်းၸိူဝ်းၼၼ်ႉပဵၼ်ဝဵင်း ၵိပွင်ႇ၊ ဝဵင်း ၶေႇၽိရႃႉ၊ ဝဵင်း ပေႇရုတ်ႉ၊ ဝဵင်း ၵိရယတ်ႉယႃႇရိမ်ႇ၊ ဢေႃႈ။-
ၵူၺ်းၵႃႈ၊ၵူၼ်းမဵဝ်း ဢိသရေး၊ တင်းလၢႆဢမ်ႇၸၢင်ႈတိုၵ်းတေႃးယႃႉပႅတ်ႈၶဝ်ၼၼ်ႉၵွပ်ႈပိူဝ်ႈၵူၼ်းဢၼ်ပဵၼ်ၵႄႇပဵၼ်ႁူဝ်ၶဝ်လႆႈႁဵတ်းမိၵ်ႈသႁႃႇယႃႉတၢင်းဢၼ်ထုၵ်ႇၵၼ်လူၺ်ႈၵၼ်တင်းၶဝ်ၼၼ်ႉၵႃႈၼႂ်းၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ ၼၼ်ႉဝႆႉယဝ်ႉၼၼ်ႉဢေႃႈ။ ၵူၼ်းၵႃႈမီးတင်းသဵင်ႈတင်းလူင်ဢွၼ်ၵၼ်တၢင်ႇဢပျတ်ႈတီႈၵူၼ်းၵႄႇၵူၼ်းႁူဝ်တင်းလၢႆလူၺ်ႈလွင်ႈတၢင်းၼႆႉဢေႃႈ။-
ၶုၼ်ၸိူဝ်းၼၼ်ႉဢွၼ်ၵၼ်ၶိုၼ်းလၢတ်ႈလႄႈဝႃႈ၊ “ႁဝ်းလႆႈၶၢမ်ႇၵတိသဵတ်ႈၸႃႇတီႈၶဝ်ၵႃႈၼႂ်းၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ ၼၼ်ႉဝႆႉယဝ်ႉလႄႈႁဝ်းဢမ်ႇၸၢင်ႈလႆႈတိူဝ်ႉလႆႈထုၵ်ႇၶဝ်ယဝ်ႉ။-
ႁဝ်းလူဝ်ႇဝႆႉႁႂ်ႈၶဝ်လႆႈယူႇၶျၢမ်းသႃႇၵွပ်ႈလူၺ်ႈၵတိသဵတ်ႈၸႃႇႁဝ်းၼၼ်ႉဢေႃႈ။ ပေႃးႁဝ်းသဵတ်ႈၸႃႇလုၸိုင်၊ၵူဝ်ၽြႃးပဵၼ်ၸဝ်ႈတၵ်းပၼ်တၢမ်ႇဢပျတ်ႈတီႈႁဝ်းဢေႃႈ။”
“ဝႆႉႁႂ်ႈၶဝ်လႆႈယူႇၶျၢမ်းသႃႇတႃႉ။ ၵူၺ်းၵႃႈ၊ၶဝ်တၵ်းလႆႈႁႃၽိုၼ်းဢိၵ်ႇတင်းတဵၵ်းၼမ်ႉပုၼ်ႈႁဝ်းဢေႃႈ၊” ဝႃႈၼင်ႇၼႆၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆပူင်ဢမိင်ႉဝႆႉဢေႃႈ။
ယေႃးသု၊ ပူင်ဢမိင်ႉႁႂ်ႈႁွင်ႉဢဝ်ၵူၼ်းဝဵင်း ၵိပွင်ႇ၊ ၸိူဝ်းၼၼ်ႉမႃးၸူးတီႈမၼ်းသေလႄႈလၢတ်ႈဝႃႈ၊ “သူၼႆႉမီးၵႃႈတီႈႁိမ်းႁွမ်းႁဝ်းၵူၺ်းလႄႈႁဵတ်းသင်သမ်ႉပႅတ်ႉလႅၼ်ႁဝ်းလႄႈဝႃႈ၊သူလုၵ်ႉသေၵႃႈတီႈဢၼ်ၵႆၼႃႇလူင်လၢင်ၼၼ်ႉမႃးဝႃႈၼင်ႇၼႆၸိူဝ်ႉၼင်ႇႁိုဝ်။-
ၵွပ်ႈပိူဝ်ႈလွင်ႈတၢင်းၼႆႉလႄႈ၊ၽြႃးပဵၼ်ၸဝ်ႈၵိၼ်ႇဝႃႈတီႈသူယဝ်ႉ။ ၵူၼ်းသူတင်းလၢႆတၵ်းလႆႈပဵၼ်ၶႃႈဢၼ်ႁႃၽိုၼ်းဢိၵ်ႇတင်းတဵၵ်းၼမ်ႉပၼ်ပုၼ်ႈႁိူၼ်းၽြႃးပဵၼ်ၸဝ်ႈဢဝ်ၼႆႉၵႂႃႇတႃႇသေႇဢမ်ႇထၢတ်ႇဢေႃႈ၊” ဝႃႈၼင်ႇၼႆဢေႃႈ။
ၶဝ်ၵေႃႈၶိုၼ်းလၢတ်ႈလႄႈဝႃႈ၊ “ၸဝ်ႈႁဝ်းတီႈၶႃႈ။ ၶႃႈၸဝ်ႈႁဝ်းၶဝ်လႆႈႁဵတ်းမႅၼ်ႈၸိူဝ်ႉၼင်ႇၼႆၵွပ်ႈပိူဝ်ႈၶႃႈၸဝ်ႈႁဝ်းၶဝ်လႆႈႁုလွင်ႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူၸဝ်ႈၼၼ်ႉသင်ႇလၢတ်ႈဝႆႉတီႈၶႃႈမၼ်းၸဝ်ႈ မူဝ်းသေႇ၊ လႄႈဝႃႈ၊တၵ်းဢဝ်မိူင်းၼႆႉတင်းသဵင်ႈတင်းလူင်ဢၢပ်ႈပၼ်ၼႂ်းမိုဝ်းသူၸဝ်ႈ၊သမ်ႉႁႂ်ႈပႄႇၽဵဝ်ႈဢဝ်တၢႆၵူၼ်းဢၼ်ယူႇၼႂ်းမိူင်းၼႆႉတင်းသဵင်ႈတင်းမူတ်းဝႃႈၼႆၼၼ်ႉပဵၼ်ၸွမ်းမႃးတႄႉတႄႉဝႃႈဝႃႈၼၼ်ႉတီႈၶႃႈဢေႃႈ။ ၶႃႈၸဝ်ႈႁဝ်းၶဝ်လႆႈႁဵတ်းမႅၼ်ႈၸိူဝ်ႉၼင်ႇၼႆၵွပ်ႈပိူဝ်ႈၶႃႈၸဝ်ႈႁဝ်းၶဝ်ၵူဝ်ႁႄၸဝ်ႈႁဝ်းၼႃႇလူင်လၢင်လႄႈၵူဝ်ဢသၢၵ်ႈၶႃႈၸဝ်ႈႁဝ်းၶဝ်တၵ်းလႆႈသုမ်းလႆႈလုၵႂႃႇလၢႆလၢႆၼၼ်ႉတီႈၶႃႈဢေႃႈ။-
တေႃႈလဵဝ်ၼႆႉၶႃႈၸဝ်ႈႁဝ်းၶဝ်မီးၼႂ်းမိုဝ်းၸဝ်ႈႁဝ်းတီႈၶႃႈဢေႃႈ။ ၵႃႈၼင်ႇဢၼ်ၸဝ်ႈႁဝ်းထၢင်ႇပဵၼ်ဢၼ်လီဢၼ်ထုၵ်ႇပုၼ်ႈၶႃႈၸဝ်ႈႁဝ်းၶဝ်ၼၼ်ႉႁဵတ်းသေၵမ်းတီႈၶႃႈ၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈဢၼ် ယေႃးသု၊ ႁဵတ်းတီႈၶဝ်ၼၼ်ႉၸမ်ႉ၊မၼ်းႁႄႉၶႅၼ်ၶဝ်လႄႈဢမ်ႇပၼ်ဢၶႂၢင်ႉႁႂ်ႈၵူၼ်းမဵဝ်း ဢိသရေး၊ တင်းလၢႆလႆႈဢဝ်ၶဝ်တၢႆၼၼ်ႉဢေႃႈ။-
ၼႆႉၵူၺ်းဢမ်ႇၵႃး၊မၼ်းၸီႇယၢင်ႇႁႂ်ႈၶဝ်ပဵၼ်ၶႃႈဢၼ်ႁႃၽိုၼ်းဢိၵ်ႇတင်းတဵၵ်းၼမ်ႉပၼ်ပုၼ်ႈၵူၼ်းမဵဝ်း ဢိသရေး၊ တင်းလၢႆ ဢိၵ်ႇတင်းပုၼ်ႈၶဵင်ႇတၢင်းလူႇ ထႃႇဝရႃႉၽြႃး၊ ဢေႃႈ။ ၶဝ်ၵေႃႈလႆႈသိုပ်ႇႁဵတ်းၼႃႈၵၢၼ်ၼၼ်ႉၵႃႈၼႂ်းတီႈဢၼ် ထႃႇဝရႃႉၽြႃး၊ လိူၵ်ႈဢဝ်ႁႂ်ႈပဵၼ်တီႈဢၼ်ႁဵတ်းဝၢတ်ႈၽြႃးၼၼ်ႉယူႇတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
ဢတေႃးၼိၸေႇတႅၵ်ႉ၊ ၶုၼ်ႁေႃၶမ်းဝဵင်း ယေႇရုသလႅမ်ႇ၊ ငိၼ်းလွင်ႈဢၼ် ယေႃးသု၊ တိုၵ်းပႄႉသိမ်းဢဝ်ဝဵင်း ဢႃႇဢိ၊ လႄႈယႃႉၽဵဝ်ႈပႅတ်ႈမူတ်းမူတ်းသဵင်ႈသဵင်ႈဢိၵ်ႇတင်းၶုၼ်ႁေႃၶမ်းမၼ်းၵေႃႈလႆႈၶၢမ်ႇတၢင်းဢၼ်ဢဝ်တၢႆမိူၼ်မိူၼ်ၵၼ်တင်းတၢင်းဢၼ်ႁဵတ်းတီႈဝဵင်း ယေႇရိၶူဝ်း၊ ဢိၵ်ႇတင်းၶုၼ်ႁေႃၶမ်းမၼ်းၼၼ်ႉဢေႃႈ။ မၼ်းသမ်ႉလႆႈငိၼ်းဝႃႈ၊ၵူၼ်းဝဵင်း ၵိပွင်ႇ၊ ၶဝ်ႁဵတ်းမိၵ်ႈသႁႃႇယႃႉတၢင်းဢၼ်ထုၵ်ႇၵၼ်ၼၼ်ႉလူၺ်ႈၵၼ်တင်းၵူၼ်းမဵဝ်း ဢိသရေး၊ ၶဝ်လႄႈယူႇလူၺ်ႈၵၼ်တင်းၶဝ်ယူႇၼၼ်ႉဢေႃႈ။-
မိူဝ်ႈၼၼ်ႉၵူၼ်းဝဵင်း ယေႇရုသလႅမ်ႇ၊ တင်းလၢႆတူၵ်းၸႂ်ၵူဝ်ႁႄၼႃႇလူင်လၢင်ၵွပ်ႈပိူဝ်ႈဢၼ်ဝဵင်း ၵိပွင်ႇ၊ ၼၼ်ႉပဵၼ်ဝဵင်းယႂ်ႇဝဵင်းလူင်မိူၼ်ၸိူဝ်ႉၼင်ႇပဵၼ်ဝဵင်းၸဝ်ႈလႄႈယင်းပဵၼ်ဝဵင်းဢၼ်ယႂ်ႇသေဝဵင်း ဢႃႇဢိ၊ သေယဝ်ႉ၊ၵူၼ်းသိုၵ်းမၼ်းတင်းလၢႆၵေႃႈပဵၼ်ၵူၼ်းၵတ်ႉၵူၼ်းၶႅၼ်ႇၼႃႇၼၼ်ႉဢေႃႈ။-
ပိူဝ်ႈၼႆလႄႈ ဢတေႃးၼိၸေႇတႅၵ်ႉ၊ သူင်ႇၶၢဝ်ႇၵႂႃႇၸူးတီႈၶုၼ်ႁေႃၶမ်း ႁေႃႇရမ်ႇ၊ ဢၼ်ပဵၼ်ၶုၼ်ႁေႃၶမ်းဝဵင်း ႁေႇပရုၼ်ႇ၊ပိရမ်ႇ၊ ဢၼ်ပဵၼ်ၶုၼ်ႁေႃၶမ်းဝဵင်း ယႃႇမုတ်ႉ၊ယႃႇၽျႃႉ၊ ဢၼ်ပဵၼ်ၶုၼ်ႁေႃၶမ်းဝဵင်း လႃႇၶိသႃႉ၊ ဢိၵ်ႇတင်းၶုၼ်ႁေႃၶမ်း တေႇပိရႃႉ၊ ဢၼ်ပဵၼ်ၶုၼ်ႁေႃၶမ်းဝဵင်း ဢေႇၵလွၼ်ႇ၊ ၸိူဝ်းၼၼ်ႉလႄႈဝႃႈ၊-
“ဢွၼ်ၵၼ်မႃးၸွႆႈၵဝ်တိုၵ်းဝဵင်း ၵိပွင်ႇ၊ သေၵမ်း။ ၶဝ်ၼၼ်ႉႁဵတ်းမိၵ်ႈသႁႃႇယႃႉတၢင်းဢၼ်ထုၵ်ႇၵၼ်တင်း ယေႃးသု၊ ဢိၵ်ႇတင်းၵူၼ်းမဵဝ်း ဢိသရေး၊ ၶဝ်ယဝ်ႉ၊” ဝႃႈၼင်ႇၼႆဢေႃႈ။-
ၶုၼ်ႁေႃၶမ်း ဢႃႇမေႃးရိ၊ ႁႃႈပႃးဢၼ်ဝႃႈ၊ၶုၼ်ႁေႃၶမ်းဝဵင်း ယေႇရုသလႅမ်ႇ၊ ၶုၼ်ႁေႃၶမ်းဝဵင်း ႁေႇပရုၼ်ႇ၊ ၶုၼ်ႁေႃၶမ်းဝဵင်း ယႃႇမုတ်ႉ၊ ၶုၼ်ႁေႃၶမ်းဝဵင်း လႃႇၶိသႃႉ၊ တင်းၶုၼ်ႁေႃၶမ်းဝဵင်း ဢေႇၵလွၼ်ႇ၊ ၸိူဝ်းၼၼ်ႉၽွမ်ႉၵၼ်မႃးၸွမ်းတိုၵ်းဝဵင်း ၵိပွင်ႇ၊ ဢေႃႈ။
ၵူၼ်းဝဵင်း ၵိပွင်ႇ၊ ၸိူဝ်းၼၼ်ႉသူင်ႇၶၢဝ်ႇၵႂႃႇၸူးတီႈ ယေႃးသု၊ ၵႃႈတီႈပၢင်တပ်ႉ ၵိလႃႉၵႃႇလႃႉ၊ လႄႈဝႃႈ၊ “ၶႅၼ်းတေႃႈယႃႇပေၸုၼ်ႉပႅတ်ႈၶႃႈၸဝ်ႈႁဝ်းၶဝ်ဝႆႉသေၵမ်း။ ၶႅၼ်းတေႃႈမႃးၵမ်းလဵဝ်သေၵမ်း။ မႃးၸွႆႈထႅမ်ၶႃႈၸဝ်ႈႁဝ်းၶဝ်လႄႈၵႄႇသႄႇဢဝ်ၶႃႈၸဝ်ႈႁဝ်းၶဝ်သေၵမ်း။ ၶုၼ်ႁေႃၶမ်းမဵဝ်း ဢႃႇမေႃးရိ၊ ၸိူဝ်းဢၼ်မီးၵႃႈၼိူဝ်မိူင်းလွႆတင်းလၢႆၼၼ်ႉၽွမ်ႉၵၼ်မႃးတိုၵ်းတေႃးၶႃႈၸဝ်ႈႁဝ်းၶဝ်တီႈၶႃႈဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ယေႃးသု၊ ဢိၵ်ႇတင်းတပ်ႉသိုၵ်းမၼ်းတင်းသဵင်ႈတင်းလူင်ဢၼ်ပႃးၸႃႉၸဵမ်ၵူၼ်းသိုၵ်းဢၼ်ၵတ်ႉၶႅၼ်ႇၼႃႇၸိူဝ်းၼၼ်ႉဢွၼ်ၵၼ်လုၵ်ႉသေၵႃႈတီႈ ၵိလႃႉၵႃႇလႃႉ၊ ၶိုၼ်ႈၵႂႃႇဢေႃႈ။-
ထႃႇဝရႃႉၽြႃး၊ မီးဢမိင်ႉတီႈ ယေႃးသု၊ လႄႈဝႃႈ၊ “ယႃႇပေၵူဝ်ၶဝ်။ ၵဝ်လႆႈပၼ်တၢင်းဢၼ်ဢွင်ႇသိုၵ်းၼၼ်ႉတီႈမႂ်းယဝ်ႉယဝ်ႉ။ ၽူႈလႂ်သေၵေႃႉသေၵူၼ်းဢမ်ႇၸုၵ်းၶၢမ်ႇၽၢႆႇၼႃႈမႂ်းလႆႈ၊” ဝႃႈၼင်ႇၼႆဢေႃႈ။-
ယေႃးသု၊ ဢိၵ်ႇတင်းတပ်ႉသိုၵ်းမၼ်းလုၵ်ႉသေၵႃႈတီႈ ၵိလႃႉၵႃႇလႃႉ၊ ၶီႇသိုၵ်းၶိုၼ်ႈၵႂႃႇၸူးတီႈဝဵင်း ၵိပွင်ႇ၊ တင်းၶိုၼ်းလႄႈၵိုင်ႉၵၢင်ႉၽုတ်းသႂ်ႇတိုၵ်းတေႃးၵူၼ်း ဢႃႇမေႃးရိ၊ ၶဝ်ၵမ်းလဵဝ်ဢေႃႈ။-
ထႃႇဝရႃႉၽြႃး၊ ႁႂ်ႈၵူၼ်း ဢႃႇမေႃးရိ၊ ၶဝ်တူၵ်းသုမ်းၵႃႈတီႈၽၢႆႇၼႃႈတပ်ႉသိုၵ်း ဢိသရေး၊ တင်းလၢႆဢေႃႈ။ ၵူၼ်းမဵဝ်း ဢိသရေး၊ တင်းလၢႆဢဝ်ၶဝ်တၢႆၵႃႈတီႈႁိမ်းဝဵင်း ၵိပွင်ႇ၊ သေလႄႈလိုပ်ႈလမ်းၶဝ်လူင်းၸွမ်းသဵၼ်ႈတၢင်းလွႆၵႃႈတီႈဝဵင်း ပႅတ်ႉႁေႃႇရုၼ်ႇ၊ ၼၼ်ႉလႄႈတိုၵ်းတေႃးယႃႉပႅတ်ႈတေႃႇထိုင်ႁွတ်ႈဝဵင်း ဢၸေႇၵႃႇ၊ တင်းဝဵင်း မိၵ်ႉၵတႃႇ၊ ပုၼ်ႉဢေႃႈ။-
ယၢမ်းမိူဝ်ႈဢၼ်ၵူၼ်းမဵဝ်း ဢႃႇမေႃးရိ၊ တင်းလၢႆယင်းတိုၵ်ႉလႅၼ်ႈပၢႆႈၵူၼ်းမဵဝ်း ဢိသရေး၊ ၶဝ်ၵႂႃႇၸွမ်းသဵၼ်ႈတၢင်းယူႇၼၼ်ႉ ထႃႇဝရႃႉၽြႃး၊ ဢဝ်မၢၵ်ႇႁဵပ်းလူင်တူၵ်းသႂ်ႇၵႃႈၼိူဝ်ၵူၼ်းမဵဝ်းၸွမ်းၵူႈၶၢဝ်းတၢင်းတေႃႇထိုင်ႁွတ်ႈဝဵင်း ဢၸေႇၵႃႇ၊ လႄႈၶဝ်ၼၼ်ႉတၢႆဢေႃႈ။ ၵူၼ်းဢၼ်တၢႆလူၺ်ႈမၢၵ်ႇႁဵပ်းၸိူဝ်းၼၼ်ႉယဵင်ႈၶႅၼ်းၼမ်ၼႃႇသေၵူၼ်းဢၼ်တၢႆလူၺ်ႈလၢပ်ႇလူၺ်ႈလႅဝ်းဢၼ်ၵူၼ်းမဵဝ်း ဢိသရေး၊ ၶဝ်ၽၼ်းတၢႆၼၼ်ႉလူးၵွၼ်ႇဢေႃႈ။
ၼႂ်းဝၼ်းဢၼ် ထႃႇဝရႃႉၽြႃး၊ ပၼ်ႁႂ်ႈၵူၼ်းမဵဝ်း ဢိသရေး၊ ပႄႉသိုၵ်းၵႃႈၼိူဝ်ၵူၼ်း ဢႃႇမေႃးရိ၊ ၶဝ်ၼၼ်ႉ၊ ယေႃးသု၊ သူးတွင်းတီႈ ထႃႇဝရႃႉၽြႃး၊ ဢေႃႈ။ မၼ်းလၢတ်ႈဢွၵ်ႇသူပ်းၵႃႈတီႈၽၢႆႇၼႃႈမဵဝ်း ဢိသရေး၊ ၶဝ်လႄႈဝႃႈ၊ “ၵၢင်ဝၼ်း႟။ သဝ်းယူႇၵႃႈၼိူဝ်ဝဵင်း ၵိပွင်ႇ၊ ဝႆႉၼိမ်ၼိမ်တႃႉ။ လိူၼ်႟။ ၵိုတ်းသဝ်းယူႇၵႃႈၼိူဝ်ထူင်ႉ ဢႃႇၸလုၼ်ႇ၊ တႃႉ၊” ဝႃႈၼင်ႇၼႆဢေႃႈ။
ၵၢင်ဝၼ်းယူႇၼိမ်ၼိမ်လႄႈ၊လိူၼ်ၵေႃႈၵိုတ်းသဝ်းယူႇတေႃႇထိုင်ႁွတ်ႈၵူၼ်းမဵဝ်းၶဝ်ထၢၼ်ႈပေႃးတိုၵ်းပႄႉရၢၼ်ႇသူႇၶဝ်ဢေႃႈ။ လွင်ႈတၢင်းၼႆႉၸိုင်၊တႅမ်ႈဝႆႉၵႃႈၼႂ်း ပပ်ႉလိၵ်ႈယႃႇသႃႇ၊ လႄႈဝႃႈ၊ၵၢင်ဝၼ်းသဝ်းၼိမ်ယူႇၵႃႈၼႂ်းၼႃႈၽႃႉၵၢင်ႁၢဝ်လႄႈယင်းဢမ်ႇၼႅတ်ႈတူၵ်းၵႂႃႇၸူဝ်ႈဝၼ်းၼိုင်ႈၸမ်ၸမ်ဢေႃႈ၊ဝႃႈၼင်ႇၼႆဝႆႉဢေႃႈ။-
ထႃႇဝရႃႉၽြႃး၊ ထွမ်ႇဢဝ်ၵႂၢမ်းၵူၼ်းလႄႈၵႃႈပူၼ်ႉမႃးဢမ်ႇတွၼ်ႉပဵၼ်ဝၼ်းမိူၼ်ၸိူဝ်ႉၼင်ႇၼၼ်သေဝၼ်း။ လိုၼ်းၼၼ်ႉၵေႃႈတေဢမ်ႇပဵၼ်ထႅင်ႈ။ လွင်ႈမၼ်းၸမ်ႉ၊ ထႃႇဝရႃႉၽြႃး၊ ယူႇၽၢႆႇၵူၼ်းမဵဝ်း ဢိသရေး၊ သေလႄႈတိုၵ်းသိုၵ်းဢေႃႈ။
လိုၼ်းၼၼ်ႉ၊ ယေႃးသု၊ ဢိၵ်ႇတင်းတပ်ႉသိုၵ်းမၼ်းၶိုၼ်းမိူဝ်းၸူးတီႈပၢင်တပ်ႉ ၵိလႃႉၵႃႇလႃႉ၊ သေဢေႃႈ။
ၶုၼ်ႁေႃၶမ်း ဢႃႇမေႃးရိ၊ ႁႃႈပႃးၼၼ်ႉၸမ်ႉ၊လွတ်ႈၵႂႃႇလႄႈဢွၼ်ၵၼ်ပၢႆႈတဵတ်ႇယူႇၵႃႈၼႂ်းႁူးထမ်ႈၵႃႈတီႈ မိၵ်ႉၵတႃႇ၊ ဢေႃႈ။-
ပိူၼ်ႈထူပ်းႁၼ်ၶဝ်လႄႈၵႂႃႇမွၵ်ႇလၢတ်ႈထိုင်တီႈ ယေႃးသု၊ လွင်ႈဢၼ်ၶဝ်ၼၼ်ႉပၢႆႈတဵတ်ႇယူႇၵႃႈတီႈလႂ်ၼၼ်ႉဢေႃႈ။-
ယေႃးသု၊ လၢတ်ႈလႄႈဝႃႈ၊ “ဢဝ်မၢၵ်ႇႁိၼ်ဢၼ်ယႂ်ႇဢၼ်လူင်ၵိင်ႈသႂ်ႇဝႆႉၵႃႈတီႈပၢၵ်ႇထမ်ႈတႃႉ။ ၸႂ်ႉၵူၼ်းၵမ်ႈၽွင်ႈပႂ်ႉဝႆႉတႃႉ။-
တူဝ်သူၸမ်ႉ၊ယႃႇပေၵိုတ်းယူႇၵႃႈတီႈၼၼ်ႈ။ ဢွၼ်ၵၼ်လိုပ်ႈလမ်းၸွမ်းရၢၼ်ႇသူႇသူလႄႈတိုၵ်းတေႃးၶဝ်ၽၢႆႇတၢင်းလင်တႃႉ။ ယႃႇပေႁႂ်ႈၶဝ်လႆႈၶဝ်ႈဝဵင်းၶဝ်၊ ထႃႇဝရႃႉၽြႃး၊ ပၼ်ႁႂ်ႈသူပႄႉသိုၵ်းၵႃႈၼိူဝ်ၶဝ်ယဝ်ႉ၊” ဝႃႈၼင်ႇၼႆဢေႃႈ။-
ယေႃးသု၊ ဢိၵ်ႇတင်းၵူၼ်းမဵဝ်း ဢိသရေး၊ တင်းလၢႆ ဢဝ်ၶဝ်တၢႆပႅတ်ႈတင်းသဵင်ႈတင်းလူင်၊ပိၵ်ႉသမ်ႉၵူၼ်းၵမ်ႈၽွင်ႈၶတ်းၸႂ်ၵျူဝ်းၸႃးၼီပၢႆႈႁႂ်ႈလႆႈၶဝ်ႈၵႃႈၼႂ်းလမ်းဝဵင်း ႁႂ်ႈလႆႈလွတ်ႈတၢင်းတၢႆသေၵေႃႈယင်းဢမ်ႇလွတ်ႈသေၵေႃႉသေၵူၼ်းဢေႃႈ။-
လိုၼ်းၼၼ်ႉၸင်ႇၵူၼ်း ယေႃးသု၊ တင်းသဵင်ႈတင်းလူင်ဢွၼ်ၵၼ်ၶိုၼ်းမႃးလူင်ႉလူင်ႉလွတ်ႈလွတ်ႈၸူးတီႈ ယေႃးသု၊ ၵႃႈၼႂ်းပၢင်တပ်ႉၵႃႈတီႈဝဵင်း မိၵ်ႉၵတႃႇ၊ ဢေႃႈ။ ၵူၼ်းဝၢၼ်ႈၵူၼ်းမိူင်းၸိူဝ်းၼၼ်ႉၽူႈလႂ်သေၵေႃႉသေၵူၼ်းဢမ်ႇႁတ်းလၢတ်ႈၶတ်းၵၼ်တင်းၵူၼ်းမဵဝ်း ဢိသရေး၊ ၶဝ်လႃးလႃးဢေႃႈ။
မိူဝ်ႈၼၼ်ႉ၊ ယေႃးသု၊ လၢတ်ႈလႄႈဝႃႈ၊ “ၽုၺ်ႇပၢၵ်ႇထမ်ႈၼၼ်ႉသေလႄႈဢဝ်ၶုၼ်ႁေႃၶမ်းႁႃႈပႃးၼၼ်ႉဢွၵ်ႇမႃးၸူးတီႈၵဝ်တႃႉ၊” ဝႃႈၼင်ႇၼႆဢေႃႈ၊-
ၶဝ်ၵေႃႈႁဵတ်းၸွမ်းလႄႈဢဝ်ၶုၼ်ႁေႃၶမ်းဝဵင်း ယေႇရုသလႅမ်ႇ၊ ၶုၼ်ႁေႃၶမ်းဝဵင်း ႁေႇပရုၼ်ႇ၊ ၶုၼ်ႁေႃၶမ်းဝဵင်း ယႃႇမုတ်ႉ၊ ၶုၼ်ႁေႃၶမ်းဝဵင်း လႃႇၶိသႃႉ၊ ဢိၵ်ႇတင်းၶုၼ်ႁေႃၶမ်းဝဵင်း ဢေႇၵလွၼ်ႇ၊ ၸိူဝ်းၼၼ်ႉဢွၵ်ႇထမ်ႈမႃးသေလႄႈ၊-
ဢဝ်ၵႂႃႇၸူးတီႈ ယေႃးသု၊ ဢေႃႈ။ ယေႃးသု၊ ၸင်ႇႁွင်ႉဢဝ်ၵူၼ်းမဵဝ်း ဢိသရေး၊ တင်းသဵင်ႈတင်းလူင်မႃးၵႃႈတီႈမၼ်းသေလႄႈပူင်ဢမိင်ႉတီႈၶုၼ်သိုၵ်းၸိူဝ်းဢၼ်ၶီႇသိုၵ်းၵႂႃႇလူၺ်ႈၵၼ်တင်းမၼ်းၸိူဝ်းၼၼ်ႉႁႂ်ႈၶဝ်ဢဝ်တိၼ်ၶဝ်တၢင်ႇၵႃႈၼိူဝ်ၵွင်ႇၵေႃႈၶုၼ်ႁေႃၶမ်းၸိူဝ်းၼၼ်ႉဢေႃႈ။ ၶဝ်ၵေႃႈႁဵတ်းၸွမ်းဢေႃႈ။-
မိူဝ်ႈၼၼ်ႉ၊ ယေႃးသု၊ လၢတ်ႈတီႈၶုၼ်သိုၵ်းၸိူဝ်းၼၼ်ႉလႄႈဝႃႈ၊ “ယႃႇပေၵူဝ်ပေႁႄ။ ယႃႇပေၸႂ်လု။ ဢဝ်ႁႅင်းလႄႈမီးတၢင်းဢၼ်ႁတ်းႁၢၼ်တႃႉ။ ထႃႇဝရႃႉၽြႃး၊ ႁႂ်ႈသူႁဵတ်းၸိူဝ်ႉၼင်ႇၼႆတီႈရၢၼ်ႇသူႇသူၵႃႈဢၼ်သူတိုၵ်းတေႃးၼၼ်ႉဢေႃႈ၊” ဝႃႈၼင်ႇၼႆဢေႃႈ။-
လိုၼ်းၼၼ်ႉ၊ ယေႃးသု၊ ဢဝ်ၶုၼ်ႁေႃၶမ်းၸိူဝ်းၼၼ်ႉတၢႆသေယဝ်ႉ၊ဢဝ်ႁွႆႈဝႆႉၵႃႈတီႈတူၼ်ႈမႆႉႁႃႈတူၼ်ႈလႄႈ၊ႁွႆႈဝႆႉၸိူဝ်ႉၼင်ႇၼၼ်တေႃႇထိုင်ၶိင်ႇႁူဝ်ၶမ်ႈဢေႃႈ။-
မိူဝ်ႈဢၼ်ႁွတ်ႈထိုင်ၶိင်ႇဢၼ်ၵၢင်ဝၼ်းတူၵ်းၼၼ်ႉၸိုင်၊ ယေႃးသု၊ ပူင်ဢမိင်ႉသေလႄႈဢွၼ်ၵၼ်ဢဝ်တူဝ်တၢႆၸိူဝ်းၼၼ်ႉၶျႃးတူၵ်းသေတူၼ်ႈမႆႉသေယဝ်ႉ၊ဢဝ်ၵႂႃႇပႅတ်ႈသႂ်ႇၵႃႈၼႂ်းထမ်ႈဢၼ်ၶဝ်တဵတ်ႇမႅပ်းၼၼ်ႉသေလႄႈဢဝ်မၢၵ်ႇႁိၼ်ဢၼ်ယႂ်ႇဢၼ်လူင်ၵွင်ဝႆႉၵႃႈတီႈပၢၵ်ႇထမ်ႈၼၼ်ႉ မီးယူႇတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
ၼႂ်းဝၼ်းၼၼ်ႉ ယေႃးသု၊ တိုၵ်းပႄႉသိမ်းလႆႈဝဵင်း မိၵ်ႉၵတႃႇ၊ လႄႈယင်းဢမ်ႇႁႂ်ႈလႆႈၵိုတ်းၵျၢၼ်ႇဝႆႉသေၵေႃႉသေၵူၼ်းဢေႃႈ။ မၼ်းႁဵတ်းတီႈၶုၼ်ႁေႃၶမ်းဝဵင်း မိၵ်ႉၵတႃႇ၊ မိူၼ်ၸိူဝ်ႉၼင်ႇဢၼ်မၼ်းႁဵတ်းတီႈၶုၼ်ႁေႃၶမ်းဝဵင်း ယေႇရိၶူဝ်း၊ ၼၼ်ႉဢေႃႈ။
လိုၼ်းၼၼ်ႉ၊ ယေႃးသု၊ ဢိၵ်ႇတင်းတပ်ႉသိုၵ်းမၼ်းလုၵ်ႉသေၵႃႈတီႈဝဵင်း မိၵ်ႉၵတႃႇ၊ ၶီႇသိုၵ်းၶိုၼ်ႈၸူးတီႈဝဵင်း လိပၼႃႉ၊ သေလႄႈတိုၵ်းပႄႉသိမ်းလႆႈဝဵင်းၼၼ်ႉဢေႃႈ။-
ထႃႇဝရႃႉၽြႃး၊ ပၼ်ႁႂ်ႈၵူၼ်းမဵဝ်း ဢိသရေး၊ ၶဝ်ပႄႉသိုၵ်းၵႃႈၼိူဝ်ဝဵင်းၼၼ်ႉဢိၵ်ႇတင်းၶုၼ်ႁေႃၶမ်းမၼ်းဢေႃႈ။ ၶဝ်ဢဝ်ၵူၼ်းဝဵင်းၼၼ်ႉတၢႆၵူႈၵေႃႉၵူႈၵူၼ်းလႄႈယင်းဢမ်ႇႁႂ်ႈလႆႈဢသၢၵ်ႈၶျၢမ်းသႃႇသေၵေႃႉသေၵူၼ်းဢေႃႈ။ ၶဝ်ႁဵတ်းတီႈၶုၼ်ႁေႃၶမ်းၼၼ်ႉမိူၼ်ၸိူဝ်ႉၼင်ႇဢၼ်ၶဝ်ႁဵတ်းတီႈၶုၼ်ႁေႃၶမ်းဝဵင်း ယေႇရိၶူဝ်း၊ ၼၼ်ႉဢေႃႈ။
လိုၼ်းၼၼ်ႉ ယေႃးသု၊ ဢိၵ်ႇတင်းတပ်ႉသိုၵ်းမၼ်းလုၵ်ႉသေၵႃႈတီႈဝဵင်း လိပၼႃႉ၊ ၶီႇသိုၵ်းၶိုၼ်ႈၸူးတီႈဝဵင်း လႃႇၶိသႃႉ၊ သေလႄႈဝႅတ်ႉလွမ်ႉဝဵင်းၼၼ်ႉသေတိုၵ်းပႄႉသိမ်းလႆႈသေဢေႃႈ။-
ထႃႇဝရႃႉၽြႃး၊ ပၼ်ႁႂ်ႈၵူၼ်းမဵဝ်း ဢိသရေး၊ ၶဝ်ပႄႉသိုၵ်းၵႃႈၼိူဝ်ဝဵင်း လႃႇၶိသႃႉ၊ မိူဝ်ႈဢၼ်တိုၵ်းတေႃးၼႂ်းဝၼ်းတီႈသွင်ၼၼ်ႉဢေႃႈ။ ၸိူဝ်ႉၼင်ႇဢၼ်ၶဝ်ႁဵတ်းတီႈၵူၼ်းဝဵင်း လိပၼႃႉ၊ ၼၼ်ႉ၊ၶဝ်ဢဝ်ၵူၼ်းဝဵင်းၼၼ်ႉတၢႆၵူႈၵေႃႉၵူႈၵူၼ်းလႄႈယင်းဢမ်ႇႁႂ်ႈၶဝ်လႆႈဢသၢၵ်ႈၶျၢမ်းသႃႇသေၵေႃႉသေၵူၼ်းဢေႃႈ။-
ၶုၼ်ႁေႃၶမ်း ႁေႇရၼ်ႇ၊ ဝဵင်း ၵေႇၸႃႇ၊ မႃးၸွႆႈတိုၵ်းၽၢႆႇဝဵင်း လႃႇၶိသႃႉ၊ ၼၼ်ႉလႄႈ၊ ယေႃးသု၊ တိုၵ်းပႄႉမၼ်းဢိၵ်ႇတင်းတပ်ႉသိုၵ်းမၼ်းတေႃႇထိုင်ႁွတ်ႈထၢၼ်ႈပေႃးဢမ်ႇၵိုတ်းဢမ်ႇၵျၢၼ်ႇသေၵေႃႉသေၵူၼ်းဢေႃႈ။
လိုၼ်းၼၼ်ႉ၊ ယေႃးသု၊ ဢိၵ်ႇတင်းတပ်ႉသိုၵ်းမၼ်းသမ်ႉလုၵ်ႉသေၵႃႈတီႈဝဵင်း လႃႇၶိသႃႉ၊ ၼၼ်ႉၶီႇသိုၵ်းၶိုၼ်ႈၸူးတီႈဝဵင်း ဢေႇၵလွၼ်ႇ၊ သေလႄႈဝႅတ်ႉလွမ်ႉဝဵင်းၼၼ်ႉသေယဝ်ႉ၊တိုၵ်းပႄႉသိမ်းလႆႈသေဢေႃႈ။-
မၼ်းတိုၵ်းပႄႉသိမ်းဢဝ်ၼႂ်းဝၼ်းလဵဝ်ၵၼ်ၵူၺ်းလႄႈဢဝ်ၵူၼ်းဝဵင်းတၢႆၵူႈၵေႃႉၵူႈၵူၼ်းမိူၼ်ၸိူဝ်ႉၼင်ႇဢၼ်ၶဝ်ႁဵတ်းတီႈဝဵင်း လႃႇၶိသႃႉ၊ ၼၼ်ႉဢေႃႈ။
လိုၼ်းၼၼ်ႉ၊ ယေႃးသု၊ ဢိၵ်ႇတင်းတပ်ႉသိုၵ်းမၼ်းသမ်ႉလုၵ်ႉသေၵႃႈတီႈဝဵင်း ဢေႇၵလွၼ်ႇ၊ ၼၼ်ႉသေလႄႈၶီႇသိုၵ်းၶိုၼ်ႈၸူးလွႆ ႁေႇပရုၼ်ႇ၊ သေယဝ်ႉ၊တိုၵ်းပႄႉသေလႄႈ၊-
သိမ်းလႆႈဝဵင်းၼၼ်ႉဢေႃႈ။ ၶဝ်ဢဝ်တၢႆၸႃႉၸဵမ်ၶုၼ်ႁေႃၶမ်းဢိၵ်ႇတင်းၵူၼ်းဝဵင်းၼၼ်ႉၵူႈၵေႃႉၵူႈၵူၼ်းဢိၵ်ႇတင်းၵူၼ်းဢၼ်မီးၵႃႈၼႂ်းဝဵင်းႁိမ်းႁွမ်းၸိူဝ်းၼၼ်ႉပႅတ်ႈဢေႃႈ။ ယေႃးသု၊ ယႃႉၽဵဝ်ႈဝဵင်းလူင်ၼၼ်ႉပႅတ်ႈမူတ်းမူတ်းသဵင်ႈသဵင်ႈ၊မိူၼ်ၸိူဝ်ႉၼင်ႇဢၼ်မၼ်းႁဵတ်းတီႈဝဵင်း ဢေႇၵလွၼ်ႇ၊ ၼၼ်ႉလႄႈယင်းဢမ်ႇႁႂ်ႈလႆႈဢသၢၵ်ႈၶျၢမ်းသႃႇသေၵေႃႉသေၵူၼ်းဢေႃႈ။
ယေႃးသု၊ ဢိၵ်ႇတင်းတပ်ႉသိုၵ်းမၼ်းဢွၼ်ၵၼ်ၶိုၼ်းပွၵ်ႈမႃးၸူးတီႈဝဵင်း တေႇပိရႃႉ၊ သေလႄႈတိုၵ်းတေႃးဝဵင်းၼၼ်ႉဢေႃႈ။-
မၼ်းသိမ်းလႆႈဝဵင်းၼၼ်ႉလူၺ်ႈၵၼ်တင်းၶုၼ်ႁေႃၶမ်းမၼ်းဢိၵ်ႇတင်းဝဵင်းၸိူဝ်းဢၼ်မီးႁိမ်းႁွမ်းမၼ်းၼၼ်ႉတင်းသဵင်ႈတင်းလူင်ဢေႃႈ။ ၶဝ်ဢဝ်ၵူၼ်းဝဵင်းၸိူဝ်းၼၼ်ႉတၢႆၵူႈၵေႃႉၵူႈၵူၼ်းတေႃႇထိုင်ႁွတ်ႈထၢၼ်ႈပေႃးဢမ်ႇၵိုတ်းဢမ်ႇၵျၢၼ်ႇသေၵေႃႉသေၵူၼ်းဢေႃႈ။ ယေႃးသု၊ ႁဵတ်းတီႈဝဵင်း တေႇပိရႃႉ၊ တင်းၶုၼ်ႁေႃၶမ်းမၼ်းမိူၼ်ၸိူဝ်ႉၼင်ႇဢၼ်မၼ်းႁဵတ်းတီႈဝဵင်း ႁေႇပရုၼ်ႇ၊ တင်းဝဵင်း လိပၼႃႉ၊ တင်းၶုၼ်ႁေႃၶမ်းၶဝ်ၼၼ်ႉဢေႃႈ။
ယေႃးသု၊ ပႄႉၼႅင်ႇပႅတ်ႈတင်းမိူင်းယဝ်ႉဢေႃႈ။ မၼ်းတိုၵ်းပႄႉၶုၼ်ႁေႃၶမ်းတင်းလၢႆဢၼ်မီးၵႃႈတီႈမိူင်းလွႆ၊မိူင်းတၢပ်ႈလွႆဢၼ်ႁႄႈၸူးၽၢႆႇတၢင်းဝၼ်းဢွၵ်ႇ၊မိူင်းဢၼ်မီးတီႈတိၼ်လွႆၽၢႆႇတၢင်းဝၼ်းတူၵ်း၊ဢိၵ်ႇတင်းမိူင်းဢၼ်ႁႅင်ႈဢၼ်ႁွင်ဢၼ်ယူႇၽၢႆႇတၢင်းၸၢၼ်းၸိူဝ်းၼၼ်ႉဢေႃႈ။ မၼ်းဢဝ်ၵူၼ်းဝဵင်းတင်းလၢႆတၢႆၵူႈၵေႃႉၵူႈၵူၼ်းလႄႈယင်းဢမ်ႇႁႂ်ႈလႆႈဢသၢၵ်ႈၶျၢမ်းသႃႇသေၵေႃႉသေၵူၼ်း၊ၸွမ်းၵႃႈၼင်ႇဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ မီးဢမိင်ႉဝႆႉၼၼ်ႉဢေႃႈ။-
ယေႃးသု၊ တိုၵ်းပႄႉၶဝ်တႄႇဢဝ်ၵႃႈတီႈဝဵင်း ၵႃႇတေႇသပႃႇၼႃႉ၊ ၽၢႆႇတၢင်းၸၢၼ်းၵႂႃႇတေႃႇထိုင်ႁွတ်ႈဝဵင်း ၵႃႇၸႃႉ၊ ဢၼ်ၸမ်ၽင်ႇပၢင်ႇလၢႆႇဢၼ်ပႃးၸဵမ်ဢိူင်ႇဝဵင်း ၵေႃးသိၼ်း၊ တင်းသဵင်ႈတင်းမူတ်းတေႃႇထိုင်ႁွတ်ႈဝဵင်း ၵိပွင်ႇ၊ ၽၢႆႇတၢင်းႁွင်ႇပုၼ်ႉဢေႃႈ။-
ယေႃးသု၊ ပႄႉၼႅင်ႇၶုၼ်ႁေႃၶမ်းၸိူဝ်းၼၼ်ႉတင်းသဵင်ႈတင်းလူင်ဢိၵ်ႇတင်းသိုင်ႇတိူင်းမိူင်းၶဝ်ၵႂႃႇပွၵ်ႈလဵဝ်ၵူၺ်းၵွပ်ႈပိူဝ်ႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ ၼၼ်ႉတိုၵ်းသိုၵ်းပၼ်ပုၼ်ႈၵူၼ်းမဵဝ်း ဢိသရေး၊ ၼၼ်ႉဢေႃႈ။-
လိုၼ်းၼၼ်ႉ၊ ယေႃးသု၊ ဢိၵ်ႇတင်းတပ်ႉသိုၵ်းမၼ်းပွၵ်ႈၶိုၼ်းၵႂႃႇၸူးတီႈပၢင်တပ်ႉဝဵင်း ၵိလႃႉၵႃႇလႃႉ၊ သေဢေႃႈ။
မိူဝ်ႈဢၼ်ၶုၼ်ႁေႃၶမ်း ယႃႇၽိၼ်း၊ ဝဵင်း ႁႃႇၸေႃႇ၊ လႆႈငိၼ်းသဵင်ၶၢဝ်ႇတၢင်းဢၼ်ၵူၼ်းမဵဝ်း ဢိသရေး၊ ဢွင်ႇသိုၵ်းၼၼ်ႉၸိုင်၊မၼ်းသင်ႇၵႂၢမ်းၵႂႃႇၸူးတီႈၶုၼ်ႁေႃၶမ်း ယေႃးပပ်ႉ၊ ဝဵင်း မႃႇတုၼ်ႇ၊ ဢိၵ်ႇတင်းၶုၼ်ႁေႃၶမ်းဝဵင်း သိမရုၼ်ႇ၊ တင်းဝဵင်း ဢႃႇၶသပ်ႉ၊ ၸိူဝ်းၼၼ်ႉ၊-
ဢိၵ်ႇတင်းၶုၼ်ႁေႃၶမ်းတင်းလၢႆဢၼ်မီးၽၢႆႇတၢင်းႁွင်ႇၵႃႈၼိူဝ်မိူင်းလွႆ၊ၵႃႈၼႂ်းပၢင်ႇထူင်ႉၼမ်ႉ ယေႃးတၢၼ်ႇ၊ ၽၢႆႇတၢင်းၸၢၼ်းၼွင်လူင် ၵႃႇလိလႄး၊ ၵႃႈတႂ်ႈတီႈဢၼ်ပၢင်ႇဢၼ်ပဵင်းဢိၵ်ႇတင်းၵႃႈၼိူဝ်ၽင်ႇပၢင်ႇလၢႆႇႁိမ်းဝဵင်း တေႃႇရႃႉ၊ ၸိူဝ်းၼၼ်ႉဢေႃႈ။-
မၼ်းယင်းသင်ႇၵႂၢမ်းၵႂႃႇတီႈၶုၼ် ၶႃႇၼၼိ၊ ဢၼ်ယူႇသွင်ၽၢႆႇၶၢင်ႈၼမ်ႉ ယေႃးတၢၼ်ႇ၊ ၵူၼ်း ဢႃႇမေႃးရိ၊ ၵူၼ်း ႁိတ်ႉတိ၊ ၵူၼ်း ၽေႇရၸိ၊ တင်းၵူၼ်း ယေႇပုသိ၊ ဢၼ်ယူႇၵႃႈၼိူဝ်မိူင်းလွႆဢိၵ်ႇလူၺ်ႈၵူၼ်း ႁိဝိ၊ ဢၼ်ယူႇၵႃႈတီႈတိၼ်လွႆ ႁေႇရမုၼ်ႇ၊ မိူင်း မိၸပႃႇ၊ ၸိူဝ်းၼၼ်ႉလူးၵွၼ်ႇဢေႃႈ။-
ၶဝ်ၸိူဝ်းၼၼ်ႉဢွၼ်ၵၼ်ပႃးဢဝ်ၵူၼ်းသိုၵ်းၶဝ်၊တပ်ႉသိုၵ်းၶဝ်ဢၼ်ၼမ်ၼႃႇလူင်လၢင်ထၢၼ်ႈပေႃးၼမ်မိူၼ်ၸိူဝ်ႉၼင်ႇမဵတ်ႉႁိၼ်မဵတ်ႉသၢႆးႁၢတ်ႇပၢင်ႇလၢႆႇၼၼ်ႉဢေႃႈ။ ၶဝ်မီးမႃႉလႂ်၊လေႃႉမႃႉလႂ်ၼမ်ၼႃႇဢေႃႈ။-
ၶုၼ်ႁေႃၶမ်းၸိူဝ်းၼၼ်ႉၽွမ်ႉႁႅင်းၵၼ်လႄႈမႃးၶျႃးပၢင်တပ်ႉယူႇမုၵ်ႉလဵဝ်ၵၼ်ၵႃႈတီႈႁိမ်းႁွင်ႈႁူၺ်ႈ မေႇရုမ်ႇ၊ ႁႂ်ႈလႆႈတိုၵ်းတေႃးမဵဝ်း ဢိသရေး၊ ဢေႃႈ။
ထႃႇဝရႃႉၽြႃး၊ မီးဢမိင်ႉ တီႈ ယေႃးသု၊ လႄႈဝႃႈ၊ “ယႃႇပေၵူဝ်ၶဝ်။ လွင်ႈမၼ်းၸမ်ႉ၊ၼႂ်းဝၼ်းမိူဝ်ႈၽုၵ်ႈၶိင်ႇယၢမ်းၼႆႉၼၼ်ႉ ၵဝ်တၵ်းဢဝ်ၶဝ်တၢႆပႅတ်ႈတင်းသဵင်ႈတင်းမူတ်းပုၼ်ႈၵူၼ်းမဵဝ်း ဢိသရေး၊ ဢေႃႈ။ မႂ်းတၵ်းတေလႆႈတႅပ်းဢဵၼ်တိၼ်မႃႉၶဝ်ၶၢတ်ႇ၊ဢိၵ်ႇတင်းတေလႆႈဢဝ်ၽႆးတုတ်ႇလေႃႉမႃႉၶဝ်ၸိူဝ်းၼၼ်ႉပႅတ်ႈဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ ယေႃးသု၊ ဢိၵ်ႇတင်းၵူၼ်းမၼ်းတင်းသဵင်ႈတင်းလူင်ၶီႇသိုၵ်းၵႂႃႇလႄႈၵိုင်ႉၵၢင်ႉၽုတ်းသႂ်ႇတိုၵ်းတေႃးၶဝ်ၵႃႈတီႈႁိမ်းႁွင်ႈႁူၺ်ႈ မေႇရုမ်ႇ၊ ၼၼ်ႉဢေႃႈ။-
ထႃႇဝရႃႉၽြႃး၊ ပၼ်ႁႂ်ႈၵူၼ်းမဵဝ်း ဢိသရေး၊ တင်းလၢႆဢွင်ႇသိုၵ်းၵႃႈၼိူဝ်ၶဝ်လႄႈ၊ၵူၼ်းမဵဝ်း ဢိသရေး၊ တင်းလၢႆတိုၵ်းတေႃးသေယဝ်ႉ၊လိုပ်ႈလမ်းၸွမ်းၶဝ်ၵႂႃႇၵႆၼႃႇတေႃႇထိုင်ႁွတ်ႈဝဵင်းလူင် မိသရၽေႃႇသမိမ်း၊ တင်းဝဵင်း ၸိတုမ်ႇ၊ ဢၼ်မီးၽၢႆႇႁွင်ႇ၊ဢိၵ်ႇတင်းတေႃႇထိုင်ႁွတ်ႈပၢင်ႇထူင်ႉ မိၸပႃႇ၊ ၽၢႆႇတၢင်းဝၼ်းဢွၵ်ႇပုၼ်ႉဢေႃႈ။ ၼႃႈသိုၵ်းၼၼ်ႉတိုၵ်းတေႃးယူႇတေႃႇထိုင်ႁွတ်ႈရၢၼ်ႇသူႇထၢၼ်ႈပေႃးတၢႆၵႂႃႇဢမ်ႇၵိုတ်းဢမ်ႇၵျၢၼ်ႇဝႆႉသေၵေႃႉသေၵူၼ်းဢေႃႈ။-
ယေႃးသု၊ ႁဵတ်းတီႈၶဝ်ၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉဝႆႉၼၼ်ႉလႄႈ၊တႅပ်းဢဵၼ်တိၼ်မႃႉၶဝ်ၶၢတ်ႇ၊ဢိၵ်ႇတင်းဢဝ်ၽႆးတုတ်ႇလေႃႉမႃႉၶဝ်ၸိူဝ်းၼၼ်ႉပႅတ်ႈဢေႃႈ။
မိူဝ်ႈၼၼ်ႉ၊ ယေႃးသု၊ ဝၢႆႇပွၵ်ႈၶိုၼ်းမႃးလႄႈတိုၵ်းပႄႉသိမ်းဢဝ်ဝဵင်း ႁႃႇၸေႃႇ၊ သေယဝ်ႉ၊ဢဝ်ၶုၼ်ႁေႃၶမ်းမၼ်းတၢႆဢေႃႈ။ (ၶိင်ႇၵႃႇလႃႉယၢမ်းၼၼ်ႉဝဵင်း ႁႃႇၸေႃႇ၊ မီးၽုင်းယႂ်ႇၼႃႇသေသိုင်ႇတိူင်းမိူင်းတင်းသဵင်ႈတင်းလူင်ၸိူဝ်းၼၼ်ႉဢေႃႈ။)-
ၶဝ်ဢဝ်ၵူၼ်းဝဵင်းၼၼ်ႉတၢႆၵူႈၵေႃႉၵူႈၵူၼ်းလႄႈယင်းဢမ်ႇႁႂ်ႈလႆႈဢသၢၵ်ႈၶျၢမ်းသႃႇသေၵေႃႉသေၵူၼ်းဢေႃႈ။ မၼ်းသမ်ႉဢဝ်ၽႆးတုတ်ႇဝဵင်း ႁႃႇၸေႃႇ၊ ပႅတ်ႈဢေႃႈ။
ယေႃးသု၊ တိုၵ်းပႄႉသိမ်းလႆႈၵႃႈပဵၼ်ဝဵင်းလူင်ၸိူဝ်းၼၼ်ႉတင်းသဵင်ႈတင်းလူင်ဢိၵ်ႇတင်းၶုၼ်ႁေႃၶမ်းဝဵင်းၸိူဝ်းၼၼ်ႉလႄႈၶဝ်ဢဝ်တၢႆၵူႈၵေႃႉၵူႈၵူၼ်းၸွမ်းၵႃႈၼင်ႇဢၼ် မူဝ်းသေႇ၊ ၶႃႈ ထႃႇဝရႃႉၽြႃး၊ ၼၼ်ႉသင်ႇလၢတ်ႈဝႆႉၼၼ်ႉဢေႃႈ။-
ၼႂ်းဝႃႈၼၼ်သေၵေႃႈ ၼွၵ်ႈသေဝဵင်း ႁႃႇၸေႃႇ၊ ၼၼ်ႉဝဵင်းဢၼ်တႄႇယူႇၼိူဝ်လွႆဢိုၼ်ႈၸိူဝ်းၼၼ်ႉၸိုင်၊ၵူၼ်းမဵဝ်း ဢိသရေး၊ တင်းလၢႆဢမ်ႇတုတ်ႇၽႆးပႅတ်ႈ။ ယေႃးသု၊ တုတ်ႇၽႆးပႅတ်ႈဝဵင်းၼၼ်ႉဝဵင်းလဵဝ်ၵူၺ်းဢေႃႈ။-
ဢုၵ်ႉၸႃႇဢၼ်ထိူၵ်ႈၵႃႈထိူၵ်ႈၶၼ်လႂ်တင်းတရိၵ်ႈသၢၼ်ႇတင်းလၢႆၵႃႈၼႂ်းဝဵင်းၸိူဝ်းၼၼ်ႉၵူၺ်းၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်သိမ်းဢဝ်ပုၼ်ႈၶဝ်ဢေႃႈ။ ၵူၼ်းဝဵင်းတင်းလၢႆၸမ်ႉ၊ၶဝ်ဢဝ်တၢႆၵူႈၵေႃႉၵူႈၵူၼ်းလႄႈယင်းဢမ်ႇႁႂ်ႈလႆႈဢသၢၵ်ႈၶျၢမ်းသႃႇသေၵေႃႉသေၵူၼ်းဢေႃႈ။-
ထႃႇဝရႃႉၽြႃး၊ မီးဢမိင်ႉဝႆႉတီႈ မူဝ်းသေႇ၊ ၸိူဝ်ႉၼင်ႇၼႆလႄႈ၊ မူဝ်းသေႇ၊ သမ်ႉသင်ႇလၢတ်ႈဝႆႉတီႈ ယေႃးသု၊ ဢေႃႈ။ ယေႃးသု၊ ၵေႃႈႁဵတ်းၸွမ်းၵူႈၶေႃႈၵူႈၵမ်းဢေႃႈ။ မၼ်းႁဵတ်းၸွမ်းၵူႈၸိူဝ်ႉၵူႈပိူင်ၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉဝႆႉတီႈ မူဝ်းသေႇ၊ ၼၼ်ႉဢေႃႈ။
ယေႃးသု၊ တိုၵ်းပႄႉသိမ်းလႆႈမိူင်းၸိူဝ်းၼၼ်ႉတင်းသဵင်ႈဢၼ်ဝႃႈ၊မိူင်းလွႆမိူင်းတီႈတိၼ်လွႆၸႃႉၸဵမ်ၽၢႆႇတၢင်းႁွင်ႇတၢင်းၸၢၼ်းလႂ်၊သိုင်ႇတိူင်းမိူင်း ၵေႃးသိၼ်း၊ ဢိၵ်ႇတင်းမိူင်းဢၼ်ႁႅင်ႈဢၼ်ႁွင်ဢၼ်မီးတီႈၽၢႆႇတၢင်းၸၢၼ်းမၼ်းလႂ်၊ဢိၵ်ႇလူၺ်ႈပၢင်ႇထူင်ႉၼမ်ႉ ယေႃးတၢၼ်ႇ၊ လႂ်ဢေႃႈ။-
သိုင်ႇတိူင်းမိူင်းၸိူဝ်းၼၼ်ႉၶႂၢၵ်ႈၵႂႃႇသေၸႃႉၸဵမ်လွႆ ႁႃႇလၵ်ႉ၊ ဢၼ်မီးတီႈၽၢႆႇတၢင်းၸၢၼ်းႁိမ်းမိူင်း ဢေႇတုမ်ႇ၊ တေႃႇထိုင်ႁွတ်ႈဝဵင်း ပလၵတ်ႉ၊ ၽၢႆႇတၢင်းႁွင်ႇၵႃႈၼႂ်းပၢင်ႇထူင်ႉ လေႇပၼုၼ်ႇ၊ ၽၢႆႇတၢင်းၸၢၼ်းလွႆ ႁေႇရမုၼ်ႇ၊ ပုၼ်ႉဢေႃႈ။ ယေႃးသု၊ ပႄႉၼႅင်ႇၶုၼ်ႁေႃၶမ်းတင်းသဵင်ႈတင်းလူင်သေလႄႈၶႃႈၽၼ်းဢဝ်ၶဝ်တၢႆဢေႃႈ။
မၼ်းလႆႈတိုၵ်းသိုၵ်းၵၼ်တင်းၶုၼ်ႁေႃၶမ်းၸိူဝ်းၼၼ်ႉႁိုင်ၼႃႇလူင်လၢင်ဢေႃႈ။-
မီးၵူၼ်းမဵဝ်း ႁိဝိ၊ ၸိူဝ်းဢၼ်ပဵၼ်ၵူၼ်းဝဵင်း ၵိပွင်ႇ၊ ၼၼ်ႉၵူၺ်းႁဵတ်းမိၵ်ႈသႁႃႇယႃႉတၢင်းဢၼ်ထုၵ်ႇၵၼ်တင်းၵူၼ်းမဵဝ်း ဢိသရေး၊ ၶဝ်လႄႈ၊ဝဵင်းတၢင်ႇဝဵင်းၸိူဝ်းၼၼ်ႉၵေႃႈ၊တိုၵ်းပႄႉလႄႈသိမ်းလႆႈဢေႃႈ။-
လွင်ႈမၼ်းၸမ်ႉ၊ ထႃႇဝရႃႉၽြႃး၊ တိုၼ်းႁဵတ်းႁႂ်ႈႁူဝ်ၸႂ်ၶဝ်တိုဝ်တၼ်တေႃႇထိုင်ႁွတ်ႈႁႂ်ႈၶဝ်ထၢၼ်ႈပေႃးႁႄႉတိုၵ်းတေႃးၵူၼ်းမဵဝ်း ဢိသရေး၊ တင်းလၢႆပုၼ်ႈလွင်ႈၼင်ႇႁိုဝ်မၼ်းၸဝ်ႈလႆႈယႃႉၽဵဝ်ႈၶဝ်ပႅတ်ႈလုမ်းလုမ်းလႄႈ၊ယင်းဢမ်ႇႁႂ်ႈလႆႈမီးၸႂ်ဢၼ်ဢဵတ်းလူႁႂ်ႈလႆႈဢဝ်ၶဝ်တၢႆပႅတ်ႈမူတ်းမူတ်းသဵင်ႈသဵင်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉဝႆႉတီႈ မူဝ်းသေႇ၊ ၼၼ်ႉဢေႃႈ။
ၼႂ်းၶိင်ႇမိူဝ်ႈၼၼ်ႉ၊ ယေႃးသု၊ ၶီႇသိုၵ်းၵႂႃႇပႄႇၽဵဝ်ႈၵူၼ်းမဵဝ်းဢၼ်တူဝ်ယႂ်ႇႁႅင်းလူင်ဢၼ်ႁွင်ႉဝႃႈ၊ၵူၼ်းမဵဝ်း ဢႃႇၼၵႃႉ၊ တင်းလၢႆပႅတ်ႈသေၵႃႈတီႈမိူင်းလွႆ၊ၵႃႈၼႂ်းဝဵင်း ႁေႇပရုၼ်ႇ၊ ဝဵင်း တေႇပိရႃႉ၊ ဝဵင်း ဢႃႇၼပ်ႉ၊ ဢိၵ်ႇတင်းၵႃႈၼႂ်းဝဵင်းမိူင်းလွႆတင်းသဵင်ႈတင်းလူင်မိူင်း ဢိသရေး၊ တင်းမိူင်း ယုတႃႉ၊ ၼၼ်ႉဢေႃႈ။-
ၼွၵ်ႈသေဢၼ်ၵိုတ်းဢၼ်ၵျၢၼ်ႇဝႆႉၵႃႈၼႂ်းဝဵင်း ၵႃႇသႃႉ၊ ဝဵင်း ၵတ်ႉတိ၊ တင်းဝဵင်း ဢႃႇၸုတ်ႉ၊ ဢိတ်းဢီႈၸိူဝ်းၼၼ်ႉ၊ၵူၼ်း ဢႃႇၼၵႃႉ၊ ဢမ်ႇၵိုတ်းဢမ်ႇၵျၢၼ်ႇဝႆႉၵႃႈၼႂ်းမိူင်း ဢိသရေး၊ သေၵေႃႉသေၵူၼ်း။
ယေႃးသု၊ တိုၵ်းပႄႉသိမ်းလႆႈမိူင်းၼၼ်ႉတင်းမိူင်းၸွမ်းၵႃႈၼင်ႇဢၼ် ထႃႇဝရႃႉ၊ မီးဢမိင်ႉဝႆႉတီႈ မူဝ်းသေႇ၊ ၼၼ်ႉဢေႃႈ။ ယေႃးသု၊ ၵေႃႈဢဝ်မိူင်းၼၼ်ႉၽႄမႅင်ႇပၼ်ၵူၼ်းမဵဝ်း ဢိသရေး၊ တင်းလၢႆႁႂ်ႈပဵၼ်ဢမူၺ်ႇၶဝ်ၸွမ်းလူၺ်ႈၸိူဝ်ႉၶိူဝ်းၽႂ်ၸိူဝ်ႉၶိူဝ်းမၼ်းၼၼ်ႉဢေႃႈ။ ၼင်ႇၼၼ်လႄႈသိုၵ်းထၢတ်ႇယဵၼ်ၵႂႃႇသေတင်းမိူင်းဢေႃႈ။
ၵူၼ်းမဵဝ်း ဢိသရေး၊ ၶဝ်တိုၵ်းပႄႉလႄႈသိမ်းလႆႈမိူင်းဢၼ်မီးၽၢႆႇတၢင်းဝၼ်းဢွၵ်ႇၼမ်ႉ ယေႃးတၢၼ်ႇ၊ ၸႃႉၸဵမ်ပၢင်ႇထူင်ႉ ဢႃႇၼုၼ်ႇ၊ ၶိုၼ်ႈၵႂႃႇတေႃႇထိုင်ပၢင်ႇထူင်ႉၼမ်ႉ ယေႃးတၢၼ်ႇ၊ ၽၢႆႇတၢင်းႁွင်ႇလွႆ ႁေႇရမုၼ်ႇ၊ ဢေႃႈ။ ၶဝ်တိုၵ်းပႄႉၶုၼ်ႁေႃၶမ်းသွင်ပႃးဢေႃႈ။-
ပႃးၼိုင်ႈပဵၼ်ၶုၼ်ႁေႃၶမ်း သိႁုၼ်ႇ၊ ၵူၼ်း ဢႃႇမေႃးရိ၊ ဢၼ်ဢုပ်ႉပိူင်ႇၵႃႈတီႈဝဵင်း ႁေႇသၽုၼ်ႇ၊ ဢေႃႈ။ သိုင်ႇတိူင်းမိူင်းမၼ်းၼၼ်ႉပႃးမိူင်း ၵိလတ်ႉ၊ ၶိုင်ႈၼိုင်ႈၸႃႉၸဵမ်ဝဵင်း ဢႃႇရေႃႇ၊ (ဢၼ်မီးႁိမ်းၸွၵ်ႉပၢင်ႇထူင်ႉ ဢႃႇၼုၼ်ႇ၊ ) ဢိၵ်ႇတင်းဝဵင်းဢၼ်မီးၼႂ်းၵၢင်ပၢင်ႇထူင်ႉၼၼ်ႉၵႂႃႇတေႃႇထိုင်ႁွတ်ႈၼမ်ႉ ယပ်ႉပုၵ်ႉ၊ ဢၼ်ပဵၼ်လႅၼ်လိၼ်မိူင်းၵူၼ်းမဵဝ်း ဢမ်ႇမုၼ်ႇ၊ ၼၼ်ႉ၊-
ဢိၵ်ႇလူၺ်ႈပၢင်ႇထူင်ႉၼမ်ႉ ယေႃးတၢၼ်ႇ၊ ၸႃႉၸဵမ်ၼွင်လူင် ၵႃႇလိလႄး၊ ၵႂႃႇၽၢႆႇတၢင်းၸၢၼ်းၸူးတီႈဝဵင်း ပႅတ်ႉယေႇသိမုတ်ႉ၊ (ၽၢႆႇတၢင်းဝၼ်းဢွၵ်ႇ ပၢင်ႇလၢႆႇတၢႆ၊ ) ၶိုၼ်ႈၵႂႃႇတေႃႇထိုင်ႁွတ်ႈတိၼ်လွႆ ပိသၵႃႇ၊ ဢေႃႈ။
ၶဝ်သမ်ႉလႆႈပႄႉၶုၼ်ႁေႃၶမ်း ဢေႃႇၶႃႉ၊ မိူင်း ပႃႇသၢၼ်ႇ၊ ၵေႃႉဢၼ်ပဵၼ်ၶုၼ်ႁေႃၶမ်းလိုၼ်းလင်သုတ်းၼႂ်းၵူၼ်းမဵဝ်း ရေႇၽိမ်ႇ၊ ၼၼ်ႉလႄႈမၼ်းဢုပ်ႉပိူင်ႇယူႇၵႃႈၼႂ်းဝဵင်း ဢႃႇသတႃႇရုတ်ႉ၊ ဢိၵ်ႇတင်းဝဵင်း ဢေႇတရိ၊ ဢေႃႈ။-
သိုင်ႇတိူင်းမိူင်းမၼ်းၸမ်ႉ၊ပႃးလွႆ ႁေႇရမုၼ်ႇ၊ မိူင်း သႃႇလၵႃႇ၊ တင်းမိူင်း ပႃႇသၢၼ်ႇ၊ တင်းမိူင်းတေႃႇထိုင်ႁွတ်ႈလႅၼ်လိၼ်ၵူၼ်း ၵေႇသုရိ၊ တင်းၵူၼ်း မႃႇၶႃႇသိ၊ ၸိူဝ်းၼၼ်ႉဢိၵ်ႇလူၺ်ႈမိူင်း ၵိလတ်ႉ၊ ၶိုင်ႈၼိုင်ႈတေႃႇထိုင်ႁွတ်ႈဢိူင်ႇၶုၼ်ႁေႃၶမ်း သိႁုၼ်ႇ၊ မိူင်း ႁေႇသၽုၼ်ႇ၊ ဢေႃႈ။
ၶုၼ်ႁေႃၶမ်းသွင်ပႃးၼႆႉၸိုင်၊ မူဝ်းသေႇ၊ ဢိၵ်ႇတင်းၵူၼ်းမဵဝ်း ဢိသရေး၊ တင်းလၢႆတိုၵ်းပႄႉဝႆႉဢေႃႈ။ မူဝ်းသေႇ၊ ၶႃႈ ထႃႇဝရႃႉၽြႃး၊ ၼၼ်ႉဢဝ်မိူင်းၶဝ်ၼၼ်ႉပၼ်တီႈၸိူဝ်ႉၶိူဝ်း ရုပိၼ်ႇ၊ တင်းၸိူဝ်ႉၶိူဝ်း ၵၢတ်ႉ၊ ဢိၵ်ႇတင်းၸိူဝ်ႉၶိူဝ်း မၼႃႇသေႇ၊ ၶိုင်ႈၼိုင်ႈၸိူဝ်းၼၼ်ႉႁႂ်ႈၶဝ်ပိူင်ႇဢေႃႈ။
ယေႃးသု၊ ဢိၵ်ႇတင်းၵူၼ်းမဵဝ်း ဢိသရေး၊ တင်းလၢႆတိုၵ်းပႄႉၶုၼ်ႁေႃၶမ်းတင်းမူတ်းၼႂ်းသိုင်ႇတိူင်းဢၼ်မီးၽၢႆႇတၢင်းဝၼ်းတူၵ်းၼမ်ႉ ယေႃးတၢၼ်ႇ၊ ၸႃႉၸဵမ်ဝဵင်း ပလၵတ်ႉ၊ ၼႂ်းပၢင်ႇထူင်ႉ လေႇပၼုၼ်ႇ၊ ၵႂႃႇတေႃႇထိုင်ႁွတ်ႈလွႆ ႁႃႇလၵ်ႉ၊ ၽၢႆႇတၢင်းၸၢၼ်းႁိမ်းမိူင်း ဢေႇတုမ်ႇ၊ ဢေႃႈ။ ယေႃးသု၊ ဢဝ်မိူင်းၼၼ်ႉၽႄမႅင်ႇပၼ်ၵႃႈၼႂ်းၸိူဝ်ႉၶိူဝ်းတင်းလၢႆႁႂ်ႈလႆႈပဵၼ်ဢမူၺ်ႇၶဝ်မၼ်ႈမၼ်ႈၶိူင်ႇၶိူင်ႇဢေႃႈ။-
မိူင်းၼၼ်ႉပႃးမိူင်းလွႆ၊တိၼ်လွႆၽၢႆႇတၢင်းဝၼ်းတူၵ်း၊ပၢင်ႇထူင်ႉၼမ်ႉ ယေႃးတၢၼ်ႇ၊ ဢိၵ်ႇတင်းလွႆမၼ်း၊တၢပ်ႈလွႆဢၼ်ႁႄႈလူင်းၽၢႆႇတၢင်းဝၼ်းဢွၵ်ႇဢိၵ်ႇတင်းမိူင်းဢၼ်ႁႅင်ႈဢၼ်ႁွင်ၽၢႆႇတၢင်းၸၢၼ်းၸိူဝ်းၼၼ်ႉဢေႃႈ။ မိူင်းၸိူဝ်းၼၼ်ႉပဵၼ်တီႈယူႇၵူၼ်း ႁိတ်ႉတိ၊ ၵူၼ်း ဢႃႇမေႃးရိ၊ ၵူၼ်း ၶႃႇၼၼိ၊ ၵူၼ်း ၽေႇရၸိ၊ ၵူၼ်း ႁိဝိ၊ တင်းၵူၼ်း ယေႇပုသိ၊ ၸိူဝ်းၼၼ်ႉဢေႃႈ။-
ၶုၼ်ႁေႃၶမ်းၸိူဝ်းဢၼ်ၵူၼ်းမဵဝ်း ဢိသရေး၊ တင်းလၢႆတိုၵ်းပႄႉသိမ်းလႆႈဝဵင်းလူင်ၶဝ်ၼၼ်ႉၸမ်ႉ၊ၶုၼ်ႁေႃၶမ်းဝဵင်း ယေႇရိၶူဝ်း၊ ၶုၼ်ႁေႃၶမ်းဝဵင်း ဢႃႇဢိ၊ ဢၼ်မီးႁိမ်းဝဵင်း ပေႇသလႃႉ၊-
ၶုၼ်ႁေႃၶမ်းဝဵင်း ယေႇရုသလႅမ်ႇ၊ ၶုၼ်ႁေႃၶမ်းဝဵင်း ႁေႇပရုၼ်ႇ၊-
ၶုၼ်ႁေႃၶမ်းဝဵင်း ယႃႇမုတ်ႉ၊ ၶုၼ်ႁေႃၶမ်းဝဵင်း လႃႇၶိသႃႉ၊-
ၶုၼ်ႁေႃၶမ်းဝဵင်း ဢေႇၵလွၼ်ႇ၊ ၶုၼ်ႁေႃၶမ်းဝဵင်း ၵေႇၸႃႇ၊-
ၶုၼ်လူင်ဝဵင်း တေႇပိရႃႉ၊ ၶုၼ်ႁေႃၶမ်းဝဵင်း ၵေႇတႃႇ၊-
ၶုၼ်ႁေႃၶမ်းဝဵင်း ႁေႃႇမႃႇ၊ ၶုၼ်ႁေႃၶမ်းဝဵင်း ဢႃႇရတ်ႉ၊-
ၶုၼ်ႁေႃၶမ်းဝဵင်း လိပၼႃႉ၊ ၶုၼ်ႁေႃၶမ်းဝဵင်း ဢတုလမ်ႇ၊-
ၶုၼ်ႁေႃၶမ်းဝဵင်း မိၵ်ႉၵတႃႇ၊ ၶုၼ်ႁေႃၶမ်းဝဵင်း ပေႇသလႃႉ၊-
ၶုၼ်ႁေႃၶမ်းဝဵင်း တႃႇပွႃႇ၊ ၶုၼ်ႁေႃၶမ်းဝဵင်း ႁေႇၽႃႇ၊-
ၶုၼ်ႁေႃၶမ်းဝဵင်း ဢႃႇၽႅၵ်ႉ၊ ၶုၼ်ႁေႃၶမ်းဝဵင်း လႃႇၸရုၼ်ႇ၊-
ၶုၼ်ႁေႃၶမ်းဝဵင်း မႃႇတုၼ်ႇ၊ ၶုၼ်ႁေႃၶမ်းဝဵင်း ႁႃႇၸေႃႇ၊-
ၶုၼ်ႁေႃၶမ်းဝဵင်း သိမရုၼ်ႇမေႇရုၼ်ႇ၊ ၶုၼ်ႁေႃၶမ်းဝဵင်း ဢႃႇၶသပ်ႉ၊-
ၶုၼ်ႁေႃၶမ်းဝဵင်း တႃႇၼၵ်ႉ၊ ၶုၼ်ႁေႃၶမ်းဝဵင်း မေႇၵိတ်ႉတေႃႇ၊-
ၶုၼ်ႁေႃၶမ်းဝဵင်း ၵေႇတေးသႃႉ၊ ၶုၼ်ႁေႃၶမ်းဝဵင်း ယေႃးၵၼမ်ႇ၊ ၵႃႈၼိူဝ်လွႆ ၵရမေႇလႃႉ၊-
ၶုၼ်ႁေႃၶမ်းဝဵင်း တေႃႇရႃႉ၊ ၵႃႈၼိူဝ်တီႈဢၼ်သုင်မိူင်း တေႃႇရႃႉ၊ ၶုၼ်ႁေႃၶမ်း ၵေႃးဢိမ်ႇ၊ ၵႃႈတီႈမိူင်း ၵိလႃႉၵႃႇလႃႉ၊ -
ၶုၼ်ႁေႃၶမ်းဝဵင်း တိရၸႃႉ၊ တင်းသဵင်ႈတင်းလူင်ပွင်းၵၼ်မီးၶုၼ်ႁေႃၶမ်းသၢမ်သိပ်းဢဵတ်းပႃးဢေႃႈ။
မိူဝ်ႈဢၼ် ယေႃးသု၊ ၵေႃႈထဝ်ႈၼႃႇယဝ်ႉၼၼ်ႉ။ ထႃႇဝရႃႉၽြႃး၊ မီးဢမိင်ႉတီႈမၼ်းလႄႈဝႃႈ၊ “မႂ်းၼႆႉထဝ်ႈၼႃႇယဝ်ႉ။ မိူင်းဢၼ်တၵ်းတေလႆႈသိမ်းဢဝ်ၼၼ်ႉယင်းၵိုတ်းၵျၢၼ်ႇယူႇၼမ်ၼႃႇလူးၵွၼ်ႇဢေႃႈ။-
မိူင်းဢၼ်ယင်းၵိုတ်းၵျၢၼ်ႇယူႇၸိူဝ်းၼၼ်ႉၸမ်ႉ၊ပဵၼ်မိူင်း ၽိလိတ်ႉတိ၊ တင်းမိူင်း ၵေႇသုရႃႉ၊ တင်းသဵင်ႈတင်းမူတ်း၊-
ဢိၵ်ႇတင်းမိူင်း ဢႃႇဝိမ်ႇ၊ ၵႂႃႇၸူးၽၢႆႇတၢင်းၸၢၼ်းၼၼ်ႉတင်းသဵင်ႈတင်းလူင်ဢေႃႈ။ (မိူင်းဢၼ်ၸႃႉဢဝ်ၵႃႈတီႈၼမ်ႉမႄႈ သီးႁေႃႇရႃႉ၊ ၵႃႈတီႈလႅၼ်လိၼ်မိူင်း ဢေးၵျိပ်ႉ၊ ၵႂႃႇတေႃႇထိုင်ႁွတ်ႈလႅၼ်လိၼ်မိူင်း ဢေႇၵရုၼ်ႇ၊ ၽၢႆႇတၢင်းႁွင်ႇၼၼ်ႉမၢတ်ႈပဵၼ်မိူင်း ၶႃႇၼၼိ၊ ဢေႃႈ။ ၶုၼ်ႁေႃၶမ်းမိူင်း ၽိလိတ်ႉတိ၊ ႁႃႈပႃးၼၼ်ႉယူႇၵႃႈတီႈဝဵင်း ၵႃႇၸႃႉ၊ ဝဵင်း ဢႃႇၸုတ်ႉ၊ ဝဵင်း ဢႃႇသၵေႇလုၼ်ႇ၊ ဝဵင်း ၵိတ်ႉတိ၊ တင်းဝဵင်း ဢေႇၵရုၼ်ႇ၊ ၸိူဝ်းၼၼ်ႉဢေႃႈ။)-
ယင်းမီးမိူင်း ၶႃႇၼၼိ၊ တင်းသဵင်ႈတင်းမူတ်းဢိၵ်ႇတင်းမိူင်း မေႇရႃႉ၊ (ဢၼ်ၵူၼ်းမိူင်း ၸိတုမ်ႇ၊ ၶဝ်ပိူင်ႇၼၼ်ႉ) တေႃႇထိုင်ႁွတ်ႈဝဵင်း ဢႃႇၽႅၵ်ႉ၊ ၵႃႈတီႈလႅၼ်လိၼ်မိူင်း ဢႃႇမေႃးရိ၊ ၼၼ်ႉထႅင်ႈ၊-
ဢိၵ်ႇတင်းမိူင်းၵူၼ်း ၵေႇပလႃႉ၊ မိူင်း လေႇပၼုၼ်ႇ၊ တင်းမိူင်းၽၢႆႇတၢင်းဝၼ်းဢွၵ်ႇဢဝ်တီႈၸႃႉၸဵမ်ဝဵင်း ပလၵတ်ႉ၊ ဢၼ်မီးၽၢႆႇတၢင်းၸၢၼ်းလွႆ ႁေႇရမုၼ်ႇ၊ တေႃႇထိုင်ႁွတ်ႈသဵၼ်ႈတၢင်းဢၼ်ၵႂႃႇၸူးဝဵင်း ႁႃႇမတ်ႉ၊ ၸိူဝ်းၼၼ်ႉလူးၵွၼ်ႇဢေႃႈ။-
လိၼ်မိူင်းၼႆႉတင်းမူတ်းၶဝ်ႈပႃးသိုင်ႇတိူင်းမိူင်းၵူၼ်း ၸိတုမ်ႇ၊ ၸိူဝ်းဢၼ်ယူႇၵႃႈၼိူဝ်မိူင်းလွႆၵႃႈၼႂ်းဝူင်ႈၵၢင်လွႆ လေႇပၼုၼ်ႇ၊ တင်းဝဵင်း မိသရၽေႃႇသမိမ်း၊ ၼၼ်ႉဢေႃႈ။ မိူင်းဢၼ်ၵူၼ်းမဵဝ်း ဢိသရေး၊ ၶီႇသိုၵ်းၶိုၼ်ႈၼၼ်ႉၵဝ်တၵ်းႁေႃႈၵူၼ်းၸိူဝ်းၼၼ်ႉဢွၵ်ႇပႅတ်ႈတင်းသဵင်ႈတင်းမူတ်းဢေႃႈ။ သူတၵ်းလႆႈဢဝ်မိူင်းၸိူဝ်းၼၼ်ႉၽႄမႅင်ႇပၼ်ၵႃႈၼႂ်းၵူၼ်းမဵဝ်း ဢိသရေး၊ တင်းလၢႆၸွမ်းၵႃႈၼင်ႇဢၼ်ၵဝ်မီးဢမိင်ႉဝႆႉႁႂ်ႈသူႁဵတ်းၼၼ်ႉဢေႃႈ။-
ပိူဝ်ႈၼႆလႄႈဢဝ်မိူင်းၼၼ်ႉၽႄမႅင်ႇပၼ်ၵႃႈၼႂ်းၸိူဝ်ႉၶိူဝ်းၵဝ်ႈမဵဝ်း ဢိၵ်ႇတင်းၸိူဝ်ႉၶိူဝ်း မၼႃႇသေႇ၊ ၶိုင်ႈၼိုင်ႈၼၼ်ႉႁႂ်ႈပဵၼ်ဢမူၺ်ႇဢၼ်ၶဝ်ပိူင်ႇတႃႉ၊” ဝႃႈၼင်ႇၼႆဢေႃႈ။
ၸိူဝ်ႉၶိူဝ်း ရုပိၼ်ႇ၊ တင်းၸိူဝ်ႉၶိူဝ်း ၵၢတ်ႉ၊ ဢိၵ်ႇတင်းၸိူဝ်ႉၶိူဝ်း မၼႃႇသေႇ၊ ၶိုင်ႈၼိုင်ႈၼၼ်ႉၸိုင်၊လႆႈဢမူၺ်ႇလိၼ်မိူင်းဝႆႉယဝ်ႉၼၼ်ႉၵွပ်ႈပိူဝ်ႈ မူဝ်းသေႇ၊ ၶႃႈ ထႃႇဝရႃႉၽြႃး၊ ပေႃးၽႄမႅင်ႇပၼ်ၶဝ်ၽၢႆႇတၢင်းဝၼ်းဢွၵ်ႇၼမ်ႉ ယေႃးတၢၼ်ႇ၊ ဝႆႉယဝ်ႉဢေႃႈ။-
လိၼ်မိူင်းၶဝ်ၼၼ်ႉၸိုင်၊ၸႃႉဢဝ်ၵႃႈတီႈဝဵင်း ဢႃႇရေႃႇ၊ (ဢၼ်မီးၵႃႈတီႈၸွၵ်ႉပၢင်ႇထူင်ႉ ဢႃႇၼုၼ်ႇ၊ ) ဢိၵ်ႇတင်းဝဵင်းဢၼ်မီးၵႃႈတီႈၼႂ်းၵၢင်ပၢင်ႇထူင်ႉၼၼ်ႉပႃးတင်းပၢင်ႇၵွင်းပဵင်းဢၼ်ၸႃႉဢဝ်တီႈဝဵင်း မေႇတေႇၽႃႉ၊ တေႃႇထိုင်ႁွတ်ႈဝဵင်း တိၽုၼ်ႇ၊ ၼၼ်ႉတင်းသဵင်ႈတင်းလူင်ဢေႃႈ။-
လုၵ်ႉသေၵႃႈတီႈၼၼ်ႈၶိုၼ်ႈၵႂႃႇတေႃႇထိုင်ႁွတ်ႈၵႃႈတီႈလႅၼ်လိၼ်မိူင်း ဢမ်ႇမုၼ်ႇ၊ ပႃးတင်းဝဵင်းၵႃႈဢၼ်ၶုၼ်ႁေႃၶမ်း သိႁုၼ်ႇ၊ ၵူၼ်း ဢႃႇမေႃးရိ၊ ဢၼ်ဢုပ်ႉပိူင်ႇၵႃႈတီႈဝဵင်း ႁေႇသၽုၼ်ႇ၊ ၵႂႃႇၼၼ်ႉဢေႃႈ။-
မိူင်းၼၼ်ႉယင်းၶဝ်ႈပႃးမိူင်း ၵိလတ်ႉ၊ ဢၼ်ပဵၼ်ဢိူင်ႇၵူၼ်း ၵေႇသုရိ၊ တင်းၵူၼ်း မႃႇၶႃႇသိ၊ လွႆ ႁေႇရမုၼ်ႇ၊ တင်းလွႆ၊မိူင်း ပႃႇသၢၼ်ႇ၊ တင်းသဵင်ႈတင်းလူင်တေႃႇထိုင်ႁွတ်ႈမိူင်း သႃႇလၵႃႇ၊ ဢေႃႈ။-
သမ်ႉယင်းၶဝ်ႈပႃးသိုင်ႇတိူင်းမိူင်းၶုၼ်ႁေႃၶမ်း ဢေႃႇၶႃႉ၊ ၶုၼ်ႁေႃၶမ်းလိုၼ်းလင်သုတ်းၼႂ်းၵူၼ်းမဵဝ်း ရေႇၽိမ်ႇ၊ ဢၼ်ဢုပ်ႉပိူင်ႇၵႃႈတီႈဝဵင်း ဢႃႇသတႃႇရုတ်ႉ၊ တင်းဝဵင်း ဢေႇတရိ၊ ၵႂႃႇၼၼ်ႉဢေႃႈ။ ၵူၼ်းၸိူဝ်းၼၼ်ႉၸိုင်၊ မူဝ်းသေႇ၊ တိုၵ်းပႄႉလႄႈႁေႃႈဢွၵ်ႇပႅတ်ႈယဝ်ႉဢေႃႈ။-
ၼႂ်းဝႃႈၼၼ်သေၵေႃႈၵူၼ်းမဵဝ်း ဢိသရေး၊ တင်းလၢႆဢမ်ႇႁေႃႈၵူၼ်း ၵေႇသုရိ၊ တင်းၵူၼ်း မႃႇၶႃႇသိ၊ ၸိူဝ်းၼၼ်ႉဢွၵ်ႇပႅတ်ႈလႄႈၶဝ်လႆႈယူႇလူၺ်ႈၵၼ်တင်းၵူၼ်း ဢိသရေး၊ တေႃႇထိုင်ႁွတ်ႈမိူဝ်ႈလဵဝ်ဢေႃႈ။
တီႈၸိူဝ်ႉၶိူဝ်း လေႇဝိ၊ ၸမ်ႉ၊ မူဝ်းသေႇ၊ ဢမ်ႇပၼ်လိၼ်မိူင်းပုၼ်ႈၶဝ်။ ၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ ဝႆႉၼၼ်ႉၶဝ်လႆႈၶၢမ်ႇဢဝ်ၶိူင်ႈတၢင်းလူႇဢၼ်တုတ်ႇၽႆးၵႃႈၼိူဝ်ၶဵင်ႇတၢင်းလူႇၵႃႈတီႈ ထႃႇဝရႃႉၽြႃး၊ၽြႃးပဵၼ်ၸဝ်ႈ၊ မဵဝ်း ဢိသရေး၊ ၼၼ်ႉၸိူဝ်ႉၼင်ႇဢမူၺ်ႇဢၼ်ၶဝ်ထိူၵ်ႈၶၢမ်ႇဢဝ်ၼၼ်ႉဢေႃႈ။
မူဝ်းသေႇ၊ ပၼ်လိၼ်ပွတ်းၼိုင်ႈတီႈၸိူဝ်ႉၶိူဝ်း ရုပိၼ်ႇ၊ ႁႂ်ႈပဵၼ်ဢမူၺ်ႇတီႈၶိူဝ်းႁိူၼ်းၶဝ်ႁင်းၽႂ်ႁင်းမၼ်းဢေႃႈ။-
လိၼ်မိူင်းၶဝ်ၼၼ်ႉၸႃႉဢဝ်ၵႃႈတီႈဝဵင်း ဢႃႇရေႃႇ၊ (ဢၼ်မီးၵႃႈတီႈၸွၵ်ႉပၢင်ႇထူင်ႉ ဢႃႇၼုၼ်ႇ၊ ) ဢိၵ်ႇတင်းဝဵင်းဢၼ်မီးၵႃႈတီႈၼႂ်းၵၢင်ပၢင်ႇထူင်ႉၼၼ်ႉပႃးတင်းပၢင်ႇၵွင်းပဵင်းဢၼ်မီးႁိမ်းႁွမ်းဝဵင်း မေႇတေႇၽႃႉ၊ ၼၼ်ႉဢေႃႈ။-
မိူင်းမၼ်းၶဝ်ႈပႃးဝဵင်း ႁေႇသၽုၼ်ႇ၊ ဢိၵ်ႇတင်းဝဵင်းၵႃႈဢၼ်မီးၵႃႈတီႈၼိူဝ်ပၢင်ႇၵွင်းပဵင်းဢၼ်ပဵၼ်ဝဵင်း တိၽုၼ်ႇ၊ ဝဵင်း ပႃႇမုတ်ႉပႃႇလႃႉ၊ ဝဵင်း ပႅတ်ႉပႃႇလမုၼ်ႇ၊-
ဝဵင်း ယႃႇႁတ်ႉ၊ ဝဵင်း ၵေႇတမုတ်ႉ၊ ဝဵင်း မေႇၽတ်ႉ၊-
ဝဵင်း ၵိရိယသိမ်း၊ ဝဵင်း ၸိပမႃႇ၊ ဝဵင်း ၸႃႇရိတ်ႉသႃႇႁႃႉ၊ ဢၼ်မီးၵႃႈၼိူဝ်လွႆ၊တီႈၵႃႈၼႂ်းၶူင်ႈႁူၺ်ႈ၊-
ဝဵင်း ပႅတ်ႉပေႇဢုရႃႉ၊ တၢပ်ႈလွႆ ပိသၵႃႇ၊ ဝဵင်း ပႅတ်ႉယေႇသိမုတ်ႉ၊ ၸိူဝ်းၼၼ်ႉ၊-
ယင်းပႃးတင်းဝဵင်းၵႃႈမီးၵႃႈၼိူဝ်ပၢင်ႇၵွင်းပဵင်းဢိၵ်ႇတင်းသိုင်ႇတိူင်းမိူင်းၶုၼ်ႁေႃၶမ်း သိႁုၼ်ႇ၊ မဵဝ်း ဢႃႇမေႃးရိ၊ ဢၼ်ဢုပ်ႉပိူင်ႇၵႃႈတီႈဝဵင်း ႁေႇသၽုၼ်ႇ၊ ၵႂႃႇၼၼ်ႉဢေႃႈ။ မူဝ်းသေႇ၊ တိုၵ်းပႄႉမၼ်းဢိၵ်ႇလူၺ်ႈၵၼ်တင်းၶုၼ်ၸိူဝ်းဢၼ်ဢုပ်ႉပိူင်ႇမိူင်း မိတျၼ်ႇ၊ ဢၼ်ဝႃႈ၊ၶုၼ် ဢေးဝိ၊ ၶုၼ် ရေႇၵိမ်ႇ၊ ၶုၼ် ၸုရႃႉ၊ ၶုၼ် ႁုရႃႉ၊ တင်းၶုၼ် ရေးၽႃႉ၊ ၸိူဝ်းၼၼ်ႉဢေႃႈ။ ၶုၼ်ၸိူဝ်းၼၼ်ႉပဵၼ်ၶုၼ်ဢၼ်ဢုပ်ႉပိူင်ႇတႂ်ႈၶုၼ်ႁေႃၶမ်း သိႁုၼ်ႇ၊ ဢေႃႈ။-
ၵႃႈၼႂ်းၶဝ်ၸိူဝ်းဢၼ်ၵူၼ်းမဵဝ်း ဢိသရေး၊ တင်းလၢႆၶႃႈၽၼ်းဢဝ်တၢႆၼၼ်ႉပႃးတင်းပရေႃးၽႅတ်ႈ ပႃႇလၢမ်ႇ၊ လုၵ်ႈၸၢႆး ပေႃးရႃႉ၊ ၼၼ်ႉဢေႃႈ။-
ၼမ်ႉ ယေႃးတၢၼ်ႇ၊ ၼၼ်ႉပဵၼ်ၶွပ်ႇၼမ်ႉလႅၼ်လိၼ်မိူင်းၸိူဝ်ႉၶိူဝ်း ရုပိၼ်ႇ၊ ၽၢႆႇတၢင်းဝၼ်းတူၵ်းမၼ်းဢေႃႈ။ ဢၼ်ၼႆႉၸမ်ႉ၊ပဵၼ်ဝၢၼ်ႈပဵၼ်ဝဵင်းၸိူဝ်းဢၼ်ပၼ်တီႈၸိူဝ်ႉၶိူဝ်း ရုပိၼ်ႇ၊ ႁႂ်ႈပဵၼ်ဢမူၺ်ႇတီႈၶိူဝ်းႁိူၼ်းၶဝ်ႁင်းၽႂ်ႁင်းမၼ်းဢေႃႈ။
မူဝ်းသေႇ၊ သမ်ႉပၼ်လိၼ်ပွတ်းၼိုင်ႈတီႈၸိူဝ်ႉၶိူဝ်း ၵၢတ်ႉ၊ ႁႂ်ႈပဵၼ်ဢမူၺ်ႇတီႈၶိူဝ်းႁိူၼ်းၶဝ်ႁင်းၽႂ်ႁင်းမၼ်းဢေႃႈ။-
လိၼ်မိူင်းၶဝ်ၼၼ်ႉၸိုင်၊ၸႃႉၸဵမ်ဝဵင်း ယႃႇၸႃႇ၊ လႄႈပႃးမိူင်း ၵိလတ်ႉ၊ တင်းမိူင်း ဢိၵ်ႇတင်းမိူင်းၵူၼ်း ဢမ်ႇမုၼ်ႇ၊ ၶဝ်ၶိုင်ႈၼိုင်ႈတေႃႇထိုင်ႁွတ်ႈဝဵင်း ဢႃႇရေႃႇ၊ ဢၼ်မီးၵႃႈတီႈၽၢႆႇဝၼ်းဢွၵ်ႇဝဵင်း ရပ်ႉပႃႇ၊ သေလႄႈ၊-
မိူင်းၶဝ်ၶႂၢၵ်ႈဢွၵ်ႇၸႃႉၸဵမ်ဝဵင်း ႁေႇသၽုၼ်ႇ၊ ၵႂႃႇတေႃႇထိုင်ႁွတ်ႈဝဵင်း ရႃႇမတ်ႉမိၸပႃႉ၊ တင်းဝဵင်း ပေႇတေႃႇၼိမ်း၊ သမ်ႉၸႃႉဢဝ်တီႈဝဵင်း မႁႃႇၼိမ်ႇ၊ ၵႂႃႇတေႃႇထိုင်ႁွတ်ႈလႅၼ်လိၼ်ဝဵင်း လိတ်ႉပိရႃႉ၊ ဢေႃႈ။-
ၵႃႈၼႂ်းပၢင်ႇထူင်ႉၼမ်ႉ ယေႃးတၢၼ်ႇ၊ ၼၼ်ႉပႃးတင်းဝဵင်း ပေႇရႃႇရမ်ႇ၊ ဝဵင်း ပႅတ်ႉၼိမရႃႉ၊ ဝဵင်း သုၵုတ်ႉ၊ တင်းဝဵင်း ၸႃႇၽုၼ်ႇ၊ ဢိၵ်ႇတင်းၵႃႈဢၼ်ၵိုတ်းဢၼ်ၵျၢၼ်ႇဝႆႉၵႃႈတီႈမိူင်းၶုၼ်ႁေႃၶမ်း သိႁုၼ်ႇ၊ ဝဵင်း ႁေႇသၽုၼ်ႇ၊ ဢေႃႈ။ ၶွပ်ႇၼမ်ႉလႅၼ်လိၼ်ၽၢႆႇတၢင်းဝၼ်းတူၵ်းမိူင်းၶဝ်ၼၼ်ႉပဵၼ်ၼမ်ႉ ယေႃးတၢၼ်ႇ၊ ၶိုၼ်ႈၵႂႃႇတေႃႇထိုင်ႁွတ်ႈၼွင်လူင် ၵႃႇလိလႄး၊ ဢေႃႈ။-
ဢၼ်ၼႆႉၸမ်ႉ၊ပဵၼ်ဝၢၼ်ႈပဵၼ်ဝဵင်းၸိူဝ်းဢၼ်ပၼ်တီႈၸိူဝ်ႉၶိူဝ်း ၵၢတ်ႉ၊ ႁႂ်ႈပဵၼ်ဢမူၺ်ႇတီႈၶိူဝ်းႁိူၼ်းၶဝ်ႁင်းၽႂ်ႁင်းမၼ်းဢေႃႈ။
မူဝ်းသေႇ၊ သမ်ႉပၼ်လိၼ်မိူင်းၼၼ်ႉပွတ်းၼိုင်ႈတီႈၸိူဝ်ႉၶိူဝ်း မၼႃႇသေႇ၊ ၶိုင်ႈၼိုင်ႈႁႂ်ႈပဵၼ်ဢမူၺ်ႇတီႈၶိူဝ်းႁိူၼ်းၶဝ်ၶိုင်ႈၼိုင်ႈၼၼ်ႉႁင်းၽႂ်ႁင်းမၼ်းဢေႃႈ။-
လိၼ်မိူင်းၶဝ်ၼၼ်ႉၸိုင်၊ၸႃႉဢဝ်တီႈဝဵင်း မႁႃႇၼိမ်ႇ၊ ပႃးတင်းမိူင်း ပႃႇသၢၼ်ႇ၊ တင်းမိူင်း၊ဢၼ်ပဵၼ်သိုင်ႇတိူင်းမိူင်းၶုၼ်ႁေႃၶမ်း ဢေႃႇၶႃႉ၊ မိူင်း ပႃႇသၢၼ်ႇ၊ ၼၼ်ႉတင်းသဵင်ႈတင်းမူတ်းဢိၵ်ႇလူၺ်ႈဝဵင်းၸိူဝ်းဢၼ်မီးတႂ်ႈမိုဝ်းၶုၼ် ယႃႇဢိရႃႉ၊ ၵႃႈၼႂ်းမိူင်း ပႃႇသၢၼ်ႇ၊ ႁူၵ်းသိပ်းဝဵင်းၼၼ်ႉဢေႃႈ။-
မိူင်းၼၼ်ႉ၊ပႃးတင်းမိူင်း ၵိလတ်ႉ၊ ၶိုင်ႈၼိုင်ႈဢိၵ်ႇလူၺ်ႈဝဵင်း ဢႃႇသတႃႇရုတ်ႉ၊ တင်းဝဵင်း ဢေႇတရိ၊ ဢၼ်ပဵၼ်ဝဵင်းလူင်ၶုၼ်ႁေႃၶမ်း ဢေႃႇၶႃႉ၊ ၵႃႈၼႂ်းသိုင်ႇတိူင်းမိူင်း ပႃႇသၢၼ်ႇ၊ ဢေႃႈ။ လိၼ်မိူင်းၸိူဝ်းၼႆႉတင်းသဵင်ႈတင်းမူတ်းၸိုင်၊ပၼ်တီႈ မႃႇၶိရႃႉ၊ လုၵ်ႈၸၢႆး မၼႃႇသေႇ၊ ဢၼ်ပဵၼ်ၶိူဝ်းႁိူၼ်းၵႃႈမီးၶိုင်ႈၼိုင်ႈၼၼ်ႉဢေႃႈ။
လိၼ်မိူင်းၸိူဝ်းၼႆႉၸမ်ႉ၊ မူဝ်းသေႇ၊ ၽႄမႅင်ႇပၼ်ၵႃႈၼႂ်းပၢင်ႇပဵင်းမိူင်း မေႃႇၽႃႉ၊ ၵႃႈတီႈၽၢႆႇတၢင်းဝၼ်းဢွၵ်ႇၼမ်ႉ ယေႃးတၢၼ်ႇ၊ သိုဝ်ႈဝဵင်း ယေႇရိၶူဝ်း၊ ၼၼ်ႉဢေႃႈ။-
တီႈၸိူဝ်ႉၶိူဝ်း လေႇဝိ၊ ၸမ်ႉ၊ မူဝ်းသေႇ၊ ဢမ်ႇၽႄမႅင်ႇပၼ်လိၼ်မိူင်းသေဢိတ်း။ မၼ်းသင်ႇလၢတ်ႈၶဝ်ဝႆႉလွင်ႈဢၼ်ဝႃႈ၊ဢမူၺ်ႇၶဝ်ၼၼ်ႉၸိုင်၊ပဵၼ်တၢင်းဢၼ်ၽႄဢဝ်ၶိူင်ႈတၢင်းလူႇၸိူဝ်းဢၼ်သၢၵ်ႈလူႇတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈ၊မဵဝ်း ဢိသရေး၊ ၼၼ်ႉဢေႃႈ။
ၼင်ႇၼႆလႄႈဢၼ်ၸိူဝ်းၼႆႉၸမ်ႉ၊ပဵၼ်လွင်ႈတၢင်းဢၼ်ဢဝ်လိၼ်မိူင်း ၶႃႇၼၼ်ႇ၊ ၽၢႆႇဝၼ်းတူၵ်းၼမ်ႉ ယေႃးတၢၼ်ႇ၊ ၼၼ်ႉၽႄမႅင်ႇပၼ်ၵႃႈၼႂ်းၵူၼ်းမဵဝ်း ဢိသရေး၊ ၶဝ်ဢေႃႈ။ ယဵၸ်ႈပရေႃးႁဵၵ်ႈ ယေႃးသု၊ လုၵ်ႈၸၢႆး ၼုၼ်ႇ၊ ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၵႃႈၼႂ်းၶိူဝ်းႁိူၼ်းၶဝ်ၵႃႈၼႂ်းၸိူဝ်ႉၶိူဝ်းမဵဝ်း ဢိသရေး၊ တင်းလၢႆၸိူဝ်းၼၼ်ႉၽႄမႅင်ႇပၼ်ဢေႃႈ။-
ၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ ဝႆႉၼၼ်ႉၶဝ်ႁဵတ်းတၢင်းဢၼ်တူၵ်းၸႃႇၵွၵ်ႈသေလႄႈၽႄမႅင်ႇပၼ်တီႈၸိူဝ်ႉၶိူဝ်းၵဝ်ႈမဵဝ်းပၢႆၶိုင်ႈၼိုင်ႈၼၼ်ႉဢေႃႈ။-
ၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ၽႄမႅင်ႇဢဝ်လိၼ်မိူင်းၶဝ် ၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ ဝႆႉၼၼ်ႉဢေႃႈ။
မီးဝၼ်းၼိုင်ႈ၊ၵူၼ်းၼႂ်းၸိူဝ်ႉၶိူဝ်း ယုတႃႉ၊ ၶဝ်ၵမ်ႈၽွင်ႈမႃးၸူးတီႈ ယေႃးသု၊ ၵႃႈတီႈ ၵိလႃႉၵႃႇလႃႉ၊ ဢေႃႈ။ ၼႂ်းၶဝ်ၼၼ်ႉၵေႃႉၼိုင်ႈဢၼ်ပဵၼ် ၵႃႇလႅပ်ႉ၊ လုၵ်ႈၸၢႆး ယေႇၽုၼ်ႇၼႃႉ၊ ၵူၼ်းမဵဝ်း ၵေးၼိတ်ႉ၊ ၼၼ်ႉ လဝ်ႈလၢတ်ႈတီႈမၼ်းလႄႈဝႃႈ၊ “ၸဝ်ႈႁဝ်းႁုလွင်ႈၵႂၢမ်းဢၼ် ထႃႇဝရႃႉၽြႃး၊ မီးဢမိင်ႉဝႆႉတီႈ မူဝ်းသေႇ၊ ၵူၼ်းၽြႃးပဵၼ်ၸဝ်ႈၵႃႈတီႈ ၵႃႇတေႇသပႃႇၼႃႉ၊ ဢၼ်ၵပ်းၵၢႆႇလူၺ်ႈလွင်ႈၸဝ်ႈႁဝ်းတင်းၵဝ်ၶႃႈၼၼ်ႉယူႇၶႃႈဢေႃႈ။-
မိူဝ်ႈဢၼ် မူဝ်းသေႇ၊ ၶႃႈၽြႃးပဵၼ်ၸဝ်ႈပွႆႇၸႂ်ႉၵဝ်ၶႃႈဢွၵ်ႇသေၵႃႈတီႈ ၵႃႇတေႇသပႃႇၼႃႉ၊ ၵႂႃႇႁႂ်ႈလႆႈလူလွမ်တူၺ်းမိူင်းၼႆႉၼၼ်ႉၸိုင်၊ဢသၢၵ်ႈၵဝ်ၶႃႈလႆႈသီႇသိပ်းပီၶႃႈဢေႃႈ။ ၵဝ်ၶႃႈၶိုၼ်းမႃးလဝ်ႈလၢတ်ႈၵႂၢမ်းဢၼ်ၸိုဝ်ႈဢၼ်ၸႂ်ႈတီႈမၼ်းၶႃႈဢေႃႈ။-
ၵူၼ်းၸိူဝ်းဢၼ်ၵႂႃႇလူၺ်ႈၵၼ်တင်းၵဝ်ၶႃႈၼၼ်ႉပိၵ်ႉသမ်ႉဢွၼ်ၵၼ်ႁဵတ်းႁႂ်ႈၵူၼ်းႁဝ်းတင်းလၢႆၵူဝ်ႁႄသၼ်ႇဝႆသေၵေႃႈ၊ၵဝ်ၶႃႈပႃးတင်းသဵတ်ႈၸႃႇလႄႈၸွမ်းလင် ထႃႇဝရႃႉၽြႃး၊ ၽြႃးပဵၼ်ၸဝ်ႈၵဝ်ၶႃႈလုမ်းလုမ်းၶႃႈဢေႃႈ။-
ၼႂ်းဝၼ်းၼၼ်ႉ မူဝ်းသေႇ၊ ဝႆႉၵတိလႄႈဝႃႈ၊ ‘ၵွပ်ႈပိူဝ်ႈဢၼ်မႂ်းၸွမ်းလင် ထႃႇဝရႃႉၽြႃး၊ ၽြႃးပဵၼ်ၸဝ်ႈၵဝ်လုမ်းလုမ်းၼၼ်ႉလႄႈ၊လိၼ်ဢၼ်တိၼ်မႂ်းလႆႈယဵပ်ႇယဝ်ႉၼၼ်ႉတၵ်းလႆႈပဵၼ်ဢမူၺ်ႇမႂ်းဢိၵ်ႇတင်းလုၵ်ႈလၢၼ်မႂ်းယူႇတႃႇသေႇဢမ်ႇထၢတ်ႇဢမၢၼ်ႇၶၼ်ပဵၼ်ဢေႃႈ၊’ ဝႃႈၼင်ႇၼႆဢေႃႈ။-
တေႃႈလဵဝ်ၼႆႉ၊တူၺ်းၶႃႈလူး။ ထႃႇဝရႃႉၽြႃး၊ မီးဢမိင်ႉတီႈ မူဝ်းသေႇ၊ ၸဵမ်မိူဝ်ႈပူၼ်ႉမႃးသီႇသိပ်းပၢႆႁႃႈပီၼၼ်ႉၶႃႈယဝ်ႉ။ မိူဝ်ႈၶိင်ႇၼၼ်ႉၸိုင်၊ပဵၼ်ၶိင်ႇၵႃႇလႃႉဢၼ်ၵူၼ်းမဵဝ်း ဢိသရေး၊ ယင်းတိုၵ်ႉပႆယူႇၼႂ်းၶၢဝ်းတၢင်းထိူၼ်ႇလႅင်ႉၼၼ်ႉလႄႈ၊ ထႃႇဝရႃႉၽြႃး၊ ၵေႃႈၸွမ်းၵႃႈၼင်ႇဢၼ်မၼ်းၸဝ်ႈဝႆႉၵတိၼၼ်ႉယင်းပၼ်ႁႂ်ႈၵဝ်ၶႃႈဢသၢၵ်ႈလိပ်းယူႇၶႃႈဢေႃႈ။ တူၺ်းၶႃႈလူး။ ဢသၢၵ်ႈၵဝ်ၶႃႈလႆႈပႅတ်ႇသိပ်းပၢႆႁႃႈပီယဝ်ႉသေၵေႃႈ၊-
ၵဝ်ၶႃႈယင်းမီးႁႅင်းယူႇၼႂ်းဝၼ်းမိူဝ်ႈၼႆႉမိူၼ်ၸိူဝ်ႉၼင်ႇဢၼ်မီးႁႅင်းၼႂ်းဝၼ်းဢၼ် မူဝ်းသေႇ၊ ပွႆႇၸႂ်ႉၵႂႃႇၼၼ်ႉၶႃႈဢေႃႈ။ ၵဝ်ၶႃႈယင်းတိုၵ်ႉမီးႁႅင်းတဵမ်ဝႆႉပုၼ်ႈတၢင်းဢၼ်တိုၵ်းသိုၵ်းဢိၵ်ႇတင်းပုၼ်ႈလွင်ႈတၢင်းဢၼ်ႁဵတ်းၵူႈၸိူဝ်ႉၵူႈပိူင်ယူႇလူးၵွၼ်ႇဢေႃႈ။-
ပိူဝ်ႈၼႆလႄႈဢဝ်မိူင်းလွႆဢၢပ်ႈပၼ်တီႈၵဝ်ၶႃႈသေၵမ်း။ မိူင်းလွႆဢၼ် ထႃႇဝရႃႉၽြႃး၊ ဝႆႉၵတိတေႃႇၵဝ်ၶႃႈၼႂ်းဝၼ်းဢၼ်ၵဝ်ၶႃႈတင်းၵူၼ်းၵဝ်ၶႃႈၶိုၼ်းမႃးလဝ်ႈဝႃႈၼၼ်ႉတီႈၶႃႈဢေႃႈ။ ၼႂ်းဝၼ်းမိူဝ်ႈၼၼ်ႉၵဝ်ၶႃႈလဝ်ႈလၢတ်ႈတီႈၸဝ်ႈႁဝ်းလွင်ႈဢၼ်ၵူၼ်းမဵဝ်းဢၼ်တူဝ်ယႂ်ႇႁႅင်းလူင်ဢၼ်ႁွင်ႉဝႃႈ၊ၵူၼ်းမဵဝ်း ဢႃႇၼၵႃႉ၊ မီးၵႃႈၼိူဝ်လွႆၼႆႉၵႃႈၼႂ်းဝဵင်းဢၼ်လမ်းဝဵင်းၶဝ်မၼ်ႈၶိူင်ႇၼႃႇၸိူဝ်းၼၼ်ႉယဝ်ႉၶႃႈယဝ်ႉ။ ၵွပ်ႈပိူဝ်ႈ ထႃႇဝရႃႉၽြႃး၊ မီးယူႇလူၺ်ႈၵၼ်တင်းၵဝ်ၶႃႈႁိုဝ်ဢမ်ႇႁု။ ၵဝ်ၶႃႈတၵ်းလႆႈႁေႃႈၶဝ်ဢွၵ်ႇပႅတ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉဝႆႉၼၼ်ႉယူႇၶႃႈဢေႃႈ၊” ဝႃႈၼင်ႇၼႆဢေႃႈ။
ယေႃးသု၊ ၵေႃႈပၼ်တၢင်းလီတီႈ ၵႃႇလႅပ်ႉ၊ လုၵ်ႈၸၢႆး ယေႇၽုၼ်ႇၼႃႉ၊ သေယဝ်ႉ၊ဢၢပ်ႈမိူင်း ႁေႇပရုၼ်ႇ၊ ႁႂ်ႈပဵၼ်ဢမူၺ်ႇမၼ်းသေဢေႃႈ။-
ပိူဝ်ႈၼႆလႄႈမိူင်း ႁေႇပရုၼ်ႇ၊ ၼၼ်ႉလႆႈပဵၼ်လိၼ်ဢမူၺ်ႇ ၵႃႇလႅပ်ႉ၊ လုၵ်ႈၸၢႆး ယေႇၽုၼ်ႇၼႃႉ၊ ၵူၼ်းမဵဝ်း ၵေးၼိတ်ႉ၊ ၼၼ်ႉတေႃႇထိုင်ႁွတ်ႈဝၼ်းမိူဝ်ႈၼႆႉၵွပ်ႈပိူဝ်ႈဢၼ်မၼ်းၸွမ်းလင် ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ လုမ်းလုမ်းၼၼ်ႉဢေႃႈ။-
မိူဝ်ႈဢွၼ်တၢင်းၼၼ်ႉဝဵင်း ႁေႇပရုၼ်ႇ၊ ၸိုင်၊မီးၸိုဝ်ႈႁွင်ႉဝႃႈ၊ဝဵင်း ၵိရိယႃႉဢႃႇပႃႇ၊ ဢေႃႈ။ ( ဢႃႇပႃႇ၊ ၼၼ်ႉပဵၼ်ၵူၼ်းႁႅင်းလူင်ဢၼ်ယႂ်ႇၼႃႇသေပိူၼ်ႈၵႃႈၼႂ်းၵူၼ်းမဵဝ်း ဢႃႇၼၵႃႉ၊ ဢေႃႈ။) မိူဝ်ႈၼၼ်ႉသိုၵ်းထၢတ်ႇယဵၼ်ၵႂႃႇတင်းမိူင်းဢေႃႈ။
လိၼ်မိူင်းဢၼ်တူၵ်းၸႃႇၵွၵ်ႈတီႈၸိူဝ်ႉၶိူဝ်း ယုတႃႉ၊ ဢၼ်ၸွမ်းလူၺ်ႈၶိူဝ်းႁိူၼ်းၶဝ်ႁင်းၽႂ်ႁင်းမၼ်းၼၼ်ႉၸမ်ႉ၊ ၽၢႆႇတၢင်းၸဵင်ႇၸၢၼ်းသုတ်းသေပိူၼ်ႈၼၼ်ႉၵႃႈတီႈထိူၼ်ႇလႅင်ႉ ၸိၼႃႉ၊ ၸၢပ်ႈလႅၼ်လိၼ်မိူင်း ဢေႇတုမ်ႇ၊ ဢေႃႈ။-
ၶွပ်ႇၼမ်ႉလႅၼ်လိၼ်ၶဝ်ၽၢႆႇတၢင်းၸၢၼ်းၼၼ်ႉလုၵ်ႉသေၵႃႈတီႈငွၵ်းၵူတ်ႉ ပၢင်ႇလၢႆႇတၢႆ၊ ၽၢႆႇတၢင်းၸၢၼ်းလႄႈ၊-
ၵႂႃႇၽၢႆႇတၢင်းၸၢၼ်းၸွမ်းသဵၼ်ႈတၢင်းဢၼ်ၶိုၼ်ႈၵုင်းလွႆ ဢႃႇၵႃႇရိပ်ႉပိမ်း၊ ၵႂႃႇႁွတ်ႈထိုင်ၵႃႈတီႈထိူၼ်ႇလႅင်ႉ ၸိၼႃႉ၊ သေယဝ်ႉ၊သမ်ႉၶိုၼ်ႈၸွမ်းၽၢႆႇတၢင်းၸၢၼ်းဝၢၼ်ႈ ၵႃႇတေႇသပႃႇၼႃႉ၊ လႄႈပႆၵႂႃႇၸူးတီႈဝၢၼ်ႈ ႁေႇၸရုၼ်ႇ၊ ၶိုၼ်ႈၸူးၵႃႈတီႈဝၢၼ်ႈ ဢတ်ႉတႃႇ၊ သေယဝ်ႉ၊လဵပ်ႈၵႂႃႇၸူးတီႈဝၢၼ်ႈ ၵႃးၵႃႉ၊ လႄႈ၊-
ၸင်ႇပႆၸွမ်းၵႂႃႇၸူးၵႃႈတီႈဝၢၼ်ႈ ဢႃႇၸမုၼ်ႇ၊ သမ်ႉၵႂႃႇၸွမ်းၽင်ႇၶွပ်ႇၼမ်ႉလႅၼ်လိၼ်မိူင်း ဢေးၵျိပ်ႉ၊ ၵႂႃႇႁွတ်ႈထိုင်ပၢင်ႇလၢႆႇ မေႇတိထေးရီးယၼ်း၊ တီႈဢၼ်လႅၼ်လိၼ်တိူၵ်ႉၵႂႃႇၼၼ်ႉဢေႃႈ။ ဢၼ်ၼႆႉၸမ်ႉ၊ပဵၼ်ၶွပ်ႇၼမ်ႉလႅၼ်လိၼ်သိုင်ႇတိူင်းမိူင်း ယုတႃႉ၊ ၼႃႈတၢင်းၸၢၼ်းဢေႃႈ။
ၶွပ်ႇၼမ်ႉလႅၼ်လိၼ်ၼႃႈတၢင်းဝၼ်းဢွၵ်ႇၼၼ်ႉပဵၼ် ပၢင်ႇလၢႆႇတၢႆ၊ ၸွမ်းၶိုၼ်ႈၵႂႃႇတေႃႇထိုင်ႁွတ်ႈပၢၵ်ႇၼမ်ႉ ယေႃးတၢၼ်ႇ၊ ဢေႃႈ။ ၶွပ်ႇၼမ်ႉလႅၼ်လိၼ်ၼႃႈတၢင်းႁွင်ႇသမ်ႉတႄႇဢဝ်ၵႃႈတီႈငွၵ်းၵူတ်ႉပၢင်ႇလၢႆႇဢၼ်သိုဝ်ႈပၢၵ်ႇၼမ်ႉ ယေႃးတၢၼ်ႇ၊ ၼၼ်ႉသေလႄႈ၊-
ၶႂၢၵ်ႈၵႂႃႇၸူးတီႈဝၢၼ်ႈ ပႅတ်ႉႁေႃႇၵလႃႉ၊ ၶိုၼ်ႈၸွမ်းတႄးလွႆၵႂႃႇၽၢႆႇတၢင်းႁွင်ႇဢၼ်မုင်ႈႁၼ်ပၢင်ႇထူင်ႉၼမ်ႉ ယေႃးတၢၼ်ႇ၊ ၼၼ်ႉဢေႃႈ။ လုၵ်ႉသေၵႃႈတီႈၼၼ်ႈသမ်ႉၶိုၼ်ႈၸူးတီႈမၢၵ်ႇႁိၼ် ပေႃႇႁၼ်ႇ၊ ( ပေႃႇႁၼ်ႇ၊ ၼၼ်ႉပဵၼ်လုၵ်ႈၸၢႆး ရုပိၼ်ႇ၊ ) သေလႄႈ၊-
သမ်ႉဢွၵ်ႇသေၵႃႈတီႈႁူၺ်ႈ ဢႃႇၶေႃႇ၊ ၶိုၼ်ႈၸူးဝၢၼ်ႈ တေႇပိရႃႉ၊ သေယဝ်ႉ၊ငႅၵ်းၵႂႃႇၽၢႆႇတၢင်းႁွင်ႇၵႂႃႇၸူးတီႈဝဵင်း ၵိလႃႉၵႃႇလႃႉ၊ ဢၼ်မီးသိုဝ်ႈၵုင်း ဢတုမ်ႇမိမ်း၊ ၽၢႆႇတၢင်းၸၢၼ်းႁူၺ်ႈၼၼ်ႉဢေႃႈ။ သမ်ႉၵႂႃႇၸူးတီႈၼမ်ႉဢွၵ်ႇႁူး ဢႅၼ်ႇသေႇမိတ်ႉ၊ လႄႈသိုပ်ႇၵႂႃႇၸူးတီႈၼမ်ႉဢွၵ်ႇႁူး ဢႅၼ်ႇရေႃႇၵေးလႃႉ၊ သေယဝ်ႉ၊-
လတ်းၶဝ်ႈၶူင်ႈႁူၺ်ႈ ႁိၼ်ႇၼုမ်ႇ၊ ၽၢႆႇတၢင်းၸၢၼ်းၵုင်းလွႆတီႈဢၼ်ၵူၼ်း ယေႇပုသိ၊ တႄႇတင်ႈဝဵင်းလူင် ယေႇရုသလႅမ်ႇ၊ ၼၼ်ႉဢေႃႈ။ လႅၼ်လိၼ်ၼၼ်ႉသမ်ႉသိုပ်ႇၵႂႃႇၸူးတီႈၸိၵ်းလွႆၽၢႆႇတၢင်းၼႃႈဝၼ်းဢွၵ်ႇၶူင်ႈႁူၺ်ႈ ႁိၼ်ႇၼုမ်ႇ၊ ၵႃႈတီႈႁူဝ်ၸဵင်ႇၶူင်ႈႁူၺ်ႈ ရေႇၽိမ်ႇ၊ ၼႃႈတၢင်းႁွင်ႇၼၼ်ႉဢေႃႈ။-
လုၵ်ႉသေၵႃႈတီႈၼၼ်ႈသမ်ႉလူင်းၸူးတီႈၼမ်ႉဢွၵ်ႇႁူး ၼေႇၽတေႃႇ၊ လႄႈဢွၵ်ႇၵႂႃႇၸူးၵႃႈတီႈဝဵင်းၸိူဝ်းဢၼ်မီးၵႃႈႁိမ်းလွႆ ဢေႇၽရုၼ်ႇ၊ ၼၼ်ႉဢေႃႈ။-
သမ်ႉငႅၵ်းၸူးတီႈဝဵင်း ပႃႇလႃႉ (ဢၼ်ဝႃႈ၊ဝဵင်း ၵေႇရထႃႉယႃႇရိမ်း ) ၼၼ်ႉလဵပ်ႈၵႂႃႇၽၢႆႇတၢင်းတူၵ်းတေႃႇထိုင်ႁွတ်ႈလွႆ ၸိရႃႉ၊ ယဝ်ႉၸင်ႇၶိုၼ်ႈၵႂႃႇၵႃႈတီႈၽၢႆႇတၢင်းႁွင်ႇလွႆ ယႃႇရိမ်း၊ (ဢၼ်ဝႃႈ၊လွႆ ၶေႇသလုၼ်ႇ ) ၼၼ်ႉလႄႈလူင်းၵႂႃႇၸူးတီႈဝဵင်း ပႅတ်ႉသေးမိတ်ႉ၊ လႄႈသမ်ႉပူၼ်ႉဝဵင်း တိမၼႃႉ၊ ၵႂႃႇဢေႃႈ။-
လႅၼ်လိၼ်ၼၼ်ႉသမ်ႉဢွၵ်ႇၵႂႃႇၵႃႈၼိူဝ်လွႆၽၢႆႇတၢင်းႁွင်ႇၸူးတီႈဝဵင်း ဢေႇၵရုၼ်ႇ၊ သမ်ႉငႅၵ်းၵႂႃႇၸူးတီႈဝၢၼ်ႈ သိၵရုၼ်ႇ၊ လႄႈတႆႇပူၼ်ႉလွႆ ပႃႇလႃႉ၊ ၵႂႃႇႁွတ်ႈထိုင်ဝဵင်း ယႃႇပၼေးလႃႉ၊ သေယဝ်ႉ၊လႅၼ်လိၼ်သုတ်းတိူၵ်ႉၵႃႈတီႈပၢင်ႇလၢႆႇ မေႇတိထေးရီးယၼ်း၊ ဢေႃႈ။-
ၶွပ်ႇၼမ်ႉလႅၼ်လိၼ်ၼႃႈဝၼ်းတူၵ်းၼၼ်ႉပဵၼ်ပၢင်ႇလၢႆႇလူင်ၼၼ်ႉၸွမ်းၽင်ႇႁိုၵ်းမၼ်းၵႂႃႇဢေႃႈ။ ဢၼ်ၼႆႉၸမ်ႉ၊ပဵၼ်ၶွပ်ႇၼမ်ႉလႅၼ်လိၼ်တီႈယူႇၸိူဝ်ႉၶိူဝ်း ယုတႃႉ၊ ၸွမ်းၼင်ႇၶိူဝ်းႁိူၼ်းၶဝ်ႁင်းၽႂ်ႁင်းမၼ်းဢေႃႈ။
ၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉတီႈ ယေႃးသု၊ ဝႆႉၼၼ်ႉသိုင်ႇတိူင်းမိူင်း ယုတႃႉ၊ ၼၼ်ႉပွတ်းၼိုင်ႈၽႄမႅင်ႇပၼ် ၵႃႇလႅပ်ႉ၊ လုၵ်ႈၸၢႆး ယေႇၽုၼ်ႇၼႃႉ၊ ဢၼ်ပဵၼ်ၸိူဝ်ႉၶိူဝ်း ယုတႃႉ၊ ၼၼ်ႉဢေႃႈ။ မၼ်းလႆႈဢမူၺ်ႇဝဵင်း ႁေႇပရုၼ်ႇ၊ ပဵၼ်ဝဵင်းလူင်ဢၼ် ဢႃႇၽႃႉ၊ ၵေႃႉဢၼ်ပဵၼ်ပေႃႈ ဢႃႇၼၵ်ႉ၊ ပိူင်ႇၼၼ်ႉဢေႃႈ။-
ၵႃႇလႅပ်ႉ၊ ႁေႃႈပႅတ်ႈၸိူဝ်ႉၶိူဝ်းလုၵ်ႈလၢၼ် ဢႃႇၽႃႉ၊ ဢၼ်ဝႃႈ၊ၶိူဝ်းႁိူၼ်း သေးသေး၊ ၶိူဝ်းႁိူၼ်း ဢႁိမၼ်ႇ၊ တင်းၶိူဝ်းႁိူၼ်း တႃႇလမေး၊ ၸိူဝ်းၼၼ်ႉသေၵႃႈတီႈဝဵင်းၼၼ်ႉဢေႃႈ။-
မၼ်းသမ်ႉၶီႇသိုၵ်းၶိုၼ်ႈတိုၵ်းဝဵင်း တေႇပိရႃႉ၊ ဢေႃႈ။ (ဝဵင်းၼၼ်ႉယၢမ်းမီးၸိုဝ်ႈဝႃႈ၊ဝဵင်း ၵိရယႃႉသေႃႇၽႃႉ၊ ဢေႃႈ။)-
ၵႃႇလႅပ်ႉ၊ လၢတ်ႈဝႃႈ၊ “ၵေႃႉဢၼ်တိုၵ်းပႄႉသိမ်းဢဝ်ဝဵင်း ၵိရယႃႉသေႃႇၽႃႉ၊ ၼၼ်ႉၸိုင်၊ၵဝ်တၵ်းဢဝ်လုၵ်ႈယိင်းၵဝ် ဢႃႇၶသႃႉ၊ သွင်ႇမၢင်ႇၵလႃႇပၼ်ၵၼ်တင်းမၼ်းဢေႃႈ၊” ဝႃႈၼင်ႇၼႆဢေႃႈ။-
ဢေႃးႀၼ်ႇယေႇလႃႉ၊ လုၵ်ႈၸၢႆး ၵေးၼတ်ႉ၊ ၼွင်ႉၸၢႆး ၵႃႇလႅပ်ႉ၊ ၼၼ်ႉသိမ်းလႆႈဝဵင်းလူင်ၼၼ်ႉလႄႈ၊ ၵႃႇလႅပ်ႉ၊ ၵေႃႈဢဝ်လုၵ်ႈယိင်းမၼ်း ဢႃႇၶသႃႉ၊ သေလႄႈသွင်ႇမၢင်ႇၵလႃႇပၼ်တီႈမၼ်းသေဢေႃႈ။-
ၼႂ်းဝၼ်းဢၼ်သွင်ႇမၢင်ႇၵလႃႇၼၼ်ႉ ဢေႃးႀၼ်ႇယေႇလႃႉ၊ တိုၵ်းယူင်းမႄႈယိင်းၼၼ်ႉ ႁႂ်ႈလႆႈယွၼ်းဢဝ်ၵႂၢၵ်ႈလိၼ်သေၵႂၢၵ်ႈၼိုင်ႈတီႈပေႃႈမၼ်းဢေႃႈ။ မႄႈယိင်းၼၼ်ႉၵေႃႈလူင်းသေၵႃႈၼိူဝ်မႃႉလီႈမႃးလႄႈ၊ ၵႃႇလႅပ်ႉ၊ ထၢမ်တီႈမၼ်းလႄႈဝႃႈ၊ “မႂ်းၶႂ်ႈလႆႈၵႃႈသင်၊” ဝႃႈၼင်ႇၼႆဢေႃႈ။-
မၼ်းၶိုၼ်းလၢတ်ႈလႄႈဝႃႈ၊ “ပၼ်လၢၵ်ႈသွင်ႇတီႈၵဝ်ၶႃႈမဵဝ်းၼိုင်ႈသေၵမ်းၶႃႈ။ လိၼ်ဢၼ်ပေႃႈပၼ်ၵဝ်ၶႃႈဝႆႉၼၼ်ႉပဵၼ်တီႈႁႅင်ႈတီႈႁွင် ဢေႃႈ။ တီႈၼမ်ႉဢွၵ်ႇႁူးၵေႃႈပၼ်သေၵမ်းၶႃႈ၊” ဝႃႈၼင်ႇၼႆသေယဝ်ႉ၊ ၵႃႇလႅပ်ႉ၊ ၵေႃႈပၼ်ၼမ်ႉဢွၵ်ႇႁူးဢၼ်မီးၽၢႆႇတၢင်းၼိူဝ်ဢိၵ်ႇတင်းၼမ်ႉဢွၵ်ႇႁူးဢၼ်မီးၽၢႆႇတၢင်းတႂ်ႈၸိူဝ်းၼၼ်ႉတီႈမၼ်းဢေႃႈ။
ဢၼ်ၼႆႉသမ်ႉပဵၼ်လိၼ်ဢမူၺ်ႇဢၼ်ၸိူဝ်ႉၶိူဝ်း ယုတႃႉ၊ လႆႈႁပ်ႉဢဝ်ၸွမ်းၼင်ႇၶိူဝ်းႁိူၼ်းၽႂ်ၶိူဝ်းႁိူၼ်းမၼ်းၼၼ်ႉဢေႃႈ။-
ဝဵင်းၸိူဝ်းဢၼ်ၶဝ်လႆႈပိူင်ႇၼၼ်ႉမီးၽၢႆႇပွတ်းၸၢၼ်းသုတ်းပိူၼ်ႈဢၼ်ၸမ်ၵၼ်တၢမ်းၵၼ်တင်းလႅၼ်လိၼ်မိူင်း ဢေႇတုမ်ႇ၊ ၼၼ်ႉၸမ်ႉ၊ပဵၼ်ဝဵင်း ၵပ်ႉၸေးလႃႉ၊ ဝဵင်း ဢီးတႃႇ၊ ဝဵင်း ယႃႇၵုရႃႉ၊-
ဝဵင်း ၵိၼႃႉ၊ ဝဵင်း တိမေႃးၼႃႉ၊ ဝဵင်း ဢႃႇတတႃႇ၊-
ဝဵင်း ၵေႇတေးသႃႉ၊ ဝဵင်း ႁႃႇၸေႃႇ၊ ဝဵင်း ၵိသၼၼ်ႇ၊-
ဝဵင်း ၸိၽႃႉ၊ ဢိၵ်ႇတင်းဝဵင်း တေႇလိမ်ႇ၊ ဢိၵ်ႇတင်းဝဵင်း ပေႇလုတ်ႉ၊-
ဝဵင်း ႁႃႇၸေႃႇႁတတ်ႉတႃႇ၊ ဝဵင်း ၵိရဢုတ်ႉႁေႇၸရုၼ်ႇ၊ ဢၼ်ဝႃႈ၊ဝဵင်း ႁႃႇၸေႃႇ၊-
ဝဵင်း ဢႃႇမၼ်ႇ၊ ဢိၵ်ႇတင်းဝဵင်း သေႇမႃႉ၊ ဢိၵ်ႇတင်းဝဵင်း မေႃႇလတႃႇ၊-
ဝဵင်း ႁႃႇၸေႃႇၵတ်ႉတႃႉ၊ ဝဵင်း ႁေႇၸမုၼ်ႇ၊ ဝဵင်း ပႅတ်ႉပႃႇလိတ်ႉ၊-
ဝဵင်း ႁႃႇၸႃႉသုဢႃႇလႃႉ၊ ဝဵင်း ပေႇရသေးၽႃႉ၊ ဝဵင်း ပႅတ်ႉၸႃႇသယႃႇ၊-
ဝဵင်း ပႃႇလႃႉ၊ ဢိၵ်ႇတင်းဝဵင်း ဢိဢိမ်ႇ၊ ဢိၵ်ႇတင်းဝဵင်း ဢႃႇၸိမ်ႇ၊-
ဝဵင်း ဢေႇလႃႉတေႃႇလတ်ႉ၊ ဝဵင်း ၶေႇသိလႃႉ၊ ဝဵင်း ႁေႃႇမႃႉ၊-
ဝဵင်း ၸိၵလၵ်ႉ၊ ဝဵင်း မႃႇတမေးၼႃႉ၊ ဝဵင်း သၼ်ႇသၼ်ႇၼႃႉ၊-
ဝဵင်း ယေႇပွတ်ႉ၊ ဝဵင်း သိလႁိမ်ႇ၊ ဝဵင်း ဢႃႇဢိၼ်ႇ၊ ဝဵင်း ရိမ်ႇမုၼ်ႇ၊ ၸိူဝ်းၼၼ်ႉလႄႈ၊ပႃးတင်းဝၢၼ်ႈၶဝ်တင်းလၢႆမီးသၢဝ်းၵဝ်ႈဝဵင်းဢေႃႈ။
ၵႃႈၼႂ်းတီႈပၢင်ႇပဵင်းၵေႃႈ ပဵၼ်ဝဵင်း ဢေးသတေႃးလႃႉ၊ ဝဵင်း ၸူဝ်းရႃႇ၊ ဝဵင်း ဢႃႇသၼႃႇ၊-
ဝဵင်း ၸႃႇၼေႃႇ၊ ဝဵင်း ဢိၼ်ႇၵၼ်ႇၼိမ်ႇ၊ ဝဵင်း တႃႇပွႃႇ၊ ဝဵင်း ဢေႇၼမ်ႇ၊-
ဝဵင်း ယႃႇမုတ်ႉ၊ ဝဵင်း ဢတုလမ်ႇ၊ ဝဵင်း သေႃႇၶေႃႇ၊ ဝဵင်း ဢၸေႇၵႃႇ၊-
ဝဵင်း သႃႇရိမ်း၊ ဝဵင်း ဢတိသိမ်ႇ၊ ဝဵင်း ၵတေးရႃႉ၊ ဝဵင်း ၵတေႇရေႃႇသိမ်း၊ ၸိူဝ်းၼၼ်ႉလႄႈ၊ပႃးတင်းဝၢၼ်ႈၶဝ်တင်းလၢႆမီးသီႇသိပ်းဝဵင်းဢေႃႈ။
ၼွၵ်ႈသေၼၼ်ႉပဵၼ်ဝဵင်း ၸေႇၼၼ်ႇ၊ ဝဵင်း ႁတႃႇသႃႉ၊ ဝဵင်း မိၵ်ႉတႃႇတလႃႉၵတ်ႉ၊ ဝဵင်း ဢႃႇသၼ်ႇ၊-
ဝဵင်း တိလၼ်ႇ၊ ဝဵင်း မိၸပႃႇ၊ ဝဵင်း ယေႃႇၵႃႉသေးလႃႉ၊-
ဝဵင်း လႃႇၶိသႃႉ၊ ဝဵင်း ပေႃႇၸၵတ်ႉ၊ ဝဵင်း ဢေႇၵလွၼ်ႇ၊-
ဝဵင်း ၵပ်ႉပုၼ်ႇ၊ ဝဵင်း လႃႇမၼ်ႇ၊ ဝဵင်း ၵိသလိတ်ႉ၊-
ဝဵင်း ၵေႇတရွတ်ႉ၊ ဝဵင်း ပႅတ်ႉတႃႇၵုၼ်ႇ၊ ဝဵင်း ၼေႇမႃႉ၊ ဝဵင်း မိၵ်ႉၵတႃႇ၊ ၸိူဝ်းၼၼ်ႉလႄႈ၊ပႃးတင်းဝၢၼ်ႈၶဝ်တင်းလၢႆမီးသိပ်းႁူၵ်းဝဵင်းဢေႃႈ။
ၼွၵ်ႈသေၼၼ်ႉပဵၼ်ဝဵင်း လိပၼႃႉ၊ ဝဵင်း ဢေႇသႃႇ၊ ဝဵင်း ဢႃႇသၼ်ႇ၊-
ဝဵင်း ယိၽတႃႉ၊ ဝဵင်း ဢႃႇသၼႃႇ၊ ဝဵင်း ၼေႇၸိပ်ႉ၊-
ဝဵင်း ၵိလႃႉ၊ ဝဵင်း ဢႃႇၶၸိပ်ႉ၊ ဝဵင်း မရေးသႃႉ၊ ၸိူဝ်းၼၼ်ႉလႄႈ၊ပႃးတင်းဝၢၼ်ႈၶဝ်တင်းလၢႆမီးၵဝ်ႈဝဵင်းဢေႃႈ။
ယင်းပႃးတင်းတူင်ႇဝဵင်း ဢေႇၵရုၼ်ႇ၊ ဢိၵ်ႇတင်းဝၢၼ်ႈမၼ်းဝဵင်းမၼ်းတင်းလၢႆ၊-
ဢဝ်ၵႃႈတီႈဝဵင်း ဢေႇၵရုၼ်ႇ၊ ၼၼ်ႉၵႂႃႇတေႃႇထိုင်ႁွတ်ႈပၢင်ႇလၢႆႇ မေႇတိထေးရီးယၼ်း၊ ၵႃႈပဵၼ်ဝဵင်းဢိၵ်ႇတင်းဝၢၼ်ႈမၼ်းတင်းလၢႆဢၼ်ၸမ်ၵၼ်တင်းတူင်ႇဝဵင်း ဢႃႇၸုတ်ႉ၊ ၸိူဝ်းၼၼ်ႉ၊-
ဝဵင်း ဢႃႇၸုတ်ႉ၊ တင်းဝဵင်း ၵႃႇၸႃႉ၊ ဢိၵ်ႇတင်းဝၢၼ်ႈၶဝ်ဝဵင်းၶဝ်တင်းလၢႆလူင်းၵႂႃႇတေႃႇထိုင်ႁွတ်ႈၶွပ်ႇၼမ်ႉလႅၼ်လိၼ် မိူင်း ဢေးၵျိပ်ႉ၊ ဢိၵ်ႇတင်းၸွမ်းၽင်ႇပၢင်ႇလၢႆႇ မေႇတိထေးရီးယၼ်း၊ ၸိူဝ်းၼၼ်ႉဢေႃႈ။
ၵႃႈၼိူဝ်ႁၢၼ်ႉလွႆၵေႃႈပဵၼ်ဝဵင်း သမိရႃႉ၊ ဝဵင်း ယတ်ႉတိရႃႉ၊ ဝဵင်း သေႃႇၶေႃႇ၊-
ဝဵင်း တၼ်ႇၼႃႉ၊ ဝဵင်း ၵိရယႃႉသေႃႇၽႃႉ၊ ဢၼ်ဝႃႈ၊ဝဵင်း တေႇပိရႃႉ၊-
ဝဵင်း ဢႃႇၼပ်ႉ၊ ဝဵင်း ဢေႇသတမေႃႇ၊ ဝဵင်း ဢႃႇၼိမ်ႇ၊-
ဝဵင်း ၵေႃးသိၼ်း၊ ဝဵင်း ႁေႃးလုၼ်ႇ၊ ဝဵင်း ၵိလေႃႇ၊ ၸိူဝ်းၼၼ်ႉလႄႈပႃးတင်းဝၢၼ်ႈၶဝ်တင်းလၢႆမီးသိပ်းဢဵတ်းဝဵင်းဢေႃႈ။
ၼွၵ်ႈသေၼၼ်ႉပဵၼ်ဝဵင်း ဢႃႇရပ်ႉ၊ ဝဵင်း တုမႃႇ၊ ဝဵင်း ဢေႇသၼ်ႇ၊-
ဝဵင်း ယႃႇၼုမ်ႇ၊ ဝဵင်း ပႅတ်ႉတႃႇပွႃႇ၊ ဝဵင်း ဢႃႇၽႅတ်ႉ၊-
ဝဵင်း ႁူမ်ႇတႃႉ၊ ဝဵင်း ၵိရိယႃႉဢႃႇပႃႇ၊ ဢၼ်ဝႃႈ၊ဝဵင်း ႁေႇပရုၼ်ႇ၊ ဝဵင်း ၸိဢေႃႇရႃႉ၊ ၸိူဝ်းၼၼ်ႉလႄႈ၊ပႃးတင်းဝၢၼ်ႈၶဝ်တင်းလၢႆမီးၵဝ်ႈဝဵင်းဢေႃႈ။
ၼွၵ်ႈသေၼၼ်ႉပဵၼ်ဝဵင်း မႃႇဢုၼ်ႇ၊ ဝဵင်း ၵရမေႇလႃႉ၊ ဝဵင်း ၸိၽႃႉ၊ ဝဵင်း ယုတ်ႉတႃႉ၊-
ဝဵင်း ယေႇၸရေး၊ ဝဵင်း ယေႃႇၵတမ်ႇ၊ ဝဵင်း ၸႃႇၼေႃႇ၊-
ဝဵင်း ၵႃႇဢိၼႃႉ၊ ဝဵင်း ၵိပိယႃႉ၊ ဝဵင်း တိမၼႃႉ၊ ၸိူဝ်းၼၼ်ႉလႄႈပႃးတင်းဝၢၼ်ႈၶဝ်တင်းလၢႆမီးသိပ်းဝဵင်းဢေႃႈ။
ၼွၵ်ႈသေၼၼ်ႉပဵၼ်ဝဵင်း ႁႃႇလႁု၊ ဝဵင်း ပႅတ်ႉၸုရႃႉ၊ ဝဵင်း ၵေးတေႃး၊-
ဝဵင်း မႃႇရုတ်ႉ၊ ဝဵင်း ပေႇသၼုတ်ႉ၊ ဝဵင်း ဢေးလႃႉတေႇၵုၼ်ႇ၊ ၸိူဝ်းၼၼ်ႉလႄႈ၊ပႃးတင်းဝၢၼ်ႈၶဝ်တင်းလၢႆမီးႁူၵ်းဝဵင်းဢေႃႈ။
ၼွၵ်ႈသေၼၼ်ႉပဵၼ်ဝဵင်း ၵိရိယႃႉပႃႇလႃႉ၊ ဢၼ်ဝႃႈ၊ဝဵင်း ၵိရိယႃႉယႃႇရိမ်ႇ၊ ဝဵင်း ရပ်ႉပႃႇ၊ ၸိူဝ်းၼၼ်ႉလႄႈ၊ပႃးတင်းဝၢၼ်ႈၶဝ်တင်းလၢႆမီးသွင်ဝဵင်းဢေႃႈ။
ၵႃႈတီႈထိူၼ်ႇလႅင်ႉၵေႃႈပဵၼ်ဝဵင်း ပေႇသႃႉရႃႇပႃႉ၊ ဝဵင်း မိတ်ႉတိၼ်း၊ ဝဵင်း သေႇၵႃႇၵႃႉ၊-
ဝဵင်း ၼိပသၼ်ႇ၊ ဝဵင်း ၼမ်ႉၵိူဝ်၊ ဝဵင်း ဢႅၼ်ႇၵေးတိ၊ ၸိူဝ်းၼၼ်ႉလႄႈ၊ပႃးတင်းဝၢၼ်ႈၶဝ်တင်းလၢႆမီးႁူၵ်းဝဵင်းဢေႃႈ။
ၼႂ်းဝႃႈၼၼ်သေၵေႃႈၵူၼ်းၸိူဝ်ႉၶိူဝ်း ယုတႃႉ၊ ၼၼ်ႉယင်းဢမ်ႇႁေႃႈဢွၵ်ႇၵူၼ်းမဵဝ်း ယေႇပုသိ၊ ဢၼ်ယူႇၵႃႈၼႂ်းဝဵင်း ယေႇရုသလႅမ်ႇ၊ ၸိူဝ်းၼၼ်ႉပႅတ်ႈလႆႈလႃးလႃး။ ပိူဝ်ႈၼႆၸင်ႇၵူၼ်းမဵဝ်း ယေႇပုသိ၊ ၶဝ်ယင်းတိုၵ်ႉယူႇလူၺ်ႈၵၼ်တင်းၵူၼ်းၸိူဝ်ႉၶိူဝ်း ယုတႃႉ၊ ဢေႃႈ။
လိၼ်မိူင်းၸွမ်းၼင်ႇဢၼ်တူၵ်းၸႃႇၵွၵ်ႈၵႃႈၼႂ်းလုၵ်ႈလၢၼ်ၸိူဝ်ႉၶိူဝ်း ယူဝ်းသႅပ်ႈ၊ ၸိူဝ်းၼၼ်ႉၸမ်ႉ၊တႄႇဢဝ်တီႈၼမ်ႉ ယေႃးတၢၼ်ႇ၊ ၵႃႈႁိမ်းဝဵင်း ယေႇရိၶူဝ်း၊ တီႈၼမ်ႉဢွၵ်ႇႁူး ယေႇရိၶူဝ်း၊ ၽၢႆႇတၢင်းဝၼ်းဢွၵ်ႇၼၼ်ႉၵႂႃႇ၊ပႃးတင်းထိူၼ်ႇလႅင်ႉသေလႄႈၶိုၼ်ႈၵႂႃႇပွင်ႇႁွတ်ႈမိူင်းႁၢၼ်ႉလွႆၸူးတီႈဝဵင်း ပေႇသလႃႉ၊ ဢေႃႈ။-
သမ်ႉတႄႇဢဝ်တီႈဝဵင်း ပေႇသလႃႉ၊ ၵႂႃႇၸူးဝဵင်း လုၸႃႉ၊ သေလႄႈၵႂႃႇၸွမ်းလႅၼ်လိၼ်ၵူၼ်း ဢႃႇၶိ၊ ၵႃႈတီႈဝဵင်း ဢႃႇတရုတ်ႉဢတ်ႉတႃႉ၊ သေယဝ်ႉ၊-
လူင်းၵႂႃႇၽၢႆႇတၢင်းဝၼ်းတူၵ်းၸူးတီႈလႅၼ်လိၼ်ၵူၼ်း ယႃႇၽႃႉလေးတိ၊ တေႃႇထိုင်ႁွတ်ႈဝဵင်း ပႅတ်ႉႁေႃႇရုၼ်ႇ၊ ပွတ်းတႂ်ႈ၊သိုပ်ႇလူင်းၵႂႃႇၸူးတီႈဝဵင်း ၵေႇၸႃႇ၊ လႄႈၵႂႃႇသုတ်းတိူၵ်ႉၵႃႈတီႈပၢင်ႇလၢႆႇ မေႇတိထေးရီးယၼ်း၊ ပုၼ်ႉဢေႃႈ။
ၼင်ႇၼၼ်လႄႈလုၵ်ႈလၢၼ်ၸိူဝ်ႉၶိူဝ်း ယူဝ်းသႅပ်ႈ၊ ဢၼ်ဝႃႈ၊ၸိူဝ်ႉၶိူဝ်း ဢေႇၽရိမ်ႇ၊ ဢိၵ်ႇတင်းၸိူဝ်ႉၶိူဝ်း မၼႃႇသေႇ၊ ပွတ်းဝၼ်းတူၵ်းၼၼ်ႉၸိူဝ်းၼၼ်ႉလႆႈၶၢမ်ႇဢဝ်ဢမူၺ်ႇၶဝ်ဢေႃႈ။
ၶွပ်ႇၼမ်ႉလႅၼ်လိၼ်ၸိူဝ်ႉၶိူဝ်း ဢေႇၽရိမ်ႇ၊ တင်းလၢႆၸွမ်းလူၺ်ႈၸိူဝ်ႉၶိူဝ်းႁိူၼ်းၶဝ်ႁင်းၽႂ်ႁင်းမၼ်းၸမ်ႉ၊လႅၼ်လိၼ်ဢမူၺ်ႇၶဝ်ၼၼ်ႉလုၵ်ႉသေၵႃႈတီႈဝဵင်း ဢႃႇတရုတ်ႉဢတ်ႉတႃႉ၊ ၶိုၼ်ႈၸူးၽၢႆႇဝၼ်းဢွၵ်ႇၵႂႃႇထိုင်ၵႃႈတီႈဝဵင်း ပႅတ်ႉႁေႃႇရုၼ်ႇ၊ ပွတ်းၼိူဝ်လႄႈ၊-
လႅၼ်လိၼ်မၼ်းသိုပ်ႇၵႂႃႇၸူးတီႈပၢင်ႇလၢႆႇ မေႇတိထေးရီးယၼ်း၊ ၸွမ်းၽၢႆႇတၢင်းႁွင်ႇဝဵင်း မိတ်ႉမေးသႃႉ၊ သေယဝ်ႉ၊သမ်ႉငွၵ်းၵႂႃႇၽၢႆႇတၢင်းဝၼ်းဢွၵ်ႇၸူးတီႈဝဵင်း တႃႇၼိတ်ႉသိလေႃႇ၊ ပူၼ်ႉၵႂႃႇၽၢႆႇတၢင်းဝၼ်းဢွၵ်ႇမၼ်းလႄႈၵႂႃႇထိုင်ၵႃႈတီႈဝဵင်း ယၼေႃႇႁႃႉ၊ ဢေႃႈ။-
သမ်ႉလုၵ်ႉသေၵႃႈတီႈဝဵင်း ယၼေႃႇႁႃႉ၊ လူင်းၵႂႃႇၸူးတီႈဝဵင်း ဢႃႇတရုတ်ႉ၊ ဢိၵ်ႇတင်းဝဵင်း ၼႃႇရတ်ႉ၊ လႄႈႁွတ်ႈထိုင်ဝဵင်း ယေႇရိၶူဝ်း၊ သေယဝ်ႉ၊ၵႂႃႇသုတ်းတိူၵ်ႉတီႈၼမ်ႉ ယေႃးတၢၼ်ႇ၊ ဢေႃႈ။-
လႅၼ်လိၼ်မၼ်းသမ်ႉလုၵ်ႉသေၵႃႈတီႈဝဵင်း တႃႇပွႃႇ၊ လူင်းၸွမ်းၵႂႃႇၽၢႆႇတၢင်းဝၼ်းတူၵ်းၸူးတီႈၼမ်ႉႁွင်ႈ ၵႃႇၼႃႉ၊ လႄႈၵႂႃႇသုတ်းတိူၵ်ႉၵႃႈတီႈပၢင်ႇလၢႆႇ မေႇတိထေးရီးယၼ်း၊ ဢေႃႈ။ ဢၼ်ၼႆႉၸမ်ႉ၊ပဵၼ်လိၼ်ဢမူၺ်ႇၸိူဝ်ႉၶိူဝ်း ဢေႇၽရိမ်ႇ၊ တင်းလၢႆၸွမ်းလူၺ်ႈၶိူဝ်းႁိူၼ်းၶဝ်ႁင်းၽႂ်ႁင်းမၼ်းဢေႃႈ။-
သမ်ႉယင်းပႃးတင်းဝၢၼ်ႈဝဵင်းၵမ်ႈၽွင်ႈဢၼ်မီးၼႂ်းလႅၼ်လိၼ်ၸိူဝ်ႉၶိူဝ်း မၼႃႇသေႇ၊ ဢၼ်ဝႆႉပုၼ်ႈၸိူဝ်ႉၶိူဝ်း ဢေႇၽရိမ်ႇ၊ ၼၼ်ႉလူးၵွၼ်ႇဢေႃႈ။-
ၶဝ်ယင်းဢမ်ႇႁေႃႈၵူၼ်း ၶႃႇၼၼိ၊ ဢၼ်ယူႇၵႃႈၼႂ်းဝဵင်း ၵေႇၸႃႇ၊ ၸိူဝ်းၼၼ်ႉဢွၵ်ႇပႅတ်ႈလႄႈၵူၼ်းမဵဝ်းၼၼ်ႉယူႇလူၺ်ႈၵၼ်တင်းၸိူဝ်ႉၶိူဝ်း ဢေႇၽရိမ်ႇ၊ ယူႇတေႃႇထိုင်ႁွတ်ႈမိူဝ်ႈလဵဝ်ၼႆႉလႄႈလႆႈၶၢမ်ႇပဵၼ်ၶႃႈလႄႈႁဵတ်းၵၢၼ်ယူႇဢေႃႈ။
လိၼ်မိူင်းၸွမ်းၼင်ႇဢၼ်တူၵ်းၸႃႇၵွၵ်ႈၵႃႈၼႂ်းၸိူဝ်ႉၶိူဝ်း မၼႃႇသေႇ၊ လုၵ်ႈတူၼ်ႈ ယူဝ်းသႅပ်ႈ၊ ၸိူဝ်းၼၼ်ႉၸမ်ႉ၊လုၵ်ႈတူၼ်ႈ မၼႃႇသေႇ၊ ဢၼ်ဝႃႈ၊ မႃႇၶိရႃႉ၊ ၼၼ်ႉၵွပ်ႈပိူဝ်ႈမၼ်းပဵၼ်ပေႃႈ ၵိလတ်ႉ၊ လႄႈသမ်ႉပဵၼ်ၵူၼ်းသိုၵ်းၼၼ်ႉ၊မၼ်းလႆႈမိူင်း ၵိလတ်ႉ၊ တင်းမိူင်း ပႃႇသၢၼ်ႇ၊ ဢေႃႈ။-
လိၼ်မိူင်းပွတ်းဝၼ်းတူၵ်းၼမ်ႉ ယေႃးတၢၼ်ႇ၊ ၼၼ်ႉလႆႈမႅင်ႇပၼ်တီႈလုၵ်ႈလၢၼ်ၶိူဝ်းႁိူၼ်း မၼႃႇသေႇ၊ ၸိူဝ်းဢၼ်ၵိုတ်းဢၼ်ၵျၢၼ်ႇၸွမ်းလူၺ်ႈၶိူဝ်းႁိူၼ်းၶဝ်ဢၼ်ဝႃႈ၊ၶိူဝ်းႁိူၼ်း ဢပျေႇၸႃႇ၊ ၶိူဝ်းႁိူၼ်း ႁေႇလိၵ်ႉ၊ ၶိူဝ်းႁိူၼ်း ဢႃႇသရေးလႃႉ၊ ၶိူဝ်းႁိူၼ်း သေးၶိမ်ႇ၊ ၶိူဝ်းႁိူၼ်း ႁေႇၽႃႇ၊ ၶိူဝ်းႁိူၼ်း သမိတႃႉ၊ ၸိူဝ်းၼၼ်ႉႁင်းၽႂ်ႁင်းမၼ်းဢေႃႈ။ ၶဝ်ၸိူဝ်းၼၼ်ႉပဵၼ်ၶိူဝ်းလုၵ်ႈၸၢႆးဢၼ်သိုပ်ႇလူင်းမႃးတီႈ မၼႃႇသေႇ၊ လုၵ်ႈၸၢႆး ယူဝ်းသႅပ်ႈ၊ လႄႈပဵၼ်ႁူဝ်ႁိူၼ်းၸွမ်းလူၺ်ႈၶိူဝ်းႁိူၼ်းၶဝ်ႁင်းၽႂ်ႁင်းမၼ်းဢေႃႈ။-
ၵူၺ်းၵႃႈ၊တီႈ ၸလေႃးၽတ်ႉ၊ လုၵ်ႈၸၢႆး ႁေႇၽႃႇ၊ လုၵ်ႈၸၢႆး ၵိလတ်ႉ၊ ဢၼ်ပဵၼ်လုၵ်ႈၸၢႆး မႃႇၶိရႃႉ၊ လုၵ်ႈၸၢႆး မၼႃႇသေႇ၊ ၼၼ်ႉဢမ်ႇမီးလုၵ်ႈၸၢႆး။ မီးလုၵ်ႈယိင်းၵူၺ်းၵူၺ်းဢေႃႈ။ ၸိုဝ်ႈသဵင်လုၵ်ႈယိင်းၸိူဝ်းၼၼ်ႉၸမ်ႉ၊ပဵၼ် မႃႇလႃႇ၊ၼေႃႇဢႃႇ၊ႁေႃႇၵလႃႇ၊မိလၶႃႇ၊ ဢိၵ်ႇတင်း တိရၸႃႉ၊ ဢေႃႈ။-
ၶဝ်ဢွၼ်ၵၼ်ၶဝ်ႈၸူးတီႈၽၢႆႇၼႃႈယဵၸ်ႈပရေႃးႁဵၵ်ႈ ဢေးလႃႇၸႃႇ၊ ဢိၵ်ႇတင်း ယေႃးသု၊ လုၵ်ႈၸၢႆး ၼုၼ်ႇ၊ တင်းၶုၼ်တင်းလၢႆသေလႄႈလဝ်ႈလၢတ်ႈဝႃႈ၊ “ ထႃႇဝရႃႉၽြႃး၊ သင်ႇလၢတ်ႈဝႆႉတီႈ မူဝ်းသေႇ၊ ႁႂ်ႈမၼ်းၽႄပၼ်လိၼ်ဢမူၺ်ႇတီႈႁဝ်းၶႃႈလူၺ်ႈၵၼ်တင်းပီႈၼွင်ႉၶိူဝ်းႁိူၼ်းႁဝ်းၶႃႈၼၼ်ႉၶႃႈယဝ်ႉ၊” ဝႃႈၼင်ႇၼႆဢေႃႈ။ ပိူဝ်ႈၼႆလႄႈမၼ်းၵေႃႈၽႄပၼ်လိၼ်ဢမူၺ်ႇလူၺ်ႈၵၼ်တင်းၵူၼ်းၶိူဝ်းႁိူၼ်းပေႃႈၶဝ်ၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉၼၼ်ႉဢေႃႈ။-
ၼင်ႇၼၼ်လႄႈၼွၵ်ႈသေမိူင်း ၵိလတ်ႉ၊ တင်းမိူင်း ပႃႇသၢၼ်ႇ၊ ၵႃႈတီႈၽၢႆႇဝၼ်းဢွၵ်ႇၼမ်ႉ ယေႃးတၢၼ်ႇ၊ ၼၼ်ႉ ၸိူဝ်ႉၶိူဝ်း မၼႃႇသေႇ၊ ယင်းလႆႈထႅင်ႈသိပ်းပုၼ်ႈပုၼ်ႈၼိုင်ႈဢေႃႈ။-
ၵွပ်ႈပိူဝ်ႈဢၼ်ၶိူဝ်းႁိူၼ်းလုၵ်ႈယိင်း မၼႃႇသေႇ၊ ၸိူဝ်းၼၼ်ႉၵေႃႈလႆႈလိၼ်ဢမူၺ်ႇလူၺ်ႈၵၼ်တင်းၶိူဝ်းႁိူၼ်းလုၵ်ႈၸၢႆးမၼ်းတင်းလၢႆၼၼ်ႉဢေႃႈ။ လိၼ်မိူင်း ၵိလတ်ႉ၊ ၸမ်ႉၽႄမႅင်ႇပၼ်တီႈၶိူဝ်းႁိူၼ်းလုၵ်ႈၸၢႆး မၼႃႇသေႇ၊ ဢၼ်ၵိုတ်းဢၼ်ၵျၢၼ်ႇဝႆႉၸိူဝ်းၼၼ်ႉဢေႃႈ။
သိုင်ႇတိူင်းမိူင်း မၼႃႇသေႇ၊ ၼၼ်ႉလုၵ်ႉသေၵႃႈတီႈဝဵင်း ဢႃႇသျႃႇ၊ ၵႂႃႇၸူးတီႈဝဵင်း မိတ်ႉမေးသႃႉ၊ ဢၼ်မီးၽၢႆႇဝၼ်းဢွၵ်ႇဝဵင်း သေးၶိမ်ႇ၊ ၼၼ်ႉဢေႃႈ။ လႅၼ်လိၼ်မၼ်းလူင်းၵႂႃႇၽၢႆႇတၢင်းၸၢၼ်းလႄႈႁႂ်ႈၵူၼ်းမဵဝ်း ဢိၼ်ႇတႃႇပွႃႇ၊ ၸိူဝ်းၼၼ်ႉၶဝ်ႈပႃးၸွမ်းဢေႃႈ။-
လိၼ်ဢၼ်လဵပ်ႈႁွပ်ႈဝဵင်း တႃႇပွႃႇ၊ ၼၼ်ႉၸိူဝ်ႉၶိူဝ်း မၼႃႇသေႇ၊ ပိူင်ႇဢဝ်လႄႈဝဵင်း တႃႇပွႃႇ၊ ဢၼ်မီးၵႃႈၼႂ်းလႅၼ်လိၼ် မၼႃႇသေႇ၊ ၼၼ်ႉၸမ်ႉ၊ၸိူဝ်ႉၶိူဝ်း ဢေႇၽရိမ်ႇ၊ ပိူင်ႇဢဝ်ဢေႃႈ။-
လႅၼ်လိၼ်မၼ်းသမ်ႉလူင်းၸူးတီႈႁိမ်းၼမ်ႉႁွင်ႈ ၵႃႇၼႃႉ၊ ဢေႃႈ။ ဝဵင်းၸိူဝ်းဢၼ်မီးၸွမ်းၽၢႆႇတၢင်းၸၢၼ်းၼမ်ႉႁွင်ႈၼၼ်ႉၸိုင်၊ၸိူဝ်ႉၶိူဝ်း ဢေႇၽရိမ်ႇ၊ လႆႈပိူင်ႇဢဝ်ၵႃႈၼႂ်းသိုင်ႇတိူင်းမိူင်း မၼႃႇသေႇ၊ ဢေႃႈ။ လႅၼ်လိၼ် မၼႃႇသေႇ၊ သိုပ်ႇၶိုၼ်ႈၸွမ်းၵႂႃႇၽၢႆႇတၢင်းႁွင်ႇၼမ်ႉႁွင်ႈၼၼ်ႉ ၵႂႃႇသုတ်းတိူၵ်ႉတီႈပၢင်ႇလၢႆႇ မေႇတိထေးရီးယၼ်း၊ ဢေႃႈ။-
လိၼ် ဢေႇၽရိမ်ႇ၊ ပိူင်ႇဢဝ်ၽၢႆႇတၢင်းၸၢၼ်းလႄႈလိၼ် မၼႃႇသေႇ၊ ပိူင်ႇဢဝ်ၽၢႆႇတၢင်းႁွင်ႇသေယဝ်ႉ၊ပၢင်ႇလၢႆႇ မေႇတိထေးရီးယၼ်း၊ ပဵၼ်ၶွပ်ႇၼမ်ႉလႅၼ်လိၼ်မၼ်းလႄႈ ဢႃႇသျႃႇ၊ ပိူင်ႇဢဝ်ၸဵင်ႇဝၼ်းတူၵ်းပွတ်းႁွင်ႇၼၼ်ႉသေယဝ်ႉ၊ ဢိသၶႃႇ၊ သမ်ႉပိူင်ႇဢဝ်ၸဵင်ႇဝၼ်းဢွၵ်ႇပွတ်းၸၢၼ်းဢေႃႈ။-
သိုင်ႇတိူင်းမိူင်း မၼႃႇသေႇ၊ ၼႂ်းဝူင်ႈၵၢင်ဝဵင်း ဢိသၶႃႇ၊ တင်းဝဵင်း ဢႃႇသျႃႇ၊ ၼၼ်ႉၸိုင်၊ပဵၼ်ဝဵင်း ပႅတ်ႉသၼ်ႇ၊ တင်းဝဵင်း ဢိပလမ်ႇ၊ ဢိၵ်ႇတင်းဝၢၼ်ႈၶဝ်တင်းလၢႆ၊ၵူၼ်းဝဵင်း တေႃႇရႃႉ၊ ဢိၵ်ႇတင်းဝၢၼ်ႈမၼ်းတင်းလၢႆတီႈဢၼ်ပဵၼ်လွႆပဵၼ်ၵုင်းသၢမ်မိူင်းဢၼ်ဝႃႈ၊ၵူၼ်းဝဵင်း ဢိၼ်ႇတေႃးရႃႉ၊ တင်းဝၢၼ်ႈမၼ်းတင်းလၢႆ၊ၵူၼ်းဝဵင်း တႃႇၼၵ်ႉ၊ ဢိၵ်ႇတင်းဝၢၼ်ႈမၼ်းတင်းလၢႆ၊ၵူၼ်းဝဵင်း မေႇၵိတ်ႉတေႃႇ၊ ဢိၵ်ႇတင်းဝၢၼ်ႈမၼ်းတင်းလၢႆၸိူဝ်းၼၼ်ႉဢေႃႈ။-
ၸိူဝ်ႉၶိူဝ်း မၼႃႇသေႇ၊ ဢမ်ႇႁေႃႈဢွၵ်ႇၵူၼ်းၸိူဝ်းဢၼ်ယူႇၼႂ်းဝဵင်းလူင်ၸိူဝ်းၼၼ်ႉပႅတ်ႈလႆႈလႄႈၵူၼ်းမဵဝ်း ၶႃႇၼၼိ၊ ၶဝ်သိုပ်ႇယူႇသဝ်းၵႂႃႇၵႃႈတီႈၼၼ်ႈဢေႃႈ။-
ၼႂ်းမိူဝ်ႈဢၼ်ၵူၼ်းမဵဝ်း ဢိသရေး၊ ၶဝ်ႁႅင်းယႂ်ႇမႃးၼၼ်ႉၵေႃႈၶဝ်ယင်းဢမ်ႇႁေႃႈၵူၼ်း ၶႃႇၼၼိ၊ ၸိူဝ်းၼၼ်ႉဢွၵ်ႇပႅတ်ႈလႄႈၵူၺ်းတဵၵ်းၶေႃးႁႂ်ႈၶဝ်ႁဵတ်းၶႃႈဢၼ်ႁဵတ်းၵၢၼ်ဢေႃႈ။
လုၵ်ႈလၢၼ်ၸိူဝ်ႉၶိူဝ်း ယူဝ်းသႅပ်ႈ၊ လဝ်ႈလၢတ်ႈတီႈ ယေႃးသု၊ လႄႈဝႃႈ၊ “ႁဝ်းၶႃႈၼႆႉပဵၼ်ၸိူဝ်ႉၶိူဝ်းဢၼ်ၼမ်ၵိုၼ်းၼႃႇၵွပ်ႈပိူဝ်ႈ ထႃႇဝရႃႉၽြႃး၊ ပၼ်တၢင်းလီတီႈႁဝ်းၶႃႈၼၼ်ႉယဝ်ႉ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းၵူၺ်းပၼ်ပုၼ်ႈလဵဝ်တႃႇလဵဝ်တီႈႁဝ်းၶႃႈၼင်ႇႁိုဝ်ၶႃႈ၊” ဝႃႈၼင်ႇၼႆဢေႃႈ။
ယေႃးသု၊ ၶိုၼ်းလၢတ်ႈလႄႈဝႃႈ၊ “ပေႃးသူၼမ်ၵိုၼ်းၼႃႇလူင်လၢင်လႄႈမိူင်းႁၢၼ်ႉလွႆ ဢေႇၽရိမ်ႇ၊ ပဵၼ်ဢၼ်ၵိတ်ႇဢၼ်ၵႅပ်ႈပုၼ်ႈသူၸိုင်၊ဢွၼ်ၵၼ်ၶိုၼ်ႈၵႂႃႇၸူးတီႈပႃႇမႆႉလႄႈတီႇထၢင်ပုၼ်ႈသူၵႃႈၼႂ်းမိူင်းၵူၼ်း ၽေႇရၸိ၊ တင်းၵူၼ်း ရေႇၽိမ်ႇ၊ ၸိူဝ်းၼၼ်ႉတႃႉ၊” ဝႃႈၼင်ႇၼႆဢေႃႈ။
ၶဝ်ၸိူဝ်းၼၼ်ႉၶိုၼ်းလဝ်ႈလၢတ်ႈလႄႈဝႃႈ၊ “ႁၢၼ်ႉလွႆ ဢေႇၽရိမ်ႇ၊ ၼၼ်ႉဢမ်ႇပေႃးပုၼ်ႈႁဝ်းၶႃႈတီႈၶႃႈ။ ၼႆႉၵူၺ်းဢမ်ႇၵႃးၵူၼ်း ၶႃႇၼၼိ၊ ၸိူဝ်းဢၼ်ယူႇၵႃႈတီႈပၢင်ႇတီႈပဵင်းၸႃႉၸဵမ်ၶဝ်ၸိူဝ်းဢၼ်ယူႇၵႃႈၼႂ်းဝဵင်း ပႅတ်ႉသၼ်ႇ၊ ဢိၵ်ႇတင်းဝၢၼ်ႈမၼ်းတင်းလၢႆဢိၵ်ႇတင်းၶဝ်ၸိူဝ်းဢၼ်ယူႇၵႃႈတီႈထူင်ႉ ယေႇၸရေး၊ မီးလေႃႉလဵၵ်းတင်းလၢႆၶႃႈဢေႃႈ၊” ဝႃႈၼင်ႇၼႆဢေႃႈ။
ယေႃးသု၊ ၶိုၼ်းလၢတ်ႈတီႈၸိူဝ်ႉၶိူဝ်း ဢေႇၽရိမ်ႇ၊ တင်း မၼႃႇသေႇ၊ ပွတ်းဝၼ်းတူၵ်းၸိူဝ်းၼၼ်ႉလႄႈဝႃႈ၊ “သူပဵၼ်ၸိူဝ်ႉၶိူဝ်းဢၼ်ၼမ်ၵိုၼ်းၼႃႇလူင်လၢင်လႄႈမီးႁႅင်းဢၼ်ယႂ်ႇၼႃႇလူင်လၢင်တႄႉဢေႃႈ။ သူတေလႆႈဢဝ်ၼမ်ၼႃႇသေၼိုင်ႈပုၼ်ႈၼၼ်ႉဢေႃႈ။-
မိူင်းၵႃႈၼိူဝ်ႁၢၼ်ႉလွႆတၵ်းလႆႈပဵၼ်ပုၼ်ႈတႃႇသူဢေႃႈ။ ပိၵ်ႉသမ်ႉဝႃႈ၊ပဵၼ်ပႃႇမႆႉသေၵေႃႈ၊တီႇထၢင်လႄႈပိူင်ႇဢဝ်သေတီႈၸဵင်ႇၼိုင်ႈတေႃႇထိုင်ႁွတ်ႈသုတ်းၵႂႃႇတီႈတၢင်ႇၸဵင်ႇတႃႉ။ ၵူၼ်း ၶႃႇၼၼိ၊ ၸိူဝ်းၼၼ်ႉပိၵ်ႉသမ်ႉၶဝ်မီးလေႃႉလဵၵ်းတိုၵ်းသိုၵ်းတင်းလၢႆလႄႈႁႅင်းယႂ်ႇၼႃႇသေၵေႃႈသူတၵ်းႁေႃႈၶဝ်ဢွၵ်ႇပႅတ်ႈလႆႈဢေႃႈ၊” ဝႃႈၼင်ႇၼႆဢေႃႈ။
လိုၼ်းသေဢၼ်ၶဝ်တိုၵ်းပႄႉဢဝ်မိူင်းၼၼ်ႉယဝ်ႉတူဝ်ႈယဝ်ႉၼၼ်ႉ၊မဵဝ်း ဢိသရေး၊ တင်းသဵင်ႈတင်းမူတ်းၸုတုမ်ၵၼ်ၵႃႈတီႈဝဵင်း သိလေႃႇ၊ လႄႈဢွၼ်ၵၼ်ပူၵ်းတင်ႈသုမ်ႉထဵင်ၸဝ်ႈဢေႃႈ။-
မိူဝ်ႈၼၼ်ႉယင်းၵိုတ်းၵျၢၼ်ႇၸိူဝ်ႉၶိူဝ်းၵူၼ်း ဢိသရေး၊ ၸဵတ်းမဵဝ်းဢၼ်ဢမ်ႇပႆႇလႆႈၽႄမႅင်ႇပၼ်ဢမူၺ်ႇၼၼ်ႉဢေႃႈ။-
ယေႃးသု၊ ၸင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈ၊ “သူႁဵတ်းထိူင်းႁဵတ်းၼၢၼ်းပုၼ်ႈတႃႇတေၶဝ်ႈသိမ်းဢဝ်လိၼ်ဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇမွၼ်ႇသူပၼ်ၼၼ်ႉတၵ်းယူႇႁိုင်ၵႃႈႁိုဝ်။-
ဢွၼ်ၵၼ်လိူၵ်ႈဢဝ်ၵႃႈၼႂ်းသူယေႈမဵဝ်းသၢမ်ၵေႃႉတႃႉ။ ၵဝ်တၵ်းပွႆႇၸႂ်ႉႁႂ်ႈၶဝ်ၶဝ်ႈၵႃႈၼႂ်းမိူင်းၼၼ်ႉၸွတ်ႇၸွတ်ႇလႄႈတႅမ်ႈမၢႆဢဝ်ပုင်ႇႁၢင်ႈလႅၼ်လိၼ်သိုင်ႇတိူင်းမိူင်းဢၼ်ၶဝ်ထိူၵ်ႈၶၢမ်ႇဢဝ်ဢမူၺ်ႇလိၼ်သေယဝ်ႉ၊တၵ်းလႆႈၶိုၼ်းမႃးၵႃႈတီႈၵဝ်ဢေႃႈ။-
ၶဝ်တၵ်းလႆႈမႅင်ႇႁဵတ်းပဵၼ်ၸဵတ်းပွတ်းသေယဝ်ႉ၊ၸိူဝ်ႉၶိူဝ်း ယုတႃႉ၊ တၵ်းလႆႈယူႇၵႃႈၼႂ်းသိုင်ႇတိူင်းၽၢႆႇတၢင်းၸၢၼ်းလႄႈ၊ၸိူဝ်ႉၶိူဝ်း ယူဝ်းသႅပ်ႈ၊ တၵ်းလႆႈယူႇၵႃႈၼႂ်းသိုင်ႇတိူင်းၽၢႆႇတၢင်းႁွင်ႇဢေႃႈ။-
တႅမ်ႈမၢႆဢဝ်မိူင်းႁဵတ်းပဵၼ်ၸဵတ်းပွတ်းသေယဝ်ႉ၊တၵ်းလႆႈဢဝ်ပုင်ႇႁၢင်ႈလႅၼ်လိၼ်မႃးၸူးတီႈၵဝ်ဢေႃႈ။ မိူဝ်ႈၼၼ်ႉၵဝ်တၵ်းႁဵတ်းတၢင်းဢၼ်တူၵ်းၸႃႇၵွၵ်ႈပုၼ်ႈသူၵႃႈတီႈၽၢႆႇၼႃႈ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းဢေႃႈ။-
ၸိူဝ်ႉၶိူဝ်း လေႇဝိ၊ ၸိုင်၊ဢမ်ႇလႆႈမီးပုၼ်ႈမီးတႃႇၵႃႈၼႂ်းသူ။ ၶဝ်ၼၼ်ႉမီးပုၼ်ႈမီးတႃႇၵႃႈၼႂ်းဢရႃႇယဵၸ်ႈပရေႃးႁဵၵ်ႈ ထႃႇဝရႃႉၽြႃး၊ ၼၼ်ႉဢေႃႈ။ ပုၼ်ႈတႃႇၸိူဝ်ႉၶိူဝ်း ၵၢတ်ႉ၊ ၸိူဝ်ႉၶိူဝ်း ရုပိၼ်ႇ၊ တင်းၸိူဝ်ႉၶိူဝ်း မၼႃႇသေႇ၊ ပွတ်းဝၼ်းဢွၵ်ႇၸိူဝ်းၼၼ်ႉၸမ်ႉ၊လႆႈၶၢမ်ႇဢဝ်လိၼ်ၽၢႆႇဝၼ်းဢွၵ်ႇၼမ်ႉ ယေႃးတၢၼ်ႇ၊ ၸွမ်းၵႃႈၼင်ႇဢၼ် မူဝ်းသေႇ၊ ၶႃႈ ထႃႇဝရႃႉၽြႃး၊ ၽႄပၼ်တီႈၶဝ်ယဝ်ႉၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵူၼ်းၸိူဝ်းၼၼ်ႉဢွၼ်ၵၼ်ဢွၵ်ႇၵႂႃႇႁႂ်ႈလႆႈတႅမ်ႈပုင်ႇႁၢင်ႈလႅၼ်လိၼ်ၸိူဝ်းၼၼ်ႉ၊လိုၼ်းသေဢၼ် ယေႃးသု၊ သင်ႇလၢတ်ႈတီႈၶဝ်လႄႈဝႃႈ၊ “ၵႂႃႇၵႃႈတီႈမိူင်းၼၼ်ႉၸွတ်ႇၸွတ်ႇသေလႄႈတႅမ်ႈမၢႆဢဝ်ပုင်ႇႁၢင်ႈလႅၼ်လိၼ်ၸိူဝ်းၼၼ်ႉသေယဝ်ႉ၊ၶိုၼ်းမႃးၸူးတီႈၵဝ်တႃႉ။ ၵဝ်တၵ်းႁဵတ်းတၢင်းဢၼ်တူၵ်းၸႃႇၵွၵ်ႈပုၼ်ႈသူၵႃႈတီႈဝဵင်း သိလေႃႇ၊ ၼႆႉၽၢႆႇၼႃႈ ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆၼၼ်ႉဢေႃႈ။-
ၶဝ်ၵႂႃႇၵႃႈၼႂ်းမိူင်းၼၼ်ႉၸွတ်ႇၸွတ်ႇသေလႄႈတႅမ်ႈမၢႆပုင်ႇႁၢင်ႈလႅၼ်လိၼ်ၼၼ်ႉဢိၵ်ႇတင်းတႅမ်ႈဢဝ်ၸိုဝ်ႈဝၢၼ်ႈၸိုဝ်ႈဝဵင်းတင်းမူတ်းႁဵတ်းပဵၼ်ၸဵတ်းပွတ်းသေယဝ်ႉ၊ၶိုၼ်းမႃးၸူးတီႈ ယေႃးသု၊ ၵႃႈတီႈပၢင်တပ်ႉ သိလေႃႇ၊ ဢေႃႈ။-
ယေႃးသု၊ ၵေႃႈႁဵတ်းတၢင်းဢၼ်တူၵ်းၸႃႇၵွၵ်ႈပုၼ်ႈၶဝ်ၵႃႈတီႈၽၢႆႇၼႃႈ ထႃႇဝရႃႉၽြႃး၊ လႄႈၽႄမႅင်ႇတႅပ်းပၼ်တီႈၸိူဝ်ႉၶိူဝ်းၵူၼ်း ဢိသရေး၊ တင်းလၢႆၸွမ်းလူၺ်ႈၸိူဝ်ႉၶိူဝ်းၶဝ်ႁင်းၽႂ်ႁင်းမၼ်းဢေႃႈ။
သိုင်ႇတိူင်းမိူင်းဢၼ်ၸိူဝ်ႉၶိူဝ်း ပိၼ်ႇယႃႇမိၼ်ႇ၊ လႆႈပိူင်ႇဢဝ်ၼၼ်ႉပဵၼ်တၢင်းဢၼ်တူၵ်းၸႃႇၵွၵ်ႈဢွၼ်တၢင်းသုတ်းပိူၼ်ႈဢေႃႈ။ သိုင်ႇတိူင်းမိူင်းၶဝ်ၼၼ်ႉတူၵ်းယူႇၵႃႈတီႈဝူင်ႈၵၢင်ၸိူဝ်ႉၶိူဝ်း ယုတႃႉ၊ တင်း ယူဝ်းသႅပ်ႈ၊ ၸိူဝ်းၼၼ်ႉဢေႃႈ။-
ၼႃႈတၢင်းႁွင်ႇၼၼ်ႉၶွပ်ႇၼမ်ႉလႅၼ်လိၼ်ၶဝ်ၸႃႉဢဝ်ၵႃႈတီႈၼမ်ႉ ယေႃးတၢၼ်ႇ၊ လႄႈၶိုၼ်ႈၸွမ်းပဵမ်ႉလွႆၽၢႆႇတၢင်းႁွင်ႇဝဵင်း ယေႇရိၶူဝ်း၊ ၸူးၼႃႈတၢင်းဝၼ်းတူၵ်းၸွမ်းၵႃႈၼိူဝ်ႁၢၼ်ႉလွႆၵႂႃႇသုတ်းတိူၵ်ႉၵႃႈတီႈထိူၼ်ႇလႅင်ႉ ပႅတ်ႉဢႃႇဝႅၼ်ႇ၊ ဢေႃႈ။-
လႅၼ်လိၼ်ၼၼ်ႉသမ်ႉလုၵ်ႉသေၵႃႈတီႈၼၼ်ႈၵႂႃႇသေယဝ်ႉ၊ၸွမ်းတၢပ်ႈလွႆၵႂႃႇၽၢႆႇတၢင်းၸၢၼ်းၸူးဝဵင်း လုၸႃႉ၊ (ဢၼ်ဝႃႈ၊ဝဵင်း ပေႇသလႃႉ၊ ) လႄႈလူင်းၵႂႃႇၸူးတီႈဝဵင်း ဢတရုတ်ႉဢတ်ႉတႃႉ၊ ၵႃႈႁိမ်းတိၼ်လွႆဢၼ်မီးၽၢႆႇတၢင်းၸၢၼ်းဝဵင်း ပႅတ်ႉႁေႃႇရုၼ်ႇ၊ ပွတ်းတႂ်ႈၼၼ်ႉဢေႃႈ။-
လႅၼ်လိၼ်မၼ်းသမ်ႉငႅၵ်းၵႂႃႇၼႃႈတၢင်းၸၢၼ်းလႄႈၸႃႉဢဝ်ၵႃႈတီႈၽၢႆႇတၢင်းဝၼ်းတူၵ်းလွႆၸိူဝ်းၼၼ်ႉလႄႈၵႂႃႇသုတ်းတိူၵ်ႉၵႃႈတီႈဝဵင်း ၵိရိယႃႉပႃႇလႃႉ၊ (ဢၼ်ဝႃႈ၊ဝဵင်း ယႃႇရိမ်ႇ၊) ဢၼ်ၸိူဝ်ႉၶိူဝ်း ယုတႃႉ၊ ယူႇၼၼ်ႉဢေႃႈ။ ဢၼ်ၼႆႉၸမ်ႉ၊ပဵၼ်ၶွပ်ႇၼမ်ႉလႅၼ်လိၼ်ၽၢႆႇတၢင်းဝၼ်းတူၵ်းဢေႃႈ။-
ၶွပ်ႇၼမ်ႉလႅၼ်လိၼ်ၽၢႆႇတၢင်းၸၢၼ်းသမ်ႉၸႃႉဢဝ်ၵႃႈတီႈၸဵင်ႇဝဵင်း ၵိရယတ်ႉယႃႇရိမ်ႇ၊ ၵႂႃႇၸူးၽၢႆႇတၢင်းဝၼ်းတူၵ်းလႄႈသုတ်းတိူၵ်ႉၵႃႈတီႈၼမ်ႉဢွၵ်ႇႁူး ၼေႇၽတေႃႇ၊ ဢေႃႈ။-
လႅၼ်လိၼ်ၼၼ်ႉလူင်းၸူးတီႈတိၼ်လွႆဢၼ်မီးၽၢႆႇၼႃႈၶူင်ႈႁူၺ်ႈ ႁိၼ်ႇၼုမ်ႇ၊ ၵႃႈတီႈၸဵင်ႇသုတ်းၽၢႆႇတၢင်းႁွင်ႇထူင်ႉ ရေႇၽိမ်ႇ၊ ဢေႃႈ။ မၼ်းသမ်ႉလူင်းၵႂႃႇၽၢႆႇတၢင်းၸၢၼ်းၶူင်ႈႁူၺ်ႈ ႁိၼ်ႇၼုမ်ႇ၊ ၽၢႆႇတၢင်းၸၢၼ်းတႄးလွႆဝဵင်း ယေႇပုတ်ႉ၊ ၵႂႃႇသုတ်းတိူၵ်ႉတီႈဝၢၼ်ႈ ဢႅၼ်ႇရေႃႇၵေးလႃႉ၊ ဢေႃႈ။-
မၼ်းသမ်ႉငႅၵ်းၵႂႃႇၼႃႈတၢင်းႁွင်ႇ၊ဢွၵ်ႇၵႂႃႇၸူးတီႈဝၢၼ်ႈ ဢႅၼ်ႇသေႇမိတ်ႉ၊ တင်းဝၢၼ်ႈ ၵႄးလိလုၵ်ႉ၊ ဢၼ်မီးသိုဝ်ႈၵုင်း ဢတုမ်ႇမိမ်း၊ ၼၼ်ႉသေယဝ်ႉ၊သမ်ႉလူင်းၸူးတီႈမၢၵ်ႇႁိၼ်ဢၼ်မီးၸိုဝ်ႈႁွင်ႉဝႃႈ၊ ပေႃႇႁၼ်ႇ၊ ဢေႃႈ။ ပေႃႇႁၢၼ်ႇ၊ ၸမ်ႉ၊ပဵၼ်လုၵ်ႈၸၢႆး ရုပိၼ်ႇ၊ ဢေႃႈ။-
သမ်ႉတႆႇၸွမ်းသၼ်လွႆဢၼ်သိုဝ်ႈၵၼ်တင်းထူင်ႉပၢင်ႇပဵင်းၼမ်ႉ ယေႃးတၢၼ်ႇ၊ ၼၼ်ႉဢေႃႈ။ မၼ်းသမ်ႉလူင်းၸူးတီႈပၢင်ႇပဵင်းသေလႄႈ၊-
လတ်းၵႂႃႇၽၢႆႇတၢင်းႁွင်ႇတႄးလွႆဝဵင်း ပႅတ်ႉႁေႃႇၵလႃႉ၊ ၵႂႃႇသုတ်းတိူၵ်ႉၵႃႈတီႈၽၢႆႇတၢင်းႁွင်ႇ ၵူတ်ႉၼမ်ႉပၢင်ႇလၢႆႇတၢႆ၊ ၵႃႈတီႈလၢႆႇပွင်ႇၼမ်ႉ ယေႃးတၢၼ်ႇ၊ ၼၼ်ႉဢေႃႈ။ ဢၼ်ၼႆႉၸမ်ႉ၊ပဵၼ်ၶွပ်ႇၼမ်ႉလႅၼ်လိၼ်ၽၢႆႇတၢင်းၸၢၼ်းဢေႃႈ။-
ၼမ်ႉ ယေႃးတၢၼ်ႇ၊ ပဵၼ်ၶွပ်ႇၼမ်ႉလႅၼ်လိၼ်ၼႃႈဝၼ်းဢွၵ်ႇဢေႃႈ။ ဢၼ်ၼႆႉၸမ်ႉ၊ၸွမ်းလူၺ်ႈလႅၼ်လိၼ်လဵပ်ႈႁွပ်ႈၼၼ်ႉသေလႄႈပဵၼ်ၼမ်ႉလိၼ်ႁိၼ်ၽႃၸိူဝ်ႉၶိူဝ်း ပိၼ်ႇယႃႇမိၼ်ႇ၊ လႆႈဢုပ်ႉပိူင်ႇၸွမ်းလူၺ်ႈၶိူဝ်းႁိူၼ်းၶဝ်ႁင်းၽႂ်ႁင်းမၼ်းၼၼ်ႉဢေႃႈ။
ဝဵင်းၸိူဝ်းဢၼ်ၸိူဝ်ႉၶိူဝ်း ပိၼ်ႇယႃႇမိၼ်ႇ၊ လႆႈပိူင်ႇဢဝ်ၸွမ်းလူၺ်ႈၶိူဝ်းႁိူၼ်းၶဝ်ၼၼ်ႉၸမ်ႉ၊ပႃးဝဵင်း ယေႇရိၶူဝ်း၊ ဝဵင်း ပႅတ်ႉႁေႃႇၵလႃႉ၊ ဝဵင်း ဢေးမိၵ်ႉၵၸိၵ်ႉ၊-
ဝဵင်း ပေႇသႃႉရႃႇပႃႉ၊ ဝဵင်း ၸေႇမရိမ်ႇ၊ ဝဵင်း ပေႇသလႃႉ၊-
ဝဵင်း ဢႃႇဝိမ်ႇ၊ ဝဵင်း ပရႃႉ၊ ဝဵင်း ဢေႃႇၽရႃႉ၊-
ဝဵင်း ၶေႇၽႃႇႁႃႇမေႃႇၼႆႇ၊ ဝဵင်း ဢေႃးၽၼိ၊ ဝဵင်း ၵႃႇၽႃႉ၊ ဢၼ်ဝႃႈဝဵင်းသိပ်းသွင်ဝဵင်းဢိၵ်ႇတင်းဝၢၼ်ႈမၼ်းတင်းလၢႆၸိူဝ်းၼၼ်ႉ။-
ဝဵင်း ၵိပွင်ႇ၊ ဝဵင်း ရႃႇမႃႉ၊ ဝဵင်း ပေႇရုတ်ႉ၊-
ဝဵင်း မိၸပႃႇ၊ ဝဵင်း ၶေႇၽိရႃႉ၊ ဢိၵ်ႇတင်းဝဵင်း မေႃႇၸႃႉ၊-
ဝဵင်း ရေႇၵိမ်ႇ၊ ဝဵင်း ဢီရႃႉပေႇလႃႉ၊ ဝဵင်း တႃႇရလႃႉ၊-
ဝဵင်း ၸေးလႃႉ၊ ဝဵင်း ဢေးလပ်ႉ၊ ဝဵင်း ယေႇပုတ်ႉ၊ ဢၼ်ဝႃႈဝဵင်း ယေႇရုသလႅမ်ႇ၊ ဝဵင်း ၵိပိယႃႉ၊ ဝဵင်း ၵိရယတ်ႉ၊ ဢၼ်ဝႃႈ၊ဝဵင်းသိပ်းသီႇဝဵင်းဢိၵ်ႇတင်းဝၢၼ်ႈမၼ်းတင်းလၢႆၸိူဝ်းၼၼ်ႉဢေႃႈ။ ဢၼ်ၼႆႉၸမ်ႉ၊ပဵၼ်ဢမူၺ်ႇလိၼ်ၸိူဝ်ႉၶိူဝ်း ပိၼ်ႇယႃႇမိၼ်ႇ၊ ၸွမ်းလူၺ်ႈၶိူဝ်းႁိူၼ်းၶဝ်ႁင်းၽႂ်ႁင်းမၼ်းၼၼ်ႉဢေႃႈ။
တၢင်းဢၼ်တူၵ်းၸႃႇၵွၵ်ႈပွၵ်ႈတီႈသွင်လႄႈၸိူဝ်ႉၶိူဝ်း သိမုၼ်ႇ၊ လႆႈပိူင်ႇဢဝ်ၸွမ်းၼင်ႇၶိူဝ်းႁိူၼ်းၶဝ်ႁင်းၽႂ်ႁင်းမၼ်းၼၼ်ႉၸမ်ႉ၊လိၼ်ဢမူၺ်ႇၶဝ်မီးၸွမ်းၼႂ်းလိၼ်ဢမူၺ်ႇၸိူဝ်ႉၶိူဝ်း ယုတႃႉ၊ ဢေႃႈ။-
ဝဵင်းၸိူဝ်းဢၼ်ၶဝ်လႆႈဢမူၺ်ႇၸမ်ႉ၊ပႃးဝဵင်း ပေႇရသေးၽႃႉ၊ ဝဵင်း သေးပႃႉ၊ ဝဵင်း မေႃႇလတႃႇ၊-
ဝဵင်း ႁႃႇၸႃႉသုဢႃႇလႃႉ၊ ဝဵင်း ပႃႇလႃႇ၊ ဝဵင်း ဢႃႇၸိမ်ႇ၊-
ဝဵင်း ဢေႇလႃႉတေႃႇလတ်ႉ၊ ဝဵင်း သုလႃႉ၊ ဝဵင်း ႁေႃႇမႃႉ၊-
ဝဵင်း ၸိၵလၵ်ႉ၊ ဝဵင်း ပႅတ်ႉမႃႇၵပုတ်ႉ၊ ဝဵင်း ႁႃႇၸႃႇသုသိမ်း၊-
ဝဵင်း ပႅတ်ႉလေးပုတ်ႉ၊ ဝဵင်း သရုႁိၼ်ႇ၊ ဢၼ်ဝႃႈ၊ဝဵင်းသိပ်းသၢမ်ဝဵင်းဢိၵ်ႇတင်းဝၢၼ်ႈၶဝ်ၸိူဝ်းၼၼ်ႉ။
ဝဵင်း ဢႃႇဢိၼ်ႇ၊ ဝဵင်း ရိမ်ႇမုၼ်ႇ၊ ဝဵင်း ဢေႇသႃႇ၊ ဝဵင်း ဢႃႇသၼ်ႇ၊ ဢၼ်ဝႃႈ၊ဝဵင်းသီႇဝဵင်းဢိၵ်ႇတင်းဝၢၼ်ႈၶဝ်တင်းလၢႆၸိူဝ်းၼၼ်ႉ၊-
ဢိၵ်ႇတင်းဝၢၼ်ႈၵႃႈဢၼ်မီးႁိမ်းႁွမ်းလဵပ်ႈႁွပ်ႈဝဵင်းဢၼ်ဝႃႈမႃးယဝ်ႉၸိူဝ်းၼၼ်ႉတေႃႇထိုင်ႁွတ်ႈဝဵင်း ပႃႇလၵ်ႉပေႇရႃႉ၊ ဢၼ်ဝႃႈ၊ဝဵင်း ရႃႇမႃႉ၊ ၵႃႈတီႈပွတ်းတၢင်းၸၢၼ်းၼၼ်ႉဢေႃႈ။ ဢၼ်ၼႆႉၸမ်ႉ၊ပဵၼ်ဢမူၺ်ႇလိၼ်ၸိူဝ်ႉၶိူဝ်း သိမုၼ်ႇ၊ ၸွမ်းလူၺ်ႈၸိူဝ်ႉၶိူဝ်းႁိူၼ်းၶဝ်ႁင်းၽႂ်ႁင်းမၼ်းၼၼ်ႉဢေႃႈ။-
ဢမူၺ်ႇလိၼ်ဢၼ်တၵ်းပၼ်ၸိူဝ်ႉၶိူဝ်း ယုတႃႉ၊ ၼၼ်ႉၵႂၢင်ႈၼႃႇပူၼ်ႉလိူဝ်လႄႈၸင်ႇလႆႈၼုၵ်ႈဢဝ်သိုင်ႇတိူင်းမိူင်းၼၼ်ႉၵမ်ႈၽွင်ႈၽႄမႅင်ႇပၼ်ႁႂ်ႈပဵၼ်ဢမူၺ်ႇလိၼ်ပုၼ်ႈၸိူဝ်ႉၶိူဝ်း သိမုၼ်ႇ၊ ဢေႃႈ။
တၢင်းဢၼ်တူၵ်းၸႃႇၵွၵ်ႈပွၵ်ႈတီႈသၢမ်လႄႈၸိူဝ်ႉၶိူဝ်း ၸေႇပုလုၼ်ႇ၊ လႆႈပိူင်ႇဢဝ်ၸွမ်းၼင်ႇၶိူဝ်းႁိူၼ်းၶဝ်ႁင်းၽႂ်ႁင်းမၼ်းၼၼ်ႉၸမ်ႉ၊ၶွပ်ႇၼမ်ႉလႅၼ်လိၼ်ဢၼ်ၶဝ်လႆႈၼၼ်ႉၵႂႃႇတေႃႇထိုင်ႁွတ်ႈဝဵင်း ၸႃႇရိတ်ႉ၊ လႄႈ၊-
လႅၼ်လိၼ်ၼၼ်ႉဢဝ်ၵႃႈတီႈၼၼ်ႈၵႂႃႇတၢင်းဝၼ်းတူၵ်းၸူးတီႈဝဵင်း မရႃႇလႃႉ၊ ၸပ်းဝဵင်း တပ်ႉပသိတ်ႉ၊ ဢိၵ်ႇတင်းၼမ်ႉႁွင်ႈဢၼ်မီးၽၢႆႇဝၼ်းဢွၵ်ႇဝဵင်း ယေႃးၵၼမ်ႇ၊ ၼၼ်ႉဢေႃႈ။-
ၵႃႈတီႈၽၢႆႇၼိုင်ႈတင်းဝဵင်း ၸႃႇရိတ်ႉ၊ ၼၼ်ႉလႅၼ်လိၼ်မၼ်းငႅၵ်းၶိုၼ်ႈၵႂႃႇၸွမ်းၽၢႆႇဝၼ်းဢွၵ်ႇသိုဝ်ႈတီႈၵၢင်ဝၼ်းဢွၵ်ႇၼၼ်ႉလီလီ၊ၵႂႃႇၸူးတီႈဝဵင်း ၶိသလုတ်ႉတႃႇပေႃႇ၊ သေယဝ်ႉ၊သမ်ႉၵႂႃႇၸူးတီႈဝဵင်း တႃႇပရတ်ႉ၊ လႄႈၶိုၼ်ႈၸူးဝဵင်း ယႃႇၽျႃႉ၊ ဢေႃႈ။-
မၼ်းသမ်ႉသိုပ်ႇၵႂႃႇၸွမ်းၽၢႆႇတၢင်းဝၼ်းတူၵ်းၸူးတီႈဝဵင်း ၵတ်ႉတႁေႇၽႃႇ၊ ဢိၵ်ႇတင်းဝဵင်း တၵႃႉၸိၼ်း၊ လႄႈ ငႅၵ်းၵႂႃႇၸူးတီႈဝဵင်း ၼေႇဢႃႇ၊ ဢၼ်မီးၵႃႈၼိူဝ်သဵၼ်ႈတၢင်းဝဵင်း ရိမ်ႇမုၼ်ႇ၊ ၼၼ်ႉဢေႃႈ။-
လႅၼ်လိၼ်ၼႃႈတၢင်းႁွင်ႇၸိုင်၊ငႅၵ်းၵႂႃႇၸူးဝဵင်း ႁၼ်ႇၼသုၼ်ႇ၊ လႄႈ သုတ်းတိူၵ်ႉၵႃႈတီႈထူင်ႉ ယိၽႃႉထေးလႃႉ၊ ဢေႃႈ။-
ၼွၵ်ႈသေၼၼ်ႉယင်းပႃးဝဵင်း ၵတ်ႉတတ်ႉ၊ ဝဵင်း ၼႁႃႇလႃႇလႃႉ၊ ဝဵင်း သိမရုၼ်ႇ၊ ဝဵင်း ဢီႇတလႃႉ၊ ဝဵင်း ပႅတ်ႉလႁႅမ်ႇ၊ ဢၼ်ဝႃႈ၊သိပ်းသွင်ဝဵင်းဢိၵ်ႇတင်းဝၢၼ်ႈၶဝ်တင်းလၢႆဢေႃႈ။-
ဝဵင်းလူင်ၸိူဝ်းၼႆႉပႃးဝၢၼ်ႈမၼ်းဝဵင်းမၼ်းတင်းလၢႆယူႇသေလႄႈပဵၼ်ဢမူၺ်ႇလိၼ်ၸိူဝ်ႉၶိူဝ်း ၸေႇပုလုၼ်ႇ၊ ၸွမ်းလူၺ်ႈၶိူဝ်းႁိူၼ်းၶဝ်ႁင်းၽႂ်ႁင်းမၼ်းၼၼ်ႉဢေႃႈ။
တၢင်းဢၼ်တူၵ်းၸႃႇၵွၵ်ႈပွၵ်ႈတီႈသီႇလႄႈၸိူဝ်ႉၶိူဝ်း ဢိသၶႃႇ၊ လႆႈပိူင်ႇဢဝ်ၸွမ်းၼင်ႇၶိူဝ်းႁိူၼ်းၶဝ်ႁင်းၽႂ်ႁင်းမၼ်းၸမ်ႉ၊-
သိုင်ႇတိူင်းမိူင်းၶဝ်ပႃးဝဵင်း ယေႇၸရေး၊ ဝဵင်း ၶေႇသုလုတ်ႉ၊ ဝဵင်း သုၼိမ်ႇ၊-
ဝဵင်း ႁႃႇၸရိမ်ႇ၊ ဝဵင်းသိႁုၼ်ႇ၊ ဝဵင်း ဢႃႇၼႁႃႇရတ်ႉ၊-
ဝဵင်း ရပ်ႉပိတ်ႉ၊ ဝဵင်း ၵိသုၼ်ႇ၊ ဝဵင်း ဢႃႇပိတ်ႉ၊-
ဝဵင်း ရေႇမိတ်ႉ၊ ဝဵင်း ဢိၼ်ႇၵၼ်ႇၼိမ်ႇ၊ ဝဵင်း ဢိၼ်ႇႁတ်ႉတႃႇ၊ ဝဵင်း ပႅတ်ႉပတ်ႉၸိတ်ႉ၊ ၸိူဝ်းၼၼ်ႉသေလႄႈ၊-
လႅၼ်လိၼ်မၼ်းၵႂႃႇတေႃႇသႂ်ႇဝဵင်း တႃႇပေႃႇ၊ ဝဵင်း သႁႃႇၸုမႃႉ၊ ဝဵင်း ပႅတ်ႉသေးမိတ်ႉ၊ သေယဝ်ႉ၊ၵႂႃႇသုတ်းတိူၵ်ႉတီႈၼမ်ႉ ယေႃးတၢၼ်ႇ၊ ဢေႃႈ။ မီးသိပ်းႁူၵ်းဝဵင်းဢိၵ်ႇတင်းဝၢၼ်ႈၶဝ်တင်းလၢႆဢေႃႈ။-
ဝဵင်းလူင်ၸိူဝ်းၼႆႉပႃးဝၢၼ်ႈမၼ်းဝဵင်းမၼ်းတင်းလၢႆယူႇသေလႄႈပဵၼ်ဢမူၺ်ႇလိၼ်ၸိူဝ်ႉၶိူဝ်း ဢိသၶႃႇ၊ ၸွမ်းလူၺ်ႈၶိူဝ်းႁိူၼ်းၶဝ်ႁင်းၽႂ်ႁင်းမၼ်းၼၼ်ႉဢေႃႈ။
တၢင်းဢၼ်တူၵ်းၸႃႇၵွၵ်ႈပွၵ်ႈတီႈႁႃႈလႄႈၸိူဝ်ႉၶိူဝ်း ဢႃႇသျႃႇ၊ လႆႈပိူင်ႇဢဝ်ၸွမ်းၼင်ႇၶိူဝ်းႁိူၼ်းၶဝ်ႁင်းၽႂ်ႁင်းမၼ်းၸမ်ႉ၊-
သိုင်ႇတိူင်းမိူင်းၶဝ်ပႃးဝဵင်း ႁေႇလၵတ်ႉ၊ ဝဵင်း ႁႃႇလိ၊ ဝဵင်း ပေႇတိၼ်ႇ၊ ဝဵင်း ဢႃႇၶသပ်ႉ၊-
ဝဵင်း ဢႃႇလမ်ႇမေးလႅၵ်ႉ၊ ဝဵင်း ဢႃႇမတ်ႉ၊ ဝဵင်း မိသလႃႇ၊ ၸိူဝ်းၼၼ်ႉသေယဝ်ႉ၊ၽၢႆႇတၢင်းဝၼ်းတူၵ်းၼႆႉၸိုင်၊တေႃႇသႂ်ႇဝဵင်း ၵရမေႇလႃႉ၊ တင်းဝဵင်း သႁေႃႇလိပ်ႉပၼတ်ႉ၊ ဢေႃႈ။-
မၼ်းသမ်ႉငႅၵ်းၵႂႃႇၽၢႆႇတၢင်းဝၼ်းဢွၵ်ႇလႄႈၶိုၼ်ႈၵႂႃႇၸူးဝဵင်း ပႅတ်ႉတႃႇၵုၼ်ႇ၊ သေယဝ်ႉ၊တေႃႇသႂ်ႇမိူင်း ၸေႇပုလုၼ်ႇ၊ တင်းထူင်ႉ ယိၽႃႉထေးလႃႉ၊ ဢၼ်ၵႂႃႇၸွမ်းၽၢႆႇတၢင်းႁွင်ႇႁွတ်ႈထိုင်ၵႃႈတီႈဝဵင်း ပႅတ်ႉသမိတ်ႇ၊ တင်းဝဵင်း ၼယေးလႃႉ၊ ဢေႃႈ။ မၼ်းသမ်ႉငႅၵ်းၵႂႃႇၽၢႆႇတၢင်းႁွင်ႇၸူးတီႈဝဵင်း ၵႃႇပုလႃႉ၊-
ဝဵင်း ႁေႇပရုၼ်ႇ၊ ဝဵင်း ရေးႁွပ်ႉ၊ ဝဵင်း ရမ်ႇမုၼ်ႇ၊ ဝဵင်း ၵႃႇၼႃႉ၊ တေႃႇထိုင်ႁွတ်ႈဝဵင်းလူင် ၸိတုမ်ႇ၊ ဢေႃႈ။-
လႅၼ်လိၼ်ၼၼ်ႉသမ်ႉငႅၵ်းၵႂႃႇၸူးဝဵင်း ရႃႇမႃႉ၊ ဢိၵ်ႇတင်းဝဵင်းလူင် တုရု၊ ဢၼ်လမ်းဝဵင်းမၼ်းမၼ်ႈၶိူင်ႇၼၼ်ႉသေယဝ်ႉ၊သမ်ႉငႅၵ်းၵႂႃႇၸူးဝဵင်း ႁေႃႇသႃႉ၊ လႄႈ ၵႂႃႇသုတ်းတိူၵ်ႉၵႃႈတီႈပၢင်ႇလၢႆႇ မေႇတိထေးရီးယၼ်း၊ ၸွမ်းသၢပ်ႇပၢင်ႇလၢႆႇၵႂႃႇတေႃႇထိုင်ႁွတ်ႈဢိူင်ႇ ဢႃႇၶၸိပ်ႉ၊ ဢေႃႈ။-
သမ်ႉပႃးတင်းဝဵင်း ဢုမ်းမႃႉ၊ ဝဵင်း ဢႃႇၽႅၵ်ႉ၊ ဝဵင်း ရေးႁွပ်ႉ၊ မီးသၢဝ်းသွင်ဝဵင်းဢိၵ်ႇတင်းဝၢၼ်ႈၶဝ်တင်းလၢႆဢေႃႈ။-
ဝဵင်းလူင်ၸိူဝ်းၼႆႉပႃးတင်းဝၢၼ်ႈမၼ်းဝဵင်းမၼ်းတင်းလၢႆသေလႄႈပဵၼ်ဢမူၺ်ႇလိၼ်ၸိူဝ်ႉၶိူဝ်း ဢႃႇသျႃႇ၊ ၸွမ်းလူၺ်ႈၶိူဝ်းႁိူၼ်းၶဝ်ႁင်းၽႂ်ႁင်းမၼ်းဢေႃႈ။
တၢင်းဢၼ်တူၵ်းၸႃႇၵွၵ်ႈၵမ်းတီႈႁူၵ်းလႄႈၸိူဝ်ႉၶိူဝ်း ၼပ်ႉထလိ၊ လႆႈပိူင်ႇဢဝ်ၸွမ်းၼင်ႇၶိူဝ်းႁိူၼ်းၶဝ်ႁင်းၽႂ်ႁင်းမၼ်းၸမ်ႉ၊-
ၶွပ်ႇၼမ်ႉလႅၼ်လိၼ်မၼ်းလုၵ်ႉသေၵႃႈတီႈဝဵင်း ႁေးလိပ်ႉ၊ ၵႂႃႇၸူးတီႈပႃႇမႆႉၼိမ်ဝဵင်း ၸႃႇၼၼ်ႇၼိမ်း၊ သမ်ႉၵႂႃႇၸူးဝဵင်း ဢႃႇတမိၼေးၵႅပ်ႉ၊ ဝဵင်း ယႃႇပၼေးလႃႉ၊ တေႃႇထိုင်ႁွတ်ႈဝဵင်း လႃႇၵုမ်း၊ လႄႈသုတ်းတိူၵ်ႈၵႃႈတီႈၼမ်ႉ ယေႃးတၢၼ်ႇ၊ ဢေႃႈ။-
ၵႃႈတီႈၼၼ်ႈလႅၼ်လိၼ်မၼ်းသမ်ႉငႅၵ်းၵႂႃႇၽၢႆႇတၢင်းဝၼ်းတူၵ်းၵႂႃႇၸူးဝဵင်း ဢႃႇၸၼုတ်ႉတႃႇပေႃႇ၊ လႄႈ၊သမ်ႉလုၵ်ႉသေၵႃႈတီႈၼၼ်ႈၵႂႃႇၸူးဝဵင်း ႁူးၵုတ်ႉ၊ သေယဝ်ႉ၊ၼႃႈတၢင်းၸၢၼ်းၼၼ်ႉၵႂႃႇတေႃႇသႂ်ႇမိူင်း ၸေႇပုလုၼ်ႇ၊ ၽၢႆႇတၢင်းဝၼ်းတူၵ်းတေႃႇသႂ်ႇမိူင်း ဢႃႇသျႃႇ၊ ၼႃႈတၢင်းဝၼ်းဢွၵ်ႇတေႃႇသႂ်ႇမိူင်း ယုတႃႉ၊ ႁိမ်းၼမ်ႉ ယေႃးတၢၼ်ႇ၊ ဢေႃႈ။-
ဝဵင်းၸိူဝ်းဢၼ်မၼ်ႈၶိူင်ႇတင်းလၢႆၸမ်ႉ၊ပဵၼ်ဝဵင်း ၸိတ်ႉတိမ်း၊ ဝဵင်း ၸေးရႃႉ၊ ဝဵင်း ႁႃႇမတ်ႉ၊ ဝဵင်း ရၵ်ႉၵတ်ႉ၊ ဝဵင်း ၵိၼ်ႇၼီႇၸရိတ်ႈ၊-
ဝဵင်း ဢႃႇတမႃႇ၊ ဝဵင်း ရႃႇမႃႉ၊ ဝဵင်း ႁႃႇၸေႃႇ၊-
ဝဵင်း ၵေႇတေးသႃႉ၊ ဝဵင်း ဢေႇတရိ၊ ဝဵင်း ဢိၼ်ႇႁႃႇၸေႃႇ၊-
ဝဵင်း ဢီႇရုၼ်ႇ၊ ဝဵင်း မိၵ်ႉတလေးလႃႉ၊ ဝဵင်း ႁေႃႇရဵမ်ႇ၊ ဝဵင်း ပႅတ်ႉသၼတ်ႉ၊ ဝဵင်း ပႅတ်ႉသေးမိတ်ႉ၊ မီးသိပ်းၵဝ်ႈဝဵင်းဢိၵ်ႇတင်းဝၢၼ်ႈၶဝ်တင်းလၢႆဢေႃႈ။
ဝဵင်းလူင်ၸိူဝ်းၼႆႉပႃးဝၢၼ်ႈမၼ်းဝဵင်းမၼ်းတင်းလၢႆယူႇသေလႄႈပဵၼ်ဢမူၺ်ႇလိၼ်ၸိူဝ်ႉၶိူဝ်း ၼပ်ႉထလိ၊ ၸွမ်းလူၺ်ႈၶိူဝ်းႁိူၼ်းၶဝ်ႁင်းၽႂ်ႁင်းမၼ်းၼၼ်ႉဢေႃႈ။
တၢင်းဢၼ်တူၵ်းၸႃႇၵွၵ်ႈၵမ်းတီႈၸဵတ်းလႄႈၸိူဝ်ႉၶိူဝ်း တၢၼ်ႇ၊ လႆႈပိူင်ႇဢဝ်ၸွမ်းၼင်ႇၶိူဝ်းႁိူၼ်းၶဝ်ႁင်းၽႂ်ႁင်းမၼ်းၸမ်ႉ၊-
သိုင်ႇတိူင်းမိူင်းၶဝ်ႈပႃးဝဵင်း ၸူဝ်းရႃႇ၊ ဝဵင်း ဢေးသတေႃးလႃႉ၊ ဝဵင်း ဢိႁသေးမႅတ်ႉ၊-
ဝဵင်း သႃႇလပိမ်ႇ၊ ဝဵင်း ဢႃႇၸလုၼ်ႇ၊ ဝဵင်း ယေႇသလႃႉ၊-
ဝဵင်း ဢေႇလုၼ်ႇ၊ ဝဵင်း ထိမၼႃႇထႃႉ၊ ဝဵင်း ဢေႇၵရုၼ်ႇ၊-
ဝဵင်း ဢေႇလတေးၵႃႉ၊ ဝဵင်း ၵိပ်ႉပိသုၼ်ႇ၊ ဝဵင်း ပႃႇလၵ်ႉ၊-
ဝဵင်း ယေႇရုတ်ႉ၊ ဝဵင်း ပေႇၼပႄးရၵ်ႉ၊ ဝဵင်း ၵႃႇသႃႇရိမ်ႇမုၼ်ႇ၊-
ဝဵင်း မေႇယၵုၼ်ႇ၊ ဝဵင်း ရၵ်ႉၵုၼ်ႇ၊ ဢိၵ်ႇတင်းဢိူင်ႇဢၼ်မီးလဵပ်ႈႁွပ်ႈႁိမ်းဝဵင်း ယွပ်ႉပႃႉ၊ ဢေႃႈ။-
မိူဝ်ႈသိုင်ႇတိူင်းမိူင်းၸိူဝ်ႉၶိူဝ်း တၢၼ်ႇ၊ လႆႈသုမ်းၵႂႃႇၼၼ်ႉၶဝ်ၶီႇသိုၵ်းတိုၵ်းတေႃးဝဵင်း လေႇသႃႉ၊ ပႄႉၼႅင်ႇဢဝ်ဢေႃႈ။ ၶဝ်သိမ်းဢဝ်ဝဵင်းၼၼ်ႉႁွင်ႉႁဵၵ်ႈဝဵင်း တၢၼ်ႇ၊ ၸွမ်းလူၺ်ႈၸိုဝ်ႈသဵင်ပေႃႈၸိူဝ်ႉၶိူဝ်း တၢၼ်ႇ၊ ဢေႃႈ။-
ဝဵင်းလူင်ၸိူဝ်းၼႆႉပႃးဝၢၼ်ႈမၼ်းဝဵင်းမၼ်းတင်းလၢႆယူႇသေလႄႈပဵၼ်ဢမူၺ်ႇလိၼ်ၸိူဝ်ႉၶိူဝ်း တၢၼ်ႇ၊ ၸွမ်းလူၺ်ႈၶိူဝ်းႁိူၼ်းၶဝ်ႁင်းၽႂ်ႁင်းမၼ်းဢေႃႈ။
မိူဝ်ႈဢၼ်ၵူၼ်းမဵဝ်း ဢိသရေး၊ တင်းလၢႆႁဵတ်းတၢင်းဢၼ်ၽႄမႅင်ႇဢဝ်လိၼ်ၶဝ်ယဝ်ႉတူဝ်ႈယဝ်ႉၼၼ်ႉၸိုင်၊ၶဝ်ဢွၼ်ၵၼ်ပၼ်ဢမူၺ်ႇတီႈ ယေႃးသု၊ လုၵ်ႈၸၢႆး ၼုၼ်ႇ၊ ႁႂ်ႈမၼ်းလႆႈပိူင်ႇဢဝ်ဢေႃႈ။-
ၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉဝႆႉၼၼ်ႉၶဝ်ဢဝ်ဝဵင်းဢၼ်မၼ်းယွၼ်းဢဝ်ဢၼ်ပဵၼ်ဝဵင်း တိမၼႃႇသေႇရႃႇ၊ ၵႃႈၼိူဝ်ႁၢၼ်ႉလွႆ ဢေႇၽရိမ်ႇ၊ ၼၼ်ႉပၼ်တီႈမၼ်းဢေႃႈ။ မၼ်းတႄႇႁဵတ်းဝဵင်းလူင်လႄႈယူႇဢေႃႈ။
ဢၼ်ၸိူဝ်းၼႆႉၸမ်ႉ၊ပဵၼ်ဢမူၺ်ႇလိၼ်ဢၼ်ယဵၸ်ႈပရေႃးႁဵၵ်ႈ ဢေးလႃႇၸႃႇ၊ တင်း ယေႃးသု၊ လုၵ်ႈၸၢႆး ၼုၼ်ႇ၊ ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၵႃႈၼႂ်းၸိူဝ်ႉၶိူဝ်းၵူၼ်းမဵဝ်း ဢိသရေး၊ တင်းလၢႆတူၵ်းၸႃႇၵွၵ်ႈသေလႄႈၽႄမႅင်ႇပၼ်ၶဝ်ၵႃႈၼႂ်းဝဵင်း သိလေႃႇ၊ ၵႃႈတီႈၽၢႆႇၼႃႈ ထႃႇဝရႃႉၽြႃး၊ တီႈႁိမ်းၽၵ်းတူသုမ်ႉထဵင်ၸဝ်ႈၼၼ်ႉဢေႃႈ။ ၼင်ႇၼၼ်လႄႈၶဝ်ႁဵတ်းတၢင်းဢၼ်ၽႄမႅင်ႇပၼ်လိၼ်ၼၼ်ႉယဝ်ႉတူဝ်ႈလီငၢမ်းဢေႃႈ။
မိူဝ်ႈၼၼ်ႉ၊ ၸဝ်ႈထႃႇဝရႃႉၽြႃး၊ မီးဢမိင်ႉတီႈ ယေႃးသု၊ လႄႈ၊-
ႁႂ်ႈမၼ်းသင်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈၸမ်ႉ၊ “လိူၵ်ႈဝႆႉဝဵင်းပုၼ်ႈတႃႇတၵ်းပၢႆႈၸူးလႄႈသွၼ်ႈပိုင်ႈၸွမ်းၵႃႈၼင်ႇဢၼ်ၵဝ်ဢဝ် မူဝ်းသေႇ၊ သင်ႇလၢတ်ႈဝႆႉတီႈသူၼၼ်ႉတႃႉ။-
ၵေႃႉဢၼ်ယင်းဢမ်ႇတင်ႈၸႂ်လႄႈဢဝ်ဢသၢၵ်ႈၵူၼ်းတၢႆမႅၼ်ႈၼၼ်ႉတၵ်းတေလႆႈပၢႆႈၸူးသွၼ်ႈပိုင်ႈယူႇၵႃႈတီႈၼၼ်ႈႁႂ်ႈလႆႈၵၢင်းလွတ်ႈသေၵူၼ်းၵေႃႉဢၼ်သွၵ်ႈႁႃတွပ်ႇၶိုၼ်းဢဝ်တၢႆၼၼ်ႉဢေႃႈ။-
မၼ်းတၵ်းလႆႈပၢႆႈၸူးတီႈဝဵင်းၸိူဝ်းၼၼ်ႉသေဝဵင်းဝဵင်း၊ၶဝ်ႈၸူးၵႃႈတီႈတီႈဢၼ်ၸီႇယၢင်ႇတြႃးၵႃႈတီႈႁိမ်းၼႃႈၽၵ်းတူဝဵင်းသေလႄႈမွၵ်ႇလၢတ်ႈၼႄလွင်ႈတၢင်းမၼ်းဢၼ်ပဵၼ်မႃးၼၼ်ႉတီႈၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆၼၼ်ႉဢေႃႈ။ မိူဝ်ႈၼၼ်ႉၶဝ်တၵ်းလႆႈဢွၼ်ၵၼ်ဢဝ်မၼ်းၵႂႃႇၵႃႈၼႂ်းဝဵင်းလႄႈၶျႃးတီႈယူႇမၼ်းပၼ်ႁႂ်ႈမၼ်းလႆႈယူႇသဝ်းဢေႃႈ။-
ပေႃးၵူၼ်းၵေႃႉဢၼ်တၵ်းတွပ်ႇၶိုၼ်းဢဝ်တၢႆလိုပ်ႈၸွမ်းလမ်းၸွမ်းမႃးၸိုင်၊ၵူၼ်းဝဵင်းတင်းလၢႆဢမ်ႇလႆႈဢဝ်ၵေႃႉဢၼ်ဢမ်ႇတင်ႈၸႂ်လႄႈဢဝ်ဢသၢၵ်ႈၵူၼ်းတၢႆမႅၼ်ႈၼၼ်ႉဢၢပ်ႈပၼ်ၵႃႈၼႂ်းမိုဝ်းမၼ်းၼၼ်ႉ။ ၶဝ်တၵ်းလႆႈဢွၼ်ၵၼ်ၵႅတ်ႇၶႄမၼ်း၊ၵွပ်ႈပိူဝ်ႈမၼ်းဢမ်ႇလႆႈတင်ႈၸႂ်လႄႈဢဝ်တၢႆမႅၼ်ႈ၊ဢိၵ်ႇတင်းဢမ်ႇမီးတၢင်းၽိတ်းဝႆႉထႃႈဢွၼ်တၢင်းၼၼ်ႉဢေႃႈ။-
မၼ်းၼၼ်ႉတၵ်းလႆႈယူႇၵႃႈၼႂ်းဝဵင်းၼၼ်ႉတေႃႇထိုင်ႁွတ်ႈမၼ်းလႆႈၶၢမ်ႇတၢင်းဢၼ်ပရိၵ်ႈသၢတ်ႈၸႅတ်ႈသေးယဝ်ႉ၊ဢိၵ်ႇတင်းတေႃႇထိုင်ႁွတ်ႈၶုၼ်ယဵၸ်ႈပရေႃးႁဵၵ်ႈ ဢၼ်မီးၸူဝ်ႈပၢၼ်ၼၼ်ႉထၢၼ်ႈပေႃးတၢႆယဝ်ႉၼၼ်ႉဢေႃႈ။ လိုၼ်းၼၼ်ႉၸင်ႇမၼ်းၼၼ်ႉတၵ်းမီးဢၶႂၢင်ႉဢၼ်လႆႈၶိုၼ်းမိူဝ်းၸူးႁိူၼ်းမၼ်းၵႃႈတီႈဝဵင်းဢၼ်မၼ်းဢွၵ်ႇပၢႆႈမႃးၼၼ်ႉဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈၶဝ်ၸတ်းဝႆႉဝဵင်း ၵေႇတေးသႃႉ၊ ၵႃႈၼႂ်းမိူင်း ၵႃႇလိလႄး၊ ၵႃႈၼိူဝ်ႁၢၼ်ႉလွႆ ၼပ်ႉထလိ၊ ဝဵင်း သေးၶိမ်ႇ၊ ၵႃႈၼိူဝ်ႁၢၼ်ႉလွႆ ဢေႇၽရိမ်ႇ၊ ဝဵင်း ၵိရိယႃႉဢႃႇပႃႇ၊ ဢၼ်ဝႃႈ၊ဝဵင်း ႁေႇပရုၼ်ႇ၊ ၵႃႈၼိူဝ်ႁၢၼ်ႉလွႆ ယုတႃႉ၊ ၸိူဝ်းၼၼ်ႉဢေႃႈ။-
ၵႃႈတီႈၽၢႆႇဝၼ်းဢွၵ်ႇၼမ်ႉ ယေႃးတၢၼ်ႇ၊ ၵႃႈၼိူဝ်ပၢင်ႇၵွင်းပဵင်းဢၼ်မီးၽၢႆႇဝၼ်းဢွၵ်ႇဝဵင်း ယေႇရိၶူဝ်း၊ ၼၼ်ႉၵေႃႈၶဝ်လိူၵ်ႈဢဝ်ဝဵင်း ပေႇၸႃႇ၊ ၵႃႈတီႈၼႂ်းထိူၼ်ႇလႅင်ႉပၢင်ႇၵွင်းပဵင်းၵႃႈၼႂ်းဢိူင်ႇ ယုတႃႉ၊ ဝဵင်း ရႃႇမုတ်ႉ၊ ၵႃႈတီႈမိူင်း ၵိလတ်ႉ၊ ပုၼ်ႈဢိူင်ႇ ၵၢတ်ႉ၊ ဝဵင်း ၵေႃႇလၼ်ႇ၊ ၵႃႈတီႈမိူင်း ပႃႇသၢၼ်ႇ၊ ပုၼ်ႈဢိူင်ႇ မၼႃႇသေႇ၊ ၸိူဝ်းၼၼ်ႉဝႆႉဢေႃႈ။-
ဝဵင်းလူင်ၸိူဝ်းၼႆႉၸိုင်၊ပဵၼ်ဝဵင်းဢၼ်လိူၵ်ႈဢဝ်ဝႆႉပုၼ်ႈမဵဝ်း ဢိသရေး၊ တင်းလၢႆဢိၵ်ႇတင်းၵူၼ်းတၢင်ႇၸိူဝ်ႉတၢင်ႇမဵဝ်းဢၼ်ယင်းဢမ်ႇလႆႈတင်ႈၸႂ်လႄႈဢဝ်ဢသၢၵ်ႈၵူၼ်းတၢႆမႅၼ်ႈၼၼ်ႉလႆႈၶၢမ်ႇဢဝ်တၢင်းဢၼ်ႁႄႉဢၼ်ၶႅၼ်သေၼႂ်းမိုဝ်းၵူၼ်းၵေႃႉဢၼ်ထၢမ်ႁႃတွပ်ႇၶိုၼ်းဢဝ်တၢႆၼၼ်ႉသေယဝ်ႉ၊ပေႃးယင်းဢမ်ႇလႆႈၶၢမ်ႇတၢင်းဢၼ်ပရိၵ်ႈသၢတ်ႈၸႅတ်ႈသေးဢွၼ်တၢင်းၸိုင်၊မၼ်းၼၼ်ႉဢမ်ႇလႆႈၶၢမ်ႇတၢင်းဢၼ်ဢဝ်တၢႆဢေႃႈ။
ၶဝ်ၸိူဝ်းဢၼ်ပဵၼ်ၵႄႇပဵၼ်ငဝ်ႈၶိူဝ်းႁိူၼ်းၼႂ်းၸိူဝ်ႉၶိူဝ်း လေႇဝိ၊ ၼၼ်ႉဢွၼ်ၵၼ်ၶဝ်ႈၸူးတီႈယဵၸ်ႈပရေႃးႁဵၵ်ႈ ဢေးလႃႇၸႃႇ၊ တင်း ယေႃးသု၊ လုၵ်ႈၸၢႆး ၼုၼ်ႇ၊ ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၵႃႈၼႂ်းၸိူဝ်ႉၶိူဝ်းၵူၼ်းမဵဝ်း ဢိသရေး၊ တင်းလၢႆၸိူဝ်းၼၼ်ႉသေလႄႈ၊-
လဝ်ႈလၢတ်ႈတီႈၶဝ်ၵႃႈၼႂ်းဝဵင်း သိလေႃႇ၊ မိူင်း ၶႃႇၼၼ်ႇ၊ လႄႈဝႃႈ၊ “ ထႃႇဝရႃႉၽြႃး၊ ဢဝ် မူဝ်းသေႇ၊ သင်ႇလၢတ်ႈႁႂ်ႈဢဝ်ဝဵင်းတင်းလၢႆပၼ်ပုၼ်ႈႁဝ်းတၵ်းယူႇ၊ဢိၵ်ႇတင်းပၢင်ႇယိူဝ်ႈဢၼ်လဵပ်ႈႁွပ်ႈမၼ်းပၼ်ပုၼ်ႈတရိၵ်ႈသၢၼ်ႇႁဝ်းၶႃႈဝႃႈၼႆယဝ်ႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၵူၼ်းမဵဝ်း ဢိသရေး၊ ၶဝ်ဢဝ်ဝဵင်းမၢင်ဝဵင်းဢိၵ်ႇတင်းလိၼ်ပၢင်ႇယိူဝ်ႈၵႃႈၼႂ်းသိုင်ႇတိူင်းမိူင်းၶဝ်ၼၼ်ႉ ပၼ်ၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉၼၼ်ႉဢေႃႈ။
တၢင်းဢၼ်တူၵ်းၸႃႇၵွၵ်ႈဢွၼ်တၢင်းပိူၼ်ႈလႄႈၶိူဝ်းႁိူၼ်း ၵေႃႇႁတ်ႉ၊ ၸိူဝ်ႉၶိူဝ်း လေႇဝိ၊ လႆႈပိူင်ႇဢဝ်ဝဵင်းၼၼ်ႉၸမ်ႉ၊လုၵ်ႈလၢၼ်ၸိူဝ်ႉၶိူဝ်းယဵၸ်ႈပရေႃးႁဵၵ်ႈ ဢႃႇရုၼ်ႇ၊ လႆႈပိူင်ႇဢဝ်သိပ်းသၢမ်ဝဵင်းၵႃႈၼႂ်းသိုင်ႇတိူင်းမိူင်း ယုတႃႉ၊ မိူင်း သိမုၼ်ႇ၊ တင်းမိူင်း ပိၼ်ႇယႃႇမိၼ်ႇ၊ ဢေႃႈ။-
ၶိူဝ်းႁိူၼ်း ၵေႃႇႁတ်ႉ၊ ဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉလႆႈပိူင်ႇဢဝ်သိပ်းဝဵင်းၵႃႈၼႂ်းသိုင်ႇတိူင်းမိူင်း ဢေႇၽရိမ်ႇ၊ မိူင်း တၢၼ်ႇ၊ တင်းမိူင်း မၼႃႇသေႇ၊ ၽၢႆႇဝၼ်းတူၵ်းဢေႃႈ။
ၶိူဝ်းႁိူၼ်း ၵေႇရသုၼ်ႇ၊ တင်းလၢႆလႆႈပိူင်ႇဢဝ်သိပ်းသၢမ်ဝဵင်းၵႃႈၼႂ်းသိုင်ႇတိူင်းမိူင်း ဢိသၶႃႇ၊ မိူင်း ဢႃႇသျႃႇ၊ မိူင်း ၼပ်ႉထလိ၊ တင်းမိူင်း မၼႃႇသေႇ၊ ၽၢႆႇဝၼ်းဢွၵ်ႇဢေႃႈ။
ၶိူဝ်းႁိူၼ်း မေႇရႃႇရိ၊ တင်းလၢႆၼၼ်ႉလႆႈပိူင်ႇဢဝ်သိပ်းသွင်ဝဵင်းၵႃႈၼႂ်းသိုင်ႇတိူင်းမိူင်း ရုပိၼ်ႇ၊ မိူင်း ၵၢတ်ႉ၊ တင်းမိူင်း ၸေႇပုလုၼ်ႇ၊ ဢေႃႈ။
ဝဵင်းလူင်ၸိူဝ်းၼႆႉဢိၵ်ႇတင်းလိၼ်ပၢင်ႇယိူဝ်ႈၶဝ်ၸိုင်၊ၵူၼ်းမဵဝ်း ဢိသရေး၊ တင်းလၢႆႁဵတ်းတၢင်းဢၼ်တူၵ်းၸႃႇၵွၵ်ႈသေလႄႈၽႄမႅင်ႇပၼ်ၸိူဝ်ႉၶိူဝ်း လေႇဝိ၊ ၶဝ်ၸွမ်းၵႃႈၼင်ႇဢၼ် ထႃႇဝရႃႉၽြႃး၊ ဢဝ် မူဝ်းသေႇ၊ သင်ႇလၢတ်ႈဝႆႉၼၼ်ႉဢေႃႈ။
ၵႃႈၼႂ်းသိုင်ႇတိူင်းမိူင်း၊ ယုတႃႉ၊ တင်းမိူင်း သိမုၼ်ႇ၊ ၼၼ်ႉၶဝ်ၽႄမႅင်ႇပၼ်ဝဵင်းလူင်ဢၼ်မီးၸိုဝ်ႈၸိူဝ်းၼၼ်ႉ၊-
တူၵ်းတီႈလုၵ်ႈလၢၼ်ၸိူဝ်ႉၶိူဝ်း ဢႃႇရုၼ်ႇ၊ ဢၼ်ပဵၼ်ၶိူဝ်းႁိူၼ်း ၵေႃႇႁတ်ႉ၊ ၵႃႈၼႂ်းၸိူဝ်ႉၶိူဝ်း လေႇဝိ၊ ၵွပ်ႈႁဵတ်းတၢင်းဢၼ်တူၵ်းၸႃႇၵွၵ်ႈဢွၼ်တၢင်းပိူၼ်ႈၼၼ်ႉဢေႃႈ။-
ၶဝ်လႆႈပိူင်ႇဢဝ်ဝဵင်းဢၼ်မီးၸိုဝ်ႈဝႃႈ၊ ဢႃႇၽႃႉ၊ လႄႈ ( ဢႃႇၽႃႉ၊ ၸမ်ႉ၊ပဵၼ်ပေႃႈ ဢႃႇၼၵ်ႉ၊) ဢၼ်မိူဝ်ႈလဵဝ်ႁွင်ႉဝႃႈဝဵင်း ႁေႇပရုၼ်ႇ၊ ၵႃႈၼိူဝ်ႁၢၼ်ႉလွႆ ယုတႃႉ၊ ဢိၵ်ႇပႃးတင်းလိၼ်ပၢင်ႇယိူဝ်ႈလဵပ်ႈႁွပ်ႈဝဵင်းၼၼ်ႉဢေႃႈ။-
ၵူၺ်းၵႃႈ၊ႁႆႈၼႃးမၼ်းလႂ်၊ဝၢၼ်ႈမၼ်းလႂ်ၸိူဝ်းၼၼ်ႉၸိုင်၊ႁႂ်ႈ ၵႃႇလႅပ်ႉ၊ လုၵ်ႈၸၢႆး ယေႇၽုၼ်ႇၼႃႉ၊ လႆႈပိူင်ႇဢဝ်ဢေႃႈ။
ၼွၵ်ႈသေဝဵင်း ႁေႇပရုၼ်ႇ၊ (ဢၼ်ပဵၼ်ဝဵင်းပုၼ်ႈတၵ်းပၢႆႈသွၼ်ႈ) ဝဵင်းၸိူဝ်းဢၼ်လုၵ်ႈလၢၼ်ၸိူဝ်ႉၶိူဝ်း ဢႃႇရုၼ်ႇ၊ လႆႈပိူင်ႇဢဝ်တင်းလၢႆၸမ်ႉ၊ပဵၼ်ဝဵင်း လိပၼႃႉ၊-
ၵႃႈၼႂ်းသိုင်ႇတိူင်းမိူင်း ပိၼ်ႇယႃႇမိၼ်ႇ၊ ၸမ်ႉ၊ၶဝ်ဢဝ်ပၼ်ဝဵင်းသီႇဝဵင်းဢၼ်ဝႃႈ၊ဝဵင်း ၵိပွင်ႇ၊ ဝဵင်း ၵေးပႃႉ၊-
ဝဵင်း ဢႃႇၼသုတ်ႉ၊ တင်း ဝဵင်း ဢႃႇလမုၼ်ႇ၊ ဢိၵ်ႇပႃးတင်းလိၼ်ပၢင်ႇယိူဝ်ႈၶဝ်ၼၼ်ႉပၼ်ဢေႃႈ။-
ဝဵင်းၵႃႈဢၼ်ယဵၸ်ႈပရေႃးႁဵၵ်ႈ လုၵ်ႈလၢၼ် ဢႃႇရုၼ်ႇ၊ ၸိူဝ်းၼၼ်ႉလႆႈပိူင်ႇဢဝ်တင်းသဵင်ႈတင်းလူင်ၼၼ်ႉၸမ်ႉ၊မီးသိပ်းသၢမ်ဝဵင်းလူၺ်ႈၵၼ်တင်းလိၼ်ပၢင်ႇယိူဝ်ႈဢၼ်လဵပ်ႈႁွပ်ႈၶဝ်ၼၼ်ႉဢေႃႈ။
ၵႃႈၼႂ်းၸိူဝ်ႉၶိူဝ်း လေႇဝိ၊ ဢၼ်ပဵၼ်ၶိူဝ်းႁိူၼ်း ၵေႃႇႁတ်ႉ၊ ၸိူဝ်းဢၼ်ယင်းၵိုတ်းယင်းၵျၢၼ်ႇၼၼ်ႉတၢင်းဢၼ်တူၵ်းၸႃႇၵွၵ်ႈၶဝ်တူၵ်းၵႃႈၼႂ်းသိုင်ႇတိူင်းမိူင်း ဢေႇၽရိမ်ႇ၊ ဢေႃႈ။-
ဝဵင်းသီႇဝဵင်းဢၼ်ၽႄမႅင်ႇပၼ်ၶဝ်ၼၼ်ႉၸမ်ႉ၊ပဵၼ်ဝဵင်း သေးၶိမ်ႇ၊ ဢိၵ်ႇတင်းလိၼ်ပၢင်ႇယိူဝ်ႈမၼ်းၵႃႈၼိူဝ်ႁၢၼ်ႉလွႆ ဢေႇၽရိမ်ႇ၊ ဢၼ်ပဵၼ်ဝဵင်းပုၼ်ႈတၵ်းပၢႆႈသွၼ်ႈ၊ဝဵင်း ၵေႇၸႃႇ၊-
ဝဵင်း ၵိပၸိမ်ႇ၊ တင်းဝဵင်း ပႅတ်ႉႁေႃႇရုၼ်ႇ၊ လူၺ်ႈၵၼ်တင်းလိၼ်ပၢင်ႇယိူဝ်ႈၶဝ်ဢေႃႈ။-
ၵႃႈၼႂ်းသိုင်ႇတိူင်းမိူင်း တၢၼ်ႇ၊ ၵေႃႈဝဵင်းသီႇဝဵင်းဢၼ်ၽႄမႅင်ႇပၼ်ၶဝ်ၼၼ်ႉၸမ်ႉ၊ပဵၼ်ဝဵင်း ဢေႇလတေးၵႃႉ၊ ဝဵင်း ၵိပ်ႉပိသုၼ်ႇ၊-
ဝဵင်း ဢႃႇၸလုၼ်ႇ၊ တင်းဝဵင်း ၵႃႇသႃႇရိမ်ႇမုၼ်ႇ၊ လူၺ်ႈၵၼ်တင်းလိၼ်ပၢင်ႇယိူဝ်ႈၶဝ်ဢေႃႈ။-
ၵႃႈၼႂ်းသိုင်ႇတိူင်းမိူင်း မၼႃႇသေႇ၊ ၽၢႆႇဝၼ်းတူၵ်းၵေႃႈဝဵင်းသွင်ဝဵင်းဢၼ်ၽႄမႅင်ႇပၼ်ၶဝ်ၼၼ်ႉၸမ်ႉ၊ပဵၼ်ဝဵင်း တႃႇၼၵ်ႉ၊ တင်းဝဵင်း ၵႃႇသႃႇရိမ်ႇမုၼ်ႇ၊ လူၺ်ႈၵၼ်တင်းလိၼ်ပၢင်ႇယိူဝ်ႈၶဝ်ဢေႃႈ။-
ဝဵင်းၸိူဝ်းဢၼ်ၵႃႈၼႂ်းၸိူဝ်ႉၶိူဝ်းၶဝ်ဢၼ်ပဵၼ်ၶိူဝ်းႁိူၼ်း ၵေႃႇႁတ်ႉ၊ လႆႈပိူင်ႇဢဝ်ၼၼ်ႉမီးသိပ်းဝဵင်းဢိၵ်ႇတင်းတီႈလိၼ်ဢၼ်မီးပၢင်ႇယိူဝ်ႈၼၼ်ႉဢေႃႈ။
ၶိူဝ်းႁိူၼ်း ဢေႃႇရသုၼ်ႇ၊ ဢၼ်ၶဝ်ႈပႃးၼႂ်းၸိူဝ်ႉၶိူဝ်း လေႇဝိ၊ ၼၼ်ႉၵေႃႈလႆႈပိူင်ႇဢဝ်ဝဵင်းသွင်ဝဵင်းၵႃႈၼႂ်းသိုင်ႇတိူင်းမိူင်း မၼႃႇသေႇ၊ ၽၢႆႇဝၼ်းဢွၵ်ႇၼၼ်ႉၸမ်ႉ၊ပဵၼ်ဝဵင်း ၵေႃႇလၼ်ႇ၊ ၵႃႈၼႂ်းမိူင်း ပႃႇသၢၼ်ႇ၊ ဢၼ်ပဵၼ်ဝဵင်းပုၼ်ႈတၵ်းပၢႆႈသွၼ်ႈ၊ဢိၵ်ႇတင်းဝဵင်း ပေႇသႃႉတေႇရႃႉ၊ လူၺ်ႈၵၼ်တင်းလိၼ်ပၢင်ႇယိူဝ်ႈၶဝ်ဢေႃႈ။-
ၵႃႈၼႂ်းသိုင်ႇတိူင်းမိူင်း ဢိသၶႃႇ၊ ၵေႃႈဝဵင်းသီႇဝဵင်းဢၼ်ၶဝ်လႆႈပိူင်ႇဢဝ်ၸမ်ႉ၊ပဵၼ်ဝဵင်း ၵိသုၼ်ႇ၊ ဝဵင်း တႃႇပရေႇ၊-
ဝဵင်း ယႃႇမုတ်ႉ၊ တင်းဝဵင်း ဢိၼ်ႇၵၼ်ႇၼိမ်ႇ၊ လူၺ်ႈၵၼ်တင်းလိၼ်ပၢင်ႇယိူဝ်ႈၶဝ်ၼၼ်ႉဢေႃႈ။-
ၵႃႈၼႂ်းသိုင်ႇတိူင်းမိူင်း ဢႃႇသျႃႇ၊ ၵေႃႈဝဵင်းသီႇဝဵင်းဢၼ်ၶဝ်လႆႈပိူင်ႇဢဝ်ၸမ်ႉ၊ပဵၼ်ဝဵင်း မိသလႃႇ၊ ဝဵင်း ဢႃႇပတုၼ်ႇ၊-
ဝဵင်း ႁေႇလၵတ်ႉ၊ တင်းဝဵင်း ရေးႁွပ်ႉ၊ ဢိၵ်ႇတင်းတီႈလိၼ်ဢၼ်မီးပၢင်ႇယိူဝ်ႈၶဝ်ၼၼ်ႉဢေႃႈ။-
ၵႃႈၼႂ်းသိုင်ႇတိူင်းမိူင်း ၼပ်ႉထလိ၊ ၵေႃႈဝဵင်းသၢမ်ဝဵင်းဢၼ်ၶဝ်လႆႈပိူင်ႇဢဝ်ၸမ်ႉ၊ပဵၼ်ဝဵင်း ၵေႇတေးသႃႉ၊ ၵႃႈၼႂ်းမိူင်း ၵႃႇလိလႄး၊ ဢိၵ်ႇတင်းပၢင်ႇယိူဝ်ႈမၼ်းဢၼ်ပဵၼ်ဝဵင်းပုၼ်ႈတၵ်းပၢႆႈသွၼ်ႈ၊ဝဵင်း ႁမ်ႇမုတ်ႉ၊ တင်းဝဵင်း ၵႃႇတၼ်ႇ၊ ဢိၵ်ႇတင်းတီႈလိၼ်ဢၼ်မီးပၢင်ႇယိူဝ်ႈၶဝ်ၼၼ်ႉဢေႃႈ။-
ၶိူဝ်းႁိူၼ်း ၵေႇရသုၼ်ႇ၊ ၵူႈမဵဝ်းမဵဝ်းၼၼ်ႉလႆႈပိူင်ႇဢဝ်သိပ်းသၢမ်ဝဵင်းဢိၵ်ႇတင်းတီႈလိၼ်ဢၼ်မီးပၢင်ႇယိူဝ်ႈၶဝ်ၼၼ်ႉဢေႃႈ။
ၶိူဝ်းႁိူၼ်း မေႇရႃႇရိ၊ ၵႃႈၼႂ်းၸိူဝ်ႉၶိူဝ်း လေႇဝိ၊ ဢၼ်ၵိုတ်းဢၼ်ၵျၢၼ်ႇလႆႈပိူင်ႇဢဝ်ဝဵင်းသီႇဝဵင်းၵႃႈၼႂ်းသိုင်ႇတိူင်းမိူင်း ၸေႇပုလုၼ်ႇ၊ ၸမ်ႉ၊ပဵၼ်ဝဵင်း ယေႃးၵၼမ်ႇ၊ ဝဵင်း ၵႃႇတႃႉ၊-
ဝဵင်း တိမ်းၼႃႉ၊ တင်းဝဵင်း ၼႁႃႇလႃႇလႃႉ၊ ဢိၵ်ႇတင်းတီႈလိၼ်ဢၼ်မီးပၢင်ႇယိူဝ်ႈၶဝ်ၼၼ်ႉဢေႃႈ။-
ၵႃႈၼႂ်းသိုင်ႇတိူင်းမိူင်း ရုပိၼ်ႇ၊ ၵေႃႈဝဵင်းသီႇဝဵင်းဢၼ်ၶဝ်လႆႈပိူင်ႇဢဝ်ၸမ်ႉ၊ပဵၼ်ဝဵင်း ပေႇၸႃႇ၊ ဝဵင်း ယႃႇႁတ်ႉ၊-
ဝဵင်း ၵေႇတမုတ်ႉ၊ တင်းဝဵင်း မေႇၽတ်ႉ၊ ဢိၵ်ႇတင်းတီႈလိၼ်ဢၼ်မီးပၢင်ႇယိူဝ်ႈၶဝ်ၼၼ်ႉဢေႃႈ။-
ၵႃႈၼႂ်းသိုင်ႇတိူင်းမိူင်း ၵၢတ်ႉ၊ ၵေႃႈဝဵင်းသီႇဝဵင်းဢၼ်ၶဝ်လႆႈပိူင်ႇဢဝ်ၸမ်ႉ၊ပဵၼ်ဝဵင်း ရႃႇမုတ်ႉ၊ ၵႃႈၼႂ်းမိူင်း ၵိလတ်ႉ၊ ဢိၵ်ႇတင်းတီႈလိၼ်ပၢင်ႇယိူဝ်ႈမၼ်းဢၼ်ပဵၼ်ဝဵင်းပုၼ်ႈတၵ်းပၢႆႈသွၼ်ႈ၊ဝဵင်း မႁႃႇၼိမ်ႇ၊-
ဝဵင်း ႁေႇသၽုၼ်ႇ၊ တင်းဝဵင်း ယႃႇၸႃႇ၊ ဢိၵ်ႇတင်းတီႈလိၼ်ဢၼ်မီးပၢင်ႇယိူဝ်ႈၶဝ်ၼၼ်ႉဢေႃႈ။-
ပိူဝ်ႈၼႆလႄႈၶိူဝ်းႁိူၼ်း မေႇရႃႇရိ၊ လႆႈပိူင်ႇဢဝ်ဝဵင်းသိပ်းသွင်ဝဵင်းဢိၵ်ႇတင်းတီႈလိၼ်ဢၼ်မီးပၢင်ႇယိူဝ်ႈၶဝ်ၼၼ်ႉဢေႃႈ။
ၼင်ႇၼၼ်လႄႈ ထႃႇဝရႃႉၽြႃး၊ ဢဝ်မိူင်းၵႃႈဢၼ်မၼ်းၸဝ်ႈတိူင်ႇၵတိဝႃႈဝႆႉတီႈပူႇမွၼ်ႇၵူၼ်းမဵဝ်း ဢိသရေး၊ တင်းလၢႆလႄႈၶဝ်ၵေႃႈသိမ်းဢဝ်သေယဝ်ႉ၊ယူႇသဝ်းၵႃႈၼႂ်းမၼ်းဢေႃႈ။-
ထႃႇဝရႃႉၽြႃး၊ ပၼ်ႁႂ်ႈသိုၵ်းထၢတ်ႇယဵၼ်လႄႈလႆႈယူႇၼိမ်ၼိမ်လီလီၸွမ်းၵႃႈၼင်ႇဢၼ်မၼ်းၸဝ်ႈတိူင်ႇဝႃႈၵတိဝႆႉၵႃႈတီႈပူႇမွၼ်ႇၶဝ်တင်းလၢႆၼၼ်ႉဢေႃႈ။ ၵွပ်ႈပိူဝ်ႈ ထႃႇဝရႃႉၽြႃး၊ ပၼ်ဢၶႂၢင်ႉဢၼ်ၵူၼ်းမဵဝ်း ဢိသရေး၊ တင်းလၢႆလႆႈပႄႉသိုၵ်းၼၼ်ႉလႄႈရၢၼ်ႇသူႇၶဝ်ဢမ်ႇၸုၵ်းဢမ်ႇၶၢမ်ႇၶဝ်လႆႈသေၵေႃႉသေၵူၼ်း။-
ထႃႇဝရႃႉၽြႃး၊ ႁဵတ်းႁႂ်ႈၵတိၵႃႈဢၼ်မၼ်းၸဝ်ႈတိူင်ႇဝႃႈဝႆႉတင်းသဵင်ႈတင်းမူတ်းတီႈၵူၼ်းမဵဝ်း ဢိသရေး၊ ၼၼ်ႉပဵၼ်ၸွမ်းၵူႈၸိူဝ်ႉၵူႈမဵဝ်းဢေႃႈ။
မိူဝ်ႈၼၼ်ႉ၊ ယေႃးသု၊ ႁွင်ႉဢဝ်ၸိူဝ်ႉၶိူဝ်း ရုပိၼ်ႇ၊ ၸိူဝ်ႉၶိူဝ်း ၵၢတ်ႉ၊ တင်းၸိူဝ်ႉၶိူဝ်း မၼႃႇသေႇ၊ ၶိုင်ႈၼိုင်ႈၸိူဝ်းၼၼ်ႉမႃးလႄႈသင်ႇလၢတ်ႈတီႈၶဝ်လႄႈဝႃႈ၊-
“သူႁဵတ်းၸွမ်းၵႃႈဢၼ် မူဝ်းသေႇ၊ ၶႃႈ ထႃႇဝရႃႉၽြႃး၊ သင်ႇလၢတ်ႈဝႆႉတီႈသူၼၼ်ႉၵူႈၸိူဝ်ႉၵူႈပိူင်၊ဢိၵ်ႇတင်းထွမ်ႇဢဝ်ၵႂၢမ်းၵႃႈဢၼ်ၵဝ်သင်ႇလၢတ်ႈဝႆႉတင်းသဵင်ႈတင်းလူင်ၼၼ်ႉယဝ်ႉ။-
သူယင်းဢမ်ႇၸုၼ်ႉဢမ်ႇပႅတ်ႈပီႈၼွင်ႉၸိူဝ်ႉၶိူဝ်းမဵဝ်း ဢိသရေး၊ သူၼႂ်းၸူဝ်ႈၶၢဝ်းၵႃႇလႃႉၼႆႉတင်းၶိင်ႇယဝ်ႉ။ သူပႂ်ႉၸွမ်းၵႃႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူသင်ႇလၢတ်ႈဝႆႉၼၼ်ႉယဝ်ႉ။-
ၵမ်းၼႆႉၸမ်ႉ၊ၸွမ်းၵႃႈၼင်ႇဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဝႆႉၵတိတိူင်ႇဝႃႈဝႆႉၼၼ်ႉ၊မၼ်းၸဝ်ႈပၼ်ႁႂ်ႈပီႈၼွင်ႉၸိူဝ်ႉၶိူဝ်းမဵဝ်း ဢိသရေး၊ သူလႆႈယူႇၼိမ်ၼိမ်လီလီယဝ်ႉ။ ပိူဝ်ႈၼႆလႄႈသူဢွၼ်ၵၼ်ၶိုၼ်းပွၵ်ႈမိူဝ်းႁိူၼ်းသူလႄႈၵႂႃႇၸူးတီႈမိူင်းဢၼ်သူယွၼ်းႁႂ်ႈလႆႈပိူင်ႇဢဝ်၊မိူင်းဢၼ်မီးၽၢႆႇတၢင်းဝၼ်းဢွၵ်ႇၼမ်ႉ ယေႃးတၢၼ်ႇ၊ ဢၼ် မူဝ်းသေႇ၊ ၶႃႈ ထႃႇဝရႃႉၽြႃး၊ ပၼ်သူပုၼ်ႉတႃႉ။-
ၵႆႉၶတ်းၸႂ်လႄႈဢွၼ်ၵၼ်ႁဵတ်းသတိႁႂ်ႈလႆႈၵမ်ၵျၢင်ႉပိင်းၺၢပ်ႈတြႃးဢိၵ်ႇတင်းထုင်းတြႃးဢၼ် မူဝ်းသေႇ၊ ၶႃႈ ထႃႇဝရႃႉၽြႃး၊ သင်ႇလၢတ်ႈဝႆႉတီႈသူၼၼ်ႉတႃႉ။ ပႃးတင်းႁူဝ်ၸႂ်သဵင်ႈသဵင်ႈႁၵ်ႉ ထႃႇဝရႃႉၽြႃး၊ ၽြႃးပဵၼ်ၸဝ်ႈသူယူႇ၊ၵမ်ၵျၢင်ႉၸွမ်းဢလူဝ်ႇမၼ်းၸဝ်ႈယူႇ၊ပႂ်ႉၵမ်ပႂ်ႉၸွမ်းပိင်းၺၢပ်ႈတြႃးမၼ်းၸဝ်ႈယူႇ၊ပႂ်ႉသဵတ်ႈၸႃႇတီႈမၼ်းၸဝ်ႈယူႇလႄႈပွင်ႁဵတ်းဢမုမၼ်းၸဝ်ႈယူႇတႃႉ၊” ဝႃႈၼင်ႇၼႆဢေႃႈ။-
ယေႃးသု၊ ၵေႃႈပၼ်တၢင်းလီတီႈၶဝ်ယဝ်ႉၸင်ႇပွႆႇၶဝ်ပွၵ်ႈမိူဝ်းၵႂႃႇဢေႃႈ။ ၶဝ်ၵေႃႈဢွၼ်ၵၼ်ဢွၵ်ႇလႄႈၶိုၼ်းပွၵ်ႈမိူဝ်းၸူးႁိူၼ်းၶဝ်သေဢေႃႈ။
ၸိူဝ်ႉၶိူဝ်း မၼႃႇသေႇ၊ ၶိုင်ႈၼိုင်ႈၼၼ်ႉ မူဝ်းသေႇ၊ ပေႃးလႆႈဢဝ်လိၼ်ၵႃႈၼႂ်းမိူင်း ပႃႇသၢၼ်ႇ၊ ၼၼ်ႉပၼ်ဝႆႉယဝ်ႉ။ ဢၼ်ၵိုတ်းယူႇၶိုင်ႈၼိုင်ႈၸမ်ႉ၊ ယေႃးသု၊ သမ်ႉဢဝ်ပၼ်လူၺ်ႈၵၼ်တင်းပီႈၼွင်ႉၸိူဝ်ႉၶိူဝ်းၶဝ်ၽၢႆႇတၢင်းဝၼ်းတူၵ်းၼမ်ႉ ယေႃးတၢၼ်ႇ၊ ဢေႃႈ။ ယၢမ်းမိူဝ်ႈဢၼ် ယေႃးသု၊ ပွႆႇၶဝ်ၶိုၼ်းပွၵ်ႈမိူဝ်းၵႂႃႇၼၼ်ႉ ယေႃးသု၊ ပၼ်တၢင်းလီတီႈၶဝ်၊-
လႄႈလၢတ်ႈဝႃႈ၊ “ဢွၼ်ၵၼ်ပႃးဢဝ်တင်းဢုၵ်ႉၸႃႇဢၼ်မၢၵ်ႈမီးလီပဵၼ်၊တင်းတရိၵ်ႈသၢၼ်ႇ၊တင်းငိုၼ်း၊ၶမ်း၊တွင်းလိူင်၊လဵၵ်း၊ၶူဝ်းၼုင်ႈတၢင်းမႆၼမ်ၼႃႇထၼ်ႇၼႆႉၼၼ်ႉလႄႈၶိုၼ်းပွၵ်ႈမိူဝ်းၸူးႁိူၼ်းသူတႃႉ။ ဢဝ်ဢုၵ်ႉၸႃႇဢၼ်ႁိမ်လႆႈၼႂ်းမိုဝ်းရၢၼ်ႇသူႇသူမႃးၸိူဝ်းၼၼ်ႉၽႄမႅင်ႇပၼ်တီႈပီႈတီႈၼွင်ႉသူတႃႉ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈၸိူဝ်ႉၶိူဝ်း ရုပိၼ်ႇ၊ ၸိူဝ်ႉၶိူဝ်း ၵၢတ်ႉ၊ တင်းၸိူဝ်ႉၶိူဝ်း မၼႃႇသေႇ၊ ၶိုင်ႈၼိုင်ႈၸိူဝ်းၼၼ်ႉဢွၼ်ၵၼ်ၶိုၼ်းပွၵ်ႈမိူဝ်းၸူးႁိူၼ်းၶဝ်ဢေႃႈ။ ၶဝ်ၽၢတ်ႇဢွၵ်ႇသေၵူၼ်းမဵဝ်း ဢိသရေး၊ ၶဝ်ၵႃႈတီႈဝဵင်း သိလေႃႇ၊ ဢၼ်မီးၵႃႈၼႂ်းမိူင်း ၶႃႇၼၼ်ႇ၊ ၼၼ်ႉသေလႄႈမိူဝ်းၵႂႃႇၸူးဝၢၼ်ႈၶဝ်မိူင်းၶဝ်ၵႃႈၼႂ်းမိူင်း ၵိလတ်ႉ၊ လိၼ်ၶဝ်ဢၼ်လႆႈပိူင်ႇဢဝ်ၸွမ်းၵႃႈၼင်ႇဢၼ် ထႃႇဝရႃႉၽြႃး၊ ဢဝ်တင်း မူဝ်းသေႇ၊ လႄႈမီးဢမိင်ႉဝႆႉၼၼ်ႉဢေႃႈ။
မိူဝ်ႈဢၼ်ၶဝ်ႁွတ်ႈထိုင်ၵႃႈႁိမ်းၼမ်ႉ ယေႃးတၢၼ်ႇ၊ ဢၼ်ယင်းမီးယူႇၵႃႈၼႂ်းမိူင်း ၶႃႇၼၼ်ႇ၊ ယူႇၼၼ်ႉၸိုင်၊ၵူၼ်းၸိူဝ်ႉၶိူဝ်း ရုပိၼ်ႇ၊ ၸိူဝ်ႉၶိူဝ်း ၵၢတ်ႉ၊ တင်း ၵူၼ်းၸိူဝ်ႉၶိူဝ်း မၼႃႇသေႇ၊ ၶိုင်ႈၼိုင်ႈၸိူဝ်းၼၼ်ႉဢွၼ်ၵၼ်တႄႇႁဵတ်းၶဵင်ႇတၢင်းလူႇလူင်ၵႃႈႁိမ်းၼမ်ႉ ယေႃးတၢၼ်ႇ၊ ဢၼ်ၼိုင်ႈဢေႃႈ။-
မိူဝ်ႈၼၼ်ႉၵူၼ်းမဵဝ်း ဢိသရေး၊ တင်းလၢႆလႆႈငိၼ်းၶၢဝ်ႇဢၼ်လၢတ်ႈဝႃႈ၊ “ၵူၼ်းၸိူဝ်ႉၶိူဝ်း ရုပိၼ်ႇ၊ ၸိူဝ်ႉၶိူဝ်း ၵၢတ်ႉ၊ တင်းၵူၼ်းၸိူဝ်ႉၶိူဝ်း မၼႃႇသေႇ၊ ၶိုင်ႈၼိုင်ႈၸိူဝ်းၼၼ်ႉဢွၼ်ၵၼ်တႄႇႁဵတ်းၶဵင်ႇတၢင်းလူႇၵႃႈၼႂ်းမိူင်း ၶႃႇၼၼ်ႇ၊ ဢၼ်ပဵၼ်လိၼ်ၵူၼ်းမဵဝ်း ဢိသရေး၊ တင်းလၢႆပိူင်ႇၵႃႈတီႈႁိမ်းၼမ်ႉ ယေႃးတၢၼ်ႇ၊ ၼၼ်ႉယဝ်ႉ၊” ဝႃႈၼင်ႇၼႆဢေႃႈ။-
ၵူၼ်းမဵဝ်း ဢိသရေး၊ တင်းလၢႆလႆႈငိၼ်းသေယဝ်ႉ၊ပရိၵ်ႈသၢတ်ႈၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ၸုတုမ်ၵၼ်မႃးၵႃႈတီႈဝဵင်း သိလေႃႇ၊ ႁႂ်ႈလႆႈၶီႇသိုၵ်းၸူးၶဝ်ဢေႃႈ။
မိူဝ်ႈၼၼ်ႉၵူၼ်းမဵဝ်း ဢိသရေး၊ တင်းလၢႆပွႆႇၸႂ်ႉယဵၸ်ႈပရေႃးႁဵၵ်ႈ ၽိၼႁတ်ႉ၊ လုၵ်ႈၸၢႆး ဢေးလႃႇၸႃႇ၊ ၵႂႃႇၸူးၵူၼ်းၸိူဝ်ႉၶိူဝ်း ရုပိၼ်ႇ၊ ၸိူဝ်ႉၶိူဝ်း ၵၢတ်ႉ၊ တင်းၵူၼ်းၸိူဝ်ႉၶိူဝ်း မၼႃႇသေႇ၊ ၶိုင်ႈၼိုင်ႈၼၼ်ႉၵႃႈၼႂ်းမိူင်း ၵိလတ်ႉ၊ ပုၼ်ႉဢေႃႈ။-
ၵူၼ်းဢွၼ်ႁူဝ်သိပ်းၵေႃႉဢၼ်တၢင်တူဝ်ၸိူဝ်ႉၶိူဝ်းယေႈမဵဝ်းယေႈၵေႃႉၼၼ်ႉၵေႃႈ ၵႂႃႇၸွမ်းယဵၸ်ႈပရေႃးႁဵၵ်ႈ ၽိၼႁတ်ႉ၊ ဢေႃႈ။-
ၶဝ်ႁွတ်ႈထိုင်ၵႂႃႇၵႃႈတီႈၵူၼ်းၸိူဝ်ႉၶိူဝ်း ရုပိၼ်ႇ၊ ၸိူဝ်ႉၶိူဝ်း ၵၢတ်ႉ၊ တင်း ၵူၼ်းၸိူဝ်ႉၶိူဝ်း မၼႃႇသေႇ၊ ၶိုင်ႈၼိုင်ႈၸိူဝ်းၼၼ်ႉၵႃႈတီႈမိူင်း ၵိလတ်ႉ၊ သေယဝ်ႉ၊-
တၢင်တူဝ်ပရိၵ်ႈသၢတ်ႈၵူၼ်း ထႃႇဝရႃႉၽြႃး၊ တင်းသဵင်ႈတင်းလူင်သေလႄႈလၢတ်ႈဝႃႈ၊ “ၵွပ်ႈသင်လႄႈသူႁဵတ်းတၢင်းၽိတ်းဢၼ်ၶတ်းၵၼ်တင်းၽြႃးပဵၼ်ၸဝ်ႈမဵဝ်း ဢိသရေး၊ ၼႆႉၸိူဝ်ႉၼင်ႇႁိုဝ်။ သူတႄႇႁဵတ်းၶဵင်ႇတၢင်းလူႇပုၼ်ႈတူဝ်ၸဝ်ႈၵဝ်ႇသေလႄႈလုၵ်ႉၽိုၼ်ႉ ထႃႇဝရႃႉၽြႃး၊ ႁိုဝ်း။ သူဢမ်ႇၸွမ်းလင်မၼ်းၸဝ်ႈလႃးလႃးလႄႈယူႇလူင်ပႄႇ။-
ၶုၵ်းၸႂ်လႆႈဢပျတ်ႈဢၼ်ႁဝ်းႁဵတ်းၵႃႈတီႈဝဵင်း ပေႇဢုရႃႉ၊ မိူဝ်ႈဢၼ် ထႃႇဝရႃႉၽြႃး၊ ဢဝ်ၽေးလူင်ပၼ်တၢမ်ႇတီႈၵူၼ်းမၼ်းၸဝ်ႈၼၼ်ႉလူး။ ႁဝ်းယင်းလႆႈၶၢမ်ႇတုၵ်ႉၶႃႉၵွပ်ႈပိူဝ်ႈဢပျတ်ႈၼၼ်ႉဢမ်ႇပႆႇပေႃးၵုမ်ႇပုၼ်ႈႁဝ်းႁိုဝ်း။-
သူဢၢင်ႈတၵ်းပႄႇပႅတ်ႈတၢင်းဢၼ်ပႆၸွမ်းမၼ်းၸဝ်ႈဝၼ်းမိူဝ်ႈၼႆႉႁိုဝ်း။ ပေႃးသူလုၵ်ႉၽိုၼ်ႉ ထႃႇဝရႃႉၽြႃး၊ ဝၼ်းမိူဝ်ႈၼႆႉၸိုင်၊ဝၼ်းမိူဝ်ႈၽုၵ်ႈမၼ်းၸဝ်ႈတၵ်းဢွၵ်ႇတေႃးသႃႉတေႃႇၵူၼ်းမဵဝ်း ဢိသရေး၊ ၵူႈၵေႃႉၵူႈၵူၼ်းဢေႃႈ။-
ပေႃးဝႃႈမိူင်းသူၼၼ်ႉၵူဝ်ႈၵိူၵ်ႇလႄႈဢမ်ႇၵိုင်ႇၵၼ်တင်းတၢင်းဢၼ်ဝႆႈ ထႃႇဝရႃႉၽြႃး၊ ၸိုင်၊ၶၢမ်ႈမႃးၵႃႈၼႂ်းလိၼ်ဢၼ် ထႃႇဝရႃႉၽြႃး၊ ပိူင်ႇလႄႈမီးသုမ်ႉထဵင်ၸဝ်ႈၼၼ်ႉသေယဝ်ႉ၊ယွၼ်းဢဝ်လိၼ်ၵႃႈၼႂ်းႁဝ်းၼႆႉတႃႉ။ ယႃႇပေႁဵတ်းတၢင်းဢၼ်တႄႇတင်ႈၶဵင်ႇတၢင်းလူႇထႅင်ႈ၊ၼွၵ်ႈသေၶဵင်ႇတၢင်းလူႇ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၼၼ်ႉလႄႈ၊ယႃႇပေလုၵ်ႉၽိုၼ်ႉ ထႃႇဝရႃႉၽြႃး၊ ယႃႇပေလုၵ်ႉၽိုၼ်ႉႁဝ်းသေၵမ်း။-
ၶုၵ်းၸႂ်လႆႈလွင်ႈဢၼ် ဢႃႇၶၼ်ႇ၊ လုၵ်ႈၸၢႆး ၸေးရႃႉ၊ ၽိတ်းပိူင်ႈလူၺ်ႈလွင်ႈတၢင်းဢၼ်ထုၵ်ႇၵိၼ်ႇဝႃႈၼၼ်ႉလႄႈတၢင်းဢၼ်ၸႂ်မႆႈၶႂ်ႈၸႃႉၸဝ်ႈတူၵ်းႁွတ်ႈၵႃႈၼိူဝ်ပရိၵ်ႈသၢတ်ႈၵူၼ်း ဢိသရေး၊ တင်းသဵင်ႈတင်းလူင်ဢမ်ႇၸႂ်ႈႁိုဝ်း။ ဢႃႇၶၼ်ႇ၊ လႆႈတၢႆၵွပ်ႈပိူဝ်ႈဢပျတ်ႈၼၼ်ႉၵေႃႉလဵဝ်ၵူၺ်းမၼ်းဢမ်ႇၸႂ်ႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၵူၼ်းၸိူဝ်ႉၶိူဝ်း ရုပိၼ်ႇ၊ ၸိူဝ်ႉၶိူဝ်း ၵၢတ်ႉ၊ တင်းၵူၼ်းၸိူဝ်ႉၶိူဝ်း မၼႃႇသေႇ၊ ၶိုင်ႈၼိုင်ႈၸိူဝ်းၼၼ်ႉဢွၼ်ၵၼ်ၶိုၼ်းလၢတ်ႈတီႈၶုၼ်ၸိူဝ်းဢၼ်တၢင်တူဝ်ၸိူဝ်ႉၶိူဝ်းၽၢႆႇတၢင်းဝၼ်းတူၵ်းတင်းလၢႆၼၼ်ႉလႄႈဝႃႈ၊-
“ ထႃႇဝရႃႉၽြႃး၊ ၽြႃးပဵၼ်ၸဝ်ႈၼိူဝ်ၽြႃးတင်းလၢႆ၊ ထႃႇဝရႃႉၽြႃး၊ ၽြႃးပဵၼ်ၸဝ်ႈၼိူဝ်ၽြႃးတင်းလၢႆၼၼ်ႉမၼ်းၸဝ်ႈႁုလွင်ႈတၢင်းမၼ်းဢေႃႈ။ ၵူၼ်း ဢိသရေး၊ ၵေႃႈႁႂ်ႈႁုသေၵမ်းတႃႉ။ ပေႃးႁဝ်းလုၵ်ႉၽိုၼ်ႉလႄႈဢမ်ႇပႂ်ႉသဵတ်ႈၸႃႇတီႈ ထႃႇဝရႃႉၽြႃး၊ ၸိုင်၊ယႃႇပေႁႂ်ႈႁဝ်းလႆႈဢၶႂၢင်ႉဢၼ်ဢသၢၵ်ႈလိပ်းယူႇသေၵမ်းလူၺ်ႈ။-
ပေႃးႁဝ်းၼႆႉဢမ်ႇထွမ်ႇဢမ်ႇဢဝ် ထႃႇဝရႃႉၽြႃး၊ လႄႈဢၢင်ႈတၵ်းတႄႇႁဵတ်းၶဵင်ႇတၢင်းလူႇပုၼ်ႈတူဝ်ၸဝ်ႈၵဝ်ႇႁႂ်ႈလႆႈသၢၵ်ႈလူႇၶိူင်ႈတၢင်းလူႇဢၼ်တုတ်ႇၽႆးလႂ်၊သၢၵ်ႈလူႇတၢင်းလူႇမၢၵ်ႇၶဝ်ႈႁူင်းၶဝ်ႈလႂ်၊သၢၵ်ႈလူႇၶိူင်ႈတၢင်းလူႇမိၵ်ႈသႁႃႇယႃႉလႂ်ၸိုင်၊ႁႂ်ႈ ထႃႇဝရႃႉၽြႃး၊ ၸီႇယၢင်ႇပၼ်တၢမ်ႇတီႈႁဝ်းၼႆႉသေၵမ်းလူၺ်ႈ။-
ႁဝ်းၼႆႉဢၢင်ႈတၵ်းႁဵတ်းၸိူဝ်ႉၼင်ႇၼႆဢမ်ႇၸႂ်ႈ။ ဝၼ်း လိုၼ်းမိူဝ်းၼႃႈမႃးၵူဝ်လုၵ်ႈသူလၢၼ်သူတၵ်းလၢတ်ႈတီႈလုၵ်ႈႁဝ်းလၢၼ်ႁဝ်းလႄႈဝႃႈ၊ ‘သူၸၢပ်ႈသႅင်ႇၵၼ်တင်း ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ ၸိူဝ်ႉၼင်ႇႁိုဝ်။-
ထႃႇဝရႃႉၽြႃး၊ ဢဝ်ၼမ်ႉ ယေႃးတၢၼ်ႇ၊ လႄႈႁဵတ်းဢၼ်ၶၼ်ႈဢၼ်ၶႅၼ်ႈတီႈဝူင်ႈၵၢင်ႁဝ်းတင်းသူၵူၼ်းမဵဝ်း ရုပိၼ်ႇ၊ တင်းမဵဝ်း ၵၢတ်ႉ၊ ၼၼ်ႉဝႆႉယဝ်ႉ။ သူဢမ်ႇၸၢပ်ႈသႅင်ႇၵၼ်တင်း ထႃႇဝရႃႉၽြႃး၊ လႃးလႃး၊’ ဝႃႈၼႆသေယဝ်ႉ၊ႁဝ်းၼႆႉၵူဝ်လုၵ်ႈသူလၢၼ်သူတၵ်းဢမ်ႇႁႂ်ႈလုၵ်ႈႁဝ်းလၢၼ်ႁဝ်းဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ဢေႃႈ။-
ပိူဝ်ႈၼႆလႄႈႁဝ်းဢွၼ်ၵၼ်တႄႇႁဵတ်းၶဵင်ႇတၢင်းလူႇပုၼ်ႈတၵ်းသၢၵ်ႈလူႇၶိူင်ႈတၢင်းလူႇဢၼ်တုတ်ႇၽႆးလႂ်၊ဢိၵ်ႇတင်းၶိူင်ႈတၢင်းလူႇတၢင်ႇၸိူဝ်ႉတၢင်ႇမဵဝ်းလႂ်ဢမ်ႇၸႂ်ႈ။-
ၶဵင်ႇတၢင်းလူႇၼႆႉႁႂ်ႈပဵၼ်သၢၵ်ႈသေႇၵႃႈတီႈဝူင်ႈၵၢင်ႁဝ်းတင်းသူ၊ဝူင်ႈၵၢင်လုၵ်ႈႁဝ်းလၢၼ်ႁဝ်းတင်းလုၵ်ႈသူလၢၼ်သူလွင်ႈဢၼ်ႁဝ်းလႆႈဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၵႃႈတီႈၽၢႆႇၼႃႈသုမ်ႉထဵင်ၸဝ်ႈဢၼ်မူတ်းၸၢင်ႇလူၺ်ႈၶိူင်ႈတၢင်းလူႇဢၼ်တုတ်ႇၽႆးလႂ်၊တၢင်းလူႇမိၵ်ႈသႁႃႇယႃႉလႂ်၊ဢိၵ်ႇတင်းလွင်ႈဢၼ်လုၵ်ႈသူလၢၼ်သူတၵ်းဢမ်ႇလၢတ်ႈတီႈလုၵ်ႈႁဝ်းလၢၼ်ႁဝ်းၼႂ်းဝၼ်းလိုၼ်းမိူဝ်းၼႃႈလႄႈဝႃႈ၊ ‘သူဢမ်ႇၸၢပ်ႈသႅင်ႇၵၼ်တင်း ထႃႇဝရႃႉၽြႃး၊ လႃးလႃး၊’ ဝႃႈၼႆၼၼ်ႉဢေႃႈ။-
ႁဝ်းၼႆႉမီးတၢင်းၵျၢမ်ႇလႄႈဝႃႈ၊ပေႃးပဵၼ်မႃးၸိူဝ်ႉၼင်ႇၼႆတႄႉၸိုင်၊လုၵ်ႈႁဝ်းလၢၼ်ႁဝ်းၼႆႉတၵ်းၸၢင်ႈဝႃႈ၊ ‘တူၺ်းလူး။ ပူႇပေႃႈႁဝ်းၶဝ်ႁဵတ်းဝႆႉၶဵင်ႇတၢင်းလူႇဢၼ်မိူၼ်မိူၼ်ၵၼ်တင်းၶဵင်ႇတၢင်းလူႇ ထႃႇဝရႃႉၽြႃး၊ ၼၼ်ႉယူႇဢေႃႈ။ မၼ်းပဵၼ်ပုၼ်ႈဢၼ်တၵ်းသၢၵ်ႈလူႇၶိူင်ႈတၢင်းလူႇဢၼ်ၽဝ်ၽႆးလႂ်၊ဢမ်ႇၼၼ်ၶိူင်ႈတၢင်းလူႇတၢင်ႇၸိူဝ်ႉတၢင်ႇမဵဝ်းဢမ်ႇၸႂ်ႈ။ မၼ်းပဵၼ်သၢၵ်ႈသေႇၵႃႈတီႈဝူင်ႈၵၢင်ၵူၼ်းသူတင်းၵူၼ်းႁဝ်းဢေႃႈ၊’ ဝႃႈၼင်ႇၼႆဢေႃႈ။-
ႁဝ်းၼႆႉတိုၼ်းဢမ်ႇႁဵတ်းတၢင်းဢၼ်လုၵ်ႉၽိုၼ်ႉ ထႃႇဝရႃႉၽြႃး၊ တိုၼ်းဢမ်ႇဝႄႈပိူင်ႈသေတၢင်းဢၼ်ၸွမ်းလင်မၼ်းၸဝ်ႈၼႂ်းတၢင်းဢၼ်တႄႇတင်ႈၶဵင်ႇတၢင်းလူႇပုၼ်ႈဢၼ်တၵ်းၽဝ်ၶိူင်ႈတၢင်းလူႇၵႃႈၼိူဝ်မၼ်းလႂ်၊ၶိူင်ႈတၢင်းလူႇမၢၵ်ႇၶဝ်ႈႁူင်းၶဝ်ႈလႂ်၊ဢမ်ႇၼၼ်ၶိူင်ႈတၢင်းလူႇတၢင်ႇၸိူဝ်ႉတၢင်ႇမဵဝ်းလႂ်ၼၼ်ႉလႃးလႃး။ ၼွၵ်ႈသေၶဵင်ႇတၢင်းလူႇ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းဢၼ်တႄႇတင်ႈယူႇၵႃႈတီႈၽၢႆႇၼႃႈသုမ်ႉထဵင်ၸဝ်ႈလႄႈႁဝ်းတိုၼ်းဢမ်ႇတႄႇဢမ်ႇတင်ႈၶဵင်ႇတၢင်းလူႇတၢင်ႇၸိူဝ်ႉတၢင်ႇဢၼ်လႃးလႃး၊” ဝႃႈၼင်ႇၼႆဢေႃႈ။
ယဵၸ်ႈပရေႃးႁဵၵ်ႈ ၽိၼႁတ်ႉ၊ ဢိၵ်ႇတင်းၶုၼ်သိပ်းၵေႃႉၵႃႈၼႂ်းပရိၵ်ႈသၢတ်ႈမဵဝ်း ဢိသရေး၊ ၸိူဝ်းဢၼ်တၢင်တူဝ်ၸိူဝ်ႉၶိူဝ်းတင်းလၢႆၸိူဝ်းၼၼ်ႉလႆႈငိၼ်းၵႂၢမ်းဢၼ်ၵူၼ်းၸိူဝ်ႉၶိူဝ်း ရုပိၼ်ႇ၊ ၸိူဝ်ႉၶိူဝ်း ၵၢတ်ႉ၊ တင်းၵူၼ်းၸိူဝ်ႉၶိူဝ်း မၼႃႇသေႇ၊ ၶိုင်ႈၼိုင်ႈလၢတ်ႈၼၼ်ႉၸိုင်၊ပဵၼ်ဢၼ်ထုၵ်ႇၸႂ်ၵျိူၵ်ႈၸႂ်ၶဝ်ဢေႃႈ။-
ယဵၸ်ႈပရေႃးႁဵၵ်ႈ ၽိၼႁတ်ႉ၊ လုၵ်ႈၸၢႆး ဢေးလႃႇၸႃႇ၊ ၼၼ်ႉၵေႃႈလၢတ်ႈတီႈၶဝ်လႄႈဝႃႈ၊ “ဝၼ်းမိူဝ်ႈၼႆႉႁဝ်းႁုႁၼ်လွင်ႈဢၼ် ထႃႇဝရႃႉၽြႃး၊ မီးယူႇလူၺ်ႈၵၼ်တင်းႁဝ်းဢေႃႈ။ သူဢမ်ႇလုၵ်ႉၽိုၼ်ႉ၊ဢမ်ႇႁဵတ်းၶတ်းၵၼ်တင်းမၼ်းၸဝ်ႈလႄႈ၊တေႃႈလဵဝ်ၼႆႉသူၵႄႇသႄႇဢဝ်ၵူၼ်းမဵဝ်း ဢိသရေး၊ တင်းလၢႆဢွၵ်ႇသေၵႃႈၼႂ်းၽေးဢပျတ်ႈတၢမ်ႇ ထႃႇဝရႃႉၽြႃး၊ ၼၼ်ႉယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉယဵၸ်ႈပရေႃးႁဵၵ်ႈ ၽိၼႁတ်ႉ၊ တင်းၶုၼ်ၸိူဝ်းၼၼ်ႉဢွၼ်ၵၼ်ၽၢတ်ႇသေၵူၼ်းၸိူဝ်ႉၶိူဝ်း ရုပိၼ်ႇ၊ တင်းၵူၼ်းၸိူဝ်ႉၶိူဝ်း ၵၢတ်ႉ၊ ၸိူဝ်းၼၼ်ႉလႄႈဢွၵ်ႇသေၵႃႈတီႈမိူင်း ၵိလတ်ႉ၊ ၶိုၼ်းမိူဝ်းၵႂႃႇၵႃႈတီႈမိူင်း ၶႃႇၼၼ်ႇ၊ ၸူးတီႈၵူၼ်းမဵဝ်း ဢိသရေး၊ ၸိူဝ်းၼၼ်ႉလႄႈၶိုၼ်းမွၵ်ႇလၢတ်ႈၼႄၵႂၢမ်းၶဝ်ၼၼ်ႉဢေႃႈ။-
ၵူၼ်းမဵဝ်း ဢိသရေး၊ တင်းလၢႆပဵၼ်ဢၼ်ထုၵ်ႇၸႂ်ၵျိူၵ်ႈၸႂ်လႄႈဢွၼ်ၵၼ်ယွင်ႈယေႃးၵျေးၸူးၽြႃးပဵၼ်ၸဝ်ႈဢေႃႈ။ လိုၼ်းၼၼ်ႉလွင်ႈဢၼ်ဝႃႈ၊တၵ်းၶီႇသိုၵ်းၶိုၼ်ႈၵႂႃႇယႃႉပႅတ်ႈမိူင်းတီႈဢၼ်ၵူၼ်းၸိူဝ်ႉၶိူဝ်း ရုပိၼ်ႇ၊ တင်းၵူၼ်းၸိူဝ်ႉၶိူဝ်း ၵၢတ်ႉ၊ ယူႇၼၼ်ႉၸိုင်၊ၶဝ်ဢမ်ႇလၢတ်ႈထႅင်ႈသေပွၵ်ႈယဝ်ႉ။
ၵူၼ်းၸိူဝ်ႉၶိူဝ်း ရုပိၼ်ႇ၊ တင်းၵူၼ်းၸိူဝ်ႉၶိူဝ်း ၵၢတ်ႉ၊ ၶဝ်ၵေႃႈလၢတ်ႈဝႃႈ၊ “ၶဵင်ႇတၢင်းလူႇၼႆႉပဵၼ်သၢၵ်ႈသေႇဝူင်ႈၵၢင်ႁဝ်းလူၺ်ႈလွင်ႈဢၼ် ထႃႇဝရႃႉၽြႃး၊ ပဵၼ်ၽြႃးပဵၼ်ၸဝ်ႈဢေႃႈ၊” ဝႃႈၼင်ႇၼႆသေယဝ်ႉ၊ႁွင်ႉႁဵၵ်ႈၸိုဝ်ႈၶဵင်ႇတၢင်းလူႇၼၼ်ႉဝႃႈ၊ “သၢၵ်ႈသေႇ” ဢေႃႈ။
ထႃႇဝရႃႉၽြႃး၊ ပၼ်တၢင်းလီတီႈၵူၼ်းမဵဝ်း ဢိသရေး၊ တင်းလၢႆႁႂ်ႈၶဝ်လႆႈယူႇၼိမ်လီယဵၼ်လီလႄႈ၊ယူႇလူင်ႉလီလွတ်ႈလီသေၵႃႈၼႂ်းမိုဝ်းရၢၼ်ႇသူႇၶဝ်ၸိူဝ်းဢၼ်ယူႇလဵပ်ႈႁွပ်ႈႁိမ်းႁွမ်းၶဝ်ၶိင်ႇၵႃႇလႃႉႁိုင်ၼႃႇဢေႃႈ။ မိူဝ်ႈယၢမ်းၼၼ်ႉ ယေႃးသု၊ ၵေႃႈထဝ်ႈၼႃႇယဝ်ႉလႄႈ၊-
မၼ်းၸင်ႇႁွင်ႉဢဝ်ၵူၼ်းမဵဝ်း ဢိသရေး၊ တင်းသဵင်ႈတင်းမူတ်းဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၶဝ်၊ၵူၼ်းဢၼ်ၸီႇယၢင်ႇတြႃးၶဝ်တင်းၶုၼ်ဢၼ်ပွင်ၵၢၼ်တင်းလၢႆသေလႄႈလၢတ်ႈတီႈၶဝ်လႄႈဝႃႈ၊ “ၵဝ်ၼႆႉဢသၢၵ်ႈၵႄႇထဝ်ႈၼႃႇယဝ်ႉ။-
သူလႆႈႁုႁၼ်ၵႃႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူႁဵတ်းတီႈၵူၼ်းမဵဝ်းတင်းသဵင်ႈတင်းလူင်ၸိူဝ်းၼႆႉပုၼ်ႈဢၵျူဝ်းသူၼၼ်ႉယဝ်ႉ။ ထႃႇဝရႃႉၽြႃး၊ ၽြႃးပဵၼ်ၸဝ်ႈသူၼၼ်ႉၸွႆႈတိုၵ်းသိုၵ်းပုၼ်ႈသူမႃးယဝ်ႉ။-
ၵဝ်ဢဝ်ၵူၼ်းမဵဝ်းဢၼ်ယင်းၵိုတ်းယင်းၵျၢၼ်ႇဢိၵ်ႇတင်းၵူၼ်းမဵဝ်းဢၼ်ၵဝ်ပႄႉၼႅင်ႇသိမ်းဢဝ်ယဝ်ႉၸိူဝ်းၼၼ်ႉမႃးတူၵ်းၸႃႇၵွၵ်ႈၽႄမႅင်ႇပၼ်ႁႂ်ႈပဵၼ်ဢမူၺ်ႇပုၼ်ႈၸိူဝ်ႉၶိူဝ်းသူတင်းလၢႆၸႃႉဢဝ်တီႈၼမ်ႉ ယေႃးတၢၼ်ႇ၊ ၽၢႆႇတၢင်းဝၼ်းဢွၵ်ႇၵႂႃႇတေႃႇထိုင်ႁွတ်ႈပၢင်ႇလၢႆႇ မေႇတိထေးရီးယၼ်း၊ ၽၢႆႇတၢင်းဝၼ်းတူၵ်းၼၼ်ႉယဝ်ႉ။-
ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းဢီးၶဝ်သုတ်ႉႁူၼ်သေၵႃႈတီႈၽၢႆႇၼႃႈသူၵႂႃႇလႄႈတၵ်းႁေႃႈၶဝ်ဢွၵ်ႇပၢႆႈႁႂ်ႈသူထၢၼ်ႈပေႃးဢမ်ႇလႆႈႁၼ်ၶဝ်သေယဝ်ႉ၊သူတၵ်းတေလႆႈပိူင်ႇဢဝ်လိၼ်ၶဝ်မႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဝႆႉၵတိဝႆႉၼၼ်ႉဢေႃႈ။-
ပိူဝ်ႈၼႆလႄႈဢွၼ်ၵၼ်ႁဵတ်းသတိလီလီႁႂ်ႈလႆႈပႂ်ႉၸွမ်းၵမ်ၵျၢင်ႉၵႃႈဢၼ်တႅမ်ႈသႂ်ႇဝႆႉၵႃႈၼႂ်းၵျၢမ်းလိၵ်ႈပိင်းၺၢပ်ႈ မူဝ်းသေႇ၊ တၵ်းဢမ်ႇၸုၼ်ႉပႅတ်ႈတြႃးၼၼ်ႉသေဢိတ်းသေဢီႈ၊-
ဢိၵ်ႇတင်းတၵ်းတေဢမ်ႇႁဵတ်းၵေႃႉႁဵတ်းသႄႈလူၺ်ႈၵၼ်တင်းၵူၼ်းမဵဝ်းဢၼ်ယင်းၵိုတ်းယူႇၵျၢၼ်ႇယူႇၵႃႈၼႂ်းသူ၊တၵ်းတေဢမ်ႇလၢတ်ႈလွင်ႈၸိုဝ်ႈသဵင်ၽြႃးၶဝ်၊တၵ်းတေဢမ်ႇဢဝ်ၽြႃးၶဝ်ႁဵတ်းတၢင်းဢၼ်တိူင်ႇဝႃႈၵတိ၊ဢမ်ႇဝႆႈဢမ်ႇၵူမ်ႈႁူဝ်ၵွမ်းႁူဝ်ပၼ်တီႈၶဝ်ၼၼ်ႉ။-
ၵူၺ်းႁႂ်ႈမီးသဵတ်ႈၸႃႇၵႃႈတီႈ ထႃႇဝရႃႉၽြႃး၊ ယူႇမိူၼ်ၸိူဝ်ႉၼင်ႇဢၼ်သူၵမ်ၵျၢင်ႉတေႃႇထိုင်ႁွတ်ႈဝၼ်းမိူဝ်ႈၼႆႉၼၼ်ႉတႃႉ။-
ထႃႇဝရႃႉၽြႃး၊ ႁေႃႈၵူၼ်းမဵဝ်းဢၼ်ယႂ်ႇဢၼ်ႁႅင်းၼႃႇၸိူဝ်းၼၼ်ႉဢွၵ်ႇပႅတ်ႈသေၵႃႈတီႈၽၢႆႇၼႃႈသူယဝ်ႉ။ တေႃႇထိုင်ႁွတ်ႈဝၼ်းမိူဝ်ႈၼႆႉ၊ၽူႈလႂ်ဢမ်ႇၸုၵ်းဢမ်ႇၶၢမ်ႇသူလႆႈလႃးလႃး။-
သူၵေႃႉလဵဝ်ၵူၺ်းယင်းတိုၵ်းပႄႉပိူၼ်ႈႁဵင်ၼိုင်ႈ၊ၸွမ်းလူၺ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူယူႇၽၢႆႇသူလႄႈၸွႆႈတိုၵ်းသိုၵ်းပၼ်သူၸွမ်းၵႃႈၼင်ႇဢၼ်မၼ်းၸဝ်ႈဝႆႉၵတိၼၼ်ႉယဝ်ႉ။-
ပိူဝ်ႈၼႆလႄႈဢွၼ်ၵၼ်ႁဵတ်းသတိလီလီႁႂ်ႈလႆႈႁၵ်ႉ ထႃႇဝရႃႉၽြႃး၊ ၽြႃးပဵၼ်ၸဝ်ႈသူယူႇတႃႉ။-
ပေႃးသူယႃႉသဵတ်ႈၸႃႇလႄႈၵႂႃႇသိူၵ်ႈသမ်ႇၵၼ်တင်းၵူၼ်းမဵဝ်းဢၼ်ယင်းၵိုတ်းယူႇၵျၢၼ်ႇယူႇၵႃႈၼႂ်းသူသေလႄႈသွင်ႇမၢင်ႇၵလႃႇဢဝ်ၵၼ်တင်းၶဝ်၊ၶဝ်ႈဢွၵ်ႇၵႃႈၼႂ်းၶဝ်၊ၶဝ်ၵေႃႈၶဝ်ႈဢွၵ်ႇၵႃႈၼႂ်းသူယူႇၸိုင်၊-
ဢွၼ်ၵၼ်ႁုမၢတ်ႈလွင်ႈဢၼ်ဝၼ်းလိုၼ်းမိူဝ်းၼႃႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းတေဢမ်ႇႁေႃႈၵူၼ်းမဵဝ်းၸိူဝ်းၼႆႉဢွၵ်ႇပႅတ်ႈသေၵႃႈတီႈသူၵူၺ်းဢမ်ႇၵႃး၊ယင်းတၵ်းပဵၼ်ၽေးတီႈသူမိူၼ်ၸိူဝ်ႉၼင်ႇတူင်ႇႁႅဝ်ႉတူင်ႇၶိုမ်း၊မိူၼ်ၸိူဝ်ႉၼင်ႇႁူးၶုမ်၊မိူၼ်ၸိူဝ်ႉၼင်ႇၶွၼ်ႉဢၼ်တူၵ်းတီႈပႄလင်သူၸဵပ်းၼႃႇ၊ဢမ်ႇၼၼ်မိူၼ်ၸိူဝ်ႉၼင်ႇၼၢမ်ၶမ်ၼႂ်းမၢၵ်ႇတႃသူၼၼ်ႉဢေႃႈ။ ဢၼ်ၸိူဝ်းၼႆႉတၵ်းပဵၼ်တေႃႇထိုင်ႁွတ်ႈသူထၢၼ်ႈပေႃးဢမ်ႇၵိုတ်းဢမ်ႇၵျၢၼ်ႇသေၵေႃႉသေၵူၼ်းၵႃႈၼႂ်းမိူင်းဢၼ်လီဢၼ်ငၢမ်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူပၼ်သူၼၼ်ႉဢေႃႈ။
“ၵမ်းၼႆႉ၊ၶိင်ႇဢၼ်ၵဝ်တၢႆၼၼ်ႉၸမ်ႁွတ်ႈထိုင်ယဝ်ႉ။ သူၵူႈၵေႃႉႁုၼႂ်းၸႂ်ၼႂ်းၶေႃးသူလူၺ်ႈလွင်ႈတၢင်းလီၵႃႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဝႆႉၵတိၼၼ်ႉယင်းဢမ်ႇယူတ်းဢမ်ႇယွမ်းသေၸိူဝ်ႉသေပိူင်လႄႈပၼ်ပျေႉၸုမ်ႇတင်းသဵင်ႈတင်းမူတ်းယဝ်ႉၼၼ်ႉဢေႃႈ။-
ၸိူဝ်ႉၼင်ႇဢၼ်မၼ်းၸဝ်ႈႁႂ်ႈတၢင်းလီၵႃႈဢၼ်ဝႆႉၵတိၼၼ်ႉတူၵ်းႁွတ်ႈတူၵ်းထိုင်ၵႃႈၼႂ်းသူတင်းသဵင်ႈတင်းမူတ်းယဝ်ႉၼၼ်ႉ၊မိူၼ်ၸိူဝ်ႉၼင်ႇၼၼ်မၼ်းၸဝ်ႈတၵ်းႁႂ်ႈၽေးဢုပၢတ်ႈတူၵ်းႁွတ်ႈတူၵ်းထိုင်ၵႃႈၼိူဝ်သူတင်းသဵင်ႈတင်းမူတ်းဢမၢၼ်ႇၶၼ်ပဵၼ်ဢေႃႈ။-
ပေႃးသူယင်းဢမ်ႇပႂ်ႉၸွမ်းပႂ်ႉၵျၢင်ႉပတိၺိၺ်ႇဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူမီးဢမိင်ႉဝႆႉႁႂ်ႈသူပႂ်ႉၵမ်ပႂ်ႉၵျၢင်ႉၼၼ်ႉလႄႈ၊ၵူၺ်းႁဵတ်းဝၢတ်ႈၵူဝ်းၵႂၢႆႇၽြႃးတၢင်ႇသူႇတၢင်ႇပႃးတင်းလၢႆယူႇၸိုင်၊တၢင်းၸႂ်မႆႈၶႂ်ႈၸႃႉမၼ်းၸဝ်ႈၼၼ်ႉတၵ်းပၼ်တၢမ်ႇႁႂ်ႈသူလုလႅဝ်ၶၼ်ၽႂ်းၼႃႇထၢၼ်ႈပေႃးသူဢမ်ႇၵိုတ်းဢမ်ႇၵျၢၼ်ႇသေၵေႃႉသေၵူၼ်းၵႃႈၼႂ်းမိူင်းဢၼ်လီဢၼ်ငၢမ်းဢၼ်မၼ်းၸဝ်ႈပၼ်သူၼၼ်ႉဢေႃႈ၊” ဝႃႈၼင်ႇၼႆဢေႃႈ။
ယေႃးသု၊ ႁႂ်ႈၸိူဝ်ႉၶိူဝ်းၵူၼ်းမဵဝ်း ဢိသရေး၊ ၸုတုမ်ၵၼ်ၵႃႈတီႈဝဵင်း သေးၶိမ်ႇ၊ ဢေႃႈ။ မၼ်းႁွင်ႉဢဝ်ၶဝ်ၸိူဝ်းဢၼ်ပဵၼ်ၵူၼ်းၵႄႇၵူၼ်းႁူဝ်ၶဝ်၊ၵူၼ်းဢၼ်ၸီႇယၢင်ႇတြႃးၶဝ်တင်းၶုၼ်ဢၼ်ပွင်ၵၢၼ်ၶဝ်တင်းလၢႆ၊ၼႂ်းမဵဝ်း ဢိသရေး၊ ၼၼ်ႉလႄႈ၊ၶဝ်ဢွၼ်ၵၼ်မႃးၵႃႈတီႈၽၢႆႇၼႃႈၽြႃးပဵၼ်ၸဝ်ႈဢေႃႈ။-
ယေႃးသု၊ လၢတ်ႈတေႃႇၵူၼ်းတင်းသဵင်ႈတင်းလူင်လႄႈဝႃႈ၊ “ ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ မီးဢမိင်ႉလႄႈဝႃႈၸမ်ႉ၊ ‘မိူဝ်ႈၵွၼ်ႇဢွၼ်ဢၼ်ပူၼ်ႉမႃးၼၼ်ႉပူႇမွၼ်ႇသူတင်းလၢႆယူႇၵႃႈတီႈၽၢႆႇပုၼ်ႉမႄႈၼမ်ႉလူင် ဢုၽရတ်ႉ၊ လႄႈၵူဝ်းၵႂၢႆႇဝႆႈသႃၽြႃးတၢင်ႇသူႇတၢင်ႇပႃးဢေႃႈ။ ၼႂ်းပူႇမွၼ်ႇၸိူဝ်းၼၼ်ႉမီး တေႇရႃႉ၊ ပေႃႈ ဢႃႇပြႃႇႁၢမ်ႇ၊ တင်း ၼႃႇၶေႃႇ၊ ဢေႃႈ။-
မိူဝ်ႈၼၼ်ႉၵဝ်ႁွင်ႉဢဝ် ဢႃႇပြႃႇႁၢမ်ႇ၊ ဢၼ်ပဵၼ်ပူႇမွၼ်ႇသူလုၵ်ႉသေၵႃႈတီႈၽၢႆႇပုၼ်ႉၼမ်ႉလူင် ဢုၽရတ်ႉ၊ လႄႈဢွၼ်သူင်ႇမၼ်းႁွတ်ႈမႃးၵႃႈၼႂ်းမိူင်း ၶႃႇၼၼ်ႇ၊ ၵူႈတီႈၵူႈလႅၼ်ယဝ်ႉ။ ၵဝ်ႁႂ်ႈၸိူဝ်ႉၶိူဝ်းမၼ်းယႂ်ႇၽႄၼမ်ၵိုၼ်းယဝ်ႉ။ ၵဝ်ပၼ် ဢိၸၢၵ်ႈ၊ တီႈမၼ်းယဝ်ႉ။-
တီႈ ဢိၸၢၵ်ႈ၊ ၼၼ်ႉသမ်ႉပၼ် ယႃႇၵုပ်ႈ၊ တင်း ဢေးသေႃး၊ ဢေႃႈ။ တီႈ ဢေးသေႃး၊ ၼၼ်ႉၵဝ်ပၼ်ႁၢၼ်ႉလွႆ ဢေႇတုမ်ႇ၊ ႁႂ်ႈမၼ်းလႆႈပိူင်ႇဢဝ်လႄႈ၊ပူႇမွၼ်ႇသူ ယႃႇၵုပ်ႈ၊ တင်းလုၵ်ႈလၢၼ်မၼ်းတင်းလၢႆၸမ်ႉ၊လူင်းၵႂႃႇၸူးၵႃႈတီႈမိူင်း ဢေးၵျိပ်ႉ၊ ဢေႃႈ။-
လိုၼ်းၼၼ်ႉ ၵဝ်ပွႆႇၸႂ်ႉ မူဝ်းသေႇ၊ တင်း ဢႃႇရုၼ်ႇ၊ လႄႈ ၵဝ်ႁဵတ်းၽေးဢုပၢတ်ႈသႂ်ႇၵႃႈၼိူဝ်မိူင်း ဢေးၵျိပ်ႉ၊ ယႂ်ႇၼႃႇလူင်လၢင်သေယဝ်ႉ၊ၸင်ႇၼုၵ်ႈဢဝ်သူဢွၵ်ႇမႃးဢေႃႈ။-
ၵဝ်ၼုၵ်ႈဢဝ်ပူႇမွၼ်ႇသူတင်းလၢႆဢွၵ်ႇသေၵႃႈၼႂ်းမိူင်း ဢေးၵျိပ်ႉ၊ မႃးလႄႈ၊ၵူၼ်းမဵဝ်း ဢေးၵျိပ်ႉ၊ ပႃးတင်းလေႃႉမႃႉတင်းတပ်ႉသိုၵ်းၶီႇမႃႉလိုပ်ႈၸွမ်းလမ်းၸွမ်းဢေႃႈ။ မိူဝ်ႈဢၼ်ပူႇမွၼ်ႇသူၸိူဝ်းၼၼ်ႉႁွတ်ႈထိုင်ၵႃႈတီႈ ပၢင်ႇလၢႆႇလႅင်၊ မႃးၼၼ်ႉၸိုင်၊-
ၶဝ်ဢွၼ်ၵၼ်ႁွင်ႉသႅၼ်ႇတီႈၵဝ်ပုၼ်ႈတၢင်းဢၼ်ႁႂ်ႈၸွႆႈထႅမ်ဢေႃႈ။ ၵဝ်ၵေႃႈဢဝ်ဢၼ်လပ်းသိင်ႇၶျႃးဝႆႉၵႃႈတီႈဝူင်ႈၵၢင်ၶဝ်တင်းၵူၼ်းမဵဝ်း ဢေးၵျိပ်ႉ၊ ၸိူဝ်းၼၼ်ႉလႄႈႁဵတ်းႁႂ်ႈၼမ်ႉပၢင်ႇလၢႆႇပဵၼ်ၵဵၼ်ပဵၼ်ႁမ်းႁွတ်ႈထိုင်ၵႃႈၼိူဝ်ၵူၼ်းမဵဝ်း ဢေးၵျိပ်ႉ၊ တင်းလၢႆ၊ထူမ်ႈႁူမ်ႇၶဝ်တၢႆဢေႃႈ။ သူလႆႈႁုႁၼ်လွင်ႈတၢင်းဢၼ်ၵဝ်ႁဵတ်းၵႃႈၼႂ်းမိူင်း ဢေးၵျိပ်ႉ၊ မႃးၼၼ်ႉယဝ်ႉ။ “‘သူလႆႈယူႇမႃးၵႃႈၼႂ်းထိူၼ်ႇလႅင်ႉၶိင်ႇၵႃႇလႃႉႁိုင်ၼႃႇလူင်လၢင်ဢေႃႈ။-
လိုၼ်းၼၼ်ႉၵဝ်ဢဝ်သူသူင်ႇႁွတ်ႈထိုင်ၵႃႈတီႈမိူင်း ဢႃႇမေႃးရိ၊ ဢၼ်မီးယူႇၽၢႆႇဝၼ်းဢွၵ်ႇၼမ်ႉ ယေႃးတၢၼ်ႇ၊ ၼၼ်ႉဢေႃႈ။ ၶဝ်ၼၼ်ႉတိုၵ်းတေႃးသူသေၵေႃႈၵဝ်ႁႂ်ႈသူလႆႈပႄႉသိုၵ်းၼၼ်ႉဢေႃႈ။ သူၵေႃႈသိမ်းဢဝ်လိၼ်ၶဝ်လႄႈၵဝ်ပႄႇၽဵဝ်ႈၶဝ်ပႅတ်ႈသေၵႃႈတီႈၽၢႆႇၼႃႈသူဢေႃႈ။-
မိူဝ်ႈၼၼ်ႉၶုၼ်ႁေႃၶမ်းမိူင်း မေႃႇၽႃႉ၊ ဢၼ်ပဵၼ် ပႃႇလၵ်ႉ၊ လုၵ်ႈၸၢႆး ၸိၽေႃႇ၊ သမ်ႉတိုၵ်းတေႃးသူဢေႃႈ။ မၼ်းယင်းပွႆႇၸႂ်ႉၵႂႃႇႁွင်ႉဢဝ် ပႃႇလၢမ်ႇ၊ လုၵ်ႈၸၢႆး ပေႃးရႃႉ၊ မႃးႁႂ်ႈမၼ်းၵိၼ်ႇဝႃႈသူဢေႃႈ။-
ၵူၺ်းၵႃႈ၊ၵဝ်တိုၼ်းဢမ်ႇထွမ်ႇဢမ်ႇဢဝ်ၵႂၢမ်း ပႃႇလၢမ်ႇ ။ ပိူဝ်ႈၼႆလႄႈမၼ်းပၼ်တၢင်းလီတီႈသူလႄႈႁဵတ်းၸိူဝ်ႉၼင်ႇၼၼ်ၵဝ်ၵႄႇၼုၵ်ႈဢဝ်သူလွတ်ႈသေၵႃႈတီႈ ပႃႇလၵ်ႉ၊ ဢေႃႈ။-
လိုၼ်းၼၼ်ႉသူၶၢမ်ႈၼမ်ႉ ယေႃးတၢၼ်ႇ၊ ၵႂႃႇႁွတ်ႈထိုင်ၵႃႈတီႈဝဵင်း ယေႇရိၶူဝ်း၊ ဢေႃႈ။ ၵူၼ်းဝဵင်း ယေႇရိၶူဝ်း၊ ၵေႃႈ တိုၵ်းတေႃးသူမိူၼ်ၸိူဝ်ႉၼင်ႇၵူၼ်းမဵဝ်း ဢႃႇမေႃးရိ၊ ၵူၼ်းမဵဝ်း ၽေႇရၸိ၊ ၵူၼ်းမဵဝ်း ၶႃႇၼၼိ၊ ၵူၼ်းမဵဝ်း ႁိတ်ႉတိ၊ ၵူၼ်းမဵဝ်း ၵိရၵႃႇသိ၊ ၵူၼ်းမဵဝ်း ႁိဝိ၊ ၵူၼ်းမဵဝ်း ယေႇပုသိ၊ ၸိူဝ်းၼၼ်ႉတိုၵ်းတေႃးသူၼၼ်ႉဢေႃႈ။ ၵူၺ်းၵႃႈ၊ၵဝ်ႁႂ်ႈသူပႄႉၼႅင်ႇၵႃႈၼိူဝ်ၶဝ်တင်းသဵင်ႈတင်းမူတ်းဢေႃႈ။-
ၵဝ်ၸႂ်ႉတေႃႇလႂ်တႅၼ်လႂ်ၵႂႃႇဢွၼ်တၢင်းသူလႄႈႁေႃႈပႅတ်ႈၶုၼ်ႁေႃၶမ်း ဢႃႇမေႃးရိ၊ ၶဝ်သွင်ပႃးဢွၵ်ႇပၢႆႈသေၵႃႈတီႈၽၢႆႇၼႃႈသူဢေႃႈ။-
ၵဝ်ဢဝ်လိၼ်ဢၼ်သူဢမ်ႇလႆႈၽုၵ်ႇလႆႈသွမ်ႈမၼ်း၊ဝဵင်းဢၼ်သူဢမ်ႇတင်ႈလႆႈတႄႇၼၼ်ႉဢၢပ်ႈပၼ်တီႈသူဢေႃႈ။ တေႃႈလဵဝ်ၼႆႉသူလႆႈယူႇသဝ်းၵႃႈတီႈၼၼ်ႈလႄႈလႆႈၵိၼ်မၢၵ်ႇၸပိတ်ႉတင်းမၢၵ်ႇသၢၼ်ႇလုၼ်ႇၵႃႈၼႂ်းသူၼ်ဢၼ်သူဢမ်ႇလႆႈၽုၵ်ႇလႆႈသွမ်ႈၼၼ်ႉဢေႃႈ၊’ ဝႃႈၼႆယဝ်ႉ၊” ဝႃႈၼင်ႇၼႆဢေႃႈ။
ယေႃးသု၊ သမ်ႉလၢတ်ႈထႅင်ႈလႄႈဝႃႈ၊ “တေႃႈလဵဝ်ၼႆႉဢွၼ်ၵၼ်ရူဝ်ႇသေႇၵူဝ်ယမ် ထႃႇဝရႃႉၽြႃး၊ လႄႈမီးတၢင်းဢၼ်ၸႂ်ၽိူၵ်ႇၸိုၼ်ႈၶၢဝ်သႂ်၊တၢင်းဢၼ်ပႂ်ႉသဵတ်ႈၸႃႇသေလႄႈႁဵတ်းဝၢတ်ႈတီႈမၼ်းၸဝ်ႈတႃႉ။ ပႄႇပႅတ်ႈၽြႃးၸိူဝ်းဢၼ်ပူႇမွၼ်ႇသူယၢမ်ႈၵူဝ်းၵႂၢႆႇၵႃႈၼႂ်းမိူင်း မေႇသူဝ်ႇပူဝ်ႇတေးမီးယႃး၊ ဢိၵ်ႇတင်းၵႃႈတီႈမိူင်း ဢေးၵျိပ်ႉ၊ ၸိူဝ်းၼၼ်ႉသေလႄႈႁဵတ်းဝၢတ်ႈတီႈ ထႃႇဝရႃႉၽြႃး၊ ၵူၺ်းတႃႉ။-
ဢမ်ႇၼၼ်ၵေႃႈ၊ပေႃးသူဢမ်ႇမီးၸႂ်ဢၼ်ၶႂ်ႈႁဵတ်းဝၢတ်ႈၵူဝ်းၵႂၢႆႇတီႈ ထႃႇဝရႃႉၽြႃး၊ ၸိုင်၊ဝၼ်းမိူဝ်ႈၼႆႉတႅပ်းတတ်းလွင်ႈဢၼ်တၵ်းႁဵတ်းဝၢတ်ႈၵူဝ်းၵႂၢႆႇတီႈၽြႃးသူႇလႂ်ၼၼ်ႉတႃႉ။ တၵ်းႁဵတ်းဝၢတ်ႈတီႈၽြႃးၸိူဝ်းဢၼ်ပူႇမွၼ်ႇသူၵူဝ်းၵႂၢႆႇၵႃႈတီႈမိူင်း မေႇသူဝ်ႇပူဝ်ႇတေးမီးယႃး၊ ၼၼ်ႉႁိုဝ်း။ ဢမ်ႇၼၼ်တီႈၽြႃးၵူၼ်းမိူင်း ဢႃႇမေႃးရိ၊ ၶဝ်ဢၼ်သူယူႇၼႆႉႁိုဝ်း။ ၵဝ်ဢိၵ်ႇတင်းၵူၼ်းႁိူၼ်းၵူၼ်းယေးၵဝ်ၸမ်ႉ၊တၵ်းႁဵတ်းဝၢတ်ႈတီႈ ထႃႇဝရႃႉၽြႃး၊ ၵူၺ်းဢေႃႈ၊” ဝႃႈၼင်ႇၼႆဢေႃႈ။
ၵူၼ်းတင်းလၢႆၶိုၼ်းလၢတ်ႈလႄႈဝႃႈ၊ “ႁဝ်းတၵ်းဢမ်ႇၸုၼ်ႉပႅတ်ႈ ထႃႇဝရႃႉၽြႃး၊ ႁႂ်ႈလႆႈႁဵတ်းဝၢတ်ႈၽြႃးတၢင်ႇသူႇတၢင်ႇပႃးၼၼ်ႉလႃးလႃးတီႈၶႃႈ။-
ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၶႃႈၼုၵ်ႈဢဝ်ပူႇမွၼ်ႇႁဝ်းၶႃႈဢိၵ်ႇတင်းႁဝ်းၶႃႈဢွၵ်ႇသေၵႃႈတီႈမိူင်း ဢေးၵျိပ်ႉ၊ တီႈဢၼ်လႆႈၶၢမ်ႇႁဵတ်းၶႃႈမႃးၼၼ်ႉသေယဝ်ႉ၊သမ်ႉႁဵတ်းၼႄၼိမိၵ်ႈလၢၵ်ႈၶၼႃႇဢၼ်ယႂ်ႇၼႃႇတင်းလၢႆသိုဝ်ႈၼႃႈတႂ်ႈတႃႁဝ်းၶႃႈ၊ၸွမ်းပႂ်ႉလူပႂ်ႉတူၺ်းႁဝ်းၶႃႈႁႂ်ႈလႆႈပႆၵႂႃႇလူင်ႉလီလွတ်ႈလီၵႃႈၼႂ်းမိူင်းဢၼ်ႁဝ်းၶႃႈၶၢမ်ႈပူၼ်ႉမႃးၸိူဝ်းၼၼ်ႉဢေႃႈ။-
ၸိူဝ်ႉၼင်ႇဢၼ်ႁဝ်းၶႃႈယဵပ်ႇၶဝ်ႈမႃးၵႃႈၼႂ်းမိူင်းၼႆႉၼၼ်ႉ ထႃႇဝရႃႉၽြႃး၊ ႁေႃႈၵူၼ်းမဵဝ်း ဢႃႇမေႃးရိ၊ ဢၼ်ယူႇၵႃႈတီႈၼႆႈၼၼ်ႉဢွၵ်ႇပႅတ်ႈဢေႃႈ။ ပိူဝ်ႈၼႆလႄႈႁဝ်းၶႃႈၵေႃႈတၵ်းႁဵတ်းဝၢတ်ႈတီႈ ထႃႇဝရႃႉၽြႃး၊ ၶႃႈဢေႃႈ။ မၼ်းၸဝ်ႈၼၼ်ႉပဵၼ်ၽြႃးပဵၼ်ၸဝ်ႈႁဝ်းၶႃႈၶႃႈဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ ယေႃးသု၊ လၢတ်ႈတီႈၶဝ်လႄႈဝႃႈ၊ “သူဢမ်ႇႁဵတ်းဝၢတ်ႈတီႈ ထႃႇဝရႃႉၽြႃး၊ လႆႈ။ မၼ်းၸဝ်ႈၼၼ်ႉပဵၼ်ၽြႃးဢၼ်မူတ်းၸၢင်ႇလႄႈ၊မၼ်းၸဝ်ႈတေဢမ်ႇပွႆႇလွတ်ႈဢပျတ်ႈသူၼၼ်ႉ။ မၼ်းၸဝ်ႈပဵၼ်ၽြႃးပဵၼ်ၸဝ်ႈဢၼ်ၶႅၼ်သူၼၼ်ႉဢေႃႈ။-
ပေႃးသူၸုၼ်ႉပႅတ်ႈမၼ်းၸဝ်ႈလႄႈႁဵတ်းဝၢတ်ႈတီႈၽြႃးတၢင်ႇဝၢၼ်ႈတၢင်ႇမိူင်းၸိုင်၊မၼ်းၸဝ်ႈတၵ်းၸုၼ်ႉပႅတ်ႈသူသေလႄႈဝၢႆႇၼႃႈပႅတ်ႈသူ၊ပိၵ်ႉသမ်ႉမၼ်းလႆႈႁဵတ်းၵျေးၸူးတီႈသူမႃးသေၵေႃႈၵမ်းလိုၼ်းမၼ်းၸဝ်ႈတၵ်းယႃႉၽဵဝ်ႈသူပႅတ်ႈဢေႃႈ၊” ဝႃႈၼင်ႇၼႆဢေႃႈ။
ၵူၼ်းတင်းလၢႆၶိုၼ်းလဝ်ႈလၢတ်ႈတီႈ ယေႃးသု၊ လႄႈဝႃႈ၊ “ဢမ်ႇၸႂ်ႈၶႃႈ။ ႁဝ်းၶႃႈတၵ်းႁဵတ်းဝၢတ်ႈတီႈ ထႃႇဝရႃႉၽြႃး၊ ၵူၺ်းဢေႃႈ၊” ဝႃႈၼင်ႇၼႆဢေႃႈ။
ယေႃးသု၊ ၵေႃႈလၢတ်ႈၶဝ်လႄႈဝႃႈ၊ “တူဝ်သူပဵၼ်သၢၵ်ႈသေႇတီႈသူလွင်ႈဢၼ်သူလိူၵ်ႈဢဝ်ႁႂ်ႈလႆႈႁဵတ်းဝၢတ်ႈတီႈ ထႃႇဝရႃႉၽြႃး၊ ၼၼ်ႉယဝ်ႉ၊” ဝႃႈၼင်ႇၼႆဢေႃႈ။ ၶဝ်ၵေႃႈၶိုၼ်းလဝ်ႈလၢတ်ႈလႄႈဝႃႈ၊ “ၸႂ်ႈၶႃႈယဝ်ႉ။ ႁဝ်းၶႃႈပဵၼ်သၢၵ်ႈသေႇတီႈတူဝ်ၸဝ်ႈၵဝ်ႇၶႃႈဢေႃႈ၊” ဝႃႈၼင်ႇၼႆဢေႃႈ။
မၼ်းၵေႃႈပူင်ဢမိင်ႉလၢတ်ႈလႄႈဝႃႈ၊ “ပေႃးပဵၼ်ၸိူဝ်ႉၼင်ႇၼႆၸိုင်၊ပႄႇပႅတ်ႈၽြႃးတၢင်ႇဝၢၼ်ႈတၢင်ႇမိူင်းဢၼ်မီးတီႈသူၼၼ်ႉသေလႄႈ၊ဢဝ်ႁူဝ်ၸႂ်သူၵူမ်ႈၵွမ်းၸူးတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ တႃႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၵူၼ်းတင်းလၢႆဢွၼ်ၵၼ်လဝ်ႈလၢတ်ႈတီႈ ယေႃးသု၊ လႄႈဝႃႈ၊ “ႁဝ်းၶႃႈတၵ်းႁဵတ်းဝၢတ်ႈတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၶႃႈၶႃႈဢေႃႈ။ တၵ်းထွမ်ႇဢဝ်ၵႂၢမ်းမၼ်းၸဝ်ႈၶႃႈဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ယေႃးသု၊ ႁဵတ်းပတိၺိၺ်ႇပုၼ်ႈ ၵူၼ်းတင်းလၢႆၼႂ်းဝၢၼ်ႈၼၼ်ႉလႄႈဝႆႉထုင်းၽိင်ႈတြႃးဢိၵ်ႇတင်းမၢႆမီႈဢၼ်ထုၵ်ႇလႆႈႁဵတ်းၸွမ်းပုၼ်ႈၶဝ်ၵႃႈတီႈဝဵင်း သေးၶိမ်ႇ၊ ၼၼ်ႉဢေႃႈ။-
ယေႃးသု၊ ဢဝ်ၵႂၢမ်းၼၼ်ႉတႅမ်ႈသႂ်ႇဝႆႉၵႃႈၼႂ်းထမ်ႇမႃႉၵျၢမ်းလိၵ်ႈၽြႃးပဵၼ်ၸဝ်ႈလႄႈ ဢဝ်မၢၵ်ႇႁိၼ်လူင်ပူၵ်းတင်ႈဝႆႉၵႃႈတႂ်ႈတူၼ်ႈမႆႉၼိမ်ၵႃႈၼႂ်းထႃႇၼႃႉတီႈမူတ်းၸၢင်ႇ ထႃႇဝရႃႉၽြႃး၊ သေဢေႃႈ။-
မၼ်းၸင်ႇလၢတ်ႈတီႈၵူၼ်းတင်းသဵင်ႈတင်းလူင်လႄႈဝႃႈ၊ “မၢၵ်ႇႁိၼ်လူင်ၼႆႉတၵ်းပဵၼ်သၢၵ်ႈသေႇႁဝ်းယဝ်ႉ။ မၼ်းလႆႈငိၼ်းၵႂၢမ်းဢၼ် ထႃႇဝရႃႉၽြႃး၊ မီးဢမိင်ႉဝႆႉတီႈႁဝ်းၵူႈၸိူဝ်ႉၵူႈပိူင်ၼၼ်ႉယဝ်ႉ။ ပိူဝ်ႈၼႆလႄႈမၼ်းတၵ်းပဵၼ်သၢၵ်ႈသေႇၽၢႆႇၼိုင်ႈတင်းသူ ႁႂ်ႈသူဢမ်ႇလုၵ်ႉၽိုၼ်ႉၽြႃးပဵၼ်ၸဝ်ႈသူၼၼ်ႉဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ ယေႃးသု၊ ပွႆႇၵူၼ်းတင်းလၢႆၵႂႃႇလႄႈ၊ၶဝ်ဢွၼ်ၵၼ်ၶိုၼ်းမိူဝ်းၸူးတီႈလိၼ်ဢမူၺ်ႇၶဝ်ႁင်းၽႂ်ႁင်းမၼ်းသေဢေႃႈ။
လိုၼ်းၼၼ်ႉၸင်ႇ၊ၶႃႈ ထႃႇဝရႃႉၽြႃး၊ယေႃးသု၊ လုၵ်ႈၸၢႆး ၼုၼ်ႇ၊ ၼၼ်ႉဢသၢၵ်ႈလႆႈပၢၵ်ႇပၢႆသိပ်းပီလႄႈသဵင်ႈဢသၢၵ်ႈၵႂႃႇသေဢေႃႈ။-
ၶဝ်ဢဝ်မၼ်းသၢင်းၵျူဝ်ႇၵႃႈတီႈလိၼ်ဢမူၺ်ႇမၼ်းၵႃႈၼႂ်းဝဵင်း တိမၼႃႇသေႇရႃႇ၊ ဢၼ်မီးၵႃႈၼိူဝ်ႁၢၼ်ႉလွႆ ဢေႇၽရိမ်ႇ၊ ၽၢႆႇတၢင်းႁွင်ႇၵုင်း ၵႃႇဢတ်ႉ၊ ၼၼ်ႉဢေႃႈ။
ၼႂ်းၸူဝ်ႈပၢၼ် ယေႃးသု၊ ၼၼ်ႉၵူၼ်းမဵဝ်း ဢိသရေး၊ တင်းလၢႆႁဵတ်းဝၢတ်ႈၵူဝ်းၵႂၢႆႇတီႈ ထႃႇဝရႃႉၽြႃး၊ လႄႈ၊လိုၼ်းသေဢၼ်မၼ်းတၢႆယဝ်ႉၼၼ်ႉၵေႃႈၶဝ်ႁဵတ်းဝၢတ်ႈၵူဝ်းၵႂၢႆႇတီႈ ထႃႇဝရႃႉၽြႃး၊ ၼႂ်းၸူဝ်ႈပၢၼ်ၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆ ၸိူဝ်းဢၼ်ႁုႁၼ်လွင်ႈတၢင်းဢၼ် ထႃႇဝရႃႉၽြႃး၊ ႁဵတ်းပုၼ်ႈၵူၼ်းမဵဝ်း ဢိသရေး၊ ၼၼ်ႉဢေႃႈ။
လုပ်ႇ ယူဝ်းသႅပ်ႈ၊ ဢၼ်ၵူၼ်းမဵဝ်း ဢိသရေး၊ ၶဝ်ဢဝ်ၵႃႈတီႈမိူင်း ဢေးၵျိပ်ႉ၊ မႃးၼၼ်ႉၶဝ်သၢင်းၵျူဝ်ႇဝႆႉၵႃႈၼႂ်းဢိူင်ႇဝဵင်း သေးၶိမ်ႇ၊ ၵႃႈၼႂ်းၵႂၢၵ်ႈလိၼ်ဢၼ် ယႃႇၵုပ်ႈ၊ ဢဝ်တင်းငိုၼ်းပၢၵ်ႇၵျၢပ်ႈသိုဝ်ႉဢဝ်တီႈလုၵ်ႈၸၢႆး ႁႃႇမေႃႇ၊ ပေႃႈ သေးၶိမ်ႇ၊ ၶဝ်ၼၼ်ႉဢေႃႈ။ ၵႂၢၵ်ႈလိၼ်ၼၼ်ႉပဵၼ်လိၼ်ဢမူၺ်ႇၵူၼ်းၸိူဝ်ႉၶိူဝ်း ယူဝ်းသႅပ်ႈ၊ တင်းလၢႆဢေႃႈ။
ဢေးလႃႇၸႃႇ၊ လုၵ်ႈၸၢႆး ဢႃႇရုၼ်ႇ၊ ၼၼ်ႉၵေႃႈသဵင်ႈဢသၢၵ်ႈၵႂႃႇလႄႈဢဝ်မၼ်းသၢင်းၵျူဝ်ႇဝႆႉၵႃႈတီႈဝဵင်း ၵိပ်ႉယိ၊ ဢၼ်မီးၵႃႈၼိူဝ်ႁၢၼ်ႉလွႆ ဢေႇၽရိမ်ႇ၊ ဢၼ်ၽႄမႅင်ႇပၼ်တီႈလုၵ်ႈၸၢႆးမၼ်း ၽိၼႁတ်ႉ၊ ဝႆႉၼၼ်ႉဢေႃႈ။ လိၵ်ႈမၢတ်ႈလွင်ႈယေႃးသုယဝ်ႉယဝ်ႉဢေႃႈ။
လိုၼ်းသေဢၼ် ယေႃးသု၊ သဵင်ႈႁၢႆတၢႆၵႂႃႇယဝ်ႉၼၼ်ႉ၊ၵူၼ်းမဵဝ်း ဢိသရေး၊ တင်းလၢႆလဝ်ႈထၢမ်တီႈ ထႃႇဝရႃႉၽြႃး၊ လႄႈဝႃႈ၊ “ၵႃႈၼႂ်းၸိူဝ်ႉၶိူဝ်းၶႃႈၸဝ်ႈႁဝ်းၸိူဝ်းၼႆႉၸိူဝ်ႉၶိူဝ်းလႂ်တၵ်းလႆႈၶီႇၶိုၼ်ႈတိုၵ်းတေႃးၵူၼ်း ၶႃႇၼၼိ၊ တင်းလၢႆၼၼ်ႉဢွၼ်တၢင်းသေပိူၼ်ႈတီႈၶႃႈ၊” ဝႃႈၼင်ႇၼႆဢေႃႈ။-
ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ၸိူဝ်ႉၶိူဝ်း ယုတႃႉ၊ တၵ်းၶီႇၶိုၼ်ႈဢွၼ်တၢင်းသေပိူၼ်ႈဢေႃႈ။ ၵဝ်ဢဝ်မိူင်းၼၼ်ႉဢၢပ်ႈပၼ်ၶဝ်ယဝ်ႉ၊” ဝႃႈၼင်ႇၼႆဢေႃႈ။
ၵူၼ်း ယုတႃႉ၊ ၸိူဝ်းၼၼ်ႉလၢတ်ႈတီႈၵူၼ်း သိမုၼ်ႇ၊ တင်းလၢႆလႄႈဝႃႈ၊ “ၸွမ်းလူၺ်ႈၵၼ်တင်းႁဝ်းၶိုၼ်ႈၵႂႃႇၵႃႈတီႈဢိူင်ႇဢၼ်မၵ်းၶၢၼ်းဝႆႉပုၼ်ႈႁဝ်းၼၼ်ႉသေလႄႈဢွၼ်ၵၼ်တိုၵ်းတေႃးၵူၼ်းမဵဝ်း ၶႃႇၼၼိ၊ တင်းလၢႆၵၼ်တႃႉႁဝ်း။ ႁဝ်းသမ်ႉတၵ်းၸွမ်းလူၺ်ႈၵၼ်တင်းသူၶိုၼ်ႈၵႂႃႇၵႃႈတီႈဢိူင်ႇဢၼ်မၵ်းၶၢၼ်းဝႆႉပုၼ်ႈသူဢေႃႈ၊” ဝႃႈၼင်ႇၼႆဢေႃႈ။ ပိူဝ်ႈၼႆလႄႈၸိူဝ်ႉၶိူဝ်း သိမုၼ်ႇ၊-
ဢိၵ်ႇတင်းၸိူဝ်ႉၶိူဝ်း ယုတႃႉ၊ ၶဝ်ဢွၼ်ၵၼ်ၶိုၼ်ႈၵႂႃႇၼႂ်းၼႃႈသိုၵ်းႁူမ်ႈလူၺ်ႈၵၼ်ဢေႃႈ။ ထႃႇဝရႃႉၽြႃး၊ ႁႂ်ႈၶဝ်တိုၵ်းပႄႉၵူၼ်းမဵဝ်း ၶႃႇၼၼိ၊ ဢိၵ်ႇတင်းၵူၼ်းမဵဝ်း ၽေႇရၸိ၊ တင်းလၢႆလႄႈၶဝ်ပႄႉၼႅင်ႇၵူၼ်းမိုၼ်ႇၼိုင်ႈၵႃႈတီႈဝဵင်း ပေးၸႅၵ်ႉ၊ ဢေႃႈ။-
ၶဝ်ၼၼ်ႉထူပ်းၵၼ်တင်းၶုၼ် ဢတေႃႇၼိပေးၸႅၵ်ႉ၊ ၵႃႈတီႈၼၼ်ႈလႄႈတိုၵ်းတေႃးမၼ်းပႅတ်ႈဢေႃႈ။-
မၼ်းၼၼ်ႉဢွၵ်ႇပၢႆႈသေၵေႃႈ၊ၶဝ်ယင်းလိုပ်ႈလမ်းၸွမ်းၵႂႃႇတိဢဝ်မၼ်းမႃးသေလႄႈတႅပ်းႁူဝ်မႄႈမိုဝ်းႁူဝ်မႄႈတိၼ်မၼ်းပႅတ်ႈဢေႃႈ။-
ၶုၼ် ဢတေႃႇၼိပေးၸႅၵ်ႉ၊ ၵေႃႈဝႃႈ၊ “ၶုၼ်ႁေႃၶမ်းၸဵတ်းသိပ်းဢၼ်လႆႈၶၢမ်ႇတၢင်းဢၼ်တႅပ်းႁူဝ်မႄႈမိုဝ်းႁူဝ်မႄႈတိၼ်ၸိူဝ်းၼၼ်ႉယၢမ်ႈလႆႈၵဵပ်းၵိၼ်ဢၼ်ယွႆႈဢၼ်ယႅမ်းၵႃႈတႂ်ႈၽိူၼ်ၶဝ်ႈၵဝ်မႃးယဝ်ႉ။ ၸွမ်းၵႃႈၼင်ႇဢၼ်ၵဝ်ႁဵတ်းမႃးၼၼ်ႉတေႃႈလဵဝ်ၼႆႉၽြႃးပဵၼ်ၸဝ်ႈပၼ်ဢပျတ်ႈတီႈၵဝ်ယဝ်ႉ၊” ဝႃႈၼင်ႇၼႆဢေႃႈ။ ၶဝ်ဢဝ်မၼ်းၵႂႃႇၵႃႈတီႈဝဵင်း ယေႇရုသလႅမ်ႇ၊ လႄႈ၊မၼ်းၼၼ်ႉတၢႆၵႃႈတီႈၼၼ်ႈဢေႃႈ။
လိုၼ်းၼၼ်ႉ၊ၵူၼ်း ယုတႃႉ၊ ၶဝ်တိုၵ်းတေႃးဝဵင်းလူင် ယေႇရုသလႅမ်ႇ၊ သေလႄႈသိမ်းဢဝ်သေယဝ်ႉ၊ဢဝ်ၵူၼ်းဝဵင်းၼၼ်ႉတၢႆပႅတ်ႈလႄႈဢဝ်ၽႆးတုတ်ႇဝဵင်းလူင်ၼၼ်ႉဢေႃႈ။-
လိုၼ်းၼၼ်ႉ၊ၶဝ်တိုၵ်းတေႃးၵူၼ်းမဵဝ်း ၶႃႇၼၼိ၊ ၸိူဝ်းဢၼ်ယူႇၵႃႈတီႈၼိူဝ်ႁၢၼ်ႉလွႆ၊ယူႇၵႃႈတီႈတိၼ်လွႆဢိၵ်ႇတင်းပွတ်းတၢင်းၸၢၼ်းဢၼ်ႁႅင်ႈဢၼ်ႁွင်ၼၼ်ႉဢေႃႈ။-
ၶဝ်သမ်ႉၶီႇသိုၵ်းၵႂႃႇၸူးၵူၼ်း ၶႃႇၼၼိ၊ ၸိူဝ်းဢၼ်ယူႇၵႃႈၼႂ်းဝဵင်း ႁေႇပရုၼ်ႇ၊ ဢၼ်ယၢမ်ႈမီးၸိုဝ်ႈဝႃႈ၊ဝဵင်း ၵိရိယႃႉဢႃႇပႃႇ၊ ၼၼ်ႉလႄႈတိုၵ်းတေႃးယႃႉပႅတ်ႈၶိူဝ်းႁိူၼ်း သေးသေး၊ဢႁိမၼ်ႇ၊ တင်း တႃႇလမေး၊ ၸိူဝ်းၼၼ်ႉဢေႃႈ။
လုၵ်ႉသေၵႃႈတီႈၼၼ်ႈလႄႈၵူၼ်း ယုတႃႉ၊ ၶဝ်ၶီႇသိုၵ်းၵႂႃႇၸူးဝဵင်းလူင် တေႇပိရႃႉ၊ ဢၼ်ယၢမ်းမီးၸိုဝ်ႈဝႃႈ၊ဝဵင်း ၵိရယႃႉသေႃႇၽႃႉ၊ ၼၼ်ႉဢေႃႈ။-
မိူဝ်ႈၼၼ်ႉ၊ ၵႃႇလႅပ်ႉ၊ လၢတ်ႈလႄႈဝႃႈ၊ “ၵဝ်တၵ်းဢဝ်လုၵ်ႈယိင်းၵဝ် ဢႃႇၶသႃႉ၊ ပၼ်ၵၼ်တင်းၵေႃႉဢၼ်တိုၵ်းဢဝ်ဝဵင်း ၵိရယႃႉသေႃႇၽႃႉ၊ ၼၼ်ႉဢေႃႈ၊” ဝႃႈၼင်ႇၼႆဢေႃႈ။-
ဢေႃးႀၼ်ႇယေႇလႃႉ၊ လုၵ်ႈၸၢႆး ၵေးၼတ်ႉ၊ ဢၼ်ပဵၼ်ၼွင်ႉၸၢႆး ၵႃႇလႅပ်ႉ၊ ၼၼ်ႉတိုၵ်းဢဝ်ဝဵင်းလူင်ၼၼ်ႉသေယဝ်ႉ၊ ၵႃႇလႅပ်ႉ၊ ဢဝ်လုၵ်ႈယိင်းမၼ်း ဢႃႇၶသႃႉ၊ ပၼ်ၵၼ်တင်းမၼ်းသေဢေႃႈ။-
ၼႂ်းဝၼ်းသွင်ႇမၢင်ႇၵလႃႇၼၼ်ႉ ဢေႃးႀၼ်ႇယေႇလႃႉ၊ တိုၵ်းယူင်းၸူဝ်းဢဝ်မေးမၼ်း ႁႂ်ႈမေးမၼ်းယွၼ်းဢဝ်ၵႂၢၵ်ႈလိၼ်သေၵႂၢၵ်ႈၼိုင်ႈတီႈပေႃႈမၼ်းဢေႃႈ။ မႄႈယိင်းၼၼ်ႉလူင်းမႃႉလီႈမၼ်းသေလႄႈ၊ ၵႃႇလႅပ်ႉ၊ ၵေႃႈထၢမ်ဝႃႈ၊ “မႂ်းၶႂ်ႈလႆႈဢီႈသင်” ဝႃႈၼင်ႇၼႆလႄႈ၊-
မၼ်းၶိုၼ်းလၢတ်ႈတီႈပေႃႈမၼ်းလႄႈဝႃႈ၊ “ပၼ်လၢၵ်ႈသွင်ႇတီႈၵဝ်ၶႃႈသေၵမ်း။ ပေႃႈႁဝ်းပၼ်လိၼ်ဢၼ်ႁႅင်ႈဢၼ်ႁွင်တီႈၵဝ်ၶႃႈယဝ်ႉ။ တီႈၼမ်ႉဢွၵ်ႇႁူးၵေႃႈပၼ်သေၵမ်းၶႃႈ၊” ဝႃႈၼင်ႇၼႆဢေႃႈ။ ၵႃႇလႅပ်ႉ၊ ၵေႃႈဢဝ်ၼမ်ႉဢွၵ်ႇႁူးဢၼ်မီးၵႃႈၼိူဝ်ၵႂၢၵ်ႈလိၼ်ဢိၵ်ႇတင်းၼမ်ႉဢွၵ်ႇႁူးဢၼ်မီးၵႃႈတႂ်ႈၵႂၢၵ်ႈလိၼ်ၼၼ်ႉပၼ်တီႈမၼ်းဢေႃႈ။
ၸိူဝ်ႉၶိူဝ်းလုၵ်ႈလၢၼ် ၵိၼိ၊ ၵေႃႉဢၼ်ပဵၼ်ပူႇၼၢႆး မူဝ်းသေႇ၊ ၼၼ်ႉၸိူဝ်းၼၼ်ႉဢွၼ်ၵၼ်လုၵ်ႉသေၵႃႈတီႈဝဵင်း ယေႇရိၶူဝ်း၊ ဢၼ်ဝႃႈ၊ဝဵင်းတူၼ်ႈထၢၼ်လႄႈၸွမ်းလူၺ်ႈၵၼ်တင်းၵူၼ်းၸိူဝ်ႉၶိူဝ်း ယုတႃႉ၊ ၸိူဝ်းၼၼ်ႉၵႂႃႇၵႃႈၼႂ်းမိူင်း ယုတႃႉ၊ ၵႃႈတီႈဢိူင်ႇဢၼ်ႁႅင်ႈဢၼ်ႁွင်ၽၢႆႇၸၢၼ်းဝဵင်း ဢႃႇရတ်ႉ၊ ၼၼ်ႉသေယဝ်ႉ၊ယူႇလူၺ်ႈၵူၼ်းမဵဝ်း ဢႃႇမလႅၵ်ႉ၊ ၶဝ်ဢေႃႈ။-
ၵူၼ်း ယုတႃႉ၊ ၶဝ်သမ်ႉၵႂႃႇလူၺ်ႈၵၼ်တင်းၵူၼ်း သိမုၼ်ႇ၊ တင်းလၢႆလႄႈတိုၵ်းတေႃးပႄႉၼႅင်ႇၵူၼ်းမဵဝ်း ၶႃႇၼၼိ၊ ဢၼ်ယူႇၵႃႈတီႈဝဵင်း ၸေးၽတ်ႉ၊ သေယဝ်ႉ၊ယႃႉၽဵဝ်ႈပႅတ်ႈမူတ်းမူတ်းယဝ်ႉၸင်ႇ၊ဝဵင်းၼၼ်ႉလႆႈၶၢမ်ႇႁွင်ႉဝႃႈ၊ဝဵင်း ႁေႃႇမႃႇ၊ ဢေႃႈ။-
ၵူၼ်း ယုတႃႉ၊ ၶဝ်ယင်းတိုၵ်းဢဝ်ဝဵင်း ၵႃႇၸႃႉ၊ ဝဵင်း ဢႃႇသၵေႇလုၼ်ႇ၊ တင်းဝဵင်း ဢေႇၵရုၼ်ႇ၊ ဢိၵ်ႇတင်းဢိူင်ႇဝဵင်းၶဝ်တင်းလၢႆဢေႃႈ။-
ထႃႇဝရႃႉၽြႃး၊ မီးယူႇလူၺ်ႈၵၼ်တင်းၵူၼ်း ယုတႃႉ၊ ၶဝ်လႄႈ၊ၶဝ်လႆႈသိမ်းဢဝ်မိူင်းႁၢၼ်ႉလွႆတင်းလၢႆဢေႃႈ။ ၵူၺ်းၵႃႈ၊ၶဝ်ဢမ်ႇႁေႃႈၵူၼ်းၸိူဝ်းဢၼ်မီးတီႈပၢင်ႇတီႈပဵင်းၼၼ်ႉဢွၵ်ႇပႅတ်ႈလႆႈ၊ၵွပ်ႈပိူဝ်ႈၵူၼ်းၸိူဝ်းၼၼ်ႉမီးလေႃႉရထႃးလဵၵ်းဢေႃႈ။-
ၼင်ႇၼၼ်လႄႈၸွမ်းၵႃႈၼင်ႇဢၼ် မူဝ်းသေႇ၊ သင်ႇလၢတ်ႈဝႆႉၼၼ်ႉၶဝ်ဢဝ်ဝဵင်း ႁေႇပရုၼ်ႇ၊ ဢၢပ်ႈပၼ်တီႈ ၵႃႇလႅပ်ႉ၊ ၵေႃႉဢၼ်ႁေႃႈလိုပ်ႈလုၵ်ႈ ဢႃႇၼၵ်ႉ၊ သၢမ်ၵေႃႉဢွၵ်ႇပႅတ်ႈၼၼ်ႉဢေႃႈ။-
ၸိူဝ်ႉၶိူဝ်း ပိၼ်ႇယႃႇမိၼ်ႇ၊ ယင်းဢမ်ႇႁေႃႈၵူၼ်း ယေႇပုသိ၊ ၶဝ်ဢၼ်ယူႇၵႃႈၼႂ်းဝဵင်း ယေႇရုသလႅမ်ႇ၊ ၸိူဝ်းၼၼ်ႉဢွၵ်ႇလႄႈ၊ၵူၼ်း ယေႇပုသိ၊ ၶဝ်လႆႈယူႇလူၺ်ႈၵၼ်တင်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ တင်းလၢႆယူႇတေႃႇထိုင်ႁွတ်ႈဝၼ်းမိူဝ်ႈလဵဝ်ဢေႃႈ။
ၵူၼ်းၸိူဝ်ႉၶိူဝ်း ဢေႇၽရိမ်ႇ၊ တင်း မၼႃႇသေႇ၊ ၶဝ်ၶီႇသိုၵ်းၶိုၼ်ႈၸူးတီႈဝဵင်း ပေႇသလႃႉ၊ လႄႈ ထႃႇဝရႃႉၽြႃး၊ ယူႇလူၺ်ႈၵၼ်တင်းၶဝ်ဢေႃႈ။-
ၶဝ်ပွႆႇၸႂ်ႉၵူၼ်းသွပ်ႇၶၢဝ်ႇၵႂႃႇလူလွမ်တူၺ်းဝဵင်း ပေႇသလႃႉ၊ ဢၼ်မိူဝ်ႈဢွၼ်ၼႆႉၼၼ်ႉႁွင်ႉဝႃႈ၊ဝဵင်း လုၸႃႉ၊ ၼၼ်ႉဢေႃႈ။-
မိူဝ်ႈၼၼ်ႉၵူၼ်းသွပ်ႇၶၢဝ်ႇၸိူဝ်းၼၼ်ႉထူပ်းႁၼ်ၵူၼ်းၵေႃႉၼိုင်ႈဢွၵ်ႇဝဵင်းမႃးယူႇလႄႈၶဝ်လၢတ်ႈတီႈမၼ်းလႄႈဝႃႈ၊ “ၼႄပၼ်သဵၼ်ႈတၢင်းဢၼ်ၶဝ်ႈဝဵင်းၼၼ်ႉတီႈႁဝ်းတႃႉ။ ပေႃးမႂ်းၼႄပၼ်ၸိုင်၊ႁဝ်းတၵ်းပၼ်ၶျၢမ်းသႃႇတီႈမႂ်းဢေႃႈ၊” ဝႃႈၼင်ႇၼႆဢေႃႈ။-
ၵေႃႉၼၼ်ႉၼႄပၼ်သဵၼ်ႈတၢင်းဢၼ်ၶဝ်ႈဝဵင်းၼၼ်ႉသေယဝ်ႉ၊ၵူၼ်းၸိူဝ်ႉၶိူဝ်း ဢေႇၽရိမ်ႇ၊ တင်းၸိူဝ်ႉၶိူဝ်း မၼႃႇသေႇ၊ တင်းလၢႆတိုၵ်းတေႃးဢဝ်တၢႆပႅတ်ႈၵူၼ်းတင်းဝဵင်းလႄႈ၊ဝႆႉၵိုတ်းၵူၼ်းၵေႃႉၼၼ်ႉဢိၵ်ႇတင်းၵူၼ်းႁိူၼ်းၵူၼ်းယေးမၼ်းတင်းမူတ်းၵူၺ်းလႆႈလွတ်ႈဢေႃႈ။-
ၵေႃႉၼၼ်ႉၵေႃႈၵႂႃႇၵႃႈတီႈမိူင်း ႁိတ်ႉတိ၊ လႄႈတႄႇႁဵတ်းဝဵင်းသေယဝ်ႉ၊ႁွင်ႈၸိုဝ်ႈဝႃႈ၊ဝဵင်း လုၸႃႉ၊ ဢေႃႈ။ ၸိုဝ်ႈသဵင်ဝဵင်းၼၼ်ႉမီးယူႇတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
ၵူၼ်းၸိူဝ်ႉၶိူဝ်း မၼႃႇသေႇ၊ ၼၼ်ႉယင်းဢမ်ႇႁေႃႈၶဝ်ၸိူဝ်းဢၼ်ယူႇၵႃႈတီႈဝဵင်း ပႅတ်ႉသၼ်ႇ၊ ဝဵင်း တႃႇၼၵ်ႉ၊ ဝဵင်း တေႃႇရႃႉ၊ ဝဵင်း ဢိပလမ်ႇ၊ တင်းဝဵင်း မေႇၵိတ်ႉတေႃႇ၊ ဢိၵ်ႇတင်းဢိူင်ႇဝဵင်းၶဝ်ဝၢၼ်ႈၶဝ်တင်းလၢႆၸိူဝ်းၼၼ်ႉဢွၵ်ႇပႅတ်ႈလႄႈ၊ၵူၼ်းမဵဝ်း ၶႃႇၼၼိ၊ ၶဝ်သိုပ်ႇယူႇသိုပ်ႇသဝ်းၵႂႃႇဢေႃႈ။-
မိူဝ်ႈဢၼ်မဵဝ်း ဢိသရေး၊ ၶဝ်ႁႅင်းယႂ်ႇမႃးၼၼ်ႉၸိုင်၊ၶဝ်တဵၵ်းၶေႃးငႅၼ်းၶေႃးႁႂ်ႈၵူၼ်းၸိူဝ်းၼၼ်ႉၶၢမ်ႇပဵၼ်ၶႃႈၸႂ်ႉၶႃႈသွႆၶဝ်ဢေႃႈ။ ၵွပ်ႈၼႆလႄႈၶဝ်ယင်းဢမ်ႇႁေႃႈဢွၵ်ႇပႅတ်ႈၵူၼ်းၸိူဝ်းၼၼ်ႉသေၵႃႈတီႈၶဝ်လႄႈယူႇဢေႃႈ။
ၵူၼ်းၸိူဝ်ႉၶိူဝ်း ဢေႇၽရိမ်ႇ၊ ယင်းဢမ်ႇႁေႃႈၵူၼ်းမဵဝ်း ၶႃႇၼၼိ၊ ၸိူဝ်းဢၼ်ယူႇၵႃႈၼႂ်းဝဵင်း ၵေႇၸႃႇ၊ ၼၼ်ႉဢွၵ်ႇပႅတ်ႈဢေႃႈ။ ပိူဝ်ႈၼႆလႄႈၵူၼ်း ၶႃႇၼၼိ၊ ၶဝ်သိုပ်ႇယူႇသဝ်းၵႂႃႇလူၺ်ႈၵၼ်တင်းၶဝ်ဢေႃႈ။
ၵူၼ်းၸိူဝ်ႉၶိူဝ်း ၸေႇပုလုၼ်ႇ၊ ယင်းဢမ်ႇႁေႃႈၵူၼ်းဝဵင်း ၵိတရုၼ်ႇ၊ ဢိၵ်ႇတင်းၵူၼ်းဝဵင်း ၼႁႃႇလႃႇလႃႉ၊ ၸိူဝ်းၼၼ်ႉဢွၵ်ႇပႅတ်ႈဢေႃႈ။ ပိူဝ်ႈၼႆလႄႈၵူၼ်း ၶႃႇၼၼိ၊ ၶဝ်သိုပ်ႇယူႇသဝ်းၵႂႃႇလူၺ်ႈၵၼ်တင်းၶဝ်သေလႄႈလႆႈၶၢမ်ႇပဵၼ်ၶႃႈဢၼ်ၸႂ်ႉဢၼ်သွႆဢေႃႈ။
ၵူၼ်းၸိူဝ်ႉၶိူဝ်း ဢႃႇသျႃႇ၊ ယင်းဢမ်ႇႁေႃႈၵူၼ်းဝဵင်း ဢၵ်ႉၶေႃႇ၊ ၵူၼ်းဝဵင်း ၸိတုမ်ႇ၊ ၵူၼ်းဝဵင်း ဢႃႇလပ်ႉ၊ ၵူၼ်းဝဵင်း ဢႃႇၶၸိပ်ႉ၊ ၵူၼ်းဝဵင်း ႁေႇလပႃႉ၊ ၵူၼ်းဝဵင်း ဢႃႇၽိၵ်ႉ၊ တင်းၵူၼ်းဝဵင်း ရေးႁွပ်ႉ၊ ၸိူဝ်းၼၼ်ႉဢွၵ်ႇပႅတ်ႈဢေႃႈ။
ၵူၼ်းၸိူဝ်ႉၶိူဝ်း ဢႃႇသျႃႇ၊ ၶဝ်ယင်းယူႇသဝ်းလူၺ်ႈၵၼ်တင်းၵူၼ်း ၶႃႇၼၼိ၊ ၸိူဝ်းၼၼ်ႉယူႇလႄႈဢမ်ႇႁေႃႈၶဝ်ၸိူဝ်းၼၼ်ႉဢွၵ်ႇပႅတ်ႈဢေႃႈ။
ၵူၼ်းၸိူဝ်ႉၶိူဝ်း ၼပ်ႉထလိ၊ ယင်းဢမ်ႇႁေႃႈၵူၼ်းဝဵင်း ပႅတ်ႉသေးမိတ်ႉ၊ ဢိၵ်ႇတင်းၵူၼ်းဝဵင်း ပႅတ်ႉသၼတ်ႉ၊ ၸိူဝ်းၼၼ်ႉဢွၵ်ႇပႅတ်ႈဢေႃႈ။ ၵူၼ်းၸိူဝ်ႉၶိူဝ်း ၼပ်ႉထလိ၊ ၶဝ်ယူႇသဝ်းလူၺ်ႈၵူၼ်း ၶႃႇၼၼိ၊ ၸိူဝ်းၼၼ်ႉလႄႈတဵၵ်းငႅၼ်းႁႂ်ႈပဵၼ်ၶႃႈၶဝ်ဢေႃႈ။
ၵူၼ်းမဵဝ်း ဢႃႇမေႃးရိ၊ ၶဝ်တိုၵ်းတေႃးႁႂ်ႈၵူၼ်းၸိူဝ်ႉၶိူဝ်း တၢၼ်ႇ၊ တင်းလၢႆယူႇၵႃႈတီႈႁၢၼ်ႉလွႆတႄးလွႆလႄႈဢမ်ႇပၼ်ဢၶႂၢင်ႉဢၼ်လႆႈလူင်းယူႇၵႃႈတႂ်ႈတီႈပၢင်ႇတီႈပဵင်း။-
ၵူၼ်း ဢႃႇမေႃးရိ၊ ၸိူဝ်းၼၼ်ႉသိုပ်ႇယူႇသဝ်းၵႃႈၼႂ်းဝဵင်း ဢႃႇၸလုၼ်ႇ၊ ဝဵင်း သႃႇလပိမ်ႇ၊ တင်းႁၢၼ်ႉလွႆ ႁေးရိတ်ႉ၊ ၸိူဝ်းၼၼ်ႉဢေႃႈ။ ၵူၺ်းၵႃႈ၊ၵူၼ်းၸိူဝ်ႉၶိူဝ်း ဢေႇၽရိမ်ႇ၊ တင်း မၼႃႇသေႇ၊ မႃးပႄႉၵိၼ်ၶဝ်သေလႄႈတဵၵ်းငႅၼ်းႁႂ်ႈႁဵတ်းၵၢၼ်ၵျၢမ်းပုၼ်ႈၶဝ်ဢေႃႈ။
လႅၼ်လိၼ်မိူင်း ဢႃႇမေႃးရိ၊ ၼၼ်ႉ တႄႇဢဝ်တီႈၽၢႆႇႁွင်ႇဝဵင်း သေးလႃႇ၊ ၽႃႇလတ်းၸွမ်းတၢင်းလွႆ ဢႃႇၵႃႇရိပ်ႉပိမ်း၊ လႄႈၶိုၼ်ႈၵႂႃႇဢေႃႈ။
တမၢၼ်ႇၵၢင်ႁၢဝ် ထႃႇဝရႃႉၽြႃး၊ လုၵ်ႉသေၵႃႈတီႈဝဵင်း ၵိလႃႉၵႃႇလႃႉ၊ မႃးၵႃႈတီႈဝဵင်း ပေႃႇၶိမ်း၊ လႄႈလၢတ်ႈတီႈမဵဝ်း ဢိသရေး၊ ၶဝ်လႄႈဝႃႈ၊ “ၵဝ်ဢဝ်သူဢွၵ်ႇသေၵႃႈတီႈမိူင်း ဢေးၵျိပ်ႉ၊ မႃးၸူးမိူင်းဢၼ်ၵဝ်ဝႆႉၵတိတီႈပူႇမွၼ်ႇသူဝႆႉၼၼ်ႉယဝ်ႉ။ ၵဝ်လႆႈဝႃႈ၊ ‘ၵဝ်တၵ်းဢမ်ႇယႃႉပတိၺိၺ်ႇဢၼ်ၵဝ်ႁဵတ်းဝႆႉလူၺ်ႈၵၼ်တင်းသူၼၼ်ႉပႅတ်ႈသေပွၵ်ႈ။-
သူတၵ်းဢမ်ႇလႆႈႁဵတ်းပတိၺိၺ်ႇသေၸိူဝ်ႉသေပိူင်လူၺ်ႈၵၼ်တင်းၵူၼ်းဝၢၼ်ႈၵူၼ်းမိူင်းၼႆႉ။ သူတၵ်းလႆႈယႃႉၽဵဝ်ႈၶဵင်ႇၽြႃးၶဝ်ၼၼ်ႉပႅတ်ႈဢေႃႈ၊’ ဝႃႈၼႆဝႆႉယဝ်ႉ။ ၵူၺ်းၵႃႈ၊သူဢမ်ႇႁဵတ်းၸွမ်းၵႃႈၼင်ႇဢၼ်ၵဝ်သင်ႇလၢတ်ႈဝႆႉၼၼ်ႉ။ သူယင်းႁဵတ်းၶတ်းၵႂၢမ်းၵဝ်ဢေႃႈ။-
ၵမ်းၼႆႉၸမ်ႉ၊ၵဝ်ဝႃႈ၊ ‘ၵဝ်တၵ်းတေဢမ်ႇႁေႃႈၶဝ်ဢွၵ်ႇပႅတ်ႈသေၵႃႈတီႈသူ။ ၶဝ်တၵ်းၸူဝ်းဢဝ်သူၽိတ်းတၢင်းပိူင်ႈတၢင်း ဢေႃႈ။ ၽြႃးၶဝ်ၸိူဝ်းၼၼ်ႉၵေႃႈတၵ်းပဵၼ်တူင်ႇႁႅဝ်ႉတူင်ႇၶိုမ်းတီႈသူဢေႃႈ၊’ ဝႃႈၼႆဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈဢၼ်တမၢၼ်ႇၵၢင်ႁၢဝ် ထႃႇဝရႃႉၽြႃး၊ လၢတ်ႈဝႃႈၸိူဝ်ႉၼင်ႇၼႆယဝ်ႉၼၼ်ႉၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢွၼ်ၵၼ်ၵိဝ်သဵင်လႄႈႁွင်ႉႁႆႈဢေႃႈ။-
တီႈၼၼ်ႈၸိုင်၊ၶဝ်ႁွင်ႉၸိုဝ်ႈဝႃႈ ပေႃႇၶိမ်း၊ သေလႄႈ၊ဢွၼ်ၵၼ်သၢၵ်ႈလူႇၶိူင်ႈတၢင်းလူႇၵႃႈတီႈ ထႃႇဝရႃႉၽြႃး၊ ဢေႃႈ။
မိူဝ်ႈဢၼ် ယေႃးသု၊ ပွႆႇၵူၼ်း ဢိသရေး၊ တင်းလၢႆမိူဝ်းၵႂႃႇၼၼ်ႉၶဝ်ဢွၼ်ၵၼ်ၵႂႃႇၸူးလိၼ်ဢမူၺ်ႇၽႂ်လိၼ်ဢမူၺ်ႇမၼ်းႁႂ်ႈလႆႈသိမ်းဢဝ်ဢမူၺ်ႇၶဝ်ဢေႃႈ။-
ၸူဝ်ႈဢသၢၵ်ႈ ယေႃးသု၊ ၼၼ်ႉၸိုင်၊ၵူၼ်းမဵဝ်း ဢိသရေး၊ တင်းလၢႆႁဵတ်းဝၢတ်ႈၵူဝ်းၵႂၢႆႇ ထႃႇဝရႃႉၽြႃး၊ ယူႇလႄႈ၊လိုၼ်းသေဢၼ်မၼ်းသဵင်ႈႁၢႆတၢႆၵႂႃႇယဝ်ႉၼၼ်ႉၵေႃႈၶဝ်ယင်းဢွၼ်ၵၼ်သိုပ်ႇႁဵတ်းဝၢတ်ႈၵူဝ်းၵႂၢႆႇယူႇၼႂ်းၸူဝ်ႈဢၼ်ၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆယင်းဢသၢၵ်ႈလိပ်းယူႇ၊ၸိူဝ်းဢၼ်ႁၼ်လွင်ႈတၢင်းၵႃႈဢၼ် ထႃႇဝရႃႉၽြႃး၊ ႁဵတ်းဢၼ်ယႂ်ႇဢၼ်လူင်ပုၼ်ႈမဵဝ်း ဢိသရေး၊ ၼၼ်ႉၸိူဝ်းၼၼ်ႉဢေႃႈ။-
ၶႃႈ ထႃႇဝရႃႉၽြႃး၊ ဢၼ်ပဵၼ် ယေႃးသု၊ လုၵ်ႈၸၢႆး ၼုၼ်ႇ၊ ၼၼ်ႉဢသၢၵ်ႈလႆႈပၢၵ်ႇပၢႆသိပ်းပီလႄႈသဵင်ႈႁၢႆတၢႆၵႂႃႇဢေႃႈ။-
ၶဝ်ဢဝ်မၼ်းသၢင်းၵျူဝ်ႇၵႃႈတီႈလိၼ်ဢမူၺ်ႇမၼ်းၵႃႈၼႂ်းဝဵင်း တိမၼႃႇသေႇရႃႇ၊ ဢၼ်မီးၵႃႈၼိူဝ်ႁၢၼ်ႉလွႆ ဢေႇၽရိမ်ႇ၊ ၽၢႆႇႁွင်ႇၵုင်း ၵႃႇဢတ်ႉ၊ ၼၼ်ႉဢေႃႈ။-
ၵူၼ်းၸူဝ်ႈပၢၼ်ၼၼ်ႉၸိူဝ်းၼၼ်ႉၵေႃႈသဵင်ႈႁၢႆတၢႆၵႂႃႇမူတ်းယဝ်ႉသေယဝ်ႉ၊ၵူၼ်းဢၼ်သိုပ်ႇလူင်းသေၵႃႈတီႈၶဝ်မႃးၼၼ်ႉပေႃႇမႃးလႄႈၶဝ်ဢမ်ႇႁုၸၵ်း ထႃႇဝရႃႉၽြႃး၊ ဢမ်ႇႁုလွင်ႈတၢင်းဢၼ်မၼ်းၸဝ်ႈႁဵတ်းပုၼ်ႈမဵဝ်း ဢိသရေး၊ ၼၼ်ႉယဝ်ႉ။
မိူဝ်ႈၼၼ်ႉ၊ၵူၼ်းမဵဝ်း ဢိသရေး၊ တင်းလၢႆႁဵတ်းတုၸရိူၵ်ႈၵႃႈတီႈၽၢႆႇၼႃႈ ထႃႇဝရႃႉၽြႃး၊ လႄႈဢွၼ်ၵၼ်ႁဵတ်းဝၢတ်ႈတီႈၽြႃး ပႃႇလႃႉ၊ တင်းလၢႆဢေႃႈ။-
ၶဝ်ဢမ်ႇႁဵတ်းဝၢတ်ႈဢမ်ႇၵူဝ်းၵႂၢႆႇ ထႃႇဝရႃႉၽြႃး၊ ဢၼ်ပဵၼ်ၽြႃးပဵၼ်ၸဝ်ႈပူႇမွၼ်ႇၶဝ်၊ၽြႃးပဵၼ်ၸဝ်ႈဢၼ်ဢဝ်ၶဝ်ဢွၵ်ႇမိူင်း ဢေးၵျိပ်ႉ၊ မႃးၼၼ်ႉသေယဝ်ႉ၊ဢွၼ်ၵၼ်ဝႆႈၽြႃးတၢင်ႇသူႇတၢင်ႇပႃးတင်းလၢႆ၊ဢၼ်ပဵၼ်ၽြႃးၵူၼ်းၸိူဝ်းဢၼ်မီးႁိမ်းႁွမ်းၶဝ်ၼၼ်ႉဢေႃႈ။ ၶဝ်ၵူမ်ႈႁူဝ်ၵွမ်းႁူဝ်ၸူးၽြႃးၸိူဝ်းၼၼ်ႉသေလႄႈႁဵတ်းႁႂ်ႈ ထႃႇဝရႃႉၽြႃး၊ ၸႂ်မႆႈၶႂ်ႈၸႃႉဢေႃႈ။-
ၶဝ်ဢမ်ႇႁဵတ်းဝၢတ်ႈၵူဝ်းၵႂၢႆႇတီႈ ထႃႇဝရႃႉၽြႃး၊ ယဝ်ႉလႄႈဢွၼ်ၵၼ်ႁဵတ်းဝၢတ်ႈတီႈၽြႃး ပႃႇလႃႉ၊ ဢိၵ်ႇတင်းၼၢင်းၽီ ဢႃႇသတရိတ်ႉ၊ တင်းလၢႆဢေႃႈ။-
ပိူဝ်ႈၼႆလႄႈ ထႃႇဝရႃႉၽြႃး၊ ၸႂ်မႆႈၶႂ်ႈၸႃႉတေႃႇၵူၼ်းမဵဝ်း ဢိသရေး၊ တင်းလၢႆၼႃႇလူင်လၢင်လႄႈမၼ်းၸဝ်ႈႁႂ်ႈၵူၼ်းႁၢႆႉၵူၼ်းလိူင်းတင်းလၢႆမႃးတိုၵ်းတေႃးႁိမ်ႁူင်ႇဢဝ်ၶဝ်ဢေႃႈ။ မၼ်းၸဝ်ႈဢဝ်ရၢၼ်ႇသူႇၶဝ်တင်းလၢႆဢုပ်ႉပိူင်ႇၵႃႈၼိူဝ်ၶဝ်တေႃႇထိုင်ႁွတ်ႈၶဝ်ထၢၼ်ႈပေႃးဢမ်ႇႁႄႉၶႅၼ်တူဝ်ၸဝ်ႈၵဝ်ႇလႆႈလႃးလႃးဢေႃႈ။-
ၶဝ်ၶီႇသိုၵ်းတိုၵ်းတေႃးပွၵ်ႈလႂ်ၵေႃႈ ထႃႇဝရႃႉၽြႃး၊ ႁႂ်ႈၶဝ်တူၵ်းသုမ်းၵူႈပွၵ်ႈၸွမ်းၵႃႈၼင်ႇဢၼ်မၼ်းၸဝ်ႈတိူင်ႇဝႃႈၵတိၼၼ်ႉ၊ၶဝ်ၼၼ်ႉႁွတ်ႈထိုင်တုၵ်ႉၶႃႉတၢင်းၽၢၼ်ၼႃႇလူင်လၢင်ဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ ယုၵ်ႉတၢင်ႇပၼ်ၵူၼ်းလူင်ဢၼ်ၸီႇယၢင်ႇတြႃးတင်းလၢႆႁႂ်ႈလႆႈၵႄႇၼုၵ်ႈဢဝ်ၶဝ်ဢွၵ်ႇသေၵႃႈၼႂ်းမိုဝ်းၵူၼ်းႁၢႆႉၵူၼ်းလိူင်းတင်းလၢႆၼၼ်ႉဢေႃႈ။-
ၼႂ်းဝႃႈၼၼ်သေၵေႃႈ၊ၶဝ်ယင်းဢမ်ႇထွမ်ႇဢမ်ႇဢဝ်ၵႂၢမ်းၵူၼ်းလူင်ဢၼ်ၸီႇယၢင်ႇတြႃးၸိူဝ်းၼၼ်ႉ။ ၶဝ်ယင်းဢမ်ႇပႂ်ႉသဵတ်ႈၸႃႇတီႈ ထႃႇဝရႃႉၽြႃး၊ သေလႄႈဝႆႈသႃၽြႃးတၢင်ႇသူႇတၢင်ႇပႃးၸိူဝ်းၼၼ်ႉယူႇဢေႃႈ။ ပူႇမွၼ်ႇၶဝ်ၸိူဝ်းၼၼ်ႉၵမ်ၵျၢင်ႉၸွမ်းပိင်းၺၢပ်ႈ ထႃႇဝရႃႉၽြႃး၊ သေၵေႃႈ၊ၵူၼ်းဢၼ်သိုပ်ႇလူင်းမႃးၸူဝ်ႈပၢၼ်ၼႆႉၸမ်ႉ၊ၸုၼ်ႉပႅတ်ႈတၢင်းၵမ်တၢင်းၵျၢင်ႉၼၼ်ႉၶၼ်ၶၼ်ၽႂ်းၽႂ်းဢေႃႈ။-
မိူဝ်ႈလႂ်သေဢမ်ႇဝႃႈ၊မိူဝ်ႈဢၼ် ထႃႇဝရႃႉၽြႃး၊ ယုၵ်ႉတၢင်ႇၵူၼ်းလူင်ဢၼ်ၸီႇယၢင်ႇတြႃးပုၼ်ႈၶဝ်ၼၼ်ႉၸိုင်၊မၼ်းၸဝ်ႈမီးလူၺ်ႈၵၼ်တင်းၵူၼ်းလူင်ၼၼ်ႉယူႇသေလႄႈၵႄႇသႄႇၶျွတ်ႈဢဝ်ၶဝ်လွတ်ႈသေၵႃႈၼႂ်းမိုဝ်းရၢၼ်ႇသူႇၶဝ်ၼႂ်းၸူဝ်ႈပၢၼ်ၵူၼ်းလူင်ၼၼ်ႉတဵမ်တဵမ်ဢေႃႈ။ ထႃႇဝရႃႉၽြႃး၊ ၶုၵ်းၸႂ်လႆႈၶဝ်ၵွပ်ႈပိူဝ်ႈၶဝ်ၶၢင်းၶီၶၢင်းၽၢၼ်လူၺ်ႈတၢင်းဢၼ်လႆႈၶၢမ်ႇၼိၵ်ႈၸၢၵ်ႈငႅၼ်းသႄးၼၼ်ႉဢေႃႈ။-
ၵူၺ်းၵႃႈ၊လိုၼ်းသေၵူၼ်းလူင်ဢၼ်ၸီႇယၢင်ႇတြႃးၼၼ်ႉသဵင်ႈႁၢႆတၢႆယဝ်ႉၼၼ်ႉၸိုင်၊ၶဝ်ၼၼ်ႉသမ်ႉဝၢႆႇၶိုၼ်ႈလႄႈယဵင်ႈၶႅၼ်းႁၢႆႉမိူၵ်ႈသေၸူဝ်ႈပၢၼ်ပူႇမွၼ်ႇၶဝ်ၼၼ်ႉဢေႃႈ။ ၶဝ်ႁဵတ်းဝၢတ်ႈၵူဝ်းၵႂၢႆႇၽြႃးတၢင်ႇသူႇတၢင်ႇပႃးတင်းလၢႆလႄႈ၊ၶဝ်ဢမ်ႇၸုၼ်ႉပႅတ်ႈတၢင်းၵမ်တၢင်းၵျၢင်ႉဢၼ်ႁၢႆႉဢၼ်မိူၵ်ႈၶဝ်ၼၼ်ႉလႃးလႃး။-
ထႃႇဝရႃႉၽြႃး၊ ၸႂ်မႆႈၶႂ်ႈၸႃႉတေႃႇၵူၼ်းမဵဝ်း ဢိသရေး၊ တင်းလၢႆလႄႈလၢတ်ႈဝႃႈ၊ “ၵူၼ်းမဵဝ်းၼႆႉယႃႉပႅတ်ႈပတိၺိၺ်ႇဢၼ်ၵဝ်ႁဵတ်းဝႆႉလူၺ်ႈၵၼ်တင်းပူႇမွၼ်ႇၶဝ်ၼၼ်ႉယဝ်ႉ။ ၵွပ်ႈပိူဝ်ႈၶဝ်ဢမ်ႇထွမ်ႇဢမ်ႇဢဝ်ၵႂၢမ်းၵဝ်ၼၼ်ႉလႄႈ၊-
ၵဝ်တၵ်းဢမ်ႇႁေႃႈၵူၼ်းမဵဝ်းၸိူဝ်းဢၼ်ၵိုတ်းၵျၢၼ်ႇမီးဝႆႉၵႃႈၼႂ်းမိူင်းၼႆႉလိုၼ်းသေ ယေႃးသု၊ တၢႆယဝ်ႉၼၼ်ႉလႃးလႃး။-
ၵဝ်တၵ်းဢဝ်ၵူၼ်းမဵဝ်းၸိူဝ်းၼႆႉၸၢမ်းတူၺ်းတီႈၵူၼ်းမဵဝ်း ဢိသရေး၊ လွင်ႈဢၼ်ၶဝ်တၵ်းပႂ်ႉၵမ်ပႂ်ႉၸွမ်းသဵၼ်ႈတၢင်းၵဝ်မိူၼ်ၸိူဝ်ႉၼင်ႇပူႇမွၼ်ႇၶဝ်ပႂ်ႉၵမ်ပႂ်ႉၵျၢင်ႉႁိုဝ်း၊ဢမ်ႇပႂ်ႉၵမ်ပႂ်ႉၵျၢင်ႉႁိုဝ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ ထႃႇဝရႃႉၽြႃး၊ ႁႂ်ႈၵူၼ်းမဵဝ်းၸိူဝ်းၼၼ်ႉယူႇသဝ်းၵႃႈၼႂ်းမိူင်းၼၼ်ႉလႄႈမၼ်းၸဝ်ႈယင်းဢမ်ႇပၼ်ဢၶႂၢင်ႉ ယေႃးသု၊ တၵ်းပႄႉၼႅင်ႇၶဝ်၊မၼ်းၸဝ်ႈယင်းဢမ်ႇႁေႃႈၶဝ်ဢွၵ်ႇပႅတ်ႈၵမ်းလဵဝ်ဝၢႆးသေ ယေႃးသု၊ တၢႆယဝ်ႉၼၼ်ႉဢေႃႈ။
ၵွပ်ႈပိူဝ်ႈလွင်ႈတၢင်းၸိူဝ်ႉၼင်ႇၼႆလႄႈ ထႃႇဝရႃႉၽြႃး၊ ဝႆႉၵူၼ်းမဵဝ်းၵမ်ႈၽွင်ႈၵိုတ်းၵျၢၼ်ႇယူႇပုၼ်ႈတႃႇတေၸၢမ်းတူၺ်းၵူၼ်းမဵဝ်း ဢိသရေး၊ တင်းလၢႆ၊ၸိူဝ်းဢၼ်ဢမ်ႇလႆႈႁုလွင်ႈၼႃႈသိုၵ်းဢၼ်တိုၵ်းတေႃးၵႃႈၼႂ်းမိူင်း ၶႃႇၼၼ်ႇ၊ ၼၼ်ႉဢေႃႈ။-
မၼ်းၸဝ်ႈႁဵတ်းၸိူဝ်ႉၼင်ႇၼႆႁႂ်ႈလႆႈသွၼ်ပၼ်ၵူၼ်းမဵဝ်း ဢိသရေး၊ ၵူႈသိုပ်ႇသိုပ်ႇႁႂ်ႈၶဝ်ႁုလွင်ႈၼႃႈသိုၵ်းလႄႈ၊လိူဝ်တွၼ်းၼႃႇသေပိူၼ်ႈၶႂ်ႈသွၼ်ၶဝ်ၸိူဝ်းဢၼ်ဢမ်ႇတွၼ်ႉလႆႈၶဝ်ႈတိုၵ်းသိုၵ်းသေပွၵ်ႈၼၼ်ႉၵူၺ်းဢေႃႈ။-
ၵူၼ်းမဵဝ်းဢၼ်ၵိုတ်းၵျၢၼ်ႇယူႇၵႃႈၼႂ်းမိူင်းၼၼ်ႉၸမ်ႉ၊ပဵၼ်ၶုၼ်ၵူၼ်း ၽိလိတ်ႉတိ၊ ၶဝ်ႁႃႈပႃး၊ၵႃႈပဵၼ်ၵူၼ်း ၶႃႇၼၼိ၊ ၵူၼ်း ၸိတုမ်ႇ၊ ၵူၼ်း ႁိဝိ၊ ဢၼ်ယူႇၵႃႈၼိူဝ်ႁၢၼ်ႉလွႆ လေႇပၼုၼ်ႇ၊ ဢဝ်သေၵႃႈတီႈလွႆ ပႃႇလႃႉႁေရမုၼ်ႇ၊ တေႃႇထိုင်ႁွတ်ႈပၢၵ်ႇတၢင်း ႁႃႇမတ်ႉ၊ ၼၼ်ႉဢေႃႈ။-
ၶဝ်ၼၼ်ႉပဵၼ်ပုၼ်ႈဢၼ်တၵ်းၸၢမ်းတူၺ်းမဵဝ်း ဢိသရေး၊ ႁႂ်ႈလႆႈႁုလွင်ႈဢၼ်ၶဝ်ၵမ်ၵျၢင်ႉၸွမ်းၵႃႈၼင်ႇပိင်းၺၢပ်ႈတြႃး ထႃႇဝရႃႉၽြႃး၊ ဢၼ်ဢဝ်တင်း မူဝ်းသေႇ၊ သင်ႇလၢတ်ႈဝႆႉတီႈပူႇမွၼ်ႇၶဝ်ၼၼ်ႉႁိုဝ်း၊ဢမ်ႇၵမ်ၵျၢင်ႉႁိုဝ်းၼၼ်ႉဢေႃႈ။-
ၼင်ႇၼၼ်လႄႈၵူၼ်းမဵဝ်း ဢိသရေး၊ တင်းလၢႆယူႇလူၺ်ႈၵၼ်တင်းၵူၼ်းမဵဝ်း ၶႃႇၼၼိ၊ ၵူၼ်းမဵဝ်း ႁိတ်ႉတိ၊ ၵူၼ်းမဵဝ်း ဢႃႇမေႃးရိ၊ ၵူၼ်းမဵဝ်း ၽေႇရၸိ၊ ၵူၼ်းမဵဝ်း ႁိဝိ၊ တင်းၵူၼ်းမဵဝ်း ယေႇပုသိ၊ ၸိူဝ်းၼၼ်ႉဢေႃႈ။-
ၶဝ်ဢဝ်လုၵ်ႈသၢဝ်ၵူၼ်းၸိူဝ်းၼၼ်ႉမႃးပဵၼ်မေးၶဝ်လႄႈသမ်ႉဢဝ်လုၵ်ႈယိင်းတူဝ်ၸဝ်ႈၵဝ်ႇပၼ်တီႈလုၵ်ႈၸၢႆးၵူၼ်းၸိူဝ်းၼၼ်ႉသေယဝ်ႉ၊ဢွၼ်ၵၼ်ႁဵတ်းဝၢတ်ႈၵူဝ်းၵႂၢႆႇၽြႃးၶဝ်ယူႇဢေႃႈ။
ၵူၼ်းမဵဝ်း ဢိသရေး၊ တင်းလၢႆ လူင်လိုမ်း ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်လႄႈႁဵတ်းတုၸရိူၵ်ႈၵႃႈတီႈၽၢႆႇၼႃႈမၼ်းၸဝ်ႈသေယဝ်ႉ၊ဢွၼ်ၵၼ်ဝႆႈႁုၼ်ႇႁၢင်ႈၽြႃး ပႃႇလႃႉ၊ တင်းသဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ ၶဝ်ဢေႃႈ။-
ၵွပ်ႈၼႆလႄႈ ထႃႇဝရႃႉၽြႃး၊ ၸႂ်မႆႈၶႂ်ႈၸႃႉတေႃႇၵူၼ်းမဵဝ်း ဢိသရေး၊ ၼႃႇလူင်လၢင်လႄႈမၼ်းၸဝ်ႈႁႂ်ႈၶုၼ်ႁေႃၶမ်း ၵုသၼ်ႇရိသႀိမ်ႇ၊ မိူင်း မေႇသူဝ်ႇပူဝ်ႇတေးမီးယႃး၊ တိုၵ်းတေႃးပႄႉၼႅင်ႇၶဝ်သေယဝ်ႉ၊မၼ်းၼၼ်ႉဢုပ်ႉပိူင်ႇၶဝ်ပႅတ်ႇပီဢေႃႈ။-
မိူဝ်ႈၼၼ်ႉ၊ၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ႁွင်ႉသႅၼ်ႇတီႈ ထႃႇဝရႃႉၽြႃး၊ လႄႈမၼ်းၸဝ်ႈပွႆႇၸႂ်ႉၵူၼ်းၵေႃႉၼိုင်ႈၵႂႃႇႁႂ်ႈလႆႈပွႆႇၶဝ်လွတ်ႈဢေႃႈ။ ၵေႃႉၼၼ်ႉပဵၼ် ဢေႃးႀၼ်ႇယေႇလႃႉ၊ လုၵ်ႈၸၢႆး ၵေးၼတ်ႉ၊ ၵေႃႉဢၼ်ပဵၼ်ၼွင်ႉၸၢႆး ၵႃႇလႅပ်ႉ၊ ၼၼ်ႉဢေႃႈ။-
ဝိၺိၺ်ႇ ထႃႇဝရႃႉၽြႃး၊ တူၵ်းႁွတ်ႈၵႃႈၼိူဝ်မၼ်းလႄႈမၼ်းလႆႈပဵၼ်ၵူၼ်းလူင်ဢၼ်ၸီႇယၢင်ႇတြႃးတီႈၵူၼ်းမဵဝ်း ဢိသရေး၊ ၶဝ်ဢေႃႈ။ မၼ်းၶီႇသိုၵ်းလႄႈ ထႃႇဝရႃႉၽြႃး၊ ႁႂ်ႈမၼ်းဢွင်ႇသိုၵ်းၵႃႈၼိူဝ်ၶုၼ်ႁေႃၶမ်းမိူင်း မေႇသူဝ်ႇပူဝ်ႇတေးမီးယႃး၊ ၼၼ်ႉဢေႃႈ။-
မိူင်းတင်းမိူင်းၼိမ်လီယဵၼ်လီသီႇသိပ်းပီတဵမ်တဵမ်သေယဝ်ႉ၊ ဢေႃးႀၼ်ႇယေႇလႃႉ၊ သဵင်ႈႁၢႆတၢႆၵႂႃႇဢေႃႈ။
ၵူၼ်းမဵဝ်း ဢိသရေး၊ တင်းလၢႆသမ်ႉႁဵတ်းတုၸရိူၵ်ႈၽၢႆႇၼႃႈ ထႃႇဝရႃႉၽြႃး၊ ထႅင်ႈဢေႃႈ။ ၵွပ်ႈပိူဝ်ႈလွင်ႈတၢင်းၼႆႉလႄႈ ထႃႇဝရႃႉၽြႃး၊ ႁႂ်ႈ ဢေႇၵလွၼ်ႇ၊ ၶုၼ်ႁေႃၶမ်းမိူင်း မေႃႇၽႃႉ၊ ႁႅင်းယႂ်ႇၼႃႇသေမဵဝ်း ဢိသရေး၊ ဢေႃႈ။-
ၶုၼ်ၼၼ်ႉၽွမ်ႉၵၼ်တင်းၵူၼ်းမဵဝ်း ဢမ်ႇမုၼ်ႇ၊ တင်းၵူၼ်းမဵဝ်း ဢႃႇမလႅၵ်ႉ၊ သေလႄႈတိုၵ်းပႄႉမဵဝ်း ဢိသရေး၊ သေယဝ်ႉ၊သိမ်းဢဝ်ဝဵင်း ယေႇရိၶူဝ်း၊ ဢၼ်ဝႃႈဝဵင်းတူၼ်ႈထၼ်ၼၼ်ႉဢေႃႈ။-
ၵူၼ်းမဵဝ်း ဢိသရေး၊ တင်းလၢႆလႆႈၶၢမ်ႇပဵၼ်ၶႃႈၵူၼ်းမိူင်းၶုၼ်ႁေႃၶမ်း ဢေႇၵလွၼ်ႇ၊ ၼၼ်ႉသိပ်းပႅတ်ႇပီတဵမ်တဵမ်ဢေႃႈ။
မိူဝ်ႈၼၼ်ႉ၊ၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ႁွင်ႉႁႆႈတီႈ ထႃႇဝရႃႉၽြႃး၊ သေလႄႈမၼ်းၸဝ်ႈပွႆႇၸႂ်ႉၵူၼ်းၵေႃႉၼိုင်ႈၵႂႃႇႁႂ်ႈလႆႈပွႆႇၶဝ်လွတ်ႈဢေႃႈ။ ၵေႃႉၼၼ်ႉပဵၼ် ဢေႇႁုတ်ႉ၊ ၵူၼ်းမိုဝ်းသၢႆႉဢၼ်ပဵၼ်လုၵ်ႈၸၢႆး ၵေးရႃႉ၊ ၵႃႈၼႂ်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ ၼၼ်ႉဢေႃႈ။ ၵူၼ်းမဵဝ်း ဢိသရေး၊ တင်းလၢႆႁႂ်ႈမၼ်းၼၼ်ႉပႃးဢဝ်တင်းလၢၵ်ႈသွင်ႇသေလႄႈၵႂႃႇၸူးတီႈၶုၼ်ႁေႃၶမ်း ဢေႇၵလွၼ်ႇ၊ မိူင်း မေႃႇၽႃႉ၊ ပုၼ်ႉဢေႃႈ။-
ဢေႇႁုတ်ႉ၊ ၵေႃႈႁဵတ်းလၢပ်ႇဢၼ်မီးၶူမ်းသွင်ၽၢႆႇဢၼ်ယၢဝ်းသွၵ်ႇၼိုင်ႈၸမ်ၸမ်သေလႄႈမတ်ႉၸပ်းၶႃမၼ်းၽၢႆႇၶႂႃ သိူင်ႇဝႆႉၵႃႈၼႂ်းၶူဝ်းၼုင်ႈမၼ်းဢေႃႈ။-
ၵမ်းၼၼ်ႉ မၼ်းၸင်ႇဢဝ်လၢၵ်ႈသွင်ႇၸိူဝ်းၼၼ်ႉသၢၵ်ႈတီႈၶုၼ်ႁေႃၶမ်း ဢေႇၵလွၼ်ႇ၊ ဢၼ်ပဵၼ်ၵူၼ်းပီးၼႃႇလူင်လၢင်ၼၼ်ႉဢေႃႈ။-
မိူဝ်ႈဢၼ်မၼ်းသၢၵ်ႈပၼ်လၢၵ်ႈသွင်ႇတီႈၶုၼ်ႁေႃၶမ်း ဢေႇၵလွၼ်ႇ၊ ယဝ်ႉတူဝ်ႈယဝ်ႉၼၼ်ႉၸိုင်၊မၼ်းပွႆႇၶဝ်ၸိူဝ်းဢၼ်ႁၢပ်ႇလၢၵ်ႈသွင်ႇမႃးၼၼ်ႉႁႂ်ႈၶိုၼ်းပွၵ်ႈမိူဝ်းသေဢေႃႈ။-
တူဝ်မၼ်းၸမ်ႉ၊လုၵ်ႉသေၵႃႈတီႈမၢၵ်ႇႁိၼ်လႂ်ဢၼ်ၶွၵ်းႁဵတ်းတွင်ႈႁဵတ်းလၢႆးဝႆႉဢၼ်မီးၵႃႈတီႈဝဵင်း ၵိလႃႉၵႃႇလႃႉ၊ ၼၼ်ႉ ပွၵ်ႈၶိုၼ်းၵႂႃႇၸူးတီႈၶုၼ်ႁေႃၶမ်း ဢေႇၵလွၼ်ႇ၊ လႄႈလၢတ်ႈဝႃႈ၊ “ၸဝ်ႈၶုၼ်လူင်တီႈၶႃႈ။ ၶႃႈၸဝ်ႈမီးလွင်ႈဢၼ်တၵ်းတဵတ်ႇတဵတ်ႇလွမ်လဝ်ႈလၢတ်ႈတီႈၸဝ်ႈႁဝ်းမဵဝ်းၼိုင်ႈတီႈၶႃႈဢေႃႈ၊” ဝႃႈၼင်ႇၼႆလႄႈ။ ၶုၼ်ၼၼ်ႉၵေႃႈမီးဢမိင်ႉတီႈၶႃႈၵူၼ်းဢွၼ်ႇမၼ်းၸိူဝ်းၼၼ်ႉလႄႈဝႃႈ၊ “ႁႂ်ႈႁဝ်းသွင်ၵေႃႉၼႆႉလႆႈယူႇၶေႃၶေႃသေၵမ်း၊” ဝႃႈၼင်ႇၼႆသေယဝ်ႉ၊ၶဝ်ဢွၼ်ၵၼ်ဢွၵ်ႇၵႂႃႇဢေႃႈ။
မိူဝ်ႈၼၼ်ႉ၊ယၢမ်းမိူဝ်ႈဢၼ်ၶုၼ် ဢေႇၵလွၼ်ႇ၊ ယင်းတိုၵ်ႉၼင်ႈယူႇၵေႃႉလဵဝ်ၵႃႈၼႂ်းႁေႃယဵၼ်ဢၼ်မီးၵႃႈတီႈထၢပ်ႈၼိူဝ်ၼၼ်ႉ ဢေႇႁုတ်ႉ၊ ၶဝ်ႈၸူးတီႈမၼ်းလႄႈလၢတ်ႈဝႃႈ၊ “ၶႃႈၸဝ်ႈပႃးဢဝ်ဢမိင်ႉၽြႃးပဵၼ်ၸဝ်ႈမႃးပုၼ်ႈၸဝ်ႈႁဝ်းတီႈၶႃႈဢေႃႈ၊” ဝႃႈၼင်ႇၼႆလႄႈမၼ်းၼၼ်ႉလုၵ်ႉၸုၵ်းဢေႃႈ။-
ဢေႇႁုတ်ႉ၊ ၵေႃႈဢဝ်မိုဝ်းၶွၼ်သၢႆႉၸၵ်ႉထွတ်ႇဢဝ်လၢပ်ႇၵႃႈတီႈၶႃၶွၼ်ၶႂႃၼၼ်ႉလႄႈတႅင်းသႂ်ႇပုမ်ၶုၼ်ႁေႃၶမ်းၼၼ်ႉဢေႃႈ။-
လၢပ်ႇတႅင်းၶဝ်ႈၵႂႃႇတင်းမၢၵ်ႈထူမ်ႈၵၼ်းမၼ်းၵႂႃႇလႄႈၵွၼ်ႈၶႆၵွၼ်ႈမၼ်းထူမ်ႈလၢပ်ႇဝႆႉထၢၼ်ႈပေႃးဢမ်ႇထွတ်ႇလႆႈဢေႃႈ။ လၢပ်ႇၼၼ်ႉပွင်ႇဢွၵ်ႇၵႂႃႇၽၢႆႇတၢင်းၵူၼ်ႈမၼ်းလႄႈၶမ်ဝႆႉဢေႃႈ။-
မိူဝ်ႈၼၼ်ႉ၊ ဢေႇႁုတ်ႉ၊ ဢွၵ်ႇၵႂႃႇၸူးတီႈၼႃႈႁေႃသေယဝ်ႉ၊ဢိုတ်းၽၵ်းတူတင်းလၢႆသေလႄႈၶတ်းသေႃးဝႆႉဢေႃႈ။-
မၼ်းဢွၵ်ႇၵႂႃႇသေယဝ်ႉ၊ၶႃႈၵူၼ်းဢွၼ်ႇၶုၼ်ႁေႃၶမ်းတင်းလၢႆမႃးလႄႈထူပ်းႁၼ်ၽၵ်းတူတင်းလၢႆၶတ်းသေႃးဝႆႉဢေႃႈ။ ၶဝ်ၵူၺ်းထၢင်ႇဝႃႈၶုၼ်ႁေႃၶမ်းယင်ႉလိုဝ်ႈယူႇၽၢႆႇတၢင်းၼႂ်းၼၼ်ႉဢေႃႈ။-
ၶဝ်ဢွၼ်ၵၼ်ပႂ်ႉထႃႈယူႇႁိုင်ၼႃႇတေႃႇထိုင်ႁွတ်ႈၶဝ်ထၢၼ်ႈပေႃးတူၵ်းၸႂ်ယဝ်ႉၸင်ႇ၊ၵွပ်ႈပိူဝ်ႈဢၼ်မၼ်းၼၼ်ႉဢမ်ႇၽုၺ်ႇၽၵ်းတူၸိူဝ်းၼၼ်ႉလႄႈ၊ၶဝ်ဢဝ်ၵၢၵ်ႇသေႃးၽုၺ်ႇၽၵ်းတူဢေႃႈ။ ၶဝ်ထူပ်းႁၼ်ၸဝ်ႈၶဝ်လူမ်ႉတၢႆယူႇၵႃႈၼႂ်းႁေႃၼၼ်ႉဢေႃႈ။
ယၢမ်းမိူဝ်ႈဢၼ်ၶဝ်ယင်းတိုၵ်ႉပႂ်ႉထႃႈယူႇၼၼ်ႉ ဢေႇႁုတ်ႉ၊ ဢွၵ်ႇၵႂႃႇလႄႈပႆၶၢမ်ႈၵႂႃႇတီႈမၢၵ်ႇႁိၼ်ဢၼ်ၶွၵ်းလၢႆးဝႆႉၸိူဝ်းၼၼ်ႉပၢႆႈလွတ်ႈၵႂႃႇၸူးတီႈဝၢၼ်ႈ ၸိရပ်ႉ၊ ဢေႃႈ။-
မၼ်းႁွတ်ႈၽႅဝ်ၵႃႈၼိူဝ်ႁၢၼ်ႉလွႆ ဢေႇၽရိမ်ႇ၊ လႄႈပဝ်ႇတိုင်ႈၼႄးၶရႃႇမၼ်းႁႂ်ႈလႆႈႁွင်ႉဢဝ်မဵဝ်း ဢိသရေး၊ ၸုတုမ်ၵၼ်ပုၼ်ႈၼႃႈသိုၵ်းသေယဝ်ႉ၊ဢွၼ်ႁူဝ်ၶဝ်လူင်းမႃးဢေႃႈ။-
မၼ်းလၢတ်ႈတီႈၶဝ်လႄႈဝႃႈ၊ “ၸွမ်းၵဝ်မႃးတႃႉ။ ထႃႇဝရႃႉၽြႃး၊ ပၼ်တၢင်းဢၼ်ဢွင်ႇသိုၵ်းတီႈသူႁႂ်ႈလႆႈပႄႉၼႅင်ႇရၢၼ်ႇသူႇသူမဵဝ်း မေႃႇၽႃႉ၊ ယဝ်ႉ၊” ဝႃႈၼင်ႇၼႆလႄႈၶဝ်ဢွၼ်ၵၼ်လူင်းၸွမ်း ဢေႇႁုတ်ႉ၊ ၵႂႃႇသိမ်းဢဝ်တႃႈၶၢမ်ႈၼမ်ႉ ယေႃးတၢၼ်ႇ၊ တီႈဢၼ်ၵူၼ်း မေႃႇၽႃႉ၊ ၶဝ်ဢၢင်ႈတၵ်းၶၢမ်ႈၼၼ်ႉဢေႃႈ။ ၶဝ်ဢမ်ႇႁႂ်ႈၽူႈလႂ်ၶၢမ်ႈပူၼ်ႉလႆႈသေၵေႃႉသေၵူၼ်း။-
ၼႂ်းဝၼ်းၼၼ်ႉၶဝ်ၽၼ်းၵူၼ်းသိုၵ်း မေႃႇၽႃႉ၊ ဢၼ်ၵတ်ႉၶၼ်ႁႅင်းယႂ်ႇၸိူဝ်းၼၼ်ႉမိုၼ်ႇၼိုင်ႈၸမ်ၸမ်လႄႈဢမ်ႇလွတ်ႈၵႂႃႇသေၵေႃႉသေၵူၼ်း။-
ၼင်ႇၼၼ်လႄႈၵူၼ်းမဵဝ်း ဢိသရေး၊ ၶဝ်တိုၵ်းပႄႉၵူၼ်း မေႃႇၽႃႉ၊ ၼႂ်းဝၼ်းၼၼ်ႉသေယဝ်ႉ၊မိူင်းတင်းမိူင်းၼိမ်လီယဵၼ်လီယူႇပႅတ်ႇသိပ်းပီတဵမ်တဵမ်ဢေႃႈ။
လိုၼ်းၼၼ်ႉ၊ သမ်းၵႃး၊ လုၵ်ႈၸၢႆး ဢႃႇၼတ်ႉ၊ ပဵၼ်ၵူၼ်းလူင်ဢၼ်ၸီႇယၢင်ႇတြႃးဢေႃႈ။ မၼ်းၼၼ်ႉဢဝ်တၢႆၵူၼ်း ၽိလိတ်ႉတိ၊ ႁူၵ်းပၢၵ်ႇလူၺ်ႈၶွၼ်ႉလႅမ်ဝူဝ်း သေလႄႈၵႄႇသႄႇၶျွတ်ႈဢဝ်မဵဝ်း ဢိသရေး၊ ဢေႃႈ။
လိုၼ်းသေ ဢေႇႁုတ်ႉ၊ တၢႆယဝ်ႉၼၼ်ႉ ၵူၼ်းမဵဝ်း ဢိသရေး၊ တင်းလၢႆသမ်ႉႁဵတ်းတုၸရိူၵ်ႈၽၢႆႇၼႃႈ ထႃႇဝရႃႉၽြႃး၊ ထႅင်ႈဢေႃႈ။-
ပိူဝ်ႈၼႆလႄႈ ထႃႇဝရႃႉၽြႃး၊ ႁႂ်ႈၶဝ်တူၵ်းသုမ်းၼႂ်းမိုဝ်းၶုၼ်ႁေႃၶမ်း ယႃႇၽိၼ်း၊ ၵူၼ်းမဵဝ်း ၶႃႇၼၼိ၊ ဢၼ်ဢုပ်ႉပိူင်ႇယူႇၵႃႈတီႈဝဵင်း ႁႃႇၸေႃႇ၊ ၼၼ်ႉဢေႃႈ။ ၸဝ်ႈၵွၼ်းတပ်ႉသိုၵ်းလူင်မၼ်းၼၼ်ႉပဵၼ် သိသရႃႉ၊ ဢၼ်ယူႇၵႃႈၼႂ်းဝဵင်း ႁႃႇရေႃးသိၵ်ႉ၊ မိူင်းၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၼၼ်ႉဢေႃႈ။-
ၶုၼ်ႁေႃၶမ်း ယႃႇၽိၼ်း၊ မီးလေႃႉမႃႉသိုၵ်းလဵၵ်းၵဝ်ႈပၢၵ်ႇလႄႈ ဢုပ်ႉပိူင်ႇၵႃႈၼိူဝ်ၵူၼ်းမဵဝ်း ဢိသရေး၊ တင်းလၢႆႁၢဝ်ႈၵျၢမ်းၼႃႇၼိၵ်ႈၸၢၵ်ႈငႅၼ်းသႄးၼႃႇလူင်လၢင်ယူႇသၢဝ်းပီတဵမ်တဵမ်ဢေႃႈ။ မိူဝ်ႈၼၼ်ႉ ၵူၼ်းမဵဝ်း ဢိသရေး၊ တင်းလၢႆႁွင်ႉသႅၼ်ႇတီႈ ထႃႇဝရႃႉၽြႃး၊ ပုၼ်ႈတၢင်းဢၼ်ၸွႆႈဢၼ်ထႅမ်ဢေႃႈ။
မိူဝ်ႈယၢမ်းၼၼ်ႉ တေႇပေႃးရႃႇ၊ ၵေႃႉပဵၼ်မေး လပိတုတ်ႉ၊ ၼၼ်ႉပဵၼ်ပရေႃးၽႅတ်ႈမႄႈယိင်း ဢၼ်ထၢမ်းၼႃႈၵၢၼ်ၵူၼ်းလူင်ဢၼ်ၸီႇယၢင်ႇတြႃးၵႃႈၼိူဝ်မဵဝ်း ဢိသရေး၊ ယူႇဢေႃႈ။-
မၼ်းၼၼ်ႉယၢမ်ႈၼင်ႈၵႃႈတႂ်ႈတူၼ်ႈထၢၼ်တူၼ်ႈၼိုင်ႈ ဢၼ်မီးဝူင်ႈၵၢင်ဝဵင်း ရႃႇမႃႉ၊ တင်း ဝဵင်း ပေႇသလႃႉ၊ ၵႃႈၼိူဝ်ႁၢၼ်ႉလွႆ ဢေႇၽရိမ်ႇ၊ ၼၼ်ႉလႄႈ ၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ၶိုၼ်ႈၵႂႃႇၶၢမ်ႇဢဝ်တၢင်းဢၼ်မၼ်းၸီႇယၢင်ႇတြႃးဢေႃႈ။-
မီးဝၼ်းၼိုင်ႈမၼ်းႁွင်ႉဢဝ် ပႃႇရၵ်ႉ၊ လုၵ်ႈၸၢႆး ဢၽိၼုမ်ႇ၊ သေၵႃႈတီႈဝဵင်း ၵေႇတေးသႃႉ၊ ဢိူင်ႇ ၼပ်ႉထလိ၊ မႃးလႄႈလၢတ်ႈတီႈမၼ်းလႄႈဝႃႈ၊ “ ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ ၼၼ်ႉမီးဢမိင်ႉတီႈမႂ်းလႄႈဝႃႈၸမ်ႉ၊ ‘မႂ်းႁွင်ႉဢဝ်ၵူၼ်းမိုၼ်ႇၼိုင်ႈၵႃႈၼႂ်းၵူၼ်းၸိူဝ်ႉၶိူဝ်း ၼပ်ႉထလိ၊ တင်း ၸေႇပုလုၼ်ႇ၊ ၸိူဝ်းၼၼ်ႉသေလႄႈဢွၵ်ႇၵႂႃႇၸူးတီႈလွႆ တႃႇပေႃႇ၊ တႃႉ။-
ၵဝ်တၵ်းဢဝ်ၸဝ်ႈၵွၼ်းတပ်ႉသိုၵ်းလူင် သိသရႃႉ၊ ဢၼ်ဢုပ်ႉထိင်းတပ်ႉသိုၵ်းၶုၼ်ႁေႃၶမ်း ယႃႇၽိၼ်း၊ ၼၼ်ႉမႃးတိုၵ်းမႂ်းၵႃႈတီႈမႄႈၼမ်ႉ ၵိသုၼ်ႇ၊ ပုၼ်ႉဢေႃႈ။ မၼ်းတၵ်းပႃးဢဝ်တင်းလေႃႉမႃႉသိုၵ်းလဵၵ်းတင်းလၢႆ၊ဢိၵ်ႇတင်းၵူၼ်းသိုၵ်းမၼ်းတင်းလၢႆမႃးဢေႃႈ။ ၵူၺ်းၵႃႈ၊ၵဝ်တၵ်းပၼ်ႁႂ်ႈမႂ်းလႆႈဢွင်ႇသိုၵ်းၵႃႈၼိူဝ်မၼ်းဢေႃႈ၊’ ဝႃႈၼႆယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ပႃႇရၵ်ႉ၊ ၶိုၼ်းလၢတ်ႈလႄႈဝႃႈ၊ “ပေႃးၸဝ်ႈၼၢင်းၵႂႃႇလူၺ်ႈၵၼ်တင်းၵဝ်ၶႃႈၸိုင်၊ၵဝ်ၶႃႈတၵ်းၵႂႃႇတီႈၶႃႈဢေႃႈ။ ပေႃးၸဝ်ႈၼၢင်းဢမ်ႇၵႂႃႇၸွမ်းၸိုင်၊ၵဝ်ၶႃႈဢမ်ႇၵႂႃႇၶႃႈ၊” ဝႃႈၼင်ႇၼႆဢေႃႈ။
မႄႈယိင်းၼၼ်ႉၵေႃႈလၢတ်ႈလႄႈဝႃႈ၊ “လီယဝ်ႉ။ ၵဝ်တၵ်းၵႂႃႇလူၺ်ႈၵၼ်တင်းမႂ်းဢေႃႈ။ ၵူၺ်းၵႃႈ၊တၢင်းဢၼ်ဢွင်ႇသိုၵ်းၼၼ်ႉ တၵ်းဢမ်ႇပဵၼ်မုၼ်သရေႇပုၼ်ႈမႂ်း။ လွင်ႈမၼ်းၸမ်ႉ၊ ထႃႇဝရႃႉၽြႃး၊ တၵ်းပွႆႇႁႂ်ႈၸဝ်ႈၵွၼ်းတပ်ႉသိုၵ်း သိသရႃႉ၊ တူၵ်းသုမ်းၼႂ်းမိုဝ်းမႄႈယိင်းဢေႃႈ၊” ဝႃႈၼင်ႇၼႆသေယဝ်ႉ၊ တေႇပေႃးရႃႇ၊ ၸင်ႇလုၵ်ႉလႄႈၵႂႃႇလူၺ်ႈၵၼ်တင်း ပႃႇရၵ်ႉ၊ ၸူးတီႈဝဵင်း ၵေႇတေးသႃႉ၊ ဢေႃႈ။-
ပႃႇရၵ်ႉ၊ ၼၼ်ႉႁွင်ႉဢဝ်ၵူၼ်းၸိူဝ်ႉၶိူဝ်း ၸေႇပုလုၼ်ႇ၊ တင်း ၼပ်ႉထလိ၊ သေယဝ်ႉ၊ၵႂႃႇၸူးဝဵင်း ၵေႇတေးသႃႉ၊ လႄႈ ၵူၼ်းမိုၼ်ႇၼိုင်ႈၸွမ်းမၼ်းၵႂႃႇဢေႃႈ။ တေႇပေႃးရႃႇ၊ ၵေႃႈၵႂႃႇလူၺ်ႈၵၼ်တင်းမၼ်းဢေႃႈ။
မိူဝ်ႈယၢမ်းၼၼ်ႉ၊ ႁေႇပႃႇ၊ ၵူၼ်းမဵဝ်း ၵိၼိ၊ တႄႇတင်ႈသုမ်ႉထဵင်မၼ်းယူႇၵႃႈတီႈႁိမ်းတူၼ်ႈမႆႉၼိမ်ၵႃႈတီႈဝၢၼ်ႈ ၸႃႇၼၼ်ႇၼိမ်း၊ ဢၼ်မီးၸမ်ဝဵင်း ၵေႇတေးသႃႉ၊ ၼၼ်ႉဢေႃႈ။ မၼ်းပဵၼ်လုၵ်ႈလၢၼ် ႁေႃးပပ်ႉ၊ ပူႇၼၢႆး မူဝ်းသေႇ၊ ၼၼ်ႉလႄႈၽၢတ်ႇဢွၵ်ႇသေၵူၼ်း ၵေးၼိ၊ မႃးဢေႃႈ။
မိူဝ်ႈဢၼ် သိသရႃႉ၊ ႁုငိၼ်းလွင်ႈဢၼ် ပႃႇရၵ်ႉ၊ ၶိုၼ်ႈၸူးၵႃႈၼိူဝ်လွႆ တႃႇပေႃႇ၊ ၵႂႃႇၼၼ်ႉၸိုင်၊-
သိသရႃႉ၊ ႁွင်ႉဢဝ်လေႃႉမႃႉသိုၵ်းလဵၵ်းမၼ်းၵဝ်ႈပၢၵ်ႇဢိၵ်ႇတင်းၵူၼ်းမၼ်းတင်းမူတ်းၼၼ်ႉလုၵ်ႉသေၵႃႈတီႈဝဵင်း ႁႃႇရေႃးသိၵ်ႉ၊ မိူင်းၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၼၼ်ႉ မႃးၸူးတီႈၼမ်ႉမႄႈ ၵိသုၼ်ႇ၊ ဢေႃႈ။
မိူဝ်ႈၼၼ်ႉ၊ တေႇပေႃးရႃႇ၊ လၢတ်ႈတီႈ ပႃႇရၵ်ႉ၊ လႄႈဝႃႈ၊ “ၵႂႃႇတႃႉ။ ထႃႇဝရႃႉၽြႃး၊ ဢွၼ်ႁူဝ်မႂ်းၵႂႃႇယူႇယဝ်ႉ။ မၼ်းၸဝ်ႈပၼ်ႁႂ်ႈမႂ်းဢွင်ႇသိုၵ်းၵႃႈၼိူဝ် သိသရႃႉ၊ ၼႂ်းဝၼ်းမိူဝ်ႈၼႆႉယဝ်ႉ၊” ဝႃႈၼင်ႇၼႆဢေႃႈ။ ပိူဝ်ႈၼႆလႄႈ ပႃႇရၵ်ႉ၊ လူင်းလွႆ တႃႇပေႃႇ၊ ၵႂႃႇလူၺ်ႈၵၼ်တင်းၵူၼ်းမၼ်းမိုၼ်ႇၼိုင်ႈၼၼ်ႉဢေႃႈ။-
မိူဝ်ႈဢၼ် ပႃႇရၵ်ႉ၊ တိုၵ်းတေႃးလူၺ်ႈၵၼ်တင်းၵူၼ်းသိုၵ်းမၼ်းၼၼ်ႉၸိုင်၊ ထႃႇဝရႃႉၽြႃး၊ ႁႂ်ႈ သိသရႃႉ၊ ဢိၵ်ႇတင်းလေႃႉမႃႉလဵၵ်းမၼ်းတင်းမူတ်းဢိၵ်ႇတင်းၵူၼ်းမၼ်းတင်းမူတ်းတူၵ်းသုမ်းပႅတ်ႈဢေႃႈ။ သိသရႃႉ၊ ၸမ်ႉ၊ဝႅၼ်လူင်းလေႃႉမႃႉမၼ်းသေလႄႈလႅၼ်ႈပၢႆႈၵႂႃႇဢေႃႈ။-
ပႃႇရၵ်ႉ၊ ၵေႃႈလိုပ်ႈလမ်းၸွမ်းလေႃႉမႃႉသိုၵ်းလဵၵ်းတင်းလၢႆတင်းတပ်ႉသိုၵ်းၸိူဝ်းၼၼ်ႉၵႂႃႇတေႃႇထိုင်ႁွတ်ႈဝဵင်း ႁႃႇရေႃးသိၵ်ႉ၊ မိူင်းၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၼၼ်ႉလႄႈဢဝ်လၢပ်ႇဢဝ်လႅဝ်းၽၼ်းၵူၼ်းသိုၵ်းတင်းတပ်ႉတၢႆပႅတ်ႈဢေႃႈ။ ဢမ်ႇၵိုတ်းဢမ်ႇၵျၢၼ်ႇဝႆႉသေၵေႃႉသေၵူၼ်း။
သိသရႃႉ၊ ၼၼ်ႉ လႅၼ်ႈပၢႆႈၵႂႃႇၸူးတီႈသုမ်ႉထဵင် ယေႇလႃႉ၊ ၵေႃႉပဵၼ်မေး ႁေႇပႃႇ၊ ၵူၼ်းမဵဝ်း ၵိၼိ၊ ၼၼ်ႉ၊ၵွပ်ႈပိူဝ်ႈၶုၼ်ႁေႃၶမ်း ယႃႇၽိၼ်း၊ ဢၼ်ဢုပ်ႉပိူင်ႇတီႈဝဵင်း ႁႃႇၸေႃႇ၊ ၼၼ်ႉႁဵတ်းမိၵ်ႈသႁႃႇယႃႉဢၼ်ထုၵ်ႇၵၼ်တင်းၵူၼ်းၶိူဝ်းႁိူၼ်း ႁေႇပႃႇ၊ ဝႆႉၼၼ်ႉဢေႃႈ။-
ယေႇလႃႉ၊ ၵေႃႈ ဢွၵ်ႇၵႂႃႇႁပ်ႉႁူဝ်တၢင်း သိသလႃႉ၊ လႄႈ ႁွင်ႉဝႃႈ၊ “ၸဝ်ႈႁဝ်း၊ၶဝ်ႈမႃးသေၵမ်း။ ၶဝ်ႈၵႃႈၼႂ်းသုမ်ႉၵဝ်ၶႃႈမႃးသေၵမ်းၶႃႈ။ ဢမ်ႇလူဝ်ႇမႆႈၸႂ်ၵႃႈသင်တီႈၶႃႈ၊” ဝႃႈၼင်ႇၼႆသေယဝ်ႉ၊ သိသရႃႉ၊ ၶဝ်ႈၵႂႃႇလႄႈ၊ ယေႇလႃႉ၊ ၵေႃႈဢဝ်ၽႃႈဝႆႁူမ်ႇသုမ်ႇမၼ်းဝႆႉဢေႃႈ။-
မၼ်းၵေႃႈယွၼ်းလႄႈဝႃႈ၊ “ပၼ်ၼမ်ႉၵိၼ်တီႈၵဝ်သေၵမ်း။ ၵဝ်တွင်ႉမႆႈၼမ်ႉဢေႃႈ၊” ဝႃႈၼင်ႇၼႆလႄႈ၊ ယေႇလႃႉ၊ ၵေႃႈၽုၺ်ႇတဝ်ႈၼမ်ႉၼူမ်းလႄႈပၼ်ၵိၼ်သေယဝ်ႉ၊သမ်ႉၶိုၼ်းဢဝ်ၽႃႈႁူမ်ႇသုမ်ႇဝႆႉသေဢေႃႈ။-
မၼ်းသမ်ႉလၢတ်ႈတီႈ ယေႇလႃႉ၊ လႄႈဝႃႈ၊ “ၸုၵ်းယူႇၵႃႈတီႈႁူးၽၵ်းတူသုမ်ႉၼႆႉသေၵမ်း။ ပေႃးပိူၼ်ႈမႃးထၢမ်တီႈမႂ်းလႄႈဝႃႈ၊ ‘ၵႃႈတီႈၼႆႈ ၸွင်ႇမီးၵူၼ်းၸၢႆးသေၵေႃႉၵေႃႉႁိုဝ်း၊’ ဝႃႈၼႆၸိုင်၊မႂ်းၶိုၼ်းလၢတ်ႈလႄႈဝႃႈ၊ ‘ဢမ်ႇမီးၵူၺ်း၊’ ဝႃႈၼႆတႃႉ၊” ဝႃႈၼင်ႇၼႆဢေႃႈ။
သိသရႃႉ၊ ၼၼ်ႉ ၵွပ်ႈပိူဝ်ႈမၼ်းႁိူဝ်ႉၼႃႇလႄႈ ၼွၼ်းလပ်းၵႂႃႇဢေႃႈ။ မိူဝ်ႈၼၼ်ႉ ယေႇလႃႉ၊ ဢဝ်လိမ်ႈၸိမ်သုမ်ႉတင်းၶွၼ်ႉတွၵ်ႇသေယဝ်ႉ၊လွမ်ၶဝ်ႈၸူးမၼ်းတဵတ်ႇတဵတ်ႇလႄႈ တွၵ်ႇသႂ်ႇၵႃႈတီႈသီႈမႅပ်ႉမၼ်းတေႃႇထိုင်ႁွတ်ႈထၢၼ်ႈပေႃးၶဝ်ႈလိၼ်ၵႂႃႇဢေႃႈ။-
မိူဝ်ႈဢၼ် ပႃႇရၵ်ႉ၊ မႃးၸွမ်းႁႃ သိသရႃႉ၊ ၼၼ်ႉၸိုင်၊ ယေႇလႃႉ၊ ဢွၵ်ႇၵႂႃႇႁပ်ႉႁူဝ်တၢင်းမၼ်းလႄႈလၢတ်ႈဝႃႈ၊ “ၶဝ်ႈမႃးသေၵမ်းၶႃႈ။ ၵဝ်ၶႃႈတၵ်းၼႄၵေႃႉဢၼ်ၸဝ်ႈႁဝ်းႁႃၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။ မၼ်းၵေႃႈၶဝ်ႈၸွမ်း ယေႇလႃႉ၊ ၵႂႃႇလႄႈထူပ်းႁၼ် သိသရႃႉ၊ တၢႆယဵတ်ႇယူႇလူၺ်ႈတၢင်းဢၼ်လိမ်ႈၸိမ်သဵပ်ႇသႂ်ႇၵႃႈတီႈသီႈမႅပ်ႉမၼ်းယူႇဢေႃႈ။
ၼႂ်းဝၼ်းၼၼ်ႉ ၽြႃးပဵၼ်ၸဝ်ႈႁႂ်ႈၵူၼ်းမဵဝ်း ဢိသရေး၊ ၶဝ်ဢွင်ႇသိုၵ်းၵႃႈၼိူဝ် ယႃႇၽိၼ်း၊ ၶုၼ်ႁေႃၶမ်းၵူၼ်းမဵဝ်း ၶႃႇၼၼိ၊ ဢေႃႈ။-
ၶဝ်ဢွၼ်ၵၼ်တိုၵ်းတေႃးမၼ်းၼႂ်းၶၢဝ်းတၢင်းဢၼ်ပွၵ်ႈမိူဝ်းၼၼ်ႉႁႅင်းၼႃႇလူင်လၢင်ထၢၼ်ႈပေႃးယႃႉၽဵဝ်ႈမၼ်းပႅတ်ႈဢေႃႈ။
ၼႂ်းဝၼ်းၼၼ်ႉ တေႇပေႃးရႃႇ၊ တင်း ပႃႇရၵ်ႉ၊ လုၵ်ႈၸၢႆး ဢၽိၼုမ်ႇ၊ ၼၼ်ႉႁဵတ်းၵႂၢမ်းလႄႈ ဝႃႈၸမ်ႉ၊
“ယွင်ႈယေႃး ထႃႇဝရႃႉၽြႃး၊ တီႈၶႃႈဢေႃႈ။ လွင်ႈမၼ်းၸမ်ႉ၊ၵူၼ်းမဵဝ်း ဢိသရေး၊ တႅပ်းတတ်းၸႂ်ႁႂ်ႈလႆႈတိုၵ်းသိုၵ်း၊ ၵူၼ်းတင်းလၢႆပႃးၸႂ်ၸေႇတၼႃႇသေလႄႈသၢၵ်ႈလူႇတူဝ်ၸဝ်ႈၵဝ်ႇယဝ်ႉ။
ၶုၼ်ႁေႃၶမ်းၶဝ်႟။ ဢွၼ်ၵၼ်ထွမ်ႇငိၼ်းတႃႉ။ ၶုၼ်လူင်ၶဝ်႟။ ဢွၼ်ၵၼ်ႁႄႈႁူၸူးတႃႉ။ ၵဝ်ၼႆႉတၵ်းႁဵတ်းၵႂၢမ်း၊ၵဝ်ၼႆႉတၵ်းႁႆႇတူႇရိယႃႇ၊ ႁႂ်ႈလႆႈယွင်ႈယေႃးၽြႃးမဵဝ်း ဢိသရေး၊ ဢၼ်ဝႃႈ၊ ထႃႇဝရႃႉၽြႃး၊ ၼၼ်ႉဢေႃႈ။
ထႃႇဝရႃႉၽြႃး၊ တီႈၶႃႈ။ မိူဝ်ႈဢၼ်ၸဝ်ႈႁဝ်းဢွၵ်ႇသေၵႃႈတီႈလွႆ ၸိရႃႉ၊ ၵႂႃႇ၊ မိူဝ်ႈဢၼ်ၸဝ်ႈႁဝ်းလုၵ်ႉသေၵႃႈတီႈဢိူင်ႇ ဢေႇတုမ်ႇ၊ ၶီႇသိုၵ်းၵႂႃႇၼၼ်ႉ၊ လိၼ်မိူင်းသၼ်ႇဝႆလႄႈၽႃႉၵၢင်ႁၢဝ် သၼ်ႇၶွၼ်းယူႇ၊ ၽႃႉၽူၼ်တင်းလၢႆၵေႃႈယွတ်ႇၼမ်ႉႁူဝ်ႈတူၵ်းယူႇတီႈၶႃႈဢေႃႈ။
လွႆတင်းလၢႆမီးတၢင်းဢၼ်ၵူဝ်ႁႄသၼ်ႇသၢႆ ၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢၼ်ပဵၼ်ၸဝ်ႈၽြႃးလွႆ သိၼႃႉ၊ ၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢၼ်ပဵၼ်ၽြႃးပဵၼ်ၸဝ်ႈမဵဝ်း ဢိသရေး၊ ၼၼ်ႉတီႈၶႃႈဢေႃႈ။
ၼႂ်းၸူဝ်ႈပၢၼ် သမ်းၵႃး၊ လုၵ်ႈၸၢႆး ၵႃႇၼတ်ႉ၊ ဢိၵ်ႇတင်း ၼႂ်းၸူဝ်ႈပၢၼ် ယေႇလႃႉ၊ ၼၼ်ႉလေႃႉမႃႉတင်းလၢႆဢမ်ႇၵႂႃႇဢမ်ႇမႃးလႃးလႃး။ ၵူၼ်းပႆတႃႈပႆတၢင်းၸွမ်းသဵၼ်ႈတၢင်းလူင် တင်းလၢႆ လႆႈဢွၼ်ၵၼ်ပႆၸွမ်းတၢင်းဢၼ်လဵၵ်ႉၼွႆႉယဝ်ႉ။
ဝၢၼ်ႈၼွၵ်ႈၼႃးပၢင်ႇတင်းလၢႆ သဵတ်ႇၵူၼ်းငႅဝ်ၵူၼ်းဝႆႉယူႇယဝ်ႉ၊ သဵတ်ႇငႅဝ်ယူႇတေႃႇထိုင်ႁွတ်ႈၵဝ် တေႇပေႃးရႃႇ၊ ပေႃႇဢွၵ်ႇမႃး၊ ပေႃႇမႃးၸိူဝ်ႉၼင်ႇမႄႈမဵဝ်း ဢိသရေး၊ ၼၼ်ႉဢေႃႈ။
မိူဝ်ႈဢၼ် ဢိသရေး၊ ၶဝ်လိူၵ်ႈဢဝ်ၽြႃး ဢၼ်မႂ်ႇၼၼ်ႉ၊ ပဵၼ်သိုၵ်းပဵၼ်သိူဝ်ၵႃႈၼႂ်းမိူင်းဢေႃႈ။ မိူဝ်ႈၼၼ်ႉၸွင်ႇလႆႈႁၼ်ၶႅပ်းႁႄႉလၢၵ်ႈၼၢၵ်ႈသေဢၼ်ဢၼ်၊ႁွၵ်ႇသေၵၼ်းၵၼ်း ၵႃႈၼႂ်းၵူၼ်းမဵဝ်း ဢိသရေး၊ သီႇမိုၼ်ႇၼၼ်ႉႁိုဝ်း။
ႁူဝ်ၸႂ်ၵဝ်ၼူပ်ႈၸူးတီႈၸဝ်ႈၵွၼ်းတပ်ႉသိုၵ်းမဵဝ်း ဢိသရေး၊ ၶဝ်တင်းလၢႆဢိၵ်ႇတင်း တီႈၶဝ်ၸိူဝ်းဢၼ်ပႃးၸႂ်ၸေႇတၼႃႇသေ သၢၵ်ႈလူႇတူဝ်ၸဝ်ႈၵဝ်ႇ၊ၵႃႈၼႂ်းၵူၼ်းတင်းလၢႆၼၼ်ႉဢေႃႈ။ ယွင်ႈယေႃး ထႃႇဝရႃႉၽြႃး၊ တီႈၶႃႈဢေႃႈ။
သူၸိူဝ်းဢၼ်ၶီႇမႃႉလီႈၽိူၵ်ႇလႄႈၼင်ႈ ၵႃႈၼိူဝ်ၵွပ်းယူႇ၊ ၸိူဝ်းဢၼ်ဢွၵ်ႇတႃႈဢွၵ်ႇတၢင်းယူႇၶဝ်႟။ ဢွၼ်ၵၼ်ၶႆႈၸႂ်ဝူၼ်ႉၸႂ်လူး။
ထွမ်ႇလူး။ သဵင်မူႇၵူၼ်းၸိူဝ်းၵူၼ်းႁုၼ်ႈမေႃးယူႇၵႃႈႁိမ်းၼမ်ႉမေႃႇ၊ ဢွၼ်ၵၼ်မွၵ်ႇလၢတ်ႈလွင်ႈတၢင်းဢၼ် ထႃႇဝရႃႉၽြႃး၊ ပႄႉၼႅင်ႇဢိၵ်ႇတင်းလွင်ႈတၢင်းၵူၼ်း ဝၢၼ်ႈၼွၵ်ႈၼႃးပၢင်ႇ၊ မဵဝ်း ဢိသရေး၊ ပႄႉၼႅင်ႇၼၼ်ႉယူႇဢေႃႈ။ မိူဝ်ႈၼၼ်ႉၵူၼ်း ထႃႇဝရႃႉၽြႃး၊ ဢွၼ်ၵၼ်ၶိုၼ်းလူင်းၸူး၊ တီႈၽၵ်းတူဝဵင်းမႃးလႄႈဝႃႈၸမ်ႉ၊
‘ဢွၼ်ႁူဝ် သေၵမ်း။ တေႇပေႃးရႃႇ၊ ႟။ ဢွၼ်ႁူဝ်သေၵမ်း။ ဢွၼ်ႁူဝ်သေၵမ်း။ ႁဵတ်းၵႂၢမ်းသေၵမ်း။ ဢွၼ်ႁူဝ်သေၵမ်း။ ၶိုၼ်ႈပႃႈၼႃႈသေၵမ်း။ ပႃႇရၵ်ႉ၊ လုၵ်ႈၸၢႆး ဢၽိၼုမ်ႇ၊ ႟။ ဢွၼ်ဢဝ်ၵူၼ်းဢၼ်မႂ်းတိလႆႈမႃးၸိူဝ်းၼၼ်ႉ ၵႂႃႇသေၵမ်း၊’ ဝႃႈၼင်ႇၼႆဢေႃႈ။
ၶဝ်ၸိူဝ်းဢၼ်ပႂ်ႉသဵတ်ႈၸႃႇၼၼ်ႉဢွၼ်ၵၼ်လူင်းၸူးတီႈၵူၼ်းဢၼ်ပဵၼ်ၵႄႇပဵၼ်ႁူဝ်လႄႈ ၵူၼ်း ထႃႇဝရႃႉၽြႃး၊ ၸိူဝ်းၼၼ်ႉမႃးၸူးတီႈ မၼ်းၸဝ်ႈႁႂ်ႈလႆႈတိုၵ်းသိုၵ်းဢေႃႈ။
ၶဝ်ၸိူဝ်းၼၼ်ႉဢွၼ်ၵၼ်ဢွၵ်ႇသေၵႃႈတီႈ ဢိူင်ႇ ဢေႇၽရိမ်ႇ။ လူင်းၸူး တီႈၶူင်ႈတီႈႁူၺ်ႈ ဢေႃႈ။ ဝၢႆးလင်ၸိူဝ်ႉၶိူဝ်း ပိၼ်ႇယႃႇမိၼ်ႇ၊ ဢိၵ်ႇတင်းၵူၼ်းမၼ်းၼၼ်ႉ၊ ၸဝ်ႈၵွၼ်းတပ်ႉသိုၵ်းတင်းလၢႆဢွၼ်ၵၼ်ဢွၵ်ႇသေၵႃႈၼႂ်းမဵဝ်း မႃႇၶိရႃႉ၊ ၶဝ်ၸိူဝ်းဢၼ်ယိပ်းၵမ်ၵၼ်းႁွၵ်ႇ ရႃႇၸႃႉ ၼၼ်ႉဢွၼ်ၵၼ်ဢွၵ်ႇသေ ၵႃႈၼႂ်းၵူၼ်းမဵဝ်း ၸေႇပုလုၼ်ႇ၊ ၼၼ်ႉသေလႄႈလူင်းၸူးဢေႃႈ။
ၶုၼ်တင်းလၢႆၼႂ်းမဵဝ်း ဢိသၶႃႇ၊ ၶဝ်မီးယူႇ လူၺ်ႈၵၼ်တင်း တေႇပေႃးရႃႇ၊ ၵူၼ်း ဢိသၶႃႇ၊ မီးလူၺ်ႈၵၼ်တင်း ပႃႇရၵ်ႉ၊ ဢေႃႈ။ ၶဝ်ဢွၼ်ၵၼ်လိုပ်ႈလမ်းလူင်းၸွမ်းၵႃႈတီႈပၢင်ႇတီႈႁူၺ်ႈဢေႃႈ။ ၸိူဝ်ႉၶိူဝ်း ရုပိၼ်ႇ၊ ၽၢတ်ႇၵၼ်ပဵၼ်လၢႆမူႇဝႆႉလႄႈ ၶဝ်ဢမ်ႇၸၢင်ႈတႅပ်းတတ်းၸႂ်တေလႆႈၵႂႃႇႁိုဝ်၊ဢမ်ႇလႆႈၵႂႃႇႁိုဝ်ၼၼ်ႉဢေႃႈ။
ႁဵတ်းသင်လႄႈၶဝ်ငိူဝ်ႈငဝ်ယူႇၵႃႈၼႂ်းၶွၵ်ႈသူဝ်း။ ႁႂ်ႈလႆႈထွမ်ႇလႆႈငိၼ်းသဵင်ၵေႃႉဢၼ်လဵင်ႉသူဝ်းပဝ်ႇတုတ်ႈႁႂ်ႈသူဝ်းလႆႈငိၼ်းၼၼ်ႉႁိုဝ်း။ ၸႂ်ႈယဝ်ႉ။ ၸိူဝ်ႉၶိူဝ်း ရုပိၼ်ႇ၊ ၽၢတ်ႇၵၼ်ပဵၼ် လၢႆမူႇဝႆႉလႄႈ ၶဝ်ဢမ်ႇၸၢင်ႈတႅပ်းတတ်းၸႂ်တႃႇတေၵႂႃႇႁိုဝ်၊ဢမ်ႇၵႂႃႇႁိုဝ်ၼၼ်ႉဢေႃႈ။
ၸိူဝ်ႉၶိူဝ်း ၵၢတ်ႉ၊ ၼၼ်ႉယူႇၼိမ်ၼိမ်လီလီယူႇ ၵႃႈတီႈၽၢႆႇဝၼ်းဢွၵ်ႇၼမ်ႉ ယေႃးတၢၼ်ႇ၊ ဢေႃႈ။ ၸိူဝ်ႉၶိူဝ်း တၢၼ်ႇ၊ သမ်ႉႁဵတ်းသင်လႄႈၵိုတ်းသဝ်းယူႇ၊ ၵႃႈတီႈႁိမ်းတႃႈႁိူဝ်းသၢင်းၽေႃးယူႇ။ ၸိူဝ်ႉၶိူဝ်း ဢႃႇသျႃႇ၊ ၵေႃႈယူႇၼိမ်ၼိမ်ၵႃႈတီႈၽင်ႇပၢင်ႇလၢႆႇၸိူဝ်းၼၼ်ႉလူင်ပႄႇ။
ၸိူဝ်ႉၶိူဝ်း ၸေႇပုလုၼ်ႇ၊ တင်းၸိူဝ်ႉၶိူဝ်း ၼပ်ႉထလိ၊ ၸမ်ႉ၊ လႆႈၸုၼ်ႉဢသၢၵ်ႈတူဝ်ၸဝ်ႈၵဝ်ႇယူႇၵႃႈၼႂ်းၼႃႈသိုၵ်းဢေႃႈ။
ၶုၼ်ႁေႃၶမ်းတင်းလၢႆဢွၼ်ၵၼ်မႃးလႄႈတိုၵ်းတေႃးဢေႃႈ။ ၶုၼ်ႁေႃၶမ်းၼႂ်းမိူင်း ၶႃႇၼၼ်ႇ၊ တင်းလၢႆၵေႃႈဢွၼ်ၵၼ်တိုၵ်းတေႃး၊ ၵႃႈတီႈဝဵင်း တႃႇၼၵ်ႉ၊ ၵႃႈႁိမ်းၼမ်ႉ မေႇၵိတ်ႉတေႃႇ၊ ဢေႃႈ။ ၵူၺ်းၵႃႈ၊ၶဝ်ဢမ်ႇသိမ်းဢဝ်ငိုၼ်းၵႂႃႇလႃးလႃး။
လၢဝ်တင်းလၢႆၸွႆႈသိုၵ်းထႅမ်သိုၵ်းယူႇ ၵႃႈၼိူဝ်ၵၢင်ႁၢဝ်၊ ယၢမ်းမိူဝ်ႈဢၼ်ၶဝ်ပၼ်ႇလဵပ်ႈယူႇၸိူဝ်းၼၼ်ႉလႄႈ၊ ဢွၼ်ၵၼ်တိုၵ်းတေႃး သိသရႃႉ၊ ဢေႃႈ။
ၼမ်ႉမႄႈ ၵိသုၼ်ႇ၊ ထူမ်ႈလႄႈပတ်ႉထူဝ်းၶဝ်ၵႂႃႇယဝ်ႉ၊ၼမ်ႉ ၵိသုၼ်ႇ၊ ဢၼ်မီးဝႆႉၸႃႉၸဵမ် မိူဝ်ႈၵွၼ်ႇဢွၼ်ၼႆႉၼၼ်ႉဢေႃႈ။ ဝိၺိၺ်ႇၵဝ်႟။ ၸိုၼ်ႈဢဝ်ႁႅင်းဢွၵ်ႇလႄႈၶီႇၶိုၼ်ႈၵႂႃႇတႃႉ။
မိူဝ်ႈၼၼ်ႉမႃႉတင်းလၢႆဢွၼ်ၵၼ်သီႇတိၼ် ဢိုၼ်းမႃးလႄႈ ဢဝ်တင်းၵိပ်ႇၶဝ်ထိပ်ႇၽင်ႈလိၼ်ၵႂႃႇဢေႃႈ။
တမၢၼ်ႇၵၢင်ႁၢဝ် ထႃႇဝရႃႉၽြႃး၊ လၢတ်ႈလႄႈဝႃႈ၊ ‘ၵိၼ်ႇဝႃႈဝဵင်း မေႇရေႃးၸႃႉတႃႉ၊ ၼၼ်ႉတႃႉ။ ၵိၼ်ႇဝႃႈၶဝ်ၸိူဝ်းဢၼ်ယူႇၵႃႈတီႈဝဵင်းၼၼ်ႉၼႃႇၼႃႇတႃႉ။ လွင်ႈမၼ်းၸမ်ႉ၊ၶဝ်ဢမ်ႇမႃးၸွႆႈမႃးထႅမ် ထႃႇဝရႃႉၽြႃး၊ ၶဝ်ဢမ်ႇၸွႆႈဢမ်ႇထႅမ် ထႃႇဝရႃႉၽြႃး၊ ၼႂ်းလွင်ႈတၢင်းဢၼ်၊ တိုၵ်းတေႃးၵၼ်တင်းၵူၼ်းႁႅင်းယႂ်ႇၼၼ်ႉ၊’ ဝႃႈၼင်ႇၼႆဢေႃႈ။
ယေႇလႃႉ၊ ၵေႃႉပဵၼ်မေး ႁေႇပႃႇ၊ မဵဝ်း ၵိၼိ၊ ၼၼ်ႉမီးမၢင်ႇၵလႃႇဢေႃႈ။ မီးမၢင်ႇၵလႃႇဢၼ်မျၢတ်ႈၼႃႇလိူဝ်တွၼ်းသေမႄႈယိင်းတင်းလၢႆ၊ မႄႈယိင်းၸိူဝ်းဢၼ်မီးယူႇၵႃႈၼႂ်းသုမ်ႉၼႂ်းထဵင်တင်းလၢႆၼၼ်ႉဢေႃႈ။
သိသရႃႉ၊ ယွၼ်းၵိၼ်ၼမ်ႉဢေႃႈ။ ၵူၺ်းၵႃႈ၊မၼ်းပၼ်ၵိၼ်ၼမ်ႉၼူမ်းဢေႃႈ။ မၼ်းဢဝ်ၼမ်ႉၼူမ်းၵၢမ်ႈသႂ်ႇၼႂ်းၵွၵ်းဢၼ်ၶုၼ်သုင်းၼၼ်ႉပၼ်ဢေႃႈ။
မၼ်းဢဝ်မိုဝ်းၶွၼ်ၼိုင်ႈယိပ်းလိမ်ႈၸိမ် သုမ်ႉထဵင်ယူႇ၊ ဢဝ်မိုဝ်းၶွၼ်ၶႂႃယိပ်းၶွၼ်ႉတွၵ်ႇၵူၼ်းႁဵတ်းၵၢၼ်ၼၼ်ႉသေလႄႈ မၼ်းတွၵ်ႇသႂ်ႇၵွၵ်းႁူဝ်ၵေႃႉၼၼ်ႉထၢၼ်ႈပေႃးတႅၵ်ႇယဝ်ႉ။ မၼ်းသဵပ်ႇတႅင်းသႂ်ႇသီႈမႅပ်ႉၵေႃႉၼၼ်ႉ ပွင်ႇပိဝ်ၵႂႃႇဢေႃႈ။
ၵေႃႉၼၼ်ႉလူမ်ႉတူၵ်းၵႂႃႇယဵတ်ႇယူႇဢိူၼ်လိူၼ်ၵႃႈတီႈတိၼ်မၼ်းဢေႃႈ။ ၵေႃႉၼၼ်ႉလူမ်ႉတူၵ်းၵႂႃႇၵႃႈၼိူဝ်လိၼ်လႄႈတၢႆၵႂႃႇၵႃႈတီႈတိၼ်မၼ်းဢေႃႈ။
မႄႈ သိသရႃႉ၊ ၼၼ်ႉမွင်းထႃႈယူႇၵႃႈတီႈ ႁူးလၢင်းတဵၼ်၊ ယူႇၵႃႈတီႈႁူးၽႃလႄႈပွင်ႉၶၢင်းဝႃႈ၊ ‘ၵွပ်ႈပိူဝ်ႈသင်လႄႈလေႃႉမႃႉမၼ်းၼၢၼ်းမႃး။ ၵွပ်ႈပိူဝ်ႈသင်လႄႈမၢၵ်ႇလေႃႉမၼ်းထိူင်းၼႃႇ ၸိူဝ်ႉၼင်ႇႁိုဝ်၊’ ဝႃႈၼႆယူႇဢေႃႈ။
ၸိူင်ႉၼၢင်းမၼ်းဢၼ်မီးပိင်ႇၺႃႇၸိူဝ်းၼၼ်ႉ ၶိုၼ်းလဝ်ႈလၢတ်ႈၵူၺ်းဢမ်ႇၵႃး၊ တူဝ်မၼ်းၵေႃႈၶိုၼ်းလၢတ်ႈယူႇၶိူဝ်းၶိူဝ်းယႂ်းယႂ်းလႄႈဝႃႈ၊
‘ၶဝ်ထူပ်းႁၼ်ဢုၵ်ႉၸႃႇယဝ်ႉလႄႈသိမ်းဢဝ် ၽႄမႅင်ႇၵၼ်ယူႇယဝ်ႉ။ ပုၼ်ႈၵူၼ်းသိုၵ်းယေႈၵေႃႉလႆႈဢဝ်သၢဝ်ၵၼ်ႇၺႃႇယေႈၵေႃႉဢမ်ႇၼၼ်သွင်ၵေႃႉ၊ ပုၼ်ႈ သိသရႃႉ၊ ၸမ်ႉ၊ၶူဝ်းၼုင်ႈဢၼ်ၶိုၵ်ႉ ဢၼ်ၶမ်ႇလီ၊ ပုၼ်ႈမုၼ်သရေႇၵေႃႉဢၼ်ဢွင်ႇသိုၵ်းသမ်ႉမီးၶိူင်ႈၶေႃးဢၼ်ႁွႆႈၶေႃးဝႆႉယဝ်ႉ၊’ ဝႃႈၼႆယူႇဢေႃႈ။
ဢူဝ်း ထႃႇဝရႃႉၽြႃး၊ တီႈၶႃႈ။ ႁႂ်ႈရၢၼ်ႇသူႇၸဝ်ႈႁဝ်းတၢႆမူတ်းမူတ်းသဵင်ႈသဵင်ႈၸိူဝ်ႉၼင်ႇၼၼ်သေၵမ်းတီႈၶႃႈ။ ၵေႃႉသႄႈၸဝ်ႈႁဝ်းတင်းလၢႆၸမ်ႉ၊ႁိူဝ်ႈလႅင်းမိူၼ်ၸိူဝ်ႉၼင်ႇသၢႆလႅတ်ႇဢၼ်ၶိုၼ်ႈယူႇၼၼ်ႉသေၵမ်းလူၺ်ႈတီႈၶႃႈ၊” ဝႃႈၼင်ႇၼႆဢေႃႈ။ လိုၼ်းၼၼ်ႉမိူင်းတင်းမိူင်းယဵၼ်ၼိမ်လီယူႇသီႇသိပ်းပီတဵမ်တဵမ်ဢေႃႈ။
ၵူၼ်းမဵဝ်း ဢိသရေး၊ တင်းလၢႆသမ်ႉႁဵတ်းတုၸရိူၵ်ႈၵႃႈတီႈၽၢႆႇၼႃႈ ထႃႇဝရႃႉၽြႃး၊ ထႅင်ႈလႄႈမၼ်းၸဝ်ႈႁႂ်ႈၵူၼ်းမဵဝ်း မိတျၼ်ႇ၊ ဢုပ်ႉပိူင်ႇၵႃႈၼိူဝ်ၶဝ်ၸဵတ်းပီတဵမ်တဵမ်ဢေႃႈ။-
မဵဝ်း မိတျၼ်ႇ၊ ၼၼ်ႉ မီးႁႅင်းတၼ်းၶူဝ်းယႂ်ႇၼႃႇလိူဝ်တွၼ်းသေမဵဝ်း ဢိသရေး၊ တေႃႇထိုင်ႁွတ်ႈၵူၼ်း ဢိသရေး၊ ၶဝ်လႆႈပၢႆႈၵႂႃႇတဵတ်ႇမႅပ်းၵႃႈၼႂ်းပိုင်ႈၼႂ်းထမ်ႈ၊ၵႃႈၼိူဝ်လွႆတီႈဢၼ်မၼ်ႈဢၼ်ၶိူင်ႇလွတ်ႈၽေးၼၼ်ႉဢေႃႈ။-
မိူဝ်ႈဢၼ်ၵူၼ်းမဵဝ်း ဢိသရေး၊ ၶဝ်ဝၢၼ်ႇၸိူဝ်ႉဝၢၼ်ႇၽၼ်းမိူဝ်ႈလႂ်သေဢမ်ႇဝႃႈ၊ၵူၼ်းမဵဝ်း မိတျၼ်ႇ၊ တင်းလၢႆႁွင်ႉပႃးဢဝ်ၵူၼ်းမဵဝ်း ဢႃႇမလႅၵ်ႉ၊ တင်းၵူၼ်းၸိူဝ်ႉၶိူဝ်းၼႂ်းထိူၼ်ႇလႅင်ႉတင်းလၢႆမႃးလႄႈတိုၵ်းတေႃးၶဝ်ဢေႃႈ။-
ၶဝ်ၸိူဝ်းၼၼ်ႉၶျႃးပၢင်တပ်ႉသေလႄႈယႃႉၽဵဝ်ႈပႅတ်ႈမၢၵ်ႇၶဝ်ႈႁူင်းၼမ်ႉတင်းလၢႆလူင်းၵႂႃႇတၢင်းၸၢၼ်းတေႃႇထိုင်ဢိူင်ႇဝဵင်း ၵႃႇၸႃႉ၊ ပုၼ်ႉဢေႃႈ။ ၶဝ်ၸိူဝ်းၼၼ်ႉယင်းႁိမ်ဢဝ်သူဝ်း၊ဝူဝ်း၊မႃႉလီႈၶဝ်တင်းလၢႆတေႃႇထိုင်ႁွတ်ႈၶဝ်ဢမ်ႇမီးတၢင်းၵိၼ်တၢင်းၶူပ်းဢေႃႈ။-
ၶဝ်ၸိူဝ်းၼၼ်ႉၸၢင်ႈပႃးဢဝ်တင်းတရိၵ်ႈသၢၼ်ႇၶဝ်၊တင်းသုမ်ႉၶဝ်ထဵင်ၶဝ်မႃးၼမ်ၼႃႇမိူၼ်ၸိူဝ်ႉၼင်ႇမႅင်းၸၵ်းတႅၼ်ဢေႃႈ။ ၶဝ်ၸိူဝ်းၼၼ်ႉမႃးႁႂ်ႈလႆႈတိုၵ်းသိမ်းဢဝ်မိူင်းၼၼ်ႉယူႇယဝ်ႉလႄႈ၊-
မဵဝ်း ဢိသရေး၊ ဢမ်ႇၸၢင်ႈႁဵတ်းၸိူဝ်ႉၼင်ႇႁိုဝ်တီႈၶဝ်ၸိူဝ်းၼၼ်ႉလႄႈယူႇဢေႃႈ။
မိူဝ်ႈၼၼ်ႉၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ႁွင်ႉသႅၼ်ႇတီႈ ထႃႇဝရႃႉၽြႃး၊ ပုၼ်ႈဢၼ်တၵ်းၸွႆႈတၵ်းထႅမ်ၵွပ်ႈပိူဝ်ႈၵူၼ်းမဵဝ်း မိတျၼ်ႇ၊ တင်းလၢႆၼၼ်ႉဢေႃႈ။-
ထႃႇဝရႃႉၽြႃး၊ ပွႆႇၸႂ်ႉပရေႃးၽႅတ်ႈ ၵေႃႉၼိုင်ႈမႃးၵႃႈတီႈၵူၼ်းမဵဝ်း ဢိသရေး၊ တင်းလၢႆလႄႈ၊ဢဝ်ၵႂၢမ်းဢၼ် ထႃႇဝရႃႉၽြႃး၊ သင်ႇလၢတ်ႈၼၼ်ႉသေလႄႈလၢတ်ႈတီႈၶဝ်လႄႈဝႃႈၸမ်ႉ၊ “ၵဝ်ၼုၵ်ႈဢဝ်သူၵႃႈတီႈတၢင်းဢၼ်ပဵၼ်ၶႃႈၵႃႈၼႂ်းမိူင်း ဢေးၵျိပ်ႉ၊ ၼၼ်ႉဢွၵ်ႇမႃးယဝ်ႉ။-
ၵဝ်ၵႄႇၼုၵ်ႈဢဝ်သူဢွၵ်ႇသေၵႃႈၼႂ်းမိုဝ်းၵူၼ်းမဵဝ်း ဢေးၵျိပ်ႉ၊ တင်းၵႃႈၼႂ်းမိုဝ်းၶဝ်ၸိူဝ်းဢၼ်ၼိၵ်ႈၸၢၵ်ႈငႅၼ်းသႄးသူၼၼ်ႉမႃးယဝ်ႉ။ ၵဝ်ႁေႃႈၶဝ်ဢွၵ်ႇပႅတ်ႈသေၵႃႈတီႈၽၢႆႇၼႃႈသူသေလႄႈဢဝ်မိူင်းၶဝ်ပၼ်တီႈသူယဝ်ႉ။-
ၵဝ်ပိင်းၺၢပ်ႈဝႆႉတီႈသူလႄႈဝႃႈ၊ ‘ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။ ယႃႇပေၵူဝ်းၵႂၢႆႇၽြႃးၵူၼ်း ဢႃႇမေႃးရိ၊ ဢၼ်သူယူႇၵႃႈၼႂ်းမိူင်းၶဝ်ၼၼ်ႉ၊’ ဝႃႈၼႆဝႆႉယဝ်ႉ။ ၵူၺ်းၵႃႈ၊သူဢမ်ႇထွမ်ႇဢမ်ႇဢဝ်ၵႂၢမ်းၵဝ်၊” ဝႃႈၼင်ႇၼႆဢေႃႈ။
ၵမ်းၼၼ်ႉ တမၢၼ်ႇၵၢင်ႁၢဝ် ထႃႇဝရႃႉၽြႃး၊ မႃးၵႃႈတီႈဝၢၼ်ႈ ဢေႃႇၽရႃႉ၊ သေလႄႈၼင်ႈယူႇၵႃႈတႂ်ႈတူၼ်ႈမႆႉၼိမ်ၶွင် ယေႃးသႃႉ၊ ၵူၼ်းၶိူဝ်းႁိူၼ်း ဢပျေႇၸႃႇ၊ ၼၼ်ႉဢေႃႈ။ လုၵ်ႈၸၢႆးမၼ်း ၵိတိဢုၼ်ႇ၊ ၼၼ်ႉပေႃႉၶဝ်ႈၵျုင်ႇယူႇတဵတ်ႇတဵတ်ႇၵႃႈၼႂ်းၶုမ်ၶိူင်ႈယဵပ်ႇမၢၵ်ႇၸပိတ်ႉပုၼ်ႈလွင်ႈၼင်ႇႁိုဝ်ၵူၼ်းမဵဝ်း မိတျၼ်ႇ၊ ၶဝ်တေဢမ်ႇႁၼ်မၼ်းဢေႃႈ။-
တမၢၼ်ႇၵၢင်ႁၢဝ် ထႃႇဝရႃႉၽြႃး၊ ပေႃႇမႃးၵႃႈတီႈမၼ်းလႄႈလၢတ်ႈဝႃႈ၊ “ၵူၼ်းႁတ်းႁၢၼ်ဢၼ်ႁႅင်းယႂ်ႇၼႃႇၼႆႉ႟။ ထႃႇဝရႃႉၽြႃး၊ မီးယူႇလူၺ်ႈၵၼ်တင်းမႂ်းဢေႃႈ၊” ဝႃႈၼင်ႇၼႆဢေႃႈ။
ၵိတိဢုၼ်ႇ၊ ၵေႃႈ ၶိုၼ်းလၢတ်ႈလႄႈဝႃႈ၊ “ၸဝ်ႈတီႈၶႃႈ။ ႁႂ်ႈၵဝ်ၶႃႈယွၼ်းထၢမ်သေၵမ်းၶႃႈ။ ပေႃး ထႃႇဝရႃႉၽြႃး၊ မီးယူႇလူၺ်ႈၵၼ်တင်းႁဝ်းၶႃႈတႄႉၸိုင်၊ႁဵတ်းသင်လႄႈလွင်ႈတၢင်းၸိူဝ်းၼႆႉပဵၼ်မႃးတီႈႁဝ်းၶႃႈၸိူဝ်ႉၼင်ႇႁိုဝ်ၶႃႈ။ လွင်ႈတၢင်းႁဵတ်းဢၼ်လီဢၢမ်းတင်းလၢႆဢၼ်ပူႇပေႃႈႁဝ်းၶႃႈယၢမ်ႈလၢတ်ႈၼႄတီႈႁဝ်းၶႃႈလႄႈဝႃႈ၊ ‘ ထႃႇဝရႃႉၽြႃး၊ ၼုၵ်ႈဢဝ်ႁဝ်းဢွၵ်ႇမိူင်း ဢေးၵျိပ်ႉ၊ မႃးဢေႃႈ၊’ ဝႃႈၼင်ႇၼႆၸိူဝ်းၼၼ်ႉမီးၵႃႈတီႈလႂ်ၶႃႈ။ တေႃႈလဵဝ်ၼႆႉ ထႃႇဝရႃႉၽြႃး၊ ၸုၼ်ႉပႅတ်ႈႁဝ်းၶႃႈလႄႈဢဝ်ႁဝ်းၶႃႈဢၢပ်ႈပၼ်ၼႂ်းမိုဝ်းၵူၼ်းမဵဝ်း မိတျၼ်ႇ၊ ယဝ်ႉတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၵေႃႈမီးဢမိင်ႉတီႈမၼ်းလႄႈဝႃႈ၊ “ယိပ်းသုင်းဢဵၼ်ႁႅင်းဢၼ်မႂ်းမီးယူႇၼႆႉသေလႄႈၵႂႃႇႁႂ်ႈလႆႈၵႄႇၼုၵ်ႈဢဝ်မဵဝ်း ဢိသရေး၊ ဢွၵ်ႇသေၵႃႈၼႂ်းမိုဝ်းၵူၼ်းမဵဝ်း မိတျၼ်ႇ၊ တင်းလၢႆတႃႉ။ ၵဝ်ပဵၼ်ၵေႃႉဢၼ်ပွႆႇၸႂ်ႉမႂ်းဢေႃႈ၊” ဝႃႈၼင်ႇၼႆဢေႃႈ။
ၵိတိဢုၼ်ႇ၊ ၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈတီႈၶႃႈႁႂ်ႈၵဝ်ၶႃႈယွၼ်းထၢမ်သေၵမ်းၶႃႈ။ ၵဝ်ၶႃႈတၵ်းႁဵတ်းၸိူဝ်ႉၼင်ႇႁိုဝ်ၵႄႇၼုၵ်ႈဢဝ်မဵဝ်း ဢိသရေး၊ လႆႈတီႈၶႃႈ။ ၶိူဝ်းႁိူၼ်းၵဝ်ၶႃႈၼႆႉပဵၼ်ဢၼ်ႁႅင်းလဵၵ်ႉႁႅင်းၼွႆႉသေပိူၼ်ႈၵႃႈၼႂ်းၵူၼ်းၸိူဝ်ႉၶိူဝ်း မၼႃႇသေႇ၊ တီႈၶႃႈလႄႈ၊ၵဝ်ၶႃႈၼႆႉပဵၼ်ၵေႃႉဢၼ်ယုတ်ႈဢၼ်ယွမ်းသေပိူၼ်ႈၵႃႈၼႂ်းၵူၼ်းႁိူၼ်းၵူၼ်းယေးပေႃႈၵဝ်ၶႃႈၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၵေႃႈမီးဢမိင်ႉလႄႈဝႃႈ၊ “မႂ်းတၵ်းတၢတ်ႈၼိူင်ႇလႆႈၵွပ်ႈပိူဝ်ႈဢၼ်ၵဝ်တၵ်းၸွႆႈတၵ်းထႅမ်မႂ်းၼၼ်ႉဢေႃႈ။ မႂ်းတၵ်းတိုၵ်းတေႃးယႃႉပႅတ်ႈၵူၼ်းမဵဝ်း မိတျၼ်ႇ၊ တင်းလၢႆလႆႈငၢႆႈၼႃႇထၢၼ်ႈပေႃးမိူၼ်ၸိူဝ်ႉၼင်ႇဢၼ်ၶဝ်ပဵၼ်ၵူၼ်းၵေႃႉလဵဝ်ၵူၺ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵိတိဢုၼ်ႇ၊ ၶိုၼ်းလဝ်ႈလၢတ်ႈလႄႈဝႃႈ၊ “ပေႃးၸဝ်ႈႁဝ်းထုၵ်ႇၸႂ်ၵျိူၵ်ႈၸႂ်ၵဝ်ၶႃႈၸိုင်၊ၶႅၼ်းတေႃႈၼႄပျႃးလၢၵ်ႈၶၼႃႇလွင်ႈဢၼ်ၸဝ်ႈႁဝ်းပဵၼ် ထႃႇဝရႃႉၽြႃး၊ ၼၼ်ႉတီႈၵဝ်ၶႃႈသေၵမ်းၶႃႈ။-
ၶႅၼ်းတေႃႈယႃႇပေဢွၵ်ႇၵႂႃႇသေၵႃႈတီႈၼႆႈတေႃႇထိုင်ႁွတ်ႈၵဝ်ၶႃႈဢဝ်ၶိူင်ႈတၢင်းလူႇဢႁႃႇရႃႉတၢင်းၵိၼ်မႃးသၢၵ်ႈၵၢပ်ႈတီႈၸဝ်ႈႁဝ်းၼၼ်ႉသေၵမ်းၶႃႈ၊” ဝႃႈၼႆလႄႈ၊ မၼ်းၸဝ်ႈမီးဢမိင်ႉလႄႈဝႃႈ၊ “ၵဝ်တၵ်းယူႇတေႃႇထိုင်ႁွတ်ႈမႂ်းၶိုၼ်းမႃးဢေႃႈ၊” ဝႃႈၼင်ႇၼႆဢေႃႈ။
ၵိတိဢုၼ်ႇ၊ ၵေႃႈၶဝ်ႈၵႃႈၼႂ်းႁိူၼ်းမၼ်းၵႂႃႇလႄႈႁုင်ၼိူဝ်ႉပႄႉဢွၼ်ႇတူဝ်ၼိုင်ႈ၊ဢိၵ်ႇတင်းဢဝ်ၽွင်ၶဝ်ႈၵျုင်ႇၸဵတ်းပႄႇႁဵတ်းၶဝ်ႈမုၼ်းၶႅပ်းဢၼ်ဢမ်ႇသႂ်ႇၸိူဝ်ႉပႅင်ႈၼၼ်ႉဢေႃႈ။ မၼ်းဢဝ်ၼိူဝ်ႉပႄႉၼၼ်ႉသႂ်ႇၵႃႈၼႂ်းသႃႉလႄႈဢဝ်ၼမ်ႉတူမ်ႈၼိူဝ်ႉၼၼ်ႉထွၵ်ႇသႂ်ႇၵႃႈၼႂ်းမေႃႈသေယဝ်ႉ၊ဢဝ်မႃးၵႃႈတီႈမၼ်းၸဝ်ႈၵႃႈတႂ်ႈတူၼ်ႈမႆႉၼိမ်ၼၼ်ႉသေလႄႈသၢၵ်ႈၵၢပ်ႈဢေႃႈ။-
တမၢၼ်ႇၵၢင်ႁၢဝ် ထႃႇဝရႃႉၽြႃး၊ ၵေႃႈမီးဢမိင်ႉလႄႈဝႃႈ၊ “ဢဝ်ၼိူဝ်ႉပႄႉတင်းၶဝ်ႈမုၼ်းၶႅပ်းၸိူဝ်းၼၼ်ႉတၢင်ႇဝႆႉၵႃႈၼိူဝ်မၢၵ်ႇႁိၼ်ၼႆႉသေလႄႈ၊ဢဝ်ၼမ်ႉတူမ်ႈၼိူဝ်ႉၼၼ်ႉထွၵ်ႇႁူတ်းသႂ်ႇတႃႉ၊” ဝႃႈၼင်ႇၼႆဢေႃႈ။ ၵိတိဢုၼ်ႇ၊ ၵေႃႈႁဵတ်းၸွမ်းဢေႃႈ။-
မိူဝ်ႈၼၼ်ႉတမၢၼ်ႇၵၢင်ႁၢဝ် ထႃႇဝရႃႉၽြႃး၊ ၼၼ်ႉဢဝ်ပၢႆၶွၼ်ႉတဝ်ႉဢၼ်မိုဝ်းမၼ်းယိပ်းယူႇၼၼ်ႉတိူဝ်ႉသႂ်ႇၼိူဝ်ႉတင်းၶဝ်ႈမုၼ်းၼၼ်ႉဢေႃႈ။ ၽႆးလုၵ်ႉဢွၵ်ႇသေၵႃႈတီႈမၢၵ်ႇႁိၼ်မႃးလႄႈမႆႈၶႅမ်ႈၼိူဝ်ႉတင်းၶဝ်ႈမုၼ်းၶႅပ်းၼၼ်ႉပႅတ်ႈဢေႃႈ။ မိူဝ်ႈၼၼ်ႉတမၢၼ်ႇၵၢင်ႁၢဝ်ၼၼ်ႉလပ်ႉႁၢႆၵႂႃႇသေဢေႃႈ။
မိူဝ်ႈၼၼ်ႉ၊ ၵိတိဢုၼ်ႇ၊ ႁုႁၼ်လွင်ႈဢၼ်ပဵၼ်တမၢၼ်ႇၵၢင်ႁၢဝ် ထႃႇဝရႃႉၽြႃး၊ သေယဝ်ႉ၊မၼ်းၵူဝ်ႁႄၼႃႇလႄႈလဝ်ႈလၢတ်ႈဝႃႈ၊ “ဢလူဝ်း။ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တီႈၶႃႈ။ ၵဝ်ၶႃႈၼႆႉလႆႈႁၼ်တမၢၼ်ႇၵၢင်ႁၢဝ်ၸဝ်ႈႁဝ်းၶႃႈၼႃႈတေႃႇၼႃႈတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉတီႈမၼ်းလႄႈဝႃႈ၊ “ႁႂ်ႈမီးၸႂ်ၼိမ်ၸႂ်လီတႃႉ။ ယႃႇပေၵူဝ်ပေႁႄ။ မႂ်းဢမ်ႇလႆႈတၢႆၵူၺ်း၊” ဝႃႈၼင်ႇၼႆဢေႃႈ။-
ၵိတိဢုၼ်ႇ၊ တႄႇႁဵတ်းၶဵင်ႇတၢင်းလူႇတီႈ ထႃႇဝရႃႉၽြႃး၊ ၵႃႈတီႈၼၼ်ႈသေလႄႈႁွင်ႉႁဵၵ်ႈၸိုဝ်ႈ၊ “ ထႃႇဝရႃႉၽြႃး၊ ပဵၼ်တၢင်းၼိမ်” ဢေႃႈ။ ၶဵင်ႇတၢင်းလူႇၼၼ်ႉမီးယူႇၵႃႈတီႈဝၢၼ်ႈ ဢေႃႇၽရႃႉ၊ တီႈဢၼ်ၵူၼ်းၶိူဝ်းႁိူၼ်း ဢပျေႇၸႃႇ၊ ယူႇၼၼ်ႉတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
ၼႂ်းၶိုၼ်းၼၼ်ႉ ထႃႇဝရႃႉၽြႃး၊ မီးဢမိင်ႉတီႈ ၵိတိဢုၼ်ႇ၊ လႄႈဝႃႈ၊ “ဢဝ်ဝူဝ်းဢွၼ်ႇပေႃႈမႂ်းတင်းဝူဝ်းပေႃႈတၢင်ႇတူဝ်ဢၼ်ဢသၢၵ်ႈလႆႈၸဵတ်းပီၼၼ်ႉသေယဝ်ႉ၊ၵိူၼ်ႇယႃႉၶဵင်ႇၽြႃး ပႃႇလႃႉ၊ ဢၼ်ပေႃႈမႂ်းတႄႇႁဵတ်းဝႆႉၼၼ်ႉဢိၵ်ႇတင်းယႃႉပႅတ်ႈသဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ ဢၼ်မီးႁိမ်းၶဵင်ႇၽြႃး ပႃႇလႃႉ၊ ၼၼ်ႉပႅတ်ႈတႃႉ။-
တႄႇႁဵတ်းၶဵင်ႇတၢင်းလူႇဢၼ်ဢဝ်မၢၵ်ႇႁိၼ်ၵေႃႇဝႆႉႁၢင်ႈလီႁၢင်ႈငၢမ်းပုၼ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈမႂ်းၵႃႈၼိူဝ်ၸိၵ်းထႃႇၼႃႉတီႈဢၼ်မၼ်ႈၶိူင်ႇၼႆႉသေယဝ်ႉ၊ဢဝ်ဝူဝ်းပေႃႈတူဝ်တီႈသွင်ၼၼ်ႉတုတ်ႇၽႆးတင်းတူဝ်ႁႂ်ႈပဵၼ်ၶိူင်ႈတၢင်းလူႇတႃႉ။ ဢဝ်သဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ ဢၼ်မႂ်းယႃႉပႅတ်ႈၼၼ်ႉႁဵတ်းၽိုၼ်းမၼ်းတႃႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ ၵိတိဢုၼ်ႇ၊ ၸႂ်ႉၵူၼ်းဢွၼ်ႇမၼ်းသိပ်းၵေႃႉႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉၼၼ်ႉဢေႃႈ။ ပိူဝ်ႈဢၼ်မၼ်းၵူဝ်ၵူၼ်းႁိူၼ်းပေႃႈမၼ်းတင်းၵူၼ်းဝဵင်းတင်းလၢႆလႄႈမၼ်းဢမ်ႇႁတ်းႁဵတ်းၼႂ်းၶိင်ႇၵၢင်ဝၼ်း။ မၼ်းႁဵတ်းၼႂ်းၶိင်ႇၵၢင်ၶိုၼ်းဢေႃႈ။
မိူဝ်ႈဢၼ်ၵူၼ်းဝဵင်းတင်းလၢႆလုၵ်ႉမႃးၼႂ်းၶိင်ႇၵၢင်ၼႂ်ၸဝ်ႉၸဝ်ႉၼၼ်ႉၶဝ်လႆႈႁၼ်ၶဵင်ႇၽြႃး ပႃႇလႃႉ၊ ပင်းလုဝႆႉ၊တင်းသဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ ၶၢမ်ႇတၢင်းဢၼ်ပွမ်ႈလူမ်ႉဝႆႉၵူၺ်းဢမ်ႇၵႃး၊ဝူဝ်းပေႃႈတူဝ်တီႈသွင်ဢၼ်ဢဝ်ၽဝ်ၽႆးလႄႈလႆႈသၢၵ်ႈလူႇဝႆႉယဝ်ႉၵႃႈၼိူဝ်ၶဵင်ႇတၢင်းလူႇဢၼ်တႄႇႁဵတ်းဝႆႉၵႃႈတီႈၼၼ်ႈၼၼ်ႉဢေႃႈ။-
ၶဝ်ၼင်ႇၵၼ်တွင်ႈထၢမ်ၵၼ်လႄႈဝႃႈ၊ “ၽူႈလႂ်ႁဵတ်းလွင်ႈတၢင်းၼႆႉ၊” ဝႃႈၼႆသေယဝ်ႉ၊ၶဝ်ၸႅတ်ႈထၢမ်ၸႅတ်ႈတူၺ်းလႄႈလႆႈႁုလွင်ႈဢၼ် ၵိတိဢုၼ်ႇ၊ လုၵ်ႈၸၢႆး ယေႃးသႃႉ၊ ႁဵတ်းၼၼ်ႉဢေႃႈ။-
မိူဝ်ႈၼၼ်ႉၶဝ်ဢွၼ်ၵၼ်လၢတ်ႈတီႈ ယေႃးသႃႉ၊ လႄႈဝႃႈ၊ “ဢဝ်လုၵ်ႈၸၢႆးမႂ်းဢွၵ်ႇမႃးႁႂ်ႈမၼ်းလႆႈၶၢမ်ႇတၢႆတႃႉ။ မၼ်းၵိူၼ်ႇယႃႉၶဵင်ႇၽြႃး ပႃႇလႃႉ၊ ဢိၵ်ႇတင်းယႃႉပႅတ်ႈသဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ ဢၼ်မီးႁိမ်းမၼ်းၼၼ်ႉလူမ်ႉပႅတ်ႈယဝ်ႉ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ ယေႃးသႃႉ၊ ၶိုၼ်းလၢတ်ႈတီႈၶဝ်ၸိူဝ်းဢၼ်ၸုၵ်းလွမ်ႉႁွပ်ႈမၼ်းယူႇၸိူဝ်းၼၼ်ႉလႄႈဝႃႈ၊ “သူတၵ်းၽွမ်ႉၸႂ်ၽၢႆႇၽြႃး ပႃႇလႃႉ၊ ႁိုဝ်း။ သူတၵ်းၵႅတ်ႇၶႄမၼ်းႁိုဝ်း။ ႁႂ်ႈၵေႃႉဢၼ်ၽွမ်ႉၽၢႆႇမၼ်းၼၼ်ႉတၢႆၼႂ်းၶိင်ႇၵၢင်ၼႂ်ၼႆႉသေ။ ပေႃးမၼ်းပဵၼ်ၽြႃးသူႇၼိုင်ႈၸိုင်၊ႁႂ်ႈမၼ်းၵႅတ်ႇၶႄတူဝ်မၼ်းသေ။ ၶဵင်ႇၽြႃးမၼ်းၼၼ်ႉလႆႈၶၢမ်ႇတၢင်းဢၼ်ၵိူၼ်ႇယႃႉပႅတ်ႈယဝ်ႉ၊” ဝႃႈၼင်ႇၼႆဢေႃႈ။-
ၼႂ်းဝၼ်းၼၼ်ႉ၊ ယေႃႇသႃႉ၊ ႁွင်ႉႁဵၵ်ႈၸိုဝ်ႈလုၵ်ႈၸၢႆးမၼ်း ၵိတိဢုၼ်ႇ၊ ဝႃႈ၊ ယေႇရုပ်ႉပႃႇလႃႉ၊ ဢၼ်ပွင်ႇဝႃႈ၊ “ၵေႃႉဢၼ်ၵိူၼ်ႇယႃႉၶဵင်ႇၽြႃးၼၼ်ႉယဝ်ႉ။ ႁႂ်ႈၽြႃး ပႃႇလႃႉ၊ ၼၼ်ႉၵႅတ်ႇၶႄတူဝ်ၸဝ်ႈၵဝ်ႇတႃႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၵူၼ်းမဵဝ်း မိတျၼ်ႇ၊ တင်းၵူၼ်းမိူင်း ဢႃႇမလႅၵ်ႉ၊ ဢိၵ်ႇတင်းၵူၼ်းၸိူဝ်ႉၶိူဝ်းၼႂ်းထိူၼ်ႇလႅင်ႉတင်းလၢႆၽွမ်ႉသိုၵ်းၵၼ်ၶၢမ်ႈၼမ်ႉ ယေႃးတၢၼ်ႇ၊ မႃးၶျႃးပၢင်တပ်ႉၵႃႈၼႂ်းပၢင်ႇထူင်ႉ ယေႇၸရေး၊ ဢေႃႈ။-
ဝိၺိၺ်ႇ ထႃႇဝရႃႉၽြႃး၊ ႁွတ်ႈထိုင်ၵႃႈၼိူဝ် ၵိတိဢုၼ်ႇ၊ သေယဝ်ႉ၊မၼ်းပဝ်ႇၼႄးၶရႃႇႁွင်ႉဢဝ်ၵူၼ်းၶိူဝ်းႁိူၼ်း ဢပျေႇၸႃႇ၊ ႁႂ်ႈၶဝ်ၸွမ်းလင်မၼ်းမႃးဢေႃႈ။-
မၼ်းပွႆႇၸႂ်ႉတမၢၼ်ႇတင်းလၢႆၵႂႃႇၵႃႈၼႂ်းဢိူင်ႇ မၼႃႇသေႇ၊ ၵူႈတီႈၵူႈလႅၼ်ႁွင်ႉဢဝ်ႁႂ်ႈၶဝ်ၸွမ်းလင်မၼ်းမႃးဢေႃႈ။ မၼ်းပွႆႇၸႂ်ႉတမၢၼ်ႇတင်းလၢႆၵႂႃႇၵႃႈတီႈဢိူင်ႇ ဢႃႇသျႃႇ၊ ဢိူင်ႇ ၸေႇပုလုၼ်ႇ၊ တင်းဢိူင်ႇ ၼပ်ႉထလိ၊ သေလႄႈၶဝ်ၵေႃႈဢွၼ်ၵၼ်ၸွမ်းလင်မၼ်းမႃးဢေႃႈ။
မိူဝ်ႈၼၼ်ႉ၊ ၵိတိဢုၼ်ႇ၊ လဝ်ႈလၢတ်ႈတီႈၽြႃးပဵၼ်ၸဝ်ႈလႄႈဝႃႈ၊ “ၸဝ်ႈႁဝ်းမီးဢမိင်ႉဝႃႈ၊ၸဝ်ႈႁဝ်းတႅပ်းတတ်းၸႂ်တႃႇတေၸႂ်ႉၶႃႈၸဝ်ႈၵႂႃႇၵႄႇၼုၵ်ႈဢဝ်မဵဝ်း ဢိသရေး၊ တီႈၶႃႈဢေႃႈ။-
ၶႃႈၸဝ်ႈတၵ်းဢဝ်ၶူၼ်သူဝ်းၵွင်ၼိုင်ႈဝႆႉၵႃႈတီႈတလၢင်းယဵပ်ႇၶဝ်ႈတီႈၶႃႈဢေႃႈ။ ပေႃးထိုင်ၶိင်ႇၵၢင်ၼႂ်မႃးပေႃးၼမ်ႉၼၢႆးယမ်းၶူၼ်သူဝ်းၵူၺ်းလႄႈပေႃးၼႃႈလိၼ်ႁႅင်ႈႁွင်ယူႇၵူၺ်းၸိုင်၊ၶႃႈၸဝ်ႈတၵ်းႁုလွင်ႈဢၼ်ၸဝ်ႈႁဝ်းတၵ်းတေၸႂ်ႉၶႃႈၸဝ်ႈၵႂႃႇၵႄႇၼုၵ်ႈဢဝ်မဵဝ်း ဢိသရေး၊ တႄႉတီႈၶႃႈယဝ်ႉ၊” ဝႃႈၼင်ႇၼႆဢေႃႈ။-
ပဵၼ်ၸွမ်းၸိူဝ်ႉၼင်ႇၼၼ်လီလီဢေႃႈ။ ၶိင်ႇၵၢင်ၼႂ်ၸဝ်ႉၸဝ်ႉ ၵိတိဢုၼ်ႇ၊ လုၵ်ႉလႄႈႁုပ်ႈဢဝ်ၶူၼ်သူဝ်းၼၼ်ႉသေယဝ်ႉ၊မိပ်ႇပၼ်ႈလႄႈၼမ်ႉၼၢႆးဢွၵ်ႇၵႃႈၼႂ်းၶူၼ်သူဝ်းမႃးလႆႈတဵမ်ဝၢၼ်ႇၼိုင်ႈဢေႃႈ။-
မိူဝ်ႈၼၼ်ႉ၊ ၵိတိဢုၼ်ႇ၊ လဝ်ႈလၢတ်ႈတီႈၽြႃးပဵၼ်ၸဝ်ႈလႄႈဝႃႈ၊ “ၶႅၼ်းတေႃႈယႃႇပေၶႂ်ႈၸႃႉတေႃႇၶႃႈၸဝ်ႈသေၵမ်းတီႈၶႃႈ။ ၶႅၼ်းတေႃႈႁႂ်ႈၶႃႈၸဝ်ႈလႆႈလၢတ်ႈထႅင်ႈၶေႃႈၼိုင်ႈလူးၵွၼ်ႇတီႈၶႃႈ။ ၶႅၼ်းတေႃႈပၼ်ဢၶႂၢင်ႉဢၼ်ၶႃႈၸဝ်ႈဢဝ်တင်းၶူၼ်သူဝ်းၼႆႉၸၢမ်းတူၺ်းထႅင်ႈပွၵ်ႈၼိုင်ႈသေၵမ်းတီႈၶႃႈ။ ပွၵ်ႈၼႆႉၸမ်ႉ၊ႁႂ်ႈၶူၼ်သူဝ်းၵူၺ်းႁႅင်ႈယူႇလႄႈၼႃႈလိၼ်ယမ်းၼမ်ႉၼၢႆးသေၵမ်းတီႈၶႃႈ၊” ဝႃႈၼင်ႇၼႆဢေႃႈ။-
ၼႂ်းၶိုၼ်းၼၼ်ႉၽြႃးပဵၼ်ၸဝ်ႈၵေႃႈႁဵတ်းၸိူဝ်ႉၼင်ႇၼၼ်ဢေႃႈ။ ၼႂ်းၶိင်ႇၵၢင်ၼႂ်ၼၼ်ႉၶူၼ်သူဝ်းၵူၺ်းႁႅင်ႈယူႇလႄႈၼႃႈလိၼ်ယမ်းၼမ်ႉၼၢႆးယူႇဢေႃႈ။
ၼႂ်းၶိင်ႇၵၢင်ၼႂ်ၸဝ်ႉၸဝ်ႉ ၵိတိဢုၼ်ႇ၊ (ဢၼ်မိူဝ်ႈလဵဝ်ႁွင်ႉဝႃႈ၊ ယေႇရုပ်ႉပႃႇလႃႉ၊ ) ဢိၵ်ႇတင်းၵူၼ်းမၼ်းၵႃႈမီးတင်းသဵင်ႈတင်းလူင်ၼၼ်ႉဢွၼ်ၵၼ်ၵႂႃႇၶျႃးပၢင်တပ်ႉၵႃႈႁိမ်းၼမ်ႉဢွၵ်ႇႁူး ႁႃႇရွတ်ႉ၊ ဢေႃႈ။ တပ်ႉ မိတျၼ်ႇ၊ ၼၼ်ႉ မီးၽၢႆႇတၢင်းႁွင်ႇၶဝ်ၵႃႈၼႂ်းပၢင်ႇထူင်ႉတီႈလွႆ မေႃႇရေး၊ ၼၼ်ႉဢေႃႈ။
ထႃႇဝရႃႉၽြႃး၊ မီးဢမိင်ႉတီႈ ၵိတိဢုၼ်ႇ၊ လႄႈဝႃႈ၊ “ၵူၼ်းတင်းလၢႆဢၼ်မီးတီႈမႂ်းၼႆႉၼမ်ၼႃႇပုၼ်ႈတႃႇၵဝ်တၵ်းႁႂ်ႈၶဝ်တိုၵ်းပႄႉၵူၼ်းမဵဝ်း မိတျၼ်ႇ၊ ၸိူဝ်းၼၼ်ႉဢေႃႈ။ မဵဝ်း ဢိသရေး၊ တင်းလၢႆတၵ်းၸၢင်ႈယုၵ်ႉယွင်ႈၵုင်ႇသရေႇတူဝ်ၸဝ်ႈၵဝ်ႇလႄႈၵူဝ်ၶဝ်ထၢင်ႇဝႃႈ၊ၶဝ်တိုၵ်းပႄႉၵႂႃႇၵွပ်ႈပိူဝ်ႈႁႅင်းတၼ်းၶူဝ်းတူဝ်ၸဝ်ႈၵဝ်ႇဢေႃႈ။-
မႂ်းပၢဝ်ႇသေႃႇတီႈၵူၼ်းတင်းလၢႆလႄႈဝႃႈ၊ ‘ႁႂ်ႈၵေႃႉဢၼ်ၸၢင်ႈၵူဝ်ႁႄ၊ၸၢင်ႈတူၵ်းၸႂ်ၼၼ်ႉဝၢႆႇၶိုၼ်းလႄႈလုၵ်ႉသေၵႃႈတီႈလွႆ ၵိလတ်ႉ၊ ၼႆႉပွၵ်ႈမိူဝ်းသေ၊’ ဝႃႈၼႆတႃႉ၊” ဝႃႈၼင်ႇၼႆဢေႃႈ။ ပိူဝ်ႈၼႆလႄႈၵူၼ်းသွင်မိုၼ်ႇပၢႆသွင်ႁဵင်ဢွၼ်ၵၼ်ၶိုၼ်းမိူဝ်းၵႂႃႇလႄႈၵိုတ်းၵျၢၼ်ႇယူႇမိုၼ်ႇၼိုင်ႈဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ မီးဢမိင်ႉတီႈ ၵိတိဢုၼ်ႇ၊ လႄႈဝႃႈ၊ “ၵူၼ်းယင်းမီးၼမ်ၼႃႇဢေႃႈ။ ႁွင်ႉၶဝ်လူင်းၸူးတီႈတႃႈၼမ်ႉတႃႉ။ ၵဝ်တၵ်းၽႄဢဝ်ၶဝ်ၵႃႈတီႈၼၼ်ႈပုၼ်ႈမႂ်းဢေႃႈ။ ပေႃးၵဝ်လၢတ်ႈတီႈမႂ်းလႄႈဝႃႈ၊ ‘ၵေႃႉၼႆႉတၵ်းလႆႈၵႂႃႇလူၺ်ႈၵၼ်တင်းမႂ်းဢေႃႈ၊’ ဝႃႈၼႆၸိုင်၊မၼ်းတၵ်းလႆႈၵႂႃႇဢေႃႈ။-”
မိူဝ်ႈဢၼ် ၵိတိဢုၼ်ႇ၊ ႁွင်ႉဢဝ်ၵူၼ်းၸိူဝ်းၼၼ်ႉလူင်းၸူးတီႈတႃႈၼမ်ႉၼၼ်ႉၸိုင်၊ ထႃႇဝရႃႉၽြႃး၊ မီးဢမိင်ႉတီႈမၼ်းလႄႈဝႃႈ၊ “ၽႄဢဝ်ၶဝ်ၸိူဝ်းဢၼ်ဢဝ်လိၼ်ႉလေးၵိၼ်ၸိူဝ်ႉၼင်ႇဢၼ်မႃၵိၼ်ၼမ်ႉၼႆႉဝႆႉၸုမ်းၼိုင်ႈ။ ဢိၵ်ႇတင်းၶဝ်ၸိူဝ်းဢၼ်ၶုပ်ႉၶဝ်ႇလႄႈၵူမ်ႈၵိၼ်ၼမ်ႉၼၼ်ႉဝႆႉၸုမ်းၼိုင်ႈတႃႉ၊” ဝႃႈၼင်ႇၼႆဢေႃႈ။-
ၶဝ်ၸိူဝ်းဢၼ်ဢဝ်ဢူင်ႈမိုဝ်းၵွပ်ႇဢဝ်ၼမ်ႉလႄႈလေးၵိၼ်ၼၼ်ႉၼပ်ႉဢၢၼ်ႇမီးသၢမ်ပၢၵ်ႇတဵမ်တဵမ်ဢေႃႈ။ တၢင်ႇၵေႃႉတၢင်ႇၵူၼ်းၵႃႈမီးၸိူဝ်းၼၼ်ႉၶုပ်ႉၶဝ်ႇလႄႈၵိၼ်ၼမ်ႉဢေႃႈ။-
ထႃႇဝရႃႉၽြႃး၊ မီးဢမိင်ႉတီႈ ၵိတိဢုၼ်ႇ၊ လႄႈဝႃႈ၊ “ၵဝ်တၵ်းဢဝ်ၵူၼ်းသၢမ်ပၢၵ်ႇဢၼ်လေးၵိၼ်ၼမ်ႉၸိူဝ်းၼၼ်ႉၵႄႇၼုၵ်ႈဢဝ်မႂ်းလႄႈႁႂ်ႈမႂ်းလႆႈဢွင်ႇသိုၵ်းၵႃႈၼိူဝ်ၵူၼ်းမဵဝ်း မိတျၼ်ႇ၊ ဢေႃႈ။ ႁႂ်ႈၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇၼၼ်ႉပွၵ်ႈမိူဝ်းတႃႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ ၵိတိဢုၼ်ႇ၊ ပွႆႇၵူၼ်းမဵဝ်း ဢိသရေး၊ တင်းလၢႆပွၵ်ႈမိူဝ်းၵႂႃႇလႄႈၵူၺ်းမီးၶဝ်သၢမ်ပၢၵ်ႇၵေႃႉ၊ဢၼ်ဢွၼ်ၵၼ်ဢဝ်ၸရိပ်ႈတၢင်းၵိၼ်ဢိၵ်ႇတင်းၼႄးၶရႃႇဝႆႉၼၼ်ႉဢေႃႈ။ တပ်ႉ မိတျၼ်ႇ၊ ၼၼ်ႉမီးၵႃႈတီႈႁၢၼ်ႉတႂ်ႈၶဝ်ၵႃႈၼႂ်းပၢင်ႇႁူၺ်ႈဢေႃႈ။
ၼႂ်းၶမ်ႈၼၼ်ႉ၊ ထႃႇဝရႃႉၽြႃး၊ မီးဢမိင်ႉတီႈ ၵိတိဢုၼ်ႇ၊ လႄႈဝႃႈ၊ “လုၵ်ႉလႄႈတိုၵ်းတေႃးတပ်ႉၼၼ်ႉတႃႉ။ ၵဝ်ႁႂ်ႈမႂ်းဢွင်ႇသိုၵ်းၵႃႈၼိူဝ်မၼ်းဢေႃႈ။-
ပေႃးမႂ်းဢမ်ႇႁတ်းတိုၵ်းၸိုင်၊ႁွင်ႉဢဝ်ၶႃႈမႂ်း ၽုရႃႉ၊ လႄႈလူင်းၵႂႃႇၵႃႈတီႈတပ်ႉၼၼ်ႉတႃႉ။-
မႂ်းတၵ်းငိၼ်းၵႂၢမ်းဢၼ်ၶဝ်လၢတ်ႈတေႃႇၵၼ်ၼၼ်ႉလႄႈမႂ်းတၵ်းမီးၸႂ်ဢၼ်ႁႅင်းယႂ်ႇမႃးပုၼ်ႈဢၼ်တၵ်းတိုၵ်းဢေႃႈ၊” ဝႃႈၼင်ႇၼႆဢေႃႈ။ ပိူဝ်ႈၼႆလႄႈ ၵိတိဢုၼ်ႇ၊ တင်းၶႃႈမၼ်း ၽုရႃႉ၊ လူင်းၵႂႃႇၵႃႈတီႈၸဵင်ႇတပ်ႉရၢၼ်ႇသူႇၼၼ်ႉဢေႃႈ။-
ၵူၼ်း မိတျၼ်ႇ၊ တင်းၵူၼ်း ဢႃႇမလႅၵ်ႉ၊ ဢိၵ်ႇတင်းၵူၼ်းဢၼ်ယူႇၼႂ်းထိူၼ်ႇလႅင်ႉတင်းလၢႆဢွၼ်ၵၼ်ၶျႃးၼွၼ်းယူႇၵႃႈၼႂ်းပၢင်ႇႁူၺ်ႈၼၼ်ႉၼမ်ၼႃႇမိူၼ်ၸိူဝ်ႉၼင်ႇၽုင်မႅင်းၸၵ်းတႅၼ်ဢေႃႈ။ ၵလႃႇဢုၵ်ႈၶဝ်ၵေႃႈၼမ်ၼႃႇမိူၼ်ၸိူဝ်ႉၼင်ႇမဵတ်ႉသၢႆးၼမ်ႉသမ်ႇမုၵ်ႈတြႃႇထၢၼ်ႈပေႃးဢမ်ႇၼပ်ႉဢမ်ႇဢၢၼ်ႇလႆႈဢေႃႈ။
မိူဝ်ႈဢၼ် ၵိတိဢုၼ်ႇ၊ ႁွတ်ႈၽႅဝ်ၵႂႃႇၼၼ်ႉမၼ်းငိၼ်းၵူၼ်းၵေႃႉၼိုင်ႈၶႆႈၼႄတၢင်းၼွၼ်းၽၼ်ႁၼ်မၼ်းတီႈၵေႃႉသႄႈမၼ်းယူႇၼၼ်ႉဢေႃႈ။ မၼ်းၼၼ်ႉလၢတ်ႈဝႃႈ၊ “ၵဝ်ၼွၼ်းၽၼ်ႁၼ်ၶဝ်ႈမုၼ်းမုယေႃးၶႅပ်းၼိုင်ႈၵိင်ႈၶဝ်ႈမႃးၵႃႈၼႂ်းပၢင်တပ်ႉႁဝ်းလႄႈလေႃႇသႂ်ႇသုမ်ႉလင်ၼိုင်ႈဢေႃႈ။ သုမ်ႉၼၼ်ႉပင်းတူၵ်းလႄႈပိၼ်ႉလူမ်ႉၵႂႃႇၵႃႈၼိူဝ်လိၼ်သေဢေႃႈ၊” ဝႃႈၼင်ႇၼႆဢေႃႈ။
ၵေႃႉသႄႈမၼ်းၶိုၼ်းလၢတ်ႈလႄႈဝႃႈ၊ “ဢၼ်ၼႆႉပဵၼ်လၢပ်ႇ ၵိတိဢုၼ်ႇ၊ လုၵ်ႈၸၢႆး ယေႃးသႃႉ၊ ၵူၼ်းမဵဝ်း ဢိသရေး၊ ၼၼ်ႉယဝ်ႉ။ ၼွၵ်ႈသေလွင်ႈၼႆႉဢမ်ႇပဵၼ်လွင်ႈတၢင်ႇၸိူဝ်ႉတၢင်ႇမဵဝ်းလႆႈ။ ၽြႃးပဵၼ်ၸဝ်ႈပၼ်ႁႂ်ႈမၼ်းဢွင်ႇသိုၵ်းၵႃႈၼိူဝ်မဵဝ်း မိတျၼ်ႇ၊ ဢိၵ်ႇတင်းတပ်ႉႁဝ်းတင်းမူတ်းယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈဢၼ် ၵိတိဢုၼ်ႇ၊ ငိၼ်းလွင်ႈတၢင်းဢၼ်ၵေႃႉၼၼ်ႉၼွၼ်းၽၼ်ႁၼ်ၼၼ်ႉဢိၵ်ႇတင်းဢၼၢၵ်ႈဢထိၵ်ႈပႄႇမၼ်းၼၼ်ႉၸိုင်၊မၼ်းၶုပ်ႉၶဝ်ႇဝႆႈၽြႃးပဵၼ်ၸဝ်ႈဢေႃႈ။ မၼ်းၶိုၼ်းမိူဝ်းၸူးတီႈပၢင်တပ်ႉ ဢိသရေး၊ သေလႄႈလၢတ်ႈဝႃႈ၊ “ဢွၼ်ၵၼ်လုၵ်ႉတႃႉ။ ထႃႇဝရႃႉၽြႃး၊ ပၼ်တၢင်းဢၼ်သူဢွင်ႇသိုၵ်းၵႃႈၼိူဝ်တပ်ႉသိုၵ်း မိတျၼ်ႇ၊ ယဝ်ႉ၊” ဝႃႈၼင်ႇၼႆဢေႃႈ။
ၵိတိဢုၼ်ႇ၊ ၽႄၵူၼ်းသၢမ်ပၢၵ်ႇၼၼ်ႉႁဵတ်းသၢမ်မုၵ်ႉသေယဝ်ႉ၊ႁႂ်ႈၵူၼ်းယေႈၵေႃႉယိပ်းၼႄးၶရႃႇယေႈဢၼ်တင်းမေႃႈဢၼ်ၼႂ်းမၼ်းသႂ်ႇဝႆႉၵၢၼ်ႈၽႆးယေႈလုၵ်ႈၼၼ်ႉဢေႃႈ။-
မၼ်းသင်ႇလၢတ်ႈတီႈၶဝ်ဝႆႉလႄႈဝႃႈ၊ “မိူဝ်ႈဢၼ်ၵဝ်ႁွတ်ႈၽႅဝ်ၵႂႃႇၵႃႈႁိမ်းၸဵင်ႇတပ်ႉၼၼ်ႉတူၺ်းၵဝ်လႄႈႁဵတ်းၸွမ်းၵႃႈၼင်ႇဢၼ်ၵဝ်ႁဵတ်းၼၼ်ႉတႃႉ။-
မိူဝ်ႈဢၼ်ၵဝ်ဢိၵ်ႇတင်းၵူၼ်းၸုမ်းၵဝ်ပဝ်ႇတိုင်ႈၼႄးၶရႃႇၸိုင်၊သူၵေႃႈဢွၼ်ၵၼ်ပဝ်ႇတိုင်ႈၼႄးၶရႃႇသူႁွပ်ႈႁွပ်ႈတပ်ႉတင်းတပ်ႉသေလႄႈႁွင်ႉသႅၼ်ႇဝႃႈ၊ ‘ပုၼ်ႈ ထႃႇဝရႃႉၽြႃး၊ ဢိၵ်ႇတင်းပုၼ်ႈ ၵိတိဢုၼ်ႇ၊ ဢေႃႈ၊’ ဝႃႈၼႆတႃႉ၊” ဝႃႈၼင်ႇၼႆဢေႃႈ။
ၵိတိဢုၼ်ႇ၊ တင်းၵူၼ်းမၼ်းပၢၵ်ႇၼိုင်ႈၼၼ်ႉႁွတ်ႈၽႅဝ်ၵႂႃႇတီႈႁိမ်းၸဵင်ႇတပ်ႉမိူဝ်ႈၶိင်ႇတဵင်ႈၶိုၼ်းဢမ်ႇပႆႇထိုင်လီ၊ဢၼ်ပဵၼ်ၶိင်ႇဢၼ်ၵူၼ်းပႂ်ႉယၢမ်းၸႃႉပုတ်ႈလၢႆႈၵၼ်ၼၼ်ႉဢေႃႈ။ မိူဝ်ႈၼၼ်ႉၶဝ်ပဝ်ႇတိုင်ႈၼႄးၶရႃႇသေပေႃႉမေႃႈဢၼ်ၶဝ်ယိပ်းယူႇၼႂ်းမိုဝ်းၶဝ်ၼၼ်ႉတႅၵ်ႇဢေႃႈ။-
သွင်မူႇၼၼ်ႉၵေႃႈႁဵတ်းၸွမ်းဢေႃႈ။ မိုဝ်းၶဝ်ၶွၼ်သၢႆႉယိပ်းၵၢၼ်ႈၽႆးယူႇ၊မိုဝ်းၶွၼ်ၶႂႃယိပ်းၼႄးၶရႃႇယူႇသေလႄႈ၊ႁွင်ႉသႅၼ်ႇဝႃႈ၊ “လၢပ်ႇပုၼ်ႈ ထႃႇဝရႃႉၽြႃး၊ တင်းပုၼ်ႈ ၵိတိဢုၼ်ႇ၊ ဢေႃႈ၊” ဝႃႈၼင်ႇၼႆဢေႃႈ။
ၶဝ်ၸုၵ်းယူႇတီႈဢၼ်ၶဝ်မီးယူႇၼၼ်ႉႁင်းၽႂ်ႁင်းမၼ်းၵူႈၵေႃႉၵူႈၵူၼ်းႁွပ်ႈႁွပ်ႈတပ်ႉဝႆႉလႄႈ၊ၵူၼ်းသိုၵ်းတပ်ႉရၢၼ်ႇသူႇၵႃႈမီးတင်းသဵင်ႈတင်းလူင်ႁွင်ႉပၢဝ်ႇႁွင်ႉသႅၼ်ႇယူႇသေလႄႈဢွၼ်ၵၼ်ဢွၵ်ႇပၢႆႈဢေႃႈ။-
ယၢမ်းမိူဝ်ႈဢၼ်ၵူၼ်း ၵိတိဢုၼ်ႇ၊ တင်းသၢမ်ပၢၵ်ႇပဝ်ႇတိုင်ႈၼႄးၶရႃႇယူႇၼၼ်ႉ ထႃႇဝရႃႉၽြႃး၊ ႁႂ်ႈၵူၼ်းသိုၵ်းရၢၼ်ႇသူႇၸိူဝ်းၼၼ်ႉၵေႃႉၼိုင်ႈလႄႈၵေႃႉၼိုင်ႈၼင်ႇၵၼ်ၵၼ်ဢဝ်လၢပ်ႇၶႃႈၽၼ်းၵၼ်ဢေႃႈ။ ၶဝ်ဢွၵ်ႇပၢႆႈၸွမ်းသဵၼ်ႈတၢင်းဝဵင်း ၸေးရရတ်ႉ၊ ၵႂႃႇတေႃႇထိုင်ႁွတ်ႈဝဵင်း ပႅတ်ႉသိတ်ႉတႃႇ၊ သမ်ႉႁွတ်ႈထိုင်တီႈဝဵင်း ဢႃႇပေႇလႃႉမႁေႃႇလႃႉ၊ ႁိမ်းဝဵင်း တပ်ႉပတ်ႉ၊ ၼၼ်ႉဢေႃႈ။
ၵူၼ်းတင်းလၢႆၵႃႈၼႂ်းၸိူဝ်ႉၶိူဝ်း ၼပ်ႉထလိ၊ ၸိူဝ်ႉၶိူဝ်း ဢႃႇသျႃႇ၊ တင်းၸိူဝ်ႉၶိူဝ်း မၼႃႇသေႇ၊ တင်းသွင်ဢိူင်ႇမႃးၸုတုမ်ၵၼ်သေလႄႈလိုပ်ႈၸွမ်းလမ်းၸွမ်းၵူၼ်းမဵဝ်း မိတျၼ်ႇ၊ ၸိူဝ်းၼၼ်ႉဢေႃႈ။-
ၵိတိဢုၼ်ႇ၊ ပွႆႇၸႂ်ႉတမၢၼ်ႇတင်းလၢႆၵႂႃႇၵႃႈၼိူဝ်ႁၢၼ်ႉလွႆ ဢေႇၽရိမ်ႇ၊ တင်းလၢႆလႄႈသင်ႇလၢတ်ႈဝႃႈ၊ “ဢွၼ်ၵၼ်လူင်းတိုၵ်းတေႃးၵူၼ်းမဵဝ်း မိတျၼ်ႇ၊ တႃႉ။ ႁႄႉၵင်ႈတႃႈၼမ်ႉ ယေႃးတၢၼ်ႇ၊ တင်းတႃႈၼမ်ႉႁွင်ႈၼမ်ႉၵႄးတင်းလၢႆတေႃႇထိုင်ႁွတ်ႈဝဵင်း ပႅတ်ႉပႃႇရႃႇ၊ ပုၼ်ႉတႃႉ။ ယႃႇပေႁႂ်ႈၵူၼ်း မိတျၼ်ႇ၊ ၶၢမ်ႈလႆႈတႃႉ။” ဝႃႈၼင်ႇၼႆလႄႈ၊ၵူၼ်း ဢေႇၽရိမ်ႇ၊ တင်းလၢႆၸုတုမ်ၵၼ်မႃးႁႄႉတၢင်းတႃႈၼမ်ႉ ယေႃးတၢၼ်ႇ၊ တင်းတႃႈၼမ်ႉႁွင်ႈၼမ်ႉၵႄးတင်းလၢႆတေႃႇထိုင်ႁွတ်ႈဝဵင်း ပႅတ်ႉပႃႇရႃႇ၊ ပုၼ်ႉဢေႃႈ။-
ၶဝ်တိၺွပ်းလႆႈၶုၼ်သိုၵ်းလူင်မဵဝ်း မိတျၼ်ႇ၊ သွင်ၵေႃႉဢၼ်ဝႃႈ၊ ဢေႃးရၽႃႉ၊ တင်း ၸေးၽႃႉ၊ သေယဝ်ႉ၊ဢဝ် ဢေႃးရၽႃႉ၊ ၼၼ်ႉတၢႆၵႃႈတီႈမၢၵ်ႇႁိၼ် ဢေႃးရၽႃႉ၊ ဢဝ် ၸေးၽႃႉ၊ တၢႆၵႃႈတီႈၶုမ်ၼူတ်ႈမၢၵ်ႇၸပိတ်ႉ ၸေးၽႃႉ၊ ဢေႃႈ။ ၶဝ်သမ်ႉလိုပ်ႈၸွမ်းလမ်းၸွမ်းၵူၼ်း မိတျၼ်ႇ၊ သေယဝ်ႉ၊ဢဝ်ၵွၵ်းႁူဝ် ဢေႃးရၽႃႉ၊ တင်းၵွၵ်းႁူဝ် ၸေးၽႃႉ၊ ၼၼ်ႉမႃးၸူးတီႈ ၵိတိဢုၼ်ႇ၊ ၵႃႈတီႈၽၢႆႇတၢင်းဝၼ်းဢွၵ်ႇမႄႈၼမ်ႉ ယေႃးတၢၼ်ႇ၊ ၼၼ်ႉဢေႃႈ။
မိူဝ်ႈၼၼ်ႉၵူၼ်းၸိူဝ်ႉၶိူဝ်း ဢေႇၽရိမ်ႇ၊ တင်းလၢႆလၢတ်ႈတီႈ ၵိတိဢုၼ်ႇ၊ လႄႈဝႃႈ၊ “ၵွပ်ႈသင်လႄႈၸဝ်ႈယင်းဢမ်ႇႁွင်ႉဢဝ်ႁဝ်းၶႃႈမိူဝ်ႈဢၼ်ၸဝ်ႈၵႂႃႇတိုၵ်းၵူၼ်း မိတျၼ်ႇ၊ ၸိူဝ်းၼၼ်ႉၶႃႈ။ ၵွပ်ႈသင်လႄႈၸဝ်ႈႁဵတ်းတီႈႁဝ်းၸိူဝ်ႉၼင်ႇၼႆတီႈၶႃႈ၊” ဝႃႈၼင်ႇၼႆလႄႈၶဝ်တၢင်ႇဢပျတ်ႈတီႈမၼ်းၼႃႇလူင်လၢင်ဢေႃႈ။
မၼ်းၵေႃႈၶိုၼ်းလၢတ်ႈလႄႈဝႃႈ၊ “ဢၼ်ၵဝ်ႁဵတ်းယဝ်ႉၸိူဝ်းၼႆႉတႅၵ်ႈၼိူင်းၵၼ်တင်းတၢင်းဢၼ်သူႁဵတ်းၼၼ်ႉလႆႈႁိုဝ်း။ တၢင်းဢၼ်ၵူၼ်း ဢေႇၽရိမ်ႇ၊ ၸွမ်းၵဵပ်းမၢၵ်ႇၸပိတ်ႉၼၼ်ႉလီတွၼ်းၼႃႇသေတၢင်းဢၼ် ဢပျေႇၸႃႇ၊ ပၢတ်ႇသိမ်းဢဝ်မၢၵ်ႇၸပိတ်ႉၼၼ်ႉဢမ်ႇၸႂ်ႈႁိုဝ်း။-
ၽြႃးပဵၼ်ၸဝ်ႈဢဝ် ဢေႃးရၽႃႉ၊ တင်း ၸေးၽႃႉ၊ ဢၼ်ပဵၼ်ၶုၼ်သိုၵ်းလူင်မဵဝ်း မိတျၼ်ႇ၊ ၼၼ်ႉဢၢပ်ႈပၼ်ၼႂ်းမိုဝ်းသူယဝ်ႉ။ တၢင်းဢၼ်ၵဝ်ႁဵတ်းၸိူဝ်းၼၼ်ႉတႅၵ်ႈၼိူင်းၵၼ်တင်းတၢင်းဢၼ်သူႁဵတ်းၼၼ်ႉလႆႈႁိုဝ်း၊” ဝႃႈၼင်ႇၼႆဢေႃႈ။ ၼင်ႇၼၼ်လႄႈတၢင်းၶႂ်ႈၸႃႉၶဝ်ပျေႇၵႂႃႇဢေႃႈ။
ယၢမ်းမိူဝ်ႈၼၼ်ႉ ၵိတိဢုၼ်ႇ၊ တင်းၵူၼ်းမၼ်းသၢမ်ပၢၵ်ႇၼၼ်ႉႁွတ်ႈထိုင်ၵႂႃႇၵႃႈတီႈၼမ်ႉ ယေႃးတၢၼ်ႇ၊ လႄႈၶၢမ်ႈပူၼ်ႉၼမ်ႉယဝ်ႉဢေႃႈ။ ၶဝ်ၼၼ်ႉႁိူဝ်ႉၼူၼ်းၼႃႇယဝ်ႉသေၵေႃႈယင်းသိုပ်ႇလႄႈလိုပ်ႈၸွမ်းလမ်းၸွမ်းရၢၼ်ႇသူႇၵႂႃႇဢေႃႈ။-
မိူဝ်ႈဢၼ်ၶဝ်ႁွတ်ႈၵႂႃႇၵႃႈတီႈဝဵင်း သုၵုတ်ႉ၊ ၼၼ်ႉမၼ်းလၢတ်ႈတီႈၵူၼ်းဝဵင်းၼၼ်ႉလႄႈဝႃႈ၊ “ပၼ်ၶဝ်ႈမုၼ်းတီႈၵူၼ်းၵဝ်ၸိူဝ်းၼႆႉသေၵမ်း။ ၶဝ်ႁိူဝ်ႉၼူၼ်းၼႃႇယဝ်ႉ။ မိူဝ်ႈလဵဝ်ၵဝ်လိုပ်ႈၸွမ်းလမ်းၸွမ်း ၸေးၽႁႃႉ၊ တင်း ၸႃႇလမုၼ်ႇၼႃႉ၊ ဢၼ်ပဵၼ်ၶုၼ်ႁေႃၶမ်းမဵဝ်း မိတျၼ်ႇ၊ ၶဝ်ၼၼ်ႉယူႇဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ၵူၼ်းလူင်ဝဵင်း သုၵုတ်ႉ၊ ၸိူဝ်းၼၼ်ႉၶိုၼ်းလၢတ်ႈလႄႈဝႃႈ၊ “ႁဵတ်းသင်လႄႈႁဝ်းတၵ်းလႆႈပၼ်ၶဝ်ႈမုၼ်းတီႈၵူၼ်းတပ်ႉသိုၵ်းမႂ်း။ မႂ်းယင်းဢမ်ႇပႆႇတိၺွပ်းဢဝ် ၸေးၽႁႃႉ၊ တင်း ၸႃႇလမုၼ်ႇၼႃႉ၊ လႆႈလူင်ပႄႇ၊” ဝႃႈၼင်ႇၼႆဢေႃႈ။
ၵိတိဢုၼ်ႇ၊ ၵေႃႈလၢတ်ႈလႄႈဝႃႈ၊ “လီယဝ်ႉ။ မိူဝ်ႈဢၼ် ထႃႇဝရႃႉၽြႃး၊ ဢဝ် ၸေးၽႁႃႉ၊ တင်း ၸႃႇလမုၼ်ႇၼႃႉ၊ ဢၢပ်ႈပၼ်ၼႂ်းမိုဝ်းၵဝ်ယဝ်ႉၼၼ်ႉၸိုင်၊ၵဝ်တၵ်းဢဝ်တူၼ်ႈၼၢမ်ထိူၼ်ႇတင်းတူၼ်ႈၼၢမ်လိၼ်ပေႃႉပႄလင်သူႁႂ်ႈပေႃးတႅၵ်ႇပေႃးလႅဝ်ဢေႃႈ၊” ဝႃႈၼင်ႇၼႆဢေႃႈ။-
ၵိတိဢုၼ်ႇ၊ ၶိုၼ်ႈၸူးတီႈဝဵင်း ပေႇၼူၺ်ႇလႃႉ၊ လႄႈသမ်ႉယွၼ်းၶဝ်ၸိူဝ်ႉၼင်ႇၼၼ်သေၵေႃႈ ၵူၼ်းဝဵင်းၸိူဝ်းၼၼ်ႉၶိုၼ်းလၢတ်ႈမိူၼ်ၸိူဝ်ႉၼင်ႇဢၼ်ၵူၼ်းဝဵင်း သုၵုတ်ႉ၊ ၶဝ်လၢတ်ႈၼၼ်ႉၼင်ႇၵဝ်ႇဢေႃႈ။-
ပိူဝ်ႈၼႆလႄႈ မၼ်းၶိုၼ်းလၢတ်ႈတီႈၶဝ်လႄႈဝႃႈ၊ “ၵဝ်တၵ်းၵႂႃႇလႄႈပွၵ်ႈၶိုၼ်းမႃးလူင်ႉလီလွတ်ႈလီဢေႃႈ။ မိူဝ်ႈဢၼ်ပဵၼ်ၸိူဝ်ႉၼင်ႇၼၼ်ၸိုင်၊ၵဝ်တၵ်းၵိူၼ်ႇယႃႉသဝ်လၢင်းတီႈတိူၵ်ႈတိုၵ်းသိုၵ်းသူၼႆႉတူၵ်းပႅတ်ႈဢေႃႈ၊” ဝႃႈၼင်ႇၼႆဢေႃႈ။
ၸေးၽႁႃႉ၊ တင်း ၸႃႇလမုၼ်ႇၼႃႉ၊ ၼၼ်ႉမီးၵႃႈတီႈဝဵင်း ၵႃႇၵေႃႇ၊ ယူႇလူၺ်ႈၵၼ်တင်းတပ်ႉသိုၵ်းၶဝ်ဢေႃႈ။ ၵႃႈၼႂ်းတပ်ႉၵူၼ်းသိုၵ်းၸိူဝ်ႉၶိူဝ်းၵူၼ်းဢၼ်ယူႇတီႈထိူၼ်ႇလႅင်ႉၼၼ်ႉတင်းသဵင်ႈတင်းလူင်ၵိုတ်းၵျၢၼ်ႇယူႇၼိုင်ႈမိုၼ်ႇႁႃႈႁဵင်ၵူၺ်းယဝ်ႉ။ ၵွပ်ႈပိူဝ်ႈၵူၼ်းသိုၵ်းသႅၼ်သွင်မိုၼ်ႇလူမ်ႉတၢႆၵႂႃႇယဝ်ႉၼၼ်ႉဢေႃႈ။-
ၵိတိဢုၼ်ႇ၊ ၶီႇသိုၵ်းၵႂႃႇၼႂ်းသဵၼ်ႈတၢင်းဢၼ်ၸွမ်းႁိမ်းၶွပ်ႇထိူၼ်ႇလႅင်ႉၽၢႆႇဝၼ်းဢွၵ်ႇဝဵင်း ၼေႃႇပႃႉ၊ တင်းဝဵင်း ယူဝ်းၽေႇႁႃႉ၊ သေယဝ်ႉ၊ၵိုင်ႉၵၢင်ႉတိုၵ်းတေႃးမိူဝ်ႈဢၼ်တပ်ႉၶဝ်ဢမ်ႇထၢင်ႇဢမ်ႇထိူမ်ၼၼ်ႉဢေႃႈ။-
ၶုၼ်ႁေႃၶမ်း မိတျၼ်ႇ၊ သွင်ပႃးဢၼ်ဝႃႈ၊ ၸေးၽႁႃႉ၊ တင်း ၸႃႇလမုၼ်ႇၼႃႉ၊ ၼၼ်ႉဢွၵ်ႇပၢႆႈသေၵေႃႈ၊မၼ်းလိုပ်ႈၸွမ်းလမ်းၸွမ်းၶဝ်လႄႈတိၺွပ်းဢဝ်ၶဝ်သေယဝ်ႉ၊ယႃႉတပ်ႉသိုၵ်းၶဝ်ပႅတ်ႈတင်းတပ်ႉသေဢေႃႈ။
မိူဝ်ႈဢၼ် ၵိတိဢုၼ်ႇ၊ ပွၵ်ႈသေၵႃႈတီႈၼႃႈသိုၵ်းမႃးၸွမ်းသဵၼ်ႈတၢင်းၵိဝ်ႇ ႁေႇၶရိတ်ႉ၊ ၼၼ်ႉၸိုင်၊-
မၼ်းတိဢဝ်ၵူၼ်းၼုမ်ႇဝဵင်း သုၵုတ်ႉ၊ ၵေႃႉၼိုင်ႈသေယဝ်ႉ၊ၸႅတ်ႈထၢမ်လႄႈၵေႃႉၼၼ်ႉတႅမ်ႈၸိုဝ်ႈသဵင်ၵူၼ်းလူင်ဝဵင်း သုၵုတ်ႉ၊ ဢၼ်ပဵၼ်ၵူၼ်းဢၼ်ပဵၼ်ၵႄႇပဵၼ်ႁူဝ်ၶဝ်ၸဵတ်းသိပ်းပၢႆၸဵတ်းၵေႃႉပၼ်တီႈမၼ်းဢေႃႈ။-
မိူဝ်ႈၼၼ်ႉမၼ်းၵႂႃႇၸူးတီႈၵူၼ်းဝဵင်း သုၵုတ်ႉ၊ လႄႈဝႃႈ၊ “ၸွင်ႇသူၶုၵ်းၸႂ်လႆႈလွင်ႈဢၼ်သူထဵင်ပႅတ်ႈတၢင်းဢၼ်ၸွႆႈဢၼ်ထႅမ်ၵဝ်ၼၼ်ႉႁိုဝ်း။ သူသႄႉသွမ်းၵဝ်လႄႈဝႃႈ၊ ‘သူဢမ်ႇပၼ်တၢင်းၵိၼ်တၢင်းၶူပ်းတီႈၵူၼ်းသိုၵ်းၵဝ်ၸိူဝ်းဢၼ်ႁိူဝ်ႉၼူၼ်းၼႃႇၼၼ်ႉၵွပ်ႈပိူဝ်ႈၵဝ်ဢမ်ႇပႆႇတိၺွပ်းဢဝ် ၸေးၽႁႃႉ၊ တင်း ၸႃႇလမုၼ်ႇၼႃႉ၊ လႆႈဝႃႈၼႆယဝ်ႉ။ တူၺ်းတႃႉ။ ၶဝ်သွင်ၵေႃႉၼၼ်ႉမီးၵႃႈတီႈၼႆႈယဝ်ႉ၊’” ဝႃႈၼင်ႇၼႆဢေႃႈ။-
မၼ်းၵေႃႈဢဝ်တူၼ်ႈၼၢမ်ထိူၼ်ႇတင်းတူၼ်ႈၼၢမ်လိၼ်သုင်းမႃႉပၼ်တၢမ်ႇတီႈၵူၼ်းဢၼ်ပဵၼ်ၵႄႇပဵၼ်ႁူဝ်ဝဵင်း သုၵုတ်ႉ၊ ၸိူဝ်းၼၼ်ႉဢေႃႈ။-
သဝ်လၢင်းတီႈတိုၵ်းသိုၵ်းဝဵင်း ပေႇၼူၺ်ႇလႃႉ၊ ၼၼ်ႉၵေႃႈမၼ်းၵိူၼ်ႇယႃႉတူၵ်းပႅတ်ႈသေလႄႈဢဝ်တၢႆၵူၼ်းဝဵင်းတင်းလၢႆဢေႃႈ။
မိူဝ်ႈၼၼ်ႉ၊ ၵိတိဢုၼ်ႇ၊ ထၢမ်တီႈ ၸေးၽႁႃႉ၊ တင်း ၸႃႇလမုၼ်ႇၼႃႉ၊ လႄႈဝႃႈ၊ “ၶဝ်ၸိူဝ်းဢၼ်သူဢဝ်တၢႆၵႃႈတီႈဝဵင်း တႃႇပေႃႇ၊ ၼၼ်ႉပဵၼ်ၵူၼ်းၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။ ၶဝ်ၵေႃႈၶိုၼ်းလၢတ်ႈလႄႈဝႃႈ၊ “ၶဝ်ၸိူဝ်းၼၼ်ႉပဵၼ်မိူၼ်ၸိူဝ်ႉၼင်ႇၸဝ်ႈႁဝ်းလႄႈ၊မီးႁၢင်ႈၽၢင်မိူၼ်လုၵ်ႈၸၢႆးၶုၼ်ႁေႃၶမ်းဝႆႉၵူႈၵေႃႉၶႃႈဢေႃႈ၊” ဝႃႈၼင်ႇၼႆဢေႃႈ။
ၵိတိဢုၼ်ႇ၊ ၵေႃႈလၢတ်ႈလႄႈဝႃႈ၊ “ၶဝ်ၸိူဝ်းၼၼ်ႉပဵၼ်ၼွင်ႉၸၢႆးၵဝ်၊လုၵ်ႈၸၢႆးမႄႈၵဝ်ဢိူဝ်း။ ၵဝ်တိူင်ႇဝႃႈၼႂ်း ထႃႇဝရႃႉၽြႃး၊ ၸမ်ႉ၊သင်သူဢမ်ႇလႆႈဢဝ်တၢႆၶဝ်ၸိူဝ်းၼၼ်ႉၸိုင်၊ၵဝ်ၵေႃႈတၵ်းဢမ်ႇဢဝ်သူတၢႆ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉမၼ်းလၢတ်ႈတီႈ ယေႇႀႃႇ၊ လုၵ်ႈၸၢႆးတူၼ်ႈမၼ်းၼၼ်ႉလႄႈဝႃႈ၊ “လုၵ်ႉလႄႈဢဝ်ၶဝ်ၼႆႉတၢႆတႃႉ၊” ဝႃႈၼင်ႇၼႆဢေႃႈ။ ၼႂ်းဝႃႈၼၼ်သေၵေႃႈ၊လုၵ်ႈၸၢႆးမၼ်းၼၼ်ႉယင်းဢမ်ႇထွတ်ႇဢဝ်လႅဝ်းလႄႈယူႇဢေႃႈ။ မၼ်းႁဵတ်းထိူင်းႁဵတ်းၼၢၼ်းၸိူဝ်ႉၼင်ႇၼၼ်ၵွပ်ႈပိူဝ်ႈမၼ်းဢသၢၵ်ႈယင်းတိုၵ်ႉလဵၵ်ႉယူႇၼၼ်ႉဢေႃႈ။
မိူဝ်ႈၼၼ်ႉ ၸေးၽႁႃႉ၊ တင်း ၸႃႇလမုၼ်ႇၼႃႉ၊ လၢတ်ႈတီႈ ၵိတိဢုၼ်ႇ၊ လႄႈဝႃႈ၊ “တူဝ်ၸဝ်ႈႁဝ်းလုၵ်ႉလႄႈၶႃႈၽၼ်းႁဝ်းၶႃႈပႅတ်ႈတႃႉ။ ၸွမ်းၼင်ႇၸဝ်ႈပဵၼ်ၵူၼ်းလူင်လႄႈမီးႁႅင်းဢၼ်ယႂ်ႇၼႃႇဢေႃႈ၊” ဝႃႈၼင်ႇၼႆၸင်ႇ၊မၼ်းလုၵ်ႉလႄႈဢဝ်တၢႆသေယဝ်ႉ၊ထွတ်ႇဢဝ်ပုင်ႇႁၢင်ႈလၢဝ်ၶမ်းဢၼ်ႁၢင်ႈၶိူင်ႈၵႃႈတီႈၶေႃးၵလႃႇဢုၵ်ႈၶဝ်ၸိူဝ်းၼၼ်ႉဢေႃႈ။
လိုၼ်းသေၼၼ်ႉၵူၼ်းမဵဝ်း ဢိသရေး၊ တင်းလၢႆလဝ်ႈလၢတ်ႈတီႈ ၵိတိဢုၼ်ႇ၊ လႄႈဝႃႈ၊ “ၸဝ်ႈႁဝ်းၵႄႇၶျွတ်ႈဢဝ်ႁဝ်းၶႃႈသေၵႃႈၼႂ်းမိုဝ်းၵူၼ်း မိတျၼ်ႇ၊ ၸိူဝ်းၼၼ်ႉတီႈၶႃႈယဝ်ႉ။ ႁဵတ်းၶုၼ်ဢုပ်ႉပိူင်ႇႁဝ်းၶႃႈၸူဝ်ႈလုၵ်ႈပၢၼ်လၢၼ်သေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ၵိတိဢုၼ်ႇ၊ ၶိုၼ်းလၢတ်ႈလႄႈဝႃႈ၊ “ၵဝ်တၵ်းဢမ်ႇဢုပ်ႉပိူင်ႇသူ။ လုၵ်ႈၸၢႆးၵဝ်ၵေႃႈတၵ်းဢမ်ႇဢုပ်ႉပိူင်ႇသူ။ ထႃႇဝရႃႉၽြႃး၊ တၵ်းဢုပ်ႉပိူင်ႇသူဢေႃႈ၊” ဝႃႈၼင်ႇၼႆဢေႃႈ။-
မၼ်းသမ်ႉလၢတ်ႈတီႈၶဝ်ထႅင်ႈလႄႈဝႃႈ၊ “ႁႂ်ႈၵဝ်လႆႈယွၼ်းဢဝ်မဵဝ်းၼိုင်ႈတီႈသူသေၵမ်း။ သူၵူႈၵေႃႉၵူႈၵူၼ်းဢဝ်ပေႇႁူၶမ်းဢၼ်သူႁိမ်ဢဝ်လႆႈမႃးၸိူဝ်းၼၼ်ႉပၼ်ၵဝ်သေၵမ်း၊” ဝႃႈၼင်ႇၼႆဢေႃႈ။ လွင်ႈမၼ်းၸမ်ႉ၊ရၢၼ်ႇသူႇၸိူဝ်းၼၼ်ႉပဵၼ်ၵူၼ်းမဵဝ်း ဢိသမေႇလႃႉ၊ လႄႈၸၢင်ႈတိုဝ်းပေႇႁူၶမ်းဢေႃႈ။
ၵူၼ်းတင်းလၢႆဢွၼ်ၵၼ်လၢတ်ႈလႄႈဝႃႈ၊ “ႁဝ်းၶႃႈတၵ်းပႃးၸႂ်ၸေႇတၼႃႇလႄႈပၼ်ၶႃႈဢေႃႈ၊” ဝႃႈၼင်ႇၼႆသေယဝ်ႉ၊ဢဝ်ၽႃႈဝႆသိူဝ်ႇလႄႈၵူၼ်းတင်းလၢႆဢွၼ်ၵၼ်ဢဝ်ပေႇႁူၶမ်းဢၼ်ၶဝ်ႁိမ်ဢဝ်လႆႈမႃးၸိူဝ်းၼၼ်ႉၶျႃးဝၢင်းဢေႃႈ။-
ပေႇႁူၶမ်းဢၼ်မၼ်းယွၼ်းလႆႈၸိူဝ်းၼၼ်ႉၸင်ႈႁိဝ်ႈလႄႈမီးသိပ်းသွင်ၸွႆႉ ၸမ်ၸမ်ဢေႃႈ။ ၼွၵ်ႈသေၼၼ်ႉလၢဝ်ၶမ်းလႂ်၊သွႆႈႁွႆႈၶေႃးလႂ်တင်းၶူဝ်းလႅင်ၵမ်ႇဢၼ်ၶုၼ်ႁေႃၶမ်း မိတျၼ်ႇ၊ ၼုင်ႈမႆလႂ်၊ဢိၵ်ႇတင်းၸိူၵ်ႈၶေႃးၵလႃႇဢုၵ်ႈလႂ်ၸိူဝ်းၼၼ်ႉၵေႃႈယင်းလႆႈမႃးလူးၵွၼ်ႇဢေႃႈ။-
ၵိတိဢုၼ်ႇ၊ ဢဝ်ၶိူင်ႈၶမ်းၸိူဝ်းၼၼ်ႉႁဵတ်းႁုၼ်ႇႁၢင်ႈသၢင်းထု ဢၼ်ၼိုင်ႈလႄႈဝႆႉၵႃႈၼႂ်းဝၢၼ်ႈၵဝ်ႇဝဵင်းလင်မၼ်းဝဵင်း ဢေႃႇၽရႃႉ၊ ၼၼ်ႉဢေႃႈ။ ၵူၼ်းမဵဝ်း ဢိသရေး၊ တင်းသဵင်ႈတင်းလူင်ၸုၼ်ႉပႅတ်ႈၽြႃးပဵၼ်ၸဝ်ႈသေလႄႈဢွၼ်ၵၼ်ၵႂႃႇဝႆႈႁုၼ်ႇႁၢင်ႈသၢင်းထုၼၼ်ႉဢေႃႈ။ ဢၼ်ၼၼ်ႉပဵၼ်တူင်ႇႁႅဝ်ႉတူင်ႇၶိုမ်းတီႈ ၵိတိဢုၼ်ႇ၊ တင်းၵူၼ်းႁိူၼ်းၵူၼ်းယေးမၼ်းဢေႃႈ။
ၼင်ႇၼၼ်လႄႈၵူၼ်းမဵဝ်း မိတျၼ်ႇ၊ တင်းလၢႆလႆႈတူၵ်းသုမ်းတႂ်ႈမိုဝ်းၵူၼ်းမဵဝ်း ဢိသရေး၊ တင်းလၢႆလႄႈဢမ်ႇၶိုၼ်းငွၵ်ႈႁူဝ်လႆႈထႅင်ႈသေပွၵ်ႈယဝ်ႉဢေႃႈ။ မိူင်းတင်းမိူင်းၼိမ်လီယဵၼ်လီတေႃႇထိုင်ႁွတ်ႈ ၵိတိဢုၼ်ႇ၊ သဵင်ႈႁၢႆတၢႆၵႂႃႇၼၼ်ႉသီႇသိပ်းပီတဵမ်တဵမ်ဢေႃႈ။
ၵိတိဢုၼ်ႇ၊ ပွၵ်ႈၵႂႃႇဝၢၼ်ႈၵဝ်ႇဝဵင်းလင်မၼ်းသေလႄႈယူႇၵႃႈတီႈၼၼ်ႈဢေႃႈ။-
မၼ်းမီးလုၵ်ႈၸၢႆးၸဵတ်းသိပ်းၵေႃႉၵွပ်ႈပိူဝ်ႈမၼ်းမီးမေးၼမ်ၼႃႇၼၼ်ႉဢေႃႈ။-
မေးၼွႆႉမၼ်းၵႃႈတီႈဝဵင်း သေးၶိမ်ႇ၊ ၼၼ်ႉၵိူတ်ႇလဵင်ႉလုၵ်ႈၸၢႆးမၼ်းၵေႃႉၼိုင်ႈႁွင်ႉဝႃႈ၊ ဢၽိမလႅၵ်ႉ၊ ဢေႃႈ။-
ၵိတိဢုၼ်ႇ၊ လုၵ်ႈၸၢႆး ယေႃးသႃႉ၊ ၼၼ်ႉဢသၢၵ်ႈထဝ်ႈၵႄႇၼႃႇယဝ်ႉလႄႈသဵင်ႈႁၢႆတၢႆၵႂႃႇသေယဝ်ႉ၊ဢဝ်သၢင်းၵျူဝ်ႇၵႃႈၼႂ်းပႃႇႁဵဝ်ႈပေႃႈမၼ်း ယေႃးသႃႉ၊ ၵႃႈတီႈဝဵင်း ဢေႃႇၽရႃႉ၊ တီႈယူႇၼႂ်းၶိူဝ်းႁိူၼ်း ဢပျေႇၸႃႇ၊ ၸိူဝ်းၼၼ်ႉဢေႃႈ။
လိုၼ်းသေဢၼ် ၵိတိဢုၼ်ႇ၊ သဵင်ႈႁၢႆတၢႆၵႂႃႇယဝ်ႉၼၼ်ႉၸိုင်၊ၵူၼ်းမဵဝ်း ဢိသရေး၊ တင်းလၢႆသမ်ႉဢွၼ်ၵၼ်လူင်လိုမ်းၵတိသဵတ်ႈၸႃႇတီႈၽြႃးပဵၼ်ၸဝ်ႈလႄႈဝႆႈၽြႃး ပႃႇလႃႉ၊ ၶိုၼ်းဢေႃႈ။ ၶဝ်ယုၵ်ႉယွင်ႈ ပႃႇလႃႉပေႇရိတ်ႉ၊ ဝႆႉၼႂ်းဢရႃႇၽြႃးၶဝ်ဢေႃႈ။-
ၶဝ်ၼၼ်ႉဢမ်ႇၶိုၼ်းႁဵတ်းဝၢတ်ႈတီႈၽြႃးပဵၼ်ၸဝ်ႈဢၼ်ၵႄႇသႄႇၶျွတ်ႈဢဝ်ၶဝ်ဢွၵ်ႇသေၵႃႈၼႂ်းမိုဝ်းရၢၼ်ႇသူႇတင်းလၢႆဢၼ်လွမ်ႉႁွပ်ႈဝႆႉၼၼ်ႉထႅင်ႈသေပွၵ်ႈယဝ်ႉၵူၺ်းဢမ်ႇၵႃး၊-
ၶဝ်ဢမ်ႇတွပ်ႇဢမ်ႇၶိုၼ်းႁဵတ်းၵျေးၸူးတီႈလုၵ်ႈလၢၼ် ၵိတိဢုၼ်ႇ၊ ပုၼ်ႈၵျေးၸူးၵႃႈဢၼ်မၼ်းလႆႈႁဵတ်းတီႈမဵဝ်း ဢိသရေး၊ ၼၼ်ႉလႄႈယူႇဢေႃႈ။
လုၵ်ႈၸၢႆး ၵိတိဢုၼ်ႇ၊ ဢၼ်ဝႃႈ၊ ဢၽိမလႅၵ်ႉ၊ ၼၼ်ႉ ၵႂႃႇၵႃႈတီႈဝဵင်း သေးၶိမ်ႇ၊ တီႈဢၼ်လုင်းမၼ်းတင်းလၢႆယူႇၼၼ်ႉလႄႈလၢတ်ႈတီႈၶဝ်ဢိၵ်ႇတင်းပီႈၼွင်ႉၸိူဝ်ႉၶိူဝ်းပူႇမၼ်း၊-
ႁႂ်ႈၶဝ်ဢွၼ်ၵၼ်တွင်းပၢၼ်ႇလၢတ်ႈထိုင်ႁူၵူၼ်းဝဵင်း သေးၶိမ်ႇ၊ တင်းလၢႆလႄႈဝႃႈ၊ “သူထၢင်ႇၸိူဝ်ႉၼင်ႇႁိုဝ်။ လုၵ်ႈၸၢႆး ၵိတိဢုၼ်ႇ၊ တင်းၸဵတ်းသိပ်းၽွမ်ႉၵၼ်ဢုပ်ႉပိူင်ႇ၊ဢမ်ႇၼၼ်ၵေႃႈလုၵ်ႈၸၢႆးမၼ်းၵေႃႉလဵဝ်ၵူၺ်းဢုပ်ႉပိူင်ႇၼၼ်ႉဢၼ်လႂ်ယဵင်ႈၶႅၼ်းထုၵ်ႇ၊ယဵင်ႈၶႅၼ်းလီ။ ၶုၵ်းၸႂ်လႆႈလွင်ႈဢၼ် ဢၽိမလႅၵ်ႉ၊ ၼႆႉပဵၼ်လုပ်ႇသူၼိူဝ်ႉသူၼၼ်ႉတႃႉ၊” ဝႃႈၼင်ႇၼႆဢေႃႈ။-
လုင်းမၼ်းၸိူဝ်းၼၼ်ႉၵေႃႈဢွၼ်ၵၼ်ဢဝ်ၵႂၢမ်းၸိူဝ်းၼၼ်ႉလၢတ်ႈထိုင်ႁူၵူၼ်းဝဵင်း သေးၶိမ်ႇ၊ တင်းလၢႆလႄႈ၊ၵူၼ်းဝဵင်း သေးၶိမ်ႇ၊ တင်းလၢႆဢွၼ်ၵၼ်တႅပ်းတတ်းႁႂ်ႈလႆႈၸွမ်းလင် ဢၽိမလႅၵ်ႉ၊ ၵွပ်ႈပိူဝ်ႈမၼ်းပဵၼ်ၼႂ်းလုၵ်ႈၼႂ်းလၢၼ်ၶဝ်ၼၼ်ႉဢေႃႈ။-
ၶဝ်ၼၼ်ႉဢဝ်ငိုၼ်းၸဵတ်းသိပ်းၵျၢပ်ႈသေၵႃႈၼႂ်းႁိူၼ်း ပႃႇလႃႉပေႇရိတ်ႉ၊ လႄႈပၼ်တီႈမၼ်းဢေႃႈ။ မၼ်းၵေႃႈဢဝ်ငိုၼ်းၼၼ်ႉၸၢင်ႈငႃဢဝ်ၵူၼ်းၸိူဝ်းဢၼ်ဢမ်ႇပွင်ႇလွင်ႈၵႃႈသင်တင်းလၢႆၼၼ်ႉၸွမ်းလင်မၼ်းဢေႃႈ။-
မၼ်းသမ်ႉၵႂႃႇၵႃႈတီႈႁိူၼ်းပေႃႈမၼ်းၼႂ်းဝဵင်း ဢေႃႇၽရႃႉ၊ သေယဝ်ႉ၊မၼ်းဢဝ်ပီႈၼွင်ႉမၼ်းၸိူဝ်းဢၼ်ပဵၼ်လုၵ်ႈၸၢႆး ၵိတိဢုၼ်ႇ၊ တင်းၸဵတ်းသိပ်းၵေႃႉၼၼ်ႉတၢႆၵႃႈၼိူဝ်မၢၵ်ႇႁိၼ်လုၵ်ႈလဵဝ်ၵူၺ်းဢေႃႈ။ ၵူၺ်းမီး ယေႃးႀမ်ႇ၊ လုၵ်ႈၸၢႆးၵွႆ ၵိတိဢုၼ်ႇ၊ ၼၼ်ႉလွတ်ႈလႄႈၵိုတ်းၵျၢၼ်ႇဝႆႉၵေႃႉလဵဝ်ၵွပ်ႈပိူဝ်ႈမၼ်းတဵတ်ႇမႅပ်းယူႇၼၼ်ႉဢေႃႈ။-
မိူဝ်ႈၼၼ်ႉၵူၼ်းဝဵင်း သေးၶိမ်ႇ၊ တင်းလၢႆဢိၵ်ႇတင်းၵူၼ်းဝဵင်း မိလေႃႇ၊ ၸိူဝ်းၼၼ်ႉတင်းသဵင်ႈတင်းလူင်ၸုတုမ်ၵၼ်သေလႄႈၵႂႃႇယုၵ်ႉတၢင်ႇ ဢၽိမလႅၵ်ႉ၊ ၼႂ်းဢရႃႇၶုၼ်ႁေႃၶမ်းၵႃႈတီႈတူၼ်ႈမႆႉၼိမ်သဝ်တီႈမၢတ်ႈတီႈတွင်းဢၼ်မီးၵႃႈၼႂ်းဝဵင်း သေးၶိမ်ႇ၊ ၼၼ်ႉဢေႃႈ။
မိူဝ်ႈဢၼ် ယေႃးႀမ်ႇ၊ လႆႈငိၼ်းလွင်ႈတၢင်းၼႆႉၼၼ်ႉၸိုင်၊မၼ်းၵႂႃႇၸုၵ်းယူႇၵႃႈၼိူဝ်ၸိၵ်းလွႆ ၵေႇရၸိမ်ႇ၊ သေယဝ်ႉ၊ၵိဝ်သဵင်ႁွင်ႉပၢဝ်ႇႁွင်ႉလၢတ်ႈလႄႈဝႃႈ၊ “ၵူၼ်းဝဵင်း သေးၶိမ်ႇ၊ ၶဝ်႟။ ပုၼ်ႈလွင်ႈၼင်ႇႁိုဝ်ၽြႃးပဵၼ်ၸဝ်ႈတၵ်းထွမ်ႇငိၼ်းၵႂၢမ်းသူၸိုင်၊ဢွၼ်ၵၼ်ထွမ်ႇငိၼ်းၵႂၢမ်းၵဝ်တႃႉ။-
မိူဝ်ႈၵွၼ်ႇဢွၼ်တၢင်းၼၼ်ႉ၊မီးၽဝ်ႇၼိုင်ႈတူၼ်ႈမႆႉတင်းလၢႆဢွၼ်ၵၼ်ၸုတုမ်ၵၼ်ႁႂ်ႈလႆႈလိူၵ်ႈတၢင်ႇၶုၼ်ႁေႃၶမ်းဢၼ်တၵ်းဢုပ်ႉပိူင်ႇၶဝ်ၼၼ်ႉဢေႃႈ။ ၶဝ်လၢတ်ႈတီႈတူၼ်ႈသၢၼ်ႇလုၼ်ႇလႄႈဝႃႈ၊ ‘ႁဵတ်းၶုၼ်ႁေႃၶမ်းႁဝ်းၶႃႈသေၵမ်း၊’ ဝႃႈၼင်ႇၼႆဢေႃႈ။-
တူၼ်ႈသၢၼ်ႇလုၼ်ႇၼၼ်ႉၶိုၼ်းလၢတ်ႈလႄႈဝႃႈ၊ ‘ပုၼ်ႈဢၼ်တၵ်းဢုပ်ႉပိူင်ႇသူၸိုင်၊ၵဝ်ဢမ်ႇၸုၼ်ႉပႅတ်ႈတၢင်းဢၼ်ႁဵတ်းဢွၵ်ႇၵွၼ်ႈၶႆၵွၼ်ႈမၼ်းၵဝ်ဢၼ်ၵူၼ်းဢဝ်ၵႂႃႇလုမ်းလႃးသရေႇၽြႃး၊သရေႇၵူၼ်းၼၼ်ႉလႆႈ၊’ ဝႃႈၼင်ႇၼႆဢေႃႈ။-
မိူဝ်ႈၼၼ်ႉတူၼ်ႈမႆႉတင်းလၢႆသမ်ႉလဝ်ႈလၢတ်ႈတီႈတူၼ်ႈမၢၵ်ႇလိူဝ်ႇလႄႈဝႃႈ၊ ‘မႃးႁဵတ်းၶုၼ်ႁေႃၶမ်းႁဝ်းသေၵမ်း၊’ ဝႃႈၼင်ႇၼႆဢေႃႈ။-
ၵူၺ်းၵႃႈ၊တူၼ်ႈမၢၵ်ႇလိူဝ်ႇၼၼ်ႉၶိုၼ်းလၢတ်ႈလႄႈဝႃႈ၊ ‘ပုၼ်ႈဢၼ်တၵ်းဢုပ်ႉပိူင်ႇသူၸိုင်၊ၵဝ်ဢမ်ႇၸုၼ်ႉပႅတ်ႈတၢင်းဢၼ်ႁဵတ်းဢွၵ်ႇဢရႃႉသႃႇဢၼ်ဝၢၼ်ဢၼ်ၸဵမ်းၼၼ်ႉလႆႈ၊’ ဝႃႈၼင်ႇၼႆဢေႃႈ။-
ပိူဝ်ႈၼႆလႄႈတူၼ်ႈမႆႉတင်းလၢႆသမ်ႉလဝ်ႈလၢတ်ႈတီႈတူၼ်ႈၶိူဝ်းမၢၵ်ႇၸပိတ်ႉလႄႈဝႃႈ၊ ‘မႃးႁဵတ်းၶုၼ်ႁေႃၶမ်းႁဝ်းၶႃႈသေၵမ်း၊’ ဝႃႈၼင်ႇၼႆဢေႃႈ။-
ၵူၺ်းၵႃႈ၊တူၼ်ႈမၢၵ်ႇၸပိတ်ႉၶိုၼ်းလၢတ်ႈလႄႈဝႃႈ၊ ‘ပုၼ်ႈဢၼ်တၵ်းဢုပ်ႉပိူင်ႇသူၸိုင်၊ၵဝ်ဢမ်ႇၸုၼ်ႉပႅတ်ႈတၢင်းဢၼ်ႁဵတ်းဢွၵ်ႇၼမ်ႉမၢၵ်ႇၸပိတ်ႉမႂ်ႇမႂ်ႇၵဝ်ဢၼ်ႁႂ်ႈၸႂ်ၽြႃးၸႂ်ၵူၼ်းသႂၢင်ႇသိူဝ်းၼၼ်ႉလႆႈ၊’ ဝႃႈၼင်ႇၼႆဢေႃႈ။
“မိူဝ်ႈၼၼ်ႉတူၼ်ႈမႆႉတင်းသဵင်ႈတင်းလူင်လဝ်ႈလၢတ်ႈတီႈတူၼ်ႈၼၢမ်လိၼ်လႄႈဝႃႈ၊ ‘မႃးႁဵတ်းၶုၼ်ႁေႃၶမ်းႁဝ်းၶႃႈသေၵမ်း၊’ ဝႃႈၼင်ႇၼႆဢေႃႈ။-
တူၼ်ႈၼၢမ်လိၼ်ၼၼ်ႉၶိုၼ်းလၢတ်ႈလႄႈဝႃႈ၊ ‘ပေႃးသူမီးၸႂ်ၶႂ်ႈႁႂ်ႈၵဝ်ႁဵတ်းၶုၼ်ႁေႃၶမ်းသူတႄႉၸိုင်၊ဢွၼ်ၵၼ်မႃးသွၼ်ႈယူႇတႂ်ႈႁူမ်ႈၵဝ်တႃႉ။ ပေႃးသူဢမ်ႇသွၼ်ႈၸိုင်၊ၽႆးတၵ်းဢွၵ်ႇသေၵႃႈၼႂ်းၵိင်ႇၼၢမ်ၵဝ်ၼႆႉလႄႈမႆႈတူၼ်ႈဢႃႇရိတ်ႉမိူင်း လေႇပၼုၼ်ႇ၊ ဢေႃႈ၊’ ဝႃႈၼင်ႇၼႆဢေႃႈ။
“တေႃႈလဵဝ်ၼႆႉတၢင်းဢၼ်သူယုၵ်ႉတၢင်ႇ ဢၽိမလႅၵ်ႉ၊ ၼႂ်းဢရႃႇၶုၼ်ႁေႃၶမ်းၼၼ်ႉၸွင်ႇသူပႂ်ႉသဵတ်ႈၸႃႇလႄႈႁဵတ်းသိုဝ်ႈသိုဝ်ႈတေႃႇတေႃႇႁိုဝ်း။ ၸွင်ႇသူရူဝ်ႇသေႇလေႇမၢတ်ႈတၢင်းႁဵတ်းတၢင်းသၢင်ႈ ၵိတိဢုၼ်ႇ၊ လႄႈႁဵတ်းလီလီငၢမ်းငၢမ်းတီႈလုၵ်ႈမၼ်းလၢၼ်မၼ်း၊တွပ်ႇတႅၼ်းပၼ်ၵျေးၸူးတီႈမၼ်းၵႃႈၼင်ႇဢၼ်မၼ်းႁဵတ်းၵျေးၸူးဢၼ်ထိူၵ်ႈၶၢမ်ႇၼၼ်ႉႁိုဝ်း။-
ၶုၵ်းၸႂ်လႆႈလွင်ႈတၢင်းဢၼ်ပေႃႈၵဝ်တိုၵ်းသိုၵ်းပုၼ်ႈသူလႄႈဝႆႉၸႂ်ၸုၼ်ႉဢသၢၵ်ႈမၼ်းႁႂ်ႈလႆႈၵႄႇသႄႇၶျွတ်ႈဢဝ်သူဢွၵ်ႇသေၵႃႈၼႂ်းမိုဝ်းၵူၼ်းမဵဝ်း မိတျၼ်ႇ၊ မႃးၼၼ်ႉတႃႉ။-
ဝၼ်းမိူဝ်ႈၼႆႉၸိုင်၊သူဢွၼ်ၵၼ်ႁဵတ်းၶတ်းၵၼ်တင်းလုၵ်ႈလၢၼ်ပေႃႈၵဝ်ယဝ်ႉ။ သူဢဝ်လုၵ်ႈၸၢႆးမၼ်းၸဵတ်းသိပ်းၵေႃႉတၢႆၵႃႈၼိူဝ်မၢၵ်ႇႁိၼ်လုၵ်ႈလဵဝ်ၵူၺ်း၊ၵွပ်ႈလူၺ်ႈဢဝ် ဢၽိမလႅၵ်ႉ၊ ဢၼ်ပဵၼ်လုၵ်ႈၸၢႆးမႄႈယိင်းၵေႃႉဢၼ်ပဵၼ်ၶႃႈၼၼ်ႉႁဵတ်းၶုၼ်ႁေႃၶမ်းၵႃႈၼိူဝ်ၵူၼ်းဝဵင်း သေးၶိမ်ႇ၊ ၵွပ်ႈပိူဝ်ႈဢၼ်မၼ်းပဵၼ်ပီႈပဵၼ်ၼွင်ႉသူၼၼ်ႉယဝ်ႉလူင်ပႄႇ။-
မိူဝ်ႈလဵဝ်ၼႆႉပေႃးသူပႂ်ႉသဵတ်ႈၸႃႇလႄႈႁဵတ်းသိုဝ်ႈသိုဝ်ႈတေႃႇတေႃႇတီႈ ၵိတိဢုၼ်ႇ၊ တင်းလုၵ်ႈလၢၼ်မၼ်းၼႂ်းဝၼ်းမိူဝ်ႈၼႆႉမႅၼ်ႈၸိုင်၊ဢွၼ်ၵၼ်ၸူမ်းသိူဝ်းၼႂ်း ဢၽိမလႅၵ်ႉ၊ တႃႉ။ ႁႂ်ႈမၼ်းၵေႃႈၸူမ်းသိူဝ်းၼႂ်းသူသေၵမ်းလူၺ်ႈ။-
ပေႃးဢမ်ႇၸႂ်ႈၸိုင်၊ႁႂ်ႈၽႆးဢွၵ်ႇတီႈ ဢၽိမလႅၵ်ႉ၊ လႄႈမႆႈၵူၼ်းဝဵင်း သေးၶိမ်ႇ၊ တင်းၵူၼ်းဝဵင်း မိလေႃႇ၊ ပႅတ်ႈသေၵမ်း။ ႁႂ်ႈၽႆးဢွၵ်ႇမႃးသေၵႃႈတီႈၵူၼ်း သေးၶိမ်ႇ၊ ဢိၵ်ႇတင်းၵူၼ်း မိလေႃႇ၊ သေလႄႈမႆႈပႅတ်ႈ ဢၽိမလႅၵ်ႉ၊ သေၵမ်းလူၺ်ႈ၊” ဝႃႈၼင်ႇၼႆဢေႃႈ။-
ၵွပ်ႈပိူဝ်ႈဢၼ် ယေႃးႀမ်ႇ၊ ၵူဝ်ပီႈၸၢႆးမၼ်း ဢၽိမလႅၵ်ႉ၊ လႄႈၶုၼ်ႇလႅၼ်ႈဢွၵ်ႇပၢႆႈၶၼ်ၶၼ်ၽႂ်းၽႂ်းလႄႈၵႂႃႇယူႇၵႃႈတီႈဝဵင်း ပေႇရႃႉ၊ ပုၼ်ႉသေဢေႃႈ။
ဢၽိမလႅၵ်ႉ၊ ၼၼ်ႉဢုပ်ႉပိူင်ႇၵႃႈၼိူဝ်ၵူၼ်းမဵဝ်း ဢိသရေး၊ တင်းလၢႆသၢမ်ပီဢေႃႈ။-
မိူဝ်ႈၼၼ်ႉ၊ၽြႃးပဵၼ်ၸဝ်ႈႁဵတ်းႁႂ်ႈ ဢၽိမလႅၵ်ႉ၊ တင်းၵူၼ်းဝဵင်း သေးၶိမ်ႇ၊ ၸိူဝ်းၼၼ်ႉၽိတ်းၵၼ်သေလႄႈၵူၼ်းဝဵင်း သေးၶိမ်ႇ၊ တင်းလၢႆလုၵ်ႉၽိုၼ်ႉ ဢၽိမလႅၵ်ႉ၊ ဢေႃႈ။-
လွင်ႈမၼ်းပဵၼ်မႃးၸိူဝ်ႉၼင်ႇၼႆပုၼ်ႈတၵ်းတွၼ်ႇတႅၼ်းၶိုၼ်းဢပျတ်ႈ ဢၽိမလႅၵ်ႉ၊ ဢိၵ်ႇတင်းၵူၼ်းဝဵင်း သေးၶိမ်ႇ၊ ၸိူဝ်းဢၼ်ပၼ်ႁႅင်းႁႂ်ႈမၼ်းဢဝ်တၢႆလုၵ်ႈၸၢႆး ၵိတိဢုၼ်ႇ၊ ၸဵတ်းသိပ်းၵေႃႉၼၼ်ႉဢေႃႈ။-
ၵူၼ်းဝဵင်း သေးၶိမ်ႇ၊ ၶဝ်ၼၼ်ႉပွႆႇဝႆႉၵူၼ်းတင်းလၢႆႁႂ်ႈလႆႈလွမ်ၽုတ်းသႂ်ႇတိုၵ်းတေႃး ဢၽိမလႅၵ်ႉ၊ ၵႃႈၼိူဝ်ပၢႆလွႆပၢႆၵုင်းတင်းလၢႆသေယဝ်ႉ၊ၶဝ်ၸိူဝ်းၼၼ်ႉၸူၼ်ဢဝ်ဢုၵ်ႉၸႃႇၶူဝ်းလဵင်းၵူၼ်းၵႃႈဢၼ်ၵႂႃႇမႃးသဵၼ်ႈတၢင်းၼၼ်ႉဢေႃႈ။ ပိူၼ်ႈလဝ်ႈလၢတ်ႈလွင်ႈတၢင်းၼၼ်ႉတီႈ ဢၽိမလႅၵ်ႉ၊ ဢေႃႈ။
မိူဝ်ႈၼၼ်ႉ၊ ၵႃႇလႃႉ၊ လုၵ်ႈၸၢႆး ဢေးပႅတ်ႉ၊ ပႃးလူၺ်ႈၵၼ်တင်းပီႈၼွင်ႉမၼ်းတင်းလၢႆမႃးလႄႈယူႇၽၢႆႇၵူၼ်းဝဵင်း သေးၶိမ်ႇ၊ ဢေႃႈ။ ၵူၼ်းဝဵင်းၸိူဝ်းၼၼ်ႉၵေႃႈယုမ်ႇယမ်တမ်းၸႂ် ၵႃႇလႃႉ၊ ဢေႃႈ။-
ၶဝ်ဢွၼ်ၵၼ်ၵႂႃႇၸူးတီႈသူၼ်မၢၵ်ႇၸပိတ်ႉၶဝ်ၸိူဝ်းၼၼ်ႉ၊ၵဵပ်းသိမ်းဢဝ်မၢၵ်ႇၸပိတ်ႉတင်းလၢႆလႄႈယဵပ်ႇၼူတ်ႈႁဵတ်းၼမ်ႉမၢၵ်ႇၸပိတ်ႉသေယဝ်ႉ၊ႁဵတ်းပွႆးမူၼ်ႈပွႆးပျေႃႇဢေႃႈ။ ၶဝ်ၶဝ်ႈၵႃႈၼႂ်းၵျွင်းၽြႃးၶဝ်သေယဝ်ႉ၊ၵိၼ်ၶူပ်းယူႇ၊သူတ်ႉယူႇဢိုၵ်ႉယူႇသေလႄႈဢွၼ်ၵၼ်ၵိၼ်ႇလႃႇ ဢၽိမလႅၵ်ႉ၊ ဢေႃႈ။-
ၵႃႇလႃႉ၊ ၼၼ်ႉလၢတ်ႈလႄႈဝႃႈ “ၵူၼ်းဝဵင်း သေးၶိမ်ႇ၊ ၼႆႉပဵၼ်ၽူႈလႂ်။ ႁဵတ်းသင်လႄႈႁဝ်းပႂ်ႉထၢမ်းၵၢၼ် ဢၽိမလႅၵ်ႉ၊ ယူႇ။ မၼ်းပဵၼ်ၽူႈလႂ်။ ပဵၼ်လုၵ်ႈၸၢႆး ၵိတိဢုၼ်ႇ၊ ဝႃႈၼႆႁိုဝ်း။ ၸေႇပုလႃႉ၊ ၼၼ်ႉၼွမ်းၶၢမ်ႇဢဝ်ဢမိင်ႉမၼ်းသေၵေႃႈ၊ႁဝ်းၼႆႉထုၵ်ႇလီပႂ်ႉထၢမ်းၵၢၼ်မၼ်းႁိုဝ်း။ ဢွၼ်ၵၼ်ပႂ်ႉသဵတ်ႈၸႃႇၵႃႈၼိူဝ်ပူႇပေႃႈႁဝ်း ႁႃႇမေႃႇ၊ ၵေႃႉဢၼ်ပဵၼ်ငဝ်ႈၶိူဝ်းႁိူၼ်းႁဝ်းၼၼ်ႉတႃႉႁဝ်း။-
ႁႂ်ႈၵဝ်လႆႈဢွၼ်ႁူဝ်ၵူၼ်းတင်းလၢႆၼႆႉသေၵမ်းလူၺ်ႈ။ ပေႃးပဵၼ်ၼင်ႇၼၼ်ၸိုင်၊ၵဝ်တၵ်းပႄႇ ဢၽိမလႅၵ်ႉ၊ ပႅတ်ႈလႄႈလၢတ်ႈတီႈမၼ်းလႄႈဝႃႈ၊ ‘ထၢပ်ႈသႂ်ႇႁႅင်းတပ်ႉသိုၵ်းမႂ်းၼမ်ၼမ်သေလႄႈဢွၵ်ႇမႃးတိုၵ်းတေႃးတႃႉ၊’ ဝႃႈၼႆဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ် ၸေႇပုလႃႉ၊ ၶုၼ်ဝဵင်းလူင်ၼၼ်ႉငိၼ်းၵႂၢမ်း ၵႃႇလႃႉ၊ ၼၼ်ႉၸိုင်၊ၸႂ်မႆႈၶႂ်ႈၸႃႉၼႃႇဢေႃႈ။-
မၼ်းပွႆႇၸႂ်ႉတမၢၼ်ႇၵႂႃႇၸူးတီႈ ဢၽိမလႅၵ်ႉ၊ ၵႃႈတီႈဝဵင်း ဢရုမႃႇ၊ လႄႈႁႂ်ႈၵႂႃႇလၢတ်ႈဝႃႈ၊ “ ၵႃႇလႃႉ၊ လုၵ်ႈၸၢႆး ဢေးပႅတ်ႉ၊ ဢိၵ်ႇတင်းပီႈၼွင်ႉမၼ်းတင်းလၢႆမႃးၵႃႈတီႈဝဵင်း သေးၶိမ်ႇ၊ လႄႈႁဵတ်းႁႂ်ႈၵူၼ်းဝဵင်းတင်းလၢႆလုၵ်ႉၽိုၼ်ႉၶတ်းၵၼ်တင်းၸဝ်ႈႁဝ်းတီႈၶႃႈဢေႃႈ။-
ပိူဝ်ႈၼႆလႄႈၶိင်ႇၵၢင်ၶိုၼ်းၸဝ်ႈႁဝ်းဢိၵ်ႇတင်းၵူၼ်းၸဝ်ႈႁဝ်းၸိူဝ်းၼၼ်ႉဢွၼ်ၵၼ်ၶၢႆႉမႃးတဵတ်ႇမႅပ်းပႂ်ႉယူႇၵႃႈၼႂ်းတူင်ႈၼႃးတႃႉ။-
ၼႂ်းၶိင်ႇၵၢင်ၼႂ်ၸူဝ်ႈဢၼ်ဝၼ်းဢမ်ႇပႆႇဢွၵ်ႇၸိုင်၊ၵိုင်ႉၵၢင်ႉတိုၵ်းတေႃးႁႅင်းႁႅင်းတႃႉ။ မိူဝ်ႈဢၼ် ၵႃႇလႃႉ၊ တင်းၵူၼ်းမၼ်းဢွၵ်ႇမႃးတိုၵ်းတေႃးၸဝ်ႈႁဝ်းၸိုင်၊ၸဝ်ႈႁဝ်းႁဵတ်းၵႃႈၼင်ႇဢၼ်သၢင်ႇထုၵ်ႇၼၼ်ႉတႃႉ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ဢၽိမလႅၵ်ႉ၊ ဢိၵ်ႇတင်းၵူၼ်းမၼ်းတင်းလၢႆၶၢႆႉမႃးမိူဝ်ႈၵၢင်ၶိုၼ်းသေလႄႈၽႄႁဵတ်းသီႇတပ်ႉပႂ်ႉထႃႈႁႂ်ႈလႆႈတိုၵ်းဝဵင်း သေးၶိမ်ႇ၊ ဢေႃႈ။-
မိူဝ်ႈဢၼ် ဢၽိမလႅၵ်ႉ၊ ဢိၵ်ႇတင်းၵူၼ်းမၼ်းတင်းလၢႆႁၼ် ၵႃႇလႃႉ၊ ဢွၵ်ႇမႃးၸုၵ်းယူႇၵႃႈတီႈၽၵ်းတူဝဵင်းၼၼ်ႉၸိုင်၊ၶဝ်လုၵ်ႉတီႈဢၼ်ပႂ်ႉယူႇၼၼ်ႉဢွၵ်ႇမႃးဢေႃႈ။-
ၵႃႇလႃႉ၊ ႁၼ်ၵူၼ်းၸိူဝ်းၼၼ်ႉသေယဝ်ႉ၊လၢတ်ႈတီႈ ၸေႇပုလႃႉ၊ လႄႈဝႃႈ၊ “တူၺ်းလူး။ ၵူၼ်းၼမ်ၼႃႇလုၵ်ႉသေၵႃႈတီႈၸိၵ်းလွႆပုၼ်ႉလူင်းမႃးဢေႃႈ၊” ဝႃႈၼင်ႇၼႆဢေႃႈ။ ၸေႇပုလႃႉ၊ ၶိုၼ်းလၢတ်ႈလႄႈဝႃႈ၊ “ဢၼ်ၸဝ်ႈႁဝ်းတူၺ်းႁၼ်မိူၼ်ၸိူဝ်ႉၼင်ႇၵူၼ်းၼၼ်ႉပဵၼ်ၵွင်ႉငဝ်းလွႆၶႃႈဢေႃႈ၊” ဝႃႈၼင်ႇၼႆဢေႃႈ။
ၵႃႇလႃႉ၊ လၢတ်ႈထႅင်ႈလႄႈဝႃႈ၊ “တူၺ်းလူး။ ၵူၼ်းၵမ်ႈၽွင်ႈတႆႇၸွမ်းသၼ်လွႆလူင်းမႃးဢေႃႈ။ ၵမ်ႈၽွင်ႈသမ်ႉၸွမ်းသဵၼ်ႈတၢင်းတူၼ်ႈမႆႉၼိမ်ဢၼ်မီးၵူၼ်းႁဵတ်းၽီမေႃႇၼၼ်ႉမႃးဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ၸေႇပုလႃႉ၊ လၢတ်ႈတီႈမၼ်းလႄႈဝႃႈ၊ “သူပ်းၵႂၢမ်းၸဝ်ႈဢၼ်ႁတ်းႁၢၼ်ၼၼ်ႉတေႃႈလဵဝ်ၼႆႉမီးၵႃႈလႂ်။ ၸဝ်ႈဝႃႈ၊ ‘ ဢၽိမလႅၵ်ႉ၊ ပဵၼ်ၽူႈလႂ်လႄႈႁဝ်းလႆႈထၢမ်းၵၢၼ်မၼ်းယူႇ၊’ ဝႃႈၼႆယဝ်ႉ။ ၶဝ်ၸိူဝ်းၼၼ်ႉပဵၼ်ၵူၼ်းၸိူဝ်းဢၼ်ၸဝ်ႈသမ်ႇမုၵ်ႈသႄႉသွမ်းၼၼ်ႉဢမ်ႇၸႂ်ႈႁိုဝ်း။ တေႃႈလဵဝ်ၼႆႉဢွၵ်ႇလႄႈၵႂႃႇတိုၵ်းတေႃးၶဝ်တႃႉ၊” ဝႃႈၼင်ႇၼႆဢေႃႈ။-
ၵႃႇလႃႉ၊ ၵေႃႈဢွၼ်ႁူဝ်ၵူၼ်းဝဵင်း သေးၶိမ်ႇ၊ တင်းလၢႆဢွၵ်ႇၵႂႃႇတိုၵ်းတေႃး ဢၽိမလႅၵ်ႉ၊ ဢေႃႈ။-
ၵႃႇလႃႉ၊ ဢွၵ်ႇပၢႆႈလႄႈ ဢၽိမလႅၵ်ႉ၊ လိုပ်ႈလမ်းၸွမ်းမၼ်းၵႂႃႇဢေႃႈ။ ၵူၼ်းၼမ်ၼႃႇၼၼ်ႉလႆႈၶၢမ်ႇတၢင်းဢၼ်တိူဝ်ႉမၢတ်ႇလႄႈလူမ်ႉတၢႆတေႃႇထိုင်ႁွတ်ႈႁူးၽၵ်းတူဝဵင်းဢေႃႈ။-
ဢၽိမလႅၵ်ႉ၊ ယူႇၵႃႈၼႂ်းဝဵင်း ဢရုမႃႇ၊ လႄႈ ၸေႇပုလႃႉ၊ ၵေႃႈႁေႃႈ ၵႃႇလႃႉ၊ ဢိၵ်ႇတင်းပီႈၼွင်ႉမၼ်းတင်းလၢႆဢွၵ်ႇဝဵင်း သေးၶိမ်ႇ၊ လႄႈၶဝ်ၼၼ်ႉဢမ်ႇလႆႈၶိုၼ်းၶဝ်ႈဝဵင်းမႃးထႅင်ႈသေပွၵ်ႈယဝ်ႉဢေႃႈ။
ၼႂ်းဝၼ်းမိူဝ်ႈၽုၵ်ႈၼၼ်ႉ ဢၽိမလႅၵ်ႉ၊ လႆႈႁုလႆႈငိၼ်းလွင်ႈဢၼ်ၵူၼ်းဝဵင်း သေးၶိမ်ႇ၊ တင်းလၢႆၶိုင်ပွင်တႃႇတေဢွၵ်ႇၵႂႃႇၵႃႈၼႂ်းတူင်ႈႁႆႈတူင်ႈၼႃးဢေႃႈ။-
ပိူဝ်ႈၼႆလႄႈမၼ်းဢဝ်ၵူၼ်းမၼ်းတင်းလၢႆၽႄႁဵတ်းသၢမ်မုၵ်ႉသေလႄႈၵႂႃႇလွမ်ပႂ်ႉယူႇၵႃႈတီႈတူင်ႈႁႆႈတူင်ႈၼႃးဢေႃႈ။ မိူဝ်ႈဢၼ်ၵူၼ်းတင်းလၢႆ ဢွၵ်ႇမႃးယူႇၼၼ်ႉၸိုင်၊မၼ်းဢွၵ်ႇၵႂႃႇလႄႈၽၼ်းတၢႆပႅတ်ႈဢေႃႈ။-
ယၢမ်းမိူဝ်ႈဢၼ် ဢၽိမလႅၵ်ႉ၊ တင်းၵူၼ်းမၼ်းမုၵ်ႉၼိုင်ႈၶုၼ်ႇလႅၼ်ႈၵႂႃႇၸုၵ်းပႂ်ႉႁူးၽၵ်းတူဝဵင်းယူႇၼၼ်ႉၸိုင်၊ၵူၼ်းသွင်မုၵ်ႉၼၼ်ႉၶိုၼ်ႈတိုၵ်းၵူၼ်းၸိူဝ်းဢၼ်မီးၵႃႈၼႂ်းတူင်ႈႁႆႈတူင်ႈၼႃးသေလႄႈၽၼ်းတၢႆပႅတ်ႈတင်းမူတ်းဢေႃႈ။-
ဢၽိမလႅၵ်ႉ၊ တိုၵ်းတေႃးဝဵင်းၼၼ်ႉတင်းဝၼ်းလႄႈလႆႈဝဵင်းသေယဝ်ႉ၊ၶႃႈတၢႆၽၼ်းတၢႆၵူၼ်းဝဵင်းတင်းလၢႆ၊ၵိူၼ်ႇယႃႉလမ်းဝဵင်းမၼ်းတူၵ်းသေလႄႈဢဝ်ၵိူဝ်ၸၢတ်ႇပိုၼ်ၵႃႈၼိူဝ်လိၼ်ၼႂ်းဝဵင်းၼၼ်ႉသေဢေႃႈ။
မိူဝ်ႈဢၼ်ၵူၼ်းဢၼ်ယူႇၼႂ်းသဝ်လၢင်းတီႈတိုၵ်းသိုၵ်း သေးၶိမ်ႇ၊ တင်းသဵင်ႈတင်းလူင်ငိၼ်းလွင်ႈၼၼ်ႉၸိုင်၊ၶဝ်ဢွၼ်ၵၼ်ပၢႆႈတဵတ်ႇသွၼ်ႈယူႇၵႃႈၼႂ်းလုၵ်းဢၼ်မၼ်ႈၶိူင်ႇၵႃႈၼႂ်းၵျွင်းၽြႃး ပေႇရိတ်ႉ၊ ဢေႃႈ။-
ပိူၼ်ႈမွၵ်ႇလၢတ်ႈလွင်ႈဢၼ်ၵူၼ်းတင်းလၢႆၸုတုမ်ၵၼ်ၵႃႈတီႈ ဢၽိမလႅၵ်ႉ၊ လႄႈ၊-
မၼ်းၵေႃႈၶိုၼ်ႈၵႃႈၼိူဝ်လွႆ ၸႃႇလမုၼ်ႇ၊ သေယဝ်ႉ၊ဢဝ်တႃမႅတ်းတႅပ်းဢဝ်ၵိင်ႇမႆႉလႄႈမႅၵ်ႇတၢင်ႇမႃႇၵႂႃႇဢေႃႈ။ တီႈၵူၼ်းမၼ်းတင်းလၢႆၵေႃႈမၼ်းသင်ႇလၢတ်ႈႁႂ်ႈႁဵတ်းၸွမ်းၵႃႈၼင်ႇဢၼ်မၼ်းႁဵတ်းၼၼ်ႉၶၼ်ၶၼ်ၽႂ်းၽႂ်းဢေႃႈ။-
ပိူဝ်ႈၼႆလႄႈၵူၼ်းၵူႈၵေႃႉၵူႈၵူၼ်းတႅပ်းဢဝ်ၵိင်ႇမႆႉလႄႈမႅၵ်ႇၸွမ်း ဢၽိမလႅၵ်ႉ၊ မႃးသေယဝ်ႉ၊ဢဝ်မႆႉၸိူဝ်းၼၼ်ႉၵွင်ဝႆႉၵႃႈတီႈလုၵ်းဢၼ်မၼ်ႈၶိူင်ႇၼၼ်ႉသေယဝ်ႉ၊ဢဝ်ၽႆးတုတ်ႇလုၵ်းဢၼ်မၼ်ႈၶိူင်ႇၼၼ်ႉပႃးလူၺ်ႈၵၼ်တင်းၵူၼ်းတင်းလၢႆဢေႃႈ။ ၼင်ႇၼၼ်လႄႈၵူၼ်းဢၼ်မီးၼႂ်းလုၵ်းဢၼ်မၼ်ႈၶိူင်ႈၼၼ်ႉတၢႆမူတ်းတၢႆၵဵင်ႈ၊ၽူႈယိင်းၵူၼ်းၸၢႆးမီးႁဵင်ၼိုင်ႈၸမ်ၸမ်ဢေႃႈ။
လိုၼ်းၼၼ်ႉ၊ ဢၽိမလႅၵ်ႉ၊ ၵႂႃႇၸူးတီႈဝဵင်း ထေႇပႅတ်ႉ၊ လႄႈလွမ်ႉႁွပ်ႈဝဵင်းၼၼ်ႉသေယဝ်ႉ၊သိမ်းဢဝ်ဢေႃႈ။-
ၵႃႈၼႂ်းဝဵင်းၼၼ်ႉမီးသဝ်လၢင်းတီႈတိုၵ်းသိုၵ်းဢၼ်မၼ်ႈၶိူင်ႇၼႃႇၼၼ်ႉလႄႈၵူၼ်းယိင်းၵူၼ်းၸၢႆးၵႃႈၼႂ်းဝဵင်းၼၼ်ႉဢိၵ်ႇလူၺ်ႈၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆဢွၼ်ၵၼ်ၵႂႃႇၵႃႈၼႂ်းမၼ်း၊ၶတ်းသေႃးဝႆႉသေယဝ်ႉ၊ၶိုၼ်ႈၵႂႃႇပၢႆႈသွၼ်ႈယူႇၵႃႈၼိူဝ်ၵုင်းၼိူဝ်ၸွမ်မၼ်းဢေႃႈ။-
မိူဝ်ႈဢၼ် ဢၽိမလႅၵ်ႉ၊ မႃးတိုၵ်းသဝ်လၢင်းတီႈတိုၵ်းသိုၵ်းၼၼ်ႉၸိုင်၊မၼ်းၵႂႃႇၸူးတီႈၽၵ်းတူသဝ်လၢင်းသေလႄႈတုတ်ႇၽႆးဢေႃႈ။-
မႄႈယိင်းၵေႃႉၼိုင်ႈဢဝ်ၽၢၵ်ႇမၢၵ်ႇႁိၼ်လူၺ်ၽၢၵ်ႇၼိုင်ႈထိမ်ႈတူၵ်းသႂ်ႇၵႃႈၼိူဝ်ႁူဝ်မၼ်းလႄႈလုပ်ႇၵွၵ်းႁူဝ်မၼ်းတႅၵ်ႇၵႂႃႇဢေႃႈ။-
မၼ်းႁွင်ႉဢဝ်ၵူၼ်းဢွၼ်ႇဢၼ်ပႃးလၢၵ်ႈၼၢၵ်ႈမၼ်းၼၼ်ႉၶၼ်ၶၼ်ၽႂ်းၽႂ်းလႄႈလၢတ်ႈဝႃႈ၊ “ထွတ်ႇလၢပ်ႇမႂ်းလႄႈၽၼ်းၵဝ်တၢႆတႃႉ။ ၵဝ်ဢမ်ႇၶႂ်ႈႁႂ်ႈမီးတီႈတၵ်းလၢတ်ႈဝႃႈ၊ ‘မႄႈယိင်းဢဝ်မၼ်းတၢႆဢေႃႈ၊’ ဝႃႈၼႆၼၼ်ႉ၊” ဝႃႈၼင်ႇၼႆဢေႃႈ။ ၵူၼ်းဢွၼ်ႇၼၼ်ႉၵေႃႈတႅင်းသႂ်ႇမၼ်းလႄႈမၼ်းတၢႆဢေႃႈ။-
မိူဝ်ႈဢၼ်ၵူၼ်းမဵဝ်း ဢိသရေး၊ တင်းလၢႆႁၼ် ဢၽိမလႅၵ်ႉ၊ တၢႆၼၼ်ႉၸိုင်၊ၶဝ်ဢွၼ်ၵၼ်ပွၵ်ႈၶိုၼ်းမိူဝ်းၵႂႃႇႁိူၼ်းၽႂ်ႁိူၼ်းမၼ်းသေဢေႃႈ။
ၼင်ႇၼၼ်လႄႈ ထႃႇဝရႃႉၽြႃး၊ တွပ်ႇတႅၼ်းပၼ်ဢပျတ်ႈဢၼ် ဢၽိမလႅၵ်ႉ၊ ႁဵတ်းမႅၼ်ႈတီႈပေႃႈမၼ်းလႄႈဢဝ်တၢႆပႅတ်ႈပီႈၼွင်ႉမၼ်းၸဵတ်းသိပ်းၼၼ်ႉဢေႃႈ။-
ၵူၼ်းဝဵင်း သေးၶိမ်ႇ၊ ၸိူဝ်းၼၼ်ႉၵေႃႈၽြႃးပဵၼ်ၸဝ်ႈႁႂ်ႈၶဝ်လႆႈၶၢမ်ႇၵွပ်ႈလူၺ်ႈတၢင်းဢၼ်ၶဝ်ႁၢႆႉမိူၵ်ႈၼၼ်ႉၸွမ်းၵႃႈၼင်ႇဢၼ် ယေႃးႀမ်ႇ၊ လုၵ်ႈၸၢႆး ၵိတိဢုၼ်ႇ၊ ဝႃႈဝႆႉယၢမ်းမိူဝ်ႈဢၼ်မၼ်းၵိၼ်ႇဝႃႈၼၼ်ႉဢေႃႈ။
လိုၼ်းသေ ဢၽိမလႅၵ်ႉ၊ ၼၼ်ႉ တေႃးလႃႉ၊ လုၵ်ႈၸၢႆး ၽုဝႃႇ၊ လၢၼ်ၸၢႆး တူဝ်းတူဝ်း၊ ၼၼ်ႉပေႃႇမႃးႁႂ်ႈလႆႈပွႆႇမဵဝ်း ဢိသရေး၊ လွတ်ႈဢေႃႈ။ မၼ်းပဵၼ်ၵူၼ်းၸိူဝ်ႉၶိူဝ်း ဢိသၶႃႇ၊ လႄႈယူႇၼႂ်းဝဵင်း သမိရႃႉ၊ ၵႃႈၼိူဝ်ႁၢၼ်ႉလွႆ ဢေႇၽရိမ်ႇ၊ ၼၼ်ႉဢေႃႈ။-
မၼ်းလႆႈပဵၼ်ၵူၼ်းလူင်ဢၼ်ၸီႇယၢင်ႇတြႃးတီႈမဵဝ်း ဢိသရေး၊ သၢဝ်းသၢမ်ပီဢေႃႈ။ မၼ်းတၢႆလႄႈဢဝ်သၢင်းၵျူဝ်ႇၵႃႈၼႂ်းဝဵင်း သမိရႃႉ၊ ဢေႃႈ။
လိုၼ်းသေ တေႃးလႃႉ၊ ၼၼ်ႉ ယႃႇဢိရႃႉ၊ ပေႃႇမႃးၵႃႈၼႂ်းမိူင်း ၵိလတ်ႉ၊ ဢေႃႈ။ မၼ်းလႆႈပဵၼ်ၵူၼ်းလူင်ဢၼ်ၸီႇယၢင်ႇတြႃးတီႈမဵဝ်း ဢိသရေး၊ သၢဝ်းသွင်ပီဢေႃႈ။-
မၼ်းမီးလုၵ်ႈၸၢႆးသၢမ်သိပ်းၵေႃႉဢၼ်ၶီႇမႃႉလီႈသၢမ်သိပ်းတူဝ်သေလႄႈဢုပ်ႉၵိၼ်ဝဵင်းသၢမ်သိပ်းဝဵင်းဢၼ်ႁွင်ႉဝႃႈ၊ ႁႃႇဝုတ်ႉယႃႇဢိရႃႉ၊ တေႃႇထိုင်ႁွတ်ႈဝၼ်းမိူဝ်ႈၼႆႉလႄႈမီးၵႃႈၼႂ်းမိူင်း ၵိလတ်ႉ၊ ၼၼ်ႉဢေႃႈ။-
ယႃႇဢိရႃႉ၊ ၼၼ်ႉတၢႆလႄႈသၢင်းၵျူဝ်ႇတီႈဝဵင်း ၵႃႇမုၼ်ႇ၊ ဢေႃႈ။
ၵူၼ်းမဵဝ်း ဢိသရေး၊ တင်းလၢႆသမ်ႉၶိုၼ်းႁဵတ်းဢပျတ်ႈဢၼ်ၶတ်းၵၼ်တင်း ထႃႇဝရႃႉၽြႃး၊ သေလႄႈဝႆႈၽြႃး ပႃႇလႃႉ၊ တင်းလၢႆဢိၵ်ႇတင်းၼၢင်းၽီ ဢႃႇသတရိတ်ႉ၊ တင်းလၢႆၵူၺ်းဢမ်ႇၵႃး၊ၶဝ်ဝႆႈၽြႃးမိူင်း သီးရီးယႃး၊ ၽြႃးမိူင်း ၸိတုမ်ႇ၊ ၽြႃးမိူင်း မေႃႇၽႃႉ၊ ၽြႃးမိူင်း ဢမ်ႇမုၼ်ႇ၊ တင်းၽြႃးမိူင်း ၽိလိတ်ႉတိ၊ ၸိူဝ်းၼၼ်ႉလူးၵွၼ်ႇဢေႃႈ။ ၶဝ်ဢွၼ်ၵၼ်ၸုၼ်ႉပႅတ်ႈ ထႃႇဝရႃႉၽြႃး၊ လႄႈဢမ်ႇႁဵတ်းဝၢတ်ႈတီႈမၼ်းၸဝ်ႈ။-
ပိူဝ်ႈၼႆလႄႈ ထႃႇဝရႃႉၽြႃး၊ ၸႂ်မႆႈၶႂ်ႈၸႃႉတေႃႇၵူၼ်းမဵဝ်း ဢိသရေး၊ တင်းလၢႆလႄႈ၊မၼ်းၸဝ်ႈပွႆႇႁႂ်ႈၵူၼ်းမဵဝ်း ၽိလိတ်ႉတိ၊ တင်းၵူၼ်းမဵဝ်း ဢမ်ႇမုၼ်ႇ၊ မႃးတိုၵ်းတေႃးၶဝ်ဢေႃႈ။-
ၵူၼ်းမဵဝ်းၸိူဝ်းၼၼ်ႉယႃႉယူၵ်ႉၼိၵ်ႈၸၢၵ်ႈငႅၼ်းသႄးၵူၼ်းမဵဝ်း ဢိသရေး၊ ၸိူဝ်းဢၼ်ယူႇၼႂ်းမိူင်း ဢႃႇမေႃးရိ၊ ၽၢႆႇတၢင်းဝၼ်းဢွၵ်ႇမႄႈၼမ်ႉ ယေႃးတၢၼ်ႇ၊ ၵႃႈၼႂ်းမိူင်း ၵိလတ်ႉ၊ ၼၼ်ႉသိပ်းပႅတ်ႇပီတဵမ်တဵမ်ဢေႃႈ။-
ၵူၼ်းမဵဝ်း ဢမ်ႇမုၼ်ႇ၊ ၶဝ်ယင်းၶၢမ်ႈၼမ်ႉ ယေႃးတၢၼ်ႇ၊ မႃးလႄႈတိုၵ်းတေႃးၵူၼ်းၸိူဝ်ႉၶိူဝ်း ယုတႃႉ၊ တင်းၸိူဝ်ႉၶိူဝ်း ရုပိၼ်ႇ၊ ဢိၵ်ႇတင်းၸိူဝ်ႉၶိူဝ်း ဢေႇၽရိမ်ႇ၊ ၶဝ်ဢေႃႈ။ ၼင်ႇၼၼ်လႄႈၵူၼ်းမဵဝ်း ဢိသရေး၊ တူၵ်းႁွတ်ႈၼႂ်းတုၵ်ႉၶႃႉယႂ်ႇၼႃႇဢေႃႈ။
မိူဝ်ႈၼၼ်ႉၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ႁွင်ႉသႅၼ်ႇတီႈ ထႃႇဝရႃႉၽြႃး၊ လႄႈလၢတ်ႈဝႃႈ၊ “ၶႃႈၸဝ်ႈႁဝ်းၶဝ်ႁဵတ်းဢပျတ်ႈဢၼ်ၶတ်းၵၼ်တင်းၸဝ်ႈႁဝ်းယဝ်ႉတီႈၶႃႈဢေႃႈ။ လွင်ႈမၼ်းၸမ်ႉ၊ၶႃႈၸဝ်ႈႁဝ်းၶဝ်ၸုၼ်ႉပႅတ်ႈၸဝ်ႈႁဝ်းၽြႃးပဵၼ်ၸဝ်ႈၶႃႈၸဝ်ႈႁဝ်းၶဝ်သေလႄႈဝႆႈၽြႃး ပႃႇလႃႉ၊ တင်းလၢႆတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉတီႈၶဝ်လႄႈဝႃႈၸမ်ႉ၊ “ၵူၼ်းမဵဝ်း ဢေးၵျိပ်ႉ၊ မဵဝ်း ဢႃႇမေႃးရိ၊ မဵဝ်း ဢမ်ႇမုၼ်ႇ၊ မဵဝ်း ၽိလိတ်ႉတိ၊-
မဵဝ်း ၸိတုမ်ႇ၊ မဵဝ်း ဢႃႇမလႅၵ်ႉ၊ တင်းၵူၼ်းမဵဝ်း မေႃးၼိ၊ ၸိူဝ်းၼၼ်ႉၼိၵ်ႈၸၢၵ်ႈတဵၵ်းငႅၼ်းသူမိူဝ်ႈဢွၼ်ၼႆႉၼၼ်ႉလႄႈ၊မိူဝ်ႈဢၼ်သူႁွင်ႉသႅၼ်ႇႁွင်ႉႁႆႈတီႈၵဝ်ၼၼ်ႉၸွင်ႇၵဝ်ဢမ်ႇၵႄႇသႄႇၶျွတ်ႈဢဝ်သူဢွၵ်ႇၼႂ်းမိုဝ်းၶဝ်ၼၼ်ႉႁိုဝ်း။-
ၵူၺ်းၵႃႈ၊သူယင်းတိုၵ်ႉၸုၼ်ႉပႅတ်ႈၵဝ်သေယဝ်ႉ၊ဝႆႈၽြႃးၶဝ်ၸိူဝ်းၼၼ်ႉဢေႃႈ။ ပိူဝ်ႈၼႆလႄႈၵဝ်တၵ်းဢမ်ႇၵႄႇၼုၵ်ႈဢဝ်သူထႅင်ႈယဝ်ႉ။-
ဢွၼ်ၵၼ်ၵႂႃႇလႄႈႁွင်ႉႁႆႈႁွင်ႉသႅၼ်ႇတီႈၽြႃးၸိူဝ်းဢၼ်သူလိူၵ်ႈဢဝ်ၼၼ်ႉတႃႉ။ ႁႂ်ႈၶဝ်ၵႄႇၼုၵ်ႈဢဝ်သူၼႂ်းမိူဝ်ႈဢၼ်သူမီးၽေးတုၵ်ႉၶႃႉၼၼ်ႉတႃႉ၊” ဝႃႈၼင်ႇၼႆဢေႃႈ။
ၵူၼ်းမဵဝ်း ဢိသရေး၊ ၸိူဝ်းၼၼ်ႉၵေႃႈလဝ်ႈယွၼ်းတီႈ ထႃႇဝရႃႉၽြႃး၊ လႄႈဝႃႈ၊ “ၶႃႈၸဝ်ႈႁဝ်းၶဝ်ႁဵတ်းဢပျတ်ႈမႅၼ်ႈတီႈၶႃႈယဝ်ႉ။ ၸီႇယၢင်ႇၸွမ်းၵႃႈၼင်ႇဢၼ်ဢလူဝ်ႇၸဝ်ႈႁဝ်းမီးၼၼ်ႉသေၵမ်းတီႈၶႃႈ။ ၵူၺ်းၵႃႈ၊ၶႅၼ်းတေႃႈၸဝ်ႈႁဝ်းၵႄႇသႄႇၶျွတ်ႈဢဝ်ၶႃႈၸဝ်ႈႁဝ်းၶဝ်ၼႂ်းဝၼ်းမိူဝ်ႈၼႆႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၶဝ်ပႄႇပႅတ်ႈၽြႃးၵူၼ်းတၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉသေလႄႈဢွၼ်ၵၼ်ႁဵတ်းဝၢတ်ႈၵူဝ်းၵႂၢႆႇ ထႃႇဝရႃႉၽြႃး၊ ဢေႃႈ။ ထႃႇဝရႃႉၽြႃး၊ ၵေႃႈၼႅင်ၸႂ်မႆႈၸႂ်ၵွပ်ႈပိူဝ်ႈတုၵ်ႉၶႃႉတၢင်းၽၢၼ်ဢၼ်ၵူၼ်းမဵဝ်း ဢိသရေး၊ လႆႈၶၢမ်ႇၼၼ်ႉဢေႃႈ။
မိူဝ်ႈၼၼ်ႉတပ်ႉသိုၵ်းၵူၼ်းမဵဝ်း ဢမ်ႇမုၼ်ႇ၊ ၶဝ်မႄးႁႅၼ်းပုၼ်ႈၼႃႈသိုၵ်းလႄႈၶျႃးပၢင်တပ်ႉၵႃႈတီႈမိူင်း ၵိလတ်ႉ၊ ဢေႃႈ။ ၵူၼ်းမဵဝ်း ဢိသရေး၊ ၶဝ်ၸမ်ႉ၊မႃးၸုတုမ်ၵၼ်လႄႈၶျႃးပၢင်တပ်ႉၵႃႈတီႈဝဵင်း မိၸပႃႇ၊ မိူင်း ၵိလတ်ႉ၊ ဢေႃႈ။-
ၵႃႈတီႈၼၼ်ႈၼၼ်ႉၵူၼ်းတင်းလၢႆဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၸိူဝ်ႉၶိူဝ်း ဢိသရေး၊ တင်းလၢႆဢွၼ်ၵၼ်တိူင်ႇပၢင်ႇလၢတ်ႈၸႃၵၼ်လႄႈဝႃႈ၊ “ၽူႈလႂ်သေဢမ်ႇဝႃႈ၊ၵေႃႉဢၼ်ၸႃႉတိုၵ်းၵူၼ်းမဵဝ်း ဢမ်ႇမုၼ်ႇ၊ ၶဝ်ဢွၼ်တၢင်းပိူၼ်ႈၼၼ်ႉ၊ႁႂ်ႈၵေႃႉၼၼ်ႉပဵၼ်ၵူၼ်းတူၼ်ႈၵူၼ်းႁူဝ်ၵူၼ်းဝၢၼ်ႈၵူၼ်းမိူင်း ၵိလတ်ႉ၊ တင်းသဵင်ႈတင်းလူင်သေ၊” ဝႃႈၼင်ႇၼႆဢေႃႈ။
ယေႇၽႀႃႉ၊ ဢၼ်ပဵၼ်ၵူၼ်းသိုၵ်းဢၼ်ႁတ်းႁၢၼ်ၼႃႇၵႃႈၼႂ်းၵူၼ်းမဵဝ်း ၵိလတ်ႉ၊ ၼၼ်ႉပဵၼ်လုၵ်ႈၸၢႆးမႄႈမွၵ်ႇယႃႈဢေႃႈ။ ပေႃႈမၼ်း ၵိလတ်ႉ၊ ၼၼ်ႉ၊-
သမ်ႉမီးလုၵ်ႈၸၢႆးတၢင်ႇၵေႃႉလူၺ်ႈၵၼ်တင်းမေးလူင်မၼ်းလႄႈ၊မိူဝ်ႈဢၼ်လုၵ်ႈၸၢႆးၸိူဝ်းၼၼ်ႉယႂ်ႇမႃးၼၼ်ႉၸိုင်၊ၶဝ်ဢွၼ်ၵၼ်ႁေႃႈ ယေႇၽႀႃႉ၊ ဢွၵ်ႇႁိူၼ်းပႅတ်ႈသေဢေႃႈ။ ၶဝ်လၢတ်ႈတီႈမၼ်းလႄႈဝႃႈ၊ “မႂ်းဢမ်ႇမီးလွင်ႈဢၼ်တၵ်းၶၢမ်ႇဢဝ်ဢမူၺ်ႇၵႃႈၼႂ်းႁိူၼ်းပေႃႈႁဝ်းၼႆႉ။ လွင်ႈမၼ်းၸမ်ႉ၊မႂ်းပဵၼ်လုၵ်ႈၸၢႆးမႄႈယိင်းတၢင်ႇၵေႃႉတၢင်ႇၵူၼ်းဢေႃႈ၊” ဝႃႈၼင်ႇၼႆဢေႃႈ။-
ယေႇၽႀႃႉ၊ ၵေႃႈဢွၵ်ႇပၢႆႈသေၵႃႈတီႈပီႈၸၢႆးမၼ်းၸိူဝ်းၼၼ်ႉသေလႄႈၵႂႃႇယူႇၵႃႈၼႂ်းမိူင်း တေႃႇၽႃႉ၊ ဢေႃႈ။ ၵႃႈတီႈၼၼ်ႈၵူၼ်းၸိူဝ်းဢၼ်ဢမ်ႇပွင်ႇလွင်ႈတင်းလၢႆၸုတုမ်ၵၼ်တီႈမၼ်းလႄႈႁဵတ်းတပႄးမၼ်းဢေႃႈ။
မိူဝ်ႈၼၼ်ႉဢမ်ႇႁိုင်ဢမ်ႇၼၢၼ်းၵူၼ်းမဵဝ်း ဢမ်ႇမုၼ်ႇ၊ ၶီႇသိုၵ်းမႃးတိုၵ်းတေႃးၵူၼ်းမဵဝ်း ဢိသရေး၊ ဢေႃႈ။-
မိူဝ်ႈဢၼ်ပဵၼ်ၸိူဝ်ႉၼင်ႇၼၼ်ၼၼ်ႉၸိုင်၊ၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်း ၵိလတ်ႉ၊ ၸိူဝ်းၼၼ်ႉဢွၼ်ၵၼ်ၵႂႃႇႁႂ်ႈလႆႈႁွင်ႉဢဝ် ယေႇၽႀႃႉ၊ သေၵႃႈၼႂ်းမိူင်း တေႃႇၽႃႉ၊ ၼၼ်ႉဢေႃႈ။-
ၶဝ်ၵႂႃႇလၢတ်ႈတီႈမၼ်းလႄႈဝႃႈ၊ “မႃးလႄႈဢွၼ်ႁူဝ်ဢွၼ်ၵၼ်ႁဝ်းႁႂ်ႈလႆႈတိုၵ်းတေႃးၵူၼ်းမဵဝ်း ဢမ်ႇမုၼ်ႇ၊ ၼၼ်ႉသေၵမ်း၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ ယေႇၽႀႃႉ၊ ၶိုၼ်းလၢတ်ႈတီႈၶဝ်လႄႈဝႃႈ၊ “သူၸင်းၵဝ်ၼႃႇလူင်လၢင်လႄႈႁေႃႈၵဝ်ဢွၵ်ႇသေၵႃႈတီႈႁိူၼ်းပေႃႈၵဝ်မႃးယဝ်ႉ။ မိူဝ်ႈလဵဝ်ၼႆႉၵွပ်ႈသင်လႄႈသူမႃးတီႈၵဝ်မိူဝ်ႈဢၼ်သူႁွတ်ႈတုၵ်ႉၶႃႉၼၼ်ႉၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ၶဝ်ၸိူဝ်းၼၼ်ႉသမ်ႉတွင်းပၢၼ်ႇတီႈမၼ်းလႄႈလၢတ်ႈဝႃႈ၊ “ႁဝ်းၶႃႈဝၢႆႇၼႃႈမႃးၸူးၸဝ်ႈတေႃႈလဵဝ်ၼႆႉၵွပ်ႈပိူဝ်ႈႁဝ်းၶႃႈၶႂ်ႈႁႂ်ႈၸဝ်ႈမႃးလူၺ်ႈၵၼ်တင်းႁဝ်းၶႃႈလႄႈတိုၵ်းတေႃးၵူၼ်းမဵဝ်း ဢမ်ႇမုၼ်ႇ၊ သမ်ႉၶႂ်ႈႁႂ်ႈၸဝ်ႈႁဵတ်းၵူၼ်းတူၼ်ႈၵူၼ်းႁူဝ်ၵႃႈၼႂ်းၵူၼ်းမဵဝ်း ၵိလတ်ႉ၊ တင်းသဵင်ႈတင်းလူင်တီႈၶႃႈဢေႃႈ၊” ဝႃႈၼင်ႇၼႆဢေႃႈ။
ယေႇၽႀႃႉ၊ သမ်ႉလၢတ်ႈတီႈၶဝ်လႄႈဝႃႈ၊ “ပေႃးဝႃႈ၊သူသမ်ႉၶိုၼ်းႁွင်ႉဢဝ်ၵဝ်ၵႂႃႇတိုၵ်းတေႃးၵူၼ်းမဵဝ်း ဢမ်ႇမုၼ်ႇ၊ လႄႈ ထႃႇဝရႃႉၽြႃး၊ ပၼ်ႁႂ်ႈဢွင်ႇသိုၵ်းၸိုင်၊ၵဝ်တၵ်းလႆႈပဵၼ်ၵူၼ်းတူၼ်ႈၵူၼ်းႁူဝ်သူဢေႃႈ၊” ဝႃႈၼင်ႇၼႆဢေႃႈ။
ၶဝ်ဢွၼ်ၵၼ်ၶိုၼ်းလၢတ်ႈလႄႈဝႃႈ၊ “ႁဝ်းၶႃႈၽွမ်ႉၸႂ်ယဝ်ႉဢေႃႈ။ ႁႂ်ႈ ထႃႇဝရႃႉၽြႃး၊ ပဵၼ်သၢၵ်ႈသေႇလွင်ႈၼႆႉတႃႉ၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈ ယေႇၽႀႃႉ၊ ၵႂႃႇလူၺ်ႈၵၼ်တင်းၵူၼ်းဢၼ်ပဵၼ်ၵႄႇပဵၼ်ႁူဝ်မဵဝ်း ၵိလတ်ႉ၊ ၸိူဝ်းၼၼ်ႉလႄႈၵူၼ်းတင်းလၢႆဢွၼ်ၵၼ်ယုၵ်ႉတၢင်ႇႁႂ်ႈမၼ်းပဵၼ်ၵူၼ်းတူၼ်ႈၵူၼ်းႁူဝ်ၶုၼ်သိုၵ်းလူင်သေဢေႃႈ။ ယေႇၽႀႃႉ၊ ၵေႃႈလၢတ်ႈၵႂၢမ်းမၼ်ႈၵႂၢမ်းၵႅၼ်ႇတီႈၽၢႆႇၼႃႈ ထႃႇဝရႃႉၽြႃး၊ ၵႃႈၼႂ်းဝဵင်း မိၸပႃႇ၊ ဢေႃႈ။
မိူဝ်ႈၼၼ်ႉ ယေႇၽႀႃႉ၊ ပွႆႇၸႂ်ႉသၢၼ်ႇတမၢၼ်ႇတင်းလၢႆၵႂႃႇၸူးတီႈၶုၼ်ႁေႃၶမ်းမဵဝ်း ဢမ်ႇမုၼ်ႇ၊ လႄႈလၢတ်ႈဝႃႈ၊ “ၸဝ်ႈမီးတၢင်းဢၼ်ၽိတ်းၵၼ်တင်းႁဝ်းဢၼ်လႂ်လႄႈယဵပ်ႇၶၢမ်ႈမႃးတိုၵ်းတေႃးမိူင်းႁဝ်းၼႆႉ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းမဵဝ်း ဢမ်ႇမုၼ်ႇ၊ ၵေႃႈၶိုၼ်းလၢတ်ႈတီႈသၢၼ်ႇတမၢၼ်ႇ ယေႇၽႀႃႉ၊ ၸိူဝ်းၼၼ်ႉလႄႈဝႃႈ၊ “မိူဝ်ႈဢၼ်ၵူၼ်းမဵဝ်း ဢိသရေး၊ တင်းလၢႆဢွၵ်ႇမိူင်း ဢေးၵျိပ်ႉ၊ မႃးၼၼ်ႉၸိုင်၊ၶဝ်သိမ်းဢဝ်လိၼ်ၵဝ်ၸႃႉဢဝ်ၼမ်ႉမႄႈ ဢႃႇၼုၼ်ႇ၊ တေႃႇထိုင်ႁွတ်ႈၼမ်ႉမႄႈ ယပ်ႉပုၵ်ႉ၊ တင်းၼမ်ႉမႄႈ ယေႃးတၢၼ်ႇ၊ ဢေႃႈ။ တေႃႈလဵဝ်ၼႆႉဢဝ်လိၼ်ၸိူဝ်းၼၼ်ႉၶိုၼ်းပၼ်လီလီတႃႉ၊” ဝႃႈၼင်ႇၼႆဢေႃႈ။
ယေႇၽႀႃႉ၊ သမ်ႉၶိုၼ်းပွႆႇၸႂ်ႉသၢၼ်ႇတမၢၼ်ႇတင်းလၢႆၵႂႃႇထႅင်ႈလႄႈ၊-
ႁႂ်ႈၶဝ်ၵႂႃႇလၢတ်ႈဝႃႈ၊ “မဵဝ်း ဢိသရေး၊ ႁိမ်ဢဝ်လိၼ် မေႃႇၽႃႉ၊ တင်းလိၼ် ဢမ်ႇမုၼ်ႇ၊ ဢမ်ႇၸႂ်ႈ။-
လွင်ႈတၢင်းဢၼ်ပဵၼ်မႃးၸမ်ႉ၊မိူဝ်ႈဢၼ်ၵူၼ်းမဵဝ်း ဢိသရေး၊ တင်းလၢႆဢွၵ်ႇမိူင်း ဢေးၵျိပ်ႉ၊ မႃးလႄႈပႆၽႃႇလတ်းၵႃႈၼႂ်းထိူၼ်ႇလႅင်ႉၵႂႃႇၸူးတီႈၵူတ်ႉလူင်ပၢင်ႇလၢႆႇ ဢၵပ်ႉပႃႉ၊ သေယဝ်ႉၸင်ႇႁွတ်ႈထိုင်ၵႃႈတီႈဝၢၼ်ႈ ၵႃႇတေႇသႃႉ၊ ဢေႃႈ။-
မိူဝ်ႈၼၼ်ႉၶဝ်ပွႆႇၸႂ်ႉသၢၼ်ႇတမၢၼ်ႇတင်းလၢႆၵႂႃႇၸူးတီႈၶုၼ်ႁေႃၶမ်းမိူင်း ဢေႇတုမ်ႇ၊ လႄႈၶေႃယွၼ်းဢၶႂၢင်ႉႁႂ်ႈလႆႈပႆၽႃႇလတ်းလႅၼ်လိၼ်မၼ်းၵႂႃႇဢေႃႈ။ ၵူၺ်းၵႃႈ၊ၶုၼ်လူင်ၼၼ်ႉဢမ်ႇပၼ်ဢၶႂၢင်ႉ။ ၶဝ်သမ်ႉၶေႃယွၼ်းတီႈၶုၼ်ႁေႃၶမ်းမိူင်း မေႃႇၽႃႉ၊ သေၵေႃႈၶုၼ်လူင်ၼၼ်ႉၵေႃႈဢမ်ႇပၼ်ဢၶႂၢင်ႉတီႈၶဝ်။ ပိူဝ်ႈၼႆလႄႈၵူၼ်းမဵဝ်း ဢိသရေး၊ ၸိူဝ်းၼၼ်ႉယူႇၵႃႈတီႈဝၢၼ်ႈ ၵႃႇတေႇသႃႉ၊ ယူႇဢေႃႈ။-
မိူဝ်ႈၼၼ်ႉၶဝ်သိုပ်ႇၶၢဝ်းတၢင်းၸွမ်းၵႂႃႇၼႂ်းထိူၼ်ႇလႅင်ႉ၊လဵပ်ႈၸွမ်းႁိမ်းမိူင်း ဢေႇတုမ်ႇ၊ တင်းႁိမ်းမိူင်း မေႃႇၽႃႉ၊ ၵႂႃႇတေႃႇထိုင်ႁွတ်ႈၵႃႈတီႈၽၢႆႇဝၼ်းဢွၵ်ႇမိူင်း မေႃႇၽႃႉ၊ ၵႃႈတီႈၽၢႆႇပုၼ်ႉၼမ်ႉမႄႈ ဢႃႇၼုၼ်ႇ၊ ဢေႃႈ။ ၵႃႈတီႈၼၼ်ႈၶဝ်ၶျႃးပၢင်တပ်ႉလႄႈယင်းဢမ်ႇၶၢမ်ႈၼမ်ႉၼၼ်ႉၵႂႃႇ၊ၵွပ်ႈပိူဝ်ႈမၼ်းပဵၼ်ၶွပ်ႇၼမ်ႉလႅၼ်လိၼ်မိူင်း မေႃႇၽႃႉ၊ ဢေႃႈ။-
မိူဝ်ႈၼၼ်ႉၵူၼ်းမဵဝ်း ဢိသရေး၊ ပွႆႇၸႂ်ႉသၢၼ်ႇတမၢၼ်ႇၵႂႃႇၸူးတီႈၶုၼ်ႁေႃၶမ်း သိႁုၼ်ႇ၊ မဵဝ်း ဢႃႇမေႃးရိ၊ ၵႃႈတီႈဝဵင်း ႁေႇသၽုၼ်ႇ၊ သေလႄႈၶေႃယွၼ်းႁႂ်ႈလႆႈပႆၽႃႇလတ်းမိူင်းၶုၼ်လူင်ၼၼ်ႉၸူးတီႈမိူင်းတူဝ်ၸဝ်ႈၵဝ်ႇဢေႃႈ။-
ၵူၺ်းၵႃႈ၊ၶုၼ်ႁေႃၶမ်း သိႁုၼ်ႇ၊ ဢမ်ႇပၼ်ဢၶႂၢင်ႉတီႈၶဝ်ဢမ်ႇၵႃး၊မၼ်းၼၼ်ႉၸုတုမ်ဢဝ်တပ်ႉသိုၵ်းမၼ်းတင်းမူတ်းလႄႈၶျႃးပၢင်တပ်ႉၵႃႈတီႈဝဵင်း ယႃႇႁတ်ႉ၊ သေယဝ်ႉ၊တိုၵ်းတေႃးၵူၼ်းမဵဝ်း ဢိသရေး၊ ဢေႃႈ။-
ၵူၺ်းၵႃႈ၊ ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ ၼၼ်ႉပၼ်ႁႂ်ႈၵူၼ်းမဵဝ်း ဢိသရေး၊ တင်းလၢႆဢွင်ႇသိုၵ်းၵႃႈၼိူဝ်ၶုၼ်ႁေႃၶမ်း သိႁုၼ်ႇ၊ တင်းၵူၼ်းသိုၵ်းမၼ်းၼၼ်ႉဢေႃႈ။ ပိူဝ်ႈၼႆၸင်ႇ၊ၵူၼ်းမဵဝ်း ဢိသရေး၊ တင်းလၢႆလႆႈသိမ်းဢဝ်ၼမ်ႉလိၼ်ႁိၼ်ၽႃၵူၼ်းမဵဝ်း ဢႃႇမေႃးရိ၊ ၸိူဝ်းဢၼ်ယူႇၵႃႈၼႂ်းမိူင်းၼၼ်ႉဢေႃႈ။-
ၶဝ်သိမ်းဢဝ်ၼမ်ႉဢဝ်လိၼ်ၵူၼ်းမဵဝ်း ဢႃႇမေႃးရိ၊ ၶဝ်တင်းလၢႆတႄႇၸႃႉဢဝ်တီႈၼမ်ႉမႄႈ ဢႃႇၼုၼ်ႇ၊ ၽၢႆႇတၢင်းၸၢၼ်းၶိုၼ်ႈၵႂႃႇထိုင်တီႈၼမ်ႉမႄႈ ယပ်ႉပုၵ်ႉ၊ ၽၢႆႇတၢင်းႁွင်ႇဢိၵ်ႇတင်းၸႃႉဢဝ်တီႈထိူၼ်ႇလႅင်ႉၽၢႆႇတၢင်းဝၼ်းဢွၵ်ႇလူင်းၵႂႃႇထိုင်တီႈၼမ်ႉမႄႈ ယေႃးတၢၼ်ႇ၊ ၽၢႆႇတၢင်းဝၼ်းတူၵ်းပုၼ်ႉဢေႃႈ။-
လွင်ႈတၢင်းၼႆႉၸိုင်၊ပဵၼ်တၢင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ၼၼ်ႉႁေႃႈၵူၼ်းမဵဝ်း ဢႃႇမေႃးရိ၊ တင်းလၢႆၵႂႃႇပႅတ်ႈပုၼ်ႈၵူၼ်းမၼ်းၸဝ်ႈဢၼ်ဝႃႈ၊ၵူၼ်းမဵဝ်း ဢိသရေး၊ ၼၼ်ႉဢေႃႈ။-
ၸွင်ႇၸဝ်ႈဢၢင်ႈတၵ်းၶိုၼ်းသိမ်းဢဝ်မိူင်းၼၼ်ႉၶႃႈႁိုဝ်း။ ၸဝ်ႈပိူင်ႇဢဝ်ၵႃႈဢၼ်ၽြႃး ၶေးမုသႃႉ ဢၢပ်ႈပၼ်တီႈၸဝ်ႈၼၼ်ႉၵူၺ်းတႃႉ။ ႁဝ်းၸမ်ႉ၊တၵ်းပိူင်ႇဢဝ်ၵႃႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းဢၢပ်ႈပၼ်ဝႆႉတီႈႁဝ်းၼၼ်ႉဢေႃႈ။-
ၸဝ်ႈထၢင်ႇဝႃႈ၊ၸဝ်ႈယဵင်ႈၶႅၼ်းမျၢတ်ႈၼႃႇသေၶုၼ်ႁေႃၶမ်း ပႃႇလၵ်ႉ၊ လုၵ်ႈၸၢႆး ၸိၽေႃႇ၊ ၵူၼ်းမဵဝ်း မေႃႇၽႃႉ၊ ၼၼ်ႉႁိုဝ်း။ မၼ်းၼၼ်ႉယၢမ်ႈတႃႉၵၼ်ၶဵင်ႇၵၼ်တင်းၵူၼ်းမဵဝ်း ဢိသရေး၊ ႁိုဝ်း၊ယၢမ်ႈတိုၵ်းၵၼ်ႁိုဝ်း။-
ၼႂ်းၸူဝ်ႈသၢမ်ပၢၵ်ႇပီတဵမ်တဵမ်ၼႆႉမဵဝ်း ဢိသရေး၊ လႆႈသိမ်းဢဝ်ဝဵင်း ႁေႇသၽုၼ်ႇ၊ တင်းဝဵင်း ဢႃႇရေႃႇ၊ ဢိၵ်ႇတင်းဝၢၼ်ႈဝဵင်းမၼ်းဢၼ်မီးႁိမ်းႁွမ်းၶဝ်ဢိၵ်ႇတင်းဝဵင်းလူင်ၵႃႈဢၼ်မီးၸွမ်းၽင်ႇၼမ်ႉမႄႈ ဢႃႇၼုၼ်ႇ၊ တင်းလၢႆၼၼ်ႉႁဵတ်းသင်လႄႈသူဢမ်ႇၶိုၼ်းသိမ်းဢဝ်လႆႈၸိူဝ်ႉၼင်ႇႁိုဝ်။-
ပိူဝ်ႈၼႆလႄႈၵဝ်ဢမ်ႇၽိတ်းပိူင်ႈၸဝ်ႈ။ ၸဝ်ႈႁႃတၢင်းၽိတ်းသႂ်ႇၵဝ်လႄႈတိုၵ်းတေႃးၵဝ်ဢေႃႈ။ ထႃႇဝရႃႉၽြႃး၊ ပဵၼ်ၸဝ်ႈဢၼ်ၸီႇယၢင်ႇတြႃးဢေႃႈ။ ႁႂ်ႈမၼ်းၸဝ်ႈတႅပ်းတတ်းတြႃးဝၼ်းမိူဝ်ႈၼႆႉၵႃႈတီႈဝူင်ႈၵၢင်မဵဝ်း ဢိသရေး၊ တင်းမဵဝ်း ဢမ်ႇမုၼ်ႇ၊ သေၵမ်းလူၺ်ႈ၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊ၶုၼ်ႁေႃၶမ်းမဵဝ်း ဢမ်ႇမုၼ်ႇ၊ ၼၼ်ႉယင်းဢမ်ႇထွမ်ႇဢမ်ႇဢဝ်ၵႂၢမ်းဢၼ် ယေႇၽႀႃႉ၊ သင်ႇလၢတ်ႈၵႂႃႇၼၼ်ႉလႄႈယူႇဢေႃႈ။
မိူဝ်ႈၼၼ်ႉဝိၺိၺ်ႇ ထႃႇဝရႃႉၽြႃး၊ တူၵ်းႁွတ်ႈၵႃႈၼိူဝ် ယေႇၽႀႃႉ၊ ဢေႃႈ။ မၼ်းပႆၽႃႇလတ်းမိူင်း ၵိလတ်ႉ၊ တင်းမိူင်း မၼႃႇသေႇ၊ ၵႂႃႇလႄႈပွၵ်ႈၶိုၼ်းၸူးဝဵင်း မိၸပႃႇ၊ ၵႃႈၼႂ်းမိူင်း ၵိလတ်ႉ၊ သေယဝ်ႉ၊ၶီႇသိုၵ်းၶိုၼ်ႈၸူးတီႈၵူၼ်းမဵဝ်း ဢမ်ႇမုၼ်ႇ၊ ဢေႃႈ။-
ယေႇၽႀႃႉ၊ ႁဵတ်းၵတိသဵတ်ႈၸႃႇတေႃႇ ထႃႇဝရႃႉၽြႃး၊ လႄႈဝႃႈ၊ “ပေႃႈၸဝ်ႈႁဝ်းပၼ်ႁႂ်ႈၶႃႈၸဝ်ႈဢွင်ႇသိုၵ်းၵႃႈၼိူဝ်ၵူၼ်းမဵဝ်း ဢမ်ႇမုၼ်ႇ၊ ၸိုင်၊-
မိူဝ်ႈဢၼ်ၶႃႈၸဝ်ႈပွၵ်ႈသေၵႃႈတီႈတၢင်းဢၼ်ဢွင်ႇသိုၵ်းလႄႈၶိုၼ်းမႃးယူႇၼၼ်ႉ၊ၵႃႈၼႂ်းႁိူၼ်းၶႃႈၸဝ်ႈၵေႃႉဢၼ်ဢွၵ်ႇမႃးႁပ်ႉႁူဝ်တၢင်းၶႃႈၸဝ်ႈဢွၼ်တၢင်းသေပိူၼ်ႈၼၼ်ႉ၊ၶႃႈၸဝ်ႈတၵ်းဢဝ်ၵေႃႉၼၼ်ႉႁဵတ်းပဵၼ်တၢင်းလူႇဢၼ်တုတ်ႇၽႆးတီႈၸဝ်ႈႁဝ်းဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ယေႇၽႀႃႉ၊ ၶၢမ်ႈၼမ်ႉၵႂႃႇႁႂ်ႈလႆႈတိုၵ်းၵူၼ်းမဵဝ်း ဢမ်ႇမုၼ်ႇ၊ တင်းလၢႆလႄႈ ထႃႇဝရႃႉၽြႃး၊ ပၼ်ႁႂ်ႈမၼ်းဢွင်ႇသိုၵ်းဢေႃႈ။-
မၼ်းတိုၵ်းတေႃးၶဝ်တႄႇဢဝ်ၵႃႈတီႈဝဵင်း ဢႃႇရေႃႇ၊ ၵႂႃႇတေႃႇထိုင်ႁွတ်ႈဢိူင်ႇဝဵင်း မိၼ်းၼိတ်ႉ၊ လႄႈယႃႉၽဵဝ်ႈပႅတ်ႈဝဵင်းသၢဝ်းဝဵင်းၶိုၼ်ႈၵႂႃႇတေႃႇထိုင်ႁွတ်ႈဝဵင်း ဢႃႇပေႇလႃႉၶေႇရမိမ်း၊ ပုၼ်ႉဢေႃႈ။ ၼင်ႇၼၼ်လႄႈၵူၼ်းမဵဝ်း ဢမ်ႇမုၼ်ႇ၊ တင်းလၢႆလႆႈတူၵ်းသုမ်းတႂ်ႈမိုဝ်းမဵဝ်း ဢိသရေး၊ သေဢေႃႈ။
မိူဝ်ႈဢၼ် ယေႇၽႀႃႉ၊ ပွၵ်ႈၶိုၼ်းႁိူၼ်းၵႃႈတီႈဝဵင်း မိၸပႃႇ၊ ၼၼ်ႉၸိုင်၊လုၵ်ႈယိင်းမၼ်းႁႆႇၵွင်ယူႇ၊ၵႃႈဝႅၼ်ယူႇသေလႄႈမႃးႁပ်ႉႁူဝ်တၢင်းမၼ်းဢေႃႈ။ မၼ်းၼၼ်ႉမီးလုၵ်ႈယိင်းၵေႃႉလဵဝ်ၵူၺ်းဢေႃႈ။-
မိူဝ်ႈဢၼ်မၼ်းႁၼ်လုၵ်ႈယိင်းမၼ်းၸိုင်၊မၼ်းၸၵ်ႉသိၵ်ႇၶူဝ်းၼုင်ႈတူဝ်ၸဝ်ႈၵဝ်ႇသေလႄႈလၢတ်ႈဝႃႈ၊ “ဢလူဝ်း။ ဢလူဝ်း။ လုၵ်ႈယိင်းၵဝ်႟။ မႂ်းႁႂ်ႈႁူဝ်ၸႂ်ပေႃႈတႅၵ်ႇယဝ်ႉ။ ႁဵတ်းသင်လႄႈမႂ်းႁဵတ်းႁႂ်ႈပေႃႈလႆႈၼႅင်ၸႂ်ၼႃႇလူင်လၢင်။ ပေႃႈလႆႈတိူင်ႇသဵတ်ႈၸႃႇဝႆႉတီႈ ထႃႇဝရႃႉၽြႃး၊ ယဝ်ႉ။ ဢမ်ႇမီးဢၶႂၢင်ႉဢၼ်တၵ်းၶိုၼ်းၶိုၼ်ၵႂၢမ်းယဝ်ႉ၊” ဝႃႈၼင်ႇၼႆဢေႃႈ။
လုၵ်ႈယိင်းၼၼ်ႉၵေႃႈၶိုၼ်းလၢတ်ႈလႄႈဝႃႈ၊ “ပေႃးဝႃႈပေႃႈလႆႈတိူင်ႇၵတိသဵတ်ႈၸႃႇတီႈ ထႃႇဝရႃႉၽြႃး၊ ယဝ်ႉၸိုင်၊ႁဵတ်းတီႈၵဝ်ၶႃႈၸွမ်းၵႃႈၼင်ႇဢၼ်ၵတိသဵတ်ႈၸႃႇပေႃႈမီးဝႆႉၼၼ်ႉသေၵမ်းၶႃႈ။ လွင်ႈမၼ်းၸမ်ႉ၊ ထႃႇဝရႃႉၽြႃး၊ တွပ်ႇတႅၼ်းပၼ်ဢပျတ်ႈတီႈရၢၼ်ႇသူႇပေႃႈႁဝ်းဢၼ်ပဵၼ်ၵူၼ်းမဵဝ်း ဢမ်ႇမုၼ်ႇ၊ ၼၼ်ႉတီႈၶႃႈယဝ်ႉ၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊မၼ်းၶေႃယွၼ်းတီႈပေႃႈမၼ်းလႄႈဝႃႈ၊ “ပေႃႈ႟။ ၶႅၼ်းတေႃႈပၼ်ဢၶႂၢင်ႉဢၼ်ၼိုင်ႈၼႆႉသေၵမ်းၶႃႈ။ ႁႂ်ႈၵဝ်ၶႃႈလႆႈယူႇလွတ်ႈလွတ်ႈလႅဝ်းလႅဝ်းယူႇသွင်လိူၼ်တဵမ်တဵမ်၊ႁႂ်ႈၵဝ်ၶႃႈလႆႈၵႂႃႇမႃးလူၺ်ႈၵၼ်တင်းၵေႃႉသႄႈၵဝ်ၶႃႈတင်းလၢႆလႄႈလႄႇၵႂႃႇၵႃႈၼိူဝ်သၼ်လွႆတႄးလွႆ၊ႁႂ်ႈလႆႈၶၢင်းၶီၶၢင်းၽၢၼ်လူၺ်ႈတၢင်းဢၼ်ၵဝ်ၶႃႈပဵၼ်သၢဝ်ၵၼ်ႇၺႃႇလႄႈတေလႆႈတၢႆၼၼ်ႉသေၵမ်းၶႃႈ၊” ဝႃႈၼင်ႇၼႆဢေႃႈ။-
မၼ်းပွႆႇႁႂ်ႈလုၵ်ႈယိင်းမၼ်းၵႂႃႇလႄႈၶဵၼ်းဝႆႉသွင်လိူၼ်တဵမ်တဵမ်ဢေႃႈ။ လုၵ်ႈသၢဝ်မၼ်းၼၼ်ႉၵေႃႈၶိုၼ်ႈၵႂႃႇၵႃႈၼိူဝ်လွႆဢိၵ်ႇလူၺ်ႈၵၼ်တင်းၵေႃႉသႄႈမၼ်းတင်းလၢႆလႄႈ၊ၵႂႃႇၶၢင်းၶီၶၢင်းၽၢၼ်ယူႇလူၺ်ႈလွင်ႈဢၼ်မၼ်းတၵ်းတေလႆႈတၢႆၵႃႈၼႂ်းတၢင်းဢၼ်မၼ်းပဵၼ်သၢဝ်ၵၼ်ႇၺႃႇလႄႈဢမ်ႇမီးလုၵ်ႈမီးလၢင်းၼၼ်ႉဢေႃႈ။-
မိူဝ်ႈဢၼ်ၸေးသွင်လိူၼ်ၸိုင်၊မၼ်းပွၵ်ႈၶိုၼ်းမႃးတီႈပေႃႈမၼ်းသေယဝ်ႉ၊ပေႃႈမၼ်းၵေႃႈႁဵတ်းၸွမ်းၵႃႈၼင်ႇဢၼ်လႆႈႁဵတ်းၵတိသဵတ်ႈၸႃႇတီႈ ထႃႇဝရႃႉၽြႃး၊ ဝႆႉယဝ်ႉၼၼ်ႉသေလႄႈ၊မၼ်းၵေႃႈလႆႈတၢႆၵႃႈၼႂ်းတၢင်းဢၼ်ပဵၼ်သၢဝ်ၵၼ်ႇၺႃႇၵႂႃႇသေဢေႃႈ။ လိုၼ်းၼၼ်ႉလႆႈပဵၼ်ထုင်းၸၢမ်ႇၵႃႈၼႂ်းမဵဝ်း ဢိသရေး၊-
ဢၼ်သၢဝ်တင်းလၢႆဢွၼ်ၵၼ်ဢွၵ်ႇၵႂႃႇယေႈပီသီႇဝၼ်းႁႂ်ႈလႆႈၼႄပျႃးလွင်ႈတၢင်းၶီၸႂ်မႆႈၸႂ်ပုၼ်ႈလုၵ်ႈယိင်း ယေႇၽႀႃႉ၊ မဵဝ်း ၵိလတ်ႉ၊ ၼၼ်ႉၵူႈပီဢေႃႈ။
ၵူၼ်းၸိူဝ်ႉၶိူဝ်း ဢေႇၽရိမ်ႇ၊ တင်းလၢႆဢွၼ်ၵၼ်ၶီႇသိုၵ်းလႄႈၶၢမ်ႈၼမ်ႉမႄႈ ယေႃးတၢၼ်ႇ၊ ၵႂႃႇၸူးတီႈဝဵင်း ၸႃႇၽုၼ်ႇ၊ သေယဝ်ႉ၊လၢတ်ႈတီႈ ယေႇၽႀႃႉ၊ လႄႈဝႃႈ၊ “မႂ်းယင်းဢမ်ႇႁွင်ႉဢဝ်ႁဝ်းလႄႈၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၶီႇသိုၵ်းၵႂႃႇတိုၵ်းၵူၼ်း ဢမ်ႇမုၼ်ႇ၊ ၸိူဝ်းၼၼ်ႉၼင်ႇႁိုဝ်။ ႁဝ်းတၵ်းဢဝ်ၽႆးတုတ်ႇႁိူၼ်းမႂ်းႁႂ်ႈတပ်ႉသႂ်ႇၵႃႈၼိူဝ်မႂ်းဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ ယေႇၽႀႃႉ၊ လၢတ်ႈတီႈၶဝ်လႄႈဝႃႈ၊ “ၵဝ်ဢိၵ်ႇတင်းၵူၼ်းၵဝ်တင်းလၢႆၽိတ်းၵၼ်တင်းၵူၼ်း ဢမ်ႇမုၼ်ႇ၊ ၶဝ်တႄႉတႄႉဝႃႈဝႃႈလႄႈ၊ၵဝ်ႁွင်ႉဢဝ်သူဢေႃႈ။ ၵူၺ်းၵႃႈ၊သူဢမ်ႇၵႄႇၼုၵ်ႈဢဝ်ၵဝ်ဢွၵ်ႇသေၵႃႈၼႂ်းမိုဝ်းၶဝ်လူင်ပႄႇ။-
မိူဝ်ႈဢၼ်ၵဝ်ႁုႁၼ်လွင်ႈဢၼ်သူဢမ်ႇၵႄႇၼုၵ်ႈဢဝ်ၵဝ်ၼၼ်ႉၸိုင်၊ၵဝ်ၸုၼ်ႉဢသၢၵ်ႈၵဝ်လႄႈၶီႇသိုၵ်းၶၢမ်ႈလႅၼ်လိၼ်ၵႂႃႇတိုၵ်းတေႃးၶဝ်ဢေႃႈ။ ထႃႇဝရႃႉၽြႃး၊ ၵေႃႈပၼ်ႁႂ်ႈၵဝ်ဢွင်ႇသိုၵ်းယဝ်ႉ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမိူဝ်ႈလဵဝ်ၼႆႉသူမႃးႁႂ်ႈလႆႈတိုၵ်းတေႃးၵဝ်၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ ယေႇၽႀႃႉ၊ ၸုတုမ်ဢဝ်ၵူၼ်းမိူင်း ၵိလတ်ႉ၊ ၵႃႈမီးတင်းသဵင်ႈတင်းလူင်လႄႈတိုၵ်းတေႃးၵူၼ်း ဢေႇၽရိမ်ႇ၊ သေယဝ်ႉ၊ပႄႉၼႅင်ႇၶဝ်ဢေႃႈ။ (ၶဝ်ႁဵတ်းၸိူဝ်ႉၼင်ႇၼႆၵွပ်ႈပိူဝ်ႈၵူၼ်း ဢေႇၽရိမ်ႇ၊ သႄႉသွမ်းၶဝ်လႄႈဝႃႈ၊ “သူဢၼ်ပဵၼ်ၵူၼ်းမိူင်း ၵိလတ်ႉ၊ ၼႆႉပဵၼ်ၵူၼ်း ဢေႇၽရိမ်ႇ၊ ဢၼ်ဢွၵ်ႇပၢႆႈသေၵႃႈၼႂ်းမဵဝ်း ဢေႇၽရိမ်ႇ၊ တင်းမဵဝ်း မၼႃႇသေႇ၊ ဢေႃႈ၊” ဝႃႈၼင်ႇၼႆၼၼ်ႉဢေႃႈ)။-
ပုၼ်ႈလွင်ႈၼင်ႇႁိုဝ်ၵူၼ်း ဢေႇၽရိမ်ႇ၊ တၵ်းဢမ်ႇပၢႆႈလွတ်ႈလႆႈသေၵေႃႉသေၵူၼ်းၸိုင်၊ၵူၼ်းမိူင်း ၵိလတ်ႉ၊ ႁႄႉတီႈတႃႈၶၢမ်ႈၼမ်ႉမႄႈ ယေႃးတၢၼ်ႇ၊ ယူႇဢေႃႈ။ မိူဝ်ႈဢၼ်ၵူၼ်း ဢေႇၽရိမ်ႇ၊ သေၵေႃႉသေၵူၼ်းဢၢင်ႈတၵ်းပႆၶၢမ်ႈၵႂႃႇႁႂ်ႈလႆႈလွတ်ႈလႄႈယွၼ်းဢၶႂၢင်ႉႁႂ်ႈလႆႈၶၢမ်ႈတႃႈၼမ်ႉၸိုင်၊ၵူၼ်းမိူင်း ၵိလတ်ႉ၊ ၸိူဝ်းၼၼ်ႉတဵၵ်းထၢမ်လႄႈဝႃႈ၊ “မႂ်းပဵၼ်ၵူၼ်း ဢေႇၽရိမ်ႇ၊ ႁိုဝ်း၊” ဝႃႈၼင်ႇၼႆဢေႃႈ။ ပေႃးၵေႃႉၼၼ်ႉဝႃႈ၊ “ဢမ်ႇၸႂ်ႈၵူၺ်း၊” ဝႃႈၼင်ႇၼႆၸိုင်၊-
ၶဝ်သမ်ႉၸႂ်ႉၵေႃႉၼၼ်ႉဝႃႈ၊ “သျိပေႃးလႅတ်ႉ၊” ဢေႃႈ။ ၵူၺ်းၵႃႈ၊ၵေႃႉၼၼ်ႉၸၢင်ႈဝႃႈ၊ “ၸိပေႃးလႅတ်ႉ၊” ဝႃႈၼႆၵွပ်ႈပိူဝ်ႈမၼ်းဢမ်ႇလၢတ်ႈၵႂၢမ်းၼၼ်ႉပီႇလႆႈဢေႃႈ။ ပေႃးဝႃႈၸိူဝ်ႉၼင်ႇၼၼ်ၸိုင်၊ၶဝ်တိဢဝ်ၵေႃႉၼၼ်ႉလႄႈဢဝ်တၢႆပႅတ်ႈၵႃႈတီႈတႃႈၶၢမ်ႈၼၼ်ႉဢေႃႈ။ မိူဝ်ႈၼၼ်ႉၵူၼ်း ဢေႇၽရိမ်ႇ၊ တၢႆသီႇမိုၼ်ႇပၢႆသွင်ႁဵင်ဢေႃႈ။
ယေႇၽႀႃႉ၊ ပဵၼ်ၵူၼ်းလူင်ဢၼ်ၸီႇယၢင်ႇတြႃးတီႈမဵဝ်း ဢိသရေး၊ ႁူၵ်းပီတဵမ်တဵမ်သေယဝ်ႉ၊တၢႆၵႂႃႇလႄႈဢဝ်မၼ်းသၢင်းၵျူဝ်ႇၵႃႈတီႈဝၢၼ်ႈၵဝ်ႇမိူင်းလင်မၼ်းၵႃႈၼႂ်းမိူင်း ၵိလတ်ႉ၊ ဢေႃႈ။
လိုၼ်းသေ ယေႇၽႀႃႉ၊ ၼၼ်ႉ ဢီပၸၼ်ႇ၊ ၵူၼ်းဝဵင်း ပႅတ်ႉလႁႅမ်ႇ၊ ပဵၼ်ၵူၼ်းလူင်ဢၼ်ၸီႇယၢင်ႇတြႃးတီႈမဵဝ်း ဢိသရေး၊ ဢေႃႈ။-
မၼ်းမီးလုၵ်ႈၸၢႆးသၢမ်သိပ်းၵေႃႉဢိၵ်ႇတင်းလုၵ်ႈယိင်းသၢမ်သိပ်းၵေႃႉဢေႃႈ။ မၼ်းပၼ်ႁႂ်ႈလုၵ်ႈယိင်းမၼ်းၸိူဝ်းၼၼ်ႉဢဝ်ၵၼ်တင်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆလႄႈ၊သမ်ႉဢဝ်ၽူႈယိင်းၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းသၢမ်သိပ်းၵေႃႉႁႂ်ႈပဵၼ်လုၵ်ႈပႂ်ႉမၼ်းဢေႃႈ။ ဢီပၸၼ်ႇ၊ ပဵၼ်ၵူၼ်းလူင်ဢၼ်ၸီႇယၢင်ႇတြႃးတီႈမဵဝ်း ဢိသရေး၊ ၸဵတ်းပီတဵမ်တဵမ်ဢေႃႈ။-
မိူဝ်ႈၼၼ်ႉမၼ်းတၢႆလႄႈဢဝ်သၢင်းၵျူဝ်ႇဝႆႉၵႃႈၼႂ်းဝဵင်း ပႅတ်ႉလႁႅမ်ႇ၊ ဢေႃႈ။
လိုၼ်းသေ ဢီပၸၼ်ႇ၊ ၼၼ်ႉ ဢေႇလုၼ်ႇ၊ ၵူၼ်းၸိူဝ်ႉၶိူဝ်း ၸေႇပုလုၼ်ႇ၊ သမ်ႉပဵၼ်ၵူၼ်းလူင်ဢၼ်ၸီႇယၢင်ႇတြႃးတီႈမဵဝ်း ဢိသရေး၊ သိပ်းပီတဵမ်တဵမ်ဢေႃႈ။-
မိူဝ်ႈၼၼ်ႉ၊မၼ်းတၢႆလႄႈဢဝ်သၢင်းၵျူဝ်ႇဝႆႉၵႃႈၼႂ်းဝဵင်း ဢႃႇၸလုၼ်ႇ၊ ဢိူင်ႇ ၸေႇပုလုၼ်ႇ၊ ဢေႃႈ။
လိုၼ်းသေ ဢေႇလုၼ်ႇ၊ ၼၼ်ႉ ဢႃႇပတုၼ်ႇ၊ လုၵ်ႈၸၢႆး ႁိလေးလႃႉ၊ ၵူၼ်းမဵဝ်း ပိရသေႃႇၼိ၊ ပဵၼ်ၵူၼ်းလူင်ဢၼ်ၸီႇယၢင်ႇတြႃးတီႈမဵဝ်း ဢိသရေး၊ ဢေႃႈ။-
မၼ်းမီးလုၵ်ႈၸၢႆးသီႇသိပ်း၊လၢၼ်ၸၢႆးသၢမ်သိပ်းဢၼ်ၶီႇမႃႉလီႈၸဵတ်းသိပ်းတူဝ်ဢေႃႈ။ ဢႃႇပတုၼ်ႇ၊ ပဵၼ်ၵူၼ်းလူင်ဢၼ်ၸီႇယၢင်ႇတြႃးတီႈမဵဝ်း ဢိသရေး၊ ပႅတ်ႇပီတဵမ်တဵမ်လႄႈ၊-
မိူဝ်ႈဢၼ်မၼ်းတၢႆၵႂႃႇယဝ်ႉၼၼ်ႉၸိုင်၊ဢဝ်သၢင်းၵျူဝ်ႇဝႆႉၵႃႈတီႈၼႂ်းဝဵင်း ပိရသေႃႇၼိ၊ ဢိူင်ႇ ဢေႇၽရိမ်ႇ၊ ၵႃႈၼိူဝ်ႁၢၼ်ႉလွႆမိူင်း ဢႃႇမလႅၵ်ႉ၊ ၼၼ်ႉဢေႃႈ။
ၵူၼ်းမဵဝ်း ဢိသရေး၊ တင်းလၢႆသမ်ႉႁဵတ်းဢပျတ်ႈၶတ်းၵၼ်တင်း ထႃႇဝရႃႉၽြႃး၊ ထႅင်ႈလႄႈ၊မၼ်းၸဝ်ႈႁႂ်ႈၵူၼ်းမဵဝ်း ၽိလိတ်ႉတိ၊ ဢုပ်ႉပိူင်ႇၶဝ်သီႇသိပ်းပီတဵမ်တဵမ်ဢေႃႈ။-
မိူဝ်ႈယၢမ်းၼၼ်ႉမီးၵူၼ်းၵေႃႉၼိုင်ႈဢၼ်လႆႈႁွင်ႉႁဵၵ်ႈၸိုဝ်ႈ မႃႇၼေႃႇ၊ ၵူၼ်းဝဵင်း ၸူဝ်းရႃႇ၊ ၵႃႈၼႂ်းၸိူဝ်ႉၶိူဝ်း တၢၼ်ႇ၊ ဢေႃႈ။ မေးမၼ်းပဵၼ်မႄႈယိင်းမၼ်လႄႈဢမ်ႇၵိူတ်ႇလုၵ်ႈၵိူတ်ႇလၢင်းလႆႈ။-
တမၢၼ်ႇၵၢင်ႁၢဝ် ထႃႇဝရႃႉၽြႃး၊ ပေႃႇမႃးတီႈမႄႈယိင်းၼၼ်ႉသေလႄႈလၢတ်ႈဝႃႈ၊ “ပိၵ်ႉသမ်ႉမႂ်းပဵၼ်မႄႈယိင်းမၼ်လႄႈဢမ်ႇၵိူတ်ႇလုၵ်ႈၵိူတ်ႇလၢင်းလႆႈသေၵေႃႈ၊မႂ်းတၵ်းပႃးပတိၵ်ႈသၼ်ႇထေႇလႄႈၵိူတ်ႇလဵင်ႉမႃးလုၵ်ႈၸၢႆးၵေႃႉၼိုင်ႈဢေႃႈ။-
ပိူဝ်ႈၼႆလႄႈႁဵတ်းသတိတႃႉ။ ယႃႇပေၵိၼ်လဝ်ႈ။ ယႃႇပေၵိၼ်ၼမ်ႉမၢၵ်ႇၸပိတ်ႉဢၼ်ၶိုၼ်ႇၼၼ်ႉ။ ယႃႇပေၵိၼ်တၢင်းၵိၼ်ဢၼ်ဢမ်ႇမူတ်းသႂ်ၼၼ်ႉ။-
မိူဝ်ႈဢၼ်လုၵ်ႈၸၢႆးမႂ်းၵိူတ်ႇလဵင်ႉမႃးယဝ်ႉၼၼ်ႉၸိုင်၊တၵ်းဢမ်ႇလႆႈထႃၶူၼ်ႁူဝ်မၼ်းလႃးလႃး။ လွင်ႈမၼ်းၸမ်ႉ၊ၸႃႉဢဝ်ဝၼ်းဢၼ်မၼ်းၵိူတ်ႇလဵင်ႉမႃးၼၼ်ႉမၼ်းတၵ်းလႆႈၶၢမ်ႇတၢင်းဢၼ်သၢၵ်ႈၵၢပ်ႈတီႈၽြႃးပဵၼ်ၸဝ်ႈႁႂ်ႈပဵၼ်ၵူၼ်း ၼႃႇၸရိ၊ ဢေႃႈ။ မၼ်းတၵ်းၸႃႉႁဵတ်းတၢင်းဢၼ်ၵႄႇၼုၵ်ႈဢဝ်မဵဝ်း ဢိသရေး၊ ဢွၵ်ႇသေၵႃႈၼႂ်းမိုဝ်းၵူၼ်းမဵဝ်း ၽိလိတ်ႉတိ၊ တင်းလၢႆဢေႃႈ၊” ဝႃႈၼင်ႇၼႆဢေႃႈ။
မႄႈယိင်းၼၼ်ႉၵေႃႈလၢတ်ႈတီႈၽူဝ်မၼ်းလႄႈဝႃႈ၊ “ၵူၼ်းၽြႃးပဵၼ်ၸဝ်ႈၵေႃႉၼိုင်ႈဢၼ်ႁၢင်ႈၽၢင်မၼ်းပဵၼ်ၸိူဝ်ႉၼင်ႇႁၢင်ႈၽၢင်တမၢၼ်ႇၵၢင်ႁၢဝ် ထႃႇဝရႃႉၽြႃး၊ လႄႈပဵၼ်ဢၼ်လီၵူဝ်လီႁႄၼၼ်ႉပေႃႇမႃးၵႃႈတီႈၵဝ်ၶႃႈၶႃႈဢေႃႈ။ ၵဝ်ၶႃႈဢမ်ႇထၢမ်လွင်ႈဢၼ်မၼ်းလုၵ်ႉသေၵႃႈတီႈလႂ်မႃးၼၼ်ႉ၊မၼ်းၵေႃႈဢမ်ႇလၢတ်ႈၸိုဝ်ႈလၢတ်ႈသဵင်မၼ်းတီႈၵဝ်ၶႃႈၶႃႈဢေႃႈ။-
ၵူၺ်းၵႃႈ၊မၼ်းလၢတ်ႈတီႈၵဝ်ၶႃႈလႄႈဝႃႈ၊ ‘မႂ်းတၵ်းပႃးပတိၵ်ႈသၼ်ႇထေႇလႄႈၵိူတ်ႇလဵင်ႉမႃးလုၵ်ႈၸၢႆးၵေႃႉၼိုင်ႈဢေႃႈ။ တႄႇၸႃႉဢဝ်မိူဝ်ႈလဵဝ်ၼႆႉၵႂႃႇယႃႇပေၵိၼ်လဝ်ႈ၊ယႃႇပေၵိၼ်ၼမ်ႉမၢၵ်ႇၸပိတ်ႉဢၼ်ၶိုၼ်ႇ၊ယႃႇပေၵိၼ်တၢင်းၵိၼ်ဢၼ်ဢမ်ႇမူတ်းသႂ်ၼၼ်ႉ။ လွင်ႈမၼ်းၸမ်ႉ၊လုၵ်ႈၸၢႆးဢွၼ်ႇၼႆႉတၵ်းလႆႈပဵၼ်ၵူၼ်း ၼႃႇၸရိ၊ ဢၼ်လႆႈၶၢမ်ႇတၢင်းဢၼ်သၢၵ်ႈၵၢပ်ႈတီႈၽြႃးပဵၼ်ၸဝ်ႈၸႃႉၸဵမ်ဝၼ်းဢၼ်မၼ်းၵိူတ်ႇလဵင်ႉမႃးတေႃႇထိုင်ႁွတ်ႈဝၼ်းတၢႆမၼ်းဢေႃႈ၊’ ” ဝႃႈၼင်ႇၼႆဢေႃႈ။
မႃႇၼေႃႇ၊ သူးတွင်းတီႈၽြႃးပဵၼ်ၸဝ်ႈလႄႈဝႃႈ၊ “ ထႃႇဝရႃႉၽြႃး၊ တီႈၶႃႈ။ ပေႃးၸဝ်ႈႁဝ်းမီးတၢင်းဢၼ်ထုၵ်ႇၸႂ်ၵျိူၵ်ႈၸႂ်ၸိုင်၊ၶႅၼ်းတေႃႈႁႂ်ႈၵူၼ်းၽြႃးပဵၼ်ၸဝ်ႈဢၼ်ၸဝ်ႈႁဝ်းပွႆႇၸႂ်ႉမႃးၼၼ်ႉသမ်ႉမႃးတီႈၶႃႈၸဝ်ႈႁဝ်းၶဝ်ထႅင်ႈလႄႈသင်ႇသွၼ်ပၼ်လွင်ႈဢၼ်ၶႃႈၸဝ်ႈႁဝ်းၶဝ်တၵ်းလႆႈႁဵတ်းၸိူဝ်ႉၼင်ႇႁိုဝ်တီႈလုၵ်ႈဢွၼ်ႇဢၼ်တၵ်းၵိူတ်ႇလဵင်ႉမႃးၼၼ်ႉသေၵမ်းတီႈၶႃႈ၊” ဝႃႈၼင်ႇၼႆလႄႈ။
ၽြႃးပဵၼ်ၸဝ်ႈႁဵတ်းပၼ်ၵႃႈဢၼ် မႃႇၼေႃႇ၊ သူးတွင်းၼၼ်ႉဢေႃႈ။ တမၢၼ်ႇၵၢင်ႁၢဝ် ထႃႇဝရႃႉၽြႃး၊ ၼၼ်ႉသမ်ႉၶိုၼ်းမႃးၵႃႈတီႈမႄႈယိင်းၼၼ်ႉယၢမ်းမိူဝ်ႈဢၼ်မၼ်းယင်းၼင်ႈယူႇၵႃႈၼႂ်းတူင်ႈၼႃးၼၼ်ႉဢေႃႈ။ ၽူဝ်မၼ်း မႃႇၼေႃႇ၊ ဢမ်ႇမီးယူႇလူၺ်ႈၵၼ်တင်းမၼ်းလႄႈ၊-
မၼ်းႁိပ်ႈၼႅတ်ႈလႅၼ်ႈၵႂႃႇႁွင်ႉဢဝ်ၽူဝ်မၼ်းၵမ်းလဵဝ်လႄႈဝႃႈ၊ “တူၺ်းလူး။ ၵူၼ်းၵေႃႉဢၼ်မႃးၵႃႈတီႈၵဝ်ၶႃႈမိူဝ်ႈဝၼ်းၵွၼ်ႇၼၼ်ႉသမ်ႉမႃးၵႃႈတီႈၵဝ်ၶႃႈထႅင်ႈၶႃႈဢေႃႈ၊” ဝႃႈၼင်ႇၼႆဢေႃႈ။-
မႃႇၼေႃႇ၊ လုၵ်ႉလႄႈၸွမ်းမေးမၼ်းမႃးၸူးတီႈၵေႃႉၼၼ်ႉလႄႈလဝ်ႈထၢမ်ဝႃႈ၊ “ၸွင်ႇၸဝ်ႈၸႂ်ႈၵေႃႉဢၼ်လၢတ်ႈတေႃႇမေးၵဝ်ၶႃႈၼႆႉၼၼ်ႉၶႃႈႁိုဝ်း၊” ဝႃႈၼင်ႇၼႆဢေႃႈ။ ၵေႃႉၼၼ်ႉၵေႃႈလၢတ်ႈလႄႈဝႃႈ၊ “ၸႂ်ႈယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ မႃႇၼေႃႇ၊ လဝ်ႈထၢမ်လႄႈဝႃႈ၊ “ပေႃးၵႂၢမ်းၸဝ်ႈႁဝ်းၼၼ်ႉပျေႉၸုမ်ႇမႃးၸိုင်၊လုၵ်ႈၸၢႆးဢွၼ်ႇၼၼ်ႉတၵ်းလႆႈပဵၼ်ၵေႃႉၸိူဝ်ႉၼင်ႇႁိုဝ်ၶႃႈ။ မၼ်းတၵ်းႁဵတ်းဢီႈသင်ၶႃႈ၊” ဝႃႈၼင်ႇၼႆဢေႃႈ။
တမၢၼ်ႇၵၢင်ႁၢဝ်ၼၼ်ႉလၢတ်ႈတီႈမၼ်းလႄႈဝႃႈ၊ “မေးမႂ်းတၵ်းလႆႈႁဵတ်းသတိလႄႈႁဵတ်းၸွမ်းၵႃႈၼင်ႇဢၼ်ၵဝ်မွၵ်ႇလၢတ်ႈဝႆႉယဝ်ႉၼၼ်ႉၵူႈၸိူဝ်ႉၵူႈမဵဝ်းဢေႃႈ။-
မၼ်းဢမ်ႇလႆႈၵိၼ်ၵႃႈဢၼ်ဢွၵ်ႇပဵၼ်မႃးတီႈတူၼ်ႈမၢၵ်ႇၸပိတ်ႉသေၸိူဝ်ႉသေပိူင်၊မၼ်းဢမ်ႇလႆႈၵိၼ်လဝ်ႈ၊ဢမ်ႇလႆႈၵိၼ်ၼမ်ႉမၢၵ်ႇၸပိတ်ႉဢၼ်ၶိုၼ်ႇ၊ဢမ်ႇလႆႈၵိၼ်တၢင်းၵိၼ်ဢၼ်ဢမ်ႇမူတ်းသႂ်ၼၼ်ႉ။ မၼ်းတၵ်းလႆႈပႂ်ႉၵမ်ၵႃႈၼင်ႇဢၼ်ၵဝ်မွၵ်ႇလၢတ်ႈဝႆႉယဝ်ႉၼၼ်ႉၵူႈၸိူဝ်ႉၵူႈပိူင်ဢေႃႈ၊” ဝႃႈၼင်ႇၼႆဢေႃႈ။
မႃႇၼေႃႇ၊ ၵေႃႈလဝ်ႈလၢတ်ႈတီႈတမၢၼ်ႇၵၢင်ႁၢဝ်ၼၼ်ႉလႄႈဝႃႈ၊ “ႁႂ်ႈႁဝ်းၶႃႈလႆႈႁၢမ်ႈတၢပ်ႈၸဝ်ႈႁဝ်းဝႆႉယူႇသေၵမ်းၶႃႈ။ ႁႂ်ႈႁဝ်းၶႃႈလႆႈမႄးႁႅၼ်းပႄႉဢွၼ်ႇပုၼ်ႈၸဝ်ႈႁဝ်းသေၵမ်းၶႃႈ၊” ဝႃႈၼင်ႇၼႆဢေႃႈ။-
တမၢၼ်ႇၵၢင်ႁၢဝ်ၼၼ်ႉၶိုၼ်းလၢတ်ႈလႄႈဝႃႈ၊ “ပိၵ်ႉသမ်ႉမႂ်းႁၢမ်ႈတၢပ်ႈၵဝ်ဝႆႉယူႇသေၵေႃႈၵဝ်တၵ်းဢမ်ႇၵိၼ်တၢင်းၵိၼ်မႂ်းၼၼ်ႉ။ ၵူၺ်းၵႃႈ၊ပေႃးမႂ်းမီးဢလူဝ်ႇၶႂ်ႈသၢၵ်ႈလူႇတူဝ်တၢင်းလူႇဢၼ်တုတ်ႇၽႆးၸိုင်၊သၢၵ်ႈလူႇတၢင်းလူႇဢၼ်တုတ်ႇၽႆးတီႈ ထႃႇဝရႃႉၽြႃး၊ တႃႉ၊” ဝႃႈၼင်ႇၼႆဢေႃႈ။ မႃႇၼေႃႇ၊ ဢမ်ႇပႆႇႁုလွင်ႈဢၼ်ၵေႃႉၼၼ်ႉပဵၼ်တမၢၼ်ႇၵၢင်ႁၢဝ် ထႃႇဝရႃႉၽြႃး၊ လႄႈ။
လၢတ်ႈတီႈမၼ်းၼၼ်ႉလႄႈဝႃႈ၊ “ၸိုဝ်ႈသဵင်ၸဝ်ႈႁဝ်းၸိုဝ်ႈၵႃႈသင်ၶႃႈ။ လွင်ႈမၼ်းၸမ်ႉ၊မိူဝ်ႈဢၼ်ၵႂၢမ်းၸဝ်ႈႁဝ်းပျေႉၸုမ်ႇၼၼ်ႉႁဝ်းၶႃႈၶႂ်ႈယွင်ႈယေႃးၸဝ်ႈႁဝ်းၶႃႈဢေႃႈ၊” ဝႃႈၼင်ႇၼႆဢေႃႈ။
တမၢၼ်ႇၵၢင်ႁၢဝ်ၼၼ်ႉလၢတ်ႈလႄႈဝႃႈ၊ “ၵွပ်ႈသင်လႄႈမႂ်းၶႂ်ႈႁုၸိုဝ်ႈသဵင်ၵဝ်။ ပဵၼ်ၸိုဝ်ႈသဵင်ဢၼ်လီဢၢမ်းဢေႃႈ၊” ဝႃႈၼင်ႇၼႆဢေႃႈ။
မႃႇၼေႃႇ၊ ၵေႃႈဢဝ်ပႄႉဢွၼ်ႇတင်းၶဝ်ႈၵျုင်ႇသေလႄႈသၢၵ်ႈၵၢပ်ႈၶိူင်ႈတၢင်းလူႇဢႁႃႇရႃႉၵႃႈၼိူဝ်မၢၵ်ႇႁိၼ်တီႈ ထႃႇဝရႃႉၽြႃး၊ ဢၼ်ႁဵတ်းလွင်ႈတၢင်းဢၼ်လီဢၢမ်းၼၼ်ႉဢေႃႈ။ ယၢမ်းမိူဝ်ႈဢၼ် မႃႇၼေႃႇ၊ တင်းမေးမၼ်းယင်းတိုၵ်ႉပႂ်ႉတူၺ်းယူႇၼၼ်ႉ၊-
ပိဝ်ၽႆးလုၵ်ႉသေၵႃႈတီႈၶဵင်ႇတၢင်းလူႇၼၼ်ႉၶိုၼ်ႈၸူးတီႈၵၢင်ႁၢဝ်ယူႇလႄႈ၊တမၢၼ်ႇၵၢင်ႁၢဝ် ထႃႇဝရႃႉၽြႃး၊ ၼၼ်ႉၶိုၼ်ႈၸူးၵႃႈၼႂ်းပိဝ်ၽႆးၼၼ်ႉၵႂႃႇဢေႃႈ။ မႃႇၼေႃႇ၊ ၶဝ်ၽူဝ်မေးၼၼ်ႉတူၺ်းႁၼ်သေယဝ်ႉ၊ၶုပ်ႉမူပ်ႇယူႇၵႃႈၼိူဝ်လိၼ်ဢေႃႈ။
တမၢၼ်ႇၵၢင်ႁၢဝ် ထႃႇဝရႃႉၽြႃး၊ ၼၼ်ႉသမ်ႉဢမ်ႇၶိုၼ်းပေႃႇမႃးတီႈ မႃႇၼေႃႇ၊ ၶဝ်ၽူဝ်မေးထႅင်ႈယဝ်ႉ။ မိူဝ်ႈၼၼ်ႉ မႃႇၼေႃႇ၊ ႁုလွင်ႈဢၼ်ပဵၼ်တမၢၼ်ႇၵၢင်ႁၢဝ် ထႃႇဝရႃႉၽြႃး၊ ဢေႃႈ။-
မႃႇၼေႃႇ၊ ၵေႃႈလၢတ်ႈတီႈမေးမၼ်းလႄႈဝႃႈ၊ “ႁဝ်းတၵ်းလႆႈတၢႆဢမၢၼ်ႇၶၼ်ပဵၼ်ယဝ်ႉ။ လွင်ႈမၼ်းၸမ်ႉ၊ႁဝ်းလႆႈႁၼ် ထႃႇဝရႃႉၽြႃး၊ ယဝ်ႉ၊” ဝႃႈၼင်ႇၼႆဢေႃႈ။-
မေးမၼ်းၶိုၼ်းလၢတ်ႈလႄႈဝႃႈ၊ “ပေႃး ထႃႇဝရႃႉၽြႃး၊ မီးဢလူဝ်ႇၶႂ်ႈဢဝ်ႁဝ်းတၢႆၸိုင်၊မၼ်းၸဝ်ႈဢမ်ႇၶၢမ်ႇဢဝ်ၶိူင်ႈတၢင်းလူႇဢၼ်တုတ်ႇၽႆးဢိၵ်ႇတင်းတၢင်းလူႇမၢၵ်ႇၶဝ်ႈႁူင်းၶဝ်ႈႁဝ်းၼႆႉယဝ်ႉ။ မၼ်းၸဝ်ႈဢမ်ႇၼႄပျႃးလွင်ႈတၢင်းၵူႈၸိူဝ်ႉၵူႈပိူင်ၼႆႉ။ ၵႂၢမ်းၸိူဝ်ႉၼင်ႇၼႆမိူဝ်ႈလဵဝ်ၼႆႉၵေႃႈမၼ်းၸဝ်ႈဢမ်ႇမီးဢမိင်ႉၵူၺ်း၊” ဝႃႈၼင်ႇၼႆဢေႃႈ။
မႄႈယိင်းၼၼ်ႉၵိူတ်ႇလဵင်ႉလုၵ်ႈၸၢႆးမႃးလႄႈႁွင်ႉႁဵၵ်ႈၸိုဝ်ႈ သၢမ်ႇသုၼ်ႇ၊ ဢေႃႈ။ လုၵ်ႈၸၢႆးဢွၼ်ႇၼၼ်ႉယႂ်ႇမႃးလႄႈ ထႃႇဝရႃႉၽြႃး၊ ၵေႃႈပၼ်တၢင်းလီတီႈမၼ်းဢေႃႈ။-
တၼ်းၶူဝ်းဝိၺိၺ်ႇ ထႃႇဝရႃႉၽြႃး၊ ၸမ်ႉ၊ထႅင်ႈႁႅင်းပၼ်ႁႅင်းမၼ်းၸူဝ်ႈဢၼ်မၼ်းယူႇၵႃႈၼႂ်းတပ်ႉမဵဝ်း တၢၼ်ႇ၊ ၼႂ်းဝူင်ႈၵၢင်ဝဵင်း ၸူဝ်းရႃႇ၊ တင်းဝဵင်း ဢေးသတေႃးလႃႉ၊ ၼၼ်ႉဢေႃႈ။
ၽဝ်ႇၼိုင်ႈ သၢမ်ႇသုၼ်ႇ၊ လူင်းၵႂႃႇၵႃႈတီႈဝဵင်း တိမၼႃႉ၊ လႄႈ၊ၵႃႈၼႂ်းဝဵင်းၼၼ်ႉမၼ်းႁၼ်သၢဝ်မဵဝ်း ၽိလိတ်ႉတိ၊ ၼၼ်ႉၵေႃႉၼိုင်ႈဢေႃႈ။-
မၼ်းပွၵ်ႈမိူဝ်းႁိူၼ်းလႄႈယွၼ်းပေႃႈမႄႈမၼ်းလႄႈဝႃႈ၊ “ၵဝ်ၶႃႈၶႂ်ႈလႆႈသၢဝ်ၵူၼ်းမဵဝ်း ၽိလိတ်ႉတိ၊ ၵေႃႉၼိုင်ႈၵႃႈၼႂ်းဝဵင်း တိမၼႃႉ၊ ၼၼ်ႉဢေႃႈ။ ယွၼ်းဢဝ်မၼ်းပုၼ်ႈတၵ်းပဵၼ်မေးၵဝ်ၶႃႈသေၵမ်းၶႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ပေႃႈမႄႈမၼ်းတွင်ႈထၢမ်လႄႈဝႃႈ၊ “ၵွပ်ႈလွင်ႈၸိူဝ်ႉႁိုဝ်လႄႈမႂ်းလူဝ်ႇလႆႈၵႂႃႇဢဝ်မေးၼႂ်းမဵဝ်း ၽိလိတ်ႉတိ၊ ဢၼ်ပဵၼ်ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၼၼ်ႉ။ မႂ်းဢမ်ႇၸၢင်ႈၵႂႃႇႁႃဢဝ်သၢဝ်ၵႃႈၼႂ်းၶိူဝ်းႁိူၼ်းမႂ်းၼင်ႇၵၼ်၊ၵႃႈၼႂ်းၵူၼ်းမဵဝ်းႁဝ်းၼင်ႇၵၼ်ႁိုဝ်း၊” ဝႃႈၼင်ႇၼႆဢေႃႈ။ ၵူၺ်းၵႃႈ၊ သၢမ်ႇသုၼ်ႇ၊ လၢတ်ႈတီႈပေႃႈမႄႈမၼ်းလႄႈဝႃႈ၊ “ယွၼ်းဢဝ်မၼ်းၼၼ်ႉလႄႈပၼ်ၵဝ်ၶႃႈသေၵမ်း။ ၵဝ်ၶႃႈၵျိူၵ်ႈႁၵ်ႉမၼ်းၶႃႈဢေႃႈ၊” ဝႃႈၼင်ႇၼႆဢေႃႈ။
ပေႃႈမႄႈမၼ်းဢမ်ႇႁုလွင်ႈဢၼ်ပဵၼ်မႃးၵွပ်ႈပိူဝ်ႈ ထႃႇဝရႃႉၽြႃး၊ ၼၼ်ႉ။ လွင်ႈမၼ်းၸမ်ႉ၊ ထႃႇဝရႃႉၽြႃး၊ ႁႃဢၶိင်ႇဢၶႂၢင်ႉဢၼ်တၵ်းတိုၵ်းတေႃးၵူၼ်းမဵဝ်း ၽိလိတ်ႉတိ၊ တင်းလၢႆ ၸိူဝ်းဢၼ်ဢုပ်ႉပိူင်ႇမဵဝ်း ဢိသရေး၊ ယူႇမိူဝ်ႈၶိင်ႇယၢမ်းၼၼ်ႉဢေႃႈ။
ပိူဝ်ႈၼႆလႄႈ သၢမ်ႇသုၼ်ႇ၊ လူင်းၵႂႃႇၵႃႈတီႈဝဵင်း တိမၼႃႉ၊ လူၺ်ႈၵၼ်တင်းပေႃႈမႄႈမၼ်းဢေႃႈ။ မိူဝ်ႈဢၼ်ၶဝ်ပႆၽႃႇလတ်းသူၼ်မၢၵ်ႇၸပိတ်ႉၵႂႃႇယူႇၼၼ်ႉမၼ်းငိၼ်းသဵင်သၢင်ႇသီႈၼုမ်ႇႁွင်ႉႁဝ်ႇယူႇဢေႃႈ။-
မိူဝ်ႈၼၼ်ႉၵမ်းလဵဝ်တၼ်းၶူဝ်းဝိၺိၺ်ႇ ထႃႇဝရႃႉၽြႃး၊ တူၵ်းႁွတ်ႈၵႃႈၼိူဝ်မၼ်းႁႂ်ႈမၼ်းမီးႁႅင်းၼႃႇလူင်လၢင်လႄႈ၊ဢဝ်တင်းမိုဝ်းပဝ်ႇမိုဝ်းလၢႆၵူၺ်းတိုတ်ႉသိၵ်ႇသၢင်ႇသီႈၼၼ်ႉၶၢတ်ႇမိူၼ်ၼင်ႇမၼ်းတိုတ်ႉသိၵ်ႇပႄႉဢွၼ်ႇၶၢတ်ႇၼၼ်ႉဢေႃႈ။ ၵူၺ်းၵႃႈ၊မၼ်းဢမ်ႇမွၵ်ႇဢမ်ႇလၢတ်ႈလွင်ႈတၢင်းဢၼ်မၼ်းႁဵတ်းၼၼ်ႉတီႈပေႃႈမႄႈမၼ်း။
မိူဝ်ႈဢၼ်မၼ်းလူင်းၸူးလႄႈလၢတ်ႈတေႃႇသၢဝ်ၼၼ်ႉၸိုင်၊မၼ်းၵျိူၵ်ႈႁၵ်ႉသၢဝ်ၼၼ်ႉၼႃႇဢေႃႈ။
ႁိုင်တၢၼ်ႇတၢၼ်ႇသေယဝ်ႉ၊ သၢမ်ႇသုၼ်ႇ၊ ၶိုၼ်းၵႂႃႇႁႂ်ႈလႆႈသွင်ႇမၢင်ႇၵလႃႇဢဝ်သၢဝ်ၼၼ်ႉဢေႃႈ။ ၼႂ်းၶၢဝ်းတၢင်းၼၼ်ႉမၼ်းဝႄႈဢွၵ်ႇသေၵႃႈၼႂ်းသဵၼ်ႈတၢင်းႁႂ်ႈလႆႈလူတူၺ်းသၢင်ႇသီႈတူဝ်ဢၼ်မၼ်းဢဝ်တၢႆဝႆႉၼၼ်ႉလႄႈ၊ထူပ်းႁၼ်ႁူင်းၽိုင်ႈဢိၵ်ႇတင်းၼမ်ႉၽိုင်ႈၵႃႈၼႂ်းတူဝ်သၢင်ႇသီႈၼၼ်ႉဢေႃႈ။-
မၼ်းဢဝ်မိုဝ်းၸူၵ်းဢဝ်ၼမ်ႉၽိုင်ႈသႂ်ႇၵႃႈၼႂ်းဢူင်ႈမိုဝ်းမၼ်းလႄႈၵိၼ်ၸွမ်းတၢင်းၵႂႃႇဢေႃႈ။ မၼ်းႁွတ်ႈထိုင်ၵႃႈတီႈပေႃႈမႄႈမၼ်းသေယဝ်ႉပၼ်တီႈၶဝ်လႄႈၶဝ်ဢဝ်ၵိၼ်ဢေႃႈ။ ၵူၺ်းၵႃႈ၊မၼ်းဢမ်ႇမွၵ်ႇဢမ်ႇလၢတ်ႈတီႈပေႃႈမႄႈမၼ်းလွင်ႈဢၼ်မၼ်းၸူၵ်းဢဝ်ၼမ်ႉၽိုင်ႈၵႃႈတီႈၼႂ်းတူဝ်တၢႆသၢင်ႇသီႈမႃးၼၼ်ႉဢေႃႈ။
မိူဝ်ႈၼၼ်ႉပေႃႈမၼ်းလူင်းၸူးႁႂ်ႈလႆႈထူပ်းႁၼ်မႄႈယိင်းၼၼ်ႉဢေႃႈ။ သၢမ်ႇသုၼ်ႇ၊ ၸမ်ႉ၊ၸွမ်းၼင်ႇဢၼ်ထုင်းၸၢမ်ႇၽူႈမၢဝ်ႇမီးၼၼ်ႉမၼ်းႁဵတ်းပွႆးလဵင်ႉလူဢေႃႈ။-
မိူဝ်ႈဢၼ်ၵူၼ်း ၽိလိတ်ႉတိ၊ ၶဝ်ႁၼ်မၼ်းၼၼ်ႉၶဝ်လိူၵ်ႈဢဝ်ၽူႈမၢဝ်ႇသၢမ်သိပ်းၵေႃႉႁႂ်ႈမႃးႁဵတ်းၵေႃႉႁဵတ်းသႄႈမၼ်းဢေႃႈ။-
သၢမ်ႇသုၼ်ႇ၊ ၵေႃႈလၢတ်ႈတီႈၶဝ်လႄႈဝႃႈ၊ “ၵဝ်တၵ်းဢဝ်ၵႂၢမ်းသိူင်ႇၵႂၢမ်းဢမ်တႃႉသူဢေႃႈ။ ပေႃးသူၵႄႈလိတ်ႈလႆႈၼႂ်းၸူဝ်ႈၶၢမ်ႇပွႆးၸဵတ်းဝၼ်းၼႆႉၸိုင်၊ၵဝ်တၵ်းပၼ်သိူဝ်ႈၽႃႈပၢၼ်ႇယၢဝ်းသၢမ်သိပ်းၸုမ်ႇဢိၵ်ႇတင်းသိူဝ်ႈဢၼ်ပုတ်ႈဢၼ်လၢႆႈသၢမ်သိပ်းၸုမ်ႇတီႈသူလႄႈ၊-
ပေႃးသူဢမ်ႇၵႄႈလိတ်ႈလႆႈၸိုင်၊သူတၵ်းလႆႈပၼ်သိူဝ်ႈၸိူဝ်ႉၼင်ႇၼၼ်ၼၼ်ႉတီႈၵဝ်ဢေႃႈ၊” ဝႃႈၼင်ႇၼႆဢေႃႈ။ ၶဝ်ၸိူဝ်းၼၼ်ႉၵေႃႈဢွၼ်ၵၼ်လၢတ်ႈတီႈမၼ်းလႄႈဝႃႈ၊ “မွၵ်ႇလၢတ်ႈၵႂၢမ်းသိူင်ႇၵႂၢမ်းဢမ်ၼၼ်ႉႁႂ်ႈႁဝ်းငိၼ်းတႃႉ၊” ဝႃႈၼင်ႇၼႆလႄႈ။
မၼ်းၵေႃႈလၢတ်ႈလႄႈဝႃႈ၊ “ၵႃႈၼႂ်းၵေႃႉဢၼ်ၸၢင်ႈၵိၼ်ၸၢင်ႈၶူပ်းၼၼ်ႉၸၢင်ႈဢွၵ်ႇတၢင်းၵိၼ်တၢင်းၶူပ်းမႃး။ ၵႃႈၼႂ်းၵေႃႉဢၼ်ၵတ်ႉၶၼ်ႁႅင်းယႂ်ႇၼၼ်ႉ ၸၢင်ႈဢွၵ်ႇဢၼ်ဝၢၼ်ဢၼ်ၸဵမ်းမႃး၊” ဝႃႈၼင်ႇၼႆဢေႃႈ။- ဢၼၢၵ်ႈဢထိၵ်ႈပႄႇၵႂၢမ်းသိူင်ႇၵႂၢမ်းဢမ်ၼၼ်ႉၶဝ်ႁႃသၢမ်ဝၼ်းတဵမ်တဵမ်လႄႈဢမ်ႇပႆႇႁုလႆႈ။
မိူဝ်ႈဢၼ်ထူၼ်ႈထိုင်သီႇဝၼ်းၼၼ်ႉၶဝ်ဢွၼ်ၵၼ်လၢတ်ႈတီႈမေး သၢမ်ႇသုၼ်ႇ၊ လႄႈဝႃႈ၊ “မႂ်းၶျေႃးဝွၼ်းၽူဝ်မႂ်းႁႂ်ႈမၼ်းမွၵ်ႇလၢတ်ႈဢထိၵ်ႈပႄႇၵႂၢမ်းသိူင်ႇၵႂၢမ်းဢမ်ၼၼ်ႉတီႈမႂ်းတႃႉ။ ပေႃးဢမ်ႇၼၼ်ႁဝ်းတၵ်းဢဝ်ၽႆးတုတ်ႇမႂ်းဢိၵ်ႇတင်းၵူၼ်းႁိူၼ်းၵူၼ်းယေးပေႃႈမႂ်းပႅတ်ႈဢေႃႈ။ သူၽူဝ်မေးၽိတ်ႈပၢင်းႁဝ်းမႃးပုၼ်ႈတႃႇတၵ်းၸူၼ်ဢဝ်ႁဝ်းႁိုဝ်း၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈမေး သၢမ်ႇသုၼ်ႇ၊ ပႃးတင်းၼမ်ႉႁူၼမ်ႉတႃသေလႄႈလၢတ်ႈတီႈမၼ်းလႄႈဝႃႈ၊ “သူဢမ်ႇႁၵ်ႉႁဝ်းၵူၺ်း။ သူၸင်းႁဝ်းၵူၺ်းဢေႃႈ။ သူဢဝ်ၵႂၢမ်းသိူင်ႇၵႂၢမ်းဢမ်လႄႈတႃႉၵေႃႉသႄႈႁဝ်းၸိူဝ်းၼၼ်ႉယဝ်ႉ။ သူယင်းဢမ်ႇမွၵ်ႇလၢတ်ႈဢထိၵ်ႈပႄႇမၼ်းၼၼ်ႉတီႈႁဝ်း၊” ဝႃႈၼင်ႇၼႆဢေႃႈ။ မၼ်းၵေႃႈလၢတ်ႈလႄႈဝႃႈ၊ “တူၺ်းလူး။ တီႈပေႃႈမႄႈၵဝ်ၼၼ်ႉၵဝ်ယင်းဢမ်ႇမွၵ်ႇဢမ်ႇလၢတ်ႈလႄႈ၊ၵဝ်တၵ်းလႆႈမွၵ်ႇလၢတ်ႈတီႈသူႁိုဝ်း၊” ဝႃႈၼင်ႇၼႆဢေႃႈ။-
မေးမၼ်းၼၼ်ႉႁႆႈႁွင်ႉၵႃႈတီႈၽၢႆႇၼႃႈမၼ်းလႄႈတုၵ်းတဝ်ႇယူႇၵူႈဝၼ်းတေႃႇထိုင်ႁွတ်ႈၸဵတ်းဝၼ်းဢၼ်ၶၢမ်ႇပွႆးလဵင်ႉလူၼၼ်ႉဢေႃႈ။ ၼႂ်းဝၼ်းဢၼ်ထူၼ်ႈတီႈၸဵတ်းဝၼ်းၼၼ်ႉၵွပ်ႈပိူဝ်ႈမေးမၼ်းတုၵ်းတဝ်ႇၼႃႇလူင်လၢင်လႄႈမၼ်းမွၵ်ႇလၢတ်ႈၼႄဢထိၵ်ႈပႄႇၵႂၢမ်းသိူင်ႇၵႂၢမ်းဢမ်ၼၼ်ႉတီႈမေးမၼ်းသေဢေႃႈ။ မေးမၼ်းၵေႃႈၵႂႃႇမွၵ်ႇလၢတ်ႈပၼ်တီႈၵူၼ်း ၽိလိတ်ႉတိ၊ ၸိူဝ်းၼၼ်ႉဢေႃႈ။-
ပိူဝ်ႈၼႆလႄႈၼႂ်းဝၼ်းဢၼ်ထူၼ်ႈတီႈၸဵတ်းဝၼ်းၼၼ်ႉၸူဝ်ႈဢၼ်ၵၢင်ဝၼ်းဢမ်ႇပႆႇတူၵ်းၼၼ်ႉၸိုင်၊ၵူၼ်းဝဵင်းၸိူဝ်းၼၼ်ႉလၢတ်ႈတီႈမၼ်းလႄႈဝႃႈ၊ “ဢၼ်လႂ်ဝၢၼ်ၸဵမ်းလိူဝ်တွၼ်းသေၼမ်ႉၽိုင်ႈ၊ ဢၼ်လႂ်ၵတ်ႉၶၼ်ႁႅင်းယႂ်ႇၼႃႇသေသၢင်ႇသီႈ၊” ဝႃႈၼင်ႇၼႆဢေႃႈ။ သၢမ်ႇသုၼ်ႇ၊ ၶိုၼ်းလၢတ်ႈတီႈၶဝ်လႄႈဝႃႈ၊ “ပေႃးသူယင်းဢမ်ႇဢဝ်ဝူဝ်းမႄႈၵဝ်ထႆၸိုင်၊ သူႁႃလႄႈ တၵ်းဢမ်ႇႁုဢထိၵ်ႈပႄႇၵႂၢမ်းသိူင်ႇၵႂၢမ်းဢမ်ၵဝ်ၼၼ်ႉလႆႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၵမ်းလဵဝ်တၼ်းၶူဝ်းဝိၺိၺ်ႇ ထႃႇဝရႃႉၽြႃး၊ ႁဵတ်းႁႂ်ႈ သၢမ်ႇသုၼ်ႇ၊ ႁႅင်းယႂ်ႇမႃးၼႃႇလူင်လၢင်လႄႈမၼ်းလူင်းၵႂႃႇၵႃႈတီႈဝဵင်း ဢႃႇသၵေႇလုၼ်ႇ၊ ဢေႃႈ။ မၼ်းဢဝ်တၢႆၵူၼ်းသၢမ်သိပ်းသေယဝ်ႉ၊သိမ်းဢဝ်ၶူဝ်းလဵင်းၶဝ်မႃးပၼ်တီႈၶဝ်ၸိူဝ်းဢၼ်ၵႄႈလိတ်ႈဢထိၵ်ႈပႄႇၵႂၢမ်းသိူင်ႇၵႂၢမ်းဢမ်မၼ်းလႆႈၼၼ်ႉသေဢေႃႈ။ လိုၼ်းၼၼ်ႉမၼ်းမီးတၢင်းဢၼ်ၸႂ်လမ်ၶႂ်ႈၸႃႉၼႃႇသေလႄႈၶိုၼ်းမိူဝ်းၵႂႃႇၵႃႈတီႈႁိူၼ်းပေႃႈမၼ်းသေဢေႃႈ။-
မေးမၼ်းၼၼ်ႉၸမ်ႉ၊ၶဝ်ဢဝ်ပၼ်တီႈၵေႃႉဢၼ်ႁဵတ်းၵေႃႉသႄႈမၼ်းမိူဝ်ႈမၼ်းပဵၼ်လုၵ်ႈၶူၺ်မႂ်ႇၼၼ်ႉသေဢေႃႈ။
လိုၼ်းၼၼ်ႉႁိုင်တၢၼ်ႇတၢၼ်ႇယဝ်ႉလႄႈ သၢမ်ႇသုၼ်ႇ၊ ၶိုၼ်ႈၵႂႃႇၸႂ်းမေးမၼ်းၼႂ်းၶိင်ႇဢၼ်ပၢတ်ႇၶဝ်ႈၵျုင်ႇၼၼ်ႉဢေႃႈ။ မၼ်းပႃးဢဝ်ပႄႉဢွၼ်ႇတူဝ်ၼိုင်ႈၵႂႃႇပၼ်လၢၵ်ႈသွင်ႇၶွင်ၽၢၵ်ႇပုၼ်ႈမေးမၼ်းသေယဝ်ႉ၊လၢတ်ႈလႄႈဝႃႈ၊ “ၵဝ်တၵ်းၶဝ်ႈၸူးတီႈမေးၵဝ်ၵႃႈၼႂ်းႁွင်ႈၼွၼ်းႁဝ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။ ၵူၺ်းၵႃႈ၊ပေႃႈၼၢႆးမၼ်းဢမ်ႇပၼ်ဢၶႂၢင်ႉဢၼ်ႁႂ်ႈမၼ်းလႆႈၶဝ်ႈၸူးယဝ်ႉလႄႈ၊-
သမ်ႉလၢတ်ႈတီႈမၼ်းလႄႈဝႃႈ၊ “ၵဝ်ထၢင်ႇမႂ်းၸင်းမၼ်းတႄႉတႄႉဝႃႈဝႃႈယဝ်ႉလႄႈ၊ၵဝ်လႆႈဢဝ်မၼ်းပၼ်ႁႂ်ႈပဵၼ်မေးၵေႃႉသႄႈမႂ်းယဝ်ႉ။ ၼွင်ႉယိင်းမၼ်းယဵင်ႈၶႅၼ်းႁၢင်ႈလီသေမၼ်းဢေႃႈ။ ဢဝ်ၼွင်ႉယိင်းမၼ်းတႅၼ်းတူဝ်မၼ်းတႃႉ၊” ဝႃႈၼင်ႇၼႆဢေႃႈ။
သၢမ်ႇသုၼ်ႇ၊ ၵေႃႈလၢတ်ႈလႄႈဝႃႈ၊ “ၵမ်းၼႆႉတႄႉၸိုင်၊ၵဝ်တၵ်းၵၢင်းလွတ်ႈတင်းတီႈတၢင်ႇဢပျတ်ႈလူၺ်ႈလွင်ႈဢၼ်ႁဵတ်းတီႈၵူၼ်းမဵဝ်း ၽိလိတ်ႉတိ၊ တင်းလၢႆၼၼ်ႉယဝ်ႉ။ ၵဝ်တၵ်းယႃႉၵဝ်းၶဝ်ႁဵတ်းတႄႉႁဵတ်းဝႃႈယဝ်ႉ၊” ဝႃႈၼင်ႇၼႆဢေႃႈ။-
မၼ်းၵႂႃႇလႄႈတိဢဝ်မႃၼႆးသၢမ်ပၢၵ်ႇသေယဝ်ႉ၊ဢဝ်ႁၢင်ၶဝ်ဢၼ်ၼိုင်ႈလႄႈဢၼ်ၼိုင်ႈမတ်ႉႁွမ်းၵၼ်သွင်တူဝ်သွင်တူဝ်သေလႄႈဢဝ်ၵၢၼ်ႈၽႆးမတ်ႉၸပ်းသႂ်ႇၵႃႈတီႈၶွတ်ႇႁၢင်ၼၼ်ႉယဝ်ႉၸင်ႇ၊-
ဢဝ်ၽႆးၸပ်းတီႈၵၢၼ်ႈၽႆးၸိူဝ်းၼၼ်ႉသေယဝ်ႉ၊ပွႆႇၵႂႃႇၵႃႈၼႂ်းတူင်ႈၼႃးၶဝ်ႈၵျုင်ႇၵူၼ်း ၽိလိတ်ႉတိ၊ တင်းလၢႆဢေႃႈ။ ၼင်ႇၼၼ်လႄႈၽႆးမႆႈလိုၼ်ႈၶဝ်ႈၵျုင်ႇၶဝ်၊တူၼ်ႈၶဝ်ႈၵျုင်ႇၶဝ်ၵူၺ်းဢမ်ႇၵႃး၊မႆႈပႃးသူၼ်မၢၵ်ႇသၢၼ်ႇလုၼ်ႇၶဝ်ဢေႃႈ။-
မိူဝ်ႈဢၼ်ၵူၼ်း ၽိလိတ်ႉတိ၊ ၶဝ်တွင်ႈထၢမ်လႄႈဝႃႈ၊ “ၽူႈလႂ်ႁဵတ်းဢၼ်ၼႆႉ၊” ဝႃႈၼႆၸိုင်၊ၶဝ်လႆႈႁုလွင်ႈဢၼ်ပဵၼ် သၢမ်ႇသုၼ်ႇ၊ ႁဵတ်းၸိူဝ်ႉၼင်ႇၼႆၵွပ်ႈပိူဝ်ႈပေႃႈၼၢႆးမၼ်းၵူၼ်းမဵဝ်း တိမၼႃႉ၊ ၼၼ်ႉလႆႈဢဝ်မေးမၼ်းပၼ်ႁႂ်ႈႁဵတ်းမေးၵေႃႉသႄႈမၼ်းၼၼ်ႉယဝ်ႉၼၼ်ႉဢေႃႈ။ ပိူဝ်ႈၼႆလႄႈၵူၼ်း ၽိလိတ်ႉတိ၊ ၸိူဝ်းၼၼ်ႉၵႂႃႇဢဝ်မႄႈယိင်းၼၼ်ႉတုတ်ႇၽႆးတၢႆပႅတ်ႈဢိၵ်ႇလူၺ်ႈၵၼ်တင်းၵူၼ်းႁိူၼ်းၵူၼ်းယေးမၼ်းတင်းလၢႆၼၼ်ႉသေဢေႃႈ။
သၢမ်ႇသုၼ်ႇ၊ ၵေႃႈလၢတ်ႈတီႈၶဝ်လႄႈဝႃႈ၊ “ပေႃးသူႁဵတ်းၸိူဝ်ႉၼင်ႇၼႆၸိုင်၊ၵဝ်တိူင်ႇၵၢဝ်ႇလႄႈဝႃႈ၊ၵဝ်တၵ်းၽိုၼ်ႉတွပ်ႇသူႁႂ်ႈၵဝ်ပျေႇၸႂ်ၵဝ်ၵွၼ်ႇဢေႃႈ။ ပျေႇၸႂ်ယဝ်ႉၸင်ႇၵဝ်တၵ်းယူႇၼိမ်ၼိမ်လီလီဢေႃႈ၊” ဝႃႈၼင်ႇၼႆဢေႃႈ။-
မၼ်းၼၼ်ႉတိုၵ်းတေႃးပေႃႉယႅၼ်ႉၶဝ်ႁႅင်းယႂ်ႇၼႃႇသေလႄႈႁဵတ်းတၢင်းဢၼ်ၶႃႈတၢႆၽၼ်းတၢႆၶဝ်ပႅတ်ႈၼမ်ၼႃႇလူင်လၢင်ဢေႃႈ။ လိုၼ်းၼၼ်ႉမၼ်းလူင်းၵႂႃႇလႄႈယူႇၼႂ်းထမ်ႈငၢပ်ႇႁိၼ်ငၢပ်ႇၽႃၵႃႈတီႈ ဢေးတမ်ႇ၊ သေဢေႃႈ။
ၵူၼ်းမဵဝ်း ၽိလိတ်ႉတိ၊ တင်းလၢႆၶီႇသိုၵ်းမႃးၶျႃးပၢင်တပ်ႉၼႂ်းမိူင်း ယုတႃႉ၊ သေလႄႈတိုၵ်းတေႃးဝဵင်း လေးႁိ၊ ဢေႃႈ။-
ၵူၼ်း ယုတႃႉ၊ ၸိူဝ်းၼၼ်ႉၵေႃႈထၢမ်ၶဝ်လႄႈဝႃႈ၊ “ႁဵတ်းသင်လႄႈသူတိုၵ်းတေႃးႁဝ်း၊” ဝႃႈၼင်ႇၼႆဢေႃႈ။ ၶဝ်ၵေႃႈၶိုၼ်းလၢတ်ႈလႄႈဝႃႈ၊ “ႁဝ်းမႃးႁႂ်ႈလႆႈတိဢဝ် သၢမ်ႇသုၼ်ႇ၊ သႂ်ႇထွင်ႇသေလႄႈႁဵတ်းတီႈမၼ်းမိူၼ်ၸိူဝ်ႉၼင်ႇဢၼ်မၼ်းႁဵတ်းတီႈႁဝ်းမႃးၼၼ်ႉဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၵူၼ်း ယုတႃႉ၊ သၢမ်ပၢၵ်ႇဢွၼ်ၵၼ်ၵႂႃႇၸူးတီႈထမ်ႈၼႂ်းငၢပ်ႇႁိၼ်ငၢပ်ႇၽႃၵႃႈတီႈ ဢေးတမ်ႇ၊ သေယဝ်ႉ၊လၢတ်ႈတီႈ သၢမ်ႇသုၼ်ႇ၊ လႄႈဝႃႈ၊ “ၵူၼ်း ၽိလိတ်ႉတိ၊ ၶဝ် ဢုပ်ႉပိူင်ႇႁဝ်းယူႇၼၼ်ႉမႂ်းႁုလီလီငၢမ်းငၢမ်းယူႇဢမ်ႇၸႂ်ႈႁိုဝ်း။ တေႃႈလဵဝ်ၼႆႉမႂ်းႁဵတ်းၸိူဝ်ႉၼင်ႇႁိုဝ်တီႈႁဝ်း၊” ဝႃႈၼင်ႇၼႆဢေႃႈ။ မၼ်းၶိုၼ်းလၢတ်ႈတီႈၶဝ်လႄႈဝႃႈ၊ “ၵဝ်ႁဵတ်းတီႈၶဝ်မိူၼ်ၸိူဝ်ႉၼင်ႇဢၼ်ၶဝ်ႁဵတ်းတီႈၵဝ်ၼၼ်ႉၵူၺ်းဢေႃႈ၊” ဝႃႈၼင်ႇၼႆဢေႃႈ။
ၶဝ်ၵေႃႈလၢတ်ႈလႄႈဝႃႈ၊ “ႁဝ်းမႃးၵႃႈတီႈၼႆႈႁႂ်ႈလႆႈတိမတ်ႉဢဝ်မႂ်းသေလႄႈဢဝ်ဢၢပ်ႈပၼ်ၼႂ်းမိုဝ်း ၽိလိတ်ႉတိ၊ ၶဝ်ဢေႃႈ၊” ဝႃႈၼင်ႇၼႆဢေႃႈ။ သၢမ်ႇသုၼ်ႇ၊ ၶိုၼ်းလၢတ်ႈလႄႈဝႃႈ၊ “သူတိူင်ႇဝႃႈၵႂၢမ်းၵတိလွင်ႈဢၼ်ဝႃႈ၊တူဝ်သူတၵ်းဢမ်ႇဢဝ်ၵဝ်တၢႆၼၼ်ႉတႃႉ၊” ဝႃႈၼင်ႇၼႆဢေႃႈ။
ၶဝ်ၼၼ်ႉၵေႃႈလၢတ်ႈလႄႈဝႃႈ၊ “လီယဝ်ႉ။ ႁဝ်းတၵ်းဢဝ်ၸိူၵ်ႈမတ်ႉမႂ်းလႄႈဢၢပ်ႈပၼ်ၼႂ်းမိုဝ်းၶဝ်ၵူၺ်းဢေႃႈ။ ႁဝ်းဢမ်ႇဢဝ်မႂ်းတၢႆတႄႉတႄႉဢေႃႈ၊” ဝႃႈၼင်ႇၼႆသေယဝ်ႉ၊ဢဝ်ၸိူၵ်ႈမႂ်ႇသွင်သဵၼ်ႈမတ်ႉလႄႈဢဝ်မၼ်းဢွၵ်ႇထမ်ႈၼၼ်ႉမႃးဢေႃႈ။
မိူဝ်ႈဢၼ်ႁွတ်ႈထိုင်ၵႃႈတီႈဝဵင်း လေးႁိ၊ မႃးၼၼ်ႉၵူၼ်းမဵဝ်း ၽိလိတ်ႉတိ၊ တင်းလၢႆဢွၼ်ၵၼ်ႁုၼ်ႉလႄႈလႅၼ်ႈမႃးၸူးတီႈမၼ်းဢေႃႈ။ မိူဝ်ႈၼၼ်ႉၵမ်းလဵဝ်တၼ်းၶူဝ်းဝိၺိၺ်ႇ ထႃႇဝရႃႉၽြႃး၊ ႁဵတ်းႁႂ်ႈမၼ်းမီးႁႅင်းယႂ်ႇမႃးလႄႈ၊မၼ်းတိုတ်ႉၸိူၵ်ႈၸိူဝ်းဢၼ်မတ်ႉဝႆႉၵႃႈတီႈၶႅၼ်မိုဝ်းမၼ်းၼၼ်ႉၶၢတ်ႇၵႂႃႇမိူၼ်ၸိူဝ်ႉၼင်ႇဢၼ်တိုတ်ႉၸိူၵ်ႈပေႃဢၼ်မႆႈၽႆးၶၢတ်ႇၼၼ်ႉဢေႃႈ။-
မိူဝ်ႈၼၼ်ႉမၼ်းထူပ်းႁၼ်လုပ်ႇၵၢင်းမႃႉလီႈဢၼ်ယင်းလိပ်းဝႆႉၼၼ်ႉလႄႈၵူမ်ႈၵဵပ်းဢဝ်သေယဝ်ႉ၊ဢဝ်ၵူၼ်းတၢႆႁဵင်ၼိုင်ႈလူၺ်ႈလုပ်ႇၵၢင်းမႃႉလီႈၼၼ်ႉဢေႃႈ။-
သၢမ်ႇသုၼ်ႇ၊ ႁဵတ်းၵႂၢမ်းလႄႈဝႃႈၸမ်ႉ၊ “လူၺ်ႈလုပ်ႇၵၢင်းမႃႉလီႈၼၼ်ႉၵဝ်ဢဝ် ၵူၼ်းတၢႆႁဵင်ၼိုင်ႈ၊ လူၺ်ႈလုပ်ႇၵၢင်းမႃႉလီႈလႄႈၵဝ်ဢဝ်ၶဝ်ၵွင်ဝႆႉပဵၼ်ၵွင်ပဵၼ်ၵွင်၊” ဝႃႈၼင်ႇၼႆဢေႃႈ။
မၼ်းႁဵတ်းၵႂၢမ်းၼၼ်ႉယဝ်ႉလႄႈမၼ်းဢဝ်လုပ်ႇၵၢင်းမႃႉလီႈၼၼ်ႉထိမ်ႈပႅတ်ႈသေဢေႃႈ။ မၼ်းႁွင်ႉႁဵၵ်ႈၵႃႈတီႈၼၼ်ႈဝႃႈ၊ “ရႃႇမတ်ႉလေးႁိ၊” ဢေႃႈ။
မိူဝ်ႈၼၼ်ႉ၊ သၢမ်ႇသုၼ်ႇ၊ ယၢၵ်ႇၼမ်ႉၼႃႇလူင်လၢင်လႄႈသူးတွင်းတီႈ ထႃႇဝရႃႉၽြႃး၊ လႄႈဝႃႈ၊ “ၸဝ်ႈႁဝ်းပၼ်ႁႂ်ႈၶႃႈၸဝ်ႈႁဝ်းဢွင်ႇသိုၵ်းတီႈၶႃႈယဝ်ႉ။ တေႃႈလဵဝ်ၼႆႉၶႃႈၸဝ်ႈႁဝ်းတၵ်းတၢႆလူၺ်ႈၵၼ်တၢင်းဢၼ်ယၢၵ်ႇၼမ်ႉသေလႄႈႁွတ်ႈထိုင်ၼႂ်းမိုဝ်းၵူၼ်း ၽိလိတ်ႉတိ၊ ဢၼ်ပဵၼ်ၵူၼ်းတၢင်ႇၸိူဝ်ႉတၢင်ႇၶိူဝ်းတီႈၶႃႈႁိုဝ်း၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉၽြႃးပဵၼ်ၸဝ်ႈၽုၺ်ႇၼမ်ႉႁူးၵူင်ၼႂ်းလိၼ်ၵႃႈတီႈဝဵင်း လေးႁိ၊ ၼၼ်ႉလႄႈၼမ်ႉဢွၵ်ႇမႃးဢေႃႈ။ မၼ်းၵိၼ်ၼမ်ႉသေယဝ်ႉ၊ထူၺ်ႈၸႂ်ႁွမ်ႁႅင်းၶိုၼ်းဢေႃႈ။ ၼမ်ႉဢွၵ်ႇႁူးၼၼ်ႉႁွင်ႉႁဵၵ်ႈဝႃႈ၊ ဢိၼ်ႇႁၵ်ႉၵေႃးရႃႉ၊ လႄႈယင်းမီးယူႇတီႈဝဵင်း လေးႁိ၊ တေႃႇထိုင်ႁွတ်ႈမိူဝ်ႈလဵဝ်ဢေႃႈ။
သၢမ်ႇသုၼ်ႇ၊ ႁဵတ်းၵူၼ်းလူင်ဢၼ်ၸီႇယၢင်ႇတြႃးတီႈမဵဝ်း ဢိသရေး၊ ၸူဝ်ႈပၢၼ်ၵူၼ်း ၽိလိတ်ႉတိ၊ ၼၼ်ႉသၢဝ်းပီတဵမ်တဵမ်ဢေႃႈ။
ဝၼ်းၼိုင်ႈ သၢမ်ႇသုၼ်ႇ၊ ၵႂႃႇၵႃႈတီႈမိူင်း ၽိလိတ်ႉတိ၊ ၵႃႈတီႈဝဵင်း ၵႃႇၸႃႉ၊ ဢေႃႈ။ တီႈၼၼ်ႈမၼ်းထူပ်းႁၼ်မႄႈမွၵ်ႇယႃႈၵေႃႉၼိုင်ႈလႄႈၶဝ်ႈၸူးၼွၼ်းလူၺ်ႈၵၼ်သေဢေႃႈ။-
ၵူၼ်းဝဵင်း ၵႃႇၸႃႉ၊ ၶဝ်ႁုငိၼ်းလွင်ႈဢၼ် သၢမ်ႇသုၼ်ႇ၊ မီးတီႈၼၼ်ႈၼၼ်ႉလႄႈဢွၼ်ၵၼ်ပႂ်ႉလွမ်ႉႁွပ်ႈတီႈၼၼ်ႈသေယဝ်ႉ၊ပႂ်ႉထႃႈမၼ်းဝႆႉၵႃႈတီႈႁူးၽၵ်းတူဝဵင်းယူႇတင်းၶိုၼ်းဢေႃႈ။ ၸူဝ်ႈၶိုၼ်းၼၼ်ႉတင်းၶိုၼ်းၶဝ်ဢမ်ႇတၵ်ႉသဵင်လႄႈဢၢင်ႈဢၢၼ်းဝႆႉလႄႈဝႃႈ၊ “မိူဝ်ႈဢၼ်မိူင်းလႅင်းမႃးၸိုင်၊ႁဝ်းတေလႆႈဢၶႂၢင်ႉဢၼ်ဢဝ်မၼ်းတၢႆယဝ်ႉ၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊ သၢမ်ႇသုၼ်ႇ၊ ၼွၼ်းတေႃႇထိုင်ႁွတ်ႈၶိင်ႇတဵင်ႈၶိုၼ်းၵူၺ်းဢေႃႈ။ မိူဝ်ႈၼၼ်ႉမၼ်းလုၵ်ႉသေယဝ်ႉ၊ၵွတ်ႇႁွပ်ႇဢဝ်မႂ်ၽၵ်းတူဝဵင်းတင်းသွင်မႂ်လႄႈထူၺ်ႈဢဝ်သဝ်မၼ်းသွင်လႅမ်ႈပႃးတင်းၵိူၼ်ႇမၼ်း၊ဢိၵ်ႇတင်းၵႃႈမီးၼၼ်ႉသေလႄႈမႅၵ်ႇတၢင်ႇမႃႇမၼ်းၵႂႃႇပႅတ်ႈဝႆႉၵႃႈၼိူဝ်ၸိၵ်းလွႆဢၼ်မီးတေႃႇၼႃႈဝဵင်း ႁေႇပရုၼ်ႇ၊ ၼၼ်ႉသေဢေႃႈ။
လိုၼ်းၼၼ်ႉႁိုင်တၢၼ်ႇတၢၼ်ႇသေယဝ်ႉ၊ သၢမ်ႇသုၼ်ႇ၊ သမ်ႉငိၼ်းႁၵ်ႉငိၼ်းပႅင်းမႄႈယိင်းၵေႃႉၼိုင်ႈဢၼ်လႆႈၸိုဝ်ႈ တေႇလိလႃႉ၊ ဢၼ်ယူႇၵႃႈတီႈထူင်ႉ ၸေႃႇရိၵ်ႉ၊ ၼၼ်ႉဢေႃႈ။-
ၶုၼ် ၽိလိတ်ႉတိ၊ တင်းလၢႆမႃးၸူးတီႈမႄႈယိင်းၼၼ်ႉလႄႈလၢတ်ႈတီႈမၼ်းဝႃႈ၊ “ႁဵတ်းပရိယႄႇလႄႈတွင်ႈထၢမ်တီႈ သၢမ်ႇသုၼ်ႇ၊ ႁႂ်ႈမၼ်းလၢတ်ႈလွင်ႈဢၼ်ဢဵၼ်ႁႅင်းမၼ်းတႄႇယူႇၵွပ်ႈဢၼ်လႂ်၊ဢိၵ်ႇတင်းလွင်ႈဢၼ်ႁဝ်းတၵ်းလႆႈႁဵတ်းၸိူဝ်ႉၼင်ႇႁိုဝ်ပႄႉမၼ်းလႆႈလႄႈမတ်ႉဢဝ်မၼ်းသေယဝ်ႉ၊ႁဵတ်းႁႂ်ႈမၼ်းပေႃးဢမ်ႇငွၵ်ႈႁူဝ်လႆႈၼၼ်ႉသေၵမ်း။ ႁဝ်းတၵ်းၽွမ်ႉၵၼ်ပၼ်ငိုၼ်းႁဵင်ပၢႆပၢၵ်ႇၵျၢပ်ႈတီႈမႂ်းဢေႃႈ၊” ဝႃႈၼင်ႇၼႆဢေႃႈ။
တေႇလိလႃႉ၊ ၵေႃႈလၢတ်ႈတီႈ သၢမ်ႇသုၼ်ႇ၊ လႄႈဝႃႈ၊ “ၶႅၼ်းတေႃႈမွၵ်ႇလၢတ်ႈလွင်ႈဢၼ်ဢဵၼ်ႁႅင်းသူတႄႇယူႇၵွပ်ႈဢၼ်လႂ်၊ဢိၵ်ႇတင်းလွင်ႈဢၼ်ဢဝ်ၵႃႈသင်မတ်ႉၽုၵ်ႇသူႁႂ်ႈၼိၵ်ႈၸၢၵ်ႈငႅၼ်းသႄးသူလႆႈၸိူဝ်ႉၼင်ႇႁိုဝ်ၼၼ်ႉသေၵမ်း။ ႁဝ်းတွင်းပၢၼ်ႇသူဢေႃႈ၊” ဝႃႈၼင်ႇၼႆဢေႃႈ။-
သၢမ်ႇသုၼ်ႇ၊ ၵေႃႈလၢတ်ႈလႄႈဝႃႈ၊ “ပေႃးၶဝ်ဢဝ်ၸိူၵ်ႈၼင်လိပ်းၸဵတ်းသဵၼ်ႈဢၼ်ယင်းဢမ်ႇပႆႇႁႅင်ႈၼၼ်ႉမတ်ႉၵဝ်ၸိုင်၊ႁႅင်းၵဝ်တၵ်းဢူၼ်ႈၵႂႃႇပဵၼ်ၸိူဝ်ႉၼင်ႇပိူၼ်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၶုၼ် ၽိလိတ်ႉတိ၊ ၸိူဝ်းၼၼ်ႉၵေႃႈဢဝ်ၸိူၵ်ႈၼင်လိပ်းၸဵတ်းသဵၼ်ႈပၼ် တေႇလိလႃႉ၊ လႄႈမၼ်းဢဝ်မတ်ႉ သၢမ်ႇသုၼ်ႇ၊ ဝႆႉဢေႃႈ။-
မၼ်းၸႂ်ႉၵူၼ်းၵမ်ႈၽွင်ႈတဵတ်ႇမႅပ်းယူႇၼႂ်းလုၵ်းတၢင်ႇလုၵ်းဝႆႉယဝ်ႉလႄႈ၊မၼ်းႁွင်ႉလၢတ်ႈတီႈ သၢမ်ႇသုၼ်ႇ၊ လႄႈဝႃႈ၊ “ သၢမ်ႇသုၼ်ႇ၊ ႟။ ၵူၼ်း ၽိလိတ်ႉတိ၊ ၶဝ်မႃးတိုၵ်းသူယဝ်ႉ၊” ဝႃႈၼင်ႇၼႆဢေႃႈ။ သၢမ်ႇသုၼ်ႇ၊ ၵေႃႈၸၵ်ႉတိုတ်ႉၸိူၵ်ႈၸိူဝ်းၼၼ်ႉၶၢတ်ႇမိူၼ်ၵၼ်တင်းမၼ်းၸၵ်ႉတိုတ်ႉၸိူၵ်ႈပေႃဢၼ်မႆႈၽႆးၼၼ်ႉၶၢတ်ႇၼၼ်ႉဢေႃႈ။ ၼင်ႇၼၼ်လႄႈဢမ်ႇလႆႈႁုလွင်ႈႁႅင်းမၼ်းၼၼ်ႉဢေႃႈ။
တေႇလိလႃႉ၊ ၵေႃႈလၢတ်ႈတီႈ သၢမ်ႇသုၼ်ႇ၊ လႄႈဝႃႈ၊ “သူယွၵ်ႇယဝ်ႈႁဝ်းလႄႈလၢတ်ႈပႅတ်ႉလၢတ်ႈလႅၼ်ႁဝ်းယဝ်ႉ။ ၵမ်းၼႆႉၶႅၼ်းတေႃႈလၢတ်ႈၼႄလွင်ႈဢၼ်တၵ်းလႆႈဢဝ်ၵႃႈသင်မတ်ႉသူၼၼ်ႉသေၵမ်း။ ႁဝ်းတွင်းပၢၼ်ႇသူဢေႃႈ၊” ဝႃႈၼင်ႇၼႆဢေႃႈ။
သၢမ်ႇသုၼ်ႇ၊ ၵေႃႈလၢတ်ႈလႄႈဝႃႈ၊ “ပေႃးဢဝ်ၸိူၵ်ႈမႂ်ႇမႂ်ႇဢၼ်ဢမ်ႇပႆႇတွၼ်ႉသုင်းၼၼ်ႉမတ်ႉၵဝ်လီလီဝႆႉၸိုင်၊ႁႅင်းၵဝ်တၵ်းဢူၼ်ႈၵႂႃႇပဵၼ်ၸိူဝ်ႉၼင်ႇပိူၼ်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ တေႇလိလႃႉ၊ ဢဝ်ၸိူၵ်ႈမႂ်ႇမႂ်ႇမတ်ႉၽုၵ်ႇမၼ်းဝႆႉလီလီသေယဝ်ႉ၊ႁွင်ႉလၢတ်ႈလႄႈဝႃႈ၊ “ သၢမ်ႇသုၼ်ႇ၊ ႟။ ၵူၼ်း ၽိလိတ်ႉတိ၊ ၶဝ်မႃးတိုၵ်းသူယဝ်ႉ၊” ဝႃႈၼင်ႇၼႆဢေႃႈ။ ၵူၼ်းၸိူဝ်းဢၼ်တဵတ်ႇမႅပ်းပႂ်ႉမၼ်းၼၼ်ႉမီးယူႇၼႂ်းလုၵ်းတၢင်ႇလုၵ်းဢေႃႈ။ ၵူၺ်းၵႃႈ၊မၼ်းၸၵ်ႉတိုတ်ႉၸိူၵ်ႈၸိူဝ်းၼၼ်ႉၶၢတ်ႇမိူၼ်ၸိူဝ်ႉၼင်ႇဢၼ်တိုတ်ႉမႆၶႅမ်ႈၽႆးၼၼ်ႉၶၢတ်ႇၼၼ်ႉဢေႃႈ။
တေႇလိလႃႉ၊ ၵေႃႈလၢတ်ႈတီႈ သၢမ်ႇသုၼ်ႇ၊ လႄႈဝႃႈ၊ “သူယင်းယွၵ်ႇယဝ်ႈႁဝ်းယူႇလႄႈလၢတ်ႈမုသႃႇတီႈႁဝ်းဢေႃႈ။ လၢတ်ႈပၼ်လွင်ႈဢၼ်တၵ်းလႆႈဢဝ်ၵႃႈသင်မတ်ႉသူၼၼ်ႉသေၵမ်း၊” ဝႃႈၼင်ႇၼႆဢေႃႈ။ သၢမ်ႇသုၼ်ႇ၊ ၶိုၼ်းလၢတ်ႈလႄႈဝႃႈ၊ “ပေႃးဢဝ်ၶူၼ်ႁူဝ်ၵဝ်ၸဵတ်းယုမ်တေႃးသႂ်ႇၼႂ်းႁုၵ်ႇလႄႈဢဝ်ၸိမ်တွၵ်ႇသႂ်ႇဝႆႉၵႃႈၼႂ်းၵီႇတေႃးၽႃႈၸိုင်၊ႁႅင်းၵဝ်တၵ်းဢူၼ်ႈၵႂႃႇမိူၼ်ၸိူဝ်ႉၼင်ႇပိူၼ်ႈဢေႃႈ၊” ဝႃႈၼင်ႇၼႆဢေႃႈ။
တေႇလိလႃႉ၊ ၵေႃႈၶျေႃးႁႂ်ႈမၼ်းၼွၼ်းလပ်းလႄႈဢဝ်ၶူၼ်ႁူဝ်မၼ်းၸဵတ်းယုမ်ၼၼ်ႉတေႃးသႂ်ႇၼႂ်းႁုၵ်ႇၼၼ်ႉဢေႃႈ။ သမ်ႉဢဝ်တႅမ်တွၵ်ႇယဝ်ႉလႄႈႁွင်ႉလၢတ်ႈလႄႈဝႃႈ၊ “ သၢမ်ႇသုၼ်ႇ၊ ႟။ ၵူၼ်း ၽိလိတ်ႉတိ၊ ၶဝ်မႃးတိုၵ်းသူယဝ်ႉ၊” ဝႃႈၼင်ႇၼႆဢေႃႈ။ ၵူၺ်းၵႃႈ၊ သၢမ်ႇသုၼ်ႇ၊ တိုၼ်ႇမႃးလႄႈထွၼ်ဢဝ်ၶူၼ်ႁူဝ်မၼ်းဢွၵ်ႇသေၵႃႈၼႂ်းႁုၵ်ႇဢေႃႈ။
တေႇလိလႃႉ၊ ၵေႃႈလၢတ်ႈတီႈ သၢမ်ႇသုၼ်ႇ၊ လႄႈဝႃႈ၊ “သူယင်းဢမ်ႇပႃးၸႂ်လႄႈတေႁဵတ်းၸိူဝ်ႉၼင်ႇႁိုဝ်လၢတ်ႈဝႃႈ၊ ‘ႁဝ်းႁၵ်ႉသူ၊’ ဝႃႈၼင်ႇၼႆလႆႈ။ သူယွၵ်ႇယဝ်ႈႁဝ်းသၢမ်ပွၵ်ႈယဝ်ႉ။ သူယင်းဢမ်ႇပႆႇလၢတ်ႈၼႄလွင်ႈဢၼ်လႂ်ႁဵတ်းႁႂ်ႈသူႁႅင်းယႂ်ႇၼၼ်ႉတီႈႁဝ်းလူင်ပႄႇ၊” ဝႃႈၼင်ႇၼႆဢေႃႈ။-
မႄႈယိင်းၼၼ်ႉတုၵ်းတဝ်ႇမၼ်းၵူႈမိူဝ်ႈၵူႈဝၼ်းယူႇၸိူဝ်ႉၼင်ႇၼၼ်တေႃႇထိုင်ႁွတ်ႈမၼ်းမိူဝ်ႇမၼ်းၸၢၼ်ႈၼႃႇထၢၼ်ႈပေႃးၶႂ်ႈတၢႆဢေႃႈ။-
မၼ်းၸင်ႇဢဝ်ၵႃႈဢၼ်မီးၵႃႈၼႂ်းႁူဝ်ၸႂ်မၼ်းၼၼ်ႉလၢတ်ႈပၼ်လႄႈဝႃႈ၊ “ၶူၼ်ႁူဝ်ႁဝ်းၼႆႉဢမ်ႇပႆႇတွၼ်ႉထႃသေပွၵ်ႈ၊ၸႃႉၸဵမ်မိူဝ်ႈဢၼ်ႁဝ်းၵိူတ်ႇလဵင်ႉမႃးၼၼ်ႉႁဝ်းလႆႈႁဵတ်းတၢင်းဢၼ်သၢၵ်ႈၵၢပ်ႈတီႈ ထႃႇဝရႃႉၽြႃး၊ ပဵၼ်ၵူၼ်း ၼႃႇၸရိ၊ ဢေႃႈ။ ပေႃးထႃၶူၼ်ႁူဝ်ႁဝ်းပႅတ်ႈၸိုင်၊ႁႅင်းႁဝ်းတၵ်းဢူၼ်ႈၵႂႃႇလႄႈပဵၼ်ၸိူဝ်ႉၼင်ႇပိူၼ်ႈၵူၺ်းဢေႃႈ၊” ဝႃႈၼင်ႇၼႆဢေႃႈ။
တေႇလိလႃႉ၊ ႁုႁၼ်လွင်ႈဢၼ်မၼ်းလၢတ်ႈၼႄလွင်ႈဢၼ်ၸိုဝ်ႈဢၼ်ၸႂ်ႈမၼ်းယဝ်ႉလႄႈမၼ်းသင်ႇၵႂၢမ်းၵႂႃႇတီႈၶုၼ် ၽိလိတ်ႉတိ၊ ၸိူဝ်းၼၼ်ႉလႄႈဝႃႈ၊ “မႃးထႅင်ႈပွၵ်ႈၼိုင်ႈလူးၵွၼ်ႇတႃႉ။ မၼ်းလၢတ်ႈၼႄလွင်ႈဢၼ်ၸိုဝ်ႈဢၼ်ၸႂ်ႈမၼ်းတီႈၵဝ်ၶႃႈယဝ်ႉ၊” ဝႃႈၼင်ႇၼႆဢေႃႈ။ ၶုၼ် ၽိလိတ်ႉတိ၊ ၸိူဝ်းၼၼ်ႉၵေႃႈပႃးဢဝ်ငိုၼ်းသေလႄႈမႃးၵႃႈတီႈမႄႈယိင်းၼၼ်ႉဢေႃႈ။-
တေႇလိလႃႉ၊ ဢဝ်ၶႃမၼ်းမွၼ်ႁူဝ် သၢမ်ႇသုၼ်ႇ၊ လႄႈၶျေႃးႁႂ်ႈ သၢမ်ႇသုၼ်ႇ၊ ၼွၼ်းလပ်းသေယဝ်ႉ၊ႁွင်ႉဢဝ်ၵူၼ်းၵေႃႉၼိုင်ႈထႃၶူၼ်ႁူဝ် သၢမ်ႇသုၼ်ႇ၊ ၸဵတ်းယုမ်ၼၼ်ႉပႅတ်ႈသေဢေႃႈ။ မၼ်းတႄႇၸႃႉယႃႉၵဝ်းလႄႈႁႂ်ႈႁႅင်း သၢမ်ႇသုၼ်ႇ၊ သုတ်ႉယွမ်းႁၢႆၵႂႃႇဢေႃႈ။-
မိူဝ်ႈၼၼ်ႉမၼ်းႁွင်ႉလၢတ်ႈလႄႈဝႃႈ၊ “သၢမ်ႇသုၼ်ႇ႟။ ၵူၼ်း ၽိလိတ်ႉတိ၊ ၶဝ်မႃးတိုၵ်းသူယဝ်ႉ၊” ဝႃႈၼင်ႇၼႆဢေႃႈ။ မၼ်းတိုၼ်ႇမႃးလႄႈၶႆႈၸႂ်ၸဵၼ်းၸႃးဝႃႈ၊ “ၵဝ်တၵ်းႁႂ်ႈလွတ်ႈလႄႈဢွၵ်ႇၵႂႃႇမိူၼ်ၸိူဝ်ႉၼင်ႇၵူႈပွၵ်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။ လွင်ႈမၼ်းၸမ်ႉ၊မၼ်းဢမ်ႇႁုလွင်ႈဢၼ် ထႃႇဝရႃႉၽြႃး၊ ၸုၼ်ႉပႅတ်ႈမၼ်းယဝ်ႉၼၼ်ႉ။-
ၵူၼ်း ၽိလိတ်ႉတိ၊ ၸိူဝ်းၼၼ်ႉတိၺွပ်းဢဝ်မၼ်းလႄႈၶွၵ်းႁူၺ်ႇတႃမၼ်းပႅတ်ႈတင်းသွင်ႁူၺ်ႇသေယဝ်ႉ၊ဢဝ်မၼ်းလူင်းၵႂႃႇၵႃႈတီႈဝဵင်း ၵႃႇၸႃႉ၊ လႄႈဢဝ်ၸိူၵ်ႈတွင်းလိူင်မတ်ႉၽုၵ်ႇမၼ်းဝႆႉယဝ်ႉၸင်ႇၸႂ်ႉႁႂ်ႈမၼ်းၶိုတ်ႈမေႃႇႁိၼ်လူင်ၵႃႈၼႂ်းထွင်ႇဢေႃႈ။-
ၵူၺ်းၵႃႈ၊ၶူၼ်ႁူဝ်မၼ်းၶိုၼ်းယၢဝ်းမႃးထႅင်ႈယူႇဢေႃႈ။
ၶုၼ် ၽိလိတ်ႉတိ၊ တင်းလၢႆၸုတုမ်ၵၼ်ႁႂ်ႈလႆႈႁဵတ်းတၢင်းလူႇဢၼ်ယႂ်ႇၼႃႇတီႈၽြႃးၶဝ် တႃႇၵုၼ်ႇ၊ လႄႈႁဵတ်းတၢင်းဢၼ်ၸူမ်းသိူဝ်းမူၼ်ႈပျေႃႇဢေႃႈ။ ၶဝ်ႁဵတ်းၵႂၢမ်းလႄႈဝႃႈ၊ “ၽြႃးႁဝ်းပၼ်တၢင်းဢၼ်ႁဝ်းဢွင်ႇသိုၵ်းၵႃႈၼိူဝ်ရၢၼ်ႇသူႇႁဝ်း သၢမ်ႇသုၼ်ႇ၊ ဢေႃႈ၊” ဝႃႈၼင်ႇၼႆဢေႃႈ။-
ၵူၼ်းတင်းလၢႆၵေႃႈမိူဝ်ႈဢၼ်ႁၼ်မၼ်းၼၼ်ႉၶဝ်ယွင်ႈယေႃးၽြႃးၶဝ်ၼၼ်ႉလႄႈႁဵတ်းၵႂၢမ်းဝႃႈ၊ “ၽြႃးႁဝ်းဢဝ်ရၢၼ်ႇသူႇႁဝ်းဢၢပ်ႈပၼ်ၼႂ်းမိုဝ်းႁဝ်းယဝ်ႉ။ မၼ်းၼၼ်ႉပဵၼ်ၵေႃႉဢၼ်ယႃႉၽဵဝ်ႈပႅတ်ႈမိူင်းႁဝ်းလႄႈဢဝ်တူဝ်တၢႆၵူၼ်းႁဝ်းၵွင်ဝႆႉပဵၼ်ၵွင်ပဵၼ်ၵွင်ယဝ်ႉ၊” ဝႃႈၼင်ႇၼႆဢေႃႈ။-
မိူဝ်ႈဢၼ်ႁူဝ်ၸႂ်ၶဝ်သႂၢင်ႇသိူဝ်းမႃးၼၼ်ႉၸိုင်၊ၶဝ်လၢတ်ႈလႄႈဝႃႈ၊ “ႁွင်ႉဢဝ် သၢမ်ႇသုၼ်ႇ၊ မႃးတႃႉ။ ႁႂ်ႈမၼ်းလဵၼ်ႈၼႄပၼ်ႁဝ်းတႃႉ၊” ဝႃႈၼင်ႇၼႆသေယဝ်ႉ၊ၶဝ်ႁွင်ႉဢဝ်မၼ်းဢွၵ်ႇထွင်ႇမႃးဢေႃႈ။ ၶဝ်ၸႂ်ႉမၼ်းႁဵတ်းႁႂ်ႈၶဝ်ၸူမ်းသိူဝ်းမူၼ်ႈပျေႃႇသေယဝ်ႉ၊ၶဝ်ဢဝ်မၼ်းဝႆႉ ဝူင်ႈၵၢင်သဝ်ႁိူၼ်းတိူၵ်ႈလူင်ဢေႃႈ။-
သၢမ်ႇသုၼ်ႇ၊ လၢတ်ႈတီႈၵူၼ်းၸၢႆးဢွၼ်ႇဢၼ်ၸုင်မိုဝ်းမၼ်းၵႂႃႇၼၼ်ႉလႄႈဝႃႈ၊ “ဢဝ်ၵဝ်ဝႆႉၵႃႈတီႈဢၼ်ၵဝ်တိူဝ်ႉသဝ်ဢၼ်ၵမ်ႉႁိူၼ်းတိူၵ်ႈၼႆႉႁႂ်ႈၵဝ်လႆႈဢိင်သဝ်ၸိူဝ်းၼၼ်ႉသေၵမ်း၊” ဝႃႈၼင်ႇၼႆဢေႃႈ။-
ၵႃႈတီႈႁိူၼ်းတိူၵ်ႈၼၼ်ႉမီးတဵမ်ဝႆႉတင်းၵူၼ်းၸၢႆးၵူၼ်းယိင်းဢေႃႈ။ ၶုၼ် ၽိလိတ်ႉတိ၊ တင်းလႆႈၵေႃႈမီးယူႇၵႃႈတီႈၼၼ်ႈဢေႃႈ။ ၵူၼ်းၸၢႆးၵူၼ်းယိင်းဢၼ်မီးယူႇၵႃႈၼိူဝ်ၸွမ်ႁိူၼ်းတိူၵ်ႈလႄႈလူတူၺ်း သၢမ်ႇသုၼ်ႇ၊ ႁဵတ်းၼႄတၢင်းဢၼ်ၸူမ်းသိူဝ်းမူၼ်ႈပျေႃႇယူႇၼၼ်ႉမီးမွၵ်ႈသေသၢမ်ႁဵင်ဢေႃႈ။
မိူဝ်ႈၼၼ်ႉ၊ သၢမ်ႇသုၼ်ႇ၊ သူးတွင်းလႄႈဝႃႈ၊ “ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈၶုၵ်းၸႂ်လႆႈၶႃႈၸဝ်ႈသေၵမ်းတီႈၶႃႈ။ ၶႅၼ်းတေႃႈပၼ်ႁႅင်းတီႈၶႃႈၸဝ်ႈထႅင်ႈပွၵ်ႈၼႆႉပွၵ်ႈလဵဝ်ၵူၺ်းႁႂ်ႈၶႃႈၸဝ်ႈလႆႈတွပ်ႇႁဵတ်းၶိုၼ်းပွၵ်ႈလဵဝ်ၼႆႉၵူၺ်းလႄႈတွပ်ႇတႅၼ်းၶိုၼ်းၵူၼ်း ၽိလိတ်ႉတိ၊ ၸိူဝ်းဢၼ်ၶွၵ်းမၢၵ်ႇတႃၶႃႈၸဝ်ႈတင်းသွင်ႁူၺ်ႇပႅတ်ႈၼႆႉသေၵမ်းတီႈၶႃႈ၊ၸဝ်ႈၽြႃးတီႈၶႃႈ၊” ဝႃႈၼင်ႇၼႆဢေႃႈ။-
သၢမ်ႇသုၼ်ႇ၊ ၵေႃႈယိပ်းၵမ်သဝ်ၵၢင်ဢၼ်ၵမ်ႉႁိူၼ်းတိူၵ်ႈလူင်သွင်သဝ်ၼၼ်ႉသေလႄႈ၊ဢဝ်မိုဝ်းၶွၼ်ၶႂႃတဝ်ႉဢီးသဝ်ၼိုင်ႈ၊မိုဝ်းၶွၼ်သၢႆႉတဝ်ႉဢီးသဝ်ၼိုင်ႈယူႇသေယဝ်ႉ၊-
ႁွင်ႉသႅၼ်ႇလႄႈဝႃႈ၊ “ႁႂ်ႈၵဝ်တၢႆလူၺ်ႈၵၼ်တင်းၵူၼ်း ၽိလိတ်ႉတိ၊ ၸိူဝ်းၼႆႉတႃႉ၊” ဝႃႈၼင်ႇၼႆသေယဝ်ႉ၊ဢဝ်တူဝ်မၼ်းၵွင်သေလႄႈဢီးသႂ်ႇတင်းႁႅင်းဢေႃႈ။ ႁိူၼ်းတိူၵ်ႈလူင်ၼၼ်ႉတႅၵ်ႇႁၵ်းလူမ်ႉတူၵ်းသႂ်ႇၵႃႈၼိူဝ်ၶုၼ်တင်းလၢႆဢိၵ်ႇတင်းၵူၼ်းတင်းသဵင်ႈတင်းလူင်ၼၼ်ႉဢေႃႈ။ ၼင်ႇၼၼ်လႄႈၵူၼ်းဢၼ်လႆႈၶၢမ်ႇတၢင်းဢၼ်ဢဝ်တၢႆၼႂ်းမိူဝ်ႈဢၼ်မၼ်းတၢႆၼၼ်ႉယဵင်ႈၶႅၼ်းၼမ်ၼႃႇသေၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ဢဝ်တၢႆၼႂ်းမိူဝ်ႈဢၼ်မၼ်းဢသၢၵ်ႈလိပ်းယူႇၼၼ်ႉဢေႃႈ။
မိူဝ်ႈၼၼ်ႉ၊ၼွင်ႉၸၢႆးမၼ်းတင်းလၢႆဢိၵ်ႇတင်းၵူၼ်းႁိူၼ်းၵူၼ်းယေးမၼ်းၵႃႈမီးၸိူဝ်းၼၼ်ႉမႃးဢဝ်တူဝ်တၢႆမၼ်းၵႂႃႇသၢင်းၵျူဝ်ႇၵႃႈတီႈဝူင်ႈၵၢင်ဝဵင်း ၸူဝ်းရႃႇ၊ ဢိၵ်ႇတင်းဝဵင်း ဢေးသတေႃးလႃႉ၊ ၵႃႈၼႂ်းပႃႇႁဵဝ်ႈပေႃႈမၼ်း မႃႇၼေႃႇ၊ ၼၼ်ႉဢေႃႈ။ မၼ်းၼၼ်ႉလႆႈပဵၼ်ၵူၼ်းလူင်ဢၼ်ၸီႇယၢင်ႇတြႃးတီႈမဵဝ်း ဢိသရေး၊ သၢဝ်းပီဢေႃႈ။
မိူဝ်ႈၼၼ်ႉမီးၵူၼ်းၵေႃႉၼိုင်ႈဢၼ်လႆႈၸိုဝ်ႈ မိၶႃႇ၊ လႄႈမၼ်းယူႇၵႃႈၼိူဝ်ႁၢၼ်ႉလွႆ ဢေႇၽရိမ်ႇ၊ ဢေႃႈ။-
မၼ်းလၢတ်ႈတီႈမႄႈမၼ်းလႄႈဝႃႈ၊ “မိူဝ်ႈဢၼ်ပိူၼ်ႈလၵ်ႉဢဝ်ငိုၼ်းတီႈမႄႈႁဝ်းႁဵင်ပၢႆပၢၵ်ႇၵျၢပ်ႈၼၼ်ႉမႄႈႁဝ်းၵိၼ်ႇလႃႇၵိၼ်ႇဝႃႈၵႃႈတီႈၽူႈလၵ်ႉၼၼ်ႉလႄႈၵဝ်ၶႃႈလႆႈငိၼ်းၵႂၢမ်းၵိၼ်ႇလႃႇၼၼ်ႉဢေႃႈ။ ၵဝ်ၶႃႈဢဝ်မႅၼ်ႈလႄႈငိုၼ်းၼၼ်ႉမီးတီႈၵဝ်ၶႃႈဢေႃႈ။ တေႃႈလဵဝ်ၼႆႉၵဝ်ၶႃႈၶိုၼ်းပၼ်ၶႃႈဢေႃႈ၊” ဝႃႈၼင်ႇၼႆဢေႃႈ။ မႄႈမၼ်းၵေႃႈလၢတ်ႈလႄႈဝႃႈ၊ “လုၵ်ႈၸၢႆးၵဝ်႟။ ႁႂ်ႈ ထႃႇဝရႃႉၽြႃး၊ ပၼ်တၢင်းလီတီႈမႂ်းသေၵမ်းလူၺ်ႈ၊” ဝႃႈၼင်ႇၼႆဢေႃႈ။-
မိူဝ်ႈဢၼ်မၼ်းဢဝ်ငိုၼ်းႁဵင်ပၢႆပၢၵ်ႇၵျၢပ်ႈၶိုၼ်းပၼ်တီႈမႄႈမၼ်းၼၼ်ႉ၊မႄႈမၼ်းလၢတ်ႈလႄႈဝႃႈ၊ “ပုၼ်ႈလွင်ႈၼင်ႇႁိုဝ်ၵႂၢမ်းဢၼ်ၵိၼ်ႇလႃႇဝႆႉၼၼ်ႉတၵ်းဢမ်ႇတူၵ်းႁွတ်ႈၵႃႈၼိူဝ်လုၵ်ႈၸၢႆးၵဝ်ၸိုင်၊တူဝ်ၵဝ်ဢဝ်ငိုၼ်းၼၼ်ႉသၢၵ်ႈၵၢပ်ႈတီႈ ထႃႇဝရႃႉၽြႃး၊ တီႈၶႃႈဢေႃႈ။ ငိုၼ်းၼၼ်ႉႁႂ်ႈပဵၼ်ငိုၼ်းဢၼ်ၶႅၵ်းႁဵတ်းႁုၼ်ႇႁၢင်ႈသၢင်းထုဢၼ်ဢဝ်ငိုၼ်းဢုမ်ႇႁေႃႇဝႆႉၼၼ်ႉဢေႃႈ။ ပိူဝ်ႈၼႆလႄႈၵဝ်ဢဝ်ငိုၼ်းၼႆႉၶိုၼ်းဢၢပ်ႈပၼ်တီႈမႂ်းယဝ်ႉ၊” ဝႃႈၼင်ႇၼႆဢေႃႈ။-
မၼ်းၵေႃႈဢဝ်လႄႈၶိုၼ်းပၼ်တီႈမႄႈမၼ်းဢေႃႈ။ မႄႈမၼ်းၵေႃႈဢဝ်ငိုၼ်းသွင်ပၢၵ်ႇၵျၢပ်ႈဢၢပ်ႈပၼ်တီႈၸၢင်ႈငိုၼ်းဢၼ်ၶႅၵ်းႁဵတ်းႁုၼ်ႇႁၢင်ႈသၢင်းထုမႆႉသေလႄႈဢဝ်ငိုၼ်းၵႃႈဢၼ်မီးၼၼ်ႉဢုမ်ႇႁေႃႇႁုၼ်ႇႁၢင်ႈသၢင်းထုၼၼ်ႉဝႆႉဢေႃႈ။ ႁုၼ်ႇႁၢင်ႈသၢင်းထုၼၼ်ႉၵေႃႈဢဝ်ဝႆႉတီႈၼႂ်းႁိူၼ်း မိၶႃႇ၊ ဢေႃႈ။
တီႈၵူၼ်းၵေႃႉဢၼ်ဝႃႈ၊ မိၶႃႇ၊ ၼႆႉမီးၵျွင်းၽြႃးလႄႈမၼ်းႁဵတ်းႁုၼ်ႇႁၢင်ႈသၢင်းထု တေႇရၽိမ်း၊ ဢိၵ်ႇတင်းသိူဝ်ႈသုပ်းၸဝ်ႈၽိုၼ်ၼိုင်ႈဝႆႉသေယဝ်ႉ၊ယုၵ်ႉတၢင်ႇၼႂ်းလုၵ်ႈၸၢႆးမၼ်းတင်းလၢႆၼၼ်ႉၵေႃႉၼိုင်ႈဝႆႉၼႂ်းဢရႃႇယဵၸ်ႈပရေႃးႁဵၵ်ႈ ဢေႃႈ။-
မိူဝ်ႈၶိင်ႇၼၼ်ႉမဵဝ်း ဢိသရေး၊ ဢမ်ႇမီးၶုၼ်ႁေႃၶမ်းလႄႈၵူၼ်းၵူႈၵေႃႉၵူႈၵူၼ်းႁဵတ်းၸွမ်းၵမ်ၸႂ်ၽႂ်မၼ်းယူႇဢေႃႈ။
ၼႂ်းၶိင်ႇလဵဝ်ၵၼ်ၼၼ်ႉမီးၵူၼ်းမၢဝ်ႇမဵဝ်း လေႇဝိ၊ ၵေႃႉၼိုင်ႈဢၼ်ယူႇၵႃႈၼႂ်းဝဵင်း ပႅတ်ႉလႁႅမ်ႇ၊ ၼႂ်းမိူင်း ယုတႃႉ၊ ၼၼ်ႉဢေႃႈ။-
မၼ်းဢွၵ်ႇဝဵင်းၵႂႃႇႁႂ်ႈလႆႈႁႃတီႈယူႇတီႈသဝ်းသေတီႈသေလႅၼ်ဢေႃႈ။ ယၢမ်းမိူဝ်ႈဢၼ်မၼ်းယင်းလႄႇၵႂႃႇလႄႇမႃးယူႇၼၼ်ႉမၼ်းႁွတ်ႈမႃးထိုင်တီႈႁိူၼ်း မိၶႃႇ၊ ၵႃႈၼိူဝ်ႁၢၼ်ႉလွႆ ဢေႇၽရိမ်ႇ၊ ဢေႃႈ။-
မိၶႃႇ၊ တွင်ႈထၢမ်မၼ်းလႄႈဝႃႈ၊ “မႂ်းလုၵ်ႉသေၵႃႈတီႈလႂ်မႃး၊” ဝႃႈၼင်ႇၼႆလႄႈ၊မၼ်းၶိုၼ်းလၢတ်ႈလႄႈဝႃႈ၊ “ၵဝ်ၶႃႈပဵၼ်ၵူၼ်း လေႇဝိ၊ ၵူၼ်းဝဵင်း ပႅတ်ႉလႁႅမ်ႇ၊ ၼႂ်းမိူင်း ယုတႃႉ၊ ၼၼ်ႉဢေႃႈ။ ၵဝ်ၶႃႈသွၵ်ႈႁႃတီႈယူႇတီႈသဝ်းသေတီႈသေလႅၼ်ယူႇဢေႃႈ၊” ဝႃႈၼင်ႇၼႆဢေႃႈ။
မိၶႃႇ၊ ၵေႃႈလၢတ်ႈတီႈမၼ်းလႄႈဝႃႈ၊ “ယူႇသဝ်းလူၺ်ႈၵၼ်တင်းၵဝ်တႃႉ။ ႁဵတ်းၵေႃႉဢၼ်ပၼ်တၢင်းၵျၢမ်ႇတီႈၵဝ်ဢိၵ်ႇတင်းယဵၸ်ႈပရေႃးႁဵၵ်ႈၵဝ်သေၵမ်း။ ၵဝ်တၵ်းပၼ်ငိုၼ်းယေႈပီသိပ်းၵျၢပ်ႈဢိၵ်ႇတင်းၶူဝ်းၼုင်ႈၶူဝ်းမႆလႄႈတၢင်းၵိၼ်တၢင်းၶူပ်းဢေႃႈ၊” ဝႃႈၼင်ႇၼႆဢေႃႈ။-
ၵူၼ်းမၢဝ်ႇမဵဝ်း လေႇဝိ၊ ၼၼ်ႉၵေႃႈၽွမ်ႉၸႂ်တႃႇတေယူႇလူၺ်ႈၵၼ်တင်း မိၶႃႇ၊ လႄႈပဵၼ်ၸိူဝ်ႉၼင်ႇလုၵ်ႈၸၢႆးၵေႃႉၼိုင်ႈသေဢေႃႈ။-
မိၶႃႇ၊ ယုၵ်ႉတၢင်ႇၵေႃႉၼၼ်ႉႁႂ်ႈပဵၼ်ယဵၸ်ႈပရေႃးႁဵၵ်ႈတီႈမၼ်းလႄႈမၼ်းၼၼ်ႉၵေႃႈယူႇၼႂ်းႁိူၼ်း မိၶႃႇ၊ သေဢေႃႈ။-
မိၶႃႇ၊ ၵေႃႈလၢတ်ႈလႄႈဝႃႈ၊ “မိူဝ်ႈလဵဝ်ၼႆႉၵဝ်ႁုလွင်ႈဢၼ် ထႃႇဝရႃႉၽြႃး၊ ႁႂ်ႈၵဝ်ၶိုၼ်ႈယႂ်ႇမႂ်ႇသုင်ၵွပ်ႈပိူဝ်ႈၵူၼ်း လေႇဝိ၊ မႃးပဵၼ်ယဵၸ်ႈပရေႃးႁဵၵ်ႈၵဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ယၢမ်းမိူဝ်ႈၼၼ်ႉမဵဝ်း ဢိသရေး၊ ဢမ်ႇမီးၶုၼ်ႁေႃၶမ်း။ မိူဝ်ႈၶိင်ႇၼၼ်ႉၵူၼ်းၶိူဝ်းႁိူၼ်း တၢၼ်ႇ၊ တင်းလၢႆႁႃလိၼ်ဢမူၺ်ႇပုၼ်ႈဢၼ်တၵ်းယူႇတၵ်းသဝ်းၼၼ်ႉၵွပ်ႈပိူဝ်ႈတေႃႇထိုင်ႁွတ်ႈၶိင်ႇဝၼ်းၼၼ်ႉၶဝ်ဢမ်ႇပႆႇလႆႈလိၼ်ဢမူၺ်ႇၽႄမႅင်ႇၼႂ်းမဵဝ်း ဢိသရေး၊ ၼၼ်ႉလူးၵွၼ်ႇဢေႃႈ။-
ပိူဝ်ႈၼႆလႄႈၶဝ်ဢွၼ်ၵၼ်လိူၵ်ႈဢဝ်ၵူၼ်းဢၼ်ၵတ်ႉၶႅၼ်ႇၵႃႈၼႂ်းၵူၼ်းၸိူဝ်ႉၶိူဝ်း တၢၼ်ႇ၊ ၶဝ်ၼင်ႇၵၼ်ၼၼ်ႉႁႃႈၵေႃႉဢွၵ်ႇသေၵႃႈတီႈဝဵင်း ၸူဝ်းရႃႇ၊ တင်းဝဵင်း ဢေးသတေႃးလႃႉ၊ ပွႆႇၸႂ်ႉၵႂႃႇႁႂ်ႈလႆႈသွပ်ႇၶၢဝ်ႇလူလွမ်တူၺ်းမိူင်းဢေႃႈ။ မိူဝ်ႈဢၼ်ၶဝ်ႁွတ်ႈထိုင်ၵႃႈၼိူဝ်ႁၢၼ်ႉလွႆ ဢေႇၽရိမ်ႇ၊ ၼၼ်ႉၸိုင်၊ၶဝ်ၵႂႃႇသွၼ်ႈပိုင်ႈယူႇၵႃႈၼႂ်းႁိူၼ်း မိၶႃႇ၊ ဢေႃႈ။-
ယၢမ်းမိူဝ်ႈဢၼ်ၶဝ်ယင်းမီးယူႇၵႃႈၼႂ်းႁိူၼ်း မိၶႃႇ၊ ၼၼ်ႉၶဝ်တွင်းသဵင်ၵႂၢမ်းၵူၼ်းမၢဝ်ႇ လေႇဝိ၊ ၼၼ်ႉလႄႈၶဝ်ဝႄႈၶဝ်ႈၸူးတီႈမၼ်းသေယဝ်ႉ၊တွင်ႈထၢမ်လႄႈဝႃႈ၊ “ၽူႈလႂ်ဢဝ်မႂ်းမႃးသူင်ႇႁွတ်ႈၵႃႈတီႈၼႆႈ။ မႂ်းမႃးႁဵတ်းၵႃႈသင်ၵႃႈတီႈၼႆႈ။ မႂ်းပွင်ႁဵတ်းၵၢၼ်ငၢၼ်းဢၼ်လႂ်၊” ဝႃႈၼင်ႇၼႆဢေႃႈ။
မၼ်းၶိုၼ်းလၢတ်ႈလႄႈဝႃႈ၊ “ၵဝ်မီးၼႃႈၵၢၼ်ဢၼ်တိူင်ႇပၢင်ႇၵၼ်တင်း မိၶႃႇ၊ ဢေႃႈ။ မၼ်းၸၢင်ႈဢဝ်ၵဝ်လႄႈၵဝ်လႆႈႁဵတ်းယဵၸ်ႈပရေႃးႁဵၵ်ႈ မၼ်းယူႇဢေႃႈ၊” ဝႃႈၼင်ႇၼႆဢေႃႈ။
ၶဝ်ၼၼ်ႉၵေႃႈလၢတ်ႈတီႈမၼ်းလႄႈဝႃႈ၊ “ၶႅၼ်းတေႃႈတွင်ႈထၢမ်ၽြႃးပဵၼ်ၸဝ်ႈႁႂ်ႈႁဝ်းၶႃႈလႆႈႁုလွင်ႈသဵၼ်ႈတၢင်းဢၼ်ႁဝ်းၶႃႈၵႂႃႇထၢမ်းႁဵတ်းၼႆႉတၵ်းဢွင်ႇမႅင်ႇႁိုဝ်း၊ဢမ်ႇဢွင်ႇမႅင်ႇႁိုဝ်းၼၼ်ႉသေၵမ်း၊” ဝႃႈၼင်ႇၼႆဢေႃႈ။-
ယဵၸ်ႈပရေႃးႁဵၵ်ႈၼၼ်ႉၶိုၼ်းလၢတ်ႈလႄႈဝႃႈ၊ “သူဢမ်ႇလူဝ်ႇမီးတၢင်းဢၼ်ယၢပ်ႇၸႂ်မႆႈၸႂ်။ ထႃႇဝရႃႉၽြႃး၊ လူတူၺ်းသဵၼ်ႈတၢင်းဢၼ်သူၵႂႃႇထၢမ်းႁဵတ်းၼႆႉယူႇဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၶဝ်ႁႃႈၵေႃႉၼၼ်ႉဢွၵ်ႇၵႂႃႇႁွတ်ႈထိုင်ၵႃႈတီႈဝဵင်း လေႇသႃႉ၊ ဢေႃႈ။ ၶဝ်ႁုႁၼ်လွင်ႈဢၼ်ၵူၼ်းဝဵင်းၸိူဝ်းၼၼ်ႉယင်းဢမ်ႇမီးတၢင်းမႆႈတၢင်းၶီလႄႈဢွၼ်ၵၼ်လႆႈယူႇၵတ်းၸႂ်ယဵၼ်ၸႂ်မိူၼ်ၵၼ်တင်းၵူၼ်းဝဵင်း ၸိတုမ်ႇ၊ ၸိူဝ်းၼၼ်ႉယူႇ၊ၵႃႈၼႂ်းမိူင်းၶဝ်ၼၼ်ႉပျေႉၸုမ်ႇလိူင်ႇၸႂ်ဝႆႉလႄႈယင်းဢမ်ႇလူဝ်ႇၵႃႈသင်ထႅင်ႈလႃးလႃးၼၼ်ႉဢေႃႈ။ လိူဝ်သေၼၼ်ႉၶဝ်ယၢၼ်ၵႆၵၼ်တင်းၵူၼ်းဝဵင်း ၸိတုမ်ႇ၊ တင်းလၢႆလႄႈၶဝ်ဢမ်ႇၶဝ်ႈဢမ်ႇဢွၵ်ႇတီႈပိူၼ်ႈ သေၵေႃႉသေၵူၼ်းၼၼ်ႉဢေႃႈ။
ၶဝ်ႁႃႈၵေႃႉၼၼ်ႉၶိုၼ်းမႃးၵႃႈတီႈဝဵင်း ၸူဝ်းရႃႇ၊ တင်းဝဵင်း ဢေးသတေႃးလႃႉ၊ သေလႄႈပီႈၼွင်ႉၸိူဝ်ႉၶိူဝ်းၶဝ်ဢွၼ်ၵၼ်တွင်ႈထၢမ်လွင်ႈတၢင်းဢၼ်ၶဝ်လႆႈႁုလႆႈႁၼ်မႃးၼၼ်ႉဢေႃႈ။-
ၶဝ်ၵေႃႈမွၵ်ႇလၢတ်ႈလႄႈဝႃႈ၊ “ဢွၼ်ၵၼ်ၵႂႃႇတိုၵ်းဝဵင်း လေႇသႃႉ၊ ၵမ်းလဵဝ်တႃႉႁဝ်း။ မိူင်းဢၼ်ႁဝ်းႁၼ်မႃးၼၼ်ႉပဵၼ်မိူင်းဢၼ်လီဢၼ်ငၢမ်းဢေႃႈ။ ယူႇငိူဝ်ႈယူႇငဝ်ယူႇႁဵတ်းသင်။ ႁဵတ်းၶၼ်ႁဵတ်းၽႂ်းတႃႉ။ ၵႂႃႇတိုၵ်းသိမ်းဢဝ်တႃႉႁဝ်း။-
မိူဝ်ႈဢၼ်သူႁွတ်ႈထိုင်ၵႂႃႇၼၼ်ႉသူတၵ်းထူပ်းႁၼ်ၵူၼ်းမဵဝ်းဢၼ်ဢသၢၵ်ႈတၢၼ်းၶဝ်ၵတ်းယဵၼ်လွတ်ႈလႅဝ်းၼႃႇၵႃႈၼႂ်းမိူင်းဢၼ်ၵႂၢင်ႈလီလႃးလီၼၼ်ႉဢေႃႈ။ ပဵၼ်မိူင်းဢၼ်ဢမ်ႇလူဝ်ႇၵႃႈသင်ထႅင်ႈၵႃႈၼႂ်းမိူင်းၵူၼ်းၼႆႉၼၼ်ႉလႄႈ၊ပဵၼ်မိူင်းဢၼ်ၽြႃးပဵၼ်ၸဝ်ႈဢဝ်ဢၢပ်ႈပၼ်ၼႂ်းမိုဝ်းသူယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၵူၼ်းၸိူဝ်ႉၶိူဝ်း တၢၼ်ႇ၊ ၶဝ်ႁူၵ်းပၢၵ်ႇႁၢင်ႈႁႅၼ်းၶိူင်ႈလၢၵ်ႈၼၢၵ်ႈၸေးမိုဝ်းသေလႄႈၶီႇသိုၵ်းဢွၵ်ႇၵႂႃႇသေၵႃႈတီႈဝဵင်း ၸူဝ်းရႃႇ၊ တင်းဝဵင်း ဢေးသတေႃးလႃႉ၊ ဢေႃႈ။-
ၶဝ်ၵႂႃႇၶျႃးပၢင်တပ်ႉၽၢႆႇဝၼ်းဢွၵ်ႇဝဵင်း ၵိရယတ်ႉယႃႇရိမ်ႇ၊ ၵႃႈၼႂ်းမိူင်း ယုတႃႉ၊ ဢေႃႈ။ ၵွပ်ႈပိူဝ်ႈလွင်ႈတၢင်းၼႆႉလႄႈၶဝ်ႁွင်ႉႁဵၵ်ႈၸိုဝ်ႈတီႈၼၼ်ႈဝႃႈ၊ပၢင်တပ်ႉမဵဝ်း တၢၼ်ႇ၊ တေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။-
ၶဝ်သမ်ႉလုၵ်ႉသေၵႃႈတီႈၼၼ်ႈၵႂႃႇၵႃႈၼိူဝ်ႁၢၼ်ႉလွႆ ဢေႇၽရိမ်ႇ၊ လႄႈႁွတ်ႈထိုင်ၵႂႃႇၵႃႈတီႈႁိူၼ်း မိၶႃႇ၊ ဢေႃႈ။
မိူဝ်ႈၼၼ်ႉၵူၼ်းႁႃႈၵေႃႉဢၼ်ၵႂႃႇလူလွမ်တူၺ်းမိူင်းႁိမ်းႁွမ်းဝဵင်း လေႇသႃႉ၊ ၼၼ်ႉမွၵ်ႇလၢတ်ႈတီႈပီႈၼွင်ႉၸိူဝ်ႉၶိူဝ်းၶဝ်ၼၼ်ႉလႄႈဝႃႈ၊ “လွင်ႈဢၼ်ဝႃႈ၊ၵႃႈၼႂ်းႁိူၼ်းၸိူဝ်းၼႆႉလင်ၼိုင်ႈမီးႁုၼ်ႇႁၢင်ႈသၢင်းထုမႆႉဢၼ်ဢဝ်ငိုၼ်းဢုမ်ႇဝႆႉၼၼ်ႉဢၼ်ၼိုင်ႈဢိၵ်ႇတင်းရုၵ်ႉထု တေႇရၽိမ်း၊ ဢၼ်ၼိုင်ႈတင်းသိူဝ်ႈသုပ်းၸဝ်ႈၽိုၼ်ၼိုင်ႈၼၼ်ႉၸွင်ႇသူႁုႁိုဝ်း။ ႁဝ်းထုၵ်ႇလီႁဵတ်းၸိူဝ်ႉၼင်ႇႁိုဝ်ၸိုင်၊သူၶႆႈၸႂ်ဝူၼ်ႉတူၺ်းတႃႉ၊” ဝႃႈၼင်ႇၼႆဢေႃႈ။-
ၶဝ်ဢွၼ်ၵၼ်ငႅၵ်းၵႂႃႇၸူးတီႈႁိူၼ်း မိၶႃႇ၊ သေယဝ်ႉ၊ၶဝ်ႈၼႂ်းႁိူၼ်းလင်ဢၼ်ၵူၼ်းမၢဝ်ႇမဵဝ်း လေႇဝိ၊ ယူႇသဝ်းၼၼ်ႉသေလႄႈတၵ်ႉလၢတ်ႈတေႃႇမၼ်းဢေႃႈ။-
ယၢမ်းမိူဝ်ႈဢၼ်ၵူၼ်းၸိူဝ်ႉၶိူဝ်း တၢၼ်ႇ၊ ႁူၵ်းပၢၵ်ႇဢၼ်မီးလၢၵ်ႈၼၢၵ်ႈၸေးမိုဝ်းၸိူဝ်းၼၼ်ႉယင်းၸုၵ်းယူႇၵႃႈတီႈႁူးၽၵ်းတူယူႇၼၼ်ႉ၊-
ၵူၼ်းႁႃႈၵေႃႉဢၼ်ၵႂႃႇလူလွမ်တူၺ်းမိူင်းၼၼ်ႉၶဝ်ႈၵႂႃႇၵႃႈၼႂ်းႁိူၼ်းၼၼ်ႉၵမ်းလဵဝ်သေယဝ်ႉ၊သိမ်းဢဝ်ႁုၼ်ႇႁၢင်ႈသၢင်းထုမႆႉဢၼ်ဢဝ်ငိုၼ်းဢုမ်ႇဝႆႉၼၼ်ႉဢိၵ်ႇတင်းႁုၼ်ႇႁၢင်ႈသၢင်းထု တေႇရၽိမ်း၊ တင်းသိူဝ်ႈသုပ်းၸဝ်ႈၼၼ်ႉဢေႃႈ။ ယဵၸ်ႈပရေႃးႁဵၵ်ႈ ၼၼ်ႉၸုၵ်းယူႇၵႃႈတီႈႁူးၽၵ်းတူလူၺ်ႈၵၼ်တင်းၵူၼ်းႁူၵ်းပၢၵ်ႇဢၼ်မီးလၢၵ်ႈၼၢၵ်ႈၸေးမိုဝ်းဝႆႉၸိူဝ်းၼၼ်ႉဢေႃႈ။
ၼႂ်းမိူဝ်ႈဢၼ်ၵူၼ်းၸိူဝ်းၼၼ်ႉၶဝ်ႈၵႃႈၼႂ်းႁိူၼ်း မိၶႃႇ၊ လႄႈသိမ်းဢဝ်ၶိူင်ႈမူတ်းၸၢင်ႇၸိူဝ်းၼၼ်ႉၸိုင်၊ယဵၸ်ႈပရေႃးႁဵၵ်ႈၼၼ်ႉတွင်ႈထၢမ်ၶဝ်လႄႈဝႃႈ၊ “သူႁဵတ်းၵႃႈသင်” ဝႃႈၼင်ႇၼႆဢေႃႈ။
ၶဝ်ၼၼ်ႉဢွၼ်ၵၼ်လၢတ်ႈလႄႈဝႃႈ၊ “ယူႇတဵတ်ႇတဵတ်ႇတႃႉ။ ယႃႇပေတၵ်ႉသဵင်သေၵမ်း။ မႃးလူၺ်ႈၵၼ်တင်းႁဝ်းလႄႈႁဵတ်းယဵၸ်ႈပရေႃးႁဵၵ်ႈႁဝ်း၊ႁဵတ်းၵေႃႉဢၼ်ပၼ်တၢင်းၵျၢမ်ႇတီႈႁဝ်းသေၵမ်း။ လီႁဵတ်းယဵၸ်ႈပရေႃးႁဵၵ်ႈတီႈႁိူၼ်းလဵဝ်ၵူၺ်းႁိုဝ်း၊ဢမ်ႇၼၼ်ၵေႃႈလီႁဵတ်းယဵၸ်ႈပရေႃးႁဵၵ်ႈတီႈၸိူဝ်ႉၶိူဝ်းမဵဝ်းၼိုင်ႈ၊တင်းၶိူဝ်းႁိူၼ်းမဵဝ်းၼိုင်ႈၼႂ်းမဵဝ်း ဢိသရေး၊ ၼၼ်ႉဢၼ်လႂ်ယဵင်ႈၶႅၼ်းတေလီ၊” ဝႃႈၼင်ႇၼႆဢေႃႈ။-
ယဵၸ်ႈပရေႃးႁဵၵ်ႈၼၼ်ႉမီးၸႂ်ဢၼ်ၸူမ်းသိူဝ်းမူၼ်ႈပျေႃႇလႄႈဢဝ်ၶိူင်ႈမူတ်းၸၢင်ႇၸိူဝ်းၼၼ်ႉသေယဝ်ႉ၊ပႃးၸွမ်းၵႂႃႇၵႃႈၼႂ်းမုၵ်ႉၵူၼ်းၸိူဝ်းၵူၼ်းၼၼ်ႉဢေႃႈ။
ၶဝ်ၼၼ်ႉဝၢႆႇပွၵ်ႈၶိုၼ်းၵႂႃႇလႄႈဢဝ်လုၵ်ႈဢွၼ်ႇလႂ်၊တရိၵ်ႈသၢၼ်ႇလႂ်၊ၶူဝ်းႁၢပ်ႇလႂ်၊ႁႂ်ႈပႆၵႂႃႇတၢင်းၼႃႈဢွၼ်တၢင်းဢေႃႈ။
မိူဝ်ႈဢၼ်ၵႂႃႇၵႆၵၼ်တင်းႁိူၼ်း မိၶႃႇ၊ ယဝ်ႉၼၼ်ႉၸိုင်၊ၵူၼ်းႁိူၼ်းၸမ်ၵၼ်တင်းႁိူၼ်း မိၶႃႇ၊ ၼၼ်ႉၸိူဝ်းၼၼ်ႉဢွၼ်ၵၼ်ၸုတုမ်ၵၼ်သေလႄႈလိုပ်ႈၸွမ်းလမ်းၸွမ်းၵူၼ်းၸိူဝ်ႉၶိူဝ်း တၢၼ်ႇ၊ ၸိူဝ်းၼၼ်ႉၵႂႃႇၶိုတ်းၶဝ်သေယဝ်ႉ၊ႁွင်ႉပၢဝ်ႇတီႈၶဝ်ဢေႃႈ။-
ၵူၼ်းၸိူဝ်ႉၶိူဝ်း တၢၼ်ႇ၊ ၸိူဝ်းၼၼ်ႉဝၢႆႇတူၺ်းၶဝ်သေလႄႈထၢမ် မိၶႃႇ၊ လႄႈဝႃႈ၊ “မႂ်းမီးလွင်ႈၵႃႈသင်လႄႈပႃးဢဝ်မုၵ်ႉၵူၼ်းၸိူဝ်းၵူၼ်းၼမ်ထၼ်ႇၼႆႉၸွမ်းမႃး၊” ဝႃႈၼင်ႇၼႆဢေႃႈ။
မိၶႃႇ၊ ၶိုၼ်းလၢတ်ႈလႄႈဝႃႈ၊ “သူယင်းလၢတ်ႈဝႃႈ၊ ‘မီးလွင်ႈၵႃႈသင်’ ဝႃႈၼႆလူးၵွၼ်ႇႁိုဝ်း။ သူၼႆႉသိမ်းဢဝ်ယဵၸ်ႈပရေႃးႁဵၵ်ႈၵဝ်၊တင်းၽြႃးဢၼ်ၵဝ်ႁဵတ်းၸိူဝ်းၼၼ်ႉၵႂႃႇယဝ်ႉ။ ၵဝ်ယင်းမီးလွင်ႈတၢင်းဢၼ်လႂ်ထႅင်ႈလူးၵွၼ်ႇႁိုဝ်း၊” ဝႃႈၼင်ႇၼႆဢေႃႈ။
ၵူၼ်းၸိူဝ်ႉၶိူဝ်း တၢၼ်ႇ၊ ၸိူဝ်းၼၼ်ႉၶိုၼ်းလၢတ်ႈလႄႈဝႃႈ၊ “မႂ်းဢမ်ႇလူဝ်ႇလၢတ်ႈၵႃႈသင်သေၶေႃႈသေၵမ်းယဝ်ႉ။ ႁဝ်းၼႆႉပဵၼ်ၵူၼ်းဢၼ်ၸႂ်လမ်သႆႈၵမ်ႇဢေႃႈ။ ပေႃးႁဝ်းတိုၵ်းတေႃးမႂ်းၸိုင်၊ဢသၢၵ်ႈမႂ်းတင်းဢသၢၵ်ႈၵူၼ်းႁိူၼ်းၵူၼ်းယေးမႂ်းတင်းလၢႆတၵ်းလႆႈသုမ်းဢေႃႈ၊” ဝႃႈၼင်ႇၼႆသေယဝ်ႉ၊-
ၶဝ်သိုပ်ႇၶၢဝ်းတၢင်းၶဝ်ၵႂႃႇသေဢေႃႈ။ မိၶႃႇ၊ ႁၼ်လွင်ႈဢၼ်ၶဝ်ၸိူဝ်းၼၼ်ႉႁႅင်းယႂ်ႇၼႃႇသေမၼ်းလႄႈပွၵ်ႈၶိုၼ်းမိူဝ်းၸူးတီႈႁိူၼ်းမၼ်းသေဢေႃႈ။
ၵူၼ်းၸိူဝ်ႉၶိူဝ်း တၢၼ်ႇ၊ ၸိူဝ်းၼၼ်ႉပႃးဢဝ်ၶိူင်ႈပိူင်ဢၼ် မိၶႃႇ၊ ႁဵတ်းပုၼ်ႈတူဝ်ၸဝ်ႈၵဝ်ႇၼၼ်ႉဢိၵ်ႇတင်းယဵၸ်ႈပရေႃးႁဵၵ်ႈ ဢၼ်ယူႇၵႃႈတီႈမၼ်းၼၼ်ႉသေလႄႈၵႂႃႇတိုၵ်းတေႃးၵူၼ်းဝဵင်း လေႇသႃႉ၊ တီႈဢၼ်ၵူၼ်းတင်းလၢႆယင်းဢမ်ႇထၢင်ႇဢမ်ႇထိူမ်ၵႃႈသင်လႄႈယူႇၼိမ်ၼိမ်လီလီၼၼ်ႉသေယဝ်ႉ၊ၶဝ်ဢဝ်လၢပ်ႇဢဝ်လႅဝ်းၽၼ်းၵူၼ်းတင်းဝဵင်းတၢႆလႄႈတုတ်ႇၽႆးဝဵင်းၼၼ်ႉပႅတ်ႈဢေႃႈ။-
ၵွပ်ႈပိူဝ်ႈဢၼ်ၵႆၵၼ်တင်းဝဵင်း ၸိတုမ်ႇ၊ ဢိၵ်ႇတင်းၵွပ်ႈပိူဝ်ႈဢမ်ႇၶဝ်ႈဢမ်ႇဢွၵ်ႇတီႈပိူၼ်ႈသေၵေႃႉသေၵူၼ်းၼၼ်ႉလႄႈဢမ်ႇမီးၵေႃႉဢၼ်မႃးၵႄႇသႄႇဢဝ်ၶဝ်။ ဝဵင်းၼၼ်ႉမီးယူႇၵႃႈၼႂ်းပၢင်ႇႁူၺ်ႈၵႃႈတီႈႁိမ်းဝဵင်း ပႅတ်ႉရႁေႃႇၽႃႉ၊ ၼၼ်ႉဢေႃႈ။ ၶဝ်ဢွၼ်ၵၼ်မႄးၵုမ်းမႄးႁဵတ်းဝဵင်းမႂ်ႇသေလႄႈယူႇဢေႃႈ။-
ဝဵင်းၼၼ်ႉၵေႃႈၶဝ်ႁွင်ႉႁဵၵ်ႈဝႃႈဝဵင်း တၢၼ်ႇ၊ ၸွမ်းလူၺ်ႈၸိုဝ်ႈသဵင်ပူႇပေႃႈၶဝ် တၢၼ်ႇ၊ ဢၼ်ပဵၼ်လုၵ်ႈၸၢႆး ဢိသရေး၊ ၼၼ်ႉဢေႃႈ။ ၸိုဝ်ႈၵဝ်ႇသဵင်ၵဝ်ႇဝဵင်းၼၼ်ႉႁွင်ႉႁဵၵ်ႈဝႃႈ၊ဝဵင်း လေႇသႃႉ၊ ဢေႃႈ။-
ၵူၼ်းၸိူဝ်ႉၶိူဝ်း တၢၼ်ႇ၊ ၸိူဝ်းၼၼ်ႉဢဝ်ႁုၼ်ႇႁၢင်ႈသၢင်းထုဢၼ်လႆႈတီႈ မိၶႃႇ၊ မႃးၼၼ်ႉတႄႇဝႆႉတင်ႈဝႆႉပုၼ်ႈဢၼ်တၵ်းၵူဝ်းၵႂၢႆႇလႄႈ၊ ယေႃးၼႀၼ်ႇ၊ လုၵ်ႈၸၢႆး ၵေႇရသုၼ်ႇ၊ ၵေႃႉပဵၼ်လၢၼ် မူဝ်းသေႇ၊ ၼၼ်ႉႁဵတ်းယဵၸ်ႈပရေႃးႁဵၵ်ႈလူၺ်ႈၵၼ်တင်းလုၵ်ႈၸၢႆးမၼ်းတင်းလၢႆယူႇတေႃႇထိုင်ႁွတ်ႈၵူၼ်းၸိူဝ်ႉၶိူဝ်းႁိူၼ်း တၢၼ်ႇ၊ တင်းလၢႆလႆႈၶၢမ်ႇတၢင်းဢၼ်ပိူၼ်ႈတိဢဝ်သိမ်းဢဝ်ၵႂႃႇၼၼ်ႉဢေႃႈ။-
ႁုၼ်ႇႁၢင်ႈသၢင်းထုဢၼ် မိၶႃႇ၊ သွၼ်းႁဵတ်းလေႃႇႁဵတ်းၼၼ်ႉတႄႇဝႆႉတင်ႈဝႆႉၸွမ်းၼင်ႇၸူဝ်ႈဢၼ်ႁိူၼ်းၽြႃးပဵၼ်ၸဝ်ႈမီးၵႃႈတီႈဝဵင်း သိလေႃႇ၊ ယူႇၼၼ်ႉဢေႃႈ။
မိူဝ်ႈၸူဝ်ႈပၢၼ်ၼၼ်ႉမဵဝ်း ဢိသရေး၊ ဢမ်ႇမီးၶုၼ်ႁေႃၶမ်း။ မိူဝ်ႈၼၼ်ႉမီးၵူၼ်း လေႇဝိ၊ ၵေႃႉၼိုင်ႈယူႇၵႃႈတီႈႁိမ်းၸဵင်ႇလႅၼ်သုတ်းႁၢၼ်ႉလွႆ ဢေႇၽရိမ်ႇ၊ လႄႈမၼ်းဢဝ်ၽူႈယိင်းၵူၼ်းဝဵင်း ပႅတ်ႉလႁႅမ်ႇ၊ ၼႂ်းမိူင်း ယုတႃႉ၊ ၼၼ်ႉမႃးပဵၼ်မေးၼွႆႉမၼ်းဢေႃႈ။-
ၵူၺ်းၵႃႈ၊မေးၼွႆႉၼၼ်ႉၶိုၼ်းယႃႉသဵတ်ႈၸႃႇၵႃႈၼိူဝ်မၼ်းလႄႈပႅတ်ႈမၼ်းဝႆႉသေယဝ်ႉ၊ၶိုၼ်းမိူဝ်းၵႂႃႇၸူးတီႈပေႃႈတူဝ်ၸဝ်ႈၵဝ်ႇၵႃႈတီႈဝဵင်း ပႅတ်ႉလႁႅမ်ႇ၊ ၼႂ်းမိူင်း ယုတႃႉ၊ ၼၼ်ႉဢေႃႈ။ မိူဝ်ႈဢၼ်ႁိုင်မႃးသီႇလိူၼ်ယဝ်ႉၸိုင်၊-
ၽူဝ်မၼ်းႁွင်ႉဢဝ်ၵူၼ်းဢွၼ်ႇၵေႃႉၼိုင်ႈပႃးဢဝ်တင်းမႃႉလီႈသွင်တူဝ်သေလႄႈၸွမ်းၵႂႃႇႁႂ်ႈလႆႈၶျေႃးဝွၼ်းမၼ်းလႄႈဢဝ်မၼ်းၶိုၼ်းဢေႃႈ။ မၼ်းၵေႃႈႁွင်ႉဢဝ်ၽူဝ်မၼ်းၶဝ်ႈၵႃႈၼႂ်းႁိူၼ်းပေႃႈတူဝ်ၸဝ်ႈၵဝ်ႇလႄႈပေႃႈမၼ်းၼၼ်ႉထူပ်းႁၼ်လုၵ်ႈၶူၺ်မၼ်းသေယဝ်ႉ၊ၸူမ်းသိူဝ်းၼႃႇဢေႃႈ။-
ပိူဝ်ႈၼႆလႄႈပေႃႈၼၢႆးမၼ်းဢၼ်ဝႃႈပေႃႈမႄႈယိင်းၼၼ်ႉႁပ်ႉတွၼ်ႉဢဝ်မၼ်းလႄႈမၼ်းယူႇၵႃႈတီႈပေႃႈၼၢႆးမၼ်းသၢမ်ဝၼ်းတဵမ်တဵမ်ဢေႃႈ။ ၶဝ်ၵေႃႈၵိၼ်ယူႇသူတ်ႉယူႇလူၺ်ႈၵၼ်ၼႂ်းၸူဝ်ႈၶၢဝ်းဢၼ်ပဵၼ်ၶႅၵ်ႇယူႇၼၼ်ႉဢေႃႈ။-
ၼႂ်းဝၼ်းတီႈသီႇဝၼ်းၼၼ်ႉၵူၼ်း လေႇဝိ၊ ၼၼ်ႉလုၵ်ႉၸဝ်ႉၸဝ်ႉလႄႈမႄးႁႅၼ်းႁႂ်ႈလႆႈဢွၵ်ႇၵႂႃႇဢေႃႈ။ ၵူၺ်းၵႃႈ၊ပေႃႈၼၢႆးမၼ်းၼၼ်ႉလၢတ်ႈတီႈလုၵ်ႈၶူၺ်မၼ်းလႄႈဝႃႈ၊ “ၵိၼ်ၶဝ်ႈမုၼ်းဢိတ်းၼိုင်ႈႁႂ်ႈၸႂ်လီယဝ်ႉၸင်ႇၵႂႃႇသေၵမ်း၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈၵူၼ်းၸၢႆးသွင်ၵေႃႉၼၼ်ႉၼင်ႈယူႇ၊ၵိၼ်ယူႇ၊သူတ်ႉယူႇလူၺ်ႈၵၼ်ဢေႃႈ။ ပေႃႈမႄႈယိင်းၼၼ်ႉၵေႃႈလၢတ်ႈတီႈလုၵ်ႈၶူၺ်မၼ်းလႄႈဝႃႈ၊ “ၵိုတ်းယူႇထႅင်ႈၶိုၼ်းၼိုင်ႈပျေႃႇပျေႃႇလူးၵွၼ်ႇသေၵမ်း၊” ဝႃႈၼင်ႇၼႆဢေႃႈ။
မိူဝ်ႈဢၼ်ၵူၼ်း လေႇဝိ၊ ၼၼ်ႉလုၵ်ႉလႄႈဢၢင်ႈတၵ်းၵႂႃႇၼၼ်ႉၸိုင်၊ပေႃႈၼၢႆးမၼ်းႁၢမ်ႈမၼ်းထႅင်ႈလႄႈမၼ်းသမ်ႉၶိုၼ်းၼွၼ်းၵႃႈတီႈၼၼ်ႈဢေႃႈ။-
မိူဝ်ႈၶိင်ႇၵၢင်ၼႂ်ၸဝ်ႉၸဝ်ႉၼႂ်းဝၼ်းတီႈႁႃႈၼၼ်ႉမၼ်းဢၢင်ႈတေဢွၵ်ႇၵႂႃႇဢေႃႈ။ ၵူၺ်းၵႃႈ၊ပေႃႈမႄႈယိင်းၼၼ်ႉသမ်ႉလၢတ်ႈထႅင်ႈလႄႈဝႃႈ၊ “ၵိၼ်သေၸိူဝ်ႉသေမဵဝ်းလူးၵွၼ်ႇတႃႉ။ ပႂ်ႉႁႂ်ႈၵၢင်ဝၼ်းၸၢႆႉလူးၵွၼ်ႇတႃႉ၊” ဝႃႈၼင်ႇၼႆဢေႃႈ။ ၶဝ်သွင်ၵေႃႉၼၼ်ႉသမ်ႉၵိၼ်ၶူပ်းလူၺ်ႈၵၼ်ထႅင်ႈဢေႃႈ။
မိူဝ်ႈၼၼ်ႉၵူၼ်း လေႇဝိ၊ ၵေႃႉၼၼ်ႉဢိၵ်ႇတင်းမေးၼွႆႉမၼ်းတင်းၵူၼ်းဢွၼ်ႇမၼ်းသမ်ႉၶိုၼ်းဢွၼ်ၵၼ်လုၵ်ႉလႄႈဢၢင်ႈတၵ်းၵႂႃႇၸိုင်၊ပေႃႈၼၢႆးမၼ်းလၢတ်ႈလႄႈဝႃႈ၊ “တူၺ်းလူး။ ၵၢင်ဝၼ်းၸမ်တၵ်းၶမ်ႈယဝ်ႉ။ ၵိုတ်းယူႇထႅင်ႈၶိုၼ်းၼႆႉတႃႉ။ ၸမ်တၵ်းလပ်းသိင်ႇယဝ်ႉ။ ၼွၼ်းၵႃႈတီႈၼႆႈမူၼ်ႈမူၼ်ႈပျေႃႇပျေႃႇယူႇသေၵမ်း။ မိူဝ်ႈၽုၵ်ႈလုၵ်ႉၵၢင်ၼႂ်ၸဝ်ႉၸဝ်ႉလုၵ်ႉလႄႈပွၵ်ႈမိူဝ်းႁိူၼ်းၵႂႃႇတႃႉ၊” ဝႃႈၼင်ႇၼႆသေၵေႃႈ။
မၼ်းယင်းဢမ်ႇၶႂ်ႈယူႇၵိုတ်းပူၼ်ႉၶိုၼ်းထႅင်ႈယဝ်ႉလႄႈဢွၵ်ႇၵႂႃႇသေဢေႃႈ။ မၼ်းၼၼ်ႉႁွတ်ႈထိုင်ၵႂႃႇၵႃႈတီႈဢၼ်တေႃႇၼႃႈၵၼ်တင်းဝဵင်း ယေႇပုတ်ႉ၊ ဢၼ်ဝႃႈဝဵင်း ယေႇရုသလႅမ်ႇ၊ ၼၼ်ႉလႄႈမႃႉလီႈဢၼ်ႁၢင်ႈၵွပ်းဝႆႉသွင်တူဝ်ဢိၵ်ႇတင်းမေးၼွႆႉမၼ်းၵေႃႈၵႂႃႇလူၺ်ႈမၼ်းယူႇဢေႃႈ။-
မိူဝ်ႈဢၼ်ၶဝ်ႁွတ်ႈထိုင်ၸမ်ႁိမ်းဝဵင်း ယေႇပုတ်ႉ၊ ၼၼ်ႉၸိုင်၊ၵၢင်ဝၼ်းၸမ်တၵ်းၶမ်ႈယဝ်ႉလႄႈၵူၼ်းဢွၼ်ႇမၼ်းလၢတ်ႈတီႈၸဝ်ႈမၼ်းလႄႈဝႃႈ၊ “မႃးသေၵမ်း။ ဝႄႈၶဝ်ႈၸူးၵႃႈၼႂ်းၵူၼ်း ယေႇပုသိ၊ ၸိူဝ်းၼႆႉသေလႄႈလိုဝ်ႈၼွၼ်းတႃႉႁဝ်း၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ၸဝ်ႈမၼ်းၶိုၼ်းလၢတ်ႈလႄႈဝႃႈ၊ “ႁဝ်းတၵ်းဢမ်ႇဝႄႈၸူးတီႈဝဵင်းၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ဢမ်ႇၸႂ်ႈမဵဝ်း ဢိသရေး၊ ႁဝ်းၼၼ်ႉ။ ႁဝ်းတၵ်းသိုပ်ႇၵႂႃႇၵႃႈတီႈဝဵင်း ၵိပိယႃႉ၊ လူးၵွၼ်ႇဢေႃႈ၊” ဝႃႈၼင်ႇၼႆဢေႃႈ။-
မၼ်းသမ်ႉလၢတ်ႈတီႈၵူၼ်းဢွၼ်ႇမၼ်းလႄႈဝႃႈ၊ “မႃးတႃႉ။ ႁဝ်းဢွၼ်ၵၼ်ၶတ်းၸႂ်ၵႂႃႇႁႂ်ႈႁွတ်ႈထိုင်ဝဵင်းၸိူဝ်းၼႆႉသေဝဵင်းဝဵင်းလႄႈလိုဝ်ႈၼွၼ်းၵိုတ်းၶိုၼ်းၵႃႈတီႈဝဵင်း ၵိပိယႃႉ၊ ဢမ်ႇၼၼ်ၵႃႈတီႈဝဵင်း ရႃႇမႃႉ၊ ၼၼ်ႉတႃႉႁဝ်း၊” ဝႃႈၼင်ႇၼႆသေယဝ်ႉ၊-
ၶဝ်ပူၼ်ႉသေၵႃႈတီႈၼၼ်ႈလႄႈသိုပ်ႇၶၢဝ်းတၢင်းၵႂႃႇဢေႃႈ။ မိူဝ်ႈဢၼ်ၶဝ်ႁွတ်ႈထိုင်ၵႂႃႇၵႃႈတီႈႁိမ်းဝဵင်း ၵိပိယႃႉ၊ ၵႃႈၼႂ်းဢိူင်ႇၵူၼ်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ ၼၼ်ႉၸိုင်၊ၵၢင်ဝၼ်းတူၵ်းသေဢေႃႈ။-
ၶဝ်ဝႄႈၸူးတီႈၼၼ်ႈႁႂ်ႈလႆႈၶဝ်ႈလႄႈလိုဝ်ႈၼွၼ်းၵိုတ်းၶိုၼ်းၵႃႈတီႈဝဵင်း ၵိပိယႃႉ၊ ဢေႃႈ။ မၼ်းၶဝ်ႈၵႃႈၼႂ်းဝဵင်းသေယဝ်ႉ၊ၼင်ႈယူႇၵႃႈတီႈၵၢင်တၢင်းဝဵင်းဢေႃႈ။ ၵူၺ်းၵႃႈ၊ၽူႈလႂ်ဢမ်ႇမႃးႁပ်ႉဢဝ်ၶဝ်ၶဝ်ႈၵႃႈၼႂ်းႁိူၼ်းႁႂ်ႈလႆႈလိုဝ်ႈသဝ်းၼၼ်ႉဢေႃႈ။
မိူဝ်ႈဢၼ်လပ်းသိင်ႇမႃးယဝ်ႉၼၼ်ႉၸိုင်၊ၵူၼ်းထဝ်ႈၵေႃႉၼိုင်ႈပွၵ်ႈသေၵႃႈတီႈၼႃးမႃးဢေႃႈ။ ၵေႃႉၼၼ်ႉပဵၼ်ၵူၼ်းႁၢၼ်ႉလွႆ ဢေႇၽရိမ်ႇ၊ လႄႈယူႇၵႃႈတီႈဝဵင်း ၵိပိယႃႉ၊ ၼၼ်ႉဢေႃႈ။ ၵူၼ်းဝဵင်းတင်းလၢႆပဵၼ်ၵူၼ်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ ဢေႃႈ။-
မၼ်းၼၼ်ႉမုင်ႈတူၺ်းလႄႈႁၼ်ၶႅၵ်ႇတၢင်းၵႆမီးယူႇၵႃႈတီႈၵၢင်တၢင်းဝဵင်းၼၼ်ႉသေယဝ်ႉ၊ၵူၼ်းထဝ်ႈၼၼ်ႉတွင်ႈထၢမ်လႄႈဝႃႈ၊ “သူလုၵ်ႉၵႃႈတီႈလႂ်မႃး။ သမ်ႉတေၵႂႃႇၵႃႈတီႈလႂ်၊” ဝႃႈၼင်ႇၼႆဢေႃႈ။
ၵူၼ်း လေႇဝိ၊ ၼၼ်ႉၶိုၼ်းလၢတ်ႈလႄႈဝႃႈ၊ “ႁဝ်းၶႃႈၵႂႃႇလႄႇၵႃႈတီႈဝဵင်း ပႅတ်ႉလႁႅမ်ႇ၊ ၼႂ်းဢိူင်ႇ ယုတႃႉ၊ လႄႈ၊တေႃႈလဵဝ်ၼႆႉႁဝ်းၶႃႈၶိုၼ်းပွၵ်ႈမိူဝ်းၸူးၵႃႈတီႈတီႈယူႇႁဝ်းၶႃႈဢၼ်မီးၵႃႈတီႈႁိမ်းၸဵင်ႇလႅၼ်သုတ်းႁၢၼ်ႉလွႆ ဢေႇၽရိမ်ႇ၊ ၼၼ်ႉၶႃႈဢေႃႈ။ ၽူႈလႂ်ဢမ်ႇလႆႈႁပ်ႉဢဝ်ႁဝ်းၶႃႈၶဝ်ႈလိုဝ်ႈသဝ်းၵႃႈၼႂ်းႁိူၼ်းၶဝ်ၶႃႈ။-
ယိူဝ်ႈႁႅင်ႈဢိၵ်ႇတင်းတၢင်ႇၸိူဝ်ႉတၢင်ႇပိူင်ပုၼ်ႈဢၼ်တၵ်းဢွႆႇမႃႉလီႈၵေႃႈမီးဝႆႉယူႇၶႃႈ။ ၶဝ်ႈမုၼ်းဢိၵ်ႇတင်းၼမ်ႉမၢၵ်ႇၸပိတ်ႉပုၼ်ႈၵဝ်ၶႃႈ၊ဢိၵ်ႇတင်းမႄႈယိင်းၵဝ်ၶႃႈတင်းၵူၼ်းဢွၼ်ႇဢၼ်ၸွမ်းလူၺ်ႈၵၼ်တင်းႁဝ်းၶႃႈၼၼ်ႉၵေႃႈမီးဝႆႉယဝ်ႉၶႃႈဢေႃႈ။ ႁဝ်းၶႃႈဢမ်ႇလူဝ်ႇထႅင်ႈသေၸိူဝ်ႉသေပိူင်ၶႃႈ၊” ဝႃႈၼင်ႇၼႆဢေႃႈ။
ၵူၼ်းထဝ်ႈၼၼ်ႉၵေႃႈလၢတ်ႈလႄႈဝႃႈ၊ “ၵဝ်ႁပ်ႉတွၼ်ႈဢဝ်သူဢေႃႈ။ ၵဝ်တၵ်းပၼ်ၵႃႈဢၼ်သူလူဝ်ႇၼၼ်ႉဢေႃႈ။ ၵူၺ်းၵႃႈ၊ယႃႇပေၵိုတ်းလိုဝ်ႈပူၼ်ႉၶိုၼ်းၵႃႈတီႈၵၢင်တၢင်းၼႆႉသေၵမ်း၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈမၼ်းႁပ်ႉဢဝ်ၶဝ်ၶဝ်ႈၵႃႈၼႂ်းႁိူၼ်းမၼ်းသေယဝ်ႉ၊ဢွႆႇပၼ်မႃႉလီႈၶဝ်ၸိူဝ်းၼၼ်ႉဢေႃႈ။ ၶဝ်သုၵ်ႈတိၼ်သေလႄႈၵိၼ်ၶူပ်းဢေႃႈ။
ၼႂ်းမိူဝ်ႈဢၼ်ၶဝ်ယင်းတိုၵ်ႉမူၼ်ႈၸႂ်ပျေႃႇၸႂ်ၸိူဝ်ႉၼင်ႇၼၼ်ယူႇၼၼ်ႉၸိုင်၊ၵူၼ်းဝဵင်းဢၼ်ၵိလေႇသႃႇမႆႈႁွၼ်ႉၼႃႇၵမ်ႈၽွင်ႈဢွၼ်ၵၼ်မႃးလွမ်ႉႁွပ်ႈႁိူၼ်းသေလႄႈပေႃႉထုပ်ႉၽၵ်းတူဢေႃႈ။ တီႈၵူၼ်းထဝ်ႈၸဝ်ႈႁိူၼ်းၼၼ်ႉၵေႃႈၶဝ်ႁွင်ႉလႄႈဝႃႈ၊ “ဢဝ်ၵူၼ်းၸၢႆးဢၼ်ၶဝ်ႈၵႃႈၼႂ်းႁိူၼ်းမႂ်းၼႆႉၼၼ်ႉဢွၵ်ႇမႃးႁႂ်ႈႁဝ်းလႆႈၼွၼ်းပျေႃႇလူၺ်ႈၵၼ်တင်းမၼ်းတႃႉ၊” ဝႃႈၼင်ႇၼႆဢေႃႈ။
ၵူၼ်းထဝ်ႈၸဝ်ႈႁိူၼ်းၼၼ်ႉဢွၵ်ႇၵႂႃႇတွင်းပၢၼ်ႇတီႈၶဝ်လႄႈဝႃႈ၊ “ပီႈၼွင်ႉၶဝ်႟။ ယႃႇပေႁဵတ်းတၢင်းဢၼ်ႁုၵ်းဢၼ်ႁၢႆႉၸိူဝ်ႉၼင်ႇၼႆသေၵမ်း။ ၵွပ်ႈပိူဝ်ႈၵေႃႉၼႆႉပဵၼ်ၶႅၵ်ႇၵဝ်ၶႃႈလႄႈယႃႇပေႁဵတ်းမေႇထုင်ႇဢၼ်ဢမ်ႇတြႃးၼႆႉသေၵမ်း။-
တူၺ်းလူး။ ၵႃႈတီႈၼႆႈမီးလုၵ်ႈယိင်းသၢဝ်ၵဝ်ၶႃႈဢၼ်ပဵၼ်ၵၼ်ႇၺႃႇဢိၵ်ႇတင်းမေးၼွႆႉမၼ်းၼၼ်ႉၶႃႈဢေႃႈ။ ၵဝ်ၶႃႈတၵ်းဢဝ်ၶဝ်သွင်ၵေႃႉၼႆႉဢၢပ်ႈပၼ်ၶႃႈဢေႃႈ။ ၵႃႈၼင်ႇဢၼ်ဢလူဝ်ႇၵၢင်ၸႂ်သူမီးၼၼ်ႉႁဵတ်းတီႈၶဝ်ၼႆႉသေၵမ်း။ ၵူၺ်းၵႃႈ၊ယႃႇပေႁဵတ်းတၢင်းဢၼ်ႁၢႆႉဢၼ်မိူၵ်ႈၸိူဝ်ႉၼင်ႇၼႆတီႈၵေႃႉၼႆႉသေၵမ်း၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊ၵူၼ်းၸၢႆးၸိူဝ်းၼၼ်ႉဢမ်ႇထွမ်ႇဢဝ်ၵႂၢမ်းမၼ်း။ ပိူဝ်ႈၼႆလႄႈၵူၼ်း လေႇဝိ၊ ၼၼ်ႉဢဝ်မေးၼွႆႉမၼ်းဢွၵ်ႇပၼ်တီႈၶဝ်ဢေႃႈ။ ၶဝ်ၼၼ်ႉႁဵတ်းဢထမ်ႇမႃႉယႃႉၵဝ်းမၼ်းတင်းၶိုၼ်းတေႃႇထိုင်ႁွတ်ႈၶိင်ႇၵၢင်ၼႂ်သေယဝ်ႉ၊ႁူဝ်မိူင်းသႂ်ယဝ်ႉၸင်ႇပွႆႇမၼ်းၵႂႃႇဢေႃႈ။
မိူဝ်ႈဢၼ်ႁူဝ်မိူင်းသႂ်ၼၼ်ႉမႄႈယိင်းၼၼ်ႉမႃးလႄႈလူမ်ႉယူႇၵႃႈတီႈၽၢႆႇၼႃႈၽၵ်းတူႁိူၼ်းၵူၼ်းထဝ်ႈ၊တီႈဢၼ်ၽူဝ်မၼ်းယူႇၼၼ်ႉဢေႃႈ။ မၼ်းမီးယူႇၵႃႈတီႈၼၼ်ႈတေႃႇထိုင်ႁွတ်ႈမိူင်းလႅင်းဢေႃႈ။
ၶိင်ႇၵၢင်ၼႂ်ၼၼ်ႉၽူဝ်မၼ်းလုၵ်ႉလႄႈၽုၺ်ႇၽၵ်းတူႁိူၼ်းဢွၵ်ႇၵႂႃႇႁႂ်ႈလႆႈၵႂႃႇတၢင်းပႆတၢင်းဢေႃႈ။ မိူဝ်ႈၼၼ်ႉမၼ်းႁၼ်မေးၼွႆႉမၼ်းလူမ်ႉဝႆႉယူႇၵႃႈတီႈၽၢႆႇၼႃႈၽၵ်းတူႁိူၼ်းလႄႈဢဝ်မိုဝ်းမၼ်းယိုၼ်းၸူးတီႈၽၵ်းတူယူႇဢေႃႈ။-
မၼ်းၵေႃႈဝႃႈ၊ “လုၵ်ႉတႃႉ။ ဢွၼ်ၵၼ်ၵႂႃႇတႃႉႁဝ်း။” ဝႃႈၼင်ႇၼႆသေၵေႃႈ၊မေးၼွႆႉမၼ်းဢမ်ႇၶိုၼ်းတွပ်ႇၶိုၼ်းလၢတ်ႈလႄႈယူႇဢေႃႈ။ မၼ်းၵေႃႈဢဝ်တူဝ်မေးၼွႆႉမၼ်းတၢင်ႇၵႃႈၼိူဝ်မႃႉလီႈသေလႄႈမိူဝ်းၵႂႃႇႁိူၼ်းမၼ်းသေဢေႃႈ။
မိူဝ်ႈဢၼ်မၼ်းႁွတ်ႈထိုင်ၵႃႈၼႂ်းႁိူၼ်းမၼ်းၸိုင်၊မၼ်းဢဝ်တင်းၽႃႉမိတ်ႈသေလႄႈယိပ်းၵမ်တူဝ်မေးၼွႆႉမၼ်းသေယဝ်ႉ၊တႅပ်းၸွမ်းပွင်ႈလုပ်ႇမၼ်းပဵၼ်ပွင်ႈပဵၼ်ပွင်ႈႁဵတ်းသိပ်းသွင်ပွတ်းသေလႄႈဢဝ်ပၼ်ၵႂႃႇၵႃႈၼႂ်းမဵဝ်း ဢိသရေး၊ ယေႈၸိူဝ်ႉၶိူဝ်းယေႈပွတ်းဢေႃႈ။-
မၼ်းသင်ႇႁႂ်ႈၵူၼ်းဢၼ်ဢဝ်ၸိူဝ်းၼၼ်ႉၵႂႃႇသူင်ႇပၼ်ၼၼ်ႉလၢတ်ႈတီႈၵူၼ်းမဵဝ်း ဢိသရေး၊ ၵူႈၵေႃႉၵူႈၵူၼ်းလႄႈဝႃႈၸမ်ႉ၊ “ၸႃႉၸဵမ်မိူဝ်ႈဢၼ်ၵူၼ်းမဵဝ်း ဢိသရေး၊ တင်းလၢႆဢွၵ်ႇမိူင်း ဢေးၵျိပ်ႉ၊ မႃးတေႃႇထိုင်ႁွတ်ႈဝၼ်းမိူဝ်ႈၼႆႉၸွင်ႇမီးဢမုမဵဝ်းၼႆႉယၢမ်ႈပဵၼ်ႁိုဝ်း။ ၸွင်ႇယၢမ်ႈႁၼ်ႁိုဝ်း။ ဢွၼ်ၵၼ်ၶႆႈၸႂ်ဝူၼ်ႉၸႂ်လႄႈတိူင်ႇပၢင်ႇၸီႇယၢင်ႇသေၵမ်း၊” ဝႃႈၼင်ႇၼႆဢေႃႈ။ ၵူၼ်းဢၼ်ႁၼ်ၸိူဝ်းၼၼ်ႉဢွၼ်ၵၼ်လၢတ်ႈလႄႈဝႃႈ၊ “ၸႃႉၸဵမ်မိူဝ်ႈၼၼ်ႉလႄႈဢမုၸိူဝ်ႉၼင်ႇၼႆဢမ်ႇတွၼ်ႉပဵၼ်၊ဢမ်ႇတွၼ်ႉႁၼ်သေပွၵ်ႈ၊ ႁဝ်းထုၵ်ႇလီႁဵတ်းၸိူဝ်ႉၼင်ႇႁိုဝ်တိူင်ႇပၢင်ႇၵၼ်၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၵူၼ်းမဵဝ်း ဢိသရေး၊ ၵႃႈမီးတင်းသဵင်ႈတင်းလူင်တႄႇဢဝ်ဝဵင်း တၢၼ်ႇ၊ ဢၼ်မီးၽၢႆႇတၢင်းႁွင်ႇတေႃႇထိုင်ႁွတ်ႈဝဵင်း ပေႇရသေးၽႃႉ၊ ဢၼ်မီးၽၢႆႇတၢင်းၸၢၼ်းဢိၵ်ႇတင်းမိူင်း ၵိလတ်ႉ၊ ဢၼ်မီးၽၢႆႇဝၼ်းဢွၵ်ႇၸိူဝ်းၼၼ်ႉဢွၼ်ၵၼ်ထွမ်ႇဢဝ်သဵင်ၵႂၢမ်းဢၼ်ႁွင်ႉၼၼ်ႉဢေႃႈ။ ၶဝ်ၸုတုမ်ၵၼ်မႃးပဵၼ်သဵင်လဵဝ်ၵၼ်ၵႃႈတီႈၽၢႆႇၼႃႈၽြႃးပဵၼ်ၸဝ်ႈၵႃႈတီႈၼႂ်းဝဵင်း မိၸပႃႇ၊ ဢေႃႈ။-
ၵူၼ်းဢၼ်ပဵၼ်ၵႄႇပဵၼ်ႁူဝ်ၵႃႈၼႂ်းၸိူဝ်ႉၶိူဝ်းၵူၼ်းမဵဝ်း ဢိသရေး၊ ၵူႈၶိူဝ်းၶိူဝ်းၼၼ်ႉၵေႃႈဢွၼ်ၵၼ်ၶဝ်ႈပႃးၸုတုမ်ၼႂ်းၵူၼ်းၽြႃးပဵၼ်ၸဝ်ႈလႄႈမီးၵူၼ်းသိုၵ်းတပ်ႉတိၼ်သီႇသႅၼ်ၵေႃႉဢေႃႈ။-
ယၢမ်းမိူဝ်ႈၼၼ်ႉၵူၼ်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ တင်းလၢႆလႆႈငိၼ်းလွင်ႈဢၼ်ၵူၼ်းမဵဝ်း ဢိသရေး၊ တင်းလၢႆၶိုၼ်ႈၸူးတီႈဝဵင်း မိၸပႃႇ၊ ၼၼ်ႉဢေႃႈ။ မဵဝ်း ဢိသရေး၊ ၶဝ်ဢွၼ်ၵၼ်တွင်ႈထၢမ်လႄႈဝႃႈ၊ “ဢမုဢၼ်ႁုၵ်းဢၼ်ႁၢႆႉၼႆႉပဵၼ်မႃးလႆႈၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။-
ၵူၼ်း လေႇဝိ၊ ၽူဝ်မႄႈယိင်းဢၼ်လႆႈတၢႆၵႂႃႇၼၼ်ႉမွၵ်ႇလၢတ်ႈလႄႈဝႃႈ၊ “ၵဝ်ၶႃႈဢိၵ်ႇတင်းမေးၼွႆႉၵဝ်ၶႃႈႁွတ်ႈမႃးၵႃႈတီႈဝဵင်း ၵိပိယႃႉ၊ ၵႃႈၼႂ်းဢိူင်ႇၵူၼ်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ ႁႂ်ႈလႆႈလိုဝ်ႈၵိုတ်းၶိုၼ်းၵႃႈတီႈၼၼ်ႈၶႃႈဢေႃႈ။-
ၼႂ်းၶိုၼ်းၼၼ်ႉၵူၼ်းၸၢႆးဝဵင်း ၵိပိယႃႉ၊ တင်းလၢႆဢွၼ်ၵၼ်မႃးႁႂ်ႈလႆႈတိုၵ်းတေႃးၵဝ်ၶႃႈလႄႈဢွၼ်ၵၼ်လွမ်ႉႁွပ်ႈႁိူၼ်းၼၼ်ႉဢေႃႈ။ ၶဝ်ဢၢင်ႈတၵ်းဢဝ်ၵဝ်ၶႃႈတၢႆဢေႃႈ။ ၵူၺ်းၵႃႈ၊ၶဝ်ႁဵတ်းဢထမ်ႇမႃႉယႃႉၵၼ်ႉမေးၵဝ်ၶႃႈထၢၼ်ႈပေႃးတၢႆၵႂႃႇၶႃႈဢေႃႈ။-
ၵဝ်ၶႃႈၸင်ႇဢဝ်တူဝ်တၢႆမေးၵဝ်ၶႃႈၼၼ်ႉတႅပ်းႁဵတ်းပွတ်းႁဵတ်းတွၼ်ႈသေယဝ်ႉ၊ဢဝ်သူင်ႇၵႂႃႇၵႃႈၼႂ်းမဵဝ်း ဢိသရေး၊ သိပ်းသွင်မဵဝ်းၼႆႉယေႈမဵဝ်းယေႈပွတ်းသေဢေႃႈ။ ၶဝ်ၸိူဝ်းၼၼ်ႉႁဵတ်းတၢင်းဢၼ်ႁၢႆႉဢၼ်ယုတ်ႈဢမုမေႇထုင်ႇဢၼ်ဢမ်ႇတြႃးၵႃႈၼႂ်းမဵဝ်း ဢိသရေး၊ ၶႃႈယဝ်ႉ။-
ၵွပ်ႈပိူဝ်ႈၼႆလႄႈသူၸဝ်ႈဢၼ်ပဵၼ်မဵဝ်း ဢိသရေး၊ ၵႃႈမီးတင်းသဵင်ႈတင်းလူင်ၶဝ်႟။ တေႃႈလဵဝ်ၼႆႉဢွၼ်ၵၼ်တိူင်ႇပၢင်ႇၵၼ်သေလႄႈၸီႇယၢင်ႇၵႃႈတီႈၼႆႈသေၵမ်းၶႃႈ၊” ဝႃႈၼင်ႇၼႆဢေႃႈ။
ၵူၼ်းၵႃႈမီးတင်းသဵင်ႈတင်းလူင်ဢွၼ်ၵၼ်လုၵ်ႉထၢၼ်ႈပေႃးမိူၼ်ၵူၼ်းၵေႃႉလဵဝ်ၵူၺ်းၼၼ်ႉသေလႄႈလၢတ်ႈဝႃႈ၊ “ႁဝ်းတေဢမ်ႇၶိုၼ်းမိူဝ်းၸူးတီႈသုမ်ႉထဵင်ႁဝ်းသေၵေႃႉသေၵူၼ်း။ ႁဝ်းတၵ်းဢမ်ႇၶိုၼ်းမိူဝ်းၸူးတီႈႁိူၼ်းတီႈယေးႁဝ်းသေၵေႃႉသေၵူၼ်းယဝ်ႉ။-
ႁဝ်းတၵ်းႁဵတ်းၸိူဝ်ႉၼင်ႇႁိုဝ်ဝႃႈၼႆၸမ်ႉ၊ႁဝ်းတၵ်းတူၵ်းၸႃႇၵွၵ်ႈသေလႄႈလိူၵ်ႈဢဝ်ၵူၼ်းဢၼ်တၵ်းၶီႇသိုၵ်းၵႂႃႇတိုၵ်းၵူၼ်းဝဵင်း ၵိပိယႃႉ၊ ဢေႃႈ။-
ၵႃႈၼႂ်းၸိူဝ်ႉၶိူဝ်းၵူၼ်းမဵဝ်း ဢိသရေး၊ တင်းသဵင်ႈတင်းလူင်ၼႆႉၼႂ်းသိပ်းပုၼ်ႈၼၼ်ႉပုၼ်ႈၼိုင်ႈတၵ်းလႆႈၸွမ်းသူင်ႇၸရိပ်ႈတၢင်းၵိၼ်ၵူၼ်းသိုၵ်းဢေႃႈ။ ၵူၼ်းဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉၸမ်ႉ၊တၵ်းလႆႈၶီႇသိုၵ်းၵႂႃႇတွပ်ႇတႅၼ်းဢပျတ်ႈတၢမ်ႇတီႈၵူၼ်းဝဵင်း ၵိပိယႃႉ၊ ပုၼ်ႈဢမုမေႇထုင်ႇဢၼ်ဢမ်ႇတြႃးဢၼ်ၶဝ်ႁဵတ်းၼႂ်းမဵဝ်း ဢိသရေး၊ ၼၼ်ႉဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၵူၼ်းမဵဝ်း ဢိသရေး၊ တင်းသဵင်ႈတင်းလူင်ၼၼ်ႉမီးၼမ်ႉၼိုင်ႈၸႂ်လဵဝ်ၵၼ်လႄႈၸုတုမ်ၵၼ်ႁႂ်ႈလႆႈတိုၵ်းဝဵင်းၼၼ်ႉဢေႃႈ။
ၵူၼ်းမဵဝ်း ဢိသရေး၊ ၵူႈၶိူဝ်းၶိူဝ်းၼၼ်ႉပွႆႇၸႂ်ႉၵူၼ်းၵႂႃႇၵႃႈၼႂ်းဢိူင်ႇၸိူဝ်ႉၶိူဝ်းၵူၼ်း ပိၼ်ႇယႃႇမိၼ်ႇ၊ ၵူႈတီႈၵူႈလႅၼ်ၼၼ်ႉႁႂ်ႈၵႂႃႇဝႃႈ၊ “ဢမုဢၼ်ႁုၵ်းဢၼ်ႁၢႆႉဢၼ်သူႁဵတ်းမႃးယဝ်ႉၼႆႉပဵၼ်ၸိူဝ်ႉၼင်ႇႁိုဝ်။-
တေႃႈလဵဝ်ၼႆႉၵူၼ်းဢထမ်ႇမႃႉဢၼ်မီးၼႂ်းဝဵင်း ၵိပိယႃႉ၊ ၸိူဝ်းၼၼ်ႉဢၢပ်ႈပၼ်တီႈႁဝ်းႁႂ်ႈႁဝ်းလႆႈဢဝ်ၶဝ်တၢႆလႄႈပႄႇၽဵဝ်ႈဢပျတ်ႈတုၸရိူၵ်ႈပႅတ်ႈသေၵႃႈၼႂ်းမဵဝ်း ဢိသရေး၊ သေၵမ်း၊” ဝႃႈၼင်ႇၼႆဢေႃႈ။ ၵူၺ်းၵႃႈ၊ၵူၼ်းမဵဝ်း ပိၼ်ႇယႃႇမိၼ်ႇ၊ ၸိူဝ်းၼၼ်ႉယင်းဢမ်ႇဝႆႉဢယေးတီႈၵႂၢမ်းပီႈၼွင်ႉမဵဝ်း ဢိသရေး၊ တင်းလၢႆၼၼ်ႉလႄႈယူႇဢေႃႈ။-
ၵႃႈၼႂ်းဝဵင်းတင်းလၢႆၵႃႈပဵၼ်မဵဝ်း ပိၼ်ႇယႃႇမိၼ်ႇ၊ တင်းသဵင်ႈတင်းလူင်ဢွၼ်ၵၼ်ၸုတုမ်ၵၼ်မႃးၵႃႈတီႈဝဵင်း ၵိပိယႃႉ၊ ႁႂ်ႈလႆႈၶီႇသိုၵ်းတိုၵ်းတေႃးၵၼ်တင်းၵူၼ်းမဵဝ်း ဢိသရေး၊ တင်းလၢႆၼၼ်ႉဢေႃႈ။-
ၼႂ်းဝၼ်းၼၼ်ႉမဵဝ်း ပိၼ်ႇယႃႇမိၼ်ႇ၊ ဢၼ်လုၵ်ႉသေၵူႈဝၢၼ်ႈၵူႈဝဵင်းမႃးၼၼ်ႉၼပ်ႉဢၢၼ်ႇမီးၵူၼ်းသိုၵ်းဢၼ်လၢၵ်ႈၼၢၵ်ႈၸေးမိုဝ်းသွင်မိုၼ်ႇပၢႆႁူၵ်းႁဵင်ၵေႃႉဢေႃႈ။ ၵႃႈၼႂ်းၵူၼ်းဝဵင်း ၵိပိယႃႉ၊ ၼၼ်ႉၵေႃႈမီးၵူၼ်းၸၢႆးဢၼ်လိူၵ်ႈဢဝ်မႃးၸဵတ်းပၢၵ်ႇၵေႃႉဢေႃႈ။-
ၶဝ်ၸိူဝ်းၼႆႉပဵၼ်ၵူၼ်းမိုဝ်းသၢႆႉၵူၺ်းၵူၺ်းလႄႈၶဝ်ၸၢင်ႈဢဝ်မၢၵ်ႇၵၢင်ႇၵူင်ပိုတ်းႁႂ်ႈမႅၼ်ႈသဵၼ်ႈၶူၼ်ႁူဝ်သဵၼ်ႈၼိုင်ႈဢမ်ႇတွၼ်ႉႁႂ်ႈပိူင်ႈၼၼ်ႉဢေႃႈ။-
ၵူၼ်းၸိူဝ်ႉၶိူဝ်းမဵဝ်း ဢိသရေး၊ ဢၼ်ဢမ်ႇပႃးမဵဝ်း ပိၼ်ႇယႃႇမိၼ်ႇ၊ ၼၼ်ႉၸမ်ႉ၊ၵူၼ်းသိုၵ်းဢၼ်ၽိုၵ်းဝႆႉလီလီလႄႈလၢၵ်ႈၼၢၵ်ႈၸေးမိုဝ်းဝႆႉၼၼ်ႉမီးသီႇသႅၼ်ဢေႃႈ။
ၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ၶိုၼ်ႈၵႂႃႇၸူးတီႈဝဵင်း ပေႇသလႃႉ၊ ၵႃႈတီႈထႃႇၼႃႉဢၼ်ဝႆႈၽြႃးၼၼ်ႉသေယဝ်ႉ၊လဝ်ႈထၢမ်တီႈ ထႃႇဝရႃႉၽြႃး၊ လႄႈဝႃႈ၊ “ၸိူဝ်ႉၶိူဝ်းဢၼ်လႂ်တၵ်းလႆႈၶီႇသိုၵ်းၶိုၼ်ႈတိုၵ်းတေႃးၵၼ်တင်းၵူၼ်းမဵဝ်း ပိၼ်ႇယႃႇမိၼ်ႇ၊ ၼၼ်ႉဢွၼ်တၢင်းသေပိူၼ်ႈတီႈၶႃႈ၊” ဝႃႈၼင်ႇၼႆဢေႃႈ။ ထႃႇဝရႃႉၽြႃး၊ ၶိုၼ်းလၢတ်ႈလႄႈဝႃႈ၊ “ၸိူဝ်ႉၶိူဝ်း ယုတႃႉ၊ တၵ်းလႆႈၶီႇသိုၵ်းၶိုၼ်ႈဢွၼ်တၢင်းသေပိူၼ်ႈဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈၶိင်ႇၵၢင်ၼႂ်ၸဝ်ႉၸဝ်ႉၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ၶီႇသိုၵ်းၵႂႃႇၶျႃးပၢင်တပ်ႉၶဝ်ၵႃႈတီႈႁိမ်းဝဵင်း ၵိပိယႃႉ၊ သေယဝ်ႉ၊-
ၶဝ်ၶီႇသိုၵ်းၶိုၼ်ႈၵႂႃႇႁႂ်ႈလႆႈတိုၵ်းၵၼ်တင်းတပ်ႉသိုၵ်းၵူၼ်း ပိၼ်ႇယႃႇမိၼ်ႇ၊ ၶဝ်လႄႈၶဝ်ယၼ်ႇတပ်ႉၶပ်ႉတပ်ႉၶဝ်သိုဝ်ႈၵၼ်တင်းဝဵင်း ၵိပိယႃႉ၊ ဝႆႉဢေႃႈ။-
တပ်ႉသိုၵ်းၵူၼ်းမဵဝ်း ပိၼ်ႇယႃႇမိၼ်ႇ၊ ၶဝ်ဢွၵ်ႇဝဵင်းမႃးတိုၵ်းၽၼ်းလႄႈၼႂ်းဝၼ်းၼၼ်ႉၵူၼ်းမဵဝ်း ဢိသရေး၊ လူမ်ႉတၢႆၵႃႈၼိူဝ်လိၼ်သွင်ႇမိုၼ်ႇပၢႆသွင်ႁဵင်ၵေႃႉဢေႃႈ။-
ၶဝ်ဢွၼ်ၵၼ်ၶီႇသိုၵ်းၶိုၼ်ႈၵႂႃႇတိုၵ်းတပ်ႉမဵဝ်း ပိၼ်ႇယႃႇမိၼ်ႇ၊ ထႅင်ႈဝၼ်းတီႈသွင်ဢေႃႈ။-
ဝၼ်းတီႈသွင်ၼၼ်ႉၵေႃႈမဵဝ်း ပိၼ်ႇယႃႇမိၼ်ႇ၊ တင်းလၢႆဢွၵ်ႇဝဵင်း ၵိပိယႃႉ၊ မႃးတိုၵ်းၽၼ်းလႄႈဢဝ်ၵူၼ်းသိုၵ်း ဢိသရေး၊ တင်းလၢႆဢၼ်ၽိုၵ်းဝႆႉလီလီၼၼ်ႉလူမ်ႉတၢႆမိုၼ်ႇပၢႆပႅတ်ႇႁဵင်ၵေႃႉဢေႃႈ။-
တပ်ႉသိုၵ်းမဵဝ်း ဢိသရေး၊ တင်းသဵင်ႈတင်းလူင်ၶိုၼ်းပွၵ်ႈၵႂႃႇၸူးတီႈဝဵင်း ပေႇသလႃႉ၊ သေယဝ်ႉ၊ၶုပ်ႉမူပ်ႇၵႃႈတီႈၽၢႆႇၼႃႈ ထႃႇဝရႃႉၽြႃး၊ လႄႈႁွင်ႉႁႆႈယူႇ၊ၵမ်တၢင်းၵိၼ်ၼႂ်းဝၼ်းၼၼ်ႉယူႇတေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။ ၶဝ်သၢၵ်ႈလူႇတူဝ်တၢင်းလူႇဢၼ်တုတ်ႇၽႆးဢိၵ်ႇတင်းၶိူင်ႈတၢင်းလူႇမိၵ်ႈသႁႃႇယႃႉၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢေႃႈ။-
ၵွပ်ႈပိူဝ်ႈတိူၵ်ႈပတိၺိၺ်ႇၽြႃးပဵၼ်ၸဝ်ႈမီးၵႃႈတီႈဝဵင်း ပေႇသလႃႉ၊ ၼႂ်းၶိင်ႇမိုဝ်ႉဝၼ်းၼၼ်ႉလႄႈ၊ ၽိၼႁတ်ႉ၊ လုၵ်ႈၸၢႆး ဢေးလႃႇၸႃႇ၊ လၢၼ်ၸၢႆး ဢႃႇရုၼ်ႇ၊ ၼၼ်ႉဢဝ်ပုၼ်ႈၽွၼ်းၼႃႈၵၢၼ်တိူၵ်ႈတႃႇၸဝ်ႈၼၼ်ႉယူႇဢေႃႈ။ ၵူၼ်းတင်းလၢႆလဝ်ႈထၢမ်တီႈ ထႃႇဝရႃႉၽြႃး၊ လႄႈဝႃႈ၊-
“ၶႃႈၸဝ်ႈႁဝ်းၶဝ်သမ်ႉတၵ်းလႆႈၶိုၼ်ႈၵႂႃႇတိုၵ်းၵၼ်တင်းပီႈၼွင်ႉၶႃႈၸဝ်ႈႁဝ်းၶဝ်မဵဝ်း ပိၼ်ႇယႃႇမိၼ်ႇ၊ ၸိူဝ်းၼၼ်ႉထႅင်ႈတီႈၶႃႈႁိုဝ်း။ တၵ်းလႆႈၶၢမ်ႇတူၵ်းသုမ်းတီႈၶႃႈႁိုဝ်း၊” ဝႃႈၼင်ႇၼႆဢေႃႈ။ ထႃႇဝရႃႉၽြႃး၊ ၶိုၼ်းလၢတ်ႈလႄႈဝႃႈ၊ “ၵႂႃႇတိုၵ်းတႃႉ။ ၼႂ်းဝၼ်းမိူဝ်ႈၽုၵ်ႈၵဝ်တၵ်းႁႂ်ႈသူဢွင်ႇသိုၵ်းၵႃႈၼိူဝ်ၶဝ်ဢေႃႈ၊” ဝႃႈၼင်ႇၼႆဢေႃႈ။
ၼင်ႇၼၼ်လႄႈၵူၼ်းမဵဝ်း ဢိသရေး၊ တင်းလၢႆဝႆႉၵူၼ်းသိုၵ်းၵမ်ႈၽွင်ႈတဵတ်ႇမႅပ်းပႂ်ႉလွမ်ႉႁွပ်ႈဝဵင်း ၵိပိယႃႉ၊ ဝႆႉဢေႃႈ။-
ၼႂ်းဝၼ်းဢၼ်ထူၼ်ႈတီႈသၢမ်ဝၼ်းၼၼ်ႉၵူၼ်းမဵဝ်း ဢိသရေး၊ တင်းလၢႆၶီႇသိုၵ်းၵႂႃႇႁႂ်ႈလႆႈတိုၵ်းၵၼ်တင်းတပ်ႉသိုၵ်းမဵဝ်း ပိၼ်ႇယႃႇမိၼ်ႇ၊ လႄႈယၼ်ႇတပ်ႉၶပ်ႉတပ်ႉၶိုၼ်ႈၸူးတီႈဝဵင်း ၵိပိယႃႉ၊ မိူၼ်ၸိူဝ်ႉၼင်ႇဢွၼ်တၢင်းၼၼ်ႉၼင်ႇၵဝ်ႇဢေႃႈ။-
ၵူၼ်း ပိၼ်ႇယႃႇမိၼ်ႇ၊ ၸိူဝ်းၼၼ်ႉဢွၵ်ႇဝဵင်းမႃးတိုၵ်းလႄႈၵႆယၢၼ်ၵၼ်တင်းဝဵင်းၵႂႃႇဢေႃႈ။ ၶဝ်တႄႇၸႃႉဢဝ်ၵူၼ်း ဢိသရေး၊ ၶဝ်တၢႆၵမ်ႈၽွင်ႈၵႃႈၼႂ်းၵၢင်ပၢင်ႇဢၼ်ၸွမ်းသဵၼ်ႈတၢင်းၵႂႃႇၸူးတီႈဝဵင်း ပေႇသလႃႉ၊ တင်းသဵၼ်ႈတၢင်းဢၼ်ၵႂႃႇၸူးတီႈဝဵင်း ၵိပိယႃႉ၊ ၼၼ်ႉဢေႃႈ။ ၶဝ်ဢဝ်ၵူၼ်းမဵဝ်း ဢိသရေး၊ တၢႆသၢမ်သိပ်းၵေႃႉၸမ်ၸမ်ဢေႃႈ။-
ၵူၼ်း ပိၼ်ႇယႃႇမိၼ်ႇ၊ ၸိူဝ်းၼၼ်ႉထၢင်ႇဝႃႈ၊ “ႁဝ်းသမ်ႉပႄႉၶဝ်ထႅင်ႈမိူၼ်ၸိူဝ်ႉၼင်ႇၵမ်းဢွၼ်တၢင်းၼၼ်ႉယဝ်ႉ၊” ဝႃႈၼင်ႇၼႆသေၵေႃႈ၊ၵူၼ်းမဵဝ်း ဢိသရေး၊ တင်းလၢႆသမ်ႉဝႃႈ၊ “ႁဝ်းဢွၼ်ၵၼ်သုတ်ႉႁူၼ်တႃႉႁဝ်း။ ႁဝ်းယွၵ်ႇႁႂ်ႈၶဝ်ၵႆယၢၼ်ၵၼ်တင်းဝဵင်းဢၼ်ၸူးၵႃႈတီႈသဵၼ်ႈတၢင်းတင်းလၢႆတႃႉႁဝ်း၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈတပ်ႉသိုၵ်းငဝ်ႈငုၼ်းၵူၼ်းမဵဝ်း ဢိသရေး၊ ၶဝ်သုတ်ႉႁူၼ်ၵႂႃႇၸူးတီႈဝဵင်း ပႃႇလႃႉတႃႇမႃႇ၊ ဢေႃႈ။ မိူဝ်ႈၼၼ်ႉတပ်ႉသိုၵ်း ဢိသရေး၊ ဢၼ်တဵတ်ႇမႅပ်းပႂ်ႉယူႇၸိူဝ်းၼၼ်ႉၽုတ်းဢွၵ်ႇမႃးသေၵႃႈတီႈဢၼ်ၶဝ်တဵတ်ႇမႅပ်းယူႇၵႃႈၼႂ်းႁိၼ်ၽႃလဵပ်ႈႁွပ်ႈဝဵင်း ၵိပိယႃႉ၊ ၼၼ်ႉဢေႃႈ။-
ၵူၼ်းၸၢႆးဢၼ်လိူၵ်ႈဢဝ်ဝႆႉၵႃႈၼႂ်း ဢိသရေး၊ မိုၼ်ႇၼိုင်ႈတိုၵ်းတေႃးဝဵင်း ၵိပိယႃႉ၊ လႄႈၼႃႈသိုၵ်းၼၼ်ႉပဵၼ်ဢၼ်ၵျၢမ်းထၢမ်းၼႃႇလူင်လၢင်ဢေႃႈ။ ၼႂ်းဝႃႈၼၼ်သေၵေႃႈၵူၼ်း ပိၼ်ႇယႃႇမိၼ်ႇ၊ ၶဝ်ယင်းဢမ်ႇပႆႇႁုလွင်ႈဢၼ်ၶဝ်ၸမ်တၵ်းႁွတ်ႈထိုင်တၢင်းဢၼ်လုသုမ်းၼၼ်ႉလူးၵွၼ်ႇဢေႃႈ။-
ထႃႇဝရႃႉၽြႃး၊ ပၼ်ႁႂ်ႈၵူၼ်း ဢိသရေး၊ ဢွင်ႇသိုၵ်းၵႃႈၼိူဝ်တပ်ႉမဵဝ်း ပိၼ်ႇယႃႇမိၼ်ႇ၊ လႄႈၼႂ်းဝၼ်းၼၼ်ႉၵူၼ်း ဢိသရေး၊ ၶဝ်တိုၵ်းၽၼ်းရၢၼ်ႇသူႇၶဝ်ဢၼ်ယိပ်းလၢၵ်ႈၼၢၵ်ႈၸေးမိုဝ်းၼၼ်ႉတၢႆပႅတ်ႈသွင်မိုၼ်ႇႁႃႈႁဵင်ပၢႆပၢၵ်ႇၼိုင်ႈဢေႃႈ။-
ၼင်ႇၼၼ်လႄႈၵူၼ်း ပိၼ်ႇယႃႇမိၼ်ႇ၊ ၸိူဝ်းၼၼ်ႉႁုႁၼ်လွင်ႈဢၼ်ၶဝ်တူၵ်းသုမ်းယဝ်ႉၼၼ်ႉဢေႃႈ။ တပ်ႉသိုၵ်းငဝ်ႈငုၼ်းၵူၼ်းမဵဝ်း ဢိသရေး၊ ၶဝ်သုတ်ႉႁူၼ်ပၢႆႈၵူၼ်းမဵဝ်း ပိၼ်ႇယႃႇမိၼ်ႇ၊ ၵႂႃႇၵွပ်ႈပိူဝ်ႈၶဝ်လႆႈၸႂ်မီးႁႅင်းလူၺ်ႈၵူၼ်းၸိူဝ်းဢၼ်ၶဝ်ပႂ်ႉတဵတ်ႇမႅပ်းယူႇၵႃႈတီႈႁိမ်းဝဵင်း ၵိပိယႃႉ၊ ၼၼ်ႉဢေႃႈ။-
ၵူၼ်းၸိူဝ်းဢၼ်ပႂ်ႉတဵတ်ႇမႅပ်းယူႇၼၼ်ႉၽုတ်းဢွၵ်ႇလႅၼ်ႈၶဝ်ႈဝဵင်း ၵိပိယႃႉ၊ ၵႂႃႇၶၼ်ၽႂ်းၼႃႇသေယဝ်ႉ၊ၽႄၸွတ်ႇတူဝ်ႈၵႂႃႇၵူႈၸွၵ်ႉၵူႈၸဵင်ႇလႄႈတိုၵ်းၽၼ်းၵူၼ်းဝဵင်းတင်းဝဵင်းတၢႆပႅတ်ႈဢေႃႈ။-
တပ်ႉသိုၵ်းငဝ်ႈငုၼ်းၵူၼ်း ဢိသရေး၊ ၶဝ်ဢိၵ်ႇတင်းၵူၼ်းၸိူဝ်းဢၼ်ပႂ်ႉတဵတ်ႇမႅပ်းယူႇၸိူဝ်းၼႆႉဝႆႉတီႈမၢတ်ႈတီႈတွင်းဢၼ်ၶဵၼ်းၵၼ်ဝႆႉၵႃႈတီႈၵႄႈၵၢင်ၶဝ်ၸမ်ႉ၊မိူဝ်ႈဢၼ်ၶဝ်ႁၼ်ၵႂၼ်းၽႆးပဵၼ်မုၵ်ႉဢၼ်ယႂ်ႇၼႃႇဢွၵ်ႇၶိုၼ်ႈၵႃႈၼိူဝ်ဝဵင်းၸိုင်၊-
ၵူၼ်းမဵဝ်း ဢိသရေး၊ ၸိူဝ်းဢၼ်မီးယူႇၵႃႈၼႂ်းၼႃႈသိုၵ်းၼၼ်ႉတၵ်းလႆႈပွၵ်ႈၶိုၼ်းၽၢႆႇလင်ဢေႃႈ။ ၵူၺ်းၵႃႈ၊ယၢမ်းမိူဝ်ႈၼၼ်ႉၵူၼ်းမဵဝ်း ပိၼ်ႇယႃႇမိၼ်ႇ၊ ၶဝ်ပေႃးတၼ်းလႆႈၽၼ်းၵူၼ်း ဢိသရေး၊ တၢႆပႅတ်ႈသၢမ်သိပ်းၸမ်ၸမ်ယဝ်ႉဢေႃႈ။ ၶဝ်ၼင်ႇၵၼ်လၢတ်ႈတီႈၵၼ်လႄႈဝႃႈ၊ “ၸႂ်ႈတႄႉယဝ်ႉ။ ႁဝ်းသမ်ႉတိုၵ်းပႄႉၶဝ်မိူၼ်ၸိူဝ်ႉၼင်ႇဢၼ်ႁဝ်းယၢမ်ႈပႄႉၵူႈပွၵ်ႈၼၼ်ႉထႅင်ႈယဝ်ႉ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉမီးၵႂၼ်းၽႆးပေႃႇပဵၼ်မႃးတႄႇၸႃႉဢွၵ်ႇၵႃႈၼိူဝ်ဝဵင်းမႃးဢေႃႈ။ ၵူၼ်းမဵဝ်း ပိၼ်ႇယႃႇမိၼ်ႇ၊ ၶဝ်ဝၢႆႇတူၺ်းတၢင်းလင်လႄႈႁၼ်ပိဝ်ၽႆးဢၼ်မႆႈဝဵင်းၼၼ်ႉၶိုၼ်ႈၵႃႈၼိူဝ်ၽႃႉၵၢင်ႁၢဝ်ယူႇ၊-
သမ်ႉႁၼ်ၵူၼ်းမဵဝ်း ဢိသရေး၊ ၶဝ်ပွၵ်ႈၶိုၼ်းၸူးတီႈၶဝ်ယူႇၼၼ်ႉၶဝ်တူၵ်းၸႂ်ၵူဝ်ႁႄၼႃႇလူင်လၢင်ဢေႃႈ။ မိူဝ်ႈယၢမ်းၼၼ်ႉၶဝ်ႁုႁၼ်လွင်ႈဢၼ်ၶဝ်တူၵ်းသုမ်းယဝ်ႉၼၼ်ႉဢေႃႈ။-
ပိူဝ်ႈၼႆလႄႈၶဝ်ဢွၼ်ၵၼ်သုတ်ႉႁူၼ်သေၵႃႈတီႈၵူၼ်းမဵဝ်း ဢိသရေး၊ လႄႈပၢႆႈၸူးတီႈထိူၼ်ႇဢေႃႈ။ ၵူၺ်းၵႃႈ၊ၶဝ်ပၢႆႈဢမ်ႇလွတ်ႈလႆႈ၊ၵွပ်ႈပိူဝ်ႈၶဝ်ၶမ်ၼႂ်းၵႄႈဝူင်ႈၵၢင်တပ်ႉသိုၵ်းငဝ်ႈဢိၵ်ႇတင်းၵူၼ်းၸိူဝ်းဢၼ်ဢွၵ်ႇဝဵင်းမႃးၼၼ်ႉသေလႄႈၶဝ်လႆႈၶၢမ်ႇတၢင်းဢၼ်ယႃႉၽဵဝ်ႈပႅတ်ႈဢေႃႈ။-
ၵူၼ်းမဵဝ်း ဢိသရေး၊ ၶဝ်ၵၢင်ဢဝ်ရၢၼ်ႇသူႇၶဝ်သေယဝ်ႉ၊ယင်းဢမ်ႇၵိုတ်းဢမ်ႇသဝ်းလႄႈလိုပ်ႈၸွမ်းလမ်းၸွမ်းတေႃႇထိုင်ႁွတ်ႈၸႅင်ႈလႅၼ်လိၼ်သုတ်းၽၢႆႇဝၼ်းဢွၵ်ႇဝဵင်း ၵိပိယႃႉ၊ ၼၼ်ႉလႄႈတိုၵ်းၽၼ်းဢဝ်တၢႆပႅတ်ႈၸွမ်းၵူႈၶၢဝ်းတၢင်းဢေႃႈ။-
ၵူၼ်းသိုၵ်းမဵဝ်း ပိၼ်ႇယႃႇမိၼ်ႇ၊ ဢၼ်ၵတ်ႉဢၼ်ၶႅၼ်ႇၵူၺ်းၵူၺ်းလူမ်ႉတၢႆမိုၼ်ႇပၢႆပႅတ်ႇႁဵင်ၵေႃႉဢေႃႈ။-
ၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇၼၼ်ႉငႅၵ်းပၢႆႈၵႂႃႇၸူးၵႃႈတီႈထိူၼ်ႇတီႈမၢၵ်ႇႁိၼ်မၢၵ်ႇၽႃ ရိမ်ႇမုၼ်ႇ၊ လႄႈ၊ၼႂ်းၶဝ်ၼၼ်ႉၵူၼ်းႁႃႈႁဵင်လႆႈလူမ်ႉတၢႆၸွမ်းတႃႈၸွမ်းတၢင်းဢေႃႈ။ ၵူၼ်း ဢိသရေး၊ ၶဝ်သိုပ်ႇလိုပ်ႈၸွမ်းလမ်းၸွမ်းတေႃႇထိုင်ႁွတ်ႈဝဵင်း ၵိတုမ်ႇ၊ လႄႈလႆႈတိုၵ်းၽၼ်းဢဝ်တၢႆထႅင်ႈသွင်ႁဵင်ၵေႃႉဢေႃႈ။-
ၼႂ်းဝၼ်းၼၼ်ႉၵူၼ်းမဵဝ်း ပိၼ်ႇယႃႇမိၼ်ႇ၊ တင်းလၢႆဢၼ်ပဵၼ်ၵူၼ်းသိုၵ်းဢၼ်ၵတ်ႉဢၼ်ၶႅၼ်ႇၵူၺ်းၵူၺ်းလူမ်ႉတၢႆပႅတ်ႈသွင်မိုၼ်ႇပၢႆႁႃႈႁဵင်ၵေႃႉဢေႃႈ။
မီးၶဝ်ႁူၵ်းပၢၵ်ႇၵေႃႉလႆႈပၢႆႈလွတ်ႈၵႂႃႇၸူးၵႃႈတီႈထိူၼ်ႇတီႈမၢၵ်ႇႁိၼ်မၢၵ်ႇၽႃ ရိမ်ႇမုၼ်ႇ၊ လႄႈယူႇသီႇလိူၼ်ဢေႃႈ။-
ၵူၼ်းမဵဝ်း ဢိသရေး၊ ၶဝ်ၸမ်ႉ၊ပွၵ်ႈၶိုၼ်းၸူးတီႈၵူၼ်းမဵဝ်း ပိၼ်ႇယႃႇမိၼ်ႇ၊ ဢၼ်ၵိုတ်းဢၼ်ၵျၢၼ်ႇတင်းလၢႆသေလႄႈၽၼ်းဢဝ်တၢႆပႅတ်ႈၸႃႉၸဵမ်ၵူၼ်းၸၢႆးၵူၼ်းယိင်းဢိၵ်ႇတင်းလုၵ်ႈဢွၼ်ႇတင်းလၢႆဢိၵ်ႇတင်းတရိၵ်ႈသၢၼ်ႇတင်းလၢႆဢေႃႈ။ ၶဝ်ယင်းတုတ်ႇၽႆးဝဵင်းၸိူဝ်းဢၼ်မီးႁိမ်းႁွမ်းၸိူဝ်းၼၼ်ႉပႅတ်ႈဢေႃႈ။
ၼႂ်းမိူဝ်ႈဢၼ်ၵူၼ်းမဵဝ်း ဢိသရေး၊ ၶဝ်ၸုတုမ်ၵၼ်ၵႃႈတီႈဝဵင်း မိၸပႃႇ၊ ၼၼ်ႉၶဝ်လႆႈႁဵတ်းတၢင်းဢၼ်တိူင်ႇၵၢဝ်ႇဝႆႉၵတိလႄႈဝႃႈ၊ “ၼႂ်းႁဝ်းၼႆႉတၵ်းဢမ်ႇလႆႈဢဝ်လုၵ်ႈယိင်းႁဝ်းပၼ်တီႈၵူၼ်းမဵဝ်း ပိၼ်ႇယႃႇမိၼ်ႇ၊ သေၵေႃႉသေၵူၼ်း၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ၵႂႃႇၵႃႈတီႈဝဵင်း ပေႇသလႃႉ၊ လႄႈယူႇၵႃႈတီႈၽၢႆႇၼႃႈၽြႃးပဵၼ်ၸဝ်ႈတေႃႇထိုင်ႁွတ်ႈၶိင်ႇႁူဝ်ၶမ်ႈယူႇ၊ၵိဝ်သဵင်လႄႈႁွင်ႉႁႆႈၼႃႇလူင်လၢင်ယူႇ၊ပွင်ႉမိုၼ်ႇပွင်ႉၶၢင်းယူႇလႄႈဝႃႈ၊-
“ ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ တီႈၶႃႈ။ ႁဵတ်းသင်လႄႈဢမုၼႆႉပဵၼ်မႃးၵႃႈတီႈၶႃႈၸဝ်ႈႁဝ်းၶဝ်ဝၼ်းမိူဝ်ႈၼႆႉထၢၼ်ႈပေႃးႁႂ်ႈၸိူဝ်ႉၶိူဝ်းမဵဝ်းၼိုင်ႈႁၢႆလၢႆၵႂႃႇသေၵႃႈၼႂ်းမဵဝ်း ဢိသရေး၊ ၼႆႉတီႈၶႃႈ၊” ဝႃႈၼင်ႇၼႆဢေႃႈ။
ဝၼ်းမိူဝ်ႈၽုၵ်ႈၼၼ်ႉၶိင်ႇၵၢင်ၼႂ်ၸဝ်ႉၸဝ်ႉၵူၼ်းတင်းလၢႆလုၵ်ႉလႄႈဢွၼ်ၵၼ်တႄႇႁဵတ်းၶဵင်ႇတၢင်းလူႇသေယဝ်ႉ၊သၢၵ်ႈလူႇတူဝ်တၢင်းလူႇဢၼ်တုတ်ႇၽႆး၊ဢိၵ်ႇတင်းၶိူင်ႈတၢင်းလူႇမိၵ်ႈသႁႃႇယႃႉဢေႃႈ။-
ၵႃႈတီႈၼၼ်ႈၵူၼ်းမဵဝ်း ဢိသရေး၊ ၼင်ႇၵၼ်တွင်ႈထၢမ်ၵၼ်လႄႈဝႃႈ၊ “ၼႂ်းၸိူဝ်ႉၶိူဝ်းမဵဝ်း ဢိသရေး၊ ဢၼ်ဢမ်ႇမႃးၶဝ်ႈပႃးၼႂ်းပၢင်ဢၼ်ၸုတုမ်ၵႃႈတီႈၽၢႆႇၼႃႈၽြႃးပဵၼ်ၸဝ်ႈၼႆႉမီးၸိူဝ်ႉၶိူဝ်းဢၼ်လႂ်၊” ဝႃႈၼင်ႇၼႆ၊ၵွပ်ႈပိူဝ်ႈၶဝ်လႆႈႁဵတ်းတၢင်းဢၼ်တိူင်ႇၵၢဝ်ႇဝႆႉၵတိလႄႈဝႃႈ၊ “ၸိူဝ်ႉၶိူဝ်းဢၼ်ဢမ်ႇမႃးၶဝ်ႈပႃးၼႂ်းပၢင်ဢၼ်ၸုတုမ်ၵႃႈတီႈၽၢႆႇၼႃႈ ထႃႇဝရႃႉၽြႃး၊ ၵႃႈတီႈဝဵင်း မိၸပႃႇ၊ ၼၼ်ႉၸိူဝ်ႉၶိူဝ်းၼၼ်ႉတၵ်းလႆႈၶၢမ်ႇတၢင်းဢၼ်ဢဝ်တၢႆဢေႃႈ၊” ဝႃႈၼင်ႇၼႆဢေႃႈ။-
ၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ၶုၵ်းၸႂ်လႆႈမႆႈၸႂ်လူၺ်ႈၼွင်ႉၸၢႆးၶဝ် ပိၼ်ႇယႃႇမိၼ်ႇ၊ လႄႈလၢတ်ႈဝႃႈ၊ “ဝၼ်းမိူဝ်ႈၼႆႉ ဢိသရေး၊ လႆႈသုမ်းႁၢႆၸိူဝ်ႉၶိူဝ်းမၼ်းမဵဝ်းၼိုင်ႈယဝ်ႉ။-
ႁဝ်းတၵ်းႁဵတ်းၸိူဝ်ႉၼင်ႇႁိုဝ်ႁႃမေးပၼ်တီႈၵူၼ်းၸၢႆးမဵဝ်း ပိၼ်ႇယႃႇမိၼ်ႇ၊ ဢၼ်ယင်းၵိုတ်းယင်းၵျၢၼ်ႇယူႇၸိူဝ်းၼၼ်ႉ။ ႁဝ်းၸမ်ႉ၊လႆႈတိူင်ႇၵၢဝ်ႇဝႆႉၵတိၵႃႈတီႈၽၢႆႇၼႃႈ ထႃႇဝရႃႉၽြႃး၊ လႄႈဝႃႈ၊ ‘ႁဝ်းတၵ်းဢမ်ႇဢဝ်လုၵ်ႈယိင်းႁဝ်းပၼ်တီႈၶဝ်၊’ ဝႃႈၼႆဝႆႉယဝ်ႉ၊” ဝႃႈၼင်ႇၼႆဢေႃႈ။
ၶဝ်သမ်ႉတွင်ႈထၢမ်လႄႈဝႃႈ၊ “ၼႂ်းၸိူဝ်ႉၶိူဝ်းမဵဝ်း ဢိသရေး၊ ဢၼ်ဢမ်ႇမႃးၶဝ်ႈပႃးၵႃႈၼႂ်းပၢင်ၸုတုမ်ၵႃႈတီႈၽၢႆႇၼႃႈၽြႃးပဵၼ်ၸဝ်ႈၼႂ်းဝဵင်း မိၸပႃႇ၊ ၼႆႉမီးၸိူဝ်ႉၶိူဝ်းဢၼ်လႂ်၊” ဝႃႈၼင်ႇၼႆၼၼ်ႉၸိုင်၊ႁုႁၼ်လွင်ႈဢၼ်ၵူၼ်းဝဵင်း ယႃႇပႅတ်ႉ၊ မိူင်း ၵိလတ်ႉ၊ ၼၼ်ႉဢမ်ႇမႃးႁွတ်ႈမႃးပႃးၼႂ်းပၢင်တပ်ႉပရိၵ်ႈသၢတ်ႈဢၼ်ၸုဢၼ်တုမ်ၼၼ်ႉသေၵေႃႉသေၵူၼ်းဢေႃႈ။-
မိူဝ်ႈဢၼ်ႁွင်ႉၸိုဝ်ႈႁွင်ႉသဵင်ၵူၼ်းမဵဝ်းတင်းလၢႆၼၼ်ႉၸိုင်၊ၵူၼ်းဝဵင်း ယႃႇပႅတ်ႉ၊ ၼၼ်ႉဢမ်ႇတွပ်ႇဢမ်ႇၶၢၼ်သေၵေႃႉသေၵူၼ်း။-
ပိူဝ်ႈၼႆလႄႈၵူၼ်းပရိၵ်ႈသၢတ်ႈတင်းလၢႆပွႆႇၸႂ်ႉၵူၼ်းသိုၵ်းဢၼ်ႁတ်းႁၢၼ်ၼႃႇလူင်လၢင်ၼၼ်ႉမိုၼ်ႇပၢႆသွင်ႁဵင်သေလႄႈသင်ႇလၢတ်ႈတီႈၶဝ်လႄႈဝႃႈ၊ “သူဢွၼ်ၵၼ်ၵႂႃႇလႄႈတိုၵ်းတေႃးယႃႉၽဵဝ်ႈၽၼ်းပႅတ်ႈၵူၼ်းၸၢႆးၵူၼ်းယိင်းလုၵ်ႈဢွၼ်ႇၵူၼ်းဝဵင်း ယႃႇပႅတ်ႉ၊ မိူင်း ၵိလတ်ႉ၊ ၸိူဝ်းၼၼ်ႉတႃႉ။-
လွင်ႈဢၼ်သူတၵ်းလႆႈႁဵတ်းၸမ်ႉ၊ၽၼ်းတၢႆၵူၼ်းၸၢႆးတင်းမူတ်းဢိၵ်ႇတင်းမႄႈယိင်းဢၼ်လႆႈၼွၼ်းလူၺ်ႈၵၼ်တင်းၵူၼ်းၸၢႆးယဝ်ႉတင်းမူတ်းၸိူဝ်းၼၼ်ႉတႃႉ၊” ဝႃႈၼင်ႇၼႆဢေႃႈ။-
ၼႂ်းၵူၼ်းဝဵင်း ယႃႇပႅတ်ႉ၊ ၼၼ်ႉၶဝ်ထူပ်းႁၼ်သၢဝ်ၵၼ်ႇၺႃႇၸႅတ်ႈသီႇပၢၵ်ႇၵေႃႉသေယဝ်ႉ၊ၶဝ်ဢဝ်မႃးၵႃႈၼႂ်းပၢင်တပ်ႉၵႃႈတီႈဝဵင်း သိလေႃႇ၊ ဢၼ်မီးၵႃႈၼႂ်းမိူင်း ၶႃႇၼၼ်ႇ၊ ၼၼ်ႉဢေႃႈ။
ၵမ်းၼၼ်ႉ ၵူၼ်းပရိၵ်ႈသၢတ်ႈတင်းလၢႆပွႆႇၸႂ်ႉၽူႈတၢင်တူဝ်ၵႂႃႇၸူးတီႈၵူၼ်းမဵဝ်း ပိၼ်ႇယႃႇမိၼ်ႇ၊ ၸိူဝ်းဢၼ်မီးယူႇၵႃႈတီႈမၢၵ်ႇႁိၼ်မၢၵ်ႇၽႃ ရိမ်ႇမုၼ်ႇ၊ ႁႂ်ႈလႆႈမွၵ်ႇလၢတ်ႈလွင်ႈဢၼ်ပဵၼ်သိုၵ်းၼၼ်ႉလႆႈထၢတ်ႇယဵၼ်ယဝ်ႉၼၼ်ႉဢေႃႈ။-
ၵူၼ်းမဵဝ်း ပိၼ်ႇယႃႇမိၼ်ႇ၊ ၸိူဝ်းၼၼ်ႉၵေႃႈ ဢွၼ်ၵၼ်ၶိုၼ်းမႃးလႄႈ၊ၵူၼ်းမဵဝ်း ဢိသရေး၊ ၸိူဝ်းၼၼ်ႉဢဝ်သၢဝ်ဝဵင်း ယႃႇပႅတ်ႉ၊ မိူင်း ၵိလတ်ႉ၊ ဢၼ်ဝႆႉပၼ်ဢသၢၵ်ႈလိပ်းယူႇၸိူဝ်းၼၼ်ႉပၼ်ႁႂ်ႈပဵၼ်မေးၶဝ်ဢေႃႈ။ ၵူၺ်းၵႃႈ၊သၢဝ်ၸိူဝ်းၼၼ်ႉဢမ်ႇပေႃးဢမ်ႇၵုမ်ႇပုၼ်ႈၶဝ်။
ၵူၼ်းတင်းလၢႆဢဵတ်းလူၵူၼ်းမဵဝ်း ပိၼ်ႇယႃႇမိၼ်ႇ၊ ၸိူဝ်းၼၼ်ႉၵွပ်ႈပိူဝ်ႈၽြႃးပဵၼ်ၸဝ်ႈႁႂ်ႈၸိူဝ်ႉၶိူဝ်းဢၼ်ၼိုင်ႈၶၢတ်ႇဢွၵ်ႇသေၵႃႈၼႂ်းမဵဝ်း ဢိသရေး၊ ၵႂႃႇၼၼ်ႉဢေႃႈ။-
ၵူၼ်းဢၼ်ပဵၼ်ၵႄႇပဵၼ်ႁူဝ်ၵႃႈၼႂ်းပရိၵ်ႈသၢတ်ႈၸိူဝ်းၼၼ်ႉတိူင်ႇပၢင်ႇၵၼ်လႄႈဝႃႈ၊ “ၵွပ်ႈပိူဝ်ႈဢၼ်လႆႈပႄႇၽဵဝ်ႈမႄႈယိင်းၵူၼ်းမဵဝ်း ပိၼ်ႇယႃႇမိၼ်ႇ၊ တင်းလၢႆပႅတ်ႈယဝ်ႉၼၼ်ႉႁဝ်းတၵ်းလႆႈႁဵတ်းၸိူဝ်ႉၼင်ႇႁိုဝ်ႁႃမေးပၼ်ၵူၼ်းၸၢႆးၶဝ်ၸိူဝ်းဢၼ်ယင်းၵိုတ်းၵျၢၼ်ႇယူႇၼၼ်ႉ၊” ဝႃႈၼင်ႇၼႆဢေႃႈ။-
ၶဝ်သမ်ႉလၢတ်ႈလႄႈဝႃႈ၊ “လွင်ႈၼင်ႇႁိုဝ်ၸိူဝ်ႉၶိူဝ်းမဵဝ်းၼိုင်ႈတၵ်းဢမ်ႇမွတ်ႇဢမ်ႇႁၢႆ ၵႃႈၼႂ်းၵူၼ်းမဵဝ်း ဢိသရေး၊ သိပ်းသွင်မဵဝ်းၼႆႉၸိုင်၊ႁဝ်းထုၵ်ႇလီႁႃလွင်ႈႁႃတၢင်းပုၼ်ႈၵူၼ်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ တၵ်းလႆႈၶျၢမ်းသႃႇလွတ်ႈဢသၢၵ်ႈယူႇၼၼ်ႉဢေႃႈ။-
ႁဝ်းတေဢမ်ႇဢဝ်လုၵ်ႈယိင်းႁဝ်းပၼ်ၵၼ်တင်းၶဝ်ၵွပ်ႈပိူဝ်ႈၵူၼ်းမဵဝ်း ဢိသရေး၊ တင်းလၢႆႁဵတ်းတၢင်းဢၼ်တိူင်ႇၵၢဝ်ႇဝႆႉၵတိလႄႈဝႃႈ၊ ‘ႁႂ်ႈၵေႃႉဢၼ်ဢဝ်လုၵ်ႈယိင်းမၼ်းပၼ်ၵၼ်တင်းၵူၼ်းမဵဝ်း ပိၼ်ႇယႃႇမိၼ်ႇ၊ ၼၼ်ႉပဵၼ်ၵေႃႉဢၼ်ၺႃးတၢင်းဢၼ်ၵိၼ်ႇဝႃႈသေၵမ်းလူၺ်ႈ၊’” ဝႃႈၼင်ႇၼႆဢေႃႈ။
မိူဝ်ႈၼၼ်ႉၶဝ်ၶႆႈၸႂ်ဝူၼ်ႉၸႂ်လႄႈဝႃႈ၊ “တူၺ်းလူး။ ယေႈပီယေႈပွၵ်ႈမီးပွႆးတၢင်းလူႇတီႈ ထႃႇဝရႃႉၽြႃး၊ ၼႂ်းဝဵင်း သိလေႃႇ၊ ဢေႃႈ။ ဝၼ်းပွႆးၸမ်တၵ်းႁွတ်ႈမႃးယဝ်ႉ၊” ဝႃႈၼင်ႇၼႆဢေႃႈ။ (ဝဵင်း သိလေႃႇ၊ ၼၼ်ႉမီးၽၢႆႇတၢင်းႁွင်ႇဝဵင်း ပေႇသလႃႉ၊ ၽၢႆႇတၢင်းၸၢၼ်းဝဵင်း လေႇပေႃႇၼႃႉ၊ လႄႈမီးၽၢႆႇဝၼ်းဢွၵ်ႇသဵၼ်ႈတၢင်းဢၼ်လုၵ်ႉသေၵႃႈတီႈဝဵင်း ပေႇသလႃႉ၊ ၵႂႃႇၸူးတီႈဝဵင်း သေးၶိမ်ႇ၊ ၼၼ်ႉဢေႃႈ။-)
ၶဝ်ဢွၼ်ၵၼ်လၢတ်ႈတီႈၵူၼ်းမဵဝ်း ပိၼ်ႇယႃႇမိၼ်ႇ၊ ၸိူဝ်းၼၼ်ႉလႄႈဝႃႈ၊ “သူၵႂႃႇလႄႈလွမ်ပႂ်ႉယူႇၵႃႈၼႂ်းသူၼ်မၢၵ်ႇၸပိတ်ႉၸိူဝ်းၼၼ်ႉတႃႉ။-
မိူဝ်ႈဢၼ်လုၵ်ႈယိင်းသၢဝ်ဝဵင်း သိလေႃႇ၊ ၶဝ်မႃးႁႂ်ႈလႆႈၵႃႈဝႅၼ်ၵႃႈၼႂ်းပွႆးၼၼ်ႉၸိုင်၊သူဢွၼ်ၵၼ်ဢွၵ်ႇသေၵႃႈၼႂ်းသူၼ်မၢၵ်ႇၸပိတ်ႉမႃးတိၺွပ်းဢဝ်သၢဝ်ၸိူဝ်းၼၼ်ႉႁႂ်ႈပဵၼ်မေးၽႂ်မေးမၼ်းလႄႈဢဝ်မိူဝ်းၵႂႃႇၵႃႈတီႈမိူင်း ပိၼ်ႇယႃႇမိၼ်ႇ၊ ပုၼ်ႉတႃႉ။-
မိူဝ်ႈဢၼ်ပေႃႈၶဝ်၊ဢမ်ႇၼၼ်ပီႈၸၢႆးၼွင်ႉၸၢႆးၶဝ်မႃးလႄႈမွၵ်ႇလၢတ်ႈၼႄလွင်ႈတၢင်းမၼ်းတီႈႁဝ်းၸိုင်၊ႁဝ်းတၵ်းၶိုၼ်းလၢတ်ႈတီႈၶဝ်လႄႈဝႃႈ၊ ‘ထွၵ်ႈလူၺ်ႈၼႃႈႁဝ်းသေလႄႈဢဵတ်းလူပၼ်ၶဝ်သေၵမ်း။ ၼႂ်းမိူဝ်ႈဢၼ်ႁဝ်းတိုၵ်းသိုၵ်းၼၼ်ႉႁဝ်းဢမ်ႇလႆႈဢဝ်မေးပၼ်ၶဝ်ၵူႈၵေႃႉ။ သူၵေႃႈၵွပ်ႈပိူဝ်ႈဢမ်ႇဢဝ်လုၵ်ႈယိင်းသူပၼ်ၶဝ်လႄႈဢမ်ႇႁႂ်ႈဢပျတ်ႈမီးတီႈသူ၊’ ဝႃႈၼႆယဝ်ႉ၊” ဝႃႈၼင်ႇၼႆဢေႃႈ။
ၵူၼ်းမဵဝ်း ပိၼ်ႇယႃႇမိၼ်ႇ၊ ၸိူဝ်းၼၼ်ႉၵေႃႈႁဵတ်းၸွမ်းၸိူဝ်ႉၼင်ႇၼၼ်လႄႈ၊ၶဝ်ဢွၼ်ၵၼ်တိၺွပ်းဢဝ်မႄႈယိင်းသၢဝ်ၸိူဝ်းဢၼ်ၵႃႈယူႇဝႅၼ်ယူႇၵႃႈၼႂ်းဝဵင်း သိလေႃႇ၊ ၼၼ်ႉပုၼ်ႈတၵ်းဢဝ်ၵႂႃႇႁဵတ်းမေးၶဝ်ႁင်းၽႂ်ႁင်းမၼ်းၼၼ်ႉဢေႃႈ။ ၶဝ်ႁွတ်ႈထိုင်ၵႂႃႇၵႃႈတီႈလိၼ်ဢမူၺ်ႇၶဝ်သေယဝ်ႉ၊ၶိုၼ်းမႄးတႄႇႁဵတ်းဝဵင်းတင်းလၢႆသေလႄႈယူႇသဝ်းၵႃႈတီႈၼၼ်ႈဢေႃႈ။-
ၵူၼ်းမဵဝ်း ဢိသရေး၊ တင်းလၢႆၵေႃႈဢွၵ်ႇသေၵႃႈတီႈၼၼ်ႈသေလႄႈမိူဝ်းၵႂႃႇၵႃႈတီႈလိၼ်ဢမူၺ်ႇၸိူဝ်ႉၶိူဝ်းၽႂ်ၸိူဝ်ႉၶိူဝ်းမၼ်း၊ၵႂႃႇၸူးတီႈႁိူၼ်းၽႂ်ႁိူၼ်းမၼ်းၵူႈၵေႃႉၵူႈၵူၼ်းဢေႃႈ။-
ၶိင်ႇမိူဝ်ႈယၢမ်းၼၼ်ႉၶုၼ်ႁေႃၶမ်းၵူၼ်းမဵဝ်း ဢိသရေး၊ ဢမ်ႇမီးလႄႈ၊ၵူႈၵေႃႉၵူႈၵူၼ်းႁဵတ်းၸွမ်းၵႃႈၼင်ႇဢၼ်ဢလူဝ်ႇၵၢင်ၸႂ်တူဝ်ၸဝ်ႈၵဝ်ႇႁင်းၽႂ်ႁင်းမၼ်းယူႇဢေႃႈ။ လိၵ်ႈမၢတ်ႈလွင်ႈၵူၼ်းလူင်ဢၼ်ၸီႇယၢင်ႇတြႃးယဝ်ႉယဝ်ႉဢေႃႈ။
ၼႂ်းၸူဝ်ႈပၢၼ်ၽူႈဢၼ်ၸီႇယၢင်ႇတြႃးလႆႈဢုပ်ႉပိူင်ႇမိူင်း ဢိသရေး၊ ၼၼ်ႉၼႂ်းမိူင်းၶဝ်မီးတၢင်းဢၼ်ၶဝ်ႈၵႃႈမၢၵ်ႇပႅင်းၼႃႇလူင်လၢင်ဢေႃႈ။ ၵူၼ်းဝဵင်း ပႅတ်ႉလႁႅမ်ႇ၊ မိူင်း ယုတႃႉ၊ ၵေႃႉၼိုင်ႈႁွင်ႉပႃးဢဝ်မေးမၼ်းတင်းလုၵ်ႈၸၢႆးမၼ်းသွင်ၵေႃႉသေလႄႈၵႂႃႇသွၼ်ႈပိုင်ႈယူႇသဝ်းၵႃႈၼႂ်းမိူင်း မေႃႇၽႃႉ၊ ဢေႃႈ။-
ၸိုဝ်ႈသဵင်ၵေႃႉၼၼ်ႉႁွင်ႉဝႃႈ ဢေးလိမလႅၵ်ႉ၊ လႄႈမေးမၼ်းၸိုဝ်ႈ ၼေႃးမိ၊ ဢေႃႈ။ လုၵ်ႈၸၢႆးလူင်မၼ်းၸိုဝ်ႈ မႁႃႇလုၼ်ႇ၊ လုၵ်ႈၸၢႆးဢွၼ်ႇၸိုဝ်ႈ ၶိလီႇယၼ်ႇ၊ ဝႃႈၼႆဢေႃႈ။ ၶဝ်ပေႃႈလုၵ်ႈပဵၼ်ၸိူဝ်ႉၶိူဝ်း ဢေႇၽရတ်ႉ၊ ဢေႃႈ။-
မိူဝ်ႈဢၼ်ၶဝ်သွၼ်ႈပိုင်ႈၵႃႈၼႂ်းမိူင်း မေႃႇၽႃႉ၊ ၼၼ်ႉ ဢေးလိမလႅၵ်ႉ၊ တၢႆၵႂႃႇလႄႈ ၼေႃးမိ၊ ၵိုတ်းယူႇလူၺ်ႈတင်းလုၵ်ႈၸၢႆးမၼ်းသွင်ၵေႃႉဢေႃႈ။-
သွင်ၵေႃႉပီႈၼွင်ႉတႄႇၼႃႈႁိူၼ်းလူၺ်ႈၵၼ်တင်းမႄႈယိင်းမိူင်း မေႃႇၽႃႉ၊ ဢၼ်ၸိုဝ်ႈသဵင်ၵေႃႉၼိုင်ႈႁွင်ႉဝႃႈ၊ ဢေႃးရပႃႉ၊ လႄႈၵေႃႉၼိုင်ႈႁွင်ႉဝႃႈ၊ ရုထႃႉ၊ ဝႃႈၼႆဢေႃႈ။-
ၶဝ်သွၼ်ႈပိုင်ႈယူႇသဝ်းတီႈၼၼ်ႈသေမွၵ်ႈသိပ်းပီသေယဝ်ႉ၊ မႁႃႇလုၼ်ႇ၊ တင်း ၶိလီႇယၼ်ႇ၊ ၵေႃႈတၢႆၵႂႃႇလႄႈ ၼေႃးမိ၊ ယင်းဢမ်ႇမီးၽူဝ်ဢမ်ႇမီးလုၵ်ႈၸၢႆးလႄႈၵိုတ်းယူႇၵေႃႉလဵဝ်ၵူၺ်းမၼ်းဢေႃႈ။
ယၢမ်းမိူဝ်ႈဢၼ်ၶဝ်ယင်းသွၼ်ႈပိုင်ႈယူႇၵႃႈၼႂ်းမိူင်း မေႃႇၽႃႉ၊ ယူႇၼၼ်ႉ ၼေႃးမိ၊ လႆႈငိၼ်းၶၢဝ်ႇငၢဝ်းလွင်ႈဢၼ်ၽြႃးပဵၼ်ၸဝ်ႈပၼ်တၢင်းလီမၢင်ႇၵလႃႇတီႈမၢၵ်ႇၶဝ်ႈႁူင်းၼမ်ႉတီႈၵူၼ်းမၼ်းၸဝ်ႈၼၼ်ႉလႄႈ၊-
မၼ်းႁႅၼ်းၶူဝ်းပုၼ်ႈတႃႇတၵ်းဢွၵ်ႇသေၵႃႈၼႂ်းမိူင်း မေႃႇၽႃႉ၊ လူၺ်ႈၵၼ်တင်းလုၵ်ႈပႂ်ႉမၼ်းသွင်ၵေႃႉၼၼ်ႉဢေႃႈ။ ၶဝ်ၸင်ႇဢွၵ်ႇၵႂႃႇၸွမ်းၵၼ်ႁႂ်ႈလႆႈၶိုၼ်းမိူဝ်းၸူးမိူင်း ယုတႃႉ၊ ဢေႃႈ။-
မိူဝ်ႈဢၼ်တိုၵ်ႉပၢႆၵႂႃႇၼႂ်းၶၢဝ်းတၢင်းယူႇၼၼ်ႉ ၼေႃးမိ၊ လၢတ်ႈတီႈလုၵ်ႈပႂ်ႉမၼ်းသွင်ၵေႃႉလႄႈဝႃႈ၊ “သူသွင်ၵေႃႉပွၵ်ႈၶိုၼ်းမိူဝ်းၸူးတီႈႁိူၼ်းမႄႈသူႁင်းၽႂ်ႁင်းမၼ်းတႃႉ။ ႁႂ်ႈၽြႃးပဵၼ်ၸဝ်ႈႁဵတ်းၵျေးၸူးတီႈသူသွင်ၵေႃႉမိူၼ်ၸိူဝ်ႉၼင်ႇဢၼ်သူသွင်ၵေႃႉၸၢင်ႈႁဵတ်းၵျေးၸူးတီႈၵဝ်ဢိၵ်ႇတင်းတီႈၶဝ်ၸိူဝ်းဢၼ်တၢႆယဝ်ႉၸိူဝ်းၼၼ်ႉသေၵမ်းလူၺ်ႈ။-
ႁႂ်ႈၽြႃးပဵၼ်ၸဝ်ႈပၼ်ဢၶႂၢင်ႉႁႂ်ႈသူသွင်ၵေႃႉၶိုၼ်းလႆႈၽူဝ်လႆႈတႄႇၼႃႈႁိူၼ်းႁင်းၽႂ်ႁင်းမၼ်းသေၵမ်းလူၺ်ႈ၊” ဝႃႈၼင်ႇၼႆလႄႈၸုပ်ႇၼူမ်ၶဝ်သွင်ၵေႃႉဢေႃႈ။ ၵူၺ်းၵႃႈ၊ၶဝ်သွင်ၵေႃႉၵိဝ်ႇသဵင်ႁွင်ႉႁႆႈလႄႈလၢတ်ႈတီႈ ၼေႃးမိ၊ လႄႈဝႃႈ၊-
“ဢမ်ႇၸႂ်ႈၶႃႈၵူၺ်း။ ႁဝ်းၶႃႈတၵ်းၸွမ်းမႄႈႁဝ်းၵႂႃႇၸူးပီႈၼွင်ႉၸိူဝ်ႉၶူဝ်းမႄႈႁဝ်းၼၼ်ႉၶႃႈဢေႃႈ၊” ဝႃႈၼင်ႇၼႆဢေႃႈ။
ၼေႃးမိ၊ ၵေႃႈလၢတ်ႈတီႈၶဝ်သွင်ၵေႃႉလႄႈဝႃႈ၊ “လုၵ်ႈယိင်းၵဝ်႟။ ၶိုၼ်းမိူဝ်ႈၵႂႃႇတႃႉ၊ႁဵတ်းသင်လႄႈၶႂ်ႈၵႂႃႇၸွမ်းၵဝ်။ ၸွင်ႇၵဝ်တေၵိူတ်ႇပၼ်လုၵ်ႈၸၢႆးႁႂ်ႈလႆႈပဵၼ်ၽူဝ်သူသွင်ၵေႃႉလႆႈထႅင်ႈႁိုဝ်း။-
ၶိုၼ်းမိူဝ်းၵႂႃႇတႃႉ။ တႃႇတေတႄႇၼႃႈႁိူၼ်းထႅင်ႈၼၼ်ႉၵဝ်ထဝ်ႈၼႃႇၼႃႇယဝ်ႉ။ ပိၵ်ႉသမ်ႉဝႃႈၵဝ်မီးတီႈမုင်ႈမွင်းလႄႈဢဝ်ၽူဝ်ၶမ်ႈၼႆႉႁႂ်ႈလႆႈၵိူတ်ႇလုၵ်ႈၸၢႆးသေၵေႃႈ၊-
တေႃႇၶဝ်သမ်ႉပေႃးယႂ်ႇမႃးၼၼ်ႉၸွင်ႇသူသွင်ၵေႃႉတေပႂ်ႉထႃႈလႆႈႁိုဝ်း။ တေယင်းဢမ်ႇဢဝ်ၽူဝ်လႄႈပႂ်ႉထႃႈလႆႈယူႇႁိုဝ်း။ လုၵ်ႈယိင်းၵဝ်႟။ မၼ်းဢမ်ႇပဵၼ်လႆႈ၊ ထႃႇဝရႃႉၽြႃး၊ ဢမ်ႇလူတူၺ်းၵဝ်ယဝ်ႉလႄႈၵဝ်ၶူမ်ၸႂ်ၼႃႇလူင်လၢင်ပုၼ်ႈသူသွင်ၵေႃႉဢိူဝ်း၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၶဝ်သွင်ၵေႃႉသမ်ႉၵိဝ်ႇသဵင်ႁွင်ႉႁႆႈထႅင်ႈလႄႈ ဢေႃးရပႃႉ၊ ၸုပ်ႇၼူမ်မႄႈၸဝ်ႈၶဝ်သေၵေႃႈ ရုထႃႉ၊ ၸမ်ႉ၊ယင်းဢမ်ႇၽၢတ်ႇဢမ်ႇယၢၼ်ၵၼ်တင်း ၼေႃးမိ၊ လႄႈယူႇယူႇဢေႃႈ။-
ၼေႃးမိ၊ ၵေႃႈလၢတ်ႈတီႈ ရုထႃႉ၊ လႄႈဝႃႈ၊ “ ရုထႃႉ၊ ႟။ ပီႈလူဝ်းမႂ်းၶိုၼ်းမိူဝ်းၸူးတီႈပီႈၼွင်ႉၸိူဝ်ႉၶိူဝ်းဢွၵ်ႇမၼ်းဢိၵ်ႇတင်းၽြႃးဢွၵ်ႇမၼ်းယဝ်ႉ။ မိူဝ်းၵႂႃႇၸွမ်းပီႈလူဝ်းမႂ်းတႃႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ ရုထႃႉ၊ ၶိုၼ်းလၢတ်ႈလႄႈဝႃႈ၊ “ယႃႇပေၸႂ်ႉၵဝ်ၶႃႈဢွၵ်ႇၵႂႃႇသေတီႈမႄႈႁဝ်းသေၵမ်းၶႃႈ။ တီႈဢၼ်မႄႈႁဝ်းၵႂႃႇၶႃႈတၵ်းၸွမ်းၵႂႃႇ၊တီႈဢၼ်မႄႈႁဝ်းယူႇၶႃႈတၵ်းယူႇသဝ်းလူၺ်ႈလႄႈၸိူဝ်ႉၶိူဝ်းမႄႈႁဝ်းႁႂ်ႈပဵၼ်ၸိူဝ်ႉၶိူဝ်းၵဝ်ၶႃႈ၊ၽြႃးမႄႈႁဝ်းႁႂ်ႈပဵၼ်ၽြႃးၵဝ်ၶႃႈသေၵမ်းတီႈၶႃႈ။-
ၵႃႈတီႈဢၼ်မႄႈႁဝ်းတၢႆၼၼ်ႉၶႃႈတၵ်းတၢႆလႄႈတီႈၼၼ်ႈႁႂ်ႈလႆႈပဵၼ်ပႃႇႁဵဝ်ႈၵဝ်ၶႃႈသေၵမ်းတီႈၶႃႈ။ လိူဝ်သေတၢင်းတၢႆလႄႈပေႃးၵဝ်ၶႃႈၽၢတ်ႇယၢၼ်ၵၼ်တင်းမႄႈႁဝ်းၸိုင်၊ႁႂ်ႈ ထႃႇဝရႃႉၽြႃး၊ ပၼ်ၽေးတၢမ်ႇတီႈၵဝ်ၶႃႈသေၵမ်းၶႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ် ၼေႃးမိ၊ ႁုႁၼ်လွင်ႈဢၼ် ရုထႃႉ၊ တႅပ်းတတ်းၸႂ်ႁႂ်ႈလႆႈၵႂႃႇၸွမ်းမၼ်းၼၼ်ႉၸိုင်၊မၼ်းယင်းဢမ်ႇလၢတ်ႈသင်လႄႈယူႇဢေႃႈ။
ႁဵတ်းၼၼ်လႄႈၶဝ်သွင်ၵေႃႉသိုပ်ႇၶၢဝ်းတၢင်းၵႂႃႇၽႅဝ်တီႈဝဵင်း ပႅတ်ႉလႁႅမ်ႇ၊ ဢေႃႈ။ မိူဝ်ႈဢၼ်ၶဝ်သွင်ၵေႃႉႁွတ်ႈထိုင်ၵႂႃႇၼၼ်ႉၵူၼ်းတင်းဝဵင်းဢွၼ်ၵၼ်လၢတ်ႈၸႃလွင်ႈၶဝ်သွင်ၵေႃႉပေႃးဢူၼ်ဢဵၼ်ၵႂႃႇလႄႈမႄႈယိင်းၵမ်ႈၽွင်ႈလၢတ်ႈဝႃႈ၊ “ၸွင်ႇဢမ်ႇၸႂ်ႈ ၼေႃးမိ၊ ႁိုဝ်ၼၼ်ႉ၊” ဝႃႈၼင်ႇၼႆဢေႃႈ။
ၼေႃးမိ၊ ၵေႃႈၶိုၼ်းလၢတ်ႈလႄႈဝႃႈ၊ “ယႃႇပေႁွင်ႉၵဝ်ၶႃႈဝႃႈ၊ ၼေႃးမိ ၊သေၵမ်း။ ႁွင်ႉၵဝ်ၶႃႈဝႃႈ၊ မႃႇရႃႉ ၊သေၵမ်း။ ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ ၼၼ်ႉႁဵတ်းလွင်ႈတၢင်းဢၼ်ၶူမ်ၸႂ်ၼႃႇလူင်လၢင်တီႈၵဝ်ယဝ်ႉ။-
မိူဝ်ႈဢၼ်ၵဝ်ဢွၵ်ႇၵႂႃႇၼၼ်ႉၵဝ်ပျေႉၸုမ်ႇသေၵေႃႈမိူဝ်ႈဢၼ်ၵဝ်ၶိုၼ်းမႃးၼႆႉၸမ်ႉ၊ၸဝ်ႈၽြႃးသူင်ႇၵဝ်ၶိုၼ်းမႃးတူဝ်လၢႆမိုဝ်းပဝ်ႇၵူၺ်းယဝ်ႉလူင်ပႄႇ။ ၵွပ်ႈပိူဝ်ႈၸဝ်ႈဢၼၼ်ႇတႃႉတၼ်းၶူဝ်းၸီႇယၢင်ႇႁႂ်ႈၵဝ်လႆႈၶၢမ်ႇတုၵ်ႉၶႃႉၶၢၼ်ၸႂ်ထၼ်ႇၼႆႉႁဵတ်းႁိုဝ်လႄႈႁွင်ႉၵဝ်ဝႃႈ၊ ၼေႃးမိ၊ ” ဝႃႈၼင်ႇၼႆဢေႃႈ။
ႁဵတ်းၼၼ်လႄႈ ၼေႃးမိ၊ ႁွတ်ႈထိုင်မႃးၵႃႈတီႈဝဵင်း ပႅတ်ႉလႁႅမ်ႇ၊ လူၺ်ႈၵၼ်တင်းလုၵ်ႈပႂ်ႉမၼ်း ရုထႃႉ၊ မႄႈယိင်း မေႃႇၽႃႉ၊ မႅၼ်ႈမိူဝ်ႈၶၢဝ်းတႄႇၸႃႉပၢတ်ႇၶဝ်ႈမုယေႃးၼၼ်ႉဢေႃႈ။
ၼေႃးမိ၊ မီးပီႈၼွင်ႉၵေႃႉၼိုင်ႈဢၼ်ၸိုဝ်ႈဝႃႈ၊ ပေႃႇၸႃႉ၊ ပဵၼ်ပီႈၼွင်ႉၽၢႆႇၽူဝ်မၼ်း ဢေးလိမလႅၵ်ႉ၊ ဢၼ်ၸိုဝ်ႈဝႃႈ၊ ပေႃႇၸႃႉ၊ ၼၼ်ႉၵေႃႉၼိုင်ႈဢေႃႈ။ ပေႃႇၸႃႉ၊ ၼၼ်ႉပဵၼ်ၵေႃႉမီးသရေႇၼႃႈတႃလႄႈမၢၵ်ႈမီးၼႃႇဢေႃႈ။-
ဝၼ်းၼိုင်ႈ ရုထႃႉ၊ ယွၼ်းဢၶႂၢင်ႉတီႈ ၼေႃးမိ၊ လႄႈဝႃႈ၊ “ႁႂ်ႈၵဝ်ၶႃႈလႆႈၵႂႃႇၵႃႈတီႈတူင်ႈၼႃးပုၼ်ႈတႃႇတေၵဵပ်းႁူင်းၶဝ်ႈဢၼ်တူၵ်းဢၼ်ႁူင်ႈၵႃႈၼႂ်းတူင်ႈၼႃးသေၵမ်းၶႃႈ။ ၶႃႈၸၢင်ႈၶႄးတေထူပ်းၺႃးသေၵေႃႉၵေႃႉဢၼ်မီးၸေႇတၼႃႇၼိူဝ်ၵဝ်ၶႃႈၶႃႈဢေႃႈ၊” ဝႃႈၼင်ႇၼႆလႄႈ။ ၼေႃးမိ၊ ၵေႃႈတွပ်ႇမၼ်းလႄႈဝႃႈ၊ “ၵႂႃႇတႃႉလုၵ်ႈယိင်းၵဝ်႟။” ဝႃႈၼင်ႇၼႆဢေႃႈ။
ရုထႃႉ၊ ၵေႃႈဢွၵ်ႇၵႂႃႇၵႃႈတီႈတူင်ႈၼႃးလႄႈၵဵပ်းႁူင်းၶဝ်ႈဢၼ်တူၵ်းဢၼ်ႁူင်ႈၸွမ်းလင်ၵူၼ်းပၢတ်ႇၶဝ်ႈၸိူဝ်းၼၼ်ႉဢေႃႈ။ မၼ်းယင်းသၢင်ႇတေႃႇလႄႈၵႂႃႇၵဵပ်းမႅၼ်ႈၵႃႈၼႂ်းတူင်ႈၼႃး ပေႃႇၸႃႉ၊ ဢၼ်ပဵၼ်ၸိူဝ်ႉၶိူဝ်း ဢေးလိမလႅၵ်ႉ၊ ၼၼ်ႉဢေႃႈ။
ယၢမ်းၼၼ်ႉ၊ ပေႃႇၸႃႉ၊ လုၵ်ႉသေၵႃႈတီႈဝဵင်း ပႅတ်ႉလႁႅမ်ႇ၊ ၽႅဝ်မႃးလႄႈတူင်ႉတၵ်ႉၵူၼ်းပၢတ်ႇၶဝ်ႈၸိူဝ်းၼၼ်ႉလႄႈဝႃႈ၊ “ႁႂ်ႈ ထႃႇဝရႃႉၽြႃး၊ မီးယူႇလူၺ်ႈသူသေၵမ်းလူၺ်ႈ၊” ဝႃႈၼင်ႇၼႆလႄႈၶဝ်ၵေႃႈၶိုၼ်းတၵ်ႉလၢတ်ႈလႄႈဝႃႈ။ “ႁႂ်ႈၽြႃးပဵၼ်ၸဝ်ႈပၼ်တၢင်းလီမၢင်ႇၵလႃႇၵႃႈၼိူဝ်ပေႃႈလဵင်ႉႁဝ်းသေၵမ်းလူၺ်ႈ၊” ဝႃႈၼင်ႇၼႆဢေႃႈ။
ၵမ်းၼၼ်ႉ၊ ပေႃႇၸႃႉ၊ ထၢမ်ၽူႈဢွၼ်ႁူဝ်ၵူၼ်းပၢတ်ႇၶဝ်ႈမၼ်းၼၼ်ႉလႄႈဝႃႈ၊ “မႄႈယိင်းၼုမ်ႇၼႆႉပဵၼ်လုၵ်ႈၽူႈလႂ်၊” ဝႃႈၼင်ႇၼႆလႄႈ။
ၽူႈဢွၼ်ႁူဝ်ၵူၼ်းပၢတ်ႇၶဝ်ႈၵေႃႈတွပ်ႇလႄႈဝႃႈ၊ “မႄႈယိင်းၼုမ်ႇၼႆႉမၼ်းပဵၼ်မႄႈယိင်းၵူၼ်းမဵဝ်း မေႃႇၽႃႉ၊ ဢၼ်လုၵ်ႉၵႃႈတီႈမိူင်း မေႃႇၽႃႉ၊ မႃးၸွမ်း ၼေႃးမိ၊ ၼၼ်ႉဢေႃႈ။-
မၼ်းယွၼ်းဢၶႂၢင်ႉတီႈၵဝ်ၶႃႈႁႂ်ႈလႆႈၵဵပ်းႁူင်းၶဝ်ႈဢၼ်တူၵ်းဢၼ်ႁေႈၼႂ်းၵႄႈၶွၼ်ႈၶဝ်ႈၸွမ်းၽၢႆႇလင်ၵူၼ်းပၢတ်ႇၶဝ်ႈၸိူဝ်းၼၼ်ႉၶႃႈဢေႃႈ။ မၼ်းမႃးၵဵပ်းယူႇၸဵမ်မိူဝ်ႈၵၢင်ၼႂ်ၸဝ်ႉလႄႈတိုၵ်ႉႁႃၵိုတ်းၵႂႃႇသေယဝ်ႉ၊မႃးလိုဝ်ႈသဝ်းယူႇၼႂ်းသုမ်ႉထဵင်မိူဝ်ႈလဵဝ်ၼႆႉၵူၺ်းဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ ပေႃႇၸႃႉ၊ လၢတ်ႈတီႈ ရုထႃႉ၊ လႄႈဝႃႈ၊ “ထွမ်ႇလူးလုၵ်ႈယိင်းၵဝ်႟။ လိူဝ်သေတူင်ႈၼႃးၵဝ်ၼႆႉဢမ်ႇလူဝ်ႇၵႂႃႇၵဵပ်းၼႂ်းတူင်ႈၼႃးပိူၼ်ႈ၊ၵႂႃႇၸွမ်းၶႃႈၵူၼ်းယိင်းၵဝ်ၸိူဝ်းၼၼ်ႉၵူၺ်းတႃႉ။-
ဝႆႉသတိ၊ယႃႇပေႁႂ်ႈပူၼ်ႉဢွၵ်ႇလႅၼ်ၼႃးဢၼ်ၶဝ်ပၢတ်ႇယူႇလႄႈၵႂႃႇၸွမ်းၶဝ်တႃႉ။ လွင်ႈၼင်ႇႁိုဝ်ၵူၼ်းၼုမ်ႇၶဝ်တင်းလၢႆတၵ်းဢမ်ႇလူလၢႆၽိတ်းပိူင်ႈမႂ်းၸိုင်၊ၵဝ်ပေႃးသင်ႇလၢတ်ႈဝႆႉယဝ်ႉ။ ပေႃးယၢၵ်ႇၼမ်ႉၵေႃႈၵႂႃႇႁႃတၵ်းၵိၼ်ၼႂ်းမေႃႈၼမ်ႉဢၼ်ၵူၼ်းၼုမ်ႇၶဝ်တၵ်းဝႆႉယဝ်ႉၼၼ်ႉတႃႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ ရုထႃႉ၊ ၶုပ်ႉမူပ်ႇငူပ်ႉၼႃႈမၼ်းၸပ်းလိၼ်သေလႄႈလၢတ်ႈဝႃႈ၊ “ၵွပ်ႈပိူဝ်ႈလွင်ႈၸိူဝ်ႉႁိုဝ်လႄႈၸဝ်ႈဝႆႉဢယေးၵႃႈၼိူဝ်ၵဝ်ၶႃႈထၼ်ႇၼႆႉလႄႈဢဵတ်းလူတူၺ်းထိုင်ၵဝ်ၶႃႈဢၼ်ပဵၼ်ၵူၼ်းတၢင်ႇၸိူဝ်ႉတၢင်ႇၶိူဝ်းၼႆႉၼင်ႇႁိုဝ်ၶႃႈ၊” ဝႃႈၼင်ႇၼႆဢေႃႈ။
ပေႃႇၸႃႉ၊ ၶိုၼ်းလၢတ်ႈလႄႈဝႃႈ၊ “လွင်ႈဢၼ်မႂ်းလုမ်းလႃးမႄႈၸဝ်ႈမႂ်းထၼ်ႇႁိုဝ်ဝၢႆးသေၽူဝ်မႂ်းတၢႆယဝ်ႉၼၼ်ႉဢိၵ်ႇတင်းလွင်ႈဢၼ်မႂ်းၸုၼ်ႉပႅတ်ႈပေႃႈမႄႈမႂ်းၸႃႉၸဵမ်မိူင်းၽင်ႁူၵ်ႉၽင်ႁႄႇမႂ်းသေလႄႈမႃးယူႇၵႃႈၼႂ်းၵႄႈၵူၼ်းမဵဝ်းဢၼ်မႂ်းဢမ်ႇတွၼ်ႉႁုၸၵ်းမိုတ်ႈၵိုဝ်းသေပွၵ်ႈၼၼ်ႉပိူၼ်ႈပေႃးမွၵ်ႇလၢတ်ႈၵဝ်ဝႆႉမူတ်းယဝ်ႉ။-
ႁႂ်ႈ ထႃႇဝရႃႉၽြႃး၊ တႅၼ်းပၼ်ဢၵျူဝ်းတီႈလွင်ႈဢၼ်မႂ်းႁဵတ်းၸိူဝ်းၼၼ်ႉသေၵမ်းလူၺ်ႈ။ ႁႂ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ ၽြႃးဢၼ်မႂ်းမႃးသွၼ်ႈႁူမ်ႈၽူၺ်းၸဝ်ႈယူႇၼႆႉၶျႃးပၼ်သူးဢၼ်ၸေးၸုမ်ႇတီႈမႂ်းသေၵမ်းလူၺ်ႈ၊” ဝႃႈၼင်ႇၼႆလႄႈ။
ရုထႃႉ၊ ၵေႃႈၶိုၼ်းလၢတ်ႈလႄႈဝႃႈ၊ “ဢူဝ်းၸဝ်ႈ၊ၸဝ်ႈမီးမႅတ်ႈတႃႇၵရုၼႃႇၼိူဝ်ၵဝ်ၶႃႈလႄႈလၢတ်ႈၵႂၢမ်းဢၼ်ပၼ်ႁႅင်းတီႈၵဝ်ၶႃႈၶႃႈဢေႃႈ။ ပိၵ်ႉသမ်ႉၵဝ်ၶႃႈဢမ်ႇၸႂ်ႈၶႃႈတီႈၸဝ်ႈသေၵေႃႈၸဝ်ႈယင်းလၢတ်ႈၵႂၢမ်းဢူၼ်ႈဢွၼ်ႇတေႃႇၶႃႈထၼ်ႇၼႆႉတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈဢၼ်ထိုင်ၶိင်ႇၵိၼ်တၢင်းၵိၼ်ၼၼ်ႉ ပေႃႇၸႃႉ၊ ႁွင်ႉ ရုထႃႉ၊ လႄႈဝႃႈ၊ “မႃးၵိၼ်ၶဝ်ႈမုၼ်းၸွမ်းႁဝ်းတႃႉ။ ဢဝ်ၶဝ်ႈမုၼ်းၸမ်ႈၼႂ်းၼမ်ႉမၢၵ်ႇၸပိတ်ႉလႄႈၵိၼ်တႃႉ၊” ဝႃႈၼင်ႇၼႆလႄႈ ရုထႃႉ၊ ၵေႃႈၶဝ်ႈၵႂႃႇၼင်ႈၵိၼ်ၸွမ်းၵူၼ်းပၢတ်ႇၶဝ်ႈၸိူဝ်းၼၼ်ႉဢေႃႈ။ ပေႃႇၸႃႉ၊ ဢဝ်ၶဝ်ႈတႅၵ်ႇယိုၼ်ႈပၼ် ရုထႃႉ၊ လႄႈ ရုထႃႉ၊ ၵေႃႈၵိၼ်တေႃႇပေႃးဢိမ်ႇသေယဝ်ႉ၊ယင်းၵိုတ်းယင်းၵျၢၼ်ႇဝႆႉၵမ်ႈၽွင်ႈယူႇဢေႃႈ။-
ဝၢႆးၼၼ်ႉ၊ ရုထႃႉ၊ လုၵ်ႉၵႂႃႇၵဵပ်းႁူင်းၶဝ်ႈၵိင်ႇဢၼ်တူၵ်းဢၼ်ႁေႈၼၼ်ႉထႅင်ႈလႄႈ ပေႃႇၸႃႉ၊ သင်ႇလၢတ်ႈတီႈၵူၼ်းပၢတ်ႇၶဝ်ႈတင်းလၢႆလႄႈဝႃႈ၊ “ႁႂ်ႈမၼ်းၵဵပ်းႁူင်းၶဝ်ႈဢၼ်တူၵ်းဢၼ်ႁေႈၸွမ်းၵႄႈလိုၼ်ႈၶဝ်ႈၸိူဝ်းၼၼ်ႉတႃႉ။ ယႃႇပေႁႂ်ႈမၼ်းလႆႈဢူၵ်းလႆႈဢၢႆလႄႈ၊-
တိုတ်ႉထွၼ်ႁူင်းၶဝ်ႈၵမ်ႈၽွင်ႈတူၵ်းဝႆႉ ႁႂ်ႈမၼ်းလႆႈၵဵပ်းဢဝ်သေၵမ်း၊ယႃႇပေၼႄးမၼ်း၊” ဝႃႈၼင်ႇၼႆဢေႃႈ။
ရုထႃႉ၊ ၵေႃႈၵဵပ်းႁူင်းၶဝ်ႈဢၼ်တူၵ်းဢၼ်ႁေႈတေႃႇပေႃးၶမ်ႈလႄႈမိူဝ်ႈဢၼ်မၼ်းပေႃႉၶဝ်ႈဢၼ်မၼ်းၵဵပ်းလႆႈမႃးၼၼ်ႉလႆႈၶဝ်ႈပိူၵ်ႇသေႁၢပ်ႇၼိုင်ႈၸမ်ၸမ်ယူႇဢေႃႈ။-
ရုထႃႉ၊ ႁၢပ်ႇၶဝ်ႈပိူၵ်ႇမိူဝ်းၵႂႃႇၼႂ်းဝဵင်းလႄႈၼႄၶဝ်ႈပိူၵ်ႇဢၼ်မၼ်းၵဵပ်းလႆႈမႃးၼမ်ထၼ်ႇလႂ်ၼၼ်ႉတီႈမႄႈၸဝ်ႈမၼ်းဢေႃႈ။ မၼ်းသမ်ႉဢဝ်ၶဝ်ႈတႅၵ်ႇဢၼ်မၼ်းၵဵပ်းႁွမ်မႃးၼၼ်ႉပၼ်မႄႈၸဝ်ႈမၼ်းၵိၼ်ဢေႃႈ။-
ၼေႃးမိ၊ ၸင်ႇထၢမ်လႄႈဝႃႈ၊ “မိူဝ်ႈၼႆႉမႂ်းၵႂႃႇၵဵပ်းႁူင်းၶဝ်ႈဢၼ်တူၵ်းဢၼ်ႁေႈတီႈလႂ်။ ၵဵပ်းၵႃႈၼႂ်းတူင်ႈၼႃးၽႂ်။ ႁႂ်ႈၸဝ်ႈၽြႃးပၼ်တၢင်းလီမၢင်ႇၵလႃႇတီႈၵေႃႉဢၼ်ဢဵတ်းလူတူၺ်းထိုင်မႂ်းၼႆႉသေၵမ်းလူၺ်ႈ၊” ဝႃႈၼင်ႇၼႆသေယဝ်ႉ။ ရုထႃႉ၊ ၵေႃႈမွၵ်ႇလၢတ်ႈလွင်ႈဢၼ်မၼ်းလႆႈၵႂႃႇၵဵပ်းႁူင်းၶဝ်ႈဢၼ်တူၵ်းဢၼ်ႁေႈတီႈၼႂ်းတူင်ႈၼႃးဢၼ်ၸဝ်ႈမၼ်းၸိုဝ်ႈ ပေႃႇၸႃႉ၊ ၼၼ်ႉဢေႃႈ။
မိူဝ်ႈၼၼ်ႉ ၼေႃးမိ၊ လၢတ်ႈလႄႈဝႃႈ၊ “ႁႂ်ႈ ထႃႇဝရႃႉၽြႃး၊ ဢၼ်ႁဵတ်းၵျေးၸူးတီႈၵေႃႉဢၼ်ဢသၢၵ်ႈလိပ်းဢိၵ်ႇတင်းၵေႃႉဢၼ်တၢႆယဝ်ႉၼၼ်ႉပၼ်မၢင်ႇၵလႃႇတီႈမၼ်းသေၵမ်းလူၺ်ႈ၊” ဝႃႈၼင်ႇၼႆသေယဝ်ႉ၊သမ်ႉလၢတ်ႈၼႄ ရုထႃႉ၊ လႄႈဝႃႈ၊ “ၵေႃႉၼၼ်ႉပဵၼ်ပီႈၼွင်ႉၸိူဝ်ႉၶိူဝ်းဢၼ်ၸမ်ၵၼ်တင်းႁဝ်းလႄႈပဵၼ်ၵေႃႉဢၼ်မီးပုၼ်ႈၽွၼ်းဢၼ်ထုၵ်ႇလီပႂ်ႉလူလုမ်းလႃးႁဝ်းၵေႃႉၼိုင်ႈဢိူဝ်း၊” ဝႃႈၼင်ႇၼႆဢေႃႈ။
ရုထႃႉ၊ သမ်ႉမွၵ်ႇလၢတ်ႈလႄႈဝႃႈ၊ “ၼႆႉၵူၺ်းဢမ်ႇၵႃး၊မၼ်းယင်းလၢတ်ႈၵဝ်ၶႃႈႁႂ်ႈၵဝ်ၶႃႈၵဵပ်းႁူင်းၶဝ်ႈဢၼ်တူၵ်းဢၼ်ႁေႈၸွမ်းလင်ၵူၼ်းပၢတ်ႇၶဝ်ႈမၼ်းၸိူဝ်းၼၼ်ႉတေႃႇႁွတ်ႈပၢတ်ႇၶဝ်ႈယဝ်ႉၵႂႃႇၼၼ်ႉလူးၵွၼ်ႇဢေႃႈ၊” မိူဝ်ႈဢၼ်ဝႃႈၼင်ႇၼႆၸိုင်။
ၼေႃးမိ၊ လၢတ်ႈလႄႈဝႃႈ၊ “ၸႂ်ႈယဝ်ႉ၊လုၵ်ႈယိင်းၵဝ်႟။ ပေႃးပဵၼ်ၼႆ၊ၵူဝ်မႂ်းလႆႈထူပ်းၽေးတီႈၼႂ်းတူင်ႈၼႃးတၢင်ႇတူင်ႈလႄႈမႂ်းလီႁဵတ်းၵေႃႉၸွမ်းမႄႈယိင်းၸိူဝ်းဢၼ်ပၢတ်ႇၶဝ်ႈမၼ်းယူႇၼၼ်ႉဢိူဝ်း၊” ဝႃႈၼင်ႇၼႆသေယဝ်ႉ။-
ရုထႃႉ၊ ၵေႃႈႁဵတ်းၵၢၼ်ၸွမ်းၵူၼ်းပၢတ်ႇၶဝ်ႈၸိူဝ်းၼၼ်ႉလႄႈၵဵပ်းႁူင်းၶဝ်ႈဢၼ်တူၵ်းဢၼ်ႁေႈတေႃႇႁွတ်ႈၶဝ်ၸိူဝ်းၼၼ်ႉပၢတ်ႇၶဝ်ႈပေႃးယဝ်ႉတူဝ်ႈၵႂႃႇၼၼ်ႉသေလႄႈမၼ်းယူႇလူၺ်ႈမႄႈၸဝ်ႈမၼ်းယူႇဢေႃႈ။
လိုၼ်းၼၼ်ႉ၊ ၼေႃးမိ၊ လၢတ်ႈတီႈ ရုထႃႉ၊ လႄႈဝႃႈ၊ “လုၵ်ႈယိင်းၵဝ်႟။ လွင်ႈၼင်ႇႁိုဝ်မႂ်းတၵ်းတေမီးၸႂ်ၶျၢမ်းသႃႇၸိုင်၊မႂ်းထုၵ်ႇလီတႄႇၼႃႈႁိူၼ်းယဝ်ႉ။-
မႂ်းၶႆႈၸႂ်ထူပ်း ပေႃႇၸႃႉ၊ ပေႃႈလဵင်ႉမႄႈယိင်းပၢတ်ႇၶဝ်ႈၸိူဝ်းဢၼ်မႂ်းႁဵတ်းၵေႃႉၸွမ်းၶဝ်ၼၼ်ႉပဵၼ်ပီႈၼွင်ႉၸိူဝ်ႉၶိူဝ်းၸမ်ၵၼ်တင်းႁဝ်းၼၼ်ႉယူႇ၊တူၺ်းလူး၊ၶမ်ႈၼႆႉမၼ်းတေလၢင်ၶဝ်ႈမုယေႃးၵႃႈတီႈတလၢင်းယဵပ်ႇၶဝ်ႈဢိူဝ်း။-
မႂ်းဢၢပ်ႇၼမ်ႉသေယဝ်ႉ၊တႃးၼမ်ႉမၼ်းႁွမ်လႄႈၼုင်ႈၶူဝ်းႁၢင်ႈၶိူင်ႈလူင်းၸူးၵႃႈတီႈတလၢင်းယဵပ်ႇၶဝ်ႈၼၼ်ႉတႃႉ။ ၵူၺ်းၵႃႈ၊ယႃႇပေၼႅတ်ႈႁႂ်ႈမၼ်းလႆႈႁုလွင်ႈဢၼ်မႂ်းမီးယူႇတီႈၼၼ်ႈတေႃႇႁွတ်ႈၶိင်ႇဢၼ်မၼ်းၵိၼ်ၶူပ်းယဝ်ႉၼၼ်ႉတႃႉ။-
မိူဝ်ႈဢၼ်မၼ်းၶဝ်ႈၼွၼ်းၼၼ်ႉတွင်းတီႈၼွၼ်းမၼ်းဝႆႉလီလီသေလႄႈပေႃးမၼ်းၼွၼ်းလပ်းယဝ်ႉၸိုင်၊လွမ်ၵႂႃႇပိုတ်ႇတိၼ်ၽႃႈႁူမ်ႇမၼ်းလႄႈၼွၼ်းတီႈၼၼ်ႈတႃႉ။ မၼ်းတၵ်းလၢတ်ႈလွင်ႈဢၼ်မႂ်းထုၵ်ႇလီႁဵတ်းၸိူဝ်ႉႁိုဝ်ၼၼ်ႉတီႈမႂ်းဢိူဝ်း၊” ဝႃႈၼင်ႇၼႆဢေႃႈ။
ရုထႃႉ၊ ၵေႃႈၶိုၼ်းလၢတ်ႈလႄႈဝႃႈ၊ “ၵဝ်ၶႃႈတၵ်းႁဵတ်းၸွမ်းၵႃႈၼင်ႇဢၼ်မႄႈႁဝ်းသင်ႇလၢတ်ႈၼၼ်ႉၶႃႈဢေႃႈ၊” ဝႃႈၼင်ႇၼႆႁပ်ႉတုင်းဢဝ်ဢေႃႈ။
ဝၢႆးၼၼ်ႉ၊ ရုထႃႉ၊ လူင်းၸူးၵႃႈတီႈတလၢင်းယဵပ်ႇၶဝ်ႈသေလႄႈႁဵတ်းၸွမ်းၵႃႈၼင်ႇဢၼ်မႄႈၸဝ်ႈမၼ်းသင်ႇလၢတ်ႈဝႆႉၼၼ်ႉဢေႃႈ။-
မိူဝ်ႈဢၼ် ပေႃႇၸႃႉ၊ ၵိၼ်ယဝ်ႉသူတ်ႉယဝ်ႉၼၼ်ႉမၼ်းသႂၢင်ႇသိူဝ်းၸႂ်ၼႃႇသေလႄႈၵႂႃႇၼွၼ်းၵႃႈတီႈႁိမ်းတိၼ်ၵွင်ၶဝ်ႈဢေႃႈ။ ရုထႃႉ၊ ၵေႃႈလွမ်လွမ်ၵႂႃႇပိုတ်ႇၽႃႈႁူမ်ႇလႄႈၼွၼ်းၵႃႈတီႈပၢႆတိၼ်မၼ်းဢေႃႈ။-
ၶိင်ႇတဵင်ႈၶိုၼ်းမိူဝ်ႈဢၼ် ပေႃႇၸႃႉ၊ တိုၼ်ႇမႃးၼၼ်ႉႁုလွင်ႈဢၼ်ၽူႈယိင်းၵေႃႉၼိုင်ႈၼွၼ်းယူႇၵႃႈတီႈပၢႆတိၼ်မၼ်းၸိုင်၊တူၵ်းၸႂ်လႄႈဝၢႆႇၸူးသေယဝ်ႉ။-
ထၢမ်လႄႈဝႃႈ၊ “မႂ်းပဵၼ်ၽူႈလႂ်” ဝႃႈၼင်ႇၼႆဢေႃႈ။ ရုထႃႉ၊ ၶိုၼ်းလၢတ်ႈလႄႈဝႃႈ၊ “ၵဝ်ၶႃႈပဵၼ် ရုထႃႉ၊ ၶႃႈၸဝ်ႈႁဝ်း၊ၶႃႈဢေႃႈ။ ပိူဝ်ႈဢၼ်ၸဝ်ႈႁဝ်းပဵၼ်ၵေႃႉဢၼ်ထိူၵ်ႈထုတ်ႇဢဝ်ၶႃႈၸဝ်ႈလႄႈၶႅၼ်းတေႃႈဢဝ်ၸဵင်ႇၽႃႈဝႆၸဝ်ႈႁဝ်းႁူမ်ႇပၼ်ၶႃႈၸဝ်ႈသေၵမ်းၶႃႈ၊” ဝႃႈၼင်ႇၼႆဢေႃႈ။
ပေႃႇၸႃႉ၊ ၵေႃႈလၢတ်ႈလႄႈဝႃႈ၊ “လုၵ်ႈယိင်းၵဝ်႟။ ႁႂ်ႈ ထႃႇဝရႃႉၽြႃး၊ ပၼ်မၢင်ႇၵလႃႇတၢင်းလီတီႈမႂ်းသေၵမ်းလူၺ်ႈ။ မႂ်းယင်းဢမ်ႇၸွမ်းလင်မၢဝ်ႇၵူၼ်းမီးဢမ်ႇၼၼ်မၢဝ်ႇၵူၼ်းၽၢၼ်တၢင်ႇၵေႃႉလႄႈၵျေးၸူးဢၼ်မႂ်းႁဵတ်းၵမ်းလိုၼ်းၼႆႉယဵင်ႈၶႅၼ်းယႂ်ႇၼႃႇသေၵျေးၸူးဢၼ်မႂ်းႁဵတ်းၵမ်းဢွၼ်တၢင်းၼၼ်ႉယဝ်ႉ။-
တေႃႈလဵဝ်ၼႆႉယႃႇပေမႆႈၸႂ်ယဝ်ႉ။ ရုထႃႉ၊ ႟။ ၵူၼ်းတင်းဝဵင်းႁုလွင်ႈဢၼ်မႂ်းပဵၼ်မႄႈယိင်းဢၼ်လီၼၼ်ႉယူႇ၊ၵဝ်တေႁဵတ်းၸွမ်းဢၼ်မႂ်းယွၼ်းၼၼ်ႉယူႇ။-
ၸႂ်ႈယဝ်ႉ။ ၵဝ်ပဵၼ်ၸိူဝ်ႉၶိူဝ်းဢၼ်ၸမ်ၵၼ်တင်းမႂ်းလႄႈမီးပုၼ်ႈၽွၼ်းဢၼ်ထိူၵ်ႈထုတ်ႇဢဝ်မႂ်းၸႂ်ႈတႄႉယဝ်ႉ။ ၵူၺ်းၵႃႈ၊ယင်းမီးၵေႃႉၼိုင်ႈဢၼ်ယဵင်ႈၶႅၼ်းၸမ်လႄႈထိူၵ်ႈထုတ်ႇဢဝ်မႂ်းၼၼ်ႉဢိူဝ်း။-
ၶမ်ႈၼႆႉတႄႉသဝ်းယူႇလူးၵွၼ်ႇတႃႉ။ ၼႂ်ၽုၵ်ႈၵဝ်တၵ်းတွင်ႈထၢမ်မၼ်းလႄႈပေႃးမၼ်းဢဝ်ပုၼ်ႈၽွၼ်းဢၼ်ထုတ်ႇဢဝ်မႂ်းၸိုင်၊ပဵၼ်ဢၼ်ထုၵ်ႇဢၼ်ဢၢပ်ႈယဝ်ႉ။ သင်ဝႃႈဢမ်ႇပဵၼ်ၸိူဝ်ႉၼင်ႇၼၼ်ၸိုင်၊ၵဝ်တၵ်းဢဝ်ပုၼ်ႈၽွၼ်းဢၼ်ထုတ်ႇဢဝ်မႂ်းဝႃႈၼႆၵဝ်တိူင်ႇဝႃႈၵတိ၊ၵႃႈၼႂ်းၸိုဝ်ႈသဵင်ၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉဢေႃႈ။ တေႃႈလဵဝ်ၼႆႉၼွၼ်းၵႂႃႇတေႃႇၽႃႉပၢင်ႇမိူင်းလႅင်းလူးၵွၼ်ႇတႃႉ။” ဝႃႈၼင်ႇၼႆဢေႃႈ။
ရုထႃႉ၊ ၵေႃႈၼွၼ်းၵႃႈတီႈပၢႆတိၼ်မၼ်းတေႃႇႁွတ်ႈၶိင်ႇႁူဝ်ၼႂ်သေယဝ်ႉ။ ပိူဝ်ႈဢၼ် ပေႃႇၸႃႉ၊ ဢမ်ႇၶႂ်ႈႁႂ်ႈပိူၼ်ႈလႆႈႁုလႆႈႁၼ်လွင်ႈဢၼ်မႄႈယိင်းၵေႃႉၼိုင်ႈၶဝ်ႈၼွၼ်းႁိမ်းမၼ်းၼၼ်ႉလႄႈၸူဝ်ႈဢၼ်ၽႃႉဢမ်ႇပႆႇလႅင်းပၢင်ႇႁႂ်ႈလႆႈတွင်းၼႃႈၼၼ်ႉ ရုထႃႉ၊ လုၵ်ႉၵႂႃႇသေဢေႃႈ။-
ပေႃႇၸႃႉ၊ လၢတ်ႈတီႈမၼ်းလႄႈဝႃႈ၊ “ဢဝ်ၽႃႈဝႆဢၼ်မႂ်းပႃးမႃးၼၼ်ႉသိူဝ်ႇတီႈၼႆႈတႃႉ၊” ဝႃႈၼင်ႇၼႆလႄႈမၼ်းၵေႃႈၽႄႇၵီႈပၼ်ဢေႃႈ။ ပေႃႇၸႃႉ၊ ထွၵ်ႇၶဝ်ႈပိူၵ်ႇမုယေႃးသႂ်ႇမွၵ်ႈႁူၵ်းပႄႇၼိုင်ႈသေယဝ်ႉ၊ၸွႆႈယွင်ႈတၢင်ႇၼိူဝ်မႃႇမၼ်းသေလႄႈမၼ်းၵေႃႈမိူဝ်းၵႂႃႇၵႃႈတီႈဝဵင်းဢေႃႈ။-
မိူဝ်ႈဢၼ်မၼ်းႁွတ်ႈထိုင်ၵႃႈတီႈမႄႈၸဝ်ႈမၼ်းၸိုင်၊မႄႈၸဝ်ႈမၼ်းၵေႃႈထၢမ်လႄႈဝႃႈ၊ “လုၵ်ႈယိင်းၵဝ်႟။ ပဵၼ်မႃးၸိူဝ်ႉၼင်ႇႁိုဝ်တီႈမႂ်း၊” ဝႃႈၼင်ႇၼႆလႄႈ။ မၼ်းၵေႃႈမွၵ်ႇလၢတ်ႈပၼ်ၵႃႈဢၼ် ပေႃႇၸႃႉ၊ ႁဵတ်းပၼ်တီႈမၼ်းၼၼ်ႉၸေးၸေးဢေႃႈ။-
မၼ်းသမ်ႉသိုပ်ႇမွၵ်ႇလၢတ်ႈဝႃႈ၊ “ ပေႃႇၸႃႉ၊ လၢတ်ႈတီႈၵဝ်ၶႃႈဝႃႈ၊ ‘မႂ်းဢမ်ႇထုၵ်ႇလီမိူဝ်းၸူးမႄႈၸဝ်ႈမႂ်းတိၼ်လၢႆမိုဝ်းပဝ်ႇၵူၺ်း၊’ ဝႃႈၼႆလႄႈထွၵ်ႇသႂ်ႇၶဝ်ႈပိူၵ်ႇမုယေႃးၸိူဝ်းၼႆႉပၼ်ၵဝ်ၶႃႈဢေႃႈ၊” ဝႃႈၼင်ႇၼႆသေယဝ်ႉ။
ၼေႃးမိ၊ ၸင်ႇလၢတ်ႈလႄႈဝႃႈ၊ “ ရုထႃႉ၊ ႟။ ပႂ်ႉယူႇတဵတ်ႇတဵတ်ႇတေႃႇႁွတ်ႈပေႃးလႆႈႁုလွင်ႈဢမုၼႆႉတၵ်းပဵၼ်မႃးၸိူဝ်ႉၼင်ႇႁိုဝ်ၼၼ်ႉတႃႉ။ ပေႃႇၸႃႉ၊ တၵ်းတေဢမ်ႇယူႇၼိမ်ၼိမ်တေႃႇႁွတ်ႈဢမုၼႆႉပေႃးယဝ်ႉတူဝ်ႈၵႂႃႇလီလီၼႂ်းဝၼ်းမိူဝ်ႈၼႆႉဢိူဝ်း၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ပေႃႇၸႃႉ၊ ၵႂႃႇၵႃႈတီႈပၢင်ႇပၢင်ၵုမ်တီႈႁူးၽၵ်းတူဝဵင်းလႄႈၼင်ႈယူႇၵႃႈတီႈၼၼ်ႈဢေႃႈ။ မိူဝ်ႈဢၼ်မၼ်းႁၼ်ပီႈၼွင်ႉၸိူဝ်ႉၶိူဝ်းဢၼ်ယဵင်ႈၶႅၼ်းၸမ်ၵၼ်တင်း ဢေးလိမလႅၵ်ႉ၊ ၵေႃႉဢၼ် ပေႃႇၸႃႉ၊ လၢတ်ႈလွင်ႈမၼ်းၼၼ်ႉပႆတၢင်းမႃးလႄႈမၼ်းႁွင်ႉဢဝ်ၵေႃႉၼၼ်ႉလႄႈဝႃႈ၊ “ၵေႃႉ႟။ ဝႄႉလႄႈၼင်ႈၵႃႈတီႈၼႆႈၵမ်းၼိုင်ႈလူး၊” ဝႃႈၼင်ႇၼႆလႄႈၵေႃႉၼၼ်ႉၵေႃႈဝႄႉလႄႈၼင်ႈၵႃႈတီႈၼၼ်ႈဢေႃႈ။-
ပေႃႇၸႃႉ၊ ၸင်ႇႁွင်ႉဢဝ်ၵူၼ်းဢၼ်ပဵၼ်ၵႄႇပဵၼ်ႁူဝ်ဝဵင်းၼၼ်ႉသိပ်းၵေႃႉႁႂ်ႈမႃးၼင်ႈတီႈၼၼ်ႈၼင်ႇၵဝ်ႇဢေႃႈ။-
မိူဝ်ႈဢၼ်ၶဝ်ၼင်ႈယူႇၼၼ်ႉ ပေႃႇၸႃႉ၊ လၢတ်ႈတီႈပီႈၼွင်ႉၸိူဝ်ႉၶိူဝ်းမၼ်းၼၼ်ႉလႄႈဝႃႈ၊ “မိူဝ်ႈလဵဝ် ၼေႃးမိ၊ ဢၼ်လုၵ်ႉသေၵႃႈတီႈမိူင်း မေႃႇၽႃႉ၊ မႃးၼၼ်ႉၶႂ်ႈၶၢႆၵႂၢၵ်ႈလိၼ်ဢၼ်ပီႈၸၢႆးႁဝ်း ဢေးလိမလႅၵ်ႉ၊ ပိူင်ႇၼၼ်ႉလႄႈ၊-
ၵဝ်ၶႃႈထၢင်ႇဝႃႈၵဝ်ၶႃႈထုၵ်ႇလီလၢတ်ႈႁႂ်ႈၸဝ်ႈႁုလွင်ႈၼႆႉယူႇဢေႃႈ။ ပေႃးၸဝ်ႈၶႂ်ႈလႆႈၸိုင်၊သိုဝ်ႉဢဝ်ၵႃႈတီႈၽၢႆႇၼႃႈၵူၼ်းလူင်ၸိူဝ်းဢၼ်ၼင်ႈယူႇၵႃႈတီႈၼႆႈၼႆႉတႃႉ။ သင်ဝႃႈၸဝ်ႈဢမ်ႇၶႂ်ႈထုတ်ႇဢဝ်ၵေႃႈမွၵ်ႇလၢတ်ႈၵဝ်ၶႃႈသေၵမ်း။ ၵွပ်ႈပိူဝ်ႈၸဝ်ႈပဵၼ်ၵေႃႉဢၼ်ယဵင်ႈၶႅၼ်းထိူၵ်ႈပိူင်ႇထုတ်ႇဢဝ်ပိူၼ်ႈလႄႈၵဝ်ၶႃႈပဵၼ်ၵေႃႉဢၼ်တၢမ်းၸဝ်ႈၶႃႈဢေႃႈ၊” ဝႃႈၼင်ႇၼႆဢေႃႈ။ ၵေႃႉၼၼ်ႉၵေႃႈၶိုၼ်းလၢတ်ႈလႄႈဝႃႈ။ “ၵဝ်တၵ်းထုတ်ႇဢဝ်ဢေႃႈ၊” ဝႃႈၼင်ႇၼႆသေလႄႈ။
ပေႃႇၸႃႉ၊ သိုပ်ႇလၢတ်ႈလႄႈဝႃႈ၊ “လီၶႃႈယဝ်ႉ။ ပိူဝ်ႈဢၼ်ၸဝ်ႈသိုပ်ႇဢဝ်ၵႂၢၵ်ႈလိၼ်တီႈ ၼေႃးမိ၊ ၼၼ်ႉလႄႈ ရုထႃႉ၊ မဵဝ်း မေႃႇၽႃႉ၊ ဢၼ်ပဵၼ်မႄႈမၢႆႈၼၼ်ႉၵေႃႈၸဝ်ႈတၵ်းလႆႈထုတ်ႇဢဝ်ပဵၼ်မေးၸဝ်ႈပုၼ်ႈလွင်ႈၼင်ႇႁိုဝ်ၵႂၢၵ်ႈလိၼ်ၼၼ်ႉတၵ်းပဵၼ်ဢမူၺ်ႇၼႂ်းၸိုဝ်ႈသဵင်ၸဝ်ႈမၼ်းဢၼ်တၢႆယဝ်ႉၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၵေႃႉၼၼ်ႉၶိုၼ်းလၢတ်ႈလႄႈဝႃႈ၊ “ပေႃးပဵၼ်ၸိူဝ်ႉၼင်ႇၼႆၸိုင်၊ၵဝ်ၶႃႈဢမ်ႇထုတ်ႇဢဝ်လႆႈ။ ပေႃးထုတ်ႇဢဝ်ၸိုင်၊ၵူဝ်ဢမူၺ်ႇလုၵ်ႈလၢင်းၵဝ်ၶႃႈတၵ်းယွမ်းၵႂႃႇဢေႃႈ။ ပိူဝ်ႈဢၼ်ၵဝ်ၶႃႈဢမ်ႇၸၢင်ႈထုတ်ႇဢဝ်ၼၼ်ႉၸဝ်ႈထုတ်ႇဢဝ်ပုၼ်ႈၸဝ်ႈသေတႃႉ၊” ဝႃႈၼင်ႇၼႆဢေႃႈ။
ၸွမ်းၼင်ႇထုင်းၸၢမ်ႇ ဢိသရေး၊ ၶဝ်မီးမိူဝ်ႈဢွၼ်ၼႆႉၼၼ်ႉပေႃးမီးတၢင်းဢၼ်သိုဝ်ႉဢၼ်ၶၢႆဢမ်ႇၼၼ်လွင်ႈဢၼ်လႅၵ်ႈဢၼ်လၢႆႈမီးၸိုင်၊ၵေႃႉၶၢႆၼၼ်ႉတေလႆႈထွတ်ႇၶႅပ်းတိၼ်ဢၢပ်ႈပၼ်တီႈၵေႃႉသိုဝ်ႉၼၼ်ႉဢေႃႈ။ ၼႆႉၸမ်ႉ၊ပဵၼ်သၢၵ်ႈသေႇဢၼ်ႁႂ်ႈဢမုတႄႇမၼ်ႈၼႂ်းၵူၼ်းမဵဝ်း ဢိသရေး၊ ၶဝ်ဢေႃႈ။
ပိူဝ်ႈၼႆလႄႈၵေႃႉၼၼ်ႉၵေႃႈမိူဝ်ႈဢၼ်မၼ်းဝႃႈ၊ “ၸဝ်ႈထုတ်ႇဢဝ်ပုၼ်ႈၸဝ်ႈသေတႃႉ၊” ဝႃႈၼင်ႇၼႆသေယဝ်ႉ၊မၼ်းၵေႃႈထွတ်ႇၶႅပ်းတိၼ်မၼ်းပၼ်တီႈ ပေႃႇၸႃႉ၊ ဢေႃႈ။-
ပေႃႇၸႃႉ၊ ၵေႃႈလၢတ်ႈတီႈၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆဢိၵ်ႇတင်းၶဝ်ၸိူဝ်းဢၼ်မီးယူႇၵႃႈတီႈၼၼ်ႈလႄႈဝႃႈ၊ “မိူဝ်ႈၼႆႉ၊သူၸဝ်ႈပဵၼ်သၢၵ်ႈသေႇလွင်ႈဢၼ်ၵဝ်ၶႃႈသိုဝ်ႉဢဝ်ဢုၵ်ႉၸႃႇၵူႈမဵဝ်းၵႃႈဢၼ်ပဵၼ်ၶွင် ဢေးလိမလႅၵ်ႉ၊ တင်း ၶိလီႇယၼ်ႇ၊ တင်း မႁႃႇလုၼ်ႇ၊ ၵႃႈၼႂ်းမိုဝ်း ၼေႃးမိ၊ ယဝ်ႉ။-
လိူဝ်သေၼၼ်ႉ၊ ရုထႃႉ၊ မႄႈယိင်းမဵဝ်း မေႃႇၽႃႉ၊ မႄႈမၢႆႈမေး မႁႃႇလုၼ်ႇ၊ ၵေႃႈတၵ်းလႆႈပဵၼ်မေးၵဝ်ၶႃႈႁႂ်ႈလႆႈပႂ်ႉထိင်းဢမူၺ်ႇဢုၵ်ႉၸႃႇၵေႃႉဢၼ်တၢႆယဝ်ႉၼၼ်ႉ၊ဢိၵ်ႇတင်းႁႂ်ႈလႆႈသိုပ်ႇၸိူဝ်ႉၶိူဝ်းႁိူၼ်းမၼ်းၵႃႈၼႂ်းၵူၼ်းမဵဝ်းမၼ်းဢိၵ်ႇတင်းၵႃႈၼႂ်းဝၢၼ်ႈၼႂ်းဝဵင်းမၼ်းၼၼ်ႉဢေႃႈ။ သူၸဝ်ႈပဵၼ်သၢၵ်ႈသေႇဝၼ်းမိူဝ်ႈၼႆႉၶႃႈဢေႃႈ၊” ဝႃႈၼင်ႇၼႆဢေႃႈ။
ၵူၼ်းပဵၼ်ၵႄႇပဵၼ်ႁူဝ်တင်းလၢႆဢိၵ်ႇတင်းၵူၼ်းတၢင်ႇၵေႃႉဢၼ်ယူႇၵႃႈတီႈၼၼ်ႈၵေႃႈ၊ဢွၼ်ၵၼ်လၢတ်ႈလႄႈဝႃႈ၊ “ၸႂ်ႈယဝ်ႉ၊ႁဝ်းပဵၼ်သၢၵ်ႈသေႇဢေႃႈ။ ႁႂ်ႈ ထႃႇဝရႃႉၽြႃး၊ ႁဵတ်းႁႂ်ႈမႄႈယိင်းဢၼ်တၵ်းပဵၼ်မေးမႂ်းၼႆႉၶိုၼ်ႈယႂ်ႇမိူၼ်ၸိူဝ်ႉၼင်ႇ ရႃႇၶေႇလႃႉ၊ တင်း လေးဢႃႇ၊ ၶဝ်သွင်ၵေႃႉဢၼ်တႄႇတင်ႈၸိူဝ်ႉၶိူဝ်းၵူၼ်းမဵဝ်း ဢိသရေး၊ ၼၼ်ႉသေၵမ်းလူၺ်ႈ။ မႂ်းၵေႃႈႁႂ်ႈမၢၵ်ႈမီးလီပဵၼ်ၵႃႈၼႂ်းၶိူဝ်းလုၵ်ႈလၢၼ် ဢေႇၽရတ်ႉ၊ လႄႈမီးသရေႇႁူင်ႁၢင်းၵႃႈၼႂ်းဝဵင်း ပႅတ်ႉလႁႅမ်ႇ၊ သေၵမ်းလူၺ်ႈ။-
ႁႂ်ႈၸိူဝ်ႉၶိူဝ်းလုၵ်ႈလၢၼ်မႂ်းဢၼ် ထႃႇဝရႃႉၽြႃး၊ တၵ်းဢဝ်တီႈမႄႈယိင်းဢၼ်ယင်းၼုမ်ႇၼႆႉပၼ်တီႈမႂ်းၼၼ်ႉပဵၼ်မိူၼ်ၸိူဝ်ႉၼင်ႇၸိူဝ်ႉၶိူဝ်း ၽေးရိတ်ႉ၊ ဢၼ် တႃႇမႃႇ၊ မေး ယုတႃႉ၊ ၵိူတ်ႇလဵင်ႉမႃးၼၼ်ႉသေၵမ်းလူၺ်ႈ၊” ဝႃႈၼင်ႇၼႆပၼ်တၢင်းလီမၢင်ႇၵလႃႇတီႈမၼ်းဢေႃႈ။
ၼင်ႇၼၼ်လႄႈ ပေႃႇၸႃႉ၊ သိမ်းဢဝ် ရုထႃႉ၊ ႁႂ်ႈလႆႈပဵၼ်မေးမၼ်းသေဢေႃႈ။ ထႃႇဝရႃႉၽြႃး၊ ပၼ်မၢင်ႇၵလႃႇတၢင်းလီတီႈ ရုထႃႉ၊ လႄႈမၼ်းပႃးပတိၵ်ႈသၼ်ႇထေႇသေယဝ်ႉ၊ၵိူတ်ႇလဵင်ႉလုၵ်ႈၸၢႆးမႃးဢေႃႈ။-
မႄႈယိင်းတင်းလၢႆ ဢွၼ်ၵၼ်လၢတ်ႈတီႈ ၼေႃးမိ၊ လႄႈဝႃႈ၊ “ႁဝ်းယွင်ႈယေႃး ထႃႇဝရႃႉၽြႃး၊ ၶႃႈဢေႃႈ။ ဝၼ်းမိူဝ်ႈၼႆႉမၼ်းၸဝ်ႈပၼ်လၢၼ်ၸၢႆးတီႈမႂ်းႁႂ်ႈလႆႈလုမ်းလႃးမႂ်းယဝ်ႉ။ ႁႂ်ႈဢၢႆႈၸၢႆးဢွၼ်ႇၼႆႉမီးသရေႇႁူင်ႁၢင်းၵႃႈၼႂ်းမဵဝ်း ဢိသရေး၊ သေၵမ်းလူၺ်ႈ။-
လုၵ်ႈပႂ်ႉမႂ်းႁၵ်ႉမႂ်းၼႃႇလူင်လၢင်လႄႈယဵင်ႈၶႅၼ်းလုမ်းလႃးမႂ်းလီၼႃႇသေဢၼ်မႂ်းလႆႈလုၵ်ႈၸၢႆးၸဵတ်းၵေႃႉလူးၵွၼ်ႇယဝ်ႉ။ မိူဝ်ႈလဵဝ်ၼႆႉမၼ်းပၼ်လၢၼ်ၸၢႆးတီႈမႂ်းလႄႈလၢၼ်ၸၢႆးၼႆႉတၵ်းမႄးၵုမ်းမႄးႁဵတ်းၽဝႃႉၸူဝ်ႈတႃႇဢသၢၵ်ႈမႂ်းပဵၼ်ဢၼ်မႂ်ႇ၊ဢိၵ်ႇတင်းတေၸွႆႈထႅမ်မႃႉၸႃႉမႂ်းမိူဝ်ႈဢၼ်မႂ်းဢသၢၵ်ႈၵႄႇၼၼ်ႉဢေႃႈ၊” ဝႃႈၼင်ႇၼႆဢေႃႈ။-
ၼေႃးမိ၊ ၵေႃႈႁွပ်ႇဢုမ်ႈဢဝ်လုၵ်ႈဢွၼ်ႇၼၼ်ႉသေလႄႈလဵင်ႉလူလုမ်းလႃးသေဢေႃႈ။
မႄႈယိင်းဢၼ်ႁိူၼ်းၸမ်ၵၼ်ၸိူဝ်းၼၼ်ႉဢွၼ်ၵၼ်ပၼ်ၸိုဝ်ႈပၼ်သဵင်လႄႈဝႃႈ၊ “ဢူဝ်းပိတ်ႉ” ဢေႃႈ။ ၶဝ်ၼင်ႇၵၼ်လၢတ်ႈတီႈၵၼ်လႄႈဝႃႈ၊ “ ၼေႃးမိ၊ လႆႈလုၵ်ႈၸၢႆးယဝ်ႉ၊” ဝႃႈၼင်ႇၼႆဢေႃႈ။ ဢူဝ်းပိတ်ႉ၊ ပဵၼ်ပေႃႈ ယေႇသႄး၊ ၵေႃႉဢၼ်ပဵၼ်ပေႃႈ တႃႇဝိတ်ႈ၊ ၼၼ်ႉဢေႃႈ။
ၸိူဝ်ႉၶိူဝ်းၸူဝ်ႈလုၵ်ႈပၢၼ်လၢၼ် ၽေးရိတ်ႉ၊ တေႃႇႁွတ်ႈ တႃႇဝိတ်ႈ၊ ၸမ်ႉ၊ ၽေးရိတ်ႉ၊ မီးလုၵ်ႈၸၢႆး ႁေႇၸရုၼ်ႇ၊-
ႁေႇၸရုၼ်ႇ၊ မီးလုၵ်ႈၸၢႆး ဢႃႇရမ်ႇ၊ဢႃႇရမ်ႇ၊ မီးလုၵ်ႈၸၢႆး ဢမိၼတပ်ႉ၊-
ဢမိၼတပ်ႉ၊ မီးလုၵ်ႈၸၢႆး ၼႃႇသုၼ်ႇ၊ၼႃႇသုၼ်ႇ၊ မီးလုၵ်ႈၸၢႆး သႃႇလမုၼ်ႇ၊သႃႇလမုၼ်ႇ၊ မီးလုၵ်ႈၸၢႆး ပေႃႇၸႃႉ၊-
ပေႃႇၸႃႉ၊ မီးလုၵ်ႈၸၢႆး ဢူဝ်းပိတ်ႉ၊-
ဢူဝ်ႇပိတ်ႉ၊ မီးလုၵ်ႈၸၢႆး ယေႇသႄး၊ယေႇသႄး၊ မီးလုၵ်ႈၸၢႆး တႃႇဝိတ်ႈ၊ ဢေႃႈ။ ပိုၼ်းၼၢင်းရုထႃႉယဝ်ႉယဝ်ႉဢေႃႈ။
မိူဝ်ႈၼၼ်ႉ၊မီးၵူၼ်းၵေႃႉၼိုင်ႈဢၼ်လႆႈၸိုဝ်ႈ ဢေးလႃႉၵႃႇၼႃႉ၊ ၵူၼ်းၸိူဝ်ႉၶိူဝ်း ဢေႇၽရိမ်ႇ၊ ဢၼ်ယူႇၵႃႈတီႈဝဵင်း ရႃႇမႀိမ်းၸုပိမ်း၊ ၵႃႈၼိူဝ်ႁၢၼ်ႉလွႆ ဢေႇၽရိမ်ႇ၊ ၼၼ်ႉဢေႃႈ။ မၼ်းၼၼ်ႉပဵၼ်လုၵ်ႈၸၢႆး ယေႇရေႃးႁမ်ႇ၊ လၢၼ်ၸၢႆး ဢေးလိႁု၊ ၼႂ်းၶိူဝ်းႁိူၼ်း တေႃႇႁု၊ ဢၼ်ၽႄဢွၵ်ႇပဵၼ်ၶိူဝ်းႁိူၼ်း ၸုၽႃႉ၊ ၼၼ်ႉဢေႃႈ။-
ဢေးလႃႉၵႃႇၼႃႉ၊ ၼၼ်ႉမီးမေးသွင်ၵေႃႉလႄႈၵေႃႉၼိုင်ႈပဵၼ် ႁၼ်ႇၼႃႉ၊ ၵေႃႉၼိုင်ႈသမ်ႉပဵၼ် ပေႇၼိၼ်ႇၼႃႉ၊ ဢေႃႈ။ ပေႇၼိၼ်ႇၼႃႉ၊ ၼၼ်ႉမီးလုၵ်ႈမီးလၢင်းဢေႃႈ။ ႁၼ်ႇၼႃႉ၊ ၸမ်ႉဢမ်ႇမီး။
ၵူၼ်းၵေႃႉၼႆႉၸိုင်၊ယၢမ်ႈလုၵ်ႉသေၵႃႈတီႈဝဵင်းဢၼ်မၼ်းယူႇသေလႄႈၶိုၼ်ႈၸူးၵႃႈတီႈဝဵင်း သိလေႃႇ၊ ၵူႈပီၵူႈပီႁႂ်ႈလႆႈဝႆႈလႄႈႁဵတ်းတၢင်းလူႇဢၼ်သၢၵ်ႈၵၢပ်ႈတီႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ဢေႃႈ။ ၵႃႈတီႈဝဵင်း သိလေႃႇ၊ ၼၼ်ႉ၊လုၵ်ႈၸၢႆး ဢေးလိ၊ သွင်ၵေႃႉဢၼ်ပဵၼ် ႁေႃႇၽၼိ၊ တင်း ၽိၼႁတ်ႉ၊ ႁဵတ်းယဵၸ်ႈပရေႃးႁဵၵ်ႈ ဢေႃႈ။-
ၼႂ်းဝၼ်းဢၼ် ဢေးလႃႉၵႃႇၼႃႉ၊ ႁဵတ်းတၢင်းလူႇဢၼ်သၢၵ်ႈၵၢပ်ႈၼၼ်ႉမၼ်းမႅင်ႇပုၼ်ႈမႅင်ႇတႃႇပၼ်တီႈမေးမၼ်း ပေႇၼိၼ်ႇၼႃႉ၊ ပုၼ်ႈၼိုင်ႈဢိၵ်ႇတင်းပုၼ်ႈတႃႇလုၵ်ႈယိင်းလုၵ်ႈၸၢႆးမၼ်းပုၼ်ႈၼိုင်ႈၼင်ႇၵၼ်ဢေႃႈ။-
တီႈ ႁၼ်ႇၼႃႉ၊ ၼၼ်ႉပိၵ်ႉသမ်ႉမၼ်းႁၵ်ႉၼႃႇလူင်လၢင်သေၵေႃႈ မၼ်းမႅင်ႇပၼ်ပုၼ်ႈလဵဝ်ၵူၺ်း ၵွပ်ႈပိူဝ်ႈ ထႃႇဝရႃႉၽြႃး၊ ဢမ်ႇပၼ်ဢၶႂၢင်ႉဢၼ်ၵိူတ်ႇလဵင်ႉလုၵ်ႈလဵင်ႉလၢင်းတီႈမၼ်းၼၼ်ႉဢေႃႈ။-
ၵွပ်ႈပိူဝ်ႈဢၼ်မၼ်းဢမ်ႇၵိူတ်ႇလုၵ်ႈၵိူတ်ႇလၢင်းလႄႈ ပေႇၼိၼ်ႇၼႃႉ၊ ၵေႃႉဢၼ်ၶေႉဢၼ်ၶဵင်ႇၵၼ်တင်းမၼ်းၼၼ်ႉယႃႉယူၵ်ႉမၼ်းၼႃႇလူင်လၢင်ႁႂ်ႈမၼ်းလႆႈၸႂ်မႆႈၸႂ်လမ်ဢေႃႈ။-
လွင်ႈတၢင်းၼၼ်ႉပဵၼ်ၸိူဝ်ႉၼင်ႇၼၼ်ယူႇၵႃႈၼင်ႇဢၼ်ၶဝ်ၵႂႃႇၵႃႈတီႈႁိူၼ်း ထႃႇဝရႃႉၽြႃး၊ ၵူႈပီၵူႈပီ၊ ပေႇၼိၼ်ႇၼႃႉ၊ ၼၼ်ႉယႃႉယူၵ်ႉမၼ်းၼႃႇလူင်လၢင်တေႃႇထိုင်ႁွတ်ႈႁွင်ႉႁႆႈသေလႄႈဢမ်ႇၵိၼ်ဢမ်ႇၶူပ်းသေၸိူဝ်ႉသေပိူင်လႄႈယူႇဢေႃႈ။-
ၽူဝ်မၼ်း ဢေးလႃႉၵႃႇၼႃႉ၊ ၼၼ်ႉထၢမ်တီႈမၼ်းလႄႈဝႃႈ၊ “ ႁၼ်ႇၼႃႉ၊ ႟။ ၵွပ်ႈသင်လႄႈမႂ်းႁွင်ႉႁႆႈယူႇ။ ၵွပ်ႈသင်လႄႈမႂ်းဢမ်ႇၵိၼ်ဢမ်ႇၶူပ်း။ ၵွပ်ႈသင်လႄႈမႂ်းၸႂ်လဵၵ်ႉၸႂ်ဢူၼ်ႈယူႇ။ ၸွင်ႇၵဝ်ဢမ်ႇလီတီႈမႂ်းလိူဝ်တွၼ်းၼႃႇသေလုၵ်ႈၸၢႆးသိပ်းၵေႃႉၼၼ်ႉႁိုဝ်း၊” ဝႃႈၼင်ႇၼႆဢေႃႈ။
ႁၼ်ႇၼႃႉ၊ တိူင်ႇၵၢဝ်ႇဝႆႉၵတိလႄႈဝႃႈၸမ်ႉ၊ “ၸဝ်ႈပူဝ်ႇပႃႇၵၢင်ႁၢဝ်၊ ၸဝ်ႈထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းလူတူၺ်းၶႃႈၸဝ်ႈၼႆႉလူး။ တူၺ်းႁၼ်တုၵ်ႉၶႃႉၶႃႈၸဝ်ႈႁဝ်းၼႆႉလႄႈၶုၵ်းၸႂ်လႆႈၶႃႈၸဝ်ႈသေၵမ်း။ ပေႃးၸဝ်ႈႁဝ်းပၼ်လုၵ်ႈၸၢႆးၵေႃႉၼိုင်ႈတီႈၶႃႈၸဝ်ႈၸိုင်၊ၶႃႈၸဝ်ႈတၵ်းဢဝ်မၼ်းသၢၵ်ႈၵၢပ်ႈတီႈၸဝ်ႈႁဝ်းၸူဝ်ႈဢသၢၵ်ႈမၼ်းလႄႈၶႃႈၸဝ်ႈတၵ်းဢမ်ႇႁဵတ်းတၢင်းဢၼ်ထႃႁူဝ်မၼ်းလႃးလႃး ဝႃႈၼႆၶႃႈၸဝ်ႈႁဝ်းဝႆႉၵတိတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ႁၼ်ႇၼႃႉ၊ သိုပ်ႇသူးတွင်းတီႈ ထႃႇဝရႃႉၽြႃး၊ ႁိုင်ၼႃႇလႄႈ ဢေးလိ၊ ၵေႃႈပႂ်ႉတူၺ်းသူပ်းမၼ်းဢေႃႈ။-
မၼ်းသူးတွင်းၵႃႈၼႂ်းၸႂ်ၵူၺ်းလႄႈ၊ပိၵ်ႉသမ်ႉသူပ်းမၼ်းတူင်ႉယူႇသေၵေႃႈဢမ်ႇဢွၵ်ႇသဵင်လႃးလႃး။ ပိူဝ်ႈၼႆလႄႈ ဢေးလိ၊ ထၢင်ႇမၼ်းမဝ်းလဝ်ႈသေယဝ်ႉ၊-
လၢတ်ႈတီႈမၼ်းၼၼ်ႉလႄႈဝႃႈ၊ “မႂ်းတၵ်းပဵၼ်ၶီႈလဝ်ႈယူႇႁိုင်ၵႃႈႁိုဝ်။ တိုတ်းပႅတ်ႈၵိၼ်လဝ်ႈမႂ်းတႃႉ၊” ဝႃႈၼင်ႇၼႆဢေႃႈ။
ႁၼ်ႇၼႃႉ၊ ၵေႃႈၶိုၼ်းလၢတ်ႈလႄႈဝႃႈ၊ “ၵဝ်ၶႃႈမဝ်းလဝ်ႈဢမ်ႇၸႂ်ႈၶႃႈ။ ၵဝ်ၶႃႈၸႂ်လဵၵ်ႉၸႂ်ဢူၼ်ႈၼႃႇလႄႈသူးတွင်းယူႇတီႈၶႃႈဢေႃႈ။ ၵဝ်ၶႃႈဢဝ်တုၵ်ႉၶႃႉၵဝ်ၶႃႈၽုၺ်ႇဢွၵ်ႇၼႄပျႃးၵႃႈတီႈၽၢႆႇၼႃႈ ထႃႇဝရႃႉၽြႃး၊ ယူႇတီႈၶႃႈဢေႃႈ။-
ယႃႇပေထၢင်ႇဝႃႈ၊ၵဝ်ၶႃႈၼႆႉပဵၼ်မႄႈယိင်းဢၼ်မဝ်ဢၼ်မၢင်သေၵမ်း။ ၵဝ်ၶႃႈႁဵတ်းပထၼႃႇသူးတွင်းယူႇၸိူဝ်ႉၼင်ႇၼႆၵွပ်ႈပိူဝ်ႈဢၼ်ၵဝ်ၶႃႈငိၼ်းၽၢၼ်ထိုင်ၸႂ်ၼႃႇၶႃႈဢေႃႈ၊” ဝႃႈၼင်ႇၼႆဢေႃႈ။
ဢေးလိ၊ ၵေႃႈလၢတ်ႈလႄႈဝႃႈ၊ “ၵႂႃႇၼိမ်ၼိမ်လီလီတႃႉ။ ႁႂ်ႈၽြႃးပဵၼ်ၸဝ်ႈမဵဝ်း ဢိသရေး၊ ၼၼ်ႉဢဵတ်းလူပၼ်ၵႃႈဢၼ်မႂ်းလႆႈသူးတွင်းယဝ်ႉၼၼ်ႉသေၵမ်းလူၺ်ႈ၊” ဝႃႈၼင်ႇၼႆဢေႃႈ။
မႄႈယိင်းၼၼ်ႉၶိုၼ်းလၢတ်ႈလႄႈဝႃႈ၊ “ႁႂ်ႈၵဝ်ၶႃႈပဵၼ်ၵေႃႉဢၼ်ၵိုင်ႇထိူၵ်ႈၵၼ်တင်းတၢင်းဢၼ်ၸဝ်ႈမီးၸႂ်ၵရုၼႃႇဢၼ်ဢဵတ်းလူၼၼ်ႉသေၵမ်းလူၺ်ႈ၊” ဝႃႈၼင်ႇၼႆသေယဝ်ႉ၊မိူဝ်းၵႂႃႇလႄႈၵိၼ်တၢင်းၵိၼ်တၢင်းၶူပ်းသေလႄႈယင်းဢမ်ႇမီးၼႃႈငိူဝ်ႈၼႃႈငဝ်ထႅင်ႈသေဢိတ်းသေဢီႈယဝ်ႉဢေႃႈ။
ၼႂ်းဝၼ်းမိူဝ်ႈၽုၵ်ႈၼၼ်ႉ ဢေးလႃႉၵႃႇၼႃႉ၊ တင်းၵူၼ်းႁိူၼ်းၵူၼ်းယေးမၼ်းလုၵ်ႉၸဝ်ႉၸဝ်ႉသေယဝ်ႉ၊ႁဵတ်းဝၢတ်ႈတၢင်းဢၼ်ဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ သေလႄႈဢွၼ်ၵၼ်ၶိုၼ်းမိူဝ်းၵႂႃႇၵႃႈတီႈႁိူၼ်းၶဝ်ဝဵင်း ရႃႇမႃႉ၊ ၼၼ်ႉသေဢေႃႈ။ ဢေးလႃႉၵႃႇၼႃႉ၊ ၵေႃႈၶဝ်ႈၸူးၼွၼ်းလူၺ်ႈၵၼ်တင်းမေးမၼ်း ႁၼ်ႇၼႃႉ၊ လႄႈ ထႃႇဝရႃႉၽြႃး၊ ပၼ်ႁႂ်ႈၵႂၢမ်းသူးတွင်းမႄႈယိင်းၼၼ်ႉပျေႉၸုမ်ႇဢေႃႈ။-
ပိူဝ်ႈၼႆလႄႈ ႁၼ်ႇၼႃႉ၊ ပႃးပတိၵ်ႈသၼ်ႇထေႇမႃးသေယဝ်ႉ၊မိူဝ်ႈဢၼ်ၶိင်ႇၶႃႇမၼ်းၸေးၼၼ်ႉၵိူတ်ႇလဵင်ႉလုၵ်ႈၸၢႆးမႃးလႄႈႁွင်ႉႁဵၵ်ႈၸိုဝ်ႈလုၵ်ႈၸၢႆးၼၼ်ႉဝႃႈ၊ သမူၺ်ႇလႃႉ၊ ဢေႃႈ။ မၼ်းၼၼ်ႉမွၵ်ႇလၢတ်ႈၼႄပိူၼ်ႈလႄႈဝႃႈ၊ “ၵဝ်ၶႃႈသူးတွင်းယွၼ်းဢဝ်မၼ်းတီႈ ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။
ၶိင်ႇၶႃႇဢၼ် ဢေးလႃႉၵႃႇၼႃႉ၊ တင်းၵူၼ်းႁိူၼ်းၵူၼ်းယေးမၼ်းတင်းလၢႆတၵ်းဢွၼ်ၵၼ်ၶိုၼ်ႈၸူးၵႃႈတီႈဝဵင်း သိလေႃႇ၊ ႁႂ်ႈလႆႈႁဵတ်းတၢင်းလူႇတီႈ ထႃႇဝရႃႉၽြႃး၊ ဢၼ်ႁဵတ်းၵူႈပီဢိၵ်ႇတင်းၶိူင်ႈတၢင်းလူႇဢၼ်ၶိုၵ်ႉဢၼ်ၶမ်ႇဢၼ်ၸၢပ်ႈသႅင်ႇၵၼ်တင်းၵတိသဵတ်ႈၸႃႇမၼ်းၼၼ်ႉသမ်ႉႁွတ်ႈထိုင်မႃးထႅင်ႈယဝ်ႉဢေႃႈ။-
ႁၼ်ႇၼႃႉ၊ ဢမ်ႇၵႂႃႇၸွမ်း။ လွင်ႈမၼ်းၸမ်ႉ၊မၼ်းလၢတ်ႈတီႈၽူဝ်မၼ်းလႄႈဝႃႈ၊ “ဝၢႆးသေလုၵ်ႈၸၢႆးၽၢတ်ႇၼူမ်းယဝ်ႉၵမ်းလဵဝ်ၼၼ်ႉၵဝ်ၶႃႈၸင်ႇတၵ်းဢဝ်မၼ်းၵႂႃႇၸူးၵႃႈတီႈၽၢႆႇၼႃႈ ထႃႇဝရႃႉၽြႃး၊ လႄႈႁႂ်ႈမၼ်းယူႇၵႃႈတီႈၼၼ်ႈၸူဝ်ႈဢသၢၵ်ႈမၼ်းဢေႃႈ၊” ဝႃႈၼင်ႇၼႆဢေႃႈ။
ၽူဝ်မၼ်း ဢေးလႃႉၵႃႇၼႃႉ၊ ႁပ်ႉတုင်းဢဝ်လႄႈဝႃႈ၊ “ႁဵတ်းၸွမ်းၵႃႈၼင်ႇဢၼ်မႂ်းထၢင်ႇပဵၼ်ဢၼ်လီၼၼ်ႉတႃႉ။ ပႂ်ႉထႃႈတေႃႇထိုင်ႁွတ်ႈမၼ်းၽၢတ်ႇၼူမ်းတႃႉ။ ႁႂ်ႈၵတိ ထႃႇဝရႃႉၽြႃး၊ တႄႇမၼ်ႈသေၵမ်းလူၺ်ႈ၊” ဝႃႈၼင်ႇၼႆဢေႃႈ။ ပိူဝ်ႈၼႆလႄႈမႄႈယိင်းၼၼ်ႉၵိုတ်းဝႆႉယူႇလႄႈလုမ်းလႃးလုၵ်ႈၸၢႆးဢွၼ်ႇမၼ်းတေႃႇထိုင်ႁွတ်ႈၽၢတ်ႇၼူမ်းဢေႃႈ။
ႁၼ်ႇၼႃႉ၊ ႁႂ်ႈၽၢတ်ႇၼူမ်းယဝ်ႉမၼ်းၸင်ႇဢဝ်လုၵ်ႈဢွၼ်ႇၼၼ်ႉၵႂႃႇၵႃႈတီႈႁိူၼ်း ထႃႇဝရႃႉၽြႃး၊ ၵႃႈၼႂ်းဝဵင်း သိလေႃႇ၊ ဢေႃႈ။ မၼ်းပႃးဢဝ်ဝူဝ်းဢၼ်ဢသၢၵ်ႈမီးသၢမ်ပီ တူဝ်ၼိုင်ႈ၊ၽွင်ၶဝ်ႈၵျုင်ႇၸဵတ်းပႄႇ တင်းထူင်ၼင်ဢၼ်တဵမ်ဝႆႉတင်းၼမ်ႉမၢၵ်ႇၸပိတ်ႉၼၼ်ႉထူင်ၼိုင်ႈၵႂႃႇဢေႃႈ။ မိူဝ်ႈၼၼ်ႉ သမူၺ်ႇလႃႉ၊ ၼၼ်ႉဢသၢၵ်ႈယင်းတိုၵ်ႉလဵၵ်ႉၼႃႇဢွၼ်ႇၼႃႇဢေႃႈ။-
ၶဝ်ႁႅမ်ဝူဝ်းတူဝ်ၼၼ်ႉယဝ်ႉၸင်ႇဢဝ်လုၵ်ႈဢွၼ်ႇၼၼ်ႉၶဝ်ႈၸူးတီႈ ဢေးလိ၊ ဢေႃႈ။-
ႁၼ်ႇၼႃႉ၊ လၢတ်ႈတီႈမၼ်းလႄႈဝႃႈ၊ “ဢူဝ်း။ ၸဝ်ႈတီႈၶႃႈ႟။ ၸွင်ႇၸဝ်ႈတွင်းၵဝ်ၶႃႈယူႇတီႈၶႃႈႁိုဝ်း။ ၵဝ်ၶႃႈၼႆႉပဵၼ်မႄႈယိင်းၵေႃႉဢၼ်ၸဝ်ႈႁၼ်မၼ်းၸုၵ်းယူႇၵႃႈတီႈၼႆႈသေလႄႈသူးတွင်းတီႈ ထႃႇဝရႃႉၽြႃး၊ မိူဝ်ႈဝၼ်းၼၼ်ႉၶႃႈဢေႃႈ။-
ၵဝ်ၶႃႈသူးတွင်းယွၼ်းဢဝ်လုၵ်ႈဢွၼ်ႇၼႆႉၶႃႈဢေႃႈ။ ထႃႇဝရႃႉၽြႃး၊ ဢဵတ်းလူပၼ်ၵႃႈၼင်ႇဢၼ်ၵဝ်ၶႃႈယွၼ်းဢဝ်ၼၼ်ႉၶႃႈယဝ်ႉ။-
ၵွပ်ႈပိူဝ်ႈၼင်ႇၼၼ်လႄႈၵဝ်ၶႃႈဢဝ်မၼ်းသၢၵ်ႈၵၢပ်ႈတီႈ ထႃႇဝရႃႉၽြႃး၊ ၶႃႈဢေႃႈ။ သၢၵ်ႈၵၢပ်ႈႁႂ်ႈမၼ်းပဵၼ်ၵူၼ်း ထႃႇဝရႃႉၽြႃး၊ ပိူင်ႇယူႇၸူဝ်ႈဢသၢၵ်ႈမၼ်းၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။ ၶဝ်ၵေႃႈႁဵတ်းတၢင်းဢၼ်ၵူဝ်းၵႂၢႆႇဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၵႃႈတီႈၼၼ်ႈဢေႃႈ။
မိူဝ်ႈၼၼ်ႉ၊ ႁၼ်ႇၼႃႉ၊ ႁဵတ်းပထၼႃႇသူးတွင်း လႄႈဝႃႈ၊ “ႁူဝ်ၸႂ်ၵဝ်ၶႃႈသႂၢင်ႇသိူဝ်းၼႂ်း ထႃႇဝရႃႉၽြႃး၊ လႄႈ ၵဝ်ၶႃႈသမ်ႉလႆႈၸႂ်ယႂ်ႇၵွပ်ႈပိူဝ်ႈ ထႃႇဝရႃႉၽြႃး၊ ဢေႃႈ။ သူပ်းၵဝ်ၶႃႈလႆႈလၢတ်ႈၵႂၢမ်းဢၼ်ဢုပ်ႇဝၢဝ်းၵႃႈၼိူဝ်ရၢၼ်ႇသူႇၵဝ်ၶႃႈတင်းလၢႆယူႇ၊ ၵွပ်ႈပိူဝ်ႈၵဝ်ၶႃႈၸူမ်းသိူဝ်းမူၼ်ႈပျေႃႇလူၺ်ႈတၢင်းဢၼ်ၵဝ်ၶႃႈလႆႈပႄႉၼႅင်ႇၼၼ်ႉဢေႃႈ။
ၽူႈလႂ်ဢမ်ႇမူတ်းၸၢင်ႇမိူၼ်ၸိူဝ်ႉၼင်ႇ ထႃႇဝရႃႉၽြႃး၊ လႆႈ ၽြႃးတၢင်ႇသူႇတၢင်ႇပႃးဢမ်ႇမိူၼ်ၵၼ်တင်း ထႃႇဝရႃႉၽြႃး၊ လႆႈ ၽူႈလႂ်ၵေႃႈဢမ်ႇႁႄႉဢမ်ႇၵင်ႈမိူၼ်ၸိူဝ်ႉၼင်ႇ ထႃႇဝရႃႉၽြႃး၊ လႆႈသေၵေႃႉသေၵူၼ်း။
ယႃႇပေလၢတ်ႈၵႂၢမ်းဢၼ်ဢုပ်ႇဢၢတ်ႇ ၼႃႇလူင်လၢင်၊ ယႃႇပေႁႂ်ႈၵႂၢမ်းဢၼ်ဢုပ်ႇဝၢဝ်းၽႅၼ်သုင် လႆႈဢွၵ်ႇသူပ်းမႂ်း၊ လွင်ႈမၼ်းၸမ်ႉ၊ ထႃႇဝရႃႉၽြႃး၊ ပဵၼ်ၽြႃးဢၼ်ႁုလွင်ႈဢွၼ်တၢင်းဝႆႉတင်းမူတ်းတီႈၶႃႈဢေႃႈ။ မၼ်းၸဝ်ႈၸႅတ်ႈသေးတူၺ်းလႄႈႁုတၢင်းၵမ်တၢင်းၵျၢင်ႉၵူၼ်းတီႈၶႃႈဢေႃႈ။
ပိုၼ်ၵၢင်ႇၵူၼ်းသိုၵ်းဢၼ်ႁႅင်းယႂ်ႇၼႃႇယိပ်းၵမ်ၼၼ်ႉလႆႈၶၢမ်ႇတၢင်းဢၼ်ႁၵ်းပႅတ်ႈယဝ်ႉ၊ ၶဝ်ၸိူဝ်းဢၼ်ႁႅင်းလဵၵ်ႉႁႅင်းၼွႆႉၸမ်ႉ၊ႁႅင်းယႂ်ႇမႃးတိၵ်းတိၵ်းဢေႃႈ။
ၶဝ်ၸိူဝ်းဢၼ်ယၢမ်ႈၵိၼ်ဢိမ်ႇၵိၼ်တဵမ်ၼၼ်ႉတေႃႈလဵဝ်ၼႆႉ၊ လႆႈႁဵတ်းၵူၼ်းၵိၼ်ၸၢင်ႈၵိၼ်ငႃႁႂ်ႈလႆႈ တၢင်းၵိၼ်ဢေႃႈ။ ၶဝ်ၸိူဝ်းဢၼ်ယၢမ်ႈဢိုပ်းယၢၵ်ႈၼၼ်ႉဢွၼ်ၵၼ်လႆႈဢိမ်ႇတဵမ်ဢေႃႈ။ မႄႈယိင်းမၼ်းၼၼ်ႉလႆႈၵိူတ်ႇလဵင်ႉလုၵ်ႈမႃးၸဵတ်းၵေႃႉယဝ်ႉလႄႈ မႄႈယိင်းဢၼ်ယၢမ်ႈမီးလုၵ်ႈလၢင်းၼမ်ၼၼ်ႉလႆႈၵိုတ်းၵျၢၼ်ႇယူႇၵေႃႉလဵဝ်ၵူၺ်းမၼ်းယဝ်ႉ။
ထႃႇဝရႃႉၽြႃး၊ မီးဢႃႇၼႃႇႁႂ်ႈဢဝ်တၢႆ၊မီးဢႃႇၼႃႇႁႂ်ႈဢသၢၵ်ႈလိပ်းလႄႈ မၼ်းၸဝ်ႈမီးဢႃႇၼႃႇဢဝ်ၵူၼ်းၶျႃးတူၵ်းမိူင်း မရၼႃႉ၊ဢိၵ်ႇတင်း မီးဢႃႇၼႃႇဢဝ်ၶဝ်ၶိုၼ်းဢွၵ်ႇမိူင်းငရၢႆးမႃးဢေႃႈ။
မၼ်းၸဝ်ႈမီးဢႃႇၼႃႇႁဵတ်းႁႂ်ႈမၢင်ၵေႃႉယၢၵ်ႈၽၢၼ်၊ဢိၵ်ႇတင်းႁႂ်ႈမၢင်ၵေႃႉမၢၵ်ႈမီးလႄႈ မၼ်းၸဝ်ႈပိူင်ႇႁဵတ်းႁႂ်ႈမၢင်ၵေႃႉတူၵ်းတီႈတႅမ်ႇ၊ဢိၵ်ႇတင်း ႁႂ်ႈတၢင်ႇၵေႃႉမီးၵုင်ႇမီးမုၼ်ဢေႃႈ။
မၼ်းၸဝ်ႈယူၵ်ႉဢဝ်ၵူၼ်းၽၢၼ်ဢွၵ်ႇသေၵႃႈတီႈမုၼ်ႈလိၼ်လႄႈ ယူၵ်ႉဢဝ်ၵေႃႉဢၼ်ၸုတ်ႈဢၼ်လုတ်ႈဢွၵ်ႇသေၵွင်ၶီႈဝူဝ်းသေယဝ်ႉ၊ ပၼ်ဢၶႂၢင်ႉႁႂ်ႈၶဝ်လႆႈပဵၼ်ၵေႃႉသႄႈလုၵ်ႈၵူၼ်းတင်းလၢႆလႄႈႁဵတ်းႁႂ်ႈၶဝ်မီးၵုင်ႇမီးမုၼ်ဢေႃႈ။ ထႃႇဝရႃႉၽြႃး၊ ပိူင်ႇငဝ်ႈႁၢၵ်ႈလိၼ်မိူင်းလႄႈ မၼ်းၸဝ်ႈတႄႇတင်ႈမိူင်းလေႃးၵႃႉၵႃႈၼိူဝ် ငဝ်ႈႁၢၵ်ႈၸိူဝ်းၼၼ်ႉဢေႃႈ။
မၼ်းၸဝ်ႈၵႅတ်ႇၶႄႁႄႉၵင်ႈယၢင်ႈတိၼ်ၵူၼ်းမၼ်းၸဝ်ႈၸိူဝ်းဢၼ်မီးသဵတ်ႈၸႃႇၼၼ်ႉလႄႈ တီႈၶဝ်ၸိူဝ်းဢၼ်ႁၢႆႉယုတ်ႈၼၼ်ႉၸမ်ႉ၊မၼ်းၸဝ်ႈႁႂ်ႈၶဝ်လပ်းႁၢႆၵႃႈၼႂ်းလပ်းသိင်ႇဢေႃႈ။ လွင်ႈမၼ်းၸမ်ႉ၊ၽူႈလႂ်ဢမ်ႇပႄႉၼႅင်ႇလႆႈ လူၺ်ႈတၢင်းၵတ်ႉတၢင်းၶၼ်တူဝ်ၸဝ်ႈၵဝ်ႇ ၼၼ်ႉတီႈၶႃႈ။
ၶဝ်ၸိူဝ်းဢၼ်ၶတ်းၶႅင်ႁႅင်းတႃႉ ထႃႇဝရႃႉၽြႃး၊ ၼၼ်ႉတၵ်းလႆႈလုလႅဝ်လႄႈ မၼ်းၸဝ်ႈတၵ်းႁႂ်ႈၽႃႉလင်သေၵႃႈၼိူဝ်ၽႃႉၵၢင်ႁၢဝ်တေႃႇၶဝ်ဢေႃႈ။ ထႃႇဝရႃႉၽြႃး၊ ပဵၼ်ၸဝ်ႈဢၼ်ၸီႇယၢင်ႇၵႃႈၼိူဝ်လေႃးၵႃႉတင်းသဵင်ႈတင်းလူင်ဢေႃႈ။ မၼ်းၸဝ်ႈတၵ်းပၼ်မုၼ်ၽုင်းဢႃႇၼုၽေႃႇတီႈၶုၼ်ႁေႃၶမ်းမၼ်းၸဝ်ႈလႄႈ တၵ်းႁႂ်ႈၶုၼ်ႁေႃၶမ်းဢၼ်မၼ်းၸဝ်ႈလိူၵ်ႈဢဝ်ဝႆႉၼၼ်ႉပႄႉၼႅင်ႇဢွင်ႇသိုၵ်းဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ဢေးလႃႉၵႃႇၼႃႉ၊ ၵေႃႈၶိုၼ်းမိူဝ်းၵႂႃႇၸူးတီႈႁိူၼ်းမၼ်းၵႃႈတီႈဝဵင်း ရႃႇမႃႉ၊ ဢေႃႈ။ ၸၢႆးဢွၼ်ႇ သမူၺ်ႇလႃႉ၊ ၸမ်ႉ၊ယူႇသဝ်းၵႃႈၼႂ်းဝဵင်း သိလေႃႇ၊ လႄႈႁဵတ်းဝၢတ်ႈတၢင်းဢၼ်ထၢမ်းၼႃႈၵၢၼ် ထႃႇဝရႃႉၽြႃး၊ ယူႇတႂ်ႈမိုဝ်းယဵၸ်ႈပရေႃးႁဵၵ်ႈ ဢေးလိ၊ ယူႇဢေႃႈ။
လုၵ်ႈၸၢႆး ဢေးလိ၊ ၸိူဝ်းၼၼ်ႉပဵၼ်ၵူၼ်းဢၼ်ႁၢႆႉၵဝ်းလႄႈဢမ်ႇဝႆႉဢယေးတီႈ ထႃႇဝရႃႉၽြႃး၊-
ထုင်းၸၢမ်ႇဢၼ်ယဵၸ်ႈပရေႃးႁဵၵ်ႈလႆႈႁဵတ်းၼႂ်းၵူၼ်းတင်းလၢႆၸမ်ႉ၊ယၢမ်းမိူဝ်ႈဢၼ်ၵူၼ်းသေၵေႃႉၵေႃႉမႃးႁဵတ်းတၢင်းလူႇလႄႈယင်းတိုၵ်ႉတူမ်ႈၼိူဝ်ႉယူႇၼၼ်ႉ၊ၵူၼ်းၸႂ်ႉၵူၼ်းသွႆယဵၸ်ႈပရေႃးႁဵၵ်ႈၵေႃႉၼိုင်ႈယိပ်းၵမ်ဢဝ်ၶေႃသၢမ်ငႅမ်ႈဢၼ်ၵွင်ႉၼိူဝ်ႉၼၼ်ႉမႃးလႄႈ၊-
သႄႇတမ်သႂ်ႇၵႃႈၼႂ်းမေႃႈၶၢင်၊မေႃႈၽႅၼ်၊မေႃႈလူင်၊မေႃႈဢွၼ်ႇၸိူဝ်းၼၼ်ႉဢေႃႈ။ ၵွၼ်ႈၼိူဝ်ႉၵႃႈဢၼ်ၸပ်းပႃးတီႈၶေႃၼၼ်ႉမႃးၼၼ်ႉ၊ယဵၸ်ႈပရေႃးႁဵၵ်ႈသိမ်းဢဝ်ပုၼ်ႈမၼ်းဢေႃႈ။ ၼင်ႇၼၼ်လႄႈၶဝ်ႁဵတ်းၸိူဝ်ႉၼင်ႇၼႆတီႈၵူၼ်းမဵဝ်း ဢိသရေး၊ ၸိူဝ်းဢၼ်မႃးႁဵတ်းတၢင်းလူႇၵႃႈတီႈဝဵင်း သိလေႃႇ၊ ၼၼ်ႉဢေႃႈ။-
လိူဝ်သေၼၼ်ႉၵူၺ်းဢမ်ႇၵႃး၊ၸူဝ်ႈဢၼ်ဢမ်ႇပႆႇဢဝ်ၵွၼ်ႈၶႆၵွၼ်ႈမၼ်းတုတ်ႇၽႆးၼၼ်ႉၵူၼ်းၸႂ်ႉၵူၼ်းသွႆယဵၸ်ႈပရေႃးႁဵၵ်ႈၼၼ်ႉၸၢင်ႈမႃးလႄႈလၢတ်ႈတီႈၵေႃႉဢၼ်ႁဵတ်းတၢင်းလူႇၼၼ်ႉလႄႈဝႃႈ၊ “ပၼ်ၼိူဝ်ႉၵမ်ႈၽွင်ႈပုၼ်ႈဢၼ်တၵ်းပိင်ႈပၼ်ယဵၸ်ႈပရေႃးႁဵၵ်ႈသေၵမ်း။ မၼ်းဢမ်ႇဢဝ်ၼိူဝ်ႉဢၼ်တူမ်ႈတီႈမႂ်းၵူၺ်း။ တၵ်းဢဝ်ၼိူဝ်ႉလိပ်းၵူၺ်းၵူၺ်းဢေႃႈ၊” ဝႃႈၼင်ႇၼႆဢေႃႈ။
ပေႃးၵေႃႉၼၼ်ႉလၢတ်ႈလႄႈဝႃႈ၊ “ႁႂ်ႈလႆႈႁဵတ်းၸွမ်းထုင်းၸၢမ်ႇမၼ်းလႄႈဢဝ်ၵွၼ်ႈၼိူဝ်ႉတုတ်ႇၽႆးသေၵမ်း။ လိုၼ်းၼၼ်ႉၸင်ႇဢဝ်ၵႃႈဢၼ်မႂ်းၶႂ်ႈဢဝ်ၼၼ်ႉသေၵမ်း၊” ဝႃႈၼင်ႇၼႆၸိုင်၊ၵူၼ်းၸႂ်ႉသွႆယဵၸ်ႈပရေႃးႁဵၵ်ႈ ၼၼ်ႉၸၢင်ႈၶိုၼ်းလၢတ်ႈလႄႈဝႃႈ၊ “ဢမ်ႇၸႂ်ႈၵူၺ်း။ ပၼ်တီႈၵဝ်မိူဝ်ႈလဵဝ်ၼႆႉတႃႉ။ ပေႃးဢမ်ႇၼၼ်ၵဝ်တၵ်းဢထမ်ႇမႃႉႁိမ်ဢဝ်ဢေႃႈ၊” ဝႃႈၼင်ႇၼႆဢေႃႈ။
ဢပျတ်ႈလုၵ်ႈၸၢႆး ဢေးလိ၊ ၸိူဝ်းၼၼ်ႉယႂ်ႇၼႃႇလူင်လၢင်ၵႃႈတီႈၽၢႆႇၼႃႈ ထႃႇဝရႃႉၽြႃး၊ ၵွပ်ႈပိူဝ်ႈၶဝ်ႁဵတ်းဢမ်ႇရူဝ်ႇဢမ်ႇသေႇၶိူင်ႈတၢင်းလူႇတီႈ ထႃႇဝရႃႉၽြႃး၊ ၼၼ်ႉဢေႃႈ။
ယၢမ်ႈမိူဝ်ႈၼၼ်ႉၸၢႆးဢွၼ်ႇ သမူၺ်ႇလႃႉ၊ ၼၼ်ႉၼုင်ႈသိူဝ်ႈသုပ်းၽႃႈပၢၼ်ႇသေလႄႈထၢမ်းႁဵတ်းၼႃႈၵၢၼ် ထႃႇဝရႃႉၽြႃး၊ ယူႇဢေႃႈ။-
မႄႈမၼ်းၸၢင်ႈယဵပ်ႉသိူဝ်ႈယၢဝ်းဢွၼ်ႇလႄႈဢဝ်မႃးပၼ်မၼ်းၵူႈပီၵူႈပီၼႂ်းမိူဝ်ႈဢၼ်မၼ်းၸွမ်းၽူဝ်မၼ်းမႃးသၢၵ်ႈၵၢပ်ႈၶိူင်ႈတၢင်းလူႇဢၼ်ယၢမ်ႈႁဵတ်းၵူႈပီၼၼ်ႉဢေႃႈ။
ၽဝ်ႇၼိုင်ႈ ဢေးလိ၊ ပၼ်တၢင်းလီတီႈ ဢေးလႃႉၵႃႇၼႃႉ၊ ၶဝ်ၽူဝ်မေးလႄႈဝႃႈ၊ “ႁႂ်ႈ ထႃႇဝရႃႉၽြႃး၊ တႅၼ်းပၼ်မဵဝ်းၸိူဝ်ႉၶိူဝ်းတီႈမႂ်းၼႂ်းမႄႈယိင်းၼႆႉတၢင်တူဝ်လုၵ်ႈၸၢႆးဢၼ်သူသၢၵ်ႈၵၢပ်ႈဝႆႉတီႈ ထႃႇဝရႃႉၽြႃး၊ ၼၼ်ႉသေၵမ်းလူၺ်ႈ၊” ဝႃႈၼင်ႇၼႆဢေႃႈ။ လိုၼ်းၼၼ်ႉ၊ၶဝ်ၽူဝ်မေးၶိုၼ်းမိူဝ်းၵႂႃႇၸူးတီႈႁိူၼ်းၶဝ်သေဢေႃႈ။
ထႃႇဝရႃႉၽြႃး၊ ၵေႃႈပၼ်ၵျေးၸူးမၢင်ႇၵလႃႇတီႈ ႁၼ်ႇၼႃႉ၊ တႄႉလႄႈမၼ်းသမ်ႉမီးမႃးလုၵ်ႈၸၢႆးသၢမ်ၵေႃႉတင်းလုၵ်ႈယိင်းထႅင်ႈသွင်ၵေႃႉဢေႃႈ။ ဢၢႆႈၸၢႆးဢွၼ်ႇ သမူၺ်ႇလႃႉ၊ ၸမ်ႉ၊ယႂ်ႇသုင်မႃးၵႃႈၼႂ်းတၢင်းဢၼ်ထၢမ်းႁဵတ်းၼႃႈၵၢၼ် ထႃႇဝရႃႉၽြႃး၊ ၼၼ်ႉယူႇဢေႃႈ။
ဢေးလိ၊ ထဝ်ႈၵႄႇၼႃႇယဝ်ႉလႄႈ၊လႆႈငိၼ်းယူႇၶိူဝ်းၶိူဝ်းလွင်ႈၵႃႈဢၼ်လုၵ်ႈၸၢႆးမၼ်းတင်းလၢႆႁဵတ်းၵူႈၸိူဝ်ႉၵူႈမဵဝ်းတီႈၵူၼ်းမဵဝ်း ဢိသရေး၊ ၶဝ်ဢိၵ်ႇတင်းလွင်ႈဢၼ်ၶဝ်ယင်းၶဝ်ႈၸူးၼွၼ်းလူၺ်ႈၵၼ်တင်းမႄႈယိင်းၸိူဝ်းဢၼ်ထၢမ်းႁဵတ်းၼႃႈၵၢၼ်ၵႃႈတီႈႁူးၽၵ်းတူသုမ်ႉထဵင်ၸဝ်ႈၼၼ်ႉဢေႃႈ။-
ပိူဝ်ႈၼႆလႄႈမၼ်းသင်ႇသွၼ်ၶဝ်လႄႈဝႃႈ၊ “ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈသူႁဵတ်းၸိူဝ်ႉၼင်ႇၼႆ။ ၵူၼ်းၵူႈၵေႃႉၵူႈၵူၼ်းဢွၼ်ၵၼ်လၢတ်ႈၼႄလွင်ႈဢၼ်သူႁဵတ်းဢမ်ႇလီဢမ်ႇငၢမ်းၼၼ်ႉတီႈၵဝ်ယဝ်ႉ။-
လုၵ်ႈၸၢႆးၵဝ်ၶဝ်႟။ ဢမ်ႇလီႁဵတ်းၵူၺ်း။ လွင်ႈတၢင်းဢၼ်ၵူၼ်း ထႃႇဝရႃႉၽြႃး၊ တင်းလၢႆဢွၼ်ၵၼ်လၢတ်ႈယူႇၼၼ်ႉပဵၼ်ၶၢဝ်ႇဢၼ်လီဢဵတ်ႇသဵတ်ႇဢေႃႈ။-
ပေႃးၵူၼ်းၼင်ႇၵၼ်ၵၼ်ၽိတ်းပိူင်ႈၵၼ်ၸိုင်၊ ထႃႇဝရႃႉၽြႃး၊ တၵ်းၸီႇယၢင်ႇၸႅတ်ႈထၢမ်ဢေႃႈ။ ပေႃးၵူၼ်းၽိတ်းပိူင်ႈ ထႃႇဝရႃႉၽြႃး၊ ၸိုင်၊ၽူႈလႂ်တၵ်းၵႄႈလိတ်ႈပၼ်မၼ်းလႆႈ၊” ဝႃႈၼင်ႇၼႆသေၵေႃႈ၊ၶဝ်ဢမ်ႇထွမ်ႇဢမ်ႇဢဝ်ၵႂၢမ်းပေႃႈၶဝ်။ လွင်ႈမၼ်းၸမ်ႉ၊ ထႃႇဝရႃႉၽြႃး၊ တႅပ်းတတ်းၸႂ်ႁႂ်ႈလႆႈဢဝ်ၶဝ်တၢႆဢေႃႈ။
ၸၢႆးဢွၼ်ႇ သမူၺ်ႇလႃႉ၊ ၼၼ်ႉယႂ်ႇသုင်မႃးယူႇလႄႈလႆႈၼႃႈလႆႈတႃၵႃႈတီႈ ထႃႇဝရႃႉၽြႃး၊ ဢိၵ်ႇတင်းၵႃႈတီႈၽၢႆႇၼႃႈၵူၼ်းတင်းလၢႆဢေႃႈ။
ပရေႃးၽႅတ်ႈၵေႃႉၼိုင်ႈ မႃးၵႃႈတီႈ ဢေးလိ၊ လႄႈလၢတ်ႈဝႃႈ၊ “ၼႂ်းမိူဝ်ႈဢၼ်ပူႇမွၼ်ႇမႂ်း ဢႃႇရုၼ်ႇ၊ တင်းၵူၼ်းႁိူၼ်းၵူၼ်းယေးမၼ်းယင်းတိုၵ်ႉပဵၼ်ၶႃႈၵႃႈတီႈၶုၼ်ႁေႃၶမ်းမိူင်း ဢေးၵျိပ်ႉ၊ ယူႇၼၼ်ႉၵဝ်ပေႃႇမႃးတီႈ ဢႃႇရုၼ်ႇ၊ ဢေႃႈ။-
ၵႃႈၼႂ်းမဵဝ်း ဢိသရေး၊ ၵႃႈမီးတင်းသဵင်ႈတင်းလူင်၊ၵဝ်လိူၵ်ႈဢဝ်ၵူၼ်းႁိူၼ်းၵူၼ်းယေးမၼ်းႁႂ်ႈၶဝ်ပဵၼ်ယဵၸ်ႈပရေႃးႁဵၵ်ႈၵဝ်ဢၼ်လႆႈထၢမ်းႁဵတ်းၼႃႈၵၢၼ်ဢၼ်ႁဵတ်းတၢင်းလူႇၵႃႈၼိူဝ်ၶဵင်ႇတၢင်းလူႇလႂ်၊တၢင်းဢၼ်ၽဝ်ၼၢမ်ႇသႃႇလႂ်ဢိၵ်ႇတင်းတၢင်းဢၼ်ၼုင်ႈသိူဝ်ႈသုပ်းႁႂ်ႈလႆႈတိူင်ႇပၢင်ႇၵၼ်တင်းၵဝ်လႂ်ဢေႃႈ။ ၵဝ်သမ်ႉပၼ်ဢၶႂၢင်ႉႁႂ်ႈၶဝ်ၶၢမ်ႇဢဝ်ပုၼ်ႈဢဝ်တႃႇၶိူင်ႈတၢင်းလူႇၸိူဝ်းဢၼ်တုတ်ႇၵႃႈၼိူဝ်ၶဵင်ႇတၢင်းလူႇၸိူဝ်းၼၼ်ႉယဝ်ႉ။-
ႁဵတ်းသင်လႄႈသူဢဝ်တင်းတႃဢၼ်လေႃးၽႃႉယႂ်ႇလူတူၺ်း ၶိူင်ႈတၢင်းလူႇၸိူဝ်းဢၼ်ၵဝ်ၸႂ်ႉႁႂ်ႈၵူၼ်းၵဝ်တင်းလၢႆသၢၵ်ႈၵၢပ်ႈဝႆႉၼၼ်ႉၼင်ႇႁိုဝ်။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းယဵင်ႈၶႅၼ်းယုၵ်ႉယွင်ႈလုၵ်ႈၸၢႆးမႂ်းတင်းလၢႆၼႃႇသေၵဝ်ပွႆႇႁႂ်ႈၶဝ်ပီးလီမၼ်းလီလူၺ်ႈၵွၼ်ႈၼိူဝ်ႉဢၼ်မွၼ်းၼႃႇသေပိူၼ်ႈၼႂ်းၶိူင်ႈတၢင်းလူႇၵႃႈဢၼ်ၵူၼ်းၵဝ်တင်းလၢႆလူႇတၢၼ်းပၼ်ၵဝ်ၼၼ်ႉၸိူဝ်ႉၼင်ႇႁိုဝ်။-
ၵဝ် ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ လႆႈဝႆႉၵတိမိူဝ်ႈၵွၼ်ႇဢွၼ်တၢင်းၼၼ်ႉလွင်ႈဢၼ်ႁႂ်ႈၵူၼ်းႁိူၼ်းၵူၼ်းယေးမႂ်းဢိၵ်ႇတင်းၵူၼ်းၶိူဝ်းႁိူၼ်းမႂ်းတင်းလၢႆထၢမ်းႁဵတ်းၼႃႈၵၢၼ်ယဵၸ်ႈပရေႃးႁဵၵ်ႈ တႃႇသေႇဢမ်ႇထၢတ်ႇၼၼ်ႉယဝ်ႉ။ ၵူၺ်းၵႃႈ၊တေႃႈလဵဝ်ၼႆႉၵဝ်သမ်ႉဝႃႈၸမ်ႉ၊ ‘ႁႂ်ႈၵတိၼၼ်ႉၵႆၵၼ်တင်းၵဝ်သေ။ လွင်ႈမၼ်းၸမ်ႉ၊ၵဝ်တၵ်းယုၵ်ႉယွင်ႈၶဝ်ၸိူဝ်းဢၼ်ယုၵ်ႉယွင်ႈၵဝ်ၼၼ်ႉဢေႃႈ။ ၶဝ်ၸိူဝ်းဢၼ်ႁဵတ်းဢမ်ႇပေႃးၼင်ႇႁိုဝ်တီႈၵဝ်ၼၼ်ႉၵဝ်တၵ်းယႃႉမုၼ်သရေႇၶဝ်လုဢေႃႈ၊’ ဝႃႈၼႆဢေႃႈ။-
ထွမ်ႇငိၼ်းတႃႉ။ ၶိင်ႇမိုဝ်ႉဝၼ်းဢၼ်ၵဝ်တၵ်းဢဝ်တၢႆပႅတ်ႈၵူၼ်းၼုမ်ႇၵူၼ်းၵမ်ၵႃႈဢၼ်မီးၵႃႈၼႂ်းၵူၼ်းႁိူၼ်းၵူၼ်းယေးမႂ်း ဢိၵ်ႇတင်းၵႃႈၼႂ်းၵူၼ်းၶိူဝ်းႁိူၼ်းမႂ်း၊ႁႂ်ႈၵေႃႉဢၼ်ထဝ်ႈဢၼ်ၵႄႇၼၼ်ႉထၢၼ်ႈပေႃးဢမ်ႇမီးၵႃႈၼႂ်းၵူၼ်းၶိူဝ်းႁိူၼ်းမႂ်းသေၵေႃႉသေၵူၼ်းၼၼ်ႉႁွတ်ႈထိုင်ယဝ်ႉ။-
ၼင်ႇၼၼ်လႄႈ၊မႂ်းတေမီးၸႂ်လဵၵ်ႉၸႂ်ၼွႆႉလႄႈဢဝ်တင်းတႃဢၼ်လေႃးၽႃႉယႂ်ႇလူတူၺ်းၵႃႈၼိူဝ်ၸေးၸိမ်ႇဢုၵ်ႉၸႃႇဢၼ်ၵဝ်ပၼ်တၢင်းလီတီႈၵူၼ်းမဵဝ်း ဢိသရေး၊ ၼၼ်ႉဢေႃႈ။ ၵႃႈၼႂ်းၵူၼ်းၶိူဝ်းႁိူၼ်းမႂ်းၸမ်ႉ၊တေဢမ်ႇလႆႈမီးၵေႃႉဢၼ်ထဝ်ႈၵႄႇယဝ်ႉဢေႃႈ။-
ၼႂ်းဝႃႈၼၼ်သေၵေႃႈၵဝ်တၵ်းဝႆႉႁႂ်ႈၵူၼ်းၵႃႈၼႂ်းလုၵ်ႈလၢၼ်ၸိူဝ်ႉၶိူဝ်းမႂ်းၼႆႉၵေႃႉၼိုင်ႈဢသၢၵ်ႈလိပ်းယူႇသေလႄႈႁႂ်ႈမၼ်းပဵၼ်ယဵၸ်ႈပရေႃးႁဵၵ်ႈဢၼ်ထၢမ်းႁဵတ်းၼႃႈၵၢၼ်ၵဝ်ယူႇဢေႃႈ။ ၵူၺ်းၵႃႈ၊မၼ်း တၵ်းတႃမွတ်ႇလႄႈၸႂ်လုယူႇဢေႃႈ။ ၵူၼ်းၸိူဝ်ႉၶိူဝ်းႁိူၼ်းမႂ်းတင်းမူတ်းၸိူဝ်းၼၼ်ႉတၵ်းလႆႈတၢႆၸူဝ်ႈဢၼ်ဢသၢၵ်ႈဢရွႆႇၶဝ်ဢမ်ႇပႆႇၵႄႇပႆႇထဝ်ႈ ၼၼ်ႉဢေႃႈ။-
ယၢမ်းမိူဝ်ႈဢၼ်လုၵ်ႈၸၢႆးမႂ်း ႁေႃႇၽၼိ၊ တင်း ၽိၼႁတ်ႉ၊ တၢႆၵႂႃႇၼႂ်းဝၼ်းလဵဝ်တင်းသွင်ၵေႃႉၼၼ်ႉၸင်ႇ၊လွင်ႈတၢင်းၼႆႉတၵ်းၼႄပျႃးတီႈမႂ်းလွင်ႈဢၼ်ၵဝ်လၢတ်ႈဝႆႉၵူႈၸိူဝ်ႉၵူႈပိူင်တၵ်းပဵၼ်မႃးဢမၢၼ်ႇၶၼ်ပဵၼ်ၼၼ်ႉဢေႃႈ။-
ၵွပ်ႈၼႆလႄႈ၊ၵဝ်တၵ်းလိူၵ်ႈဢဝ်ယဵၸ်ႈပရေႃးႁဵၵ်ႈၵေႃႉဢၼ်ၸၢင်ႈပႂ်ႉသဵတ်ႈၸႃႇတေႃႇၵဝ်လႄႈၸၢင်ႈႁဵတ်းၸွမ်းၵႃႈဢၼ်ဢလူဝ်ႇၵၢင်ၸႂ်ၵဝ်မီးၼၼ်ႉဢေႃႈ။ ၵဝ်တၵ်းပၼ်ၸိူဝ်ႉပၼ်ၶိူဝ်းတီႈမၼ်းသေလႄႈႁႂ်ႈမၼ်းထၢမ်းႁဵတ်းၼႃႈၵၢၼ်ၵႃႈတီႈၽၢႆႇၼႃႈၶုၼ်ႁေႃၶမ်းဢၼ်ၵဝ်လိူၵ်ႈဢဝ်ဝႆႉၼၼ်ႉတႃႇသေႇဢေႃႈ။-
လုၵ်ႈလၢၼ်ၸိူဝ်ႉၶိူဝ်းမႂ်းဢၼ်ဢသၢၵ်ႈလိပ်းလႄႈၵိုတ်းၵျၢၼ်ႇယူႇၸိူဝ်းၼၼ်ႉတၵ်းတေဢွၼ်ၵၼ်ၵႂႃႇၵႃႈတီႈယဵၸ်ႈပရေႃးႁဵၵ်ႈၼၼ်ႉလႄႈယွၼ်းဢဝ်ႁႂ်ႈလႆႈငိုၼ်းသေဢိတ်းသေဢီႈတင်းၶဝ်ႈမုၼ်းသေႁူၺ်ႇသေလႂ်လႄႈဝႃႈ၊ ‘ၶႅၼ်းတေႃႈၸႂ်ႉၵဝ်ၶႃႈလႆႈႁဵတ်းၵၢၼ်ယဵၸ်ႈပရေႃးႁဵၵ်ႈသေၸိူဝ်ႉသေပိူင်၊ပုၼ်ႈဢၼ်ၵဝ်ၶႃႈတၵ်းလႆႈၵိၼ်ၶဝ်ႈမုၼ်းသေၵွၼ်ႈၼိုင်ႈသေၵမ်း၊’ ဝႃႈၼႆဢေႃႈ၊” ဝႃႈၼင်ႇၼႆဢေႃႈ။
ၼႂ်းမိုဝ်ႉဝၼ်းၸိူဝ်းဢၼ်ၸၢႆးဢွၼ်ႇ သမူၺ်ႇလႃႉ၊ ထၢမ်းႁဵတ်းၼႃႈၵၢၼ် ထႃႇဝရႃႉၽြႃး၊ ယူႇတႂ်ႈမိုဝ်း ဢေးလိ၊ ၼၼ်ႉတၢင်းဢၼ်ႁေႃးၼုၵ်ႈၵပၢတ်ႈ ထႃႇဝရႃႉၽြႃး၊ ၵေႇမၢင်ၼႃႇဢေႃႈ။ ရူႇပႃႇရူင်ႇဢၼ်ထၢင်ႇထၢင်ႇသႃးသႃးၵေႃႈဢမ်ႇသူႈမီး။-
ၸူဝ်ႈယၢမ်းၼၼ်ႉ ဢေးလိ၊ ၵေႃႉဢၼ်တႃမၼ်းမူဝ်းထၢၼ်ႈပေႃးဢမ်ႇႁၼ်လႆႈၼၼ်ႉၼွၼ်းယူႇၵႃႈၼႂ်းႁွင်ႈၼွၼ်းမၼ်းလႄႈ၊-
သမူၺ်ႇလႃႉ၊ ၸမ်ႉ၊ၼွၼ်းယူႇၵႃႈၼႂ်းထႃႇၼႃႉတီႈမူတ်းၸၢင်ႇတီႈဢၼ်တိူၵ်ႈပတိၺိၺ်ႇၸဝ်ႈမီးၼၼ်ႉဢေႃႈ။ ၶိုၼ်းၼိုင်ႈ၊ၸူဝ်ႈဢၼ်မိူင်းဢမ်ႇပႆႇလႅင်း၊ၽႆးတဵၼ်းၽြႃးပဵၼ်ၸဝ်ႈယင်းဢမ်ႇပႆႇမွတ်ႇၼၼ်ႉ၊-
ထႃႇဝရႃႉၽြႃး၊ ႁွင်ႉ သမူၺ်ႇလႃႉ၊ လႄႈမၼ်းဢိူဝ်လႄႈဝႃႈ၊ “ဢေႃႈတီႈၶႃႈ၊” ဝႃႈၼင်ႇၼႆသေယဝ်ႉ၊-
လႅၼ်ႈၵႂႃႇၸူးတီႈ ဢေးလိ၊ လႄႈဝႃႈ၊ “ၸဝ်ႈႁဝ်းႁွင်ႉၵဝ်ၶႃႈလႄႈ၊ၵဝ်ၶႃႈမႃးၶႃႈယဝ်ႉ၊” ဝႃႈၼင်ႇၼႆဢေႃႈ။ ဢေးလိ၊ ၶိုၼ်းလၢတ်ႈလႄႈဝႃႈ၊ “ၵဝ်ဢမ်ႇလႆႈႁွင်ႉၵူၺ်း၊ၶိုၼ်းၵႂႃႇၼွၼ်းတႃႉ၊” ဝႃႈၼင်ႇၼႆလႄႈမၼ်းသမ်ႉၶိုၼ်းၵႂႃႇၼွၼ်းသေဢေႃႈ။
ထႃႇဝရႃႉၽြႃး၊ သမ်ႉႁွင်ႉထႅင်ႈလႄႈဝႃႈ၊ “ သမူၺ်ႇလႃႉ၊ ႟၊” ဝႃႈၼင်ႇၼႆလႄႈ၊ သမူၺ်ႇလႃႉ၊ လုၵ်ႉၵႂႃႇၸူးတီႈ ဢေးလိ၊ လႄႈဝႃႈ၊ “ၸဝ်ႈႁဝ်းႁွင်ႉၵဝ်ၶႃႈလႄႈ၊ၵဝ်ၶႃႈမႃးယဝ်ႉ၊” ဝႃႈၼင်ႇၼႆဢေႃႈ။ ဢေးလိ၊ ၵေႃႈၶိုၼ်းလၢတ်ႈလႄႈဝႃႈ၊ “ၵဝ်ဢမ်ႇလႆႈႁွင်ႉၵူၺ်း။ လုၵ်ႈၸၢႆးၵဝ်႟။ သမ်ႉၶိုၼ်းၼွၼ်းတႃႉ၊” ဝႃႈၼင်ႇၼႆဢေႃႈ။-
သမူၺ်ႇလႃႉ၊ ဢမ်ႇပႆႇႁုလွင်ႈဢၼ်ပဵၼ် ထႃႇဝရႃႉၽြႃး၊ ႁွင်ႉမၼ်း၊ၵွပ်ႈပိူဝ်ႈ ထႃႇဝရႃႉၽြႃး၊ ဢမ်ႇပႆႇတွၼ်ႉလၢတ်ႈတေႃႇမၼ်းသေပွၵ်ႈၼၼ်ႉဢေႃႈ။
ထႃႇဝရႃႉၽြႃး၊ သမ်ႉၶိုၼ်းႁွင်ႉ သမူၺ်ႇလႃႉ၊ ထႅင်ႈပွၵ်ႈတီႈသၢမ်လႄႈ၊မၼ်းၵေႃႈလုၵ်ႉၵႂႃႇၸူးတီႈ ဢေးလိ၊ လႄႈလၢတ်ႈဝႃႈ၊ “ၸဝ်ႈႁဝ်းႁွင်ႉၵဝ်ၶႃႈလႄႈ၊ၵဝ်ၶႃႈမႃးၶႃႈယဝ်ႉ၊” ဝႃႈၼင်ႇၼႆဢေႃႈ။ မိူဝ်ႈၼၼ်ႉ ဢေးလိ၊ ႁုသၢႆငၢႆလွင်ႈဢၼ် ထႃႇဝရႃႉၽြႃး၊ ႁွင်ႉလုၵ်ႈဢွၼ်ႇၼၼ်ႉသေယဝ်ႉ၊-
ဢေးလိ၊ သင်ႇလၢတ်ႈတီႈမၼ်းလႄႈဝႃႈ၊ “ၶိုၼ်းၵႂႃႇၼွၼ်းတႃႉ။ ပေႃးမၼ်းၸဝ်ႈႁွင်ႉထႅင်ႈၸိုင်၊မႂ်းလဝ်ႈလၢတ်ႈလႄႈဝႃႈ၊ ‘ ထႃႇဝရႃႉၽြႃး၊ တီႈၶႃႈ။ မီးဢမိင်ႉသေၵမ်းတီႈၶႃႈ။ ၶႃႈၸဝ်ႈႁဝ်းထွမ်ႇယူႇတီႈၶႃႈဢေႃႈ၊’ ဝႃႈၼႆတႃႉ၊” ဝႃႈၼင်ႇၼႆဢေႃႈ။ သမူၺ်ႇလႃႉ၊ ၵေႃႈၶိုၼ်းၵႂႃႇၼွၼ်းသေဢေႃႈ။
ထႃႇဝရႃႉၽြႃး၊ ၵေႃႈမႃးၸုၵ်းယူႇမိူၼ်ၸိူဝ်ႉၼင်ႇၵမ်းဢွၼ်တၢင်းၼၼ်ႉသေလႄႈႁွင်ႉဝႃႈ၊ “ သမူၺ်ႇလႃႉ၊ ႟။ သမူၺ်ႇလႃႉ၊ ႟၊” ဝႃႈၼင်ႇၼႆသေယဝ်ႉ၊ သမူၺ်ႇလႃႉ၊ လဝ်ႈလၢတ်ႈလႄႈဝႃႈ။ “ၸဝ်ႈႁဝ်းမီးဢမိင်ႉသေၵမ်းတီႈၶႃႈ။ ၶႃႈၸဝ်ႈထွမ်ႇယူႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉတီႈ သမူၺ်ႇလႃႉ၊ လႄႈဝႃႈ၊ “တူၺ်းလူး။ ဝၼ်းၼိုင်ႈၸဝ်ႉၸဝ်ႉ၊ၵဝ်တၵ်းႁဵတ်းသေၸိူဝ်ႉသေပိူင်တီႈၵူၼ်းမဵဝ်း ဢိသရေး၊ တင်းလၢႆႁႂ်ႈလွင်ႈတၢင်းဢၼ်လီၵူဝ်လီႁႄတေႃႇထိုင်ႁွတ်ႈၶဝ်ၸိူဝ်းဢၼ်လႆႈငိၼ်းၶၢဝ်ႇငၢဝ်းမၼ်းၼၼ်ႉထၢၼ်ႈပေႃးႁူၶူမ်းၵၢႆးၵႂႃႇတင်းသွင်ၶွၼ်ဢေႃႈ။-
ၼႂ်းမိုဝ်ႉဝၼ်းၼၼ်ႉၵဝ်တၵ်းႁဵတ်းတီႈ ဢေးလိ၊ ၵႃႈဢၼ်ၵဝ်ဝႃႈဝႆႉ၊လူၺ်ႈလွင်ႈၵူၼ်းႁိူၼ်းမၼ်းၼၼ်ႉဢဝ်ၸဵမ်တီႈၸႃႉတေႃႇတီႈသုတ်းဢေႃႈ။-
ၵဝ်လၢတ်ႈဝႆႉတီႈမၼ်းလွင်ႈဢၼ်ၵဝ်တၵ်းၸီႇယၢင်ႇပၼ်တၢမ်ႇၵူၼ်းႁိူၼ်းမၼ်းတင်းလၢႆတႃႇသေႇၵွပ်ႈပိူဝ်ႈလုၵ်ႈၸၢႆးမၼ်းၸိူဝ်းၼၼ်ႉလၢတ်ႈၵႂၢမ်းဢၼ်ၵိၼ်ႇဢၼ်လႃႇတီႈၵဝ်ၼၼ်ႉဢေႃႈ။ ဢေးလိ၊ ႁုလွင်ႈဢၼ်ၶဝ်ႁဵတ်းၼၼ်ႉယူႇသေၵေႃႈမၼ်းယင်းဢမ်ႇႁၢမ်ႈတၢပ်ႈၶဝ်။-
ၵွပ်ႈပိူဝ်ႈၼင်ႇၼၼ်လႄႈၵဝ်ၵိၼ်ႇဝႃႈတီႈၵူၼ်းႁိူၼ်း ဢေးလိ၊ တင်းလၢႆဢဝ်တင်းတၢင်းလူႇတၢင်းတၢၼ်းဢိၵ်ႇတင်းၶိူင်ႈတၢင်းလူႇလႄႈယင်းဢမ်ႇၽေႇဢပျတ်ႈတၢမ်ႇဢၼ်လီၵူဝ်လီႁႄၼႃႇၼႆႉလႆႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
သမူၺ်ႇလႃႉ၊ ၵေႃႈၼွၼ်းယူႇတေႃႇထိုင်ႁွတ်ႈၶိင်ႇၵၢင်ၼႂ်သေယဝ်ႉၸင်ႇလုၵ်ႉမႃးလႄႈၽုၺ်ႇၽၵ်းတူႁိူၼ်း ထႃႇဝရႃႉၽြႃး၊ ဢေႃႈ။ မၼ်းဢမ်ႇႁတ်းမွၵ်ႇလၢတ်ႈရူႇပႃႇရူင်ႇၼၼ်ႉတီႈ ဢေးလိ၊-
ဢေးလိ၊ ႁွင်ႉဢဝ် သမူၺ်ႇလႃႉ၊ လႄႈဝႃႈ၊ “ သမူၺ်ႇလႃႉ၊ လုၵ်ႈၸၢႆးၵဝ်႟၊” ဝႃႈၼင်ႇၼႆလႄႈ။ သမူၺ်ႇလႃႉ၊ ဢိူဝ်လႄႈဝႃႈ၊ “ဢေႃႈတီႈၶႃႈ၊” ဝႃႈၼင်ႇၼႆဢေႃႈ။
ဢေးလိ၊ ၵေႃႈဝႃႈ၊ “ ထႃႇဝရႃႉၽြႃး၊ မီးဢမိင်ႉၸိူဝ်ႉၼင်ႇႁိုဝ်တီႈမႂ်း။ ယႃႇပေသိူင်ႇပေဢမ်ဝႆႉတီႈၵဝ်သေၵမ်း။ ၵႃႈၼႂ်းၵႃႈဢၼ်မၼ်းၸဝ်ႈမီးဢမိင်ႉတီႈမႂ်းၼၼ်ႉပေႃးမႂ်းသိူင်ႇဢမ်ဝႆႉၶေႃႈၼိုင်ႈၵူၺ်းၵေႃႈႁႂ်ႈၽြႃးပဵၼ်ၸဝ်ႈပၼ်တၢမ်ႇၵႃႈၼိူဝ်မႂ်းသေၵမ်းလူၺ်ႈ၊” ဝႃႈၼင်ႇၼႆဢေႃႈ။-
သမူၺ်ႇလႃႉ၊ ၵေႃႈယင်းဢမ်ႇသိူင်ႇဝႆႉဢမ်ဝႆႉသေၶေႃႈသေၵမ်းလႄႈမွၵ်ႇလၢတ်ႈပၼ်မၼ်းၵူႈၸိူဝ်ႉၵူႈပိူင်ဢေႃႈ။ ဢေးလိ၊ ၵေႃႈလၢတ်ႈလႄႈဝႃႈ၊ “မၼ်းၸဝ်ႈပဵၼ် ထႃႇဝရႃႉၽြႃး၊ လူင်လၢင်။ မၼ်းၸဝ်ႈတၵ်းႁဵတ်းၵႃႈဢၼ်သၢင်ႇထုၵ်ႇၵႃႈတီႈတႂ်ႈတႃမၼ်းၸဝ်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
သမူၺ်ႇလႃႉ၊ ၼၼ်ႉယႂ်ႇသုင်မႃးသေယဝ်ႉ၊ ထႃႇဝရႃႉၽြႃး၊ မီးလူၺ်ႈၵၼ်တင်းမၼ်းယူႇလႄႈဢမ်ႇႁႂ်ႈၵႂၢမ်းမၼ်းတူၵ်းၽၢၵ်ႈလၢၵ်ႈလိၼ်သေၶေႃႈသေၵမ်း။-
ၵွပ်ႈပိူဝ်ႈၸိူဝ်ႉၼင်ႇၼၼ်လႄႈၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢဝ်ၵႃႈတီႈၸႃႉၸဵမ်ဝဵင်း တၢၼ်ႇ၊ ၽၢႆႇတၢင်းႁွင်ႇတေႃႇထိုင်ႁွတ်ႈဝဵင်း ပေႇရသေးၽႃႉ၊ ၽၢႆႇတၢင်းၸၢၼ်းၼၼ်ႉဢွၼ်ၵၼ်ႁုလွင်ႈဢၼ် သမူၺ်ႇလႃႉ၊ တေပဵၼ်ပရေႃးၽႅတ်ႈ ထႃႇဝရႃႉၽြႃး၊ မႃးဢမၢၼ်ႇၶၼ်ပဵၼ်ၼၼ်ႉဢေႃႈ။-
ထႃႇဝရႃႉၽြႃး၊ ပေႃႇမႃးၵႃႈတီႈဝဵင်း သိလေႃႇ၊ ၶိူဝ်းၶိူဝ်းယႂ်းယႂ်းၵႃႈတီႈၼၼ်ႈလႄႈလၢတ်ႈတေႃႇ သမူၺ်ႇလႃႉ၊ ဢေႃႈ။ ၼင်ႇၼၼ်လႄႈမိူဝ်ႈဢၼ် သမူၺ်ႇလႃႉ၊ လၢတ်ႈၼၼ်ႉၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢွၼ်ၵၼ်ထွမ်ႇဢဝ်ဢေႃႈ။
ၼႂ်းၶိင်ႇယၢမ်းၼၼ်ႉၵူၼ်းမဵဝ်း ၽိလိတ်ႉတိ၊ တင်းလၢႆၸုတုမ်ၵၼ်မႃးႁဵတ်းသိုၵ်းတိုၵ်းတေႃးမဵဝ်း ဢိသရေး၊ ဢေႃႈ။ ပိူဝ်ႈၼႆလႄႈ ၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ၶီႇသိုၵ်းၵႂႃႇႁႂ်ႈလႆႈတိုၵ်းၶဝ်ဢေႃႈ။ ၵူၼ်းမဵဝ်း ဢိသရေး၊ ၶဝ်ၶျႃးပၢင်တပ်ႉၵႃႈတီႈဝဵင်း ဢေႇပၼေႇၸႃႇ၊ လႄႈၵူၼ်းမဵဝ်း ၽိလိတ်ႉတိ၊ ၶဝ်သမ်ႉၶျႃးပၢင်တပ်ႉၵႃႈတီႈဝဵင်း ဢႃႇၽႅၵ်ႉ၊ ဢေႃႈ။-
ၵူၼ်းမဵဝ်း ၽိလိတ်ႉတိ၊ ၸိူဝ်းၼၼ်ႉႁႄႉတပ်ႉသေယဝ်ႉ၊တိုၵ်းတေႃးလႄႈ၊လိုၼ်းသေဢၼ်တိုၵ်းတေႃးၵၼ်ႁႅင်းၼႃႇယဝ်ႉၼၼ်ႉၸိုင်၊ၵူၼ်းမဵဝ်း ဢိသရေး၊ လႆႈသုမ်းသိုၵ်းဢေႃႈ။ ၵႃႈၼႂ်းပၢင်သိုၵ်းလူင်ၼၼ်ႉႁူဝ်ႁၢၼ်ၵူၼ်းသိုၵ်းမဵဝ်း ဢိသရေး၊ ၼၼ်ႉတၢႆသီႇႁဵင်ဢေႃႈ။-
မိူဝ်ႈဢၼ်ၶဝ်ၸိူဝ်းဢၼ်လွတ်ႈတၢႆမႃးၼၼ်ႉႁွတ်ႈထိုင်ၵႃႈတီႈပၢင်တပ်ႉမႃးၸိုင်၊ၵူၼ်းဢၼ်ပဵၼ်ၵႄႇပဵၼ်ႁူဝ်မဵဝ်း ဢိသရေး၊ ၶဝ်လၢတ်ႈလႄႈဝႃႈ၊ “ၵွပ်ႈသင်လႄႈ ထႃႇဝရႃႉၽြႃး၊ ႁႂ်ႈႁဝ်းတူၵ်းသုမ်းတႂ်ႈမိုဝ်းၵူၼ်းမဵဝ်း ၽိလိတ်ႉတိ၊ ၼႂ်းဝၼ်းမိူဝ်ႈၼႆႉ။ ဢွၼ်ၵၼ်ၵႂႃႇဢဝ်တိူၵ်ႈပတိၺိၺ်ႇ ထႃႇဝရႃႉၽြႃး၊ ဢွၵ်ႇသေၵႃႈတီႈဝဵင်း သိလေႃႇ၊ မႃးပုၼ်ႈလွင်ႈၼင်ႇႁိုဝ်မၼ်းၸဝ်ႈ တၵ်းၵႂႃႇလူၺ်ႈၵၼ်တင်းႁဝ်းလႄႈၵႄႇသႄႇၶျွတ်ႈဢဝ်ႁဝ်းသေၵႃႈၼႂ်းမိုဝ်းရၢၼ်ႇသူႇႁဝ်းၼၼ်ႉတႃႉႁဝ်း၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၶဝ်ပွႆႇၸႂ်ႉၵူၼ်းၵႂႃႇၸူးတီႈဝဵင်း သိလေႃႇ၊ လႄႈဢွၼ်ၵၼ်ဢဝ်တိူၵ်ႈပတိၺိၺ်ႇ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ဢၼ်မီးၵႃႈၼိူဝ်ပလၢင်ႇၶေႇရုၽဵမ်ႇ ၼၼ်ႉၶိုၼ်းမႃးဢေႃႈ။ ႁေႃႇၽၼိ၊ တင်း ၽိၼႁတ်ႉ၊ လုၵ်ႈၸၢႆး ဢေးလိ၊ သွင်ၵေႃႉၼၼ်ႉၵေႃႈပႃးလူၺ်ႈၵၼ်တင်းတိူၵ်ႈပတိၺိၺ်ႇၸဝ်ႈမႃးဢေႃႈ။
မိူဝ်ႈဢၼ်တိူၵ်ႈပတိၺိၺ်ႇၸဝ်ႈၶိုၼ်းႁွတ်ႈမႃးယဝ်ႉၼၼ်ႉၸိုင်၊ၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ႁုၼ်ႈသဵင်ၸူမ်းသိူဝ်းမူၼ်ႈပျေႃႇတေႃႇထိုင်ႁွတ်ႈလိၼ်မိူင်းထၢၼ်ႈပေႃးသၼ်ႇဝႆဢေႃႈ။-
ၵူၼ်းမဵဝ်း ၽိလိတ်ႉတိ၊ ၶဝ် ငိၼ်းသဵင်ဢၼ်ႁုၼ်ႈၼၼ်ႉသေယဝ်ႉ၊ထၢမ်ၵၼ်လႄႈဝႃႈ၊ “သဵင်ဢၼ်ႁုၼ်ႈလႄႈလင်မေႃးၼႃႇလူင်လၢင်ၵႃႈတီႈပၢင်တပ်ႉ ႁေႇပြႄး၊ ၼၼ်ႉပဵၼ်လွင်ႈၸိူဝ်ႉၼင်ႇႁိုဝ်၊” ဝႃႈၼင်ႇၼႆသေလႄႈ၊ႁုလွင်ႈဢၼ်တိူၵ်ႈပတိၺိၺ်ႇ ထႃႇဝရႃႉၽြႃး၊ ႁွတ်ႈထိုင်ၵႃႈၼႂ်းပၢင်တပ်ႉ ႁေႇပြႄး၊ ယဝ်ႉၼၼ်ႉဢေႃႈ။-
ၵူၼ်းမဵဝ်း ၽိလိတ်ႉတိ၊ ၸိူဝ်းၼၼ်ႉၵူဝ်ႁႄလႄႈလၢတ်ႈဝႃႈ၊ “ၽြႃးသူႇၼိုင်ႈႁွတ်ႈထိုင်ၵႃႈၼႂ်းပၢင်တပ်ႉၶဝ်ယဝ်ႉလူင်ပႄႇ။ ႁဝ်းၼႆႉထူပ်းၽေးယဝ်ႉ။ ဢမ်ႇတွၼ်ႉပဵၼ်ၸိူဝ်ႉၼင်ႇၼႆသေပွၵ်ႈ။-
ဢႃႉမၢင်ႇၵလႃႇတူၵ်းႁွတ်ႈၵႃႈၼိူဝ်ႁဝ်းယဝ်ႉလူင်ပႄႇ။ ၽူႈလႂ်တၵ်းၵႄႇသႄႇၶျွတ်ႈဢဝ်ႁဝ်းလွတ်ႈသေၵႃႈၼႂ်းမိုဝ်းၽြႃးၸိူဝ်းဢၼ်တၼ်းၶူဝ်းယႂ်ႇၼႃႇၼၼ်ႉလႆႈ။ ၽြႃးၸိူဝ်းၼႆႉပဵၼ်ၽြႃးဢၼ်ဢဝ်ၽေးဢုပၢတ်ႈၵူႈၸိူဝ်ႉၵူႈမဵဝ်းပၼ်တၢမ်ႇတီႈၵူၼ်းမဵဝ်း ဢေးၵျိပ်ႉ၊ ၶဝ်ၵႃႈတီႈၼႂ်းထိူၼ်ႇလႅင်ႉၼၼ်ႉဢေႃႈ။-
မဵဝ်း ၽိလိတ်ႉတိ၊ ၶဝ်႟။ ဢွၼ်ၵၼ်မီးၸႂ်ႁတ်းႁၢၼ်တႃႉ။ တိုၵ်းတေႃးၸိူဝ်ႉၼင်ႇၵူၼ်းၸၢႆးတႃႉ။ ပေႃးဢမ်ႇၼၼ်ႁဝ်းတၵ်းလႆႈပဵၼ်ၶႃႈတီႈမဵဝ်း ႁေႇပြႄး၊ ၵႂႃႇမိူၼ်ၸိူဝ်ႉၼင်ႇဢၼ်ၶဝ်လႆႈၶၢမ်ႇႁဵတ်းၶႃႈတီႈႁဝ်းမႃးယဝ်ႉၼၼ်ႉဢေႃႈ။ ပိူဝ်ႈၼႆလႄႈဢွၼ်ၵၼ်တိုၵ်းတေႃးမိူၼ်ၵူၼ်းၸၢႆးတႃႉ၊” ဝႃႈၼင်ႇၼႆဢေႃႈ။
မဵဝ်း ၽိလိတ်ႉတိ၊ ၶဝ်တိုၵ်းတေႃးႁႅင်းၼႃႇလႄႈတိုၵ်းပႄႉမဵဝ်း ဢိသရေး၊ ၶဝ်သေယဝ်ႉ၊ၵူၼ်းမဵဝ်း ဢိသရေး၊ တင်းလၢႆဢွၵ်ႇပၢႆႈၸူးတီႈႁိူၼ်းၶဝ်ၵူႈၵေႃႉၵူႈၵူၼ်းဢေႃႈ။ တီႈၼၼ်ႈလႆႈၶၢမ်ႇတၢင်းဢၼ်ဢဝ်တၢႆၼမ်ၼႃႇလူင်လၢင်လႄႈၵူၼ်းသိုၵ်းမဵဝ်း ဢိသရေး၊ လူမ်ႉတၢႆသၢမ်မိုၼ်ႇၵေႃႉဢေႃႈ။-
တိူၵ်ႈပတိၺိၺ်ႇၽြႃးပဵၼ်ၸဝ်ႈၼၼ်ႉလႆႈၶၢမ်ႇတၢင်းဢၼ်ပိူၼ်ႈသိမ်းဢဝ်ၵႂႃႇလႄႈ၊ ႁေႃႇၽၼိ၊ တင်း ၽိၼႁတ်ႉ၊ လုၵ်ႈၸၢႆး ဢေးလိ၊ သွင်ၵေႃႉၼၼ်ႉၵေႃႈသုမ်းဢသၢၵ်ႈသေဢေႃႈ။
ၵူၼ်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ ၵေႃႉၼိုင်ႈလုၵ်ႉသေၵႃႈတီႈပၢင်ၼႃႈသိုၵ်းလႅၼ်ႈပၢႆႈမႃးႁွတ်ႈထိုင်ၵႃႈတီႈဝဵင်း သိလေႃႇ၊ ၼႂ်းဝၼ်းၼၼ်ႉၵမ်းလဵဝ်လႄႈၶူဝ်းၼုင်ႈမၼ်းသိၵ်ႇယွၵ်းဝႆႉဢိၵ်ႇတင်းၵႃႈၼိူဝ်ႁူဝ်မၼ်းၵေႃႈမုၼ်ႈလိၼ်ၽုၵ်ႇသႂ်ႇဝႆႉႁႂ်ႈလႆႈၼႄလွင်ႈတၢင်းမႆႈၸႂ်ဢေႃႈ။-
ဢေးလိ၊ ၼၼ်ႉမႆႈၸႂ်မႆႈၶေႃးလူၺ်ႈလွင်ႈတိူၵ်ႈပတိၺိၺ်ႇၸဝ်ႈလႄႈၼင်ႈၵႃႈၼိူဝ်တင်ႇဢၼ်မီးႁိမ်းသဵၼ်ႈတၢင်းသေယဝ်ႉ၊မုင်ႈတူၺ်းယူႇဢေႃႈ။ ၵေႃႉၼၼ်ႉႁွတ်ႈထိုင်ၵႃႈၼႂ်းဝဵင်းလႄႈမွၵ်ႇလၢတ်ႈလွင်ႈတၢင်းမၼ်းသေယဝ်ႉ၊ၵူၼ်းတင်းဝဵင်းဢွၼ်ၵၼ်ႁွင်ႉသႅၼ်ႇဢေႃႈ။-
ဢေးလိ၊ ငိၼ်းသဵင်ၼၼ်ႉလႄႈထၢမ်ဝႃႈ၊ “သဵင်ဢူၼ်ဢဵၼ်မေႃးမေးထၼ်ႇၼႆႉပဵၼ်လွင်ႈၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။ ၵေႃႉၼၼ်ႉႁိပ်ႈၼႅတ်ႈမႃးလဝ်ႈလၢတ်ႈတီႈ ဢေးလိ၊ ဢေႃႈ။-
မိူဝ်ႈယၢမ်းၼၼ်ႉဢသၢၵ်ႈ ဢေးလိ၊ လႆႈၵဝ်ႈသိပ်းပၢႆပႅတ်ႇပီယဝ်ႉလႄႈမၢၵ်ႇတႃၸမ်တေမွတ်ႇလုမ်းလုမ်းယဝ်ႉဢေႃႈ။-
ၵေႃႉၼၼ်ႉမွၵ်ႇလၢတ်ႈတီႈ ဢေးလိ၊ လႄႈဝႃႈ၊ “ၵဝ်ၶႃႈပၢႆႈလွတ်ႈပၢင်သိုၵ်းသေယဝ်ႉ၊လႅၼ်ႈမႃးသုတ်းတၢင်းလႄႈႁွတ်ႈထိုင်မႃးၵႃႈတီႈၼႆႈမိူဝ်ႈၼႆႉၶႃႈဢေႃႈ၊” ဝႃႈၼင်ႇၼႆဢေႃႈ။ ဢေးလိ၊ ထၢမ်လႄႈဝႃႈ၊ “လုၵ်ႈၸၢႆးၵဝ်႟။ ၼႃႈသိုၵ်းၼၼ်ႉပဵၼ်ၸိူဝ်ႉၼင်ႇႁိုဝ်၊” ဝႃႈၼင်ႇၼႆလႄႈ။
ၵေႃႉဢၼ်မႃးမွၵ်ႇလၢတ်ႈၶၢဝ်ႇငၢဝ်းၼၼ်ႉၶိုၼ်းလဝ်ႈလၢတ်ႈလႄႈဝႃႈ၊ “ၵူၼ်းမဵဝ်း ဢိသရေး၊ လႆႈလႅၼ်ႈပၢႆႈသေၵႃႈတီႈၵူၼ်းမဵဝ်း ၽိလိတ်ႉတိ၊ ၶႃႈဢေႃႈ။ ၵူၼ်းသိုၵ်းႁဝ်းလႆႈၶၢမ်ႇတၢင်းဢၼ်ၶႃႈၽၼ်းတၢႆၼမ်ၼႃႇဢေႃႈ။ လိူဝ်သေၼၼ်ႉလုၵ်ႈၸၢႆးၸဝ်ႈႁဝ်း ႁေႃႇၽၼိ၊ တင်း ၽိၼႁတ်ႉ၊ တၢႆၵႂႃႇယဝ်ႉၶႃႈယဝ်ႉ။ တိူၵ်ႈပတိၺိၺ်ႇၸဝ်ႈၵေႃႈလႆႈၶၢမ်ႇတၢင်းဢၼ်သိမ်းဢဝ်ၵႂႃႇယဝ်ႉၶႃႈယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၵေႃႉၼၼ်ႉမွၵ်ႇလၢတ်ႈလွင်ႈတိူၵ်ႈပတိၺိၺ်ႇၸဝ်ႈၼၼ်ႉၸိုင်၊ ဢေးလိ၊ ပိၼ်ႈတူၵ်းတင်ႇဢၼ်မၼ်းၼင်ႈယူႇၼၼ်ႉၵႃႈႁိမ်းၽၵ်းတူဢေႃႈ။ ဢေးလိ၊ ၼၼ်ႉပဵၼ်ၵေႃႉဢၼ်ထဝ်ႈၼႃႇ၊သမ်ႉပီးၼႃႇၼၼ်ႉလႄႈၶေႃးမၼ်းႁၵ်းလႄႈတၢႆၵႂႃႇဢေႃႈ။ မၼ်းလႆႈႁဵတ်းၵူၼ်းလူင်ဢၼ်ၸီႇယၢင်ႇတြႃးၵႃႈၼိူဝ်မဵဝ်း ဢိသရေး၊ သီႇသိပ်းပီဢေႃႈ။
လုၵ်ႈပႂ်ႉ ဢေးလိ၊ မေး ၽိၼႁတ်ႉ၊ ၼၼ်ႉပႃးပတိၵ်ႈသၼ်ႇထေႇၵႄႇထူၼ်ႈလႄႈၸမ်တၵ်းၵိူတ်ႇလဵင်ႉလုၵ်ႈယဝ်ႉဢေႃႈ။ မိူဝ်ႈဢၼ်မၼ်းလႆႈငိၼ်းၶၢဝ်ႇလွင်ႈဢၼ်တိူၵ်ႈပတိၺိၺ်ႇၽြႃးပဵၼ်ၸဝ်ႈလႆႈၶၢမ်ႇတၢင်းဢၼ်ပိူၼ်ႈသိမ်းဢဝ်ၵႂႃႇဢိၵ်ႇတင်းလွင်ႈဢၼ်ပေႃႈၸဝ်ႈမၼ်းတင်းၽူဝ်မၼ်းတၢႆၸိုင်၊ငွမ်ၼင်ႈလႄႈၵိူတ်ႇလဵင်ႉလုၵ်ႈၵမ်းလဵဝ်ၵွပ်ႈပိူဝ်ႈဢၼ်ဝူၺ်ႇတၼႃႇမၼ်းႁွတ်ႈထိုင်ၼၼ်ႉဢေႃႈ။-
မိူဝ်ႈဢၼ်မၼ်းၸမ်တၵ်းတၢႆၼၼ်ႉၸိုင်၊မႄႈယိင်းၸိူဝ်းဢၼ်မႃးၸွႆႈထႅမ်မၼ်းၼၼ်ႉလၢတ်ႈတီႈမၼ်းလႄႈဝႃႈ၊ “ဝႆႉၸႂ်ၼိမ်ၼိမ်တႃႉ။ မႂ်းၵိူတ်ႇလဵင်ႉလုၵ်ႈၸၢႆးမႃးယဝ်ႉ၊” ဝႃႈၼင်ႇၼႆသေၵေႃႈမၼ်းယင်းဢမ်ႇတၵ်ႉသဵင်၊ယင်းဢမ်ႇဝႆႉဢယေးလႄႈယူႇဢေႃႈ။-
မၼ်းႁွင်ႉႁဵၵ်ႈၸိုဝ်ႈလုၵ်ႈၸၢႆးဢွၼ်ႇၼၼ်ႉ ဢိၶပုတ်ႉ၊ ဢၼ်မီးဢထိၵ်ႈပႄႇဝႃႈ၊ “မုၼ်သရေႇၽြႃးပဵၼ်ၸဝ်ႈလပ်းႁၢႆသေၵႃႈတီႈမဵဝ်း ဢိသရေး၊ ယဝ်ႉ၊” ဝႃႈၼင်ႇၼႆၶႂ်ႈၼႄပျႃးသၢႆငၢႆဢၼ်တိူၵ်ႈပတိၺိၺ်ႇၸဝ်ႈလႆႈၶၢမ်ႇတၢင်းဢၼ်ပိူၼ်ႈသိမ်းဢဝ်ၵႂႃႇဢိၵ်ႇတင်းပေႃႈၸဝ်ႈမၼ်းတင်းၽူဝ်မၼ်းတၢႆၼၼ်ႉဢေႃႈ။-
မၼ်းသမ်ႉလၢတ်ႈလႄႈဝႃႈ၊ “မုၼ်သရေႇၽြႃးပဵၼ်ၸဝ်ႈလပ်းႁၢႆသေၵႃႈတီႈမဵဝ်း ဢိသရေး၊ ၵွပ်ႈပိူဝ်ႈတိူၵ်ႈပတိၺိၺ်ႇၽြႃးပဵၼ်ၸဝ်ႈလႆႈၶၢမ်ႇတၢင်းဢၼ်ပိူၼ်ႈသိမ်းဢဝ်ၵႂႃႇယဝ်ႉၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵူၼ်းမဵဝ်း ၽိလိတ်ႉတိ၊ ၸိူဝ်းၼၼ်ႉဢဝ်တိူၵ်ႈပတိၺိၺ်ႇၸဝ်ႈလႄႈဢွၵ်ႇသေၵႃႈတီႈဝဵင်း ဢေႇပၼေႇၸႃႇ၊ ၵႂႃႇၸူးၵႃႈတီႈဝဵင်းၶဝ်ဢၼ်ပဵၼ်ဝဵင်း ဢႃႇၸုတ်ႉ၊ ဢေႃႈ။-
ၶဝ်ဢဝ်တိူၵ်ႈပတိၺိၺ်ႇၸဝ်ႈၼၼ်ႉၶဝ်ႈၵႃႈၼႂ်းၵျွင်းၽြႃး တႃႇၵုၼ်ႇ၊ လႄႈဝၢင်းဝႆႉၵႃႈႁိမ်းႁုၼ်ႇႁၢင်ႈသၢင်းထုၽြႃး တႃႇၵုၼ်ႇ၊ ၼၼ်ႉဢေႃႈ။-
ထိုင်ၶိင်ႇၵၢင်ၼႂ်ဝၼ်းမိူဝ်ႈၽုၵ်ႈၼၼ်ႉၵူၼ်းဝဵင်း ဢႃႇၸုတ်ႉ၊ တင်းလၢႆထူပ်းႁၼ်ရုၵ်ႉထုၽြႃး တႃႇၵုၼ်ႇ၊ လူမ်ႉဢူပ်ႇပူပ်ႇၵႃႈၼိူဝ်လိၼ်ၵႃႈတီႈၽၢႆႇၼႃႈတိူၵ်ႈပတိၺိၺ်ႇ ထႃႇဝရႃႉၽြႃး၊ ယူႇဢေႃႈ။ ၶဝ်ၸင်ႇၶိုၼ်းဢဝ်တင်ႈဝႆႉၵႃႈတီႈတီႈယူႇမၼ်းၵဝ်ႇၵဝ်ႇၼၼ်ႉဢေႃႈ။-
ထႅင်ႈဝၼ်းၼိုင်ႈၼႂ်းၶိင်ႇၵၢင်ၼႂ်ၸဝ်ႉၸဝ်ႉၼၼ်ႉၶဝ်သမ်ႉထူပ်းႁၼ်ႁုၼ်ႇႁၢင်ႈသၢင်းထုၼၼ်ႉလူမ်ႉဢူပ်ႇပူပ်ႇယူႇၵႃႈတီႈၽၢႆႇၼႃႈတိူၵ်ႈပတိၺိၺ်ႇၸဝ်ႈထႅင်ႈဢေႃႈ။ ၵမ်းၼႆႉၸိုင်၊ႁူဝ်မၼ်းတင်းၶႅၼ်မိုဝ်းမၼ်းတင်းသွင်ၶွၼ်ပုတ်းၵႂႃႇလႄႈမီးယူႇၵႃႈၼိူဝ်ၶူင်ႇၽၵ်းတူၵျွင်းၼၼ်ႉလႄႈ၊တူဝ်ၽြႃး တႃႇၵုၼ်ႇ၊ ၵူၺ်းၵိုတ်းၵျၢၼ်ႇဝႆႉၵူၺ်းမၼ်းဢေႃႈ။-
ၵွပ်ႈပိူဝ်ႈၸိူဝ်ႉၼင်ႇၼႆလႄႈယဵၸ်ႈပရေႃးႁဵၵ်ႈ တႃႇၵုၼ်ႇ၊ တင်းလၢႆဢိၵ်ႇတင်းၶဝ်ၸိူဝ်းဢၼ်ၵူဝ်းၵႂၢႆႇၽြႃး တႃႇၵုၼ်ႇ၊ ၸိူဝ်းၼၼ်ႉမီးထုင်းၸၢမ်ႇဢၼ်ဢမ်ႇယဵပ်ႇဢမ်ႇၶၢမ်ႈၶူင်ႇၽၵ်းတူၽြႃး တႃႇၵုၼ်ႇ၊ ဢၼ်မီးၵႃႈၼႂ်းဝဵင်း ဢႃႇၸုတ်ႉ၊ ၼၼ်ႉတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
မိုဝ်း ထႃႇဝရႃႉၽြႃး၊ တဵၵ်းငႅၼ်းၵူၼ်းဝဵင်း ဢႃႇၸုတ်ႉ၊ ၼၼ်ႉၼၵ်းၼႃႇလူင်လၢင်လႄႈထိမ်ႈသႂ်ႇႁႂ်ႈၶဝ်ႁွတ်ႈထိုင်တၢင်းလုတၢင်းလႅဝ်ဢေႃႈ။ မၼ်းၸဝ်ႈဢဝ်ၽေးဢုပၢတ်ႈတုမ်ႇၸဵပ်းတုမ်ႇၽီၼၼ်ႉပၼ်တၢမ်ႇတီႈၶဝ်လႄႈသိုင်ႇၸိုင်ႈဝၢၼ်ႈမိူင်းၶဝ်တဵမ်ဝႆႉတင်းတၢင်းဢၼ်တၢႆဢိၵ်ႇတင်းတၢင်းဢၼ်လုဢၼ်လႅဝ်ၸွတ်ႇတူဝ်ႈၵႂႃႇတင်းဝဵင်းဢေႃႈ။-
ၶဝ်ႁၼ်လွင်ႈတၢင်းၼႆႉသေလႄႈၵူၼ်းဝဵင်း ဢႃႇၸုတ်ႉ၊ တင်းလၢႆဢွၼ်ၵၼ်လၢတ်ႈလႄႈဝႃႈ၊ “တိူၵ်ႈပတိၺိၺ်ႇၽြႃးပဵၼ်ၸဝ်ႈမဵဝ်း ဢိသရေး၊ ၼႆႉဢမ်ႇထုၵ်ႇလီမီးၵႃႈတီႈႁဝ်း၊ၵွပ်ႈပိူဝ်ႈမိုဝ်းမၼ်းၸဝ်ႈတဵၵ်းငႅၼ်းႁဝ်း၊ဢိၵ်ႇတင်းၽြႃးႁဝ်း တႃႇၵုၼ်ႇ၊ ၼႆႉဢေႃႈ၊” ဝႃႈၼင်ႇၼႆသေယဝ်ႉ။-
ၶဝ်ပွႆႇၸႂ်ႉၵူၼ်းၵႂႃႇႁွင်ႉဢဝ်ၶုၼ် ၽိလိတ်ႉတိ၊ တင်းမူတ်းမႃးၸုတုမ်ၵၼ်လႄႈတွင်ႈထၢမ်လႄႈဝႃႈ၊ “တၵ်းလႆႈဢဝ်တိူၵ်ႈပတိၺိၺ်ႇၽြႃးပဵၼ်ၸဝ်ႈမဵဝ်း ဢိသရေး၊ ၼၼ်ႉႁဵတ်းၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။ ၶဝ်ၽွမ်ႉၸႂ်ၵၼ်လႄႈဝႃႈ၊ “ဢဝ်ၵႂႃႇဝႆႉၵႃႈတီႈဝဵင်း ၵတ်ႉတိ၊ သေ၊” ဝႃႈၼင်ႇၼႆသေလႄႈ၊ဢွၼ်ၵၼ်ဢဝ်ၶၢႆႉၵႂႃႇဝႆႉၵႃႈတီႈၼၼ်ႈသေဢေႃႈ။-
လိုၼ်းသေဢၼ်ၶၢႆႉၵႂႃႇဝႆႉယဝ်ႉၼၼ်ႉ၊ ထႃႇဝရႃႉၽြႃး၊ ႁဵတ်းတၢင်းဢၼ်ယႃႉၽဵဝ်ႈပႅတ်ႈဢၼ်ယႂ်ႇၼႃႇတီႈဝဵင်းၼၼ်ႉလႄႈမၼ်းၸဝ်ႈႁႂ်ႈၽေးဢုပၢတ်ႈတုမ်ႇၸဵပ်းတုမ်ႇၽီတူၵ်းႁွတ်ႈၵႃႈၼိူဝ်ၶဝ်ယိင်းၸၢႆးၸဵမ်လဵၵ်ႉၸဵမ်ယႂ်ႇဢေႃႈ။-
ၵမ်းၼၼ်ႉ၊ၶဝ်ဢွၼ်ၵၼ်ဢဝ်တိူၵ်ႈပတိၺိၺ်ႇၽြႃးပဵၼ်ၸဝ်ႈၵႂႃႇသူင်ႇၵႃႈတီႈဝဵင်း ဢေႇၵရုၼ်ႇ၊ ဢၼ်ပဵၼ်ဝဵင်းၵူၼ်း ၽိလိတ်ႉတိ၊ ၶဝ်တၢင်ႇဝဵင်းၼၼ်ႉလႄႈ၊မိူဝ်ႈဢၼ်တိူၵ်ႈတႃႇၼၼ်ႉႁွတ်ႈထိုင်ၸိုင်၊ၵူၼ်းဝဵင်း ဢေႇၵရုၼ်ႇ၊ ၸိူဝ်းၼၼ်ႉဢွၼ်ၵၼ်ႁွင်ႉသႅၼ်ႇလႄႈဝႃႈ၊ “ၶဝ်ဢဝ်တိူၵ်ႈပတိၺိၺ်ႇၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ၼၼ်ႉမႃးၵႃႈတီႈၼႆႈႁႂ်ႈလႆႈဢဝ်ႁဝ်းၵႃႈမီးတင်းသဵင်ႈတင်းလူင်တၢႆလူင်ပႄႇ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၶဝ်သမ်ႉပွႆႇၸႂ်ႉႁႂ်ႈၶုၼ် ၽိလိတ်ႉတိ၊ တင်းမူတ်းၸုတုမ်ၵၼ်မႃးထႅင်ႈလႄႈလၢတ်ႈဝႃႈ၊ “ပွႆႇတိူၵ်ႈပတိၺိၺ်ႇၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ၶဝ်ၼၼ်ႉၵႂႃႇၶိုၼ်းၸူးၵႃႈတီႈတီႈယူႇၵဝ်ႇၵဝ်ႇမၼ်းၼၼ်ႉပုၼ်ႈလွင်ႈၼင်ႇႁိုဝ်မၼ်းဢမ်ႇဢဝ်ႁဝ်းဢိၵ်ႇတင်းၵူၼ်းႁိူၼ်းႁဝ်းတင်းလၢႆတၢႆသေၵမ်း၊” ဝႃႈၼင်ႇၼႆဢေႃႈ။ လွင်ႈမၼ်းၸမ်ႉ၊တၢင်းၶႆႈတၢင်းပဵၼ်ဢၼ်ၸၢင်ႈႁႂ်ႈတၢႆၼၼ်ႉၸွတ်ႇတူဝ်ႈၵႂႃႇၵႃႈၼႂ်းဝဵင်းတင်းဝဵင်း၊ၵွပ်ႈပိူဝ်ႈၽြႃးပဵၼ်ၸဝ်ႈပၼ်တၢမ်ႇၶဝ်ၼၵ်းၼႃႇလူင်လၢင်ၼၼ်ႉဢေႃႈ။-
ၶဝ်ၸိူဝ်းဢၼ်လွတ်ႈတၢႆၼၼ်ႉလႆႈၶၢမ်ႇတၢမ်ႇၽေးဢုပၢတ်ႈတုမ်ႇၸဵပ်းတုမ်ႇၽီၼႃႇလူင်လၢင်လႄႈသဵင်ဢၼ်ၶဝ်ႁွင်ႉသႅၼ်ႇၼၼ်ႉၶိုၼ်ႈၽႃႉၶိုၼ်ႈမွၵ်ႇယူႇဢေႃႈ။
လိုၼ်းသေဢၼ်တိူၵ်ႈပတိၺိၺ်ႇၸဝ်ႈ ထႃႇဝရႃႉၽြႃး၊ ယူႇတီႈမိူင်း ၽိလိတ်ႉတိ၊ ၸဵတ်းလိူၼ်ယဝ်ႉၼၼ်ႉၸိုင်၊-
ၵူၼ်းမဵဝ်း ၽိလိတ်ႉတိ၊ ၶဝ်ႁွင်ႉဢဝ်ယဵၸ်ႈပရေႃးႁဵၵ်ႈ တင်းလၢႆဢိၵ်ႇတင်းသြႃႇမေႃၽီၶဝ်တင်းလၢႆမႃးလႄႈတွင်ႈထၢမ်ဝႃႈ၊ “တိူၵ်ႈပတိၺိၺ်ႇၸဝ်ႈ ထႃႇဝရႃႉၽြႃး၊ ၼႆႉႁဝ်းၶႃႈတၵ်းတေလႆႈႁဵတ်းၸိူဝ်ႉၼင်ႇႁိုဝ်။ ပေႃးႁဝ်းၶႃႈဢဝ်ၵႂႃႇသူင်ႇၸူးၵႃႈတီႈတီႈယူႇၵဝ်ႇၵဝ်ႇမၼ်းၸိုင်၊ႁဝ်းၶႃႈတၵ်းလႆႈဢဝ်တင်းၵႃႈသင်သူင်ႇၵႂႃႇၸွမ်းလူၺ်ႈၵၼ်ၼၼ်ႉမွၵ်ႇလၢတ်ႈပၼ်ႁဝ်းၶႃႈသေၵမ်း၊” ဝႃႈၼင်ႇၼႆဢေႃႈ။
ၶဝ်ၵေႃႈၶိုၼ်းလၢတ်ႈလႄႈဝႃႈ၊ “ပေႃးသူဢဝ်တိူၵ်ႈပတိၺိၺ်ႇၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ၼၼ်ႉသူင်ႇၶိုၼ်းၸိုင်၊တၵ်းလႆႈသူင်ႇပႃးၶွင်ၽၢၵ်ႇလၢၵ်ႈသွင်ႇပုၼ်ႈဢၼ်တၵ်းၽေႇၵႃႈၶၼ်ဢပျတ်ႈသူၼၼ်ႉဢေႃႈ။ ယႃႇပေသူင်ႇၵႂႃႇလၢႆလၢႆလွၵ်ႇလွၵ်ႇ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊တၢင်းၶႆႈတၢင်းပဵၼ်သူတၵ်းထၢတ်ႇယဵၼ်ဢေႃႈ။ ၼင်ႇၼၼ်လႄႈသူတၵ်းႁုႁၼ်လွင်ႈဢၼ်ၵွပ်ႈသင်လႄႈမၼ်းၸဝ်ႈယင်းတိုၵ်ႉပၼ်တၢမ်ႇတီႈသူယူႇၶိူဝ်းၶိူဝ်းယႂ်းယႂ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵူၼ်းတင်းလၢႆသမ်ႉထၢမ်လႄႈဝႃႈ၊ “ႁဝ်းၶႃႈတၵ်းလႆႈဢဝ်ၶွင်ၽၢၵ်ႇလၢၵ်ႈသွင်ႇမဵဝ်းလႂ်ပၼ်မၼ်းၸဝ်ႈ၊” ဝႃႈၼင်ႇၼႆဢေႃႈ။ ၶဝ်ၶိုၼ်းလၢတ်ႈလႄႈဝႃႈ၊ “သူင်ႇပႃးတုမ်ႇၸဵပ်းတုမ်ႇၽီဢၼ်ဢဝ်တင်းၶမ်းႁဵတ်းႁႃႈဢၼ်ဢိၵ်ႇတင်းၼူၶမ်းႁႃႈဢၼ်၊ႁႂ်ႈယေႈဢၼ်ပဵၼ်ပုၼ်ႈၶုၼ် ၽိလိတ်ႉတိ၊ ယေႈပႃးတႃႉ။ လွင်ႈမၼ်းၸမ်ႉ၊ၽေးဢုပၢတ်ႈမဵဝ်းၼႆႉပဵၼ်ဢၼ်တူၵ်းႁွတ်ႈၵႃႈၼိူဝ်သူဢိၵ်ႇတင်းၵႃႈၼိူဝ်ၶုၼ်ႁႃႈပႃးၼၼ်ႉယဝ်ႉ။-
ႁဵတ်းပဵၼ်တူဝ်ႁၢင်ႈတုမ်ႇၸဵပ်းတုမ်ႇၽီတင်းတူဝ်ႁၢင်ႈၼူဢၼ်ၸၢင်ႈယႃႉမိူင်းသူၼၼ်ႉသေလႄႈယွင်ႈယေႃးမုၼ်ၵုင်ႇၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ တႃႉ။ မၼ်းၸဝ်ႈၸၢင်ႈၶႄးတၵ်းၵိုတ်းပႅတ်ႈတၢင်းဢၼ်ပၼ်တၢမ်ႇတီႈသူ၊တီႈၽြႃးသူၸိူဝ်းၼၼ်ႉဢိၵ်ႇတင်းတီႈမိူင်းသူဢေႃႈ။-
ႁဵတ်းသင်လႄႈသူမီးၸႂ်ဢၼ်တိုဝ်တၼ်မိူၼ်ၸိူဝ်ႉၼင်ႇၶုၼ်ႁေႃၶမ်းမိူင်း ဢေးၵျိပ်ႉ၊ ဢိၵ်ႇတင်းၵူၼ်းမဵဝ်း ဢေးၵျိပ်ႉ၊ ၶဝ်ၼၼ်ႉ။ လွင်ႈတၢင်းဢၼ်ၽြႃးပဵၼ်ၸဝ်ႈႁဵတ်းႁၢဝ်ႉႁဵတ်းၵျၢမ်းတီႈၶဝ်ထၼ်ႇႁိုဝ်တေႃႇထိုင်ႁွတ်ႈၶဝ်သမ်ႉလႆႈပွႆႇၵူၼ်းမဵဝ်း ဢိသရေး၊ ၶဝ်ၵႂႃႇၼၼ်ႉၸိုင်၊ယႃႇပေလိုမ်းသေၵမ်း။-
ပိူဝ်ႈၼႆလႄႈႁႅၼ်းလေႃႉဝူဝ်းဢၼ်မႂ်ႇသေယဝ်ႉ၊ဢဝ်ဝူဝ်းမႄႈသွင်တူဝ်ဢၼ်မီးလုၵ်ႈယဝ်ႉလႄႈယင်းဢမ်ႇပႆႇယၢမ်ႈတၢင်ႇၵၢၼ်းၼၼ်ႉႁၢင်ႈသႂ်ႇလႄႈႁေႃႈလုၵ်ႈၶဝ်ၼၼ်ႉၶိုၼ်းၵႂႃႇၸူးၵႃႈတီႈၶွၵ်ႈၶဝ်တႃႉ။-
ဢဝ်တိူၵ်ႈပတိၺိၺ်ႇၸဝ်ႈတၢင်ႇသႂ်ႇၵႃႈၼိူဝ်လေႃႉၼၼ်ႉသေယဝ်ႉ၊ဢဝ်ႁုၼ်ႇႁၢင်ႈသၢင်းထုၶမ်းၸိူဝ်းဢၼ်သူတၵ်းသူင်ႇၸွမ်းၵႂႃႇႁႂ်ႈပဵၼ်ပုၼ်ႈဢၼ်တၵ်းၽေႇဢပျတ်ႈသူၼၼ်ႉသႂ်ႇၼႂ်းတိူၵ်ႈတႃႇဢွၼ်ႇလႄႈဝႆႉၵႃႈႁိမ်းတိူၵ်ႈတႃႇၸဝ်ႈၼၼ်ႉသေယဝ်ႉ၊ပွႆႇပႅတ်ႈႁႂ်ႈမၼ်းၵႂႃႇၵူၺ်းမၼ်းတႃႉ။-
ႁဵတ်းၸိူဝ်ႉၼင်ႇၼၼ်ယဝ်ႉၸင်ႇပႂ်ႉတူၺ်းမၼ်းတႃႉ။ ပေႃးမၼ်းၵႂႃႇၸွမ်းသဵၼ်ႈတၢင်းၸူးဝၢၼ်ႈၵဝ်ႇမိူင်းလင်မၼ်းၵႃႈတီႈဝဵင်း ပႅတ်ႉသေးမိတ်ႉ၊ ၸိုင်၊မၼ်းပွင်ႇဝႃႈ၊ၽြႃးၵူၼ်းမဵဝ်း ဢိသရေး၊ ၼၼ်ႉပဵၼ်ၸဝ်ႈဢၼ်ႁဵတ်းၽေးဢုပၢတ်ႈလူင်သႂ်ႇတီႈႁဝ်းယဝ်ႉ။ ပေႃးမၼ်းဢမ်ႇၵႂႃႇၸိူဝ်ႉၼင်ႇၼၼ်ၸိုင်၊ႁဝ်းတၵ်းႁုလွင်ႈဢၼ်မၼ်းၸဝ်ႈဢမ်ႇႁဵတ်းၽေးဢုပၢတ်ႈသႂ်ႇတီႈႁဝ်းလႄႈပဵၼ်မႃးၵူၺ်းမၼ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵူၼ်းတင်းလၢႆႁဵတ်းၸိူဝ်ႉၼင်ႇၼၼ်သေယဝ်ႉ၊ဢဝ်ဝူဝ်းမႄႈသွင်တူဝ်ဢၼ်မီးလုၵ်ႈယဝ်ႉၼၼ်ႉႁၢင်ႈသႂ်ႇတီႈလေႃႉလႄႈဢဝ်လုၵ်ႈၶဝ်ၶင်ဝႆႉၵႃႈၼႂ်းၶွၵ်ႈဢေႃႈ။-
ၶဝ်ဢွၼ်ၵၼ်ဢဝ်တိူၵ်ႈပတိၺိၺ်ႇၸဝ်ႈဢိၵ်ႇတင်းတိူၵ်ႈတႃႇဢွၼ်ႇဢၼ်သႂ်ႇၼူၶမ်းတင်းတုမ်ႇၸဵပ်းတုမ်ႇၽီၶမ်းၸိူဝ်းၼၼ်ႉတၢင်ႇသႂ်ႇၵႃႈၼိူဝ်လေႃႉၼၼ်ႉဢေႃႈ။-
ဝူဝ်းမႄႈၸိူဝ်းၼၼ်ႉပႆၸွမ်းသဵၼ်ႈတၢင်းၵႂႃႇၸူးဝဵင်း ပႅတ်ႉသေးမိတ်ႉ၊ သိုဝ်ႈသိုဝ်ႈ၊ယင်းဢမ်ႇဝႄႈဢွၵ်ႇတၢင်းလႃးလႃးလႄႈႁွင်ႉယူႇမေႃးယူႇတင်းတၢင်းဢေႃႈ။ ၶုၼ် ၽိလိတ်ႉတိ၊ ႁႃႈပႃးၼၼ်ႉၸွမ်းၵႂႃႇတေႃႇထိုင်ႁွတ်ႈလႅၼ်လိၼ်ဝဵင်း ပႅတ်ႉသေးမိတ်ႉ၊ ဢေႃႈ။
ၵူၼ်းဝဵင်း ပႅတ်ႉသေးမိတ်ႉ၊ တင်းလၢႆဢွၼ်ၵၼ်ပၢတ်ႇၶဝ်ႈၵျုင်ႇၵႃႈၼႂ်းပၢင်ႇႁူၺ်ႈယူႇလႄႈ၊မိူဝ်ႈဢၼ်မုင်ႈတူၺ်းၸိုင်၊ၶဝ်ႁၼ်တိူၵ်ႈတႃႇၸဝ်ႈသေယဝ်ႉ၊ၸူမ်းသိူဝ်းမူၼ်ႈပျေႃႇၵွပ်ႈပိူဝ်ႈဢၼ်ႁၼ်ၼၼ်ႉဢေႃႈ။-
လေႃႉၼၼ်ႉၶဝ်ႈၵႂႃႇၵႃႈၼႂ်းတူင်ႈၼႃး ယေႃးသု၊ ၵူၼ်းဝဵင်း ပႅတ်ႉသေးမိတ်ႉ၊ ၼၼ်ႉသေလႄႈၵိုတ်းသဝ်းၵႃႈတီႈႁိမ်းမၢၵ်ႇႁိၼ်လူင်ၼၼ်ႉဢေႃႈ။ ၵူၼ်းတင်းလၢႆၽႃႇလေႃႉမႃႉၼၼ်ႉသေယဝ်ႉဢဝ်ႁဵတ်းၽိုၼ်း၊ႁႅမ်ဝူဝ်းမႄႈၸိူဝ်းၼၼ်ႉလႄႈႁႂ်ႈပဵၼ်ၶိူင်ႈတၢင်းလူႇဢၼ်တုတ်ႇၽႆးၵႃႈတီႈ ထႃႇဝရႃႉၽြႃး၊ ဢေႃႈ။-
မိူဝ်ႈၼၼ်ႉၵူၼ်းၸိူဝ်ႉၶိူဝ်း လေႇဝိ၊ တင်းလၢႆယုၵ်ႉဢဝ်တိူၵ်ႈပတိၺိၺ်ႇ ထႃႇဝရႃႉၽြႃး၊ ဢိၵ်ႇတင်းတိူၵ်ႈတႃႇဢွၼ်ႇဢၼ်သႂ်ႇရုၵ်ႉထုၶမ်းၸိူဝ်းၼၼ်ႉၵႂႃႇတၢင်ႇဝႆႉၵႃႈၼိူဝ်မၢၵ်ႇႁိၼ်လူင်ၼၼ်ႉဢေႃႈ။ မိူဝ်ႈၼၼ်ႉၵူၼ်းဝဵင်း ပႅတ်ႉသေးမိတ်ႉ၊ တင်းလၢႆဢွၼ်ၵၼ်သၢၵ်ႈလူႇၶိူင်ႈတၢင်းလူႇဢၼ်တုတ်ႇၽႆးဢိၵ်ႇတင်းသၢၵ်ႈလူႇၶိူင်ႈတၢင်းလူႇတင်းလၢႆတီႈ ထႃႇဝရႃႉၽြႃး၊ ဢေႃႈ။-
ၶုၼ် ၽိလိတ်ႉတိ၊ ႁႃႈပႃးၼၼ်ႉပႂ်ႉတူၺ်းလွင်ႈတၢင်းဢၼ်ၶဝ်ႁဵတ်းၼၼ်ႉသေယဝ်ႉ၊ၶိုၼ်းမိူဝ်းၵႂႃႇၵႃႈတီႈဝဵင်း ဢေႇၵရုၼ်ႇ၊ ၼႂ်းဝၼ်းၼၼ်ႉၵမ်းလဵဝ်ဢေႃႈ။
ၵူၼ်း ၽိလိတ်ႉတိ၊ ၶဝ်သူင်ႇႁၢင်ႈတုမ်ႇၸဵပ်းတုမ်ႇၽီၶမ်းႁႃႈဢၼ်တီႈ ထႃႇဝရႃႉၽြႃး၊ ပုၼ်ႈဢၼ်ႁႂ်ႈပဵၼ်ၶွင်ၽၢၵ်ႇလၢၵ်ႈသွင်ႇဢၼ်တၵ်းၽေႇဢပျတ်ႈၶဝ်ၼၼ်ႉၸမ်ႉ၊ပဵၼ်ပုၼ်ႈဝဵင်း ဢႃႇၸုတ်ႉ၊ ဢၼ်ၼိုင်ႈ၊ပုၼ်ႈဝဵင်း ၵႃႇသႃႉ၊ ဢၼ်ၼိုင်ႈ၊ပုၼ်ႈဝဵင်း ဢႃႇသၵေႇလုၼ်ႇ၊ ဢၼ်ၼိုင်ႈ၊ပုၼ်ႈဝဵင်း ၵတ်ႉတိ၊ ဢၼ်ၼိုင်ႈဢိၵ်ႇတင်းပုၼ်ႈဝဵင်း ဢေႇၵရုၼ်ႇ၊ ဢၼ်ၼိုင်ႈဢေႃႈ။-
ၼူၶမ်းၸိူဝ်းၼၼ်ႉၵေႃႈသူင်ႇၵႂႃႇပုၼ်ႈဝဵင်းဢၼ်ၶုၼ် ၽိလိတ်ႉတိ၊ ႁႃႈပႃးဢုပ်ႉပိူင်ႇၸႃႉၸဵမ်ဝဵင်းဢၼ်မၼ်ႈဢၼ်ၶိူင်ႇဢိၵ်ႇတင်းဝၢၼ်ႈၼွၵ်ႈဢၼ်ဢမ်ႇမီးလမ်းဝဵင်းၸိူဝ်းၼၼ်ႉယေႈဝဵင်းယေႈဢၼ်ၼင်ႇၵၼ်ဢေႃႈ။ မၢၵ်ႇႁိၼ်လူင်ဢၼ်မီးၼႂ်းတူင်ႈၼႃး ယေႃးသု၊ ၵူၼ်းဝဵင်း ပႅတ်ႉသေးမိတ်ႉ၊ ဢၼ်ၶဝ်ဢဝ်တိူၵ်ႈပတိၺိၺ်ႇ ထႃႇဝရႃႉၽြႃး၊ တၢင်ႇသႂ်ႇၼၼ်ႉယင်းတိုၵ်ႉမီးယူႇပုၼ်ႈတၵ်းပဵၼ်သၢၵ်ႈသေႇလွင်ႈဢၼ်ပဵၼ်မႃးၼၼ်ႉဢေႃႈ။
ထႃႇဝရႃႉၽြႃး၊ လႆႈဢဝ်ၵူၼ်းဝဵင်း ပႅတ်ႉသေးမိတ်ႉ၊ တၢႆၸဵတ်းသိပ်းၵေႃႉ ၵွပ်ႈပိူဝ်ႈၶဝ်လွမ်တူၺ်းမႅၼ်ႈၵႃႈၼႂ်းတိူၵ်ႈပတိၺိၺ်ႇၸဝ်ႈၼၼ်ႉဢေႃႈ။ ၵူၼ်းတင်းလၢႆဢွၼ်ၵၼ်ႁႆႈႁွင်ႉပွင်ႉၶၢင်းၵွပ်ႈပိူဝ်ႈ ထႃႇဝရႃႉၽြႃး၊ ႁဵတ်းတၢင်းဢၼ်ႁႂ်ႈၵူၼ်းၶဝ်လႆတၢႆၼမ်ၼႃႇၼၼ်ႉဢေႃႈ။
ၵူၼ်းဝဵင်း ပႅတ်ႉသေးမိတ်ႉ၊ ၸိူဝ်းၼၼ်ႉလၢတ်ႈလႄႈဝႃႈ၊ “ၽူႈလႂ်တၵ်းၸုၵ်းၶၢမ်ႇယူႇၽၢႆႇၼႃႈ ထႃႇဝရႃႉၽြႃး၊ ၽြႃးပဵၼ်ၸဝ်ႈဢၼ်မူတ်းၸၢင်ႇၼႆႉလႆႈ။ မၼ်းၸဝ်ႈတၵ်းလုၵ်ႉသေၵႃႈတီႈႁဝ်းလႄႈၵႂႃႇၸူးတီႈၽူႈလႂ်လူးၵွၼ်ႇ၊” ဝႃႈၼင်ႇၼႆဢေႃႈ။-
ၶဝ်ၸင်ႇပွႆႇၸႂ်ႉ ၵူၼ်းၵႂႃႇၸူးတီႈၵူၼ်းဝဵင်း ၵိရယတ်ႉယႃႇရိမ်ႇ၊ တင်းလၢႆသင်ႇလၢတ်ႈၵႂႃႇလႄႈဝႃႈ၊ “ၵူၼ်းမဵဝ်း ၽိလိတ်ႉတိ၊ ၶဝ်ဢဝ်တိူၵ်ႈပတိၺိၺ်ႇ ထႃႇဝရႃႉၽြႃး၊ သူင်ႇၶိုၼ်းမႃးယဝ်ႉ။ သူဢွၼ်ၵၼ်လူင်းမႃးဢဝ်ၵႂႃႇဝႆႉၵႃႈတီႈသူသေၵမ်း၊” ဝႃႈၼင်ႇၼႆဢေႃႈ။
ၵူၼ်းဝဵင်း ၵိရယတ်ႉယႃႇရိမ်ႇ၊ ၸိူဝ်းၼၼ်ႉဢွၼ်ၵၼ်မႃးဢဝ်တိူၵ်ႈပတိၺိၺ်ႇ ထႃႇဝရႃႉၽြႃး၊ ၵႂႃႇသေယဝ်ႉ၊ဝႆႉၵႃႈၼႂ်းႁိူၼ်း ဢၽိၼတပ်ႉ၊ ဢၼ်ယူႇၵႃႈၼိူဝ်ႁၢၼ်ႉလွႆၼၼ်ႉဢေႃႈ။ ၶဝ်ဢွၼ်ၵၼ်ဢဝ်လုၵ်ႈၸၢႆးမၼ်း ဢေးလႃႇၸႃႇ၊ သၢၵ်ႈၵၢပ်ႈလႄႈႁႂ်ႈမၼ်းပႂ်ႉထိင်းတိူၵ်ႈတႃႇၸဝ်ႈၼၼ်ႉဢေႃႈ။
ၶိင်ႇမိူဝ်ႈဢၼ်တိူၵ်ႈပတိၺိၺ်ႇ ထႃႇဝရႃႉၽြႃး၊ မီးယူႇၵႃႈၼႂ်းဝဵင်း ၵိရယတ်ႉယႃႇရိမ်ႇ၊ ႁိုင်ၼႃႇပဵၼ်သၢဝ်းပီတဵမ်တဵမ်ၼၼ်ႉၵူၼ်းမဵဝ်း ဢိသရေး၊ တင်းသဵင်ႈတင်းလူင်ႁႆႈႁွင်ႉပုၼ်ႈတၵ်းလႆႈတၢင်းၸွႆႈတၢင်းထႅမ်တီႈ ထႃႇဝရႃႉၽြႃး၊ ဢေႃႈ။
မိူဝ်ႈၼၼ်ႉ သမူၺ်ႇလႃႉ၊ သင်ႇလၢတ်ႈတီႈၵူၼ်းမဵဝ်း ဢိသရေး၊ ၸိူဝ်းၼၼ်ႉလႄႈဝႃႈ၊ “ပေႃးသူပႃးတင်းႁူဝ်ၸႂ်သဵင်ႈသဵင်ႈၶိုၼ်းမႃးၸူးတီႈ ထႃႇဝရႃႉၽြႃး၊ လႄႈ၊ပႄႇပႅတ်ႈၽြႃးၵူၼ်းတၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉ၊ဢိၵ်ႇတင်းႁုၼ်ႇႁၢင်ႈၼၢင်းၽီ ဢႃႇသတရိတ်ႉ၊ တင်းလၢႆၼၼ်ႉသေယဝ်ႉ၊ဢဝ်တူဝ်ၸႂ်သူသၢၵ်ႈၵၢပ်ႈတီႈ ထႃႇဝရႃႉၽြႃး၊ လုမ်းလုမ်းလႄႈဝႆႈသႃၵူဝ်းၵႂၢႆႇမၼ်းၸဝ်ႈသူႇလဵဝ်ၵူၺ်းတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊မၼ်းၸဝ်ႈတၵ်းၵႄႇသႄႇဢဝ်သူဢွၵ်ႇသေၵႃႈၼႂ်းမိုဝ်းၵူၼ်းမဵဝ်း ၽိလိတ်ႉတိ၊ ဢေႃႈ၊” ဝႃႈၼင်ႇၼႆဢေႃႈ။-
ၵွပ်ႈပိူဝ်ႈၼႆလႄႈၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ပႄႇပႅတ်ႈႁုၼ်ႇႁၢင်ႈသၢင်းထုၽြႃး ပႃႇလႃႉ၊ ဢိၵ်ႇတင်းႁုၼ်ႇႁၢင်ႈသၢင်းထုၼၢင်းၽီဢၼ်ႁွင်ႉဝႃႈ၊ ဢႃႇသတရိတ်ႉ၊ ၼၼ်ႉသေယဝ်ႉ၊ဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ သူႇလဵဝ်ၵူၺ်းဢေႃႈ။
မိူဝ်ႈၼၼ်ႉ၊ သမူၺ်ႇလႃႉ၊ ႁွင်ႉဢဝ်ႁႂ်ႈၵူၼ်းမဵဝ်း ဢိသရေး၊ တင်းသဵင်ႈတင်းမူတ်းမႃးၸုတုမ်ၵၼ်ၵႃႈတီႈဝဵင်း မိၸပႃႇ၊ သေယဝ်ႉ၊သင်ႇလၢတ်ႈလႄႈဝႃႈ၊ “ၵဝ်တၵ်းသူးတွင်းတီႈ ထႃႇဝရႃႉၽြႃး၊ ပုၼ်ႈသူၵႃႈတီႈၼၼ်ႈဢေႃႈ၊” ဝႃႈၼင်ႇၼႆဢေႃႈ။-
ၶဝ်ၵေႃႈၸုတုမ်ၵၼ်ၵႃႈတီႈဝဵင်း မိၸပႃႇ၊ သေယဝ်ႉ၊ဢွၼ်ၵၼ်တဵၵ်းၼမ်ႉလႄႈသွၼ်းလေႃႇႁႂ်ႈပဵၼ်ၶိူင်ႈတၢင်းလူႇတီႈ ထႃႇဝရႃႉၽြႃး၊ ယူႇ၊ၵမ်တၢင်းၵိၼ်ၼႂ်းဝၼ်းၼၼ်ႉတင်းဝၼ်း၊ဢွၼ်ၵၼ်ႁပ်ႉၶၢမ်ႇတုင်းဢဝ်လႄႈဝႃႈ၊ “ႁဝ်းၶႃႈၼႆႉၽိတ်းပိူင်ႈ ထႃႇဝရႃႉၽြႃး၊ ၶႃႈယဝ်ႉ၊” ဝႃႈၼင်ႇၼႆယူႇဢေႃႈ။ ၵႃႈတီႈဝဵင်း မိၸပႃႇ၊ ၼၼ်ႉၸိုင်၊ သမူၺ်ႇလႃႉ၊ ႁဵတ်းၵူၼ်းလူင်ဢၼ်ၸီႇယၢင်ႇတြႃးၵႃႈၼိူဝ်မဵဝ်း ဢိသရေး၊ ဢေႃႈ။
မိူဝ်ႈဢၼ်မဵဝ်း ၽိလိတ်ႉတိ၊ ၶဝ်လႆႈငိၼ်းဝႃႈ၊မဵဝ်း ဢိသရေး၊ ၶဝ်မႃးၸုတုမ်ၵၼ်ၵႃႈတီႈဝဵင်း မိၸပႃႇ၊ ယူႇၼၼ်ႉၸိုင်၊ၶုၼ် ၽိလိတ်ႉတိ၊ ႁႃႈပႃးၼၼ်ႉၶီႇသိုၵ်းၶိုၼ်ႈမႃးႁႂ်ႈလႆႈတိုၵ်းတေႃးၶဝ်ဢေႃႈ။ မဵဝ်း ဢိသရေး၊ ၶဝ်လႆႈငိၼ်းလွင်ႈတၢင်းၼၼ်ႉလႄႈဢွၼ်ၵၼ်ၵူဝ်ႁႄသေယဝ်ႉ၊-
လၢတ်ႈတီႈ သမူၺ်ႇလႃႉ၊ လႄႈဝႃႈ၊ “ၶႅၼ်းတေႃႈသူးတွင်းၶိူဝ်းၶိူဝ်းယႂ်းယႂ်းတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၶႃႈ ႁႂ်ႈမၼ်းၸဝ်ႈၵႄႇသႄႇဢဝ်ႁဝ်းၶႃႈလွတ်ႈသေၵႃႈၼႂ်းမိုဝ်းမဵဝ်း ၽိလိတ်ႉတိ၊ ၸိူဝ်းၼၼ်ႉသေၵမ်း၊” ဝႃႈၼင်ႇၼႆဢေႃႈ။-
သမူၺ်ႇလႃႉ၊ ၵေႃႈႁႅမ်သူဝ်းဢွၼ်ႇဢၼ်ယင်းဢမ်ႇပႆႇၽၢတ်ႇၼူမ်းၼၼ်ႉသေယဝ်ႉ၊ႁဵတ်းတၢင်းလူႇဢၼ်တုတ်ႇၽႆးတင်းတူဝ်တီႈ ထႃႇဝရႃႉၽြႃး၊ ဢေႃႈ။ ၵမ်းၼၼ်ႉမၼ်းသူးတွင်းတီႈ ထႃႇဝရႃႉၽြႃး၊ ႁႂ်ႈမၼ်းၸဝ်ႈၸွႆႈထႅမ်မဵဝ်း ဢိသရေး၊ လႄႈ ထႃႇဝရႃႉၽြႃး၊ ထွမ်ႇဢဝ်ၵႂၢမ်းမၼ်းဢေႃႈ။-
ယၢမ်းမိူဝ်ႈဢၼ် သမူၺ်ႇလႃႉ၊ ယင်းတိုၵ်ႉသၢၵ်ႈၵၢပ်ႈတၢင်းလူႇယူႇၼၼ်ႉၸိုင်၊မဵဝ်း ၽိလိတ်ႉတိ၊ ၶဝ်ဢွၼ်ၵၼ်ၶီႇသိုၵ်းမႃးႁႂ်ႈလႆႈတိုၵ်းတေႃးဢေႃႈ။ ၼႂ်းၶိင်ႇယၢမ်းၼၼ်ႉၵမ်းလဵဝ် ထႃႇဝရႃႉၽြႃး၊ ႁႂ်ႈၽႃႉလင်ၵႃႈၼိူဝ်မဵဝ်း ၽိလိတ်ႉတိ၊ ၶဝ်ႁႅင်းယႂ်ႇၼႃႇလူင်လၢင်တေႃႇထိုင်ႁွတ်ႈၶဝ်တူၵ်းၸႂ်လႄႈထၢၼ်ႈပေႃးၼီပၢႆႈဢေႃႈ။-
ၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်လုၵ်ႉသေၵႃႈတီႈဝဵင်း မိၸပႃႇ၊ ၶီႇသိုၵ်းလိုပ်ႈၸွမ်းလမ်းၸွမ်းၵူၼ်းမဵဝ်း ၽိလိတ်ႉတိ၊ ၶဝ်၊ၶႃႈၽၼ်းၶဝ်တၢႆၸွမ်းတၢင်းၵႂႃႇတေႃႇထိုင်ႁွတ်ႈဝဵင်း ပိတ်ႉၵႃႇ၊ ဢေႃႈ။
မိူဝ်ႈၼၼ်ႉ သမူၺ်ႇလႃႉ၊ ဢဝ်မၢၵ်ႇႁိၼ်ပူၵ်းတင်ႈဝႆႉၵႃႈတီႈဝူင်ႈၵၢင်ဝဵင်း မိၸပႃႇ၊ တင်းဝဵင်း သိၼ်း၊ သေလႄႈပၼ်ၸိုဝ်ႈႁႂ်ႈႁွင်ႉဝႃႈ၊ ဢေႇပၼေႇၸႃႇ၊ လႄႈဝႃႈ၊ “ ထႃႇဝရႃႉၽြႃး၊ ၸွႆႈထႅမ်မႃႉၸႃႉႁဝ်းမႃးတင်းတၢင်းယဝ်ႉ၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈမဵဝ်း ၽိလိတ်ႉတိ၊ ၼၼ်ႉသုမ်းသိုၵ်းသေယဝ်ႉ၊ ထႃႇဝရႃႉၽြႃး၊ ႁႄႉၶႅၼ်လႄႈၶဝ်ဢမ်ႇၶဝ်ႈဢမ်ႇမႃးႁိမ်ဢဝ်လိၼ်ၵူၼ်းမဵဝ်း ဢိသရေး၊ ၶဝ်ထႅင်ႈၼႂ်းၸူဝ်ႈပၢၼ် သမူၺ်ႇလႃႉ၊ ၼၼ်ႉသေပွၵ်ႈယဝ်ႉဢေႃႈ။-
ဝဵင်းလူင်ၸိူဝ်းဢၼ်မဵဝ်း ၽိလိတ်ႉတိ၊ တိုၵ်းသိမ်းဢဝ်ဝူင်ႈၵၢင်ဝဵင်း ဢေႇၵရုၼ်ႇ၊ တင်းဝဵင်း ၵတ်ႉတိ၊ ၼၼ်ႉၵေႃႈၶိုၼ်းလႆႈပၼ်တီႈမဵဝ်း ဢိသရေး၊ သေယဝ်ႉ၊ၵူၼ်းမဵဝ်း ဢိသရေး၊ ၵေႃႈလႆႈဢဝ်ဢိူင်ႇဝဵင်းလိၼ်ဝဵင်းၸိူဝ်းၼၼ်ႉၶိုၼ်းတင်းသဵင်ႈတင်းမူတ်းဢေႃႈ။ မိူဝ်ႈၼၼ်ႉသိုၵ်းထၢတ်ႇယဵၼ်ယူႇၵႃႈၼႂ်းဝူင်ႈၵၢင်ၵူၼ်းမဵဝ်း ဢိသရေး၊ တင်းမဵဝ်း ၶႃႇၼၼိ၊ ဢေႃႈ။
သမူၺ်ႇလႃႉ၊ ႁဵတ်းၵူၼ်းလူင်ဢၼ်ၸီႇယၢင်ႇတြႃးၵႃႈၼိူဝ်မဵဝ်း ဢိသရေး၊ ယူႇၸူဝ်ႈတႃႇဢသၢၵ်ႈမၼ်းဢေႃႈ။-
မၼ်းၸၢင်ႈလႄႇလဵပ်ႈၵႂႃႇၵႃႈတီႈဝဵင်း ပေႇသလႃႉ၊ ဝဵင်း ၵိလႃႉၵႃႇလႃႉ၊ ဝဵင်း မိၸပႃႇ၊ ၸိူဝ်းၼၼ်ႉၵူႈပီၵူႈပီလႄႈၸီႇယၢင်ႇဢမုၵႃႈၼႂ်းဝဵင်းၸိူဝ်းၼၼ်ႉဢေႃႈ။-
လိုၼ်းၼၼ်ႉမၼ်းၸၢင်ႈၶိုၼ်းမိူဝ်းၸူးတီႈ ရႃႇမႃႉ၊ ဢၼ်ပဵၼ်ဝဵင်းတီႈယူႇမၼ်းဢေႃႈ။ မၼ်းယူႇသဝ်းၵႃႈတီႈၼၼ်ႈလႄႈႁဵတ်းၵူၼ်းလူင်ဢၼ်ၸီႇယၢင်ႇတြႃးယူႇဢေႃႈ။ ၵႃႈတီႈဝဵင်း ရႃႇမႃႉ၊ ၼၼ်ႉမၼ်းတႄႇႁဵတ်းၶဵင်ႇတၢင်းလူႇပုၼ်ႈ ထႃႇဝရႃႉၽြႃး၊ ဢေႃႈ။
သမူၺ်ႇလႃႉ၊ ၼၼ်ႉမိူဝ်ႈဢၼ်ဢသၢၵ်ႈထဝ်ႈၵႄႇယဝ်ႉၼၼ်ႉၸိုင်၊ဢဝ်လုၵ်ႈၸၢႆးမၼ်းတင်းလၢႆယုၵ်ႉတၢင်ႇဝႆႉႁႂ်ႈပဵၼ်ၵူၼ်းလူင်ဢၼ်ၸီႇယၢင်ႇတြႃးၵႃႈၼိူဝ်မဵဝ်း ဢိသရေး၊ ဢေႃႈ။-
လုၵ်ႈၸၢႆးတူၼ်ႈမၼ်းၼၼ်ႉမီးၸိုဝ်ႈႁွင်ႉႁဵၵ်ႈဝႃႈ၊ ယူဝ်းဢေးလႃႉ၊ လႄႈၵေႃႉၼွင်ႉမၼ်းသမ်ႉပဵၼ် ဢၽိယႃႉ၊ ဢေႃႈ။ ၶဝ်ၼၼ်ႉႁဵတ်းၵူၼ်းလူင်ဢၼ်ၸီႇယၢင်ႇတြႃးၵႃႈတီႈဝဵင်း ပေႇရသေးၽႃႉ၊ ဢေႃႈ။-
ၼႂ်းဝႃႈၼၼ်သေၵေႃႈ ၶဝ်သွင်ၵေႃႉၼၼ်ႉဢမ်ႇႁဵတ်းမိူၼ်ပေႃႈၶဝ်။ ၶဝ်ၼၼ်ႉၸႂ်ၸပ်းၸွႆးငိုၼ်းၵူၺ်းသေယဝ်ႉ၊ၵိၼ်သူးၵိၼ်လၢပ်ႈလႄႈဢမ်ႇၸီႇယၢင်ႇဢမုၸွမ်းၼင်ႇတြႃးဢေႃႈ။
ပိူဝ်ႈၼႆလႄႈၵူၼ်းဢၼ်ပဵၼ်ၵႄႇပဵၼ်ႁူဝ်မဵဝ်း ဢိသရေး၊ တင်းလၢႆတိူင်ႇပၢင်ႇၵၼ်လႄႈၶဝ်ႈၸူးတီႈ သမူၺ်ႇလႃႉ၊ ၵႃႈၼႂ်းဝဵင်း ရႃႇမႃႉ၊ သေယဝ်ႉ၊-
ဢွၼ်ၵၼ်လဝ်ႈလၢတ်ႈတီႈမၼ်းလႄႈဝႃႈ၊ “တူၺ်းၶႃႈလူး။ ၸဝ်ႈႁဝ်းဢသၢၵ်ႈထဝ်ႈၵႄႇယဝ်ႉၶႃႈယဝ်ႉ။ လုၵ်ႈၸၢႆးၸဝ်ႈၸိူဝ်းၼၼ်ႉၵေႃႈဢမ်ႇႁဵတ်းမိူၼ်ၸဝ်ႈႁဝ်းလႄႈယူႇၶႃႈယဝ်ႉ။ ၵွပ်ႈပိူဝ်ႈၸိူဝ်ႉၼင်ႇၼႆလႄႈၶႅၼ်းတေႃႈယုၵ်ႉတၢင်ႇၶုၼ်ႁေႃၶမ်းပႃးၼိုင်ႈဢၼ်တၵ်းဢုပ်ႉပိူင်ႇၵႃႈၼိူဝ်ႁဝ်းၶႃႈ၊ႁႂ်ႈႁဝ်းၶႃႈမီးၶုၼ်ႁေႃၶမ်းမိူၼ်ၸိူဝ်ႉၼင်ႇၵူၼ်းတၢင်ႇသိုင်ႇတၢင်ႇမိူင်းၼၼ်ႉသေၵမ်း၊” ဝႃႈၼင်ႇၼႆဢေႃႈ။-
သမူၺ်ႇလႃႉ၊ ဢမ်ႇထုၵ်ႇၸႂ်လူၺ်ႈလွင်ႈဢၼ်ၶဝ်ယွၼ်းဢဝ်ၶုၼ်ႁေႃၶမ်းၼၼ်ႉသေယဝ်ႉ၊မၼ်းသူးတွင်းတီႈ ထႃႇဝရႃႉၽြႃး၊ ဢေႃႈ။-
ထႃႇဝရႃႉၽြႃး၊ ၵေႃႈ မီးဢမိင်ႉတီႈမၼ်းလႄႈဝႃႈ၊ “ထွမ်ႇဢဝ်ၵႂၢမ်းၵႃႈဢၼ်ၵူၼ်းတင်းလၢႆလၢတ်ႈတီႈမႂ်းၼၼ်ႉတႃႉ။ ၶဝ်ၼၼ်ႉပႄႇပႅတ်ႈမႂ်းၵူၺ်းဢမ်ႇၵႃး၊ပႄႇပႅတ်ႈပႃးတင်းၵဝ်ႁႂ်ႈၵဝ်ဢမ်ႇလႆႈဢုပ်ႉပိူင်ႇၵႃႈၼိူဝ်ၶဝ်ယဝ်ႉ၊-
ၸႃႉၸဵမ်မိူဝ်ႈဢၼ်ၵဝ်ဢဝ်ၶဝ်ဢွၵ်ႇသေမိူင်း ဢေးၵျိပ်ႉ၊ မႃးၼၼ်ႉၶဝ်ၸုၼ်ႉပႅတ်ႈၵဝ်လႄႈဝႆႈၽြႃးတၢင်ႇသူႇတၢင်ႇပႃးမႃးယဝ်ႉ။ ၸိူဝ်ႉၼင်ႇဢၼ်ၶဝ်ႁဵတ်းတီႈၵဝ်မႃးသေႇသေႇၼၼ်ႉတေႃႈလဵဝ်ၼႆႉၶဝ်ႁဵတ်းတီႈမႂ်းယဝ်ႉ။-
မိူဝ်ႈလဵဝ်ၼႆႉၸိုင်၊ထွမ်ႇဢဝ်ၵႂၢမ်းၶဝ်တႃႉ။ ၵူၺ်းၵႃႈ၊ပၼ်သတိတီႈၶဝ်ႁႅင်းႁႅင်းလႄႈမွၵ်ႇလၢတ်ႈၶႆႈၼႄလွင်ႈဢၼ်ၶုၼ်ႁေႃၶမ်းၸၢင်ႈတေႁဵတ်းၸိူဝ်ႉၼင်ႇႁိုဝ်တီႈၶဝ်ၼၼ်ႉတႃႉ၊” ဝႃႈၼင်ႇၼႆဢေႃႈ။
သမူၺ်ႇလႃႉ၊ ၵေႃႈ ဢဝ်ဢမိင်ႉ ထႃႇဝရႃႉၽြႃး၊ ၵႃႈမီးၼၼ်ႉၶိုၼ်းမွၵ်ႇလၢတ်ႈတီႈၶဝ်ၸိူဝ်းဢၼ်ယွၼ်းၶုၼ်ႁေႃၶမ်းၼၼ်ႉလႄႈဝႃႈ၊-
“ထုင်းၸၢမ်ႇၶုၼ်ႁေႃၶမ်းဢၼ်တၵ်းဢုပ်ႉပိူင်ႇသူၼၼ်ႉၸမ်ႉ၊မၼ်းတၵ်းၸႂ်ႉလုၵ်ႈၸၢႆးသူၸိူဝ်းၼၼ်ႉႁႂ်ႈႁဵတ်းလုၵ်ႈသိုၵ်းလႄႈ၊ႁႂ်ႈၵမ်ႈၽွင်ႈထၢမ်းၼႃႈၵၢၼ်ၽၢႆႇတပ်ႉလေႃႉမႃႉသိုၵ်းမၼ်း၊ၵမ်ႈၽွင်ႈႁႂ်ႈႁဵတ်းၵူၼ်းသိုၵ်းတပ်ႉမႃႉမၼ်း၊ၵမ်ႈၽွင်ႈႁႂ်ႈၶုၼ်ႇလႅၼ်ႈဢွၼ်တၢင်းတပ်ႉမႃႉမၼ်းဢေႃႈ။-
မၼ်းတၵ်းယုၵ်ႉတၢင်ႇၵမ်ႈၽွင်ႈႁႂ်ႈပဵၼ်ႁူဝ်သိုၵ်းလူင်ဢၼ်ဢုပ်ႉၵူၼ်းယေႈႁဵင်၊ၵမ်ႈၽွင်ႈႁႂ်ႈဢုပ်ႉၵူၼ်းႁႃႈသိပ်းဢေႃႈ။ သမ်ႉတၵ်းၸႂ်ႉၵမ်ႈၽွင်ႈႁႂ်ႈထႆၼႃးမၼ်း၊ႁႂ်ႈပၢတ်ႇၶဝ်ႈမၼ်း၊ၵမ်ႈၽွင်ႈႁႂ်ႈႁဵတ်းၶိူင်ႈလၢၵ်ႈၼၢၵ်ႈဢိၵ်ႇတင်းၶိူင်ႈလေႃႉမႃႉသိုၵ်းမၼ်းဢေႃႈ။-
လုၵ်ႈယိင်းသူတင်းလၢႆၵေႃႈမၼ်းတၵ်းၸႂ်ႉႁႂ်ႈၶဝ်ၽေႃႇႁဵတ်းၼမ်ႉမၼ်းႁွမ်ပုၼ်ႈမၼ်း၊ႁႂ်ႈပဵၼ်ၵေႃႉဢၼ်တူမ်ႈဢၼ်ႁုင်ဢိၵ်ႇတင်းၵေႃႉဢၼ်ၼိုင်ႈၶဝ်ႈမုၼ်းပုၼ်ႈမၼ်းဢေႃႈ။-
မၼ်းတၵ်းဢဝ်တူင်ႈႁႆႈတူင်ႈၼႃးသူ၊သူၼ်မၢၵ်ႇၸပိတ်ႉသူ၊သူၼ်မၢၵ်ႇသၢၼ်ႇလုၼ်ႇသူ၊ဢၼ်လီသေပိူၼ်ႈၸိူဝ်းၼၼ်ႉပၼ်တီႈၶဝ်ၸိူဝ်းဢၼ်ၵိုတ်ႉႁၢပ်ႇဢမုမၼ်းၸိူဝ်းၼၼ်ႉဢေႃႈ။-
မၼ်းတၵ်းဢဝ်ၸိူဝ်ႉၽၼ်းႁူၺ်ႇမၢၵ်ႇသူသိပ်းပုၼ်ႈပုၼ်ႈၼိုင်ႈလႄႈပၼ်တီႈမူးမၢတ်ႈၽွင်းမိူင်းမၼ်းတင်းလၢႆ ဢိၵ်ႇတင်းၶဝ်ၸိူဝ်းဢၼ်ၵိုတ်ႉႁၢပ်ႇဢမုမၼ်းၸိူဝ်းၼၼ်ႉဢေႃႈ။-
မၼ်းတၵ်းဢဝ်ၶႃႈၵူၼ်းၸၢႆးၶႃႈၵူၼ်းယိင်းသူတင်းလၢႆဢိၵ်ႇတင်းတူဝ်ဝူဝ်း၊ဢိၵ်ႇတင်းမႃႉလီႈသူၸိူဝ်းဢၼ်လီသေပိူၼ်ႈၼၼ်ႉၵႂႃႇၸႂ်ႉပုၼ်ႈၼႃႈၵၢၼ်မၼ်းဢေႃႈ။-
ၽုင်သူဝ်းသူသိပ်းပုၼ်ႈပုၼ်ႈၼိုင်ႈၵေႃႈမၼ်းတၵ်းဢဝ်လႄႈ၊တူဝ်သူတၵ်းလႆႈၶၢမ်ႇပဵၼ်ၶႃႈမၼ်းဢေႃႈ။-
မိူဝ်ႈဢၼ်ထိုင်ၶိင်ႇၼၼ်ႉမႃးၸိုင်၊သူတၵ်းပွင်ႉမိုၼ်ႇပွင်ႉၶၢင်းၵွပ်ႈပိူဝ်ႈၶုၼ်ႁေႃၶမ်းဢၼ်သူလိူၵ်ႈဢဝ်ၼၼ်ႉဢေႃႈ။ ၼႂ်းဝႃႈၼၼ်သေၵေႃႈ ထႃႇဝရႃႉၽြႃး၊ တၵ်းဢမ်ႇထွမ်ႇဢမ်ႇငိၼ်းဢဝ်ၵႂၢမ်းဢၼ်သူပွင်ႉမိုၼ်ႇပွင်ႉၶၢင်းၼၼ်ႉ၊” ဝႃႈၼင်ႇၼႆဢေႃႈ။
ၼႂ်းဝႃႈၼၼ်သေၵေႃႈၵူၼ်းတင်းလၢႆယင်းဢမ်ႇဝႆႉဢမုၵႂၢမ်း သမူၺ်ႇလႃႉ၊ လႄႈဢွၼ်ၵၼ်လၢတ်ႈဝႃႈ၊ “ဢမ်ႇၸႂ်ႈၶႃႈ။ ႁဝ်းၶႃႈၶႂ်ႈလႆႈၶုၼ်ႁေႃၶမ်းဢၼ်ဢုပ်ႉပိူင်ႇၵႃႈၼိူဝ်ႁဝ်းၶႃႈ၊-
ႁႂ်ႈႁဝ်းၶႃႈလႆႈမိူၼ်ၵၼ်တင်းၵူၼ်းတၢင်ႇမဵဝ်းလႄႈ၊မီးၶုၼ်ႁေႃၶမ်းဢၼ်ဢုပ်ႉပိူင်ႇႁဝ်းၶႃႈယူႇ၊ႁႂ်ႈဢွၼ်ႁူဝ်ႁဝ်းၶႃႈၶီႇသိုၵ်းၵႂႃႇတိုၵ်းၵႃႈတီႈၼႃႈသိုၵ်းႁဝ်းၶႃႈၼၼ်ႉဢေႃႈ၊” ဝႃႈၼင်ႇၼႆဢေႃႈ။-
သမူၺ်ႇလႃႉ၊ လႆႈငိၼ်းၵႂၢမ်းၵူၼ်းတင်းလၢႆၼၼ်ႉၵူႈၶေႃႈၵူႈၵမ်းသေလႄႈလဝ်ႈလၢတ်ႈထိုင်တီႈ ထႃႇဝရႃႉၽြႃး၊ ဢေႃႈ။-
ထႃႇဝရႃႉၽြႃး၊ ၵေႃႈ မီးဢမိင်ႉတီႈမၼ်းလႄႈဝႃႈ၊ “ထွမ်ႇဢဝ်ၵႂၢမ်းၵဝ်သေလႄႈယုၵ်ႉတၢင်ႇၶုၼ်ႁေႃၶမ်းပုၼ်ႈၶဝ်တႃႉ၊” ဝႃႈၼင်ႇၼႆဢေႃႈ။ မိူဝ်ႈၼၼ်ႉမၼ်းပွႆႇႁႂ်ႈၵူၼ်းမဵဝ်း ဢိသရေး၊ တင်းလၢႆၶိုၼ်းမိူဝ်းၵႂႃႇၸူးတီႈႁိူၼ်းၽႂ်ႁိူၼ်းမၼ်းသေဢေႃႈ။
မိူဝ်ႈယၢမ်းၼၼ်ႉမီးၵူၼ်းဢၼ်လႆႈၸိုဝ်ႈ ၵိသႃႉ၊ ၼၼ်ႉၵေႃႉၼိုင်ႈဢေႃႈ။ မၼ်းၼၼ်ႉပဵၼ်ၵူၼ်းမၢၵ်ႈၵူၼ်းမီး၊ၵူၼ်းဢၼ်မီးဢေႃးၸႃႇၸၢၵ်ႈသူပ်းၸၢၵ်ႈၵႂၢမ်းလႄႈပဵၼ်ၵူၼ်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ လုၵ်ႈၸၢႆး ဢပျေႇလႃႉ၊ လၢၼ်ၸၢႆး ၸေႇရေႃႇ၊ ၵႃႈၼႂ်းၶိူဝ်းႁိူၼ်း ပေႇၶေႃႇရတ်ႉ၊ ၼႂ်းၵူၼ်းႁိူၼ်း ဢႃႇၽိ၊ ၼၼ်ႉဢေႃႈ။-
မၼ်းၼၼ်ႉမီးလုၵ်ႈၸၢႆးၵေႃႉၼိုင်ႈဢၼ်လႆႈၸိုဝ်ႈ သေႃးလု၊ ဢၼ်ပဵၼ်ၵူၼ်းႁၢင်ႈလီၼၼ်ႉဢေႃႈ။ ၵႃႈၼႂ်းမဵဝ်း ဢိသရေး၊ ၼႆႉမၼ်းသုင်လိူဝ်ပိူၼ်ႈႁူဝ်မၼ်းပူၼ်ႉပႅၼ်ပိူၼ်ႈယူႇလႄႈႁၢင်ႈလီၼႃႇလိူဝ်ပိူၼ်ႈဢေႃႈ။
ၽဝ်ႇၼိုင်ႈၽုင်မႃႉလီႈ ၵိသႃႉ၊ ပေႃႈ သေႃးလု၊ ၼၼ်ႉႁၢႆၵႂႃႇလႄႈမၼ်းလၢတ်ႈတီႈလုၵ်ႈၸၢႆးမၼ်းလႄႈဝႃႈ၊ “မႂ်းႁွင်ႉဢဝ်ၵႃႈၼႂ်းၵူၼ်းဢွၼ်ႇတင်းလၢႆၼႆႉၵေႃႉၼိုင်ႈသေယဝ်ႉ၊လုၵ်ႉလႄႈၵႂႃႇၸွမ်းႁႃမႃႉလီႈၸိူဝ်းၼၼ်ႉတႃႉ၊” ဝႃႈၼင်ႇၼႆဢေႃႈ။-
ၶဝ်သွင်ၵေႃႉၼၼ်ႉၵႂႃႇလႄႈႁႃၵႃႈၼိူဝ်ႁၢၼ်ႉလွႆ ဢေႇၽရိမ်ႇ၊ ဢိၵ်ႇတင်းၵႃႈတီႈမိူင်း သႃႇလိသႃႉ၊ ၵူႈတီႈၵူႈလႅၼ်သေၵေႃႈဢမ်ႇထူပ်းဢမ်ႇႁၼ်။ ၶဝ်သမ်ႉလႄႇႁႃၵႃႈတီႈဢိူင်ႇ သႃႇလိမ်း၊ ၵေႃႈဢမ်ႇထူပ်းဢမ်ႇႁၼ်။ ၶဝ်ၵႂႃႇလႄႇႁႃၵႃႈတီႈသိုင်ႇတိူင်းမိူင်း ပိၼ်ႇယႃႇမိၼ်ႇ၊ ၵူႈတီႈၵူႈလႅၼ်ၼႆႉၵေႃႈဢမ်ႇထူပ်းဢမ်ႇႁၼ်။-
မိူဝ်ႈဢၼ်ၶဝ်ႁွတ်ႈထိုင်ၵႃႈတီႈဢိူင်ႇ ၸုၽႃႉ၊ ၼၼ်ႉၸိုင်၊ သေႃးလု၊ လၢတ်ႈတီႈၵူၼ်းဢွၼ်ႇမၼ်းလႄႈဝႃႈ၊ “ၶိုၼ်းပွၵ်ႈမိူဝ်းႁိူၼ်းတႃႉႁဝ်း။ ပေႃႈၵဝ်တၵ်းဢမ်ႇမႆႈၸႂ်လူၺ်ႈမႃႉလီႈၸိူဝ်းၼၼ်ႉလႄႈတၵ်းမႆႈၸႂ်ၵွပ်ႈႁဝ်းယဝ်ႉ၊” ဝႃႈၼင်ႇၼႆဢေႃႈ။
ၵူၼ်းဢွၼ်ႇၼၼ်ႉလၢတ်ႈလႄႈဝႃႈ၊ “ၵမ်းၼိုင်ႈလူးၵွၼ်ႇၶႃႈ။ ၵႃႈၼႂ်းဝဵင်းၼႆႉမီးၵူၼ်းၽြႃးပဵၼ်ၸဝ်ႈၵေႃႉၼိုင်ႈဢၼ်မီးသရေႇၼႃႈတႃႁူင်ႁၢင်းၼၼ်ႉ၊ၵွပ်ႈပိူဝ်ႈၵႂၢမ်းၵႃႈဢၼ်မၼ်းလၢတ်ႈၼၼ်ႉၸၢင်ႈပဵၼ်ၸွမ်းၵူႈၶေႃႈၵူႈၵမ်းၼၼ်ႉ ဢေႃႈ။ ၵႂႃႇၸူးတီႈမၼ်းလူးၵွၼ်ႇတႃႉႁဝ်း။ ၸၢင်ႈၶႄးမၼ်းတၵ်းလၢတ်ႈၼႄတီႈဢၼ်ႁဝ်းတၵ်းထူပ်းႁၼ်မႃႉလီႈၸိူဝ်းၼၼ်ႉလႆႈဢေႃႈ၊” ဝႃႈၼင်ႇၼႆဢေႃႈ။
သေႃးလု၊ ၵေႃႈလၢတ်ႈလႄႈဝႃႈ၊ “ပေႃးႁဝ်းၵႂႃႇၸိုင်၊ႁဝ်းတၵ်းဢဝ်ၵႃႈသင်ၵႂႃႇလူႇတၢၼ်း။ တၢင်းၵိၼ်ႁဝ်းဢၼ်ပႃးမႃးၵႃႈၼႂ်းႁေႃႇၼၼ်ႉမူတ်းသဵင်ႈယဝ်ႉ။ ႁဝ်းယင်းဢမ်ႇမီးၶွင်ၽၢၵ်ႇသေၸိူဝ်ႉသေမဵဝ်း။ ႁဝ်းမီးၵႃႈသင်ဝႆႉ၊” ဝႃႈၼင်ႇၼႆဢေႃႈ။
ၵူၼ်းဢွၼ်ႇၼၼ်ႉၵေႃႈလၢတ်ႈလႄႈဝႃႈ၊ “ၵမ်းၼိုင်ႈလူးၵွၼ်ႇၶႃႈ။ တီႈၵဝ်ၶႃႈၼႆႉမီးငိုၼ်းမၢတ်ႈၼိုင်ႈၶႃႈဢေႃႈ။ ၵဝ်ၶႃႈတၵ်းဢဝ်ငိုၼ်းၼၼ်ႉပၼ်တီႈမၼ်း၊ႁႂ်ႈမၼ်းၶႆႈၼႄတီႈဢၼ်ႁဝ်းတၵ်းထူပ်းႁၼ်မႃႉလီႈလႆႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၼၢင်းယိင်းသၢဝ်ၸိူဝ်းၼၼ်ႉၶိုၼ်းလၢတ်ႈလႄႈဝႃႈ၊ “မီးၶႃႈဢေႃႈ။ မၼ်းၸင်ႇပူၼ်ႉၵႂႃႇဢွၼ်တၢင်းသူၸဝ်ႈၼႆႉၵူၺ်းၶႃႈဢေႃႈ။ ၵႂႃႇၶၼ်ၶၼ်ၽႂ်းၽႂ်းတႃႉ။ မၼ်းႁွတ်ႈမႃးၵႃႈတီႈဝဵင်းၼႆႉၵွပ်ႈပိူဝ်ႈဢၼ်မီးပွႆးဢၼ်ႁဵတ်းတၢင်းလူႇၵႃႈၼိူဝ်ၶဵင်ႇတၢင်းလူႇၵႃႈတီႈၼိူဝ်လွႆပုၼ်ႉဢေႃႈ။-
ပေႃးသူၸဝ်ႈၶဝ်ႈၵႃႈၼႂ်းဝဵင်းတေႃႈလဵဝ်ၼႆႉၸိုင်၊တၵ်းထူပ်းႁၼ်မၼ်းၵမ်းလဵဝ်၊ၸူဝ်ႈဢၼ်မၼ်းဢမ်ႇပႆႇၶိုၼ်ႈၵႃႈတီႈၼိူဝ်လွႆႁႂ်ႈလႆႈၵိၼ်ၼၼ်ႉဢေႃႈ။ ၵူၼ်းတင်းလၢႆဢမ်ႇၸၢင်ႈႁဵတ်းၵႃႈသင်တေႃႇထိုင်မၼ်းႁွတ်ႈမႃး၊ၵွပ်ႈပိူဝ်ႈမၼ်းလူဝ်ႇပၼ်တၢင်းလီတီႈၶိူင်ႈတၢင်းလူႇၼၼ်ႉဢွၼ်တၢင်းဢေႃႈ။ လိုၼ်းၼၼ်ႉၸင်ႇ၊ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ႁွင်ႉပၢင်းၼၼ်ႉလႆႈၵိၼ်ဢေႃႈ။ ပိူဝ်ႈၼႆလႄႈသူၸဝ်ႈၶိုၼ်ႈၵႂႃႇၸူးတေႃႈလဵဝ်ၼႆႉတႃႉ။ သူၸဝ်ႈတၵ်းထူပ်းႁၼ်မၼ်းၵမ်းလဵဝ်ဢေႃႈ၊” ဝႃႈၼင်ႇၼႆဢေႃႈ။-
ၶဝ်သွင်ၵေႃႉၼၼ်ႉၵေႃႈ ၶိုၼ်ႈၸူးတီႈဝဵင်းလႄႈ၊မိူဝ်ႈဢၼ်ယင်းတိုၵ်ႉၶဝ်ႈဝဵင်းၵႂႃႇယူႇၼၼ်ႉ ၶဝ်ႁၼ် သမူၺ်ႇလႃႉ၊ ဢွၵ်ႇမႃးတေႃႇၼႃႈၵၼ်တင်းၶဝ်သွင်ၵေႃႉ ယူႇၸွမ်းသဵၼ်ႈတၢင်းဢၼ်မၼ်းၶိုၼ်ႈၵႂႃႇၸူးတီႈလွႆဢၼ်ႁဵတ်းဝၢတ်ႈၵူဝ်းၵႂၢႆႇၼၼ်ႉဢေႃႈ။
ဝၼ်းမိူဝ်ႈဝႃးၼၼ်ႉၸူဝ်ႈဢၼ် သမူၺ်ႇလႃႉ၊ ဢမ်ႇပႆႇႁွတ်ႈမႃးၼၼ်ႉၸိုင်၊ ထႃႇဝရႃႉၽြႃး၊ မီးဢမိင်ႉတီႈမၼ်းဝႆႉလႄႈဝႃႈ၊-
“ဝၼ်းမိူဝ်ႈၽုၵ်ႈၶိင်ႇၼႆႉၵဝ်တၵ်းပွႆႇၸႂ်ႉၵူၼ်းၵေႃႉၼိုင်ႈဢၼ်ပဵၼ်ၵူၼ်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ မႃးၸူးတီႈမႂ်းဢေႃႈ။ မႂ်းတၵ်းလႆႈပၼ်ၽိၵ်ႈသိၵ်ႈတၢင်းဢၼ်သွၼ်းလေႃႇၵႃႈၼိူဝ်မၼ်းလူၺ်ႈၼမ်ႉမၼ်း၊ႁႂ်ႈမၼ်းပဵၼ်ၶုၼ်ဢၼ်ဢုပ်ႉပိူင်ႇၵူၼ်းၵဝ်ၵူၼ်းမဵဝ်း ဢိသရေး၊ တႃႉ။ မၼ်းတၵ်းၵႄႇၼုၵ်ႈဢဝ်ၶဝ်လွတ်ႈသေၵႃႈၼႂ်းမိုဝ်းမဵဝ်း ၽိလိတ်ႉတိ၊ ဢေႃႈ။ လွင်ႈမၼ်းၸမ်ႉ၊ၵဝ်တူၺ်းႁၼ်တုၵ်ႉၶႃႉတၢင်းၽၢၼ်ၵူၼ်းၵဝ်လႄႈလႆႈငိၼ်းသဵင်ဢၼ်ၶဝ်ႁႆႈႁွင်ႉပုၼ်ႈတၢင်းၸွႆႈတၢင်းထႅမ်ၶဝ်ၼၼ်ႉယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈဢၼ် သမူၺ်ႇလႃႉ၊ ႁၼ် သေႃးလု၊ ၼၼ်ႉၸိုင်၊ ထႃႇဝရႃႉၽြႃး၊ မီးဢမိင်ႉတီႈမၼ်းလႄႈဝႃႈ၊ “ၵေႃႉၼႆႉပဵၼ်ၵူၼ်းဢၼ်ၵဝ်လၢတ်ႈလွင်ႈမၼ်းဝႆႉတီႈမႂ်းၼၼ်ႉယဝ်ႉ။ မၼ်းတၵ်းဢုပ်ႉပိူင်ႇၵႃႈၼိူဝ်ၵူၼ်းၵဝ်တင်းလၢႆဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ သေႃးလု၊ ၵႂႃႇၸူးတီႈ သမူၺ်ႇလႃႉ၊ ၵေႃႉဢၼ်မီးတီႈႁိမ်းၽၵ်းတူၼၼ်ႉလႄႈတွင်ႈထၢမ်ဝႃႈ၊ “ၶႅၼ်းတေႃႈၼႄပၼ်ႁိူၼ်းၽူႈၸၢင်ႈႁုႁၼ်ၼၼ်ႉသေၵမ်း၊” ဝႃႈၼင်ႇၼႆဢေႃႈ။
သမူၺ်ႇလႃႉ၊ ၶိုၼ်းလၢတ်ႈလႄႈဝႃႈ၊ “ၵဝ်ပဵၼ်ၽူႈၸၢင်ႈႁုႁၼ်ဢေႃႈ။ ၶိုၼ်ႈၵႂႃႇထႃႈၵဝ်ၵႃႈတီႈထႃႇၼႃႉဢၼ်ႁဵတ်းဝၢတ်ႈၵူဝ်းၵႂၢႆႇၼၼ်ႉတႃႉ။ သူတင်းသွင်ၵေႃႉတၵ်းလႆႈၵိၼ်လူၺ်ႈၵၼ်တင်းၵဝ်ၼႂ်းဝၼ်းမိူဝ်ႈၼႆႉဢေႃႈ။ မိူဝ်ႈၽုၵ်ႈၵၢင်ၼႂ်တၵ်းလၢတ်ႈၼႄၵႃႈဢၼ်မႂ်းမီးဢလူဝ်ႇၼၼ်ႉယဝ်ႉၸင်ႇတၵ်းပွႆႇမႂ်းၵႂႃႇဢေႃႈ။-
လူၺ်ႈလွင်ႈမႃႉလီႈၸိူဝ်းဢၼ်ႁၢႆၵႂႃႇမိူဝ်ႈသိုၼ်းၼၼ်ႉၵေႃႈယႃႇပေမႆႈၸႂ်။ ထူပ်းႁၼ်ဝႆႉယဝ်ႉ။ ၵေႃႉဢၼ်ၵူၼ်းမဵဝ်း ဢိသရေး၊ လူဝ်ႇသေပိူၼ်ႈၼၼ်ႉပဵၼ်ၽူႈလႂ်ဝႃႈၼႆၸမ်ႉ၊ပဵၼ်မႂ်းဢိၵ်ႇတင်းၵူၼ်းႁိူၼ်းပေႃႈမႂ်းၵႃႈမီးၼၼ်ႉယဝ်ႉ၊” ဝႃႈၼင်ႇၼႆဢေႃႈ။
သေႃးလု၊ ၵေႃႈလဝ်ႈလၢတ်ႈလႄႈဝႃႈ၊ “ၵဝ်ၶႃႈၼႆႉပဵၼ်ၵူၼ်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ မဵဝ်းဢၼ်လဵၵ်ႉဢၼ်ၼွႆႉသေပိူၼ်ႈၵႃႈၼႂ်းၵူၼ်းမဵဝ်း ဢိသရေး၊ လႄႈၶိူဝ်းႁိူၼ်းၵဝ်ၶႃႈသမ်ႉပဵၼ်ဢၼ်ၼႃႈလဵၵ်ႉတႃတႅမ်ႇသေပိူၼ်ႈၵႃႈၼႂ်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ ဢေႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈလၢတ်ႈၸိူဝ်ႉၼင်ႇၼႆတီႈၵဝ်ၶႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ သမူၺ်ႇလႃႉ၊ ဢွၼ်ဢဝ် သေႃးလု၊ တင်းၵူၼ်းဢွၼ်ႇမၼ်းၶဝ်ႈၸူးၵႃႈၼႂ်းလုၵ်းလူင်သေယဝ်ႉ၊ႁႂ်ႈမၼ်းၼင်ႈၵႃႈတီႈႁူဝ်ၽိူၼ်တီႈဢၼ်မီးၶႅၵ်ႇယူႇသၢမ်သိပ်းၵေႃႉၼင်ႈယူႇၼၼ်ႉဢေႃႈ။-
သမူၺ်ႇလႃႉ၊ လၢတ်ႈတီႈၵူၼ်းဢၼ်ပဵၼ်ႁူဝ်ၼႃႈၽၢႆႇတူမ်ႈႁုင်မၼ်းလႄႈဝႃႈ၊ “ဢဝ်ၵွၼ်ႈၼိူဝ်ႉဢၼ်ၵဝ်ဢၢပ်ႈပၼ်တီႈမႂ်းလႄႈသင်ႇလၢတ်ႈႁႂ်ႈမႂ်းၸတ်းဝႆႉၶေႃၶေႃၼၼ်ႉမႃးတႃႉ၊” ဝႃႈၼင်ႇၼႆဢေႃႈ။-
ၵေႃႉၼၼ်ႉၵေႃႈဢဝ်ၵွၼ်ႈၼိူဝ်ႉႁူဝ်ၶႃဢၼ်မွၼ်းမွၼ်းၼၼ်ႉမႃးတမ်းပၼ်ၵႃႈတီႈၽၢႆႇၼႃႈ သေႃးလု၊ ဢေႃႈ။ သမူၺ်ႇလႃႉ၊ ၵေႃႈလၢတ်ႈလႄႈဝႃႈ၊ “တူၺ်းလူး။ ဢၼ်ၼႆႉပဵၼ်ၵွၼ်ႈၼိူဝ်ႉဢၼ်ၵဝ်ဢဝ်ဝႆႉပုၼ်ႈမႂ်းယဝ်ႉ။ ၵိၼ်တႃႉ။ ၵဝ်သိမ်းဝႆႉပုၼ်ႈမႂ်းႁႂ်ႈလႆႈၵိၼ်ပွၵ်ႈၼႆႉႁူမ်ႈလူၺ်ႈၵၼ်တင်းၶႅၵ်ႇဢၼ်ႁွင်ႉပၢင်းဝႆႉၼၼ်ႉယဝ်ႉ၊” ဝႃႈၼင်ႇၼႆဢေႃႈ။ ပိူဝ်ႈၼႆလႄႈ သေႃးလု၊ ၵိၼ်ၶူပ်းလူၺ်ႈၵၼ်တင်း သမူၺ်ႇလႃႉ၊ ၼႂ်းဝၼ်းၼၼ်ႉဢေႃႈ။-
မိူဝ်ႈဢၼ်ၶဝ်လူင်းသေၵႃႈတီႈထႃႇၼႃႉဢၼ်ႁဵတ်းဝၢတ်ႈၵူဝ်းၵႂၢႆႇလႄႈၶဝ်ႈၵႃႈၼႂ်းဝဵင်းၸိုင်၊ၶဝ်မႄးႁႅၼ်းပၼ်ၵူႇတီႈၼွၼ်းပုၼ်ႈ သေႃးလု၊ ၵႃႈၼိူဝ်လင်ၶႃးႁိူၼ်း သေယဝ်ႉ၊-
မၼ်းၼွၼ်းၵႃႈတီႈၼၼ်ႈ ဢေႃႈ။ မိူဝ်ႈထိုင်ၵၢင်ၼႂ်မိူင်းလႅင်းမႃးၼၼ်ႉ၊ သမူၺ်ႇလႃႉ၊ ၵႂႃႇပူၵ်းလုၵ်ႉ သေႃးလု၊ ၵႃႈၼိူဝ်လင်ၶႃးႁိူၼ်းသေလႄႈလၢတ်ႈဝႃႈ၊ “လုၵ်ႉတႃႉ။ ၵဝ်တၵ်းပွႆႇမႂ်းၵႂႃႇဢေႃႈ၊” ဝႃႈၼင်ႇၼႆဢေႃႈ။ သေႃးလု၊ လုၵ်ႉသေယဝ်ႉ၊မၼ်းတင်း သမူၺ်ႇလႃႉ၊ ၵႂႃႇၸွမ်းၵၼ်ဢေႃႈ။-
မိူဝ်ႈဢၼ်ၶဝ်ႁွတ်ႈၵႂႃႇၵႃႈတီႈႁိမ်းတီႈသုတ်းဝဵင်းၼၼ်ႉၸိုင်၊ သမူၺ်ႇလႃႉ၊ လၢတ်ႈတီႈ သေႃးလု၊ လႄႈဝႃႈ၊ “လၢတ်ႈႁႂ်ႈၵူၼ်းဢွၼ်ႇမႂ်းၵႂႃႇဢွၼ်တၢင်းတႃႉ၊” ဝႃႈၼင်ႇၼႆလႄႈၵူၼ်းဢွၼ်ႇၼၼ်ႉၵႂႃႇဢွၼ်တၢင်းသေယဝ်ႉ၊ သမူၺ်ႇလႃႉ၊ သမ်ႉလၢတ်ႈလႄႈဝႃႈ၊ “ၵိုတ်းသဝ်းယူႇၵမ်းဢွၼ်ႇၼိုင်ႈတႃႉ။ ၵဝ်တၵ်းမွၵ်ႇလၢတ်ႈဢမိင်ႉၽြႃးပဵၼ်ၸဝ်ႈတီႈမႂ်းဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ သမူၺ်ႇလႃႉ၊ ဢဝ်ၼမ်ႉမၼ်းမၢၵ်ႇသၢၼ်ႇလုၼ်ႇတဝ်ႈၼိုင်ႈသွၼ်းလေႃႇၵႃႈၼိူဝ်ႁူဝ် သေႃးလု၊ သေယဝ်ႉ၊ၼူမ်မၼ်းသေလႄႈလၢတ်ႈဝႃႈ၊ “ ထႃႇဝရႃႉၽြႃး၊ ပၼ်ၽိၵ်ႈသိၵ်ႈတၢင်းဢၼ်သွၼ်းလေႃႇၼမ်ႉမၼ်းလႄႈၶၢၼ်းမႂ်းဝႆႉၼႂ်းဢရႃႇၶုၼ်ဢၼ်ဢုပ်ႉပိူင်ႇၵူၼ်းမၼ်းၸဝ်ႈမဵဝ်း ဢိသရေး၊ ဢေႃႈ။ မႂ်းတၵ်းလႆႈဢုပ်ႉပိူင်ႇၵူၼ်း ထႃႇဝရႃႉၽြႃး၊ သေယဝ်ႉ၊ၵႄႇၼုၵ်ႈဢဝ်ၶဝ်ဢွၵ်ႇသေၵႃႈၼႂ်းမိုဝ်းရၢၼ်ႇသူႇၸိူဝ်းဢၼ်လွမ်ႉႁွပ်ႈၶဝ်ဝႆႉၼၼ်ႉဢေႃႈ။ ပုၼ်ႈဢၼ်တၵ်းပဵၼ်လၢၵ်ႈၶၼႃႇဢၼ် ထႃႇဝရႃႉၽြႃး၊ ၶၢၼ်းဝႆႉႁႂ်ႈမႂ်းပဵၼ်ၶုၼ်ဢၼ်ဢုပ်ႉပိူင်ႇဢမူၺ်ႇမၼ်းၸဝ်ႈၼၼ်ႉ ၸမ်ႉ၊-
ဝၼ်းမိူဝ်ႈၼႆႉမိူဝ်ႈဢၼ်မႂ်းၽၢတ်ႇၵၼ်တင်းၵဝ်ၵႂႃႇယဝ်ႉၼၼ်ႉၸိုင်၊မႂ်းတၵ်းထူပ်းႁၼ်ၵူၼ်းသွင်ၵေႃႉၵႃႈတီႈႁိမ်းၶုမ်ပႃႇႁဵဝ်ႈ ရႃႇၶေႇလႃႉ၊ ဝၢၼ်ႈ ၸေႇလၸႃႉ၊ ၼႂ်းသိုင်ႇတိူင်းမိူင်း ပိၼ်ႇယႃႇမိၼ်ႇ၊ ပုၼ်ႉဢေႃႈ။ ၶဝ်ၼၼ်ႉတၵ်းမွၵ်ႇလၢတ်ႈတီႈမႂ်းလွင်ႈဢၼ်မႃႉလီႈၸိူဝ်းဢၼ်မႂ်းၵႂႃႇသွၵ်ႈႁႃၼၼ်ႉထူပ်းယဝ်ႉ၊ဢိၵ်ႇတင်းလွင်ႈဢၼ်ပေႃႈမႂ်းဢမ်ႇမႆႈၸႂ်ၵွပ်ႈမႃႉလီႈၸိူဝ်းၼၼ်ႉလႄႈမႆႈၸႂ်ၵွပ်ႈမႂ်းယူႇသေယဝ်ႉ၊ထၢမ်ႁႃယူႇလႄႈဝႃႈ၊ ‘ၵဝ်တၵ်းႁဵတ်းၸိူဝ်ႉၼင်ႇႁိုဝ်ၵွပ်ႈလူၺ်ႈလုၵ်ႈၸၢႆးၵဝ်ၼၼ်ႉ၊’ ဝႃႈၼႆယူႇၶိူဝ်းၶိူဝ်းယႂ်းယႂ်းၼၼ်ႉဢေႃႈ။-”
မႂ်းပူၼ်ႉသေၵႃႈတီႈၼၼ်ႈၵႂႃႇလႄႈမိူဝ်ႈဢၼ်ႁွတ်ႈထိုင်ၵႃႈတီႈတူၼ်ႈမႆႉၼိမ် တႃႇပေႃႇ၊ ၼၼ်ႉၸိုင်၊မႂ်းတၵ်းႁူပ်ႉထူပ်းၵူၼ်းသၢမ်ၵေႃႉဢၼ်ၶိုၼ်ႈၸူးတီႈၽြႃးပဵၼ်ၸဝ်ႈၵႃႈတီႈဝဵင်း ပေႇသလႃႉ၊ ႁႂ်ႈလႆႈၵႂႃႇသၢၵ်ႈၵၢပ်ႈတၢင်းလူႇၼၼ်ႉဢေႃႈ။ ၼႂ်းၶဝ်ၼၼ်ႉၵေႃႉၼိုင်ႈႁေႃႈဢဝ်ပႄႉသၢမ်တူဝ်ယူႇ၊ၵေႃႉၼိုင်ႈသမ်ႉပႃးဢဝ်ၶဝ်ႈမုၼ်းသၢမ်လုၵ်ႈ၊ၵေႃႉၼိုင်ႈသမ်ႉပႃးဢဝ်ထူင်ၼင်ဢၼ်တဵမ်ဝႆႉတင်းၼမ်ႉမၢၵ်ႇၸပိတ်ႉၼၼ်ႉဢေႃႈ။-
ၶဝ်တၵ်းတူင်ႉတၵ်ႉၵၼ်တင်းမႂ်းသေယဝ်ႉ၊ဢဝ်ၶဝ်ႈမုၼ်းၼၼ်ႉသွင်လုၵ်ႈပၼ်တီႈမႂ်းလႄႈမႂ်းတၵ်းလႆႈႁပ်ႉဢဝ်ဢေႃႈ။-
လိုၼ်းၼၼ်ႉမိူဝ်ႈဢၼ်မႂ်းႁွတ်ႈထိုင်ၵႃႈတီႈဝဵင်း ၵိပႃႉ၊ တီႈလွႆၽြႃးပဵၼ်ၸဝ်ႈတီႈဢၼ်မီးတပ်ႉၵူၼ်းမဵဝ်း ၽိလိတ်ႉတိ၊ ၼၼ်ႉဢေႃႈ။ ၵႃႈတီႈၼႃႈၽၵ်းတူဝဵင်းၼၼ်ႉမႂ်းတၵ်းႁူပ်ႉထူပ်းပရေႃးၽႅတ်ႈ မူႇၼိုင်ႈဢွၼ်ၵၼ်လဵတ်းတိင်ႇလဵတ်းတရေႃးယူႇ၊ႁႆႇၵွင်ၶဵတ်ႇယူႇ၊ပဝ်ႇၼႄးယူႇလႄႈလူင်းသေၵႃႈတီႈၶဵင်ႇတၢင်းလူႇၵႃႈၼိူဝ်လွႆၼၼ်ႉမႃးယူႇၼၼ်ႉဢေႃႈ။ ၶဝ်ၼၼ်ႉတၵ်းဢွၼ်ၵၼ်ႁေႃးလၢတ်ႈၵႂၢမ်းပရေႃးၽႅတ်ႈယူႇဢေႃႈ။-
မိူဝ်ႈၼၼ်ႉဝိၺိၺ်ႇ ထႃႇဝရႃႉၽြႃး၊ တၵ်းဢုပ်ႉထိင်းမႂ်းၵမ်းလဵဝ်သေယဝ်ႉ၊မႂ်းတၵ်းၶဝ်ႈပႃးၵႃႈၼႂ်းတၢင်းဢၼ်ၶဝ်ႁေႃးလၢတ်ႈၵႂၢမ်းပရေႃးၽႅတ်ႈယူႇၼၼ်ႉသေလႄႈမႂ်းတၵ်းပဵၼ်ၵေႃႉဢၼ်လၢၵ်ႇပိူင်ႈမႃးဢေႃႈ။-
မိူဝ်ႈဢၼ်လွင်ႈတၢင်းၸိူဝ်းၼႆႉပဵၼ်မႃးၼၼ်ႉၸိုင်၊ႁဵတ်းၸွမ်းၵႃႈၼင်ႇဢၼ်သၢင်ႇထုၵ်ႇၼၼ်ႉတႃႉ။ ၽြႃးပဵၼ်ၸဝ်ႈတၵ်းမီးယူႇလူၺ်ႈၵၼ်တင်းမႂ်းဢေႃႈ။-
“မႂ်းသမ်ႉတၵ်းလႆႈလူင်းၵႂႃႇၵႃႈတီႈဝဵင်း ၵိလႃႉၵႃႇလႃႉ၊ ဢွၼ်တၢင်းၵဝ်ဢေႃႈ။ ၵဝ်ၵေႃႈတၵ်းလူင်းမႃးၸူးတီႈမႂ်းႁႂ်ႈလႆႈသၢၵ်ႈလူႇတၢင်းလူႇဢၼ်တုတ်ႇၽႆးဢိၵ်ႇတင်းတၢင်းလူႇမိၵ်ႈသႁႃႇယႃႉဢေႃႈ။ ၵႃႈတီႈၼၼ်ႈမႂ်းပႂ်ႉထႃႈၵဝ်ယူႇၸဵတ်းဝၼ်းတဵမ်တဵမ်တေႃႇထိုင်ႁွတ်ႈၵဝ်မႃးလႄႈမွၵ်ႇလၢတ်ႈလွင်ႈဢၼ်မႂ်းတၵ်းလႆႈႁဵတ်းၼၼ်ႉတႃႉ၊” ဝႃႈၼင်ႇၼႆဢေႃႈ။
မိူဝ်ႈဢၼ် သေႃးလု၊ ဝၢႆႇၼႃႈဢွၵ်ႇသေၵႃႈတီႈ သမူၺ်ႇလႃႉ၊ ၵႂႃႇၼၼ်ႉ၊ ထႃႇဝရႃႉၽြႃး၊ ႁဵတ်းႁႂ်ႈ သေႃးလု၊ ပဵၼ်ၵူၼ်းဢၼ်ႁူဝ်ၸႂ်လၢၵ်ႇပိူင်ႈဢေႃႈ။ ၵႃႈဢၼ် သမူၺ်ႇလႃႉ၊ လၢတ်ႈၼၼ်ႉၵေႃႈပဵၼ်ၸွမ်းၵူႈၸိူဝ်ႉၵူႈမဵဝ်းၼႂ်းဝၼ်းၼၼ်ႉၵမ်းလဵဝ်ဢေႃႈ။-
မိူဝ်ႈဢၼ် သေႃးလု၊ တင်းၵူၼ်းဢွၼ်ႇမၼ်းႁွတ်ႈထိုင်မႃးၵႃႈတီႈဝဵင်း ၵိပႃႉ၊ ၼၼ်ႉၸိုင်၊မုၵ်ႉပရေႃးၽႅတ်ႈ မူႇၼိုင်ႈမႃးႁူပ်ႉထူပ်းမၼ်းဢေႃႈ။ မိူဝ်ႈၼၼ်ႉၵမ်းလဵဝ်ဝိၺိၺ်ႇၽြႃးပဵၼ်ၸဝ်ႈဢုပ်ႉထိင်းမၼ်းလႄႈမၼ်းၶဝ်ႈပႃးၵႃႈၼႂ်းတၢင်းဢၼ်ၶဝ်ႁေႃးလၢတ်ႈၵႂၢမ်းပရေႃးၽႅတ်ႈယူႇၼၼ်ႉဢေႃႈ။-
ၶဝ်ၸိူဝ်းဢၼ်ႁုၸၵ်းမိုတ်ႈၵိုဝ်းမၼ်းမိူဝ်ႈဢွၼ်ၼၼ်ႉႁၼ်မၼ်းႁဵတ်းၸိူဝ်ႉၼင်ႇၼၼ်ယူႇၼၼ်ႉၸိုင်၊ၶဝ်ၼင်ႇၵၼ်ၵၼ်တွင်ႈထၢမ်ၵၼ်လႄႈဝႃႈ၊ “ပဵၼ်ၸိူဝ်ႉၼင်ႇႁိုဝ်မႃးတီႈလုၵ်ႈၸၢႆး ၵိသႃႉ၊ ၼၼ်ႉယဝ်ႉ။ သေႃးလု၊ ၶဝ်ႈပႃးၼႂ်းပရေႃးၽႅတ်ႈၼင်ႇၵဝ်ႇႁိုဝ်း၊” ဝႃႈၼင်ႇၼႆဢေႃႈ။-
ၵူၼ်းၵႃႈ၊တီႈၼၼ်ႈၵေႃႉၼိုင်ႈထၢမ်လႄႈဝႃႈ၊ “ပေႃႈၶဝ်ပဵၼ်ၽူႈလႂ်၊” ဝႃႈၼင်ႇၼႆလႄႈ၊ၵႂၢမ်းဢၼ်ဝႃႈ၊ “ သေႃးလု၊ ၵေႃႈၶဝ်ႈပႃးၼႂ်းပရေႃးၽႅတ်ႈၼင်ႇၵဝ်ႇႁိုဝ်း၊” ဢၼ်ဝႃႈၼၼ်ႉပဵၼ်ထုင်းၵႂၢမ်းဝႆႉဢေႃႈ။-
မိူဝ်ႈဢၼ် သေႃးလု၊ ႁေႃးလၢတ်ႈၵႂၢမ်းပရေႃးၽႅတ်ႈယဝ်ႉတူဝ်ႈယဝ်ႉၼၼ်ႉမၼ်းၵႂႃႇၸူးတီႈၶဵင်ႇတၢင်းလူႇၵႃႈတီႈၼိူဝ်လွႆပုၼ်ႉဢေႃႈ။
ပေႃႈၼႃႉ သေႃးလု၊ ႁၼ် သေႃးလု၊ တင်းၵူၼ်းဢွၼ်ႇမၼ်းၼၼ်ႉလႄႈထၢမ်ဝႃႈ၊ “သူသွင်ၵေႃႉၵႂႃႇတီႈလႂ်မႃး၊” ဝႃႈၼင်ႇၼႆလႄႈ၊ သေႃးလု၊ ၶိုၼ်းလၢတ်ႈလႄႈဝႃႈ။ “သွၵ်ႈႁႃမႃႉလီႈၸိူဝ်းၼၼ်ႉၶႃႈဢေႃႈ။ မိူဝ်ႈဢၼ်ဢမ်ႇထူပ်းဢမ်ႇႁၼ်ၼၼ်ႉၸိုင်၊ႁဝ်းသွင်ၵေႃႉၵႂႃႇၸူးတီႈ သမူၺ်ႇလႃႉ၊ ၶႃႈဢေႃႈ၊” ဝႃႈၼင်ႇၼႆဢေႃႈ။
ၼႃႉ သေႃးလု၊ သမ်ႉထၢမ်လႄႈဝႃႈ၊ “ သမူၺ်ႇလႃႉ၊ မွၵ်ႇလၢတ်ႈၸိူဝ်ႉၼင်ႇႁိုဝ်တီႈသူသွင်ၵေႃႉ၊” ဝႃႈၼင်ႇၼႆလႄႈ။
သေႃးလု၊ ၶိုၼ်းလၢတ်ႈတီႈပေႃႈၼႃႉမၼ်းလႄႈဝႃႈ၊ “မၼ်းလၢတ်ႈပၼ်လွင်ႈဢၼ်မႃႉလီႈၸိူဝ်းၼၼ်ႉထူပ်းႁၼ်ယဝ်ႉၼၼ်ႉလႅင်းလႅင်းဢေႃႈ၊” ဝႃႈၼႆၵူၺ်းလႄႈ၊ယင်းဢမ်ႇမွၵ်ႇဢမ်ႇလၢတ်ႈလွင်ႈဢၼ် သမူၺ်ႇလႃႉ၊ လၢတ်ႈလွင်ႈမၼ်းပဵၼ်ၶုၼ်ႁေႃၶမ်းမႃးယဝ်ႉၼၼ်ႉလႄႈယူႇဢေႃႈ။
သမူၺ်ႇလႃႉ၊ ႁွင်ႉဢဝ်ၵူၼ်းတင်းလၢႆမႃးၸုၵၼ်တုမ်ၵၼ်ၵႃႈတီႈ ထႃႇဝရႃႉၽြႃး၊ ၼႂ်းဝဵင်း မိၸပႃႇ၊ သေယဝ်ႉ၊-
လၢတ်ႈတီႈၶဝ်လႄႈဝႃႈ၊ “ ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ မီးဢမိင်ႉလႄႈဝႃႈၸမ်ႉ၊ ‘ၵဝ်ဢဝ်သူဢွၵ်ႇသေမိူင်း ဢေးၵျိပ်ႉ၊ ၵႃႈၼႂ်းမိုဝ်းၵူၼ်းမဵဝ်း ဢေးၵျိပ်ႉ၊ မႃးဢိၵ်ႇတင်းၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းဢၼ်ၼိၵ်ႈၸၢၵ်ႈငႅၼ်းသႄးသူၼၼ်ႉဢေႃႈ။-
ၵူၺ်းၵႃႈ၊ၼႂ်းဝၼ်းမိူဝ်ႈၼႆႉသူပႄႇပႅတ်ႈၵဝ်ဢၼ်ပဵၼ်ၽြႃးပဵၼ်ၸဝ်ႈသူဢၼ်ၵႄႇၼုၵ်ႈဢဝ်သူဢွၵ်ႇသေၵႃႈၼႂ်းၽေးဢုပၢတ်ႈဢိၵ်ႇတင်းတုၵ်ႉၶႃႉတၢင်းၽၢၼ်သူၼၼ်ႉသေယဝ်ႉ၊ဢွၼ်ၵၼ်လဝ်ႈယွၼ်းဢဝ်ၶုၼ်ႁေႃၶမ်းတီႈၵဝ်ဢေႃႈ။ ပေႃးပဵၼ်ၸိူဝ်ႉၼင်ႇၼႆၸိုင်၊ၸွမ်းလူၺ်ႈၸိူဝ်ႉၶိူဝ်းၽႂ်ၸိူဝ်ႉၶိူဝ်းမၼ်းယေႈမဵဝ်းယေႈႁဵင်ဢွၼ်ၵၼ်ၸုတုမ်ၵၼ်မႃးၵႃႈတီႈၽၢႆႇၼႃႈ ထႃႇဝရႃႉၽြႃး၊ တႃႉ၊’ ဝႃႈၼႆယဝ်ႉ၊” ဝႃႈၼင်ႇၼႆဢေႃႈ။
ၼင်ႇၼၼ်လႄႈ သမူၺ်ႇလႃႉ၊ ၸႂ်ႉၵူၼ်းၸိူဝ်ႉၶိူဝ်းမဵဝ်းၼိုင်ႈယဝ်ႉမဵဝ်းၼိုင်ႈႁႂ်ႈၶိုၼ်ႈမႃးပႃႈၼႃႈလႄႈ ထႃႇဝရႃႉၽြႃး၊ လိူၵ်ႈၵဵပ်းဢဝ်ၵူၼ်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ ဢေႃႈ။-
ၵမ်းၼၼ်ႉ၊ သမူၺ်ႇလႃႉ၊ သမ်ႉၸႂ်ႉၵူၼ်းၶိူဝ်းႁိူၼ်းၼႂ်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ ႁႂ်ႈၶိုၼ်ႈမႃးပႃႈၼႃႈၸွမ်းၼင်ႇၶိူဝ်းႁိူၼ်းၽႂ်ၶိူဝ်းႁိူၼ်းမၼ်းလႄႈ ထႃႇဝရႃႉၽြႃး၊ လိူၵ်ႈၵဵပ်းဢဝ်ၶိူဝ်းႁိူၼ်း မႃႇတရိ၊ ဢေႃႈ။ သမူၺ်ႇလႃႉ၊ သမ်ႉၸႂ်ႉၵူၼ်းၶိူဝ်းႁိူၼ်း မႃႇတရိ၊ ႁႂ်ႈၶိုၼ်ႈမႃးပႃႈၼႃႈပဵၼ်ၵေႃႉပဵၼ်ၵေႃႉ လႄႈ သေႃးလု၊ လုၵ်ႈၸၢႆး ၵိသႃႉ၊ ၼၼ်ႉလႆႈၶၢမ်ႇတၢင်းဢၼ်လိူၵ်ႈၵဵပ်းဢဝ်ဢေႃႈ။ မိူဝ်ႈဢၼ်ၶဝ်ႁွင်ႉႁႃမၼ်းၼၼ်ႉၸိုင်၊ဢမ်ႇထူပ်းဢမ်ႇႁၼ်မၼ်း။-
ၶဝ်ၸင်ႇလဝ်ႈထၢမ်တီႈ ထႃႇဝရႃႉၽြႃး၊ လႄႈဝႃႈ၊ “ၸွင်ႇမီးသေၵေႃႉသေၵူၼ်းဢၼ်တၵ်းမႃးထႅင်ႈၼၼ်ႉလူးၵွၼ်ႇၶႃႈႁိုဝ်း၊” ဝႃႈၼင်ႇၼႆသေယဝ်ႉ။ ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ သေႃးလု၊ မီးယူႇၵႃႈတီႈၼၼ်ႈတဵတ်ႇမႅပ်းယူႇၼႂ်းၵႄႈၶူဝ်းလဵင်းၸိူဝ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၶဝ်ဢွၼ်ၵၼ်လႅၼ်ႈၵႂႃႇႁွင်ႉဢဝ်မၼ်းမႃးလႄႈမိူဝ်ႈဢၼ်မႃးၸုၵ်းယူႇၵႃႈၼႂ်းၵၢင်ၵူၼ်းတင်းလၢႆၼၼ်ႉၸိုင်၊ၶဝ်လႆႈႁၼ်မၼ်းသုင်လိူဝ်ပိူၼ်ႈႁူဝ်မၼ်းပူၼ်ႉပႅၼ်ပိူၼ်ႈၵူႈၵေႃႉၵူႈၵူၼ်းယူႇၼၼ်ႉဢေႃႈ။-
သမူၺ်ႇလႃႉ၊ ၵေႃႈလၢတ်ႈတီႈၵူၼ်းတင်းလၢႆလႄႈဝႃႈ၊ “ၵူၼ်းဢၼ် ထႃႇဝရႃႉၽြႃး၊ လိူၵ်ႈဢဝ်ၼၼ်ႉပဵၼ်ၵေႃႉၼႆႉယဝ်ႉ။ ၼႂ်းၵူၼ်းတင်းသဵင်ႈတင်းလူင်ၼႆႉၵေႃႉဢၼ်မိူၼ်ၵၼ်တင်းမၼ်းဢမ်ႇမီးသေၵေႃႉသေၵူၼ်း၊” ဝႃႈၼင်ႇၼႆဢေႃႈ။ ၵူၼ်းတင်းသဵင်ႈတင်းလူင်ဢွၼ်ၵၼ်ႁွင်ႉသႅၼ်ႇႁွင်ႉပၢဝ်ႇလႄႈဝႃႈ၊ “ႁႂ်ႈၶုၼ်ႁေႃၶမ်းႁဝ်းဢသၢၵ်ႈယၢဝ်းယိုၼ်းသေၵမ်းလူၺ်ႈ၊” ဝႃႈၼင်ႇၼႆဢေႃႈ။
သမူၺ်ႇလႃႉ၊ ဢဝ်ဢရႃႇဢိၵ်ႇတင်းပုၼ်ႈၽွၼ်းၼၼ်ႉမွၵ်ႇလၢတ်ႈတီႈၵူၼ်းတင်းလၢႆလႄႈ၊တႅမ်ႈသႂ်ႇဝႆႉၵႃႈၼႂ်းၽိုၼ်လိၵ်ႈသေယဝ်ႉ၊ဢဝ်ဝႆႉၵႃႈတီႈထႃႇၼႃႉတီႈမူတ်းၸၢင်ႇၸဝ်ႈသေဢေႃႈ။ မိူဝ်ႈၼၼ်ႉမၼ်းပွႆႇၵူၼ်းတင်းလၢႆပွၵ်ႈမိူဝ်းၵႂႃႇၸူးတီႈႁိူၼ်းၽႂ်ႁိူၼ်းမၼ်းၵူႈၵေႃႉၵူႈၵူၼ်းသေဢေႃႈ။-
သေႃးလု၊ ၵေႃႈပွၵ်ႈမိူဝ်းၵႂႃႇတီႈႁိူၼ်းမၼ်းၵႃႈၼႂ်းဝဵင်း ၵိပႃႉ၊ ၼင်ႇၵဝ်ႇဢေႃႈ။ မုၵ်ႉၸိူဝ်းၵူၼ်းဢၼ်ႁဵတ်းသိုၵ်းလႆႈဢၼ်ၽြႃးပဵၼ်ၸဝ်ႈတိုၵ်းယူင်းႁူဝ်ၸႂ်ၶဝ်ၼၼ်ႉဢွၼ်ၵၼ်ၸွမ်းၵႂႃႇလူၺ်ႈၵၼ်တင်းမၼ်းဢေႃႈ။-
ၵူၺ်းၵႃႈ၊ၵူၼ်းယႃႉၵူၼ်းၵဝ်းတင်းလၢႆလၢတ်ႈဝႃႈ၊ “ၵေႃႉၼႆႉတၵ်းႁဵတ်းၸိူဝ်ႉၼင်ႇႁိုဝ်ၵႄႇသႄႇဢဝ်ႁဝ်းလွတ်ႈလႆႈ၊” ဝႃႈၼင်ႇၼႆသေယဝ်ႉ၊ႁဵတ်းဢမ်ႇပေႃးၼင်ႇႁိုဝ်တီႈ သေႃးလု၊ လႄႈဢမ်ႇသၢၵ်ႈဢမ်ႇပၼ်လၢၵ်ႈသွင်ႇတီႈမၼ်းလႄႈယူႇဢေႃႈ။ ၵူၺ်းၵႃႈ၊ သေႃးလု၊ ယင်းဢမ်ႇတၵ်ႉသဵင်လႄႈယူႇဢေႃႈ။ [ယၢမ်းမိူဝ်ႈၼၼ်ႉၶုၼ်ႁေႃၶမ်း ၼႃႇႁတ်ႉ၊ ၵူၼ်းမဵဝ်း ဢမ်ႇမုၼ်ႇ၊ ၼၼ်ႉႁဵတ်းပႄႉႁဵတ်းၼႅင်ႇလႄႈၼိၵ်ႈၸၢၵ်ႈငႅၼ်းသႄးၵူၼ်းၸိူဝ်ႉၶိူဝ်း ၵၢတ်ႉ၊ တင်း ရုပိၼ်ႇ၊ ၼႃႇလူင်လၢင်ဢေႃႈ။ မၼ်းၼၼ်ႉၶွၵ်းပႅတ်ႈမၢၵ်ႇတႃၶွၼ်ၶႂႃၶဝ်ၵူႈၵေႃႉၵူႈၵူၼ်းလႄႈဢမ်ႇပၼ်ႁႂ်ႈမီးၵေႃႉဢၼ်တၵ်းၵႄႇသႄႇၼုၵ်ႈဢဝ်ၵူၼ်းမဵဝ်း ဢိသရေး၊ ၼၼ်ႉဢေႃႈ။ ၵႃႈတီႈၽၢႆႇဝၼ်းဢွၵ်ႇၼမ်ႉ ယေႃးတၢၼ်ႇ၊ ၼၼ်ႉၵူၼ်းမဵဝ်း ဢိသရေး၊ ဢၼ်မၢၵ်ႇတႃၶွၼ်ၶႂႃၶဝ်ဢၼ်ဢမ်ႇလႆႈၶၢမ်ႇတၢင်းဢၼ်ၶုၼ်ႁေႃၶမ်း ၼႃႇႁတ်ႉ၊ ၵူၼ်းမဵဝ်း ဢမ်ႇမုၼ်ႇ၊ ၶွၵ်းပႅတ်ႈၼၼ်ႉဢမ်ႇမီးသေၵေႃႉသေၵူၼ်း။ ၵူၺ်းမီးၵူၼ်းၸဵတ်းႁဵင်ပၢႆႈလွတ်ႈသေၵႃႈၼႂ်းမိုဝ်းၵူၼ်းမဵဝ်း ဢမ်ႇမုၼ်ႇ၊ သေလႄႈၶဝ်ႈဝဵင်း ယႃႇပႅတ်ႉၵိလတ်ႉ၊ ၵႂႃႇၼၼ်ႉဢေႃႈ။]
လိုၼ်းသေၼၼ်ႉလိူၼ်ၼိုင်ႈၶုၼ်ႁေႃၶမ်း ၼႃႇႁတ်ႉ၊ ၵူၼ်းမဵဝ်း ဢမ်ႇမုၼ်ႇ၊ ၶီႇသိုၵ်းမႃးလႄႈၶျႃးပၢင်တပ်ႉၵႃႈႁိမ်းဝဵင်း ယႃႇပႅတ်ႉ၊ မိူင်း ၵိလတ်ႉ၊ ၼၼ်ႉဢေႃႈ။ ၵူၼ်းဝဵင်း ယႃႇပႅတ်ႉ၊ ၵႃႈမီးၼၼ်ႉဢွၼ်ၵၼ်လဝ်ႈလၢတ်ႈတီႈၶုၼ်ႁေႃၶမ်း ၼႃႇႁတ်ႉ၊ လႄႈဝႃႈ၊ “ႁဵတ်းမိၵ်ႈသႁႃႇယႃႉလူၺ်ႈၵၼ်တင်းႁဝ်းၶႃႈသေၵမ်း။ ႁဝ်းၶႃႈတၵ်းၶၢမ်ႇဢဝ်တၢင်းဢၼ်ၸဝ်ႈႁဝ်းဢုပ်ႉပိူင်ႇၶႃႈဢေႃႈ၊” ဝႃႈၼင်ႇၼႆဢေႃႈ။
ၼႃႇႁတ်ႉ၊ ၶိုၼ်းလၢတ်ႈလႄႈဝႃႈ၊ “ပေႃးၵဝ်လႆႈဢၶႂၢင်ႉမဵဝ်းလဵဝ်၊ဢၼ်လႆႈၶွၵ်းမၢၵ်ႇတႃၶွၼ်ၶႂႃသူၵူႈၵေႃႉၵူႈၵူၼ်းလႄႈႁဵတ်းႁႂ်ႈၵူၼ်းမဵဝ်း ဢိသရေး၊ ၵုင်ႇသရေႇသုမ်းယဝ်ႉၵူၺ်း၊ၵဝ်တၵ်းႁဵတ်းမိၵ်ႈသႁႃႇယႃႉလူၺ်ႈၵၼ်တင်းသူဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၵူၼ်းဢၼ်ပဵၼ်ၵႄႇပဵၼ်ႁူဝ်ဝဵင်း ယႃႇပႅတ်ႉ၊ ၸိူဝ်းၼၼ်ႉလဝ်ႈလၢတ်ႈလႄႈဝႃႈ၊ “ၶႅၼ်းတေႃႈယိူၼ်ႉထႃႈသေၸဵတ်းဝၼ်း၊ႁႂ်ႈႁဝ်းၶႃႈလႆႈပွႆႇၸႂ်ႉၽူႈတၢင်တူဝ်တင်းလၢႆၵႂႃႇၵႃႈၼႂ်းမိူင်း ဢိသရေး၊ ၵူႈတီႈၵူႈလႅၼ်သေၵမ်းၶႃႈ။ ပေႃးယင်းဢမ်ႇမီးၵေႃႉဢၼ်တၵ်းၵႄႇသႄႇၼုၵ်ႈဢဝ်ႁဝ်းၶႃႈသေၵေႃႉသေၵူၼ်းၸိုင်၊ႁဝ်းၶႃႈတၵ်းၶၢမ်ႇတူၵ်းသုမ်းတီႈၸဝ်ႈၶုၼ်လူင်ႁဝ်းၶႃႈဢေႃႈ၊” ဝႃႈၼင်ႇၼႆဢေႃႈ။
ၵူၼ်းသူင်ႇၶၢဝ်ႇၸိူဝ်းၼၼ်ႉႁွတ်ႈထိုင်ၵႂႃႇၵႃႈတီႈဝဵင်း ၵိပႃႉ၊ ဝဵင်းဢၼ် သေႃးလု၊ ယူႇၼၼ်ႉလႄႈဢဝ်ၵႂၢမ်းၸိူဝ်းၼၼ်ႉမွၵ်ႇလၢတ်ႈထိုင်ႁူၵူၼ်းတင်းလၢႆသေယဝ်ႉ၊ၶဝ်ဢွၼ်ၵၼ်ၵိဝ်သဵင်ႁွင်ႉႁႆႈဢေႃႈ။-
မိူဝ်ႈၼၼ်ႉ၊ သေႃးလု၊ ႁေႃႈၽုင်ဝူဝ်းမၼ်းလႄႈပွၵ်ႈသေၵႃႈတီႈတူင်ႈႁႆႈတူင်ႈၼႃးႁွတ်ႈမႃးသေယဝ်ႉ၊ထၢမ်လႄႈဝႃႈ၊ “ၵူၼ်းတင်းလၢႆႁွင်ႉႁႆႈၵွပ်ႈပိူဝ်ႈၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။ ၶဝ်ဢွၼ်ၵၼ်ဢဝ်ၵႂၢမ်းၵူၼ်းဝဵင်း ယႃႇပႅတ်ႉ၊ ၸိူဝ်းၼၼ်ႉမွၵ်ႇလၢတ်ႈဢေႃႈ။-
မိူဝ်ႈဢၼ် သေႃးလု၊ ငိၼ်းၵႂၢမ်းၼၼ်ႉၸိုင်၊ဝိၺိၺ်ႇၽြႃးပဵၼ်ၸဝ်ႈမႃးမီးယူႇၵႃႈၼိူဝ်လႄႈမၼ်းဢွၵ်ႇတေႃးသႃႉႁႅင်းၼႃႇဢေႃႈ။-
မၼ်းဢဝ်ဝူဝ်းၵူႈၼိုင်ႈတႅပ်းႁဵတ်းၵွၼ်ႈႁဵတ်းပွတ်းသေယဝ်ႉ၊သႂ်ႇပၼ်ၵႃႈၼႂ်းမိုဝ်းၽူႈသူင်ႇၶၢဝ်ႇၸိူဝ်းၼၼ်ႉၸႂ်ႉၶဝ်ပႃးၵႂႃႇၵႃႈၼႂ်းမိူင်း ဢိသရေး၊ ၵူႈတီႈၵူႈလႅၼ်လႄႈ၊ႁႂ်ႈပၢဝ်ႇသေႃႇဝႃႈ၊ “ၽူႈလႂ်သေဢမ်ႇဝႃႈ၊ၵေႃႉဢၼ်ဢမ်ႇဢွၵ်ႇၸွမ်း သေႃးလု၊ တင်း သမူၺ်ႇလႃႉ၊ ၵႂႃႇထၢမ်းၼႃႈသိုၵ်းၼၼ်ႉၸိုင်၊တၵ်းလႆႈႁဵတ်းတီႈဝူဝ်းၵေႃႉၼၼ်ႉမိူၼ်ၸိူဝ်ႉၼင်ႇၼႆဢေႃႈ၊” ဝႃႈၼင်ႇၼႆဢေႃႈ။ ၵူၼ်းမဵဝ်း ဢိသရေး၊ တင်းလၢႆၵူဝ်ႁႄတၢင်းဢၼ် ထႃႇဝရႃႉၽြႃး၊ တၵ်းႁဵတ်းၼၼ်ႉလႄႈၶဝ်ၽွမ်ႉၵၼ်ဢွၵ်ႇမႃးမိူၼ်ၸိူဝ်ႉၼင်ႇၵူၼ်းၵေႃႉလဵဝ်ဢေႃႈ။-
မၼ်းႁႂ်ႈၶဝ်ၸုတုမ်ၵၼ်ၵႃႈတီႈဝဵင်း ပေႇၸိၵ်ႉ၊ လႄႈမီးၵူၼ်းမဵဝ်း ဢိသရေး၊ သၢမ်သႅၼ်ဢိၵ်ႇတင်းၵူၼ်းမဵဝ်း ယုတႃႉ၊ သၢမ်မိုၼ်ႇဢေႃႈ။-
သင်ႇလၢတ်ႈတီႈၵူၼ်းသူင်ႇၶၢဝ်ႇၸိူဝ်းၼၼ်ႉလႄႈဝႃႈ၊ “သူၵႂႃႇလႄႈမွၵ်ႇလၢတ်ႈတီႈၵူၼ်းသူလွင်ႈဢၼ်ဝၼ်းမိူဝ်ႈၽုၵ်ႈၸူဝ်ႈဢၼ်ၵၢင်ဝၼ်းဢမ်ႇပႆႇတဵင်ႈၼၼ်ႉၸိုင်၊သူတၵ်းလႆႈလွတ်ႈလႅဝ်းယဝ်ႉၼၼ်ႉတႃႉ၊” ဝႃႈၼင်ႇၼႆဢေႃႈ။ မိူဝ်ႈဢၼ်ၵူၼ်းမဵဝ်း ယႃႇပႅတ်ႉ၊ တင်းလၢႆလႆႈငိၼ်းသဵင်ၶၢဝ်ႇၼၼ်ႉၸိုင်၊ၶဝ်ၼၼ်ႉၸူမ်းသိူဝ်းဢေႃႈ။-
ၵူၺ်းၵႃႈ၊ၶဝ်ယင်းလဝ်ႈလၢတ်ႈတီႈၶုၼ်ႁေႃၶမ်း ၼႃႇႁတ်ႉ၊ လႄႈဝႃႈ၊ “ဝၼ်းမိူဝ်ႈၽုၵ်ႈႁဝ်းၶႃႈတၵ်းၶၢမ်ႇတူၵ်းသုမ်းတီႈၸဝ်ႈႁဝ်းဢေႃႈ။ ၸဝ်ႈႁဝ်းၵူၺ်းႁဵတ်းၸွမ်းၵႃႈၼင်ႇဢၼ်ၸဝ်ႈႁဝ်းမီးဢလူဝ်ႇၼၼ်ႉတႃႉ၊” ဝႃႈၼင်ႇၼႆဢေႃႈ။
ဝၼ်းမိူဝ်ႈၽုၵ်ႈၸဝ်ႉၸဝ်ႉၼၼ်ႉ သေႃးလု၊ ၽႄၵူၼ်းႁဵတ်းသၢမ်တပ်ႉသေယဝ်ႉ၊မိူဝ်ႈဢၼ်ႁူဝ်မိူင်းသႂ်ယဝ်ႉၸိုင်၊ၶဝ်ၶုၼ်ႇလႅၼ်ႈၶဝ်ႈၵႃႈၼႂ်းပၢင်တပ်ႉရၢၼ်ႇသူႇလႄႈတိုၵ်းတေႃးဢေႃႈ။ မိူဝ်ႈထိုင်ၶိင်ႇၵၢင်ဝၼ်းတဵင်ႈၼၼ်ႉၶဝ်ၶႃႈၽၼ်းၵူၼ်းမဵဝ်း ဢမ်ႇမုၼ်ႇ၊ တၢႆပႅတ်ႈမူတ်းဢေႃႈ။ ၶဝ်ၸိူဝ်းဢၼ်လွတ်ႈဢသၢၵ်ႈၼၼ်ႉၼီပၢႆႈတၢင်းၽႂ်တၢင်းမၼ်းၽၢတ်ႇၽႄၵၼ်ၵႂႃႇဢေႃႈ။
မိူဝ်ႈၼၼ်ႉၵူၼ်းမဵဝ်း ဢိသရေး၊ တင်းလၢႆလၢတ်ႈတီႈ သမူၺ်ႇလႃႉ၊ လႄႈဝႃႈ၊ “ၶဝ်ၸိူဝ်းဢၼ်ဝႃႈ၊ သေႃးလု၊ တၵ်းလႆႈဢုပ်ႉပိူင်ႇႁဝ်းႁိုဝ်းဝႃႈၼႆၼၼ်ႉပဵၼ်ၽူႈလႂ်။ ႁွင်ႉဢဝ်ၶဝ်မႃးသေၵမ်း။ ႁဝ်းတၵ်းဢဝ်ၶဝ်တၢႆပႅတ်ႈဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ သေႃးလု၊ လၢတ်ႈလႄႈဝႃႈ၊ “ၼႂ်းဝၼ်းမိူဝ်ႈၼႆႉ တၵ်းဢမ်ႇလႆႈဢဝ်ၵူၼ်းတၢႆသေၵေႃႉသေၵူၼ်း။ ဝၼ်းမိူဝ်ႈၼႆႉပဵၼ်ဝၼ်းဢၼ် ထႃႇဝရႃႉၽြႃး၊ ၵႄႇၼုၵ်ႈဢဝ်ၵူၼ်းမဵဝ်း ဢိသရေး၊ ဢေႃႈ၊” ဝႃႈၼင်ႇၼႆဢေႃႈ။-
သမူၺ်ႇလႃႉ၊ လၢတ်ႈတီႈၵူၼ်းတင်းလၢႆလႄႈဝႃႈ၊ “ဢွၼ်ၵၼ်ၵႂႃႇၵႃႈတီႈဝဵင်း ၵိလႃႉၵႃႇလႃႉ၊ လႄႈပိုၼ်ၶၢဝ်ႇထႅင်ႈလွင်ႈ သေႃးလု၊ ပဵၼ်ၶုၼ်ႁေႃၶမ်းတႃႉႁဝ်း၊” ဝႃႈၼင်ႇၼႆဢေႃႈ။-
ၵူၼ်းတင်းသဵင်ႈတင်းလူင်ဢွၼ်ၵၼ်ၵႂႃႇၵႃႈတီႈဝဵင်း ၵိလႃႉၵႃႇလႃႉ၊ လႄႈၶဝ်ဢွၼ်ၵၼ်ယုၵ်ႉယွင်ႈ သေႃးလု၊ ၼႂ်းဢရႃႇၶုၼ်ႁေႃၶမ်းၵႃႈတီႈထႃႇၼႃႉဢၼ်မူတ်းၸၢင်ႇၼၼ်ႉဢေႃႈ။ ၶဝ်ဢွၼ်ၵၼ်သၢၵ်ႈလူႇၶိူင်ႈတၢင်းလူႇမိၵ်ႈသႁႃႇယႃႉလႄႈ သေႃးလု၊ တင်းၵူၼ်းမဵဝ်း ဢိသရေး၊ တင်းလၢႆႁဵတ်းပွႆးဢၼ်ၸူမ်းသိူဝ်းမူၼ်ႈပျေႃႇၼႃႇလူင်လၢင်ၵႃႈတီႈၼၼ်ႈဢေႃႈ။
မိူဝ်ႈၼၼ်ႉ သမူၺ်ႇလႃႉ၊ လၢတ်ႈတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈ၊ “တူၺ်းလူး။ ၵဝ်ႁဵတ်းပၼ်ၵႃႈဢၼ်သူလဝ်ႈယွၼ်းႁႂ်ႈၵဝ်ႁဵတ်းပၼ်တီႈသူၼၼ်ႉယဝ်ႉတူဝ်ႈလီငၢမ်းယဝ်ႉလႄႈသမ်ႉလႆႈယုၵ်ႉယွင်ႈၶုၼ်ႁေႃၶမ်းဝႆႉၵႃႈၼိူဝ်သူယဝ်ႉ။-
ၵမ်းၼႆႉ၊ၶုၼ်ႁေႃၶမ်းပဵၼ်ၽူႈဢၼ်ဢွၼ်ႁူဝ်သူယူႇယဝ်ႉ။ ၵဝ်ၸမ်ႉ၊ထဝ်ႈၵႄႇၼႃႇလႄႈၶူၼ်ႁူဝ်ႁွၵ်ႇယဝ်ႉ။ လုၵ်ႈၸၢႆးၵဝ်တင်းလၢႆၵေႃႈမီးယူႇၵႃႈတီႈသူဢေႃႈ။ ၵဝ်ၼႆႉဢွၼ်ႁူဝ်သူၸႃႉၸဵမ်မိူဝ်ႈဢသၢၵ်ႈယင်းလဵၵ်ႉတေႃႇထိုင်ႁွတ်ႈဝၼ်းမိူဝ်ႈၼႆႉယဝ်ႉ။-
ၵဝ်ယင်းမီးယူႇၵႃႈတီႈၼႆႈဢေႃႈ။ ပေႃးၵဝ်လႆႈႁဵတ်းၽိတ်းသေၸိူဝ်ႉသေပိူင်ၸိုင်၊တၢင်ႇဢပျတ်ႈတီႈၵဝ်ယၢမ်းမိူဝ်ႈလဵဝ်ၼႆႉၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢိၵ်ႇတင်းၵႃႈတီႈၽၢႆႇၼႃႈၶုၼ်ႁေႃၶမ်းဢၼ်မၼ်းၸဝ်ႈလိူၵ်ႈဢဝ်ဝႆႉၼႆႉတႃႉ။ ၵဝ်တွၼ်ႉလႆႈဢဝ်ဝူဝ်းၽူႈလႂ်။ ၵဝ်တွၼ်ႉလႆႈဢဝ်မႃႉလီႈၽူႈလႂ်။ ၵဝ်တွၼ်ႉလႆႈပႅတ်ႉလႆႈလႅၼ်ၽူႈလႂ်။ ၵဝ်တွၼ်ႉလႆႈၼိၵ်ႈၸၢၵ်ႈငႅၼ်းသႄးၽူႈလႂ်။ ၵဝ်ယၢမ်ႈတွၼ်ႉလႆႈၵိၼ်သူးၵိၼ်လၢပ်ႈတီႈၽူႈလႂ်ထၢၼ်ႈပေႃးႁႂ်ႈတႃၵဝ်မွတ်ႇၵွပ်ႈၼၼ်ႉ။ ပေႃးၵဝ်လႆႈႁဵတ်းမႅၼ်ႈယဝ်ႉၸိုင်၊ၵဝ်တၵ်းၶိုၼ်းတႅၼ်းပၼ်ဢေႃႈ၊” ဝႃႈၼင်ႇၼႆဢေႃႈ။
ၶဝ်ဢွၼ်ၵၼ်လဝ်ႈလၢတ်ႈလႄႈဝႃႈ၊ “ၸဝ်ႈႁဝ်းဢမ်ႇပႅတ်ႉဢမ်ႇလႅၼ်ႁဝ်းၶႃႈ။ ဢမ်ႇၼိၵ်ႈၸၢၵ်ႈငႅၼ်းသႄးႁဝ်းၶႃႈ။ ဢမ်ႇတွၼ်ႉဢဝ်ၶွင်ၽူႈလႂ်သေၵေႃႉသေၵူၼ်းၶႃႈ၊” ဝႃႈၼင်ႇၼႆဢေႃႈ။
သမူၺ်ႇလႃႉ၊ သမ်ႉလၢတ်ႈလႄႈဝႃႈ၊ “ ထႃႇဝရႃႉၽြႃး၊ တင်းၶုၼ်ႁေႃၶမ်းဢၼ်မၼ်းၸဝ်ႈလိူၵ်ႈဢဝ်ဝႆႉၼၼ်ႉပဵၼ်သၢၵ်ႈသေႇၼႂ်းမိူဝ်ႈဝၼ်းၼႆႉလွင်ႈဢၼ်သူထူပ်းႁၼ်ၵဝ်ၵၢင်းလွတ်ႈတင်းဢပျတ်ႈၼၼ်ႉယူႇဢေႃႈ၊” ဝႃႈၼင်ႇၼႆလႄႈ၊ၶဝ်ဢွၼ်ၵၼ်ၶိုၼ်းလဝ်ႈလၢတ်ႈလႄႈဝႃႈ၊ “ၸႂ်ႈတီႈၶႃႈဢေႃႈ။ ထႃႇဝရႃႉၽြႃး၊ ပဵၼ်သၢၵ်ႈသေႇတီႈႁဝ်းၶႃႈၶႃႈဢေႃႈ၊” ဝႃႈၼင်ႇၼႆဢေႃႈ။
သမူၺ်ႇလႃႉ၊ သိုပ်ႇလၢတ်ႈထႅင်ႈလႄႈဝႃႈ၊ “ ထႃႇဝရႃႉၽြႃး၊ ပဵၼ်ၸဝ်ႈဢၼ်ယုၵ်ႉယွင်ႈ မူဝ်းသေႇ၊ တင်း ဢႃႇရုၼ်ႇ၊ လႄႈပဵၼ်ၸဝ်ႈဢၼ်ဢဝ်ပူႇမွၼ်ႇသူဢွၵ်ႇသေမိူင်း ဢေးၵျိပ်ႉ၊ မႃးၼၼ်ႉဢေႃႈ။-
တေႃႈလဵဝ်ၼႆႉလုၵ်ႉၸုၵ်းတႃႉ။ ၵႃႈတီႈၽၢႆႇၼႃႈ ထႃႇဝရႃႉၽြႃး၊ ၼၼ်ႉၵဝ်တၵ်းၸွႆးတၢင်ႇဢမုၵႃႈၼိူဝ်သူလႄႈမွၵ်ႇလၢတ်ႈၵႃႈဢၼ်မၼ်းၸဝ်ႈလႆႈႁဵတ်းလႄႈၸွႆႈထႅမ်သူ၊ဢိၵ်ႇတင်းပုၼ်ႈပူႇမွၼ်ႇသူၼၼ်ႉတင်းသဵင်ႈတင်းလူင်ဢေႃႈ။-
လိုၼ်းသေဢၼ် ယႃႇၵုပ်ႈ၊ တင်းလုၵ်ႈၸၢႆးမၼ်းတင်းလၢႆႁွတ်ႈထိုင်ၵႃႈတီႈမိူင်း ဢေးၵျိပ်ႉ၊ ၵႂႃႇယဝ်ႉၼၼ်ႉ၊ၶဝ်လႆႈၶၢမ်ႇတၢင်းဢၼ်မိုဝ်းၵူၼ်းမဵဝ်း ဢေးၵျိပ်ႉ၊ ၶဝ်ၼိၵ်ႈၸၢၵ်ႈငႅၼ်းသႄးဢေႃႈ။ ပူႇမွၼ်ႇသူၸိူဝ်းၼၼ်ႉႁွင်ႉႁႆႈယွၼ်းႁႂ်ႈ ထႃႇဝရႃႉၽြႃး၊ တၵ်းၸွႆႈထႅမ်မႃႉၸႃႉလႄႈမၼ်းၸဝ်ႈပွႆႇၸႂ်ႉ မူဝ်းသေႇ၊ တင်း ဢႃႇရုၼ်ႇ၊ ႁႂ်ႈဢွၼ်ၶဝ်ဢွၵ်ႇမိူင်း ဢေးၵျိပ်ႉ၊ မႃးသေယဝ်ႉ၊ႁႂ်ႈၶဝ်ယူႇသဝ်းၵႃႈၼႂ်းမိူင်းၼႆႉယဝ်ႉ။-
ၵူၺ်းၵႃႈ၊ၵူၼ်းတင်းလၢႆလူင်လိုမ်း ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်ၼၼ်ႉဢေႃႈ။ ပိူဝ်ႈၼႆလႄႈမၼ်းၸဝ်ႈၸႂ်ႉ သိသရႃႉ၊ ၽူႈၵွၼ်းတပ်ႉသိုၵ်းၶုၼ်ႁေႃၶမ်း ယႃႇၽိၼ်း၊ ဝဵင်း ႁႃႇၸေႃႇ၊ ဢိၵ်ႇတင်းၵူၼ်းမဵဝ်း ၽိလိတ်ႉတိ၊ လႂ်၊ၶုၼ်ႁေႃၶမ်းမဵဝ်း မေႃႇၽႃႉ၊ လႂ်၊ႁႂ်ႈမႃးတိုၵ်းတေႃးပူႇမွၼ်ႇသူၸိူဝ်းၼၼ်ႉသေလႄႈပႄႉၼႅင်ႇၶဝ်ဢေႃႈ။-
မိူဝ်ႈၼၼ်ႉၶဝ်ႁွင်ႉႁႆႈပုၼ်ႈဢၼ် ထႃႇဝရႃႉၽြႃး၊ တၵ်းၸွႆႈထႅမ်မႃႉၸႃႉၶဝ်လႄႈလၢတ်ႈဝႃႈ၊ ‘ၶႃႈၸဝ်ႈႁဝ်းၶဝ်ၽိတ်းပိူင်ႈၵွပ်ႈပိူဝ်ႈဢၼ်လႆႈၸုၼ်ႉပႅတ်ႈၸဝ်ႈႁဝ်းလႄႈဝႆႈၽြႃး ပႃႇလႃႉ၊ တင်းၽြႃး ဢႃႇသတရိတ်ႉ၊ ၼၼ်ႉယဝ်ႉတီႈၶႃႈယဝ်ႉ။ ၶႅၼ်းတေႃႈၵႄႇၼုၵ်ႈဢဝ်ၶႃႈၸဝ်ႈႁဝ်းၶဝ်လွတ်ႈသေၵႃႈၼႂ်းမိုဝ်းရၢၼ်ႇသူႇသေၵမ်းတီႈၶႃႈ။ ၶႃႈၸဝ်ႈႁဝ်းၶဝ်တၵ်းႁဵတ်းဝၢတ်ႈတီႈၸဝ်ႈႁဝ်းတီႈၶႃႈဢေႃႈ၊’ ဝႃႈၼင်ႇၼႆဢေႃႈ။-
ထႃႇဝရႃႉၽြႃး၊ ၵေႃႈၸႂ်ႉ ယေႇရုပႃႇလႃႉ၊ ဝၢႆးၼၼ်ႉ၊ ပႃႇရၵ်ႉ၊ ဝၢႆးၼၼ်ႉ ယေႇၽႀႃႉ၊ ဝၢႆးၼၼ်ႉၵဝ် ၸိူဝ်းၼၼ်ႉႁႂ်ႈၵႄႇသႄႇၼုၵ်ႈဢဝ်သူသေၵႃႈတီႈရၢၼ်ႇသူႇသူလႄႈသူလႆႈယူႇလူင်ႉလီလွတ်ႈလီဢေႃႈ။-
ၼႂ်းဝႃႈၼၼ်သေၵေႃႈမိူဝ်ႈဢၼ်သူႁၼ်ၶုၼ်ႁေႃၶမ်း ၼႃႇႁတ်ႉ၊ မဵဝ်း ဢမ်ႇမုၼ်ႇ၊ ဢၢင်ႈတၵ်းတိုၵ်းတေႃးသူၼၼ်ႉၸိုင်၊ပိၵ်ႉသမ်ႉ ထႃႇဝရႃႉၽြႃး၊ ႁဵတ်းၶုၼ်ႁေႃၶမ်းသူယူႇသေၵေႃႈသူသမ်ႉယင်းလၢတ်ႈတီႈၵဝ်လႄႈဝႃႈ၊ ‘ႁဝ်းၶႃႈၶႂ်ႈႁႂ်ႈၶုၼ်ႁေႃၶမ်းဢုပ်ႉပိူင်ႇႁဝ်းၶႃႈဢေႃႈ၊’ ဝႃႈၼႆယူႇဢေႃႈ။
“တေႃႈလဵဝ်ၼႆႉၶုၼ်ႁေႃၶမ်းဢၼ်သူလိူၵ်ႈဢဝ်ၼၼ်ႉမီးယူႇတီႈၼႆႈယဝ်ႉ။ သူယွၼ်းဢဝ်ၶုၼ်ႁေႃၶမ်းလႄႈတေႃႈလဵဝ်ၼႆႉ ထႃႇဝရႃႉၽြႃး၊ ယုၵ်ႉယွင်ႈမၼ်းပၼ်တီႈသူယဝ်ႉ။-
ပေႃးသူရူဝ်ႇသေႇၵူဝ်ယမ် ထႃႇဝရႃႉၽြႃး၊ ယူႇ၊ထွမ်ႇဢဝ်ၵႂၢမ်းမၼ်းၸဝ်ႈယူႇလႄႈၵမ်ၵျၢင်ႉၸွမ်းတြႃးမၼ်းၸဝ်ႈယူႇဢိၵ်ႇတင်းပေႃးသူတင်းၶုၼ်ႁေႃၶမ်းသူပႂ်ႉသဵတ်ႈၸႃႇၵႃႈၼိူဝ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူယူႇၸိုင်၊သူတၵ်းလႆႈလီလႆႈပဵၼ်ဢေႃႈ။-
ၵူၺ်းၵႃႈ၊ပေႃးသူဢမ်ႇထွမ်ႇဢမ်ႇဢဝ်ၵႂၢမ်းမၼ်းၸဝ်ႈလႄႈပူၼ်ႉလိူဝ်ပိင်းၺၢပ်ႈ ထႃႇဝရႃႉၽြႃး၊ ၸိုင်၊မၼ်းၸဝ်ႈတၵ်းႁဵတ်းၶတ်းၵၼ်တင်းသူဢိၵ်ႇတင်းၶုၼ်ႁေႃၶမ်းသူဢေႃႈ။-
ပိူဝ်ႈၼႆလႄႈၸုၵ်းယူႇၵႃႈတီႈဢၼ်သူမီးယူႇၼၼ်ႉသေလႄႈလူတူၺ်းလွင်ႈတၢင်းဢၼ် ထႃႇဝရႃႉၽြႃး၊ တၵ်းႁဵတ်းဢၼ်ယႂ်ႇဢၼ်လူင်ၼၼ်ႉတႃႉ။-
ၶိင်ႇမိူဝ်ႈလဵဝ်ၼႆႉပဵၼ်ၶိင်ႇႁႅင်ႈဢမ်ႇၸႂ်ႈႁိုဝ်။ ၵူၺ်းၵႃႈ၊ၵဝ်တၵ်းသူးတွင်းလႄႈ ထႃႇဝရႃႉၽြႃး၊ တၵ်းႁႂ်ႈၽႃႉလင်လႄႈၽူၼ်တူၵ်းဢေႃႈ။ ပေႃးလွင်ႈတၢင်းၼၼ်ႉပဵၼ်မႃးၸိုင်၊သူတၵ်းႁုဝႃႈ၊သူလႆႈႁဵတ်းတုၸရိူၵ်ႈဢၼ်ယႂ်ႇၼႃႇဢၼ်ၶတ်းၵၼ်တင်း ထႃႇဝရႃႉၽြႃး၊ ၵွပ်ႈပိူဝ်ႈဢၼ်သူယွၼ်းဢဝ်ၶုၼ်ႁေႃၶမ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
သမူၺ်ႇလႃႉ၊ ၵေႃႈသူးတွင်းတီႈ ထႃႇဝရႃႉၽြႃး၊ လႄႈၼႂ်းဝၼ်းၼၼ်ႉၵမ်းလဵဝ် ထႃႇဝရႃႉၽြႃး၊ ႁႂ်ႈၽႃႉလင်လႄႈၽူၼ်တူၵ်းမႃးဢေႃႈ။ မိူဝ်ႈၼၼ်ႉၵူၼ်းတင်းလၢႆဢွၼ်ၵၼ်ၵူဝ်ႁႄ ထႃႇဝရႃႉၽြႃး၊ ဢိၵ်ႇတင်း သမူၺ်ႇလႃႉ၊ ဢေႃႈ။-
ၶဝ်ၸင်ႇဢွၼ်ၵၼ်လဝ်ႈလၢတ်ႈတီႈ သမူၺ်ႇလႃႉ၊ လႄႈဝႃႈ၊ “ၶႅၼ်းတေႃႈၸဝ်ႈႁဝ်းသူးတွင်းတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၼၼ်ႉပုၼ်ႈလွင်ႈၼင်ႇႁိုဝ်ႁဝ်းၶႃႈတၵ်းလွတ်ႈတၢင်းတၢႆၼၼ်ႉသေၵမ်းၶႃႈ။ လွင်ႈမၼ်းၸမ်ႉ၊ႁဝ်းၶႃႈၼႆႉဢဝ်တုၸရိူၵ်ႈတၢင်းဢၼ်ယွၼ်းဢဝ်ၶုၼ်ႁေႃၶမ်းၼၼ်ႉထၢပ်ႈသႂ်ႇထႅင်ႈၵႃႈတီႈဢပျတ်ႈႁဝ်းၶႃႈၵႃႈမီးၼၼ်ႉယဝ်ႉၶႃႈယဝ်ႉ၊” ဝႃႈၼင်ႇၼႆဢေႃႈ။
သမူၺ်ႇလႃႉ၊ ၵေႃႈလၢတ်ႈတီႈၶဝ်လႄႈဝႃႈ၊ “ယႃႇပေမႆႈၸႂ်။ သူႁဵတ်းတုၸရိူၵ်ႈၵႃႈမီးၼႆႉမႅၼ်ႈသေၵေႃႈယႃႇပေဝႄႈပိူင်ႈသဵၼ်ႈတၢင်းဢၼ်ၸွမ်းတြႃး ထႃႇဝရႃႉၽြႃး၊ ၼၼ်ႉ။ ပႃးတင်းႁူဝ်ၸႂ်မူတ်းမူတ်းသဵင်ႈသဵင်ႈသေလႄႈႁဵတ်းဝၢတ်ႈတီႈ ထႃႇဝရႃႉၽြႃး၊ ၵူၺ်းတႃႉ။-
ယႃႇပေၸွမ်းၵႂႃႇၸွမ်းပႆၽြႃးဢၼ်ၽိတ်းဢၼ်ပိူင်ႈၸိူဝ်းၼၼ်ႉ။ ၶဝ်ၼၼ်ႉဢမ်ႇၸၢင်ႈၸွႆႈထႅမ်မႃႉၸႃႉသူ။ ဢမ်ႇၸၢင်ႈၵႄႇသႄႇၶျွတ်ႈဢဝ်သူၵွပ်ႈပိူဝ်ႈၶဝ်ပဵၼ်ဢၼ်လၢႆလၢႆလွၵ်ႇလွၵ်ႇဢမ်ႇပွင်ႇလွင်ႈၵႃႈသင်ဢေႃႈ။-
ထႃႇဝရႃႉၽြႃး၊ ထွၵ်ႈလူၺ်ႈၼႃႇမႃႉမျၢတ်ႈမၼ်းၸဝ်ႈသေလႄႈတၵ်းဢမ်ႇပႄႇဢမ်ႇၸုၼ်ႉပႅတ်ႈသူၵွပ်ႈပိူဝ်ႈမၼ်းၸဝ်ႈတႅပ်းတတ်းၸႂ်ဝႆႉႁႂ်ႈသူလႆႈပဵၼ်ၵူၼ်းမၼ်းၸဝ်ႈဢေႃႈ။-
လိူဝ်သေၼၼ်ႉ၊ပုၼ်ႈၵဝ်ၼႆႉၸမ်ႉ၊ႁႂ်ႈတၢင်းဢၼ်ၵဝ်ၽိတ်းပိူင်ႈ ထႃႇဝရႃႉၽြႃး၊ ဢၼ်ယင်းဢမ်ႇသူးတွင်းပုၼ်ႈသူလႄႈယူႇၼၼ်ႉၵႆၵၼ်တင်းၵဝ်သေၵမ်းလူၺ်ႈ။ ၵဝ်သမ်ႉတၵ်းသင်ႇသွၼ်ၼႄတၢင်းပၼ်ဢၵျၢင်ႉဢၼ်လီငၢမ်းသိုဝ်ႈတေႃႇၼၼ်ႉတီႈသူလူးၵွၼ်ႇဢေႃႈ။-
ဢွၼ်ၵၼ်ရူဝ်ႇသေႇၵူဝ်ယမ် ထႃႇဝရႃႉၽြႃး၊ သေယဝ်ႉ၊မီးတင်းသဵတ်ႈၸႃႇလႄႈပႃးတင်းႁူဝ်ၸႂ်သဵင်ႈသဵင်ႈႁဵတ်းဝၢတ်ႈတီႈ ထႃႇဝရႃႉၽြႃး၊ ၵူၺ်းတႃႉ။ ဢွၼ်ၵၼ်ၶႆႈၸႂ်ဝူၼ်ႉတူၺ်းလွင်ႈဢၼ်မၼ်းၸဝ်ႈႁဵတ်းပုၼ်ႈသူထၼ်ႇလႂ်ယဝ်ႉၼၼ်ႉတႃႉ။-
ပေႃးဢမ်ႇၼၼ်၊ပေႃးသူယင်းထၢပ်ႈထႅင်ႈလႄႈႁဵတ်းတုၸရိူၵ်ႈယူႇၸိုင်၊သူဢိၵ်ႇတင်း၊ၶုၼ်ႁေႃၶမ်းသူတၵ်းလႆႈႁွတ်ႈထိုင်တၢင်းလုတၢင်းလႅဝ်ဢေႃႈ၊” ဝႃႈၼင်ႇၼႆဢေႃႈ။
သေႃးလု၊ ၼၼ်ႉမိူဝ်ႈဢၼ်မၼ်းပဵၼ်ၶုၼ်ႁေႃၶမ်းၼၼ်ႉၸိုင်၊ဢသၢၵ်ႈမၼ်းမီး … ပီယဝ်ႉလႄႈမၼ်းဢုပ်ႉပိူင်ႇမဵဝ်း ဢိသရေး၊ … ပၢႆသွင်ပီ။
သေႃးလု၊ လိူၵ်ႈၵဵပ်းဢဝ်ၵူၼ်းၵႃႈၼႂ်းမဵဝ်း ဢိသရေး၊ သၢမ်ႁဵင်သေယဝ်ႉ၊ဢဝ်ဝႆႉၵႃႈတီႈမၼ်းယူႇသွင်ႁဵင်၊ၵႃႈၼႂ်းဝဵင်း မိၵ်ႉမတ်ႉ၊ ဢိၵ်ႇတင်းၵႃႈၼိူဝ်လွႆ ပေႇသလႃႉ၊ ၼၼ်ႉ၊ဢိၵ်ႇတင်းဢဝ်ႁဵင်ၼိုင်ႈဝႆႉၵႃႈတီႈလုၵ်ႈၸၢႆးမၼ်း ယေႃးၼႀၼ်ႇ၊ ၵႃႈၼႂ်းဝဵင်း ၵိပႃႉ၊ ၵႃႈၼႂ်းဢိူင်ႇၵူၼ်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ ၼၼ်ႉဢေႃႈ။ ၵူၼ်းဢၼ်ၵိုတ်းဢၼ်ၵျၢၼ်ႇၼၼ်ႉၸမ်ႉ၊ သေႃးလု၊ ပွႆႇၶဝ်ပွၵ်ႈမိူဝ်းၸူးတီႈႁိူၼ်းၽႂ်ႁိူၼ်းမၼ်းဢေႃႈ။
ယေႃးၼႀၼ်ႇ၊ ၼၼ်ႉတိုၵ်းတေႃးၶႃႈၽၼ်းပႅတ်ႈၸဝ်ႈၵွၼ်းတပ်ႉသိုၵ်းဢၼ်မီးၵႃႈတီႈဝဵင်း ၵေးပႃႉ၊ ၼၼ်ႉလႄႈၵူၼ်း ၽိလိတ်ႉတိ၊ ၸိူဝ်းၼၼ်ႉငိၼ်းၶၢဝ်ႇမၼ်းဢေႃႈ။ သေႃးလု၊ ၵေႃႈပဝ်ႇတိုင်ႈၼႄးၶရႃႇၵႃႈၼႂ်းမိူင်းတင်းမိူင်းလႄႈပၢဝ်ႇသေႃႇဝႃႈ၊ “ႁႂ်ႈၵူၼ်း ႁေႇပြႄး၊ တင်းလၢႆႁုငိၼ်းတႃႉ၊” ဝႃႈၼင်ႇၼႆဢေႃႈ။-
ၵူၼ်းမဵဝ်း ဢိသရေး၊ တင်းသဵင်ႈတင်းလူင်လႆႈငိၼ်းၶၢဝ်ႇဢၼ် သေႃးလု၊ တိုၵ်းတေႃးၶႃႈၽၼ်းပႅတ်ႈၸဝ်ႈၵွၼ်းတပ်ႉသိုၵ်း ၽိလိတ်ႉတိ၊ ဢိၵ်ႇတင်းလွင်ႈဢၼ်မဵဝ်း ဢိသရေး၊ ပဵၼ်ဢၼ်ၵူၼ်းမဵဝ်း ၽိလိတ်ႉတိ၊ ၶဝ်လီႁင်ႈဢဵတ်ႇသဵတ်ႇၼၼ်ႉသေယဝ်ႉ၊ၵူၼ်းတင်းလၢႆဢွၼ်ၵၼ်ၽွမ်ႉၽၢႆႇ သေႃးလု၊ လႄႈၸုတုမ်ၵၼ်မႃးၵႃႈတီႈဝဵင်း ၵိလႃႉၵႃႇလႃႉ၊ ဢေႃႈ။
ၵူၼ်းမဵဝ်း ၽိလိတ်ႉတိ၊ ၶဝ်ၶီႇသိုၵ်းမႃးႁႂ်ႈလႆႈတိုၵ်းတေႃးမဵဝ်း ဢိသရေး၊ ဢေႃႈ။ ၶဝ်ၼၼ်ႉမီးလေႃႉမႃႉသိုၵ်းသၢမ်မိုၼ်ႇ၊ၵူၼ်းသိုၵ်းၶီႇမႃႉႁူၵ်းႁဵင်ဢိၵ်ႇတင်းၵူၼ်းသိုၵ်းၼမ်ၼႃႇမိူၼ်ၸိူဝ်ႉၼင်ႇမဵတ်ႉႁိၼ်မဵတ်ႉသၢႆးၼမ်ႉသမ်ႇမုၵ်ႈတြႃႇလႄႈၶျႃးပၢင်တပ်ႉၵႃႈတီႈဝဵင်း မိၵ်ႉမတ်ႉ၊ ၽၢႆႇဝၼ်းဢွၵ်ႇဝဵင်း ပႅတ်ႉဢႃႇဝႅၼ်ႇ၊ ဢေႃႈ။-
မိူဝ်ႈၼၼ်ႉ၊ၶဝ်ၶိုၼ်ႈၵႂႃႇတိုၵ်းတေႃးႁႅင်းၼႃႇလူင်လၢင်တီႈမဵဝ်း ဢိသရေး၊ ႁႂ်ႈၶဝ်ယုင်ႈယၢင်ႈၵႂႃႇဢေႃႈ။ ၵူၼ်းမဵဝ်း ဢိသရေး၊ တင်းလၢႆလႆႈပၢႆႈတဵတ်ႇမႅပ်းၼႂ်းထမ်ႈၼႂ်းႁူး၊ၼႂ်းယုမ်းမႆႉယုမ်းၶိူဝ်း၊ၼႂ်းၵႄႈမၢၵ်ႇႁိၼ်မၢၵ်ႇၽႃ၊ၼႂ်းၶုမ်ၼႂ်းၼမ်ႉမေႃႇလႂ်၊-
ဢိၵ်ႇတင်းၵမ်ႈၽွင်ႈဢွၵ်ႇပၢႆႈၶၢမ်ႈၼမ်ႉ ယေႃးတၢၼ်ႇ၊ ၵႂႃႇၵႃႈၼႂ်းသိုင်ႇတိူင်းမိူင်း ၵၢတ်ႉ၊ တင်းမိူင်း ၵိလိတ်ႉ၊ ပုၼ်ႉဢေႃႈ။ သေႃးလု၊ ၸမ်ႉ၊ယင်းယူႇၵႃႈတီႈဝဵင်း ၵိလႃႉၵႃႇလႃႉ၊ လႄႈၵူၼ်းမၼ်းတင်းလၢႆၵူဝ်ႁႄသၼ်ႇသၼ်ႇသၢႆသၢႆယူႇဢေႃႈ။-
မၼ်းပႂ်ႉထႃႈ သမူၺ်ႇလႃႉ၊ ၸဵတ်းဝၼ်းတဵမ်တဵမ်ၸွမ်းၼင်ႇဢၼ် သမူၺ်ႇလႃႉ၊ ၶဵၼ်းၶိင်ႇမၼ်းဝႆႉၼၼ်ႉသေၵေႃႈ သမူၺ်ႇလႃႉ၊ ဢမ်ႇႁွတ်ႈမႃးၵႃႈတီႈဝဵင်း ၵိလႃႉၵႃႇလႃႉ၊ လႄႈၵူၼ်းမၼ်းၸိူဝ်းၼၼ်ႉၵေႃႈတႄႇၸႃႉၽူင်ႉပၢႆႈယၢႆႈၼီသေၵႃႈတီႈမၼ်းဢေႃႈ။-
သေႃးလု၊ ၸင်ႇလၢတ်ႈတီႈၶဝ်လႄႈဝႃႈ၊ “ဢဝ်ၶိူင်ႈတၢင်းလူႇဢၼ်တုတ်ႇၽႆးဢိၵ်ႇတင်းၶိူင်ႈတၢင်းလူႇမိၵ်ႈသႁႃႇယႃႉတင်းလၢႆမႃးၵႃႈတီႈၵဝ်တႃႉ၊” ဝႃႈၼင်ႇၼႆသေယဝ်ႉ၊မၼ်းဢဝ်ၶိူင်ႈတၢင်းလူႇဢၼ်တုတ်ႇၽႆးၼၼ်ႉသၢၵ်ႈလူႇဢေႃႈ။-
မိူဝ်ႈၶိင်ႇမၼ်းသၢၵ်ႈလူႇယဝ်ႉတူဝ်ႈၵႂႃႇၼၼ်ႉ သမူၺ်ႇလႃႉ၊ ႁွတ်ႈမႃးၵမ်းလဵဝ်ဢေႃႈ။ သေႃးလု၊ ဢွၵ်ႇၵႂႃႇႁပ်ႉႁူဝ်တၢင်းမၼ်းလႄႈတူင်ႉတၵ်ႉမၼ်းသေယဝ်ႉ၊-
သမူၺ်ႇလႃႉ၊ ထၢမ်လႄႈဝႃႈ၊ “မႂ်းႁဵတ်းၵႃႈသင်ယဝ်ႉ၊” ဝႃႈၼင်ႇၼႆလႄႈ။ သေႃးလု၊ ၶိုၼ်းလၢတ်ႈလႄႈဝႃႈ၊ “ၵူၼ်းၵဝ်ၶႃႈတင်းလၢႆတႅၵ်ႇယၢႆႈပၢႆႈၼီသေၵႃႈတီႈၵဝ်ၶႃႈၵႂႃႇယဝ်ႉ။ ၸဝ်ႈႁဝ်းၵေႃႈဢမ်ႇႁွတ်ႈမႃးၸွမ်းၼင်ႇမိုဝ်ႉဝၼ်းဢၼ်ၶဵၼ်းဝႆႉၼၼ်ႉၵူၺ်းဢမ်ႇၵႃး၊ၵူၼ်းမဵဝ်း ၽိလိတ်ႉတိ၊ ၶဝ်ၵေႃႈၸုတုမ်ၵၼ်ၵႃႈတီႈဝဵင်း မိၵ်ႉမတ်ႉ၊ ဝႆႉၶႃႈဢေႃႈ။-
ၵဝ်ၶႃႈၸဵၼ်းၸႃးဝႃႈ၊ ‘မဵဝ်း ၽိလိတ်ႉတိ၊ ၶဝ်တၵ်းတေမႃးတိုၵ်းတေႃးၵဝ် ၵႃႈတီႈဝဵင်း ၵိလႃႉၵႃႇလႃႉ၊ ၼႆႉယဝ်ႉ။ ၵဝ်ယင်းဢမ်ႇပႆႇလႆႈၶေႃယွၼ်းဢဝ်ဢလူဝ်ႇ ထႃႇဝရႃႉၽြႃး၊ လူင်ပႄႇ၊’ ဝႃႈၼႆလႄႈ၊ၵဝ်ၶႃႈတိုၵ်းသူၼ်းႁူဝ်ၸႂ်တူဝ်ၸဝ်ႈၵဝ်ႇသေယဝ်ႉ၊သၢၵ်ႈလူႇၶိူင်ႈတၢင်းလူႇဢၼ်တုတ်ႇၽႆးၶႃႈဢေႃႈ၊” ဝႃႈၼင်ႇၼႆဢေႃႈ။
သမူၺ်ႇလႃႉ၊ ၵေႃႈလၢတ်ႈလႄႈဝႃႈ၊ “မႂ်းႁဵတ်းဢၼ်ႁၢႆႉမိူၵ်ႈၼႃႇယဝ်ႉ။ မႂ်းဢမ်ႇပႂ်ႉပိင်းၺၢပ်ႈတြႃးဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈမႂ်းသင်ႇလၢတ်ႈဝႆႉတီႈမႂ်းၼၼ်ႉလူင်ပႄႇ။ ပေႃးမႂ်းပႂ်ႉၵမ်မႅၼ်ႈၸိုင်၊ ထႃႇဝရႃႉၽြႃး၊ တၵ်းႁႂ်ႈဢႃႇၼႃႇမႂ်းတႄႇယူႇၵႃႈၼိူဝ်မဵဝ်း ဢိသရေး၊ ၵႂႃႇၸူဝ်ႈလုၵ်ႈပၢၼ်လၢၼ်မႂ်းဢေႃႈ။-
မိူဝ်ႈလဵဝ်ၼႆႉဢႃႇၼႃႇမႂ်းဢမ်ႇလႆႈတႄႇ။ ၵွပ်ႈပိူဝ်ႈမႂ်းဢမ်ႇပႂ်ႉဢမ်ႇထွမ်ႇဢဝ်မၼ်းၸဝ်ႈၼၼ်ႉ ထႃႇဝရႃႉၽြႃး၊ ႁႃဢဝ်ၵေႃႉဢၼ်မၼ်းၸဝ်ႈထုၵ်ႇၸႂ်မႅၼ်ႈၸႂ်ၼၼ်ႉယဝ်ႉ၊ႁႂ်ႈၵေႃႉၼၼ်ႉလႆႈဢုပ်ႉပိူင်ႇၵူၼ်းမၼ်းၸဝ်ႈယဝ်ႉ၊” ဝႃႈၼင်ႇၼႆဢေႃႈ။
သမူၺ်ႇလႃႉ၊ လုၵ်ႉသေၵႃႈတီႈဝဵင်း ၵိလႃႉၵႃႇလႃႉ၊ လႄႈဢွၵ်ႇၵႂႃႇၼႂ်းသဵၼ်ႈတႃသၢႆတၢင်းမၼ်းသေဢေႃႈ။ ၵူၼ်းဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉၸမ်ႉ၊ၸွမ်းလူၺ်ႈၵၼ်တင်း သေႃးလု၊ ၵႂႃႇၵပ်းသိုပ်ႇၵၼ်တင်းတပ်ႉသိုၵ်းၶဝ်ဢေႃႈ။ ၶဝ်ဢွၵ်ႇသေၵႃႈတီႈဝဵင်း ၵိလႃႉၵႃႇလႃႉ၊ လႄႈၵႂႃႇၸူးတီႈဝဵင်း ၵိပႃႉ၊ ၼႂ်းဢိူင်ႇ ပိၼ်ႇယႃႇမိၼ်ႇ၊ ၼၼ်ႉလႄႈ သေႃးလု၊ ၼၼ်ႉ ၼပ်ႉဢၢၼ်ႇၵူၼ်းမၼ်းမီးသေႁူၵ်းပၢၵ်ႇၵေႃႉၵူၺ်းဢေႃႈ။-
သေႃးလု၊ တင်းလုၵ်ႈၸၢႆးမၼ်း ယေႃးၼႀၼ်ႇ၊ ဢိၵ်ႇတင်းၵူၼ်းၶဝ်တင်းလၢႆၶျႃးပၢင်တပ်ႉၵႃႈတီႈဝဵင်း ၵေးပႃႉ၊ ၼႂ်းဢိူင်ႇ ပိၼ်ႇယႃႇမိၼ်ႇ၊ ယူႇလႄႈမဵဝ်း ၽိလိတ်ႉတိ၊ ၸမ်ႉၶျႃးပၢင်တပ်ႉၶဝ်ၵႃႈတီႈဝဵင်း မိၵ်ႉမတ်ႉ၊ ဢေႃႈ။-
တပ်ႉၸိူဝ်းဢၼ်တၵ်းႁိမ်ဢဝ်ႁူင်ႇဢဝ်ၼၼ်ႉဢွၵ်ႇသေၵႃႈတီႈပၢင်တပ်ႉမဵဝ်း ၽိလိတ်ႉတိ၊ လႄႈၽႄၵႂႃႇႁဵတ်းသၢမ်ငႃးဢေႃႈ။ ငႃးၼိုင်ႈၶီႇသိုၵ်းၵႂႃႇတီႈဝဵင်း ဢေႃႇၽရႃႉ၊ ဢိူင်ႇ သွႃႇလႃႉ၊ ဢေႃႈ။-
ငႃးၼိုင်ႈသမ်ႉၶိုၼ်ႈၵႂႃႇၸူးတီႈဝဵင်း ပႅတ်ႉႁေႃႇရုၼ်ႇ၊ လႄႈငႃးၼိုင်ႈၼၼ်ႉသမ်ႉၶိုၼ်ႈၵႂႃႇၸွမ်းသဵၼ်ႈတၢင်းလႅၼ်လိၼ်တေႃႇၼႃႈၵၼ်တင်းထူင်ႉႁူၺ်ႈ ၸေႇပူဝ်းဢိမ်း၊ ၽၢႆႇတၢင်းထိူၼ်ႇလႅင်ႉၼၼ်ႉဢေႃႈ။
ၵွပ်ႈပိူဝ်ႈဢၼ်ၵူၼ်းမဵဝ်း ၽိလိတ်ႉတိ၊ တႅပ်းတတ်းႁႂ်ႈလႆႈႁၢမ်ႈတၢပ်ႈၵူၼ်းမဵဝ်း ႁေႇပြႄး၊ ဢမ်ႇလႆႈပေႃႉႁဵတ်းလၢပ်ႇပေႃႉႁဵတ်းႁွၵ်ႇၼၼ်ႉလႄႈၼႂ်းမိူင်း ဢိသရေး၊ ၼၼ်ႉ ဢမ်ႇမီးၸၢင်ႈလဵၵ်းသေၵေႃႉသေၵူၼ်း။-
ၵူၼ်းမဵဝ်း ဢိသရေး၊ တင်းလၢႆလႆႈဢွၼ်ၵၼ်ၵႂႃႇၸူးတီႈၵူၼ်းမဵဝ်း ၽိလိတ်ႉတိ၊ ၸိူဝ်းၼၼ်ႉပုၼ်ႈဢၼ်တၵ်းလပ်ႉသိၵ်ႈထိူၼ်ႇလႂ်၊လေႃႈၸေႃႉလႂ်၊တႃမၢတ်ႇလႂ်၊တင်းၶဵဝ်းလႂ်ၼၼ်ႉဢေႃႈ။-
ၵႃႈၶၼ်ဢၼ်လပ်ႉတႃမၢတ်ႇတင်းလဵၵ်းလႅမ်သဵပ်ႇၼၼ်ႉလႆႈပၼ်ငိုၼ်းၶႅပ်းၼိုင်ႈလႄႈဢၼ်လပ်ႉသိၵ်ႈထိူၼ်ႇတင်းလေႃႈၸေႃႉၸမ်ႉ၊လႆႈပၼ်ငိုၼ်းသွင်ၶႅပ်းဢေႃႈ။-
ပိူဝ်ႈၼႆလႄႈမိူဝ်ႈဢၼ်တိုၵ်းသိုၵ်းၼၼ်ႉၼွၵ်ႈသေ သေႃးလု၊ တင်းလုၵ်ႈၸၢႆးမၼ်း ယေႃးၼႀၼ်ႇ၊ လႄႈၵူၼ်းသိုၵ်းမဵဝ်း ဢိသရေး၊ ၶဝ်ၼၼ်ႉဢမ်ႇလႆႈယိပ်းလၢပ်ႇယိပ်းႁွၵ်ႇသေၵေႃႉသေၵူၼ်း။ သေႃးလု၊ တင်း ယေႃးၼႀၼ်ႇ၊ ၵူၺ်းလႆႈယိပ်းလၢၵ်ႈၼၢၵ်ႈဢေႃႈ။
ၵူၼ်းမဵဝ်း ၽိလိတ်ႉတိ၊ ၶဝ်ပွႆႇတပ်ႉသိုၵ်းဝႆႉတပ်ႉၼိုင်ႈပုၼ်ႈဢၼ်တၵ်းႁႄႉၵိဝ်ႇတၢင်းဢၼ်ၵႂႃႇၸူးဝဵင်း မိၵ်ႉမတ်ႉ၊ ၼၼ်ႉဢေႃႈ။
ဝၼ်းၼိုင်ႈ၊ ယေႃးၼႀၼ်ႇ၊ လၢတ်ႈတီႈၵူၼ်းဢွၼ်ႇဢၼ်ပႃးလၢၵ်ႈၼၢၵ်ႈမၼ်းၼၼ်ႉလႄႈဝႃႈ၊ “မႃး႟။ ၶၢမ်ႈၵႂႃႇၸူးၵႃႈတီႈတပ်ႉ ၽိလိတ်ႉတိ၊ ဢၼ်မီးယူႇၵႃႈတီႈၽၢႆႇပုၼ်ႉၼၼ်ႉတႃႉႁဝ်း၊” ဝႃႈၼင်ႇၼႆဢေႃႈ။ မၼ်းယင်းဢမ်ႇလၢတ်ႈထိုင်ပေႃႈမၼ်း သေႃးလု၊-
ဢၼ်ၶျႃးသုမ်ႉထဵင်မၼ်းယူႇၵႃႈတႂ်ႈတူၼ်ႈမၢၵ်ႇၸင်ႈၵႃႈၼႂ်းဝၢၼ်ႈ မိၵရုၼ်ႇ၊ ဢၼ်ဢမ်ႇပေႃးၵႆယၢၼ်ၵၼ်တင်းဝဵင်း ၵိပႃႉ၊ ၼၼ်ႉဢေႃႈ။ မၼ်းၼၼ်ႉမီးၵူၼ်းသေႁူၵ်းပၢၵ်ႇယူႇလူၺ်ႈၵၼ်တင်းမၼ်းဢေႃႈ။-
ၼႂ်းၶဝ်ၸိူဝ်းၼၼ်ႉမီး ဢႁိယႃႉ၊ လုၵ်ႈၸၢႆး ဢႁိတုပ်ႉ၊ ဢၼ်ပဵၼ်ပီႈဢၢႆႈ ဢိၶပုတ်ႉ၊ လုၵ်ႈၸၢႆး ၽိၼႁတ်ႉ၊ ဢၼ်ပဵၼ်လုၵ်ႈၸၢႆး ဢေးလိ၊ ၼၼ်ႉၼုင်ႈသိူဝ်ႈသုပ်းသေလႄႈပဵၼ်ယဵၸ်ႈပရေႃးႁဵၵ်ႈ ထႃႇဝရႃႉၽြႃး၊ ၵႃႈၼႂ်းဝဵင်း သိလေႃႇ၊ ဢေႃႈ။ ၵူၼ်းတင်းလၢႆဢမ်ႇႁုလွင်ႈဢၼ် ယေႃးၼႀၼ်ႇ၊ ဢွၵ်ႇၵႂႃႇၼၼ်ႉ။
ၵႃႈတီႈၵိဝ်ႇတၢင်းၸူးဝဵင်း မိၵ်ႉမတ်ႉ၊ တီႈဢၼ် ယေႃးၼႀၼ်ႇ၊ ဢၢင်ႈၶၢမ်ႈၵႂႃႇၸူးတီႈပၢင်တပ်ႉ ၽိလိတ်ႉတိ၊ ၶဝ်ၼၼ်ႉမီးၽႃႁိၼ်ၸဵင်ႇလႅမ်လူင်သွင်ဢၼ်၊ယေႈဢၼ်မီးယူႇယေႈၽၢႆႇၶၢင်ႈၵိဝ်ႇတၢင်းၼၼ်ႉလႄႈ၊ဢၼ်ၼိုင်ႈလႆႈၸိုဝ်ႈ ပေႃႇၸိၵ်ႉ၊ လႄႈဢၼ်ၼိုင်ႈလႆႈၸိုဝ်ႈ သေႇၼေႇ၊ ဢေႃႈ။-
ဢၼ်ၼိုင်ႈမီးၽၢႆႇႁွင်ႇၵိဝ်ႇတၢင်းတေႃႇၼႃႈၵၼ်တင်းဝဵင်း မိၵ်ႉမတ်ႉ၊ လႄႈဢၼ်ၼိုင်ႈမီးၽၢႆႇၸၢၼ်းၵိဝ်ႇတၢင်းတေႃႇၼႃႈၵၼ်တင်းဝဵင်း ၵေးပႃႉ၊ ဢေႃႈ။
ယေႃးၼႀၼ်ႇ၊ လၢတ်ႈတီႈၵူၼ်းဢွၼ်ႇၼၼ်ႉလႄႈဝႃႈ၊ “မႃး႟။ ၶၢမ်ႈၵႂႃႇၸူးတီႈတပ်ႉ ၽိလိတ်ႉတိ၊ ဢၼ်ဢမ်ႇၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ၸိူဝ်းၼၼ်ႉတႃႉႁဝ်း။ ထႃႇဝရႃႉၽြႃး၊ ၸၢင်ႈၶႄးတၵ်းၸွႆႈထႅမ်မႃႉၸႃႉႁဝ်းဢေႃႈ။ ပေႃးမၼ်းၸဝ်ႈၸွႆႈထႅမ်ႁဝ်းၸိုင်၊ဢမ်ႇမီးလွင်ႈဢၼ်တၵ်းႁႄႉတၵ်းၶႅၼ်တီႈတၢင်းဢၼ်ႁဝ်းတၵ်းပႄႉၼႅင်ႇၼၼ်ႉ။ ၽၢႆႇႁဝ်းၼႆႉမီးၵူၼ်းၵေႇထၼ်ႇႁိုဝ်သေၵေႃႈဢမ်ႇလူဝ်ႇမႆႈၸႂ်လႃးလႃး၊” ဝႃႈၼင်ႇၼႆဢေႃႈ။
ၵူၼ်းဢွၼ်ႇၼၼ်ႉၵေႃႈလၢတ်ႈလႄႈဝႃႈ၊ “ၵႃႈၼင်ႇဢၼ်ၸဝ်ႈႁဝ်းၶႂ်ႈႁဵတ်းၼၼ်ႉၵဝ်ၶႃႈမီးယူႇလူၺ်ႈၵၼ်တင်းၸဝ်ႈႁဝ်းဢေႃႈ၊” ဝႃႈၼင်ႇၼႆဢေႃႈ။
ယေႃးၼႀၼ်ႇ၊ လၢတ်ႈလႄႈဝႃႈ၊ “လီယဝ်ႉ။ ႁဝ်းတၵ်းၶၢမ်ႈၵႂႃႇၸူးတီႈၵူၼ်း ၽိလိတ်ႉတိ၊ ၸိူဝ်းၼၼ်ႉလႄႈၼႄတူဝ်ႁဝ်းႁႂ်ႈၶဝ်ႁၼ်ဢေႃႈ။-
ပေႃးၶဝ်လၢတ်ႈဝႃႈ၊ႁႂ်ႈႁဝ်းၵိုတ်းသဝ်းထႃႈၶဝ်မႃးၸူးတီႈႁဝ်းၸိုင်၊ႁဝ်းပႂ်ႉထႃႈဝႆႉတီႈဢၼ်ႁဝ်းယူႇၼၼ်ႉတႃႉ။-
ပေႃးၶဝ်လၢတ်ႈဝႃႈႁႂ်ႈႁဝ်းၶိုၼ်ႈၸူးတီႈၶဝ်ၵေႃႈႁဝ်းတၵ်းၶိုၼ်ႈၸူးဢေႃႈ။ လွင်ႈမၼ်းၸမ်ႉ၊ဢၼ်ၼၼ်ႉတၵ်းပဵၼ်လၢၵ်ႈၶၼႃႇတၢင်းဢၼ် ထႃႇဝရႃႉၽြႃး၊ ပၼ်ႁႂ်ႈႁဝ်းပႄႉၼႅင်ႇၶဝ်ဢေႃႈ၊” ဝႃႈၼင်ႇၼႆဢေႃႈ။
ၶဝ်သွင်ၵေႃႉၼၼ်ႉၼႄပျႃးတူဝ်ၶဝ်ႁႂ်ႈၵူၼ်း ၽိလိတ်ႉတိ၊ ၶဝ်ႁၼ်သေလႄႈ၊ၵူၼ်း ၽိလိတ်ႉတိ၊ ၸိူဝ်းၼၼ်ႉလၢတ်ႈလႄႈဝႃႈ၊ “တူၺ်းလူး။ ၵူၼ်း ႁေႇပြႄး၊ ၸိူဝ်းၼၼ်ႉဢွၵ်ႇၶုမ်ဢွၵ်ႇႁူးတီႈဢၼ်ၶဝ်တဵတ်ႇမႅပ်းၼၼ်ႉမႃးယဝ်ႉလူင်ပႄႇ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉၶဝ်ႁွင်ႉပၢဝ်ႇတီႈ ယေႃးၼႀၼ်ႇ၊ တင်းၵူၼ်းဢွၼ်ႇၼၼ်ႉလႄႈဝႃႈ၊ “ၶိုၼ်ႈမႃးၸူးတီႈၼႆႈတႃႉ။ ႁဝ်းမီးတီႈတၵ်းလၢတ်ႈၼႄသူဢေႃႈ၊” ဝႃႈၼင်ႇၼႆဢေႃႈ။ ယေႃးၼႀၼ်ႇ၊ ၵေႃႈလၢတ်ႈတီႈၵူၼ်းဢွၼ်ႇမၼ်းၼၼ်ႉလႄႈဝႃႈ၊ “ၶိုၼ်ႈၸွမ်းၵဝ်မႃးတႃႉ။ ထႃႇဝရႃႉၽြႃး၊ ပၼ်တၢင်းဢၼ် ဢိသရေး၊ ပႄႉၼႅင်ႇမဵဝ်း ၽိလိတ်ႉတိ၊ ယဝ်ႉ၊” ဝႃႈၼင်ႇၼႆသေယဝ်ႉ။-
ယေႃးၼႀၼ်ႇ၊ ၵၢၼ်းသီႇတိၼ်ၶိုၼ်ႈလႄႈၵူၼ်းဢွၼ်ႇမၼ်းၼၼ်ႉၵေႃႈၸွမ်းမၼ်းၵႂႃႇဢေႃႈ။ ယေႃးၼႀၼ်ႇ၊ တိုၵ်းတေႃးမဵဝ်း ၽိလိတ်ႉတိ၊ ၸိူဝ်းၼၼ်ႉလႄႈၶႃႈၽၼ်းၶဝ်တၢႆဢေႃႈ။ ၵူၼ်းဢွၼ်ႇမၼ်းၼၼ်ႉၵေႃႈၸွမ်းၶႃႈၽၼ်းၶဝ်တၢႆၽၢႆႇလင်ၸဝ်ႈမၼ်းဢေႃႈ။-
ၼႂ်းတၢင်းဢၼ်ၶႃႈၽၼ်းဢဝ်တၢႆၵမ်းဢွၼ်တၢင်းသုတ်းၼၼ်ႉ ယေႃးၼႀၼ်ႇ၊ တင်းၵူၼ်းဢွၼ်ႇမၼ်းၶႃႈၽၼ်းတၢႆသေသၢဝ်းၼိုင်ႈၵႃႈၼႂ်းပၢင်ႇဢၼ်ၵႂၢင်ႈထၼ်ႇလွၵ်းၼႃးလွၵ်းၼိုင်ႈၼၼ်ႉၵူၺ်းဢေႃႈ။-
ၵႃႈၼႂ်းတပ်ႉဢိၵ်ႇတင်းၵႃႈၼႂ်းတီႈပၢင်ႇတီႈပဵင်းတင်းၵႃႈၼႂ်းၵူၼ်းတင်းသဵင်ႈတင်းလူင်ၼၼ်ႉမီးတၢင်းဢၼ်ၵူဝ်ႁႄသၼ်ႇဝႆလႄႈ၊တပ်ႉၽႄဢၼ်ဢွၵ်ႇတိုၵ်းတင်းတပ်ႉၽႄဢၼ်ႁိမ်ဢဝ်ႁူင်ႇဢဝ်ၸိူဝ်းၼၼ်ႉၵေႃႈသၼ်ႇဝႆဢေႃႈ။ လိၼ်မိူင်းၵေႃႈမီးတၢင်းဢၼ်သၼ်ႇဝႆဢၼ်ယႂ်ႇၼႃႇလူင်လၢင်ဢေႃႈ။
ၵူၼ်းပႂ်ႉတႃႈပႂ်ႉတၢင်းၵႃႈတီႈဝဵင်း ၵိပိယႃႉ၊ ၼႂ်းဢိူင်ႇ ပိၼ်ႇယႃႇမိၼ်ႇ၊ ၸိူဝ်းၼၼ်ႉတူၺ်းႁၼ်မုၵ်ႉၵူၼ်းၸိူဝ်းၵူၼ်း ၽိလိတ်ႉတိ၊ တင်းလၢႆလႅၼ်ႈၵႂႃႇလႅၼ်ႈမႃးသူၼ်သၢၼ်ၵၼ်ယူႇၼၼ်ႉဢေႃႈ။-
မိူဝ်ႈၼၼ်ႉ သေႃးလု၊ လၢတ်ႈတီႈၵူၼ်းမၼ်းတင်းလၢႆလႄႈဝႃႈ၊ “ၼပ်ႉဢၢၼ်ႇၵူၼ်းသိုၵ်းတင်းလၢႆႁႂ်ႈလႆႈႁုလွင်ႈဢၼ်ၽူႈလႂ်ႁၢႆလၢႆၵႂႃႇၼၼ်ႉတႃႉ၊” ဝႃႈၼင်ႇၼႆဢေႃႈ။ ၶဝ်ၼပ်ႉဢၢၼ်ႇလႄႈႁုႁၼ်လွင်ႈဢၼ် ယေႃးၼႀၼ်ႇ၊ ဢိၵ်ႇတင်းၵူၼ်းဢွၼ်ႇဢၼ်ပႃးလၢၵ်ႈၼၢၵ်ႈမၼ်းၼၼ်ႉႁၢႆလၢႆယူႇဢေႃႈ။-
သေႃးလု၊ လၢတ်ႈတီႈယဵၸ်ႈပရေႃးႁဵၵ်ႈ ဢႁိယႃႉ၊ လႄႈဝႃႈ၊ “ဢဝ်တိူၵ်ႈၽြႃးပဵၼ်ၸဝ်ႈမႃးၵႃႈတီႈၼႆႈတႃႉ၊” ဝႃႈၼင်ႇၼႆဢေႃႈ။ လွင်ႈမၼ်းၸမ်ႉ၊ၼႂ်းဝၼ်းၼၼ်ႉ ဢႁိယႃႉ၊ ႁၢမ်တိူၵ်ႈတႃႇၽြႃးပဵၼ်ၸဝ်ႈၵႃႈတီႈၽၢႆႇၼႃႈၵူၼ်း ဢိသရေး၊ တင်းလၢႆယူႇဢေႃႈ။-
ယၢမ်းမိူဝ်ႈဢၼ် သေႃးလု၊ ယင်းတိုၵ်ႉလၢတ်ႈၵႂၢမ်းတေႃႇၵၼ်တင်းယဵၸ်ႈပရေႃးႁဵၵ်ႈယူႇၼၼ်ႉၸိုင်၊တၢင်းဢၼ်ယုင်ႈယၢင်ႈသူၼ်သၢၼ်ၵႃႈၼႂ်းပၢင်တပ်ႉမဵဝ်း ၽိလိတ်ႉတိ၊ ၼၼ်ႉယဵင်ႈၶႅၼ်းယႂ်ႇမႃးႁႅင်းမႃးယူႇလႄႈ သေႃးလု၊ လၢတ်ႈတီႈယဵၸ်ႈပရေႃးႁဵၵ်ႈၼၼ်ႉလႄႈဝႃႈ၊ “ဢမ်ႇမီးၶိင်ႇယၢမ်းတႃႇတေတွင်ႈထၢမ်ဢလူဝ်ႇ ထႃႇဝရႃႉၽြႃး၊ ယဝ်ႉ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ သေႃးလု၊ ဢိၵ်ႇတင်းၵူၼ်းမၼ်းတင်းလၢႆၶီႇသိုၵ်းၶိုၼ်ႈၸူးတီႈမဵဝ်း ၽိလိတ်ႉတိ၊ ၸိူဝ်းဢၼ်ယုင်ႈယၢင်ႈသူၼ်သၢၼ်လႄႈၶဝ်ၼင်ႇၵၼ်ၵၼ်ၶႃႈၽၼ်းၵၼ်ယူႇၼၼ်ႉဢေႃႈ။-
ၵူၼ်း ႁေႇပြႄး၊ ၵမ်ႈၽွင်ႈဢၼ်ႁၢၼ်ႉတေႃႇမိူဝ်ႈလဵဝ်ယင်းမီးတႂ်ႈမိုဝ်း ၽိလိတ်ႉတိ၊ ၶဝ်လႄႈမီးယူႇၼႂ်းတပ်ႉၶဝ်ဝႆႉၸိူဝ်းၼၼ်ႉၵေႃႈဢွၼ်ၵၼ်ၶၢႆႉပုတ်ႈမႃးယူႇၽၢႆႇမဵဝ်း ဢိသရေး၊ ၽွမ်ႉ သေႃးလု၊ ဢိၵ်ႇတင်း ယေႃးၼႀၼ်ႇ၊ ဢေႃႈ။-
တၢင်ႇၵေႃႉတၢင်ႇၵူၼ်းၸိူဝ်းဢၼ်တဵတ်ႇမႅပ်းယူႇၵႃႈၼိူဝ်ႁၢၼ်ႉလွႆ ဢေႇၽရိမ်ႇ၊ ၼၼ်ႉလႆႈငိၼ်းလွင်ႈဢၼ်ၵူၼ်းမဵဝ်း ၽိလိတ်ႉတိ၊ တင်းလၢႆၼီပၢႆႈယူႇၼၼ်ႉၸိုင်၊ၶဝ်ဢွၼ်ၵၼ်ဢွၵ်ႇမႃးၽွမ်ႉၵၼ်လႄႈလိုပ်ႈၸွမ်းလမ်းၸွမ်းၵႂႃႇၸမ်ၸမ်သေလႄႈ၊-
ၼႃႈသိုၵ်းၼၼ်ႉပူၼ်ႉဝဵင်း ပႅတ်ႉဢႃႇဝႅၼ်ႇ၊ ၵႂႃႇဢေႃႈ။ ထႃႇဝရႃႉၽြႃး၊ ၵႄႇသႄႇၶျွတ်ႈဢဝ်ၵူၼ်းမဵဝ်း ဢိသရေး၊ ၼႂ်းဝၼ်းၼၼ်ႉယဝ်ႉဢေႃႈ။
ၼႂ်းဝၼ်းၼၼ်ႉၵူၼ်းမဵဝ်း ဢိသရေး၊ ၸိူဝ်းၼၼ်ႉတွင်ႉမႆႈလႄႈႁႅင်းဢူၼ်ႈၸွပ်ႈၼႃႇလူင်လၢင်ၵွပ်ႈပိူဝ်ႈ သေႃးလု၊ ႁဵတ်းတၢင်းဢၼ်ၵိၼ်ႇဢၼ်ဝႃႈလႄႈပၼ်ဢမိင်ႉဝႃႈ၊ “ႁႂ်ႈတၢင်းဢၼ်ၵိၼ်ႇဢၼ်ဝႃႈၼႆႉတူၵ်းႁွတ်ႈၵႃႈၼိူဝ်ၵေႃႉဢၼ်ၵိၼ်တၢင်းၵိၼ်တၢင်းၶူပ်းသေၸိူဝ်ႉသေပိူင်၊ၼႂ်းဝၼ်းမိူဝ်ႈၼႆႉၸူဝ်ႈဢၼ်ၵဝ်ဢမ်ႇပႆႇလႆႈတွပ်ႇတႅၼ်းတီႈရၢၼ်ႇသူႇၵဝ်ယဝ်ႉတူဝ်ႈၼၼ်ႉသေၵမ်းလူၺ်ႈ၊” ဝႃႈၼင်ႇၼႆၼၼ်ႉဢေႃႈ။ ၵွပ်ႈပိူဝ်ႈၸိူဝ်ႉၼင်ႇၼၼ်လႄႈၽူႈလႂ်ဢမ်ႇၵိၼ်တၢင်းၵိၼ်တၢင်းၶူပ်းသေၵေႃႉသေၵူၼ်း။-
ၶဝ်တင်းသဵင်ႈတင်းလူင်ႁွတ်ႈထိုင်ၵႃႈၼႂ်းပႃႇမႆႉတီႈၼိုင်ႈလႄႈထူပ်းႁၼ်ၼမ်ႉၽိုင်ႈမီးယူႇၵူႈတီႈၵူႈလႅၼ်ဢေႃႈ။-
ၼႂ်းထိူၼ်ႇပႃႇမႆႉၼၼ်ႉပိၵ်ႉသမ်ႉၼမ်ႉၽိုင်ႈယွတ်ႇတူၵ်းယူႇၸိၵ်းၸိၵ်းသေၵေႃႈၽူႈလႂ်သေၵေႃႉသေၵူၼ်းဢမ်ႇႁတ်းဢဝ်ၵိၼ်သေဢိတ်းသေဢီႈၵွပ်ႈပိူဝ်ႈၶဝ်ၵူဝ်တၢင်းဢၼ် သေႃးလု၊ ၵိၼ်ႇဝႃႈၼၼ်ႉတၵ်းတူၵ်းႁွတ်ႈၵႃႈၼိူဝ်ၵေႃႉဢၼ်ၵိၼ်ၼၼ်ႉဢေႃႈ။-
ၵူၺ်းၵႃႈ၊ ယေႃးၼႀၼ်ႇ၊ ၸမ်ႉ၊ၵွပ်ႈပိူဝ်ႈဢမ်ႇငိၼ်းၵႂၢမ်းပေႃႈမၼ်းၵိၼ်ႇဝႃႈဝႆႉၼၼ်ႉလႄႈဢဝ်ပၢႆၵၼ်းႁွၵ်ႇဢၼ်မၼ်းယိပ်းၵမ်ၼၼ်ႉသႄႇသႂ်ႇၵႃႈၼႂ်းႁူဝ်ႁူင်းၽိုင်ႈလႄႈၵိၼ်ၼမ်ႉၽိုင်ႈၼၼ်ႉဢေႃႈ။ မၼ်းႁွတ်ႈတၢင်းဢၼ်သၢၵ်ႈသႃႇၸႂ်မႃးၵမ်းလဵဝ်ဢေႃႈ။-
မိူဝ်ႈၼၼ်ႉၵူၼ်းၵေႃႉၼိုင်ႈလဝ်ႈလၢတ်ႈလႄႈဝႃႈ၊ “ႁဝ်းၶႃႈၵႃႈမီးတင်းသဵင်ႈတင်းလူင်တွင်ႉမႆႈလႄႈႁႅင်းဢူၼ်ႈႁႅင်းၸွပ်ႈၼႃႇၶႃႈဢေႃႈ။ ၵူၺ်းၵႃႈ၊ပေႃႈၸဝ်ႈ၊ၸဝ်ႈႁဝ်းပၼ်ဢမိင်ႉလႄႈၵိၼ်ႇဝႃႈတီႈႁဝ်းၶႃႈဝႆႉလႄႈဝႃႈ၊ ‘ႁႂ်ႈတၢင်းဢၼ်ၵိၼ်ႇဢၼ်ဝႃႈတူၵ်းႁွတ်ႈၵႃႈၼိူဝ်ၵေႃႉဢၼ်ၵိၼ်တၢင်းၵိၼ်သေၸိူဝ်ႉသေပိူင်ၼႂ်းဝၼ်းမိူဝ်ႈၼႆႉၼၼ်ႉသေၵမ်းလူၺ်ႈ၊’ ဝႃႈၼႆၼၼ်ႉဢေႃႈ၊” ဝႃႈၼင်ႇၼႆဢေႃႈ။
ယေႃးၼႀၼ်ႇ၊ ၵေႃႈလၢတ်ႈလႄႈဝႃႈ၊ “ပေႃႈၸဝ်ႈၵဝ်ၼၼ်ႉယႃႉယုၵ်ႉၵူၼ်းတင်းလၢႆယဝ်ႉ။ တူၺ်းလူး။ ၵဝ်ႁွတ်ႈထိုင်တၢင်းဢၼ်သၢၵ်ႈသႃႇၸႂ်မႃးၵွပ်ႈပိူဝ်ႈဢၼ်ၵဝ်လႆႈၵိၼ်ၼမ်ႉၽိုင်ႈၼၼ်ႉယဝ်ႉ။-
ပေႃးၵူၼ်းႁဝ်းလႆႈၵိၼ်တၢင်းၵိၼ်တၢင်းၶူပ်းဢၼ်တိုၵ်းပႄႉရၢၼ်ႇသူႇလႄႈသိမ်းဢဝ်မႃးၼၼ်ႉၼႂ်းဝၼ်းမိူဝ်ႈၼႆႉၸိုင်၊ဢၵျူဝ်းတၵ်းယႂ်ႇၼႃႇလူင်လၢင်ဢေႃႈ။ ႁဝ်းတၵ်းယဵင်ႈၶႅၼ်းလႆႈၶႃႈၽၼ်းဢဝ်တၢႆပႅတ်ႈၵူၼ်း ၽိလိတ်ႉတိ၊ ၶဝ်ၼမ်ၼႃႇသေၼႆႉလူးၵွၼ်ႇဢေႃႈ၊” ဝႃႈၼင်ႇၼႆဢေႃႈ။
ၼႂ်းဝၼ်းၼၼ်ႉမဵဝ်း ဢိသရေး၊ တိုၵ်းပႄႉ ၽိလိတ်ႉတိ၊ တင်းလၢႆတႄႇဢဝ်တီႈဝဵင်း မိၵ်ႉမတ်ႉ၊ လိုပ်ႈလမ်းၵႂႃႇတေႃႇထိုင်ႁွတ်ႈဝဵင်း ဢႃႇၸလုၼ်ႇ၊ ဢေႃႈ။ ယၢမ်းမိူဝ်ႈၼၼ်ႉၵူၼ်းမဵဝ်း ဢိသရေး၊ တင်းလၢႆတွင်ႉမႆႈလႄႈႁႅင်းဢူၼ်ႈႁႅင်းၸွပ်ႈၼႃႇလူင်လၢင်သေလႄႈ၊-
ၶဝ်ဢွၼ်ၵၼ်ႁိမ်ႁူင်ႇဢဝ်ဢုၵ်ႉၸႃႇဢၼ်သိမ်းလႆႈၵႃႈတီႈရၢၼ်ႇသူႇဢၼ်ပဵၼ်သူဝ်းဝူဝ်းတင်းလၢႆသေယဝ်ႉ၊ႁႅမ်ၵႃႈၼိူဝ်ၵၢင်ပၢင်ႇလႄႈၵိၼ်ၼိူဝ်ႉမၼ်းပႃးလူၺ်ႈၵၼ်တင်းလိူတ်ႈမၼ်းဢေႃႈ။-
ပိူၼ်ႈဢွၼ်ၵၼ်လဝ်ႈလၢတ်ႈတီႈ သေႃးလု၊ လႄႈဝႃႈ၊ “ၵူၼ်းတင်းလၢႆႁဵတ်းဢပျတ်ႈတၢင်းဢၼ်ပူၼ်ႉလိူဝ် ထႃႇဝရႃႉၽြႃး၊ ၼႂ်းတၢင်းဢၼ်ၵိၼ်ၼိူဝ်ႉပႃးလိူတ်ႈမၼ်းၼၼ်ႉယဝ်ႉ၊” ဝႃႈၼင်ႇၼႆဢေႃႈ။ သေႃးလု၊ လၢတ်ႈလႄႈဝႃႈ၊ “သူၼႆႉသဵတ်ႈၸႃႇလုယဝ်ႉ။ ဢွၼ်ၵၼ်ၵိင်ႈဢဝ်မၢၵ်ႇႁိၼ်ဢၼ်ယႂ်ႇၼႃႇမႃးတီႈၵဝ်ၵမ်းလဵဝ်တႃႉ၊” ဝႃႈၼင်ႇၼႆသေယဝ်ႉ၊-
သမ်ႉမီးဢမိင်ႉလႄႈဝႃႈ၊ “ဢွၼ်ၵၼ်ၵႂႃႇၵႃႈၼႂ်းၵူၼ်းတင်းလၢႆၵေႃႉတီႈၵေႃႉတၢင်းလႄႈမွၵ်ႇလၢတ်ႈႁႂ်ႈၶဝ်ဢဝ်သူဝ်းဝူဝ်းၽႂ်ၽႂ်မၼ်းမၼ်းမႃးၵႃႈတီႈၼႆႈသေယဝ်ႉ၊ႁႅမ်ၵိၼ်ၵႃႈတီႈၼႆႈတႃႉ။ ယႃႇပေၵိၼ်ၼိူဝ်ႉဢၼ်ပႃးလိူတ်ႈလႄႈၽိတ်းပိူင်ႈ ထႃႇဝရႃႉၽြႃး၊ ” ဝႃႈၼင်ႇၼႆဢေႃႈ။ မိူဝ်ႈၶမ်ႈၼၼ်ႉၶဝ်ဢွၼ်ၵၼ်ဢဝ်သူဝ်းဝူဝ်းၶဝ်မႃးႁင်းၽႂ်ႁင်းမၼ်းလႄႈႁႅမ်ၵႃႈတီႈၼၼ်ႈဢေႃႈ။-
သေႃးလု၊ ၵေႃႈတႄႇႁဵတ်းၶဵင်ႇတၢင်းလူႇပုၼ်ႈ ထႃႇဝရႃႉၽြႃး၊ ဢေႃႈ။ ဢၼ်ၼၼ်ႉၸမ်ႉ၊ပဵၼ်ၶဵင်ႇတၢင်းလူႇဢၼ်မၼ်းတႄႇႁဵတ်းဢွၼ်တၢင်းသေပိူၼ်ႈ ပုၼ်ႈ ထႃႇဝရႃႉၽြႃး၊ ဢေႃႈ။
သေႃးလု၊ လၢတ်ႈတီႈၵူၼ်းမၼ်းတင်းလၢႆလႄႈဝႃႈ၊ “ႁဝ်းဢွၼ်ၵၼ်လူင်းၵႂႃႇတိုၵ်းတေႃးၵူၼ်းမဵဝ်း ၽိလိတ်ႉတိ၊ ၸိူဝ်းၼၼ်ႉတင်းၶိုၼ်းလႄႈယႃႉၽဵဝ်ႈပႅတ်ႈၶဝ်တေႃႇထိုင်ႁွတ်ႈမိူင်းလႅင်းသေယဝ်ႉ၊ၶႃႈၽၼ်းတၢႆပႅတ်ႈတင်းသဵင်ႈတင်းမူတ်းတႃႉႁဝ်း၊” ဝႃႈၼင်ႇၼႆဢေႃႈ။ ၶဝ်ၵေႃႈၶိုၼ်းလၢတ်ႈလႄႈဝႃႈ၊ “ႁဵတ်းၸွမ်းၵႃႈၼင်ႇဢၼ်ၸဝ်ႈႁဝ်းထၢင်ႇပဵၼ်ဢၼ်လီဢၼ်ထုၵ်ႇၼၼ်ႉသေၵမ်း၊” ဝႃႈၼင်ႇၼႆဢေႃႈ။ ၵူၺ်းၵႃႈ၊ယဵၸ်ႈပရေႃးႁဵၵ်ႈလၢတ်ႈလႄႈဝႃႈ၊ “ဢွၼ်ၵၼ်တွင်ႈထၢမ်တူၺ်း ထႃႇဝရႃႉၽြႃး၊ ဢွၼ်တၢင်းလူးၵွၼ်ႇတႃႉ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ သေႃးလု၊ လဝ်ႈထၢမ်တီႈ ထႃႇဝရႃႉၽြႃး၊ လႄႈဝႃႈ၊ “ၸွင်ႇၶႃႈၸဝ်ႈႁဝ်းတၵ်းလႆႈၵႂႃႇတိုၵ်းတေႃးမဵဝ်း ၽိလိတ်ႉတိ၊ တီႈၶႃႈႁိုဝ်း။ ၸဝ်ႈႁဝ်းတၵ်းပၼ်ဢၶႂၢင်ႉႁႂ်ႈၶႃႈၸဝ်ႈႁဝ်းၶဝ်ဢွင်ႇသိုၵ်းတီႈၶႃႈႁိုဝ်း၊” ဝႃႈၼင်ႇၼႆဢေႃႈ။ ၵူၺ်းၵႃႈ၊ၼႂ်းဝၼ်းၼၼ်ႉ ထႃႇဝရႃႉၽြႃး၊ ဢမ်ႇၶိုၼ်းတွပ်ႇၶိုၼ်းလၢတ်ႈလႄႈယူႇဢေႃႈ။-
သေႃးလု၊ ၵေႃႈလၢတ်ႈလႄႈဝႃႈ၊ “ၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆၶဝ်႟။ ဢွၼ်ၵၼ်မႃးၵႃႈတီႈၼႆႈလႄႈႁႃႁႂ်ႈထူပ်းလွင်ႈဢၼ်ၽိတ်းပိူင်ႈၼႂ်းဝၼ်းမိူဝ်ႈၼႆႉၼၼ်ႉပဵၼ်လွင်ႈတၢင်းဢၼ်လႂ်ၼၼ်ႉတႃႉ။-
ႁဵတ်းၵတိသဵတ်ႈၸႃႇၵႃႈတီႈ ထႃႇဝရႃႉၽြႃး၊ ဢၼ်ဢသၢၵ်ႈလိပ်းယူႇၼႆႉလႄႈမၼ်းၸဝ်ႈပဵၼ်ၸဝ်ႈဢၼ်ၵႄႇသႄႇၶျွတ်ႈဢဝ်မဵဝ်း ဢိသရေး၊ ဢေႃႈ။ ၵေႃႉဢၼ်ႁဵတ်းၽိတ်းၼၼ်ႉပဵၼ်လုၵ်ႈၸၢႆးၵဝ် ယေႃးၼႀၼ်ႇ၊ သေၵေႃႈတၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၼ်ပဵၼ်ဢေႃႈ၊” ဝႃႈၼင်ႇၼႆဢေႃႈ။ ၵူၺ်းၵႃႈ၊ၽူႈလႂ်ဢမ်ႇၶိုၼ်းလဝ်ႈလၢတ်ႈသေၵေႃႉသေၵူၼ်း။-
မၼ်းၸင်ႇလၢတ်ႈတီႈၶဝ်ၸိူဝ်းၼၼ်ႉလႄႈဝႃႈ၊ “သူၵႃႈမီးတင်းသဵင်ႈတင်းလူင်ဢွၼ်ၵၼ်ၸုၵ်းယူႇၽၢႆႇၼၼ်ႉတႃႉ။ ၵဝ်တင်းလုၵ်ႈၸၢႆးၵဝ် ယေႃးၼႀၼ်ႇ၊ သမ်ႉတၵ်းၸုၵ်းယူႇၽၢႆႇၼႆႉဢေႃႈ၊” ဝႃႈၼင်ႇၼႆဢေႃႈ။ ၶဝ်ၼၼ်ႉၵေႃႈလဝ်ႈလၢတ်ႈလႄႈဝႃႈ၊ “ႁဵတ်းၸွမ်းၵႃႈၼင်ႇဢၼ်ၸဝ်ႈႁဝ်းထၢင်ႇပဵၼ်ဢၼ်လီဢၼ်ထုၵ်ႇၼၼ်ႉသေၵမ်း၊” ဝႃႈၼင်ႇၼႆဢေႃႈ။
သေႃးလု၊ သူးတွင်းတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ ၼၼ်ႉလႄႈဝႃႈ၊ “ ထႃႇဝရႃႉၽြႃး၊ တီႈၶႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းဢမ်ႇၶိုၼ်းတွပ်ႇၶိုၼ်းလၢတ်ႈတီႈၶႃႈၸဝ်ႈႁဝ်းဝၼ်းမိူဝ်ႈၼႆႉတီႈၶႃႈ။ ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ တီႈၶႃႈ။ ၶႅၼ်းတေႃႈဢဝ်မၢၵ်ႇႁိၼ်လူင်ဢၼ်မူတ်းၸၢင်ႇၼႆႉသေလႄႈၶိုၼ်းတွပ်ႇၶိုၼ်းလၢတ်ႈပၼ်ၶႃႈၸဝ်ႈႁဝ်းသေၵမ်းတီႈၶႃႈ။ ပေႃးတၢင်းၽိတ်းပိူင်ႈၼႆႉပဵၼ်ၵွပ်ႈပိူဝ်ႈ ယေႃးၼႀၼ်ႇ၊ ဢမ်ႇၼၼ်ၵွပ်ႈပိူဝ်ႈၶႃႈၸဝ်ႈႁဝ်းၸိုင်၊ဢဝ်တင်းဢုရိမ်းသေလႄႈၶိုၼ်းတွပ်ႇလၢတ်ႈသေၵမ်း။ ပေႃးပဵၼ်ၵွပ်ႈပိူဝ်ႈၵူၼ်းတင်းလၢႆၸမ်ႉ၊ဢဝ်တင်းႀုမိမ်း လႄႈတွပ်ႇလၢတ်ႈပၼ်သေၵမ်းတီႈၶႃႈ၊” ဝႃႈၼင်ႇၼႆဢေႃႈ။ ၵႂၢမ်းတွပ်ႇၼၼ်ႉၸိၼႄ ယေႃးၼႀၼ်ႇ၊ တင်း သေႃးလု၊ သေယဝ်ႉ၊ၵူၼ်းတင်းလၢႆလွတ်ႈဢေႃႈ။-
မိူဝ်ႈၼၼ်ႉ၊ သေႃးလု၊ သမ်ႉလၢတ်ႈလႄႈဝႃႈ၊ “တႅပ်းတတ်းပၼ်ၼႂ်းဝူင်ႈၵၢင်လုၵ်ႈၸၢႆးၵဝ်ၶႃႈ ယေႃးၼႀၼ်ႇ၊ တင်းၶႃႈၸဝ်ႈႁဝ်းၼႆႉသေၵမ်းတီႈၶႃႈ၊” ဝႃႈၼင်ႇၼႆလႄႈ၊ ယေႃးၼႀၼ်ႇ၊ လႆႈၶၢမ်ႇတၢင်းဢၼ်ၸိၼႄဢေႃႈ။-
သေႃးလု၊ ၵေႃႈထၢမ်တီႈ ယေႃးၼႀၼ်ႇ၊ လႄႈဝႃႈ၊ “မႂ်းႁဵတ်းၽိတ်းဢၼ်လႂ်ယဝ်ႉ၊” ဝႃႈၼင်ႇၼႆလႄႈ။ ယေႃးၼႀၼ်ႇ၊ ၶိုၼ်းလဝ်ႈလၢတ်ႈလႄႈဝႃႈ၊ “ၵဝ်ၶႃႈလႆႈၵိၼ်မႅၼ်ႈၼမ်ႉၽိုင်ႈဢိတ်းၼိုင်ႈၶႃႈဢေႃႈ။ ၵွပ်ႈၼႆလႄႈၵဝ်ၶႃႈတၵ်းလႆႈတၢႆယဝ်ႉ၊” ဝႃႈၼင်ႇၼႆဢေႃႈ။
သေႃးလု၊ ၵေႃႈလၢတ်ႈလႄႈဝႃႈ၊ “ ယေႃးၼႀၼ်ႇ၊ ႟။ ပေႃးၵဝ်ယင်းဢမ်ႇဢဝ်မႂ်းတၢႆၸိုင်၊ႁႂ်ႈ ထႃႇဝရႃႉၽြႃး၊ ႁဵတ်းတီႈၵဝ်ဢဝ်ဢၼ်ႁႅင်းသေၼၼ်ႉသေၵမ်း၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ၵူၼ်းတင်းလၢႆဢွၼ်ၵၼ်လဝ်ႈလၢတ်ႈတီႈ သေႃးလု၊ လႄႈဝႃႈ၊ “ ယေႃးၼႀၼ်ႇ၊ ဢၼ်ႁဵတ်းၵျေးၸူးတၢင်းဢၼ်ၵႄႇသႄႇၶျွတ်ႈဢဝ်မဵဝ်း ဢိသရေး၊ ၼႆႉၼၼ်ႉတၵ်းလႆႈတၢႆၶႃႈႁိုဝ်း။ ယႃႇႁႂ်ႈပဵၼ်ၸိူဝ်ႉၼင်ႇၼၼ်သေၵမ်းၶႃႈ။ ၵႃႈၼင်ႇဢၼ် ထႃႇဝရႃႉၽြႃး၊ ဢသၢၵ်ႈလိပ်းယူႇၼၼ်ႉယႃႇႁႂ်ႈၶူၼ်ႁူဝ်မၼ်းတူၵ်းၵႃႈၼိူဝ်လိၼ်သေသဵၼ်ႈသေၵမ်းၶႃႈ။ လွင်ႈမၼ်းၸမ်ႉ၊ၵႃႈဢၼ်မၼ်းႁဵတ်းယဝ်ႉၼႂ်းဝၼ်းၼႆႉၼၼ်ႉ ထႃႇဝရႃႉၽြႃး၊ ၽွမ်ႉၽၢႆႇမၼ်းဢေႃႈ၊” ဝႃႈၼင်ႇၼႆဢေႃႈ။ ၼင်ႇၼၼ်လႄႈၵူၼ်းတင်းလၢႆၵႄႇသႄႇၼုၵ်ႈဢဝ်ဢသၢၵ်ႈမၼ်းလွတ်ႈတၢင်းတၢႆဢေႃႈ။
လိုၼ်းၼၼ်ႉ သေႃးလု၊ ယင်းဢမ်ႇလိုပ်ႈၸွမ်းလမ်းၸွမ်းၵူၼ်း ၽိလိတ်ႉတိ၊ ၶဝ်လႄႈၶိုၼ်းမိူဝ်းၵႂႃႇသေဢေႃႈ။ ၵူၼ်း ၽိလိတ်ႉတိ၊ ၸိူဝ်းၼၼ်ႉၵေႃႈၶိုၼ်းမိူဝ်းၵႂႃႇၸူးသိုင်ႇၸိုင်ႈဝၢၼ်ႈမိူင်းၶဝ်သေဢေႃႈ။
ၼႂ်းၸူဝ်ႈဢၼ် သေႃးလု၊ ပဵၼ်ၶုၼ်ႁေႃၶမ်းမဵဝ်း ဢိသရေး၊ ၶဝ်ၼၼ်ႉမၼ်းတိုၵ်းပႅတ်ႈၵႃႈဢၼ်ပဵၼ်ရၢၼ်ႇသူႇမၼ်းတင်းသဵင်ႈတင်းလူင်ၵူႈတီႈၵူႈလႅၼ်ဢၼ်ဝႃႈၵူၼ်းမဵဝ်း မေႃႇၽႃႉ၊ ၵူၼ်းမဵဝ်း ဢမ်ႇမုၼ်ႇ၊ ၵူၼ်းမဵဝ်း ဢေႇတုမ်ႇ၊ ၶုၼ်ႁေႃၶမ်းၼမ်ၼႃႇၼႂ်းၵူၼ်းမဵဝ်း ၸေႃႇၽႃႉ၊ ဢိၵ်ႇတင်းၵူၼ်းမဵဝ်း ၽိလိတ်ႉတိ၊ တင်းလၢႆၸိူဝ်းၼၼ်ႉဢေႃႈ။ ၵႃႈတီႈၵႃႈဢၼ်မၼ်းၶီႇသိုၵ်းၶိုၼ်ႈၼၼ်ႉမၼ်းလႆႈဢွင်ႇသိုၵ်းလွၼ်ႉလွၼ်ႉဢေႃႈ။-
မၼ်းတိုၵ်းတေႃးႁတ်းႁတ်းႁၢၼ်ႁၢၼ်သေလႄႈမၼ်းယင်းပႄႉၼႅင်ႇၵူၼ်းမဵဝ်း ဢႃႇမလႅၵ်ႉ၊ လူးၵွၼ်ႇဢေႃႈ။ မၼ်းၵႄႇသႄႇၶျွတ်ႈဢဝ်ၵူၼ်းမဵဝ်း ဢိသရေး၊ သေၵႃႈၼႂ်းမဵဝ်းၵူၼ်းဢၼ်ႁိမ်ဢဝ်ႁူင်ႇဢဝ်ၶဝ်ၼၼ်ႉဢေႃႈ။
လုၵ်ႈၸၢႆး သေႃးလု၊ ၸမ်ႉ၊ပဵၼ် ယေႃးၼႀၼ်ႇ၊ ဢိသဝီႇ၊ တင်း မေႇလၶိသွႃႇ၊ ဢေႃႈ။ ၸိုဝ်ႈသဵင်လုၵ်ႈသၢဝ်မၼ်းၵေႃႉယႂ်ႇၼၼ်ႉပဵၼ် မေးရပ်ႉ၊ ၵေႃႉလဵၵ်ႉသမ်ႉပဵၼ် မိၶႃႇလႃႉ၊ ဢေႃႈ။-
ၸိုဝ်ႈသဵင်မေးမၼ်းၸမ်ႉ၊ပဵၼ် ဢႁိၼွမ်ႇ၊ လုၵ်ႈသၢဝ် ဢႁိမတ်ႉ၊ ဢေႃႈ။ ၸိုဝ်ႈသဵင်ၸဝ်ႈၵွၼ်းတပ်ႉသိုၵ်းလူင်မၼ်းၸမ်ႉ၊ပဵၼ် ဢပ်ႉပၼႃး၊ လုၵ်ႈၸၢႆးၼႃႉမၼ်း ၼေးရႃႉ၊ ၼၼ်ႉဢေႃႈ။-
ၵိသႃႉ၊ ဢၼ်ပဵၼ်ပေႃႈ သေႃးလု၊ တင်း ၼေးရႃႉ၊ ပေႃႈ ဢပ်ႉပၼႃး၊ ၶဝ်ၼၼ်ႉပဵၼ်လုၵ်ႈၸၢႆး ဢပျေႇလႃႉ၊ ဢေႃႈ။
ၸူဝ်ႈပၢၼ် သေႃးလု၊ ၼၼ်ႉမၼ်းလႆႈတိုၵ်းတေႃးၵူၼ်း ၽိလိတ်ႉတိ၊ ၶဝ်ၼႃႇလူင်လၢင်ဢေႃႈ။ မိူဝ်ႈလႂ်သေဢမ်ႇဝႃႈ၊ပေႃးမၼ်းထူပ်းႁၼ်ၵေႃႉဢၼ်ႁႅင်းယႂ်ႇ၊ၵေႃႉဢၼ်ႁတ်းႁၢၼ်ၸိုင်၊မၼ်းၸၢင်ႈႁွင်ႉဢဝ်ႁႂ်ႈထၢမ်းၼႃႈၵၢၼ်မၼ်းဢေႃႈ။
သမူၺ်ႇလႃႉ၊ လၢတ်ႈတီႈ သေႃးလု၊ လႄႈဝႃႈ၊ “ၵဝ်ၼႆႉပဵၼ်ၵေႃႉဢၼ် ထႃႇဝရႃႉၽြႃး၊ ပွႆႇၸႂ်ႉမႃးႁႂ်ႈလႆႈပၼ်ၽိၵ်ႈသိၵ်ႈတီႈမႂ်း၊ႁႂ်ႈမႂ်းလႆႈပဵၼ်ၶုၼ်ႁေႃၶမ်းၵူၼ်းမဵဝ်း ဢိသရေး၊ ၼႆႉယဝ်ႉ။ ပိူဝ်ႈၼႆလႄႈ၊တေႃႈလဵဝ်ၼႆႉထွမ်ႇဢဝ်ၵႂၢမ်း ထႃႇဝရႃႉၽြႃး၊ တႃႉ။-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ ‘ၵဝ်တၵ်းပၼ်တၢမ်ႇတီႈၵူၼ်းမဵဝ်း ဢႃႇမလႅၵ်ႉ၊ တင်းလၢႆၵွပ်ႈပိူဝ်ႈဢၼ်ပူႇမွၼ်ႇၶဝ်ၼၼ်ႉႁၢမ်ႈတၢပ်ႈႁႄႉၶႅၼ်ၵူၼ်းမဵဝ်း ဢိသရေး၊ မိူဝ်ႈဢၼ်ၶဝ်ဢွၵ်ႇမိူင်း ဢေးၵျိပ်ႉ၊ မႃးယူႇၼၼ်ႉဢေႃႈ။-
ၵႂႃႇလႄႈတိုၵ်းတေႃးယႃႉပႅတ်ႈမဵဝ်း ဢႃႇမလႅၵ်ႉ၊ ၼၼ်ႉတႃႉ။ ယင်းဢမ်ႇသေလၢႆလႄႈယႃႉၽဵဝ်ႈပႅတ်ႈမူတ်းမူတ်းသဵင်ႈသဵင်ႈတႃႉ။ ယႃႇပေႁႂ်ႈၵိုတ်းႁႂ်ႈၵျၢၼ်ႇသေမဵဝ်း။ ဢဝ်တၢႆၵူၼ်းၸၢႆး၊ၵူၼ်းယိင်း၊လုၵ်ႈဢွၼ်ႇ၊လုၵ်ႈဢွၼ်ႇလႅင်ဢၼ်ယင်းၵိၼ်ၼူမ်းယူႇတင်းလၢႆဢိၵ်ႇတင်းသူဝ်း၊ဝူဝ်း၊ၵလႃႇဢုၵ်ႈ၊မႃႉလီႈတင်းလၢႆတႃႉ၊’ ဝႃႈၼႆယဝ်ႉ၊” ဝႃႈၼင်ႇၼႆဢေႃႈ။
သေႃးလု၊ ၵေႃႈႁႂ်ႈၵူၼ်းတင်းလၢႆၸုတုမ်မႃးသေယဝ်ႉ၊ဢဝ်ၸရၢင်းၵူၼ်းၵႃႈတီႈဝဵင်း တႄႇလိမ်ႇ၊ လႄႈႁူဝ်ႁၢၼ်ၵူၼ်းသိုၵ်းတပ်ႉတိၼ်မီးသွင်သႅၼ်ဢိၵ်ႇတင်းၵူၼ်းသိုၵ်းမဵဝ်း ယုတႃႉ၊ မီးမိုၼ်ႇၼိုင်ႈဢေႃႈ။-
သေႃးလု၊ တင်းၵူၼ်းမၼ်းတင်းလၢႆၶီႇသိုၵ်းၸူးတီႈဝဵင်း ဢႃႇမလႅၵ်ႉ၊ လႄႈမူၵ်းယုမ်းပႂ်ႉထႃႈယူႇၵႃႈၼႂ်းႁူၺ်ႈဢေႃႈ။-
မၼ်းသင်ႇၵႂၢမ်းၵႂႃႇၵႃႈတီႈၵူၼ်းမဵဝ်း ၵိၼိ၊ တင်းလၢႆလႄႈဝႃႈ၊ “ဢွၼ်ၵၼ်ဢွၵ်ႇသေၵႃႈတီႈၵူၼ်းမဵဝ်း ဢႃႇမလႅၵ်ႉ၊ လႄႈလူင်းၵႂႃႇသေၵမ်း။ ၵူဝ်ၵဝ်တၵ်းယႃႉၽဵဝ်ႈဢဝ်သူတၢႆႁူမ်ႈလူၺ်ႈၵၼ်တင်းၶဝ်ဢေႃႈ။ လွင်ႈမၼ်းၸမ်ႉ၊ပူႇမွၼ်ႇသူလႆႈႁဵတ်းၵျေးၸူးဝႆႉတီႈၵူၼ်းမဵဝ်း ဢိသရေး၊ ၵႃႈမီးတင်းသဵင်ႈတင်းလူင်မိူဝ်ႈဢၼ်ၶဝ်ဢွၵ်ႇမိူင်း ဢေးၵျိပ်ႉ၊ လႄႈမႃးယူႇၼၼ်ႉဢေႃႈ၊” ဝႃႈၼင်ႇၼႆဢေႃႈ။ ၵူၼ်းမဵဝ်း ၵိၼိ၊ ၸိူဝ်းၼၼ်ႉဢွၼ်ၵၼ်ဢွၵ်ႇသေၵႃႈတီႈၵူၼ်း ဢႃႇမလႅၵ်ႉ၊ ၸိူဝ်းၼၼ်ႉၵႂႃႇဢေႃႈ။
သေႃးလု၊ တိုၵ်းတေႃးယႃႉပႅတ်ႈၵူၼ်း ဢႃႇမလႅၵ်ႉ၊ ၸိူဝ်းၼၼ်ႉၸႃႉဢဝ်တီႈဝဵင်း ႁႃႇဝိလႃႉ၊ ၵႂႃႇတေႃႇထိုင်ႁွတ်ႈဝဵင်း သုရႃႉ၊ ၽၢႆႇဝၼ်းဢွၵ်ႇမိူင်း ဢေးၵျိပ်ႉ၊ ၼၼ်ႉဢေႃႈ။-
မၼ်းတိလႆႈတူဝ်လိပ်းၶုၼ်ႁေႃၶမ်း ဢႃႇၵၵ်ႉ၊ မဵဝ်း ဢႃႇမလႅၵ်ႉ၊ ၶဝ်ၼၼ်ႉသေလႄႈၶႃႈၽၼ်းပႅတ်ႈၵူၼ်းတင်းသဵင်ႈတင်းလူင်ဢေႃႈ။-
ၵူၺ်းၵႃႈ၊ သေႃးလု၊ တင်းၵူၼ်းသိုၵ်းမၼ်းတင်းလၢႆသေလၢႆၶုၼ်ႁေႃၶမ်း ဢႃႇၵၵ်ႉ၊ ဢိၵ်ႇတင်းသူဝ်းဝူဝ်းဢၼ်မျၢတ်ႈပၢၼ်ၵၢင်၊ဢိၵ်ႇတင်းဝူဝ်းဢွၼ်ႇသူဝ်းဢွၼ်ႇၸိူဝ်းဢၼ်ပီးလီမၼ်းလီဢိၵ်ႇတင်းဢၼ်လီဢၼ်ငၢမ်းတၢင်ႇၸိူဝ်ႉတၢင်ႇဢၼ်ၼၼ်ႉဢေႃႈ။ ၶဝ်ၵူၺ်းယႃႉပႅတ်ႈမဵဝ်းဢၼ်ဢမ်ႇမီးၵႃႈမီးၶၼ်၊ဢၼ်ယုတ်ႈဢၼ်တႅမ်ႇၼၼ်ႉတင်းသဵင်ႈတင်းမူတ်းဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးၵႃႈတီႈ သမူၺ်ႇလႃႉ၊ လႄႈဝႃႈၸမ်ႉ၊-
“ၵဝ်မီးတၢင်းဢၼ်မႆႈၸႂ်လူၺ်ႈလွင်ႈဢၼ်ၶၢၼ်း သေႃးလု၊ ဝႆႉၼႂ်းဢရႃႇၶုၼ်ႁေႃၶမ်းၼၼ်ႉဢေႃႈ။ မၼ်းၼၼ်ႉဝၢႆႇပႅတ်ႈသေၵႃႈတီႈၵဝ်ၵႂႃႇယဝ်ႉလႄႈ၊ဢမ်ႇပႂ်ႉဢမ်ႇၸွမ်းပိင်းၺၢပ်ႈၵဝ်၊” ဝႃႈၼင်ႇၼႆဢေႃႈ။ သမူၺ်ႇလႃႉ၊ ၸႂ်မႆႈၶႂ်ႈၸႃႉၼႃႇသေလႄႈတွင်းပၢၼ်ႇတီႈ ထႃႇဝရႃႉၽြႃး၊ တင်းၶိုၼ်းဢေႃႈ။-
မၼ်းလုၵ်ႉၶိင်ႇၵၢင်ၼႂ်ၸဝ်ႉၸဝ်ႉသေယဝ်ႉ၊ဢွၵ်ႇၵႂႃႇႁႂ်ႈလႆႈႁႃ သေႃးလု၊ ဢေႃႈ။ မၼ်းလႆႈငိၼ်းလွင်ႈဢၼ် သေႃးလု၊ ႁွတ်ႈထိုင်ၵႂႃႇၵႃႈတီႈဝဵင်း ၵရမေႇလႃႉ၊ သေလႄႈပူၵ်းသဝ်ပႄႉၼႅင်ႇပုၼ်ႈဢၼ်လီမၢတ်ႈလီတွင်းသေယဝ်ႉ၊ပူၼ်ႉၵႂႃႇၸူးတီႈဝဵင်း ၵိလႃႉၵႃႇလႃႉ၊ ယဝ်ႉၼၼ်ႉဢေႃႈ။-
မၼ်းၵႂႃႇၸူးတီႈ သေႃးလု၊ လႄႈ သေႃးလု၊ တၵ်ႉလၢတ်ႈလႄႈဝႃႈ၊ “ႁႂ်ႈ ထႃႇဝရႃႉၽြႃး၊ ပၼ်တၢင်းလီတီႈၸဝ်ႈသေၵမ်းလူၺ်ႈ။ ၵဝ်ၶႃႈႁဵတ်းၸွမ်းၵႃႈၼင်ႇဢၼ်ဢမိင်ႉ ထႃႇဝရႃႉၽြႃး၊ မီးၼၼ်ႉယဝ်ႉၶႃႈယဝ်ႉ၊” ဝႃႈၼင်ႇၼႆဢေႃႈ။
သမူၺ်ႇလႃႉ၊ ၵေႃႈထၢမ်လႄႈဝႃႈ၊ “ပေႃးပဵၼ်ၸိူဝ်ႉၼင်ႇၼႆၸိုင်၊သဵင်သူဝ်းဢိၵ်ႇတင်းသဵင်ဝူဝ်းဢၼ်ၵဝ်လႆႈငိၼ်းၼၼ်ႉပဵၼ်ၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
သေႃးလု၊ ၶိုၼ်းလၢတ်ႈလႄႈဝႃႈ၊ “ၵူၼ်းၵဝ်ၶႃႈတင်းလၢႆဢဝ်ၸိူဝ်းၼၼ်ႉ ၵႃႈတီႈၵူၼ်း ဢႃႇမလႅၵ်ႉ၊ မႃးၶႃႈဢေႃႈ။ ၶဝ်သိမ်းဢဝ်သူဝ်းဝူဝ်းၸိူဝ်းဢၼ်လီၼႃႇသေပိူၼ်ႈၼၼ်ႉႁႂ်ႈလႆႈပဵၼ်ၶိူင်ႈတၢင်းလူႇ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၼၼ်ႉဢေႃႈ။ ဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉၸမ်ႉႁဝ်းၶႃႈယႃႉပႅတ်ႈမူတ်းမူတ်းသဵင်ႈသဵင်ႈယဝ်ႉၶႃႈယဝ်ႉ၊” ဝႃႈၼင်ႇၼႆဢေႃႈ။
သမူၺ်ႇလႃႉ၊ ၵေႃႈလၢတ်ႈတီႈ သေႃးလု၊ လႄႈဝႃႈ၊ “ယူႇတဵတ်ႇတဵတ်ႇတႃႉ။ ၵဝ်တၵ်းမွၵ်ႇလၢတ်ႈၵႂၢမ်းဢၼ် ထႃႇဝရႃႉၽြႃး၊ မီးဢမိင်ႉတီႈၵဝ်ၼႂ်းၶိုၼ်းပူၼ်ႉၼႆႉၼၼ်ႉလူးၵွၼ်ႇဢေႃႈ၊” ဝႃႈၼင်ႇၼႆလႄႈ၊မၼ်းၶိုၼ်းလၢတ်ႈလႄႈဝႃႈ၊ “လၢတ်ႈၶႃႈတႃႉ၊” ဝႃႈၼင်ႇၼႆဢေႃႈ။
သမူၺ်ႇလႃႉ၊ ၵေႃႈမွၵ်ႇလၢတ်ႈလႄႈဝႃႈ၊ “မိူဝ်ႈဢွၼ်ၼႆႉၼၼ်ႉမႂ်းထၢင်ႇတူဝ်မႂ်းပဵၼ်ၵေႃႉဢၼ်လဵၵ်ႉဢၼ်ၼွႆႉသေၵေႃႈ၊တေႃႈလဵဝ်ၼႆႉမႂ်းလႆႈပဵၼ်ႁူဝ်ပဵၼ်ၵၼ်းမဵဝ်း ဢိသရေး၊ ယဝ်ႉ။ ထႃႇဝရႃႉၽြႃး၊ ပၼ်ၽိၵ်ႈသိၵ်ႈႁႂ်ႈမႂ်းပဵၼ်ၶုၼ်ႁေႃၶမ်းမဵဝ်း ဢိသရေး၊ သေယဝ်ႉ၊-
မၼ်းၸဝ်ႈပွႆႇၸႂ်ႉမႂ်းၵႂႃႇပွင်ႁဵတ်းၼႃႈၵၢၼ်ဢၼ်ၼိုင်ႈလႄႈမီးဢမိင်ႉဝႃႈ၊ ‘ၵႂႃႇလႄႈယႃႉၽဵဝ်ႈပႅတ်ႈၵူၼ်းမဵဝ်း ဢႃႇမလႅၵ်ႉ၊ ဢၼ်မီးဢပျတ်ႈၼၼ်ႉတႃႉ။ တိုၵ်းတေႃးယႃႉပႅတ်ႈၶဝ်တေႃႇထိုင်ႁွတ်ႈထၢၼ်ႈပေႃးလုလႅဝ်ႁၢႆလၢႆၵႂႃႇတႃႉ၊’ ဝႃႈၼႆဢေႃႈ။-
ပိူဝ်ႈဢၼ်ပဵၼ်ၸိူဝ်ႉၼင်ႇၼႆလႄႈမႂ်းယင်းဢမ်ႇထွမ်ႇဢမ်ႇဢဝ်ဢမိင်ႉၽြႃးပဵၼ်ၸဝ်ႈ၊ယင်းႁိမ်ႁူင်ႇဢဝ်ဢုၵ်ႉၸႃႇရၢၼ်ႇသူႇၸိူဝ်းၼၼ်ႉသေလႄႈႁဵတ်းတုၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ႁဵတ်းသင်၊” ဝႃႈၼင်ႇၼႆဢေႃႈ။
သေႃးလု၊ ၶိုၼ်းလၢတ်ႈလႄႈဝႃႈ၊ “ၵဝ်ၶႃႈထွမ်ႇဢဝ်ဢမိင်ႉ ထႃႇဝရႃႉၽြႃး၊ ယဝ်ႉယဝ်ႉ။ ၵဝ်ၶႃႈၵႂႃႇၸွမ်းၵႃႈၼင်ႇဢၼ်မၼ်းၸဝ်ႈမီးဢမိင်ႉတီႈၵဝ်ၶႃႈၼၼ်ႉယဝ်ႉလႄႈ၊ဢဝ်ၶုၼ်ႁေႃၶမ်း ဢႃႇၵၵ်ႉ၊ ၼၼ်ႉမႃးယဝ်ႉ။ သမ်ႉၶႃႈၽၼ်းပႅတ်ႈၵူၼ်းမဵဝ်း ဢႃႇမလႅၵ်ႉ၊ တင်းသဵင်ႈတင်းမူတ်းယဝ်ႉၶႃႈယဝ်ႉ။-
ၵူၺ်းၵႃႈ၊ၵူၼ်းသိုၵ်းၵဝ်ၶႃႈၸိူဝ်းၼၼ်ႉသိမ်းဢဝ်သူဝ်း၊ဝူဝ်း၊ဢၼ်ဝႃႈတရိၵ်ႈသၢၼ်ႇဢၼ်လီဢၼ်ငၢမ်းသေပိူၼ်ႈ ၵႃႈၼႂ်းလွင်ႈတၢင်းဢၼ်ၵိၼ်ႇဝႃႈဝႆႉ၊ႁႂ်ႈလႆႈဢဝ်တၢႆပႅတ်ႈၼၼ်ႉမႃးပုၼ်ႈဢၼ်တၵ်းႁဵတ်းၶိူင်ႈတၢင်းလူႇတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၵႃႈတီႈဝဵင်း ၵိလႃႉၵႃႇလႃႉ၊ ၼႆႉၶႃႈဢေႃႈ၊” ဝႃႈၼင်ႇၼႆဢေႃႈ။
သမူၺ်ႇလႃႉ၊ ၵေႃႈလၢတ်ႈလႄႈဝႃႈ၊ “ ထႃႇဝရႃႉၽြႃး၊ ထုၵ်ႇၸႂ်ၵျိူၵ်ႈၸႂ်ဢၼ်လႂ်။ ထုၵ်ႇၸႂ်ၵျိူၵ်ႈၸႂ်တၢင်းဢၼ်ထွမ်ႇဢဝ်ဢမိင်ႉၸဝ်ႈႁိုဝ်း၊ဢမ်ႇၼၼ်ၵေႃႈထုၵ်ႇၸႂ်ၵျိူၵ်ႈၸႂ်ၶိူင်ႈတၢင်းလူႇဢိၵ်ႇတင်းတၢင်းဢၼ်သၢၵ်ႈလူႇၼၼ်ႉႁိုဝ်း။ တူၺ်းလူး။ တၢင်းဢၼ်ၸွမ်းဢလူဝ်ႇၸဝ်ႈၼၼ်ႉယဵင်ႈၶႅၼ်းလီၼႃႇသေၶိူင်ႈတၢင်းလူႇလႄႈ၊တၢင်းဢၼ်ထွမ်ႇဢဝ်ၼၼ်ႉယဵင်ႈၶႅၼ်းလီၼႃႇသေသူဝ်းဢၼ်လီဢၼ်ငၢမ်းသေပိူၼ်ႈၼၼ်ႉဢေႃႈ။-
သၽေႃးတၢင်းဢၼ်လုၵ်ႉၽိုၼ်ႉမၼ်းၸဝ်ႈၼၼ်ႉပဵၼ်ဢပျတ်ႈမိူၼ်ၵၼ်တင်းႁဵတ်းသြႃႇမေႃၽီဢေႃႈ။ ႁူဝ်ၸႂ်ဢၼ်တိုဝ်တၼ်ၼၼ်ႉပဵၼ်ဢပျတ်ႈမိူၼ်ၵၼ်တင်းတၢင်းဢၼ်ဝႆႈႁုၼ်ႇႁၢင်ႈသၢင်းထုဢေႃႈ။ ၵွပ်ႈပိူဝ်ႈဢၼ်မႂ်းပႄႇပႅတ်ႈပိင်းၺၢပ်ႈတြႃး ထႃႇဝရႃႉၽြႃး၊ ယဝ်ႉၼၼ်ႉလႄႈမၼ်းၸဝ်ႈပႄႇပႅတ်ႈမႂ်းၼႂ်းဢရႃႇၶုၼ်ႁေႃၶမ်းယဝ်ႉ၊” ဝႃႈၼင်ႇၼႆဢေႃႈ။
သေႃးလု၊ ၵေႃႈတွင်းပၢၼ်ႇတီႈ သမူၺ်ႇလႃႉ၊ လႄႈဝႃႈ၊ “ၵဝ်ၶႃႈၽိတ်းပိူင်ႈမႅၼ်ႈတီႈၶႃႈယဝ်ႉ။ ၵဝ်ၶႃႈပူၼ်ႉလိူဝ်ပိင်းၺၢပ်ႈတြႃး ထႃႇဝရႃႉၽြႃး၊ ဢိၵ်ႇတင်းၵႂၢမ်းဢၼ်ၸဝ်ႈလၢတ်ႈၼၼ်ႉမႅၼ်ႈၶႃႈယဝ်ႉ။ ၵွပ်ႈပိူဝ်ႈၵဝ်ၶႃႈၵူဝ်ၵူၼ်းသိုၵ်းၵဝ်ၶႃႈလႄႈလႆႈပွႆႇႁႂ်ႈၶဝ်ႁဵတ်းၸွမ်းဢလူဝ်ႇၵၢင်ၸႂ်ၶဝ်မႅၼ်ႈၶႃႈယဝ်ႉ။-
တေႃႈလဵဝ်ၼႆႉၸိုင်၊ၵဝ်ၶႃႈတွင်းပၢၼ်ႇၶႃႈဢေႃႈ။ ၶႅၼ်းတေႃႈပွႆႇလွတ်ႈဢပျတ်ႈၵဝ်ၶႃႈသေယဝ်ႉ၊ၶိုၼ်းမႃးလူၺ်ႈၵၼ်တင်းၵဝ်ၶႃႈလႄႈၵႂႃႇၸူးတီႈဝဵင်း ၵိလႃႉၵႃႇလႃႉ၊ ႁႂ်ႈၵဝ်ၶႃႈလႆႈဝႆႈ ထႃႇဝရႃႉၽြႃး၊ သေၵမ်းတီႈၶႃႈ၊” ဝႃႈၼင်ႇၼႆဢေႃႈ။
သမူၺ်ႇလႃႉ၊ ၶိုၼ်းလၢတ်ႈလႄႈဝႃႈ၊ “ၵဝ်တၵ်းဢမ်ႇၶိုၼ်းမႃးလူၺ်ႈၵၼ်တင်းမႂ်းယဝ်ႉ။ ၵွပ်ႈပိူဝ်ႈဢၼ်မႂ်းပႄႇပႅတ်ႈပိင်းၺၢပ်ႈ ထႃႇဝရႃႉၽြႃး၊ လႄႈ ထႃႇဝရႃႉၽြႃး၊ ပႄႇပႅတ်ႈမႂ်းၼႂ်းဢရႃႇၶုၼ်ႁေႃၶမ်းမဵဝ်း ဢိသရေး၊ ယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈဢၼ် သမူၺ်ႇလႃႉ၊ ဝၢႆႇၶိုၼ်းႁႂ်ႈလႆႈၵႂႃႇၼၼ်ႉၸိုင်၊ သေႃးလု၊ ယိပ်းၸၼ်ဢဝ်ၸဵင်ႇသိူဝ်ႈယၢဝ်း သမူၺ်ႇလႃႉ၊ လႄႈသိူဝ်ႈယၢဝ်းၼၼ်ႉသိၵ်ႇၵႂႃႇဢေႃႈ။-
သမူၺ်ႇလႃႉ၊ ၵေႃႈလၢတ်ႈတီႈမၼ်းလႄႈဝႃႈ၊ “ဝၼ်းမိူဝ်ႈၼႆႉ၊ ထႃႇဝရႃႉၽြႃး၊ သိၵ်ႇဢဝ်သိုင်ႇၸိုင်ႈဝၢၼ်ႈမိူင်း ဢိသရေး၊ ဢွၵ်ႇသေၵႃႈတီႈမႂ်းသေယဝ်ႉ၊ပၼ်တီႈၵူၼ်းၵေႃႉၼိုင်ႈဢၼ်လီသေမႂ်းၼၼ်ႉယဝ်ႉ။-
ၽြႃးပဵၼ်ၸဝ်ႈဢၼ်ပဵၼ်ၸဝ်ႈတၢင်းၵတ်ႉတၢင်းၶၼ်မဵဝ်း ဢိသရေး၊ ၼၼ်ႉဢမ်ႇလၢတ်ႈမုသႃႇ၊ဢမ်ႇပိၼ်ႇၸႂ်တူဝ်ၸဝ်ႈၵဝ်ႇ။ မၼ်းၸဝ်ႈၼၼ်ႉပဵၼ်ၵူၼ်းဢမ်ႇၸႂ်ႈလႄႈမၼ်းၸဝ်ႈဢမ်ႇၶၢႆႉပုတ်ႈႁူဝ်ၸႂ်မၼ်းၸဝ်ႈ၊” ဝႃႈၼင်ႇၼႆဢေႃႈ။
သေႃးလု၊ တွင်းပၢၼ်ႇလႄႈဝႃႈ၊ “ၵဝ်ၶႃႈၽိတ်းပိူင်ႈမႅၼ်ႈတီႈၶႃႈယဝ်ႉ။ ၼႂ်းဝႃႈၼၼ်သေၵေႃႈပွၵ်ႈၼႆႉၸိုင်၊ၶႅၼ်းတေႃႈႁဵတ်းႁႂ်ႈၵဝ်ၶႃႈမီးၵုင်ႇသရေႇၵႃႈတီႈၽၢႆႇၼႃႈၵူၼ်းၵႄႇၵူၼ်းႁူဝ်ၼႂ်းၵူၼ်းမဵဝ်းၵဝ်ၶႃႈတင်းလၢႆ၊ဢိၵ်ႇတင်းၽၢႆႇၼႃႈၵူၼ်းမဵဝ်း ဢိသရေး၊ သေၵမ်းၶႃႈ။ ၶႅၼ်းတေႃႈၶိုၼ်းမႃးလူၺ်ႈၵၼ်တင်းၵဝ်ၶႃႈႁႂ်ႈၵဝ်ၶႃႈလႆႈၵူမ်ႈႁူဝ်ဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၽြႃးပဵၼ်ၸဝ်ႈၸဝ်ႈႁဝ်းၼၼ်ႉသေၵမ်းၶႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ သမူၺ်ႇလႃႉ၊ ဝၢႆႇၶိုၼ်းၸွမ်း သေႃးလု၊ ၵႂႃႇၸူးတီႈဝဵင်း ၵိလႃႉၵႃႇလႃႉ၊ လႄႈ သေႃးလု၊ လႆႈဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ဢေႃႈ။
မိူဝ်ႈၼၼ်ႉ သမူၺ်ႇလႃႉ၊ လၢတ်ႈလႄႈဝႃႈ၊ “ႁွင်ႉဢဝ်ၶုၼ်ႁေႃၶမ်း ဢႃႇၵၵ်ႉ၊ မဵဝ်း ဢႃႇမလႅၵ်ႉ၊ ၼၼ်ႉမႃးၵႃႈတီႈၵဝ်တႃႉ၊” ဝႃႈၼင်ႇၼႆဢေႃႈ။ ဢႃႇၵၵ်ႉ၊ ၼၼ်ႉၵူဝ်ႁႄသၼ်ႇဝႆလႄႈမႃးဢေႃႈ။ မၼ်းထၢင်ႇၵႃႈၼႂ်းၸႂ်လႄႈဝႃႈ “တၢင်းတၢႆၼၼ်ႉပဵၼ်ဢၼ်ၶူမ်ၸႂ်ၼႃႇလူင်လၢင် ဢေႃႈ၊” ဝႃႈၼင်ႇၼႆဢေႃႈ။-
သမူၺ်ႇလႃႉ၊ လၢတ်ႈလႄႈဝႃႈ၊ “ၸိူဝ်ႉၼင်ႇဢၼ်လၢပ်ႇမႂ်းႁဵတ်းႁႂ်ႈမႄႈယိင်းတင်းလၢႆသုမ်းလုၵ်ႈသုမ်းလၢင်းၼၼ်ႉ၊တေႃႈလဵဝ်ၼႆႉမႄႈမႂ်းတၵ်းလႆႈသုမ်းလုၵ်ႈသုမ်းလၢင်းမိူၼ်ၸိူဝ်ႉၼင်ႇမႄႈယိင်းတင်းလၢႆဢေႃႈ၊” ဝႃႈၼင်ႇၼႆသေယဝ်ႉ၊ သမူၺ်ႇလႃႉ၊ တႅပ်း ဢႃႇၵၵ်ႉ၊ ပဵၼ်ပွတ်းပဵၼ်တွၼ်ႈၵႃႈတီႈၽၢႆႇၼႃႈ ထႃႇဝရႃႉၽြႃး၊ ၵႃႈၼႂ်းဝဵင်း ၵိလႃႉၵႃႇလႃႉ၊ ဢေႃႈ။
မိူဝ်ႈၼၼ်ႉ သမူၺ်ႇလႃႉ၊ ၵႂႃႇၵႃႈတီႈဝဵင်း ရႃႇမႃႉ၊ လႄႈ သေႃးလု၊ ၵႂႃႇၵႃႈတီႈဝဵင်း ၵိပႃႉ၊ သေဢေႃႈ။-
လိုၼ်းၼၼ်ႉ သမူၺ်ႇလႃႉ၊ ၵေႃႈဢမ်ႇမႃးသူႇမႃးၸႂ်း သေႃးလု၊ ထႅင်ႈသေပွၵ်ႈၼႂ်းၸူဝ်ႈဢသၢၵ်ႈမၼ်းၼၼ်ႉယဝ်ႉ။ ၵူၺ်းၵႃႈ၊မၼ်းၸႂ်ဢမ်ႇသႃႇမႆႈၸႂ်ထိုင်ၸႂ်ပုၼ်ႈ သေႃးလု၊ ယူႇဢေႃႈ။ ထႃႇဝရႃႉၽြႃး၊ မႆႈၸႂ်ၵွပ်ႈပိူဝ်ႈဢၼ်လႆႈၶၢၼ်း သေႃးလု၊ ဝႆႉၵႃႈၼႂ်းဢရႃႇၶုၼ်ႁေႃၶမ်းၼၼ်ႉဢေႃႈ။
ထႃႇဝရႃႉၽြႃး၊ မီးဢမိင်ႉတီႈ သမူၺ်ႇလႃႉ၊ လႄႈဝႃႈ၊ “ၵွပ်ႈပိူဝ်ႈဢၼ်ၵဝ်ပႄႇပႅတ်ႈ သေႃးလု၊ သေၵႃႈၼႂ်းဢရႃႇၶုၼ်ႁေႃၶမ်းၼၼ်ႉလႄႈမႂ်းတၵ်းမႆႈၸႂ်ထိုင်ၸႂ်ပုၼ်ႈမၼ်းယူႇႁိုင်ၵႃႈႁိုဝ်။ ဢဝ်ၼမ်ႉမၼ်းမၢၵ်ႇသၢၼ်ႇလုၼ်ႇထႅမ်သႂ်ႇတဝ်ႈမႂ်းတဵမ်တဵမ်သေယဝ်ႉၵႂႃႇၵႃႈတီႈဝဵင်း ပႅတ်ႉလႁႅမ်ႇ၊ ၸူးတီႈ ယေႇသႄး၊ တႃႉ။ လွင်ႈမၼ်းၸမ်ႉ၊ၵဝ်လိူၵ်ႈဢဝ်ၵႃႈၼႂ်းလုၵ်ႈၸၢႆးမၼ်းၸိူဝ်းၼၼ်ႉဝႆႉၵေႃႉၼိုင်ႈ၊ပုၼ်ႈၵဝ်ႁႂ်ႈပဵၼ်ၶုၼ်ႁေႃၶမ်းယဝ်ႉ၊” ဝႃႈၼင်ႇၼႆဢေႃႈ။
သမူၺ်ႇလႃႉ၊ လဝ်ႈလၢတ်ႈလႄႈဝႃႈ၊ “ၵဝ်ၶႃႈတၵ်းႁဵတ်းၸိူဝ်ႉၼင်ႇႁိုဝ်ၵႂႃႇလႆႈတီႈၶႃႈ။ ပေႃး သေႃးလု၊ ငိၼ်းၸိုင်၊မၼ်းတၵ်းဢဝ်ၵဝ်ၶႃႈတၢႆၶႃႈဢေႃႈ၊” ဝႃႈၼင်ႇၼႆဢေႃႈ။ ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ပႃးဢဝ်ဝူဝ်းမႄႈသိုဝ်ႇၵႂႃႇလႄႈလၢတ်ႈဝႃႈ၊ ‘ၵဝ်မႃးႁႂ်ႈလႆႈႁဵတ်းတၢင်းလူႇတီႈ ထႃႇဝရႃႉၽြႃး၊ ဢေႃႈ၊’ ဝႃႈၼင်ႇၼႆတႃႉ။-
ၽိတ်ႈပၢင်းဢဝ် ယေႇသႄး၊ မႃးၵႃႈတီႈပွႆးလူႇၼၼ်ႉတႃႉ။ မႂ်းထုၵ်ႇလီႁဵတ်းၸိူဝ်ႉၼင်ႇႁိုဝ်ၼၼ်ႉၸိုင်၊ၵဝ်တၵ်းမွၵ်ႇလၢတ်ႈမႂ်းဢေႃႈ။ မႂ်းတၵ်းလႆႈပၼ်ၽိၵ်ႈသိၵ်ႈတီႈၵေႃႉဢၼ်ၵဝ်မွၵ်ႇလၢတ်ႈႁႂ်ႈမႂ်းပၼ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
သမူၺ်ႇလႃႉ၊ ႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉၼၼ်ႉသေလႄႈၵႂႃႇၵႃႈတီႈဝဵင်း ပႅတ်ႉလႁႅမ်ႇ၊ ဢေႃႈ။ ၵူၼ်းဢၼ်ပဵၼ်ၵႄႇပဵၼ်ႁူဝ်ၵႃႈၼႂ်းဝဵင်းၼၼ်ႉၸိူဝ်းၼၼ်ႉဢွၼ်ၵၼ်သၼ်ႇသၼ်ႇသၢႆသၢႆမႃးႁပ်ႉႁူဝ်တၢင်းမၼ်းလႄႈလဝ်ႈလၢတ်ႈဝႃႈ၊ “ၸဝ်ႈဢၼ်ၸၢင်ႈႁုၸၢင်ႈႁၼ်တီႈၶႃႈ။ ၸွင်ႇပဵၼ်တၢင်းဢၼ်ၸဝ်ႈႁဝ်းမႃးလႄႇမႃးၸႂ်းၼိမ်ၼိမ်လီလီၶႃႈႁိုဝ်း၊” ဝႃႈၼင်ႇၼႆဢေႃႈ။
သမူၺ်ႇလႃႉ၊ ၶိုၼ်းလၢတ်ႈလႄႈဝႃႈ၊ “ပဵၼ်တၢင်းဢၼ်မႃးလႄႇမႃးၸႂ်းၼိမ်ၼိမ်လီလီဢေႃႈ။ ၵဝ်မႃးႁႂ်ႈလႆႈႁဵတ်းတၢင်းလူႇတီႈ ထႃႇဝရႃႉၽြႃး၊ ယဝ်ႉ။ ႁႂ်ႈတူဝ်သူမူတ်းၸၢင်ႇလႄႈမႃးၶဝ်ႈပွႆးလူႇပွႆးတၢၼ်းၼႆႉတႃႉ၊” ဝႃႈၼင်ႇၼႆဢေႃႈ။ ယေႇသႄး၊ တင်းလုၵ်ႈၸၢႆးမၼ်းတင်းလၢႆၵေႃႈမၼ်းၸႂ်ႉႁႂ်ႈၶဝ်ႁဵတ်းတၢင်းဢၼ်တူဝ်ၶဝ်မူတ်းၸၢင်ႇသေယဝ်ႉ၊ၽိတ်ႈႁွင်ႉႁႂ်ႈၶဝ်ပေႃႈလုၵ်ႈမႃးၶဝ်ႈပွႆးလူႇပွႆးတၢၼ်းၼၼ်ႉဢေႃႈ။
မိူဝ်ႈဢၼ်ၶဝ်ႁွတ်ႈထိုင်မႃးၼၼ်ႉ၊ သမူၺ်ႇလႃႉ၊ ႁၼ် ဢေးလျႃႇၽႃႉ၊ လႄႈၶႆႈၸႂ်ဝႃႈ၊ “ၵေႃႉဢၼ်ၸုၵ်းယူႇၵႃႈတီႈၽၢႆႇၼႃႈ ထႃႇဝရႃႉၽြႃး၊ ၼႆႉပဵၼ်ၵေႃႉဢၼ်မၼ်းၸဝ်ႈလိူၵ်ႈဢဝ်ဝႆႉၼၼ်ႉဢမၢၼ်ႇၶၼ်ပဵၼ်ယဝ်ႉ၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊ ထႃႇဝရႃႉၽြႃး၊ မီးဢမိင်ႉတီႈမၼ်းလႄႈဝႃႈ၊ “ယႃႇပေတူၺ်းႁၼ်တၢင်းသုင်မၼ်းတင်းတၢင်းဢၼ်ႁၢင်ႈလီႁၢင်ႈငၢမ်းမၼ်းၼၼ်ႉ။ ၵဝ်ပႄႇပႅတ်ႈမၼ်းယဝ်ႉ။ လွင်ႈမၼ်းၸမ်ႉ၊ ထႃႇဝရႃႉၽြႃး၊ တူၺ်းႁၼ်မိူၼ်ၸိူဝ်ႉၼင်ႇဢၼ်ၵူၼ်းတူၺ်းႁၼ်ၼၼ်ႉဢမ်ႇၸႂ်ႈ။ ၵူၼ်းၸိုင်၊ၸၢင်ႈတူၺ်းႁၼ်ႁၢင်ႈၽၢင်ဢေႃႈ။ ထႃႇဝရႃႉၽြႃး၊ ၸမ်ႉ၊တူၺ်းႁၼ်ႁူဝ်ၸႂ်ဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ ယေႇသႄး၊ ဢဝ်လုၵ်ႈၸၢႆးမၼ်း ဢၽိၼတပ်ႉ၊ မႃးႁႂ်ႈမၼ်းလႆႈပႆၵၢႆ သမူၺ်ႇလႃႉ၊ ၵႂႃႇဢေႃႈ။ ၵူၺ်းၵႃႈ၊ သမူၺ်ႇလႃႉ၊ လၢတ်ႈလႄႈဝႃႈ၊ “ၵေႃႉၼႆႉၵေႃႈ ထႃႇဝရႃႉၽြႃး၊ ဢမ်ႇလိူၵ်ႈဢဝ်၊” ဝႃႈၼင်ႇၼႆဢေႃႈ။-
ယေႇသႄး၊ သမ်ႉႁႂ်ႈ သၢမ်ႇမႃႇ၊ ပႆၵၢႆၵႂႃႇသေယဝ်ႉ၊ သမူၺ်ႇလႃႉ၊ သမ်ႉဝႃႈ၊ “ၵေႃႉၼႆႉၵေႃႈ ထႃႇဝရႃႉၽြႃး၊ ဢမ်ႇလိူၵ်ႈဢဝ်၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈ ယေႇသႄး၊ ႁႂ်ႈလုၵ်ႈၸၢႆးမၼ်းတင်းၸဵတ်းၵေႃႉပႆၵၢႆ သမူၺ်ႇလႃႉ၊ ၵႂႃႇလႄႈ သမူၺ်ႇလႃႉ၊ လၢတ်ႈတီႈ ယေႇသႄး၊ လႄႈဝႃႈ၊ “ၶဝ်ၸိူဝ်းၼႆႉၵေႃႈ ထႃႇဝရႃႉၽြႃး၊ ဢမ်ႇလိူၵ်ႈဢဝ်သေၵေႃႉ၊” ဝႃႈၼင်ႇၼႆဢေႃႈ။-
သမူၺ်ႇလႃႉ၊ ၸင်ႇထၢမ်တီႈ ယေႇသႄး၊ လႄႈဝႃႈ၊ “လုၵ်ႈၸၢႆးမႂ်းယင်းမီးထႅင်ႈသေၵေႃႉသေၵူၼ်းႁိုဝ်း၊” ဝႃႈၼင်ႇၼႆဢေႃႈ။ ယေႇသႄး၊ ၶိုၼ်းလၢတ်ႈလႄႈဝႃႈ၊ “ယင်းမီးလုၵ်ႈၸၢႆးၵေႃႉလဵၵ်ႉသေပိူၼ်ႈလူးၵွၼ်ႇၶႃႈဢေႃႈ။ မၼ်းၼၼ်ႉလဵင်ႉထိင်းသူဝ်းယူႇၶႃႈဢေႃႈ၊” ဝႃႈၼင်ႇၼႆဢေႃႈ။ သမူၺ်ႇလႃႉ၊ ၵေႃႈလၢတ်ႈလႄႈဝႃႈ၊ “မွၵ်ႇႁႂ်ႈမၼ်းမႃးၵႃႈတီႈၼႆႈတႃႉ။ ၸူဝ်ႈဢၼ်မၼ်းယင်းဢမ်ႇပႆႇႁွတ်ႈထိုင်မႃးၼၼ်ႉႁဝ်းဢမ်ႇလႆႈသၢၵ်ႈလူႇၶိူင်ႈတၢင်းလူႇ ၵူၺ်း၊” ဝႃႈၼင်ႇၼႆဢေႃႈ။-
ယေႇသႄး၊ ၵေႃႈပွႆႇၸႂ်ႉၵႂႃႇႁွင်ႉမၼ်းၼၼ်ႉမႃးဢေႃႈ။ မၼ်းၼၼ်ႉပဵၼ်ၵူၼ်းႁၢင်ႈလီ၊ၵူၼ်းၼုမ်ႇဢၼ်ယူႇလီမီးႁႅင်းလႄႈမီးၼႃႈတႃဢၼ်လီႁၵ်ႉဢေႃႈ။ ထႃႇဝရႃႉၽြႃး၊ မီးဢမိင်ႉတီႈ သမူၺ်ႇလႃႉ၊ လႄႈဝႃႈ၊ “ပၼ်ၽိၵ်ႈသိၵ်ႈတီႈမၼ်းတႃႉ။ ပဵၼ်ၵေႃႉၼႆႉယဝ်ႉ၊” ဝႃႈၼင်ႇၼႆဢေႃႈ။-
သမူၺ်ႇလႃႉ၊ ဢဝ်ၼမ်ႉမၼ်းမၢၵ်ႇသၢၼ်ႇလုၼ်ႇသေလႄႈပၼ်ၽိၵ်ႈသိၵ်ႈတီႈ တႃႇဝိတ်ႈ၊ ၵႃႈတီႈၽၢႆႇၼႃႈပီႈဢၢႆႈမၼ်းၸိူဝ်းၼၼ်ႉဢေႃႈ။ သမူၺ်ႇလႃႉ၊ ၵေႃႈပွၵ်ႈၶိုၼ်းၸူးတီႈဝဵင်း ရႃႇမႃႉ၊ သေဢေႃႈ။
ဝိၺိၺ်ႇ ထႃႇဝရႃႉၽြႃး၊ ဢွၵ်ႇသေၵႃႈတီႈ သေႃးလု၊ ၵႂႃႇလႄႈ ဝိၺိၺ်ႇႁၢႆႉဢၼ် ထႃႇဝရႃႉၽြႃး၊ ၸႂ်ႉမႃးၼၼ်ႉယႃႉၵဝ်းမၼ်းဢေႃႈ။-
ၶႃႈမၼ်းၸိူဝ်းၼၼ်ႉလၢတ်ႈတီႈမၼ်းလႄႈဝႃႈ၊ “တူၺ်းၶႃႈလူး။ ဝိၺိၺ်ႇႁၢႆႉဢၼ်ၽြႃးပဵၼ်ၸဝ်ႈၸႂ်ႉမႃးၼၼ်ႉယႃႉၵဝ်းၸဝ်ႈႁဝ်းၶႃႈဢေႃႈ။-
ၸဝ်ႈႁဝ်းၶႅၼ်းတေႃႈမီးဢမိင်ႉတီႈၶႃႈၸဝ်ႈႁဝ်းၶဝ်ၸိူဝ်းၼႆႉႁႂ်ႈလႆႈႁႃဢဝ်ၵေႃႉဢၼ်မေႃလဵတ်းတိင်ႇသဵင်လီသဵင်ဝၢၼ်ၼၼ်ႉမႃးသေၵမ်းၶႃႈ။ ယၢမ်းမိူဝ်ႈဢၼ်ဝိၺိၺ်ႇႁၢႆႉၶဝ်ႈၼႂ်းၸဝ်ႈႁဝ်းၼၼ်ႉႁႂ်ႈၵေႃႉၼၼ်ႉလဵတ်းတိင်ႇမၼ်းလႄႈၸဝ်ႈႁဝ်းတၵ်းၶိုၼ်းသၢၵ်ႈသႃႇမႃးၶႃႈဢေႃႈ၊” ဝႃႈၼင်ႇၼႆဢေႃႈ။
သေႃးလု၊ ၵေႃႈမီးဢမိင်ႉတီႈၶႃႈမၼ်းၸိူဝ်းၼၼ်ႉလႄႈဝႃႈ၊ “ႁႃၵေႃႉဢၼ်မေႃလဵတ်းတိင်ႇသဵင်လီသဵင်ဝၢၼ်ၼၼ်ႉသေလႄႈဢဝ်မႃးၵႃႈတီႈၵဝ်တႃႉ၊” ဝႃႈၼင်ႇၼႆဢေႃႈ။
ၵႃႈၼႂ်းၵူၼ်းဢၼ်ၶႃးၸႃးယူႇတီႈမၼ်းၸိူဝ်းၼၼ်ႉၵေႃႉၼိုင်ႈလဝ်ႈလၢတ်ႈလႄႈဝႃႈ၊ “ၶႃႈၸဝ်ႈလႆႈထူပ်းႁၼ်လုၵ်ႈၸၢႆး ယေႇသႄး၊ ၵူၼ်းဝဵင်း ပႅတ်ႉလႁႅမ်ႇ၊ ဢၼ်မေႃလဵတ်းတိင်ႇၵတ်ႉၶႅၼ်ႇၼႃႇၼၼ်ႉဢေႃႈ။ မၼ်းၼၼ်ႉပဵၼ်ၵေႃႉဢၼ်ၵတ်ႉၶၼ်ႁတ်းႁၢၼ်၊ၵူၼ်းႁၢင်ႈလီဢၼ်ၸၢင်ႈတိုၵ်းသိုၵ်းလႄႈပဵၼ်ၵေႃႉဢၼ်ၸၢင်ႈလၢတ်ႈၸၢင်ႈၸႃဢေႃႈ။ ထႃႇဝရႃႉၽြႃး၊ မီးယူႇလူၺ်ႈၵၼ်တင်းမၼ်းဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ သေႃးလု၊ ပွႆႇၸႂ်ႉၵူၼ်းၵႂႃႇၵႃႈတီႈ ယေႇသႄး၊ လႄႈမီးဢမိင်ႉဝႃႈ၊ “ပွႆႇၸႂ်ႉလုၵ်ႈၸၢႆးမႂ်း တႃႇဝိတ်ႈ၊ ဢၼ်ပဵၼ်ၵူၼ်းလဵင်ႉထိင်းသူဝ်းၼၼ်ႉမႃးၵႃႈတီႈၵဝ်တႃႉ၊” ဝႃႈၼင်ႇၼႆဢေႃႈ။-
ယေႇသႄး၊ ၵေႃႈဢဝ်မႃႉလီႈတူဝ်ၼိုင်ႈဢၼ်တၢင်ႇၶဝ်ႈမုၼ်းတင်းတဝ်ႈၼမ်ႉမၢၵ်ႇၸပိတ်ႉဢိၵ်ႇတင်းပႄႉဢွၼ်ႇတူဝ်ၼိုင်ႈဢၢပ်ႈပၼ်ၼႂ်းမိုဝ်းလုၵ်ႈၸၢႆးမၼ်း တႃႇဝိတ်ႈ၊ သေလႄႈပွႆႇၸႂ်ႉၵႂႃႇၸူးတီႈ သေႃးလု၊ ဢေႃႈ။-
တႃႇဝိတ်ႈ၊ ႁွတ်ႈထိုင်ၵႃႈတီႈ သေႃးလု၊ သေယဝ်ႉ၊ၶဝ်ႈၶႃးၸႃးတီႈမၼ်းဢေႃႈ။ သေႃးလု၊ ႁၵ်ႉမၼ်းၼႃႇလူင်လၢင်လႄႈၶၢၼ်းမၼ်းဝႆႉၼႂ်းဢရႃႇၵူၼ်းဢၼ်ပႃးလၢၵ်ႈၼၢၵ်ႈၸဝ်ႈဢေႃႈ။-
မိူဝ်ႈၼၼ်ႉ၊ သေႃးလု၊ ပွႆႇၸႂ်ႉၵူၼ်းၵႂႃႇတီႈ ယေႇသႄး၊ ႁႂ်ႈယွၼ်းဢၶႂၢင်ႉလႄႈဝႃႈ၊ “ၵဝ်ထုၵ်ႇၸႂ်ၵျိူၵ်ႈၸႂ် တႃႇဝိတ်ႈ၊ ဢေႃႈ။ ႁႂ်ႈမၼ်းၶႃးၸႃးယူႇတီႈၵဝ်သေၵမ်း၊” ဝႃႈၼင်ႇၼႆဢေႃႈ။-
ၸႃႉဢဝ်ၸဵမ်မိူဝ်ႈဝၼ်းၼၼ်ႉလႄႈဝိၺိၺ်ႇႁၢႆႉဢၼ်ၽြႃးပဵၼ်ၸဝ်ႈၸႂ်ႉမႃးၼၼ်ႉၶဝ်ႈၵႃႈၼႂ်း သေႃးလု၊ မိူဝ်ႈလႂ်သေဢမ်ႇဝႃႈ တႃႇဝိတ်ႈ၊ ယိပ်းဢဝ်တိင်ႇမၼ်းလႄႈလဵတ်းဢေႃႈ။ မိူဝ်ႈၼၼ်ႉဝိၺိၺ်ႇႁၢႆႉၸၢင်ႈဢွၵ်ႇလႄႈ သေႃးလု၊ လႆႈတၢင်းဢၼ်သၢၵ်ႈသႃႇမႃးလႄႈယူႇလီၵိၼ်ဝၢၼ်ယူႇဢေႃႈ။
ယၢမ်းၼႆႉၸိုင်၊ၵူၼ်းမဵဝ်း ၽိလိတ်ႉတိ၊ တင်းလၢႆၸုတုမ်ၵၼ်ၵႃႈတီႈဝဵင်း သေႃႇၶေႃႇ၊ ၼႂ်းမိူင်း ယုတႃႉ၊ ႁႂ်ႈလႆႈတိုၵ်းတေႃးလႄႈၶျႃးပၢင်တပ်ႉၵႃႈတီႈဝဵင်း ဢေႇၽတ်ႉတမ်ႇမိမ်း၊ ၼႂ်းဝူင်ႈၵၢင်ဝဵင်း သေႃႇၶေႃႇ၊ တင်းဝဵင်း ဢၸေႇၵႃႇ၊ ဢေႃႈ။-
သေႃးလု၊ တင်းၵူၼ်းမဵဝ်း ဢိသရေး၊ တင်းလၢႆၵေႃႈၸုတုမ်ၵၼ်လႄႈၶျႃးပၢင်တပ်ႉၵႃႈၼႂ်းပၢင်ႇႁူၺ်ႈ ဢေးလႃႇ၊ လႄႈဢွၼ်ၵၼ်မႄးႁႅၼ်းႁၢင်ႈဝႆႉႁႂ်ႈလႆႈတိုၵ်းတေႃးမဵဝ်း ၽိလိတ်ႉတိ၊ ဢေႃႈ။-
ၼင်ႇၼၼ်လႄႈၵူၼ်းမဵဝ်း ၽိလိတ်ႉတိ၊ ၶပ်ႉၶႂၢင်တပ်ႉၶဝ်ဝႆႉၼိူဝ်တႄးလွႆၽၢႆႇၼိုင်ႈ၊ၵူၼ်းမဵဝ်း ဢိသရေး၊ သမ်ႉၶပ်ႉၶႂၢင်တပ်ႉၶဝ်ဝႆႉၼိူဝ်လွႆၽၢႆႇၼိုင်ႈလႄႈၶူင်ႈႁူၺ်ႈၶႅၼ်ႈဝႆႉဝူင်ႈၵၢင်ၶဝ်ဢေႃႈ။
မိူဝ်ႈၼၼ်ႉၵႃႈၼႂ်းတပ်ႉ ၽိလိတ်ႉတိ၊ ၶဝ်ၼၼ်ႉၵူၼ်းသိုၵ်းၵေႃႉၼိုင်ႈဢၼ်လႆႈၸိုဝ်ႈ ၵေႃးလျတ်ႈ၊ ၵူၼ်းဝဵင်း ၵတ်ႉတိ၊ ၼၼ်ႉဢွၵ်ႇမႃးၶဵင်ႇတႃႉၵၼ်တင်းမဵဝ်း ဢိသရေး၊ ဢေႃႈ။ ၵေႃႉၼၼ်ႉတၢင်းသုင်မၼ်းမီးႁူၵ်းသွၵ်ႇပၢႆၶိုပ်ႈလႄႈ၊-
ၼုင်ႈသိူဝ်ႈၶႅပ်းတွင်းလိူင်ဢၼ်ၼမ်ႉၼၵ်းမီးသၢမ်သိပ်းဢဵတ်းၸွႆႉ သေလႄႈတိုဝ်းမွၵ်ႇႁူဝ်တွင်းလိူင်ဝႆႉဢေႃႈ။-
မၼ်းတိုဝ်းသွၵ်းတိၼ်တွင်းလိူင်ယူႇ၊ဢဝ်ႁွၵ်ႇတွင်းလိူင်လႅမ်ႈၼိုင်ႈတၢင်ႇႁူဝ်မႃႇဝႆႉယူႇဢေႃႈ။-
ၵၼ်းႁွၵ်ႇမၼ်းယႂ်ႇပဵင်းထၼ်ႇသီႈပၼ်ႉႁမ်းႁုၵ်ႇလႄႈမၢၵ်ႇႁွၵ်ႇမၼ်းပဵၼ်လဵၵ်းဢၼ်ၼမ်ႉၼၵ်းမၼ်းမီးသီႇၸွႆႉ ဢေႃႈ။ လုၵ်ႈသိုၵ်းၵေႃႉၼိုင်ႈပႃးဢဝ်ၶႅပ်းႁႄႉလၢၵ်ႈၼၢၵ်ႈမၼ်းသေလႄႈၵႂႃႇၽၢႆႇၼႃႈမၼ်းယူႇဢေႃႈ။-
ၵေႃးလျတ်ႈ၊ ၼၼ်ႉၸုၵ်းယူႇသေလႄႈႁွင်ႉပၢဝ်ႇတီႈၵူၼ်းသိုၵ်းတပ်ႉ ဢိသရေး၊ ၶဝ်လႄႈဝႃႈ၊ “သူမႃးမီးယူႇၵႃႈတီႈၼႆႈတႃႇတေႁဵတ်းၵႃႈသင်။ တႃႇတေၶပ်ႉႁၢင်ႈႁဵတ်းသိုၵ်းႁိုဝ်း။ ၵဝ်ၼႆႉပဵၼ်ၵူၼ်း ၽိလိတ်ႉတိ၊ လႄႈသူၼႆႉပဵၼ်ၶႃႈ သေႃးလု၊ ယဝ်ႉ။ ၼႂ်းသူၼၼ်ႉလိူၵ်ႈဢဝ်ၵေႃႉၼိုင်ႈမႃးတိုၵ်းၵၼ်တင်းၵဝ်တႃႉ။-
ပေႃးၵေႃႉၼၼ်ႉပႄႉၵဝ်လႄႈဢဝ်ၵဝ်တၢႆၸိုင်၊ႁဝ်းတၵ်းႁဵတ်းၶႃႈသူဢေႃႈ။ ၵူၺ်းၵႃႈ၊ပေႃးၵဝ်ပႄႉၵေႃႉၼၼ်ႉလႄႈဢဝ်မၼ်းတၢႆၸိုင်၊သူတၵ်းလႆႈႁဵတ်းၶႃႈႁဝ်းဢေႃႈ။-
ၵဝ်မီးယူႇၵႃႈတီႈၼႆႈလႄႈၶဵင်ႇတႃႉၵၼ်တင်းသူမိူဝ်ႈလဵဝ်ၼႆႉယဝ်ႉ။ လိူၵ်ႈဢဝ်ၵူၼ်းၵေႃႉၼိုင်ႈမႃးတိုၵ်းၵဝ်တႃႉ၊” ဝႃႈၼင်ႇၼႆဢေႃႈ။-
သေႃးလု၊ တင်းၵူၼ်းမၼ်းတင်းလၢႆငိၼ်းၵႂၢမ်းၼၼ်ႉလႄႈဢွၼ်ၵၼ်ၵူဝ်ႁႄသၼ်ႇဝႆၼႃႇလူင်လၢင်ဢေႃႈ။
တႃႇဝိတ်ႈ၊ ပဵၼ်လုၵ်ႈၸၢႆး ယေႇသႄး၊ ၵူၼ်းၸိူဝ်ႉၶိူဝ်း ဢေႇၽရတ်ႉ၊ ၵူၼ်းဝဵင်း ပႅတ်ႉလႁႅမ်ႇ၊ မိူင်း ယုတႃႉ၊ ဢေႃႈ။ ယေႇသႄး၊ မီးလုၵ်ႈၸၢႆးပႅတ်ႇၵေႃႉလႄႈၼႂ်းၸူဝ်ႈပၢၼ် သေႃးလု၊ ပဵၼ်ၶုၼ်ႁေႃၶမ်းၼၼ်ႉမၼ်းပဵၼ်ၵေႃႉဢၼ်ဢသၢၵ်ႈထဝ်ႈၵႄႇၼႃႇလူင်လၢင်ယဝ်ႉဢေႃႈ။-
လုၵ်ႈၸၢႆးလူင်သၢမ်ၵေႃႉၸိုင်၊ၸွမ်း သေႃးလု၊ ၵႂႃႇၼႂ်းပၢင်သိုၵ်းယဝ်ႉလႄႈၸိုဝ်ႈသဵင်ၶဝ်ၸမ်ႉ၊လုၵ်ႈတူၼ်ႈပဵၼ် ဢေးလျႃႇၽႃႉ၊ ၵေႃႉတီႈသွင်ပဵၼ် ဢၽိၼတပ်ႉ၊ လႄႈၵေႃႉတီႈသၢမ်ပဵၼ် သၢမ်ႇမႃႇ၊ ဢေႃႈ။-
တႃႇဝိတ်ႈ၊ ပဵၼ်လုၵ်ႈၸၢႆးၵေႃႉလဵၵ်ႉသုတ်းလႄႈ၊ယၢမ်းမိူဝ်ႈဢၼ်ပီႈဢၢႆႈလူင်မၼ်းသၢမ်ၵေႃႉမီးယူႇၵႃႈတီႈ သေႃးလု၊ ၼၼ်ႉၸိုင်၊-
မၼ်းၸၢင်ႈပွၵ်ႈၶိုၼ်းသေၵႃႈတီႈ သေႃးလု၊ လႄႈၵမ်းၵမ်းပွၵ်ႈၵႂႃႇလဵင်ႉထိင်းသူဝ်းပေႃႈၶဝ်ၵႃႈတီႈဝဵင်း ပႅတ်ႉလႁႅမ်ႇ၊ ဢေႃႈ။
ၵေႃးလျတ်ႈ၊ ၼၼ်ႉဢွၵ်ႇမႃးၶဵင်ႇတႃႉၵူၼ်းမဵဝ်း ဢိသရေး၊ ၶိင်ႇၵၢင်ၼႂ်ပွၵ်ႈၼိုင်ႈ၊ၶိင်ႇႁူဝ်ၶမ်ႈပွၵ်ႈၼိုင်ႈ၊ယူႇၸိူဝ်ႉၼင်ႇၼၼ်သီႇသိပ်းဝၼ်းယဝ်ႉဢေႃႈ။
မီးဝၼ်းၼိုင်ႈ ယေႇသႄး၊ လၢတ်ႈတီႈ တႃႇဝိတ်ႈ၊ လႄႈဝႃႈ၊ “ဢဝ်ၶဝ်ႈတႅၵ်ႇၸဵတ်းၸွႆႉ ဢိၵ်ႇတင်းၶဝ်ႈမုၼ်းသိပ်းႁူၺ်ႇၸိူဝ်းၼႆႉၵႂႃႇၵႃႈတီႈပီႈဢၢႆႈမႂ်းၸိူဝ်းၼၼ်ႉၶၼ်ၶၼ်ၽႂ်းၽႂ်းၵႃႈတီႈပၢင်တပ်ႉၼၼ်ႉတႃႉ။-
ၶႆၼမ်ႉၼူမ်းသိပ်းၵွၼ်ႈၼႆႉၵေႃႈဢဝ်ၵႂႃႇပၼ်တီႈၸဝ်ႈၵွၼ်းတပ်ႉသိုၵ်းၼၼ်ႉတႃႉ။ လူတူၺ်းလွင်ႈဢၼ်ပီႈဢၢႆႈမႂ်းၸိူဝ်းၼၼ်ႉယူႇလီၵိၼ်ဝၢၼ်ယူႇႁိုဝ်ၼၼ်ႉသေလႄႈဢဝ်သေၸိူဝ်ႉသေမဵဝ်းမႃးႁႂ်ႈပဵၼ်သၢၵ်ႈသေႇလွင်ႈဢၼ်လႆႈထူပ်းႁၼ်ၶဝ်ယူႇလီၵိၼ်ဝၢၼ်ယူႇၼၼ်ႉတႃႉ။-
ၶုၼ်ႁေႃၶမ်း သေႃးလု၊ တင်းပီႈဢၢႆႈမႂ်းၸိူဝ်းၼၼ်ႉ၊ဢိၵ်ႇတင်းၵူၼ်းမဵဝ်း ဢိသရေး၊ တင်းသဵင်ႈတင်းလူင်မီးယူႇၵႃႈတီႈပၢင်ႇႁူၺ်ႈ ဢေးလႃႇ၊ လႄႈတိုၵ်းတေႃးၵၼ်တင်းၵူၼ်းမဵဝ်း ၽိလိတ်ႉတိ၊ ၸိူဝ်းၼၼ်ႉယူႇဢေႃႈ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ လုၵ်ႉၶိင်ႇၵၢင်ၼႂ်ၸဝ်ႉၸဝ်ႉသေလႄႈၸႂ်ႉၵူၼ်းသေၵေႃႉၵေႃႉပႂ်ႉထိင်းသူဝ်းသေယဝ်ႉ၊ဢဝ်တၢင်းၵိၼ်တၢင်းၶူပ်းၸိူဝ်းၼၼ်ႉၵႂႃႇၸွမ်းၵႃႈၼင်ႇဢၼ်ပေႃႈမၼ်း ယေႇသႄး၊ သင်ႇလၢတ်ႈဝႆႉၼၼ်ႉဢေႃႈ။ မၼ်းႁွတ်ႈထိုင်ၵႂႃႇၵႃႈတီႈပၢင်တပ်ႉယၢမ်းမိူဝ်ႈဢၼ်ၵူၼ်းသိုၵ်း ဢိသရေး၊ တင်းလၢႆၶီႇၵႂႃႇၵႃႈတီႈၼႃႈသိုၵ်းယူႇလႄႈဢွၼ်ၵၼ်ႁဵတ်းသဵင်ဢၼ်တိုၵ်းသိုၵ်းလႄႈႁွင်ႉသႅၼ်ႇယူႇဢေႃႈ။-
ၵူၼ်းသိုၵ်းတပ်ႉ ၽိလိတ်ႉတိ၊ ဢိၵ်ႇတင်းၵူၼ်းသိုၵ်းတပ်ႉ ဢိသရေး၊ ဢွၼ်ၵၼ်ဢဝ်တီႈယူႇႁၢင်ႈႁႅၼ်းပုၼ်ႈၼႃႈသိုၵ်းတေႃႇၼႃႈၵၼ်ယူႇဢေႃႈ။-
တႃႇဝိတ်ႈ၊ ၵေႃႈဢဝ်တၢင်းၵိၼ်တၢင်းၶူပ်းၸိူဝ်းၼၼ်ႉဢၢပ်ႈဝႆႉၼႂ်းမိုဝ်းၵေႃႉဢၼ်ၵွၼ်းၶူဝ်းလဵင်းၼၼ်ႉသေယဝ်ႉ၊ၶုၼ်ႇလႅၼ်ႈၵႂႃႇၵႃႈၼႂ်းမုၵ်ႉၸိူဝ်းၵူၼ်းသိုၵ်းၼၼ်ႉလႄႈတၵ်ႉလၢတ်ႈပီႈဢၢႆႈမၼ်းၸိူဝ်းၼၼ်ႉဢေႃႈ။-
ယၢမ်းမိူဝ်ႈဢၼ်မၼ်းယင်းတိုၵ်ႉလၢတ်ႈတေႃႇၵၼ်တင်းပီႈဢၢႆႈမၼ်းၸိူဝ်းၼၼ်ႉယူႇၼၼ်ႉ ၵေႃးလျတ်ႈ၊ ဢွၵ်ႇမႃးပႃႈၼႃႈသေယဝ်ႉ၊လၢတ်ႈၵႂၢမ်းဢၼ်ၶဵင်ႇဢၼ်တႃႉတေႃႇမဵဝ်း ဢိသရေး၊ ၸိူဝ်ႉၼင်ႇဢၼ်မၼ်းယၢမ်ႈႁဵတ်းသေႇသေႇၼၼ်ႉလႄႈ တႃႇဝိတ်ႈ၊ လႆႈငိၼ်းၵႂၢမ်းၼၼ်ႉဢေႃႈ။-
မိူဝ်ႈဢၼ်မဵဝ်း ဢိသရေး၊ ႁၼ် ၵေႃးလျတ်ႈ၊ ၼၼ်ႉၸိုင်၊ၶဝ်ၵူဝ်ႁႄၼႃႇလႄႈဢွၼ်ၵၼ်ဢွၵ်ႇပၢႆႈသၼ်ႇသၼ်ႇသၢႆသၢႆဢေႃႈ။-
ၶဝ်ၼင်ႇၵၼ်ၵၼ်လၢတ်ႈတီႈၵၼ်လႄႈဝႃႈ၊ “သူလႆႈႁၼ်ၵေႃႉၼၼ်ႉႁိုဝ်း။ ထွမ်ႇဢဝ်ၵႂၢမ်းဢၼ်မၼ်းၶဵင်ႇတႃႉၵၼ်တင်းႁဝ်းၼၼ်ႉလူး။ ၶုၼ်ႁေႃၶမ်း သေႃးလု၊ ဝႆႉၵတိဝႃႈတၵ်းပၼ်သူးလၢပ်ႈယႂ်ႇၼႃႇတီႈၵေႃႉဢၼ်ဢဝ်မၼ်းတၢႆလႆႈၼၼ်ႉၵူၺ်းဢမ်ႇၵႃး၊ယင်းတၵ်းဢဝ်လုၵ်ႈယိင်းသၢဝ်ၸဝ်ႈပၼ်ဢေႃႈ။ ပီႈၼွင်ႉၸိူဝ်ႉၶိူဝ်းပေႃႈမၼ်းတင်းလၢႆၵေႃႈတၵ်းပၼ်ႁႂ်ႈလွတ်ႈတၢင်းဢၼ်ထၢမ်းၶွၼ်ႇလူးၵွၼ်ႇဢေႃႈ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ တွင်ႈထၢမ်ၵူၼ်းၸိူဝ်းဢၼ်မီးယူႇႁိမ်းမၼ်းၼၼ်ႉလႄႈဝႃႈ၊ “ၵေႃႉဢၼ်ဢဝ်ၵူၼ်း ၽိလိတ်ႉတိ၊ ၵေႃႉၼႆႉတၢႆလႄႈဢမ်ႇႁႂ်ႈၵူၼ်းမဵဝ်း ဢိသရေး၊ လႆႈဢူၵ်းလႆႈဢၢႆၼၼ်ႉတၵ်းလႆႈဢၵျူဝ်းၸိူဝ်ႉၼင်ႇႁိုဝ်။ ၵူၼ်းမဵဝ်း ၽိလိတ်ႉတိ၊ ဢၼ်ဢမ်ႇၶၢမ်ႇမၢင်ႇၵလႃႇပၢတ်ႇပၢႆၼင်ၼၼ်ႉပဵၼ်ၵေႃႉၸိူဝ်ႉၼင်ႇႁိုဝ်လႄႈလႆႈသႄႉသွမ်းတပ်ႉသိုၵ်းၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉ၊” ဝႃႈၼင်ႇၼႆဢေႃႈ။-
ၶဝ်ၸိူဝ်းၼၼ်ႉၵေႃႈၶိုၼ်းလၢတ်ႈလႄႈဝႃႈ၊ၵေႃႉဢၼ်ဢဝ် ၵေႃးလျတ်ႈ၊ တၢႆလႆႈၼၼ်ႉ၊တၵ်းလႆႈႁပ်ႉဢဝ်ဢၵျူဝ်းၸိူဝ်းဢၼ်ဝႃႈမႃးၼၼ်ႉဢေႃႈ။
ဢေးလျႃႇၽႃႉ၊ ဢၼ်ပဵၼ်ပီႈဢၢႆႈလူင်မၼ်းၼၼ်ႉလႆႈငိၼ်းမၼ်းလၢတ်ႈတေႃႇၵၼ်တင်းၵူၼ်းၸိူဝ်းၼၼ်ႉသေယဝ်ႉ၊ၶႂ်ႈၸႃႉ တႃႇဝိတ်ႈ၊ လႄႈလၢတ်ႈဝႃႈ၊ “မႂ်းလူင်းမႃးႁဵတ်းၵႃႈသင်ယူႇၵႃႈတီႈၼႆႈ။ မႂ်းၸႂ်ႉၽူႈလႂ်ပႂ်ႉထိင်းသူဝ်းမႂ်းဢၼ်မီးၵႃႈၼႂ်းထိူၼ်ႇၼၼ်ႉ။ ၵဝ်ႁုတၢင်းဢၼ်မႂ်းမႃႇၼႃႉယႂ်ႇ၊တၢင်းဢၼ်ႁူဝ်ၸႂ်မႂ်းႁၢႆႉယုတ်ႈၼၼ်ႉယူႇဢေႃႈ။ မႂ်းလူင်းမႃးႁႂ်ႈလႆႈပႂ်ႉတူၺ်းပွႆးတိုၵ်းသိုၵ်းလူင်ပႄႇ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ၵေႃႈလၢတ်ႈလႄႈဝႃႈ၊ “မိူဝ်ႈလဵဝ်ၼႆႉၵဝ်ၶႃႈလႆႈႁဵတ်းမႅၼ်ႈၵႃႈသင်ယဝ်ႉ။ ၵဝ်ၶႃႈဢမ်ႇမီးဢၶႂၢင်ႉဢၼ်တွင်ႈထၢမ်ႁိုဝ်း၊” ဝႃႈၼင်ႇၼႆသေယဝ်ႉ၊-
ဝၢႆႇၸူးတီႈပိူၼ်ႈတၢင်ႇၵေႃႉလႄႈတွင်ႈထၢမ်ၵႂၢမ်းၶေႃႈၵဝ်ႇၼၼ်ႉဢေႃႈ။ မၼ်းတွင်ႈထၢမ်တူၺ်းပွၵ်ႈလႂ်သေၵေႃႈမၼ်းလႆႈငိၼ်းၵႂၢမ်းတွပ်ႇၶေႃႈလဵဝ်ၵူၺ်းဢေႃႈ။
မိူဝ်ႈဢၼ်ပိူၼ်ႈငိၼ်းၵႂၢမ်းဢၼ် တႃႇဝိတ်ႈ၊ လၢတ်ႈၸိူဝ်ႉၼင်ႇၼၼ်ၼၼ်ႉၸိုင်၊ၶဝ်ၵႂႃႇလဝ်ႈလၢတ်ႈထိုင်တီႈၶုၼ်ႁေႃၶမ်း သေႃးလု၊ သေယဝ်ႉ၊ သေႃးလု၊ ႁွင်ႉဢဝ်မၼ်းဢေႃႈ။-
တႃႇဝိတ်ႈ၊ ၵေႃႈလဝ်ႈလၢတ်ႈတီႈ သေႃးလု၊ လႄႈဝႃႈ၊ “ၸဝ်ႈမုၼ်ယႂ်ႇၶုၼ်ႁေႃၶမ်းတီႈၶႃႈ။ ယႃႇပေႁႂ်ႈၽူႈလႂ်သေၵေႃႉသေၵူၼ်းလႆႈၸႂ်လုၵွပ်ႈၵူၼ်းၵေႃႉၼၼ်ႉသေၵမ်းတီႈၶႃႈ။ ၶႃႈၸဝ်ႈႁဝ်းတၵ်းၵႂႃႇတိုၵ်းတေႃးမၼ်းဢေႃႈ၊” ဝႃႈၼင်ႇၼႆဢေႃႈ။
သေႃးလု၊ လၢတ်ႈလႄႈဝႃႈ၊ “မႂ်းဢမ်ႇၵႂႃႇတိုၵ်းမၼ်းလႆႈၵူၺ်း။ မႂ်းၼႆႉယင်းလဵၵ်ႉယင်းၼုမ်ႇယူႇလႄႈမၼ်းၼၼ်ႉၸမ်ႉ၊ပဵၼ်ၵူၼ်းသိုၵ်းမႃးၸူဝ်ႈဢသၢၵ်ႈမၼ်းယဝ်ႉ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈမုၼ်ယႂ်ႇၶုၼ်ႁေႃၶမ်းတီႈၶႃႈ။ ၶႃႈၸဝ်ႈႁဝ်းလဵင်ႉထိင်းသူဝ်းပေႃႈၶႃႈၸဝ်ႈတီႈၶႃႈဢေႃႈ။ မိူဝ်ႈလႂ်ဝၼ်းလႂ်သေဢမ်ႇဝႃႈ၊သၢင်ႇသီႈလႂ်၊မီလႂ်၊မႃးၶူပ်းၵၢပ်ႈဢဝ်သူဝ်းဢွၼ်ၸိုင်၊-
ၶႃႈၸဝ်ႈႁဝ်းလိုပ်ႈၸွမ်းလမ်းၸွမ်းၵႂႃႇဢဝ်တၢႆပႅတ်ႈလႄႈၵႄႇၼုၵ်ႈဢဝ်သူဝ်းၶိုၼ်းမႃးဢေႃႈ။ မိူဝ်ႈဢၼ်သၢင်ႇသီႈလႂ်၊မီလႂ်၊မႃးႁဵတ်းတီႈၶႃႈၸဝ်ႈႁဝ်းၼၼ်ႉၸိုင်၊ၶႃႈၸဝ်ႈႁဝ်းမိပ်ႇလွတ်ႇၶေႃးမၼ်းလႄႈထုပ်ႉတၢႆပႅတ်ႈၶႃႈဢေႃႈ။-
ၶႃႈၸဝ်ႈႁဝ်းၼႆႉဢဝ်တၢႆသၢင်ႇသီႈလႂ်၊တင်းမီလႂ်တီႈၶႃႈဢေႃႈ။ မိူၼ်ၸိူဝ်ႉၼင်ႇၼၼ်ၶႃႈၸဝ်ႈႁဝ်းတၵ်းဢဝ်တၢႆၵူၼ်းမဵဝ်း ၽိလိတ်ႉတိ၊ ၵေႃႉဢၼ်ဢမ်ႇၶၢမ်ႇမၢင်ႇၵလႃႇပၢတ်ႇပၢႆၼင်၊ဢၼ်သႄႉသွမ်းတပ်ႉသိုၵ်းၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼႆႉဢမၢၼ်ႇၶၼ်ပဵၼ်ဢေႃႈ။-
ထႃႇဝရႃႉၽြႃး၊ ၵႄႇသႄႇၶျွတ်ႈဢဝ်ၶႃႈၸဝ်ႈႁဝ်းလွတ်ႈသေၵႃႈတီႈသၢင်ႇသီႈလႂ်၊မီလႂ်၊တီႈၶႃႈယဝ်ႉ။ မၼ်းၸဝ်ႈသမ်ႉတၵ်းၵႄႇသႄႇၶျွတ်ႈဢဝ်ၶႃႈၸဝ်ႈႁဝ်းလွတ်ႈသေၵႃႈတီႈၵူၼ်း ၽိလိတ်ႉတိ၊ ၼႆႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။ သေႃးလု၊ ၵေႃႈလၢတ်ႈလႄႈဝႃႈ၊ “ၵႂႃႇတႃႉ။ ႁႂ်ႈ ထႃႇဝရႃႉၽြႃး၊ မီးယူႇလူၺ်ႈၵၼ်တင်းမႂ်းသေၵမ်းလူၺ်ႈ၊” ဝႃႈၼင်ႇၼႆဢေႃႈ။-
သေႃးလု၊ ဢဝ်ၶူဝ်းသိုၵ်းတူဝ်ၸဝ်ႈၵဝ်ႇၼၼ်ႉႁႂ်ႈ တႃႇဝိတ်ႈ၊ ၼုင်ႈမႆသေယဝ်ႉ၊ဢဝ်မွၵ်ႇႁူဝ်တွင်းလိူင်တိုဝ်းပၼ်ၵႃႈၼိူဝ်ႁူဝ်မၼ်းလႄႈဢဝ်သိူဝ်ႈၶႅပ်းလဵၵ်းထၢပ်ႈသႂ်ႇပၼ်ဢေႃႈ။-
တႃႇဝိတ်ႈ၊ သမ်ႉဢဝ်လၢပ်ႇၸဝ်ႈမတ်ႉၸပ်းၶူဝ်းၼုင်ႈမၼ်းသေယဝ်ႉ၊ၶတ်းၸႂ်သေၸၢမ်းပႆတူၺ်းဢေႃႈ။ ၵူၺ်းၵႃႈ၊ၵွပ်ႈပိူဝ်ႈဢၼ်မၼ်းဢမ်ႇပႆႇတွၼ်ႉယၢမ်ႈလႆႈၸၢမ်းတူၺ်းလၢၵ်ႈၼၢၵ်ႈၼၼ်ႉလႄႈမၼ်းဢမ်ႇပႆလႆႈ။ မၼ်းၸင်ႇလဝ်ႈလၢတ်ႈတီႈ သေႃးလု၊ လႄႈဝႃႈ၊ “ၶႃႈၸဝ်ႈၼုင်ႈမႆၸိူဝ်းၼႆႉလႄႈဢမ်ႇၸၢင်ႈတိုၵ်းတေႃးလႆႈတီႈၶႃႈ။ ၶႃႈၸဝ်ႈဢမ်ႇတွၼ်ႉလႆႈၼုင်ႈသေပွၵ်ႈတီႈၶႃႈ၊” ဝႃႈၼင်ႇၼႆသေယဝ်ႉ၊မၼ်းၶိုၼ်းၵႄႈထွတ်ႇသေဢေႃႈ။-
မၼ်းၶိုၼ်းဢဝ်ၶွၼ်ႉတဝ်ႉလဵင်ႉသူဝ်းမၼ်းသေယဝ်ႉ၊လိူၵ်ႈၵဵပ်းဢဝ်မၢၵ်ႇႁိၼ်ဢၼ်လိူမ်ႈလီလွမ်လီႁႃႈလုၵ်ႈသေၵႃႈၼႂ်းၼမ်ႉႁွင်ႈသေယဝ်ႉ၊ဢဝ်သႂ်ႇၵႃႈၼႂ်းထူင်မၼ်းဢေႃႈ။ မၼ်းယိပ်းၵမ်ၵၢင်ႇၵူင်မၼ်းလီလီသေလႄႈဢွၵ်ႇၵႂႃႇႁႂ်ႈလႆႈႁူပ်ႉထူပ်း ၵေႃးလျတ်ႈ၊ ဢေႃႈ။
မိူဝ်ႈၼၼ်ႉ၊ၵူၼ်း ၽိလိတ်ႉတိ၊ ၼၼ်ႉၸႂ်ႉၵူၼ်းဢၼ်ပႃးၶႅပ်းႁႄႉလၢၵ်ႈၼၢၵ်ႈမၼ်းၼၼ်ႉပႆၵႂႃႇတၢင်းၼႃႈမၼ်းယူႇသေလႄႈသုတ်ႉၸပ်းသုတ်ႉၸူးတီႈ တႃႇဝိတ်ႈ၊ မႃးဢေႃႈ။-
မိူဝ်ႈဢၼ်မၼ်းတူၺ်း တႃႇဝိတ်ႈ၊ လီလီၼၼ်ႉႁုႁၼ် တႃႇဝိတ်ႈ၊ ပဵၼ်ၵူၼ်းၼုမ်ႇလႄႈမီးႁၢင်ႈၽၢင်ဢၼ်ႁၢင်ႈလီဢေႃႈ။ မၼ်းထၢင်ႇလဵၵ်ႉၼိူဝ် တႃႇဝိတ်ႈ၊ ဢေႃႈ။-
မၼ်းၸင်ႇလၢတ်ႈတီႈ တႃႇဝိတ်ႈ၊ လႄႈဝႃႈ၊ “မႂ်းထၢင်ႇၵဝ်ပဵၼ်မႃလႄႈမႂ်းပႃးဢဝ်ၶွၼ်ႉၼၼ်ႉမႃးၸူးတီႈၵဝ်ႁိုဝ်း၊” ဝႃႈၼင်ႇၼႆသေယဝ်ႉ၊ဢဝ်တင်းၽြႃးမၼ်းလႄႈၵိၼ်ႇဝႃႈ တႃႇဝိတ်ႈ၊ ဢေႃႈ။-
မၼ်းၶဵင်ႇတႃႉ တႃႇဝိတ်ႈ၊ လႄႈဝႃႈ၊ “မႃးၸူးတီႈၵဝ်တႃႉ။ ၵဝ်တၵ်းဢဝ်ၼိူဝ်ႉမႂ်းဢွႆႇႁႂ်ႈၼူၵ်ႉတင်းတူဝ်ထိူၼ်ႇၵိၼ်ဢေႃႈ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ၵေႃႈလၢတ်ႈလႄႈဝႃႈ၊ “မႂ်းပႃးဢဝ်လၢပ်ႇ၊ႁွၵ်ႇ၊ၶၢၵ်ႇလႅမ်လႄႈမႃးၸူးတီႈၵဝ်ဢေႃႈ။ ၵဝ်ၸိုင်၊ပႃးဢဝ်ၼႃႇမႃႉၸိုဝ်ႈသဵင် ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ဢၼ်မႂ်းသႄႉသွမ်းၼၼ်ႉမႃးၸူးတီႈမႂ်းဢေႃႈ။-
ထႃႇဝရႃႉၽြႃး၊ တၵ်းဢဝ်မႂ်းဢၢပ်ႈပၼ်ၼႂ်းမိုဝ်းၵဝ်မိူဝ်ႈၼႆႉယဝ်ႉ။ ၵဝ်တၵ်းတိုၵ်းပႄႉမႂ်းလႄႈတႅပ်းဢဝ်ႁူဝ်မႂ်းယဝ်ႉၸင်ႇဢဝ်ၼိူဝ်ႉၵူၼ်း ၽိလိတ်ႉတိ၊ ၸိူဝ်းၼႆႉဢွႆႇတီႈၼူၵ်ႉတင်းတူဝ်ထိူၼ်ႇလႂ်ဢေႃႈ။ ၼင်ႇၼၼ်လႄႈၵူၼ်းလိၼ်မိူင်းတင်းသဵင်ႈတင်းလူင်တၵ်းႁုလွင်ႈဢၼ်ၽြႃးပဵၼ်ၸဝ်ႈမီးၼႂ်းၵူၼ်းမဵဝ်း ဢိသရေး၊ ၼၼ်ႉဢေႃႈ။-
ၼႆႉၵူၺ်းဢမ်ႇၵႃး၊ပိူၼ်ႈတၵ်းႁုႁၼ်လွင်ႈဢၼ် ထႃႇဝရႃႉၽြႃး၊ ဢမ်ႇလူဝ်ႇဢဝ်လၢပ်ႇ၊ဢဝ်ႁွၵ်ႇလႄႈၵႄႇသႄႇၶျွတ်ႈဢဝ်ၵူၼ်းမၼ်းၸဝ်ႈၼၼ်ႉဢေႃႈ။ မၼ်းၸဝ်ႈပဵၼ်ၸဝ်ႈဢၼ်ဢွင်ႇသိုၵ်းၼႂ်းၼႃႈသိုၵ်းလႄႈတၵ်းဢဝ်သူတင်းမူတ်းဢၢပ်ႈပၼ်ၼႂ်းမိုဝ်းႁဝ်းဢေႃႈ၊” ဝႃႈၼင်ႇၼႆဢေႃႈ။
ၵေႃးလျတ်ႈ၊ ၼၼ်ႉတႄႇၸႃႉသုတ်ႉၶိုၼ်ႈၸူးတီႈ တႃႇဝိတ်ႈ၊ မႃးထႅင်ႈယူႇလႄႈ တႃႇဝိတ်ႈ၊ ၶုၼ်ႇလႅၼ်ႈၵႂႃႇၸူးတီႈတပ်ႉ ၽိလိတ်ႉတိ၊ ၶၼ်ၽႂ်းၼႃႇႁႂ်ႈလႆႈထူပ်းၺႃးမၼ်းဢေႃႈ။-
မၼ်းၸူၵ်းဢဝ်မၢၵ်ႇႁိၼ်လုၵ်ႈၼိုင်ႈသေယဝ်ႉ၊ပိုတ်းသႂ်ႇၼႃႈၽၢၵ်ႇ ၵေႃးလျတ်ႈ၊ တႅၵ်ႇၶဝ်ႈၵႂႃႇထိုင်ၵႃႈၼႂ်းလုပ်ႇႁူဝ်မၼ်းလႄႈမၼ်းၼၼ်ႉလူမ်ႉတူၵ်းၵႂႃႇၵႃႈၼိူဝ်လိၼ်ဢေႃႈ။-
ၼင်ႇၼၼ်လႄႈ တႃႇဝိတ်ႈ၊ ယင်းဢမ်ႇပႃးလၢပ်ႇသေမၢၵ်ႈ၊ၵူၺ်းဢဝ်ၵၢင်ႇၵူင်တင်းမၢၵ်ႇႁိၼ်လုၵ်ႈၼိုင်ႈသေလႄႈပႄႉၼႅင်ႇဢဝ်တၢႆပႅတ်ႈ ၵေႃးလျတ်ႈ၊ ဢေႃႈ။-
တႃႇဝိတ်ႈ၊ ၵေႃႈၶုၼ်ႇလႅၼ်ႈၵႂႃႇလႄႈဢဝ်တိၼ်ယဵပ်ႇၵူၼ်း ၽိလိတ်ႉတိ၊ ၼၼ်ႉသေယဝ်ႉ၊ထွတ်ႇဢဝ်လၢပ်ႇ ၵေႃးလျတ်ႈ၊ လႄႈတႅပ်းႁူဝ်မၼ်းသေဢဝ်တၢႆပႅတ်ႈဢေႃႈ။ မိူဝ်ႈဢၼ်ၵူၼ်း ၽိလိတ်ႉတိ၊ တင်းလၢႆႁၼ်ၵူၼ်းႁတ်းၵူၼ်းႁၢၼ်ၶဝ်ၼၼ်ႉတၢႆယဝ်ႉၼၼ်ႉၸိုင်၊ဢွၼ်ၵၼ်လႅၼ်ႈဢွၵ်ႇပၢႆႈၵႂႃႇဢေႃႈ။-
ၵူၼ်းမဵဝ်း ဢိသရေး၊ ဢိၵ်ႇတင်းၵူၼ်းမဵဝ်း ယုတႃႉ၊ တင်းလၢႆႁုၼ်ႈႁိူဝ်ႈယူႇသေလႄႈဢွၼ်ၵၼ်လိုပ်ႈလမ်းၸွမ်းၵူၼ်း ၽိလိတ်ႉတိ၊ ၸိူဝ်းၼၼ်ႉတေႃႇထိုင်ႁွတ်ႈဝဵင်း ၵတ်ႉတိ၊ ဢိၵ်ႇတင်းတေႃႇထိုင်ႁွတ်ႈၽၵ်းတူဝဵင်း ဢေႇၵရုၼ်ႇ၊ ဢေႃႈ။ ၵူၼ်း ၽိလိတ်ႉတိ၊ ဢၼ်တိူဝ်ႉမၢတ်ႇၸိူဝ်းၼၼ်ႉလူမ်ႉတၢႆၸွမ်းသဵၼ်ႈတၢင်းၵႂႃႇၸႃႉဢဝ်တီႈဝဵင်း သႃႇရိမ်း၊ တေႃႇထိုင်ႁွတ်ႈဝဵင်း ၵတ်ႉတိ၊ တင်းဝဵင်း ဢေႇၵရုၼ်ႇ၊ ဢေႃႈ။-
ၵူၼ်း ဢိသရေး၊ ၸိူဝ်းၼၼ်ႉမိူဝ်ႈဢၼ်ၶိုၼ်းပွၵ်ႈသေၵႃႈတီႈဢၼ်လိုပ်ႈၸွမ်းလမ်းၸွမ်းၼၼ်ႉမႃးၸိုင်၊ၶဝ်ႁိမ်ႁူင်ႇဢဝ်ၵႃႈၼႂ်းတပ်ႉၶဝ်ၼၼ်ႉမႃးဢေႃႈ။-
တႃႇဝိတ်ႈ၊ ဢဝ်ၵွၵ်းႁူဝ် ၵေႃးလျတ်ႈ၊ ၼၼ်ႉပႃးၵႂႃႇၵႃႈတီႈဝဵင်း ယေႇရုသလႅမ်ႇ၊ သေယဝ်ႉ၊ဢဝ်ၶိူင်ႈလၢၵ်ႈၼၢၵ်ႈ ၵေႃးလျတ်ႈ၊ ၸိူဝ်းၼၼ်ႉသိမ်းဝႆႉၵႃႈၼႂ်းသုမ်ႉထဵင်မၼ်းဢေႃႈ။
မိူဝ်ႈဢၼ် သေႃးလု၊ ႁၼ် တႃႇဝိတ်ႈ၊ ဢွၵ်ႇၵႂႃႇႁႂ်ႈလႆႈတိုၵ်း ၵေႃးလျတ်ႈ၊ ၼၼ်ႉၸိုင်၊ထၢမ်တီႈၸဝ်ႈၵွၼ်းတပ်ႉသိုၵ်းလူင်မၼ်း ဢပ်ႉပၼႃး၊ လႄႈဝႃႈ၊ “ ဢပ်ႉပၼႃး၊ ႟။ မၼ်းပဵၼ်လုၵ်ႈၸၢႆးၽူႈလႂ်၊” ဝႃႈၼင်ႇၼႆလႄႈ။ ဢပ်ႉပၼႃး၊ ၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈမုၼ်ယႂ်ႇၶုၼ်ႁေႃၶမ်းတီႈၶႃႈ။ ၶႃႈၸဝ်ႈဢမ်ႇႁုၸၵ်းမၼ်းတီႈၶႃႈ၊” ဝႃႈၼင်ႇၼႆဢေႃႈ။
သေႃးလု၊ ၵေႃႈ မီးဢမိင်ႉလႄႈဝႃႈ၊ “ၵႂႃႇႁႃထၢမ်တူၺ်းႁႂ်ႈလႆႈႁုမႃးတႃႉ၊” ဝႃႈၼင်ႇၼႆဢေႃႈ။
မိူဝ်ႈဢၼ် တႃႇဝိတ်ႈ၊ ဢဝ် ၵေႃးလျတ်ႈ၊ တၢႆယဝ်ႉလႄႈပွၵ်ႈၶိုၼ်းမႃးၸူးတီႈပၢင်တပ်ႉယူႇၼၼ်ႉ ဢပ်ႉပၼႃး၊ ႁွင်ႉဢဝ် တႃႇဝိတ်ႈ၊ ၶဝ်ႈၸူးတီႈ သေႃးလု၊ ဢေႃႈ။ တႃႇဝိတ်ႈ၊ ယင်းတိုၵ်ႉၵမ်ႁိဝ်ႈၵွၵ်းႁူဝ် ၵေႃးလျတ်ႈ၊ ဝႆႉယူႇဢေႃႈ။-
သေႃးလု၊ ၵေႃႈထၢမ်လႄႈဝႃႈ၊ “ၵူၼ်းၼုမ်ႇဢွၼ်ႇ႟။ မႂ်းပဵၼ်လုၵ်ႈၸၢႆးၽူႈလႂ်၊” ဝႃႈၼင်ႇၼႆလႄႈ တႃႇဝိတ်ႈ၊ ၶိုၼ်းလဝ်ႈလၢတ်ႈလႄႈဝႃႈ၊ “ၶႃႈၸဝ်ႈပဵၼ်လုၵ်ႈၸၢႆးၵေႃႉဢၼ်ပဵၼ်ၶႃႈ၊ၸဝ်ႈႁဝ်း ယေႇသႄး၊ ၵူၼ်းဝဵင်း ပႅတ်ႉလႁႅမ်ႇ၊ တီႈၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ် တႃႇဝိတ်ႈ၊ တင်း သေႃးလု၊ လၢတ်ႈတေႃႇၵၼ်ယဝ်ႉတူဝ်ႈယဝ်ႉၼၼ်ႉၸိုင်၊ ယေႃးၼႀၼ်ႇ၊ လုၵ်ႈၸၢႆး သေႃးလု၊ ၼၼ်ႉမီးၸႂ်ဢၼ်ႁၵ်ႉပႅင်း တႃႇဝိတ်ႈ၊ ၼႃႇလူင်လၢင်လႄႈႁၵ်ႉပႅင်းမိူၼ်ႁၵ်ႉတူဝ်ၸဝ်ႈၵဝ်ႇဢေႃႈ။-
သေႃးလု၊ ၵေႃႈဢဝ် တႃႇဝိတ်ႈ၊ ဝႆႉၼႂ်းဝၼ်းၼၼ်ႉၵမ်းလဵဝ်လႄႈ၊ၵမ်းလိုၼ်းဢမ်ႇႁႂ်ႈမၼ်းမိူဝ်းၶိုၼ်းတီႈႁိူၼ်းပေႃႈမၼ်းယဝ်ႉဢေႃႈ။-
ယေႃးၼႀၼ်ႇ၊ ၵေႃႈတိူင်ႇဝႃႈၵတိႁႂ်ႈလႆႈပဵၼ်ၵေႃႉသႄႈၵၼ်တႃႇသေႇလူၺ်ႈၵၼ်တင်း တႃႇဝိတ်ႈ၊ ၵွပ်ႈပိူဝ်ႈဢၼ်ႁၵ်ႉမၼ်းၼႃႇလူင်လၢင်ၼၼ်ႉဢေႃႈ။-
မၼ်းထွတ်ႇဢဝ်သိူဝ်ႈယၢဝ်းဢၼ်မၼ်းၼုင်ႈယူႇၼၼ်ႉသေလႄႈပၼ်တီႈ တႃႇဝိတ်ႈ၊ ဢိၵ်ႇတင်းၶိူင်ႈၶူဝ်းသိုၵ်းမၼ်း၊လၢပ်ႇမၼ်း၊ၵၢင်ႇမၼ်း၊သၢႆဢႅဝ်မၼ်းၸိူဝ်းၼၼ်ႉဢေႃႈ။-
တႃႇဝိတ်ႈ၊ ၼၼ်ႉၵႃႈဢၼ် သေႃးလု၊ ပွႆႇၸႂ်ႉၵႂႃႇႁဵတ်းၼႃႈၵၢၼ်ဢၼ်လႂ်သေဢမ်ႇဝႃႈမၼ်းၵႂႃႇပွင်ႁဵတ်းယဝ်ႉတူဝ်ႈလီငၢမ်းၼႃႇလူင်လၢင်လႄႈ သေႃးလု၊ ၶၢၼ်းမၼ်းဝႆႉၼႂ်းဢရႃႇဢၼ်ဢုပ်ႉၵႃႈၼိူဝ်တပ်ႉသိုၵ်းမၼ်းဢေႃႈ။ မၼ်းၵေႃႈလႆႈၼႃႈလႆႈတႃၵႃႈတီႈၽၢႆႇၼႃႈၶုၼ်ဢၼ်ပွင်ၵၢၼ် သေႃးလု၊ တင်းလၢႆဢိၵ်ႇတင်းၵႃႈတီႈၽၢႆႇၼႃႈၵူၼ်းတင်းသဵင်ႈတင်းလူင်ဢေႃႈ။
ယၢမ်ႈမိူဝ်ႈဢၼ်ၵူၼ်းသိုၵ်းတင်းလၢႆပွၵ်ႈၶိုၼ်းမႃးလိုၼ်းသေဢၼ် တႃႇဝိတ်ႈ၊ ဢဝ် ၵေႃးလျတ်ႈ၊ တၢႆယဝ်ႉၼၼ်ႉလႄႈၶဝ်ႈမႃးယူႇၼၼ်ႉၸိုင်၊မႄႈယိင်းတင်းလၢႆဢွၵ်ႇသေၵႃႈတီႈဝၢၼ်ႈဝဵင်း ဢိသရေး၊ ၵူႈတီႈၵူႈလႅၼ်မႃးႁပ်ႉႁူဝ်တၢင်းၶုၼ်ႁေႃၶမ်း သေႃးလု၊ ဢေႃႈ။ ၶဝ်ဢွၼ်ၵၼ်ႁဵတ်းၵႂၢမ်းသႂၢင်ႇၸႂ်သိူဝ်းၸႂ်ယူႇ၊ၵႃႈဝႅၼ်ယူႇ၊ႁႆႇၵွင်ၶဵတ်ႇဢိၵ်ႇတင်းလဵတ်းတူႇရိယႃႇယူႇဢေႃႈ။-
ၼႂ်းပွႆးၵႃႈဝႅၼ်ၼၼ်ႉမႄႈယိင်းၸိူဝ်းၼၼ်ႉႁဵတ်းၵႂၢမ်းလႄႈဝႃႈ၊ “ သေႃးလု၊ ဢဝ်တၢႆပဵၼ်ႁဵင်ပဵၼ်ႁဵင်၊ တႃႇဝိတ်ႈ၊ ဢဝ်တၢႆပဵၼ်မိုၼ်ႇပဵၼ်မိုၼ်ႇ၊” ဝႃႈၼင်ႇၼႆဢေႃႈ။-
ၵႂၢမ်းၼၼ်ႉဢမ်ႇထုၵ်ႇၸႂ်ၵျိူၵ်ႈၸႂ် သေႃးလု၊ လႄႈမၼ်းၸႂ်မႆႈၶႂ်ႈၸႃႉလႄႈလၢတ်ႈဝႃႈ၊ “ၶဝ်ၼႆႉဢွၼ်ၵၼ်ပၼ် တႃႇဝိတ်ႈ၊ ပဵၼ်မိုၼ်ႇပဵၼ်မိုၼ်ႇလႄႈပၼ်တီႈၵဝ်ပဵၼ်ႁဵင်ပဵၼ်ႁဵင်ၵူၺ်းလူင်ပႄႇ။ ၼွၵ်ႈသေတၢင်းဢၼ်မၼ်းပဵၼ်ၶုၼ်ႁေႃၶမ်းၼၼ်ႉမၼ်းတၵ်းလႆႈဢီႈသင်လူးၵွၼ်ႇ၊” ဝႃႈၼင်ႇၼႆဢေႃႈ။-
ၸႃႉၸဵမ်ဝၼ်းၼၼ်ႉမၼ်းမီးၸႂ်သီႈၵေႉႁေႈတႃလႄႈပႂ်ႉလွမ်ပႂ်ႉတူၺ်း တႃႇဝိတ်ႈ၊ ယူႇသေႇသေႇဢေႃႈ။
ဝၼ်းမိူဝ်ႈၽုၵ်ႈၼၼ်ႉဝိၺိၺ်ႇႁၢႆႉဢၼ်ၽြႃးပဵၼ်ၸဝ်ႈပွႆႇမႃးၼၼ်ႉၶဝ်ႈၵႃႈၼႂ်း သေႃးလု၊ လႄႈမႃႈမိုၼ်ႇယူႇၵႃႈၼႂ်းၵၢင်ႁေႃၸဝ်ႈမိူၼ်ၸိူဝ်ႉၼင်ႇၵူၼ်းယွင်ႇဢေႃႈ။ တႃႇဝိတ်ႈ၊ ၵေႃႈလဵတ်းတိင်ႇမိူၼ်ၸိူဝ်ႉၼင်ႇဢၼ်မၼ်းႁဵတ်းၵူႈဝၼ်းၼၼ်ႉလႄႈ သေႃးလု၊ ယိပ်းဢဝ်ၵၼ်းႁွၵ်ႇမၼ်းသေယဝ်ႉ၊-
လၢတ်ႈၼႂ်းၸႂ်လႄႈဝႃႈ၊ “ၵဝ်တၵ်းဢဝ်ႁွၵ်ႇတႅင်းသႂ်ႇမၼ်းႁႂ်ႈသွႆႉၸပ်းၽႃဢေႃႈ၊” ဝႃႈၼင်ႇၼႆသေလႄႈဢဝ်ႁွၵ်ႇၼၼ်ႉပိုင်ႈသႂ်ႇသွင်ပွၵ်ႈဢေႃႈ။ ၵူၺ်းၵႃႈ၊ တႃႇဝိတ်ႈ၊ ငႅၵ်းပၢႆႈလႆႈတင်းသွၵ်ႈပွၵ်ႈဢေႃႈ။
သေႃးလု၊ ၼၼ်ႉၵူဝ်ႁႄယူႇၵွပ်ႈပိူဝ်ႈ ထႃႇဝရႃႉၽြႃး၊ ၸုၼ်ႉပႅတ်ႈမၼ်းသေလႄႈမီးယူႇလူၺ်ႈၵၼ်တင်း တႃႇဝိတ်ႈ၊ ယူႇၼၼ်ႉဢေႃႈ။-
ပိူဝ်ႈၼႆလႄႈ သေႃးလု၊ ၶၢၼ်းႁႂ်ႈမၼ်းပဵၼ်ၶုၼ်သိုၵ်းလူင်ဢၼ်ဢုပ်ႉၵႃႈၼိူဝ်ၵူၼ်းသိုၵ်းႁဵင်ၼိုင်ႈၼၼ်ႉသေယဝ်ႉ၊ပွႆႇၸႂ်ႉမၼ်းဢွၵ်ႇၵႂႃႇတိုၵ်းသိုၵ်းဢေႃႈ။ တႃႇဝိတ်ႈ၊ ၵေႃႈဢွၼ်ႁူဝ်တပ်ႉသိုၵ်းမၼ်းလႄႈၵႂႃႇတိုၵ်းသိုၵ်းဢေႃႈ။-
ၵွပ်ႈပိူဝ်ႈဢၼ် ထႃႇဝရႃႉၽြႃး၊ မီးယူႇလူၺ်ႈၵၼ်တင်းမၼ်းၼၼ်ႉလႄႈၵႃႈဢၼ်မၼ်းႁဵတ်းၼၼ်ႉဢွင်ႇမႅင်ႇၵူႈၸိူဝ်ႉၵူႈပိူင်ဢေႃႈ။-
သေႃးလု၊ ႁုႁၼ်လွင်ႈတၢင်းဢၼ် တႃႇဝိတ်ႈ၊ ဢွင်ႇမႅင်ႇၼၼ်ႉလႄႈယဵင်ႈၶႅၼ်းၵူဝ်ႁႄမၼ်းဢေႃႈ။-
ၵူၺ်းၵႃႈ၊ၵူၼ်းမဵဝ်း ဢိသရေး၊ တင်းၵူၼ်းမဵဝ်း ယုတႃႉ၊ တင်းလၢႆဢွၼ်ၵၼ်ႁၵ်ႉ တႃႇဝိတ်ႈ၊ ၵွပ်ႈပိူဝ်ႈဢၼ်မၼ်းပဵၼ်ၵူၼ်းလူင်ဢၼ်ၸၢင်ႈဢွၼ်ႁူဝ်ႁႂ်ႈဢွင်ႇမႅင်ႇၼၼ်ႉဢေႃႈ။
ၽဝ်ႇၼိုင်ႈ သေႃးလု၊ လၢတ်ႈတီႈ တႃႇဝိတ်ႈ၊ လႄႈဝႃႈ၊ “လုၵ်ႈယိင်းၵဝ်ၵေႃႉယႂ်ႇ မေးရပ်ႉ၊ ၼႆႉၵဝ်တၵ်းပၼ်ႁႂ်ႈမၼ်းပဵၼ်မေးမႂ်းဢေႃႈ။ မႂ်းၵူၺ်းတၵ်းလႆႈႁတ်းႁၢၼ်ပုၼ်ႈၵဝ်လႄႈတိုၵ်းသိုၵ်းပုၼ်ႈ ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။ (လွင်ႈမၼ်းၸမ်ႉ၊ သေႃးလု၊ ဝႃႈ၊ယႃႇပေႁႂ်ႈမိုဝ်းၵဝ်လႆႈတိူဝ်ႉထုၵ်ႇမၼ်းႁႂ်ႈမိုဝ်းၵူၼ်း ၽိလိတ်ႉတိ၊ ၶဝ်တိူဝ်ႉထုၵ်ႇမၼ်းယဵင်ႈၶႅၼ်းတေလီဢေႃႈ။)
တႃႇဝိတ်ႈ၊ ၵေႃႈလဝ်ႈလၢတ်ႈလႄႈဝႃႈ၊ “ၶႃႈၸဝ်ႈပဵၼ်ၵေႃႉၸိူဝ်ႉၼင်ႇႁိုဝ်၊ပီႈၼွင်ႉၸိူဝ်ႉၶိူဝ်းပေႃႈၶႃႈၸဝ်ႈၼၼ်ႉမျၢတ်ႈၵႃႈႁိုဝ်လႄႈၶႃႈၸဝ်ႈတေလႆႈပဵၼ်လုၵ်ႈၶူၺ်ၶုၼ်ႁေႃၶမ်းတီႈၶႃႈ၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊မိူဝ်ႈထိုင်ၶိင်ႇဢၼ်တၵ်းဢဝ် မေးရပ်ႉ၊ ပၼ်ၵၼ်တင်း တႃႇဝိတ်ႈ၊ ၼၼ်ႉၸိုင်၊ဢဝ်ပၼ်ၵၼ်တင်းၵူၼ်းၸၢႆးတၢင်ႇၵေႃႉဢၼ်လႆႈၸိုဝ်ႈ ဢႃႇတရေးလႃႉ၊ မဵဝ်း မေးႁေႃႇလသိ၊ ၼၼ်ႉသေဢေႃႈ။
ၵမ်းၼၼ်ႉ မိၶႃႇလႃႉ၊ လုၵ်ႈယိင်း သေႃးလု၊ ၼၼ်ႉႁၵ်ႉ တႃႇဝိတ်ႈ၊ ဢေႃႈ။ သေႃးလု၊ လႆႈငိၼ်းလွင်ႈတၢင်းၼၼ်ႉလႄႈထုၵ်ႇၸႂ်မၼ်းသေယဝ်ႉ၊-
လၢတ်ႈၼႂ်းၸႂ်ဝႃႈ၊ “ၵဝ်တၵ်းဢဝ် မိၶႃႇလႃႉ၊ ပၼ်ၵၼ်တင်း တႃႇဝိတ်ႈ၊ ႁႂ်ႈပဵၼ်တူင်ႇႁႅဝ်ႉတူင်ႇၶိုမ်းတီႈမၼ်းလႄႈႁႂ်ႈမဵဝ်း ၽိလိတ်ႉတိ၊ ဢဝ်မၼ်းတၢႆလူးၵွၼ်ႇဢေႃႈ၊” ဝႃႈၼင်ႇၼႆဢေႃႈ။ ပိူဝ်ႈၼႆလႄႈ သေႃးလု၊ လၢတ်ႈတီႈ တႃႇဝိတ်ႈ၊ ပွၵ်ႈထူၼ်ႈသွင်လႄႈဝႃႈ၊ “ၵမ်းၼႆႉၸိုင်၊မႂ်းတၵ်းတေလႆႈပဵၼ်လုၵ်ႈၶူၺ်ၵဝ်ယဝ်ႉ၊” ဝႃႈၼင်ႇၼႆဢေႃႈ။-
မၼ်းၸင်ႇမီးဢမိင်ႉႁႂ်ႈၶုၼ်ဢၼ်ပွင်ၵၢၼ်မၼ်းတင်းလၢႆႁႂ်ႈၶဝ်ၵႂႃႇလွမ်သွပ်ႉသႅပ်ႉတီႈ တႃႇဝိတ်ႈ၊ လႄႈႁႂ်ႈလၢတ်ႈဝႃႈ၊ “ၶုၼ်ႁေႃၶမ်းႁၵ်ႉပႅင်းမႂ်းလႄႈၶႃႈၶုၼ်ႁေႃၶမ်းတင်းသဵင်ႈတင်းလူင်ၵေႃႈႁၵ်ႉပႅင်းမႂ်းဢေႃႈ။ ပိူဝ်ႈၼႆလႄႈမႂ်းထုၵ်ႇလီပဵၼ်လုၵ်ႈၶူၺ်ၶုၼ်ႁေႃၶမ်းဢေႃႈ၊” ဝႃႈၼင်ႇၼႆဢေႃႈ။
ၶုၼ်ဢၼ်ပွင်ၵၢၼ်ၼႂ်းႁေႃမၼ်းၸိူဝ်းၼၼ်ႉၵေႃႈဢဝ်ၵႂၢမ်းၼၼ်ႉလၢတ်ႈတီႈ တႃႇဝိတ်ႈ၊ ဢေႃႈ။ တႃႇဝိတ်ႈ၊ ၵေႃႈၶိုၼ်းလၢတ်ႈလႄႈဝႃႈ၊ “သူထၢင်ႇလွင်ႈတၢင်းဢၼ်ႁဵတ်းလုၵ်ႈၶူၺ်ၶုၼ်ႁေႃၶမ်းၼႆႉမဝ်မၢင်ႁိုဝ်း။ ၵဝ်ၼႆႉပဵၼ်ၵူၼ်းၽၢၼ်၊ဢမ်ႇမီးသရေႇၼႃႈတႃၵႃႈသင်လႄႈဢမ်ႇၵိုင်ႇၵူၺ်း၊” ဝႃႈၼင်ႇၼႆဢေႃႈ။
ၶုၼ်ဢၼ်ပွင်ၵၢၼ်ၸိူဝ်းၼၼ်ႉၶိုၼ်းဢဝ်ၵႂၢမ်း တႃႇဝိတ်ႈ၊ ၼၼ်ႉလဝ်ႈလၢတ်ႈတီႈ သေႃးလု၊ ဢေႃႈ။-
သေႃးလု၊ သမ်ႉမီးဢမိင်ႉႁႂ်ႈၶဝ်ၵႂႃႇမွၵ်ႇလၢတ်ႈတီႈ တႃႇဝိတ်ႈ၊ လႄႈဝႃႈ၊ “ပုၼ်ႈတႃႇတၵ်းလႆႈလုၵ်ႈယိင်းၶုၼ်ႁေႃၶမ်းၸိုင်၊မၼ်းၸဝ်ႈၶႂ်ႈလႆႈပၢႆၼင်ၶွင်ၵူၼ်းၸၢႆး ၽိလိတ်ႉတိ၊ ပၢၵ်ႇၼိုင်ႈႁႂ်ႈပဵၼ်တၢင်းဢၼ်တွပ်ႇတႅၼ်းရၢၼ်ႇသူႇမၼ်းတင်းလၢႆဢေႃႈ၊” ဝႃႈၼင်ႇၼႆဢေႃႈ။ (လွင်ႈတၢင်းၼႆႉၸိုင်၊ပဵၼ်ဢၼ် သေႃးလု၊ ၵျၢမ်ႇႁႂ်ႈၵူၼ်း ၽိလိတ်ႉတိ၊ ဢဝ် တႃႇဝိတ်ႈ၊ တၢႆဢေႃႈ။-)
ၶုၼ်ဢၼ်ပွင်ၵၢၼ်ၸိူဝ်းၼၼ်ႉသမ်ႉဢဝ်ၵႂၢမ်းဢၼ် သေႃးလု၊ လၢတ်ႈၼၼ်ႉမွၵ်ႇလၢတ်ႈတီႈ တႃႇဝိတ်ႈ၊ လႄႈ တႃႇဝိတ်ႈ၊ ထုၵ်ႇၸႂ်ၵျိူၵ်ႈၸႂ်လူၺ်ႈလွင်ႈဢၼ်တၵ်းလႆႈပဵၼ်လုၵ်ႈၶူၺ်ၶုၼ်ႁေႃၶမ်းၼၼ်ႉဢေႃႈ။ ပိူဝ်ႈၼႆလႄႈၸူဝ်ႈဢၼ်ဝၼ်းသွင်ႇမၢင်ႇၵလႃႇဢမ်ႇပႆႇထိုင်ၼၼ်ႉ၊-
တႃႇဝိတ်ႈ၊ တင်းၵူၼ်းတင်းလၢႆၵႂႃႇလႄႈဢဝ်ၵူၼ်း ၽိလိတ်ႉတိ၊ တၢႆသွင်ပၢၵ်ႇသေယဝ်ႉ၊ဢဝ်ပၢႆၼင်ၶွင်ၵူၼ်းၸၢႆးမႃးသေလႄႈၼပ်ႉဢၢၼ်ႇၸေးၸုမ်ႇယဝ်ႉၸင်ႇ၊ဢၢပ်ႈပၼ်တီႈၶုၼ်ႁေႃၶမ်း၊ႁႂ်ႈလႆႈပဵၼ်လုၵ်ႈၶူၺ်ၶုၼ်ႁေႃၶမ်းဢေႃႈ။ ၼင်ႇၼၼ်လႄႈ သေႃးလု၊ ဢမ်ႇလိူဝ်လႆႈယဝ်ႉၸင်ႇဢဝ်လုၵ်ႈယိင်းမၼ်း မိၶႃႇလႃႉ၊ သွင်ႇမၢင်ႇၵလႃႇပၼ်တီႈ တႃႇဝိတ်ႈ၊ ဢေႃႈ။
သေႃးလု၊ ႁုႁၼ်လွင်ႈဢၼ် ထႃႇဝရႃႉၽြႃး၊ မီးယူႇလူၺ်ႈၵၼ်တင်း တႃႇဝိတ်ႈ၊ ဢိၵ်ႇတင်းလွင်ႈဢၼ်လုၵ်ႈယိင်းတူဝ်ၸဝ်ႈၵဝ်ႇ မိၶႃႇလႃႉ၊ ၵေႃႈႁၵ်ႉမၼ်းလႄႈ၊-
သေႃးလု၊ ယဵင်ႈၶႅၼ်းၵူဝ်ႁႄ တႃႇဝိတ်ႈ၊ သေယဝ်ႉ၊ဝႆႉၸႂ်ႁဵတ်းရၢၼ်ႇသူႇတီႈ တႃႇဝိတ်ႈ၊ ယူႇတႃႇသေႇဢေႃႈ။
ၵူၼ်းသိုၵ်း ၽိလိတ်ႉတိ၊ တင်းလၢႆၸၢင်ႈမႃးတိုၵ်းတေႃးဢေႃႈ။ ၵူၺ်းၵႃႈ၊ပွၵ်ႈလႂ်သေဢမ်ႇဝႃႈ၊ တႃႇဝိတ်ႈ၊ ယဵင်ႈၶႅၼ်းဢွင်ႇမႅင်ႇၼႃႇသေၶုၼ်ဢၼ်ပွင်ၵၢၼ်ၼႂ်းႁေႃ သေႃးလု၊ တင်းသဵင်ႈတင်းလူင်ၼၼ်ႉဢေႃႈ။ ၼင်ႇၼၼ်လႄႈ တႃႇဝိတ်ႈ၊ ၼၼ်ႉယဵင်ႈၶႅၼ်းမီးၸိုဝ်ႈသဵင်ဢွၵ်ႇၼႃႇလူင်လၢင်ဢေႃႈ။
ႁဵတ်းၸိူဝ်ႉၼင်ႇၼၼ်လႄႈ သေႃးလု၊ လၢတ်ႈၼႄလွင်ႈဢၼ်မၼ်းၵျၢမ်ႇဢဝ် တႃႇဝိတ်ႈ၊ တၢႆၼၼ်ႉတီႈလုၵ်ႈၸၢႆးမၼ်း ယေႃးၼႀၼ်ႇ၊ ဢိၵ်ႇတင်းၶုၼ်ဢၼ်ပွင်ၵၢၼ်မၼ်းတင်းသဵင်ႈတင်းလူင်ဢေႃႈ။ ၵူၺ်းၵႃႈ၊ ယေႃးၼႀၼ်ႇ၊ ႁၵ်ႉ တႃႇဝိတ်ႈ၊ ၼႃႇလူင်လၢင်လႄႈ၊-
မၼ်းမွၵ်ႇလၢတ်ႈတီႈ တႃႇဝိတ်ႈ၊ လႄႈဝႃႈ၊ “ပေႃႈၸဝ်ႈၵဝ်ၼၼ်ႉၵျၢမ်ႇႁႃႁႂ်ႈလႆႈဢဝ်မႂ်းတၢႆဢေႃႈ။ ပိူဝ်ႈၼႆလႄႈဝႆႉသတိတီႈတူဝ်ၸဝ်ႈၵဝ်ႇယူႇတႃႉ။ မိူဝ်ႈၽုၵ်ႈၵၢင်ၼႂ်ၸိုင်၊ပၢႆႈတဵတ်ႇတီႈဢၼ်ဢမ်ႇထၢင်ႇဢမ်ႇသႃးလႄႈမႅပ်းယူႇၵႃႈတီႈၼၼ်ႈလူးၵွၼ်ႇတႃႉ။-
ၵဝ်တၵ်းၵႂႃႇလႄႈၶႃးၸႃးတီႈပေႃႈၸဝ်ႈၵဝ်ၵႃႈတီႈၼႂ်းပၢင်ႇတီႈဢၼ်မႂ်းတဵတ်ႇမႅပ်းယူႇၼၼ်ႉသေယဝ်ႉ၊လၢတ်ႈတေႃႇပေႃႈၸဝ်ႈၵဝ်လူၺ်ႈလွင်ႈမႂ်းဢေႃႈ။ ပေႃးၵဝ်လႆႈႁုလႆႈငိၼ်းသေမဵဝ်းမဵဝ်းၸိုင်၊ၵဝ်တၵ်းမွၵ်ႇလၢတ်ႈတီႈမႂ်းဢေႃႈ၊” ဝႃႈၼင်ႇၼႆဢေႃႈ။
ယေႃးၼႀၼ်ႇ၊ လၢတ်ႈၵႂၢမ်းယွင်ႈယေႃး တႃႇဝိတ်ႈ၊ တီႈပေႃႈၸဝ်ႈမၼ်းလႄႈဝႃႈ၊ “ပေႃႈၸဝ်ႈတီႈၶႃႈ။ ၶႅၼ်းတေႃႈယႃႇပေၽိတ်းပိူင်ႈၶႃႈပေႃႈၸဝ်ႈႁဝ်း တႃႇဝိတ်ႈ၊ ၼၼ်ႉသေၵမ်းတီႈၶႃႈ။ မၼ်းၼၼ်ႉဢမ်ႇၽိတ်းပိူင်ႈပေႃႈၸဝ်ႈႁဝ်းတီႈၶႃႈ။ ၵႃႈဢၼ်မၼ်းႁဵတ်းၼၼ်ႉယင်းဢမ်ႇႁဵတ်းၶတ်းၵၼ်တင်းပေႃႈၸဝ်ႈႁဝ်း၊မၼ်းႁဵတ်းတၢင်းဢၼ်ၸွႆႈထႅမ်ဢၼ်ယႂ်ႇၼႃႇပုၼ်ႈပေႃႈၸဝ်ႈႁဝ်းဢေႃႈ။-
မၼ်းယင်းဢမ်ႇသေလၢႆဢသၢၵ်ႈမၼ်းလႄႈဢဝ် ၵေႃးလျတ်ႈ၊ တၢႆသေယဝ်ႉ၊ ထႃႇဝရႃႉၽြႃး၊ ႁႂ်ႈမဵဝ်း ဢိသရေး၊ ဢွင်ႇသိုၵ်းဢၼ်ယႂ်ႇၼႃႇၼၼ်ႉတီႈၶႃႈဢေႃႈ။ ပေႃႈၸဝ်ႈႁဝ်းႁၼ်လႄႈၸူမ်းသိူဝ်းတီႈၶႃႈယဝ်ႉ။ ၵွပ်ႈပိူဝ်ႈသင်လႄႈပေႃႈၸဝ်ႈႁဝ်းမီးၸႂ်ၶႂ်ႈၽိတ်းပိူင်ႈၵေႃႉဢၼ်ဢမ်ႇမီးဢပျတ်ႈၼၼ်ႉ။ သမ်ႉယင်းဢမ်ႇမီးလွင်ႈမီးတၢင်းမၼ်းလႄႈတၵ်းဢဝ် တႃႇဝိတ်ႈ၊ တၢႆႁဵတ်းသင်တီႈၶႃႈ၊” ဝႃႈၼင်ႇၼႆဢေႃႈ။
သေႃးလု၊ ပွင်ႇၸႂ် ၼႂ်းၵႂၢမ်းဢၼ် ယေႃးၼႀၼ်ႇ၊ လၢတ်ႈၼၼ်ႉသေယဝ်ႉ၊တိူင်ႇၵႂၢမ်းၵတိလႄႈဝႃႈ၊ “ၵႃႈၼင်ႇဢၼ် ထႃႇဝရႃႉၽြႃး၊ ဢသၢၵ်ႈယင်းလိပ်းယူႇၼၼ်ႉတေဢမ်ႇလႆႈဢဝ်မၼ်းတၢႆ၊” ဝႃႈၼင်ႇၼႆဢေႃႈ။-
ယေႃးၼႀၼ်ႇ၊ ႁွင်ႉဢဝ် တႃႇဝိတ်ႈ၊ လႄႈမွၵ်ႇလၢတ်ႈလွင်ႈတၢင်းၵူႈၸိူဝ်ႉၵူႈပိူင်သေယဝ်ႉ၊ဢဝ် တႃႇဝိတ်ႈ၊ ၶိုၼ်းသႂၢင်းၶဝ်ႈၵႃႈတီႈ သေႃးလု၊ ဢေႃႈ။ တႃႇဝိတ်ႈ ထၢမ်းႁဵတ်းၼႃႈၵၢၼ် ၶုၼ်ႁေႃၶမ်းမိူၼ်ၸိူဝ်ႉၼင်ႇပၵ်းၵဝ်ႇပိူင်ၵဝ်ႇဢေႃႈ။
လိုၼ်းၼၼ်ႉတၢင်းဢၼ်တိုၵ်းသိုၵ်းလူၺ်ႈၵၼ်တင်းၵူၼ်းမဵဝ်း ၽိလိတ်ႉတိ၊ ၶဝ်သမ်ႉပေႃႇပဵၼ်မႃးထႅင်ႈဢေႃႈ။ တႃႇဝိတ်ႈ၊ ဢွၵ်ႇတိုၵ်းပႄႉၶဝ်လႄႈၶႃႈၽၼ်းတၢႆပႅတ်ႈၼမ်ၼႃႇႁႂ်ႈၶဝ်လႆႈဢွၵ်ႇပၢႆႈဢေႃႈ။
ဝၼ်းၼိုင်ႈၽီႁၢႆႉဢၼ် ထႃႇဝရႃႉၽြႃး၊ ပွႆႇၸႂ်ႉမႃးၼၼ်ႉဢုပ်ႉထိင်း သေႃးလု၊ ဢေႃႈ။ မၼ်းၼၼ်ႉၼင်ႈယူႇၵႃႈၼႂ်းႁေႃၸဝ်ႈလႄႈယိပ်းၵမ်ၵၼ်းႁွၵ်ႇၼႂ်းမိုဝ်းဝႆႉဢေႃႈ။ တႃႇဝိတ်ႈ၊ ၵေႃႈလဵတ်းတိင်ႇယူႇဢေႃႈ။-
မိူဝ်ႈၼၼ်ႉ၊ သေႃးလု၊ ၶတ်းၸႂ်ဢဝ်ႁွၵ်ႇမၼ်းပုင်ႈသႂ်ႇႁႂ်ႈလႆႈတႅင်းသွႆ တႃႇဝိတ်ႈ၊ ၸပ်းၽႃဢေႃႈ။ တႃႇဝိတ်ႈ၊ ငႅၵ်းပႅတ်ႈလႆႈလႄႈႁွၵ်ႇၼၼ်ႉသဵပ်ႇပၵ်းၸပ်းၽႃယူႇဢေႃႈ။ တႃႇဝိတ်ႈ၊ လႅၼ်ႈပၢႆႈလႄႈလွတ်ႈၵႂႃႇဢေႃႈ။
ၼႂ်းၶိုၼ်းၼၼ်ႉၵမ်းလဵဝ် သေႃးလု၊ ပွႆႇၸႂ်ႉၵူၼ်းၵမ်ႈၽွင်ႈၵႂႃႇပႂ်ႉၵႃႈတီႈႁိူၼ်း တႃႇဝိတ်ႈ၊ သေလႄႈႁႂ်ႈဢဝ်မၼ်းတၢႆၶိင်ႇၵၢင်ၼႂ်ဢေႃႈ။ မိၶႃႇလႃႉ၊ မေး တႃႇဝိတ်ႈ၊ ၼၼ်ႉပၼ်သတိတီႈမၼ်းလႄႈဝႃႈ၊ “ပေႃးသူဢမ်ႇဢွၵ်ႇပၢႆႈၼႂ်းၶိုၼ်းၼႆႉၸိုင်၊မိူဝ်ႈၽုၵ်ႈၵၢင်ၼႂ်သူတၵ်းတၢႆဢေႃႈ၊” ဝႃႈၼင်ႇၼႆသေယဝ်ႉ၊-
ဢဝ် တႃႇဝိတ်ႈ၊ ယွၼ်ႇတူၵ်းၵႃႈတီႈႁူးလၢင်းတဵၼ်လႄႈမၼ်းလႅၼ်ႈပၢႆႈလွတ်ႈၵႂႃႇဢေႃႈ။-
မိၶႃႇလႃႉ၊ ဢဝ်ႁုၼ်ႇႁၢင်ႈၽြႃးႁူဝ်ႁိူၼ်း ၼွၼ်းဝႆႉၵႃႈၼိူဝ်ၵူႇသေယဝ်ႉ၊ဢဝ်မွၼ်ၶူၼ်ပႄႉဝႆႉၽၢႆႇႁူဝ်ၼွၼ်းလႄႈဢဝ်ၽႃႈႁူမ်ႇဝႆႉဢေႃႈ။-
မိူဝ်ႈဢၼ်ၵူၼ်း သေႃးလု၊ ၸိူဝ်းၼၼ်ႉမႃးႁႂ်ႈလႆႈတိဢဝ် တႃႇဝိတ်ႈ၊ ၼၼ်ႉၸိုင်၊ မိၶႃႇလႃႉ၊ လၢတ်ႈတီႈၶဝ်လႄႈဝႃႈ၊ “ တႃႇဝိတ်ႈ၊ ပဵၼ်ၶႆႈၼၢဝ်ယူႇဢေႃႈ၊” ဝႃႈၼင်ႇၼႆဢေႃႈ။-
သေႃးလု၊ သမ်ႉပွႆႇၸႂ်ႉၵူၼ်းၸိူဝ်းၼၼ်ႉၵႂႃႇႁႂ်ႈတူဝ်ၶဝ်ၶဝ်ႈတူၺ်း တႃႇဝိတ်ႈ၊ လႄႈသင်ႇလၢတ်ႈဝႃႈ၊ “ႁၢမ်ၵူႇပႃးလူၺ်ႈတူဝ်မၼ်းၼၼ်ႉမႃးၵႃႈတီႈၼႆႈတႃႉ။ ၵဝ်တၵ်းဢဝ်မၼ်းတၢႆဢေႃႈ၊” ဝႃႈၼင်ႇၼႆဢေႃႈ။-
ၶဝ်ၶဝ်ႈၵႂႃႇၵႃႈၼႂ်းလႄႈထူပ်းႁၼ်ရုၵ်ႉထုၽြႃးႁူဝ်ႁိူၼ်းၼွၼ်းယူႇၵႃႈၼိူဝ်ၵူႇ၊ဢိၵ်ႇတင်းမွၼ်ၶူၼ်ပႄႉမီးယူႇၽၢႆႇႁူဝ်ၼွၼ်းမၼ်းဢေႃႈ။-
သေႃးလု၊ ၵေႃႈထၢမ်တီႈ မိၶႃႇလႃႉ၊ လႄႈ၊ “ႁဵတ်းသင်လႄႈမႂ်းပႅတ်ႉလႅၼ်ၵဝ်ၸိူဝ်ႉၼင်ႇၼႆထၢၼ်ႈပေႃးႁႂ်ႈရၢၼ်ႇသူႇၵဝ်လႆႈလွတ်ႈၵႂႃႇ၊” ဝႃႈၼင်ႇၼႆဢေႃႈ။ မိၶႃႇလႃႉ၊ ၶိုၼ်းလဝ်ႈလၢတ်ႈလႄႈဝႃႈ၊ “မၼ်းဝႃႈ၊ပေႃးမႂ်းဢမ်ႇၸွႆႈထႅမ်ႁႂ်ႈၵဝ်လွတ်ႈၸိုင်၊ၵဝ်တၵ်းဢဝ်မႂ်းတၢႆဢေႃႈ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ပၢႆႈလွတ်ႈလႄႈၵႂႃႇၸူးတီႈ သမူၺ်ႇလႃႉ၊ ၵႃႈတီႈဝဵင်း ရႃႇမႃႉ၊ သေယဝ်ႉ၊မွၵ်ႇလၢတ်ႈလွင်ႈၵႃႈဢၼ် သေႃးလု၊ ႁဵတ်းတီႈမၼ်းၼၼ်ႉဢေႃႈ။ မိူဝ်ႈၼၼ်ႉမၼ်းတင်း သမူၺ်ႇလႃႉ၊ ၵႂႃႇလႄႈယူႇၵႃႈတီႈဝၢၼ်ႈ ၼႃႇယုတ်ႉ၊ ဢေႃႈ။-
ပိူၼ်ႈလဝ်ႈလၢတ်ႈတီႈ သေႃးလု၊ လွင်ႈဢၼ် တႃႇဝိတ်ႈ၊ မီးၵႃႈတီႈဝၢၼ်ႈ ၼႃႇယုတ်ႉ၊ ၼႂ်းတူင်ႇဝဵင်း ရႃႇမႃႉ၊ ၼၼ်ႉဢေႃႈ။-
ပိူဝ်ႈၼႆလႄႈမၼ်းပွႆႇၸႂ်ႉၵူၼ်းၵမ်ႈၽွင်ႈၵႂႃႇတိဢဝ် တႃႇဝိတ်ႈ၊ ဢေႃႈ။ ၶဝ်ႁၼ်မုၵ်ႉၸိူဝ်းပရေႃးၽႅတ်ႈ တင်းလၢႆႁဵတ်းပရေႃးၽႅတ်ႈယူႇ၊ သမူၺ်ႇလႃႉ၊ ၵေႃႈႁဵတ်းၵႄႇႁဵတ်းႁူဝ်ၶဝ်ယူႇလႄႈ၊ၶဝ်ၵေႃႈၶဝ်ႈပႃးၵႃႈဝႅၼ်ႁွင်ႉပၢဝ်ႇႁွင်ႉသႅၼ်ႇၸွမ်းဢေႃႈ။-
မိူဝ်ႈဢၼ် သေႃးလု၊ လႆႈငိၼ်းၼၼ်ႉၸိုင်၊မၼ်းပွႆႇၸႂ်ႉၵူၼ်းၵႂႃႇထႅင်ႈၼမ်ၼမ်ဢေႃႈ။ ၶဝ်ၸိူဝ်းၼၼ်ႉၵေႃႈၶဝ်ႈပႃးၵႃႈဝႅၼ်ပၢဝ်ႇသႅၼ်ႇၸွမ်းၼင်ႇၵဝ်ႇဢေႃႈ။ မၼ်းသမ်ႉပွႆႇၸႂ်ႉၵူၼ်းၸုမ်းတီႈသၢမ်ၵႂႃႇထႅင်ႈသေၵေႃႈၶဝ်ႁဵတ်းၸိူဝ်ႉၼင်ႇၼၼ်ၼင်ႇၵဝ်ႇဢေႃႈ။-
မိူဝ်ႈၼၼ်ႉတူဝ်မၼ်းၵႂႃႇၵႃႈတီႈဝဵင်း ရႃႇမႃႉ၊ လႄႈႁွတ်ႈထိုင်ၵႃႈတီႈၼမ်ႉမေႃႇလူင်ဝဵင်း ၸေႇၶု၊ သေယဝ်ႉ၊တွင်ႈထၢမ်လႄႈဝႃႈ၊ “ သမူၺ်ႇလႃႉ၊ တင်း တႃႇဝိတ်ႈ၊ မီးၵႃႈလႂ်၊” ဝႃႈၼင်ႇၼႆဢေႃႈ။ ၵူၼ်းၵေႃႉၼိုင်ႈၶိုၼ်းလဝ်ႈလၢတ်ႈလႄႈဝႃႈ၊ “မီးယူႇၵႃႈတီႈဝၢၼ်ႈ ၼႃႇယုတ်ႉ၊ ဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈဢၼ်မၼ်းၵႂႃႇယူႇၼၼ်ႉဝိၺိၺ်ႇၽြႃးပဵၼ်ၸဝ်ႈၶဝ်ႈၵႃႈၼႂ်းမၼ်းၼင်ႇၵဝ်ႇလႄႈမၼ်းၵေႃႈၵႃႈဝႅၼ်ပၢဝ်ႇသႅၼ်ႇၸွမ်းတၢင်းၵႂႃႇတေႃႇထိုင်ဝၢၼ်ႈ ၼႃႇယုတ်ႉ၊ ဢေႃႈ။-
မၼ်းၼၼ်ႉထွတ်ႇပႅတ်ႈၶူဝ်းၼုင်ႈမၼ်းသေလႄႈၵႃႈဝႅၼ်ပၢဝ်ႇသႅၼ်ႇၵႃႈတီႈၽၢႆႇၼႃႈ သမူၺ်ႇလႃႉ၊ ယူႇတူဝ်ပူၺ်ဝႆႉၼႂ်းဝၼ်းၼၼ်ႉတင်းဝၼ်း၊ဢိၵ်ႇတင်းၼႂ်းၶိုၼ်းၼၼ်ႉတင်းၶိုၼ်းဢေႃႈ။ ၵွပ်ႈပိူဝ်ႈၼင်ႇၼၼ်လႄႈမီးၵႂၢမ်းဝႃႈ၊ “ သေႃးလု၊ ၵေႃႈၶဝ်ႈပႃးၼႂ်းပရေႃးၽႅတ်ႈယဝ်ႉႁိုဝ်း၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ဢွၵ်ႇပၢႆႈသေၵႃႈတီႈဝၢၼ်ႈ ၼႃႇယုတ်ႉ၊ ၵႂႃႇလႄႈႁွတ်ႈထိုင်ၵႃႈတီႈ ယေႃးၼႀၼ်ႇ၊ သေယဝ်ႉထၢမ်လႄႈဝႃႈ၊ “ၵဝ်ၶႃႈလႆႈႁဵတ်းၵႃႈသင်ယဝ်ႉ။ ၵဝ်ၶႃႈလႆႈႁဵတ်းတၢင်းၽိတ်းၵႃႈသင်တီႈပေႃႈၸဝ်ႈၸဝ်ႈႁဝ်းတေဢဝ်ၵဝ်ၶႃႈတၢႆ၊” ဝႃႈၼင်ႇၼႆဢေႃႈ။
ယေႃးၼႀၼ်ႇ၊ ၶိုၼ်းလၢတ်ႈလႄႈဝႃႈ၊ “မႂ်းဢမ်ႇလႆႈတၢႆၵူၺ်း။ ပေႃႈၸဝ်ႈၵဝ်ၼၼ်ႉၵႃႈဢၼ်မၼ်းႁဵတ်းၵူႈၸိူဝ်ႉၵူႈပိူင်၊ဢၼ်လဵၵ်ႉဢၼ်ယႂ်ႇမဵဝ်းလႂ်သေဢမ်ႇဝႃႈ၊ယင်းဢမ်ႇမွၵ်ႇဢမ်ႇလၢတ်ႈၵဝ်လႄႈဢမ်ႇၸၢင်ႈႁဵတ်းဢၼ်လႂ်။ လွင်ႈတၢင်းၼႆႉၵေႃႈမၼ်းတၵ်းဢမ်ႇသိူင်ႇဢမ်ႇဢမ်ဝႆႉႁႂ်ႈၵဝ်ဢမ်ႇႁုၼၼ်ႉ။ ပဵၼ်လွင်ႈဢၼ်ဢမ်ႇၸိုဝ်ႈဢမ်ႇၸႂ်ႈၵူၺ်းဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ တႃႇဝိတ်ႈ၊ သမ်ႉလၢတ်ႈလႄႈဝႃႈ၊ “ၵဝ်ၶႃႈႁတ်းတိူင်ႇၵၢဝ်ႇဢေႃႈ။ ပေႃႈၸဝ်ႈၸဝ်ႈႁဝ်းၼၼ်ႉၸဵၼ်းၸႃးလႄႈဝႃႈ၊ ‘လွင်ႈတၢင်းၼႆႉၸိုင်၊ ယေႃးၼႀၼ်ႇ၊ ဢမ်ႇလီႁု။ ၵူဝ်မၼ်းတၵ်းၸႂ်ဢမ်ႇသႃႇဢေႃႈ၊’ ဝႃႈၼႆဝႆႉ၊ၵွပ်ႈပိူဝ်ႈဢၼ်မၼ်းၸဝ်ႈႁုလွင်ႈဢၼ်ၸဝ်ႈႁဝ်းၵျိူၵ်ႈႁၵ်ႉထုၵ်ႇၸႂ်ၵဝ်ၶႃႈၼႃႇၼၼ်ႉဢေႃႈ။ ၵႃႈၼင်ႇဢၼ် ထႃႇဝရႃႉၽြႃး၊ ဢသၢၵ်ႈလိပ်းယူႇလႄႈ၊ဢသၢၵ်ႈၸဝ်ႈႁဝ်းၵေႃႈတႄႇယူႇၼၼ်ႉၵဝ်ၶႃႈယၢၼ်ၵၼ်တင်းတၢင်းတၢႆၸူဝ်ႈယၢင်ႈတိၼ်ၼိုင်ႈၵူၺ်းယဝ်ႉ၊” ဝႃႈၼင်ႇၼႆဢေႃႈ။
ယေႃးၼႀၼ်ႇ၊ ၵေႃႈလၢတ်ႈလႄႈဝႃႈ၊ “ၵဝ်တၵ်းႁဵတ်းၸွမ်းၵႃႈၼင်ႇဢၼ်ဢလူဝ်ႇၵၢင်ၸႂ်မႂ်းၼၼ်ႉဢေႃႈ၊” ဝႃႈၼင်ႇၼႆလႄႈ။
တႃႇဝိတ်ႈ၊ လၢတ်ႈလႄႈဝႃႈ၊ “ဝၼ်းမိူဝ်ႈၽုၵ်ႈပဵၼ်ဝၼ်းပွႆးလိူၼ်မႂ်ႇယဝ်ႉ။ ၵဝ်ၶႃႈထုၵ်ႇလီၵိၼ်ၶဝ်ႈၶမ်ႈလူၺ်ႈၵၼ်တင်းၶုၼ်ႁေႃၶမ်းဢေႃႈ။ ၵူၺ်းၵႃႈ၊ႁႂ်ႈၵဝ်ၶႃႈလႆႈၵႂႃႇတဵတ်ႇမႅပ်းယူႇၼႂ်းထိူၼ်ႇတေႃႇထိုင်ႁွတ်ႈၶိင်ႇႁူဝ်ၶမ်ႈဝၼ်းမိူဝ်ႈႁိုဝ်းသေၵမ်း။-
ပေႃးပေႃႈၸဝ်ႈၸဝ်ႈႁဝ်းၶႆႈၸႂ်ထူပ်းလွင်ႈဢၼ်ၵဝ်ၶႃႈဢမ်ႇၼင်ႈယူႇၵႃႈတီႈၽိူၼ်ၶဝ်ႈၼၼ်ႉၸိုင်၊ၶႅၼ်းတေႃႈလဝ်ႈလၢတ်ႈလႄႈဝႃႈ၊ ‘ တႃႇဝိတ်ႈ၊ ယွၼ်းဢၶႂၢင်ႉႁႂ်ႈလႆႈမိူဝ်းႁိူၼ်းၸူးတီႈဝဵင်း ပႅတ်ႉလႁႅမ်ႇ၊ ၵွပ်ႈပိူဝ်ႈဢၼ်ပဵၼ်ၶိင်ႇၶႃႇပွႆးၶွပ်ႈၶူပ်ႇဢၼ်ႁဵတ်းတၢင်းလူႇပုၼ်ႈပီႈၼွင်ႉၸိူဝ်ႉၶိူဝ်းမၼ်းၼၼ်ႉဢေႃႈ၊’ ဝႃႈၼႆသေၵမ်း။-
ပေႃးမၼ်းၸဝ်ႈဝႃႈ၊ ‘လီယဝ်ႉ၊’ ဝႃႈၼႆၸိုင်၊ၵဝ်ၶႃႈတၵ်းလွတ်ႈဢေႃႈ။ ပေႃးဝႃႈမၼ်းၸဝ်ႈၸႂ်မႆႈၶႂ်ႈၸႃႉၸိုင်၊ၶႅၼ်းတေႃႈႁုဝႃႈမၼ်းၸဝ်ႈတႅပ်းတတ်းႁႂ်ႈလႆႈႁဵတ်းၽေးသႂ်ႇတီႈၵဝ်ၶႃႈၼၼ်ႉယဝ်ႉ။-
ႁဵတ်းၵျေးၸူးတီႈၵဝ်ၶႃႈသေၵမ်း။ လွင်ႈမၼ်းၸမ်ႉ၊ၸဝ်ႈႁဝ်းတင်းၵဝ်ၶႃႈလႆႈႁဵတ်းၵတိသဵတ်ႈၸႃႇတီႈ ထႃႇဝရႃႉၽြႃး၊ ဝႆႉယဝ်ႉ။ ၼႂ်းဝႃႈၼၼ်သေၵေႃႈ၊ပေႃးၵဝ်ၶႃႈၽိတ်းပိူင်ႈၸိုင်၊တူဝ်ၸဝ်ႈႁဝ်းၽၼ်းၵဝ်ၶႃႈတၢႆသေၵမ်း။ ၵွပ်ႈပိူဝ်ႈၵႃႈသင်လႄႈဢဝ်ၵဝ်ၶႃႈၵႂႃႇတီႈပေႃႈၸဝ်ႈ၊ၸဝ်ႈႁဝ်းႁႂ်ႈၵဝ်ၶႃႈလႆႈတၢႆတီႈၶႃႈ၊” ဝႃႈၼင်ႇၼႆဢေႃႈ။
ယေႃးၼႀၼ်ႇ၊ ၶိုၼ်းလၢတ်ႈလႄႈဝႃႈ၊ “ယႃႇၶႆႈၸႂ်ၸိူဝ်ႉၼင်ႇၼၼ်သေၵမ်း။ ပေႃးၵဝ်ႁုသေႇၶျႃႇလွင်ႈဢၼ်ပေႃႈၸဝ်ႈၵဝ်တႅပ်းတတ်းၸႂ်ႁႂ်ႈလႆႈႁဵတ်းၽေးသႂ်ႇမႂ်းၸိုင်၊ၵဝ်ယင်းဢမ်ႇမွၵ်ႇဢမ်ႇလၢတ်ႈမႂ်းလႄႈတၵ်းယူႇႁိုဝ်း၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ၵေႃႈထၢမ်လႄႈဝႃႈ၊ “ပေႃးပေႃႈၸဝ်ႈၸဝ်ႈႁဝ်းၶိုၼ်းတွပ်ႇလၢတ်ႈၸဝ်ႈႁဝ်းႁၢဝ်ႉၵျၢမ်းၼႃႇၸိုင်၊ၽူႈလႂ်တၵ်းမႃးမွၵ်ႇလၢတ်ႈႁႂ်ႈၵဝ်ၶႃႈလႆႈႁုၶႃႈ၊” ဝႃႈၼင်ႇၼႆသေယဝ်ႉ။
ယေႃးၼႀၼ်ႇ၊ ၶိုၼ်းလၢတ်ႈလႄႈဝႃႈ၊ “မႃးတႃႉ။ ၵႂႃႇၵႃႈၼႂ်းထိူၼ်ႇတႃႉႁဝ်း၊” ဝႃႈၼင်ႇၼႆလႄႈ၊ၶဝ်ၵႂႃႇဢေႃႈ။-
ယေႃးၼႀၼ်ႇ၊ လၢတ်ႈတီႈ တႃႇဝိတ်ႈ၊ လႄႈဝႃႈ၊ “ႁႂ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ ၼႆႉပဵၼ်သၢၵ်ႈသေႇပုၼ်ႈႁဝ်းသွင်ၵေႃႉသေၵမ်းလူၺ်ႈ။ မိူဝ်ႈၽုၵ်ႈဢမ်ႇၼၼ်ၵေႃႈမိူဝ်ႈႁိုဝ်းမိူဝ်ႈၶိင်ႇၼႆႉၼၼ်ႉၵဝ်တၵ်းတွင်ႈထၢမ်တူၺ်းတီႈပေႃႈၸဝ်ႈၵဝ်ဢေႃႈ။ ပေႃးမၼ်းၸဝ်ႈမီးသၽေႃးဢၼ်လီတီႈမႂ်းၸိုင်၊ၵဝ်တၵ်းသင်ႇၵႂၢမ်းမႃးတီႈမႂ်းဢေႃႈ။-
ပေႃးမၼ်းၸဝ်ႈမီးဢၵျၢမ်ႇဢၼ်တၵ်းႁဵတ်းၽေးသႂ်ႇမႂ်းလႄႈ၊ၵဝ်သမ်ႉယင်းဢမ်ႇမွၵ်ႇလၢတ်ႈႁႂ်ႈမႂ်းလႆႈႁု၊ယင်းဢမ်ႇၵႄႇသႄႇဢဝ်ႁႂ်ႈမႂ်းလႆႈလွတ်ႈၸိုင်၊ႁႂ်ႈ ထႃႇဝရႃႉၽြႃး၊ ပေႃႉထုပ်ႉသႂ်ႇၵဝ်တၢႆသေၵမ်းလူၺ်ႈ။ ႁႂ်ႈ ထႃႇဝရႃႉၽြႃး၊ မီးယူႇလူၺ်ႈၵၼ်တင်းမႂ်း၊မိူၼ်ၸိူဝ်ႉၼင်ႇဢၼ်မၼ်းၸဝ်ႈမီးယူႇလူၺ်ႈၵၼ်တင်းပေႃႈၸဝ်ႈၵဝ်ၶႃႈမႃးယဝ်ႉၼၼ်ႉသေၵမ်း။-
ပေႃးၵဝ်ယင်းဢသၢၵ်ႈလိပ်းလႄႈၵိုတ်းၵျၢၼ်ႇယူႇၸိုင်၊ႁဵတ်းၵျေးၸူးပႂ်ႉသဵတ်ႈၸႃႇၼိူဝ်ၵဝ်ယူႇသေၵမ်း။ ၵူၺ်းၵႃႈ၊ပေႃးၵဝ်တၢႆၵႂႃႇၸိုင်၊-
ႁဵတ်းၵျေးၸူးပႂ်ႉသဵတ်ႈၸႃႇၵႃႈတီႈၵူၼ်းႁိူၼ်းၵဝ်တင်းလၢႆသေႇသေႇသေၵမ်း။ လိူဝ်သေၼၼ်ႉမိူဝ်ႈဢၼ် ထႃႇဝရႃႉၽြႃး၊ ပႄႇၽဵဝ်ႈပႅတ်ႈရၢၼ်ႇသူႇမႂ်းၵႃႈမီးမူတ်းမူတ်းၵဵင်ႈၵဵင်ႈယဝ်ႉၼၼ်ႉၸိုင်၊-
ႁႂ်ႈၵႂၢမ်းၵတိသဵတ်ႈၸႃႇႁဝ်းၼၼ်ႉ ဢမ်ႇထၢတ်ႇဢမ်ႇၶၢတ်ႇသေၵမ်းလူၺ်ႈ။ ပေႃးထၢတ်ႇၵႂႃႇၶၢတ်ႇၵႂႃႇၸိုင်၊ ထႃႇဝရႃႉၽြႃး၊ တၵ်းၸီႇယၢင်ႇပၼ်တၢမ်ႇတီႈမႂ်းဢေႃႈ၊” ဝႃႈၼင်ႇၼႆဢေႃႈ။
ၵမ်းၼၼ်ႉ၊ ယေႃးၼႀၼ်ႇ၊ သမ်ႉႁႂ်ႈ တႃႇဝိတ်ႈ၊ ဝႆႉၵတိသဵတ်ႈၸႃႇဝႃႈ၊တၵ်းႁၵ်ႉမၼ်းၼၼ်ႉဢေႃႈ။ လွင်ႈမၼ်းၸမ်ႉ၊ ယေႃးၼႀၼ်ႇ၊ ႁၵ်ႉ တႃႇဝိတ်ႈ၊ ၼႃႇလူင်လၢင်မိူၼ်မၼ်းႁၵ်ႉတူဝ်ၸဝ်ႈၵဝ်ႇဢေႃႈ။-
မိူဝ်ႈၼၼ်ႉ၊ ယေႃးၼႀၼ်ႇ၊ လၢတ်ႈတီႈ တႃႇဝိတ်ႈ၊ လႄႈဝႃႈ၊ “မိူဝ်ႈၽုၵ်ႈပဵၼ်ဝၼ်းပွႆးလိူၼ်မႂ်ႇယဝ်ႉ။ ၵူၼ်းတင်းလၢႆတၵ်းဢွၼ်ၵၼ်ၶုၵ်းၸႂ်လႆႈလွင်ႈဢၼ်မႂ်းဢမ်ႇမီးတီႈၼၼ်ႈၵွပ်ႈပိူဝ်ႈတီႈၼင်ႈမႂ်းပဝ်ႇဝႆႉၼၼ်ႉဢေႃႈ။-
ၼႂ်းဝၼ်းမိူဝ်ႈႁိုဝ်းၼၼ်ႉပိူၼ်ႈတၵ်းယဵင်ႈၶႅၼ်းၶႆႈၸႂ်ထူပ်းလူၺ်ႈလွင်ႈဢၼ်မႂ်းဢမ်ႇမီးယူႇၼၼ်ႉယဝ်ႉ။ ပိူဝ်ႈၼႆလႄႈၵႂႃႇပၢႆႈတဵတ်ႇယူႇတီႈဢၼ်မႂ်းမႅပ်းၵမ်းဢွၼ်တၢင်း၊ၽၢႆႇလင်မၢၵ်ႇႁိၼ် ဢေႇၸေႇလႃႉ၊ ၼၼ်ႉတႃႉ။-
ၵဝ်တၵ်းပိုတ်းပိုၼ်ၵၢင်ႇၸိူဝ်ႉၼင်ႇႁၢင်ႈယိုဝ်းၸၢၵ်ႈၵႃႈတီႈမၢၵ်ႇႁိၼ်ၼၼ်ႉသၢမ်လိမ်ႈဢေႃႈ။-
ၵဝ်သမ်ႉတၵ်းၸႂ်ႉၵူၼ်းဢွၼ်ႇၵဝ်ၵႂႃႇၵဵပ်းဢဝ်ပိုၼ်ၸိူဝ်းၼၼ်ႉဢေႃႈ။ ပေႃးၵဝ်ႁွင်ႉလၢတ်ႈတီႈမၼ်းလႄႈဝႃႈ၊ ‘ၼႄႈ။ ပိုၼ်ၸိူဝ်းၼၼ်ႉမီးၽၢႆႇၼႆႉမႂ်းဢိူဝ်း။ ၵဵပ်းဢဝ်မႃးတႃႉ၊’ ဝႃႈၼင်ႇၼႆၸိုင်၊မႂ်းဢွၵ်ႇသေၵႃႈတီႈဢၼ်တဵတ်ႇမႅပ်းယူႇၼၼ်ႉမႃးလႆႈယဝ်ႉ။ ၵဝ်တိူင်ႇၵၢဝ်ႇၵတိလူၺ်ႈၽြႃးဢၼ်ဢသၢၵ်ႈလိပ်းယူႇလႄႈဝႃႈ၊မႂ်းလွတ်ႈၽေးယဝ်ႉ။-
ၵူၺ်းၵႃႈ၊ပေႃးၵဝ်လၢတ်ႈတီႈမၼ်းလႄႈဝႃႈ၊ ‘ပိုၼ်ၸိူဝ်းၼၼ်ႉယူႇၽၢႆႇပုၼ်ႉမႂ်းဢိူဝ်း၊’ ဝႃႈၼႆၸိုင်၊ဢွၵ်ႇပၢႆႈၵႂႃႇတႃႉ။ ထႃႇဝရႃႉၽြႃး၊ ပွႆႇၸႂ်ႉမႂ်းၵႂႃႇဢေႃႈ။-
ၼႂ်းလွင်ႈဢၼ်ႁဝ်းသွင်ၵေႃႉဝႆႉၵတိသဵတ်ႈၸႃႇတီႈၵၼ်ၼၼ်ႉႁႂ်ႈ ထႃႇဝရႃႉၽြႃး၊ မီးယူႇဝူင်ႈၵၢင်မႂ်းတင်းၵဝ်ၼႆႉသေၵမ်းလူၺ်ႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ တႃႇဝိတ်ႈ၊ တဵတ်ႇမႅပ်းယူႇၼႂ်းထိူၼ်ႇဢေႃႈ။ ၼႂ်းဝၼ်းပွႆးလိူၼ်မႂ်ႇၼၼ်ႉၶုၼ်ႁေႃၶမ်း သေႃးလု၊ မႃးၵႃႈတီႈၽိူၼ်ၶဝ်ႈလႄႈ၊-
ၸွမ်းၼင်ႇထုင်းၸၢမ်ႇမီးၼၼ်ႉၼင်ႈယူႇၵႃႈတီႈတီႈၼင်ႈမၼ်းဢၼ်မီးႁိမ်းၽႃၼၼ်ႉဢေႃႈ။ ဢပ်ႉပၼႃး၊ ၼင်ႈၽႃၶၢင်ႈမၼ်းလႄႈ၊ ယေႃးၼႀၼ်ႇ၊ ၼင်ႈတေႃႇၼႃႈမၼ်းဢေႃႈ။ တီႈၼင်ႈ တႃႇဝိတ်ႈ၊ ၸမ်ႉ၊ပဝ်ႇဝႆႉဢေႃႈ။-
ၵူၺ်းၵႃႈ၊ သေႃးလု၊ ဢမ်ႇလၢတ်ႈၵႃႈသင်လူၺ်ႈလွင်ႈမၼ်းၼၼ်ႉလႄႈထၢင်ႇဝႃႈ၊ “မၼ်းပဵၼ်သေၸိူဝ်ႉသေပိူင်လႄႈမၼ်းႁွတ်ႈထိုင်တၢင်းဢၼ်ဢမ်ႇမူတ်းသႂ်ယဝ်ႉ၊” ဝႃႈၼင်ႇၼႆဢေႃႈ။-
ဝၼ်းမိူဝ်ႈၽုၵ်ႈဝၢႆးပွႆးလိူၼ်မႂ်ႇၼၼ်ႉတီႈၼင်ႈ တႃႇဝိတ်ႈ၊ ယင်းပဝ်ႇဝႆႉလူးၵွၼ်ႇလႄႈ သေႃးလု၊ ထၢမ် ယေႃးၼႀၼ်ႇ၊ လႄႈဝႃႈ၊ “ တႃႇဝိတ်ႈ၊ ပဵၼ်ဢီႈသင်လႄႈယင်းဢမ်ႇမႃးၵိၼ်ပွႆးၸဝ်ႈဝၼ်းမိူဝ်ႈဝႃး၊ဢိၵ်ႇတင်းဝၼ်းမိူဝ်ႈၼႆႉ၊” ဝႃႈၼင်ႇၼႆဢေႃႈ။
ယေႃးၼႀၼ်ႇ၊ ၶိုၼ်းလဝ်ႈလၢတ်ႈလႄႈဝႃႈ၊ “မၼ်းယွၼ်းဢၶႂၢင်ႉတီႈၶႃႈၸဝ်ႈႁႂ်ႈလႆႈမိူဝ်းၵႂႃႇၵႃႈတီႈဝဵင်း ပႅတ်ႉလႁႅမ်ႇ၊ လႄႈ၊-
တွင်းပၢၼ်ႇလႄႈဝႃႈ၊ ‘ႁႂ်ႈၵဝ်ၶႃႈလႆႈပွၵ်ႈမိူဝ်းသေၵမ်း။ ၵွပ်ႈပိူဝ်ႈပီႈၼွင်ႉၸိူဝ်ႉၶိူဝ်းႁဝ်းၶႃႈႁဵတ်းပွႆးတၢင်းလူႇၵႃႈတီႈၼႂ်းဝဵင်းၼၼ်ႉလႄႈပီႈဢၢႆႈၵဝ်ၶႃႈၸိူဝ်းၼၼ်ႉၸႂ်ႉႁႂ်ႈၵဝ်ၶႃႈၵႂႃႇပွႆးၼၼ်ႉၶႃႈဢေႃႈ။ ပေႃးၸဝ်ႈႁဝ်းပဵၼ်ၵေႃႉသႄႈၵဝ်ၶႃႈဢမၢၼ်ႇၶၼ်ပဵၼ်ၸိုင်၊ၶႅၼ်းတေႃႈပၼ်ဢၶႂၢင်ႉႁႂ်ႈၵဝ်ၶႃႈလႆႈၵႂႃႇထူပ်းႁၼ်ပီႈဢၢႆႈၵဝ်ၶႃႈတင်းလၢႆသေၵမ်းၶႃႈ၊’ ဝႃႈၼင်ႇၼႆဢေႃႈ။ ၵွပ်ႈပိူဝ်ႈၸိူဝ်ႉၼင်ႇၼၼ်လႄႈမၼ်းဢမ်ႇလႆႈမႃးၵိၼ်ပွႆးၸဝ်ႈႁဝ်းၼႆႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ သေႃးလု၊ ၸႂ်မႆႈၶႂ်ႈၸႃႉတီႈ ယေႃးၼႀၼ်ႇ၊ လႄႈဝႃႈ၊ “လုၵ်ႈမၢၼ်းလၢႆၼႆႉ႟။ ၵဝ်ႁုလွင်ႈဢၼ်မႂ်းၽွမ်ႉၽၢႆႇ တႃႇဝိတ်ႈ၊ ၼၼ်ႉထၢၼ်ႈပေႃးႁဵတ်းႁႂ်ႈတူဝ်ၸဝ်ႈၵဝ်ႇဢူၵ်းဢၢႆၸိူဝ်ႉၼင်ႇဢၼ်မႄႈမႂ်းပွႆႇတူဝ်ပူၺ်ၼၼ်ႉယဝ်ႉလူင်ပႄႇ။-
ၼႂ်းၵႃႈၸူဝ်ႈဢၼ် တႃႇဝိတ်ႈ၊ ယင်းဢသၢၵ်ႈလိပ်းယူႇၼႆႉမႂ်းဢမ်ႇၸၢင်ႈလႆႈပဵၼ်ၶုၼ်ႁေႃၶမ်းၼႂ်းမိူင်းၼႆႉၼၼ်ႉမႂ်းဢမ်ႇႁုႁိုဝ်း။ တေႃႈလဵဝ်ၼႆႉၵႂႃႇလႄႈဢဝ်မၼ်းမႃးၵႃႈတီႈၼႆႈတႃႉ။ မၼ်းတၵ်းလႆႈတၢႆဢေႃႈ၊” ဝႃႈၼင်ႇၼႆဢေႃႈ။
ယေႃးၼႀၼ်ႇ၊ ၶိုၼ်းလဝ်ႈလၢတ်ႈလႄႈဝႃႈ၊ “ၵွပ်ႈပိူဝ်ႈၵႃႈသင်လႄႈ တႃႇဝိတ်ႈ၊ တၵ်းလႆႈတၢႆတီႈၶႃႈ။ မၼ်းႁဵတ်းၽိတ်းၵႃႈသင်ယဝ်ႉတီႈၶႃႈ၊” ဝႃႈၼင်ႇၼႆဢေႃႈ။
သေႃးလု၊ ဢဝ်ႁွၵ်ႇထိမ်ႈသႂ်ႇ ယေႃးၼႀၼ်ႇ၊ ႁႂ်ႈလႆႈဢဝ်မၼ်းတၢႆဢေႃႈ။ မိူဝ်ႈၼၼ်ႉ၊ ယေႃးၼႀၼ်ႇ၊ ႁုႁၼ်လွင်ႈဢၼ်ပေႃႈၸဝ်ႈမၼ်းမီးတၢင်းၵျၢမ်ႇပွင်ဢၼ်တၵ်းဢဝ် တႃႇဝိတ်ႈ၊ တၢႆၼၼ်ႉဢေႃႈ။-
ယေႃးၼႀၼ်ႇ၊ ဢွၵ်ႇတေႃးသႃႉလႄႈလုၵ်ႉဢွၵ်ႇသေၵႃႈတီႈၽိူၼ်ၶဝ်ႈၵႂႃႇသေယဝ်ႉ၊ယင်းဢမ်ႇၵိၼ်သေၸိူဝ်ႉသေပိူင်ၼႂ်းဝၼ်းလိူၼ်မႂ်ႇသွင်ၶမ်ႈၼၼ်ႉလႄႈယူႇဢေႃႈ။ လွင်ႈမၼ်းၸမ်ႉ၊မၼ်းမႆႈၸႂ်ပုၼ်ႈ တႃႇဝိတ်ႈ၊ ၵွပ်ႈပိူဝ်ႈဢၼ်ပေႃႈၸဝ်ႈမၼ်းယႃႉသရေႇ တႃႇဝိတ်ႈ၊ ၼၼ်ႉဢေႃႈ။-
မိူဝ်ႈဢၼ်ထိုင်ၶိင်ႇၵၢင်ၼႂ် ၼႂ်းဝၼ်းမိူဝ်ႈၽုၵ်ႈၼၼ်ႉၸိုင်၊ ယေႃးၼႀၼ်ႇ၊ ႁွင်ႉပႃးဢဝ်ၵူၼ်းဢွၼ်ႇမၼ်းၵေႃႉၼိုင်ႈသေယဝ်ႉ၊ၵႂႃႇၵႃႈတီႈထိူၼ်ႇၸူးတီႈ တႃႇဝိတ်ႈ၊ ၸွမ်းၵႃႈၼင်ႇဢၼ်ၶဝ်ၶဵၼ်းၵၼ်ဝႆႉၼၼ်ႉဢေႃႈ။-
မၼ်းလၢတ်ႈတီႈၵူၼ်းဢွၼ်ႇမၼ်းလႄႈဝႃႈ၊ “လႅၼ်ႈၵႂႃႇႁႂ်ႈလႆႈႁႃဢဝ်ပိုၼ်ဢၼ်ၵဝ်တၵ်းယိုဝ်းၸိူဝ်းၼၼ်ႉတႃႉ၊” ဝႃႈၼင်ႇၼႆသေလႄႈ၊မိူဝ်ႈဢၼ်ၵူၼ်းဢွၼ်ႇယင်းတိုၵ်ႉလႅၼ်ႈၵႂႃႇယူႇၼၼ်ႉ ယေႃးၼႀၼ်ႇ၊ ယိုဝ်းပိုၼ်လိမ်ႈၼိုင်ႈပူၼ်ႉမၼ်းၵႂႃႇဢေႃႈ။-
ၼႂ်းမိူဝ်ႈဢၼ်ၵူၼ်းဢွၼ်ႇၼၼ်ႉႁွတ်ႈထိုင်ၵႂႃႇၵႃႈတီႈဢၼ်ပိုၼ်တူၵ်းၼၼ်ႉၸိုင်၊ ယေႃးၼႀၼ်ႇ၊ ႁွင်ႉၸွမ်းလင်မၼ်းၼၼ်ႉလႄႈဝႃႈ၊ “ပိုၼ်ၼၼ်ႉပူၼ်ႉမႂ်းၵႂႃႇယဝ်ႉ။-
ယႃႇပေၸုၵ်းယူႇၵူၺ်း။ ႁိပ်ႈၼႅတ်ႈၶုၼ်ႇလႅၼ်ႈၶၼ်ၶၼ်ၽႂ်းၽႂ်းတႃႉ၊” ဝႃႈၼင်ႇၼႆဢေႃႈ။ ၵူၼ်းဢွၼ်ႇၼၼ်ႉၵဵပ်းဢဝ်ပိုၼ်သေလႄႈပွၵ်ႈမႃးၸူးတီႈၸဝ်ႈမၼ်းဢေႃႈ။-
ၵူၼ်းဢွၼ်ႇၼၼ်ႉယင်းဢမ်ႇႁုလွင်ႈၼၼ်ႉ။ ယေႃးၼႀၼ်ႇ၊ တင်း တႃႇဝိတ်ႈ၊ ၵူၺ်းႁုဢေႃႈ။-
ယေႃးၼႀၼ်ႇ၊ ဢဝ်ၶိူင်ႈလၢၵ်ႈၼၢၵ်ႈမၼ်းပၼ်တီႈၵူၼ်းဢွၼ်ႇၼၼ်ႉသေယဝ်ႉ၊ႁႂ်ႈမၼ်းဢဝ်ပွၵ်ႈမိူဝ်းၵႂႃႇၵႃႈတီႈဝဵင်းသေဢေႃႈ။
လိုၼ်းသေဢၼ်ၵူၼ်းဢွၼ်ႇၼၼ်ႉဢွၵ်ႇၵႂႃႇယဝ်ႉၼၼ်ႉ၊ တႃႇဝိတ်ႈ၊ ဢွၵ်ႇသေၵႃႈတီႈၽၢႆႇလင်မၢၵ်ႇႁိၼ်လူင် မႃးသေယဝ်ႉ၊ၶုပ်ႉမူပ်ႇၵႃႈၼိူဝ်လိၼ်လႄႈၵူမ်ႈႁူဝ်ၸူးသၢမ်ပွၵ်ႈဢေႃႈ။ ၶဝ်သွင်ၵေႃႉၼၼ်ႉၵေႃႉၼိုင်ႈလႄႈၵေႃႉၼိုင်ႈၼူမ်ၵၼ်ယူႇ၊ဢွၼ်ၵၼ်ၼမ်ႉတႃတူၵ်းယူႇလႄႈ၊ တႃႇဝိတ်ႈ၊ ယဵင်ႈၶႅၼ်းထိုင်ၸႂ်ၼႃႇသေ ယေႃးၼႀၼ်ႇ၊ ဢေႃႈ။-
ယေႃးၼႀၼ်ႇ၊ ၵေႃႈလၢတ်ႈတီႈ တႃႇဝိတ်ႈ၊ လႄႈဝႃႈ၊ “ ထႃႇဝရႃႉၽြႃး၊ တၵ်းမီးယူႇၵႃႈတီႈဝူင်ႈၵၢင်မႂ်းတင်းၵဝ်လႄႈ၊ႁႂ်ႈၵႂၢမ်းဢၼ်ႁႃးသွင်ၵေႃႉဝႆႉၵတိသဵတ်ႈၸႃႇတေႃႇၵၼ်ၼၼ်ႉတႄႇယူႇၸူဝ်ႈလုၵ်ႈပၢၼ်လၢၼ်မႂ်းတင်းၸူဝ်ႈလုၵ်ႈပၢၼ်လၢၼ်ၵဝ်သေၵမ်းလူၺ်ႈ။ ႁႂ်ႈ ထႃႇဝရႃႉၽြႃး၊ မီးယူႇလူၺ်ႈၵၼ်တင်းမႂ်းၸူဝ်ႈၶၢဝ်းတၢင်းမႂ်းသေၵမ်းလူၺ်ႈ၊” ဝႃႈၼင်ႇၼႆဢေႃႈ။ တႃႇဝိတ်ႈ၊ ၵေႃႈဢွၵ်ႇၵႂႃႇလႄႈ ယေႃးၼႀၼ်ႇ၊ ၶိုၼ်းၶဝ်ႈၵႂႃႇၵႃႈၼႂ်းဝဵင်းသေဢေႃႈ။
တႃႇဝိတ်ႈ၊ ၵႂႃႇၵႃႈတီႈဝဵင်း ၼေႃႇပႃႉ၊ ၸူးတီႈယဵၸ်ႈပရေႃးႁဵၵ်ႈ ဢႁိမလႅၵ်ႉ၊ လႄႈ၊ ဢႁိမလႅၵ်ႉ၊ ၼၼ်ႉသၼ်ႇသၼ်ႇသၢႆသၢႆမႃးႁပ်ႉႁူဝ်တၢင်းမၼ်းလႄႈထၢမ်ဝႃႈ၊ “ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းမႃးၵႃႈတီႈၼႆႈၵေႃႉလဵဝ်ၵူၺ်းႁဵတ်းသင်၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ၶိုၼ်းလၢတ်ႈလႄႈဝႃႈ၊ “ၵဝ်မႃးၵႃႈတီႈၼႆႈလူၺ်ႈၼႃႈၵၢၼ်ၶုၼ်ႁေႃၶမ်းဢေႃႈ။ မၼ်းၸဝ်ႈသင်ႇလၢတ်ႈဝႆႉလွင်ႈဢၼ်ၵဝ်တၵ်းႁဵတ်းၵႃႈသင်ၼၼ်ႉဢမ်ႇႁႂ်ႈၽူႈလႂ်လႆႈႁုသေၵေႃႉသေၵူၼ်းဢေႃႈ။ လူၺ်ႈလွင်ႈၵူၼ်းၵဝ်တင်းလၢႆၸိုင်၊ၵဝ်ၶဵၼ်းဝႆႉႁႂ်ႈလႆႈထူပ်းၵၼ်တီႈၼိုင်ႈဢေႃႈ။-
တေႃႈလဵဝ်ၼႆႉၸိုင်၊ၸဝ်ႈမီးတၢင်းၵိၼ်ဢၼ်လႂ်၊ၶႅၼ်းတေႃႈပၼ်ၶဝ်ႈမုၼ်းႁႃႈလုၵ်ႈ၊ဢမ်ႇၼၼ်ပၼ်သေၸိူဝ်ႉသေပိူင်ၵႃႈဢၼ်ၸဝ်ႈမီးၼၼ်ႉသေၵမ်းၶႃႈ၊” ဝႃႈၼင်ႇၼႆဢေႃႈ။
ယဵၸ်ႈပရေႃးႁဵၵ်ႈ ၼၼ်ႉၶိုၼ်းလၢတ်ႈလႄႈဝႃႈ၊ “ၵႃႈတီႈၵဝ်ၶႃႈၼႆႉဢမ်ႇမီးၶဝ်ႈမုၼ်းယူဝ်းယူဝ်းၼၼ်ႉ။ မီးၶဝ်ႈမုၼ်းဢၼ်မူတ်းၸၢင်ႇၵူၺ်းဢေႃႈ။ ပေႃးၵူၼ်းဢွၼ်ႇမႂ်းၸိူဝ်းၼႆႉဢမ်ႇလႆႈသိူၵ်ႈသမ်ႇၵႃႇမႃႉလူၺ်ႈၵၼ်တင်းမႄႈယိင်းသေဢိတ်းၸိုင်၊ၵဝ်ၶႃႈတၵ်းပၼ်ဢေႃႈ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ၵေႃႈၶိုၼ်းလၢတ်ႈလႄႈဝႃႈ၊ “ၶဝ်ဢမ်ႇလႆႈႁူမ်ႈပွင်းၵၼ်တင်းမႄႈယိင်းၸွမ်းၼင်ႇထုင်းၸၢမ်ႇဢၼ်ႁဝ်းႁဵတ်းသေႇသေႇ မိူဝ်ႈဢၼ်ၵဝ်ဢွၵ်ႇတႃႈပႆတၢင်းၵူႈပွၵ်ႈၼၼ်ႉဢေႃႈ။ ပိူဝ်ႈၼႆလႄႈႁဝ်းဢွၵ်ႇတႃႈပႆတၢင်းဢၼ်ဢမ်ႇမူတ်းသႂ်ၼၼ်ႉသေၵေႃႈၶိူင်ႈပိူင်ၵူၼ်းဢွၼ်ႇၵဝ်ၸိူဝ်းၼၼ်ႉယင်းမူတ်းသႂ်ယူႇဢေႃႈ။ ဝၼ်းမိူဝ်ႈၼႆႉၸိုင်၊ယဵင်ႈၶႅၼ်းမူတ်းသႂ်ၼႃႇဢေႃႈ၊” ဝႃႈၼင်ႇၼႆဢေႃႈ။
ၼင်ႇၼၼ်လႄႈယဵၸ်ႈပရေႃးႁဵၵ်ႈၼၼ်ႉဢဝ်ၶဝ်ႈမုၼ်းဢၼ်မူတ်းၸၢင်ႇၼၼ်ႉပၼ်တီႈ တႃႇဝိတ်ႈ၊ ၵွပ်ႈပိူဝ်ႈဢၼ်မၼ်းဢမ်ႇမီးၶဝ်ႈမုၼ်း၊ၼွၵ်ႈသေၶဝ်ႈမုၼ်းဢၼ်သၢၵ်ႈလူႇတီႈၽြႃးပဵၼ်ၸဝ်ႈယဝ်ႉသေယဝ်ႉ၊လႆႈဢဝ်ဢွၵ်ႇသေၵႃႈၼိူဝ်ၽိူၼ်မူတ်းၸၢင်ႇလႄႈသမ်ႉဢဝ်ၶဝ်ႈမုၼ်းမႂ်ႇမႂ်ႇတၢင်ႇသႂ်ႇဝႆႉဢေႃႈ။
(ၼႂ်းဝၼ်းၼၼ်ႉၸၢင်ႈပဵၼ်ၸၢင်ႈဝႃႈ၊ၵူၼ်း သေႃးလု၊ ၵေႃႉဢၼ်ဢုပ်ႉပိူင်ႇၵႃႈၼိူဝ်ၵူၼ်းလဵင်ႉသူဝ်းၸဝ်ႈဢၼ်ၸိုဝ်ႈသဵင်မၼ်းႁွင်ႉႁဵၵ်ႈဝႃႈ၊ တွၵ်ႉၵႃႉ၊ ၵူၼ်းမဵဝ်း ဢေႇတုမ်ႇ၊ ၼၼ်ႉမႃးမီးယူႇတီႈၼၼ်ႈၵိုတ်းသဝ်းယူႇၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢေႃႈ။)
တႃႇဝိတ်ႈ၊ လၢတ်ႈတီႈ ဢႁိမလႅၵ်ႉ၊ လႄႈဝႃႈ၊ “ၸွင်ႇၸဝ်ႈမီးႁွၵ်ႇလႂ်၊လၢပ်ႇလႂ်တႃႇတေပၼ်ၵဝ်ၶႃႈၶႃႈႁိုဝ်း။ ၶုၼ်ႁေႃၶမ်းပူင်ဢမိင်ႉႁႂ်ႈၵဝ်ၶႃႈဢွၵ်ႇၶၼ်ၶၼ်ၽႂ်းၽႂ်းၼႃႇလႄႈၵဝ်ၶႃႈဢမ်ႇတၼ်းပႃးလၢပ်ႇလႂ်၊လၢၵ်ႈၼၢၵ်ႈလႂ်သေၸိူဝ်ႉသေပိူင်တီႈၶႃႈ၊” ဝႃႈၼင်ႇၼႆဢေႃႈ။
ဢႁိမလႅၵ်ႉ၊ ၶိုၼ်းလၢတ်ႈလႄႈဝႃႈ၊ “မီးလၢပ်ႇ ၵေႃးလျတ်ႈ၊ ၵူၼ်း ၽိလိတ်ႉတိ၊ ဢၼ်မႂ်းဢဝ်တၢႆၵႃႈတီႈပၢင်ႇႁူၺ်ႈ ဢေးလႃႇ၊ ၼၼ်ႉဢေႃႈ။ ဢဝ်ၽႃႈႁေႃႇဝႆႉလႄႈမီးၽၢႆႇလင်သိူဝ်ႈသုပ်းၸဝ်ႈၼၼ်ႉဢေႃႈ။ ၶႂ်ႈဢဝ်ၵေႃႈဢဝ်တႃႉ။ လၢပ်ႇတၢင်ႇမၢၵ်ႈဢမ်ႇမီးယဝ်ႉ၊” ဝႃႈၼင်ႇၼႆလႄႈ။ တႃႇဝိတ်ႈ၊ လၢတ်ႈလႄႈဝႃႈ၊ “လၢပ်ႇဢၼ်လီသေၼႆႉဢမ်ႇမီးၶႃႈယဝ်ႉ။ ပၼ်သေၵမ်းၶႃႈ၊” ဝႃႈၼင်ႇၼႆဢေႃႈ။
ၼႂ်းဝၼ်းၼၼ်ႉၵမ်းလဵဝ် တႃႇဝိတ်ႈ၊ ဢွၵ်ႇပၢႆႈၵွပ်ႈပိူဝ်ႈဢၼ်ၵူဝ် သေႃးလု၊ ၼၼ်ႉလႄႈၵႂႃႇၸူးတီႈၶုၼ်ႁေႃၶမ်း ဢႃႇၶိတ်ႉ၊ ဝဵင်း ၵတ်ႉတိ၊ ဢေႃႈ။-
ၶုၼ်ဢၼ်ပွင်ၵၢၼ်ၼႂ်းႁေႃၶုၼ်ႁေႃၶမ်း ဢႃႇၶိတ်ႉ၊ ၸိူဝ်းၼၼ်ႉလဝ်ႈလၢတ်ႈလႄႈဝႃႈ၊ “ၵေႃႉၼႆႉပဵၼ် တႃႇဝိတ်ႈ၊ ၶုၼ်ႁေႃၶမ်းမိူင်းပုၼ်ႉဢမ်ႇၸႂ်ႈၶႃႈႁိုဝ်း။ မၼ်းပဵၼ်ၵေႃႉဢၼ်မႄႈယိင်းတင်းလၢႆႁဵတ်းၵႂၢမ်းၼႂ်းတၢင်းဢၼ်ၶဝ်ၵႃႈဝႅၼ်ၼၼ်ႉလႄႈဝႃႈ၊ ‘ သေႃးလု၊ ဢဝ်တၢႆပဵၼ်ႁဵင်ပဵၼ်ႁဵင်လႄႈ တႃႇဝိတ်ႈ၊ ဢဝ်တၢႆပဵၼ်မိုၼ်ႇပဵၼ်မိုၼ်ႇယဝ်ႉ၊’ ဝႃႈၼႆၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵႂၢမ်းၸိူဝ်းၼၼ်ႉ တႃႇဝိတ်ႈ၊ ဢဝ်ၵဵပ်းဝႆႉၵႃႈၼႂ်းၸႂ်မၼ်းလႄႈမၼ်းၵူဝ်ႁႄၶုၼ်ႁေႃၶမ်း ဢႃႇၶိတ်ႉ၊ ၼႃႇလူင်လၢင်ဢေႃႈ။-
ပိူဝ်ႈၼႆလႄႈမၼ်းႁဵတ်းၼင်ႇႁၢင်ႈပဵၼ်ၵူၼ်းယွင်ႇၵႃႈတီႈၽၢႆႇၼႃႈပရိၵ်ႈသၢတ်ႈလႄႈမိူဝ်ႈဢၼ်ပိူၼ်ႈဢၢင်ႈတၵ်းႁၢမ်ႈတၢပ်ႈမၼ်းၸိုင်၊မၼ်းႁဵတ်းယွင်ႇႁဵတ်းမႃႈယူႇသေလႄႈၶိတ်ႇတႅမ်ႈၵႃႈၼိူဝ်မႂ်ၽၵ်းတူဝဵင်းယူႇ၊ႁႂ်ႈၼမ်ႉလၢႆးယွႆႈၸွမ်းၼူတ်ႇၵၢင်းမၼ်းယူႇဢေႃႈ။-
ၶုၼ်ႁေႃၶမ်း ဢႃႇၶိတ်ႉ၊ ၵေႃႈလၢတ်ႈတီႈၵူၼ်းမၼ်းၸိူဝ်းၼၼ်ႉလႄႈဝႃႈ၊ “မၼ်းပဵၼ်ၵူၼ်းယွင်ႇဢေႃႈ။ ႁဵတ်းသင်လႄႈသူဢဝ်မၼ်းၶဝ်ႈၸူးတီႈၵဝ်ၸိူဝ်ႉၼင်ႇႁိုဝ်။-
ၵဝ်လူဝ်ႇၵူၼ်းယွင်ႇလႄႈသူဢဝ်ၵူၼ်းယွင်ႇၵေႃႉၼႆႉၶဝ်ႈမႃးယႃႉၵဝ်းၵဝ်ႁိုဝ်း။ ၵူၼ်းၸိူဝ်ႉၼင်ႇမၼ်းၼႆႉထုၵ်ႇလီၶဝ်ႈၵႃႈၼႂ်းႁေႃၵဝ်ၼႆႉႁိုဝ်း၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ဢွၵ်ႇသေၵႃႈတီႈဝဵင်း ၵတ်ႉတိ၊ လႄႈပၢႆႈၵႂႃႇၵႃႈတီႈႁူးထမ်ႈႁိမ်းဝဵင်း ဢတုလမ်ႇ၊ ဢေႃႈ။ ပီႈဢၢႆႈမၼ်းတင်းလၢႆ၊ဢိၵ်ႇတင်းပီႈၼွင်ႉၸိူဝ်ႉၶိူဝ်းမၼ်းၵႃႈမီးၸိူဝ်းၼၼ်ႉငိၼ်းလွင်ႈမၼ်းလႄႈဢွၼ်ၵၼ်ၵႂႃႇယူႇလူၺ်ႈၵၼ်တင်းမၼ်းၵႃႈတီႈၼၼ်ႈဢေႃႈ။-
ၵူၼ်းဢၼ်လႆႈၶၢမ်ႇတၢင်းဢၼ်တဵၵ်းငႅၼ်းလႂ်၊ၵူၼ်းဢၼ်မီးၼီႈမီးၶွတ်ႇလႂ်၊ၵူၼ်းဢၼ်ၶူမ်ၸႂ်ၶိုၼ်ႇၸႂ်တင်းလၢႆမီးသေသၢမ်ပၢၵ်ႇၼိုင်ႈၸမ်ၸမ်၊ၵႂႃႇၸုတုမ်ၵၼ်ၵႃႈတီႈမၼ်းလႄႈမၼ်းလႆႈဢုပ်ႉပိူင်ႇၵႃႈၼိူဝ်ၶဝ်ဢေႃႈ။
တႃႇဝိတ်ႈ၊ သမ်ႉဢွၵ်ႇသေၵႃႈတီႈၼၼ်ႈ၊ၵႂႃႇၵႃႈတီႈဝဵင်း မိၸပႃႇ၊ မိူင်း မေႃႇၽႃႉ၊ သေလႄႈၶဝ်ႈၸူးလဝ်ႈလၢတ်ႈတီႈၶုၼ်ႁေႃၶမ်း မေႃႇၽႃႉ၊ လႄႈဝႃႈ၊ “ၸူဝ်ႈဢၼ်ၵဝ်ၶႃႈဢမ်ႇႁုလွင်ႈဢၼ်ၽြႃးပဵၼ်ၸဝ်ႈတၵ်းႁဵတ်းၸိူဝ်ႉၼင်ႇႁိုဝ်တီႈၵဝ်ၶႃႈၼၼ်ႉၸိုင်၊ၶႅၼ်းတေႃႈႁႂ်ႈပေႃႈမႄႈၵဝ်ၶႃႈလႆႈမႃးသွၼ်ႈပိုင်ႈၵႃႈတီႈၸဝ်ႈႁဝ်းသေၵမ်းတီႈၶႃႈ၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈ တႃႇဝိတ်ႈ၊ ဢဝ်ပေႃႈမႄႈမၼ်းဝႆႉၵိုတ်းယူႇၵႃႈတီႈၶုၼ်ႁေႃၶမ်း မေႃႇၽႃႉ၊ လႄႈၶဝ်လႆႈယူႇၵႃႈတီႈၼၼ်ႈၼႂ်းၸူဝ်ႈဢၼ် တႃႇဝိတ်ႈ၊ တဵတ်ႇမႅပ်းယူႇၵႃႈၼႂ်းႁူးထမ်ႈၼၼ်ႉဢေႃႈ။
ၵမ်းၼၼ်ႉ၊ပရေႃးၽႅတ်ႈ ၵၢတ်ႉ၊ မႃးၸူးတီႈ တႃႇဝိတ်ႈ၊ လႄႈလၢတ်ႈဝႃႈ၊ “ယႃႇပေယူႇယူႇၵႃႈတီႈၼႆႈယဝ်ႉ။ ၵႂႃႇၵႃႈတီႈမိူင်း ယုတႃႉ၊ ပုၼ်ႉၵမ်းလဵဝ်တႃႉ၊” ဝႃႈၼင်ႇၼႆလႄႈ၊ တႃႇဝိတ်ႈ၊ ဢွၵ်ႇသေၵႃႈတီႈၼၼ်ႈၵႂႃႇၸူးတီႈထိူၼ်ႇ ႁႃႇရိတ်ႉ၊ ဢေႃႈ။
ဝၼ်းၼိုင်ႈ သေႃးလု၊ မီးယူႇၵႃႈတီႈဝဵင်း ၵိပႃႉ၊ လႄႈမိူဝ်ႈဢၼ်ယင်းတိုၵ်ႉယိပ်းၵမ်ႁွၵ်ႇယူႇလႄႈၼင်ႈယူႇတႂ်ႈတူၼ်ႈမၢၵ်ႇၵႅင်းဢၼ်မီးၵႃႈၼိူဝ်ၵုင်းလွႆ၊လူၺ်ႈၵၼ်တင်းၶုၼ်ဢၼ်ပွင်ၵၢၼ်မၼ်းတင်းသဵင်ႈတင်းလူင်လွမ်ႉႁွပ်ႈမၼ်းယူႇၼၼ်ႉၸိုင်၊ပိူၼ်ႈမႃးမွၵ်ႇလၢတ်ႈလွင်ႈဢၼ်ထူပ်းႁၼ် တႃႇဝိတ်ႈ၊ ဢိၵ်ႇတင်းၵူၼ်းမၼ်းတင်းလၢႆယဝ်ႉၼၼ်ႉဢေႃႈ။-
မၼ်းၵေႃႈလၢတ်ႈတီႈၶုၼ်ဢၼ်ပွင်ၵၢၼ်မၼ်းၸိူဝ်းၼၼ်ႉလႄႈဝႃႈ၊ “ၵူၼ်းမဵဝ်း ပိၼ်ႇယႃႇမိၼ်ႇ၊ ၶဝ်႟။ ဢွၼ်ၵၼ်ထွမ်ႇငိၼ်းတႃႉ။ သူထၢင်ႇ တႃႇဝိတ်ႈ၊ တၵ်းဢဝ်တူင်ႈႁႆႈတူင်ႈၼႃးလႂ်၊တင်းသူၼ်မၢၵ်ႇၸပိတ်ႉလႂ်၊မႅင်ႇပၼ်တီႈသူၵႃႈမီးၼႆႉႁိုဝ်း။ ၸွင်ႇမၼ်းတၵ်းဢဝ်သူၵႃႈမီးၼႆႉၶၢၼ်းဝႆႉၼႂ်းဢရႃႇၶုၼ်သိုၵ်းႁၢၼ်ၵႃႈၼႂ်းတပ်ႉသိုၵ်းမၼ်းႁိုဝ်း။-
ၵွပ်ႈပိူဝ်ႈလွင်ႈတၢင်းၼႆႉလႄႈသူဢွၼ်ၵၼ်ၵျၢမ်ႇႁဵတ်းၶတ်းၵၼ်တင်းၵဝ်ႁိုဝ်း။ ၼႂ်းသူၼႆႉၵေႃႉလႂ်ၵေႃႈဢမ်ႇလဝ်ႈလၢတ်ႈလွင်ႈဢၼ်လုၵ်ႈၸၢႆးၵဝ်ႁဵတ်းၵေႃႉၵၼ်တင်း တႃႇဝိတ်ႈ၊ ၼၼ်ႉ။ ၵေႃႉလႂ်ၵေႃႈဢမ်ႇၶႆႈၸႂ်ပုၼ်ႈဢၵျူဝ်းၵဝ်။ ဢမ်ႇမွၵ်ႇဢမ်ႇလၢတ်ႈလွင်ႈဢၼ်ၶႃႈၵဝ် တႃႇဝိတ်ႈ၊ ၼၼ်ႉလွမ်ပႂ်ႉဢၶႂၢင်ႉဢယေးႁႂ်ႈလႆႈဢဝ်ၵဝ်တၢႆၼၼ်ႉ၊ဢိၵ်ႇတင်းလွင်ႈဢၼ်လုၵ်ႈၸၢႆးၵဝ်ယင်းပၼ်ဢဵၼ်ပၼ်ႁႅင်းမၼ်းၼၼ်ႉယူႇလူင်ပႄႇ၊” ဝႃႈၼင်ႇၼႆဢေႃႈ။
တွၵ်ႉၵႃႉ၊ ၼၼ်ႉၸုၵ်းယူႇၵႃႈတီႈၼၼ်ႈလူၺ်ႈၵၼ်တင်းၶုၼ်ဢၼ်ပွင်ၵၢၼ် သေႃးလု၊ ၸိူဝ်းၼၼ်ႉယူႇလႄႈလဝ်ႈလၢတ်ႈဝႃႈ၊ “ၵဝ်ၶႃႈႁၼ် တႃႇဝိတ်ႈ၊ မိူဝ်ႈဢၼ်မၼ်းၵႂႃႇၵႃႈတီႈဝဵင်း ၼေႃႇပႃႉ၊ ၸူးတီႈ ဢႁိမလႅၵ်ႉ၊ လုၵ်ႈၸၢႆး ဢႁိတုပ်ႉ၊ ၼၼ်ႉတီႈၶႃႈဢေႃႈ။-
ဢႁိမလႅၵ်ႉ၊ ၼၼ်ႉတွင်ႈထၢမ်တီႈ ထႃႇဝရႃႉၽြႃး၊ ပုၼ်ႈမၼ်းလႄႈဢဝ်ၸရိပ်ႈတၢင်းၵိၼ်၊ဢိၵ်ႇတင်းလၢပ်ႇ ၵေႃးလျတ်ႈ၊ ၵူၼ်း ၽိလိတ်ႉတိ၊ ၼၼ်ႉပၼ်မၼ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈၶုၼ်ႁေႃၶမ်း သေႃးလု၊ ပွႆႇၸႂ်ႉႁွင်ႉဢဝ်ယဵၸ်ႈပရေႃးႁဵၵ်ႈ ဢႁိမလႅၵ်ႉ၊ လုၵ်ႈၸၢႆး ဢႁိတုပ်ႉ၊ ဢိၵ်ႇတင်းၵႃႈပဵၼ်ပီႈၼွင်ႉၸိူဝ်ႉၶိူဝ်းမၼ်းၸိူဝ်းဢၼ်ပဵၼ်ယဵၸ်ႈပရေႃးႁဵၵ်ႈၼင်ႇၵဝ်ႇၼႂ်းဝဵင်း ၼေႃႇပႃႉ၊ ၼၼ်ႉလႄႈ၊ၶဝ်ၵေႃႈမႃးၵႃႈတီႈ သေႃးလု၊ ဢေႃႈ။-
မၼ်းၵေႃႈလၢတ်ႈတီႈ ဢႁိမလႅၵ်ႉ၊ လႄႈဝႃႈ၊လုၵ်ႈၸၢႆး “ ဢႁိတုပ်ႉ၊ ႟။ ထွမ်ႇတႃႉ၊” ဝႃႈၼင်ႇၼႆလႄႈ၊မၼ်းၶိုၼ်းလဝ်ႈလၢတ်ႈလႄႈဝႃႈ၊ “ၵဝ်ၶႃႈမီးယူႇၵႃႈတီႈၼႆႈၶႃႈဢေႃႈ၊ၸဝ်ႈ” ဝႃႈၼင်ႇၼႆဢေႃႈ။
သေႃးလု၊ ၵေႃႈလၢတ်ႈတီႈမၼ်းလႄႈဝႃႈ၊ “ႁဵတ်းသင်လႄႈမႂ်းတင်း တႃႇဝိတ်ႈ၊ ၵျၢမ်ႇဢၢင်ႈႁဵတ်းၶတ်းၵဝ်ၸိူဝ်ႉၼင်ႇႁိုဝ်။ ႁဵတ်းသင်လႄႈမႂ်းဢဝ်ၸရိပ်ႈတၢင်းၵိၼ်ဢိၵ်ႇတင်းလၢပ်ႇပၼ်မၼ်းသေယဝ်ႉ၊တွင်ႈထၢမ်တီႈၽြႃးပဵၼ်ၸဝ်ႈပုၼ်ႈမၼ်းၸိူဝ်ႉၼင်ႇႁိုဝ်။ တေႃႈလဵဝ်ၼႆႉမၼ်းလုၵ်ႉၽိုၼ်ႉၵဝ်လႄႈလွမ်ပႂ်ႉပုၼ်ႈႁႂ်ႈလႆႈဢဝ်ၵဝ်တၢႆယဝ်ႉ၊” ဝႃႈၼင်ႇၼႆဢေႃႈ။
ဢႁိမလႅၵ်ႉ၊ ၶိုၼ်းလဝ်ႈလၢတ်ႈလႄႈဝႃႈ၊ “ တႃႇဝိတ်ႈ၊ ၼႆႉပဵၼ်ၵေႃႉဢၼ်မီးသဵတ်ႈၸႃႇသေပိူၼ်ႈၵႃႈၼႂ်းၶုၼ်ဢၼ်ပွင်ၵၢၼ်ၼႂ်းႁေႃၸဝ်ႈႁဝ်းတင်းလၢႆၼၼ်ႉၶႃႈဢေႃႈ။ မၼ်းပဵၼ်လုၵ်ႈၶူၺ်ၸဝ်ႈ၊ၶုၼ်သိုၵ်းလူင်ဢၼ်ဢုပ်ႉမူႇၵူၼ်းပႂ်ႉဢသၢၵ်ႈၸဝ်ႈလႄႈလႆႈၶၢမ်ႇဢဝ်တၢင်းဢၼ်ၵူၼ်းႁၢင်ႈၵူၼ်းႁေႃၸဝ်ႈတင်းလၢႆရူဝ်ႇသေႇလေႇမၢတ်ႈၼၼ်ႉၶႃႈဢေႃႈ။-
ၸႂ်ႈတီႈၶႃႈဢေႃႈ။ ၵဝ်ၶႃႈၸႃႉႁဵတ်းတၢင်းဢၼ်တွင်ႈထၢမ်တီႈၽြႃးပဵၼ်ၸဝ်ႈပုၼ်ႈမၼ်းၼႂ်းဝၼ်းၼၼ်ႉၸွင်ႇပဵၼ်ပွၵ်ႈတီႈၼိုင်ႈၶႃႈႁိုဝ်း။ ၵပ်းၵၢႆႇလူၺ်ႈလွင်ႈဢၼ်လုၵ်ႉၽိုၼ်ႉၸဝ်ႈႁဝ်းၼႆႉၸိုင်၊ၸဝ်ႈၶုၼ်လူင်ႁဝ်းယႃႇပေတၢင်ႇဢပျတ်ႈတီႈၵဝ်ၶႃႈဢိၵ်ႇတင်းပီႈၼွင်ႉၸိူဝ်ႉၶိူဝ်းပေႃႈၵဝ်ၶႃႈၼႆႉသေၵမ်းတီႈၶႃႈ။ ၵဝ်ၶႃႈတိုၼ်းဢမ်ႇႁုလွင်ႈတၢင်းၼႆႉသေဢိတ်းသေဢီႈလႃးလႃးတီႈၶႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းၵေႃႈလၢတ်ႈလႄႈဝႃႈ၊ “ ဢႁိမလႅၵ်ႉ၊ ႟။ မႂ်းဢိၵ်ႇတင်းပီႈၼွင်ႉၸိူဝ်ႉၶိူဝ်းပေႃႈမႂ်းၵႃႈမီးတၵ်းလႆႈၶၢမ်ႇတၢႆဢမၢၼ်ႇၶၼ်ပဵၼ်ဢေႃႈ၊” ဝႃႈၼင်ႇၼႆသေလႄႈ၊-
ပူင်ဢမိင်ႉတီႈမူႇၵူၼ်းပႂ်ႉဢသၢၵ်ႈၸဝ်ႈၸိူဝ်းဢၼ်ၸုၵ်းလွမ်ႉႁွပ်ႈႁိမ်းမၼ်းယူႇၼၼ်ႉလႄႈဝႃႈ၊ “ဢွၼ်ၵၼ်ဢဝ်ယဵၸ်ႈပရေႃးႁဵၵ်ႈ ထႃႇဝရႃႉၽြႃး၊ ၸိူဝ်းၼၼ်ႉတၢႆတႃႉ။ ၶဝ်ၼၼ်ႉၽွမ်ႉၽၢႆႇ တႃႇဝိတ်ႈ၊ လႄႈပိၵ်ႉသမ်ႉႁုလွင်ႈဢၼ်မၼ်းဢွၵ်ႇပၢႆႈယူႇၼၼ်ႉသေၵေႃႈယင်းဢမ်ႇမွၵ်ႇဢမ်ႇလၢတ်ႈတီႈၵဝ်လူင်ပႄႇ၊” ဝႃႈၼင်ႇၼႆဢေႃႈ။ ၵူၺ်းၵႃႈ၊မူႇၵူၼ်းပႂ်ႉဢသၢၵ်ႈၸဝ်ႈၸိူဝ်းၼၼ်ႉယင်းဢမ်ႇယုၵ်ႉမိုဝ်းႁႂ်ႈလႆႈဢဝ်တၢႆယဵၸ်ႈပရေႃးႁဵၵ်ႈ ထႃႇဝရႃႉၽြႃး၊ ၸိူဝ်းၼၼ်ႉလႄႈယူႇဢေႃႈ။-
ပိူဝ်ႈၼႆလႄႈ သေႃးလု၊ ပူင်ဢမိင်ႉတီႈ တွၵ်ႉၵႃႉ၊ လႄႈဝႃႈ၊ “မႂ်းဢဝ်ၶဝ်တၢႆတႃႉ၊” ဝႃႈၼင်ႇၼႆလႄႈ၊ တွၵ်ႉၵႃႉ၊ ၶႃႈၽၼ်းၶဝ်တၢႆပႅတ်ႈတင်းသဵင်ႈတင်းလူင်ဢေႃႈ။ ၼႂ်းဝၼ်းၼၼ်ႉမၼ်းဢဝ်တၢႆပႅတ်ႈယဵၸ်ႈပရေႃးႁဵၵ်ႈသိပ်းပၢႆႁႃႈၵေႃႉၸိူဝ်းဢၼ်ၼုင်ႈသိူဝ်ႈၽႃႈပၢၼ်ႇဢၼ်သုပ်းႁူဝ်ၼၼ်ႉဢေႃႈ။-
သေႃးလု၊ သမ်ႉပူင်ဢမိင်ႉႁႂ်ႈဢဝ်ၵူၼ်းဝဵင်း ၼေႃႇပႃႉ၊ ဝဵင်းဢၼ်ယဵၸ်ႈပရေႃးႁဵၵ်ႈပိူင်ႇၼၼ်ႉတၢႆတင်းသဵင်ႈတင်းမူတ်းလႄႈၸႃႉၸဵမ်ၵူၼ်းၸၢႆး၊ၽူႈယိင်း၊လုၵ်ႈဢွၼ်ႇႁၢႆး၊လုၵ်ႈဢွၼ်ႇလႅင်လႄႈ၊ဝူဝ်း၊မႃႉလီႈ၊သူဝ်းတင်းလၢႆလႆႈတၢႆလူၺ်ႈလၢပ်ႇလူၺ်ႈလႅဝ်းဢေႃႈ။
ၵူၺ်းၵႃႈ၊ၵႃႈၼႂ်းလုၵ်ႈၸၢႆး ဢႁိမလႅၵ်ႉ၊ ၼၼ်ႉၵေႃႉၼိုင်ႈဢၼ်လႆႈၸိုဝ်ႈ ဢပျႃႇထႃႇ၊ ၼၼ်ႉလွတ်ႈဢသၢၵ်ႈသေလႄႈပၢႆႈၵႂႃႇယူႇလူၺ်ႈၵၼ်တင်း တႃႇဝိတ်ႈ၊ ဢေႃႈ။-
မၼ်းမွၵ်ႇလၢတ်ႈတီႈ တႃႇဝိတ်ႈ၊ လွင်ႈဢၼ် သေႃးလု၊ ၶႃႈၽၼ်းယဵၸ်ႈပရေႃးႁဵၵ်ႈ ထႃႇဝရႃႉၽြႃး၊ တၢႆမူတ်းယဝ်ႉၼၼ်ႉဢေႃႈ။-
တႃႇဝိတ်ႈ၊ ၵေႃႈလၢတ်ႈတီႈမၼ်းလႄႈဝႃႈ၊ “မိူဝ်ႈဢၼ်ၵဝ်ႁၼ် တွၵ်ႉၵႃႉ၊ ၵႃႈတီႈၼၼ်ႈၼႂ်းဝၼ်းၼၼ်ႉၸိုင်၊ၵဝ်ႁုသၢႆငၢႆလွင်ႈဢၼ်မၼ်းတၵ်းမွၵ်ႇလၢတ်ႈထိုင်ႁူ သေႃးလု၊ ၼၼ်ႉၵမ်းလဵဝ်ယဝ်ႉ။ ပိူဝ်ႈၼႆၵဝ်လႄႈပီႈၼွင်ႉၸိူဝ်ႉၶိူဝ်းမႂ်းတင်းလၢႆလႆႈတၢႆၼၼ်ႉဢေႃႈ။-
ယူႇလူၺ်ႈၵၼ်တင်းၵဝ်တႃႉ။ ယႃႇပေမႆႈၸႂ်။ သေႃးလု၊ ၼၼ်ႉမီးဢလူဝ်ႇၶႂ်ႈဢဝ်မႂ်းတင်းၵဝ်တၢႆဢေႃႈ။ ပေႃးမႂ်းယူႇလူၺ်ႈၵၼ်တင်းၵဝ်ၸိုင်၊မႂ်းတၵ်းၵၢင်းလွတ်ႈတင်းၽေးဢေႃႈ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ငိၼ်းၶၢဝ်ႇလွင်ႈဢၼ်ၵူၼ်း ၽိလိတ်ႉတိ၊ ၶဝ်တိုၵ်းတေႃးဝဵင်း ၵိလႃႉ၊ ယူႇၼၼ်ႉဢိၵ်ႇတင်းလွင်ႈဢၼ်ၶဝ်ႁိမ်ႁူင်ႇဢဝ်တလၢင်းယဵပ်ႇၶဝ်ႈတင်းလၢႆယူႇၼၼ်ႉဢေႃႈ။-
ပိူဝ်ႈၼႆလႄႈမၼ်းတွင်ႈထၢမ်တီႈ ထႃႇဝရႃႉၽြႃး၊ လႄႈဝႃႈ၊ “ၶႃႈၸဝ်ႈတၵ်းလႆႈၵႂႃႇလႄႈတိုၵ်းတေႃးယႃႉပႅတ်ႈၵူၼ်း ၽိလိတ်ႉတိ၊ ၸိူဝ်းၼၼ်ႉတီႈၶႃႈႁိုဝ်း၊” ဝႃႈၼင်ႇၼႆလႄႈ။ ထႃႇဝရႃႉၽြႃး၊ မီးဢမိင်ႉဝႃႈ၊ “ၵႂႃႇတႃႉ။ တိုၵ်းတေႃးယႃႉပႅတ်ႈၶဝ်ၵႄႇသႄႇၶျွတ်ႈဢဝ်ဝဵင်း ၵိလႃႉ၊ တႃႉ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ၵူၼ်း တႃႇဝိတ်ႈ၊ ၸိူဝ်းၼၼ်ႉလၢတ်ႈတီႈမၼ်းလႄႈဝႃႈ၊ “တေႃႈၵႃႈႁဝ်းမီးယူႇၼႂ်းမိူင်း ယုတႃႉ၊ ၼႆႉယင်းၵူဝ်ႁႄယူႇဢေႃႈ။ ပေႃးႁဝ်းၵႂႃႇၵႃႈတီႈဝဵင်း ၵိလႃႉ၊ လႄႈတိုၵ်းတေႃးတပ်ႉယႂ်ႇတပ်ႉလူင်ၵူၼ်းမဵဝ်း ၽိလိတ်ႉတိ၊ ၸိုင်၊တၵ်းပဵၼ်ဢၼ်ယဵင်ႈၶႅၼ်းႁၢႆႉလိူဝ်တွၼ်းၼႃႇလူင်လၢင်တီႈၶႃႈဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ တႃႇဝိတ်ႈ၊ သမ်ႉတွင်ႈထၢမ်တီႈ ထႃႇဝရႃႉၽြႃး၊ လႄႈ ထႃႇဝရႃႉၽြႃး၊ ၶိုၼ်းမီးဢမိင်ႉတီႈမၼ်းလႄႈဝႃႈ၊ “ၵႂႃႇလႄႈတိုၵ်းတေႃးဝဵင်း ၵိလႃႉ၊ တႃႉ။ ၵဝ်တၵ်းပၼ်ႁႂ်ႈမႂ်းဢွင်ႇသိုၵ်းၵႃႈၼိူဝ်ၵူၼ်း ၽိလိတ်ႉတိ၊ ဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ တႃႇဝိတ်ႈ၊ ဢိၵ်ႇတင်းၵူၼ်းမၼ်းၸိူဝ်းၼၼ်ႉၵႂႃႇၵႃႈတီႈဝဵင်း ၵိလႃႉ၊ လႄႈတိုၵ်းတေႃးၵူၼ်း ၽိလိတ်ႉတိ၊ ၶဝ်ဢေႃႈ။ ၶဝ်ဢွၼ်ၵၼ်ၶႃႈၽၼ်းဢဝ်တၢႆၵူၼ်းမဵဝ်း ၽိလိတ်ႉတိ၊ ၼမ်ၼႃႇသေယဝ်ႉ၊သိမ်းဢဝ်တရိၵ်ႈသၢၼ်ႇၶဝ်ၼၼ်ႉဢေႃႈ။ ၼင်ႇၼၼ်လႄႈ တႃႇဝိတ်ႈ၊ ႁဵတ်းၸိူဝ်ႉၼင်ႇၼၼ်ၵႄႇသႄႇၶျွတ်ႈဢဝ်ဝဵင်း ၵိလႃႉ၊ ဢေႃႈ။
မိူဝ်ႈဢၼ် ဢပျႃႇထႃႇ၊ လုၵ်ႈၸၢႆး ဢႁိမလႅၵ်ႉ၊ ၼၼ်ႉလွတ်ႈသေၵႂႃႇယူႇလူၺ်ႈၵၼ်တင်း တႃႇဝိတ်ႈ၊ ၼၼ်ႉမၼ်းပႃးသိူဝ်ႈသုပ်းၸဝ်ႈၵႂႃႇၸွမ်းဢေႃႈ။
ပိူၼ်ႈဢဝ်ၶၢဝ်ႇလွင်ႈဢၼ် တႃႇဝိတ်ႈ၊ ၵႂႃႇၶဝ်ႈဝဵင်း ၵိလႃႉ၊ ၼၼ်ႉလၢတ်ႈထိုင်တီႈ သေႃးလု၊ လႄႈမၼ်းလၢတ်ႈလႄႈဝႃႈ၊ “ၽြႃးပဵၼ်ၸဝ်ႈဢဝ် တႃႇဝိတ်ႈ၊ ဢၢပ်ႈပၼ်ၼႂ်းမိုဝ်းၵဝ်ယဝ်ႉ။ မၼ်းၶမ်တူင်ႇၶိုမ်းၼႂ်းတၢင်းဢၼ်ၶဝ်ႈၵႃႈၼႂ်းဝဵင်းဢၼ်မီးလမ်းဝဵင်းလႄႈမီးၽၵ်းတူၵိူၼ်ႇဢၼ်မၼ်ႈၶိူင်ႇၼၼ်ႉဝႆႉယဝ်ႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ သေႃးလု၊ ႁွင်ႉဢဝ်တပ်ႉသိုၵ်းမၼ်းၶီႇသိုၵ်းၵႂႃႇႁႂ်ႈလႆႈတိုၵ်းတေႃးဝဵင်း ၵိလႃႉ၊ ဢိၵ်ႇတင်းႁႂ်ႈလႆႈလွမ်ႉႁွပ်ႈတိဢဝ် တႃႇဝိတ်ႈ၊ တင်းၵူၼ်းမၼ်းတင်းလၢႆဢေႃႈ။
တႃႇဝိတ်ႈ၊ လႆႈငိၼ်းၶၢဝ်ႇဢၼ် သေႃးလု၊ ၶတ်းၸႂ်ၵျူဝ်းၸႃးႁႂ်ႈလႆႈတိုၵ်းတေႃးမၼ်းၼၼ်ႉလႄႈမၼ်းလၢတ်ႈတီႈယဵၸ်ႈပရေႃးႁဵၵ်ႈ ဢပျႃႇထႃႇ၊ လႄႈဝႃႈ၊ “ဢဝ်သိူဝ်ႈသုပ်းၸဝ်ႈမႃးတီႈၼႆႈသေၵမ်း၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ တႃႇဝိတ်ႈ၊ တွင်ႈထၢမ်တီႈ ထႃႇဝရႃႉၽြႃး၊ လႄႈဝႃႈ၊ “ ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ တီႈၶႃႈ။ ၶႃႈၸဝ်ႈႁဝ်းလႆႈငိၼ်းၶၢဝ်ႇဢၼ် သေႃးလု၊ ၶတ်းၸႂ်ၵျူဝ်းၸႃးမႃးၵႃႈတီႈဝဵင်း ၵိလႃႉ၊ ႁႂ်ႈလႆႈယႃႉပႅတ်ႈဝဵင်းၼၼ်ႉၵွပ်ႈပိူဝ်ႈၶႃႈၸဝ်ႈႁဝ်းတီႈၶႃႈဢေႃႈ။-
ၵူၼ်းဝဵင်း ၵိလႃႉ၊ ၸိူဝ်းၼႆႉတၵ်းဢဝ်ၶႃႈၸဝ်ႈဢၢပ်ႈပၼ်ၵႃႈၼႂ်းမိုဝ်း သေႃးလု၊ ၶႃႈႁိုဝ်း။ မႅၼ်ႈၸွမ်းၵႃႈၼင်ႇဢၼ်ၶႃႈၸဝ်ႈလႆႈငိၼ်းၼၼ်ႉ သေႃးလု၊ တၵ်းမႃးဢမၢၼ်ႇၶၼ်ပဵၼ်ၶႃႈႁိုဝ်း။ ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ တီႈၶႃႈ။ ၶႃႈၸဝ်ႈႁဝ်းတွင်းပၢၼ်ႇႁႂ်ႈၸဝ်ႈႁဝ်းမီးဢမိင်ႉတီႈၶႃႈၸဝ်ႈႁဝ်းသေၵမ်းတီႈၶႃႈ၊” ဝႃႈၼင်ႇၼႆဢေႃႈ။ ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ သေႃးလု၊ တၵ်းမႃးဢေႃႈ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ သမ်ႉလဝ်ႈထၢမ်လႄႈဝႃႈ၊ “ၵူၼ်းဝဵင်း ၵိလႃႉ၊ ၸိူဝ်းၼႆႉတၵ်းဢဝ်ၶႃႈၸဝ်ႈဢိၵ်ႇတင်းၵူၼ်းၶႃႈၸဝ်ႈတင်းလၢႆၼႆႉဢၢပ်ႈပၼ်ၼႂ်းမိုဝ်း သေႃးလု၊ ၶႃႈႁိုဝ်း၊” ဝႃႈၼင်ႇၼႆလႄႈ၊ ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ၶဝ်ၼၼ်ႉတၵ်းဢဝ်မႂ်းဢၢပ်ႈဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ တႃႇဝိတ်ႈ၊ ဢိၵ်ႇတင်းၵူၼ်းမၼ်းမီးႁူၵ်းပၢၵ်ႇၸမ်ၸမ်ၼၼ်ႉဢွၵ်ႇဝဵင်း ၵိလႃႉ၊ ၵႂႃႇၵမ်းလဵဝ်သေလႄႈသိုပ်ႇၶၢဝ်းတၢင်းၶဝ်ၵႂႃႇတိၵ်းတိၵ်းဢေႃႈ။ မိူဝ်ႈဢၼ် သေႃးလု၊ ငိၼ်းလွင်ႈဢၼ် တႃႇဝိတ်ႈ၊ လွတ်ႈဢွၵ်ႇသေၵႃႈတီႈဝဵင်း ၵိလႃႉ၊ ၵႂႃႇယဝ်ႉယဝ်ႉၼၼ်ႉၸိုင်၊မၼ်းယင်းဢမ်ႇသိုပ်ႇၵႂႃႇလႄႈယူႇဢေႃႈ။
တႃႇဝိတ်ႈ၊ ယူႇၵႃႈတီႈမိူင်းႁၢၼ်ႉလွႆလႄႈတဵတ်ႇမႅပ်းယူႇၵႃႈၼႂ်းထိူၼ်ႇတီႈႁိမ်းဝဵင်း ၸိၽႃႉ၊ ဢေႃႈ။ သေႃးလု၊ သွၵ်ႈႁႃမၼ်းယူႇၵူႈဝၼ်းသေၵေႃႈၽြႃးပဵၼ်ၸဝ်ႈဢမ်ႇဢဝ် တႃႇဝိတ်ႈ၊ ဢၢပ်ႈပၼ်ၵႃႈၼႂ်းမိုဝ်းမၼ်းၼၼ်ႉ။-
တႃႇဝိတ်ႈ၊ ႁၼ်တၢင်းဢၼ် သေႃးလု၊ ဢွၵ်ႇမႃးႁႂ်ႈလႆႈဢဝ်မၼ်းတၢႆၼၼ်ႉယူႇဢေႃႈ။ မိူဝ်ႈဢၼ် တႃႇဝိတ်ႈ၊ ယူႇသဝ်းၵႃႈၼႂ်းထိူၼ်ႇ ႁေႃႇရိသႃႉ၊ ဢၼ်မီးတီႈႁိမ်းဝဵင်း ၸိၽႃႉ၊ ယူႇၼၼ်ႉ၊-
ယေႃးၼႀၼ်ႇ၊ ၵႂႃႇၸူးတီႈမၼ်းသေလႄႈပၼ်ၸႂ်ႁႅင်းယႂ်ႇႁႂ်ႈမၼ်းသွၼ်ႈပိုင်ႈၽြႃးပဵၼ်ၸဝ်ႈၼႃႇၼႃႇလႄႈ၊-
လၢတ်ႈတီႈမၼ်းလႄႈဝႃႈ၊ “ယႃႇပေမႆႈၸႂ်။ ပေႃႈၸဝ်ႈၵဝ် သေႃးလု၊ ၼၼ်ႉတၵ်းဢမ်ႇႁဵတ်းၽေးတီႈမႂ်းလႆႈ။ လွင်ႈဢၼ်မႂ်းတၵ်းပဵၼ်ၶုၼ်ႁေႃၶမ်းမဵဝ်း ဢိသရေး၊ လႄႈၵဝ်ၸမ်ႉ၊တၵ်းတေလႆႈၶၢမ်ႇဢရႃႇဢၼ်ယႂ်ႇယူႇၵႃႈတႂ်ႈမိုဝ်းမႂ်းၵူၺ်းၼၼ်ႉမၼ်းၸဝ်ႈႁုလီလီဢေႃႈ၊” ဝႃႈၼင်ႇၼႆဢေႃႈ။-
ၶဝ်ႁဵတ်းၵတိသဵတ်ႈၸႃႇႁႂ်ႈပဵၼ်ၵေႃႉသႄႈတေႃႇၵၼ်သေယဝ်ႉ၊ တႃႇဝိတ်ႈ၊ ယူႇၵႃႈတီႈ ႁေႃႇရိသႃႉ၊ လႄႈ ယေႃးၼႀၼ်ႇ၊ ၶိုၼ်းမိူဝ်းၵႂႃႇၵႃႈတီႈႁိူၼ်းမၼ်းသေဢေႃႈ။
ၵူၼ်းဝဵင်း ၸိၽႃႉ၊ ၵမ်ႈၽွင်ႈၶိုၼ်ႈၸူးတီႈ သေႃးလု၊ ၵႃႈတီႈဝဵင်း ၵိပႃႉ၊ သေယဝ်ႉ၊လဝ်ႈလၢတ်ႈလႄႈဝႃႈ၊ “ တႃႇဝိတ်ႈ၊ တဵတ်ႇမႅပ်းယူႇၵႃႈၼႂ်းဢိူင်ႇႁဝ်းၶႃႈၵႃႈတီႈ ႁေႃႇရိသႃႉ၊ ၵႃႈၼိူဝ်လွႆ ႁၶိလႃႉ၊ ဢၼ်မီးတီႈတၢင်းပွတ်းၸၢၼ်းထိူၼ်ႇ ယေႇသိမုၼ်ႇ၊ ၼၼ်ႉတီႈၶႃႈဢေႃႈ။-
ၸဝ်ႈၶုၼ်လူင်တီႈၶႃႈ၊ႁဝ်းၶႃႈႁုလွင်ႈဢၼ်ၸဝ်ႈႁဝ်းမီးဢလူဝ်ႇၶႂ်ႈတိဢဝ်မၼ်းၼၼ်ႉဢေႃႈ။ ပိူဝ်ႈၼႆလႄႈၶႅၼ်းတေႃႈလူင်းမႃးၸူးတီႈဢိူင်ႇႁဝ်းၶႃႈသေၵမ်းတီႈၶႃႈ။ ပုၼ်ႈဢၼ်တၵ်းတိဢဝ်မၼ်းလႆႈၼၼ်ႉၸိုင်၊ႁႂ်ႈပဵၼ်ပုၼ်ႈပဵၼ်တႃႇႁဝ်းၶႃႈသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
သေႃးလု၊ ၶိုၼ်းလၢတ်ႈလႄႈဝႃႈ၊ “ၵွပ်ႈပိူဝ်ႈဢၼ်သူဢဵတ်းလူၵဝ်ၼၼ်ႉလႄႈ၊ႁႂ်ႈ ထႃႇဝရႃႉၽြႃး၊ ပၼ်တၢင်းလီတီႈသူသေၵမ်းလူၺ်ႈ။-
သူၵႂႃႇလႄႈႁဵတ်းႁႂ်ႈယဵင်ႈၶႅၼ်းႁုသေႇၶျႃႇလီငၢမ်း၊လွင်ႈမၼ်းတဵတ်ႇမႅပ်းယူႇတီႈလႂ်ဢိၵ်ႇတင်းၽူႈလႂ်ႁၼ်မၼ်းယဝ်ႉၼၼ်ႉထႃႈဝႆႉတႃႉ။ ၵဝ်ငိၼ်းဝႃႈ၊မၼ်းၼႆႉလၵ်းလႅမ်ၼႃႇလူင်လၢင်ဝႃႈၼႆဢေႃႈ။-
ပိူဝ်ႈၼႆလႄႈလူတူၺ်းမၢတ်ႈတွင်းတီႈဢၼ်မၼ်းယၢမ်ႈတဵတ်ႇမႅပ်းသွၼ်ႈပိုင်ႈၸိူဝ်းၼၼ်ႉသေယဝ်ႉ၊ဢဝ်ၶၢဝ်ႇဢၼ်သေႇၶျႃႇလီငၢမ်းၼၼ်ႉၶိုၼ်းမႃးမွၵ်ႇလၢတ်ႈထိုင်ႁူၵဝ်ၵမ်းလဵဝ်တႃႉ။ ၵဝ်တၵ်းၸွမ်းလူၺ်ႈၵၼ်တင်းသူၵႂႃႇဢေႃႈ။ ပေႃးမၼ်းယင်းတိုၵ်ႉမီးယူႇၵႃႈၼႂ်းမိူင်းၼၼ်ႉၸိုင်၊ၵဝ်တၵ်းၸွမ်းသွၵ်ႈၸွမ်းႁႃမၼ်းထၢၼ်ႈပေႃးၸွတ်ႇတူဝ်ႈမိူင်း ယုတႃႉ၊ ၵႂႃႇတင်းမိူင်းဢေႃႈ။”
ပိူဝ်ႈၼႆလႄႈၶဝ်ၸိူဝ်းၼၼ်ႉၶိုၼ်းမိူဝ်းၵႂႃႇၸူးတီႈဝဵင်း ၸိၽႃႉ၊ ဢွၼ်တၢင်း သေႃးလု၊ ဢေႃႈ။ ယၢမ်းမိူဝ်ႈၼၼ်ႉ တႃႇဝိတ်ႈ၊ တင်းၵူၼ်းမၼ်းတင်းလၢႆမီးယူႇၼႂ်းထိူၼ်ႇ မေႃႇၼႃႉ၊ ၵႃႈတီႈၶူင်ႈႁူၺ်ႈဢၼ်သဵတ်ႇဢၼ်ငႅဝ်ၵူၼ်းတီႈပွတ်းၸၢၼ်းထိူၼ်ႇ ယေႇသိမုၼ်ႇ၊ ဢေႃႈ။-
သေႃးလု၊ တင်းၵူၼ်းမၼ်းတင်းလၢႆၵႂႃႇႁႂ်ႈလႆႈသွၵ်ႈႁႃ တႃႇဝိတ်ႈ၊ လႄႈပိူၼ်ႈလၢတ်ႈလွင်ႈၼၼ်ႉတီႈ တႃႇဝိတ်ႈ၊ သေယဝ်ႉ၊လူင်းၵႂႃႇၸူးတီႈမၢၵ်ႇႁိၼ်မၢၵ်ႇၽႃၵႃႈၼႂ်းထိူၼ်ႇ မေႃႇၼႃႉ၊ လႄႈၵိုတ်းသဝ်းၵႃႈတီႈၼၼ်ႈဢေႃႈ။ မိူဝ်ႈဢၼ်မၼ်းလႆႈငိၼ်းလွင်ႈတၢင်းၼႆႉၸိုင်၊ သေႃးလု၊ ၸွမ်းႁႃ တႃႇဝိတ်ႈ၊ ဢေႃႈ။-
သေႃးလု၊ တင်းၵူၼ်းမၼ်းတင်းလၢႆမီးယူႇၵႃႈၼိူဝ်ၽၢႆႇၼိုင်ႈလွႆသေလႄႈ၊ တႃႇဝိတ်ႈ၊ တင်းၵူၼ်းမၼ်းသမ်ႉမီးယူႇၽၢႆႇၼိုင်ႈလွႆၼၼ်ႉဢေႃႈ။ သေႃးလု၊ တင်းၵူၼ်းမၼ်းတင်းလၢႆဢၼ်မႃးမီးၸမ်ႁိမ်း တႃႇဝိတ်ႈ၊ လႄႈၸမ်တၵ်းတိလႆႈၶဝ်ၼၼ်ႉဢေႃႈ။-
ယၢမ်းမိူဝ်ႈဢၼ်ပဵၼ်ၸိူဝ်ႉၼင်ႇၼၼ်ယူႇၼၼ်ႉတမၢၼ်ႇၵေႃႉၼိုင်ႈႁွတ်ႈထိုင်မႃးတီႈ သေႃးလု၊ သေလႄႈလဝ်ႈလၢတ်ႈဝႃႈ၊ “ၶိုၼ်းပွၵ်ႈမႃးၵမ်းလဵဝ်သေၵမ်းတီႈၶႃႈ။ ၵူၼ်း ၽိလိတ်ႉတိ၊ ၶဝ်မႃးတိုၵ်းမိူင်းၸဝ်ႈယူႇၶႃႈဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ သေႃးလု၊ ဢမ်ႇသိုပ်ႇလိုပ်ႈၸွမ်းလင် တႃႇဝိတ်ႈ၊ ယဝ်ႉလႄႈ၊ၶီႇသိုၵ်းၵႂႃႇတိုၵ်းၵူၼ်း ၽိလိတ်ႉတိ၊ ၸိူဝ်းၼၼ်ႉဢေႃႈ။ ၵွပ်ႈပိူဝ်ႈၸိူဝ်ႉၼင်ႇၼႆလႄႈၶဝ်ႁွင်ႉႁဵၵ်ႈၸိုဝ်ႈတီႈၼၼ်ႈ သေးလႃႇႁမ်ႇမလေႇၵုတ်ႉ၊ ဢၼ်ပွင်ႇဝႃႈမၢၵ်ႇႁိၼ်တီႈဢၼ်ၽၢတ်ႇၵၼ်ဢေႃႈ။-
တႃႇဝိတ်ႈ၊ ၵေႃႈဢွၵ်ႇသေၵႃႈတီႈၼၼ်ႈလႄႈၵႂႃႇယူႇတီႈဢၼ်မၼ်ႈဢၼ်ၶိူင်ႇၼႂ်းဢိူင်ႇ ဢႅၼ်ႇၵေးတိ၊ ဢေႃႈ။
ၼႂ်းမိူဝ်ႈဢၼ် သေႃးလု၊ ပွၵ်ႈသေၵႃႈတီႈဢၼ်တိုၵ်းၵၼ်တၢင်းၵူၼ်း ၽိလိတ်ႉတိ၊ ၶဝ်ၶိုၼ်းမႃးၼၼ်ႉမၼ်းလႆႈႁုငိၼ်းဝႃႈ တႃႇဝိတ်ႈ၊ မီးယူႇၵႃႈၼႂ်းထိူၼ်ႇ ဢႅၼ်ႇၵေးတိ၊ ၼၼ်ႉဢေႃႈ။-
သေႃးလု၊ ပႃးဢဝ်ၵူၼ်းသိုၵ်းသၢမ်ႁဵင်ဢၼ်လီဢၼ်ၶႅၼ်ႇသေပိူၼ်ႈၵႃႈၼႂ်းမဵဝ်း ဢိသရေး၊ ၼၼ်ႉသေယဝ်ႉ၊ၵႂႃႇသွၵ်ႈႁႃ တႃႇဝိတ်ႈ၊ တင်းၵူၼ်းမၼ်းၽၢႆႇပွတ်းဝၼ်းဢွၵ်ႇလွႆၽႃႁိၼ် ပႄႉထိူၼ်ႇ၊ ၼၼ်ႉဢေႃႈ။-
မၼ်းႁွတ်ႈထိုင်ၵႃႈတီႈႁူးထမ်ႈဢၼ်ၸမ်ၵၼ်တင်းၶွၵ်ႈသူဝ်းၵႃႈႁိမ်းသဵၼ်ႈတၢင်းၼၼ်ႉလႄႈ၊မၼ်းၶဝ်ႈထမ်ႈၵႂႃႇႁႂ်ႈလႆႈႁဵတ်းၽၢႆႈလူင်ဢေႃႈ။ ၸၢင်ႈပဵၼ်ၸၢင်ႈဝႃႈ၊ႁူးထမ်ႈၼၼ်ႉပဵၼ်တီႈဢၼ် တႃႇဝိတ်ႈ၊ တင်းၵူၼ်းမၼ်းတင်းလၢႆတဵတ်ႇမႅပ်းယူႇတၢင်းၼႂ်းၼႂ်းမၼ်းၼၼ်ႉဢေႃႈ။-
ၵူၼ်း တႃႇဝိတ်ႈ၊ ၸိူဝ်းၼၼ်ႉလၢတ်ႈတီႈမၼ်းလႄႈဝႃႈ၊ “ဢၼ်ၼႆႉပဵၼ်ဢၶႂၢင်ႉဢယေးပုၼ်ႈၸဝ်ႈႁဝ်းယဝ်ႉ။ ထႃႇဝရႃႉၽြႃး၊ မီးဢမိင်ႉတီႈၸဝ်ႈႁဝ်းဝႆႉဝႃႈ၊ ‘ၵဝ်တၵ်းဢဝ်ရၢၼ်ႇသူႇမႂ်းဢၢပ်ႈပၼ်ၵႃႈၼႂ်းမိုဝ်းမႂ်းလႄႈ၊မႂ်းမီးဢၶႂၢင်ႉဢၼ်ႁဵတ်းတီႈမၼ်းၸွမ်းၵႃႈၼင်ႇဢၼ်မႂ်းၶႂ်ႈႁဵတ်းၼၼ်ႉဢေႃႈ၊’ ဝႃႈၼႆတီႈၶႃႈယဝ်ႉ၊” ဝႃႈၼင်ႇၼႆဢေႃႈ။ တႃႇဝိတ်ႈ၊ လွမ်ၵႂႃႇပၢတ်ႇဢဝ်သိူဝ်ႈယၢဝ်း သေႃးလု၊ မႃးပွတ်းၼိုင်ႈဢေႃႈ။-
လိုၼ်းၼၼ်ႉ၊ တႃႇဝိတ်ႈ၊ ၼႅင်ၸႂ်ၵွပ်ႈပိူဝ်ႈဢၼ်ပၢတ်ႇဢဝ်သိူဝ်ႈ သေႃးလု၊ ၸိူဝ်ႉၼင်ႇၼၼ်ၼၼ်ႉဢေႃႈ။-
မၼ်းလၢတ်ႈတီႈၵူၼ်းမၼ်းၸိူဝ်းၼၼ်ႉလႄႈဝႃႈ၊ “ႁႂ်ႈ ထႃႇဝရႃႉၽြႃး၊ ႁၢမ်ႈတၢပ်ႈၵဝ်သေၵႃႈတၢင်းဢၼ်ႁဵတ်းၽေးသႂ်ႇတီႈၸဝ်ႈၵဝ်၊ၵေႃႉဢၼ် ထႃႇဝရႃႉၽြႃး၊ လိူၵ်ႈတၢင်ႇပဵၼ်ၶုၼ်ႁေႃၶမ်းဝႆႉၼၼ်ႉသေၵမ်းလူၺ်ႈ။ ႁုဝႃႈ၊မၼ်းပဵၼ်ၵေႃႉဢၼ် ထႃႇဝရႃႉၽြႃး၊ ပၼ်ၽိၵ်ႈသိၵ်ႈယူႇလႄႈၵဝ်ဢမ်ႇထုၵ်ႇလီယုၵ်ႉမိုဝ်းၵဝ်ႁႂ်ႈလႆႈတိူဝ်ႉထုၵ်ႇမၼ်းလႃးလႃး၊” ဝႃႈၼင်ႇၼႆသေယဝ်ႉ၊-
မၼ်းၶျေႃးဝွၼ်းၵူၼ်းမၼ်းၸိူဝ်းၼၼ်ႉၼင်ႇႁိုဝ်တၵ်းဢမ်ႇတိုၵ်းတေႃး သေႃးလု၊ ဢေႃႈ။ သေႃးလု၊ လုၵ်ႉသေလႄႈဢွၵ်ႇသေၵႃႈတီႈႁူးထမ်ႈသေယဝ်ႉ၊သိုပ်ႇၶၢဝ်းတၢင်းမၼ်းၵႂႃႇဢေႃႈ။-
တႃႇဝိတ်ႈ၊ ၵေႃႈဢွၵ်ႇသေၵႃႈတီႈႁူးထမ်ႈၼၼ်ႉႁွင်ႉသႅၼ်ႇၸွမ်းလင် သေႃးလု၊ လႄႈဝႃႈ၊ “ၸဝ်ႈၶုၼ်လူင်တီႈၶႃႈ၊” ဝႃႈၼင်ႇၼႆလႄႈ၊ သေႃးလု၊ ဝၢႆႇတူၺ်းဢေႃႈ။ တႃႇဝိတ်ႈ၊ ၵေႃႈပႃးတင်းရူဝ်ႇသေႇလေႇမၢတ်ႈလႄႈၵူမ်ႈႁူဝ်မူပ်ႇၸပ်းလိၼ်သေယဝ်ႉ၊-
လၢတ်ႈလႄႈဝႃႈ၊ “ႁဵတ်းသင်လႄႈထွမ်ႇဢဝ်ၵႂၢမ်းပိူၼ်ႈဢၼ်လဝ်ႈဝႃႈ၊ ‘ တႃႇဝိတ်ႈ၊ ၵျၢမ်ႇႁႃႁႂ်ႈလႆႈယႃႉယူၵ်ႉၸဝ်ႈႁဝ်းတီႈၶႃႈဢေႃႈ၊’ ဝႃႈၼင်ႇၼႆၼၼ်ႉၸိူဝ်ႉၼင်ႇႁိုဝ်တီႈၶႃႈ။-
တူၺ်းတီႈၶႃႈလူး။ တူဝ်ၸဝ်ႈႁဝ်းလႆႈတူၺ်းႁၼ်လွင်ႈဢၼ် ထႃႇဝရႃႉၽြႃး၊ ဢဝ်ၸဝ်ႈႁဝ်းဢၢပ်ႈပၼ်ၼႂ်းမိုဝ်းၶႃႈၸဝ်ႈၵႃႈၼႂ်းႁူးထမ်ႈၼႆႉၼႂ်းဝၼ်းမိူဝ်ႈၼႆႉယဝ်ႉတီႈၶႃႈဢေႃႈ။ ၵူၼ်းၵဝ်ၶႃႈၵမ်ႈၽွင်ႈတိုၵ်းယူင်းႁႂ်ႈၶႃႈၸဝ်ႈဢဝ်ၸဝ်ႈႁဝ်းတၢႆသေၵေႃႈ၊ၶႃႈၸဝ်ႈမီးၸႂ်ဢၼ်သေလၢႆလႄႈလၢတ်ႈဝႃႈ၊ ‘ၵဝ်တၵ်းဢမ်ႇယုၵ်ႉမိုဝ်းၵဝ်ႁႂ်ႈလႆႈတိူဝ်ႉထုၵ်ႇၸဝ်ႈၵဝ်လႃးလႃး၊ၵွပ်ႈပိူဝ်ႈဢၼ်ၸဝ်ႈၵဝ်ပဵၼ်ၵေႃႉဢၼ် ထႃႇဝရႃႉၽြႃး၊ ပၼ်ၽိၵ်ႈသိၵ်ႈဝႆႉၼၼ်ႉဢေႃႈ၊’ ဝႃႈၼင်ႇၼႆတီႈၶႃႈဢေႃႈ။-
လိူဝ်သေၼၼ်ႉပေႃႈၸဝ်ႈတီႈၶႃႈ႟။ လူတူၺ်းသေၵမ်းၶႃႈ။ သိူဝ်ႈယၢဝ်းၸဝ်ႈႁဝ်းမီးၼႂ်းမိုဝ်းၶႃႈၸဝ်ႈဝႆႉပွတ်းၼိုင်ႈယဝ်ႉ။ ၶႃႈၸဝ်ႈဢဝ်ၸဝ်ႈႁဝ်းတၢႆလႆႈသေၵေႃႈ၊ၶႃႈၸဝ်ႈပၢတ်ႇဢဝ်ဢၼ်ၼႆႉၵူၺ်းတီႈၶႃႈဢေႃႈ။ ၶႅၼ်းတေႃႈႁုႁၼ်လွင်ႈဢၼ်ၶႃႈၸဝ်ႈတိုၼ်းဢမ်ႇမီးတၢင်းၵျၢမ်ႇတႃႇတေလုၵ်ႉၽိုၼ်ႉၸဝ်ႈႁဝ်း၊ဢမ်ႇမီးၸႂ်ဢၼ်တၵ်းယႃႉယူၵ်ႉၸဝ်ႈႁဝ်းၼၼ်ႉသေၵမ်းတီႈၶႃႈ။ ၶႃႈၸဝ်ႈဢမ်ႇၽိတ်းပိူင်ႈၸဝ်ႈႁဝ်းတီႈၶႃႈ။ ၼႂ်းဝႃႈၼၼ်သေၵေႃႈၸဝ်ႈႁဝ်းၸွမ်းႁႃႁႂ်ႈလႆႈဢဝ်ၶႃႈၸဝ်ႈတၢႆတီႈၶႃႈလူင်ပႄႇ။-
ႁႂ်ႈ ထႃႇဝရႃႉၽြႃး၊ တႅပ်းတတ်းဝူင်ႈၵၢင်ၸဝ်ႈႁဝ်းဢိၵ်ႇတင်းၶႃႈၸဝ်ႈၼႆႉသေၵမ်းတီႈၶႃႈ။ ႁႂ်ႈ ထႃႇဝရႃႉၽြႃး၊ တွပ်ႇတႅၼ်းပၼ်ဢပျတ်ႈပုၼ်ႈဢၼ်ၸဝ်ႈႁဝ်းၽိတ်းပိူင်ႈၶႃႈၸဝ်ႈၼႆႉသေၵမ်းတီႈၶႃႈ။ ၶႃႈၸဝ်ႈၸမ်ႉတၵ်းဢမ်ႇလႆႈယႃႉယူၵ်ႉၸဝ်ႈႁဝ်းလႃးလႃးတီႈၶႃႈ။-
ၸဝ်ႈႁဝ်းႁုထုင်းၵႂၢမ်းမိူဝ်ႈၵွၼ်ႇမီးမႃးလႄႈဝႃႈ၊ ‘လွင်ႈတၢင်းဢၼ်ႁၢႆႉမိူၵ်ႈၸိုင်၊ၵေႃႉဢၼ်ႁၢႆႉမိူၵ်ႈၵူၺ်းၸၢင်ႈႁဵတ်းဢေႃႈ၊’ ဝႃႈၼင်ႇၼႆၼၼ်ႉယူႇတီႈၶႃႈဢေႃႈ။ ၵွပ်ႈပိူဝ်ႈလွင်ႈတၢင်းၼႆႉလႄႈၶႃႈၸဝ်ႈတၵ်းဢမ်ႇယႃႉယူၵ်ႉၸဝ်ႈႁဝ်းတီႈၶႃႈ။-
ၶုၼ်ႁေႃၶမ်းမဵဝ်း ဢိသရေး၊ ၸွမ်းႁႃႁႂ်ႈလႆႈဢဝ်တၢႆၽူႈလႂ်။ ၸဝ်ႈႁဝ်းၸွမ်းႁႃတူဝ်မႃဢၼ်တၢႆၼၼ်ႉတီႈၶႃႈႁိုဝ်း။ ၸဝ်ႈႁဝ်းၸွမ်းႁႃမတ်းတီႈၶႃႈႁိုဝ်း။-
ထႃႇဝရႃႉၽြႃး၊ တၵ်းၸီႇယၢင်ႇသေလႄႈတႅပ်းတတ်းလွင်ႈဢၼ်ၵေႃႉလႂ်ၽိတ်းပိူင်ႈၼၼ်ႉတီႈၶႃႈဢေႃႈ။ ၶႅၼ်းတေႃႈႁႂ်ႈမၼ်းၸဝ်ႈလူတူၺ်းဢမုၼႆႉသေယဝ်ႉ၊ၵႅတ်ႇၶႄႁႄႉၵင်ႈၶႃႈၸဝ်ႈလႄႈၵႄႇသႄႇၶျွတ်ႈဢဝ်ၶႃႈၸဝ်ႈသေၵႃႈၼႂ်းမိုဝ်းၸဝ်ႈႁဝ်းသေၵမ်းလူၺ်ႈ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ လဝ်ႈလၢတ်ႈယဝ်ႉတူဝ်ႈယဝ်ႉလႄႈ၊ သေႃးလု၊ ထၢမ်လႄႈဝႃႈ၊ “လုၵ်ႈၸၢႆးၵဝ် တႃႇဝိတ်ႈ၊ ႟။ ဢၼ်ၼႆႉပဵၼ်သဵင်ၵႂၢမ်းမႂ်းႁိုဝ်း၊” ဝႃႈၼင်ႇၼႆသေယဝ်ႉ၊ သေႃးလု၊ ၵိဝ်သဵင်လႄႈႁွင်ႉႁႆႈဢေႃႈ။-
ႁဵတ်းၸိူဝ်ႉၼင်ႇၼၼ်လႄႈမၼ်းလၢတ်ႈတီႈ တႃႇဝိတ်ႈ၊ လႄႈဝႃႈ၊ “ၸႂ်သၽေႃးမႂ်းသိုဝ်ႈလီၼႃႇသေၵဝ်ဢေႃႈ။ ယၢမ်းမိူဝ်ႈဢၼ်ၵဝ်ႁဵတ်းတၢင်းၽိတ်းသႂ်ႇတီႈမႂ်းယူႇၼၼ်ႉမႂ်းယင်းလီတေႃႇၵဝ်ၼႃႇလူင်လၢင်ယဝ်ႉ။-
မႂ်းၼႄပျႃးၸႂ်သၽေႃးဢၼ်မႂ်းလႆႈႁဵတ်းၵျေးၸူးတီႈၵဝ်ၼႂ်းဝၼ်းမိူဝ်ႈၼႆႉယဝ်ႉ။ လွင်ႈမၼ်းၸမ်ႉ၊ပိၵ်ႉသမ်ႉ ထႃႇဝရႃႉၽြႃး၊ ဢဝ်ၵဝ်ဢၢပ်ႈၼႂ်းမိုဝ်းမႂ်းသေၵေႃႈ မႂ်းယင်းဢမ်ႇဢဝ်ၵဝ်တၢႆလႄႈယူႇလူင်ပႄႇ။-
ပေႃးတိလႆႈရၢၼ်ႇသူႇတူဝ်ၸဝ်ႈၵဝ်ႇၸိုင်၊ၽူႈလႂ်ယၢမ်ႈတွၼ်ႉပွႆႇမၼ်းလွတ်ႈ။ ပိူဝ်ႈၼႆလႄႈႁႂ်ႈ ထႃႇဝရႃႉၽြႃး၊ တွပ်ႇတႅၼ်းပၼ်ၵျေးၸူးဢၼ်မႂ်းႁဵတ်းတီႈၵဝ်ဝၼ်းမိူဝ်ႈၼႆႉၼၼ်ႉသေၵမ်းလူၺ်ႈ။-
မိူဝ်ႈလဵဝ်ၼႆႉၵဝ်ႁုထၢင်ႇသႃးလွင်ႈဢၼ်မႂ်းတေပဵၼ်ၶုၼ်ႁေႃၶမ်းဢမၢၼ်ႇၶၼ်ပဵၼ်လႄႈသိုင်ႇၸိုင်ႈဝၢၼ်ႈမိူင်း ဢိသရေး၊ ၼႆႉတၵ်းတႄႇယူႇၼႂ်းမိုဝ်းမႂ်းၼၼ်ႉဢေႃႈ။-
ၵူၺ်းၵႃႈ၊ၵႃႈၼႂ်းၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ၼၼ်ႉၶႅၼ်းတေႃႈႁဵတ်းၵတိသဵတ်ႈၸႃႇတီႈၵဝ်လူၺ်ႈလွင်ႈဢၼ်မႂ်းတၵ်းဢမ်ႇပႄႇၽဵဝ်ႈၸူဝ်ႈလုၵ်ႈပၢၼ်လၢၼ်ၵဝ်ၼင်ႇႁိုဝ်ၸိုဝ်ႈသဵင်ၵဝ်ဢိၵ်ႇတင်းၸိုဝ်ႈသဵင်ပီႈၼွင်ႉၸိူဝ်ႉၶိူဝ်းပေႃႈၵဝ်တၵ်းတေဢမ်ႇလပ်ႉႁၢႆမူတ်းမူတ်းၵႂႃႇၼၼ်ႉသေၵမ်း၊” ဝႃႈၼင်ႇၼႆဢေႃႈ။-
တႃႇဝိတ်ႈ၊ ၵေႃႈႁဵတ်းၵတိသဵတ်ႈၸႃႇဢေႃႈ။ လိုၼ်းၼၼ်ႉ၊ သေႃးလု၊ ၶိုၼ်းမိူဝ်းၵႂႃႇၵႃႈတီႈႁေႃၶမ်းသေလႄႈ၊ တႃႇဝိတ်ႈ၊ တင်းၵူၼ်းမၼ်းတင်းလၢႆၵေႃႈဢွၼ်ၵၼ်ၶိုၼ်းမိူဝ်းၸူးတီႈဢၼ်ၶဝ်တဵတ်ႇမႅပ်းၼၼ်ႉသေဢေႃႈ။
သမူၺ်ႇလႃႉ၊ သဵင်ႈႁၢႆတၢႆယဝ်ႉလႄႈ၊ၵူၼ်းမဵဝ်း ဢိသရေး၊ တင်းသဵင်ႈတင်းလူင်ၸုတုမ်ၵၼ်သေလႄႈႁဵတ်းတၢင်းဢၼ်ႁွင်ႉႁႆႈပွင်ႉၶၢင်းသေယဝ်ႉ၊ဢွၼ်ၵၼ်ဢဝ်မၼ်းသၢင်းၵျူဝ်ႇၵႃႈတီႈႁိူၼ်းမၼ်းၵႃႈၼႂ်းဝဵင်း ရႃႇမႃႉ၊ သေဢေႃႈ။ လိုၼ်းသေၼၼ်ႉ၊ တႃႇဝိတ်ႈ၊ ၵေႃႈလုၵ်ႉလႄႈလူင်းၵႂႃႇၸူးတီႈထိူၼ်ႇ ပႃႇရၼ်ႇ၊ သေဢေႃႈ။-
မိူဝ်ႈၼၼ်ႉ၊မီးၵူၼ်းၵေႃႉၼိုင်ႈဢၼ်ယူႇၵႃႈတီႈဝဵင်းလူင် မေႃႇၼႃႉ၊ လႄႈမီးသူဝ်းသၢမ်ႁဵင်ဢိၵ်ႇတင်းပႄႉႁဵင်ၼိုင်ႈဢေႃႈ။ မၼ်းၼၼ်ႉၵႅတ်းႁႆးၶူၼ်သူဝ်းမၼ်းယူႇၵႃႈတီႈဝဵင်း ၵရမေႇလႃႉ၊ ဢေႃႈ။-
ၸိုဝ်ႈသဵင်မၼ်းပဵၼ် ၼႃႇပလႃႉ၊ လႄႈမေးမၼ်းပဵၼ် ဢၽိၵေးလႃႉ၊ ဢေႃႈ။ မႄႈယိင်းၼၼ်ႉမီးၺၢၼ်ႇလီလႄႈႁၢင်ႈလီဢေႃႈ။ ၵူၼ်းၸၢႆးၼၼ်ႉၸမ်ႉ၊မီးသၽေႃးဢၼ်ႁၢဝ်ႈၵျၢမ်းလႄႈၸၢင်ႈႁဵတ်းဢၼ်ဢမ်ႇလီဢေႃႈ။ မၼ်းပဵၼ်ၸိူဝ်ႉၶိူဝ်းၵူၼ်းၶိူဝ်းႁိူၼ်း ၵႃႇလႅပ်ႉ၊ ဢေႃႈ။
တႃႇဝိတ်ႈ၊ ယူႇၵႃႈၼႂ်းထိူၼ်ႇလႄႈလႆႈငိၼ်းၶၢဝ်ႇဢၼ် ၼႃႇပလႃႉ၊ ၵႅတ်းႁႆးၶူၼ်သူဝ်းမၼ်းယူႇၼၼ်ႉသေယဝ်ႉ၊-
ပွႆႇၸႂ်ႉၵူၼ်းဢွၼ်ႇသိပ်းၵေႃႉႁႂ်ႈၶဝ်ၶိုၼ်ႈၵႂႃႇၵႃႈတီႈဝဵင်း ၵရမေႇလႃႉ၊ လႄႈဢဝ်တင်းၸိုဝ်ႈသဵင်မၼ်းတၵ်ႉလၢတ်ႈတီႈၵေႃႉၼၼ်ႉဢေႃႈ။-
မၼ်းသင်ႇလၢတ်ႈၶဝ်ႁႂ်ႈလၢတ်ႈတီႈ ၼႃႇပလႃႉ၊ လႄႈဝႃႈၸမ်ႉ၊ “ႁႂ်ႈယူႇလီၵိၼ်ဝၢၼ်သေၵမ်းလူၺ်ႈ။ ၸႃႉၸဵမ်ၸဝ်ႈလႄႈၵူၼ်းႁိူၼ်းၸဝ်ႈဢိၵ်ႇတင်းၵူၼ်းၵႃႈဢၼ်ၸၢပ်ႈသႅင်ႇၵၼ်တင်းၸဝ်ႈ၊တင်းသဵင်ႈတင်းလူင်ၼၼ်ႉႁႂ်ႈမီးတၢင်းဢၼ်ၵတ်းယဵၼ်ၶျၢမ်းသႃႇသေၵမ်းလူၺ်ႈ။-
ၵဝ်လႆႈငိၼ်းၶၢဝ်ႇဢၼ်မိူဝ်ႈလဵဝ်ပဵၼ်ၶၢဝ်းဢၼ်ၵႅတ်းႁႆးၶူၼ်သူဝ်းဢေႃႈ။ မိူဝ်ႈလဵဝ်ၼႆႉၵူၼ်းလဵင်ႉသူဝ်းၸဝ်ႈၸိူဝ်းၼၼ်ႉမီးယူႇလူၺ်ႈၵၼ်တင်းႁဝ်းလႄႈႁဝ်းဢမ်ႇယႃႉဢမ်ႇယူၵ်ႉၶဝ်။ ၸူဝ်ႈၶိင်ႇဢၼ်ၶဝ်ယူႇၵႃႈတီႈဝဵင်း ၵရမေႇလႃႉ၊ ၼႆႉဢုၵ်ႉၸႃႇၶဝ်ဢမ်ႇႁူင်ႈဢမ်ႇႁၢႆသေၸိူဝ်ႉသေမဵဝ်းၶႃႈၵူၺ်း။-
ထၢမ်တူၺ်းတီႈၵူၼ်းဢွၼ်ႇၸိူဝ်းၼၼ်ႉၶႃႈတႃႉ။ ၶဝ်တၵ်းမွၵ်ႇလၢတ်ႈၶႃႈဢေႃႈ။ ၵွပ်ႈပိူဝ်ႈလွင်ႈတၢင်းၸိူဝ်းၼႆႉလႄႈႁႂ်ႈၵူၼ်းဢွၼ်ႇၵဝ်ၶႃႈတင်းလၢႆလႆႈထူပ်းၵျေးၸူးတီႈၸဝ်ႈသေၵမ်းၶႃႈ။ ဝၼ်းပွႆးမၢင်ႇၵလႃႇႁဝ်းႁွတ်ႈထိုင်မႃးယဝ်ႉလႄႈ၊ၶႅၼ်းတေႃႈဢဝ်ၵႃႈဢၼ်ၸဝ်ႈတၢတ်ႈၼိူင်ႇလႆႈၼၼ်ႉပၼ်တီႈၶႃႈၸဝ်ႈႁဝ်းၸိူဝ်းၼႆႉဢိၵ်ႇတင်းတီႈၵေႃႉသႄႈၸဝ်ႈ တႃႇဝိတ်ႈ၊ ၼႆႉသေၵမ်းၶႃႈ၊” ဝႃႈၼင်ႇၼႆဢေႃႈ။
ၵူၼ်းဢွၼ်ႇၸိူဝ်းၼၼ်ႉၵေႃႈဢွၼ်ၵၼ်ဢဝ်ၵႂၢမ်းၼၼ်ႉမွၵ်ႇလၢတ်ႈထိုင်ၼႂ်းၼႃႇမႃႉၸိုဝ်ႈသဵင် တႃႇဝိတ်ႈ၊ တီႈ ၼႃႇပလႃႉ၊ သေယဝ်ႉ၊ၶဝ်ယူႇတဵတ်ႇတဵတ်ႇလႄႈပႂ်ႉထွမ်ႇယူႇဢေႃႈ။
မိူဝ်ႈၼၼ်ႉ၊ ၼႃႇပလႃႉ၊ ၶိုၼ်းလၢတ်ႈလႄႈဝႃႈ၊ “ တႃႇဝိတ်ႈ၊ ၼၼ်ႉပဵၼ်ၽူႈလႂ်။ ၵဝ်ဢမ်ႇတွၼ်ႉငိၼ်းၸိုဝ်ႈမၼ်းလူင်ပႄႇ။ ၶိင်ႇၵႃႇလႃႉမိူဝ်ႈလဵဝ်ၼႆႉၶႃႈဢၼ်လုၵ်ႉၽိုၼ်ႉမိူင်းၼၼ်ႉမီးၼမ်ၼႃႇလူင်လၢင်။-
ၵဝ်တၵ်းဢမ်ႇဢဝ်ၶဝ်ႈမုၼ်းၵဝ်၊ၼမ်ႉၵဝ်၊ၼိူဝ်ႉၵဝ်ဢၼ်ၵဝ်ႁႅမ်ပုၼ်ႈၵူၼ်းၸိူဝ်းဢၼ်ၵႅတ်းႁႆးၶူၼ်သူဝ်းၵဝ်ၼႆႉသေလႄႈပၼ်တီႈၶဝ်ၸိူဝ်းဢၼ်ၵဝ်ဢမ်ႇႁုလွင်ႈဢၼ်ၶဝ်လုၵ်ႉသေၵႃႈတီႈလႂ်မႃးၼၼ်ႉၵူၺ်း၊” ဝႃႈၼင်ႇၼႆဢေႃႈ။
ၵူၼ်းဢွၼ်ႇ တႃႇဝိတ်ႈ၊ ၸိူဝ်းၼၼ်ႉၶိုၼ်းပွၵ်ႈမိူဝ်းၵႂႃႇလႄႈဢဝ်ၵႂၢမ်း ၼႃႇပလႃႉ၊ လၢတ်ႈၼၼ်ႉလဝ်ႈလၢတ်ႈတီႈ တႃႇဝိတ်ႈ၊ ဢေႃႈ။-
တႃႇဝိတ်ႈ၊ ၵေႃႈ ပူင်ဢမိင်ႉတီႈၵူၼ်းမၼ်းတင်းလၢႆလႄႈဝႃႈ၊ “ဢွၼ်ၵၼ်ဢဝ်လၢပ်ႇသူမတ်ႉၵွပ်ႈဢႅဝ်သူၵူႈၵေႃႉၵူႈၵူၼ်းတႃႉ၊” ဝႃႈၼင်ႇၼႆလႄႈၶဝ်ဢွၼ်ၵၼ်ႁဵတ်းၸွမ်းၵူႈၵေႃႉၵူႈၵူၼ်းဢေႃႈ။ တႃႇဝိတ်ႈ၊ ၵေႃႈဢဝ်လၢပ်ႇမၼ်းမတ်ႉၵွပ်ႈဢႅဝ်မၼ်းသေယဝ်ႉ၊ပႃးဢဝ်ၵူၼ်းမၼ်းသီႇပၢၵ်ႇဢွၵ်ႇၵႂႃႇလႄႈ၊ဝႆႉသွင်ပၢၵ်ႇပႂ်ႉဢုၵ်ႉၸႃႇၶူဝ်းလဵင်းၶဝ်ယူႇဢေႃႈ။
ၶႃႈ ၼႃႇပလႃႉ၊ ၼၼ်ႉၵေႃႉၼိုင်ႈမွၵ်ႇလၢတ်ႈတီႈ ဢၽိၵေးလႃႉ၊ ၵေႃႉပဵၼ်မေး ၼႃႇပလႃႉ၊ ၼၼ်ႉလႄႈဝႃႈ၊ “တႃႇဝိတ်ႈ၊ ပွႆႇၸႂ်ႉၵူၼ်းလုၵ်ႉသေၵႃႈတီႈထိူၼ်ႇမႃးႁႂ်ႈလႆႈတၵ်ႉလၢတ်ႈတီႈၸဝ်ႈႁဝ်းတီႈၶႃႈလႄႈ၊ၸဝ်ႈႁဝ်းၼၼ်ႉႁိုတ်းႁၢတ်ႇလူၺ်ႈၵႂၢမ်းလႃႇၵႂၢမ်းလင်တီႈၶဝ်ပႅတ်ႈတီႈၶႃႈဢေႃႈ။-
ၶဝ်ၼၼ်ႉ၊ႁဵတ်းလီတေႃႇႁဝ်းၶႃႈတႄႉတႄႉဢေႃႈ။ ၶဝ်ဢမ်ႇတွၼ်ႉယႃႉယုၵ်ႉႁဝ်းၶႃႈလႃးလႃး။ ၸူဝ်ႈဢၼ်ႁဝ်းၶႃႈယူႇလူၺ်ႈၵၼ်တင်းၶဝ်ယူႇတင်းၸူဝ်ႈၼၼ်ႉဢုၵ်ႉၸႃႇႁဝ်းၶႃႈဢမ်ႇလႆႈသုမ်းလႆႈႁၢႆသေၸိူဝ်ႉသေမဵဝ်းတီႈၶႃႈ။-
ၸူဝ်ႈဢၼ်ႁဝ်းၶႃႈလဵင်ႉထိင်းသူဝ်းလႄႈႁဵတ်းၵေႃႉႁဵတ်းသႄႈလူၺ်ႈၵၼ်တင်းၶဝ်ယူႇတင်းၸူဝ်ႈၼၼ်ႉၶဝ်ပဵၼ်ဢၼ်ႁႄႉဢၼ်ၵင်ႈႁဝ်းၶႃႈၵူႈဝၼ်းၵူႈၶိုၼ်းတႃႇသေႇဢေႃႈ။-
ၸဝ်ႈၼၢင်းႁဝ်းယဵင်ႈၶႅၼ်းၶႆႈၸႂ်ဝူၼ်ႉတူၺ်းလီလီလႄႈတႅပ်းတတ်းလွင်ႈဢၼ်ထုၵ်ႇလီႁဵတ်းဢၼ်လႂ်ၼၼ်ႉၶႃႈတႃႉ။ ၸၢင်ႈပဵၼ်တၢင်းဢၼ်ၶိုၼ်းပဵၼ်ၽေးသႂ်ႇတီႈၸဝ်ႈႁဝ်းၼၼ်ႉဢိၵ်ႇတင်းၵူၼ်းႁိူၼ်းမၼ်းတင်းလၢႆယဝ်ႉၶႃႈယဝ်ႉ။ ၵွပ်ႈပိူဝ်ႈဢၼ်ၸဝ်ႈႁဝ်းၼၼ်ႉပဵၼ်ၵူၼ်းၸႂ်တိုဝ်လႄႈမၼ်းဢမ်ႇထွမ်ႇဢဝ်ၵႂၢမ်းၽူႈလႂ်လႃးလႃး၊” ဝႃႈၼင်ႇၼႆဢေႃႈ။
ဢၽိၵေးလႃႉ၊ ၵေႃႈႁိပ်ႈၼႅတ်ႈဢဝ်ၶဝ်ႈမုၼ်းသွင်ပၢၵ်ႇလုၵ်ႈ၊ထူင်ၼင်ဢၼ်တဵမ်ဝႆႉတင်းၼမ်ႉမၢၵ်ႇၸပိတ်ႉၼၼ်ႉသွင်လုၵ်ႈ၊ၼိူဝ်ႉသူဝ်းဢၼ်ႁုင်ယဝ်ႉႁႃႈတူဝ်၊ၶဝ်ႈတႅၵ်ႇသိပ်းၸွႆႉ၊မၢၵ်ႇၸပိတ်ႉႁႅင်ႈပၢၵ်ႇပုၵ်ႉ၊ၶႅပ်းၶဝ်ႈမုၼ်းမၢၵ်ႇလိူဝ်ႇသွင်ပၢၵ်ႇတၢင်ႇၵႃႈၼိူဝ်လင်မႃႉလီႈတင်းလၢႆသေယဝ်ႉ၊-
လၢတ်ႈတီႈၵူၼ်းဢွၼ်ႇမၼ်းတင်းလၢႆလႄႈဝႃႈ၊ “သူဢွၼ်ၵၼ်ၵႂႃႇဢွၼ်တၢင်းတႃႉ။ ၵဝ်တၵ်းၸွမ်းမႃးယူႇ၊” ဝႃႈၼင်ႇၼႆဢေႃႈ။ မၼ်းဢမ်ႇမွၵ်ႇဢမ်ႇလၢတ်ႈတီႈၽူဝ်မၼ်းလႃးလႃး။
ဢၽိၵေးလႃႉ၊ ၼၼ်ႉၶီႇမႃႉလီႈမၼ်းၵႂႃႇလႄႈမိူဝ်ႈဢၼ်ၵႂႃႇၸွမ်းသဵၼ်ႈတၢင်းၵူတ်ႉလွႆၵႂႃႇယူႇၼၼ်ႉၸိုင်၊မၼ်းႁူပ်ႉထူပ်း တႃႇဝိတ်ႈ၊ တင်းၵူၼ်းမၼ်းတင်းလၢႆလူင်းၸွမ်းသဵၼ်ႈတၢင်းၼၼ်ႉမႃးၸူးတီႈမၼ်းယူႇဢေႃႈ။-
ၸူဝ်ႈဢၼ်ဢမ်ႇပႆႇႁူပ်ႉထူပ်းၵၼ်ၼၼ်ႉ တႃႇဝိတ်ႈ၊ ၶႆႈၸႂ်လႄႈဝႃႈ၊ “တၢင်းဢၼ်ၵဝ်ၵႅတ်ႇၶႄႁႄႉၵင်ႈပၼ်ဢုၵ်ႉၸႃႇၵေႃႉၼႆႉၵႃႈၼႂ်းထိူၼ်ႇလီလီငၢမ်းငၢမ်း၊ယင်းဢမ်ႇႁႂ်ႈႁူင်ႈႁႂ်ႈႁၢႆသေၸိူဝ်ႉသေပိူင်ၼၼ်ႉပဵၼ်ဢၼ်သုမ်းပႅတ်ႈဢၶိင်ႇၵဝ်လၢႆလၢႆလွၵ်ႇလွၵ်ႇၵူၺ်းယဝ်ႉ။ မၼ်းဢဝ်ဢၼ်ႁၢႆႉတွပ်ႇတႅၼ်းပုၼ်ႈဢၼ်လီယဝ်ႉ၊” ဝႃႈၼင်ႇၼႆဢေႃႈ။-
တႃႇဝိတ်ႈ၊ လၢတ်ႈလႄႈဝႃႈ၊ “မိူဝ်ႈၽုၵ်ႈၵၢင်ၼႂ်၊ပေႃးၵဝ်ယင်းဝႆႉၵိုတ်းဝႆႉၵျၢၼ်ႇၵူၼ်းၸၢႆးဢၼ်ၸၢပ်ႈသႅင်ႇၵၼ်တင်းမၼ်းၼၼ်ႉႁႂ်ႈဢသၢၵ်ႈလိပ်းယူႇသေၵေႃႉသေၵူၼ်းၸိုင်၊ႁႂ်ႈၽြႃးပဵၼ်ၸဝ်ႈၸီႇယၢင်ႇႁႂ်ႈၵဝ်တၢႆတႃႉ၊” ဝႃႈၼင်ႇၼႆဢေႃႈ။
ၼႂ်းမိူဝ်ႈဢၼ် ဢၽိၵေးလႃႉ၊ ႁၼ် တႃႇဝိတ်ႈ၊ ၼၼ်ႉမၼ်းလူင်းသေမႃႉလီႈမၼ်းၶၼ်ၶၼ်ၽႂ်းၽႂ်းသေယဝ်ႉ၊ဢဝ်တူဝ်မၼ်းၵူမ်ႈငူပ်ႉၸပ်းလိၼ်၊-
ၵႃႈတီႈတိၼ် တႃႇဝိတ်ႈ၊ လႄႈလဝ်ႈလၢတ်ႈဝႃႈ၊ “ၸဝ်ႈၵဝ်တီႈၶႃႈ႟။ ႁႂ်ႈဢပျတ်ႈတူၵ်းထိုင်ၼိူဝ်ၶႃႈၸဝ်ႈၵေႃႉလဵဝ်ၵူၺ်းသေၵမ်းတီႈၶႃႈ။ ၶႅၼ်းတေႃႈႁႂ်ႈၶႃႈမႄႈယိင်းၸဝ်ႈႁဝ်းၶႃႈၼႆႉလႆႈလၢတ်ႈထိုင်ႁူၸဝ်ႈႁဝ်းသေၵမ်းတီႈၶႃႈ။-
ၶႅၼ်းတေႃႈယႃႇပေဝႆႉဢမုဢယေး လူၺ်ႈလွင်ႈ ၼႃႇပလႃႉ၊ ၵူၼ်းဢၼ်ဢမ်ႇပွင်ႇလွင်ႈၵႃႈသင်လႃးလႃးၼၼ်ႉသေၵမ်းတီႈၶႃႈ။ ၸိုဝ်ႈသဵင်မၼ်းၼၼ်ႉတိုၼ်းပဵၼ်ဢၼ်မႅၼ်ႈၸွမ်းဢထိၵ်ႈပႄႇမၼ်းပွင်ႇဝႃႈၵူၼ်းမိူၵ်ႈၼၼ်ႉတီႈၶႃႈယဝ်ႉ။ မိူဝ်ႈဢၼ်ၵူၼ်းဢွၼ်ႇဢၼ်ၸဝ်ႈႁဝ်းပွႆႇၸႂ်ႉမႃးၸိူဝ်းၼၼ်ႉႁွတ်ႈမႃးၼၼ်ႉၶႃႈၸဝ်ႈဢမ်ႇယူႇၵႃႈတီႈၼၼ်ႈၶႃႈ။-
ဢၼ်ၼႆႉၸိုင်၊ပဵၼ်လွင်ႈတၢင်းဢၼ် ထႃႇဝရႃႉၽြႃး၊ ႁႄႉၶႅၼ်ၸဝ်ႈႁဝ်းဝႆႉ၊ဢမ်ႇႁႂ်ႈၸဝ်ႈႁဝ်းတွပ်ႇတႅၼ်းဢပျတ်ႈၶဝ်လႄႈဢဝ်ရၢၼ်ႇသူႇၸဝ်ႈႁဝ်းတင်းလၢႆတၢႆၼၼ်ႉတီႈၶႃႈဢေႃႈ။ ၼင်ႇၼၼ်လႄႈၶႃႈၸဝ်ႈႁဝ်းတိူင်ႇဝႃႈလႄႈဝႃႈ၊ ‘ႁႂ်ႈရၢၼ်ႇသူႇၸဝ်ႈႁဝ်းတင်းလၢႆ၊ဢိၵ်ႇတင်းၶဝ်ၸိူဝ်းဢၼ်မီးဢလူဝ်ႇၶႂ်ႈယႃႉယူၵ်ႉၸဝ်ႈႁဝ်းၸိူဝ်းၼၼ်ႉလႆႈၶၢမ်ႇဢပျတ်ႈတၢမ်ႇမိူၼ်မိူၼ်ၵၼ်တင်း ၼႃႇပလႃႉ၊ သေၵမ်းလူၺ်ႈ၊-’
မိူဝ်ႈလဵဝ်ၼႆႉၸိုင်၊ၸဝ်ႈၵဝ်ၶႃႈ႟။ ၶႅၼ်းတေႃႈႁပ်ႉဢဝ်လၢၵ်ႈသွင်ႇဢၼ်ၶႃႈၸဝ်ႈႁဝ်းပႃးမႃးသၢၵ်ႈထိုင်ၸဝ်ႈႁဝ်းပုၼ်ႈၵူၼ်းၸဝ်ႈႁဝ်းတင်းလၢႆၼၼ်ႉသေၵမ်းတီႈၶႃႈ။-
ယိူၼ်ႉၶၢမ်ႇဢပျတ်ႈၶႃႈၸဝ်ႈႁဝ်းၼႆႉသေၵမ်းတီႈၶႃႈ။ ၵွပ်ႈပိူဝ်ႈဢၼ်ၸဝ်ႈႁဝ်းတိုၵ်းသိုၵ်းပုၼ်ႈ ထႃႇဝရႃႉၽြႃး၊ ဢိၵ်ႇတင်းၵွပ်ႈပိူဝ်ႈဢၼ်ဢမ်ႇထူပ်းဢမ်ႇႁၼ်တီႈဢၼ်လီတၢင်ႇဢပျတ်ႈၸဝ်ႈႁဝ်းၸူဝ်ႈဢသၢၵ်ႈၸဝ်ႈႁဝ်းၶႃႈၼၼ်ႉလႄႈ ထႃႇဝရႃႉၽြႃး၊ တၵ်းႁႂ်ႈၸဝ်ႈႁဝ်းဢိၵ်ႇတင်းၸူဝ်ႈလုၵ်ႈပၢၼ်လၢၼ်ၸဝ်ႈႁဝ်းၸိူဝ်းၼၼ်ႉပဵၼ်ၶုၼ်ႁေႃၶမ်းတီႈၶႃႈဢေႃႈ။-
ပေႃးသေၵေႃႉသေၵူၼ်းဢၢင်ႈတၵ်းတိုၵ်းတေႃးၸဝ်ႈႁဝ်းလႄႈၵျၢမ်ႇႁႃႁႂ်ႈလႆႈဢဝ်ၸဝ်ႈႁဝ်းတၢႆၸိုင်၊ ထႃႇဝရႃႉၽြႃး၊ ၽြႃးပဵၼ်ၸဝ်ႈ၊ၸဝ်ႈႁဝ်းၼၼ်ႉတၵ်းပႂ်ႉလူပႂ်ႉတူၺ်းႁႂ်ႈၸဝ်ႈႁဝ်းၵၢင်းလွတ်ႈတင်းၽေးမိူၼ်ၸိူဝ်ႉၼင်ႇဢၼ်ၵူၼ်းပႂ်ႉယၢမ်းပႂ်ႉလူပႂ်ႉတူၺ်းဢုၵ်ႉၸႃႇဢၼ်မီးၵႃႈၶၼ်ယႂ်ႇၼၼ်ႉတီႈၶႃႈဢေႃႈ။ ဢသၢၵ်ႈရၢၼ်ႇသူႇၸဝ်ႈႁဝ်းတင်းလၢႆၸမ်ႉ၊ ထႃႇဝရႃႉၽြႃး၊ တၵ်းဢဝ်မၼ်းပိုဝ်ႈပႅတ်ႈမိူၼ်ၸိူဝ်ႉၼင်ႇႁူၺ်ႇမၢၵ်ႇႁိၼ်ဢၼ်ပိူၼ်ႈဢဝ်တင်းၵၢင်ႇၵူင်ပိုတ်းယိုဝ်းၼၼ်ႉတီႈၶႃႈဢေႃႈ။-
မိူဝ်ႈဢၼ် ထႃႇဝရႃႉၽြႃး၊ ႁဵတ်းၵျေးၸူးတီႈၸဝ်ႈႁဝ်းၸွမ်းၼင်ႇၵတိမၼ်းၸဝ်ႈမီးဝႆႉ၊တီႈၸဝ်ႈႁဝ်းယဝ်ႉတူဝ်ႈယဝ်ႉသေလႄႈၶၢၼ်းၸဝ်ႈႁဝ်းဝႆႉၼႂ်းဢရႃႇၶုၼ်ႁေႃၶမ်းၵူၼ်းမဵဝ်း ဢိသရေး၊ ယဝ်ႉတူဝ်ႈလီငၢမ်းယဝ်ႉၼၼ်ႉၸိုင်၊-
ၸဝ်ႈႁဝ်းတၵ်းတေဢမ်ႇမီးလွင်ႈဢၼ်ၸႂ်လဵၵ်ႉၸႂ်ဢူၼ်ႈ၊ဢမ်ႇလႆႈၼႅင်ၸႂ်ၶီၸႂ်လႃးလႃးၵွပ်ႈပိူဝ်ႈၸဝ်ႈၵဝ်ၶႃႈၼၼ်ႉ၊လွင်ႈတၢင်းမၼ်းယင်းဢမ်ႇမီးလႄႈၸဝ်ႈႁဝ်းဢမ်ႇလႆႈဢဝ်ပိူၼ်ႈတၢႆလႂ်၊ဢိၵ်ႇတင်းၸဝ်ႈႁဝ်းဢမ်ႇၶိုၼ်းတွပ်ႇတႅၼ်းဢပျတ်ႈပိူၼ်ႈၼၼ်ႉဢေႃႈ။ ၼင်ႇၼၼ်လႄႈမိူဝ်ႈဢၼ် ထႃႇဝရႃႉၽြႃး၊ ပၼ်တၢင်းလီတီႈၸဝ်ႈၵဝ်ၶႃႈယဝ်ႉၼၼ်ႉၸိုင်၊ၶႅၼ်းတေႃႈယႃႇပေလူင်လိုမ်းပႅတ်ႈၶႃႈၸဝ်ႈႁဝ်းၼႆႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ၵေႃႈလၢတ်ႈတီႈ ဢၽိၵေးလႃႉ၊ လႄႈဝႃႈ၊ “ယွင်ႈယေႃး ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ ၸဝ်ႈဢၼ်သူင်ႇမႂ်းမႃးႁပ်ႉႁူဝ်တၢင်းၵဝ်ဝၼ်းမိူဝ်ႈၼႆႉၼၼ်ႉဢေႃႈ။-
တၢင်ႇၵျေးၸူးၽြႃးပဵၼ်ၸဝ်ႈၵွပ်ႈပိူဝ်ႈမႂ်းမီးၺၢၼ်ႇပိင်ႇၺႃႇဢိၵ်ႇတင်းၵွပ်ႈပိူဝ်ႈမႂ်းႁႄႉၶႅၼ်ၵဝ်ႁႂ်ႈၵဝ်လႆႈၵၢင်းလွတ်ႈတင်းဢမုဢၼ်ၶႃႈၸႂ်ပိူၼ်ႈတၢႆဢိၵ်ႇတင်းၵဝ်ဢမ်ႇလႆႈႁဵတ်းဢပျတ်ႈဢၼ်တွပ်ႇတႅၼ်းပၼ်တၢမ်ႇတီႈပိူၼ်ႈတၢင်ႇၵေႃႉၼၼ်ႉဢေႃႈ။-
ထႃႇဝရႃႉၽြႃး၊ ႁႄႉၶႅၼ်ၵဝ်ၼင်ႇႁိုဝ်ၵဝ်တၵ်းဢမ်ႇလႆႈႁဵတ်းၽေးသႂ်ႇမႂ်းၼၼ်ႉယဝ်ႉ။ ၼႂ်းဝႃႈၼၼ်သေၵေႃႈ ၵဝ်တိူင်ႇဝႃႈၼႂ်းၽြႃးပဵၼ်ၸဝ်ႈဢၼ်ဢသၢၵ်ႈလိပ်းလႄႈမဵဝ်း ဢိသရေး၊ ၶဝ်ၵူဝ်းၵႂၢႆႇၼၼ်ႉၸမ်ႉ၊ပေႃးမႂ်းဢမ်ႇႁိပ်ႈၼႅတ်ႈမႃးႁူပ်ႉထူပ်းၵဝ်ၸိုင်၊ၵူၼ်း ၼႃႇပလႃႉ၊ ၸိူဝ်းဢၼ်ပဵၼ်ၵူၼ်းၸၢႆးတင်းမူတ်းတၵ်းတၢႆသဵင်ႈသဵင်ႈမိူဝ်ႈၽုၵ်ႈၶိင်ႇၵၢင်ၼႂ်မိူဝ်ႈဢၼ်မိူင်းလႅင်းမႃးၼၼ်ႉဢေႃႈ၊” ဝႃႈၼင်ႇၼႆသေလႄႈ၊-
တႃႇဝိတ်ႈ၊ ႁပ်ႉတုင်းဢဝ်လၢၵ်ႈသွင်ႇဢၼ်မၼ်းဢဝ်မႃးၼၼ်ႉသေလႄႈဝႃႈ၊ “မႂ်းၶိုၼ်းမိူဝ်းၵႂႃႇၵႃႈတီႈႁိူၼ်းမႂ်းၼိမ်ၼိမ်လီလီတႃႉ။ ယႃႇပေမႆႈၸႂ်။ ၵဝ်ထွၵ်ႈလူၺ်ႈၼႃႈမႂ်းလႄႈတၵ်းဢမ်ႇႁဵတ်းၵႃႈသင်ယဝ်ႉ၊” ဝႃႈၼင်ႇၼႆဢေႃႈ။
ဢၽိၵေးလႃႉ၊ ၶိုၼ်းမိူဝ်းၸူးၵႃႈတီႈႁိူၼ်းမၼ်း ၼႃႇပလႃႉ၊ မိူဝ်ႈၼၼ်ႉႁဵတ်းပွႆးၵိၼ်ပွႆးၶူပ်းယူႇမိူၼ်ၸိူဝ်ႉၼင်ႇၶုၼ်ႁေႃၶမ်းၼၼ်ႉလႄႈမီးတၢင်းဢၼ်ၸႂ်သႂၢင်ႇၸႂ်သိူဝ်းၵွပ်ႈပိူဝ်ႈမၼ်းမဝ်းလဝ်ႈၼၼ်ႉဢေႃႈ။ ပိူဝ်ႈၼႆလႄႈ ဢၽိၵေးလႃႉ၊ ဢမ်ႇမွၵ်ႇဢမ်ႇလၢတ်ႈၵႃႈသင်တီႈမၼ်းတေႃႇထိုင်ႁွတ်ႈမိူင်းလႅင်းၼၼ်ႉဢေႃႈ။-
မိူဝ်ႈဢၼ်လဝ်ႈမၼ်းပၢင်ႇၸိုၼ်ႈယဝ်ႉၼၼ်ႉၸိုင်၊မေးမၼ်းမွၵ်ႇလၢတ်ႈၶႆႈၼႄၵူႈၸိူဝ်ႉၵူႈပိူင်တီႈမၼ်းလႄႈႁူဝ်ၸႂ်မၼ်းမူၺ်ႈလၢင်ႈသေလႄႈတၢႆၵႂႃႇၶႅင်မိူၼ်ၸိူဝ်ႉၼင်ႇမၢၵ်ႇႁိၼ်ဢေႃႈ။-
လိုၼ်းၼၼ်ႉ၊မွၵ်ႈသိပ်းဝၼ်းၸမ်ၸမ် ထႃႇဝရႃႉၽြႃး၊ ပၼ်တၢမ်ႇတီႈမၼ်းလႄႈမၼ်းတၢႆသေဢေႃႈ။
တႃႇဝိတ်ႈ၊ ငိၼ်းၶၢဝ်ႇဢၼ် ၼႃႇပလႃႉ၊ တၢႆယဝ်ႉၼၼ်ႉသေလႄႈလၢတ်ႈဝႃႈ၊ “ယွင်ႈယေႃး ထႃႇဝရႃႉၽြႃး၊ တီႈၶႃႈဢေႃႈ။ မၼ်းၸဝ်ႈတွပ်ႇတႅၼ်းပၼ်တၢမ်ႇတီႈ ၼႃႇပလႃႉ၊ ၵွပ်ႈပိူဝ်ႈမၼ်းယႃႉယူၵ်ႉၵဝ်ၼၼ်ႉ၊ဢိၵ်ႇတင်းမၼ်းၸဝ်ႈႁႄႉၶႅၼ်ၵဝ်ဢၼ်ပဵၼ်ၶႃႈမၼ်းၸဝ်ႈဢမ်ႇႁႂ်ႈလႆႈႁဵတ်းတုၸရိူၵ်ႈမႅၼ်ႈၼၼ်ႉဢေႃႈ။ ထႃႇဝရႃႉၽြႃး၊ ဢဝ်တၢင်းဢၼ်မၼ်းႁၢႆႉမိူၵ်ႈၼၼ်ႉၶိုၼ်းတွပ်ႇတႅၼ်းပၼ်တီႈမၼ်းယဝ်ႉ၊” ဝႃႈၼင်ႇၼႆဢေႃႈ။ ၼင်ႇၼၼ်လႄႈ တႃႇဝိတ်ႈ၊ ပွႆႇၸႂ်ႉၵူၼ်းၵႂႃႇတွင်ႈထၢမ်တီႈ ဢၽိၵေးလႃႉ၊ ႁႂ်ႈလႆႈၵူပ်ႉၵူႈပဵၼ်ႁိူၼ်းလူၺ်ႈၵၼ်တင်းမၼ်းဢေႃႈ။-
ၵူၼ်းဢွၼ်ႇ တႃႇဝိတ်ႈ၊ ၸိူဝ်းၼၼ်ႉၵႂႃႇၵႃႈတီႈဝဵင်း ၵရမေႇလႃႉ၊ ၸူးတီႈ ဢၽိၵေးလႃႉ၊ လႄႈလၢတ်ႈဝႃႈ၊ “ တႃႇဝိတ်ႈ၊ ပွႆႇၸႂ်ႉႁဝ်းၶႃႈမႃးႁႂ်ႈလႆႈႁွင်ႉဢဝ်ၸဝ်ႈၼၢင်းႁဝ်းၵႂႃႇႁူမ်ႈပွင်းပဵၼ်ၵူပ်ႉပဵၼ်ၵူႈလူၺ်ႈၵၼ်တင်းမၼ်းၶႃႈဢေႃႈ၊” ဝႃႈၼင်ႇၼႆဢေႃႈ။
မၼ်းၶုပ်ႉမူပ်ႇၸပ်းၵႃႈတီႈလိၼ်လႄႈလၢတ်ႈဝႃႈ၊ “ၶႃႈၸဝ်ႈၼႆႉပဵၼ်ၶႃႈၸႂ်ႉၸဝ်ႈႁဝ်းတီႈၶႃႈလႄႈ၊တၼ်းဝႆႉႁႂ်ႈသုၵ်ႈတိၼ်ၶႃႈၸဝ်ႈၵဝ်ၶႃႈၸိူဝ်းၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈမၼ်းႁိပ်ႈၼႅတ်ႈလုၵ်ႉလႄႈႁွင်ႉပႃးတင်းၸိူင်ႉၼၢင်းမၼ်းႁႃႈၵေႃႉသေယဝ်ႉ၊ၶီႇမႃႉလီႈၸွမ်းလူၺ်ႈၵၼ်တင်းၵူၼ်းဢွၼ်ႇ တႃႇဝိတ်ႈ၊ ၸိူဝ်းၼၼ်ႉၵႂႃႇလႄႈပဵၼ်မေး တႃႇဝိတ်ႈ၊ သေဢေႃႈ။
တႃႇဝိတ်ႈ၊ လႆႈဢဝ်မေးမၼ်း ဢႁိၼွမ်ႇ၊ ၽူႈယိင်းဝဵင်း ယေႇၸရေးလႃႉ၊ ဝႆႉယဝ်ႉလႄႈၶဝ်သွင်ၵေႃႉၼၼ်ႉပဵၼ်မေး တႃႇဝိတ်ႈ၊ ဢေႃႈ။-
ယၢမ်းမိူဝ်ႈၼၼ်ႉ၊ သေႃးလု၊ ဢဝ်လုၵ်ႈယိင်းမၼ်း မိၶႃႇလႃႉ၊ ဢၼ်ပဵၼ်မေး တႃႇဝိတ်ႈ၊ ၼၼ်ႉပၼ်ၵၼ်တင်း ၽႃႇလတိ၊ လုၵ်ႈၸၢႆး လေႇသႃႉ၊ ၵူၼ်းဝဵင်း ၵႃႇလိမ်း၊ ၼၼ်ႉယဝ်ႉ။
ၵူၼ်းဝဵင်း ၸိၽႃႉ၊ ၵမ်ႈၽွင်ႈမႃးၸူးတီႈ သေႃးလု၊ တီႈဝဵင်း ၵိပႃႉ၊ သေလႄႈလဝ်ႈလၢတ်ႈဝႃႈ၊ “ တႃႇဝိတ်ႈ၊ တဵတ်ႇမႅပ်းယူႇၵႃႈတီႈလွႆ ႁၶိလႃႉ၊ ၽၢႆႇပွတ်းဝၼ်းဢွၵ်ႇ ယေႇသိမုၼ်ႇ၊ ၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ သေႃးလု၊ ပႃးဢဝ်ၵူၼ်းသိုၵ်းဢၼ်ၵတ်ႉဢၼ်ၶႅၼ်ႇသေပိူၼ်ႈၵႃႈၼႂ်းမဵဝ်း ဢိသရေး၊ သၢမ်ႁဵင်သေလႄႈၵႂႃႇၸူးတီႈထိူၼ်ႇ ၸိၽႃႉ၊ ၵမ်းလဵဝ်ႁႂ်ႈလႆႈသွၵ်ႈႁႃ တႃႇဝိတ်ႈ၊ ဢေႃႈ။-
မၼ်းၵႂႃႇၶျႃးပၢင်တပ်ႉၵႃႈႁိမ်းသဵၼ်ႈတၢင်းတီႈလွႆ ႁၶိလႃႉ၊ ဢေႃႈ။ တႃႇဝိတ်ႈ၊ ယင်းမီးယူႇၵႃႈၼႂ်းထိူၼ်ႇၼၼ်ႉယူႇလႄႈမိူဝ်ႈဢၼ်ငိၼ်းလွင်ႈ သေႃးလု၊ ႁွတ်ႈထိုင်မႃးသွၵ်ႈႁႃမၼ်းယူႇၼၼ်ႉၸိုင်၊-
မၼ်းပွႆႇၸႂ်ႉၵူၼ်းသွပ်ႇၶၢဝ်ႇၵႂႃႇလူလွမ်တူၺ်းလႄႈႁုႁၼ်လွင်ႈဢၼ် သေႃးလု၊ ႁွတ်ႈထိုင်မႃးယူႇၵႃႈတီႈၼၼ်ႈတႄႉယဝ်ႉၼၼ်ႉဢေႃႈ။-
မိူဝ်ႈၼၼ်ႉ တႃႇဝိတ်ႈ၊ ၵႂႃႇၵမ်းလဵဝ်လႄႈလူတူၺ်းတီႈဢၼ် သေႃးလု၊ ဢိၵ်ႇတင်းၸဝ်ႈၵွၼ်းတပ်ႉသိုၵ်းလူင်မၼ်း ဢပ်ႉပၼႃး၊ လုၵ်ႈၸၢႆး ၼေးရႃႉ၊ ၼွၼ်းၼၼ်ႉဢေႃႈ။ သေႃးလု၊ ၼွၼ်းၵႃႈၼႂ်းၵၢင်ပၢင်တပ်ႉယူႇသေလႄႈၵူၼ်းသိုၵ်းမၼ်းၶျႃးပၢင်တပ်ႉလွမ်ႉႁွပ်ႈမၼ်းယူႇဢေႃႈ။
တႃႇဝိတ်ႈ၊ ထၢမ်တီႈ ဢႁိမလႅၵ်ႉ၊ ၵူၼ်းမဵဝ်း ႁိတ်ႉတိ၊ တင်း ဢၽိသေး၊ ၼွင်ႉၸၢႆး ယွႃႇၽႃႉ၊ ဢၼ်မႄႈၶဝ်ပဵၼ် ၸေႇရုယႃႇ၊ ၼၼ်ႉလႄႈဝႃႈ၊ “ၼႂ်းသူသွင်ၵေႃႉၼႆႉၵေႃႉလႂ်တေၸွမ်းၵဝ်ၶဝ်ႈၸူးတီႈ သေႃးလု၊ ၵႃႈၼႂ်းပၢင်တပ်ႉၼၼ်ႉ၊” ဝႃႈၼင်ႇၼႆလႄႈ။ ဢၽိသေး၊ လဝ်ႈလၢတ်ႈလႄႈဝႃႈ၊ “ၶႃႈၸဝ်ႈတေၸွမ်းၶႃႈဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ တႃႇဝိတ်ႈ၊ တင်း ဢၽိသေး၊ ၶဝ်ႈၵႂႃႇၵႃႈၼႂ်းပၢင်တပ်ႉ သေႃးလု၊ ၼၼ်ႉၶိင်ႇၵၢင်ၶိုၼ်းလႄႈထူပ်းႁၼ် သေႃးလု၊ ၼွၼ်းလပ်းယူႇၵႃႈၼႂ်းၶိုင်ႈၵၢင်ပၢင်တပ်ႉယူႇ၊ႁွၵ်ႇၸဝ်ႈပၵ်းၵႃႈတီႈလိၼ်ဝႆႉၵႃႈႁိမ်းႁူဝ်ၼွၼ်းၸဝ်ႈယူႇဢေႃႈ။ ဢပ်ႉပၼႃး၊ ဢိၵ်ႇတင်းၵူၼ်းသိုၵ်းမၼ်းတင်းလၢႆဢွၼ်ၵၼ်ၼွၼ်းလပ်းၵႃႈတီႈလဵပ်ႈႁွပ်ႈမၼ်းယူႇဢေႃႈ။-
ဢၽိသေး၊ ၵေႃႈလဝ်ႈလၢတ်ႈတီႈ တႃႇဝိတ်ႈ၊ လႄႈဝႃႈ၊ “ၽြႃးပဵၼ်ၸဝ်ႈဢဝ်ရၢၼ်ႇသူႇၸဝ်ႈႁဝ်းၼၼ်ႉဢၢပ်ႈပၼ်ၼႂ်းမိုဝ်းၸဝ်ႈႁဝ်းဝၼ်းမိူဝ်ႈၼႆႉၶႃႈယဝ်ႉ။ မိူဝ်ႈလဵဝ်ၼႆႉပၼ်ဢၶႂၢင်ႉႁႂ်ႈၶႃႈၸဝ်ႈဢဝ်ႁွၵ်ႇသႅပ်ႇတႅင်းပွၵ်ႈလဵဝ်ႁႂ်ႈမၼ်းၸပ်းလိၼ်ဝႆႉသေၵမ်း။ ၶႃႈၸဝ်ႈတၵ်းဢမ်ႇလူဝ်ႇသႅပ်ႇတႅင်းသွင်ပွၵ်ႈတီႈၶႃႈၵူၺ်း၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ တႃႇဝိတ်ႈ၊ လၢတ်ႈလႄႈဝႃႈ၊ “မႂ်းဢမ်ႇလႆႈပၼ်ၽေးတီႈမၼ်းလႃးလႃး။ ၽူႈလႂ်သေဢမ်ႇဝႃႈ၊ၵေႃႉဢၼ်ပၼ်ၽေးၶုၼ်ႁေႃၶမ်းဢၼ် ထႃႇဝရႃႉၽြႃး၊ ပၼ်ၽိၵ်ႈသိၵ်ႈဝႆႉၼၼ်ႉမၼ်းၸဝ်ႈတၵ်းပၼ်တၢမ်ႇဢပျတ်ႈတီႈၵေႃႉၼၼ်ႉဢမၢၼ်ႇၶၼ်ပဵၼ်ဢေႃႈ၊” ဝႃႈၼင်ႇၼႆသေယဝ်ႉ၊-
တႃႇဝိတ်ႈ၊ သမ်ႉလၢတ်ႈလႄႈဝႃႈ၊ “ၵႃႈၼင်ႇဢၼ် ထႃႇဝရႃႉၽြႃး၊ ဢသၢၵ်ႈလိပ်းယူႇၼၼ်ႉၵဝ်ႁုလွင်ႈဢၼ်တူဝ် ထႃႇဝရႃႉၽြႃး၊ တၵ်းဢဝ် သေႃးလု၊ တၢႆမိူဝ်ႈဢၼ်ဝၼ်းမၼ်းၸေးယဝ်ႉၼၼ်ႉဢမ်ႇၼၼ်ၵေႃႈ၊တၵ်းတၢႆလူၺ်ႈၽေးဢၼ်တိုၵ်းသိုၵ်းၼၼ်ႉဢေႃႈ။-
ႁႂ်ႈ ထႃႇဝရႃႉၽြႃး၊ ႁၢမ်ႈတၢပ်ႈႁႄႉၶႅၼ်ႁႂ်ႈၵဝ်ဢမ်ႇလႆႈပၼ်ၽေးၵေႃႉဢၼ် ထႃႇဝရႃႉၽြႃး၊ ပၼ်ၽိၵ်ႈသိၵ်ႈဝႆႉႁႂ်ႈပဵၼ်ၶုၼ်ႁေႃၶမ်းၼၼ်ႉသေၵမ်းလူၺ်ႈ။ ႁဝ်းဢွၼ်ၵၼ်ဢဝ်ႁွၵ်ႇၸဝ်ႈ၊ဢိၵ်ႇတင်းၼမ်ႉတဝ်ႈၸဝ်ႈၼၼ်ႉလႄႈၵႂႃႇတႃႉႁဝ်း၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ တႃႇဝိတ်ႈ၊ ဢဝ်ႁွၵ်ႇၸဝ်ႈဢိၵ်ႇတင်းၼမ်ႉတဝ်ႈၸဝ်ႈဢၼ်မီးၵႃႈတီႈႁူဝ်ၼွၼ်း သေႃးလု၊ ၼၼ်ႉသေလႄႈၵႂႃႇဢေႃႈ။ ၽူႈလႂ်သေၵေႃႉသေၵူၼ်းဢမ်ႇႁုဢမ်ႇႁၼ်လွင်ႈတၢင်းၼၼ်ႉလႄႈၽူႈလႂ်ၵေႃႈဢမ်ႇတိုၼ်ႇသေၵေႃႉသေၵူၼ်း။ ၶဝ်တင်းသဵင်ႈတင်းလူင်ၼွၼ်းလပ်းၼွၼ်းလီယူႇၵွပ်ႈပိူဝ်ႈဢၼ် ထႃႇဝရႃႉၽြႃး၊ ႁႂ်ႈတၢင်းၼွၼ်းဢၼ်ၼူၵ်ႇၼႃႇတူၵ်းႁွတ်ႈၵႃႈၼိူဝ်ၶဝ်ဢေႃႈ။
တႃႇဝိတ်ႈ၊ ၶၢမ်ႈႁူၺ်ႈၵႂႃႇထိုင်ၵႃႈတီႈပၢႆလွႆတၢင်ႇၽၢႆႇဢၼ်ယၢၼ်ၵႆၵၼ်တင်း သေႃးလု၊ တၢၼ်ႇတၢၼ်ႇယဝ်ႉၸင်ႇ၊-
ႁွင်ႉသႅၼ်ႇတီႈတပ်ႉသိုၵ်း သေႃးလု၊ တင်း ဢပ်ႉပၼႃး၊ လႄႈဝႃႈ၊ “ ဢပ်ႉပၼႃး၊ ႟။ ဢိူဝ်ၵဝ်တႃႉ၊” ဝႃႈၼင်ႇၼႆဢေႃႈ။ ဢပ်ႉပၼႃး၊ ၶိုၼ်းလၢတ်ႈလႄႈဝႃႈ၊ “ၽူႈလႂ်မႃးႁွင်ႉသႅၼ်ႇယူႇႁႂ်ႈၶုၼ်ႁေႃၶမ်းတိုၼ်ႇမႃးၼၼ်ႉ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ၵေႃႈလၢတ်ႈလႄႈဝႃႈ၊ “ ဢပ်ႉပၼႃး၊ ႟။ မႂ်းဝႃႈမႂ်းပဵၼ်ၵူၼ်းၸၢႆးႁိုဝ်း။ ၵႃႈၼႂ်းမဵဝ်း ဢိသရေး၊ ၼႆႉၽူႈလႂ်တၵ်းမိူၼ်ၵၼ်တင်းမႂ်း။ ၵွပ်ႈပိူဝ်ႈလွင်ႈတၢင်းၼႆႉလႄႈႁဵတ်းသင်လႄႈမႂ်းယင်းဢမ်ႇပႂ်ႉၸဝ်ႈမႂ်းၶုၼ်ႁေႃၶမ်းၼၼ်ႉၼင်ႇႁိုဝ်။ ၵူၼ်းၵေႃႉၼိုင်ႈၶဝ်ႈၵႂႃႇႁႂ်ႈလႆႈဢဝ်ၸဝ်ႈမႂ်းၶုၼ်ႁေႃၶမ်းၼၼ်ႉတၢႆယဝ်ႉယဝ်ႉ။-
မႂ်းဢမ်ႇထၢမ်းႁဵတ်းပုၼ်ႈၽွၼ်းမႂ်းတဵမ်ထူၼ်ႈလူင်ပႄႇ။ ၵႃႈၼင်ႇဢၼ် ထႃႇဝရႃႉၽြႃး၊ ဢသၢၵ်ႈလိပ်းယူႇၼၼ်ႉသူၵႃႈမီးတင်းမူတ်းထိူၵ်ႈလႆႈတၢႆၵွပ်ႈပိူဝ်ႈသူဢမ်ႇပႂ်ႉၸဝ်ႈသူၶုၼ်ႁေႃၶမ်းဢၼ် ထႃႇဝရႃႉၽြႃး၊ ပၼ်ၽိၵ်ႈသိၵ်ႈဝႆႉၼၼ်ႉဢေႃႈ။ တူၺ်းလူး။ ႁွၵ်ႇၸဝ်ႈဢိၵ်ႇတင်းၼမ်ႉတဝ်ႈၸဝ်ႈဢၼ်မီးၵႃႈတီႈႁူဝ်ၼွၼ်းၸဝ်ႈၼၼ်ႉမီးယူႇၵႃႈတီႈလႂ်ယဝ်ႉ၊” ဝႃႈၼင်ႇၼႆဢေႃႈ။
သေႃးလု၊ တွင်းသဵင် တႃႇဝိတ်ႈ၊ လႄႈထၢမ်ဝႃႈ၊ “လုၵ်ႈၸၢႆးၵဝ် တႃႇဝိတ်ႈ၊ ႟။ ဢၼ်ၼႆႉပဵၼ်သဵင်မႂ်းဢမ်ႇၸႂ်ႈႁိုဝ်း၊” ဝႃႈၼင်ႇၼႆဢေႃႈ။ တႃႇဝိတ်ႈ၊ ၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈၶုၼ်လူင်တီႈၶႃႈ႟။ ပဵၼ်သဵင်ၶႃႈၸဝ်ႈတီႈၶႃႈဢေႃႈ၊” ဝႃႈၼင်ႇၼႆသေယဝ်ႉ၊-
သမ်ႉလၢတ်ႈထႅင်ႈလႄႈဝႃႈ၊ “ၸဝ်ႈႁဝ်းတီႈၶႃႈ။ ႁဵတ်းသင်လႄႈၸဝ်ႈႁဝ်းယင်းတိုၵ်ႉၸွမ်းႁႃၶႃႈၸဝ်ႈယူႇၸိူဝ်ႉၼင်ႇႁိုဝ်တီႈၶႃႈ။ ၶႃႈၸဝ်ႈလႆႈႁဵတ်းမႅၼ်ႈၵႃႈသင်တီႈၶႃႈယဝ်ႉ။ ၶႃႈၸဝ်ႈၽိတ်းပိူင်ႈတုၸရိူၵ်ႈဢၼ်လႂ်တီႈၶႃႈ။-
ၸဝ်ႈၶုၼ်လူင်တီႈၶႃႈ႟။ ၶႅၼ်းတေႃႈထွမ်ႇငိၼ်းၵႂၢမ်းဢၼ်ၶႃႈၸဝ်ႈလၢတ်ႈယူႇမိူဝ်ႈလဵဝ်ၼႆႉသေၵမ်းတီႈၶႃႈ။ ပေႃးပဵၼ်တၢင်းဢၼ် ထႃႇဝရႃႉၽြႃး၊ တိုၵ်းယူင်းၸဝ်ႈႁဝ်းႁႂ်ႈၸဝ်ႈႁဝ်းယူႇၽၢႆႇၼိုင်ႈတင်းၶႃႈၸဝ်ႈၸိုင်၊တၢင်းဢၼ်ႁဵတ်းတၢင်းလူႇတီႈမၼ်းၸဝ်ႈၼၼ်ႉၸၢင်ႈႁႂ်ႈတၢင်းၵျၢမ်ႇမၼ်းၸဝ်ႈလႅၵ်ႈလၢႆႈၶိုၼ်းလႆႈယူႇတီႈၶႃႈဢေႃႈ။ သင်သမ်ႉပဵၼ်တၢင်းဢၼ်ၵူၼ်းတိုၵ်းယူင်းၸဝ်ႈႁဝ်းၸိုင်၊ႁႂ်ႈတၢင်းဢၼ် ထႃႇဝရႃႉၽြႃး၊ ၵိၼ်ႇဝႃႈၼၼ်ႉတူၵ်းႁွတ်ႈၵႃႈၼိူဝ်ၶဝ်သေၵမ်းလူၺ်ႈ။ လွင်ႈမၼ်းၸမ်ႉ၊ၶဝ်ႁေႃႈၶႃႈၸဝ်ႈဢွၵ်ႇၵႂႃႇပႅတ်ႈသေၵႃႈတီႈလိၼ်ဢမူၺ်ႇဢၼ် ထႃႇဝရႃႉၽြႃး၊ ပၼ်ၼၼ်ႉလႄႈလၢတ်ႈဝႃႈ၊ ‘မႂ်းၵႂႃႇဝႆႈၽြႃးတၢင်ႇသူႇတၢင်ႇပႃးတႃႉ’ ဝႃႈတီႈၶႃႈၸဝ်ႈႁဝ်းၸိူဝ်ႉၼင်ႇၼႆယဝ်ႉဢေႃႈ။-
ၶႅၼ်းတေႃႈယႃႇပေဢဝ်ၶႃႈၸဝ်ႈတၢႆၼႂ်းပႃႇၽိူင်းမိူင်းပိူၼ်ႈတီႈဢၼ်ၵႆဢၼ်ယၢၼ်ၵၼ်တင်း ထႃႇဝရႃႉၽြႃး၊ ၼႆႉသေၵမ်းတီႈၶႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းသွၵ်ႈႁႃမတ်းဢၼ်ပဵၼ်ၶႃႈၸဝ်ႈ၊မိူၼ်ၸိူဝ်ႉၼင်ႇၵူၼ်းဢၼ်သွၵ်ႈႁႃၼူၵ်ႉၶုမ်ႈၵႃႈတီႈၼိူဝ်လွႆၼၼ်ႉၶႃႈ၊” ဝႃႈၼင်ႇၼႆဢေႃႈ။
သေႃးလု၊ ၶိုၼ်းလၢတ်ႈလႄႈဝႃႈ၊ “ၵဝ်ၽိတ်းယဝ်ႉ။ လုၵ်ႈၸၢႆး တႃႇဝိတ်ႈ၊ ႟။ ၶိုၼ်းပွၵ်ႈမႃးတႃႉ။ ပိူဝ်ႈဢၼ်မႂ်းပွႆႇႁႂ်ႈၵဝ်လွတ်ႈတၢႆၼႂ်းၶိုၼ်းၼႆႉယဝ်ႉၼၼ်ႉၵဝ်တၵ်းဢမ်ႇပၼ်ၽေးမႂ်းထႅင်ႈလႃးလႃး။ ၵဝ်လႆႈႁဵတ်းမိူၵ်ႈၼႃႇလူင်လၢင်ယဝ်ႉ။ ၵဝ်လႆႈႁဵတ်းၽိတ်းပိူင်ႈၼႃႇလူင်လၢင်ယဝ်ႉ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈၶုၼ်လူင်တီႈၶႃႈ။ ႁွၵ်ႇၸဝ်ႈၼၼ်ႉမီးၵႃႈတီႈၼႆႈတီႈၶႃႈဢေႃႈ။ ၸႂ်ႉႁႂ်ႈၵူၼ်းဢွၼ်ႇၸဝ်ႈသေၵေႃႉၵေႃႉမႃးဢဝ်ၵႃႈတီႈၼႆႈတႃႉ။-
ထႃႇဝရႃႉၽြႃး၊ တွပ်ႇတႅၼ်းပၼ်ဢၵျူဝ်းတီႈၵေႃႉဢၼ်မီးသဵတ်ႈၸႃႇလႄႈသိုဝ်ႈတေႃႇၼၼ်ႉတီႈၶႃႈဢေႃႈ။ ဝၼ်းမိူဝ်ႈၼႆႉမၼ်းၸဝ်ႈဢဝ်ၸဝ်ႈႁဝ်းဢၢပ်ႈပၼ်ၼႂ်းမိုဝ်းၶႃႈၸဝ်ႈယဝ်ႉသေၵေႃႈၶႃႈၸဝ်ႈယင်းဢမ်ႇပၼ်ၽေးၸဝ်ႈႁဝ်း၊ဢၼ် ထႃႇဝရႃႉၽြႃး၊ လိူၵ်ႈတၢင်ႇႁႂ်ႈပဵၼ်ၶုၼ်ႁေႃၶမ်းၼၼ်ႉတီႈၶႃႈ။-
မိူၼ်ၸိူဝ်ႉၼင်ႇဢၼ်ၶႃႈၸဝ်ႈပွႆႇႁႂ်ႈၸဝ်ႈႁဝ်းလွတ်ႈတၢႆၼၼ်ႉ၊ႁႂ်ႈ ထႃႇဝရႃႉၽြႃး၊ ႁဵတ်းၸိူဝ်ႉၼင်ႇၼၼ်တီႈၶႃႈၸဝ်ႈသေလႄႈပွႆႇႁႂ်ႈၶႃႈၸဝ်ႈလွတ်ႈၵၢင်းသေၽေးဢၼ်ႇတရေႇၵူႈၸိူဝ်ႉၵူႈပိူင်သေၵမ်းတီႈၶႃႈ၊” ဝႃႈၼင်ႇၼႆဢေႃႈ။
သေႃးလု၊ လၢတ်ႈတီႈ တႃႇဝိတ်ႈ လႄႈဝႃႈ၊ “လုၵ်ႈၸၢႆးၵဝ် တႃႇဝိတ်ႈ၊ ႟။ ႁႂ်ႈၽြႃးပဵၼ်ၸဝ်ႈပၼ်တၢင်းလီမၢင်ႇၵလႃႇတီႈမႂ်းသေၵမ်းလူၺ်ႈ။ မႂ်းတၵ်းဢွင်ႇမႅင်ႇၵႃႈၼႂ်းၵႃႈဢၼ်မႂ်းႁဵတ်းၼၼ်ႉတင်းသဵင်ႈတင်းလူင်ဢေႃႈ၊” ဝႃႈၼင်ႇၼႆဢေႃႈ။ ၼင်ႇၼၼ်လႄႈ တႃႇဝိတ်ႈ၊ ဢွၵ်ႇၵႂႃႇသေယဝ်ႉ၊ သေႃးလု၊ ၵေႃႈၶိုၼ်းမိူဝ်းၵႂႃႇၵႃႈတီႈႁေႃပုၼ်ႉသေဢေႃႈ။
တႃႇဝိတ်ႈ၊ ၸဵၼ်းၸႃးၵေႃႉလဵဝ်လႄႈဝႃႈ၊ “ သေႃးလု၊ တၵ်းဢဝ်ၵဝ်တၢႆသေဝၼ်းဝၼ်းဢေႃႈ။ ပေႃးၵဝ်ပၢႆႈၵႂႃႇၵႃႈတီႈမိူင်း ၽိလိတ်ႉတိ၊ ၸိုင်၊တေပဵၼ်ဢၼ်လီသေပိူၼ်ႈယဝ်ႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ သေႃးလု၊ တၵ်းဢမ်ႇသွၵ်ႈႁႃၵဝ်ၵႃႈၼႂ်းလႅၼ်လိၼ်မိူင်း ဢိသရေး၊ ၼႆႉယဝ်ႉလႄႈၵဝ်တၵ်းပူင်ၸႂ်ဝၢင်းၶေႃးယူႇလူင်ႉလွတ်ႈလီဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ တႃႇဝိတ်ႈ၊ ဢိၵ်ႇတင်းၵူၼ်းမၼ်းႁူၵ်းပၢၵ်ႇၵႂႃႇၸူးတီႈ ဢႃႇၶိတ်ႉ၊ လုၵ်ႈၸၢႆး မေႃႇၶႃႉ၊ ၶုၼ်ႁေႃၶမ်း ၵတ်ႉတိ၊ ၼၼ်ႉဢေႃႈ။-
တႃႇဝိတ်ႈ၊ တင်းၵူၼ်းမၼ်းၸိူဝ်းၼၼ်ႉပႃးလုၵ်ႈပႃးမေးၶဝ်ၵႂႃႇယူႇသဝ်းၵႃႈတီႈဝဵင်း ၵတ်ႉတိ၊ ဢေႃႈ။ မေး တႃႇဝိတ်ႈ၊ သွင်ၵေႃႉဢၼ်ပဵၼ် ဢႁိၼွမ်ႇ၊ ၽူႈယိင်းဝဵင်း ယေႇၸရေး၊ ဢိၵ်ႇတင်း ဢၽိၵေးလႃႉ၊ မႄႈမၢႆႈ ၼႃႇပလႃႉ၊ ၵူၼ်းဝဵင်း ၵရမေႇလႃႉ၊ ၼၼ်ႉၵေႃႈမီးယူႇလူၺ်ႈၵၼ်တင်း တႃႇဝိတ်ႈ၊ ဢေႃႈ။-
မိူဝ်ႈဢၼ် သေႃးလု၊ ငိၼ်းၶၢဝ်ႇလွင်ႈဢၼ် တႃႇဝိတ်ႈ၊ ၼီပၢႆႈၵႂႃႇၵႃႈတီႈဝဵင်း ၵတ်ႉတိ၊ ယဝ်ႉၼၼ်ႉၸိုင်၊လိုၼ်းၼၼ်ႉမၼ်းယင်းဢမ်ႇၸွမ်းႁႃလႄႈယူႇဢေႃႈ။
တႃႇဝိတ်ႈ၊ လၢတ်ႈတီႈ ဢႃႇၶိတ်ႉ၊ လႄႈဝႃႈ၊ “ပေႃးၸဝ်ႈမၢတ်ႈၵဝ်ၶႃႈပဵၼ်ၵေႃႉသႄႈၸဝ်ႈၸိုင်၊ၶႅၼ်းတေႃႈပၼ်ဝဵင်းဢွၼ်ႇဝဵင်းၼိုင်ႈပုၼ်ႈဢၼ်ၵဝ်ၶႃႈတၵ်းယူႇသဝ်းၼၼ်ႉသေၵမ်း။ ၼင်ႇၼၼ်လႄႈၵဝ်ၶႃႈတၵ်းဢမ်ႇယူႇလူၺ်ႈၵၼ်တင်းၸဝ်ႈၼႂ်းဝဵင်းလူင်ၸဝ်ႈၼႆႉတီႈၶႃႈယဝ်ႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ ဢႃႇၶိတ်ႉ၊ ပၼ်ဝဵင်း ၸိၵလၵ်ႉ၊ တီႈမၼ်းလႄႈ၊ဝဵင်း ၸိၵလၵ်ႉ၊ ၼၼ်ႉပဵၼ်ဝဵင်းဢၼ်ၶုၼ်ႁေႃၶမ်း ယုတႃႉ၊ ပိူင်ႇယူႇတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။-
တႃႇဝိတ်ႈ၊ ယူႇသဝ်းၵႃႈၼႂ်းမိူင်း ၽိလိတ်ႉတိ၊ ၼၼ်ႉႁိုင်ပီၼိုင်ႈပၢႆသီႇလိူၼ်တဵမ်တဵမ်ဢေႃႈ။
ၸူဝ်ႈၶၢဝ်းဢၼ်မၼ်းယူႇၵႃႈတီႈၼၼ်ႈၼၼ်ႉ တႃႇဝိတ်ႈ၊ ဢိၵ်ႇတင်းၵူၼ်းမၼ်းဢွၼ်ၵၼ်ၶီႇသိုၵ်းတိုၵ်းတေႃးၵူၼ်းမဵဝ်း ၵေႇသုရိ၊ ၵူၼ်းမဵဝ်း ၵေႇရၸိ၊ တင်းၵူၼ်းမဵဝ်း ဢႃႇမလႅၵ်ႉ၊ တင်းလၢႆၸိူဝ်းဢၼ်ပဵၼ်ၵူၼ်းၵဝ်ႇၵူၼ်းႁိုင်ၼႂ်းဢိူင်ႇၼၼ်ႉဢေႃႈ။ မၼ်းတိုၵ်းတေႃးႁိမ်ဢဝ်လိၼ်မိူင်းၶဝ်ၸွမ်းသဵၼ်ႈတၢင်းလူင်းၵႂႃႇၸူးတီႈမိူင်း ဢေးၵျိပ်ႉ၊ ၼၼ်ႉတေႃႇထိုင်ႁွတ်ႈဝဵင်း သုရႃႉ၊ ပုၼ်ႉဢေႃႈ။-
မၼ်းၶႃႈၽၼ်းတၢႆၵူၼ်းယိင်းၵူၼ်းၸၢႆးပႅတ်ႈတင်းသဵင်ႈတင်းလူင်သေလႄႈသိမ်းဢဝ်သူဝ်း၊ဝူဝ်း၊မႃႉလီႈ၊ၵလႃႇဢုၵ်ႈလႂ်၊ဢိၵ်ႇတင်းၶိူင်ႈၼုင်ႈတၢင်းမႆၶဝ်ဢေႃႈ။ ၼင်ႇၼၼ်လႄႈမၼ်းၸင်ႇၶိုၼ်းပွၵ်ႈမႃးၸူးတီႈ ဢႃႇၶိတ်ႉ၊ ဢေႃႈ။-
မိူဝ်ႈဢၼ် ဢႃႇၶိတ်ႉ၊ ထၢမ်လႄႈဝႃႈ၊ “ပွၵ်ႈၼႆႉသူၵႂႃႇတိုၵ်းတေႃးႁိမ်ဢဝ်ၽူႈလႂ်၊” ဝႃႈၼင်ႇၼႆၸိုင်၊ တႃႇဝိတ်ႈ၊ ၸင်ႇၶိုၼ်းမွၵ်ႇလၢတ်ႈတီႈ ဢႃႇၶိတ်ႉ၊ လႄႈဝႃႈ၊ “ၵႂႃႇၵႃႈတီႈပွတ်းတၢင်းၸၢၼ်းမိူင်း ယုတႃႉ၊ ဢေႃႈ၊” ဢမ်ႇၼၼ်ၵေႃႈဝႃႈ၊ “ၵႂႃႇၵႃႈတီႈပွတ်းၸၢၼ်းမိူင်း ယေႇရမေးလႃႉ၊ ဢေႃႈ၊” ဢမ်ႇၼၼ်ၵေႃႈဝႃႈ၊ “ၵႂႃႇၵႃႈတီႈပွတ်းတၢင်းၸၢၼ်းမိူင်း ၵိၼိ၊ ဢေႃႈ၊” ဝႃႈၼင်ႇၼႆဢေႃႈ။-
တႃႇဝိတ်ႈ၊ ဢဝ်တၢႆၵူၼ်းၸၢႆးၵူၼ်းယိင်းၵူႈၵေႃႉၵူႈၵူၼ်းပႅတ်ႈပုၼ်ႈလွင်ႈၼင်ႇႁိုဝ်ၽူႈလႂ်တၵ်းဢမ်ႇၸၢင်ႈမႃးၵႃႈတီႈဝဵင်း ၵတ်ႉတိ၊ သေယဝ်ႉ၊လဝ်ႈလၢတ်ႈလွင်ႈဢၼ်မၼ်းတင်းၵူၼ်းမၼ်းတင်းလၢႆႁဵတ်းၵႃႈသင်တႄႉတႄႉၼၼ်ႉဢေႃႈ။ တႃႇဝိတ်ႈ၊ ႁဵတ်းၸိူဝ်ႉၼင်ႇၼႆယူႇၼႂ်းၸူဝ်ႈဢၼ်မၼ်းယူႇသဝ်းၵႃႈတီႈၼႂ်းမိူင်း ၽိလိတ်ႉတိ၊ ၼၼ်ႉဢေႃႈ။-
ဢႃႇၶိတ်ႉ၊ ၸမ်ႉ၊ယုမ်ႇယမ်ဝႆႉၸႂ် တႃႇဝိတ်ႈ၊ ယူႇသေလႄႈလၢတ်ႈတီႈတူဝ်ၸဝ်ႈၵဝ်ႇလႄႈဝႃႈ၊ “မၼ်းႁဵတ်းႁႂ်ႈၵူၼ်းမဵဝ်းမၼ်းမဵဝ်း ဢိသရေး၊ မိူဝ်ႇၸၢၼ်ႈမၼ်းယဝ်ႉ။ ပိူဝ်ႈၼႆလႄႈမၼ်းတၵ်းလႆႈၶၢမ်ႇႁဵတ်းၶႃႈတီႈၵဝ်ယူႇတႃႇသေႇဢေႃႈ၊” ဝႃႈၼင်ႇၼႆဢေႃႈ။
လိုၼ်းၼၼ်ႉ၊ဢမ်ႇႁိုင်ဢမ်ႇၼၢၼ်း၊ၵူၼ်းမဵဝ်း ၽိလိတ်ႉတိ၊ ႁွင်ႉၸုတုမ်ဢဝ်ၵူၼ်းသိုၵ်းၶဝ်ႁႂ်ႈလႆႈတိုၵ်းမဵဝ်း ဢိသရေး၊ ဢေႃႈ။ မိူဝ်ႈၼၼ်ႉ၊ ဢႃႇၶိတ်ႉ၊ လၢတ်ႈတီႈ တႃႇဝိတ်ႈ၊ လႄႈဝႃႈ၊ “မႂ်းႁုမၢတ်ႈလွင်ႈဢၼ်မႂ်း၊ဢိၵ်ႇတင်းၵူၼ်းမႂ်းတင်းလၢႆၽွမ်ႉၽၢႆႇၵဝ်လႄႈတိုၵ်းၼၼ်ႉတႃႉ၊” ဝႃႈၼင်ႇၼႆဢေႃႈ။-
တႃႇဝိတ်ႈ၊ ၶိုၼ်းလၢတ်ႈလႄႈဝႃႈ၊ “လီၶႃႈယဝ်ႉ။ ၸဝ်ႈတၵ်းႁုလွင်ႈဢၼ်ၶႃႈၸဝ်ႈၼႆႉႁဵတ်းလႆႈထၼ်ႇလႂ်ၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။ ဢႃႇၶိတ်ႉ၊ ၵေႃႈလၢတ်ႈတီႈ တႃႇဝိတ်ႈ၊ လႄႈဝႃႈ၊ “လီယဝ်ႉ။ ၵဝ်တၵ်းၶၢၼ်းႁႂ်ႈမႂ်းပဵၼ်ၵေႃႉဢၼ်ပႂ်ႉဢသၢၵ်ႈၵဝ်ယူႇၸူဝ်ႈဢသၢၵ်ႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ သမူၺ်ႇလႃႉ၊ တၢႆယဝ်ႉယဝ်ႉ။ ၵူၼ်းမဵဝ်း ဢိသရေး၊ တင်းလၢႆႁဵတ်းတၢင်းဢၼ်ႁွင်ႉႁႆႈပွင်ႉၶၢင်းသေလႄႈဢဝ်မၼ်းသၢင်းၵျူဝ်ႇၵႃႈၼႂ်းဝဵင်း ရႃႇမႃႉ၊ ဝၢၼ်ႈၵဝ်ႇမိူင်းလင်မၼ်းယဝ်ႉယဝ်ႉ။ သေႃးလု၊ ၵေႃႈပႄႇၽဵဝ်ႈၵႃႈဢၼ်ပဵၼ်မႄႈၽိူဝ်ႉလႂ်၊ဢိၵ်ႇတင်းမႄႈၽီလႂ်တင်းသဵင်ႈတင်းလူင်ပႅတ်ႈသေၵႃႈၼႂ်းမိူင်း ဢိသရေး၊ ယဝ်ႉဢေႃႈ။
တပ်ႉသိုၵ်းၵူၼ်း ၽိလိတ်ႉတိ၊ ၶဝ်ၸုတုမ်ၵၼ်မႃးၶျႃးပၢင်တပ်ႉၵႃႈတီႈဝဵင်း သုၼိမ်ႇ၊ လႄႈ သေႃးလု၊ သမ်ႉၸုတုမ်ဢဝ်ၵူၼ်း ဢိသရေး၊ ၶျႃးပၢင်တပ်ႉၵႃႈၼိူဝ်လွႆ ၵိလပေႃႇ၊ ဢေႃႈ။-
မိူဝ်ႈဢၼ် သေႃးလု၊ ႁၼ်တပ်ႉသိုၵ်း ၽိလိတ်ႉတိ၊ ၸိုင်၊မၼ်းၵူဝ်ႁႄသၼ်ႇဝႆၼႃႇလူင်လၢင်လႄႈ၊-
မၼ်းလဝ်ႈထၢမ်တီႈ ထႃႇဝရႃႉၽြႃး၊ လွင်ႈဢၼ်ထုၵ်ႇလီႁဵတ်းၸိူဝ်ႉၼင်ႇႁိုဝ်ၼၼ်ႉဢေႃႈ။ ၵူၺ်းၵႃႈ၊ ထႃႇဝရႃႉၽြႃး၊ ဢမ်ႇဢိူဝ်ၼႂ်းတၢင်းၼွၼ်းၽၼ်ႁၼ်လႄႈသင်၊ၼႂ်းတၢင်းဢၼ်ၸႂ်ႉဢုရိမ်းဢမ်ႇၼၼ်ႀုမိမ်း လႄႈသင်၊ၼႂ်းတၢင်းပရေႃးၽႅတ်ႈ လႄႈသင်၊မၼ်းၸဝ်ႈဢမ်ႇဢိူဝ်လႃးလႃး။-
မိူဝ်ႈၼၼ်ႉ သေႃးလု၊ ပူင်ဢမိင်ႉတီႈၶုၼ်ဢၼ်ပွင်ၵၢၼ်ၼႂ်းႁေႃမၼ်းတင်းလၢႆလႄႈဝႃႈ၊ “ႁႃမႄႈယိင်းဢၼ်ပဵၼ်မႄႈၽီၼၼ်ႉပုၼ်ႈၵဝ်တႃႉ။ ၵဝ်တၵ်းၵႂႃႇလႄႈတွင်ႈထၢမ်တီႈမၼ်းဢေႃႈ၊” ဝႃႈၼင်ႇၼႆဢေႃႈ။ ၶဝ်ၼၼ်ႉၶိုၼ်းလဝ်ႈလၢတ်ႈလႄႈဝႃႈ၊ “မီးမႄႈၽီၵေႃႉၼိုင်ႈၵႃႈတီႈဝဵင်း ဢိၼ်ႇတေႃးရႃႉ၊ ဢေႃႈ၊” ဝႃႈၼင်ႇၼႆဢေႃႈ။
သေႃးလု၊ ပုတ်ႈလၢႆႈၶူဝ်းၼုင်ႈၸဝ်ႈသေယဝ်ႉ၊ႁဵတ်းႁၢင်ႈဢၼ်ပႅၵ်ႇပိူင်ႈသေႁွင်ႉပႃးဢဝ်ၶုၼ်ဢၼ်ပွင်ၵၢၼ်ၼႂ်းႁေႃမၼ်းသွင်ၵေႃႉလႄႈ ၵႂႃႇၵႃႈတီႈမႄႈၽီၼၼ်ႉၼႂ်းၶိင်ႇၵၢင်ၶိုၼ်းဢေႃႈ။ မၼ်းတွင်ႈထၢမ်လႄႈဝႃႈ၊ “ဢိင်ပိုင်ႈၽီဢၼ်မႂ်းႁူမ်ႈပွင်းၼၼ်ႉသေလႄႈႁွင်ႉဢဝ်ၶွၼ်ၵေႃႉဢၼ်ၵဝ်တၵ်းလၢတ်ႈတီႈမႂ်းၼၼ်ႉပေႃႇမႃးတႃႉ၊” ဝႃႈၼင်ႇၼႆဢေႃႈ။
မႄႈယိင်းၼၼ်ႉၶိုၼ်းလၢတ်ႈလႄႈဝႃႈ၊ “မႂ်းႁုလွင်ႈဢၼ်ၶုၼ်ႁေႃၶမ်း သေႃးလု၊ ႁဵတ်းၸိူဝ်ႉၼင်ႇႁိုဝ်ၼၼ်ႉယူႇဢမ်ႇၸႂ်ႈႁိုဝ်း။ မၼ်းၸဝ်ႈၼၼ်ႉပႄႇၽဵဝ်ႈမႄႈၽီလႂ်၊မႄႈမူတ်ႉလႂ်ဢွၵ်ႇသေၵႃႈၼႂ်းမိူင်း ဢိသရေး၊ ၼႆႉပႅတ်ႈယဝ်ႉ။ ႁဵတ်းသင်လႄႈမႂ်းမႃးၵၢင်ဢဝ်ၵဝ်ႁႂ်ႈဢသၢၵ်ႈၵဝ်လႆႈတၢႆၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
သေႃးလု၊ တိူင်ႇဝႃႈၵတိတီႈ ထႃႇဝရႃႉၽြႃး၊ လႄႈဝႃႈ၊ “ၵႃႈၼင်ႇဢၼ် ထႃႇဝရႃႉၽြႃး၊ ဢသၢၵ်ႈလိပ်းယူႇၼၼ်ႉၵဝ်တၵ်းဢမ်ႇႁႂ်ႈဢပျတ်ႈတူၵ်းႁွတ်ႈၵႃႈၼိူဝ်မႂ်း၊ၵွပ်ႈပိူဝ်ႈဢၼ်ႁေႃးလၢတ်ႈပၼ်ၵဝ်ၼၼ်ႉ၊” ဝႃႈၼင်ႇၼႆဢေႃႈ။
မႄႈယိင်းၼၼ်ႉၵေႃႈလၢတ်ႈလႄႈဝႃႈ “ၵဝ်တၵ်းလႆႈႁွင်ႉၽူႈလႂ်ပေႃႇမႃး၊” ဝႃႈၼင်ႇၼႆလႄႈ၊ သေႃးလု၊ ၶိုၼ်းလၢတ်ႈလႄႈဝႃႈ၊ “ႁွင်ႉ သမူၺ်ႇလႃႉ၊ ပေႃႇမႃးတႃႉ၊” ဝႃႈၼင်ႇၼႆဢေႃႈ။
မိူဝ်ႈဢၼ်မႄႈယိင်းၼၼ်ႉႁၼ် သမူၺ်ႇလႃႉ၊ ၼၼ်ႉၸိုင်၊ႁဵတ်းသဵင်ဢၼ်ယႂ်ႇၼႃႇႁွင်ႉသႅၼ်ႇတီႈ သေႃးလု၊ လႄႈဝႃႈ၊ “ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းပႅတ်ႉလႅၼ်ၶႃႈၸဝ်ႈတီႈၶႃႈ။ ၸဝ်ႈႁဝ်းပဵၼ်ၶုၼ်ႁေႃၶမ်း သေႃးလု၊ တီႈၶႃႈဢေႃႈ၊” ဝႃႈၼင်ႇၼႆလႄႈ။
ၶုၼ်ႁေႃၶမ်း သေႃးလု၊ လၢတ်ႈတီႈမၼ်းလႄႈဝႃႈ၊ “ယႃႇပေၵူဝ်ႁႄ။ မႂ်းႁၼ်ၽူႈလႂ်၊” ဝႃႈၼင်ႇၼႆဢေႃႈ။ မႄႈယိင်းၼၼ်ႉၶိုၼ်းလဝ်ႈလၢတ်ႈလႄႈဝႃႈ၊ “ၶႃႈၸဝ်ႈႁၼ်ဝိၺိၺ်ႇပေႃႇဢွၵ်ႇသေၵႃႈၼႂ်းလိၼ်မႃးၶႃႈဢေႃႈ၊” ဝႃႈၼင်ႇၼႆဢေႃႈ။
သေႃးလု၊ ၶိုၼ်းထၢမ်လႄႈဝႃႈ၊ “ႁၢင်ႈၽၢင်မၼ်းပဵၼ်ၸိူဝ်ႉၼင်ႇႁိုဝ်ဝႆႉ၊” ဝႃႈၼင်ႇၼႆလႄႈ၊မႄႈယိင်းၼၼ်ႉၶိုၼ်းလဝ်ႈလၢတ်ႈလႄႈဝႃႈ၊ “ပဵၼ်ၵူၼ်းထဝ်ႈသေလႄႈလုၵ်ႉၶိုၼ်ႈမႃးတီႈၶႃႈဢေႃႈ။ မၼ်းဢဝ်ၽႃႈမႆႁူမ်ႇသုမ်ႇယူႇၶႃႈဢေႃႈ၊” ဝႃႈၼင်ႇၼႆလႄႈ၊ သေႃးလု၊ ႁုလွင်ႈဢၼ်ပဵၼ် သမူၺ်ႇလႃႉ၊ သေယဝ်ႉ၊မၼ်းၶုပ်ႉမူပ်ႇၸပ်းလိၼ်ယူႇၼႂ်းတၢင်းဢၼ်ရူဝ်ႇသေႇလေႇမၢတ်ႈဢေႃႈ။
သမူၺ်ႇလႃႉ၊ ၵေႃႈလၢတ်ႈတီႈ သေႃးလု၊ လႄႈဝႃႈ၊ “ၵွပ်ႈသင်လႄႈမႂ်းယႃႉယူၵ်ႉၵဝ်လႄႈႁွင်ႉႁႂ်ႈၵဝ်ပေႃႇမႃးၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။ သေႃးလု၊ ၶိုၼ်းလၢတ်ႈလႄႈဝႃႈ၊ “ၵဝ်ၶႃႈထူပ်းၽေးတုၵ်ႉၶႃႉယႂ်ႇၼႃႇၶႃႈယဝ်ႉ။ ၵူၼ်း ၽိလိတ်ႉတိ၊ ၶဝ်ႁဵတ်းသိုၵ်းတေႃႇၵဝ်ၶႃႈၶႃႈဢေႃႈ။ ၽြႃးပဵၼ်ၸဝ်ႈၸုၼ်ႉပႅတ်ႈၵဝ်ၶႃႈယဝ်ႉ။ မၼ်းၸဝ်ႈဢမ်ႇဢဝ်တၢင်းၼွၼ်းၽၼ်ႁၼ်၊ဢမ်ႇဢဝ်ပရေႃးၽႅတ်ႈ သေလႄႈဢိူဝ်ၵဝ်ၶႃႈလႃးလႃးၶႃႈယဝ်ႉ။ ပိူဝ်ႈၼႆလႄႈၵဝ်ၶႃႈႁွင်ႉဢဝ်ၸဝ်ႈမႃးႁႂ်ႈလႆႈမွၵ်ႇလၢတ်ႈလွင်ႈဢၼ်ၵဝ်ၶႃႈထုၵ်ႇလီႁဵတ်းၵႃႈသင်ၼၼ်ႉၶႃႈဢေႃႈ၊” ဝႃႈၼင်ႇၼႆဢေႃႈ။
သမူၺ်ႇလႃႉ၊ ၵေႃႈလၢတ်ႈလႄႈဝႃႈ၊ “ ထႃႇဝရႃႉၽြႃး၊ ယင်းၸုၼ်ႉပႅတ်ႈမႂ်းယဝ်ႉလႄႈမၢတ်ႈမႂ်းပဵၼ်ရၢၼ်ႇသူႇယဝ်ႉ။ ႁဵတ်းသင်လႄႈမႂ်းႁွင်ႉဢဝ်ၵဝ်ၸိူဝ်ႉၼင်ႇႁိုဝ်။-
ထႃႇဝရႃႉၽြႃး၊ ႁဵတ်းတီႈမႂ်းၸွမ်းၵႃႈၼင်ႇဢၼ်မၼ်းၸဝ်ႈမီးဢမိင်ႉဝႆႉတီႈၵဝ်ၼၼ်ႉယဝ်ႉ။ မၼ်းၸဝ်ႈယိုတ်းဢဝ်သိုင်ႇၸိုင်ႈဝၢၼ်ႈမိူင်းသေၵႃႈၼႂ်းမိုဝ်းမႂ်းသေလႄႈဢၢပ်ႈပၼ်တီႈ တႃႇဝိတ်ႈ၊ ယဝ်ႉယဝ်ႉ။-
လွင်ႈမၼ်းၸမ်ႉ၊မႂ်းဢမ်ႇထွမ်ႇဢဝ်ၵႂၢမ်း ထႃႇဝရႃႉၽြႃး၊ သေလႄႈမႂ်းဢမ်ႇယႃႉၽဵဝ်ႈၵူၼ်းမဵဝ်း ဢႃႇမလႅၵ်ႉ၊ လုမ်းလုမ်းဢိၵ်ႇတင်းဢုၵ်ႉၸႃႇၶူဝ်းလဵင်းဢၼ်ၶဝ်မီးၼၼ်ႉပႅတ်ႈ။ ၵွပ်ႈပိူဝ်ႈလွင်ႈတၢင်းၼၼ်ႉလႄႈ ထႃႇဝရႃႉၽြႃး၊ ၸီႇယၢင်ႇၸိူဝ်ႉၼင်ႇၼႆတီႈမႂ်းဝၼ်းမိူဝ်ႈၼႆႉယဝ်ႉ။-
မၼ်းၸဝ်ႈတၵ်းဢဝ်ၸႃႉၸဵမ်မႂ်းဢိၵ်ႇတင်းၵူၼ်း ဢိသရေး၊ ဢၢပ်ႈပၼ်ၵႃႈၼႂ်းမိုဝ်းၵူၼ်း ၽိလိတ်ႉတိ၊ ဢေႃႈ။ ၼႂ်းဝၼ်းမိူဝ်ႈၽုၵ်ႈမႂ်း၊ဢိၵ်ႇတင်းလုၵ်ႈၸၢႆးမႂ်းၸိူဝ်းၼၼ်ႉတၵ်းမီးယူႇလူၺ်ႈၵၼ်တင်းၵဝ်ဢေႃႈ။ ၼင်ႇၼၼ်လႄႈ ထႃႇဝရႃႉၽြႃး၊ တၵ်းဢဝ်တပ်ႉသိုၵ်း ဢိသရေး၊ ဢၢပ်ႈပၼ်ၼႂ်းမိုဝ်းၵူၼ်း ၽိလိတ်ႉတိ၊ ဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ သေႃးလု၊ လူမ်ႉယဵတ်ႇတဵတ်ႇၵႃႈၼိူဝ်လိၼ်သေလႄႈၵူဝ်ႁႄၵွပ်ႈပိူဝ်ႈၵႂၢမ်းဢၼ် သမူၺ်ႇလႃႉ၊ လၢတ်ႈၼၼ်ႉဢေႃႈ။ ၵွပ်ႈပိူဝ်ႈဢၼ်မၼ်းဢမ်ႇၵိၼ်ၵႃႈသင်လႃးလႃးတင်းၶိုၼ်းတင်းဝၼ်းၼၼ်ႉလႄႈႁႅင်းမၼ်းဢူၼ်ႈၵႂႃႇဢေႃႈ။-
မႄႈယိင်းၼၼ်ႉမႃးၸူးတီႈမၼ်းလႄႈႁၼ်လွင်ႈဢၼ်မၼ်းမႆႈၸႂ်ၶီၸႂ်ၼႃႇလူင်လၢင်ၼၼ်ႉသေယဝ်ႉလၢတ်ႈဝႃႈ၊ “ၸဝ်ႈၶုၼ်လူင်တီႈၶႃႈ။ ၶႃႈၸဝ်ႈယင်းဢမ်ႇသေလၢႆဢသၢၵ်ႈတူဝ်ၸဝ်ႈၵဝ်ႇသေလႄႈႁဵတ်းၸွမ်းၵႃႈၼင်ႇဢၼ်ၸဝ်ႈႁဝ်းၸႂ်ႉႁဵတ်းၼၼ်ႉၶႃႈယဝ်ႉ။-
တေႃႈလဵဝ်ၼႆႉၸမ်ႉ၊ၶႅၼ်းတေႃႈႁဵတ်းၸွမ်းၵႃႈၼင်ႇဢၼ်ၶႃႈၸဝ်ႈလဝ်ႈလၢတ်ႈၼၼ်ႉသေၵမ်းၶႃႈ။ ၶႅၼ်းတေႃႈႁႂ်ႈၶႃႈၸဝ်ႈလႆႈႁႅၼ်းတၢင်းၵိၼ်ဢိတ်းဢွၼ်ႇၼိုင်ႈတမ်းပၼ်ၸဝ်ႈႁဝ်းသေၵမ်းၶႃႈ။ ၶႅၼ်းတေႃႈၵိၼ်ႁႂ်ႈမီးႁႅင်းတႃႇတေသိုပ်ႇၶၢဝ်းတၢင်းၸဝ်ႈႁဝ်းၼၼ်ႉသေၵမ်းၶႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ သေႃးလု၊ ထဵင်ပႅတ်ႈလႄႈဢမ်ႇၵိၼ်ၵႃႈသင်လႄႈယူႇဢေႃႈ။ ၵူၺ်းၵႃႈ၊ၶုၼ်ဢၼ်ပွင်ၵၢၼ်ၼႂ်းႁေႃၸိူဝ်းၼၼ်ႉၵေႃႈတိုၵ်းယူင်းႁႂ်ႈမၼ်းၵိၼ်ဢေႃႈ။ မၼ်းထွမ်ႇဢဝ်ၵႂၢမ်းၶဝ်တင်းလၢႆသေယဝ်ႉ၊လုၵ်ႉသေၵႃႈၼိူဝ်လိၼ်သေလႄႈၶိုၼ်ႈၼင်ႈၵႃႈၼိူဝ်ၵူႇဢေႃႈ။-
မႄႈယိင်းၼၼ်ႉၵေႃႈႁႅမ်ဝူဝ်းဢွၼ်ႇဢၼ်မၼ်းလဵင်ႉဝႆႉပီးလီမၼ်းလီၼၼ်ႉၶၼ်ၶၼ်ၽႂ်းၽႂ်းဢေႃႈ။ မၼ်းသမ်ႉဢဝ်ၽွင်ၶဝ်ႈၵျုင်ႇၵမ်ႈၽွင်ႈၼူတ်ႈႁဵတ်းၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈၼၼ်ႉဢေႃႈ။-
မၼ်းၸင်ႇဢဝ်တၢင်းၵိၼ်ၼၼ်ႉတမ်းပၼ် သေႃးလု၊ တင်းၶုၼ်ဢၼ်ပွင်ၵၢၼ်ၼႂ်းႁေႃတင်းလၢႆလႄႈၶဝ်ဢွၼ်ၵၼ်ၵိၼ်ဢေႃႈ။ ၶဝ်ၵေႃႈလုၵ်ႉလႄႈပွၵ်ႈမိူဝ်းၵႂႃႇၼႂ်းၶိုၼ်းၼၼ်ႉၵမ်းလဵဝ်ဢေႃႈ။
မိူဝ်ႈၼၼ်ႉ၊ၵူၼ်း ၽိလိတ်ႉတိ၊ ၶဝ်ဢဝ်တပ်ႉသိုၵ်းတင်းလၢႆၸုတုမ်ၵၼ်ၵႃႈတီႈဝဵင်း ဢႃႇၽႅၵ်ႉ၊ ဢေႃႈ။ ၵူၼ်း ဢိသရေး၊ သမ်ႉၶျႃးပၢင်တပ်ႉၶဝ်ၵႃႈတီႈၼမ်ႉဢွၵ်ႇႁူးၵႃႈၼႂ်းပၢင်ႇႁူၺ်ႈဝဵင်း ယေႇၸရေးလႃႉ၊ ဢေႃႈ။-
ၶုၼ်ႁေႃၶမ်း ၽိလိတ်ႉတိ၊ ၶဝ်ႁႃႈပႃးဢွၼ်ၵၼ်ၶီႇသိုၵ်းၶိုၼ်ႈယူႇပဵၼ်မုၵ်ႉပဵၼ်မုၵ်ႉမူႇယေႈပၢၵ်ႇ၊မူႇယေႈႁဵင်ယူႇသေလႄႈ၊ တႃႇဝိတ်ႈ၊ တင်းၵူၼ်းမၼ်းတင်းလၢႆၵေႃႈ ၶီႇသိုၵ်းၶိုၼ်ႈၸွမ်းတပ်ႉၶုၼ်ႁေႃၶမ်း ဢႃႇၶိတ်ႉ၊ ယူႇၽၢႆႇလင်ၶဝ်ဢေႃႈ။-
ၸဝ်ႈၵွၼ်းတပ်ႉသိုၵ်းလူင်ၵူၼ်း ၽိလိတ်ႉတိ၊ ၸိူဝ်းၼၼ်ႉႁၼ်ၶဝ်လႄႈဢွၼ်ၵၼ်ထၢမ်လႄႈဝႃႈ၊ “ၵူၼ်း ႁေႇပြႄး၊ ၸိူဝ်းၼႆႉႁဵတ်းၵႃႈသင်၊” ဝႃႈၼင်ႇၼႆလႄႈ။ ၶုၼ် ဢႃႇၶိတ်ႉ၊ ၶိုၼ်းလၢတ်ႈလႄႈဝႃႈ၊ “မၼ်းပဵၼ် တႃႇဝိတ်ႈ၊ ပဵၼ်ၶုၼ်ဢၼ်ပွင်ၵၢၼ်ၼႂ်းႁေႃၶုၼ်ႁေႃၶမ်း သေႃးလု၊ မဵဝ်း ဢိသရေး၊ ဢေႃႈ။ မၼ်းမႃးမီးယူႇလူၺ်ႈၵဝ်ပီလိူၼ်ဝၼ်းႁိုင်ၼႃႇယဝ်ႉ။ ၸႃႉၸဵမ်ဝၼ်းဢၼ်မၼ်းမႃးတီႈၵဝ်ၼၼ်ႉၵဝ်ဢမ်ႇႁၼ်တီႈတၵ်းတၢင်ႇဢပျတ်ႈတီႈမၼ်းတေႃႇထိုင်ႁွတ်ႈဝၼ်းမိူဝ်ႈၼႆႉယဝ်ႉ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ၸဝ်ႈၵွၼ်းတပ်ႉသိုၵ်းလူင်မဵဝ်း ၽိလိတ်ႉတိ၊ ၸိူဝ်းၼၼ်ႉဢွၼ်ၵၼ်ၸႂ်မႆႈၶႂ်ႈၸႃႉတီႈၶုၼ် ဢႃႇၶိတ်ႉ၊ လႄႈလၢတ်ႈတီႈမၼ်းလႄႈဝႃႈ၊ “ႁႂ်ႈၵေႃႉၼႆႉၶိုၼ်းမိူဝ်းၵႂႃႇၵႃႈတီႈဝဵင်းဢၼ်မႂ်းပၼ်မၼ်းၼၼ်ႉတႃႉ။ ယႃႇပေႁႂ်ႈမၼ်းၵႂႃႇတိုၵ်းသိုၵ်းလူၺ်ႈၵၼ်တင်းႁဝ်း။ ၵူဝ်မၼ်းပိၼ်ႇၸႂ်လႄႈဝၢႆႇတိုၵ်းႁဝ်းဢေႃႈ။ မၼ်းတၵ်းတေၶိုၼ်းလီၵၼ်တင်းၸဝ်ႈမၼ်း သေႃးလု၊ လႆႈၸိူဝ်ႉၼင်ႇႁိုဝ်၊မၼ်းတၵ်းဢဝ်ၵွၵ်းႁူဝ်ႁဝ်းၸိူဝ်းၼႆႉဢၢပ်ႈပၼ်ၼၼ်ႉဢမ်ႇၸႂ်ႈႁိုဝ်း။-
လိူဝ်သေၼၼ်ႉဢမ်ႇၵႃး၊မၼ်းပဵၼ် တႃႇဝိတ်ႈ၊ ဢၼ်ၶဝ်ဢွၼ်ၵၼ်ၵႃႈဝႅၼ်သေလႄႈႁဵတ်းၵႂၢမ်းၸၢပ်ႈလွင်ႈမၼ်းလႄႈဝႃႈ။ ‘ သေႃးလု၊ ဢဝ်တၢႆပဵၼ်ႁဵင်ပဵၼ်ႁဵင်၊ တႃႇဝိတ်ႈ၊ ဢဝ်တၢႆပဵၼ်မိုၼ်ႇပဵၼ်မိုၼ်ႇ၊’ ဝႃႈၼႆၼၼ်ႉဢမ်ႇၸႂ်ႈႁိုဝ်း၊” ဝႃႈၼင်ႇၼႆဢေႃႈ။
ၶုၼ် ဢႃႇၶိတ်ႉ၊ ႁွင်ႉဢဝ် တႃႇဝိတ်ႈ၊ သေယဝ်ႉ၊လၢတ်ႈတီႈမၼ်းလႄႈဝႃႈ၊ “ၵႃႈဢၼ် ထႃႇဝရႃႉၽြႃး၊ မဵဝ်း ဢိသရေး၊ ဢသၢၵ်ႈလိပ်းယူႇၼၼ်ႉၵဝ်ႁုလွင်ႈဢၼ်မႂ်းၼႆႉမီးသဵတ်ႈၸႃႇၼိူဝ်ၵဝ်လႄႈ၊ၵဝ်မီးဢလူဝ်ႇၶႂ်ႈႁႂ်ႈမႂ်းၵႂႃႇၸွမ်းလူၺ်ႈၵၼ်တင်းၵဝ်ၼႂ်းၼႃႈသိုၵ်းၼၼ်ႉဢေႃႈ။ ၸႃႉၸဵမ်ဝၼ်းဢၼ်မႂ်းႁွတ်ႈမႃးၵႃႈတီႈၵဝ်ၼၼ်ႉဢမ်ႇမီးတီႈတၵ်းတၢင်ႇဢပျတ်ႈလႃးလႃး။ ၵူၺ်းၵႃႈ၊ၶုၼ်ႁေႃၶမ်းတၢင်ႇပႃးၸိူဝ်းၼၼ်ႉဢမ်ႇႁပ်ႉတုင်းဢဝ်မႂ်းလႃးလႃး။-
ပိူဝ်ႈၼႆလႄႈၶိုၼ်းမိူဝ်းၵႂႃႇၼိမ်ၼိမ်လီလီတႃႉ။ ယႃႇပေႁဵတ်းႁႂ်ႈၶဝ်ၸိူဝ်းၼၼ်ႉၸႂ်မႆႈၶႂ်ႈၸႃႉသေၵမ်း၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ၶိုၼ်းလၢတ်ႈလႄႈဝႃႈ၊ “ၵဝ်ၶႃႈႁဵတ်းၽိတ်းဢၼ်လႂ်ၶႃႈ။ ပေႃးၸဝ်ႈဝႃႈ၊ၸဝ်ႈဢမ်ႇမီးတီႈတၵ်းတၢင်ႇဢပျတ်ႈတီႈၵဝ်ၶႃႈၸႃႉၸဵမ်ဝၼ်းဢၼ်ၵဝ်ၶႃႈႁွတ်ႈမႃးၵႃႈတီႈၸဝ်ႈၼၼ်ႉၸိုင်၊ႁဵတ်းသင်လႄႈၵဝ်ၶႃႈဢမ်ႇထုၵ်ႇလီၵႂႃႇၸွမ်းႁဝ်းၶုၼ်ႁေႃၶမ်းၸဝ်ႈၵဝ်ၶႃႈလႄႈတိုၵ်းရၢၼ်ႇသူႇၸဝ်ႈၼၼ်ႉတီႈၶႃႈ၊” ဝႃႈၼင်ႇၼႆဢေႃႈ။
ၶုၼ် ဢႃႇၶိတ်ႉ၊ ၶိုၼ်းလၢတ်ႈလႄႈဝႃႈ၊ “ၸႂ်ႈယဝ်ႉ။ မႂ်းမီးသဵတ်ႈၸႃႇၼိူဝ်ၵဝ်မိူၼ်ၸိူဝ်ႉၼင်ႇတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈတႄႉယဝ်ႉ။ ၵူၺ်းၵႃႈ၊ၶုၼ်ႁေႃၶမ်းတၢင်ႇပႃးၸိူဝ်းၼၼ်ႉဝႃႈ၊မႂ်းဢမ်ႇထုၵ်ႇလီၵႂႃႇတိုၵ်းသိုၵ်းၸွမ်းႁဝ်းဝႃႈၼႆယဝ်ႉ။-
ပိူဝ်ႈၼႆလႄႈ၊ တႃႇဝိတ်ႈ၊ ႟။ မိူဝ်ႈၽုၵ်ႈၵၢင်ၼႂ်သူၸိူဝ်းဢၼ်ဢွၵ်ႇသေၵႃႈတီႈ သေႃးလု၊ မႃးလႄႈယူႇလူၺ်ႈၵဝ်တင်းသဵင်ႈတင်းမူတ်းၼၼ်ႉတၵ်းလႆႈလုၵ်ႉၸဝ်ႉၸဝ်ႉလႄႈမိူဝ်းၵႂႃႇမိူဝ်ႈဢၼ်သၢႆဝၼ်းလႅင်းမႃးၼၼ်ႉၵမ်းလဵဝ်တႃႉ၊” ဝႃႈၼင်ႇၼႆဢေႃႈ။
ၵွပ်ႈပိူဝ်ႈၸိူဝ်ႉၼင်ႇၼႆလႄႈ တႃႇဝိတ်ႈ၊ ဢိၵ်ႇတင်းၵူၼ်းမၼ်းတင်းလၢႆလုၵ်ႉၵၢင်ၼႂ်ၸဝ်ႉၸဝ်ႉသေလႄႈဢွၵ်ႇမိူဝ်းၵႂႃႇမိူင်း ၽိလိတ်ႉတိ၊ ဢေႃႈ။ ၵူၼ်း ၽိလိတ်ႉတိ၊ ၶဝ်သမ်ႉၶီႇသိုၵ်းၵႂႃႇၵႃႈတီႈဝဵင်း ယေႇၸရေးလႃႉ၊ ဢေႃႈ။
မိူဝ်ႈဢၼ်ထူၼ်ႈထိုင်သၢမ်ဝၼ်းၸိုင်၊ တႃႇဝိတ်ႈ၊ ဢိၵ်ႇတင်းၵူၼ်းမၼ်းၸိူဝ်းၼၼ်ႉၶိုၼ်းႁွတ်ႈမႃးၵႃႈတီႈဝဵင်း ၸိၵလၵ်ႉ၊ ဢေႃႈ။ ၸူဝ်ႈၶၢဝ်းယၢမ်းၼၼ်ႉၵူၼ်း ဢႃႇမလႅၵ်ႉ၊ ၶဝ်မႃးတိုၵ်းတေႃးႁိမ်ႁူင်ႇဢဝ်မိူင်း ယုတႃႉ၊ ပွတ်းတၢင်းၸၢၼ်းလႄႈတိုၵ်းတေႃးဝဵင်း ၸိၵလၵ်ႉ၊ သေယဝ်ႉ၊ဢဝ်ၽႆးတုတ်ႇပႅတ်ႈဝဵင်းၼၼ်ႉသေလႄႈ။-
တိဢဝ်မႄႈယိင်းၵေႃႉလဵၵ်ႉၵေႃႉယႂ်ႇၵႃႈမီးတင်းသဵင်ႈတင်းလူင်သေၵေႃႈဢမ်ႇဢဝ်တၢႆသေၵေႃႉသေၵူၼ်း။ ၵူၺ်းသိမ်းဢဝ်ၶဝ်ၵႃႈမီးသေလႄႈဢွၵ်ႇၵႂႃႇသေဢေႃႈ။-
မိူဝ်ႈဢၼ် တႃႇဝိတ်ႈ၊ တင်းၵူၼ်းမၼ်းတင်းလၢႆႁွတ်ႈမႃးၼၼ်ႉၸိုင်၊ထူပ်းႁၼ်ဝဵင်းၼၼ်ႉမႆႈၶႅမ်ႈပႅတ်ႈယဝ်ႉ၊ဢိၵ်ႇတင်းမေးၶဝ်၊လုၵ်ႈၸၢႆးလုၵ်ႈယိင်းၶဝ်လႆႈၶၢမ်ႇတၢင်းဢၼ်တိဢဝ်သိမ်းဢဝ်ၵႂႃႇယဝ်ႉၼၼ်ႉဢေႃႈ။-
တႃႇဝိတ်ႈ၊ ဢိၵ်ႇတင်းၵူၼ်းၸိူဝ်းဢၼ်ပႃးလူၺ်ႈၵၼ်တင်းမၼ်းၼၼ်ႉဢွၼ်ၵၼ်ၵိဝ်သဵင်ႁွင်ႉႁႆႈတေႃႇထိုင်ႁွတ်ႈထၢၼ်ႈပေႃးဢမ်ႇမီးႁႅင်းႁွင်ႉႁႆႈလႆႈထႅင်ႈယဝ်ႉဢေႃႈ။-
မေး တႃႇဝိတ်ႈ၊ဢႁိၼွမ်ႇ၊ ၽူႈယိင်းဝဵင်း ယေႇၸရေး၊ တင်း ဢၽိၵေးလႃႉ၊ ၽူႈယိင်းဝဵင်း ၵရမေႇလႃႉ၊ မႄႈမၢႆႈ ၼႃႇပလႃႉ၊ ၼၼ်ႉၵေႃႈလႆႈပႃးၵႂႃႇၸွမ်းၼႃးတၢင်းဢၼ်လႆႈၶၢမ်ႇတိဢဝ်သိမ်းဢဝ်ၵႂႃႇၼၼ်ႉဢေႃႈ။
တႃႇဝိတ်ႈ၊ မီးတၢင်းဢၼ်ယၢပ်ႇၸႂ်ၶၢၼ်ၸႂ်ၼႃႇလူင်လၢင်ၵွပ်ႈပိူဝ်ႈၵူၼ်းမၼ်းတင်းလၢႆၶူမ်ၸႂ်ၼႃႇၼႂ်းတၢင်းဢၼ်ၶႆႈၸႂ်ထိုင်လုၵ်ႈၸၢႆးလုၵ်ႈယိင်းၶဝ်ၼၼ်ႉသေလႄႈမႆႈႁွၼ်ႉၼႃႇထၢၼ်ႈပေႃးထၢမ်ဢဝ်မၢၵ်ႇႁိၼ်ပိုဝ်ႈသႂ်ႇမၼ်းဢေႃႈ။ ၵူၺ်းၵႃႈ၊ တႃႇဝိတ်ႈ၊ ဢိင်ပိုင်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈမၼ်းၼၼ်ႉလႄႈမၼ်းၸဝ်ႈၵေႃႈပၼ်တၢင်းဢၼ်ႁတ်းႁၢၼ်ႁႅင်းယႂ်ႇၼႃႇတီႈ တႃႇဝိတ်ႈ၊ ဢေႃႈ။-
တႃႇဝိတ်ႈ၊ ၸင်ႇလၢတ်ႈတီႈယဵၸ်ႈပရေႃးႁဵၵ်ႈ ဢပျႃႇထႃႇ၊ လုၵ်ႈၸၢႆး ဢႁိမလႅၵ်ႉ၊ ၼၼ်ႉလႄႈဝႃႈ၊ “ဢဝ်သိူဝ်ႈသုပ်းၸဝ်ႈမႃးတီႈၵဝ်သေၵမ်း၊” ဝႃႈၼင်ႇၼႆသေယဝ်ႉ၊ ဢပျႃႇထႃႇ၊ ၵေႃႈဢဝ်မႃးပၼ်တီႈမၼ်းဢေႃႈ။-
တႃႇဝိတ်ႈ၊ တွင်ႈထၢမ်တီႈ ထႃႇဝရႃႉၽြႃး၊ လႄႈဝႃႈ၊ “ၶႃႈၸဝ်ႈတၵ်းလႆႈလိုပ်ႈၸွမ်းလမ်းၸွမ်းမူႇၵူၼ်းဢၼ်မႃးႁိမ်ဢဝ်ႁူင်ႇဢဝ်ၼႆႉၶႃႈႁိုဝ်း၊တၵ်းၶိုတ်းၶဝ်လႆႈလူးၵွၼ်ႇႁိုဝ်း၊” ဝႃႈၼင်ႇၼႆဢေႃႈ။ မၼ်းၸဝ်ႈမီးဢမိင်ႉလႄႈဝႃႈ၊ “ၸွမ်းၵႂႃႇတႃႉ။ မႂ်းတၵ်းၶိုတ်းၶဝ်လႄႈၵႄႇသႄႇၼုၵ်ႈဢဝ်ၵူႈၸိူဝ်ႉၵူႈပိူင်လႆႈၶိုၼ်းမႃးဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ တႃႇဝိတ်ႈ၊ တင်းၵူၼ်းမၼ်းႁူၵ်းပၢၵ်ႇၵႂႃႇလႄႈ၊မိူဝ်ႈဢၼ်ႁွတ်ႈထိုင်ၼမ်ႉဢွၵ်ႇႁူး ပေႇသေႃႇ၊ ၼၼ်ႉၸိုင်၊ၵူၼ်းၶဝ်ၵမ်ႈၽွင်ႈၵိုတ်းသဝ်းယူႇၵႃႈတီႈၼၼ်ႈဢေႃႈ။-
တႃႇဝိတ်ႈ၊ ပႃးဢဝ်ၵူၼ်းမၼ်းသီႇပၢၵ်ႇသေလႄႈသိုပ်ႇၶၢဝ်းတၢင်းၵႂႃႇဢေႃႈ။ ၵူၼ်းသွင်ပၢၵ်ႇၸမ်ႉ၊ႁိူဝ်ႉၼူၼ်းၼႃႇထၢၼ်ႈပေႃးဢမ်ႇၶၢမ်ႈၼမ်ႉၼၼ်ႉလႆႈလႄႈၵိုတ်းသဝ်းယူႇၽၢႆႇလင်ဢေႃႈ။-
ၵူၼ်း တႃႇဝိတ်ႈ၊ ၸိူဝ်းၼၼ်ႉထူပ်းႁၼ်ၵူၼ်းၼုမ်ႇမဵဝ်း ဢေးၵျိပ်ႉ၊ ၵႃႈတီႈၵၢင်ပၢင်ႇလႄႈဢွၼ်ၵၼ်ဢဝ်မႃးၸူးတီႈ တႃႇဝိတ်ႈ၊ ဢေႃႈ။ ၶဝ်ဢဝ်ၶဝ်ႈဢဝ်ၼမ်ႉ၊-
ၶႅပ်းမၢၵ်ႇလိူဝ်ႇၽၢၵ်ႇၼိုင်ႈဢိၵ်ႇတင်းမၢၵ်ႇၸပိတ်ႉႁႅင်ႈသွင်ပုၵ်း၊ပၼ်ႁႂ်ႈမၼ်းၵိၼ်သေယဝ်ႉ၊ၸင်ႇသမ်ႉမီးႁႅင်းမႃးဢေႃႈ။ မၼ်းဢမ်ႇလႆႈၵိၼ်တၢင်းၵိၼ်၊ဢမ်ႇလႆႈၵိၼ်ၼမ်ႉႁိုင်သၢမ်ဝၼ်းသၢမ်ၶိုၼ်းယဝ်ႉဢေႃႈ။-
တႃႇဝိတ်ႈ၊ ထၢမ်မၼ်းလႄႈဝႃႈ၊ “ၸဝ်ႈမႂ်းပဵၼ်ၽူႈလႂ်။ မႂ်းလုၵ်ႉသေၵႃႈတီႈလႂ်မႃး၊” ဝႃႈၼင်ႇၼႆဢေႃႈ။ မၼ်းၼၼ်ႉၶိုၼ်းလၢတ်ႈလႄႈဝႃႈ၊ “ၵဝ်ၶႃႈပဵၼ်ၵူၼ်းမဵဝ်း ဢေးၵျိပ်ႉ၊ လႄႈပဵၼ်ၶႃႈတီႈၵူၼ်းမဵဝ်း ဢႃႇမလႅၵ်ႉ၊ ဢေႃႈ။ ၸဝ်ႈၵဝ်ၶႃႈပႅတ်ႈၵဝ်ၶႃႈဝႆႉၽၢႆႇလင်ၵွပ်ႈပိူဝ်ႈၵဝ်ၶႃႈမီးတၢင်းၶႆႈတၢင်းပဵၼ်လႄႈလႆႈသၢမ်ဝၼ်းၶႃႈယဝ်ႉ။-
ႁဝ်းၶႃႈတိုၵ်းတေႃးႁိမ်ႁူင်ႇဢဝ်ဢိူင်ႇ ၶေးရသိ၊ ဢၼ်မီးပွတ်းၸၢၼ်းမိူင်း ယုတႃႉ၊ ၼၼ်ႉ၊ဢိၵ်ႇတင်းလိၼ်ၵူၼ်းၶိူဝ်းႁိူၼ်း ၵႃႇလႅပ်ႉ၊ သေယဝ်ႉ၊ဢဝ်ၽႆးတုတ်ႇပႅတ်ႈဝဵင်း ၸိၵလၵ်ႉ၊ ဢေႃႈ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ၵေႃႈထၢမ်မၼ်းလႄႈဝႃႈ၊ “ၸွင်ႇမႂ်းတၵ်းဢွၼ်ၵဝ်သူင်ႇထိုင်တီႈမူႇၵူၼ်းဢၼ်ႁိမ်ႁူင်ႇၸိူဝ်းၼၼ်ႉလႆႈႁိုဝ်း၊” ဝႃႈၼင်ႇၼႆဢေႃႈ။ မၼ်းၼၼ်ႉလၢတ်ႈလႄႈဝႃႈ၊ “ပေႃးၸဝ်ႈႁဝ်းဝႆႉၵတိၼႂ်းၼႃႇမႃႉၸိုဝ်ႈသဵင်ၽြႃးပဵၼ်ၸဝ်ႈလူၺ်ႈလွင်ႈဢၼ်ဢမ်ႇဢဝ်ၶႃႈၸဝ်ႈတၢႆ၊ဢမ်ႇဢဝ်ၶႃႈၸဝ်ႈဢၢပ်ႈၼႂ်းမိုဝ်းၸဝ်ႈၵဝ်ၶႃႈၸိုင်၊ၵဝ်ၶႃႈတၵ်းဢွၼ်သူင်ႇၶႃႈဢေႃႈ၊” ဝႃႈၼင်ႇၼႆဢေႃႈ။-
မၼ်းၵေႃႈဢွၼ် တႃႇဝိတ်ႈ၊ ၵႂႃႇသူင်ႇထိုင်တီႈၶဝ်ၼၼ်ႉဢေႃႈ။ ၵူၼ်းသိုၵ်းမဵဝ်း ဢႃႇမလႅၵ်ႉ၊ ဢၼ်ၸၢင်ႈႁိမ်ႁူင်ႇၸိူဝ်းၼၼ်ႉဢွၼ်ၵၼ်ႁဵတ်းပွႆးပျေႃႇပွႆးမူၼ်ႈၵိၼ်ယူႇ၊သူတ်ႉယူႇၵႃႈဝႅၼ်ယူႇသေလႄႈမီးၸွတ်ႇၸႅတ်ႇၵႂႃႇၵူႈတီႈၵူႈလႅၼ်ၵွပ်ႈပိူဝ်ႈၶဝ်လႆႈဢုၵ်ႉၸႃႇၶူဝ်းလဵင်းဢၼ်ၶဝ်ႁိမ်ႁူင်ႇဢဝ်ၵႃႈၼႂ်းမိူင်း ၽိလိတ်ႉတိ၊ ဢိၵ်ႇတင်းၵႃႈၼႂ်းမိူင်း ယုတႃႉ၊ မႃးၼၼ်ႉဢေႃႈ။-
တႃႇဝိတ်ႈ၊ ၵေႃႈတႄႇၸႃႉဢဝ်ၶိင်ႇႁူဝ်ၶမ်ႈၼၼ်ႉတိုၵ်းတေႃးယႃႉပႅတ်ႈၶဝ်တေႃႇထိုင်ႁွတ်ႈၶိင်ႇႁူဝ်ၶမ်ႈဝၼ်းမိူဝ်ႈၽုၵ်ႈၼၼ်ႉဢေႃႈ။ ၼွၵ်ႈသေၵူၼ်းၼုမ်ႇသီႇပၢၵ်ႇဢၼ်ၶီႇၵလႃႇဢုၵ်ႈလႄႈဢွၵ်ႇပၢႆႈၵႂႃႇၼၼ်ႉဢမ်ႇလွတ်ႈသေၵေႃႉသေၵူၼ်း။-
တႃႇဝိတ်ႈ၊ ၵေႃႈၵႄႇၼုၵ်ႈဢဝ်ၵူႈၵေႃႉၵူႈၵူၼ်းဢိၵ်ႇတင်းဢုၵ်ႉၸႃႇၵႃႈဢၼ်ၵူၼ်း ဢႃႇမလႅၵ်ႉ၊ ၶဝ်သိမ်းဢဝ်ၵႂႃႇၼၼ်ႉၵူႈၸိူဝ်ႉၵူႈပိူင်ပႃးတင်းမေးမၼ်းတင်းသွင်ၵေႃႉဢေႃႈ။-
ယင်းဢမ်ႇႁူင်ႈဢမ်ႇႁၢႆသေၸိူဝ်ႉသေပိူင်လႄႈ တႃႇဝိတ်ႈ၊ ၶိုၼ်းဢဝ်လႆႈလုၵ်ႈၸၢႆးလုၵ်ႈယိင်းဢိၵ်ႇတင်းဢုၵ်ႉၸႃႇၵႃႈဢၼ်ၵူၼ်း ဢႃႇမလႅၵ်ႉ၊ ၶဝ်သိမ်းဢဝ်ၵႂႃႇသေၵႃႈတီႈၵူၼ်းမၼ်းၸိူဝ်းၼၼ်ႉဢေႃႈ။-
ၵႃႈဢၼ်ပဵၼ်ၽုင်သူဝ်း၊ၽုင်ဝူဝ်းတင်းသဵင်ႈတင်းလူင်ၵေႃႈမၼ်းၶိုၼ်းဢဝ်လႆႈမႃးသေယဝ်ႉ၊ၵူၼ်းမၼ်းၸိူဝ်းၼၼ်ႉႁေႃႈၵႂႃႇပႃႈၼႃႈၶဝ်ယူႇသေလႄႈ၊လၢတ်ႈဝႃႈ၊ “ဢၼ်ၸိူဝ်းၼႆႉပဵၼ်ဢုၵ်ႉၸႃႇဢၼ် တႃႇဝိတ်ႈ၊ ပိူင်ႇယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ တႃႇဝိတ်ႈ၊ ၶိုၼ်းၵႂႃႇၸူးတီႈၵူၼ်းသွင်ပၢၵ်ႇဢၼ်ႁိူဝ်ႉဢူၼ်ႈၼႃႇတေႃႇထိုင်ႁွတ်ႈထၢၼ်ႈပေႃးဢမ်ႇၸွမ်းမၼ်းၵႂႃႇလႆႈယဝ်ႉလႄႈၵိုတ်းသဝ်းယူႇၵႃႈတီႈၼမ်ႉဢွၵ်ႇႁူး ပေႇသေႃႇ၊ ၼၼ်ႉဢေႃႈ။ ၶဝ်ၼၼ်ႉဢွၼ်ၵၼ်ၶိုၼ်ႈမႃးႁပ်ႉႁူဝ်တၢင်း တႃႇဝိတ်ႈ၊ ဢိၵ်ႇတင်းၵူၼ်းမၼ်းတင်းလၢႆသေလႄႈ တႃႇဝိတ်ႈ၊ ၵႂႃႇတၵ်ႉၵႂႃႇလၢတ်ႈၶဝ်ဢေႃႈ။-
ၵူၺ်းၵႃႈ၊ၵူၼ်းမိူၵ်ႈဢၼ်ၸႂ်တိုဝ်ၸႂ်တၼ်ဢၼ်ၵႂႃႇလူၺ်ႈၵၼ်တင်း တႃႇဝိတ်ႈ၊ ၼၼ်ႉလၢတ်ႈလႄႈဝႃႈ၊ “ၶဝ်ယင်းဢမ်ႇၵႂႃႇလူၺ်ႈၵၼ်တင်းႁဝ်းလူင်ပႄႇ။ ပိူဝ်ႈၼႆလႄႈ၊ဢုၵ်ႉၸႃႇၸိူဝ်းဢၼ်ႁိမ်ႁူင်ႇဢဝ်မႃးၼႆႉႁဝ်းတၵ်းဢမ်ႇပၼ်တီႈၶဝ်သေၸိူဝ်ႉသေပိူင်။ ႁႂ်ႈၶဝ်ဢဝ်မေးၶဝ်၊လုၵ်ႈၶဝ်သေလႄႈၵႂႃႇတႃႉ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ တႃႇဝိတ်ႈ၊ ၶိုၼ်းလၢတ်ႈလႄႈဝႃႈ၊ “ပီႈၼွင်ႉၵဝ်တင်းလၢႆၶဝ်႟။ သူဢမ်ႇထုၵ်ႇလီႁဵတ်းၸိူဝ်ႉၼင်ႇၼၼ်တီႈဢုၵ်ႉၸႃႇဢၼ် ထႃႇဝရႃႉၽြႃး၊ ပၼ်တီႈႁဝ်းၼႆႉၵူၺ်း။ မၼ်းၸဝ်ႈၵႄႇသႄႇၶျွတ်ႈဢဝ်ႁဝ်းသေယဝ်ႉ၊ႁႂ်ႈႁဝ်းလႆႈဢွင်ႇသိုၵ်းၵႃႈၼိူဝ်ၵူၼ်းသိုၵ်းဢၼ်ၸၢင်ႈႁိမ်ႁူင်ႇဢဝ်ၸိူဝ်းၼၼ်ႉယဝ်ႉ။-
ၽူႈလႂ်ဢမ်ႇၽွမ်ႉၵႂၢမ်းသူလႆႈ။ ႁဝ်းတၵ်းလႆႈမႅင်ႇၵၼ်ၽဵင်ႇၽဵင်ႇဢေႃႈ။ ၶဝ်ၸိူဝ်းဢၼ်ၵိုတ်းသဝ်းယူႇတၢင်းလင်ၵေႃႈထုၵ်ႇလီလႆႈဢမူၺ်ႇမိူၼ်မိူၼ်ၵၼ်တင်းၶဝ်ၸိူဝ်းဢၼ်ၵႂႃႇၵႃႈၼႂ်းၼႃႈသိုၵ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။-
တႃႇဝိတ်ႈ၊ ႁဵတ်းႁႂ်ႈပဵၼ်ထုင်းၽိင်ႈၸိူဝ်ႉၼင်ႇၼႆလႄႈၵူၼ်းမဵဝ်း ဢိသရေး၊ ၵမ်ၵျၢင်ႉၸွမ်းၸႃႉၸဵမ်ဝၼ်းၼၼ်ႉမႃးတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
မိူဝ်ႈဢၼ် တႃႇဝိတ်ႈ၊ ႁွတ်ႈထိုင်ၵႃႈတီႈဝဵင်း ၸိၵလၵ်ႉ၊ ယဝ်ႉၼၼ်ႉၸိုင်၊မၼ်းဢဝ်ဢုၵ်ႉၸႃႇဢၼ်ႁိမ်ဢဝ်လႆႈမႃးၼၼ်ႉၵမ်ႈၽွင်ႈပၼ်ၵႂႃႇၵႃႈတီႈၵေႃႉသႄႈမၼ်းတင်းလၢႆဢၼ်ပဵၼ်ၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းမဵဝ်း ဢိသရေး၊ ၼၼ်ႉသေလႄႈသင်ႇလၢတ်ႈဝႃႈ၊ “ဢၼ်ၼႆႉပဵၼ်လၢၵ်ႈသွင်ႇပုၼ်ႈသူဢၼ်ဢဝ်ၵႃႈၼႂ်းဢုၵ်ႉၸႃႇဢၼ်ႁိမ်လႆႈၵႃႈၼႂ်းမိုဝ်းရၢၼ်ႇသူႇ ထႃႇဝရႃႉၽြႃး၊ ၼၼ်ႉဢေႃႈ၊” ဝႃႈၼင်ႇၼႆဢေႃႈ။-
မၼ်းဢဝ်ပၼ်ၵႂႃႇၵႃႈတီႈၵူၼ်းဝဵင်း ပေႇသလႃႉ၊ ၵူၼ်းဝဵင်း ရႃႇမႃႉ၊ ၼႂ်းပွတ်းၸၢၼ်းမိူင်း ယုတႃႉ၊ ဢိၵ်ႇတင်းၵူၼ်းဝဵင်း ယတ်ႉတိရႃႉ၊-
ဝဵင်း ဢႃႇရေႃႇ၊ ဝဵင်း သိၽမုတ်ႉ၊ ဝဵင်း ဢေႇသတမေႃႇ၊-
ဝဵင်း ရႃႇၶလႃႉ၊ တီႈၵူၼ်းၶိူဝ်းႁိူၼ်း ယေႇရမေးလႃႉ၊ တီႈဝဵင်းဢၼ်ၵူၼ်း ၵိၼိ၊ ၶဝ်ယူႇ၊-
ဢိၵ်ႇတင်းၵူၼ်းဢၼ်မီးၼႂ်းဝဵင်း ႁေႃႇမႃႇ၊ ဝဵင်း ၶေႃႇရသၼ်ႇ၊ ဝဵင်း ဢႃႇထၵ်ႉ၊-
ဢိၵ်ႇတင်းဝဵင်း ႁေႇပရုၼ်ႇ၊ ၸိူဝ်းၼၼ်ႉဢၼ်ပဵၼ်ဝဵင်းၵႃႈဢၼ် တႃႇဝိတ်ႈ၊ ဢိၵ်ႇတင်းၵူၼ်းမၼ်းတင်းလၢႆယၢမ်ႈလႄႇထိုင်ၼၼ်ႉၸိူဝ်းၼၼ်ႉဢေႃႈ။
မိူဝ်ႈၼၼ်ႉ၊ၵူၼ်း ၽိလိတ်ႉတိ၊ ၸိူဝ်းၼၼ်ႉတိုၵ်းတေႃးၵူၼ်း ဢိသရေး၊ ၵႃႈတီႈၼိူဝ်လွႆ ၵိလပေႃႇ၊ ဢေႃႈ။ ၵူၼ်းမဵဝ်း ဢိသရေး၊ ၼမ်ၼႃႇလႆႈတၢႆၵႃႈတီႈၼၼ်ႈလႄႈၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇပႃးၸဵမ် သေႃးလု၊ တင်းလုၵ်ႈၸၢႆးမၼ်းၸိူဝ်းၼၼ်ႉဢွၼ်ၵၼ်ဢွၵ်ႇပၢႆႈၵႂႃႇဢေႃႈ။-
ၵူၺ်းၵႃႈ၊ၵူၼ်း ၽိလိတ်ႉတိ၊ ၶဝ်တိဢဝ်ၶဝ်လႆႈသေယဝ်ႉ၊ဢဝ်လုၵ်ႈၸၢႆး သေႃးလု၊ သၢမ်ၵေႃႉဢၼ်ပဵၼ်၊ ယေႃးၼႀၼ်ႇ၊ ဢၽိၼတပ်ႉ၊ ဢိၵ်ႇတင်း မေႇလၶိသွႃႇ၊ ၸိူဝ်းၼၼ်ႉတၢႆပႅတ်ႈဢေႃႈ။-
တၢင်းဢၼ်တိုၵ်းတေႃးႁႅင်းၼႃႇလွမ်ႉႁွပ်ႈ သေႃးလု၊ ယူႇသေလႄႈ၊တီႈတူဝ်မၼ်းၵေႃႈပိုၼ်ၵၢင်ႇရၢၼ်ႇသူႇထုၵ်ႇမႅၼ်ႈလႄႈတိူဝ်ႉမၢတ်ႇႁႅင်းၼႃႇဢေႃႈ။-
မၼ်းလၢတ်ႈတီႈၵူၼ်းဢွၼ်ႇဢၼ်ပႃးၶိူင်ႈလၢၵ်ႈၼၢၵ်ႈမၼ်းၼၼ်ႉလႄႈဝႃႈ၊ “ထွတ်ႇဢဝ်လႅဝ်းမႂ်းလႄႈတႅင်းၵဝ်ႁႂ်ႈပွင်ႇတႃႉ။ ၵူဝ်ၵူၼ်းဢၼ်ဢမ်ႇၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ၸိူဝ်းၼၼ်ႉတၵ်းမႃးတႅင်းၵဝ်ႁႂ်ႈပွင်ႇသေယဝ်ႉ၊ဢမ်ႇရူဝ်ႇသေႇၵူဝ်ယမ်ၼပ်ႉတေႃႈႁဵတ်းတီႈၵဝ်ဢေႃႈ၊” ဝႃႈၼင်ႇၼႆဢေႃႈ။ ၵူၺ်းၵႃႈ၊ၵူၼ်းဢွၼ်ႇၼၼ်ႉဢမ်ႇႁတ်းႁဵတ်း။ ပိူဝ်ႈၼႆလႄႈ သေႃးလု၊ လူမ်ႉတဵင်သႂ်ႇပၢႆလၢပ်ႇမၼ်းၵူၺ်းမၼ်းဢေႃႈ။-
ၵူၼ်းဢွၼ်ႇၼၼ်ႉႁၼ် သေႃးလု၊ တၢႆယဝ်ႉၼၼ်ႉသေလႄႈမၼ်းၵေႃႈလူမ်ႉတဵင်သႂ်ႇပၢႆလၢပ်ႇမၼ်းၵူၺ်းမၼ်းၼင်ႇၵဝ်ႇသေယဝ်ႉ၊တၢႆၸွမ်း သေႃးလု၊ ၵႂႃႇဢေႃႈ။-
ၼင်ႇၼၼ်လႄႈ သေႃးလု၊ ဢိၵ်ႇတင်းလုၵ်ႈၸၢႆးမၼ်းသၢမ်ၵေႃႉဢိၵ်ႇတင်းၵူၼ်းဢွၼ်ႇဢၼ်ပႃးလၢၵ်ႈၼၢၵ်ႈမၼ်းၼၼ်ႉတၢႆၵူၺ်းဢမ်ႇၵႃး၊ၵူၼ်း သေႃးလု၊ တင်းသဵင်ႈတင်းလူင်တၢႆၼင်ႇၵၼ်ၼႂ်းဝၼ်းလဵဝ်ၵၼ်ၼၼ်ႉဢေႃႈ။-
မိူဝ်ႈဢၼ်ၵူၼ်း ဢိသရေး၊ ၸိူဝ်းဢၼ်မီးယူႇၽၢႆႇၼိုင်ႈပၢင်ႇႁူၺ်ႈ ယေႇၸရေးလႃႉ၊ ဢိၵ်ႇတင်းၶဝ်ၸိူဝ်းဢၼ်မီးယူႇၽၢႆႇဝၼ်းဢွၵ်ႇၼမ်ႉ ယေႃးတၢၼ်ႇ၊ ၼၼ်ႉလႆႈငိၼ်းၶၢဝ်ႇလွင်ႈဢၼ်တပ်ႉသိုၵ်း ဢိသရေး၊ ၼီပၢႆႈယဝ်ႉ၊ဢိၵ်ႇတင်းလွင်ႈဢၼ် သေႃးလု၊ တင်းလုၵ်ႈၸၢႆးမၼ်းၸိူဝ်းၼၼ်ႉၵေႃႈတူၵ်းသုမ်းယဝ်ႉၼၼ်ႉၸိုင်၊ၶဝ်ပႅတ်ႈဝၢၼ်ႈပႅတ်ႈဝဵင်းၶဝ်သေလႄႈဢွၼ်ၵၼ်ၼီပၢႆႈဢေႃႈ။ မိူဝ်ႈၼၼ်ႉ၊ၵူၼ်း ၽိလိတ်ႉတိ၊ ၶဝ်မႃးသိမ်းဢဝ်ဝဵင်းၸိူဝ်းၼၼ်ႉဢေႃႈ။
ဝၢႆးသေၼႃႈသိုၵ်းၼၼ်ႉဝၼ်းၼိုင်ႈ၊မိူဝ်ႈဢၼ်ၵူၼ်း ၽိလိတ်ႉတိ၊ ၶဝ်ဢွၼ်ၵၼ်ၵဵပ်းထွတ်ႇဢဝ်ၶိူင်ႈတီႈတူဝ်တၢႆၸိူဝ်းၼၼ်ႉၸိုင်၊ၶဝ်ထူပ်းႁၼ် သေႃးလု၊ တင်းလုၵ်ႈၸၢႆးမၼ်းသၢမ်ၵေႃႉတၢႆၵႂႃႇယဝ်ႉၵႃႈၼိူဝ်လွႆ ၵိလပေႃႇ၊ ၼၼ်ႉဢေႃႈ။-
ၶဝ်တႅပ်းဢဝ်ၵွၵ်းႁူဝ် သေႃးလု၊ သေယဝ်ႉ၊ထွတ်ႇဢဝ်လၢၵ်ႈၼၢၵ်ႈၸဝ်ႈလႄႈပွႆႇၸႂ်ႉၵူၼ်းၵႂႃႇၵႃႈၼႂ်းမိူင်း ၽိလိတ်ႉတိ၊ ၵူႈတီႈၵူႈလႅၼ်ႁႂ်ႈလႆႈပိုၼ်ၽၢဝ်ႇၶၢဝ်ႇဢၼ်လီတီႈႁုၼ်ႇႁၢင်ႈသၢင်းထုၶဝ်လႂ်၊ဢိၵ်ႇတင်းတီႈၵူၼ်းတင်းလၢႆလႂ်ၼၼ်ႉဢေႃႈ။-
ၶဝ်ဢဝ်လၢပ်ႇၸဝ်ႈၼၼ်ႉဝႆႉၵႃႈၼႂ်းၵျွင်းဢၼ်ၶဝ်ၵူဝ်းၵႂၢႆႇၼၢင်းၽီဢၼ်ႁွင်ႉဝႃႈ၊ ဢႃႇသတရိတ်ႉ၊ သေယဝ်ႉ၊တူဝ်တၢႆမၼ်းၸဝ်ႈၸိုင်၊ၶဝ်ဢဝ်ႁွႆႈဝႆႉၵႃႈတီႈလမ်းဝဵင်း ပႅတ်ႉသၼ်ႇ၊ ၼၼ်ႉသေဢေႃႈ။
မိူဝ်ႈဢၼ်ၵူၼ်းဝဵင်း ယႃႇပႅတ်ႉ၊ မိူင်း ၵိလတ်ႉ၊ ၸိူဝ်းၼၼ်ႉငိၼ်းလွင်ႈဢၼ်ၵူၼ်း ၽိလိတ်ႉတိ၊ ႁဵတ်းတီႈ သေႃးလု၊ ၼၼ်ႉၸိုင်၊-
ၵူၼ်းဢၼ်ႁတ်းႁၢၼ်ၼႃႇသေပိူၼ်ႈၸိူဝ်းၼၼ်ႉဢွၼ်ၵၼ်လုၵ်ႉလႄႈၶီႇသိုၵ်းၶိုၼ်ႈၵႂႃႇတင်းၶိုၼ်းသေယဝ်ႉ၊ၶျႃးဢဝ်တူဝ်တၢႆ သေႃးလု၊ ဢိၵ်ႇတင်းတူဝ်တၢႆလုၵ်ႈၸၢႆးမၼ်းၸိူဝ်းၼၼ်ႉလူင်းသေလမ်းဝဵင်း ပႅတ်ႉသၼ်ႇ၊ လႄႈဢဝ်မႃးၵႃႈတီႈဝဵင်း ယႃႇပႅတ်ႉ၊ သေယဝ်ႉ၊တုတ်ႇၽႆးဢေႃႈ။-
ၶဝ်ဢွၼ်ၵၼ်ဢဝ်လုပ်ႇၶဝ်ၸိူဝ်းၼၼ်ႉလႄႈသၢင်းၵျူဝ်ႇတႂ်ႈတူၼ်ႈမႆႉလူင်ၵႃႈၼႂ်းဝဵင်းၼၼ်ႉသေယဝ်ႉ၊ၵမ်တၢင်းၵိၼ်ၸဵတ်းဝၼ်းဢေႃႈ။ ၵျၢမ်းသမူၺ်ႇလႃႉၽိုၼ်တီႈၼိုင်ႈယဝ်ႉယဝ်ႉဢေႃႈ။
လိုၼ်းသေ သေႃးလု၊ တၢႆယဝ်ႉၼၼ်ႉ၊ တႃႇဝိတ်ႈ၊ လုၵ်ႉသေၵႃႈတီႈဢၼ်မၼ်းၶႃႈၽၼ်းဢဝ်တၢႆၵူၼ်းမဵဝ်း ဢႃႇမလႅၵ်ႉ၊ ၸိူဝ်းၼၼ်ႉၶိုၼ်းမႃးလႄႈယူႇသဝ်းၵႃႈတီႈဝဵင်း ၸိၵလၵ်ႉ၊ သွင်ဝၼ်းဢေႃႈ။-
ထႅင်ႈဝၼ်းၼိုင်ႈၵူၼ်းဢွၼ်ႇၵေႃႉၼိုင်ႈလုၵ်ႉသေၵႃႈတီႈပၢင်တပ်ႉ သေႃးလု၊ ႁွတ်ႈမႃးဢေႃႈ။ မၼ်းၼၼ်ႉသိၵ်ႇၶူဝ်းၼုင်ႈမၼ်းဢိၵ်ႇတင်းဢဝ်မုၼ်ႈလိၼ်ၽွၵ်းသႂ်ႇၵႃႈၼိူဝ်ႁူဝ်မၼ်းသေလႄႈၼႄပျႃးတၢင်းမႆႈတၢင်းၶီမၼ်းယူႇဢေႃႈ။ မၼ်းၵႂႃႇၵႃႈတီႈ တႃႇဝိတ်ႈ၊ သေယဝ်ႉ၊ၶုပ်ႉမူပ်ႇၵႃႈၼိူဝ်လိၼ်လႄႈဝႆႈဢေႃႈ။-
တႃႇဝိတ်ႈ၊ ထၢမ်လႄႈဝႃႈ၊ “မႂ်းလုၵ်ႉၵႃႈတီႈလႂ်မႃး၊” ဝႃႈၼင်ႇၼႆလႄႈ၊ၵူၼ်းဢွၼ်ႇၼၼ်ႉလဝ်ႈလၢတ်ႈလႄႈဝႃႈ။ “ၶႃႈၸဝ်ႈပၢႆႈလွတ်ႈမႃးသေၵႃႈတီႈတပ်ႉ ဢိသရေး၊ တီႈၶႃႈဢေႃႈ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ထၢမ်လႄႈဝႃႈ၊ “လွင်ႈတၢင်းမၼ်းပဵၼ်ၸိူဝ်ႉၼင်ႇႁိုဝ်ၼၼ်ႉမွၵ်ႇလၢတ်ႈတီႈၵဝ်လူး၊” ဝႃႈၼင်ႇၼႆလႄႈ၊ၵူၼ်းဢွၼ်ႇၼၼ်ႉၵေႃႈလဝ်ႈလၢတ်ႈလႄႈဝႃႈ။ “တပ်ႉသိုၵ်းႁဝ်းၶႃႈလႆႈဢွၵ်ႇပၢႆႈသေၵႃႈတီႈၼႃႈသိုၵ်းၼၼ်ႉလႄႈၵူၼ်းႁဝ်းၶႃႈၼမ်ၼႃႇလႆႈလူမ်ႉတၢႆတီႈၶႃႈဢေႃႈ။ သေႃးလု၊ ဢိၵ်ႇတင်းလုၵ်ႈၸၢႆးမၼ်း ယေႃးၼႀၼ်ႇ၊ ၵေႃႈတၢႆယဝ်ႉတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ထၢမ်လႄႈဝႃႈ၊ “မႂ်းႁဵတ်းၸိူဝ်ႉၼင်ႇႁိုဝ်လႄႈႁုလွင်ႈဢၼ် သေႃးလု၊ ဢိၵ်ႇတင်းလုၵ်ႈၸၢႆးမၼ်း ယေႃးၼႀၼ်ႇ၊ တၢႆၼၼ်ႉ၊” ဝႃႈၼင်ႇၼႆသေယဝ်ႉ။
ၵူၼ်းဢွၼ်ႇၼၼ်ႉလဝ်ႈလၢတ်ႈလႄႈဝႃႈ၊ “ၶႃႈၸဝ်ႈယင်းဢမ်ႇထၢင်ႇဢမ်ႇထိူမ်လႄႈႁွတ်ႈထိုင်ၵႃႈတီႈလွႆ ၵိလပေႃႇ၊ သေယဝ်ႉ၊ထူပ်းႁၼ် သေႃးလု၊ တဝ်ႉဢိင်ၵႃႈၼိူဝ်ၵၼ်းႁွၵ်ႇမၼ်းယူႇၶႃႈဢေႃႈ။ တပ်ႉလေႃႉမႃႉဢိၵ်ႇတင်းတပ်ႉသိုၵ်းမႃႉတင်းလၢႆဢၼ်ပဵၼ်ရၢၼ်ႇသူႇၸဝ်ႈၸိူဝ်းၼၼ်ႉၶီႇသိုၵ်းၶိုၼ်ႈၸမ်တီႈမၼ်းၸဝ်ႈမႃးၼႃႇလူင်လၢင်ဢေႃႈ။-
မၼ်းၸဝ်ႈဝၢႆႇတူၺ်းတၢင်းလင်လႄႈႁၼ်ၶႃႈၸဝ်ႈသေယဝ်ႉ၊ႁွင်ႉၶႃႈၸဝ်ႈဢေႃႈ။ ၶႃႈၸဝ်ႈၵေႃႈၶိုၼ်းလဝ်ႈလၢတ်ႈလႄႈဝႃႈ၊ ‘ၶႃႈၸဝ်ႈမီးယူႇတီႈၶႃႈဢေႃႈ၊’ ဝႃႈၼင်ႇၼႆလႄႈ၊-
မၼ်းၸဝ်ႈထၢမ်လႄႈဝႃႈ၊ ‘မႂ်းပဵၼ်ၽူႈလႂ်၊’ ဝႃႈၼႆသေယဝ်ႉ၊ၶႃႈၸဝ်ႈလဝ်ႈလၢတ်ႈဝႃႈ၊ ‘ၶႃႈၸဝ်ႈပဵၼ်ၵူၼ်း ဢႃႇမလႅၵ်ႉ၊ တီႈၶႃႈဢေႃႈ၊’ ဝႃႈၼင်ႇၼႆတီႈၶႃႈဢေႃႈ။-
မၼ်းၸဝ်ႈၵေႃႈလၢတ်ႈတီႈၶႃႈၸဝ်ႈလႄႈဝႃႈ၊ ‘မႃးလႄႈၽၼ်းၵဝ်တၢႆတႃႉ။ ၵဝ်လႆႈၶၢမ်ႇဝူၺ်ႇတၼႃႇႁႅင်းၼႃႇလူင်လၢင်ၵွပ်ႈပိူဝ်ႈဢၼ်ၸႂ်ၵဝ်ဢမ်ႇၶၢတ်ႇလႆႈၼၼ်ႉဢေႃႈ၊’ ဝႃႈၼင်ႇၼႆဢေႃႈ။-
ၶႃႈၸဝ်ႈၵေႃႈၵႂႃႇၸုၵ်းၵႃႈႁိမ်းမၼ်းၸဝ်ႈသေလႄႈဢဝ်မၼ်းၸဝ်ႈတၢႆ၊ၵွပ်ႈပိူဝ်ႈၶႃႈၸဝ်ႈႁုလွင်ႈဢၼ်လိုၼ်းသေမၼ်းၸဝ်ႈလူမ်ႉယဝ်ႉၼၼ်ႉဢသၢၵ်ႈဢမ်ႇလိပ်းလႆႈထႅင်ႈၼၼ်ႉတီႈၶႃႈဢေႃႈ။ ၶႃႈၸဝ်ႈပူတ်းဢဝ်မွၵ်ႇႁူဝ်သရၽူႇၵႃႈတီႈႁူဝ်မၼ်းၸဝ်ႈဢိၵ်ႇတင်းဝႅၼ်ၵႃႈတီႈၶႅၼ်မိုဝ်းၸဝ်ႈသေလႄႈဢဝ်မႃးၸူးတီႈၸဝ်ႈႁဝ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ တႃႇဝိတ်ႈ၊ တိုတ်ႉသိၵ်ႇၶူဝ်းၼုင်ႈမၼ်းလူၺ်ႈတၢင်းဢၼ်မႆႈၸႂ်ၶီၸႂ်ၼႃႇလႄႈၵူၼ်းမၼ်းတင်းသဵင်ႈတင်းမူတ်းၵေႃႈဢွၼ်ၵၼ်ႁဵတ်းၸိူဝ်ႉၼင်ႇၼၼ်ဢေႃႈ။-
ၶဝ်ဢွၼ်ၵၼ်ႁွင်ႉႁႆႈပွင်ႉၶၢင်းလႄႈၵမ်သိၼ်ဢမ်ႇၵိၼ်တၢင်းၵိၼ်ပုၼ်ႈ သေႃးလု၊ တင်းလုၵ်ႈၸၢႆးမၼ်း ယေႃးၼႀၼ်ႇ၊ ဢိၵ်ႇတင်းၵူၼ်းမဵဝ်း ဢိသရေး၊ ဢၼ်ပဵၼ်ၵူၼ်း ထႃႇဝရႃႉၽြႃး၊ ဢၼ်လႆႈလူမ်ႉတၢႆၼမ်ၼႃႇၼႂ်းၼႃႈသိုၵ်းၼၼ်ႉဢေႃႈ။
တႃႇဝိတ်ႈ၊ ထၢမ်တီႈၵူၼ်းဢွၼ်ႇဢၼ်မႃးမွၵ်ႇလၢတ်ႈၶၢဝ်ႇငၢဝ်းၼၼ်ႉလႄႈဝႃႈ၊ “မႂ်းလုၵ်ႉသေၵႃႈတီႈလႂ်မႃး၊” ဝႃႈၼင်ႇၼႆလႄႈ၊ၵေႃႉၼၼ်ႉၶိုၼ်းလဝ်ႈလၢတ်ႈလႄႈဝႃႈ၊ “ၶႃႈၸဝ်ႈပဵၼ်ၵူၼ်းမဵဝ်း ဢႃႇမလႅၵ်ႉ၊ ဢၼ်ယူႇၵႃႈၼႂ်းမိူင်းၸဝ်ႈႁဝ်းၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ၵေႃႈလၢတ်ႈလႄႈဝႃႈ၊ “ႁဵတ်းႁိုဝ်လႄႈမႂ်းႁတ်းဢဝ်တၢႆၶုၼ်ႁေႃၶမ်းဢၼ် ထႃႇဝရႃႉၽြႃး၊ ပၼ်ၽိၵ်ႈသိၵ်ႈဝႆႉၼၼ်ႉၸိူဝ်ႉၼင်ႇႁိုဝ်၊” ဝႃႈၼင်ႇၼႆသေယဝ်ႉ၊-
တႃႇဝိတ်ႈ၊ ႁွင်ႉဢဝ်ၵူၼ်းဢွၼ်ႇမၼ်းၵေႃႉၼိုင်ႈလႄႈဝႃႈ၊ “ဢဝ်မၼ်းတၢႆတႃႉ၊” ဝႃႈၼင်ႇၼႆဢေႃႈ။ ၵေႃႉၼၼ်ႉၵေႃႈၶႃႈၽၼ်းၵူၼ်း ဢႃႇမလႅၵ်ႉ၊ ၼၼ်ႉတၢႆပႅတ်ႈသေဢေႃႈ။-
တႃႇဝိတ်ႈ၊ ၵေႃႈလၢတ်ႈဝႃႈ၊ “ႁႂ်ႈဢပျတ်ႈၼၼ်ႉတူၵ်းႁွတ်ႈၵႃႈၼိူဝ်ႁူဝ်မႂ်းသေၵမ်းလူၺ်ႈ။ မႂ်းၸီႇယၢင်ႇဢပျတ်ႈတူဝ်ၸဝ်ႈၵဝ်ႇပိူဝ်ႈဢၼ်မႂ်းၶၢမ်ႇသၢၵ်ႈသေႇလူၺ်ႈသူပ်းမႂ်းလႄႈဝႃႈ၊ ‘ၶႃႈၸဝ်ႈဢဝ်ၶုၼ်ႁေႃၶမ်းဢၼ် ထႃႇဝရႃႉၽြႃး၊ ပၼ်ၽိၵ်ႈသိၵ်ႈဝႆႉၼၼ်ႉတၢႆတီႈၶႃႈယဝ်ႉ၊’ ဝႃႈၼႆၼၼ်ႉယဝ်ႉ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ဢဝ်တင်းၵႂၢမ်းဢၼ်ႁွင်ႉႁႆႈပွင်ႉၶၢင်းၼၼ်ႉႁွင်ႉႁႆႈပွင်ႉၶၢင်းပုၼ်ႈ သေႃးလု၊ ဢိၵ်ႇတင်းလုၵ်ႈၸၢႆးမၼ်း ယေႃးၼႀၼ်ႇ၊ ၼၼ်ႉသေယဝ်ႉ၊-
ပူင်ဢမိင်ႉႁႂ်ႈဢဝ်တၢင်းဢၼ်ႁဵတ်းၵႂၢမ်း ၼၼ်ႉသွၼ်ပၼ်တီႈၵူၼ်းမဵဝ်း ယုတႃႉ၊ တင်းလၢႆဢေႃႈ။ တၢင်းဢၼ်ႁဵတ်းၵႂၢမ်းၼၼ်ႉပႃးၼႂ်းလိၵ်ႈ ယႃႇသႃႇ၊ လႄႈဝႃႈၸမ်ႉ။
“ဢူဝ်း၊မဵဝ်း ဢိသရေး၊ ႟။ ၵႃႈၼိူဝ်ထႃႇၼႃႉ တီႈသုင်မႂ်းၸိူဝ်းၼၼ်ႉ၊ မုၼ်ၽုင်းသရေႇမႂ်းလႆႈၶၢမ်ႇတၢင်းတၢႆယဝ်ႉ၊ ႁူဝ်ႁၢၼ်ၵူၼ်းသိုၵ်းဢၼ်ႁတ်းႁၢၼ်ၸိူဝ်းၼၼ်ႉတူၵ်းသုမ်းယဝ်ႉလူင်ပႄႇ။
ယႃႇပေဢဝ်လွင်ႈမၼ်းမွၵ်ႇလၢတ်ႈတီႈဝဵင်း ၵတ်ႉတိ၊ ယႃႇပေမွၵ်ႇလၢတ်ႈၶႆႈၼႄလွင်ႈမၼ်းၼၼ်ႉ၊ တီႈၼႂ်းသဵၼ်ႈတၢင်းဝဵင်း ဢႃႇသၵေႇလုၼ်ႇ၊ ၸိူဝ်းၼၼ်ႉ၊ ၵူဝ်ၽူႈယိင်းၵူၼ်း ၽိလိတ်ႉတိ၊ ၶဝ်တၵ်း ၸူမ်းသိူဝ်းလႄႈ ၵူဝ်လုၵ်ႈယိင်းၵူၼ်းၸိူဝ်းဢၼ်ဢမ်ႇၶၢမ်ႇဢဝ် မၢင်ႇၵလႃႇပၢတ်ႇပၢႆၼင်ၼၼ်ႉ၊ တၵ်းဢွၼ်ၵၼ်မူၼ်ႈပျေႃႇသႂၢင်ႇသိူဝ်းဢေႃႈ။
လွႆ ၵိလပေႃႇ၊ ၶဝ်႟။ ယႃႇႁႂ်ႈၼမ်ႉၼၢႆးတင်းၽူၼ်တူၵ်းသႂ်ႇၵႃႈၼိူဝ်သူသေလႄႈ ႁႂ်ႈႁႆႈၼႃးတင်းလၢႆ ႁၢမ်းယူႇတႃႇသေႇသေၵမ်း။ လွင်ႈမၼ်းၸမ်ႉ၊ၶႅပ်းႁႄႉလၢၵ်ႈၼၢၵ်ႈႁူဝ်ႁၢၼ်ၵူၼ်းသိုၵ်းယိပ်းတိုဝ်းၼၼ်ႉ၊ တူၵ်းဝႆႉပဵၼ်ၶီႈမိင်ႈမူတ်းယဝ်ႉ။ ၶႅပ်းႁႄႉလၢၵ်ႈၼၢၵ်ႈဢၼ် သေႃးလု၊ တိုဝ်းၼၼ်ႉၵေႃႈ၊ ဢမ်ႇသွင်ႇဢမ်ႇႁိူဝ်ႈမၢပ်ႈလူၺ်ႈၼမ်ႉမၼ်းယဝ်ႉ။
ၵၢင်ႇ ယေႃးၼႀၼ်ႇ၊ ဢမ်ႇၸၢင်ႈၶိုၼ်းဝၢႆႇၶိုၼ်းၸူးၵႃႈတီႈႁူဝ်ဢူၵ်းရၢၼ်ႇသူႇမၼ်း၊ ၵႃႈတီႈၵွၼ်ႈၶႆၵွၼ်ႈမၼ်းႁူဝ်ႁၢၼ်ၵူၼ်းသိုၵ်းၸိူဝ်းဢၼ်ႁႅင်းယႂ်ႇၼၼ်ႉလႃးလႃး၊ လၢပ်ႇ သေႃးလု၊ ဢမ်ႇၸၢင်ႈၶိုၼ်းမႃးၸူးတီႈၵပ်းမၼ်းၼၼ်ႉလၢႆလၢႆပဝ်ႇပဝ်ႇ။
သေႃးလု၊ တင်း ယေႃးၼႀၼ်ႇ၊ ၼၼ်ႉပဵၼ်ဢၼ်လီႁၵ်ႉလီပႅင်းလႄႈ ထုၵ်ႇၸႂ်ၵျိူၵ်ႈၸႂ်ပိူၼ်ႈယူႇသေလႄႈၶဝ်သွင်ၵေႃႉၼၼ်ႉလိပ်းသေဢမ်ႇဝႃႈ၊တၢႆသေဢမ်ႇဝႃႈ၊ ဢမ်ႇတွၼ်ႉၽၢတ်ႇၵၼ်ၽႄၵၼ်လႃးလႃး၊ ၶဝ်ၼၼ်ႉၶၼ်ၽႂ်းလိူဝ်တွၼ်းၼႃႇသေ ၼူၵ်ႉၶၢင်ႇလေႃႉလႄႈႁႅင်းယႂ်ႇၼႃႇသေ သၢင်ႇသီႈဢေႃႈ။
ၽူႈယိင်းမဵဝ်း ဢိသရေး၊ ၶဝ်႟။ မီးတၢင်းဢၼ် မႆႈၸႂ်ၶီၸႂ်ပုၼ်ႈ သေႃးလု၊ တႃႉ။ မၼ်းဢဝ်ၶူဝ်းၼုင်ႈဢၼ်လႅင်ၵမ်ႇၼုင်ႈမႆပၼ်သူႁႂ်ႈႁၢင်ႈလီႁၢင်ႈငၢမ်းလႄႈ ဢဝ်ၶူဝ်းသႅင်ၶူဝ်းၶမ်းႁၢင်ႈၶိူင်ႈပၼ်သူယဝ်ႉ။
ၵူၼ်းသိုၵ်းဢၼ်ႁတ်းႁၢၼ်တင်းလၢႆလႆႈတူၵ်းသုမ်းလႄႈ ၶဝ်လႆႈၶၢမ်ႇတၢင်းတၢႆၵႃႈၼႂ်းၼႃႈသိုၵ်းယဝ်ႉ၊ ယေႃးၼႀၼ်ႇ၊ ၵေႃႈလႆႈတူၵ်းလူမ်ႉတၢႆၵႃႈၼိူဝ်လွႆၼၼ်ႉယဝ်ႉလူင်ပႄႇ။
ပီႈၸၢႆးၵဝ် ယေႃးၼႀၼ်ႇ၊ ႟။ ၵဝ်မီးတၢင်းဢၼ်ၸႂ်ႁဵဝ်ႇၸွပ်ႈၵွပ်ႈမႂ်းဢေႃႈ။ မႂ်းပဵၼ်ၵေႃႉဢၼ်ၵဝ်ထုၵ်ႇၸႂ်လႄႈႁၵ်ႉပႅင်းၼႃႇလူင်လၢင်ဢေႃႈ။ တၢင်းႁၵ်ႉမႅတ်ႈတႃႇမႂ်းဢၼ်ႁၵ်ႉပႅင်းၵဝ်ၼၼ်ႉ လီဢၢမ်းၼႃႇလူင်လၢင်လႄႈ ပဵၼ်တၢင်းႁၵ်ႉမႅတ်ႈတႃႇဢၼ်လိူဝ်တွၼ်းၼႃႇသေတၢင်းႁၵ်ႉယိင်းလူးၵွၼ်ႇဢေႃႈ။
ၵူၼ်းသိုၵ်းဢၼ်ႁတ်းႁၢၼ်တင်းလၢႆတူၵ်းသုမ်းလူမ်ႉတၢႆယဝ်ႉလႄႈ လၢၵ်ႈၼၢၵ်ႈၶဝ်ၸိူဝ်းၼၼ်ႉသုမ်းပႅတ်ႈလၢႆလၢႆ၊ ဢမ်ႇပွင်ႇလွင်ႈၵႃႈသင်ယဝ်ႉလူင်ပႄႇ၊” ဝႃႈၼင်ႇၼႆဢေႃႈ။
လိုၼ်းၼၼ်ႉ၊ တႃႇဝိတ်ႈ၊ လဝ်ႈထၢမ်တီႈ ထႃႇဝရႃႉၽြႃး၊ လႄႈဝႃႈ၊ “ၶႃႈၸဝ်ႈတၵ်းလႆႈၶိုၼ်ႈၸူးၵႂႃႇတီႈဝဵင်း ယုတႃႉ၊ သေဝဵင်းဝဵင်းတီႈၶႃႈႁိုဝ်း၊” ဝႃႈၼင်ႇၼႆလႄႈ၊ ထႃႇဝရႃႉၽြႃး၊ ၶိုၼ်းလၢတ်ႈလႄႈဝႃႈ၊ “ၶိုၼ်ႈၵႂႃႇတႃႉ၊” ဝႃႈၼင်ႇၼႆဢေႃႈ။ တႃႇဝိတ်ႈ၊ သမ်ႉလဝ်ႈထၢမ်လႄႈဝႃႈ၊ “ၶႃႈၸဝ်ႈတၵ်းလႆႈၶိုၼ်ႈၵႂႃႇၸူးတီႈဝဵင်းလႂ်တီႈၶႃႈ၊” ဝႃႈၼင်ႇၼႆလႄႈ၊ ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ၶိုၼ်ႈၵႂႃႇၸူးတီႈဝဵင်း ႁေႇပရုၼ်ႇ၊ တႃႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ တႃႇဝိတ်ႈ၊ ပႃးဢဝ်မေးမၼ်းသွင်ၵေႃႉ၊ ဢႁိၼွမ်ႇ၊ ၽူႈယိင်းဝဵင်း ယေႇၸရေး၊ ဢိၵ်ႇတင်း ဢၽိၵေးလႃႉ၊ ၽူႈယိင်းဝဵင်း ၵရမေႇလႃႉ၊ မႄႈမၢႆႈ ၼႃႇပလႃႉ၊ ၸိူဝ်းၼၼ်ႉသေလႄႈၶိုၼ်ႈၵႂႃႇဢေႃႈ။-
မၼ်းႁွင်ႉပႃးဢဝ်ၵူၼ်းမၼ်းတင်းလၢႆ ၸႃႉၸဵမ်မေးၶဝ်လုၵ်ႈၶဝ်တင်းလၢႆသေလႄႈယူႇသဝ်းၵႃႈတီႈဝၢၼ်ႈဝဵင်း ႁေႇပရုၼ်ႇ၊ ၸိူဝ်းၼၼ်ႉဢေႃႈ။-
မိူဝ်ႈၼၼ်ႉ၊ၵူၼ်းမဵဝ်း ယုတႃႉ၊ တင်းလၢႆမႃးလႄႈဢွၼ်ၵၼ်ပၼ်ၽိၵ်ႈသိၵ်ႈတီႈ တႃႇဝိတ်ႈ၊ ႁႂ်ႈမၼ်းပဵၼ်ၶုၼ်ႁေႃၶမ်းမိူင်း ယုတႃႉ၊ ဢေႃႈ။ မိူဝ်ႈဢၼ် တႃႇဝိတ်ႈ၊ လႆႈငိၼ်းလွင်ႈဢၼ်ၵူၼ်းဝဵင်း ယႃႇပႅတ်ႉ၊ မိူင်း ၵိလတ်ႉ၊ ၶဝ်ဢွၼ်ၵၼ်သၢင်းၵျူဝ်ႇတူဝ်တၢႆ သေႃးလု၊ ၼၼ်ႉၸိုင်၊-
မၼ်းပွႆႇၸႂ်ႉၵူၼ်းၵမ်ႈၽွင်ႈၵႂႃႇၸူးတီႈၵူၼ်းဝဵင်း ယႃႇပႅတ်ႉ၊ ၸိူဝ်းၼၼ်ႉလႄႈသမ်ႉသင်ႇၵႂၢမ်းၵႂႃႇတီႈၶဝ်လႄႈဝႃႈ၊ “ႁႂ်ႈ ထႃႇဝရႃႉၽြႃး၊ ပၼ်တၢင်းလီမၢင်ႇၵလႃႇတီႈသူပိူဝ်ႈဢၼ်သူႁဵတ်းၵျေးၸူးၵရုၼႃႇတီႈၶုၼ်ႁေႃၶမ်းသူ သေႃးလု၊ ဢၼ်သူဢဝ်တူဝ်တၢႆမၼ်းၸဝ်ႈသၢင်းၵျူဝ်ႇပၼ်ၼၼ်ႉသေၵမ်းလူၺ်ႈ။-
ႁႂ်ႈ ထႃႇဝရႃႉၽြႃး၊ ႁဵတ်းၵျေးၸူးၵရုၼႃႇဢိၵ်ႇတင်းၵျေးၸူးသဵတ်ႈၸႃႇတီႈသူသေၵမ်းလူၺ်ႈ။ ၵဝ်ၵေႃႈတၵ်းတွပ်ႇတႅၼ်းၵျေးၸူးၼႆႉတီႈသူၵွပ်ႈပိူဝ်ႈဢၼ်သူလႆႈႁဵတ်းလွင်ႈတၢင်းၼႆႉၼၼ်ႉဢေႃႈ။-
မိူဝ်ႈလဵဝ်ၼႆႉၸိုင်၊ႁႂ်ႈမိုဝ်းသူႁႅင်းယႂ်ႇလႄႈမီးတၢင်းဢၼ်ၵတ်ႉၶႅၼ်ႇႁတ်းႁၢၼ်တႃႉ။ လွင်ႈမၼ်းၸမ်ႉ၊ၶုၼ်ႁေႃၶမ်းသူ သေႃးလု၊ တၢႆယဝ်ႉ။ ၵူၼ်းမဵဝ်း ယုတႃႉ၊ တင်းလၢႆဢွၼ်ၵၼ်ပၼ်ၽိၵ်ႈသိၵ်ႈတီႈၵဝ်၊ႁႂ်ႈၵဝ်လႆႈပဵၼ်ၶုၼ်ႁေႃၶမ်းၶဝ်ယဝ်ႉ၊” ဝႃႈၼင်ႇၼႆဢေႃႈ။
ၸဝ်ႈၵွၼ်းတပ်ႉသိုၵ်းလူင် ဢပ်ႉပၼႃး၊ ဢၼ်ပဵၼ်လုၵ်ႈၸၢႆး ၼေးရႃႉ၊ ဢၼ်ဢွၼ်ႁူဝ်တပ်ႉသိုၵ်း သေႃးလု၊ ၼၼ်ႉၼီပၢႆႈၵႂႃႇလူၺ်ႈၵၼ်တင်း ဢိသပေႃႇသႅတ်ႉ၊ လုၵ်ႈၸၢႆး သေႃးလု၊ ၼၼ်ႉၶၢမ်ႈၼမ်ႉ ယေႃးတၢၼ်ႇ၊ ၵႂႃႇၸူးတီႈဝဵင်း မႁႃႇၼိမ်ႇ၊ ဢေႃႈ။-
ၵႃႈတီႈၼၼ်ႈ ဢပ်ႉပၼႃး၊ ယုၵ်ႉယွင်ႈ ဢိသပေႃႇသႅတ်ႉ၊ ႁႂ်ႈပဵၼ်ၶုၼ်ႁေႃၶမ်းဢၼ်ဢုပ်ႉပိူင်ႇသိုင်ႇၸိုင်ႈဝၢၼ်ႈမိူင်း ၵိလတ်ႉ၊ဢႃႇသျႃႇ၊ယေႇၸရေး၊ဢေႇၽရိမ်ႇ၊ တင်း ပိၼ်ႇယႃႇမိၼ်ႇ၊ ဢၼ်ပဵၼ်မိူင်း ဢိသရေး၊ တင်းသဵင်ႈတင်းမူတ်းၼၼ်ႉဢေႃႈ။-
ဢိသပေႃႇသႅတ်ႉ၊ ၼၼ်ႉမိူဝ်ႈဢၼ်မၼ်းပဵၼ်ၶုၼ်ႁေႃၶမ်းၼၼ်ႉၸိုင်၊ဢသၢၵ်ႈလႆႈသီႇသိပ်းပီယဝ်ႉလႄႈမၼ်းၸၢမ်ႇၸႃးဢုပ်ႉပိူင်ႇယူႇသွင်ပီဢေႃႈ။ ၸိူဝ်ႉၶိူဝ်းမဵဝ်း ယုတႃႉ၊ ၸမ်ႉ၊ဢွၼ်ၵၼ်ၸွမ်းလင် တႃႇဝိတ်ႈ၊ လႄႈ၊-
မၼ်းၸၢမ်ႇၸႃးယူႇၵႃႈၼႂ်းဝဵင်း ႁေႇပရုၼ်ႇ၊ သေယဝ်ႉ၊ဢုပ်ႉပိူင်ႇၵူၼ်းမဵဝ်း ယုတႃႉ၊ ၸဵတ်းပီပၢႆႁူၵ်းလိူၼ်ဢေႃႈ။
ဢပ်ႉပၼႃး၊ ႁွင်ႉပႃးဢဝ်တင်းၶုၼ်ဢၼ်ပွင်ၵၢၼ်ၼႂ်းႁေႃ ဢိသပေႃႇသႅတ်ႉ၊ ၸိူဝ်းၼၼ်ႉလုၵ်ႉသေၵႃႈတီႈဝဵင်း မႁႃႇၼိမ်ႇ၊ လႄႈၵႂႃႇၵႃႈတီႈဝဵင်း ၵိပွင်ႇ၊ ဢေႃႈ။-
ယွႃႇၽႃႉ၊ ဢၼ်မႄႈမၼ်းပဵၼ် ၸေႇရုယႃႇ၊ ၼၼ်ႉ၊ဢိၵ်ႇတင်းၶုၼ်ဢၼ်ပွင်ၵၢၼ်ၼႂ်းႁေႃ တႃႇဝိတ်ႈ၊ ၵမ်ႈၽွင်ႈဢွၵ်ႇၵႂႃႇႁူပ်ႉထူပ်းၵၼ်ၵႃႈႁိမ်းၼွင် ၵိပွင်ႇ၊ သေယဝ်ႉ၊မူႇၼိုင်ႈၼင်ႈယူႇၵႃႈတီႈၽၢႆႇၼိုင်ႈၼမ်ႉၼွင်လႄႈ၊မူႇၼိုင်ႈသမ်ႉၼင်ႈတေႃႇၼႃႈယူႇထႅင်ႈၽၢႆႇၼိုင်ႈဢေႃႈ။-
ဢပ်ႉပၼႃး၊ လၢတ်ႈတီႈ ယွႃႇၽႃႉ၊ လႄႈဝႃႈ၊ “ႁႂ်ႈၵူၼ်းဢွၼ်ႇတင်းသွင်ၽၢႆႇဢွၵ်ႇမႃးၶေႉၶဵင်ႇတိုၵ်းၵၼ်ၽၢႆႇၼႃႈႁဝ်းတႃႉ၊” ဝႃႈၼင်ႇၼႆလႄႈ ယွႃႇၽႃႉ၊ ၵေႃႈဝႃႈ “လီယဝ်ႉ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ၊ၼပ်ႉဢၢၼ်ႇဢဝ်ၵူၼ်းသိပ်းသွင်ၵေႃႉတၢင်တူဝ် ဢိသပေႃႇသႅတ်ႉ၊ တင်းၸိူဝ်ႉၶိူဝ်းမဵဝ်း ပိၼ်ႇယႃႇမိၼ်ႇ၊ ဢိၵ်ႇတင်းၵူၼ်း တႃႇဝိတ်ႈ၊ သိပ်းသွင်ၵေႃႉလုၵ်ႉသေလႄႈတိုၵ်းတေႃးၵၼ်ဢေႃႈ။-
ၶဝ်ၼၼ်ႉၵေႃႉတေႃႇၵေႃႉယိပ်းၵမ်ၵွၵ်းႁူဝ်ၵၼ်ယူႇ၊ဢဝ်မိတ်ႈတႅင်းသႂ်ႇပဵမ်ႉၵၼ်သေလႄႈၶဝ်တင်းသၢဝ်းသီႇၵေႃႉလူမ်ႉတၢႆတီႈလဵဝ်ၵၼ်ဢေႃႈ။ ပိူဝ်ႈၼႆလႄႈတီႈၼၼ်ႈဢၼ်မီးၼႂ်းဢိူင်ႇ ၵိပွင်ႇ၊ ၼၼ်ႉလႆႈႁွင်ႉႁဵၵ်ႈၸိုဝ်ႈ ႁေႇလၵႃႉႁိတ်ႉၸုရိမ်း၊ ဢေႃႈ။
ၼႂ်းဝၼ်းၼၼ်ႉၼႃႈသိုၵ်းပေႃႇပဵၼ်မႃးလႄႈမီးတၢင်းဢၼ်တိုၵ်းတေႃးၵၼ်ႁႅင်းၼႃႇဢေႃႈ။ ဢပ်ႉပၼႃး၊ ဢိၵ်ႇတင်းၵူၼ်း ဢိသရေး၊ ၶဝ်တူၵ်းသုမ်းၼႂ်းမိုဝ်းၵူၼ်း တႃႇဝိတ်ႈ၊ တင်းလၢႆဢေႃႈ။-
လုၵ်ႈၸၢႆး ၸေႇရုယႃႇ၊ သၢမ်ၵေႃႉဢၼ်ဝႃႈ၊ ယွႃႇၽႃႉ၊ဢၽိသေး၊ တင်း ဢသႃႇႁေးလႃႉ၊ ၸိူဝ်းၼၼ်ႉၵေႃႈပႃးဢေႃႈ။ ဢသႃႇႁေးလႃႉ၊ ၼၼ်ႉတိၼ်ၶၼ်တိၼ်ၽႂ်းမိူၼ်ၸိူဝ်ႉၼင်ႇၽၢၼ်းလႄႈ၊-
ၶုၼ်ႇလႅၼ်ႈလိုပ်ႈလမ်း ဢပ်ႉပၼႃး၊ ၵႂႃႇသိုဝ်ႈသိုဝ်ႈယင်းဢမ်ႇဝႄႉသၢႆႉဝႄႉၶႂႃဢေႃႈ။-
ဢပ်ႉပၼႃး၊ ဝၢႆႇတူၺ်းလႄႈလၢတ်ႈဝႃႈ၊ “ ဢသႃႇႁေးလႃႉ၊ ႟။ ပဵၼ်မႂ်းႁိုဝ်း၊” ဝႃႈၼင်ႇၼႆလႄႈ မၼ်းၶိုၼ်းလၢတ်ႈလႄႈဝႃႈ၊ “ပဵၼ်ၵဝ်ယဝ်ႉ၊” ဝႃႈၼင်ႇၼႆဢေႃႈ။
ဢပ်ႉပၼႃး၊ ၵေႃႈလၢတ်ႈလႄႈဝႃႈ၊ “ယႃႇပေလမ်းၸွမ်းၵဝ်ယဝ်ႉ။ ၶုၼ်ႇလႅၼ်ႈၵႂႃႇၵႃႈတီႈၵူၼ်းသိုၵ်းၸိူဝ်းၼၼ်ႉသေၵေႃႉၵေႃႉလႄႈတိၵမ်ႁိမ်ဢဝ်လၢၵ်ႈၼၢၵ်ႈမၼ်းတႃႉ၊” ဝႃႈၼင်ႇၼႆဢေႃႈ။ ၵူၺ်းၵႃႈ၊ ဢသႃႇႁေးလႃႉ၊ လိုပ်ႈလမ်းၸွမ်းမၼ်းယူႇတိၵ်းတိၵ်းဢေႃႈ။-
ဢပ်ႉပၼႃး၊ သမ်ႉလၢတ်ႈတီႈမၼ်းထႅင်ႈလႄႈဝႃႈ၊ “ယႃႇပေလမ်းၸွမ်းၵဝ်ယဝ်ႉ။ ႁဵတ်းသင်လႄႈတိုၵ်းသူၼ်းႁႂ်ႈၵဝ်လႆႈဢဝ်မႂ်းတၢႆယူႇၸိူဝ်ႉၼင်ႇႁိုဝ်။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ၵဝ်တၵ်းႁဵတ်းၸိူဝ်ႉၼင်ႇႁိုဝ်ၼႄၼႃႈၵဝ်တီႈပီႈၸၢႆးမႂ်း ယွႃႇၽႃႉ၊ ၼၼ်ႉလႆႈ၊” ဝႃႈၼင်ႇၼႆဢေႃႈ။-
ဢသႃႇႁေးလႃႉ၊ ယင်းဢမ်ႇၵိုတ်းဢမ်ႇသဝ်းလႄႈလမ်းၸွမ်းယူႇဢေႃႈ။ ဢပ်ႉပၼႃး၊ ၵေႃႈဢဝ်သူၼ်ႈႁွၵ်ႇမၼ်းထိမ်ႈမႃးတၢင်းလင်လႄႈတႅင်းမႅၼ်ႈသႂ်ႇတီႈပုမ် ဢသႃႇႁေးလႃႉ၊ ထၢၼ်ႈပေႃးပွင်ႇပိဝ်ၵႂႃႇတၢင်းသၼ်လင်မၼ်းသေယဝ်ႉ၊မၼ်းလူမ်ႉတၢႆၵႃႈတီႈၼၼ်ႈၵမ်းလဵဝ်ဢေႃႈ။ ၵူၼ်းၸိူဝ်းဢၼ်ႁွတ်ႈထိုင်မႃးၵႃႈတီႈဢၼ်မၼ်းလူမ်ႉတၢႆၼၼ်ႉဢွၼ်ၵၼ်ၸုၵ်းသဝ်းယူႇၵႃႈတီႈၼၼ်ႈဢေႃႈ။
ယွႃႇၽႃႉ၊ တင်း ဢၽိသေး ၸမ်ႉ၊လိုပ်ႈလမ်းၸွမ်း ဢပ်ႉပၼႃး၊ ၵႂႃႇလႄႈမိူဝ်ႈဢၼ်ၶဝ်ႁွတ်ႈထိုင်ၵႃႈတီႈလွႆ ဢမ်ႇမႃႇ၊ ဢၼ်မီးၽၢႆႇဝၼ်းဢွၵ်ႇဝဵင်း ၵိဢႃႇ၊ ၵႃႈၼိူဝ်သဵၼ်ႈတၢင်းဢၼ်ၵႂႃႇၸူးတီႈထိူၼ်ႇ ၵိပွင်ႇ၊ ယူႇၼၼ်ႉၸိုင်၊ၵၢင်ဝၼ်းတူၵ်းသေဢေႃႈ။-
ၵူၼ်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ တင်းလၢႆသမ်ႉၸုတုမ်ၵၼ်မႃးၵႃႈတီႈ ဢပ်ႉပၼႃး၊ လႄႈၶဝ်ဢဝ်တီႈယူႇၵႃႈၼိူဝ်ပၢႆၸိၵ်းလွႆဝႆႉဢေႃႈ။-
မိူဝ်ႈၼၼ်ႉ၊ ဢပ်ႉပၼႃး၊ ႁွင်ႉသႅၼ်ႇၸူးတီႈ ယွႃႇၽႃႉ၊ လႄႈလၢတ်ႈဝႃႈ၊ “ႁဝ်းတေႁဵတ်းၸိူဝ်ႉၼင်ႇၼႆတိုၵ်းတေႃးၵၼ်ယူႇတႃႇသေႇယဝ်ႉႁိုဝ်း။ တီႈၵမ်းလိုၼ်းသုတ်းၼၼ်ႉတၵ်းပဵၼ်တၢင်းဢၼ်ၶူမ်ၸႂ်ၵူၺ်းၸိုင်၊မႂ်းဢမ်ႇၶႆႈၸႂ်ၸဵၼ်းၸႃးမႅၼ်ႈႁိုဝ်း။ ႁဝ်းၸိူဝ်းၼႆႉ၊ပဵၼ်ပီႈၼွင်ႉၵူၼ်းမိူင်းလဵဝ်ၵၼ်ၵူၺ်းလႄႈမႂ်းယင်းဢမ်ႇပူင်ဢမိင်ႉႁႂ်ႈၵူၼ်းမႂ်းတင်းလၢႆၵိုတ်းသဝ်းသေတၢင်းဢၼ်လိုပ်ႈၸွမ်းလမ်းၸွမ်းႁဝ်းၼႆႉလႄႈတၵ်းယူႇႁိုင်ၵႃႈႁိုဝ်၊” ဝႃႈၼင်ႇၼႆဢေႃႈ။
ယွႃႇၽႃႉ၊ တိူင်ႇၵၢဝ်ႇလၢတ်ႈလႄႈဝႃႈ၊ “ၵႃႈၼင်ႇဢၼ်ၽြႃးပဵၼ်ၸဝ်ႈဢသၢၵ်ႈလိပ်းယူႇၼၼ်ႉ၊ပေႃးမႂ်းယင်းဢမ်ႇလၢတ်ႈဢွၼ်တၢင်းၸိုင်၊ၵူၼ်းၵဝ်တင်းလၢႆတၵ်းလိုပ်ႈလမ်းၸွမ်းပီႈၼွင်ႉမႂ်းယူႇတေႃႇထိုင်ႁွတ်ႈၶိင်ႇၵၢင်ၼႂ်ဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ ယွႃႇၽႃႉ၊ ပဝ်ႇတိုင်ႈသဵင်ၼႄးၶရႃႇဢၼ်ႁႂ်ႈၵူၼ်းမၼ်းတင်းလၢႆၵိုတ်းသဝ်းသေတၢင်းဢၼ်လိုပ်ႈလမ်းၸွမ်းၵူၼ်းမဵဝ်း ဢိသရေး၊ ၶဝ်လႄႈသိုၵ်းၵေႃႈထၢတ်ႇယဵၼ်ၵႂႃႇဢေႃႈ။
ဢပ်ႉပၼႃး၊ တင်းၵူၼ်းမၼ်းၸိူဝ်းၼၼ်ႉၵေႃႈၽႃႇလတ်းပၢင်ႇႁူၺ်ႈၼမ်ႉ ယေႃးတၢၼ်ႇ၊ ၵႂႃႇတင်းၶိုၼ်းလႄႈၶၢမ်ႈၼမ်ႉ ယေႃးတၢၼ်ႇ၊ သေယဝ်ႉ၊သမ်ႉပႆထႅင်ႈၶိင်ႇၵၢင်ၼႂ်တင်းၼႂ်ယဝ်ႉၸင်ႇႁွတ်ႈၽႅဝ်ၵႂႃႇၵႃႈတီႈဝဵင်း မႁႃႇၼိမ်ႇ၊ ဢေႃႈ။
မိူဝ်ႈဢၼ် ယွႃႇၽႃႉ၊ ၵိုတ်းသဝ်းသေတၢင်းဢၼ်လိုပ်ႈလမ်းၸွမ်းၼၼ်ႉသေယဝ်ႉ၊မၼ်းသင်ႇႁႂ်ႈၵူၼ်းမၼ်းတင်းလၢႆၸုတုမ်ၵၼ်မႃးၼၼ်ႉႁႂ်ႈလႆႈႁုဝႃႈ၊ၵူၼ်းၶဝ်လႆႈလုႁၢႆၵႂႃႇသိပ်းၵဝ်ႈၵေႃႉဢိၵ်ႇတင်း ဢသႃႇႁေးလႃႉ၊ ဢေႃႈ။-
ၵူၼ်း တႃႇဝိတ်ႈ၊ ၸိူဝ်းၼၼ်ႉၶႃႈၽၼ်းပႅတ်ႈၵူၼ်း ဢပ်ႉပၼႃး၊ မဵဝ်း ပိၼ်ႇယႃႇမိၼ်ႇ၊ ၸိူဝ်းၼၼ်ႉတၢႆသၢမ်ပၢၵ်ႇပၢႆႁူၵ်းသိပ်းၵေႃႉဢေႃႈ။-
ယွႃႇၽႃႉ၊ ဢိၵ်ႇတင်းၵူၼ်းမၼ်းတင်းလၢႆႁၢမ်တူဝ်တၢႆ ဢသႃႇႁေးလႃႉ၊ ၼၼ်ႉၵႂႃႇသေလႄႈသၢင်းၵျူဝ်ႇၵႃႈၼႂ်းပႃႇႁဵဝ်ႈၵူၼ်းႁိူၼ်းၵူၼ်းယေးမၼ်းဢၼ်မီးၵႃႈတီႈဝဵင်း ပႅတ်ႉလႁႅမ်ႇ၊ ၼၼ်ႉဢေႃႈ။ ၶဝ်ဢွၼ်ၵၼ်သိုပ်ႇပႆတၢင်းၵႂႃႇလႄႈမိူဝ်ႈဢၼ်မိူင်းလႅင်းၸိုင်၊ၶဝ်ႁွတ်ႈထိုင်ၵႂႃႇတီႈဝဵင်း ႁေႇပရုၼ်ႇ၊ ဢေႃႈ။
မိူဝ်ႈၼၼ်ႉပဵၼ်သိုၵ်းပဵၼ်သိူဝ်ႁိုင်ၼႃႇၵႃႈၼႂ်းဝူင်ႈၵၢင်ၸိူဝ်ႉၶိူဝ်း သေႃးလု၊ ဢိၵ်ႇတင်းၸိူဝ်ႉၶိူဝ်း တႃႇဝိတ်ႈ၊ လႄႈ၊ တႃႇဝိတ်ႈ၊ ၼၼ်ႉႁႅင်းယႂ်ႇမႃးတိၵ်းတိၵ်းယူႇလႄႈၸိူဝ်ႉၶိူဝ်း သေႃးလု၊ ၸမ်ႉ၊ႁႅင်းဢူၼ်ႈၵႂႃႇတိၵ်းတိၵ်းဢေႃႈ။
လုၵ်ႈၸၢႆး တႃႇဝိတ်ႈ၊ ဢၼ်ၵိူတ်ႇလဵင်ႉမႃးၵႃႈတီႈဝဵင်း ႁေႇပရုၼ်ႇ၊ ဢၼ်ၶပ်ႉတၢမ်းၵၼ်မႃးၸမ်ႉ၊လုၵ်ႈၸၢႆးတူၼ်ႈပဵၼ် ဢႃႇမၼုၼ်ႇ၊ ဢၼ်မႄႈမၼ်းပဵၼ် ဢႁိၼွမ်ႇ၊ ၽူႈယိင်းဝဵင်း ယေႇၸရေး၊ ၼၼ်ႉဢေႃႈ။
လုၵ်ႈၸၢႆးထူၼ်ႈသွင်ပဵၼ် ၶိလတ်ႉ၊ ဢၼ်မႄႈမၼ်းပဵၼ် ဢၽိၵေးလႃႉ၊ ၽူႈယိင်းဝဵင်း ၵရမေႇလႃႉ၊ မႄႈမၢႆႈ ၼႃႇပလႃႉ၊ ၼၼ်ႉဢေႃႈ။ လုၵ်ႈၸၢႆးထူၼ်ႈသၢမ်ပဵၼ် ဢပႃႉသလုမ်ႇ၊ ဢၼ်မႄႈမၼ်းပဵၼ် မႃႇၶႃႇ၊ လုၵ်ႈယိင်းၶုၼ်ႁေႃၶမ်း တႃႇလမေး၊ မိူင်း ၵေႇသုရႃႉ၊ ၼၼ်ႉဢေႃႈ။
လုၵ်ႈၸၢႆးထူၼ်ႈသီႇပဵၼ် ဢတေႃးၼိယႃး၊ ဢၼ်မႄႈမၼ်းပဵၼ် ႁၵ်ႉၵိတ်ႉ၊ လုၵ်ႈၸၢႆးထူၼ်ႈႁႃႈပဵၼ် သေႇပတိ၊ ဢၼ်မႄႈမၼ်းပဵၼ် ဢၽိတလႃႉ၊ ၼၼ်ႉဢေႃႈ။
လုၵ်ႈၸၢႆးထူၼ်ႈႁူၵ်းပဵၼ် ဢိသရမ်ႇ၊ ဢၼ်မႄႈမၼ်းပဵၼ် ဢေးၵလႃႇ၊ ၼၼ်ႉဢေႃႈ။ လုၵ်ႈၸၢႆးၸိူဝ်းၼႆႉၵိူတ်ႇလဵင်ႉမႃးတီႈ တႃႇဝိတ်ႈ၊ ၵႃႈၼႂ်းဝဵင်း ႁေႇပရုၼ်ႇ၊ ဢေႃႈ။
ၼႂ်းၸူဝ်ႈဢၼ်ပဵၼ်သိုၵ်းပဵၼ်သိူဝ်ၵႃႈတီႈဝူင်ႈၵၢင်ၸိူဝ်ႉၶိူဝ်း သေႃးလု၊ ဢိၵ်ႇတင်းၸိူဝ်ႉၶိူဝ်း တႃႇဝိတ်ႈ၊ ယူႇၼၼ်ႉၸိုင်၊ ဢပ်ႉပၼႃး၊ ယဵင်ႈၶႅၼ်းမီးဢႃႇၼႃႇတၼ်းၶူဝ်းယႂ်ႇမႃးတိၵ်းတိၵ်းၵႃႈၼႂ်းၸိူဝ်ႉၶိူဝ်း သေႃးလု၊ ၼၼ်ႉဢေႃႈ။
ဝၼ်းၼိုင်ႈ၊ ဢိသပေႃႇသႅတ်ႉ၊ လုၵ်ႈၸၢႆး သေႃးလု၊ ၼၼ်ႉတၢင်ႇဢပျတ်ႈတီႈ ဢပ်ႉပၼႃး၊ ၵွပ်ႈပိူဝ်ႈမၼ်းၶဝ်ႈၼွၼ်းလူၺ်ႈမေးၼွႆႉ သေႃးလု၊ ဢၼ်လႆႈၸိုဝ်ႈဝႃႈ၊ ရိၸပႃႉ၊ လုၵ်ႈယိင်း ဢေႇဢႃႉ၊ ၼၼ်ႉဢေႃႈ။-
ၵွပ်ႈပိူဝ်ႈၵႂၢမ်းၼၼ်ႉလႄႈ ဢပ်ႉပၼႃး၊ ၸႂ်မႆႈၶႂ်ႈၸႃႉၼႃႇလူင်လၢင်လႄႈဝႃႈ၊ “မႂ်းမၢတ်ႈၵဝ်ပဵၼ်မႃမဵဝ်း ယုတႃႉ၊ ႁိုဝ်း။ ပိၵ်ႉသမ်ႉၵဝ်ပႂ်ႉသဵတ်ႈၸႃႇတေႃႇပီႈၼွင်ႉၸိူဝ်ႉၶိူဝ်းပေႃႈၸဝ်ႈ သေႃးလု၊ ဢိၵ်ႇတင်းပီႈၼွင်ႉမၼ်းတင်းၵေႃႉသႄႈမၼ်းတေႃႇထိုင်ႁွတ်ႈမိူဝ်ႈလဵဝ်ၼႆႉသေယဝ်ႉ၊ၵဝ်ယင်းဢမ်ႇဢဝ်ၸဝ်ႈဢၢပ်ႈၵႃႈၼႂ်းမိုဝ်း တႃႇဝိတ်ႈ၊ သေၵေႃႈ၊ၸဝ်ႈယင်းတၢင်ႇဢပျတ်ႈတီႈၵဝ်ၵွပ်ႈပိူဝ်ႈမႄႈယိင်းၼႆႉႁိုဝ်း။-
တေႃႈလဵဝ်ၼႆႉၸမ်ႉ၊ႁႂ်ႈၽြႃးပဵၼ်ၸဝ်ႈၸွႆႈထႅမ်ၵဝ်သေၵမ်း။ ၵဝ်တၵ်းႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ တိူင်ႇဝႃႈၵတိတီႈ တႃႇဝိတ်ႈ၊ လႄႈဝႃႈ၊-
‘ၵဝ်တၵ်းၼုၵ်ႈဢဝ်သိုင်ႇၸိုင်ႈဝၢၼ်ႈမိူင်း သေႃးလု၊ လႄႈႁႂ်ႈရႃႇၸႃႉပလၢင်ႇ တႃႇဝိတ်ႈ၊ တႄႇယူႇၵႃႈၼိူဝ်မိူင်း ဢိသရေး၊ တင်းမိူင်း ယုတႃႉ၊ တႄႇဢဝ်ၵႃႈတီႈဝဵင်း တၢၼ်ႇ၊ တေႃႇထိုင်ႁွတ်ႈဝဵင်း ပေႇရသေးၽႃႉ၊ ’ ဝႃႈၼင်ႇၼႆၼၼ်ႉဢေႃႈ၊” ဝႃႈၼင်ႇၼႆဢေႃႈ။-
ဢိသပေႃႇသႅတ်ႉ၊ ၵူဝ်ႁႄလႄႈဢမ်ႇႁတ်းလၢတ်ႈၵႂၢမ်းသေၶေႃႈသေၵမ်း၊ၵွပ်ႈပိူဝ်ႈဢၼ်မၼ်းၵူဝ် ဢပ်ႉပၼႃး၊ ၼႃႇလူင်လၢင်ၼၼ်ႉဢေႃႈ။
ဢပ်ႉပၼႃး၊ ပွႆႇၸႂ်ႉၵူၼ်းတၢင်တူဝ်မၼ်းၵႂႃႇၸူးတီႈ တႃႇဝိတ်ႈ၊ လူၺ်ႈၵႂၢမ်းဢၼ်သင်ႇလၢတ်ႈႁႂ်ႈၵႂႃႇလၢတ်ႈၸမ်ႉ၊ “ၶုၼ်ဢၼ်တၵ်းဢုပ်ႉပိူင်ႇမိူင်းၼႆႉၼၼ်ႉပဵၼ်ၽူႈလႂ်။ ႁဵတ်းမိၵ်ႈသႁႃႇယႃႉလူၺ်ႈၵၼ်တင်းၶႃႈၸဝ်ႈသေၵမ်း။ ၶႃႈၸဝ်ႈတၵ်းၽွမ်ႉၽၢႆႇၸဝ်ႈႁဝ်းလႄႈတၵ်းဢဝ်ၵူၼ်းမဵဝ်း ဢိသရေး၊ တင်းလၢႆမႃးဢၢပ်ႈပၼ်တီႈၸဝ်ႈႁဝ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ၵေႃႈဝႃႈ၊ “လီယဝ်ႉ။ ၵဝ်တၵ်းႁဵတ်းမိၵ်ႈသႁႃႇယႃႉလူၺ်ႈၵၼ်တင်းမႂ်းဢေႃႈ။ ၼႂ်းဝႃႈၼၼ်သေၵေႃႈ၊ၵဝ်မီးတၢင်းဢၼ်ယွၼ်းဢဝ်မဵဝ်းၼိုင်ႈၵူၺ်းတီႈမႂ်းၸမ်ႉ၊မိူဝ်ႈဢၼ်မႂ်းမႃးၶဝ်ႈၸူးတီႈၽၢႆႇၼႃႈၵဝ်ၼၼ်ႉၸိုင်၊ပႃးဢဝ် မိၶႃႇလႃႉ၊ လုၵ်ႈယိင်း သေႃးလု၊ ၼၼ်ႉမႃးတီႈၵဝ်တႃႉ၊” ဝႃႈၼင်ႇၼႆဢေႃႈ။-
တႃႇဝိတ်ႈ၊ သမ်ႉပွႆႇၸႂ်ႉသၢၼ်ႇတမၢၼ်ႇၵႂႃႇၸူးတီႈ ဢိသပေႃႇသႅတ်ႉ၊ လုၵ်ႈၸၢႆး သေႃးလု၊ ၼၼ်ႉလႄႈဝႃႈ၊ “ဢဝ်မေးၵဝ် မိၶႃႇလႃႉ၊ ဢၼ်ၵဝ်လႆႈဢဝ်ပၢႆၼင်ၵူၼ်းၸၢႆးမဵဝ်း ၽိလိတ်ႉတိ၊ ပၢၵ်ႇၼိုင်ႈသေလႄႈပၼ်ႁႂ်ႈပဵၼ်ၵႃႈၶၼ်ပုၼ်ႈတူဝ်ၶိင်းမၼ်းၼၼ်ႉဢၢပ်ႈပၼ်ၶိုၼ်းမႃးသေၵမ်း၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ ဢိသပေႃႇသႅတ်ႉ၊ ၼုၵ်ႈဢဝ်မႄႈယိင်းၼၼ်ႉသေၵႃႈတီႈၽူဝ်မၼ်း ၽႃႇလတိ၊ လုၵ်ႈၸၢႆး လေႇသႃႉ၊ ၼၼ်ႉသေယဝ်ႉ၊ဢၢပ်ႈပၼ်ၶိုၼ်းၵႂႃႇသေဢေႃႈ။-
ၽူဝ်မၼ်းၼၼ်ႉႁွင်ႉႁႆႈလႄႈၵႂႃႇၸွမ်းလူၺ်ႈၵၼ်တင်းမၼ်းတေႃႇထိုင်ႁွတ်ႈဝဵင်း ပႃႇႁုရိမ်း၊ ဢေႃႈ။ မိူဝ်ႈၼၼ်ႉ၊ ဢပ်ႉပၼႃး၊ လၢတ်ႈတီႈမၼ်းလႄႈဝႃႈ၊ “ၶိုၼ်းမိူဝ်းၵႂႃႇတႃႉ၊” ဝႃႈၼင်ႇၼႆၸိုင်၊မၼ်းလႆႈၶိုၼ်းမိူဝ်းၵႂႃႇဢေႃႈ။
မိူဝ်ႈၼၼ်ႉ၊ ဢပ်ႉပၼႃး၊ ၵႂႃႇတိူင်ႇပၢင်ႇလၢတ်ႈၸႃလူၺ်ႈၵၼ်တင်းၵူၼ်းဢၼ်ပဵၼ်ၵႄႇပဵၼ်ႁူဝ်မဵဝ်း ဢိသရေး၊ ၸိူဝ်းၼၼ်ႉလႄႈဝႃႈ၊ “မိူဝ်ႈၶိင်ႇဢၼ်ပူၼ်ႉမႃးၼၼ်ႉသူၵျၢမ်ႇဢၢင်ႈတေႁႂ်ႈ တႃႇဝိတ်ႈ၊ ပဵၼ်ၶုၼ်ႁေႃၶမ်းသူဢေႃႈ။-
မိူဝ်ႈလဵဝ်ၼႆႉပဵၼ်ၶိင်ႇဢၼ်ထုၵ်ႇလီယုၵ်ႉယွင်ႈမၼ်းယဝ်ႉ။ လွင်ႈမၼ်းၸမ်ႉ၊ ထႃႇဝရႃႉၽြႃး၊ မီးဢမိင်ႉလူၺ်ႈလွင်ႈ တႃႇဝိတ်ႈ၊ လႄႈဝႃႈၸမ်ႉ၊ ‘ၵဝ်တၵ်းၸႂ်ႉၶႃႈၵဝ် တႃႇဝိတ်ႈ၊ ႁႂ်ႈမၼ်းၵႄႇၼုၵ်ႈဢဝ်ၵူၼ်းမဵဝ်း ဢိသရေး၊ ဢွၵ်ႇသေၵႃႈၼႂ်းမိုဝ်းၵူၼ်းမဵဝ်း ၽိလိတ်ႉတိ၊ တင်းလၢႆဢိၵ်ႇတင်းၵႃႈၼႂ်းမိုဝ်းရၢၼ်ႇသူႇၶဝ်တင်းသဵင်ႈတင်းလူင်ဢေႃႈ၊’ ဝႃႈၼင်ႇၼႆဝႆႉယဝ်ႉ၊” ဝႃႈၼင်ႇၼႆဢေႃႈ။-
ဢပ်ႉပၼႃး၊ သမ်ႉၵႂႃႇလၢတ်ႈတီႈၵူၼ်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ ထႅင်ႈၼင်ႇၵဝ်ႇသေယဝ်ႉ၊ၵႂႃႇၵႃႈတီႈဝဵင်း ႁေႇပရုၼ်ႇ၊ ၸူးတီႈ တႃႇဝိတ်ႈ၊ လႄႈမွၵ်ႇလၢတ်ႈၶႆႈၼႄလွင်ႈဢၼ်ၵူၼ်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ ဢိၵ်ႇတင်းၵူၼ်းမဵဝ်း ဢိသရေး၊ တင်းလၢႆၽွမ်ႉၸႂ်ၵၼ်ယဝ်ႉၼၼ်ႉဢေႃႈ။
မိူဝ်ႈဢၼ် ဢပ်ႉပၼႃး၊ ပႃးဢဝ်ၵူၼ်းသၢဝ်းၼိုင်ႈၵႂႃႇႁွတ်ႈထိုင်ၵႃႈတီႈ တႃႇဝိတ်ႈ၊ ၵႃႈတီႈဝဵင်း ႁေႇပရုၼ်ႇ၊ ၼၼ်ႉၸိုင်၊ တႃႇဝိတ်ႈ၊ ႁဵတ်းပွႆးလဵင်ႉလူတီႈ ဢပ်ႉပၼႃး၊ ဢိၵ်ႇတင်းၵူၼ်းမၼ်းၸိူဝ်းၼၼ်ႉဢေႃႈ။-
ဢပ်ႉပၼႃး၊ ၵေႃႈလဝ်ႈလၢတ်ႈတီႈ တႃႇဝိတ်ႈ၊ လႄႈဝႃႈ၊ “တေႃႈလဵဝ်ၼႆႉၶႃႈၸဝ်ႈတၵ်းၵႂႃႇလႄႈႁႂ်ႈၵူၼ်း ဢိသရေး၊ ၵႃႈမီးတင်းသဵင်ႈတင်းလူင်မႃးၸုတုမ်ၵၼ်ၵႃႈတီႈၸဝ်ႈႁဝ်းၸဝ်ႈၶုၼ်ႁေႃၶမ်းႁဝ်းတီႈၶႃႈဢေႃႈ။ ၶဝ်တၵ်းဢွၼ်ၵၼ်ႁပ်ႉတုင်းဢဝ်ၸဝ်ႈႁဝ်းပဵၼ်ၶုၼ်ႁေႃၶမ်းၶဝ်လႄႈ၊ၸဝ်ႈႁဝ်းတၵ်းတေလႆႈဢုပ်ႉပိူင်ႇၸၢမ်ႇၸႃးၵႃႈၼင်ႇဢၼ်ၸဝ်ႈႁဝ်းမီးဢလူဝ်ႇၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။ တႃႇဝိတ်ႈ၊ ၵေႃႈဝႆႉၵတိတီႈ ဢပ်ႉပၼႃး၊ သေယဝ်ႉ၊မၼ်းၵေႃႈၵႂႃႇၼိမ်ၼိမ်လီလီဢေႃႈ။
ယၢမ်းမိူဝ်ႈၼၼ်ႉ၊ ယွႃႇၽႃႉ၊ ဢိၵ်ႇတင်းၶုၼ်ဢၼ်ပွင်ၵၢၼ်ၼႂ်းႁေႃ တႃႇဝိတ်ႈ၊ ၸိူဝ်းၼၼ်ႉပွၵ်ႈသေၵႃႈတီႈတၢင်းဢၼ်ႁိမ်ႁူင်ႇဢဝ်ၶိုၼ်းမႃးယူႇလႄႈ၊ပႃးဢဝ်ဢုၵ်ႉၸႃႇဢၼ်ႁိမ်လႆႈၼမ်ၼႃႇၼၼ်ႉမႃးဢေႃႈ။ ဢပ်ႉပၼႃး၊ ၵေႃႈဢမ်ႇမီးယူႇလူၺ်ႈၵၼ်တင်း တႃႇဝိတ်ႈ၊ ၵႃႈတီႈဝဵင်း ႁေႇပရုၼ်ႇ၊ ၵွပ်ႈပိူဝ်ႈဢၼ် တႃႇဝိတ်ႈ၊ ပွႆႇမၼ်းၵႂႃႇၼိမ်ၼိမ်လီလီယဝ်ႉၼၼ်ႉဢေႃႈ။-
မိူဝ်ႈဢၼ် ယွႃႇၽႃႉ၊ တင်းၵူၼ်းမၼ်းတင်းလၢႆႁွတ်ႈမႃးၼၼ်ႉပိူၼ်ႈမွၵ်ႇလၢတ်ႈတီႈ ယွႃႇၽႃႉ၊ လွင်ႈဢၼ် ဢပ်ႉပၼႃး၊ ႁွတ်ႈမႃးၵႃႈတီႈၶုၼ်ႁေႃၶမ်း တႃႇဝိတ်ႈ၊ သေယဝ်ႉ၊မၼ်းၸဝ်ႈၵေႃႈပွႆႇႁႂ်ႈမၼ်းလႆႈၵႂႃႇၼိမ်ၼိမ်လီလီၼၼ်ႉဢေႃႈ။-
ပိူဝ်ႈၼႆလႄႈ ယွႃႇၽႃႉ၊ ၶဝ်ႈၸူးတီႈၶုၼ်ႁေႃၶမ်းသေလႄႈလဝ်ႈလၢတ်ႈဝႃႈ၊ “ၸဝ်ႈႁဝ်းႁဵတ်းၸိူဝ်ႉၼင်ႇႁိုဝ်တီႈၶႃႈ။ ဢပ်ႉပၼႃး၊ မႃးၸူးတီႈၸဝ်ႈႁဝ်းၶႃႈယဝ်ႉ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းပွႆႇႁႂ်ႈမၼ်းလွတ်ႈဢွၵ်ႇၵႂႃႇတီႈၶႃႈ။-
မၼ်းၼၼ်ႉမႃးၵႃႈတီႈၼႆႈႁႂ်ႈလႆႈပႅတ်ႉလႅၼ်ၸဝ်ႈႁဝ်း၊ႁႂ်ႈလႆႈႁုႁၼ်တၢင်းဢၼ်ၸဝ်ႈႁဝ်းၶဝ်ႈဢွၵ်ႇ၊ဢိၵ်ႇတင်းႁႂ်ႈလႆႈႁုလွင်ႈတၢင်းဢၼ်ၸဝ်ႈႁဝ်းၸီႇယၢင်ႇၵျၢမ်ႇပွင်ၵူႈၸိူဝ်ႉၵူႈပိူင်ၼၼ်ႉၵူၺ်းဢေႃႈ၊ၸဝ်ႈႁဝ်းႁုလီလီယူႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။
လိုၼ်းသေဢၼ် ယွႃႇၽႃႉ၊ ဢွၵ်ႇသေၵႃႈတီႈ တႃႇဝိတ်ႈ၊ ၵႂႃႇယဝ်ႉၼၼ်ႉမၼ်းပွႆႇၸႂ်ႉၵူၼ်းမၼ်းၵႂႃႇၸွမ်းလင် ဢပ်ႉပၼႃး၊ လႄႈႁွင်ႉဢဝ်မၼ်းသေၵႃႈတီႈၼမ်ႉမေႃႇ သိရႃႉ၊ ၶိုၼ်းမႃးၼၼ်ႉ တႃႇဝိတ်ႈ၊ ဢမ်ႇလႆႈႁုလွင်ႈၼၼ်ႉလႃးလႃး။-
မိူဝ်ႈဢၼ် ဢပ်ႉပၼႃး၊ ႁွတ်ႈထိုင်ၵႃႈတီႈဝဵင်း ႁေႇပရုၼ်ႇ၊ မႃးၼၼ်ႉ ယွႃႇၽႃႉ၊ ႁွင်ႉဢဝ်မၼ်းၵႂႃႇၵႃႈတီႈႁိမ်းၼႃႈၽၵ်းတူ၊ၸိူဝ်ႉၼင်ႇႁၢင်ႈတၵ်းလၢတ်ႈတေႃႇမၼ်းတဵတ်ႇတဵတ်ႇသေယဝ်ႉ၊တႅင်းသႂ်ႇပုမ်မၼ်းႁႂ်ႈတၢႆပုၼ်ႈဢၼ်တွပ်ႇတႅၼ်းတၢင်းဢၼ်ဢဝ် ဢသႃႇႁေးလႃႉ၊ ၼွင်ႉၸၢႆး ယွႃႇၽႃႉ၊ တၢႆၼၼ်ႉဢေႃႈ။-
မိူဝ်ႈဢၼ် တႃႇဝိတ်ႈ၊ လႆႈငိၼ်းၶၢဝ်ႇၼၼ်ႉၸိုင်၊မၼ်းလၢတ်ႈလႄႈဝႃႈ၊ “ ထႃႇဝရႃႉၽြႃး၊ ႁုလွင်ႈဢၼ်ၵဝ်ဢိၵ်ႇတင်းၵူၼ်းဝၢၼ်ႈၵူၼ်းမိူင်းၵဝ်တင်းလၢႆၵၢင်းလွတ်ႈတင်းဢပျတ်ႈဢၼ်ဢဝ် ဢပ်ႉပၼႃး၊ တၢႆၼႆႉၼၼ်ႉယူႇဢေႃႈ။-
ႁႂ်ႈဢပျတ်ႈတၢမ်ႇမၼ်းတူၵ်းႁွတ်ႈၵႃႈၼိူဝ် ယွႃႇၽႃႉ၊ ဢိၵ်ႇတင်းၵႃႈၼိူဝ်ပီႈၼွင်ႉၸိူဝ်ႉၶိူဝ်းမၼ်းၸိူဝ်းၼၼ်ႉသေၵမ်းလူၺ်ႈ။ ၵႃႈၼႂ်းလုၵ်ႈလၢၼ်ၸိူဝ်ႉၶိူဝ်း ယွႃႇၽႃႉ၊ ၵူႈသိုပ်ႇၼၼ်ႉႁႂ်ႈမီးၵူၼ်းပဵၼ်ယေႃးၵႃႇၵလၢင်ႇလႂ်၊ဢမ်ႇၼၼ်ၵေႃႉဢၼ်ပဵၼ်တုတ်ႈလႂ်၊ဢမ်ႇၼၼ်ၸၢင်ႈႁဵတ်းၵၢၼ်ငၢၼ်းၽူႈယိင်းလႂ်ၵူၺ်း၊ဢမ်ႇၼၼ်တၵ်းလႆႈတၢႆလူၺ်ႈလၢပ်ႇလူၺ်ႈလႅဝ်းလႂ်၊ဢမ်ႇၼၼ်တၵ်းလႆႈၶေႃၵိၼ်ယွၼ်းၵိၼ်လႂ်ၼၼ်ႉသေၵမ်းလူၺ်ႈ၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈ ယွႃႇၽႃႉ၊ တင်းၼွင်ႉၸၢႆးမၼ်း ဢၽိသေး၊ တွပ်ႇတႅၼ်းဢဝ်တၢႆ ဢပ်ႉပၼႃး၊ ၼၼ်ႉၵွပ်ႈလူၺ်ႈမၼ်းဢဝ် ဢသႃႇႁေးလႃႉ၊ ၼွင်ႉၸၢႆးၶဝ်တၢႆၵႃႈၼႂ်းပၢင်သိုၵ်း ၵိပွင်ႇ၊ ၼၼ်ႉဢေႃႈ။
မိူဝ်ႈၼၼ်ႉ၊ တႃႇဝိတ်ႈ၊ ပူင်ဢမိင်ႉႁႂ်ႈ ယွႃႇၽႃႉ၊ တင်းၵူၼ်းမၼ်းတင်းလၢႆသိၵ်ႇၶူဝ်းၼုင်ႈၶဝ်သေယဝ်ႉ၊ၼုင်ႈမႆၼင်ပေႃယူႇႁႂ်ႈလႆႈႁဵတ်းတၢင်းဢၼ်ႁွင်ႉႁႆႈပွင်ႉၶၢင်းပုၼ်ႈ ဢပ်ႉပၼႃး၊ ဢေႃႈ။ ၼႂ်းဝၼ်းဢၼ်သၢင်းၵျူဝ်ႇၼၼ်ႉတူဝ်ၶုၼ်ႁေႃၶမ်း တႃႇဝိတ်ႈ၊ ၸွမ်းသူင်ႇတူဝ်တၢႆ ဢပ်ႉပၼႃး၊ ဢေႃႈ။-
ၶဝ်ဢဝ်တူဝ်တၢႆ ဢပ်ႉပၼႃး၊ သၢင်းၵျူဝ်ႇၵႃႈတီႈဝဵင်း ႁေႇပရုၼ်ႇ၊ လႄႈၶုၼ်ႁေႃၶမ်းၵိဝ်သဵင်ႁွင်ႉႁႆႈၵႃႈတီႈႁိမ်းၶုမ်ပႃႇႁဵဝ်ႈ ဢပ်ႉပၼႃး၊ ၼၼ်ႉဢေႃႈ၊ၵူၼ်းတင်းလၢႆၵေႃႈဢွၼ်ၵၼ်ႁွင်ႉႁႆႈဢေႃႈ။-
ၶုၼ်ႁေႃၶမ်းႁွင်ႉႁႆႈလႄႈႁဵတ်းၵႂၢမ်းၸၢပ်ႈလူၺ်ႈ ဢပ်ႉပၼႃး၊ လႄႈဝႃႈၸမ်ႉ၊ “ ဢပ်ႉပၼႃး၊ ၸွင်ႇထုၵ်ႇလႆႈတၢႆမိူၼ်ၵူၼ်းငိူဝ်ႈၵူၼ်းမိူၵ်ႈလႆႈတၢႆၼၼ်ႉႁိုဝ်း။
မိုဝ်းမႂ်းယင်းဢမ်ႇလႆႈၶၢမ်ႇတၢင်းဢၼ်မတ်ႉ ဢၼ်ၽုၵ်ႇ၊ တိၼ်မႂ်းယင်းဢမ်ႇလႆႈၶၢမ်ႇတၢင်းဢၼ်သႂ်ႇ ၶူၺ်ႇလဵၵ်းၶူၺ်ႇတွင်း၊ မႂ်းလႆႈတၢႆၵႂႃႇမိူၼ်ၸိူဝ်ႉၼင်ႇၵေႃႉဢၼ်တၢႆလူၺ်ႈမိုဝ်းၵူၼ်းႁၢႆႉၵူၼ်းမိူၵ်ႈၼၼ်ႉယဝ်ႉလူင်ပႄႇ။” ဝႃႈၼင်ႇၼႆဢေႃႈ။ ၼင်ႇၼၼ်လႄႈၵူၼ်းတင်းသဵင်ႈတင်းလူင်ဢွၼ်ၵၼ်ႁွင်ႉႁႆႈပုၼ်ႈမၼ်းထႅင်ႈဢေႃႈ။
မိူဝ်ႈၼၼ်ႉ၊ၵူၼ်းတင်းလၢႆဢွၼ်ၵၼ်မႃးၸူဝ်းဢဝ်ႁႂ်ႈ တႃႇဝိတ်ႈ၊ ၵိၼ်တၢင်းၵိၼ်တၢင်းၶူပ်းၸူဝ်ႈဢၼ်တႃဝၼ်းယင်းမီးယူႇၼႆႉၼၼ်ႉသေၵေႃႈ၊ တႃႇဝိတ်ႈ၊ တိူင်ႇၵၢဝ်ႇလႄႈလၢတ်ႈဝႃႈ၊ “ႁႂ်ႈၽြႃးပဵၼ်ၸဝ်ႈၸီႇယၢင်ႇႁႂ်ႈၵဝ်တၢႆ၊ပေႃးၵဝ်ၵိၼ်တၢင်းၵိၼ်တၢင်းၶူပ်းသေၸိူဝ်ႉသေမဵဝ်းၸူဝ်ႈဢၼ်ၵၢင်ဝၼ်းဢမ်ႇပႆႇတူၵ်းၼၼ်ႉသေၵမ်း၊” ဝႃႈၼင်ႇၼႆဢေႃႈ။-
ၵူၼ်းတင်းသဵင်ႈတင်းလူင်ႁၼ်လွင်ႈတၢင်းၼၼ်ႉလႄႈဢွၼ်ၵၼ်ထုၵ်ႇၸႂ်ၵျိူၵ်ႈၸႂ်ဢေႃႈ။ လွင်ႈမၼ်းၸမ်ႉ၊ၵႃႈဢၼ်ၶုၼ်ႁေႃၶမ်းႁဵတ်းၼၼ်ႉမႅၼ်ႈၸႂ်ၵူၼ်းတင်းလၢႆဢေႃႈ။-
ၵူၼ်း တႃႇဝိတ်ႈ၊ တင်းသဵင်ႈတင်းလူင်ဢိၵ်ႇတင်းၵူၼ်းမဵဝ်း ဢိသရေး၊ တင်းသဵင်ႈတင်းလူင်ႁုၸႅင်ႈလွင်ႈဢၼ်ၶုၼ်ႁေႃၶမ်းဢမ်ႇမီးဢပျတ်ႈၵွပ်ႈလူၺ်ႈ ဢပ်ႉပၼႃး၊ လႆႈတၢႆၼၼ်ႉဢေႃႈ။-
ၶုၼ်ႁေႃၶမ်းလၢတ်ႈတီႈၶုၼ်ဢၼ်ပွင်ၵၢၼ်ၸဝ်ႈၸိူဝ်းၼၼ်ႉလႄႈဝႃႈ၊ “သူဢမ်ႇႁုလွင်ႈဢၼ်ၵူၼ်းလူင်ဢၼ်ဢွၼ်ႁူဝ်ဢွၼ်ၵၼ်ၵူၼ်းမဵဝ်း ဢိသရေး၊ ၼၼ်ႉၵေႃႉၼိုင်ႈလႆႈသုမ်းၸွမ်းၵႂႃႇၵႃႈၼႂ်းဝၼ်းမိူဝ်ႈၼႆႉၼၼ်ႉႁိုဝ်း။-
ပိၵ်ႉသမ်ႉၵဝ်ၼႆႉပဵၼ်ၶုၼ်ႁေႃၶမ်းဢၼ်ၽြႃးပဵၼ်ၸဝ်ႈပၼ်ၽိၵ်ႈသိၵ်ႈဝႆႉသေၵေႃႈ၊ဝၼ်းမိူဝ်ႈၼႆႉပဵၼ်ဢၼ်ႁႅင်းလဵၵ်ႉႁႅင်းဢူၼ်ႈဢေႃႈ။ လုၵ်ႈၸၢႆး ၸေႇရုယႃႇ၊ ၸိူဝ်းၼႆႉႁၢဝ်ႈၵျၢမ်းႁႅင်းၼႃႇတီႈၵဝ်ယဝ်ႉ။ ႁႂ်ႈ ထႃႇဝရႃႉၽြႃး၊ တွပ်ႇတႅၼ်းပၼ်တီႈၵေႃႉဢၼ်ႁဵတ်းတုၸရိူၵ်ႈၸွမ်းၼင်ႇဢၼ်မၼ်းမီးဢပျတ်ႈၼၼ်ႉသေၵမ်းလူၺ်ႈ၊” ဝႃႈၼင်ႇၼႆဢေႃႈ။
မိူဝ်ႈဢၼ် ဢိသပေႃႇသႅတ်ႉ၊ လုၵ်ႈၸၢႆး သေႃးလု၊ လႆႈငိၼ်းလွင်ႈဢၼ် ဢပ်ႉပၼႃး၊ တၢႆၵႃႈတီႈဝဵင်း ႁေႇပရုၼ်ႇ၊ ၼၼ်ႉၸိုင်၊ၸႂ်မၼ်းႁႅင်းဢူၼ်ႈၵႂႃႇလႄႈၵူၼ်းမဵဝ်း ဢိသရေး၊ တင်းလၢႆတူၵ်းၸႂ်ဢေႃႈ။-
ဢိသပေႃႇသႅတ်ႉ၊ ၼၼ်ႉမီးၶုၼ်ဢၼ်ပွင်ၵၢၼ်မၼ်းသွင်ၵေႃႉလႄႈၵေႃႉၼိုင်ႈၸိုဝ်ႈ ပႃႇၼႃႇ၊ ထႅင်ႈၵေႃႉၼိုင်ႈသမ်ႉၸိုဝ်ႈ ရေႇၶပ်ႉ၊ ဢေႃႈ။ ၶဝ်သွင်ၵေႃႉၼၼ်ႉမီးလုၵ်ႈၸၢႆး ရိမ်ႇမုၼ်ႇ၊ ၵူၼ်းဝဵင်း ပေႇရုတ်ႉ၊ ၼႂ်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ ဢေႃႈ။ (ပိၵ်ႉသမ်ႉ၊ဝဵင်း ပေႇရုတ်ႉ၊ ၼၼ်ႉၶဝ်ႈပႃးၼႂ်းဢိူင်ႇ ပိၼ်ႇယႃႇမိၼ်ႇ၊ သေၵေႃႈ၊-
ၵူၼ်းဝဵင်း ပေႇရုတ်ႉ၊ တင်းလၢႆၼီပၢႆႈၵႂႃႇၸူးၵႃႈတီႈဝဵင်း ၵိတ်ႉတိမ်ႇ၊ လႄႈယူႇသဝ်းယူႇၵႃႈတီႈၼၼ်ႈတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။)
ၸိူဝ်ႉၶိူဝ်း သေႃးလု၊ ဢၼ်ပဵၼ် မေႇၽိပေႃးသႅတ်ႉ၊ လုၵ်ႈၸၢႆး ယေႃးၼႀၼ်ႇ၊ ၼၼ်ႉယင်းမီးယူႇဢေႃႈ။ မိူဝ်ႈဢၼ် သေႃးလု၊ တင်း ယေႃးၼႀၼ်ႇ၊ တၢႆၼၼ်ႉမၼ်းၸင်ႇမီးဢသၢၵ်ႈႁႃႈပီၵူၺ်းလႄႈ၊မိူဝ်ႈဢၼ်ၶၢဝ်ႇငၢဝ်းလွင်ႈဢၼ်ၶဝ်သွင်ၵေႃႉတၢႆၼၼ်ႉလုၵ်ႉသေၵႃႈတီႈဝဵင်း ယေႇၸရေး၊ ႁွတ်ႈမႃးၼၼ်ႉၸိုင်၊မႄႈလဵင်ႉမၼ်းၼၼ်ႉႁွပ်ႇဢုမ်ႈဢဝ်မၼ်းသေလႄႈဢွၵ်ႇပၢႆႈဢေႃႈ။ ပိူဝ်ႈဢၼ်မၼ်းႁိပ်ႈၼႅတ်ႈၼႃႇဢႃးလႃးလႄႈလုၵ်ႈဢွၼ်ႇၼၼ်ႉလွတ်ႈတူၵ်းၵႂႃႇသေယဝ်ႉ၊တိၼ်မၼ်းၵႅင်ႉၵႂႃႇဢေႃႈ။
ရေႇၶပ်ႉ၊ တင်း ပႃႇၼႃႇ၊ ဢၼ်ပဵၼ်လုၵ်ႈၸၢႆး ရိမ်ႇမုၼ်ႇ၊ ၵူၼ်းဝဵင်း ပေႇရုတ်ႉ၊ ၼၼ်ႉဢွၵ်ႇၵႂႃႇႁႃ ဢိသပေႃႇသႅတ်ႉ၊ လႄႈႁွတ်ႈထိုင်ၵႃႈတီႈႁေႃမိူဝ်ႈဢၼ်မၼ်းယင်းတိုၵ်ႉၼွၼ်းလိုဝ်ႈႁိူဝ်ႉၶိင်ႇၵၢင်ဝၼ်းတဵင်ႈယူႇၼၼ်ႉဢေႃႈ။-
ၽူႈယိင်းဢၼ်ပႂ်ႉၽၵ်းတူၼၼ်ႉၽတ်းၶဝ်ႈၵျုင်ႇယူႇလႄႈငဝ်သူၼ်းၼွၼ်းလပ်းယူႇၼၼ်ႉ၊ ရေႇၶပ်ႉ၊ တင်း ပႃႇၼႃႇ၊ ပႆၶဝ်ႈၵႂႃႇတၢင်းၼႂ်းသေဢေႃႈ။-
ၵႃႈၼႂ်းႁေႃၼၼ်ႉၶဝ်သွင်ၵေႃႉၶဝ်ႈၵႂႃႇၵႃႈၼႂ်းလုၵ်းၼွၼ်း ဢိသပေႃႇသႅတ်ႉ၊ သေယဝ်ႉ၊မၼ်းၼၼ်ႉၼွၼ်းဝၢၼ်ၼွၼ်းလီယူႇၵႃႈၼိူဝ်ၵူႇမၼ်းလႄႈၶဝ်တႅင်းမၼ်းတၢႆသေဢေႃႈ။ ၶဝ်ၸင်ႇတႅပ်းၵွၵ်းႁူဝ်မၼ်းဢဝ်ပႃးၵႂႃႇၸွမ်းသဵၼ်ႈတၢင်းပၢင်ႇႁူၺ်ႈၼမ်ႉ ယေႃးတၢၼ်ႇ၊ တင်းၶိုၼ်းဢေႃႈ။-
ၶဝ်သွင်ၵေႃႉဢဝ်ၵွၵ်းႁူဝ်ၼၼ်ႉသၢၵ်ႈပၼ်ၵႃႈတီႈၶုၼ်ႁေႃၶမ်း တႃႇဝိတ်ႈ၊ ၵႃႈတီႈဝဵင်း ႁေႇပရုၼ်ႇ၊ လႄႈလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “ႁဝ်းၶႃႈဢဝ်ၵွၵ်းႁူဝ် ဢိသပေႃႇသႅတ်ႉ၊ လုၵ်ႈၸၢႆးၸဝ်ႈ သေႃးလု၊ ဢၼ်ပဵၼ်ရၢၼ်ႇသူႇၸဝ်ႈႁဝ်းဢၼ်ထၢမ်ႁႃဢဝ်ၸဝ်ႈႁဝ်းတၢႆၼၼ်ႉမႃးသၢၵ်ႈပၼ်တီႈၸဝ်ႈႁဝ်းတီႈၶႃႈဢေႃႈ။ ထႃႇဝရႃႉၽြႃး၊ ပၼ်ဢၶႂၢင်ႉႁႂ်ႈၸဝ်ႈႁဝ်းၶုၼ်ႁေႃၶမ်းတၵ်းတွပ်ႇတႅၼ်းပၼ်ဢပျတ်ႈတီႈ သေႃးလု၊ ဢိၵ်ႇတင်းလုၵ်ႈလၢၼ်ၸိူဝ်ႉၶိူဝ်းမၼ်းဝၼ်းမိူဝ်ႈၼႆႉတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ၶိုၼ်းလၢတ်ႈတီႈသွင်ပီႈၼွင်ႉၼၼ်ႉလႄႈဝႃႈ၊ “ၵဝ်တိူင်ႇဝႃႈတီႈ ထႃႇဝရႃႉၽြႃး၊ ဢၼ်ဢသၢၵ်ႈလိပ်းယူႇ၊ဢၼ်ၵႄႇသႄႇၶျွတ်ႈဢဝ်ၵဝ်လွတ်ႈသေၵႃႈတီႈၽေးဢုပၢတ်ႈတင်းလၢႆမႃးၼၼ်ႉဢေႃႈ။-
မိူဝ်ႈၵမ်းဢွၼ်တၢင်းၼၼ်ႉမိူဝ်ႈဢၼ်ၵူၼ်းၵေႃႉဢၼ်မႃးလၢတ်ႈၶၢဝ်ႇငၢဝ်းတီႈၵဝ်ၵႃႈတီႈဝဵင်း ၸိၵလၵ်ႉ၊ လႄႈမွၵ်ႇလၢတ်ႈလွင်ႈ သေႃးလု၊ လႆႈၶၢမ်ႇတၢႆဢၼ်မၼ်းထၢင်ႇပဵၼ်ၶၢဝ်ႇငၢဝ်းဢၼ်လီၼၼ်ႉ၊ၵဝ်တိၺွပ်းဢဝ်မၼ်းသေလႄႈၶႃႈတၢႆပႅတ်ႈႁႂ်ႈပဵၼ်သူးလၢပ်ႈဢၼ်ၵဝ်ပၼ်ပုၼ်ႈၶၢဝ်ႇငၢဝ်းဢၼ်မၼ်းထၢင်ႇဝႃႈ၊ပဵၼ်ဢၼ်လီၼၼ်ႉယဝ်ႉ။-
တၢင်းဢၼ်ၵူၼ်းႁၢႆႉၵူၼ်းမိူၵ်ႈဢဝ်တၢႆၵေႃႉဢၼ်ၵၢင်းလွတ်ႈဢပျတ်ႈလႄႈၼွၼ်းလပ်းၼွၼ်းလီယူႇၵႃႈၼႂ်းႁိူၼ်းတူဝ်ၸဝ်ႈၵဝ်ႇၼၼ်ႉယဵင်ႈၶႅၼ်းႁၢႆႉမိူၵ်ႈၼႃႇလူင်လၢင်ယဝ်ႉ။ တေႃႈလဵဝ်ၼႆႉၵဝ်တၵ်းတွပ်ႇတႅၼ်းဢပျတ်ႈဢၼ်သူဢဝ်မၼ်းတၢႆၼၼ်ႉသေယဝ်ႉ၊ဢဝ်သူပႄႇပႅတ်ႈသေၵႃႈၼိူဝ်လိၼ်မိူင်းၼႆႉဢေႃႈ၊” ဝႃႈၼင်ႇၼႆဢေႃႈ။-
တႃႇဝိတ်ႈ၊ ပူင်ဢမိင်ႉသေယဝ်ႉ၊ၵူၼ်းသိုၵ်းမၼ်းတင်းလၢႆဢွၼ်ၵၼ်ဢဝ်သွင်ၵေႃႉၼၼ်ႉတၢႆလႄႈတႅပ်းတိၼ်တႅပ်းမိုဝ်းၶဝ်သေယဝ်ႉ၊ဢဝ်ႁွႆႈဝႆႉၵႃႈတီႈႁိမ်းၼမ်ႉၼွင် ႁေႇပရုၼ်ႇ၊ ဢေႃႈ။ ၵွၵ်းႁူဝ် ဢိသပေႃႇသႅတ်ႉ၊ ၼၼ်ႉၸမ်ႉ၊ၶဝ်ဢဝ်သၢင်းၵျူဝ်ႇၵႃႈၼႂ်းပႃႇႁဵဝ်ႈ ဢပ်ႉပၼႃး၊ ၵႃႈတီႈဝဵင်း ႁေႇပရုၼ်ႇ၊ ၼၼ်ႉသေဢေႃႈ။
မိူဝ်ႈၼၼ်ႉ၊ၵႃႈဢၼ်ပဵၼ်ၸိူဝ်ႉၶိူဝ်း ဢိသရေး၊ တင်းသဵင်ႈတင်းလူင်ဢွၼ်ၵၼ်မႃးၸူးတီႈ တႃႇဝိတ်ႈ၊ ၵႃႈတီႈဝဵင်း ႁေႇပရုၼ်ႇ၊ သေယဝ်ႉ၊လဝ်ႈလၢတ်ႈတီႈမၼ်းလႄႈဝႃႈ၊ “ၶႃႈၸဝ်ႈၸိူဝ်းၼႆႉပဵၼ်ၼိူဝ်ႉလိူတ်ႈဢၼ်လဵဝ်ၵၼ်တင်းၸဝ်ႈႁဝ်းတီႈၶႃႈဢေႃႈ။-
မိူဝ်ႈဢွၼ်တၢင်းၼၼ်ႉၼႂ်းၸူဝ်ႈဢၼ် သေႃးလု ပဵၼ်ၶုၼ်ႁေႃၶမ်းၶႃႈၸဝ်ႈႁဝ်းၶဝ်ယူႇၼၼ်ႉၸဝ်ႈႁဝ်းပဵၼ်ၵေႃႉဢၼ်ဢွၼ်ႁူဝ်တပ်ႉသိုၵ်း ဢိသရေး၊ လႄႈၶီႇသိုၵ်းၼၼ်ႉတီႈၶႃႈဢေႃႈ။ ထႃႇဝရႃႉၽြႃး၊ ဝႆႉၵတိတီႈၸဝ်ႈႁဝ်းလႄႈဝႃႈ၊ ‘မႂ်းတၵ်းလႆႈပဵၼ်ၵေႃႉဢၼ်လဵင်ႉထိင်းၵူၼ်းၵဝ်မဵဝ်း ဢိသရေး၊ လႄႈတၵ်းလႆႈပဵၼ်ၵေႃႉဢၼ်ဢုပ်ႉပိူင်ႇၵႃႈၼိူဝ်ၶဝ်တင်းလၢႆဢေႃႈ၊’ ဝႃႈၼင်ႇၼႆတီႈၶႃႈယဝ်ႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းမဵဝ်း ဢိသရေး၊ တင်းလၢႆၼၼ်ႉဢွၼ်ၵၼ်မႃးၸူးတီႈၶုၼ်ႁေႃၶမ်း တႃႇဝိတ်ႈ၊ ၵႃႈတီႈဝဵင်း ႁေႇပရုၼ်ႇ၊ သေယဝ်ႉ၊ တႃႇဝိတ်ႈ၊ ႁဵတ်းမိၵ်ႈသႁႃႇယႃႉလူၺ်ႈၵၼ်တင်းၶဝ်ၵႃႈတီႈၽၢႆႇၼႃႈ ထႃႇဝရႃႉၽြႃး၊ သေလႄႈၶဝ်ဢွၼ်ၵၼ်ပၼ်ၽိၵ်ႈသိၵ်ႈတီႈ တႃႇဝိတ်ႈ၊ ႁႂ်ႈမၼ်းပဵၼ်ၶုၼ်ႁေႃၶမ်းမိူင်း ဢိသရေး၊ ဢေႃႈ။-
မိူဝ်ႈဢၼ် တႃႇဝိတ်ႈ၊ ပဵၼ်ၶုၼ်ႁေႃၶမ်းၼၼ်ႉဢသၢၵ်ႈမၼ်းမီးသၢမ်သိပ်းပီတဵမ်ယဝ်ႉလႄႈမၼ်းဢုပ်ႉပိူင်ႇၸၢမ်ႇၸႃးသီႇသိပ်းပီဢေႃႈ။-
မၼ်းဢုပ်ႉပိူင်ႇမိူင်း ယုတႃႉ၊ မိူဝ်ႈဢၼ်မၼ်းၼင်ႈႁၢင်ႈၼင်ႈႁေႃၵႃႈတီႈဝဵင်း ႁေႇပရုၼ်ႇ၊ ၸဵတ်းပီပၢႆႁူၵ်းလိူၼ်သေလႄႈမိူဝ်ႈဢၼ်မၼ်းၼင်ႈႁၢင်ႈၼင်ႈႁေႃၵႃႈတီႈဝဵင်း ယေႇရုသလႅမ်ႇ၊ ၼၼ်ႉ၊မၼ်းဢုပ်ႉပိူင်ႇၵႃႈၼိူဝ်မိူင်း ယုတႃႉ၊ တင်းမိူင်း ဢိသရေး၊ တင်းသဵင်ႈတင်းမူတ်းသၢမ်သိပ်းပၢႆသၢမ်ပီဢေႃႈ။
ဢၶိင်ႇမၼ်းႁွတ်ႈမႃးယဝ်ႉလႄႈၶုၼ်ႁေႃၶမ်း တႃႇဝိတ်ႈ၊ ဢိၵ်ႇတင်းၵူၼ်းမၼ်းတင်းလၢႆၶီႇသိုၵ်းၶိုၼ်ႈၸူးတီႈဝဵင်း ယေႇရုသလႅမ်ႇ၊ ဢေႃႈ။ ၵူၼ်းမဵဝ်း ယေႇပုသိ၊ ဢၼ်ပဵၼ်ၵူၼ်းဝၢၼ်ႈၵူၼ်းမိူင်းၵဝ်ႇၵဝ်ႇၼၼ်ႉထၢင်ႇဝႃႈ တႃႇဝိတ်ႈ၊ ဢမ်ႇပႄႉၼႅင်ႇဝဵင်းလူင်ၼၼ်ႉလႆႈလႄႈၶဝ်လၢတ်ႈတီႈမၼ်းလႄႈဝႃႈ၊ “မႂ်းဢမ်ႇၶဝ်ႈလႆႈၵႃႈတီႈၼႂ်းၼႆႉလႃးလႃး။ ၵူၼ်းတႃမွတ်ႇတင်းၵူၼ်းတိၼ်ၵႅင်ႉၵူၺ်းၵေႃႈတၵ်းႁႄႉတၵ်းႁၢမ်ႈသူဝႆႉလႆႈဢေႃႈ၊” ဝႃႈၼင်ႇၼႆဢေႃႈ။-
(ၼႂ်းဝႃႈၼၼ်သေၵေႃႈ၊ တႃႇဝိတ်ႈ၊ တိုၵ်းပႄႉသိမ်းဢဝ်တိူၵ်ႈတီႈတိုၵ်းသိုၵ်း ၸိဢုၼ်ႇ၊ ၼၼ်ႉသေယဝ်ႉ၊လႆႈပဵၼ်ဝဵင်းဢၼ်ႁွင်ႉဝႃႈ၊ဝဵင်း “တႃႇဝိတ်ႈ၊” ဢေႃႈ။)
ၼႂ်းဝၼ်းၼၼ်ႉ၊ တႃႇဝိတ်ႈ၊ လၢတ်ႈတီႈၵူၼ်းမၼ်းတင်းလၢႆလႄႈဝႃႈ၊ “မိူၼ်ၸိူဝ်ႉၼင်ႇဢၼ်ၵဝ်ၸင်းၵူၼ်း ယေႇပုသိ၊ ၸိူဝ်းၼၼ်ႉၸွင်ႇမီးၵေႃႉဢၼ်ၸင်းမိူၼ်ၵဝ်ထၢၼ်ႈပေႃးၶႂ်ႈဢဝ်ၶဝ်တၢႆၼၼ်ႉႁိုဝ်း။ ႁႂ်ႈမၼ်းၶဝ်ႈၸွမ်းၶူးဝဵင်းၵႂႃႇသေလႄႈတိုၵ်းယႃႉပႅတ်ႈၵူၼ်းၽၢၼ်ဢၼ်တႃမွတ်ႇတိၼ်ၵႅင်ႉၸိူဝ်းၼၼ်ႉတႃႉ၊” ဝႃႈၼင်ႇၼႆဢေႃႈ။ ပိူဝ်ႈၼႆလႄႈမီးထုင်းၵႂၢမ်းလႄႈဝႃႈ၊ “ၵူၼ်းတႃမွတ်ႇတင်းၵူၼ်းတိၼ်ၵႅင်ႉဢမ်ႇလႆႈၶဝ်ႈၵႃႈၼႂ်းႁိူၼ်း ထႃႇဝရႃႉၽြႃး၊ ” ဝႃႈၼင်ႇၼႆဝႆႉဢေႃႈ။
လိုၼ်းသေဢၼ်တိုၵ်းသိမ်းဢဝ်တိူၵ်ႈတီႈတိုၵ်းသိုၵ်းၼၼ်ႉယဝ်ႉၸိုင်၊ တႃႇဝိတ်ႈ၊ ယူႇၵႃႈၼႂ်းမၼ်းသေလႄႈႁွင်ႉႁဵၵ်ႈၸိုဝ်ႈဝႃႈ၊ဝဵင်း တႃႇဝိတ်ႈ၊ ဢေႃႈ။ တႃႇဝိတ်ႈ၊ တႄႇႁဵတ်းဝဵင်းလူင်လွမ်ႉႁွပ်ႈတိူၵ်ႈတီႈတိုၵ်းသိုၵ်းၼၼ်ႉၸႃႉဢဝ်ၵႃႈတီႈ မိလေႃႇ၊ လႄႈသၢင်ႈႁဵတ်းၵႂႃႇတၢင်းၼႂ်းမၼ်းဢေႃႈ။-
တႃႇဝိတ်ႈ၊ ၶိုၼ်ႈယႂ်ႇတူဝ်းတွၼ်းမႃးယူႇတိၵ်းတိၵ်းၵွပ်ႈပိူဝ်ႈဢၼ် ထႃႇဝရႃႉၽြႃး၊ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ မီးယူႇလူၺ်ႈၵၼ်တင်းမၼ်းဢေႃႈ။
ၵမ်းၼၼ်ႉ၊ၶုၼ်ႁေႃၶမ်း ႁိရမ်ႇ၊ မိူင်း တုရု၊ ပွႆႇၸႂ်ႉသၢၼ်ႇတမၢၼ်ႇႁဵတ်းတၢင်းၵႃႉၶၢႆတေႃႇၵၼ်လႄႈမၼ်းၼၼ်ႉၸွႆႈထႅမ်မႆႉဢႃႇရိတ်ႉတင်းၸၢင်ႈမႆႉ၊ၸၢင်ႈၵေႃႇတိူၵ်ႈႁဵတ်းတိူၵ်ႈမႃးၸူးတီႈ တႃႇဝိတ်ႈ၊ လႄႈ၊ၶဝ်တႄႇႁဵတ်းႁေႃၸဝ်ႈပုၼ်ႈ တႃႇဝိတ်ႈ၊ ဢေႃႈ။-
ၼင်ႇၼၼ်လႄႈ တႃႇဝိတ်ႈ၊ ႁုႁၼ်လွင်ႈဢၼ် ထႃႇဝရႃႉၽြႃး၊ ႁႂ်ႈဢရႃႇၶုၼ်ႁေႃၶမ်းမၼ်းၼၼ်ႉမၼ်ႈၶိူင်ႇယူႇ၊ဢိၵ်ႇတင်းလွင်ႈဢၼ်မၼ်းၸဝ်ႈယုၵ်ႉယွင်ႈသိုင်ႇၸိုင်ႈဝၢၼ်ႈမိူင်းမၼ်းၸဝ်ႈႁႂ်ႈပဵၼ်ပုၼ်ႈၵူၼ်းမၼ်းၸဝ်ႈၼၼ်ႉဢေႃႈ။
လိုၼ်းသေဢၼ် တႃႇဝိတ်ႈ၊ ၶၢႆႉသေၵႃႈတီႈဝဵင်း ႁေႇပရုၼ်ႇ၊ မႃးၼင်ႈႁၢင်ႈၼင်ႈႁေႃၵႃႈတီႈဝဵင်း ယေႇရုသလႅမ်ႇ၊ ၼၼ်ႉၸိုင်၊မၼ်းဢဝ်မေးၼွႆႉထႅင်ႈၼမ်ၼႃႇလႄႈလႆႈလုၵ်ႈၸၢႆးလုၵ်ႈယိင်းလႂ်ထႅင်ႈဢေႃႈ။-
လုၵ်ႈလၢင်းၸိူဝ်းဢၼ်ၵိူတ်ႇလဵင်ႉၵႃႈတီႈဝဵင်း ယေႇရုသလႅမ်ႇ၊ ၼၼ်ႉၸမ်ႉ၊ပဵၼ် သမွႃႇ၊သေႃးပပ်ႉ၊ၼႃႇႀၼ်ႇ၊သေႃးလမုၼ်ႇ၊-
ဢိပႁႃႇ၊ဢေးလိသွႃႉ၊ၼေႇၽႅတ်ႉ၊ယႃႇၽျႃႇ၊-
ဢေးလိသမႃႇ၊ဢေးလျႃႇတႃႉ၊ ဢိၵ်ႇတင်း ဢေႇလီႇၽလႅတ်ႉ၊ ဢေႃႈ။
ၵူၼ်းမဵဝ်း ၽိလိတ်ႉတိ၊ တင်းလၢႆလႆႈငိၼ်းလွင်ႈဢၼ် တႃႇဝိတ်ႈ၊ ပဵၼ်ၶုၼ်ႁေႃၶမ်းမဵဝ်း ဢိသရေး၊ ယဝ်ႉၸင်ႇၶီႇသိုၵ်းမႃးႁႂ်ႈလႆႈတိၺွပ်းဢဝ် တႃႇဝိတ်ႈ၊ ဢေႃႈ။ မိူဝ်ႈဢၼ် တႃႇဝိတ်ႈ၊ လႆႈငိၼ်းလွင်ႈမၼ်းၸိုင်၊မၼ်းလူင်းၸူးတီႈတိူၵ်ႈတိုၵ်းသိုၵ်းဢေႃႈ။-
ၵူၼ်း ၽိလိတ်ႉတိ၊ ၸိူဝ်းၼၼ်ႉႁွတ်ႈထိုင်ၵႃႈတီႈပၢင်ႇႁူၺ်ႈ ရေႇၽိမ်း၊ သေလႄႈတိုၵ်းသိမ်းဢဝ်ပၢင်ႇႁူၺ်ႈၼၼ်ႉဝႆႉယဝ်ႉ။-
တႃႇဝိတ်ႈ၊ ၸင်ႇလဝ်ႈထၢမ်တီႈ ထႃႇဝရႃႉၽြႃး၊ လႄႈဝႃႈ၊ “ၶႃႈၸဝ်ႈတၵ်းလႆႈၶိုၼ်ႈတိုၵ်းၵူၼ်း ၽိလိတ်ႉတိ၊ ၸိူဝ်းၼၼ်ႉတီႈၶႃႈႁိုဝ်း။ ၸဝ်ႈႁဝ်းတၵ်းပၼ်ႁႂ်ႈၶႃႈၸဝ်ႈလႆႈပႄႉသိုၵ်းၶႃႈႁိုဝ်း၊” ဝႃႈၼင်ႇၼႆဢေႃႈ။ ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ၶိုၼ်ႈတိုၵ်းတႃႉ။ ၵဝ်တၵ်းပၼ်ႁႂ်ႈမႂ်းလႆႈပႄႉၼႅင်ႇဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ တႃႇဝိတ်ႈ၊ ၵႂႃႇၸူးတီႈဝဵင်း ပႃႇလႃႉပေႇရၸိမ်း၊ လႄႈတိုၵ်းတေႃးယႃႉၽဵဝ်ႈၵူၼ်း ၽိလိတ်ႉတိ၊ ၶဝ်ပႅတ်ႈၵႃႈတီႈၼၼ်ႈသေယဝ်ႉ၊လၢတ်ႈလႄႈဝႃႈ၊ “ ထႃႇဝရႃႉၽြႃး၊ ၵိူၼ်ႇယႃႉပႅတ်ႈရၢၼ်ႇသူႇၵဝ်တင်းလၢႆ မိူၼ်ၸိူဝ်ႉၼင်ႇၼမ်ႉၼွင်းဢၼ်လုပ်ႇထူမ်ႈပႅတ်ႈၼၼ်ႉယဝ်ႉ၊” ဝႃႈၼင်ႇၼႆဢေႃႈ။ ၵွပ်ႈပိူဝ်ႈလွင်ႈတၢင်းၼၼ်ႉလႄႈႁွင်ႉႁဵၵ်ႈၸိုဝ်ႈတီႈၼၼ်ႈဝႃႈ၊ ပႃႇလႃႉပေႇရၸိမ်း၊ ဢေႃႈ။-
မိူဝ်ႈဢၼ်ၵူၼ်း ၽိလိတ်ႉတိ၊ ၶဝ်ၼီပၢႆႈၵႂႃႇၼၼ်ႉၶဝ်ပႅတ်ႈႁုၼ်ႇႁၢင်ႈသၢင်းထုၶဝ်ဝႆႉတၢင်းလင်လႄႈ တႃႇဝိတ်ႈ၊ တင်းၵူၼ်းမၼ်းၸိူဝ်းၼၼ်ႉဢွၼ်ၵၼ်ဢဝ်ၸိူဝ်းၼၼ်ႉၵႂႃႇဢေႃႈ။
လိုၼ်းၼၼ်ႉ၊ၵူၼ်း ၽိလိတ်ႉတိ၊ တင်းလၢႆသမ်ႉမႃးလႄႈတိုၵ်းသိမ်းဢဝ်ပၢင်ႇႁူၺ်ႈ ရေႇၽိမ်း၊ ၼၼ်ႉထႅင်ႈဢေႃႈ။-
တႃႇဝိတ်ႈ၊ သမ်ႉတွင်ႈထၢမ်တီႈ ထႃႇဝရႃႉၽြႃး၊ ထႅင်ႈပွၵ်ႈၼိုင်ႈလႄႈမၼ်းၸဝ်ႈမီးဢမိင်ႉဝႃႈ၊ “ယႃႇပေၶိုၼ်ႈၵႂႃႇတိုၵ်းၶဝ်ၽၢႆႇတၢင်းၼႆႉ။ မႂ်းတၵ်းလႆႈလဵပ်ႈၵႂႃႇၽၢႆႇတၢင်းလင်သေယဝ်ႉ၊ယူႇၽၢႆႇဢၼ်တေႃႇၼႃႈၵၼ်တင်းၶဝ်လႄႈၶီႇၶိုၼ်ႈၵႂႃႇၵႃႈႁိမ်းတူၼ်ႈမႆႉမွၼ်းၵႂႃႇၸူးၶဝ်ဢေႃႈ။-
မိူဝ်ႈဢၼ်မႂ်းလႆႈငိၼ်းသဵင်ၶီႇသိုၵ်းၵႃႈၼိူဝ်ပၢႆမႆႉမွၼ်းၸိူဝ်းၼၼ်ႉၸိုင်၊လုၵ်ႉတိုၵ်းၵမ်းလဵဝ်တႃႉ။ မိူဝ်ႈၼၼ်ႉ ထႃႇဝရႃႉၽြႃး၊ တၵ်းဢွၼ်ႁူဝ်မႂ်းၵႂႃႇႁႂ်ႈလႆႈတိုၵ်းပႄႉတပ်ႉသိုၵ်း ၽိလိတ်ႉတိ၊ ၶဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။-
တႃႇဝိတ်ႈ၊ ႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ ပူင်ဢမိင်ႉဝႆႉၼၼ်ႉသေယဝ်ႉ၊တိုၵ်းတေႃးယႃႉပႅတ်ႈၵူၼ်း ၽိလိတ်ႉတိ၊ ၸိူဝ်းၼၼ်ႉဢဝ်တီႈဝဵင်း ၵေးပႃႉ၊ တေႃႇထိုင်ႁွတ်ႈဝဵင်း ၵေႇၸႃႇ၊ ဢေႃႈ။
သမ်ႉထႅင်ႈပွၵ်ႈၼိုင်ႈ၊ တႃႇဝိတ်ႈ၊ ႁႂ်ႈၵူၼ်းသိုၵ်းဢၼ်လႆႈၶၢမ်ႇလိူၵ်ႈဢဝ်ဢၼ်ၵတ်ႉၶႅၼ်ႇသေပိူၼ်ႈၵႃႈၼႂ်းမဵဝ်း ဢိသရေး၊ တင်းလၢႆသၢမ်မိုၼ်ႇၵေႃႉၼၼ်ႉမႃးၸုတုမ်ၵၼ်သေယဝ်ႉ၊-
ဢွၼ်ႁူဝ်တပ်ႉသိုၵ်းၼၼ်ႉတင်းသဵင်ႈတင်းမူတ်းၵႂႃႇၸူးၵႃႈတီႈဝဵင်း ပႃႇလႃႉ၊ မိူင်း ယုတႃႉ၊ ပုၼ်ႈဢၼ်တၵ်းဢဝ်တိူၵ်ႈပတိၺိၺ်ႇၽြႃးပဵၼ်ၸဝ်ႈဢၼ်လႆႈၶၢမ်ႇဢဝ်ၼႃႇမႃႉၸိုဝ်ႈသဵင် ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ လႄႈၵိင်းဝၢပ်ႈယူႇၵႃႈၼိူဝ် ၶေႇရုၽဵမ်ႇ၊ ၼၼ်ႉဢေႃႈ။-
ၶဝ်ဢဝ်တိူၵ်ႈတႃႇၸဝ်ႈၼၼ်ႉဢွၵ်ႇသေၵႃႈၼႂ်းႁိူၼ်း ဢၽိၼတပ်ႉ၊ ဢၼ်မီးၵႃႈၼိူဝ်လွႆၼၼ်ႉသေလႄႈဢွၼ်ၵၼ်ဢဝ်တၢင်ႇသႂ်ႇၵႃႈၼိူဝ်လေႃႉဢၼ်မႂ်ႇဢေႃႈ။ ဢေႃႇၸႃႉ၊ တင်း ဢႁိဢေႃး၊ လုၵ်ႈၸၢႆး ဢၽိၼတပ်ႉ၊ ႁေႃႈလေႃႉမႂ်ႇ၊-
ဢၼ်ဢဝ်တိူၵ်ႈပတိၺိၺ်ႇၽြႃးပဵၼ်ၸဝ်ႈတၢင်ႇဝႆႉၼၼ်ႉလႄႈ၊ ဢႁိဢေႃး၊ ပႆပႃႈၼႃႈလေႃႉၼၼ်ႉၵႂႃႇဢေႃႈ။-
တႃႇဝိတ်ႈ၊ ဢိၵ်ႇတင်းၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢွၼ်ၵၼ်လဵတ်းတိင်ႇလဵတ်းတရေႃး၊ႁႆႇၵွင်ၶဵတ်ႇ၊ၸၢပ်ႇသႅင်ႇ၊ပဝ်ႇတိုင်ႈၶရႃႇသေလႄႈဢွၼ်ၵၼ်ၵႃႈဝႅၼ်ႁဵတ်းၵႂၢမ်းၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢေႃႈ။
မိူဝ်ႈဢၼ်ၶဝ်ႁွတ်ႈထိုင်ၵႃႈတီႈတလၢင်းယဵပ်ႇၶဝ်ႈ ၼႃႇၶုၼ်ႇ၊ ၼၼ်ႉၸိုင်၊ဝူဝ်းၸိူဝ်းၼၼ်ႉၶီႈလိုတ်းလႄႈ ဢေႃႇၸႃႉ၊ ယိုၼ်ႈမိုဝ်းမၼ်းသေယိပ်းၵမ်ဢဝ်တိူၵ်ႈပတိၺိၺ်ႇၸဝ်ႈဝႆႉဢေႃႈ။-
မိူဝ်ႈၼၼ်ႉၵမ်းလဵဝ် ထႃႇဝရႃႉၽြႃး၊ ၽြႃးပဵၼ်ၸဝ်ႈၸႂ်မႆႈၶႂ်ႈၸႃႉတီႈ ဢေႃႇၸႃႉ၊ ၵွပ်ႈပိူဝ်ႈဢၼ်မၼ်းႁဵတ်းဢမ်ႇရူဝ်ႇသေႇၼၼ်ႉလႄႈဢဝ်မၼ်းတၢႆပႅတ်ႈၵႃႈတီႈႁိမ်းတိူၵ်ႈပတိၺိၺ်ႇၸဝ်ႈဢေႃႈ။-
တႃႇဝိတ်ႈ၊ မီးတၢင်းဢၼ်ၸႂ်မႆႈၶႂ်ႈၸႃႉၵွပ်ႈပိူဝ်ႈ ထႃႇဝရႃႉၽြႃး၊ ပၼ်တၢမ်ႇတီႈ ဢေႃႇၸႃႉ၊ ၼၼ်ႉလႄႈႁွင်ႉႁဵၵ်ႈၸိုဝ်ႈတီႈၼၼ်ႈဝႃႈ၊ ပေးရိတ်ႉဢေႃႇၸႃႉ ၊တေႃႇထိုင်ႁွတ်ႈဝၼ်းမိူဝ်ႈလဵဝ်ဢေႃႈ။
ၼႂ်းဝၼ်းၼၼ်ႉ တႃႇဝိတ်ႈ၊ ၵူဝ်ႁႄ ထႃႇဝရႃႉၽြႃး၊ လႄႈလၢတ်ႈဝႃႈ၊ “ၵဝ်တၵ်းတေလႆႈႁဵတ်းၸိူဝ်ႉၼင်ႇႁိုဝ်လႄႈဢဝ်တိူၵ်ႈပတိၺိၺ်ႇၸဝ်ႈၵႂႃႇလူၺ်ႈၵၼ်တင်းၵဝ်၊” ဝႃႈၼင်ႇၼႆသေယဝ်ႉ၊-
မၼ်းတႅပ်းတတ်းၸႂ်ဝႃႈ၊တၵ်းဢမ်ႇဢဝ်တိူၵ်ႈတႃႇၸဝ်ႈၼၼ်ႉလူၺ်ႈၵၼ်တင်းမၼ်းၵႂႃႇၵႃႈတီႈဝဵင်း ယေႇရုသလႅမ်ႇ၊ ယဝ်ႉဢေႃႈ။ မၼ်းၸင်ႇငႅၵ်းၵႂႃႇၸူးတီႈႁိူၼ်း ဢူဝ်းပိတ်ႉဢေႇတုမ်ႇ၊ ၵူၼ်းဝဵင်း ၵိတ်ႉတိ၊ ၼၼ်ႉဢေႃႈ။-
ၼင်ႇၼၼ်လႄႈတိူၵ်ႈပတိၺိၺ်ႇၸဝ်ႈၼၼ်ႉမီးယူႇၵႃႈတီႈႁိူၼ်း ဢူဝ်းပိတ်ႉဢေႇတုမ်ႇ၊ သၢမ်လိူၼ်တဵမ်တဵမ်ဢေႃႈ။ ထႃႇဝရႃႉၽြႃး၊ ၵေႃႈပၼ်တၢင်းလီတီႈ ဢူဝ်းပိတ်ႉဢေႇတုမ်ႇ၊ ဢိၵ်ႇတင်းၵူၼ်းႁိူၼ်းၵူၼ်းယေးမၼ်းတင်းလၢႆဢေႃႈ။
ၶုၼ်ႁေႃၶမ်း တႃႇဝိတ်ႈ၊ လႆႈငိၼ်းၶၢဝ်ႇလွင်ႈဢၼ် ထႃႇဝရႃႉၽြႃး၊ ပၼ်တၢင်းလီတီႈ ဢူဝ်းပိတ်ႉဢေႇတုမ်ႇ၊ တင်းၵူၼ်းႁိူၼ်းၵူၼ်းယေးမၼ်းဢိၵ်ႇတင်းၵႃႈဢၼ်မၼ်းမီးၼၼ်ႉတင်းသဵင်ႈတင်းလူင်ၵွပ်ႈပိူဝ်ႈတိူၵ်ႈပတိၺိၺ်ႇၽြႃးပဵၼ်ၸဝ်ႈၼၼ်ႉဢေႃႈ။ ပိူဝ်ႈၼႆလႄႈမၼ်းႁဵတ်းပွႆးလၢမ်းဢၼ်မူၼ်ႈပျေႃႇၼႃႇလႄႈၵႂႃႇဢဝ်တိူၵ်ႈပတိၺိၺ်ႇၸဝ်ႈသေၵႃႈတီႈႁိူၼ်း ဢူဝ်းပိတ်ႉဢေႇတုမ်ႇ၊ မႃးၵႃႈတီႈဝဵင်း ယေႇရုသလႅမ်ႇ၊ ဢေႃႈ။-
မိူဝ်ႈဢၼ်ၵူၼ်းၸိူဝ်းဢၼ်ႁၢမ်တိူၵ်ႈပတိၺိၺ်ႇၸဝ်ႈၼၼ်ႉပႆၵႂႃႇလႆႈႁူၵ်းယၢင်ႈတိၼ်ၼၼ်ႉၸိုင်၊ တႃႇဝိတ်ႈ၊ ႁႂ်ႈၶဝ်ၵိုတ်းသဝ်းယူႇယၢမ်းမိူဝ်ႈဢၼ်မၼ်းဢဝ်ဝူဝ်းပေႃႈတူဝ်ၼိုင်ႈဢိၵ်ႇတင်းဝူဝ်းဢွၼ်ႇတူဝ်ၼိုင်ႈဢၼ်ပီးလီမၼ်းလီၼၼ်ႉသၢၵ်ႈၵၢပ်ႈတၢင်းလူႇတီႈ ထႃႇဝရႃႉၽြႃး၊ ဢေႃႈ။-
တႃႇဝိတ်ႈ၊ ၵူၺ်းဢဝ်ၽႃႈပၢၼ်ႇၶျေႃးဝဵၼ်းဢႅဝ်မၼ်းလႄႈဢဝ်ႁႅင်းဢွၵ်ႇလႄႈၶတ်းၸႂ်ၵႃႈဝႅၼ်ၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢေႃႈ။-
ၼင်ႇၼၼ်လႄႈ တႃႇဝိတ်ႈ၊ ဢိၵ်ႇတင်းၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢွၼ်ၵၼ်ႁုၼ်ႈႁိူဝ်ႈယူႇ၊ပဝ်ႇၼႄးၶရႃႇယူႇသေလႄႈဢဝ်တိူၵ်ႈပတိၺိၺ်ႇၸဝ်ႈမႃးၵႃႈတီႈဝဵင်း ယေႇရုသလႅမ်ႇ၊ ဢေႃႈ။
မိူဝ်ႈဢၼ်ယင်းဢဝ်တိူၵ်ႈတႃႇၸဝ်ႈၶဝ်ႈၼႂ်းဝဵင်းလူင်မႃးယူႇၼၼ်ႉၸိုင်၊ မိၶႃႇလႃႉ၊ လုၵ်ႈယိင်း သေႃးလု၊ ယူႇၵႃႈတီႈႁူးလၢင်းတဵၼ်သေယဝ်ႉ၊တူၺ်းႁၼ်ၶုၼ်ႁေႃၶမ်း တႃႇဝိတ်ႈ၊ ၵႃႈယူႇဝႅၼ်ယူႇၼၼ်ႉသေလႄႈမီးၸႂ်ဢၼ်ငိၼ်းၸင်းဢဵတ်ႇသဵတ်ႇ တႃႇဝိတ်ႈ၊ ဢေႃႈ။-
ၶဝ်ဢွၼ်ၵၼ်ဢဝ်တိူၵ်ႈပတိၺိၺ်ႇ ထႃႇဝရႃႉၽြႃး၊ ၼၼ်ႉသႂၢင်းၶဝ်ႈလႄႈဝႆႉၵႃႈၼႂ်းသုမ်ႉထဵင်၊တီႈဢၼ် တႃႇဝိတ်ႈ၊ ပူၵ်းတင်ႈဝႆႉပုၼ်ႈတိူၵ်ႈပတိၺိၺ်ႇၼၼ်ႉဢေႃႈ။ ၼင်ႇၼၼ်လႄႈ တႃႇဝိတ်ႈ၊ သၢၵ်ႈၵၢပ်ႈတၢင်းလူႇဢၼ်ၽဝ်ၽႆးဢိၵ်ႇတင်းတၢင်းလူႇမိၵ်ႈသႁႃႇယႃႉတီႈ ထႃႇဝရႃႉၽြႃး၊ ဢေႃႈ။-
မိူဝ်ႈဢၼ်မၼ်းသၢၵ်ႈၵၢပ်ႈတၢင်းလူႇၸိူဝ်းၼၼ်ႉယဝ်ႉတူဝ်ႈၼၼ်ႉၸိုင်၊မၼ်းဢိင်ၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ဢၼ်ယႂ်ႇမျၢတ်ႈၼႃႇၼၼ်ႉသေလႄႈပၼ်တၢင်းလီတီႈၵူၼ်းတင်းလၢႆဢေႃႈ။-
မၼ်းမႅင်ႇပၼ်တၢင်းၵိၼ်တီႈၶဝ်တင်းသဵင်ႈတင်းလူင်လႄႈၽႄမႅင်ႇပၼ်ၸဵမ်ယိင်းၸဵမ်ၸၢႆးၸိူဝ်းၼၼ်ႉယေႈၵေႃႉၶဝ်ႈမုၼ်းယေႈၶႅပ်း၊ၼိူဝ်ႉပိင်ႈယေႈၵွၼ်ႈ၊ၶႅပ်းမၢၵ်ႇၸပိတ်ႉႁႅင်ႈယေႈၶႅပ်းၼင်ႇၵၼ်သေယဝ်ႉ၊ၵူၼ်းတင်းသဵင်ႈတင်းလူင်ဢွၼ်ၵၼ်ၶိုၼ်းမိူဝ်းၵႂႃႇႁိူၼ်းၽႂ်ႁိူၼ်းမၼ်းသေဢေႃႈ။
လိုၼ်းၼၼ်ႉ၊ တႃႇဝိတ်ႈ၊ မိူဝ်းၵႂႃႇႁႂ်ႈလႆႈပၼ်တၢင်းလီတီႈၵူၼ်းၼႂ်းႁၢင်ႈၼႂ်းႁေႃမၼ်းၸိူဝ်းၼၼ်ႉလႄႈ မိၶႃႇလႃႉ၊ ဢွၵ်ႇႁပ်ႉႁူဝ်တၢင်းမၼ်းလႄႈလၢတ်ႈဝႃႈ၊ “ၶုၼ်ႁေႃၶမ်း ဢိသရေး၊ ႁဵတ်းႁႂ်ႈမုၼ်ၽုင်းတူဝ်ၸဝ်ႈၵဝ်ႇယႂ်ႇၼႃႇၼႂ်းဝၼ်းမိူဝ်ႈၼႆႉယဝ်ႉ။ မၼ်းထွတ်ႇၶူဝ်းၼုင်ႈမၼ်းၸဝ်ႈဝၼ်းမိူဝ်ႈၼႆႉၵႃႈတီႈၽၢႆႇၼႃႈၶႃႈၵူၼ်းယိင်းၶႃႈၵူၼ်းၸၢႆးမၼ်းၸဝ်ႈမိူၼ်ၸိူဝ်ႉၼင်ႇၵူၼ်းဢၼ်လဵၵ်ႉဢၼ်တမ်ႇ၊ဢမ်ႇမီးၸႂ်ဢူၵ်းၸႂ်ဢၢႆထွတ်ႇၶူဝ်းၼုင်ႈတူဝ်ၸဝ်ႈၵဝ်ႇၼၼ်ႉယဝ်ႉလူင်ပႄႇ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ၵေႃႈၶိုၼ်းလၢတ်ႈလႄႈဝႃႈ၊ “ၵဝ်ၵႃႈဝႅၼ်ႁႂ်ႈလႆႈယုၵ်ႉယွင်ႈ ထႃႇဝရႃႉၽြႃး၊ ဢၼ်လိူၵ်ႈဢဝ်ၵဝ်တၢင်တူဝ်ပေႃႈမႂ်း၊ဢိၵ်ႇတင်းလုၵ်ႈလၢၼ်ၸိူဝ်ႉၶိူဝ်းပေႃႈမႂ်း၊ႁႂ်ႈၵဝ်လႆႈဢုပ်ႉပိူင်ႇၵူၼ်း ထႃႇဝရႃႉၽြႃး၊ မဵဝ်း ဢိသရေး၊ ၼၼ်ႉဢမ်ႇၸႂ်ႈႁိုဝ်း။ ၵဝ်တၵ်းၵႃႈဝႅၼ်ႁႂ်ႈလႆႈယုၵ်ႉယွင်ႈ ထႃႇဝရႃႉၽြႃး၊ ၶိူဝ်းၶိူဝ်းယႂ်းယႂ်းဢေႃႈ။-
တၵ်းပဵၼ်တၢင်းဢၼ်ၸိုဝ်ႈသဵင်ၵဝ်ယဵင်ႈၶႅၼ်းလုၵူၺ်းဢမ်ႇၵႃး၊ၵဝ်တၵ်းပဵၼ်ၵေႃႉဢၼ်လဵၵ်ႉဢၼ်တမ်ႇသိုဝ်ႈၼႃႈတႂ်ႈတႃမႂ်းသေၵေႃႈ၊ၵႃႈတီႈၶႃႈၵူၼ်းယိင်းဢၼ်မႂ်းလၢတ်ႈၸိူဝ်းၼၼ်ႉၸမ်ႉ၊ၵဝ်တၵ်းမီးသရေႇၼႃႈတႃဢေႃႈ၊” ဝႃႈၼင်ႇၼႆဢေႃႈ။
မိၶႃႇလႃႉ၊ လုၵ်ႈယိင်း သေႃးလု၊ ၼၼ်ႉယင်းဢမ်ႇမီးလုၵ်ႈမီးလၢင်းတေႃႇထိုင်ႁွတ်ႈမၼ်းတၢႆၵႂႃႇၼၼ်ႉဢေႃႈ။
ၶုၼ်ႁေႃၶမ်း တႃႇဝိတ်ႈ၊ ၼင်ႈႁၢင်ႈၼင်ႈႁေႃယူႇၼိမ်ၼိမ်လီလီလႄႈ ထႃႇဝရႃႉၽြႃး၊ ပၼ်ႁႂ်ႈမၼ်းယူႇလူင်ႈလီလွတ်ႈလီသေၵႃႈတီႈၽေးရၢၼ်ႇသူႇမၼ်းတင်းလၢႆဢေႃႈ။-
မိူဝ်ႈၼၼ်ႉၶုၼ်ႁေႃၶမ်းလၢတ်ႈတီႈပရေႃးၽႅတ်ႈ ၼႃႇႀၼ်ႇ၊ လႄႈဝႃႈ၊ “တူၺ်းလူး။ ၵဝ်လႆႈယူႇၵႃႈၼႂ်းႁေႃမႆႉဢႃႇရိတ်ႉဢေႃႈ။ တိူၵ်ႈပတိၺိၺ်ႇၽြႃးပဵၼ်ၸဝ်ႈၸမ်ႉ၊လႆႈယူႇၵႃႈၼႂ်းသုမ်ႉထဵင်ဢေႃႈ၊” ဝႃႈၼင်ႇၼႆဢေႃႈ။
ၼႃႇႀၼ်ႇ၊ ၶိုၼ်းလဝ်ႈလၢတ်ႈလႄႈဝႃႈ၊ “ႁဵတ်းၸွမ်းၵႃႈၼင်ႇဢၼ်ၸဝ်ႈႁဝ်းမီးဢလူဝ်ႇၼၼ်ႉသေၵမ်းတီႈၶႃႈ။ ထႃႇဝရႃႉၽြႃး၊ မီးယူႇလူၺ်ႈၵၼ်တင်းၸဝ်ႈႁဝ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊ၼႂ်းၶိုၼ်းၼၼ်ႉၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးၵႃႈတီႈ ၼႃႇႀၼ်ႇ၊ လႄႈဝႃႈၸမ်ႉ၊-
“ၵႂႃႇလႄႈမွၵ်ႇလၢတ်ႈၶႃႈၵဝ် တႃႇဝိတ်ႈ၊ ၼၼ်ႉလႄႈဝႃႈ၊ ‘ ထႃႇဝရႃႉၽြႃး၊ မီးဢမိင်ႉလႄႈဝႃႈၸမ်ႉ၊မႂ်းပဵၼ်ၵေႃႉဢၼ်တၵ်းႁဵတ်းႁိူၼ်းပုၼ်ႈၵဝ်တေယူႇၼၼ်ႉဢမ်ႇၸႂ်ႈ။-
ၵဝ်ဢမ်ႇတွၼ်ႉယူႇၵႃႈၼႂ်းႁိူၼ်းၸႃႉၸဵမ်မိုဝ်ႉဝၼ်းဢၼ်ၵဝ်ၼုၵ်ႈဢဝ်ၵူၼ်းမဵဝ်း ဢိသရေး၊ တင်းလၢႆဢွၵ်ႇမိူင်း ဢေးၵျိပ်ႉ၊ မႃးၼၼ်ႉတေႃႇထိုင်ႁွတ်ႈဝၼ်းမိူဝ်ႈၼႆႉယဝ်ႉ။ ၵဝ်လႆႈၶၢႆႉၵႂႃႇတီႈၼိုင်ႈယဝ်ႉတီႈၼိုင်ႈလႄႈယူႇၵႃႈၼႂ်းသုမ်ႉထဵင်မိူၼ်ပဵၼ်တီႈယူႇတီႈသဝ်းၵဝ်ယဝ်ႉ။-
တီႈလႂ်တၼ်းလႂ်ဢၼ်ၵဝ်ၶၢႆႉၵႂႃႇလူၺ်ႈၵၼ်တင်းၵူၼ်း ဢိသရေး၊ တင်းလၢႆၼၼ်ႉၸွင်ႇၵဝ်ယၢမ်ႈထၢမ်တီႈၵူၼ်းလူင်ဢၼ်ၸီႇယၢင်ႇတြႃးဢၼ်ၵဝ်ၸႂ်ႉႁႂ်ႈလဵင်ႉထိင်းၵူၼ်းၵဝ်မဵဝ်း ဢိသရေး၊ ၸိူဝ်းၼၼ်ႉသေၵေႃႉၵေႃႉလႄႈဝႃႈ၊ “ၵွပ်ႈသင်လႄႈမႂ်းဢမ်ႇႁဵတ်းႁိူၼ်းမႆႉဢႃႇရိတ်ႉပုၼ်ႈၵဝ်၊”’ ဝႃႈၼင်ႇၼႆႁိုဝ်း။
“မိူဝ်ႈလဵဝ်ၼႆႉမႂ်းလၢတ်ႈတီႈၶႃႈၵဝ် တႃႇဝိတ်ႈ၊ လႄႈဝႃႈ၊ ‘ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉလႄႈဝႃႈၸမ်ႉ၊ၵဝ်ၼုၵ်ႈဢဝ်မႂ်းဢွၵ်ႇသေၵႃႈတီႈဢၼ်လဵင်ႉထိင်းသူဝ်းၵႃႈၼႂ်းပၢင်ႇယိူဝ်ႈၼၼ်ႉမႃးလႄႈၶၢၼ်းမႂ်းဝႆႉၼႂ်းဢရႃႇၶုၼ်ဢၼ်ဢုပ်ႉပိူင်ႇၵူၼ်းၵဝ်မဵဝ်း ဢိသရေး၊ ယဝ်ႉ။-
ၵဝ်ၵႂႃႇၸွမ်းလူၺ်ႈၵၼ်တင်းမႂ်းၵႃႈတီႈဢၼ်မႂ်းၵႂႃႇၼၼ်ႉလႄႈပႄႇၽဵဝ်ႈရၢၼ်ႇသူႇမႂ်းၵႃႈမီးပႅတ်ႈသေၵႃႈတီႈၽၢႆႇၼႃႈမႂ်းသေယဝ်ႉ၊ပၼ်ႁႂ်ႈၸိုဝ်ႈသဵင်မႂ်းယႂ်ႇမိူၼ်ၼႃႇမႃႉၸိုဝ်ႈသဵင်ၵေႃႉဢၼ်ယႂ်ႇသေပိူၼ်ႈၵႃႈၼိူဝ်လိၼ်မိူင်းတင်းလၢႆၼၼ်ႉယဝ်ႉ။-
ၵဝ်လိူၵ်ႈဢဝ်တီႈဝႆႉပုၼ်ႈၵူၼ်းၵဝ်မဵဝ်း ဢိသရေး၊ လႄႈႁႂ်ႈၶဝ်လႆႈယူႇသဝ်းၵႃႈတီႈႁိူၼ်းၶဝ်သေယဝ်ႉ၊ၵမ်းလိုၼ်းတၵ်းဢမ်ႇလႆႈၶၢမ်ႇတၢင်းဢၼ်ယႃႉယုၵ်ႉလႃးလႃး။ ၵူၼ်းႁၢႆႉၵူၼ်းမိူၵ်ႈတင်းလၢႆ၊တၵ်းဢမ်ႇလႆႈတဵၵ်းငႅၼ်းၶဝ်မိူၼ်ၸိူဝ်ႉၼင်ႇဢွၼ်တၢင်းၼၼ်ႉယဝ်ႉ။-
ဢိၵ်ႇတင်းၼႂ်းၶိင်ႇဢၼ်ၵဝ်ၶၢၼ်းၵူၼ်းလူင်ဢၼ်ၸီႇယၢင်ႇတြႃးၸိူဝ်းၼၼ်ႉဝႆႉၵႃႈၼႂ်းၵူၼ်းၵဝ်မဵဝ်း ဢိသရေး၊ တင်းလၢႆၼၼ်ႉထႅင်ႈ။ ၵဝ်တၵ်းႁႂ်ႈမႂ်းလိုဝ်ႈယူႇၼိမ်ၼိမ်လီလီ၊ႁႂ်ႈၵၢင်းလွတ်ႈတင်းၽေးရၢၼ်ႇသူႇမႂ်းၸိူဝ်းၼၼ်ႉဢေႃႈ။ လိူဝ်သေၼၼ်ႉဢမ်ႇၵႃး၊ ထႃႇဝရႃႉၽြႃး၊ မွၵ်ႇလၢတ်ႈတီႈမႂ်းလူၺ်ႈလွင်ႈဢၼ်မၼ်းၸဝ်ႈတၵ်းႁႂ်ႈလုၵ်ႈလၢၼ်ၸိူဝ်ႉၶိူဝ်းမႂ်းတႄႇယူႇၼၼ်ႉဢေႃႈ။-
မိူဝ်ႈဢၼ်မိုဝ်ႉဝၼ်းဢသၢၵ်ႈမႂ်းထူၼ်ႈတဵမ်ယဝ်ႉလႄႈၼွၼ်းလပ်းလူၺ်ႈၵၼ်တင်းပူႇမွၼ်ႇမႂ်းၸိူဝ်းၼၼ်ႉယဝ်ႉၸိုင်၊ၵဝ်တၵ်းယုၵ်ႉယွင်ႈလုၵ်ႈလၢၼ်ဢၼ်သိုပ်ႇဢွၵ်ႇမႃးတီႈမႂ်းၼၼ်ႉၵေႃႉၼိုင်ႈပဵၼ်ၶုၼ်ႁေႃၶမ်းလႄႈႁႂ်ႈသိုင်ႇၸိုင်ႈဝၢၼ်ႈမိူင်းမၼ်းတႄႇယူႇဢေႃႈ။-
မၼ်းၼၼ်ႉပဵၼ်ၵေႃႉဢၼ်တၵ်းႁဵတ်းႁိူၼ်းပုၼ်ႈၼႃႇမႃႉၸိုဝ်ႈသဵင်ၵဝ်လႄႈၵဝ်တၵ်းႁႂ်ႈရႃႇၸႃႉပလၢင်ႇမိူင်းမၼ်းၼၼ်ႉတႄႇယူႇတႃႇသေႇဢေႃႈ။-
ၵဝ်တၵ်းပဵၼ်ပေႃႈမၼ်းလႄႈမၼ်းတၵ်းပဵၼ်လုၵ်ႈၸၢႆးၵဝ်ဢေႃႈ။ မိူဝ်ႈဢၼ်မၼ်းႁဵတ်းတုၸရိူၵ်ႈၸိုင်၊ၵဝ်တၵ်းပၼ်တၢမ်ႇဢပျတ်ႈတီႈမၼ်းမိူၼ်ၸိူဝ်ႉၼင်ႇဢၼ်ပေႃႈပၼ်တၢမ်ႇတီႈလုၵ်ႈၸၢႆးမၼ်းၼၼ်ႉဢေႃႈ။-
ၵူၺ်းၵႃႈ၊မႅတ်ႈတႃႇၵဝ်တၵ်းဢမ်ႇၽၢတ်ႇယၢၼ်သေၵႃႈတီႈမၼ်းမိူၼ်ၸိူဝ်ႉၼင်ႇဢၼ်မႅတ်ႈတႃႇၵဝ်ၽၢတ်ႇယၢၼ်သေၵႃႈတီႈ သေႃးလု၊ ဢၼ်ၵဝ်ဢဝ်ဢွၵ်ႇပႅတ်ႈပုၼ်ႈတႃႇမႂ်းတၵ်းပဵၼ်ၶုၼ်ႁေႃၶမ်းၼၼ်ႉဢေႃႈ။-
လုၵ်ႈလၢၼ်ၸိူဝ်ႉၶိူဝ်းမႂ်းတၵ်းမၼ်ႈၶိူင်ႇယၢဝ်းယိုၼ်းလႄႈၵဝ်တၵ်းႁႂ်ႈသိုင်ႇၸိုင်ႈဝၢၼ်ႈမိူင်းမႂ်းတႄႇယူႇသေႇသေႇဢေႃႈ။ ၶိူဝ်းၶုၼ်ႁေႃၶမ်းမႂ်းတၵ်းဢမ်ႇလႆႈမီးတီႈသုတ်းတီႈၵွႆဢေႃႈ၊’ ဝႃႈၼင်ႇၼႆမီးဢမိင်ႉဢေႃႈ၊” ဝႃႈၼင်ႇၼႆဢေႃႈ။
ၼင်ႇၼၼ်လႄႈ ၼႃႇႀၼ်ႇ၊ ဢဝ်ၵႂၢမ်းပျႃႇတိၵ်ႈရူႇပႃႇရူင်ႇၸဝ်ႈၵႃႈမီးၼႆႉၶိုၼ်းမွၵ်ႇလၢတ်ႈတီႈ တႃႇဝိတ်ႈ၊ ၵူႈၶေႃႈၵူႈၵမ်းဢေႃႈ။
မိူဝ်ႈၼၼ်ႉ ၶုၼ်ႁေႃၶမ်း တႃႇဝိတ်ႈ၊ ၶဝ်ႈၵႂႃႇၵႃႈၼႂ်းသုမ်ႉထဵင်ၸဝ်ႈၼၼ်ႉသေယဝ်ႉ၊ၼင်ႈယူႇၵႃႈတီႈၽၢႆႇၼႃႈ ထႃႇဝရႃႉၽြႃး၊ လႄႈသူးတွင်းဝႃႈ၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈဢိၵ်ႇတင်းၵူၼ်းႁိူၼ်းၵူၼ်းယေးၶႃႈၸဝ်ႈတင်းလၢႆ ဢမ်ႇၵိုင်ႇထိူၵ်ႈတၢင်းဢၼ်ၸဝ်ႈႁဝ်းႁဵတ်းပုၼ်ႈၶႃႈၸဝ်ႈယဝ်ႉၸိူဝ်းၼၼ်ႉတီႈၶႃႈ။-
ၵူၺ်းၵႃႈ၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တီႈၶႃႈ။ တေႃႈလဵဝ်ၼႆႉၸဝ်ႈႁဝ်းႁဵတ်းပုၼ်ႈၶႃႈၸဝ်ႈၼမ်ၼႃႇထၢၼ်ႈပေႃးလူၼ်ႉပေႃးလိူဝ်တီႈၶႃႈယဝ်ႉ။ ၸဝ်ႈႁဝ်းဝႆႉၵတိလူၺ်ႈလွင်ႈၸိူဝ်ႉၶိူဝ်းၶႃႈၸဝ်ႈ ပုၼ်ႈၶိင်ႇၶႃႇဝၼ်းလိုၼ်းမိူဝ်းၼႃႈၼၼ်ႉတီႈၶႃႈယဝ်ႉလူင်ပႄႇ။ ဢူဝ်း။ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တီႈၶႃႈ။ ၸွင်ႇယၢမ်ႈပဵၼ်ထုင်းၸၢမ်ႇဢၼ်ၸဝ်ႈႁဝ်းႁဵတ်းတေႃႇၵူၼ်းၸိူဝ်ႉၼင်ႇၼႆတီႈၶႃႈႁိုဝ်း။-
ၶႃႈၸဝ်ႈတၵ်းမီးလွင်ႈဢၼ်လဝ်ႈလၢတ်ႈၸိူဝ်ႉၼင်ႇႁိုဝ်ထႅင်ႈတီႈၶႃႈ။ ၸဝ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈတီႈၶႃႈ။ ၸဝ်ႈႁဝ်းႁုၸၵ်းၶႃႈၸဝ်ႈယူႇတီႈၶႃႈဢေႃႈ။-
ဢၼ်ၼႆႉၸိုင်၊ပဵၼ်ဢလူဝ်ႇၵၢင်ၸႂ်ၸဝ်ႈ ဢိၵ်ႇတင်းတၢင်းဢၼ်ဢဵၼ်းဢၢၼ်းၸဝ်ႈတႃႇတေႁဵတ်းၸိူဝ်ႉၼင်ႇၼႆလႄႈ၊ၸဝ်ႈႁဝ်းႁဵတ်းလွင်ႈတၢင်းဢၼ်ယႂ်ႇမျၢတ်ႈၸိူဝ်းၼႆႉ ႁႂ်ႈလႆႈသင်ႇသွၼ်ၶႃႈၸဝ်ႈတီႈၶႃႈဢေႃႈ။-
ဢူဝ်း။ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ၸဝ်ႈႁဝ်းယႂ်ႇမျၢတ်ႈၼႃႇတီႈၶႃႈဢေႃႈ။ ၵႃႈၼင်ႇဢၼ်ၶႃႈၸဝ်ႈႁဝ်းၶဝ်ယၢမ်ႈငိၼ်းၼၼ်ႉ ဢမ်ႇမီးၽြႃးဢၼ်မိူၼ်ၵၼ်တင်းၸဝ်ႈႁဝ်းတီႈၶႃႈ။ ၼွၵ်ႈသေၸဝ်ႈႁဝ်းဢမ်ႇမီးၽြႃးတၢင်ႇသူႇတၢင်ႇပႃးတီႈၶႃႈ။-
ၵႃႈၼိူဝ်လိၼ်မိူင်းၼႆႉ ဢမ်ႇမီးၵူၼ်းမဵဝ်းဢၼ်မိူၼ်ၵူၼ်းမဵဝ်း ဢိသရေး၊ ဢၼ်ၸဝ်ႈႁဝ်းၵႄႇၼုၵ်ႈဢဝ်သေတၢင်းဢၼ်ပဵၼ်ၶႃႈ၊ႁႂ်ႈလႆႈမႃးပဵၼ်ၵူၼ်းၸဝ်ႈႁဝ်းၼၼ်ႉတီႈၶႃႈ။ လွင်ႈဢၼ်ယႂ်ႇမျၢတ်ႈဢၼ်လီဢၢမ်းၸဝ်ႈႁဝ်းႁဵတ်းပုၼ်ႈၶဝ်ၼၼ်ႉ ႁဵတ်းႁႂ်ႈၼႃႇမႃႉၸိုဝ်ႈသဵင်ၸဝ်ႈႁဝ်းထၢင်ႇသႃးၸွတ်ႇတူဝ်ႈၵမ်ႇၽႃႇၵႂႃႇတီႈၶႃႈယဝ်ႉ။ ၸဝ်ႈႁဝ်းႁေႃႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ၊ဢိၵ်ႇတင်းၽြႃးၶဝ်ဢွၵ်ႇပႅတ်ႈပုၼ်ႈၵူၼ်းၸဝ်ႈႁဝ်း၊ၵူၼ်းမဵဝ်းဢၼ်ၸဝ်ႈႁဝ်းပွႆႇလွတ်ႈဢွၵ်ႇမိူင်း ဢေးၵျိပ်ႉ၊ မႃး ႁႂ်ႈလႆႈပဵၼ်ၵူၼ်းၸဝ်ႈႁဝ်းၼၼ်ႉတီႈၶႃႈယဝ်ႉ။-
ၸဝ်ႈႁဝ်းႁႂ်ႈၵူၼ်းမဵဝ်း ဢိသရေး၊ ပဵၼ်ၵူၼ်းၸဝ်ႈႁဝ်းသေယဝ်ႉ၊ၸဝ်ႈႁဝ်းသမ်ႉပဵၼ်ၽြႃးၶဝ်တီႈၶႃႈယဝ်ႉဢေႃႈ။
“မိူဝ်ႈလဵဝ်ၼႆႉၸိုင်၊ ထႃႇဝရႃႉၽြႃး၊ ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈႁႂ်ႈၵတိၸဝ်ႈဢၼ်ဝႆႉၵႃႈတီႈၶႃႈၸဝ်ႈ၊ဢိၵ်ႇတင်းလုၵ်ႈလၢၼ်ၸိူဝ်ႉၶိူဝ်းၶႃႈၸဝ်ႈၼၼ်ႉပျေႉၸုမ်ႇတႄႇယူႇတႃႇသေႇသေလႄႈ၊ႁဵတ်းၸွမ်းၵႃႈၼင်ႇဢၼ်ၸဝ်ႈႁဝ်းမီးဢမိင်ႉဝႆႉၼၼ်ႉသေၵမ်းတီႈၶႃႈ။-
ႁႂ်ႈၼႃႇမႃႉၸိုဝ်ႈသဵင်ၸဝ်ႈႁဝ်းမီးတၢင်းဢၼ်ယုၵ်ႉယွင်ႈယူႇတႃႇသေႇသေၵမ်းတီႈၶႃႈ။ ႁႂ်ႈၵူၼ်းတင်းလၢႆဝႃႈ၊ ‘ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ပဵၼ်ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ၶဝ်ဢေႃႈ၊’ ဝႃႈၼင်ႇၼႆတႃႇသေႇသေၵမ်းတီႈၶႃႈ။ ႁႂ်ႈၶိူဝ်းၶုၼ်ႁေႃၶမ်းၶႃႈၸဝ်ႈႁဝ်း တႃႇဝိတ်ႈ၊ ၼႆႉတႄႇယူႇၵႃႈတီႈၽၢႆႇၼႃႈၸဝ်ႈႁဝ်းသေၵမ်းတီႈၶႃႈ။-
ဢူဝ်း။ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ တီႈၶႃႈ။ ၸဝ်ႈႁဝ်းပၼ်ပျႃႇတိၵ်ႈတီႈၶႃႈၸဝ်ႈႁဝ်းၼႆႉလႄႈဝႃႈ၊ ‘ၵဝ်တၵ်းႁႂ်ႈလုၵ်ႈလၢၼ်ၸိူဝ်ႉၶိူဝ်းမႂ်းတႄႇယူႇဢေႃႈ၊’ ဝႃႈၼင်ႇၼႆလႄႈၶႃႈၸဝ်ႈႁဝ်းၼႆႉမီးၸႂ်ဢၼ်ႁတ်းႁၢၼ်၊ႁဵတ်းပထၼႃႇတၢင်းဢၼ်သူးတွင်း၊တီႈၸဝ်ႈႁဝ်းၸိူဝ်ႉၼင်ႇၼႆတီႈၶႃႈဢေႃႈ။
“ဢူဝ်း။ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းပဵၼ်ၽြႃးပဵၼ်ၸဝ်ႈတီႈၶႃႈဢေႃႈ။ ၵႂၢမ်းၵတိၸဝ်ႈႁဝ်းၸိူဝ်းၼၼ်ႉ၊ပဵၼ်ဢၼ်လီယုမ်ႇယမ်တမ်းၸႂ်တီႈၶႃႈလႄႈၸဝ်ႈႁဝ်းဝႆႉၵတိသဵတ်ႈၸႃႇဢၼ်လီဢၼ်ငၢမ်းၸိူဝ်းၼႆႉတီႈၶႃႈၸဝ်ႈတီႈၶႃႈဢေႃႈ။-
မိူဝ်ႈလဵဝ်ၼႆႉၸိုင်၊ၶႅၼ်းတေႃႈမီးၸႂ်လီၸႂ်ဝၢၼ်ႁႂ်ႈလႆႈပၼ်တၢင်းလီတီႈလုၵ်ႈလၢၼ်ၸိူဝ်ႉၶိူဝ်းၶႃႈၸဝ်ႈႁဝ်းၼႆႉႁႂ်ႈမၼ်းတႄႇယူႇၽၢႆႇၼႃႈၸဝ်ႈႁဝ်းသိုပ်ႇသိုပ်ႇတၢမ်တၢမ်သေၵမ်းၶႃႈ။ ဢူဝ်း။ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တီႈၶႃႈ။ ၸွမ်းၵႃႈၼင်ႇဢၼ်ၸဝ်ႈႁဝ်းမီးၵတိဝႆႉၼၼ်ႉ၊ၶႅၼ်းတေႃႈႁႂ်ႈမၢင်ႇၵလႃႇတၢင်းလီၸဝ်ႈႁဝ်းတႄႇယူႇၵႃႈၼိူဝ်မဵဝ်းၸိူဝ်ႉၶိူဝ်းၶႃႈၸဝ်ႈႁဝ်းၼႆႉတႃႇသေႇဢမ်ႇထၢတ်ႇသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
လိုၼ်းၼၼ်ႉဢမ်ႇႁိုင်ဢမ်ႇၼၢၼ်းၶုၼ်ႁေႃၶမ်း တႃႇဝိတ်ႈ၊ တိုၵ်းတေႃးၵူၼ်းမဵဝ်း ၽိလိတ်ႉတိ၊ ထႅင်ႈလႄႈယႃႉၽဵဝ်ႈၶဝ်ပႅတ်ႈသေယဝ်ႉ၊မၼ်းသိမ်းဢဝ်ဝဵင်း မႅတ်ႉထႅၵ်ႉဢမ်ႇမႃႇ၊ ၵႃႈၼႂ်းမိုဝ်းၵူၼ်းမဵဝ်း ၽိလိတ်ႉတိ၊ ၸိူဝ်းၼၼ်ႉဢေႃႈ။
ၵူၼ်းမိူင်း မေႃႇၽႃႉ၊ ၵေႃႈ တႃႇဝိတ်ႈ၊ တိုၵ်းပႄႉၶဝ်ဢေႃႈ။ မၼ်းဢဝ်ၶဝ်ၼွၼ်းၶပ်ႉၵၼ်ၵႃႈၼိူဝ်လိၼ်လႄႈ၊ၼပ်ႉဢၢၼ်ႇၼႂ်းသၢမ်ၵေႃႉၼၼ်ႉဢဝ်တၢႆသွင်ၵေႃႉဢေႃႈ။ ၼင်ႇၼၼ်လႄႈၵူၼ်းမဵဝ်း မေႃႇၽႃႉ၊ လႆႈၶၢမ်ႇပဵၼ်ၵူၼ်းမိူင်းမၼ်းမႃးသေယဝ်ႉ၊လႆႈသၢၵ်ႈၶွၼ်ႇတီႈမၼ်းဢေႃႈ။
လိူဝ်သေၼၼ်ႉ၊ တႃႇဝိတ်ႈ၊ တိုၵ်းတေႃး ႁႃႇတႃႉတေႇၸႃႇ၊ လုၵ်ႈၸၢႆး ရေးႁွပ်ႉ၊ ၶုၼ်ႁေႃၶမ်းမိူင်း ၸေႃႇၽႃႉ၊ ယၢမ်းမိူဝ်ႈဢၼ်မၼ်းၶီႇသိုၵ်းၵႂႃႇႁႂ်ႈလႆႈသိမ်းဢဝ်လိၼ်မၼ်းဢၼ်မီးၸွမ်းၼမ်ႉ ဢုၽရတ်ႉ၊ ၼၼ်ႉဢေႃႈ။-
တႃႇဝိတ်ႈ၊ တိဢဝ်လေႃႉမႃႉသိုၵ်းမၼ်းႁဵင်ၼိုင်ႈ၊ၵူၼ်းသိုၵ်းၶီႇလေႃႉၸဵတ်းပၢၵ်ႇ၊ဢိၵ်ႇတင်းၵူၼ်းသိုၵ်းတပ်ႉတိၼ်သွင်မိုၼ်ႇဢေႃႈ။ မၼ်းဢဝ်မႃႉဝႆႉပုၼ်ႈတႃႇလေႃႉမႃႉသိုၵ်းပၢၵ်ႇၼိုင်ႈၵူၺ်းလႄႈတၢင်ႇတူဝ်ၸိူဝ်းၼၼ်ႉၸမ်ႉ၊ၽၼ်းဢဵၼ်ၼွင်ႈၶဝ်ၶၢတ်ႇပႅတ်ႈတင်းမူတ်းဢေႃႈ။
မိူဝ်ႈဢၼ်ၵူၼ်းမဵဝ်း သီးရီးယႃး၊ ဝဵင်း တမ်ႇမတ်ႉသၵတ်ႉ၊ မႃးၸွႆႈသိုၵ်းတီႈ ႁႃႇတႃႉတေႇၸႃႇ၊ ၶုၼ်ႁေႃၶမ်းမိူင်း ၸေႃႇၽႃႉ၊ ၼၼ်ႉၸိုင်၊ တႃႇဝိတ်ႈ၊ တိုၵ်းတေႃးယႃႉၽဵဝ်ႈပႅတ်ႈၶဝ်သွင်မိုၼ်ႇပၢႆသွင်ႁဵင်ဢေႃႈ။-
တႃႇဝိတ်ႈ၊ ဝႆႉတပ်ႉပႂ်ႉဝဵင်း တမ်ႇမတ်ႉသၵတ်ႉ၊ မိူင်း သီးရီးယႃး၊ ၼၼ်ႉသေလႄႈၵူၼ်းမဵဝ်း သီးရီးယႃး၊ ၸိူဝ်းၼၼ်ႉလႆႈၶၢမ်ႇပဵၼ်ၵူၼ်းမိူင်းမၼ်းမႃးသေယဝ်ႉ၊လႆႈသၢၵ်ႈၶွၼ်ႇတီႈမၼ်းဢေႃႈ။ ၵႃႈဢၼ် တႃႇဝိတ်ႈ၊ ၵႂႃႇၵူႈတီႈၵူႈတၢင်းၼၼ်ႉ ထႃႇဝရႃႉၽြႃး၊ ပၼ်ႁႂ်ႈ တႃႇဝိတ်ႈ၊ ပႄႉသိုၵ်းဢေႃႈ။-
တႃႇဝိတ်ႈ၊ သိမ်းဢဝ်ၶႅပ်းႁႄႉလၢၵ်ႈၼၢၵ်ႈဢၼ်ဢဝ်ၶမ်းႁဵတ်းၶုမ်ၸိူဝ်းဢၼ်ပွင်ၵၢၼ်ၼႂ်းႁေႃၸဝ်ႈ ႁႃႇတႃႉတေႇၸႃႇ၊ ၶဝ်ယိပ်းၵမ်ၸိူဝ်းၼၼ်ႉလႄႈဢဝ်ၵႂႃႇၵႃႈတီႈဝဵင်း ယေႇရုသလႅမ်ႇ၊ ဢေႃႈ။-
ၶုၼ်ႁေႃၶမ်း တႃႇဝိတ်ႈ၊ သိမ်းဢဝ်ၵႂႃႇၶိူင်ႈတွင်းလိူင်ၼမ်ၼႃႇလူင်လၢင်သေၵႃႈတီႈဝဵင်း ၽေႇတႃႉ၊ တင်းဝဵင်း ပေႇရေႃႇသေး၊ ဝဵင်းလူင်ၸိူဝ်းဢၼ်ၶုၼ် ႁႃႇတႃႉတေႇၸႃႇ၊ ဢုပ်ႉပိူင်ႇၼၼ်ႉဢေႃႈ။
မိူဝ်ႈဢၼ်ၶုၼ်ႁေႃၶမ်း တေႃႇဢိ၊ ဝဵင်း ႁႃႇမတ်ႉ၊ လႆႈငိၼ်းၶၢဝ်ႇဢၼ် တႃႇဝိတ်ႈ၊ တိုၵ်းတေႃးယႃႉၽဵဝ်ႈပႅတ်ႈတပ်ႉသိုၵ်း ႁႃႇတႃႉတေႇၸႃႇ၊ တင်းသဵင်ႈတင်းလူင်ၼၼ်ႉၸိုင်၊-
မၼ်းပွႆႇၸႂ်ႉလုၵ်ႈၸၢႆးမၼ်း ယေႃးရမ်ႇ၊ ၵႂႃႇၸူးတီႈၶုၼ်ႁေႃၶမ်း တႃႇဝိတ်ႈ၊ ႁႂ်ႈလႆႈတၵ်ႉလၢတ်ႈယုၵ်ႉယွင်ႈဢိၵ်ႇတင်းႁႂ်ႈလႆႈသူင်ႇၵႂၢမ်းမႅတ်ႈတႃႇတီႈမၼ်းၵွပ်ႈပိူဝ်ႈမၼ်းတိုၵ်းတေႃးပႄႉၼႅင်ႇ ႁႃႇတႃႉတေႇၸႃႇ၊ ၵႃႈၼႂ်းၼႃႈသိုၵ်းၼၼ်ႉဢေႃႈ။ လွင်ႈမၼ်းၸမ်ႉ၊ ႁႃႇတႃႉတေႇၸႃႇ၊ တင်း တေႃႇဢိ၊ ယၢမ်ႈလႆႈပဵၼ်သိုၵ်းပဵၼ်သိူဝ်တီႈၵၼ်မႃးဢေႃႈ။ ယေႃးရမ်ႇ၊ ၼၼ်ႉပႃးဢဝ်တင်းၶိူင်ႈၶမ်း၊ၶိူင်ႈငိုၼ်း၊ၶိူင်ႈတွင်းလိူင်ၼမ်ၼႃႇလႄႈမႃးဢေႃႈ။-
ၶုၼ်ႁေႃၶမ်း တႃႇဝိတ်ႈ၊ ဢဝ်ၶိူင်ႈၸိူဝ်းၼၼ်ႉသၢၵ်ႈလူႇတီႈ ထႃႇဝရႃႉၽြႃး၊ ဢိၵ်ႇတင်းငိုၼ်းၶမ်းဢၼ်သိမ်းလႆႈၵႃႈတီႈမိူင်းဢၼ်မၼ်းပႄႉၼႅင်ႇဢၼ်ဝႃႈ၊-
မိူင်း သီးရီးယႃး၊ မိူင်း မေႃႇၽႃႉ၊ မိူင်း ဢမ်ႇမုၼ်ႇ၊ မိူင်း ၽိလိတ်ႉတိ၊ မိူင်း ဢႃႇမလႅၵ်ႉ၊ ၸိူဝ်းၼၼ်ႉဢိၵ်ႇလူၺ်ႈၵၼ်တင်းဢုၵ်ႉၸႃႇဢၼ်ႁိမ်ဢဝ်လႆႈမႃးၵႃႈတီႈၶုၼ်လူင် ႁႃႇတႃႉတေႇၸႃႇ၊ လုၵ်ႈၸၢႆး ရေးႁွပ်ႉ၊ မိူင်း ၸေႃႇၽႃႉ၊ ၼၼ်ႉဢေႃႈ။
မိူဝ်ႈဢၼ် တႃႇဝိတ်ႈ၊ ပွၵ်ႈသေတၢင်းဢၼ်တိုၵ်းတေႃးယႃႉၽဵဝ်ႈပႅတ်ႈၵူၼ်းသိုၵ်း သီးရီးယႃး၊ မိုၼ်ႇပၢႆပႅတ်ႇႁဵင်ၵႃႈၼႂ်း ပၢင်ႇႁူၺ်ႈၵိူဝ်၊ သေယဝ်ႉ၊ၶိုၼ်းမႃးၼၼ်ႉၸိုင်၊ၸိုဝ်ႈသဵင်မၼ်းယဵင်ႈၶႅၼ်းၸွတ်ႇသႃႇႁူင်ႁၢင်းၼႃႇဢေႃႈ။-
မၼ်းဝႆႉတပ်ႉပႂ်ႉဝဵင်းၸိူဝ်းဢၼ်မီးၵႃႈၼႂ်းမိူင်း ဢေႇတုမ်ႇ၊ ၵူႈတီႈၵူႈလႅၼ်လႄႈၵူၼ်းမဵဝ်း ဢေႇတုမ်ႇ၊ တင်းလၢႆလႆႈၶၢမ်ႇပဵၼ်ၵူၼ်းမိူင်းမၼ်းဢေႃႈ။ ၵႃႈတီႈဢၼ် တႃႇဝိတ်ႈ၊ ၵႂႃႇၵူႈတီႈၵူႈတၢင်းၼၼ်ႉ ထႃႇဝရႃႉၽြႃး၊ ပၼ်ႁႂ်ႈ တႃႇဝိတ်ႈ၊ ဢွင်ႇသိုၵ်းဢေႃႈ။
ၼင်ႇၼၼ်လႄႈ တႃႇဝိတ်ႈ၊ ဢုပ်ႉပိူင်ႇၸၢမ်ႇၸႃးမိူင်း ဢိသရေး၊ တင်းမိူင်းသေယဝ်ႉ၊ၸီႇယၢင်ႇတႅပ်းတတ်းတြႃးသိုဝ်ႈသိုဝ်ႈတေႃႇတေႃႇ၊ၽဵင်ႇၽဵင်ႇၵၼ်ၵႃႈၼိူဝ်ၶႃႈဝၢၼ်ႈၵူၼ်းမိူင်းမၼ်းဢေႃႈ။
ယွႃႇၽႃႉ၊ ဢၼ်မႄႈမၼ်းပဵၼ် ၸေႇရုယႃႇ၊ ၼၼ်ႉပဵၼ်ၸဝ်ႈၵွၼ်းတပ်ႉသိုၵ်းလူင်ဢေႃႈ။ ယေႇႁူဝ်းသၽတ်ႉ၊ လုၵ်ႈၸၢႆး ဢႁိလုတ်ႉ၊ ပဵၼ်ဢတႂၢင်းဝုၼ်ႇဢေႃႈ။-
ၸႃႇတုၵ်ႉ၊ လုၵ်ႈၸၢႆး ဢႁိတုပ်ႉ၊ ဢိၵ်ႇတင်း ဢႁိမလႅၵ်ႉ၊ လုၵ်ႈၸၢႆး ဢပျႃႇထႃႇ၊ ၸိူဝ်းၼၼ်ႉပဵၼ်ယဵၸ်ႈပရေႃးႁဵၵ်ႈ ဢေႃႈ။ ၸရႃႇယႃႉ၊ ပဵၼ်ၽူႈမၢႆလူင်ဢေႃႈ။-
ပေႇၼႃႇယႃႉ၊ လုၵ်ႈၸၢႆး ယေႃႇယတႃႉ၊ ပဵၼ်ၵူၼ်းၵွၼ်းတပ်ႉပႂ်ႉဢသၢၵ်ႈ တႃႇဝိတ်ႈ၊ ဢေႃႈ။ လုၵ်ႈၸၢႆး တႃႇဝိတ်ႈ၊ တင်းလၢႆၸမ်ႉ၊ပဵၼ်ၵူၼ်းပၼ်တၢင်းၵျၢမ်ႇ ဢေႃႈ။
မီးဝၼ်းၼိုင်ႈ တႃႇဝိတ်ႈ၊ ထၢမ်တူၺ်းလႄႈဝႃႈ၊ “ၵႃႈၼႂ်းလုၵ်ႈလၢင်း သေႃးလု၊ ၼၼ်ႉၸွင်ႇယင်းၵိုတ်းၵျၢၼ်ႇဝႆႉသေၵေႃႉသေၵူၼ်းႁိုဝ်း။ ပေႃးမီးၸိုင်၊ၵဝ်ၶႂ်ႈၼႄပျႃးၸႂ်ၵရုၼႃႇတီႈၵေႃႉၼၼ်ႉၵွပ်ႈပိူဝ်ႈၶႆႈၸႂ်ထူပ်း ယေႃးၼႀၼ်ႇ၊ ၼၼ်ႉဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊မီးၶႃႈဢၼ်ၸၢပ်ႈသႅင်ႇၵၼ်တင်းၵူၼ်းႁိူၼ်း သေႃးလု၊ ၼၼ်ႉၵေႃႉၼိုင်ႈဢၼ်မီးၸိုဝ်ႈဝႃႈ၊ ၸိၽႃႉ၊ ၼၼ်ႉဢေႃႈ။ ၶဝ်ဢွၼ်ၵၼ်ႁွင်ႉဢဝ်မၼ်းၶဝ်ႈၶႃးၸႃးၵႃႈတီႈ တႃႇဝိတ်ႈ၊ လႄႈ၊ၶုၼ်ႁေႃၶမ်းၵေႃႈထၢမ်မၼ်းလႄႈဝႃႈ၊ “ၸွင်ႇမႂ်းၸႂ်ႈ ၸိၽႃႉ၊ ႁိုဝ်း၊” ဝႃႈၼင်ႇၼႆဢေႃႈ။ မၼ်းၵေႃႈၶိုၼ်းလဝ်ႈလၢတ်ႈလႄႈဝႃႈ၊ “ၶႃႈၸဝ်ႈႁဝ်းၸႂ်ႈတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းၵေႃႈထၢမ်တူၺ်းမၼ်းလႄႈဝႃႈ၊ “ၵႃႈၼႂ်းလုၵ်ႈလၢၼ် သေႃးလု၊ ၼၼ်ႉၸွင်ႇမီးသေၵေႃႉသေၵူၼ်းၵိုတ်းၵျၢၼ်ႇဝႆႉႁိုဝ်း။ ၸွမ်းလူၺ်ႈဢၼ်ၵဝ်ဝႆႉၵတိတီႈၽြႃးပဵၼ်ၸဝ်ႈၼၼ်ႉၵဝ်ၶႂ်ႈၼႄပျႃးၸႂ်မႅတ်ႈတႃႇတီႈမၼ်းဢေႃႈ၊” ဝႃႈၼင်ႇၼႆဢေႃႈ။ ၸိၽႃႉ၊ ၶိုၼ်းလဝ်ႈလၢတ်ႈလႄႈဝႃႈ၊ “ၼႂ်းလုၵ်ႈၸၢႆး ယေႃးၼႀၼ်ႇ၊ တင်းလၢႆၼၼ်ႉၵိုတ်းၵျၢၼ်ႇဝႆႉၵေႃႉၼိုင်ႈတီႈၶႃႈဢေႃႈ။ မၼ်းၼၼ်ႉတိၼ်ၵႅင်ႉဝႆႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းထၢမ်လႄႈဝႃႈ၊ “မၼ်းမီးၵႃႈလႂ်၊” ဝႃႈၼင်ႇၼႆလႄႈ၊ ၸိၽႃႉ၊ ၶိုၼ်းလၢတ်ႈလႄႈဝႃႈ၊ “မီးယူႇၵႃႈၼႂ်းႁိူၼ်း မႃႇၶိရႃႉ၊ လုၵ်ႈၸၢႆး ဢမျေးလႃႉ၊ ၵႃႈတီႈဝၢၼ်ႈ လေႃႇတေႇပႃႇ၊ ၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၶုၼ်ႁေႃၶမ်း တႃႇဝိတ်ႈ၊ ပွႆႇၸႂ်ႉၵူၼ်းၵႂႃႇႁွင်ႉဢဝ်မၼ်းမႃးဢေႃႈ။
မိူဝ်ႈၼၼ်ႉ၊ မေႇၽိပေႃးသႅတ်ႉ၊ လုၵ်ႈၸၢႆး ယေႃးၼႀၼ်ႇ၊ လၢၼ်ၸၢႆး သေႃးလု၊ ႁွတ်ႈထိုင်မႃးသေယဝ်ႉ၊ၶုပ်ႉမူပ်ႇဝႆႈ တႃႇဝိတ်ႈ၊ ဢေႃႈ။ တႃႇဝိတ်ႈ၊ ၵေႃႈႁွင်ႉမၼ်းလႄႈဝႃႈ၊ “ မေႇၽိပေႃးသႅတ်ႉ၊ ႟၊” ဝႃႈၼင်ႇၼႆလႄႈ၊မၼ်းၼၼ်ႉၶိုၼ်းလဝ်ႈလၢတ်ႈလႄႈဝႃႈ၊ “ၶႃႈၸဝ်ႈမီးယူႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ လၢတ်ႈလႄႈဝႃႈ၊ “ယႃႇပေၵူဝ်ပေႁႄ၊ၵဝ်တၵ်းႁဵတ်းၵျေးၸူးတီႈမႂ်းၵွပ်ႈလူၺ်ႈပေႃႈမႂ်း ယေႃးၼႀၼ်ႇ၊ ဢေႃႈ။ ၵဝ်တၵ်းဢဝ်လိၼ်ၵႃႈဢၼ်ပူႇမႂ်း သေႃးလု၊ ပိူင်ႇၼၼ်ႉၶိုၼ်းပၼ်တီႈမႂ်းဢေႃႈ။ မႂ်းၸမ်ႉ၊တၵ်းလႆႈၵိၼ်လႆႈၶူပ်းလူၺ်ႈၵၼ်တင်းၵဝ်ၵႃႈတီႈၽိူၼ်ၶဝ်ႈၵဝ်ၵူႈဝၼ်းဢေႃႈ၊” ဝႃႈၼင်ႇၼႆဢေႃႈ။
မေႇၽိပေႃးသႅတ်ႉ၊ သမ်ႉၶုပ်ႉမူပ်ႇထႅင်ႈလႄႈလဝ်ႈထၢမ်ဝႃႈ၊ “ၶႃႈၸဝ်ႈႁဝ်းၼႆႉပဵၼ်ၵေႃႉဢၼ်ယင်းဢမ်ႇတၢၼ်ႇမႃတၢႆတူဝ်ၼိုင်ႈတီႈၶႃႈ။ ၸဝ်ႈႁဝ်းသမ်ႉပႄႉမႃးလီတေႃႇၶႃႈၸဝ်ႈထၢၼ်ႇၼႆႉၸိူဝ်ႉၼင်ႇႁိုဝ်တီႈၶႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၶုၼ်ႁေႃၶမ်းႁွင်ႉဢဝ် ၸိၽႃႉ၊ ၶႃႈ သေႃးလု၊ ၼၼ်ႉလႄႈပူင်ဢမိင်ႉဝႃႈ၊ “ၵဝ်ဢဝ်ၵႃႈဢၼ် သေႃးလု၊ တင်းၵူၼ်းႁိူၼ်းမၼ်းထိူၵ်ႈပိူင်ႇၸိူဝ်းၼၼ်ႉပၼ်တီႈ မေႇၽိပေႃးသႅတ်ႉ၊ ၵေႃႉပဵၼ်လၢၼ်ၸၢႆးၸဝ်ႈမႂ်းၼႆႉယဝ်ႉ။-
မႂ်းဢိၵ်ႇတင်းလုၵ်ႈၸၢႆးမႂ်းတင်းလၢႆတင်းၶႃႈမႂ်းတင်းလၢႆ၊တၵ်းလႆႈႁဵတ်းႁႆႈႁဵတ်းၼႃးပုၼ်ႈၵူၼ်းႁိူၼ်းၵူၼ်းယေးၸဝ်ႈမႂ်း သေႃးလု၊ လႄႈသႂၢင်းပၼ်မၢၵ်ႇပၼ်ႁူင်းပုၼ်ႈတႃႇၶဝ်တၵ်းၵိၼ်တႃႉ။ မေႇၽိပေႃးသႅတ်ႉ၊ ၸမ်ႉ၊တၵ်းၵိၼ်ၶူပ်းၵႃႈတီႈၽိူၼ်ၶဝ်ႈၵဝ်ၵူႈဝၼ်းဢေႃႈ၊” ဝႃႈၼင်ႇၼႆဢေႃႈ။ ( ၸိၽႃႉ၊ ၼၼ်ႉမီးလုၵ်ႈၸၢႆးသိပ်းႁႃႈၵေႃႉဢိၵ်ႇတင်းၶႃႈသၢဝ်းၼိုင်ႈဢေႃႈ။)
ၸိၽႃႉ၊ ၵေႃႈၶိုၼ်းလဝ်ႈလၢတ်ႈလႄႈဝႃႈ၊ “ၵႃႈၼင်ႇဢၼ်ၸဝ်ႈႁဝ်းၶႃႈၸဝ်ႈၶုၼ်လူင်သင်ႇလၢတ်ႈဝႆႉတီႈၶႃႈၸဝ်ႈႁဝ်းၼၼ်ႉၶႃႈၸဝ်ႈႁဝ်းတၵ်းႁဵတ်းၸွမ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။ ပိူဝ်ႈၼႆလႄႈ မေႇၽိပေႃးသႅတ်ႉ၊ လႆႈၵိၼ်လႆႈၶူပ်းၵႃႈတီႈၽိူၼ်ၶဝ်ႈၶုၼ်ႁေႃၶမ်းယူႇမိူၼ်ၸိူဝ်ႉၼင်ႇပဵၼ်လုၵ်ႈၸၢႆးဢွၵ်ႇၶုၼ်ႁေႃၶမ်းၸိူဝ်းၼၼ်ႉၵေႃႉၼိုင်ႈဢေႃႈ။-
မေႇၽိပေႃးသႅတ်ႉ၊ မီးလုၵ်ႈၸၢႆးဢွၼ်ႇၵေႃႉၼိုင်ႈဢၼ်မီးၸိုဝ်ႈႁွင်ႉဝႃႈ၊ မိၵ်ႉၶႃႇ၊ ဢေႃႈ။ ၵူၼ်းၵႃႈဢၼ်ယူႇၵႃႈၼႂ်းႁိူၼ်း ၸိၽႃႉ၊ တင်းသဵင်ႈတင်းလူင်လႆႈပဵၼ်ၶႃႈ မေႇၽိပေႃးသႅတ်ႉ၊ ဢေႃႈ။-
ပိူဝ်ႈၼႆလႄႈ မေႇၽိပေႃးသႅတ်ႉ၊ ဢၼ်တိၼ်မၼ်းၵႅင်ႉတင်းသွင်ၶွၼ်ၼၼ်ႉယူႇၵႃႈၼႂ်းဝဵင်း ယေႇရုသလႅမ်ႇ၊ လႄႈလႆႈၵိၼ်လႆႈၶူပ်းၵႃႈတီႈၽိူၼ်ၶဝ်ႈၶုၼ်ႁေႃၶမ်းၵူႈတႃႇၵူႈမႃးဢေႃႈ။
လိုၼ်းၼၼ်ႉဢမ်ႇႁိုင်ဢမ်ႇၼၢၼ်းၶုၼ်ႁေႃၶမ်း ၼႃႇႁတ်ႉ၊ ၵူၼ်းမဵဝ်း ဢမ်ႇမုၼ်ႇ၊ တၢႆလႄႈလုၵ်ႈၸၢႆးမၼ်း ႁႃႇၼုၼ်ႇ၊ သိုပ်ႇၼင်ႈႁၢင်ႈၼင်ႈႁေႃဢေႃႈ။-
ၶုၼ်ႁေႃၶမ်း တႃႇဝိတ်ႈ၊ လၢတ်ႈလႄႈဝႃႈ၊ “ၵဝ်တၵ်းႁဵတ်းမိၵ်ႈသႁႃႇယႃႉလူၺ်ႈၵၼ်တင်း ႁႃႇၼုၼ်ႇ၊ ၸိူဝ်ႉၼင်ႇဢၼ်ပေႃႈမၼ်း ၼႃႇႁတ်ႉ၊ ႁဵတ်းလူၺ်ႈၵၼ်တင်းၵဝ်ၼၼ်ႉဢေႃႈ၊” ဝႃႈၼင်ႇၼႆသေယဝ်ႉ၊ပွႆႇသၼ်ႇတမၢၼ်ႇၵႂႃႇႁဵတ်းႁႂ်ႈမၼ်းယဵၼ်ၸႂ်ၼိမ်ၸႂ်လူၺ်ႈလွင်ႈပေႃႈမၼ်းၼၼ်ႉဢေႃႈ။ မိူဝ်ႈဢၼ်ၶဝ်ႁွတ်ႈထိုင်ၵႃႈတီႈမိူင်း ဢမ်ႇမုၼ်ႇ၊ ၵႂႃႇၼၼ်ႉၸိုင်၊-
မူးမၢတ်ႈၽွင်းမိူင်းမဵဝ်း ဢမ်ႇမုၼ်ႇ၊ ၸိူဝ်းၼၼ်ႉလၢတ်ႈတီႈၸဝ်ႈၶဝ်ၶုၼ်ႁေႃၶမ်း ႁႃႇၼုၼ်ႇ၊ လႄႈဝႃႈ၊ “တၢင်းဢၼ် တႃႇဝိတ်ႈ၊ ပွႆႇၸႂ်ႉၵူၼ်းၸိူဝ်းၼႆႉမႃးႁဵတ်းႁႂ်ႈၸဝ်ႈႁဝ်းယဵၼ်ၸႂ်ၼိမ်ၸႂ်ၼႆႉၸဝ်ႈႁဝ်းထၢင်ႇမၢတ်ႈပဵၼ်ဢၼ်ရူဝ်ႇသေႇၵူဝ်ယမ်ပေႃႈၸဝ်ႈႁဝ်းတီႈၶႃႈႁိုဝ်း။ ဢမ်ႇၸႂ်ႈတီႈၶႃႈၵူၺ်း။ တႃႇဝိတ်ႈ၊ ပွႆႇၸႂ်ႉၵူၼ်းသွပ်ႇၶၢဝ်ႇမႃးႁႂ်ႈလႆႈသိုပ်ႇလူလွမ်တူၺ်းဝဵင်းၸဝ်ႈပုၼ်ႈဢၼ်ၶဝ်တၵ်းတိုၵ်းပႄႉႁဝ်းၶႃႈၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ႁႃႇၼုၼ်ႇ၊ တိၺွပ်းဢဝ်သၼ်ႇတမၢၼ်ႇၸိူဝ်းဢၼ် တႃႇဝိတ်ႈ၊ ပွႆႇၸႂ်ႉမႃးၼၼ်ႉသေယဝ်ႉ၊ထႃၼူတ်ႇၵၢင်းၶဝ်ၽၢၵ်ႇၼိုင်ႈပႅတ်ႈလႄႈၵႅတ်းၶိူင်ႈၵၢင်သိူဝ်ႈၼုင်ႈၶဝ်ပႅတ်ႈထၢၼ်ႈပေႃးႁႂ်ႈထိုင်ၵုမ်ႇၶဝ်သေယဝ်ႉ၊ပွႆႇဢွၵ်ႇၵႂႃႇဢေႃႈ။-
ၶဝ်ၼၼ်ႉဢၢႆပိူၼ်ႈၼႃႇလူင်လၢင်ထၢၼ်ႈပေႃးဢမ်ႇႁတ်းၶိုၼ်းပွၵ်ႈမိူဝ်းဢေႃႈ။ တႃႇဝိတ်ႈ၊ လႆႈငိၼ်းၶၢဝ်ႇမၼ်းလႄႈသင်ႇလၢတ်ႈၵႂႃႇႁႂ်ႈၶဝ်ယူႇၵႃႈတီႈဝဵင်း ယေႇရိၶူဝ်း၊ လႄႈယင်းဢမ်ႇၶိုၼ်းပွၵ်ႈမႃးတေႃႇထိုင်ႁွတ်ႈၼူတ်ႇၶဝ်ယၢဝ်းဢွၵ်ႇမႃးထႅင်ႈၼၼ်ႉဢေႃႈ။
ၵူၼ်း ဢမ်ႇမုၼ်ႇ၊ မၢတ်ႈ တႃႇဝိတ်ႈ၊ ပဵၼ်ၸိူဝ်ႉၼင်ႇရၢၼ်ႇသူႇၶဝ်လႄႈၶဝ်ၸၢင်ႈငႃဢဝ်ၵူၼ်းသိုၵ်း သီးရီးယႃး၊ သွင်မိုၼ်ႇသေၵႃႈတီႈဝဵင်း ပႅတ်ႉရႃႉႁေႃႇၽႃႉ၊ ဢိၵ်ႇတင်းၵႃႈတီႈဝဵင်း ၸေႃႇၽႃႉ၊ ၵူၼ်းသိုၵ်းၼိုင်ႈမိုၼ်ႇပၢႆသွင်ႁဵင်သေၵႃႈတီႈဝဵင်း တေႃႇၽႃႉ၊ ဢိၵ်ႇတင်းၵူၼ်းသိုၵ်းႁဵင်ၼိုင်ႈသေၵႃႈတီႈၶုၼ်ႁေႃၶမ်း မႃႇၶႃႇ၊ ဢေႃႈ။-
တႃႇဝိတ်ႈ၊ လႆႈငိၼ်းလွင်ႈတၢင်းၼၼ်ႉသေယဝ်ႉ၊ပွႆႇၸႂ်ႉ ယွႃႇၽႃႉ၊ ဢိၵ်ႇတင်းမုၵ်ႉၸိူဝ်းတပ်ႉသိုၵ်းၵႃႈမီးၵႂႃႇဢေႃႈ။-
ၵူၼ်းမဵဝ်း ဢမ်ႇမုၼ်ႇ၊ ၸိူဝ်းၼၼ်ႉၶီႇသိုၵ်းဢွၵ်ႇၵႂႃႇလႄႈဢွၼ်ၵၼ်တင်ႈတပ်ႉၶၢင်းတပ်ႉၶဝ်ဝႆႉၵႃႈတီႈၽၢႆႇၼႃႈၽၵ်းတူဝဵင်းလူင်ၶဝ်ၼၼ်ႉဢေႃႈ။ တပ်ႉသိုၵ်းၵူၼ်းတၢင်ႇမဵဝ်းတင်းလၢႆ၊ဢၼ်ပဵၼ်တပ်ႉသိုၵ်းၵူၼ်းမဵဝ်း သီးရီးယႃး၊ ဢိၵ်ႇတင်းတပ်ႉသိုၵ်းဝဵင်း ၸေႃႇၽႃႉ၊ တင်းတပ်ႉသိုၵ်းၶုၼ်လူင် မႃႇၶႃႇ၊ ၸမ်ႉ၊ဢွၼ်ၵၼ်ဢဝ်တီႈယူႇၵႃႈတီႈပၢင်ႇတီႈပဵင်းႁင်းၽႂ်ႁင်းမၼ်းဢေႃႈ။
ယွႃႇၽႃႉ၊ ႁၼ်လွင်ႈဢၼ်တပ်ႉသိုၵ်းရၢၼ်ႇသူႇတင်းလၢႆၸၢင်ႈဝၢႆႇတိုၵ်းတေႃးၶဝ်ၸဵမ်ၽၢႆႇၼႃႈၽၢႆႇလင်သေယဝ်ႉ၊မၼ်းလိူၵ်ႈဢဝ်ၵူၼ်းသိုၵ်းၸိူဝ်းဢၼ်ၵတ်ႉၶႅၼ်ႇၶၼ်ၽႂ်းၵႃႈၼႂ်းၵူၼ်းမဵဝ်း ဢိသရေး၊ တင်းလၢႆၼၼ်ႉဢဝ်တီႈယူႇဢၼ်တေႃႇၼႃႈၵၼ်တင်းတပ်ႉသိုၵ်း သီးရီးယႃး၊ ၼၼ်ႉဢေႃႈ။-
တပ်ႉသိုၵ်းဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉၸမ်ႉ၊မၼ်းဢၢပ်ႈပၼ်ၵႃႈၼႂ်းမိုဝ်းၼွင်ႉၸၢႆးမၼ်း ဢၽိသေး၊ သေယဝ်ႉ၊ဢဝ်တီႈယူႇဢၼ်တေႃႇၼႃႈၵၼ်တင်းၵူၼ်း ဢမ်ႇမုၼ်ႇ၊ ၸိူဝ်းၼၼ်ႉသေယဝ်ႉ၊-
လၢတ်ႈတီႈမၼ်းလႄႈဝႃႈ၊ “ပေႃးတပ်ႉသိုၵ်းၵူၼ်းမဵဝ်း သီးရီးယႃး၊ ႁႅင်းယႂ်ႇသေတပ်ႉသိုၵ်းၵဝ်ၸိုင်၊မႂ်းမႃးၸွႆႈထႅမ်ၵဝ်တႃႉ။ ပေႃးတပ်ႉသိုၵ်းၵူၼ်းမဵဝ်း ဢမ်ႇမုၼ်ႇ၊ ႁႅင်းယႂ်ႇသေတပ်ႉသိုၵ်းမႂ်းၸိုင်၊ၵဝ်တၵ်းၵႂႃႇၸွႆႈထႅမ်မႂ်းဢေႃႈ။-
ဢွၼ်ၵၼ်မီးၸႂ်ဢၼ်ႁတ်းႁၢၼ်လႄႈဢဝ်ႁႅင်းဢွၵ်ႇတႃႉ။ ဢွၼ်ၵၼ်တိုၵ်းႁတ်းႁတ်းႁၢၼ်ႁၢၼ်ပုၼ်ႈၵူၼ်းမဵဝ်းႁဝ်းဢိၵ်ႇတင်းပုၼ်ႈဝၢၼ်ႈဝဵင်းၽြႃးပဵၼ်ၸဝ်ႈႁဝ်းၼၼ်ႉတႃႉႁဝ်း။ ႁႂ်ႈဢလူဝ်ႇ ထႃႇဝရႃႉၽြႃး၊ ပျေႉၸုမ်ႇသေၵမ်းလူၺ်ႈ၊” ဝႃႈၼင်ႇၼႆဢေႃႈ။
ယွႃႇၽႃႉ၊ ဢိၵ်ႇတင်းၵူၼ်းမၼ်းတင်းလၢႆၶီႇၶိုၼ်ႈတိုၵ်းတေႃးလႄႈၵူၼ်း သီးရီးယႃး၊ ၶဝ်ဢွၼ်ၵၼ်ၼီပၢႆႈဢေႃႈ။-
မိူဝ်ႈဢၼ်ၵူၼ်း ဢမ်ႇမုၼ်ႇ၊ ၸိူဝ်းၼၼ်ႉႁၼ်ၵူၼ်း သီးရီးယႃး၊ ၶဝ်ၼီပၢႆႈၼၼ်ႉၸိုင်၊ၶဝ်ၵေႃႈၼီပၢႆႈသေၵႃႈတီႈ ဢၽိသေး၊ သေယဝ်ႉ၊ၶဝ်ႈၵႂႃႇၵႃႈၼႂ်းဝဵင်းဢေႃႈ။ ယွႃႇၽႃႉ၊ ၵေႃႈလုၵ်ႉသေၵႃႈတီႈဢၼ်တိုၵ်းတေႃးၵၼ်တင်းၵူၼ်း ဢမ်ႇမုၼ်ႇ၊ ၶဝ်ၼၼ်ႉသေလႄႈၶိုၼ်းပွၵ်ႈမိူဝ်းၵႂႃႇတီႈဝဵင်း ယေႇရုသလႅမ်ႇ၊ သေဢေႃႈ။
ၵူၼ်းမဵဝ်း သီးရီးယႃး၊ ၸိူဝ်းၼၼ်ႉႁုႁၼ်လွင်ႈဢၼ်ၶဝ်တူၵ်းသုမ်းတႂ်ႈမိုဝ်းၵူၼ်းမဵဝ်း ဢိသရေး၊ ၶဝ်သေၵေႃႈၶဝ်ၶိုၼ်းၸုတွမ်တပ်ႉသိုၵ်းၶဝ်ၵႃႈမီးတင်းသဵင်ႈတင်းလူင်ထႅင်ႈဢေႃႈ။-
ၶုၼ်ႁေႃၶမ်း ႁႃႇတရေးၸႃႇ၊ ပွႆႇၸႂ်ႉႁွင်ႉၵူၼ်း သီးရီးယႃး၊ ဢၼ်မီးၽၢႆႇဝၼ်းဢွၵ်ႇၼမ်ႉလူင် ဢုၽရတ်ႉ၊ ၼၼ်ႉလႄႈၶဝ်ဢွၼ်ၵၼ်မႃးၵႃႈတီႈဝဵင်း ႁေႇလမ်ႇ၊ ဢေႃႈ။ သေႃးပၵ်ႉ၊ ၸဝ်ႈၵွၼ်းတပ်ႉသိုၵ်းလူင်တပ်ႉၶုၼ်ႁေႃၶမ်း ႁႃႇတရေးၸႃႇ၊ မိူင်း ၸေႃႇၽႃႉ၊ ၼၼ်ႉဢုပ်ႉပိူင်ႇဢွၼ်ႁူဝ်ၶဝ်မႃးဢေႃႈ။-
မိူဝ်ႈဢၼ် တႃႇဝိတ်ႈ၊ ငိၼ်းလွင်ႈၼၼ်ႉၸိုင်၊မၼ်းၸုတွမ်တပ်ႉသိုၵ်းၵူၼ်းမဵဝ်း ဢိသရေး၊ သေယဝ်ႉ၊ၶၢမ်ႈၼမ်ႉ ယေႃးတၢၼ်ႇ၊ ၵႂႃႇလႄႈႁွတ်ႈထိုင်ဝဵင်း ႁေႇလမ်ႇ၊ တီႈဢၼ်တပ်ႉသိုၵ်း သီးရီးယႃး၊ ၶဝ်ဢဝ်တီႈပႂ်ႉယူႇၼၼ်ႉဢေႃႈ။ ၼႃႈသိုၵ်းတႄႇၸႃႉတိုၵ်းတေႃးၵၼ်သေယဝ်ႉ၊-
တပ်ႉသိုၵ်း ဢိသရေး၊ လိုပ်ႈလမ်းၸွမ်းလႄႈတပ်ႉသိုၵ်း သီးရီးယႃး၊ ၼီပၢႆႈပွၵ်ႈၶိုၼ်းမိူဝ်းၵႂႃႇဢေႃႈ။ တႃႇဝိတ်ႈ၊ ဢိၵ်ႇတင်းၵူၼ်းမၼ်းတင်းလၢႆၶႃႈတၢႆၽၼ်းပႅတ်ႈၵူၼ်းသိုၵ်းၶီႇလေႃႉမႃႉသိုၵ်း သီးရီးယႃး၊ ၶဝ်ၸဵတ်းပၢၵ်ႇ၊ၵူၼ်းသိုၵ်းၶီႇမႃႉသီႇမိုၼ်ႇဢိၵ်ႇတင်းၸဝ်ႈသိုၵ်းၵွၼ်းတပ်ႉ သေႃးပၵ်ႉ၊ လႆႈတိူဝ်ႉမၢတ်ႇလႄႈထၢၼ်ႈပေႃးလႆႈတၢႆၵႃႈတီႈပၢင်သိုၵ်းၼၼ်ႉဢေႃႈ။-
မိူဝ်ႈဢၼ်ၶုၼ်ႁေႃၶမ်းတင်းလၢႆဢၼ်ယူႇတႂ်ႈၶုၼ်ႁေႃၶမ်း ႁႃႇတရေးၸႃႇ၊ ႁုႁၼ်လွင်ႈဢၼ်ၶဝ်တူၵ်းသုမ်းတႂ်ႈမိုဝ်း ဢိသရေး၊ ယဝ်ႉၼၼ်ႉၸိုင်၊ဢွၼ်ၵၼ်ႁဵတ်းမိၵ်ႈသႁႃႇယႃႉလူၺ်ႈၵၼ်တင်းၵူၼ်းမဵဝ်း ဢိသရေး၊ လႄႈၶၢမ်ႇပဵၼ်ၵူၼ်းမိူင်းၶဝ်ဢေႃႈ။ ၼင်ႇၼၼ်လႄႈ၊လိုၼ်းၼၼ်ႉၵူၼ်းမဵဝ်း သီးရီးယႃး၊ ဢမ်ႇႁတ်းၸွႆႈသိုၵ်းထႅမ်သိုၵ်းတီႈၵူၼ်းမဵဝ်း ဢမ်ႇမုၼ်ႇ၊ ၶဝ်ထႅင်ႈသေပွၵ်ႈယဝ်ႉဢေႃႈ။
မိူဝ်ႈဢၼ်ၶွပ်ႈၶူပ်ႇပီၶိင်ႇဢၼ်ၶုၼ်ႁေႃၶမ်းတင်းလၢႆယၢမ်ႈတိုၵ်းသိုၵ်းၵၼ်ၼၼ်ႉၸိုင်၊ တႃႇဝိတ်ႈ၊ ပွႆႇၸႂ်ႉ ယွႃႇၽႃႉ၊ ဢိၵ်ႇတင်းၶုၼ်ဢၼ်ပွင်ၵၢၼ်ၼႂ်းႁေႃမၼ်းတင်းလၢႆတင်းတပ်ႉသိုၵ်း ဢိသရေး၊ တင်းလၢႆၵႂႃႇလႄႈၶဝ်တိုၵ်းတေႃးယႃႉၽဵဝ်ႈပႅတ်ႈၵူၼ်း ဢမ်ႇမုၼ်ႇ၊ ၶဝ်သေယဝ်ႉ၊လွမ်ႉႁွပ်ႈဝဵင်းလူင် ရပ်ႉပႃႇ၊ ဝႆႉဢေႃႈ။ တူဝ် တႃႇဝိတ်ႈ၊ ၸမ်ႉ၊မီးၵႃႈတီႈဝဵင်း ယေႇရုသလႅမ်ႇ၊ ယူႇဢေႃႈ။
မိူဝ်ႈၼၼ်ႉဝၼ်းၼိုင်ႈၶိင်ႇႁူဝ်ၶမ်ႈ တႃႇဝိတ်ႈ၊ ဢွၵ်ႇသေၵႃႈတီႈလုၵ်းၼွၼ်းမၼ်းလႄႈၶဝ်ႈၵႂႃႇတီႈႁေႃၸဝ်ႈဢၼ်မီးၵႃႈတီႈထၢပ်ႈၼိူဝ်ဢေႃႈ။ မိူဝ်ႈဢၼ်မၼ်းပႆၵႂႃႇပႆမႃးယူႇၼၼ်ႉၸိုင်၊မၼ်းႁၼ်မႄႈယိင်းၵေႃႉၼိုင်ႈဢၢပ်ႇၼမ်ႉယူႇဢေႃႈ။ မႄႈယိင်းၼၼ်ႉႁၢင်ႈလီၼႃႇလူင်လၢင်ဢေႃႈ။-
တႃႇဝိတ်ႈ၊ ပွႆႇၸႂ်ႉၵူၼ်းၵႂႃႇထၢမ်လွင်ႈမႄႈယိင်းၼၼ်ႉလႄႈလႆႈႁုလွင်ႈဢၼ်မၼ်းပဵၼ် ပႃႇသႃႉသေးၽႃႉ၊ မေး ဢုရိယႃး၊ ၵူၼ်း ႁိတ်ႉတိ၊ လုၵ်ႈယိင်း ဢေးလီႇယမ်ႇ၊ ၼၼ်ႉဢေႃႈ။-
တႃႇဝိတ်ႈ၊ သမ်ႉပွႆႇၸႂ်ႉၵူၼ်းၵႂႃႇႁွင်ႉဢဝ်မႄႈယိင်းၼၼ်ႉမႃးတီႈမၼ်းသေယဝ်ႉ၊မႄႈယိင်းၼၼ်ႉၵေႃႈၶဝ်ႈၸူးတီႈမၼ်းလႄႈမၼ်းၼွၼ်းလူၺ်ႈၵၼ်တင်းမႄႈယိင်းၼၼ်ႉဢေႃႈ။ (မႄႈယိင်းၼၼ်ႉလႆႈႁဵတ်းႁႂ်ႈတူဝ်ၸဝ်ႈၵဝ်ႇမူတ်းသႂ်သေတၢင်းဢၼ်လိူတ်ႈၼႃႈလိူၼ်မၼ်းမႃးယဝ်ႉၼၼ်ႉဢေႃႈ။) ၵမ်းၼၼ်ႉ မႄႈယိင်းၼၼ်ႉၵေႃႈၶိုၼ်းမိူဝ်းၵႂႃႇၵႃႈတီႈႁိူၼ်းမၼ်းသေဢေႃႈ။-
လိုၼ်းၼၼ်ႉ၊မႄႈယိင်းၼၼ်ႉလႆႈႁုလွင်ႈဢၼ်မၼ်းၸပ်းပတိၵ်ႈသၼ်ႇထေႇယဝ်ႉလႄႈမၼ်းသူင်ႇၶၢဝ်ႇငၢဝ်းၼၼ်ႉၵႂႃႇၵႃႈတီႈ တႃႇဝိတ်ႈ၊ ဢေႃႈ။
မိူဝ်ႈၼၼ်ႉ၊ တႃႇဝိတ်ႈ၊ သင်ႇလၢတ်ႈၶေႃႈၵႂၢမ်းၵႂႃႇတီႈ ယွႃႇၽႃႉ၊ လႄႈဝႃႈ၊ “ပွႆႇၸႂ်ႉ ဢုရိယႃး၊ ၵူၼ်း ႁိတ်ႉတိ၊ ၼၼ်ႉမႃးတီႈၵဝ်တႃႉ၊” ဝႃႈၼင်ႇၼႆလႄႈ၊ ယွႃႇၽႃႉ၊ ပွႆႇၸႂ်ႉ ဢုရိယႃး၊ ၵႂႃႇၸူးတီႈ တႃႇဝိတ်ႈ၊ ဢေႃႈ။-
ဢုရိယႃး၊ ႁွတ်ႈထိုင်လႄႈ တႃႇဝိတ်ႈ၊ တွင်ႈထၢမ်လူၺ်ႈလွင်ႈဢၼ် ယွႃႇၽႃႉ၊ တင်းၵူၼ်းသိုၵ်းတင်းလၢႆယူႇလီၵိၼ်ဝၢၼ်ယူႇႁိုဝ်း၊ဢိၵ်ႇတင်းတိုၵ်းသိုၵ်းလႄႈပႄႉၼႅင်ႇယူႇႁိုဝ်းၼၼ်ႉဢေႃႈ။-
မိူဝ်ႈၼၼ်ႉ၊ တႃႇဝိတ်ႈ၊ လၢတ်ႈတီႈ ဢုရိယႃး၊ လႄႈဝႃႈ၊ “ပွၵ်ႈမိူဝ်းၵႂႃႇၵႃႈတီႈႁိူၼ်းလႄႈလိုဝ်ႈသဝ်းၸူဝ်ႈၵမ်းဢွၼ်ႇၼိုင်ႈတႃႉ၊” ဝႃႈၼင်ႇၼႆသေယဝ်ႉ၊ ဢုရိယႃး၊ ဢွၵ်ႇၵႂႃႇလႄႈ တႃႇဝိတ်ႈ၊ ဢဝ်လၢၵ်ႈသွင်ႇၶွင်ၽၢၵ်ႇၼမ်ၼႃႇပၼ်ၵႂႃႇၵႃႈတီႈႁိူၼ်းမၼ်းဢေႃႈ။-
ၵူၺ်းၵႃႈ၊ ဢုရိယႃး၊ ယင်းဢမ်ႇပွၵ်ႈမိူဝ်းႁိူၼ်းလႄႈၼွၼ်းယူႇၵႃႈတီႈႁူးၽၵ်းတူႁေႃၸဝ်ႈလူၺ်ႈၵၼ်တင်းၵူၼ်းပႂ်ႉႁေႃၸဝ်ႈၸိူဝ်းၼၼ်ႉဢေႃႈ။-
မိူဝ်ႈဢၼ် တႃႇဝိတ်ႈ၊ လႆႈႁုလွင်ႈဢၼ် ဢုရိယႃး၊ ယင်းဢမ်ႇမိူဝ်းၵႂႃႇၵႃႈတီႈႁိူၼ်းမၼ်းၼၼ်ႉၸိုင်၊ထၢမ်တီႈမၼ်းလႄႈဝႃႈ၊ “မႂ်းလုၵ်ႉသေၵႃႈတီႈဢၼ်ဢွၵ်ႇတႃႈပၢႆတၢင်းႁိုင်ၼႃႇလႄႈၸင်ႇပွၵ်ႈမႃးထိုင်ႁိူၼ်းၵူၺ်းဢမ်ႇၸႂ်ႈႁိုဝ်း။ ႁဵတ်းသင်လႄႈမႂ်းဢမ်ႇမိူဝ်းၵႂႃႇတီႈႁိူၼ်းမႂ်း၊” ဝႃႈၼင်ႇၼႆဢေႃႈ။
ဢုရိယႃး၊ ၶိုၼ်းလဝ်ႈလၢတ်ႈလႄႈဝႃႈ၊ “ၵူၼ်း ဢိသရေး၊ တင်းလၢႆဢိၵ်ႇတင်းၵူၼ်း ယုတႃႉ၊ တင်းလၢႆမီးယူႇၵႃႈတီႈၼႃႈသိုၵ်းၼႃႈသိူဝ်တီႈၶႃႈလႄႈ၊တိူၵ်ႈပတိၺိၺ်ႇၸဝ်ႈၵေႃႈမီးယူႇလူၺ်ႈၵၼ်တင်းၶဝ်ဢေႃႈ။ ၸဝ်ႈၵွၼ်းတပ်ႉသိုၵ်းလူင် ယွႃႇၽႃႉ၊ ဢိၵ်ႇတင်းၶုၼ်ဢၼ်ယူႇတႂ်ႈမၼ်းတင်းလၢႆၶျႃးပၢင်တပ်ႉယူႇၵႃႈတီႈပၢင်ႇတီႈပိဝ်တီႈၶႃႈဢေႃႈ။ ၶႃႈၸဝ်ႈၼႆႉတၵ်းႁဵတ်းၸိူဝ်ႉႁိုဝ်မိူဝ်းၵႂႃႇၵႃႈတီႈႁိူၼ်းလႄႈၵိၼ်ၶူပ်းမူၼ်ႈပျေႃႇယူႇ၊ၼွၼ်းမူၼ်ႈပျေႃႇလူၺ်ႈၵၼ်တင်းမေးၶႃႈၸဝ်ႈယူႇလႆႈၸိူဝ်ႉၼင်ႇႁိုဝ်တီႈၶႃႈ။ ၵႃႈၼင်ႇဢၼ်ၸဝ်ႈႁဝ်းဢသၢၵ်ႈလိပ်းယူႇၼႆႉၶႃႈၸဝ်ႈဢမ်ႇႁဵတ်းၸိူဝ်ႉၼင်ႇၼႆလႆႈတီႈၶႃႈ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ၵေႃႈလၢတ်ႈလႄႈဝႃႈ၊ “ပေႃးပဵၼ်ၼႆၸိုင်၊ယူႇၵႃႈတီႈၼႆႈထႅင်ႈဝၼ်းၼိုင်ႈလူးၵွၼ်ႇတႃႉ။ မိူဝ်ႈၽုၵ်ႈၵဝ်တၵ်းၶိုၼ်းပွႆႇၸႂ်ႉမႂ်းၵႂႃႇဢေႃႈ၊” ဝႃႈၼင်ႇၼႆလႄႈ၊ ဢုရိယႃး၊ ၵေႃႈယူႇၵႃႈတီႈဝဵင်း ယေႇရုသလႅမ်ႇ၊ ၼႂ်းဝၼ်းၼၼ်ႉဢိၵ်ႇတင်းဝၼ်းမိူဝ်ႈၽုၵ်ႈဢေႃႈ။-
တႃႇဝိတ်ႈ၊ ၽိတ်ႈႁွင်ႉ ဢုရိယႃး၊ မႃးၵိၼ်ၶဝ်ႈၶမ်ႈလူၺ်ႈၵၼ်တင်းမၼ်းလႄႈ၊မၼ်းတိုၵ်းလဝ်ႈတီႈ ဢုရိယႃး၊ ထၢၼ်ႈပေႃးမဝ်းၼႃႇဢေႃႈ။ ၵူၺ်းၵႃႈ၊ၼႂ်းၶိုၼ်းၼၼ်ႉၵေႃႈ ဢုရိယႃး၊ ယင်းဢမ်ႇမိူဝ်းၵႂႃႇၵႃႈတီႈႁိူၼ်းမၼ်းၼင်ႇၵဝ်ႇလႄႈမၼ်းၵႂႃႇၼွၼ်းၵႃႈတီႈၵူႇၼွၼ်းၵူၼ်းပႂ်ႉႁေႃၸဝ်ႈၸိူဝ်းၼၼ်ႉၵူၺ်းဢေႃႈ။
ၶိင်ႇၵၢင်ၼႂ်ၼၼ်ႉ တႃႇဝိတ်ႈ၊ တႅမ်ႈလိၵ်ႈၽၢၵ်ႇၼႂ်းမိုဝ်း ဢုရိယႃး၊ ၵႂႃႇပၼ် ယွႃႇၽႃႉ၊ လႄႈဝႃႈၸမ်ႉ၊-
“ပၼ်ပုၼ်ႈၽွၼ်း ဢုရိယႃး၊ ဝႆႉၵႃႈတီႈတပ်ႉဢွၼ်တၢင်းသုတ်းတီႈဢၼ်တိုၵ်းသိုၵ်းမႆႈႁွၼ်ႉၼႃႇၼၼ်ႉသေလႄႈ၊ၵူႈသိမ်းဢဝ်တပ်ႉၶိုၼ်းမႃးႁႂ်ႈမၼ်းတၢႆလူၺ်ႈတၢင်းဢၼ်တိူဝ်ႉမၢတ်ႇသႂ်ႇၼၼ်ႉတႃႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈယၢမ်းမိူဝ်ႈဢၼ် ယွႃႇၽႃႉ၊ လွမ်ႉဝဵင်းယူႇၼၼ်ႉမၼ်းၶၢၼ်း ဢုရိယႃး၊ ၶီႇသိုၵ်းၶိုၼ်ႈၸူးတီႈဢၼ်မၼ်းႁုလွင်ႈဢၼ်ရၢၼ်ႇသူႇႁႅင်းယႂ်ႇၼႃႇၼၼ်ႉဢေႃႈ။-
တပ်ႉသိုၵ်းရၢၼ်ႇသူႇၵေႃႈဢွၵ်ႇဝဵင်းမႃးႁႄႉတိုၵ်းတေႃးတပ်ႉသိုၵ်း ယွႃႇၽႃႉ၊ လႄႈၶုၼ်ဢၼ်ပွင်ၵၢၼ်ႁေႃ တႃႇဝိတ်ႈ၊ ၵမ်ႈၽွင်ႈတၢႆဢေႃႈ။ ဢုရိယႃး၊ ၵေႃႈတၢႆဢေႃႈ။
မိူဝ်ႈၼၼ်ႉ၊ ယွႃႇၽႃႉ၊ ပွႆႇၸႂ်ႉၵူၼ်းၵႂႃႇမွၵ်ႇလၢတ်ႈၶၢဝ်ႇတီႈ တႃႇဝိတ်ႈ၊ လွင်ႈဢၼ်ၶဝ်လႆႈတိုၵ်းတေႃးၵၼ်ၼၼ်ႉလႄႈ၊-
သင်ႇလၢတ်ႈတီႈၵူၼ်းသူင်ႇၶၢဝ်ႇၼၼ်ႉလႄႈဝႃႈ၊ “လိုၼ်းသေဢၼ်မႂ်းလဝ်ႈလၢတ်ႈလွင်ႈၼႃႈသိုၵ်းတီႈၶုၼ်ႁေႃၶမ်းယဝ်ႉတူဝ်ႈယဝ်ႉၼၼ်ႉ၊-
ပေႃးၶုၼ်ႁေႃၶမ်းၸႂ်မႆႈၶႂ်ႈၸႃႉလႄႈထၢမ်မႂ်းလႄႈဝႃႈ၊ ‘ႁဵတ်းသင်လႄႈသူသုတ်ႈၶိုၼ်ႈၸူးတီႈဝဵင်းၸမ်ၸမ်ႁႂ်ႈလႆႈတိုၵ်းတေႃးၵၼ်တင်းၶဝ်ၸိူဝ်ႉၼင်ႇၼၼ်။ သူဢမ်ႇႁုလွင်ႈဢၼ်ရၢၼ်ႇသူႇတၵ်းယူႇၵႃႈၼိူဝ်လမ်းဝဵင်းလႄႈပိုတ်းပိုၼ်ၵၢင်ႇသႂ်ႇသူၼၼ်ႉႁိုဝ်း။-
သူဢမ်ႇၶုၵ်းၸႂ်လႆႈလွင်ႈဢၼ် ဢၽိမလႅၵ်ႉ၊ လုၵ်ႈၸၢႆး ယေႇရုပ်ႉပေႇသႅတ်ႉ၊ လႆႈၶၢမ်ႇတၢႆၵႂႃႇၸိူဝ်ႉၼင်ႇႁိုဝ်ၼၼ်ႉႁိုဝ်း။ ၵႃႈတီႈပၢင်တိုၵ်းသိုၵ်းဝဵင်း ထေႇပႅတ်ႉ၊ ၼၼ်ႉမႄႈယိင်းၵေႃႉၼိုင်ႈဢဝ်မၢၵ်ႇႁိၼ်လူၺ်ၽၢၵ်ႇၼိုင်ႈထိမ်ႈတူၵ်းသေၵႃႈၼိူဝ်လမ်းဝဵင်းလႄႈတိူဝ်ႉသႂ်ႇမၼ်းတၢႆဢမ်ႇၸႂ်ႈႁိုဝ်း။ ႁဵတ်းသင်လႄႈသူသုတ်ႉၶိုၼ်ႈၸမ်လမ်းဝဵင်းထၢၼ်ႇၼၼ်ႉၸိူဝ်ႉၼင်ႇႁိုဝ်၊’ မိူဝ်ႈဢၼ်ဝႃႈၼင်ႇၼႆၸိုင်၊မႂ်းလဝ်ႈလၢတ်ႈလႄႈဝႃႈ၊ ‘ၶုၼ်ပွင်ၵၢၼ်ႁေႃၸဝ်ႈႁဝ်း ဢုရိယႃး၊ ၵေႃႈတၢႆၼင်ႇၵဝ်ႇတီႈၶႃႈဢေႃႈ၊’ ဝႃႈၼႆတႃႉ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈၵူၼ်းသူင်ႇၶၢဝ်ႇၼၼ်ႉၵႂႃႇလႄႈႁွတ်ႈထိုင်သေယဝ်ႉ၊လဝ်ႈလၢတ်ႈၵႃႈၼင်ႇဢၼ်ၸဝ်ႈၵွၼ်းတပ်ႉသိုၵ်း ယွႃႇၽႃႉ၊ ၸႂ်ႉမၼ်းလၢတ်ႈၼၼ်ႉလႄႈဝႃႈ၊-
“ရၢၼ်ႇသူႇၶႃႈၸဝ်ႈႁဝ်းၶဝ်ၼၼ်ႉယဵင်ႈၶႅၼ်းႁႅင်းယႂ်ႇၼႃႇသေတပ်ႉသိုၵ်းၶႃႈၸဝ်ႈႁဝ်းၶဝ်သေယဝ်ႉ၊ၶဝ်ဢွၵ်ႇဝဵင်းမႃးတိုၵ်းတေႃးၶႃႈၸဝ်ႈႁဝ်းၶဝ်ၵႃႈၼႂ်းၵၢင်ပၢင်ႇဢေႃႈ။ ၵူၺ်းၵႃႈ၊ၶႃႈၸဝ်ႈႁဝ်းၶဝ်ၶိုၼ်းလိုပ်ႈႁေႃႈၶဝ်၊ၶဝ်ႈၵႂႃႇၵႃႈၼႂ်းၽၵ်းတူဝဵင်းတီႈၶႃႈဢေႃႈ။-
မိူဝ်ႈၼၼ်ႉ၊ၶဝ်ယူႇၵႃႈၼိူဝ်လမ်းဝဵင်းသေယဝ်ႉ၊ပိုတ်းပိုၼ်ၵၢင်ႇသႂ်ႇၶႃႈၸဝ်ႈႁဝ်းၶဝ်လႄႈၶုၼ်ဢၼ်ပွင်ၵၢၼ်ၸဝ်ႈၶုၼ်လူင်ႁဝ်းၵမ်ႈၽွင်ႈလူမ်ႉတၢႆတီႈၶႃႈဢေႃႈ။ ၶုၼ်ဢၼ်ပွင်ၵၢၼ်ၸဝ်ႈႁဝ်း ဢုရိယႃး၊ ၵေႃႈတၢႆၼင်ႇၵဝ်ႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ လၢတ်ႈတီႈၵေႃႉၼၼ်ႉလႄႈဝႃႈ၊ “မႂ်းၵႂႃႇပၼ်ဢဵၼ်ပၼ်ႁႅင်း ယွႃႇၽႃႉ၊ လႄႈမွၵ်ႇလၢတ်ႈမၼ်းယႃႇႁႂ်ႈၸႂ်လုၵွပ်ႈပိူဝ်ႈဢမုၼႆႉၼၼ်ႉတႃႉ။ ႁဝ်းဢမ်ႇၸၢင်ႈႁုထႃႈလွင်ႈဢၼ်ၽူႈလႂ်တၵ်းလူမ်ႉတၢႆၵႃႈၼႂ်းၼႃႈသိုၵ်းၼၼ်ႉ။ ႁႂ်ႈမၼ်းဢဝ်ႁႅင်းလႄႈတိုၵ်းတေႃးမႆႈမႆႈႁွၼ်ႉႁွၼ်ႉသေလႄႈသိမ်းဢဝ်ဝဵင်းၼၼ်ႉတႃႉ၊” ဝႃႈၼင်ႇၼႆဢေႃႈ။
မိူဝ်ႈဢၼ် ပႃႇသႃႉသေးၽႃႉ၊ မေး ဢုရိယႃး၊ လႆႈငိၼ်းလွင်ႈဢၼ်ၽူဝ်မၼ်းတၢႆယဝ်ႉၼၼ်ႉၸိုင်၊မၼ်းႁွင်ႉႁႆႈပွင်ႉၶၢင်းပုၼ်ႈၽူဝ်မၼ်းဢေႃႈ။-
မိူဝ်ႈဢၼ်ၶိင်ႇဢၼ်ႁွင်ႉႁႆႈပွင်ႉၶၢင်းသုတ်းပူၼ်ႉယဝ်ႉတူဝ်ႈၵႂႃႇၼၼ်ႉ၊ တႃႇဝိတ်ႈ၊ ပွႆႇၸႂ်ႉၵႂႃႇႁွင်ႉဢဝ်မၼ်းမႃးၵႃႈတီႈႁေႃၸဝ်ႈသေယဝ်ႉ၊မၼ်းလႆႈပဵၼ်ၼၢင်းႁေႃၶမ်းလႄႈၵိူတ်ႇလဵင်ႉလုၵ်ႈၸၢႆးမႃးဢေႃႈ။ ၵူၺ်းၵႃႈ၊ ထႃႇဝရႃႉၽြႃး၊ ဢမ်ႇၵျိူၵ်ႈၸႂ်ထုၵ်ႇၸႂ်ၵႃႈတီႈလွင်ႈတၢင်းဢၼ် တႃႇဝိတ်ႈ၊ ႁဵတ်းၼၼ်ႉဢေႃႈ။
ထႃႇဝရႃႉၽြႃး၊ ပွႆႇၸႂ်ႉပရေႃးၽႅတ်ႈ ၼႃႇႀၼ်ႇ၊ ၵႂႃႇၸူး တႃႇဝိတ်ႈ၊ ဢေႃႈ။ ၼႃႇႀၼ်ႇ၊ ၵေႃႈၵႂႃႇၸူးတီႈမၼ်းလႄႈလၢတ်ႈဝႃႈ၊ “ၵႃႈၼႂ်းဝဵင်းဝဵင်းၼိုင်ႈမီးသထေးၵေႃႉၼိုင်ႈ၊ဢိၵ်ႇတင်းၵူၼ်းၽၢၼ်ၵေႃႉၼိုင်ႈတီႈၶႃႈဢေႃႈ။-
သထေးၼၼ်ႉပျေႉၸုမ်ႇလိူင်ႇၸႂ်မၢၵ်ႈမီးၽုင်သူဝ်းၽုင်ဝူဝ်းၼမ်ၼႃႇလူင်လၢင်တီႈၶႃႈဢေႃႈ။-
ၵူၼ်းၽၢၼ်ၼၼ်ႉၸမ်ႉ၊မီးသူဝ်းမႄႈဢွၼ်ႇဢၼ်မၼ်းသိုဝ်ႉဢဝ်ဝႆႉမီးတူဝ်လဵဝ်ၵူၺ်းတီႈၶႃႈဢေႃႈ။ သူဝ်းမႄႈဢွၼ်ႇတူဝ်ၼၼ်ႉမၼ်းၵဵပ်းလဵင်ႉဝႆႉလႄႈယႂ်ႇမႃးလူၺ်ႈၵၼ်တင်းလုၵ်ႈလၢင်းၸဝ်ႈမၼ်းဢေႃႈ။
မီးဝၼ်းၼိုင်ႈ၊ၶႅၵ်ႇၵေႃႉၼိုင်ႈႁွတ်ႈမႃးၵႃႈတီႈႁိူၼ်းသထေးၼၼ်ႉလႄႈမၼ်းၼၼ်ႉသေလၢႆသူဝ်းဝူဝ်းမၼ်းပုၼ်ႈဢၼ်တၵ်းလဵင်ႉၶႅၵ်ႇဢေႃႈ။ မၼ်းၵႂႃႇဢဝ်သူဝ်းမႄႈဢွၼ်ႇၵူၼ်းၽၢၼ်ၼၼ်ႉသေယဝ်ႉ၊ႁုင်ၽၵ်းလဵင်ႉၶႅၵ်ႇမၼ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ၸႂ်မႆႈၶႂ်ႈၸႃႉတီႈသထေးၼၼ်ႉၼႃႇလူင်လၢင်လႄႈဝႃႈ၊ “ၸိူဝ်ႉၼင်ႇဢၼ် ထႃႇဝရႃႉၽြႃး၊ ဢသၢၵ်ႈလိပ်းၼၼ်ႉ၊ၵေႃႉဢၼ်ႁဵတ်းၸိူဝ်ႉၼင်ႇၼၼ်ၼၼ်ႉၸိုင်၊ထိူၵ်ႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၼ်ပဵၼ်ဢေႃႈ။-
ၵွပ်ႈပိူဝ်ႈဢၼ်မၼ်းဢမ်ႇမီးၸႂ်ၵရုၼႃႇလႄႈႁဵတ်းလွင်ႈတၢင်းၼၼ်ႉၸိုင်၊မၼ်းတၵ်းလႆႈတႅၼ်းပၼ်သီႇပုၼ်ႈ၊ပုၼ်ႈတႃႇသူဝ်းမႄႈဢွၼ်ႇၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၼႃႇႀၼ်ႇ၊ ၵေႃႈလဝ်ႈလၢတ်ႈတီႈ တႃႇဝိတ်ႈ၊ လႄႈဝႃႈ၊ “ၸဝ်ႈႁဝ်းပဵၼ်ၵေႃႉၼၼ်ႉဢေႃႈ။ ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ မီးဢမိင်ႉလႄႈဝႃႈၸမ်ႉ၊ ‘ၵဝ်ပၼ်ၽိၵ်ႈသိၵ်ႈလႄႈၶၢၼ်းမႂ်းဝႆႉၼႂ်းဢရႃႇၶုၼ်ႁေႃၶမ်း ဢိသရေး၊ ယဝ်ႉ။ ၵဝ်ၵႄႇၼုၵ်ႈဢဝ်မႂ်းလွတ်ႈသေၵႃႈၼႂ်းမိုဝ်း သေႃးလု၊ ယဝ်ႉ။-
ၵဝ်ဢဝ်သိုင်ႇၸိုင်ႈဝၢၼ်ႈမိူင်းမၼ်းဢိၵ်ႇတင်းမေးမၼ်းတင်းလၢႆဢၢပ်ႈပၼ်တီႈမႂ်းယဝ်ႉ။ ၵဝ်ၶၢၼ်းမႂ်းဝႆႉႁႂ်ႈပဵၼ်ၶုၼ်ႁေႃၶမ်းမိူင်း ဢိသရေး၊ တင်းမိူင်း ယုတႃႉ၊ ယဝ်ႉ။ သင်ဝႃႈလွင်ႈတၢင်းၸိူဝ်းၼႆႉယင်းဢမ်ႇၵုမ်ႇဢမ်ႇပေႃးတီႈမႂ်းၸိုင်၊ၵဝ်ဢၢင်ႈဢၢၼ်းတၵ်းပၼ်ထႅင်ႈသွင်ပုၼ်ႈလူးၵွၼ်ႇဢေႃႈ။-
ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းဢမ်ႇပႂ်ႉၸွမ်းပိင်းၺၢပ်ႈတြႃးၵဝ်ၸိူဝ်းၼၼ်ႉ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းႁဵတ်းဢၼ်ႁၢႆႉယုတ်ႈၼၼ်ႉၸိူဝ်ႉၼင်ႇႁိုဝ်။ မႂ်းၶိုင်ပွင်ႁႂ်ႈ ဢုရိယႃး၊ လႆႈတၢႆၼႂ်းၼႃႈသိုၵ်းလႄႈႁႂ်ႈၵူၼ်း ဢမ်ႇမုၼ်ႇ၊ ၶဝ်လႆႈၶႃႈၽၼ်းမၼ်းတၢႆသေယဝ်ႉ၊မႂ်းသိမ်းဢဝ်မေးမၼ်းႁႂ်ႈမႃးပဵၼ်မေးမႂ်းယဝ်ႉလူင်ပႄႇ။-
မိူဝ်ႈလဵဝ်ၼႆႉၸိုင်၊ၵွပ်ႈပိူဝ်ႈဢၼ်မႂ်းဢမ်ႇထွမ်ႇဢဝ်ၵႂၢမ်းၵဝ်လႄႈသိမ်းဢဝ်မေး ဢုရိယႃး၊ ၼၼ်ႉ၊ၵႃႈၼႂ်းလုၵ်ႈလၢၼ်ၸိူဝ်ႉၶိူဝ်းမႂ်းၵူႈသိုပ်ႇသိုပ်ႇၼၼ်ႉတၵ်းလႆႈမီးသေၵေႃႉၵေႃႉဢၼ်လႆႈတၢႆလူၺ်ႈၽေးလၢပ်ႇၼၼ်ႉဢမၢၼ်ႇၶၼ်ပဵၼ်ဢေႃႈ။-
ၵဝ်တၵ်းႁႂ်ႈၵူၼ်းၼႂ်းလုၵ်ႈလၢၼ်မႂ်းသေၵေႃႉၵေႃႉႁဵတ်းၽေးရၢၼ်ႇဢၼ်ႇတရေႇသႂ်ႇတီႈမႂ်းဢေႃႈ။ ၵဝ်တၵ်းဢဝ်မေးမႂ်းၸိူဝ်းၼၼ်ႉဢၢပ်ႈပၼ်တီႈၵူၼ်းၸမ်ၵၼ်တင်းမႂ်းသိုဝ်ႈၼႃႈတႂ်ႈတႃမႂ်းသေယဝ်ႉ၊မၼ်းတၵ်းၵွတ်ႇၵဵဝ်ႈၼွၼ်းလူၺ်ႈၵၼ်တင်းမေးမႂ်းၸိူဝ်းၼၼ်ႉၵႃႈၼႂ်းဢၼ်လႅင်းၵၢင်ဝၼ်းဢေႃႈ။-
မႂ်းလၵ်ႉလွမ်ႁဵတ်းတုၸရိူၵ်ႈသေၵေႃႈၵဝ်တၵ်းႁဵတ်းဢမုၼႆႉၵႃႈၼႂ်းဢၼ်လႅင်းၵၢင်ဝၼ်းႁႂ်ႈၵူၼ်းမဵဝ်း ဢိသရေး၊ တင်းသဵင်ႈတင်းလူင်လႆႈႁၼ်ဢေႃႈ၊’ ဝႃႈၼႆယဝ်ႉ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ၵေႃႈတွင်းပၢၼ်ႇတီႈ ၼႃႇႀၼ်ႇ၊ လႄႈဝႃႈ၊ “ၵဝ်လႆႈၽိတ်းပိူင်ႈ ထႃႇဝရႃႉၽြႃး၊ ယဝ်ႉ၊” ဝႃႈၼင်ႇၼႆဢေႃႈ။ ၼႃႇႀၼ်ႇ၊ ၶိုၼ်းလဝ်ႈလၢတ်ႈလႄႈဝႃႈ၊ “ ထႃႇဝရႃႉၽြႃး၊ ပႄႇပႅတ်ႈဢပျတ်ႈၸဝ်ႈႁဝ်းယဝ်ႉတီႈၶႃႈလႄႈၸဝ်ႈႁဝ်းတေဢမ်ႇတၢႆတီႈၶႃႈ။-
ၼႂ်းဝႃႈၼၼ်သေၵေႃႈ ၵွပ်ႈပိူဝ်ႈဢၼ်ၸဝ်ႈႁဝ်းႁဵတ်းတၢင်းၽိတ်းဢၼ် ထႃႇဝရႃႉၽြႃး၊ လီႁင်ႈဢဵတ်ႇသဵတ်ႇၼၼ်ႉယဝ်ႉလႄႈလုၵ်ႈၸၢႆးဢၼ်ၵိူတ်ႇလဵင်ႉၼႆႉတၵ်းလႆႈတၢႆဢမၢၼ်ႇၶၼ်ပဵၼ်တီႈၶႃႈဢေႃႈ၊” ဝႃႈၼင်ႇၼႆသေယဝ်ႉ၊-
ၼႃႇႀၼ်ႇ၊ ဢွၵ်ႇမိူဝ်းၵႂႃႇတီႈႁိူၼ်းမၼ်းသေဢေႃႈ။ ထႃႇဝရႃႉၽြႃး၊ ပၼ်တၢမ်ႇတီႈလုၵ်ႈၸၢႆးဢၼ်မေး ဢုရိယႃး၊ ၵိူတ်ႇလဵင်ႉမႃးတီႈ တႃႇဝိတ်ႈ၊ ၼၼ်ႉလႄႈ၊လုၵ်ႈဢွၼ်ႇၼၼ်ႉမီးတၢင်းၶႆႈတၢင်းပဵၼ်ဢၼ်ႁႅင်းယႂ်ႇၼႃႇဢေႃႈ။-
တႃႇဝိတ်ႈ၊ တွင်းပၢၼ်ႇတီႈ ထႃႇဝရႃႉၽြႃး၊ ပုၼ်ႈတႃႇလုၵ်ႈဢွၼ်ႇတၵ်းႁၢႆတၵ်းၶႅၼ်းလႄႈ၊မၼ်းၵမ်တၢင်းၵိၼ်ယူႇ၊ၶဝ်ႈၵႃႈၼႂ်းလုၵ်းၼွၼ်းမၼ်းၶိင်ႇၵၢင်ၶိုၼ်းလႄႈၵိင်းၼွၼ်းယူႇၵႃႈၼိူဝ်ပႅၼ်ႈသိူဝ်ႇတင်းၶိုၼ်းဢေႃႈ။-
ၶုၼ်ဢၼ်ပွင်ၵၢၼ်ႁေႃမၼ်းတင်းလၢႆဢွၼ်ၵၼ်ၶဝ်ႈၸူးတီႈမၼ်း၊ႁႂ်ႈမၼ်းလုၵ်ႉသေၵေႃႈမၼ်းထဵင်ပႅတ်ႈလႄႈဢမ်ႇၵိၼ်တၢင်းၵိၼ်တၢင်းၶူပ်းလူၺ်ႈၵၼ်တင်းၶဝ်လႃးလႃး။-
မိူဝ်ႈဢၼ်ထူၼ်ႈထိုင်ၸဵတ်းဝၼ်းၸိုင်၊လုၵ်ႈဢွၼ်ႇၼၼ်ႉတၢႆၵႂႃႇဢေႃႈ။ ၶုၼ်ဢၼ်ပွင်ၵၢၼ်ၼႂ်းႁေႃၸိူဝ်းၼၼ်ႉဢမ်ႇႁတ်းလဝ်ႈလၢတ်ႈလွင်ႈဢၼ်လုၵ်ႈဢွၼ်ႇတၢႆယဝ်ႉၼၼ်ႉတီႈမၼ်း။ ၶဝ်လၢတ်ႈလႄႈဝႃႈ၊ “မိူဝ်ႈဢၼ်လုၵ်ႈဢွၼ်ႇဢသၢၵ်ႈယင်းလိပ်းယူႇၼၼ်ႉႁဝ်းလၢတ်ႈတေႃႇမၼ်းသေၵေႃႈ၊မၼ်းယင်းဢမ်ႇၶိုၼ်းလၢတ်ႈတေႃႇႁဝ်း။ ပေႃးႁဝ်းမွၵ်ႇလၢတ်ႈလွင်ႈဢၼ်လုၵ်ႈဢွၼ်ႇၼၼ်ႉတၢႆယဝ်ႉဝႃႈၼႆၸိုင်၊ၵူဝ်မၼ်းႁဵတ်းသေမဵဝ်းမဵဝ်းတီႈတူဝ်ၸဝ်ႈၵဝ်ႇဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ် တႃႇဝိတ်ႈ၊ ႁုႁၼ်လွင်ႈဢၼ်ၶဝ်ၸိူဝ်းၼၼ်ႉၼင်ႇၵၼ်ၵၼ်သွပ်ႉသႅပ်ႉၵၼ်ၼၼ်ႉၸိုင်၊မၼ်းႁုသၢႆငၢႆလွင်ႈဢၼ်လုၵ်ႈဢွၼ်ႇတၢႆယဝ်ႉၼၼ်ႉသေလႄႈထၢမ်တူၺ်းၶဝ်လႄႈဝႃႈ၊ “လုၵ်ႈဢွၼ်ႇတၢႆယဝ်ႉႁိုဝ်း၊” ဝႃႈၼင်ႇၼႆဢေႃႈ။ ၶဝ်ၵေႃႈလဝ်ႈလၢတ်ႈလႄႈဝႃႈ၊ “တၢႆယဝ်ႉတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ လုၵ်ႉၶိုၼ်ႈသေၵႃႈၼိူဝ်ပႅၼ်ႈသိူဝ်ႇလႄႈဢၢပ်ႇၼမ်ႉသေယဝ်ႉ၊ဝီႁူဝ်ပုတ်ႈလၢႆႈၶူဝ်းၼုင်ႈမၼ်းယဝ်ႉၸင်ႇ၊မၼ်းၵႂႃႇၵႃႈၼႂ်းႁိူၼ်း ထႃႇဝရႃႉၽြႃး၊ လႄႈဝႆႈၽြႃးပဵၼ်ၸဝ်ႈဢေႃႈ။ မိူဝ်ႈဢၼ်မၼ်းၶိုၼ်းမႃးၵႃႈတီႈႁေႃၸဝ်ႈၸိုင်၊မၼ်းယွၼ်းတၢင်းၵိၼ်တၢင်းၶူပ်းလႄႈၶဝ်ဢွၼ်ၵၼ်ႁႅၼ်းတမ်းပၼ်မၼ်းၵိၼ်ဢေႃႈ။-
ၶုၼ်ပွင်ၵၢၼ်ႁေႃၸိူဝ်းၼၼ်ႉဢွၼ်ၵၼ်လဝ်ႈထၢမ်မၼ်းလႄႈဝႃႈ၊ “ၸဝ်ႈႁဝ်းႁဵတ်းၸိူဝ်ႉၼင်ႇႁိုဝ်တီႈၶႃႈ။ မိူဝ်ႈဢၼ်လုၵ်ႈဢွၼ်ႇယင်းတိုၵ်ႉဢသၢၵ်ႈလိပ်းယူႇၼၼ်ႉၸဝ်ႈႁဝ်းႁွင်ႉႁႆႈပုၼ်ႈလုၵ်ႈဢွၼ်ႇၼၼ်ႉလႄႈၵမ်တၢင်းၵိၼ်တီႈၶႃႈဢေႃႈ။ မိူဝ်ႈဢၼ်လုၵ်ႈဢွၼ်ႇတၢႆယဝ်ႉၼၼ်ႉၸိုင်၊ၸဝ်ႈႁဝ်းသမ်ႉလုၵ်ႉလႄႈၵိၼ်ၶူပ်းၵမ်းလဵဝ်ၸိူဝ်ႉၼင်ႇႁိုဝ်ၶႃႈ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ၶိုၼ်းလၢတ်ႈလႄႈဝႃႈ၊ “ၼႂ်းမိူဝ်ႈဢၼ်လုၵ်ႈဢွၼ်ႇယင်းတိုၵ်ႉဢသၢၵ်ႈလိပ်းယူႇၼၼ်ႉၵဝ်ၵမ်တၢင်းၵိၼ်လႄႈႁွင်ႉႁႆႈၵွပ်ႈပိူဝ်ႈဢၼ်ၵဝ်ၶႆႈၸႂ်လႄႈဝႃႈ၊ ‘ၸၢင်ႈၶႄး ထႃႇဝရႃႉၽြႃး၊ တၵ်းဢဵတ်းလူၵဝ်လႄႈပၼ်ဢသၢၵ်ႈလုၵ်ႈဢွၼ်ႇႁႂ်ႈၵတ်းယဵၼ်ၶျၢမ်းသႃႇဢေႃႈ၊’ ဝႃႈၼင်ႇၼႆဢေႃႈ။-
မိူဝ်ႈလဵဝ်ၼႆႉမၼ်းတၢႆယဝ်ႉ။ တၵ်းလႆႈၵမ်တၢင်းၵိၼ်ၸိူဝ်ႉၼင်ႇႁိုဝ်လူးၵွၼ်ႇ။ တၵ်းၶိုၼ်းႁႂ်ႈလုၵ်ႈဢွၼ်ႇၼၼ်ႉဢသၢၵ်ႈလိပ်းမႃးလႆႈႁိုဝ်း။ ဝၼ်းၼိုင်ႈၸဝ်ႉၸဝ်ႉၵဝ်တၵ်းလႆႈၵႂႃႇၵႃႈတီႈဢၼ်မၼ်းမီးၼၼ်ႉလႄႈမၼ်းဢမ်ႇၸၢင်ႈၶိုၼ်းမႃးၵႃႈတီႈဢၼ်ၵဝ်မီးယူႇၼႆႉလႆႈ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ပၼ်ႁႅင်းၸႂ်တီႈမေးမၼ်း ပႃႇသႃႉသေးၽႃႉ၊ လႄႈၶဝ်ႈၸူးတီႈမၼ်းသေယဝ်ႉ၊မူၼ်ႈပျေႃႇလူၺ်ႈၵၼ်တင်းမၼ်းဢေႃႈ။ မၼ်းၵေႃႈၵိူတ်ႇလဵင်ႉလုၵ်ႈၸၢႆးမႃးလႄႈ တႃႇဝိတ်ႈ၊ ႁွင်ႉႁဵၵ်ႈၸိုဝ်ႈမၼ်းဝႃႈ၊ သေႃးလမုၼ်ႇ၊ ဢေႃႈ။-
ထႃႇဝရႃႉၽြႃး၊ ႁၵ်ႉလုၵ်ႈဢွၼ်ႇၼၼ်ႉလႄႈ၊ပူင်ဢမိင်ႉႁႂ်ႈပရေႃးၽႅတ်ႈ ၼႃႇႀၼ်ႇ၊ ၵႂႃႇပၼ်ၸိုဝ်ႈပၼ်သဵင်ဝႃႈ၊ ယေႇတိတိ၊ ၵွပ်ႈပိူဝ်ႈဢၼ် ထႃႇဝရႃႉၽြႃး၊ ႁၵ်ႉမၼ်းၼၼ်ႉဢေႃႈ။
မိူဝ်ႈယၢမ်းၼၼ်ႉ၊ ယွႃႇၽႃႉ၊ ယင်းတိုၵ်ႉတိုၵ်းတေႃးဝဵင်း ရပ်ႉပႃႇ၊ ဢၼ်ပဵၼ်ဝဵင်းလူင်မိူင်း ဢမ်ႇမုၼ်ႇ၊ ၼၼ်ႉယူႇလႄႈၸမ်တၵ်းပႄႉၼႅင်ႇယဝ်ႉဢေႃႈ။-
မၼ်းပွႆႇၸႂ်ႉၵူၼ်းၵႂႃႇသူင်ႇၶၢဝ်ႇတီႈ တႃႇဝိတ်ႈ၊ လႄႈဝႃႈ၊ “ၶႃႈၸဝ်ႈတိုၵ်းပႄႉဝဵင်းလူင် ရပ်ႉပႃႇ၊ လႄႈသိမ်းဢဝ်ဝဵင်းဢၼ်မီးၼမ်ႉလိူင်ႇၼႃႇၼၼ်ႉတီႈၶႃႈယဝ်ႉ။-
မိူဝ်ႈလဵဝ်ၼႆႉၸုတုမ်ဢဝ်တပ်ႉသိုၵ်းၸဝ်ႈဢၼ်ၵိုတ်းဝႆႉၵျၢၼ်ႇဝႆႉၸိူဝ်းၼၼ်ႉမႃးတိုၵ်းတေႃးဝဵင်းၼၼ်ႉသေလႄႈသိမ်းဢဝ်ပုၼ်ႈၸဝ်ႈႁဝ်းသေၵမ်း။ ပေႃးဢမ်ႇၼၼ်ၶႃႈၸဝ်ႈတၵ်းတိုၵ်းဢဝ်ဝဵင်းၼၼ်ႉလႄႈဢဝ်ၸိုဝ်ႈသဵင်ၶႃႈၸဝ်ႈႁွင်ႉႁဵၵ်ႈဝဵင်းၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ တႃႇဝိတ်ႈ၊ ၸုတုမ်ဢဝ်တပ်ႉသိုၵ်းမၼ်းတင်းလၢႆ ၵႂႃႇၸူးတီႈဝဵင်းလူင် ရပ်ႉပႃႇ၊ လႄႈတိုၵ်းတေႃးပႄႉၼႅင်ႇဢဝ်သေဢေႃႈ။-
မၼ်းထွတ်ႇဢဝ်သရၽူႇၶမ်းသေၵႃႈတီႈႁူဝ်ႁုၼ်ႇႁၢင်ႈသၢင်းထု မိလႃႉၵုမ်း၊ ဢၼ်ပဵၼ်ၽြႃးၵူၼ်းမဵဝ်း ဢမ်ႇမုၼ်ႇ၊ ဢၼ်ၼမ်ႉၼၵ်းမၼ်းမီးသၢဝ်းၸွႆႉ လႄႈသႅင်လီၵေႃႈမီးၵႃႈၼႂ်းမၼ်းလုၵ်ႈၼိုင်ႈၼၼ်ႉဢေႃႈ။ တႃႇဝိတ်ႈ၊ ဢဝ်ဢၼ်ၼၼ်ႉလႄႈတိုဝ်းဝႆႉၵႃႈၼိူဝ်ႁူဝ်မၼ်းဢေႃႈ။ ဢုၵ်ႉၸႃႇဢၼ်ႁိမ်ဢဝ်ႁူင်ႇဢဝ်ၵႃႈတီႈဝဵင်းၼၼ်ႉၵေႃႈမၼ်းဢဝ်ၵႂႃႇၼမ်ၼႃႇဢေႃႈ။-
ၵူၼ်းဝဵင်းၸိူဝ်းၼၼ်ႉၵေႃႈမၼ်းၸႂ်ႉၶဝ်ႁဵတ်းၵၢၼ်ဢဝ်လဵၵ်းလိူဝ်ႈလိူဝ်ႈလႂ်၊ႁဵတ်းမႂ်ထႆလဵၵ်းလႂ်၊ႁဵတ်းတႃမၢတ်ႇလဵၵ်းလႂ်၊ဢိၵ်ႇတင်းၸႂ်ႉႁႂ်ႈၶဝ်ထၢမ်းၼႃႈၵၢၼ်ႁဵတ်းမၢၵ်ႇဢုတ်ႇလႂ်ဢေႃႈ။ ၼင်ႇၼၼ်လႄႈမၼ်းၸႂ်ႉၵူၼ်းဝဵင်းတင်းဝဵင်းၸိူဝ်းဢၼ်ပဵၼ်ၵူၼ်းမဵဝ်း ဢမ်ႇမုၼ်ႇ၊ တင်းလၢႆမိူၼ်မိူၼ်ၵၼ်ဢေႃႈ။ မိူဝ်ႈၼၼ်ႉမၼ်းဢိၵ်ႇတင်းၵူၼ်းမၼ်းတင်းလၢႆဢွၼ်ၵၼ်ၶိုၼ်းမိူဝ်းၵႂႃႇတီႈဝဵင်း ယေႇရုသလႅမ်ႇ၊ ဢေႃႈ။
လိုၼ်းၼၼ်ႉလုၵ်ႈၸၢႆး တႃႇဝိတ်ႈ၊ ဢၼ်ပဵၼ် ဢပႃႉသလုမ်ႇ၊ ၼၼ်ႉမီးၼွင်ႉသၢဝ်ဢၼ်ႁၢင်ႈလီဢၼ်လႆႈၸိုဝ်ႈ တႃႇမႃႇ၊ ၼၼ်ႉဢေႃႈ။ လုၵ်ႈၸၢႆး တႃႇဝိတ်ႈ၊ တၢင်ႇၵေႃႉဢၼ်ပဵၼ် ဢႃႇမၼုၼ်ႇ၊ ငိၼ်းႁၵ်ႉငိၼ်းပႅင်းမၼ်းဢေႃႈ။-
မၼ်းႁၵ်ႉပႅင်းၼႃႇလူင်လၢင်တေႃႇထိုင်ႁွတ်ႈယၢပ်ႇၸႂ်ယုင်ႈၸႂ်ထၢၼ်ႈပေႃးၸပ်းတၢင်းၶႆႈတၢင်းပဵၼ်ၵွပ်ႈပိူဝ်ႈဢၼ် တႃႇမႃႇ၊ ၼၼ်ႉယင်းတိုၵ်ႉပဵၼ်သၢဝ်ၵၼ်ႇၺႃႇဢၼ်ထိင်းဝႆႉ၊ဢမ်ႇႁႂ်ႈလႆႈထူပ်းၵၼ်တင်းၵူၼ်းၸၢႆးၼၼ်ႉလႄႈ ဢႃႇမၼုၼ်ႇ၊ ႁုလွင်ႈဢၼ်မၼ်းဢမ်ႇၸၢင်ႈႁဵတ်းၸိူဝ်ႉၼင်ႇႁိုဝ်ႁႂ်ႈလႆႈပဵၼ်ၸွမ်းၼင်ႇဢၼ်ဢလူဝ်ႇမၼ်းမီးၼၼ်ႉဢေႃႈ။-
ၵူၺ်းၵႃႈ၊ ဢႃႇမၼုၼ်ႇ၊ မီးၵေႃႉသႄႈၵေႃႉၼိုင်ႈဢၼ်ပဵၼ် ယေႃးၼတပ်ႉ၊ လုၵ်ႈၸၢႆး သိမႃႇ၊ ပီႈၸၢႆး တႃႇဝိတ်ႈ၊ ၼၼ်ႉဢေႃႈ။ ယေႃးၼတပ်ႉ၊ ၼၼ်ႉလၵ်းလႅမ်ၼႃႇလူင်လၢင်ဢေႃႈ။-
မၼ်းလၢတ်ႈတီႈ ဢႃႇမၼုၼ်ႇ၊ လႄႈဝႃႈ၊ “ၸဝ်ႈႁဝ်းပဵၼ်လုၵ်ႈၸၢႆးၶုၼ်ႁေႃၶမ်းသေယဝ်ႉ၊ပဵၼ်ၵွပ်ႈသင်လႄႈသမ်ႉယွမ်ႁဵဝ်ႇၵႂႃႇယေႈဝၼ်းယေႈဢိတ်းယူႇၸိူဝ်ႉၼင်ႇႁိုဝ်ၶႃႈ။ ၸွင်ႇမွၵ်ႇလၢတ်ႈတီႈၶႃႈၸဝ်ႈလႆႈတီႈၶႃႈႁိုဝ်း၊” ဝႃႈၼင်ႇၼႆဢေႃႈ။ ဢႃႇမၼုၼ်ႇ၊ ၶိုၼ်းလၢတ်ႈလႄႈဝႃႈ၊ “ၵဝ်ႁၵ်ႉပႅင်း တႃႇမႃႇ၊ ၼွင်ႉယိင်း ဢပႃႉသလုမ်ႇ၊ ၼွင်ႉၸၢႆးၵဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ယေႃးၼတပ်ႉ၊ လဝ်ႈလၢတ်ႈတီႈမၼ်းလႄႈဝႃႈ၊ “ႁဵတ်းၸိူဝ်ႉၼင်ႇႁၢင်ႈပဵၼ်ၶႆႈပဵၼ်ၼၢဝ်လႄႈၼွၼ်းယဵတ်ႇဢိူၼ်လိူၼ်ယူႇၵႃႈၼိူဝ်ၵူႇသေၵမ်းၶႃႈ။ မိူဝ်ႈဢၼ်ၸဝ်ႈပေႃႈၸဝ်ႈႁဝ်းမႃးလူမႃးတူၺ်းၼၼ်ႉၸိုင်၊ယွၼ်းဢၶႂၢင်ႉလႄႈဝႃႈ၊ ‘ၶႅၼ်းတေႃႈႁႂ်ႈၼွင်ႉယိင်းၶႃႈၸဝ်ႈ တႃႇမႃႇ၊ မႃးႁဵတ်းလဵင်ႉႁဵတ်းလူၶႃႈၸဝ်ႈႁဝ်းသေၵမ်းတီႈၶႃႈ။ ႁႂ်ႈမၼ်းမႃးတူမ်ႈမႃးႁုင်ၵႃႈတီႈၼႆႈႁႂ်ႈၶႃႈၸဝ်ႈလႆႈႁၼ်ဢၼ်မၼ်းတူမ်ႈမၼ်းႁုင်ၼၼ်ႉလႄႈ၊ႁႂ်ႈတူဝ်မၼ်းႁႅၼ်းတႄႇႁႅၼ်းတမ်းပၼ်တၢင်းၵိၼ်ပုၼ်ႈၶႃႈၸဝ်ႈသေၵမ်းတီႈၶႃႈ၊’ ဝႃႈၼႆသေၵမ်းၶႃႈ၊” ဝႃႈၼင်ႇၼႆဢေႃႈ။-
ဢႃႇမၼုၼ်ႇ၊ ၵေႃႈႁဵတ်းၼင်ႇႁၢင်ႈၵူၼ်းပဵၼ်ၶႆႈပဵၼ်ၼၢဝ်လႄႈၼွၼ်းယဵတ်ႇဢိူၼ်လိူၼ်ယူႇၵႃႈၼိူဝ်ၵူႇၼွၼ်းမၼ်းဢေႃႈ။ ၶုၼ်ႁေႃၶမ်း တႃႇဝိတ်ႈ၊ မႃးလူမႃးတူၺ်းမၼ်းလႄႈ ဢႃႇမၼုၼ်ႇ၊ လဝ်ႈယွၼ်းဢၶႂၢင်ႉလႄႈဝႃႈ၊ “ႁႂ်ႈ တႃႇမႃႇ၊ ၼွင်ႉယိင်းၶႃႈၸဝ်ႈၼၼ်ႉမႃးႁဵတ်းၶဝ်ႈမုၼ်းမဵဝ်းဢၼ်ဝၢၼ်လီၼၼ်ႉၵႃႈတီႈသိုဝ်ႈၼႃႈတႂ်ႈတႃၶႃႈၸဝ်ႈလႄႈႁႂ်ႈၶႃႈၸဝ်ႈလႆႈၵိၼ်ဢၼ်ဢဝ်တင်းမိုဝ်းမၼ်းႁဵတ်းလဵင်ႉႁဵတ်းလူၼၼ်ႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ တႃႇဝိတ်ႈ၊ ပွႆႇၸႂ်ႉၵူၼ်းၵႂႃႇၵႃႈတီႈႁိူၼ်း တႃႇမႃႇ၊ လူၺ်ႈတင်းၵႂၢမ်းသင်ႇလႄႈလၢတ်ႈဝႃႈ၊ “ၵႂႃႇၵႃႈတီႈႁိူၼ်းပီႈၸၢႆးမႂ်း ဢႃႇမၼုၼ်ႇ၊ လႄႈတူမ်ႈႁုင်တၢင်းၵိၼ်တၢင်းၶူပ်းပုၼ်ႈမၼ်းတႃႉ၊” ဝႃႈၼင်ႇၼႆဢေႃႈ။-
တႃႇမႃႇ၊ ၵေႃႈၵႂႃႇၵႃႈတီႈၼၼ်ႈလႄႈထူပ်းႁၼ်ပီႈၸၢႆးမၼ်း ဢႃႇမၼုၼ်ႇ၊ ၼွၼ်းယူႇဢိူၼ်လိူၼ်ၵႃႈၼိူဝ်ၵူႇၼွၼ်းမၼ်းဢေႃႈ။ တႃႇမႃႇ၊ ၸင်ႇၼူတ်ႈၵွၼ်ႈၶဝ်ႈၵျုင်ႇဢိတ်းဢီႈၵႃႈတီႈၽၢႆႇၼႃႈပီႈၸၢႆးမၼ်းလႄႈမူၵ်းၽႆးယဝ်ႉၸင်ႇ၊-
ဢဝ်သႂ်ႇဝၢၼ်ႇၽႄသေယဝ်ႉ၊တမ်းပၼ်ႁႂ်ႈပီႈၸၢႆးမၼ်းၵိၼ်သေၵေႃႈမၼ်းဢမ်ႇဢဝ်ၵိၼ်။ မၼ်းလၢတ်ႈလႄႈဝႃႈ၊ “ႁႂ်ႈၵူႈၵေႃႉၵူႈၵူၼ်းဢွၵ်ႇၵႂႃႇတႃႉ၊” ဝႃႈၼင်ႇၼႆလႄႈၵူၼ်းၵူႈၵေႃႉၵေႃႈဢွၼ်ၵၼ်ဢွၵ်ႇၵႂႃႇဢေႃႈ။-
မိူဝ်ႈၼၼ်ႉမၼ်းလၢတ်ႈတီႈ တႃႇမႃႇ၊ လႄႈဝႃႈ၊ “ဢဝ်ၶဝ်ႈမုၼ်းၸိူဝ်းၼၼ်ႉမႃးၵႃႈတီႈၵဝ်ၼႆႉလႄႈတူဝ်မႂ်းႁဵတ်းလဵင်ႉလူၵဝ်သေၵမ်း၊” ဝႃႈၼင်ႇၼႆလႄႈ၊ တႃႇမႃႇ၊ ၵေႃႈဢဝ်ၶဝ်ႈမုၼ်းသေလႄႈၵႂႃႇၸူးတီႈမၼ်းဢေႃႈ။-
မိူဝ်ႈဢၼ် တႃႇမႃႇ၊ ဢဝ်ၶဝ်ႈမုၼ်းပၼ်တီႈမၼ်းၼၼ်ႉၸိုင်၊မၼ်းတိုတ်ႉၸၼ်ဢဝ်မိုဝ်း တႃႇမႃႇ၊ လႄႈလၢတ်ႈဝႃႈ၊ “ၼွင်ႉယိင်းၵဝ်႟။ မႃးၼွၼ်းလူၺ်ႈၵဝ်သေၵမ်း၊” ဝႃႈၼင်ႇၼႆဢေႃႈ။
တႃႇမႃႇ၊ ၵေႃႈလၢတ်ႈလႄႈဝႃႈ၊ “ယႃႇပေႁဵတ်း။ ပီႈဢၢႆႈၵဝ်ၶႃႈ႟။ ယႃႇပေၶျႃးတူဝ်ၵဝ်ၶႃႈတူၵ်းတီႈတႅမ်ႇသေၵမ်း။ ဢမုၸိူဝ်ႉၼင်ႇၼႆၼႆႉဢမ်ႇထုၵ်ႇလီႁဵတ်းၵႃႈၼႂ်းၵူၼ်းမဵဝ်း ဢိသရေး၊ ၵူၺ်း။ ယႃႇပေႁဵတ်းဢမုဢၼ်ႁၢႆႉမိူၵ်ႈၼႃႇၼႆႉသေၵမ်း။-
ပေႃးႁဵတ်းၸိုင်၊တၢင်းဢၼ်လီဢူၵ်းလီဢၢႆၵဝ်ၶႃႈၼႆႉတၵ်းဢဝ်ပႅတ်ႈၵႃႈတီႈလႂ်ၶႃႈ။ ၸဝ်ႈၵေႃႈတၵ်းတူၵ်းတႅမ်ႇၼႃႇလူင်လၢင်ၵႃႈၼႂ်းမဵဝ်း ဢိသရေး၊ ဢေႃႈ။ ၶႅၼ်းတေႃႈတၢင်ႇလဝ်ႈထိုင်ၶုၼ်ႁေႃၶမ်းသေၵမ်း။ ၵဝ်ၶႃႈယုမ်ႇလွင်ႈဢၼ်မၼ်းၸဝ်ႈတၵ်းပၼ်ႁဝ်းဢဝ်ၵၼ်ယူႇဢေႃႈ၊” ဝႃႈၼင်ႇၼႆဢေႃႈ။-
ပိၵ်ႉသမ်ႉဝႃႈၸိူဝ်ႉၼင်ႇႁိုဝ်သေၵေႃႈမၼ်းယင်းဢမ်ႇထွမ်ႇဢမ်ႇဢဝ်ၵႂၢမ်း တႃႇမႃႇ၊ လႄႈၸွမ်းၼင်ႇမၼ်းႁႅင်းယႂ်ႇသေ တႃႇမႃႇ၊ ၼၼ်ႉမၼ်းႁဵတ်းပႄႉႁဵတ်းၼႅင်ႇသေယဝ်ႉ၊တဵၵ်းၼွၼ်းလူၺ်ႈ တႃႇမႃႇ၊ သေဢေႃႈ။
ၵမ်းၼၼ်ႉ၊ ဢႃႇမၼုၼ်ႇ၊ သမ်ႉမီးၸႂ်ဢၼ်ငိၼ်းၸင်း တႃႇမႃႇ၊ ၼႃႇလူင်လၢင်ဢေႃႈ။ တၢင်းဢၼ်မၼ်းငိၼ်းၸင်းၼၼ်ႉယဵင်ႈၶႅၼ်းယႂ်ႇၼႃႇသေတၢင်းဢၼ်မၼ်းႁၵ်ႉမၼ်းပႅင်းမိူဝ်ႈဢွၼ်တၢင်းၼၼ်ႉသေယဝ်ႉ၊လၢတ်ႈတီႈ တႃႇမႃႇ၊ လႄႈဝႃႈ၊ “လုၵ်ႉသေဢွၵ်ႇၵႂႃႇတႃႉ၊” ဝႃႈၼင်ႇၼႆဢေႃႈ။
တႃႇမႃႇ၊ ၵေႃႈလၢတ်ႈလႄႈဝႃႈ၊ “ဢမ်ႇမီးလွင်ႈဢၼ်တၵ်းဢွၵ်ႇၵႂႃႇၶႃႈ။ တၢင်းဢၼ်ႁေႃႈၵဝ်ၶႃႈဢွၵ်ႇၼႆႉယဵင်းၶႅၼ်းဢပျတ်ႈယႂ်ႇၼႃႇသေတၢင်းဢၼ်လႆႈႁဵတ်းတီႈၵဝ်ၶႃႈမႃးယဝ်ႉၼၼ်ႉလူးၵွၼ်ႇဢေႃႈ။” ဝႃႈၼင်ႇၼႆသေၵေႃႈ၊ ဢႃႇမၼုၼ်ႇ၊ ၼၼ်ႉဢမ်ႇထွမ်ႇဢမ်ႇဢဝ်။-
မၼ်းႁွင်ႉဢဝ်ၶႃႈၵူၼ်းၸႂ်ႉမၼ်းလႄႈပူင်ဢမိင်ႉဝႃႈ၊ “တိုတ်ႉၸၼ်မႄႈယိင်းၼႆႉဢွၵ်ႇၵႂႃႇသေၵႃႈတီႈၽၢႆႇၼႃႈၵဝ်သေယဝ်ႉ၊ဢိုတ်းႁပ်းၽၵ်းတူဝႆႉတႃႉ၊” ဝႃႈၼင်ႇၼႆဢေႃႈ။-
ၶႃႈၵူၼ်းၸႂ်ႉၼၼ်ႉဢဝ် တႃႇမႃႇ၊ ဢွၵ်ႇသေယဝ်ႉ၊ဢိုတ်းႁပ်းၽၵ်းတူဝႆႉသေဢေႃႈ။ တႃႇမႃႇ၊ ၼုင်ႈသိူဝ်ႈဢၼ်ယူင်ႉလီယၢဝ်းလီမဵဝ်းဢၼ်လုၵ်ႈယိင်းၶုၼ်ႁေႃၶမ်းဢၼ်ပဵၼ်သၢဝ်ၵၼ်ႇၺႃႇၸၢင်ႈၼုင်ႈၼၼ်ႉဢေႃႈ။-
မၼ်းဢဝ်တဝ်ႈၽၢဝ်ႇသႂ်ႇၵႃႈၼိူဝ်ႁူဝ်မၼ်းသေလႄႈ၊သိၵ်ႇသိူဝ်ႈဢၼ်ယူင်ႉလီယၢဝ်းလီမၼ်းၼၼ်ႉသေယဝ်ႉ၊ဢဝ်မိုဝ်းတူမ်းၼႃႈမၼ်းယူႇ၊ႁွင်ႉႁႆႈၸွမ်းတၢင်းပွၵ်ႈမိူဝ်းႁိူၼ်းၵႂႃႇဢေႃႈ။-
ပီႈၸၢႆးဢွၵ်ႇမၼ်း ဢပႃႉသလုမ်ႇ၊ ႁၼ်လႄႈလၢတ်ႈဝႃႈ၊ “ပီႈၸၢႆးမႂ်း ဢႃႇမၼုၼ်ႇ၊ ၼၼ်ႉလႆႈယူႇၼွၼ်းလူၺ်ႈၵၼ်တင်းမႂ်းယဝ်ႉႁိုဝ်း။ ၵူၺ်းၵႃႈ၊ၼွင်ႉယိင်းၵဝ်႟။ ယႃႇပေယုင်ႈၸႂ်ၼႃႇလူင်လၢင်။ မၼ်းပဵၼ်ပီႈၸၢႆးဢၼ်ႁူမ်ႈပေႃႈၵၼ်တင်းမႂ်းဢေႃႈ။ ယႃႇပေလၢတ်ႈႁႂ်ႈၽူႈလႂ်လႆႈႁုလွင်ႈတၢင်းၼႆႉသေၵမ်း၊” ဝႃႈၼင်ႇၼႆဢေႃႈ။ တႃႇမႃႇ၊ ၵေႃႈယူႇတဵတ်ႇတဵတ်ႇၵေႃႉလဵဝ်ၵူၺ်းမၼ်းၵႃႈတီႈႁိူၼ်းပီႈဢၢႆႈမၼ်း ဢပႃႉသလုမ်ႇ၊ ဢေႃႈ။
ၶုၼ်ႁေႃၶမ်း တႃႇဝိတ်ႈ၊ လႆႈငိၼ်းလွင်ႈတၢင်းၼၼ်ႉလႄႈၸႂ်မႆႈၶႂ်ႈၸႃႉၼႃႇလူင်လၢင်ဢေႃႈ။-
ဢပႃႉသလုမ်ႇ၊ ၸမ်ႉ၊ငိၼ်းၸင်း ဢႃႇမၼုၼ်ႇ၊ ၼႃႇလူင်လၢင် ၵွပ်ႈပိူဝ်ႈဢၼ်ႁဵတ်းတၢင်းဢၼ်တဵၵ်းၼွၼ်းလူၺ်ႈၵၼ်တင်းၼွင်ႉယိင်းမၼ်း တႃႇမႃႇ၊ ၼၼ်ႉလႄႈမၼ်းတိုၼ်းဢမ်ႇလၢတ်ႈတေႃႇ ဢႃႇမၼုၼ်ႇ၊ လႃးလႃးလႄႈယူႇဢေႃႈ။
လိုၼ်းၼၼ်ႉသွင်ပီ ဢပႃႉသလုမ်ႇ၊ ႁဵတ်းပွႆးဢၼ်ၵႅတ်းႁႆးၶူၼ်သူဝ်းၵႃႈတီႈဝၢၼ်ႈ ပႃႇလႃႉႁႃႇၸေႃႇ၊ ၵႃႈတီႈႁိမ်းဝဵင်း ဢေႇၽရိမ်ႇ၊ ၼၼ်ႉလႄႈမၼ်းႁွင်ႉပၢင်းဢဝ်လုၵ်ႈၸၢႆးၶုၼ်ႁေႃၶမ်းတင်းသဵင်ႈတင်းလူင်ဢေႃႈ။-
မၼ်းၶဝ်ႈၸူးတီႈၶုၼ်ႁေႃၶမ်းလႄႈလဝ်ႈလၢတ်ႈဝႃႈ၊ “ၸဝ်ႈပေႃႈတီႈၶႃႈ။ ၶႃႈၸဝ်ႈႁဵတ်းပွႆးဢၼ်ၵႅတ်းႁႆးၶူၼ်သူဝ်းတီႈၶႃႈဢေႃႈ။ ၸဝ်ႈပေႃႈႁဝ်းဢိၵ်ႇတင်းၶုၼ်ဢၼ်ပွင်ၵၢၼ်ႁေႃတင်းလၢႆၶႅၼ်းတေႃႈမႃးၶဝ်ႈပွႆးၵိၼ်ပွႆးၶူပ်းၼႆႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းၶိုၼ်းလၢတ်ႈလႄႈဝႃႈ၊ “ဢမ်ႇၵႂႃႇလႆႈၵူၺ်း၊လုၵ်ႈၸၢႆးၵဝ်႟။ ႁဝ်းဢမ်ႇထုၵ်ႇလီၵႂႃႇတင်းသဵင်ႈတင်းမူတ်း။ ၵူဝ်ႁဝ်းပဵၼ်တၢင်းဢၼ်ပၼ်တုၵ်ႉၶႃႉၼၵ်းၼႃႇပုၼ်ႈမႂ်းဢေႃႈ၊” ဝႃႈၼင်ႇၼႆဢေႃႈ။ ဢပႃႉသလုမ်ႇ၊ ၸူဝ်းဢဝ်ထၢၼ်ႇႁိုဝ်သေၵေႃႈယင်းဢမ်ႇၵႂႃႇ၊ၵူၺ်းၵႃႈပၼ်တၢင်းလီမၢင်ႇၵလႃႇတီႈမၼ်းဢေႃႈ။
ၵူၺ်းၵႃႈ၊ ဢပႃႉသလုမ်ႇ၊ သမ်ႉလဝ်ႈလၢတ်ႈထႅင်ႈလႄႈဝႃႈ၊ “လီၶႃႈယဝ်ႉၸဝ်ႈပေႃႈ။ ၶႅၼ်းတေႃႈပၼ်ဢၶႂၢင်ႉႁႂ်ႈပီႈၸၢႆးၶႃႈၸဝ်ႈ ဢႃႇမၼုၼ်ႇ၊ ၵႂႃႇၸွမ်းႁဝ်းၶႃႈသေၵမ်းတီႈၶႃႈ၊” ဝႃႈၼင်ႇၼႆဢေႃႈ။ ၶုၼ်ႁေႃၶမ်းၵေႃႈၶိုၼ်းလၢတ်ႈလႄႈဝႃႈ၊ “ၵွပ်ႈသင်လႄႈတၵ်းလႆႈႁႂ်ႈမၼ်းၸွမ်းမႂ်းၵႂႃႇၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။-
ပိူဝ်ႈဢၼ် ဢပႃႉသလုမ်ႇ၊ တုၵ်းတဝ်ႇၼႃႇလူင်လၢင်လႄႈ တႃႇဝိတ်ႈ၊ ပၼ်ဢၶႂၢင်ႉ ဢႃႇမၼုၼ်ႇ၊ ဢိၵ်ႇတင်းလုၵ်ႈၸၢႆးၸဝ်ႈတင်းမူတ်းၼၼ်ႉၵႂႃႇၸွမ်းဢေႃႈ။ ဢပႃႉသလုမ်ႇ၊ ႁႅၼ်းတႄႇႁႅၼ်းတမ်းတၢင်းၵိၼ်တၢင်းၶူပ်းဢၼ်ၵိုင်ႇတၢၼ်ႇၵၼ်တင်းၶုၼ်ႁေႃၶမ်းၼၼ်ႉပၼ်သေလႄႈ၊-
မၼ်းသင်ႇဝႆႉတီႈၶႃႈမၼ်းတင်းလၢႆလႄႈဝႃႈ၊ “သူဢွၼ်ၵၼ်ပႂ်ႉထႃႈၶိင်ႇဢၼ် ဢႃႇမၼုၼ်ႇ၊ တၵ်းသႂၢင်ႇသိူဝ်း၊မူၼ်ႈပျေႃႇလႄႈမဝ်းလဝ်ႈယူႇၼၼ်ႉတႃႉ။ မိူဝ်ႈဢၼ်ၵဝ်ပူင်ဢမိင်ႉလႄႈဝႃႈ၊ ‘တႅင်းမၼ်းတၢႆတႃႉ၊’ ဝႃႈၼင်ႇၼႆၼၼ်ႉသူဢွၼ်ၵၼ်ဢဝ်မၼ်းတၢႆတႃႉ။ ယႃႇပေၵူဝ်။ ၵဝ်ပဵၼ်ၵေႃႉဢၼ်သင်ႇၵၢၼ်ဢမုၼႆႉဢေႃႈ။ သူမီးၸႂ်ဢၼ်ႁတ်းႁၢၼ်လႄႈယႃႇႁဵတ်းထိူင်းႁဵတ်းၼၢၼ်း၊” ဝႃႈၼင်ႇၼႆဢေႃႈ။-
ၶဝ်ၸိူဝ်းၼၼ်ႉၵေႃႈႁဵတ်းၸွမ်းမႅၼ်ႈၵႃႈၼင်ႇဢၼ် ဢပႃႉသလုမ်ႇ၊ သင်ႇလၢတ်ႈဝႆႉၼၼ်ႉဢေႃႈ။ လုၵ်ႈၸၢႆးၶုၼ်ႁေႃၶမ်းၵႃႈမီးၸိူဝ်းၼၼ်ႉဢွၼ်ၵၼ်ၶီႇမႃႉလီႈၶဝ်လႄႈၼီပၢႆႈၵႂႃႇတင်းသဵင်ႈတင်းမူတ်းဢေႃႈ။
မိူဝ်ႈဢၼ်ၶဝ်ယင်းတိုၵ်ႉၸွမ်းတၢင်းပွၵ်ႈမိူဝ်းၵႂႃႇယူႇၼၼ်ႉၶၢဝ်ႇငၢဝ်းႁွတ်ႈထိုင်ၵႃႈတီႈ တႃႇဝိတ်ႈ၊ လႄႈဝႃႈ၊ “ ဢပႃႉသလုမ်ႇ၊ ဢဝ်လုၵ်ႈၸၢႆးၸဝ်ႈႁဝ်းတၢႆသဵင်ႈယဝ်ႉ။ ဢမ်ႇၵိုတ်းဢမ်ႇၵျၢၼ်ႇဝႆႉသေၵေႃႉသေၵူၼ်း၊” ဝႃႈၼင်ႇၼႆဢေႃႈ။-
ၶုၼ်ႁေႃၶမ်းၵေႃႈလုၵ်ႉၸုၵ်းလႄႈၸၵ်ႉသိၵ်ႇသိူဝ်ႈမၼ်းၸဝ်ႈၵွပ်ႈပိူဝ်ႈတၢင်းဢၼ်မႆႈၸႂ်ၶီၸႂ်သေယဝ်ႉ၊ၼွၼ်းယဵတ်ႇယူႇၵႃႈၼိူဝ်လိၼ်ဢေႃႈ။ ၶႃႈၵူၼ်းၸႂ်ႉၸဝ်ႈၸိူဝ်းၼၼ်ႉၵေႃႈၸၵ်ႉသိၵ်ႇၶူဝ်းၼုင်ႈၶဝ်လႄႈဢွၼ်ၵၼ်ၸုၵ်းယူႇၵႃႈတီႈႁိမ်းမၼ်းဢေႃႈ။-
ယေႃးၼတပ်ႉ၊ လုၵ်ႈၸၢႆး သိမႃႇ၊ ပီႈၸၢႆး တႃႇဝိတ်ႈ၊ ၼၼ်ႉလဝ်ႈလၢတ်ႈလႄႈဝႃႈ၊ “ၸဝ်ႈၶုၼ်လူင်တီႈၶႃႈ။ ယႃႇပေယုမ်ႇလွင်ႈဢၼ်လုၵ်ႈၸၢႆးၸဝ်ႈတၢႆယဝ်ႉတင်းသဵင်ႈတင်းမူတ်းၼၼ်ႉသေၵမ်း။ ဢႃႇမၼုၼ်ႇ၊ ၵေႃႉလဵဝ်ၵူၺ်းတၢႆတီႈၶႃႈဢေႃႈ။ ၸဝ်ႈႁဝ်းၶႆႈၸႂ်လႄႈႁုလွင်ႈဢၼ် ဢပႃႉသလုမ်ႇ၊ မီးၸႂ်ဝႆႉၸႃႉၸဵမ်မိူဝ်ႈဝၼ်းဢၼ် ဢႃႇမၼုၼ်ႇ၊ ႁဵတ်းပႄႉႁဵတ်းၼႅင်ႇလႄႈတဵၵ်းၼွၼ်းလူၺ်ႈၵၼ်တင်းၼွင်ႉယိင်းမၼ်း တႃႇမႃႇ၊ ၼၼ်ႉသေၵမ်းတီႈၶႃႈ။-
ယႃႇပေယုမ်ႇၶၢဝ်ႇဢၼ်ဝႃႈ၊လုၵ်ႈၸၢႆးၸဝ်ႈႁဝ်းတၢႆယဝ်ႉတင်းသဵင်ႈတင်းမူတ်းၼၼ်ႉသေၵမ်း။ ဢႃႇမၼုၼ်ႇ၊ ၵေႃႉလဵဝ်ၵူၺ်းတၢႆတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ယၢမ်းမိူဝ်ႈၼၼ်ႉ၊ ဢပႃႉသလုမ်ႇ၊ ၼီပၢႆႈၵႂႃႇယဝ်ႉဢေႃႈ။ ၼႂ်းၶိင်ႇၼၼ်ႉလုၵ်ႈသိုၵ်းဢၼ်ပႂ်ႉယၢမ်းမုင်ႈႁၼ်မူႇၵူၼ်းၼမ်ၼႃႇၸွမ်းသဵၼ်ႈတၢင်းဝဵင်း ႁေႃႇရေႃႇၼိမ်း၊ မႃးယူႇၼၼ်ႉသေယဝ်ႉ၊မၼ်းၵႂႃႇလႄႈပၼ်သဵင်ၶၢဝ်ႇၼၼ်ႉတီႈၶုၼ်ႁေႃၶမ်းလႄႈဝႃႈ၊ “ၶႃႈၸဝ်ႈႁၼ်မူႇၵူၼ်းၸွမ်းသဵၼ်ႈတၢင်းဝဵင်း ႁေႃႇရေႃႇၼိမ်း၊ ၼၼ်ႉလူင်းလွႆမႃးဢေႃႈ၊” ဝႃႈၼင်ႇၼႆဢေႃႈ။-
ယေႃးၼတပ်ႉ၊ လဝ်ႈလၢတ်ႈတီႈ တႃႇဝိတ်ႈ၊ လႄႈဝႃႈ၊ “တူၺ်းသေၵမ်းတီႈၶႃႈ။ လုၵ်ႈၸၢႆးၸဝ်ႈႁဝ်းၸိူဝ်းၼၼ်ႉမႃးယူႇတီႈၶႃႈယဝ်ႉ၊ၵႂၢမ်းဢၼ်ၶႃႈၸဝ်ႈလဝ်ႈလၢတ်ႈၼၼ်ႉပဵၼ်ဢၼ်တႄႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈဢၼ်မၼ်းလဝ်ႈလၢတ်ႈယဝ်ႉတူဝ်ႈယဝ်ႉၼၼ်ႉ၊လုၵ်ႈၸၢႆးၸဝ်ႈၶုၼ်ႁေႃၶမ်းတင်းလၢႆဢွၼ်ၵၼ်ႁွတ်ႈမႃးလႄႈၵိဝ်သဵင်ႁွင်ႉႁႆႈဢေႃႈ။ တႃႇဝိတ်ႈ၊ တင်းၶုၼ်ဢၼ်ပွင်ၵၢၼ်မၼ်းတင်းလၢႆၵေႃႈႁွင်ႉႁႆႈၼႃႇလူင်လၢင်ဢေႃႈ။
ၵူၺ်းၵႃႈ၊မိူဝ်ႈဢၼ်မၼ်းပျေႇၸႂ်လူၺ်ႈလွင်ႈတၢင်းတၢႆ ဢႃႇမၼုၼ်ႇ၊ ယဝ်ႉယဝ်ႉၼၼ်ႉမၼ်းသမ်ႉၶႆႈၸႂ်ထိုင် ဢပႃႉသလုမ်ႇ၊ ၼႃႇလူင်လၢင်ဢေႃႈ။
ယွႃႇၽႃႉ၊ ႁုသၢႆငၢႆလွင်ႈဢၼ်ၶုၼ်ႁေႃၶမ်း တႃႇဝိတ်ႈ၊ ၶႆႈၸႂ်ထိုင် ဢပႃႉသလုမ်ႇ၊ ၼႃႇလူင်လၢင်ၼၼ်ႉသေလႄႈ၊-
မၼ်းပွႆႇၸႂ်ႉၵူၼ်းၵႂႃႇၸူးတီႈဝဵင်း တေႇၵေႃႇ၊ လႄႈႁွင်ႉဢဝ်မႄႈယိင်းဢၼ်လၵ်းလႅမ်ၼၼ်ႉၵေႃႉၼိုင်ႈမႃးဢေႃႈ။ မိူဝ်ႈဢၼ်မႄႈယိင်းၼၼ်ႉႁွတ်ႈထိုင်မႃးၸိုင်၊မၼ်းသင်ႇလၢတ်ႈလႄႈဝႃႈ၊ “မႂ်းႁဵတ်းၸိူဝ်ႉၼင်ႇႁၢင်ႈႁူဝ်ၸႂ်ဢမ်ႇသႃႇၶၢင်းၶီၶၢင်းၽၢၼ်ၼၼ်ႉယူႇသေလႄႈၼုင်ႈၶူဝ်းၼုင်ႈမႃႇသႃႇယူႇတႃႉ။ ယႃႇပေဝီၶူၼ်ႁူဝ်ႁၢင်ႈၶိူင်ႈမႂ်း။ ႁဵတ်းၸိူဝ်ႉၼင်ႇႁၢင်ႈမႄႈယိင်းဢၼ်ႁွင်ႉႁႆႈၶၢင်းၶီၶၢင်းၽၢၼ်ႁိုင်ၼႃႇၵွပ်ႈလူၺ်ႈၵေႃႉဢၼ်တၢႆၼၼ်ႉတႃႉ။-
ႁဵတ်းၼၼ်လႄႈၶဝ်ႈၸူးတီႈၶုၼ်ႁေႃၶမ်းသေယဝ်ႉ၊လဝ်ႈလၢတ်ႈတီႈမၼ်းၸဝ်ႈၸိူဝ်ႉၼင်ႇဢၼ်ၵဝ်သင်ႇလၢတ်ႈၼႆႉတႃႉ၊” ဝႃႈၼင်ႇၼႆလႄႈ ယွႃႇၽႃႉ၊ သႂ်ႇသူပ်းသႂ်ႇၵႂၢမ်းဝႆႉတီႈမၼ်းၸိူဝ်ႉၼင်ႇၼႆဢေႃႈ။
မႄႈယိင်းၼၼ်ႉၵေႃႈၶဝ်ႈၶႃးၸႃးၵႃႈတီႈၶုၼ်ႁေႃၶမ်းလႄႈၶုပ်ႉမူပ်ႇသေယဝ်ႉ၊လဝ်ႈလၢတ်ႈလႄႈဝႃႈ၊ “ဢဵတ်းလူၵႄႇသႄႇၸွႆႈထႅမ်ၶႃႈၸဝ်ႈသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းၵေႃႈထၢမ်လႄႈဝႃႈ၊ “မႂ်းမီးတုၵ်ႉၶႃႉတၢင်းယၢပ်ႇၸႂ်ဢီႈသင်၊” ဝႃႈၼင်ႇၼႆဢေႃႈ။ မႄႈယိင်းၼၼ်ႉၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈၶုၼ်လူင်တီႈၶႃႈ။ ၶႃႈၸဝ်ႈၼႆႉပဵၼ်မႄႈမၢႆႈတီႈၶႃႈဢေႃႈ၊ၽူဝ်ၶႃႈၸဝ်ႈတၢႆၵႂႃႇၶႃႈယဝ်ႉ။-
ၶႃႈၸဝ်ႈမီးလုၵ်ႈၸၢႆးသွင်ၵေႃႉလႄႈ၊ဝၼ်းၼိုင်ႈၶဝ်ၽိတ်းၵၼ်ၵႃႈတီႈတူင်ႈၼႃးလႄႈတီႈၼၼ်ႈဢမ်ႇမီးၽူႈလႂ်မႃးၶႄၼႂ်းဝူင်ႈၵၢင်ၶဝ်၊တေႃႇထိုင်ႁွတ်ႈၵေႃႉၼိုင်ႈသမ်ႉပေႃးလႆႈဢဝ်ၵေႃႉၼိုင်ႈတၢႆၵႂႃႇတီႈၶႃႈယဝ်ႉ။-
ၸဝ်ႈၶုၼ်လူင်တီႈၶႃႈ။ မိူဝ်ႈလဵဝ်ၼႆႉပီႈၼွင်ႉၸိူဝ်ႉၶိူဝ်းၶႃႈၸဝ်ႈတင်းလၢႆဢွၼ်ၵၼ်ႁဵတ်းၶတ်းၵၼ်တင်းၶႃႈၸဝ်ႈသေယဝ်ႉ၊တိုၵ်းသူၼ်းႁႂ်ႈၶႃႈၸဝ်ႈဢဝ်လုၵ်ႈၸၢႆးၶႃႈၸဝ်ႈဢၢပ်ႈပၼ်တီႈၶဝ်ႁႂ်ႈလႆႈဢဝ်မၼ်းတၢႆတႅၼ်းတူဝ်ပီႈၸၢႆးမၼ်းဢၼ်မၼ်းလႆႈဢဝ်တၢႆၼၼ်ႉတီႈၶႃႈဢေႃႈ။ ပေႃးႁဵတ်းၸိူဝ်ႉၼင်ႇၼႆၸိုင်၊ၶႃႈၸဝ်ႈတေဢမ်ႇမီးလုၵ်ႈၸၢႆးသေၵေႃႉသေၵူၼ်းတီႈၶႃႈယဝ်ႉ။ ၶဝ်တၵ်းႁဵတ်းႁႂ်ႈၶႃႈၸဝ်ႈဢမ်ႇမီးတၢင်းမုင်ႈမွင်းၵႃႈသင်တီႈၶႃႈယဝ်ႉ၊တီႈၽူဝ်ၶႃႈၸဝ်ႈၵေႃႈတေဢမ်ႇမီးလုၵ်ႈၸၢႆးဢၼ်တၵ်းသိုပ်ႇၸိုဝ်ႈသဵင်ၸိူဝ်ႉၶိူဝ်းမၼ်းၵႂႃႇထႅင်ႈတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းၶိုၼ်းမီးဢမိင်ႉတီႈမႄႈယိင်းၼၼ်ႉလႄႈဝႃႈ၊ “ၶိုၼ်းမိူဝ်းၵႂႃႇၵႃႈတီႈႁိူၼ်းမႂ်းတႃႉ။ ၵဝ်တၵ်းၸီႇယၢင်ႇပၼ်ဢမုမႂ်းဢေႃႈ၊” ဝႃႈၼင်ႇၼႆဢေႃႈ။
မႄႈယိင်းၼၼ်ႉသမ်ႉလဝ်ႈလၢတ်ႈထႅင်ႈလႄႈဝႃႈ၊ “ၸဝ်ႈၶုၼ်လူင်တီႈၶႃႈ။ ဢပျတ်ႈၼၼ်ႉႁႂ်ႈတူၵ်းႁွတ်ႈၵႃႈၼိူဝ်ၶႃႈၸဝ်ႈဢိၵ်ႇတင်းၵႃႈၼိူဝ်ၵူၼ်းႁိူၼ်းၵူၼ်းယေးၶႃႈၸဝ်ႈသေၵမ်းၶႃႈ။ ႁႂ်ႈၸဝ်ႈႁဝ်းဢိၵ်ႇတင်းၵူၼ်းႁၢင်ႈၵူၼ်းႁေႃၸဝ်ႈႁဝ်းၵၢင်းလွတ်ႈတင်းဢပျတ်ႈသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းၶိုၼ်းမီးဢမိင်ႉလႄႈဝႃႈ၊ “ပေႃးသေၵေႃႉသေၵူၼ်းတၢင်ႇဢပျတ်ႈတီႈမႂ်းၸိုင်၊ႁွင်ႉမၼ်းမႃးတီႈၵဝ်တႃႉ။ ၵမ်းလိုၼ်းမၼ်းတေဢမ်ႇလႆႈယႃႉၵဝ်းမႂ်းထႅင်ႈ၊” ဝႃႈၼင်ႇၼႆဢေႃႈ။
မႄႈယိင်းၼၼ်ႉၵေႃႈလဝ်ႈလၢတ်ႈလႄႈဝႃႈ၊ “ၸဝ်ႈၶုၼ်လူင်တီႈၶႃႈ။ ၶႅၼ်းတေႃႈၸဝ်ႈႁဝ်းၶေႃယွၼ်းတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၸဝ်ႈႁဝ်းပုၼ်ႈလွင်ႈၼင်ႇႁိုဝ်ပီႈၼွင်ႉၸိူဝ်ႉၶိူဝ်းၶႃႈၸဝ်ႈၸိူဝ်းဢၼ်ဝႆႉၸႂ်တွပ်ႇတႅၼ်းပုၼ်ႈတၢင်းဢၼ်လုၵ်ႈၸၢႆးၶႃႈၸဝ်ႈတၢႆယဝ်ႉၼၼ်ႉတေဢမ်ႇႁဵတ်းမႅၼ်ႈဢပျတ်ႈဢၼ်ယႂ်ႇၼႃႇလူၺ်ႈလွင်ႈဢၼ်တၵ်းဢဝ်လုၵ်ႈၸၢႆးၶႃႈၸဝ်ႈတၢႆထႅင်ႈၼၼ်ႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။ တႃႇဝိတ်ႈ၊ ၵေႃႈမီးဢမိင်ႉလႄႈဝႃႈ၊ “ၵႃႈၼင်ႇဢၼ် ထႃႇဝရႃႉၽြႃး၊ ဢသၢၵ်ႈလိပ်းယူႇၼႆႉၽူႈလႂ်ဢမ်ႇလႆႈႁဵတ်းၽေးရၢၼ်ႇၵႃႈၼိူဝ်လုၵ်ႈၸၢႆးမႂ်းသေၵေႃႉသေၵူၼ်းၵူၺ်း၊” ဝႃႈၼင်ႇၼႆဢေႃႈ။
မႄႈယိင်းၼၼ်ႉလဝ်ႈလၢတ်ႈလႄႈဝႃႈ၊ “ၸဝ်ႈၶုၼ်လူင်တီႈၶႃႈ။ ၶႅၼ်းတေႃႈၸဝ်ႈႁဝ်းပၼ်ဢၶႂၢင်ႉႁႂ်ႈၶႃႈၸဝ်ႈလႆႈလၢတ်ႈၵႂၢမ်းၶေႃႈၼိုင်ႈထႅင်ႈသေၵမ်းတီႈၶႃႈ၊” ဝႃႈၼင်ႇၼႆလႄႈ၊ ၶုၼ်ႁေႃၶမ်းၶိုၼ်းလၢတ်ႈလႄႈဝႃႈ၊ “လဝ်ႈလၢတ်ႈတႃႉ၊” ဝႃႈၼင်ႇၼႆဢေႃႈ။
မႄႈယိင်းၼၼ်ႉလဝ်ႈလၢတ်ႈလႄႈဝႃႈ၊ “ပေႃးပဵၼ်ၸိူဝ်ႉၼင်ႇၼႆၸိုင်၊ႁဵတ်းသင်လႄႈၸဝ်ႈႁဝ်းၶိုင်ပွင်လွင်ႈဢၼ်ၶတ်းၵၼ်တင်းၵူၼ်းၽြႃးပဵၼ်ၸဝ်ႈတင်းလၢႆၼၼ်ႉၸိူဝ်ႉၼင်ႇႁိုဝ်တီႈၶႃႈ။ ၼႂ်းလွင်ႈတၢင်းဢၼ်ၸဝ်ႈႁဝ်းတႅပ်းတတ်းလႄႈမီးဢမိင်ႉၼၼ်ႉ၊ပဵၼ်တၢင်းဢၼ်ၸဝ်ႈၶုၼ်လူင်ၸီႇယၢင်ႇတီႈတူဝ်ၸဝ်ႈၵဝ်ႇယဝ်ႉ၊ၵွပ်ႈပိူဝ်ႈဢၼ်ၸဝ်ႈၶုၼ်လူင်ဢမ်ႇၶိုၼ်းႁွင်ႉဢဝ်လုၵ်ႈၸၢႆးၸဝ်ႈ၊ဢၼ်ၸဝ်ႈၶုၼ်လူင်ႁေႃႈပႅတ်ႈၼၼ်ႉၶိုၼ်းမႃးတီႈၶႃႈယဝ်ႉ။-
မိူၼ်ၸိူဝ်ႉၼင်ႇၼမ်ႉဢၼ်ထွၵ်ႇပႅတ်ႈၵႃႈၼိူဝ်လိၼ်ဢမ်ႇၸၢင်ႈၶိုၼ်းၵွပ်ႇဢဝ်လႆႈၼၼ်ႉၵူၼ်းႁဝ်းတၵ်းလႆႈတၢႆၵူႈၵေႃႉဢေႃႈ။ ၽြႃးပဵၼ်ၸဝ်ႈဢမ်ႇဢဝ်ဢသၢၵ်ႈၵူၼ်းတၢႆ၊မၼ်းၸဝ်ႈၵျၢမ်ႇႁႃသဵၼ်ႈတၢင်းႁႂ်ႈၵေႃႉဢၼ်လႆႈၶၢမ်ႇတၢင်းဢၼ်ႁေႃႈဢွၵ်ႇၼၼ်ႉလႆႈဢၶႂၢင်ႉဢၼ်ပွၵ်ႈၶိုၼ်းမႃးယူႇၼၼ်ႉတီႈၶႃႈဢေႃႈ။-
မိူဝ်ႈလဵဝ်ၼႆႉ၊ၸဝ်ႈၶုၼ်လူင်တီႈၶႃႈ။ လွင်ႈတၢင်းဢၼ်ၶႃႈၸဝ်ႈမႃးလဝ်ႈလၢတ်ႈၼႆႉၸမ်ႉ၊ၵွပ်ႈပိူဝ်ႈၵူၼ်းတင်းလၢႆလွၵ်ႇငိုတ်ႈႁႂ်ႈၶႃႈၸဝ်ႈၵူဝ်ႁႄတီႈၶႃႈဢေႃႈ။ ၶႃႈၸဝ်ႈၸင်ႇထၢင်ႇၵႃႈၼႂ်းၸႂ်လႄႈဝႃႈ၊ ‘ၵဝ်တၵ်းလဝ်ႈလၢတ်ႈထိုင်တီႈၶုၼ်ႁေႃၶမ်းဢေႃႈ။ ၶုၼ်ႁေႃၶမ်းၸၢင်ႈၶႄးတၵ်းႁဵတ်းၸွမ်းၵႃႈၼင်ႇဢၼ်ၵဝ်တွင်းပၢၼ်ႇၼၼ်ႉဢေႃႈ။-
လွင်ႈမၼ်းၸမ်ႉ၊ၶုၼ်ႁေႃၶမ်းတၵ်းထွမ်ႇဢဝ်ႁႂ်ႈလႆႈၵႄႇသႄႇဢဝ်ၵဝ်လွတ်ႈသေၵႃႈၼႂ်းမိုဝ်းၵေႃႉဢၼ်တၵ်းယႃႉၽဵဝ်ႈၵဝ်ဢိၵ်ႇတင်းလုၵ်ႈၸၢႆးၵဝ်ပႅတ်ႈသေၵႃႈၼႂ်းဢမူၺ်ႇၽြႃးပဵၼ်ၸဝ်ႈၼႆႉဢေႃႈ၊’ ဝႃႈၼင်ႇၼႆဢေႃႈ။-
ၶႃႈၸဝ်ႈသမ်ႉထၢင်ႇဝႃႈ၊ဢမိင်ႉၸဝ်ႈၵဝ်ၶႃႈၶုၼ်ႁေႃၶမ်းၼၼ်ႉတၵ်းႁႂ်ႈၶႃႈၸဝ်ႈၵတ်းၸႂ်ယဵၼ်ၸႂ်ဢေႃႈ။ လွင်ႈမၼ်းၸမ်ႉ၊ၸဝ်ႈၶုၼ်လူင်ပဵၼ်ၸိူဝ်ႉၼင်ႇတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈလႄႈၸၢင်ႈၸၵ်းၽႄလႄႈႁုလွင်ႈလီလွင်ႈၸႃႉၼၼ်ႉဢေႃႈ။ ႁႂ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈ၊ၸဝ်ႈႁဝ်းၼၼ်ႉမီးယူႇလူၺ်ႈၵၼ်တင်းၸဝ်ႈႁဝ်းသေၵမ်းလူၺ်ႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းၶိုၼ်းလၢတ်ႈလႄႈဝႃႈ၊ “ၵဝ်တၵ်းထၢမ်မႂ်းၵႂၢမ်းၶေႃႈၼိုင်ႈဢေႃႈ။ မွၵ်ႇလၢတ်ႈသိုဝ်ႈသိုဝ်ႈတႃႉ၊” ဝႃႈၼင်ႇၼႆလႄႈ၊မႄႈယိင်းၼၼ်ႉၵေႃႈဝႃႈ၊ “ၸဝ်ႈၶုၼ်လူင်တီႈၶႃႈ။ မီးဢမိင်ႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းထၢမ်လႄႈဝႃႈ၊ “လွင်ႈတၢင်းၸိူဝ်းၼႆႉ ယွႃႇၽႃႉ၊ သႂ်ႇသူပ်းသႂ်ႇၵႂၢမ်းမႂ်းဝႆႉဢမ်ႇၸႂ်ႈႁိုဝ်း၊” ဝႃႈၼင်ႇၼႆလႄႈ၊မႄႈယိင်းၼၼ်ႉၶိုၼ်းလဝ်ႈလၢတ်ႈလႄႈဝႃႈ၊ “ၵႃႈၼင်ႇဢၼ်ၸဝ်ႈၶုၼ်လူင်ဢသၢၵ်ႈလိပ်းယူႇၼႆႉ၊ၵႂၢမ်းထၢမ်ၸဝ်ႈႁဝ်းၸဝ်ႈၶုၼ်လူင်ၼၼ်ႉၽူႈလႂ်ဢမ်ႇဝႄႈပႅတ်ႈၽၢႆႇသၢႆႉၽၢႆႇၶႂႃၵႂႃႇလႆႈတီႈၶႃႈ။ ၸႂ်ႈတီႈၶႃႈယဝ်ႉ။ ၶုၼ်ဢၼ်ပွင်ၵၢၼ်ၼႂ်းႁေႃၸဝ်ႈၶုၼ်လူင်ႁဝ်း ယွႃႇၽႃႉ၊ သင်ႇတီႈၶႃႈၸဝ်ႈတၵ်းလႆႈႁဵတ်းၸိူဝ်ႉၼင်ႇႁိုဝ်လႄႈတၵ်းလႆႈလၢတ်ႈၸိူဝ်ႉၼင်ႇႁိုဝ်ၼၼ်ႉတီႈၶႃႈဢေႃႈ။-
လွင်ႈတၢင်းဢၼ်သုၵ်ႉယုင်ႈၸိူဝ်းၼႆႉမၼ်းၵႄႈလိတ်ႈပၼ်တီႈၶႃႈဢေႃႈ။ ၸဝ်ႈၶုၼ်လူင်မီးပိင်ႇၺႃႇတၢင်းႁုဢၼ်လၵ်းလႅမ်မိူၼ်ၸိူဝ်ႉၼင်ႇတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈလႄႈၸၢင်ႈၸၵ်းၽႄလႄႈႁုလွင်ႈတၢင်းၵႃႈၼိူဝ်လိၼ်မိူင်းၼႆႉလႆႈတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၶုၼ်ႁေႃၶမ်းမီးဢမိင်ႉတီႈ ယွႃႇၽႃႉ၊ လႄႈဝႃႈ၊ “လီတႄႉတႄႉယဝ်ႉ။ ၵဝ်ပၼ်ဢၶႂၢင်ႉယဝ်ႉ။ ၵႂႃႇလႄႈႁွင်ႉဢဝ် ဢပႃႉသလုမ်ႇ၊ ၼၼ်ႉပွၵ်ႈၶိုၼ်းမႃးတႃႉ၊” ဝႃႈၼင်ႇၼႆဢေႃႈ။
ယွႃႇၽႃႉ၊ ၵေႃႈၶုပ်ႉမူပ်ႇၵႃႈၼိူဝ်လိၼ်လႄႈလဝ်ႈလၢတ်ႈဝႃႈ၊ “ႁႂ်ႈၽြႃးပဵၼ်ၸဝ်ႈပၼ်တၢင်းလီတီႈၸဝ်ႈႁဝ်း၊ၸဝ်ႈၶုၼ်လူင်သေၵမ်းလူၺ်ႈ။ ဝၼ်းမိူဝ်ႈၼႆႉၶႃႈၸဝ်ႈႁုလွင်ႈဢၼ်ၸဝ်ႈႁဝ်းထုၵ်ႇၸႂ်ၵျိူၵ်ႈၸႂ်ၶႃႈၸဝ်ႈ၊ၵွပ်ႈပိူဝ်ႈဢၼ်ၸဝ်ႈႁဝ်းပၼ်ဢၶႂၢင်ႉၵႃႈဢၼ်ၶႃႈၸဝ်ႈလဝ်ႈယွၼ်းၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ ယွႃႇၽႃႉ၊ လုၵ်ႉလႄႈၵႂႃႇၵႃႈတီႈဝဵင်း ၵေႇသုရႃႉ၊ သေယဝ်ႉ၊ႁွင်ႉဢဝ် ဢပႃႉသလုမ်ႇ၊ ၶိုၼ်းပွၵ်ႈမႃးတီႈဝဵင်း ယေႇရုသလႅမ်ႇ၊ သေဢေႃႈ။-
ၶုၼ်ႁေႃၶမ်းၵေႃႈမီးဢမိင်ႉလႄႈဝႃႈ၊ “ႁႂ်ႈမၼ်းဝႄႈၵႂႃႇၸူးတီႈႁိူၼ်းမၼ်းသေ။ ယႃႇပေႁႂ်ႈမၼ်းႁၼ်ၼႃႈၵဝ်၊” ဝႃႈၼင်ႇၼႆလႄႈ ဢပႃႉသလုမ်ႇ၊ ဝႄႈၵႂႃႇၸူးတီႈႁိူၼ်းမၼ်းသေလႄႈ၊မၼ်းဢမ်ႇၶဝ်ႈၸူးတီႈၶုၼ်ႁေႃၶမ်းလႄႈယူႇဢေႃႈ။
ၼႂ်းမဵဝ်း ဢိသရေး၊ တင်းသဵင်ႈတင်းလူင်ၼၼ်ႉၵေႃႉဢၼ်ၸိုဝ်ႈဢွၵ်ႇသဵင်ဢွၵ်ႇၵွပ်ႈပိူဝ်ႈႁၢင်ႈၽၢင်ဢၼ်ႁၢင်ႈလီႁၢင်ႈငၢမ်းမိူၼ်ၸိူဝ်ႉၼင်ႇ ဢပႃႉသလုမ်ႇ၊ ၼၼ်ႉဢမ်ႇမီးသေၵေႃႉသေၵူၼ်း။ တႄႇဢဝ်ၸိၵ်းႁူဝ်တေႃႇပၢႆတိၼ်ဢမ်ႇမီးတီႈလၢတ်ႈသေၸိူဝ်ႉသေမဵဝ်းယဝ်ႉ။-
ၶူၼ်ႁူဝ်မၼ်းၼႃၼႃႇလူင်လၢင်ထၢၼ်ႈပေႃးလႆႈၵႅတ်းပႅတ်ႈယေႈပီယေႈပွၵ်ႈမိူဝ်ႈဢၼ်မၼ်းယၢဝ်းလႄႈၼၵ်းၼႃႇၼၼ်ႉဢေႃႈ။ ၶူၼ်ႁူဝ်ဢၼ်ၵႅတ်းပႅတ်ႈၼၼ်ႉၸွမ်းလူၺ်ႈမၢၵ်ႇလုၵ်ႈၶၼ်ၶုၼ်လႄႈလႆႈၼိုင်ႈၸွႆႉပၢႆသွင်ၶၼ် ဢေႃႈ။-
ဢပႃႉသလုမ်ႇ၊ မီးလုၵ်ႈၸၢႆးသၢမ်ၵေႃႉတင်းလုၵ်ႈယိင်းၵေႃႉၼိုင်ႈဢၼ်လႆႈၸိုဝ်ႈ တႃႇမႃႇ၊ ဢေႃႈ။ တႃႇမႃႇ၊ ၼၼ်ႉပဵၼ်မႄႈယိင်းဢၼ်ႁၢင်ႈလီၼႃႇလူင်လၢင်ဢေႃႈ။
ဢပႃႉသလုမ်ႇ၊ ယူႇၵႃႈၼႂ်းဝဵင်း ယေႇရုသလႅမ်ႇ၊ သွင်ပီလႄႈယင်းဢမ်ႇလႆႈႁၼ်ၼႃႈၶုၼ်ႁေႃၶမ်း။-
မၼ်းၸင်ႇႁွင်ႉဢဝ် ယွႃႇၽႃႉ၊ ႁႂ်ႈလႆႈပွႆႇၸႂ်ႉမၼ်းၵႂႃႇၸူးတီႈၶုၼ်ႁေႃၶမ်းပုၼ်ႈတၢင်တူဝ်မၼ်းဢေႃႈ။ ၵူၺ်းၵႃႈ၊ ယွႃႇၽႃႉ၊ ဢမ်ႇမႃး။ ဢပႃႉသလုမ်ႇ၊ သမ်ႉပွႆႇၸႂ်ႉႁွင်ႉဢဝ်မၼ်းထႅင်ႈသေၵေႃႈ၊ ယွႃႇၽႃႉ၊ ထဵင်ပႅတ်ႈဢေႃႈ။-
မိူဝ်ႈၼၼ်ႉ၊ ဢပႃႉသလုမ်ႇ၊ လၢတ်ႈတီႈၶႃႈမၼ်းၵူၼ်းမၼ်းတင်းလၢႆလႄႈဝႃႈ၊ “တူၺ်းလူး။ သူၼ်ႁႆႈ ယွႃႇၽႃႉ၊ ၼၼ်ႉၸပ်းၵၼ်တင်းသူၼ်ႁႆႈၵဝ်လႄႈမီးတူၼ်ႈၶဝ်ႈမုယေႃးဢေႃႈ။ ဢွၼ်ၵၼ်ၵႂႃႇလႄႈဢဝ်ၽႆးတုတ်ႇတႃႉ၊” ဝႃႈၼင်ႇၼႆဢေႃႈ။ ၶဝ်ၵေႃႈၵႂႃႇလႄႈဢဝ်ၽႆးတုတ်ႇသူၼ်ႁႆႈ ယွႃႇၽႃႉ၊ ပႅတ်ႈသေဢေႃႈ။
ယွႃႇၽႃႉ၊ ၵႂႃႇၸူးတီႈႁိူၼ်း ဢပႃႉသလုမ်ႇ၊ လႄႈလဝ်ႈလၢတ်ႈဝႃႈ၊ “ၵွပ်ႈသင်လႄႈၶႃႈၵူၼ်းၸဝ်ႈႁဝ်းၸိူဝ်းၼႆႉဢဝ်ၽႆးတုတ်ႇပႅတ်ႈသူၼ်ႁႆႈၶႃႈၸဝ်ႈၸိူဝ်ႉၼင်ႇႁိုဝ်တီႈၶႃႈ၊” ဝႃႈၼင်ႇၼႆဢေႃႈ။-
ဢပႃႉသလုမ်ႇ၊ ၶိုၼ်းလၢတ်ႈလႄႈဝႃႈ၊ “ၵွပ်ႈပိူဝ်ႈဢၼ်ၵဝ်ပွႆႇၸႂ်ႉႁွင်ႉဢဝ်မႂ်းသေၵေႃႈမႂ်းဢမ်ႇမႃးၵႃႈတီႈၼႆႈၼၼ်ႉယဝ်ႉ။ ၵဝ်ၶႂ်ႈႁႂ်ႈမႂ်းၵႂႃႇၵႃႈတီႈၶုၼ်ႁေႃၶမ်းလႄႈလဝ်ႈထၢမ်ဝႃႈ၊ ‘ၵွပ်ႈသင်လႄႈၶႃႈၸဝ်ႈလႆႈလုၵ်ႉသေၵႃႈတီႈဝဵင်း ၵေႇသုရႃႉ၊ သေလႄႈမႃးၵႃႈတီႈၼႆႈတီႈၶႃႈ။ သင်ၶႃႈၸဝ်ႈသိုပ်ႇသဝ်းယူႇၵႃႈတီႈၼၼ်ႈယူႇၸိုင်၊ယဵင်ႈၶႅၼ်းတေလီတီႈၶႃႈဢေႃႈ၊’” ဝႃႈၼႆဢေႃႈ။ ဢပႃႉသလုမ်ႇ၊ ၶိုၼ်းသိုပ်ႇလၢတ်ႈလႄႈဝႃႈ၊ “ၵဝ်ၶႂ်ႈႁႂ်ႈမႂ်းၶိုင်ႁႃလွင်ႈတၢင်းပုၼ်ႈဢၼ်ၵဝ်တၵ်းလႆႈႁၼ်ၼႃႈၶုၼ်ႁေႃၶမ်းဢေႃႈ။ ၼင်ႇၼၼ်လႄႈပေႃးၵဝ်မီးဢပျတ်ႈၸိုင်၊ႁႂ်ႈမၼ်းၸဝ်ႈဢဝ်ၵဝ်တၢႆသေၵမ်းလူၺ်ႈ၊” ဝႃႈၼင်ႇၼႆဢေႃႈ။
ယွႃႇၽႃႉ၊ ၵေႃႈၵႂႃႇၸူးတီႈၶုၼ်ႁေႃၶမ်း တႃႇဝိတ်ႈ၊ လႄႈလဝ်ႈလၢတ်ႈၵႃႈဢၼ် ဢပႃႉသလုမ်ႇ၊ သင်ႇလၢတ်ႈၼၼ်ႉဢေႃႈ။ ၶုၼ်ႁေႃၶမ်းၵေႃႈပွႆႇၸႂ်ႉႁွင်ႉဢဝ် ဢပႃႉသလုမ်ႇ၊ လႄႈမၼ်းၵေႃႈမႃးသေယဝ်ႉ၊ဝၢင်းႁူဝ်ၶုပ်ႉမူပ်ႇၵႃႈၼိူဝ်လိၼ်ၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။ ၶုၼ်ႁေႃၶမ်းၵေႃႈႁပ်ႉတွၼ်ႈဢဝ်မၼ်းလူၺ်ႈတၢင်းဢၼ်ၸုပ်ႇၼူမ်မၼ်းဢေႃႈ။
လိုၼ်းၼၼ်ႉ၊ ဢပႃႉသလုမ်ႇ၊ ပွင်ႁႅၼ်းလေႃႉမႃႉသိုၵ်းလမ်းၼိုင်ႈ၊ပုၼ်ႈတူဝ်ၸဝ်ႈၵဝ်ႇဢိၵ်ႇတင်းၶိုင်ႁႅၼ်းမႃႉလႄႈၵူၼ်းဢၼ်တၢမ်းၸႂ်ႁႃႈသိပ်းၵေႃႉဢေႃႈ။-
မၼ်းၸၢင်ႈလုၵ်ႉၸဝ်ႉၸဝ်ႉသေယဝ်ႉ၊ၵႂႃႇၸုၵ်းယူႇၵႃႈတီႈသဵၼ်ႈတၢင်းႁူးၽၵ်းတူဝဵင်းဢေႃႈ။ မိူဝ်ႈဢၼ်သေၵေႃႉသေၵူၼ်းမီးဢမုလႄႈမႃးၸူးတီႈၶုၼ်ႁေႃၶမ်းႁႂ်ႈလႆႈၶၢမ်ႇဢဝ်တၢင်းဢၼ်ၸီႇယၢင်ႇဢမုၼၼ်ႉၸိုင်၊ ဢပႃႉသလုမ်ႇ၊ ၸၢင်ႈႁွင်ႉဢဝ်ၵေႃႉၼၼ်ႉမႃးတွင်ႈထၢမ်တူၺ်းလွင်ႈဢၼ်ၵေႃႉၼၼ်ႉလုၵ်ႉသေၵႃႈတီႈလႂ်မႃးၼၼ်ႉဢေႃႈ။ လိုၼ်းသေဢၼ်ၵေႃႉၼၼ်ႉမွၵ်ႇလၢတ်ႈလွင်ႈဢၼ်မၼ်းပဵၼ်ၵူၼ်းၸိူဝ်ႉၶိူဝ်းမဵဝ်းလႂ်ၼၼ်ႉယဝ်ႉၸိုင်၊-
ဢပႃႉသလုမ်ႇ၊ ၸၢင်ႈလၢတ်ႈလႄႈဝႃႈ၊ “တူၺ်းလူး။ ဢမုမႂ်းၼႆႉၸိုဝ်ႈၸႂ်ႈမၢၼ်ႇမႅၼ်ႈဢေႃႈ။ ၵူၺ်းၵႃႈ၊ဢမ်ႇမီးၽူႈလႂ်လႆႈဢၶႂၢင်ႉတီႈၶုၼ်ႁေႃၶမ်းလႄႈထွမ်ႇဢဝ်ဢမုမႂ်း၊” ဝႃႈၼင်ႇၼႆဢေႃႈ။-
ဢပႃႉသလုမ်ႇ၊ သမ်ႉလၢတ်ႈထႅင်ႈလႄႈဝႃႈ၊ “ၵဝ်မုင်ႈမွင်းႁႂ်ႈၵဝ်ပဵၼ်ၶုၼ်ဢၼ်ၸီႇယၢင်ႇတြႃးဢေႃႈ။ ပေႃးပဵၼ်ၸိူဝ်ႉၼင်ႇၼၼ်ၸိုင်၊ၵႃႈပဵၼ်ၶဝ်ၸိူဝ်းဢၼ်မီးဢမု၊ဢမ်ႇၼၼ်မီးတၢင်းဢၼ်ၸွႆးတြႃးသႂ်ႇတီႈၵၼ်လႄႈမႃးၸူးတီႈၵဝ်ၼၼ်ႉၵဝ်တၵ်းၸီႇယၢင်ႇၸွမ်းၼင်ႇတြႃးၽဵင်ႇၽဵင်ႇဢေႃႈ၊” ဝႃႈၼင်ႇၼႆဢေႃႈ။-
မၢင်ၽဝ်ႇမၢင်ပွၵ်ႈပေႃးသေၵေႃႉသေၵူၼ်းမႃးႁဵတ်းရူဝ်ႇသေႇၵူမ်ႈႁူဝ်ၸူးမၼ်းၸိုင်၊မၼ်းၸၢင်ႈယဵတ်ႇမိုဝ်းမၼ်းသေယိပ်းၵမ်ဢဝ်ၵေႃႉၼၼ်ႉလႄႈၼူမ်ဢေႃႈ။-
ဢပႃႉသလုမ်ႇ၊ ႁဵတ်းၸိူဝ်ႉၼင်ႇၼႆတီႈၵူၼ်းမဵဝ်း ဢိသရေး၊ ၵႃႈဢၼ်မႃးတီႈၶုၼ်ႁေႃၶမ်းႁႂ်ႈလႆႈၶၢမ်ႇဢဝ်တၢင်းဢၼ်ၸီႇယၢင်ႇဢမုၼၼ်ႉၵူႈၵေႃႉလႄႈလၵ်ႉဢဝ်ႁူဝ်ၸႂ်ၵူၼ်းမဵဝ်း ဢိသရေး၊ တင်းလၢႆဢေႃႈ။
ဝၢႆးၼၼ်ႉသီႇပီ ဢပႃႉသလုမ်ႇ၊ လဝ်ႈလၢတ်ႈတီႈၶုၼ်ႁေႃၶမ်း တႃႇဝိတ်ႈ၊ လႄႈဝႃႈ၊ “ၶႅၼ်းတေႃႈပၼ်ဢၶႂၢင်ႉႁႂ်ႈၶႃႈၸဝ်ႈလႆႈၵႂႃႇၵႃႈတီႈဝဵင်း ႁေႇပရုၼ်ႇ၊ လႄႈႁႂ်ႈလႆႈႁဵတ်းၸွမ်းၵတိသဵတ်ႈၸႃႇဢၼ်ၶႃႈၸဝ်ႈလႆႈဝႆႉၵႃႈတီႈ ထႃႇဝရႃႉၽြႃး၊ ၼၼ်ႉသေၵမ်းတီႈၶႃႈ။-
လွင်ႈမၼ်းၸမ်ႉ၊ၶႃႈၸဝ်ႈလႆႈႁဵတ်းၵတိသဵတ်ႈၸႃႇဝႆႉယၢမ်းမိူဝ်ႈဢၼ်ၶႃႈၸဝ်ႈယင်းယူႇၵႃႈတီႈဝဵင်း ၵေႇသုရႃႉ၊ မိူင်း သီးရီးယႃး၊ ၼၼ်ႉလႄႈဝႃႈ၊ ‘ပေႃး ထႃႇဝရႃႉၽြႃး၊ ဢဝ်ၵဝ်ၶႃႈသူင်ႇၶိုၼ်းတီႈဝဵင်း ယေႇရုသလႅမ်ႇ၊ ၸိုင်၊ၵဝ်ၶႃႈတၵ်းႁဵတ်းဝၢတ်ႈတီႈၸဝ်ႈႁဝ်းၵႃႈတီႈဝဵင်း ႁေႇပရုၼ်ႇ၊ ၼႆႉ ဢေႃႈ၊’ ဝႃႈၼႆတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းၵေႃႈမီးဢမိင်ႉဝႃႈ၊ “ၵႂႃႇၼိမ်ၼိမ်လီလီတႃႉ၊” ဝႃႈၼင်ႇၼႆဢေႃႈ။ ဢပႃႉသလုမ်ႇ၊ ၵေႃႈၵႂႃႇၵႃႈတီႈဝဵင်း ႁေႇပရုၼ်ႇ၊ ဢေႃႈ။
ၵူၺ်းၵႃႈ၊မၼ်းပွႆႇၸႂ်ႉၵူၼ်းသွပ်ႇၶၢဝ်ႇတင်းလၢႆၵႂႃႇၸူးတီႈၵူၼ်းၸိူဝ်ႉၶိူဝ်း ဢိသရေး၊ ၵူႈၸိူဝ်ႉၵူႈၶိူဝ်းလႄႈႁႂ်ႈၶဝ်လၢတ်ႈဝႃႈ၊ “မိူဝ်ႈဢၼ်သူလႆႈငိၼ်းသဵင်ပဝ်ႇၼႄးၶရႃႇၼၼ်ႉၸိုင်၊ဢွၼ်ၵၼ်ပၢဝ်ႇသႅၼ်ႇလၢတ်ႈဝႃႈ၊ ‘ ဢပႃႉသလုမ်ႇ၊ ၼင်ႈႁၢင်ႈၼင်ႈႁေႃၼႂ်းဝဵင်း ႁေႇပရုၼ်ႇ၊ ယဝ်ႉ၊’ ဝႃႈၼႆတႃႉ၊” ဝႃႈၼင်ႇၼႆဢေႃႈ။-
ဢပႃႉသလုမ်ႇ၊ ၼၼ်ႉႁွင်ႉဢဝ်ပၢင်းဢဝ်ၵူၼ်းသွင်ပၢၵ်ႇဢွၵ်ႇသေၵႃႈတီႈဝဵင်း ယေႇရုသလႅမ်ႇ၊ ၵႂႃႇၸွမ်းလူၺ်ႈၵၼ်တင်းမၼ်းဢေႃႈ။ ၶဝ်ၼၼ်ႉယင်းဢမ်ႇႁုတၢင်းၵျၢမ်ႇတၢင်းပွင်ၼၼ်ႉလႃးလႃးလႄႈဢွၼ်ၵၼ်ၸွမ်းၵႂႃႇလီလီငၢမ်းငၢမ်းဢေႃႈ။-
ယၢမ်းမိူဝ်ႈဢၼ်မၼ်းယင်းတိုၵ်ႉသၢၵ်ႈလူႇၶိူင်ႈတၢင်းလူႇယူႇၼၼ်ႉၸိုင်၊မၼ်းပွႆႇၸႂ်ႉၵူၼ်းၵႂႃႇႁွင်ႉဢဝ် ဢႁိသေႃႇၽေးလႃႉ၊ ဢၼ်ပဵၼ်ဢမၢတ်ႈဢၼ်တိူင်ႇပၢင်ႇႁူမ်ႈ တႃႇဝိတ်ႈ၊ ဢၼ်မီးယူႇၵႃႈတီႈဝဵင်း ၵိလေႃႇ၊ ၼၼ်ႉမႃးဢေႃႈ။ ဢမုတၢင်းဢၼ် ဢပႃႉသလုမ်ႇ၊ လုၵ်ႉၽိုၼ်ႉၶုၼ်ႁေႃၶမ်းၼၼ်ႉႁႅင်းယႂ်ႇမႃးတိၵ်းတိၵ်းၵွပ်ႈပိူဝ်ႈဢၼ်ၵူၼ်းၸွမ်းလင်မၼ်းယႂ်ႇၽႄၼမ်ၵိုၼ်းမႃးၶိူဝ်းၶိူဝ်းယႂ်းယႂ်းၼၼ်ႉဢေႃႈ။
သၢၼ်ႇတမၢၼ်ႇၵေႃႉၼိုင်ႈမႃးလဝ်ႈလၢတ်ႈတီႈ တႃႇဝိတ်ႈ၊ လႄႈဝႃႈ၊ “ႁူဝ်ၸႂ်ၵူၼ်းမဵဝ်း ဢိသရေး၊ တင်းလၢႆပႃးၸွမ်းၽၢႆႇ ဢပႃႉသလုမ်ႇ၊ ၵႂႃႇတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ မီးဢမိင်ႉတီႈၶုၼ်ဢၼ်ပွင်ၵၢၼ်ႁေႃမၼ်းၸိူဝ်းဢၼ်မီးယူႇလူၺ်ႈၵၼ်တင်းမၼ်းၵႃႈတီႈဝဵင်း ယေႇရုသလႅမ်ႇ၊ ၼၼ်ႉလႄႈဝႃႈ၊ “လုၵ်ႉတႃႉ၊ဢွၼ်ၵၼ်ၼီပၢႆႈတႃႉႁဝ်း။ ပေႃးဢမ်ႇၼၼ်ၸိုင်၊ႁဝ်းတေဢမ်ႇမီးတၢင်းဢၼ်တၵ်းလွတ်ႈသေၵႃႈတီႈမိုဝ်း ဢပႃႉသလုမ်ႇ၊ ယဝ်ႉ။ ဢွၼ်ၵၼ်ၼႅတ်ႈဢွၵ်ႇၵႂႃႇတႃႉႁဝ်း။ ၵူဝ်မၼ်းမႃးၶိုတ်းႁဝ်းလႄႈႁဵတ်းၽေးသႂ်ႇတီႈႁဝ်း၊ဢဝ်လၢပ်ႇဢဝ်လႅဝ်းတိုၵ်းတေႃးယႃႉပႅတ်ႈႁဝ်းတင်းဝဵင်းဢေႃႈ၊” ဝႃႈၼင်ႇၼႆဢေႃႈ။
ၶဝ်ၸိူဝ်းၼၼ်ႉၵေႃႈဢွၼ်ၵၼ်လဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “ၼေႃႈတီႈၶႃႈ။ ၵႃႈဢၼ်ၸဝ်ႈႁဝ်းၶႃႈ၊ၸဝ်ႈၶုၼ်လူင်ၸီႇယၢင်ႇၼၼ်ႉၶႃႈၸဝ်ႈႁဝ်းၶဝ်တၵ်းႁဵတ်းၸွမ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။-
ႁဵတ်းၼၼ်ႉလႄႈၶုၼ်ႁေႃၶမ်းပႃးဢဝ်ၵူၼ်းႁၢင်ႈၵူၼ်းႁေႃၸဝ်ႈ၊ဢိၵ်ႇတင်းၶုၼ်ဢၼ်ပွင်ၵၢၼ်ႁေႃၵႃႈမီးဢွၵ်ႇၵႂႃႇဢေႃႈ။ ၵူၺ်းၵႃႈ၊ၶုၼ်ႁေႃၶမ်းဝႆႉၵိုတ်းၸိူင်ႉၼၢင်းသိပ်းၵေႃႉႁႂ်ႈလႆႈပႂ်ႉႁၢင်ႈပႂ်ႉႁေႃၸဝ်ႈဢေႃႈ။
မိူဝ်ႈဢၼ်ၶုၼ်ႁေႃၶမ်း၊ဢိၵ်ႇတင်းၵူၼ်းမၼ်းတင်းသဵင်ႈတင်းလူင်ဢွၵ်ႇဝဵင်းၵႂႃႇယူႇၼၼ်ႉၸိုင်၊ၶဝ်ဢွၼ်ၵၼ်ၵိုတ်းသဝ်းၵႃႈတီႈလင်ႁိူၼ်းဢၼ်ယူႇတၢင်းပၢႆသုတ်းသေပိူၼ်ႈၼၼ်ႉဢေႃႈ။-
ၶုၼ်ဢၼ်ပွင်ၵၢၼ်ႁေႃတင်းလၢႆၸုၵ်းၸွမ်းယူႇ သေယဝ်ႉ၊ၵႃႈပဵၼ်ၵူၼ်း ၶေးရသိ၊ လႂ်၊ၵႃႈပဵၼ်ၵူၼ်း ပေႇလသိ၊ လႂ်၊ဢိၵ်ႇတင်းၵူၼ်း ၵိတ်ႉတိ၊ ႁူၵ်းပၢၵ်ႇၵေႃႉဢၼ်လုၵ်ႉသေၵႃႈတီႈဝဵင်း ၵႃႇသႃႉ၊ ၸွမ်းမႃးၸိူဝ်းၼၼ်ႉၶီႇၶိုၼ်ႈပူၼ်ႉၵႂႃႇၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။-
မိူဝ်ႈၼၼ်ႉ၊ၶုၼ်ႁေႃၶမ်းမီးဢမိင်ႉတီႈ ဢိတ်ႉတေႇ၊ ၵူၼ်းဢွၼ်ႁူဝ်မဵဝ်း ၵိတ်ႉတိ၊ ၼၼ်ႉလႄႈဝႃႈ၊ “မႂ်းၸွမ်းလူၺ်ႈၵၼ်တင်းႁဝ်းမႃးႁဵတ်းသင်။ ၶိုၼ်းၵႂႃႇယူႇလူၺ်ႈၶုၼ်ႁေႃၶမ်းပႃးမႂ်ႇၼၼ်ႉတႃႉ။ မႂ်းပဵၼ်ၵူၼ်းဢၼ်ပဵၼ်ၶႅၵ်ႇတၢင်ႇဝၢၼ်ႈတၢင်ႇမိူင်းဢၼ်ပၢႆႈသိုၵ်းလႄႈသွၼ်ႈယူႇတီႈႁဝ်းၼႆႉၵူၺ်းဢေႃႈ။-
မႂ်းၸင်ႇႁွတ်ႈၽႅဝ်မႃးမိူဝ်ႈဝႃးၵူၺ်းလႄႈမိူဝ်ႈၼႆႉၵဝ်တၵ်းႁႂ်ႈမႂ်းလႄႇၵႂႃႇလႄႇမႃးၸွမ်းၵဝ်လႆႈၸိူဝ်ႉၼင်ႇႁိုဝ်။ ၵဝ်တေၵႂႃႇၵႃႈတီႈလႂ်ၵဝ်ယင်းဢမ်ႇပႆႇႁုလူးၵွၼ်ႇ။ ႁွင်ႉဢဝ်ၵူၼ်းဝၢၼ်ႈၵူၼ်းမိူင်းမႂ်းၸိူဝ်းၼႆႉလႄႈမိူဝ်းၵႂႃႇလူၺ်ႈၵၼ်တင်းမႂ်းတႃႉ။ ႁႂ်ႈၵရုၼႃႇဢိၵ်ႇတင်းသဵတ်ႈၸႃႇ ထႃႇဝရႃႉၽြႃး၊ ၼၼ်ႉမီးတီႈမႂ်းသေၵမ်းလူၺ်ႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ ဢိတ်ႉတေႇ၊ ၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈၶုၼ်လူင်တီႈၶႃႈ။ ၶႃႈၸဝ်ႈတိူင်ႇဝႃႈၼႂ်းၼႃႇမႃႉၸိုဝ်ႈသဵင် ထႃႇဝရႃႉၽြႃး၊ လႄႈဝႃႈၸမ်ႉ၊ၵႃႈတီႈဢၼ်ၸဝ်ႈႁဝ်းၵႂႃႇၼၼ်ႉပိၵ်ႉသမ်ႉဝႃႈတေတၢႆတေလိပ်းၸိူဝ်ႉႁိုဝ်ၵေႃႈၶႃႈၸဝ်ႈတၵ်းၵႂႃႇၸွမ်းလူၺ်ႈၵၼ်တင်းၸဝ်ႈႁဝ်းတႃႇသေႇဢေႃႈ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ မီးဢမိင်ႉလႄႈဝႃႈ၊ “လီယဝ်ႉ။ သိုပ်ႇပႆၵႂႃႇတႃႉ၊” ဝႃႈၼင်ႇၼႆလႄႈ၊ ဢိတ်ႉတေႇ၊ သိုပ်ႇပႆၵႂႃႇလူၺ်ႈၵၼ်တင်းၵူၼ်းမၼ်းတင်းသဵင်ႈတင်းလူင်၊ဢိၵ်ႇတင်းလုၵ်ႈဢွၼ်ႇၸိူဝ်းဢၼ်မီးလူၺ်ႈၵၼ်တင်းၶဝ်ၼၼ်ႉဢေႃႈ။-
ၵူၼ်းဝၢၼ်ႈၵူၼ်းဝဵင်းတင်းလၢႆဢွၼ်ၵၼ်ႁွင်ႉႁႆႈတင်းသဵင်ဢၼ်ယႂ်ႇၼႃႇယၢမ်းမိူဝ်ႈဢၼ်ၵူၼ်းၸွမ်း တႃႇဝိတ်ႈ၊ တင်းလၢႆဢွၼ်ၵၼ်ဢွၵ်ႇၵႂႃႇၼၼ်ႉဢေႃႈ။ ၶုၼ်ႁေႃၶမ်းၶၢမ်ႈၼမ်ႉ ၵေႇတရုၼ်ႇ၊ လႄႈၵူၼ်းတင်းလၢႆဢွၼ်ၵၼ်ၵႂႃႇၸွမ်းသေယဝ်ႉ၊ၶဝ်ၶဝ်ႈၸူးတီႈသဵၼ်ႈတၢင်းထိူၼ်ႇလႅင်ႉၵႂႃႇဢေႃႈ။
မိူဝ်ႈၼၼ်ႉ၊ယဵၸ်ႈပရေႃးႁဵၵ်ႈ ဢပျႃႇထႃႇ၊ ၶိုၼ်ႈမႃးလႄႈယဵၸ်ႈပရေႃးႁဵၵ်ႈ ၸႃႇတုၵ်ႉ၊ ၵေႃႈၶိုၼ်ႈမႃးလူၺ်ႈၵၼ်တင်းၵူၼ်း လေႇဝိ၊ တင်းမူတ်းဢွၼ်ၵၼ်ႁၢမ်ဢဝ်တိူၵ်ႈပတိၺိၺ်ႇၽြႃးပဵၼ်ၸဝ်ႈသေလႄႈႁွတ်ႈမႃးဢေႃႈ။ ၶဝ်ဢဝ်တိူၵ်ႈပတိၺိၺ်ႇၽြႃးပဵၼ်ၸဝ်ႈၼၼ်ႉၶျႃးဝႆႉသေလႄႈ ဢပျႃႇထႃႇ၊ သၢၵ်ႈလူႇၶိူင်ႈတၢင်းလူႇယူႇတေႃႇထိုင်ႁွတ်ႈၵူၼ်းတင်းသဵင်ႈတင်းလူင်ထၢၼ်ႈပေႃးပႆပူၼ်ႉဝဵင်းလူင်ၵႂႃႇဢေႃႈ။-
ၶုၼ်ႁေႃၶမ်းမီးဢမိင်ႉတီႈယဵၸ်ႈပရေႃးႁဵၵ်ႈ ၸႃႇတုၵ်ႉ၊ လႄႈဝႃႈ၊ “ဢဝ်တိူၵ်ႈပတိၺိၺ်ႇၽြႃးပဵၼ်ၸဝ်ႈၶိုၼ်းၵႂႃႇသူင်ႇဝႆႉၵႃႈၼႂ်းဝဵင်းတႃႉ။ ပေႃး ထႃႇဝရႃႉၽြႃး၊ မီးတၢင်းဢၼ်ထုၵ်ႇၸႂ်ၵျိူၵ်ႈၸႂ်ၵဝ်ၸိုင်၊မၼ်းၸဝ်ႈတၵ်းဢဝ်ၵဝ်ၵႂႃႇႁႂ်ႈၵဝ်လႆႈႁၼ်တိူၵ်ႈပတိၺိၺ်ႇၸဝ်ႈ၊ဢိၵ်ႇတင်းတီႈဢၼ်မၼ်းၸဝ်ႈၵိင်းဝၢပ်ႈၼၼ်ႉထႅင်ႈဢေႃႈ။-
ဢမ်ႇၼၼ်ၵေႃႈပေႃးမၼ်းၸဝ်ႈမီးဢမိင်ႉလႄႈဝႃႈ၊ ‘ၵဝ်ဢမ်ႇလူဝ်ႇမႂ်းယဝ်ႉ၊’ ဝႃႈၼင်ႇၼႆၸိုင်၊ၵဝ်တၵ်းထွမ်ႇဢဝ်ဢေႃႈ။ ႁႂ်ႈမၼ်းၸဝ်ႈႁဵတ်းၸွမ်းၵႃႈၼင်ႇဢၼ်မၼ်းၸဝ်ႈမီးဢလူဝ်ႇၼၼ်ႉသေၵမ်းလူၺ်ႈ၊” ဝႃႈၼင်ႇၼႆဢေႃႈ။-
ၶုၼ်ႁေႃၶမ်းသမ်ႉမီးဢမိင်ႉတီႈယဵၸ်ႈပရေႃးႁဵၵ်ႈ ၸႃႇတုၵ်ႉ၊ လႄႈဝႃႈ၊ “မႂ်းပဵၼ်ၵေႃႉဢၼ်ႁူပွင်ႇတႃလႅင်းဢမ်ႇၸႂ်ႈႁိုဝ်း။ ႁွင်ႉဢဝ်လုၵ်ႈၸၢႆးမႂ်း ဢႁိမတ်ႉ၊ တင်း ယေႃးၼႀၼ်ႇ၊ လုၵ်ႈၸၢႆး ဢပျႃႇထႃႇ၊ ၼၼ်ႉသေလႄႈသူဢွၼ်ၵၼ်မိူဝ်းၵႂႃႇၵႃႈတီႈဝဵင်းၼိမ်ၼိမ်လီလီတႃႉ။-
ၵဝ်တၵ်းပႂ်ႉထႃႈၵႃႈတီႈတႃႈၶၢမ်ႈၼမ်ႉၵႃႈၼႂ်းထိူၼ်ႇယူႇတေႃႇထိုင်ႁွတ်ႈၵႂၢမ်းဢၼ်သူတၵ်းလဝ်ႈလၢတ်ႈၼၼ်ႉႁွတ်ႈမႃးတီႈၵဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။-
ၵွပ်ႈၼႆလႄႈ ၸႃႇတုၵ်ႉ၊ တင်း ဢပျႃႇထႃႇ၊ ဢွၼ်ၵၼ်ဢဝ်တိူၵ်ႈပတိၺိၺ်ႇၽြႃးပဵၼ်ၸဝ်ႈၶိုၼ်းမိူဝ်းၵႂႃႇသူင်ႇၵႃႈတီႈဝဵင်း ယေႇရုသလႅမ်ႇ၊ လႄႈယူႇၵႃႈတီႈၼၼ်ႈဢေႃႈ။
တႃႇဝိတ်ႈ၊ သမ်ႉၶိုၼ်ႈလွႆ သၢၼ်ႇလုၼ်ႇ၊ ၸွမ်းသဵၼ်ႈတၢင်းဢၼ်ၶိုၼ်ႈလွႆယူႇသေလႄႈႁွင်ႉႁႆႈယူႇ၊ယင်းဢမ်ႇတိုဝ်းသွၵ်းတိၼ်လႄႈႁူမ်ႇသုမ်ႇႁူဝ်မၼ်းဝႆႉ၊ၼႄလွင်ႈတၢင်းဢၼ်မႆႈၸႂ်ၼၼ်ႉယူႇဢေႃႈ။ ၵူၼ်းၵႃႈဢၼ်ၸွမ်းမၼ်းၵႂႃႇၸိူဝ်းၼၼ်ႉၵေႃႈဢွၼ်ၵၼ်ႁူမ်သုမ်ႇႁူဝ်ၶဝ်ယူႇ၊ႁွင်ႉႁႆႈၸွမ်းတၢင်းယူႇလႄႈၶိုၼ်ႈၵႂႃႇၸွမ်းဢေႃႈ။-
မိူဝ်ႈၼၼ်ႉ၊ပိူၼ်ႈမႃးလဝ်ႈလၢတ်ႈတီႈ တႃႇဝိတ်ႈ၊ လႄႈဝႃႈ၊ “ ဢႁိသေႃႇၽေးလႃႉ၊ ႁူမ်ႈပွင်းလူၺ်ႈၵၼ်တင်း ဢပႃႉသလုမ်ႇ၊ ၼႂ်းတၢင်းဢၼ်လုၵ်ႉၽိုၼ်ႉၼၼ်ႉတီႈၶႃႈယဝ်ႉ၊” ဝႃႈၼင်ႇၼႆဢေႃႈ။ တႃႇဝိတ်ႈ၊ သူးတွင်းလႄႈဝႃႈ၊ “ ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈႁႂ်ႈတၢင်းဢၼ် ဢႁိသေႃႇၽေးလႃႉ၊ ပၼ်တၢင်းၵျၢမ်ႇၼၼ်ႉပဵၼ်တၢင်းၵျၢမ်ႇတၢင်းပွင်ဢၼ်လၢႆလၢႆဢမ်ႇပွင်ႇလွင်ႈၵႃႈသင်ၼၼ်ႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ် တႃႇဝိတ်ႈ၊ ႁွတ်ႈထိုင်ၵႃႈတီႈပၢႆၸိၵ်းလွႆတီႈဢၼ်ၵူၼ်းယၢမ်ႈၵူဝ်းၵႂၢႆႇၽြႃးပဵၼ်ၸဝ်ႈၼၼ်ႉၸိုင်၊ ႁုသေး၊ ၵူၼ်း ဢႃႇၶိ၊ ၼၼ်ႉမႃးႁပ်ႉႁူဝ်တၢင်း တႃႇဝိတ်ႈ၊ လူၺ်ႈသိူဝ်ႈယၢဝ်းမၼ်းသိၵ်ႇဝႆႉဢိၵ်ႇတင်းမုၼ်ႈလိၼ်ၵေႃႈၽွၵ်းသႂ်ႇၵႃႈၼိူဝ်ႁူဝ်မၼ်းဝႆႉဢေႃႈ။-
တႃႇဝိတ်ႈ၊ မီးဢမိင်ႉတီႈမၼ်းလႄႈဝႃႈ၊ “ပေႃးမႂ်းၵႂႃႇၸွမ်းၵဝ်ၸိုင်၊မႂ်းတၵ်းဢမ်ႇၸၢင်ႈၸွႆႈထႅမ်ၵႃႈသင်တီႈၵဝ်ယဝ်ႉ။-
ပေႃးမႂ်းၶိုၼ်းမိူဝ်းၵႂႃႇၵႃႈတီႈဝဵင်းလႄႈလဝ်ႈလၢတ်ႈတီႈ ဢပႃႉသလုမ်ႇ၊ လႄႈဝႃႈ၊ ‘ဢူဝ်း။ ၶုၼ်ႁေႃၶမ်းတီႈၶႃႈ။ မိူဝ်ႈလဵဝ်ၼႆႉၶႃႈၸဝ်ႈမႃးၶၢမ်ႇႁဵတ်းၶႃႈတီႈၸဝ်ႈႁဝ်းမိူၼ်ၸိူဝ်ႉၼင်ႇဢၼ်ယၢမ်ႈႁဵတ်းၶႃႈတီႈပေႃႈၸဝ်ႈမႃးၼၼ်ႉတီႈၶႃႈဢေႃႈ၊’ ဝႃႈၼႆၸိုင်၊မႂ်းတၵ်းၸၢင်ႈၸွႆႈထႅမ်ၵဝ်လႄႈယႃႉတၢင်းၵျၢမ်ႇတၢင်းပွင်ဢၼ် ဢႁိသေႃႇၽေးလႃႉ၊ ပၼ်ၼၼ်ႉဢေႃႈ။-
ယဵၸ်ႈပရေႃးႁဵၵ်ႈ ၸႃႇတုၵ်ႉ၊ ဢိၵ်ႇတင်းယဵၸ်ႈပရေႃးႁဵၵ်ႈ ဢပျႃႇထႃႇ၊ မီးယူႇၵႃႈတီႈၼၼ်ႈယဝ်ႉ။ ၵႃႈဢၼ်မႂ်းလႆႈငိၼ်းၵႃႈၼႂ်းႁၢင်ႈၼႂ်းႁေႃၼၼ်ႉၸိုင်၊မွၵ်ႇလၢတ်ႈတီႈၶဝ်တႃႉ။-
လုၵ်ႈၸၢႆးၶဝ်ဢၼ်ပဵၼ် ဢႁိမတ်ႉ၊ တင်း ယေႃးၼႀၼ်ႇ၊ ၵေႃႈမီးယူႇလူၺ်ႈၵၼ်တင်းၶဝ်ဢေႃႈ။ တၵ်းလႆႈဢဝ်ၵႃႈဢၼ်မႂ်းလႆႈငိၼ်းၼၼ်ႉမွၵ်ႇလၢတ်ႈတီႈၶဝ်ႁႂ်ႈမႃးမွၵ်ႇလၢတ်ႈၵႃႈတီႈၵဝ်ဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ႁုသေး၊ ၵေႃႉသႄႈ တႃႇဝိတ်ႈ၊ ၼၼ်ႉၶိုၼ်းပွၵ်ႈမိူဝ်းၵႂႃႇၸူးၵႃႈတီႈဝဵင်းလူင်ယၢမ်းမိူဝ်ႈဢၼ် ဢပႃႉသလုမ်ႇ၊ ၶဝ်ႈၵႂႃႇၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉဢေႃႈ။
မိူဝ်ႈဢၼ် တႃႇဝိတ်ႈ၊ ပူၼ်ႉၸိၵ်းလွႆၵႂႃႇဢိတ်းၼိုင်ႈၼၼ်ႉၸိုင်၊ ၸိၽႃႉ၊ ၶႃႈ မေႇၽိပေႃးသႅတ်ႉ၊ ဢွၵ်ႇမႃးႁပ်ႉႁူဝ်တၢင်း တႃႇဝိတ်ႈ၊ ဢေႃႈ။ ၸိၽႃႉ၊ ပႃးဢဝ်မႃႉလီႈသွင်တူဝ်ႁၢင်ႈၵွပ်းသေလႄႈဢဝ်ၶဝ်ႈမုၼ်းသွင်ပၢၵ်ႇႁူၺ်ႇ၊ၶႅပ်းမၢၵ်ႇၸပိတ်ႉႁႅင်ႈပၢၵ်ႇၶႅပ်း၊မၢၵ်ႇလိူဝ်ႇပၢၵ်ႇၼိုင်ႈဢိၵ်ႇတင်းထူင်ၼင်ၼမ်ႉမၢၵ်ႇၸပိတ်ႉထူင်ၼိုင်ႈတၢင်ႇၵႃႈၼိူဝ်မႃႉလီႈၸိူဝ်းၼၼ်ႉမႃးဢေႃႈ။-
ၶုၼ်ႁေႃၶမ်း တႃႇဝိတ်ႈ၊ ထၢမ်မၼ်းလႄႈဝႃႈ၊ “မႂ်းဢဝ်ၸိူဝ်းၼႆႉမႃးႁႂ်ႈလႆႈႁဵတ်းၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။ ၸိၽႃႉ၊ ၶိုၼ်းလဝ်ႈလၢတ်ႈလႄႈဝႃႈ၊ “မႃႉလီႈၸိူဝ်းၼႆႉပဵၼ်ပုၼ်ႈၵူၼ်းႁၢင်ႈၵူၼ်းႁေႃၸဝ်ႈတၵ်းၶီႇ၊ၶဝ်ႈမုၼ်းဢိၵ်ႇတင်းမၢၵ်ႇမႆႉၸိူဝ်းၼႆႉပဵၼ်ပုၼ်ႈၵူၼ်းတင်းလၢႆတၵ်းၵိၼ်၊ၼမ်ႉမၢၵ်ႇၸပိတ်ႉၵေႃႈပဵၼ်ပုၼ်ႈၵူၼ်းၸိူဝ်းဢၼ်ႁိူဝ်ႉၼူၼ်းၵႃႈတီႈထိူၼ်ႇလႅင်ႉၼႆႉတၵ်းၵိၼ်တီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းသမ်ႉထၢမ်လႄႈဝႃႈ၊ “ မေႇၽိပေႃးသႅတ်ႉ၊ လၢၼ်ၸၢႆးၸဝ်ႈမႂ်း သေႃးလု၊ ၼၼ်ႉမီးၵႃႈတီႈလႂ်၊” ဝႃႈၼင်ႇၼႆဢေႃႈ။ ၸိၽႃႉ၊ ၶိုၼ်းလဝ်ႈလၢတ်ႈလႄႈဝႃႈ၊ “မၼ်းၵိုတ်းသဝ်းယူႇၵႃႈၼႂ်းဝဵင်း ယေႇရုသလႅမ်ႇ၊ တီႈၶႃႈဢေႃႈ။ မၼ်းထၢင်ႇဝႃႈ၊ ‘ဝၼ်းမိူဝ်ႈၼႆႉၵူၼ်းမဵဝ်း ဢိသရေး၊ တၵ်းဢဝ်သိုင်ႇၸိုင်ႈဝၢၼ်ႈမိူင်းပူႇမၼ်း သေႃးလု၊ ၼၼ်ႉၶိုၼ်းပၼ်တီႈမၼ်းဢေႃႈ၊’ ဝႃႈၼႆတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းမီးဢမိင်ႉတီႈ ၸိၽႃႉ၊ လႄႈဝႃႈ၊ “ၵႃႈဢၼ်ပဵၼ်ဢုၵ်ႉၸႃႇၶူဝ်းၶွင် မေႇၽိပေႃးသႅတ်ႉ၊ ၼၼ်ႉႁႂ်ႈပဵၼ်ဢုၵ်ႉၸႃႇၶူဝ်းၶွင်မႂ်းသေ၊” ဝႃႈၼင်ႇၼႆဢေႃႈ။ ၸိၽႃႉ၊ ၶိုၼ်းလဝ်ႈလၢတ်ႈလႄႈဝႃႈ၊ “တၢင်ႇၼိူဝ်ႁူဝ်တီႈၶႃႈဢေႃႈ။ ႁႂ်ႈၶႃႈၸဝ်ႈလႆႈထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈႁဝ်းၸဝ်ႈၶုၼ်လူင်သေၵမ်းတီႈၶႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၶုၼ်ႁေႃၶမ်း တႃႇဝိတ်ႈ၊ ႁွတ်ႈထိုင်ၵႃႈတီႈဝဵင်း ပႃႇႁုရိမ်း၊ ၼၼ်ႉၸိုင်၊ၵူၼ်းၼႂ်းပီႈၼွင်ႉၸိူဝ်ႉၶိူဝ်း သေႃးလု၊ ၼၼ်ႉၵေႃႉၼိုင်ႈဢၼ်လႆႈၸိုဝ်ႈ သိမိ၊ လုၵ်ႈၸၢႆး ၵေးရႃႉ၊ ၼၼ်ႉမႃးႁပ်ႉႁူဝ်တၢင်း တႃႇဝိတ်ႈ၊ လႄႈလႃႇလင် တႃႇဝိတ်ႈ၊ ၸွမ်းတၢင်းမႃးယူႇဢေႃႈ။-
ၵူၼ်းတင်းလၢႆဢိၵ်ႇတင်းၵူၼ်းပႂ်ႉဢသၢၵ်ႈၸဝ်ႈလွမ်ႉႁွပ်ႈ တႃႇဝိတ်ႈ၊ ယူႇသေၵေႃႈ သိမိ၊ ဢဝ်မၢၵ်ႇႁိၼ်ပိုဝ်ႈသႂ်ႇ တႃႇဝိတ်ႈ၊ ဢိၵ်ႇတင်းၶုၼ်ဢၼ်ပွင်ၵၢၼ်ႁေႃၸဝ်ႈၸိူဝ်းၼၼ်ႉဢေႃႈ။-
သိမိ၊ လႃႇလင် တႃႇဝိတ်ႈ၊ သေလႄႈလၢတ်ႈဝႃႈ၊ “ၵႂႃႇတႃႉ။ ၵႂႃႇတႃႉႁေး။ ၵူၼ်းဢထမ်ႇမႃႉဢၼ်ဢဝ်ဢသၢၵ်ႈၵူၼ်းတၢႆၼႆႉ႟။-
မႂ်းၼႆႉႁိမ်ဢဝ်သိုင်ႇၸိုင်ႈဝၢၼ်ႈမိူင်း သေႃးလု၊ ယဝ်ႉ။ တေႃႈလဵဝ်ၼႆႉ ထႃႇဝရႃႉၽြႃး၊ ပၼ်တၢမ်ႇတီႈမႂ်းၵွပ်ႈပိူဝ်ႈဢၼ်ၵူၼ်းႁၢင်ႈၵူၼ်းႁေႃ သေႃးလု၊ တၢႆၼၼ်ႉယဝ်ႉ။ ထႃႇဝရႃႉၽြႃး၊ ယိုတ်းဢဝ်သိုင်ႇၸိုင်ႈဝၢၼ်ႈမိူင်းၼၼ်ႉလႄႈဢၢပ်ႈပၼ်တီႈလုၵ်ႈၸၢႆးမႂ်း ဢပႃႉသလုမ်ႇ၊ ယဝ်ႉ။ မႂ်းၼႆႉဢဝ်တၢႆၵူၼ်းၼမ်ၼႃႇယဝ်ႉလႄႈ၊တူၺ်းလူး၊မႂ်းႁွတ်ႈထိုင်တၢင်းဢၼ်လုလႅဝ်ၼႃႇလူင်လၢင်ယဝ်ႉ၊” ဝႃႈၼင်ႇၼႆဢေႃႈ။
ဢၽိသေး၊ ဢၼ်မႄႈမၼ်းပဵၼ် ၸေႇရုယႃႇ၊ ၼၼ်ႉလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “ၸဝ်ႈၶုၼ်လူင်တီႈၶႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းပွႆႇမႃတူဝ်ၼႆႉလႃႇလင်ၸဝ်ႈႁဝ်းယူႇၸိူဝ်ႉၼင်ႇႁိုဝ်တီႈၶႃႈ။ ႁႂ်ႈၶႃႈၸဝ်ႈလႆႈၵႂႃႇလႄႈတႅပ်းႁူဝ်မၼ်းသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းမီးဢမိင်ႉတီႈ ဢၽိသေး၊ တင်းပီႈၸၢႆးမၼ်း ယွႃႇၽႃႉ၊ လႄႈဝႃႈ၊ “လွင်ႈၼႆႉဢမ်ႇသႅင်ႇၵၼ်တင်းသူၵႃႈသင်။ ပေႃး ထႃႇဝရႃႉၽြႃး၊ ၸႂ်ႉႁႂ်ႈမၼ်းလႃႇလင်ၵဝ်ၸိုင်၊ၽူႈလႂ်ဢမ်ႇမီးဢၶႂၢင်ႉဢယေးဢၼ်ထၢမ်လႄႈဝႃႈ၊ ‘ၵွပ်ႈသင်လႄႈမႂ်းႁဵတ်းၸိူဝ်ႉၼင်ႇၼႆ၊’ ဝႃႈၼႆၼၼ်ႉလႆႈ၊” ဝႃႈၼင်ႇၼႆဢေႃႈ။-
တႃႇဝိတ်ႈ၊ သမ်ႉမီးဢမိင်ႉတီႈ ဢၽိသေး၊ တင်းၶုၼ်ဢၼ်ပွင်ၵၢၼ်ႁေႃၸဝ်ႈၵႃႈမီးၼၼ်ႉလႄႈဝႃႈ၊ “လုၵ်ႈၸၢႆးဢွၵ်ႇၵဝ်ယင်းသွၵ်ႈႁႃႁႂ်ႈလႆႈဢဝ်ၵဝ်တၢႆယူႇလႄႈ၊ၵႃႈၼႂ်းၵူၼ်းမဵဝ်း ပိၼ်ႇယႃႇမိၼ်ႇ၊ ၼႆႉသူမီးလွင်ႈဢၼ်တၵ်းဢၢမ်းၵႃႈသင်လူးၵွၼ်ႇ။ ထႃႇဝရႃႉၽြႃး၊ ၸႂ်ႉႁႂ်ႈမၼ်းမႃးလႃႇလင်ၵဝ်ယဝ်ႉ၊ယႃႇမၼ်းတႃႉ။ ႁႂ်ႈမၼ်းလႃႇလင်တႃႉ။-
ထႃႇဝရႃႉၽြႃး၊ ၸၢင်ႈၶႄးတၵ်းလူတူၺ်းတုၵ်ႉၶႃႉတၢင်းၶၢၼ်ၸႂ်ၵဝ်ၼႆႉသေလႄႈ၊ယူဝ်မၼ်းၸဝ်ႈတၵ်းတႅၼ်းပၼ်တၢင်းလီမၢင်ႇၵလႃႇတီႈဢၵျူဝ်းတၢင်းဢၼ်ၵိၼ်ႇလႃႇၵဝ်ၼႆႉဢေႃႈ၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈ တႃႇဝိတ်ႈ၊ ဢိၵ်ႇတင်းၵူၼ်းမၼ်းတင်းလၢႆသိုပ်ႇပႆၸွမ်းသဵၼ်ႈတၢင်းၵႂႃႇယူႇဢေႃႈ။ သိမိ၊ ၵေႃႈၵႂႃႇၸွမ်းတၢပ်ႈလွႆၵႂႃႇယူႇလႄႈလႃႇလင်ယူႇ၊ဢဝ်မၢၵ်ႇႁိၼ်ပိုဝ်ႈသႂ်ႇယူႇ၊ဢဝ်မုၼ်ႈလိၼ်ပိုၼ်ၽၢဝ်ႇၶိုၼ်ႈၸွမ်းတၢင်းၵႂႃႇယူႇဢေႃႈ။-
ၶုၼ်ႁေႃၶမ်းဢိၵ်ႇတင်းၵူၼ်းမၼ်းတင်းမူတ်းၸိူဝ်းၼၼ်ႉႁိူဝ်ႉၼူၼ်းၼႃႇမိူဝ်ႈဢၼ်ၶဝ်ႁွတ်ႈထိုင်ၵႃႈတီႈၼမ်ႉ ယေႃးတၢၼ်ႇ၊ ၼၼ်ႉဢေႃႈ။ ၶဝ်ဢွၼ်ၵၼ်လိုဝ်ႈႁိူဝ်ႉဢဝ်ႁႅင်းၵႃႈတီႈၼၼ်ႈဢေႃႈ။
ယၢမ်းမိူဝ်ႈၼၼ်ႉ ဢပႃႉသလုမ်ႇ၊ ဢိၵ်ႇတင်းၵူၼ်းမၼ်းမဵဝ်း ဢိသရေး၊ တင်းလၢႆဢွၼ်ၵၼ်ၶဝ်ႈၵႃႈၼႂ်းဝဵင်း ယေႇရုသလႅမ်ႇ၊ ၵႂႃႇလႄႈ ဢႁိသေႃႇၽေးလႃႉ၊ ၵေႃႈပႃးဢေႃႈ။-
မိူဝ်ႈဢၼ် ႁုသေး၊ ၵေႃႉသႄႈဢၼ်ၸႂ် တႃႇဝိတ်ႈ၊ ဝႆႉၸႂ်ၼၼ်ႉႁွတ်ႈမႃးၸိုင်၊မၼ်းၵႂႃႇသေယဝ်ႉ၊ႁပ်ႉႁူဝ်တၢင်း ဢပႃႉသလုမ်ႇ၊ လႄႈလၢတ်ႈဝႃႈ၊ “ႁႂ်ႈၶုၼ်ႁေႃၶမ်းဢသၢၵ်ႈယၢဝ်းယိုၼ်းသေၵမ်းလူၺ်ႈ။ ႁႂ်ႈၶုၼ်ႁေႃၶမ်းဢသၢၵ်ႈယၢဝ်းယိုၼ်းသေၵမ်းလူၺ်ႈ၊” ဝႃႈၼင်ႇၼႆဢေႃႈ။
ဢပႃႉသလုမ်ႇ၊ ထၢမ်မၼ်းလႄႈဝႃႈ၊ “ဢၼ်ၼႆႉပဵၼ်တၢင်းဢၼ်မႂ်းၼပ်ႉယမ်ၵေႃႉသႄႈမႂ်း တႃႇဝိတ်ႈ၊ ၼၼ်ႉႁိုဝ်း။ ႁဵတ်းသင်လႄႈမႂ်းဢမ်ႇၸွမ်းလူၺ်ႈၵၼ်တင်းၵေႃႉသႄႈမႂ်းၵႂႃႇ၊” ဝႃႈၼင်ႇၼႆဢေႃႈ။
ႁုသေး၊ ၶိုၼ်းလဝ်ႈလၢတ်ႈလႄႈဝႃႈ၊ “ၶႃႈၸဝ်ႈတေႁဵတ်းၸိူဝ်ႉၼင်ႇႁိုဝ်လႄႈၸွမ်းလူၺ်ႈၵၼ်တင်းမၼ်းၵႂႃႇတီႈၶႃႈ။ ၶႃႈၸဝ်ႈၼႆႉပဵၼ်ၵူၼ်းဢၼ်ထၢမ်းၼႃႈၵၢၼ်တီႈၵေႃႉဢၼ် ထႃႇဝရႃႉၽြႃး၊ ဢိၵ်ႇတင်းၵူၼ်းဢၼ်မီးတီႈၼႆႈ၊ဢိၵ်ႇတင်းၵူၼ်းမဵဝ်း ဢိသရေး၊ တင်းသဵင်ႈတင်းလူင်လိူၵ်ႈၵဵပ်းဢဝ်ဝႆႉၼၼ်ႉဢေႃႈ။ ၶႃႈၸဝ်ႈတၵ်းယူႇလူၺ်ႈၵၼ်တင်းၵေႃႉၼၼ်ႉၵူၺ်းတီႈၶႃႈဢေႃႈ၊ဝႃႈၼင်ႇၼႆဢေႃႈ။-
လိုၼ်းသုတ်းပိူၼ်ႈၶႃႈၸဝ်ႈတၵ်းလႆႈထၢမ်းၼႃႈၵၢၼ်ၽူႈလႂ်။ ၶႃႈၸဝ်ႈတၵ်းလႆႈထၢမ်းၼႃႈၵၢၼ်လုၵ်ႈၸၢႆးၸဝ်ႈၵဝ်ၶႃႈဢမ်ႇၸႂ်ႈတီႈၶႃႈႁိုဝ်း။ ၸိူဝ်ႉၼင်ႇဢၼ်ၶႃႈၸဝ်ႈလႆႈထၢမ်းၼႃႈၵၢၼ်ၸဝ်ႈပေႃႈၸဝ်ႈႁဝ်းမႃးၼၼ်ႉၶႃႈၸဝ်ႈတၵ်းထၢမ်းၼႃႈၵၢၼ်ၸဝ်ႈႁဝ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ဢပႃႉသလုမ်ႇ၊ ဝၢႆႇၸူးတီႈ ဢႁိသေႃႇၽေးလႃႉ၊ လႄႈလၢတ်ႈဝႃႈ၊ “ပၼ်တၢင်းၵျၢမ်ႇတၢင်းပွင်သေၵမ်း။ မိူဝ်ႈလဵဝ်ၼႆႉႁဝ်းတၵ်းတေလႆႈႁဵတ်းၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ဢႁိသေႃႇၽေးလႃႉ၊ ၶိုၼ်းလဝ်ႈလၢတ်ႈလႄႈဝႃႈ၊ “ၶဝ်ႈၸူးၼွၼ်းလူၺ်ႈၸိူင်ႉၼၢင်းၸိူဝ်းဢၼ်ၸဝ်ႈပေႃႈၸဝ်ႈႁဝ်းဝႆႉၵိုတ်းဝႆႉၵျၢၼ်ႇႁႂ်ႈလႆႈပႂ်ႉႁေႃၸဝ်ႈၼၼ်ႉသေၵမ်းတီႈၶႃႈ။ မိူဝ်ႈၼၼ်ႉၵူၼ်းမဵဝ်း ဢိသရေး၊ တင်းသဵင်ႈတင်းလူင်တၵ်းႁုႁၼ်လွင်ႈဢၼ်ၸဝ်ႈပေႃႈၸဝ်ႈႁဝ်းလီႁင်ႈဢဵတ်ႇသဵတ်ႇၸဝ်ႈႁဝ်းလႄႈၶဝ်ၸိူဝ်းၼၼ်ႉတၵ်းၽွမ်ႉၽၢႆႇၸဝ်ႈႁဝ်းလႄႈတၵ်းမီးတၢင်းဢၼ်ၸႂ်ႁႅင်းယႂ်ႇၼႃႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၶဝ်ဢွၼ်ၵၼ်ပူၵ်းတင်ႈသုမ်ႉထဵင်ပုၼ်ႈ ဢပႃႉသလုမ်ႇ၊ ၵႃႈၼိူဝ်ၸိၵ်းႁေႃၸွမ်ႁေႃၶမ်းၼၼ်ႉသေယဝ်ႉ၊ ဢပႃႉသလုမ်ႇ၊ ၶဝ်ႈၸူးၼွၼ်းလူၺ်ႈၵၼ်တင်းၸိူင်ႉၼၢင်းၸဝ်ႈပေႃႈမၼ်းၵႃႈတီႈၽၢႆႇၼႃႈၵူၼ်းမဵဝ်း ဢိသရေး၊ တင်းလၢႆၼၼ်ႉဢေႃႈ။
တၢင်းၵျၢမ်ႇတၢင်းပွင်ဢၼ် ဢႁိသေႃႇၽေးလႃႉ၊ ပၼ်ၼႂ်းၸူဝ်ႈပၢၼ်ၼၼ်ႉပဵၼ်ၸိူဝ်ႉၼင်ႇပျႃႇတိၵ်ႈဢၼ်လဝ်ႈထၢမ်တီႈ ထႃႇဝရႃႉၽြႃး၊ ၼၼ်ႉဢေႃႈ။ ၸႃႉၸဵမ် တႃႇဝိတ်ႈ၊ ဢိၵ်ႇတင်း ဢပႃႉသလုမ်ႇ၊ လႆႈႁပ်ႉတုင်းဢဝ်ၵႂၢမ်းတိူင်ႇပၢင်ႇ ဢႁိသေႃႇၽေးလႃႉ၊ ၸိူဝ်ႉၼင်ႇၼၼ်ဢေႃႈ။
လိုၼ်းၼၼ်ႉဢမ်ႇႁိုင်ဢမ်ႇၼၢၼ်း ဢႁိသေႃႇၽေးလႃႉ၊ လဝ်ႈလၢတ်ႈတီႈ ဢပႃႉသလုမ်ႇ၊ လႄႈဝႃႈ၊ “ႁႂ်ႈၶႃႈၸဝ်ႈလႆႈလိူၵ်ႈဢဝ်ၵူၼ်းမိုၼ်ႇပၢႆသွင်ႁဵင်သေၵမ်းၶႃႈ။ ၼႂ်းၶိုၼ်းၼႆႉၵမ်းလဵဝ်ၶႃႈၸဝ်ႈတၵ်းၶီႇသိုၵ်းၶိုၼ်ႈၸူးတီႈ တႃႇဝိတ်ႈ၊ ဢေႃႈ။-
ၶႃႈၸဝ်ႈတၵ်းတိုၵ်းတေႃးမၼ်းယၢမ်းမိူဝ်ႈဢၼ်မၼ်းႁိူဝ်ႉၼူၼ်းလႄႈၸႂ်ႁႅင်းဢူၼ်ႈယူႇၼၼ်ႉတီႈၶႃႈဢေႃႈ။ မၼ်းတၵ်းတူၵ်းၸႂ်လႄႈၶဝ်ၸိူဝ်းဢၼ်မီးလူၺ်ႈၵၼ်တင်းမၼ်းၼၼ်ႉတၵ်းတႅၵ်ႇပၢႆႈယၢႆႈၼီတီႈၶႃႈဢေႃႈ။ ၶႃႈၸဝ်ႈတၵ်းဢဝ်တၢႆၶုၼ်ႁေႃၶမ်းၵူၺ်းၶႃႈလႄႈ၊-
တၵ်းဢဝ်ၵူၼ်းတင်းသဵင်ႈတင်းလူင်မႃးၸူးတီႈၸဝ်ႈႁဝ်း၊မိူၼ်ၸိူဝ်ႉၼင်ႇဢၼ်လုၵ်ႈပႂ်ႉမႂ်ႇမႃးၸူးတီႈၽူဝ်မၼ်းၼၼ်ႉတီႈၶႃႈဢေႃႈ။ ၸဝ်ႈႁဝ်းမီးဢလူဝ်ႇၶႂ်ႈႁႂ်ႈၵူၼ်းၵေႃႉလဵဝ်ၵူၺ်းတၢႆလႄႈႁႂ်ႈၵူၼ်းဢၼ်ၵိုတ်းဢၼ်ၵျၢၼ်ႇတင်းလၢႆလႆႈလူင်ႉလီလွတ်ႈလီတီႈၶႃႈဢေႃႈ၊” ဝႃႈၼင်ႇၼႆဢေႃႈ။-
ၵႂၢမ်းၼၼ်ႉမိူၼ်ၼင်ႇႁၢင်ႈပဵၼ်ဢၼ်ထုၵ်ႇဢၼ်လီတီႈ ဢပႃႉသလုမ်ႇ၊ ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၵူၼ်းမဵဝ်း ဢိသရေး၊ ၶဝ်ၼၼ်ႉဢေႃႈ။
ဢပႃႉသလုမ်ႇ၊ မီးဢမိင်ႉလႄႈဝႃႈ၊ “ႁွင်ႉဢဝ် ႁုသေး၊ မႃးတႃႉ။ ဢွၼ်ၵၼ်ထွမ်ႇငိၼ်းၵႂၢမ်းမၼ်းလူးၵွၼ်ႇတႃႉႁဝ်း၊” ဝႃႈၼင်ႇၼႆဢေႃႈ။-
ႁုသေး၊ ၵေႃႈႁွတ်ႈမႃးလႄႈ ဢပႃႉသလုမ်ႇ၊ လၢတ်ႈၼႄမၼ်းလႄႈဝႃႈ၊ “ ဢႁိသေႃႇၽေးလႃႉ၊ ပၼ်တၢင်းၵျၢမ်ႇတီႈႁဝ်းၸိူဝ်ႉၼင်ႇၼႆယဝ်ႉ။ ထုၵ်ႇလီထွမ်ႇဢဝ်ၵႂၢမ်းမၼ်းႁိုဝ်း။ ပေႃးဢမ်ႇၼၼ်မႂ်းလၢတ်ႈတႃႉ၊” ဝႃႈၼင်ႇၼႆဢေႃႈ။
ႁုသေး၊ ၶိုၼ်းလဝ်ႈလၢတ်ႈလႄႈဝႃႈ၊ “တၢင်းၵျၢမ်ႇဢၼ် ဢႁိသေႃႇၽေးလႃႉ၊ ပၼ်မိူဝ်ႈလဵဝ်ၼႆႉၼၼ်ႉဢမ်ႇထုၵ်ႇဢမ်ႇလီတီႈၶႃႈ။-
ၸဝ်ႈႁဝ်းႁုလွင်ႈဢၼ်ၸဝ်ႈပေႃႈၸဝ်ႈႁဝ်း တႃႇဝိတ်ႈ၊ ဢိၵ်ႇတင်းၵူၼ်းမၼ်းတင်းလၢႆပဵၼ်ၵူၼ်းသိုၵ်းဢၼ်ႁႅင်းၵႅၼ်ႇႁႅင်းၶႅင်ၼႃႇဢိၵ်ႇတင်းလွင်ႈဢၼ်ၶဝ်ႁၢဝ်ႈၵျၢမ်းၼႃႇမိူၼ်ၸိူဝ်ႉၼင်ႇမီမႄႈဢၼ်ပိူၼ်ႈႁိမ်ဢဝ်လုၵ်ႈမၼ်းၵႂႃႇၼၼ်ႉတီႈၶႃႈဢေႃႈ။ ၸဝ်ႈပေႃႈၸဝ်ႈႁဝ်းၼၼ်ႉပဵၼ်ႁူဝ်ႁၢၼ်ၵူၼ်းသိုၵ်းဢၼ်တၢင်းႁုၼမ်ထူၼ်ႈလႄႈဢမ်ႇသူႈၼွၼ်းလူၺ်ႈၵၼ်တင်းၵူၼ်းမၼ်းတင်းလၢႆၼႂ်းၶိင်ႇၵၢင်ၶိုၼ်းတီႈၶႃႈ။-
တေႃႈလဵဝ်ၼႆႉၵေႃႈမၼ်းၸၢင်ႈၶႄးတဵတ်ႇမႅပ်းယူႇၵႃႈၼႂ်းႁူးထမ်ႈသေတီႈတီႈ၊ဢမ်ႇၼၼ်ၵေႃႈၵႂႃႇမီးယူႇတၢင်ႇတီႈတၢင်ႇလႅၼ်တီႈၶႃႈဢေႃႈ။ မိူဝ်ႈဢၼ်ၸဝ်ႈပေႃႈၸဝ်ႈႁဝ်း တႃႇဝိတ်ႈ၊ ဢွၵ်ႇတိုၵ်းၵူၼ်းၸဝ်ႈႁဝ်းၼၼ်ႉၸိုင်၊ၵူၼ်းၵႃႈဢၼ်ငိၼ်းၶၢဝ်ႇသိုၵ်းၼၼ်ႉတၵ်းဢွၼ်ၵၼ်လၢတ်ႈဝႃႈ၊ ‘ၵူၼ်း ဢပႃႉသလုမ်ႇ၊ တူၵ်းသုမ်းယဝ်ႉ၊’ ဝႃႈၼႆတီႈၶႃႈဢေႃႈ။-
မိူဝ်ႈၼၼ်ႉ၊ၵေႃႉဢၼ်ႁတ်းႁၢၼ်သေပိူၼ်ႈ၊မီးၸႂ်ႁၢႆႉမိူၼ်သၢင်ႇသီႈၼၼ်ႉၸႂ်တၵ်းလုတီႈၶႃႈဢေႃႈ။ လွင်ႈမၼ်းၸမ်ႉ၊ၵူၼ်းမဵဝ်း ဢိသရေး၊ တင်းသဵင်ႈတင်းလူင်ႁုလွင်ႈဢၼ်ၸဝ်ႈပေႃႈၸဝ်ႈႁဝ်း၊ႁုႁၼ်ၵူၼ်းသိုၵ်းဢၼ်ႁႅင်းယႂ်ႇဢိၵ်ႇတင်းၵူၼ်းမၼ်းတင်းလၢႆပဵၼ်ၵူၼ်းသိုၵ်းဢၼ်ႁႅင်းၵႅၼ်ႇႁႅင်းၶႅင်ၼႃႇၼၼ်ႉတီႈၶႃႈဢေႃႈ။-
တၢင်းၵျၢမ်ႇဢၼ်ၶႃႈၸဝ်ႈပၼ်ၼၼ်ႉၸမ်ႉ၊ၸဝ်ႈႁဝ်းႁွင်ႉဢဝ်ၵူၼ်းမဵဝ်း ဢိသရေး၊ တင်းသဵင်ႈတင်းလူင်ၵႃႈၼႂ်းမိူင်း ဢိသရေး၊ လုၵ်ႉသေၵႃႈတီႈၸဵင်ႇသုတ်းၽၢႆႇၼိုင်ႈၵႂႃႇတေႃႇထိုင်ႁွတ်ႈၸဵင်ႇသုတ်းတၢင်ႇၽၢႆႇ၊ဢၼ်ၼပ်ႉဢၢၼ်ႇၼမ်ၼႃႇမိူၼ်ၸိူဝ်ႉၼင်ႇမဵတ်ႉသၢႆးၵႃႈတီႈႁၢတ်ႇသၢႆးပၢင်ႇလၢႆႇၼၼ်ႉ၊ႁႂ်ႈၸုတုမ်ၵၼ်မႃးသေယဝ်ႉ၊တူဝ်ၸဝ်ႈႁဝ်းဢွၼ်ႁူဝ်ၶီႇသိုၵ်းၵႂႃႇသေၵမ်း။-
ႁဝ်းတၵ်းထူပ်းႁၼ် တႃႇဝိတ်ႈ၊ သေတီႈတီႈလႄႈတိုၵ်းတေႃးမၼ်းမိူၼ်ၼမ်ႉၼၢႆးတူၵ်းသႂ်ႇၵႃႈၼိူဝ်လိၼ်လႄႈၸႃႉၸဵမ်တူဝ်မၼ်းလႄႈၵူၼ်းမၼ်းတင်းလၢႆတၵ်းဢမ်ႇႁႂ်ႈလႆႈၵိုတ်းလႆႈၵျၢၼ်ႇသေၵေႃႉသေၵူၼ်းတီႈၶႃႈ။-
ပေႃးမၼ်းႁူၼ်လင်ပၢႆႈၶဝ်ႈဝဵင်းသေဝဵင်းဝဵင်းၸိုင်၊ၵူၼ်းႁဝ်းတင်းလၢႆတၵ်းဢွၼ်ၵၼ်ဢဝ်ၸိူၵ်ႈၼမ်ၼႃႇမႃးသေယဝ်ႉ၊တိုတ်ႉၸၼ်ဢဝ်ဝဵင်းလူင်ၼၼ်ႉတူၵ်းပႅတ်ႈၵႃႈတႂ်ႈႁူၺ်ႈတေႃႇထိုင်ႁွတ်ႈမၢၵ်ႇႁိၼ်ဢွၼ်ႇၵေႃႈဢမ်ႇလႆႈၵိုတ်းလႆႈၵျၢၼ်ႇဝႆႉၵႃႈတီႈၼၼ်ႈသေလုၵ်ႈတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ဢပႃႉသလုမ်ႇ၊ ဢိၵ်ႇတင်းၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢွၼ်ၵၼ်လၢတ်ႈလႄႈဝႃႈ၊ “တၢင်းၵျၢမ်ႇဢၼ် ႁုသေး၊ ပၼ်ၼၼ်ႉယဵင်ႈၶႅၼ်းလီၼႃႇသေတၢင်းၵျၢမ်ႇ ဢႁိသေႃႇၽေးလႃႉ၊ ပၼ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။ လွင်ႈမၼ်းၸမ်ႉ၊ ထႃႇဝရႃႉၽြႃး၊ ႁဵတ်းႁႂ်ႈတၢင်းၵျၢမ်ႇဢၼ်လီ ဢႁိသေႃႇၽေးလႃႉ၊ ၼၼ်ႉလႆႈလုသုမ်းၵႂႃႇလႄႈသမ်ႉႁႂ်ႈတၢင်းလုတၢင်းလႅဝ်မႃးထိုင်တီႈ ဢပႃႉသလုမ်ႇ၊ ၼၼ်ႉဢေႃႈ။
မိူဝ်ႈၼၼ်ႉ၊ ႁုသေး၊ မွၵ်ႇလၢတ်ႈတီႈယဵၸ်ႈပရေႃးႁဵၵ်ႈ ၸႃႇတုၵ်ႉ၊ ဢိၵ်ႇတင်းယဵၸ်ႈပရေႃးႁဵၵ်ႈ ဢပျႃႇထႃႇ၊ လွင်ႈဢၼ်မၼ်းပၼ်တၢင်းၵျၢမ်ႇတီႈ ဢပႃႉသလုမ်ႇ၊ ယဝ်ႉၸိူဝ်ႉၼင်ႇႁိုဝ်ဢိၵ်ႇတင်း ဢႁိသေႃႇၽေးလႃႉ၊ သမ်ႉပၼ်တၢင်းၵျၢမ်ႇယဝ်ႉၸိူဝ်ႉၼင်ႇႁိုဝ်ၼၼ်ႉဢေႃႈ။-
ႁုသေး၊ ၸင်ႇသင်ႇလၢတ်ႈထႅင်ႈလႄႈဝႃႈ၊ “တေႃႈလဵဝ်ၼႆႉပွႆႇၸႂ်ႉၵူၼ်းၵႂႃႇၸူးတီႈၶုၼ်ႁေႃၶမ်း တႃႇဝိတ်ႈ၊ ၶၼ်ၶၼ်ၽႂ်းၽႂ်းလႄႈမွၵ်ႇလၢတ်ႈဝႃႈ၊ ‘ၶိုၼ်းၼႆႉယႃႇပေၵိုတ်းသဝ်းယူႇတီႈတႃႈၶၢမ်ႈၼမ်ႉၵႃႈၼႂ်းထိူၼ်ႇၼၼ်ႉသေၵမ်း။ ၶၢမ်ႈၵႂႃႇၶၼ်ၶၼ်ၽႂ်းၽႂ်းပုၼ်ႈလွင်ႈၼင်ႇႁိုဝ်ၶုၼ်ႁေႃၶမ်း၊ဢိၵ်ႇတင်းၵူၼ်းမၼ်းတင်းလၢႆတၵ်းဢမ်ႇလႆႈၶၢမ်ႇတၢင်းဢၼ်တိဢဝ်လႄႈၶၢမ်ႇတၢင်းဢၼ်ဢဝ်တၢႆၼၼ်ႉသေၵမ်း၊’” ဝႃႈၼင်ႇၼႆဢေႃႈ။
ယေႃးၼႀၼ်ႇ၊ ဢိၵ်ႇတင်း ဢႁိမတ်ႉ၊ ၵေႃႈပႂ်ႉထႃႈၵႃႈတီႈၼမ်ႉဢွၵ်ႇႁူး ဢႅၼ်ႇရေႃႇၵေးလႃႉ၊ ၵႃႈတီႈႁိမ်းၶွပ်ႇလႅၼ်လိၼ်ဝဵင်း ယေႇရုသလႅမ်ႇ၊ ယူႇဢေႃႈ။ ၶဝ်သွင်ၵေႃႉၼၼ်ႉၵူဝ်ပိူၼ်ႈႁၼ်ၶဝ်လႄႈဢမ်ႇႁတ်းၶဝ်ႈၵႃႈၼႂ်းဝဵင်းၼၼ်ႉဢေႃႈ။ ၶႃႈမႄႈယိင်းဢွၼ်ႇၵေႃႉၼိုင်ႈယၢမ်ႈၵႂႃႇလၢတ်ႈၼႄလွင်ႈမၼ်းတီႈၶဝ်လႄႈၶဝ်ၸင်ႇၵႂႃႇမွၵ်ႇလၢတ်ႈတီႈၶုၼ်ႁေႃၶမ်း တႃႇဝိတ်ႈ၊ ဢေႃႈ။-
ၵူၺ်းၵႃႈ၊ၼႂ်းဝၼ်းၼၼ်ႉၵူၼ်းဢွၼ်ႇၵေႃႉၼိုင်ႈႁၼ်ၶဝ်လႄႈလဝ်ႈလၢတ်ႈတီႈ ဢပႃႉသလုမ်ႇ၊ ဢေႃႈ။ ၶဝ်ၼၼ်ႉၵႂႃႇၶၼ်ၶၼ်ၽႂ်းၽႂ်းႁႂ်ႈလႆႈၵႂႃႇတဵတ်ႇမႅပ်းၵႃႈၼႂ်းႁိူၼ်းၵူၼ်းၵေႃႉၼိုင်ႈၵႃႈတီႈဝဵင်း ပႃႇႁုရိမ်း၊ ပုၼ်ႉဢေႃႈ။ ၸဝ်ႈႁိူၼ်းၼၼ်ႉမီးၼမ်ႉမေႃႇၵႃႈႁိမ်းႁိူၼ်းမၼ်းလႄႈၶဝ်လူင်းၵႂႃႇယူႇၼႂ်းၼမ်ႉမေႃႇၼၼ်ႉဢေႃႈ။-
မေးမၼ်းၼၼ်ႉဢဝ်ၽႃႁူမ်ႇႁူမ်ႇပၢၵ်ႇၼမ်ႉမေႃႇဝႆႉသေယဝ်ႉ၊ဢဝ်ၶဝ်ႈပိူၵ်ႇၽႄႇတၢၵ်ႇဝႆႉၵႃႈၼိူဝ်ၼၼ်ႉလႄႈဢမ်ႇမီးၽူႈလႂ်ႁုႁၼ်လွင်ႈၼၼ်ႉလႃးလႃး။-
ၶုၼ်ဢၼ်ပွင်ၵၢၼ်ႁေႃ ဢပႃႉသလုမ်ႇ၊ တင်းလၢႆႁွတ်ႈမႃးၵႃႈတီႈႁိူၼ်းၼၼ်ႉလႄႈထၢမ်မႄႈယိင်းၼၼ်ႉလႄႈဝႃႈ၊ “ ဢႁိမတ်ႉ၊ တင်း ယေႃးၼႀၼ်ႇ၊ မီးၵႃႈလႂ်၊” ဝႃႈၼင်ႇၼႆလႄႈ၊မႄႈယိင်းၼၼ်ႉၶိုၼ်ႈလၢတ်ႈလႄႈဝႃႈ၊ “ၶဝ်ၶၢမ်ႈၵႂႃႇၽၢႆႇပုၼ်ႉၼမ်ႉႁွင်ႈယဝ်ႉ၊” ဝႃႈၼင်ႇၼႆဢေႃႈ။ မိူဝ်ႈဢၼ်ၶဝ်သွၵ်ႈႁႃဢမ်ႇထူပ်းဢမ်ႇႁၼ်ၼၼ်ႉၸိုင်၊ၶဝ်ၶိုၼ်းမိူဝ်းၵႂႃႇၵႃႈတီႈဝဵင်း ယေႇရုသလႅမ်ႇ၊ သေဢေႃႈ။-
လိုၼ်းသေဢၼ်ၶဝ်ၶိုၼ်းမိူဝ်းၵႂႃႇယဝ်ႉၼၼ်ႉ၊ ဢႁိမတ်ႉ၊ တင်း ယေႃးၼႀၼ်ႇ၊ ၵေႃႈဢွၵ်ႇသေၵႃႈၼႂ်းၼမ်ႉမေႃႇမႃးလႄႈၵႂႃႇလဝ်ႈလၢတ်ႈတီႈၶုၼ်ႁေႃၶမ်း တႃႇဝိတ်ႈ၊ လႄႈဝႃႈ၊ “ၶၢမ်ႈၵႂႃႇၵႃႈတီႈၽၢႆႇပုၼ်ႉၼမ်ႉမႄႈၶၼ်ၶၼ်ၽႂ်းၽႂ်းတႃႉ။ ဢႁိသေႃႇၽေးလႃႉ၊ ၶိုင်ပွင်ၸိူဝ်ႉၼင်ႇၼႆၶတ်းၵၼ်တင်းၸဝ်ႈႁဝ်းတီႈၶႃႈယဝ်ႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ တႃႇဝိတ်ႈ၊ ဢိၵ်ႇတင်းၵူၼ်းမၼ်းၸိူဝ်းၼၼ်ႉဢွၼ်ၵၼ်ၶၢမ်ႈၼမ်ႉ ယေႃးတၢၼ်ႇ၊ လႄႈမိူဝ်ႈဢၼ်မိူင်းလႅင်းၸိုင်၊ၵေႃႉဢၼ်ဢမ်ႇပႆႇလႆႈၶၢမ်ႈၼမ်ႉ ယေႃးတၢၼ်ႇ၊ ၼၼ်ႉဢမ်ႇမီးသေၵေႃႉသေၵူၼ်းယဝ်ႉဢေႃႈ။
မိူဝ်ႈဢၼ် ဢႁိသေႃႇၽေးလႃႉ၊ ႁုလွင်ႈဢၼ်ဢမ်ႇႁဵတ်းၸွမ်းတၢင်းၵျၢမ်ႇမၼ်းၼၼ်ႉၸိုင်၊မၼ်းႁၢင်ႈၵွပ်းမႃႉလီႈမၼ်းသေယဝ်ႉ၊ပွၵ်ႈမိူဝ်းၵႂႃႇၵႃႈတီႈဝဵင်းတီႈယူႇမၼ်းသေဢေႃႈ။ လိုၼ်းသေဢၼ်မၼ်းသၢင်ႈႁဵတ်းၵၢၼ်ၼႃႈႁိူၼ်းမၼ်းယဝ်ႉတူဝ်ႈယဝ်ႉၼၼ်ႉၸိုင်၊ဢဝ်ၸိူၵ်ႈၶႅၼ်ၶေႃးတူဝ်ၸဝ်ႈၵဝ်ႇလႄႈတၢႆၵႂႃႇသေဢေႃႈ။ မၼ်းလႆႈၶၢမ်ႇတၢင်းဢၼ်သၢင်းၵျူဝ်ႇၵႃႈၼႂ်းပႃႇႁဵဝ်ႈပူႇမွၼ်ႇမၼ်းၸိူဝ်းၼၼ်ႉဢေႃႈ။
တႃႇဝိတ်ႈ၊ ႁွတ်ႈထိုင်ၵႃႈတီႈဝဵင်း မႁႃႇၼိမ်ႇ၊ ယၢမ်းမိူဝ်ႈဢၼ် ဢပႃႉသလုမ်ႇ၊ ဢိၵ်ႇတင်းၵူၼ်း ဢိသရေး၊ တင်းလၢႆၶၢမ်ႈပူၼ်ႉၼမ်ႉ ယေႃးတၢၼ်ႇ၊ ယဝ်ႉၼၼ်ႉဢေႃႈ။-
ဢပႃႉသလုမ်ႇ၊ ၶၢၼ်းဝႆႉ ဢႃႇမသႃႇ၊ ၵႃႈၼႂ်းဢရႃႇၸဝ်ႈၵွၼ်းတပ်ႉသိုၵ်းတၢင်တူဝ် ယွႃႇၽႃႉ၊ ဢေႃႈ။ ဢႃႇမသႃႇ၊ ၼၼ်ႉပဵၼ်လုၵ်ႈၸၢႆး ယေႇသႃႇ၊ ၵူၼ်းမဵဝ်း ဢိသမေႇလႃႉ၊ လႄႈ၊မႄႈမၼ်းပဵၼ် ဢၽိၵေးလႃႉ၊ ဢၼ်ပဵၼ်လုၵ်ႈယိင်း ၼႃႇႁတ်ႉ၊ သမ်ႉပဵၼ်ပီႈၼၢင်း ၸေႇရုယႃႇ၊ မႄႈ ယွႃႇၽႃႉ၊ ၶဝ်ၼၼ်ႉဢေႃႈ။-
ဢပႃႉသလုမ်ႇ၊ ဢိၵ်ႇတင်းၵူၼ်းမၼ်းၸိူဝ်းၼၼ်ႉၶျႃးပၢင်တပ်ႉၶဝ်ၵႃႈတီႈမိူင်း ၵိလတ်ႉ၊ ဢေႃႈ။
မိူဝ်ႈဢၼ် တႃႇဝိတ်ႈ၊ ႁွတ်ႈထိုင်ၵႃႈတီႈဝဵင်း မႁႃႇၼိမ်ႇ၊ ၼၼ်ႉၸိုင်၊ သေႃႇၽိ၊ လုၵ်ႈၸၢႆး ၼႃႇႁတ်ႉ၊ ၵူၼ်းဝဵင်း ရပ်ႉပႃႇ၊ မိူင်း ဢမ်ႇမုၼ်ႇ၊ ဢိၵ်ႇတင်း မႃႇၶိရႃႉ၊ လုၵ်ႈၸၢႆး ဢမျေးလႃႉ၊ ၵူၼ်းဝဵင်း လေႃႇတေႇပႃႇ၊ တင်း ပႃႇၸိလေး၊ ၵူၼ်းဝဵင်း ရေႃႇၵေႇလိမ်း၊ မိူင်း ၵိလတ်ႉ၊ ၸိူဝ်းၼၼ်ႉမႃးႁပ်ႉႁူဝ်တၢင်း တႃႇဝိတ်ႈ၊ ဢေႃႈ။-
ၶဝ်ၸိူဝ်းၼၼ်ႉဢွၼ်ၵၼ်ပႃးၽႃႈသိူဝ်ႇလႂ်၊ၵွပ်းလႂ်၊မေႃႈလိၼ်လႂ်၊ဢိၵ်ႇလူၺ်ႈၵၼ်တင်းၶဝ်ႈၼမ်ႉတၢင်းၵိၼ်ဢၼ်ပဵၼ်၊ၶဝ်ႈၵျုင်ႇ၊ၶဝ်ႈမုယေႃး၊ၽွင်ၶဝ်ႈမုၼ်း၊ၶဝ်ႈတႅၵ်ႇ၊ထူဝ်ႇယၢဝ်း၊ထူဝ်ႇတႅပ်ႇ၊ထူဝ်ႇလိၼ်၊-
ၼမ်ႉၽိုင်ႈ၊ၼမ်ႉၼူမ်းၵၢမ်ႈ၊ၶႆၼမ်ႉၼူမ်း၊ဢိၵ်ႇတင်းသူဝ်းလႂ်၊ပုၼ်ႈ တႃႇဝိတ်ႈ၊ ဢိၵ်ႇတင်းၵူၼ်းမၼ်းတင်းလၢႆတၵ်းၵိၼ်ၼၼ်ႉဢေႃႈ။ လွင်ႈမၼ်းၸမ်ႉ၊ၶဝ်ႁုဝႃႈ၊ “ၵူၼ်းတင်းလၢႆဢိုပ်းတၢင်းၵိၼ်ၼႃႇ၊ယၢၵ်ႇၼမ်ႉၼႃႇ၊လႆႈယူႇၵႃႈၼႂ်းထိူၼ်ႇလႄႈႁိူဝ်ႉၼူၼ်းၼႃႇယဝ်ႉ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်း တႃႇဝိတ်ႈ၊ ဢဝ်ၵူၼ်းမၼ်းၵႃႈမီးၸုတုမ်ၵၼ်မႃးသေယဝ်ႉ၊ၼပ်ႉဢၢၼ်ႇၽႄႁဵတ်းပဵၼ်မူႇယေႈႁဵင်၊မူႇယေႈပၢၵ်ႇႁင်းၽႂ်ႁင်းမၼ်းသေလႄႈၶၢၼ်းၶုၼ်သိုၵ်းႁၢၼ်တင်းလၢႆ ႁႂ်ႈလႆဢုပ်ႉၼိူဝ်မူႇတပ်ႉသိုၵ်းၸိူဝ်းၼၼ်ႉဢေႃႈ။-
မိူဝ်ႈၼၼ်ႉ၊ တႃႇဝိတ်ႈ၊ ႁဵတ်းပဵၼ်သၢမ်မုၵ်ႉသၢမ်ၸိူဝ်းလႄႈႁႂ်ႈ ယွႃႇၽႃႉ၊ ဢုပ်ႉထိင်းမုၵ်ႉၼိုင်ႈ၊ၼွင်ႉၸၢႆးမၼ်း ဢၽိသေး၊ ဢုပ်ႉထိင်းမုၵ်ႉၼိုင်ႈ၊ႁႂ်ႈ ဢိတ်ႉတေႇ၊ ၵူၼ်း ၵတ်ႉတိ၊ ၼၼ်ႉဢုပ်ႉထိင်းမုၵ်ႉၼိုင်ႈလႄႈၶုၼ်ႁေႃၶမ်းလၢတ်ႈတီႈၵူၼ်းမၼ်းတင်းလၢႆလႄႈဝႃႈ၊ “တူဝ်ၵဝ်တၵ်းၶီႇသိုၵ်းၵႂႃႇလူၺ်ႈၵၼ်တင်းသူဢေႃႈ၊” ဝႃႈၼင်ႇၼႆဢေႃႈ။
ၶဝ်ၸိူဝ်းၼၼ်ႉဢွၼ်ၵၼ်လဝ်ႈလၢတ်ႈလႄႈဝႃႈ၊ “တူဝ်ၸဝ်ႈႁဝ်းဢမ်ႇထုၵ်ႇလီၵႂႃႇတီႈၶႃႈ။ လွင်ႈမၼ်းၸမ်ႉ၊ပေႃးၶႃႈၸဝ်ႈႁဝ်းၶဝ်ဢွၵ်ႇပၢႆႈသေၵေႃႈ၊ၶဝ်ဢမ်ႇဝႆႉဢယေးၵႃႈသင်တီႈၶႃႈ။ ပိၵ်ႉသမ်ႉၶႃႈၸဝ်ႈႁဝ်းၶဝ်တၢႆၵႂႃႇၶိုင်ႈၼိုင်ႈသေၵေႃႈၶဝ်တေဢမ်ႇဝႆႉဢယေးၵႃႈသင်တီႈၶႃႈ။ ၸဝ်ႈႁဝ်းၸမ်ႉ၊မျၢတ်ႈၼႃႇသေၶႃႈၸဝ်ႈႁဝ်းၶဝ်မိုၼ်ႇၼိုင်ႈတီႈၶႃႈဢေႃႈ။ ပေႃးၸဝ်ႈႁဝ်းယူႇၵႃႈၼႂ်းဝဵင်းလႄႈၸွႆႈၵမ်ႉၶႃႈၸဝ်ႈႁဝ်းၶဝ်ၸိုင်၊ယဵင်ႈၶႅၼ်းတေလီတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်း တႃႇဝိတ်ႈ၊ မီးဢမိင်ႉလႄႈဝႃႈ၊ “ၵႃႈဢၼ်သူထၢင်ႇပဵၼ်ဢၼ်လီၼၼ်ႉၵဝ်တၵ်းႁဵတ်းၸွမ်းဢေႃႈ၊” ဝႃႈၼင်ႇၼႆသေယဝ်ႉ၊ၸုၵ်းယူႇၵႃႈတီႈႁူးၽၵ်းတူယၢမ်းမိူဝ်ႈဢၼ်ၵူၼ်းမၼ်းတင်းလၢႆ၊ႁဵတ်းပဵၼ်တပ်ႉယေႈပၢၵ်ႇ၊မူႇတပ်ႉယေႈႁဵင်လႄႈၶီႇသိုၵ်းဢွၵ်ႇၵႂႃႇယူႇၼၼ်ႉဢေႃႈ။-
မၼ်းပူင်ဢမိင်ႉတီႈ ယွႃႇၽႃႉ၊ဢၽိသေး၊ တင်း ဢိတ်ႉတေႇ၊ ၸိူဝ်းၼၼ်ႉလႄႈဝႃႈ၊ “ထွၵ်ႈလူၺ်ႈၼႃႈၵဝ်လႄႈယႃႇပေႁဵတ်းၽေးသႂ်ႇတီႈ ဢပႃႉသလုမ်ႇ၊ ၼၼ်ႉသေၵမ်း၊” ဝႃႈၼင်ႇၼႆဢေႃႈ။ တပ်ႉသိုၵ်းတင်းလၢႆလႆႈငိၼ်းၵႂၢမ်းဢၼ်ၶုၼ်ႁေႃၶမ်းပူင်ဢမိင်ႉၸိူဝ်ႉၼင်ႇၼၼ်ၵႃႈတီႈၶုၼ်ဢၼ်ပွင်ၵၢၼ်ၸိူဝ်းၼၼ်ႉဢေႃႈ။
တပ်ႉသိုၵ်းၶုၼ်ႁေႃၶမ်း တႃႇဝိတ်ႈ၊ ၼၼ်ႉဢွၵ်ႇၵႂႃႇၸူးတီႈပၢင်ႇတီႈပိုၼ်ႁႂ်ႈလႆႈတိုၵ်းတေႃးၵူၼ်းမဵဝ်း ဢိသရေး၊ ၵႃႈၼႂ်းပႃႇမႆႉပႃႇတွၵ်ႇထိူၼ်ႇ ဢေႇၽရိမ်ႇ၊ ဢေႃႈ။-
ၵူၼ်းမဵဝ်း ဢိသရေး၊ တူၵ်းသုမ်းၵႂႃႇၵႃႈတႂ်ႈမိုဝ်းၵူၼ်းသိုၵ်း တႃႇဝိတ်ႈ၊ ၸိူဝ်းၼၼ်ႉလႄႈၼႂ်းဝၼ်းၼၼ်ႉမီးတၢင်းဢၼ်ၶႃႈၽၼ်းဢဝ်တၢႆၵၼ်ၼမ်ၼႃႇလႄႈၵူၼ်းတၢႆသွင်မိုၼ်ႇၵေႃႉဢေႃႈ။-
ၼႃႈသိုၵ်းၼၼ်ႉၸွတ်ႇတူဝ်ႈၵႂႃႇၵႃႈတီႈပၢင်ႇတီႈပဵင်းလႄႈၶဝ်ၸိူဝ်းဢၼ်တၢႆလူၺ်ႈပႃႇမႆႉပႃႇထိူၼ်ႇၼၼ်ႉၼမ်ၼႃႇသေတၢႆလူၺ်ႈလၢပ်ႇလူၺ်ႈလႅဝ်းဢေႃႈ။
ဢပႃႉသလုမ်ႇ၊ ၼၼ်ႉႁူပ်ႉထူပ်းၵူၼ်း တႃႇဝိတ်ႈ၊ ၵမ်ႈၽွင်ႈဢေႃႈ။ မၼ်းၶီႇမႃႉလေႃႈသေလႄႈ၊မိူဝ်ႈဢၼ်မႃႉလေႃႈလၼ်ႈတႂ်ႈတူၼ်ႈမႆႉၼိမ်ၵႂႃႇၼၼ်ႉၵွၵ်းႁူဝ် ဢပႃႉသလုမ်ႇ၊ ၶမ်ၶဝ်ႈၼႂ်းၵိင်ႇမႆႉၼိမ်သေယဝ်ႉ၊မႃႉလေႃႈၼၼ်ႉလႅၼ်ႈဢွၵ်ႇၵႂႃႇလႄႈတူဝ်မၼ်းၼၼ်ႉႁွႆႈၽႅၼ်ဝႆႉယူႇဢေႃႈ။-
ၼႂ်းၵူၼ်း တႃႇဝိတ်ႈ၊ ၸိူဝ်းၼၼ်ႉၵေႃႉၼိုင်ႈႁၼ်လႄႈၵႂႃႇမွၵ်ႇလၢတ်ႈတီႈ ယွႃႇၽႃႉ၊ လႄႈဝႃႈ၊ “ၵဝ်ၶႃႈႁၼ် ဢပႃႉသလုမ်ႇ၊ ႁွႆႈၽႅၼ်ယူႇၵႃႈတီႈတူၼ်ႈမႆႉၼိမ်ၼၼ်ႉၶႃႈဢေႃႈ၊” ဝႃႈၼင်ႇၼႆဢေႃႈ။
ယွႃႇၽႃႉ၊ ၵေႃႈလၢတ်ႈလႄႈဝႃႈ၊ “ပေႃးမႂ်းႁၼ်မၼ်းမႃးယဝ်ႉၸိုင်၊ႁဵတ်းသင်လႄႈမႂ်းဢမ်ႇဢဝ်မၼ်းတၢႆၵႃႈတီႈၼၼ်ႈပႅတ်ႈၵမ်းလဵဝ်ၼင်ႇႁိုဝ်။ ပေႃးမၼ်းတၢႆၸိုင်၊တူဝ်ၵဝ်တၵ်းပၼ်ငိုၼ်းသိပ်းၶႅပ်းတင်းသၢႆႁတ်ႉဢႅဝ်တီႈမႂ်းဢေႃႈ၊” ဝႃႈၼင်ႇၼႆဢေႃႈ။
ၵေႃႉၼၼ်ႉၵေႃႈၶိုၼ်းလၢတ်ႈလႄႈဝႃႈ၊ “ပိၵ်ႉသမ်ႉၸဝ်ႈပၼ်ငိုၼ်းႁဵင်ၶႅပ်းသေၵေႃႈၵဝ်ၶႃႈယင်းတေဢမ်ႇဢဝ်တင်းၼိဝ်ႉမိုဝ်းၵဝ်ၶႃႈတိူဝ်ႉထုၵ်ႇလုၵ်ႈၸၢႆးၶုၼ်ႁေႃၶမ်းလႆႈၶႃႈ။ လွင်ႈမၼ်းၸမ်ႉ၊ႁဝ်းၶႃႈၵႃႈမီးလႆႈငိၼ်းၵႂၢမ်းဢၼ်ၶုၼ်ႁေႃၶမ်း တႃႇဝိတ်ႈ၊ ပူင်ဢမိင်ႉတီႈၸဝ်ႈႁဝ်း၊ဢိၵ်ႇတင်း ဢၽိသေး၊ တင်း ဢိတ်ႉတေႇ၊ ၼၼ်ႉလႄႈဝႃႈ၊ ‘ထွၵ်ႈလူၺ်ႈၼႃႈၵဝ်လႄႈသူယႃႇပေႁဵတ်းၽေးသႂ်ႇတီႈ ဢပႃႉသလုမ်ႇ၊ သေၵမ်း၊’ ဝႃႈၼင်ႇၼႆၼၼ်ႉၶႃႈဢေႃႈ။-
သင်ၵဝ်ၶႃႈပူၼ်ႉလိူဝ်ဢမိင်ႉၶုၼ်ႁေႃၶမ်းလႄႈဢဝ် ဢပႃႉသလုမ်ႇ၊ တၢႆၸိုင်၊ၶုၼ်ႁေႃၶမ်းတၵ်းငိၼ်းလွင်ႈတၢင်းၼၼ်ႉဢေႃႈ။ ၵွပ်ႈပိူဝ်ႈဢၼ်ၶုၼ်ႁေႃၶမ်းၸၢင်ႈႁုၸၢင်ႈႁၼ်လွင်ႈတၢင်းၵူႈၸိူဝ်ႉၵူႈမဵဝ်းၼၼ်ႉသေယဝ်ႉ၊ၸဝ်ႈႁဝ်းတၵ်းၵႅတ်ႇၶႄႁႄႉၵင်ႈပၼ်ၵဝ်ၶႃႈလႆႈဢမ်ႇၸႂ်ႈ၊” ဝႃႈၼင်ႇၼႆဢေႃႈ။
ယွႃႇၽႃႉ၊ လၢတ်ႈလႄႈဝႃႈ၊ “ၵဝ်ဢမ်ႇၶၢမ်ႇသုမ်းဢၶိင်ႇလူၺ်ႈၵၼ်တင်းမႂ်း၊” ဝႃႈၼင်ႇၼႆသေယဝ်ႉ၊ဢဝ်ႁွၵ်ႇပွတ်းသၢမ်မၢၵ်ႈၵႂႃႇတႅင်းသႂ်ႇႁူဝ်ဢူၵ်း ဢပႃႉသလုမ်ႇ၊ ပွင်ႇပိဝ်ၵႂႃႇယၢမ်းမိူဝ်ႈဢၼ်ဢသၢၵ်ႈမၼ်းယင်းတိုၵ်ႉလိပ်းလႄႈႁွႆႈၽႅၼ်ယူႇၵႃႈတီႈတူၼ်ႈမႆႉၼိမ်ၼၼ်ႉဢေႃႈ။-
ၵူၼ်းသိုၵ်း ယွႃႇၽႃႉ၊ သိပ်းၵေႃႉၵေႃႈမႃးဝႅင်းႁွပ်ႈသေယဝ်ႉ၊ႁဵတ်းသႂ်ႇတီႈ ဢပႃႉသလုမ်ႇ၊ ထၢၼ်ႈပေႃးတၢႆဢေႃႈ။
ယွႃႇၽႃႉ၊ ပူင်ဢမိင်ႉႁႂ်ႈပဝ်ႇတိုင်ႈၼႄးၶရႃႇဢၼ်ပၢင်တိုၵ်းသိုၵ်းထၢတ်ႇယဵၼ်ၼၼ်ႉလႄႈၵူၼ်းတပ်ႉသိုၵ်းမၼ်းတင်းလၢႆဢွၼ်ၵၼ်ပွၵ်ႈမႃးသေၵႃႈတီႈဢၼ်ၶဝ်လိုပ်ႈၸွမ်းလမ်းၸွမ်းၵူၼ်းမဵဝ်း ဢိသရေး၊ ၸိူဝ်းၼၼ်ႉဢေႃႈ။-
ၶဝ်ဢွၼ်ၵၼ်ဢဝ်တူဝ်တၢႆ ဢပႃႉသလုမ်ႇ၊ ၶျႃးတူၵ်းၵႃႈၼႂ်းလုၵ်းဢၼ်လိုၵ်ႉၼႃႇၵႃႈတီႈၼႂ်းထိူၼ်ႇသေယဝ်ႉ၊ဢဝ်မၢၵ်ႇႁိၼ်ၵွင်သႂ်ႇဝႆႉၵႃႈၼိူဝ်တူဝ်မၼ်းပဵၼ်ၵွင်လူင်ဝႆႉဢေႃႈ။ ၵူၼ်းမဵဝ်း ဢိသရေး၊ ၵႃႈမီးဢွၼ်ၵၼ်ပၢႆႈၵႂႃႇၸူးတီႈႁိူၼ်းၶဝ်ႁင်းၽႂ်ႁင်းမၼ်းသေဢေႃႈ။
ၼႂ်းၸူဝ်ႈဢၼ် ဢပႃႉသလုမ်ႇ၊ ယင်းဢသၢၵ်ႈလိပ်းယူႇၼၼ်ႉမၼ်းပူၵ်းသဝ်ဝႆႉပုၼ်ႈမၼ်းၵႃႈတီႈ ၶူင်ႈႁူၺ်ႈၶုၼ်ႁေႃၶမ်း၊ လႄႈဝႃႈ၊ “ၵဝ်ဢမ်ႇမီးလုၵ်ႈၸၢႆးပုၼ်ႈဢၼ်တၵ်းသိုပ်ႇၸိုဝ်ႈသိုပ်ႇသဵင်ၵဝ်ႁႂ်ႈမၼ်ႈၶိူင်ႇၵႂႃႇၼၼ်ႉ၊” ဝႃႈၼင်ႇၼႆဢေႃႈ။ မၼ်းႁွင်ႉႁဵၵ်ႈသဝ်ၼၼ်ႉၸွမ်းလူၺ်ႈၸိုဝ်ႈသဵင်မၼ်းလႄႈႁွင်ႉဝႃႈ၊ သဝ်ဢပႃႉသလုမ်ႇ၊ တေႃႇထိုင်ႁွတ်ႈဝၼ်းမိူဝ်ႈလဵဝ်ၼႆႉဢေႃႈ။
မိူဝ်ႈၼၼ်ႉ၊ ဢႁိမတ်ႉ၊ လုၵ်ႈၸၢႆး ၸႃႇတုၵ်ႉ၊ လၢတ်ႈတီႈ ယွႃႇၽႃႉ၊ လႄႈဝႃႈ၊ “ႁႂ်ႈၵဝ်ၶႃႈလႆႈၶုၼ်ႇလႅၼ်ႈၵႂႃႇလဝ်ႈလၢတ်ႈၶၢဝ်ႇငၢဝ်းဢၼ်လီၵႃႈတီႈၶုၼ်ႁေႃၶမ်းလွင်ႈဢၼ် ထႃႇဝရႃႉၽြႃး၊ ၵႄႇသႄႇဢဝ်မၼ်းလွတ်ႈသေၵႃႈၼႂ်းမိုဝ်းရၢၼ်ႇသူႇၼၼ်ႉသေၵမ်း၊” ဝႃႈၼင်ႇၼႆဢေႃႈ။-
ယွႃႇၽႃႉ၊ ၶိုၼ်းလၢတ်ႈလႄႈဝႃႈ၊ “ဝၼ်းမိူဝ်ႈၼႆႉမႂ်းဢမ်ႇလႆႈၵႂႃႇလၢတ်ႈၶၢဝ်ႇငၢဝ်းဢၼ်လီသေၸိူဝ်ႉသေမဵဝ်း။ တၵ်းလႆႈၵႂႃႇလၢတ်ႈတၢင်ႇမိူဝ်ႈတၢင်ႇဝၼ်းဢေႃႈ။ ဢမ်ႇလႆႈလဝ်ႈလၢတ်ႈၼႂ်းဝၼ်းမိူဝ်ႈၼႆႉ ၵွပ်ႈပိူဝ်ႈလုၵ်ႈၸၢႆးၶုၼ်ႁေႃၶမ်းတၢႆၼၼ်ႉဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉမၼ်းလၢတ်ႈတီႈၶႃႈမၼ်းၵူၼ်းမဵဝ်း ဢေႇတီႇဢူဝ်းပီးယႃး၊ ၼၼ်ႉလႄႈဝႃႈ၊ “မႂ်းၵႂႃႇလဝ်ႈလၢတ်ႈတီႈၶုၼ်ႁေႃၶမ်းလွင်ႈဢၼ်မႂ်းႁၼ်ၼၼ်ႉတႃႉ၊” ဝႃႈၼင်ႇၼႆလႄႈ၊ၶႃႈၼၼ်ႉၵူမ်ႈႁူဝ်သေယဝ်ႉ၊ၶုၼ်ႇလႅၼ်ႈဢွၵ်ႇၵႂႃႇဢေႃႈ။
ဢႁိမတ်ႉ၊ သမ်ႉယွၼ်းဢၶႂၢင်ႉတီႈ ယွႃႇၽႃႉ၊ ထႅင်ႈလႄႈဝႃႈ၊ “ပိၵ်ႉသမ်ႉဝႃႈၼၼ်သေၵေႃႈႁႂ်ႈၵဝ်ၶႃႈလႆႈၵႂႃႇလဝ်ႈလၢတ်ႈၶၢဝ်ႇငၢဝ်းၼၼ်ႉသေၵမ်း၊” ဝႃႈၼင်ႇၼႆလႄႈ၊ ယွႃႇၽႃႉ၊ ၶိုၼ်းလၢတ်ႈလႄႈဝႃႈ။ “လုၵ်ႈၸၢႆးၵဝ်႟။ မႂ်းၶႂ်ႈၶုၼ်ႇလႅၼ်ႈၵႂႃႇႁဵတ်းသင်။ မႂ်းတၵ်းတေလႆႈၵႃႈၶၼ်ပုၼ်ႈၶၢဝ်ႇငၢဝ်းၼၼ်ႉၵေႃႈဢမ်ႇၸႂ်ႈ၊” ဝႃႈၼင်ႇၼႆဢေႃႈ။
ဢႁိမတ်ႉ၊ သမ်ႉလၢတ်ႈလႄႈဝႃႈ၊ “ပိၵ်ႉသမ်ႉဝႃႈတေပဵၼ်ၵႃႈသင်မႃးၵေႃႈလီယဝ်ႉ။ ၵဝ်ၶႃႈၶႂ်ႈၶုၼ်ႇလႅၼ်ႈၵႂႃႇၶႃႈဢေႃႈ၊” ဝႃႈၼင်ႇၼႆလႄႈ၊ ယွႃႇၽႃႉ၊ ၵေႃႈဝႃႈ၊ “ၵႂႃႇတႃႉ၊” ဝႃႈၼင်ႇၼႆဢေႃႈ။ ဢႁိမတ်ႉ၊ ၵေႃႈၶုၼ်ႇလႅၼ်ႈလူင်းၸွမ်းၶူင်ႈႁူၺ်ႈၼမ်ႉ ယေႃးတၢၼ်ႇ၊ ၵႂႃႇလႄႈပူၼ်ႉၶႃႈၵေႃႉၼၼ်ႉၵႂႃႇဢေႃႈ။
တႃႇဝိတ်ႈ၊ ၼင်ႈယူႇၵႃႈၼႂ်းဝူင်ႈၵၢင်ၽၵ်းတူဝဵင်းသွင်ထၢပ်ႈယူႇဢေႃႈ။ ၵူၼ်းပႂ်ႉယၢမ်းၶိုၼ်ႈၵႂႃႇၵႃႈၼိူဝ်ပၢႆလမ်းဝဵင်းလႄႈၸုၵ်းၵႃႈၼိူဝ်ၸွမ်ၼိူဝ်ၵုင်းၽၵ်းတူဝဵင်းသေယဝ်ႉ၊မုင်ႈတူၺ်းလႄႈႁၼ်ၵူၼ်းၶုၼ်ႇလႅၼ်ႈမႃးၵေႃႉလဵဝ်ၵူၺ်းမၼ်းယူႇဢေႃႈ။-
ၵူၼ်းပႂ်ႉယၢမ်းၼၼ်ႉႁွင်ႉပၢဝ်ႇလဝ်ႈလၢတ်ႈတီႈၶုၼ်ႁေႃၶမ်းဢေႃႈ။ ၶုၼ်ႁေႃၶမ်းၵေႃႈမီးဢမိင်ႉလႄႈဝႃႈ၊ “ပေႃးမၼ်းၶုၼ်ႇလႅၼ်ႈမႃးၵေႃႉလဵဝ်ၵူၺ်းၸိုင်၊ၸၢင်ႈပႃးၶၢဝ်ႇငၢဝ်းဢၼ်လီမႃးဢေႃႈ၊” ဝႃႈၼင်ႇၼႆဢေႃႈ။ ၵေႃႉဢၼ်ၶုၼ်ႇလႅၼ်ႈၼၼ်ႉႁွတ်ႈထိုင်ၸမ်မႃးယူႇတိၵ်းတိၵ်းဢေႃႈ။
မိူဝ်ႈၼၼ်ႉ၊ၵူၼ်းပႂ်ႉယၢမ်းသမ်ႉႁၼ်တၢင်ႇၵေႃႉၶုၼ်ႇလႅၼ်ႈမႃးထႅင်ႈၵေႃႉလဵဝ်ၵူၺ်းလႄႈမၼ်းၸင်ႇႁွင်ႉပၢဝ်ႇမွၵ်ႇလၢတ်ႈတီႈၵူၼ်းပႂ်ႉၽၵ်းတူလႄႈဝႃႈ၊ “တူၺ်းလူး။ ၵူၼ်းတၢင်ႇၵေႃႉၶုၼ်ႇလႅၼ်ႈမႃးထႅင်ႈယဝ်ႉ၊” ဝႃႈၼင်ႇၼႆဢေႃႈ။ ၶုၼ်ႁေႃၶမ်းသမ်ႉမီးဢမိင်ႉလႄႈဝႃႈ၊ “ၵေႃႉၼႆႉၵေႃႈပႃးဢဝ်ၶၢဝ်ႇငၢဝ်းဢၼ်လီမႃးဢေႃႈ၊” ဝႃႈၼင်ႇၼႆဢေႃႈ။
ၵူၼ်းပႂ်ႉယၢမ်းၼၼ်ႉလဝ်ႈလၢတ်ႈလႄႈဝႃႈ၊ “ၶႃႈၸဝ်ႈထၢင်ႇၵေႃႉဢွၼ်တၢင်းၼၼ်ႉၶုၼ်ႇလႅၼ်ႈမႃးမိူၼ်ၸိူဝ်ႉၼင်ႇ ဢႁိမတ်ႉ၊ တီႈၶႃႈဢေႃႈ၊” ဝႃႈၼင်ႇၼႆလႄႈၶုၼ်ႁေႃၶမ်းမီးဢမိင်ႉဝႃႈ၊ “မၼ်းၼၼ်ႉပဵၼ်ၵူၼ်းလီလႄႈတၵ်းပႃးၶၢဝ်ႇငၢဝ်းဢၼ်လီမႃးဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ဢႁိမတ်ႉ၊ ႁွင်ႉပၢဝ်ႇတီႈၶုၼ်ႁေႃၶမ်းလႄႈလဝ်ႈလၢတ်ႈလႄႈဝႃႈ၊ “ပဵၼ်ဢၼ်လီဢၼ်ငၢမ်းမူတ်းမူတ်းတီႈၶႃႈယဝ်ႉ၊” ဝႃႈၼင်ႇၼႆသေယဝ်ႉ၊ၶုပ်ႉမူပ်ႇၸပ်းလိၼ်ၽၢႆႇၼႃႈၶုၼ်ႁေႃၶမ်းသေလႄႈလဝ်ႈလၢတ်ႈဝႃႈ၊ “ယွင်ႈယေႃး ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၶႃႈဢေႃႈ။ ၵွပ်ႈပိူဝ်ႈမၼ်းၸဝ်ႈႁႂ်ႈၸဝ်ႈႁဝ်းပႄႉသိုၵ်းၵႃႈၼိူဝ်ၶဝ်ၸိူဝ်းဢၼ်လုၵ်ႉၽိုၼ်ႉၸဝ်ႈႁဝ်းၸဝ်ႈၶုၼ်လူင်ၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းၵေႃႈထၢမ်လႄႈဝႃႈ၊ “ ဢပႃႉသလုမ်ႇ၊ ဢွၼ်ႇၼၼ်ႉလူး။ ၸွင်ႇလႆႈလူင်ႉလႆႈလွတ်ႈၽေးႁိုဝ်း၊” ဝႃႈၼင်ႇၼႆလႄႈ၊ ဢႁိမတ်ႉ၊ ၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈၶုၼ်လူင်တီႈၶႃႈ။ မိူဝ်ႈဢၼ် ယွႃႇၽႃႉ၊ ၶုၼ်ဢၼ်ပွင်ၵၢၼ်ၸဝ်ႈႁဝ်းပွႆႇၸႂ်ႉၶႃႈၸဝ်ႈမႃးၼၼ်ႉ၊ၶႃႈၸဝ်ႈလႆႈႁၼ်တၢင်းဢၼ်ဢူၼ်ဢဵၼ်မေႃးမႄးယႂ်ႇၼႃႇတီႈၶႃႈဢေႃႈ။ ၶႃႈၸဝ်ႈဢမ်ႇလႆႈႁုလွင်ႈမၼ်းသေႇၶျႃႇလီငၢမ်းတီႈၶႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းပူင်ဢမိင်ႉတီႈမၼ်းလႄႈဝႃႈ၊ “ၵႂႃႇၸုၵ်းယူႇတီႈၼၼ်ႈတႃႉ၊” ဝႃႈၼင်ႇၼႆလႄႈမၼ်းၵေႃႈၵႂႃႇၸုၵ်းယူႇဢေႃႈ။
မိူဝ်ႈၼၼ်ႉ၊ၶႃႈၵူၼ်းမဵဝ်း ဢေႇတီႇဢူဝ်းပီးယႃး၊ ၼၼ်ႉႁွတ်ႈမႃးလႄႈလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “ၶႃႈၸဝ်ႈမီးၶၢဝ်ႇငၢဝ်းဢၼ်လီပုၼ်ႈၸဝ်ႈမုၼ်ယႂ်ႇၶုၼ်ႁေႃၶမ်းတီႈၶႃႈဢေႃႈ။ ၼႂ်းဝၼ်းမိူဝ်ႈၼႆႉ ထႃႇဝရႃႉၽြႃး၊ ႁႂ်ႈၸဝ်ႈႁဝ်းပႄႉၼႅင်ႇၵႃႈၼိူဝ်ၶဝ်ၸိူဝ်းဢၼ်လုၵ်ႉၽိုၼ်ႉၸဝ်ႈႁဝ်းၼၼ်ႉတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းၵေႃႈထၢမ်ဝႃႈ၊ “ ဢပႃႉသလုမ်ႇ၊ ဢွၼ်ႇၼၼ်ႉလူး။ ၸွင်ႇလႆႈလူင်ႉလႆႈလွတ်ႈၽေးႁိုဝ်း၊” ဝႃႈၼင်ႇၼႆလႄႈ၊ ၶႃႈၼၼ်ႉၶိုၼ်းလဝ်ႈလၢတ်ႈလႄႈဝႃႈ၊ “ႁႂ်ႈရၢၼ်ႇသူႇၸဝ်ႈႁဝ်းၸဝ်ႈၶုၼ်လူင်တင်းသဵင်ႈတင်းလူင်ဢိၵ်ႇတင်းၶဝ်ၸိူဝ်းဢၼ်လုၵ်ႉၽိုၼ်ႉၸဝ်ႈႁဝ်းၼၼ်ႉႁႂ်ႈပဵၼ်မိူၼ်ၵူၼ်းၼုမ်ႇဢွၼ်ႇၵေႃႉၼၼ်ႉသေၵမ်းလူၺ်ႈတီႈၶႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းၵေႃႈတိူဝ်ႉၸႂ်ၼႃႇလူင်လၢင်လႄႈၶိုၼ်းၵႂႃႇၵႃႈတီႈသုမ်ႉထဵင်ဢၼ်မီးၵႃႈၼိူဝ်ၸွမ်ၽၵ်းတူဝဵင်းလႄႈႁွင်ႉႁႆႈဢေႃႈ။ မိူဝ်ႈဢၼ်ယင်းတိုၵ်ႉၶိုၼ်ႈၵႂႃႇယူႇၼၼ်ႉမၼ်းဝႃႈ၊ “ဢူဝ်းလုၵ်ႈၸၢႆးၵဝ် ဢပႃႉသလုမ်ႇ၊ လုၵ်ႈၸၢႆးၵဝ်႟။ ဢပႃႉသလုမ်ႇ၊ လုၵ်ႈၸၢႆးၵဝ်႟။ ၵဝ်ၶႂ်ႈတၢႆတၢင်တူဝ်မႂ်းယဝ်ႉ၊လုၵ်ႈၸၢႆးၵဝ် ဢပႃႉသလုမ်ႇ၊ လုၵ်ႈၸၢႆးၵဝ်႟၊” ဝႃႈၼင်ႇၼႆဢေႃႈ။
ၼင်ႇၼၼ်လႄႈပိူၼ်ႈမွၵ်ႇလၢတ်ႈတီႈ ယွႃႇၽႃႉ၊ လွင်ႈဢၼ်ၶုၼ်ႁေႃၶမ်းႁွင်ႉႁႆႈပွင်ႉၶၢင်းၵွပ်ႈပိူဝ်ႈ ဢပႃႉသလုမ်ႇ၊ ၼၼ်ႉဢေႃႈ။-
ပိူဝ်ႈၼႆလႄႈၼႂ်းဝၼ်းၼၼ်ႉပွႆးမူၼ်ႈပွႆးပျေႃႇပုၼ်ႈတၢင်းဢၼ်ဢွင်ႇသိုၵ်းၼၼ်ႉပဵၼ်လွင်ႈဢၼ်မႆႈၶီသဝ်ႈမွင်ၵႂႃႇဢေႃႈ။ ၵွပ်ႈပိူဝ်ႈၶဝ်လႆႈငိၼ်းလွင်ႈဢၼ်ၶုၼ်ႁေႃၶမ်းၶီၸႂ်ၶူမ်ၸႂ်ၵွပ်ႈပိူဝ်ႈလုၵ်ႈၸၢႆးၸဝ်ႈတၢႆၼၼ်ႉလႄႈ၊-
ၶဝ်ဢွၼ်ၵၼ်ၶိုၼ်းၶဝ်ႈဝဵင်းၵႂႃႇတဵတ်ႇတဵတ်ႇမိူၼ်ၸိူဝ်ႉၼင်ႇဢၼ်ၵူၼ်းသိုၵ်းလႆႈဢူၵ်းဢၢႆၵွပ်ႈပိူဝ်ႈၶဝ်သုမ်းသိုၵ်းလႄႈလွမ်ၶဝ်ႈဝဵင်းၵႂႃႇတဵတ်ႇတဵတ်ႇၼၼ်ႉဢေႃႈ။-
ၶုၼ်ႁေႃၶမ်းၵေႃႈဢဝ်မိုဝ်းတူမ်းၼႃႈၸဝ်ႈသေလႄႈႁဵတ်းတင်းသဵင်ဢၼ်ယႂ်ႇၼႃႇႁွင်ႉႁႆႈလႄႈဝႃႈ၊ “လုၵ်ႈၸၢႆးၵဝ် ဢပႃႉသလုမ်ႇ၊ ႟။ လုၵ်ႈၸၢႆးၵဝ်႟။ လုၵ်ႈၸၢႆးၵဝ် ဢပႃႉသလုမ်ႇ၊ ႟၊” ဝႃႈၼင်ႇၼႆဢေႃႈ။
ယွႃႇၽႃႉ၊ ၶဝ်ႈၸူးၵႃႈတီႈၶုၼ်ႁေႃၶမ်းလႄႈလဝ်ႈလၢတ်ႈဝႃႈ၊ “ဝၼ်းမိူဝ်ႈၼႆႉၸဝ်ႈႁဝ်းယႃႉသရေႇၼႃႈတႃၵူၼ်းၸဝ်ႈႁဝ်းတင်းလၢႆဢၼ်ဝႃႈ၊ၵူၼ်းၸိူဝ်းဢၼ်ၵႄႇသႄႇဢဝ်ဢသၢၵ်ႈၸဝ်ႈႁဝ်းလႂ်၊ဢသၢၵ်ႈလုၵ်ႈၸၢႆးၸဝ်ႈလႂ်၊ဢသၢၵ်ႈလုၵ်ႈယိင်းၸဝ်ႈလႂ်၊ဢသၢၵ်ႈမေးၸဝ်ႈတင်းလၢႆ၊ဢိၵ်ႇတင်းၸိူင်ႉၼၢင်းၸဝ်ႈလႂ်ၸိူဝ်းၼၼ်ႉတီႈၶႃႈယဝ်ႉ။-
ၸဝ်ႈႁဝ်းႁၵ်ႉၶဝ်ၸိူဝ်းဢၼ်ၸင်းၸဝ်ႈႁဝ်းသေလႄႈ၊ၸဝ်ႈႁဝ်းၸင်းၶဝ်ၸိူဝ်းဢၼ်ႁၵ်ႉၸဝ်ႈႁဝ်းၼၼ်ႉတီႈၶႃႈလူင်ပႄႇ။ ဝၼ်းမိူဝ်ႈၼႆႉၸဝ်ႈႁဝ်းၼႄပျႃးလွင်ႈဢၼ်ၸဝ်ႈႁဝ်းဢမ်ႇထၢင်ႇဢမ်ႇမၢတ်ႈပဵၼ်ၵႃႈသင်တီႈမူးမၢတ်ႈၽွင်းမိူင်းလႂ်၊ၵူၼ်းၸဝ်ႈႁဝ်းတင်းလၢႆၼၼ်ႉတီႈၶႃႈယဝ်ႉ။ ၶႃႈၸဝ်ႈႁုႁၼ်လွင်ႈဢၼ်ပေႃး ဢပႃႉသလုမ်ႇ၊ ဢသၢၵ်ႈလိပ်းလႄႈၶႃႈၸဝ်ႈႁဝ်းၸိူဝ်းၼႆႉတၢႆၸိုင်၊တၵ်းထုၵ်ႇၸႂ်ၵျိူၵ်ႈၸႂ်ၸဝ်ႈႁဝ်းတီႈၶႃႈဢေႃႈ။-
မိူဝ်ႈလဵဝ်ၼႆႉလုၵ်ႉသေၵမ်းတီႈၶႃႈ။ ဢွၵ်ႇလႄႈလၢတ်ႈၵႂၢမ်းဢုၼ်ႇၸႂ်တီႈၵူၼ်းၸဝ်ႈႁဝ်းတင်းလၢႆသေၵမ်းၶႃႈ။ ၶႃႈၸဝ်ႈၵိၼ်ႇဝႃႈတိူင်ႇဝႃႈၼႂ်းၼႃႇမႃႉၸိုဝ်ႈသဵင် ထႃႇဝရႃႉၽြႃး၊ လွင်ႈဢၼ်ပေႃးၸဝ်ႈႁဝ်းဢမ်ႇဢွၵ်ႇလၢတ်ႈၸိုင်၊ၶိုၼ်းၼႆႉၵူၼ်းၵေႃႉၼိုင်ႈၵူၺ်းၵေႃႈတၵ်းဢမ်ႇမီးယူႇလူၺ်ႈၵၼ်တင်းၸဝ်ႈႁဝ်းတီႈၶႃႈယဝ်ႉ။ လွင်ႈတၢင်းၼၼ်ႉတၵ်းယဵင်ႈၶႅၼ်းလီၶူမ်ၸႂ်ၼႃႇသေတၢင်းဢၼ်ယၢမ်ႈပဵၼ်မႃးတီႈၸဝ်ႈႁဝ်းၵႃႈၼႂ်းဢသၢၵ်ႈတၢၼ်းၸဝ်ႈႁဝ်းၼႆႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ၶုၼ်ႁေႃၶမ်းလုၵ်ႉလႄႈၵႂႃႇၼင်ႈယူႇၵႃႈတီႈႁူးၽၵ်းတူဝဵင်းဢေႃႈ။ ၵူၼ်းမၼ်းၸဝ်ႈတင်းလၢႆငိၼ်းလွင်ႈၼၼ်ႉလႄႈၶဝ်ဢွၼ်ၵၼ်ၸုတုမ်ၵၼ်မႃးၵႃႈတီႈၶုၼ်ႁေႃၶမ်းဢေႃႈ။ မိူဝ်ႈယၢမ်းၼၼ်ႉၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ၶိုၼ်းပွၵ်ႈမိူဝ်းၸူးတီႈႁိူၼ်းၽႂ်ႁိူၼ်းမၼ်းတင်းမူတ်းယဝ်ႉလႄႈ၊-
ၶဝ်မီးၵႂၢမ်းဢၼ်တွပ်ႇထဵင်ၵၼ်လႄႈဝႃႈ၊ “ၶုၼ်ႁေႃၶမ်း တႃႇဝိတ်ႈ၊ ၼႆႉၵႄႇသႄႇဢဝ်ႁဝ်းလွတ်ႈသေၵႃႈၼႂ်းၽေးရၢၼ်ႇသူႇႁဝ်းဢၼ်ဝႃႈ၊ၵူၼ်းမဵဝ်း ၽိလိတ်ႉတိ၊ ၸိူဝ်းၼၼ်ႉမႃးယဝ်ႉ။ ၵူၺ်းၵႃႈ၊မိူဝ်ႈလဵဝ်ၼႆႉမၼ်းၼီပၢႆႈ ဢပႃႉသလုမ်ႇ၊ လႄႈပႅတ်ႈဝၢၼ်ႈပႅတ်ႈမိူင်းမၼ်းၵႂႃႇယဝ်ႉ။-
ဢပႃႉသလုမ်ႇ၊ ဢၼ်ႁဝ်းပၼ်ၽိၵ်ႈသိၵ်ႈႁႂ်ႈပဵၼ်ၶုၼ်ႁေႃၶမ်းႁဝ်းၼၼ်ႉၵေႃႈတၢႆၼႂ်းၼႃႈသိုၵ်းယဝ်ႉ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈႁဝ်းယင်းဢမ်ႇၶိုင်ပွင်လွင်ႈဢၼ်တၵ်းၶိုၼ်းႁွင်ႉဢဝ်ၶုၼ်ႁေႃၶမ်း တႃႇဝိတ်ႈ၊ မႃးၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်း တႃႇဝိတ်ႈ၊ ပွႆႇၸႂ်ႉၵူၼ်းၵႂႃႇၸူးတီႈယဵၸ်ႈပရေႃးႁဵၵ်ႈ ၸႃႇတုၵ်ႉ၊ တင်းယဵၸ်ႈပရေႃးႁဵၵ်ႈ ဢပျႃႇထႃႇ၊ လႄႈဝႃႈ၊ “သူလၢတ်ႈတီႈၵူၼ်းဢၼ်ပဵၼ်ၵႄႇပဵၼ်ႁူဝ်ၵူၼ်းမဵဝ်း ယုတႃႉ၊ လႄႈဝႃႈ၊ ‘ၵွပ်ႈသင်လႄႈသူပဵၼ်ၵေႃႉဢၼ်တူၵ်းလိုၼ်းသုတ်းပိူၼ်ႈ၊ႁႂ်ႈလႆႈပၢင်းဢဝ်ၶုၼ်ႁေႃၶမ်းၶိုၼ်းၵႂႃႇၸူးတီႈႁေႃၸဝ်ႈၼၼ်ႉၸိူဝ်ႉၼင်ႇႁိုဝ်။ ၶၢဝ်ႇငၢဝ်းဢၼ်ၵူၼ်းမဵဝ်း ဢိသရေး၊ ၶဝ်လၢတ်ႈၸႃၼၼ်ႉႁွတ်ႈထိုင်ၶိုၼ်းၵႃႈတီႈၶုၼ်ႁေႃၶမ်းတီႈႁေႃၸဝ်ႈၼၼ်ႉယဝ်ႉ။-
သူၼႆႉပဵၼ်ပီႈပဵၼ်ၼွင်ႉၵဝ်၊ပဵၼ်ၼိူဝ်ႉပဵၼ်လိူတ်ႈၵဝ်၊ၵွပ်ႈသင်လႄႈသူတူၵ်းလိုၼ်းသုတ်းပိူၼ်ႈၼႂ်းတၢင်းဢၼ်ပၢင်းဢဝ်ၶုၼ်ႁေႃၶမ်းၶိုၼ်းၵႂႃႇၼၼ်ႉၸိူဝ်ႉၼင်ႇႁိုဝ်၊’ ဝႃႈၼႆတႃႉ။-
သမ်ႉဢွၼ်ၵၼ်လၢတ်ႈတီႈ ဢႃႇမသႃႇ၊ လႄႈဝႃႈ၊ ‘မႂ်းပဵၼ်ပီႈပဵၼ်ၼွင်ႉၵဝ်ဢေႃႈ။ ဢဝ်ၼႆႉၵႂႃႇမိူဝ်းၼႃႈၵဝ်ၶၢၼ်းမႂ်းဝႆႉၼႂ်းဢရႃႇၸဝ်ႈၵွၼ်းတပ်ႉသိုၵ်းလူင်တၢင်တူဝ် ယွႃႇၽႃႉ၊ ဢေႃႈ။ ပေႃးၵဝ်ယင်းဢမ်ႇႁဵတ်းၸိုင်၊ႁႂ်ႈၽြႃးပဵၼ်ၸဝ်ႈပၼ်တၢမ်ႇတီႈၵဝ်သေၵမ်းလူၺ်ႈ၊’ ဝႃႈၼႆတႃႉ၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈၵႂၢမ်းၶုၼ်ႁေႃၶမ်း တႃႇဝိတ်ႈ၊ ၼၼ်ႉပႄႉဢဝ်ႁူဝ်ၸႂ်ၵူၼ်းမဵဝ်း ယုတႃႉ၊ တင်းသဵင်ႈတင်းမူတ်းပဵၼ်ၼမ်ႉၼိုင်ႈၸႂ်လဵဝ်ၵၼ်မိူၼ်ၸိူဝ်ႉၼင်ႇႁူဝ်ၸႂ်ၵူၼ်းၵေႃႉလဵဝ်ၼၼ်ႉသေယဝ်ႉ၊ၶဝ်ဢွၼ်ၵၼ်ပွႆႇၸႂ်ႉၵူၼ်းၵႂႃႇပၢင်းဢဝ်ၸႃႉၸဵမ်ၶုၼ်ႁေႃၶမ်းဢိၵ်ႇတင်းၶုၼ်ဢၼ်ပွင်ၵၢၼ်ၼႂ်းႁေႃလႂ်ဢေႃႈ။
ပိူဝ်ႈၼႆလႄႈၶုၼ်ႁေႃၶမ်းပွၵ်ႈၶိုၼ်းလႄႈႁွတ်ႈထိုင်ၵႂႃႇၵႃႈတီႈၼမ်ႉ ယေႃးတၢၼ်ႇ၊ ဢေႃႈ။ မိူဝ်ႈၼၼ်ႉ၊ၵူၼ်းမဵဝ်း ယုတႃႉ၊ တင်းလၢႆဢွၼ်ၵၼ်ၵႂႃႇၵႃႈတီႈဝဵင်း ၵိလႃႉၵႃႇလႃႉ၊ ႁႂ်ႈလႆႈႁပ်ႉႁူဝ်တၢင်းၶုၼ်ႁေႃၶမ်းသေယဝ်ႉ၊သူင်ႇၶုၼ်ႁေႃၶမ်းၶၢမ်ႈၼမ်ႉ ယေႃးတၢၼ်ႇ၊ ဢေႃႈ။-
ၼႂ်းၶိင်ႇလဵဝ်ၵၼ်ၼၼ်ႉ သိမိ၊ လုၵ်ႈၸၢႆး ၵေးရႃႉ၊ ၵူၼ်းဝဵင်း ပႃႇႁုရိမ်း၊ မဵဝ်း ပိၼ်ႇယႃႇမိၼ်ႇ၊ ၼၼ်ႉၵေႃႈႁိပ်ႈၼႅတ်ႈလူင်းမႃးၸူးတီႈၼမ်ႉ ယေႃးတၢၼ်ႇ၊ ႁႂ်ႈလႆႈႁပ်ႉႁူဝ်တၢင်းၶုၼ်ႁေႃၶမ်းဢေႃႈ။-
ၵူၼ်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ ႁဵင်ၼိုင်ႈၸွမ်းမႃးလူၺ်ႈၵၼ်တင်းမၼ်းဢေႃႈ။ ၸိၽႃႉ၊ ၶႃႈပီႈၼွင်ႉၸိူဝ်ႉၶိူဝ်း သေႃးလု၊ ၼၼ်ႉၵေႃႈၸွမ်းမႃးလူၺ်ႈၵၼ်တင်းမၼ်းၼင်ႇၵဝ်ႇဢေႃႈ။ မၼ်းဢိၵ်ႇတင်းလုၵ်ႈၸၢႆးမၼ်းသိပ်းႁႃႈၵေႃႉ၊ဢိၵ်ႇတင်းၶႃႈမၼ်းသၢဝ်းၼိုင်ႈဢွၼ်ၵၼ်ၶုၼ်ႇလႅၼ်ႈလူင်းၸူးတီႈၼမ်ႉ ယေႃးတၢၼ်ႇ၊ ႁႂ်ႈလႆႈႁပ်ႉႁူဝ်တၢင်းၶုၼ်ႁေႃၶမ်းဢေႃႈ။-
တပ်ႉသိုၵ်းႁၢၼ်ၶဝ်ဢွၼ်ၵၼ်ၶၢမ်ႈၼမ်ႉၵႂႃႇလႄႈႁႂ်ႈလႆႈၸွႆႈထႅမ်သူင်ႇၵူၼ်းႁၢင်ႈၵူၼ်းႁေႃၶၢမ်ႈၼမ်ႉပုၼ်ႈလွင်ႈၼင်ႇႁိုဝ်တၵ်းႁႂ်ႈထုၵ်ႇၸႂ်မႅၼ်ႈၸႂ်ၶုၼ်ႁေႃၶမ်း တႃႇဝိတ်ႈ၊ ၼၼ်ႉဢေႃႈ။ မိူဝ်ႈဢၼ်ၶုၼ်ႁေႃၶမ်း တႃႇဝိတ်ႈ၊ ၸမ်တၵ်းၶၢမ်ႈၼမ်ႉၼၼ်ႉၸိုင်၊ သိမိ၊ လုၵ်ႈၸၢႆး ၵေးရႃႉ၊ ၼၼ်ႉၶုပ်ႉမူပ်ႇၵႃႈတီႈၽၢႆႇၼႃႈၶုၼ်ႁေႃၶမ်းသေလႄႈလဝ်ႈလၢတ်ႈဝႃႈ၊-
“ၸဝ်ႈၶုၼ်လူင်တီႈၶႃႈ။ ၶႅၼ်းတေႃႈလိုမ်းပႅတ်ႈတၢင်းၽိတ်းဢၼ်ၶႃႈၸဝ်ႈလႆႈႁဵတ်းမႅၼ်ႈၼႂ်းဝၼ်းဢၼ်ၸဝ်ႈႁဝ်းဢွၵ်ႇဝဵင်း ယေႇရုသလႅမ်ႇ၊ မႃးၼၼ်ႉသေၵမ်းတီႈၶႃႈ။ ၶႅၼ်းတေႃႈယႃႇပေမူမ်ႇဝႆႉတၢင်းၽိတ်းဢၼ်ၶႃႈၸဝ်ႈႁဵတ်းပူၼ်ႉႁဵတ်းလိူဝ်ၼၼ်ႉသေလႄႈယႃႇပေမၢတ်ႈမၢႆဢပျတ်ႈၶႃႈၸဝ်ႈသေၵမ်းတီႈၶႃႈ။-
ၶႃႈၸဝ်ႈႁုလွင်ႈဢၼ်ၶႃႈၸဝ်ႈႁဵတ်းၽိတ်းမႅၼ်ႈၼၼ်ႉယူႇတီႈၶႃႈဢေႃႈ။ ပိူဝ်ႈၼႆလႄႈၶႃႈၸဝ်ႈလႆႈပဵၼ်ၵေႃႉဢၼ်လူင်းမႃးဢွၼ်တၢင်းသုတ်းပိူၼ်ႈၵႃးၼႂ်းမဵဝ်း ယူဝ်းသႅပ်ႈ၊ ၵႃႈမီးတင်းသဵင်ႈတင်းလူင်ႁႂ်ႈလႆႈႁပ်ႉႁူဝ်တၢင်းၸဝ်ႈႁဝ်းၶႃႈၼႂ်းဝၼ်းမိူဝ်ႈၼႆႉတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
ဢၽိသေး၊ ဢၼ်မႄႈမၼ်းပဵၼ် ၸေႇရုယႃႇ၊ ၼၼ်ႉလဝ်ႈလၢတ်ႈလႄႈဝႃႈ၊ “ သိမိ၊ ၼႆႉထိူၵ်ႈလႆႈၶၢမ်ႇတၢႆၵွပ်ႈပိူဝ်ႈဢၼ်မၼ်းလႃႇလင်ၸဝ်ႈဢၼ် ထႃႇဝရႃႉၽြႃး၊ ပၼ်ၽိၵ်ႈသိၵ်ႈၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊ တႃႇဝိတ်ႈ၊ လၢတ်ႈတီႈ ဢၽိသေး၊ တင်းပီႈၸၢႆးမၼ်း ယွႃႇၽႃႉ၊ လႄႈဝႃႈ၊ “လုၵ်ႈၸၢႆး ၸေႇရုယႃႇ၊ ၶဝ်႟။ ၽူႈလႂ်ယွၼ်းထၢမ်တၢင်းၵျၢမ်ႇတီႈသူ။ မိူဝ်ႈလဵဝ်ၼႆႉၵဝ်ပဵၼ်ၶုၼ်ႁေႃၶမ်း ဢိသရေး၊ ယဝ်ႉလႄႈၵူၼ်းမဵဝ်း ဢိသရေး၊ သေၵေႃႉသေၵူၼ်းဢမ်ႇလႆႈၶၢမ်ႇတၢင်းဢၼ်ဢဝ်တၢႆၼႂ်းဝၼ်းမိူဝ်ႈၼႆႉ၊” ဝႃႈၼင်ႇၼႆသေယဝ်ႉ၊-
သမ်ႉလၢတ်ႈတီႈ သိမိ၊ လႄႈဝႃႈ၊ “မႂ်းဢမ်ႇလႆႈၶၢမ်ႇတၢင်းဢၼ်ဢဝ်တၢႆၵူၺ်းဝႃႈၼႆ၊ၵဝ်ဝႆႉၵတိတီႈမႂ်းယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ မေႇၽိပေႃးသႅတ်ႉ၊ လၢၼ်ၸၢႆး သေႃးလု၊ ၼၼ်ႉၵေႃႈလူင်းမႃးႁႂ်ႈလႆႈႁပ်ႉႁူဝ်တၢင်းၶုၼ်ႁေႃၶမ်း တႃႇဝိတ်ႈ၊ ဢေႃႈ။ မၼ်းၼၼ်ႉယင်းဢမ်ႇသုၵ်ႈတိၼ်၊ယင်းဢမ်ႇထႃၼူတ်ႇၶုတ်ႇၼူတ်ႇ၊ယင်းဢမ်ႇသၵ်ႉၶူဝ်းလွႆးၶူဝ်းၸႃႉၸဵမ်ဝၼ်းဢၼ်ၶုၼ်ႁေႃၶမ်းဢွၵ်ႇဝဵင်း ယေႇရုသလႅမ်ႇ၊ ၵႂႃႇတေႃႇထိုင်ႁွတ်ႈဝၼ်းဢၼ်ၶိုၼ်းပွၵ်ႈမႃးၼိမ်ၼိမ်လီလီၼၼ်ႉဢေႃႈ။-
မိူဝ်ႈဢၼ်မၼ်းဢွၵ်ႇသေၵႃႈတီႈဝဵင်း ယေႇရုသလႅမ်ႇ၊ ၵႂႃႇႁႂ်ႈလႆႈႁပ်ႉႁူဝ်တၢင်းၶုၼ်ႁေႃၶမ်းၼၼ်ႉၸိုင်၊ၶုၼ်ႁေႃၶမ်းထၢမ်မၼ်းလႄႈဝႃႈ၊ “ မေႇၽိပေႃးသႅတ်ႉ၊ ႟။ ႁဵတ်းသင်လႄႈမႂ်းဢမ်ႇၵႂႃႇလူၺ်ႈၵၼ်တင်းၵဝ်ၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
မၼ်းၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈၵဝ်ၶႃႈၶုၼ်ႁေႃၶမ်းတီႈၶႃႈ။ ၸွမ်းလူၺ်ႈၵဝ်ၶႃႈဢၼ်ပဵၼ်ၶႃႈၸဝ်ႈႁဝ်းၼႆႉတိၼ်ၵႅင်ႉလႄႈ၊ၵဝ်ၶႃႈလၢတ်ႈဝႃႈ၊ ‘ၵဝ်တၵ်းႁၢင်ႈၵွပ်းမႃႉလီႈလႄႈၶီႇၵႂႃႇၸွမ်းလူၺ်ႈၵၼ်တင်းၶုၼ်ႁေႃၶမ်းဢေႃႈ၊’ ဝႃႈၼႆဢေႃႈ။ ၵူၺ်းၵႃႈ၊ၶႃႈၵဝ်ၶႃႈ ၸိၽႃႉ၊ ၼၼ်ႉပႅတ်ႉလႅၼ်ၵဝ်ၶႃႈဢေႃႈ။-
မၼ်းယင်းၶႃႉၸိုဝ်ႈၶၢႆသဵင်ၵဝ်ၶႃႈတီႈၸဝ်ႈၵဝ်ၶႃႈၶုၼ်ႁေႃၶမ်းၼၼ်ႉတီႈၶႃႈဢေႃႈ။ ၸဝ်ႈၵဝ်ၶႃႈၶုၼ်ႁေႃၶမ်းၼၼ်ႉၸိုင်၊ပဵၼ်မိူၼ်ၸိူဝ်ႉၼင်ႇတမၢၼ်ႇၵၢင်ႁၢဝ်တီႈၶႃႈလႄႈ၊ထိူၵ်ႈႁဵတ်းၸွမ်းၵႃႈၼင်ႇဢၼ်ၸဝ်ႈႁဝ်းထုၵ်ႇၸႂ်ၵျိူၵ်ႈၸႂ်ၼၼ်ႉတီႈၶႃႈဢေႃႈ။-
ၵႃႈပဵၼ်လုၵ်ႈလၢၼ်ၸိူဝ်ႉၶိူဝ်းပူႇၵဝ်ၶႃႈတင်းသဵင်ႈတင်းမူတ်းၼၼ်ႉထိူၵ်ႈၶၢမ်ႇတၢင်းဢၼ်ၸဝ်ႈႁဝ်းဢဝ်တၢႆတီႈၶႃႈဢေႃႈ။ ၵွပ်ႈပိူဝ်ႈပဵၼ်ၸိူဝ်ႉၼင်ႇၼႆလႄႈၵဝ်ၶႃႈတၵ်းမီးဢၶႂၢင်ႉဢယေးဢၼ်ယွၼ်းဢဝ်ဢၼ်လႂ်တီႈၸဝ်ႈႁဝ်းထႅင်ႈလူးၵွၼ်ႇတီႈၶႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းမီးဢမိင်ႉလႄႈဝႃႈ၊ “မႂ်းဢမ်ႇလူဝ်ႇလဝ်ႈလၢတ်ႈလွင်ႈဢၼ်လႂ်တီႈၵဝ်ထႅင်ႈယဝ်ႉ။ ၵဝ်ၸီႇယၢင်ႇႁႂ်ႈမႂ်းတင်း ၸိၽႃႉ၊ ၽႄမႅင်ႇၵၼ်ဢဝ်ဢမူၺ်ႇဢုၵ်ႉၸႃႇ သေႃးလု၊ ၼၼ်ႉယဝ်ႉ၊” ဝႃႈၼင်ႇၼႆဢေႃႈ။
မေႇၽိပေႃးသႅတ်ႉ၊ ၶိုၼ်းလဝ်ႈလၢတ်ႈလႄႈဝႃႈ၊ “ႁႂ်ႈ ၸိၽႃႉ၊ ဢဝ်ၵူႈၸိူဝ်ႉၵူႈပိူင်သေၵမ်း။ ၸဝ်ႈၵဝ်ၶႃႈၶုၼ်ႁေႃၶမ်းသမ်ႉၶိုၼ်းလႆႈႁွတ်ႈထိုင်ၵႃႈတီႈႁၢင်ႈၸဝ်ႈႁေႃၸဝ်ႈၼိမ်ၼိမ်လီလီၼၼ်ႉပေႃးၵုမ်ႇပုၼ်ႈၵဝ်ၶႃႈတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
ပႃႇၸိလေး၊ ၵူၼ်းမိူင်း ၵိလတ်ႉ၊ ၼၼ်ႉၵေႃႈလုၵ်ႉသေၵႃႈတီႈဝဵင်း ရေႃႇၵေႇလိမ်း၊ မႃးႁႂ်ႈလႆႈႁပ်ႉတွၼ်ႈလႄႈသူင်ႇၶုၼ်ႁေႃၶမ်းၶၢမ်ႈၼမ်ႉ ယေႃးတၢၼ်ႇ၊ ဢေႃႈ။-
ပႃႇၸိလေး၊ ၼၼ်ႉထဝ်ႈၵႄႇၼႃႇယဝ်ႉလႄႈဢသၢၵ်ႈလႆႈပႅတ်ႇသိပ်းပီယဝ်ႉဢေႃႈ။ မၼ်းပဵၼ်ၵေႃႉဢၼ်မၢၵ်ႈမီးလီပဵၼ်ၼႃႇလႄႈလႆႈၸွႆႈၵမ်ႉၶဝ်ႈၼမ်ႉတၢင်းၵိၼ်တီႈၶုၼ်ႁေႃၶမ်းၸူဝ်ႈဢၼ်မၼ်းၸဝ်ႈယင်းတိုၵ်ႉၶျႃးတပ်ႉယူႇၵႃႈတီႈဝဵင်း မႁႃႇၼိမ်ႇ၊ ၼၼ်ႉဢေႃႈ။-
ၶုၼ်ႁေႃၶမ်းမီးဢမိင်ႉတီႈမၼ်းလႄႈဝႃႈ၊ “ၸွမ်းလူၺ်ႈၵၼ်တင်းၵဝ်ၵႂႃႇၵႃႈတီႈဝဵင်း ယေႇရုသလႅမ်ႇ၊ တႃႉ။ ၵဝ်တၵ်းလဵင်ႉလူမႂ်းဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ ပႃႇၸိလေး၊ ၶိုၼ်းလဝ်ႈလၢတ်ႈလႄႈဝႃႈ၊ “ၶႃႈၸဝ်ႈၼႆႉဢသၢၵ်ႈဢမ်ႇယၢဝ်းလႆႈထႅင်ႈႁိုင်ၵႃႈႁိုဝ်တီႈၶႃႈယဝ်ႉလႄႈ၊တၵ်းထုၵ်ႇလီၵႂႃႇၸွမ်းလူၺ်ႈၵၼ်တင်းၸဝ်ႈၶုၼ်လူင်ၸိူဝ်ႉၼင်ႇႁိုဝ်တီႈၶႃႈ။-
ဢသၢၵ်ႈၶႃႈၸဝ်ႈလႆႈပႅတ်ႇသိပ်းပီတီႈၶႃႈယဝ်ႉ။ မဵဝ်းဢၼ်လႂ်ၸၢင်ႈတၵ်းႁဵတ်းႁႂ်ႈၶႃႈၸဝ်ႈမူၼ်ႈပျေႃႇလႆႈတီႈၶႃႈ။ ၶႃႈၸဝ်ႈဢမ်ႇၸၢင်ႈၸိမ်းတူၺ်းဢရႃႉသႃႇတၢင်းၵိၼ်တၢင်းၶူပ်းလႆႈတီႈၶႃႈယဝ်ႉ။ ၶႃႈၸဝ်ႈတၵ်းထွမ်ႇငိၼ်းသဵင်ၵႂၢမ်းမေႃၵႂၢမ်းၵူၼ်းၸၢႆး၊သဵင်မေႃၵႂၢမ်းၵူၼ်းယိင်းၶဝ်ႁွင်ႉၼၼ်ႉလႆႈၶႃႈႁိုဝ်း။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈသမ်ႉတေႁႂ်ႈၶႃႈၸဝ်ႈဢဝ်လွင်ႈတၢင်းဢၼ်၊ဢၼ်ၼၵ်းဢၼ်ၼႃႇတၢင်ႇသႂ်ႇၵႃႈၼိူဝ်မႃႇၸဝ်ႈၶုၼ်လူင်ၵဝ်ၶႃႈလႆႈၸိူဝ်ႉၼင်ႇႁိုဝ်ၶႃႈ။-
ၶႃႈၸဝ်ႈၼႆႉဢမ်ႇထိူၵ်ႈၶၢမ်ႇဢဝ်သူးဢၼ်ယႂ်ႇၼႃႇထၢၼ်ႇၼႆႉလႄႈ၊ၶႃႈၸဝ်ႈတၵ်းၸွမ်းလူၺ်ႈၵၼ်တင်းၸဝ်ႈၶုၼ်လူင်ႁဝ်းၶၢမ်ႈၼမ်ႉ ယေႃးတၢၼ်ႇ၊ ၵႂႃႇဢိတ်းၼိုင်ႈၵူၺ်းတီႈၶႃႈဢေႃႈ။-
ၼင်ႇၼၼ်လႄႈၶႅၼ်းတေႃႈပၼ်ဢၶႂၢင်ႉႁႂ်ႈၶႃႈၸဝ်ႈလႆႈၶိုၼ်းပွၵ်ႈမိူဝ်းၵႂႃႇၵႃႈတီႈႁိူၼ်းလႄႈတၢႆၵႃႈတီႈႁိမ်းၶုမ်ပႃႇႁဵဝ်ႈပေႃႈမႄႈၶႃႈၸဝ်ႈၼၼ်ႉသေၵမ်းတီႈၶႃႈ။ ၼႂ်းဝႃႈၼၼ်သေၵေႃႈယင်းမီးလုၵ်ႈၸၢႆးၶႃႈၸဝ်ႈႁဝ်း ၶိမ်ႁမ်ႇ၊ တီႈၶႃႈဢေႃႈ။ ႁွင်ႉဢဝ်မၼ်းၵႂႃႇသေၵမ်း။ မၼ်းတၵ်းထၢမ်းႁဵတ်းၼႃႈၵၢၼ်ၸဝ်ႈႁဝ်းတီႈၶႃႈဢေႃႈ။ ၶႅၼ်းတေႃႈႁဵတ်းပၼ်တီႈမၼ်းၸွမ်းၵႃႈၼင်ႇဢၼ်ၸဝ်ႈႁဝ်းထၢင်ႇဝႃႈပဵၼ်ဢၼ်လီၼၼ်ႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းၵေႃႈမီးဢမိင်ႉလႄႈဝႃႈ၊ “ ၶိမ်ႁမ်ႇ၊ တၵ်းလႆႈၸွမ်းလူၺ်ႈၵၼ်တင်းၵဝ်ၶၢမ်ႈၼမ်ႉၵႂႃႇဢေႃႈ။ ၵဝ်တၵ်းႁဵတ်းပၼ်တီႈမၼ်းၸွမ်းၵႃႈၼင်ႇဢၼ်မႂ်းထၢင်ႇဝႃႈ၊ပဵၼ်ဢၼ်လီၼၼ်ႉဢေႃႈ။ ၵႃႈဢၼ်မႂ်းယွၼ်းၵႃႈတီႈၵဝ်ၼၼ်ႉၵေႃႈၵဝ်တၵ်းႁဵတ်းပၼ်ပုၼ်ႈမႂ်းဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ တႃႇဝိတ်ႈ၊ ဢိၵ်ႇတင်းၵူၼ်းမၼ်းတင်းသဵင်ႈတင်းလူင်ၶၢမ်ႈၼမ်ႉ ယေႃးတၢၼ်ႇ၊ ၵႂႃႇဢေႃႈ။ မၼ်းၸုပ်ႇၼူမ် ပႃႇၸိလေး၊ သေယဝ်ႉ၊ပၼ်တၢင်းလီမၢင်ႇၵလႃႇတီႈမၼ်းသေလႄႈ၊မၼ်းၵေႃႈပွၵ်ႈမိူဝ်းၶိုၼ်းၵႂႃႇတီႈႁိူၼ်းမၼ်းသေဢေႃႈ။
မိူဝ်ႈဢၼ်ၶုၼ်ႁေႃၶမ်းဢိၵ်ႇတင်းၵူၼ်းမဵဝ်း ယုတႃႉ၊ တင်းသဵင်ႈတင်းလူင်လႄႈၵူၼ်းမဵဝ်း ဢိသရေး၊ ၶိုင်ႈၼိုင်ႈၶၢမ်ႈၼမ်ႉၵႂႃႇသေယဝ်ႉ၊ၵႂႃႇၵႃႈတီႈဝဵင်း ၵိလႃႉၵႃႇလႃႉ၊ ဢေႃႈ။ ၶိမ်ႁမ်ႇ၊ ၵေႃႈၵႂႃႇလူၺ်ႈၵၼ်တင်းမၼ်းဢေႃႈ။-
မိူဝ်ႈၼၼ်ႉၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢွၼ်ၵၼ်မႃးၸူးတီႈၶုၼ်ႁေႃၶမ်းလႄႈလဝ်ႈလၢတ်ႈဝႃႈ၊ “ၸဝ်ႈၶုၼ်လူင်တီႈၶႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၵူၼ်းမဵဝ်း ယုတႃႉ၊ ဢၼ်ပဵၼ်ပီႈၼွင်ႉၸိူဝ်ႉၶိူဝ်းၶႃႈၸဝ်ႈႁဝ်းၶဝ်ၸိူဝ်းၼႆႉဢွၼ်ၵၼ်လၵ်ႉဢဝ်ၸဝ်ႈႁဝ်း၊ဢိၵ်ႇတင်းလုၵ်ႈမေး၊ဢိၵ်ႇတင်းၵူၼ်းၸဝ်ႈႁဝ်းတင်းသဵင်ႈတင်းလူင်သေလႄႈၶၢမ်ႈၼမ်ႉ ယေႃးတၢၼ်ႇ၊ ၼၼ်ႉၸိူဝ်ႉၼင်ႇႁိုဝ်ၶႃႈ၊” မိူဝ်ႈဢၼ်ဝႃႈၸိူဝ်ႉၼင်ႇၼႆၸိုင်၊-
ၵူၼ်းမဵဝ်း ယုတႃႉ၊ တင်းသဵင်ႈတင်းလူင်သမ်ႉဢွၼ်ၵၼ်ၶိုၼ်းလၢတ်ႈတီႈၵူၼ်းမဵဝ်း ဢိသရေး၊ ၸိူဝ်းၼၼ်ႉလႄႈဝႃႈ၊ “ႁဝ်းႁဵတ်းၸိူဝ်ႉၼင်ႇၼႆၵွပ်ႈပိူဝ်ႈၶုၼ်ႁေႃၶမ်း တႃႇဝိတ်ႈ၊ ပဵၼ်ၵူၼ်းၸိူဝ်ႉၶိူဝ်းႁဝ်းၼၼ်ႉဢေႃႈ။ ၵွပ်ႈပိူဝ်ႈၸိူဝ်ႉၼင်ႇၼႆလႄႈသူၸႂ်မႆႈၶႂ်ႈၸႃႉလူၺ်ႈလွင်ႈၼႆႉၸိူဝ်ႉၼင်ႇႁိုဝ်။ ႁဝ်းၵိၼ်ၶဝ်ႈၼမ်ႉတၢင်းၵိၼ်ၶုၼ်ႁေႃၶမ်းႁိုဝ်း။ ႁဝ်းလႆႈႁပ်ႉဢဝ်သူးလၢပ်ႈသေၸိူဝ်ႉသေပိူင်ၵႃႈတီႈမၼ်းၸဝ်ႈႁိုဝ်း၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၵူၼ်းမဵဝ်း ဢိသရေး၊ တင်းလၢႆၶိုၼ်းလၢတ်ႈတီႈၵူၼ်းမဵဝ်း ယုတႃႉ၊ ၸိူဝ်းၼၼ်ႉလႄႈဝႃႈ၊ “ႁဝ်းၸၢပ်ႈသႅင်ႇၵၼ်တင်းၶုၼ်ႁေႃၶမ်း တႃႇဝိတ်ႈ၊ သိပ်းပုၼ်ႈၵူၺ်းဢမ်ႇၵႃး၊ႁဝ်းယဵင်ႈၶႅၼ်းၸၢပ်ႈသႅင်ႇၵၼ်တင်းၶုၼ်ႁေႃၶမ်း တႃႇဝိတ်ႈ၊ လိူဝ်တွၼ်းၼႃႇသေသူဢေႃႈ။ ၵွပ်ႈသင်လႄႈသူႁဵတ်းဢမ်ႇၼပ်ႉဢမ်ႇၶၢၼ်းတီႈႁဝ်းၸိူဝ်ႉၼင်ႇႁိုဝ်။ ႁဝ်းၸိူဝ်းၼႆႉပဵၼ်ၵူၼ်းဢၼ်လၢတ်ႈဢွၼ်တၢင်းပိူၼ်ႈလွင်ႈဢၼ်တေပၢင်းဢဝ်ၶုၼ်ႁေႃၶမ်းႁဝ်းပွၵ်ႈမိူဝ်းၶိုၼ်းၵႂႃႇၼၼ်ႉဢမ်ႇၸႂ်ႈႁိုဝ်း၊” ဝႃႈၼင်ႇၼႆဢေႃႈ။ ၶေႃႈၵႂၢမ်းၵူၼ်းမဵဝ်း ယုတႃႉ၊ ၶဝ်ယဵင်ႈၶႅၼ်းႁႅင်းလႄႈႁၢဝ်ႈၵျၢမ်းၼႃႇသေၶေႃႈၵႂၢမ်းၵူၼ်းမဵဝ်း ဢိသရေး၊ ၶဝ်ဢေႃႈ။
မိူဝ်ႈၼၼ်ႉ၊ၵူၼ်းဢၼ်ၸၢင်ႈႁဵတ်းၽေးတုၵ်ႉၶႃႉသႂ်ႇပိူၼ်ႈဢၼ်လႆႈၸိုဝ်ႈဝႃႈ၊ သေးပႃႉ၊ လုၵ်ႈၸၢႆး ပိၶရိ၊ မဵဝ်း ပိၼ်ႇယႃႇမိၼ်ႇ၊ ၼၼ်ႉၵေႃႉၼိုင်ႈၵႂႃႇမီးယူႇၵႃႈတီႈၼၼ်ႈယူႇဢေႃႈ။ မၼ်းၼၼ်ႉပဝ်ႇတိုင်ႈၼႄးၶရႃႇသေယဝ်ႉလၢတ်ႈဝႃႈ၊ “ဢူဝ်းၵူၼ်းမဵဝ်း ဢိသရေး၊ ၶဝ်႟။ ႁဝ်းဢမ်ႇၸၢပ်ႈသႅင်ႇၵၼ်တင်း တႃႇဝိတ်ႈ၊ လႃးလႃး။ ႁဝ်းဢမ်ႇမီးလွင်ႈဢၼ်တၵ်းၶၢမ်ႇဢဝ်ၵႃႈသင်တီႈလုၵ်ႈၸၢႆး ယေႇသႄး၊ ယဝ်ႉ၊ဢွၼ်ၵၼ်ပွၵ်ႈၶိုၼ်းမိူဝ်းၵႂႃႇတီႈႁိူၼ်းၽႂ်ႁိူၼ်းမၼ်းၵူႈၵေႃႉၵူႈၵူၼ်းတႃႉႁဝ်း၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢွၼ်ၵၼ်ဢွၵ်ႇသေၵႃႈတီႈ တႃႇဝိတ်ႈ၊ သေလႄႈၸွမ်းၵႂႃႇၽၢႆႇ သေးပႃႉ၊ သေဢေႃႈ။ ၵူၼ်းမဵဝ်း ယုတႃႉ၊ တင်းလၢႆၸမ်ႉ၊ၸုၵ်းယူႇၽၢႆႇၶုၼ်ႁေႃၶမ်းၶဝ်သေယဝ်ႉ၊ၸပ်းၸွမ်းမၼ်းၸဝ်ႈယူႇ၊တႄႇဢဝ်ၵႃႈတီႈၼမ်ႉ ယေႃးတၢၼ်ႇ၊ တေႃႇထိုင်ႁွတ်ႈဝဵင်း ယေႇရုသလႅမ်ႇ၊ ဢေႃႈ။
မိူဝ်ႈဢၼ် တႃႇဝိတ်ႈ၊ ႁွတ်ႈထိုင်ၵႃႈတီႈႁၢင်ႈႁေႃၸဝ်ႈဝဵင်း ယေႇရုသလႅမ်ႇ၊ ယဝ်ႉၼၼ်ႉ၊ဢဝ်ၸိူင်ႉၼၢင်းသိပ်းၵေႃႉဢၼ်ဝႆႉၵိုတ်းႁႂ်ႈပႂ်ႉႁေႃၸဝ်ႈၸိူဝ်းၼၼ်ႉၶင်ဝႆႉၵႃႈၼႂ်းႁိူၼ်းဢေႃႈ။ ပိၵ်ႉသမ်ႉလဵင်ႉလူၶဝ်ဝႆႉလီလီသေၵေႃႈမၼ်းဢမ်ႇၶဝ်ႈၸူးၼွၼ်းလူၺ်ႈၵၼ်တင်းၶဝ်။ ၶဝ်ၼၼ်ႉၶၢမ်ႇတၢင်းဢၼ်ၶျုၵ်ႈဝႆႉမိူၼ်ၸိူဝ်ႉၼင်ႇၶဝ်ပဵၼ်မႄႈမၢႆႈတေႃႇၸူဝ်ႈဢသၢၵ်ႈၶဝ်ဢေႃႈ။
ၶုၼ်ႁေႃၶမ်းပူင်ဢမိင်ႉတီႈ ဢႃႇမသႃႇ၊ လႄႈဝႃႈ၊ “ၼႂ်းသၢမ်ဝၼ်းၼႆႉႁွင်ႉဢဝ်ၵူၼ်း ယုတႃႉ၊ တင်းလၢႆမႃးၸုတုမ်ၵၼ်ၵႃႈတီႈၵဝ်ၼႆႉတႃႉ။ တူဝ်မႂ်းၵေႃႈမႃးၸွမ်းတႃႉ၊” ဝႃႈၼင်ႇၼႆဢေႃႈ။-
ဢႃႇမသႃႇ၊ ၵေႃႈၵႂႃႇလႄႈႁႂ်ႈၵူၼ်း ယုတႃႉ၊ တင်းလၢႆမႃးၸုတုမ်ၵၼ်သေယဝ်ႉ၊တူဝ်မၼ်းၸမ်ႉ၊မႃးပူၼ်ႉၶိင်ႇဢၼ်သင်ႇလၢတ်ႈဝႆႉၼၼ်ႉဢေႃႈ။-
တႃႇဝိတ်ႈ၊ ၸင်ႇမီးဢမိင်ႉတီႈ ဢၽိသေး၊ လႄႈဝႃႈ၊ “ သေးပႃႉ၊ တၵ်းႁဵတ်းၽေးတုၵ်ႉၶႃႉဢၼ်ယဵင်ႈၶႅၼ်းယႂ်ႇၼႃႇသေ ဢပႃႉသလုမ်ႇ၊ လူးၵွၼ်ႇဢေႃႈ။ ႁွင်ႉဢဝ်ၵူၼ်းၵဝ်တင်းလၢႆလႄႈလိုပ်ႈလမ်းၸွမ်းမၼ်းၼၼ်ႉတႃႉ။ ၵူဝ်မၼ်းၶဝ်ႈၵႂႃႇၵႃႈၼႂ်းဝဵင်းဢၼ်မၼ်ႈၶိူင်ႇသေတီႈတီႈလႄႈလပ်ႉႁၢႆတႃႁဝ်းၵႂႃႇဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၵႃႈပဵၼ်ၵူၼ်း ယွႃႇၽႃႉ၊ လႂ်၊ၵူၼ်းပႂ်ႉဢသၢၵ်ႈၸဝ်ႈလႂ်၊ဢိၵ်ႇတင်းၵူၼ်းသိုၵ်းတင်းသဵင်ႈတင်းလူင်ၸိူဝ်းၼၼ်ႉဢွၼ်ၵၼ်ၸွမ်း ဢၽိသေး၊ ဢွၵ်ႇဝဵင်း ယေႇရုသလႅမ်ႇ၊ ၵႂႃႇႁႂ်ႈလႆႈလိုပ်ႈလမ်းၸွမ်း သေးပႃႉ၊ ဢေႃႈ။-
မိူဝ်ႈဢၼ်ၶဝ်ႁွတ်ႈထိုင်တီႈမၢၵ်ႇႁိၼ်လူင်ၵႃႈတီႈဝဵင်း ၵိပွင်ႇ၊ ၼၼ်ႉၸိုင်၊ ဢႃႇမသႃႇ၊ မႃးႁပ်ႉႁူဝ်တၢင်းၶဝ်ဢေႃႈ။ ယွႃႇၽႃႉ၊ ၼုင်ႈၶူဝ်းသိုၵ်းယူႇ၊ႁတ်ႉသၢႆဢႅဝ်ယူႇလႄႈဢဝ်လၢပ်ႇသႂ်ႇၵပ်းၼၼ်ႉမတ်ႉၵွပ်ႈၸပ်းသၢႆဢႅဝ်ယူႇဢေႃႈ။ ၼႂ်းမိူဝ်ႈဢၼ်မၼ်းယင်းတိုၵ်ႉၵႂႃႇယူႇၼၼ်ႉလၢပ်ႇမၼ်းထွတ်ႇတူၵ်းၵႂႃႇဢေႃႈ။-
ယွႃႇၽႃႉ၊ ၵေႃႈလၢတ်ႈတီႈ ဢႃႇမသႃႇ၊ လႄႈဝႃႈ၊ “ယူႇလီၵိၼ်ဝၢၼ်ယူႇႁိုဝ်း။ ၼွင်ႉၸၢႆးၵဝ်႟၊” ဝႃႈၼင်ႇၼႆလႄႈ ယွႃႇၽႃႉ၊ ဢဝ်မိုဝ်းၶွၼ်ၶႂႃမၼ်းယိပ်းၵမ်ၼူတ်ႇၵၢင်း ဢႃႇမသႃႇ၊ သေလႄႈၸုပ်ႇၼူမ်ဢေႃႈ။-
ဢႃႇမသႃႇ၊ ဢမ်ႇလႆႈဝႆႉသတိတီႈလၢပ်ႇဢၼ် ယွႃႇၽႃႉ၊ ယိပ်းၵမ်ဝႆႉၵႃႈၼႂ်းမိုဝ်းၶွၼ်သၢႆႉမၼ်းၼၼ်ႉလႄႈ၊ ယွႃႇၽႃႉ၊ ဢဝ်တႅင်းသႂ်ႇတီႈပုမ်မၼ်းလႄႈဢဝ်သႆႈမၼ်းႁႄႈတူၵ်းၵႃႈၼိူဝ်လိၼ်ဢေႃႈ။ မၼ်းတၢႆၵႂႃႇၵမ်းလဵဝ်လႄႈ ယွႃႇၽႃႉ၊ ယင်းဢမ်ႇလူဝ်ႇတႅင်းသႂ်ႇထႅင်ႈယဝ်ႉဢေႃႈ။ ယွႃႇၽႃႉ၊ တင်းၼွင်ႉၸၢႆးမၼ်း ဢၽိသေး၊ ၸိူဝ်းၼၼ်ႉဢွၼ်ၵၼ်သိုပ်ႇလိုပ်ႈလမ်းၸွမ်း သေးပႃႉ၊ လုၵ်ႈၸၢႆး ပိၶရိ၊ ဢေႃႈ။-
ၵူၼ်း ယွႃႇၽႃႉ၊ ၵေႃႉၼိုင်ႈၸုၵ်းၵႃႈတီႈႁိမ်းတူဝ်တၢႆ ဢႃႇမသႃႇ၊ ယူႇသေယဝ်ႉ၊ႁွင်ႉပၢဝ်ႇလႄႈဝႃႈ၊ “ၵေႃႉဢၼ်ၽွမ်ႉၽၢႆႇ ယွႃႇၽႃႉ၊ ဢိၵ်ႇတင်းၵေႃႉဢၼ်ယူႇၽၢႆႇ တႃႇဝိတ်ႈ၊ ၼၼ်ႉၵႂႃႇၸွမ်း ယွႃႇၽႃႉ၊ တႃႉ၊” ဝႃႈၼင်ႇၼႆဢေႃႈ။-
တူဝ်တၢႆ ဢႃႇမသႃႇ၊ ၼၼ်ႉၵိင်ႈဢိူၵ်ႇလိူတ်ႈယူႇၵႃႈၼႂ်းၵၢင်တၢင်းဢေႃႈ။ ၵူၼ်း ယွႃႇၽႃႉ၊ ၼၼ်ႉလႆႈႁၼ်ၵူၼ်းတင်းသဵင်ႈတင်းလူင်ၸုၵ်းယူႇ၊မၼ်းၸင်ႇလၢၵ်ႈဢဝ်တူဝ်တၢႆၼၼ်ႉသေၵႃႈတီႈၶူၼ်တၢင်းၵႂႃႇဝႆႉၵႃႈတီႈၼႂ်းပၢင်ႇတူင်ႈၼႃးသေယဝ်ႉ၊ဢဝ်ၶူဝ်းၼုင်ႈႁူမ်ႇဝႆႉဢေႃႈ။-
တူဝ်တၢႆၼၼ်ႉၶၢႆႉဢွၵ်ႇသေၵႃႈတီႈၶူၼ်တၢင်းၵႂႃႇယဝ်ႉလႄႈ၊ၵူၼ်းၵူႈၵေႃႉၵူႈၵူၼ်းၸွမ်းလင် ယွႃႇၽႃႉ၊ ၵႂႃႇလႄႈလိုပ်ႈလမ်းၸွမ်း သေးပႃႉ၊ ဢေႃႈ။
သေးပႃႉ၊ ၼၼ်ႉၶၢမ်ႈပူၼ်ႉဢိူင်ႇဢၼ်ၵူၼ်းၸိူဝ်ႉၶိူဝ်း ဢိသရေး၊ ယူႇသဝ်းၵႃႈမီးတင်းသဵင်ႈတင်းလူင်ၼၼ်ႉလႄႈႁွတ်ႈၽႅဝ်ၵႂႃႇၵႃႈတီႈဝဵင်း ဢႃႇပေႇလႃႉ၊ မိူင်း ပႅတ်ႉမႃႇၶႃႉ၊ လူၺ်ႈၵၼ်တင်းၵႃႈဢၼ်ပဵၼ်ၵူၼ်းၸိူဝ်ႉၶိူဝ်း ပိၶရိ၊ ၼၼ်ႉၸုလုမ်းတုမ်ၵၼ်သေလႄႈၸွမ်းမၼ်းၶဝ်ႈၵႂႃႇၵႃႈၼႂ်းဝဵင်းၼၼ်ႉဢေႃႈ။-
ၵူၼ်း ယွႃႇၽႃႉ၊ တင်းလၢႆငိၼ်းလွင်ႈဢၼ် သေးပႃႉ၊ မီးၵႃႈတီႈၼၼ်ႈၼၼ်ႉလႄႈၶဝ်ၵႂႃႇလွမ်ႉႁွပ်ႈဝဵင်းၼၼ်ႉဝႆႉဢေႃႈ။ ၶဝ်ၵုမ်းတႅၼ်လိၼ်ဢၼ်မီးတေႃႈၼႃႈၵၼ်ၽၢႆႇၼိုင်ႈတင်းလမ်းဝဵင်းၼၼ်ႉသေယဝ်ႉ၊သမ်ႉၶုတ်းမူင်ႇတႂ်ႈလမ်းဝဵင်းႁႂ်ႈၵိူၼ်ႇပင်းတူၵ်းဢေႃႈ။-
မီးမႄႈမၢႆႈဢၼ်မီးတၢင်းႁုၵေႃႉၼိုင်ႈၸင်ႇၸုၵ်းၵႃႈၼိူဝ်လမ်းဝဵင်းလႄႈႁွင်ႉသႅၼ်ႇလႄႈဝႃႈ၊ “ထွမ်ႇ။ ထွမ်ႇ။ မွၵ်ႇလၢတ်ႈႁႂ်ႈ ယွႃႇၽႃႉ၊ မႃးၵႃႈတီႈၼႆႈတႃႉ။ ၵဝ်တၵ်းလၢတ်ႈၵႂၢမ်းတေႃႇမၼ်းၶႃႈဢေႃႈ၊” ဝႃႈၼင်ႇၼႆဢေႃႈ။-
ယွႃႇၽႃႉ၊ ၵေႃႈၵႂႃႇလႄႈမၼ်းၼၼ်ႉထၢမ်လႄႈဝႃႈ၊ “ၸွင်ႇၸဝ်ႈႁဝ်းၼႆႉၸႂ်ႈ ယွႃႇၽႃႉ၊ ၶႃႈႁိုဝ်း၊” ဝႃႈၼင်ႇၼႆလႄႈ၊ ယွႃႇၽႃႉ၊ ၶိုၼ်းလၢတ်ႈလႄႈဝႃႈ၊ “ၸႂ်ႈယဝ်ႉ။ ပဵၼ်ၵဝ်ယဝ်ႉ၊” ဝႃႈၼင်ႇၼႆဢေႃႈ။ မႄႈယိင်းၼၼ်ႉၵေႃႈလၢတ်ႈလႄႈဝႃႈ၊ “ၸဝ်ႈ၊ထွမ်ႇငိၼ်းၵႂၢမ်းၵဝ်ၶႃႈသေၵမ်း၊” ဝႃႈၼင်ႇၼႆဢေႃႈ။ ယွႃႇၽႃႉ၊ ၶိုၼ်းလၢတ်ႈလႄႈဝႃႈ၊ “ၵဝ်ထွမ်ႇငိၼ်းယူႇဢေႃႈ၊” ဝႃႈၼင်ႇၼႆဢေႃႈ။
မႄႈယိင်းၼၼ်ႉလၢတ်ႈလႄႈဝႃႈ၊ “မိူဝ်ႈၵွၼ်ႇဢွၼ်ၼႆႉၼၼ်ႉပိူၼ်ႈၵႆႉမီးထုင်းၵႂၢမ်းဢၼ်ဝႃႈ၊ ‘ၵႂႃႇလႄႈတိူင်ႇပၢင်ႇၵၼ်ၵႃႈတီႈဝဵင်း ဢႃႇပေႇလႃႉ၊ လႄႈတႅပ်းတတ်းဢမုတႃႉ၊’ ဝႃႈၼင်ႇၼႆဢေႃႈ။-
ဝဵင်းႁဝ်းၶႃႈၼႆႉပဵၼ်ဝဵင်းယႂ်ႇဝဵင်းလူင်၊ဝဵင်းဢၼ်ၸၢင်ႈယူႇၼိမ်ၼိမ်လီလီလႄႈပႂ်ႉသဵတ်ႈၸႃႇၼႂ်းမဵဝ်း ဢိသရေး၊ ဢေႃႈ။ ၸဝ်ႈႁဝ်းၼႆႉႁႃႁႂ်ႈလႆႈယႃႉၽဵဝ်ႈဝဵင်းလူင်ၼႆႉလူင်ပႄႇ။ ၵွပ်ႈသင်လႄႈၸဝ်ႈႁဝ်းမီးဢလူဝ်ႇႁႂ်ႈလႆႈၵိူၼ်ႇယႃႉပႅတ်ႈဢုၵ်ႉၸႃႇၶူဝ်းၶွင် ထႃႇဝရႃႉၽြႃး၊ ၸိူဝ်ႉၼင်ႇႁိုဝ်ၶႃႈ၊” ဝႃႈၼင်ႇၼႆဢေႃႈ။
ယွႃႇၽႃႉ၊ ၶိုၼ်းလၢတ်ႈလႄႈဝႃႈ၊ “ၵဝ်ဢမ်ႇမီးဢလူဝ်ႇႁႂ်ႈလႆႈႁဵတ်းၸိူဝ်ႉၼင်ႇၼၼ်။ ၵဝ်တၵ်းဢမ်ႇယႃႉၽဵဝ်ႈဝဵင်းလူင်သူၼႆႉလႃးလႃး။-
ႁဝ်းဢၢင်ႈဢၢၼ်းႁႂ်ႈလႆႈယႃႉၽဵဝ်ႈဢမ်ႇၸႂ်ႈ။ ၵူၼ်းၵေႃႉၼိုင်ႈဢၼ်လႆႈၸိုဝ်ႈ သေးပႃႉ၊ လုၵ်ႈၸၢႆး ပိၶရိ၊ ဢၼ်လုၵ်ႉသေၵႃႈတီႈမိူင်းလွႆ ဢေႇၽရိမ်ႇ၊ မႃးၼၼ်ႉလုၵ်ႉၽိုၼ်ႉၶုၼ်ႁေႃၶမ်း တႃႇဝိတ်ႈ၊ ဢေႃႈ။ ဢဝ်ၵူၼ်းၵေႃႉၼႆႉၵေႃႉလဵဝ်ၵူၺ်းဢၢပ်ႈပၼ်တႃႉ။ ပေႃးဢၢပ်ႈပၼ်ၸိုင်၊ၵဝ်တၵ်းသုတ်ႉႁူၼ်သေၵႃႈတီႈဝဵင်းၼႆႉၵႂႃႇဢေႃႈ၊” ဝႃႈၼင်ႇၼႆဢေႃႈ။ မႄႈယိင်းၼၼ်ႉၶိုၼ်းလၢတ်ႈလႄႈဝႃႈ၊ “ႁဝ်းၶႃႈတၵ်းဢဝ်ၵွၵ်းႁူဝ်မၼ်းထိမ်ႈတူၵ်းၶၢမ်ႈလမ်းဝဵင်းပၼ်တီႈၸဝ်ႈၶႃႈဢေႃႈ၊” ဝႃႈၼင်ႇၼႆဢေႃႈ။-
မႄႈယိင်းၼၼ်ႉၸွမ်းၵႃႈၼင်ႇဢၼ်မၼ်းလၵ်းလႅမ်ၼၼ်ႉလႄႈမၼ်းၵႂႃႇတီႈၵူၼ်းဝဵင်းတင်းသဵင်ႈတင်းလူင်သေယဝ်ႉ၊ၶဝ်ဢွၼ်ၵၼ်တႅပ်းဢဝ်ၵွၵ်းႁူဝ် သေးပႃႉ၊ သေလႄႈထိမ်ႈတူၵ်းၶၢမ်ႈလမ်းဝဵင်းပၼ်တီႈ ယွႃႇၽႃႉ၊ ဢေႃႈ။ ယွႃႇၽႃႉ၊ ၵေႃႈပဝ်ႇတိုင်ႈၼႄးၶရႃႇႁႂ်ႈၵူၼ်းမၼ်းတင်းလၢႆဢွၵ်ႇသေၵႃႈတီႈဝဵင်းၼၼ်ႉၵႂႃႇသေယဝ်ႉ၊ၶဝ်ဢွၼ်ၵၼ်ၶိုၼ်းမိူဝ်းၵႂႃႇသေဢေႃႈ။ ယွႃႇၽႃႉ၊ ပွၵ်ႈမိူဝ်းၸူးတီႈၶုၼ်ႁေႃၶမ်းဝဵင်း ယေႇရုသလႅမ်ႇ၊ သေဢေႃႈ။
ယွႃႇၽႃႉ၊ ပဵၼ်ၸဝ်ႈသိုၵ်းၵွၼ်းတပ်ႉဢၼ်ဢုပ်ႉထိင်းတပ်ႉသိုၵ်းမဵဝ်း ဢိသရေး၊ ဢေႃႈ။ ပေႇၼႃႇယႃႉ၊ လုၵ်ႈၸၢႆး ယေႃႇယတႃႉ၊ ပဵၼ်ၶုၼ်ၵွၼ်းတပ်ႉဢၼ်ပႂ်ႉဢသၢၵ်ႈၸဝ်ႈဢေႃႈ။-
ဢတေႃးရမ်ႇ၊ ပဵၼ်ဝုၼ်ႇၵဵပ်းၶွၼ်ႇၸဝ်ႈဢေႃႈ။ ယေႇႁူဝ်းသၽတ်ႉ၊ လုၵ်ႈၸၢႆး ဢႁိလုတ်ႉ၊ ၼၼ်ႉပဵၼ်ဢတႂၢင်းဝုၼ်ႇဢေႃႈ။-
သေးဝႃႉ၊ ပဵၼ်ၽူႈမၢႆလူင်ဢေႃႈ။ ၸႃႇတုၵ်ႉ၊ ဢိၵ်ႇတင်း ဢပျႃႇထႃႇ၊ ၸိူဝ်းၼၼ်ႉပဵၼ်ယဵၸ်ႈပရေႃးႁဵၵ်ႈ ဢေႃႈ။-
ဢိရႃႉ၊ ၵူၼ်းဝဵင်း ယႃႇဢိရႃႉ၊ ၼၼ်ႉၸမ်ႉ၊ပဵၼ်ယဵၸ်ႈပရေႃးႁဵၵ်ႈတီႈ တႃႇဝိတ်ႈ၊ ဢေႃႈ။
ၼႂ်းၸူဝ်ႈပၢၼ်ဢၼ် တႃႇဝိတ်ႈ၊ ႁဵတ်းၶုၼ်ႁေႃၶမ်းယူႇၼၼ်ႉပဵၼ်တၢင်းဢၼ်ၶဝ်ႈၵႃႈမၢၵ်ႇပႅင်းသၢမ်ပီထတ်းၵၼ်ဢေႃႈ။ ပိူဝ်ႈၼႆလႄႈ တႃႇဝိတ်ႈ၊ လဝ်ႈထၢမ်တီႈ ထႃႇဝရႃႉၽြႃး၊ လႄႈ ထႃႇဝရႃႉၽြႃး၊ ၵေႃႈမီးဢမိင်ႉလႄႈဝႃႈ၊ “ဢၼ်ၼႆႉၸိုင်၊ပဵၼ်ၵွပ်ႈပိူဝ်ႈ သေႃးလု၊ ဢိၵ်ႇတင်းပီႈၼွင်ႉၸိူဝ်ႉၶိူဝ်းမၼ်းၸိူဝ်းဢၼ်ၸၢင်ႈဢဝ်ဢသၢၵ်ႈၵူၼ်းတၢႆၼၼ်ႉဢေႃႈ။ မၼ်းၼၼ်ႉဢဝ်ၵူၼ်းဝဵင်း ၵိပွင်ႇ၊ တင်းလၢႆတၢႆဢေႃႈ၊” ဝႃႈၼင်ႇၼႆဢေႃႈ။-
ၵူၼ်း ၵိပွင်ႇ၊ ၸိူဝ်းၼၼ်ႉဢမ်ႇၸႂ်ႈၸိူဝ်ႉၶိူဝ်းမဵဝ်း ဢိသရေး၊ ပဵၼ်ၵူၼ်းမဵဝ်း ဢႃႇမေႃးရိ၊ ၸိူဝ်ႉဢွၼ်ႇၶိူဝ်းၼွႆႉမဵဝ်းၼိုင်ႈဢၼ်ၵိုတ်းၵျၢၼ်ႇဝႆႉၵွပ်ႈပိူဝ်ႈမဵဝ်း ဢိသရေး၊ ၶဝ်ဝႆႉၵတိဝႃႈ၊တၵ်းပၼ်ၵတ်းယဵၼ်ၶျၢမ်းသႃႇၶဝ်ၼၼ်ႉဢေႃႈ။ ၵူၺ်းၵႃႈ၊ သေႃးလု၊ ပႂ်ႉဢၵျူဝ်းပုၼ်ႈၵူၼ်းမဵဝ်း ဢိသရေး၊ ဢိၵ်ႇတင်းၵူၼ်းမဵဝ်း ယုတႃႉ၊ သေလႄႈမၼ်းၶတ်းၸႂ်ၵျူဝ်းၸႃးႁႂ်ႈလႆႈဢဝ်ၶဝ်တၢႆဢေႃႈ။-
ပိူဝ်ႈၼႆလႄႈ တႃႇဝိတ်ႈ၊ ႁွင်ႉဢဝ်ၵူၼ်း ၵိပွင်ႇ၊ တင်းလၢႆမႃးလႄႈလၢတ်ႈတီႈၶဝ်လႄႈဝႃႈ၊ “ၶႂ်ႈႁႂ်ႈၵဝ်ႁဵတ်းၵႃႈသင်ပုၼ်ႈသူ။ ၵဝ်တၵ်းလႆႈဢဝ်ၵႃႈသင်ၽေႇဢပျတ်ႈပၼ်သူ၊ၼင်ႇႁိုဝ်သူတၵ်းလႆႈပၼ်တၢင်းလီတီႈၵူၼ်း ထႃႇဝရႃႉၽြႃး၊ ” ဝႃႈၼင်ႇၼႆဢေႃႈ။
ၶဝ်ၶိုၼ်းဢွၼ်ၵၼ်လဝ်ႈလၢတ်ႈလႄႈဝႃႈ၊ “တၢင်းဢၼ်ၶႃႈၸဝ်ႈႁဝ်းၶဝ်ၽိတ်းၵၼ်တင်း သေႃးလု၊ ဢိၵ်ႇတင်းလုၵ်ႈလၢၼ်ၸိူဝ်ႉၶိူဝ်းမၼ်းၼၼ်ႉဢဝ်တင်းငိုၼ်းတင်းၶမ်းၵႄႈလိတ်ႈပၼ်ၵေႃႈဢမ်ႇပျေႇၸႂ်လႆႈၶႃႈ။ သမ်ႉဢဝ်ၵူၼ်းၼႂ်းမဵဝ်း ဢိသရေး၊ တၢင်ႇၵေႃႉတၢင်ႇၵူၼ်းၶၢမ်ႇတၢႆၵေႃႈဢမ်ႇပျေႇၸႂ်ႁဝ်းၶႃႈလႆႈတီႈၶႃႈ၊” ဝႃႈၼင်ႇၼႆဢေႃႈ။ တႃႇဝိတ်ႈ၊ ထၢမ်လႄႈဝႃႈ၊ “ပေႃးပဵၼ်ၼႆၸိုင်၊သူၶႂ်ႈႁႂ်ႈၵဝ်ႁဵတ်းၵႃႈသင်ပုၼ်ႈသူ၊” ဝႃႈၼင်ႇၼႆဢေႃႈ။
ၶဝ်ၵေႃႈၶိုၼ်းလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “ သေႃးလု၊ ၼၼ်ႉၶတ်းၸႂ်ၵျူဝ်းၸႃးယႃႉၽဵဝ်ႈၶႃႈၸဝ်ႈႁဝ်းၶဝ်ပႅတ်ႈတေႃႇထိုင်ႁွတ်ႈၶႃႈၸဝ်ႈႁဝ်းၶဝ်ထၢၼ်ႈပေႃးဢမ်ႇၵိုတ်းဢမ်ႇၵျၢၼ်ႇၵႃႈၼႂ်းမိူင်း ဢိသရေး၊ ၼႆႉတီႈၶႃႈယဝ်ႉ။-
ပိူဝ်ႈၼႆလႄႈၶႅၼ်းတေႃႈဢဝ်လုၵ်ႈၸၢႆးမၼ်းၸဵတ်းၵေႃႉဢၢပ်ႈပၼ်ၶႃႈၸဝ်ႈႁဝ်းၶဝ်၊ႁႂ်ႈလႆႈဢဝ်ၶဝ်ႁွႆႈဝႆႉၵႃႈတီႈၽၢႆႇၼႃႈ ထႃႇဝရႃႉၽြႃး၊ ၵႃႈၼႂ်းဝဵင်း ၵိပႃႉ၊ ဢၼ်ပဵၼ်ဝဵင်း သေႃးလု၊ ၵေႃႉဢၼ် ထႃႇဝရႃႉၽြႃး၊ လိူၵ်ႈတင်ႈဝႆႉၼၼ်ႉသေၵမ်းၶႃႈ၊” ဝႃႈၼင်ႇၼႆဢေႃႈ။
ၼႂ်းဝႃႈၼၼ်သေၵေႃႈ တႃႇဝိတ်ႈ၊ သေလၢႆ မေႇၽိပေႃးသႅတ်ႉ၊ လုၵ်ႈၸၢႆး ယေႃးၼႀၼ်ႇ၊ လၢၼ်ၸၢႆး သေႃးလု၊ ၼၼ်ႉ၊ၵွပ်ႈပိူဝ်ႈဢၼ်ၵတိသဵတ်ႈၸႃႇ ထႃႇဝရႃႉၽြႃး၊ မီးဝူင်ႈၵၢင် တႃႇဝိတ်ႈ၊ တင်း ယေႃးၼႀၼ်ႇ၊ ဢၼ်ၶဝ်လႆႈတိူင်ႇဝႃႈဝႆႉၼၼ်ႉဢေႃႈ။-
ၵွပ်ႈပိူဝ်ႈၸိူဝ်ႉၼင်ႇၼႆလႄႈ၊မၼ်းဢဝ် ဢႃႇမေႃးၼိ၊ ဢိၵ်ႇတင်း မေႇၽိပေႃးသႅတ်ႉ၊ ဢၼ်မႄႈၶဝ်ပဵၼ် ရိၸပႃႉ၊ လုၵ်ႈယိင်း ဢေႇဢႃႉ၊ သွင်ပီႈၼွင်ႉဢၼ်ၵိူတ်ႇလဵင်ႉမႃးတီႈ သေႃးလု၊ ဢိၵ်ႇတင်းလုၵ်ႈၸၢႆး မေးရပ်ႉ၊ လုၵ်ႈယိင်း သေႃးလု၊ ဢၼ်ၵိူတ်ႇလဵင်ႉမႃးတီႈ ဢႃႇတရေးလႃႉ၊ လုၵ်ႈၸၢႆး ပႃႇၸိလေး၊ ၵူၼ်းဝဵင်း မေႇႁေႃႇလသိ၊ ႁႃႈၵေႃႉၼၼ်ႉဢၢပ်ႈပၼ်ၶဝ်ဢေႃႈ။-
တႃႇဝိတ်ႈ၊ ဢဝ်ၸိူဝ်းၼၼ်ႉဢၢပ်ႈပၼ်ၼႂ်းမိုဝ်းၵူၼ်း ၵိပွင်ႇ၊ တင်းလၢႆလႄႈၶဝ်ၵေႃႈဢဝ်ၵႂႃႇႁွႆႈဝႆႉၵႃႈတီႈၼိူဝ်လွႆၽၢႆႇၼႃႈ ထႃႇဝရႃႉၽြႃး၊ သေယဝ်ႉ၊ၶဝ်တင်းၸဵတ်းၵေႃႉတၢႆၵႂႃႇမိူဝ်ႈလဵဝ်ၵၼ်ဢေႃႈ။ ၶိင်ႇယၢမ်းဢၼ်ၶဝ်လႆႈၶၢမ်ႇတၢင်းဢၼ်ဢဝ်တၢႆၼၼ်ႉပဵၼ်ၶိင်ႇပၢတ်ႇၶဝ်ႈၼႂ်းဝၼ်းဢွၼ်တၢင်းသုတ်းဢၼ်တႄႇၸႃႉပၢတ်ႇၶဝ်ႈမုယေႃးၼၼ်ႉဢေႃႈ။
မိူဝ်ႈၼၼ်ႉ၊မေးၼွႆႉ သေႃးလု၊ ဢၼ်ပဵၼ် ရိၸပႃႉ၊ လုၵ်ႈယိင်း ဢေႇဢႃႉ၊ ၼၼ်ႉဢဝ်ၼင်ပေႃသိူဝ်ႇၵႃႈၼိူဝ်မၢၵ်ႇႁိၼ်ပုၼ်ႈဢၼ်တၵ်းၼွၼ်းဢၼ်မီးၵႃႈႁိမ်းတူဝ်တၢႆၸိူဝ်းၼၼ်ႉသေယဝ်ႉ၊ပႂ်ႉယူႇၵႃႈတီႈၼၼ်ႈၸႃႉၸဵမ်ၶိင်ႇဢၼ်ၸႃႉပၢတ်ႇၶဝ်ႈတေႃႇထိုင်ႁွတ်ႈၶိင်ႇႁူဝ်ၽူၼ်ၶၢဝ်းႁိူဝ်ႉဢေႃႈ။ မၼ်းပႂ်ႉႁေႃႈၼူၵ်ႉႁႂ်ႈၶဝ်ဢမ်ႇလႆႈၸပ်းတူဝ်တၢႆၶိင်ႇၵၢင်ဝၼ်းဢိၵ်ႇတင်းႁႂ်ႈတူဝ်ထိူၼ်ႇဢမ်ႇလႆႈၶူပ်းၵိၼ်ၶဝ်ၶိင်ႇၵၢင်ၶိုၼ်းၼၼ်ႉဢေႃႈ။
မိူဝ်ႈဢၼ် တႃႇဝိတ်ႈ၊ ငိၼ်းလွင်ႈဢၼ် ရိၸပႃႉ၊ ႁဵတ်းၸိူဝ်ႉၼင်ႇၼၼ်ၼၼ်ႉၸိုင်၊-
တႃႇဝိတ်ႈ၊ ၵႂႃႇဢဝ်လုပ်ႇ သေႃးလု၊ တင်းလုပ်ႇလုၵ်ႈၸၢႆးၸဝ်ႈ ယေႃးၼႀၼ်ႇ၊ ၸိူဝ်းၼၼ်ႉသေၵႃႈၼႂ်းမိုဝ်းၵူၼ်းဝဵင်း ယႃႇပႅတ်ႉ၊ မိူင်း ၵိလတ်ႉ၊ ၼၼ်ႉမႃးဢေႃႈ။ လုပ်ႇၸိူဝ်းၼၼ်ႉၶဝ်လၵ်ႉဢဝ်မႃးသေၵႃႈတီႈပၢင်ႇဢၼ်ၸုတုမ်ၵၼ် ၵႃႈၼႂ်းဝဵင်း ပႅတ်ႉသၼ်ႇ၊ တီႈဢၼ်ၵူၼ်း ၽိလိတ်ႉတိ၊ ၶဝ်လႆႈဢဝ် သေႃးလု၊ တၢႆၵႃႈၼိူဝ်လွႆ ၵိလပေႃႇ၊ သေလႄႈဢဝ်မႃးႁွႆႈဝႆႉၼၼ်ႉဢေႃႈ။-
တႃႇဝိတ်ႈ၊ ဢဝ်လုပ်ႇ သေႃးလု၊ တင်းလုပ်ႇ ယေႃးၼႀၼ်ႇ၊ ၸိူဝ်းၼၼ်ႉမႃးသေယဝ်ႉ၊ၸုသိမ်းဢဝ်လုပ်ႇၶဝ်ၸဵတ်းၵေႃႉဢၼ်ႁွႆႈဝႆႉၸိူဝ်းၼၼ်ႉသေလႄႈ၊-
ဢဝ်လုပ်ႇ သေႃးလု၊ တင်းလုပ်ႇ ယေႃးၼႀၼ်ႇ၊ ၸိူဝ်းၼၼ်ႉသၢင်းၵျူဝ်ႇၵႃႈတီႈဝၢၼ်ႈ ၸေးလႃႉ၊ ဢိူင်ႇ ပိၼ်ႇယႃႇမိၼ်ႇ၊ ၵႃႈၼႂ်းပႃႇႁဵဝ်ႈ ၵိသႃႉ၊ ၵေႃႉဢၼ်ပဵၼ်ပေႃႈ သေႃးလု၊ ၼၼ်ႉဢေႃႈ။ လွင်ႈတၢင်းၼႆႉၶဝ်ႁဵတ်းၸွမ်းၵႃႈၼင်ႇဢၼ်ၶုၼ်ႁေႃၶမ်းပူင်ဢမိင်ႉဝႆႉၼၼ်ႉဢေႃႈ။ လိုၼ်းၼၼ်ႉၸင်ႇၽြႃးပဵၼ်ၸဝ်ႈထွမ်ႇဢဝ်ၵႂၢမ်းသူးတွင်းပုၼ်ႈသိုင်ႇၸိုင်ႈဝၢၼ်ႈမိူင်းၸဝ်ႈၼၼ်ႉဢေႃႈ။
ၵူၼ်း ၽိလိတ်ႉတိ၊ တင်းလၢႆသမ်ႉတိုၵ်းၵၼ်တင်းၵူၼ်းမဵဝ်း ဢိသရေး၊ ထႅင်ႈဢေႃႈ။ တႃႇဝိတ်ႈ၊ ဢိၵ်ႇတင်းၵူၼ်းမၼ်းတင်းလၢႆၵေႃႈလူင်းၵႂႃႇႁပ်ႉတိုၵ်းတေႃးၵူၼ်း ၽိလိတ်ႉတိ၊ ၸိူဝ်းၼၼ်ႉဢေႃႈ။ ၼႂ်းၼႃႈသိုၵ်းၸိူဝ်းၼၼ်ႉ တႃႇဝိတ်ႈ၊ ႁႅင်းဢူၼ်ႈၵႂႃႇဢေႃႈ။-
မိူဝ်ႈၼၼ်ႉ၊ ဢိသပိပေႇၼုတ်ႉ၊ ၵူၼ်းတူဝ်ယႂ်ႇမိူၼ်ၽီလူးလူင်ၼႂ်းၸိူဝ်ႉၶိူဝ်း ရေႇၽိမ်း၊ ၼၼ်ႉယိပ်းၵမ်ၵၼ်းႁွၵ်ႇတွင်းလိူင်ဢၼ်ၼမ်ႉၼၵ်းမၼ်းမီးသွင်ၸွႆႉႁႃႈၶၼ် လႄႈႁတ်ႉသၢႆပႃးလၢပ်ႇဢၼ်မႂ်ႇဝႆႉသေယဝ်ႉ၊ၵျၢမ်ႇတၵ်းဢဝ် တႃႇဝိတ်ႈ၊ တၢႆဢေႃႈ။-
ၵူၺ်းၵႃႈ၊ ဢၽိသေး၊ ဢၼ်မႄႈမၼ်းပဵၼ် ၸေႇရုယႃႇ၊ ၼၼ်ႉမႃးၸွႆႈၽၢႆႇ တႃႇဝိတ်ႈ၊ လႄႈတိုၵ်းတေႃးၵူၼ်းၽီလူးလူင်ၼၼ်ႉသေယဝ်ႉဢဝ်တၢႆပႅတ်ႈဢေႃႈ။ မိူဝ်ႈၼၼ်ႉၵူၼ်း တႃႇဝိတ်ႈ၊ တင်းလၢႆႁႂ်ႈ တႃႇဝိတ်ႈ၊ ဝႆႉၵတိသဵတ်ႈၸႃႇလွင်ႈဢၼ်တၵ်းဢမ်ႇၸွမ်းၵႂႃႇၵႃႈၼႂ်းၼႃႈသိုၵ်းထႅင်ႈသေပွၵ်ႈၼၼ်ႉလႄႈလဝ်ႈလၢတ်ႈဝႃႈ၊ “ၸဝ်ႈႁဝ်းပဵၼ်တီႈဢၼ်မဵဝ်း ဢိသရေး၊ မုင်ႈမွင်းဢႃးၵူဝ်းလႄႈႁဝ်းၶႃႈဢမ်ႇသိူဝ်းလႆႈသုမ်းပႅတ်ႈၸဝ်ႈႁဝ်းလၢႆလၢႆၶႃႈ၊” ဝႃႈၼင်ႇၼႆဢေႃႈ။
ဝၢႆးသေၼၼ်ႉမီးပွၵ်ႈၼိုင်ႈသမ်ႉပဵၼ်သိုၵ်းၵၼ်တင်းၵူၼ်းမဵဝ်း ၽိလိတ်ႉတိ၊ ၶဝ်ၵႃႈတီႈဝဵင်း ၵေႃႇၽႃႉ၊ လႄႈၼႂ်းၼႃႈသိုၵ်းၼၼ်ႉ သိပေႇၵေး၊ ၵူၼ်းဝဵင်း ႁုသႃႉ၊ လႆႈဢဝ်တၢႆၵူၼ်းတူဝ်ယႂ်ႇမိူၼ်ၽီလူးလူင်ဢၼ်လႆႈၸိုဝ်ႈဝႃႈ၊ သႃႇၽႃႉ၊ ၼၼ်ႉဢေႃႈ။
လိုၼ်းၼၼ်ႉ၊သမ်ႉပဵၼ်သိုၵ်းၵၼ်တင်းၵူၼ်းမဵဝ်း ၽိလိတ်ႉတိ၊ ၶဝ်ၵႃႈတီႈဝဵင်း ၵေႃႇၽႃႉ၊ ထႅင်ႈလႄႈ ဢေးလႁႃႇၼၼ်ႇ၊ လုၵ်ႈၸၢႆး ယႃႇဢိရႃႉ၊ ၵူၼ်းဝဵင်း ပႅတ်ႉလႁႅမ်ႇ၊ ၼၼ်ႉလႆႈဢဝ်တၢႆ ၵေႃးလျတ်ႈ၊ ၵူၼ်းဝဵင်း ၵတ်ႉတိ၊ ဢၼ်ယိပ်းၵမ်ၵၼ်းႁွၵ်ႇဢၼ်ယႂ်ႇတၢၼ်ႇသီႈပၼ်ႉႁမ်းႁုၵ်ႇၼၼ်ႉဢေႃႈ။
လိုၼ်းၼၼ်ႉ၊သမ်ႉပဵၼ်သိုၵ်းၵၼ်ထႅင်ႈၵႃႈတီႈဝဵင်း ၵတ်ႉတိ၊ ဢေႃႈ။ ၵႃႈၼႂ်းပၢင်သိုၵ်းၼၼ်ႉမီးၵူၼ်းတူဝ်ယႂ်ႇမိူၼ်ၽီလူးလူင်ဢၼ်ၵျိူၵ်ႈတိုၵ်းသိုၵ်းၼၼ်ႉၵေႃႉၼိုင်ႈဢေႃႈ။ မိုဝ်းမၼ်းယေႈၶွၼ်မီးၼိဝ်ႉမိုဝ်းႁူၵ်းၼိဝ်ႉလႄႈတိၼ်မၼ်းယေႈၶွၼ်မီးၼိဝ်ႉတိၼ်ႁူၵ်းၼိဝ်ႉဢေႃႈ။ ပွင်းၵၼ်မီးသၢဝ်းသီႇၼိဝ်ႉလႄႈမၼ်းပဵၼ်ၵူၼ်းၼႂ်းၸိူဝ်ႉၶိူဝ်း ရေႇၽိမ်း၊ ဢေႃႈ။-
မၼ်းထၢမ်တႃႉထၢမ်ၶဵင်ႇမဵဝ်း ဢိသရေး၊ လႄႈ ယေႃးၼႀၼ်ႇ၊ လုၵ်ႈၸၢႆး သိမႃႇ၊ ပီႈၸၢႆး တႃႇဝိတ်ႈ၊ ၼၼ်ႉဢဝ်ၵေႃႉၼၼ်ႉတၢႆဢေႃႈ။
ၶဝ်သီႇၵေႃႉၼၼ်ႉပဵၼ်ၸိူဝ်ႉၶိူဝ်းလုၵ်ႈလၢၼ် ရေႇၽိမ်း၊ ၵူၼ်းဝဵင်း ၵတ်ႉတိ၊ လႄႈလႆႈတၢႆလူၺ်ႈမိုဝ်း တႃႇဝိတ်ႈ၊ တင်းၵူၼ်းမၼ်းတင်းလၢႆဢေႃႈ။
မိူဝ်ႈဢၼ် ထႃႇဝရႃႉၽြႃး၊ ၵႄႇသႄႇၼုၵ်ႈဢဝ် တႃႇဝိတ်ႈ၊ ဢွၵ်ႇသေၵႃႈၼႂ်းၽေးရၢၼ်ႇသူႇမၼ်းတင်းသဵင်ႈတင်းလူင်၊ဢိၵ်ႇတင်း သေႃးလု၊ ယဝ်ႉၼၼ်ႉၸိုင်၊မၼ်းႁဵတ်းၵႂၢမ်းပုၵ်ႈၼႆႉတီႈ ထႃႇဝရႃႉၽြႃး၊ ဢေႃႈ။
“ ထႃႇဝရႃႉၽြႃး၊ ပဵၼ်ၸဝ်ႈဢၼ်ၵႅတ်ႇၶႄ ႁႄႉၵင်ႈၵဝ်လႄႈ ပဵၼ်တိူၵ်ႈတီႈတိုၵ်းသိုၵ်းၵဝ်ဢေႃႈ။
ၽြႃးပဵၼ်ၸဝ်ႈၵဝ်ၼၼ်ႉပဵၼ်ၸဝ်ႈဢၼ်ၵႅတ်ႇၶႄႁႄႉၵင်ႈၵဝ်လႄႈ ၵဝ်လႆႈလူင်ႉလွတ်ႈလီၵွပ်ႈလူၺ်ႈမၼ်းၸဝ်ႈဢေႃႈ။ မၼ်းၸဝ်ႈၵႅတ်ႇၶႄႁႄႉၵင်ႈၵဝ်မိူၼ်ၸိူဝ်ႉၼင်ႇၶႅပ်းႁႄႉလၢၵ်ႈၼၢၵ်ႈလႄႈ ႁႄႉၵင်ႈပၼ်ၵဝ်ယူႇႁႂ်ႈၵဝ်လႆႈလူင်ႉလွတ်ႈလီဢေႃႈ။ မၼ်းၸဝ်ႈပဵၼ်ၸဝ်ႈဢၼ်ၵႄႇသႄႇဢဝ် ၵဝ်လွတ်ႈလႄႈ ၵႅတ်ႇၶႄၵဝ်၊ၵႄႇသႄႇဢဝ်ၵဝ်လွတ်ႈသေ ၵႃႈတီႈၽေး၊ တၢင်းဢၼ်ၼိၵ်ႈၸၢၵ်ႈငႅၼ်းသႄးၼၼ်ႉဢေႃႈ။
ၵဝ်ႁွင်ႉၵၢဝ်ႇတီႈ ထႃႇဝရႃႉၽြႃး၊ လႄႈမၼ်းၸဝ်ႈၵႄႇသႄႇဢဝ်ၵဝ်၊ လွတ်ႈသေၵႃႈၼႂ်းမိုဝ်းရၢၼ်ႇသူႇၵဝ်တင်းလၢႆဢေႃႈ။ ယွင်ႈယေႃး ထႃႇဝရႃႉၽြႃး၊ တီႈၶႃႈဢေႃႈ။
လႅင်းၼမ်ႉပိူပ်ႈၼမ်ႉတၢင်းတၢႆလွမ်ႉႁွပ်ႈၵဝ်ဝႆႉလႄႈ ၼမ်ႉၸႅဝ်ႈတၢင်းဢၼ်ယႃႉလုယႃႉလႅဝ်ၼၼ်ႉထူမ်ႈတဵင်ၵႃႈၼိူဝ်ၶႃႈလႄႈႁဵတ်းႁႂ်ႈ ၵူဝ်ႁႄဢေႃႈ။
ၽေးဢၼ်ႇတရေႇမိူင်းမရၼႃႉၼၼ်ႉလွမ်ႉႁွပ်ႈ ၵဝ်ဝႆႉလႄႈ တူင်ႇႁႅဝ်ႉၶုၼ်မရၼႃႉတင်းလၢႆၵၢင်ဝႆႉ ႁွပ်ႈႁွပ်ႈၵဝ်ဢေႃႈ။
ၼႂ်းတၢင်းဢၼ်ၵဝ်ထူပ်းၽေးၼၼ်ႉၵဝ်ၵၢဝ်ႇႁႃ ထႃႇဝရႃႉၽြႃး၊ လႄႈ ၵဝ်ႁွင်ႉသႅၼ်ႇႁွင်ႉႁႃၽြႃးပဵၼ်ၸဝ်ႈပုၼ်ႈတၢင်းၸွႆႈတၢင်းထႅမ်ဢေႃႈ။ မၼ်းၸဝ်ႈယူႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈ ငိၼ်းသဵင်ၵဝ်လႄႈ မၼ်းၸဝ်ႈထွမ်ႇငိၼ်းၵႂၢမ်းဢၼ်ၵဝ်ႁွင်ႉသႅၼ်ႇပုၼ်ႈတၢင်းၸွႆႈထႅမ်ၼၼ်ႉယူႇဢေႃႈ။
မိူဝ်ႈၼၼ်ႉလိၼ်မိူင်းတူင်ႉၼိုင်ၵႂႃႇသၼ်ႇသၼ်ႇသၢႆသၢႆယူႇ၊ ငဝ်ႈႁၢၵ်ႈၽႃႉၵၢင်ႁၢဝ်တင်းလၢႆၶွၼ်းၶဝ်းဝႆၵႂႃႇဝႆမႃးယူႇ၊ ၵွပ်ႈပိူဝ်ႈၽြႃးပဵၼ်ၸဝ်ႈၸီႇယၢင်ႇပၼ်တၢမ်ႇ ၼၼ်ႉဢေႃႈ။
ၵႂၼ်းၽႆးဢွၵ်ႇသေၵႃႈၼႂ်းၶူႈလင်မၼ်းၸဝ်ႈ မႃးယူႇ၊ ပိဝ်ၽႆးတင်းထၢၼ်ႇၽႆးလႅင်ဢွၵ်ႇသူပ်း မၼ်းၸဝ်ႈမႃးယူႇဢေႃႈ။
မၼ်းၸဝ်ႈၸၵ်ႉသိၵ်ႇတွင်ႉၽႃႉသေယဝ်ႉ၊ လူင်းမႃးယူႇ တိၼ်မၼ်းၸဝ်ႈယဵပ်ႇၵႃႈၼိူဝ်မွၵ်ႇၵုမ်ႈဢၼ်လပ်းသိင်ႇလႄႈလူင်းမႃးဢေႃႈ။
မၼ်းၸဝ်ႈၶီႇၶေႇရုၽဵမ်ႇ ဢၼ်မိၼ်ယူႇ ၶၼ်ၽႂ်းၼႃႇၼၼ်ႉလႄႈ မၼ်းၸဝ်ႈၵႂႃႇမႃးယူႇလူၺ်ႈပိၵ်ႇလူမ်းဢေႃႈ။
မၼ်းၸဝ်ႈဢဝ်ဢၼ်လပ်းသိင်ႇႁူမ်ႇသုမ်ႇ တူဝ်ၸဝ်ႈၵဝ်ႇယူႇ၊ ႁႂ်ႈမွၵ်ႇၵုမ်ႈဢၼ်ၼႃတၼ်ၼႃႇဢၼ်တဵမ်ဝႆႉတင်းၼမ်ႉၼၼ်ႉလွမ်ႉႁွပ်ႈဝႆႉဢေႃႈ။
ပိဝ်ထၢၼ်ႇၽႆးလႅင်လုၵ်ႉႁိုင်းယူႇၵိုၼ်ႉၵိုၼ်ႉ၊ ၵႃႈတီႈဢရွင်ႇဢၼ်ႁိူဝ်ႈလႅင်းၽၢႆႇၼႃႈ မၼ်းၸဝ်ႈဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ ႁႂ်ႈၽႃႉလင်မေႃးယူႇၵႃႈၼိူဝ်တွင်ႉၽႃႉလႄႈ လႆႈငိၼ်းသဵင် ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ ဢၼ်သုင်ၼႃႇၼၼ်ႉဢေႃႈ။
မၼ်းၸဝ်ႈယိုဝ်းပိုၼ်ၵၢင်ႇမၼ်းၸဝ်ႈလႄႈႁႂ်ႈ ရၢၼ်ႇသူႇၸဝ်ႈတင်းလၢႆ၊ ၽူင်ႉပၢႆႈယၢႆႈၼီၵႂႃႇဢေႃႈ။ မၼ်းၸဝ်ႈဢဝ်သၢႆလႅင်းၽႃႉမႅပ်ႈၸဝ်ႈႁေႃႈၶဝ်ပႅတ်ႈႁႂ်ႈၶဝ်ၼီပၢႆႈဢေႃႈ။
ၵႃႈတႂ်ႈပိုၼ်ႉၼမ်ႉသမ်ႇမုၵ်ႈတြႃႇၼၼ်ႉ လႆႈပိုတ်ႇပၢင်ႇလႄႈ ငဝ်ႈႁၢၵ်ႈတိူၵ်ႈလေႃးၵႃႉလႆႈပေႃႇဢွၵ်ႇဝႆႉ၊ ၼႂ်းမိူဝ်ႈဢၼ် ထႃႇဝရႃႉၽြႃး၊ တၢင်ႇဢပျတ်ႈ တီႈရၢၼ်ႇသူႇၸဝ်ႈတင်းလၢႆလႄႈ ႁိုတ်းႁၢတ်ႇသႂ်ႇတီႈၶဝ်ၼၼ်ႉဢေႃႈ။
မၼ်းၸဝ်ႈယဵတ်ႇယိုၼ်းမိုဝ်းၸဝ်ႈၵႃႈၼိူဝ်ၼၼ်ႉသေလႄႈယိပ်းၵမ်ၵဝ်၊ တိုတ်ႉၸၼ်ဢဝ်ၵဝ်ဢွၵ်ႇသေၼမ်ႉဢၼ် လိုၵ်ႉၼႃႇၼၼ်ႉဢေႃႈ။
မၼ်းၸဝ်ႈၵႄႇၼုၵ်ႈဢဝ်ၵဝ်ဢွၵ်ႇသေၵႃႈၼႂ်းမိုဝ်းရၢၼ်ႇသူႇၵဝ်ဢၼ်ႁႅင်းယႂ်ႇၼႃႇလႄႈ ပဵၼ်ၶဝ်ၸိူဝ်းဢၼ်ၸင်းၵဝ်ၼၼ်ႉဢေႃႈ။ လွင်ႈမၼ်းၸမ်ႉ၊ၶဝ်ၼၼ်ႉယဵင်ႈၶႅၼ်းႁႅင်းယႂ်ႇၼႃႇ သေၵဝ်ဢေႃႈ။
ၶဝ်ၼၼ်ႉၽုတ်းၽၢတ်းပေႃႇမႃးတိုၵ်းတေႃးၵဝ်ၼႂ်းမိူဝ်ႈဢၼ်၊ ၵဝ်ထူပ်းၽေးဢုပၢတ်ႈၼၼ်ႉဢေႃႈ။ ၼႂ်းဝႃႈၼၼ်သေၵေႃႈ ထႃႇဝရႃႉၽြႃး၊ ႁႄႉၵင်ႈပၼ်ၵဝ်ဢေႃႈ။
မၼ်းၸဝ်ႈၸွႆႈထႅမ်ၵဝ်ႁႂ်ႈလွတ်ႈဢွၵ်ႇသေၵႃႈၼႂ်းၽေးဢုပၢတ်ႈလႄႈ မၼ်းၸဝ်ႈၵႄႇသႄႇတိုတ်ႉၸၼ်ဢဝ်ၵဝ် ၵွပ်ႈပိူဝ်ႈဢၼ်မၼ်းၸဝ်ႈထုၵ်ႇၸႂ်ၵျိူၵ်ႈၸႂ် ၵဝ်ၼၼ်ႉဢေႃႈ။
ထႃႇဝရႃႉၽြႃး၊ တႅၼ်းပၼ်ဢၵျူဝ်းတီႈၵဝ်၊ ၵွပ်ႈပိူဝ်ႈဢၼ် ၵဝ်ၵမ်ၵျၢင်ႉသိုဝ်ႈသိုဝ်ႈယူဝ်းယူဝ်းလႄႈ မၼ်းၸဝ်ႈပၼ်တၢင်းလီတီႈၵဝ်ၵွပ်ႈပိူဝ်ႈဢၼ်ၵဝ်ၵၢင်းလွတ်ႈဢပျတ်ႈဢေႃႈ။
လွင်ႈမၼ်းၸမ်ႉ၊ၵဝ်ပႂ်ႉၸွမ်းထုင်းတြႃး ထႃႇဝရႃႉၽြႃး၊ လႄႈ ယင်းဢမ်ႇဝႄႈပႅတ်ႈသေၵႃႈတီႈသဵၼ်ႈတၢင်း ၽြႃးပဵၼ်ၸဝ်ႈဢေႃႈ။
လွင်ႈမၼ်းၸမ်ႉ၊ၵဝ်ပႂ်ႉၸွမ်းထုင်းတြႃးၸဝ်ႈ ၵႃႈမီးတင်းသဵင်ႈတင်းလူင်လႄႈ ၵဝ်ဢမ်ႇပႄႇပႅတ်ႈပိင်းၺၢပ်ႈတြႃးမၼ်းၸဝ်ႈၸိူဝ်းၼၼ်ႉလႃးလႃး။
မၼ်းၸဝ်ႈႁုလွင်ႈဢၼ်ၵဝ်ၵၢင်းလွတ်ႈတင်း တၢင်းဢၼ်ၽိတ်းဢၼ်ပိူင်ႈ၊ ဢိၵ်ႇတင်းလွင်ႈဢၼ်ၵဝ်ဝႄႈပႅတ်ႈတုၸရိူၵ်ႈတူဝ်ၸဝ်ႈၵဝ်ႇၼၼ်ႉယူႇဢေႃႈ။
ပိူဝ်ႈၼႆလႄႈမၼ်းၸဝ်ႈတႅၼ်းပၼ်ဢၵျူဝ်းတီႈၵဝ်ၵွပ်ႈပိူဝ်ႈဢၼ်၊ ၵဝ်ၵမ်ၵျၢင်ႉသိုဝ်ႈသိုဝ်ႈယူဝ်းယူဝ်းဢိၵ်ႇတင်း ၵွပ်ႈပိူဝ်ႈဢၼ်မၼ်းၸဝ်ႈႁုလွင်ႈဢၼ်ၵဝ်ၵၢင်းလွတ်ႈဢပျတ်ႈဢေႃႈ။
ဢူဝ်း၊ ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းမီးသဵတ်ႈၸႃႇၵႃႈၼိူဝ်ၵေႃႉဢၼ်ပႂ်ႉသဵတ်ႈၸႃႇတီႈၸဝ်ႈႁဝ်းၼၼ်ႉလႄႈ၊ ၸဝ်ႈႁဝ်းၸႂ်လီၸႂ်ဝၢၼ်တေႃႇၵေႃႉဢၼ် ၸေးၸုမ်ႇၼၼ်ႉဢေႃႈ။
ၸဝ်ႈႁဝ်းၶၢဝ်သႂ်တေႃႇၵေႃႉဢၼ်မီးၸႂ် ၶၢဝ်ၸၢင်ႇၼၼ်ႉဢေႃႈ။ ၵူၺ်းၵႃႈ၊ၸဝ်ႈႁဝ်းႁဵတ်းၶတ်းတေႃႇၵေႃႉဢၼ်ႁၢႆႉဢၼ်မိူၵ်ႈၼၼ်ႉဢေႃႈ။
ၸဝ်ႈႁဝ်းၵႄႇသႄႇၶျွတ်ႈဢဝ်ၶဝ်ၸိူဝ်းဢၼ်ႁူဝ်ၸႂ်ၶျႃးတႅမ်ႇၼၼ်ႉလႄႈ ၵူၺ်းၵႃႈ၊ၵေႃႉဢၼ်ႁူဝ်ၸႂ်ၽႅၼ်သုင်ၸမ်ႉ၊ ၸဝ်ႈႁဝ်းဢဝ်မၼ်းၶျႃးတူၵ်းတီႈတႅမ်ႇဢေႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းပဵၼ်ဢၼ်လႅင်းတီႈၶႃႈၸဝ်ႈလႄႈ ႁႂ်ႈဢၼ်လပ်းသိင်ႇၶႃႈၸဝ်ႈပၢင်ႇၸိုၼ်ႈဢေႃႈ။
ၸဝ်ႈႁဝ်းပၼ်ဢဵၼ်ပၼ်ႁႅင်းႁႂ်ႈလႆႈတိုၵ်းပႄႉရၢၼ်ႇသူႇၶႃႈၸဝ်ႈတင်းလၢႆ၊ ဢိၵ်ႇတင်းပၼ်တၼ်းၶူဝ်းဢၼ်ပႄႉၼႅင်ႇတၢင်းဢၼ်ၶဝ်ႁႄႉၶႅၼ်တိုၵ်းတေႃးၼၼ်ႉဢေႃႈ။
ၽြႃးပဵၼ်ၸဝ်ႈပႃးၼႆႉၸမ်ႉ၊သဵၼ်ႈတၢင်း မၼ်းၸဝ်ႈပဵၼ်ဢၼ်ၸေးၸုမ်ႇလႄႈ ၶေႃႈၵႂၢမ်းဢၼ်မၼ်းၸဝ်ႈမီးဢမိင်ႉၼၼ်ႉပဵၼ်တီႈဢၼ်လီသွၼ်ႈပိုင်ႈဢေႃႈ။ မၼ်းၸဝ်ႈပဵၼ်ၸိူဝ်ႉၼင်ႇၶႅပ်းႁႄႉလၢၵ်ႈၼၢၵ်ႈ ပုၼ်ႈၶဝ်ၸိူဝ်းဢၼ်၊ သွၼ်ႈပိုင်ႈမၼ်းၸဝ်ႈတင်းသဵင်ႈတင်းလူင် ၼၼ်ႉဢေႃႈ။
ထႃႇဝရႃႉၽြႃး၊ သူႇလဵဝ်ပႃးလဵဝ်ၵူၺ်းပဵၼ်ၽြႃးပဵၼ်ၸဝ်ႈလႄႈ ၽြႃးပဵၼ်ၸဝ်ႈသူႇလဵဝ်ပႃးလဵဝ်ၼၼ်ႉၵူၺ်းပဵၼ်ၸဝ်ႈဢၼ်ႁႄႉဢၼ်ၶႅၼ်ႁဝ်းဢေႃႈ။
ၽြႃးပဵၼ်ၸဝ်ႈသူႇၼႆႉပဵၼ်တီႈပိုင်ႈတီႈသွၼ်ႈဢၼ်မၼ်ႈၶိူင်ႇပုၼ်ႈၵဝ်လႄႈ မၼ်းၸဝ်ႈႁဵတ်းႁႂ်ႈသဵၼ်ႈတၢင်းၵဝ်လူင်ႉလီလွတ်ႈလီဢေႃႈ။
မၼ်းၸဝ်ႈႁႂ်ႈယၢင်ႈတိၼ်ၵဝ်မၼ်ႈၶိူင်ႇယူႇ မိူၼ်ၸိူဝ်ႉၼင်ႇတိၼ်ပႄႉၽႃလႄႈ ႁႂ်ႈၵဝ်လႆႈယူႇလူင်ႉလီလွတ်ႈလီၵႃႈၼိူဝ် လွႆတင်းလၢႆဢေႃႈ။
မၼ်းၸဝ်ႈၽိုၵ်းပၼ်မိုဝ်းၵဝ်ႁႂ်ႈမေႃႁႂ်ႈၸၢင်ႈ တိုၵ်းသိုၵ်းလႄႈ ႁႂ်ႈၶႅၼ်ၵဝ်ဝူတ်ႈတၢင်ႇၵၢင်ႇဢၼ်ၶႅင်ၼႃႇ သေပိူၼ်ႈၼၼ်ႉဢေႃႈ။
ဢူဝ်း။ ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းႁႄႉၶႅၼ်လႄႈၵႄႇသႄႇဢဝ်ၶႃႈၸဝ်ႈဢေႃႈ။ တၢင်းဢၼ်ၸဝ်ႈႁဝ်းၸွႆႈထႅမ်ၼၼ်ႉႁဵတ်းႁႂ်ႈၶႃႈၸဝ်ႈယႂ်ႇမျၢတ်ႈဢေႃႈ။
ၸဝ်ႈႁဝ်းႁႂ်ႈသဵၼ်ႈတၢင်းဢၼ်တိၼ်ၶႃႈၸဝ်ႈယဵပ်ႇၼၼ်ႉၵႂၢင်ႈလီလႃးလီလႄႈ တိၼ်ၶႃႈၸဝ်ႈဢမ်ႇပရၢတ်ႈၵႂႃႇတီႈၶႃႈ။
ၶႃႈၸဝ်ႈလိုပ်ႈလမ်းၸွမ်းရၢၼ်ႇသူႇၶႃႈၸဝ်ႈတင်းလၢႆလႄႈပႄႉၼႅင်ႇၶဝ်ဢေႃႈ။ ၶႃႈၸဝ်ႈဢမ်ႇၵိုတ်းဢမ်ႇသဝ်းတေႃႇထိုင်ႁွတ်ႈၶႃႈၸဝ်ႈယႃႉၽဵဝ်ႈၶဝ်ပႅတ်ႈၼၼ်ႉဢေႃႈ။
ၶႃႈၸဝ်ႈထုပ်ႉပေႃႉၶဝ်လူမ်ႉတူၵ်းလႄႈၶဝ်ဢမ်ႇလုၵ်ႉလႆႈထၢၼ်ႈပေႃး၊ ၼွၼ်းယဵတ်ႇယူႇၵႃႈတႂ်ႈတိၼ်ၶႃႈၸဝ်ႈဢေႃႈ။
ၸဝ်ႈႁဝ်းပၼ်ဢဵၼ်ပၼ်ႁႅင်းပုၼ်ႈဢၼ်ၶႃႈၸဝ်ႈတိုၵ်းသိုၵ်းလႄႈ ႁႂ်ႈၶႃႈၸဝ်ႈလႆႈဢွင်ႇသိုၵ်းၵႃႈၼိူဝ်ရၢၼ်ႇသူႇၶႃႈၸဝ်ႈတင်းလၢႆဢေႃႈ။
ၸဝ်ႈႁဝ်းႁႂ်ႈရၢၼ်ႇသူႇၶႃႈၸဝ်ႈတင်းလၢႆဢွၵ်ႇပၢႆႈသေၵႃႈတီႈၶႃႈၸဝ်ႈလႄႈ ၶႃႈၸဝ်ႈလႆႈယႃႉၽဵဝ်ႈပႅတ်ႈၶဝ်ၸိူဝ်းဢၼ်ၸင်းၶႃႈၸဝ်ႈၼၼ်ႉဢေႃႈ။
ၶဝ်ဢွၼ်ၵၼ်သွၵ်ႈႁႃတၢင်းဢၼ်ၸွႆႈဢၼ်ထႅမ်သေၵေႃႈ၊ ၵေႃႉဢၼ်တၵ်းၵႄႇသႄႇဢဝ်ၶဝ်ၼၼ်ႉဢမ်ႇမီး၊ ၶဝ်ၵၢဝ်ႇႁႃႁွင်ႉႁႃ ထႃႇဝရႃႉၽြႃး၊ သေၵေႃႈမၼ်းၸဝ်ႈဢမ်ႇဢိူဝ်ၶဝ်လႃးလႃး။
ၶႃႈၸဝ်ႈၶိုတ်ႈၶဝ်ႁႂ်ႈပဵၼ်ၽွင်ၵႂႃႇမိူၼ်ၸိူဝ်ႉၼင်ႇမုၼ်ႈလိၼ်လႄႈ ၶႃႈၸဝ်ႈယဵပ်ႇယမ်ႈၶဝ်မိူၼ်ၸိူဝ်ႉၼင်ႇၵူမ်ႇမုၼ်ႈလိၼ်ဢၼ်မီးၵႃႈၼိူဝ်သဵၼ်ႈတႃသၢႆတၢင်းၼၼ်ႉဢေႃႈ။
ၸဝ်ႈႁဝ်းၵႄႇသႄႇဢဝ်ၶႃႈၸဝ်ႈလွတ်ႈသေၵႃႈၼႂ်းမိုဝ်းၶဝ်ၸိူဝ်းဢၼ်လုၵ်ႉၽိုၼ်ႉၶႃႈၸဝ်ႈၼၼ်ႉသေလႄႈ ၸဝ်ႈႁဝ်းမႄးၵုမ်းမႄးႁဵတ်းႁႂ်ႈၶႃႈၸဝ်ႈလႆႈပဵၼ်ၸဝ်ႈပဵၼ်ၶုၼ်ၵႃႈၼိူဝ်မဵဝ်းၵူၼ်းတင်းလၢႆဢေႃႈ။ မုၵ်ႉၵူၼ်းၸိူဝ်းၵူၼ်းဢၼ်ၶႃႈၸဝ်ႈဢမ်ႇတွၼ်ႉႁုၸၵ်းၼၼ်ႉတေႃႈလဵဝ်ၼႆႉယင်းလႆႈမႃးပဵၼ်ၶႃႈဝၢၼ်ႈၵူၼ်းမိူင်းၶႃႈၸဝ်ႈဢေႃႈ။
ၵူၼ်းတၢင်ႇသိုင်ႇတၢင်ႇမိူင်းလႆႈဢွၼ်ၵၼ်ၵူမ်ႈၵွမ်းတီႈၶႃႈၸဝ်ႈလႄႈ ဢွၼ်ၵၼ်ထွမ်ႇဢဝ်ၼႂ်းမိူဝ်ႈဢၼ်ၶဝ်ငိၼ်းၵႂၢမ်းၶႃႈၸဝ်ႈၼၼ်ႉဢေႃႈ။
ၶဝ်ၸႂ်လုႁႅင်းဢူၼ်ႈၼႃႇလႄႈမီးတၢင်းဢၼ်သၼ်ႇသၼ်ႇသၢႆသၢႆသေ၊ ဢွၵ်ႇသေၵႃႈၼႂ်းတိူၵ်ႈတီႈတိုၵ်းသိုၵ်း ၶဝ်ၼၼ်ႉမႃးဢေႃႈ။
ထႃႇဝရႃႉၽြႃး၊ ဢသၢၵ်ႈလိပ်းယူႇတီႈၶႃႈဢေႃႈ။ ယွင်ႈယေႃးၸဝ်ႈဢၼ်ႁႄႉၵင်ႈၵဝ်ၼၼ်ႉဢေႃႈ။ ၽုၺ်ႇဢွၵ်ႇလၢတ်ႈၼႄလွင်ႈတၢင်းဢၼ်ယႂ်ႇမျၢတ်ႈၽြႃးပဵၼ်ၸဝ်ႈ၊ ဢၼ်ႁႅင်းယႂ်ႇလႄႈၵႄႇသႄႇၶျွတ်ႈဢဝ် ၵဝ်ၼၼ်ႉဢေႃႈ။
လွင်ႈမၼ်းၸမ်ႉ၊မၼ်းၸဝ်ႈပၼ်ႁႂ်ႈၵဝ်ဢွင်ႇသိုၵ်းၵႃႈၼိူဝ်ရၢၼ်ႇသူႇၵဝ်တင်းလၢႆလႄႈ ဢဝ်မုၵ်ႉၵူၼ်းၸိူဝ်းၵူၼ်းၶျႃးတူၵ်းဝႆႉၵႃႈတႂ်ႈ ၵဝ်သေယဝ်ႉ၊
ၵႄႇသႄႇဢဝ်ၵဝ်လွတ်ႈသေၵႃႈၼႂ်းမိုဝ်းရၢၼ်ႇသူႇၵဝ်တင်းလၢႆဢေႃႈ။ ဢူဝ်း။ ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းပၼ်ႁႂ်ႈၶႃႈၸဝ်ႈဢွင်ႇသိုၵ်းၵႃႈၼိူဝ်ရၢၼ်ႇသူႇၶႃႈၸဝ်ႈတင်းလၢႆလႄႈ ၵႅတ်ႇၶႄႁႄႉၵင်ႈၶႃႈၸဝ်ႈလွတ်ႈသေၵႃႈၼႂ်းမိုဝ်းၵူၼ်းဢၼ်ႁၢဝ်ႈၵျၢမ်းတင်းလၢႆဢေႃႈ။
ပိူဝ်ႈၼႆလႄႈၶႃႈၸဝ်ႈယွင်ႈယေႃးၸဝ်ႈႁဝ်းၵႃႈၼႂ်းမဵဝ်းၵူၼ်းတင်းလၢႆလႄႈ ႁဵတ်းၵႂၢမ်းထေႃးပၼႃႇတီႈၸဝ်ႈႁဝ်း တီႈၶႃႈဢေႃႈ။
ၽြႃးပဵၼ်ၸဝ်ႈပၼ်တၢင်းဢၼ်ဢွင်ႇသိုၵ်း ယႂ်ႇၼႃႇလူင်လၢင်၊ တီႈၶုၼ်ႁေႃၶမ်းမၼ်းၸဝ်ႈၼၼ်ႉ တီႈၶႃႈဢေႃႈ။ မၼ်းၸဝ်ႈၼႄပျႃးတၢင်းႁၵ်ႉမႅတ်ႈတႃႇ တီႈၵေႃႉဢၼ်မၼ်းၸဝ်ႈလိူၵ်ႈဢဝ်၊ ဢၼ်ဝႃႈ တႃႇဝိတ်ႈ၊ ဢိၵ်ႇတင်းၸိူဝ်ႉၶိူဝ်းမၼ်း တင်းလၢႆယူႇၶိင်ႇၵႃႇလႃႉသိုပ်ႇသိုပ်ႇတၢမ်တၢမ်တႃႇသေႇတီႈၶႃႈဢေႃႈ။”
တႃႇဝိတ်ႈ၊ လုၵ်ႈၸၢႆး ယေႇသႄး၊ ၼၼ်ႉၸိုင်၊ပဵၼ်ၵေႃႉဢၼ်ၽြႃးပဵၼ်ၸဝ်ႈႁဵတ်းႁႂ်ႈမၼ်းမီးမုၼ်ၽုင်းယႂ်ႇ၊ၵေႃႉဢၼ်ၽြႃးပဵၼ်ၸဝ်ႈမဵဝ်း ယႃႇၵုပ်ႈ၊ လိူၵ်ႈတၢင်ႇၼႂ်းဢရႃႇၶုၼ်ႁေႃၶမ်းလႄႈပဵၼ်ၵေႃႉဢၼ်ၸၢပ်ႈႁဵတ်းလိၵ်ႈႁဵတ်းၵႂၢမ်းဢၼ်သဵင်လီသဵင်ဝၢၼ်ပုၼ်ႈၵူၼ်းမဵဝ်း ဢိသရေး၊ ဢေႃႈ။ ၶေႃႈၵႂၢမ်း တႃႇဝိတ်ႈ၊ လိုၼ်းသုတ်းပိူၼ်ႈၼၼ်ႉၸမ်ႉ၊
“ဢဝ်တင်းတူဝ်ၵဝ်ၶႃႈဝိၺိၺ်ႇ ထႃႇဝရႃႉၽြႃး၊ မွၵ်ႇလၢတ်ႈ၊ ၼုၵ်ႈၵပၢတ်ႈၸဝ်ႈမီးယူႇၵႃႈတီႈလိၼ်ႉၵဝ် ၼၼ်ႉဢေႃႈ။
ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ၼၼ်ႉလႆႈလႄႈ ၸဝ်ႈဢၼ်ၵႅတ်ႇၶႄႁႄႉၵင်ႈၵူၼ်းမဵဝ်း ဢိသရေး၊ ၼၼ်ႉမီးဢမိင်ႉတီႈၵဝ်လႄႈဝႃႈၸမ်ႉ၊ ‘ၶုၼ်ႁေႃၶမ်းဢၼ်တႅပ်းတတ်းၽဵင်ႇပဵင်းလႄႈဢုပ်ႉပိူင်ႇၵူၼ်းတင်းလၢႆ၊ၵေႃႉဢၼ်ၵူဝ်ယမ်ၽြႃးပဵၼ်ၸဝ်ႈလႄႈဢုပ်ႉပိူင်ႇၼၼ်ႉ၊
တၵ်းပဵၼ်မိူၼ်ၸိူဝ်ႉၼင်ႇၵၢင်ဝၼ်းဢၼ် ထွင်ႇလႅင်းယူႇယၢမ်းမိူဝ်ႈဢၼ် ၽူၼ်ဢမ်ႇၵုမ်ႈၽႃႉဢမ်ႇမိုတ်ႈ၊ မိူၼ်ၸိူဝ်ႉၼင်ႇဢၼ်လႅတ်ႇထွင်ႇသႂ်ႇယိူဝ်ႈၼုမ်ႇယႃႈၼုမ်ႇဢၼ်ယမ်းၽူၼ်လႄႈ၊ ႁိူဝ်ႈမၢပ်ႈယူႇၼၼ်ႉဢေႃႈ၊’ ဝႃႈၼင်ႇၼႆဢေႃႈ။
ပိူဝ်ႈၼႆၸင်ႇၽြႃးပဵၼ်ၸဝ်ႈႁဵတ်းၸိူဝ်ႉၼင်ႇၼႆပၼ်တၢင်းလီတီႈၸိူဝ်ႉၶိူဝ်းၵဝ်တင်းလၢႆ ၵွပ်ႈပိူဝ်ႈဢၼ်၊ မၼ်းၸဝ်ႈဝႆႉပတိၺိၺ်ႇထႃႇဝရႃႉလူၺ်ႈၵၼ်တင်းၵဝ်၊ဢၼ်ဝႃႈၵတိသဵတ်ႈၸႃႇဢၼ်ဢမ်ႇလုလႅဝ်လႆႈဢိၵ်ႇတင်း ၵတိသဵတ်ႈၸႃႇဢၼ်ဢမ်ႇၸၢင်ႈၶၢႆႉပုတ်ႈလႅၵ်ႈလၢႆႈလႃးလႃးၼၼ်ႉဢေႃႈ။ လွင်ႈတၢင်းၼႆႉၸိုင်၊ပဵၼ်မဵဝ်းဢၼ်ၵဝ်ဢၢင်ႈဢဵၼ်းၶႂ်ႈလႆႈ၊ဢၼ်တၵ်းပဵၼ်တၢင်းဢၼ်ၵဝ်ဢွင်ႇသိုၵ်းဢိၵ်ႇတင်း ပဵၼ်တၢင်းဢၼ်ၵႄႇသႄႇၶျွတ်ႈဢဝ်ၵဝ် တင်းသဵင်ႈတင်းမူတ်းဢေႃႈ။
ၵူၼ်းဢၼ်ဢမ်ႇပွင်ႇလွင်ႈၵႃႈသင်ၸိူဝ်းၼၼ်ႉၸမ်ႉ၊ပဵၼ်မိူၼ်ၸိူဝ်ႉၼင်ႇ၊ တူၼ်ႈၼၢမ်ဢၼ်လႆႈထိမ်ႈပႅတ်ႈ ၵွပ်ႈပိူဝ်ႈဢၼ်ဢမ်ႇၸၢင်ႈဢဝ်တင်းမိုဝ်းလၢႆယိပ်းၵမ်ဢဝ်လႆႈၼၼ်ႉဢေႃႈ။
ၵေႃႉဢၼ်ယိပ်းၵမ်ၼၼ်ႉတၵ်းလႆႈဢဝ်တင်းၶိူင်ႈလဵၵ်းဢမ်ႇၼၼ်ၵၼ်းႁွၵ်ႇသႄႇဢေႃႈ။ တူၼ်ႈၼၢမ်ၸိူဝ်းၼၼ်ႉတၵ်းလႆႈၶၢမ်ႇတၢင်းဢၼ်ဢဝ်ၽႆးတုတ်ႇပႅတ်ႈမူတ်းမူတ်းသဵင်ႈသဵင်ႈဢေႃႈ၊”
ႁူဝ်ႁၢၼ်ၶုၼ်သိုၵ်းလူင်ဢၼ်ၵိုတ်ႉႁၢပ်ႇၼႃႈၵၢၼ် တႃႇဝိတ်ႈ၊ လႄႈၸိုဝ်ႈဢွၵ်ႇသဵင်ဢွၵ်ႇၸိူဝ်းၼၼ်ႉၸမ်ႉ၊ၵေႃႉဢၼ်ၵတ်ႉၶႅၼ်ႇလိူဝ်ပိူၼ်ႈၼၼ်ႉပဵၼ် ယူဝ်းသႅပ်ႉပႃႇသေပႅတ်ႉ၊ ၵူၼ်းဝဵင်း တႃႇၶိမုၼ်ႇ၊ ဢၼ်ၵွၼ်းၼိူဝ်ၶဝ်သၢမ်ၵေႃႉၼၼ်ႉဢေႃႈ။ မၼ်းၼၼ်ႉယိပ်းၵမ်ၵၼ်းႁွၵ်ႇသေလႄႈႁဵတ်းပွၵ်ႈလဵဝ်တိုၵ်းတေႃးဢဝ်တၢႆပႅတ်ႈၵူၼ်းပႅတ်ႇပၢၵ်ႇၵႃႈၼႂ်းၼႃႈသိုၵ်းဢၼ်ၼိုင်ႈဢေႃႈ။
ၵေႃႉထူၼ်ႈသွင်ပဵၼ် ဢေးလႃႇၸႃႇ၊ လုၵ်ႈၸၢႆး တေႃႇတေႃႇ၊ ၼႂ်းၶိူဝ်းႁိူၼ်း ဢႁေႃႇႁိ၊ ၼၼ်ႉၶဝ်ႈပႃးၼႂ်းၶဝ်သၢမ်ၵေႃႉၼၼ်ႉဢေႃႈ။ မီးဝၼ်းၼိုင်ႈမၼ်းတင်း တႃႇဝိတ်ႈ၊ ထၢမ်တႃႉထၢမ်ၶဵင်ႇၵူၼ်း ၽိလိတ်ႉတိ၊ ဢၼ်ၸုတုမ်ၵၼ်မႃးတိုၵ်းတေႃးၼၼ်ႉဢေႃႈ။ ပိၵ်ႉသမ်ႉၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်သုတ်ႉႁူၼ်ဢွၵ်ႇပၢႆႈသေၵေႃႈ၊-
မၼ်းၼၼ်ႉၸုၵ်းၶၢမ်ႇတိုၵ်းတေႃးၵူၼ်း ၽိလိတ်ႉတိ၊ တင်းလၢႆတေႃႇထိုင်ႁွတ်ႈမိုဝ်းၵူၼ်ႉၼႃႇဢူၼ်ႈၼႃႇထၢၼ်ႈပေႃးဢမ်ႇပွႆႇဢမ်ႇဝၢင်းလၢပ်ႇမၼ်းလႆႈဢေႃႈ။ ထႃႇဝရႃႉၽြႃး၊ ပႄႉၼႅင်ႇဢွင်ႇသိုၵ်းဢၼ်ယႂ်ႇၼႃႇၼႂ်းဝၼ်းၼၼ်ႉလႄႈၵူၼ်း ဢိသရေး၊ တင်းလၢႆလႆႈၶိုၼ်းမႃးတီႈ ဢေးလႃႉၸႃႇ၊ ႁႂ်ႈလႆႈၵဵပ်းဢဝ်ၶိူင်ႈလၢၵ်ႈၼၢၵ်ႈၵူၼ်းတၢႆၸိူဝ်းၼၼ်ႉၵူၺ်းဢေႃႈ။
ၵေႃႉထူၼ်ႈသၢမ်ၸမ်ႉ၊ပဵၼ် သၢမ်ႇမႃႇ၊ လုၵ်ႈၸၢႆး ဢႃႇၵိ၊ ၵူၼ်းမဵဝ်း ႁႃႇရရိ၊ ဢေႃႈ။ ၵူၼ်း ၽိလိတ်ႉတိ၊ ၶဝ်ၸုတုမ်ၵၼ်မႃးၵႃႈတီႈဝဵင်း လေႇႁိ၊ ၵႃႈၼႂ်းႁႆႈဢၼ်ၽုၵ်ႇထူဝ်ႇၼၼ်ႉလႄႈၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ဢွၵ်ႇပၢႆႈဢေႃႈ။-
သၢမ်ႇမႃႇ၊ ၸုၵ်းၶၢမ်ႇၵႃႈၼႂ်းႁႆႈထူဝ်ႇလႄႈႁႄႉတိုၵ်းဢဝ်တၢႆၵူၼ်း ၽိလိတ်ႉတိ၊ ၸိူဝ်းၼၼ်ႉဢေႃႈ။ ထႃႇဝရႃႉၽြႃး၊ ပႄႉၼႅင်ႇဢွင်ႇသိုၵ်းဢၼ်ယႂ်ႇၼႃႇၼႂ်းဝၼ်းၼၼ်ႉဢေႃႈ။
မိူဝ်ႈဢၼ်ၸမ်ထိုင်ၶိင်ႇပၢတ်ႇၶဝ်ႈၼၼ်ႉၶဝ်သၢမ်ၵေႃႉဢၼ်ၶဝ်ႈပႃးၼႂ်းၶုၼ်သိုၵ်းလူင်သၢမ်သိပ်းၼၼ်ႉ လူင်းၵႂႃႇၵႃႈတီႈႁူးထမ်ႈ ဢတုလမ်ႇ၊ ၵႂႃႇၸူးတီႈ တႃႇဝိတ်ႈ၊ ယၢမ်းမိူဝ်ႈဢၼ်မုၵ်ႉၵူၼ်းၸိူဝ်းၵူၼ်း ၽိလိတ်ႉတိ၊ ၶဝ်မႃးၶျႃးပၢင်တပ်ႉယူႇၵႃႈတီႈပၢင်ႇႁူၺ်ႈ ရေႇၽိမ်း၊ ၼၼ်ႉဢေႃႈ။-
ၼႂ်းၶိင်ႇယၢမ်းၼၼ်ႉ တႃႇဝိတ်ႈ၊ မီးယူႇၼႂ်းတိူၵ်ႈတီႈတိုၵ်းသိုၵ်းလႄႈတပ်ႉသိုၵ်း ၽိလိတ်ႉတိ၊ ၶဝ်သိမ်းဢဝ်ဝဵင်း ပႅတ်ႉလႁႅမ်ႇ၊ ဝႆႉဢေႃႈ။-
တႃႇဝိတ်ႈ၊ ၸႂ်ထိုင်ႁိူၼ်းလႄႈဝႃႈ၊ “ၵဝ်ၼႆႉပႄႉမႃးမီးၸႂ်ၶႂ်ႈႁႂ်ႈသေၵေႃႉၵေႃႉဢဝ်ၼမ်ႉသေၵႃႈတီႈၼမ်ႉမေႃႇဢၼ်မီးၵႃႈႁိမ်းၽၵ်းတူဝဵင်း ပႅတ်ႉလႁႅမ်ႇ၊ ၼၼ်ႉပၼ်ၵဝ်ၵိၼ်၊” ဝႃႈၼင်ႇၼႆဢေႃႈ။-
ႁူဝ်ႁၢၼ်ၶုၼ်သိုၵ်းသၢမ်ၵေႃႉၼၼ်ႉလေႃႇၽင်ႈၽႃႇတပ်ႉသိုၵ်းၵူၼ်းမဵဝ်း ၽိလိတ်ႉတိ၊ ၵႂႃႇသေလႄႈတဵၵ်းဢဝ်ၼမ်ႉၵႃႈၼႂ်းၼမ်ႉမေႃႇၼၼ်ႉသေယဝ်ႉ၊ပၼ်ၵႃႈတီႈ တႃႇဝိတ်ႈ၊ ဢေႃႈ။ ၵူၺ်းၵႃႈ၊မၼ်းဢမ်ႇၵိၼ်ၼမ်ႉၼၼ်ႉ။ မၼ်းဢဝ်ထွၵ်ႇၵႃႈတီႈၽၢႆႇၼႃႈ ထႃႇဝရႃႉၽြႃး၊ ၸိူဝ်ႉၼင်ႇၶိူင်ႈတၢင်းလူႇလႄႈ၊-
မၼ်းလၢတ်ႈလႄႈဝႃႈ၊ “ ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈတၵ်းဢမ်ႇၵိၼ်ၼမ်ႉၼႆႉတီႈၶႃႈ။ မၼ်းမိူၼ်ၵၼ်တင်းတၢင်းဢၼ်ၵိၼ်လိူတ်ႈၶဝ်ၸိူဝ်းဢၼ်ယင်းဢမ်ႇသေလၢႆဢသၢၵ်ႈတူဝ်ၸဝ်ႈၵဝ်ႇလႄႈၵႂႃႇဢဝ်ၼမ်ႉမႃးၼၼ်ႉဢေႃႈ၊” ဝႃႈၼင်ႇၼႆသေယဝ်ႉ၊မၼ်းယင်းဢမ်ႇၵိၼ်ၼမ်ႉၼၼ်ႉလႄႈယူႇဢေႃႈ။ ဢၼ်ၼႆႉၸိုင်၊ပဵၼ်တၢင်းဢၼ်ႁတ်းဢၼ်ႁၢၼ်ႁူဝ်ႁၢၼ်ၶုၼ်သိုၵ်းလူင်သၢမ်ၵေႃႉၼၼ်ႉဢေႃႈ။
ၼွင်ႉၸၢႆး ယွႃႇၽႃႉ၊ ဢၼ်ဝႃႈ၊ ဢၽိသေး၊ (ဢၼ်မႄႈၶဝ်ပဵၼ် ၸေႇရုယႃႇ၊ ) ၼၼ်ႉ ပဵၼ်ၽူႈဢုပ်ႉပိူင်ႇၶုၼ်သိုၵ်းလူင်သၢမ်သိပ်းၵေႃႉၼၼ်ႉဢေႃႈ။ မၼ်းၼၼ်ႉဢဝ်တင်းႁွၵ်ႇတိုၵ်းတေႃးဢဝ်တၢႆၵူၼ်းသၢမ်ပၢၵ်ႇလႄႈလႆႈၸိုဝ်ႈလႆႈသဵင်မိူၼ်ၸိူဝ်ႉၼင်ႇပဵၼ်ၵူၼ်းသၢမ်ၵေႃႉၼၼ်ႉဢေႃႈ။-
မၼ်းပဵၼ်ၵေႃႉဢၼ်ၸိုဝ်ႈဢွၵ်ႇသဵင်ဢွၵ်ႇသေပိူၼ်ႈၼႂ်းၶဝ်သၢမ်သိပ်းၵေႃႉၼၼ်ႉၵွပ်ႈပိူဝ်ႈမၼ်းပဵၼ်ၽူႈဢုပ်ႉပိူင်ႇၵႃႈၼိူဝ်ၶဝ်ဢေႃႈ။ ၵူၺ်းၵႃႈ၊မၼ်းဢမ်ႇၶိုတ်းဢမ်ႇပဵင်းၶုၼ်သိုၵ်းလူင်သၢမ်ၵေႃႉၼၼ်ႉ။
ပေႇၼႃႇယႃႉ၊ လုၵ်ႈၸၢႆး ယေႃႇယတႃႉ၊ ၵူၼ်းဝဵင်း ၵပ်ႉၸေးလႃႉ၊ ၼၼ်ႉၵေႃႈပဵၼ်ၶုၼ်သိုၵ်းလူင်ဢၼ်လႆႈၸိုဝ်ႈလႆႈသဵင်ၵေႃႉၼိုင်ႈဢေႃႈ။ မၼ်းႁဵတ်းလွင်ႈတၢင်းဢၼ်ႁတ်းဢၼ်ႁၢၼ်လၢႆၸိူဝ်ႉလၢႆမဵဝ်း၊ဢိၵ်ႇပႃးတင်းတၢင်းဢၼ်ဢဝ်ၵူၼ်းသိုၵ်း မေႃႇၽႃႉ၊ တၢႆသွင်ၵေႃႉၼၼ်ႉဢေႃႈ။ မီးၽဝ်ႇၼိုင်ႈ၊ၼႂ်းဝၼ်းဢၼ်မူၺ်တူၵ်းၼၼ်ႉမၼ်းလူင်းၵႂႃႇၵႃႈၼႂ်းၶုမ်လိၼ်ႁူးလိၼ်လႄႈဢဝ်သၢင်ႇသီႈတၢႆဢေႃႈ။-
ၵူၼ်း ဢေးၵျိပ်ႉ၊ ၵေႃႉၼိုင်ႈဢၼ်ယႂ်ႇသုင်ၼႃႇၼၼ်ႉၵေႃႈမၼ်းဢဝ်တၢႆဢေႃႈ။ ၵူၼ်း ဢေးၵျိပ်ႉ၊ ၵေႃႉၼၼ်ႉယိပ်းၵမ်ႁွၵ်ႇဝႆႉလႄႈမၼ်းသမ်ႉယိပ်းၵမ်ၶွၼ်ႉတဝ်ႉသေၵေႃႈ၊မၼ်းတိုၵ်းတေႃးၵူၼ်း ဢေးၵျိပ်ႉ၊ ၼၼ်ႉသေယဝ်ႉ၊ႁိမ်ဢဝ်ႁွၵ်ႇၵႃႈၼႂ်းမိုဝ်းမၼ်းသေလႄႈသမ်ႉဢဝ်ႁွၵ်ႇမၼ်းၼၼ်ႉတႅင်းမၼ်းတၢႆဢေႃႈ။-
ဢၼ်ၸိူဝ်းၼႆႉၸိုင်၊ပဵၼ်တၢင်းႁတ်းတၢင်းႁၢၼ် ပေႇၼႃႇယႃႉ၊ ဢၼ်ၶဝ်ႈပႃးၼႂ်းၶဝ်သၢမ်ၵေႃႉၼၼ်ႉဢေႃႈ။-
မၼ်းပဵၼ်ၵေႃႉဢၼ်ယဵင်ႈၶႅၼ်းလႆႈၸိုဝ်ႈလႆႈသဵင်ၼႂ်းၶဝ်သၢမ်သိပ်းၵေႃႉၼၼ်ႉသေၵေႃႈ၊မၼ်းဢမ်ႇၶိုတ်းဢမ်ႇပဵင်းၶဝ်သၢမ်ၵေႃႉၼၼ်ႉ။ တႃႇဝိတ်ႈ၊ ၶၢၼ်းဝႆႉႁႂ်ႈမၼ်းၵွၼ်းတပ်ႉဢၼ်ပႂ်ႉဢသၢၵ်ႈၸဝ်ႈဢေႃႈ။
ထႃႇဝရႃႉၽြႃး၊ ၸႂ်မႆႈၶႂ်ႈၸႃႉၵူၼ်းမဵဝ်း ဢိသရေး၊ ထႅင်ႈလႄႈ၊မၼ်းၸဝ်ႈၸႂ်ႉႁႂ်ႈ တႃႇဝိတ်ႈ၊ ႁဵတ်းၽေးတုၵ်ႉၶႃႉသႂ်ႇတီႈၶဝ်ဢေႃႈ။ ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ၵႂႃႇလႄႈၼပ်ႉဢၢၼ်ႇၸရၢင်းၵူၼ်းမဵဝ်း ဢိသရေး၊ တင်းလၢႆဢိၵ်ႇတင်းၵူၼ်းမဵဝ်း ယုတႃႉ၊ တင်းလၢႆတႃႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ တႃႇဝိတ်ႈ၊ ပူင်ဢမိင်ႉတီႈ ယွႃႇၽႃႉ၊ ၸဝ်ႈၵွၼ်းတပ်ႉသိုၵ်းလူင်မၼ်းၼၼ်ႉလႄႈဝႃႈ၊ “မႂ်းႁွင်ႉဢဝ်ၶုၼ်ဢၼ်ပွင်ၵၢၼ်ႁေႃမႂ်းတင်းလၢႆလႄႈ၊လႄႇလဵပ်ႈၵႃႈၼႂ်းၵူၼ်းၸိူဝ်ႉၶိူဝ်း ဢိသရေး၊ ၵႃႈမီးဢဝ်ၸႃႉၸဵမ်ၸဵင်ႇမိူင်းၽၢႆႇၼိုင်ႈတေႃႇထိုင်ႁွတ်ႈၸဵင်ႇမိူင်းတၢင်ႇၽၢႆႇသေယဝ်ႉ၊ၼပ်ႉဢၢၼ်ႇၵူၼ်းတင်းလၢႆႁႂ်ႈၵဝ်လႆႈႁုလွင်ႈဢၼ်ၵူၼ်းတင်းလၢႆမီးၼမ်ထၢၼ်ႇလႂ်ၼၼ်ႉတႃႉ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ ယွႃႇၽႃႉ၊ ၶိုၼ်းလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “ၸဝ်ႈၶုၼ်လူင်တီႈၶႃႈ၊ႁႂ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈ၊ၸဝ်ႈႁဝ်းထၢပ်ႈထႅင်ႈၵူၼ်းႁႂ်ႈယႂ်ႇၽႄၼမ်ၵိုၼ်းမႃးသေဢၼ်မီးယူႇမိူဝ်ႈလဵဝ်ၼႆႉထႅင်ႈပၢၵ်ႇပုၼ်ႈသေယဝ်ႉ၊ႁႂ်ႈတႃၸဝ်ႈႁဝ်းလႆႈႁၼ်သေၵမ်းလူၺ်ႈ။ ၼႂ်းဝႃႈၼၼ်သေၵေႃႈႁဵတ်းသင်လႄႈၸဝ်ႈႁဝ်းၶႂ်ႈႁဵတ်းလွင်ႈၼႆႉၸိူဝ်ႉၼင်ႇႁိုဝ်တီႈၶႃႈ၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊ဢမိင်ႉၶုၼ်ႁေႃၶမ်းပႄႉၼႅင်ႇၵႂၢမ်း ယွႃႇၽႃႉ၊ တင်းၶုၼ်ဢၼ်ပွင်ၵၢၼ်ႁေႃမၼ်းၸိူဝ်းၼၼ်ႉသေယဝ်ႉ၊ၶဝ်ဢွၼ်ၵၼ်ဢွၵ်ႇသေၵႃႈတီႈၽၢႆႇၼႃႈမၼ်းၵႂႃႇလႄႈႁႂ်ႈလႆႈၼပ်ႉဢၢၼ်ႇၵူၼ်းမဵဝ်း ဢိသရေး၊ တင်းလၢႆဢေႃႈ။
ၶဝ်ၶၢမ်ႈၼမ်ႉ ယေႃးတၢၼ်ႇ၊ လႄႈၶျႃးပၢင်တပ်ႉၵႃႈတီႈၽၢႆႇၸၢၼ်းဝဵင်း ဢႃႇရေႃႇ၊ ဝဵင်းလူင်ဢၼ်မီးၵႃႈၼႂ်းၵၢင်ပၢင်ႇႁူၺ်ႈၵႃႈၼႂ်းဢိူင်ႇ ၵၢတ်ႉ၊ ၼၼ်ႉဢေႃႈ။ လုၵ်ႉသေၵႃႈတီႈၼၼ်ႈလႄႈဢွၵ်ႇၵႂႃႇၽၢႆႇတၢင်းႁွင်ႇၵႂႃႇၸူးတီႈဝဵင်း ယႃႇၸႃႇ၊ ဢေႃႈ။-
သမ်ႉသိုပ်ႇၵႂႃႇၸူးၵႃႈတီႈဝဵင်း ၵိလတ်ႉ၊ တင်းဝဵင်း ၵႃႇတေးသႃႉ၊ ၵႃႈၼႂ်းဢိူင်ႇ ႁိတ်ႉတိ၊ ဢေႃႈ။ လိုၼ်းၼၼ်ႉၶဝ်ၵႂႃႇၸူးတီႈဝဵင်း တၢၼ်ႇ၊ လုၵ်ႉသေၵႃႈတီႈ တၢၼ်ႇ၊ ငႅၵ်းၵႂႃႇၽၢႆႇဝၼ်းဢွၵ်ႇၵႂႃႇၸူးတီႈဝဵင်း ၸိတုမ်ႇ၊ ဢေႃႈ။-
လိုၼ်းၼၼ်ႉ၊ၶဝ်ဢွၵ်ႇၵႂႃႇတၢင်းၽၢႆႇၸၢၼ်းၵႂႃႇၸူးတီႈတိူၵ်ႈတီႈတိုၵ်းသိုၵ်းဝဵင်း တုရု၊ သေယဝ်ႉ၊ၶိုၼ်ႈၸူးတီႈဝဵင်းလူင်ၵူၼ်း ႁိတ်ႉတိ၊ တင်းလၢႆဢိၵ်ႇတင်းၵူၼ်း ၶႃႇၼၼိ၊ တင်းလၢႆၵႃႈမီးၸိူဝ်းၼၼ်ႉလႄႈ၊ၵႂႃႇသုတ်းၵႃႈတီႈဝဵင်း ပေႇရသေးၽႃႉ၊ ပွတ်းၸၢၼ်းမိူင်း ယုတႃႉ၊ ၼၼ်ႉဢေႃႈ။-
ၼင်ႇၼၼ်လႄႈဝၢႆးသေလႄႇလဵပ်ႈၸွတ်ႇတူဝ်ႈၵႂႃႇတင်းမိူင်း၊ႁိုင်ၵဝ်ႈလိူၼ်ပၢႆသၢဝ်းဝၼ်းသေယဝ်ႉ၊ၶိုၼ်းႁွတ်ႈထိုင်တီႈဝဵင်း ယေႇရုသလႅမ်ႇ၊ ဢေႃႈ။-
ၶဝ်ဢဝ်ၸရၢင်းၵူၼ်းတင်းလၢႆမႃးတၢင်ႇလဝ်ႈထိုင်တီႈၶုၼ်ႁေႃၶမ်းလွင်ႈဢၼ်ၵူၼ်းၸၢႆးတိုၵ်းသိုၵ်းလႆႈၵႃႈၼႂ်းၵူၼ်းမဵဝ်း ဢိသရေး၊ မီးပႅတ်ႇသႅၼ်၊ဢိၵ်ႇတင်းၵႃႈၼႂ်းၵူၼ်းမဵဝ်း ယုတႃႉ၊ မီးႁႃႈသႅၼ်ၵေႃႉဢေႃႈ။
လိုၼ်းသေဢၼ် တႃႇဝိတ်ႈ၊ ႁဵတ်းတၢင်းဢၼ်ၵဵပ်းၸရၢင်းၵူၼ်းမိူင်းယဝ်ႉၼၼ်ႉ၊မၼ်းၼႅင်ၸႂ်လႄႈတွင်းပၢၼ်ႇလဝ်ႈလၢတ်ႈတီႈ ထႃႇဝရႃႉၽြႃး၊ လႄႈဝႃႈ၊ “ၶႃႈၸဝ်ႈၽိတ်းပိူင်ႈၼႃႇလူင်လၢင်ၼႂ်းလွင်ႈတၢင်းဢၼ်ၶႃႈၸဝ်ႈႁဵတ်းဢၼ်ၼႆႉမႅၼ်ႈၼၼ်ႉတီႈၶႃႈယဝ်ႉ။ ၶႅၼ်းတေႃႈပွႆႇလွတ်ႈဢပျတ်ႈၶႃႈၸဝ်ႈသေၵမ်းတီႈၶႃႈ။ ၶႃႈၸဝ်ႈႁဵတ်းႁၢႆႉမိူၵ်ႈၼႃႇလူင်လၢင်တီႈၶႃႈယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈဢၼ် တႃႇဝိတ်ႈ၊ လုၵ်ႉမႃးၶိင်ႇၵၢင်ၼႂ်ၼၼ်ႉၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးၵႃႈတီႈပရေႃးၽႅတ်ႈ ၵၢတ်ႉ၊ ဢၼ်ပဵၼ်ၵူၼ်းႁူပွင်ႇတႃလႅင်းတီႈ တႃႇဝိတ်ႈ၊ ၼၼ်ႉလႄႈဝႃႈ၊-
“မႂ်းၵႂႃႇတီႈ တႃႇဝိတ်ႈ၊ လႄႈဝႃႈ၊ ‘ ထႃႇဝရႃႉၽြႃး၊ မီးဢမိင်ႉၸဝ်ႈၸမ်ႉ၊ၵဝ်ပၼ်ႁႂ်ႈမႂ်းလိူၵ်ႈဢဝ်လွင်ႈတၢင်းသၢမ်မဵဝ်းဢေႃႈ။ ဢဝ်သၽေႃးၵၢင်ၸႂ်မႂ်းလိူၵ်ႈဢဝ်သေမဵဝ်းမဵဝ်းပုၼ်ႈဢၼ်ၵဝ်တၵ်းႁဵတ်းပၼ်တီႈမႂ်းတႃႉ၊’ ဝႃႈၼႆတႃႉ၊” ဝႃႈၼင်ႇၼႆဢေႃႈ။
ၵၢတ်ႉ၊ ၵေႃႈၵႂႃႇၸူးတီႈ တႃႇဝိတ်ႈ၊ လႄႈလဝ်ႈလၢတ်ႈၶေႃႈၵႂၢမ်းဢၼ်ၽြႃးပဵၼ်ၸဝ်ႈမီးဢမိင်ႉၼၼ်ႉလႄႈဝႃႈ၊ “တၵ်းတေႁႂ်ႈၶဝ်ႈၵႃႈမၢၵ်ႇပႅင်းၵႃႈၼႂ်းမိူင်းၸဝ်ႈႁဝ်းသၢမ်ပီတဵမ်တဵမ်တီႈၶႃႈႁိုဝ်း။ ဢမ်ႇၼၼ်ၵေႃႈတၵ်းတေႁႂ်ႈဢွၵ်ႇပၢႆႈရၢၼ်ႇသူႇၸဝ်ႈႁဝ်းယူႇယၢမ်းမိူဝ်ႈဢၼ်ၶဝ်လိုပ်ႈလမ်းၸွမ်းၸဝ်ႈႁဝ်းယူႇသၢမ်လိူၼ်တဵမ်တဵမ်ႁိုဝ်း။ ဢမ်ႇၼၼ်ၵေႃႈတၵ်းတေႁႂ်ႈၵႃႇလႃႉႁႃႈလႅင်မိူင်းပဵၼ်ၵႃႈၼႂ်းမိူင်းၸဝ်ႈႁဝ်းသၢမ်ဝၼ်းတဵမ်တဵမ်တီႈၶႃႈႁိုဝ်း။ တေႃႈလဵဝ်ၼႆႉၶႆႈၸႂ်ဝူၼ်ႉၸႂ်လႄႈတႅပ်းတတ်းၸႂ်လွင်ႈဢၼ်ၶႃႈၸဝ်ႈတၵ်းလႆႈၶိုၼ်းလဝ်ႈလၢတ်ႈၸိူဝ်ႉၼင်ႇႁိုဝ်တီႈ ထႃႇဝရႃႉၽြႃး၊ ဢၼ်ပွႆႇၸႂ်ႉၶႃႈၸဝ်ႈမႃးၼၼ်ႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ၵေႃႈၶိုၼ်းလၢတ်ႈတီႈ ၵၢတ်ႉ၊ လႄႈဝႃႈ၊ “ၵဝ်ၼႆႉၶမ်ၸႂ်ၶမ်ၶေႃးၵႃႈၼႂ်းဢၼ်ၵိတ်ႇဢၼ်ၵႅပ်ႉၼႃႇၼၼ်ႉယဝ်ႉ။ ႁႂ်ႈ ထႃႇဝရႃႉၽြႃး၊ ပဵၼ်ၸဝ်ႈၸီႇယၢင်ႇသေၵမ်းလူၺ်ႈ။ လွင်ႈမၼ်းၸမ်ႉ၊ၵရုၼႃႇမၼ်းၸဝ်ႈယႂ်ႇၼႃႇဢေႃႈ။ ယႃႇပေႁႂ်ႈၵဝ်လႆႈၶၢမ်ႇတၢင်းဢၼ်ၵူၼ်းၸီႇယၢင်ႇသေၵမ်း၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ ထႃႇဝရႃႉၽြႃး၊ ပွႆႇၵႃႇလႃႉႁႃႈလႅင်မိူင်းႁွတ်ႈထိုင်ၵႃႈၼိူဝ်ၵူၼ်းမဵဝ်း ဢိသရေး၊ ၸႃႉဢဝ်ၶိင်ႇၵၢင်ၼႂ်ၼၼ်ႉတေႃႇထိုင်ႁွတ်ႈၶိင်ႇဢၼ်မၵ်းၶၢၼ်းဝႆႉၼၼ်ႉလႄႈ၊တႄႇဢဝ်ၵႃႈတီႈၸဵင်ႇမိူင်းၽၢႆႇၼိုင်ႈတေႃႇထိုင်ႁွတ်ႈၸဵင်ႇမိူင်းတၢင်ႇၽၢႆႇၵူၼ်းမဵဝ်း ဢိသရေး၊ တၢႆၸဵတ်းမိုၼ်ႇဢေႃႈ။-
မိူဝ်ႈဢၼ်တမၢၼ်ႇၵၢင်ႁၢဝ် ထႃႇဝရႃႉၽြႃး၊ ဢၢင်ႈတၵ်းယႃႉပႅတ်ႈဝဵင်း ယေႇရုသလႅမ်ႇ၊ ၼၼ်ႉၸိုင်၊ ထႃႇဝရႃႉၽြႃး၊ မႆႈၸႂ်လူၺ်ႈတၢင်းဢၼ်ယႃႉပႅတ်ႈၵူၼ်းတင်းလၢႆၼၼ်ႉလႄႈမီးဢမိင်ႉတီႈတမၢၼ်ႇၵၢင်ႁၢဝ်ၼၼ်ႉလႄႈဝႃႈ၊ “ပေႃးယဝ်ႉ။ ယိုတ်းမိုဝ်းမႂ်းၶိုၼ်းတႃႉ၊” ဝႃႈၼင်ႇၼႆဢေႃႈ။ မိူဝ်ႈၼၼ်ႉတမၢၼ်ႇၵၢင်ႁၢဝ်ၼၼ်ႉမီးယူႇၵႃႈတီႈႁိမ်းတလၢင်းယဵပ်ႇၶဝ်ႈ ဢရေႃးၼႃႇ၊ ၵူၼ်း ယေႇပုသိ၊ ၼၼ်ႉဢေႃႈ။
မိူဝ်ႈဢၼ် တႃႇဝိတ်ႈ၊ ႁၼ်တမၢၼ်ႇၵၢင်ႁၢဝ်ဢၼ်ယႃႉပႅတ်ႈၵူၼ်းတင်းလၢႆယူႇၼၼ်ႉၸိုင်၊မၼ်းလဝ်ႈလၢတ်ႈတီႈ ထႃႇဝရႃႉၽြႃး၊ လႄႈဝႃႈ၊ “ၶႃႈၸဝ်ႈၼႆႉပဵၼ်ၵေႃႉဢၼ်ၽိတ်းပိူင်ႈတီႈၶႃႈဢေႃႈ။ ၶဝ်ၸိူဝ်းၼႆႉပဵၼ်သူဝ်းၵူၺ်းတီႈၶႃႈလႄႈၶဝ်ႁဵတ်းၵႃႈသင်မႅၼ်ႈတီႈၶႃႈ။ ၸဝ်ႈႁဝ်းထုၵ်ႇလီပၼ်တၢမ်ႇတီႈၶႃႈၸဝ်ႈဢိၵ်ႇတင်းတီႈၵူၼ်းႁိူၼ်းၵူၼ်းယေးၶႃႈၸဝ်ႈတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၼႂ်းဝၼ်းၼၼ်ႉၵမ်းလဵဝ်၊ ၵၢတ်ႉ၊ ၵႂႃႇၸူးၵႃႈတီႈ တႃႇဝိတ်ႈ၊ လႄႈလဝ်ႈလၢတ်ႈဝႃႈ၊ “ၸဝ်ႈႁဝ်းၶိုၼ်ႈၵႂႃႇၵႃႈတီႈတလၢင်းယဵပ်ႇၶဝ်ႈ ဢရေႃးၼႃႇ၊ လႄႈတႄႇႁဵတ်းၶဵင်ႇတၢင်းလူႇပုၼ်ႈ ထႃႇဝရႃႉၽြႃး၊ သေၵမ်း၊” ဝႃႈၼင်ႇၼႆဢေႃႈ။-
တႃႇဝိတ်ႈ၊ ထွမ်ႇဢဝ်ဢမိင်ႉ ထႃႇဝရႃႉၽြႃး၊ လႄႈၶိုၼ်ႈၵႂႃႇၸွမ်းၵႃႈၼင်ႇဢၼ် ၵၢတ်ႉ၊ သင်ႇလၢတ်ႈတီႈမၼ်းၼၼ်ႉဢေႃႈ။-
မိူဝ်ႈဢၼ် ဢရေႃးၼႃႇ၊ မုင်ႈတူၺ်းလႄႈႁၼ်ၶုၼ်ႁေႃၶမ်း၊ဢိၵ်ႇတင်းၶုၼ်ဢၼ်ပွင်ၵၢၼ်မၼ်းတင်းလၢႆမႃးၸူးတီႈမၼ်းယူႇၼၼ်ႉၸိုင်၊မၼ်းဢွၵ်ႇၵႂႃႇလႄႈၶုပ်ႉမူပ်ႇဝၢင်းႁူဝ်ၵႃႈၼိူဝ်လိၼ်ၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။-
မၼ်းလဝ်ႈထၢမ်လႄႈဝႃႈ၊ “ၸဝ်ႈၶုၼ်လူင်တီႈၶႃႈ။ ၸဝ်ႈႁဝ်းမီးလွင်ႈတၢင်းဢၼ်လႂ်လႄႈႁွတ်ႈထိုင်မႃးၵႃႈတီႈၶႃႈၸဝ်ႈႁဝ်းၼႆႉတီႈၶႃႈ၊” ဝႃႈၼင်ႇၼႆဢေႃႈ။ တႃႇဝိတ်ႈ၊ ၵေႃႈၶိုၼ်းလၢတ်ႈလႄႈဝႃႈ၊ “မႃးႁႂ်ႈလႆႈသိုဝ်ႉဢဝ်တလၢင်းယဵပ်ႇၶဝ်ႈမႂ်းသေလႄႈတႄႇႁဵတ်းၶဵင်ႇတၢင်းလူႇပုၼ်ႈ ထႃႇဝရႃႉၽြႃး၊ ပုၼ်ႈတႃႇတေႁဵတ်းႁႂ်ႈၽေးၵႃႇလႃႉႁႃႈလႅင်မိူင်းထၢတ်ႇယဵၼ်သေၵႃႈတီႈၵူၼ်းတင်းလၢႆဢေႃႈ၊” ဝႃႈၼင်ႇၼႆဢေႃႈ။
ဢရေႃးၼႃႇ၊ ၵေႃႈလဝ်ႈလၢတ်ႈလႄႈဝႃႈ၊ “ၸဝ်ႈၶုၼ်လူင်တီႈၶႃႈ။ ၶႅၼ်းတေႃႈဢဝ်သေလႄႈသၢၵ်ႈလူႇတီႈ ထႃႇဝရႃႉၽြႃး၊ ၵႃႈၼင်ႇဢၼ်ဢလူဝ်ႇၵၢင်ၸႂ်ၸဝ်ႈႁဝ်းမီးၼၼ်ႉသေၵမ်းတီႈၶႃႈ။ တူၺ်းတီႈၶႃႈလူး။ မီးဝူဝ်းလႂ်ပုၼ်ႈၶိူင်ႈတၢင်းလူႇဢၼ်တၵ်းတုတ်ႇၽႆးတီႈၶႃႈဢေႃႈ။ ၶွၼ်ႉပၢႆႇလႂ်ဢိၵ်ႇတင်းၵၢၼ်းဝူဝ်းလႂ်ၵေႃႈ၊ပုၼ်ႈတႃႇတေပဵၼ်ၽိုၼ်းတီႈၶႃႈဢေႃႈ။-
ဢူဝ်း၊ၶုၼ်ႁေႃၶမ်းတီႈၶႃႈ။ ဢရေႃးၼႃႇ၊ ဢဝ်ၵႃႈမီးတင်းသဵင်ႈတင်းလူင်ၼႆႉသၢၵ်ႈတီႈၸဝ်ႈႁဝ်းတီႈၶႃႈဢေႃႈ၊” ဝႃႈၼင်ႇၼႆသေယဝ်ႉ၊ ဢရေႃးၼႃႇ၊ သမ်ႉလဝ်ႈလၢတ်ႈထႅင်ႈလႄႈဝႃႈ၊ “ႁႂ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းႁပ်ႉတုင်းဢဝ်ၶိူင်ႈတၢင်းလူႇၸဝ်ႈႁဝ်းသေၵမ်းလူၺ်ႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ၶုၼ်ႁေႃၶမ်းမီးဢမိင်ႉဝႃႈ၊ “ဢမ်ႇၸႂ်ႈၵူၺ်းၵဝ်တၵ်းပၼ်ၵႃႈမၼ်းၶၼ်မၼ်းတီႈမႂ်းဢေႃႈ။ ပေႃးၵဝ်ဢမ်ႇလႆႈဢဝ်ငိုၼ်းၵဝ်သိုဝ်ႉၸိုင်၊ၵဝ်ဢမ်ႇၶႂ်ႈသၢၵ်ႈလူႇၶိူင်ႈတၢင်းလူႇဢၼ်တုတ်ႇၽႆးၵႃႈတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၵဝ်ၵူၺ်း၊” ဝႃႈၼင်ႇၼႆသေယဝ်ႉ၊ တႃႇဝိတ်ႈ၊ ဢဝ်ငိုၼ်းႁႃႈသိပ်းၶႅပ်းသေလႄႈသိုဝ်ႉဢဝ်တလၢင်းယဵပ်ႇၶဝ်ႈဢိၵ်ႇတင်းဝူဝ်းၸိူဝ်းၼၼ်ႉဢေႃႈ။-
မိူဝ်ႈၼၼ်ႉမၼ်းတႄႇႁဵတ်းၶဵင်ႇတၢင်းလူႇတီႈ ထႃႇဝရႃႉၽြႃး၊ လႄႈသၢၵ်ႈလူႇၶိူင်ႈတၢင်းလူႇဢၼ်တုတ်ႇၽႆးဢိၵ်ႇတင်းၶိူင်ႈတၢင်းလူႇမိၵ်ႈသႁႃႇယႃႉဢေႃႈ။ ၼင်ႇၼၼ်လႄႈ ထႃႇဝရႃႉၽြႃး၊ ထွမ်ႇဢဝ်ၵႂၢမ်းသူးတွင်းပုၼ်ႈမိူင်းၸဝ်ႈၼၼ်ႉလႄႈၽေးၵႃႇလႃႉႁႃႈလႅင်မိူင်းဢၼ်ႁွတ်ႈထိုင်ၵႃႈၼိူဝ်ၵူၼ်းမဵဝ်း ဢိသရေး၊ ၼၼ်ႉထၢတ်ႇယဵၼ်ၵႂႃႇဢေႃႈ။ ၵျၢမ်းသမူၺ်ႇလႃႉၽိုၼ်တီႈသွင်ယဝ်ႉယဝ်ႉဢေႃႈ။
ၶုၼ်ႁေႃၶမ်း တႃႇဝိတ်ႈ၊ ၼၼ်ႉမိူဝ်ႈလဵဝ်ဢသၢၵ်ႈထဝ်ႈၵႄႇၼႃႇယဝ်ႉလႄႈပိၵ်ႉသမ်ႉဢဝ်ၽႃႈႁူမ်ႇပၼ်ၼမ်ထၢၼ်ႇႁိုဝ်သေၵေႃႈဢမ်ႇဢုၼ်ႇလႆႈ။-
ပိူဝ်ႈၼႆလႄႈၶုၼ်ဢၼ်ပွင်ၵၢၼ်မၼ်းတင်းလၢႆလၢတ်ႈတီႈမၼ်းၸဝ်ႈလႄႈဝႃႈ၊ “ၸဝ်ႈၶုၼ်လူင်တီႈၶႃႈ။ ႁႂ်ႈလႆႈႁႃဢဝ်သၢဝ်ၵၼ်ႇၺႃႇဢၼ်ဢသၢၵ်ႈယင်းၼုမ်ႇၼၼ်ႉႁႂ်ႈမၼ်းယူႇလူၺ်ႈၵၼ်တင်းၸဝ်ႈႁဝ်းလႄႈလူတူၺ်းလုမ်းလႃးၸဝ်ႈႁဝ်းသေၵမ်း။ ပေႃးမၼ်းၼွၼ်းၼႂ်းဝၢင်ႈႁူဝ်ဢူၵ်းၸဝ်ႈႁဝ်းၸိုင်၊ၸဝ်ႈႁဝ်းတၵ်းဢုၼ်ႇလီဢေႃႈ၊” ဝႃႈၼင်ႇၼႆဢေႃႈ။-
ၶဝ်ဢွၼ်ၵၼ်သွၵ်ႈႁႃသၢဝ်ၵၼ်ႇၺႃႇဢၼ်ႁၢင်ႈလီၵႃႈၼႂ်းမိူင်း ဢိသရေး၊ တင်းမိူင်းလႄႈထူပ်းႁၼ်ၼၢင်းသၢဝ် ဢၽိသၵ်ႉ၊ ၵူၼ်းဝဵင်း သုၼိမ်ႇ၊ သေယဝ်ႉ၊ဢဝ်မႃးသၢၵ်ႈတီႈၶုၼ်ႁေႃၶမ်းဢေႃႈ။-
သၢဝ်ၼၼ်ႉ၊ႁၢင်ႈလီၼႃႇလူင်လၢင်လႄႈလႆႈလူတူၺ်းလုမ်းလႃးၶုၼ်ႁေႃၶမ်းဢေႃႈ။ ၼႂ်းဝႃႈၼၼ်သေၵေႃႈၶုၼ်ႁေႃၶမ်းဢမ်ႇသိူၵ်ႈသမ်ႇၵႃႇမႃႉလူၺ်ႈၵၼ်တင်းမၼ်း။
လိုၼ်းၼၼ်ႉ၊ ဢတေႃးၼိယႃး၊ လုၵ်ႈၸၢႆး ႁၵ်ႉၵိတ်ႉ၊ ၼၼ်ႉယုၵ်ႉယွင်ႈတူဝ်ၸဝ်ႈၵဝ်ႇလႄႈဝႃႈ၊ “ၵဝ်တၵ်းႁဵတ်းၶုၼ်ႁေႃၶမ်းဢေႃႈ၊” ဝႃႈၼင်ႇၼႆသေယဝ်ႉ၊ႁၢင်ႈလေႃႉမႃႉသိုၵ်းလႂ်၊မႃႉလႂ်ဢိၵ်ႇတင်းၵူၼ်းႁႃႈသိပ်းဢၼ်ၸွမ်းပႂ်ႉဢသၢၵ်ႈမၼ်းၸိူဝ်းၼၼ်ႉဢေႃႈ။-
ၸဝ်ႈပေႃႈမၼ်းဢမ်ႇတွၼ်ႉတၢင်ႇဢပျတ်ႈႁႂ်ႈမၼ်းၽိတ်းၸႂ်တိူဝ်ႉၸႂ်သေပွၵ်ႈယင်းဢမ်ႇတွၼ်ႉဝႃႈ၊ “ၵွပ်ႈသင်လႄႈမႂ်းႁဵတ်းၸိူဝ်ႉၼင်ႇၼႆၼင်ႇႁိုဝ်၊” မၼ်းၼၼ်ႉပဵၼ်ၵေႃႉဢၼ်ႁၢင်ႈလီၽၢင်လီလႄႈသမ်ႉပဵၼ်လုၵ်ႈၸၢႆးဢၼ်ၵိူတ်ႇလဵင်ႉမႃးတၢမ်း ဢပႃႉသလုမ်ႇ၊ ၼၼ်ႉဢေႃႈ။-
မၼ်းတိူင်ႇပၢင်ႇၵၼ်တင်း ယွႃႇၽႃႉ၊ ဢၼ်မႄႈမၼ်းပဵၼ် ၸေႇရုယႃႇ၊ ဢိၵ်ႇတင်းယဵၸ်ႈပရေႃးႁဵၵ်ႈ ဢပျႃႇထႃႇ၊ လႄႈၶဝ်ၵေႃႈၽွမ်ႉၽၢႆႇမၼ်းႁႂ်ႈလႆႈၸွႆႈထႅမ်ၼႃႈၵၢၼ်မၼ်းဢေႃႈ။-
ၵူၺ်းၵႃႈ၊ယဵၸ်ႈပရေႃးႁဵၵ်ႈ ၸႃႇတုၵ်ႉ၊ပေႇၼႃႇယႃႉ၊ လုၵ်ႈၸၢႆး ယေႃႇယတႃႉ၊ ပရေႃးၽႅတ်ႈ ၼႃႇႀၼ်ႇ၊သိမိ၊ရေႇဢိ၊ ဢိၵ်ႇတင်းတပ်ႉသိုၵ်းဢၼ်ပႂ်ႉဢသၢၵ်ႈ တႃႇဝိတ်ႈ၊ ၸိူဝ်းၼၼ်ႉၸမ်ႉ၊ဢမ်ႇၶဝ်ႈပႃးၽၢႆႇ ဢတေႃးၼိယႃး။
ဢတေႃးၼိယႃး၊ ၼၼ်ႉႁႅမ်သူဝ်းလႂ်၊ဝူဝ်းပေႃႈလႂ်တင်းဝူဝ်းၼုမ်ႇလႂ်ဢၼ်ပီးလီမၼ်းလီၼၼ်ႉႁဵတ်းတၢင်းလူႇဢၼ်သၢၵ်ႈၵၢပ်ႈၵႃႈတီႈမၢၵ်ႇႁိၼ်ငူးႁဝ်ႇၵႃႈႁိမ်းၼမ်ႉဢွၵ်ႇႁူး ဢႅၼ်ႇႁေႃႇၵေးလႃႉ၊ ဢေႃႈ။ မၼ်းႁွင်ႉပၢင်းလုၵ်ႈၸၢႆးၶုၼ်ႁေႃၶမ်းၵူႈၵေႃႉ၊ဢိၵ်ႇတင်းၶုၼ်ဢၼ်ပွင်ၵၢၼ်ၸဝ်ႈၵူၼ်းမဵဝ်း ယုတႃႉ၊ တင်းလၢႆၼၼ်ႉဢေႃႈ။-
ၵူၺ်းၵႃႈ၊ပရေႃးၽႅတ်ႈ ၼႃႇႀၼ်ႇ၊ပေႇၼႃႇယႃႉ၊ တင်းႁူဝ်ႁၢၼ်ၵူၼ်းသိုၵ်းဢၼ်ပႂ်ႉဢသၢၵ်ႈၶုၼ်ႁေႃၶမ်း၊ဢိၵ်ႇတင်းၼွင်ႉၸၢႆးမၼ်း သေႃးလမုၼ်ႇ၊ ၸမ်ႉ၊မၼ်းဢမ်ႇႁွင်ႉဢမ်ႇပၢင်း။
မိူဝ်ႈၼၼ်ႉ၊ ၼႃႇႀၼ်ႇ၊ ၵႂႃႇၸူးတီႈၼၢင်း ပႃႇသႃႉသေးၽႃႉ၊ မႄႈ သေႃးလမုၼ်ႇ၊ သေလႄႈဝႃႈ၊ “ၸဝ်ႈၼၢင်းႁဝ်းဢမ်ႇလႆႈငိၼ်းလွင်ႈဢၼ် ဢတေႃးၼိယႃး၊ လုၵ်ႈၸၢႆးၼၢင်း ႁၵ်ႉၵိတ်ႉ၊ ၼၼ်ႉႁဵတ်းၶုၼ်ႁေႃၶမ်းယဝ်ႉၼၼ်ႉတီႈၶႃႈႁိုဝ်း။ ၸဝ်ႈႁဝ်း တႃႇဝိတ်ႈ၊ ယင်းဢမ်ႇလႆႈႁုလွင်ႈတၢင်းၼၼ်ႉလႃးလႃးတီႈၶႃႈ။-
ပေႃးၸဝ်ႈၼၢင်းႁဝ်းၶႂ်ႈၵႄႇသႄႇဢသၢၵ်ႈတူဝ်ၸဝ်ႈၵဝ်ႇဢိၵ်ႇတင်းဢသၢၵ်ႈလုၵ်ႈၸၢႆးၸဝ်ႈၼၢင်းႁဝ်း သေႃးလမုၼ်ႇ၊ ၼၼ်ႉၸိုင်၊ၵဝ်ၶႃႈၶႂ်ႈပၼ်တၢင်းၵျၢမ်ႇၸမ်ႉ၊-
ၵႂႃႇၸူးတီႈၶုၼ်ႁေႃၶမ်း တႃႇဝိတ်ႈ၊ ၵမ်းလဵဝ်သေလႄႈထၢမ်ဝႃႈ၊ ‘ၸဝ်ႈၵဝ်ၶႃႈၸဝ်ႈၶုၼ်လူင်တီႈၶႃႈ႟။ ၸဝ်ႈႁဝ်းၵိၼ်ႇဝႃႈတီႈၶႃႈၸဝ်ႈလွင်ႈဢၼ်တၵ်းႁႂ်ႈလုၵ်ႈၸၢႆးၶႃႈၸဝ်ႈ သေႃးလမုၼ်ႇ၊ သိုပ်ႇပုတ်ႈဢဝ်ဢရႃႇၶုၼ်ႁေႃၶမ်း၊ဝႃႈၼႆဝႆႉယဝ်ႉဢမ်ႇၸႂ်ႈတီႈၶႃႈႁိုဝ်း။ ပေႃးပဵၼ်ၸိူဝ်ႉၼင်ႇၼၼ်ၸိုင်၊ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ဢတေႃးၼိယႃး၊ ႁဵတ်းၶုၼ်ႁေႃၶမ်းယူႇတီႈၶႃႈ၊’ ဝႃႈၼင်ႇၼႆသေၵမ်းတီႈၶႃႈ၊” ဝႃႈၼင်ႇၼႆဢေႃႈ။-
ၼႃႇႀၼ်ႇ၊ သမ်ႉသိုပ်ႇလၢတ်ႈလႄႈဝႃႈ၊ “ၼႂ်းမိူဝ်ႈဢၼ်ၸဝ်ႈၼၢင်းႁဝ်းယင်းတိုၵ်ႉလဝ်ႈလၢတ်ႈတီႈၶုၼ်ႁေႃၶမ်း တႃႇဝိတ်ႈ၊ ယူႇၼၼ်ႉၸိုင်၊ၶႃႈၸဝ်ႈတၵ်းၸွမ်းလႄႈၵမ်ႉထွၵ်ႈၸွႆႈလၢတ်ႈၵႂၢမ်းၸဝ်ႈၼၢင်းႁဝ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ပႃႇသႃႉသေးၽႃႉ၊ ၶဝ်ႈၸူးတီႈၼႂ်းႁွင်ႈဢၼ်ၶုၼ်ႁေႃၶမ်းမီးၼၼ်ႉဢေႃႈ။ ၶုၼ်ႁေႃၶမ်းၼၼ်ႉပဵၼ်ဢၼ်ထဝ်ႈၼႃႇလႄႈ ဢၽိသၵ်ႉ၊ ၵူၼ်းယိင်းသၢဝ်ဝဵင်း သုၼိမ်ႇ၊ ၼၼ်ႉလူတူၺ်းလုမ်းလႃးယူႇဢေႃႈ။-
ပႃႇသႃႉသေးၽႃႉ၊ ၵေႃႈၵူမ်ႈႁူဝ်ဝႆႈၶုၼ်ႁေႃၶမ်းသေယဝ်ႉ၊ၶုၼ်ႁေႃၶမ်းထၢမ်ဝႃႈ၊ “မႂ်းမီးဢလူဝ်ႇၶႂ်ႈလႆႈၵႃႈသင်၊” ဝႃႈၼင်ႇၼႆဢေႃႈ။
မၼ်းၵေႃႈလဝ်ႈလၢတ်ႈလႄႈဝႃႈ၊ “ၸဝ်ႈႁဝ်းၸဝ်ႈၶုၼ်လူင်တီႈၶႃႈ႟။ ၸဝ်ႈႁဝ်းလႆႈတိူင်ႇဝႃႈ၊ၼႂ်းၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ၽြႃးပဵၼ်ၸဝ်ႈၸဝ်ႈႁဝ်းတီႈၶိင်းပဵၼ်ၶႃႈၸဝ်ႈႁဝ်းၼႆႉလႄႈဝႃႈ၊ ‘လုၵ်ႈၸၢႆးမႂ်း သေႃးလမုၼ်ႇ၊ တၵ်းလႆႈသိုပ်ႇၼင်ႈႁၢင်ႈၼင်ႈႁေႃဝၢႆးသေၵဝ်ဢေႃႈ၊’ ဝႃႈၼႆဝႆႉတီႈၶႃႈယဝ်ႉ။-
တူၺ်းတီႈၶႃႈလူး။ မိူဝ်ႈလဵဝ်ၼႆႉ ဢတေႃးၼိယႃး၊ ၼၼ်ႉပေႃးႁဵတ်းၶုၼ်ႁေႃၶမ်းယူႇတီႈၶႃႈယဝ်ႉ။ ၸဝ်ႈၵဝ်ၶႃႈၸဝ်ႈၶုၼ်လူင်ယင်းဢမ်ႇလႆႈႁုလွင်ႈတၢင်းၼၼ်ႉသေဢိတ်းတီႈၶႃႈ။-
မၼ်းၼၼ်ႉႁႅမ်ဝူဝ်းပေႃႈလႂ်၊သူဝ်းလႂ်၊ဝူဝ်းၼုမ်ႇလႂ်ၼမ်ၼႃႇဢၼ်ပီးလီမၼ်းလီလႄႈသၢၵ်ႈၵၢပ်ႈတၢင်းလူႇတီႈၶႃႈဢေႃႈ။ မၼ်းႁွင်ႉပၢင်းဢဝ်လုၵ်ႈၸၢႆးၸဝ်ႈၶုၼ်လူင်တင်းမူတ်းဢိၵ်ႇတင်းယဵၸ်ႈပရေႃးႁဵၵ်ႈ ဢပျႃႇထႃႇ၊ တင်းၸဝ်ႈၵွၼ်းတပ်ႉသိုၵ်းလူင် ယွႃႇၽႃႉ၊ ၸိူဝ်းၼၼ်ႉၶဝ်ႈပွႆးမၼ်းတီႈၶႃႈဢေႃႈ။ လုၵ်ႈၸၢႆးၸဝ်ႈႁဝ်း သေႃးလမုၼ်ႇ၊ ၸမ်ႉ၊မၼ်းဢမ်ႇႁွင်ႉဢမ်ႇပၢင်းတီႈၶႃႈ။-
ၸဝ်ႈၵဝ်ၶႃႈ၊ၶုၼ်လူင်တီႈၶႃႈ။ ၵူၼ်းမဵဝ်း ဢိသရေး၊ ၵႃႈမီးတင်းသဵင်ႈတင်းလူင်ဢွၼ်ၵၼ်မုင်ႈထႃႈပႂ်ႉတူၺ်းၸဝ်ႈႁဝ်း၊လူၺ်ႈလွင်ႈဢၼ်ၸဝ်ႈႁဝ်းတၵ်းယုၵ်ႉတၢင်ႇႁႂ်ႈၽူႈလႂ်သိုပ်ႇၼင်ႈႁၢင်ႈၼင်ႈႁေႃဝၢႆးသေၸဝ်ႈႁဝ်းၼၼ်ႉယူႇတီႈၶႃႈဢေႃႈ။-
ပေႃးယင်းဢမ်ႇၶၢၼ်းဝႆႉၸိုင်၊ၶိင်းပဵၼ်ၶႃႈၸဝ်ႈႁဝ်းၼႆႉ၊ဢိၵ်ႇတင်းလုၵ်ႈၸၢႆးၶႃႈၸဝ်ႈ သေႃးလမုၼ်ႇ၊ ၼၼ်ႉတၵ်းလႆႈၶၢမ်ႇတၢင်းဢၼ်ပိူၼ်ႈသိူၵ်ႈသမ်ႇပဵၼ်မိူၼ်ၸိူဝ်ႉၼင်ႇၵူၼ်းဢၼ်ၽိတ်းပိူင်ႈရႃႇၸဝုတ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ယၢမ်ႈမိူဝ်ႈဢၼ်မၼ်းယင်းတိုၵ်ႉလဝ်ႈလၢတ်ႈတေႃႇၶုၼ်ႁေႃၶမ်းယူႇၼၼ်ႉၸိုင်၊ပရေႃးၽႅတ်ႈ ၼႃႇႀၼ်ႇ၊ ႁွတ်ႈထိုင်မႃးတီႈႁေႃၸဝ်ႈဢေႃႈ။-
ပိူၼ်ႈဢွၼ်ၵၼ်လဝ်ႈလၢတ်ႈတီႈၶုၼ်ႁေႃၶမ်းလွင်ႈဢၼ်ပရေႃးၽႅတ်ႈ ၼႃႇႀၼ်ႇ၊ မႃးၼၼ်ႉသေယဝ်ႉ၊ ၼႃႇႀၼ်ႇ၊ ၶဝ်ႈၸူးတီႈၶုၼ်ႁေႃၶမ်းလႄႈၶုပ်ႉမူပ်ႇၵူမ်ႈႁူဝ်ၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။-
မၼ်းလဝ်ႈလၢတ်ႈလႄႈဝႃႈ၊ “ၸဝ်ႈၶုၼ်လူင်တီႈၶႃႈ။ ၸွင်ႇၸဝ်ႈႁဝ်းမီးဢမိင်ႉႁႂ်ႈ ဢတေႃးၼိယႃး၊ သိုပ်ႇၶၢမ်ႇဢဝ်ဢရႃႇၶုၼ်ႁေႃၶမ်းယဝ်ႉတီႈၶႃႈႁိုဝ်း။-
ၼႂ်းဝၼ်းမိူဝ်ႈၼႆႉ၊မၼ်းလူင်းၵႂႃႇဢဝ်သူဝ်း၊ဝူဝ်းပေႃႈတင်းဝူဝ်းၼုမ်ႇဢၼ်ပီးလီမၼ်းလီၼမ်ၼႃႇသၢၵ်ႈၵၢပ်ႈတၢင်းလူႇတီႈၶႃႈယဝ်ႉ။ မၼ်းႁွင်ႉပၢင်းဢဝ်လုၵ်ႈၸၢႆးၸဝ်ႈတင်းလၢႆ၊ဢိၵ်ႇတင်းၸဝ်ႈၵွၼ်းတပ်ႉသိုၵ်းလူင် ယွႃႇၽႃႉ၊ လႄႈၵိၼ်ၶူပ်းလူၺ်ႈၵၼ်တင်းမၼ်းယူႇသေလႄႈႁွင်ႉပၢဝ်ႇဝႃႈ၊ ‘ႁႂ်ႈၶုၼ်လူင် ဢတေႃးၼိယႃး၊ ဢသၢၵ်ႈယၢဝ်းယိုၼ်းသေၵမ်းလူၺ်ႈ၊’ ဝႃႈၼင်ႇၼႆယူႇတီႈၶႃႈဢေႃႈ။-
ၵူၺ်းၵႃႈ၊မၼ်းဢမ်ႇႁွင်ႉဢမ်ႇပၢင်းၶႃႈၸဝ်ႈတီႈၶႃႈ။ ယဵၸ်ႈပရေႃးႁဵၵ်ႈ ၸႃႇတုၵ်ႉ၊ပေႇၼႃႇယႃႉ၊ တင်း သေႃးလမုၼ်ႇ၊ ၸိူဝ်းၼၼ်ႉၵေႃႈမၼ်းဢမ်ႇႁွင်ႉဢမ်ႇပၢင်းတီႈၶႃႈ။-
ၸွင်ႇၸဝ်ႈႁဝ်းၸဝ်ႈၶုၼ်လူင်ၽွမ်ႉၸႂ်လူၺ်ႈလွင်ႈတၢင်းၼႆႉယဝ်ႉႁိုဝ်း။ ၵွပ်ႈၼႆၸဝ်ႈႁဝ်းဢမ်ႇပူင်ဢမိင်ႉတီႈႁဝ်းၶႃႈဝႃႈ၊ၽူႈလႂ်တၵ်းပုတ်ႈဢဝ်ဢရႃႇၶုၼ်ႁေႃၶမ်းၼၼ်ႉယဝ်ႉႁိုဝ်း၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၶုၼ်ႁေႃၶမ်း တႃႇဝိတ်ႈ၊ မီးဢမိင်ႉလႄႈဝႃႈ၊ “ႁွင်ႉဢဝ် ပႃႇသႃႉသေးၽႃႉ၊ ၶိုၼ်းၶဝ်ႈမႃးသေၵမ်း၊” ဝႃႈၼင်ႇၼႆသေယဝ်ႉ၊မၼ်းၵေႃႈၶဝ်ႈမႃးၸုၵ်းယူႇၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။-
ၶုၼ်ႁေႃၶမ်းတိူင်ႇၵၢဝ်ႇၵတိသဵတ်ႈၸႃႇလႄႈဝႃႈ၊ “ၸူဝ်ႈဢၼ် ထႃႇဝရႃႉၽြႃး၊ ဢၼ်ၵႄႇၼုၵ်ႈဢဝ်ၵဝ်ဢွၵ်ႇသေၵႃႈၼႂ်းၽေးတုၵ်ႉၶႃႉၵူႈၸိူဝ်ႉၵူႈပိူင်ၼၼ်ႉဢသၢၵ်ႈယင်းလိပ်းယူႇၼၼ်ႉ၊-
ၵဝ်တၵ်းပႂ်ႉသဵတ်ႈၸႃႇတီႈဢၼ်ၵဝ်ႁဵတ်းသဵတ်ႈၸႃႇၵႃႈတီႈမႂ်းၼႂ်းၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ ဢၼ်ဝႃႈ၊လုၵ်ႈၸၢႆးမႂ်း သေႃးလမုၼ်ႇ၊ တၵ်းလႆႈသိုပ်ႇၶၢမ်ႇဢဝ်ဢရႃႇၶုၼ်ႁေႃၶမ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ပႃႇသႃႉသေးၽႃႉ၊ ၶုပ်ႉမူပ်ႇၵူမ်ႈႁူဝ်ၸူးသေယဝ်ႉလဝ်ႈလၢတ်ႈဝႃႈ၊ “ႁႂ်ႈၸဝ်ႈၵဝ်ၶႃႈၸဝ်ႈၶုၼ်လူင်ဢသၢၵ်ႈလိပ်းယူႇတႃႇသေႇသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၶုၼ်ႁေႃၶမ်း တႃႇဝိတ်ႈ၊ ပွႆႇၸႂ်ႉၵႂႃႇႁွင်ႉဢဝ် ၸႃႇတုၵ်ႉ၊ ဢိၵ်ႇတင်း ၼႃႇႀၼ်ႇ၊ပေႇၼႃႇယႃႉ၊ မႃးလႄႈမိူဝ်ႈဢၼ်ၶဝ်ႁွတ်ႈထိုင်ၼၼ်ႉၸိုင်၊-
မၼ်းမီးဢမိင်ႉတီႈၶဝ်လႄႈဝႃႈ၊ “ႁွင်ႉဢဝ်ၶုၼ်ဢၼ်ပွင်ၵၢၼ်ၸဝ်ႈၸိူဝ်းၼၼ်ႉသေယဝ်ႉ၊ႁႂ်ႈလုၵ်ႈၸၢႆးၵဝ် သေႃးလမုၼ်ႇ၊ ၶီႇမႃႉလီႈၵဝ်လႄႈသူဢွၼ်ၵၼ်ပႂ်ႉထိင်းမၼ်းလူင်းၵႂႃႇၸူးတီႈၼမ်ႉဢွၵ်ႇႁူး ၵိႁုၼ်ႇ၊ တႃႉ။-
ႁႂ်ႈယဵၸ်ႈပရေႃးႁဵၵ်ႈ ၸႃႇတုၵ်ႉ၊ တင်းပရေႃးၽႅတ်ႈ ၼႃႇႀၼ်ႇ၊ ပၼ်ၽိၵ်ႈသိၵ်ႈတီႈမၼ်းႁႂ်ႈမၼ်းႁဵတ်းၶုၼ်ႁေႃၶမ်းမဵဝ်း ဢိသရေး၊ တႃႉ။ ၼင်ႇၼၼ်လႄႈပဝ်ႇတိုင်ႈၼႄးၶရႃႇလႄႈႁွင်ႉဝႃႈ၊ ‘ႁႂ်ႈၶုၼ်ႁေႃၶမ်း သေႃးလမုၼ်ႇ၊ ဢသၢၵ်ႈယၢဝ်းယိုၼ်းသေၵမ်းလူၺ်ႈ၊’ ဝႃႈၼႆတႃႉ။-
လိုၼ်းၼၼ်ႉ၊သူဢွၼ်ၵၼ်ၸွမ်းလူၺ်ႈၵၼ်တင်းမၼ်းၶိုၼ်းမႃးမိူဝ်ႈဢၼ်မၼ်းမႃးၼင်ႈပလၢင်ႇၵဝ်ၼၼ်ႉတႃႉ။ ၵဝ်ၶၢၼ်းမၼ်းဝႆႉႁႂ်ႈပုတ်ႈဢရႃႇၶုၼ်ႁေႃၶမ်းမဵဝ်း ဢိသရေး၊ တင်းမဵဝ်း ယုတႃႉ၊ ယဝ်ႉ၊” ဝႃႈၼင်ႇၼႆဢေႃႈ။
ပေႇၼႃႇယႃႉ၊ ၶိုၼ်းလဝ်ႈလၢတ်ႈလႄႈဝႃႈ၊ “တၵ်းႁႂ်ႈပဵၼ်ၸွမ်းတီႈၶႃႈဢေႃႈ။ ႁႂ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၸဝ်ႈႁဝ်းႁဵတ်းႁႂ်ႈဢမိင်ႉၼၼ်ႉတႄႇမၼ်ႈသေၵမ်းတီႈၶႃႈ။-
ၸိူဝ်ႉၼင်ႇဢၼ် ထႃႇဝရႃႉၽြႃး၊ မီးယူႇလူၺ်ႈၵၼ်တင်းၸဝ်ႈႁဝ်းမႃးၼၼ်ႉႁႂ်ႈမၼ်းၸဝ်ႈမီးယူႇလူၺ်ႈၵၼ်တင်း သေႃးလမုၼ်ႇ၊ သေယဝ်ႉ၊ႁႂ်ႈတၢင်းဢၼ်ဢုပ်ႉပိူင်ႇယဵင်ႈၶႅၼ်းၶိုၼ်ႈယႂ်ႇမႂ်ႇသုင်ၼႃႇသေၸဝ်ႈႁဝ်းသေၵမ်းလူၺ်ႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ယဵၸ်ႈပရေႃးႁဵၵ်ႈ ၸႃႇတုၵ်ႉ၊ ဢိၵ်ႇတင်းပရေႃးၽႅတ်ႈ ၼႃႇႀၼ်ႇ၊ တင်း ပေႇၼႃႇယႃႉ၊ ပႃးလူၺ်ႈၵၼ်တင်းတပ်ႉသိုၵ်းပႂ်ႉဢသၢၵ်ႈၸဝ်ႈၸိူဝ်းၼၼ်ႉဢဝ် သေႃးလမုၼ်ႇ၊ ၶီႇမႃႉလီႈၶုၼ်ႁေႃၶမ်း တႃႇဝိတ်ႈ၊ ၼၼ်ႉသေယဝ်ႉ၊ဢွၼ်ၵၼ်ပႂ်ႉထိင်းမၼ်းလူင်းၸူးတီႈၼမ်ႉဢွၵ်ႇႁူး ၵိႁုၼ်ႇ၊ ဢေႃႈ။-
ယဵၸ်ႈပရေႃးႁဵၵ်ႈ ၸႃႇတုၵ်ႉ၊ ဢဝ်တဝ်ႈၼမ်ႉမၼ်းသၢၼ်ႇလုၼ်ႇ ဢၼ်ဢဝ်ဢွၵ်ႇသေၵႃႈတီႈသုမ်ႉထဵင်ၸဝ်ႈၼၼ်ႉသေယဝ်ႉ၊ပၼ်ၽိၵ်ႈသိၵ်ႈၵႃႈတီႈ သေႃးလမုၼ်ႇ၊ ဢေႃႈ။ မိူဝ်ႈၼၼ်ႉၶဝ်ပဝ်ႇတိုင်ႈၼႄးၶရႃႇလႄႈၵူၼ်းတင်းသဵင်ႈတင်းလူင်ဢွၼ်ၵၼ်ႁွင်ႉပၢဝ်ႇႁွင်ႉသေႃႇဝႃႈ၊ “ႁႂ်ႈၶုၼ်ႁေႃၶမ်း သေႃးလမုၼ်ႇ၊ ဢသၢၵ်ႈယၢဝ်းယိုၼ်းသေၵမ်းလူၺ်ႈ၊” ဝႃႈၼင်ႇၼႆဢေႃႈ။-
ၶဝ်ၸိူဝ်းၼၼ်ႉဢွၼ်ၵၼ်ၸွမ်းလူၺ်ႈၵၼ်တင်းမၼ်းၶိုၼ်းမႃးလႄႈႁွင်ႉပၢဝ်ႇႁွင်ႉသေႃႇၸူမ်းၸူမ်းသိူဝ်းသိူဝ်းယူႇ၊ပဝ်ႇပီႇပဝ်ႇၼႄးယူႇ၊ႁုၼ်ႈမေႃးၼႃႇလူင်လၢင်တေႃႇထိုင်ႁွတ်ႈၼင်လိၼ်ထၢၼ်ႈပေႃးသၼ်ႇၶွၼ်းၵႂႃႇဢေႃႈ။
ယၢမ်းမိူဝ်ႈဢၼ်ပွႆးၵိၼ်ပွႆးၶူပ်း ဢတေႃးၼိယႃး၊ ဢိၵ်ႇတင်းၶႅၵ်ႇမၼ်းၸိူဝ်းၼၼ်ႉယဝ်ႉတူဝ်ႈၵႂႃႇယဝ်ႉၼၼ်ႉၶဝ်လႆႈငိၼ်းသဵင်ၼၼ်ႉဢေႃႈ။ ယွႃႇၽႃႉ၊ ၵေႃႈလႆႈငိၼ်းသဵင်ၼႄးၶရႃႇသေယဝ်ႉထၢမ်ဝႃႈ၊ “သဵင်ဢၼ်လင်မေႃးယူႇၵႃႈၼႂ်းဝဵင်းၼၼ်ႉၶႂ်ႈဝႃႈၵႃႈသင်၊” ဝႃႈၼင်ႇၼႆဢေႃႈ။-
ၼႂ်းမိူဝ်ႈဢၼ်မၼ်းလၢတ်ႈယူႇယင်းဢမ်ႇပႆႇသုတ်းၼၼ်ႉ ယေႃးၼႀၼ်ႇ၊ လုၵ်ႈၸၢႆးယဵၸ်ႈပရေႃးႁဵၵ်ႈ ဢပျႃႇထႃႇ၊ ႁွတ်ႈမႃးလႄႈ၊ ဢတေႃးၼိယႃး၊ ၵေႃႈလၢတ်ႈဝႃႈ၊ “ၶဝ်ႈမႃးတႃႉ။ မႂ်းၼႆႉပဵၼ်ၵူၼ်းလီလႄႈၸၢင်ႈမွၵ်ႇၶၢဝ်ႇငၢဝ်းဢၼ်လီဢေႃႈ၊” ဝႃႈၼင်ႇၼႆဢေႃႈ။
ယေႃးၼႀၼ်ႇ၊ ၶိုၼ်းလဝ်ႈလၢတ်ႈလႄႈဝႃႈ၊ “ဢမ်ႇၸႂ်ႈၶၢဝ်ႇငၢဝ်းဢၼ်လီတီႈၶႃႈ။ ၸဝ်ႈမုၼ်ယႂ်ႇၶုၼ်ႁေႃၶမ်း တႃႇဝိတ်ႈ၊ ယုၵ်ႉတၢင်ႇ သေႃးလမုၼ်ႇ၊ ဝႆႉႁႂ်ႈႁဵတ်းၶုၼ်ႁေႃၶမ်းတီႈၶႃႈယဝ်ႉ။-
မၼ်းၸဝ်ႈပွႆႇၸႂ်ႉယဵၸ်ႈပရေႃးႁဵၵ်ႈ ၸႃႇတုၵ်ႉ၊ ဢိၵ်ႇတင်းပရေႃးၽႅတ်ႈ ၼႃႇႀၼ်ႇ၊ တင်း ပေႇၼႃႇယႃႉ၊ ပႃးလူၺ်ႈၵၼ်တင်းတပ်ႉသိုၵ်းပႂ်ႉဢသၢၵ်ႈၸဝ်ႈၸိူဝ်းၼၼ်ႉၵႂႃႇလူၺ်ႈၵၼ်တင်း သေႃးလမုၼ်ႇ၊ လႄႈႁႂ်ႈမၼ်းၶီႇမႃႉလီႈၶုၼ်ႁေႃၶမ်းၼၼ်ႉတီႈၶႃႈယဝ်ႉ။-
ယဵၸ်ႈပရေႃးႁဵၵ်ႈ ၸႃႇတုၵ်ႉ၊ တင်းပရေႃးၽႅတ်ႈ ၼႃႇႀၼ်ႇ၊ ပၼ်ရႃႇၸႃႉၽိၵ်ႈသိၵ်ႈတီႈမၼ်းၵႃႈတီႈၼမ်ႉဢွၵ်ႇႁူး ၵိႁုၼ်ႇ၊ တီႈၶႃႈယဝ်ႉ။ မိူဝ်ႈဢၼ်ၶဝ်ဢွၼ်ၵၼ်ၶိုၼ်းၶဝ်ႈၵႂႃႇၵႃႈၼႂ်းဝဵင်းယူႇၼၼ်ႉႁွင်ႉပၢဝ်ႇႁွင်ႉသေႃႇၸူမ်းၸူမ်းသိူဝ်းသိူဝ်းယူႇလႄႈမိူဝ်ႈလဵဝ်ၵူၼ်းတင်းလၢႆႁုၼ်ႈႁၢၼ်ႈဢူၼ်ဢဵၼ်ၵႂႃႇတင်းဝဵင်းတီႈၶႃႈဢေႃႈ။ သဵင်ၼၼ်ႉပဵၼ်သဵင်ဢၼ်ၸဝ်ႈႁဝ်းငိၼ်းယူႇယဝ်ႉၼၼ်ႉတီႈၶႃႈဢေႃႈ။-
သေႃးလမုၼ်ႇ၊ ၵေႃႈမိူဝ်ႈလဵဝ်ၼႆႉပဵၼ်ၶုၼ်ႁေႃၶမ်းယူႇတီႈၶႃႈယဝ်ႉ။-
လိူဝ်သေၼၼ်ႉ၊ၶုၼ်ဢၼ်ပွင်ၵၢၼ်ၸဝ်ႈၵႃႈမီးၸိူဝ်းၼၼ်ႉဢွၼ်ၵၼ်ၶဝ်ႈၸူးႁႂ်ႈလႆႈၼပ်ႉယမ်ၸဝ်ႈမုၼ်ယႂ်ႇၶုၼ်ႁေႃၶမ်း တႃႇဝိတ်ႈ၊ လႄႈလဝ်ႈလၢတ်ႈဝႃႈ၊ ‘ႁႂ်ႈၽြႃးပဵၼ်ၸဝ်ႈၸဝ်ႈႁဝ်းၼၼ်ႉယုၵ်ႉယွင်ႈ သေႃးလမုၼ်ႇ၊ လိူဝ်တွၼ်းၼႃႇသေၸဝ်ႈႁဝ်း၊ဢိၵ်ႇတင်းႁႂ်ႈမုၼ်ၽုင်းဢႃႇၼႃႇၸၢၵ်ႈ သေႃးလမုၼ်ႇ၊ ယႂ်ႇလိူဝ်တွၼ်းၼႃႇသေမုၼ်ၽုင်းဢႃႇၼႃႇၸၢၵ်ႈၸဝ်ႈႁဝ်းၼၼ်ႉသေၵမ်းလူၺ်ႈ၊’ ဝႃႈၼႆတီႈၶႃႈဢေႃႈ။ မိူဝ်ႈၼၼ်ႉ၊ၶုၼ်ႁေႃၶမ်း တႃႇဝိတ်ႈ၊ ၵူမ်ႈႁူဝ်ဝၢင်းႁူဝ်ၵႃႈတီႈၵူႇၼွၼ်းမၼ်းသေယဝ်ႉ၊ဝႆႈ ထႃႇဝရႃႉၽြႃး၊ လႄႈ၊-
သူးတွင်းဝႃႈ၊ ‘ဢွၼ်ၵၼ်ယွင်ႈယေႃး ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ ၼၼ်ႉတႃႉႁဝ်း။ မၼ်းၸဝ်ႈယုၵ်ႉတၢင်ႇၵေႃႉဢၼ်ပုတ်ႈႁၢင်ႈပုတ်ႈႁေႃၵဝ်ၼႂ်းဢရႃႇၶုၼ်ႁေႃၶမ်းၼႂ်းဝၼ်းမိူဝ်ႈၼႆႉယဝ်ႉလႄႈ၊ႁႂ်ႈၵဝ်လႆႈဢသၢၵ်ႈလိပ်းလႄႈလႆႈႁၼ်လွင်ႈတၢင်းၼႆႉယဝ်ႉ၊’ ဝႃႈၼႆတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ပီႈၼွင်ႉၶႅၵ်ႇ ဢတေႃးၼိယႃး၊ ၸိူဝ်းၼၼ်ႉၵူဝ်ႁႄယူႇသေလႄႈဢွၼ်ၵၼ်လုၵ်ႉပၢႆႈၵႂႃႇယေႈၵေႃႉယေႈတီႈ၊ယေႈၵေႃႉယေႈတၢင်းသေဢေႃႈ။-
ဢတေႃးၼိယႃး၊ ၵေႃႈၵူဝ်ႁႄ သေႃးလမုၼ်ႇ၊ ၼႃႇလူင်လၢင်လႄႈၶဝ်ႈၵႂႃႇၵႃႈၼႂ်းသုမ်ႉထဵင်ၸဝ်ႈသေယဝ်ႉ၊ယိပ်းၵမ်ပၢႆသဝ်ႁူဝ်ၸဵင်ႇၶဵင်ႇတၢင်းလူႇ ၼၼ်ႉဢေႃႈ။-
ပိူၼ်ႈဢွၼ်ၵၼ်လဝ်ႈလၢတ်ႈတီႈၶုၼ်ႁေႃၶမ်း သေႃးလမုၼ်ႇ၊ လႄႈဝႃႈ၊ “ ဢတေႃးၼိယႃး၊ ၼၼ်ႉၵူဝ်ႁႄၶုၼ်လူင် သေႃးလမုၼ်ႇ၊ လႄႈယိပ်းၵမ်ပၢႆသဝ်ႁူဝ်ၸဵင်ႇၶဵင်ႇတၢင်းလူႇယူႇသေလႄႈလၢတ်ႈဝႃႈ၊ ‘ၵဝ်ၶႂ်ႈႁႂ်ႈၶုၼ်ႁေႃၶမ်း သေႃးလမုၼ်ႇ၊ တိူင်ႇဝႃႈတီႈၵဝ်လူၺ်ႈလွင်ႈဢၼ်မၼ်းၸဝ်ႈတၵ်းဢမ်ႇၶႃႈၽၼ်းဢဝ်ၵဝ်တၢႆၼၼ်ႉဢေႃႈ၊’ ဝႃႈၼႆယူႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။
သေႃးလမုၼ်ႇ၊ မီးဢမိင်ႉလႄႈဝႃႈ၊ “ပေႃးမၼ်းပဵၼ်ၵေႃႉဢၼ်ပႂ်ႉသဵတ်ႈၸႃႇၸိုင်၊ၶူၼ်ႁူဝ်မၼ်းသေသဵၼ်ႈၼိုင်ႈၵေႃႈ၊ဢမ်ႇလႆႈတူၵ်းၵႃႈတီႈလိၼ်။ ၵူၺ်းၵႃႈ၊ပေႃးမၼ်းယႃႉသဵတ်ႈၸႃႇၸိုင်၊မၼ်းတၵ်းလႆႈတၢႆဢေႃႈ၊” ဝႃႈၼင်ႇၼႆဢေႃႈ။-
ၶုၼ်ႁေႃၶမ်း သေႃးလမုၼ်ႇ၊ ပွႆႇၸႂ်ႉၵူၼ်းၵႂႃႇလႄႈၶဝ်ဢွၼ်ၵၼ်ဢဝ်မၼ်းလူင်းၶဵင်ႇတၢင်းလူႇမႃးသေယဝ်ႉ၊မၼ်းၶဝ်ႈၸူးၵႃႈတီႈၶုၼ်ႁေႃၶမ်းလႄႈၵူမ်ႈႁူဝ်ၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။ ၶုၼ်ႁေႃၶမ်းၵေႃႈမီးဢမိင်ႉတီႈမၼ်းလႄႈဝႃႈ၊ “ၵႂႃႇၵႃႈတီႈႁိူၼ်းမႂ်းတႃႉ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ၼၼ်ႉမိူဝ်ႈဢၼ်ထိုင်ၶိင်ႇဢၼ်ၸမ်တၵ်းႁွတ်ႈၼိၵ်ႈၸႃႉၼၼ်ႉၸိုင်၊မၼ်းႁွင်ႉဢဝ် သေႃးလမုၼ်ႇ၊ မႃးလႄႈသင်ႇလၢတ်ႈၵႂၢမ်းသုင်းမႃႉလႄႈဝႃႈၸမ်ႉ၊-
“ၶိင်ႇၵႃႇလႃႉဢၼ်ၵဝ်တၵ်းတၢႆၼၼ်ႉၸိုင်၊ႁွတ်ႈထိုင်ယဝ်ႉ။ ပိူဝ်ႈၼႆလႄႈႁႂ်ႈပဵၼ်ၵေႃႉဢၼ်ယုမ်ႇယမ်တမ်းၸႂ်လႆႈလႄႈႁဵတ်းၵေႃႉၸၢႆးတႃႉ။-
ၵမ်ၵျၢင်ႉၸွမ်းၵႃႈၼင်ႇဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈမႂ်းပူင်ဢမိင်ႉဝႆႉတီႈမႂ်းၼၼ်ႉတႃႉ။ ထွမ်ႇဢဝ်ထုင်းတြႃးၸဝ်ႈတင်းလၢႆ၊ဢိၵ်ႇတင်းပိင်းၺၢပ်ႈတြႃးၸဝ်ႈတင်းလၢႆ၊ၸွမ်းၵႃႈၼင်ႇဢၼ်တႅမ်ႈဝႆႉၼႂ်းၵျၢမ်းပိင်းၺၢပ်ႈ မူဝ်းသေႇ၊ ႁႂ်ႈမႂ်းလႆႈလီလႆႈပဵၼ်ၵႃႈၼႂ်းၵႃႈဢၼ်မႂ်းႁဵတ်းၼၼ်ႉတႃႉ။-
ပေႃးမႂ်းထွမ်ႇဢဝ်ၸိုင်၊ ထႃႇဝရႃႉၽြႃး၊ တၵ်းပႂ်ႉၵတိသဵတ်ႈၸႃႇဢၼ်မၼ်းၸဝ်ႈမီးဢမိင်ႉတီႈၵဝ်ဝႆႉလႄႈဝႃႈ၊ ‘ပေႃးၸိူဝ်ႉၶိူဝ်းမႂ်းပႃးၸႂ်ပႃးၶေႃးဝႆႉဢမုၼႂ်းတၢင်းဢၼ်ၵမ်ၵျၢင်ႉလီလီငၢမ်းငၢမ်းသိုဝ်ႈၼႃႈတႂ်ႈတႃၵဝ်ၸိုင်၊ၸိူဝ်ႉၶုၼ်ၶိူဝ်းၶုၼ်ဢၼ်ၼင်ႈရႃႇၸႃႉပလၢင်ႇ ဢိသရေး၊ ၼႆႉၵဝ်တၵ်းဢမ်ႇႁႂ်ႈသုတ်းႁႂ်ႈထၢတ်ႇ၊’ ဝႃႈၼင်ႇၼႆၼၼ်ႉဢေႃႈ။
“သမ်ႉမီးထႅင်ႈလွင်ႈၼိုင်ႈလူးၵွၼ်ႇ။ မႂ်းမၢတ်ႈတွင်းလွင်ႈဢၼ် ယွႃႇၽႃႉ၊ ႁဵတ်းၸိူဝ်ႉၼင်ႇႁိုဝ်တီႈၵဝ်ၼႂ်းလွင်ႈတၢင်းဢၼ်မၼ်းၶႃႈၽၼ်းဢဝ်တၢႆၸဝ်ႈၵွၼ်းတပ်ႉသိုၵ်းလူင် ဢိသရေး၊ သွင်ၵေႃႉဢၼ်ဝႃႈ၊ ဢပ်ႉပၼႃး၊ လုၵ်ႈၸၢႆး ၼေးရႃႉ၊ ဢိၵ်ႇတင်း ဢႃႇမသႃႇ၊ လုၵ်ႈၸၢႆး ယေႇႀႃႇ၊ ၼၼ်ႉတႃႉ။ မႂ်းမၢတ်ႈတွင်းလွင်ႈဢၼ်မၼ်းၶႃႈၽၼ်းၶဝ်သွင်ၵေႃႉတၢႆၼႂ်းၶိင်ႇယၢမ်းမိူဝ်ႈဢၼ်သိုၵ်းထၢတ်ႇယဵၼ်ၼႂ်းတၢင်းဢၼ်တွပ်ႇတႅၼ်းလူၺ်ႈလွင်ႈဢၼ်ၶဝ်ထွၵ်ႇလိူတ်ႈပိူၼ်ႈၼႂ်းၶိင်ႇဢၼ်တိုၵ်းသိုၵ်းတိုၵ်းသိူဝ်ၼၼ်ႉဢေႃႈ။ မၼ်းဢဝ်ၵူၼ်းဢၼ်ၵၢင်းလွတ်ႈတင်းဢပျတ်ႈၼၼ်ႉတၢႆလႄႈတႃႇဝုၼ်ႇပုၼ်ႈၽွၼ်းၼၼ်ႉတူၵ်းႁွတ်ႈၵႃႈၼိူဝ်ၵဝ်လႄႈၵဝ်လႆႈၶၢမ်ႇဢၵျူဝ်းဢပျတ်ႈၼၼ်ႉယဝ်ႉ။-
ႁႂ်ႈႁုလွင်ႈဢၼ်ထုၵ်ႇလီႁဵတ်းၸိူဝ်ႉၼင်ႇႁိုဝ်ၼၼ်ႉယူႇလႄႈယႃႇပေပွႆႇႁႂ်ႈမၼ်းတၢႆၼိမ်ၼိမ်ၵူၺ်းမၼ်း။
“တီႈလုၵ်ႈၸၢႆး ပႃႇၸိလေး၊ ၵူၼ်းမိူင်း ၵိလတ်ႉ၊ ၸိူဝ်းၼၼ်ႉၸမ်ႉ၊ႁဵတ်းၵျေးၸူးတၢင်းဢၼ်လူတူၺ်းလုမ်းလႃးၶဝ်တႃႉ။ လွင်ႈမၼ်းၸမ်ႉ၊မိူဝ်ႈဢၼ်ၵဝ်ဢွၵ်ႇပၢႆႈသေၵႃႈတီႈပီႈၸၢႆးမႂ်း ဢပႃႉသလုမ်ႇ၊ ၼၼ်ႉၶဝ်ႁဵတ်းၵျေးၸူးၸိူဝ်ႉၼင်ႇၼၼ်ၵႃႈတီႈၵဝ်ဢေႃႈ။
“ယႃႇပေလူင်လိုမ်း သိမိ၊ လုၵ်ႈၸၢႆး ၵေးရႃႉ၊ ၵူၼ်း ပိၼ်ႇယႃႇမိၼ်ႇ၊ ဝၢၼ်ႈ ပႃႇႁုရိမ်း၊ ၼၼ်ႉမၼ်းၼၼ်ႉလႃႇလင်ၵျၢမ်းထၢမ်းၼႃႇလူင်လၢင်တီႈၵဝ်ၼႂ်းမိူဝ်ႈဢၼ်ၵဝ်ၵႂႃႇၵႃႈတီႈဝဵင်း၊ မႁႃႇၼိမ်ႇ၊ ၼၼ်ႉဢေႃႈ။ ၵူၺ်းၵႃႈ၊မိူဝ်ႈဢၼ်မၼ်းမႃးႁပ်ႉႁူဝ်တၢင်းၵဝ်တီႈၼမ်ႉ ယေႃးတၢၼ်ႇ၊ ၼၼ်ႉၸိုင်၊ၵဝ်ဢဝ် ထႃႇဝရႃႉၽြႃး၊ တိူင်ႇဝႃႈၵတိတီႈမၼ်းလႄႈဝႃႈ၊ ‘ၵဝ်ဢမ်ႇၶႃႈၽၼ်းမႂ်းတၢႆၵူၺ်း၊’ ဝႃႈၼႆဝႆႉယဝ်ႉ။-
ၵူၺ်းၵႃႈ၊မႂ်းယႃႇပေပွႆႇမၼ်းလွတ်ႈသေတၢင်းဢၼ်တၵ်းပၼ်တၢမ်ႇဢပျတ်ႈတီႈမၼ်း။ မႂ်းႁုလွင်ႈဢၼ်ထုၵ်ႇလီႁဵတ်းၸိူဝ်ႉၼင်ႇႁိုဝ်ၼၼ်ႉယူႇလႄႈမႂ်းႁႃလွင်ႈႁႃတၢင်းႁႂ်ႈလႆႈၶႃႈၽၼ်းတၢႆတႃႉ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ႁွတ်ႈၼိၵ်ႈၸႃႉၼွၼ်းၽႄးၵႂႃႇလႄႈလႆႈၶၢမ်ႇတၢင်းဢၼ်သၢင်းၵျူဝ်ႇၵႃႈတီႈဝဵင်း တႃႇဝိတ်ႈ၊ ဢေႃႈ။-
တႃႇဝိတ်ႈ၊ ဢုပ်ႉပိူင်ႇၸၢမ်ႇၸႃးမိူင်း ဢိသရေး၊ သီႇသိပ်းပီတဵမ်တဵမ်၊ၼင်ႈႁၢင်ႈၼင်ႈႁေႃၵႃႈတီႈဝဵင်း ႁေႇပရုၼ်ႇ၊ ၸဵတ်းပီဢိၵ်ႇတင်းၵႃႈတီႈဝဵင်း ယေႇရုသလႅမ်ႇ၊ သၢမ်သိပ်းပၢႆသၢမ်ပီဢေႃႈ။-
သေႃးလမုၼ်ႇ၊ ပုတ်ႈဢဝ်ဢရႃႇပေႃႈမၼ်းသေလႄႈႁဵတ်းၶုၼ်ႁေႃၶမ်းသေယဝ်ႉ၊ဢႃႇၼႃႇၸဝ်ႈတႄႇယူႇမၼ်ႈမၼ်ႈၶိူင်ႇၶိူင်ႇဢေႃႈ။
လိုၼ်းၼၼ်ႉ ဢတေႃးၼိယႃး၊ ဢၼ်မႄႈမၼ်းပဵၼ် ႁတ်ႉၵိတ်ႉ၊ ၼၼ်ႉၶဝ်ႈၸူးတီႈ ပႃႇသႃႉသေးၽႃႉ၊ ဢၼ်ပဵၼ်ၸဝ်ႈမႄႈ သေႃးလမုၼ်ႇ၊ ၼၼ်ႉဢေႃႈ။ ပႃႇသႃႉသေးၽႃႉ၊ ၵေႃႈထၢမ်တီႈမၼ်းလႄႈဝႃႈ၊ “မႂ်းမႃးလႄႇၸိူဝ်ႉၼင်ႇၵေႃႉသႄႈႁိုဝ်း၊” ဝႃႈၼင်ႇၼႆလႄႈ။ မၼ်းၵေႃႈၶိုၼ်းလၢတ်ႈလႄႈဝႃႈ၊ “မႃးလႄႇၸိူဝ်ႉၼင်ႇၵေႃႉသႄႈဢေႃႈ၊” ဝႃႈၼင်ႇၼႆသေယဝ်ႉ၊-
သိုပ်ႇလၢတ်ႈလႄႈဝႃႈ၊ “ၵဝ်ၶႃႈမီးလွင်ႈတိူင်ႇပၢင်ႇၸိူဝ်ႉၼိုင်ႈပိူင်ၼိုင်ႈဢေႃႈ၊” ဝႃႈၼင်ႇၼႆဢေႃႈ။ ပႃႇသႃႉသေးၽႃႉ၊ ၵေႃႈလၢတ်ႈလႄႈဝႃႈ၊ “လၢတ်ႈသေၵမ်း၊” ဝႃႈၼင်ႇၼႆသေယဝ်ႉ။
မၼ်းၼၼ်ႉလၢတ်ႈလႄႈဝႃႈ၊ “ၸဝ်ႈမႄႈႁုလွင်ႈဢၼ်ၵဝ်ၶႃႈထုၵ်ႇလီႁဵတ်းၶုၼ်ႁေႃၶမ်းလႄႈၵူၼ်းမဵဝ်း ဢိသရေး၊ တင်းသဵင်ႈတင်းလူင်ၵေႃႈဢွၼ်ၵၼ်မုင်ႈမွင်းၸိူဝ်ႉၼင်ႇၼၼ်ၼၼ်ႉယူႇတီႈၶႃႈဢေႃႈ။ ၵူၺ်းၵႃႈ၊ဢရႃႇၼၼ်ႉငႅၵ်းပိူင်ႈၵဝ်ၶႃႈၵႂႃႇလႄႈႁွတ်ႈထိုင်ၵႃႈၼႂ်းမိုဝ်းၸဝ်ႈၼွင်ႉၶႃႈယဝ်ႉ။ ဢၼ်ၼႆႉၸမ်ႉ၊ပဵၼ်ၸွမ်းဢလူဝ်ႇ ထႃႇဝရႃႉၽြႃး၊ တီႈၶႃႈဢေႃႈ။-
မိူဝ်ႈလဵဝ်ၼႆႉၸိုင်၊ၵဝ်ၶႃႈၶႂ်ႈယွၼ်းဢဝ်သူးၸိူဝ်ႉၼိုင်ႈပိူင်ၼိုင်ႈတီႈၸဝ်ႈမႄႈၶႃႈဢေႃႈ။ ယႃႇပေထဵင်ပႅတ်ႈသေၵမ်း၊” ဝႃႈၼင်ႇၼႆဢေႃႈ။ ပႃႇသႃႉသေးၽႃႉ၊ ၵေႃႈလၢတ်ႈလႄႈဝႃႈ၊ “ပဵၼ်လွင်ႈဢီႈသင်လၢတ်ႈသေၵမ်း၊” ဝႃႈၼင်ႇၼႆသေယဝ်ႉ။
မၼ်းၼၼ်ႉၶိုၼ်းလၢတ်ႈလႄႈဝႃႈ၊ “ၶႅၼ်းတေႃႈလဝ်ႈလၢတ်ႈႁႂ်ႈၶုၼ်ႁေႃၶမ်း သေႃးလမုၼ်ႇ၊ ဢဝ် ဢၽိသၵ်ႉ၊ ၽူႈယိင်းဝဵင်း သုၼိမ်ႇ၊ ၼၼ်ႉပၼ်ႁႂ်ႈပဵၼ်မေးၵဝ်ၶႃႈသေၵမ်း။ ၶုၼ်လူင်ၼၼ်ႉ၊တၵ်းတေဢမ်ႇထဵင်ပႅတ်ႈၸဝ်ႈမႄႈၶႃႈဢေႃႈ၊” ဝႃႈၼင်ႇၼႆဢေႃႈ။
ပႃႇသႃႉသေးၽႃႉ၊ ၶိုၼ်းလၢတ်ႈလႄႈဝႃႈ၊ “လီယဝ်ႉ။ ၵဝ်တၵ်းလဝ်ႈလၢတ်ႈထိုင်ႁူၶုၼ်ႁေႃၶမ်းပုၼ်ႈမႂ်းဢေႃႈ၊” ဝႃႈၼင်ႇၼႆသေယဝ်ႉ။
ပႃႇသႃႉသေးၽႃႉ၊ ၶဝ်ႈၸူးတီႈၶုၼ်ႁေႃၶမ်းႁႂ်ႈလႆႈလဝ်ႈလၢတ်ႈထိုင်ႁူၸဝ်ႈပုၼ်ႈ ဢတေႃးၼိယႃး၊ ဢေႃႈ။ ၶုၼ်ႁေႃၶမ်းလုၵ်ႉၵႂႃႇႁပ်ႉႁူဝ်တၢင်းလႄႈၵူမ်ႈၵွမ်းႁူဝ်သေယဝ်ႉ၊ၶိုၼ်းၼင်ႈရႃႇၸႃႉပလၢင်ႇသေလႄႈ၊ၸႂ်ႉပိူၼ်ႈဢဝ်ပလၢင်ႇမႃးထႅင်ႈဢၼ်ၼိုင်ႈ၊ႁႂ်ႈမႄႈၸဝ်ႈၼင်ႈၵႃႈတီႈၽၢႆႇၶႂႃၸဝ်ႈဢေႃႈ။-
ၸဝ်ႈမႄႈလဝ်ႈလၢတ်ႈလႄႈဝႃႈ၊ “ၵဝ်ၶႂ်ႈယွၼ်းသူးဢၼ်လဵၵ်ႉဢၼ်ၼွႆႉၸိူဝ်ႉၼိုင်ႈပိူင်ၼိုင်ႈဢေႃႈ။ ယႃႇပေထဵင်ပႅတ်ႈသေၵမ်း၊” ဝႃႈၼင်ႇၼႆဢေႃႈ။ ၶုၼ်ႁေႃၶမ်းမီးဢမိင်ႉလႄႈဝႃႈ၊ “ၸဝ်ႈမႄႈ။ ယွၼ်းသေၵမ်း။ ၵဝ်ၶႃႈတၵ်းဢမ်ႇထဵင်ပႅတ်ႈၶႃႈၵူၺ်း၊” ဝႃႈၼင်ႇၼႆဢေႃႈ။
ၸဝ်ႈမႄႈၵေႃႈလဝ်ႈယွၼ်းလႄႈဝႃႈ၊ “ၶႅၼ်းတေႃႈဢဝ် ဢၽိသၵ်ႉ၊ ၽူႈယိင်းဝဵင်း သုၼိမ်ႇ၊ ၼၼ်ႉပၼ်ၵၼ်တင်းပီႈၸၢႆးၸဝ်ႈ ဢတေႃးၼိယႃး၊ သေၵမ်း၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းၵေႃႈၶိုၼ်းလၢတ်ႈတီႈမႄႈၸဝ်ႈလႄႈဝႃႈ၊ “ႁဵတ်းသင်လႄႈယွၼ်းႁႂ်ႈၵဝ်ၶႃႈဢဝ် ဢၽိသၵ်ႉ၊ ပၼ်ႁႂ်ႈပဵၼ်မေး ဢတေႃးၼိယႃး၊ ၸိူဝ်ႉၼင်ႇႁိုဝ်ၶႃႈ။ သိုင်ႇၸိုင်ႈ၊ဝၢၼ်ႈမိူင်းၵေႃႈယွၼ်းဢဝ်ပုၼ်ႈမၼ်းသေၵမ်း။ ဝႃႈတႄႉမၼ်း၊မၼ်းပဵၼ်ၸဝ်ႈပီႈၵဝ်ၶႃႈဢေႃႈ။ ယဵၸ်ႈပရေႃးႁဵၵ်ႈ ဢပျႃႇထႃႇ၊ တင်း ယွႃႇၽႃႉ၊ ၵေႃႈၽွမ်ႉၽၢႆႇမၼ်းတင်းသွင်ၵေႃႉယဝ်ႉ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉၶုၼ်ႁေႃၶမ်း သေႃးလမုၼ်ႇ၊ တိူင်ႇဝႃႈၵႃႈၼႂ်းၼႃႇမႃႉၸိုဝ်ႈသဵင် ထႃႇဝရႃႉၽြႃး၊ လႄႈဝႃႈ၊ “ၵွပ်ႈပိူဝ်ႈ ဢတေႃးၼိယႃး၊ ယွၼ်းဢဝ်ၸိူဝ်ႉၼင်ႇၼႆၼၼ်ႉပေႃးၵဝ်ယင်းဢမ်ႇလႆႈတွပ်ႇတႅၼ်းတီႈဢသၢၵ်ႈမၼ်းၸိုင်၊ႁႂ်ႈၽြႃးပဵၼ်ၸဝ်ႈပေႃႉထုပ်ႉၵဝ်လူမ်ႉတူၵ်းၵႂႃႇသေၵမ်းလူၺ်ႈ။-
ထႃႇဝရႃႉၽြႃး၊ ႁႂ်ႈၵဝ်မၼ်ႈၶိူင်ႇၼႂ်းဢရႃႇႁၢင်ႈႁေႃၸဝ်ႈပေႃႈၵဝ် တႃႇဝိတ်ႈ၊ ဝႆႉလႄႈ၊မၼ်းၸဝ်ႈႁဵတ်းၵတိသဵတ်ႈၸႃႇလႄႈပၼ်သိုင်ႇၸိုင်ႈဝၢၼ်ႈမိူင်းတီႈၵဝ်ဢိၵ်ႇတင်းၸူဝ်ႈလုၵ်ႈပၢၼ်လၢၼ်ၵဝ်ယဝ်ႉ။ ၵဝ်တိူင်ႇဝႃႈၼႂ်း ထႃႇဝရႃႉၽြႃး၊ ဢၼ်ဢသၢၵ်ႈလိပ်းယူႇၼၼ်ႉဝႃႈ၊ၼႂ်းဝၼ်းမိူဝ်ႈၼႆႉ ဢတေႃးၼိယႃး၊ တၵ်းလႆႈၶၢမ်ႇတၢင်းတၢႆဢေႃႈ၊” ဝႃႈၼင်ႇၼႆသေယဝ်ႉ။
ၶုၼ်ႁေႃၶမ်း သေႃးလမုၼ်ႇ၊ ပူင်ဢမိင်ႉတီႈ ပေႇၼႃႇယႃႉ၊ ႁႂ်ႈမၼ်းၵႂႃႇၶႃႈၽၼ်း ဢတေႃးၼိယႃး၊ တၢႆသေဢေႃႈ။
မိူဝ်ႈၼၼ်ႉၶုၼ်ႁေႃၶမ်း သေႃးလမုၼ်ႇ၊ မီးဢမိင်ႉတီႈယဵၸ်ႈပရေႃးႁဵၵ်ႈ ဢပျႃႇထႃႇ၊ လႄႈဝႃႈ၊ “မႂ်းၶိုၼ်းပွၵ်ႈၵႂႃႇၸူးတီႈဝၢၼ်ႈၵဝ်ႇမိူင်းလင်မႂ်းဝဵင်း ဢႃႇၼသုတ်ႉ၊ ပုၼ်ႉတႃႉ။ မႂ်းထိူၵ်ႈလႆႈတၢႆဢေႃႈ။ ၵူၺ်းၵႃႈ၊ၵဝ်တၵ်းဢမ်ႇပႆႇဢဝ်မႂ်းတၢႆတေႃႈလဵဝ်ၼႆႉလူးၵွၼ်ႇ။ လွင်ႈမၼ်းၸမ်ႉ၊မႂ်းလႆႈႁၢပ်ႇတိူၵ်ႈပတိၺိၺ်ႇ ထႃႇဝရႃႉၽြႃး၊ ၽြႃးပဵၼ်ၸဝ်ႈဢွၼ်ၼႃႈဢွၼ်ႁူဝ်ၸဝ်ႈပေႃႈၵဝ် တႃႇဝိတ်ႈ၊ ၼၼ်ႉမႃးယဝ်ႉ။ မႂ်းလႆႈၶၢမ်ႇတုၵ်ႉၶႃႉတၢင်းၽၢၼ်ႁူမ်ႈလူၺ်ႈၵၼ်တင်းၸဝ်ႈပေႃႈၵဝ်မႃးယဝ်ႉ၊” ဝႃႈၼင်ႇၼႆဢေႃႈ။-
လိုၼ်းၼၼ်ႉ၊ သေႃးလမုၼ်ႇ၊ ပူတ်းၶျႃးပႅတ်ႈ ဢပျႃႇထႃႇ၊ သေၵႃႈၼႂ်းဢရႃႇယဵၸ်ႈပရေႃးႁဵၵ်ႈဢၼ်လႆႈထၢမ်းၼႃႈၵၢၼ်တီႈ ထႃႇဝရႃႉၽြႃး၊ ၼၼ်ႉသေယဝ်ႉ၊ႁဵတ်းႁႂ်ႈၵႂၢမ်းဢၼ် ထႃႇဝရႃႉၽြႃး၊ ဢဝ်လွင်ႈၸိူဝ်ႉၶိူဝ်း ဢေးလိ၊ ပျႃႇတိၵ်ႈဝႆႉၵႃႈတီႈဝဵင်း သိလေႃႇ၊ ၼၼ်ႉပျေႉၸုမ်ႇဢေႃႈ။
ယွႃႇၽႃႉ၊ လႆႈငိၼ်းၶၢဝ်ႇငၢဝ်းၼၼ်ႉသေယဝ်ႉ၊ပိၵ်ႉသမ်ႉမၼ်းဢမ်ႇၸွမ်းလင် ဢပႃႉသလုမ်ႇ၊ သေၵေႃႈမၼ်းလႆႈၽွမ်ႉၽၢႆႇ ဢတေႃးၼိယႃး၊ ယဝ်ႉလႄႈ ယွႃႇၽႃႉ၊ ပၢႆႈၵႂႃႇၵႃႈၼႂ်းသုမ်ႉထဵင်ၸဝ်ႈသေယဝ်ႉ၊ယိပ်းၵမ်ပၢႆသဝ်ႁူဝ်ၸဵင်ႇၶဵင်ႇတၢင်းလူႇ ယူႇဢေႃႈ။-
ပိူၼ်ႈလဝ်ႈလၢတ်ႈတီႈၶုၼ်ႁေႃၶမ်း သေႃးလမုၼ်ႇ၊ လွင်ႈဢၼ် ယွႃႇၽႃႉ၊ ပၢႆႈၵႂႃႇၵႃႈၼႂ်းသုမ်ႉထဵင်ၸဝ်ႈလႄႈမီးယူႇၵႃႈတီႈႁိမ်းၶဵင်ႇတၢင်းလူႇၼၼ်ႉလႄႈ သေႃးလမုၼ်ႇ၊ ပွႆႇၸႂ်ႉ ပေႇၼႃႇယႃႉ၊ ၵႂႃႇႁႂ်ႈၶႃႈၽၼ်း ယွႃႇၽႃႉ၊ တၢႆဢေႃႈ။-
ပေႇၼႃႇယႃႉ၊ ၵေႃႈႁွတ်ႈထိုင်ၵႃႈတီႈသုမ်ႉထဵင်ၸဝ်ႈလႄႈလၢတ်ႈတီႈ ယွႃႇၽႃႉ၊ လႄႈဝႃႈ၊ “ၶုၼ်ႁေႃၶမ်းမီးဢမိင်ႉႁႂ်ႈမႂ်းဢွၵ်ႇမႃးဢေႃႈ၊” ဝႃႈၼင်ႇၼႆဢေႃႈ။ ၵူၺ်းၵႃႈ၊ ယွႃႇၽႃႉ၊ ၶိုၼ်းလၢတ်ႈလႄႈဝႃႈ၊ “ၵဝ်ဢမ်ႇဢွၵ်ႇ။ ၵဝ်တၵ်းၶၢမ်ႇတၢႆၵႃႈတီႈၼႆႈဢေႃႈ၊” ဝႃႈၼင်ႇၼႆလႄႈ။ ပေႇၼႃႇယႃႉ၊ ၶိုၼ်းလဝ်ႈလၢတ်ႈတီႈၶုၼ်ႁေႃၶမ်းလွင်ႈဢၼ် ယွႃႇၽႃႉ၊ ၶိုၼ်းလၢတ်ႈၸိူဝ်းၼၼ်ႉဢေႃႈ။
ၶုၼ်ႁေႃၶမ်း သေႃးလမုၼ်ႇ၊ လၢတ်ႈလႄႈဝႃႈ၊ “ႁဵတ်းၸွမ်းၵႃႈၼင်ႇဢၼ်မၼ်းလၢတ်ႈၼၼ်ႉတႃႉ။ ၶႃႈတၢႆလႄႈဢဝ်သၢင်းၵျူဝ်ႇသေ။ ၼင်ႇၼၼ်လႄႈတႃႇဝုၼ်ႇပုၼ်ႈၽွၼ်းဢၼ်မၼ်းၶႃႈတၢႆၵူၼ်းၸိူဝ်းဢၼ်ၵၢင်းလွတ်ႈတင်းဢပျတ်ႈၼၼ်ႉတၵ်းလွတ်ႈၵၢင်းၵၼ်တင်းၵဝ်ဢိၵ်ႇတင်းၸူဝ်ႈလုၵ်ႈပၢၼ်လၢၼ်ၵဝ်ဢေႃႈ။-
ထႃႇဝရႃႉၽြႃး၊ တၵ်းပၼ်တၢမ်ႇဢပျတ်ႈတီႈ ယွႃႇၽႃႉ၊ ၵွပ်ႈလူၺ်ႈမၼ်းယင်းဢမ်ႇႁႂ်ႈၸဝ်ႈပေႃႈၵဝ် တႃႇဝိတ်ႈ၊ လႆႈႁုလႄႈဢဝ်ၵူၼ်းတၢႆၼၼ်ႉဢေႃႈ။ ယွႃႇၽႃႉ၊ ၼၼ်ႉဢဝ်တၢႆၵူၼ်းသွင်ၵေႃႉဢၼ်ၵၢင်းလွတ်ႈတင်းဢပျတ်ႈလႄႈပဵၼ်ၵေႃႉဢၼ်သိုဝ်ႈတေႃႇမျၢတ်ႈလီၼႃႇသေမၼ်းဢၼ်ပဵၼ် ဢပ်ႉပၼႃး၊ ၸဝ်ႈၵွၼ်းတပ်ႉသိုၵ်းလူင် ဢိသရေး၊ ဢိၵ်ႇတင်း ဢႃႇမသႃႇ၊ ၸဝ်ႈၵွၼ်းတပ်ႉသိုၵ်းလူင် ယုတႃႉ၊ ၼၼ်ႉဢေႃႈ။-
ဢပျတ်ႈတၢမ်ႇဢၼ်ၶဝ်သွင်ၵေႃႉတၢႆၼၼ်ႉ၊တၵ်းႁွတ်ႈထိုင်ၵႃႈၼိူဝ် ယွႃႇၽႃႉ၊ ဢိၵ်ႇတင်းၵႃႈၼိူဝ်ၸိူဝ်ႉၶိူဝ်းမၼ်းယူႇတႃႇသေႇဢေႃႈ။ ၵႃႈၼိူဝ် တႃႇဝိတ်ႈ၊ ဢိၵ်ႇတင်းၸူဝ်ႈလုၵ်ႈပၢၼ်လၢၼ်ၸဝ်ႈတင်းႁၢင်ႈႁေႃၸဝ်ႈ၊ရႃႇၸႃႉပလၢင်ႇၸဝ်ႈၸမ်ႉ၊ ထႃႇဝရႃႉၽြႃး၊ တၵ်းႁႂ်ႈၶိုၼ်ႈယႂ်ႇမႂ်ႇသုင်ယူႇတႃႇသေႇဢမ်ႇထၢတ်ႇဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ပေႇၼႃႇယႃႉ၊ ၶဝ်ႈၵႂႃႇၵႃႈၼႂ်းသုမ်ႉထဵင်ၸဝ်ႈၼၼ်ႉသေလႄႈၶႃႈၽၼ်း ယွႃႇၽႃႉ၊ တၢႆသေယဝ်ႉ၊ဢဝ်မၼ်းသၢင်းၵျူဝ်ႇၵႃႈတီႈႁိူၼ်းမၼ်းၵႃႈၼႂ်းထိူၼ်ႇဢေႃႈ။-
ၶုၼ်ႁေႃၶမ်းယုၵ်ႉတၢင်ႇ ပေႇၼႃႇယႃႉ၊ ၼႂ်းဢရႃႇၸဝ်ႈၵွၼ်းတပ်ႉသိုၵ်းတၢင်တူဝ် ယွႃႇၽႃႉ၊ ဢိၵ်ႇတင်းယုၵ်ႉတၢင်ႇ ၸႃႇတုၵ်ႉ၊ ၼႂ်းဢရႃႇယဵၸ်ႈပရေႃးႁဵၵ်ႈတၢင်တူဝ် ဢပျႃႇထႃႇ၊ ဢေႃႈ။
မိူဝ်ႈၼၼ်ႉၶုၼ်ႁေႃၶမ်းပွႆႇၸႂ်ႉၵႂႃႇႁွင်ႉဢဝ် သိမိ၊ မႃးသေယဝ်ႉ၊မီးဢမိင်ႉတီႈမၼ်းလႄႈဝႃႈ၊ “မႂ်းတၵ်းလႆႈႁဵတ်းႁိူၼ်းၵႃႈၼႂ်းဝဵင်း ယေႇရုသလႅမ်ႇ၊ လႄႈယူႇၵႃႈတီႈၼၼ်ႈဢေႃႈ။ ယႃႇပေဢွၵ်ႇဝဵင်းလႄႈၵႂႃႇၵႃႈတီႈလႂ်။-
ပေႃးမႂ်းဢွၵ်ႇဝဵင်းလႄႈၶၢမ်ႈပူၼ်ႉၼမ်ႉ ၵေႇတရုၼ်ႇ၊ ၸိုင်၊မႂ်းတၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၼ်ပဵၼ်ဢေႃႈ။ ဢပျတ်ႈၼၼ်ႉတၵ်းတူၵ်းႁွတ်ႈၵႃႈၼိူဝ်မႂ်းဢေႃႈ၊” ဝႃႈၼင်ႇၼႆဢေႃႈ။
သိမိ၊ ၵေႃႈလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “ဢမိင်ႉၸဝ်ႈမုၼ်ယႂ်ႇၶုၼ်ႁေႃၶမ်းၼၼ်ႉလီတီႈၶႃႈဢေႃႈ။ ၶႃႈၸဝ်ႈတၵ်းႁဵတ်းၸွမ်းၵႃႈၼင်ႇဢၼ်ဢမိင်ႉၸဝ်ႈမီးၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။ ၼင်ႇၼၼ်လႄႈမၼ်းယူႇၵႃႈၼႂ်းဝဵင်း ယေႇရုသလႅမ်ႇ၊ ႁိုင်ၼႃႇဢေႃႈ။
ၵူၺ်းၵႃႈ၊မိူဝ်ႈဢၼ်ယူႇလႆႈသၢမ်ပီၸိုင်၊ၶႃႈမၼ်းသွင်ၵေႃႉဢွၵ်ႇပၢႆႈၵႂႃႇၸူးတီႈၶုၼ်ႁေႃၶမ်း ဢႃႇၶိတ်ႉ၊ လုၵ်ႈၸၢႆး မႃႇၶႃႇ၊ ဝဵင်း ၵတ်ႉတိ၊ ပုၼ်ႉဢေႃႈ။ မိူဝ်ႈဢၼ် သိမိ၊ လႆႈငိၼ်းဝႃႈၶဝ်သွင်ၵေႃႉမီးယူႇၵႃႈတီႈဝဵင်း ၵတ်ႉတိ၊ ၼၼ်ႉၸိုင်၊-
မၼ်းႁၢင်ႈၵွပ်းမႃႉလီႈမၼ်းသေယဝ်ႉ၊ၵႂႃႇၵႃႈတီႈဝဵင်း ၵတ်ႉတိ၊ ၸူးတီႈၶုၼ်ႁေႃၶမ်း ဢႃႇၶိတ်ႉ၊ ႁႂ်ႈလႆႈသွၵ်ႈႁႃၶႃႈမၼ်းၸိူဝ်းၼၼ်ႉဢေႃႈ။ မၼ်းထူပ်းႁၼ်ၶဝ်သွင်ၵေႃႉလႄႈႁွင်ႉဢဝ်ၶဝ်ၶိုၼ်းမႃးဢေႃႈ။-
မိူဝ်ႈဢၼ် သေႃးလမုၼ်ႇ၊ ငိၼ်းလွင်ႈဢၼ် သိမိ၊ ႁဵတ်းၸိူဝ်ႉၼင်ႇၼၼ်ၼၼ်ႉၸိုင်၊-
ၶုၼ်ႁေႃၶမ်းပွႆႇၸႂ်ႉႁွင်ႉဢဝ်မၼ်းမႃးလႄႈမီးဢမိင်ႉလႄႈဝႃႈ၊ “ၵဝ်ႁႂ်ႈမႂ်းႁဵတ်းၵတိသဵတ်ႈၸႃႇၼႂ်းၼႃႇမႃႉၸိုဝ်ႈသဵင် ထႃႇဝရႃႉၽြႃး၊ လွင်ႈဢၼ်မႂ်းတၵ်းဢမ်ႇဢွၵ်ႇဝဵင်း ယေႇရုသလႅမ်ႇ၊ ၼၼ်ႉဝႆႉယဝ်ႉ။ ၵဝ်ပၼ်သတိတီႈမႂ်းဝႃႈ၊ပေႃးမႂ်းဢွၵ်ႇဝဵင်းၸိုင်၊မႂ်းတၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၼ်ပဵၼ်ၼၼ်ႉဝႆႉယဝ်ႉ။ မႂ်းၵေႃႈၽွမ်ႉၸႂ်ယဝ်ႉလႄႈဝႃႈ၊မႂ်းတၵ်းထွမ်ႇဢဝ်ဢမိင်ႉၵဝ်ယဝ်ႉဢမ်ႇၸႂ်ႈႁိုဝ်း။-
ၵွပ်ႈပိူဝ်ႈသင်လႄႈမႂ်းဢမ်ႇပႂ်ႉသဵတ်ႈၸႃႇ ထႃႇဝရႃႉၽြႃး၊ ဢိၵ်ႇတင်းၵႂၢမ်းဢၼ်ၵဝ်ပိင်းၺၢပ်ႈဝႆႉတီႈမႂ်းၼၼ်ႉၸိူဝ်ႉၼင်ႇႁိုဝ်။-
သိမိ၊ ႟။ မႂ်းႁႃတၢင်းၽိတ်းဢၼ်မႂ်းယၢမ်ႈႁဵတ်းတီႈၸဝ်ႈပေႃႈၵဝ် တႃႇဝိတ်ႈ၊ ၸွမ်းၵႃႈၼင်ႇဢၼ်ထုၵ်ႇၸႂ်ၵျိူၵ်ႈၸႂ်မႂ်းၼၼ်ႉယူႇဢေႃႈ။ ထႃႇဝရႃႉၽြႃး၊ တၵ်းတွပ်ႇတႅၼ်းတၢမ်ႇဢပျတ်ႈၼၼ်ႉတီႈမႂ်းဢေႃႈ။-
ၵူၺ်းၵႃႈ၊မၼ်းၸဝ်ႈတၵ်းပၼ်တၢင်းလီမၢင်ႇၵလႃႇတီႈၵဝ်ဢိၵ်ႇတင်းရႃႇၸႃႉပလၢင်ႇ တႃႇဝိတ်ႈ၊ ၼၼ်ႉတႃႇသေႇဢမ်ႇထၢတ်ႇဢေႃႈ၊” ဝႃႈၼင်ႇၼႆဢေႃႈ။
လိုၼ်းၼၼ်ႉ၊ၶုၼ်ႁေႃၶမ်းပူင်ဢမိင်ႉတီႈ ပေႇၼႃႇယႃႉ၊ ႁႂ်ႈမၼ်းဢွၵ်ႇၵႂႃႇၶႃႈ သိမိ၊ တၢႆသေဢေႃႈ။ ဢႃႇၼႃႇၸၢၵ်ႈၽုင်းတၼ်းၶူဝ်း သေႃးလမုၼ်ႇ၊ ၸမ်ႉ၊တႄႇမၼ်ႈယူႇဢေႃႈ။
သေႃးလမုၼ်ႇ၊ ၼၼ်ႉႁဵတ်းမိၵ်ႈသႁႃႇယႃႉလူၺ်ႈၵၼ်တင်းၶုၼ်ႁေႃၶမ်းမိူင်း ဢေးၵျိပ်ႉ၊ ယူႇၵွပ်ႈလူၺ်ႈသွင်ႇမၢင်ႇၵလႃႇဢဝ်လုၵ်ႈယိင်းၸဝ်ႈ ၽႃႇရေႃး၊ ဢေႃႈ။ မၼ်းဢဝ်မႄႈယိင်းၼၼ်ႉမႃးယူႇၵႃႈၼႂ်းဝဵင်း တႃႇဝိတ်ႈ၊ ယူႇတေႃႇထိုင်ႁွတ်ႈမၼ်းတႄႇႁဵတ်းႁေႃၸဝ်ႈဢိၵ်ႇတင်းၵျွင်းပိၵ်ႈမၢၼ်ႇၸဝ်ႈတင်းလမ်းဝဵင်းဢၼ်လွမ်ႉႁွပ်ႈဝဵင်း ယေႇရုသလႅမ်ႇ၊ ၼၼ်ႉထၢၼ်ႈပေႃးယဝ်ႉတူဝ်ႈလီငၢမ်းယဝ်ႉၼၼ်ႉဢေႃႈ။-
မိူဝ်ႈၼၼ်ႉ၊ၵွပ်ႈပိူဝ်ႈဢၼ်ၵျွင်းပိၵ်ႈမၢၼ်ႇၸဝ်ႈဢမ်ႇပႆႇတႄႇပႆႇႁဵတ်းဝႆႉၼၼ်ႉလႄႈၵူၼ်းတင်းလၢႆယင်းတိုၵ်ႉသၢၵ်ႈၵၢပ်ႈၶိူင်ႈတၢင်းလူႇၶဝ်ၵႃႈၼိူဝ်ၶဵင်ႇတၢင်းလူႇၸိူဝ်းဢၼ်မီးၵူႈတီႈၵူႈလႅၼ်ယူႇဢေႃႈ။-
သေႃးလမုၼ်ႇ၊ ၼၼ်ႉႁၵ်ႉ ထႃႇဝရႃႉၽြႃး၊ လႄႈၵမ်ၵျၢင်ႉၸွမ်းထုင်းၽိင်ႈဢၼ်ၸဝ်ႈပေႃႈမၼ်း တႃႇဝိတ်ႈ၊ သင်ႇလၢတ်ႈဝႆႉၸိူဝ်းၼၼ်ႉဢေႃႈ။ မၼ်းသမ်ႉယင်းႁႅမ်တူဝ်သတ်းတင်းလၢႆသေယဝ်ႉ၊ဢဝ်သၢၵ်ႈလူႇၵႃႈၼိူဝ်ၶဵင်ႇတၢင်းလူႇဢၼ်မီးယူႇလၢႆလၢႆတီႈၼၼ်ႉဢေႃႈ။
ၽဝ်ႇၼိုင်ႈ၊ၶုၼ်ႁေႃၶမ်းၵႂႃႇၵႃႈတီႈဝဵင်း ၵိပွင်ႇ၊ ႁႂ်ႈလႆႈသၢၵ်ႈလူႇၶိူင်ႈတၢင်းလူႇၵႃႈတီႈၼၼ်ႈၵွပ်ႈပိူဝ်ႈဢၼ်တီႈၼၼ်ႈမီးၶဵင်ႇတၢင်းလူႇဢၼ်မျၢတ်ႈၼႃႇသေပိူၼ်ႈၼၼ်ႉဢေႃႈ။ ၵႃႈတီႈၼၼ်ႈမၼ်းယၢမ်ႈဢဝ်တူဝ်တၢင်းလူႇဢၼ်တုတ်ႇၽႆးၼၼ်ႉႁဵင်ၼိုင်ႈသၢၵ်ႈလူႇၵႃႈၼိူဝ်ၶဵင်ႇတၢင်းလူႇၼၼ်ႉဢေႃႈ။-
ၼႂ်းၶိုၼ်းၼၼ်ႉ ထႃႇဝရႃႉၽြႃး၊ ပေႃႇမႃးၵႃႈတီႈမၼ်းၼႂ်းတၢင်းၼွၼ်းၽၼ်လႄႈၽြႃးပဵၼ်ၸဝ်ႈမီးဢမိင်ႉဝႃႈ၊ “မႂ်းၶႂ်ႈႁႂ်ႈၵဝ်ပၼ်သူးဢၼ်လႂ်တီႈမႂ်းၸိုင်၊ယွၼ်းဢဝ်တႃႉ၊” ဝႃႈၼင်ႇၼႆဢေႃႈ။
သေႃးလမုၼ်ႇ၊ လဝ်ႈယွၼ်းလႄႈဝႃႈ၊ “ၸဝ်ႈႁဝ်းၼႄပျႃးၵျေးၸူးမႅတ်ႈတႃႇယႂ်ႇၼႃႇလူင်လၢင်ၵႃႈတီႈၶႃႈၸဝ်ႈႁဝ်း တႃႇဝိတ်ႈ၊ ဢၼ်ပဵၼ်ပေႃႈၶႃႈၸဝ်ႈၼၼ်ႉၸွမ်းၵႃႈၼင်ႇဢၼ်မၼ်းပဵၼ်ၵူၼ်းလီ၊ပႂ်ႉသဵတ်ႈၸႃႇ၊ၵေႃႉဢၼ်ၸၢင်ႈရူဝ်ႇသေႇၼပ်ႉယမ်ၼႂ်းတၢင်းဢၼ်ၵပ်းသိုပ်ႇၵၼ်တင်းၸဝ်ႈႁဝ်းၼၼ်ႉတီႈၶႃႈဢေႃႈ။ လိူဝ်သေၼၼ်ႉၸဝ်ႈႁဝ်းယင်းသိုပ်ႇၼႄပျႃးၵျေးၸူးမႅတ်ႈတႃႇယႂ်ႇၼႃႇလူင်လၢင်ၵႃႈတီႈမၼ်းၼႂ်းလွင်ႈတၢင်းဢၼ်ၸဝ်ႈႁဝ်းဢဵတ်းလူပၼ်လုၵ်ႈၸၢႆးဢၼ်ဝၼ်းမိူဝ်ႈၼႆႉလႆႈပုတ်ႈဢဝ်ႁၢင်ႈႁေႃမၼ်းၼၼ်ႉထႅင်ႈတီႈၶႃႈဢေႃႈ။-
ဢူဝ်း။ ထႃႇဝရႃႉၽြႃး၊ၽြႃးပဵၼ်ၸဝ်ႈ၊ တီႈၶႃႈ။ ၸဝ်ႈႁဝ်းယုၵ်ႉတၢင်ႇၶႃႈၸဝ်ႈၼႆႉၼႂ်းဢရႃႇၶုၼ်ႁေႃၶမ်းတၢင်တူဝ်ပေႃႈၶႃႈၸဝ်ႈတီႈၶႃႈယဝ်ႉ။ ၼႂ်းဝႃႈၼၼ်သေၵေႃႈ၊ၶႃႈၸဝ်ႈယင်းၼုမ်ႇယင်းၵမ်ယူႇလႄႈဢမ်ႇၵတ်ႉဢမ်ႇၶၼ်ၼႂ်းၼႃႈၵၢၼ်ၸဝ်ႈၵၢၼ်ၶုၼ်တီႈၶႃႈ။-
ၶႃႈၸဝ်ႈၼႆႉမီးယူႇၼႂ်းၵၢင်ၵူၼ်းၸဝ်ႈႁဝ်းဢၼ်ၸဝ်ႈႁဝ်းလိူၵ်ႈဢဝ်ဝႆႉဢၼ်ဝႃႈ၊ၵူၼ်းမဵဝ်းယႂ်ႇမဵဝ်းလူင်ဢၼ်ၼမ်ၵိုၼ်းၼႃႇလူင်လၢင်၊ထၢၼ်ႈပေႃးၼပ်ႉဢၢၼ်ႇဢမ်ႇမူတ်းလႆႈၼၼ်ႉတီႈၶႃႈဢေႃႈ။-
ၵွပ်ႈပိူဝ်ႈၼႆလႄႈၶႅၼ်းတေႃႈပၼ်ၺၢၼ်ႇပိင်ႇၺႃႇပုၼ်ႈဢၼ်ၶႃႈၸဝ်ႈတၵ်းဢုပ်ႉပိူင်ႇၵႃႈၼိူဝ်ၵူၼ်းၸဝ်ႈႁဝ်းတင်းလၢႆသိုဝ်ႈသိုဝ်ႈတေႃႇတေႃႇ၊ဢိၵ်ႇတင်းၺၢၼ်ႇပိင်ႇၺႃႇဢၼ်ၸၢင်ႈၸၵ်ႉၽႄလႄႈႁုလွင်ႈလီလွင်ႈၸႃႉၼၼ်ႉသေၵမ်းတီႈၶႃႈ။ ပေႃးဢမ်ႇၼၼ်ၸိုင်၊ၶႃႈၸဝ်ႈတၵ်းႁဵတ်းၸိူဝ်ႉၼင်ႇႁိုဝ်တၢတ်ႈၼိူင်ႇႁႂ်ႈလႆႈဢုပ်ႉပိူင်ႇၵူၼ်းၸဝ်ႈႁဝ်းဢၼ်ၼမ်ၵိုၼ်းၼႃႇထၢၼ်ႇၼႆႉၼၼ်ႉတီႈၶႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ထုၵ်ႇၸႂ်ထုၵ်ႇၶေႃးတၢင်းဢၼ် သေႃးလမုၼ်ႇ၊ လဝ်ႈယွၼ်းၸိူဝ်ႉၼင်ႇၼၼ်ၼၼ်ႉသေယဝ်ႉ၊-
မၼ်းၸဝ်ႈမီးဢမိင်ႉတီႈမၼ်းလႄႈဝႃႈ၊ “ၵွပ်ႈပိူဝ်ႈဢၼ်မႂ်းယွၼ်းဢဝ်ၺၢၼ်ႇပိင်ႇၺႃႇ ဢၼ်ၸၢင်ႈဢုပ်ႉပိူင်ႇသိုဝ်ႈသိုဝ်ႈတေႃႇတေႃႇၵူၺ်း၊ယင်းဢမ်ႇယွၼ်းဢဝ်ၸူဝ်ႈဢသၢၵ်ႈဢၼ်ယၢဝ်းဢၼ်ယိုၼ်း၊ဢမ်ႇယွၼ်းဢဝ်ၸေးၸိမ်ႇ၊ဢမ်ႇယွၼ်းဢဝ်ဢသၢၵ်ႈရၢၼ်ႇသူႇမႂ်းပုၼ်ႈတူဝ်ၸဝ်ႈၵဝ်ႇၼၼ်ႉၸိုင်၊-
ၵဝ်တၵ်းပၼ်ၵႃႈဢၼ်မႂ်းယွၼ်းဢဝ်ၼၼ်ႉဢေႃႈ။ ၵဝ်တၵ်းပၼ်ၺၢၼ်ႇပိင်ႇၺႃႇတၢင်းဢၼ်ႁုၸႅင်ႈဢၼ်ယဵင်ႈၶႅၼ်းၼမ်ယႂ်ႇၼႃႇလိူဝ်ပိူၼ်ႈဢၼ်ဢမ်ႇတွၼ်ႉမီးမႃးမိူဝ်ႈၵွၼ်ႇဢွၼ်ၼႆႉ ဢိၵ်ႇတင်းမိူဝ်ႈၵမ်းလိုၼ်းၵေႃႈတၵ်းတေဢမ်ႇမီးထႅင်ႈသေၵေႃႉသေၵူၼ်းၼၼ်ႉတီႈမႂ်းဢေႃႈ။-
ၼွၵ်ႈသေၼၼ်ႉၵဝ်သမ်ႉတၵ်းပၼ်သူးဢၼ်မႂ်းယင်းဢမ်ႇယွၼ်းဢဝ်ဢၼ်ဝႃႈၸေးၸိမ်ႇဢုၵ်ႉၸႃႇ၊မုၼ်ၵုင်ႇသရေႇၼၼ်ႉယိင်းၶႅၼ်းၼမ်ၼႃႇလိူဝ်ၶုၼ်ႁေႃၶမ်းတင်းလၢႆၼႂ်းၸူဝ်ႈပၢၼ်မႂ်းၼၼ်ႉတီႈမႂ်းဢေႃႈ။-
ပေႃးမႂ်းထွမ်ႇဢဝ်ၵႂၢမ်းၵဝ်လႄႈၵမ်ၵျၢင်ႉၸွမ်းထုင်းတြႃးတင်းလၢႆဢိၵ်ႇတင်းပိင်းၺၢပ်ႈတြႃးၵဝ်တင်းလၢႆၼၼ်ႉယူႇမိူၼ်ၸိူဝ်ႉၼင်ႇဢၼ်ပေႃႈမႂ်း တႃႇဝိတ်ႈ၊ ၵမ်ၵျၢင်ႉၼၼ်ႉၸိုင်၊ၵဝ်တၵ်းႁႂ်ႈၸူဝ်ႈဢသၢၵ်ႈမႂ်းယၢဝ်းယိုၼ်းဢေႃႈ၊” ဝႃႈၼင်ႇၼႆဢေႃႈ။
သေႃးလမုၼ်ႇ၊ တိုၼ်ႇမႃးလႄႈႁုပဵၼ်တၢင်းဢၼ်ၽြႃးပဵၼ်ၸဝ်ႈလၢတ်ႈတေႃႇမၼ်းၼႂ်းတၢင်းဢၼ်ၼွၼ်းၽၼ်ႁၼ်ၼၼ်ႉဢေႃႈ။ မိူဝ်ႈၼၼ်ႉမၼ်းၶိုၼ်းမိူဝ်းၵႂႃႇၵႃႈတီႈဝဵင်း ယေႇရုသလႅမ်ႇ၊ လႄႈၸုၵ်းယူႇၵႃႈတီႈၽၢႆႇၼႃႈတိူၵ်ႈပတိၺိၺ်ႇၸဝ်ႈ ထႃႇဝရႃႉၽြႃး၊ သေယဝ်ႉ၊သၢၵ်ႈၵၢပ်ႈၶိူင်ႈတၢင်းလူႇဢၼ်တုတ်ႇၽႆး၊ဢိၵ်ႇတင်းၶိူင်ႈတၢင်းလူႇမိၵ်ႈသႁႃႇယႃႉၸိူဝ်းၼၼ်ႉတီႈ ထႃႇဝရႃႉၽြႃး၊ ဢေႃႈ။ လိုၼ်းသေၼၼ်ႉမၼ်းႁဵတ်းပွႆးပုၼ်ႈၶုၼ်ဢၼ်ပွင်ၵၢၼ်မၼ်းတင်းသဵင်ႈတင်းလူင်ဢေႃႈ။
မီးဝၼ်းၼိုင်ႈ၊မႄႈမွၵ်ႇယႃႈသွင်ၵေႃႉဢွၼ်ၵၼ်မႃးၸုၵ်းယူႇၵႃႈတီႈၽၢႆႇၼႃႈၶုၼ်ႁေႃၶမ်း သေႃးလမုၼ်ႇ၊ ဢေႃႈ။-
မႄႈယိင်းၵေႃႉၼိုင်ႈၼၼ်ႉလဝ်ႈလၢတ်ႈလႄႈဝႃႈ၊ “ၸဝ်ႈၶုၼ်လူင်တီႈၶႃႈ။ ၶႃႈၸဝ်ႈတင်းမႄႈယိင်းၵေႃႉၼႆႉယူႇၵႃႈၼႂ်းႁိူၼ်းလဵဝ်ၵၼ်ၶႃႈဢေႃႈ။ ၶႃႈၸဝ်ႈၵိူတ်ႇလဵင်ႉလုၵ်ႈၸၢႆးမႃးၵေႃႉၼိုင်ႈယၢမ်းမိူဝ်ႈဢၼ်ယူႇႁိူၼ်းလဵဝ်ၵၼ်ၼၼ်ႉတီႈၶႃႈဢေႃႈ။-
လိုၼ်းသေဢၼ်ၶႃႈၸဝ်ႈၵိူတ်ႇလဵင်ႉလုၵ်ႈယဝ်ႉလႆႈသွင်ဝၼ်းယဝ်ႉၼၼ်ႉ၊မႄႈယိင်းၼႆႉၵေႃႈၵိူတ်ႇလဵင်ႉလုၵ်ႈၸၢႆးမႃးတီႈၶႃႈဢေႃႈ။ ႁဝ်းၶႃႈသွင်ၵေႃႉၵူၺ်းမီးယူႇၼႂ်းႁိူၼ်းလဵဝ်ၵၼ်လႄႈဢမ်ႇမီးၽူႈလႂ်ယူႇသေၵေႃႉသေၵူၼ်းတီႈၶႃႈ။-
မိူဝ်ႈၼၼ်ႉ၊ၶိင်ႇတဵင်ႈၶိုၼ်းၸိုင်၊မၼ်းၼွၼ်းၽိုၼ်ႉၶိင်းလႄႈတဵင်မႅၼ်ႈလုၵ်ႈဢွၼ်ႇမၼ်းၼၼ်ႉတၢႆတီႈၶႃႈဢေႃႈ။-
ၼႂ်းၶိုၼ်းၼၼ်ႉ၊ၼႂ်းမိူဝ်ႈဢၼ်ၶႃႈၸဝ်ႈယင်းတိုၵ်ႉၼွၼ်းလပ်းယူႇၼၼ်ႉမၼ်းလုၵ်ႉလႄႈဢဝ်လုၵ်ႈၸၢႆးၶႃႈၸဝ်ႈဢၼ်မီးၵႃႈတီႈႁိမ်းၶၢင်ႈၶႃႈၸဝ်ႈၼၼ်ႉဝႆႉၵႃႈၼိူဝ်ၵူႇၼွၼ်းမၼ်းသေယဝ်ႉ၊သမ်ႉဢဝ်တူဝ်တၢႆလုၵ်ႈဢွၼ်ႇမၼ်းၼၼ်ႉဝႆႉၵႃႈၼိူဝ်ၵူႇၼွၼ်းၶႃႈၸဝ်ႈတီႈၶႃႈဢေႃႈ။-
ၶိင်ႇၵၢင်ၼႂ်မိူဝ်ႈဢၼ်ၶႃႈၸဝ်ႈတိုၼ်ႇမႃးႁႂ်ႈလႆႈပၼ်လုၵ်ႈဢွၼ်ႇၵိၼ်ၼူမ်းၼၼ်ႉၸိုင်၊လုၵ်ႈဢွၼ်ႇၼၼ်ႉတၢႆဝႆႉတီႈၶႃႈဢေႃႈ။ ၶႃႈၸဝ်ႈလူတူၺ်းလုၵ်ႈဢွၼ်ႇၼၼ်ႉလီလီငၢမ်းငၢမ်းလႄႈႁၼ်လွင်ႈဢၼ်ဢမ်ႇၸႂ်ႈလုၵ်ႈဢွၼ်ႇၶႃႈၸဝ်ႈၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မႄႈယိင်းထႅင်ႈၵေႃႉၼိုင်ႈၼၼ်ႉၶိုၼ်းလၢတ်ႈလႄႈဝႃႈ၊ “ဢမ်ႇၸႂ်ႈၵူၺ်း။ လုၵ်ႈဢွၼ်ႇဢၼ်ဢသၢၵ်ႈလိပ်းၼၼ်ႉပဵၼ်လုၵ်ႈၸၢႆးၵဝ်ဢိူဝ်း။ လုၵ်ႈဢွၼ်ႇဢၼ်တၢႆၼၼ်ႉပဵၼ်လုၵ်ႈၸၢႆးမႂ်းဢိူဝ်း၊” ဝႃႈၼင်ႇၼႆဢေႃႈ။ ၼင်ႇၼၼ်လႄႈမႄႈယိင်းသွင်ၵေႃႉၼၼ်ႉတွပ်ႇထဵင်ၵၼ်ၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။
ၶုၼ်ႁေႃၶမ်း သေႃးလမုၼ်ႇ၊ ၸင်ႇမီးဢမိင်ႉလႄႈဝႃႈ၊ “သူၼႆႉၵေႃႉလႂ်ၵေႃႈဝႃႈ၊ ‘လုၵ်ႈဢွၼ်ႇဢၼ်ဢသၢၵ်ႈလိပ်းၼႆႉပဵၼ်လုၵ်ႈၵဝ်၊လုၵ်ႈဢွၼ်ႇဢၼ်တၢႆၼၼ်ႉပဵၼ်လုၵ်ႈဢွၼ်ႇမႂ်း၊’ ဝႃႈၼႆတင်းသွင်ၵေႃႉယဝ်ႉ၊” ဝႃႈၼင်ႇၼႆသေလႄႈ၊-
ၸႂ်ႉႁႂ်ႈၵူၼ်းဢွၼ်ႇမၼ်းဢဝ်လၢပ်ႇမႃးလႄႈမိူဝ်ႈဢၼ်ဢဝ်လၢပ်ႇမႃးယဝ်ႉၼၼ်ႉ၊-
မၼ်းၸီႇယၢင်ႇတႅပ်းတတ်းလႄႈဝႃႈ၊ “ၽႃႇလုၵ်ႈဢွၼ်ႇဢၼ်ဢသၢၵ်ႈလိပ်းၼႆႉသေလႄႈပၼ်ၶဝ်ယေႈၵေႃႉယေႈၶိုင်ႈတႃႉ၊” ဝႃႈၼင်ႇၼႆဢေႃႈ။
ၵေႃႉဢၼ်ပဵၼ်မႄႈလုၵ်ႈဢွၼ်ႇတႄႉၼၼ်ႉဢဵတ်းလူလုၵ်ႈၸၢႆးမၼ်းၼႃႇလူင်လၢင်လႄႈတွင်းပၢၼ်ႇလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “ၸဝ်ႈၶုၼ်လူင်တီႈၶႃႈ။ ၶႅၼ်းတေႃႈယႃႇပေဢဝ်လုၵ်ႈဢွၼ်ႇၼႆႉတၢႆသေၵမ်းတီႈၶႃႈ။ ဢဝ်ပၼ်မၼ်းသေၵမ်းတီႈၶႃႈ၊” ဝႃႈၼင်ႇၼႆဢေႃႈ။ မႄႈယိင်းထႅင်ႈၵေႃႉၼိုင်ႈၼၼ်ႉၸမ်ႉ၊လၢတ်ႈလႄႈဝႃႈ၊ “ယႃႇပေႁႂ်ႈမၼ်းပဵၼ်ပုၼ်ႈၵဝ်ၵူၺ်းၵူၺ်း။ ယႃႇပေႁႂ်ႈပဵၼ်ပုၼ်ႈမႂ်းၵူၺ်းၵူၺ်း။ ႁႂ်ႈၽႃႇတႃႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ သေႃးလမုၼ်ႇ၊ ပူင်ဢမိင်ႉလႄႈဝႃႈ၊ “ယႃႇပေဢဝ်လုၵ်ႈဢွၼ်ႇၼႆႉတၢႆ။ ဢဝ်ပၼ်တီႈမႄႈယိင်းၵေႃႉဢွၼ်တၢင်းၼႆႉတႃႉ။ မၼ်းပဵၼ်မႄႈလုၵ်ႈဢွၼ်ႇၼႆႉတႄႉတႄႉယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၵူၼ်းမဵဝ်း ဢိသရေး၊ တင်းလၢႆငိၼ်းလွင်ႈတၢင်းဢၼ်ၶုၼ်ႁေႃၶမ်း သေႃးလမုၼ်ႇ၊ တႅပ်းတတ်းၼၼ်ႉၸိုင်၊ၶဝ်ဢွၼ်ၵၼ်ရူဝ်ႇသေႇၵူဝ်ယမ်ၶုၼ်ႁေႃၶမ်း၊ၵွပ်ႈပိူဝ်ႈဢၼ်ၶဝ်ႁုႁၼ်လွင်ႈဢၼ်ၽြႃးပဵၼ်ၸဝ်ႈပၼ်ၺၢၼ်ႇပိင်ႇၺႃႇဢၼ်ၸၢင်ႈမေႃၸီႇယၢင်ႇတႅပ်းတတ်းဢမုၽဵင်ႇၽဵင်ႇၼၼ်ႉဢေႃႈ။
ၶုၼ်ႁေႃၶမ်း သေႃးလမုၼ်ႇ၊ ဢုပ်ႉပိူင်ႇမိူင်း ဢိသရေး၊ တင်းသဵင်ႈတင်းမူတ်းဢေႃႈ။-
ၶုၼ်ဢၼ်ပွင်ၵၢၼ်ၸဝ်ႈတင်းလၢႆဢၼ်ပဵၼ်၊ ၶုၼ်ယဵၸ်ႈပရေႃးႁဵၵ်ႈ ၸမ်ႉ၊ပဵၼ် ဢႃႇၸရိ၊ လုၵ်ႈၸၢႆး ၸႃႇတုၵ်ႉ။
ၸရေးလူင်ၸဝ်ႈၸမ်ႉ၊ပဵၼ် ဢေးလိႁေႃႇရိပ်ႉ၊ တင်း ဢႁိယႃႉ၊ လုၵ်ႈၸၢႆး သိသႃႉ၊ ၸိူဝ်းၼၼ်ႉ။ ဢတႂၢင်းဝုၼ်ႇၸမ်ႉ၊ပဵၼ် ယေႇႁူဝ်းသၽတ်ႉ၊ လုၵ်ႈၸၢႆး ဢႁိလုတ်ႉ။
ၸဝ်ႈၵွၼ်းတပ်ႉသိုၵ်းလူင်ၸမ်ႉ၊ပဵၼ် ပေႇၼႃႇယႃႉ၊ လုၵ်ႈၸၢႆး ယေႃႇယတႃႉ၊ ယဵၸ်ႈပရေႃးႁဵၵ်ႈတင်းလၢႆၸမ်ႉ၊ပဵၼ် ၸႃႇတုၵ်ႉ၊ တင်း ဢပျႃႇထႃႇ။
ၽူႈၵွၼ်းဝုၼ်ႇတင်းလၢႆၸမ်ႉ၊ပဵၼ် ဢႃႇၸရိ၊ လုၵ်ႈၸၢႆး ၼႃႇႀၼ်ႇ၊ ၽူႈပၼ်တၢင်းၵျၢမ်ႇၸဝ်ႈၸမ်ႉ၊ပဵၼ်ယဵၸ်ႈပရေႃးႁဵၵ်ႈ ၸႃႇပုတ်ႉ၊ လုၵ်ႈၸၢႆး ၼႃႇႀၼ်ႇ။
ၽူႈၵွၼ်းႁေႃၸဝ်ႈၸမ်ႉ၊ပဵၼ် ဢႁိသႃႇ၊ ဝုၼ်ႇၵဵပ်းၶွၼ်ႇၸဝ်ႈၸမ်ႉ၊ပဵၼ် ဢတေႃးၼိရမ်ႇ၊ လုၵ်ႈၸၢႆး ဢႃႇပတႃႉ၊ ၸိူဝ်းၼၼ်ႉဢေႃႈ။
သေႃးလမုၼ်ႇ၊ ၶၢၼ်းဝႆႉၵူၼ်းသိပ်းသွင်ၵေႃႉႁႂ်ႈပဵၼ်ဝုၼ်ႇၵႃႈတီႈဢိူင်ႇၼႂ်းမိူင်း ဢိသရေး၊ သေယဝ်ႉ၊ၶဝ်လႆႈဢဝ်ပုၼ်ႈၽွၼ်းႁႃၶဝ်ႈၼမ်ႉတၢင်းၵိၼ်တီႈဢိူင်ႇၽႂ်ဢိူင်ႇမၼ်း၊ပုၼ်ႈၶုၼ်ႁေႃၶမ်း ဢိၵ်ႇတင်းၵူၼ်းႁၢင်ႈၵူၼ်းႁေႃၸဝ်ႈၸိူဝ်းၼၼ်ႉၼႂ်းယေႈပီၼၼ်ႉယေႈၵေႃႉတူၵ်းပုၼ်ႈၽွၼ်းယေႈလိူၼ်ဢေႃႈ။-
ၸိုဝ်ႈသဵင်ၶဝ်သိပ်းသွင်ၵေႃႉဢိၵ်ႇတင်းဢိူင်ႇဢၼ်ၶဝ်တူၵ်းပုၼ်ႈၽွၼ်းၼၼ်ႉၸမ်ႉ၊ပဵၼ် ပႅၼ်ႇႁႃႇ၊ ၵႃႈတီႈႁၢၼ်ႉလွႆ ဢေႇၽရိမ်ႇ။
ပႅၼ်ႇတႃႇၵႃႇ၊ မီးပုၼ်ႈၽွၼ်းၵႃႈတီႈဝဵင်း မႃႇၵတ်ႉ၊ ဝဵင်း သႃႇလပိမ်ႇ၊ ဝဵင်း ပႅတ်ႉသေးမိတ်ႉ၊ ဝဵင်း ဢေႇလုၼ်ႇ၊ တင်းဝဵင်း ပႅတ်ႉႁႃႇၼၼ်ႇ။
ပႅၼ်ႇႁေႇသႅတ်ႉ၊ မီးပုၼ်ႈၽွၼ်းၵႃႈတီႈ ဝဵင်း ၸႃႇရုပုတ်ႉ၊ တင်းဝဵင်း သေႃႇၶေႃႇ၊ မိူင်း ႁေႇၽႃႇ၊ တင်းမိူင်း။
ပႅၼ်ႇဢၽိၼတပ်ႉ၊ ဢၼ်ၵူပ်ႉၵူႈပဵၼ်ႁိူၼ်း ၵၼ်တင်း တႃႇၽတ်ႉ၊ လုၵ်ႈယိင်းၸဝ်ႈ သေႃးလမုၼ်ႇ၊ မီးပုၼ်ႈၽွၼ်းၵႃႈတီႈဢိူင်ႇ တေႃႇရႃႉ၊ တင်းမူတ်း။
ပႃႇၼႃႉ၊ လုၵ်ႈၸၢႆး ဢႁိလုတ်ႉ၊ မီးပုၼ်ႈၽွၼ်း ၵႃႈတီႈ ဝဵင်း တႃႇၼၵ်ႉ၊ ဝဵင်း မေႇၵိတ်ႉတေႃႇ၊ ဢိၵ်ႇတင်း ဢိူင်ႇဢၼ်မီးႁိမ်းဝဵင်း ပႅတ်ႉသၼ်ႇ၊ ၼၼ်ႉ ဢိၵ်ႇတင်းဢိူင်ႇဢၼ်မီးႁိမ်းဝဵင်း ၸႃႇရတၼ်ႇ၊ ၽၢႆႇၸၢၼ်းဝဵင်း ယေႇၸရေး၊ တေႃႇႁွတ်ႈ ဝဵင်း ဢႃႇပေႇလႃႉမႁေႃႇလႃႉ၊ တင်းဝဵင်း ယွၵ်ႉမမ်ႇ၊ ပုၼ်ႉဢေႃႈ။
ပႅၼ်ႇၵေႇပႃႉ၊ မီးပုၼ်ႈၽွၼ်းၵႃႈတီႈဝဵင်း ရႃႇမုတ်ႉ၊ မိူင်း ၵိလတ်ႉ၊ ဢိၵ်ႇတင်းဝၢၼ်ႈၼွၵ်ႈၼႃးပၢင်ႇမိူင်း ၵိလတ်ႉ၊ ၸိူဝ်းဢၼ်ၵူၼ်းၶိူဝ်းႁိူၼ်း ယႃႇဢိရႃႉ၊ ၼႂ်းၸိူဝ်ႉၶိူဝ်းႁိူၼ်း မၼႃႇသေႇ၊ ပိူင်ႇဢိၵ်ႇတင်းဢိူင်ႇ ဢၵေႃႇၽႃႉ၊ မိူင်း ပႃႇသၢၼ်ႇ၊ ဢဝ်ၶဝ်ႈပႃးႁူၵ်းသိပ်းဝဵင်းဢၼ်မီးလမ်းဝဵင်းလႂ်တင်းၵိူၼ်ႇၽၵ်းတူတွင်းလိူင်လႂ်ၸိူဝ်းၼၼ်ႉ။
ဢႁိၼတပ်ႉ၊ လုၵ်ႈၸၢႆး ဢိတ်ႉတေႃႇ၊ မီးပုၼ်ႈၽွၼ်းၵႃႈတီႈဢိူင်ႇ မႁႃႇၼိမ်ႇ။
ဢႁိမတ်ႉ၊ ဢၼ်ၵူပ်ႉၵူႈပဵၼ်ႁိူၼ်းၵၼ်တင်း ပႃႇသမတ်ႉ၊ လုၵ်ႈယိင်းၸဝ်ႈ သေႃးလမုၼ်ႇ၊ မီးပုၼ်ႈၽွၼ်းၵႃႈတီႈဢိူင်ႇ ၼပ်ႉထလိ။
ပႃႇၼႃႉ၊ လုၵ်ႈၸၢႆး ႁုသေး၊ မီးပုၼ်ႈၽွၼ်း ၵႃႈတီႈဢိူင်ႇ ဢႃႇသျႃႇ၊ ဢိၵ်ႇတင်းဝဵင်း ပေႇဢႃႇလုတ်ႉ။
ယေႇႁူဝ်းသၽတ်ႉ၊ လုၵ်ႈၸၢႆး ပႃႇရွႃႇ၊ မီးပုၼ်ႈၽွၼ်းၵႃႈတီႈဢိူင်ႇ ဢိသၶႃႇ။
သိမိ၊ လုၵ်ႈၸၢႆး ဢေးလႃႇ၊ မီးပုၼ်ႈၽွၼ်းၵႃႈတီႈဢိူင်ႇ ပိၼ်ႇယႃႇမိၼ်ႇ။
ၵေႇပႃႉ၊ လုၵ်ႈၸၢႆး ဢုရိ၊ မီးပုၼ်ႈၽွၼ်း ၵႃႈတီႈမိူင်း ၵိလတ်ႉ၊ ဢၼ်ပဵၼ်လိၼ်ဢၼ်ၶုၼ်ႁေႃၶမ်း သိႁုၼ်ႇ၊ ၵူၼ်း ဢႃႇမေႃးရိ၊ ဢိၵ်ႇတင်းၶုၼ်ႁေႃၶမ်း ဢေႃႇၶႃႉ၊ ၵူၼ်းဝဵင်း ပႃႇသၢၼ်ႇ၊ လႆႈဢုပ်ႉပိူင်ႇမႃးယဝ်ႉၼၼ်ႉဢေႃႈ။ ၼွၵ်ႈသေၶဝ်သိပ်းသွင်ၵေႃႉၼၼ်ႉယင်းမီးဝုၼ်ႇလူင်ၵေႃႉၼိုင်ႈဢၼ်ၵွၼ်းၵႃႈၼိူဝ်ၶဝ်တင်းမိူင်းၼၼ်ႉလူးၵွၼ်ႇဢေႃႈ။
မိူဝ်ႈၼၼ်ႉၵူၼ်းမဵဝ်း ယုတႃႉ၊ တင်းၵူၼ်းမဵဝ်း ဢိသရေး၊ ၼမ်ၵိုၼ်းမႃးၼႃႇလႄႈပဵၼ်ၸိူဝ်ႉၼင်ႇမဵတ်ႉသၢႆးၼမ်ႉသမ်ႇမုၵ်ႈတြႃႇၼၼ်ႉသေယဝ်ႉ၊ဢွၼ်ၵၼ်ၵိၼ်ၶူပ်းမူၼ်ႈပျေႃႇယူႇဢေႃႈ။-
သိုင်ႇၸိုင်ႈဝၢၼ်ႈမိူင်း သေႃးလမုၼ်ႇ၊ ဢၼ်မၼ်းလႆႈဢုပ်ႉပိူင်ႇၸၢမ်ႇၸႃးၼၼ်ႉဢဝ်ၸႃႉၸဵမ်ၼမ်ႉ ဢုၽရတ်ႉ၊ တေႃႇထိုင်ႁွတ်ႈမိူင်း ၽိလိတ်ႉတိ၊ ဢိၵ်ႇတင်းၶွပ်ႇၼမ်ႉလႅၼ်လိၼ်မိူင်း ဢေးၵျိပ်ႉ၊ သေလႄႈၶဝ်ၸိူဝ်းၼၼ်ႉလႆႈသၢၵ်ႈၶွၼ်ႇၼမ်ႉၶွၼ်ႇလိၼ်ပၼ်လႄႈလႆႈၵိုတ်ႉႁၢပ်ႇၵၢၼ်ဢမု သေႃးလမုၼ်ႇ၊ ၼႂ်းၸူဝ်ႈပၢၼ်မၼ်းတင်းၸူဝ်ႈဢေႃႈ။
ၶဝ်ႈၼမ်ႉတၢင်းၵိၼ် သေႃးလမုၼ်ႇ၊ ဢၼ်တၵ်းၵိၼ်ၼႂ်းယေႈဝၼ်းယေႈဝၼ်းၼၼ်ႉၸမ်ႉ၊ၽွင်ၶဝ်ႈၵျုင်ႇသၢမ်ပၢၵ်ႇတၢင်၊ ၽွင်ၶဝ်ႈမုၼ်းမုယေႃးႁူၵ်းပၢၵ်ႇတၢင်၊-
ဝူဝ်းဢၼ်ပီးလီမၼ်းလီသိပ်းတူဝ်၊ဝူဝ်းဢၼ်လဵင်ႉၼႂ်းပၢင်ႇယိူဝ်ႈသၢဝ်းတူဝ်၊သူဝ်းပၢၵ်ႇၼိုင်ႈဢိၵ်ႇတင်းယိူင်း၊ၵႂၢင်၊ၸၢတ်ႇၶၢႆးလႂ်တင်းၵႆႇလႂ်ဢေႃႈ။
သေႃးလမုၼ်ႇ၊ ဢုပ်ႉပိူင်ႇလိၼ်မိူင်းၵႃႈမီးၽၢႆႇတၢင်းဝၼ်းတူၵ်းၼမ်ႉ ဢုၽရတ်ႉ၊ ဢဝ်ၵႃႈတီႈဝဵင်း တိၽသႃႉ၊ တေႃႇထိုင်ႁွတ်ႈၽၢႆႇတၢင်းဝၼ်းတူၵ်းၵႃႈတီႈဝဵင်း ၵႃႇၸႃႉ၊ ဢၼ်ဝႃႈၶုၼ်ႁေႃၶမ်းတင်းသဵင်ႈတင်းလူင်ၽၢႆႇဝၼ်းတူၵ်းၼမ်ႉ ဢုၽရတ်ႉ၊ ၼၼ်ႉလႆႈပဵၼ်ၶႃႈဝၢၼ်ႈၵူၼ်းမိူင်းမၼ်းတင်းမူတ်းလႄႈလႆႈႁဵတ်းမိၵ်ႈသႁႃႇယႃႉလူၺ်ႈၵၼ်တင်းမိူင်းဢၼ်လဵပ်ႈႁွပ်ႈႁိမ်းႁွမ်းမၼ်းၸိူဝ်းၼၼ်ႉဢေႃႈ။-
ၼႂ်းၸူဝ်ႈပၢၼ်မၼ်းၼၼ်ႉၵူၼ်းမဵဝ်း ယုတႃႉ၊ ဢိၵ်ႇတင်းၵူၼ်းမဵဝ်း ဢိသရေး၊ တင်းလၢႆလႆႈယူႇၼိမ်ၼိမ်လီလီလႄႈၼႃႈႁိူၼ်းၽႂ်ၼႃႈႁိူၼ်းမၼ်းမီးသူၼ်မၢၵ်ႇၸပိတ်ႉ၊သူၼ်မၢၵ်ႇလိူဝ်ႇႁင်းၽႂ်ႁင်းမၼ်းဢေႃႈ။
သေႃးလမုၼ်ႇ၊ သမ်ႉမီးၶွၵ်ႈမႃႉဢၼ်လၢၵ်ႈလေႃႉသိုၵ်းသီႇမိုၼ်ႇဢိၵ်ႇတင်းႁူဝ်ႁၢၼ်ၵူၼ်းသိုၵ်းၶီႇမႃႉမီးမိုၼ်ႇပၢႆသွင်ႁဵင်ဢေႃႈ။-
ဝုၼ်ႇသိပ်းသွင်ၵေႃႉၼၼ်ႉၵေႃႈမိူဝ်ႈဢၼ်တူၵ်းဢလေႉၽႂ်မၼ်းယေႈလိူၼ်ၼၼ်ႉၵဵပ်းသိမ်းသူင်ႇပၼ်ၶဝ်ႈၼမ်ႉတၢင်းၵိၼ်ၶုၼ်ႁေႃၶမ်း သေႃးလမုၼ်ႇ၊ ၵႃႈဢၼ်မၼ်းလူဝ်ႇဢိၵ်ႇတင်းၵူၼ်းႁၢင်ႈၵူၼ်းႁေႃၼၼ်ႉဢမ်ႇႁႂ်ႈလႆႈလုတ်ႈလႆႈႁၢမ်းသေၸိူဝ်ႉသေပိူင်ဢေႃႈ။-
ၶဝ်ႈမုယေႃးဢိၵ်ႇတင်းယိူဝ်ႈႁႅင်ႈပုၼ်ႈမႃႉၸဝ်ႈတင်းၵလႃႇဢုၵ်ႈၸဝ်ႈတင်းလၢႆၵေႃႈၶဝ်ဢွၼ်ၵၼ်သူင်ႇပၼ်ၵႃႈတီႈဢၼ်ၸဝ်ႈယူႇသဝ်းၼၼ်ႉၸွမ်းၼင်ႇဢၼ်ထုၵ်ႇလႄႉထုၵ်ႇၵမ်းႁင်းၽႂ်ႁင်းမၼ်းၼၼ်ႉဢေႃႈ။
ၽြႃးပဵၼ်ၸဝ်ႈပၼ်ၺၢၼ်ႇပိင်ႇၺႃႇဢၼ်လၢၵ်ႇဢၼ်လၢႆး၊ဢိၵ်ႇတင်းၺၢၼ်ႇပိင်ႇၺႃႇတၢင်းႁုတၢင်းႁၼ်ဢၼ်လိူဝ်တွၼ်းၼႃႇသေတၵ်းတႅၵ်ႈတိူင်းလႆႈၼၼ်ႉတီႈ သေႃးလမုၼ်ႇ၊ ဢေႃႈ။-
ပိူဝ်ႈၼႆလႄႈ သေႃးလမုၼ်ႇ၊ မီးၺၢၼ်ႇပိင်ႇၺႃႇဢၼ်လိူဝ်တွၼ်းသေၺၢၼ်ႇပိင်ႇၺႃႇၵူၼ်းမိူင်းဝၼ်းဢွၵ်ႇတင်းသဵင်ႈတင်းလူင်၊ဢိၵ်ႇတင်းၺၢၼ်ႇပိင်ႇၺႃႇၵူၼ်းမိူင်း ဢေးၵျိပ်ႉ၊ တင်းသဵင်ႈတင်းလူင်ဢေႃႈ။-
မၼ်းယဵင်ႈၶႅၼ်းမီးၺၢၼ်ႇပိင်ႇၺႃႇလိူဝ်တွၼ်းၼႃႇသေၵူၼ်းတင်းသဵင်ႈတင်းလူင်လႄႈ၊မီးၺၢၼ်ႇပိင်ႇၺႃႇဢၼ်လိူဝ်တွၼ်းသေ ဢေးႀၼ်ႇ၊ ၵူၼ်းမဵဝ်း ဢေႇၸရႃႉႁိတ်ႉ၊ တင်း ႁေႇမၼ်ႇ၊ၵႃႇလႃႉလေႃႇလႃႉ၊ တင်း တႃႇရတႃႉ၊ လုၵ်ႈၸၢႆး မႁေႃႇလႃႉ၊ ၸိူဝ်းၼၼ်ႉလႄႈပဵၼ်ဢၼ်ႁူင်ႁၢင်းၸွတ်ႇတူဝ်ႈၵႃႈၼႂ်းၵူၼ်းမိူင်းဢၼ်လဵပ်ႈႁွပ်ႈႁိမ်းႁွမ်းမၼ်းၸိူဝ်းၼၼ်ႉဢေႃႈ။-
မၼ်းၸၢပ်ႈဝႆႉထုင်းၵႂၢမ်းပိင်ႇၺႃႇသၢမ်ႁဵင်ၶေႃႈ၊ဢိၵ်ႇတင်းၶေႃႈႁဵတ်းၵႂၢမ်းႁဵင်ပၢႆႁႃႈပုၵ်ႈဢေႃႈ။-
မၼ်းလၢတ်ႈၸၢပ်ႈလူၺ်ႈလွင်ႈတူၼ်ႈမႆႉတူၼ်ႈတွၵ်ႇ၊ၸႃႉၸဵမ်တူၼ်ႈမႆႉဢႃႇရိတ်ႉဢၼ်မီးၵႃႈၼိူဝ်လွႆ လေႇပၼုၼ်ႇ၊ တေႃႇထိုင်ႁွတ်ႈတူၼ်ႈယိူဝ်ႈယႃႈႁုတ်ႉသူပ်ႉဢၼ်ၸၢင်ႈဢွၵ်ႇၵႃႈၼိူဝ်ၽႃသၢင်ႉဢုတ်ႇၼၼ်ႉလႄႈ၊သမ်ႉလၢတ်ႈၸၢပ်ႈလူၺ်ႈလွင်ႈတူဝ်သတ်းဢၼ်ဝႃႈၼူၵ်ႉလႂ်၊တူဝ်မူင်ႈတူဝ်မႅင်းလႂ်၊တင်းပႃလႂ်ၼၼ်ႉဢေႃႈ။-
ၶုၼ်ႁေႃၶမ်းလေႃးၵီႇၸိူဝ်းဢၼ်လႆႈငိၼ်းၶၢဝ်ႇငၢဝ်းၺၢၼ်ႇပိင်ႇၺႃႇ သေႃးလမုၼ်ႇ၊ ၼၼ်ႉဢွၼ်ၵၼ်ပွႆႇၸႂ်ႉမႃးၵူၼ်းၵူႈၸိူဝ်ႉၵူႈၶိူဝ်း၊ႁႂ်ႈလႆႈထွမ်ႇဢဝ်ငိၼ်းဢဝ်ထုင်းၵႂၢမ်းပိင်ႇၺႃႇမၼ်းဢေႃႈ။
ၶုၼ်ႁေႃၶမ်း ႁိရမ်ႇ၊ ဝဵင်း တုရု၊ ၼၼ်ႉလႆႈႁဵတ်းမိၵ်ႈသႁႃႇယႃႉလူၺ်ႈၵၼ်တင်း တႃႇဝိတ်ႈ၊ တႃႇသေႇလႄႈမိူဝ်ႈဢၼ်လႆႈငိၼ်း သေႃးလမုၼ်ႇ၊ လႆႈၶၢမ်ႇဢဝ်ဢရႃႇၶုၼ်ႁေႃၶမ်းတၢင်တူဝ်ပေႃႈမၼ်းၼၼ်ႉၸိုင်၊မၼ်းပွႆႇၸႂ်ႉသၢၼ်ႇတမၢၼ်ႇၵႂႃႇၵႃႈတီႈ သေႃးလမုၼ်ႇ၊ ဢေႃႈ။-
သေႃးလမုၼ်ႇ၊ ၵေႃႈၶိုၼ်းတွပ်ႇၵႂၢမ်းၵႃႈတီႈ ႁိရမ်ႇ၊ လႄႈဝႃႈ၊-
“ၶုၼ်လူင်ႁုလွင်ႈဢၼ်ၸဝ်ႈပေႃႈၵဝ် တႃႇဝိတ်ႈ၊ ၼၼ်ႉလႆႈတိုၵ်းသိုၵ်းတိုၵ်းသိူဝ်လူၺ်ႈၵၼ်တင်းရၢၼ်ႇသူႇမိူင်းၸိူဝ်းဢၼ်လွမ်ႉႁွပ်ႈမၼ်းယူႇၼၼ်ႉလႄႈမၼ်းဢမ်ႇလႆႈဢၶႂၢင်ႉဢၼ်တႄႇႁဵတ်းၵျွင်းပိၵ်ႈမၢၼ်ႇပုၼ်ႈဢၼ်တၵ်းဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၽြႃးပဵၼ်ၸဝ်ႈမၼ်းတေႃႇထိုင်ႁွတ်ႈ ထႃႇဝရႃႉၽြႃး၊ ပၼ်ႁႂ်ႈမၼ်းဢွင်ႇသိုၵ်းၵႃႈၼိူဝ်ရၢၼ်ႇသူႇမၼ်းတင်းလၢႆၼၼ်ႉယူႇဢေႃႈ။-
တေႃႈလဵဝ်ၼႆႉၸိုင်၊ ထႃႇဝရႃႉၽြႃး၊ ၽြႃးပဵၼ်ၸဝ်ႈၵဝ်ပၼ်ႁႂ်ႈၶွပ်ႇၼမ်ႉလႅၼ်လိၼ်မိူင်းၵဝ်လႆႈယူႇၼိမ်ၼိမ်လီလီယဝ်ႉ။ ၵဝ်ဢမ်ႇမီးရၢၼ်ႇသူႇလႃးလႃးယဝ်ႉလႄႈဢမ်ႇလႆႈၵူဝ်ၽေးသိုၵ်းၽေးသိူဝ်ၵႃႈသင်ယဝ်ႉ။-
ထႃႇဝရႃႉၽြႃး၊ ဝႆႉၵတိသဵတ်ႈၸႃႇတီႈၸဝ်ႈပေႃႈၵဝ် တႃႇဝိတ်ႈ၊ လႄႈဝႃႈ၊ ‘လုၵ်ႈၸၢႆးမႂ်းဢၼ်ၵဝ်ယုၵ်ႉတၢင်ႇၼႂ်းဢရႃႇၶုၼ်ႁေႃၶမ်းတၢင်တူဝ်မႂ်းၼၼ်ႉတၵ်းလႆႈဢၶႂၢင်ႉဢၼ်တႄႇႁဵတ်းၵျွင်းပိၵ်ႈမၢၼ်ႇပုၼ်ႈၵဝ်ဢေႃႈ၊’ ဝႃႈၼႆဝႆႉယဝ်ႉ။ ပိူဝ်ႈၼႆလႄႈၵဝ်တႅပ်းတတ်းၸႂ်တေႃႈလဵဝ်ၼႆႉႁႂ်ႈလႆႈတႄႇႁဵတ်းၵျွင်းပိၵ်ႈမၢၼ်ႇပုၼ်ႈတၵ်းဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ၽြႃးပဵၼ်ၸဝ်ႈၵဝ်ဢေႃႈ။-
ပိူဝ်ႈၼႆလႄႈပွႆႇၸႂ်ႉၵူၼ်းမႂ်းၵႂႃႇၵႃႈတီႈလွႆ လေႇပၼုၼ်ႇ၊ ႁႂ်ႈလႆႈပွမ်ႈတူၼ်ႈမႆႉဢႃႇရိတ်ႉတင်းလၢႆပုၼ်ႈၵဝ်သေၵမ်း။ ၶႃႈၵဝ်ၵူၼ်းၵဝ်တၵ်းဢွၼ်ၵၼ်ၸွႆႈထႅမ်ၶဝ်ဢေႃႈ။ ၵဝ်တၵ်းပၼ်ၵႃႈႁႅင်းတီႈၵူၼ်းၸဝ်ႈၶုၼ်လူင်ၸွမ်းၵႃႈၼင်ႇဢၼ်ၶုၼ်လူင်တၵ်းလၢတ်ႈၵႃႈၶၼ်ဢၼ်တေလႆႈပၼ်ၼၼ်ႉဢေႃႈ။ ၸိူဝ်ႉၼင်ႇဢၼ်ၸဝ်ႈၶုၼ်လူင်ႁုလွင်ႈဢၼ်ၶႃႈၵဝ်ၵူၼ်းၵဝ်ဢမ်ႇမေႃပွမ်ႈမေႃၽၼ်းတူၼ်ႈမႆႉမိူၼ်ၸိူဝ်ႉၼင်ႇဢၼ်ၵူၼ်းၶုၼ်လူင်မေႃပွမ်ႈမေႃၽၼ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ် ႁိရမ်ႇ၊ ငိၼ်းၵႂၢမ်း သေႃးလမုၼ်ႇ၊ ၼၼ်ႉၸိုင်၊ၸူမ်းသိူဝ်းၼႃႇလူင်လၢင်လႄႈဝႃႈ၊ “ဝၼ်းမိူဝ်ႈၼႆႉယွင်ႈယေႃး ထႃႇဝရႃႉၽြႃး၊ ဢၼ်ပၼ်လုၵ်ႈၸၢႆးဢၼ်မီးပိင်ႇၺႃႇလႄႈလႆႈဢုပ်ႉပိူင်ႇၵူၼ်းမဵဝ်းၼမ်ၵိုၼ်းယႂ်ႇလူင်ၼႆႉတီႈ တႃႇဝိတ်ႈ၊ ၼၼ်ႉဢေႃႈ၊” ဝႃႈၼင်ႇၼႆသေယဝ်ႉ၊-
မၼ်းၶိုၼ်းတွပ်ႇၵႂၢမ်းၵႂႃႇတီႈ သေႃးလမုၼ်ႇ၊ လႄႈဝႃႈ၊ “ၵဝ်လႆႈငိၼ်းၵႂၢမ်းဢၼ်ၶုၼ်လူင်လၢတ်ႈမႃးတီႈၵဝ်ၼၼ်ႉယဝ်ႉ။ ၵဝ်တၵ်းႁဵတ်းၸွမ်းၵႃႈၼင်ႇဢၼ်ၶုၼ်လူင်ယွၼ်းမႃးၼၼ်ႉဢေႃႈ။ ၵဝ်တၵ်းပၼ်မႆႉဢႃႇရိတ်ႉတင်းမႆႉပႅၵ်ႇတင်းလၢႆတီႈၶုၼ်လူင်ဢေႃႈ။-
ၶႃႈၵဝ်ၵူၼ်းၵဝ်တၵ်းတေဢဝ်မႆႉလူင်ၸိူဝ်းၼၼ်ႉလူင်းၸူးတီႈပၢင်ႇလၢႆႇသေယဝ်ႉ၊ၶဝ်တၵ်းၶၢတ်ႈႁဵတ်းပႄးလႄႈလွင်ႈၸွမ်းၽင်ႇပၢင်ႇလၢႆႇမႃးၸူးတီႈဢၼ်ၶုၼ်လူင်ႁၢင်ႈႁႅၼ်းဝႆႉၼၼ်ႉသေယဝ်ႉ၊ယႃႉပႄးပၼ်ၵႃႈတီႈၼၼ်ႈဢေႃႈ။ လိုၼ်းၼၼ်ႉႁႂ်ႈၶႃႈၵူၼ်းၶုၼ်လူင်တင်းလၢႆႁပ်ႉဢဝ်ၵႂႃႇတႃႉ။ ပုၼ်ႈၽွၼ်းၽၢႆႇၶုၼ်လူင်ၸမ်ႉ၊လဵင်ႉပၼ်ၸရိပ်ႈၶဝ်ႈၼမ်ႉတၢင်းၵိၼ်ပုၼ်ႈၶႃႈၵဝ်ၵူၼ်းၵဝ်ၸိူဝ်းၼၼ်ႉသေၵမ်း၊” ဝႃႈၼင်ႇၼႆဢေႃႈ။
ၼင်ႇၼၼ်လႄႈ ႁိရမ်ႇ၊ ပၼ်တုမ်မႆႉဢႃႇရိတ်ႉတင်းတုမ်မႆႉပႅၵ်ႇတင်းလၢႆတီႈ သေႃးလမုၼ်ႇ၊ ၵႃႈၼင်ႇဢၼ်မၼ်းလူဝ်ႇၼၼ်ႉဢေႃႈ။-
သေႃးလမုၼ်ႇ၊ ၵေႃႈပၼ်ၶဝ်ႈၵျုင်ႇသွင်သႅၼ်တၢင်၊ဢိၵ်ႇတင်းၼမ်ႉမၼ်းဢၼ်ၸႅတ်ႈလီသီႇသိပ်းပၢႆႁႃႈပုင်းဢေႃႈ။ ၼင်ႇၼၼ်လႄႈ သေႃးလမုၼ်ႇ၊ ပၼ်တီႈ ႁိရမ်ႇ၊ ပုၼ်ႈယေႈပီယေႈပီဢေႃႈ။-
ထႃႇဝရႃႉၽြႃး၊ ၵေႃႈပႂ်ႉၵတိသဵတ်ႈၸႃႇလႄႈပၼ်ပိင်ႇၺႃႇတီႈ သေႃးလမုၼ်ႇ၊ ဢေႃႈ။ ႁိရမ်ႇ၊ တင်း သေႃးလမုၼ်ႇ၊ ၼၼ်ႉႁဵတ်းတၢင်းဢၼ်ၼိမ်ဢၼ်လီတီႈၵၼ်ဢိၵ်ႇတင်းႁဵတ်းလိၵ်ႈမၼ်ႈၵႅၼ်ႇတေႃႇၵၼ်ဝႆႉဢေႃႈ။
ၶုၼ်ႁေႃၶမ်း သေႃးလမုၼ်ႇ၊ ၵေႃႈၽႃႇၵဵပ်းဢဝ်ၵူၼ်းႁဵတ်းၵၢၼ်သၢမ်မိုၼ်ႇၵႃႈၼႂ်းၵူၼ်းမဵဝ်း ဢိသရေး၊ တင်းလၢႆတင်းမိူင်းသေယဝ်ႉ၊-
ၶၢၼ်းႁႂ်ႈ ဢတေႃးၼိရမ်ႇ၊ ဢုပ်ႉပိူင်ႇၶဝ်ဢေႃႈ။ ၽႄႁဵတ်းသၢမ်မူႇ၊ယေႈမူႇယေႈမိုၼ်ႇသေယဝ်ႉ၊ၸႂ်ႉႁႂ်ႈယေႈမူႇထၢမ်းၼႃႈၵၢၼ်ယေႈလိူၼ်ၵႃႈၼိူဝ်လွႆ လေႇပၼုၼ်ႇ၊ လႄႈသမ်ႉပွႆႇမိူဝ်းၵႂႃႇၵႃႈတီႈႁိူၼ်းသွင်လိူၼ်ဢေႃႈ။-
သေႃးလမုၼ်ႇ၊ သမ်ႉၸႂ်ႉၵူၼ်းပႅတ်ႇမိုၼ်ႇႁႂ်ႈၶုတ်းႁိၼ်ဢိၵ်ႇတင်းၵူၼ်းၸဵတ်းမိုၼ်ႇႁႂ်ႈလႆႈတေႃႉလႆႈႁၢမ်ဢေႃႈ။-
သမ်ႉၶၢၼ်းဝႆႉၵူၼ်းသၢမ်ႁဵင်ပၢႆသၢမ်ပၢၵ်ႇႁႂ်ႈဢုပ်ႉထိင်းၼႃႈၵၢၼ်တၢင်းႁဵတ်းၶဝ်ၸိူဝ်းၼၼ်ႉဢေႃႈ။-
ၸွမ်းၵႃႈၼင်ႇဢၼ်ၶုၼ်ႁေႃၶမ်း သေႃးလမုၼ်ႇ၊ ပူင်ဢမိင်ႉဝႆႉၼၼ်ႉၶဝ်ဢွၼ်ၵၼ်ဢဝ်မၢၵ်ႇႁိၼ်ယႂ်ႇမၢၵ်ႇႁိၼ်လူင်ထၢၵ်ႇသပ်းႁႂ်ႈလီငၢမ်းသေလႄႈႁႂ်ႈပဵၼ်ပုၼ်ႈမၢၵ်ႇႁိၼ်ငဝ်ႈႁၢၵ်ႈတိူၵ်ႈၵျွင်းပိၵ်ႈမၢၼ်ႇၸဝ်ႈဢေႃႈ။-
ၶႃႈၵူၼ်း ႁိရမ်ႇ၊ တင်းၶႃႈၵူၼ်း သေႃးလမုၼ်ႇ၊ ၸိူဝ်းၼၼ်ႉဢိၵ်ႇတင်းၵူၼ်းဝဵင်း ၵေႇပႃႉ၊ တင်းလၢႆဢွၼ်ၵၼ်ပွင်ႁဵတ်းပွင်မႄးမႆႉၸိင်လႂ်၊ဢိၵ်ႇတင်းမၢၵ်ႇႁိၼ်လႂ်ပုၼ်ႈဢၼ်တၵ်းတႄႇႁဵတ်းၵျွင်းပိၵ်ႈမၢၼ်ႇၸဝ်ႈဢေႃႈ။
လိုၼ်းသေၵူၼ်းမဵဝ်း ဢိသရေး၊ ၶဝ်ဢွၵ်ႇသေမိူင်း ဢေးၵျိပ်ႉ၊ မႃးလႆႈသီႇပၢၵ်ႇပၢႆပႅတ်ႇသိပ်းပီၼၼ်ႉ သေႃးလမုၼ်ႇ၊ ဢုပ်ႉပိူင်ႇၵႃႈၼိူဝ်ၵူၼ်းမဵဝ်း ဢိသရေး၊ လႄႈမိူဝ်ႈဢၼ်ထူၼ်ႈထိုင်သီႇပီၼႂ်းလိူၼ်တီႈသွင်ဢၼ်ဝႃႈလိူၼ် ၸိၽႃႉ၊ ၼၼ်ႉ သေႃးလမုၼ်ႇ၊ ၸႃႉတႄႇႁဵတ်းၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ဢေႃႈ။-
ၵျွင်းပိၵ်ႈမၢၼ်ႇၸဝ်ႈၼၼ်ႉၼႃႈယၢဝ်းမၼ်းမီးႁူၵ်းသိပ်းသွၵ်ႇ၊ၼႃႈၵႂၢင်ႈမၼ်းသၢဝ်းသွၵ်ႇ၊တၢင်းသုင်မၼ်းမီးသၢမ်သိပ်းသွၵ်ႇဢေႃႈ။-
လုၵ်းလူင်ၼၼ်ႉလိုၵ်ႉသိပ်းသွၵ်ႇလႄႈၼႃႈၵႂၢင်ႈမၼ်းမီးသၢဝ်းသွၵ်ႇပဵင်းၵၼ်တင်းၼႃႈၵႂၢင်ႈၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။-
ၵႃႈတီႈၽႃၵျွင်းပိၵ်ႈမၢၼ်ႇၸဝ်ႈၼၼ်ႉမၼ်းႁဵတ်းႁူးလႅင်းတင်းလၢႆဢၼ်ၶွပ်ႇမၼ်းၵႂၢင်ႈလႄႈႁဵဝ်ၵႂႃႇၼၼ်ႉဢေႃႈ။-
ၸွမ်းၵႃႈတီႈၽႃၵျွင်းသွင်ၽၢႆႇၶၢင်ႈမၼ်းဢိၵ်ႇတင်းၽၢႆႇတၢင်းလင်ၵျွင်းပိၵ်ႈမၢၼ်ႇၸဝ်ႈၼၼ်ႉမၼ်းႁဵတ်းႁိူၼ်းသၢမ်ႁၢၼ်ႉလွမ်ႉႁွပ်ႈဝႆႉလႄႈယေႈႁၢၼ်ႉသုင်ႁႃႈသွၵ်ႇ ဢေႃႈ။-
လုၵ်းႁၢၼ်ႉတႂ်ႈၼၼ်ႉၵႂၢင်ႈႁႃႈသွၵ်ႇ၊ႁၢၼ်ႉၵၢင်မီးႁူၵ်းသွၵ်ႇ၊ႁၢၼ်ႉၼိူဝ်မီးၸဵတ်းသွၵ်ႇဢေႃႈ။ ၽႃသၢင်ႉၵျွင်းၼၼ်ႉႁၢၼ်ႉၼိူဝ်ၸိုင်၊မၢင်သေႁၢၼ်ႉဢၼ်မီးၵႃႈတႂ်ႈမၼ်းလႄႈႁၢၼ်ႉလႂ်ႁၢၼ်ႉၼၼ်ႉႁႂ်ႈတူင်မၼ်းတင်းလၢႆဢမ်ႇလႆႈၶဝ်ႈၵႃႈၼႂ်းတူဝ်ၽႃသၢင်ႉၼၼ်ႉဢေႃႈ။
မၢၵ်ႇႁိၼ်တင်းလၢႆၸိူဝ်းဢၼ်ၵေႃႇၵျွင်းပိၵ်ႈမၢၼ်ႇၸဝ်ႈယူႇၼၼ်ႉၵွပ်ႈပိူဝ်ႈဢၼ်ထၢၵ်ႇသပ်းမႃးယဝ်ႉလီငၢမ်းလႄႈမိူဝ်ႈဢၼ်တႄႇႁဵတ်းၵျွင်းပိၵ်ႈမၢၼ်ႇၸဝ်ႈယူႇၼၼ်ႉဢမ်ႇလႆႈငိၼ်းသဵင်ၶွၼ်ႉတွၵ်ႇ၊သဵင်တႃမၢတ်ႇသဵင်ၶိူင်ႈလဵၵ်းတင်းလၢႆ၊လႆႈလင်လႆႈမေႃးလႃးလႃး။
ႁူးၽၵ်းတူဢၼ်ၶဝ်ႈၵႃႈၼႂ်းလုၵ်းႁၢၼ်ႉတႂ်ႈမၼ်းၸိုင်၊မီးၽၢႆႇတၢင်းၸၢၼ်းၵျွင်းပိၵ်ႈမၢၼ်ႇၸဝ်ႈလႄႈမီးၶၼ်ႈလႆဢၼ်ပၼ်ႇၶိုၼ်ႈၵႂႃႇၸူးတီႈႁၢၼ်ႉၵၢင်ဢိၵ်ႇတင်းႁၢၼ်ႉၼိူဝ်ၸိူဝ်းၼၼ်ႉဢေႃႈ။-
ၼင်ႇၼၼ်လႄႈၶုၼ်ႁေႃၶမ်း သေႃးလမုၼ်ႇ၊ တႄႇႁဵတ်းၵျွင်းပိၵ်ႈမၢၼ်ႇၸဝ်ႈယဝ်ႉတူဝ်ႈလီငၢမ်းဢေႃႈ။ မၼ်းသႂ်ႇထိူင်းဝႆႉသေလႄႈဢဝ်မႆႉဢႃႇရိတ်ႉတွၵ်ႇႁပ်ႉဝႆႉဢေႃႈ။-
ႁိူၼ်းသၢမ်ႁၢၼ်ႉၸိူဝ်းၼၼ်ႉယေႈႁၢၼ်ႉသုင်ႁႃႈသွၵ်ႇလႄႈတႄႇႁဵတ်းလွမ်ႉႁွပ်ႈၽႃၵျွင်းပိၵ်ႈမၢၼ်ႇၸဝ်ႈသေယဝ်ႉ၊ဢဝ်တင်းၶိုဝ်ႇမႆႉဢႃႇရိတ်ႉၵၢႆႇသႂ်ႇၵပ်းၵၼ်ဝႆႉဢေႃႈ။
ထႃႇဝရႃႉၽြႃး၊ မီးဢမိင်ႉတီႈ သေႃးလမုၼ်ႇ၊ လႄႈဝႃႈ၊-
“ၵပ်းၵၢႆႇလူၺ်ႈၵျွင်းပိၵ်ႈမၢၼ်ႇၸဝ်ႈဢၼ်မႂ်းတႄႇႁဵတ်းဝႆႉၼႆႉ၊ပေႃးမႂ်းၵမ်ၵျၢင်ႉၸွမ်းထုင်းၽိင်ႈတြႃးလႂ်၊ဢိၵ်ႇတင်းပိင်းၺၢပ်ႈတြႃးၵဝ်လႂ်ၸိုင်၊ၵဝ်တၵ်းဢဝ်ၵႂၢမ်းၵတိၵႃႈဢၼ်ၵဝ်လၢတ်ႈဝႆႉတီႈပေႃႈမႂ်း တႃႇဝိတ်ႈ၊ ၼၼ်ႉႁႂ်ႈပဵၼ်မႃးတီႈမႂ်းဢေႃႈ။-
ၵဝ်တၵ်းယူႇၵႃႈၼႂ်းၵႄႈၵူၼ်းမဵဝ်း ဢိသရေး၊ တင်းလၢႆသေယဝ်ႉ၊တၵ်းဢမ်ႇၸုၼ်ႉပႅတ်ႈၵူၼ်းၵဝ်မဵဝ်း ဢိသရေး၊ ၼႆႉလႃးလႃး၊” ဝႃႈၼင်ႇၼႆဢေႃႈ။
ၼင်ႇၼၼ်လႄႈ သေႃးလမုၼ်ႇ၊ တႄႇႁဵတ်းၵျွင်းပိၵ်ႈမၢၼ်ႇၸဝ်ႈယဝ်ႉတူဝ်ႈလီငၢမ်းဢေႃႈ။
ၽၢႆႇတၢင်းၼႂ်းၽႃၼၼ်ႉမၼ်းဢဝ်ပႅၼ်ႈမႆႉဢႃႇရိတ်ႉၵင်ႈၵႃႈၼိူဝ်ၽၢၵ်ႈပိုၼ်ႉႁိူၼ်းၵႂႃႇတေႃႇထိုင်ႁွတ်ႈထိူင်းမၼ်း၊ဢိၵ်ႇတင်းၽၢၵ်ႈပိုၼ်ႉႁိူၼ်းမၼ်းပဵၼ်ပႅၼ်ႈမႆႉပႅၵ်ႇဢေႃႈ။-
ၵႃႈၼႂ်းမၼ်းၽၢႆႇတၢင်းလင်ၼၼ်ႉမီးလုၵ်းဢၼ်ႁွင်ႉဝႃႈ၊ထႃႇၼႃႉတီႈဢၼ်မူတ်းၸၢင်ႇသေပိူၼ်ႈၼၼ်ႉလႄႈၼႃႈၵႂၢင်ႈၼႃႈယၢဝ်းမီးသၢဝ်းသွၵ်ႇပၼ်ႇႁွပ်ႈလူၺ်ႈပႅၼ်ႈမႆႉဢႃႇရိတ်ႉ ၵင်ႈဝႆႉၵႃႈၼိူဝ်ၽၢၵ်ႈပိုၼ်ႉႁိူၼ်းၶိုၼ်ႈၵႂႃႇတေႃႇထိုင်ႁွတ်ႈတီႈမုင်းမၼ်းဢေႃႈ။-
ႁွင်ႈလူင်ဢၼ်မီးၽၢႆႇၼႃႈထႃႇၼႃႉတီႈမူတ်းၸၢင်ႇသေပိူၼ်ႈၼၼ်ႉဢၼ်ယၢဝ်းမၼ်းမီးသီႇသိပ်းသွၵ်ႇဢေႃႈ။-
ၵႃႈၼိူဝ်မႆႉပႅၼ်ႈဢႃႇရိတ်ႉၸိူဝ်းၼၼ်ႉ၊ၶွၵ်းလၢႆးပုင်ႇႁၢင်ႈမၢၵ်ႇၼမ်ႉတဝ်ႈလႂ်၊လၢႆးတုမ်ႇမွၵ်ႇလႂ်၊ဢိၵ်ႇတင်းလၢႆးလူင်ႇမွၵ်ႇလႂ်ဝႆႉဢေႃႈ။ တင်းသဵင်ႈတင်းမူတ်းပဵၼ်ပႅၼ်ႈမႆႉဢႃႇရိတ်ႉၵူၺ်းၵူၺ်းလႄႈဢမ်ႇလႆႈႁၼ်မၢၵ်ႇႁိၼ်လႃးလႃး။
ၵႃႈတီႈတၢင်းလင်ၵျွင်းပိၵ်ႈမၢၼ်ႇၸဝ်ႈၵႃႈတီႈၸၼ်ႉၼႂ်းၼႂ်းမၼ်းၼၼ်ႉ၊ႁဵတ်းလုၵ်းဝႆႉပုၼ်ႈဢၼ်တၵ်းဝၢင်းတိူၵ်ႈပတိၺိၺ်ႇ ထႃႇဝရႃႉၽြႃး၊ ဢေႃႈ။-
လုၵ်းၸၼ်ႉၼႂ်းၼႆႉၼႃႈယၢဝ်းမီးသၢဝ်းသွၵ်ႇ၊ၼႃႈၵႂၢင်ႈသၢဝ်းသွၵ်ႇတၢင်းသုင်မီးသၢဝ်းသွၵ်ႇသေယဝ်ႉ၊ဢဝ်ၶမ်းလွတ်ႈငၢၼ်ႇဢုမ်ႇဝႆႉဢေႃႈ။ ၶဵင်ႇတၢင်းလူႇၸမ်ႉ၊ဢဝ်ပႅၼ်ႈမႆႉဢႃႇရိတ်ႉႁူမ်ႇတပ်ႉဝႆႉဢေႃႈ။-
ၵႃႈၼႂ်းၵျွင်းပိၵ်ႈမၢၼ်ႇၸဝ်ႈၸမ်ႉ၊ဢဝ်ၶမ်းလွတ်ႈငၢၼ်ႇဢုမ်ႇဝႆႉ၊သမ်ႉဢဝ်သၢႆသွႆႈၶမ်းမတ်ႉလၢမ်ႈဝႆႉၵႃႈတီႈႁူးၽၵ်းတူၸၼ်ႉၼႂ်းဢၼ်ဢဝ်ၶမ်းဢုမ်ႇႁေႃႇၼၼ်ႉဝႆႉဢေႃႈ။-
ၵႃႈတီႈၽၢႆႇတၢင်းၼႂ်းၵျွင်းပိၵ်ႈမၢၼ်ႇၸဝ်ႈၸိုင်၊ဢဝ်ၶမ်းဢုမ်ႇဝႆႉၸွတ်ႇတူဝ်ႈၵူႈတီႈၵူႈလႅၼ်ဢေႃႈ။ ၶဵင်ႇတၢင်းလူႇဢၼ်မီးၼႂ်းလုၵ်းၸၼ်ႉၼႂ်းၼၼ်ႉၵေႃႈဢဝ်ၶမ်းဢုမ်ႇႁေႃႇဝႆႉၼင်ႇၵဝ်ႇဢေႃႈ။
ၵႃႈၼႂ်းလုၵ်းထႃႇၼႃႉတီႈမူတ်းၸၢင်ႇသေပိူၼ်ႈၼၼ်ႉ၊မၼ်းဢဝ်မႆႉသၢၼ်ႇလုၼ်ႇႁဵတ်းတူဝ်ၶေႇရုၽဵမ်ႇ သွင်ပႃးဢၼ်မီးတၢင်းသုင်သိပ်းသွၵ်ႇၼင်ႇၵၼ်ၼၼ်ႉဝႆႉဢေႃႈ။-
တူဝ်ၶေႇရုၽဵမ်ႇသွင်ပႃးၼၼ်ႉဢဝ်ဝၢင်းတၢမ်ၶၢင်ႈၵၼ်ယူႇၵႃႈၼႂ်းထႃႇၼႃႉတီႈမူတ်းၸၢင်ႇသေပိူၼ်ႈၼၼ်ႉလႄႈပၢႆပိၵ်ႇၶဝ်သွင်ၶွၼ်တိူဝ်ႉၸပ်းၵၼ်ယူႇၵႃႈၼႂ်းၶိုင်ႈၵၢင်လုၵ်းၼၼ်ႉ၊ဢိၵ်ႇတင်းပၢႆပိၵ်ႇၶဝ်သွင်ၶွၼ်တၢင်ႇၽၢႆႇၼၼ်ႉသမ်ႉတိူဝ်ႉၸပ်းၽႃယူႇတင်းသွင်ၽၢႆႇဢေႃႈ။-
ၶေႇရုၽဵမ်ႇၸိူဝ်းၼၼ်ႉဢဝ်ၶမ်းဢုမ်ႇဝႆႉဢေႃႈ။
ၵႃႈပဵၼ်ၽႃၵႃႈတီႈလုၵ်းလူင်ဢိၵ်ႇတင်းၵႃႈတီႈလုၵ်းၸၼ်ႉၼႂ်းပုၼ်ႉၼၼ်ႉမၼ်းတွင်ႈႁဵတ်းႁၢင်ႈၶေႇရုၽဵမ်ႇလႂ်၊ႁၢင်ႈတူၼ်ႈထၢၼ်လႂ်၊ႁၢင်ႈလူင်ႇမွၵ်ႇလႂ်၊ႁၢင်ႈၶိူင်ႈဝႆႉဢေႃႈ။-
ၽၢၵ်ႈပိုၼ်ႉႁိူၼ်းလုၵ်းၸိူဝ်းၼၼ်ႉၵေႃႈဢဝ်ၶမ်းဢုမ်ႇဝႆႉတင်းမူတ်းဢေႃႈ။
ၼႃႈၽၵ်းတူဢၼ်ၶဝ်ႈၸူးလုၵ်းထႃႇၼႃႉတီႈမူတ်းၸၢင်ႇသေပိူၼ်ႈၼၼ်ႉဢဝ်မႆႉပႅၼ်ႈသၢၼ်ႇလုၼ်ႇသွင်မႂ်ႁဵတ်းဝႆႉလႄႈၶိုဝ်ႇၽၵ်းတူၼၼ်ႉႁဵတ်းပဵၼ်ၸဵင်ႇလႅမ်ဝႆႉဢေႃႈ။-
မႂ်ၽၵ်းတူသွင်မႂ်ၼၼ်ႉ၊မၼ်းတွင်ႈႁဵတ်းႁၢင်ႈၶေႇရုၽဵမ်ႇလႂ်၊ႁၢင်ႈတူၼ်ႈထၢၼ်လႂ်၊ႁၢင်ႈလူင်ႇမွၵ်ႇလႂ်၊ႁၢင်ႈၶိူင်ႈဝႆႉလႄႈဢဝ်ၶမ်းဢုမ်ႇဝႆႉတင်းမူတ်းဢေႃႈ။-
ပုၼ်ႈတႃႇႁူးၽၵ်းတူဢၼ်ၶဝ်ႈၸူးလုၵ်းလူင်ၸမ်ႉ၊ႁဵတ်းပဵၼ်သီႇၸဵင်ႇဝႆႉလႄႈၶိုဝ်ႇမၼ်းတင်းလၢႆဢဝ်မႆႉသၢၼ်ႇလုၼ်ႇႁဵတ်းဝႆႉဢေႃႈ။-
မႂ်ၽၵ်းတူတင်းသွင်မႂ်ပဵၼ်မႂ်တူပ်ႉလႄႈဢဝ်မႆႉပႅၵ်ႇႁဵတ်းဝႆႉဢေႃႈ။-
တီႈမႂ်ၽၵ်းတူၸိူဝ်းၼၼ်ႉၵေႃႈ၊မၼ်းတွင်ႈႁဵတ်းၶွၵ်းႁဵတ်းႁၢင်ႈၶေႇရုၽဵမ်ႇလႂ်၊ႁၢင်ႈတူၼ်ႈထၢၼ်လႂ်၊ႁၢင်ႈလူင်ႇမွၵ်ႇလႂ်ႁၢင်ႈၶိူင်ႈဝႆႉဢေႃႈ။
မၼ်းသမ်ႉႁဵတ်းၸၢၼ်းၽၢႆႇတၢင်းၼႂ်းဝႆႉၵႃႈတီႈၽၢႆႇၼႃႈၵျွင်းပိၵ်ႈမၢၼ်ႇၸဝ်ႈလႄႈဢဝ်မၢၵ်ႇႁိၼ်ဢၼ်ထၢၵ်ႇဢၼ်သပ်းၵေႃႇႁဵတ်းသၢမ်ထႅဝ်သေယဝ်ႉ၊သမ်ႉသႂ်ႇမႆႉဢႃႇရိတ်ႉႁႂ်ႈပဵၼ်ၸၼ်ႉပဵၼ်ၸၼ်ႉဝႆႉဢေႃႈ။
ၼႂ်းပီဢၼ် သေႃးလမုၼ်ႇ၊ ၸၢမ်ႇႁၢင်ႈၸၢမ်ႇႁေႃလႆႈသီႇပီလိူၼ် ၸိၽႃႉ၊ ၼၼ်ႉၶဝ်ဢွၼ်ၵၼ်ၶျႃးငဝ်ႈႁၢၵ်ႈတိူၵ်ႈၵျွင်းပိၵ်ႈမၢၼ်ႇၸဝ်ႈ ထႃႇဝရႃႉၽြႃး၊ သေယဝ်ႉ၊-
ၼႂ်းပီဢၼ်မၼ်းၸၢမ်ႇႁၢင်ႈၸၢမ်ႇႁေႃလႆႈသိပ်းဢဵတ်းပီလိူၼ်ပႅတ်ႇဢၼ်ဝႃႈ၊လိူၼ် ပုရႃႉ၊ ၼၼ်ႉၵျွင်းပိၵ်ႈမၢၼ်ႇၸဝ်ႈယဝ်ႉတူဝ်ႈ၊ဢိၵ်ႇတင်းၵၢၼ်ယွႆႈၵၢၼ်ယႅမ်းၵႃႈမီးၸွမ်းၵႃႈၼင်ႇဢၼ်ပုင်ႇၸၢမ်ႇပုင်ႇႁၢင်ႈမၼ်းၼၼ်ႉဢေႃႈ။ မၼ်းလႆႈတႄႇႁဵတ်းၸဵတ်းပီတဵမ်တဵမ်ဢေႃႈ။
သေႃးလမုၼ်ႇ၊ တႄႇႁဵတ်းႁေႃပုၼ်ႈတူဝ်ၸဝ်ႈၵဝ်ႇလႄႈလႆႈႁဵတ်းသိပ်းသၢမ်ပီတဵမ်တဵမ်ဢေႃႈ။-
မၼ်းတႄႇႁဵတ်း ႁေႃၸဝ်ႈထိူၼ်ႇလေႇပၼုၼ်ႇ၊ ဢၼ်ၼႃႈယၢဝ်းမၼ်းမီးပၢၵ်ႇသွၵ်ႇ၊ၼႃႈၵႂၢင်ႈႁႃႈသိပ်းသွၵ်ႇ၊တၢင်းသုင်သၢမ်သိပ်းသွၵ်ႇဢေႃႈ။ သမ်ႉမီးသဝ်မႆႉဢႃႇရိတ်ႉသီႇထႅဝ်ဢၼ်ဢဝ်ႁူၼ်းမႆႉဢႃႇရိတ်ႉၵၢႆႇသႂ်ႇဝႆႉၼၼ်ႉဢေႃႈ။-
မၼ်းဢဝ်ပႅၼ်ႈမႆႉဢႃႇရိတ်ႉမုင်းၵႃႈၼိူဝ်မႆႉၵွၼ်သီႇသိပ်းႁႃႈၵူႈ၊ဢၼ်ၼႂ်းယေႈဝူင်ႈသဝ်မီးသိပ်းႁႃႈၵူႈလႄႈၵၢႆႇသႂ်ႇၵႃႈၼိူဝ်ပၢႆသဝ်ၼၼ်ႉဢေႃႈ။-
ၽႃသၢင်ႉယေႈၽၢၵ်ႇယေႈၽၢၵ်ႇၼၼ်ႉသမ်ႉမီးႁူးလၢင်းတဵၼ်သၢမ်ထႅဝ်မိူၼ်ၵၼ်လႄႈမီးတေႃႉၼႃႈၵၼ်သိုဝ်ႈၵၼ်ပဵၼ်ႁၢၼ်ႉပဵၼ်ႁၢၼ်ႉဝႆႉဢေႃႈ။-
ႁူးၽၵ်းတူတင်းလၢႆဢိၵ်ႇတင်းႁူးလၢင်းတဵၼ်တင်းလၢႆ၊မီးသဝ်သီႇၸဵင်ႇလႄႈႁူးလၢင်းတဵၼ်သၢမ်ထႅဝ်ၸိူဝ်းၼၼ်ႉမီးတေႃႇၼႃႈၵၼ်သိုဝ်ႈၵၼ်တင်းႁူးလၢင်းတဵၼ်တီႈၽႃသၢင်ႉတၢင်ႇၽၢႆႇၼၼ်ႉဢေႃႈ။
မၼ်းႁဵတ်းလုၵ်းလူင်ဢၼ်မီးသဝ်၊ဢၼ်ၼႃႈယၢဝ်းမၼ်းမီးႁႃႈသိပ်းသွၵ်ႇ၊ၼႃႈၵႂၢင်ႈသၢမ်သိပ်းသွၵ်ႇၼၼ်ႉဢေႃႈ။ လုၵ်းလူင်ၵႃႈတီႈၽၢႆႇၼႃႈၸဝ်ႈၼၼ်ႉမီးၸၢၼ်းဢၼ်ႁဵတ်းတုပ်ႈသေလႄႈမုင်းဝႆႉဢေႃႈ။
မၼ်းႁဵတ်းလုၵ်းလူင်ပလၢင်ႇၸဝ်ႈဢၼ်မီးၸိုဝ်ႈႁွင်ႉဝႃႈ၊ လုၵ်းႁွင်ႈလူင်တြႃးဢၼ်သိုဝ်ႈတေႃႇ၊ တီႈဢၼ်မၼ်းၸီႇယၢင်ႇဢမုလႄႈဢဝ်မႆႉပႅၼ်ႈမႆႉဢႃႇရိတ်ႉသိူဝ်ႇဝႆႉတဵမ်တဵမ်ဢေႃႈ။
ႁေႃၸဝ်ႈတီႈဢၼ်မၼ်းယူႇၼၼ်ႉ၊တႄႇႁဵတ်းဝႆႉၽၢႆႇတၢင်းလင် လုၵ်းလူင်တြႃးဢၼ်သိုဝ်ႈတေႃႇ၊ ၼၼ်ႉလႄႈႁေႃၸဝ်ႈၸိူဝ်းၼၼ်ႉႁဵတ်းမိူၼ်မိူၼ်ၵၼ်ဢေႃႈ။ ႁေႃၼၢင်းႁေႃၶမ်းဢၼ်ပဵၼ်လုၵ်ႈယိင်းၶုၼ်ႁေႃၶမ်းမိူင်း ဢေးၵျိပ်ႉ၊ ၼၼ်ႉၵေႃႈႁဵတ်းႁႂ်ႈမိူၼ်ၵၼ်ဝႆႉဢေႃႈ။
ႁေႃၸဝ်ႈတင်းသဵင်ႈတင်းလူင်ဢဝ်ၵႃႈတီႈၽၢႆႇၼွၵ်ႈတေႃႇထိုင်ႁွတ်ႈပၢင်ႇဝၢင်းလူင်၊ဢိၵ်ႇတင်းဢဝ်ၵႃႈတီႈငဝ်ႈႁၢၵ်ႈမၼ်းတေႃႇထိုင်ႁွတ်ႈၸၢႆးၶႃးၸိူဝ်းၼၼ်ႉ၊မၼ်းဢဝ်မၢၵ်ႇႁိၼ်ဢၼ်ထိူၵ်ႈၵႃႈထိူၵ်ႈၶၼ်ထၢၵ်ႇသပ်းဢဝ်ၸပ်းမႅၼ်ႈဢၼ်တႅၵ်ႈဝႆႉၼၼ်ႉလႄႈဢဝ်လဵၵ်းလိူဝ်ႈလိူဝ်ႈဢဝ်ၸဵမ်ၼႃႈၸဵမ်လင်ၸိူဝ်းၼၼ်ႉလႄႈၵေႃႇႁဵတ်းယဝ်ႉတူဝ်ႈဝႆႉဢေႃႈ။-
ငဝ်ႈႁၢၵ်ႈမၼ်းၼၼ်ႉ၊ဢဝ်မၢၵ်ႇႁိၼ်ထိူၵ်ႈၵႃႈထိူၵ်ႈၶၼ်၊ဢၼ်ယႂ်ႇဢၼ်လူင်ဢၼ်ၼႃႈမၼ်းမီးပႅတ်ႇသွၵ်ႇလႄႈသိပ်းသွၵ်ႇၸိူဝ်းၼၼ်ႉၵေႃႇႁဵတ်းယဝ်ႉတူဝ်ႈဝႆႉဢေႃႈ။-
ၵႃႈၼိူဝ်မၼ်းသမ်ႉဢဝ်မၢၵ်ႇႁိၼ်ဢၼ်ထိူၵ်ႈၵႃႈထိူၵ်ႈၶၼ်ထၢၵ်ႇသပ်းဢဝ်ၸပ်းမႅၼ်ႈဢၼ်တႅၵ်ႈဝႆႉၼၼ်ႉ၊ဢိၵ်ႇတင်းႁူၼ်းမႆႉဢႃႇရိတ်ႉဢေႃႈ။-
ႁေႃၸဝ်ႈဢိၵ်ႇတင်းပၢင်ႇဝၢင်းၸၼ်ႉၼႂ်းၵျွင်းပိၵ်ႈမၢၼ်ႇၸဝ်ႈ၊တင်းၽၵ်းတူဢၼ်ၶဝ်ႈၸူးၵျွင်းပိၵ်ႈမၢၼ်ႇၸဝ်ႈၸိူဝ်းၼၼ်ႉဢဝ်ႁိၼ်ဢၼ်ထၢၵ်ႇဢၼ်သပ်းၵေႃႇႁဵတ်းသၢမ်ထႅဝ်သေယဝ်ႉ၊ဢဝ်မႆႉဢႃႇရိတ်ႉသႂ်ႇၼိုင်ႈထႅဝ်သေလႄႈပဵၼ်ၸၼ်ႉပဵၼ်ၸၼ်ႉဝႆႉဢေႃႈ။
ၶုၼ်ႁေႃၶမ်း သေႃးလမုၼ်ႇ၊ ပွႆႇၸႂ်ႉၵူၼ်းၵႂႃႇၵႃႈတီႈဝဵင်း တုရု၊ ႁႂ်ႈႁွင်ႉဢဝ် ႁိရမ်ႇ၊ မႃးဢေႃႈ။-
ႁိရမ်ႇ၊ ၼၼ်ႉပဵၼ်လုၵ်ႈၸၢႆးမႄႈမၢႆႈမႄႈယိင်းၸိူဝ်ႉၶိူဝ်း ၼပ်ႉထလိ၊ လႄႈပေႃႈမၼ်းၸမ်ႉ၊ပဵၼ်ၵူၼ်းဝဵင်း တုရု၊ ဢၼ်ပဵၼ်ၸၢင်ႈတွင်းလိူင်ၼၼ်ႉဢေႃႈ။ ႁိရမ်ႇ၊ ၼၼ်ႉမီးပိင်ႇၺႃႇဢၼ်ၵတ်ႉဢၼ်ၶၼ်ဢၼ်ၸၢင်ႈႁဵတ်းတွင်းလိူင်ၵူႈၸိူဝ်ႉၵူႈမဵဝ်းဢေႃႈ။ မၼ်းမႃးၵႃႈတီႈၶုၼ်ႁေႃၶမ်း သေႃးလမုၼ်ႇ၊ လႄႈႁဵတ်းပၼ်ၵၢၼ်ၵူႈၸိူဝ်ႉၵူႈပိူင်ၵႃႈဢၼ်ၸႂ်ႉမၼ်းႁဵတ်းၼၼ်ႉဢေႃႈ။
မၼ်းၼၼ်ႉလေႃႇႁဵတ်းသဝ်တွင်းလိူင်သွင်လႅမ်ႈဢၼ်တၢင်းသုင်မၼ်းယေႈလႅမ်ႈမီးသိပ်းပႅတ်ႇသွၵ်ႇ၊တႅၵ်ႈႁွပ်ႈတင်းယႂ်ႇမၼ်းမီးသိပ်းသွင်သွၵ်ႇၼၼ်ႉသေလႄႈပူၵ်းဝႆႉၵႃႈတီႈၽၵ်းတူၵျွင်းပိၵ်ႈမၢၼ်ႇၸဝ်ႈဢေႃႈ။-
မၼ်းသမ်ႉလေႃႇႁဵတ်းဢၼ်တၵ်းသုပ်းပၢႆသဝ်တွင်းလိူင်သွင်ဢၼ်၊ယေႈဢၼ်တၢင်းသုင်မၼ်းမီးႁႃႈသွၵ်ႇဢေႃႈ။-
ၵႃႈၼိူဝ်ပၢႆႁူဝ်သဝ်တွင်းလိူင်ယေႈဢၼ်ၼၼ်ႉမီးတႃၶႄတွင်းလိူင်ၸဵတ်းဢၼ်ႁၢင်ႈၶိူင်ႈဝႆႉ၊-
ဢိၵ်ႇတင်းႁူၺ်ႇမၢၵ်ႇၸင်ႈတွင်းလိူင်သွင်ထႅဝ်ႁၢင်ႈၶိူင်ႈဝႆႉဢေႃႈ။
ဢၼ်သုပ်းႁူဝ်သဝ်ၸိူဝ်းၼၼ်ႉပဵၼ်ပုင်ႇႁၢင်ႈမွၵ်ႇမူဝ်ဝႆႉလႄႈတၢင်းသုင်မၼ်းမီးသီႇသွၵ်ႇသေယဝ်ႉ၊-
ဢဝ်တၢင်ႇဝႆႉၵႃႈၼိူဝ်တူင်ႇမူၼ်းဢၼ်မီးၵႃႈၼိူဝ်တႃၶႄၼၼ်ႉဢေႃႈ။ သမ်ႉမီးႁူၺ်ႇမၢၵ်ႇၸင်ႈသွင်ပၢၵ်ႇ၊ႁဵတ်းသွင်ထႅဝ်ႁၢင်ႈၶိူင်ႈဝႆႉၵႃႈတီႈႁူဝ်သဝ်ယေႈဢၼ်ၼင်ႇၵၼ်ဢေႃႈ။
ႁိရမ်ႇ၊ ပူၵ်းသဝ်တွင်းလိူင်သွင်လႅမ်ႈၼၼ်ႉၵႃႈတီႈၽၢႆႇၼႃႈၽၵ်းတူၵျွင်းပိၵ်ႈမၢၼ်ႇၸဝ်ႈသေယဝ်ႉ၊လႅမ်ႈၽၢႆႇၸၢၼ်းၼၼ်ႉႁွင်ႉၸိုဝ်ႈဝႃႈ၊ ယႃႇၶိၼ်ႇ၊ ဢိၵ်ႇတင်းလႅမ်ႈၽၢႆႇတၢင်းႁွင်ႇၼၼ်ႉသမ်ႉႁွင်ႉၸိုဝ်ႈဝႃႈ၊ ပေႃႇၸႃႉ၊ ဢေႃႈ။-
ၵႃႈၼိူဝ်ႁူဝ်သဝ်တွင်းလိူင်ၸိူဝ်းၼၼ်ႉပဵၼ်လၢႆးမွၵ်ႇမူဝ်ဝႆႉဢေႃႈ။ ၼင်ႇၼၼ်လႄႈတၢင်းဢၼ်ႁဵတ်းသဝ်ၸိူဝ်းၼၼ်ႉယဝ်ႉတူဝ်ႈယဝ်ႉဢေႃႈ။
ႁိရမ်ႇ၊ သမ်ႉလေႃႇႁဵတ်းဢၢင်ႇၼမ်ႉတွင်းလိူင်လူင်ဢၼ်မူၼ်းၼၼ်ႉဢၼ်ၼိုင်ႈလႄႈတၢင်းလိုၵ်ႉမၼ်းမီးႁႃႈသွၵ်ႈ၊တၢင်းၵႂၢင်ႈၶွပ်ႇတေႃႇၶွပ်ႇမီးသိပ်းသွၵ်ႇလႄႈတႅၵ်ႈႁွပ်ႈပၼ်ႇမူၼ်းမီးသၢမ်သိပ်းသွၵ်ႇဢေႃႈ။-
ၵႃႈတႂ်ႈၶွပ်ႇမၼ်းၼၼ်ႉမီးမၢၵ်ႇၼမ်ႉတဝ်ႈတွင်းလိူင်လဵပ်ႈႁွပ်ႈသေလႄႈၼႂ်းဝူင်ႈၵၢင်ယေႈသွၵ်ႇမီးသိပ်းလုၵ်ႈၼင်ႇၵၼ်၊ႁဵတ်းပဵၼ်သွင်ထႅဝ်သေယဝ်ႉ၊လေႃႇႁဵတ်းပဵၼ်ၼိူဝ်ႉလဵဝ်ၵၼ်တင်းထၢင်ၼမ်ႉဝႆႉဢေႃႈ။-
ဢၢင်ႇၼမ်ႉၼၼ်ႉတၢင်ႇဝႆႉၵႃႈၼိူဝ်ဝူဝ်းပေႃႈတွင်းလိူင်သိပ်းသွင်တူဝ်ဢၼ်သၢမ်တူဝ်ဝၢႆႇၼႃႈၸူးတၢင်းႁွင်ႇ၊သၢမ်တူဝ်ဝၢႆႇၼႃႈၸူးတၢင်းဝၼ်းတူၵ်း၊သၢမ်တူဝ်ဝၢႆႇၼႃႈၸူးတၢင်းၸၢၼ်း၊သၢမ်တူဝ်ဝၢႆႇၼႃႈၸူးတၢင်းဝၼ်းဢွၵ်ႇဝႆႉဢေႃႈ။-
ဢၢင်ႇၼမ်ႉၼၼ်ႉ၊တၢင်းၼႃမၼ်းမီးၽႃႇမိုဝ်းၼိုင်ႈလႄႈၶွပ်ႇမၼ်းသမ်ႉပဵၼ်လၢႆးမွၵ်ႇမူဝ်ဝႆႉဢေႃႈ။ ဢၢင်ႇၼမ်ႉၼၼ်ႉသႂ်ႇၼမ်ႉလႆႈမိုၼ်ႇပၢႆႁဵင်ႁႃႈပၢၵ်ႇၵႃႇလၢၼ်ႇ ဢေႃႈ။
ႁိရမ်ႇ၊ သမ်ႉႁဵတ်းလေႃႉတွင်းလိူင်သိပ်းလမ်းဢၼ်ယေႈလမ်းမီးတၢင်းယၢဝ်းသီႇသွၵ်ႇ၊ၼႃႈၵႂၢင်ႈသီႇသွၵ်ႇ၊တၢင်းသုင်သၢမ်သွၵ်ႇၼၼ်ႉဢေႃႈ။-
ပုင်ႇႁၢင်ႈလေႃႉၼၼ်ႉပဵၼ်ၶႅပ်းသီႇၸဵင်ႇသေပႃးတင်းဢၼ်ၺၢပ်ႈမၼ်းလႄႈတင်ႈဝႆႉဢေႃႈ။-
ၵႃႈတီႈၶႅပ်းၸိူဝ်းၼၼ်ႉမီးလၢႆးႁၢင်ႈသၢင်ႇသီႈလႂ်၊ႁၢင်ႈဝူဝ်းပေႃႈလႂ်၊တင်းႁၢင်ႈၶေႇရုၽဵမ်ႇ လႂ်ဝႆႉ၊ဢိၵ်ႇတင်းၵႃႈၼိူဝ်ဢၼ်ၺၢပ်ႈမၼ်းၼၼ်ႉၵေႃႈမီးသွႆႈမွၵ်ႇႁွႆႈယူႇၸဵမ်တႂ်ႈၸဵမ်ၼိူဝ်ၵႃႈတီႈႁူဝ်သၢင်ႇသီႈလႂ်၊တီႈတူဝ်ဝူဝ်းပေႃႈလႂ်၊ဢိၵ်ႇတင်းၶေႇရုၽဵမ်ႇလႂ်ၸိူဝ်းၼၼ်ႉဝႆႉဢေႃႈ။-
ၵႃႈတီႈလေႃႉယေႈလမ်းၼၼ်ႉမီးမၢၵ်ႇလေႃႉတွင်းလိူင်သီႇလုၵ်ႈၼင်ႇၵၼ်ဢိၵ်ႇတင်းၵႅၼ်မၢၵ်ႇလေႃႉတွင်းလိူင်မၼ်းဢေႃႈ။ ၵႃႈတီႈသီႇၸဵင်ႇမၼ်းၼၼ်ႉမီးႁူဝ်မႃႇတွင်းလိူင်တင်းလၢႆၵမ်ႉထွၵ်ႈမေႃႈဢၢင်ႇဢၼ်ၼိုင်ႈလႄႈၵႃႈတီႈႁူဝ်မႃႇၸိူဝ်းၼၼ်ႉမီးသွႆႈမွၵ်ႇႁွႆႈဝႆႉၵူႈဢၼ်ဢေႃႈ။-
ၵႃႈၼိူဝ်ၶွပ်ႇလေႃႉၼၼ်ႉ၊မီးၶွပ်ႇမူၼ်းပုၼ်ႈတႃႇႁွင်းၵူၼ်ႈမေႃႈဢၢင်ႇၼၼ်ႉလႄႈ၊ႁူမၼ်းသုင်ပူၼ်ႉၶွပ်ႇလေႃႉၵႂႃႇသွၵ်ႇၼိုင်ႈ၊ဢိၵ်ႇတင်းၵူၼ်ႈမၼ်းယွၼ်ႇလူင်းၼႂ်းမၼ်းၵႂႃႇသွၵ်ႇၶိုပ်ႈဢေႃႈ။ ၵႃႈတီႈႁူႁိမ်းပၢၵ်ႇၼၼ်ႉၵေႃႈမီးလၢႆးမွၵ်ႇလၢႆးမႂ်ဝႆႉဢေႃႈ။-
မၢၵ်ႇလေႃႉၸိူဝ်းၼၼ်ႉသုင်သွၵ်ႇၶိုပ်ႈလႄႈမီးတႂ်ႈၶႅပ်းသီႇၸဵင်ႇၸိူဝ်းၼၼ်ႉသေယဝ်ႉ၊ၵႅၼ်မၢၵ်ႇလေႃႉမၼ်းလေႃႇႁဵတ်းပဵၼ်ၼိူဝ်ႉလဵဝ်ၵၼ်တင်းလေႃႉၼၼ်ႉဢေႃႈ။-
မၢၵ်ႇလေႃႉၸိူဝ်းၼၼ်ႉပဵၼ်မိူၼ်ၸိူဝ်ႉၼင်ႇမၢၵ်ႇလေႃႉရထႃးသေယဝ်ႉ၊ၵႅၼ်မၢၵ်ႇလေႃႉမၼ်း၊ပၼ်ႇတွင်းမၼ်း၊ၵွၼ်မၼ်းတင်းၶွပ်ႇမၼ်းၸိူဝ်းၼၼ်ႉပဵၼ်တွင်းလိူင်သဵင်ႈသဵင်ႈဢေႃႈ။-
ၵႃႈတီႈပိုၼ်ႉသီႇၸဵင်ႇလေႃႉယေႈလမ်းၼၼ်ႉမီးႁူဝ်မႃႇဢၼ်လေႃႇႁဵတ်းပဵၼ်ၼိူဝ်ႉလဵဝ်ၵၼ်တင်းလေႃႉၼၼ်ႉၵမ်ႉထွၵ်ႈဝႆႉဢေႃႈ။-
ၵႃႈၼိူဝ်ၶွပ်ႇလေႃႉၼၼ်ႉမီးဢၼ်ၵူင်ႇမူၼ်းဝႆႉလႄႈသုင်ၶိုပ်ႈၼိုင်ႈဢေႃႈ။ ႁူဝ်မႃႇမၼ်းတင်းမိုဝ်းမၼ်းတင်းလၢႆလေႃႇႁဵတ်းပဵၼ်ၼိူဝ်ႉလဵဝ်ၵၼ်တင်းလေႃႉၼၼ်ႉဢေႃႈ။-
ၵႃႈၼိူဝ်ၶွပ်ႇႁူဝ်မႃႇမၼ်းၸိူဝ်းၼၼ်ႉ၊ဢိၵ်ႇတင်းၶႅပ်းသီႇၸဵင်ႇမၼ်းၸိူဝ်းၼၼ်ႉၵေႃႈမၼ်းၶွၵ်းႁဵတ်းႁၢင်ႈၶေႇရုၽဵမ်ႇ၊ႁၢင်ႈသၢင်ႇသီႈတင်းႁၢင်ႈတူၼ်ႈထၢၼ်တင်းလၢႆၵႃႈတီႈဢၼ်ပဝ်ႇဝႆႉလၢပ်ႈဝႆႉ ၵူႈတီႈၵူႈလႅၼ်၊ဢိၵ်ႇတင်းဢဝ်သွႆႈမွၵ်ႇႁွႆႈဝႆႉႁွပ်ႈႁွပ်ႈဢေႃႈ။-
ၼင်ႇၼၼ်လႄႈမၼ်းႁဵတ်းလေႃႉသိပ်းလမ်းဝႆႉလႄႈႁႂ်ႈပုင်ႇႁၢင်ႈၽၢင်တၢင်းဢၼ်လဵၵ်ႉယႂ်ႇ၊တၢင်းတႅမ်ႇသုင်မၼ်းမိူၼ်ၵၼ်ဝႆႉဢေႃႈ။
ႁိရမ်ႇ၊ သမ်ႉယင်းႁဵတ်းဢၢင်ႇၼမ်ႉတွင်းလိူင်ဢွၼ်ႇသိပ်းလုၵ်ႈ၊ႁႂ်ႈယေႈလုၵ်ႈပဵၼ်ပုၼ်ႈလေႃႉယေႈလမ်းဢေႃႈ။ ပၢၵ်ႇမေႃႈယေႈလုၵ်ႈမီးသီႇသွၵ်ႇလႄႈသႂ်ႇလႆႈၼမ်ႉႁႃႈသိပ်းပုင်းၼင်ႇၵၼ်ဢေႃႈ။-
မၼ်းဢဝ်လေႃႉၸိူဝ်းၼၼ်ႉႁႃႈလမ်းဝႆႉၽၢႆႇတၢင်းၸၢၼ်းၵျွင်းပိၵ်ႈမၢၼ်ႇၸဝ်ႈလႄႈႁႃႈလမ်းသမ်ႉဝႆႉၽၢႆႇတၢင်းႁွင်ႇဢေႃႈ။ ထၢင်ၼမ်ႉၼၼ်ႉၸမ်ႉ၊ဝႆႉၸဵင်ႇၸၢၼ်းဝၼ်းဢွၵ်ႇပုၼ်ႉဢေႃႈ။
ၶုၼ်ႁေႃၶမ်းလေႃႇသွၼ်းႁဵတ်းၶိူင်ႈပိူင်ၸိူဝ်းၼၼ်ႉလူၺ်ႈထၢင်လိၼ်ၼဵဝ်ၵႃႈတီႈပၢင်ႇပဵင်းၼမ်ႉ ယေႃးတၢၼ်ႇ၊ ဝူင်ႈၵၢင်ဝဵင်း သုၵုတ်ႉ၊ တင်းဝဵင်း ၸႃႇရတၼ်ႇ၊ ဢေႃႈ။-
သေႃးလမုၼ်ႇ၊ ဢမ်ႇလႆႈၸင်ႈလႆႈႁိဝ်ႈၼမ်ႉၼၵ်းတွင်းလိူင်ဢၼ်လေႃႇႁဵတ်းၸိူဝ်းၼၼ်ႉ၊ၵွပ်ႈပိူဝ်ႈဢၼ်ၼမ်ၼႃႇလူင်လၢင်ၼၼ်ႉဢေႃႈ။ ၼင်ႇၼၼ်လႄႈၽူႈလႂ်သေၵေႃႉသေၵူၼ်းဢမ်ႇႁုၼမ်ႉၼၵ်းၸိူဝ်းၼၼ်ႉ၊မီးၵႃႈႁိုဝ်ၼၼ်ႉလႆႈ။
သေႃးလမုၼ်ႇ၊ သမ်ႉယင်းဢဝ်တင်းၶမ်းလွတ်ႈငၢၼ်ႇႁဵတ်းၶိူင်ႈပိူင်ဢၼ်ၸၢပ်ႈသႅင်ႇၵၼ်တင်းၵျွင်းပိၵ်ႈမၢၼ်ႇၸဝ်ႈဢေႃႈ။ ဢၼ်ၸိူဝ်းၼၼ်ႉၸမ်ႉ၊ပဵၼ်ၶဵင်ႇတၢင်းလူႇ၊ၽိူၼ်ဢၼ်သၢၵ်ႈလူႇၶဝ်ႈမုၼ်းၽၢႆႇၼႃႈၽြႃးပဵၼ်ၸဝ်ႈ၊-
တိၼ်ၵွၵ်းၽႆးသိပ်းဢၼ်၊ဢၼ်မီးၽၢႆႇၼႃႈထႃႇၼႃႉတီႈမူတ်းၸၢင်ႇသေပိူၼ်ႈဢၼ်ယူႇၽၢႆႇတၢင်းၸၢၼ်းႁႃႈဢၼ်၊ၽၢႆႇတၢင်းႁွင်ႇႁႃႈဢၼ်ၼၼ်ႉ၊ဢိၵ်ႇတင်းမွၵ်ႇၶမ်း၊ဝၢၼ်ႇတႆႈၽႆး၊ၵိမ်းၺၢပ်ႈတင်းလၢႆ၊-
မေႃႈဢၢင်ႇလႂ်၊ၵိမ်းမွတ်ႇၽႆးလႂ်၊ၸေႃႉလႂ်၊ဝၢၼ်ႇလႂ်၊ဢိၵ်ႇတင်းၽၢင်ၽႆးလႂ်၊ပတ်ႉတႃႇပုၼ်ႈၽၵ်းတူထႃႇၼႃႉတီႈမူတ်းၸၢင်ႇသေပိူၼ်ႈ၊ဢိၵ်ႇတင်းၽၵ်းတူၽၢႆႇတၢင်းၼွၵ်ႈၵျွင်းပိၵ်ႈမၢၼ်ႇၸဝ်ႈလႂ်ၸိူဝ်းၼၼ်ႉဢေႃႈ။ ဢၼ်ၸိူဝ်းၼႆႉဢဝ်တင်းၶမ်းလွတ်ႈငၢၼ်ႇႁဵတ်းယဝ်ႉတူဝ်ႈဝႆႉဢေႃႈ။
ၼင်ႇၼၼ်လႄႈၶိူင်ႈပိူင်ဢၼ်ၶုၼ်ႁေႃၶမ်း သေႃးလမုၼ်ႇ၊ သၢင်ႈႁဵတ်းပုၼ်ႈၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ၼၼ်ႉယဝ်ႉတူဝ်ႈသေယဝ်ႉ၊မၼ်းဢဝ်ၶိူင်ႈပိူင်ဢၼ်ပေႃႈမၼ်း တႃႇဝိတ်ႈ၊ လူႇတၢၼ်းဝႆႉငိုၼ်း၊ၶမ်း၊ဢိၵ်ႇတင်းၶိူင်ႈပိူင်ၸိူဝ်းၼၼ်ႉမႃးသႂ်ႇဝႆႉၵႃႈၼႂ်းတိူၵ်ႈၽၼ်ႇတႃႇၵျွင်းပိၵ်ႈမၢၼ်ႇ ထႃႇဝရႃႉၽြႃး၊ သေဢေႃႈ။
မိူဝ်ႈၼၼ်ႉၶုၼ်ႁေႃၶမ်း သေႃးလမုၼ်ႇ၊ ႁွင်ႉဢဝ်ၵူၼ်းဢၼ်ပဵၼ်ၵႄႇပဵၼ်ႁူဝ်ၸိူဝ်ႉၶိူဝ်းမဵဝ်း ဢိသရေး၊ တင်းလၢႆဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၶိူဝ်းႁိူၼ်းတင်းလၢႆၼႂ်းမဵဝ်း ဢိသရေး၊ ၼၼ်ႉမႃးၸူးတီႈမၼ်းၵႃႈၼႂ်းဝဵင်း ယေႇရုသလႅမ်ႇ၊ ပုၼ်ႈဢၼ်တၵ်းဢဝ်တိူၵ်ႈပတိၺိၺ်ႇ ထႃႇဝရႃႉၽြႃး၊ ဢွၵ်ႇသေၵႃႈတီႈဝဵင်း ၸိဢုၼ်ႇ၊ ဢၼ်ဝႃႈ၊ဝဵင်း တႃႇဝိတ်ႈ၊ ၼၼ်ႉမႃးၵႃႈတီႈၵျွင်းပိၵ်ႈမၢၼ်ႇၸဝ်ႈဢေႃႈ။-
ၵူၼ်းတင်းလၢႆဢွၼ်ၵၼ်မႃးၸုတုမ်ၼႂ်းၸူဝ်ႈၶၢဝ်းပွႆးသုမ်ႉထဵင်ဢၼ်ႁဵတ်းၼႂ်းလိူၼ် ဢေးႀၼိမ်း၊ ၼၼ်ႉဢေႃႈ။-
မိူဝ်ႈဢၼ်ၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆမႃးၽွမ်ႉယဝ်ႉၼၼ်ႉၸိုင်၊ယဵၸ်ႈပရေႃးႁဵၵ်ႈ တင်းလၢႆဢွၼ်ၵၼ်ယုၵ်ႉတိူၵ်ႈပတိၺိၺ်ႇၸဝ်ႈလႄႈ၊-
ႁၢမ်မႃးၵႃႈတီႈၵျွင်းပိၵ်ႈမၢၼ်ႇၸဝ်ႈဢေႃႈ။ ၵူၼ်းမဵဝ်း လေႇဝိ၊ တင်းလၢႆ၊ဢိၵ်ႇတင်းယဵၸ်ႈပရေႃးႁဵၵ်ႈတင်းလၢႆဢွၼ်ၵၼ်တေႃႉဢဝ်သုမ်ႉထဵင်ၸဝ်ႈၼၼ်ႉ၊ဢိၵ်ႇတင်းၶိူင်ႈပိူင်ဢၼ်မူတ်းၸၢင်ႇၸဝ်ႈၵႃႈမီးၼၼ်ႉမႃးၵႃႈတီႈၵျွင်းပိၵ်ႈမၢၼ်ႇၸဝ်ႈဢေႃႈ။-
ၶုၼ်ႁေႃၶမ်း သေႃးလမုၼ်ႇ၊ ဢိၵ်ႇတင်းၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ၸုတုမ်ၵႃႈတီႈၽၢႆႇၼႃႈတိူၵ်ႈပတိၺိၺ်ႇၸဝ်ႈသေလႄႈသၢၵ်ႈလူႇသူဝ်းဝူဝ်းၼမ်ၼႃႇထၢၼ်ႈပေႃးဢမ်ႇၼပ်ႉဢမ်ႇဢၢၼ်ႇလႆႈၼၼ်ႉဢေႃႈ။-
ၼင်ႇၼၼ်လႄႈယဵၸ်ႈပရေႃးႁဵၵ်ႈတင်းလၢႆႁၢမ်ဢဝ်တိူၵ်ႈပတိၺိၺ်ႇၸဝ်ႈၶဝ်ႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈလႄႈဝၢင်းဝႆႉၵႃႈၼႂ်းထႃႇၼႃႉတီႈဢၼ်မူတ်းၸၢင်ႇသေပိူၼ်ႈၵႃႈတႂ်ႈၶေႇရုၽဵမ်ႇ ဢေႃႈ။-
ပိၵ်ႇၶေႇရုၽဵမ်ႇဢၼ်ၽႄႇၵီႈယူႇၸိူဝ်းၼၼ်ႉ၊မုင်းႁူမ်ႇတိူၵ်ႈပတိၺိၺ်ႇၸဝ်ႈတင်းၵၢၼ်းမၼ်းၸိူဝ်းၼၼ်ႉယူႇဢေႃႈ။-
ၵၢၼ်းၸိူဝ်းၼၼ်ႉယၢဝ်းၼႃႇလႄႈပေႃးယူႇၵႃႈတီႈၽၢႆႇၼႃႈထႃႇၼႃႉတီႈဢၼ်မူတ်းၸၢင်ႇသေပိူၼ်ႈသိုဝ်ႈသိုဝ်ႈသေယဝ်ႉတူၺ်းၸိုင်၊လႆႈႁၼ်ပၢႆၵၢၼ်းၸိူဝ်းၼၼ်ႉယူႇဢေႃႈ။ ပေႃးယူႇတၢင်ႇတီႈတူၺ်းၸိုင်၊ဢမ်ႇႁၼ်လႆႈ။ ၵၢၼ်းၸိူဝ်းၼၼ်ႉယင်းမီးယူႇတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။-
ၵႃႈၼႂ်းတိူၵ်ႈပတိၺိၺ်ႇၸဝ်ႈၼၼ်ႉမီးၶႅပ်းမၢၵ်ႇႁိၼ်သွင်ၶႅပ်းဢၼ် မူဝ်းသေႇ၊ ဢဝ်သႂ်ႇဝႆႉၼႂ်းမၼ်းၵႃႈတီႈလွႆ သိၼႃႉ၊ မိူဝ်ႈဢၼ် ထႃႇဝရႃႉၽြႃး၊ ႁဵတ်းပတိၺိၺ်ႇလူၺ်ႈၵၼ်တင်းၵူၼ်းမဵဝ်း ဢိသရေး၊ တင်းလၢႆယၢမ်းမိူဝ်ႈဢၼ်ၶဝ်ဢွၵ်ႇမိူင်း ဢေးၵျိပ်ႉ၊ မႃးၼၼ်ႉၸိူဝ်းၼၼ်ႉၵူၺ်း၊လိူဝ်သေၼၼ်ႉဢမ်ႇမီးၵႃႈသင်သေၸိူဝ်ႉသေပိူင်။
မိူဝ်ႈဢၼ်ယဵၸ်ႈပရေႃးႁဵၵ်ႈၸိူဝ်းၼၼ်ႉဢွၵ်ႇသေၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉၸိုင်၊မွၵ်ႇၵုမ်ႈတဵမ်ဝႆႉၵႃႈၼႂ်းၼၼ်ႉၵမ်းလဵဝ်သေယဝ်ႉ၊-
မုၼ်ၽုင်းတၢင်းဢၼ် ထႃႇဝရႃႉၽြႃး၊ ၵိင်းဝၢပ်ႈၼၼ်ႉႁိူဝ်ႈႁိူင်းၼႃႇလူင်လၢင်ထၢၼ်ႈပေႃးၶဝ်ဢမ်ႇၸၢင်ႈၶိုၼ်းၶဝ်ႈၵႂႃႇပွင်ႁဵတ်းဢမုၸဝ်ႈလႆႈထႅင်ႈဢေႃႈ။-
မိူဝ်ႈၼၼ်ႉၶုၼ်ႁေႃၶမ်း သေႃးလမုၼ်ႇ၊ ႁဵတ်းပထၼႃႇသူးတွင်းလႄႈဝႃႈ၊ “ ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းၽၢၼ်ႇသၢင်းတႃဝၼ်းဝႆႉၵႃႈၼိူဝ်ၽႃႉၵၢင်ႁၢဝ်သေၵေႃႈ၊ ၸဝ်ႈႁဝ်းယင်းလိူၵ်ႈဢဝ်တီႈယူႇၵႃႈၼႂ်းမွၵ်ႇၵုမ်ႈဢၼ်ၼႃတၼ်ၵၢမ်ႈမိုတ်ႈၼႃႇၼႆႉတီႈၶႃႈဢေႃႈ။
တေႃႈလဵဝ်ၼႆႉၶႃႈၸဝ်ႈတႄႇႁဵတ်းၵျွင်းပိၵ်ႈမၢၼ်ႇဢၼ်ၶိုၵ်ႉဢၼ်ၶမ်ႇ၊ ပုၼ်ႈၸဝ်ႈႁဝ်း၊ႁႂ်ႈပဵၼ်ထႃႇၼႃႉတီႈဢၼ်ၸဝ်ႈႁဝ်းၵိင်းဝၢပ်ႈယူႇတႃႇသေႇၼၼ်ႉတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
ယၢမ်းမိူဝ်ႈဢၼ်ၵူၼ်းတင်းလၢႆယင်းတိုၵ်ႉၸုၵ်းယူႇၵႃႈတီႈၼၼ်ႈၼၼ်ႉၸိုင်၊ၶုၼ်ႁေႃၶမ်း သေႃးလမုၼ်ႇ၊ ၶေႃယွၼ်းတၢင်းလီမၢင်ႇၵလႃႇတီႈၽြႃးပဵၼ်ၸဝ်ႈပုၼ်ႈၶဝ်ဢေႃႈ။-
မၼ်းလၢတ်ႈလႄႈဝႃႈ၊ “ယွင်ႈယေႃး ထႃႇဝရႃႉၽြႃး၊ၽြႃးပဵၼ်ၸဝ်ႈ၊ မဵဝ်း ဢိသရေး၊ ၼၼ်ႉတီႈၶႃႈဢေႃႈ။ လွင်ႈမၼ်းၸမ်ႉ၊မၼ်းၸဝ်ႈပႂ်ႉၵႂၢမ်းၵတိသဵတ်ႈၸႃႇဢၼ်ဝႆႉၵႃႈတီႈၸဝ်ႈပေႃႈၵဝ် တႃႇဝိတ်ႈ၊ မိူဝ်ႈဢၼ်မၼ်းၸဝ်ႈမီးဢမိင်ႉဝႃႈ၊-
‘ၸႃႉၸဵမ်မိူဝ်ႈဢၼ်ၵဝ်ဢဝ်ၵူၼ်းၵဝ်တင်းလၢႆဢွၵ်ႇမိူင်း ဢေးၵျိပ်ႉ၊ မႃးၼၼ်ႉပိၵ်ႉသမ်ႉၵဝ်ဢမ်ႇလိူၵ်ႈဢဝ်ဝဵင်းသေဝဵင်းသေလႂ်ၵႃႈၼႂ်းလိၼ်ၵူၼ်းမဵဝ်း ဢိသရေး၊ ၵႃႈမီးႁႂ်ႈလႆႈတႄႇႁဵတ်းၵျွင်းပိၵ်ႈမၢၼ်ႇၸဝ်ႈပုၼ်ႈတၵ်းပဵၼ်တီႈဢၼ်ၵူၼ်းတင်းလၢႆတၵ်းဝႆႈသႃၵူဝ်းၵႂၢႆႇၵဝ်ၼၼ်ႉဝႆႉသေၵေႃႈ၊ၵဝ်လိူၵ်ႈဢဝ် တႃႇဝိတ်ႈ၊ ႁႂ်ႈဢုပ်ႉပိူင်ႇၵႃႈၼိူဝ်ၵူၼ်းၵဝ်ၼႆႉဝႆႉယဝ်ႉ၊’ ဝႃႈၼင်ႇၼႆဢေႃႈ။
“ၸဝ်ႈပေႃႈၵဝ် တႃႇဝိတ်ႈ၊ ၼၼ်ႉၵျၢမ်ႇဢၢင်ႈတၵ်းတႄႇႁဵတ်းၵျွင်းပိၵ်ႈမၢၼ်ႇၸဝ်ႈပုၼ်ႈတၵ်းဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ၽြႃးပဵၼ်ၸဝ်ႈ၊ ၵူၼ်းမဵဝ်း ဢိသရေး၊ သေၵေႃႈ၊-
ထႃႇဝရႃႉၽြႃး၊ မီးဢမိင်ႉတီႈၸဝ်ႈပေႃႈၵဝ်လႄႈဝႃႈ၊ ‘လွင်ႈတၢင်းဢၼ်မႂ်းၵျၢမ်ႇဢၢင်ႈတၵ်းတႄႇႁဵတ်းၵျွင်းပိၵ်ႈမၢၼ်ႇၸဝ်ႈပုၼ်ႈၵဝ်ၼၼ်ႉပဵၼ်ဢၼ်မၢၼ်ႇဢၼ်မႅၼ်ႈဢေႃႈ။-
ၼႂ်းဝႃႈၼၼ်သေၵေႃႈမႂ်းဢမ်ႇလႆႈတႄႇလႆႈႁဵတ်း။ လုၵ်ႈၸၢႆးဢွၵ်ႇမႂ်းတၵ်းလႆႈတႄႇႁဵတ်းၵျွင်းပိၵ်ႈမၢၼ်ႇၵဝ်ဢေႃႈ၊’ ဝႃႈၼင်ႇၼႆဢေႃႈ။
“တေႃႈလဵဝ်ၼႆႉ၊ ထႃႇဝရႃႉၽြႃး၊ ပႂ်ႉၸွမ်းၵႂၢမ်းၵတိသဵတ်ႈၸႃႇမၼ်းၸဝ်ႈယဝ်ႉ။ ၵဝ်လႆႈပုတ်ႈႁၢင်ႈပုတ်ႈႁေႃၼႂ်းဢရႃႇၶုၼ်ႁေႃၶမ်း ဢိသရေး၊ ယဝ်ႉလႄႈ၊ၵဝ်လႆႈတႄႇႁဵတ်းၵျွင်းပိၵ်ႈမၢၼ်ႇၸဝ်ႈပုၼ်ႈတၵ်းဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ၽြႃးပဵၼ်ၸဝ်ႈ၊ မဵဝ်း ဢိသရေး၊ ၼၼ်ႉယဝ်ႉ။-
ၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉ၊ၵဝ်သမ်ႉမႄးႁႅၼ်းထႃႇၼႃႉတီႈဢၼ်ဝႆႉတိူၵ်ႈပတိၺိၺ်ႇၸဝ်ႈဢၼ်သႂ်ႇပႃးၶႅပ်းႁိၼ်ဢၼ်ပဵၼ်ပတိၺိၺ်ႇဢၼ် ထႃႇဝရႃႉၽြႃး၊ ႁဵတ်းလူၺ်ႈၵၼ်တင်းပူႇမွၼ်ႇႁဝ်း၊မိူဝ်ႈဢၼ်မၼ်းၸဝ်ႈဢဝ်ၶဝ်ဢွၵ်ႇမိူင်း ဢေးၵျိပ်ႉ၊ မႃးၼၼ်ႉဝႆႉယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ သေႃးလမုၼ်ႇ၊ ၸုၵ်းယူႇၵႃႈတီႈၽၢႆႇၼႃႈၶဵင်ႇတၢင်းလူႇ ထႃႇဝရႃႉၽြႃး၊ သိုဝ်ႈၼႃႈတႂ်ႈတႃမုၵ်ႉၵူၼ်းမဵဝ်း ဢိသရေး၊ တင်းသဵင်ႈတင်းလူင်ၼၼ်ႉလႄႈယုၵ်ႉမိုဝ်းမၼ်းသွင်ၶွၼ်ၶိုၼ်ႈသေယဝ်ႉ၊ႁဵတ်းပထၼႃႇသူးတွင်းလႄႈဝႃႈ၊-
“ ထႃႇဝရႃႉၽြႃး၊ၽြႃးပဵၼ်ၸဝ်ႈ၊ ၵူၼ်းမဵဝ်း ဢိသရေး၊ တီႈၶႃႈ။ ၵႃႈတီႈၼိူဝ်ၽႃႉၵၢင်ႁၢဝ်၊တႂ်ႈၽႃႉလိၼ်မိူင်းၼႆႉ၊ၽြႃးဢၼ်မိူၼ်ၸဝ်ႈႁဝ်းဢမ်ႇမီးသေသူႇသေပႃးတီႈၶႃႈ။ လွင်ႈမၼ်းၸမ်ႉ၊ၸဝ်ႈႁဝ်းပႂ်ႉၸွမ်းပတိၺိၺ်ႇဢၼ်ႁဵတ်းတီႈၵူၼ်းၸဝ်ႈႁဝ်း၊ဢိၵ်ႇတင်းၼႄပျႃးၸႂ်မႅတ်ႈတႃႇၸဝ်ႈႁဝ်းတီႈၶဝ်မိူဝ်ႈဢၼ်ၶဝ်ပႃးတင်းႁူဝ်ၸႂ်သဵင်ႈသဵင်ႈၵမ်ၵျၢင်ႉယူႇၵႃႈတီႈၽၢႆႇၼႃႈၸဝ်ႈႁဝ်းၼၼ်ႉဢေႃႈ။-
ၸဝ်ႈႁဝ်းယင်းပႂ်ႉၸွမ်းၵတိသဵတ်ႈၸႃႇဢၼ်ဝႆႉတီႈၸဝ်ႈပေႃႈၶႃႈၸဝ်ႈ တႃႇဝိတ်ႈ၊ လႄႈဝၼ်းမိူဝ်ႈၼႆႉၸဝ်ႈႁဝ်းႁႂ်ႈပျေႉၸုမ်ႇၵူႈၶေႃႈၵူႈၵမ်းတီႈၶႃႈယဝ်ႉ။-
ထႃႇဝရႃႉၽြႃး၊ၽြႃးပဵၼ်ၸဝ်ႈ၊ မဵဝ်း ဢိသရေး၊ တီႈၶႃႈ။ တေႃႈလဵဝ်ၼႆႉၶႅၼ်းတေႃႈပႂ်ႉၸွမ်းၵတိၸဝ်ႈဢၼ်ဝႆႉၵႃႈတီႈၵေႃႉဢၼ်ပဵၼ်ၶႃႈၸဝ်ႈႁဝ်း၊ဢၼ်ပဵၼ်ၸဝ်ႈပေႃႈၶႃႈၸဝ်ႈ တႃႇဝိတ်ႈ၊ ၼၼ်ႉလႄႈမီးဢမိင်ႉဝႃႈ၊ ‘ပေႃးလုၵ်ႈမႂ်းလၢၼ်မႂ်းၵမ်ၵျၢင်ႉၸွမ်းဢလူဝ်ႇၵဝ်လီလီငၢမ်းငၢမ်း၊မိူၼ်ၸိူဝ်ႉၼင်ႇဢၼ်မႂ်းၵမ်ၵျၢင်ႉၸွမ်းၼၼ်ႉၸိုင်၊မဵဝ်းၸိူဝ်ႉၶိူဝ်းမႂ်းတၵ်းတေလႆႈဢုပ်ႉပိူင်ႇၼႂ်းဢရႃႇၶုၼ်ႁေႃၶမ်းၵူၼ်းမဵဝ်း ဢိသရေး၊ တႃႇသေႇဢမ်ႇထၢတ်ႇဢေႃႈ၊’ ဝႃႈၼင်ႇၼႆၼၼ်ႉသေၵမ်းတီႈၶႃႈ။-
ပိူဝ်ႈၼႆလႄႈ၊ၽြႃးပဵၼ်ၸဝ်ႈ မဵဝ်း ဢိသရေး၊ တီႈၶႃႈ။ မိူဝ်ႈလဵဝ်ၼႆႉၶႅၼ်းတေႃႈႁႂ်ႈၵတိဢၼ်ၸဝ်ႈႁဝ်းဝႆႉၵႃႈတီႈၶႃႈၸဝ်ႈႁဝ်းၸဝ်ႈပေႃႈၶႃႈၸဝ်ႈ တႃႇဝိတ်ႈ၊ ၼၼ်ႉပျေႉၸုမ်ႇၵူႈၶေႃႈၵူႈၵမ်းသေၵမ်းတီႈၶႃႈ။
“ၼႂ်းဝႃႈၼၼ်သေၵေႃႈ၊ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ ၸဝ်ႈႁဝ်းတၵ်းၵိင်းဝၢပ်ႈယူႇၵႃႈၼိူဝ်လိၼ်မိူင်းၼႆႉတႄႉတႄႉတီႈၶႃႈႁိုဝ်း။ ၽႃႉၵၢင်ႁၢဝ်တင်းသဵင်ႈတင်းလူင်ၵေႃႈယင်းဢမ်ႇယႂ်ႇႁႂ်ႈပေႃးၵုမ်ႇပုၼ်ႈၸဝ်ႈႁဝ်းတၵ်းၵိင်းဝၢပ်ႈလႄႈၵျွင်းပိၵ်ႈမၢၼ်ႇဢၼ်ၶႃႈၸဝ်ႈတႄႇႁဵတ်းၼႆႉယဵင်ႈၶႅၼ်းတၵ်းပေႃးၵုမ်ႇပုၼ်ႈၸဝ်ႈႁဝ်းလႆႈၸိူဝ်ႉၼင်ႇႁိုဝ်တီႈၶႃႈ။-
ထႃႇဝရႃႉၽြႃး၊ ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ ၵဝ်ၶႃႈၼႆႉပဵၼ်ၶႃႈၸႂ်ႉၸဝ်ႈႁဝ်းတီႈၶႃႈဢေႃႈ။ ထွမ်ႇဢဝ်ၵႂၢမ်းသူးတွင်းၶႃႈၸဝ်ႈသေလႄႈသွၼ်းလေႃႇပၼ်တၢင်းဢၼ်ၶႃႈၸဝ်ႈလဝ်ႈယွၼ်းဝၼ်းမိူဝ်ႈၼႆႉၼၼ်ႉသေၵမ်းတီႈၶႃႈ။-
ၶႅၼ်းတေႃႈပႂ်ႉလူပႂ်ႉတူၺ်းၵျွင်းပိၵ်ႈမၢၼ်ႇၸဝ်ႈၼႆႉယူႇၵူႈဝၼ်းၵူႈၶိုၼ်းသေၵမ်းတီႈၶႃႈ။ ၵႃႈတီႈၼႆႈတၵ်းပဵၼ်တီႈဢၼ်ၸဝ်ႈႁဝ်းၶဝ်ႁဵတ်းဝၢတ်ႈၵူဝ်းၵႂၢႆႇၸဝ်ႈႁဝ်းဝႃႈၼႆ၊ၸဝ်ႈႁဝ်းမီးဢမိင်ႉဝႆႉတီႈၶႃႈယဝ်ႉလႄႈယၢမ်းမိူဝ်ႈဢၼ်ၶႃႈၸဝ်ႈဝၢႆႇၼႃႈၸူးၵျွင်းပိၵ်ႈမၢၼ်ႇၼႆႉသေလႄႈလဝ်ႈယွၼ်းသူးတွင်းၼၼ်ႉၸိုင်၊ၶႅၼ်းတေႃႈထွမ်ႇငိၼ်းၶႃႈၸဝ်ႈသေၵမ်းတီႈၶႃႈ။-
ထွမ်ႇဢဝ်ၵႂၢမ်းသူးတွင်းၶႃႈၸဝ်ႈ၊ဢိၵ်ႇတင်းၵူၼ်းတင်းလၢႆၸိူဝ်းဢၼ်ဝၢႆႇၸူးတီႈၼႆႈသေလႄႈသူးတွင်းၼၼ်ႉသေၵမ်းတီႈၶႃႈ။ ယူႇၵႃႈၼႂ်းႁိူၼ်းၸဝ်ႈၽုင်ႇၵၢင်ႁၢဝ်ပုၼ်ႉၼၼ်ႉထွမ်ႇငိၼ်းသေလႄႈပွႆႇလွတ်ႈဢပျတ်ႈၶႃႈၸဝ်ႈႁဝ်းၶဝ်သေၵမ်းတီႈၶႃႈ။
“မိူဝ်ႈဢၼ်သေၵေႃႉသေၵူၼ်းၽိတ်းပိူင်ႈၵူၼ်းတၢင်ႇၵေႃႉသေယဝ်ႉ၊ပိူၼ်ႈဢဝ်မၼ်းမႃးၵႃႈတီႈၶဵင်ႇတၢင်းလူႇၸဝ်ႈႁဝ်းၵႃႈၼႂ်းၵျွင်းပိၵ်ႈမၢၼ်ႇၼႆႉႁႂ်ႈလႆႈတိူင်ႇၵၢဝ်ႇလွင်ႈဢၼ်မၼ်းဢမ်ႇမီးဢပျတ်ႈၼၼ်ႉၸိုင်၊-
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈယူႇၵႃႈၼိူဝ်ၽုင်ႇၵၢင်ႁၢဝ်သေလႄႈထွမ်ႇငိၼ်းသေယဝ်ႉ၊ၸီႇယၢင်ႇတြႃးတီႈၶႃႈၸဝ်ႈႁဝ်းတင်းလၢႆသေၵမ်းတီႈၶႃႈ။ ပၼ်တၢမ်ႇဢၼ်ထိူၵ်ႈဢၼ်ၵိုင်ႇတီႈၵေႃႉဢၼ်မီးဢပျတ်ႈၼၼ်ႉသေလႄႈ၊တႅပ်းတတ်းၸီႇယၢင်ႇၸွမ်းတၢင်းဢၼ်သိုဝ်ႈတေႃႇတီႈၵေႃႉဢၼ်ဢမ်ႇမီးဢပျတ်ႈၼၼ်ႉသေၵမ်းတီႈၶႃႈ။
“ယၢမ်းမိူဝ်ႈဢၼ်ၵူၼ်းၸဝ်ႈႁဝ်းမဵဝ်း ဢိသရေး၊ တင်းလၢႆလႆႈတူၵ်းသုမ်းၵႃႈတီႈၽၢႆႇၼႃႈရၢၼ်ႇသူႇၶဝ်၊ၵွပ်ႈပိူဝ်ႈဢၼ်ၶဝ်ၽိတ်းပိူင်ႈၸဝ်ႈႁဝ်းၼၼ်ႉ၊မိူဝ်ႈဢၼ်ၶဝ်ၶိုၼ်းမႃးၸူးတီႈၸဝ်ႈႁဝ်းလႄႈၶဝ်ႈၵႃႈၼႂ်းၵျွင်းပိၵ်ႈမၢၼ်ႇၼႆႉပႃးတင်းႁူဝ်ၸႂ်ဢၼ်ၶျႃးတႅမ်ႇလႄႈလဝ်ႈယွၼ်းတီႈၸဝ်ႈႁဝ်း၊ပုၼ်ႈတၵ်းပွႆႇၶႂၢင်းပၼ်ဢပျတ်ႈၸိုင်၊-
ၶႅၼ်းတေႃႈယူႇၵႃႈၼိူဝ်ၽုင်ႇၵၢင်ႁၢဝ်သေလႄႈထွမ်ႇငိၼ်းသေၵမ်းတီႈၶႃႈ။ ၶႅၼ်းတေႃႈပွႆႇလွတ်ႈဢပျတ်ႈၵူၼ်းၸဝ်ႈႁဝ်းၵူၼ်းမဵဝ်း ဢိသရေး၊ သေၵႃႈၼႂ်းဢပျတ်ႈလႄႈသမ်ႉဢဝ်ၶဝ်ၶိုၼ်းသူင်ႇႁွတ်ႈၵႃႈၼႂ်းမိူင်းဢၼ်ၸဝ်ႈႁဝ်းဢဵတ်းလူပၼ်တီႈပူႇမွၼ်ႇၶဝ်ၸိူဝ်းၼၼ်ႉသေၵမ်းတီႈၶႃႈ။
“ယၢမ်းမိူဝ်ႈဢၼ်ၸဝ်ႈႁဝ်းဢမ်ႇႁႂ်ႈၽူၼ်တူၵ်းလႄႈၽႃႉလႅင်ႉၵွပ်ႈပိူဝ်ႈဢၼ်ၶဝ်ၽိတ်းပိူင်ႈၸဝ်ႈႁဝ်းၼၼ်ႉ၊ပေႃးၶဝ်ပိၼ်ႇၸႂ်ၶဝ်လႄႈဝၢႆႇၼႃႈၸူးတီႈၵျွင်းပိၵ်ႈမၢၼ်ႇၼႆႉပႃးတင်းႁူဝ်ၸႂ်ဢၼ်ၶျႃးတႅမ်ႇသေလႄႈသူးတွင်းတီႈၸဝ်ႈႁဝ်းၸိုင်၊-
ၶႅၼ်းတေႃႈယူႇၵႃႈၼိူဝ်ၽုင်ႇၵၢင်ႁၢဝ်သေလႄႈထွမ်ႇငိၼ်းသေၵမ်းတီႈၶႃႈ။ ၶႅၼ်းတေႃႈပွႆႇလွတ်ႈၵူၼ်းမဵဝ်း ဢိသရေး၊ တင်းလၢႆဢိၵ်ႇတင်းၶုၼ်ႁေႃၶမ်းၶဝ်သေၵႃႈၼႂ်းဢပျတ်ႈသေၵမ်းတီႈၶႃႈ။ သင်ႇသွၼ်ပၼ်ႁႂ်ႈၶဝ်ႁဵတ်းမဵဝ်းဢၼ်ထုၵ်ႇလီၵမ်ၵျၢင်ႉၸွမ်းၼၼ်ႉသေၵမ်းၶႃႈ၊ ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈႁႂ်ႈၽူၼ်တူၵ်းၵႃႈၼိူဝ်လိၼ်ဢၼ်ၸဝ်ႈႁဝ်းပၼ်တီႈၵူၼ်းၸဝ်ႈႁဝ်းႁႂ်ႈပဵၼ်ဢမူၺ်ႇၶဝ်ၼၼ်ႉသေၵမ်းတီႈၶႃႈ။
“ၵႃႈၼႂ်းမိူင်းၸဝ်ႈၼႆႉပေႃးပဵၼ်တၢင်းဢၼ်ၶဝ်ႈၵႃႈမၢၵ်ႇပႅင်း၊ပေႃးပဵၼ်ၽေးၵႃႇလႃႉႁႃႈလႅင်မိူင်း၊ၽေးဢၼ်လူမ်းၽႆးပတ်ႉထူဝ်းသႂ်ႇတူၼ်ႈမႆႉတၢႆ၊ၽေးဢၼ်ၼမ်ႉထူမ်ႈလႄႈတူၼ်ႈမႆႉတၢႆ၊ပေႃးပဵၼ်ၽေးတၢင်းဢၼ်ၸၵ်းတႅၼ်လႂ်၊မႅင်းမုၼ်းလႂ်ၶူပ်းၵိၼ်၊ၽေးတၢင်းဢၼ်ရၢၼ်ႇသူႇၶဝ်ပႄႉၼႅင်ႇ၊ပေႃးပဵၼ်ၽေးဢုပၢတ်ႈ၊ဢမ်ႇၼၼ်ၽေးတၢင်းၶႆႈတၢင်းပဵၼ်ၵႃႈတီႈၶဝ်ၸိုင်၊-
ၶႅၼ်းတေႃႈထွမ်ႇဢဝ်ၵႂၢမ်းသူးတွင်းၶဝ်သေၵမ်းတီႈၶႃႈ။ ပေႃးၵူၼ်းၸဝ်ႈႁဝ်းမဵဝ်း ဢိသရေး၊ သေၵေႃႉသေၵူၼ်းၶႆႈၸႂ်လွင်ႈၽေးတၢမ်ႇတုၵ်ႉၶႃႉဢၼ်လႆႈၶၢမ်ႇႁင်းၽႂ်ႁင်းမၼ်းၼၼ်ႉသေလႄႈယုၵ်ႉမိုဝ်းသူးတွင်းတီႈၵျွင်းပိၵ်ႈမၢၼ်ႇၼႆႉၸိုင်၊-
ၶႅၼ်းတေႃႈထွမ်ႇဢဝ်ၵႂၢမ်းသူးတွင်းၶဝ်သေၵမ်းတီႈၶႃႈ။ ယူႇၵႃႈၼႂ်းႁိူၼ်းၸဝ်ႈၽုင်ႇၵၢင်ႁၢဝ်ပုၼ်ႉၼၼ်ႉလႄႈထွမ်ႇငိၼ်းသေယဝ်ႉ၊ပွႆႇလွတ်ႈဢပျတ်ႈၶဝ်သေလႄႈၸွႆႈထႅမ်မႃႉၸႃႉၶဝ်သေၵမ်းတီႈၶႃႈ။ လွင်ႈမၼ်းၸမ်ႉ၊ၸဝ်ႈႁဝ်းသူႇလဵဝ်ၵူၺ်းႁုသၽေႃးႁူဝ်ၸႂ်ၶဝ်ၵျၢမ်ႇပွင်ၼၼ်ႉတီႈၶႃႈဢေႃႈ။ ၸီႇယၢင်ႇတီႈၵေႃႉလႂ်ၵေႃႉၼၼ်ႉၸွမ်းၵႃႈၼင်ႇဢၼ်ထိူၵ်ႈၵိုင်ႇၵၼ်တင်းၶဝ်ၼၼ်ႉသေၵမ်းတီႈၶႃႈ၊-
ပုၼ်ႈလွင်ႈၼင်ႇႁိုဝ်ၵူၼ်းၸဝ်ႈႁဝ်းတင်းလၢႆ၊တၵ်းၵူဝ်ယမ်ၸဝ်ႈႁဝ်းယူႇၶိင်ႇၵႃႇလႃႉမိုဝ်ႉဝၼ်းဢၼ်ၶဝ်ဢသၢၵ်ႈလိပ်းယူႇၵႃႈၼႂ်းမိူင်းဢၼ်ၸဝ်ႈႁဝ်းဢဵတ်းလူပၼ်တီႈပူႇမွၼ်ႇၶႃႈၸဝ်ႈႁဝ်းၶဝ်ၸိူဝ်းၼၼ်ႉသေၵမ်းတီႈၶႃႈ။
“မိူၼ်ၸိူဝ်ႉၼင်ႇၼၼ်၊ပေႃးၵူၼ်းတၢင်ႇသိုင်ႇတၢင်ႇမိူင်းဢၼ်ယူႇဝၢၼ်ႈၵႆမိူင်းယၢၼ်ၼၼ်ႉလႆႈငိၼ်းၶၢဝ်ႇၼႃႇမႃႉၸိုဝ်ႈသဵင်ၸဝ်ႈႁဝ်း၊ဢိၵ်ႇတင်းၶၢဝ်ႇတၢင်းႁဵတ်းၸဝ်ႈႁဝ်းဢၼ်ယႂ်ႇမျၢတ်ႈၼႃႇဢၼ်ႁဵတ်းပၼ်တီႈၵူၼ်းၸဝ်ႈႁဝ်းၼၼ်ႉသေလႄႈ၊မႃးဝႆႈသႃၵူဝ်းၵႂၢႆႇၸဝ်ႈႁဝ်းလႄႈသူးတွင်းၵႃႈတီႈၵျွင်းပိၵ်ႈမၢၼ်ႇၼႆႉၸိုင်၊-
ၶႅၼ်းတေႃႈယူႇၵႃႈၼႂ်းႁိူၼ်းၸဝ်ႈၽုင်ႇၵၢင်ႁၢဝ်ပုၼ်ႉၼၼ်ႉထွမ်ႇငိၼ်းသေလႄႈပၼ်ၵႃႈၼင်ႇဢၼ်မၼ်းသူးတွင်းလဝ်ႈယွၼ်းၼၼ်ႉ၊-
ႁႂ်ႈၵူၼ်းလေႃးၵီႇတင်းသဵင်ႈတင်းလူင်ႁုၸၵ်းၸဝ်ႈႁဝ်း၊ၵူဝ်ယမ်ၸဝ်ႈႁဝ်းမိူၼ်ၸိူဝ်ႉၼင်ႇဢၼ်ၵူၼ်းၸဝ်ႈႁဝ်းမဵဝ်း ဢိသရေး၊ ၵူဝ်ယမ်ၸဝ်ႈႁဝ်းၼၼ်ႉသေၵမ်းတီႈၶႃႈ။ ၼင်ႇၼၼ်လႄႈ၊ၶဝ်တၵ်းႁုလွင်ႈဢၼ်ၵျွင်းပိၵ်ႈမၢၼ်ႇၸဝ်ႈဢၼ်ၶႃႈၸဝ်ႈတႄႇႁဵတ်းဝႆႉၼၼ်ႉပဵၼ်ထႃႇၼႃႉတီႈဢၼ်တၵ်းဝႆႈသႃၵူဝ်းၵႂၢႆႇၸဝ်ႈႁဝ်းၼၼ်ႉတီႈၶႃႈဢေႃႈ။
“ယၢမ်းမိူဝ်ႈဢၼ်ၸဝ်ႈႁဝ်းပွႆႇၸႂ်ႉၵူၼ်းၸဝ်ႈႁဝ်းတင်းလၢႆၶီႇသိုၵ်းၵႂႃႇတိုၵ်းတေႃးရၢၼ်ႇသူႇၶဝ်ၼၼ်ႉၶဝ်ဢွၼ်ၵၼ်သူးတွင်းတီႈၸဝ်ႈႁဝ်းၼၼ်ႉ၊ၶဝ်ယူႇၵႃႈတီႈလႂ်သေဢမ်ႇဝႃႈ၊ပေႃးၶဝ်ဝၢႆႇၸူးတီႈဝဵင်းလူင်ဢၼ်ၸဝ်ႈႁဝ်းလိူၵ်ႈဢဝ်ၼႆႉ၊ဢိၵ်ႇတင်းဝၢႆႇၸူးတီႈၵျွင်းပိၵ်ႈမၢၼ်ႇဢၼ်ၶႃႈၸဝ်ႈတႄႇႁဵတ်းပုၼ်ႈၸဝ်ႈႁဝ်းၼႆႉလႄႈသူးတွင်းၸိုင်၊-
ၶႅၼ်းတေႃႈထွမ်ႇဢဝ်ၵႂၢမ်းသူးတွင်းၶဝ်သေၵမ်းတီႈၶႃႈ။ ယူႇၵႃႈၼိူဝ်ၽုင်ႇၵၢင်ႁၢဝ်ပုၼ်ႉၼၼ်ႉထွမ်ႇငိၼ်းသေလႄႈပၼ်ႁႂ်ႈၶဝ်ဢွင်ႇသိုၵ်းသေၵမ်းတီႈၶႃႈ။
“မိူဝ်ႈဢၼ်ၵူၼ်းၸဝ်ႈႁဝ်းၽိတ်းပိူင်ႈၸဝ်ႈႁဝ်း၊ဢမ်ႇမီးၽူႈလႂ်သေၵေႃႉသေၵူၼ်းဢၼ်ဢမ်ႇမီးဢပျတ်ႈ - ၸဝ်ႈႁဝ်းၸႂ်မႆႈၶႂ်ႈၸႃႉၶဝ်လႄႈပၼ်ႁႂ်ႈရၢၼ်ႇသူႇၶဝ်မႃးပႄႉၼႅင်ႇၶဝ်၊ဢဝ်ၶဝ်ၵႂႃႇတူၵ်းၵႅၼ်းၵႃႈၼႂ်းမိုဝ်းၵူၼ်းတၢင်ႇသိုင်ႇတၢင်ႇမိူင်း၊ပိၵ်ႉသမ်ႉပဵၼ်မိူင်းဢၼ်ၵႆ၊မိူင်းဢၼ်ၸမ်ၸိူဝ်ႉႁိုဝ်သေၵေႃႈ၊-
ထွမ်ႇဢဝ်ၵႂၢမ်းသူးတွင်းၵူၼ်းၸဝ်ႈႁဝ်းၸိူဝ်းၼၼ်ႉသေၵမ်းတီႈၶႃႈ။ ၵႃႈတီႈၼႂ်းမိူင်းၼၼ်ႉပေႃးၶဝ်ၽုၺ်ႇဢွၵ်ႇတၢင်းၽိတ်းဢၼ်ၶဝ်လႆႈႁဵတ်းႁၢႆႉမိူၵ်ႈမႃးထၼ်ႇႁိုဝ်ၼၼ်ႉသေယဝ်ႉ၊ၶုၵ်းၸႂ်လႆႈမႆႈၸႂ်ဢပျတ်ႈလႄႈသူးတွင်းတီႈၸဝ်ႈႁဝ်းၸိုင်၊ ထႃႇဝရႃႉၽြႃး၊ တီႈၶႃႈ၊ၶႅၼ်းတေႃႈထွမ်ႇဢဝ်ၵႂၢမ်းသူးတွင်းၶဝ်သေၵမ်းတီႈၶႃႈ။-
ၵႃႈတီႈၼႂ်းမိူင်းၼၼ်ႉပေႃးၶဝ်ပႃးတင်းႁူဝ်ၸႂ်သဵင်ႈသဵင်ႈပိၼ်ႇၸႂ်သေလႄႈမႃးၸူးတီႈၸဝ်ႈႁဝ်းၼႂ်းမိူဝ်ႈဢၼ်ၶဝ်ယင်းမီးယူႇၼႂ်းမိူင်းရၢၼ်ႇသူႇဢၼ်သိမ်းဢဝ်ၶဝ်ၵႂႃႇၼၼ်ႉလႄႈသမ်ႉသူးတွင်းလဝ်ႈယွၼ်းထိုင်မိူင်းဢၼ်ၸဝ်ႈႁဝ်းပၼ်တီႈပူႇမွၼ်ႇၶဝ်၊ဝဵင်းဢၼ်ၸဝ်ႈႁဝ်းလိူၵ်ႈဢဝ်ဝႆႉ၊ဢိၵ်ႇတင်းၵျွင်းပိၵ်ႈမၢၼ်ႇဢၼ်ၶႃႈၸဝ်ႈတႄႇႁဵတ်းပုၼ်ႈၸဝ်ႈႁဝ်းဝႆႉၼႆႉၸိုင်၊-
ၶႅၼ်းတေႃႈထွမ်ႇဢဝ်ၵႂၢမ်းသူးတွင်းၶဝ်သေၵမ်းတီႈၶႃႈ။ ယူႇၵႃႈၼႂ်းႁိူၼ်းၸဝ်ႈၽုင်ႇၵၢင်ႁၢဝ်ပုၼ်ႉၼၼ်ႉသေလႄႈထွမ်ႇငိၼ်းဢဵတ်းလူၶဝ်ၼၼ်ႉသေၵမ်းတီႈၶႃႈ။
ပွႆႇလွတ်ႈဢပျတ်ႈၵႃႈမီးၼၼ်ႉ၊ဢိၵ်ႇတင်းၵႃႈဢၼ်ၶဝ်လုၵ်ႉၽိုၼ်ႉၸဝ်ႈႁဝ်းၸိူဝ်းၼၼ်ႉသေၵမ်းတီႈၶႃႈ။ ၶႅၼ်းတေႃႈႁႂ်ႈရၢၼ်ႇသူႇၶဝ်ၵႃႈမီးၼၼ်ႉမီးႁူဝ်ၸႂ်ဢၼ်ဢဵတ်းလူၵႃႈၼိူဝ်ၶဝ်သေၵမ်းတီႈၶႃႈ။
လွင်ႈမၼ်းၸမ်ႉ၊ၶဝ်ပဵၼ်ၵူၼ်းၸဝ်ႈႁဝ်း၊မဵဝ်းဢၼ်ၸဝ်ႈႁဝ်းၼုၵ်ႈဢဝ်ၶဝ်ဢွၵ်ႇသေမိူင်း ဢေးၵျိပ်ႉ၊ မႃးဢၼ်ယူႇၵႃႈၼႂ်းၵၢင်မုၵ်ႉၽႆးၼၼ်ႉတီႈၶႃႈဢေႃႈ။
“ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ဢၼ်ယႂ်ႇမျၢတ်ႈၼႃႇတီႈၶႃႈ။ ၶႅၼ်းတေႃႈၸဝ်ႈႁဝ်းပႂ်ႉလူတူၺ်းၵူၼ်းၸဝ်ႈႁဝ်းမဵဝ်း ဢိသရေး၊ ဢိၵ်ႇတင်းၶုၼ်ႁေႃၶမ်းၶဝ်သေလႄႈထွမ်ႇဢဝ်ၵႂၢမ်းသူးတွင်းၶဝ်မိူဝ်ႈဢၼ်ၶဝ်ၵၢဝ်ႇႁႃလဝ်ႈယွၼ်းတၢင်းၸွႆႈတၢင်းထႅမ်တီႈၸဝ်ႈႁဝ်းၼၼ်ႉသေၵမ်းတီႈၶႃႈ။-
လွင်ႈမၼ်းၸမ်ႉ၊ၸဝ်ႈႁဝ်းလိူၵ်ႈဢဝ်ၶဝ်ဢွၵ်ႇသေၵႃႈၼႂ်းၵူၼ်းလေႃးၵီႇၵူႈၸိူဝ်ႉၵူႈၶိူဝ်းႁႂ်ႈပဵၼ်ၵူၼ်းၸဝ်ႈႁဝ်းၸွမ်းၵႃႈၼင်ႇဢၼ်ၸဝ်ႈႁဝ်းမီးဢမိင်ႉတီႈၵေႃႉဢၼ်ပဵၼ်ၶႃႈၸဝ်ႈႁဝ်း၊ မူဝ်းသေႇ၊ ယၢမ်းမိူဝ်ႈဢၼ်ၸဝ်ႈႁဝ်းဢဝ်ပူႇမွၼ်ႇၶႃႈၸဝ်ႈႁဝ်းၶဝ်တင်းလၢႆဢွၵ်ႇသေမိူင်း ဢေးၵျိပ်ႉ၊ မႃးၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
လိုၼ်းသေဢၼ် သေႃးလမုၼ်ႇ၊ ႁဵတ်းသူးတွင်းပထၼႃႇတီႈ ထႃႇဝရႃႉၽြႃး၊ ယဝ်ႉတူဝ်ႈလီငၢမ်းယဝ်ႉၼၼ်ႉ၊မၼ်းလုၵ်ႉၸုၵ်းသေတီႈဢၼ်မၼ်းၶုပ်ႉၶဝ်ႇၵႃႈတီႈၽၢႆႇၼႃႈၶဵင်ႇတၢင်းလူႇလႄႈဢဝ်မိုဝ်းမၼ်းယုၵ်ႉၶိုၼ်ႈယူႇၼၼ်ႉဢေႃႈ။-
မိူဝ်ႈၼၼ်ႉ၊မၼ်းဢဝ်တင်းသဵင်ဢၼ်ယႂ်ႇၼႃႇလဝ်ႈယွၼ်းတၢင်းလီမၢင်ႇၵလႃႇတီႈၽြႃးပဵၼ်ၸဝ်ႈပုၼ်ႈမုၵ်ႉၵူၼ်းၸိူဝ်းၵူၼ်းမဵဝ်း ဢိသရေး၊ ၸိူဝ်းဢၼ်ၸုတုမ်ၵၼ်ယူႇၵႃႈတီႈၼၼ်ႈလႄႈဝႃႈၸမ်ႉ၊-
“ယွင်ႈယေႃး ထႃႇဝရႃႉၽြႃး၊ ဢၼ်ပၼ်တၢင်းၼိမ်တီႈၵူၼ်းမၼ်းၸဝ်ႈတင်းလၢႆ၊ၸွမ်းၵႃႈၼင်ႇဢၼ်မၼ်းၸဝ်ႈမီးဢမိင်ႉၼၼ်ႉတီႈၶႃႈဢေႃႈ။ မၼ်းၸဝ်ႈပႂ်ႉသဵတ်ႈၸႃႇၵႃႈဢၼ်မၼ်းၸဝ်ႈဝႆႉၵတိတီႈၶႃႈမၼ်းၸဝ်ႈ မူဝ်းသေႇ၊ ၼၼ်ႉတီႈၶႃႈဢေႃႈ။-
ႁႂ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းမီးယူႇလူၺ်ႈၵၼ်တင်းႁဝ်းမိူၼ်ၸိူဝ်ႉၼင်ႇဢၼ်မၼ်းၸဝ်ႈမီးယူႇလူၺ်ႈၵၼ်တင်းပူႇမွၼ်ႇႁဝ်းၸိူဝ်းၼၼ်ႉသေၵမ်းလူၺ်ႈ။ ယႃႇပေႁႂ်ႈမၼ်းၸဝ်ႈၸုၼ်ႉပႅတ်ႈႁဝ်းလႄႈပႄႇပႅတ်ႈႁဝ်းလႃးလႃးသေၵမ်းလူၺ်ႈ။-
ႁႂ်ႈမၼ်းၸဝ်ႈမႄးႁႅၼ်းပၼ်ႁူဝ်ၸႂ်ႁဝ်းၼွမ်းၸူးထွမ်ႇဢဝ်မၼ်းၸဝ်ႈပုၼ်ႈလွင်ႈၼင်ႇႁိုဝ်ႁဝ်းတၵ်းဢသၢၵ်ႈလိပ်းယူႇၸွမ်းၵႃႈၼင်ႇဢၼ်မၼ်းၸဝ်ႈမီးဢလူဝ်ႇၶႂ်ႈႁႂ်ႈႁဝ်းဢသၢၵ်ႈလိပ်းၼၼ်ႉဢိၵ်ႇတင်းတၵ်းၵမ်ၵျၢင်ႉၸွမ်းပိင်းၺၢပ်ႈတြႃးတင်းထုင်းၽိင်ႈတြႃးမၼ်းၸဝ်ႈဢၼ်မၼ်းၸဝ်ႈပိင်းၺၢပ်ႈဝႆႉတီႈပူႇမွၼ်ႇႁဝ်းတင်းလၢႆၼၼ်ႉၸိူဝ်းၼၼ်ႉသေၵမ်းလူၺ်ႈ။-
ႁႂ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၶုၵ်းၸႂ်လႆႈၵႂၢမ်းသူးတွင်းတၢင်းဢၼ်ၵဝ်ယွၼ်းတွင်းပၢၼ်ႇတီႈမၼ်းၸဝ်ႈၵူႈၶိင်ႇၵူႈၶႃႇဢမ်ႇထၢတ်ႇၼၼ်ႉသေၵမ်းလူၺ်ႈ။ ႁႂ်ႈမၼ်းၸဝ်ႈဢဵတ်းလူၵူၼ်းမၼ်းၸဝ်ႈမဵဝ်း ဢိသရေး၊ တင်းလၢႆဢိၵ်ႇတင်းၶုၼ်ႁေႃၶမ်းၶဝ်ၸွမ်းၵႃႈၼင်ႇဢၼ်ၶဝ်လူဝ်ႇၵူႈမိူဝ်ႈၵူႈဝၼ်းၼၼ်ႉသေၵမ်းလူၺ်ႈ။-
ၼင်ႇၼၼ်လႄႈႁႂ်ႈၵူၼ်းမဵဝ်းဢၼ်မီးၵႃႈၼိူဝ်လိၼ်မိူင်းၵႃႈမီးလႆႈႁုလွင်ႈဢၼ် ထႃႇဝရႃႉၽြႃး၊ သူႇလဵဝ်ပႃးလဵဝ်ၵူၺ်းပဵၼ်ၽြႃးပဵၼ်ၸဝ်ႈဢိၵ်ႇတင်းလွင်ႈဢၼ်ဢမ်ႇမီးၽြႃးတၢင်ႇသူႇတၢင်ႇပႃးလႃးလႃးၼၼ်ႉသေၵမ်းလူၺ်ႈ။-
သူၸိူဝ်းဢၼ်ပဵၼ်ၵူၼ်းမၼ်းၸဝ်ႈၼႆႉၵေႃႈႁႂ်ႈမီးသဵတ်ႈၸႃႇတေႃႇ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းယူႇ၊ပႂ်ႉၵမ်ပႂ်ႉၸွမ်းပိင်းၺၢပ်ႈတြႃး၊ဢိၵ်ႇတင်းထုင်းၽိင်ႈတြႃးမၼ်းၸဝ်ႈၵႃႈမီးၼၼ်ႉယူႇ၊မိူၼ်ၸိူဝ်ႉၼင်ႇဝၼ်းမိူဝ်ႈၼႆႉၼၼ်ႉသေၵမ်းလူၺ်ႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၶုၼ်ႁေႃၶမ်း သေႃးလမုၼ်ႇ၊ ဢိၵ်ႇတင်းၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢွၼ်ၵၼ်သၢၵ်ႈၵၢပ်ႈၶိူင်ႈတၢင်းလူႇတီႈ ထႃႇဝရႃႉၽြႃး၊ ဢေႃႈ။-
မၼ်းသၢၵ်ႈလူႇဝူဝ်းသွင်မိုၼ်ႇသွင်ႁဵင်၊ဢိၵ်ႇတင်းသူဝ်းသႅၼ်သွင်မိုၼ်ႇပုၼ်ႈတၢင်းလူႇမိၵ်ႈသႁႃႇယႃႉဢေႃႈ။ ၼင်ႇၼၼ်လႄႈၶုၼ်ႁေႃၶမ်းဢိၵ်ႇတင်းၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ႁဵတ်းဢၼုမေႃးတၼႃႇၵျွင်းပိၵ်ႈမၢၼ်ႇၸဝ်ႈဢေႃႈ။-
ၼႂ်းဝၼ်းၼၼ်ႉၵမ်းလဵဝ် ၶုၼ်ႁေႃၶမ်းဢဝ်ၶိုင်ႈၵၢင်ပၢင်ႇဝၢင်းၸဝ်ႈ၊ဢိၵ်ႇတင်းၵၢင်ပၢင်ႇဢၼ်မီးၵႃႈတီႈၽၢႆႇၼႃႈၵျွင်းပိၵ်ႈမၢၼ်ႇၸဝ်ႈၼၼ်ႉႁဵတ်းဢၼုမေႃးတၼႃႇတၢင်းဢၼ်ဢဝ်ၶိူင်ႈတၢင်းလူႇဢၼ်တုတ်ႇၽႆးလႂ်၊ၶိူင်ႈတၢင်းလူႇမၢၵ်ႇၶဝ်ႈႁူင်းၶဝ်ႈလႂ်၊ဢိၵ်ႇတင်းၵွၼ်ႈၶႆၵွၼ်ႈမၼ်းတူဝ်တၢင်းလူႇဢၼ်ႁဵတ်းတၢင်းလူႇမိၵ်ႈသႁႃႇယႃႉလႂ်သၢၵ်ႈလူႇဢေႃႈ။ မၼ်းႁဵတ်းၸိူဝ်ႉၼင်ႇၼႆၵွပ်ႈပိူဝ်ႈဢၼ်ၶဵင်ႇတၢင်းလူႇတွင်းလိူင်ဢၼ်မီးၵႃႈတီႈၽၢႆႇၼႃႈ ထႃႇဝရႃႉၽြႃး၊ ၼၼ်ႉပဵၼ်ဢၼ်လဵၵ်ႉၼႃႇပုၼ်ႈၶိူင်ႈတၢင်းလူႇၵႃႈမီးတင်းသဵင်ႈတင်းလူင်ၼၼ်ႉဢေႃႈ။
ၵႃႈတီႈၵျွင်းပိၵ်ႈမၢၼ်ႇၸဝ်ႈၼၼ်ႉ သေႃးလမုၼ်ႇ၊ ဢိၵ်ႇတင်းၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢွၼ်ၵၼ်ႁဵတ်းပွႆးလူင်ဢၼ်ဝႃႈပွႆးသုမ်ႉထဵင်ၸဵတ်းဝၼ်း ဢေႃႈ။ မုၵ်ႉၵူၼ်းၸိူဝ်းၵူၼ်းဢၼ်မႃးၶဝ်ႈပွႆးၼၼ်ႉၵိုၼ်းၼႃႇလူင်လၢင်ဢၼ်လုၵ်ႉသေၵႃႈတီႈၽၢႆႇတၢင်းႁွင်ႇၸႃႉၸဵမ်ၶူၼ်တၢင်းၶဝ်ႈဝဵင်း ႁႃႇမတ်ႉ၊ တေႃႇထိုင်ႁွတ်ႈၽၢႆႇတၢင်းၸၢၼ်းဢၼ်ပဵၼ်ၶွပ်ႇလႅၼ်လိၼ်မိူင်း ဢေးၵျိပ်ႉ၊ ၼၼ်ႉဢေႃႈ။-
ၼႂ်းဝၼ်းဢၼ်ထူၼ်ႈထိုင်ပႅတ်ႇဝၼ်းၼၼ်ႉ သေႃးလမုၼ်ႇ၊ ပွႆႇၵူၼ်းတင်းလၢႆၶိုၼ်းပွၵ်ႈမိူဝ်းၸူးတီႈႁိူၼ်းၶဝ်သေဢေႃႈ။ ၶဝ်ဢွၼ်ၵၼ်ယွင်ႈယေႃးၶုၼ်ႁေႃၶမ်းယူႇလႄႈၶိုၼ်းပွၵ်ႈမိူဝ်းၵႂႃႇၸူမ်းၸူမ်းသိူဝ်းသိူဝ်း၊ၵွပ်ႈပိူဝ်ႈၵျေးၸူးဢၼ် ထႃႇဝရႃႉၽြႃး၊ ပၼ်တီႈၶႃႈမၼ်းၸဝ်ႈ တႃႇဝိတ်ႈ၊ ဢိၵ်ႇတင်းၵူၼ်းမၼ်းၸဝ်ႈၵူၼ်းမဵဝ်း ဢိသရေး၊ တင်းလၢႆၼၼ်ႉဢေႃႈ။
လိုၼ်းသေဢၼ် သေႃးလမုၼ်ႇ၊ ႁဵတ်းၵျွင်းပိၵ်ႈမၢၼ်ႇၸဝ်ႈ၊ဢိၵ်ႇတင်းႁေႃၸဝ်ႈတင်းၵႃႈဢၼ်ဢလူဝ်ႇၵၢင်ၸႂ်မၼ်းၶႂ်ႈတႄႇတင်ႈၵႃႈမီးယဝ်ႉတူဝ်ႈလီငၢမ်းယဝ်ႉၼၼ်ႉၸိုင်၊-
ထႃႇဝရႃႉၽြႃး၊ သမ်ႉပေႃႇမႃးတီႈ သေႃးလမုၼ်ႇ၊ ထႅင်ႈမိူၼ်ၸိူဝ်ႉၼင်ႇဢၼ်မၼ်းၸဝ်ႈပေႃႇမႃးတီႈမၼ်းၵႃႈတီႈဝဵင်း ၵိပွင်ႇ၊ ၼၼ်ႉဢေႃႈ။-
ထႃႇဝရႃႉၽြႃး၊ မီးဢမိင်ႉတီႈမၼ်းလႄႈဝႃႈ၊ “ၵဝ်လႆႈငိၼ်းၵႂၢမ်းဢၼ်မႂ်းသူးတွင်းလဝ်ႈယွၼ်းၼၼ်ႉယဝ်ႉ။ ၵဝ်ႁႂ်ႈၵျွင်းပိၵ်ႈမၢၼ်ႇဢၼ်မႂ်းႁဵတ်းၼၼ်ႉမူတ်းၸၢင်ႇလႄႈႁႂ်ႈပဵၼ်ထႃႇၼႃႉတီႈဢၼ်ၵူၼ်းတင်းလၢႆတၵ်းဝႆႈသႃၵူဝ်းၵႂၢႆႇၵဝ်သေႇသေႇယဝ်ႉ။ ၵဝ်တၵ်းပႂ်ႉလူပႂ်ႉတူၺ်းၵျွင်းပိၵ်ႈမၢၼ်ႇၼၼ်ႉသေလႄႈၵႅတ်ႇၶႄႁႄႉၵင်ႈၵူႈၶိင်ႇၵူႈၶႃႇတႃႇသေႇဢမ်ႇထၢတ်ႇဢေႃႈ။-
ပေႃးမႂ်းပႃးတင်းႁူဝ်ၸႂ်ဢၼ်သိုဝ်ႈလီယူဝ်းလီ၊တင်းႁူဝ်ၸႂ်ဢၼ်မီးသဵတ်ႈၸႃႇလႄႈႁဵတ်းဝၢတ်ႈတီႈၵဝ်မိူၼ်ၸိူဝ်ႉၼင်ႇပေႃႈမႂ်း တႃႇဝိတ်ႈ၊ ႁဵတ်းၼၼ်ႉ၊ဢိၵ်ႇတင်းပေႃးမႂ်းပႂ်ႉၵမ်ပႂ်ႉၵျၢင်ႉထုင်းၽိင်ႈတြႃးၵဝ်လႄႈႁဵတ်းၸွမ်းၵႃႈၼင်ႇဢၼ်ၵဝ်သင်ႇလၢတ်ႈဝႆႉတီႈမႂ်းၵႃႈမီးၼၼ်ႉယူႇၸိုင်၊-
ၵဝ်တၵ်းပႂ်ႉၵတိသဵတ်ႈၸႃႇဢၼ်ၵဝ်ဝႆႉၵႃႈတီႈပေႃႈမႂ်း တႃႇဝိတ်ႈ၊ လူၺ်ႈလွင်ႈဢၼ်ၵဝ်လႆႈလၢတ်ႈဝႆႉတီႈမၼ်းလႄႈဝႃႈ၊ ‘မႂ်းတၵ်းလႆႈၼင်ႈၵႃႈၼိူဝ်ရႃႇၸႃႉပလၢင်ႇသိုင်ႇၸိုင်ႈဝၢၼ်ႈမိူင်းမဵဝ်း ဢိသရေး၊ ယူႇတႃႇသေႇလႄႈၸိူဝ်ႉၶိူဝ်းမႂ်းတၵ်းတေလႆႈဢုပ်ႉပိူင်ႇသေႇသေႇဢမ်ႇထၢတ်ႇဢေႃႈ၊’ ဝႃႈၼႆဢေႃႈ။-
ပေႃးဢမ်ႇၼၼ်၊ပေႃးသူဢိၵ်ႇတင်းလုၵ်ႈလၢၼ်သူယင်းဢမ်ႇၸွမ်းလင်ၵဝ်၊ယင်းဝႄႈဢွၵ်ႇတၢင်းၵႂႃႇသေလႄႈဢမ်ႇပႂ်ႉၵမ်ပႂ်ႉၵျၢင်ႉထုင်းၽိင်ႈတြႃးၵဝ်၊ဢမ်ႇထွမ်ႇဢမ်ႇဢဝ်ၵႂၢမ်းဢၼ်ၵဝ်သင်ႇလၢတ်ႈဝႆႉၸိူဝ်းၼၼ်ႉသေယဝ်ႉ၊ၵႂႃႇဝႆႈၽြႃးတၢင်ႇသူႇတၢင်ႇပႃးတင်းလၢႆၸိုင်၊-
ၵဝ်တၵ်းပႄႇၽဵဝ်ႈပႅတ်ႈၵူၼ်းမဵဝ်း ဢိသရေး၊ ဢွၵ်ႇပႅတ်ႈသေၵႃႈၼႂ်းမိူင်းဢၼ်ၵဝ်ပၼ်တီႈၶဝ်ၼၼ်ႉဢေႃႈ။ ၵဝ်တၵ်းပႄႇပႅတ်ႈၵျွင်းပိၵ်ႈမၢၼ်ႇဢၼ်ၵဝ်ႁႂ်ႈပဵၼ်ထႃႇၼႃႉတီႈဢၼ်မူတ်းၸၢင်ႇပုၼ်ႈၵူၼ်းတင်းလၢႆဝႆႈၵဝ်ၼၼ်ႉဢေႃႈ။ ၵူၼ်းၵူႈၸိူဝ်ႉၵူႈမဵဝ်းတၵ်းဢွၼ်ၵၼ်သႄႉသွမ်းၵူၼ်းမဵဝ်း ဢိသရေး၊ လႄႈထၢင်ႇလဵၵ်ႉၵႃႈၼိူဝ်ၶဝ်ဢေႃႈ။-
ၵျွင်းပိၵ်ႈမၢၼ်ႇၸဝ်ႈၼႆႉတၵ်းလုလႅဝ်လႄႈပဵၼ်ၵွင်ပဵၼ်ပုမ်ႇဝႆႉသေယဝ်ႉ၊ၵူၼ်းၸိူဝ်းဢၼ်ပႆၵၢႆၵႂႃႇၼၼ်ႉတၵ်းဢၢမ်းလႄႈသမ်ႇမုၵ်ႉသႄႉသွမ်းတွင်ႈထၢမ်ၵၼ်လႄႈဝႃႈ၊ ‘ၵွပ်ႈသင်လႄႈ ထႃႇဝရႃႉၽြႃး၊ ႁဵတ်းၸိူဝ်ႉၼင်ႇၼႆတီႈမိူင်းၼႆႉတင်းၵျွင်းပိၵ်ႈမၢၼ်ႇၸဝ်ႈၼႆႉၸိူဝ်ႉၼင်ႇႁိုဝ်၊’ ဝႃႈၼႆဢေႃႈ။-
ပိူၼ်ႈတၵ်းၶိုၼ်းတွပ်ႇလႄႈလၢတ်ႈဝႃႈ၊ ‘မၼ်းပဵၼ်ၵွပ်ႈပိူဝ်ႈဢၼ်ၶဝ်ၸုၼ်ႉပႅတ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်ဢၼ်ၼုၵ်ႈဢဝ်ပူႇမွၼ်ႇၶဝ်ဢွၵ်ႇမိူင်း ဢေးၵျိပ်ႉ၊ မႃးၼၼ်ႉဢေႃႈ။ ၶဝ်သမ်ႉႁဵတ်းဝၢတ်ႈလႄႈဝႆႈၽြႃးတၢင်ႇသူႇတၢင်ႇပႃးတင်းလၢႆၸိူဝ်းၼၼ်ႉလူင်ပႄႇ။ ၵွပ်ႈပိူဝ်ႈလွင်ႈၼႆႉလႄႈ ထႃႇဝရႃႉၽြႃး၊ ႁႂ်ႈၵႃႈဢၼ်ႁုၵ်းဢၼ်ႁၢႆႉၼႆႉႁွတ်ႈထိုင်ၵႃႈၼိူဝ်ၶဝ်ဢေႃႈ၊’ ဝႃႈၼႆဢေႃႈ၊” ဝႃႈၼင်ႇၼႆဢေႃႈ။
သေႃးလမုၼ်ႇ၊ တႄႇႁဵတ်းၵျွင်းပိၵ်ႈမၢၼ်ႇၸဝ်ႈတင်းႁေႃၸဝ်ႈၼၼ်ႉႁိုင်သၢဝ်းပီဢေႃႈ။-
ၶုၼ်ႁေႃၶမ်း ႁိရမ်ႇ၊ ဝဵင်း တုရု၊ ၼၼ်ႉပၼ်မႆႉဢႃႇရိတ်ႉ၊မႆႉပႅၵ်ႇတင်းၶမ်းၵႃႈဢၼ်မၼ်းလူဝ်ႇသုင်းတိုဝ်းပုၼ်ႈတၵ်းႁဵတ်းၵျွင်းပိၵ်ႈမၢၼ်ႇလႄႈ၊မိူဝ်ႈဢၼ်ႁဵတ်းယဝ်ႉတူဝ်ႈလီငၢမ်းယဝ်ႉၼၼ်ႉၸိုင်၊ၶုၼ်ႁေႃၶမ်း သေႃးလမုၼ်ႇ၊ ဢဝ်ဝဵင်းဢၼ်မီးၼႂ်းမိူင်း ၵႃႇလိလႄး၊ သၢဝ်းဝဵင်းပၼ်တီႈၶုၼ်ႁေႃၶမ်း ႁိရမ်ႇ၊ ဢေႃႈ။-
ၶုၼ်ႁေႃၶမ်း ႁိရမ်ႇ၊ ၵေႃႈၵႂႃႇလႄႇလဵပ်ႈတူၺ်းဝဵင်းၸိူဝ်းၼၼ်ႉသေယဝ်ႉ၊ဢမ်ႇထုၵ်ႇၸႂ်ပဵင်းၸႂ်မၼ်း။-
ပိူဝ်ႈၼႆလႄႈမၼ်းလၢတ်ႈတီႈ သေႃးလမုၼ်ႇ၊ လႄႈဝႃႈ၊ “ၸဝ်ႈၼွင်ႉၵဝ်႟။ မႂ်းဢဝ်ဝဵင်းၸိူဝ်ႉၼင်ႇႁိုဝ်မႃးပၼ်တီႈၵဝ်၊” ဝႃႈၼင်ႇၼႆသေယဝ်ႉ၊ႁွင်ႉႁဵၵ်ႈၸိုဝ်ႈၵႃႈတီႈၼၼ်ႈဝႃႈ၊ ၵႃႇပူးလႃႉ၊ တေႃႇထိုင်ႁွတ်ႈဝၼ်းမိူဝ်ႈလဵဝ်ဢေႃႈ။-
ၶုၼ်ႁေႃၶမ်း ႁိရမ်ႇ၊ ၼၼ်ႉလႆႈပၼ်ၶမ်းသွင်ႁဵင်ပၢႆႁႃႈပၢၵ်ႇၸွႆႉ တီႈၶုၼ်ႁေႃၶမ်းဝႆႉယဝ်ႉဢေႃႈ။
ၸရၢင်းဢၼ်ၶုၼ်ႁေႃၶမ်း သေႃးလမုၼ်ႇ၊ ၽႃႇၵဵပ်းဢဝ်ၵူၼ်းၸမ်ႉ၊ပဵၼ်တၢင်းဢၼ်တႄႇႁဵတ်းၵျွင်းပိၵ်ႈမၢၼ်ႇၸဝ်ႈ၊ႁေႃၸဝ်ႈ၊တၢင်းဢၼ်ထူမ်ၼႃႈလိၼ်ၽၢႆႇဝၼ်းဢွၵ်ႇဝဵင်း ယေႇရုသလႅမ်ႇ၊ တၢင်းဢၼ်ၵေႃႇလမ်းဝဵင်း၊ဢိၵ်ႇတင်းတၢင်းဢၼ်မႄးၵုမ်းမႄးႁဵတ်းဝဵင်း ႁႃႇၸေႃႇ၊ ဝဵင်း မေႇၵိတ်ႉတေႃႇ၊ ဝဵင်း ၵေႇၸႃႇ၊ ၸိူဝ်းၼၼ်ႉဢေႃႈ။-
(ဝဵင်း ၵေႇၸႃႇ၊ ၼၼ်ႉၶုၼ်ႁေႃၶမ်းမိူင်း ဢေးၵျိပ်ႉ၊ ၶီႇသိုၵ်းတိုၵ်းဢဝ်ဝဵင်းၼၼ်ႉ၊ၶႃႈၽၼ်းဢဝ်တၢႆၵူၼ်း ၶႃႇၼၼိ၊ ဢၼ်မီးၼႂ်းဝဵင်းၼၼ်ႉသေလႄႈဢဝ်ၽႆးတုတ်ႇပႅတ်ႈသေယဝ်ႉ၊ဢဝ်ဝဵင်းၼၼ်ႉႁဵတ်းလၢၵ်ႈသွင်ႇပၼ်တီႈလုၵ်ႈယိင်းမၼ်းမိူဝ်ႈဢၼ်သွင်ႇမၢင်ႇၵလႃႇပၼ်တီႈ သေႃးလမုၼ်ႇ၊ ၼၼ်ႉဢေႃႈ။-
ပိူဝ်ႈၼႆလႄႈ သေႃးလမုၼ်ႇ၊ လႆႈမႄးၵုမ်းမႄးႁဵတ်းဝဵင်းၼၼ်ႉဢေႃႈ။) မၼ်းသမ်ႉၸႂ်ႉႁႅင်းၵူၼ်းၸိူဝ်းၼၼ်ႉမႄးၵုမ်းမႄးႁဵတ်းပွတ်းတႂ်ႈဝဵင်း ပႅတ်ႉႁေႃႇရုၼ်ႇ၊-
ဝဵင်း ပႃႇလတ်ႉ၊ ဝဵင်း တႃႇတမေႃႇ၊ ဢၼ်မီးၼႂ်းထိူၼ်ႇမိူင်း ယုတႃႉ၊-
ဝဵင်းလူင်ၸိူဝ်းဢၼ်မၼ်းဢဝ်ၽၼ်ႇတႃႇၸဝ်ႈသိမ်းဝႆႉလႂ်၊ဝဵင်းၸိူဝ်းဢၼ်ဝႆႉမႃႉၸဝ်ႈလႂ်၊လေႃႉသိုၵ်းၸဝ်ႈလႂ်ဢိၵ်ႇတင်းၵႃႈဢၼ် သေႃးလမုၼ်ႇ၊ ၶႂ်ႈတႄႇႁဵတ်းၵႃႈၼႂ်းဝဵင်း ယေႇရုသလႅမ်ႇ၊ လႂ်ၵႃႈၼိူဝ်လွႆ လေႇပၼုၼ်ႇ၊ လႂ် ၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈၵူႈတီႈၵူႈလႅၼ်လႂ်ၼၼ်ႉဢေႃႈ။-
ၵူၼ်းမဵဝ်း ဢိသရေး၊ တင်းလၢႆၸမ်ႉ၊ သေႃးလမုၼ်ႇ၊ ဢမ်ႇၸႂ်ႉၶဝ်ႁဵတ်းၶႃႈသေၵေႃႉသေၵူၼ်း။ ၶဝ်ၼၼ်ႉလႆႈထၢမ်းႁဵတ်းၵူၼ်းသိုၵ်းလႂ်၊မူးမၢတ်ႈၽွင်းမိူင်းလႂ်၊ၸဝ်ႈၵွၼ်းတပ်ႉသိုၵ်းလႂ်၊ၶုၼ်ဢုပ်ႉလေႃႉမႃႉသိုၵ်းလႂ်၊ၵူၼ်းသိုၵ်းတပ်ႉၶီႇမႃႉလႂ်ၸိူဝ်းၼၼ်ႉဢေႃႈ။-
မူးမၢတ်ႈလူင်ၸိူဝ်းဢၼ်ၽွင်းငမ်းၵႃႈၼိူဝ်ၼႃႈၵၢၼ် သေႃးလမုၼ်ႇ၊ ၼႂ်းတၢင်းဢၼ်ႁဵတ်းသၢင်ႈလွင်ႈတၢင်းၵူႈၸိူဝ်ႉၵူႈပိူင်ၼၼ်ႉမီးႁႃႈပၢၵ်ႇပၢႆႁႃႈသိပ်းဢေႃႈ။
သေႃးလမုၼ်ႇ၊ ထူမ်ၼႃႈလိၼ်ၽၢႆႇဝၼ်းဢွၵ်ႇဝဵင်း ယေႇရုသလႅမ်ႇ၊ ဝၢႆးသေဢၼ်မေးမၼ်းဢၼ်ပဵၼ်လုၵ်ႈယိင်းၶုၼ်ႁေႃၶမ်းမိူင်း ဢေးၵျိပ်ႉ၊ ၼၼ်ႉၶၢႆႉဢွၵ်ႇဝဵင်း တႃႇဝိတ်ႈ၊ မႃးၵႃႈတီႈႁေႃၼၢင်းဢၼ် သေႃးလမုၼ်ႇ၊ ႁဵတ်းဝႆႉၼၼ်ႉဢေႃႈ။
သေႃးလမုၼ်ႇ၊ သၢၵ်ႈလူႇၶိူင်ႈတၢင်းလူႇဢၼ်တုတ်ႇၽႆးလႂ်၊တၢင်းလူႇမိၵ်ႈသႁႃႇယႃႉလႂ်ၵႃႈၼိူဝ်ၶဵင်ႇတၢင်းလူႇဢၼ်မၼ်းတႄႇႁဵတ်းပုၼ်ႈ ထႃႇဝရႃႉၽြႃး၊ ၼၼ်ႉယေႈပီသၢမ်ပွၵ်ႈဢေႃႈ။ မၼ်းသမ်ႉဢဝ်ၼၢမ်ႇသႃႇတုတ်ႇၽႆးၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢေႃႈ။ ၼင်ႇၼၼ်လႄႈမၼ်းႁဵတ်းၵျွင်းပိၵ်ႈမၢၼ်ႇၸဝ်ႈယဝ်ႉတူဝ်ႈသေဢေႃႈ။
သေႃးလမုၼ်ႇ၊ သမ်ႉတႄႇႁဵတ်းႁိူဝ်းသၢင်းၽေႃးလႂ်၊ၵႃႈတီႈဝဵင်း ဢေးၸယုၼ်းၵႃႇပႃႇ၊ ဢၼ်မီးၸမ်ႁိမ်းဝဵင်း ဢေႇလုတ်ႉ၊ ၵႃႈတီႈၽင်ႇၵူတ်ႉလူင် ပၢင်ႇလၢႆႇလႅင်၊ ၵႃႈၼႂ်းမိူင်း ဢေႇတုမ်ႇ၊ ၼၼ်ႉဢေႃႈ။-
ၶုၼ်လူင် ႁိရမ်ႇ၊ ႁႂ်ႈၵူၼ်းႁိူဝ်းသၢင်းၽေႃးမၼ်းၸိူဝ်းဢၼ်ၵတ်ႉဢၼ်ၸၢင်ႈလွင်ႈတၢင်းဢၼ်ၶၢမ်ႈပၢင်ႇလၢႆႇၼၼ်ႉၶီႇၵႂႃႇၸွမ်းၵူၼ်း သေႃးလမုၼ်ႇ၊ ၵႃႈၼိူဝ်ႁိူဝ်းသၢင်းၽေႃးၼၼ်ႉဢေႃႈ။-
ၶဝ်ၼၼ်ႉဝၢႆႇၵႂႃႇၸူးၵႃႈတီႈမိူင်း ဢေႃႇၽိရႃႉ၊ လႄႈဢဝ်ၶမ်းပႅတ်ႇႁဵင်ပၢႆႁႃႈပၢၵ်ႇၸွႆႉသေလႄႈၶိုၼ်းမႃးတီႈၶုၼ်ႁေႃၶမ်း သေႃးလမုၼ်ႇ၊ ဢေႃႈ။
ၼၢင်းႁေႃၶမ်းမိူင်း သေးပႃႉ၊ လႆႈငိၼ်းၶၢဝ်ႇငၢဝ်းမုၼ်သရေႇ သေႃးလမုၼ်ႇ၊ (ဢၼ်မၼ်းၸိုဝ်ႈဢွၵ်ႇသဵင်ဢွၵ်ႇၵွပ်ႈပိူဝ်ႈၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ၼၼ်ႉ) သေယဝ်ႉ၊မႃးၵႃႈတီႈဝဵင်း ယေႇရုသလႅမ်ႇ၊ ႁႂ်ႈလႆႈဢဝ်ၵႂၢမ်းတႃႉၵႂၢမ်းထၢမ်ဢၼ်လိုၵ်ႉဢၼ်လမ်ႇၼမ်ၼႃႇၸၢမ်းတူၺ်း သေႃးလမုၼ်ႇ၊ ဢေႃႈ။-
ၸဝ်ႈၼၢင်းၼၼ်ႉ၊ပႃးဢဝ်တင်းၵူၼ်းၸွမ်းၼမ်ၼႃႇ၊ဢိၵ်ႇတင်းၵလႃႇဢုၵ်ႈဢၼ်တၢင်ႇၼၢမ်ႇသႃႇလႂ်၊သႅင်လႂ်တင်းၶမ်းလႂ်ၼမ်ၼႃႇမႃးဢေႃႈ။ မိူဝ်ႈဢၼ်မၼ်းၼၢင်းတင်း သေႃးလမုၼ်ႇ၊ ႁူပ်ႉထူပ်းၵၼ်ၼၼ်ႉၸိုင်၊မၼ်းတိူင်ႇပၢင်ႇတွင်ႈထၢမ်လူၺ်ႈလွင်ႈၵႂၢမ်းထၢမ်ဢၼ်လိုၵ်ႉဢၼ်လမ်ႇၵႃႈဢၼ်မၼ်းၶႆႈၸႂ်ထူပ်းၸိူဝ်းၼၼ်ႉဢေႃႈ။-
သေႃးလမုၼ်ႇ၊ ၵေႃႈၵႄႈလိတ်ႈၵူႈၶေႃႈၵူႈၵမ်းလႄႈမဵဝ်းဢၼ်မၼ်းၵႄႈလိတ်ႈယၢပ်ႇၼၼ်ႉယင်းဢမ်ႇမီးသေၸိူဝ်ႉသေပိူင်ဢေႃႈ။-
မိူဝ်ႈဢၼ်ၼၢင်းႁေႃၶမ်းမိူင်း သေးပႃႉ၊ လႆႈငိၼ်းၵႂၢမ်းပိင်ႇၺႃႇ သေႃးလမုၼ်ႇ၊ ဢိၵ်ႇတင်းလႆႈႁၼ်ႁေႃၸဝ်ႈဢၼ်မၼ်းတႄႇႁဵတ်းဝႆႉလႂ်၊-
တၢင်းၵိၼ်တၢင်းၶူပ်းဢၼ်ႁႅၼ်းတႄႇႁႅၼ်းတမ်းၵႃႈၼိူဝ်ၽိူၼ်ၸဝ်ႈလႂ်၊တၢင်းဢၼ်ၶိုင်ပွင်ႁေႃႁိူၼ်းမူးမၢတ်ႈၽွင်းမိူင်းၸဝ်ႈလႂ်၊ၶူဝ်းၼုင်ႈတၢင်းမႆၶဝ်လႂ်၊ၶႃႈၵူၼ်းၸၢႆးဢွၼ်ႇၸိူဝ်းဢၼ်ၸုၵ်းၶႃးၸႃးပွႆးၵိၼ်ပွႆးၶူပ်းလႂ်ၸိူဝ်းၼၼ်ႉ၊မၼ်းၸဝ်ႈၼၢင်းထၢၼ်ႈပေႃးလိုမ်းတူဝ်လိုမ်းႁၢင်ႈယူႇဢေႃႈ။-
ၸဝ်ႈၼၢင်းၼၼ်ႉၸင်ႇလၢတ်ႈတီႈၶုၼ်ႁေႃၶမ်း သေႃးလမုၼ်ႇ၊ လႄႈဝႃႈ၊ “ၶၢဝ်ႇငၢဝ်းဢၼ်ၵဝ်ၶႃႈယူႇၵႃႈတီႈမိူင်းၵဝ်ၶႃႈလႄႈလႆႈငိၼ်းလွင်ႈဢၼ်ၸဝ်ႈႁဝ်းႁဵတ်းတင်းလၢႆ၊ဢိၵ်ႇတင်းပိင်ႇၺႃႇၸဝ်ႈႁဝ်းၼၼ်ႉ ပဵၼ်ဢၼ်မၢၼ်ႇမႅၼ်ႈတီႈၶႃႈဢေႃႈ။-
ၼႂ်းဝႃႈၼၼ်သေၵေႃႈ ၵဝ်ၶႃႈဢမ်ႇယုမ်ႇၶၢဝ်ႇငၢဝ်းၼၼ်ႉ၊တေႃႇထိုင်ႁွတ်ႈတူဝ်ၵဝ်ၶႃႈလႆႈမႃးထူပ်းႁၼ်ၼၼ်ႉတီႈၶႃႈဢေႃႈ။ တေႃႈလဵဝ်ၼႆႉၸမ်ႉ၊ၵႃႈဢၼ်ၵဝ်ၶႃႈလႆႈငိၼ်းၼၼ်ႉယင်းဢမ်ႇမီးၶိုင်ႈၼိုင်ႈလူးၵွၼ်ႇလႄႈပိင်ႇၺႃႇဢိၵ်ႇတင်းၸေးၸိမ်ႇၸဝ်ႈႁဝ်းၼႆႉ၊ပဵၼ်ဢၼ်ပူၼ်ႉလိူဝ်ၶၢဝ်ႇငၢဝ်းဢၼ်ၵဝ်ၶႃႈလႆႈငိၼ်းၼၼ်ႉ
ၶမေးၸဝ်ႈႁဝ်းတင်းလၢႆမီးမၢင်ႇၵလႃႇၶႃႈဢေႃႈ။ ၶုၼ်ဢၼ်ပွင်ၵၢၼ်ၸဝ်ႈႁဝ်းၸိူဝ်းဢၼ်လႆႈၸုၵ်းၶႃးၸႃးလႄႈမီးဢၶႂၢင်ႉဢၼ်လႆႈထွမ်ႇလႆႈငိၼ်းၵႂၢမ်းပိင်ႇၺႃႇၸဝ်ႈႁဝ်းၸိူဝ်းၼၼ်ႉၵေႃႈမီးမၢင်ႇၵလႃႇၶႃႈဢေႃႈ။-
ယွင်ႈယေႃး ထႃႇဝရႃႉၽြႃး၊ ၽြႃးပဵၼ်ၸဝ်ႈၸဝ်ႈႁဝ်းၼၼ်ႉတီႈၶႃႈဢေႃႈ။ မၼ်းၸဝ်ႈၼၼ်ႉထုၵ်ႇၸႂ်ၸဝ်ႈႁဝ်းၼႂ်းတၢင်းဢၼ်ၶၢၼ်းၸဝ်ႈႁဝ်းဝႆႉၼႂ်းဢရႃႇၶုၼ်ႁေႃၶမ်းၵူၼ်းမဵဝ်း ဢိသရေး၊ ၼၼ်ႉၶႃႈဢေႃႈ။ ၵွပ်ႈပိူဝ်ႈဢၼ် ထႃႇဝရႃႉၽြႃး၊ ႁၵ်ႉၵူၼ်းမဵဝ်း ဢိသရေး၊ ယူႇတႃႇသေႇလႄႈမၼ်းၸဝ်ႈၶၢၼ်းၸဝ်ႈႁဝ်းဝႆႉၼႂ်းဢရႃႇၶုၼ်ႁေႃၶမ်းၶဝ်ပုၼ်ႈလွင်ႈၼင်ႇႁိုဝ်ၸဝ်ႈႁဝ်းတၵ်းၸီႇယၢင်ႇၸွမ်းၼင်ႇတြႃး၊ဢိၵ်ႇတင်းႁႂ်ႈလႆႈတႅပ်းတတ်းသိုဝ်ႈသိုဝ်ႈတေႃႇတေႃႇၼၼ်ႉၶႃႈယဝ်ႉ၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈဢဝ်ၶမ်းသွင်ႁဵင်ပႅတ်ႇပၢၵ်ႇပႅတ်ႇသိပ်းၸွႆႉ တင်းမဵဝ်းၼၢမ်ႇသႃႇၼမ်ၼႃႇလူင်လၢင်၊ဢိၵ်ႇတင်းသႅင်လီသႅင်မျၢတ်ႈလႂ်၊သၢၵ်ႈပၼ်တီႈၶုၼ်ႁေႃၶမ်း သေႃးလမုၼ်ႇ၊ ဢေႃႈ။ မဵဝ်းၼၢမ်ႇသႃႇဢၼ်ၼမ်ၼႃႇပဵင်းထၢၼ်ႇၼၢမ်ႇသႃႇဢၼ်ၼၢင်းၶုၼ်ႁေႃၶမ်းမိူင်း သေးပႃႉ၊ သၢၵ်ႈပၼ်ၼၼ်ႉၵမ်းလိုၼ်းၶုၼ်ႁေႃၶမ်း သေႃးလမုၼ်ႇ၊ ဢမ်ႇလႆႈႁပ်ႉဢဝ်ထႅင်ႈသေပွၵ်ႈဢေႃႈ။
(လိူဝ်သေၼၼ်ႉႁိူဝ်းသၢင်းၽေႃး ႁိရမ်ႇ၊ ၸိူဝ်းဢၼ်တၢင်ႇၶမ်းသေလုၵ်ႉၵႃႈတီႈမိူင်း ဢေႃႇၽိရႃႉ၊ မႃးၼၼ်ႉယင်းတၢင်ႇပႃးမႆႉၼၢမ်ႇသႃႇ၊ဢိၵ်ႇတင်းသႅင်လီသႅင်မျၢတ်ႈမႃးၼမ်ၼႃႇလူင်လၢင်ဢေႃႈ။-
သေႃးလမုၼ်ႇ၊ ဢဝ်မႆႉၼၢမ်ႇသႃႇၸိူဝ်းၼၼ်ႉႁဵတ်းႁၢဝ်းပုၼ်ႈဢၼ်မိုဝ်းၵမ်ၵႃႈၼႂ်းၵျွင်းပိၵ်ႈမၢၼ်ႇၸဝ်ႈတင်းႁေႃၸဝ်ႈ၊ဢိၵ်ႇတင်းတိင်ႇလႂ်၊တရေႃးလႂ်ပုၼ်ႈၶဝ်ၸိူဝ်းဢၼ်ႁဵတ်းၵႂၢမ်းၼၼ်ႉဢေႃႈ။ မႆႉၼၢမ်ႇသႃႇၸိူဝ်ႉၼင်ႇၼၼ်ၼၼ်ႉၵမ်းလိုၼ်းဢမ်ႇႁွတ်ႈဢမ်ႇၽႅဝ်ထႅင်ႈယဝ်ႉလႄႈဢမ်ႇလႆႈႁၼ်ထႅင်ႈတေႃႇထိုင်ႁွတ်ႈမိူဝ်ႈလဵဝ်ၼႆႉယဝ်ႉ။)
ၶုၼ်ႁေႃၶမ်း သေႃးလမုၼ်ႇ၊ ၵေႃႈၼွၵ်ႈသေလၢၵ်ႈသွင်ႇဢၼ်ၵၢင်ၸႂ်မၼ်းၶႂ်ႈပၼ်ၼၼ်ႉၵူၺ်းဢမ်ႇၵႃး၊ပၼ်ၸွမ်းၵႃႈၼင်ႇဢၼ်ၼၢင်းၶုၼ်ႁေႃၶမ်းမီးဢလူဝ်ႇၶႂ်ႈလႆႈလႄႈယွၼ်းဢဝ်ၸိူဝ်းၼၼ်ႉဢေႃႈ။ လိုၼ်းၼၼ်ႉ၊ၼၢင်းၼၼ်ႉဢိၵ်ႇတင်းၶႃႈမၼ်းၵူၼ်းမၼ်းတင်းလၢႆ၊ၶိုၼ်းမိူဝ်းၵႂႃႇၵႃႈတီႈမိူင်းမၼ်းသေဢေႃႈ။
ၼႂ်းယေႈပီယေႈပီၼၼ်ႉ၊ၼမ်ႉၼၵ်းၶမ်းဢၼ်မႃးႁွတ်ႈမႃးၽႅဝ်တီႈ သေႃးလမုၼ်ႇ၊ ၸမ်ႉ၊မီးမိုၼ်ႇသၢမ်ႁဵင်ပၢႆပႅတ်ႇပၢၵ်ႇၸွႆႉ ဢေႃႈ။-
ၼွၵ်ႈသေၼၼ်ႉ၊ယင်းမီးၶွၼ်ႇၶမ်းဢၼ်ၵူၼ်းၵႃႉၵူၼ်းၶၢႆလႂ်၊ဢမျတ်ႈဢတူဝ်းၸဝ်ႈၵုၼ်ႇၸဝ်ႈသိၼ်လႂ်၊ၶွၼ်ႇဢၼ်ၶုၼ်ႁေႃၶမ်း ဢရေးပီးယႃး၊ ၶဝ်ဢိၵ်ႇတင်းမဵဝ်ႉဝုၼ်ႇၵူၼ်းမဵဝ်း ဢိသရေး၊ တင်းလၢႆသႂၢင်းသႂ်ႇၸိူဝ်းၼၼ်ႉထႅင်ႈလူးၵွၼ်ႇဢေႃႈ။
ၶုၼ်ႁေႃၶမ်း သေႃးလမုၼ်ႇ၊ တွင်ႈႁဵတ်းၶႅပ်းႁႄႉလၢၵ်ႈၼၢၵ်ႈလူင်သွင်ပၢၵ်ႇဢၼ်၊ယေႈဢၼ်ပႃးၶမ်းသီႇၸွႆႉပၢႆသွင်ၶၼ်၊-
တင်းၶႅပ်းႁႄႉလၢၵ်ႈၼၢၵ်ႈဢွၼ်ႇသၢမ်ပၢၵ်ႇဢၼ်၊ယေႈဢၼ်ပႃးၶမ်းၸွႆႉပၢႆသွင်ၶၼ် လႄႈ၊ဢဝ်ၸိူဝ်းၼၼ်ႉတင်းသဵင်ႈတင်းလူင်ဝႆႉၵႃႈၼႂ်း ႁေႃၸဝ်ႈထိူၼ်ႇလေႇပၼုၼ်ႇ၊ ဢေႃႈ။
ၶုၼ်ႁေႃၶမ်းႁဵတ်းရႃႇၸႃႉပလၢင်ႇလူင်ဢၼ်ဢဝ်ငႃးၸၢင်ႉႁဵတ်းလႄႈသမ်ႉဢဝ်ၶမ်းၸႅတ်ႈဢုမ်ႇဝႆႉၼၼ်ႉဢေႃႈ။-
ရႃႇၸႃႉပလၢင်ႇၸဝ်ႈၼၼ်ႉမီးၶၼ်ႈလႆႁူၵ်းသိၵ်ႈလႄႈႁူဝ်ၽၢႆႇလင်မၼ်းမီးႁၢင်ႈၵွၵ်းႁူဝ်ဝူဝ်း၊ၵွၵ်းႁူဝ်သူဝ်းဝႆႉဢေႃႈ။ ၵႃႈတီႈၽၢႆႇၶၢင်ႈမၼ်းၼၼ်ႉမီးႁၢဝ်းတီႈတၢင်ႇမိုဝ်းယေႈၽၢႆႇယေႈႁၢဝ်းလႄႈၵႃႈတီႈႁိမ်းႁၢဝ်းယေႈဢၼ်ၼၼ်ႉမီးသၢင်ႇသီႈၸုၵ်းယူႇယေႈတူဝ်ၼင်ႇၵၼ်ဢေႃႈ။-
ၵႃႈတီႈသွင်ၽၢႆႇႁူဝ်သိၵ်ႈၶၼ်ႈလႆႁူၵ်းသိၵ်ႈၸိူဝ်းၼၼ်ႉၵေႃႈမီးသၢင်ႇသီႈၸုၵ်းယူႇယေႈတူဝ်ယေႈတူဝ်လႄႈတင်းမူတ်းမီးသိပ်းသွင်တူဝ်ဢေႃႈ။ ရႃႇၸႃႉပလၢင်ႇၸိူဝ်ႉၼင်ႇၼၼ်ၼၼ်ႉဢမ်ႇတွၼ်ႉပေႃႇတွၼ်ႉမီးၵႃႈတီႈသိုင်ႇၸိုင်ႈဝၢၼ်ႈမိူင်းတီႈလႂ်တၼ်းလႂ်သေသိုင်ႇသေမိူင်း။
ၵွၵ်းၸဝ်ႈၵႃႈဢၼ်ၶုၼ်ႁေႃၶမ်းသႂ်ႇၵိၼ်တင်းသဵင်ႈ၊ဢိၵ်ႇတင်းဢၢင်ႇၸဝ်ႈဢၼ်ၸႂ်ႉသုင်းၵႃႈတီႈ ႁေႃၸဝ်ႈထိူၼ်ႇလေႇပၼုၼ်ႇ၊ ၸိူဝ်းၼၼ်ႉတင်းမူတ်းပဵၼ်ၶမ်းလွၼ်ႉလွၼ်ႉလႄႈဢမ်ႇၸႂ်ႈငိုၼ်း၊ၵွပ်ႈပိူဝ်ႈဢၼ်ဢမ်ႇမၢတ်ႈငိုၼ်းမီးၵႃႈၶၼ်ၼႂ်းၸူဝ်ႈပၢၼ် သေႃးလမုၼ်ႇ၊ ၼၼ်ႉဢေႃႈ။-
ၶုၼ်ႁေႃၶမ်းယင်းမီးၽုင်မူႇႁိူဝ်းသၢင်းၽေႃးဢၼ်ၶၢမ်ႈပၢင်ႇလၢႆႇၵႃႉၵုၼ်ႇၵႃႉသိၼ်ၸွမ်းလူၺ်ႈၵၼ်တင်းၽုင်မူႇႁိူဝ်းသၢင်းၽေႃး ႁိရမ်ႇ၊ ၼၼ်ႉလႄႈသၢမ်ပီယေႈပွၵ်ႈႁိူဝ်းသၢင်းၽေႃးၸိူဝ်းၼၼ်ႉၸၢင်ႈတၢင်ႇဢဝ်ငိုၼ်း၊ၶမ်း၊ငႃးၸၢင်ႉ၊လိင်းလႂ်တင်းၼူၵ်ႉယုင်းလႂ်ၶိုၼ်းမႃးဢေႃႈ။
ၶုၼ်ႁေႃၶမ်း သေႃးလမုၼ်ႇ၊ မီးၸေးၸိမ်ႇၶျၢမ်းသႃႇတင်းပိင်ႇၺႃႇဢၼ်ယဵင်ႈၶႅၼ်းလိူဝ်တွၼ်းၼႃႇသေၵႃႈၼႂ်းၶုၼ်ႁေႃၶမ်းတင်းမူတ်းၼၼ်ႉဢေႃႈ။-
ၵူၼ်းလိၼ်မိူင်းတင်းသဵင်ႈတင်းလူင်ဢွၼ်ၵၼ်မႃးတီႈ သေႃးလမုၼ်ႇ၊ ႁႂ်ႈလႆႈထွမ်ႇလႆႈငိၼ်းၵႂၢမ်းပိင်ႇၺႃႇဢၼ်ၽြႃးပဵၼ်ၸဝ်ႈသႂၢင်းသႂ်ႇပၼ်ၵႃႈၼႂ်းႁူဝ်ၸႂ်မၼ်းၼၼ်ႉဢေႃႈ။-
ၶဝ်ၸိူဝ်းဢၼ်မႃးၼၼ်ႉဢွၼ်ၵၼ်ပႃးဢဝ်လၢၵ်ႈသွင်ႇဢၼ်ပဵၼ်ၶိူင်ႈငိုၼ်းၶိူင်ႈၶမ်း၊ၶူဝ်းၼုင်ႈတၢင်းမႆ၊လၢၵ်ႈၼၢၵ်ႈ၊မဵဝ်းၼၢမ်ႇသႃႇ၊မႃႉလေႃႈမႃႉလီႈလႂ်မႃးဢေႃႈ။ လွင်ႈတၢင်းၼႆႉပဵၼ်ယူႇၸိူဝ်ႉၼင်ႇၼႆၵူႈပီၵူႈပီဢေႃႈ။
ၶုၼ်ႁေႃၶမ်း သေႃးလမုၼ်ႇ၊ ၸုႁွမ်လေႃႉမႃႉသိုၵ်းႁဵင်ပၢႆသီႇပၢၵ်ႇလမ်း၊ဢိၵ်ႇတင်းၵူၼ်းသိုၵ်းၶီႇမႃႉမိုၼ်ႇပၢႆသွင်ႁဵင်သေယဝ်ႉ၊ဢဝ်ၶဝ်ဝႆႉၵႃႈၼႂ်းဝဵင်း ယေႇရုသလႅမ်ႇ၊ ၵမ်ႈၽွင်ႈလႄႈဢၼ်ၵိုတ်းဢၼ်လိူဝ်ၸိူဝ်းၼၼ်ႉၸမ်ႉ၊မၼ်းဢဝ်ဝႆႉၵႃႈၼႂ်းဝဵင်းဢၼ်ထိင်းလေႃႉမႃႉသိုၵ်းၸိူဝ်းၼၼ်ႉဢေႃႈ။-
ၼႂ်းၸူဝ်ႈပၢၼ်မၼ်းၼၼ်ႉငိုၼ်းပဵၼ်ဢၼ်လိူင်ႇၼမ်ၵႃႈၼႂ်းဝဵင်း ယေႇရုသလႅမ်ႇ၊ ထၢၼ်ႈပေႃးဢမ်ႇမီးၵႃႈမီးၶၼ်မိူၼ်ၸိူဝ်ႉၼင်ႇမၢၵ်ႇႁိၼ်လႄႈမႆႉဢႃႇရိတ်ႉၵေႃႈလိူင်ႇၼမ်ၼႃႇလူင်လၢင်ထၢၼ်ႈပေႃးမိူၼ်မႆႉမၢၵ်ႇလိူဝ်ႇဢေႃႈ။-
ၸဝ်ႈၵုၼ်ႇၸဝ်ႈသိၼ်ဢၼ်တၢင်တူဝ်ၶုၼ်ႁေႃၶမ်းတင်းလၢႆသေလႄႈပႂ်ႉထိင်းၵုၼ်ႇဢၼ်ၶၢႆဢွၵ်ႇဢၼ်ပဵၼ်မႃႉလႂ်ၸိူဝ်းၼၼ်ႉသေၵႃႈတီႈဝဵင်း မုသရိ၊ တင်းဝဵင်း သိလိသိယႃး၊ မႃးၼၼ်ႉ၊-
ဢိၵ်ႇတင်းလေႃႉမႃႉသိုၵ်းၸိူဝ်းဢၼ်ၶၢႆဢွၵ်ႇသေၵႃႈတီႈမိူင်း ဢေးၵျိပ်ႉ၊ မႃးၼၼ်ႉဢေႃႈ။ ၼင်ႇၼၼ်လႄႈၶဝ်ဢဝ်ၽႄမႅင်ႇလေႃႉမႃႉသိုၵ်းတင်းမႃႉၸိူဝ်းၼၼ်ႉၶၢႆပၼ်ၶုၼ်ႁေႃၶမ်းၵူၼ်းမဵဝ်း ႁိတ်ႉတိ၊ တင်းၶုၼ်ႁေႃၶမ်းၵူၼ်းမဵဝ်း သီးရီးယႃး၊ လေႃႉမႃႉသိုၵ်းၸိူဝ်းၼၼ်ႉယေႈလမ်းငိုၼ်းႁူၵ်းပၢၵ်ႇၵျၢပ်ႈတင်းမႃႉၸိူဝ်းၼၼ်ႉယေႈတူဝ်ငိုၼ်းပၢၵ်ႇပၢႆႁႃႈသိပ်းၵျၢပ်ႈဢေႃႈ။
ၶုၼ်ႁေႃၶမ်း သေႃးလမုၼ်ႇ၊ ႁၵ်ႉမႄႈယိင်းၵူၼ်းတၢင်ႇၸိူဝ်ႉတၢင်ႇၶိူဝ်းၼမ်ၼႃႇဢေႃႈ။ ၼွၵ်ႈသေလုၵ်ႈယိင်းၶုၼ်ႁေႃၶမ်းမိူင်း ဢေးၵျိပ်ႉ ၼၼ်ႉမၼ်းဢဝ်မေးၼႂ်းမႄႈယိင်းၵူၼ်းမဵဝ်း မေႃႇၽႃႉ၊ ၵူၼ်းမဵဝ်း ဢမ်ႇမုၼ်ႇ၊ ၵူၼ်းမဵဝ်း ဢေႇတုမ်ႇ၊ ၵူၼ်းမဵဝ်း ၸိတုမ်ႇ၊ တင်းၵူၼ်းမဵဝ်း ႁိတ်ႉတိ၊ ထႅင်ႈဢေႃႈ။-
ပိၵ်ႉသမ်ႉ ထႃႇဝရႃႉၽြႃး၊ မီးဢမိင်ႉလူၺ်ႈလွင်ႈဢၼ်ၵူၼ်းမဵဝ်း ဢိသရေး၊ တၵ်းဢမ်ႇလႆႈဢဝ်ၵၼ်ပၼ်ၵၼ်တီႈၵူၼ်းမဵဝ်းၸိူဝ်းၼၼ်ႉ၊ၵူဝ်ၶဝ်ႁဵတ်းႁႂ်ႈမဵဝ်း ဢိသရေး၊ ဝႆႈသႃၽြႃးၶဝ်ၼၼ်ႉဝႃႈၼႆသေၵေႃႈ သေႃးလမုၼ်ႇ၊ ယင်းဢဝ်မႄႈယိင်းၸိူဝ်းၼၼ်ႉဢေႃႈ။-
သေႃးလမုၼ်ႇ၊ ဢဝ်မေးဢၼ်ပဵၼ်လုၵ်ႈယိင်းၶုၼ်ၵူၺ်းၵူၺ်းၸဵတ်းပၢၵ်ႇ၊ၸိူင်ႉၼၢင်းၵူၺ်းၵူၺ်းသၢမ်ပၢၵ်ႇလႄႈ၊မႄႈယိင်းၸိူဝ်းၼၼ်ႉႁႂ်ႈႁူဝ်ၸႂ်မၼ်းပိူင်ႈၵႂႃႇဢေႃႈ။-
ၼင်ႇၼၼ်လႄႈယၢမ်းမိူဝ်ႈဢၼ်မၼ်းထဝ်ႈမႃးၵႄႇမႃးၼၼ်ႉၸိုင်၊မႄႈယိင်းၸိူဝ်းၼၼ်ႉဢွၼ်ဢဝ်မၼ်းဝႆႈသႃၽြႃးတၢင်ႇသူႇတၢင်ႇပႃးသေယဝ်ႉ၊ႁူဝ်ၸႂ်မၼ်းဢမ်ႇပႂ်ႉသဵတ်ႈၸႃႇတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈမၼ်းမိူၼ်ၸိူဝ်ႉၼင်ႇၸဝ်ႈပေႃႈမၼ်း တႃႇဝိတ်ႈ၊ ၼၼ်ႉ၊-
မၼ်းဝႆႈသႃ ဢႃႇသတရိတ်ႉ၊ ဢၼ်ပဵၼ်ၼၢင်းၽီဝဵင်း ၸိတုမ်ႇ၊ ဢိၵ်ႇတင်း မိလႃႉၵုမ်း၊ ဢၼ်ပဵၼ်ၽြႃး ဢမ်ႇမုၼ်ႇ၊ ဢၼ်လီႁင်ႈဢဵတ်ႇသဵတ်ႇၼၼ်ႉသေယဝ်ႉ၊-
မၼ်းႁဵတ်းတုၸရိူၵ်ႈၵႃႈတီႈၽၢႆႇၼႃႈ ထႃႇဝရႃႉၽြႃး၊ လႄႈဢမ်ႇၸွမ်းလင် ထႃႇဝရႃႉၽြႃး၊ လုမ်းလုမ်းမိူၼ်ၸိူဝ်ႉၼင်ႇၸဝ်ႈပေႃႈမၼ်း တႃႇဝိတ်ႈ၊ ၼၼ်ႉဢေႃႈ။-
ၵႃႈတီႈၼိူဝ်လွႆၽၢႆႇတၢင်းဝၼ်းဢွၵ်ႇဝဵင်း ယေႇရုသလႅမ်ႇ၊ ၼၼ်ႉမၼ်းတႄႇႁဵတ်းထႃႇၼႃႉတီႈဢၼ်ဝႆႈ ၶေႇလမု၊ ဢၼ်ပဵၼ်ၽြႃး မေႃႇၽႃႉ၊ ဢၼ်လီႁင်ႈဢဵတ်ႇသဵတ်ႇၼၼ်ႉ၊ဢိၵ်ႇတင်းထႃႇၼႃႉတီႈဢၼ်ဝႆႈ မူးလွၵ်ႉ၊ ဢၼ်ပဵၼ်ၽြႃး ဢမ်ႇမုၼ်ႇ၊ ဢၼ်လီႁင်ႈဢဵတ်ႇသဵတ်ႇၼၼ်ႉဢေႃႈ။-
မၼ်းသမ်ႉယင်းႁဵတ်းပၼ်ထႃႇၼႃႉတီႈဢၼ်မေးမၼ်းဢၼ်ပဵၼ်ၵူၼ်းတၢင်ႇၸိူဝ်ႉတၢင်ႇၶိူဝ်းတၵ်းဢွၼ်ၵၼ်တုတ်ႇၽႆးၼၢမ်ႇသႃႇဢၼ်သၢၵ်ႈလူႇတီႈၽြႃးၶဝ်ႁင်းၽႂ်ႁင်းမၼ်းၼၼ်ႉလူးၵွၼ်ႇဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ ၸႂ်မႆႈၶႂ်ႈၸႃႉတေႃႇ သေႃးလမုၼ်ႇ၊ ၵွပ်ႈပိူဝ်ႈႁူဝ်ၸႂ်မၼ်းပိူင်ႈသေၵႃႈတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ဢၼ်ပေႃႇမႃးတီႈမၼ်းသွင်ပွၵ်ႈလႄႈ၊-
ပိင်းၺၢပ်ႈဝႆႉလူၺ်ႈလွင်ႈတၢင်းၼႆႉၼင်ႇႁိုဝ်မၼ်းတၵ်းဢမ်ႇၸွမ်းလင်ၽြႃးတၢင်ႇသူႇတၢင်ႇပႃးသေယဝ်ႉ၊ၸုၼ်ႉပႅတ်ႈပိင်းၺၢပ်ႈတြႃးဢၼ် ထႃႇဝရႃႉၽြႃး၊ သင်ႇလၢတ်ႈဝႆႉၼၼ်ႉဢေႃႈ။-
ပိူဝ်ႈၼႆလႄႈ ထႃႇဝရႃႉၽြႃး၊ ၸင်ႇမီးဢမိင်ႉတီႈ သေႃးလမုၼ်ႇ၊ လႄႈဝႃႈ၊ “ၵွပ်ႈပိူဝ်ႈဢၼ်မႂ်းႁဵတ်းၸိူဝ်ႉၼင်ႇၼႆလႄႈဢမ်ႇပႂ်ႉဢမ်ႇၸွမ်းပိင်းၺၢပ်ႈၵဝ်၊ဢိၵ်ႇတင်းထုင်းၽိင်ႈတြႃးဢၼ်ၵဝ်သင်ႇလၢတ်ႈဝႆႉၼၼ်ႉလႄႈၵဝ်တၵ်းၼုၵ်ႈဢဝ်သိုင်ႇၸိုင်ႈဝၢၼ်ႈမိူင်းသေၵႃႈတီႈမႂ်းသေယဝ်ႉ၊ပၼ်တီႈၶုၼ်ဢၼ်ပွင်ၵၢၼ်မႂ်းသေၵေႃႉၵေႃႉဢေႃႈ။-
ၵူၺ်းၵႃႈ၊ထွၵ်ႈလူၺ်ႈၼႃႈပေႃႈမႂ်း တႃႇဝိတ်ႈ၊ ၼၼ်ႉလႄႈၵဝ်တၵ်းဢမ်ႇပႆႇႁဵတ်းၼႂ်းၸူဝ်ႈပၢၼ်မႂ်းၼႆႉ၊တၵ်းပဵၼ်ၼႂ်းၸူဝ်ႈပၢၼ်လုၵ်ႈၸၢႆးမႂ်းဢေႃႈ။-
ပိၵ်ႉသမ်ႉဝႃႈၼၼ်သေၵေႃႈၵဝ်တၵ်းဢမ်ႇၼုၵ်ႈဢဝ်သိုင်ႇၸိုင်ႈဝၢၼ်ႈမိူင်းတင်းမူတ်း။ ထွၵ်ႈလူၺ်ႈၶႃႈၵဝ် တႃႇဝိတ်ႈ၊ တင်းဝဵင်း ယေႇရုသလႅမ်ႇ၊ ဝဵင်းဢၼ်ၵဝ်တႄႇတင်ႈဝႆႉပုၼ်ႈတူဝ်ၸဝ်ႈၵဝ်ႇၼၼ်ႉလႄႈတၵ်းဝႆႉပၼ်ၸိူဝ်ႉၶိူဝ်းမဵဝ်းၼိုင်ႈပုၼ်ႈမၼ်းဢေႃႈ၊” ဝႃႈၼင်ႇၼႆဢေႃႈ။
လိုၼ်းၼၼ်ႉ၊ ထႃႇဝရႃႉၽြႃး၊ တိုၵ်းယူင်း ႁႃႇတတ်ႉ၊ ဢၼ်ပဵၼ်ၸိူဝ်ႉၸဝ်ႈၶိူဝ်းၶုၼ်ၵူၼ်းမဵဝ်း ဢေႇတုမ်ႇ၊ ၼၼ်ႉလုၵ်ႉၽိုၼ်ႉ သေႃးလမုၼ်ႇ၊ ဢေႃႈ။-
ၼႂ်းၶိင်ႇယၢမ်းမိူဝ်ႈဢၼ် တႃႇဝိတ်ႈ၊ တိုၵ်းသိမ်းဢဝ်မိူင်း ဢေႇတုမ်ႇ၊ ၼၼ်ႉၸဝ်ႈၵွၼ်းတပ်ႉသိုၵ်းလူင် ယွႃႇၽႃႉ၊ ၶႃႈၽၼ်းပႅတ်ႈၵူၼ်းၸၢႆးမဵဝ်း ဢေႇတုမ်ႇ၊ ၵႃႈၼႂ်းမိူင်းဢေႃႈ။ ၵမ်းၼၼ်ႉမၼ်းၸင်ႇၵႂႃႇႁႂ်ႈလႆႈၽင်တူဝ်တၢႆၸိူဝ်းၼၼ်ႉဢေႃႈ။-
မၼ်းဢိၵ်ႇတင်းၵူၼ်းသိုၵ်းမဵဝ်း ဢိသရေး၊ တင်းလၢႆၵိုတ်းသဝ်းယူႇၵႃႈတီႈၼၼ်ႈတေႃႇထိုင်ႁွတ်ႈမၼ်းၶႃႈၽၼ်းၵူၼ်းၸၢႆးမဵဝ်း ဢေႇတုမ်ႇ၊ တၢႆပႅတ်ႈတင်းသဵင်ႈတင်းမူတ်းၼၼ်ႉဢေႃႈ။-
ႁႃႇတတ်ႉ၊ ၼၼ်ႉယင်းတိုၵ်ႉပဵၼ်လုၵ်ႈဢွၼ်ႇယူႇလႄႈၼီပၢႆႈလူၺ်ႈၵၼ်တင်းၵူၼ်းမဵဝ်း ဢေႇတုမ်ႇ၊ ၵမ်ႈၽွင်ႈၸိူဝ်းဢၼ်ပဵၼ်ၶႃႈပေႃႈမၼ်းၼၼ်ႉသေလႄႈၵႂႃႇႁွတ်ႈထိုင်တီႈမိူင်း ဢေးၵျိပ်ႉ၊ ပုၼ်ႉဢေႃႈ။-
ၶဝ်ဢွၵ်ႇသေၵႃႈတီႈမိူင်း မိတျၼ်ႇ၊ ၵႂႃႇလႄႈႁွတ်ႈထိုင်တီႈမိူင်း ပႃႇရၼ်ႇ၊ သေယဝ်ႉ၊ၵႃႈတီႈၼၼ်ႈၵူၼ်းၵမ်ႈၽွင်ႈၵႂႃႇၸွမ်းလူၺ်ႈၵၼ်တင်းၶဝ်ထႅင်ႈဢေႃႈ။ ၶဝ်သိုပ်ႇၶၢဝ်းတၢင်းၵႂႃႇႁွတ်ႈထိုင်တီႈၶုၼ်ႁေႃၶမ်းမိူင်း ဢေးၵျိပ်ႉ၊ လႄႈၶုၼ်ႁေႃၶမ်းၼၼ်ႉပၼ်ၵႂၢၵ်ႈၼမ်ႉၵႂၢၵ်ႈလိၼ်ႁိူၼ်းယေး၊ဢိၵ်ႇတင်းၶဝ်ႈၼမ်ႉတၢင်းၵိၼ်တီႈ ႁႃႇတတ်ႉ၊ ဢေႃႈ။-
ႁႃႇတတ်ႉ၊ လႆႈႁပ်ႉဢဝ်ၵျေးၸူးတၢင်းႁၵ်ႉမႅတ်ႈတႃႇတီႈၶုၼ်ႁေႃၶမ်းၼႃႇလူင်လၢင်ထၢၼ်ႈပေႃးဢဝ်ၼွင်ႉယိင်းမေးမၼ်းၼၢင်းႁေႃၶမ်း တႃႇပၼိတ်ႉ၊ ၼၼ်ႉသွင်ႇမၢင်ႇၵလႃႇပၼ်တီႈ ႁႃႇတတ်ႉ၊ ဢေႃႈ။-
ၼင်ႇၼၼ်လႄႈၼွင်ႉယိင်း တႃႇပၼိတ်ႉ၊ ၼၼ်ႉၵိူတ်ႇလဵင်ႉလုၵ်ႈၸၢႆး ၵေႇၼုပတ်ႉ၊ မႃးသေယဝ်ႉ၊ တႃႇပၼိတ်ႉ၊ ၼၼ်ႉဢဝ်ၽၢတ်ႇၼူမ်းလႄႈဝႆႉၵႃႈၼႂ်းႁေႃၸဝ်ႈဢေႃႈ။ ၵေႇၼုပတ်ႉ၊ လႆႈယူႇလူၺ်ႈၵၼ်တင်းလုၵ်ႈၸၢႆးၶုၼ်ႁေႃၶမ်း တင်းလၢႆၵႃႈတီႈၼၼ်ႈဢေႃႈ။
ႁႃႇတတ်ႉ၊ ယူႇၵႃႈၼႂ်းမိူင်း ဢေးၵျိပ်ႉ၊ လႄႈမိူဝ်ႈဢၼ်ငိၼ်းၶၢဝ်ႇလွင်ႈဢၼ် တႃႇဝိတ်ႈ၊ ၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းယဝ်ႉ၊ဢိၵ်ႇတင်းလွင်ႈဢၼ်ၸဝ်ႈၵွၼ်းတပ်ႉသိုၵ်းလူင် ယွႃႇၽႃႉ၊ ၵေႃႈတၢႆယဝ်ႉၼၼ်ႉၸိုင်၊ ႁႃႇတတ်ႉ၊ လဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “ပၼ်ဢၶႂၢင်ႉႁႂ်ႈၶႃႈၸဝ်ႈလႆႈဢွၵ်ႇမိူဝ်းၸူးတီႈဝၢၼ်ႈၵဝ်ႇမိူင်းလင်ၶႃႈၸဝ်ႈပုၼ်ႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းၵေႃႈထၢမ်လႄႈဝႃႈ၊ “ၵွပ်ႈသင်လႄႈမႂ်းၶႂ်ႈၶိုၼ်းမိူဝ်းၵႂႃႇ။ ၸွင်ႇၵဝ်မီးတၢင်းဢၼ်လုတ်ႈဢၼ်ႁၢမ်းသေၸိူဝ်ႉသေပိူင်ဢၼ်လူဝ်ႇလႆႈပၼ်တီႈမႂ်းၼၼ်ႉလႄႈမႂ်းၶႂ်ႈၶိုၼ်းမိူဝ်းၵႂႃႇမိူင်းတူဝ်ၸဝ်ႈၵဝ်ႇႁိုဝ်း၊” ဝႃႈၼင်ႇၼႆဢေႃႈ။ ႁႃႇတတ်ႉ၊ ၶိုၼ်းလဝ်ႈလၢတ်ႈလႄႈဝႃႈ၊ “ဢမ်ႇၸႂ်ႈၶႃႈ။ ၵူၺ်းၵႃႈ၊ၶႅၼ်းတေႃႈပၼ်ဢၶႂၢင်ႉသေၵမ်းတီႈၶႃႈ၊” ဝႃႈၼင်ႇၼႆသေယဝ်ႉ၊မၼ်းၶိုၼ်းမိူဝ်းၵႂႃႇတီႈမိူင်းတူဝ်ၸဝ်ႈၵဝ်ႇသေဢေႃႈ။
ရၢၼ်ႇသူႇတၢင်ႇၵေႃႉၼၼ်ႉ၊ၽြႃးပဵၼ်ၸဝ်ႈတိုၵ်းယူင်း ရေႇၸုၼ်ႇ၊ လုၵ်ႈၸၢႆး ဢေးလျႃႇတႃႉ၊ ဢၼ်ဢွၵ်ႇပၢႆႈသေၵႃႈတီႈၸဝ်ႈမၼ်း ႁႃႇတႃႉတေႇၸႃႇ၊ ၶုၼ်ႁေႃၶမ်းမိူင်း ၸေႃႇၽႃႉ၊ ၼၼ်ႉဢေႃႈ။-
မၼ်းၼၼ်ႉၵဵပ်းတုမ်ၵဵပ်းႁွမ်ဢဝ်ၵူၼ်းတင်းလၢႆလႄႈႁဵတ်းႁူဝ်သိုၵ်းလူင်ၵႃႈၼိူဝ်မုၵ်ႉၼိုင်ႈၸိူဝ်းၼိုင်ႈမိူဝ်ႈဢၼ် တႃႇဝိတ်ႈ၊ တိုၵ်းတေႃးယႃႉပႅတ်ႈၵူၼ်း ၸေႃႇၽႃႉ၊ ၼၼ်ႉဢေႃႈ။ မၼ်းၼီပၢႆႈၸူးတီႈဝဵင်း တမ်ႇမတ်ႉသၵတ်ႉ၊ လႄႈႁဵတ်းၶုၼ်ႁေႃၶမ်းၵႃႈတီႈၼၼ်ႈဢေႃႈ။-
မၼ်းၼၼ်ႉပဵၼ်ရၢၼ်ႇသူႇတီႈၵူၼ်းမဵဝ်း ဢိသရေး၊ ၼႂ်းၸူဝ်ႈပၢၼ် သေႃးလမုၼ်ႇ၊ ၼၼ်ႉတႄႉတႄႉဝႃႈဝႃႈဢေႃႈ။ မၼ်းငႅၼ်းသႄးဢဝ်တၢႆၵူၼ်းမဵဝ်း ဢိသရေး၊ လႄႈဢုပ်ႉပိူင်ႇၸၢမ်ႇၸႃးယူႇတီႈမိူင်း ဢေႇတုမ်ႇ၊ ဢေႃႈ။
ရၢၼ်ႇသူႇတၢင်ႇၵေႃႉဢၼ်လုၵ်ႉၽိုၼ်ႉၶုၼ်ႁေႃၶမ်း သေႃးလမုၼ်ႇ၊ ၼၼ်ႉပဵၼ်ၵူၼ်းၼႂ်းၶုၼ်ဢၼ်ပွင်ၵၢၼ်မၼ်းၸိူဝ်းၼၼ်ႉၵေႃႉၼိုင်ႈဢၼ်ဝႃႈ၊ ယေႇရူဝ်းပုမ်ႇ၊ လုၵ်ႈၸၢႆး ၼေႇပတ်ႉ၊ ၵူၼ်းဝၢၼ်ႈ ၸေႇရတႃႉ၊ ၼႂ်းၸိူဝ်ႉၶိူဝ်း ဢေႇၽရိမ်ႇ၊ ၼၼ်ႉဢေႃႈ။ မႄႈမၼ်းၼၼ်ႉပဵၼ်မႄႈမၢႆႈဢၼ်လႆႈၸိုဝ်ႈ ၸေႇရွႃႇ၊ ၼၼ်ႉဢေႃႈ။-
လွင်ႈတၢင်းဢၼ်မၼ်းႁဵတ်းၶတ်းလုၵ်ႉၽိုၼ်ႉၼၼ်ႉၸမ်ႉ။ သေႃးလမုၼ်ႇ၊ ၼၼ်ႉယင်းထူမ်ၼႃႈလိၼ်ၽၢႆႇတၢင်းဝၼ်းဢွၵ်ႇဝဵင်း ယေႇရုသလႅမ်ႇ၊ ယူႇဢိၵ်ႇတင်းမႄးၵုမ်းမႄးႁဵတ်းလမ်းဝဵင်းယူႇဢေႃႈ။-
ယေႇရူဝ်းပုမ်ႇ၊ ၼၼ်ႉပဵၼ်ၵူၼ်းၼုမ်ႇဢၼ်ႁႅင်းယႂ်ႇၼႃႇဢေႃႈ။ မိူဝ်ႈဢၼ် သေႃးလမုၼ်ႇ၊ ႁုႁၼ်တၢင်းဢၼ်မၼ်းၵႆႉၶၵ်းႁဵတ်းၵၢၼ်လီၼႃႇၼၼ်ႉၸိုင်၊ သေႃးလမုၼ်ႇ၊ ၶၢၼ်းႁႂ်ႈမၼ်းၽွင်းငမ်းၵႃႈၼိူဝ်မူႇၵူၼ်းဢၼ်လႆႈၶၢမ်ႇတဵၵ်းၶေႃးႁႂ်ႈႁဵတ်းၵၢၼ်ဢၼ်ယူႇၵႃႈၼႂ်းဢိူင်ႇၸိူဝ်ႉၶိူဝ်း မၼႃႇသေႇ၊ တင်းၸိူဝ်ႉၶိူဝ်း ဢေႇၽရိမ်ႇ၊ ၼၼ်ႉဢေႃႈ။-
ဝၼ်းၼိုင်ႈယၢမ်းမိူဝ်ႈဢၼ် ယေႇရူဝ်းပုမ်ႇ၊ လုၵ်ႉသေၵႃႈတီႈဝဵင်း ယေႇရုသလႅမ်ႇ၊ ပႆၵႂႃႇယူႇၼၼ်ႉပရေႃးၽႅတ်ႈ ဢႁိယႃႉ၊ ၵူၼ်းဝဵင်း သိလေႃႇ၊ ၼၼ်ႉႁႄႉႁပ်ႉႁူဝ်တၢင်းမၼ်းၵေႃႉလဵဝ်ၵူၺ်း၊ၵႃႈၼႂ်းၵၢင်ပၢင်ႇၵၢင်ပိုၼ်ဢေႃႈ။-
ဢႁိယႃႉ၊ ၼၼ်ႉထွတ်ႇဢဝ်သိူဝ်ႈယၢဝ်းဢၼ်မႂ်ႇဢၼ်မၼ်းၼုင်ႈမႆယူႇၼၼ်ႉသေယဝ်ႉ၊သိၵ်ႇႁဵတ်းသိပ်းသွင်ပွတ်းသေလႄႈ၊-
လၢတ်ႈတီႈ ယေႇရူဝ်းပုမ်ႇ၊ လႄႈဝႃႈ၊ “ဢဝ်သိပ်းပွတ်းၼႆႉပုၼ်ႈမႂ်းတႃႉ။ လွင်ႈမၼ်းၸမ်ႉ၊ ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ မီးဢမိင်ႉၸမ်ႉ၊ ‘ၵဝ်တၵ်းၼုၵ်ႈဢဝ်သိုင်ႇၸိုင်ႈဝၢၼ်ႈမိူင်းၸဝ်ႈသေၵႃႈၼႂ်းမိုဝ်း သေႃးလမုၼ်ႇ၊ သေယဝ်ႉ၊ဢဝ်ၸိူဝ်ႉၶိူဝ်းသိပ်းမဵဝ်းပၼ်တီႈမႂ်းဢေႃႈ။-
သေႃးလမုၼ်ႇ၊ တၵ်းတေလႆႈမဵဝ်းၼိုင်ႈၵူၺ်း၊ၵွပ်ႈပိူဝ်ႈဢၼ်ၵဝ်ထွၵ်ႈလူၺ်ႈၼႃႈၶႃႈၵဝ် တႃႇဝိတ်ႈ၊ တင်းဝဵင်း ယေႇရုသလႅမ်ႇ၊ ဝဵင်းဢၼ်ၵဝ်လိူၵ်ႈဢဝ်ဝႆႉပုၼ်ႈၵဝ်ၵႃႈၼႂ်းလိၼ်မဵဝ်း ဢိသရေး၊ တင်းသဵင်ႈတင်းလူင်ၼၼ်ႉဢေႃႈ။-
ၵဝ်တၵ်းၼုၵ်ႈဢဝ်ၸိူဝ်ႉၼင်ႇၼႆၵွပ်ႈပိူဝ်ႈဢၼ် သေႃးလမုၼ်ႇ၊ ပႄႇပႅတ်ႈၵဝ်သေယဝ်ႉ၊ဝႆႈသႃၽြႃးတၢင်ႇသူႇတၢင်ႇပႃး ဢႃႇသတရိတ်ႉ၊ ဢၼ်ပဵၼ်ၼၢင်းၽီဝဵင်း ၸိတုမ်ႇ၊ၶေမုသႃႉ၊ ဢၼ်ပဵၼ်ၽြႃး မေႃႇၽႃႉ၊ ဢိၵ်ႇတင်း မိလႃႉၵုမ်း၊ ဢၼ်ပဵၼ်ၽြႃး ဢမ်ႇမုၼ်ႇ၊ ၸိူဝ်းၼၼ်ႉဢေႃႈ။ မၼ်းၼၼ်ႉဢမ်ႇထွမ်ႇဢမ်ႇဢဝ်ၵႂၢမ်းၵဝ်၊ႁဵတ်းၽိတ်းႁဵတ်းပိူင်ႈလႄႈဢမ်ႇပႂ်ႉဢမ်ႇၸွမ်းထုင်းၽိင်ႈတြႃးၵဝ်၊ဢိၵ်ႇတင်းပိင်းၺၢပ်ႈတြႃးၵဝ်မိူၼ်ၸိူဝ်ႉၼင်ႇဢၼ်ပေႃႈမၼ်း တႃႇဝိတ်ႈ၊ ပႂ်ႉၵမ်ပႂ်ႉၸွမ်းၼၼ်ႉယဝ်ႉ။-
ၵူၺ်းၵႃႈ၊ၵဝ်တၵ်းဢမ်ႇၼုၵ်ႈဢဝ်သိုင်ႇၸိုင်ႈဝၢၼ်ႈမိူင်းတင်းသဵင်ႈတင်းမူတ်းသေၵႃႈတီႈ သေႃးလမုၼ်ႇ၊ လႄႈၵဝ်တၵ်းႁႂ်ႈမၼ်းပဵၼ်ၶုၼ်လူင်ယူႇၸူဝ်ႈဢသၢၵ်ႈမၼ်းဢေႃႈ။ ၵဝ်ႁဵတ်းၸိူဝ်ႉၼင်ႇၼႆၵွပ်ႈပိူဝ်ႈဢၼ်ၵဝ်ထွၵ်ႈလူၺ်ႈၶႃႈၵဝ် တႃႇဝိတ်ႈ၊ ဢၼ်ၵဝ်လိူၵ်ႈဢဝ်ဝႆႉ၊ဢိၵ်ႇတင်းတၢင်းဢၼ်မၼ်းပဵၼ်ၵေႃႉဢၼ်ပႂ်ႉၵမ်ပႂ်ႉၸွမ်းထုင်းၽိင်ႈတြႃးၵဝ်တင်းပိင်းၺၢပ်ႈတြႃးၵဝ်တင်းလၢႆၼၼ်ႉဢေႃႈ။-
ၵဝ်တၵ်းၼုၵ်ႈဢဝ်သိုင်ႇၸိုင်ႈဝၢၼ်ႈမိူင်းၸဝ်ႈသေၵႃႈတီႈလုၵ်ႈၸၢႆး သေႃးလမုၼ်ႇ၊ လႄႈပၼ်မႂ်းသိပ်းမဵဝ်းဢေႃႈ။-
ၵူၺ်းၵႃႈ၊ၵဝ်တၵ်းႁႂ်ႈလုၵ်ႈၸၢႆး သေႃးလမုၼ်ႇ၊ လႆႈမဵဝ်းၼိုင်ႈပုၼ်ႈလွင်ႈၼင်ႇႁိုဝ်ၵဝ်တၵ်းတေလႆႈၸိူဝ်ႉၶိူဝ်းလုၵ်ႈလၢၼ်ၶႃႈၵဝ် တႃႇဝိတ်ႈ၊ ဢုပ်ႉပိူင်ႇယူႇတႃႇသေႇၵႃႈၼႂ်းဝဵင်း ယေႇရုသလႅမ်ႇ၊ ဝဵင်းဢၼ်ၵဝ်လိူၵ်ႈဝႆႉႁႂ်ႈပဵၼ်ထႃႇၼႃႉတီႈဢၼ်ၵူၼ်းတင်းလၢႆဝႆႈသႃၵဝ်ၼၼ်ႉဢေႃႈ။-
ယေႇရူဝ်းပုမ်ႇ၊ ႟။ ၵဝ်တၵ်းၶၢၼ်းမႂ်းႁႂ်ႈပဵၼ်ၶုၼ်ႁေႃၶမ်းၵူၼ်းမဵဝ်း ဢိသရေး၊ လႄႈမႂ်းတၵ်းတေလႆႈဢုပ်ႉပိူင်ႇၵူႈဢိူင်ႇၵူႈမိူင်းၸွမ်းၵႃႈၼင်ႇဢၼ်ဢလူဝ်ႇၵၢင်ၸႂ်မႂ်းမီးၼၼ်ႉဢေႃႈ။-
ပေႃးမႂ်းထွမ်ႇဢဝ်ၵႂၢမ်းၵဝ်လုမ်းလုမ်း၊ဢသၢၵ်ႈလိပ်းယူႇၼႂ်းထုင်းတြႃးၵဝ်ယူႇလႄႈႁဵတ်းဢၼ်ၸိုဝ်ႈၸႂ်ႈလီငၢမ်းသိုဝ်ႈၼႃႈတႂ်ႈတႃၵဝ်၊ဢိၵ်ႇတင်းပႂ်ႉၵမ်ပႂ်ႉၸွမ်းထုင်းၽိင်ႈတြႃးၵဝ်တင်းပိင်းၺၢပ်ႈတြႃးၵဝ်တင်းလၢႆယူႇ၊မိူၼ်ၸိူဝ်ႉၼင်ႇၶႃႈၵဝ် တႃႇဝိတ်ႈ၊ ၼၼ်ႉၸိုင်၊ၵဝ်တၵ်းမီးယူႇလူၺ်ႈၵၼ်တင်းမႂ်းဢေႃႈ။ ၵဝ်တၵ်းႁႂ်ႈမႂ်းပဵၼ်ၶုၼ်ႁေႃၶမ်းမဵဝ်း ဢိသရေး၊ လႄႈတၵ်းႁႂ်ႈၸိူဝ်ႉၶိူဝ်းမႂ်းလႆႈသိုပ်ႇဢုပ်ႉပိူင်ႇၸၢမ်ႇၸႃးၸွမ်းၵႂႃႇပႃႈလိုၼ်းမႂ်း၊မိူၼ်ၸိူဝ်ႉၼင်ႇဢၼ်ၵဝ်ႁဵတ်းပုၼ်ႈ တႃႇဝိတ်ႈ၊ ၼၼ်ႉဢေႃႈ။-
ၵွပ်ႈပိူဝ်ႈဢပျတ်ႈ သေႃးလမုၼ်ႇ၊ ၼၼ်ႉလႄႈၵဝ်တၵ်းပၼ်တၢမ်ႇတီႈၸိူဝ်ႉၶိူဝ်း တႃႇဝိတ်ႈ၊ ဢေႃႈ။ ၼႂ်းဝႃႈၼၼ်သေၵေႃႈ၊တၵ်းပၼ်တၢမ်ႇသေႇသေႇဢမ်ႇၸႂ်ႈ၊’ ဝႃႈၼႆဝႆႉယဝ်ႉ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ သေႃးလမုၼ်ႇ၊ ၶတ်းၸႂ်ႁႂ်ႈလႆႈဢဝ် ယေႇရူဝ်းပုမ်ႇ၊ တၢႆဢေႃႈ။ ၵူၺ်းၵႃႈ၊ ယေႇရူဝ်းပုမ်ႇ၊ ပၢႆႈလွတ်ႈၵႂႃႇယူႇတီႈၶုၼ်ႁေႃၶမ်း သိသၵ်ႉ၊ မိူင်း ဢေးၵျိပ်ႉ၊ သေယဝ်ႉ၊ၵိုတ်းသဝ်းယူႇၵႃႈတီႈၼၼ်ႈတေႃႇထိုင်ႁွတ်ႈ သေႃးလမုၼ်ႇ၊ တၢႆဢေႃႈ။
လွင်ႈတၢင်းဢၼ် သေႃးလမုၼ်ႇ၊ ႁဵတ်းၵၢၼ်ငၢၼ်းမႃးၵႃႈမီးတင်းသဵင်ႈတင်းလူင်၊ၸႃႉၸဵမ်လွင်ႈပိင်ႇၺႃႇမၼ်းၸိူဝ်းၼၼ်ႉၸိုင်၊တႅမ်ႈမၢႆဝႆႉၼႂ်းပိုၼ်း သေႃးလမုၼ်ႇ၊ ဢေႃႈ။-
မၼ်းလႆႈပဵၼ်ၶုၼ်ႁေႃၶမ်းၵႃႈၼႂ်းဝဵင်း ယေႇရုသလႅမ်ႇ၊ ၵႃႈၼိူဝ်ၵူၼ်းမဵဝ်း ဢိသရေး၊ တင်းမူတ်းသီႇသိပ်းပီတဵမ်တဵမ်ဢေႃႈ။-
မၼ်းၼွၼ်းၽႄးၸွမ်းပူႇမွၼ်ႇမၼ်းတင်းလၢႆယဝ်ႉလႄႈဢဝ်သၢင်းၵျူဝ်ႇဝႆႉၵႃႈၼႂ်းဝဵင်း တႃႇဝိတ်ႈ၊ ဢၼ်ပဵၼ်ဝဵင်းၸဝ်ႈပေႃႈမၼ်းၼၼ်ႉဢေႃႈ။ လိုၼ်းၼၼ်ႉလုၵ်ႈၸၢႆးမၼ်း ရူဝ်းပုမ်ႇ၊ ပုတ်ႈၶၢမ်ႇဢဝ်ႁၢင်ႈဢဝ်ႁေႃမၼ်းဢေႃႈ။
ရူဝ်းပုမ်ႇ၊ ၵႂႃႇၵႃႈတီႈဝဵင်း သေးၶိမ်ႇ၊ ပိူဝ်ႈဢၼ်ၵူၼ်းမဵဝ်း ဢိသရေး၊ ၵႃႈမီးတင်းသဵင်ႈတင်းမူတ်းမႃးၸုတုမ်ၵၼ်ႁႂ်ႈလႆႈယုၵ်ႉယွင်ႈမၼ်းဝႆႉၵႃႈၼႂ်းဢရႃႇၶုၼ်ႁေႃၶမ်းဢေႃႈ။-
မိူဝ်ႈဢၼ် ယေႇရူဝ်းပုမ်ႇ၊ လုၵ်ႈၸၢႆး ၼေႇပတ်ႉ၊ ဢၼ်ဢွၵ်ႇပၢႆႈသေၽေးၶုၼ်ႁေႃၶမ်း သေႃးလမုၼ်ႇ၊ ၵႂႃႇတဵတ်ႇသွၼ်ႈယူႇၵႃႈၼႂ်းမိူင်း ဢေးၵျိပ်ႉ၊ ၼၼ်ႉလႆႈငိၼ်းၶၢဝ်ႇလွင်ႈၼႆႉၸိုင်၊မၼ်းပွၵ်ႈၶိုၼ်းမႃးဢေႃႈ။-
ၵူၼ်းၸိူဝ်ႉၶိူဝ်းမဵဝ်း ဢိသရေး၊ ပွတ်းႁွင်ႇၸိူဝ်းၼၼ်ႉဢွၼ်ၵၼ်ႁွင်ႉပၢင်းမၼ်းမႃးလႄႈၶဝ်တင်းသဵင်ႈတင်းလူင်ဢွၼ်ၵၼ်ၶဝ်ႈၸူးတီႈ ရူဝ်းပုမ်ႇ၊ သေယဝ်ႉလၢတ်ႈလႄႈဝႃႈ၊-
“ၸဝ်ႈပေႃႈၸဝ်ႈႁဝ်း သေႃးလမုၼ်ႇ၊ ၼၼ်ႉႁဵတ်းတီႈၶႃႈၸဝ်ႈႁဝ်းၶဝ်ၵျၢမ်းထၢမ်းၼႃႇလႄႈဢဝ်ၵၢၼ်းဢၼ်ၼၵ်းၼႃႇတၢင်ႇသႂ်ႇတီႈၶႃႈၸဝ်ႈႁဝ်းၶဝ်တီႈၶႃႈယဝ်ႉ။ ပေႃးဝႃႈ၊ၸဝ်ႈႁဝ်းႁႂ်ႈၵၢၼ်တၢင်းႁဵတ်းဢၼ်ၵိုတ်ႉႁၢပ်ႇယၢပ်ႇၸႂ်ၼႃႇလူင်လၢင်ဢၼ်ၸဝ်ႈပေႃႈႁဝ်း သေႃးလမုၼ်ႇ၊ ဢဝ်တၢင်ႇသႂ်ႇၵႃႈၼိူဝ်ၶႃႈၸဝ်ႈႁဝ်းၶဝ်ၼၼ်ႉႁႂ်ႈမဝ်မႃးၸိုင်၊ၶႃႈၸဝ်ႈႁဝ်းၶဝ်တင်းလၢႆတၵ်းဢွၼ်ၵၼ်ၵိုတ်ႉႁၢပ်ႇၼႃႈၵၢၼ်ၸဝ်ႈႁဝ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။-
မၼ်းၶိုၼ်းတွပ်ႇလႄႈဝႃႈ၊ “ပူၼ်ႉသေသၢမ်ဝၼ်းၸင်ႇၶိုၼ်းမႃးတီႈၵဝ်တႃႉ။ ၵဝ်တၵ်းမွၵ်ႇလၢတ်ႈပၼ်တီႈသူဢေႃႈ၊” ဝႃႈၼင်ႇၼႆဢေႃႈ။ မိူဝ်ႈဢၼ်ၵူၼ်းတင်းသဵင်ႈတင်းလူင်ဢွၼ်ၵၼ်ၵႂႃႇယဝ်ႉၼၼ်ႉၸိုင်။
ၶုၼ်ႁေႃၶမ်း ရူဝ်းပုမ်ႇ၊ တိူင်ႇပၢင်ႇၵၼ်တင်းၶဝ်ၸိူဝ်းဢၼ်ထဝ်ႈဢၼ်ၵႄႇဢၼ်ၶႃးၸႃးၵႃႈတီႈၸဝ်ႈပေႃႈမၼ်း သေႃးလမုၼ်ႇ၊ ၼၼ်ႉလႄႈတွင်ႈထၢမ်ဝႃႈ၊ “သူတၵ်းပၼ်တၢင်းၵျၢမ်ႇတၢင်းပွင်ၸိူဝ်ႉၼင်ႇႁိုဝ်တီႈၵဝ်ႁႂ်ႈၵဝ်လႆႈၶိုၼ်းမွၵ်ႇၶိုၼ်းလၢတ်ႈၵူၼ်းတင်းလၢႆၸိူဝ်းၼႆႉ၊” ဝႃႈၼင်ႇၼႆဢေႃႈ။
ၶဝ်ဢွၼ်ၵၼ်လဝ်ႈလၢတ်ႈလႄႈဝႃႈ၊ “ပေႃးဝႃႈ၊ၸဝ်ႈႁဝ်းမီးဢလူဝ်ႇၶႂ်ႈႁဵတ်းပၼ်တီႈၵူၼ်းတင်းလၢႆၸိူဝ်းၼႆႉလီလီငၢမ်းငၢမ်းၸိုင်၊မိူဝ်ႈဢၼ်ၸဝ်ႈႁဝ်းၶိုၼ်းလၢတ်ႈတီႈၶဝ်ၼၼ်ႉ၊လၢတ်ႈၵႂၢမ်းလီၵႂၢမ်းဝၢၼ်တီႈၶဝ်သေၵမ်း။ ၶဝ်တၵ်းဢွၼ်ၵၼ်ၶၢမ်ႇႁဵတ်းၵၢၼ်တီႈၸဝ်ႈႁဝ်းလူၺ်ႈတင်းဢၼ်သိုဝ်ႈယူဝ်းယူႇသေႇသေႇဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊မၼ်းဢမ်ႇႁပ်ႉဢမ်ႇဢဝ်တၢင်းၵျၢမ်ႇတၢင်းပွင်ဢၼ်ၵူၼ်းထဝ်ႈၵူၼ်းၵႄႇၸိူဝ်းၼၼ်ႉပၼ်ၼၼ်ႉလႄႈသမ်ႉၵႂႃႇတိူင်ႇပၢင်ႇၵၼ်တင်းၵူၼ်းၼုမ်ႇၵူၼ်းၵမ်ၸိူဝ်းဢၼ်ပဵၼ်ၵေႃႉသႄႈမၼ်းလႄႈမိူဝ်ႈလဵဝ်လႆႈပဵၼ်ၵူၼ်းပၼ်တၢင်းၵျၢမ်ႇတီႈမၼ်းၼၼ်ႉယဝ်ႉ၊မၼ်းတွင်ႈထၢမ်တီႈၶဝ်လႄႈဝႃႈ၊-
“သူတၵ်းပၼ်တၢင်းၵျၢမ်ႇတၢင်းပွင်ႁႂ်ႈၵဝ်ႁဵတ်းၸိူဝ်ႉၼင်ႇႁိုဝ်ၼၼ်ႉ။ ၵဝ်တၵ်းလႆႈၶိုၼ်းမွၵ်ႇၶိုၼ်းလၢတ်ႈၸိူဝ်ႉၼင်ႇႁိုဝ်တီႈၵူၼ်းတင်းလၢႆ ၸိူဝ်းဢၼ်ၶေႃယွၼ်းတီႈၵဝ်၊ႁႂ်ႈၵဝ်ႁဵတ်းႁႂ်ႈၵၢၼ်းဢၼ်ၸဝ်ႈပေႃႈၵဝ်တၢင်ႇသႂ်ႇၼၼ်ႉမဝ်မႃးၼၼ်ႉလႆႈၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ၵူၼ်းၼုမ်ႇၵူၼ်းၵမ်ၸိူဝ်းၼၼ်ႉၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈႁဝ်းၶႅၼ်းတေႃႈၶိုၼ်းလၢတ်ႈတီႈၵူၼ်းတင်းလၢႆၸိူဝ်းဢၼ်ၶေႃယွၼ်းတီႈၸဝ်ႈႁဝ်းလႄႈဝႃႈ၊ ‘ၸဝ်ႈပေႃႈၸဝ်ႈႁဝ်းတၢင်ႇသႂ်ႇၵၢၼ်းဢၼ်ႁၢပ်ႇၼၵ်းၼႃႇလူင်လၢင်တီႈၶႃႈၸဝ်ႈႁဝ်းၶဝ်ယဝ်ႉ။ ၶႅၼ်းတေႃႈၸဝ်ႈႁဝ်းႁဵတ်းႁႂ်ႈမဝ်မႃးသေၵမ်း၊’ ၵႂၢမ်းဢၼ်ဝႃႈၼင်ႇၼႆၼၼ်ႉ၊သမ်ႉၶိုၼ်းတွပ်ႇပၼ်ၶဝ်လႄႈဝႃႈ၊ ‘ၼိဝ်ႉၵွႆႈၵဝ်ၼႆႉယင်းယႂ်ႇသေဢႅဝ်ၸဝ်ႈပေႃႈၵဝ်ဢေႃႈ။-
ၸဝ်ႈပေႃႈၵဝ်ၼၼ်ႉဢဝ်ၵၢၼ်းဢၼ်ႁၢပ်ႇၼၵ်းၼႃႇတၢင်ႇသႂ်ႇသူယဝ်ႉ။ ၵဝ်တၵ်းတၢင်ႇသႂ်ႇထႅင်ႈၵၢၼ်းဢၼ်ယဵင်ႈၶႅၼ်းႁၢပ်ႇၼၵ်းၼႃႇၼၼ်ႉလူးၵွၼ်ႇဢေႃႈ။ ၸဝ်ႈပေႃႈၵဝ်ၼၼ်ႉဢဝ်ၶွၼ်ႉဝၢႆပေႃႉယႅၼ်ႉသူဢေႃႈ။ ၵဝ်သမ်ႉတၵ်းဢဝ်ၶွၼ်ႉၸိူၵ်ႈပေႃႉယႅၼ်ႉသူလူးၵွၼ်ႇဢေႃႈ၊’ ဝႃႈၼင်ႇၼႆသေၵမ်း၊” ဝႃႈၼင်ႇၼႆဢေႃႈ။
ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉ ယေႇရူဝ်းပုမ်ႇ၊ ဢိၵ်ႇတင်းၵူၼ်းတင်းသဵင်ႈတင်းလူင်ဢွၼ်ၵၼ်ၶိုၼ်းႁွတ်ႈမႃးၵႃႈတီႈၶုၼ်ႁေႃၶမ်း ရူဝ်းပုမ်ႇ၊ ၸွမ်းၵႃႈၼင်ႇဢၼ်သင်ႇလၢတ်ႈဝႆႉၼၼ်ႉဢေႃႈ။-
ၶုၼ်ႁေႃၶမ်းယင်းဢမ်ႇၸွမ်းတၢင်းၵျၢမ်ႇတၢင်းပွင်ဢၼ်ၵူၼ်းထဝ်ႈၵူၼ်းၵႄႇပၼ်ၼၼ်ႉၵူၺ်းဢမ်ႇၵႃး၊ယင်းလၢတ်ႈတေႃႇၵူၼ်းတင်းလၢႆႁၢဝ်ႈၵျၢမ်းၼႃႇလူင်လၢင်သေယဝ်ႉ။-
ႁဵတ်းၸွမ်းတၢင်းၵျၢမ်ႇတၢင်းပွင်ဢၼ်ၵူၼ်းၼုမ်ႇၵူၼ်းၵမ်ၸိူဝ်းၼၼ်ႉပၼ်ၼၼ်ႉဢေႃႈ။ မၼ်းလၢတ်ႈလႄႈဝႃႈ၊ “ၸဝ်ႈပေႃႈၵဝ်ၼၼ်ႉဢဝ်ၵၢၼ်းဢၼ်ႁၢပ်ႇၼၵ်းၼႃႇၼၼ်ႉ တၢင်ႇသႂ်ႇၵႃႈၼိူဝ်သူယဝ်ႉ။ ၵဝ်တၵ်းဢဝ်ၵၢၼ်းဢၼ်ယဵင်ႈၶႅၼ်းႁၢပ်ႇၼၵ်းၼႃႇၼၼ်ႉတၢင်ႇသႂ်ႇထႅင်ႈလူးၵွၼ်ႇဢေႃႈ၊” ဝႃႈၼင်ႇၼႆဢေႃႈ။-
လွင်ႈတၢင်းဢၼ်ၶုၼ်ႁေႃၶမ်းဢမ်ႇထွမ်ႇဢမ်ႇဢဝ်ၵႂၢမ်းၵူၼ်းဝၢၼ်ႈၵူၼ်းမိူင်းၼၼ်ႉၸမ်ႉ၊ပဵၼ်ၸွမ်းဢလူဝ်ႇ ထႃႇဝရႃႉၽြႃး၊ ဢၼ်မၼ်းၸဝ်ႈၸႂ်ႉပရေႃးၽႅတ်ႈ ဢႁိယႃႉ၊ ၵူၼ်းဝဵင်း သိလေႃႇ၊ မီးဢမိင်ႉတီႈ ယေႇရူဝ်းပုမ်ႇ၊ လုၵ်ႈၸၢႆး ၼေႇပတ်ႉ၊ ၼၼ်ႉဢေႃႈ။
မိူဝ်ႈဢၼ်ၵူၼ်းမဵဝ်း ဢိသရေး၊ ၸိူဝ်းၼၼ်ႉႁုႁၼ်လွင်ႈဢၼ်ၶုၼ်ႁေႃၶမ်းဢမ်ႇထွမ်ႇဢမ်ႇဢဝ်ၵႂၢမ်းၶဝ်ၼၼ်ႉၸိုင်၊ၶဝ်ဢွၼ်ၵၼ်ၶိုၼ်းလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “ႁဝ်းဢမ်ႇမီးလွင်ႈဢၼ်တၵ်းၽွမ်ႉ တႃႇဝိတ်ႈ၊ ၵႃႈသင်။ ဢမ်ႇမီးလွင်ႈဢၼ်တၵ်းၶၢမ်ႇဢဝ်ဢမူၺ်ႇတီႈလုၵ်ႈ ယေႇသႄး၊ ၵႃႈသင်။ မဵဝ်း ဢိသရေး၊ ၶဝ်႟။ ဢွၼ်ၵၼ်ပွၵ်ႈမိူဝ်းၵၼ်တႃႉႁဝ်း။ ႁႂ်ႈ တႃႇဝိတ်ႈ၊ လူတူၺ်းႁိူၼ်းမႂ်းတႃႉ၊” ဝႃႈၼင်ႇၼႆသေယဝ်ႉ၊ ၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ပွၵ်ႈမိူဝ်းၵႂႃႇသေဢေႃႈ။-
ရူဝ်းပုမ်ႇ၊ ၼၼ်ႉလႆႈဢုပ်ႉပိူင်ႇၵူၼ်းမဵဝ်း ဢိသရေး၊ ၸိူဝ်းဢၼ်ယူႇၵႃႈၼႂ်းဢိူင်ႇ ယုတႃႉ၊ ၼၼ်ႉၵူၺ်းဢေႃႈ။
ၶုၼ်ႁေႃၶမ်း ရူဝ်းပုမ်ႇ၊ ပွႆႇၸႂ်ႉ ဢတေႃးရမ်ႇ၊ ၽူႈၵွၼ်းၵူၼ်းၸိူဝ်းဢၼ်လႆႈၶၢမ်ႇတဵၵ်းၶေႃးႁႂ်ႈႁဵတ်းၵၢၼ်ၼၼ်ႉၵႂႃႇၸူးတီႈၵူၼ်းမဵဝ်း ဢိသရေး၊ တင်းလၢႆဢေႃႈ။ ၵူၺ်းၵႃႈ၊မိူဝ်ႈဢၼ်ၵူၼ်း ဢိသရေး၊ တင်းလၢႆဢဝ်မၢၵ်ႇႁိၼ်ပိုဝ်ႈသႂ်ႇမၼ်းတၢႆယဝ်ႉၼၼ်ႉ၊ၶုၼ်ႁေႃၶမ်းႁိပ်ႈၼႅတ်ႈၶီႇလေႃႉမႃႉသိုၵ်းၸဝ်ႈလႄႈဢွၵ်ႇပၢႆႈၵႂႃႇၸူးတီႈဝဵင်း ယေႇရုသလႅမ်ႇ၊ သေဢေႃႈ။-
တႄႇဢဝ်မိူဝ်ႈၼၼ်ႉလႄႈၵူၼ်းၽၢႆႇပွတ်းႁွင်ႇမိူင်း ဢိသရေး၊ ၸိူဝ်းၼၼ်ႉလုၵ်ႉၽိုၼ်ႉမဵဝ်းၸိူဝ်ႉၶိူဝ်းၶုၼ်ႁေႃၶမ်း တႃႇဝိတ်ႈ၊ တေႃႇထိုင်ႁွတ်ႈမိူဝ်ႈလဵဝ်ဢေႃႈ။
မိူဝ်ႈဢၼ်ၵူၼ်းမဵဝ်း ဢိသရေး၊ တင်းလၢႆငိၼ်းၶၢဝ်ႇဢၼ် ယေႇရူဝ်းပုမ်ႇ၊ လုၵ်ႉတီႈမိူင်း ဢေးၵျိပ်ႉ၊ ၶိုၼ်းမႃးၼၼ်ႉၸိုင်၊ၶဝ်ဢွၼ်ၵၼ်ႁွင်ႉပၢင်းမၼ်းမႃးၵႃႈတီႈပရိၵ်ႈသၢတ်ႈဢၼ်ၸုဢၼ်တုမ်ၵၼ်ၼၼ်ႉသေယဝ်ႉ၊ဢဝ်မၼ်းႁဵတ်းၶုၼ်ႁေႃၶမ်းၵူၼ်းမဵဝ်း ဢိသရေး၊ သေဢေႃႈ။ မီးၸိူဝ်ႉၶိူဝ်း ယုတႃႉ၊ ၼၼ်ႉၵူၺ်းၶၢမ်ႇဢဝ်သဵတ်ႈၸႃႇတီႈမဵဝ်းၸိူဝ်ႉၶိူဝ်း တႃႇဝိတ်ႈ၊ ဢေႃႈ။
မိူဝ်ႈဢၼ် ရူဝ်းပုမ်ႇ၊ ႁွတ်ႈထိုင်တီႈဝဵင်း ယေႇရုသလႅမ်ႇ၊ မႃးၼၼ်ႉၸိုင်၊မၼ်းႁွင်ႉဢဝ်ၵူၼ်းသႅၼ်ပၢႆပႅတ်ႇမိုၼ်ႇဢၼ်ပဵၼ်ၵူၼ်းသိုၵ်းဢၼ်ၵတ်ႉၶႅၼ်ႇၵႃႈၼႂ်းၸိူဝ်ႉၶိူဝ်း ယုတႃႉ၊ တင်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ မႃးၸုတုမ်ၵၼ်ႁႂ်ႈလႆႈတိုၵ်းတေႃးၵူၼ်းပွတ်းႁွင်ႇမိူင်း ဢိသရေး၊ ႁႂ်ႈသိုင်ႇၸိုင်ႈဝၢၼ်ႈမိူင်းၸဝ်ႈၶိုၼ်းတူၵ်းႁွတ်ႈမႃးၵႃႈၼႂ်းမိုဝ်းမၼ်းဢေႃႈ။-
ၵူၺ်းၵႃႈ၊ၽြႃးပဵၼ်ၸဝ်ႈသင်ႇလၢတ်ႈတီႈပရေႃးၽႅတ်ႈ သေႇမႃႇယႃႉ၊ ၼၼ်ႉလႄႈဝႃႈ၊-
“မႂ်းမွၵ်ႇလၢတ်ႈတီႈ ရူဝ်းပုမ်ႇ၊ ဢိၵ်ႇတင်းၵူၼ်းတင်းသဵင်ႈတင်းလူင်ၵႃႈၼႂ်းၸိူဝ်ႉၶိူဝ်း ယုတႃႉ၊ တင်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ လႄႈဝႃႈ၊-
‘ ထႃႇဝရႃႉၽြႃး၊ မီးဢမိင်ႉၸမ်ႉ၊ယႃႇပေတိုၵ်းတေႃးၵၼ်တင်းပီႈၼွင်ႉသူၵူၼ်းမဵဝ်း ဢိသရေး၊ ၼင်ႇၵၼ်ၼၼ်ႉ။ သူၵႃႈမီးတင်းသဵင်ႈတင်းလူင်ဢွၼ်ၵၼ်ၶိုၼ်းမိူဝ်းတႃႉ။ ၵႃႈၼင်ႇဢၼ်ပဵၼ်မႃးၼၼ်ႉပဵၼ်ၸွမ်းဢလူဝ်ႇၵဝ်ယဝ်ႉ၊’ ဝႃႈၼႆယဝ်ႉ၊” ဝႃႈၼင်ႇၼႆဢေႃႈ။ ၶဝ်တင်းသဵင်ႈတင်းလူင်ဢွၼ်ၵၼ်ထွမ်ႇဢဝ်ဢမိင်ႉ ထႃႇဝရႃႉၽြႃး၊ ၼၼ်ႉသေလႄႈဢွၼ်ၵၼ်ၶိုၼ်းမိူဝ်းႁိူၼ်းၵႂႃႇသေဢေႃႈ။
ၶုၼ်ႁေႃၶမ်း ယေႇရူဝ်းပုမ်ႇ၊ မဵဝ်း ဢိသရေး၊ ၼၼ်ႉတႄႇႁဵတ်းဝဵင်း သေးၶိမ်ႇ၊ ၵႃႈၼိူဝ်လွႆ ဢေႇၽရိမ်ႇ၊ လႄႈၼင်ႈႁၢင်ႈၼင်ႈႁေႃၵႃႈတီႈၼၼ်ႈၸူဝ်ႈၼိုင်ႈၶၢဝ်းၼိုင်ႈဢေႃႈ။ လိုၼ်းၼၼ်ႉမၼ်းဢွၵ်ႇၵႂႃႇလႄႈတႄႇႁဵတ်းဝဵင်း ပေႇၼူၺ်ႇလႃႉ၊ ဢေႃႈ။-
မိူဝ်ႈၼၼ်ႉမၼ်းၶႆႈၸႂ်ဝူၼ်ႉၸႂ်လႄႈဝႃႈ၊ “ၸွမ်းၼင်ႇဢၼ်ပဵၼ်ယူႇမိူဝ်ႈလဵဝ်ၼႆႉသိုင်ႇၸိုင်ႈဝၢၼ်ႈမိူင်းၸၢင်ႈတၵ်းၶိုၼ်းႁွတ်ႈၵႃႈၼႂ်းမိုဝ်းၸိူဝ်ႉၶိူဝ်း တႃႇဝိတ်ႈ၊ ဢေႃႈ။-
ပေႃးၵူၼ်းဝၢၼ်ႈၵူၼ်းမိူင်းတင်းလၢႆၼႆႉၵႂႃႇသၢၵ်ႈလူႇၶိူင်ႈတၢင်းလူႇတီႈ ထႃႇဝရႃႉၽြႃး၊ ၵႃႈၼႂ်းၵျွင်းပိၵ်ႈမၢၼ်ႇၸဝ်ႈတီႈဝဵင်း ယေႇရုသလႅမ်ႇ၊ ၸိုင်၊ႁူဝ်ၸႂ်ၶဝ်ၸၢင်ႈတၵ်းၶၢႆႉပုတ်ႈၵႂႃႇၸူးတီႈၸဝ်ႈၶဝ် ရူဝ်းပုမ်ႇ၊ မိူင်း ယုတႃႉ၊ ၼၼ်ႉသေယဝ်ႉ၊ၶဝ်တၵ်းဢဝ်ၵဝ်တၢႆဢေႃႈ၊” ဝႃႈၼင်ႇၼႆဢေႃႈ။
လိုၼ်းၼၼ်ႉမၼ်းတိူင်ႇပၢင်ႇၵၼ်တင်းပိူၼ်ႈသေလႄႈႁဵတ်းဝူဝ်းၶမ်းဢွၼ်ႇသွင်တူဝ်သေယဝ်ႉ၊လၢတ်ႈတီႈၵူၼ်းတင်းလၢႆလႄႈဝႃႈ၊ “လွင်ႈတၢင်းဢၼ်သူၵႂႃႇၵႃႈတီႈဝဵင်း ယေႇရုသလႅမ်ႇ၊ ႁႂ်ႈလႆႈဝႆႈသႃၼၼ်ႉပဵၼ်ဢၼ်ထၢၼ်ႈပေႃးမိူဝ်ႇပေႃးၸၢၼ်ႈယဝ်ႉ။ မဵဝ်း ဢိသရေး၊ ၶဝ်႟။ ၽြႃးၸိူဝ်းဢၼ်ၼုၵ်ႈဢဝ်သူဢွၵ်ႇမိူင်း ဢေးၵျိပ်ႉ၊ မႃးၼၼ်ႉမီးၵႃႈတီႈၼႆႈဢေႃႈ၊” ဝႃႈၼင်ႇၼႆဢေႃႈ။-
မၼ်းဢဝ်တူဝ်ၼိုင်ႈဝႆႉၵႃႈတီႈဝဵင်း ပေႇသလႃႉ၊ လႄႈသမ်ႉဢဝ်တူဝ်ၼိုင်ႈဝႆႉၵႃႈတီႈဝဵင်း တၢၼ်ႇ၊ ဢေႃႈ။-
လွင်ႈတၢင်းၼၼ်ႉႁဵတ်းႁႂ်ႈၵူၼ်းတင်းလၢႆၽိတ်းပိူင်ႈၵွပ်ႈပိူဝ်ႈဢၼ်ၵူၼ်းဝၢၼ်ႈၵူၼ်းမိူင်းတင်းလၢႆဢွၼ်ၵၼ်ၵႂႃႇဝႆႈသႃဝူဝ်းဢွၼ်ႇတူဝ်ဢၼ်မီးၵႃႈၼႂ်းဝဵင်း ပေႇသလႃႉ၊ ဢိၵ်ႇတင်းတူဝ်ဢၼ်မီးၵႃႈတီႈဝဵင်း တၢၼ်ႇ၊ ၼၼ်ႉဢေႃႈ။-
ယေႇရူဝ်းပုမ်ႇ၊ သမ်ႉယင်းတႄႇႁဵတ်းထႃႇၼႃႉတီႈဢၼ်တၵ်းဝႆႈသႃၵႃႈၼိူဝ်ၸိၵ်းလွႆလႂ်၊ဢိၵ်ႇတင်းယုၵ်ႉတၢင်ႇၵူၼ်းၸိူဝ်းဢၼ်ဢမ်ႇၸႂ်ႈၸိူဝ်ႉၶိူဝ်း လေႇဝိ၊ ၼၼ်ႉႁဵတ်းယဵၸ်ႈပရေႃးႁဵၵ်ႈ လူးၵွၼ်ႇဢေႃႈ။
ယေႇရူဝ်းပုမ်ႇ၊ သင်ႇႁႂ်ႈၸီႇယၢင်ႇႁဵတ်းပွႆးထမ်ႇမႃႉၼႂ်းလိူၼ်ပႅတ်ႇဝၼ်းတီႈသိပ်းႁႃႈမိူၼ်ၸိူဝ်ႉၼင်ႇပွႆးဢၼ်ႁဵတ်းၵႃႈၼႂ်းမိူင်း ယုတႃႉ၊ ၼၼ်ႉဢေႃႈ။ ၵႃႈၼိူဝ်ၶဵင်ႇတၢင်းလူႇၼႂ်းဝဵင်း ပေႇသလႃႉ၊ ၼၼ်ႉမၼ်းသၢၵ်ႈလူႇၶိူင်ႈတၢင်းလူႇတီႈႁုၼ်ႇႁၢင်ႈသၢင်းထုဝူဝ်းၶမ်းဢွၼ်ႇဢၼ်မၼ်းႁဵတ်းဝႆႉၸိူဝ်းၼၼ်ႉဢေႃႈ။ ယဵၸ်ႈပရေႃးႁဵၵ်ႈၸိူဝ်းဢၼ်မၼ်းၶၢၼ်းဝႆႉၵႃႈတီႈထႃႇၼႃႉတီႈဝႆႈသႃဢၼ်မၼ်းႁဵတ်းဝႆႉၼၼ်ႉၵေႃႈမၼ်းၶျႃးတီႈယူႇၶဝ်ပၼ်တီႈဝဵင်း ပေႇသလႃႉ၊ ဢေႃႈ။-
ၼင်ႇၼၼ်လႄႈၼႂ်းလိူၼ်ပႅတ်ႇဝၼ်းတီႈသိပ်းႁႃႈ၊ဝၼ်းဢၼ်မၼ်းမၵ်းၶၢၼ်းဝႆႉၼၼ်ႉတူဝ်မၼ်းၵႂႃႇၵႃႈတီႈဝဵင်း ပေႇသလႃႉ၊ သေယဝ်ႉ၊သၢၵ်ႈလူႇၶိူင်ႈတၢင်းလူႇၵႃႈၼိူဝ်ၶဵင်ႇတၢင်းလူႇၵႃႈၼႂ်းပွႆးဢၼ်မၼ်းၸီႇယၢင်ႇပုၼ်ႈၵူၼ်းမဵဝ်း ဢိသရေး၊ ၶဝ်ၼၼ်ႉဢေႃႈ။
ၵမ်းၼၼ်ႉၸွမ်းၵႃႈၼင်ႇဢၼ် ထႃႇဝရႃႉၽြႃး၊ ပူင်ဢမိင်ႉၼၼ်ႉပရေႃးၽႅတ်ႈ ၵေႃႉၼိုင်ႈလုၵ်ႉသေၵႃႈတီႈမိူင်း ယုတႃႉ၊ မႃးလႄႈ၊မိူဝ်ႈဢၼ်ႁွတ်ႈထိုင်ဝဵင်း ပေႇသလႃႉ၊ ၼၼ်ႉၸိုင်၊ ယေႇရူဝ်းပုမ်ႇ၊ ၸုၵ်းယူႇၵႃႈတီႈၶဵင်ႇတၢင်းလူႇႁႂ်ႈလႆႈသၢၵ်ႈၵၢပ်ႈၶိူင်ႈတၢင်းလူႇယူႇဢေႃႈ။-
ၸွမ်းၵႃႈၼင်ႇဢၼ် ထႃႇဝရႃႉၽြႃး၊ ပူင်ဢမိင်ႉၼၼ်ႉပရေႃးၽႅတ်ႈၵေႃႉၼၼ်ႉတၢင်ႇဢပျတ်ႈတီႈၶဵင်ႇတၢင်းလူႇၼၼ်ႉလႄႈဝႃႈ၊ “ၶဵင်ႇတၢင်းလူႇ႟။ ၶဵင်ႇတၢင်းလူႇ႟။ ထႃႇဝရႃႉၽြႃး၊ မီးဢမိင်ႉၸမ်ႉ၊ထွမ်ႇငိၼ်းတႃႉ။ တီႈၸိူဝ်ႉၶိူဝ်း တႃႇဝိတ်ႈ၊ ၼၼ်ႉလုၵ်ႈဢွၼ်ႇၵေႃႉၼိုင်ႈတၵ်းၵိူတ်ႇလဵင်ႉမႃးလႄႈတၵ်းလႆႈၸိုဝ်ႈ ယူဝ်းသိယႃႉ၊ ဢေႃႈ။ ၵေႃႉၼၼ်ႉတၵ်းဢဝ်တၢႆယဵၸ်ႈပရေႃးႁဵၵ်ႈ ၸိူဝ်းဢၼ်ႁဵတ်းဝၢတ်ႈၵႃႈတီႈၶဵင်ႇတၢင်းလူႇသႃႇသၼႃႇပႃႉၼၼ်ႉဢေႃႈ။ မၼ်းတၵ်းဢဝ်တၢႆၵူၼ်းၵႃႈၼိူဝ်မႂ်းလႄႈဢဝ်လုပ်ႇၵူၼ်းတၢႆၽဝ်ၽႆးၵႃႈၼိူဝ်မႂ်းဢေႃႈ၊” ဝႃႈၼင်ႇၼႆဢေႃႈ။-
ၼႂ်းဝၼ်းၼၼ်ႉၵမ်းလဵဝ်မၼ်းပၼ်ပျႃႇတိၵ်ႈၼိမိၵ်ႈလႄႈဝႃႈ၊ “ၶဵင်ႇတၢင်းလူႇၼႆႉတၵ်းလူမ်ႉပင်းလႄႈတဝ်ႈဢၼ်မီးၵႃႈၼိူဝ်မၼ်းၼၼ်ႉတၵ်းၽူင်ႉၽၢင်းၵႂႃႇဢေႃႈ။ ၼင်ႇၼၼ်လႄႈသူတၵ်းႁုလွင်ႈဢၼ် ထႃႇဝရႃႉၽြႃး၊ ဢဝ်ၵဝ်မွၵ်ႇလၢတ်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်း ယေႇရူဝ်းပုမ်ႇ၊ ငိၼ်းလွင်ႈတၢင်းၼႆႉလႄႈဢဝ်မိုဝ်းမၼ်းၸိတီႈပရေႃးၽႅတ်ႈၼၼ်ႉသေယဝ်ႉ၊ပူင်ဢမိင်ႉဝႃႈ၊ “တိဢဝ်မၼ်းတႃႉ၊” ဝႃႈၼင်ႇၼႆဢေႃႈ။ မိူဝ်ႈၼၼ်ႉၵမ်းလဵဝ်မိုဝ်းမၼ်းႁဵဝ်ႇႁႅင်ႈၵႂႃႇထၢၼ်ႈပေႃးဢမ်ႇၶျႃးလူင်းလႆႈဢေႃႈ။-
ၶဵင်ႇတၢင်းလူႇၼၼ်ႉၵေႃႈလူမ်ႉပင်းလႄႈတဝ်ႈတင်းလၢႆၽူင်ႉၽၢင်းၵႂႃႇမႅၼ်ႈၸွမ်းၵႃႈၼင်ႇဢၼ်ပရေႃးၽႅတ်ႈပျႃႇတိၵ်ႈၼိမိၵ်ႈဝႆႉၵႃႈၼႂ်းၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ၼၼ်ႉဢေႃႈ။-
ၶုၼ်ႁေႃၶမ်း ယေႇရူဝ်းပုမ်ႇ၊ ၵေႃႈလၢတ်ႈတီႈပရေႃးၽႅတ်ႈၼၼ်ႉလႄႈဝႃႈ၊ “ၶႅၼ်းတေႃႈတွင်းပၢၼ်ႇတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈမႂ်းၼၼ်ႉပုၼ်ႈၵဝ်သေလႄႈၶေႃယွၼ်းႁႂ်ႈမိုဝ်းၵဝ်ၶိုၼ်းလီမႃးသေၵမ်း၊” ဝႃႈၼင်ႇၼႆဢေႃႈ။ ပရေႃးၽႅတ်ႈၼၼ်ႉၵေႃႈတွင်းပၢၼ်ႇ ထႃႇဝရႃႉၽြႃး၊ လႄႈမိုဝ်းမၼ်းၶိုၼ်းလီမႃးဢေႃႈ။-
မိူဝ်ႈၼၼ်ႉၶုၼ်ႁေႃၶမ်းလၢတ်ႈတီႈပရေႃးၽႅတ်ႈၼၼ်ႉလႄႈဝႃႈ၊ “မႃးၵႃႈတီႈႁိူၼ်းႁူမ်ႈလူၺ်ႈၵၼ်တင်းၵဝ်ၶႃႈလႄႈၵိၼ်တၢင်းၵိၼ်တၢင်းၶူပ်းသေၸိူဝ်ႉသေပိူင်သေၵမ်း။ ၵဝ်ၶႃႈတၵ်းတွပ်ႇတႅၼ်းၵျေးၸူးဢၼ်ႁဵတ်းတီႈၵဝ်ၶႃႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ပရေႃးၽႅတ်ႈၼၼ်ႉၶိုၼ်းလၢတ်ႈလႄႈဝႃႈ၊ “ပိၵ်ႉသမ်ႉၸဝ်ႈႁဝ်းပၼ်ၸေးၸိမ်ႇဢုၵ်ႉၸႃႇၸဝ်ႈႁဝ်းၶိုင်ႈၼိုင်ႈသေၵေႃႈ၊ၵဝ်ၶႃႈဢမ်ႇၵႂႃႇၸွမ်းၸဝ်ႈႁဝ်း။ တၵ်းဢမ်ႇၵိၼ်တၢင်းၵိၼ်၊တၵ်းဢမ်ႇၵိၼ်ၼမ်ႉလူၺ်ႈၵၼ်တင်းၸဝ်ႈႁဝ်းလႆႈ။-
ထႃႇဝရႃႉၽြႃး၊ ပူင်ဢမိင်ႉဝႃႈၵဝ်ၶႃႈတၵ်းဢမ်ႇလႆႈၵိၼ်သေၸိူဝ်ႉသေပိူင်၊ဢမ်ႇလႆႈၶိုၼ်းမိူဝ်းၸွမ်းတၢင်းၵဝ်ႇၵဝ်ၶႃႈၼၼ်ႉဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈမၼ်းယင်းဢမ်ႇၸွမ်းတၢင်းၵဝ်ႇၶိုၼ်းမိူဝ်းၵႂႃႇလႄႈၸွမ်းသဵၼ်ႈတၢင်းတၢင်ႇသဵၼ်ႈၵႂႃႇသေဢေႃႈ။
မိူဝ်ႈယၢမ်းၼၼ်ႉမီးပရေႃးၽႅတ်ႈထဝ်ႈၵေႃႉၼိုင်ႈဢၼ်ယူႇၵႃႈၼႂ်းဝဵင်း ပေႇသလႃႉ၊ ၼၼ်ႉဢေႃႈ။ ၼႂ်းလုၵ်ႈၸၢႆးမၼ်းၼၼ်ႉၵေႃႉၼိုင်ႈမႃးမွၵ်ႇလၢတ်ႈတီႈမၼ်းလွင်ႈပရေႃးၽႅတ်ႈဢၼ်လုၵ်ႉသေၵႃႈတီႈမိူင်း ယုတႃႉ၊ မႃးလႄႈႁဵတ်းၸိူဝ်ႉၼင်ႇႁိုဝ်ၵႃႈၼႂ်းဝဵင်း ပေႇသလႃႉ၊ ၼႂ်းဝၼ်းၼၼ်ႉၸိူဝ်းၼၼ်ႉ၊ဢိၵ်ႇတင်းၵႂၢမ်းဢၼ်မၼ်းလၢတ်ႈတီႈၶုၼ်ႁေႃၶမ်း ယေႇရူဝ်းပုမ်ႇ၊ ၼၼ်ႉဢေႃႈ။-
ပရေႃးၽႅတ်ႈထဝ်ႈၼၼ်ႉၵေႃႈထၢမ်လႄႈဝႃႈ၊ “ၵေႃႉၼၼ်ႉၶိုၼ်းမိူဝ်းၸွမ်းသဵၼ်ႈတၢင်းဢၼ်လႂ်၊” ဝႃႈၼင်ႇၼႆလႄႈ၊လုၵ်ႈၸၢႆးမၼ်းၸိူဝ်းၼၼ်ႉၼႄပၼ်သဵၼ်ႈတၢင်းဢၼ်ပရေႃးၽႅတ်ႈမိူင်း ယုတႃႉ၊ မိူဝ်းၵႂႃႇၼၼ်ႉဢေႃႈ။-
ပိူဝ်ႈၼႆလႄႈမၼ်းၸႂ်ႉလုၵ်ႈၸၢႆးမၼ်းၸိူဝ်းၼၼ်ႉႁႂ်ႈႁၢင်ႈၵွပ်းမႃႉလီႈပၼ်မၼ်းသေယဝ်ႉ၊မၼ်းၵေႃႈၶီႇၵႂႃႇဢေႃႈ။-
မၼ်းလိုပ်ႈလမ်းၸွမ်းပရေႃးၽႅတ်ႈမိူင်း ယုတႃႉ၊ ၼၼ်ႉၵႂႃႇလႄႈထူပ်းႁၼ်ၵေႃႉၼၼ်ႉၼင်ႈယူႇၵႃႈတႂ်ႈတူၼ်ႈမႆႉၼိမ်သေယဝ်ႉ၊ထၢမ်မၼ်းလႄႈဝႃႈ၊ “မႂ်းၼႆႉပဵၼ်ပရေႃးၽႅတ်ႈဢၼ်လုၵ်ႉသေၵႃႈတီႈမိူင်း ယုတႃႉ၊ မႃးၼၼ်ႉႁိုဝ်း၊” ဝႃႈၼင်ႇၼႆဢေႃႈ။ ၵေႃႉၼၼ်ႉၶိုၼ်းလၢတ်ႈလႄႈဝႃႈ၊ “ပဵၼ်ၵဝ်ယဝ်ႉ၊” ဝႃႈၼင်ႇၼႆဢေႃႈ။
မၼ်းသမ်ႉလၢတ်ႈလႄႈဝႃႈ၊ “ၸွမ်းၵဝ်မိူဝ်းၵႂႃႇၵႃႈတီႈႁိူၼ်းၵဝ်လႄႈၵိၼ်သေၸိူဝ်ႉသေပိူင်သေၵမ်း၊” ဝႃႈၼင်ႇၼႆဢေႃႈ။-
ၵေႃႉၼၼ်ႉၶိုၼ်းလၢတ်ႈလႄႈဝႃႈ၊ “ၵဝ်ဢမ်ႇၵႂႃႇၸွမ်းၵၼ်တင်းမႂ်းလႆႈ။ တၢင်းဢၼ်မႂ်းႁွင်ႉပၢင်းၼၼ်ႉႁပ်ႉဢမ်ႇလႆႈ၊ၵဝ်တေဢမ်ႇလႆႈၵိၼ်တၢင်းၵိၼ်ဢမ်ႇလႆႈၵိၼ်ၼမ်ႉလူၺ်ႈၵၼ်တင်းမႂ်းၵႃႈတီႈၼႆႈ။-
ထႃႇဝရႃႉၽြႃး၊ ပူင်ဢမိင်ႉတီႈၵဝ်လႄႈဝႃႈ၊ ‘ၵဝ်တၵ်းဢမ်ႇလႆႈၵိၼ်တၢင်းၵိၼ်၊ဢမ်ႇလႆႈၵိၼ်ၼမ်ႉ၊ဢမ်ႇလႆႈၶိုၼ်းမိူဝ်းၸွမ်းတၢင်းၵဝ်ႇၵႂႃႇ၊’ ဝႃႈၼႆယဝ်ႉ၊” ဝႃႈၼင်ႇၼႆဢေႃႈ။
မၼ်းသမ်ႉလၢတ်ႈတီႈပရေႃးၽႅတ်ႈ မိူင်း ယုတႃႉ၊ ၼၼ်ႉလႄႈဝႃႈ၊ “ၵဝ်ၵေႃႈပဵၼ်ပရေႃးၽႅတ်ႈၵေႃႉၼိုင်ႈမိူၼ်မႂ်းၼႆႉယဝ်ႉ။ ထႃႇဝရႃႉၽြႃး၊ ၸႂ်ႉတမၢၼ်ႇၵၢင်ႁၢဝ်မႃးလၢတ်ႈတီႈၵဝ်၊ႁႂ်ႈၵဝ်ႁွင်ႉပၢင်းမႂ်းၵႂႃႇၵႃႈတီႈႁိူၼ်းၵဝ်လႄႈႁႂ်ႈမႃးပဵၼ်ၶႅၵ်ႇၵဝ်ဢေႃႈ၊” ဝႃႈၼင်ႇၼႆလၢတ်ႈၵႂၢမ်းမုသႃႇဢေႃႈ။
ပိူဝ်ႈၼႆလႄႈ ပရေႃးၽႅတ်ႈမိူင်း ယုတႃႉ၊ ၼၼ်ႉၸွမ်းမၼ်းမိူဝ်းၵႂႃႇတီႈႁိူၼ်းမၼ်းလႄႈၵိၼ်တၢင်းၵိၼ်တၢင်းၶူပ်းလူၺ်ႈၵၼ်တင်းမၼ်းဢေႃႈ။
ၼႂ်းမိူဝ်ႈဢၼ်ၶဝ်သွင်ၵေႃႉယင်းတိုၵ်ႉၼင်ႈယူႇၵႃႈတီႈၽိူၼ်ၶဝ်ႈၼၼ်ႉၸိုင်၊ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးၵႃႈတီႈပရေႃးၽႅတ်ႈထဝ်ႈၼၼ်ႉလႄႈ၊-
မၼ်းႁွင်ႉသႅၼ်ႇတီႈပရေႃးၽႅတ်ႈမိူင်း ယုတႃႉ၊ ၼၼ်ႉလႄႈဝႃႈ၊ “ ထႃႇဝရႃႉၽြႃး၊ မီးဢမိင်ႉၸမ်ႉ၊မႂ်းၼႆႉဢမ်ႇထွမ်ႇဢမ်ႇဢဝ်ၵႂၢမ်းမၼ်းၸဝ်ႈ၊ဢမ်ႇၵမ်ၵျၢင်ႉၸွမ်းပိင်းၺၢပ်ႈမၼ်းၸဝ်ႈၼၼ်ႉယဝ်ႉ။-
မႂ်းယင်းပွၵ်ႈၶိုၼ်းမႃးၵိၼ်တၢင်းၵိၼ်တၢင်းၶူပ်းၵႃႈတီႈတီႈဢၼ်မၼ်းၸဝ်ႈႁၢမ်ႈဝႆႉဢမ်ႇႁႂ်ႈမႂ်းၵိၼ်ၼၼ်ႉယဝ်ႉ။ ၵွပ်ႈပိူဝ်ႈလွင်ႈတၢင်းၼႆႉလႄႈမႂ်းတၵ်းလႆႈၶၢမ်ႇတၢင်းဢၼ်ဢဝ်တၢႆသေယဝ်ႉ၊တူဝ်တၢႆမႂ်းတေဢမ်ႇလႆႈသၢင်းၵျူဝ်ႇၵႃႈတီႈၶုမ်ပႃႇႁဵဝ်ႈပူႇမွၼ်ႇမႂ်းၸိူဝ်းၼၼ်ႉဝႃႈၼႆယဝ်ႉ၊” ဝႃႈၼင်ႇၼႆဢေႃႈ။
လိုၼ်းသေဢၼ်ၶဝ်သွင်ၵေႃႉၵိၼ်ၶူပ်းယဝ်ႉၼၼ်ႉၸိုင်၊ပရေႃးၽႅတ်ႈထဝ်ႈၼၼ်ႉႁၢင်ႈၵွပ်းမႃႉလီႈပၼ်ပုၼ်ႈပရေႃးၽႅတ်ႈမိူင်း ယုတႃႉ၊ သေယဝ်ႉ၊-
ႁႂ်ႈမၼ်းၶီႇၵႂႃႇဢေႃႈ။ ၵႃႈတီႈၵၢင်တၢင်းၼၼ်ႉမၼ်းထူပ်းႁၼ်သၢင်ႇသီႈလႄႈသၢင်ႇသီႈဢဝ်မၼ်းတၢႆဢေႃႈ။ တူဝ်တၢႆမၼ်းၼွၼ်းယဵတ်ႇယူႇၵႃႈၼိူဝ်သဵၼ်ႈတၢင်းလႄႈမႃႉလီႈတင်းသၢင်ႇသီႈၸုၵ်းယူႇၵႃႈႁိမ်းတူဝ်တၢႆမၼ်းဢေႃႈ။-
ၵူၼ်းၸိူဝ်းဢၼ်ၵႂႃႇတၢင်းပႆတၢင်းႁၼ်တူဝ်တၢႆၵႃႈၼိူဝ်သဵၼ်ႈတၢင်းဢိၵ်ႇတင်းသၢင်ႇသီႈၸုၵ်းယူႇၵႃႈႁိမ်းတူဝ်တၢႆၼၼ်ႉသေယဝ်ႉ၊ၶဝ်ဢွၼ်ၵၼ်မႃးမွၵ်ႇလၢတ်ႈလွင်ႈတၢင်းၼၼ်ႉၵႃႈၼႂ်းဝဵင်း ပေႇသလႃႉ၊ ဢေႃႈ။
ပရေႃးၽႅတ်ႈထဝ်ႈၼၼ်ႉလႆႈငိၼ်းလွင်ႈတၢင်းၼၼ်ႉသေယဝ်ႉလၢတ်ႈလႄႈဝႃႈ၊ “လွင်ႈၼၼ်ႉပရေႃးၽႅတ်ႈဢၼ်ဢမ်ႇထွမ်ႇဢမ်ႇဢဝ်ဢမိင်ႉ ထႃႇဝရႃႉၽြႃး၊ ၼၼ်ႉဢေႃႈ။ ပိူဝ်ႈၼႆၸင်ႇ ထႃႇဝရႃႉၽြႃး၊ ပွႆႇၸႂ်ႉသၢင်ႇသီႈမႃးၶူပ်းမၼ်းတၢႆမႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉဝႆႉၼၼ်ႉယဝ်ႉလူင်ပႄႇ၊” ဝႃႈၼင်ႇၼႆဢေႃႈ။-
မၼ်းၸင်ႇၸႂ်ႉလုၵ်ႈၸၢႆးမၼ်းၸိူဝ်းၼၼ်ႉႁၢင်ႈၵွပ်းမႃႉလီႈပၼ်သေယဝ်ႉ၊-
မၼ်းၶီႇဢွၵ်ႇၵႂႃႇလႄႈထူပ်းႁၼ်တူဝ်တၢႆပရေႃးၽႅတ်ႈၼၼ်ႉၼွၼ်းယဵတ်ႇယူႇၵႃႈၼိူဝ်သဵၼ်ႈတၢင်းလႄႈသၢင်ႇသီႈၸုၵ်းယူႇၵႃႈႁိမ်းတူဝ်တၢႆၼၼ်ႉဢေႃႈ။ သၢင်ႇသီႈၼၼ်ႉဢမ်ႇၵိၼ်တူဝ်တၢႆ၊ဢမ်ႇၶူပ်းမႃႉလီႈၼၼ်ႉ။-
ပရေႃးၽႅတ်ႈထဝ်ႈၼၼ်ႉဢုမ်ႈဢဝ်တူဝ်တၢႆၼၼ်ႉတၢင်ႇသႂ်ႇၵႃႈၼိူဝ်မႃႉလီႈၼၼ်ႉသေယဝ်ႉ၊ဢဝ်ၶိုၼ်းမႃးၵႃႈတီႈဝဵင်း ပေႇသလႃႉ၊ ပုၼ်ႈဢၼ်တၵ်းႁွင်ႉႁႆႈပွင်ႉၶၢင်းပုၼ်ႈမၼ်းဢိၵ်ႇတင်းႁႂ်ႈလႆႈသၢင်းၵျူဝ်ႇပၼ်ၼၼ်ႉဢေႃႈ။-
မၼ်းဢဝ်တူဝ်တၢႆၼၼ်ႉသၢင်းၵျူဝ်ႇၵႃႈၼႂ်းၶုမ်ပႃႇႁဵဝ်ႈပူႇမွၼ်ႇတူဝ်ၸဝ်ႈၵဝ်ႇသေယဝ်ႉ၊မၼ်းတင်းလုၵ်ႈၸၢႆးမၼ်းတင်းလၢႆႁွင်ႉႁႆႈပွင်ႉၶၢင်းပုၼ်ႈမၼ်းလႄႈဝႃႈ၊ “ဢူဝ်း။ ၼွင်ႉၸၢႆးၵဝ်၊” ဝႃႈၼင်ႇၼႆဢေႃႈ။-
လိုၼ်းသေဢၼ်မၼ်းဢဝ်သၢင်းၵျူဝ်ႇယဝ်ႉၼၼ်ႉမၼ်းသင်ႇလၢတ်ႈတီႈလုၵ်ႈၸၢႆးမၼ်းၸိူဝ်းၼၼ်ႉလႄႈဝႃႈ၊ “မိူဝ်ႈဢၼ်ၵဝ်တၢႆၼၼ်ႉၸိုင်၊ဢဝ်ၵဝ်သၢင်းၵျူဝ်ႇၵႃႈၼႂ်းၶုမ်ပႃႇႁဵဝ်ႈၼႆႉတႃႉ။ ဢဝ်လုပ်ႇၵဝ်ဝႆႉၵႃႈႁိမ်းလုပ်ႇမၼ်းတႃႉ။-
ၵႂၢမ်းဢၼ်မၼ်းႁွင်ႉပၢဝ်ႇႁွင်ႉလၢတ်ႈၸွမ်းၼင်ႇဢမိင်ႉ ထႃႇဝရႃႉၽြႃး၊ ဢၼ်ၶတ်းၵၼ်တင်းၶဵင်ႇတၢင်းလူႇၵႃႈၼႂ်းဝဵင်း ပေႇသလႃႉ၊ ဢိၵ်ႇတင်းဢၼ်ၶတ်းၵၼ်တင်းထႃႇၼႃႉတီႈဝႆႈသႃၵႃႈၼႂ်းမိူင်း သမႃႇရိ၊ ၸိူဝ်းၼၼ်ႉတၵ်းပဵၼ်ၸွမ်းဢမၢၼ်ႇၶၼ်ပဵၼ်ဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်း ယေႇရူဝ်းပုမ်ႇ၊ မိူင်း ဢိသရေး၊ ၼၼ်ႉယင်းဢမ်ႇဝႄႈပႅတ်ႈသေတၢင်းၵမ်တၢင်းၵျၢင်ႉဢၼ်ဢမ်ႇလီဢမ်ႇငၢမ်းၸိူဝ်းၼၼ်ႉလႄႈသမ်ႉယင်းဢဝ်ၵူၼ်းယူဝ်းယူဝ်းလႂ်၊သိုပ်ႇၶၢၼ်းဝႆႉၼႂ်းဢရႃႇယဵၸ်ႈပရေႃးႁဵၵ်ႈ ၼၼ်ႉဢေႃႈ။ မၼ်းၵျိူၵ်ႈၵေႃႉလႂ်ၵေႃႈမၼ်းယုၵ်ႉတၢင်ႇႁႂ်ႈပဵၼ်ယဵၸ်ႈပရေႃးႁဵၵ်ႈၸွမ်းၸႂ်မၼ်းဢေႃႈ။-
ၵွပ်ႈပိူဝ်ႈမၼ်းႁဵတ်းၸိူဝ်ႉၼင်ႇၼႆၼၼ်ႉမၼ်းႁဵတ်းႁႂ်ႈဢပျတ်ႈႁွတ်ႈထိုင်ၵႃႈၼိူဝ်ၸိူဝ်ႉၶိူဝ်းမၼ်း၊ထၢၼ်ႈပေႃးထိူၵ်ႈပႄႇၽဵဝ်ႈပႅတ်ႈသေၵႃႈၼိူဝ်လိၼ်မိူင်းဢေႃႈ။
ယၢမ်းမိူဝ်ႈၼၼ်ႉ ဢၽိယႃႉ၊ လုၵ်ႈၸၢႆး ယေႇရူဝ်းပုမ်ႇ၊ ၼၼ်ႉပဵၼ်ၶႆႈပဵၼ်ၼၢဝ်ဢေႃႈ။-
ယေႇရူဝ်းပုမ်ႇ၊ သင်ႇလၢတ်ႈတီႈမေးမၼ်းလႄႈဝႃႈ၊ “မႂ်းႁဵတ်းႁၢင်ႈၽၢင်ဢၼ်ပႅၵ်ႇပိူင်ႈ၊ဢၼ်ၽူႈလႂ်ဢမ်ႇတွင်းမႂ်းလႆႈသေလႄႈၵႂႃႇၵႃႈတီႈဝဵင်း သိလေႃႇ၊ ပုၼ်ႉတႃႉ။ တီႈၼၼ်ႈမီးပရေႃးၽႅတ်ႈ ဢႁိယႃႉ၊ ဢၼ်လၢတ်ႈၼႄလွင်ႈဢၼ်ၵဝ်တၵ်းပဵၼ်ၶုၼ်ႁေႃၶမ်းမိူင်း ဢိသရေး၊ ၼၼ်ႉဢေႃႈ။-
ပႃးဢဝ်ၶဝ်ႈမုၼ်းသိပ်းႁူၺ်ႇ၊ဢိၵ်ႇတင်းၶဝ်ႈမုၼ်းၶႅပ်းၵမ်ႈၽွင်ႈဢိၵ်ႇတင်းၼမ်ႉၽိုင်ႈတဝ်ႈၼိုင်ႈၵႂႃႇပၼ်မၼ်းတႃႉ။ မၼ်းတၵ်းမွၵ်ႇလၢတ်ႈလွင်ႈဢၼ်တၵ်းပဵၼ်ၸိူဝ်ႉၼင်ႇႁိုဝ်မႃးတီႈလုၵ်ႈၸၢႆးႁဝ်းၼႆႉဢေႃႈ၊” ဝႃႈၼင်ႇၼႆဢေႃႈ။
မေး ယေႇရူဝ်းပုမ်ႇ၊ ၵေႃႈႁဵတ်းၸွမ်းၸိူဝ်ႉၼင်ႇၼၼ်သေလႄႈၵႂႃႇၵႃႈတီႈႁိူၼ်း ဢႁိယႃႉ၊ ၵႃႈၼႂ်းဝဵင်း သိလေႃႇ၊ ဢေႃႈ။ ၵွပ်ႈပိူဝ်ႈ ဢႁိယႃႉ၊ ထဝ်ႈၼႃႇယဝ်ႉလႄႈတႃမၼ်းမူဝ်းဝႆႉဢေႃႈ။-
ထႃႇဝရႃႉၽြႃး၊ သမ်ႉပေႃးမီးဢမိင်ႉတီႈမၼ်းဝႆႉလွင်ႈဢၼ်မေး ယေႇရူဝ်းပုမ်ႇ၊ မႃးယူႇၼၼ်ႉလႄႈ၊ႁႂ်ႈလႆႈတွင်ႈထၢမ်လွင်ႈလုၵ်ႈၸၢႆးမၼ်းဢၼ်ပဵၼ်ၶႆႈပဵၼ်ၼၢဝ်ယူႇၼၼ်ႉသေယဝ်ႉ၊ ထႃႇဝရႃႉၽြႃး၊ သမ်ႉပေႃးမွၵ်ႇလၢတ်ႈဝႆႉလွင်ႈဢၼ်မၼ်းတၵ်းလႆႈလၢတ်ႈၸိူဝ်ႉၼင်ႇႁိုဝ်ၼၼ်ႉယဝ်ႉဢေႃႈ။ မိူဝ်ႈဢၼ်မေး ယေႇရူဝ်းပုမ်ႇ၊ ႁွတ်ႈထိုင်မႃးၼၼ်ႉမၼ်းႁဵတ်းၸိူဝ်ႉၼင်ႇႁၢင်ႈပဵၼ်မႄႈယိင်းတၢင်ႇၵေႃႉသေလႄႈမႃးဢေႃႈ။-
ၵူၺ်းၵႃႈမိူဝ်ႈဢၼ် ဢႁိယႃႉ၊ ငိၼ်းသဵင်တိၼ်မႄႈယိင်းၼၼ်ႉၶဝ်ႈၽၵ်းတူမႃးယူႇၼၼ်ႉၸိုင်၊မၼ်းလၢတ်ႈလႄႈဝႃႈ၊ “ၶဝ်ႈမႃးတႃႉ။ ၵဝ်ႁုလွင်ႈဢၼ်မႂ်းပဵၼ်မေး ယေႇရူဝ်းပုမ်ႇ၊ ဢေႃႈ။ ၵွပ်ႈသင်မႂ်းႁဵတ်းမိူၼ်ၸိူဝ်ႉၼင်ႇႁၢင်ႈပဵၼ်မႄႈယိင်းတၢင်ႇၵေႃႉၼၼ်ႉၸိူဝ်ႉၼင်ႇႁိုဝ်။ ၵဝ်မီးၶၢဝ်ႇငၢဝ်းဢၼ်ၶီၸႂ်ၶူမ်ၸႂ်ပုၼ်ႈမႂ်းဢေႃႈ။-
ၵႂႃႇလႄႈမွၵ်ႇလၢတ်ႈတီႈ ယေႇရူဝ်းပုမ်ႇ၊ လႄႈဝႃႈ၊ ‘ ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ ၼၼ်ႉမီးဢမိင်ႉၸမ်ႉ၊ၵဝ်လိူၵ်ႈဢဝ်မႂ်းၵႃႈၼႂ်းၵူၼ်းတင်းလၢႆႁႂ်ႈမႂ်းဢုပ်ႉပိူင်ႇၵႃႈၼိူဝ်ၵူၼ်းၵဝ်မဵဝ်း ဢိသရေး၊ ယဝ်ႉ။-
ၵဝ်ၼုၵ်ႈဢဝ်သိုင်ႇၸိုင်ႈဝၢၼ်ႈမိူင်းၵႃႈၼႂ်းမိုဝ်းၸိူဝ်ႉၶိူဝ်း တႃႇဝိတ်ႈ၊ သေလႄႈပၼ်တီႈမႂ်းယဝ်ႉ။ ၵူၺ်းၵႃႈ၊မႂ်းဢမ်ႇပဵၼ်ၸိူဝ်ႉၼင်ႇၶႃႈၵဝ် တႃႇဝိတ်ႈ၊ ဢၼ်ပႂ်ႉၵမ်ပႂ်ႉၵျၢင်ႉပိင်းၺၢပ်ႈတြႃးၵဝ်လုမ်းလုမ်းလႄႈႁဵတ်းၸွမ်းၵႃႈၼင်ႇဢၼ်မႂ်းထုၵ်ႇၸႂ်ၵျိူၵ်ႈၸႂ်ၵူၺ်းၼၼ်ႉလူင်ပႄႇ။-
မႂ်းႁဵတ်းတုၸရိူၵ်ႈလိူဝ်တွၼ်းၼႃႇသေၶဝ်ၸိူဝ်းဢၼ်ဢုပ်ႉပိူင်ႇၵႂႃႇဢွၼ်တၢင်းမႂ်းၸိူဝ်းၼၼ်ႉယဝ်ႉ။ မႂ်းပႄႇပႅတ်ႈၵဝ်လႄႈတိုၵ်းယူင်းတေႃးသႃႉၵဝ်လူၺ်ႈတၢင်းဢၼ်ႁဵတ်းႁုၼ်ႇႁၢင်ႈလဵၵ်းလႂ်၊ႁုၼ်ႇႁၢင်ႈသၢင်းထုတွင်းလႂ်၊တႃႇတေဝႆႈၼၼ်ႉယဝ်ႉ။-
ၵွပ်ႈပိူဝ်ႈလွင်ႈတၢင်းၼႆႉလႄႈၵဝ်တၵ်းႁႂ်ႈၽေးဢုပၢတ်ႈႁွတ်ႈထိုင်ၵႃႈၼိူဝ်ၸိူဝ်ႉၶိူဝ်းမႂ်း၊ဢိၵ်ႇတင်းတၵ်းဢဝ်ၵူၼ်းၸၢႆးၵႃႈၼႂ်းၸိူဝ်ႉၶိူဝ်းမႂ်းၸဵမ်ၼုမ်ႇၸဵမ်ထဝ်ႈတၢႆပႅတ်ႈမူတ်းမူတ်းဢေႃႈ။ ၵဝ်တၵ်းပႄႇပႅတ်ႈၸိူဝ်ႉၶိူဝ်းၵူၼ်းႁိူၼ်းမႂ်းမိူၼ်ၸိူဝ်ႉၼင်ႇဢၼ်ပတ်းၽဵဝ်ႈပႅတ်ႈၵွင်ၶီႈဝူဝ်းၼၼ်ႉဢေႃႈ။-
ၵႃႈပဵၼ်ၸိူဝ်ႉၶိူဝ်းၵူၼ်းႁိူၼ်းမႂ်းၸိူဝ်းဢၼ်တၢႆၵႃႈၼႂ်းဝဵင်းၼၼ်ႉမႃတၵ်းၵိၼ်လႄႈ၊ဢၼ်တၢႆၵႃႈတီႈၵၢင်ပၢင်ႇၵၢင်ပိုၼ်ၸိူဝ်းၼၼ်ႉၸိုင်၊လၢင်းတႃႉတၵ်းၵိၼ်ဢေႃႈ။ ၵဝ် ထႃႇဝရႃႉၽြႃး၊ မီးဢမိင်ႉၸိူဝ်ႉၼင်ႇၼႆဢေႃႈ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ဢႁိယႃႉ၊ သမ်ႉလၢတ်ႈတီႈမေး ယေႇရူဝ်းပုမ်ႇ၊ ထႅင်ႈလႄႈဝႃႈ၊ “ၶိုၼ်းမိူဝ်းၵႂႃႇၵႃႈတီႈႁိူၼ်းလူးၵွၼ်ႇတႃႉ။ မိူဝ်ႈဢၼ်မႂ်းၶဝ်ႈၵႃႈၼႂ်းဝဵင်းၵႂႃႇၼၼ်ႉၵမ်းလဵဝ်လုၵ်ႈၸၢႆးမႂ်းတၵ်းတၢႆဢေႃႈ။-
ၵူၼ်းမဵဝ်း ဢိသရေး၊ တင်းသဵင်ႈတင်းလူင်တၵ်းဢွၼ်ၵၼ်ႁႆႈႁွင်ႉပွင်ႉၶၢင်းလႄႈသၢင်းၵျူဝ်ႇမၼ်းဢေႃႈ။ ၼႂ်းၶိူဝ်းႁိူၼ်း ယေႇရူဝ်းပုမ်ႇ၊ ၼႆႉ၊မၼ်းၵေႃႉလဵဝ်ၵူၺ်းတၵ်းလႆႈၶၢမ်ႇတၢင်းဢၼ်သၢင်းၵျူဝ်ႇလီလီငၢမ်းငၢမ်း၊ၵွပ်ႈပိူဝ်ႈဢၼ်မၼ်းပဵၼ်ၵေႃႉဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ လႆႈထုၵ်ႇၸႂ်ၵျိူၵ်ႈၸႂ်ၵေႃႉလဵဝ်ၵူၺ်းၵႃႈၼႂ်းၵူၼ်းႁိူၼ်းၵူၼ်းယေး ယေႇရူဝ်းပုမ်ႇ၊ ၼၼ်ႉဢေႃႈ။
“ ထႃႇဝရႃႉၽြႃး၊ တၵ်းယုၵ်ႉတၢင်ႇၶုၼ်ႁေႃၶမ်းပႃးၼိုင်ႈၵႃႈၼိူဝ်ၵူၼ်းမဵဝ်း ဢိသရေး၊ ဢၼ်တၵ်းပႄႇၽဵဝ်ႈပႅတ်ႈၸိူဝ်ႉၶိူဝ်းၶုၼ်ႁေႃၶမ်း ယေႇရူဝ်းပုမ်ႇ၊ ၼၼ်ႉၼႂ်းဝၼ်းမိူဝ်ႈၼႆႉၵမ်းလဵဝ်ဢေႃႈ။-
ထႃႇဝရႃႉၽြႃး၊ တၵ်းပၼ်တၢမ်ႇတီႈၵူၼ်းမဵဝ်း ဢိသရေး၊ မိူၼ်ၸိူဝ်ႉၼင်ႇဢၼ်တူၼ်ႈမႆႉဢေႃႈသၼ်ႇၶွၼ်းၵႃႈၼိူဝ်ၼႃႈၼမ်ႉၼၼ်ႉလႄႈမၼ်းၸဝ်ႈတၵ်းထူၺ်ႈမဵဝ်း ဢိသရေး၊ ဢွၵ်ႇပႅတ်ႈသေၵႃႈတီႈမိူင်းဢၼ်လီဢၼ်ငၢမ်း၊မိူင်းဢၼ်မၼ်းၸဝ်ႈပၼ်တီႈပူႇမွၼ်ႇၶဝ်ၸိူဝ်းၼၼ်ႉသေယဝ်ႉ၊မၼ်းၸဝ်ႈတၵ်းဢဝ်ၶဝ်ၸၢတ်ႇပိုၼ်ပႅတ်ႈၽၢႆႇပုၼ်ႉၼမ်ႉ ဢုၽရတ်ႉ၊ ၵွပ်ႈပိူဝ်ႈဢၼ်ၶဝ်တိုၵ်းယူင်းတေႃးသႃႉ ထႃႇဝရႃႉၽြႃး၊ လူၺ်ႈတၢင်းဢၼ်ပူၵ်းတင်ႈသဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ ၼၼ်ႉဢေႃႈ။-
ထႃႇဝရႃႉၽြႃး၊ တၵ်းၸုၼ်ႉပႅတ်ႈၵူၼ်းမဵဝ်း ဢိသရေး၊ ၵွပ်ႈပိူဝ်ႈဢပျတ်ႈ ယေႇရူဝ်းပုမ်ႇ၊ ဢၼ်တူဝ်မၼ်းႁဵတ်းၽိတ်းၼၼ်ႉဢိၵ်ႇတင်းၵွပ်ႈပိူဝ်ႈမၼ်းႁႂ်ႈၵူၼ်းမဵဝ်း ဢိသရေး၊ ၽိတ်းပိူင်ႈၸိူဝ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
မေး ယေႇရူဝ်းပုမ်ႇ၊ ၶိုၼ်းမိူဝ်းၵႂႃႇလႄႈႁွတ်ႈထိုင်ၵႃႈတီႈဝဵင်း တိရၸႃႉ၊ ဢေႃႈ။ ၼႂ်းယၢမ်းမိူဝ်ႈဢၼ်မၼ်းၶဝ်ႈႁိူၼ်းမၼ်းၵႂႃႇၵမ်းလဵဝ်ၼၼ်ႉ၊လုၵ်ႈၸၢႆးမၼ်းၼၼ်ႉတၢႆဢေႃႈ။-
ၵူၼ်းမဵဝ်း ဢိသရေး၊ တင်းလၢႆႁႆႈႁွင်ႉပွင်ႉၶၢင်းလႄႈသၢင်းၵျူဝ်ႇမၼ်းမႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ ဢဝ်ၶႃႈမၼ်းၸဝ်ႈပရေႃးၽႅတ်ႈ ဢႁိယႃႉ၊ လၢတ်ႈဝႆႉၼၼ်ႉဢေႃႈ။
လွင်ႈတၢင်းၵႃႈဢၼ်ၶုၼ်ႁေႃၶမ်း ယေႇရူဝ်းပုမ်ႇ၊ ႁဵတ်းၵူႈၸိူဝ်ႉၵူႈပိူင်လႂ်၊တၢင်းဢၼ်မၼ်းတိုၵ်းသိုၵ်းလႂ်၊တၢင်းဢၼ်မၼ်းဢုပ်ႉပိူင်ႇၸၢမ်ႇၸႃးလႂ်ၸိူဝ်းၼႆႉၸိုင်၊တႅမ်ႈမၢႆဝႆႉၵႃႈၼႂ်းပိုၼ်းၶုၼ်ႁေႃၶမ်းၵူၼ်းမဵဝ်း ဢိသရေး၊ ဢေႃႈ။-
ယေႇရူဝ်းပုမ်ႇ၊ ႁဵတ်းၶုၼ်ႁေႃၶမ်းသၢဝ်းပၢႆသွင်ပီသေယဝ်ႉ၊မၼ်းတၢႆၵႂႃႇလႄႈဢဝ်သၢင်းၵျူဝ်ႇယဝ်ႉၸင်ႇ၊လုၵ်ႈၸၢႆးမၼ်း ၼႃႇတပ်ႉ၊ သိုပ်ႇၼင်ႈႁၢင်ႈၼင်ႈႁေႃဢေႃႈ။
လုၵ်ႈၸၢႆး သေႃးလမုၼ်ႇ၊ ဢၼ်ပဵၼ် ရူဝ်းပုမ်ႇ၊ ၼၼ်ႉမိူဝ်ႈဢၼ်မၼ်းၸႃႉပဵၼ်ၶုၼ်ႁေႃၶမ်းမိူင်း ယုတႃႉ၊ ၼၼ်ႉၸိုင်၊ဢသၢၵ်ႈလႆႈသီႇသိပ်းဢဵတ်းပီလႄႈမၼ်းဢုပ်ႉပိူင်ႇၸၢမ်ႇၸႃးသိပ်းၸဵတ်းပီၵႃႈၼႂ်းဝဵင်း ယေႇရုသလႅမ်ႇ၊ ဢၼ် ထႃႇဝရႃႉၽြႃး၊ လိူၵ်ႈဢဝ်ၵႃႈၼႂ်းသိုင်ႇၸိုင်ႈဝၢၼ်ႈမိူင်း ဢိသရေး၊ ပုၼ်ႈထႃႇၼႃႉတီႈဢၼ်ၵူၼ်းတင်းလၢႆတၵ်းဝႆႈမၼ်းၸဝ်ႈၼၼ်ႉဢေႃႈ။ မႄႈၸဝ်ႈၸမ်ႉ၊ပဵၼ် ၼေႇမႃႉ၊ မဵဝ်း ဢမ်ႇမုၼ်ႇ၊ ဢေႃႈ။
ၵူၼ်း ယုတႃႉ၊ တင်းလၢႆဢွၼ်ၵၼ်ႁဵတ်းတုၸရိူၵ်ႈဢၼ်ၶတ်းၵၼ်တင်း ထႃႇဝရႃႉၽြႃး၊ သေယဝ်ႉ၊တၢင်းဢၼ်တိုၵ်းယူင်းတေႃးသႃႉ ထႃႇဝရႃႉၽြႃး၊ ၼၼ်ႉပဵၼ်ဢၼ်ၽိတ်းပိူင်ႈလိူဝ်တွၼ်းၼႃႇသေၵႃႈဢၼ်ပူႇမွၼ်ႇၶဝ်တင်းလၢႆၽိတ်းပိူင်ႈမႃးၼၼ်ႉဢေႃႈ။-
ၶဝ်တႄႇႁဵတ်းထႃႇၼႃႉတီႈဢၼ်ဝႆႈၽြႃးဢၼ်ၽိတ်းဢၼ်ပိူင်ႈလႂ်၊ႁဵတ်းသဝ်ႁိၼ်တီႈၵူဝ်းၵႂၢႆႇလႂ်၊သဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ ပုၼ်ႈတႃႇၵူဝ်းၵႂၢႆႇလႂ်ၵႃႈၼိူဝ်ဢၼ်သုင်ၵႃႈမီး၊ဢိၵ်ႇတင်းၵႃႈတႂ်ႈႁူမ်ႈတူၼ်ႈမႆႉလူင်တင်းလၢႆဢေႃႈ။-
လိူဝ်တွၼ်းၼႃႇသေပိူၼ်ႈ၊မီးၵူၼ်းယိင်းၵူၼ်းၸၢႆးၸိူဝ်းဢၼ်ႁဵတ်းမႄႈမွၵ်ႇယႃႈၵႃႈတီႈထႃႇၼႃႉတီႈဢၼ်ၵူၼ်းသႃႇသၼႃႇပႃႉၶဝ်ဝႆႈသႃၼၼ်ႉဢေႃႈ။ ၵူၼ်းမဵဝ်း ယုတႃႉ၊ တင်းလၢႆဢွၼ်ၵၼ်ႁဵတ်းတၢင်းဢၼ်လီႁင်ႈဢဵတ်ႇသဵတ်ႇၵူႈၸိူဝ်ႉၵူႈပိူင်ၸွမ်းဢၼ်ၵူၼ်းမဵဝ်းဢၼ် ထႃႇဝရႃႉၽြႃး၊ ႁေႃႈဢွၵ်ႇပႅတ်ႈသေၵႃႈတီႈလိၼ်ဢၼ် ဢိသရေး၊ တိုၵ်းပႄႉသိမ်းဢဝ်ၸိူဝ်းၼၼ်ႉဢေႃႈ။
ၼႂ်းပီ ရူဝ်းပုမ်ႇ၊ ၸၢမ်ႇႁၢင်ႈၸၢမ်ႇႁေႃႁႃႈပီၼၼ်ႉၶုၼ်ႁေႃၶမ်း သိသၵ်ႉ၊ မိူင်း ဢေးၵျိပ်ႉ၊ ၶီႇသိုၵ်းတိုၵ်းတေႃးဝဵင်း ယေႇရုသလႅမ်ႇ၊ ဢေႃႈ။-
မၼ်းၼၼ်ႉသိမ်းဢဝ်ၽၼ်ႇတႃႇဢုၵ်ႉၸႃႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈ၊ဢိၵ်ႇတင်းၵႃႈၼႂ်းႁေႃၸဝ်ႈတင်းသဵင်ႈတင်းလူင်ပႃးၸဵမ်ၶႅပ်းႁႄႉလၢၵ်ႈၼၢၵ်ႈၶမ်းၸိူဝ်းဢၼ် သေႃးလမုၼ်ႇ၊ ႁဵတ်းဝႆႉၼၼ်ႉဢေႃႈ။-
ၶုၼ်ႁေႃၶမ်း ရူဝ်းပုမ်ႇ၊ သမ်ႉၶိုၼ်းႁဵတ်းၶႅပ်းႁႄႉလၢၵ်ႈၼၢၵ်ႈတွင်းလိူင်တၢင်တူဝ်ၶႅပ်းႁႄႉလၢၵ်ႈၼၢၵ်ႈၶမ်းၸိူဝ်းၼၼ်ႉသေယဝ်ႉ၊ဢၢပ်ႈပၼ်ၵႃႈၼႂ်းမိုဝ်းႁူဝ်သိုၵ်းႁူဝ်ႁၢၼ်ၸိူဝ်းဢၼ်တူၵ်းပုၼ်ႈၽွၼ်းပႂ်ႉၽၵ်းတူႁေႃၸဝ်ႈၼၼ်ႉဢေႃႈ။-
မိူဝ်ႈဢၼ်ၶုၼ်ႁေႃၶမ်းၵႂႃႇၵႃႈတီႈၵျွင်းပိၵ်ႈမၢၼ်ႇၸဝ်ႈၵူႈပွၵ်ႈၼၼ်ႉၶုၼ်ႁူဝ်ႁၢၼ်ၸဝ်ႈတင်းလၢႆဢွၼ်ၵၼ်ပႃးဢဝ်ၶႅပ်းႁႄႉလၢၵ်ႈၼၢၵ်ႈၸိူဝ်းၼၼ်ႉလႄႈ၊လိုၼ်းၼၼ်ႉသမ်ႉၶိုၼ်းဢဝ်ဝႆႉၵႃႈၼႂ်းလုၵ်းဢၼ်ၶဝ်ပႂ်ႉယူႇၼၼ်ႉဢေႃႈ။
လွင်ႈတၢင်းၵႃႈဢၼ်ၶုၼ်ႁေႃၶမ်း ရူဝ်းပုမ်ႇ၊ ႁဵတ်းၵူႈၸိူဝ်ႉၵူႈပိူင်ၼၼ်ႉ၊တႅမ်ႈမၢႆဝႆႉၵႃႈၼႂ်းပိုၼ်းၶုၼ်ႁေႃၶမ်းၵူၼ်းမဵဝ်း ဢိသရေး၊ ဢေႃႈ။-
ရူဝ်းပုမ်ႇ၊ တင်း ယေႇရူဝ်းပုမ်ႇ၊ ၼၼ်ႉပဵၼ်သိုၵ်းပဵၼ်သိူဝ်တီႈၵၼ်ယူႇၸူဝ်ႈဢသၢၵ်ႈၶဝ်ဢေႃႈ။-
ရူဝ်းပုမ်ႇ၊ ၼွၼ်းၽႄးလႄႈဢဝ်သၢင်းၵျူဝ်ႇလူၺ်ႈၵၼ်တင်းပူႇမွၼ်ႇမၼ်းၵႃႈၼႂ်းဝဵင်း တႃႇဝိတ်ႈ၊ သေယဝ်ႉ၊လုၵ်ႈၸၢႆးမၼ်း ဢၽိယႃႉ၊ သိုပ်ႇၼင်ႈႁၢင်ႈၼင်ႈႁေႃဢေႃႈ။
ၼႂ်းၸူဝ်ႈပၢၼ်ၶုၼ်ႁေႃၶမ်း ယေႇရူဝ်းပုမ်ႇ၊ မိူင်း ဢိသရေး၊ ၼင်ႈႁၢင်ႈၼင်ႈႁေႃသိပ်းပႅတ်ႇပီၼၼ်ႉၸိုင်၊ ဢၽိယႃႉ၊ ၶိုၼ်ႈႁၢင်ႈၶိုၼ်ႈႁေႃမိူင်း ယုတႃႉ၊ ဢေႃႈ။-
မၼ်းၼၼ်ႉၸၢမ်ႇႁၢင်ႈၸၢမ်ႇႁေႃၵႃႈၼႂ်းဝဵင်း ယေႇရုသလႅမ်ႇ၊ သၢမ်ပီဢေႃႈ။ မႄႈၸဝ်ႈမၼ်းပဵၼ် မႃႇၶႃႇ၊ လုၵ်ႈယိင်း ဢပႃႉသလုမ်ႇ၊ ဢေႃႈ။-
မၼ်းၵေႃႈႁဵတ်းတုၸရိူၵ်ႈမိူၼ်ၸိူဝ်ႉၼင်ႇၸဝ်ႈပေႃႈမၼ်းလႄႈႁူဝ်ၸႂ်မၼ်းဢမ်ႇမူတ်းၸၢင်ႇၵႃႈတီႈၽၢႆႇၼႃႈ ထႃႇဝရႃႉၽြႃး၊ ၽြႃးပဵၼ်ၸဝ်ႈမၼ်းမိူၼ်ၸိူဝ်ႉၼင်ႇပူႇမွၼ်ႇမၼ်း တႃႇဝိတ်ႈ၊ ၼၼ်ႉ။-
ၼႂ်းဝႃႈၼၼ်သေၵေႃႈ၊ ထႃႇဝရႃႉၽြႃး၊ ၽြႃးပဵၼ်ၸဝ်ႈမၼ်းထွၵ်ႈလူၺ်ႈၼႃႈ တႃႇဝိတ်ႈ၊ လႄႈယုၵ်ႉယွင်ႈလုၵ်ႈၸၢႆးမၼ်း၊ႁႂ်ႈလႆႈဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရုသလႅမ်ႇ၊ ႁႂ်ႈမၼ်းပႂ်ႉထိင်းဝဵင်း ယေႇရုသလႅမ်ႇ၊ ႁႂ်ႈမၼ်ႈၶိူင်ႇဢေႃႈ။-
ထႃႇဝရႃႉၽြႃး၊ ႁဵတ်းၸိူဝ်ႉၼင်ႇၼႆၵွပ်ႈပိူဝ်ႈဢၼ် တႃႇဝိတ်ႈ၊ ၼၼ်ႉၼွၵ်ႈသေဢမု ဢုရိယႃး၊ ၵူၼ်းမဵဝ်း ႁိတ်ႉတိ၊ ၼၼ်ႉမၼ်းႁဵတ်းၵႃႈဢၼ်ထုၵ်ႇၸႂ်မႅၼ်ႈၸႂ်မၼ်းၸဝ်ႈလႄႈဢမ်ႇဝႄႈဢမ်ႇပိူင်ႈသေပိင်းၺၢပ်ႈတြႃးမၼ်းၸဝ်ႈသေၸိူဝ်ႉသေပိူင်ၼၼ်ႉဢေႃႈ။-
ၼႂ်းၸူဝ်ႈပၢၼ် ဢၽိယႃႉ၊ ၼင်ႈႁၢင်ႈၼင်ႈႁေႃၼၼ်ႉမၼ်းတင်း ယေႇရူဝ်းပုမ်ႇ၊ ပဵၼ်သိုၵ်းပဵၼ်သိူဝ်ၵၼ်သေႇသေႇဢေႃႈ။-
လွင်ႈတၢင်းၵႃႈဢၼ် ဢၽိယႃႉ၊ ႁဵတ်းၸိူဝ်းၼၼ်ႉတႅမ်ႈမၢႆဝႆႉၵႃႈၼႂ်းပိုၼ်းၶုၼ်ႁေႃၶမ်းမိူင်း ယုတႃႉ၊ ဢေႃႈ။
ဢၽိယႃႉ၊ တၢႆလႄႈဢဝ်သၢင်းၵျူဝ်ႇဝႆႉၵႃႈၼႂ်းဝဵင်း တႃႇဝိတ်ႈ၊ သေယဝ်ႉ၊လုၵ်ႈၸၢႆးမၼ်း ဢႃႇသႃႉ၊ သိုပ်ႇၼင်ႈႁၢင်ႈၼင်ႈႁေႃဢေႃႈ။
ၼႂ်းၸူဝ်ႈပၢၼ်ၶုၼ်ႁေႃၶမ်း ယေႇရူဝ်းပုမ်ႇ၊ မိူင်း ဢိသရေး၊ ၼင်ႈႁၢင်ႈၼင်ႈႁေႃသၢဝ်းပီၼၼ်ႉ၊ ဢႃႇသႃႉ၊ ၶိုၼ်ႈႁၢင်ႈၶိုၼ်ႈႁေႃတီႈမိူင်း ယုတႃႉ၊ ဢေႃႈ။-
မၼ်းၼၼ်ႉၸၢမ်ႇႁၢင်ႈၸၢမ်ႇႁေႃၵႃႈၼႂ်းဝဵင်း ယေႇရုသလႅမ်ႇ၊ သီႇသိပ်းဢဵတ်းပီဢေႃႈ။ ၼၢႆးၸဝ်ႈၸမ်ႉ၊ပဵၼ် မႃႇၶႃႇ၊ လုၵ်ႈယိင်း ဢပႃႉသလုမ်ႇ၊ ဢေႃႈ။-
ဢႃႇသႃႉ၊ ႁဵတ်းမဵဝ်းဢၼ်ထုၵ်ႇၸႂ်မႅၼ်ႈၸႂ် ထႃႇဝရႃႉၽြႃး၊ မိူၼ်ၸိူဝ်ႉၼင်ႇဢၼ်ပူႇမွၼ်ႇမၼ်း တႃႇဝိတ်ႈ၊ ႁဵတ်းၼၼ်ႉဢေႃႈ။-
မၼ်းပႄႇၽဵဝ်ႈႁေႃႈပႅတ်ႈၵူၼ်းၸၢႆးဢၼ်ႁဵတ်းမႄႈမွၵ်ႇယႃႈၵႃႈတီႈထႃႇၼႃႉဢၼ်ၵူၼ်းသႃႇသၼႃႇပႃႉၶဝ်ဝႆႈသႃၼၼ်ႉဢွၵ်ႇသေၵႃႈၼႂ်းမိူင်းၸဝ်ႈဢေႃႈ။-
မၼ်းၶျႃးပႅတ်ႈ မႃႇၶႃႇ၊ ဢၼ်ပဵၼ်မႄႈၼၢႆးၸဝ်ႈၼၼ်ႉသေၵႃႈၼႂ်းဢရႃႇၼၢင်းႁေႃၶမ်းၵွပ်ႈပိူဝ်ႈဢၼ်မၼ်းၼၼ်ႉပူၵ်းတင်ႈသဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ ဢၼ်လီႁင်ႈဢဵတ်ႇသဵတ်ႇၼၼ်ႉဢေႃႈ။ ဢႃႇသႃႉ၊ ဢဝ်သဝ်ႁုၼ်ႇႁၢင်ႈၼၢင်းၽီၼၼ်ႉလူမ်ႉသေလႄႈဢဝ်ၵႂႃႇတုတ်ႇၽႆးပႅတ်ႈၵႃႈၼႂ်းထူင်ႉ ၵေႇတရုၼ်ႇ၊ ဢေႃႈ။-
ပိၵ်ႉသမ်ႉ ဢႃႇသႃႉ၊ ၼၼ်ႉဢမ်ႇပႄႇၽဵဝ်ႈထႃႇၼႃႉဢၼ်ၵူၼ်းသႃႇသၼႃႇပႃႉၶဝ်ဝႆႈသႃၼၼ်ႉပႅတ်ႈတင်းသဵင်ႈတင်းမူတ်းသေၵေႃႈ၊မၼ်းမီးႁူဝ်ၸႂ်ဢၼ်မူတ်းၸၢင်ႇလႄႈယူႇၵႃႈၼႂ်း ထႃႇဝရႃႉၽြႃး၊ ၸူဝ်ႈတႃႇဢသၢၵ်ႈမၼ်းထိုင်တီႈသုတ်းဢေႃႈ။-
မၼ်းဢဝ်ဢုၵ်ႉၸႃႇၵႃႈဢၼ်ၸဝ်ႈပေႃႈမၼ်းလူႇတၢၼ်းတီႈၽြႃးပဵၼ်ၸဝ်ႈယဝ်ႉၸိူဝ်းၼၼ်ႉ၊ဢိၵ်ႇတင်းၶိူင်ႈငိုၼ်း၊ၶိူင်ႈၶမ်းၸိူဝ်းဢၼ်တူဝ်မၼ်းလူႇတၢၼ်းၸိူဝ်းၼၼ်ႉဝႆႉၵႃႈၼႂ်းၵျွင်းပိၵ်ႈမၢၼ်ႇၸဝ်ႈဢေႃႈ။
ၶုၼ်ႁေႃၶမ်း ဢႃႇသႃႉ၊ မိူင်း ယုတႃႉ၊ တင်းၶုၼ်ႁေႃၶမ်း ပႃႇသႃႉ၊ မိူင်း ဢိသရေး၊ ၼၼ်ႉပဵၼ်သိုၵ်းပဵၼ်သိူဝ်တေႃႇၵၼ်ယူႇၼႂ်းၸူဝ်ႈပၢၼ်ၶဝ်မီးဢႃႇၼႃႇၼၼ်ႉဢေႃႈ။-
ၽဝ်ႇၼိုင်ႈ ပႃႇသႃႉ၊ ၶဝ်ႈၵႂႃႇတိုၵ်းတေႃးမိူင်း ယုတႃႉ၊ သေယဝ်ႉ၊တႄႇတင်ႈဝဵင်း ရႃႇမႃႉ၊ ပုၼ်ႈတေတႅပ်းသဵၼ်ႈတၢင်းၶၢတ်ႇဢမ်ႇႁႂ်ႈၽူႈလႂ်လႆႈၶဝ်ႈလႆႈဢွၵ်ႇမိူင်း ယုတႃႉ၊ ဢေႃႈ။-
ၼင်ႇၼၼ်လႄႈၶုၼ်ႁေႃၶမ်း ဢႃႇသႃႉ၊ ဢဝ်ငိုၼ်းၶမ်းၵႃႈဢၼ်ၵိုတ်းၵျၢၼ်ႇယူႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈတင်းႁေႃၸဝ်ႈတင်းသဵင်ႈတင်းလူင်ဢၢပ်ႈပၼ်ၵႃႈၼႂ်းမိုဝ်းၶုၼ်ဢၼ်ပွင်ၵၢၼ်မၼ်းတင်းလၢႆ သူင်ႇပၼ်ၵႂႃႇတီႈၶုၼ်ႁေႃၶမ်း ပိၼ်ႇႁႃႇတတ်ႉ၊ မိူင်း သီးရီးယႃး၊ ဢၼ်ပဵၼ်လုၵ်ႈၸၢႆး တႃႇပရိမုၼ်ႇ၊ သမ်ႉပဵၼ်လၢၼ် ရေႇၸုၼ်ႇ၊ ဢၼ်ပဵၼ်ၶုၼ်ႁေႃၶမ်းမိူင်း သီးရီးယႃး၊ ဢၼ်ဢုပ်ႉပိူင်ႇဝဵင်း တမ်ႇမတ်ႉသၵတ်ႉ၊ ဢေႃႈ။-
မၼ်းမီးၵႂၢမ်းသင်ႇလၢတ်ႈၵႂႃႇလႄႈဝႃႈ၊ “ႁႃးဢွၼ်ၵၼ်ႁဵတ်းမိၵ်ႈသႁႃႇယႃႉတေႃႇၵၼ်မိူၼ်ၸိူဝ်ႉၼင်ႇဢၼ်ၸဝ်ႈပေႃႈႁဝ်းၶဝ်ႁဵတ်းမိၵ်ႈသႁႃႇယႃႉတေႃႇၵၼ်ၼၼ်ႉတႃႉႁဝ်း။ ငိုၼ်းၶမ်းၸိူဝ်းၼႆႉပဵၼ်လၢၵ်ႈသွင်ႇၸဝ်ႈႁဝ်းဢေႃႈ။ တေႃႈလဵဝ်ၼႆႉၶႅၼ်းတေႃႈယႃႉပႅတ်ႈမိၵ်ႈသႁႃႇယႃႉဢၼ်ႁဵတ်းလူၺ်ႈၵၼ်တင်းၶုၼ်ႁေႃၶမ်း ပႃႇသႃႉ၊ မိူင်း ဢိသရေး၊ ၼၼ်ႉ ႁႂ်ႈမၼ်းလႆႈဢွၵ်ႇသေမိူင်းၵဝ်ၶႃႈၼႆႉၵႂႃႇသေၵမ်း၊” ဝႃႈၼင်ႇၼႆဢေႃႈ။
ပိၼ်ႇႁႃႇတတ်ႉ၊ ၽွမ်ႉၸႂ်လူၺ်ႈလွင်ႈဢၼ် ဢႃႇသႃႉ၊ တၢင်ႇလဝ်ႈၼၼ်ႉသေယဝ်ႉ၊ပူင်ဢမိင်ႉႁႂ်ႈၸဝ်ႈသိုၵ်းလူင်မၼ်းတင်းလၢႆၶီႇသိုၵ်းၵႂႃႇတိုၵ်းတေႃးဝဵင်း ဢိသရေး၊ တင်းလၢႆဢေႃႈ။ မၼ်းတိုၵ်းတေႃးသိမ်းဢဝ်ဝဵင်း ဢိယုၼ်ႇ၊ ဝဵင်း တၢၼ်ႇ၊ ဝဵင်း ဢႃႇပေႇလႃႉပႅတ်ႉမႃႇၶႃႉ၊ ဢိၵ်ႇတင်းဢိူင်ႇဢၼ်မီးႁိမ်းႁွမ်းၼွင်လူင် ၵႃႇလိလႄး၊ တင်းဢိူင်ႇ ၼပ်ႉထလိ၊ တင်းမူတ်းသေဢေႃႈ။-
မိူဝ်ႈဢၼ်ၶုၼ်ႁေႃၶမ်း ပႃႇသႃႉ၊ ငိၼ်းလွင်ႈၼၼ်ႉၸိုင်၊ယင်းဢမ်ႇသိုပ်ႇႁဵတ်းဝဵင်း ရႃႇမႃႉ၊ လႄႈၵႂႃႇယူႇၵႃႈတီႈဝဵင်း တိရၸႃႉ၊ ဢေႃႈ။
မိူဝ်ႈၼၼ်ႉၶုၼ်ႁေႃၶမ်း ဢႃႇသႃႉ၊ ႁႂ်ႈဢဝ်ဢမိင်ႉၸဝ်ႈပၢဝ်ႇသေႃႇၵႃႈၼႂ်းမိူင်း ယုတႃႉ၊ ၵူႈတီႈၵူႈလႅၼ်ႁႂ်ႈၵူႈၵေႃႉၵူႈၵူၼ်းယင်းဢမ်ႇလုတ်ႈဢမ်ႇႁၢမ်းမႃးၸွႆႈႁႂ်ႈႁၢမ်ဢဝ်မၢၵ်ႇႁိၼ်လႂ်၊မႆႉလႂ်ၵႃႈတီႈဝဵင်း ရႃႇမႃႉ၊ ဢၼ် ပႃႇသႃႉ၊ ဢဝ်ႁဵတ်းဝဵင်းၼၼ်ႉဢေႃႈ။ ဢႃႇသႃႉ၊ ၵေႃႈဢဝ်မႆႉဢဝ်ႁိၼ်ၸိူဝ်းၼၼ်ႉသေလႄႈတႄႇႁဵတ်းဝဵင်း ၵေးပႃႉ၊ တင်းဝဵင်း မိၸပႃႇ၊ ၵႃႈၼႂ်းဢိူင်ႇ ပိၼ်ႇယႃႇမိၼ်ႇ၊ သေဢေႃႈ။
လွင်ႈတၢင်းၵႃႈဢၼ်ၶုၼ်ႁေႃၶမ်း ဢႃႇသႃႉ၊ ႁဵတ်းၵူႈၸိူဝ်ႉၵူႈပိူင်၊လွင်ႈတၢင်းဢၼ်မၼ်းႁတ်းႁၢၼ်၊လွင်ႈတၢင်းဢၼ်မၼ်းတႄႇႁဵတ်းဝဵင်းၸိူဝ်းၼၼ်ႉတႅမ်ႈမၢႆဝႆႉၵႃႈၼႂ်းပိုၼ်းၶုၼ်ႁေႃၶမ်းမိူင်း ယုတႃႉ၊ ဢေႃႈ။ ၵူၺ်းၵႃႈ၊မိူဝ်ႈဢၼ်ဢသၢၵ်ႈၸဝ်ႈၵႄႇယဝ်ႉၼၼ်ႉမၼ်းပဵၼ်ၸဵပ်းလူင်ၵႃႈတီႈတိၼ်လႄႈၶႃၶႄႉၵႂႃႇဢေႃႈ။-
ဢႃႇသႃႉ၊ တၢႆလႄႈဢဝ်သၢင်းၵျူဝ်ႇၵႃႈတီႈၶုမ်ပႃႇႁဵဝ်ႈဝဵင်း တႃႇဝိတ်ႈ၊ သေယဝ်ႉ၊လုၵ်ႈၸၢႆးမၼ်း ယူဝ်းသၽတ်ႉ၊ သိုပ်ႇၼင်ႈႁၢင်ႈၼင်ႈႁေႃဢေႃႈ။
ၼႂ်းၸူဝ်ႈပၢၼ်ၶုၼ်ႁေႃၶမ်း ဢႃႇသႃႉ၊ မိူင်း ယုတႃႉ၊ ၼင်ႈႁၢင်ႈၼင်ႈႁေႃသွင်ပီယဝ်ႉၼၼ်ႉ၊လုၵ်ႈၸၢႆးၶုၼ်ႁေႃၶမ်း ယေႇရူဝ်းပုမ်ႇ၊ ဢၼ်ပဵၼ် ၼႃႇတပ်ႉ၊ ႁဵတ်းၶုၼ်ႁေႃၶမ်းမိူင်း ဢိသရေး၊ ဢေႃႈ။ မၼ်းဢုပ်ႉပိူင်ႇၸၢမ်ႇၸႃးသွင်ပီဢေႃႈ။-
မၼ်းႁဵတ်းတုၸရိူၵ်ႈဢၼ်ၶတ်းၵၼ်တင်း ထႃႇဝရႃႉၽြႃး၊ မိူၼ်ၸိူဝ်ႉၼင်ႇၸဝ်ႈပေႃႈမၼ်းလႄႈဢွၼ်ႁႂ်ႈမဵဝ်း ဢိသရေး၊ တင်းလၢႆၽိတ်းပိူင်ႈဢေႃႈ။
ပႃႇသႃႉ၊ လုၵ်ႈၸၢႆး ဢႁိယႃႉ၊ ၵူၼ်းၸိူဝ်ႉၶိူဝ်း ဢိသၶႃႇ၊ ၼၼ်ႉလၵ်ႉလွမ်ႁဵတ်းမုၵ်ႉႁဵတ်းၸိူဝ်းလႄႈယၢမ်းမိူဝ်ႈဢၼ် ၼႃႇတပ်ႉ၊ ဢိၵ်ႇတင်းတပ်ႉသိုၵ်းမၼ်းယင်းတိုၵ်ႉလွမ်ႉဝဵင်း ၵိပ်ႉပိသုၼ်ႇ၊ မိူင်း ၽိလိတ်ႉတိ၊ ယူႇၼၼ်ႉၸိုင်၊ ပႃႇသႃႉ၊ ၶႃႈၽၼ်းမၼ်းတၢႆသေဢေႃႈ။-
လွင်ႈတၢင်းၼႆႉပဵၼ်မႃးမိူဝ်ႈၶုၼ်ႁေႃၶမ်း ဢႃႇသႃႉ၊ မိူင်း ယုတႃႉ၊ ဢုပ်ႉပိူင်ႇၸၢမ်ႇၸႃးလႆႈသၢမ်ပီယဝ်ႉၼၼ်ႉဢေႃႈ။ ၼင်ႇၼၼ်လႄႈ ပႃႇသႃႉ၊ သိုပ်ႇၼင်ႈႁၢင်ႈၼင်ႈႁေႃမိူင်း ဢိသရေး၊ တၢင်တူဝ် ၼႃႇတပ်ႉ၊ ဢေႃႈ။-
မိူဝ်ႈၼၼ်ႉၵမ်းလဵဝ်မၼ်းၶႃႈတၢႆပႅတ်ႈၸိူဝ်ႉၶိူဝ်းၵူၼ်းႁိူၼ်း ယေႇရူဝ်းပုမ်ႇ၊ ထၢၼ်ႈပေႃးဢမ်ႇၵိုတ်းဢမ်ႇၵျၢၼ်ႇသေၵေႃႉသေၵူၼ်းဢေႃႈ။ ဢၼ်ၼႆႉၸမ်ႉ၊ပဵၼ်မႃးၸွမ်းလူၺ်ႈတၢင်းဢၼ် ထႃႇဝရႃႉၽြႃး၊ သင်ႇလၢတ်ႈဝႆႉတီႈၶႃႈမၼ်းၸဝ်ႈပရေႃးၽႅတ်ႈ ဢႁိယႃႉ၊ ၵူၼ်းဝဵင်း သိလေႃႇ၊ ၼၼ်ႉဢေႃႈ။-
လွင်ႈမၼ်းၸမ်ႉ၊ ယေႇရူဝ်းပုမ်ႇ၊ ႁဵတ်းတုၸရိူၵ်ႈဢၼ်တိုၵ်းယူင်းတေႃးသႃႉ ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ ၼႂ်းတၢင်းဢၼ်တူဝ်မၼ်းႁဵတ်းဢပျတ်ႈဢိၵ်ႇတင်းမၼ်းႁႂ်ႈၵူၼ်းမဵဝ်း ဢိသရေး၊ ၽိတ်းပိူင်ႈၼၼ်ႉဢေႃႈ။
လွင်ႈတၢင်းၵႃႈဢၼ် ၼႃႇတပ်ႉ၊ ႁဵတ်းၵူႈၸိူဝ်ႉၵူႈပိူင်ၼၼ်ႉတႅမ်ႈမၢႆဝႆႉၵႃႈၼႂ်းပိုၼ်းၶုၼ်ႁေႃၶမ်းမိူင်း ဢိသရေး၊ ဢေႃႈ။-
ၶုၼ်ႁေႃၶမ်း ဢႃႇသႃႉ၊ တင်းၶုၼ်ႁေႃၶမ်း ပႃႇသႃႉ၊ ပဵၼ်သိုၵ်းပဵၼ်သိူဝ်တေႃႇၵၼ်ၼႂ်းၸူဝ်ႈပၢၼ်ၶဝ်သွင်ၵေႃႉမီးဢႃႇၼႃႇၼၼ်ႉဢေႃႈ။
ၼႂ်းၸူဝ်ႈပၢၼ်ၶုၼ်ႁေႃၶမ်း ဢႃႇသႃႉ၊ မိူင်း ယုတႃႉ၊ ၼင်ႈႁၢင်ႈၼင်ႈႁေႃလႆႈသၢမ်ပီယဝ်ႉၼၼ်ႉ၊ ပႃႇသႃႉ၊ လုၵ်ႈၸၢႆး ဢႁိယႃႉ၊ ႁဵတ်းၶုၼ်ႁေႃၶမ်းမိူင်း ဢိသရေး၊ လႄႈ၊မၼ်းဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်းလူင် တိရၸႃႉ၊ သၢဝ်းသီႇပီဢေႃႈ။-
မၼ်းႁဵတ်းတုၸရိူၵ်ႈဢၼ်ၶတ်းၵၼ်တင်း ထႃႇဝရႃႉၽြႃး၊ မိူၼ်ၸိူဝ်ႉၼင်ႇၶုၼ်ႁေႃၶမ်း ယေႇရူဝ်းပုမ်ႇ၊ ဢိၵ်ႇတင်းမၼ်းႁႂ်ႈၵူၼ်းမဵဝ်း ဢိသရေး၊ ၽိတ်းပိူင်ႈဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ဢၼ်ပဵၼ်ၵႂၢမ်းတၢင်ႇဢပျတ်ႈ ပႃႇသႃႉ၊ ၼၼ်ႉႁွတ်ႈမႃးတီႈပရေႃးၽႅတ်ႈ ယေႇႁု၊ လုၵ်ႈၸၢႆး ႁႃႇၼၼိ၊ ၼၼ်ႉလႄႈဝႃႈၸမ်ႉ၊-
“မႂ်းပဵၼ်ၵေႃႉဢၼ်ဢမ်ႇပွင်ႇလွင်ႈၵႃႈသင်ၵူၺ်းလႄႈၵဝ်ယုၵ်ႉယွင်ႈမႂ်းႁႂ်ႈပဵၼ်ၵေႃႉဢၼ်ဢွၼ်ႁူဝ်ဢွၼ်ၵၼ်ၵူၼ်းမဵဝ်း ဢိသရေး၊ ဢေႃႈ။ တေႃႈလဵဝ်ၼႆႉမႂ်းႁဵတ်းတုၸရိူၵ်ႈမိူၼ်ၸိူဝ်ႉၼင်ႇ ယေႇရူဝ်းပုမ်ႇ၊ ဢိၵ်ႇတင်းႁႂ်ႈၵူၼ်းၵဝ်တင်းလၢႆၽိတ်းပိူင်ႈယဝ်ႉ။ တၢင်းၽိတ်းၶဝ်ၼၼ်ႉတိုၵ်းယူင်းတေႃးသႃႉၵဝ်ယဝ်ႉ။-
ၵဝ်တၵ်းပႄႇၽဵဝ်ႈမႂ်းဢိၵ်ႇတင်းလုၵ်ႈလၢၼ်ၵူၼ်းႁိူၼ်းမႂ်းပႅတ်ႈမိူၼ်ၸိူဝ်ႉၼင်ႇဢၼ်ၵဝ်ပႄႇၽဵဝ်ႈပႅတ်ႈ ယေႇရူဝ်းပုမ်ႇ၊ ၼၼ်ႉဢေႃႈ။-
လုၵ်ႈလၢၼ်ၵူၼ်းႁိူၼ်းမႂ်းၸိူဝ်းၼၼ်ႉၵေႃႉဢၼ်တၢႆၵႃႈၼႂ်းဝဵင်းၸိုင်၊မႃတၵ်းၵိၼ်ပႅတ်ႈလႄႈ၊ၵေႃႉဢၼ်တၢႆၼႂ်းၵၢင်ပၢင်ႇၵၢင်ပိုၼ်ၸိုင်၊လၢင်းတႃႉတၵ်းၵိၼ်ပႅတ်ႈဢေႃႈ၊” ဝႃႈၼင်ႇၼႆဢေႃႈ။
လွင်ႈတၢင်းဢၼ် ပႃႇသႃႉ၊ ႁဵတ်းၵူႈၸိူဝ်ႉၵူႈပိူင်၊ဢိၵ်ႇတင်းလွင်ႈတၢင်းဢၼ်မၼ်းႁတ်းႁၢၼ်ၸိူဝ်းၼၼ်ႉတႅမ်ႈမၢႆဝႆႉၵႃႈၼႂ်းပိုၼ်းၶုၼ်ႁေႃၶမ်းမိူင်း ဢိသရေး၊ ဢေႃႈ။-
ပႃႇသႃႉ၊ တၢႆလႄႈဢဝ်သၢင်းၵျူဝ်ႇၵႃႈၼႂ်းဝဵင်း တိရၸႃႉ၊ သေယဝ်ႉ၊လုၵ်ႈၸၢႆးမၼ်း ဢေးလႃႇ၊ သိုပ်ႇၼင်ႈႁၢင်ႈၼင်ႈႁေႃဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ဢၼ်ၶတ်းၵၼ်တင်း ပႃႇသႃႉ၊ တင်းလုၵ်ႈလၢၼ်ၵူၼ်းႁိူၼ်းမၼ်းတင်းလၢႆၼၼ်ႉႁွတ်ႈမႃးတီႈပရေႃးၽႅတ်ႈ ယေႇႁု၊ ၵွပ်ႈပိူဝ်ႈတုၸရိူၵ်ႈဢၼ်မၼ်းႁဵတ်းၶတ်း ထႃႇဝရႃႉၽြႃး၊ ၼၼ်ႉဢေႃႈ။ မၼ်းတိုၵ်းယူင်းတေႃးသႃႉ ထႃႇဝရႃႉၽြႃး၊ ၵွပ်ႈပိူဝ်ႈတုၸရိူၵ်ႈမၼ်းဢၼ်ႁဵတ်းမိူၼ်ၸိူဝ်ႉၼင်ႇ ယေႇရူဝ်းပုမ်ႇ၊ ၼၼ်ႉၵူၺ်းဢမ်ႇၵႃး၊ၵွပ်ႈပိူဝ်ႈဢၼ်မၼ်းၶႃႈၽၼ်းတၢႆလုၵ်ႈလၢၼ်ၵူၼ်းႁိူၼ်း ယေႇရူဝ်းပုမ်ႇ၊ ၼၼ်ႉၵေႃႈပႃးဢေႃႈ။
ၼႂ်းၸူဝ်ႈပၢၼ်ၶုၼ်ႁေႃၶမ်း ဢႃႇသႃႉ၊ မိူင်း ယုတႃႉ၊ ၼင်ႈႁၢင်ႈၼင်ႈႁေႃလႆႈသၢဝ်းႁူၵ်းပီယဝ်ႉၼၼ်ႉ ဢေးလႃႇ၊ လုၵ်ႈၸၢႆး ပႃႇသႃႉ၊ ပဵၼ်ၶုၼ်ႁေႃၶမ်းမိူင်း ဢိသရေး၊ သေယဝ်ႉ၊မၼ်းဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း တိရၸႃႉ၊ သွင်ပီဢေႃႈ။-
ၼႂ်းၶုၼ်ဢၼ်ပွင်ၵၢၼ်မၼ်းတင်းလၢႆၼၼ်ႉၵေႃႉၼိုင်ႈဢၼ်ပဵၼ် ၸိမရိ၊ ဢၼ်ၵွၼ်းလေႃႉမႃႉသိုၵ်းၸဝ်ႈၶိုင်ႈၼိုင်ႈၼၼ်ႉလၵ်ႉလွမ်ႁဵတ်းမုၵ်ႉႁဵတ်းၸိူဝ်းၶတ်းၵၼ်တင်းမၼ်းဢေႃႈ။ ဝၼ်းၼိုင်ႈ၊မိူဝ်ႈဢၼ်ၵိၼ်လဝ်ႈမဝ်းၵမ်ယူႇၵႃႈၼႂ်းႁိူၼ်း ဢႃႇၸႃႉ၊ ၵူၼ်းဢုပ်ႉႁေႃၸဝ်ႈၼႂ်းဝဵင်း တိရၸႃႉ၊ ယူႇၼၼ်ႉၸိုင်၊-
ၸိမရိ၊ ၼၼ်ႉၶဝ်ႈၵႃႈၼႂ်းႁိူၼ်းလႄႈၶႃႈၽၼ်း ဢေးလႃႉ၊ တၢႆသေယဝ်ႉသိုပ်ႇၼင်ႈႁၢင်ႈၼင်ႈႁေႃသေဢေႃႈ။ လွင်ႈတၢင်းၼႆႉပဵၼ်မႃးၼႂ်းၸူဝ်ႈပၢၼ်ၶုၼ်ႁေႃၶမ်း ဢႃႇသႃႉ၊ မိူင်း ယုတႃႉ၊ ၼင်ႈႁၢင်ႈၼင်ႈႁေႃသၢဝ်းၸဵတ်းပီယဝ်ႉၼၼ်ႉဢေႃႈ။
မိူဝ်ႈဢၼ် ၸိမရိ၊ တႄႇၸႃႉၸၢမ်ႇႁၢင်ႈၸၢမ်ႇႁေႃလႄႈၼင်ႈရႃႇၸႃႉပလၢင်ႇၼၼ်ႉၸိုင်၊မၼ်းၶႃႈၽၼ်းတၢႆပႅတ်ႈလုၵ်ႈလၢၼ်ၵူၼ်းႁိူၼ်း ပႃႇသႃႉ၊ တင်းမူတ်းဢေႃႈ။ မၼ်းၶႃႈၽၼ်းတၢႆပႅတ်ႈၵူၼ်းၸၢႆးၸိူဝ်းဢၼ်ပဵၼ်ပီႈပဵၼ်ၼွင်ႉ၊ဢၼ်ပဵၼ်ၵေႃႉသႄႈ ပႃႇသႃႉ၊ ၼၼ်ႉၵူႈၵေႃႉဢေႃႈ။-
ၼင်ႇၼၼ်လႄႈ ၸိမရိ၊ ၶႃႈၽၼ်းလုၵ်ႈလၢၼ်ၵူၼ်းႁိူၼ်း ပႃႇသႃႉ၊ တၢႆတင်းမူတ်း၊မႅၼ်ႈၸွမ်းၵႃႈၼင်ႇဢၼ်ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈပရေႃးၽႅတ်ႈ ယေႇႁု၊ ၼၼ်ႉဢေႃႈ။-
ၵွပ်ႈပိူဝ်ႈတုၸရိူၵ်ႈဢၼ်ၶဝ်ႁဵတ်းၶတ်း ထႃႇဝရႃႉၽြႃး၊ ဢိၵ်ႇတင်းၵွပ်ႈပိူဝ်ႈၶဝ်ႁႂ်ႈၵူၼ်းမဵဝ်း ဢိသရေး၊ လႆႈၽိတ်းပိူင်ႈၼၼ်ႉလႄႈ ပႃႇသႃႉ၊ တင်းလုၵ်ႈၸၢႆးမၼ်း ဢေးလႃႇ၊ တိုၵ်းယူင်းတေႃးသႃႉ ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ ဢေႃႈ။-
လွင်ႈတၢင်းၵႃႈဢၼ် ဢေးလႃႇ၊ ႁဵတ်းၵူႈၸိူဝ်ႉၵူႈပိူင်ၼၼ်ႉတႅမ်ႈမၢႆဝႆႉၵႃႈၼႂ်းပိုၼ်းၶုၼ်ႁေႃၶမ်းမိူင်း ဢိသရေး၊ ဢေႃႈ။
ၼႂ်းၸူဝ်ႈပၢၼ်ၶုၼ်ႁေႃၶမ်း ဢႃႇသႃႉ၊ မိူင်း ယုတႃႉ၊ ၼင်ႈႁၢင်ႈၼင်ႈႁေႃလႆႈသၢဝ်းၸဵတ်းပီယဝ်ႉၼၼ်ႉ ၸိမရိ၊ ႁဵတ်းၶုၼ်ႁေႃၶမ်းမိူင်း ဢိသရေး၊ ၵႃႈၼႂ်းဝဵင်း တိရၸႃႉ၊ ၸဵတ်းဝၼ်းဢေႃႈ။ ၼႂ်းၶိင်ႇမိူဝ်ႈၼၼ်ႉတပ်ႉသိုၵ်းမဵဝ်း ဢိသရေး၊ တင်းလၢႆ၊လႆႈၶျႃးပၢင်တပ်ႉလွမ်ႉႁွပ်ႈဝဵင်း ၵိပ်ႉပိသုၼ်ႇ၊ ၼႂ်းမိူင်းၵူၼ်းမဵဝ်း ၽိလိတ်ႉတိ၊ ၶဝ်ၼၼ်ႉယူႇဢေႃႈ။-
မိူဝ်ႈဢၼ်တပ်ႉသိုၵ်းမဵဝ်း ဢိသရေး၊ ၶဝ်ၶျႃးပၢင်တပ်ႉယူႇၼၼ်ႉၸိုင်၊လႆႈငိၼ်းလွင်ႈဢၼ် ၸိမရိ၊ လွမ်ႁဵတ်းမုၵ်ႉႁဵတ်းၸိူဝ်းသေလႄႈဢဝ်ၶုၼ်ႁေႃၶမ်းတၢႆၸိူဝ်ႉၼင်ႇၼၼ်ၼၼ်ႉၶဝ်ဢွၼ်ၵၼ်ယုၵ်ႉတၢင်ႇၸဝ်ႈၵွၼ်းတပ်ႉသိုၵ်းလူင် ဢေႃးမရိ၊ ႁဵတ်းၶုၼ်ႁေႃၶမ်းၵႃႈၼိူဝ်ၵူၼ်းမဵဝ်း ဢိသရေး၊ ၵႃႈၼႂ်းတပ်ႉၼၼ်ႉၼႂ်းဝၼ်းၼၼ်ႉၵမ်းလဵဝ်ဢေႃႈ။-
ဢေႃးမရိ၊ တင်းတပ်ႉသိုၵ်းမၼ်းၸိူဝ်းၼၼ်ႉဢွၼ်ၵၼ်ဢွၵ်ႇသေၵႃႈတီႈဝဵင်း ၵိပ်ႉပိသုၼ်ႇ၊ ၶိုၼ်းမႃးလွမ်ႉဝဵင်း တိရၸႃႉ၊ သေဢေႃႈ။-
မိူဝ်ႈဢၼ် ၸိမရိ၊ ႁုႁၼ်လွင်ႈဢၼ်ဝဵင်းၼၼ်ႉတူၵ်းသုမ်းယဝ်ႉၼၼ်ႉၸိုင်၊မၼ်းၶဝ်ႈၵႃႈၼႂ်းတပ်ႉဢၼ်မီးတီႈၸၼ်ႉၼႂ်းႁေႃၸဝ်ႈသေယဝ်ႉ၊ဢဝ်ၽႆးတုတ်ႇႁေႃၸဝ်ႈလႄႈမၼ်းလႆႈတၢႆၵႃႈၼႂ်းၽႆးၼၼ်ႉဢေႃႈ။-
လွင်ႈတၢင်းၼႆႉပဵၼ်မႃးၵွပ်ႈပိူဝ်ႈဢပျတ်ႈဢၼ်မၼ်းႁဵတ်းၶတ်း ထႃႇဝရႃႉၽြႃး၊ ၼၼ်ႉဢေႃႈ။ မိူၼ်ၸိူဝ်ႉၼင်ႇၶုၼ်ဢွၼ်တၢင်းမၼ်း ယေႇရူဝ်းပုမ်ႇ၊ ၼၼ်ႉမၼ်းႁႂ်ႈ ထႃႇဝရႃႉၽြႃး၊ လႆႈမႆႈၸႂ်ၸဵပ်းၸႂ်ၵွပ်ႈလူၺ်ႈတၢင်းၽိတ်းမၼ်း၊ဢိၵ်ႇတင်းတၢင်းဢၼ်မၼ်းႁႂ်ႈၵူၼ်းမဵဝ်း ဢိသရေး၊ ၽိတ်းပိူင်ႈၼၼ်ႉဢေႃႈ။-
လွင်ႈတၢင်းၵႃႈဢၼ် ၸိမရိ၊ ႁဵတ်းၵူႈၸိူဝ်ႉၵူႈပိူင်၊ဢိၵ်ႇတင်းလွင်ႈတၢင်းဢၼ်မၼ်းလၵ်ႉလွမ်လုၵ်ႉၽိုၼ်ႉၸိူဝ်းၼၼ်ႉတႅမ်ႈမၢႆဝႆႉၵႃႈၼႂ်းပိုၼ်းၶုၼ်ႁေႃၶမ်းမိူင်း ဢိသရေး၊ ဢေႃႈ။
မိူဝ်ႈၼၼ်ႉၵူၼ်းမဵဝ်း ဢိသရေး၊ တင်းလၢႆတႅၵ်ႇပဵၼ်သွင်မုၵ်ႉသွင်ၸိူဝ်းၵႂႃႇဢေႃႈ။ မုၵ်ႉၼိုင်ႈၵျိူၵ်ႈၸႂ်ႁႂ်ႈဢဝ် တိပၼိ၊ လုၵ်ႈၸၢႆး ၵိၼတ်ႉ၊ ႁႂ်ႈပဵၼ်ၶုၼ်ႁေႃၶမ်းၶဝ်လႄႈၸိူဝ်းၼိုင်ႈသမ်ႉၵျိူၵ်ႈၸႂ် ဢေႃးမရိ၊ ဢေႃႈ။-
ၵမ်းလိုၼ်းသုတ်းၼၼ်ႉၶဝ်ၸိူဝ်းဢၼ်ၵျိူၵ်ႈၸႂ် ဢေႃးမရိ၊ ၼၼ်ႉပႄႉၼႅင်ႇသေယဝ်ႉ၊ဢဝ် တိပၼိ၊ တၢႆလႄႈႁႂ်ႈ ဢေႃးမရိ၊ ၼင်ႈႁၢင်ႈၼင်ႈႁေႃဢေႃႈ။-
ၼင်ႇၼၼ်လႄႈၼႂ်းၸူဝ်ႈပၢၼ်ၶုၼ်ႁေႃၶမ်း ဢႃႇသႃႉ၊ မိူင်း ယုတႃႉ၊ ၼင်ႈႁၢင်ႈၼင်ႈႁေႃလႆႈသၢမ်သိပ်းဢဵတ်းပီၼၼ်ႉ ဢေႃးမရိ၊ ပဵၼ်ၶုၼ်ႁေႃၶမ်းမိူင်း ဢိသရေး၊ သိပ်းသွင်ပီလႄႈၼႂ်းႁူၵ်းပီဢွၼ်တၢင်းၼၼ်ႉၸိုင်၊မၼ်းဢုပ်ႉပိူင်ႇၸၢမ်ႇၸႃးၼႂ်းဝဵင်း တိရၸႃႉ၊ ဢေႃႈ။-
လိုၼ်းၼၼ်ႉမၼ်းဢဝ်ငိုၼ်းႁူၵ်းႁဵင်ၵျၢပ်ႈ သိုဝ်ႉဢဝ်လွႆ သမႃႇရိ၊ ၼႂ်းမိုဝ်း သမေႇရႃႉ၊ လႄႈတႄႇႁဵတ်းဝဵင်းၵႃႈတီႈၼၼ်ႈသေယဝ်ႉ၊ႁွင်ႉႁဵၵ်ႈၸိုဝ်ႈဝဵင်းၼၼ်ႉဝႃႈ၊ သမႃႇရိ၊ ဢၼ်ၸွမ်းလူၺ်ႈၸိုဝ်ႈၸဝ်ႈမၼ်းၵဝ်ႇၵဝ်ႇ သမေႇရႃႉ၊ ၼၼ်ႉဢေႃႈ။
ဢေႃးမရိ၊ ၼၼ်ႉႁဵတ်းတုၸရိူၵ်ႈဢၼ်ၶတ်းၵၼ်တင်း ထႃႇဝရႃႉၽြႃး၊ ဢၼ်ယဵင်ႈၶႅၼ်းႁၢႆႉၼႃႇသေၶုၼ်ဢွၼ်တၢင်းမၼ်းၸိူဝ်းၼၼ်ႉဢေႃႈ။-
မၼ်းပႆၸွမ်းယၢင်ႈၸွမ်း ယေႇရူဝ်းပုမ်ႇ၊ လုၵ်ႈၸၢႆး ၼေႇပတ်ႉ၊ လူၺ်ႈတၢင်းဢၼ်ထၢပ်ႈထႅင်ႈလႄႈႁဵတ်းဢပျတ်ႈဢၼ်ႁႂ်ႈၵူၼ်းမဵဝ်း ဢိသရေး၊ ၽိတ်းပိူင်ႈၼၼ်ႉလႄႈတိုၵ်းယူင်းတေႃးသႃႉ ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်လူၺ်ႈလွင်ႈမိၵ်ႉသႃႇတိၵ်ႉထိၶဝ်ၼၼ်ႉဢေႃႈ။-
လွင်ႈတၢင်းၵႃႈဢၼ် ဢေႃးမရိ၊ ႁဵတ်းၵူႈၸိူဝ်ႉၵူႈပိူင်၊ဢိၵ်ႇတင်းလွင်ႈတၢင်းဢၼ်တၼ်းၶူဝ်းမၼ်းယႂ်ႇၸိူဝ်းၼၼ်ႉတႅမ်ႈမၢႆဝႆႉၵႃႈၼႂ်းပိုၼ်းၶုၼ်ႁေႃၶမ်းမိူင်း ဢိသရေး၊ ဢေႃႈ။-
ဢေႃးမရိ၊ တၢႆလႄႈဢဝ်မၼ်းသၢင်းၵျူဝ်ႇၵႃႈၼႂ်းဝဵင်း သမႃႇရိ၊ သေယဝ်ႉ၊လုၵ်ႈၸၢႆးမၼ်း ဢႃႇႁပ်ႉ၊ သိုပ်ႇၼင်ႈႁၢင်ႈၼင်ႈႁေႃဢေႃႈ။
ၼႂ်းၸူဝ်ႈပၢၼ်ၶုၼ်ႁေႃၶမ်း ဢႃႇသႃႉ၊ မိူင်း ယုတႃႉ၊ ၼင်ႈႁၢင်ႈၼင်ႈႁေႃလႆႈသၢမ်သိပ်းပႅတ်ႇပီယဝ်ႉၼၼ်ႉ ဢႃႇႁပ်ႉ၊ လုၵ်ႈၸၢႆး ဢေႃးမရိ၊ ႁဵတ်းၶုၼ်ႁေႃၶမ်းမိူင်း ဢိသရေး၊ လႄႈမၼ်းဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း သမႃႇရိ၊ သၢဝ်းသွင်ပီဢေႃႈ။-
မၼ်းၼၼ်ႉႁဵတ်းတုၸရိူၵ်ႈဢၼ်ၶတ်းၵၼ်တင်း ထႃႇဝရႃႉၽြႃး၊ ဢၼ်ယဵင်ႈၶႅၼ်းႁၢႆႉၼႃႇသေပူႇမွၼ်ႇမၼ်းၵူႈၵေႃႉၼၼ်ႉလူးၵွၼ်ႇဢေႃႈ။-
မၼ်းႁဵတ်းဢပျတ်ႈမိူၼ်ၸိူဝ်ႉၼင်ႇ ယေႇရူဝ်းပုမ်ႇ၊ ၵူၺ်းဢမ်ႇၵႃး၊မၼ်းသမ်ႉဢဝ်မေးၵႃႈၼႂ်းမႄႈယိင်းၵူၼ်းမဵဝ်း ၸိတုမ်ႇ၊ ဢၼ်ပဵၼ် ယေႇၸပေႇလႃႉ၊ လုၵ်ႈယိင်းၶုၼ်ႁေႃၶမ်း ဢေႇသပေႇလႃႉ၊ ၼၼ်ႉသေယဝ်ႉ၊မၼ်းၵူဝ်းၵႂၢႆႇၽြႃး ပႃႇလႃႉ၊ လႄႈဝႆႈသႃလူးၵွၼ်ႇဢေႃႈ။-
မၼ်းတႄႇႁဵတ်းၵျွင်းၽြႃး ပႃႇလႃႉ၊ သေယဝ်ႉ၊ႁဵတ်းၶဵင်ႇတၢင်းလူႇလႄႈဢဝ်ဝႆႉၵႃႈၼႂ်းၵျွင်းၼၼ်ႉဢေႃႈ။-
မၼ်းသမ်ႉယင်းဢဝ်သဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ ဝႆႉထႅင်ႈလူးၵွၼ်ႇဢေႃႈ။ မၼ်းႁဵတ်းတၢင်းဢၼ်ယဵင်ႈၶႅၼ်းတိုၵ်းယူင်းတေႃးသႃႉ ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ ၼႃႇသေၶုၼ်ႁေႃၶမ်းဢၼ်ဢွၼ်တၢင်းမၼ်းၸိူဝ်းၼၼ်ႉလူးၵွၼ်ႇဢေႃႈ။
ၼႂ်းၸူဝ်ႈပၢၼ်မၼ်းၼၼ်ႉ ႁိဢေးလႃႉ၊ ၵူၼ်းဝဵင်း ပေႇသလႃႉ၊ ၶိုၼ်းမႄးၵုမ်းမႄးႁဵတ်းဝဵင်း ယေႇရိၶူဝ်း၊ ဢေႃႈ။ မၼ်းလႆႈသုမ်းၸွမ်းလုၵ်ႈၸၢႆးတူၼ်ႈမၼ်း ဢၽိရမ်ႇ၊ မိူဝ်ႈဢၼ်မၼ်းၶျႃးငဝ်ႈႁၢၵ်ႈဝဵင်း ယေႇရိၶူဝ်း၊ ဢိၵ်ႇတင်းလႆႈသုမ်းၸွမ်းလုၵ်ႈၸၢႆးလိုၼ်းမၼ်း ၸေးၵုပ်ႉ၊ မိူဝ်ႈဢၼ်မၼ်းပူၵ်းတင်ႈၽၵ်းတူဝဵင်းၼၼ်ႉဢေႃႈ။ လွင်ႈတၢင်းၼႆႉပဵၼ်ၸွမ်းၵႂၢမ်းဢၼ် ထႃႇဝရႃႉၽြႃး၊ ဢဝ်တင်း ယေႃးသု၊ လုၵ်ႈၸၢႆး ၼုၼ်ႇ၊ မီးဢမိင်ႉဝႆႉၼၼ်ႉဢေႃႈ။
ပရေႃးၽႅတ်ႈ ဢၼ်ၸိုဝ်ႈ ဢေးလိယႃႉ၊ ၵူၼ်းဝဵင်း တိသၽိ၊ မိူင်း ၵိလတ်ႉ ၼၼ်ႉလၢတ်ႈတီႈၶုၼ်ႁေႃၶမ်း ဢႃႇႁပ်ႉ၊ လႄႈဝႃႈ၊ “ၵႃႈၼႂ်းၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ၽြႃးၵူၼ်းမဵဝ်း ဢိသရေး၊ ဢၼ်ဢသၢၵ်ႈလိပ်းယူႇလႄႈဢၼ်ၵဝ်ၵူဝ်းၵႂၢႆႇၼၼ်ႉၵဝ်လၢတ်ႈတီႈမႂ်းၸမ်ႉ၊ၼႂ်းၸူဝ်ႈသွင်သၢမ်ပီၼႆႉၽူၼ်ဢမ်ႇလႆႈတူၵ်း၊ၼမ်ႉၼၢႆးဢမ်ႇလႆႈႁူင်ႈလႄႈယူႇတေႃႇထိုင်ႁွတ်ႈၵဝ်ၶိုၼ်းလၢတ်ႈထႅင်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ ထႃႇဝရႃႉၽြႃး၊ မီးဢမိင်ႉတီႈ ဢေးလိယႃႉ၊ လႄႈဝႃႈ၊-
“မႂ်းဢွၵ်ႇသေၵႃႈတီႈၼႆႈၵႂႃႇၸူးပွတ်းၽၢႆႇတၢင်းဝၼ်းဢွၵ်ႇပုၼ်ႉသေလႄႈတဵတ်ႇမႅပ်းယူႇၵႃႈႁိမ်းၼမ်ႉၵႄး ၶေးရိတ်ႉ၊ ဢၼ်မီးၽၢႆႇတၢင်းဝၼ်းဢွၵ်ႇၼမ်ႉ ယေႃးတၢၼ်ႇ၊ ၼၼ်ႉတႃႉ။-
မႂ်းတၵ်းလႆႈၼမ်ႉၵိၼ်ၵႃႈတီႈၼမ်ႉၵႄးၼၼ်ႉဢေႃႈ။ ၵဝ်တၵ်းၸႂ်ႉၵႃလမ်တင်းလၢႆႁႂ်ႈဢဝ်တၢင်းၵိၼ်မႃးသူင်ႇပၼ်မႂ်းၵႃႈတီႈၼၼ်ႈဢေႃႈ၊” ဝႃႈၼင်ႇၼႆဢေႃႈ။
ဢေးလိယႃႉ၊ ထွမ်ႇဢဝ်ဢမိင်ႉ ထႃႇဝရႃႉၽြႃး၊ ၼၼ်ႉသေယဝ်ႉ၊ၵႂႃႇလႄႈတဵတ်ႇမႅပ်းယူႇၵႃႈႁိမ်းၼမ်ႉၵႄး ၶေးရိတ်ႉ၊ ပုၼ်ႉဢေႃႈ။-
မၼ်းၵိၼ်ၼမ်ႉၵႃႈတီႈၼမ်ႉၵႄးၼၼ်ႉလႄႈ၊ၵႃလမ်တင်းလၢႆဢဝ်ၶဝ်ႈမုၼ်းတင်းၼိူဝ်ႉမႃးသူင်ႇပၼ်မၼ်းၶိင်ႇၵၢင်ၼႂ်ပွၵ်ႈၼိုင်ႈ၊တၢမ်းၶမ်ႈပွၵ်ႈၼိုင်ႈဢေႃႈ။-
လိုၼ်းၼၼ်ႉဢမ်ႇႁိုင်ဢမ်ႇၼၢၼ်းၵွပ်ႈပိူဝ်ႈၽူၼ်ဢမ်ႇတူၵ်းလႄႈၼမ်ႉၵႄးၼၼ်ႉယူတ်းႁႅင်ႈၵႂႃႇဢေႃႈ။
မိူဝ်ႈၼၼ်ႉ ထႃႇဝရႃႉၽြႃး၊ မီးဢမိင်ႉတီႈ ဢေးလိယႃႉ၊ လႄႈဝႃႈ၊-
“တေႃႈလဵဝ်ၼႆႉၵႂႃႇၵႃႈတီႈဝဵင်း ၸႃႇရိပ်ႉတႃႉ၊ မိူင်း ၸိတုမ်ႇ၊ ပုၼ်ႉသေလႄႈယူႇၵႃႈတီႈၼၼ်ႈတႃႉ။ ၵဝ်ၸႂ်ႉမႄႈမၢႆႈဢၼ်ယူႇၵႃႈတီႈဝဵင်းၼၼ်ႉၵေႃႉၼိုင်ႈႁႂ်ႈမၼ်းလဵင်ႉလူမႂ်းယဝ်ႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ ဢေးလိယႃႉ၊ ၵႂႃႇၸူးတီႈဝဵင်း ၸႃႇရိပ်ႉတႃႉ၊ လႄႈမိူဝ်ႈဢၼ်မၼ်းၸမ်ႁိမ်းၽၵ်းတူဝဵင်းၼၼ်ႉမၼ်းထူပ်းႁၼ်မႄႈမၢႆႈၵေႃႉၼိုင်ႈႁႃၽိုၼ်းယူႇဢေႃႈ။ မၼ်းႁွင်ႉလၢတ်ႈတီႈမႄႈယိင်းၼၼ်ႉလႄႈဝႃႈ၊ “ပၼ်ၵဝ်ၵိၼ်ၼမ်ႉၵွၵ်းၼိုင်ႈသေၵမ်း၊” ဝႃႈၼင်ႇၼႆဢေႃႈ။-
ယၢမ်းမိူဝ်ႈဢၼ်မႄႈယိင်းၼၼ်ႉယင်းတိုၵ်ႉၵႂႃႇႁႂ်ႈလႆႈဢဝ်ၼမ်ႉယူႇၼၼ်ႉမၼ်းသမ်ႉႁွင်ႉလၢတ်ႈထႅင်ႈလႄႈဝႃႈ၊ “ဢဝ်ပႃးတင်းၶဝ်ႈမုၼ်းၶႅပ်းၼိုင်ႈမႃးသေၵမ်း၊” ဝႃႈၼင်ႇၼႆဢေႃႈ။
မႄႈယိင်းၼၼ်ႉၶိုၼ်းလၢတ်ႈလႄႈဝႃႈ၊ “ၵဝ်တိူင်ႇၵႃႈၼႂ်း ထႃႇဝရႃႉၽြႃး၊ ဢၼ်ဢသၢၵ်ႈလိပ်း၊ၽြႃးပဵၼ်ၸဝ်ႈမႂ်းၼၼ်ႉလႄႈဝႃႈၸမ်ႉ၊ၵဝ်ဢမ်ႇမီးၶဝ်ႈမုၼ်းသေၶႅပ်းၵူၺ်း။ မီးၽွင်ၶဝ်ႈမုၼ်းၵႃႈၼႂ်းမေႃႈဝၵ်ႉၼိုင်ႈတင်းၼမ်ႉမၼ်းၵႃႈၼႂ်းတဝ်ႈဢိတ်းဢွၼ်ႇၼိုင်ႈၵူၺ်းဢေႃႈ။ ၵဝ်ဢဝ်ၽိုၼ်းသွင်သၢမ်လုၼ်ႈၼႆႉႁႂ်ႈလႆႈၶိုၼ်းမိူဝ်းၵႂႃႇၽဝ်ၶဝ်ႈမုၼ်းၵႃႈဢၼ်မီးၼၼ်ႉပုၼ်ႈၵဝ်တင်းလုၵ်ႈၸၢႆးဢွၼ်ႇၵဝ်ၵိၼ်မူတ်းယဝ်ႉၸိုင်၊တေလႆႈဢိုပ်းတၢႆၵူၺ်းယဝ်ႉ၊” ဝႃႈၼင်ႇၼႆဢေႃႈ။
ဢေးလိယႃႉ၊ ၵေႃႈလၢတ်ႈတီႈမၼ်းလႄႈဝႃႈ၊ “ယႃႇပေမႆႈၸႂ်။ မိူဝ်းၵႂႃႇလႄႈမႄးႁႅၼ်းတၢင်းၵိၼ်တၢင်းၶူပ်းၼၼ်ႉတႃႉ။ ၵူၺ်းၵႃႈႁဵတ်းၶဝ်ႈမုၼ်းၶႅပ်းဢွၼ်ႇၼိုင်ႈသေၵႃႈၼႂ်းၵႃႈဢၼ်မႂ်းမီးၼၼ်ႉသေလႄႈဢဝ်မႃးပၼ်ၵဝ်ဢွၼ်တၢင်းတႃႉ။ လိုၼ်းၼၼ်ႉၸင်ႇႁဵတ်းပုၼ်ႈမႂ်းတင်းလုၵ်ႈၸၢႆးမႂ်းတႃႉ။-
ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉလႄႈဝႃႈၸမ်ႉ၊ ‘ၽွင်ၶဝ်ႈမုၼ်းဢၼ်မီးၵႃႈၼႂ်းမေႃႈတၵ်းဢမ်ႇလႆႈသဵင်ႈလႆႈမူတ်း။ ၼမ်ႉမၼ်းဢၼ်မီးၵႃႈၼႂ်းတဝ်ႈတၵ်းဢမ်ႇလႆႈယုတ်ႈလႆႈယွမ်းတေႃႇထိုင်ႁွတ်ႈဝၼ်းဢၼ်ၵဝ် ထႃႇဝရႃႉၽြႃး၊ ႁႂ်ႈၽူၼ်တူၵ်းၼၼ်ႉဢေႃႈ၊’ ဝႃႈၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။
မႄႈမၢႆႈၼၼ်ႉမိူဝ်းၵႂႃႇလႄႈႁဵတ်းၸွမ်းၵႃႈၼင်ႇဢၼ် ဢေးလိယႃႉ၊ သင်ႇလၢတ်ႈတီႈမၼ်းၼၼ်ႉလႄႈၶဝ်တင်းသဵင်ႈလႆႈၵိၼ်ဢိမ်ႇႁိုင်ၼႃႇလူင်လၢင်ဢေႃႈ။-
ၸွမ်းၵႃႈၼင်ႇဢၼ် ထႃႇဝရႃႉၽြႃး၊ ဢဝ် ဢေးလိယႃႉ၊ လႄႈႁဵတ်းၵတိဝႆႉၼၼ်ႉၽွင်ၶဝ်ႈမုၼ်းဢၼ်မီးၵႃႈၼႂ်းမေႃႈဢမ်ႇသဵင်ႈဢမ်ႇမူတ်း။ ၼမ်ႉမၼ်းဢၼ်မီးၵႃႈၼႂ်းတဝ်ႈဢမ်ႇယုတ်ႈဢမ်ႇယွမ်းတႄႉဢေႃႈ။
လိုၼ်းၼၼ်ႉလုၵ်ႈၸၢႆးမႄႈမၢႆႈၼၼ်ႉၸပ်းတၢင်းၶႆႈတၢင်းပဵၼ်ဢေႃႈ။ မၼ်းပဵၼ်ႁႅင်းမႃးတိၵ်းတိၵ်းလႄႈတၢႆၵႂႃႇဢေႃႈ။-
မႄႈမၢႆႈၼၼ်ႉလၢတ်ႈတီႈ ဢေးလိယႃႉ၊ လႄႈဝႃႈ၊ “ၵူၼ်းၽြႃးပဵၼ်ၸဝ်ႈ႟။ ၵွပ်ႈသင်လႄႈမႂ်းႁဵတ်းၸိူဝ်ႉၼင်ႇၼႆတီႈၵဝ်ၸိူဝ်ႉၼင်ႇႁိုဝ်။ မႂ်းမႃးတီႈၵဝ်ႁႂ်ႈဢပျတ်ႈၵဝ်ပေႃႇဢွၵ်ႇထၢင်ႇသႃးၵႃႈတီႈၽြႃးပဵၼ်ၸဝ်ႈ၊ဢိၵ်ႇတင်းဢဝ်လုၵ်ႈၸၢႆးၵဝ်တၢႆလူင်ပႄႇ၊” ဝႃႈၼင်ႇၼႆဢေႃႈ။
ဢေးလိယႃႉ၊ ၵေႃႈလၢတ်ႈတီႈမၼ်းလႄႈဝႃႈ၊ “ဢဝ်လုၵ်ႈၸၢႆးဢွၼ်ႇၼၼ်ႉမႃးတီႈၵဝ်တႃႉ၊” ဝႃႈၼင်ႇၼႆသေယဝ်ႉ၊ႁွပ်ႇဢုမ်ႈဢဝ်လုၵ်ႈဢွၼ်ႇၼၼ်ႉသေၵႃႈၼႂ်းတၵ်းမႄႈမၼ်းလႄႈၶိုၼ်ႈၵႂႃႇထၢပ်ႈၼိူဝ်ၸူးတီႈႁွင်ႈၼွၼ်းမၼ်းသေလႄႈဝႆႉၵႃႈၼိူဝ်ၵူႇၼွၼ်းမၼ်းဢေႃႈ။-
မိူဝ်ႈၼၼ်ႉမၼ်းသူးတွင်းလူၺ်ႈတင်းသဵင်ဢၼ်ယႂ်ႇၼႃႇလႄႈဝႃႈ၊ “ဢူဝ်း ထႃႇဝရႃႉၽြႃး၊ ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းပၼ်ၽေးဢုပၢတ်ႈတီႈမႄႈမၢႆႈၼႆႉတီႈၶႃႈ။ မၼ်းဢဵတ်းလူလုမ်းလႃးၶႃႈၸဝ်ႈထၼ်ႇၼႆႉတီႈၶႃႈယဝ်ႉ။ ၸဝ်ႈႁဝ်းယင်းႁႂ်ႈလုၵ်ႈၸၢႆးမၼ်းတၢႆလူင်ပႄႇ၊” ဝႃႈၼင်ႇၼႆဢေႃႈ။
ၼင်ႇၼၼ်လႄႈမၼ်းဢူပ်ႇပူပ်ႇသႂ်ႇၵႃႈၼိူဝ်လုၵ်ႈဢွၼ်ႇၼၼ်ႉသၢမ်ပွၵ်ႈသေလႄႈသူးတွင်းဝႃႈ၊ “ဢူဝ်း၊ ထႃႇဝရႃႉၽြႃး၊ ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ ၶႅၼ်းတေႃႈႁႂ်ႈလုၵ်ႈဢွၼ်ႇၼႆႉဢသၢၵ်ႈၶိုၼ်းလိပ်းသေၵမ်းတီႈၶႃႈ၊” ဝႃႈၼင်ႇၼႆဢေႃႈ။-
ထႃႇဝရႃႉၽြႃး၊ ထွမ်ႇဢဝ်ၵႂၢမ်းသူးတွင်း ဢေးလိယႃႉ၊ ၼၼ်ႉသေယဝ်ႉ၊လုၵ်ႈဢွၼ်ႇၼၼ်ႉထူၺ်ႈၸႂ်မႃးလႄႈဢသၢၵ်ႈမၼ်းသမ်ႉၶိုၼ်းလိပ်းမႃးဢေႃႈ။
ဢေးလိယႃႉ၊ ဢဝ်လုၵ်ႈဢွၼ်ႇၼၼ်ႉၶိုၼ်းလူင်းမႃးတႂ်ႈလၢင်ႈၸူးတီႈမႄႈမၼ်းသေလႄႈလၢတ်ႈတီႈမႄႈမၢႆႈၼၼ်ႉလႄႈဝႃႈ၊ “တူၺ်းလူး။ ဢသၢၵ်ႈလုၵ်ႈၸၢႆးမႂ်းၶိုၼ်းလိပ်းယဝ်ႉ၊” ဝႃႈၼင်ႇၼႆဢေႃႈ။
မႄႈမၢႆႈၼၼ်ႉၶိုၼ်းလၢတ်ႈလႄႈဝႃႈ၊ “တေႃႈလဵဝ်ၼႆႉၵဝ်ႁုလွင်ႈဢၼ်မႂ်းပဵၼ်ၵူၼ်းၽြႃးပဵၼ်ၸဝ်ႈ၊ဢိၵ်ႇတင်းၵႂၢမ်းၽြႃးပဵၼ်ၸဝ်ႈဢၼ်ဢွၵ်ႇသူပ်းမႂ်းၼၼ်ႉပဵၼ်ၵႂၢမ်းဢၼ်မၢၼ်ႇမႅၼ်ႈၸိုဝ်ႈၸႂ်ႈတႄႉၼၼ်ႉယဝ်ႉ၊” ဝႃႈၼင်ႇၼႆဢေႃႈ။
ၶိင်ႇၵႃႇလႃႉပူၼ်ႉၵႂႃႇႁိုင်ၼႃႇသေယဝ်ႉ၊ၼႂ်းပီဢၼ်ၽႃႉလႅင်ႉ ထူၼ်ႈထိုင်သၢမ်ပီၼၼ်ႉၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးၵႃႈတီႈ ဢေးလိယႃႉ၊ လႄႈဝႃႈ၊ “မႂ်းၵႂႃႇလႄႈၶဝ်ႈၸူးတီႈၶုၼ်ႁေႃၶမ်း ဢႃႇႁပ်ႉ၊ တႃႉ။ ၵဝ်တၵ်းႁႂ်ႈၽူၼ်တူၵ်းမႃးဢေႃႈ၊” ဝႃႈၼင်ႇၼႆဢေႃႈ။-
ဢေးလိယႃႉ၊ ၵေႃႈဢွၵ်ႇၵႂႃႇဢေႃႈ။ မိူဝ်ႈၶိင်ႇယၢမ်းၼၼ်ႉမီးၽေးတၢင်းဢၼ်ၶဝ်ႈၵႃႈမၢၵ်ႇပႅင်းဢိုပ်းယၢၵ်ႈၶဝ်ႈၼမ်ႉတၢင်းၵိၼ်ၼႃႇလူင်လၢင်ၵႃႈတီႈဝဵင်း သမႃႇရိ၊ ဢေႃႈ။-
ပိူဝ်ႈၼႆလႄႈ ဢႃႇႁပ်ႉ၊ ႁွင်ႉဢဝ် ဢေႃးပတိ၊ ၵေႃႉဢၼ်ဢုပ်ႉၵႃႈၼိူဝ်ႁေႃၸဝ်ႈၼၼ်ႉဢေႃႈ။ ( ဢေႃးပတိ၊ ပဵၼ်ၵေႃႉဢၼ်ရူဝ်ႇသေႇၵူဝ်ယမ် ထႃႇဝရႃႉၽြႃး၊ ၵေႃႉၼိုင်ႈလႄႈ၊-
မိူဝ်ႈဢၼ် ယေႇၸပေႇလႃႉ၊ ပႄႇၽဵဝ်ႈပရေႃးၽႅတ်ႈ ထႃႇဝရႃႉၽြႃး၊ ပႅတ်ႈယူႇၼၼ်ႉမၼ်းဢဝ်ပရေႃးၽႅတ်ႈပၢၵ်ႇၼိုင်ႈသေၽႄပဵၼ်ယေႈမူႇႁႃႈသိပ်းလႄႈသိူင်ႇဝႆႉၵႃႈၼႂ်းႁူးထမ်ႈသေယဝ်ႉ၊ဢဝ်ၶဝ်ႈမုၼ်းတင်းၼမ်ႉလဵင်ႉၶဝ်ဢေႃႈ။-)
ဢႃႇႁပ်ႉ၊ လၢတ်ႈတီႈ ဢေႃးပတိ၊ လႄႈဝႃႈ၊ “ႁဝ်းဢွၼ်ၵၼ်ၵႂႃႇသွၵ်ႈႁႃၼမ်ႉဢွၵ်ႇႁူးတင်းၼမ်ႉႁွင်ႈၼမ်ႉၵႄးၵႃႈၼႂ်းမိူင်းၵူႈတီႈၵူႈလႅၼ်တႃႉႁဝ်း။ ၸၢင်ႈၶႄးတၵ်းထူပ်းႁၼ်တူၼ်ႈယိူဝ်ႈတူၼ်ႈယႃႈပုၼ်ႈမႃႉတင်းမႃႉလီႈတင်းလၢႆႁႂ်ႈဢသၢၵ်ႈၶျၢမ်းသႃႇဢေႃႈ။ ပေႃးပဵၼ်ၼၼ်ၸင်ႇႁဝ်းဢမ်ႇသုမ်းၸွမ်းတရိၵ်ႈသၢၼ်ႇၵမ်ႈၽွင်ႈယဝ်ႉ၊” ဝႃႈၼင်ႇၼႆဢေႃႈ။-
ၶဝ်ဢဝ်မိူင်းၸဝ်ႈၽႄမႅင်ႇပၼ်ၵၼ်ယေႈၵေႃႉယေႈၽၢႆႇႁႂ်ႈပေႃးၸွတ်ႇတူဝ်ႈၵႂႃႇတင်းမိူင်းလႄႈ ဢႃႇႁပ်ႉ၊ ဢွၵ်ႇၵႂႃႇၽၢႆႇၼိုင်ႈ၊ ဢေႃးပတိ၊ ဢွၵ်ႇၵႂႃႇတၢင်ႇၽၢႆႇလႄႈၵႂႃႇႁင်းၽႂ်ႁင်းမၼ်းဢေႃႈ။
ၼႂ်းမိူဝ်ႈဢၼ် ဢေႃးပတိ၊ ယင်းတိုၵ်ႉၸွမ်းတၢင်းၵႂႃႇယူႇၼၼ်ႉ မၼ်းႁူပ်ႉထူပ်းၵၼ်တင်း ဢေးလိယႃႉ၊ ဢေႃႈ။ မၼ်းတွင်း ဢေးလိယႃႉ၊ ယူႇလႄႈၵူမ်ႈၵွမ်းဝၢင်းႁူဝ်မၼ်းလႄႈထၢမ်ဝႃႈ၊ “ၸဝ်ႈပဵၼ် ဢေးလိယႃႉ၊ ဢမ်ႇၸႂ်ႈၶႃႈႁိုဝ်း၊” ဝႃႈၼင်ႇၼႆဢေႃႈ။
ဢေးလိယႃႉ၊ ၵေႃႈၶိုၼ်းလၢတ်ႈလႄႈဝႃႈ၊ “ၸႂ်ႈယဝ်ႉ။ ၵဝ်ပဵၼ် ဢေးလိယႃႉ၊ ဢေႃႈ။ ၵႂႃႇလၢတ်ႈတီႈၸဝ်ႈမႂ်းၶုၼ်ႁေႃၶမ်းၼၼ်ႉလွင်ႈဢၼ်ၵဝ်မီးယူႇၵႃႈတီႈၼႆႈၼၼ်ႉတႃႉ၊” ဝႃႈၼင်ႇၼႆဢေႃႈ။
ဢေႃးပတိ၊ လဝ်ႈလၢတ်ႈလႄႈဝႃႈ၊ “ၵဝ်ၶႃႈႁဵတ်းၽိတ်းဢၼ်လႂ်လႄႈၸဝ်ႈႁဝ်းႁႂ်ႈၵဝ်ၶႃႈထူပ်းၽေးတၢႆၵႃႈၼႂ်းမိုဝ်းၶုၼ်ႁေႃၶမ်း ဢႃႇႁပ်ႉ၊ ၼၼ်ႉၶႃႈ။-
ၵဝ်ၶႃႈတိူင်ႇၵႃႈၼႂ်းၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ဢၼ်ဢသၢၵ်ႈလိပ်း၊ၽြႃးပဵၼ်ၸဝ်ႈႁဝ်းၼၼ်ႉဢေႃႈ။ ၶုၼ်ႁေႃၶမ်းၼၼ်ႉသွၵ်ႈႁႃၸဝ်ႈႁဝ်းၵႃႈၼႂ်းၵူႈသိုင်ႇၵူႈမိူင်းၼႂ်းလေႃးၵႃႉၼႆႉယဝ်ႉ။ မိူဝ်ႈဢၼ်ၶုၼ်ႁေႃၶမ်းမိူင်းလႂ်သေဢမ်ႇဝႃႈ၊မွၵ်ႇလၢတ်ႈလွင်ႈဢၼ်ၸဝ်ႈႁဝ်းဢမ်ႇမီးၵႃႈၼႂ်းမိူင်းမၼ်းၼၼ်ႉၸိုင်၊ ဢႃႇႁပ်ႉ၊ ယင်းႁႂ်ႈၶုၼ်လူင်ၼၼ်ႉတိူင်ႇဝႃႈလွင်ႈဢၼ်မၼ်းဢမ်ႇလႆႈထူပ်းလႆႈႁၼ်ၸဝ်ႈႁဝ်းၼၼ်ႉတီႈၶႃႈဢေႃႈ။-
တေႃႈလဵဝ်ၼႆႉၸဝ်ႈႁဝ်းၶႂ်ႈႁႂ်ႈၵဝ်ၶႃႈၵႂႃႇမွၵ်ႇလၢတ်ႈတီႈၶုၼ်ႁေႃၶမ်းလွင်ႈဢၼ်ၸဝ်ႈႁဝ်းမီးၵႃႈတီႈၼႆႈၼၼ်ႉလူင်ပႄႇ။-
မိူဝ်ႈဢၼ်ၵဝ်ၶႃႈဢွၵ်ႇသေၵႃႈတီႈၸဝ်ႈႁဝ်းၵႂႃႇၼၼ်ႉ၊ပေႃးဝႃႈဝိၺိၺ်ႇ ထႃႇဝရႃႉၽြႃး၊ ဢဝ်ၸဝ်ႈႁဝ်းဢွၵ်ႇၵႂႃႇတၢင်ႇတီႈတၢင်ႇလႅၼ်ဢၼ်ၵဝ်ၶႃႈယင်းဢမ်ႇႁုၼၼ်ႉၸိုင်၊တၵ်းလႆႈႁဵတ်းၸိူဝ်ႉၼင်ႇႁိုဝ်ၶႃႈ။ မိူဝ်ႈဢၼ်ၵဝ်ၶႃႈမွၵ်ႇလၢတ်ႈ ဢႃႇႁပ်ႉ၊ လွင်ႈဢၼ်ၸဝ်ႈႁဝ်းမီးယူႇၵႃႈတီႈၼႆႈသေယဝ်ႉ၊မၼ်းမႃးလႄႈဢမ်ႇထူပ်းႁၼ်ၸဝ်ႈႁဝ်းၸိုင်၊မၼ်းတေဢဝ်ၵဝ်ၶႃႈတၢႆၶႃႈဢေႃႈ။ ၶုၵ်းၸႂ်လႆႈလွင်ႈဢၼ်ၵဝ်ၶႃႈၼႆႉရူဝ်ႇသေႇၵူဝ်ယမ် ထႃႇဝရႃႉၽြႃး၊ မႃးၸဵမ်မိူဝ်ႈယင်းလဵၵ်ႉၼၼ်ႉသေၵမ်းၶႃႈ။-
မိူဝ်ႈဢၼ်ၼၢင်း ယေႇၸပေႇလႃႉ၊ ၶႃႈၽၼ်းပရေႃးၽႅတ်ႈ ထႃႇဝရႃႉၽြႃး၊ ၸိူဝ်းၼၼ်ႉတၢႆၼၼ်ႉ၊ၵဝ်ၶႃႈဢဝ်ၶဝ်ပၢၵ်ႇၼိုင်ႈၽႄႁဵတ်းသွင်မူႇ၊ယေႈမူႇႁႃႈသိပ်းတဵတ်ႇမႅပ်းသေလႄႈဢဝ်ၶဝ်ႈၼမ်ႉတၢင်းၵိၼ်လဵင်ႉလူၶဝ်ၼၼ်ႉၸဝ်ႈႁဝ်းဢမ်ႇလႆႈႁုလႆႈငိၼ်းၶႃႈႁိုဝ်း။-
ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းတေၸႂ်ႉၵဝ်ၶႃႈႁႂ်ႈၵႂႃႇမွၵ်ႇလၢတ်ႈၶုၼ်ႁေႃၶမ်းလွင်ႈဢၼ်ၸဝ်ႈႁဝ်းမီးယူႇၵႃႈတီႈၼႆႈၼၼ်ႉလႆႈၸိူဝ်ႉၼင်ႇႁိုဝ်ၶႃႈ။ မၼ်းတၵ်းဢဝ်ၵဝ်ၶႃႈတၢႆဢေႃႈ၊” ဝႃႈၼင်ႇၼႆဢေႃႈ။
ဢေးလိယႃႉ၊ ၶိုၼ်းလၢတ်ႈလႄႈဝႃႈ၊ “ၵႃႈၼႂ်းၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ဢၼၼ်ႇတႃႉတၼ်းၶူဝ်း၊ၽြႃးဢၼ်ၵဝ်ၵူဝ်းၵႂၢႆႇၼၼ်ႉၵဝ်ဝႆႉၵတိလွင်ႈဢၼ်ၵဝ်တၵ်းၶဝ်ႈၸူးတီႈၶုၼ်ႁေႃၶမ်းၼႂ်းဝၼ်းမိူဝ်ႈၼႆႉၼၼ်ႉဢေႃႈ၊” ဝႃႈၼင်ႇၼႆဢေႃႈ။
ဢေႃးပတိ၊ ၵေႃႈၵႂႃႇၵႃႈတီႈၶုၼ်ႁေႃၶမ်း ဢႃႇႁပ်ႉ၊ လႄႈမွၵ်ႇလၢတ်ႈပၼ်သေယဝ်ႉ၊ ဢႃႇႁပ်ႉ၊ ၵႂႃႇႁႂ်ႈလႆႈထူပ်းႁၼ် ဢေးလိယႃႉ၊ ဢေႃႈ။-
မိူဝ်ႈဢၼ် ဢႃႇႁပ်ႉ၊ ထူပ်းႁၼ် ဢေးလိယႃႉ၊ ၼၼ်ႉၸိုင်၊ ဢႃႇႁပ်ႉ၊ လၢတ်ႈလႄႈဝႃႈ၊ “ၵေႃႉဢၼ်ပၼ်ၽေးတုၵ်ႉၶႃႉၵႃႈၼႂ်းၵူၼ်းမဵဝ်း ဢိသရေး၊ ၼႆႉပဵၼ်မႂ်းၼႆႉယဝ်ႉ၊” ဝႃႈၼင်ႇၼႆဢေႃႈ။
ဢေးလိယႃႉ၊ ၶိုၼ်းလၢတ်ႈလႄႈဝႃႈ၊ “ၵေႃႉဢၼ်ပၼ်ၽေးတုၵ်ႉၶႃႉၼၼ်ႉဢမ်ႇၸႂ်ႈၵဝ်။ ပဵၼ်မႂ်းတင်းပေႃႈမႂ်းဢေႃႈ။ သူၼႆႉဢမ်ႇထွမ်ႇဢဝ်ၵႂၢမ်းပိင်းၺၢပ်ႈတြႃး ထႃႇဝရႃႉၽြႃး၊ တင်းလၢႆလႄႈ၊ၵႂႃႇဝႆႈသႃ ၽြႃးပႃႇလႃႉ၊ ယဝ်ႉလူင်ပႄႇ။-
တေႃႈလဵဝ်ၼႆႉ ပူင်ဢမိင်ႉႁႂ်ႈၵူၼ်းမဵဝ်း ဢိသရေး၊ တင်းသဵင်ႈတင်းလူင်မႃးထူပ်းၵဝ်ၵႃႈတီႈလွႆ ၵရမေႇလႃႉ၊ ပုၼ်ႉတႃႉ။ ႁွင်ႉပႃးတင်းပရေႃးၽႅတ်ႈ ပႃႇလႃႉ၊ သီႇပၢၵ်ႇႁႃႈသိပ်းဢိၵ်ႇတင်းပရေႃးၽႅတ်ႈၼၢင်းၽီ ဢႃႇသရႃႉ၊ သီႇပၢၵ်ႇၸိူဝ်းဢၼ်ၼၢင်းႁေႃၶမ်း ယေႇၸပေႇလႃႉ၊ ၵမ်ႉထွၵ်ႈလဵင်ႉလူၼၼ်ႉမႃးတႃႉ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ဢႃႇႁပ်ႉ၊ ပူင်ဢမိင်ႉႁွင်ႉဢဝ်ၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢိၵ်ႇတင်းၵႃႈဢၼ်ပဵၼ်ပရေႃးၽႅတ်ႈ ပႃႇလႃႉ၊ တင်းလၢႆမႃးၸုတုမ်ၵၼ်တီႈၼိူဝ်လွႆ ၵရမေႇလႃႉ၊ ဢေႃႈ။-
ဢေးလိယႃႉ၊ ၵေႃႈၵႂႃႇၸူးတီႈဢၼ်ၶဝ်ၸုတုမ်ၼၼ်ႉသေယဝ်ႉလၢတ်ႈလႄႈဝႃႈ၊ “သူတၵ်းမီးၸႂ်ဢၼ်ယုမ်ႇၶိုင်ႈၼိုင်ႈဢမ်ႇယုမ်ႇၶိုင်ႈၼိုင်ႈယူႇၵႃႈၼႂ်းၵႄႈဝူင်ႈၵၢင်သွင်ၽၢႆႇၼႆႉႁိုင်ၵႃႈႁိုဝ်။ ပေႃး ထႃႇဝရႃႉၽြႃး၊ ၸႂ်ႈၽြႃးပဵၼ်ၸဝ်ႈၸိုင်၊ၵူဝ်းၵႂၢႆႇ ထႃႇဝရႃႉၽြႃး၊ တႃႉ။ ပေႃး ၽြႃးပႃႇလႃႉ၊ ၸႂ်ႈၽြႃးပဵၼ်ၸဝ်ႈၸိုင်၊ၵူဝ်းၵႂၢႆႇၽြႃး ပႃႇလႃႉ၊ တႃႉ၊” ဝႃႈၼင်ႇၼႆဢေႃႈ။ ၵူၺ်းၵႃႈ၊ၵူၼ်းၸိူဝ်းၼၼ်ႉယင်းဢမ်ႇတၵ်ႉသဵင်လႄႈယူႇဢေႃႈ။-
မိူဝ်ႈၼၼ်ႉ ဢေးလိယႃႉ၊ လၢတ်ႈလႄႈဝႃႈ၊ “ပရေႃးၽႅတ်ႈ ထႃႇဝရႃႉၽြႃး၊ ၸမ်ႉ၊ၵိုတ်းၵျၢၼ်ႇၵေႃႉလဵဝ်ၵူၺ်းယဝ်ႉ။ ပရေႃးၽႅတ်ႈ ပႃႇလႃႉ၊ ၸမ်ႉ၊မီးသီႇပၢၵ်ႇပၢႆႁႃႈသိပ်းဢေႃႈ။-
ဢဝ်ဝူဝ်းငၢၼ်သွင်တူဝ်မႃးပၼ်တီႈႁဝ်းသေၵမ်း။ ႁႂ်ႈပရေႃးၽႅတ်ႈ ပႃႇလႃႉ၊ ၸိူဝ်းၼၼ်ႉလိူၵ်ႈဢဝ်တူဝ်ၼိုင်ႈသေယဝ်ႉ၊တႅပ်းႁဵတ်းပွတ်းႁဵတ်းတွၼ်ႈလႄႈဢဝ်တၢင်ႇသႂ်ႇၵႃႈၼိူဝ်ၽိုၼ်းတႃႉ။ ယႃႇပေဢဝ်ၽႆးသုမ်ၽႆးၽဝ်။ ၵဝ်ၵေႃႈတၵ်းဢဝ်ဝူဝ်းငၢၼ်တၢင်ႇတူဝ်ၼၼ်ႉႁဵတ်းမိူၼ်ၵၼ်တင်းၶဝ်ဢေႃႈ။-
ၼင်ႇၼၼ်လႄႈႁႂ်ႈပရေႃးၽႅတ်ႈ ပႃႇလႃႉ၊ ၸိူဝ်းၼၼ်ႉၵၢဝ်ႇႁႃသူးတွင်းတီႈၽြႃးၶဝ်တႃႉ။ ၵဝ်ၵေႃႈတၵ်းၵၢဝ်ႇႁႃသူးတွင်းတီႈ ထႃႇဝရႃႉၽြႃး၊ ဢေႃႈ။ ႁႂ်ႈၽြႃးဢၼ်ဢဝ်ၽႆးတွပ်ႇၶိုၼ်းၼၼ်ႉပဵၼ်ၽြႃးပဵၼ်ၸဝ်ႈသေၵမ်းတႃႉ၊” ဝႃႈၼင်ႇၼႆဢေႃႈ။ ၵူၼ်းတင်းသဵင်ႈတင်းလူင်ၼၼ်ႉဢွၼ်ၵၼ်လၢတ်ႈလႄႈဝႃႈ၊ “ၵႂၢမ်းၼႆႉၸိုဝ်ႈၸႂ်ႈလီငၢမ်းဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ ဢေးလိယႃႉ၊ လၢတ်ႈတီႈပရေႃးၽႅတ်ႈ ပႃႇလႃႉ၊ ၸိူဝ်းၼၼ်ႉလႄႈဝႃႈ၊ “ပိူဝ်ႈဢၼ်သူၼမ်လႄႈလိူၵ်ႈဢဝ်ဝူဝ်းတူဝ်ၼိုင်ႈမႄးႁႅၼ်းဢွၼ်တၢင်းတႃႉ။ ယင်းဢမ်ႇသုမ်ၽႆးလႄႈသႅၼ်ႇႁွင်ႉႁႃၽြႃးသူၸိူဝ်းၼၼ်ႉတႃႉ၊” ဝႃႈၼင်ႇၼႆဢေႃႈ။
ၶဝ်ၵေႃႈဢွၼ်ၵၼ်ဢဝ်ဝူဝ်းငၢၼ်ဢၼ်ပိူၼ်ႈပၼ်ၼၼ်ႉလႄႈမႄးႁႅၼ်းသေယဝ်ႉ၊ႁွင်ႉပၢဝ်ႇသူးတွင်းတီႈၽြႃး ပႃႇလႃႉ၊ တေႃႇထိုင်ႁွတ်ႈၶိင်ႇၵၢင်ဝၼ်းတဵင်ႈဢေႃႈ။ ၶဝ်ႁွင်ႉပၢဝ်ႇလႄႈဝႃႈ၊ “ၽြႃး ပႃႇလႃႉ၊ တီႈၶႃႈ႟။ တွပ်ႇၶႃႈၸဝ်ႈႁဝ်းၶဝ်သေၵမ်းတီႈၶႃႈ၊” ဝႃႈၼင်ႇၼႆယူႇ၊ဢွၼ်ၵၼ်ၵႃႈဝႅၼ်ပၼ်ႇႁွပ်ႈၶဵင်ႇတၢင်းလူႇဢၼ်ၶဝ်ႁဵတ်းဝႆႉၼၼ်ႉယူႇဢေႃႈ။ ၵူၺ်းၵႃႈ၊ဢမ်ႇမီးသဵင်ပျႃႇတိၵ်ႈ၊ဢမ်ႇမီးတၢင်းဢၼ်ၶိုၼ်းတွပ်ႇလႃးလႃး။
မိူဝ်ႈၶဵင်ႇၵၢင်ဝၼ်းတဵင်ႈၼၼ်ႉ ဢေးလိယႃႉ၊ ႁဵတ်းပျၢၵ်ႈၶူဝ်ၶဝ်လႄႈလၢတ်ႈဝႃႈ၊ “ဢွၼ်ၵၼ်ႁဵတ်းသဵင်ဢၼ်ယဵင်ႈၶႅၼ်းႁႅင်းယႂ်ႇၼႃႇလႄႈႁွင်ႉသႅၼ်ႇတႃႉ။ မၼ်းၸဝ်ႈပဵၼ်ၽြႃးဢေႃႈ။ ယူဝ်မၼ်းၸဝ်ႈၶႆႈၸႂ်ဝူၼ်ႉၸႂ်လွင်ႈလိုၵ်ႉလွင်ႈလမ်ႇယူႇ၊ဢမ်ႇၼၼ်ၵေႃႈမၼ်းၸဝ်ႈႁဵတ်းၵၢၼ်တူဝ်ၸဝ်ႈၵဝ်ႇယူႇ၊ဢမ်ႇၼၼ်ၵေႃႈဢွၵ်ႇတၢင်းပႆတၢင်းယူႇ၊ဢမ်ႇၼၼ်ၵေႃႈမၼ်းၸဝ်ႈၼွၼ်းလပ်းယူႇလႄႈသူလူဝ်ႇလႆႈပူၵ်းဢဝ်ဢေႃႈ၊” ဝႃႈၼင်ႇၼႆဢေႃႈ။-
ၶဝ်ၵေႃႈဢွၼ်ၵၼ်ယဵင်ႈၶႅၼ်းႁွင်ႉသႅၼ်ႇႁႅင်းႁႅင်းလႄႈဢဝ်မိတ်ႈလႂ်၊လဵၵ်းလႅမ်လႂ်၊ၶၢၼ်ႇယၢႆးတီႈတူဝ်ၶဝ်ၸွမ်းၵႃႈၼင်ႇဢၼ်ထုင်းၸၢမ်ႇၶဝ်မီးၼၼ်ႉတေႃႇထိုင်ႁွတ်ႈလိူတ်ႈၶဝ်ထၢၼ်ႈပေႃးယွႆႉၵႃႈတီႈတူဝ်ၶဝ်ဢေႃႈ။-
မိူဝ်ႈပူၼ်ႉၶိင်ႇၵၢင်ဝၼ်းတဵင်ႈယဝ်ႉၵႂႃႇၼၼ်ႉၶဝ်ဢွၼ်ၵၼ်ႁေႃးၵႂၢမ်းပရေႃးၽႅတ်ႈၶဝ်ယူႇ၊ၸႂ်ယွင်ႇၸႂ်မႃႈယူႇတေႃႇထိုင်ႁွတ်ႈၶိင်ႇၼႃႇရီႇ၊ဢၼ်ၶဝ်တၵ်းသၢၵ်ႈလူႇၼၼ်ႉဢေႃႈ။ ၵူၺ်းၵႃႈ၊ဢမ်ႇမီးတၢင်းဢၼ်ၶိုၼ်းတွပ်ႇမႃး၊ဢမ်ႇလႆႈငိၼ်းသဵင်ပျႃႇတိၵ်ႈလႃးလႃး။
မိူဝ်ႈၼၼ်ႉ ဢေးလိယႃႉ၊ လၢတ်ႈတီႈၵူၼ်းတင်းသဵင်ႈတင်းလူင်လႄႈဝႃႈ၊ “ဢွၼ်ၵၼ်မႃးၵႃႈတီႈႁိမ်းၵဝ်ၼႆႉၸမ်ၸမ်တႃႉ၊” ဝႃႈၼင်ႇၼႆဢေႃႈ။ ၵူၼ်းတင်းသဵင်ႈတင်းလူင်ၵေႃႈ မႃးၸုတုမ်လွမ်ႉႁွပ်ႈမၼ်းၸမ်ၸမ်ဢေႃႈ။ ဢွၼ်တၢင်းသေပိူၼ်ႈ ဢေးလိယႃႉ၊ မႄးႁဵတ်းၶဵင်ႇတၢင်းလူႇ ထႃႇဝရႃႉၽြႃး၊ ဢၼ်ပိူၼ်ႈယႃႉလုယႃႉလႅဝ်ဝႆႉၼၼ်ႉသေယဝ်ႉ၊-
မၼ်းဢဝ်မၢၵ်ႇႁိၼ်သိပ်းသွင်ႁူၺ်ႇဢၼ်တၢင်တူဝ်ၸိူဝ်ႉၶိူဝ်းၵူၼ်းသိပ်းသွင်မဵဝ်းၸွမ်းၵႃႈၼင်ႇၸိုဝ်ႈသဵင်လုၵ်ႈၸၢႆး ယႃႇၵုပ်ႈ၊ ၵေႃႉဢၼ် ထႃႇဝရႃႉၽြႃး၊ ပၼ်ၸိုဝ်ႈဝႃႈ ဢိသရေး၊ ၼၼ်ႉသေယဝ်ႉ၊-
ဢဝ်မၢၵ်ႇႁိၼ်ၸိူဝ်းၼၼ်ႉတႄႇႁဵတ်းၶဵင်ႇတၢင်းလူႇပုၼ်ႈၼႃႇမႃႉၸိုဝ်ႈသဵင်မၼ်းၸဝ်ႈဢေႃႈ။ မၼ်းသမ်ႉၶုတ်းၶူးဢၼ်ၶဝ်ႈလႆႈၼမ်ႉသွင်ႁၢပ်ႇၼၼ်ႉလဵပ်ႈႁွပ်ႈၶဵင်ႇတၢင်းလူႇဝႆႉဢေႃႈ။-
မိူဝ်ႈၼၼ်ႉမၼ်းဢဝ်ၽိုၼ်းၶပ်ႉတၢင်ႇသႂ်ႇၵႃႈၼိူဝ်ၶဵင်ႇတၢင်းလူႇၼၼ်ႉသေယဝ်ႉ၊တႅပ်းၼိူဝ်ႉဝူဝ်းၼၼ်ႉႁဵတ်းပွတ်းႁဵတ်းတွၼ်ႈလႄႈတၢင်ႇသႂ်ႇၵႃႈၼိူဝ်ၽိုၼ်းၼၼ်ႉဢေႃႈ။ မၼ်းၸႂ်ႉၶဝ်လႄႈဝႃႈ၊ “ဢဝ်မေႃႈသီႇလုၵ်ႈသႂ်ႇၼမ်ႉတဵမ်တဵမ်သေလႄႈထွၵ်ႇသႂ်ႇၵႃႈၼိူဝ်ၶဵင်ႇတၢင်းလူႇဢၼ်တုတ်ႇၽႆးၼႆႉ၊ဢိၵ်ႇတင်းၵႃႈၼိူဝ်ၽိုၼ်းၸိူဝ်းၼႆႉတႃႉ၊” ဝႃႈၼင်ႇၼႆလႄႈၶဝ်ၵေႃႈႁဵတ်းပၼ်ဢေႃႈ။-
မၼ်းသမ်ႉလၢတ်ႈလႄႈဝႃႈ၊ “ဢွၼ်ၵၼ်ႁဵတ်းထႅင်ႈတႃႉ၊” ဝႃႈၼင်ႇၼႆလႄႈၶဝ်ၵေႃႈႁဵတ်းပၼ်ထႅင်ႈဢေႃႈ။ မၼ်းသမ်ႉလၢတ်ႈထႅင်ႈလႄႈဝႃႈ၊ “ဢွၼ်ၵၼ်ႁဵတ်းထႅင်ႈပွၵ်ႈၼိုင်ႈလူးၵွၼ်ႇတႃႉ၊” ဝႃႈၼင်ႇၼႆလႄႈၶဝ်သမ်ႉႁဵတ်းပၼ်ထႅင်ႈပွၵ်ႈၼိုင်ႈဢေႃႈ။-
ၼမ်ႉလႆတူၵ်းလဵပ်ႈႁွပ်ႈၶဵင်ႇတၢင်းလူႇၵႂႃႇၶဝ်ႈၼႂ်းၶူးၼၼ်ႉတဵမ်ဝႆႉဢေႃႈ။
မိူဝ်ႈဢၼ်ႁွတ်ႈထိုင်ၶိင်ႇၼႃႇရီႇဢၼ်ထုၵ်ႇႁဵတ်းတၢင်းလူႇၼၼ်ႉၸိုင်၊ပရေႃးၽႅတ်ႈ ဢေးလိယႃႉ၊ သုတ်ႉၸမ်ၶဵင်ႇတၢင်းလူႇသေလႄႈသူးတွင်းဝႃႈ၊ “ဢူဝ်း။ ထႃႇဝရႃႉၽြႃး၊ ၸဝ်ႈဢၼ်ပဵၼ်ၽြႃး ဢႃႇပြႃႇႁၢမ်ႇ၊ ၽြႃး ဢိၸၢၵ်ႈ၊ ၽြႃး ဢိသရေး၊ တီႈၶႃႈ။ ႁဵတ်းၼႄသၢၵ်ႈသေႇလွင်ႈဢၼ်ၸဝ်ႈႁဝ်းပဵၼ်ၽြႃးပဵၼ်ၸဝ်ႈမဵဝ်း ဢိသရေး၊ ဢိၵ်ႇတင်းလွင်ႈၶႃႈၸဝ်ႈၼႆႉပဵၼ်ၶႃႈၸႂ်ႉၸဝ်ႈႁဝ်းလႄႈႁဵတ်းလွင်ႈတၢင်းၼႆႉၸွမ်းၵႃႈၼင်ႇဢၼ်ၸဝ်ႈႁဝ်းမီးဢမိင်ႉဝႆႉၵူႈၸိူဝ်ႉၵူႈပိူင်ၼၼ်ႉတေႃႈလဵဝ်ၼႆႉသေၵမ်းတီႈၶႃႈ။-
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈတွပ်ႇၶႃႈၸဝ်ႈသေၵမ်းတီႈၶႃႈ။ ၶႅၼ်းတေႃႈတွပ်ႇၶႃႈၸဝ်ႈႁႂ်ႈၵူၼ်းၸိူဝ်းၼႆႉလႆႈႁုလွင်ႈဢၼ်ၸဝ်ႈႁဝ်းၶႃႈ ထႃႇဝရႃႉၽြႃး၊ ၽြႃးပဵၼ်ၸဝ်ႈဢိၵ်ႇတင်းလႆႈႁုလွင်ႈဢၼ်ၸဝ်ႈႁဝ်းႁႂ်ႈၸႂ်သၽေႃးၶဝ်ၶၢႆႉပုတ်ႈၼၼ်ႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၽႆး ထႃႇဝရႃႉၽြႃး၊ တူၵ်းမႃးလႄႈမႆႈၶိူင်ႈတၢင်းလူႇဢၼ်တေတုတ်ႇၽႆးလႂ်၊ၽိုၼ်းလႂ်၊မၢၵ်ႇႁိၼ်လႂ်၊မုၼ်ႈလိၼ်ၸိူဝ်းၼၼ်ႉလႂ်လႄႈႁုပ်ႈမႆႈၼမ်ႉၼႂ်းၶူးၼၼ်ႉယူတ်းႁႅင်ႈၵႂႃႇဢေႃႈ။-
ၵူၼ်းတင်းလၢႆႁၼ်လႄႈဢွၼ်ၵၼ်ၶုပ်ႉၶဝ်ႇၵႃႈၼိူဝ်လိၼ်သေယဝ်ႉႁွင်ႉသႅၼ်ႇလႄႈဝႃႈ၊ “ ထႃႇဝရႃႉၽြႃး၊ ပဵၼ်ၽြႃးပဵၼ်ၸဝ်ႈဢေႃႈ။ ထႃႇဝရႃႉၽြႃး၊ သူႇလဵဝ်ပႃးလဵဝ်ၵူၺ်းပဵၼ်ၽြႃးပဵၼ်ၸဝ်ႈဢေႃႈ၊” ဝႃႈၼင်ႇၼႆဢေႃႈ။
ဢေးလိယႃႉ၊ လၢတ်ႈတီႈၵူၼ်းတင်းလၢႆလႄႈဝႃႈ၊ “တိဢဝ်ပရေႃးၽႅတ်ႈ ပႃႇလႃႉ၊ ၸိူဝ်းၼၼ်ႉတႃႉ။ ယႃႇပေႁႂ်ႈလွတ်ႈသေၵေႃႉသေၵူၼ်း၊” ဝႃႈၼင်ႇၼႆဢေႃႈ။ ၵူၼ်းတင်းလၢႆဢွၼ်ၵၼ်တိဢဝ်ၶဝ်တင်းမူတ်းသေယဝ်ႉ၊ ဢေးလိယႃႉ၊ ဢွၼ်ဢဝ်ၶဝ်လူင်းၵႂႃႇၸူးတီႈၼမ်ႉ ၵိသုၼ်ႇ၊ လႄႈၶႃႈၽၼ်းတၢႆပႅတ်ႈဢေႃႈ။
မိူဝ်ႈၼၼ်ႉ၊ ဢေးလိယႃႉ၊ လၢတ်ႈတီႈ ဢႃႇႁပ်ႉ၊ လႄႈဝႃႈ၊ “တေႃႈလဵဝ်ၼႆႉၶိုၼ်းမိူဝ်းၵႂႃႇလႄႈၵိၼ်ၶူပ်းတႃႉ။ ၵဝ်ငိၼ်းသဵင်ၽႃႉၽူၼ်ဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈဢၼ် ဢႃႇႁပ်ႉ၊ ၶိုၼ်းမိူဝ်းၵႂႃႇႁႂ်ႈလႆႈၵိၼ်ၶူပ်းၼၼ်ႉ ဢေးလိယႃႉ၊ ၶိုၼ်ႈၵႂႃႇၵႃႈၼိူဝ်ပၢႆၸိၵ်းလွႆ ၵရမေႇလႃႉ၊ သေလႄႈၶုပ်ႉမူပ်ႇၵႃႈၼိူဝ်လိၼ်လႄႈ၊ဢဝ်ႁူဝ်သုၵ်ႉသႂ်ႇၼႂ်းဝၢင်ႈႁူဝ်ၶဝ်ႇမၼ်းယူႇဢေႃႈ။-
မၼ်းလၢတ်ႈတီႈၶႃႈၵူၼ်းၸႂ်ႉမၼ်းလႄႈဝႃႈ၊ “ၵႂႃႇလႄႈမုင်ႈတူၺ်းတီႈပၢင်ႇလၢႆႇပုၼ်ႉလူး၊” ဝႃႈၼင်ႇၼႆဢေႃႈ။ ၶႃႈၵူၼ်းၸႂ်ႉၼၼ်ႉၵႂႃႇလႄႈၶိုၼ်းမႃးမွၵ်ႇလၢတ်ႈဝႃႈ၊ “ဢမ်ႇလႆႈႁၼ်ၵႃႈသင်သေၸိူဝ်ႉသေမဵဝ်းတီႈၶႃႈ၊” ဝႃႈၼင်ႇၼႆဢေႃႈ။ ဢေးလိယႃႉ၊ ၸႂ်ႉမၼ်းၵႂႃႇမုင်ႈတူၺ်းၸဵတ်းပွၵ်ႈတဵမ်တဵမ်ဢေႃႈ။-
မိူဝ်ႈထူၼ်ႈထိုင်ၸဵတ်းပွၵ်ႈၼၼ်ႉမၼ်းၶိုၼ်းမႃးမွၵ်ႇလၢတ်ႈလႄႈဝႃႈ၊ “ၵဝ်ၶႃႈလႆႈႁၼ်မွၵ်ႇၵုမ်ႈဢိတ်းၼိုင်ႈဢၼ်မီးထၢၼ်ႇၽႃႇမိုဝ်းၵူၼ်းၼၼ်ႉၶိုၼ်ႈမႃးၽၢႆႇတၢင်းဝၼ်းတူၵ်းပုၼ်ႉၶႃႈဢေႃႈ၊” ဝႃႈၼင်ႇၼႆဢေႃႈ။ ဢေးလိယႃႉ၊ လၢတ်ႈတီႈၶႃႈၵူၼ်းၸႂ်ႉမၼ်းလႄႈဝႃႈ၊ “မႂ်းၶိုၼ်းမိူဝ်းၸူးတီႈ ဢႃႇႁပ်ႉ၊ လႄႈလဝ်ႈလၢတ်ႈတီႈမၼ်းလႄႈဝႃႈ၊ ‘ၶုၼ်လူင်ၶီႇလေႃႉမႃႉသိုၵ်းၸဝ်ႈလႄႈမိူဝ်းၵႂႃႇၸူဝ်ႈဢၼ်ၽူၼ်ဢမ်ႇပႆႇတၼ်းလႆႈတူၵ်းလႄႈႁၢမ်ႈတၢပ်ႈသဵၼ်ႈတၢင်းၸဝ်ႈသေၵမ်း၊’ ဝႃႈၼႆတႃႉ၊” ဝႃႈၼင်ႇၼႆဢေႃႈ။
ၼင်ႇၼၼ်လႄႈၵမ်းဢွၼ်ႇၼိုင်ႈၵူၺ်း၊ၽႃႉၵၢင်ႁၢဝ်ၵၢမ်ႈမိုတ်ႈဝႆႉတင်းမွၵ်ႇၵုမ်ႈ၊ဢိၵ်ႇတင်းလူမ်းလူင်ၽူၼ်လူင်တူၵ်းမႃးႁႅင်းယႂ်ႇၼႃႇဢေႃႈ။ ဢႃႇႁပ်ႉ၊ ၶီႇလေႃႉမႃႉသိုၵ်းလႄႈၵႂႃႇၸူးတီႈဝဵင်း ယေႇၸရေး၊ ဢေႃႈ။-
တၼ်းၶူဝ်း ထႃႇဝရႃႉၽြႃး၊ ႁွတ်ႈမႃးၵႃႈတီႈ ဢေးလိယႃႉ၊ လႄႈမၼ်းႁတ်ႉသၢႆဢႅဝ်မၼ်းသေယဝ်ႉ၊ၶုၼ်ႇလႅၼ်ႈဢွၼ်တၢင်း ဢႃႇႁပ်ႉ၊ ၵႂႃႇၸူးတီႈၽၵ်းတူဝဵင်း ယေႇၸရေး၊ ဢေႃႈ။
ၶုၼ်ႁေႃၶမ်း ဢႃႇႁပ်ႉ၊ မွၵ်ႇလၢတ်ႈလွင်ႈတၢင်းဢၼ် ဢေးလိယႃႉ၊ ႁဵတ်း၊ဢိၵ်ႇတင်းလွင်ႈတၢင်းဢၼ်မၼ်းၶႃႈတၢႆပရေႃးၽႅတ်ႈ ပႃႇလႃႉ၊ တင်းသဵင်ႈတင်းလူင်ၼၼ်ႉတီႈမေးမၼ်း ယေႇၸပေႇလႃႉ၊ ဢေႃႈ။-
ၼၢင်းၼၼ်ႉသင်ႇၵႂၢမ်းၵႂႃႇတီႈ ဢေးလိယႃႉ၊ လႄႈဝႃႈ၊ “ပေႃးၵဝ်ယင်းဢမ်ႇလႆႈဢဝ်ဢသၢၵ်ႈမႂ်းပႅတ်ႈၼႂ်းဝၼ်းမိူဝ်ႈၽုၵ်ႈၶိင်ႇၼႆႉ၊မိူၼ်ၸိူဝ်ႉၼင်ႇဢၼ်မႂ်းဢဝ်ဢသၢၵ်ႈၶဝ်ပႅတ်ႈၼၼ်ႉၸိုင်၊ႁႂ်ႈၽြႃးတင်းလၢႆပၼ်တၢမ်ႇတီႈၵဝ်ယဵင်ႈၶႅၼ်းႁၢႆႉၼႃႇသေဢၼ်မႂ်းႁဵတ်းတီႈပရေႃးၽႅတ်ႈတင်းလၢႆၼၼ်ႉသေၵမ်းလူၺ်ႈ၊” ဝႃႈၼင်ႇၼႆဢေႃႈ။-
ဢေးလိယႃႉ၊ ၵူဝ်လႄႈပၢႆႈၸူးတီႈဝဵင်း ပေႇရသေးၽႃႉ၊ ၼႂ်းမိူင်း ယုတႃႉ၊ လူၺ်ႈၵၼ်တင်းၶႃႈၵူၼ်းၸႂ်ႉမၼ်းၼၼ်ႉဢေႃႈ။ မၼ်းႁႂ်ႈၶႃႈၵူၼ်းၸႂ်ႉမၼ်းၵိုတ်းယူႇၵႃႈတီႈဝဵင်းၼၼ်ႉသေယဝ်ႉ၊-
တူဝ်မၼ်းၶဝ်ႈၵႂႃႇၵႃႈၼႂ်းထိူၼ်ႇလႅင်ႉၶၢဝ်းတၢင်းဝၼ်းၼိုင်ႈဢေႃႈ။ မၼ်းႁွတ်ႈထိုင်ၵႃႈတီႈႁူမ်ႈတူၼ်ႈမႆႉလႄႈၼင်ႈသူးတွင်းႁႂ်ႈလႆႈတၢႆဢေႃႈ။ မၼ်းဝႃႈ၊ “ ထႃႇဝရႃႉၽြႃး၊ တီႈၶႃႈ။ ပဵၼ်ဢၼ်လိူဝ်ၸႂ်တီႈၶႃႈယဝ်ႉ။ သိမ်းဢဝ်ဢသၢၵ်ႈၶႃႈၸဝ်ႈသေၵမ်းတီႈၶႃႈ။ ၶႃႈၸဝ်ႈၼႆႉၵေႃႈဢမ်ႇၸႂ်ႈၵေႃႉဢၼ်လီသေပူႇမွၼ်ႇၶႃႈၸဝ်ႈတင်းလၢႆၼၼ်ႉတီႈၶႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်မၼ်းၼင်ႈယူႇတႂ်ႈတူၼ်ႈမႆႉၼၼ်ႉၸိုင်၊မၼ်းၼွၼ်းလပ်းၵႂႃႇဢေႃႈ။ မိူဝ်ႈၼၼ်ႉတမၢၼ်ႇၵၢင်ႁၢဝ်ဢဝ်မိုဝ်းတိူဝ်ႉသႂ်ႇမၼ်းလႄႈလၢတ်ႈဝႃႈ၊ “လုၵ်ႉလႄႈၵိၼ်ၶူပ်းတႃႉ၊” ဝႃႈၼင်ႇၼႆဢေႃႈ။-
မၼ်းဝၢႆႇတူၺ်းလဵပ်ႈႁွပ်ႈလႄႈ၊ႁၼ်ၶဝ်ႈမုၼ်းၵွၼ်ႈၼိုင်ႈတင်းၼမ်ႉတဝ်ႈၵႃႈတီႈႁူဝ်ၼွၼ်းမၼ်းလႄႈမၼ်းၵိၼ်ၶူပ်းသေယဝ်ႉ၊ၶိုၼ်းၼွၼ်းလပ်းထႅင်ႈဢေႃႈ။-
တမၢၼ်ႇၵၢင်ႁၢဝ် ထႃႇဝရႃႉၽြႃး၊ ၶိုၼ်းမႃးၵမ်းတီႈသွင်သေယဝ်ႉ၊ပူၵ်းမၼ်းလႄႈလၢတ်ႈဝႃႈ၊ “လုၵ်ႉလႄႈၵိၼ်ၶူပ်းတႃႉ။ ၶၢဝ်းတၢင်းဢၼ်မႂ်းလူဝ်ႇၵႂႃႇၼၼ်ႉၵႆၼႃႇလူင်လၢင်ဢေႃႈ၊” ဝႃႈၼင်ႇၼႆဢေႃႈ။-
ဢေးလိယႃႉ၊ လုၵ်ႉသေယဝ်ႉၵိၼ်ၶူပ်းလႄႈဢႁႃႇရႃႉၼၼ်ႉပေႃးၵုမ်ႇပုၼ်ႈတႃႇမၼ်းၵႂႃႇၶၢဝ်းတၢင်းသီႇသိပ်းဝၼ်းသီႇသိပ်းၶိုၼ်းဢၼ်တေၵႂႃႇၸူးတီႈလွႆ သိၼႃႉ၊ လွႆဢၼ်မူတ်းၸၢင်ႇၸဝ်ႈၼၼ်ႉဢေႃႈ။-
ၵႃႈတီႈၼၼ်ႈၼႂ်းၶိုၼ်းၼၼ်ႉမၼ်းၶဝ်ႈၵႃႈၼႂ်းႁူးထမ်ႈလႄႈလိုဝ်ႈသဝ်းယူႇဢေႃႈ။ မိူဝ်ႈၼၼ်ႉၵမ်းလဵဝ်ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈမၼ်းလႄႈဝႃႈၸမ်ႉ၊ “ ဢေးလိယႃႉ၊ ႟။ မႂ်းႁဵတ်းၵႃႈသင်ယူႇၵႃႈတီႈၼႆႈ၊” ဝႃႈၼင်ႇၼႆဢေႃႈ။
မၼ်းၶိုၼ်းလၢတ်ႈလႄႈဝႃႈ၊ “ ထႃႇဝရႃႉၽြႃး၊ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ တီႈၶႃႈ။ ၶႃႈၸဝ်ႈၼႆႉၸႂ်ႁႅင်းယႂ်ႇၼႃႇၽၢႆႇၸဝ်ႈႁဝ်းသူႇလဵဝ်ပႃးလဵဝ်ၵူၺ်းၼၼ်ႉတႃႇသေႇတီႈၶႃႈဢေႃႈ။ ၵူၼ်းမဵဝ်း ဢိသရေး၊ တင်းသဵင်ႈတင်းလူင်ၸမ်ႉ၊ၸုၼ်ႉပႅတ်ႈပတိၺိၺ်ႇတြႃးၸဝ်ႈႁဝ်းတီႈၶႃႈလႄႈၵိူၼ်ႇယႃႉၶဵင်ႇတၢင်းလူႇၸဝ်ႈႁဝ်းတင်းလၢႆပႅတ်ႈၵူၺ်းဢမ်ႇၵႃး၊ဢဝ်ပရေႃးၽႅတ်ႈ ၸဝ်ႈႁဝ်းၸိူဝ်းၼႆႉတၢႆတင်းသဵင်ႈတင်းမူတ်းတီႈၶႃႈယဝ်ႉ။ ၵိုတ်းၵျၢၼ်ႇၶႃႈၸဝ်ႈၵေႃႉလဵဝ်ၵူၺ်းလႄႈတေႃႈလဵဝ်ၼႆႉၶဝ်ဢွၼ်ၵၼ်ႁႃႁႂ်ႈလႆႈဢဝ်ၶႃႈၸဝ်ႈတၢႆတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၵေႃႈမီးဢမိင်ႉလႄႈဝႃႈ၊ “ၵႂႃႇလႄႈၸုၵ်းယူႇၵႃႈၼိူဝ်လွႆၽၢႆႇၼႃႈၵဝ်တႃႉ။” ဝႃႈၼင်ႇၼႆတီႈမၼ်းဢေႃႈ။ မိူဝ်ႈၼၼ်ႉ ထႃႇဝရႃႉၽြႃး၊ ၵၢႆၵႂႃႇၵႃႈႁိမ်းမၼ်းလႄႈပွႆႇလူမ်းဢၼ်ႁႅင်းယႂ်ႇၼႃႇမႃးၽႃႇလွႆတင်းလၢႆလႄႈႁႂ်ႈမၢၵ်ႇႁိၼ်မၢၵ်ႇၽႃၵႃႈမီးတင်းလၢႆတႅၵ်ႇဢေႃႈ။ ၵူၺ်းၵႃႈ၊ ထႃႇဝရႃႉၽြႃး၊ ဢမ်ႇမီးၵႃႈၼႂ်းလူမ်းၼၼ်ႉ။ လူမ်းၼၼ်ႉထၢတ်ႇယဵၼ်ၵႂႃႇလႄႈပဵၼ်တၢင်းဢၼ်ဢိင်ႇသၼ်ႇဢေႃႈ။ ၵူၺ်းၵႃႈ၊ ထႃႇဝရႃႉၽြႃး၊ ဢမ်ႇမီးၵႃႈၼႂ်းဢိင်ႇသၼ်ႇၼၼ်ႉ။-
လိုၼ်းသေတၢင်းဢၼ်ဢိင်ႇသၼ်ႇၼၼ်ႉမီးၽႆးဢေႃႈ။ ၵူၺ်းၵႃႈ၊ ထႃႇဝရႃႉၽြႃး၊ ဢမ်ႇမီးၵႃႈၼႂ်းၽႆးၼၼ်ႉ။ လိုၼ်းသေၽႆးၼၼ်ႉမီးသဵင်ဢၼ်ဢူၼ်ႈဢွၼ်ႇဢၼ်လၢတ်ႈသွပ်ႉသႅပ်ႉလွႆးလွႆးဢေႃႈ။
ဢေးလိယႃႉ၊ ငိၼ်းသဵင်ၼၼ်ႉလႄႈဢဝ်ၽႃႈဝႆႁူမ်ႇသုမ်ႇၼႃႈမၼ်းသေယဝ်ႉ၊ဢွၵ်ႇၵႂႃႇၸုၵ်းယူႇၵႃႈတီႈပၢၵ်ႇႁူးထမ်ႈဢေႃႈ။ သဵင်ဢွၵ်ႇမႃးလၢတ်ႈတီႈမၼ်းလႄႈဝႃႈ၊ “ ဢေးလိယႃႉ၊ ႟။ မႂ်းႁဵတ်းၵႃႈသင်ယူႇၵႃႈတီႈၼႆႈ၊” ဝႃႈၼင်ႇၼႆဢေႃႈ။
မၼ်းၶိုၼ်းလဝ်ႈလၢတ်ႈလႄႈဝႃႈ၊ “ ထႃႇဝရႃႉၽြႃး၊ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ တီႈၶႃႈ။ ၶႃႈၸဝ်ႈၼႆႉၸႂ်ႁႅင်းယႂ်ႇၼႃႇၽၢႆႇၸဝ်ႈႁဝ်းသူႇလဵဝ်ပႃးလဵဝ်ၵူၺ်းၼၼ်ႉတႃႇသေႇတီႈၶႃႈဢေႃႈ။ ၵူၼ်းမဵဝ်း ဢိသရေး၊ တင်းသဵင်ႈတင်းလူင်ၸမ်ႉ၊ၸုၼ်ႉပႅတ်ႈပတိၺိၺ်ႇတြႃးၸဝ်ႈႁဝ်းတီႈၶႃႈလႄႈၵိူၼ်ႇယႃႉပႅတ်ႈၶဵင်ႇတၢင်းလူႇၸဝ်ႈႁဝ်းတင်းလၢႆယဝ်ႉၵူၺ်းဢမ်ႇၵႃး၊ဢဝ်ပရေႃးၽႅတ်ႈၸဝ်ႈႁဝ်းၸိူဝ်းၼႆႉတၢႆတင်းသဵင်ႈတင်းမူတ်းတီႈၶႃႈယဝ်ႉ။ ၵိုတ်းၵျၢၼ်ႇၶႃႈၸဝ်ႈၵေႃႉလဵဝ်ၵူၺ်းလႄႈတေႃႈလဵဝ်ၼႆႉၶဝ်ဢွၼ်ၵၼ်ႁႃႁႂ်ႈလႆႈဢဝ်ၶႃႈၸဝ်ႈတၢႆတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၵေႃႈမီးဢမိင်ႉလႄႈဝႃႈ၊ “မႂ်းၶိုၼ်းမိူဝ်းၸူးတီႈထိူၼ်ႇလႅင်ႉၵႃႈႁိမ်းဝဵင်း တမ်ႇမတ်ႉသၵတ်ႉ၊ ၼၼ်ႉတႃႉ။ ၶဝ်ႈၵႃႈၼႂ်းဝဵင်းသေလႄႈပၼ်ၽိၵ်ႈသိၵ်ႈတီႈ ႁႃႇၸေႇလႃႉ၊ ႁႂ်ႈမၼ်းပဵၼ်ၶုၼ်ႁေႃၶမ်းမိူင်း သီးရီးယႃး၊ တႃႉ။-
သမ်ႉပၼ်ၽိၵ်ႈသိၵ်ႈတီႈ ယေႇႁု၊ လုၵ်ႈၸၢႆး ၼိမ်းသိ၊ ႁႂ်ႈမၼ်းပဵၼ်ၶုၼ်ႁေႃၶမ်းမိူင်း ဢိသရေး၊ ဢိၵ်ႇတင်းပၼ်ၽိၵ်ႈသိၵ်ႈတီႈ ဢေးလိသႄး၊ လုၵ်ႈၸၢႆး သႃႇၽတ်ႉ၊ ၵူၼ်းဝဵင်း ဢႃႇပေႇလႃႉမႁေႃႇလႃႉ၊ ၼၼ်ႉႁႂ်ႈမၼ်းပဵၼ်ပရေႃးၽႅတ်ႈတၢင်တူဝ်မႂ်းတႃႉ။-
ၵေႃႉဢၼ်လွတ်ႈတၢႆလူၺ်ႈလၢပ်ႇ ႁႃႇၸေႇလႃႉ၊ ၼၼ်ႉ ယေႇႁု၊ တၵ်းဢဝ်တၢႆဢေႃႈ။ ၵေႃႉဢၼ်လွတ်ႈတၢႆလူၺ်ႈ ယေႇႁု၊ ၼၼ်ႉ ဢေးလိသႄး၊ တၵ်းဢဝ်တၢႆဢေႃႈ။-
ၼႂ်းဝႃႈၼၼ်သေၵေႃႈ၊ၵဝ်တၵ်းႁႂ်ႈၵူၼ်းမဵဝ်း ဢိသရေး၊ ၸဵတ်းႁဵင်၊ၸိူဝ်းဢၼ်ပႂ်ႉသဵတ်ႈၸႃႇတေႃႇၵဝ်ယူႇလႄႈဢမ်ႇဝႆႈ ၽြႃးပႃႇလႃႉ၊ ဢမ်ႇၸုပ်ႇၼူမ်ႁုၼ်ႇႁၢင်ႈသၢင်းထုမၼ်းၸိူဝ်းၼၼ်ႉၵိုတ်းၵျၢၼ်ႇဝႆႉပုၼ်ႈၵဝ်ဢေႃႈ၊” ဝႃႈၼင်ႇၼႆဢေႃႈ။
ဢေးလိယႃႉ၊ ဢွၵ်ႇၵႂႃႇလႄႈထူပ်းႁၼ် ဢေးလိသႄး၊ ဢဝ်ဝူဝ်းပေႃႈသိပ်းသွင်ၵူႈထႆၼႃးယူႇလႄႈတူဝ်မၼ်းၸမ်ႉ၊ထႆလူၺ်ႈၵူႈလိုၼ်းလင်သုတ်းၼၼ်ႉဢေႃႈ။ ဢေးလိယႃႉ၊ ထွတ်ႇဢဝ်ၽႃႈဝႆတူဝ်ၸဝ်ႈၵဝ်ႇပၢတ်ႈသႂ်ႇၵႃႈၼိူဝ်မၼ်းဢေႃႈ။-
ဢေးလိသႄး၊ ၵေႃႈပႅတ်ႈဝႆႉဝူဝ်းၸိူဝ်းၼၼ်ႉသေလႄႈလႅၼ်ႈၸူးတီႈ ဢေးလိယႃႉ၊ လႄႈလၢတ်ႈဝႃႈ၊ “ႁႂ်ႈၵဝ်ၶႃႈလႆႈၸုပ်ႇၼူမ်တၵ်ႉၼၢႆပေႃႈမႄႈၵဝ်ၶႃႈလူးၵွၼ်ႇသေၵမ်းၶႃႈ။ ႁဵတ်းၼၼ်ယဝ်ႉၸင်ႇ၊ၵဝ်ၶႃႈတၵ်းၸွမ်းလင်ၸဝ်ႈႁဝ်းၶႃႈဢေႃႈ၊” ဝႃႈၼင်ႇၼႆဢေႃႈ။ ဢေးလိယႃႉ၊ ၵေႃႈလၢတ်ႈလႄႈဝႃႈ၊ “မိူဝ်းၵႂႃႇတႃႉ။ ၵဝ်ဢမ်ႇႁၢမ်ႈမႂ်း၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ ဢေးလိသႄး၊ ၶိုၼ်းမိူဝ်းၵႂႃႇလႄႈႁႅမ်ဝူဝ်းမၼ်းၵူႈၼိုင်ႈသေယဝ်ႉ၊ဢဝ်ၶိူင်ႈထႆမၼ်းႁဵတ်းၽိုၼ်းဢၼ်တူမ်ႈႁုင်ၼိူဝ်ႉဝူဝ်းၼၼ်ႉဢေႃႈ။ မၼ်းဢဝ်ၼိူဝ်ႉၼၼ်ႉလဵင်ႉလူၵူၼ်းတင်းလၢႆလႄႈၶဝ်ဢွၼ်ၵၼ်ၵိၼ်ဢေႃႈ။ လိုၼ်းၼၼ်ႉမၼ်းၵႂႃႇၸွမ်းလင် ဢေးလိယႃႉ၊ လႄႈပဵၼ်ၵေႃႉဢၼ်ပုတ်ႈတိၼ်တၢင်မိုဝ်းမၼ်းဢေႃႈ။
ၶုၼ်ႁေႃၶမ်း ပိၼ်ႇႁႃႇတတ်ႉ၊ မိူင်း သီးရီးယႃး၊ ႁွင်ႉၸုဢဝ်ၵူၼ်းသိုၵ်းမၼ်းတင်းလၢႆၸုတုမ်ၵၼ်ဢိၵ်ႇပႃးတင်းၶုၼ်လူင်သၢမ်သိပ်းသွင်ပႃး၊ဢိၵ်ႇတင်းၵူၼ်းသိုၵ်းတပ်ႉမႃႉတင်းၵူၼ်းသိုၵ်းတပ်ႉလေႃႉမႃႉတင်းလၢႆ၊ပႃးလူၺ်ႈၵၼ်တင်းမၼ်းလႄႈၶီႇသိုၵ်းၶိုၼ်ႈၸူးဝဵင်း သမႃႇရိ၊ သေယဝ်ႉ၊လွမ်ႉႁွပ်ႈတိုၵ်းတေႃးဝဵင်းၼၼ်ႉဢေႃႈ။-
မိူဝ်ႈၼၼ်ႉမၼ်းပွႆႇၸႂ်ႉသၢၼ်ႇတမၢၼ်ႇတင်းလၢႆၵႂႃႇၵႃႈၼႂ်းဝဵင်းၸူးတီႈၶုၼ်ႁေႃၶမ်း ဢႃႇႁပ်ႉ၊ မိူင်း ဢိသရေး၊ လႄႈသင်ႇလၢတ်ႈၵႂႃႇဝႃႈ၊ “ၶုၼ်ႁေႃၶမ်း ပိၼ်ႇႁႃႇတတ်ႉ၊ ပူင်ဢမိင်ႉၸမ်ႉ၊-
ငိုၼ်းၶမ်းမႂ်းၸိူဝ်းၼၼ်ႉပဵၼ်ၶွင်ၵဝ်ဢေႃႈ။ လုၵ်ႈမႂ်းမေးမႂ်းဢၼ်ႁၢင်ႈလီသေပိူၼ်ႈၸိူဝ်းၼၼ်ႉၵေႃႈပဵၼ်ၶွင်ၵဝ်ဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းမိူင်း ဢိသရေး၊ ၵေႃႈၶိုၼ်းလၢတ်ႈလႄႈဝႃႈ၊ “ၸဝ်ႈၵဝ်ၶႃႈ။ ၶုၼ်ႁေႃၶမ်းတီႈၶႃႈ႟။ ၸွမ်းၵႃႈၼင်ႇဢၼ်ၸဝ်ႈႁဝ်းမီးဢမိင်ႉၼၼ်ႉၵဝ်ၶႃႈ၊ဢိၵ်ႇတင်းၵႃႈဢၼ်ၵဝ်ၶႃႈမီးတင်းသဵင်ႈတင်းမူတ်းပဵၼ်ၶွင်ၸဝ်ႈႁဝ်းၶႃႈယဝ်ႉ၊” ဝႃႈၼင်ႇၼႆဢေႃႈ။
ဝၢႆးသေၼၼ်ႉသၢၼ်ႇတမၢၼ်ႇၸိူဝ်းၼၼ်ႉသမ်ႉၶိုၼ်းမႃးထႅင်ႈလႄႈဝႃႈ၊ “ဢမိင်ႉၶုၼ်ႁေႃၶမ်း ပိၼ်ႇႁႃႇတတ်ႉ၊ မီးၸမ်ႉ၊ၵဝ်ပူင်ဢမိင်ႉတီႈမႂ်းႁႂ်ႈမႂ်းဢဝ်ငိုၼ်းၶမ်းမႂ်း၊လုၵ်ႈမႂ်းမေးမႂ်းၸိူဝ်းၼၼ်ႉမႃးဢၢပ်ႈပၼ်တီႈၵဝ်ဢေႃႈ။-
ပေႃးဢမ်ႇၼၼ်ဝၼ်းမိူဝ်ႈၽုၵ်ႈမိူဝ်ႈဢၼ်ႁွတ်ႈထိုင်ၶိင်ႇၼႆႉၼၼ်ႉၵဝ်တၵ်းပွႆႇၸႂ်ႉၵူၼ်းဢွၼ်ႇၵဝ်တင်းလၢႆၵႂႃႇတီႈမႂ်းလႄႈ၊ၶဝ်တၵ်းသွၵ်ႈတၵ်းႁႃၵႃႈၼႂ်းႁေႃမႂ်း၊ဢိၵ်ႇတင်းၵႃႈၼႂ်းႁိူၼ်းမူးမၢတ်ႈၽွင်းမိူင်းမႂ်းၸိူဝ်းၼၼ်ႉသေယဝ်ႉ၊ၶဝ်တၵ်းယိပ်းဢဝ်ၵႃႈဢၼ်ထုၵ်ႇၸႂ်ၶဝ် ၼၼ်ႉၵႂႃႇဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၶုၼ်ႁေႃၶမ်းမိူင်း ဢိသရေး၊ ၸင်ႇႁွင်ႉဢဝ်ၵူၼ်းထဝ်ႈၵူၼ်းၵႄႇၵႃႈၼႂ်းမိူင်းၼၼ်ႉမႃးလႄႈလၢတ်ႈဝႃႈ၊ “သူဝႆႉၸႂ်လႄႈဝူၼ်ႉတူၺ်းလွင်ႈဢၼ်ၵေႃႉၼႆႉၶႂ်ႈႁႃတၢင်းၽိတ်းသႂ်ႇႁဝ်းထၢၼ်ႇၼႆႉၼၼ်ႉလူး။ မိူဝ်ႈဢၼ်မၼ်းသင်ႇလၢတ်ႈမႃးလႄႈယွၼ်းဢဝ်လုၵ်ႈမေးၵဝ်၊ငိုၼ်းၶမ်းၵဝ်ၼၼ်ႉၸိုင်၊ၵဝ်ယင်းဢမ်ႇတွပ်ႇဢမ်ႇထဵင်မၼ်း၊” ဝႃႈၼင်ႇၼႆဢေႃႈ။-
ၵူၼ်းထဝ်ႈၵူၼ်းၵႄႇတင်းလၢႆတင်းၵူၼ်းၶုၼ်တင်းသဵင်ႈတင်းလူင်ဢွၼ်ၵၼ်ၶိုၼ်းလဝ်ႈလၢတ်ႈလႄႈဝႃႈ၊ “ယႃႇပေထွမ်ႇဢဝ်ၵႂၢမ်းမၼ်းသေၵမ်း။ ယႃႇပေၽွမ်ႉမၼ်းသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ဢႃႇႁပ်ႉ၊ လၢတ်ႈတီႈသၢၼ်ႇတမၢၼ်ႇ ပိၼ်ႇႁႃႇတတ်ႉ၊ ၸိူဝ်းၼၼ်ႉလႄႈဝႃႈ၊ “သူၶိုၼ်းလဝ်ႈလၢတ်ႈတီႈၸဝ်ႈၵဝ်ၶုၼ်ႁေႃၶမ်းလႄႈဝႃႈ၊ ‘ၵႃႈဢၼ်ၸဝ်ႈႁဝ်းယွၼ်းဢဝ်ဢွၼ်တၢင်းၸိူဝ်းၼၼ်ႉၵဝ်ၶႃႈတၵ်းႁဵတ်းၸွမ်းဢေႃႈ။ ၵူၺ်းၵႃႈ၊လွင်ႈၵမ်းလိုၼ်းၼႆႉၸိုင်၊ၵဝ်ၶႃႈဢမ်ႇလီႁဵတ်းတီႈၶႃႈ၊’ ဝႃႈၼႆတႃႉ၊” ဝႃႈၼင်ႇၼႆဢေႃႈ။ သၢၼ်ႇတမၢၼ်ႇၸိူဝ်းၼၼ်ႉပွၵ်ႈၶိုၼ်းမိူဝ်းၵႂႃႇလႄႈသမ်ႉပႃးဢဝ်တင်းၵႂၢမ်းၶိုၼ်းႁွတ်ႈမႃး၊-
သေၵႃႈတီႈ ပိၼ်ႇႁႃႇတတ်ႉ၊ လႄႈဝႃႈ၊ “ၵဝ်တၵ်းပွႆႇၵူၼ်းၵဝ်ဢၼ်ၵုမ်ႇပုၼ်ႈတၵ်းယႃႉၽဵဝ်ႈဝဵင်းလူင်မႂ်းလႆႈၼၼ်ႉသေလႄႈႁႂ်ႈၶဝ်ယိပ်းဢဝ်ၵွၼ်ႈႁိၼ်ၵွၼ်ႈဢုတ်ႇမႃးယေႈၵေႃႉယေႈၵမ်မိုဝ်းဢေႃႈ။ ပေႃးၵဝ်ဢမ်ႇႁဵတ်းတႄႉၸိုင်၊ႁႂ်ႈၽြႃးတင်းလၢႆပၼ်တၢမ်ႇဢၼ်ႁၢႆႉၼႃႇတီႈၵဝ်ၼၼ်ႉသေၵမ်းလူၺ်ႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်း ဢႃႇႁပ်ႉ၊ ၶိုၼ်းတွပ်ႇလႄႈလၢတ်ႈဝႃႈ၊ “ၶိုၼ်းလၢတ်ႈတီႈၶုၼ်ႁေႃၶမ်း ပိၼ်ႇႁႃႇတတ်ႉ၊ လႄႈဝႃႈ၊ ‘ၵူၼ်းသိုၵ်းဢုပ်ႇဝၢဝ်းမိူဝ်ႈဢၼ်သိုၵ်းထၢတ်ႇယဵၼ်ယဝ်ႉၼၼ်ႉဢေႃႈ၊’ ဝႃႈၼႆတႃႉ၊” ဝႃႈၼင်ႇၼႆဢေႃႈ။
ပိၼ်ႇႁႃႇတတ်ႉ၊ ငိၼ်းၵႂၢမ်းၼၼ်ႉၼႂ်းမိူဝ်ႈဢၼ်မၼ်းယင်းတိုၵ်ႉၵိၼ်ယူႇသူတ်ႉယူႇၵႃႈၼႂ်းသုမ်ႉထဵင်ၸဝ်ႈလူၺ်ႈၵၼ်တင်းၶုၼ်လူင်ၸိူဝ်းဢၼ်ၽွမ်ႉၽၢႆႇမၼ်းၼၼ်ႉယူႇၼၼ်ႉဢေႃႈ။ မၼ်းၸင်ႇပူင်ဢမိင်ႉႁႂ်ႈၵူၼ်းသိုၵ်းတင်းလၢႆႁၢင်ႈသိုၵ်းႁႅၼ်းသိုၵ်းပုၼ်ႈဢၼ်တၵ်းၶီႇၵႂႃႇတိုၵ်းတေႃးဝဵင်းၼၼ်ႉလႄႈၶဝ်ၼၼ်ႉဢွၼ်ၵၼ်ၶပ်ႉယႆၵူၼ်းသိုၵ်းတင်းလၢႆဢေႃႈ။
မိူဝ်ႈၼၼ်ႉပရေႃးၽႅတ်ႈ ပႃးၼိုင်ႈၶဝ်ႈၸူးတီႈၶုၼ်ႁေႃၶမ်း ဢႃႇႁပ်ႉ၊ သေလႄႈလဝ်ႈလၢတ်ႈဝႃႈ၊ “ ထႃႇဝရႃႉၽြႃး၊ မီးဢမိင်ႉၸမ်ႉ၊ယႃႇပေၵူဝ်ႁႄတပ်ႉရၢၼ်ႇသူႇဢၼ်ႁႅင်းယႂ်ႇၼႃႇၼၼ်ႉ။ ၵဝ်တၵ်းဢၢပ်ႈပၼ်တၢင်းဢၼ်ဢွင်ႇသိုၵ်းၼၼ်ႉတီႈမႂ်းၼႂ်းဝၼ်းမိူဝ်ႈၼႆႉဢေႃႈ။ မႂ်းတၵ်းတေႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။
ဢႃႇႁပ်ႉ၊ ၵေႃႈထၢမ်လႄႈဝႃႈ၊ “ၸဝ်ႈႁဝ်းတၵ်းၸႂ်ႉၽူႈလႂ်ၶီႇသိုၵ်းၶိုၼ်ႈၵႂႃႇတီႈၶႃႈ၊” ဝႃႈၼင်ႇၼႆလႄႈ၊ ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵူၼ်းသိုၵ်းၸိူဝ်းဢၼ်ယင်းၼုမ်ႇယင်းၵမ်ဢၼ်ထၢမ်းၼႃႈၵၢၼ်ၸဝ်ႈမိူင်းၸိူဝ်းၼၼ်ႉတၵ်းႁဵတ်းဢေႃႈ၊” ဝႃႈၼင်ႇၼႆၶိုၼ်းတွပ်ႇလၢတ်ႈဢေႃႈ။ ၶုၼ်ႁေႃၶမ်းထၢမ်လႄႈဝႃႈ၊ “ၽူႈလႂ်တၵ်းဢုပ်ႉထိင်းတပ်ႉသိုၵ်းလူင်ၼၼ်ႉတီႈၶႃႈ၊” ဝႃႈၼင်ႇၼႆလႄႈ၊ပရေႃးၽႅတ်ႈၼၼ်ႉၶိုၼ်းလၢတ်ႈလႄႈဝႃႈ၊ “တူဝ်ၶုၼ်ႁေႃၶမ်းတၵ်းလႆႈဢုပ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ ဢႃႇႁပ်ႉ၊ ႁွင်ႉဢဝ်ၵူၼ်းသိုၵ်းဢၼ်ယင်းၼုမ်ႇယင်းၵမ်ဢၼ်ယူႇတႂ်ႈၸဝ်ႈသိုၵ်းဢိူင်ႇၼၼ်ႉမီးသွင်ပၢၵ်ႇသၢမ်သိပ်းသွင်ၵေႃႉဢိၵ်ႇတင်းၽၢႆႇလင်ၶဝ်ၼၼ်ႉမီးၵူၼ်းသိုၵ်းမဵဝ်း ဢိသရေး၊ ၸဵတ်းႁဵင်ၵေႃႉဢေႃႈ။
ၶဝ်ၼၼ်ႉဢွၼ်ၵၼ်ၶီႇသိုၵ်းဢွၵ်ႇၶိင်ႇၵၢင်ဝၼ်းတဵင်ႈယၢမ်းမိူဝ်ႈ ပိၼ်ႇႁႃႇတတ်ႉ၊ ယင်းတိုၵ်ႉမဝ်းလဝ်ႈမဝ်းၵမ်ယူႇၵႃႈၼႂ်းသုမ်ႉထဵင်ၸဝ်ႈလူၺ်ႈၵၼ်တင်းၶုၼ်လူင်ၸိူဝ်းဢၼ်ၽွမ်ႉၽၢႆႇမၼ်းၼၼ်ႉဢေႃႈ။-
ၵူၼ်းသိုၵ်းဢၼ်ယင်းၼုမ်ႇယင်းၵမ်ၸိူဝ်းၼၼ်ႉၶီႇသိုၵ်းဢွၵ်ႇဢွၼ်တၢင်းလႄႈ၊ၵူၼ်းဢွၼ်ႇဢၼ် ပိၼ်ႇႁႃႇတတ်ႉ၊ ပွႆႇၸႂ်ႉၵူၼ်းဢၼ်ဢွၵ်ႇၵႂႃႇတူၺ်းၸိူဝ်းၼၼ်ႉၶိုၼ်းမႃးလဝ်ႈလၢတ်ႈတီႈမၼ်းလွင်ႈဢၼ်တပ်ႉသိုၵ်းမူႇၼိုင်ႈဢွၵ်ႇသေၵႃႈတီႈဝဵင်း သမႃႇရိ၊ မႃးယူႇၼၼ်ႉဢေႃႈ။-
မၼ်းၼၼ်ႉမီးဢမိင်ႉလႄႈဝႃႈ၊ “ၶဝ်ဢွၵ်ႇမႃးႁႂ်ႈလႆႈတိုၵ်းတေႃးၵေႃႈလီ၊ဢွၵ်ႇမႃးႁႂ်ႈသိုၵ်းယဵၼ်ၵေႃႈလီတိဢဝ်တူဝ်ၶဝ်တႃႉ၊” ဝႃႈၼင်ႇၼႆဢေႃႈ။
ၶုၼ်သိုၵ်းဢၼ်ယင်းၼုမ်ႇယင်းၵမ်ၸိူဝ်းၼၼ်ႉဢွၼ်ႁူဝ်ၵူၼ်းသိုၵ်းမဵဝ်း ဢိသရေး၊ တင်းလၢႆဢွၵ်ႇၵႂႃႇတိုၵ်းတေႃးလႄႈ၊ဢဝ်ၵူၼ်းတၢႆ ၵေႃႉတေႃႇၵေႃႉသေယဝ်ႉ၊-
ၵူၼ်းမဵဝ်း သီးရီးယႃး၊ ၶဝ်ဢွၼ်ၵၼ်ဢွၵ်ႇပၢႆႈလႄႈၵူၼ်းမဵဝ်း ဢိသရေး၊ ၶဝ်ဢွၼ်ၵၼ်လိုပ်ႈလမ်းၸွမ်းဢေႃႈ။ ပိၼ်ႇႁႃႇတတ်ႉ၊ ၸမ်ႉ၊ၶီႇမႃႉလႄႈပၢႆႈလွတ်ႈၵႂႃႇလူၺ်ႈၵၼ်တင်းႁူဝ်ႁၢၼ်ၵူၼ်းသိုၵ်းၶီႇမႃႉၵမ်ႈၽွင်ႈသေဢေႃႈ။-
ၶုၼ်ႁေႃၶမ်း ဢႃႇႁပ်ႉ၊ ၵေႃႈၵႂႃႇတိုၵ်းပႄႉသိမ်းဢဝ်တပ်ႉမႃႉလႂ်တင်းတပ်ႉလေႃႉမႃႉသိုၵ်းလႂ်သေလႄႈၶႃႈၽၼ်းဢဝ်တၢႆၵူၼ်းမဵဝ်း သီးရီးယႃး၊ ၼမ်ၼႃႇလူင်လၢင်ဢေႃႈ။
လိုၼ်းၼၼ်ႉပရေႃးၽႅတ်ႈၼၼ်ႉၶဝ်ႈၸူးတီႈၶုၼ်ႁေႃၶမ်း ဢႃႇႁပ်ႉ၊ လႄႈလဝ်ႈလၢတ်ႈဝႃႈ၊ “ၶိုၼ်းမိူဝ်းလႄႈႁဵတ်းႁႂ်ႈတပ်ႉမႂ်းတႃႇမႂ်းမၼ်ႈၶိူင်ႇတႃႉ။ ၶိုင်ပွင်ႁၢင်ႈႁႅၼ်းဝႆႉလီလီငၢမ်းငၢမ်းတႃႉ။ လွင်ႈမၼ်းၸမ်ႉ၊မိူဝ်ႈဢၼ်ၶွပ်ႈၶူပ်ႇၸိုင်၊ၶုၼ်ႁေႃၶမ်း သီးရီးယႃး၊ ၼၼ်ႉတၵ်းၶီႇသိုၵ်းမႃးထႅင်ႈလူးၵွၼ်ႇဢေႃႈ၊” ဝႃႈၼင်ႇၼႆဢေႃႈ။
မူးမၢတ်ႈၽွင်းမိူင်း ပိၼ်ႇႁႃႇတတ်ႉ၊ ၸိူဝ်းၼၼ်ႉဢွၼ်ၵၼ်လဝ်ႈလၢတ်ႈလႄႈဝႃႈ၊ “ၽြႃးမဵဝ်း ဢိသရေး၊ ၼၼ်ႉပဵၼ်ၽြႃးဢၼ်ဢုပ်ႉပိူင်ႇၵႃႈတီႈလွႆၵူၺ်းတီႈၶႃႈလႄႈၵူၼ်းမဵဝ်း ဢိသရေး၊ ၸိူဝ်းၼၼ်ႉတိုၵ်းပႄႉႁဝ်းၶႃႈတီႈၶႃႈဢေႃႈ။ ၵွပ်ႈပိူဝ်ႈၸိူဝ်ႉၼင်ႇၼႆလႄႈပေႃးႁဝ်းၵႂႃႇတိုၵ်းတေႃးၶဝ်ၵႃႈတီႈပၢင်ႇတီႈပဵင်းၸိုင်၊ႁဝ်းတၵ်းတိုၵ်းပႄႉၶဝ်ဢမၢၼ်ႇၶၼ်ပဵၼ်တီႈၶႃႈဢေႃႈ။-
ႁဵတ်းၸိူဝ်ႉၼင်ႇၼႆသေၵမ်းတီႈၶႃႈ။ ဢဝ်ဢွၵ်ႇပႅတ်ႈၶုၼ်လူင်သၢမ်သိပ်းသွင်ပႃးၼၼ်ႉသေၵႃႈၼႂ်းဢရႃႇၶဝ်သေလႄႈယုၵ်ႉတၢင်ႇၸဝ်ႈၵွၼ်းတပ်ႉသိုၵ်းလူင်တင်းလၢႆတၢင်တူဝ်ၶဝ်သေၵမ်းတီႈၶႃႈ။-
ၶိုၼ်းမႄးႁၢင်ႈပွင်တပ်ႉသိုၵ်းဢၼ်ၼမ်ၼႃႇပဵင်းတၢၼ်ႇတပ်ႉဢၼ်သုမ်းၸွမ်းၵႂႃႇၼၼ်ႉလႄႈႁႂ်ႈတပ်ႉမႃႉလႂ်၊တင်းလေႃႉမႃႉသိုၵ်းလႂ်၊ႁႅင်းယႂ်ႇၼႃႇပဵင်းတၢၼ်ႇၵမ်းဢွၼ်တၢင်းၼၼ်ႉသေၵမ်းတီႈၶႃႈ။ ႁဝ်းၶႃႈတၵ်းတိုၵ်းတေႃးၶဝ်ၵႃႈတီႈပၢင်ႇတီႈပဵင်း၊ပွၵ်ႈၼႆႉႁဝ်းၶႃႈတၵ်းတေတိုၵ်းပႄႉၶဝ်ဢေႃႈ၊” ဝႃႈၼင်ႇၼႆဢေႃႈ။ ၶုၼ်ႁေႃၶမ်း ပိၼ်ႇႁႃႇတတ်ႉ၊ ၽွမ်ႉၸႂ်လႄႈႁဵတ်းၸွမ်းတၢင်းၵျၢမ်ႇၶဝ်ၼၼ်ႉဢေႃႈ။-
မိူဝ်ႈဢၼ်ၶွပ်ႈၶူပ်ႇၼၼ်ႉၸိုင်၊မၼ်းႁၢင်ႈပွင်တပ်ႉသိုၵ်းမၼ်းသေလႄႈၶီႇၶိုၼ်ႈၸူးတီႈဝဵင်း ဢႃႇၽႅၵ်ႉ၊ ႁႂ်ႈလႆႈတိုၵ်းတေႃးၵူၼ်းမဵဝ်း ဢိသရေး၊ တင်းလၢႆဢေႃႈ။-
ၵူၼ်းမဵဝ်း ဢိသရေး၊ တင်းလၢႆၵေႃႈ ဢွၼ်ၵၼ်ႁၢင်ႈပွင်ႁဵတ်းသွင်တပ်ႉသေယဝ်ႉ၊ၶီႇသိုၵ်းၵႂႃႇႁႂ်ႈလႆႈႁႄႉတိုၵ်းတေႃးၵၼ်တင်းရၢၼ်ႇသူႇၶဝ်ဢေႃႈ။ ၵူၼ်းမဵဝ်း ဢိသရေး၊ ၸိူဝ်းၼၼ်ႉၵႂႃႇၶျႃးပၢင်တပ်ႉယူႇပဵၼ်မိူၼ်ၸိူဝ်ႉၼင်ႇၽုင်ပႄႉဢၼ်လဵၵ်ႉဢၼ်ၵေႇသွင်ၽုင်တေႃႇၼႃႈၵၼ်တင်းၵူၼ်းမဵဝ်း သီးရီးယႃး၊ ဢၼ်မီးၸွတ်ႇတူဝ်ႈၵႂႃႇတင်းဝၢၼ်ႈတင်းမိူင်းၼၼ်ႉဢေႃႈ။
ပရေႃးၽႅတ်ႈ ပႃးၼိုင်ႈၶဝ်ႈၸူးတီႈၶုၼ်ႁေႃၶမ်း ဢႃႇႁပ်ႉ၊ လႄႈဝႃႈ၊ “ ထႃႇဝရႃႉၽြႃး၊ မီးဢမိင်ႉၸမ်ႉ၊ ‘ၵွပ်ႈပိူဝ်ႈဢၼ်ၵူၼ်းမဵဝ်း သီးရီးယႃး၊ ၶဝ်ဝႃႈၵဝ်ၼႆႉပဵၼ်ၽြႃးဢၼ်ဢုပ်ႉပိူင်ႇလွႆၵူၺ်း၊ပဵၼ်ၽြႃးဢၼ်ဢုပ်ႉပိူင်ႇၵႃႈတီႈပၢင်ႇတီႈပဵင်းဢမ်ႇၸႂ်ႈ၊ဝႃႈၼႆၼၼ်ႉလႄႈၵဝ်တၵ်းပၼ်ႁႂ်ႈသူဢွင်ႇသိုၵ်းၵႃႈၼိူဝ်တပ်ႉသိုၵ်းၶဝ်ဢၼ်ယႂ်ႇၼႃႇၼၼ်ႉသေယဝ်ႉ၊သူတၵ်းတေလႆႈႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ၼၼ်ႉဢေႃႈ၊’ ဝႃႈၼႆယဝ်ႉ၊” ဝႃႈၼင်ႇၼႆဢေႃႈ။
တပ်ႉ သီးရီးယႃး၊ ၶျႃးတပ်ႉတေႃႇၼႃႈၵၼ်တင်းတပ်ႉ ဢိသရေး၊ လႆႈၸဵတ်းဝၼ်းယဝ်ႉၸင်ႇ၊ၼႂ်းဝၼ်းတီႈၸဵတ်းၼၼ်ႉၶဝ်တႄႇၸႃႉတိုၵ်းတေႃးၵၼ်ဢေႃႈ။ ၵူၼ်းမဵဝ်း ဢိသရေး၊ တင်းလၢႆဢဝ်တၢႆၵူၼ်းသိုၵ်းတပ်ႉတိၼ်ၵူၼ်းမဵဝ်း သီးရီးယႃး၊ ၶဝ်သႅၼ်ၼိုင်ႈၼႂ်းဝၼ်းလဵဝ်ၵူၺ်းဢေႃႈ။-
ၶဝ်ၸိူဝ်းဢၼ်လွတ်ႈတၢင်းတၢႆၼၼ်ႉပၢႆႈၶဝ်ႈၸူးၼႂ်းဝဵင်း ဢႃႇၽႅၵ်ႉ၊ လႄႈလမ်းဝဵင်းၼၼ်ႉပင်းတူၵ်းတဵင်သႂ်ႇၵူၼ်းၶဝ်သွင်မိုၼ်ႇပၢႆၸဵတ်းႁဵင်ဢေႃႈ။ ပိၼ်ႇႁႃႇတတ်ႉ၊ ၵေႃႈပၢႆႈၶဝ်ႈၸူးၵႃႈၼႂ်းဝဵင်းၼၼ်ႉၼင်ႇၵဝ်ႇလႄႈတဵတ်ႇမႅပ်းယူႇၵႃႈၼႂ်းလုၵ်းၽၢႆႇလင်ႁိူၼ်း၊ႁိူၼ်းၼိုင်ႈဢေႃႈ။-
မူးမၢတ်ႈၽွင်းမိူင်းမၼ်းတင်းလၢႆၵႂႃႇလဝ်ႈလၢတ်ႈတီႈမၼ်းလႄႈဝႃႈ၊ “ႁဝ်းၶႃႈလႆႈငိၼ်းလွင်ႈဢၼ်ၶုၼ်ႁေႃၶမ်းမိူင်း ဢိသရေး၊ ၶဝ်ပဵၼ်ၶုၼ်ဢၼ်ၸၢင်ႈဢဵတ်းလူၼၼ်ႉတီႈၶႃႈဢေႃႈ။ ပၼ်ဢၶႂၢင်ႉႁႂ်ႈႁဝ်းၶႃႈလႆႈဢဝ်ၶူဝ်းၼုင်ႈၼင်ပေႃၼုင်ႈႁတ်ႉဢႅဝ်လႄႈဢဝ်ၸိူၵ်ႈၵွင်ႉၶေႃး တူဝ်ၸဝ်ႈၵဝ်ႇသေယဝ်ႉ၊ၶဝ်ႈၸူးတီႈၶုၼ်ႁေႃၶမ်း ဢိသရေး၊ သေၵမ်းတီႈၶႃႈ။ မၼ်းၸၢင်ႈၶႄးတၵ်းပၼ်ဢသၢၵ်ႈၸဝ်ႈႁဝ်းၵတ်းယဵၼ်ၶျၢမ်းသႃႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၶဝ်ဢွၼ်ၵၼ်ဢဝ်ၶူဝ်းၼုင်ႈၼင်ပေႃႁတ်ႉဢႅဝ်လႄႈဢဝ်ၸိူၵ်ႈၵွင်ႉၶေႃးသေယဝ်ႉ၊ၶဝ်ႈၸူးတီႈၶုၼ်ႁေႃၶမ်း ဢႃႇႁပ်ႉ၊ လႄႈလဝ်ႈလၢတ်ႈဝႃႈ၊ “ၶႃႈၸဝ်ႈႁဝ်း ပိၼ်ႇႁႃႇတတ်ႉ၊ ၼႆႉတွင်းပၢၼ်ႇတီႈၸဝ်ႈႁဝ်းပုၼ်ႈဢၼ်ၸဝ်ႈႁဝ်းတၵ်းပၼ်ဢသၢၵ်ႈႁႂ်ႈၶႃႈၸဝ်ႈၵတ်းယဵၼ်ၶျၢမ်းသႃႇၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ဢႃႇႁပ်ႉ၊ ၵေႃႈထၢမ်လႄႈဝႃႈ၊ “မၼ်းၼၼ်ႉဢသၢၵ်ႈယင်းလိပ်းယူႇႁိုဝ်း။ မၼ်းပဵၼ်မိူၼ်ပီႈမိူၼ်ၼွင်ႉၵၼ်တင်းၵဝ်ဢေႃႈ၊” ဝႃႈၼင်ႇၼႆဢေႃႈ။ မူးမၢတ်ႈၽွင်းမိူင်း ပိၼ်ႇႁႃႇတတ်ႉ၊ ၸိူဝ်းၼၼ်ႉပႂ်ႉထွမ်ႇၵႂၢမ်းသၢႆငၢႆဢၼ်လီၼၼ်ႉယူႇလႄႈမိူဝ်ႈဢၼ်လႆႈငိၼ်း ဢႃႇႁပ်ႉ၊ လၢတ်ႈၵႂၢမ်းဢၼ်ဝႃႈ၊ “ပီႈၼွင်ႉၵၼ်” ၼၼ်ႉၸိုင်၊ၶဝ်ယုမ်ႇၵႂၢမ်းမၼ်းၼၼ်ႉၵမ်းလဵဝ်သေလႄႈလဝ်ႈလၢတ်ႈဝႃႈ၊ “ၸႂ်ႈတႄႉၶႃႈဢေႃႈ။ ပိၼ်ႇႁႃႇတတ်ႉ၊ ပဵၼ်ပီႈပဵၼ်ၼွင်ႉၵၼ်တင်းၸဝ်ႈႁဝ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။ ဢႃႇႁပ်ႉ၊ ၵေႃႈပူင်ဢမိင်ႉလႄႈဝႃႈ၊ “ဢွၼ်ၵၼ်ၵႂႃႇႁွင်ႉဢဝ်မၼ်းမႃးတႃႉ၊” ဝႃႈၼင်ႇၼႆသေယဝ်ႉ၊ ပိၼ်ႇႁႃႇတတ်ႉ၊ ၵေႃႈႁွတ်ႈထိုင်မႃးလႄႈ၊ ဢႃႇႁပ်ႉ၊ ႁႂ်ႈမၼ်းၶိုၼ်ႈၶီႇလေႃႉမႃႉသိုၵ်းၸဝ်ႈဢေႃႈ။-
ပိၼ်ႇႁႃႇတတ်ႉ၊ လဝ်ႈလၢတ်ႈတီႈမၼ်းလႄႈဝႃႈ၊ “ၵဝ်ၶႃႈတၵ်းဢဝ်ဝဵင်းၸိူဝ်းဢၼ်ၸဝ်ႈပေႃႈၵဝ်ၶႃႈႁိမ်ဢဝ်သေၵႃႈၼႂ်းမိုဝ်းၸဝ်ႈႁဝ်းၼၼ်ႉၶိုၼ်းပၼ်ၶႃႈဢေႃႈ။ ၸဝ်ႈႁဝ်းၸၢင်ႈတၵ်းတႄႇႁဵတ်းထႅင်ႈၵၢတ်ႇၵႃႉၶၢႆၵႃႈၼႂ်းဝဵင်း တမ်ႇမတ်ႉသၵတ်ႉ၊ မိူၼ်ၸိူဝ်ႉၼင်ႇဢၼ်ၸဝ်ႈပေႃႈၵဝ်ၶႃႈတႄႇႁဵတ်းဝႆႉၵႃႈၼႂ်းဝဵင်း သမႃႇရိ၊ ၼၼ်ႉၶႃႈဢေႃႈ၊” ဝႃႈၼင်ႇၼႆဢေႃႈ။ ဢႃႇႁပ်ႉ၊ ၵေႃႈလၢတ်ႈလႄႈဝႃႈ၊ “ၵွပ်ႈပိူဝ်ႈလွင်ႈတၢင်းၼႆႉလႄႈၵဝ်တၵ်းပွႆႇမႂ်းဢေႃႈ၊” ဝႃႈၼင်ႇၼႆသေယဝ်ႉ၊လူင်းလၢႆးမိုဝ်းဢၼ်ႁဵတ်းမိၵ်ႈသႁႃႇယႃႉလူၺ်ႈၵၼ်သေလႄႈပွႆႇမၼ်းၵႂႃႇသေဢေႃႈ။
ၵူၼ်းဢၼ်ၶဝ်ႈပႃးမူႇၸုမ်းပရေႃးၽႅတ်ႈတင်းလၢႆၼၼ်ႉပႃးၼိုင်ႈ၊ၸွမ်းလူၺ်ႈ ထႃႇဝရႃႉၽြႃး၊ မီးဢမိင်ႉၼၼ်ႉၸႂ်ႉႁႂ်ႈပရေႃးၽႅတ်ႈၼႂ်းၶဝ်ၼၼ်ႉၵေႃႉၼိုင်ႈႁႂ်ႈပေႃႉယႅၼ်ႉမၼ်းဢေႃႈ။ ၵူၺ်းၵႃႈ၊ၵေႃႉၼၼ်ႉထဵင်ပႅတ်ႈဢေႃႈ။-
ပိူဝ်ႈၼႆလႄႈပရေႃးၽႅတ်ႈၼၼ်ႉလၢတ်ႈတီႈမၼ်းလႄႈဝႃႈ၊ “ၵွပ်ႈပိူဝ်ႈဢၼ်မႂ်းဢမ်ႇထွမ်ႇဢဝ်ဢမိင်ႉ ထႃႇဝရႃႉၽြႃး၊ လႄႈမိူဝ်ႈဢၼ်မႂ်းဢွၵ်ႇသေၵႃႈတီႈၵဝ်ၵႂႃႇၼၼ်ႉၸိုင်၊သၢင်ႇသီႈတၵ်းၶူပ်းမႂ်းတၢႆဢေႃႈ၊” ဝႃႈၼင်ႇၼႆဢေႃႈ။ မိူဝ်ႈဢၼ်မၼ်းယင်းတိုၵ်ႉဢွၵ်ႇၵႂႃႇယူႇၼၼ်ႉသၢင်ႇသီႈဢွၵ်ႇမႃးၶူပ်းမၼ်းတၢႆဢေႃႈ။
ပရေႃးၽႅတ်ႈၵေႃႉၼၼ်ႉၵႂႃႇလၢတ်ႈတီႈၵူၼ်းတၢင်ႇၵေႃႉလႄႈဝႃႈ၊ “ပေႃႉယႅၼ်ႉၵဝ်တႃႉ၊” ဝႃႈၼင်ႇၼႆသေယဝ်ႉ၊ၵေႃႉၼၼ်ႉၵေႃႈပေႃႉယႅၼ်ႉမၼ်းႁႅင်းၼႃႇလူင်လၢင်ထၢၼ်ႈပေႃးမၢတ်ႇၸဵပ်းဢေႃႈ။-
ပရေႃးၽႅတ်ႈၼၼ်ႉၸင်ႇဢဝ်ၽႃႈပူၵ်ႉၼႃႈမၼ်းသေယဝ်ႉ၊ဢမ်ႇႁႂ်ႈပိူၼ်ႈတွင်းမၼ်းလႄႈပႂ်ႉထႃႈၶုၼ်ႁေႃၶမ်းယူႇတီႈႁိမ်းတၢင်းဢေႃႈ။-
မိူဝ်ႈဢၼ်ၶုၼ်ႁေႃၶမ်းပႆၸွမ်းတၢင်းမႃးယူႇၼၼ်ႉၸိုင်၊ပရေႃးၽႅတ်ႈၼၼ်ႉလဝ်ႈလၢတ်ႈတီႈမၼ်းလႄႈဝႃႈ၊ “ၸဝ်ႈမုၼ်ယႂ်ႇၶုၼ်လူင်တီႈၶႃႈ။ မိူဝ်ႈဢၼ်ၶႃႈၸဝ်ႈယင်းတိုၵ်းသိုၵ်းယူႇၼၼ်ႉၸိုင်၊ၵူၼ်းသိုၵ်းၵေႃႉၼိုင်ႈတိလႆႈရၢၼ်ႇသူႇမႃးလႄႈဢၢပ်ႈပၼ်တီႈၶႃႈၸဝ်ႈသေယဝ်ႉ၊သင်ႇလၢတ်ႈဝႃႈ၊ ‘ပႂ်ႉထိင်းၵေႃႉၼႆႉလီလီတႃႉ။ ပေႃးမၼ်းလွတ်ႈၵႂႃႇၸိုင်၊ဢသၢၵ်ႈမႂ်းတၵ်းလႆႈတႅၼ်းပုၼ်ႈဢသၢၵ်ႈမၼ်းဢေႃႈ။ ဢမ်ႇၼၼ်ၵေႃႈမႂ်းတၵ်းလႆႈသၢႆႈပၼ်ငိုၼ်းသၢမ်ႁဵင်ၶႅပ်းဢေႃႈ၊’ ဝႃႈၼင်ႇၼႆဢေႃႈ။-
မိူဝ်ႈဢၼ်ၶႃႈၸဝ်ႈမီးၵၢၼ်သုၵ်ႉသၢၵ်ႉၼႃႇလၢႆၸိူဝ်ႉလၢႆမဵဝ်းၼၼ်ႉၸိုင်၊ၵေႃႉၼၼ်ႉလွတ်ႈၵႂႃႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။ ၶုၼ်ႁေႃၶမ်းၵေႃႈမီးဢမိင်ႉဝႃႈ၊ “မႂ်းၸီႇယၢင်ႇဢမုၼၼ်ႉတီႈတူဝ်ၸဝ်ႈၵဝ်ႇယဝ်ႉ။ တူဝ်မႂ်းၶၢမ်ႇဢဝ်ဢပျတ်ႈၼၼ်ႉတႃႉ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉပရေႃးၽႅတ်ႈ ၼၼ်ႉဢဝ်ၽႃႈပူၵ်ႉၼႃႈမၼ်းၼၼ်ႉဢွၵ်ႇၵမ်းလဵဝ်လႄႈ၊ၶုၼ်ႁေႃၶမ်းၵေႃႈႁုလွင်ႈဢၼ်မၼ်းပဵၼ်ပရေႃးၽႅတ်ႈသေတူၼ်သေပႃးၼၼ်ႉဢေႃႈ။-
ပရေႃးၽႅတ်ႈၵေႃႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “ၼုၵ်ႈၵပၢတ်ႈ ထႃႇဝရႃႉၽြႃး၊ မီးမႃးလႄႈဝႃႈၸမ်ႉ၊ၵွပ်ႈပိူဝ်ႈဢၼ်မႂ်းပွႆႇၵူၼ်းဢၼ်ၵဝ်ၸႂ်ႉႁႂ်ႈဢဝ်တၢႆၼၼ်ႉလွတ်ႈသေၵႃႈၼႂ်းမိုဝ်းမႂ်းၵႂႃႇလႄႈဢသၢၵ်ႈမႂ်းတၵ်းလႆႈတႅၼ်းပုၼ်ႈဢသၢၵ်ႈမၼ်း၊ဢိၵ်ႇတင်းတပ်ႉသိုၵ်းမႂ်းတၵ်းလႆႈၶၢမ်ႇတၢင်းဢၼ်ယႃႉလုယႃႉလႅဝ်ပႅတ်ႈၵွပ်ႈပိူဝ်ႈမႂ်းပွႆႇတပ်ႉသိုၵ်းမၼ်းလွတ်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းမိူဝ်းၸူးတီႈႁေႃၸဝ်ႈဝဵင်း သမႃႇရိ၊ သေယဝ်ႉ၊မီးတၢင်းဢၼ်ၸႂ်လဵၵ်ႉၸႂ်ၼွႆႉလႄႈၼႃႈသဝ်ႈမွင်ယူႇဢေႃႈ။
ၵႃႈတီႈႁိမ်းႁေႃၶုၼ်ႁေႃၶမ်း ဢႃႇႁပ်ႉ၊ ၼႂ်းဝဵင်း ယေႇၸရေး၊ ၼၼ်ႉမီးသူၼ်မၢၵ်ႇၸပိတ်ႉသူၼ်ၼိုင်ႈဢၼ်ၸဝ်ႈမၼ်းမီးၸိုဝ်ႈႁွင်ႉဝႃႈ၊ ၼႃႇပုတ်ႉ၊ ၼၼ်ႉဢေႃႈ။-
ဝၼ်းၼိုင်ႈၶုၼ်ႁေႃၶမ်းလၢတ်ႈတီႈ ၼႃႇပုတ်ႉ၊ လႄႈဝႃႈ၊ “ၵွပ်ႈပိူဝ်ႈဢၼ်သူၼ်မၢၵ်ႇၸပိတ်ႉမႂ်းမီးၸမ်ႁိမ်းႁေႃၸဝ်ႈလႄႈပၼ်တီႈၵဝ်သေၵမ်း။ ၵဝ်ၶႂ်ႈဢဝ်သူၼ်ၼၼ်ႉႁဵတ်းသူၼ်ၽၵ်းဢေႃႈ။ ၵဝ်တၵ်းဢဝ်သူၼ်မၢၵ်ႇၸပိတ်ႉဢၼ်ယဵင်ႈၶႅၼ်းလီၼႃႇသေပိူၼ်ႈၼၼ်ႉပၼ်တီႈမႂ်းဢေႃႈ။ ဢမ်ႇၼၼ်ၵေႃႈပေႃးမႂ်းၽွမ်ႉၸိုင်၊ၵဝ်တၵ်းပၼ်ၵႃႈၶၼ်မၼ်းဢၼ်ထိူၵ်ႈတၢၼ်ႇၼၼ်ႉတီႈမႂ်းဢေႃႈ၊” ဝႃႈၼင်ႇၼႆဢေႃႈ။
ၼႃႇပုတ်ႉ၊ ၶိုၼ်းလဝ်ႈလၢတ်ႈလႄႈဝႃႈ၊ “သူၼ်မၢၵ်ႇၸပိတ်ႉၼႆႉပဵၼ်သူၼ်ဢမူၺ်ႇဢၼ်လႆႈၶၢမ်ႇဢဝ်ၸူဝ်ႈပူႇပၢၼ်မွၼ်ႇၶႃႈဢေႃႈ။ ထႃႇဝရႃႉၽြႃး၊ ႁၢမ်ႈဝႆႉပုၼ်ႈဢၼ်တၵ်းပၼ်တီႈၸဝ်ႈႁဝ်းၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းၶိုၼ်းမိူဝ်းၵႂႃႇၵႃႈတီႈႁေႃၸဝ်ႈသေယဝ်ႉ၊မီးတၢင်းဢၼ်ၸႂ်လဵၵ်ႉၸႂ်ၼွႆႉလူၺ်ႈၵႂၢမ်းဢၼ် ၼႃႇပုတ်ႉ၊ လဝ်ႈလၢတ်ႈတီႈမၼ်းၼၼ်ႉသေလႄႈၼွၼ်းၵႃႈၼိူဝ်ၵူႇၸဝ်ႈယူႇ၊ဝၢႆႇၼႃႈပႅတ်ႈယူႇလႄႈယင်းဢမ်ႇၵိၼ်ဢမ်ႇၶူပ်းၵႃႈသင်ဢေႃႈ။-
မေးမၼ်း ယေႇၸပေႇလႃႉ၊ မႃးထၢမ်မၼ်းလႄႈဝႃႈ၊ “မီးလွင်ႈၵႃႈသင်ၸႂ်လဵၵ်ႉၸႂ်ၼွႆႉလႄႈၼႃႈသဝ်ႈၼႃႈမွင်ယူႇထၢၼ်ႈပေႃးဢမ်ႇၵိၼ်ဢမ်ႇၶူပ်းလႆႈၸိူဝ်ႉၼင်ႇႁိုဝ်တီႈၶႃႈ၊” ဝႃႈၼင်ႇၼႆဢေႃႈ။
မၼ်းၶိုၼ်းလၢတ်ႈလႄႈဝႃႈ၊ “ၵွပ်ႈပိူဝ်ႈၵႂၢမ်းဢၼ် ၼႃႇပုတ်ႉ၊ ၶိုၼ်းတွပ်ႇၵဝ်ၼၼ်ႉဢေႃႈ။ ၵဝ်ယွၼ်းသိုဝ်ႉဢဝ်သူၼ်မၢၵ်ႇၸပိတ်ႉမၼ်းဢေႃႈ။ ပေႃးမၼ်းၽွမ်ႉၸိုင်၊ၵဝ်တၵ်းဢၢင်ႈဢဝ်သူၼ်တၢင်ႇသူၼ်တႅၼ်းပၼ်ပုၼ်ႈသူၼ်မၼ်းဢေႃႈ။ ၵူၺ်းၵႃႈ၊မၼ်းယင်းဝႃႈမၼ်းဢမ်ႇဢဝ်သူၼ်ၼၼ်ႉပၼ်တီႈၵဝ်လႆႈဝႃႈၼႆဢေႃႈ၊” ဝႃႈၼင်ႇၼႆဢေႃႈ။
ယေႇၸပေႇလႃႉ၊ ၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈႁဝ်းပဵၼ်ၶုၼ်ႁေႃၶမ်းမဵဝ်း ဢိသရေး၊ ဢမ်ႇၸႂ်ႈတီႈၶႃႈႁိုဝ်း။ လုၵ်ႉသေၵမ်း။ မီးတင်းၸႂ်ဢၼ်သႂၢင်ႇဢၼ်သိူဝ်းသေလႄႈၵိၼ်ၶူပ်းသေၵမ်းတီႈၶႃႈ။ ၶႃႈၸဝ်ႈႁဝ်းတၵ်းဢဝ်သူၼ်မၢၵ်ႇၸပိတ်ႉ ၼႃႇပုတ်ႉ၊ ၼၼ်ႉသၢၵ်ႈပၼ်တီႈၸဝ်ႈႁဝ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ ယေႇၸပေႇလႃႉ၊ တႅမ်ႈလိၵ်ႈၽိုၼ်ၼိုင်ႈဢဝ်ၸိုဝ်ႈ ဢႃႇႁပ်ႉ၊ လူင်းလၢႆးမိုဝ်းလႄႈဢဝ်ၸုမ်ႈၸဝ်ႈတွၵ်ႇသေယဝ်ႉ၊ပၼ်ၵႂႃႇတီႈၵူၼ်းဢၼ်ပဵၼ်ၵႄႇပဵၼ်ႁူဝ်တင်းမူးမၢတ်ႈၽွင်းမိူင်းဝဵင်း ယေႇၸရေး၊ ဢေႃႈ။-
ၼႂ်းလိၵ်ႈၼၼ်ႉဝႃႈ၊ “ႁွင်ႉပၢဝ်ႇႁွင်ႉသေႃႇဝၼ်းဢၼ်တၵ်းလႆႈၵမ်တၢင်းၵိၼ်ၼၼ်ႉလႄႈယုၵ်ႉယွင်ႈ ၼႃႇပုတ်ႉ၊ ဝႆႉၵႃႈၼိူဝ်တီႈဢၼ်သုင်ၵႃႈၼႂ်းၵႄးၵူၼ်းတင်းလၢႆတႃႉ။-
ၸႂ်ႉႁႂ်ႈၵူၼ်းၸႂ်တိုဝ်ၼၼ်ႉသွင်ၵေႃႉတၢင်ႇဢပျတ်ႈမၼ်းၽၢႆႇၼႃႈပိူၼ်ႈထၢင်ႇထၢင်ႇသႃးသႃးလႄႈဝႃႈ၊ ‘မၼ်းၵိၼ်ႇလႃႇၽြႃးပဵၼ်ၸဝ်ႈဢိၵ်ႇတင်းၶုၼ်ႁေႃၶမ်းယဝ်ႉ၊’ ဝႃႈၼင်ႇၼႆသေ။ ႁဵတ်းၸိူဝ်ႉၼင်ႇၼၼ်ယဝ်ႉၸင်ႇဢွၼ်ၵၼ်ဢဝ်မၼ်းဢွၵ်ႇလႄႈဢဝ်မၢၵ်ႇႁိၼ်ပိုဝ်ႈသႂ်ႇႁႂ်ႈမၼ်းတၢႆတႃႉ၊” ဝႃႈၼင်ႇၼႆဢေႃႈ။
ၵူၼ်းဢၼ်ပဵၼ်ၵႄႇပဵၼ်ႁူဝ်တင်းမူးမၢတ်ႈၽွင်းမိူင်းဝဵင်း ယေႇၸရေး၊ ၸိူဝ်းၼၼ်ႉႁဵတ်းၵႃႈဢၼ် ယေႇၸပေႇလႃႉ၊ ၸႂ်ႉႁဵတ်းၼၼ်ႉသေလႄႈ၊-
ဢွၼ်ၵၼ်ပၢဝ်ႇသေႃႇဝၼ်းဢၼ်တၵ်းလႆႈၵမ်တၢင်းၵိၼ်ၼၼ်ႉသေယဝ်ႉယုၵ်ႉယွင်ႈ ၼႃႇပုတ်ႉ၊ ဝႆႉတီႈဢၼ်သုင်ၵႃႈၼႂ်းၵႄႈၵူၼ်းတင်းလၢႆဢေႃႈ။-
ၵူၼ်းတိုဝ်သွင်ၵေႃႉမႃးလႄႈၼင်ႈတေႃႇၼႃႈၵၼ်တင်း ၼႃႇပုတ်ႉ၊ သေယဝ်ႉ၊တၢင်ႇဢပျတ်ႈမၼ်းၵႃႈတီႈၽၢႆႇၼႃႈပိူၼ်ႈထၢင်ႇထၢင်ႇသႃးသႃးလႄႈဝႃႈ၊ “ ၼႃႇပုတ်ႉ၊ ၼႆႉၵိၼ်ႇလႃႇၽြႃးပဵၼ်ၸဝ်ႈတင်းၶုၼ်ႁေႃၶမ်းယဝ်ႉ၊” ဝႃႈၼင်ႇၼႆဢေႃႈ။ ဝၢႆးၼၼ်ႉ၊ၶဝ်ဢဝ်မၼ်းဢွၵ်ႇဝဵင်းလႄႈဢဝ်မၢၵ်ႇႁိၼ်ပိုဝ်ႈသႂ်ႇမၼ်းထၢၼ်ႈပေႃးတၢႆဢေႃႈ။-
မိူဝ်ႈၼၼ်ႉၶဝ်ပွႆႇၸႂ်ႉၵူၼ်းၵႂႃႇမွၵ်ႇလၢတ်ႈတီႈ ယေႇၸပေႇလႃႉ၊ လႄႈဝႃႈ၊ “ ၼႃႇပုတ်ႉ၊ လႆႈၶၢမ်ႇတၢင်းဢၼ်ဢဝ်မၢၵ်ႇႁိၼ်ပိုဝ်ႈသႂ်ႇလႄႈတၢႆယဝ်ႉၶႃႈယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈဢၼ် ယေႇၸပေႇလႃႉ၊ ငိၼ်းလွင်ႈဢၼ် ၼႃႇပုတ်ႉ၊ တၢႆယဝ်ႉၼၼ်ႉၸိုင်၊မၼ်းလဝ်ႈလၢတ်ႈတီႈ ဢႃႇႁပ်ႉ၊ လႄႈဝႃႈ၊ “ ၼႃႇပုတ်ႉ၊ တၢႆယဝ်ႉတီႈၶႃႈယဝ်ႉ။ ၵမ်းၼႆႉၵႂႃႇသိမ်းဢဝ်ဢုၵ်ႉၸႃႇၶူဝ်းသူၼ်မၢၵ်ႇၸပိတ်ႉဢၼ်မၼ်းဢမ်ႇၶႂ်ႈၶၢႆပၼ်တီႈၸဝ်ႈႁဝ်းၼၼ်ႉသေၵမ်းၶႃႈ၊” ဝႃႈၼင်ႇၼႆသေယဝ်ႉ၊-
ဢႃႇႁပ်ႉ၊ ၵႂႃႇၵႃႈတီႈသူၼ်မၢၵ်ႇၸပိတ်ႉၼၼ်ႉႁႂ်ႈလႆႈသိမ်းဢဝ်ဢုၵ်ႉၸႃႇၶူဝ်းသူၼ်ဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ မီးဢမိင်ႉတီႈ ဢေးလိယႃႉ၊ ပရေႃးၽႅတ်ႈ ဝဵင်း တိသၽိ၊ ၼၼ်ႉလႄႈဝႃႈ၊-
“ၵႂႃႇၵႃႈတီႈၶုၼ်ႁေႃၶမ်း ဢႃႇႁပ်ႉ၊ ဝဵင်း သမႃႇရိ၊ ၼၼ်ႉတႃႉ။ မႂ်းတၵ်းထူပ်းႁၼ်မၼ်းၼၼ်ႉမီးယူႇၵႃႈၼႂ်းသူၼ်မၢၵ်ႇၸပိတ်ႉ ၼႃႇပုတ်ႉ၊ လႄႈဢၢင်ႈတၵ်းသိမ်းဢဝ်ၼၼ်ႉဢေႃႈ။-
သင်ႇလၢတ်ႈတီႈမၼ်းလႄႈဝႃႈ၊ ‘ၵဝ် ထႃႇဝရႃႉၽြႃး၊ မီးဢမိင်ႉၸမ်ႉ၊မႂ်းၼႆႉဢဝ်ဢသၢၵ်ႈၵူၼ်းတၢႆသေယဝ်ႉ၊ဢၢင်ႈတၵ်းသိမ်းဢဝ်ဢုၵ်ႉၸႃႇၶူဝ်းသူၼ်မၼ်းႁိုဝ်း၊’ ဝႃႈၼင်ႇၼႆတႃႉ။ သမ်ႉလၢတ်ႈၸိူဝ်ႉၼင်ႇၼႆလႄႈဝႃႈ၊ ‘တီႈဢၼ်မႃတင်းလၢႆလႄးၵိၼ်လိူတ်ႈ ၼႃႇပုတ်ႉ၊ ၼၼ်ႉလိူတ်ႈမႂ်းၵေႃႈတၵ်းလႆႈၶၢမ်ႇတၢင်းဢၼ်လႄးၵိၼ်တီႈၼၼ်ႈဢေႃႈ၊’ ဝႃႈၼႆတႃႉ၊” ဝႃႈၼင်ႇၼႆဢေႃႈ။
မိူဝ်ႈဢၼ် ဢႃႇႁပ်ႉ၊ ႁၼ် ဢေးလိယႃႉ၊ ၼၼ်ႉမၼ်းလၢတ်ႈလႄႈဝႃႈ၊ “ရၢၼ်ႇသူႇၵဝ်႟။ မႂ်းႁူပ်ႉထူပ်းၵၼ်တင်းၵဝ်ႁိုဝ်း၊” ဝႃႈၼင်ႇၼႆဢေႃႈ။ ဢေးလိယႃႉ၊ ၵေႃႈဝႃႈ။ “ၸႂ်ႈယဝ်ႉ။ ၵဝ်ႁူပ်ႉထူပ်းၵၼ်တင်းမႂ်းယဝ်ႉ။ မႂ်းၼႆႉၶၢႆတူဝ်ၸဝ်ႈၵဝ်ႇႁႂ်ႈလႆႈႁဵတ်းတုၸရိူၵ်ႈၵႃႈတီႈၽၢႆႇၼႃႈ ထႃႇဝရႃႉၽြႃး၊ ယဝ်ႉ။-
ပိူဝ်ႈၼႆလႄႈ ထႃႇဝရႃႉၽြႃး၊ မီးဢမိင်ႉတီႈမႂ်းၸမ်ႉ၊ ‘ၵဝ်တၵ်းႁႂ်ႈၽေးဢုပၢတ်ႈႁွတ်ႈထိုင်ၵႃႈၼိူဝ်မႂ်းလႄႈၵဝ်တၵ်းပႄႇၽဵဝ်ႈၵႃႈဢၼ်ပဵၼ်ၵူၼ်းၸၢႆးၵႃႈၼႂ်းႁိူၼ်းမႂ်း၊ၸႃႉၸဵမ်ထဝ်ႈၼုမ်ႇသၢမ်ပၢၼ်ပႅတ်ႈတင်းသဵင်ႈတင်းမူတ်းဢေႃႈ။-
ၵဝ်တၵ်းႁႂ်ႈမဵဝ်းၸိူဝ်ႉၶိူဝ်းမႂ်းပဵၼ်မိူၼ်ၸိူဝ်ႉၼင်ႇၸိူဝ်ႉၶိူဝ်းမဵဝ်း ယေႇရူဝ်းပုမ်ႇ၊ လုၵ်ႈၸၢႆး ၼေႇပတ်ႉ၊ ဢိၵ်ႇတင်းၸိူဝ်ႉၶိူဝ်းမဵဝ်း ပႃႇသႃႉ၊ လုၵ်ႈၸၢႆး ဢႁိယႃႉ၊ ၸိူဝ်းၼၼ်ႉၵွပ်ႈပိူဝ်ႈဢၼ်မႂ်းဢွၼ်ႁႂ်ႈၵူၼ်းမဵဝ်း ဢိသရေး၊ တင်းလၢႆၽိတ်းပိူင်ႈလႄႈတိုၵ်းယူင်းတေႃးသႃႉတၢင်းၸႂ်မႆႈၶႂ်ႈၸႃႉၵဝ်ၼၼ်ႉဢေႃႈ၊’ ဝႃႈၼင်ႇၼႆဢေႃႈ။-
ၸၢပ်ႈသႅင်ႇလူၺ်ႈလွင်ႈ ယေႇၸပေႇလႃႉ၊ ၸမ်ႉ၊ ထႃႇဝရႃႉၽြႃး၊ မီးဢမိင်ႉဝႃႈ၊ ‘မႃတင်းလၢႆတၵ်းဢွၼ်ၵၼ်ၵိၼ်တူဝ်မၼ်းပႅတ်ႈၵႃႈၼႂ်းဝဵင်း ယေႇၸရေး၊ ဢေႃႈ၊’ ဝႃႈၼင်ႇၼႆယဝ်ႉ။-
ၵႃႈဢၼ်ပဵၼ်ၵူၼ်းမဵဝ်းၸိူဝ်ႉၶိူဝ်းမႂ်းၸိူဝ်းဢၼ်တၢႆၵႃႈၼႂ်းဝဵင်းၸိုင်၊မႃတၵ်းၵိၼ်ဢေႃႈ။ ၸိူဝ်းဢၼ်တၢႆတီႈပၢင်ႇတီႈပိဝ်ၸမ်ႉ၊လၢင်းတႃႉတၵ်းၵိၼ်ဢေႃႈ၊” ဝႃႈၼင်ႇၼႆဢေႃႈ။
(တၢင်းဢၼ် ဢႃႇႁပ်ႉ၊ ၶၢႆတူဝ်ၸဝ်ႈၵဝ်ႇႁႂ်ႈလႆႈႁဵတ်းတုၸရိူၵ်ႈၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢၼ်မေးမၼ်း ယေႇၸပေႇလႃႉ၊ တိုၵ်းယူင်းၼၼ်ႉၸိုင်၊ၵေႃႉဢၼ်မိူၼ်မၼ်းဢမ်ႇမီးသေၵေႃႉသေၵူၼ်း။-
မၼ်းယင်းဝႆႈႁုၼ်ႇႁၢင်ႈသၢင်းထုသေလႄႈႁဵတ်းလွင်ႈဢၼ်လီႁင်ႈဢဵတ်ႇသဵတ်ႇၸွမ်းၵူၼ်းမဵဝ်း ဢႃႇမေႃးရိ၊ ဢၼ် ထႃႇဝရႃႉၽြႃး၊ ႁေႃႈဢွၵ်ႇပႅတ်ႈသေၵႃႈတီႈၽၢႆႇၼႃႈၵူၼ်းမဵဝ်း ဢိသရေး၊ ၶဝ်ၼၼ်ႉဢေႃႈ။)
မိူဝ်ႈဢၼ် ဢေးလိယႃႉ၊ လၢတ်ႈယဝ်ႉတူဝ်ႈယဝ်ႉၼၼ်ႉၸိုင်၊ ဢႃႇႁပ်ႉ၊ သိၵ်ႇၶူဝ်းၼုင်ႈမၼ်းပႅတ်ႈလႄႈဢဝ်ၶူဝ်းၼုင်ႈၼင်ပေႃၼုင်ႈသေယဝ်ႉ၊ၵမ်သိၼ်ဢမ်ႇၵိၼ်တၢင်းၵိၼ်၊ၼွၼ်းၵႃႈၼိူဝ်ၶူဝ်းၼုင်ႈၼင်ပေႃယူႇလႄႈၶၢင်းၶီၶၢင်းၽၢၼ်ယူႇဢေႃႈ။
ထႃႇဝရႃႉၽြႃး၊ ၸင်ႇမီးဢမိင်ႉတီႈပရေႃးၽႅတ်ႈ ဢေးလိယႃႉ၊ ၵူၼ်းမဵဝ်း တိသၽိ၊ ၼၼ်ႉလႄႈဝႃႈ၊-
“မႂ်းႁၼ်လွင်ႈဢၼ် ဢႃႇႁပ်ႉ၊ ၶျႃးတူဝ်ၸဝ်ႈၵဝ်ႇတူၵ်းတႅမ်ႇယူႇၵႃႈတီႈၽၢႆႇၼႃႈၵဝ်ၼၼ်ႉယဝ်ႉႁိုဝ်း။ ၵွပ်ႈပိူဝ်ႈဢၼ်မၼ်းႁဵတ်းၸိူဝ်ႉၼင်ႇၼႆလႄႈၵဝ်တၵ်းဢမ်ႇႁႂ်ႈၽေးဢုပၢတ်ႈႁွတ်ႈထိုင်ၵႃႈၼႂ်းၸူဝ်ႈပၢၼ်မၼ်းၼႆႉ။ တၵ်းႁႂ်ႈႁွတ်ႈထိုင်ၼႂ်းၸူဝ်ႈပၢၼ်လုၵ်ႈၸၢႆးမၼ်းၵႃႈၼိူဝ်ၵူၼ်းမဵဝ်းၸိူဝ်ႉၶိူဝ်းမၼ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
သိုၵ်းမီးတၢင်းဢၼ်ထၢတ်ႇယဵၼ်ယူႇၵႃႈၼႂ်းဝူင်ႈၵၢင်မိူင်း သီးရီးယႃး၊ တင်းမိူင်း ဢိသရေး၊ သေသၢမ်ပီယဝ်ႉဢေႃႈ။-
ၼႂ်းပီဢၼ်ထူၼ်ႈထိုင်သၢမ်ပီၼၼ်ႉၸိုင်၊ၶုၼ်ႁေႃၶမ်း ယူဝ်းသၽတ်ႉ၊ မိူင်း ယုတႃႉ၊ ၵႂႃႇသူႇၵႂႃႇၸႂ်းၶုၼ်ႁေႃၶမ်း ဢႃႇႁပ်ႉ၊ မိူင်း ဢိသရေး၊ ဢေႃႈ။
ဢႃႇႁပ်ႉ၊ ထၢမ်မူးမၢတ်ႈၽွင်းမိူင်းမၼ်းၸိူဝ်းၼၼ်ႉလႄႈဝႃႈ၊ “သူႁုလွင်ႈဢၼ်ဝဵင်း ရႃႇမုတ်ႉ၊ မိူင်း ၵိလတ်ႉ၊ ၼၼ်ႉပဵၼ်မိူင်းႁဝ်းယူႇသေယဝ်ႉ၊ႁဵတ်းသင်လႄႈႁဝ်းယင်းဢမ်ႇၶိုၼ်းသိမ်းဢဝ်ဝဵင်းၼၼ်ႉသေၵႃႈၼႂ်းမိုဝ်းၶုၼ်ႁေႃၶမ်းမိူင်း သီးရီးယႃး၊ လႄႈယူႇၼိမ်ၼိမ်ယူႇၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။-
ဢႃႇႁပ်ႉ၊ သမ်ႉထၢမ် ယူဝ်းသၽတ်ႉ၊ လႄႈဝႃႈ၊ “ၸဝ်ႈတၵ်းၶီႇသိုၵ်းလူၺ်ႈၵၼ်တင်းၵဝ်ၶႃႈၵႂႃႇတိုၵ်းဝဵင်း ရႃႇမုတ်ႉ၊ ပုၼ်ႉႁိုဝ်း၊” ဝႃႈၼင်ႇၼႆဢေႃႈ။ ယူဝ်းသၽတ်ႉ၊ ၶိုၼ်းလၢတ်ႈလႄႈဝႃႈ၊ “ၵဝ်ၶႃႈမီးယူႇလူၺ်ႈၵၼ်တင်းၸဝ်ႈဢေႃႈ။ ၵူၼ်းသိုၵ်းၵဝ်ၶႃႈတင်းလၢႆၵေႃႈပဵၼ်ၵူၼ်းသိုၵ်းၸဝ်ႈယဝ်ႉ၊ႁဝ်းၶႃႈတၵ်းၶီႇသိုၵ်းၵႂႃႇလူၺ်ႈၵၼ်တင်းၸဝ်ႈဢေႃႈ။-
ယူဝ်းသၽတ်ႉ၊ သမ်ႉသိုပ်ႇလၢတ်ႈထႅင်ႈလႄႈဝႃႈ၊ၼႂ်းလွင်ႈတၢင်းၼႆႉၸိုင်၊ႁဝ်းဢွၼ်ၵၼ်တွင်ႈထၢမ် ထႃႇဝရႃႉၽြႃး၊ ဢွၼ်တၢင်းတႃႉႁဝ်း၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ဢႃႇႁပ်ႉ၊ ႁွင်ႉဢဝ်ပရေႃးၽႅတ်ႈ သီႇပၢၵ်ႇၸမ်ၸမ်မႃးၸုတုမ်ၵၼ်သေယဝ်ႉ၊တွင်ႈထၢမ်ဝႃႈ၊ “ၵဝ်ထုၵ်ႇလီၶီႇသိုၵ်းၶိုၼ်ႈတိုၵ်းဝဵင်း ရႃႇမုတ်ႉ၊ ႁိုဝ်း၊ဢမ်ႇထုၵ်ႇလီႁိုဝ်း၊” ဝႃႈၼင်ႇၼႆလႄႈ၊ၶဝ်ဢွၼ်ၵၼ်ၶိုၼ်းလဝ်ႈလၢတ်ႈလႄႈဝႃႈ၊ “ၶီႇၶိုၼ်ႈလႄႈတိုၵ်းတေႃးသေၵမ်းတီႈၶႃႈ။ ထႃႇဝရႃႉၽြႃး၊ တၵ်းႁႂ်ႈၸဝ်ႈႁဝ်းပႄႉၼႅင်ႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ ယူဝ်းသၽတ်ႉ၊ သမ်ႉထၢမ်လႄႈဝႃႈ၊ “ပရေႃးၽႅတ်ႈ ထႃႇဝရႃႉၽြႃး၊ ဢၼ်ႁဝ်းတၵ်းတွင်ႈထၢမ်ၼၼ်ႉဢမ်ႇမီးထႅင်ႈသေၵေႃႉသေၵူၼ်းယဝ်ႉၶႃႈႁိုဝ်း၊” ဝႃႈၼင်ႇၼႆဢေႃႈ။-
ဢႃႇႁပ်ႉ၊ ၶိုၼ်းလၢတ်ႈလႄႈဝႃႈ၊ “မီးထႅင်ႈတူၼ်ၼိုင်ႈပႃးၼိုင်ႈဢၼ်ပဵၼ် မိၵ်ႉၶႃး၊ လုၵ်ႈၸၢႆး ဢိမလႃႉ၊ ၼၼ်ႉလူးၵွၼ်ႇဢေႃႈ။ ၼႂ်းဝႃႈၼၼ်သေၵေႃႈၵဝ်ၶႃႈၸင်းမၼ်းဢေႃႈ။ မၼ်းဢမ်ႇတွၼ်ႉႁေႃးလၢတ်ႈၵႂၢမ်းမၢင်ႇၵလႃႇပုၼ်ႈလွင်ႈၵဝ်ၶႃႈလႄႈၸၢင်ႈႁေႃးလၢတ်ႈၵႂၢမ်းဢႃႉမၢင်ႇၵလႃႇၵူၺ်းဢေႃႈ၊” ဝႃႈၼင်ႇၼႆဢေႃႈ။ ယူဝ်းသၽတ်ႉ၊ ၵေႃႈလၢတ်ႈလႄႈဝႃႈ၊ “ၸဝ်ႈဢမ်ႇထုၵ်ႇလီလၢတ်ႈၸိူဝ်ႉၼင်ႇၼၼ်ၶႃႈ၊” ဝႃႈၼင်ႇၼႆသေလႄႈ။
ဢႃႇႁပ်ႉ၊ ႁွင်ႉဢဝ်ၶုၼ်ဢၼ်ပွင်ၵၢၼ်ၵေႃႉၼိုင်ႈလႄႈၸႂ်ႉႁႂ်ႈမၼ်းၵႂႃႇႁွင်ႉဢဝ် မိၵ်ႉၶႃး၊ ဢၼ်ပဵၼ်လုၵ်ႈၸၢႆး ဢိမလႃႉ၊ မႃးၶၼ်ၶၼ်ၽႂ်းၽႂ်းဢေႃႈ။
မိူဝ်ႈၶိင်ႇၼၼ်ႉၶုၼ်ႁေႃၶမ်းသွင်ပႃးၼၼ်ႉၼုင်ႈမႆၶိူင်ႈၶူဝ်းၼုင်ႈၶုၼ်လႄႈၼင်ႈယူႇၵႃႈၼိူဝ်ပလၢင်ႇႁင်းၽႂ်ႁင်းမၼ်းၼႂ်းတလၢင်းယဵပ်ႇၶဝ်ႈၵႃႈတီႈၼွၵ်ႈၽၵ်းတူဝဵင်း သမႃႇရိ၊ သေလႄႈပရေႃးၽႅတ်ႈတင်းသဵင်ႈတင်းမူတ်းဢွၼ်ၵၼ်ႁေႃးလၢတ်ႈၵႃႈတီႈၽၢႆႇၼႃႈၶဝ်ၸဝ်ႈယူႇဢေႃႈ။-
ၼႂ်းၶဝ်ၼၼ်ႉ ၸေႇတၵိ၊ လုၵ်ႈၸၢႆး ၶေးၼႃႇၼႃႉ၊ ၼၼ်ႉႁဵတ်းၶဝ်လႅမ်လဵၵ်းတင်းလၢႆသေယဝ်ႉႁေႃးလၢတ်ႈဝႃႈ၊ “ ထႃႇဝရႃႉၽြႃး၊ မီးဢမိင်ႉၸမ်ႉ၊ ‘ၸဝ်ႈႁဝ်းတၵ်းဢဝ်ၶဝ်လႅမ်ၸိူဝ်းၼႆႉတႅင်းသႂ်ႇၵူၼ်းမဵဝ်း သီးရီးယႃး၊ တင်းလၢႆတေႃႇထိုင်ႁွတ်ႈထၢၼ်ႈပေႃးလုလႅဝ်ၵႂႃႇဢေႃႈ၊’ ဝႃႈၼႆတီႈၶႃႈယဝ်ႉ၊” ဝႃႈၼင်ႇၼႆဢေႃႈ။-
ပရေႃးၽႅတ်ႈၵႃႈမီးၸိူဝ်းၼၼ်ႉၵေႃႈဢွၼ်ၵၼ်ႁေႃးလၢတ်ႈၶေႃႈလဵဝ်သဵင်လဵဝ်ၵၼ်လႄႈဝႃႈ၊ “ၶီႇသိုၵ်းၶိုၼ်ႈလႄႈတိုၵ်းဝဵင်း ရႃႇမုတ်ႉ၊ သေၵမ်းတီႈၶႃႈ။ ထႃႇဝရႃႉၽြႃး၊ တၵ်းႁႂ်ႈၸဝ်ႈႁဝ်းပႄႉၼႅင်ႇၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၶိင်ႇၼၼ်ႉၶုၼ်ဢၼ်ပွင်ၵၢၼ်ဢၼ်ဢွၵ်ႇၵႂႃႇႁွင်ႉ မိၵ်ႉၶႃး၊ လႄႈလၢတ်ႈဝႃႈ၊ “ပရေႃးၽႅတ်ႈၵႃႈမီးၸိူဝ်းၼၼ်ႉၽွမ်ႉၵၼ်ႁေႃးလၢတ်ႈၵႂၢမ်းမၢင်ႇၵလႃႇတီႈၶုၼ်ႁေႃၶမ်းၵူၺ်းၶႃႈဢေႃႈ။ ၸဝ်ႈၵေႃႈထုၵ်ႇလီႁေႃးလၢတ်ႈၵႂၢမ်းမိူၼ်မိူၼ်ၵၼ်တင်းၶဝ်ၶႃႈဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ မိၵ်ႉၶႃး၊ ၶိုၼ်းလၢတ်ႈလႄႈဝႃႈ၊ “ၵႃႈၼင်ႇဢၼ် ထႃႇဝရႃႉၽြႃး၊ ဢသၢၵ်ႈလိပ်းယူႇၼၼ်ႉၵဝ်တၵ်းႁေႃးလၢတ်ႈၵႂၢမ်းဢၼ် ထႃႇဝရႃႉၽြႃး၊ ၸႂ်ႉလၢတ်ႈၼၼ်ႉၵူၺ်းဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်မၼ်းႁွတ်ႈထိုင်ၵႃႈတီႈၽၢႆႇၼႃႈၶုၼ်ႁေႃၶမ်း ဢႃႇႁပ်ႉ၊ ၼၼ်ႉၸိုင်၊ၶုၼ်ႁေႃၶမ်းထၢမ်မၼ်းလႄႈဝႃႈ၊ “ မိၵ်ႉၶႃး၊ ႟။ ၸွင်ႇၶုၼ်ႁေႃၶမ်း ယူဝ်းသၽတ်ႉ၊ တင်းၵဝ်ထုၵ်ႇလီၶီႇသိုၵ်းၶိုၼ်ႈၵႂႃႇတိုၵ်းဝဵင်း ရႃႇမုတ်ႉ၊ ႁိုဝ်း၊ဢမ်ႇထုၵ်ႇလီႁိုဝ်း၊” ဝႃႈၼင်ႇၼႆဢေႃႈ။ မိၵ်ႉၶႃး၊ ၶိုၼ်းလၢတ်ႈလႄႈဝႃႈ၊ “ၶီႇသိုၵ်းၶိုၼ်ႈၸူးသေၵမ်းၶႃႈ။ ၸဝ်ႈႁဝ်းတၵ်းပႄႉၼႅင်ႇၶႃႈဢေႃႈ။ ထႃႇဝရႃႉၽြႃး၊ တၵ်းပၼ်တၢင်းဢၼ်ဢွင်ႇသိုၵ်းတီႈၸဝ်ႈႁဝ်းဢေႃႈ၊” ဝႃႈၼင်ႇၼႆဢေႃႈ။
ဢႃႇႁပ်ႉ၊ ၶိုၼ်းလၢတ်ႈလႄႈဝႃႈ၊ “ၵွပ်ႈပိူဝ်ႈဢၼ်မႂ်းဢဝ်တင်းၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ႁေႃးလၢတ်ႈပၼ်ၵဝ်ၼၼ်ႉၸိုင်၊လၢတ်ႈၵႂၢမ်းမၢၼ်ႇၵႂၢမ်းမႅၼ်ႈၵူၺ်းတႃႉ။ လွင်ႈၼႆႉၸိုင်၊ၵဝ်တၵ်းလႆႈမွၵ်ႇလၢတ်ႈတီႈမႂ်းလၢႆပွၵ်ႈလၢႆၽဝ်ႇႁိုဝ်း၊” ဝႃႈၼင်ႇၼႆဢေႃႈ။
မိၵ်ႉၶႃး၊ ၶိုၼ်းလၢတ်ႈလႄႈဝႃႈ၊ “ၵဝ်လႆႈႁၼ်ၵူၼ်းသိုၵ်းမဵဝ်း ဢိသရေး၊ တင်းသဵင်ႈတင်းလူင်မီးတၢင်းဢၼ်ၽၢတ်ႇၽႄၵၼ်ယူႇၵႃႈၼိူဝ်လွႆၼိူဝ်ၵွင်းတင်းလၢႆမိူၼ်ၸိူဝ်ႉၼင်ႇၽုင်သူဝ်းဢၼ်ဢမ်ႇမီးၵေႃႉလဵင်ႉၵေႃႉထိင်းၼၼ်ႉတီႈၶႃႈယဝ်ႉ။ မိူဝ်ႈၼၼ်ႉ ထႃႇဝရႃႉၽြႃး၊ မီးဢမိင်ႉလႄႈဝႃႈ၊ ‘ၶဝ်ၸိူဝ်းၼႆႉဢမ်ႇမီးၸဝ်ႈမီးၸွမ်ယဝ်ႉလႄႈႁႂ်ႈၶဝ်ပွၵ်ႈမိူဝ်းႁိူၼ်းၼိမ်ၼိမ်လီလီသေ၊’ ဝႃႈၼႆတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ဢႃႇႁပ်ႉ၊ လၢတ်ႈတီႈ ယူဝ်းသၽတ်ႉ၊ လႄႈဝႃႈ၊ “မၼ်းဢမ်ႇႁေႃးလၢတ်ႈၵႂၢမ်းမၢင်ႇၵလႃႇလွင်ႈၵဝ်ၶႃႈဝႃႈၼႆ၊ၸွင်ႇၵဝ်ၶႃႈဢမ်ႇလႆႈလၢတ်ႈတီႈၸဝ်ႈဝႆႉယဝ်ႉႁိုဝ်း။ မၼ်းၸၢင်ႈႁေႃးလၢတ်ႈၵႂၢမ်းဢႃႉမၢင်ႇၵလႃႇၵူၺ်းဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ မိၵ်ႉၶႃး၊ သိုပ်ႇႁေႃးလၢတ်ႈလႄႈဝႃႈ၊ “ပိူဝ်ႈၼႆလႄႈၶႅၼ်းတေႃႈထွမ်ႇငိၼ်းဢမိင်ႉ ထႃႇဝရႃႉၽြႃး၊ သေၵမ်းတီႈၶႃႈ။ ၵဝ်ၶႃႈႁၼ် ထႃႇဝရႃႉၽြႃး၊ ၼင်ႈယူႇၵႃႈၼိူဝ်ပလၢင်ႇၸဝ်ႈလႄႈတမၢၼ်ႇၵၢင်ႁၢဝ်ၸဝ်ႈၵႃႈမီးဢွၼ်ၵၼ်ၸုၵ်းယူႇႁိမ်းမၼ်းၸဝ်ႈဢေႃႈ။-
ထႃႇဝရႃႉၽြႃး၊ ထၢမ်လႄႈဝႃႈ၊ ‘ၽူႈလႂ်တၵ်းၵႂႃႇလႄႈပႅတ်ႉလႅၼ် ဢႃႇႁပ်ႉ၊ ပုၼ်ႈဢၼ်မၼ်းတၵ်းၶီႇသိုၵ်းၵႂႃႇၸူးတီႈဝဵင်း ရႃႇမုတ်ႉ၊ သေယဝ်ႉ၊လႆႈတၢႆၵႃႈတီႈၼၼ်ႈ၊’ ဝႃႈၼင်ႇၼႆဢေႃႈ။ တမၢၼ်ႇၵၢင်ႁၢဝ်ၵမ်ႈၽွင်ႈလဝ်ႈလၢတ်ႈယေႈၸိူဝ်ႉ၊ၵမ်ႈၽွင်ႈလၢတ်ႈယေႈမဵဝ်း၊-
တေႃႇထိုင်ႁွတ်ႈဝိၺိၺ်ႇပႃးၼိုင်ႈသုတ်ႉၶိုၼ်ႈၵႃႈတီႈၽၢႆႇၼႃႈ ထႃႇဝရႃႉၽြႃး၊ လႄႈလဝ်ႈလၢတ်ႈဝႃႈ၊ ‘ၵဝ်ၶႃႈတၵ်းၵႂႃႇပႅတ်ႉလႅၼ်မၼ်းၶႃႈဢေႃႈ၊’ ဝႃႈၼင်ႇၼႆဢေႃႈ။-
ထႃႇဝရႃႉၽြႃး၊ ၵေႃႈထၢမ်လႄႈဝႃႈ၊ ‘မႂ်းတၵ်းႁဵတ်းၸိူဝ်ႉၼင်ႇႁိုဝ်ပႅတ်ႉလႅၼ်မၼ်း၊’ ဝႃႈၼင်ႇၼႆလႄႈ၊ဝိၺိၺ်ႇၼၼ်ႉၶိုၼ်းလဝ်ႈလၢတ်ႈဝႃႈ၊ ‘ၵဝ်ၶႃႈတၵ်းၵႂႃႇလႄႈႁႂ်ႈပရေႃးၽႅတ်ႈ ဢၼ်မီးတီႈ ဢႃႇႁပ်ႉ၊ ၸိူဝ်းၼၼ်ႉႁေႃးလၢတ်ႈၵႂၢမ်းမုသႃႇတီႈၶႃႈဢေႃႈ၊’ ဝႃႈၼင်ႇၼႆဢေႃႈ။ ထႃႇဝရႃႉၽြႃး၊ ၵေႃႈမီးဢမိင်ႉလႄႈဝႃႈ၊ ‘ၵႂႃႇလႄႈပႅတ်ႉလႅၼ်ၶျေႃးဝွၼ်းမၼ်းၸိုင်။ မႂ်းတၵ်းပႄႉၼႅင်ႇဢေႃႈ၊’ ဝႃႈၼင်ႇၼႆၼၼ်ႉယဝ်ႉ၊” ဝႃႈၼင်ႇၼႆဢေႃႈ။
မိၵ်ႉၶႃး၊ ၶွတ်ႇယွတ်ႈၶေႃႈၵႂၢမ်းလႄႈဝႃႈ၊ “ၼႆႉၸမ်ႉ၊ပဵၼ်မႃးၸိူဝ်ႉၼင်ႇၼႆတီႈၶႃႈယဝ်ႉ။ ထႃႇဝရႃႉၽြႃး၊ ႁႂ်ႈပရေႃးၽႅတ်ႈၸဝ်ႈၸိူဝ်းၼႆႉလၢတ်ႈၵႂၢမ်းမုသႃႇတီႈၸဝ်ႈႁဝ်းတီႈၶႃႈယဝ်ႉ။ ၼႆႉၸမ်ႉ၊တူဝ် ထႃႇဝရႃႉၽြႃး၊ တႅပ်းတတ်းၶိုင်ပွင်ႁႂ်ႈၸဝ်ႈႁဝ်းထူပ်းၽေးဢႃႉမၢင်ႇၵလႃႇတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ပရေႃးၽႅတ်ႈ ၸေႇတၵိ၊ လုၵ်ႉၵႂႃႇလႄႈတူပ်းၵႅမ်ႈ မိၵ်ႉၶႃး၊ သေယဝ်ႉထၢမ်ဝႃႈ၊ “ဝိၺိၺ်ႇ ထႃႇဝရႃႉၽြႃး၊ ဢွၵ်ႇသေၵႃႈတီႈၵဝ်ၵႂႃႇၸိူဝ်ႉၼင်ႇႁိုဝ် ႁႂ်ႈလႆႈလၢတ်ႈတေႃႇမႂ်းၼၼ်ႉ၊” ဝႃႈၼင်ႇၼႆဢေႃႈ။
မိၵ်ႉၶႃး၊ ၶိုၼ်းလၢတ်ႈလႄႈဝႃႈ၊ “မႂ်းတၵ်းတေႁၼ်မိူဝ်ႈဢၼ်မႂ်းၶဝ်ႈၼႂ်းလုၵ်းၽၢႆႇလင်ႁိူၼ်းႁႂ်ႈလႆႈတဵတ်ႇမႅပ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၶုၼ်ႁေႃၶမ်း ဢႃႇႁပ်ႉ၊ ပူင်ဢမိင်ႉတီႈၶုၼ်ဢၼ်ပွင်ၵၢၼ်ၵေႃႉၼိုင်ႈလႄႈဝႃႈ၊ “တိဢဝ် မိၵ်ႉၶႃး၊ လႄႈသူင်ႇၵႂႃႇတီႈ ဢႃႇမုၼ်ႇ၊ ၸဝ်ႈမိူင်းၼၼ်ႉဢိၵ်ႇတင်း ယေႃးသႃႉ၊ ဢၼ်ပဵၼ်လုၵ်ႈၶုၼ်လုၵ်ႈၵွၼ်းၼၼ်ႉတႃႉ။-
သင်ႇလၢတ်ႈႁႂ်ႈၶဝ်ဢဝ်မၼ်းၶင်ထွင်ႇဝႆႉလႄႈဢဝ်ၶဝ်ႈမုၼ်းတင်းၼမ်ႉဢၼ်ဝႃႈ၊တၢင်းၵိၼ်တၢင်းၶူပ်းထွင်ႇၼၼ်ႉလဵင်ႉပၼ်မၼ်းယူႇတေႃႇထိုင်ႁွတ်ႈၵဝ်လႆႈၶိုၼ်းပွၵ်ႈမႃးလူင်ႉလီလွတ်ႈလီၼၼ်ႉတႃႉ၊” ဝႃႈၼင်ႇၼႆဢေႃႈ။
မိၵ်ႉၶႃး၊ ၵေႃႈလဝ်ႈလၢတ်ႈလႄႈဝႃႈ၊ “ပေႃးၸဝ်ႈႁဝ်းလႆႈၶိုၼ်းပွၵ်ႈမႃးလူင်ႉလီလွတ်ႈလီၸိုင်၊ ထႃႇဝရႃႉၽြႃး၊ ဢမ်ႇၸႂ်ႉၵဝ်ၶႃႈႁႂ်ႈမီးဢမိင်ႉတီႈၶႃႈ။ ၵူၼ်းၵႃႈမီးတင်းသဵင်ႈတင်းလူင်ၶဝ်႟။ ဢွၼ်ၵၼ်ထွမ်ႇငိၼ်းဢဝ်ၵႂၢမ်းၵဝ်ဝႆႉတႃႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၶုၼ်ႁေႃၶမ်း ဢႃႇႁပ်ႉ၊ မိူင်း ဢိသရေး၊ တင်းၶုၼ်ႁေႃၶမ်း ယူဝ်းသၽတ်ႉ၊ မိူင်း ယုတႃႉ၊ ဢွၼ်ၵၼ်ၶီႇသိုၵ်းၶိုၼ်ႈၸူးဝဵင်း ရႃႇမုတ်ႉ၊ မိူင်း ၵိလတ်ႉ၊ ဢေႃႈ။-
ဢႃႇႁပ်ႉ၊ လၢတ်ႈတီႈ ယူဝ်းသၽတ်ႉ၊ လႄႈဝႃႈ၊ “ၼႂ်းၼႃႈသိုၵ်းၼၼ်ႉၵဝ်ၶႃႈတၵ်းယႃႉႁၢင်ႈယႃႉၽၢင်ၵဝ်ၶႃႈလႄႈ၊ၸဝ်ႈၸမ်ႉ၊ၼုင်ႈမႆၶူဝ်းႁၢင်ႈၶူဝ်းႁေႃသေၵမ်း၊” ဝႃႈၼင်ႇၼႆသေယဝ်ႉ၊ၶုၼ်ႁေႃၶမ်းမဵဝ်း ဢိသရေး၊ ၼၼ်ႉယႃႉႁၢင်ႈယႃႉၽၢင်မၼ်းသေလႄႈၶဝ်ႈၼႂ်းၼႃႈသိုၵ်းဢေႃႈ။
ၶုၼ်ႁေႃၶမ်းမိူင်း သီးရီးယႃး၊ ၼၼ်ႉ ပူင်ဢမိင်ႉတီႈၶုၼ်ႁူဝ်ႁၢၼ်မၼ်းသၢမ်သိပ်းသွင်ၵေႃႉၸိူဝ်းၼၼ်ႉလႄႈဝႃႈ၊ “ၼွၵ်ႈသေၶုၼ်ႁေႃၶမ်း ဢိသရေး၊ ပႃးလဵဝ်ၵူၺ်းၼၼ်ႉ၊ယႃႇပေတိုၵ်းတေႃးၵူၼ်းလူင်ၵူၼ်းဢွၼ်ႇသေၵေႃႉသေၵူၼ်း၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈမိူဝ်ႈဢၼ်ၶဝ်ႁၼ်ၶုၼ်ႁေႃၶမ်း ယူဝ်းသၽတ်ႉ၊ ၼၼ်ႉၸိုင်၊ၶဝ်ထၢင်ႇမၼ်းပဵၼ်ၶုၼ်ႁေႃၶမ်းၵူၼ်းမဵဝ်း ဢိသရေး၊ လႄႈၶဝ်ဝၢႆႇၸူးတိုၵ်းတေႃးမၼ်းဢေႃႈ။-
ၵူၺ်းၵႃႈ၊မိူဝ်ႈဢၼ်မၼ်းႁွင်ႉသႅၼ်ႇၼၼ်ႉၶုၼ်သိုၵ်းမၼ်းတင်းလၢႆႁုႁၼ်လွင်ႈဢၼ်မၼ်းၼၼ်ႉဢမ်ႇၸႂ်ႈၶုၼ်ႁေႃၶမ်းၵူၼ်းမဵဝ်း ဢိသရေး၊ လႄႈၶဝ်ယင်းဢမ်ႇလမ်းၸွမ်းႁႂ်ႈလႆႈတိုၵ်းတေႃးမၼ်းဢေႃႈ။-
ၵူၼ်းၵေႃႉၼိုင်ႈယိုဝ်းၵၢင်ႇမၼ်းၵႂႃႇထုၵ်ႇမႅၼ်ႈသႂ်ႇၶုၼ်ႁေႃၶမ်း ဢႃႇႁပ်ႉ၊ ၶဝ်ႈတီႈသိူဝ်ႈၶႅပ်းလဵၵ်းၸၢပ်ႈၵၼ်ၼၼ်ႉဢေႃႈ။ မၼ်းၵေႃႈလၢတ်ႈတီႈၵေႃႉဢၼ်ႁေႃႈလေႃႉမႃႉသိုၵ်းၸဝ်ႈၼၼ်ႉလႄႈဝႃႈ၊ “တူဝ်ၵဝ်လႆႈတိူဝ်ႉမၢတ်ႇၸဵပ်းၼႃႇလူင်လၢင်ယဝ်ႉ။ ဝၢႆႇၶိုၼ်းလႄႈဢွၵ်ႇပၢင်တိုၵ်းသိုၵ်းၵႂႃႇတႃႉ၊” ဝႃႈၼင်ႇၼႆဢေႃႈ။
ၼႂ်းဝၼ်းၼၼ်ႉသိုၵ်းဢၼ်တိုၵ်းတေႃးၵၼ်ယဵင်ႈၶႅၼ်းႁၢဝ်ႈၵျၢမ်းမႃးၼႃႇလူင်လၢင်ယူႇဢေႃႈ။ ၶုၼ်ႁေႃၶမ်း ဢႃႇႁပ်ႉ၊ ၸမ်ႉ၊ဢိင်ယူႇၵႃႈၼႂ်းလေႃႉမႃႉသိုၵ်းလႄႈဝၢႆႇၼႃႈၸူးၵူၼ်းမဵဝ်း သီးရီးယႃး၊ ယူႇဢေႃႈ။ လိူတ်ႈၵႃႈတီႈႁွႆးမၢတ်ႇၼၼ်ႉလႆလူင်းလႄႈထူမ်ႈပိုၼ်ႉလေႃႉမႃႉသိုၵ်းယူႇဢေႃႈ။ ၶိင်ႇႁူဝ်ၶမ်ႈၼၼ်ႉဢသၢၵ်ႈသဵင်ႈၵႂႃႇသေဢေႃႈ။-
မိူဝ်ႈဢၼ်ၵၢင်ဝၼ်းတူၵ်းၼၼ်ႉၶဝ်ႁွင်ႉပၢဝ်ႇႁွင်ႉသေႃႇတပ်ႉၵူၼ်းမဵဝ်း ဢိသရေး၊ တင်းတပ်ႉလႄႈဝႃႈ၊ “ၵူၼ်းၵူႈၵေႃႉၶဝ်႟။ ဢွၼ်ၵၼ်ၶိုၼ်းပွၵ်ႈမိူဝ်းမိူင်းၽႂ်မိူင်းမၼ်းၸူးတီႈဝဵင်းၽႂ်ဝဵင်းမၼ်းတႃႉ၊” ဝႃႈၼင်ႇၼႆဢေႃႈ။
ၼင်ႇၼၼ်လႄႈၶုၼ်ႁေႃၶမ်း ဢႃႇႁပ်ႉ၊ တၢႆယဝ်ႉလႄႈၶဝ်ဢဝ်တူဝ်တၢႆမၼ်းမႃးသၢင်းၵျူဝ်ႇၵႃႈတီႈဝဵင်း သမႃႇရိ၊ ဢေႃႈ။-
လေႃႉမႃႉသိုၵ်းၸဝ်ႈၼၼ်ႉဢဝ်ၵႂႃႇသုၵ်ႈလၢင်ႉၵႃႈတီႈၼမ်ႉၼွင် သမႃႇရိ၊ လႄႈမႃတင်းလၢႆမႃးလႄးၵိၼ်လိူတ်ႈမၼ်းမႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉဝႆႉၼၼ်ႉဢေႃႈ။ မႄႈမွၵ်ႇယႃႈတင်းလၢႆၵေႃႈဢၢပ်ႇၼမ်ႉၵႃႈတီႈၼၼ်ႈဢေႃႈ။
လွင်ႈတၢင်းဢၼ် ဢႃႇႁပ်ႉ၊ ႁဵတ်းၵူႈၸိူဝ်ႉၵူႈပိူင်၊ဢိၵ်ႇတင်းႁေႃငႃးၸၢင်ႉဢၼ်မၼ်းတႄႇႁဵတ်းတင်းဝဵင်းၸိူဝ်းဢၼ်မၼ်းမႄးၵုမ်းမႄးႁဵတ်းၼၼ်ႉတႅမ်ႈမၢႆဝႆႉၵႃႈၼႂ်းပိုၼ်းၶုၼ်ႁေႃၶမ်းမိူင်း ဢိသရေး၊ ဢေႃႈ။-
မၼ်းၼွၼ်းၽႄးယဝ်ႉလႄႈလုၵ်ႈၸၢႆးမၼ်း ဢႃႇၶၸိ၊ သိုပ်ႇၼင်ႈႁၢင်ႈၼင်ႈႁေႃဢေႃႈ။
ၼႂ်းပီဢၼ်ၶုၼ်ႁေႃၶမ်း ဢႃႇႁပ်ႉ၊ ၸၢမ်ႇႁၢင်ႈၸၢမ်ႇႁေႃလႆႈသီႇပီၼၼ်ႉ ယူဝ်းသၽတ်ႉ၊ လုၵ်ႈၸၢႆး ဢႃႇသႃႉ၊ တႄႇၸႃႉၼင်ႈႁၢင်ႈၼင်ႈႁေႃမိူင်း ယုတႃႉ၊ ဢေႃႈ။-
ယူဝ်းသၽတ်ႉ၊ ၼၼ်ႉမိူဝ်ႈဢၼ်ဢသၢၵ်ႈမၼ်းလႆႈသၢမ်သိပ်းႁႃႈပီၸိုင်၊မၼ်းတႄႇၸႃႉၼင်ႈႁၢင်ႈၼင်ႈႁေႃလႄႈမၼ်းဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရုသလႅမ်ႇ၊ သၢဝ်းႁႃႈပီဢေႃႈ။ ၸိုဝ်ႈမႄႈၸဝ်ႈၸမ်ႉ၊ပဵၼ် ဢၸုၽႃႉ၊ လုၵ်ႈယိင်း သိလႁိ၊ ဢေႃႈ။-
မၼ်းၵမ်ၵျၢင်ႉၸွမ်းၵႃႈၼင်ႇဢၼ်ၸဝ်ႈပေႃႈမၼ်း ဢႃႇသႃႉ၊ ၵမ်ၵျၢင်ႉၼၼ်ႉတင်းသဵင်ႈတင်းလူင်လႄႈယင်းဢမ်ႇဝႄႈဢမ်ႇပိူင်ႈသေဢိတ်း၊ႁဵတ်းဢၼ်လီဢၼ်ငၢမ်းသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ဢေႃႈ။ ၼႂ်းဝႃႈၼၼ်သေၵေႃႈ မၼ်းယင်းဢမ်ႇပႄႇၽဵဝ်ႈထႃႇၼႃႉတီႈဢၼ်ၶဝ်ၸိူဝ်းဢၼ်ဢမ်ႇယုမ်ႇမၢတ်ႈ ထႃႇဝရႃႉၽြႃး၊ ၵူဝ်းၵႂၢႆႇၸိူဝ်းၼၼ်ႉပႅတ်ႈလႄႈၵူၼ်းတင်းလၢႆယင်းဢွၼ်ၵၼ်သၢၵ်ႈၵၢပ်ႈၶိူင်ႈတၢင်းလူႇလႂ်၊ဢဝ်ၽႆးၽဝ်ၼၢမ်ႇသႃႇလႂ်ၵႃႈတီႈၼၼ်ႈယူႇဢေႃႈ။-
ယူဝ်းသၽတ်ႉ၊ ႁဵတ်းမိၵ်ႈသႁႃႇယႃႉလူၺ်ႈၵၼ်တင်းၶုၼ်ႁေႃၶမ်းမိူင်း ဢိသရေး၊ ဢေႃႈ။
လွင်ႈတၢင်းၵႃႈဢၼ်ၶုၼ်ႁေႃၶမ်း ယူဝ်းသၽတ်ႉ၊ ႁဵတ်းၵူႈၸိူဝ်ႉၵူႈပိူင်၊ဢိၵ်ႇတင်းလွင်ႈတၢင်းဢၼ်တၼ်းၶူဝ်းယႂ်ႇတင်းတၢင်းဢၼ်မၼ်းတိုၵ်းသိုၵ်းတိုၵ်းသိူဝ်ၸိူဝ်းၼၼ်ႉတႅမ်ႈမၢႆဝႆႉၵႃႈၼႂ်းပိုၼ်းၶုၼ်ႁေႃၶမ်းမိူင်း ယုတႃႉ၊ ဢေႃႈ။-
ၵူၼ်းၸၢႆးၵူၼ်းယိင်းၵႃႈဢၼ်ႁဵတ်းၵၢၼ်မႄႈမွၵ်ႇယႃႈၵျွင်းဝၢတ်ႈၶဝ်ၸိူဝ်းဢၼ်ဢမ်ႇၵူဝ်းၵႂၢႆႇ ထႃႇဝရႃႉၽြႃး၊ ၸိူဝ်းဢၼ်ယင်းၵိုတ်းယင်းၵျၢၼ်ႇဝႆႉၼႂ်းၸူဝ်ႈပၢၼ်ၸဝ်ႈပေႃႈမၼ်း ဢႃႇသႃႉ၊ ၼၼ်ႉၸိုင်၊မၼ်းပႄႇၽဵဝ်ႈပႅတ်ႈသေဢေႃႈ။
ၶိင်ႇမိူဝ်ႈၼၼ်ႉမိူင်း ဢေႇတုမ်ႇ၊ ဢမ်ႇမီးၶုၼ်ႁေႃၶမ်းလႄႈမီးၶုၼ်ဢၼ်တၢင်တူဝ်ၶုၼ်ႁေႃၶမ်းမိူင်း ယုတႃႉ၊ ၵူၺ်းဢေႃႈ။
မိူဝ်ႈၼၼ်ႉ၊ ယူဝ်းသၽတ်ႉ၊ တႄႇႁဵတ်းႁိူဝ်းသၢင်းၽေႃးတႃႇၶၢမ်ႈပၢင်ႇလၢႆႇပုၼ်ႈဢၼ်တၵ်းၵႂႃႇၵႃႈတီႈမိူင်း ဢေႃႇၽိရႃႉ၊ ႁႂ်ႈလႆႈဢဝ်ၶမ်းဢေႃႈ။ ၵူၺ်းၵႃႈ၊ႁိူဝ်းသၢင်းၽေႃးၸိူဝ်းၼၼ်ႉႁၵ်းလုၵႃႈတီႈ ဢေးၸယုၼ်းၵႃႇပႃႇ၊ လႄႈဢမ်ႇလႆႈၵႂႃႇ။-
မိူဝ်ႈၼၼ်ႉၶုၼ်ႁေႃၶမ်း ဢႃႇၶၸိ၊ မိူင်း ဢိသရေး၊ ၼၼ်ႉယင်းယွၼ်းဢၶႂၢင်ႉႁႂ်ႈၵူၼ်းမၼ်းတင်းလၢႆလႆႈၶတ်းႁိူဝ်းသၢင်းၽေႃးလူၺ်ႈၵၼ်တင်းၵူၼ်း ယူဝ်းသၽတ်ႉ၊ ဢေႃႈ။ ၵူၺ်းၵႃႈ၊ ယူဝ်းသၽတ်ႉ၊ ဢမ်ႇပၼ်ဢၶႂၢင်ႉ။
ယူဝ်းသၽတ်ႉ၊ ၼွၼ်းၽႄးလႄႈလႆႈဢဝ်သၢင်းၵျူဝ်ႇဝႆႉၵႃႈတီႈပႃႇႁဵဝ်ႈၼႂ်းဝဵင်းၸဝ်ႈပေႃႈမၼ်း တႃႇဝိတ်ႈ၊ သေယဝ်ႉ၊လုၵ်ႈၸၢႆးမၼ်း ယႁူဝ်းရမ်ႇ၊ သိုပ်ႇၼင်ႈႁၢင်ႈၼင်ႈႁေႃဢေႃႈ။
ၼႂ်းပီဢၼ်ၶုၼ်ႁေႃၶမ်း ယူဝ်းသၽတ်ႉ၊ ၸၢမ်ႇႁၢင်ႈၸၢမ်ႇႁေႃမိူင်း ယုတႃႉ၊ လႆႈသိပ်းၸဵတ်းပီၼၼ်ႉ ဢႃႇၶၸိ၊ လုၵ်ႈၸၢႆး ဢႃႇႁပ်ႉ၊ ၸႃႉၼင်ႈႁၢင်ႈၼင်ႈႁေႃမိူင်း ဢိသရေး၊ လႄႈမၼ်းဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း သမႃႇရိ၊ သွင်ပီဢေႃႈ။-
မၼ်းႁဵတ်းတုၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ လႄႈၵမ်ၵျၢင်ႉဢၼ်ႁၢႆႉဢၼ်မိူၵ်ႈၸွမ်းၸဝ်ႈပေႃႈမၼ်း ဢႃႇႁပ်ႉ၊ တင်းမႄႈမၼ်း ယေႇၸပေႇလႃႉ၊ ဢိၵ်ႇတင်းၶုၼ်ႁေႃၶမ်း ယေႇရူဝ်းပုမ်ႇ၊ ၸိူဝ်းဢၼ်ႁႂ်ႈၵူၼ်းမဵဝ်း ဢိသရေး၊ လႆႈၽိတ်းပိူင်ႈၼၼ်ႉဢေႃႈ။-
မၼ်းႁဵတ်းဝၢတ်ႈၵူဝ်းၵႂၢႆႇ ၽြႃးပႃႇလႃႉ၊ မိူၼ်ၸိူဝ်ႉၼင်ႇၸဝ်ႈပေႃႈမၼ်းလႄႈတိုၵ်းယူင်းတေႃးသႃႉတၢင်းၸႂ်မႆႈၶႂ်ႈၸႃႉ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ၼၼ်ႉဢေႃႈ။ ၵျၢမ်းပိုၼ်းၶုၼ်ႁေႃၶမ်းၽိုၼ်တီႈၼိုင်ႈယဝ်ႉယဝ်ႉဢေႃႈ။
ဝၢႆးသေၶုၼ်ႁေႃၶမ်း ဢႃႇႁပ်ႉ၊ မိူင်း ဢိသရေး၊ တၢႆၵႂႃႇယဝ်ႉၼၼ်ႉ၊မိူင်း မေႃႇၽႃႉ၊ လုၵ်ႉၽိုၼ်ႉၶုၼ်ႁေႃၶမ်း ဢိသရေး၊ ဢေႃႈ။
ၶုၼ်ႁေႃၶမ်း ဢႃႇၶၸိ၊ မိူင်း ဢိသရေး၊ ၼၼ်ႉတူၵ်းသေၵႃႈၼိူဝ်ၸၢၼ်းဢွမ်ႇလႅတ်ႇၵႃႈၼိူဝ်လင်ၶႃးႁိူၼ်းၸဝ်ႈၵႃႈၼႂ်းဝဵင်း သမႃႇရိ၊ သေလႄႈၸဵပ်းႁႅင်းၼႃႇလူင်လၢင်ဢေႃႈ။ ပိူဝ်ႈၼႆလႄႈမၼ်းပွႆႇၸႂ်ႉၵူၼ်းၵႂႃႇႁႂ်ႈလႆႈတွင်ႈထၢမ်တီႈၽြႃး ပႃႇလႃႉၸေႇပုပ်ႉ၊ ဢၼ်ပဵၼ်ၽြႃးၵူၼ်းမဵဝ်း ၽိလိတ်ႉတိ၊ ၵႃႈတီႈဝဵင်း ဢေႇၵရုၼ်ႇ၊ ပုၼ်ႈဢၼ်တၵ်းတေလႆႈႁုလွင်ႈတၢင်းဢၼ်မၼ်းတၵ်းၶိုၼ်းႁၢႆလီမႃးလႆႈႁိုဝ်ဢမ်ႇလႆႈႁိုဝ်ၼၼ်ႉဢေႃႈ။-
မိူဝ်ႈၼၼ်ႉတမၢၼ်ႇၵၢင်ႁၢဝ် ထႃႇဝရႃႉၽြႃး၊ သင်ႇလၢတ်ႈတီႈပရေႃးၽႅတ်ႈ ဢေးလိယႃႉ၊ ၵူၼ်းဝဵင်း တိသၽိ၊ ႁႂ်ႈမၼ်းၵႂႃႇႁူပ်ႉထူပ်းၵၼ်တင်းၵူၼ်းၸိူဝ်းဢၼ်ၶုၼ်ႁေႃၶမ်း ဢႃႇၶၸိ၊ ပွႆႇၸႂ်ႉမႃးၼၼ်ႉလႄႈသင်ႇလၢတ်ႈတီႈၶဝ်လႄႈဝႃႈ၊ “ၵွပ်ႈပိူဝ်ႈဢၼ်ၵႃႈတီႈမိူင်း ဢိသရေး၊ ၼႆႉဢမ်ႇမီးၽြႃးပဵၼ်ၸဝ်ႈလႄႈသူလႆႈၵႂႃႇတွင်ႈထၢမ်တီႈၽြႃး ပႃႇလႃႉၸေႇပုပ်ႉ၊ ဝဵင်း ဢေႇၵရုၼ်ႇ၊ ႁိုဝ်း၊-
ၵႂႃႇမွၵ်ႇလၢတ်ႈတီႈၶုၼ်ႁေႃၶမ်းလွင်ႈဢၼ် ထႃႇဝရႃႉၽြႃး၊ မီးဢမိင်ႉလႄႈဝႃႈ၊ ‘တၢင်းၸဵပ်းတၢင်းသႅပ်ႇမႂ်းၸိူဝ်းၼၼ်ႉတၵ်းဢမ်ႇလႆႈၸိုၼ်ႈႁၢႆၶႅၼ်းမႃးၶိုၼ်းယဝ်ႉ။ မႂ်းတၵ်းလႆႈတၢႆဢမၢၼ်ႇၶၼ်ပဵၼ်ဢေႃႈ၊’ မီးၼင်ႇၼႆယဝ်ႉ၊ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။ ဢေးလိယႃႉ၊ ၵေႃႈၵႂႃႇလႄႈႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈၼၼ်ႉသေယဝ်ႉ။-
ၵူၼ်းၸႂ်ႉၵူၼ်းသွႆၸိူဝ်းၼၼ်ႉၵေႃႈၶိုၼ်းပွၵ်ႈမိူဝ်းၵႂႃႇၵႃႈတီႈၶုၼ်ႁေႃၶမ်းဢေႃႈ။ ၶုၼ်ႁေႃၶမ်းၵေႃႈထၢမ်လႄႈဝႃႈ၊ “ႁဵတ်းသင်လႄႈသူၶိုၼ်းပွၵ်ႈမႃးၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ၶဝ်ၼၼ်ႉဢွၼ်ၵၼ်ၶိုၼ်းလဝ်ႈလၢတ်ႈလႄႈဝႃႈ၊ “ၵူၼ်းၵေႃႉၼိုင်ႈမႃးႁူပ်ႉထူပ်းၵၼ်တင်းၶႃႈၸဝ်ႈႁဝ်းၶဝ်လႄႈၸႂ်ႉႁႂ်ႈၶႃႈၸဝ်ႈႁဝ်းၶဝ်ၶိုၼ်းမႃးၸူးတီႈၸဝ်ႈႁဝ်းသေလႄႈႁႂ်ႈမွၵ်ႇလၢတ်ႈလွင်ႈဢၼ် ထႃႇဝရႃႉၽြႃး၊ မီးဢမိင်ႉလႄႈဝႃႈ၊ ‘ၵွပ်ႈပိူဝ်ႈၵႃႈတီႈမိူင်း ဢိသရေး၊ ၼႆႉဢမ်ႇမီးၽြႃးပဵၼ်ၸဝ်ႈလႄႈမႂ်းလႆႈပွႆႇၵူၼ်းၵႂႃႇတွင်ႈထၢမ်တီႈၽြႃး ပႃႇလႃႉၸေႇပုပ်ႉ၊ ဝဵင်း ဢေႇၵရုၼ်ႇ၊ ႁိုဝ်း။ တၢင်းၶႆႈတၢင်းပဵၼ်မႂ်းၼၼ်ႉတၵ်းဢမ်ႇလႆႈၸိုၼ်ႈႁၢႆၶႅၼ်းမႃးၶိုၼ်းယဝ်ႉ။ မႂ်းတၵ်းလႆႈတၢႆဢမၢၼ်ႇၶၼ်ပဵၼ်ဢေႃႈ၊’ ဝႃႈၼင်ႇၼႆတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းၵေႃႈထၢမ်လႄႈဝႃႈ၊ “ၵေႃႉၼၼ်ႉပဵၼ်ၵူၼ်းၸိူဝ်ႉၼင်ႇႁိုဝ်၊” ဝႃႈၼင်ႇၼႆလႄႈ၊-
ၶဝ်ၼၼ်ႉလဝ်ႈလၢတ်ႈလႄႈဝႃႈ၊ “မၼ်းၼၼ်ႉပဵၼ်ၵေႃႉဢၼ်ၼုင်ႈမႆၶူဝ်းၼုင်ႈဢၼ်ဢဝ်ၼင်သတ်းႁဵတ်း ဝႆႉၼၼ်ႉလႄႈႁတ်ႉတင်းသၢႆဢႅဝ်ၼင်ဝႆႉဢေႃႈ၊” ဝႃႈၼင်ႇၼႆဢေႃႈ။ ၶုၼ်ႁေႃၶမ်းလၢတ်ႈဝႃႈ၊ “မၼ်းပဵၼ် ဢေးလိယႃႉ၊ ၵူၼ်းဝဵင်း တိသၽိ၊ ၼၼ်ႉယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၶုၼ်ႁေႃၶမ်းပွႆႇၸႂ်ႉၶုၼ်သိုၵ်းဢိၵ်ႇတင်းၵူၼ်းသိုၵ်းဢၼ်မၼ်းဢုပ်ႉႁႃႈသိပ်းၵေႃႉၼၼ်ႉၵႂႃႇႁႂ်ႈလႆႈႁွင်ႉဢဝ် ဢေးလိယႃႉ၊ မႃးဢေႃႈ။ ၶုၼ်သိုၵ်းၼၼ်ႉထူပ်းႁၼ် ဢေးလိယႃႉ၊ ၼင်ႈယူႇၵႃႈၼိူဝ်ၵုင်းလွႆသေလႄႈလၢတ်ႈဝႃႈ၊ “ၵူၼ်းၽြႃးပဵၼ်ၸဝ်ႈ႟။ ၶုၼ်ႁေႃၶမ်းပူင်ဢမိင်ႉႁႂ်ႈမႂ်းလူင်းမႃးဢေႃႈ၊” ဝႃႈၼင်ႇၼႆဢေႃႈ။
ဢေးလိယႃႉ၊ ၶိုၼ်းလၢတ်ႈလႄႈဝႃႈ၊ “ပေႃးၵဝ်ၸႂ်ႈၵူၼ်းၽြႃးပဵၼ်ၸဝ်ႈၸိုင်၊ႁႂ်ႈၽႆးလုၵ်ႉၵႃႈၼိူဝ်ၽႃႉၵၢင်ႁၢဝ်သေတူၵ်းမႃးမႆႈမႂ်း၊ဢိၵ်ႇတင်းၵူၼ်းမႂ်းၸိူဝ်းၼႆႉသေၵမ်းလူၺ်ႈ၊” ဝႃႈၼင်ႇၼႆလႄႈ၊မိူဝ်ႈၼၼ်ႉၵမ်းလဵဝ်ၽႆးလုၵ်ႉသေၵႃႈတီႈၽႃႉၵၢင်ႁၢဝ်တူၵ်းမႃးသေလႄႈမႆႈပႅတ်ႈၶုၼ်သိုၵ်း၊ဢိၵ်ႇတင်းၵူၼ်းသိုၵ်းမၼ်းႁႃႈသိပ်းၵေႃႉၼၼ်ႉဢေႃႈ။
ၶုၼ်ႁေႃၶမ်းသမ်ႉပွႆႇၸႂ်ႉၶုၼ်သိုၵ်းတၢင်ႇၵေႃႉ၊ဢိၵ်ႇတင်းၵူၼ်းသိုၵ်းမၼ်းႁႃႈသိပ်းၵႂႃႇထႅင်ႈသေယဝ်ႉ၊မၼ်းၵႂႃႇလၢတ်ႈတီႈ ဢေးလိယႃႉ၊ လႄႈဝႃႈ၊ “ၵူၼ်းၽြႃးပဵၼ်ၸဝ်ႈ႟။ ၶုၼ်ႁေႃၶမ်းပူင်ဢမိင်ႉႁႂ်ႈမႂ်းလူင်းၵုင်းလွႆမႃးၵမ်းလဵဝ်ဢေႃႈ၊” ဝႃႈၼင်ႇၼႆဢေႃႈ။
ဢေးလိယႃႉ၊ ၶိုၼ်းလဝ်ႈလၢတ်ႈလႄႈဝႃႈ၊ “ပေႃးၵဝ်ၸႂ်ႈၵူၼ်းၽြႃးပဵၼ်ၸဝ်ႈၸိုင်၊ႁႂ်ႈၽႆးလုၵ်ႉသေၵႃႈၼိူဝ်ၽႃႉၵၢင်ႁၢဝ်တူၵ်းမႃးသေလႄႈမႆႈမႂ်းဢိၵ်ႇတင်းၵူၼ်းမႂ်းၸိူဝ်းၼႆႉသေၵမ်းလူၺ်ႈ၊” ဝႃႈၼင်ႇၼႆလႄႈ၊မိူဝ်ႈၼၼ်ႉၵမ်းလဵဝ်၊ၽႆး ထႃႇဝရႃႉၽြႃး၊ တူၵ်းလူင်းမႃးမႆႈၶုၼ်သိုၵ်း ဢိၵ်ႇတင်းၵူၼ်းသိုၵ်းမၼ်းႁႃႈသိပ်းၵေႃႉၼၼ်ႉပႅတ်ႈဢေႃႈ။
မိူဝ်ႈၼၼ်ႉၵမ်းလဵဝ်ၶုၼ်ႁေႃၶမ်းသမ်ႉပွႆႇၸႂ်ႉၶုၼ်သိုၵ်း၊ဢိၵ်ႇတင်းၵူၼ်းသိုၵ်းႁႃႈသိပ်းထႅင်ႈဢေႃႈ။ မၼ်းၼၼ်ႉၶိုၼ်ႈလွႆၵႂႃႇသေယဝ်ႉ၊ၶုပ်ႉၶဝ်ႇၵႃႈတီႈၽၢႆႇၼႃႈ ဢေးလိယႃႉ၊ လႄႈတွင်းပၢၼ်ႇဝႃႈ၊ “ၵူၼ်းၽြႃးပဵၼ်ၸဝ်ႈၶႃႈ႟။ သေလၢႆဢသၢၵ်ႈၶႃႈၸဝ်ႈဢိၵ်ႇတင်းဢသၢၵ်ႈၵူၼ်းသိုၵ်းၶႃႈၸဝ်ႈၸိူဝ်းၼႆႉသေၵမ်းၶႃႈ။-
တူၺ်းလူး။ ၽႆးလုၵ်ႉသေၵႃႈၼိူဝ်ၽႃႉၵၢင်ႁၢဝ်တူၵ်းမႃးလႄႈမႆႈၶုၼ်သိုၵ်းသွင်ၵေႃႉ၊ဢိၵ်ႇတင်းလုၵ်ႈသိုၵ်းၶဝ်ပၢၵ်ႇၵေႃႉၼၼ်ႉၶႃႈယဝ်ႉ။ ၵူၺ်းၵႃႈ၊မိူဝ်ႈလဵဝ်ၼႆႉဢဵတ်းလူလႄႈသေလၢႆဢသၢၵ်ႈၶႃႈၸဝ်ႈသေၵမ်းၶႃႈ၊” ဝႃႈၼင်ႇၼႆဢေႃႈ။
တမၢၼ်ႇၵၢင်ႁၢဝ်လၢတ်ႈတီႈ ဢေးလိယႃႉ၊ လႄႈဝႃႈ၊ “လူင်းၵႂႃႇလူၺ်ႈၵၼ်တင်းမၼ်းတႃႉ။ ယႃႇပေၵူဝ်ႁႄ၊” ဝႃႈၼင်ႇၼႆသေယဝ်ႉ၊ ဢေးလိယႃႉ၊ လူင်းၵႂႃႇလူၺ်ႈၵၼ်တင်းၶုၼ်သိုၵ်းၼၼ်ႉသေယဝ်ႉ၊ၵႂႃႇၸူးတီႈၶုၼ်ႁေႃၶမ်းသေလႄႈ၊-
လဝ်ႈလၢတ်ႈလႄႈဝႃႈ၊ “ ထႃႇဝရႃႉၽြႃး၊ မီးဢမိင်ႉၸမ်ႉ၊ ‘ၵွပ်ႈပိူဝ်ႈဢၼ်မႂ်းပွႆႇၸႂ်ႉၵူၼ်းၵႂႃႇႁႂ်ႈလႆႈတွင်ႈထၢမ်ၽြႃး ပႃႇလႃႉၸေႇပုပ်ႉ၊ ဝဵင်း ဢေႇၵရုၼ်ႇ၊ ၼၼ်ႉပဵၼ်ၸိူဝ်ႉၼင်ႇဢၼ်ဢမ်ႇမီးၽြႃးပဵၼ်ၸဝ်ႈပုၼ်ႈဢၼ်တၵ်းတွင်ႈထၢမ်ၵႃႈၼႂ်းမိူင်း ဢိသရေး၊ ၼႆႉယဝ်ႉ။ ပိူဝ်ႈၼႆလႄႈမႂ်းဢမ်ႇလႆႈၸိုၼ်ႈလႆႈႁၢႆ၊တၵ်းလႆႈတၢႆဢေႃႈ၊’ ဝႃႈၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။
ဢႃႇၶၸိ၊ လႆႈတၢႆၵႂႃႇၸွမ်းၵႃႈၼင်ႇဢၼ်ၵႂၢမ်း ထႃႇဝရႃႉၽြႃး၊ ဢၼ် ဢေးလိယႃႉ၊ သင်ႇလၢတ်ႈၼၼ်ႉသေယဝ်ႉ၊ၵွပ်ႈပိူဝ်ႈဢၼ်မၼ်းဢမ်ႇမီးလုၵ်ႈၸၢႆးလႄႈ ၼွင်ႉၸၢႆးမၼ်း ယူဝ်းရမ်ႇ၊ ပုတ်ႈႁၢင်ႈပုတ်ႈႁေႃၼႂ်းပီဢၼ် ယႁူဝ်းရမ်ႇ၊ လုၵ်ႈၸၢႆး ယူဝ်းသၽတ်ႉ၊ ၸၢမ်ႇႁၢင်ႈၸၢမ်ႇႁေႃမိူင်း ယုတႃႉ၊ လႆႈသွင်ပီၼၼ်ႉဢေႃႈ။
လွင်ႈဢၼ်ၶုၼ်ႁေႃၶမ်း ဢႃႇၶၸိ၊ ႁဵတ်းၵူႈၸိူဝ်ႉၵူႈပိူင်ၼၼ်ႉ တႅမ်ႈမၢႆဝႆႉၵႃႈၼႂ်း လိၵ်ႈပိုၼ်းၶုၼ်ႁေႃၶမ်းဢိသရေး၊ ဢေႃႈ။
မိူဝ်ႈဢၼ်ၸမ်ၶိင်ႇဢၼ် ထႃႇဝရႃႉၽြႃး၊ တၵ်းဢဝ်တင်းလူမ်းၽိဝ်ႁုင်ယွင်ႈဢဝ် ဢေးလိယႃႉ၊ ၶိုၼ်ႈမိူင်းၵၢင်ႁၢဝ်ၵႂႃႇၼၼ်ႉၸိုင်၊ ဢေးလိယႃႉ၊ တင်း ဢေးလိသႄး၊ ဢွၼ်ၵၼ်ဢွၵ်ႇၵႂႃႇတီႈဝဵင်း ၵိလႃႉၵႃႇလႃႉ၊ ဢေႃႈ။-
ၵႃႈၼႂ်းၶၢဝ်းတၢင်းၼၼ်ႉ၊ ဢေးလိယႃႉ၊ လၢတ်ႈတီႈ ဢေးလိသႄး၊ လႄႈဝႃႈ၊ “မႂ်းၵိုတ်းယူႇၵႃႈတီႈၼႆႈတႃႉ။ ထႃႇဝရႃႉၽြႃး၊ ပွႆႇၸႂ်ႉၵဝ်ၵႂႃႇၸူးတီႈဝဵင်း ပေႇသလႃႉ၊ ပုၼ်ႈဢေႃႈ၊” ဝႃႈၼင်ႇၼႆဢေႃႈ။ ၵူၺ်းၵႃႈ၊ ဢေးလိသႄး၊ ၶိုၼ်းလၢတ်ႈလႄႈဝႃႈ၊ “ၵဝ်ၶႃႈတိူင်ႇဝႃႈတီႈ ထႃႇဝရႃႉၽြႃး၊ ဢၼ်ဢသၢၵ်ႈလိပ်းယူႇ၊ဢိၵ်ႇတင်းတီႈၸဝ်ႈႁဝ်းလႄႈဝႃႈၸမ်ႉ၊ၵဝ်ၶႃႈတၵ်းဢမ်ႇၽၢတ်ႇယၢၼ်ၵၼ်တင်းၸဝ်ႈႁဝ်းတီႈၶႃႈၵူၺ်း၊” ဝႃႈၼင်ႇၼႆဢေႃႈ။ ၼင်ႇၼၼ်လႄႈၶဝ်သွင်ၵေႃႉၼၼ်ႉဢွၼ်ၵၼ်ၵႂႃႇၸူးတီႈဝဵင်း ပေႇသလႃႉ၊ ဢေႃႈ။
ပရေႃးၽႅတ်ႈၸိူဝ်းဢၼ်မီးၵႃႈၼႂ်းဝဵင်းၼၼ်ႉမူႇၼိုင်ႈၵႂႃႇၸူးတီႈ ဢေးလိသႄး၊ လႄႈထၢမ်ဝႃႈ၊ “လွင်ႈဢၼ် ထႃႇဝရႃႉၽြႃး၊ တၵ်းတေဢဝ်သြႃႇၸဝ်ႈႁဝ်းၽၢတ်ႇၵႂႃႇသေၵႃႈတီႈၸဝ်ႈႁဝ်းဝၼ်းမိူဝ်ႈၼႆႉၼၼ်ႉၸဝ်ႈႁဝ်းၸွင်ႇႁုၶႃႈႁိုဝ်း၊” ဝႃႈၼင်ႇၼႆဢေႃႈ။ ဢေးလိသႄး၊ ၵေႃႈလၢတ်ႈလႄႈဝႃႈ၊ “ၸႂ်ႈယဝ်ႉ။ ၵဝ်ႁုဢေႃႈ။ ဢွၼ်ၵၼ်ယူႇတဵတ်ႇတဵတ်ႇတႃႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ဢေးလိယႃႉ၊ သမ်ႉလၢတ်ႈတီႈ ဢေးလိသႄး၊ လႄႈဝႃႈ၊ “ ဢေးလိသႄး၊ ႟။ မႂ်းၵိုတ်းယူႇၵႃႈတီႈၼႆႈတႃႉ။ ထႃႇဝရႃႉၽြႃး၊ ပွႆႇၸႂ်ႉၵဝ်ၵႂႃႇၸူးတီႈဝဵင်း ယေႇရိၶူဝ်း၊ ပုၼ်ႉဢေႃႈ၊” ဝႃႈၼင်ႇၼႆဢေႃႈ။ ၵူၺ်းၵႃႈ၊ ဢေးလိသႄး၊ ၶိုၼ်းလၢတ်ႈလႄႈဝႃႈ၊ “ၵဝ်ၶႃႈတိူင်ႇဝႃႈၵႃႈတီႈ ထႃႇဝရႃႉၽြႃး၊ ဢၼ်ဢသၢၵ်ႈလိပ်းယူႇ၊ဢိၵ်ႇတင်းၵႃႈတီႈၸဝ်ႈႁဝ်းလႄႈဝႃႈၸမ်ႉ၊ ‘ၵဝ်ၶႃႈတၵ်းဢမ်ႇၽၢတ်ႇယၢၼ်ၵၼ်တင်းၸဝ်ႈႁဝ်းတီႈၶႃႈ၊’ ” ဝႃႈၼင်ႇၼႆဢေႃႈ။ ၼင်ႇၼၼ်လႄႈၶဝ်သွင်ၵေႃႉဢွၼ်ၵၼ်ၵႂႃႇၵႃႈတီႈဝဵင်း ယေႇရိၶူဝ်း၊ ဢေႃႈ။
ပရေႃးၽႅတ်ႈၸိူဝ်းဢၼ်မီးၵႃႈၼႂ်းဝဵင်းၼၼ်ႉမူႇၼိုင်ႈၵႂႃႇၸူးၵႃႈတီႈ ဢေးလိသႄး၊ လႄႈထၢမ်ဝႃႈ၊ “လွင်ႈဢၼ် ထႃႇဝရႃႉၽြႃး၊ တၵ်းတေဢဝ်သြႃႇၸဝ်ႈႁဝ်းၽၢတ်ႇၵႂႃႇသေၵႃႈတီႈၸဝ်ႈႁဝ်းဝၼ်းမိူဝ်ႈၼႆႉၼၼ်ႉၸွင်ႇၸဝ်ႈႁဝ်းႁုၶႃႈႁိုဝ်း၊” ဝႃႈၼင်ႇၼႆဢေႃႈ။ ဢေးလိသႄး၊ ၵေႃႈလၢတ်ႈလႄႈဝႃႈ၊ “ၸႂ်ႈယဝ်ႉ။ ၵဝ်ႁုဢေႃႈ။ ဢွၼ်ၵၼ်ယူႇတဵတ်ႇတဵတ်ႇတႃႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ဢေးလိယႃႉ၊ သမ်ႉလၢတ်ႈတီႈ ဢေးလိသႄး၊ လႄႈဝႃႈ၊ “ ဢေးလိသႄး၊ ႟။ မႂ်းၵိုတ်းယူႇၵႃႈတီႈၼႆႈတႃႉ။ ထႃႇဝရႃႉၽြႃး၊ ပွႆႇၸႂ်ႉၵဝ်ၵႂႃႇၸူးတီႈၼမ်ႉ ယေႃးတၢၼ်ႇ၊ ပုၼ်ႉဢေႃႈ၊” ဝႃႈၼင်ႇၼႆဢေႃႈ။ ၵူၺ်းၵႃႈ၊ ဢေးလိသႄး၊ ၶိုၼ်းလၢတ်ႈလႄႈဝႃႈ၊ “ၵဝ်ၶႃႈတိူင်ႇဝႃႈၵႃႈတီႈ ထႃႇဝရႃႉၽြႃး၊ ဢၼ်ဢသၢၵ်ႈလိပ်းယူႇ၊ဢိၵ်ႇတင်းၵႃႈတီႈၸဝ်ႈႁဝ်းလႄႈဝႃႈၸမ်ႉ၊ ‘ၵဝ်ၶႃႈတၵ်းဢမ်ႇၽၢတ်ႇယၢၼ်ၵၼ်တင်းၸဝ်ႈႁဝ်းတီႈၶႃႈ၊’ ” ဝႃႈၼင်ႇၼႆဢေႃႈ။ ၼင်ႇၼၼ်လႄႈၶဝ်သွင်ၵေႃႉၼၼ်ႉဢွၼ်ၵၼ်ၵႂႃႇလူၺ်ႈၵၼ်ဢေႃႈ။-
ပရေႃးၽႅတ်ႈ ႁႃႈသိပ်းၵေႃႉ ၵေႃႈၸွမ်းၶဝ်ၵႂႃႇၵႃႈတီႈၼမ်ႉ ယေႃးတၢၼ်ႇ၊ ဢေႃႈ။ ဢေးလိယႃႉ၊ တင်း ဢေးလိသႄး၊ ၵိုတ်းသဝ်းၵႃႈတီႈႁိမ်းၼမ်ႉ ယေႃးတၢၼ်ႇ၊ လႄႈ ပရေႃးၽႅတ်ႈႁႃႈသိပ်းၵေႃႉၼၼ်ႉၸုၵ်းယူႇတီႈဢၼ်ၵႆၵၼ်တင်းၶဝ်သွင်ၵေႃႉၼၼ်ႉဢေႃႈ။-
မိူဝ်ႈၼၼ်ႉ၊ ဢေးလိယႃႉ၊ ထွတ်ႇဢဝ်သိူဝ်ႈယၢဝ်းမၼ်းသေယဝ်ႉ၊ႁမ်းၵဵၼ်လႄႈပေႃႉၽတ်ႉၵႃႈၼိူဝ်ၼမ်ႉဢေႃႈ။ ၼမ်ႉၼၼ်ႉတႅၵ်ႇပဵၼ်သွင်ၽၢၵ်ႇၵႂႃႇလႄႈၶဝ်သွင်ၵေႃႉၼၼ်ႉပႆၶၢမ်ႈၵႃႈၼိူဝ်လိၼ်ႁႅင်ႈၵႂႃႇဢေႃႈ။-
ႁွတ်ႈၵႂႃႇၽၢႆႇပုၼ်ႉၽင်ႇၼမ်ႉယဝ်ႉလႄႈ ဢေးလိယႃႉ၊ လၢတ်ႈတီႈ ဢေးလိသႄး၊ လႄႈဝႃႈ၊ “ၸူဝ်ႈဢၼ်ၵဝ်ဢမ်ႇပႆႇလႆႈၶၢမ်ႇတၢင်းဢၼ်ဢဝ်ၽၢတ်ႇဢွၵ်ႇၵႂႃႇသေၵႃႈတီႈမႂ်းၼၼ်ႉၸိုင်၊ၵဝ်တၵ်းလႆႈႁဵတ်းပၼ်တီႈမႂ်းၸိူဝ်ႉၼင်ႇႁိုဝ်ၸိုင်၊ယွၼ်းသေၵမ်း၊” ဝႃႈၼင်ႇၼႆဢေႃႈ။ ဢေးလိသႄး၊ ယွၼ်းလႄႈဝႃႈ၊ “ၶႅၼ်းတေႃႈႁႂ်ႈၵဝ်ၶႃႈလႆႈၶၢမ်ႇဢဝ်ဢမူၺ်ႇဝိၺိၺ်ႇၸဝ်ႈႁဝ်းၼၼ်ႉသွင်ပုၼ်ႈသေၵမ်းလူၺ်ႈ၊” ဝႃႈၼင်ႇၼႆဢေႃႈ။
ဢေးလိယႃႉ၊ ၵေႃႈလၢတ်ႈလႄႈဝႃႈ၊ “မႂ်းယွၼ်းဢဝ်သူးဢၼ်လႆႈယၢပ်ႇၼႃႇၼၼ်ႉယဝ်ႉ။ ၼႂ်းဝႃႈၼၼ်သေၵေႃႈပေႃးမႂ်းလႆႈႁၼ်ၵဝ်မိူဝ်ႈဢၼ်ၵဝ်လႆႈၶၢမ်ႇတၢင်းဢၼ်ဢဝ်ၽၢတ်ႇယၢၼ်ၵၼ်တင်းမႂ်းၵႂႃႇယူႇၼၼ်ႉၸိုင်၊မႂ်းတၵ်းလႆႈသူးၼၼ်ႉဢေႃႈ။ ပေႃးဢမ်ႇႁၼ်ၸိုင်၊ဢမ်ႇလႆႈၵူၺ်း၊” ဝႃႈၼင်ႇၼႆဢေႃႈ။
ၼႂ်းမိူဝ်ႈဢၼ်ၶဝ်ယင်းလၢတ်ႈတေႃႇၵၼ်ၸိူဝ်ႉၼင်ႇၼၼ်လႄႈပႆတၢင်းၵႂႃႇယူႇၼၼ်ႉၸိုင်၊လေႃႉရထႃးၽႆးဢၼ်မႃႉၽႆးတင်းလၢႆလၢၵ်ႈၼၼ်ႉၽုတ်းပေႃႇမႃးၼႂ်းၵႄႈဝူင်ႈၵၢင်ၶဝ်လႄႈ ဢေးလိယႃႉ၊ လႆႈၶၢမ်ႇတၢင်းဢၼ်ဢဝ်ၶိုၼ်ႈၵႂႃႇၵႃႈၼိူဝ်ၵၢင်ႁၢဝ်လူၺ်ႈလူမ်းၽိဝ်ႁုင်သေဢေႃႈ။-
ဢေးလိသႄး၊ တူၺ်းႁၼ်လွင်ႈၼၼ်ႉလႄႈႁွင်ႉသႅၼ်ႇလႄႈဝႃႈ၊ “ပေႃႈၵဝ်႟။ ပေႃႈၵဝ်႟။ ၸဝ်ႈတၼ်းၶူဝ်းဢၼ်ၵႅတ်ႇၶႄၵူၼ်းမဵဝ်း ဢိသရေး၊ ၼႆႉ႟။ ၸဝ်ႈႁဝ်းၵႂႃႇယဝ်ႉတီႈၶႃႈ၊” ဝႃႈၼင်ႇၼႆဢေႃႈ။ လိုၼ်းၼၼ်ႉ၊မိူဝ်ႈဢၼ်မၼ်းဢမ်ႇလႆႈႁၼ် ဢေးလိယႃႉ၊ ယဝ်ႉၼၼ်ႉၸိုင်၊မၼ်းယိပ်းၵမ်ၶူဝ်းၼုင်ႈတူဝ်ၸဝ်ႈၵဝ်ႇသေလႄႈသိၵ်ႇၶၢတ်ႇပဵၼ်သွင်ပွတ်းၵႂႃႇဢေႃႈ။
မိူဝ်ႈၼၼ်ႉ၊မၼ်းၵဵပ်းဢဝ်သိူဝ်ႈယၢဝ်း ဢေးလိယႃႉ၊ ဢၼ်လုၵ်ႉသေၵႃႈတီႈ ဢေးလိယႃႉ၊ တူၵ်းမႃးၼၼ်ႉသေယဝ်ႉ၊ၶိုၼ်းမိူဝ်းၵႂႃႇၸုၵ်းယူႇၵႃႈတီႈၽင်ႇၼမ်ႉ ယေႃးတၢၼ်ႇ၊ ဢေႃႈ။-
မၼ်းဢဝ်သိူဝ်ႈယၢဝ်း ဢေးလိယႃႉ၊ ၼၼ်ႉပေႃႉၽတ်ႉၵႃႈၼိူဝ်ၼမ်ႉလႄႈဝႃႈ၊ “ ထႃႇဝရႃႉၽြႃး၊ ၽြႃးပဵၼ်ၸဝ်ႈ ဢေးလိယႃႉ၊ ၼၼ်ႉမီးၵႃႈလႂ်၊” ဝႃႈၼင်ႇၼႆဢေႃႈ။ မၼ်းသမ်ႉပေႃႉၽတ်ႉၼမ်ႉထႅင်ႈလႄႈၼမ်ႉတႅၵ်ႇပဵၼ်သွင်ၽၢၵ်ႇၵႂႃႇသေယဝ်ႉ၊ပႆၶၢမ်ႈၵႂႃႇဢေႃႈ။-
ပရေႃးၽႅတ်ႈ ႁႃႈသိပ်းၵေႃႉၼၼ်ႉႁၼ်မၼ်းလႄႈလၢတ်ႈဝႃႈ၊ “တၼ်းၶူဝ်း ဢေးလိယႃႉ၊ ၼၼ်ႉတႄႇယူႇၼိူဝ် ဢေးလိသႄး၊ ယဝ်ႉဢေႃႈ၊” ဝႃႈၼင်ႇၼႆသေယဝ်ႉ၊ဢွၼ်ၵၼ်သုတ်ႉၵႂႃႇၸူးမၼ်းသေလႄႈၶုပ်ႉမူပ်ႇၵႃႈတီႈၽၢႆႇၼႃႈမၼ်းဢေႃႈ။-
ၶဝ်ၼၼ်ႉဢွၼ်ၵၼ်လၢတ်ႈလႄႈဝႃႈ၊ “ႁဝ်းၶႃႈမီးႁႃႈသိပ်းၵေႃႉလႄႈပဵၼ်ၵေႃႉဢၼ်ႁႅင်းယႂ်ႇၵူႈၵေႃႉဢေႃႈ။ ၶႅၼ်းတေႃႈပၼ်ဢၶႂၢင်ႉႁႂ်ႈႁဝ်းၶႃႈၵႂႃႇသွၵ်ႈႁႃသြႃႇၸဝ်ႈႁဝ်းၼၼ်ႉသေၵမ်း။ ၵူဝ်ဝိၺိၺ်ႇ ထႃႇဝရႃႉၽြႃး၊ ဢဝ်မၼ်းၵႂႃႇၶျႃးဝႆႉၵႃႈၼိူဝ်လွႆသေတီႈတီႈ၊ဢမ်ႇၼၼ်ၵေႃႈၵႃႈၼႂ်းႁူၺ်ႈသေတီႈတီႈၶႃႈဢေႃႈ၊” ဝႃႈၼင်ႇၼႆဢေႃႈ။ ဢေးလိသႄး၊ ၶိုၼ်းလၢတ်ႈလႄႈဝႃႈ၊ “သူဢမ်ႇလူဝ်ႇၵႂႃႇၵူၺ်း၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ၶဝ်ၼၼ်ႉဢွၼ်ၵၼ်တိုၵ်းယူင်းတေႃႇထိုင်ႁွတ်ႈမၼ်းပၼ်ဢၶႂၢင်ႉလႄႈပွႆႇၸႂ်ႉၶဝ်ၵႂႃႇဢေႃႈ။ ၶဝ်ႁႃႈသိပ်းၵေႃႉၼၼ်ႉဢွၼ်ၵၼ်သွၵ်ႈႁႃသၢမ်ဝၼ်းတဵမ်တဵမ်သေၵေႃႈဢမ်ႇထူပ်းဢမ်ႇႁၼ်။-
ၶဝ်ဢွၼ်ၵၼ်ၵႂႃႇၸူးတီႈ ဢေးလိသႄး၊ မိူဝ်ႈဢၼ်မၼ်းယင်းပႂ်ႉယူႇၵႃႈၼႂ်းဝဵင်း ယေႇရိၶူဝ်း၊ ၼၼ်ႉလႄႈ၊မၼ်းလၢတ်ႈတီႈၶဝ်လႄႈဝႃႈ၊ “ယႃႇပေၵႂႃႇဝႃႈၼႆၵဝ်လၢတ်ႈယဝ်ႉဢမ်ႇၸႂ်ႈႁိုဝ်း၊” ဝႃႈၼင်ႇၼႆဢေႃႈ။
ၵူၼ်းဝဵင်း ယေႇရိၶူဝ်း၊ ၵမ်ႈၽွင်ႈမႃးၸူးတီႈ ဢေးလိသႄး၊ လႄႈလၢတ်ႈဝႃႈ၊ “ဝဵင်းၼႆႉပဵၼ်ဝဵင်းဢၼ်သႃႇယႃႇလီငၢမ်းၵႃႈၼင်ႇဢၼ်ၸဝ်ႈႁဝ်းႁၼ်ယူႇၼႆႉတီႈၶႃႈဢေႃႈ။ ၵူၺ်းၵႃႈ၊ၼမ်ႉဢမ်ႇလီၶႃႈ။ လိၼ်ၵေႃႈဢမ်ႇၽုၵ်ႇဢမ်ႇသွမ်ႈၵိၼ်လႆႈလီလီတီႈၶႃႈ၊” ဝႃႈၼင်ႇၼႆဢေႃႈ။
မၼ်းလၢတ်ႈလႄႈဝႃႈ၊ “ဢဝ်ၼမ်ႉတဝ်ႈမႂ်ႇလုၵ်ႈၼိုင်ႈသႂ်ႇၵိူဝ်လႄႈမႃးတႃႉ၊” ဝႃႈၼင်ႇၼႆလႄႈ၊ၶဝ်ဢွၼ်ၵၼ်ဢဝ်ၼမ်ႉတဝ်ႈတင်းၵိူဝ်မႃးတီႈမၼ်းဢေႃႈ။-
မၼ်းဢွၵ်ႇၵႂႃႇတီႈၼမ်ႉဢွၵ်ႇႁူးလႄႈဢဝ်ၵိူဝ်သႂ်ႇၵႃႈတီႈၼမ်ႉၼၼ်ႉလႄႈဝႃႈ၊ “ ထႃႇဝရႃႉၽြႃး၊ မီးဢမိင်ႉလႄႈဝႃႈၸမ်ႉ၊ ‘ၵဝ်ႁႂ်ႈၼမ်ႉၼႆႉဝၢၼ်ဢေႃႈ။ ဢဝ်ၼႆႉၵႂႃႇၼႃႈတၢင်းဢၼ်ႁႂ်ႈတၢႆ၊တၢင်းဢၼ်ႁႂ်ႈပတိၵ်ႈသၼ်ႇထေႇလုၼၼ်ႉတၵ်းဢမ်ႇလႆႈမီး၊’ ဝႃႈၼႆယဝ်ႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၼမ်ႉၼၼ်ႉပဵၼ်ဢၼ်ဝၢၼ်ဢၼ်လီတေႃႇထိုင်ႁွတ်ႈဝၼ်းမိူဝ်ႈၼႆႉၸွမ်းၵႃႈၼင်ႇၵႂၢမ်းၸဝ်ႈဢၼ် ဢေးလိသႄး၊ သင်ႇလၢတ်ႈဝႆႉၼၼ်ႉဢေႃႈ။
ဢေးလိသႄး၊ ဢွၵ်ႇသေၵႃႈတီႈဝဵင်း ယေႇရိၶူဝ်း၊ ၶိုၼ်ႈၸူးတီႈဝဵင်း ပေႇသလႃႉ၊ လႄႈၼႂ်းမိူဝ်ႈဢၼ်မၼ်းယင်းတိုၵ်ႉပႆၸွမ်းသဵၼ်ႈတၢင်းၵႂႃႇယူႇၼၼ်ႉလုၵ်ႈဢွၼ်ႇၸၢႆးတင်းလၢႆဢွၵ်ႇသေၵႃႈတီႈဝဵင်းမႃးလႄႈဢွၼ်ၵၼ်ႁဵတ်းပျၢၵ်ႈတီႈမၼ်းလႄႈဝႃႈ၊ “ဢၢႆႈႁူဝ်လၢၼ်ႉ႟။ ဢွၵ်ႇပၢႆႈတႃႉ။ ဢၢႆႈႁူဝ်လၢၼ်ႉ႟။ ဢွၵ်ႇပၢႆႈတႃႉ၊” ဝႃႈၼင်ႇၼႆဢေႃႈ။
ဢေးလိသႄး၊ ဝၢႆႇၶိုၼ်းသေယဝ်ႉ၊တူၺ်းၶဝ်ၸေးၸေးသေလႄႈဢဝ်ၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ၵိၼ်ႇဝႃႈၶဝ်ဢေႃႈ။ မိူဝ်ႈၼၼ်ႉ၊မီမႄႈသွင်တူဝ်ဢွၵ်ႇသေၵႃႈၼႂ်းထိူၼ်ႇမႃးလႄႈၶူပ်းလုၵ်ႈဢွၼ်ႇၸိူဝ်းၼၼ်ႉတၢႆသီႇသိပ်းသွင်ၵေႃႉဢေႃႈ။
ဢေးလိသႄး၊ ၶိုၼ်ႈၵႂႃႇၸူးတီႈလွႆ ၵရမေႇလႃႉ၊ လႄႈလိုၼ်းၼၼ်ႉမိူဝ်းၵႂႃႇၵႃႈတီႈဝဵင်း သမႃႇရိ၊ သေဢေႃႈ။
ၼႂ်းပီဢၼ်ၶုၼ်ႁေႃၶမ်း ယူဝ်းသၽတ်ႉ၊ ဢုပ်ႉပိူင်ႇၸၢမ်ႇၸႃးမိူင်း ယုတႃႉ၊ လႆႈသိပ်းပႅတ်ႇပီၼၼ်ႉ၊ ယူဝ်းရမ်ႇ၊ လုၵ်ႈၸၢႆး ဢႃႇႁပ်ႉ၊ တႄႇၸႃႉၼင်ႈႁၢင်ႈၼင်ႈႁေႃမိူင်း ဢိသရေး၊ လႄႈဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း သမႃႇရိ၊ သိပ်းသွင်ပီဢေႃႈ။-
မၼ်းႁဵတ်းတုၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ဢေႃႈ။ ၵူၺ်းၵႃႈ၊မၼ်းဢမ်ႇႁၢႆႉမိူၼ်ၼင်ႇၸဝ်ႈပေႃႈမၼ်း၊ၸဝ်ႈမႄႈမၼ်း ယေႇၸပေႇလႃႉ၊ ၼၼ်ႉ။ မၼ်းပႄႇၽဵဝ်ႈပႅတ်ႈႁုၼ်ႇႁၢင်ႈသၢင်းထုၽြႃး ပႃႇလႃႉ၊ ဢၼ်ပေႃႈၸဝ်ႈမၼ်းႁဵတ်းဝႆႉပုၼ်ႈဢၼ်တၵ်းၵူဝ်းၵႂၢႆႇၼၼ်ႉဢေႃႈ။-
ၼႂ်းဝႃႈၼၼ်သေၵေႃႈမိူၼ်ၸိူဝ်ႉၼင်ႇၶုၼ်ႁေႃၶမ်း ယေႇရူဝ်းပုမ်ႇ၊ လုၵ်ႈၸၢႆး ၼေႇပတ်ႉ၊ ႁဵတ်းပူၼ်ႉမႃးၼၼ်ႉမၼ်းၵေႃႈဢွၼ်ႁူဝ်ၼႄတၢင်းႁႂ်ႈၵူၼ်းမဵဝ်း ဢိသရေး၊ ၽိတ်းပိူင်ႈဢေႃႈ။ မၼ်းဢမ်ႇပႄႇဢမ်ႇပႅတ်ႈ။
ၶုၼ်ႁေႃၶမ်း မေႇသႃႉ၊ မိူင်း မေႃႇၽႃႉ၊ ပဵၼ်ၵေႃႉဢၼ်လဵင်ႉသူဝ်းလႄႈလႆႈဢဝ်သူဝ်းဢွၼ်ႇသႅၼ်တူဝ်ဢိၵ်ႇတင်းၶူၼ်သူဝ်းဢၼ်လႆႈတီႈသူဝ်းသႅၼ်တူဝ်ၼၼ်ႉသၢၵ်ႈပၼ်တီႈၶုၼ်ႁေႃၶမ်း ဢိသရေး၊ ၵူႈပီဢေႃႈ။-
ၵူၺ်းၵႃႈ၊မိူဝ်ႈဢၼ်ၶုၼ်ႁေႃၶမ်း ဢႃႇႁပ်ႉ၊ တၢႆယဝ်ႉၼၼ်ႉၸိုင်၊ မေႇသႃႉ၊ လုၵ်ႉၽိုၼ်ႉၵူၼ်းမဵဝ်း ဢိသရေး၊ ဢေႃႈ။-
မိူဝ်ႈၼၼ်ႉ၊ၶုၼ်ႁေႃၶမ်း ယူဝ်းရမ်ႇ၊ ဢွၵ်ႇသေၵႃႈတီႈဝဵင်း သမႃႇရိ၊ ၵႂႃႇၸုၵႂႃႇႁွမ်းဢဝ်လုၵ်ႈသိုၵ်းၵူၼ်းမဵဝ်း ဢိသရေး၊ တင်းလၢႆဢေႃႈ။-
မၼ်းသင်ႇလၢတ်ႈၵႂႃႇတီႈၶုၼ်ႁေႃၶမ်း ယူဝ်းသၽတ်ႉ၊ မိူင်း ယုတႃႉ၊ လႄႈဝႃႈ၊ “ၶုၼ်ႁေႃၶမ်းမိူင်း မေႃႇၽႃႉ၊ ၼၼ်ႉလုၵ်ႉၽိုၼ်ႉၵဝ်ၶႃႈယဝ်ႉ။ ၸဝ်ႈတၵ်းၽွမ်ႉၵဝ်ၶႃႈသေယဝ်ႉတိုၵ်းမၼ်းၶႃႈႁိုဝ်း၊” ဝႃႈၼင်ႇၼႆလႄႈ၊မၼ်းၶိုၼ်းလၢတ်ႈလႄႈဝႃႈ။ “ၵဝ်ၶႃႈတၵ်းၶီႇသိုၵ်းၶိုၼ်ႈတိုၵ်းဢေႃႈ။ ၵဝ်ၶႃႈတၼ်းဝႆႉပုၼ်ႈဢၼ်တၵ်းပွႆႇၸႂ်ႉၵႂႃႇလူၺ်ႈၵၼ်တင်းၵူၼ်းသိုၵ်းၵဝ်ၶႃႈတင်းမႃႉၵဝ်ၶႃႈၸိူဝ်းၼၼ်ႉဢေႃႈ။-
ႁဝ်းတၵ်းၶီႇသိုၵ်းၸွမ်းသဵၼ်ႈတၢင်းလႂ်ၶိုၼ်ႈတိုၵ်းၶဝ်၊” ဝႃႈၼင်ႇၼႆဢေႃႈ။ ယူဝ်းရမ်ႇ၊ ၶိုၼ်းလၢတ်ႈလႄႈဝႃႈ၊ “ၸွမ်းသဵၼ်ႈတၢင်းထိူၼ်ႇ ဢေႇတုမ်ႇ၊ ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၼင်ႇၼၼ်လႄႈၶုၼ်ႁေႃၶမ်း ယူဝ်းရမ်ႇ၊ ဢိၵ်ႇတင်းၶုၼ်ႁေႃၶမ်း ယုတႃႉ၊ တင်းၶုၼ်ႁေႃၶမ်း ဢေႇတုမ်ႇ၊ ၸိူဝ်းၼၼ်ႉၽွမ်ႉၵၼ်ၶီႇသိုၵ်းၶိုၼ်ႈၵႂႃႇဢေႃႈ။ မိူဝ်ႈဢၼ်ၶိုၼ်ႈၵႂႃႇၶၢဝ်းတၢင်းလႆႈၸဵတ်းဝၼ်းယဝ်ႉၸိုင်၊ဢမ်ႇမီးၼမ်ႉပုၼ်ႈတႃႇတေၵိၼ်၊ဢိၵ်ႇတင်းတေဢွႆႇပၼ်တီႈတူဝ်သတ်းၶဝ်ၼၼ်ႉသေဢိတ်းယဝ်ႉ။-
ၶုၼ်ႁေႃၶမ်း ယူဝ်းရမ်ႇ၊ လၢတ်ႈလႄႈဝႃႈ၊ “ဢလူဝ်း႟။ ထႃႇဝရႃႉၽြႃး၊ ႁွင်ႉဢဝ်ႁဝ်းၶုၼ်ႁေႃၶမ်းသၢမ်ပႃးၼႆႉမႃးႁႂ်ႈလႆႈဢၢပ်ႈပၼ်ၼႂ်းမိုဝ်းၶုၼ်ႁေႃၶမ်း မေႃႇၽႃႉ၊ ယဝ်ႉလူင်ပႄႇ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်း ယူဝ်းသၽတ်ႉ၊ ထၢမ်လႄႈဝႃႈ၊ “ပုၼ်ႈဢၼ်ႁဝ်းတၵ်းတွင်ႈထၢမ်တီႈ ထႃႇဝရႃႉၽြႃး၊ ၸိုင်၊ၵႃႈတီႈၼႆႈဢမ်ႇမီးပရေႃးၽႅတ်ႈ သေတူၼ်သေပႃးႁိုဝ်း၊” ဝႃႈၼင်ႇၼႆဢေႃႈ။ ၶုၼ်ဢၼ်ပွင်ၵၢၼ်ၶုၼ်ႁေႃၶမ်း ယူဝ်းရမ်ႇ၊ ၼၼ်ႉၵေႃႉၼိုင်ႈလဝ်ႈလၢတ်ႈလႄႈဝႃႈ၊ “ ဢေးလိသႄး၊ လုၵ်ႈၸၢႆး သႃႇၽတ်ႉ၊ ၼၼ်ႉမီးယူႇၵႃႈတီႈၼႆႈဢေႃႈ။ မၼ်းပဵၼ်ၵေႃႉဢၼ်တၢင်တိၼ်တၢင်မိုဝ်း ဢေးလိယႃႉ၊ ဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်း ယူဝ်းသၽတ်ႉ၊ လၢတ်ႈဝႃႈ၊ “မၼ်းၼၼ်ႉပဵၼ်ပရေႃးၽႅတ်ႈ ဢၼ်ၸႅတ်ႈဢၼ်မၢၼ်ႇဢေႃႈ၊” ဝႃႈၼင်ႇၼႆသေယဝ်ႉ၊ၶုၼ်ႁေႃၶမ်းတင်းသၢမ်ပႃးၵႂႃႇၸူးတီႈ ဢေးလိသႄး၊ ဢေႃႈ။-
ဢေးလိသႄး၊ လၢတ်ႈတီႈၶုၼ်ႁေႃၶမ်း ဢိသရေး၊ ၼၼ်ႉလႄႈဝႃႈ၊ “ၵဝ်ၶႃႈၸၢပ်ႈသႅင်ႇၵၼ်တင်းၸဝ်ႈႁဝ်းၸိူဝ်ႉၼင်ႇႁိုဝ်။ ၵႂႃႇလႄႈတွင်ႈထၢမ်တီႈပရေႃးၽႅတ်ႈဢၼ်ပေႃႈၸဝ်ႈတင်းမႄႈၸဝ်ႈ၊ၸဝ်ႈႁဝ်းၶဝ်ယုမ်ႇယမ်ၼၼ်ႉတီႈၶႃႈတႃႉ၊” ဝႃႈၼင်ႇၼႆဢေႃႈ။ ယူဝ်းရမ်ႇ၊ ၶိုၼ်းလၢတ်ႈလႄႈဝႃႈ၊ “ယႃႇပေဝႃႈၼႆသေၵမ်း။ ထႃႇဝရႃႉၽြႃး၊ ႁွင်ႉဢဝ်ႁဝ်းၶုၼ်ႁေႃၶမ်းသၢမ်ပႃးၼႆႉမႃးဢၢပ်ႈပၼ်ၼႂ်းမိုဝ်းၶုၼ်ႁေႃၶမ်း မေႃႇၽႃႉ၊ ယဝ်ႉ၊” ဝႃႈၼင်ႇၼႆဢေႃႈ။
ဢေးလိသႄး၊ လၢတ်ႈလႄႈဝႃႈ၊ “ၵႃႈၼင်ႇဢၼ် ထႃႇဝရႃႉၽြႃး၊ ဢၼ်ၵဝ်ၶႃႈၵူဝ်းၵႂၢႆႇဢၼ်ဢသၢၵ်ႈလိပ်းယူႇၼႆႉၵဝ်ၶႃႈတိူင်ႇဝႃႈၸမ်ႉ၊သင်ဝႃႈၵဝ်ၶႃႈဢမ်ႇထွၵ်ႈလူၺ်ႈၼႃႈၶုၼ်ႁေႃၶမ်း ယူဝ်းသၽတ်ႉ၊ မိူင်း ယုတႃႉ၊ ဢၼ်ၽွမ်ႉၵၼ်မႃးလူၺ်ႈၵၼ်တင်းၸဝ်ႈႁဝ်းၼႆႉၸိုင်၊ၵဝ်ၶႃႈဢမ်ႇမီးလွင်ႈတၵ်းႁဵတ်းပုၼ်ႈၸဝ်ႈႁဝ်းၵႃႈသင်လႃးလႃး။-
မိူဝ်ႈလဵဝ်ၼႆႉႁွင်ႉဢဝ်ၵူၼ်းလဵတ်းတိင်ႇမႃးတီႈၵဝ်ၶႃႈတႃႉ၊” ဝႃႈၼင်ႇၼႆဢေႃႈ။ မိူဝ်ႈဢၼ်ၵူၼ်းလဵတ်းတိင်ႇယင်းလဵတ်းယူႇၼၼ်ႉၸိုင်၊တၼ်းၶူဝ်း ထႃႇဝရႃႉၽြႃး၊ ႁွတ်ႈထိုင်ၵႃႈၼိူဝ် ဢေးလိသႄး၊ သေယဝ်ႉ၊-
မၼ်းလၢတ်ႈလႄႈဝႃႈ၊ “ ထႃႇဝရႃႉၽြႃး၊ မီးဢမိင်ႉၸမ်ႉ၊ ‘ၶုတ်းၶုမ်တင်းလၢႆ ႁႂ်ႈၸွတ်ႇတူဝ်ႈၵႃႈၼႂ်းႁွင်ႈႁႅင်ႈၼႆႉတႃႉ။-
ပိၵ်ႉသမ်ႉသူဢမ်ႇႁၼ်ၽူၼ်ႁၼ်လူမ်းသေၵေႃႈႁွင်ႈႁႅင်ႈၼႆႉတၵ်းတဵမ်ဝႆႉတင်းၼမ်ႉသေယဝ်ႉ၊သူဢိၵ်ႇတင်းဝူဝ်းသူတင်းတူဝ်သတ်းသူတၵ်းတေလႆႈၵိၼ်ၼမ်ႉဢေႃႈ၊’ ဝႃႈၼင်ႇၼႆယဝ်ႉ။-
လွင်ႈတၢင်းၼႆႉပဵၼ်ဢၼ်ငၢႆႈပုၼ်ႈဢၼ် ထႃႇဝရႃႉၽြႃး၊ သၢင်ႈႁဵတ်းၼၼ်ႉဢေႃႈ။ ထႃႇဝရႃႉၽြႃး၊ သမ်ႉတၵ်းပၼ်ႁႂ်ႈသူဢွင်ႇသိုၵ်းၵႃႈၼိူဝ်ၵူၼ်းမဵဝ်း မေႃႇၽႃႉ၊ ၼၼ်ႉလူးၵွၼ်ႇဢေႃႈ။-
သူတၵ်းပႄႉၼႅင်ႇဢဝ်ဝဵင်းဢၼ်မၼ်ႈၶိူင်ႇဝဵင်းဢၼ်ႁၢင်ႈလီႁၢင်ႈငၢမ်းတင်းလၢႆသေယဝ်ႉ၊လႆႈပွမ်ႈတူၼ်ႈမၢၵ်ႇၶဝ်လႂ်၊လႆႈဢဝ်လိၼ်ထူမ်ၼမ်ႉမေႃႇၶဝ်လႂ်၊လႆႈဢဝ်တင်းမၢၵ်ႇႁိၼ်ထူမ်လႄႈယႃႉလိၼ်ဢၼ်လီၸိူဝ်းၼၼ်ႉပႅတ်ႈဢေႃႈ၊” ဝႃႈၼင်ႇၼႆဢေႃႈ။
ၼႂ်းဝၼ်းမိူဝ်ႈၽုၵ်ႈၶိင်ႇၵၢင်ၼႂ် ယၢမ်းမိူဝ်ႈဢၼ်သၢၵ်ႈလူႇၶိူင်ႈတၢင်းလူႇဢေႃႇၸႃႇတၢင်းၵိၼ်ၼၼ်ႉၼမ်ႉလုၵ်ႉသေၵႃႈတီႈသဵၼ်ႈတၢင်း ဢေႇတုမ်ႇ၊ မႃးလႄႈတဵမ်ၵႂႃႇတင်းမိူင်းဢေႃႈ။
မိူဝ်ႈဢၼ်ၵူၼ်း မေႃႇၽႃႉ၊ ၶဝ်ငိၼ်းလွင်ႈဢၼ်ၶုၼ်ႁေႃၶမ်းသၢမ်ပႃးၶီႇသိုၵ်းၶိုၼ်ႈမႃးၼၼ်ႉၸိုင်၊ႁႂ်ႈၵူၼ်းၸၢႆးဢၼ်ယိပ်းၵမ်လၢၵ်ႈၼၢၵ်ႈလႆႈၸဵမ်ၵေႃႉလဵၵ်ႉၵေႃႉယႂ်ႇၵႃႈမီးၼၼ်ႉၸုတုမ်သေလႄႈၶျႃးပၢင်တပ်ႉၶဝ်ပုၼ်ႈတၵ်းႁႄႉၶွပ်ႇၼမ်ႉလႅၼ်လိၼ်ၶဝ်ဢေႃႈ။-
မိူဝ်ႈၶိင်ႇၵၢင်ၼႂ်ၸဝ်ႉၶဝ်တိုၼ်ႇမႃးၼၼ်ႉၸိုင်၊ငဝ်းဢရွင်ႇတႃဝၼ်းထွင်ႇသႂ်ႇၼမ်ႉၼၼ်ႉလႄႈတူၺ်းၵႂႃႇႁၼ်ဢၼ်လႅင်ဝႆႉမိူၼ်ၸိူဝ်ႉၼင်ႇလိူတ်ႈဢေႃႈ။-
ၶဝ်လၢတ်ႈလႄႈဝႃႈ၊ “ဢၼ်ၼၼ်ႉပဵၼ်လိူတ်ႈဢေႃႈ။ ရၢၼ်ႇသူႇႁဝ်းသၢမ်မူႇၼၼ်ႉမူႇၼိုင်ႈလႄႈမူႇၼိုင်ႈတိုၵ်းတေႃးၵၼ်၊ဢဝ်တၢႆၵၼ်ပႅတ်ႈယဝ်ႉ။ ဢွၼ်ၵၼ်ၵႂႃႇႁိမ်ႁူင်ႇဢဝ်တႃႉႁဝ်း၊” ဝႃႈၼင်ႇၼႆဢေႃႈ။
ၵူၺ်းၵႃႈ၊မိူဝ်ႈဢၼ်ၶဝ်ႁွတ်ႈထိုင်ၵႃႈတီႈတပ်ႉၵူၼ်းမဵဝ်း ဢိသရေး၊ ၶဝ်ၵႂႃႇၼၼ်ႉၸိုင်၊ၵူၼ်းမဵဝ်း ဢိသရေး၊ တင်းလၢႆတိုၵ်းတေႃးၶဝ်လႄႈလိုပ်ႈႁေႃႈၶဝ်ပွၵ်ႈၶိုၼ်းဢေႃႈ။ ၵူၼ်းမဵဝ်း ဢိသရေး၊ တင်းလၢႆလိုပ်ႈလမ်းၸွမ်းလႄႈၶႃႈၽၼ်းၵူၼ်းမဵဝ်း မေႃႇၽႃႉ၊ တင်းလၢႆတၢႆသေယဝ်ႉ၊-
ဢွၼ်ၵၼ်ၵိူၼ်ႇယႃႉဝဵင်းတင်းလၢႆပႅတ်ႈဢေႃႈ။ မိူဝ်ႈဢၼ်ၶဝ်ၽႃႇလတ်းတူင်ႈၼႃးလိၼ်လီၵႂႃႇၼၼ်ႉၵူၼ်းၵူႈၵေႃႉဢွၼ်ၵၼ်ဢဝ်မၢၵ်ႇႁိၼ်ထိမ်ႈသႂ်ႇၵႃႈၼႂ်းၼႃးတင်းမူတ်းၵႂႃႇတေႃႇထိုင်ႁွတ်ႈထၢၼ်ႈပေႃးႁူမ်ႇသုမ်ႇဝႆႉဢေႃႈ။ ၶဝ်ယင်းဢဝ်လိၼ်ထူမ်ပႅတ်ႈၼမ်ႉဢွၵ်ႇႁူးတင်းလၢႆလႄႈပွမ်ႈတူၼ်ႈမၢၵ်ႇတင်းလၢႆလူမ်ႉပႅတ်ႈဢေႃႈ။ ၵႃႈတီႈဝဵင်း ၵိရႃႉႁရိတ်ႉ၊ ဝဵင်းလဵဝ်ၵူၺ်း၊မီးၽႃႁိၼ်လႂ်ၵိုတ်းၵျၢၼ်ႇဝႆႉလႄႈၵူၼ်းယိပ်းၵူင်ၵွၼ်တင်းလၢႆဢွၼ်ၵၼ်ၵႂႃႇလႄႈပိုတ်းယိုဝ်းဝဵင်းၼၼ်ႉဢေႃႈ။
မိူဝ်ႈဢၼ်ၶုၼ်ႁေႃၶမ်းမိူင်း မေႃႇၽႃႉ၊ လႆႈႁုလွင်ႈဢၼ်မၼ်းသုမ်းသိုၵ်းယဝ်ႉၸိုင်၊မၼ်းႁွင်ႉဢဝ်ၵူၼ်းယိပ်းလၢပ်ႇၸဵတ်းပၢၵ်ႇၵေႃႉလႄႈဢဝ်ႁႅင်းဢွၵ်ႇႁႂ်ႈလႆႈယႃႉတပ်ႉၶုၼ်ႁေႃၶမ်း ဢေႇတုမ်ႇ၊ ပုၼ်ႈတၵ်းလွတ်ႈဢွၵ်ႇသေၵေႃႈ၊မၼ်းဢမ်ႇယႃႉလႆႈ။-
ပိူဝ်ႈၼႆလႄႈမၼ်းဢဝ်လုၵ်ႈၸၢႆးတူၼ်ႈမၼ်းဢၼ်ထိူၵ်ႈၸၢမ်ႇႁၢင်ႈၸၢမ်ႇႁေႃတၢင်တူဝ်မၼ်းၼၼ်ႉႁဵတ်းတၢင်းဢၼ်သၢၵ်ႈလူႇတီႈၽြႃးမဵဝ်း မေႃႇၽႃႉ၊ ဢေႃႈ။ ၵူၼ်းမဵဝ်း ဢိသရေး၊ တင်းလၢႆၵူဝ်ႁႄသၼ်ႇဝႆၼႃႇလူင်လၢင်လႄႈဢွၼ်ၵၼ်သုတ်ႉႁူၼ်သေၵႃႈတီႈဝဵင်းၼၼ်ႉသေယဝ်ႉ၊ၶိုၼ်းမိူဝ်းၸူးတီႈမိူင်းတူဝ်ၸဝ်ႈၵဝ်ႇသေဢေႃႈ။
မႄႈမၢႆႈၼႂ်းမူႇၸုမ်းပရေႃးၽႅတ်ႈ ၸိူဝ်းၼၼ်ႉၵေႃႉၼိုင်ႈ မႃးၸူးတီႈ ဢေးလိသႄး၊ လႄႈလၢတ်ႈဝႃႈ၊ “ၸဝ်ႈ႟။ ၽူဝ်ၵဝ်ၶႃႈတၢႆၵႂႃႇယဝ်ႉတီႈၶႃႈဢေႃႈ။ ၸွမ်းၼင်ႇၸဝ်ႈႁဝ်းႁုယူႇၼၼ်ႉမၼ်းပဵၼ်ၵေႃႉဢၼ်ရူဝ်ႇသေႇၵူဝ်ယမ်ၽြႃးပဵၼ်ၸဝ်ႈတီႈၶႃႈဢေႃႈ။ မိူဝ်ႈလဵဝ်ၼႆႉၸဝ်ႈၼီႈမႃးႁႂ်ႈလႆႈဢဝ်လုၵ်ႈၸၢႆးၵဝ်ၶႃႈသွင်ၵေႃႉၵႂႃႇၶၢမ်ႇႁဵတ်းၶႃႈပုၼ်ႈဢၼ်တၵ်းတႅၼ်းၼီႈၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ဢေးလိသႄး၊ ၵေႃႈထၢမ်လႄႈဝႃႈ၊ “ၵဝ်တၵ်းလႆႈႁဵတ်းၸိူဝ်ႉၼင်ႇႁိုဝ်ပုၼ်ႈမႂ်း။ လၢတ်ႈလူး။ ၵႃႈၼႂ်းႁိူၼ်းမႂ်းၼၼ်ႉမႂ်းယင်းမီးဢုၵ်ႉၸႃႇၵႃႈသင်၊” ဝႃႈၼင်ႇၼႆသေယဝ်ႉ၊မၼ်းၼၼ်ႉၶိုၼ်းလၢတ်ႈလႄႈဝႃႈ။ “လိူဝ်သေမေႃႈၼမ်ႉမၼ်းသၢၼ်ႇလုၼ်ႇဢွၼ်ႇလုၵ်ႈၼိုင်ႈၵဝ်ၶႃႈဢမ်ႇမီးၵႃႈသင်သေၸိူဝ်ႉသေပိူင်ၶႃႈ၊” ဝႃႈၼင်ႇၼႆဢေႃႈ။
ဢေးလိသႄး၊ လၢတ်ႈလႄႈဝႃႈ၊ “မႂ်းၵႂႃႇယိမ်မေႃႈပဝ်ႇတီႈၵူၼ်းႁိူၼ်းၸမ်ၵၼ်တင်းမႂ်းတင်းသဵင်ႈတင်းလူင်ၸိူဝ်းၼၼ်ႉဢဝ်မႃးၼမ်ၼမ်တႃႉ။-
လိုၼ်းၼၼ်ႉ၊သူမႄႈလုၵ်ႈတင်းသၢမ်ၵေႃႉတၵ်းလႆႈၶဝ်ႈၵႃႈၼႂ်းႁိူၼ်းသေလႄႈဢိုတ်းႁပ်းၽၵ်းတူသေယဝ်ႉ၊ဢဝ်ၼမ်ႉမၼ်းၼၼ်ႉထွၵ်ႇသႂ်ႇၵႃႈၼႂ်းမေႃႈၵႃႈမီးၸိူဝ်းၼၼ်ႉႁႂ်ႈမၼ်းတဵမ်တဵမ်လႄႈဢဝ်ၶပ်ႉၵၼ်ဝႆႉတႃႉ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈမႄႈယိင်းၼၼ်ႉၶဝ်ႈၵႃႈၼႂ်းႁိူၼ်းႁူမ်ႈလူၺ်ႈၵၼ်တင်းလုၵ်ႈၸၢႆးမၼ်းၸိူဝ်းၼၼ်ႉသေလႄႈဢိုတ်းႁပ်းၽၵ်းတူဝႆႉယဝ်ႉၸင်ႇဢဝ်ၼမ်ႉမၼ်းသၢၼ်ႇလုၼ်ႇၼၼ်ႉထွၵ်ႇသႂ်ႇၵႃႈၼႂ်းမေႃႈၸိူဝ်းဢၼ်လုၵ်ႈၸၢႆးမၼ်းယိမ်မႃးၼၼ်ႉဢေႃႈ။-
မိူဝ်ႈဢၼ်မေႃႈၵႃႈမီးၸိူဝ်းၼၼ်ႉတဵမ်မူတ်းယဝ်ႉၸိုင်၊မၼ်းလၢတ်ႈတီႈလုၵ်ႈၸၢႆးမၼ်းလႄႈဝႃႈ၊ “ဢဝ်မေႃႈမႃးထႅင်ႈလူး၊” ဝႃႈၼင်ႇၼႆလႄႈ၊လုၵ်ႈၸၢႆးမၼ်းၶိုၼ်းဝႃႈ၊ “မေႃႈဢမ်ႇမီးထႅင်ႈသေလုၵ်ႈၶႃႈယဝ်ႉ၊” မိူဝ်ႈဢၼ်ဝႃႈၼင်ႇၼႆၼၼ်ႉၸိုင်၊ၼမ်ႉမၼ်းၼၼ်ႉယူတ်းႁႅင်ႈလႄႈဢမ်ႇလႆထႅင်ႈယဝ်ႉ။-
မႄႈယိင်းၼၼ်ႉၵႂႃႇမွၵ်ႇလၢတ်ႈလွင်ႈၼၼ်ႉတီႈပရေႃးၽႅတ်ႈ ဢေးလိသႄး၊ လႄႈ ဢေးလိသႄး၊ ၵေႃႈလၢတ်ႈလႄႈဝႃႈ၊ “ဢဝ်ၼမ်ႉမၼ်းၼႆႉၶၢႆသေလႄႈတႅၼ်းၼီႈမႂ်းတႃႉ။ ငိုၼ်းဢၼ်လိူဝ်ၼၼ်ႉတၵ်းၵုမ်ႇလဵင်ႉဢသၢၵ်ႈသူမႄႈလုၵ်ႈယူႇဢေႃႈ၊” ဝႃႈၼင်ႇၼႆဢေႃႈ။
ဝၼ်းၼိုင်ႈ ဢေးလိသႄး၊ ၵႂႃႇၵႃႈတီႈဝဵင်း သုၼိမ်ႇ၊ တီႈဢၼ်မႄႈယိင်းသထေးၵေႃႉၼိုင်ႈယူႇၼၼ်ႉဢေႃႈ။ မႄႈယိင်းၼၼ်ႉၽိတ်ႈပၢင်းမၼ်းႁႂ်ႈလႆႈလဵင်ႉၶဝ်ႈၼမ်ႉတၢင်းၵိၼ်ဢေႃႈ။ ဢဝ်ၼၼ်ႉၵႂႃႇၼႃႈလႄႈမိူဝ်ႈဢၼ်မၼ်းၵႂႃႇၵႃႈတီႈဝဵင်း သုၼိမ်ႇ၊ ၵူႈပွၵ်ႈၵူႈပွၵ်ႈၼၼ်ႉၸိုင်၊မၼ်းၸၢင်ႈဝႄႈၶဝ်ႈၵႃႈတီႈၼၼ်ႈႁႂ်ႈလႆႈၵိၼ်ၶဝ်ႈၵိၼ်ၼမ်ႉဢေႃႈ။-
မႄႈယိင်းၼၼ်ႉလၢတ်ႈတီႈၽူဝ်မၼ်းလႄႈဝႃႈ၊ “တူၺ်းလူး။ ၵဝ်ၶႃႈႁုသၢႆငၢႆလွင်ႈဢၼ်ၵေႃႉဢၼ်ယၢမ်ႈၶဝ်ႈယၢမ်ႈဢွၵ်ႇၵႃႈတီႈႁဝ်းၼႆႉပဵၼ်ၵူၼ်းမူတ်းၸၢင်ႇၽြႃးပဵၼ်ၸဝ်ႈဢေႃႈ။-
ပိူဝ်ႈၼႆလႄႈႁဝ်းဢွၼ်ၵၼ်ႁဵတ်းလုၵ်းလဵၵ်ႉလဵၵ်ႉလုၵ်းၼိုင်ႈၵႃႈၼိူဝ်လင်ၶႃးႁိူၼ်းလႄႈဢဝ်ၽႃလွမ်ႉဝႆႉသေယဝ်ႉ၊ဢဝ်ၵူႇ၊ဢဝ်ၽိူၼ်၊လႄႈတင်ႇၼင်ႈဢိၵ်ႇတင်းၵွၵ်းၽႆးလႂ်ဝႆႉပုၼ်ႈမၼ်းတႃႉႁဝ်း။ မိူဝ်ႈဢၼ်မၼ်းဝႄႈၶဝ်ႈမႃးသူႇမႃးၸႂ်းႁဝ်းၼၼ်ႉႁႂ်ႈမၼ်းလႆႈယူႇသဝ်းၵႃႈတီႈၼၼ်ႈတႃႉႁဝ်း၊” ဝႃႈၼင်ႇၼႆဢေႃႈ။
ဝၼ်းၼိုင်ႈ ဢေးလိသႄး၊ ႁွတ်ႈမႃးၵႃႈတီႈဝဵင်း သုၼိမ်ႇ၊ သေယဝ်ႉ၊ၶိုၼ်ႈၵႂႃႇၵႃႈတီႈၼႂ်းလုၵ်းၼၼ်ႉလႄႈလိုဝ်ႈသဝ်းယူႇဢေႃႈ။-
မၼ်းၸႂ်ႉၵူၼ်းဢွၼ်ႇမၼ်း ၵေႇႁႃႇၸိ၊ ႁႂ်ႈၵႂႃႇႁွင်ႉဢဝ်မႄႈယိင်းၼၼ်ႉမႃးဢေႃႈ။ မိူဝ်ႈဢၼ်မႄႈယိင်းၼၼ်ႉၸုၵ်းယူႇၵႃႈတီႈၽၢႆႇၼႃႈမၼ်းၼၼ်ႉၸိုင်၊-
မၼ်းလၢတ်ႈတီႈ ၵေႇႁႃႇၸိ၊ ႁႂ်ႈထၢမ်တီႈမႄႈယိင်းၼၼ်ႉလႄႈဝႃႈ၊ “ၵွပ်ႈပိူဝ်ႈဢၼ်မႂ်းလဵင်ႉလူလုမ်းလႃးတီႈႁဝ်းထၼ်ႇၼႆႉၼၼ်ႉၸိုင်၊ၵဝ်တၵ်းလႆႈႁဵတ်းၵႃႈသင်ႁႂ်ႈလႆႈတွပ်ႇတႅၼ်းၵျေးၸူးမႂ်း။ ၸွင်ႇၵဝ်တၵ်းလႆႈၶဝ်ႈလၢတ်ႈပၼ်တီႈၶုၼ်ႁေႃၶမ်း၊ဢမ်ႇၼၼ်တီႈၸဝ်ႈၵွၼ်းတပ်ႉသိုၵ်းပုၼ်ႈဢၵျူဝ်းမႂ်းႁိုဝ်း၊” ဝႃႈၼင်ႇၼႆဢေႃႈ။ မႄႈယိင်းၼၼ်ႉၶိုၼ်းလၢတ်ႈလႄႈဝႃႈ၊ “ၵႃႈၼင်ႇဢၼ်ၵဝ်ၶႃႈလူဝ်ႇၼၼ်ႉၵဝ်ၶႃႈလႆႈၶၢမ်ႇဢဝ်ၵႃႈၼႂ်းပီႈၼွင်ႉၵဝ်ၶႃႈယူႇၵူႈၸိူဝ်ႉၵူႈပိူင်ၶႃႈဢေႃႈ၊” ဝႃႈၼင်ႇၼႆဢေႃႈ။
ဢေးလိသႄး၊ ထၢမ်တီႈ ၵေႇႁႃႇၸိ၊ လႄႈဝႃႈ၊ “ပေႃးပဵၼ်ၸိူဝ်ႉၼင်ႇၼႆၸိုင်၊ၵဝ်ထုၵ်ႇလီႁဵတ်းၵႃႈသင်ပုၼ်ႈမၼ်း၊” ဝႃႈၼင်ႇၼႆလႄႈ။ ၵေႇႁႃႇၸိ၊ ၶိုၼ်းလၢတ်ႈလႄႈဝႃႈ၊ “မၼ်းဢမ်ႇမီးလုၵ်ႈမီးလၢင်းၶႃႈ။ ၽူဝ်မၼ်းၵေႃႈထဝ်ႈၼႃႇယဝ်ႉၶႃႈဢေႃႈ၊” ဝႃႈၼင်ႇၼႆဢေႃႈ။
မၼ်းၸင်ႇလၢတ်ႈလႄႈဝႃႈ၊ “ႁွင်ႉမၼ်းမႃးတႃႉ၊” ဝႃႈၼင်ႇၼႆလႄႈ၊မႄႈယိင်းၼၼ်ႉမႃးၸုၵ်းယူႇၵႃႈတီႈႁူးၽၵ်းတူဢေႃႈ။-
ဢေးလိသႄး၊ ၵေႃႈလၢတ်ႈတီႈမႄႈယိင်းၼၼ်ႉလႄႈဝႃႈ၊ “ၼႂ်းပီၼႃႈၶွပ်ႈၶူပ်ႇၶိင်ႇၼႆႉၼၼ်ႉမႂ်းတၵ်းတေလႆႈဢုမ်ႈလုၵ်ႈၸၢႆးဢေႃႈ၊” ဝႃႈၼင်ႇၼႆဢေႃႈ။ မႄႈယိင်းၼၼ်ႉၶိုၼ်းလၢတ်ႈလႄႈဝႃႈ၊ “ၸဝ်ႈတီႈၶႃႈ။ ယႃႇပေလၢတ်ႈၵႂၢမ်းမုသႃႇတီႈၵဝ်ၶႃႈသေၵမ်း။ ၸဝ်ႈပဵၼ်ၵူၼ်းၽြႃးပဵၼ်ၸဝ်ႈၶႃႈဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊မိူဝ်ႈဢၼ်ၶွပ်ႈၶူပ်ႇၼႂ်းပီၼႃႈၼၼ်ႉၸိုင်၊မႄႈယိင်းၼၼ်ႉၵိူတ်ႇလဵင်ႉလုၵ်ႈၸၢႆးမႃးမႅၼ်ႈၵႃႈၼင်ႇဢၼ် ဢေးလိသႄး၊ လၢတ်ႈဝႆႉၼၼ်ႉဢေႃႈ။
လုၵ်ႈၸၢႆးၼၼ်ႉယႂ်ႇမႃး၊ပဵၼ်လုၵ်ႈဢွၼ်ႇႁၢႆးသေယဝ်ႉ၊ဝၼ်းၼိုင်ႈမၼ်းၵႂႃႇၸူးတီႈပေႃႈမၼ်းဢၼ်မီးယူႇၵႃႈတီႈတူင်ႈၼႃးလူၺ်ႈၵၼ်တင်းၵူၼ်းပၢတ်ႇၶဝ်ႈတင်းလၢႆဢေႃႈ။-
မၼ်းၼၼ်ႉႁွင်ႉသႅၼ်ႇတီႈပေႃႈမၼ်းလႄႈဝႃႈ၊ “ဢလူဝ်း။ ႁူဝ်မဝ်းဢေႃႈ။ ႁူဝ်မဝ်းဢေႃႈ၊” ဝႃႈၼင်ႇၼႆဢေႃႈ။ ပေႃႈမၼ်းလၢတ်ႈတီႈၵူၼ်းၸႂ်ႉၵူၼ်းသွႆမၼ်းၵေႃႉၼိုင်ႈလႄႈဝႃႈ၊ “ဢဝ်ၵႂႃႇၸူးတီႈမႄႈမၼ်းသေ၊” ဝႃႈၼင်ႇၼႆဢေႃႈ။-
ၵူၼ်းၸႂ်ႉၵူၼ်းသွႆၼၼ်ႉဢဝ်မၼ်းမိူဝ်းၸူးတီႈမႄႈမၼ်းသေယဝ်ႉ၊မၼ်းၼၼ်ႉၼင်ႈယူႇၵႃႈၼိူဝ်တၵ်းမႄႈမၼ်းတေႃႇထိုင်ႁွတ်ႈၶိင်ႇၵၢင်ဝၼ်းတဵင်ႈလႄႈတၢႆၵႂႃႇသေဢေႃႈ။-
မႄႈမၼ်းၼၼ်ႉဢုမ်ႈလုၵ်ႈမၼ်းၶိုၼ်ႈၵႂႃႇတီႈႁွင်ႈၼွၼ်း ဢေးလိသႄး၊ လႄႈဢဝ်ၼွၼ်းဝႆႉၵႃႈၼိူဝ်ၵူႇသေယဝ်ႉ၊ဢိုတ်းႁပ်းၽၵ်းတူသေလႄႈဢွၵ်ႇၵႂႃႇဢေႃႈ။-
မၼ်းႁွင်ႉၽူဝ်မၼ်းမႃးလႄႈလၢတ်ႈဝႃႈ၊ “သူင်ႇၵူၼ်းဢွၼ်ႇၵေႃႉၼိုင်ႈတင်းမႃႉလီႈတူဝ်ၼိုင်ႈမႃးတီႈၵဝ်ၶႃႈတႃႉ။ ၵဝ်ၶႃႈလူဝ်ႇၵႂႃႇၸူးတီႈပရေႃးၽႅတ်ႈ ဢေးလိသႄး၊ ဢေႃႈ။ ၵဝ်ၶႃႈတၵ်းၶိုၼ်းပွၵ်ႈမႃးၶၼ်ၶၼ်ၽႂ်းၽႂ်းယူႇၶႃႈ၊” ဝႃႈၼင်ႇၼႆဢေႃႈ။
ၽူဝ်မၼ်းၶိုၼ်းလၢတ်ႈလႄႈဝႃႈ၊ “ႁဵတ်းသင်လႄႈမႂ်းၼႅတ်ႈၵႂႃႇဝၼ်းမိူဝ်ႈၼႆႉၸိူဝ်ႉၼင်ႇႁိုဝ်။ ဝၼ်းလိူၼ်မႂ်ႇၵေႃႈဢမ်ႇၸႂ်ႈ။ ဝၼ်းၵမ်သိၼ်ၵေႃႈဢမ်ႇၸႂ်ႈ၊” ဝႃႈၼင်ႇၼႆဢေႃႈ။ မၼ်းၶိုၼ်းလၢတ်ႈလႄႈဝႃႈ၊ “မၼ်းဢမ်ႇပဵၼ်ၵႃႈသင်ၵူၺ်း၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈမႄႈယိင်းၼၼ်ႉႁၢင်ႈၵွပ်းမႃႉလီႈသေယဝ်ႉ၊ၸႂ်ႉၵူၼ်းဢွၼ်ႇၼၼ်ႉလႄႈဝႃႈ၊ “ႁေႃႈမႃႉလီႈၵႂႃႇၶၼ်ၶၼ်ၽႂ်းၽႂ်းတႃႉ။ ပေႃးၵဝ်ယင်းဢမ်ႇဝႃႈၵႃႈသင်ၸိုင်၊ယႃႇပေၵႂႃႇၵွႆႈၵႂႃႇထိူင်း၊” ဝႃႈၼင်ႇၼႆသေယဝ်ႉ၊-
မၼ်းဢွၵ်ႇၵႂႃႇၸူးတီႈလွႆ ၵရမေႇလႃႉ၊ တီႈဢၼ် ဢေးလိသႄး၊ ယူႇၼၼ်ႉဢေႃႈ။ ဢေးလိသႄး၊ ႁၼ်မႄႈယိင်းၼၼ်ႉၸဵမ်မိူဝ်ႈဢၼ်ယင်းမီးတီႈၵႆၼၼ်ႉလႄႈလၢတ်ႈတီႈၵူၼ်းဢွၼ်ႇမၼ်း ၵေႇႁႃႇၸိ၊ လႄႈဝႃႈ၊ “တူၺ်းလူး။ မႄႈယိင်းဝဵင်း သုၼိမ်ႇ၊ ၼၼ်ႉမႃးယူႇဢေႃႈ။-
ၶုၼ်ႇလႅၼ်ႈၵႂႃႇႁပ်ႉႁူဝ်တၢင်းမၼ်းလႄႈထၢမ်ဝႃႈ၊ ‘တူဝ်မႂ်းယူႇလီယူႇႁိုဝ်း။ ၽူဝ်မႂ်းယူႇလီယူႇႁိုဝ်း။ လုၵ်ႈဢွၼ်ႇယူႇလီယူႇႁိုဝ်း၊’ ဝႃႈၼႆတႃႉ၊” ဝႃႈၼင်ႇၼႆဢေႃႈ။ မၼ်းၶိုၼ်းလၢတ်ႈလႄႈဝႃႈ၊ “ယူႇလီယူႇဢေႃႈ၊” ဝႃႈၼင်ႇၼႆသေၵေႃႈ၊-
မိူဝ်ႈဢၼ်မၼ်းႁွတ်ႈထိုင်ၵႃႈတီႈ ဢေးလိသႄး၊ ၸိုင်၊မၼ်းၵွတ်ႇတိၼ် ဢေးလိသႄး၊ ဢေႃႈ။ ၵေႇႁႃႇၸိ၊ ဢၢင်ႈတၵ်းတဝ်ႉဢီးမၼ်းပႅတ်ႈလႄႈ၊ ဢေးလိသႄး၊ လၢတ်ႈလႄႈဝႃႈ၊ “ယႃႇပေႁၢမ်ႈမၼ်း။ မၼ်းမီးတၢင်းဢၼ်ၶီၸႂ်ၶူမ်ၸႂ်ၼႃႇၼၼ်ႉမႂ်းဢမ်ႇႁၼ်ႁိုဝ်း။ ထႃႇဝရႃႉၽြႃး၊ ယင်းသိူင်ႇဝႆႉလွင်ႈတၢင်းၼႆႉလႄႈယင်းဢမ်ႇၼႄပျႃးတီႈၵဝ်၊” ဝႃႈၼင်ႇၼႆဢေႃႈ။
မႄႈယိင်းၼၼ်ႉလၢတ်ႈလႄႈဝႃႈ၊ “ၸဝ်ႈတီႈၶႃႈ။ ၸွင်ႇၵဝ်ၶႃႈလႆႈယွၼ်းဢဝ်သူးဢၼ်ပဵၼ်လုၵ်ႈၸၢႆးတီႈၸဝ်ႈႁဝ်းတီႈၶႃႈႁိုဝ်း။ ၵဝ်ၶႃႈယင်းဝႃႈ၊ ‘ယႃႇပေပႅတ်ႉလႅၼ်ၵဝ်ၶႃႈသေၵမ်း၊’ ဝႃႈၼႆဢမ်ႇၸႂ်ႈၶႃႈႁိုဝ်း၊” ဝႃႈၼင်ႇၼႆဢေႃႈ။
ဢေးလိသႄး၊ ဝၢႆႇၸူးတီႈ ၵေႇႁႃႇၸိ၊ လႄႈဝႃႈ၊ “ႁတ်ႉဢႅဝ်မႂ်းလႄႈယိပ်းၵမ်ၶွၼ်ႉတဝ်ႉၵဝ်သေယဝ်ႉ၊ၵႂႃႇၶၼ်ၶၼ်ၽႂ်းၽႂ်းတႃႉ။ ယႃႇပေၵိုတ်းသဝ်းလႄႈတူင်ႉတၵ်ႉၽူႈလႂ်သေၵေႃႉသေၵူၼ်း။ ပေႃးပိူၼ်ႈတၵ်ႉလၢတ်ႈတေႃႇမႂ်းၸိုင်၊ယႃႇပေၶိုၼ်းတွပ်ႇ။ ၵႂႃႇၸူးတီႈႁိူၼ်းၼၼ်ႉလႄႈဢဝ်ၶွၼ်ႉတဝ်ႉၵဝ်ၼႆႉတၢင်ႇသႂ်ႇၵႃႈၼိူဝ်ၼႃႈလုၵ်ႈဢွၼ်ႇၼၼ်ႉတႃႉ၊” ဝႃႈၼင်ႇၼႆဢေႃႈ။
မႄႈလုၵ်ႈဢွၼ်ႇၼၼ်ႉၵေႃႈလၢတ်ႈလႄႈဝႃႈ၊ “ၵဝ်ၶႃႈပႃးတင်းၸႂ်ဢၼ်ၼပ်ႉယမ်လႄႈတိူင်ႇဝႃႈၵႃႈတီႈ ထႃႇဝရႃႉၽြႃး၊ ဢၼ်ဢသၢၵ်ႈလိပ်းယူႇ၊ဢိၵ်ႇတင်းၵႃႈတီႈၸဝ်ႈႁဝ်းလႄႈဝႃႈ၊ ‘ယင်းဢမ်ႇပႃးၸဝ်ႈႁဝ်းလႄႈၵဝ်ၶႃႈတၵ်းဢမ်ႇဢွၵ်ႇၵႂႃႇၶႃႈၵူၺ်း၊’ ” ဝႃႈၼင်ႇၼႆသေယဝ်ႉ၊ ဢေးလိသႄး၊ ၵေႃႈလုၵ်ႉလႄႈၸွမ်းမႄႈယိင်းၼၼ်ႉၵႂႃႇဢေႃႈ။-
ၵေႇႁႃႇၸိ၊ ၵႂႃႇဢွၼ်တၢင်းလႄႈဢဝ်ၶွၼ်ႉတဝ်ႉတၢင်ႇသႂ်ႇဝႆႉၵႃႈၼိူဝ်ၼႃႈလုၵ်ႈဢွၼ်ႇၼၼ်ႉသေၵေႃႈလုၵ်ႈဢွၼ်ႇၼၼ်ႉဢမ်ႇဢွၵ်ႇသဵင်၊ဢမ်ႇႁုတူဝ်။ ပိူဝ်ႈၼႆလႄႈမၼ်းၶိုၼ်းပွၵ်ႈၵႂႃႇႁႂ်ႈလႆႈႁူပ်ႉထူပ်းၵၼ်တင်း ဢေးလိသႄး၊ သေလႄႈလၢတ်ႈဝႃႈ၊ “လုၵ်ႈဢွၼ်ႇၼၼ်ႉဢမ်ႇတိုၼ်ႇၶႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ် ဢေးလိသႄး၊ ႁွတ်ႈထိုင်ၵႂႃႇၼၼ်ႉၸိုင်၊မၼ်းၶဝ်ႈၵႂႃႇၵႃႈၼႂ်းလုၵ်းလဵၵ်ႉလဵၵ်ႉၼၼ်ႉၵေႃႉလဵဝ်လႄႈႁၼ်လုၵ်ႈဢွၼ်ႇၼၼ်ႉတၢႆယဝ်ႉလႄႈဢဝ်ၼွၼ်းဝႆႉၵႃႈၼိူဝ်ၵူႇမၼ်းၼၼ်ႉဢေႃႈ။-
မၼ်းဢိုတ်းႁပ်းၽၵ်းတူသေယဝ်ႉ၊သူးတွင်းတီႈ ထႃႇဝရႃႉၽြႃး၊ ဢေႃႈ။-
ၵမ်းၼၼ်ႉ၊မၼ်းၼွၼ်းထၢပ်ႈသႂ်ႇၵႃႈၼိူဝ်တူဝ်လုၵ်ႈဢွၼ်ႇသေယဝ်ႉ၊ဢဝ်သူပ်းထၢပ်ႈသႂ်ႇသူပ်း၊ဢဝ်မၢၵ်ႇတႃထၢပ်ႈသႂ်ႇမၢၵ်ႇတႃ၊ဢဝ်မိုဝ်းထၢပ်ႈသႂ်ႇမိုဝ်းသေလႄႈယဵတ်ႇတူဝ်မၼ်းထၢပ်ႈသႂ်ႇၵႃႈၼိူဝ်တူဝ်လုၵ်ႈဢွၼ်ႇၼၼ်ႉလႄႈတူဝ်လုၵ်ႈဢွၼ်ႇၼၼ်ႉဢုၼ်ႇမႃးဢေႃႈ။-
ဢေးလိသႄး၊ လုၵ်ႉၶိုၼ်ႈလႄႈပႆၵႂႃႇပႆမႃးၵႃႈၼႂ်းလုၵ်းၼၼ်ႉသေယဝ်ႉ၊သမ်ႉၶိုၼ်းဢဝ်တူဝ်မၼ်းၼွၼ်းဢူပ်ႇပူပ်ႇသႂ်ႇၵႃႈၼိူဝ်လုၵ်ႈဢွၼ်ႇၼၼ်ႉထႅင်ႈဢေႃႈ။ လုၵ်ႈဢွၼ်ႇၼၼ်ႉၶီႈၸၢမ်ၸဵတ်းၵမ်းလႄႈမိုၼ်းတႃမႃးဢေႃႈ။-
ဢေးလိသႄး၊ ႁွင်ႉဢဝ် ၵေႇႁႃႇၸိ၊ မႃးလႄႈၸႂ်ႉမၼ်းၵႂႃႇႁွင်ႉမႄႈလုၵ်ႈဢွၼ်ႇၼၼ်ႉမႃးဢေႃႈ။ မိူဝ်ႈဢၼ်မႄႈယိင်းၼၼ်ႉႁွတ်ႈမႃးၸိုင်၊မၼ်းလၢတ်ႈလႄႈဝႃႈ၊ “ဢုမ်ႈဢဝ်လုၵ်ႈၸၢႆးမႂ်းတႃႉ၊” ဝႃႈၼင်ႇၼႆဢေႃႈ။-
မႄႈယိင်းၼၼ်ႉၶုပ်ႉမူပ်ႇၵူမ်ႈႁူဝ်ၸပ်းလိၼ်ၵႃႈတီႈတိၼ် ဢေးလိသႄး၊ ယဝ်ႉၸင်ႇ၊ဢုမ်ႈဢဝ်လုၵ်ႈၸၢႆးမၼ်းၵႂႃႇဢေႃႈ။
ၽဝ်ႇၼိုင်ႈမိူဝ်ႈဢၼ်ပဵၼ်တၢင်းဢၼ်ၶဝ်ႈၵႃႈမၢၵ်ႇပႅင်းၸွတ်ႇတူဝ်ႈၵႂႃႇၵႃႈၼႂ်းမိူင်းၼၼ်ႉၸိုင်၊ ဢေးလိသႄး၊ မိူဝ်းၸူးတီႈဝဵင်း ၵိလႃႉၵႃႇလႃႉ၊ ဢေႃႈ။ ယၢမ်းမိူဝ်ႈဢၼ်မၼ်းယင်းတိုၵ်ႉသင်ႇသွၼ်ပၼ်တီႈမူႇၸုမ်းပရေႃးၽႅတ်ႈ တင်းလၢႆယူႇၼၼ်ႉၸိုင်၊မၼ်းၸႂ်ႉၵူၼ်းဢွၼ်ႇမၼ်းႁႂ်ႈဢဝ်မေႃႈလူင်တင်ႈသေလႄႈတူမ်ႈႁုင်ၽၵ်းပုၼ်ႈၶဝ်တင်းလၢႆဢေႃႈ။-
ၼႂ်းၶဝ်ၼၼ်ႉၵေႃႉၼိုင်ႈဢွၵ်ႇၵႂႃႇႁႃၽၵ်းယိူဝ်ႈၼၢင်းၶဵဝ်ၵႃႈတီႈၼွၵ်ႈတီႈပၢင်ႇလႄႈထူပ်းႁၼ်ၶိူဝ်းတူၼ်ႈထိူၼ်ႇလႂ်ဢေႃႈ။ မၼ်းၵဵပ်းဢဝ်မၢၵ်ႇၼမ်ႉတဝ်ႈထိူၼ်ႇၵႃႈဢၼ်ႁွပ်ႇဢဝ်မႃးလႆႈၼၼ်ႉသေလႄႈ၊ယင်းဢမ်ႇႁုမဵဝ်းမၢၵ်ႇၼမ်ႉတဝ်ႈၼၼ်ႉသေၵေႃႈဢဝ်သႂ်ႇၵႃႈၼႂ်းမေႃႈၽၵ်းလႄႈတူမ်ႈဢေႃႈ။-
ၶဝ်ၵွၼ်ႉဢဝ်ပုၼ်ႈဢၼ်တၵ်းၵိၼ်လႄႈမိူဝ်ႈဢၼ်ၸိမ်းတူၺ်းၼၼ်ႉၶဝ်ဢွၼ်ၵၼ်ႁွင်ႉသႅၼ်ႇတီႈ ဢေးလိသႄး၊ လႄႈဝႃႈ၊ “ၵႃႈၼႂ်းမေႃႈၼႆႉမီးၽေးတၢႆဢေႃႈ၊” ဝႃႈၼင်ႇၼႆလႄႈယင်းဢမ်ႇၵိၼ်လႄႈယူႇဢေႃႈ။-
ဢေးလိသႄး၊ ယွၼ်းဢဝ်ၽွင်ၶဝ်ႈမုၼ်းဢိတ်းၼိုင်ႈသေယဝ်ႉ၊ဢဝ်သႂ်ႇၼႂ်းမေႃႈၼၼ်ႉလႄႈလၢတ်ႈဝႃႈ၊ “ၵွၼ်ႉပၼ်ႁႂ်ႈၵူၼ်းတင်းလၢႆၵိၼ်တႃႉ၊” ဝႃႈၼင်ႇၼႆသေယဝ်ႉ၊ၽေးတၢႆဢၼ်မီးၼႂ်းမေႃႈၽၵ်းၼၼ်ႉႁၢႆၵႂႃႇဢေႃႈ။
မီးထႅင်ႈပွၵ်ႈၼိုင်ႈ၊ၵူၼ်းၵေႃႉၼိုင်ႈလုၵ်ႉသေၵႃႈတီႈဝဵင်း ပႃႇလႃႉသႃႇလိသႃႉ၊ လႄႈပႃးၶဝ်ႈမုၼ်းဢၼ်ဢဝ်ၶဝ်ႈမုယေႃးဢၼ်ဢွၵ်ႇႁူင်းဢွၼ်တၢင်းပိူၼ်ႈၼႂ်းပီၼၼ်ႉႁဵတ်းၼၼ်ႉသၢဝ်းလုၵ်ႈ၊ဢိၵ်ႇတင်းႁူင်းၶဝ်ႈၵျုင်ႇဢၼ်ၸင်ႇဝိတ်းမႃးမႂ်ႇမႂ်ႇၼၼ်ႉပၼ်တီႈ ဢေးလိသႄး၊ ဢေႃႈ။ မၼ်းၵေႃႈၸႂ်ႉႁႂ်ႈၵူၼ်းဢွၼ်ႇမၼ်းဢဝ်တၢင်းၵိၼ်ၸိူဝ်းၼၼ်ႉလဵင်ႉပၼ်တီႈပရေႃးၽႅတ်ႈတင်းလၢႆဢေႃႈ။-
ၵူၼ်းဢွၼ်ႇၼၼ်ႉၶိုၼ်းလၢတ်ႈလႄႈဝႃႈ၊ “တၢင်းၵိၼ်ဢိတ်းဢွၼ်ႇၼိုင်ႈၼႆႉတၵ်းပေႃးၵုမ်ႇၵိၼ်ပုၼ်ႈၵူၼ်းပၢၵ်ႇၵေႃႉလႆႈၶႃႈႁိုဝ်း၊” ဝႃႈၼင်ႇၼႆဢေႃႈ။ ဢေးလိသႄး၊ ၶိုၼ်းလၢတ်ႈလႄႈဝႃႈ၊ “ပၼ်ႁႂ်ႈၶဝ်ၵိၼ်တႃႉ။ ထႃႇဝရႃႉၽြႃး၊ မီးဢမိင်ႉလႄႈဝႃႈ၊ ‘ၶဝ်တၵ်းၵိၼ်ဢိမ်ႇတဵမ်ယဝ်ႉလႄႈယင်းတၵ်းလိူဝ်လူးၵွၼ်ႇဢေႃႈ၊’ ဝႃႈၼႆယဝ်ႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၵူၼ်းဢွၼ်ႇၼၼ်ႉဢဝ်ႁႅၼ်းတမ်းပၼ်လႄႈၶဝ်ဢွၼ်ၵၼ်ၵိၼ်ဢိမ်ႇသေယဝ်ႉ၊ယင်းၵိုတ်းယင်းလိူဝ်ဝႆႉမႅၼ်ႈၸွမ်းၼင်ႇၵႂၢမ်း ထႃႇဝရႃႉၽြႃး၊ ၼၼ်ႉဢေႃႈ။
ၼေႇမၼ်ႇ၊ ၸဝ်ႈၵွၼ်းတပ်ႉသိုၵ်းလူင်မဵဝ်း သီးရီးယႃး၊ ၼၼ်ႉမီးမုၼ်မီးၽုင်းလႄႈလႆႈၼႃႈလႆႈတႃယႂ်ႇၼႃႇတီႈၶုၼ်ႁေႃၶမ်း သီးရီးယႃး၊ ဢေႃႈ။ မၼ်းပဵၼ်ႁူဝ်ႁၢၼ်ၶုၼ်သိုၵ်းလူင်ဢၼ်ႁႅင်းယႂ်ႇၼႃႇဢေႃႈ။ ၵူၺ်းၵႃႈ၊မၼ်းပဵၼ်တုတ်ႈ ဢေႃႈ။-
ၼႂ်းတၢင်းဢၼ်ၶဝ်တိုၵ်းသိမ်းဢဝ်မိူင်း ဢိသရေး၊ ၸိူဝ်းၼၼ်ႉပွၵ်ႈၼိုင်ႈ သီးရီးယႃး၊ ၶဝ်တိလႆႈမႃးမႄႈယိင်းသၢဝ်ဢွၼ်ႇၵူၼ်းမဵဝ်း ဢိသရေး၊ ၵေႃႉၼိုင်ႈသေယဝ်ႉ၊မၼ်းလႆႈၶၢမ်ႇႁဵတ်းၶႃႈတီႈမေး ၼေႇမၼ်ႇ၊ ယူႇဢေႃႈ။-
ဝၼ်းၼိုင်ႈမၼ်းလၢတ်ႈတီႈၸဝ်ႈၼၢင်းမၼ်းလႄႈဝႃႈ၊ “ၵဝ်ၶႃႈမီးၵၢင်ၸႂ်ႁႂ်ႈၸဝ်ႈၵဝ်ၶႃႈၵႂႃႇႁွတ်ႈထိုင်ၵႃႈတီႈပရေႃးၽႅတ်ႈ ဢၼ်ယူႇၵႃႈတီႈဝဵင်း သမႃႇရိ၊ ၼၼ်ႉဢေႃႈ။ ပရေႃးၽႅတ်ႈၼၼ်ႉတၵ်းႁႂ်ႈတၢင်းပဵၼ်ဢၼ်ၸပ်းတီႈၸဝ်ႈၵဝ်ၶႃႈၼၼ်ႉႁၢႆတီႈၶႃႈဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈဢၼ် ၼေႇမၼ်ႇ၊ လႆႈငိၼ်းလွင်ႈတၢင်းၼၼ်ႉၸိုင်၊မၼ်းၶဝ်ႈၸူးတီႈၶုၼ်ႁေႃၶမ်းလႄႈလဝ်ႈလၢတ်ႈလွင်ႈတၢင်းဢၼ်မႄႈယိင်းဢွၼ်ႇ ဢိသရေး၊ လၢတ်ႈၼၼ်ႉဢေႃႈ။-
ၶုၼ်ႁေႃၶမ်းၵေႃႈလၢတ်ႈလႄႈဝႃႈ၊ “ၵႂႃႇတႃႉ။ ၵဝ်တၵ်းပၼ်လိၵ်ႈၵႂႃႇတီႈၶုၼ်ႁေႃၶမ်း ဢိသရေး၊ ဢေႃႈ၊” ဝႃႈၼင်ႇၼႆဢေႃႈ။ ၼေႇမၼ်ႇ၊ ဢဝ်ငိုၼ်းသၢမ်မိုၼ်ႇၶႅပ်း၊ၶမ်းႁူၵ်းႁဵင်ၵျၢပ်ႈ၊ၶူဝ်းၼုင်ႈသိပ်းၸုမ်ႇၵႂႃႇလႄႈ၊-
ဢဝ်လိၵ်ႈၼၼ်ႉသူင်ႇထိုင်ၵႃႈတီႈၶုၼ်ႁေႃၶမ်း ဢိသရေး၊ ဢေႃႈ။ ၼႂ်းလိၵ်ႈၼၼ်ႉဝႃႈ၊ “ၵဝ်ၶႃႈပွႆႇၸႂ်ႉၶုၼ်ဢၼ်ပွင်ၵၢၼ်ၵဝ် ၼေႇမၼ်ႇ၊ ပႃးဢဝ်လိၵ်ႈၼႆႉၵႂႃႇပုၼ်ႈဢၼ်ၸဝ်ႈတၵ်းႁႂ်ႈတုတ်ႈမၼ်းႁၢႆဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၶုၼ်ႁေႃၶမ်းမိူင်း ဢိသရေး၊ ၽတ်းဢၢၼ်ႇလိၵ်ႈၼၼ်ႉယဝ်ႉၼၼ်ႉၸိုင်၊ၸၵ်ႉသိၵ်ႇၶူဝ်းၼုင်ႈမၼ်းလႄႈဝႃႈ၊ “မီးလွင်ႈၸိူဝ်ႉၼင်ႇႁိုဝ်လႄႈၶုၼ်ႁေႃၶမ်းမိူင်း သီးရီးယႃး၊ မုင်ႈမွင်းႁႂ်ႈၵဝ်ႁဵတ်းႁႂ်ႈတုတ်ႈၵူၼ်းမၼ်းႁၢႆၼၼ်ႉ။ မၼ်းထၢင်ႇၵဝ်ပဵၼ်ၽြႃးဢၼ်ပိူင်ႇပၼ်၊ပိူင်ႇၼုၵ်ႈဢသၢၵ်ႈႁိုဝ်း။ တၢင်းႁဵတ်းၼႆႉၸိုင်၊ထၢင်ႇသႃးလွင်ႈဢၼ်မၼ်းႁႃတၢင်းၽိတ်းသႂ်ႇတီႈၵဝ်ယဝ်ႉ၊” ဝႃႈၼင်ႇၼႆဢေႃႈ။
ပရေႃးၽႅတ်ႈ ဢေးလိသႄး၊ လႆႈငိၼ်းလွင်ႈတၢင်းၼၼ်ႉသေယဝ်ႉ၊သင်ႇလၢတ်ႈၵႂႃႇၵႃႈတီႈၶုၼ်ႁေႃၶမ်းလႄႈဝႃႈ၊ “ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းတူၵ်းၸႂ်လႂ်တိုၼ်ႇတီႈၶႃႈ။ ပွႆႇၸႂ်ႉၵေႃႉၼၼ်ႉမႃးၵႃႈတီႈၵဝ်ၶႃႈတႃႉ။ ၵဝ်ၶႃႈတၵ်းၼႄပျႃးႁႂ်ႈမၼ်းလႆႈႁုလွင်ႈဢၼ်ပရေႃးၽႅတ်ႈမီးၼႂ်းမိူင်း ဢိသရေး၊ ၼႆႉၶႃႈဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ၼေႇမၼ်ႇ၊ ပႃးဢဝ်တင်းလေႃႉမႃႉမၼ်း၊ဢိၵ်ႇတင်းမႃႉမၼ်းတင်းလၢႆၵႂႃႇလႄႈၸုၵ်းယူႇၵႃႈတီႈၽၵ်းတူႁိူၼ်း ဢေးလိသႄး၊ ဢေႃႈ။-
ဢေးလိသႄး၊ ၸႂ်ႉႁႂ်ႈၵူၼ်းဢွၼ်ႇမၼ်းၵႂႃႇလၢတ်ႈဝႃႈ၊ႁႂ်ႈမၼ်းၵႂႃႇဢၢပ်ႇၼမ်ႉၵႃႈၼႂ်းၼမ်ႉ ယေႃးတၢၼ်ႇ၊ ၸဵတ်းပွၵ်ႈဢေႃႈ။ ပေႃးမၼ်းႁဵတ်းၸိူဝ်ႉၼင်ႇၼႆၸိုင်၊တၢင်းပဵၼ်မၼ်းတၵ်းလႆႈမူတ်းသႂ်ဢေႃႈ။-
ၼႂ်းဝႃႈၼၼ်သေၵေႃႈ ၼေႇမၼ်ႇ၊ ၶႂ်ႈၸႃႉလႄႈၸႂ်လမ်သႆႈၵမ်ႇၼႃႇလႄႈလၢတ်ႈဝႃႈ၊ “ၵဝ်ထၢင်ႇမၼ်းတၵ်းဢွၵ်ႇမႃးၸူးတီႈၵဝ်သေယဝ်ႉ၊သူးတွင်းတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈမၼ်းသေလႄႈဢဝ်တင်းမိုဝ်းမၼ်းမုင်းႁူမ်ႇၵႃႈၼိူဝ်ႁွႆးၸဵပ်းၵဝ်လႄႈႁႂ်ႈတုတ်ႈၵဝ်ႁၢႆဢေႃႈ။-
ၼႆႉၵူၺ်းဢမ်ႇၵႃး၊ၼမ်ႉ ဢႃႇပၼႃႉ၊ တင်းၼမ်ႉ ၽႃႇၽႃႇ၊ ၵႃႈတီႈမိူင်း တမ်ႇမတ်ႉသၵတ်ႉ၊ ၸိူဝ်းၼၼ်ႉယဵင်ႈၶႅၼ်းယႂ်ႇမျၢတ်ႈၼႃႇသေၼမ်ႉမႄႈၵႃႈမီးၵႃႈၼႂ်းမိူင်း ဢိသရေး၊ ၼႆႉဢမ်ႇၸႂ်ႈႁိုဝ်း။ ၵဝ်ဢၢပ်ႇၼမ်ႉၵႃႈၼႂ်းၼမ်ႉမႄႈၸိူဝ်းၼၼ်ႉၵေႃႈတၵ်းမူတ်းသႂ်လႆႈယူႇဢမ်ႇၸႂ်ႈႁိုဝ်း၊” ဝႃႈၼင်ႇၼႆသေယဝ်ႉ၊ဝၢႆႇပွၵ်ႈၶိုၼ်းမိူဝ်းၵႂႃႇသေဢေႃႈ။
ၶႃႈမၼ်းၵူၼ်းမၼ်းဢွၼ်ၵၼ်ၵႂႃႇလၢတ်ႈတီႈမၼ်းလႄႈဝႃႈ၊ “ပေႃႈႁဝ်းၶႃႈ႟။ ပေႃးဝႃႈပရေႃးၽႅတ်ႈၼၼ်ႉၸႂ်ႉႁႂ်ႈၸဝ်ႈႁဝ်းႁဵတ်းမဵဝ်းဢၼ်ယၢပ်ႇဢၼ်ယဵၼ်းၸိုင်၊ၸဝ်ႈႁဝ်းတၵ်းႁဵတ်းဢမ်ႇၸႂ်ႈၶႃႈႁိုဝ်း။ ၵွပ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းဢမ်ႇဢၢပ်ႇၼမ်ႉၸွမ်းၵႃႈၼင်ႇဢၼ်မၼ်းၸႂ်ႉႁဵတ်းၼၼ်ႉ၊တၢင်းပဵၼ်ၸဝ်ႈႁဝ်းတၵ်းႁၢႆတီႈၶႃႈဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ ၼေႇမၼ်ႇ၊ လူင်းၼႂ်းၼမ်ႉ ယေႃးတၢၼ်ႇ၊ သေလႄႈဢဝ်တူဝ်မၼ်းၸုမ်ႇၸဵတ်းပွၵ်ႈၵႃႈၼင်ႇဢၼ် ဢေးလိသႄး၊ သင်ႇလၢတ်ႈၼၼ်ႉၸိုင်၊တၢင်းပဵၼ်မၼ်းၵဵင်ႈသႂ်ၵႂႃႇႁၢႆၵႂႃႇလုမ်းလုမ်းဢေႃႈ။ ၼိူဝ်ႉၼင်မၼ်းၶၢဝ်ၼုမ်ႇမႃးမိူၼ်ၼိူဝ်ႉၼင်လုၵ်ႈဢွၼ်ႇဝႆႉဢေႃႈ။-
ၼင်ႇၼၼ်လႄႈမၼ်းဢိၵ်ႇတင်းၵူၼ်းမၼ်းတင်းသဵင်ႈတင်းလူင်ဢွၼ်ၵၼ်ၶိုၼ်ႈၵႂႃႇၸူးတီႈ ဢေးလိသႄး၊ လႄႈလၢတ်ႈဝႃႈ၊ “တေႃႈလဵဝ်ၼႆႉၵဝ်ၶႃႈႁုလွင်ႈဢၼ်ၼွၵ်ႈသေၽြႃးပဵၼ်ၸဝ်ႈမဵဝ်း ဢိသရေး၊ လႄႈဢမ်ႇမီးၽြႃးတၢင်ႇသူႇတၢင်ႇပႃးၼၼ်ႉၶႃႈယဝ်ႉ။ ပိူဝ်ႈၼႆလႄႈႁပ်ႉတုင်းဢဝ်လၢၵ်ႈသွင်ႇတၢင်းလူႇတီႈၵဝ်ၶႃႈသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ဢေးလိသႄး၊ ၶိုၼ်းလၢတ်ႈလႄႈဝႃႈ၊ “ၵဝ်တိူင်ႇဝႃႈၼႂ်းၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ဢၼ်ၵဝ်ႁဵတ်းဝၢတ်ႈၵူဝ်းၵႂၢႆႇၼႆႉလႄႈဝႃႈၸမ်ႉ၊ ‘ၵဝ်ဢမ်ႇလႆႈႁပ်ႉလႆႈဢဝ်လၢၵ်ႈသွင်ႇၼၼ်ႉ၊’ ဝႃႈၼႆယဝ်ႉ၊” ဝႃႈၼင်ႇၼႆဢေႃႈ။ ၼေႇမၼ်ႇ၊ တိုၵ်းယူင်းႁႂ်ႈမၼ်းႁပ်ႉဢဝ်သေၵေႃႈမၼ်းထဵင်ပႅတ်ႈဢေႃႈ။-
ၼေႇမၼ်ႇ၊ ၵေႃႈလၢတ်ႈလႄႈဝႃႈ၊ “ပေႃးၸဝ်ႈႁဝ်းဢမ်ႇႁပ်ႉတုင်းဢဝ်လၢၵ်ႈသွင်ႇၵဝ်ၶႃႈၸိုင်၊ၶႅၼ်းတေႃႈပၼ်ဢၶႂၢင်ႉ ႁႂ်ႈၵဝ်ၶႃႈလႆႈဢဝ်လိၼ်တႃႇသွင်လင်မႃႉလီႈၶိုၼ်းမိူဝ်း ၵႂႃႇသေၵမ်းၶႃႈ။ ဢဝ်ၼႆႉၵႂႃႇၼႃႈၵဝ်ၶႃႈၼႆႉလိူဝ်သေတီႈ ထႃႇဝရႃႉၽြႃး၊ ၼၼ်ႉတၵ်းဢမ်ႇႁဵတ်းၶိူင်ႈတၢင်းလူႇ၊ဢမ်ႇၼၼ်တၢင်းလူႇဢၼ်တုတ်ႇၽႆးတီႈၽြႃးတၢင်ႇသူႇတၢင်ႇပႃးၼၼ်ႉတီႈၶႃႈယဝ်ႉ။-
ၼႂ်းဝႃႈၼၼ်သေၵေႃႈၵဝ်ၶႃႈမုင်ႈမွင်းႁႂ်ႈ ထႃႇဝရႃႉၽြႃး၊ ပွႆႇလွတ်ႈဢပျတ်ႈၵဝ်ၶႃႈ ၵွပ်ႈလူၺ်ႈၵဝ်ၶႃႈလႆႈၶဝ်ႈၸွမ်းလူၺ်ႈၵၼ်တင်းၶုၼ်ႁေႃၶမ်းၵဝ်ၶႃႈၵႂႃႇၵႃႈၼႂ်းၵျွင်းဝၢတ်ႈ ရိမ်ႇမုၼ်ႇ၊ ၽြႃးမဵဝ်း သီးရီးယႃး၊ ၼၼ်ႉသေလႄႈလႆႈဝႆႈၽြႃးၼၼ်ႉမႃးသေၵမ်းလူၺ်ႈ။ ၵဝ်ၶႃႈယုမ်ႇလွင်ႈဢၼ် ထႃႇဝရႃႉၽြႃး၊ တၵ်းပွႆႇလွတ်ႈဢပျတ်ႈၵဝ်ၶႃႈၶႃႈဢေႃႈ၊” ဝႃႈၼင်ႇၼႆဢေႃႈ။
ဢေးလိသႄး၊ ၵေႃႈလၢတ်ႈလႄႈဝႃႈ၊ “ၵႂႃႇၼိမ်ၼိမ်တႃႉ၊” ဝႃႈၼင်ႇၼႆသေယဝ်ႉ၊ ၼေႇမၼ်ႇ၊ ဢွၵ်ႇၵႂႃႇသေဢေႃႈ။ မိူဝ်ႈဢၼ် ၼေႇမၼ်ႇ၊ ဢွၵ်ႇၵႂႃႇဢမ်ႇပႆႇပေႃးၵႆၼႃႇလူင်လၢင်ၼၼ်ႉၸိုင်၊-
ၵေႇႁႃႇၸိ၊ ၵူၼ်းဢွၼ်ႇ ဢေးလိသႄး၊ ၼၼ်ႉၶႆႈၸႂ်လႄႈဝႃႈ၊ “ၸဝ်ႈၵဝ်ၼႆႉယင်းဢမ်ႇၶၢမ်ႇဢမ်ႇဢဝ်ၵႃႈသင်သေၸိူဝ်ႉသေပိူင်လႄႈပွႆႇ ၼေႇမၼ်ႇ၊ မိူဝ်းၵႂႃႇယဝ်ႉလူင်ပႄႇ။ မၼ်းထုၵ်ႇလီႁပ်ႉတုင်းဢဝ်ၵႃႈဢၼ်ၵူၼ်းမဵဝ်း သီးရီးယႃး၊ ပၼ်မၼ်းၸိူဝ်းၼၼ်ႉဢေႃႈ။ ၵႃႈၼင်ႇဢၼ် ထႃႇဝရႃႉၽြႃး၊ ဢသၢၵ်ႈလိပ်းယူႇၼၼ်ႉၵဝ်တၵ်းၶုၼ်ႇလႅၼ်ႈၵႂႃႇဢဝ်သေၸိူဝ်ႉသေပိူင်ဢေႃႈ၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈမၼ်းၶုၼ်ႇလႅၼ်ႈၵႂႃႇၸူးတီႈ ၼေႇမၼ်ႇ၊ လႄႈ၊မိူဝ်ႈဢၼ် ၼေႇမၼ်ႇ၊ ႁၼ်ၵူၼ်းၵေႃႉၼိုင်ႈလႅၼ်ႈမႃးၸူးတီႈမၼ်းယူႇၼၼ်ႉၸိုင်၊မၼ်းလူင်းလေႃႉမႃႉမႃးလႄႈႁပ်ႉႁူဝ်တၢင်းၵေႃႉၼၼ်ႉသေယဝ်ႉထၢမ်လႄႈဝႃႈ၊ “မီးလွင်ႈတၢင်းသေၸိူဝ်ႉသေပိူင်ႁိုဝ်း၊” ဝႃႈၼင်ႇၼႆဢေႃႈ။
ၵေႇႁႃႇၸိ၊ ၶိုၼ်းလၢတ်ႈလႄႈဝႃႈ၊ “ဢမ်ႇမီးလွင်ႈတၢင်းၵႃႈသင်ၶႃႈ။ ၵူၺ်းၵႃႈ၊ၸဝ်ႈၵဝ်ၶႃႈပွႆႇၸႂ်ႉၵဝ်ၶႃႈမႃးလႄႈသင်ႇလၢတ်ႈဝႃႈ၊ ‘တေႃႈလဵဝ်ၼႆႉၵူၺ်းၵူၼ်းသွင်ၵေႃႉဢၼ်ပႃးၼႂ်းမူႇၸုမ်းပရေႃးၽႅတ်ႈ ၼၼ်ႉလုၵ်ႉသေၵႃႈတီႈ လွႆ ဢေႇၽရိမ်ႇ၊ ႁွတ်ႈၽႅဝ်မႃး၊ၶႅၼ်းတေႃႈပၼ်ငိုၼ်းသၢမ်ႁဵင်ၵျၢပ်ႈ၊ဢိၵ်ႇတင်းၶူဝ်းၼုင်ႈသွင်ၸုမ်ႇသေၵမ်း၊’ ဝႃႈၼႆယဝ်ႉ၊” ဝႃႈၼင်ႇၼႆဢေႃႈ။
ၼေႇမၼ်ႇ၊ ၵေႃႈလၢတ်ႈလႄႈဝႃႈ၊ “ဢဝ်ငိုၼ်းႁူၵ်းႁဵင်ၵျၢပ်ႈသေၵမ်း၊” ဝႃႈၼင်ႇၼႆတိုၵ်းယူင်းသေလႄႈဢဝ်ငိုၼ်းၼၼ်ႉသႂ်ႇၼႂ်းထူင်သွင်လုၵ်ႈမတ်ႉၸပ်းၵၼ်တင်းၶူဝ်းၼုင်ႈသွင်ၸုမ်ႇသေယဝ်ႉ၊ၸႂ်ႉႁႂ်ႈၵူၼ်းဢွၼ်ႇမၼ်းသွင်ၵေႃႉမႅၵ်ႇလႄႈပႆၵႂႃႇတၢင်းၼႃႈမၼ်းဢေႃႈ။-
မိူဝ်ႈဢၼ်ၶဝ်ႁွတ်ႈထိုင်ၵႃႈတီႈၵွင်းလွႆတီႈႁိမ်းဢၼ် ဢေးလိသႄး၊ ယူႇသဝ်းၼၼ်ႉၸိုင်၊ ၵေႇႁႃႇၸိ၊ ဢဝ်ထူင်သွင်လုၵ်ႈၼၼ်ႉမႅၵ်ႇတၢင်ႇမႃႇမၼ်းသေလႄႈပွႆႇၸႂ်ႉၵူၼ်းဢွၼ်ႇ ၼေႇမၼ်ႇ၊ သွင်ၵေႃႉၼၼ်ႉၶိုၼ်းမိူဝ်းၵႂႃႇသေယဝ်ႉ၊မၼ်းၵေႃႈၶဝ်ႈၵႂႃႇၵႃႈၼႂ်းႁိူၼ်းဢေႃႈ။-
မိူဝ်ႈၼၼ်ႉ၊ ဢေးလိသႄး၊ ထၢမ်မၼ်းလႄႈဝႃႈ၊ “မႂ်းၵႂႃႇၵႃႈလႂ်မႃး၊” ဝႃႈၼင်ႇၼႆလႄႈ၊ မၼ်းၶိုၼ်းလၢတ်ႈလႄႈဝႃႈ၊ “ၶႃႈၸဝ်ႈဢမ်ႇလႆႈၵႂႃႇၵႃႈတီႈလႂ်ၶႃႈ၊” ဝႃႈၼင်ႇၼႆဢေႃႈ။
ဢေးလိသႄး၊ ၵေႃႈလၢတ်ႈတီႈမၼ်းလႄႈဝႃႈ၊ “ဝိၺိၺ်ႇၵဝ်မီးလူၺ်ႈၵၼ်တင်းမႂ်းယၢမ်းမိူဝ်ႈဢၼ်ၵေႃႉၼၼ်ႉလူင်းလေႃႉမႃႉသေလႄႈႁပ်ႉႁူဝ်တၢင်းမႂ်းယူႇၼၼ်ႉဢမ်ႇၸႂ်ႈႁိုဝ်း။ ၶိင်ႇၼႆႉၸွင်ႇပဵၼ်ၶိင်ႇဢၼ်ႁပ်ႉၶၢမ်ႇဢဝ်ငိုၼ်း၊ၶူဝ်းၼုင်ႈတၢင်းမႆ၊သူၼ်မၢၵ်ႇသၢၼ်ႇလုၼ်ႇ၊သူၼ်မၢၵ်ႇၸပိတ်ႉ၊သူဝ်း၊ဝူဝ်း၊ၶႃႈၵူၼ်းယိင်း၊ၶႃႈၵူၼ်းၸၢႆးႁိုဝ်း။-
ပိူဝ်ႈဢၼ်ပဵၼ်ၼင်ႇၼႆလႄႈႁႂ်ႈတုတ်ႈ ၼေႇမၼ်ႇ၊ ၼၼ်ႉၸပ်းၵႃႈတီႈမႂ်းဢိၵ်ႇတင်းတီႈၸိူဝ်ႉၶိူဝ်းမႂ်းတႃႇသေႇသေၵမ်း၊” ဝႃႈၼင်ႇၼႆဢေႃႈ။ မိူဝ်ႈဢၼ် ၵေႇႁႃႇၸိ၊ ဢွၵ်ႇၵႂႃႇယူႇၼၼ်ႉမၼ်းပဵၼ်တုတ်ႈလႄႈ ၼိူဝ်ႉၼင်မၼ်းၽိူၵ်ႇၶၢဝ်မိူၼ်ၸိူဝ်ႉၼင်ႇမူၺ်ႁႃႇဢေႃႈ။
ဝၼ်းၼိုင်ႈ၊ပရေႃးၽႅတ်ႈ ၸိူဝ်းဢၼ် ဢေးလိသႄး၊ ဢုပ်ႉထိင်းၼၼ်ႉလၢတ်ႈတီႈမၼ်းလႄႈဝႃႈ၊ “ၸွမ်းၼင်ႇဢၼ်ၸဝ်ႈႁဝ်းႁၼ်ယူႇၼႆႉတီႈယူႇႁဝ်းၶႃႈပဵၼ်ဢၼ်ၵိတ်ႇၵႅပ်ႉၼႃႇပုၼ်ႈႁဝ်းၶႃႈၶႃႈဢေႃႈ။-
ၶႅၼ်းတေႃႈပၼ်ဢၶႂၢင်ႉႁႂ်ႈႁဝ်းၶႃႈလႆႈၵႂႃႇၽၼ်းဢဝ်မႆႉၸိင်ၵႃႈတီႈၼမ်ႉ ယေႃးတၢၼ်ႇ၊ ပုၼ်ႈဢၼ်တၵ်းႁဵတ်းတီႈယူႇႁဝ်းၶႃႈသေၵမ်းၶႃႈ၊” ဝႃႈၼင်ႇၼႆဢေႃႈ။ ဢေးလိသႄး၊ ၵေႃႈလၢတ်ႈလႄႈဝႃႈ၊ “ဢွၼ်ၵၼ်ၵႂႃႇတႃႉ၊” ဝႃႈၼင်ႇၼႆဢေႃႈ။
ၼႂ်းၶဝ်ၼၼ်ႉၵေႃႉၼိုင်ႈ၊ၸူဝ်းဢဝ် ဢေးလိသႄး၊ ႁႂ်ႈၵႂႃႇလူၺ်ႈၵၼ်တင်းၶဝ်လႄႈ၊မၼ်းၵေႃႈၵႂႃႇဢေႃႈ။-
ၶဝ်ဢွၼ်ၵၼ်ဢွၵ်ႇၵႂႃႇၸွမ်းၵၼ်လႄႈမိူဝ်ႈဢၼ်ၶဝ်ႁွတ်ႈထိုင်တီႈၼမ်ႉ ယေႃးတၢၼ်ႇ၊ ၼၼ်ႉၶဝ်ဢွၼ်ၵၼ်ပွမ်ႈမႆႉၽၼ်းမႆႉဢေႃႈ။-
ၼႂ်းၶဝ်ၼၼ်ႉၵေႃႉၼိုင်ႈၵေႃႈပွမ်ႈမႆႉယူႇလႄႈတႃမၢတ်ႇမၼ်းတူၵ်းၵႂႃႇၵႃႈၼႂ်းၼမ်ႉဢေႃႈ။ မၼ်းႁွင်ႉသႅၼ်ႇလႄႈဝႃႈ၊ “ဢလူဝ်း။ ဢလူဝ်းၸဝ်ႈ႟။ ပဵၼ်ၶွင်ဢၼ်ၵႂႃႇယိမ်တီႈပိူၼ်ႈမႃးၶႃႈဢေႃႈ၊” ဝႃႈၼင်ႇၼႆဢေႃႈ။
ဢေးလိသႄး၊ ၵေႃႈထၢမ်ဝႃႈ၊ “တူၵ်းၵႃႈတီႈလႂ်၊” ဝႃႈၼင်ႇၼႆဢေႃႈ။ ၵေႃႉၼၼ်ႉၸိၼႄတီႈမၼ်းလႄႈ ဢေးလိသႄး၊ တႅပ်းၶွၼ်ႉလႅမ်ႈၼိုင်ႈသေယဝ်ႉ၊ပႅတ်ႈသႂ်ႇၵႃႈတီႈၼၼ်ႈဢေႃႈ။ မိူဝ်ႈၼၼ်ႉႁူဝ်တႃမၢတ်ႇၼၼ်ႉၽူးမႃးသေလႄႈ၊-
မၼ်းလၢတ်ႈဝႃႈ၊ “ယိပ်းဢဝ်တႃႉ၊” ဝႃႈၼင်ႇၼႆသေယဝ်ႉ၊ၵေႃႉၼၼ်ႉၵူမ်ႈလႄႈယိပ်းဢဝ်ဢေႃႈ။
ၶုၼ်ႁေႃၶမ်းမိူင်း သီးရီးယႃး၊ တိုၵ်းတေႃးၵၼ်တင်းမိူင်း ဢိသရေး၊ ဢေႃႈ။ မၼ်းတိူင်ႇပၢင်ႇၵၼ်တင်းၶုၼ်ဢၼ်ထၢမ်းၵၢၼ်မၼ်းတင်းလၢႆသေလႄႈလိူၵ်ႈဢဝ်တီႈဢၼ်တၵ်းၶျႃးပၢင်တပ်ႉမၼ်းဢေႃႈ။-
ၵူၺ်းၵႃႈ၊ ဢေးလိသႄး၊ သင်ႇလၢတ်ႈၵႂႃႇတီႈၶုၼ်ႁေႃၶမ်းမိူင်း ဢိသရေး၊ လူၺ်ႈၵႂၢမ်းဢၼ်ပၼ်သတိႁႂ်ႈမၼ်းဢမ်ႇၵႂႃႇၸူးတီႈၼၼ်ႈ၊ၵွပ်ႈပိူဝ်ႈၵူၼ်းမဵဝ်း သီးရီးယႃး၊ ၶဝ်ပႂ်ႉႁႂ်ႈလႆႈလွမ်တိုၵ်းတေႃးၼၼ်ႉဢေႃႈ။-
ပိူဝ်ႈၼႆလႄႈၶုၼ်ႁေႃၶမ်းမိူင်း ဢိသရေး၊ ပၼ်သတိတီႈၵူၼ်းၸိူဝ်းဢၼ်ယူႇတီႈၼၼ်ႈသေလႄႈပႂ်ႉၸွမ်းၵႅတ်ႇၶႄၶဝ်ၼၼ်ႉဝႆႉသေယဝ်ႉ၊လႆႈၵၢင်းလွတ်ႈၸိူဝ်ႉၼင်ႇၼႆလၢႆၽဝ်ႇလၢႆပွၵ်ႈၼမ်ၼႃႇယဝ်ႉဢေႃႈ။
ၶုၼ်ႁေႃၶမ်းမိူင်း သီးရီးယႃး၊ ၵႂၢင်ၸႂ်ယုင်ႈၸႂ်လႄႈႁွင်ႉဢဝ်ၶုၼ်ဢၼ်ထၢမ်းၵၢၼ်မၼ်းၸိူဝ်းၼၼ်ႉသေယဝ်ႉထၢမ်ဝႃႈ၊ “ၼႂ်းသူၼႆႉပဵၼ်ၵေႃႉလႂ်ယူႇၽၢႆႇၶုၼ်ႁေႃၶမ်းမိူင်း ဢိသရေး၊ ၼၼ်ႉ၊” ဝႃႈၼင်ႇၼႆဢေႃႈ။
ၼႂ်းၶဝ်ၼၼ်ႉၵေႃႉၼိုင်ႈၶိုၼ်းလဝ်ႈလၢတ်ႈလႄႈဝႃႈ၊ “ဢမ်ႇၸႂ်ႈၸိူဝ်ႉၼင်ႇၼၼ်တီႈၶႃႈ၊ၸဝ်ႈၶုၼ်လူင်႟။ ပရေႃးၽႅတ်ႈ ဢေးလိသႄး၊ ၼၼ်ႉၸင်ႇဢဝ်ၵႂၢမ်းဢၼ်ၸဝ်ႈႁဝ်းလွမ်ပၼ်ဢမိင်ႉတဵတ်ႇတဵတ်ႇၼၼ်ႉမွၵ်ႇလၢတ်ႈတီႈၶုၼ်ႁေႃၶမ်း ဢိသရေး၊ တီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းပူင်ဢမိင်ႉလႄႈဝႃႈ၊ “ၵႂႃႇလွမ်တူၺ်းတီႈယူႇမၼ်းၼၼ်ႉတႃႉ။ ၵဝ်တၵ်းၵႂႃႇတိဢဝ်မၼ်းမႃးဢေႃႈ၊” ဝႃႈၼင်ႇၼႆသေယဝ်ႉ။ ပိူၼ်ႈလၢတ်ႈၼႄလွင်ႈဢၼ် ဢေးလိသႄး၊ မီးၵႃႈၼႂ်းဝဵင်း တေႃႇႀၼ်ႇ၊ ၼၼ်ႉဢေႃႈ။-
မၼ်းၵေႃႈပွႆႇၸႂ်ႉၵူၼ်းသိုၵ်းဢၼ်ႁႅင်းယႂ်ႇၼႃႇဢၼ်ပႃးၵူၼ်းသိုၵ်းတပ်ႉတိၼ်လႂ်၊တပ်ႉမႃႉဢိၵ်ႇတင်းလေႃႉမႃႉသိုၵ်းလႂ်၊ၵႂႃႇၵႃႈတီႈၼၼ်ႈသေယဝ်ႉ၊မိူဝ်ႈဢၼ်ႁွတ်ႈထိုင်ၵႃႈၼႂ်းၶိင်ႇၵၢင်ၶိုၼ်းၼၼ်ႉဢွၼ်ၵၼ်လွမ်ႉႁွပ်ႈဝႆႉဢေႃႈ။-
ၶိင်ႇၵၢင်ၼႂ်ၸဝ်ႉၸဝ်ႉၵူၼ်းဢွၼ်ႇ ဢေးလိသႄး၊ ၼၼ်ႉလုၵ်ႉလႄႈဢွၵ်ႇၵႃႈၼွၵ်ႈၵႂႃႇလႄႈ၊ႁၼ်တပ်ႉသိုၵ်း သီးရီးယႃး၊ ဢၼ်မီးမႃႉလႂ်တင်းလေႃႉမႃႉသိုၵ်းလႂ်၊လွမ်ႉႁွပ်ႈဝႆႉယူႇၼၼ်ႉဢေႃႈ။ မၼ်းၶိုၼ်းမႃးမွၵ်ႇလၢတ်ႈတီႈ ဢေးလိသႄး၊ လႄႈဝႃႈ၊ “ဢလူဝ်း။ ၸဝ်ႈ႟။ တၵ်းႁဵတ်းၸိူဝ်ႉၼင်ႇႁိုဝ်တီႈၶႃႈ၊” ဝႃႈၼင်ႇၼႆဢေႃႈ။
ဢေးလိသႄး၊ ၶိုၼ်းလၢတ်ႈလႄႈဝႃႈ၊ “ယႃႇပေၵူဝ်။ ၵူၼ်းၽၢႆႇႁဝ်းယဵင်ႈၶႅၼ်းၼမ်ၼႃႇသေၵူၼ်းၽၢႆႇၶဝ်ဢေႃႈ၊” ဝႃႈၼင်ႇၼႆသေယဝ်ႉ၊-
သူးတွင်းလႄႈဝႃႈ၊ “ဢူဝ်း။ ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈၽုၺ်ႇမၢၵ်ႇတႃမၼ်းႁႂ်ႈမၼ်းလႆႈႁၼ်သေၵမ်းတီႈၶႃႈ၊” ဝႃႈၼင်ႇၼႆလႄႈ၊ ထႃႇဝရႃႉၽြႃး၊ ၵေႃႈထွမ်ႇဢဝ်ၵႂၢမ်းသူးတွင်းမၼ်းၼၼ်ႉသေယဝ်ႉ၊ၵူၼ်းဢွၼ်ႇ ဢေးလိသႄး၊ ႁႅၼ်တူၺ်းလႄႈႁၼ်မႃႉၽႆးလႂ်၊လေႃႉမႃႉသိုၵ်းၽႆးလႂ်၊ႁူမ်ႇသုမ်ႇလွႆဢၼ်လဵပ်ႈႁွပ်ႈ ဢေးလိသႄး၊ ယူႇၼၼ်ႉဢေႃႈ။
မိူဝ်ႈဢၼ်တပ်ႉသိုၵ်း သီးရီးယႃး၊ ၶဝ်ၶီႇသိုၵ်းၶိုၼ်ႈတိုၵ်းၼၼ်ႉ ဢေးလိသႄး၊ သူးတွင်းလႄႈဝႃႈ၊ “ဢူဝ်း ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈပၼ်တၢမ်ႇႁႂ်ႈမၢၵ်ႇတႃၶဝ်မွတ်ႇသေၵမ်းတီႈၶႃႈ၊” ဝႃႈၼင်ႇၼႆလႄႈ၊ ထႃႇဝရႃႉၽြႃး၊ ထွမ်ႇဢဝ်ၵႂၢမ်းသူးတွင်းမၼ်းၼၼ်ႉသေယဝ်ႉ၊ပၼ်တၢမ်ႇႁႂ်ႈတႃၶဝ်မွတ်ႇဢေႃႈ။-
ဢေးလိသႄး၊ ၸင်ႇၵႂႃႇၸူးတီႈၶဝ်လႄႈလၢတ်ႈဝႃႈ၊ “သူၽိတ်းတၢင်းယဝ်ႉ။ ဢမ်ႇၸႂ်ႈဝဵင်းၼႆႉၵူၺ်း။ ၸွမ်းၵဝ်မႃးတႃႉ။ ၵဝ်တၵ်းဢွၼ်သူၵႂႃႇသူင်ႇတီႈၵေႃႉဢၼ်သူႁႃၼၼ်ႉဢေႃႈ၊” ဝႃႈၼင်ႇၼႆသေလႄႈဢဝ်ၶဝ်သူင်ႇၸူးတီႈဝဵင်း သမႃႇရိ၊ ဢေႃႈ။
မိူဝ်ႈဢၼ်ၶဝ်ယင်းတိုၵ်ႉၶဝ်ႈဝဵင်းၵႂႃႇယူႇၼၼ်ႉ ဢေးလိသႄး၊ သူးတွင်းလႄႈဝႃႈ၊ “ ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈၽုၺ်ႇမၢၵ်ႇတႃၶဝ်ႁႂ်ႈၶဝ်လႆႈႁၼ်သေၵမ်းတီႈၶႃႈ၊” ဝႃႈၼင်ႇၼႆသေလႄႈ ထႃႇဝရႃႉၽြႃး၊ ထွမ်ႇဢဝ်ၵႂၢမ်းသူးတွင်းမၼ်းၼၼ်ႉသေယဝ်ႉ၊ၶဝ်ၶိုၼ်းလႆႈႁၼ်လႄႈႁုလွင်ႈဢၼ်ၶဝ်မီးယူႇၵႃႈၼႂ်းဝဵင်း သမႃႇရိ၊ ၼၼ်ႉဢေႃႈ။
မိူဝ်ႈဢၼ်ၶုၼ်ႁေႃၶမ်း ဢိသရေး၊ ႁၼ်ၵူၼ်း သီးရီးယႃး၊ ၸိူဝ်းၼၼ်ႉၸိုင်၊မၼ်းထၢမ် ဢေးလိသႄး၊ လႄႈဝႃႈ၊ “ပေႃႈ႟။ ၵဝ်ၶႃႈတၵ်းလႆႈဢဝ်ၶဝ်တၢႆၶႃႈႁိုဝ်း။ တၵ်းလႆႈဢဝ်တၢႆႁိုဝ်း၊” ဝႃႈၼင်ႇၼႆဢေႃႈ။
မၼ်းၶိုၼ်းလၢတ်ႈလႄႈဝႃႈ၊ “ယႃႇပေဢဝ်တၢႆသေၵမ်း။ ၶဝ်ၸိူဝ်းဢၼ်ၸဝ်ႈႁဝ်းဢဝ်တင်းလၢပ်ႇတင်းၵၢင်ႇတိုၵ်းပႄႉသိမ်းဢဝ်မႃးၼၼ်ႉ ၸဝ်ႈႁဝ်းယင်းဢမ်ႇဢဝ်တၢႆတီႈၶႃႈ။ ဢဝ်ၶဝ်ႈၼမ်ႉတၢင်းၵိၼ်လဵင်ႉပၼ်ၶဝ်ၵိၼ်လႄႈၶိုၼ်းပွႆႇမိူဝ်းၸူးတီႈၶုၼ်ႁေႃၶမ်းၶဝ်ၼၼ်ႉသေတႃႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၶုၼ်ႁေႃၶမ်း ဢိသရေး၊ မႄးႁႅၼ်းၶဝ်ႈၼမ်ႉတၢင်းၵိၼ်ၼမ်ၼႃႇပုၼ်ႈၶဝ်သေလႄႈႁႂ်ႈၶဝ်ၵိၼ်သေယဝ်ႉ၊ပွႆႇၶဝ်ၶိုၼ်းမိူဝ်းၵႂႃႇၸူးတီႈၶုၼ်ႁေႃၶမ်း သီးရီးယႃး၊ သေဢေႃႈ။ လိုၼ်းၼၼ်ႉၵူၼ်းမဵဝ်း သီးရီးယႃး၊ ၶဝ်ဢမ်ႇႁိမ်ႁူင်ႇဢဝ်လိၼ် ဢိသရေး၊ ထႅင်ႈလႄႈယူႇဢေႃႈ။
လိုၼ်းၼၼ်ႉ၊ဢမ်ႇႁိုင်ဢမ်ႇၼၢၼ်းၶုၼ်ႁေႃၶမ်း ပိၼ်ႇႁႃႇတတ်ႉ၊ မိူင်း သီးရီးယႃး၊ ဢွၼ်ႁူဝ်တပ်ႉသိုၵ်းမၼ်းၵႃႈမီးတင်းမူတ်းၶီႇသိုၵ်းၶိုၼ်ႈၸူးတီႈဝဵင်း သမႃႇရိ၊ သေလႄႈလွမ်ႉဝဵင်း သမႃႇရိ၊ ဝႆႉဢေႃႈ။-
တၢင်းၵိၼ်တၢင်းၶူပ်းမူတ်းသဵင်ႈၵႂႃႇၵွပ်ႈပိူဝ်ႈဢၼ်လႆႈၶၢမ်ႇတၢင်းဢၼ်လွမ်ႉႁွပ်ႈၶင်ဝႆႉၼၼ်ႉတေႃႇထိုင်ႁွတ်ႈၵွၵ်းႁူဝ်မႃႉလီႈယေႈလုၵ်ႈမီးၵႃႈၶၼ်မၼ်းငိုၼ်းပႅတ်ႇသိပ်းၵျၢပ်ႈ၊ၶီႈၼူၵ်ႉတူႈ ယေႈပႄႇငိုၼ်းႁႃႈၵျၢပ်ႈၼႂ်းဝဵင်း သမႃႇရိ၊ ဢေႃႈ။
ၼႂ်းမိူဝ်ႈဢၼ်ၶုၼ်ႁေႃၶမ်း ဢိသရေး၊ ပႆၵႃႈၼိူဝ်လမ်းဝဵင်းၵႂႃႇယူႇၼၼ်ႉၸိုင်၊မႄႈယိင်းၵေႃႉၼိုင်ႈႁွင်ႉသႅၼ်ႇတီႈမၼ်းလႄႈဝႃႈ၊ “ၸဝ်ႈၶုၼ်လူင်တီႈၶႃႈ။ ၵႄႇသႄႇၸွႆႈထႅမ်ၶႃႈၸဝ်ႈသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
မၼ်းၶိုၼ်းလၢတ်ႈလႄႈဝႃႈ၊ “ပေႃး ထႃႇဝရႃႉၽြႃး၊ ဢမ်ႇၵႄႇသႄႇၸွႆႈထႅမ်မႂ်းၸိုင်၊ၵဝ်တၵ်းၵႄႇသႄႇၸွႆႈထႅမ်မႂ်းလႆႈၸိူဝ်ႉၼင်ႇႁိုဝ်။ ၵဝ်ဢမ်ႇမီးသၢၼ်ၶဝ်ႈၵျုင်ႇ၊ဢမ်ႇမီးၼမ်ႉမၢၵ်ႇၸပိတ်ႉၵူၺ်း။-
မႂ်းမီးတၢင်းယၢပ်ႇၵႃႈသင်၊” ဝႃႈၼင်ႇၼႆဢေႃႈ။ မႄႈယိင်းၼၼ်ႉၵေႃႈလဝ်ႈလၢတ်ႈလႄႈဝႃႈ၊ “မိူဝ်ႈဝၼ်းၼၼ်ႉမႄႈယိင်းၵေႃႉၼႆႉပၼ်တၢင်းၵျၢမ်ႇလႄႈဝႃႈ၊ ‘မိူဝ်ႈၼႆႉႁဝ်းၵိၼ်လုၵ်ႈၸၢႆးမႂ်းသေယဝ်ႉ၊ဝၼ်းမိူဝ်ႈၽုၵ်ႈၸိုင်၊ႁဝ်းသမ်ႉတၵ်းၵိၼ်လုၵ်ႈၸၢႆးၵဝ်ဢေႃႈ၊’ ဝႃႈၼင်ႇၼႆလႄႈ၊-
ၶႃႈၸဝ်ႈႁဝ်းၶဝ်ဢွၼ်ၵၼ်တူမ်ႈၵိၼ်လုၵ်ႈၸၢႆးၶႃႈၸဝ်ႈတီႈၶႃႈယဝ်ႉ။ ဝၼ်းမိူဝ်ႈၽုၵ်ႈၼၼ်ႉၶႃႈၸဝ်ႈယွၼ်းဢဝ်လုၵ်ႈၸၢႆးမၼ်းႁႂ်ႈလႆႈတူမ်ႈၵိၼ်ဢေႃႈ။ ၵူၺ်းၵႃႈ၊မၼ်းဢဝ်လုၵ်ႈၸၢႆးမၼ်းသိူင်ႇမႅပ်းဝႆႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းငိၼ်းၵႂၢမ်းမႄႈယိင်းၼၼ်ႉသေယဝ်ႉ၊မႆႈၸႂ်ၼႃႇလႄႈသိၵ်ႇၶူဝ်းၼုင်ႈမၼ်းဢေႃႈ။ ၵူၼ်းၸိူဝ်းဢၼ်ယူႇၸမ်ႁိမ်းလမ်းဝဵင်းၼၼ်ႉလႆႈႁၼ်မၼ်းၼုင်ႈၼင်ပေႃတၢင်းၼႂ်းမၼ်းဝႆႉၼၼ်ႉဢေႃႈ။-
မၼ်းလၢတ်ႈလႄႈဝႃႈ၊ “ပေႃးၵဝ်ဢမ်ႇလႆႈတႅပ်းႁူဝ် ဢေးလိသႄး၊ ၶၢတ်ႇတူၵ်းၸူဝ်ႈဢၼ်ၵၢင်ဝၼ်းဢမ်ႇပႆႇတူၵ်းၸိုင်၊ႁႂ်ႈ ထႃႇဝရႃႉၽြႃး၊ ဢဝ်ၵဝ်တၢႆသေၵမ်းလူၺ်ႈ၊” ဝႃႈၼင်ႇၼႆသေယဝ်ႉ၊-
ပွႆႇၸႂ်ႉၵူၼ်းၵႂႃႇႁွင်ႉဢဝ် ဢေးလိသႄး၊ မႃးဢေႃႈ။ ယၢမ်းမိူဝ်ႈၼၼ်ႉၸိုင်၊ ဢေးလိသႄး၊ မီးယူႇၵႃႈၼႂ်းႁိူၼ်းၼင်ႈယူႇလူၺ်ႈၵၼ်တင်းၵူၼ်းဢၼ်ပဵၼ်ၵႄႇပဵၼ်ႁူဝ်ၸိူဝ်းဢၼ်မႃးသူႇမၼ်းၸႂ်းမၼ်းၼၼ်ႉဢေႃႈ။ ၸူဝ်ႈဢၼ်ၵူၼ်းဢၼ်ၶုၼ်ႁေႃၶမ်းပွႆႇၸႂ်ႉမႃးၼၼ်ႉယင်းဢမ်ႇပႆႇႁွတ်ႈထိုင်တီႈမၼ်းၼၼ်ႉၸိုင်၊မၼ်းလၢတ်ႈတီႈၵူၼ်းဢၼ်ပဵၼ်ၵႄႇပဵၼ်ႁူဝ်ၸိူဝ်းၼၼ်ႉလႄႈဝႃႈ၊ “ၵေႃႉဢၼ်ဢဝ်ဢသၢၵ်ႈၵူၼ်းတၢႆၼၼ်ႉပွႆႇၸႂ်ႉၵူၼ်းမႃးႁႂ်ႈလႆႈဢဝ်ၵဝ်တၢႆဢေႃႈ။ မိူဝ်ႈဢၼ်မၼ်းႁွတ်ႈထိုင်မႃးၵႃႈတီႈၼႆႈၸိုင်၊ဢိုတ်းႁပ်းၽၵ်းတူလႄႈယႃႇပေႁႂ်ႈမၼ်းၶဝ်ႈမႃး။ တူဝ်ၶုၼ်ႁေႃၶမ်းၸပ်းၸွမ်းမႃးၽၢႆႇလင်မၼ်းယူႇယဝ်ႉ၊” ဝႃႈၼင်ႇၼႆဢေႃႈ။-
ၼႂ်းမိူဝ်ႈဢၼ်မၼ်းလၢတ်ႈၵႂၢမ်းယင်းဢမ်ႇပႆႇသုတ်းၼၼ်ႉၵူၼ်းၸႂ်ႉၼၼ်ႉႁွတ်ႈမႃးဢေႃႈ။ ၶုၼ်ႁေႃၶမ်းၵေႃႈႁွတ်ႈထိုင်သေယဝ်ႉလၢတ်ႈဝႃႈ၊ “ၽေးတုၵ်ႉၶႃႉၼႆႉလုၵ်ႉသေၵႃႈတီႈ ထႃႇဝရႃႉၽြႃး၊ မႃးဢေႃႈ။ ၵဝ်ထုၵ်ႇလီမုင်ႈထႃႈမွင်းထႃႈ ထႃႇဝရႃႉၽြႃး၊ ယူႇထႅင်ႈလူးၵွၼ်ႇၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ဢေးလိသႄး၊ ၶိုၼ်းလၢတ်ႈလႄႈဝႃႈ၊ “ထွမ်ႇဢဝ်ဢမိင်ႉ ထႃႇဝရႃႉၽြႃး၊ တႃႉ။ ၼႂ်းဝၼ်းမိူဝ်ႈၽုၵ်ႈမိူဝ်ႈထိုင်ၶိင်ႇၼႆႉၼၼ်ႉသူတၵ်းတေလႆႈသိုဝ်ႉသၢၼ်ၶဝ်ႈၵျုင်ႇသီႇပႄႇလူၺ်ႈငိုၼ်းယေႈၵျၢပ်ႈ၊သၢၼ်ၶဝ်ႈမုယေႃးယေႈၶႂၢႆးလူၺ်ႈငိုၼ်းယေႈၵျၢပ်ႈ၊ၵႃႈတီႈၽၵ်းတူဝဵင်း သမႃႇရိ၊ ဢေႃႈ၊” ဝႃႈၼင်ႇၼႆဢေႃႈ။
ဢမၢတ်ႈဢၼ်တမ်းၸႂ်ၶုၼ်ႁေႃၶမ်းၼၼ်ႉလၢတ်ႈတီႈ ဢေးလိသႄး၊ လႄႈဝႃႈ၊ “ပေႃး ထႃႇဝရႃႉၽြႃး၊ ယင်းဢမ်ႇၽုၺ်ႇႁူးလႅင်းၽႃႉၵၢင်ႁၢဝ်ပၼ်ၸိုင်၊တၵ်းတေဢမ်ႇပဵၼ်ၸိူဝ်ႉၼင်ႇၼၼ်လႆႈ၊” ဝႃႈၼင်ႇၼႆဢေႃႈ။ ဢေးလိသႄး၊ ၶိုၼ်းလၢတ်ႈလႄႈဝႃႈ၊ “မၢၵ်ႇတႃမႂ်းတၵ်းတေလႆႈႁၼ်လွင်ႈၼၼ်ႉဢေႃႈ။ ၵူၺ်းၵႃႈ၊မႂ်းတၵ်းတေဢမ်ႇလႆႈၵိၼ်တၢင်းၵိၼ်တၢင်းၶူပ်းၼၼ်ႉ၊” ဝႃႈၼင်ႇၼႆဢေႃႈ။
ၵႃႈတီႈၽၵ်းတူဝဵင်းၼၼ်ႉမီးၵူၼ်းတုတ်ႈ သီႇၵေႃႉဢေႃႈ။ ၶဝ်ၵေႃႉၼိုင်ႈလႄႈၵေႃႉၼိုင်ႈလၢတ်ႈၸႃတီႈၵၼ်လႄႈဝႃႈ၊ “ႁဝ်းၼႆႉတၵ်းၼင်ႈယူႇၵႃႈတီႈၼႆႈလႄႈပႂ်ႉထႃႈဝၼ်းတၢႆႁဝ်းယူႇၸိူဝ်ႉၼင်ႇႁိုဝ်။-
ပေႃးႁဝ်းၶဝ်ႈၵႃႈၼႂ်းဝဵင်းၸိုင်၊ၵွပ်ႈပိူဝ်ႈဢၼ်ၶဝ်ႈၵႃႈမၢၵ်ႇပႅင်းယူႇလႄႈႁဝ်းတေဢိုပ်းတၢႆၵႃႈတီႈၼၼ်ႈဢေႃႈ။ ပေႃးႁဝ်းၼင်ႈယူႇၵႃႈတီႈၼႆႈၵေႃႈတေတၢႆၵူၺ်းၼင်ႇၵဝ်ႇ။ ပိူဝ်ႈၼႆလႄႈႁဝ်းဢွၼ်ၵၼ်ၵႂႃႇၸူးတီႈပၢင်တပ်ႉ သီးရီးယႃး၊ ၶဝ်တႃႉႁဝ်း။ ပေႃးၶဝ်ပၼ်ဢသၢၵ်ႈႁဝ်းလိပ်းၵေႃႈႁဝ်းတေလိပ်းဢေႃႈ။ ပေႃးၶဝ်ဢဝ်ႁဝ်းတၢႆၵေႃႈတေလႆႈတၢႆၵူၺ်းၼင်ႇၵဝ်ႇယဝ်ႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈမိူဝ်ႈၶိင်ႇႁူဝ်ၶမ်ႈၸူဝ်ႈဢၼ်ဢမ်ႇပႆႇလပ်းသိင်ႇၼၼ်ႉၶဝ်ဢွၼ်ၵၼ်ၵႂႃႇၵႃႈတီႈပၢင်တပ်ႉ သီးရီးယႃး၊ ဢေႃႈ။ ၵူၺ်းၵႃႈ၊မိူဝ်ႈဢၼ်ႁွတ်ႈထိုင်ၼၼ်ႉၸိုင်၊ၶဝ်ဢမ်ႇႁၼ်ၽူႈလႂ်သေၵေႃႉသေၵူၼ်း။-
လွင်ႈမၼ်းၸမ်ႉ၊ ထႃႇဝရႃႉၽြႃး၊ ႁဵတ်းႁႂ်ႈၵူၼ်းမဵဝ်း သီးရီးယႃး၊ တင်းလၢႆလႆႈငိၼ်းသဵင်ဢၼ်တပ်ႉသိုၵ်းလူင်ဢၼ်ၶီႇသိုၵ်းၶိုၼ်ႈမႃးလူၺ်ႈတပ်ႉလေႃႉမႃႉသိုၵ်းလႂ်၊တပ်ႉမႃႉလႂ်ၼၼ်ႉသေလႄႈၶဝ်ထၢင်ႇၶုၼ်ႁေႃၶမ်း ဢိသရေး၊ ၸၢင်ႈငႃဢဝ်ၶုၼ် ႁိတ်ႉတိ၊ ဢိၵ်ႇတင်းၶုၼ် ဢေးၵျိပ်ႉ၊ တင်းလၢႆမႃးတိုၵ်းတေႃးၶဝ်ၼၼ်ႉဢေႃႈ။-
ပိူဝ်ႈၼႆလႄႈၶိင်ႇႁူဝ်ၶမ်ႈၼၼ်ႉၵူၼ်းမဵဝ်း သီးရီးယႃး၊ တင်းလၢႆဢွၼ်ၵၼ်ဢွၵ်ႇပၢႆႈႁႂ်ႈလႆႈလွတ်ႈဢသၢၵ်ႈၶဝ်ထၢၼ်ႈပေႃးဝႆႉပႅတ်ႈသုမ်ႉၶဝ်၊မႃႉၶဝ်၊မႃႉလီႈၶဝ်လႄႈၸုၼ်ႉပႅတ်ႈပၢင်တပ်ႉၶဝ်ၵႃႈဢၼ်မီးဝႆႉၸိူဝ်းၼၼ်ႉဢေႃႈ။
မိူဝ်ႈဢၼ်ၵူၼ်းတုတ်ႈၸိူဝ်းၼၼ်ႉႁွတ်ႈထိုင်ၵႃႈတီႈႁူဝ်ၸဵင်ႇတပ်ႉၼၼ်ႉသေယဝ်ႉ၊ၶဝ်ႈၵႃႈၼႂ်းသုမ်ႉလင်ၼိုင်ႈသေလႄႈၵိၼ်ၶူပ်းယဝ်ႉၸင်ႇ၊ဢဝ်ငိုၼ်းၶမ်းၶူဝ်းၼုင်ႈတၢင်းမႆၵႂႃႇသိူင်ႇဝႆႉဢေႃႈ။ သမ်ႉၶိုၼ်းမႃးလႄႈၶဝ်ႈသုမ်ႉတၢင်ႇလင်သေယဝ်ႉ၊သမ်ႉဢဝ်ဢုၵ်ႉၸႃႇၵႂႃႇသိူင်ႇဝႆႉထႅင်ႈဢေႃႈ။-
ၵမ်းၼၼ်ႉၶဝ်ၼင်ႇၵၼ်လၢတ်ႈတီႈၵၼ်လႄႈဝႃႈ၊ “ႁဝ်းဢမ်ႇထုၵ်ႇလီႁဵတ်းၸိူဝ်ႉၼင်ႇၼႆ။ ဝၼ်းမိူဝ်ႈၼႆႉပဵၼ်ဝၼ်းဢၼ်မီးၶၢဝ်ႇလီလႄႈႁဝ်းဢမ်ႇလီသိူင်ႇဝႆႉဢမ်ဝႆႉ။ ပေႃးႁဝ်းဢမ်ႇမွၵ်ႇလၢတ်ႈလႄႈယူႇတေႃႇထိုင်မိူင်းလႅင်းၸိုင်၊ႁဝ်းတၵ်းထုၵ်ႇၽေးတၢမ်ႇဢပျတ်ႈယဝ်ႉ။ ႁဝ်းဢွၼ်ၵၼ်ၵႂႃႇၵမ်းလဵဝ်လႄႈမွၵ်ႇလၢတ်ႈတီႈၵူၼ်းႁၢင်ႈၵူၼ်းႁေႃတႃႉႁဝ်း၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၶဝ်ဢွၵ်ႇသေၵႃႈတီႈပၢင်တပ်ႉ သီးရီးယႃး၊ ၶဝ်သေလႄႈၶိုၼ်းမိူဝ်းၸူးတီႈဝဵင်း သမႃႇရိ၊ သေယဝ်ႉ၊မွၵ်ႇလၢတ်ႈတီႈၵူၼ်းပႂ်ႉၽၵ်းတူဝဵင်းလႄႈဝႃႈ၊ “ႁဝ်းၶႃႈၵႂႃႇၸူးတီႈပၢင်တပ်ႉ သီးရီးယႃး၊ ၶဝ်လႄႈဢမ်ႇႁၼ်ၽူႈလႂ်၊ဢမ်ႇငိၼ်းသဵင်ၵူၼ်းသေၵေႃႉသေၵူၼ်း။ ထူပ်းႁၼ်မႃႉလႂ်၊မႃႉလီႈလႂ်မတ်ႉဝႆႉယူႇသေလႄႈသုမ်ႉတင်းလၢႆၵေႃႈမီးဝႆႉယူႇပၵ်းၵဝ်ႇပိူင်ၵဝ်ႇဢေႃႈ၊” ဝႃႈၼင်ႇၼႆဢေႃႈ။
ၵူၼ်းပႂ်ႉၽၵ်းတူၸိူဝ်းၼၼ်ႉပိုၼ်ၽၢဝ်ႇၶၢဝ်ႇၼၼ်ႉလႄႈလၢတ်ႈထိုင်တီႈၵူၼ်းႁၢင်ႈၵူၼ်းႁေႃတင်းလၢႆဢေႃႈ။-
ၶိင်ႇၼၼ်ႉပဵၼ်ၶိင်ႇၵၢင်ၶိုၼ်းလႄႈၶုၼ်ႁေႃၶမ်းလုၵ်ႉမႃးလၢတ်ႈတီႈၶုၼ်ဢၼ်ပွင်ၵၢၼ်ၸဝ်ႈတင်းလၢႆလႄႈဝႃႈ၊ “ၵဝ်တၵ်းလၢတ်ႈပၼ်လွင်ႈဢၼ်ၵူၼ်း သီးရီးယႃး၊ ၶဝ်ၶိုင်ပွင်ၸိူဝ်ႉၼင်ႇၼႆၼၼ်ႉဢေႃႈ။ ၶဝ်ႁုလွင်ႈဢၼ်ႁဝ်းဢိုပ်းယၢၵ်ႈယူႇၵႃႈတီႈၼႆႈလႄႈၶဝ်ဢွၵ်ႇသေၵႃႈတီႈပၢင်တပ်ႉႁႂ်ႈလႆႈတဵတ်ႇမႅပ်းယူႇၵႃႈၼႂ်းထိူၼ်ႇဢေႃႈ။ ၶဝ်ၶႆႈၸႂ်ဝႆႉလွင်ႈဢၼ်ႁဝ်းတၵ်းဢွၵ်ႇဝဵင်းၵႂႃႇႁႂ်ႈလႆႈဢဝ်တၢင်းၵိၼ်တၢင်းၶူပ်းလႄႈ၊ၶဝ်တၵ်းတိၺွပ်းဢဝ်တူဝ်လိပ်းႁဝ်းသေယဝ်ႉ၊သိမ်းဢဝ်ဝဵင်းႁဝ်းဢေႃႈ၊” ဝႃႈၼင်ႇၼႆဢေႃႈ။
ၶုၼ်ဢၼ်ပွင်ၵၢၼ်ၵေႃႉၼိုင်ႈလဝ်ႈလၢတ်ႈလႄႈဝႃႈ၊ “ၵူၼ်းဝဵင်းႁဝ်းၼႆႉဢိုပ်းယၢၵ်ႈၼႃႇလူင်လၢင်ထၢၼ်ႈပေႃးမိူၼ်ၵူၼ်းတၢႆယူႇတီႈၶႃႈယဝ်ႉ။ ပိူဝ်ႈၼႆလႄႈႁဝ်းၶႃႈပွႆႇၸႂ်ႉၵူၼ်းၵမ်ႈၽွင်ႈ ၶီႇမႃႉႁႃႈတူဝ်ဢၼ်ယင်းၵိုတ်းယင်းၵျၢၼ်ႇဝႆႉယူႇၼၼ်ႉၵႂႃႇလူတူၺ်းလွင်ႈတၢင်းၼၼ်ႉပဵၼ်ၸိူဝ်ႉၼင်ႇႁိုဝ်ၼၼ်ႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။-
ၶဝ်လိူၵ်ႈဢဝ်ၵူၼ်းၵမ်ႈၽွင်ႈသေယဝ်ႉ၊ၶုၼ်ႁေႃၶမ်းပွႆႇၸႂ်ႉၶဝ်ၶီႇလေႃႉသွင်လမ်းတင်းမႃႉမၼ်းၵႂႃႇႁႂ်ႈလႆႈလူတူၺ်းတပ်ႉ သီးရီးယႃး၊ ၶဝ်ပဵၼ်ၸိူဝ်ႉၼင်ႇႁိုဝ်ယူႇၼၼ်ႉဢေႃႈ။-
ၶဝ်ၸိူဝ်းၼၼ်ႉဢွၼ်ၵၼ်ၸွမ်းၵႂႃႇတေႃႇထိုင်ႁွတ်ႈၼမ်ႉ ယေႃးတၢၼ်ႇ၊ ဢေႃႈ။ ၵႃႈၼႂ်းၶၢဝ်းတၢင်းၵႃႈဢၼ်ၶဝ်ၵႂႃႇၼၼ်ႉ ၶဝ်ထူပ်းႁၼ်ၶူဝ်းၼုင်ႈတၢင်းမႆဢိၵ်ႇတင်းၶိူင်ႈယိပ်းၶိူင်ႈတိုဝ်းၸိူဝ်းဢၼ်ၵူၼ်း သီးရီးယႃး၊ ၶဝ်ပႅတ်ႈဝႆႉၼႂ်းမိူဝ်ႈဢၼ်ၶဝ်ၼႅတ်ႈဢွၵ်ႇပၢႆႈၶၼ်ၶၼ်ၽႂ်းၽႂ်းၼၼ်ႉဢေႃႈ။ မိူဝ်ႈၼၼ်ႉၶဝ်ဢွၼ်ၵၼ်ၶိုၼ်းမႃးလဝ်ႈလၢတ်ႈတီႈၶုၼ်ႁေႃၶမ်းဢေႃႈ။-
ၵူၼ်းဝဵင်း သမႃႇရိ၊ တင်းလၢႆဢွၼ်ၵၼ်ၶုၼ်ႇလႅၼ်ႈၵႂႃႇႁိမ်ဢဝ်တပ်ႉ သီးရီးယႃး၊ ၼၼ်ႉဢေႃႈ။ ၼင်ႇၼၼ်လႄႈၶဝ်ဢွၼ်ၵၼ်ၶၢႆသၢၼ်ၶဝ်ႈၵျုင်ႇသီႇပႄႇ၊ဢမ်ႇၼၼ်သၢၼ်ၶဝ်ႈမုယေႃးယေႈၶႂၢႆးလူၺ်ႈငိုၼ်းယေႈၵျၢပ်ႈၵူၺ်းလႄႈမႅၼ်ႈၸွမ်းၵႃႈၼင်ႇဢၼ်ဢမိင်ႉ ထႃႇဝရႃႉၽြႃး၊ မီးဝႆႉၼၼ်ႉဢေႃႈ။
မိူဝ်ႈယၢမ်းၼၼ်ႉၶုၼ်ႁေႃၶမ်း ဢိသရေး၊ ၶၢၼ်းဢမၢတ်ႈဢၼ်တၢမ်းၸႂ်ၸဝ်ႈၼၼ်ႉၼႂ်းဢရႃႇဢၼ်ပႂ်ႉၽၵ်းတူဝဵင်းဢေႃႈ။ ၵူၼ်းတင်းလၢႆယဵပ်ႇၵႂႃႇၵႃႈၼိူဝ်မၼ်းၵႃႈၼႂ်းၽၵ်းတူဝဵင်းလႄႈမၼ်းၼၼ်ႉတၢႆၵႂႃႇမႅၼ်ႈၸွမ်းၵႃႈၼင်ႇဢၼ် ဢေးလိသႄး၊ ႁေႃးထႃႈဝႆႉၼႂ်းမိူဝ်ႈဢၼ်ၶုၼ်ႁေႃၶမ်းလူင်းၸူးတီႈမၼ်းၼၼ်ႉဢေႃႈ။-
ၼင်ႇၼၼ်လႄႈပဵၼ်ၸွမ်းၵႃႈၼင်ႇဢၼ် ဢေးလိသႄး၊ လၢတ်ႈတီႈၶုၼ်ႁေႃၶမ်းလႄႈဝႃႈ၊ “ၼႂ်းဝၼ်းမိူဝ်ႈၽုၵ်ႈမိူဝ်ႈထိုင်ၶိင်ႇၼႆႉၼၼ်ႉသူတၵ်းတေလႆႈၶၢႆသၢၼ်ၶဝ်ႈၵျုင်ႇသီႇပႄႇ၊ဢမ်ႇၼၼ်သၢၼ်ၶဝ်ႈမုယေႃးယေႈၶႂၢႆး၊လူၺ်ႈငိုၼ်းယေႈၵျၢပ်ႈၵႃႈတီႈၽၵ်းတူဝဵင်း သမႃႇရိ၊ ၼၼ်ႉဢေႃႈ၊” ဝႃႈၼင်ႇၼႆ၊-
ဢိၵ်ႇတင်းၶုၼ်ဢၼ်ပွင်ၵၢၼ်ယၢမ်ႈလၢတ်ႈဝႆႉၼၼ်ႉလႄႈဝႃႈ၊ “ပေႃး ထႃႇဝရႃႉၽြႃး၊ ယင်းဢမ်ႇၽုၺ်ႇႁူးလႅင်းၽႃႉၵၢင်ႁၢဝ်ပၼ်ၸိုင်၊တၵ်းတေဢမ်ႇပဵၼ်ၸိူဝ်ႉၼင်ႇၼၼ်လႆႈ၊” ဝႃႈၼင်ႇၼႆသေယဝ်ႉ၊ ဢေးလိသႄး၊ ၶိုၼ်းလၢတ်ႈလႄႈဝႃႈ၊ “မၢၵ်ႇတႃမႂ်းတၵ်းတေလႆႈႁၼ်လွင်ႈၼၼ်ႉဢေႃႈ။ ၵူၺ်းၵႃႈ၊မႂ်းတၵ်းတေဢမ်ႇလႆႈၵိၼ်တၢင်းၵိၼ်တၢင်းၶူပ်းၼၼ်ႉ၊” ဝႃႈၼင်ႇၼႆၼၼ်ႉဢေႃႈ။-
ပဵၼ်မႃးတီႈမၼ်းၼၼ်ႉၸွမ်းၸိူဝ်ႉၼင်ႇၼၼ်ယဝ်ႉဢေႃႈ။ ၵူၼ်းတင်းလၢႆယဵပ်ႇၵႃႈၼိူဝ်မၼ်းၵႃႈတီႈၽၵ်းတူဝဵင်းလႄႈမၼ်းၼၼ်ႉတၢႆၵႂႃႇသေဢေႃႈ။
မိူဝ်ႈၼၼ်ႉ၊ ဢေးလိသႄး၊ လႆႈလၢတ်ႈတီႈမႄႈယိင်းဝဵင်း သုၼိမ်ႇ၊ ဢၼ် ဢေးလိသႄး၊ ႁႂ်ႈဢသၢၵ်ႈလုၵ်ႈဢွၼ်ႇမၼ်းၶိုၼ်းလိပ်းမႃးမိူဝ်ႈဢွၼ်တၢင်းၼၼ်ႉဝႆႉလႄႈဝႃႈ၊ “ ထႃႇဝရႃႉၽြႃး၊ သူင်ႇၽေးဢၼ်ပဵၼ်ၶဝ်ႈၵႃႈမၢၵ်ႇပႅင်းမႃးၵႃႈတီႈဝဵင်းၼႆႉယဝ်ႉလႄႈတၵ်းပဵၼ်ၸဵတ်းပီတဵမ်တဵမ်ဢေႃႈ။ ပိူဝ်ႈၼႆလႄႈမႂ်း၊ဢိၵ်ႇတင်းၵူၼ်းႁိူၼ်းၵူၼ်းယေးမႂ်းၶၢႆႉၵႂႃႇသွၼ်ႈပိုင်ႈယူႇသေတီႈတီႈတႃႉ၊” ဝႃႈၼင်ႇၼႆဢေႃႈ။-
မႄႈယိင်းၼၼ်ႉႁဵတ်းၸွမ်းၵႃႈၼင်ႇဢၼ်မၼ်းသင်ႇလၢတ်ႈၼၼ်ႉသေလႄႈပႃးဢဝ်ၵူၼ်းႁိူၼ်းၵူၼ်းယေးမၼ်းတင်းလၢႆၶၢႆႉၵႂႃႇသွၼ်ႈပိုင်ႈယူႇၼႂ်းမိူင်း ၽိလိတ်ႉတိ၊ ၸဵတ်းပီဢေႃႈ။
မိူဝ်ႈဢၼ်ၸေးၸဵတ်းပီယဝ်ႉၼၼ်ႉၸိုင်၊မႄႈယိင်းၼၼ်ႉၶိုၼ်းမႃးတီႈမိူင်း ဢိသရေး၊ သေယဝ်ႉ၊ၶဝ်ႈၸူးတီႈၶုၼ်ႁေႃၶမ်းႁႂ်ႈလႆႈလဝ်ႈယွၼ်းဢဝ်ႁိူၼ်းမၼ်း၊လိၼ်မၼ်းၶိုၼ်းဢေႃႈ။-
မၼ်းႁၼ်ၶုၼ်ႁေႃၶမ်းလၢတ်ႈတေႃႇၵၼ်တင်း ၵေႇႁႃႇၸိ၊ ၵူၼ်းဢွၼ်ႇ ဢေးလိသႄး၊ ၼၼ်ႉယူႇလႄႈ၊ၶုၼ်ႁေႃၶမ်းတွင်ႈထၢမ်တီႈမၼ်းလွင်ႈၼိမိၵ်ႈလၢၵ်ႈၶၼႃႇၸိူဝ်းဢၼ် ဢေးလိသႄး၊ ႁဵတ်းမႃးၼၼ်ႉဢေႃႈ။-
ယၢမ်းမိူဝ်ႈဢၼ် ၵေႇႁႃႇၸိ၊ ယင်းတိုၵ်ႉလၢတ်ႈၼႄလွင်ႈဢၼ် ဢေးလိသႄး၊ ႁဵတ်းႁႂ်ႈၵူၼ်းတၢႆလုၵ်ႉၶိုၼ်းမႃးၼၼ်ႉယူႇၼၼ်ႉၸိုင်၊မႄႈယိင်းၼၼ်ႉၶဝ်ႈၸူးတီႈၶုၼ်ႁေႃၶမ်းဢေႃႈ။ ၵေႇႁႃႇၸိ၊ ၵေႃႈလဝ်ႈလၢတ်ႈလႄႈဝႃႈ၊ “ၸဝ်ႈၶုၼ်လူင်တီႈၶႃႈ။ ၵေႃႉၼႆႉပဵၼ်မႄႈယိင်းၼၼ်ႉယဝ်ႉ။ ၵေႃႉၼႆႉသမ်ႉပဵၼ်လုၵ်ႈၸၢႆးမၼ်းဢၼ် ဢေးလိသႄး၊ ႁဵတ်းႁႂ်ႈဢသၢၵ်ႈၶိုၼ်းလိပ်းၼၼ်ႉတီႈၶႃႈယဝ်ႉ၊” ဝႃႈၼင်ႇၼႆဢေႃႈ။-
မိူဝ်ႈဢၼ်ၶုၼ်ႁေႃၶမ်းတွင်ႈထၢမ်တူၺ်းၸိုင်၊မႄႈယိင်းၼၼ်ႉၶၢမ်ႇသၢၵ်ႈသေႇဢေႃႈ။ ပိူဝ်ႈၼႆလႄႈၶုၼ်ႁေႃၶမ်းႁွင်ႉဢဝ်ၶုၼ်ဢၼ်ပွင်ၵၢၼ်ၸဝ်ႈၵေႃႉၼိုင်ႈမႃးသေယဝ်ႉ၊ၸႂ်ႉႁႂ်ႈမၼ်းဢဝ်ဢုၵ်ႉၸႃႇၶူဝ်းလဵင်းၶိုၼ်းပၼ်တီႈမႄႈယိင်းၼၼ်ႉမူတ်းမူတ်းသဵင်ႈသဵင်ႈ၊ဢိၵ်ႇတင်းၵႃႈၶၼ်မၢၵ်ႇၶဝ်ႈႁူင်းၼမ်ႉဢၼ်ဢွၵ်ႇၵႃႈတီႈတူင်ႈႁႆႈတူင်ႈၼႃးမၼ်း၊ၼႂ်းၸူဝ်ႈၸဵတ်းပီဢၼ်မၼ်းဢွၵ်ႇမိူင်းၸဝ်ႈၵႂႃႇၼၼ်ႉၶိုၼ်းပၼ်တီႈမၼ်းဢေႃႈ။
ဢေးလိသႄး၊ ၵႂႃႇၵႃႈတီႈဝဵင်း တမ်ႇမတ်ႉသၵတ်ႉ၊ ယၢမ်းမိူဝ်ႈဢၼ်ၶုၼ်ႁေႃၶမ်း ပိၼ်ႇႁႃႇတတ်ႉ၊ ပဵၼ်ၶႆႈပဵၼ်ၼၢဝ်ယူႇၼၼ်ႉဢေႃႈ။ မိူဝ်ႈဢၼ်ပိူၼ်ႈလဝ်ႈလၢတ်ႈတီႈၶုၼ်ႁေႃၶမ်းလူၺ်ႈလွင်ႈဢၼ် ဢေးလိသႄး၊ ႁွတ်ႈထိုင်ၵႃႈတီႈၼၼ်ႈၼၼ်ႉၸိုင်၊-
ၶုၼ်ႁေႃၶမ်းလၢတ်ႈတီႈ ႁႃႇၸေႇလႃႉ၊ ဢၼ်ပဵၼ်ၶုၼ်ဢၼ်ပွင်ၵၢၼ်ၵေႃႉၼိုင်ႈၼၼ်ႉလႄႈဝႃႈ၊ “မႂ်းဢဝ်တင်းလၢၵ်ႈသွင်ႇလႄႈၵႂႃႇႁပ်ႉႁူဝ်တၢင်းပရေႃးၽႅတ်ႈ ၼၼ်ႉသေယဝ်ႉ၊ႁႂ်ႈမၼ်းလဝ်ႈထၢမ်တီႈ ထႃႇဝရႃႉၽြႃး၊ လူၺ်ႈလွင်ႈဢၼ်တၢင်းၶႆႈတၢင်းပဵၼ်ၵဝ်ၼႆႉတၵ်းႁၢႆႁိုဝ်၊တၵ်းဢမ်ႇႁၢႆႁိုဝ်ၼၼ်ႉတႃႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ ႁႃႇၸေႇလႃႉ၊ ပႃးဢဝ်တင်းလၢၵ်ႈသွင်ႇဢၼ်ပဵၼ်ဢုၵ်ႉၸႃႇဝဵင်း တမ်ႇမတ်ႉသၵတ်ႉ၊ ဢၼ်လီၵူႈၸိူဝ်ႉၵူႈပိူင်တၢင်ႇသႂ်ႇၵလႃႇဢုၵ်ႈသီႇသိပ်းတူဝ်သေယဝ်ႉ၊ၵႂႃႇႁပ်ႉႁူဝ်တၢင်း ဢေးလိသႄး၊ ဢေႃႈ။ မိူဝ်ႈဢၼ် ႁႃႇၸေႇလႃႉ၊ ႁူပ်ႉထူပ်း ဢေးလိသႄး၊ ၼၼ်ႉမၼ်းလၢတ်ႈလႄႈဝႃႈ၊ “ၶုၼ်ႁေႃၶမ်း ပိၼ်ႇႁႃႇတတ်ႉ၊ လုၵ်ႈၸၢႆးၸဝ်ႈႁဝ်းၼၼ်ႉပွႆႇၸႂ်ႉၶႃႈၸဝ်ႈမႃးႁႂ်ႈလႆႈလဝ်ႈထၢမ်တီႈၸဝ်ႈႁဝ်းလူၺ်ႈလွင်ႈဢၼ်တၢင်းၶႆႈတၢင်းပဵၼ်မၼ်းတၵ်းႁၢႆႁိုဝ်ဢမ်ႇႁၢႆႁိုဝ်ၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ဢေးလိသႄး၊ ၵေႃႈလၢတ်ႈလႄႈဝႃႈ၊ “ ထႃႇဝရႃႉၽြႃး၊ ၼႄပျႃးတီႈၵဝ်လွင်ႈဢၼ်မၼ်းတၵ်းတေလႆႈတၢႆဢမၢၼ်ႇၶၼ်ပဵၼ်ၼၼ်ႉဢေႃႈ။ ၼႂ်းဝႃႈၼၼ်သေၵေႃႈၵႂႃႇလႄႈမွၵ်ႇလၢတ်ႈတီႈမၼ်းလႄႈဝႃႈ၊ ‘ၸဝ်ႈႁဝ်းတၵ်းၸိုၼ်ႈႁၢႆၶႅၼ်းမႃးဢေႃႈ၊’ ဝႃႈၼႆတႃႉ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ ဢေးလိသႄး၊ ယႅၵ်ႉတူၺ်းမၼ်းၸေးၸေးၸွတ်ႇၸွတ်ႇယူႇတေႃႇထိုင်ႁွတ်ႈ ႁႃႇၸေႇလႃႉ၊ ထၢၼ်ႈပေႃးၼႃႈလုၵႂႃႇဢေႃႈ။ ၼင်ႇၼၼ်လႄႈ ဢေးလိသႄး၊ ၼမ်ႉတႃတူၵ်းဢေႃႈ။-
ႁႃႇၸေႇလႃႉ၊ ၵေႃႈထၢမ်လႄႈဝႃႈ၊ “ၸဝ်ႈႁဝ်းၼမ်ႉတႃတူၵ်းၵွပ်ႈပိူဝ်ႈၸိူဝ်ႉၼင်ႇႁိုဝ်ၶႃႈ၊” ဝႃႈၼင်ႇၼႆဢေႃႈ။ ဢေးလိသႄး၊ ၶိုၼ်းလၢတ်ႈလႄႈဝႃႈ၊ “ၵွပ်ႈပိူဝ်ႈဢၼ်ၵဝ်ႁုႁၼ်လွင်ႈမႂ်းတၵ်းႁဵတ်းၽေးဢုပၢတ်ႈသႂ်ႇၵႃႈၼိူဝ်ၵူၼ်းမဵဝ်း ဢိသရေး၊ ၼၼ်ႉယဝ်ႉ။ မႂ်းတၵ်းဢဝ်ၽႆးၽဝ်တိူၵ်ႈတီႈတိုၵ်းသိုၵ်းၶဝ်၊တၵ်းဢဝ်တၢႆၵူၼ်းၼုမ်ႇၵူၼ်းၵမ်ၶဝ်၊တၵ်းဢဝ်လုၵ်ႈဢွၼ်ႇလႅင်ၶဝ်ပေႃႉၽတ်ႉၵႃႈၼိူဝ်လိၼ်လႄႈတၵ်းၽႃႇတွင်ႉမႄႈယိင်းၸိူဝ်းဢၼ်ပႃးတွင်ႉၼၼ်ႉလႄႈၼမ်ႉတႃၵဝ်ၸင်ႇတူၵ်းဢေႃႈ၊” ဝႃႈၼင်ႇၼႆဢေႃႈ။
ႁႃႇၸေႇလႃႉ၊ ၵေႃႈလၢတ်ႈလႄႈဝႃႈ၊ “ၶႃႈၸဝ်ႈၵူၺ်းပဵၼ်မိူၼ်မႃတူဝ်ၼိုင်ႈလႄႈတၵ်းမီးတၼ်းၶူဝ်းဢၼ်ယႂ်ႇၼႃႇထၼ်ႇၼႆႉလႆႈၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။ ဢေးလိသႄး၊ ၶိုၼ်းလၢတ်ႈလႄႈဝႃႈ၊ “ ထႃႇဝရႃႉၽြႃး၊ ၼႄပျႃးတီႈၵဝ်လွင်ႈဢၼ်မႂ်းတၵ်းပဵၼ်ၶုၼ်ႁေႃၶမ်းၵႃႈၼိူဝ်မိူင်း သီးရီးယႃး၊ ၼၼ်ႉယဝ်ႉ၊” ဝႃႈၼင်ႇၼႆဢေႃႈ။
ႁႃႇၸေႇလႃႉ၊ ၶိုၼ်းမိူဝ်းၵႂႃႇၵႃႈတီႈ ပိၼ်ႇႁႃႇတတ်ႉ၊ သေယဝ်ႉ၊ၸဝ်ႈမၼ်းထၢမ်လႄႈဝႃႈ၊ “ဢေးလိသႄး၊ လၢတ်ႈၸိူဝ်ႉၼင်ႇႁိုဝ်တီႈမႂ်း၊” ဝႃႈၼင်ႇၼႆဢေႃႈ။ ႁႃႇၸေႇလႃႉ၊ ၶိုၼ်းလဝ်ႈလၢတ်ႈလႄႈဝႃႈ၊ “မၼ်းလၢတ်ႈဝႃႈၸဝ်ႈႁဝ်းတၵ်းတေၸိုၼ်ႈႁၢႆၶႅၼ်းမႃးဢမၢၼ်ႇၶၼ်ပဵၼ်ၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊ဝၼ်းမိူဝ်ႈၽုၵ်ႈၼၼ်ႉ ႁႃႇၸေႇလႃႉ၊ ဢဝ်ၽႃႈႁူမ်ႇၸုပ်ႉၼမ်ႉသေယဝ်ႉ၊ႁူမ်ႇသုမ်ႇသႂ်ႇၼႃႈၶုၼ်ႁေႃၶမ်းႁႂ်ႈထၢၼ်ႈပေႃးတၢႆသေဢေႃႈ။ ၼင်ႇၼၼ်လႄႈ ႁႃႇၸေႇလႃႉ၊ ပုတ်ႈႁၢင်ႈၼင်ႈမိူင်းႁေႃတၢင်တူဝ် ပိၼ်ႇႁႃႇတတ်ႉ၊ လႄႈပဵၼ်ၶုၼ်ႁေႃၶမ်းမိူင်း သီးရီးယႃး၊ သေဢေႃႈ။
ၼႂ်းပီဢၼ် ယူဝ်းရမ်ႇ၊ လုၵ်ႈၸၢႆး ဢႃႇႁပ်ႉ၊ ၶုၼ်ႁေႃၶမ်းမိူင်း ဢိသရေး၊ ၸၢမ်ႇႁၢင်ႈၸၢမ်ႇႁေႃလႆႈႁႃႈပီၼၼ်ႉ၊ ယႁူဝ်းရမ်ႇ၊ လုၵ်ႈၸၢႆး ယူဝ်းသၽတ်ႉ၊ ပဵၼ်ၶုၼ်ႁေႃၶမ်းမိူင်း ယုတႃႉ၊ ဢေႃႈ။-
မိူဝ်ႈဢၼ်ဢသၢၵ်ႈမၼ်းလႆႈသၢမ်သိပ်းသွင်ပီၼၼ်ႉမၼ်းဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရုသလႅမ်ႇ၊ လႆႈပႅတ်ႇပီဢေႃႈ။-
မေးၼၢင်းမၼ်းပဵၼ်လုၵ်ႈယိင်း ဢႃႇႁပ်ႉ၊ လႄႈမၼ်းၸွမ်းတၢင်းၵမ်တၢင်းၵျၢင်ႉဢၼ်ႁၢႆႉဢၼ်မိူၵ်ႈၶုၼ်ႁေႃၶမ်းမိူင်း ဢိသရေး၊ မိူၼ်ၸိူဝ်ႉၼင်ႇမဵဝ်းၸိူဝ်ႉၶိူဝ်း ဢႃႇႁပ်ႉ၊ သေယဝ်ႉ၊ႁဵတ်းတုၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ဢေႃႈ။-
ၼႂ်းဝႃႈၼၼ်သေၵေႃႈ ထႃႇဝရႃႉၽြႃး၊ ဢမ်ႇမီးဢလူဝ်ႇၶႂ်ႈယႃႉမိူင်း ယုတႃႉ၊ ပႅတ်ႈၵွပ်ႈပိူဝ်ႈမၼ်းၸဝ်ႈလႆႈဝႆႉၵတိတီႈၶႃႈမၼ်းၸဝ်ႈ တႃႇဝိတ်ႈ၊ လူၺ်ႈလွင်ႈဢၼ်မၼ်းၸဝ်ႈတၵ်းႁႂ်ႈလုၵ်ႈလၢၼ်ၸိူဝ်ႉၶိူဝ်းမၼ်းလႆႈဢုပ်ႉပိူင်ႇယူႇသေႇသေႇၼၼ်ႉဢေႃႈ။
ၼႂ်းၸူဝ်ႈပၢၼ် ယႁူဝ်းရမ်ႇ၊ ၼၼ်ႉမိူင်း ဢေႇတုမ်ႇ၊ လုၵ်ႉၽိုၼ်ႉမိူင်း ယုတႃႉ၊ သေလႄႈပဵၼ်မိူင်းလွတ်ႈလႅဝ်းၵွၼ်းၶေႃသေဢေႃႈ။-
ယႁူဝ်းရမ်ႇ၊ ၵေႃႈပႃးဢဝ်တင်းလေႃႉမႃႉသိုၵ်းမၼ်းတင်းလၢႆ၊ၶီႇသိုၵ်းၵႂႃႇၵႃႈတီႈဝဵင်း ၸႃႇဢိရႃႉ၊ ဢေႃႈ။ မိူဝ်ႈဢၼ်ၵူၼ်းသိုၵ်း ဢေႇတုမ်ႇ၊ လွမ်ႉႁွပ်ႈမၼ်းဢိၵ်ႇတင်းၶုၼ်သိုၵ်းဢၼ်ဢုပ်ႉလေႃႉမႃႉသိုၵ်းမၼ်းတင်းလၢႆယူႇၼၼ်ႉမၼ်းလုၵ်ႉၶိင်ႇၵၢင်ၶိုၼ်းသေလႄႈတိုၵ်းတေႃးလႄႈတပ်ႉသိုၵ်းလူင်မၼ်းလႆႈပၢႆႈလွတ်ႈၶိုၼ်းမိူဝ်းၵႂႃႇဢေႃႈ။-
ၼင်ႇၼၼ်လႄႈမိူင်း ဢေႇတုမ်ႇ၊ ပဵၼ်မိူင်းဢၼ်လွတ်ႈလႅဝ်းၵွၼ်းၶေႃယူႇတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။ မိူဝ်ႈၶိင်ႇၼၼ်ႉမိူင်း လိပၼႃႉ၊ ၵေႃႈလုၵ်ႉၽိုၼ်ႉၼင်ႇၵဝ်ႇဢေႃႈ။
လွင်ႈတၢင်းဢၼ်ၶုၼ်ႁေႃၶမ်း ယႁူဝ်းရမ်ႇ၊ ႁဵတ်းၵူႈၸိူဝ်ႉၵူႈပိူင်ၸိူဝ်းၼၼ်ႉတႅမ်ႈမၢႆဝႆႉၵႃႈၼႂ်း ပိုၼ်းၶုၼ်ႁေႃၶမ်းယုတႃႉ၊ ဢေႃႈ။-
ယႁူဝ်းရမ်ႇ၊ ၼၼ်ႉၼွၼ်းၽႄးလႄႈဢဝ်သၢင်းၵျူဝ်ႇဝႆႉၵႃႈတီႈပႃႇႁဵဝ်ႈၵႃႈၼႂ်းဝဵင်းၸဝ်ႈပေႃႈမၼ်း တႃႇဝိတ်ႈ၊ သေယဝ်ႉ၊လုၵ်ႈၸၢႆးမၼ်း ဢႃႇၶၸိ၊ သိုပ်ႇၼင်ႈႁၢင်ႈၼင်ႈႁေႃဢေႃႈ။
ၼႂ်းပီဢၼ် ယူဝ်းရမ်ႇ၊ လုၵ်ႈၸၢႆး ဢႃႇႁပ်ႉ၊ ၶုၼ်ႁေႃၶမ်းမိူင်း ဢိသရေး၊ ၸၢမ်ႇႁၢင်ႈၸၢမ်ႇႁေႃလႆႈသိပ်းသွင်ပီၼၼ်ႉ၊ ဢႃႇၶၸိ၊ လုၵ်ႈၸၢႆး ယႁူဝ်းရမ်ႇ၊ ပဵၼ်ၶုၼ်ႁေႃၶမ်းမိူင်း ယုတႃႉ၊ ဢေႃႈ။-
မိူဝ်ႈဢၼ်ဢသၢၵ်ႈမၼ်းလႆႈသၢဝ်းသွင်ပီၼၼ်ႉမၼ်းဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရုသလႅမ်ႇ၊ ပီလဵဝ်ဢေႃႈ။ မႄႈၸဝ်ႈမၼ်းၼၼ်ႉပဵၼ် ဢႃႇထလိ၊ လုၵ်ႈယိင်းၶုၼ်ႁေႃၶမ်း ဢႃႇႁပ်ႉ၊ သမ်ႉပဵၼ်လၢၼ်ယိင်းၶုၼ်ႁေႃၶမ်း ဢေႃးမရိ၊ မိူင်း ဢိသရေး၊ ဢေႃႈ။-
ပိူဝ်ႈဢၼ်မၼ်းပဵၼ်လုၵ်ႈၶူၺ် ဢႃႇႁပ်ႉ၊ လႄႈမၼ်းၵေႃႈၸွမ်းတၢင်းၵမ်တၢင်းၵျၢင်ႉဢၼ်ၶိူဝ်းၶုၼ်ႁေႃၶမ်း ဢႃႇႁပ်ႉ၊ ၵမ်ၵျၢင်ႉၼၼ်ႉလႄႈႁဵတ်းတုၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ မိူၼ်ၸိူဝ်ႉၼင်ႇၸိူဝ်ႉၶိူဝ်း ဢႃႇႁပ်ႉ၊ ၼၼ်ႉၼင်ႇၵဝ်ႇဢေႃႈ။
ၶုၼ်ႁေႃၶမ်း ဢႃႇၶၸိ၊ ၽွမ်ႉၵၼ်တင်းၶုၼ်ႁေႃၶမ်း ယူဝ်းရမ်ႇ၊ မိူင်း ဢိသရေး၊ သေလႄႈၶီႇသိုၵ်းၵႂႃႇတိုၵ်းတေႃးၶုၼ်ႁေႃၶမ်း ႁႃႇၸေႇလႃႉ၊ မိူင်း သီးရီးယႃး၊ ဢေႃႈ။ ၶဝ်တိုၵ်းတေႃးၵၼ်ၵႃႈတီႈဝဵင်း ရႃႇမုတ်ႉ၊ မိူင်း ၵိလတ်ႉ၊ လႄႈ ယူဝ်းရမ်ႇ၊ လႆႈတိူဝ်ႉမၢတ်ႇၵႂႃႇၵႃႈၼႂ်းၼႃႈသိုၵ်းဢေႃႈ။-
မၼ်းၶိုၼ်းမိူဝ်းၵႂႃႇၵႃႈတီႈဝဵင်း ယေႇၸရေး၊ ႁႂ်ႈတၢင်းၸဵပ်းမၼ်းလႆႈႁၢႆလႄႈ ဢႃႇၶၸိ၊ ၵႂႃႇသူႇၵႂႃႇၸႂ်းမၼ်းၵႃႈတီႈဝဵင်းၼၼ်ႉဢေႃႈ။
ၼႂ်းမိူဝ်ႈၶိင်ႇၼၼ်ႉ၊ပရေႃးၽႅတ်ႈ ဢေးလိသႄး၊ ႁွင်ႉဢဝ်ၵူၼ်းၼုမ်ႇၵႃႈၼႂ်းမုၵ်ႉၸုမ်းပရေႃးၽႅတ်ႈၼၼ်ႉၵေႃႉၼိုင်ႈလႄႈသင်ႇလၢတ်ႈဝႃႈ၊ “မႂ်းမႄးႁႅၼ်းတူဝ်ၸဝ်ႈၵဝ်ႇလႄႈၵႂႃႇၸူးတီႈဝဵင်း ရႃႇမုတ်ႉ၊ ၼႂ်းမိူင်း ၵိလတ်ႉ၊ ပုၼ်ႉတႃႉ။ ပႃးဢဝ်တဝ်ႈၼမ်ႉမၼ်းသၢၼ်ႇလုၼ်ႇၼႆႉၵႂႃႇသေလႄႈ၊-
မိူဝ်ႈဢၼ်ႁွတ်ႈထိုင်ၵႃႈတီႈၼၼ်ႈၸိုင်၊ထၢမ်ႁႃ ယေႇႁု၊ လုၵ်ႈၸၢႆး ယေႇႁူဝ်းသၽတ်ႉ၊ လၢၼ်ၸၢႆး ၼိမ်းသိ၊ ၼၼ်ႉတႃႉ။ ႁွင်ႉဢဝ်မၼ်းဢွၵ်ႇသေၵႃႈတီႈမူႇၵေႃႉသႄႈမၼ်းၸိူဝ်းၼၼ်ႉသေယဝ်ႉ၊ၶဝ်ႈၵႃႈၼႂ်းလုၵ်းတၢင်းၼႂ်းတႃႉ၊-
ဢဝ်ၼမ်ႉမၼ်းသၢၼ်ႇလုၼ်ႇၼႆႉသွၼ်းလေႃႇၵႃႈၼိူဝ်မၼ်းသေလႄႈလၢတ်ႈဝႃႈ၊ ‘ ထႃႇဝရႃႉၽြႃး၊ မီးဢမိင်ႉၸမ်ႉ၊ၵဝ်ပၼ်ၽိၵ်ႈသိၵ်ႈတီႈမႂ်းႁႂ်ႈမႂ်းပဵၼ်ၶုၼ်ႁေႃၶမ်းယဝ်ႉ၊ဝႃႈၼင်ႇၼႆယဝ်ႉ၊’ ဝႃႈၼႆတႃႉ။ လိုၼ်းၼၼ်ႉဢွၵ်ႇသေၵႃႈတီႈၼၼ်ႈၵႂႃႇၶၼ်ၶၼ်ၽႂ်းၽႂ်းတႃႉ၊” ဝႃႈၼင်ႇၼႆဢေႃႈ။
ၸွမ်းၸိူဝ်ႉၼင်ႇၼၼ်လႄႈပရေႃးၽႅတ်ႈၵူၼ်းၼုမ်ႇၼၼ်ႉၵႂႃႇၵႃႈတီႈဝဵင်း ရႃႇမုတ်ႉ၊ ဢေႃႈ။-
ၵႃႈတီႈၼၼ်ႈမၼ်းထူပ်းႁၼ်ၶုၼ်သိုၵ်းႁၢၼ်တင်းလၢႆႁဵတ်းပၢင်ၵုမ်ယူႇၼၼ်ႉလႄႈ၊မၼ်းလၢတ်ႈတီႈၶဝ်လႄႈဝႃႈ၊ “ၸဝ်ႈၶုၼ်သိုၵ်းတီႈၶႃႈ။ ၵဝ်ၶႃႈမီးတီႈတၵ်းလၢတ်ႈတီႈၸဝ်ႈဢေႃႈ၊” ဝႃႈၼင်ႇၼႆဢေႃႈ။ ယေႇႁု၊ ထၢမ်လႄႈဝႃႈ၊ “ၼႂ်းႁဝ်းၸိူဝ်းၼႆႉမႂ်းၶႂ်ႈလၢတ်ႈတေႃႇၵေႃႉလႂ်၊” ဝႃႈၼင်ႇၼႆလႄႈ၊ မၼ်းၶိုၼ်းလၢတ်ႈလႄႈဝႃႈ၊ “ၸဝ်ႈၶုၼ်သိုၵ်းၶႃႈ။ ၵဝ်ၶႃႈၶႂ်ႈလၢတ်ႈတေႃႇၸဝ်ႈႁဝ်းဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ၶဝ်သွင်ၵေႃႉၵေႃႈၶဝ်ႈၵႃႈၼႂ်းလုၵ်းတၢင်းၼႂ်းသေယဝ်ႉ၊ပရေႃးၽႅတ်ႈၵူၼ်းၼုမ်ႇၼၼ်ႉဢဝ်ၼမ်ႉမၼ်းသၢၼ်ႇလုၼ်ႇသွၼ်းလေႃႇၵႃႈၼိူဝ်ႁူဝ် ယေႇႁု၊ လႄႈလၢတ်ႈဝႃႈ၊ “ ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ ၼၼ်ႉမီးဢမိင်ႉၸမ်ႉ၊ ‘ၵဝ်ပၼ်ၽိၵ်ႈသိၵ်ႈတီႈမႂ်းႁႂ်ႈမႂ်းပဵၼ်ၶုၼ်ႁေႃၶမ်း ဢိသရေး၊ ၼၼ်ႉယဝ်ႉ။-
မႂ်းတၵ်းလႆႈဢဝ်ၸဝ်ႈမႂ်းၶုၼ်ႁေႃၶမ်းဢၼ်ဝႃႈ၊လုၵ်ႈၸၢႆး ဢႃႇႁပ်ႉ၊ ၼၼ်ႉတၢႆ၊ပုၼ်ႈလွင်ႈၼင်ႇႁိုဝ်ၵဝ်တၵ်းပၼ်တၢမ်ႇတီႈ ယေႇၸပေႇလႃႉ၊ ပိူဝ်ႈဢၼ်မၼ်းဢဝ်ပရေႃးၽႅတ်ႈၵဝ်တင်းလၢႆဢိၵ်ႇတင်းၶႃႈၵဝ်တၢင်ႇၵေႃႉတၢင်ႇၵူၼ်းၼၼ်ႉတၢႆၼၼ်ႉဢေႃႈ။-
ၵႃႈဢၼ်ပဵၼ်ၵူၼ်းႁိူၼ်း ဢႃႇႁပ်ႉ၊ တင်းလုၵ်ႈလၢၼ်ၸိူဝ်ႉၶိူဝ်းမၼ်းတင်းသဵင်ႈတင်းလူင်တၵ်းလႆႈတၢႆဢေႃႈ။ ၵဝ်တၵ်းပႄႇၽဵဝ်ႈပႅတ်ႈၵႃႈဢၼ်ပဵၼ်ၵူၼ်းၸၢႆးၸဵမ်ၼုမ်ႇၸဵမ်ထဝ်ႈမိူၼ်မိူၼ်ၵၼ်ဢေႃႈ။-
ၵဝ်တၵ်းႁဵတ်းတီႈၵူၼ်းႁိူၼ်းမၼ်းမိူၼ်ၸိူဝ်ႉၼင်ႇဢၼ်ၵဝ်ႁဵတ်းတီႈႁိူၼ်းၶုၼ်ႁေႃၶမ်း ယေႇရူဝ်းပုမ်ႇ၊ မိူင်း ဢိသရေး၊ ဢိၵ်ႇတင်းၶုၼ်ႁေႃၶမ်း ပႃႇသႃႇ၊ မိူင်း ဢိသရေး၊ ၼၼ်ႉဢေႃႈ။-
ယေႇၸပေႇလႃႉ၊ ၼၼ်ႉမႃတင်းလၢႆတၵ်းဢွၼ်ၵၼ်ၵိၼ်တူဝ်တၢႆမၼ်းၵႃႈၼႂ်းဢိူင်ႇ ယေႇၸရေး၊ လႄႈဢမ်ႇလႆႈဢဝ်တူဝ်တၢႆမၼ်းသၢင်းၵျူဝ်ႇ၊’ ဝႃႈၼႆယဝ်ႉ၊” ဝႃႈၼင်ႇၼႆဢေႃႈ။ ဝႃႈၼင်ႇၼႆသေယဝ်ႉ၊ပၢႆႈဢွၵ်ႇသေၵႃႈတီႈလုၵ်းၼၼ်ႉၵႂႃႇဢေႃႈ။
ယေႇႁု၊ ၶိုၼ်းၶဝ်ႈၸူးတီႈၶုၼ်သိုၵ်းႁၢၼ်ၸိူဝ်းၼၼ်ႉလႄႈၵေႃႉၼိုင်ႈထၢမ်ဝႃႈ၊ “ၸွင်ႇသေႇၶျႃႇလီငၢမ်းၵူႈၸိူဝ်ႉၵူႈမဵဝ်းႁိုဝ်း။ ၵူၼ်းယွင်ႇၼၼ်ႉမႃးတီႈၸဝ်ႈၵွပ်ႈလူၺ်ႈလွင်ႈဢီႈသင်၊” ဝႃႈၼင်ႇၼႆဢေႃႈ။ ယေႇႁု၊ ၵေႃႈလၢတ်ႈလႄႈဝႃႈ၊ “သူႁုၸၵ်းမၼ်းလႄႈႁုလွင်ႈမၼ်းယူႇဢေႃႈ၊” ဝႃႈၼင်ႇၼႆဢေႃႈ။
ၶဝ်ၶိုၼ်းလၢတ်ႈလႄႈဝႃႈ၊ “ဢမ်ႇၸႂ်ႈၵူၺ်း။ လၢတ်ႈသေၵမ်း၊” ဝႃႈၼင်ႇၼႆသေယဝ်ႉ၊မၼ်းသမ်ႉလၢတ်ႈလႄႈဝႃႈ။ “မၼ်းမွၵ်ႇလၢတ်ႈတီႈၵဝ်လွင်ႈဢၼ် ထႃႇဝရႃႉၽြႃး၊ မီးဢမိင်ႉလႄႈဝႃႈ၊ ‘ၵဝ်ပၼ်ၽိၵ်ႈသိၵ်ႈတီႈမႂ်း၊ႁႂ်ႈမႂ်းပဵၼ်ၶုၼ်ႁေႃၶမ်းမိူင်း ဢိသရေး၊ ယဝ်ႉ၊’ ဝႃႈၼႆဝႆႉယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၵမ်းလဵဝ်ၵေႃႉသႄႈ ယေႇႁု၊ ၶုၼ်သိုၵ်းၸိူဝ်းၼၼ်ႉဢွၼ်ၵၼ်ဢဝ်သိူဝ်ႈယၢဝ်းၶဝ်ႁင်းၽႂ်ႁင်းမၼ်းသိူဝ်ႇၵႃႈၼိူဝ်သိၵ်ႈၶူဝ်လႆတင်းလၢႆပုၼ်ႈ ယေႇႁု၊ တၵ်းယဵပ်ႇၶိုၼ်ႈၵႂႃႇသေယဝ်ႉ၊ပဝ်ႇတိုင်ႈၼႄးၶရႃႇသေႁွင်ႉပၢဝ်ႇႁွင်ႉသေႃႇသေလႄႈလၢတ်ႈဝႃႈ၊ “ ယေႇႁု၊ ပဵၼ်ၶုၼ်ႁေႃၶမ်းယဝ်ႉ၊” ဝႃႈၼင်ႇၼႆဢေႃႈ။
ၼင်ႇၼၼ်လႄႈ ယေႇႁု၊ လွမ်ႁဵတ်းမုၵ်ႉႁဵတ်းၸိူဝ်းသေလုၵ်ႉၽိုၼ်ႉတေႃႇၶုၼ်ႁေႃၶမ်း ယူဝ်းရမ်ႇ၊ ဢၼ်ယင်းတိုၵ်ႉမီးယူႇၵႃႈၼႂ်းဝဵင်း ယေႇၸရေး၊ တီႈဢၼ်မၼ်းမႃးႁႂ်ႈလႆႈယူတ်းယႃၸဵပ်းမၼ်းဢၼ်လႆႈတိူဝ်ႉမၢတ်ႇၼႂ်းၼႃႈသိုၵ်းမိူဝ်ႈဢၼ်မၼ်းတိုၵ်းတေႃးၵၼ်တင်းၶုၼ်ႁေႃၶမ်း ႁႃႇၸေႇလႃႉ၊ ၵႃႈတီႈဝဵင်း ရႃႇမုတ်ႉ၊ မႃးၼၼ်ႉဢေႃႈ။-
ပိူဝ်ႈၼႆလႄႈ ယေႇႁု၊ လၢတ်ႈတီႈၵေႃႉသႄႈမၼ်းၶုၼ်သိုၵ်းၸိူဝ်းၼၼ်ႉလႄႈဝႃႈ၊ “ပေႃးသူပဵၼ်ၸႂ်ၵဝ်ၸိုင်၊ယႃႇပေႁႂ်ႈသေၵေႃႉသေၵူၼ်းလႆႈလွမ်ဢွၵ်ႇသေၵႃႈတီႈဝဵင်း ရႃႇမုတ်ႉ၊ ၼႆႉသေယဝ်ႉ၊ၵႂႃႇမွၵ်ႇၶၢဝ်ႇၵႃႈၼႂ်းဝဵင်း ယေႇၸရေး၊ ပုၼ်ႉၼၼ်ႉသေၵမ်း၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈမၼ်းၶီႇလေႃႉမႃႉသိုၵ်းမၼ်းသေလႄႈၶိုၼ်ႈၸူးတီႈဝဵင်း ယေႇၸရေး၊ ပုၼ်ႉဢေႃႈ။ ၸဵပ်း ယူဝ်းရမ်ႇ၊ ယင်းဢမ်ႇပႆႇႁၢႆလီလႄႈၶုၼ်ႁေႃၶမ်း ဢႃႇၶၸိ၊ မိူင်း ယုတႃႉ၊ ၼၼ်ႉယင်းမီးယူႇၵႃႈတီႈၼၼ်ႈမႃးသူႇမႃးၸႂ်းမၼ်းယူႇဢေႃႈ။
ၵူၼ်းပႂ်ႉဢၼ်ထၢမ်းၼႃႈၵၢၼ်ယူႇၵႃႈၼိူဝ်သဝ်လၢင်းဝဵင်း ယေႇၸရေး၊ ၼၼ်ႉမုင်ႈႁၼ် ယေႇႁု၊ တင်းၵူၼ်းမၼ်းတင်းလၢႆပေႃႇမႃးယူႇၼၼ်ႉသေယဝ်ႉ၊လၢတ်ႈလႄႈဝႃႈ၊ “ၵဝ်ႁၼ်ၵူၼ်းၵမ်ႈၽွင်ႈၶီႇမႃႉမႃးယူႇဢေႃႈ၊” ဝႃႈၼင်ႇၼႆဢေႃႈ။ ယူဝ်းရမ်ႇ၊ လၢတ်ႈလႄႈဝႃႈ၊ “ပွႆႇၸႂ်ႉၵူၼ်းသိုၵ်းၶီႇမႃႉၵေႃႉၼိုင်ႈၵႂႃႇၸႅတ်ႈထၢမ်တူၺ်းႁႂ်ႈလႆႈႁုဝႃႈ၊ၶဝ်ၼၼ်ႉပဵၼ်ၵေႃႉသႄႈႁဝ်းႁိုဝ်း၊ပဵၼ်ရၢၼ်ႇသူႇႁဝ်းႁိုဝ်းၼၼ်ႉတႃႉ၊” ဝႃႈၼင်ႇၼႆဢေႃႈ။
ၵူၼ်းသိုၵ်းၶီႇမႃႉၵေႃႉၼၼ်ႉၵႂႃႇႁပ်ႉႁူဝ်တၢင်း ယေႇႁု၊ သေလႄႈတွင်ႈထၢမ်ဝႃႈ၊ “ၶုၼ်ႁေႃၶမ်းၶႂ်ႈႁုလွင်ႈဢၼ်ၸဝ်ႈမႃးၼႆႉမႃးမိူၼ်ၸိူဝ်ႉၼင်ႇၵေႃႉသႄႈႁိုဝ်း၊” ဝႃႈၼင်ႇၼႆဢေႃႈ။ ယေႇႁု၊ ၶိုၼ်းတွပ်ႇလႄႈဝႃႈ၊ “ဢမ်ႇၸၢပ်ႈသႅင်ႇၵၼ်တင်းမႂ်းၵႃႈသင်ၵူၺ်း။ ဝၢႆႇၶိုၼ်းလႄႈၸွမ်းလင်ၵဝ်မႃးတႃႉ၊” ဝႃႈၼင်ႇၼႆဢေႃႈ။ ၵူၼ်းပႂ်ႉၵႃႈၼိူဝ်သဝ်လၢင်းၼၼ်ႉမွၵ်ႇလၢတ်ႈလႄႈဝႃႈ၊ “ၵေႃႉဢၼ်ၸႂ်ႉၵႂႃႇၼၼ်ႉႁွတ်ႈထိုင်ၵႃႈတီႈၶဝ်ယဝ်ႉလႄႈဢမ်ႇပွၵ်ႈၶိုၼ်းမႃးတီႈၶႃႈ၊” ဝႃႈၼင်ႇၼႆဢေႃႈ။-
ယူဝ်းရမ်ႇ၊ သမ်ႉပွႆႇၸႂ်ႉၵူၼ်းသိုၵ်းၶီႇမႃႉတၢင်ႇၵေႃႉထႅင်ႈၵႂႃႇလႄႈႁွတ်ႈထိုင်သေယဝ်ႉ၊တွင်ႈထၢမ်ၵႂၢမ်းၶေႃႈလဵဝ်ၵၼ်ထႅင်ႈဢေႃႈ။ ယေႇႁု၊ သမ်ႉလၢတ်ႈဝႃႈ၊ “ဢမ်ႇၸၢပ်ႈသႅင်ႇၵၼ်တင်းမႂ်းၵႃႈသင်ၵူၺ်း။ ဝၢႆႇၶိုၼ်းလႄႈၸွမ်းၵဝ်မႃးတႃႉ၊” ဝႃႈၼင်ႇၼႆထႅင်ႈဢေႃႈ။
ၵူၼ်းပႂ်ႉၵႃႈၼိူဝ်သဝ်လၢင်းလူင်ၼၼ်ႉသမ်ႉမွၵ်ႇလၢတ်ႈထႅင်ႈလႄႈဝႃႈ၊ “ၵေႃႉၼၼ်ႉႁွတ်ႈထိုင်တီႈၶဝ်ယဝ်ႉလႄႈဢမ်ႇပွၵ်ႈၶိုၼ်းမႃးတီႈၶႃႈ။ ၵေႃႉဢၼ်ဢွၼ်ႁူဝ်ၶဝ်ၼၼ်ႉႁေႃႈလေႃႉမႃႉသိုၵ်းမၼ်းႁၢဝ်ႈၵျၢမ်းၼႃႇလူင်လၢင်မိူၼ်ၸိူဝ်ႉၼင်ႇ ယေႇႁု၊ ႁေႃႈလေႃႉမႃႉသိုၵ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်း ယူဝ်းရမ်ႇ၊ ပူင်ဢမိင်ႉလႄႈဝႃႈ၊ “ႁၢင်ႈႁႅၼ်းလေႃႉမႃႉသိုၵ်းတႃႉ၊” ဝႃႈၼင်ႇၼႆသေယဝ်ႉ၊မိူဝ်ႈဢၼ်ႁၢင်ႈယဝ်ႉတူဝ်ႈယဝ်ႉၼၼ်ႉၸိုင်၊မၼ်းတင်းၶုၼ်ႁေႃၶမ်း ဢႃႇၶၸိ၊ ၶီႇလေႃႉမႃႉသိုၵ်းယေႈၵေႃႉယေႈလမ်းသေလႄႈဢွၵ်ႇၵႂႃႇႁႂ်ႈလႆႈႁူပ်ႉထူပ်း ယေႇႁု၊ ဢေႃႈ။ ၶဝ်ႁူပ်ႉထူပ်းၵၼ်ၵႃႈတီႈၵႂၢၵ်ႈလိၼ် ၼႃႇပုတ်ႉ၊ ၵူၼ်းဝဵင်း ယေႇၸရေး၊ ၼၼ်ႉဢေႃႈ။-
ယူဝ်းရမ်ႇ၊ ထၢမ်လႄႈဝႃႈ၊ “ ယေႇႁု၊ ႟။ မႂ်းမႃးပုၼ်ႈတၢင်းၼိမ်ႁိုဝ်း၊” ဝႃႈၼင်ႇၼႆဢေႃႈ။ ယေႇႁု၊ ၶိုၼ်းတွပ်ႇလၢတ်ႈဝႃႈ၊ “ၼႂ်းၸူဝ်ႈဢၼ်မႄႈမႂ်း ယေႇၸပေႇလႃႉ၊ ယင်းႁဵတ်းဢတၢတ်ႈမေႃၽီယူႇလႄႈဝႆႈႁုၼ်ႇႁၢင်ႈသၢင်းထုယူႇၼၼ်ႉတၵ်းမီးတၢင်းဢၼ်ၼိမ်လႆႈၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ယူဝ်းရမ်ႇ၊ ႁေႃႈလေႃႉမႃႉသိုၵ်းမၼ်းဝၢႆႇၶိုၼ်းလႄႈဢွၵ်ႇပၢႆႈသေယဝ်ႉ၊လၢတ်ႈတီႈ ဢႃႇၶၸိ၊ လႄႈဝႃႈ၊ “ ဢႃႇၶၸိ၊ ႟။ ပဵၼ်တၢင်းဢၼ်လုၵ်ႉၽိုၼ်ႉမိူင်းဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ ယေႇႁု၊ ၵေႃႈၵႃႈမီးဢဵၼ်ႁႅင်းဝူတ်ႈၵၢင်ႇမၼ်းယိုဝ်းလႄႈၸပ်းသႂ်ႇၵႃႈတီႈပႄလင် ယူဝ်းရမ်ႇ၊ သဵပ်ႇတႅင်းပွင်ႇပိဝ်ၵႂႃႇၵႃႈတီႈႁူဝ်ၸႂ်မၼ်းသေယဝ်ႉ၊မၼ်းလူမ်ႉတူၵ်းၵႃႈၼႂ်းလေႃႉမႃႉသိုၵ်းမၼ်းၵႂႃႇဢေႃႈ။-
ယေႇႁု၊ ၵေႃႈလၢတ်ႈတီႈ ပိတ်ႉၵႃႇ၊ ၵူၼ်းႁေႃႈလေႃႉမႃႉသိုၵ်းၸဝ်ႈၼၼ်ႉလႄႈဝႃႈ၊ “လၢၵ်ႈဢဝ်တူဝ်တၢႆမၼ်းၶျႃးတူၵ်းပႅတ်ႈၵႃႈၼႂ်းၵႂၢၵ်ႈလိၼ် ၼႃႇပုတ်ႉ၊ ၼၼ်ႉတႃႉ။ ၼႂ်းမိူဝ်ႈဢၼ်ၵဝ်တင်းမႂ်းၶီႇမႃႉလႄႈၸွမ်းလင်ပေႃႈမၼ်း ဢႃႇႁပ်ႉ၊ ယူႇၼၼ်ႉ ထႃႇဝရႃႉၽြႃး၊ ပျႃႇတိၵ်ႈဝႆႉလူၺ်ႈလွင်ႈမၼ်းၼၼ်ႉၸွင်ႇမႂ်းတွင်းႁိုဝ်း။-
ထႃႇဝရႃႉၽြႃး၊ လၢတ်ႈတီႈ ဢႃႇႁပ်ႉ၊ လႄႈဝႃႈ၊ ‘ၵဝ်တူၺ်းႁၼ်တၢင်းဢၼ်ဢဝ်တၢႆ ၼႃႇပုတ်ႉ၊ ဢိၵ်ႇတင်းလုၵ်ႈၸၢႆးမၼ်းတင်းလၢႆၼႂ်းဝၼ်းမိူဝ်ႈဝႃးၼၼ်ႉယဝ်ႉ။ ၼင်ႇၼၼ်လႄႈၵဝ်တၵ်းပၼ်တၢမ်ႇမႂ်းၵႃႈၼႂ်းၵႂၢၵ်ႈလိၼ်ၼႆႉဢေႃႈ၊’ ဝႃႈၼႆယဝ်ႉ။ ပိူဝ်ႈၼႆလႄႈလၢၵ်ႈတူဝ်တၢႆ ယူဝ်းရမ်ႇ၊ ၵႂႃႇၶျႃးတူၵ်းပႅတ်ႈၵႃႈၼႂ်းၵႂၢၵ်ႈလိၼ် ၼႃႇပုတ်ႉ၊ ၼႆႉၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉဝႆႉၼၼ်ႉတႃႉ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်း ဢႃႇၶၸိ၊ ႁၼ်လွင်ႈတၢင်းၼၼ်ႉသေယဝ်ႉ၊ၶီႇလေႃႉမႃႉသိုၵ်းမၼ်းဢွၵ်ႇပၢႆႈၸူးတီႈဝဵင်း ပေႇႀႁၵ်ႉၵၼ်ႇ၊ ၵႂႃႇယူႇလႄႈ ယေႇႁု၊ ၵေႃႈလိုပ်ႈလမ်းၸွမ်းဢေႃႈ။ မၼ်းပူင်ဢမိင်ႉလႄႈဝႃႈ၊ “ဢဝ်ၵၢင်ႇယိုဝ်းမၼ်းတႃႉ၊” ဝႃႈၼင်ႇၼႆလႄႈၶဝ်ၵေႃႈယိုဝ်းမၼ်းတိူဝ်ႉမၢတ်ႇၵႃႈၼႂ်းလေႃႉမႃႉသိုၵ်းမၼ်းၼႂ်းသဵၼ်ႈတၢင်းဢၼ်ၶိုၼ်ႈၵႂႃႇၸူးတီႈဝဵင်း ၵုရႃႉ၊ ဢၼ်မီးႁိမ်းဝဵင်း ဢိသလမ်ႇ၊ ၼၼ်ႉသေယဝ်ႉ၊မၼ်းသိုပ်ႇပၢႆႈၵႂႃႇၵႃႈတီႈဝဵင်း မေႇၵိတ်ႉတေႃႇ၊ လႄႈတၢႆၵႃႈတီႈၼၼ်ႈသေဢေႃႈ။-
ၶုၼ်ဢၼ်ပွင်ၵၢၼ်ၸဝ်ႈတင်းလၢႆဢဝ်တူဝ်တၢႆမၼ်းတၢင်ႇလေႃႉမႃႉသိုၵ်းမၼ်းလႄႈၶိုၼ်ႈၵႂႃႇၵႃႈတီႈဝဵင်း ယေႇရုသလႅမ်ႇ၊ သေယဝ်ႉ၊သၢင်းၵျူဝ်ႇဝႆႉၵႃႈတီႈပႃႇႁဵဝ်ႈၵႃႈၼႂ်းဝဵင်းၸဝ်ႈပေႃႈမၼ်း တႃႇဝိတ်ႈ၊ ၼၼ်ႉသေဢေႃႈ။
ဢႃႇၶၸိ၊ ပဵၼ်ၶုၼ်ႁေႃၶမ်းမိူင်း ယုတႃႉ၊ ၼႂ်းပီဢၼ် ယူဝ်းရမ်ႇ၊ လုၵ်ႈၸၢႆး ဢႃႇႁပ်ႉ၊ ပဵၼ်ၶုၼ်ႁေႃၶမ်းမိူင်း ဢိသရေး၊ လႆႈသိပ်းဢဵတ်းပီၼၼ်ႉဢေႃႈ။
ယေႇႁု၊ ႁွတ်ႈထိုင်ၵႃႈတီႈဝဵင်း ယေႇၸရေး၊ ၵႂႃႇဢေႃႈ။ ယေႇၸပေႇလႃႉ၊ ငိၼ်းလွင်ႈမၼ်းလႄႈၼႅတ်ႈၵႂႃႇႁၢင်ႈၶိူင်ႈၼႃႈတႃမၼ်း၊ဝီႁူဝ်ႁၢင်ႈၶိူင်ႈမၼ်းသေယဝ်ႉ၊ၸုၵ်းယူႇၵႃႈတီႈႁူးလၢင်းတဵၼ်ႁေႃသေလႄႈလူတူၺ်းတီႈသဵၼ်ႈတၢင်းယူႇဢေႃႈ။-
မိူဝ်ႈဢၼ် ယေႇႁု၊ ၶဝ်ႈၽၵ်းတူဝဵင်းမႃးၼၼ်ႉ ယေႇၸပေႇလႃႉ၊ ႁွင်ႉလၢတ်ႈလႄႈဝႃႈ၊ “မႂ်း ၸိမရိ ၊ၵေႃႉဢၼ်ဢဝ်ၸဝ်ႈမႂ်းတၢႆၼႆႉ႟။ ယင်းၵတ်းယဵၼ်ၶျၢမ်းသႃႇယူႇႁိုဝ်း၊” ဝႃႈၼင်ႇၼႆဢေႃႈ။
ယေႇႁု၊ ႁႅၼ်တူၺ်းတီႈႁူးလၢင်းတဵၼ်သေလႄႈထၢမ်ဝႃႈ၊ “ၽူႈလႂ်ယူႇၽၢႆႇၵဝ်၊” ဝႃႈၼင်ႇၼႆလႄႈၵူၼ်းတွၼ်ဢၼ်ထိင်းၼၢင်းသွင်သၢမ်ၵေႃႉယူႇၵႃႈတီႈႁူးလၢင်းတဵၼ်သေလႄႈၵူမ်ႈတူၺ်းမၼ်းယူႇဢေႃႈ။-
မၼ်းလၢတ်ႈတီႈၶဝ်ၼၼ်ႉလႄႈဝႃႈ၊ “ဢဝ် ယေႇၸပေႇလႃႉ၊ ထိမ်ႈတူၵ်းပႅတ်ႈသေ၊” ဝႃႈၼင်ႇၼႆလႄႈ၊ၶဝ်ဢွၼ်ၵၼ်ဢဝ်မၼ်းထိမ်ႈတူၵ်းသေယဝ်ႉ၊လိူတ်ႈမၼ်းၽူင်ႉၽၢင်းၵႂႃႇၵမ်ႈၽွင်ႈၸပ်းသႂ်ႇၵႃႈတီႈၽႃႁူဝ်ႉ၊ဢိၵ်ႇတင်းၵမ်ႈၽွင်ႈၸပ်းသႂ်ႇၵႃႈတီႈမႃႉလႂ်ဢေႃႈ။ ယေႇႁု၊ ၵေႃႈႁေႃႈလေႃႉမႃႉသိုၵ်းမၼ်းၶၢမ်ႈတူဝ်တၢႆမၼ်းၵႂႃႇသေယဝ်ႉ၊-
ၶဝ်ႈၵႂႃႇၵႃႈၼႂ်းႁေႃလႄႈၵိၼ်ၶူပ်းဢေႃႈ။ လိုၼ်းၼၼ်ႉၸင်ႇမၼ်းလၢတ်ႈလႄႈဝႃႈ၊ “ဢဝ်မႄႈယိင်းဢၼ်ထုၵ်ႇတၢင်းဢၼ်ၵိၼ်ႇဝႃႈၼၼ်ႉသၢင်းၵျူဝ်ႇတႃႉ။ မၼ်းပဵၼ်လုၵ်ႈယိင်းၶုၼ်ႁေႃၶမ်းဢေႃႈ၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊ၶဝ်ၸိူဝ်းဢၼ်ဢွၵ်ႇၵႂႃႇ ႁႂ်ႈလႆႈသၢင်းၵျူဝ်ႇၼၼ်ႉထူပ်းႁၼ်လုပ်ႇၵွၵ်းႁူဝ်၊လုပ်ႇတိၼ်လုပ်ႇမိုဝ်းမၼ်းၵူၺ်းဢေႃႈ။-
မိူဝ်ႈဢၼ်ၶဝ်လဝ်ႈလၢတ်ႈထိုင် ယေႇႁု၊ ၼၼ်ႉၸိုင်၊မၼ်းလၢတ်ႈလႄႈဝႃႈ၊ “ဢၼ်ၼႆႉၸမ်ႉ၊ပဵၼ်ၸွမ်းဢမိင်ႉ ထႃႇဝရႃႉၽြႃး၊ ဢၼ်မၼ်းၸဝ်ႈဢဝ်တင်းၶႃႈမၼ်းၸဝ်ႈ ဢေးလိယႃႉ၊ လၢတ်ႈဝႆႉလႄႈဝႃႈ၊မႃတင်းလၢႆတၵ်းၵိၼ်ၼိူဝ်ႉ ယေႇၸပေႇလႃႉ၊ ၵႃႈၼႂ်းဢိူင်ႇ ယေႇၸရေး၊ ပုၼ်ႉဢေႃႈ။-
ပိူဝ်ႈၼႆလႄႈတူဝ်တၢႆမၼ်းတၵ်းပဵၼ်မိူၼ်ၸိူဝ်ႉၼင်ႇၵွင်ၶီႈဝူဝ်းၵႃႈတီႈၵၢင်ပၢင်ႇၼႂ်းဢိူင်ႇ ယေႇၸရေး၊ လႄႈတၵ်းဢမ်ႇမီးၽူႈလႂ်လၢတ်ႈလႄႈဝႃႈ၊ ‘ဢၼ်ၼႆႉပဵၼ် ယေႇၸပေႇလႃႉ၊ ဢေႃႈ၊’ ဝႃႈၼႆၼၼ်ႉယဝ်ႉ၊” ဝႃႈၼင်ႇၼႆဢေႃႈ။
ၸိူဝ်ႉၶိူဝ်းၶုၼ်ႁေႃၶမ်း ဢႃႇႁပ်ႉ၊ မီးယူႇၵႃႈၼႂ်းဝဵင်း သမႃႇရိ၊ ၸဵတ်းသိပ်းၵေႃႉဢေႃႈ။ ယေႇႁု၊ တႅမ်ႈလိၵ်ႈပၼ်ၵႂႃႇၸူးတီႈဝဵင်း သမႃႇရိ၊ တီႈၶုၼ်ဢၼ်ဢုပ်ႉဝဵင်းတီႈၵူၼ်းယႂ်ႇၵူၼ်းလူင်တင်းလၢႆ၊ဢိၵ်ႇတင်းတီႈၶုၼ်ဢၼ်ပွင်ၵၢၼ်ၸိူဝ်းဢၼ်ထိင်းလုၵ်ႈၸၢႆးၸဝ်ႈ ဢႃႇႁပ်ႉ၊ ၸိူဝ်းၼၼ်ႉလႄႈဝႃႈ၊-
“ၸွမ်းၼင်ႇဢၼ်လုၵ်ႈၸၢႆးၸဝ်ႈသူတင်းလၢႆၼၼ်ႉမီးယူႇလူၺ်ႈၵၼ်တင်းသူယူႇ၊တပ်ႉလေႃႉမႃႉသိုၵ်းလႂ်၊တပ်ႉမႃႉလႂ်၊ဝဵင်းဢၼ်မၼ်ႈၶိူင်ႇတင်းလၢၵ်ႈၼၢၵ်ႈၸုမ်ႇလႂ်မီးတီႈသူယူႇၼၼ်ႉ၊မိူဝ်ႈဢၼ်သူလႆႈႁပ်ႉဢဝ်လိၵ်ႈၼႆႉၵမ်းလဵဝ်ၸိုင်၊-
ဢွၼ်ၵၼ်လိူၵ်ႈဢဝ်ၵေႃႉဢၼ်မီးၼမ်ႉၵတ်ႉတၢင်းၶၼ်သေပိူၼ်ႈၵႃႈၼႂ်းလုၵ်ႈၸၢႆးၸဝ်ႈသူၸိူဝ်းၼၼ်ႉသေလႄႈယုၵ်ႉတၢင်ႇႁႂ်ႈမၼ်းပဵၼ်ၶုၼ်ႁေႃၶမ်းႁႂ်ႈလႆႈတိုၵ်းတေႃးႁႄႉၶႅၼ်ပုၼ်ႈမိူင်းၸဝ်ႈသူၼၼ်ႉတႃႉ၊” ဝႃႈၼင်ႇၼႆဢေႃႈ။
ၸဝ်ႈမိူင်းဝဵင်း သမႃႇရိ၊ ၸိူဝ်းၼၼ်ႉၵူဝ်ႁႄၼႃႇလူင်လၢင်လႄႈလၢတ်ႈဝႃႈ၊ “တေႃႈၵႃႈၶုၼ်ႁေႃၶမ်းသွင်ပႃးယင်းဢမ်ႇၸုၵ်းၶၢမ်ႇမၼ်းလႆႈလႄႈႁဝ်းၼႆႉတၵ်းၸုၵ်းၶၢမ်ႇလႆႈၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၶုၼ်ဢၼ်ဢုပ်ႉႁေႃၸဝ်ႈတင်းၶုၼ်ဢၼ်ဢုပ်ႉမိူင်း၊ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆ၊ဢိၵ်ႇတင်းၶုၼ်ဢၼ်ပွင်ၵၢၼ်ၸိူဝ်းဢၼ်ထိင်းလုၵ်ႈၸၢႆးၸဝ်ႈၸိူဝ်းၼၼ်ႉဢွၼ်ၵၼ်သင်ႇလၢတ်ႈၵႂႃႇတီႈ ယေႇႁု၊ လႄႈဝႃႈ၊ “ၶႃႈၸဝ်ႈႁဝ်းၶဝ်ၼႆႉပဵၼ်ၶႃႈၵူၼ်းၸႂ်ႉၸဝ်ႈႁဝ်းလႄႈ၊တၵ်းဢွၼ်ၵၼ်ႁဵတ်းၸွမ်းၵႃႈၼင်ႇဢၼ်ၸဝ်ႈႁဝ်းမီးဢမိင်ႉၼၼ်ႉတီႈၶႃႈဢေႃႈ။ ၶႃႈၸဝ်ႈႁဝ်းၶဝ်ၼႆႉတၵ်းဢမ်ႇဢဝ်ၽူႈလႂ်တၢင်ႇပဵၼ်ၶုၼ်ႁေႃၶမ်းတီႈၶႃႈ။ ႁဵတ်းၸွမ်းဢလူဝ်ႇၵၢင်ၸႂ်ၸဝ်ႈႁဝ်းသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ယေႇႁု၊ သမ်ႉတႅမ်ႈလိၵ်ႈပၼ်ၵႂႃႇထႅင်ႈလႄႈဝႃႈ၊ “ပေႃးသူယူႇၽၢႆႇၵဝ်လႄႈတၵ်းထွမ်ႇဢဝ်ၵႂၢမ်းၵဝ်ၸိုင်၊သူဢွၼ်ၵၼ်ဢဝ်ၵွၵ်းႁူဝ်လုၵ်ႈလၢင်းၸဝ်ႈၸိူဝ်းၼၼ်ႉသူင်ႇမႃးၵႃႈတီႈၵဝ်ၵႃႈၼႂ်းဝဵင်း ယေႇၸရေး၊ ၼႂ်းဝၼ်းမိူဝ်ႈၽုၵ်ႈၽွင်းယၢမ်းၶိင်ႇၼႆႉတႃႉ၊” ဝႃႈၼင်ႇၼႆဢေႃႈ။ လုၵ်ႈလၢၼ်ၶုၼ်ႁေႃၶမ်း ဢႃႇႁပ်ႉ၊ တင်းၸဵတ်းသိပ်းၼၼ်ႉဢွၼ်ၵၼ်မီးယူႇၵႃႈတီႈၵူၼ်းယႂ်ႇၵူၼ်းလူင်ၵူၼ်းဝဵင်းဢၼ်လုမ်းလႃးလဵင်ႉလူၶဝ်ယႂ်ႇမႃးၸိူဝ်းၼၼ်ႉဢေႃႈ။-
မိူဝ်ႈဢၼ်လိၵ်ႈ ယေႇႁု၊ ႁွတ်ႈထိုင်မႃးၼၼ်ႉၸိုင်၊ၵူၼ်းယႂ်ႇၵူၼ်းလူင်ဝဵင်း သမႃႇရိ၊ ၸိူဝ်းၼၼ်ႉဢဝ်လုၵ်ႈလၢၼ် ဢႃႇႁပ်ႉ၊ တင်းၸဵတ်းသိပ်းၼၼ်ႉတၢႆသေယဝ်ႉ၊ဢဝ်ၵွၵ်းႁူဝ်ၶဝ်သႂ်ႇပဵတ်ႈသႂ်ႇၵူၺ်သေလႄႈသူင်ႇၵႂႃႇၵႃႈတီႈ ယေႇႁု၊ ၵႃႈၼႂ်းဝဵင်း ယေႇၸရေး၊ ပုၼ်ႉဢေႃႈ။
မိူဝ်ႈဢၼ်ပိူၼ်ႈမွၵ်ႇလၢတ်ႈလွင်ႈဢၼ်ၶဝ်ဢဝ်ၵွၵ်းႁူဝ်လုၵ်ႈလၢၼ် ဢႃႇႁပ်ႉ၊ ၸိူဝ်းၼၼ်ႉႁွတ်ႈမႃးယဝ်ႉၼၼ်ႉၸိုင်၊မၼ်းၸႂ်ႉႁႂ်ႈၶဝ်ဢဝ်ၵွင်သေလႄႈႁဵတ်းပဵၼ်သွင်ၵွင်ၵႃႈတီႈႁူးၽၵ်းတူဝဵင်းဝႆႉတေႃႇႁွတ်ႈထိုင်ၶိင်ႇၵၢင်ၼႂ်ဢေႃႈ။-
မိူဝ်ႈဢၼ်ႁွတ်ႈထိုင်ၶိင်ႇၵၢင်ၼႂ်ၼၼ်ႉမၼ်းဢွၵ်ႇၵႂႃႇၵႃႈတီႈၼႂ်းဝဵင်းလႄႈလၢတ်ႈတေႃႇၵူၼ်းၸိူဝ်းဢၼ်မီးၵႃႈတီႈၼၼ်ႈလႄႈဝႃႈ၊ “ၵဝ်ပဵၼ်ၵေႃႉဢၼ်လွမ်ႁဵတ်းမုၵ်ႉႁဵတ်းၸုမ်းလုၵ်ႉၽိုၼ်ႉၶုၼ်ႁေႃၶမ်း ယူဝ်းရမ်ႇ၊ သေလႄႈဢဝ်မၼ်းတၢႆယဝ်ႉ။ သူဢမ်ႇၸၢပ်ႈသႅင်ႇၵၼ်တင်းဢမုၼႆႉၵႃႈသင်။ ၵူၺ်းၵႃႈ၊ၵေႃႉဢၼ်ဢဝ်ၶဝ်တင်းသဵင်ႈတင်းလူင်တၢႆၼႆႉပဵၼ်ၽူႈလႂ်။-
သူႁုမၢတ်ႈလွင်ႈဢၼ်ဢမိင်ႉ ထႃႇဝရႃႉၽြႃး၊ ဢၼ်မီးဝႆႉၵႃႈတီႈမဵဝ်းၸိူဝ်ႉၶိူဝ်း ဢႃႇႁပ်ႉ၊ ၼၼ်ႉဢမ်ႇလႆႈတူၵ်းလႆႈႁူင်ႈသေၶေႃႈသေၵမ်းၼၼ်ႉ တႃႉ။ လွင်ႈမၼ်းၸမ်ႉ၊ ထႃႇဝရႃႉၽြႃး၊ ႁဵတ်းၸွမ်းၵႃႈၼင်ႇဢၼ်မၼ်းၸဝ်ႈဢဝ်ၶႃႈမၼ်းၸဝ်ႈ ဢေးလိယႃႉ၊ သင်ႇလၢတ်ႈဝႆႉၼၼ်ႉယဝ်ႉ၊” ဝႃႈၼင်ႇၼႆဢေႃႈ။-
ယေႇႁု၊ ဢဝ်မဵဝ်းၸိူဝ်ႉၶိူဝ်း ဢႃႇႁပ်ႉ၊ ၸိူဝ်းဢၼ်ယင်းၵိုတ်းၵျၢၼ်ႇယူႇၵႃႈၼႂ်းဝဵင်း ယေႇၸရေး၊ ဢိၵ်ႇတင်းၶုၼ်ဢၼ်ပွင်ၵၢၼ်မၼ်းတင်းသဵင်ႈတင်းမူတ်း၊ၵေႃႉသႄႈမၼ်းတင်းလၢႆဢိၵ်ႇတင်းယဵၸ်ႈပရေႃးႁဵၵ်ႈ မၼ်းတၵ်းလႆႈတၢႆထၢၼ်ႈပေႃးဢမ်ႇၵိုတ်းဢမ်ႇၵျၢၼ်ႇဝႆႉသေၵေႃႉသေၵူၼ်းဢေႃႈ။
ယေႇႁု၊ ဢွၵ်ႇသေၵႃႈတီႈဝဵင်း ယေႇၸရေး၊ လႄႈၵႂႃႇၸူးတီႈဝဵင်း သမႃႇရိ၊ ဢေႃႈ။ ၼႂ်းၶၢဝ်းတၢင်းၼၼ်ႉမိူဝ်ႈဢၼ်ၶဝ်ႁွတ်ႈထိုင်တီႈ ၸရွပ်ႈၵႅတ်းႁႆးၶူၼ်သူဝ်း၊ ၼၼ်ႉၸိုင်၊-
မၼ်းႁူပ်ႉထူပ်းပီႈၼွင်ႉၸိူဝ်ႉၶိူဝ်း ဢႃႇၶၸိ၊ မိူင်း ယုတႃႉ၊ ၼၼ်ႉလႄႈထၢမ်ၶဝ်လႄႈဝႃႈ၊ “သူပဵၼ်ၽူႈလႂ်၊” ဝႃႈၼင်ႇၼႆဢေႃႈ။ ၶဝ်ၵေႃႈလၢတ်ႈလႄႈဝႃႈ၊ “ႁဝ်းၶႃႈပဵၼ်ပီႈၼွင်ႉၸိူဝ်ႉၶိူဝ်း ဢႃႇၶၸိ၊ ဢေႃႈ။ ႁဝ်းၶႃႈဢွၼ်ၵၼ်ၵႂႃႇၵႃႈတီႈဝဵင်း ယေႇၸရေး၊ ႁႂ်ႈလႆႈမႃးလူမႃးၸႂ်းလုၵ်ႈလၢင်းၼၢင်းႁေႃၶမ်း ယေႇၸပေႇလႃႉ၊ တင်းလုၵ်ႈၸဝ်ႈလုၵ်ႈၶုၼ်တင်းလၢႆၼၼ်ႉဢေႃႈ၊” ဝႃႈၼင်ႇၼႆဢေႃႈ။-
ယေႇႁု၊ ပူင်ဢမိင်ႉတီႈၵူၼ်းမၼ်းတင်းလၢႆလႄႈဝႃႈ၊ “တိဢဝ်တူဝ်ၶဝ်ၸိူဝ်းၼႆႉတႃႉ၊” ဝႃႈၼင်ႇၼႆလႄႈ၊ၶဝ်ၵေႃႈတိဢဝ်ၵူၼ်းၸိူဝ်းၼၼ်ႉသေယဝ်ႉ၊ဢဝ်ၶဝ်တၢႆပႅတ်ႈၵႃႈတီႈႁိမ်းၶုမ်ၼၼ်ႉသေဢေႃႈ။ ၶဝ်တင်းသဵင်ႈတင်းလူင်မီးသီႇသိပ်းသွင်ၵေႃႉလႄႈဢမ်ႇလႆႈၵိုတ်းလႆႈၵျၢၼ်ႇဝႆႉသေၵေႃႉသေၵူၼ်း။
ယေႇႁု၊ သိုပ်ႇဢွၵ်ႇၵႂႃႇလႄႈၼႂ်းၶၢဝ်းတၢင်းၼၼ်ႉမၼ်းသမ်ႉႁူပ်ႉထူပ်း ယေႃးၼတပ်ႉ၊ လုၵ်ႈၸၢႆး ရေႇၶပ်ႉ၊ ဢေႃႈ။ ယေႇႁု၊ ၵႂႃႇႁပ်ႉႁူဝ်တၢင်းမၼ်းသေယဝ်ႉလၢတ်ႈဝႃႈ၊ “မႂ်းတင်းၵဝ်ၼႆႉတၢင်းဢၼ်ႁဝ်းၶႆႈၸႂ်ဝူၼ်ႉၸႂ်ၼၼ်ႉမိူၼ်ၵၼ်ဢေႃႈ။ ၸွင်ႇမႂ်းတၵ်းၸွႆႈၵမ်ႉၸွႆႈထႅမ်ၵဝ်ႁိုဝ်း၊” ဝႃႈၼင်ႇၼႆဢေႃႈ။ ယေႃးၼတပ်ႉ၊ ၶိုၼ်းလၢတ်ႈလႄႈဝႃႈ၊ “ၸွႆႈထႅမ်တီႈၶႃႈဢေႃႈ၊” ဝႃႈၼင်ႇၼႆဢေႃႈ။ ယေႇႁု၊ ၵေႃႈလၢတ်ႈလႄႈဝႃႈ၊ “ပေႃးဝႃႈၼၼ်ၸိုင်၊ယိုၼ်းမိုဝ်းမႂ်းပၼ်တီႈၵဝ်တႃႉ၊” ဝႃႈၼင်ႇၼႆသေယဝ်ႉ။ ယေႃးၼတပ်ႉ၊ ယိုၼ်းမိုဝ်းပၼ်လႄႈ၊မၼ်းတိုတ်ႉၸၼ်ဢဝ် ယေႃးၼတပ်ႉ၊ ၶိုၼ်ႈၵႃႈၼိူဝ်လေႃႉမႃႉသိုၵ်းမၼ်းသေဢေႃႈ။-
မၼ်းလၢတ်ႈလႄႈဝႃႈ၊ “ၸွမ်းၵဝ်မႃးလႄႈလူတူၺ်းလွင်ႈဢၼ်ၵဝ်မီးၸႂ်ႁႅင်းယႂ်ႇၽၢႆႇ ထႃႇဝရႃႉၽြႃး၊ ထၢၼ်ႇႁိုဝ်ၼၼ်ႉတႃႉ၊” ဝႃႈၼင်ႇၼႆဢေႃႈ။ ၼင်ႇၼၼ်လႄႈၶဝ်ၶီႇလေႃႉမႃႉသိုၵ်းလူၺ်ႈၵၼ်ၵႂႃႇၸူးတီႈဝဵင်း သမႃႇရိ၊ ဢေႃႈ။-
မိူဝ်ႈဢၼ်ႁွတ်ႈထိုင်ၵႃႈတီႈၼၼ်ႈၼၼ်ႉၸိုင်၊ ယေႇႁု၊ ဢဝ်မဵဝ်းၸိူဝ်ႉၶိူဝ်း ဢႃႇႁပ်ႉ၊ တင်းသဵင်ႈတင်းမူတ်းတၢႆပႅတ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉတီႈ ဢေးလိယႃႉ၊ ၼၼ်ႉဢေႃႈ။
ယေႇႁု၊ ႁွင်ႉဢဝ်ၵူၼ်းဝဵင်း သမႃႇရိ၊ တင်းလၢႆၸုတုမ်ၵၼ်သေလႄႈလၢတ်ႈဝႃႈ၊ “ၶုၼ်ႁေႃၶမ်း ဢႃႇႁပ်ႉ၊ ႁဵတ်းဝၢတ်ႈတီႈၽြႃးပႃႇလႃႉဢိတ်းဢွၼ်ႇၼိုင်ႈၵူၺ်းဢေႃႈ။ ၵဝ်ၸမ်ႉ၊တၵ်းႁဵတ်းဝၢတ်ႈၼမ်ၼႃႇသေမၼ်းဢေႃႈ။-
ၵွပ်ႈပိူဝ်ႈၸိူဝ်ႉၼင်ႇၼႆလႄႈႁွင်ႉဢဝ်ပရေႃးၽႅတ်ႈ ၽြႃးပႃႇလႃႉ၊ တင်းသဵင်ႈတင်းလူင်ဢိၵ်ႇတင်းၶဝ်ၸိူဝ်းဢၼ်ၵူဝ်းၵႂၢႆႇမၼ်းတင်းလၢႆတင်းယဵၸ်ႈပရေႃးႁဵၵ်ႈ မၼ်းတင်းသဵင်ႈတင်းမူတ်းမႃးတႃႉ။ ယႃႇပေႁႂ်ႈၵိုတ်းၵျၢၼ်ႇဝႆႉသေၵေႃႉသေၵူၼ်း။ ၵဝ်တၵ်းႁဵတ်းတၢင်းဢၼ်သၢၵ်ႈလူႇဢၼ်ယႂ်ႇဢၼ်လူင်တီႈ ၽြႃးပႃႇလႃႉ၊ ဢေႃႈ။ ၼင်ႇၼၼ်လႄႈၵေႃႉဢၼ်ဢမ်ႇမႃးၶဝ်ႈပႃးၼၼ်ႉတၵ်းလႆႈဢဝ်မၼ်းတၢႆဢေႃႈ၊” ဝႃႈၼင်ႇၼႆဢေႃႈ။ (ဢၼ်ၼႆႉၸိုင်၊ပဵၼ်ပရိယႄႇ ယေႇႁု၊ ၵျၢမ်ႇပွင်ႁႂ်ႈလႆႈဢဝ်တၢႆၶဝ်ၸိူဝ်းဢၼ်ဝႆႈ ၽြႃးပႃႇလႃႉ၊ တင်းသဵင်ႈတင်းမူတ်းဢေႃႈ။-)
မိူဝ်ႈၼၼ်ႉ၊ ယေႇႁု၊ ပူင်ဢမိင်ႉလႄႈဝႃႈ၊ “ဢွၼ်ၵၼ်မႄးႁႅၼ်းပွႆးထမ်ႇမႃႉ ၽြႃးပႃႇလႃႉ၊ တႃႉ၊” ဝႃႈၼင်ႇၼႆသေယဝ်ႉ၊ပၢဝ်ႇသေႃႇဝၼ်းပွႆးၼၼ်ႉဢေႃႈ။-
ယေႇႁု၊ ပိုၼ်ၽၢဝ်ႇသဵင်ၶၢဝ်ႇၸွတ်ႇတူဝ်ႈၵႃႈၼႂ်းမိူင်း ဢိသရေး၊ လႄႈၵူၼ်းၵႃႈဢၼ်ဝႆႈ ၽြႃးပႃႇလႃႉ၊ ၼၼ်ႉဢွၼ်ၵၼ်မႃးထၢၼ်ႈပေႃးဢမ်ႇၵိုတ်းဢမ်ႇၵျၢၼ်ႇသေၵေႃႉသေၵူၼ်းဢေႃႈ။ ၶဝ်ဢွၼ်ၵၼ်ၶဝ်ႈၵႃႈၼႂ်းၵျွင်းဝၢတ်ႈ ၽြႃးပႃႇလႃႉ၊ ထၢၼ်ႈပေႃးတဵမ်ၵျွင်းဝႆႉ၊လုၵ်ႉတီႈၽၢႆႇၼိုင်ႈတေႃႇထိုင်ႁွတ်ႈၵႂႃႇၽၢႆႇၼိုင်ႈဢေႃႈ။-
မိူဝ်ႈၼၼ်ႉ၊ ယေႇႁု၊ ပူင်ဢမိင်ႉတီႈယဵၸ်ႈပရေႃးႁဵၵ်ႈဢၼ်ပႂ်ႉထိင်းတိူၵ်ႈၶူဝ်းၼုင်ႈတၢင်းမႆဢၼ်ထွတ်ႈမျၢတ်ႈၼၼ်ႉလႄႈဝႃႈ၊ “ဢဝ်ၶူဝ်းၼုင်ႈတၢင်းမႆဢွၵ်ႇလႄႈၽႄမႅင်ႇပၼ်တီႈတပႄး ၽြႃးပႃႇလႃႉ၊ ၸိူဝ်းၼၼ်ႉတႃႉ၊” ဝႃႈၼင်ႇၼႆဢေႃႈ။-
လိုၼ်းၼၼ်ႉ၊ ယေႇႁု၊ တင်း ယေႃးၼတပ်ႉ၊ လုၵ်ႈၸၢႆး ရေႇၶပ်ႉ၊ ၼၼ်ႉၶဝ်ႈပႃးၼႂ်းၵျွင်းပႃႇလႃႉသေယဝ်ႉ၊လၢတ်ႈတီႈၵူၼ်းၸိူဝ်းၼၼ်ႉလႄႈဝႃႈ၊ “သွၵ်ႈႁႃတူၺ်းယႃႇပေႁႂ်ႈတပႄး ထႃႇဝရႃႉၽြႃး၊ မီးၵႃႈၼႂ်းသူသေၵေႃႉသေၵူၼ်းလႄႈ၊ႁႂ်ႈမီးတပႄး ၽြႃးပႃႇလႃႉ၊ လွၼ်ႉလွၼ်ႉၵူၺ်းတႃႉ၊” ဝႃႈၼင်ႇၼႆဢေႃႈ။-
ၵမ်းၼၼ်ႉမၼ်းတင်း ယေႃးၼတပ်ႉ၊ ၶဝ်ႈၵႂႃႇႁႂ်ႈလႆႈသၢၵ်ႈၵၢပ်ႈတၢင်းလူႇဢိၵ်ႇတင်းၶိူင်ႈတၢင်းလူႇဢၼ်တုတ်ႇၽႆးတီႈ ၽြႃးပႃႇလႃႉ၊ ဢေႃႈ။ ယေႇႁု၊ ၸႂ်ႉၵူၼ်းပႅတ်ႇသိပ်းၵေႃႉပႂ်ႉယူႇၵႃႈတီႈၼွၵ်ႈသေလႄႈသင်ႇလၢတ်ႈဝႆႉဝႃႈ၊ “သူတၵ်းလႆႈဢဝ်ၵူၼ်းၸိူဝ်းၼႆႉတၢႆတင်းသဵင်ႈတင်းမူတ်းဢေႃႈ။ ၵေႃႉဢၼ်ႁႂ်ႈၶဝ်သေၵေႃႉၵေႃႉလွတ်ႈၵႂႃႇၼၼ်ႉတၵ်းလႆႈဢဝ်ဢသၢၵ်ႈမၼ်းတႅၼ်းပုၼ်ႈၵေႃႉၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ် ယေႇႁု၊ သၢၵ်ႈလူႇၶိူင်ႈတၢင်းလူႇတင်းလၢႆယဝ်ႉတူဝ်ႈယဝ်ႉၼၼ်ႉၸိုင်၊မၼ်းလၢတ်ႈတီႈၵူၼ်းပႂ်ႉၸိူဝ်းၼၼ်ႉ၊ဢိၵ်ႇတင်းၶုၼ်ဢၼ်ပွင်ၵၢၼ်တင်းလၢႆလႄႈဝႃႈ၊ “ၶဝ်ႈၵႃႈၼႂ်းလႄႈဢဝ်ၶဝ်တၢႆတႃႉ။ ယႃႇပေႁႂ်ႈသေၵေႃႉသေၵူၼ်းလွတ်ႈ၊” ဝႃႈၼင်ႇၼႆဢေႃႈ။ ၶဝ်ၵေႃႈထွတ်ႇဢဝ်လၢပ်ႇသေလႄႈၶဝ်ႈၵႂႃႇၽၼ်းတၢႆၶဝ်ၸိူဝ်းၼၼ်ႉတင်းသဵင်ႈတင်းမူတ်းသေယဝ်ႉ၊လၢၵ်ႈတူဝ်တၢႆၶဝ်ဢွၵ်ႇမႃးၵႃႈၼွၵ်ႈသေဢေႃႈ။ မိူဝ်ႈၼၼ်ႉၶဝ်သမ်ႉၶဝ်ႈၵႃႈၼႂ်းထႃႇၼႃႉတီႈမူတ်းၸၢင်ႇၸၼ်ႉၼႂ်းၵျွင်း ၽြႃးပႃႇလႃႉ၊ သေယဝ်ႉ၊-
ဢဝ်သဝ်ဢၼ်မျၢတ်ႈဢၼ်ၶဝ်ၵူဝ်းၵႂၢႆႇတင်းလၢႆဢၼ်မီးၵႃႈၼႂ်းၵျွင်းပႃႇလႃႉၼၼ်ႉဢွၵ်ႇလႄႈတုတ်ႇၽႆးပႅတ်ႈဢေႃႈ။-
ၶဝ်ဢွၼ်ၵၼ်ၵိူၼ်ႇယႃႉပႅတ်ႈသဝ်ဢၼ်မျၢတ်ႈဢၼ်ၶဝ်ၵူဝ်းၵႂၢႆႇ ၽြႃးပႃႇလႃႉ၊ ဢိၵ်ႇတင်းၵိူၼ်ႇယႃႉၵျွင်း ၽြႃးပႃႇလႃႉ၊ ႁႂ်ႈပဵၼ်ထၢင်ၽၢႆႈလူင်မီးယူႇတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
ဢၼ်ၼႆႉပဵၼ်လွင်ႈတၢင်းဢၼ် ယေႇႁု၊ ပႄႇၽဵဝ်ႈ ၽြႃးပႃႇလႃႉ၊ ပႅတ်ႈသေၵႃႈၼႂ်းမိူင်း ဢိသရေး၊ ဢေႃႈ။-
ၼႂ်းဝႃႈၼၼ်သေၵေႃႈမၼ်းၵမ်ၵျၢင်ႉၸွမ်းတုၸရိူၵ်ႈၶုၼ်ႁေႃၶမ်း ယေႇရူဝ်းပုမ်ႇ၊ ၵေႃႉဢၼ်ဢွၼ်ႁူဝ်ႁႂ်ႈမဵဝ်း ဢိသရေး၊ ၽိတ်းပိူင်ႈဢၼ်ဝႃႈ၊တၢင်းဢၼ်ဝႆႈဝူဝ်းၶမ်းဢွၼ်ႇၸိူဝ်းဢၼ်မၼ်းတႄႇႁဵတ်းဝႆႉၵႃႈၼႂ်းဝဵင်း ပေႇသလႃႉ၊ တင်းဝဵင်း တၢၼ်ႇ၊ ၼၼ်ႉဢေႃႈ။-
ထႃႇဝရႃႉၽြႃး၊ မီးဢမိင်ႉတီႈ ယေႇႁု၊ လႄႈဝႃႈ၊ “ၵွပ်ႈပိူဝ်ႈဢၼ်မႂ်းႁၢပ်ႇၵိုတ်ႉပွင်ထၢမ်းၵႃႈၼင်ႇဢၼ်ၵဝ်မၢတ်ႈပဵၼ်ဢၼ်လီဢၼ်ငၢမ်းၼၼ်ႉယဝ်ႉတူဝ်ႈလီငၢမ်းဢိၵ်ႇတင်းၵွပ်ႈပိူဝ်ႈဢၼ်မႂ်းႁဵတ်းတီႈၸိူဝ်ႉၶိူဝ်း ဢႃႇႁပ်ႉ၊ ၸွမ်းၵႃႈၼင်ႇဢၼ်ၵဝ်မီးဢလူဝ်ႇၼၼ်ႉလႄႈၸူဝ်ႈလုၵ်ႈပၢၼ်လၢၼ်မႂ်းတၵ်းလႆႈသိုပ်ႇပဵၼ်ၶုၼ်ႁေႃၶမ်းမိူင်း ဢိသရေး၊ တေႃႇထိုင်ႁွတ်ႈသီႇသိုပ်ႇဢေႃႈ၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊ ယေႇႁု၊ ယင်းဢမ်ႇပႃးတင်းႁူဝ်ၸႂ်သဵင်ႈသဵင်ႈသေလႄႈၸွမ်းသဵၼ်ႈတၢင်းတြႃး ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မၼ်းယင်းၵမ်ၵျၢင်ႉႁဵတ်းၸွမ်းတၢင်းၵမ်တၢင်းၵျၢင်ႉ ယေႇရူဝ်းပုမ်ႇ၊ ၵေႃႉဢၼ်ဢွၼ်ႁူဝ်ႁႂ်ႈၵူၼ်းမဵဝ်း ဢိသရေး၊ ၽိတ်းပိူင်ႈၼၼ်ႉဢေႃႈ။
ၼႂ်းၶိင်ႇယၢမ်းၼၼ်ႉ၊ ထႃႇဝရႃႉၽြႃး၊ တႅပ်းမိူင်း ဢိသရေး၊ ႁႂ်ႈလဵၵ်ႉလူင်းၵႂႃႇဢေႃႈ။ ၶုၼ်ႁေႃၶမ်း ႁႃႇၸေႇလႃႉ၊ မိူင်း သီးရီးယႃး၊ တိုၵ်းတေႃးပႄႉၼႅင်ႇဢဝ်လိၼ်မိူင်း ဢိသရေး၊ တင်းလၢႆ၊-
ဢဝ်ၵႃႈတီႈၽၢႆႇဝၼ်းဢွၵ်ႇၼမ်ႉ ယေႃးတၢၼ်ႇ၊ လူင်းၵႂႃႇၽၢႆႇတၢင်းၸၢၼ်းတေႃႇထိုင်ႁွတ်ႈတီႈဝဵင်း ဢႃႇရေႃႇ၊ ၵႃႈတီႈၼမ်ႉ ဢႃႇၼုၼ်ႇ၊ ဢေႃႈ။ ဢၼ်ၸိူဝ်းၼႆႉၶဝ်ႈပႃးသိုင်ႇတိူင်းမိူင်း ၵိလတ်ႉ၊ တင်းမိူင်း ပႃႇသၢၼ်ႇ၊ ဢၼ်ပဵၼ်ထႃႇၼႃႉတီႈယူႇၵူၼ်းမဵဝ်း ၵၢတ်ႉ၊ ၵူၼ်းမဵဝ်း ရုပိၼ်ႇ၊ တင်းၵူၼ်းမဵဝ်း မၼႃႇသေႇ၊ ၽၢႆႇဝၼ်းဢွၵ်ႇၶဝ်ၸိူဝ်းၼၼ်ႉဢေႃႈ။
လွင်ႈတၢင်းၵႃႈဢၼ် ယေႇႁု၊ ႁဵတ်းၵူႈၸိူဝ်ႉၵူႈပိူင်၊ဢိၵ်ႇတင်းလွင်ႈတၢင်းဢၼ်တၼ်းၶူဝ်းမၼ်းယႂ်ႇၸိူဝ်းၼၼ်ႉတႅမ်ႈမၢႆဝႆႉၵႃႈၼႂ်း လိၵ်ႈပိုၼ်းၶုၼ်ႁေႃၶမ်းမိူင်းဢိသရေး၊ ဢေႃႈ။-
မၼ်းၼွၼ်းၽႄးလႄႈဢဝ်သၢင်းၵျူဝ်ႇဝႆႉၵႃႈၼႂ်းဝဵင်း သမႃႇရိ၊ သေယဝ်ႉ၊လုၵ်ႈၸၢႆးမၼ်း ယႁေႃးၶတ်ႉ၊ သိုပ်ႇၼင်ႈႁၢင်ႈၼင်ႈႁေႃဢေႃႈ။-
ယေႇႁု၊ ဢုပ်ႉပိူင်ႇၸၢမ်ႇၸႃးလႄႈပဵၼ်ၶုၼ်ႁေႃၶမ်းမိူင်း ဢိသရေး၊ ၵႃႈၼႂ်းဝဵင်း သမႃႇရိ၊ သၢဝ်းပႅတ်ႇပီဢေႃႈ။
မိူဝ်ႈဢၼ် ဢႃႇထလိ၊ မႄႈၶုၼ်ႁေႃၶမ်း ဢႃႇၶၸိ၊ ၼၼ်ႉလႆႈငိၼ်းလွင်ႈဢၼ်လုၵ်ႈၸၢႆးမၼ်းတၢႆယဝ်ႉၼၼ်ႉၸိုင်၊မၼ်းပူင်ဢမိင်ႉႁႂ်ႈယႃႉၽဵဝ်ႈပႅတ်ႈၸိူဝ်ႉၶိူဝ်းၸဝ်ႈၵႃႈမီးၼၼ်ႉဢေႃႈ။-
ယေႃးသႃႉ၊ လုၵ်ႈၸၢႆး ဢႃႇၶၸိ၊ ၵေႃႉလဵဝ်ၵူၺ်းလွတ်ႈဢေႃႈ။ ၼႂ်းမိူဝ်ႈဢၼ်မၼ်းၸမ်တၵ်းလႆႈၶၢမ်ႇတၢင်းဢၼ်ဢဝ်တၢႆလူၺ်ႈၵၼ်တင်းတၢင်ႇၵေႃႉၸိူဝ်းၼၼ်ႉဢႃမၼ်း ယေႃးသေႇၽႃႉ၊ ဢၼ်ပဵၼ်လုၵ်ႈယိင်းၶုၼ်ႁေႃၶမ်း ယႁူဝ်းရမ်ႇ၊ ၼွင်ႉယိင်း ဢႃႇၶၸိ၊ ၼၼ်ႉၵႄႇသႄႇဢဝ်မၼ်းတင်းမႄႈထိင်းမၼ်းၼၼ်ႉၵႂႃႇသိူင်ႇဝႆႉၵႃႈၼႂ်းလုၵ်းၼွၼ်းတၢင်းၼႂ်း၊ၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉလႄႈဢသၢၵ်ႈမၼ်းလႆႈလွတ်ႈသေၵႃႈတီႈ ဢႃႇထလိ၊ ဢေႃႈ။-
ယေႃးသေႇၽႃႉ၊ လုမ်းလႃးလုၵ်ႈဢွၼ်ႇၸၢႆးၼၼ်ႉၵႃႈတီႈဢၼ်သိူင်ႇဝႆႉ ၵႃႈၼႂ်းၵျွင်းပိၵ်ႈမၢၼ်ႇၸဝ်ႈႁူၵ်းပီတဵမ်တဵမ်ၸူဝ်ႈဢၼ် ဢႃႇထလိ၊ ပဵၼ်ၼၢင်းႁေႃၶမ်းလႄႈဢုပ်ႉပိူင်ႇၼၼ်ႉဢေႃႈ။
မိူဝ်ႈဢၼ်ထူၼ်ႈထိုင်ၸဵတ်းပီၼၼ်ႉယဵၸ်ႈပရေႃးႁဵၵ်ႈ ယူဝ်းယတႃႉ၊ ႁွင်ႉဢဝ်ၶုၼ်ဢၼ်ပွင်ၵၢၼ်ၸိူဝ်းဢၼ်ဢုပ်ႉထိင်းတပ်ႉဢၼ်ပႂ်ႉဢသၢၵ်ႈၸဝ်ႈၼၼ်ႉလႂ်၊ဢိၵ်ႇတင်းတပ်ႉဢၼ်ပႂ်ႉႁေႃၸဝ်ႈလႂ်မႃးလႄႈ၊ၸႂ်ႉႁႂ်ႈၶဝ်ၶဝ်ႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈသေယဝ်ႉ၊ႁဵတ်းပတိၺိၺ်ႇလူၺ်ႈၵၼ်တင်းၶဝ်လႄႈဝႆႉၵတိသဵတ်ႈၸႃႇလူၺ်ႈလွင်ႈတၢင်းဢၼ်မၼ်းၵျၢမ်ႇပွင်ဝႆႉၼၼ်ႉဢေႃႈ။ မၼ်းဢဝ် ယေႃးသႃႉ၊ လုၵ်ႈၸၢႆးၶုၼ်ႁေႃၶမ်း ဢႃႇၶၸိ၊ ၼၼ်ႉၼႄပျႃးတီႈၶဝ်သေယဝ်ႉ၊-
သင်ႇလၢတ်ႈတီႈၶဝ်လႄႈဝႃႈ၊ “ၼႂ်းမိူဝ်ႈဢၼ်သူမႃးထၢမ်းႁဵတ်းၼႃႈၵၢၼ်ၼႂ်းဝၼ်းၵမ်သိၼ်ၼၼ်ႉ၊ၼႂ်းသူၼႆႉသၢမ်ပုၼ်ႈပုၼ်ႈၼိုင်ႈတၵ်းလႆႈပႂ်ႉႁေႃၸဝ်ႈဢေႃႈ။-
ထႅင်ႈသၢမ်ပုၼ်ႈပုၼ်ႈၼိုင်ႈတၵ်းလႆႈပႂ်ႉၽၵ်းတူ သုရႃႉ၊ ဢေႃႈ။ သမ်ႉထႅင်ႈသၢမ်ပုၼ်ႈပုၼ်ႈၼိုင်ႈ၊တၵ်းလႆႈပႂ်ႉၽၵ်းတူဢၼ်မီးၽၢႆႇလင်ၵူၼ်းပႂ်ႉတင်းလၢႆၼၼ်ႉဢေႃႈ။-
မူႇၸုမ်းသွင်မူႇၸိူဝ်းဢၼ်ၵိုတ်းယင်ႉၼႃႈၵၢၼ်ၼႂ်းဝၼ်းၵမ်သိၼ်ၼၼ်ႉတၵ်းလႆႈပႂ်ႉၵျွင်းပိၵ်ႈမၢၼ်ႇၸဝ်ႈပုၼ်ႈဢၼ်တၵ်းၵႅတ်ႇၶႄၶုၼ်ႁေႃၶမ်းဢေႃႈ။-
သူတၵ်းလႆႈထွတ်ႇဢဝ်လၢပ်ႇဝႆႉသေယဝ်ႉ၊ပႂ်ႉၶုၼ်ႁေႃၶမ်း ယေႃးသႃႉ၊ လႄႈယူႇၸွမ်းၵၼ်တင်းမၼ်းတီႈဢၼ်မၼ်းၵႂႃႇမၼ်းမႃးၼၼ်ႉဢေႃႈ။ ၶဝ်ၸိူဝ်းဢၼ်မႃးၸမ်ႁိမ်းသူၼၼ်ႉဢဝ်တၢႆပႅတ်ႈၵူႈၵေႃႉၵူႈၵူၼ်းတႃႉ၊” ဝႃႈၼင်ႇၼႆဢေႃႈ။
ၶုၼ်ဢၼ်ပွင်ၵၢၼ်ၸိူဝ်းၼၼ်ႉထွမ်ႇဢဝ်ၵႂၢမ်း ယူဝ်းယတႃႉ၊ သေယဝ်ႉ၊ႁွင်ႉဢဝ်ၵူၼ်းၶဝ်တင်းလၢႆၸႃႉၸဵမ်ၶဝ်ၸိူဝ်းဢၼ်ၵိုတ်းယင်ႉၼႃႈၵၢၼ်ၼႂ်းဝၼ်းၵမ်သိၼ်လႂ်၊ဢိၵ်ႇတင်းၶဝ်ၸိူဝ်းဢၼ်မႃးထၢမ်းႁဵတ်းၼႃႈၵၢၼ်ၸိူဝ်းၼၼ်ႉႁႂ်ႈမႃးၵႃႈတီႈမၼ်းဢေႃႈ။-
မၼ်းၸင်ႇဢဝ်ၵၼ်းႁွၵ်ႇတင်းၶႅပ်းႁႄႉလၢၵ်ႈၼၢၵ်ႈၶုၼ်ႁေႃၶမ်း တႃႇဝိတ်ႈ၊ ၸိူဝ်းဢၼ်မၼ်းသိမ်းဝႆႉၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉဢွၵ်ႇလႄႈဢၢပ်ႈပၼ်တီႈၶုၼ်ဢၼ်ပွင်ၵၢၼ်ၸိူဝ်းၼၼ်ႉဢေႃႈ။-
ၶဝ်ၸိူဝ်းဢၼ်ပႂ်ႉၼၼ်ႉယိပ်းၵမ်လၢပ်ႇသေလႄႈပႂ်ႉလွမ်ႉႁွပ်ႈၵျွင်းပိၵ်ႈမၢၼ်ႇၸဝ်ႈယူႇႁႂ်ႈလႆႈၵႅတ်ႇၶႄၶုၼ်ႁေႃၶမ်းဢေႃႈ။-
မိူဝ်ႈၼၼ်ႉ၊ ယူဝ်းယတႃႉ၊ ဢွၼ်ဢဝ် ယေႃးသႃႉ၊ ဢွၵ်ႇၵႂႃႇၵႃႈၼွၵ်ႈသေယဝ်ႉ၊ဢဝ်ရႃႇၸႃႉသရၽူႇတိုဝ်းပၼ်လႄႈဢဝ်ၵျၢမ်းပိင်းၺၢပ်ႈတြႃးၶုၼ်ႁေႃၶမ်းၼၼ်ႉဢၢပ်ႈပၼ်ဢေႃႈ။ မိူဝ်ႈၼၼ်ႉ၊ ယူဝ်းယတႃႉ၊ ပၼ်ၽိၵ်ႈသိၵ်ႈႁႂ်ႈ ယေႃးသႃႉ၊ ပဵၼ်ၶုၼ်ႁေႃၶမ်းဢေႃႈ။ ၵူၼ်းတင်းလၢႆဢွၼ်ၵၼ်တူပ်းမိုဝ်းလႄႈႁွင်ႉပၢဝ်ႇလႄႈဝႃႈ၊ “ႁႂ်ႈၶုၼ်ႁေႃၶမ်းဢသၢၵ်ႈယၢဝ်းယိုၼ်းသေၵမ်းလူၺ်ႈ၊” ဝႃႈၼင်ႇၼႆဢေႃႈ။
ၼၢင်းႁေႃၶမ်း ဢႃႇထလိ၊ ငိၼ်းသဵင်ဢၼ်ၵူၼ်းတင်းလၢႆ၊ဢိၵ်ႇတင်းၵူၼ်းပႂ်ႉၸိူဝ်းၼၼ်ႉႁွင်ႉပၢဝ်ႇၼၼ်ႉသေလႄႈႁိပ်ႈၼႅတ်ႈၵႂႃႇၵႃႈတီႈၵျွင်းပိၵ်ႈမၢၼ်ႇၸဝ်ႈတီႈဢၼ်မုၵ်ႉၵူၼ်းၸိူဝ်းၵူၼ်းၸုတုမ်ၵၼ်ၼၼ်ႉဢေႃႈ။-
ၵႃႈတီႈၼၼ်ႈမၼ်းမုင်ႈႁၼ်ၶုၼ်ႁေႃၶမ်းၸုၵ်းယူႇၵႃႈတီႈႁိမ်းသဝ်လူင်၊ၸွမ်းၼင်ႇဢၼ်ထုင်းၸၢမ်ႇမီးၼၼ်ႉယူႇလႄႈ၊ၶုၼ်ဢၼ်ပွင်ၵၢၼ်တင်းလၢႆတင်းၵူၼ်းပဝ်ႇၼႄးၶရႃႇတင်းလၢႆ၊ဢိၵ်ႇတင်းၵူၼ်းဝၢၼ်ႈၵူၼ်းမိူင်းၸိူဝ်းၼၼ်ႉ လွမ်ႉႁွပ်ႈမၼ်းယူႇသေလႄႈဢွၼ်ၵၼ်ၸူမ်းသိူဝ်းႁွင်ႉပၢဝ်ႇယူႇ၊ပဝ်ႇတိုင်ႈၼႄးၶရႃႇယူႇၼၼ်ႉဢေႃႈ။ ဢႃႇထလိ၊ ၸၵ်ႉသိၵ်ႇၶူဝ်းၼုင်ႈမၼ်းတင်းၸႂ်ဢၼ်ၼၵ်းဢၼ်ၼႃသေလႄႈသႅၼ်ႇႁွင်ႉဝႃႈ၊ “ပဵၼ်ၵၢၼ်လုၵ်ႉၽိုၼ်ႉလူင်ပႄႇ။ ပဵၼ်ၵၢၼ်လုၵ်ႉၽိုၼ်ႉလူင်ပႄႇ၊” ဝႃႈၼင်ႇၼႆဢေႃႈ။
ယူဝ်းယတႃႉ၊ ဢမ်ႇၶႂ်ႈဢဝ် ဢႃႇထလိ၊ တၢႆၵႃႈၼႂ်းဝၢင်းၵျွင်းပိၵ်ႈမၢၼ်ႇၸဝ်ႈၼၼ်ႉၸင်ႇ၊လၢတ်ႈတီႈၶုၼ်သိုၵ်းႁၢၼ်တင်းလၢႆလႄႈဝႃႈ၊ “ဢဝ်မႄႈယိင်းၼၼ်ႉဢွၵ်ႇသေၵႃႈၼွၵ်ႈထႅဝ်ၵူၼ်းသိုၵ်းတင်းလၢႆသေလႄႈ၊ၽူႈလႂ်သေဢမ်ႇဝႃႈ၊ပေႃးဢၢင်ႈတၵ်းၵႄႇၼုၵ်ႈဢဝ်မၼ်းၸိုင်၊ႁႂ်ႈဢဝ်ၵေႃႉၼၼ်ႉတၢႆပႅတ်ႈတႃႉ၊” ဝႃႈၼင်ႇၼႆဢေႃႈ။-
ၶဝ်တိၺွပ်းဢဝ်မၼ်းလႄႈဢဝ်မၼ်းၵႂႃႇၵႃႈတီႈႁေႃၶမ်းသေယဝ်ႉ၊ဢဝ်မၼ်းတၢႆၵႃႈတီႈ ၽၵ်းတူမႃႉ၊ ၼၼ်ႉသေဢေႃႈ။
ယဵၸ်ႈပရေႃးႁဵၵ်ႈ ယူဝ်းယတႃႉ၊ ႁဵတ်းပတိၺိၺ်ႇဝူင်ႈၵၢင် ထႃႇဝရႃႉၽြႃး၊ ဢိၵ်ႇတင်းၵူၼ်းတင်းလၢႆ၊ႁႂ်ႈၶဝ်ပဵၼ်ၵူၼ်းမၼ်းၸဝ်ႈဢေႃႈ။ မၼ်းၵေႃႈႁဵတ်းပတိၺိၺ်ႇၼႂ်းဝူင်ႈၵၢင်ၶုၼ်ႁေႃၶမ်းတင်းၵူၼ်းတင်းလၢႆဢေႃႈ။-
ၼင်ႇၼၼ်လႄႈၵူၼ်းတင်းလၢႆဢွၼ်ၵၼ်ၵႂႃႇၵႃႈတီႈၵျွင်း ၽြႃးပႃႇလႃႉ၊ သေယဝ်ႉ၊ၵိူၼ်ႇယႃႉပႅတ်ႈၵျွင်းၼၼ်ႉဢေႃႈ။ ၶဝ်ပေႃႉထုပ်ႉယႃႉလႅဝ်ၶဵင်ႇတၢင်းလူႇလႂ်၊ႁုၼ်ႇႁၢင်ႈသၢင်းထုလႂ်သေလႄႈဢဝ် မတ်ႉတၼ်ႇ၊ ၵေႃႉဢၼ်ပဵၼ်ယဵၸ်ႈပရေႃးႁဵၵ်ႈ ၽြႃးပႃႇလႃႉ၊ ၼၼ်ႉတၢႆၵႃႈတီႈၽၢႆႇၼႃႈၶဵင်ႇတၢင်းလူႇၸိူဝ်းၼၼ်ႉဢေႃႈ။ ယူဝ်းယတႃႉ၊ ၸႂ်ႉၵူၼ်းတင်းလၢႆပႂ်ႉထိင်းၼႃႈၵၢၼ်ၵႃႈတီႈၵျွင်းပိၵ်ႈမၢၼ်ႇၸဝ်ႈၼၼ်ႉယဝ်ႉၸင်ႇ၊-
မၼ်းဢိၵ်ႇတင်းၶုၼ်ဢၼ်ပွင်ၵၢၼ်လႂ်၊တပ်ႉဢၼ်ပႂ်ႉဢသၢၵ်ႈၸဝ်ႈလႂ်၊ဢိၵ်ႇတင်းၵူၼ်းပႂ်ႉႁေႃၸဝ်ႈၸိူဝ်းၼၼ်ႉဢဝ်ၶုၼ်ႁေႃၶမ်းလုၵ်ႉသေၵႃႈတီႈၵျွင်းပိၵ်ႈမၢၼ်ႇၸဝ်ႈၵႂႃႇသူင်ႇၵႃႈတီႈႁေႃၸဝ်ႈလႄႈၵူၼ်းဝၢၼ်ႈၵူၼ်းမိူင်းတင်းလၢႆဢွၼ်ၵၼ်ပႆၸွမ်းၵႂႃႇဢေႃႈ။ ယေႃးသႃႉ၊ ၶဝ်ႈၵႂႃႇၸွမ်းၽၵ်းတူဢၼ်မီးၸိုဝ်ႈႁွင်ႉဝႃႈ၊ ၽၵ်းတူပႂ်ႉၵၢင်၊ ၼၼ်ႉသေယဝ်ႉ၊ၶိုၼ်ႈၼင်ႈၵႃႈၼိူဝ်ရႃႇၸႃႉပလၢင်ႇဢေႃႈ။-
ၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင်ၸူမ်းသိူဝ်းလႄႈဝဵင်းတင်းဝဵင်းၵေႃႈမီးတၢင်းဢၼ်သဵတ်ႇလီၼိမ်လီ၊ဝၢႆးသေ ဢႃႇထလိ၊ လႆႈၶၢမ်ႇတၢင်းဢၼ်ဢဝ်တၢႆၵႃႈတီႈဝၢင်းႁေႃၶမ်းၼၼ်ႉဢေႃႈ။
ယေႃးသႃႉ၊ ၸမ်ႉ၊မိူဝ်ႈဢၼ်မၼ်းၶိုၼ်းၼင်ႈႁၢင်ႈၼင်ႈႁေႃၼၼ်ႉၸိုင်၊ဢသၢၵ်ႈလႆႈၸဵတ်းပီယဝ်ႉဢေႃႈ။
ၼႂ်းပီဢၼ်ၶုၼ်ႁေႃၶမ်း ယေႇႁု၊ မိူင်း ဢိသရေး၊ ၸၢမ်ႇႁၢင်ႈၸၢမ်ႇႁေႃၸဵတ်းပီၼၼ်ႉ၊ ယေႃးသႃႉ၊ ပဵၼ်ၶုၼ်ႁေႃၶမ်းမိူင်း ယုတႃႉ၊ လႄႈဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရုသလႅမ်ႇ၊ သီႇသိပ်းပီဢေႃႈ။ မႄႈၸဝ်ႈၸမ်ႉ၊ပဵၼ် ၸိပိ၊ မႄႈယိင်းဝဵင်း ပေႇရသေးၽႃႉ၊ ဢေႃႈ။-
ၼႂ်းၸူဝ်ႈတႃႇဢသၢၵ်ႈမၼ်းၼၼ်ႉမၼ်းႁဵတ်းဢၼ်လီဢၼ်ငၢမ်းသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ၵွပ်ႈပိူဝ်ႈယဵၸ်ႈပရေႃးႁဵၵ်ႈ ယူဝ်းယတႃႉ၊ သင်ႇသွၼ်ၼႄတၢင်းပၼ်မၼ်းၼၼ်ႉဢေႃႈ။-
ၼႂ်းဝႃႈၼၼ်သေၵေႃႈမၼ်းယင်းဢမ်ႇပႄႇၽဵဝ်ႈထႃႇၼႃႉတီႈဝႆႈၽြႃးၶဝ်ၸိူဝ်းဢၼ်ဢမ်ႇယုမ်ႇမၢတ်ႈ ထႃႇဝရႃႉၽြႃး၊ ၼၼ်ႉၸိူဝ်းၼၼ်ႉပႅတ်ႈလႄႈပိူၼ်ႈယင်းဢွၼ်ၵၼ်သၢၵ်ႈလူႇၶိူင်ႈတၢင်းလူႇလႂ်၊ဢိၵ်ႇတင်းၶိူင်ႈၼၢမ်ႇသႃႇၽဝ်ၽႆးလႂ်၊ၵႃႈတီႈၼၼ်ႈယူႇဢေႃႈ။
ယေႃးသႃႉ၊ ႁွင်ႉဢဝ်ယဵၸ်ႈပရေႃးႁဵၵ်ႈတင်းလၢႆမႃးသေယဝ်ႉ၊ပူင်ဢမိင်ႉႁႂ်ႈၶဝ်ၸုဢဝ်ငိုၼ်းဢၼ်ၸၢပ်ႈသႅင်ႇၵၼ်တင်းတၢင်းလူႇၵျွင်းပိၵ်ႈမၢၼ်ႇၸဝ်ႈ၊ဢိၵ်ႇတင်းငိုၼ်းဢၼ်မီးၸႂ်ၸေႇတၼႃႇလူႇၸွမ်းဢလူဝ်ႇၵၢင်ၸႂ်တူဝ်ၸဝ်ႈၵဝ်ႇၸိူဝ်းၼၼ်ႉဝႆႉဢေႃႈ။-
ယဵၸ်ႈပရေႃးႁဵၵ်ႈၵူႈၵေႃႉတၵ်းလႆႈၶၢမ်ႇဢဝ်ငိုၼ်းတီႈၵေႃႉဢၼ်မိုတ်ႈၵိုဝ်းၵၼ်တင်းမၼ်းၼၼ်ႉမႃးႁင်းၽႂ်ႁင်းမၼ်းလႄႈငိုၼ်းၸိူဝ်းၼၼ်ႉတၵ်းလႆႈဢဝ်ၸၢႆႇပုၼ်ႈတၢင်းဢၼ်မႄးၵုမ်းမႄးႁဵတ်းၵျွင်းပိၵ်ႈမၢၼ်ႇၸဝ်ႈဢၼ်လူဝ်ႇႁဵတ်းလူဝ်ႇသၢင်ႈၼၼ်ႉဢေႃႈ။
ၵူၺ်းၵႃႈ၊တေႃႇထိုင်ႁွတ်ႈပီဢၼ်ၶုၼ်ႁေႃၶမ်း ယေႃးသႃႉ၊ ၸၢမ်ႇႁၢင်ႈၸၢမ်ႇႁေႃသၢဝ်းသၢမ်ပီၼၼ်ႉ၊ယဵၸ်ႈပရေႃးႁဵၵ်ႈၸိူဝ်းၼၼ်ႉယင်းဢမ်ႇပႆႇမႄးၵုမ်းမႄးႁဵတ်းၵျွင်းပိၵ်ႈမၢၼ်ႇၸဝ်ႈတီႈဢၼ်လုဢၼ်လႅဝ်ၼၼ်ႉၵႃႈသင်လႃးလႃး။-
ပိူဝ်ႈၼႆလႄႈမၼ်းႁွင်ႉဢဝ် ယူဝ်းယတႃႉ၊ ဢိၵ်ႇတင်းယဵၸ်ႈပရေႃးႁဵၵ်ႈတင်းလၢႆမႃးလႄႈမီးဢမိင်ႉလႄႈဝႃႈ၊ “ႁဵတ်းသင်လႄႈသူယင်းဢမ်ႇပႆႇမႄးၵုမ်းမႄးႁဵတ်းၵျွင်းပိၵ်ႈမၢၼ်ႇၸဝ်ႈဢၼ်လုဢၼ်လႅဝ်ၸိူဝ်းၼၼ်ႉၼင်ႇႁိုဝ်။ ဢဝ်ၼႆႉၵႂႃႇမိူဝ်းၼႃႈသူယႃႇပေယိပ်းပေထိင်းငိုၼ်းဢၼ်သူၶၢမ်ႇဢဝ်လႆႈမႃးၸိူဝ်းၼၼ်ႉ။ ဢွၼ်ၵၼ်ဢဝ်ဢၢပ်ႈပၼ်ပုၼ်ႈဢၼ်တၵ်းႁဵတ်းတၵ်းသၢင်ႈၵၢၼ်ဢၼ်မႄးၵုမ်းမႄးႁဵတ်းၼၼ်ႉတႃႉ၊” ဝႃႈၼင်ႇၼႆဢေႃႈ။-
ယဵၸ်ႈပရေႃးႁဵၵ်ႈ ၸိူဝ်းၼၼ်ႉဢွၼ်ၵၼ်ၽွမ်ႉၸႂ်လွင်ႈဢၼ်ၶဝ်တၵ်းဢမ်ႇၶၢမ်ႇဢဝ်ငိုၼ်းလူႇဢၼ်ပိူၼ်ႈမႃးလူႇမႃးတၢၼ်း၊ဢိၵ်ႇတင်းတၵ်းဢမ်ႇယိပ်းဢမ်ႇၵမ်ၵၢၼ်ဢၼ်မႄးၵုမ်းမႄးႁဵတ်းၼၼ်ႉၸိူဝ်းၼၼ်ႉဢေႃႈ။
ပိူဝ်ႈၼႆလႄႈ ယူဝ်းယတႃႉ၊ ဢဝ်တိူၵ်ႈတႃႇလုၵ်ႈၼိုင်ႈႁဵတ်းႁူးဝႆႉၵႃႈတီႈၽႃႁူမ်ႇမၼ်းလႄႈဢဝ်ဝႆႉၵႃႈတီႈႁိမ်းၶဵင်ႇတၢင်းလူႇၽၢႆႇၶႂႃတၢင်းၶဝ်ႈၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။ ယဵၸ်ႈပရေႃးႁဵၵ်ႈၸိူဝ်းဢၼ်တူၵ်းၼႃႈၵၢၼ်ပႂ်ႉၽၵ်းတူၼၼ်ႉဢွၼ်ၵၼ်ဢဝ်ငိုၼ်းၵႃႈဢၼ်ၵူၼ်းမႃးႁဵတ်းဝၢတ်ႈၵူဝ်းၵႂၢႆႇလူႇတၢၼ်းၼၼ်ႉသႂ်ႇဝႆႉၵႃႈၼႂ်းတိူၵ်ႈတႃႇၼၼ်ႉဢေႃႈ။-
မိူဝ်ႈလႂ်သေဢမ်ႇဝႃႈ၊ပေႃးငိုၼ်းလူႇမီးၼမ်ၼႃႇၵႃႈၼႂ်းတိူၵ်ႈတႃႇၸိုင်၊ၸရေးလူင်ၶုၼ်ႁေႃၶမ်းတင်းယဵၸ်ႈပရေႃးႁဵၵ်ႈလူင်ၼပ်ႉဢၢၼ်ႇဢဝ်ၸရၢင်းသေလႄႈႁေႃႇၸွၵ်းဝႆႉသေဢေႃႈ။-
လိုၼ်းသေဢၼ်တႅမ်ႈမၢႆၸရၢင်းငိုၼ်းလူႇၼၼ်ႉ၊ဝႆႉလီလီငၢမ်းငၢမ်းယဝ်ႉၸိုင်၊ၶဝ်ဢဝ်ငိုၼ်းၼၼ်ႉဢၢပ်ႈၼႂ်းမိုဝ်းၽူႈပွင်ၼႃႈၵၢၼ်ၵျွင်းပိၵ်ႈမၢၼ်ႇၸဝ်ႈၼၼ်ႉသေယဝ်ႉ၊ဢဝ်ငိုၼ်းၼၼ်ႉပၼ်ၵႃႈၸၢင်ႈမႆႉလႂ်၊ၵူၼ်းႁဵတ်းၵူၼ်းပွင်လႂ်၊-
ၵူၼ်းၵေႃႇဢုတ်ႇလႂ်၊ဢိၵ်ႇတင်းၵူၼ်းဢၼ်ထၢၵ်ႇဢၼ်သပ်းမၢၵ်ႇႁိၼ်လႂ်၊ဢိၵ်ႇတင်းၵႃႈသိုဝ်ႉမႆႉၸိင်လႂ်၊သိုဝ်ႉမၢၵ်ႇႁိၼ်ဢၼ်ထၢၵ်ႇယဝ်ႉသပ်းယဝ်ႉလႂ်၊ပုၼ်ႈတၵ်းလႆႈမႄးၵုမ်းမႄးႁဵတ်းႁွႆးတီႈဢၼ်လုဢၼ်လႅဝ်လႂ်ၸိူဝ်းၼၼ်ႉဢေႃႈ။-
ငိုၼ်းလူႇငိုၼ်းတၢၼ်းၸိူဝ်းၼၼ်ႉၶဝ်ဢမ်ႇဢဝ်ႁဵတ်းၵွၵ်းငိုၼ်းလႂ်၊ၵိမ်းၺၢပ်ႈၽႆးလႂ်၊ဝၢၼ်ႇလႂ်၊ၼႄးၶရႃႇလႂ်၊ၶဵင်ႇဢၼ်တၢင်ႇၵွၵ်းၽႆးလႂ်၊ဢိၵ်ႇတင်းၶိူင်ႈၸႂ်ႉဢၼ်ဢဝ်ငိုၼ်းဢဝ်ၶမ်းႁဵတ်းၸိူဝ်းၼၼ်ႉသေဢိတ်း။-
ငိုၼ်းၼၼ်ႉၸိုင်၊ၶဝ်ဢဝ်ပၼ်ၵႃႈၸၢင်ႈၵူၼ်းႁဵတ်းၵၢၼ်လႂ်၊ဢိၵ်ႇတင်းၸၢႆႇပုၼ်ႈသိုဝ်ႉၶိူင်ႈၸႂ်ႉၼႂ်းတၢင်းဢၼ်မႄးၵုမ်းမႄးႁဵတ်းၸိူဝ်းၼၼ်ႉၵူၺ်းဢေႃႈ။-
ၽူႈပွင်ၼႃႈၵၢၼ်ၸိူဝ်းၼၼ်ႉမီးသဵတ်ႈၸႃႇၼႃႇလူင်လၢင်လႄႈၶဝ်ဢမ်ႇလူဝ်ႇတႂၢၵ်ႈလူဝ်ႇတႅမ်ႈၸရၢင်းငိုၼ်းဢၼ်ၸႂ်ႉဢၼ်ၸၢႆႇၼၼ်ႉယဝ်ႉဢေႃႈ။-
ငိုၼ်းဢၼ်လူႇဢၼ်တၢၼ်းပုၼ်ႈၶိူင်ႈတၢင်းလူႇဢၼ်ၽေႇတုၸရိူၵ်ႈ၊ဢိၵ်ႇတင်းၶိူင်ႈတၢင်းလူႇဢၼ်ၽေႇဢပျတ်ႈၸိူဝ်းၼၼ်ႉၸမ်ႉ၊ဢမ်ႇလႆႈဢဝ်သႂၢင်းသႂ်ႇၵႃႈၼႂ်းတိူၵ်ႈတႃႇၸဝ်ႈလႄႈပဵၼ်ပုၼ်ႈယဵၸ်ႈပရေႃးႁဵၵ်ႈ တင်းလၢႆပိူင်ႇဢဝ်ဢေႃႈ။
မိူဝ်ႈၶိင်ႇယၢမ်းၼၼ်ႉၶုၼ်ႁေႃၶမ်း ႁႃႇၸေႇလႃႉ၊ မိူင်း သီးရီးယႃး၊ ၶီႇသိုၵ်းၶိုၼ်ႈတိုၵ်းဝဵင်း ၵတ်ႉတိ၊ လႄႈသိမ်းဢဝ်သေယဝ်ႉ၊ဢၢင်ႈတၵ်းၶိုၼ်ႈမႃးတိုၵ်းဝဵင်း ယေႇရုသလႅမ်ႇ၊ ဢေႃႈ။-
ၶုၼ်ႁေႃၶမ်း ယေႃးသႃႉ၊ မိူင်း ယုတႃႉ၊ ၼၼ်ႉဢဝ်ၶိူင်ႈလူႇၶိူင်ႈတၢၼ်းပူႇၸဝ်ႈမွၼ်ႇၸဝ်ႈၶုၼ်ႁေႃၶမ်း ယုတႃႉ၊ ဢၼ်ပဵၼ် ယူဝ်းသၽတ်ႉ၊ယႁူဝ်းရမ်ႇ၊ဢႃႇၶၸိ၊ ၸိူဝ်းဢၼ်သၢၵ်ႈလူႇႁႂ်ႈပဵၼ်ၶိူင်ႈမူတ်းၸၢင်ႇၸိူဝ်းၼၼ်ႉဢိၵ်ႇတင်းၶမ်းၵႃႈဢၼ်မီးၵႃႈၼႂ်းၽၼ်ႇတႃႇၵျွင်းပိၵ်ႈမၢၼ်ႇၸဝ်ႈဢိၵ်ႇတင်းၽၼ်ႇတႃႇႁေႃၸဝ်ႈၸုပွင်းၵၼ်သေလႄႈသူင်ႇပၼ်ၵႂႃႇတီႈၶုၼ်ႁေႃၶမ်း ႁႃႇၸေႇလႃႉ၊ ဢေႃႈ။ ႁႃႇၸေႇလႃႉ၊ ၵေႃႈဢွၼ်ဢဝ်တပ်ႉသိုၵ်းမၼ်းဝႆႉဝၢင်းပႅတ်ႈၵႃႈတီႈဝဵင်း ယေႇရုသလႅမ်ႇ၊ သေလႄႈဢွၵ်ႇၵႂႃႇဢေႃႈ။
လွင်ႈတၢင်းၵႃႈဢၼ်ၶုၼ်ႁေႃၶမ်း ယေႃးသႃႉ၊ ႁဵတ်းၵူႈၸိူဝ်ႉၵူႈပိူင်ၼၼ်ႉတႅမ်ႈမၢႆဝႆႉၵႃႈၼႂ်း လိၵ်ႈပိုၼ်းၶုၼ်ႁေႃၶမ်းမိူင်းယုတႃႉ၊ ဢေႃႈ။
ၶႃႈမၼ်းၵူၼ်းမၼ်းတင်းလၢႆလုၵ်ႉၽိုၼ်ႉမိူင်းလႄႈဢဝ် ယေႃးသႃႉ၊ တၢႆၵႃႈၼႂ်းႁေႃ မိလေႃႇ၊ ၵႃႈတီႈသဵၼ်ႈတၢင်းဢၼ်လူင်းၵႂႃႇၸူးတီႈဝၢၼ်ႈ သိလႃႉ၊ ၼၼ်ႉဢေႃႈ။-
ၶႃႈမၼ်းၵူၼ်းမၼ်း ယေႃးၸပတ်ႉ၊ လုၵ်ႈၸၢႆး သိမတ်ႉ၊ တင်း ယႁေႃးၸပတ်ႉ၊ လုၵ်ႈၸၢႆး သေႃးမႃႇရႃႉ၊ ၸိူဝ်းၼၼ်ႉပဵၼ်ၵေႃႉဢၼ်ၶႃႈဢၼ်ၽၼ်းမၼ်းတၢႆဢေႃႈ။ တူဝ်တၢႆ ယေႃးသႃႉ၊ ၼၼ်ႉလႆႈၶၢမ်ႇတၢင်းဢၼ်သၢင်းၵျူဝ်ႇဝႆႉၵႃႈတီႈပႃႇႁဵဝ်ႈဝဵင်းၸဝ်ႈပေႃႈမၼ်း တႃႇဝိတ်ႈ၊ သေယဝ်ႉ၊လုၵ်ႈၸၢႆးမၼ်း ဢႃႇမၸိ၊ သိုပ်ႇၼင်ႈႁၢင်ႈၼင်ႈႁေႃဢေႃႈ။
ၼႂ်းပီဢၼ်ၶုၼ်ႁေႃၶမ်း ယေႃးသႃႉ၊ လုၵ်ႈၸၢႆး ဢႃႇၶၸိ၊ ၸၢမ်ႇႁၢင်ႈၸၢမ်ႇႁေႃမိူင်း ယုတႃႉ၊ လႆႈသၢဝ်းသၢမ်ပီၼၼ်ႉ၊ ယႁေႃးၶတ်ႉ၊ လုၵ်ႈၸၢႆး ယေႇႁု၊ ပဵၼ်ၶုၼ်ႁေႃၶမ်းမိူင်း ဢိသရေး၊ လႄႈဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း သမႃႇရိ၊ သိပ်းၸဵတ်းပီဢေႃႈ။-
မၼ်းႁဵတ်းတုၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ မိူၼ်ၸိူဝ်ႉၼင်ႇၶုၼ်ႁေႃၶမ်း ယေႇရူဝ်းပုမ်ႇ၊ ဢၼ်ဢွၼ်ႁဵတ်းႁႂ်ႈၵူၼ်းမဵဝ်း ဢိသရေး၊ ၽိတ်းပိူင်ႈၼၼ်ႉယူႇသေလႄႈမၼ်းဢမ်ႇၸုၼ်ႉပႅတ်ႈသဵၼ်ႈတၢင်းဢၼ်ႁၢႆႉမိူၵ်ႈမၼ်းၼၼ်ႉ။-
ၵွပ်ႈပိူဝ်ႈလွင်ႈတၢင်းၼႆႉလႄႈ ထႃႇဝရႃႉၽြႃး၊ ၸႂ်မႆႈၶႂ်ႈၸႃႉၵႃႈၼိူဝ်ၵူၼ်းမဵဝ်း ဢိသရေး၊ သေယဝ်ႉ၊မၼ်းၸဝ်ႈပၼ်ဢၶႂၢင်ႉႁႂ်ႈၶုၼ်ႁေႃၶမ်း ႁႃႇၸေႇလႃႉ၊ မိူင်း သီးရီးယႃး၊ တင်းလုၵ်ႈၸၢႆးမၼ်း ပိၼ်ႇႁႃႇတတ်ႉ၊ မႃးယႃႉၵဝ်းတိုၵ်းတေႃးမိူင်း ဢိသရေး၊ ယူႇၶိူဝ်းၶိူဝ်းယႂ်းယႂ်းဢေႃႈ။-
မိူဝ်ႈၼၼ်ႉ၊ ယႁေႃးၶတ်ႉ၊ သူးတွင်းတီႈ ထႃႇဝရႃႉၽြႃး၊ လႄႈ ထႃႇဝရႃႉၽြႃး၊ ထွမ်ႇငိၼ်းဢဝ်ၵႂၢမ်းသူးတွင်းမၼ်းလႄႈမၼ်းၸဝ်ႈႁုႁၼ်တၢင်းဢၼ်ၵူၼ်းမဵဝ်း ဢိသရေး၊ လႆႈၶၢမ်ႇတၢင်းဢၼ်ၶုၼ်ႁေႃၶမ်း သီးရီးယႃး၊ ၶဝ်ၼိၵ်ႈၸၢၵ်ႈငႅၼ်းသႄးထၢၼ်ႇႁိုဝ်ၼၼ်ႉဢေႃႈ။-
ထႃႇဝရႃႉၽြႃး၊ ပွႆႇၸႂ်ႉၵူၼ်းဢၼ်ဢွၼ်ႁူဝ်ဢွၼ်ၵၼ်တီႈၵူၼ်းမဵဝ်း ဢိသရေး၊ ထၢၼ်ႈပေႃးၶဝ်လႆႈလွတ်ႈသေၽေး သီးရီးယႃး၊ ၶဝ်ၼၼ်ႉၸင်ႇၵူၼ်းမဵဝ်း ဢိသရေး၊ လႆႈယူႇၼိမ်ၼိမ်လီလီမိူၼ်ပၵ်းၵဝ်ႇပိူင်ၵဝ်ႇဢေႃႈ။-
ၼႂ်းဝႃႈၼၼ်သေၵေႃႈၵူၼ်းမဵဝ်း ဢိသရေး၊ ယင်းဢမ်ႇဝႄႈပႅတ်ႈတုၸရိူၵ်ႈဢၼ်ၶုၼ်ႁေႃၶမ်း ယေႇရူဝ်းပုမ်ႇ၊ ဢွၼ်ႁႂ်ႈၵူၼ်းမဵဝ်း ဢိသရေး၊ ၽိတ်းပိူင်ႈၼၼ်ႉ။ ၶဝ်ယင်းသိုပ်ႇႁဵတ်းတုၸရိူၵ်ႈယူႇလႄႈ၊သဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ ၵေႃႈယင်းမီးယူႇၵႃႈၼႂ်းဝဵင်း သမႃႇရိ၊ ယူႇဢေႃႈ။
ယႁေႃးၶတ်ႉ၊ ၼၼ်ႉလိူဝ်သေၵူၼ်းသိုၵ်းတပ်ႉမႃႉႁႃႈသိပ်း၊လေႃႉမႃႉသိုၵ်းသိပ်းၼိုင်ႈတင်းၵူၼ်းသိုၵ်းတပ်ႉတိၼ်မိုၼ်ႇၼိုင်ႈၵူၺ်းၼၼ်ႉဢမ်ႇမီးႁႅင်းတပ်ႉႁႅင်းတႃႇၵိုတ်းၵျၢၼ်ႇဝႆႉၵႃႈတီႈမၼ်းလႃးလႃးယဝ်ႉ။ လွင်ႈမၼ်းၸမ်ႉ၊ၶုၼ်ႁေႃၶမ်းမိူင်း သီးရီးယႃး၊ ယႃႉၽဵဝ်ႈၶဝ်ၼၼ်ႉပႅတ်ႈႁႂ်ႈၶဝ်ပဵၼ်ၸိူဝ်ႉၼင်ႇမုၼ်ႈလိၼ်ၵႂႃႇယဝ်ႉဢေႃႈ။
လွင်ႈတၢင်းၵႃႈဢၼ် ယႁေႃးၶတ်ႉ၊ ႁဵတ်းၵူႈၸိူဝ်ႉၵူႈပိူင်ဢိၵ်ႇတင်းလွင်ႈတၼ်းၶူဝ်းမၼ်းယႂ်ႇၸိူဝ်းၼၼ်ႉၸိုင်၊တႅမ်ႈမၢႆဝႆႉၵႃႈၼႂ်း ပိုၼ်းၶုၼ်ႁေႃၶမ်းမိူင်းဢိသရေး၊ ဢေႃႈ။-
မၼ်းၼွၼ်းၽႄးလႄႈဢဝ်သၢင်းၵျူဝ်ႇဝႆႉၵႃႈၼႂ်းဝဵင်း သမႃႇရိ၊ သေယဝ်ႉ၊လုၵ်ႈၸၢႆးမၼ်း ယႁေႃးသႃႉ၊ သိုပ်ႇၼင်ႈႁၢင်ႈၼင်ႈႁေႃဢေႃႈ။
ၼႂ်းပီဢၼ်ၶုၼ်ႁေႃၶမ်း ယေႃးသႃႉ၊ မိူင်း ယုတႃႉ၊ ၸၢမ်ႇႁၢင်ႈၸၢမ်ႇႁေႃလႆႈသၢမ်သိပ်းၸဵတ်းပီၼၼ်ႉ၊ ယႁေႃးသႃႉ၊ လုၵ်ႈၸၢႆး ယႁေႃးၶတ်ႉ၊ ပဵၼ်ၶုၼ်ႁေႃၶမ်းမိူင်း ဢိသရေး၊ လႄႈဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း သမႃႇရိ၊ သိပ်းႁူၵ်းပီဢေႃႈ။-
မၼ်းၵေႃႈႁဵတ်းတုၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ လႄႈၸွမ်းသဵၼ်ႈတၢင်း ယေႇရူဝ်းပုမ်ႇ၊ ဢၼ်ဢွၼ်ႁဵတ်းႁႂ်ႈၵူၼ်းမဵဝ်း ဢိသရေး၊ ၽိတ်းပိူင်ႈၼၼ်ႉဢေႃႈ။-
လွင်ႈတၢင်းဢၼ် ယႁေႃးသႃႉ၊ ႁဵတ်းၵူႈၸိူဝ်ႉၵူႈပိူင်၊ဢိၵ်ႇတင်းလွင်ႈတၼ်းၶူဝ်းမၼ်းယႂ်ႇၼႂ်းၼႃႈသိုၵ်းဢၼ်မၼ်းတိုၵ်းတေႃးၵၼ်တင်းၶုၼ်ႁေႃၶမ်း ဢႃႇမၸိ၊ မိူင်း ယုတႃႉ၊ ၸိူဝ်းၼၼ်ႉၸိုင်၊တႅမ်ႈမၢႆဝႆႉၵႃႈၼႂ်းပိုၼ်းၶုၼ်ႁေႃၶမ်းမိူင်း ဢိသရေး၊ ဢေႃႈ။-
ယႁေႃးသႃႉ၊ ၼွၼ်းၽႄးလႄႈဢဝ်သၢင်းၵျူဝ်ႇဝႆႉၵႃႈၼႂ်းပႃႇႁဵဝ်ႈၸဝ်ႈၼႂ်းဝဵင်း သမႃႇရိ၊ သေယဝ်ႉ၊လုၵ်ႈၸၢႆးမၼ်း ယေႇရူဝ်းပုမ်ႇ၊ ၵေႃႉထူၼ်ႈသွင်ၼၼ်ႉသိုပ်ႇၼင်ႈႁၢင်ႈၼင်ႈႁေႃဢေႃႈ။
မိူဝ်ႈၼၼ်ႉ၊ ဢေးလိသႄး၊ ပဵၼ်ၶႆႈပဵၼ်ၼၢဝ်ဢၼ်မၼ်းတၵ်းတၢႆလူၺ်ႈၼၼ်ႉယူႇၼၼ်ႉၸိုင်၊ၶုၼ်ႁေႃၶမ်း ယႁေႃးသႃႉ၊ မိူင်း ဢိသရေး၊ လူင်းၵႂႃႇသူႇၵႂႃႇၸႂ်းမၼ်းလႄႈႁွင်ႉႁႆႈလႄႈဝႃႈ၊ “ပေႃႈၵဝ်ၶႃႈ႟။ ပေႃႈၵဝ်ၶႃႈ႟။ ၸဝ်ႈႁဝ်းပဵၼ်ၵေႃႉဢၼ်လႆႈၵႅတ်ႇၶႄႁႄႉၵင်ႈပၼ်ၵူၼ်းမဵဝ်း ဢိသရေး၊ မႃးယဝ်ႉ၊” ဝႃႈၼင်ႇၼႆဢေႃႈ။
ဢေးလိသႄး၊ ပူင်ဢမိင်ႉတီႈမၼ်းလႄႈဝႃႈ၊ “ဢဝ်ၵၢင်ႇတင်းပိုၼ်လႂ်မႃးတႃႉ၊” ဝႃႈၼင်ႇၼႆသေယဝ်ႉ၊ ယႁေႃးသႃႉ၊ ၵေႃႈဢဝ်မႃးဢေႃႈ။-
ဢေးလိသႄး၊ ၸႂ်ႉႁႂ်ႈမၼ်းဝူတ်ႈၵၢင်ႇႁႂ်ႈလႆႈယိုဝ်းဢေႃႈ။ ၶုၼ်ႁေႃၶမ်းၵေႃႈဝူတ်ႈၵၢင်ႇလႄႈ ဢေးလိသႄး၊ ဢဝ်မိုဝ်းမၼ်းတၢင်ႇသႂ်ႇၵႃႈၼိူဝ်မိုဝ်းၶုၼ်ႁေႃၶမ်းလႄႈလၢတ်ႈဝႃႈ၊-
“ၽုၺ်ႇႁူးလၢင်းတဵၼ်ဢၼ်ဝၢႆႇၸူးၵႂႃႇတီႈမိူင်း သီးရီးယႃး၊ တႃႉ၊” ဝႃႈၼင်ႇၼႆလႄႈ၊မၼ်းၽုၺ်ႇႁူးလၢင်းတဵၼ်သေယဝ်ႉ၊ ဢေးလိသႄး၊ သမ်ႉပူင်ဢမိင်ႉလႄႈဝႃႈ၊ “ယိုဝ်းတႃႉ၊” ဝႃႈၼင်ႇၼႆလႄႈမၼ်းၵေႃႈယိုဝ်းဢေႃႈ။ ပရေႃးၽႅတ်ႈ ၼၼ်ႉၵေႃႈလၢတ်ႈလႄႈဝႃႈ၊ “မႂ်းပဵၼ်ပိုၼ် ထႃႇဝရႃႉၽြႃး၊ ပိုၼ်ဢၼ်မၼ်းၸဝ်ႈတၵ်းပႄႉၼႅင်ႇၵူၼ်းမဵဝ်း သီးရီးယႃး၊ ဢေႃႈ။ မႂ်းတၵ်းတိုၵ်းတေႃးၵူၼ်းမဵဝ်း သီးရီးယႃး၊ ၵႃႈၼႂ်းဝဵင်း ဢႃႇၽႅၵ်ႉ၊ ထၢၼ်ႈပေႃးပႄႉၼႅင်ႇၶဝ်ဢေႃႈ၊” ဝႃႈၼင်ႇၼႆဢေႃႈ။
ဢေးလိသႄး၊ သမ်ႉလၢတ်ႈတီႈၶုၼ်ႁေႃၶမ်းလႄႈဝႃႈ၊ “ဢဝ်ပိုၼ်တင်းလၢႆသေလႄႈပေႃႉၽတ်ႉၵႃႈၼိူဝ်လိၼ်တႃႉ၊” ဝႃႈၼင်ႇၼႆသေယဝ်ႉ၊ၶုၼ်ႁေႃၶမ်းၵေႃႈပေႃႉၽတ်ႉသၢမ်ၵမ်းၵူၺ်းလႄႈၵိုတ်းပႅတ်ႈသေဢေႃႈ။-
ဢေးလိသႄး၊ ၶႂ်ႈၸႃႉၶုၼ်ႁေႃၶမ်းလႄႈလၢတ်ႈဝႃႈ၊ “မႂ်းထုၵ်ႇလီပေႃႉၽတ်ႉႁႃႈႁူၵ်းၵမ်းဢေႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊မႂ်းတၵ်းပႄႉၼႅင်ႇၶုၼ်ႁေႃၶမ်းမိူင်း သီးရီးယႃး၊ ၼၼ်ႉၸေးၸေးၸုမ်ႇၸုမ်ႇဢေႃႈ။ မိူဝ်ႈလဵဝ်ၼႆႉၸိုင်၊မႂ်းတၵ်းပႄႉၼႅင်ႇမၼ်းသၢမ်ပွၵ်ႈၵူၺ်းဢေႃႈ၊” ဝႃႈၼင်ႇၼႆဢေႃႈ။
ဢေးလိသႄး၊ ၵေႃႈတၢႆၵႂႃႇလႄႈၶဝ်ဢဝ်မၼ်းသၢင်းၵျူဝ်ႇသေဢေႃႈ။ မုၵ်ႉၵူၼ်းၸိူဝ်းၵူၼ်းမဵဝ်း မေႃႇၽႃႉ၊ ၼၼ်ႉယၢမ်ႈမႃးတိုၵ်းမိူင်း ဢိသရေး၊ ၵူႈပီၵူႈပီဢေႃႈ။-
ပွၵ်ႈၼိုင်ႈ၊ယၢမ်းမိူဝ်ႈဢၼ်ယင်းတိုၵ်ႉသၢင်းၵျူဝ်ႇၵူၼ်းတၢႆၵေႃႉၼိုင်ႈယူႇၼၼ်ႉၸိုင်၊ၶဝ်ႁၼ်မုၵ်ႉၵူၼ်းၸိူဝ်းၵူၼ်း မဵဝ်း မေႃႇၽႃႉ၊ မႃးယူႇၼၼ်ႉလႄႈၶဝ်ၼႅတ်ႈဢဝ်တူဝ်တၢႆၼၼ်ႉၶျႃးတူၵ်းၼႂ်းၶုမ်ပႃႇႁဵဝ်ႈ ဢေးလိသႄး၊ သေယဝ်ႉ၊ဢွၼ်ၵၼ်ဢွၵ်ႇပၢႆႈဢေႃႈ။ မိူဝ်ႈဢၼ်တူဝ်တၢႆၼၼ်ႉတူၵ်းၵႂႃႇတိူဝ်ႉသႂ်ႇလုပ်ႇ ဢေးလိသႄး၊ ၼၼ်ႉၸိုင်၊တူဝ်တၢႆၼၼ်ႉဢသၢၵ်ႈၶိုၼ်းလိပ်းမႃးလႄႈလုၵ်ႉၸုၵ်းယူႇဢေႃႈ။
ၶုၼ်ႁေႃၶမ်း ႁႃႇၸေႇလႃႉ၊ မိူင်း သီးရီးယႃး၊ ၼၼ်ႉႁဵတ်းသိုၵ်းတေႃႇၵူၼ်းမဵဝ်း ဢိသရေး၊ ယူႇၼႂ်းၸူဝ်ႈပၢၼ် ယႁေႃးၶတ်ႉ၊ ဢုပ်ႉပိူင်ႇၸၢမ်ႇၸႃးၼၼ်ႉတင်းၸူဝ်ႈဢေႃႈ။-
ၼႂ်းဝႃႈၼၼ်သေၵေႃႈ ထႃႇဝရႃႉၽြႃး၊ ဢဵတ်းလူၶဝ်၊ႁဵတ်းၵျေးၸူးတီႈၶဝ်ယူႇလႄႈမၼ်းၸဝ်ႈဢမ်ႇပၼ်ဢၶႂၢင်ႉႁႂ်ႈၶဝ်လႆႈလုသုမ်း၊ယင်းၸွႆႈထႅမ်ၶဝ်ယူႇၵွပ်ႈပိူဝ်ႈမၼ်းၸဝ်ႈလႆႈႁဵတ်းပတိၺိၺ်ႇလူၺ်ႈၵၼ်တင်း ဢႃႇပြႃႇႁၢမ်ႇ၊ဢိၸၢၵ်ႈ၊ယႃႇၵုပ်ႈ၊ ၸိူဝ်းၼၼ်ႉသေလႄႈမၼ်းၸဝ်ႈဢမ်ႇတွၼ်ႉလူင်လိုမ်းၵူၼ်းမၼ်းၸဝ်ႈၸိူဝ်းၼၼ်ႉဢေႃႈ။
ၶုၼ်ႁေႃၶမ်း ႁႃႇၸေႇလႃႉ၊ မိူင်း သီးရီးယႃး၊ တၢႆလႄႈလုၵ်ႈၸၢႆးမၼ်း ပိၼ်ႇႁႃႇတတ်ႉ၊ သိုပ်ႇၼင်ႈႁၢင်ႈၼင်ႈႁေႃဢေႃႈ။-
မိူဝ်ႈၼၼ်ႉ၊ၶုၼ်ႁေႃၶမ်း ယႁေႃးသႃႉ၊ မိူင်း ဢိသရေး၊ ၼၼ်ႉတိုၵ်းတေႃးပႄႉၼႅင်ႇ ပိၼ်ႇႁႃႇတတ်ႉ၊ သၢမ်ပွၵ်ႈသေယဝ်ႉ၊ၶိုၼ်းသိမ်းဢဝ်ဝၢၼ်ႈဝဵင်းၵႃႈၼႂ်းမိုဝ်း ပိၼ်ႇႁႃႇတတ်ႉ၊ ၸိူဝ်းဢၼ်သုမ်းၸွမ်းၵႂႃႇၼႂ်းၸူဝ်ႈပၢၼ်ၸဝ်ႈပေႃႈမၼ်း ယႁေႃးၶတ်ႉ၊ ၼၼ်ႉဢေႃႈ။
ၼႂ်းပီဢၼ်ၶုၼ်ႁေႃၶမ်း ယႁေႃးသႃႉ၊ လုၵ်ႈၸၢႆး ယႁေႃးၶတ်ႉ၊ ၸၢမ်ႇႁၢင်ႈၸၢမ်ႇႁေႃမိူင်း ဢိသရေး၊ လႆႈသွင်ပီၼၼ်ႉ ဢႃႇမၸိ၊ လုၵ်ႈၸၢႆး ယေႃးသႃႉ၊ ပဵၼ်ၶုၼ်ႁေႃၶမ်းမိူင်း ယုတႃႉ၊ ဢေႃႈ။-
ဢသၢၵ်ႈမၼ်းလႆႈသၢဝ်းႁႃႈပီလႄႈဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရုသလႅမ်ႇ၊ သၢဝ်းၵဝ်ႈပီဢေႃႈ။ မႄႈၸဝ်ႈၸမ်ႉ၊ပဵၼ် ယေႇႁူဝ်းဢတ်ႉတၼ်ႇ၊ ၵူၼ်းယိင်းဝဵင်း ယေႇရုသလႅမ်ႇ၊ ဢေႃႈ။-
မၼ်းၵမ်ၵျၢင်ႉဢၼ်လီဢၼ်ငၢမ်းသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ဢေႃႈ။ ၵူၺ်းၵႃႈ၊မၼ်းဢမ်ႇပႆႇပဵၼ်မိူၼ်ပူႇမွၼ်ႇမၼ်း တႃႇဝိတ်ႈ၊ ၼၼ်ႉလႄႈ၊ယင်းႁဵတ်းၸွမ်းၵႃႈၼင်ႇဢၼ်ၸဝ်ႈပေႃႈမၼ်း ယေႃးသႃႉ၊ ၼၼ်ႉဢေႃႈ။-
မၼ်းဢမ်ႇယႃႉပႅတ်ႈထႃႇၼႃႉတီႈဝႆႈၽြႃးၶဝ်ၸိူဝ်းဢၼ်ဢမ်ႇယုမ်ႇမၢတ်ႈ ထႃႇဝရႃႉၽြႃး၊ ၸိူဝ်းၼၼ်ႉၵူၺ်းဢမ်ႇၵႃး၊ပိူၼ်ႈယင်းဢွၼ်ၵၼ်သၢၵ်ႈလူႇၶိူင်ႈတၢင်းလူႇလႂ်၊ဢိၵ်ႇတင်းၶိူင်ႈၼၢမ်ႇသႃႇၽဝ်ၽႆးလႂ်ၵႃႈတီႈၼၼ်ႈယူႇဢေႃႈ။
ဢႃႇမၸိ၊ ၼၼ်ႉမိူဝ်ႈဢၼ်ဢႃႇၼႃႇတၼ်းၶူဝ်းမၼ်းမၼ်ႈၶိူင်ႇတႄႇၼိမ်ယဝ်ႉၼၼ်ႉၸိုင်၊မၼ်းဢဝ်တၢႆပႅတ်ႈၶုၼ်ဢၼ်ပွင်ၵၢၼ်ၸိူဝ်းဢၼ်ဢဝ်ၸဝ်ႈပေႃႈမၼ်းတၢႆၼၼ်ႉဢေႃႈ။-
ၵူၺ်းၵႃႈ၊မၼ်းဢမ်ႇဢဝ်လုၵ်ႈလၢင်းၶဝ်တၢႆၸွမ်းၼင်ႇပိင်းၺၢပ်ႈတြႃး ထႃႇဝရႃႉၽြႃး၊ တႅမ်ႈဝႆႉၵႃႈၼႂ်းတြႃး မူဝ်းသေႇ၊ လႄႈဝႃႈ၊ “ပေႃႈမႄႈဢမ်ႇလႆႈၶၢမ်ႇတၢႆလူၺ်ႈဢမုဢၼ်လုၵ်ႈလၢင်းၶဝ်ႁဵတ်းၼၼ်ႉ၊ဢိၵ်ႇတင်းလုၵ်ႈလၢင်းဢမ်ႇလႆႈၶၢမ်ႇတၢႆလူၺ်ႈဢမုဢၼ်ပေႃႈမႄႈၶဝ်ႁဵတ်းၼၼ်ႉ။ ၵူၼ်းတၵ်းလႆႈၶၢမ်ႇတၢႆလူၺ်ႈဢမုဢၼ်တူဝ်ၸဝ်ႈၵဝ်ႇႁဵတ်းၼၼ်ႉၵူၺ်းဢေႃႈ၊” ဝႃႈၼင်ႇၼႆၼၼ်ႉဢေႃႈ။
ဢႃႇမၸိ၊ ၼၼ်ႉဢဝ်ၵူၼ်းမဵဝ်း ဢေႇတုမ်ႇ၊ တၢႆမိုၼ်ႇၼိုင်ႈၵႃႈၼႂ်း ထူင်ႉႁူၺ်ႈၵိူဝ်၊ ၼၼ်ႉလႄႈတိုၵ်းတေႃးသိမ်းဢဝ်ဝဵင်း ယေႃႇၵႃႉသေးလႃႉ၊ သေယဝ်ႉ၊ႁွင်ႉႁဵၵ်ႈဝဵင်းၼၼ်ႉဝႃႈ၊ ယွၵ်ႉထေႇလႃႉ၊ တေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
လိုၼ်းၼၼ်ႉ၊ ဢႃႇမၸိ၊ ပွႆႇၸႂ်ႉသၢၼ်ႇတမၢၼ်ႇၵႂႃႇၸူးတီႈၶုၼ်ႁေႃၶမ်း ယႁေႃးသႃႉ၊ မိူင်း ဢိသရေး၊ ၼၼ်ႉသင်ႇလၢတ်ႈၵႂႃႇလႄႈဝႃႈ၊ “မႃးတႃႉ။ ႁူပ်ႉထူပ်းၵၼ်ၼႃႈတေႃႇၼႃႈသေလႄႈတိုၵ်းတေႃးၵၼ်တႃႉႁဝ်း၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊ၶုၼ်ႁေႃၶမ်း ယႁေႃးသႃႉ၊ ၶိုၼ်းတွပ်ႇလၢတ်ႈၵႂႃႇလႄႈဝႃႈ၊ “မီးၽဝ်ႇၼိုင်ႈတူၼ်ႈၼၢမ် လေႇပၼုၼ်ႇ၊ ပွႆႇၸႂ်ႉသၢၼ်ႇတမၢၼ်ႇၵႂႃႇၸူးတီႈတူၼ်ႈ ဢႃႇရိတ်ႉလေႇပၼုၼ်ႇ၊ လႄႈဝႃႈ၊ ‘ဢဝ်လုၵ်ႈယိင်းမႂ်းႁႂ်ႈပဵၼ်မေးလုၵ်ႈၸၢႆးၵဝ်တႃႉ၊’ ဝႃႈၼႆဢေႃႈ။ တူဝ်ထိူၼ်ႇႁၢႆႉ လေႇပၼုၼ်ႇ၊ တူဝ်ၼိုင်ႈပႆတၢင်းၵႂႃႇလႄႈယဵပ်ႇယမ်ႈတူၼ်ႈၼၢမ်ၼၼ်ႉဢေႃႈ။-
ဢႃႇမၸိ၊ ႟။ မႂ်းတိုၵ်းတေႃးပႄႉၼႅင်ႇၵူၼ်းမဵဝ်း ဢေႇတုမ်ႇ၊ လႄႈမီးၸႂ်ဢၼ်ဢုပ်ႇဢၢတ်ႇပႅၼ်သုင်ၼႃႇယဝ်ႉ။ ႁႂ်ႈမီးတၢင်းဢၼ်တဵမ်ၸႂ်လူၺ်ႈတၢင်းဢၼ်မႂ်းၸိုဝ်ႈသဵင်ႁူင်ႁၢင်းၼၼ်ႉလႄႈယူႇၼိမ်ၼိမ်ၵႃႈတီႈၼႂ်းႁိူၼ်းမႂ်းယူႇတႃႉ။ ၵွပ်ႈသင်လႄႈမႂ်းတိုၵ်းယူင်းႁႂ်ႈၽေးတုၵ်ႉၶႃႉႁွတ်ႈထိုင်ၵႃႈၼိူဝ်မႂ်းပႃးလူၺ်ႈၵၼ်တင်းၵူၼ်းမိူင်း ယုတႃႉ၊ ၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ ဢႃႇမၸိ၊ ဢမ်ႇထွမ်ႇဢဝ်ၵႂၢမ်းၼၼ်ႉလႄႈ၊ၶုၼ်ႁေႃၶမ်း ယႁေႃးသႃႉ၊ မိူင်း ဢိသရေး၊ ၶီႇသိုၵ်းၶိုၼ်ႈၵႂႃႇတိုၵ်းတေႃးၶုၼ်ႁေႃၶမ်း ဢႃႇမၸိ၊ မိူင်း ယုတႃႉ၊ လႄႈၶဝ်ႁူပ်ႉထူပ်းၼႃႈတေႃႇၼႃႈၵၼ်ၵႃႈတီႈပၢင်ႇပဵင်း ပႅတ်ႉသေးမိတ်ႉ၊ မိူင်း ယုတႃႉ၊ ဢေႃႈ။-
ၵူၼ်းမိူင်း ယုတႃႉ၊ တူၵ်းသုမ်းၵူၼ်းမိူင်း ဢိသရေး၊ လႄႈဢွၼ်ၵၼ်ဢွၵ်ႇပၢႆႈၵႂႃႇၸူးတီႈႁိူၼ်းၶဝ်ႁင်းၽႂ်ႁင်းမၼ်းဢေႃႈ။-
ယႁေႃးသႃႉ၊ တိလႆႈ ဢႃႇၶၸိ သေယဝ်ႉ၊ၶိုၼ်ႈၸူးတီႈဝဵင်း ယေႇရုသလႅမ်ႇ၊ လႄႈၵိူၼ်ႇယႃႉလမ်းဝဵင်းပႅတ်ႈသီႇပၢၵ်ႇသွၵ်ႇ၊တႄႇၸႃႉဢဝ်ၵႃႈတီႈ ၽၵ်းတူဢေႇၽရိမ်ႇ၊ တေႃႇထိုင်ႁွတ်ႈ ၽၵ်းတူၸဵင်ႇ၊ ဢေႃႈ။-
မၼ်းသမ်ႉဢဝ်ၶူဝ်းငိုၼ်းၶူဝ်းၶမ်းဢိၵ်ႇတင်းၶိူင်ႈပိူင်ၵႃႈဢၼ်မၼ်းထူပ်းႁၼ်ၵႃႈၼႂ်းၵျွင်းပိၵ်ႈမၢၼ်ႇၸဝ်ႈ ထႃႇဝရႃႉၽြႃး၊ တင်းၵႃႈၼႂ်းၽၼ်ႇတႃႇႁေႃၸဝ်ႈဢေႃႈ။ ၵူၼ်းႁေႃၵူၼ်းႁိူၼ်းၸိူဝ်းၼၼ်ႉၵေႃႈမၼ်းဢဝ်သေယဝ်ႉ၊ၶိုၼ်းမိူဝ်းၵႂႃႇၵႃႈတီႈဝဵင်း သမႃႇရိ၊ ဢေႃႈ။
လွင်ႈတၢင်းၵႃႈဢၼ် ယႁေႃးသႃႉ၊ ႁဵတ်းၵူႈၸိူဝ်ႉၵူႈပိူင်၊လွင်ႈတၢင်းဢၼ်တၼ်းၶူဝ်းမၼ်းယႂ်ႇ၊တင်းလွင်ႈတၢင်းဢၼ်မၼ်းတိုၵ်းသိုၵ်းၵၼ်တင်းၶုၼ်ႁေႃၶမ်း ဢႃႇမၸိ၊ မိူင်း ယုတႃႉ၊ ၸိူဝ်းၼၼ်ႉတႅမ်ႈမၢႆဝႆႉၵႃႈၼႂ်း ပိုၼ်းၶုၼ်ႁေႃၶမ်းမိူင်းဢိသရေး၊ ဢေႃႈ။-
ယႁေႃးသႃႉ၊ ၼွၼ်းၽႄးယဝ်ႉလႄႈဢဝ်သၢင်းၵျူဝ်ႇဝႆႉၵႃႈတီႈပႃႇႁဵဝ်ႈၸဝ်ႈၼႂ်းဝဵင်း သမႃႇရိ၊ သေယဝ်ႉ၊လုၵ်ႈၸၢႆးမၼ်း ယေႇရူဝ်းပုမ်ႇၵေႃႉထူၼ်ႈသွင်၊ ၼၼ်ႉသိုပ်ႇၼင်ႈႁၢင်ႈၼင်ႈႁေႃဢေႃႈ။
လိုၼ်းသေၶုၼ်ႁေႃၶမ်း ယႁေႃးသႃႉ၊ မိူင်း ဢိသရေး၊ တၢႆယဝ်ႉၼၼ်ႉၶုၼ်ႁေႃၶမ်း ဢႃႇမၸိ၊ မိူင်း ယုတႃႉ၊ ၼၼ်ႉဢသၢၵ်ႈလိပ်းယူႇသိပ်းႁႃႈပီလူးၵွၼ်ႇဢေႃႈ။-
လွင်ႈတၢင်းၵႃႈဢၼ်ၶုၼ်ႁေႃၶမ်း ဢႃႇမၸိ၊ ႁဵတ်းၵူႈၸိူဝ်ႉၵူႈပိူင်ၸိူဝ်းၼၼ်ႉတႅမ်ႈမၢႆဝႆႉၵႃႈၼႂ်း ပိုၼ်းၶုၼ်ႁေႃၶမ်းမိူင်းယုတႃႉ၊ ဢေႃႈ။
ၵွပ်ႈပိူဝ်ႈမီးတၢင်းဢၼ်လွမ်လုၵ်ႉၽိုၼ်ႉၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉလႄႈ ဢႃႇမၸိ၊ ဢွၵ်ႇပၢႆႈၵႂႃႇၸူးတီႈဝဵင်း လႃႇၶိသႃႉ၊ သေဢေႃႈ။ ၵူၺ်းၵႃႈ၊ရၢၼ်ႇသူႇမၼ်းၸိူဝ်းၼၼ်ႉၸွမ်းၵႂႃႇဢဝ်မၼ်းတၢႆၵႃႈတီႈဝဵင်းၼၼ်ႉဢေႃႈ။-
ၶဝ်ဢဝ်တူဝ်တၢႆမၼ်းတၢင်ႇၵႃႈၼိူဝ်မႃႉသေယဝ်ႉ၊မႃးၵႃႈတီႈဝဵင်း ယေႇရုသလႅမ်ႇ၊ သေလႄႈဢဝ်သၢင်းၵျူဝ်ႇဝႆႉၵႃႈၼႂ်းပႃႇႁဵဝ်ႈၸဝ်ႈၼႂ်းဝဵင်း တႃႇဝိတ်ႈ၊ ၼၼ်ႉသေဢေႃႈ။-
ၵူၼ်းဝၢၼ်ႈၵူၼ်းမိူင်း ယုတႃႉ၊ တင်းသဵင်ႈတင်းလူင်ဢွၼ်ၵၼ်တိုဝ်းသရၽူႇပၼ်တီႈလုၵ်ႈၸၢႆးမၼ်း ဢႃႇၸရိ၊ ဢၼ်ဢသၢၵ်ႈလႆႈသိပ်းႁူၵ်းပီၼၼ်ႉႁဵတ်းၶုၼ်ႁေႃၶမ်းဢေႃႈ။-
ဢႃႇၸရိ၊ ၼၼ်ႉၶိုၼ်းတိုၵ်းဢဝ်လႄႈမႄးတႄႇမႄးတင်ႈဝဵင်း ဢေးလတ်ႉ၊ လိုၼ်းသေၸဝ်ႈပေႃႈမၼ်းတၢႆယဝ်ႉၼၼ်ႉဢေႃႈ။
ၼႂ်းပီဢၼ်ၶုၼ်ႁေႃၶမ်း ဢႃႇမၸိ၊ လုၵ်ႈၸၢႆး ယေႃးသႃႉ၊ ၶုၼ်ႁေႃၶမ်း ယုတႃႉ၊ ၸၢမ်ႇႁၢင်ႈၸၢမ်ႇႁေႃလႆႈသိပ်းႁႃႈပီၼၼ်ႉ ယေႇရူဝ်းပုမ်ႇ၊ လုၵ်ႈၸၢႆး ယႁေႃးသႃႉ၊ ၼၼ်ႉပဵၼ်ၶုၼ်ႁေႃၶမ်းမိူင်း ဢိသရေး၊ မႃးသေယဝ်ႉ၊ဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း သမႃႇရိ၊ သီႇသိပ်းဢဵတ်းပီဢေႃႈ။-
မၼ်းႁဵတ်းတုၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ၸပ်းၸွမ်းတၢင်းဢၼ်ႁၢႆႉဢၼ်မိူၵ်ႈပူႇမွၼ်ႇမၼ်းၶုၼ်ႁေႃၶမ်း ယေႇရူဝ်းပုမ်ႇ၊ လုၵ်ႈၸၢႆး ၼေႇပတ်ႉ၊ ဢၼ်ဢွၼ်ႁဵတ်းႁႂ်ႈၵူၼ်းမဵဝ်း ဢိသရေး၊ ၽိတ်းပိူင်ႈၼၼ်ႉဢေႃႈ။-
မၼ်းၶိုၼ်းတိုၵ်းလႆႈၶွပ်ႇၼမ်ႉလႅၼ်လိၼ်မိူင်း ဢိသရေး၊ ဢဝ်ၵႃႈတီႈပၢၵ်ႇတၢင်းဢၼ်ၶဝ်ႈၸူးဝဵင်း ႁႃႇမတ်ႉ၊ ၽၢႆႇတၢင်းႁွင်ႇၵႂႃႇတေႃႇထိုင်ႁွတ်ႈ ပၢင်ႇလၢႆႇတၢႆ၊ ၽၢႆႇတၢင်းၸၢၼ်းၼၼ်ႉဢေႃႈ။ လွင်ႈတၢင်းၼႆႉၸိုင်၊ပဵၼ်ၸွမ်းၵႃႈၼင်ႇဢၼ်ပျႃႇတိၵ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ဢၼ်ဢဝ်တင်းၶႃႈမၼ်းၸဝ်ႈပရေႃးၽႅတ်ႈ ယူဝ်းၼႃႉ၊ လုၵ်ႈၸၢႆး ဢမိတ်ႉတေႇ၊ ၵူၼ်းဝဵင်း ၵႃႇသႃႉႁေႇပႃႇ၊ မီးဢမိင်ႉဝႆႉၼၼ်ႉဢေႃႈ။
လွင်ႈမၼ်းၸမ်ႉ၊ ထႃႇဝရႃႉၽြႃး၊ ႁၼ်လွင်ႈတၢင်းဢၼ်ၵူၼ်းမဵဝ်း ဢိသရေး၊ တင်းလၢႆလႆႈၶၢမ်ႇတုၵ်ႉၶႃႉတၢင်းၽၢၼ်ၼၵ်းၼႃႇလူင်လၢင်၊သမ်ႉဢမ်ႇမီးၵေႃႉဢၼ်တၵ်းၸွႆႈထႅမ်ၶဝ်သေၵေႃႉသေၵူၼ်းၼၼ်ႉဢေႃႈ။-
ထႃႇဝရႃႉၽြႃး၊ ဢမ်ႇမီးဢလူဝ်ႇႁႂ်ႈလႆႈယႃႉၽဵဝ်ႈပႅတ်ႈၵူၼ်းမဵဝ်း ဢိသရေး၊ လုမ်းလုမ်း၊ဢမ်ႇႁႂ်ႈလႆႈလပ်ႉႁၢႆၵႂႃႇတႃႇသေႇၼၼ်ႉလႄႈ၊ၸင်ႇဢဝ်ၶုၼ်ႁေႃၶမ်း ယေႇရူဝ်းပုမ်ႇပႃးထူၼ်ႈသွင်၊ ၼႆႉၵႄႇၼုၵ်ႈဢဝ်ၶဝ်ဢေႃႈ။
လွင်ႈတၢင်းၵႃႈဢၼ် ယေႇရူဝ်းပုမ်ႇပႃးထူၼ်ႈသွင်၊ ႁဵတ်းလွင်ႈတၢင်းဢၼ်တၼ်းၶူဝ်းမၼ်းယႂ်ႇ၊လွင်ႈတၢင်းဢၼ်မၼ်းတိုၵ်းသိုၵ်း၊ဢိၵ်ႇတင်းလွင်ႈတၢင်းဢၼ်မၼ်းၶိုၼ်းလႆႈဝဵင်း တမ်ႇမတ်ႉသၵတ်ႉ၊ တင်းဝဵင်း ႁႃႇမတ်ႉ၊ ဢၼ်တူၵ်းၶဝ်ႈၼႂ်းမိူင်း ယုတႃႉ၊ ၵႂႃႇမိူဝ်ႈဢွၼ်တၢင်းၼၼ်ႉပုၼ်ႈၵူၼ်းမဵဝ်း ဢိသရေး၊ ၸိူဝ်းၼၼ်ႉတႅမ်ႈမၢႆဝႆႉၵႃႈၼႂ်း ပိုၼ်းၶုၼ်ႁေႃၶမ်းမိူင်းဢိသရေး၊ ဢေႃႈ။-
ယေႇရူဝ်းပုမ်ႇ၊ ၼွၼ်းၽႄးယဝ်ႉလႄႈလႆႈဢဝ်သၢင်းၵျူဝ်ႇဝႆႉၵႃႈတီႈပႃႇႁဵဝ်ႈၸဝ်ႈသေလႄႈ၊လုၵ်ႈၸၢႆးမၼ်း ၸႃႇၶရိ၊ သိုပ်ႇၼင်ႈႁၢင်ႈၼင်ႈႁေႃဢေႃႈ။
ၼႂ်းပီဢၼ်ၶုၼ်ႁေႃၶမ်း ယေႇရူဝ်းပုမ်ႇ ပႃးထူၼ်ႈသွင်၊မိူင်း ဢိသရေး၊ ၸၢမ်ႇႁၢင်ႈၸၢမ်ႇႁေႃလႆႈသၢဝ်းၸဵတ်းပီၼၼ်ႉ ဢႃႇၸရိ၊ လုၵ်ႈၸၢႆး ဢႃႇမၸိ၊ ၼၼ်ႉၸႃႉတေၼင်ႈႁၢင်ႈၼင်ႈႁေႃယဝ်ႉဢေႃႈ။-
ၼႂ်းမိူဝ်ႈဢၼ်ဢသၢၵ်ႈမၼ်းလႆႈသိပ်းႁူၵ်းပီၼၼ်ႉ၊မၼ်းဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရုသလႅမ်ႇ၊ ႁႃႈသိပ်းသွင်ပီဢေႃႈ။ မႄႈၸဝ်ႈၸမ်ႉ၊ပဵၼ် ယေႇၶေႃးလိ၊ ၵူၼ်းဝဵင်း ယေႇရုသလႅမ်ႇ၊ ဢေႃႈ။-
မၼ်းၵမ်ၵျၢင်ႉဢၼ်လီဢၼ်ငၢမ်းသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ၸွမ်းၸိူဝ်ႉၼင်ႇၸဝ်ႈပေႃႈမၼ်း ဢႃႇမၸိ၊ ၼၼ်ႉဢေႃႈ။-
ၼႂ်းဝႃႈၼၼ်သေၵေႃႈမၼ်းဢမ်ႇယႃႉၽဵဝ်ႈပႅတ်ႈထႃႇၼႃႉတီႈဝႆႈၽြႃးၶဝ်ၸိူဝ်းဢၼ်ဢမ်ႇယုမ်ႇမၢတ်ႈ ထႃႇဝရႃႉၽြႃး၊ ၼၼ်ႉၸိူဝ်းၼၼ်ႉလႄႈၵူၼ်းၸိူဝ်းၼၼ်ႉယင်းဢွၼ်ၵၼ်သၢၵ်ႈလူႇၶိူင်ႈတၢင်းလူႇလႂ်၊ဢိၵ်ႇတင်းၶိူင်ႈၼၢမ်ႇသႃႇၽဝ်ၽႆးလႂ်၊ယူႇဢေႃႈ။-
ထႃႇဝရႃႉၽြႃး၊ ပၼ်တၢမ်ႇတီႈ ဢႃႇၸရိ၊ လႄႈမၼ်းပဵၼ်တုတ်ႈ ယူႇတေႃႇထိုင်ႁွတ်ႈမၼ်းထၢၼ်ႈပေႃးတၢႆဢေႃႈ။ မၼ်းလႆႈယူႇၼႂ်းႁေႃလင်ၼိုင်ႈၶေႃၶေႃၵူၺ်းမၼ်းလႄႈပႄႇပႅတ်ႈၵိုတ်းပႅတ်ႈၼႃႈၵၢၼ်တင်းလၢႆယူႇ၊ၼႂ်းမိူဝ်ႈဢၼ်လုၵ်ႈၸၢႆးမၼ်း ယူဝ်းထမ်ႇ၊ ဢုပ်ႉပိူင်ႇၸီႇယၢင်ႇၶႃႈဝၢၼ်ႈၵူၼ်းမိူင်းယူႇၼၼ်ႉဢေႃႈ။
လွင်ႈတၢင်းၵႃႈဢၼ် ဢႃႇၸရိ၊ ႁဵတ်းၵူႈၸိူဝ်ႉၵူႈပိူင်ၸိူဝ်းၼၼ်ႉတႅမ်ႈမၢႆဝႆႉၵႃႈၼႂ်းပိုၼ်း လိၵ်ႈပိုၼ်းၶုၼ်ႁေႃၶမ်းမိူင်းယုတႃႉ၊ ဢေႃႈ။-
ဢႃႇၸရိ၊ ၼွၼ်းၽႄးယဝ်ႉလႄႈဢဝ်သၢင်းၵျူဝ်ႇဝႆႉၵႃႈတီႈပႃႇႁဵဝ်ႈၸဝ်ႈၼႂ်းဝဵင်း တႃႇဝိတ်ႈ၊ သေယဝ်ႉ၊လုၵ်ႈၸၢႆးမၼ်း ယူဝ်းထမ်ႇ၊ သိုပ်ႇၼင်ႈႁၢင်ႈၼင်ႈႁေႃဢေႃႈ။
ၼႂ်းပီဢၼ်ၶုၼ်ႁေႃၶမ်း ဢႃႇၸရိ၊ မိူင်း ယုတႃႉ၊ ၸၢမ်ႇႁၢင်ႈၸၢမ်ႇႁေႃလႆႈသၢမ်သိပ်းပႅတ်ႇပီၼၼ်ႉ ၸႃႇၶရိ၊ လုၵ်ႈၸၢႆး ယေႇရူဝ်းပုမ်ႇပႃးထူၼ်ႈသွင်၊ ပဵၼ်ၶုၼ်ႁေႃၶမ်းမိူင်း ဢိသရေး၊ မႃးသေယဝ်ႉ၊ဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း သမႃႇရိ၊ ႁူၵ်းလိူၼ်ဢေႃႈ။-
မၼ်းႁဵတ်းတုၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ မိူၼ်ၸိူဝ်ႉၼင်ႇပူႇမွၼ်ႇမၼ်းတင်းလၢႆလႄႈၸွမ်းတၢင်းဢၼ်ႁၢႆႉဢၼ်မိူၵ်ႈၶုၼ်ႁေႃၶမ်း ယေႇရူဝ်းပုမ်ႇ၊ လုၵ်ႈၸၢႆး ၼေႇပတ်ႉ၊ ဢၼ်ဢွၼ်ႁဵတ်းႁႂ်ႈၵူၼ်းမဵဝ်း ဢိသရေး၊ ၽိတ်းပိူင်ႈၼၼ်ႉဢေႃႈ။-
သႃႇလုမ်ႇ၊ လုၵ်ႈၸၢႆး ယႃႇပႅတ်ႉ၊ ၼၼ်ႉလၵ်ႉလွမ်လုၵ်ႉၽိုၼ်ႉ ၸႃႇၶရိ၊ သေလႄႈဢဝ်မၼ်းတၢႆၽၢႆႇၼႃႈၵူၼ်းတင်းလၢႆသေယဝ်ႉ၊သိုပ်ႇၼင်ႈႁၢင်ႈၼင်ႈႁေႃဢေႃႈ။
လွင်ႈတၢင်းဢၼ် ၸႃႇၶရိ၊ ႁဵတ်းၵူႈၸိူဝ်ႉၵူႈပိူင်ၸိူဝ်းၼၼ်ႉတႅမ်ႈမၢႆဝႆႉၵႃႈၼႂ်း ပိုၼ်းၶုၼ်ႁေႃၶမ်းမိူင်းဢိသရေး၊ ဢေႃႈ။
ၼင်ႇၼၼ်လႄႈၵတိ ထႃႇဝရႃႉၽြႃး၊ ဢၼ်ဝႆႉၵႃႈတီႈၶုၼ်ႁေႃၶမ်း ယေႇႁု၊ လႄႈဝႃႈ၊ “ၵဝ်တၵ်းႁႂ်ႈၸူဝ်ႈလုၵ်ႈပၢၼ်လၢၼ်မႂ်းၼင်ႈႁၢင်ႈၼင်ႈႁေႃမိူင်း ဢိသရေး၊ တေႃႇထိုင်ႁွတ်ႈသီႇသိုပ်ႇဢေႃႈ၊” ဝႃႈၼင်ႇၼႆၼၼ်ႉပျေႉၸုမ်ႇယဝ်ႉဢေႃႈ။
ၼႂ်းပီဢၼ်ၶုၼ်ႁေႃၶမ်း ဢႃႇၸရိ၊ မိူင်း ယုတႃႉ၊ ၸၢမ်ႇႁၢင်ႈၸၢမ်ႇႁေႃလႆႈသၢမ်သိပ်းၵဝ်ႈပီၼၼ်ႉ၊ သႃႇလုမ်ႇ၊ လုၵ်ႈၸၢႆး ယႃႇပႅတ်ႉ၊ ပဵၼ်ၶုၼ်ႁေႃၶမ်းမိူင်း ဢိသရေး၊ မႃးလႄႈဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း သမႃႇရိ၊ လိူၼ်ၼိုင်ႈဢေႃႈ။
မေႇၼႁိမ်ႇ၊ လုၵ်ႈၸၢႆး ၵႃႇတိ၊ ၼၼ်ႉလုၵ်ႉသေၵႃႈတီႈဝဵင်း တိရၸႃႉ၊ ၶိုၼ်ႈမႃးၵႃႈတီႈဝဵင်း သမႃႇရိ၊ သေယဝ်ႉ၊ဢဝ် သႃႇလုမ်ႇ၊ တၢႆလႄႈပုတ်ႈဢဝ်ဢရႃႇၶုၼ်ႁေႃၶမ်းၼင်ႈႁၢင်ႈၼင်ႈႁေႃဢေႃႈ။-
လွင်ႈတၢင်းၵႃႈဢၼ် သႃႇလုမ်ႇ၊ ႁဵတ်းဢိၵ်ႇတင်းၵႃႈဢၼ်မၼ်းလုၵ်ႉၽိုၼ်ႉၶုၼ်ၼၼ်ႉၸိူဝ်းၼၼ်ႉတႅမ်ႈမၢႆဝႆႉၵႃႈၼႂ်း လိၵ်ႈပိုၼ်းၶုၼ်ႁေႃၶမ်းမိူင်းဢိသရေး၊ ဢေႃႈ။-
ၼႂ်းမိူဝ်ႈဢၼ် မေႇၼႁိမ်ႇ၊ ဢွၵ်ႇသေၵႃႈတီႈဝဵင်း တိရၸႃႉ၊ ၵႂႃႇၼၼ်ႉၸိုင်၊မၼ်းတိုၵ်းတေႃးယႃႉၽဵဝ်ႈဝဵင်း တိၽသႃႉ၊ ဢိၵ်ႇတင်းၵူၼ်းဝဵင်းမၼ်းတင်းဢိူင်ႇမၼ်းပႅတ်ႈၵွပ်ႈပိူဝ်ႈဢၼ်ၶဝ်ဢမ်ႇၽုၺ်ႇၽၵ်းတူဝဵင်းပၼ်မၼ်းၼၼ်ႉဢေႃႈ။ မၼ်းယင်းၽႃႇတွင်ႉမႄႈယိင်းဢၼ်ပႃးတွင်ႉၸိူဝ်းၼၼ်ႉပႅတ်ႈတင်းသဵင်ႈတင်းမူတ်းလူးၵွၼ်ႇဢေႃႈ။
ၼႂ်းပီဢၼ်ၶုၼ်ႁေႃၶမ်း ဢႃႇၸရိ၊ မိူင်း ယုတႃႉ၊ ၸၢမ်ႇႁၢင်ႈၸၢမ်ႇႁေႃလႆႈသၢမ်သိပ်းၵဝ်ႈပီၼၼ်ႉ မေႇၼႁိမ်ႇ၊ လုၵ်ႈၸၢႆး ၵႃႇတိ၊ ပဵၼ်ၶုၼ်ႁေႃၶမ်းမိူင်း ဢိသရေး၊ မႃးလႄႈဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း သမႃႇရိ၊ သိပ်းပီဢေႃႈ။-
မၼ်းႁဵတ်းတုၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ လႄႈၸွမ်းတၢင်းဢၼ်ႁၢႆႉဢၼ်မိူၵ်ႈၶုၼ်ႁေႃၶမ်း ယေႇရူဝ်းပုမ်ႇ၊ လုၵ်ႈၸၢႆး ၼေႇပတ်ႉ၊ ဢၼ်ဢွၼ်ႁဵတ်းႁႂ်ႈၵူၼ်းမဵဝ်း ဢိသရေး၊ ၶဝ်ၽိတ်းပိူင်ႈၼၼ်ႉတေႃႇထိုင်ႁွတ်ႈမၼ်းထၢၼ်ႈပေႃးတၢႆဢေႃႈ။-
ပုလႃႉ၊ ၶုၼ်ႁေႃၶမ်း ဢႃႇသီးရီးယႃး၊ မႃးတိုၵ်းတေႃးမိူင်း ဢိသရေး၊ လႄႈ မေႇၼႁိမ်ႇ၊ ၼၼ်ႉဢဝ်ငိုၼ်းတလၢၼ်ႇတၢၼ်ႇႁဵင်ၼိုင်ႈ ပၼ်တီႈ ပုလႃႉ၊ ပုၼ်ႈဢၼ်ဢႃႇၼႃႇမၼ်းလႆႈတႄႇယူႇၼၼ်ႉဢေႃႈ။-
မေႇၼႁိမ်ႇ၊ ၽႃႇၵဵပ်းဢဝ်ငိုၼ်းတီႈၵူၼ်းမဵဝ်း ဢိသရေး၊ တင်းလၢႆလႄႈၵူၼ်းမၢၵ်ႈၵူၼ်းမီးယေႈၵေႃႉလႆႈထၢမ်းပၼ်ႁႃႈသိပ်းသၶေးလႃႉ ဢေႃႈ။ ၶုၼ်ႁေႃၶမ်း ဢႃႇသီးရီးယႃး၊ ၼၼ်ႉၶိုၼ်းမိူဝ်းၵႂႃႇၵႃႈတီႈမိူင်းတူဝ်ၸဝ်ႈၵဝ်ႇသေဢေႃႈ။
လွင်ႈတၢင်းၵႃႈဢၼ် မေႇၼႁိမ်ႇ၊ ႁဵတ်းၵူႈၸိူဝ်ႉၵူႈပိူင်ၸိူဝ်းၼၼ်ႉတႅမ်ႈမၢႆဝႆႉၵႃႈၼႂ်း ပိုၼ်းၶုၼ်ႁေႃၶမ်းမိူင်းဢိသရေး၊ ဢေႃႈ။-
မေႇၼႁိမ်ႇ၊ ၼွၼ်းၽႄးယဝ်ႉလႄႈဢဝ်သၢင်းၵျူဝ်ႇဝႆႉသေယဝ်ႉ၊လုၵ်ႈၸၢႆးမၼ်း ပေႇၵႁိ၊ သိုပ်ႇၼင်ႈႁၢင်ႈၼင်ႈႁေႃဢေႃႈ။
ၼႂ်းပီဢၼ်ၶုၼ်ႁေႃၶမ်း ဢႃႇၸရိ၊ မိူင်း ယုတႃႉ၊ ၸၢမ်ႇႁၢင်ႈၸၢမ်ႇႁေႃလႆႈႁႃႈသိပ်းပီၼၼ်ႉ ပေႇၵႁိ၊ လုၵ်ႈၸၢႆး မေႇၼႁိမ်ႇ၊ ပဵၼ်ၶုၼ်ႁေႃၶမ်းမိူင်း ဢိသရေး၊ မႃးလႄႈဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း သမႃႇရိ၊ သွင်ပီဢေႃႈ။-
မၼ်းႁဵတ်းတုၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ လႄႈၸွမ်းတၢင်းဢၼ်ႁၢႆႉဢၼ်မိူၵ်ႈၶုၼ်ႁေႃၶမ်း ယေႇရူဝ်းပုမ်ႇ၊ လုၵ်ႈၸၢႆး ၼေႇပတ်ႉ၊ ဢၼ်ဢွၼ်ႁဵတ်းႁႂ်ႈၵူၼ်းမဵဝ်း ဢိသရေး၊ ၶဝ်ၽိတ်းပိူင်ႈၼၼ်ႉဢေႃႈ။-
ၼႂ်းၶုၼ်ဢၼ်ပွင်ၵၢၼ်မၼ်းၸိူဝ်းၼၼ်ႉၵေႃႉၼိုင်ႈဢၼ်ပဵၼ် ပေႇၵႃႇ၊ လုၵ်ႈၸၢႆး ရေႇမလိ၊ လုၵ်ႉၽိုၼ်ႉမၼ်းသေလႄႈ၊ဢွၼ်ဢဝ်ၵူၼ်းမိူင်း ၵိလတ်ႉ၊ ႁႃႈသိပ်းၵေႃႉမႃးဢဝ်တၢႆပႅတ်ႈမၼ်း၊ဢိၵ်ႇတင်း ဢႃႇၵေႃႇၽႃႉ၊ တင်း ဢရေႇၽႃႉ၊ ၵႃႈၼႂ်းတပ်ႉႁေႃၸဝ်ႈၵႃႈတီႈဝဵင်း သမႃႇရိ၊ သေယဝ်ႉ၊ပုတ်ႈဢဝ်ဢရႃႇၶုၼ်ႁေႃၶမ်း၊ၼင်ႈႁၢင်ႈၼင်ႈႁေႃသေဢေႃႈ။
လွင်ႈတၢင်းဢၼ် ပေႇၵႁိ၊ ႁဵတ်းၵူႈၸိူဝ်ႉၵူႈပိူင်ၸိူဝ်းၼၼ်ႉတႅမ်ႈမၢႆဝႆႉၵႃႈၼႂ်း လိၵ်ႈပိုၼ်းၶုၼ်ႁေႃၶမ်းမိူင်းဢိသရေး၊ ဢေႃႈ။
ၼႂ်းပီဢၼ်ၶုၼ်ႁေႃၶမ်း ဢႃႇၸရိ၊ ၸၢမ်ႇႁၢင်ႈၸၢမ်ႇႁေႃမိူင်း ယုတႃႉ၊ ႁႃႈသိပ်းသွင်ပီၼၼ်ႉ ပေႇၵႃႇ၊ လုၵ်ႈၸၢႆး ရေႇမလိ၊ ပဵၼ်ၶုၼ်ႁေႃၶမ်းမိူင်း ဢိသရေး၊ မႃးလႄႈဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း သမႃႇရိ၊ သၢဝ်းပီဢေႃႈ။-
မၼ်းႁဵတ်းတုၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ လႄႈၸွမ်းတၢင်းဢၼ်ႁၢႆႉဢၼ်မိူၵ်ႈၶုၼ်ႁေႃၶမ်း ယေႇရူဝ်းပုမ်ႇ၊ လုၵ်ႈၸၢႆး ၼေႇပတ်ႉ၊ ဢၼ်ဢွၼ်ႁဵတ်းႁႂ်ႈၵူၼ်းမဵဝ်း ဢိသရေး၊ ၽိတ်းပိူင်ႈၼၼ်ႉဢေႃႈ။
ၼႂ်းၸူဝ်ႈပၢၼ် ပေႇၵႃႇ၊ ပဵၼ်ၶုၼ်ႁေႃၶမ်းၵူၼ်းမဵဝ်း ဢိသရေး၊ ၶဝ်ၼၼ်ႉ ထိၵလတ်ႉပိလေႇသႃႇ၊ ၶုၼ်ႁေႃၶမ်း ဢႃႇသီးရီးယႃး၊ မႃးတိုၵ်းဢဝ်ဝဵင်း ဢိယုၼ်ႇ၊ ဝဵင်း ဢႃႇပေႇလႃႉပႅတ်ႉမႃႇၶႃႉ၊ ဝဵင်း ယႃႇၼေႃႇ၊ ဝဵင်း ၵေႇတေးသႃႉ၊ ဝဵင်း ႁႃႇၸေႃႇ၊ ဢိၵ်ႇတင်းမိူင်း ၵိလတ်ႉ၊ မိူင်း ၵႃႇလိလႄး၊ မိူင်း ၼပ်ႉထလိ၊ ၸိူဝ်းၼၼ်ႉလႄႈသိမ်းဢဝ်ၵူၼ်းၶဝ်ၵႂႃႇဝႆႉၵႃႈတီႈမိူင်း ဢႃႇသီးရီးယႃး၊ ဢေႃႈ။
ၼႂ်းပီဢၼ် ယူဝ်းထမ်ႇ၊ လုၵ်ႈၸၢႆး ဢူဝ်းၸိယႃႉ၊ မိူင်း ယုတႃႉ၊ ၸၢမ်ႇႁၢင်ႈၸၢမ်ႇႁေႃလႆႈသၢဝ်းပီၼၼ်ႉ ႁူဝ်းသေႇ၊ လုၵ်ႈၸၢႆး ဢေးလႃႇ၊ ၼၼ်ႉလွမ်လုၵ်ႉၽိုၼ်ႉၶုၼ်ႁေႃၶမ်း ပေႇၵႃႇ၊ လႄႈဢဝ်မၼ်းတၢႆသေယဝ်ႉ၊သိုပ်ႇၼင်ႈႁၢင်ႈၼင်ႈႁေႃဢေႃႈ။-
လွင်ႈတၢင်းၵႃႈဢၼ် ပေႇၵႃႇ၊ ႁဵတ်းၵူႈၸိူဝ်ႉၵူႈပိူင်ၸိူဝ်းၼၼ်ႉတႅမ်ႈမၢႆဝႆႉၵႃႈၼႂ်း လိၵ်ႈပိုၼ်းၶုၼ်ႁေႃၶမ်းမိူင်းဢိသရေး၊ ဢေႃႈ။
ၼႂ်းပီဢၼ် ပေႇၵႃႇ၊ လုၵ်ႈၸၢႆး ရေႇမလိ၊ မိူင်း ဢိသရေး၊ ၸၢမ်ႇႁၢင်ႈၸၢမ်ႇႁေႃသွင်ပီၼၼ်ႉ၊ ယူဝ်းထမ်ႇ၊ လုၵ်ႈၸၢႆး ဢူဝ်းၸိယႃႉ၊ ပဵၼ်ၶုၼ်ႁေႃၶမ်းမိူင်း ယုတႃႉ၊ မႃး၊-
ၼႂ်းမိူဝ်ႈဢၼ်ဢသၢၵ်ႈမၼ်းလႆႈသၢဝ်းႁႃႈပီၼၼ်ႉမၼ်းလႆႈဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရုသလႅမ်ႇ၊ သိပ်းႁူၵ်းပီဢေႃႈ။ မႄႈၸဝ်ႈၸမ်ႉ၊ပဵၼ် ယေႇရုသႃႇ၊ လုၵ်ႈယိင်း ၸႃႇတုၵ်ႉ၊ ဢေႃႈ။-
မၼ်းၵမ်ၵျၢင်ႉဢၼ်လီဢၼ်ငၢမ်းသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ၸွမ်းတၢင်းဢၼ်ၸဝ်ႈပေႃႈမၼ်း ဢူဝ်းၸိယႃႉ၊ ႁဵတ်းၼၼ်ႉဢေႃႈ။-
ၵူၺ်းၵႃႈ၊မၼ်းယင်းဢမ်ႇယႃႉပႅတ်ႈထႃႇၼႃႉတီႈဝႆႈၽြႃးၶဝ်ၸိူဝ်းဢၼ်ဢမ်ႇယုမ်ႇမၢတ်ႈ ထႃႇဝရႃႉၽြႃး၊ ၼၼ်ႉလႄႈၵူၼ်းၸိူဝ်းၼၼ်ႉယင်းဢွၼ်ၵၼ်သၢၵ်ႈလူႇၶိူင်ႈတၢင်းလူႇလႂ်၊တင်းၶိူင်ႈၼၢမ်ႇသႃႇၽဝ်ၽႆးလႂ်ၵႃႈတီႈၼၼ်ႈယူႇဢေႃႈ။ ယူဝ်းထမ်ႇ၊ ၼၼ်ႉပဵၼ်ၵေႃႉဢၼ်တႄႇႁဵတ်းၽၵ်းတူၽၢႆႇႁွင်ႇၵျွင်းပိၵ်ႈမၢၼ်ႇၸဝ်ႈၼၼ်ႉယဝ်ႉ။
လွင်ႈတၢင်းဢၼ် ယူဝ်းထမ်ႇ၊ ႁဵတ်းၵူႈၸိူဝ်ႉၵူႈပိူင်ၼၼ်ႉတႅမ်ႈမၢႆဝႆႉၵႃႈၼႂ်း လိၵ်ႈပိုၼ်းၶုၼ်ႁေႃၶမ်းမိူင်းယုတႃႉ၊ ဢေႃႈ။-
ၼႂ်းၸူဝ်ႈပၢၼ်မၼ်းပဵၼ်ၶုၼ်ႁေႃၶမ်းၼၼ်ႉ ထႃႇဝရႃႉၽြႃး၊ ၸႃႉပွႆႇၸႂ်ႉၶုၼ်ႁေႃၶမ်း ရေႇၸိၼ်း၊ မိူင်း သီးရီးယႃး၊ တင်းၶုၼ်ႁေႃၶမ်း ပေႇၵႃႇ၊ မိူင်း ဢိသရေး၊ မႃးတိုၵ်းတေႃးမိူင်း ယုတႃႉ၊ ဢေႃႈ။-
ယူဝ်းထမ်ႇ၊ ၼွၼ်းၽႄးယဝ်ႉလႄႈဢဝ်သၢင်းၵျူဝ်ႇဝႆႉၵႃႈၼႂ်းပႃႇႁဵဝ်ႈၸဝ်ႈၵႃႈတီႈဝဵင်း တႃႇဝိတ်ႈ၊ သေယဝ်ႉ၊လုၵ်ႈၸၢႆးမၼ်း ဢႃႇၶတ်ႉ၊ သိုပ်ႇၼင်ႈႁၢင်ႈၼင်ႈႁေႃဢေႃႈ။
ၼႂ်းပီဢၼ် ပေႇၵႃႇ၊ လုၵ်ႈၸၢႆး ရေႇမလိ၊ မိူင်း ဢိသရေး၊ ၸၢမ်ႇႁၢင်ႈၸၢမ်ႇႁေႃလႆႈသိပ်းၸဵတ်းပီၼၼ်ႉ၊ ဢႃႇၶတ်ႉ၊ လုၵ်ႈၸၢႆး ယူဝ်းထမ်ႇ၊ ပဵၼ်ၶုၼ်ႁေႃၶမ်းမိူင်း ယုတႃႉ၊ ဢေႃႈ။-
ဢသၢၵ်ႈမၼ်းလႆႈသၢဝ်းပီလႄႈဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရုသလႅမ်ႇ၊ သိပ်းႁူၵ်းပီဢေႃႈ။ မၼ်းဢမ်ႇၵမ်ၵျၢင်ႉၸွမ်းဢၼ်လီဢၼ်ငၢမ်းပူႇမွၼ်ႇမၼ်း တႃႇဝိတ်ႈ၊ ၵမ်ၵျၢင်ႉၼၼ်ႉလႄႈ၊မၼ်းႁဵတ်းတုၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ၽြႃးပဵၼ်ၸဝ်ႈမၼ်းသေယဝ်ႉ၊-
ၵမ်ၵျၢင်ႉၸွမ်းတၢင်းဢၼ်ၶုၼ်ႁေႃၶမ်းမိူင်း ဢိသရေး၊ ၵမ်ၵျၢင်ႉၸိူဝ်းၼၼ်ႉဢေႃႈ။ မၼ်းယင်းဢဝ်လုၵ်ႈၸၢႆးမၼ်းႁႂ်ႈပဵၼ်တူဝ်တၢင်းလူႇဢၼ်တုတ်ႇၽႆးလႄႈသၢၵ်ႈလူႇတီႈႁုၼ်ႇႁၢင်ႈသၢင်းထုၸွမ်းၼင်ႇထုင်းၸၢမ်ႇၵူၼ်းၸိူဝ်းဢၼ် ထႃႇဝရႃႉၽြႃး၊ ႁေႃႈဢွၵ်ႇပႅတ်ႈသေၵႃႈတီႈၽၢႆႇၼႃႈၵူၼ်းမဵဝ်း ဢိသရေး၊ တင်းလၢႆၸိူဝ်းၼၼ်ႉဢေႃႈ။-
မၼ်းၸၢင်ႈႁဵတ်းတၢင်းလူႇလႄႈဢဝ်ၼၢမ်ႇသႃႇၽဝ်ၽႆးတီႈၽြႃးတၢင်ႇသူႇတၢင်ႇပႃးလႂ်၊ၵႃႈၼိူဝ်လွႆလႂ်၊ဢိၵ်ႇတင်းၵႃႈတီႈတူၼ်ႈမႆႉၶဵဝ်လႂ်ဢေႃႈ။
မိူဝ်ႈၼၼ်ႉ၊ၶုၼ်ႁေႃၶမ်း ရေႇၸိၼ်း၊ မိူင်း သီးရီးယႃး၊ ဢိၵ်ႇတင်းၶုၼ်ႁေႃၶမ်း ပေႇၵႃႇ၊ မိူင်း ဢိသရေး၊ ၶီႇသိုၵ်းၶိုၼ်ႈၸူးတီႈဝဵင်း ယေႇရုသလႅမ်ႇ၊ လႄႈလွမ်ႉႁွပ်ႈဝႆႉဢေႃႈ။ ၵူၺ်းၵႃႈ၊ၶဝ်ဢမ်ႇပႄႉ ဢႃႇၶတ်ႉ၊ လႆႈ။-
မိူဝ်ႈၶိင်ႇၼၼ်ႉၶုၼ်ႁေႃၶမ်း ရေႇၸိၼ်း၊ မိူင်း သီးရီးယႃး၊ သမ်ႉသိမ်းဢဝ်ဝဵင်း ဢေးလတ်ႉ၊ ၶိုၼ်းသေလႄႈႁေႃႈၵူၼ်း ယုတႃႉ၊ တင်းလၢႆဢွၵ်ႇပႅတ်ႈသေယဝ်ႉ၊သမ်ႉႁႂ်ႈၵူၼ်းမဵဝ်း ဢေႇတုမ်ႇ၊ ၶဝ်ယူႇသဝ်းၵႃႈၼႂ်းဝဵင်း ဢေးလတ်ႉ၊ တေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။-
ဢႃႇၶတ်ႉ၊ ပွႆႇၸႂ်ႉသၢၼ်ႇတမၢၼ်ႇတင်းလၢႆၵႂႃႇၸူးတီႈ တိၵလတ်ႉပိလေႇသႃႇ၊ ၶုၼ်ႁေႃၶမ်း ဢႃႇသီးရီးယႃး၊ လႄႈတွင်းပၢၼ်ႇဝႃႈ၊ “ၵဝ်ၶႃႈၼႆႉပဵၼ်ၶႃႈဢၼ်ၵူဝ်ယမ်ၸဝ်ႈႁဝ်းဢေႃႈ။ ၶႅၼ်းတေႃႈမႃးလႄႈၵႄႇသႄႇၼုၵ်ႈဢဝ်ၵဝ်ၶႃႈသေၵႃႈၼႂ်းမိုဝ်းၶုၼ်ႁေႃၶမ်း သီးရီးယႃး၊ ဢိၵ်ႇတင်းၶုၼ်ႁေႃၶမ်း ဢိသရေး၊ ၸိူဝ်းဢၼ်မႃးတိုၵ်းတေႃးၵဝ်ၶႃႈၼၼ်ႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။-
ဢႃႇၶတ်ႉ၊ ဢဝ်ၶူဝ်းငိုၼ်းၶူဝ်းၶမ်းၵႃႈၼႂ်းၵျွင်းပိၵ်ႈမၢၼ်ႇၸဝ်ႈ၊ဢိၵ်ႇတင်းၵႃႈၼႂ်းၽၼ်ႇတႃႇႁေႃၸဝ်ႈလႄႈႁဵတ်းလၢၵ်ႈသွင်ႇပၼ်ၵႂႃႇတီႈၶုၼ်ႁေႃၶမ်း ဢႃႇသီးရီးယႃး၊ ဢေႃႈ။-
တိၵလတ်ႉပိလေႇသႃႇ၊ ၵေႃႈထွမ်ႇဢဝ်ၵႂၢမ်း ဢႃႇၶတ်ႉ၊ သေလႄႈဢွၼ်ဢဝ်တပ်ႉသိုၵ်းမၼ်းၶီႇၶိုၼ်ႈတိုၵ်းတေႃးဝဵင်း တမ်ႇမတ်ႉသၵတ်ႉ၊ လႄႈသိမ်းဢဝ်ဝဵင်းသေယဝ်ႉ၊ဢဝ်ၶုၼ်ႁေႃၶမ်း ရေႇၸိၼ်း၊ တၢႆဢေႃႈ။ ၵူၼ်းဝဵင်းတင်းလၢႆၵေႃႈမၼ်းသိမ်းဢဝ်ၵႂႃႇၵႃႈတီႈဝဵင်း ၵိရႃႉ၊ ဢေႃႈ။
မိူဝ်ႈဢၼ်ၶုၼ်ႁေႃၶမ်း ဢႃႇၶတ်ႉ၊ ၵႂႃႇၵႃႈတီႈဝဵင်း တမ်ႇမတ်ႉသၵတ်ႉ၊ ႁႂ်ႈလႆႈႁူပ်ႉထူပ်းၵၼ်တင်းၶုၼ်ႁေႃၶမ်း တိၵလတ်ႉပိလေႇသႃႇ၊ ၼၼ်ႉၸိုင်၊မၼ်းႁၼ်ၶဵင်ႇတၢင်းလူႇဢၼ်ၼိုင်ႈၵႃႈတီႈဝဵင်းၼၼ်ႉသေယဝ်ႉ၊မၢတ်ႈမၢႆဢဝ်ပုင်ႇႁၢင်ႈၶဵင်ႇတၢင်းလူႇၼၼ်ႉၸွမ်းလူၺ်ႈပုင်ႇၸၢမ်ႇမၼ်း၊လၢႆးဢၼ်ႁဵတ်းဢၼ်သၢင်ႈမၼ်းၸေးၸေးလႄႈပၼ်ၵႂႃႇတီႈယဵၸ်ႈပရေႃးႁဵၵ်ႈ ဢုရိယႃး၊ ဢေႃႈ။-
ဢုရိယႃး၊ ၵေႃႈတႄႇႁဵတ်းၶဵင်ႇတၢင်းလူႇႁႂ်ႈမၼ်းမိူၼ်ၵၼ်လီလီလႄႈႁႂ်ႈမၼ်းယဝ်ႉတူဝ်ႈဝႆႉထႃႈၸူဝ်ႈဢၼ် ဢႃႇၶတ်ႉ၊ ဢမ်ႇပႆႇႁွတ်ႈၶိုၼ်းမႃးၼၼ်ႉဢေႃႈ။-
ၶုၼ်ႁေႃၶမ်းၼၼ်ႉလုၵ်ႉသေၵႃႈတီႈဝဵင်း တမ်ႇမတ်ႉသၵတ်ႉ၊ ၶိုၼ်းႁွတ်ႈမႃးလႄႈႁၼ်ၶဵင်ႇတၢင်းလူႇၼၼ်ႉႁဵတ်းဝႆႉယဝ်ႉၼၼ်ႉသေယဝ်ႉ၊-
ဢႃႇၶတ်ႉ၊ သၢၵ်ႈလူႇတူဝ်တၢင်းလူႇဢၼ်ၽဝ်ၽႆး၊ဢိၵ်ႇတင်းၶိူင်ႈတၢင်းလူႇမၢၵ်ႇၶဝ်ႈႁူင်းၶဝ်ႈၵႃႈၼိူဝ်ၶဵင်ႇတၢင်းလူႇၼၼ်ႉလႄႈသွၼ်းလေႃႇတၢင်းလူႇၼမ်ႉမၢၵ်ႇၸပိတ်ႉ၊ဢိၵ်ႇတင်းလိူတ်ႈတၢင်းလူႇမိၵ်ႈသႁႃႇယႃႉၽႅတ်းသႂ်ႇၵႃႈၼိူဝ်မၼ်းဢေႃႈ။-
ၶဵင်ႇတၢင်းလူႇတွင်းလိူင်ဢၼ်ဢဝ်သၢၵ်ႈၵၢပ်ႈဝႆႉတီႈ ထႃႇဝရႃႉၽြႃး၊ ဢၼ်မီးဝူင်ႈၵၢင်ၶဵင်ႇတၢင်းလူႇမႂ်ႇမႂ်ႇဢိၵ်ႇတင်းၵျွင်းပိၵ်ႈမၢၼ်ႇၸဝ်ႈၼၼ်ႉ ဢႃႇၶတ်ႉ၊ ဢဝ်ၶၢႆႉၵႂႃႇဝႆႉၽၢႆႇႁွင်ႇၶဵင်ႇတၢင်းလူႇမႂ်ႇမႂ်ႇၼၼ်ႉဢေႃႈ။-
ၼင်ႇၼၼ်လႄႈမၼ်းပူင်ဢမိင်ႉတီႈယဵၸ်ႈပရေႃးႁဵၵ်ႈ ဢုရိယႃး၊ လႄႈဝႃႈ၊ “ဢဝ်ၶဵင်ႇတၢင်းလူႇလူင်ၼႆႉသုင်းၸႂ်ႉပုၼ်ႈဢၼ်ႁဵတ်းတၢင်းလူႇဢၼ်တုတ်ႇၽႆးၶိင်ႇၵၢင်ၼႂ်၊ပုၼ်ႈဢၼ်ႁဵတ်းတၢင်းလူႇမၢၵ်ႇၶဝ်ႈႁူင်းၶဝ်ႈၶိင်ႇႁူဝ်ၶမ်ႈ၊တၢင်းလူႇဢၼ်တုတ်ႇၽႆး၊ဢိၵ်ႇတင်းတၢင်းလူႇမၢၵ်ႇၶဝ်ႈႁူင်းၶဝ်ႈၶုၼ်ႁေႃၶမ်း၊ပႃးၸွမ်းတၢင်းလူႇမၢၵ်ႇၶဝ်ႈႁူင်းၶဝ်ႈ၊ဢိၵ်ႇတင်းတၢင်းလူႇၼမ်ႉမၢၵ်ႇၸပိတ်ႉၵူၼ်းဝၢၼ်ႈၵူၼ်းမိူင်းတင်းလၢႆၼၼ်ႉ၊ဢဝ်လိူတ်ႈတူဝ်တၢင်းလူႇတင်းသဵင်ႈတင်းမူတ်းဢၼ်သၢၵ်ႈလူႇယဝ်ႉၼၼ်ႉသွၼ်းလေႃႇသၢၵ်ႈလူႇၵႃႈၼိူဝ်ၶဵင်ႇတၢင်းလူႇၼၼ်ႉတႃႉ။ ၶဵင်ႇတၢင်းလူႇတွင်းလိူင်ၼၼ်ႉၸမ်ႉ၊ဢဝ်ဝႆႉပုၼ်ႈၵဝ်ႁႂ်ႈလႆႈသုင်းၸႂ်ႉပုၼ်ႈဢၼ်ၵဝ်တၵ်းတွင်ႈထၢမ်ၼၼ်ႉတႃႉ၊” ဝႃႈၼင်ႇၼႆလႄႈ၊-
ယဵၸ်ႈပရေႃးႁဵၵ်ႈ ဢုရိယႃး၊ ႁဵတ်းၸွမ်းၵႃႈဢၼ်ၶုၼ်ႁေႃၶမ်းမီးဢမိင်ႉဝႆႉၼၼ်ႉဢေႃႈ။
ၶုၼ်ႁေႃၶမ်း ဢႃႇၶတ်ႉ၊ ဢဝ်လေႃႉတွင်းလိူင်ၸိူဝ်းဢၼ်သုင်းၸႂ်ႉၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉပႅတ်ႈသေယဝ်ႉ၊ဢဝ်ဢၢင်ႇဢွၼ်ႇၸိူဝ်းၼၼ်ႉၶၢႆႉလူင်းသေၵႃႈၼိူဝ်လေႃႉၸိူဝ်းၼၼ်ႉဢေႃႈ။ မၼ်းသမ်ႉဢဝ်ဢၢင်ႇၼမ်ႉလူင်တွင်းလိူင်လူင်းသေၵႃႈၼိူဝ်ဝူဝ်းတွင်းလိူင်သိပ်းသွင်တူဝ်ၼၼ်ႉသေယဝ်ႉ၊ၵႂႃႇဝႆႉၵႃႈၼိူဝ်မၢၵ်ႇႁိၼ်ဢၼ်ပဵၼ်ၸၼ်ႉဝၢင်းၼၼ်ႉဢေႃႈ။-
ၼင်ႇႁိုဝ်တၵ်းထုၵ်ႇၸႂ်ၶုၼ်ႁေႃၶမ်း ဢႃႇသီးရီးယႃး၊ ၸိုင်၊ ဢႃႇၶတ်ႉ၊ ၼၼ်ႉဢဝ်သုမ်ႉၸူဝ်ႈၶၢဝ်းဢၼ်ႁဵတ်းဝႆႉၽၢႆႇတၢင်းၼႃႈၵျွင်းပိၵ်ႈမၢၼ်ႇၸဝ်ႈပုၼ်ႈၶုၼ်ႁေႃၶမ်းတၵ်းပႂ်ႉဝၼ်းၵမ်သိၼ်ၼၼ်ႉၶၢႆႉပႅတ်ႈ၊ဢိၵ်ႇတင်းဢဝ်ၵျွင်းတၢၼ်းဢၼ်ၶုၼ်ႁေႃၶမ်းတၵ်းၶိုၼ်ႈၵျွင်းပိၵ်ႈမၢၼ်ႇၸဝ်ႈၼၼ်ႉဢိုတ်းႁပ်းပႅတ်ႈဝႆႉဢေႃႈ။
လွင်ႈတၢင်းၵႃႈဢၼ်ၶုၼ်ႁေႃၶမ်း ဢႃႇၶတ်ႉ၊ ႁဵတ်းၸိူဝ်းၼၼ်ႉတႅမ်ႈမၢႆဝႆႉၵႃႈၼႂ်း လိၵ်ႈပိုၼ်းၶုၼ်ႁေႃၶမ်းမိူင်းယုတႃႉ၊ ဝႆႉဢေႃႈ။-
ဢႃႇၶတ်ႉ၊ ၼွၼ်းၽႄးယဝ်ႉလႄႈဢဝ်သၢင်းၵျူဝ်ႇဝႆႉၵႃႈၼႂ်းပႃႇႁဵဝ်ႈၸဝ်ႈ၊ၵႃႈတီႈဝဵင်း တႃႇဝိတ်ႈ၊ သေယဝ်ႉ၊လုၵ်ႈၸၢႆးမၼ်း ႁေႇၸၵိ၊ သိုပ်ႇၼင်ႈႁၢင်ႈၼင်ႈႁေႃဢေႃႈ။
ၼႂ်းပီဢၼ်ၶုၼ်ႁေႃၶမ်း ဢႃႇၶတ်ႉ၊ မိူင်း ယုတႃႉ၊ ၸၢမ်ႇႁၢင်ႈၸၢမ်ႇႁေႃလႆႈသိပ်းသွင်ပီၼၼ်ႉ ႁူဝ်းသေႇ၊ လုၵ်ႈၸၢႆး ဢေးလႃႇ၊ လႆႈပဵၼ်ၶုၼ်ႁေႃၶမ်းမိူင်း ဢိသရေး၊ သေလႄႈဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း သမႃႇရိ၊ ၵဝ်ႈပီဢေႃႈ။-
မၼ်းႁဵတ်းတုၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ သေၵေႃႈ၊ဢမ်ႇတၢၼ်ႇၶုၼ်ႁေႃၶမ်း ဢိသရေး၊ ၸိူဝ်းဢၼ်ဢုပ်ႉပိူင်ႇၵႂႃႇဢွၼ်တၢင်းမၼ်းၸိူဝ်းၼၼ်ႉ၊-
ၶုၼ်ႁေႃၶမ်း သႃႇလႃႉမၼေႇၸႃႇ၊ မိူင်း ဢႃႇသီးရီးယႃး၊ ၶီႇသိုၵ်းတိုၵ်းတေႃးမၼ်းသေလႄႈ ႁူဝ်းသေႇ၊ လႆႈၶၢမ်ႇသုမ်းသေယဝ်ႉ၊လႆႈသၢၵ်ႈၶွၼ်ႇၵူႈပီၵူႈပီဢေႃႈ။-
ၵူၺ်းၵႃႈ၊မီးပီၼိုင်ႈ ႁူဝ်းသေႇ၊ ပွႆႇၸႂ်ႉသၢၼ်ႇတမၢၼ်ႇၵႂႃႇၵႃႈတီႈ သွႃႇ၊ ၶုၼ်ႁေႃၶမ်းမိူင်း ဢေးၵျိပ်ႉ၊ ယွၼ်းႁႂ်ႈမၼ်းၸွႆႈထႅမ်သေယဝ်ႉ၊ ႁူဝ်းသေႇ၊ ဢမ်ႇသၢၵ်ႈၶွၼ်ႇမိူၼ်ၵူႈပီၼၼ်ႉတီႈမိူင်း ဢႃႇသီးရီးယႃး၊ လႄႈယူႇဢေႃႈ။ သႃႇလႃႉမၼေႇၸႃႇ၊ ႁုႁၼ်လွင်ႈၼၼ်ႉလႄႈတိဢဝ် ႁူဝ်းသေႇ၊ ၵႂႃႇၶင်ၶွၵ်ႈဝႆႉဢေႃႈ။
မိူဝ်ႈၼၼ်ႉ၊ သႃႇလႃႉမၼေႇၸႃႇ၊ ၶီႇသိုၵ်းတိုၵ်းဢဝ်မိူင်း ဢိသရေး၊ လႄႈၵႂႃႇလွမ်ႉဝဵင်း သမႃႇရိ၊ ဝႆႉသေယဝ်ႉ၊ၼႂ်းမိူဝ်ႈဢၼ်လွမ်ႉဝႆႉထူၼ်ႈထိုင်သၢမ်ပီၸိုင်၊-
ပဵၼ်ၼႂ်းပီဢၼ် ႁူဝ်းသေႇ၊ ၸၢမ်ႇႁၢင်ႈၸၢမ်ႇႁေႃၵဝ်ႈပီၼၼ်ႉဢေႃႈ။ ၶုၼ်ႁေႃၶမ်း ဢႃႇသီးရီးယႃး၊ တိုၵ်းတေႃးသိမ်းဢဝ်ဝဵင်း သမႃႇရိ၊ တိဢဝ်ၵူၼ်းမဵဝ်း ဢိသရေး၊ တင်းလၢႆၵႂႃႇၵႃႈတီႈမိူင်း ဢႃႇသီးရီးယႃး၊ လႄႈဢဝ်ၵမ်ႈၽွင်ႈဝႆႉၵႃႈတီႈဝဵင်း ႁႃႇလႃႉ၊ လႄႈဢဝ်ၵမ်ႈၽွင်ႈဝႆႉၵႃႈတီႈႁိမ်းၼမ်ႉ ႁႃႇပေႃႇ၊ ၼႂ်းဢိူင်ႇ ၵေႃးၸၼ်ႇ၊ ဢဝ်ၵမ်ႈၽွင်ႈဝႆႉၵႃႈတီႈဝဵင်းၸိူဝ်းဢၼ်မီးၼႂ်းဢိူင်ႇ မေႇတိ၊ ၸိူဝ်းၼၼ်ႉဢေႃႈ။
ဝဵင်း သမႃႇရိ၊ တူၵ်းသုမ်းၵွပ်ႈပိူဝ်ႈဢၼ်ၵူၼ်းမဵဝ်း ဢိသရေး၊ ၶဝ်ႁဵတ်းတုၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်ဢၼ်ၼုၵ်ႈဢဝ်ၶဝ်ဢွၵ်ႇသေၵႃႈၼႂ်းမိူင်း ဢေးၵျိပ်ႉ၊ ဢိၵ်ႇတင်းၵႃႈၼႂ်းမိုဝ်းၶုၼ်ႁေႃၶမ်းမိူင်း ဢေးၵျိပ်ႉ၊ မႃးၼၼ်ႉဢေႃႈ။ ၶဝ်သမ်ႉဝႆႈသႃၽြႃးတၢင်ႇသူႇတၢင်ႇပႃးလႄႈ၊-
ၸွမ်းထုင်းၽိင်ႈၵူၼ်းၸိူဝ်းဢၼ်လႆႈၶၢမ်ႇတၢင်းဢၼ် ထႃႇဝရႃႉၽြႃး၊ ႁေႃႈဢွၵ်ႇပႅတ်ႈသေၵႃႈတီႈၽၢႆႇၼႃႈၵူၼ်းမၼ်းၸဝ်ႈ၊ဢိၵ်ႇတင်းထုင်းၽိင်ႈဢၼ်ၶုၼ်ႁေႃၶမ်းၵူၼ်းမဵဝ်း ဢိသရေး၊ ၶဝ်ယုၵ်ႉယွင်ႈဝႆႉၼၼ်ႉဢေႃႈ။-
ၵူၼ်းမဵဝ်း ဢိသရေး၊ တင်းလၢႆလၵ်ႉလွမ်ႁဵတ်းမဵဝ်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်ဢမ်ႇထုၵ်ႇၸႂ်ၸိူဝ်းၼၼ်ႉသေယဝ်ႉ၊တႄႇတင်ႈႁဵတ်းထႃႇၼႃႉတီႈဝႆႈၽြႃးၶဝ်ၸိူဝ်းဢၼ်ဢမ်ႇယုမ်ႇမၢတ်ႈ ထႃႇဝရႃႉၽြႃး၊ ၵႃႈၼႂ်းဝဵင်းၶဝ်ၵူႈဝဵင်းဝဵင်း၊ၸႃႉဢဝ်ဝၢၼ်ႈလဵၵ်ႉဝၢၼ်ႈဢွၼ်ႇတေႃႇထိုင်ႁွတ်ႈဝဵင်းယႂ်ႇဝဵင်းလူင်တင်းလၢႆဢေႃႈ။-
ၶဝ်ဢွၼ်ၵၼ်ပူၵ်းတင်ႈသဝ်မၢၵ်ႇႁိၼ်၊ဢိၵ်ႇတင်းသဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ တင်းလၢႆၵႃႈၼိူဝ်လွႆဢၼ်သုင်ၵႃႈမီးဢိၵ်ႇတင်းၵႃႈတႂ်ႈႁူမ်ႈတူၼ်ႈမႆႉၵႃႈမီးသေယဝ်ႉ၊-
ဢွၼ်ၵၼ်ႁဵတ်းတၢင်းလူႇဢၼ်ဢဝ်ၼၢမ်ႇသႃႇၽဝ်ၽႆးၵႃႈၼိူဝ်ၶဵင်ႇတၢင်းလူႇၶဝ်ၸိူဝ်းဢၼ်ဢမ်ႇယုမ်ႇမၢတ်ႈ ထႃႇဝရႃႉၽြႃး၊ လႄႈၸွမ်းထုင်းၸၢမ်ႇၶဝ်ၸိူဝ်းဢၼ် ထႃႇဝရႃႉၽြႃး၊ ႁေႃႈဢွၵ်ႇသေၵႃႈတီႈမိူင်းၶဝ်ၼၼ်ႉဢေႃႈ။ ၶဝ်ႁဵတ်းလွင်ႈတၢင်းဢၼ်ႁၢႆႉဢၼ်မိူၵ်ႈႁႂ်ႈလႆႈတိုၵ်းယူင်းတေႃးသႃႉ ထႃႇဝရႃႉၽြႃး၊ သေယဝ်ႉ၊-
ပႄႇပႅတ်ႈထဵင်ပႅတ်ႈဢမိင်ႉ ထႃႇဝရႃႉၽြႃး၊ ဢၼ်ႁၢမ်ႈၶဝ်ဝႆႉ၊ဢမ်ႇႁႂ်ႈလႆႈဝႆႈသႃႁုၼ်ႇႁၢင်ႈသၢင်းထုလႂ်ၼၼ်ႉဢေႃႈ။
ထႃႇဝရႃႉၽြႃး၊ ပွႆႇၸႂ်ႉၶဝ်ၸိူဝ်းဢၼ်ႁူပွင်ႇတႃလႅင်းဢိၵ်ႇတင်းပရေႃးၽႅတ်ႈတင်းလၢႆႁႂ်ႈလႆႈပၼ်သတိတီႈၵူၼ်းမဵဝ်း ယုတႃႉ၊ တင်းၵူၼ်းမဵဝ်း ဢိသရေး၊ တင်းလၢႆလႄႈဝႃႈၸမ်ႉ၊ “သူဢွၼ်ၵၼ်ဝႄႈပိူင်ႈသဵၼ်ႈတၢင်းဢၼ်ဢမ်ႇလီဢမ်ႇငၢမ်းၵႃႈမီးသေလႄႈပႂ်ႉၵမ်ပႂ်ႉၸွမ်းပိင်းၺၢပ်ႈတြႃးတင်းလၢႆဢၼ်ပႃးၼႂ်းထုင်းၽိင်ႈတြႃးဢၼ်ၵဝ်ပိင်းၺၢပ်ႈဝႆႉတီႈပူႇမွၼ်ႇသူတင်းလၢႆလႄႈၵဝ်ဢဝ်ၶႃႈၵဝ်ၵူၼ်းၵဝ်ပရေႃးၽႅတ်ႈ တင်းလၢႆပၼ်မႃးတီႈသူၼၼ်ႉတႃႉ၊” ဝႃႈၼင်ႇၼႆယဝ်ႉ။-
ၵူၺ်းၵႃႈ၊ၶဝ်ဢမ်ႇထွမ်ႇဢမ်ႇဢဝ်။ ၶဝ်ပဵၼ်ၵေႃႉဢၼ်ၸႂ်ၵႅၼ်ႇၶေႃးၶႅင်မိူၼ်ပူႇမွၼ်ႇၶဝ်ၸိူဝ်းဢၼ်ဢမ်ႇယုမ်ႇမၢတ်ႈဢိင်ပိုင်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်ၼၼ်ႉဢေႃႈ။-
ၶဝ်ဢွၼ်ၵၼ်ပႄႇပႅတ်ႈထုင်းၽိင်ႈတြႃးမၼ်းၸဝ်ႈ၊ထဵင်ပႅတ်ႈပတိၺိၺ်ႇဢၼ်မၼ်းၸဝ်ႈႁဵတ်းလူၺ်ႈၵၼ်တင်းပူႇမွၼ်ႇၶဝ်လႄႈၶဝ်ႁဵတ်းဢမ်ႇပေႃးၼင်ႇႁိုဝ်တီႈလွင်ႈတၢင်းဢၼ်မၼ်းၸဝ်ႈပၼ်သတိၼၼ်ႉဢေႃႈ။ ၶဝ်ဝႆႈသႃႁုၼ်ႇႁၢင်ႈသၢင်းထုဢၼ်ဢမ်ႇပွင်ႇလွင်ႈၵႃႈသင်ၸိူဝ်းၼၼ်ႉသေယဝ်ႉ၊ႁႂ်ႈတူဝ်ၸဝ်ႈၵဝ်ႇပဵၼ်ဢၼ်ဢမ်ႇပွင်ႇလွင်ႈၵႃႈသင်သေလႄႈဢွၼ်ၵၼ်ၸွမ်းထုင်းၽိင်ႈၵူၼ်းမဵဝ်းႁိမ်းႁွမ်းၶဝ်လႄႈထဵင်ပႅတ်ႈဢမိင်ႉ ထႃႇဝရႃႉၽြႃး၊ ဢၼ်ႁၢမ်ႈဝႆႉဢမ်ႇႁႂ်ႈၶဝ်ႁဵတ်းၸွမ်းယိူင်ႈၸွမ်းၼၼ်ႉဢေႃႈ။-
ၶဝ်ဢွၼ်ၵၼ်ၸုၼ်ႉပႅတ်ႈထုင်းၽိင်ႈတြႃး ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်ၵႃႈမီးသေလႄႈလေႃႇႁဵတ်းဝူဝ်းဢွၼ်ႇသွင်တူဝ်ပုၼ်ႈဢၼ်ၶဝ်တၵ်းဝႆႈ၊ဢိၵ်ႇတင်းသဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ သေယဝ်ႉ၊ၵူဝ်းၵႂၢႆႇလၢဝ်တင်းလၢႆ၊ဢိၵ်ႇတင်းႁဵတ်းဝၢတ်ႈတီႈ ၽြႃးပႃႇလႃႉ၊ ဢေႃႈ။-
ၶဝ်ဢွၼ်ၵၼ်ဢဝ်လုၵ်ႈယိင်းလုၵ်ႈၸၢႆးၶဝ်သၢၵ်ႈလူႇႁႂ်ႈပဵၼ်ၶိူင်ႈတၢင်းလူႇဢၼ်တုတ်ႇၽႆးတီႈၽြႃးၶဝ်ၸိူဝ်းဢၼ်ဢမ်ႇယုမ်ႇမၢတ်ႈ ထႃႇဝရႃႉၽြႃး၊ ၼၼ်ႉသေယဝ်ႉ၊ဢွၼ်ၵၼ်တွင်ႈထၢမ်တူၺ်းတီႈမေႃၽီလႂ်၊ဢိၵ်ႇတင်းပေႇတၢင်ႇၵႃႇလႃးလႂ်ဢေႃႈ။ ၶဝ်ဢဝ်တူဝ်ၶဝ်ထိမ်ႈသႂ်ႇၵႃႈၼႂ်းတၢင်းဢၼ်ႁဵတ်းတုၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ၵႂႃႇလုမ်းလုမ်းလႄႈႁႂ်ႈလႆႈတိုၵ်းယူင်းတေႃးသႃႉ ထႃႇဝရႃႉၽြႃး၊ ဢေႃႈ။-
ထႃႇဝရႃႉၽြႃး၊ ၸႂ်မႆႈၶႂ်ႈၸႃႉတေႃႇၵူၼ်းမဵဝ်း ဢိသရေး၊ တင်းလၢႆယႂ်ႇၼႃႇလူင်လၢင်လႄႈပႄႇၶဝ်ပႅတ်ႈသေၵႃႈတီႈသိုဝ်ႈၼႃႈတႂ်ႈတႃသေယဝ်ႉ၊ဢဝ်မိူင်း ယုတႃႉ၊ ၵိုတ်းၵျၢၼ်ႇဝႆႉမိူင်းလဵဝ်ၵူၺ်းဢေႃႈ။
ၵူၼ်းမဵဝ်း ယုတႃႉ၊ ၶဝ်ၵေႃႈယင်းဢမ်ႇထွမ်ႇဢမ်ႇဢဝ်ထုင်းတြႃး ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်ယဝ်ႉလႄႈဢွၼ်ၵၼ်ႁဵတ်းၸွမ်းယိူင်ႈၸွမ်းထုင်းၽိင်ႈဢၼ်ၵူၼ်းမဵဝ်း ဢိသရေး၊ ၶဝ်ၵမ်ၵျၢင်ႉၼၼ်ႉဢေႃႈ။-
ပိူဝ်ႈၼႆလႄႈ ထႃႇဝရႃႉၽြႃး၊ ပႄႇပႅတ်ႈၸိူဝ်ႉၶိူဝ်းၵူၼ်းမဵဝ်း ဢိသရေး၊ ၵႃႈမီးတင်းသဵင်ႈတင်းလူင်သေယဝ်ႉ၊ပၼ်တၢမ်ႇလႄႈဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းရၢၼ်ႇသူႇၸိူဝ်းဢၼ်ႁၢဝ်ႈၵျၢမ်းၼႃႇၼၼ်ႉတေႃႇထိုင်ႁွတ်ႈမၼ်းၸဝ်ႈႁေႃႈၶဝ်ဢွၵ်ႇပႅတ်ႈသေၵႃႈတီႈၽၢႆႇၼႃႈမၼ်းၸဝ်ႈဢေႃႈ။
ဝၢႆးသေတၢင်းဢၼ် ထႃႇဝရႃႉၽြႃး၊ ႁဵတ်းႁႂ်ႈၵူၼ်းမဵဝ်း ယုတႃႉ၊ ၽၢတ်ႇယၢၼ်သေၵႃႈတီႈၵူၼ်းမဵဝ်း ယုတႃႉ၊ ယဝ်ႉၼၼ်ႉ၊ၵူၼ်းမဵဝ်း ဢိသရေး၊ တင်းလၢႆယုၵ်ႉယွင်ႈ ယေႇရူဝ်းပုမ်ႇ၊ လုၵ်ႈၸၢႆး ၼေႇပတ်ႉ၊ ႁႂ်ႈပဵၼ်ၶုၼ်ႁေႃၶမ်းၶဝ်ဢေႃႈ။ ယေႇရူဝ်းပုမ်ႇ၊ ႁဵတ်းႁႂ်ႈၶဝ်ၸုၼ်ႉပႅတ်ႈ ထႃႇဝရႃႉၽြႃး၊ လႄႈမၼ်းဢွၼ်ၶဝ်ႁဵတ်းတုၸရိူၵ်ႈဢေႃႈ။-
ၶဝ်ဢွၼ်ၵၼ်ၸွမ်းထုင်းၸၢမ်ႇတုၸရိူၵ်ႈၵႃႈဢၼ် ယေႇရူဝ်းပုမ်ႇ၊ ႁဵတ်းၼၼ်ႉ၊-
တေႃႇထိုင်ႁွတ်ႈ ထႃႇဝရႃႉၽြႃး၊ ႁေႃႈၶဝ်ဢွၵ်ႇသေၵႃႈတီႈသိုဝ်ႈၼႃႈတႂ်ႈတႃမၼ်းၸဝ်ႈၸွမ်းၵႃႈၼင်ႇဢၼ်မၼ်းၸဝ်ႈဢဝ်ၶႃႈမၼ်းၸဝ်ႈပရေႃးၽႅတ်ႈ တင်းလၢႆပၼ်သတိၶဝ်လူၺ်ႈလွင်ႈဢၼ်မၼ်းၸဝ်ႈတၵ်းႁဵတ်းၸိူဝ်ႉၼင်ႇၼၼ်ၼၼ်ႉဢေႃႈ။ ၵွပ်ႈပိူဝ်ႈၸိူဝ်ႉၼင်ႇၼၼ်လႄႈၵူၼ်းမဵဝ်း ဢိသရေး၊ လႆႈၶၢမ်ႇတၢင်းဢၼ်တိဢဝ်သိမ်းဢဝ်ၵႂႃႇၶၢမ်ႇတူၵ်းၵႅၼ်းယူႇၵႃႈၼႂ်းမိူင်း ဢႃႇသီးရီးယႃး၊ တေႃႇထိုင်ႁွတ်ႈဝၼ်းမိူဝ်ႈလဵဝ်ၼႆႉဢေႃႈ။
ၶုၼ်ႁေႃၶမ်းမိူင်း ဢႃႇသီးရီးယႃး၊ ၼၼ်ႉဢဝ်ၵူၼ်းဝဵင်း ပႃႇပုလုၼ်ႇ၊ ၵူၼ်းဝဵင်း ၵုသႃႉ၊ ၵူၼ်းဝဵင်း ဢႃႇဝႃႉ၊ ၵူၼ်းဝဵင်း ႁႃႇမတ်ႉ၊ ၵူၼ်းဝဵင်း သေႇၽရႃႉဝိမ်း၊ တင်းလၢႆ မႃးဝႆႉၵႃႈၼႂ်းဝဵင်း သမႃႇရိ၊ တၢင်တူဝ်ၵူၼ်းမဵဝ်း ဢိသရေး၊ ၸိူဝ်းဢၼ်လႆႈၶၢမ်ႇတၢင်းဢၼ်ပိူၼ်ႈတိဢဝ်သိမ်းဢဝ်ၵႂႃႇတူၵ်းၵႅၼ်းယူႇၼၼ်ႉဢေႃႈ။ ၶဝ်သိမ်းဢဝ်ဝၢၼ်ႈဝဵင်းၸိူဝ်းၼၼ်ႉသေယဝ်ႉ၊ယူႇသဝ်းၵႃႈတီႈၼၼ်ႈဢေႃႈ။-
မိူဝ်ႈၶဝ်ၸႃႉယူႇသဝ်းၵႃႈတီႈၼၼ်ႈၼၼ်ႉၸိုင်၊ၶဝ်ဢမ်ႇရူဝ်ႇသေႇၵူဝ်ယမ် ထႃႇဝရႃႉၽြႃး၊ လႄႈမၼ်းၸဝ်ႈပွႆႇၸႂ်ႉသၢင်ႇသီႈတင်းလၢႆမႃးၶူပ်းၶဝ်တၢႆၵမ်ႈၽွင်ႈဢေႃႈ။-
ၵွပ်ႈပိူဝ်ႈၸိူဝ်ႉၼင်ႇၼၼ်လႄႈပိူၼ်ႈလဝ်ႈလၢတ်ႈတီႈၶုၼ်ႁေႃၶမ်းမိူင်း ဢႃႇသီးရီးယႃး၊ လႄႈဝႃႈ၊ “ၵူၼ်းၸိူဝ်းဢၼ်ၸဝ်ႈႁဝ်းဢဝ်ၶျႃးဝႆႉၵႃးၼႂ်းဝဵင်း သမႃႇရိ၊ ၸိူဝ်းၼၼ်ႉဢမ်ႇႁုၽြႃးတြႃးဢၼ်ပႂ်ႉမိူင်းၼၼ်ႉတီႈၶႃႈ။ ပိူဝ်ႈၼႆလႄႈၽြႃးမိူင်းၼၼ်ႉပွႆႇၸႂ်ႉသၢင်ႇသီႈတင်းလၢႆမႃးၶူပ်းၶဝ်တၢႆၵမ်ႈၽွင်ႈတီႈၶႃႈယဝ်ႉ၊” ဝႃႈၼင်ႇၼႆဢေႃႈ။-
ၵွပ်ႈပိူဝ်ႈၼႆလႄႈၶုၼ်ႁေႃၶမ်းၼၼ်ႉမီးဢမိင်ႉလႄႈဝႃႈ၊ “သူဢဝ်ၼႂ်းယဵၸ်ႈပရေႃးႁဵၵ်ႈ ၸိူဝ်းဢၼ်သူတိၺွပ်းသေၵႃႈတီႈမိူင်းၼၼ်ႉမႃးၼၼ်ႉပွႆႇၸႂ်ႉၵႂႃႇၵေႃႉၼိုင်ႈႁႂ်ႈမၼ်းၶိုၼ်းပွၵ်ႈမိူဝ်းၵႂႃႇလႄႈသွၼ်ပၼ်လွင်ႈၽြႃးတြႃး၊ဢၼ်ပႂ်ႉမိူင်းၼၼ်ႉတီႈၵူၼ်းၸိူဝ်းၼၼ်ႉတႃႉ၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈယဵၸ်ႈပရေႃးႁဵၵ်ႈၵူၼ်းမဵဝ်း ဢိသရေး၊ ဢၼ်ၶဝ်တိဢဝ်သိမ်းဢဝ်သေၵႃႈတီႈဝဵင်း သမႃႇရိ၊ မႃးၼၼ်ႉၵေႃႉၼိုင်ႈပွၵ်ႈၶိုၼ်းမိူဝ်းၵႂႃႇလႄႈယူႇၵႃႈတီႈဝဵင်း ပေႇသလႃႉ၊ ႁႂ်ႈလႆႈသွၼ်ပၼ်လၢႆးဢၼ်ႁဵတ်းဝၢတ်ႈၵူဝ်းၵႂၢႆႇ ထႃႇဝရႃႉၽြႃး၊ တီႈၵူၼ်းၸိူဝ်းၼၼ်ႉဢေႃႈ။
ၼႂ်းဝႃႈၼၼ်သေၵေႃႈၵူၼ်းၸိူဝ်းဢၼ်ယူႇသဝ်းၵႃႈၼႂ်းဝဵင်း သမႃႇရိ၊ ၼၼ်ႉယင်းသိုပ်ႇႁဵတ်းႁုၼ်ႇႁၢင်ႈသၢင်းထုတင်းလၢႆလႄႈဝႆႉၵႃႈၼႂ်းႁိူၼ်းထႃႇၼႃႉတီႈသုင်တင်းလၢႆ၊ဢၼ်ၵူၼ်းမဵဝ်း ဢိသရေး၊ ၶဝ်ႁဵတ်းဝႆႉၼၼ်ႉဢေႃႈ။ ၵူၼ်းမူႇၽႂ်မူႇမၼ်းဢွၼ်ၵၼ်ႁဵတ်းႁုၼ်ႇႁၢင်ႈသၢင်းထုတင်းလၢႆ၊ၼႂ်းဝဵင်းၽႂ်ဝဵင်းမၼ်းဢေႃႈ။-
ၵူၼ်းဝဵင်း ပႃႇပုလုၼ်ႇ၊ ႁဵတ်းႁုၼ်ႇႁၢင်ႈသၢင်းထုၽြႃး ဢသိမႃႉ၊-
ၵူၼ်းဝဵင်း ဢႃႇဝိၼ်ႇ၊ ႁဵတ်းႁုၼ်ႇႁၢင်ႈသၢင်းထုၽြႃး ၼိပႃႉႁႃႇၸႃႉ၊ ဢိၵ်ႇတင်းၽြႃး တႃႇတၵ်ႉ၊ ၵူၼ်းဝဵင်း သေႇၽရႃႉဝိမ်း၊ ဢဝ်လုၵ်ႈလၢင်းၶဝ်တုတ်ႇၽႆးသၢၵ်ႈလူႇတီႈၽြႃးၶဝ် ဢႃႇတရမ်ႇမလႅၵ်ႉ၊ ဢိၵ်ႇတင်းၽြႃး ဢႃႇၼမ်ႇမေးလႅၵ်ႉ၊ ဢေႃႈ။-
ၵူၼ်းၸိူဝ်းၼၼ်ႉယင်းႁဵတ်းဝၢတ်ႈၵူဝ်းၵႂၢႆႇ ထႃႇဝရႃႉၽြႃး၊ ၼင်ႇၵဝ်ႇဢေႃႈ။ ၵူၺ်းၵႃႈ၊ၶဝ်ဢွၼ်ၵၼ်ၶၢၼ်းယဵၸ်ႈပရေႃးႁဵၵ်ႈတင်းလၢႆ၊ၸွမ်းၼင်ႇၵူၼ်းၽႂ်ၵူၼ်းမၼ်းၵႃႈမီးႁႂ်ႈလႆႈႁဵတ်းၼႃႈၵၢၼ်ယဵၸ်ႈပရေႃးႁဵၵ်ႈဢၼ်သၢၵ်ႈလူႇၵႃႈၼႂ်းထႃႇၼႃႉတီႈဝႆႈၽြႃးၶဝ်ၸိူဝ်းဢၼ်ဢမ်ႇယုမ်ႇမၢတ်ႈ ထႃႇဝရႃႉၽြႃး၊ ၼၼ်ႉဢေႃႈ။-
ပိူဝ်ႈၼႆလႄႈၶဝ်ႁဵတ်းဝၢတ်ႈၵူဝ်းၵႂၢႆႇ ထႃႇဝရႃႉၽြႃး၊ ဢေႃႈ။ တီႈၽြႃးၶဝ်ၸိူဝ်းၼၼ်ႉၵေႃႈၶဝ်ႁဵတ်းဝၢတ်ႈၸွမ်းၼင်ႇထုင်းၽိင်ႈမိူင်းဢၼ်ၶဝ်ဢွၵ်ႇမႃးၼၼ်ႉဢေႃႈ။
ၶဝ်ၼၼ်ႉယင်းသိုပ်ႇၵမ်ၵျၢင်ႉၸွမ်းထုင်းၽိင်ႈၵဝ်ႇၵဝ်ႇၶဝ်တေႃႇထိုင်ႁွတ်ႈဝၼ်းမိူဝ်ႈလဵဝ်ၼႆႉဢေႃႈ။ ၶဝ်ဢမ်ႇၵူဝ်းၵႂၢႆႇ ထႃႇဝရႃႉၽြႃး၊ ဢမ်ႇၵမ်ၵျၢင်ႉၸွမ်းထုင်းတြႃးတင်းပိင်းၺၢပ်ႈတြႃးၸိူဝ်းဢၼ်မၼ်းၸဝ်ႈပၼ်တီႈၵူၼ်းမဵဝ်းၸိူဝ်ႉၶိူဝ်း ယႃႇၵုပ်ႈ၊ ဢၼ်မၼ်းၸဝ်ႈႁွင်ႉႁဵၵ်ႈၸိုဝ်ႈ ဢိသရေး၊ ၼၼ်ႉ။-
ထႃႇဝရႃႉၽြႃး၊ ႁဵတ်းပတိၺိၺ်ႇလူၺ်ႈၵၼ်တင်းၶဝ်လႄႈပူင်ဢမိင်ႉတီႈၶဝ်ဝႆႉလႄႈဝႃႈၸမ်ႉ၊ “သူဢမ်ႇလႆႈဝႆႈသႃၵူဝ်းၵႂၢႆႇၽြႃးတၢင်ႇသူႇတၢင်ႇပႃးတင်းလၢႆၼၼ်ႉ။ ယႃႇပေၵူမ်ႈႁူဝ်လႄႈဝႆႈၶဝ်။ ယႃႇပေႁဵတ်းဝၢတ်ႈတီႈၶဝ်။ ယႃႇပေသၢၵ်ႈလူႇတီႈၶဝ်လႃးလႃး။-
သူတၵ်းလႆႈဢွၼ်ၵၼ်ရူဝ်ႇသေႇၵူဝ်ယမ်ၵူမ်ႈႁူဝ်ၵွမ်းႁူဝ်လႄႈႁဵတ်းတၢင်းလူႇတီႈၵဝ် ထႃႇဝရႃႉၽြႃး၊ ဢၼ်ပႃးတင်းတၼ်းၶူဝ်းဢိၵ်ႇတင်းမုၼ်ၽုင်းယႂ်ႇၼႃႇသေလႄႈၼုၵ်ႈဢဝ်သူဢွၵ်ႇသေမိူင်း ဢေးၵျိပ်ႉ၊ မႃးၼၼ်ႉၵူၺ်းဢေႃႈ။-
သူတၵ်းလႆႈပႂ်ႉၵမ်ပႂ်ႉၸွမ်းထုင်းတြႃး၊ဢိၵ်ႇတင်းပိင်းၺၢပ်ႈတြႃးၸိူဝ်းဢၼ်ၵဝ်တႅမ်ႈဝႆႉပုၼ်ႈသူၼၼ်ႉယူႇတႃႇသေႇဢေႃႈ။ ဢမ်ႇလႆႈဝႆႈသႃၵူဝ်းၵႂၢႆႇၽြႃးတၢင်ႇသူႇတၢင်ႇပႃးၼၼ်ႉ၊-
ယႃႇပေလူင်လိုမ်းပတိၺိၺ်ႇဢၼ်ၵဝ်ႁဵတ်းဝႆႉလူၺ်ႈၵၼ်တင်းသူၼၼ်ႉ။-
သူတၵ်းလႆႈဢွၼ်ၵၼ်ၵူဝ်းၵႂၢႆႇၵဝ် ထႃႇဝရႃႉၽြႃး၊ ၵူၺ်းဢေႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ၵဝ်တၵ်းၵႄႇၼုၵ်ႈဢဝ်သူဢွၵ်ႇသေၵႃႈတီႈမိုဝ်းရၢၼ်ႇသူႇသူဢေႃႈ၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊ၵူၼ်းၸိူဝ်းၼၼ်ႉဢမ်ႇထွမ်ႇဢမ်ႇဢဝ်။ ၶဝ်ယင်းသိုပ်ႇႁဵတ်းၵမ်ၵျၢင်ႉၸွမ်းထုင်းၽိင်ႈၵဝ်ႇၵဝ်ႇၶဝ်ၼၼ်ႉယူႇဢေႃႈ။
ၼင်ႇၼၼ်လႄႈၶဝ်ၸိူဝ်းၼၼ်ႉၵူဝ်းၵႂၢႆႇ ထႃႇဝရႃႉၽြႃး၊ သေၵေႃႈၶဝ်ယင်းဢွၼ်ၵၼ်ဝႆႈႁုၼ်ႇႁၢင်ႈသၢင်းထုၶဝ်ၸိူဝ်းၼၼ်ႉယူႇဢေႃႈ။ လုၵ်ႈလၢင်းၶဝ်၊လၢၼ်ၶဝ်၊လဵၼ်ၶဝ်၊ၸိူဝ်းၼၼ်ႉဢွၼ်ၵၼ်ႁဵတ်းၸွမ်းထုင်းၽိင်ႈၸူဝ်ႈပေႃႈပၢၼ်မႄႈၶဝ်ယူႇတေႃႇထိုင်ႁွတ်ႈဝၼ်းမိူဝ်ႈလဵဝ်ၼႆႉဢေႃႈ။
ၼႂ်းပီဢၼ် ႁူဝ်းသေႇ၊ လုၵ်ႈၸၢႆး ဢေးလႃႇ၊ ၶုၼ်ႁေႃၶမ်းမိူင်း ဢိသရေး၊ ၸၢမ်ႇႁၢင်ႈၸၢမ်ႇႁေႃလႆႈသၢမ်ပီၼၼ်ႉ၊ ႁေႇၸၵိ၊ လုၵ်ႈၸၢႆး ဢႃႇၶတ်ႉ၊ ပဵၼ်ၶုၼ်ႁေႃၶမ်းမိူင်း ယုတႃႉ၊ လႄႈ၊-
ၼႂ်းမိူဝ်ႈဢၼ်ဢသၢၵ်ႈမၼ်းလႆႈသၢဝ်းႁႃႈပီၼၼ်ႉမၼ်းလႆႈဢုပ်ႉပိူင်ႇဝဵင်း ယေႇရုသလႅမ်ႇ၊ လႄႈဢုပ်ႉပိူင်ႇႁိုင်သၢဝ်းၵဝ်ႈပီဢေႃႈ။ မႄႈၸဝ်ႈၸမ်ႉ၊ပဵၼ် ဢႃႇၽိ၊ လုၵ်ႈယိင်း ၸႃႇၶရိ၊ ဢေႃႈ။-
မၼ်းၵမ်ၵျၢင်ႉဢၼ်လီဢၼ်ငၢမ်းသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ၸွမ်းၼင်ႇပူႇမွၼ်ႇမၼ်းၶုၼ်ႁေႃၶမ်း တႃႇဝိတ်ႈ၊ ၵမ်ၵျၢင်ႉၼၼ်ႉဢေႃႈ။-
မၼ်းယႃႉၽဵဝ်ႈပႅတ်ႈထႃႇၼႃႉတီႈဝႆႈၽြႃးၶဝ်ၸိူဝ်းဢၼ်ဢမ်ႇယုမ်ႇမၢတ်ႈ ထႃႇဝရႃႉၽြႃး၊ လႂ်ၵိူၼ်ႇယႃႉပႅတ်ႈသဝ်ႁိၼ်တီႈဢၼ်ၶဝ်ၵူဝ်းၵႂၢႆႇလႂ်၊ၽၼ်းလူမ်ႉပႅတ်ႈသဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ လႂ်ဢေႃႈ။ ငူးတွင်းလိူင်ဢၼ်ႁွင်ႉဝႃႈ၊ ၼႁုၵ်ႉတၼ်ႇ၊ ဢၼ် မူဝ်းသေႇ၊ ႁဵတ်းဝႆႉၼၼ်ႉၵေႃႈမၼ်းတႅပ်းႁဵတ်းပွတ်းႁဵတ်းတွၼ်ႈပႅတ်ႈသေဢေႃႈ။ လွင်ႈမၼ်းၸမ်ႉ၊ၵူၼ်းမဵဝ်း ဢိသရေး၊ တင်းလၢႆၸၢင်ႈဢဝ်ၼၢမ်ႇသႃႇၽဝ်ၽႆးႁဵတ်းတၢင်းလူႇတီႈငူးတွင်းလိူင်ၼၼ်ႉတေႃႇထိုင်ႁွတ်ႈၶိင်ႇယၢမ်းၼၼ်ႉဢေႃႈ။-
ႁေႇၸၵိ၊ ၼၼ်ႉသွၼ်ႈပိုင်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ထၢၼ်ႈပေႃးၵႃႈၼႂ်းၶုၼ်ႁေႃၶမ်း ယုတႃႉ၊ ၵႃႈဢၼ်ပဵၼ်ၶုၼ်ႁေႃၶမ်းဢွၼ်တၢင်းမၼ်း၊လိုၼ်းလင်မၼ်း၊ၸိူဝ်းၼၼ်ႉဢမ်ႇတွၼ်ႉမီးၶုၼ်ႁေႃၶမ်းဢၼ်မိူၼ်မၼ်းၼၼ်ႉသေၸဝ်ႈသေပႃး။-
မၼ်းပႂ်ႉသဵတ်ႈၸႃႇၵႃႈၼိူဝ် ထႃႇဝရႃႉၽြႃး၊ ယူႇလႄႈဢမ်ႇတွၼ်ႉၽၢတ်ႇယၢၼ်ၵၼ်တင်းမၼ်းၸဝ်ႈ။ ၵူၺ်းပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၵႃႈဢၼ် ထႃႇဝရႃႉၽြႃး၊ မီးဢမိင်ႉဝႆႉတီႈ မူဝ်းသေႇ၊ ၼၼ်ႉလႄႈယူႇဢေႃႈ။-
ပိူဝ်ႈၼႆလႄႈ ထႃႇဝရႃႉၽြႃး၊ မီးယူႇလူၺ်ႈၵၼ်တင်းမၼ်းလႄႈမၼ်းႁဵတ်းလႄႈဢွင်ႇမႅင်ႇၼႂ်းၵၢၼ်ငၢၼ်းၵူႈမဵဝ်းဢၼ်မၼ်းႁဵတ်းၼၼ်ႉဢေႃႈ။ မၼ်းလုၵ်ႉၽိုၼ်ႉၶုၼ်ႁေႃၶမ်းမိူင်း ဢႃႇသီးရီးယႃး၊ လႄႈဢမ်ႇၶၢမ်ႇႁဵတ်းၶႃႈတီႈၶုၼ်ၼၼ်ႉ။-
မၼ်းတိုၵ်းတေႃးၵူၼ်း ၽိလိတ်ႉတိ၊ ၶဝ်လႄႈပႄႉၼႅင်ႇသိမ်းဢဝ်ဝဵင်းဢၼ်မၼ်ႈဢၼ်ၶိူင်ႇၶဝ်တင်းလၢႆၸႃႉဢဝ်ဝၢၼ်ႈလဵၵ်ႉဝၢၼ်ႈဢွၼ်ႇတေႃႇထိုင်ႁွတ်ႈဝဵင်းယႂ်ႇဝဵင်းလူင်ပႃးၸဵမ်ဝဵင်း ၵႃႇၸႃႉ၊ ဢိၵ်ႇတင်းလိၼ်မိူင်းဢၼ်ၶဝ်ပိူင်ႇၼၼ်ႉဢေႃႈ။
ၼႂ်းပီၶုၼ်ႁေႃၶမ်း ႁေႇၸၵိ၊ ၸၢမ်ႇႁၢင်ႈၸၢမ်ႇႁေႃၼႂ်းမိူင်း ယုတႃႉ၊ လႆႈသီႇပီၼၼ်ႉ၊ၶုၼ်ႁေႃၶမ်း ႁူဝ်းသေႇ၊ ၸၢမ်ႇႁၢင်ႈၸၢမ်ႇႁေႃၼႂ်းမိူင်း ဢိသရေး၊ လႆႈၸဵတ်းပီလႄႈၶုၼ်ႁေႃၶမ်း သႃႇလႃႉမၼေႇၸႃႇ၊ မိူင်း ဢႃႇသီးရီးယႃး၊ ၶီႇသိုၵ်းတိုၵ်းတေႃးမိူင်း ဢိသရေး၊ လႄႈလွမ်ႉႁွပ်ႈဝဵင်း သမႃႇရိ၊ ဝႆႉဢေႃႈ။-
လွမ်ႉႁွပ်ႈဝဵင်းဝႆႉႁိုင်တေႃႇထိုင်သၢမ်ပီလႄႈဝဵင်း သမႃႇရိ၊ တူၵ်းသုမ်းဢေႃႈ။ လွင်ႈတၢင်းၼႆႉၸိုင်၊ပဵၼ်ၼႂ်းပီဢၼ် ႁေႇၸၵိ၊ ၸၢမ်ႇႁၢင်ႈၸၢမ်ႇႁေႃလႆႈႁူၵ်းပီ၊ဢိၵ်ႇတင်း ႁူဝ်းသေႇ၊ ၸၢမ်ႇႁၢင်ႈၸၢမ်ႇႁေႃလႆႈၵဝ်ႈပီၼၼ်ႉဢေႃႈ။-
ၼင်ႇၼၼ်လႄႈၶုၼ်ႁေႃၶမ်း ဢႃႇသီးရီးယႃး၊ သိမ်းဢဝ်ၵူၼ်းမဵဝ်း ဢိသရေး၊ တင်းလၢႆၵႂႃႇၶၢမ်ႇတူၵ်းၵႅၼ်းယူႇၵႃႈၼႂ်းမိူင်း ဢႃႇသီးရီးယႃး၊ လႄႈႁႂ်ႈၶဝ်ၵမ်ႈၽွင်ႈယူႇၵႃႈၼႂ်းဝဵင်း ႁႃႇလႃႉ၊ ၵမ်ႈၽွင်ႈယူႇၵႃႈတီႈႁိမ်းၼမ်ႉ ႁႃႇပေႃႇ၊ ၵႃႈၼႂ်းဢိူင်ႇ ၵေႃးၸၼ်ႇ၊ ၵမ်ႈၽွင်ႈသမ်ႉႁႂ်ႈယူႇၵႃႈၼႂ်းဝၢၼ်ႈၼႂ်းဢိူင်ႇ မေႇတိ၊ ဢေႃႈ။
ဝဵင်း သမႃႇရိ၊ လႆႈတူၵ်းသုမ်းၵွပ်ႈပိူဝ်ႈၵူၼ်းမဵဝ်း ဢိသရေး၊ တင်းလၢႆဢမ်ႇထွမ်ႇဢမ်ႇဢဝ်ၵႂၢမ်း ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်လႄႈဢွၼ်ၵၼ်ပူၼ်ႉလိူဝ်ပတိၺိၺ်ႇဢၼ်မၼ်းၸဝ်ႈႁဵတ်းဝႆႉလူၺ်ႈၵၼ်တင်းၶဝ်၊ဢိၵ်ႇတင်းဢွၼ်ၵၼ်ပႄႇပႅတ်ႈထုင်းတြႃးဢၼ် မူဝ်းသေႇ၊ ၵေႃႉပဵၼ်ၶႃႈ ထႃႇဝရႃႉၽြႃး၊ သင်ႇလၢတ်ႈဝႆႉၸိူဝ်းၼၼ်ႉဢေႃႈ။ ၶဝ်ဢမ်ႇထွမ်ႇဢမ်ႇဢဝ်၊ဢမ်ႇပႂ်ႉဢမ်ႇၸွမ်း။
ၼႂ်းပီဢၼ်ၶုၼ်ႁေႃၶမ်း ႁေႇၸၵိ၊ ၸၢမ်ႇႁၢင်ႈၸၢမ်ႇႁေႃလႆႈသိပ်းသီႇပီၼၼ်ႉ သၼႃႇၶရိပ်ႉ၊ ၶုၼ်ႁေႃၶမ်း ဢႃႇသီးရီးယႃး၊ ၼၼ်ႉၶီႇသိုၵ်းတိုၵ်းတေႃးဝဵင်းလူင်ၸိူဝ်းဢၼ်မၼ်ႈၶိူင်ႇၵႃႈမီးၵႃႈၼႂ်းမိူင်း ယုတႃႉ၊ လႄႈပႄႉၼႅင်ႇသိမ်းဢဝ်လႆႈဢေႃႈ။-
ႁေႇၸၵိ၊ ၵေႃႈပွႆႇၸႂ်ႉသၢၼ်ႇတမၢၼ်ႇၵႂႃႇၵႃႈတီႈ သၼႃႇၶရိပ်ႉ၊ ဢၼ်မီးယူႇၵႃႈတီႈဝဵင်း လႃႇၶိသႃႉ၊ လႄႈလဝ်ႈလၢတ်ႈဝႃႈ၊ “ၵဝ်ၶႃႈႁဵတ်းၽိတ်းတီႈၶႃႈယဝ်ႉ။ ၶႅၼ်းတေႃႈယိုတ်းပႅတ်ႈတၢင်းဢၼ်တိုၵ်းတေႃးၵဝ်ၶႃႈၼၼ်ႉသေၵမ်းတီႈၶႃႈ။ ၵဝ်ၶႃႈတၵ်းထၢမ်းပၼ်ၵႃႈၼင်ႇဢၼ်ၸဝ်ႈႁဝ်းယွၼ်းဢဝ်ၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။ ၶုၼ်ႁေႃၶမ်းၼၼ်ႉယွၼ်းဢဝ်ငိုၼ်းသၢမ်ပၢၵ်ႇတလၢၼ်ႇတၢၼ်ႇ၊ဢိၵ်ႇတင်းၶမ်းသိပ်းတလၢၼ်ႇတၢၼ်ႇၵႃႈတီႈ ႁေႇၸၵိ၊ ဢေႃႈ။-
ႁေႇၸၵိ၊ ဢဝ်ငိုၼ်းၵႃႈဢၼ်မီးၼႂ်းၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ဢိၵ်ႇတင်းၵႃႈဢၼ်မီးၼႂ်းၽၼ်ႇတႃႇႁေႃၸဝ်ႈတင်းသဵင်ႈတင်းလူင်ၵူၺ်းဢမ်ႇၵႃး၊-
မၼ်းသမ်ႉၵွၵ်းဢဝ်ၶမ်းၵႃႈတီႈသဝ်ၽၵ်းတူၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ဢိၵ်ႇတင်းၵႃႈတီႈသဝ်ၸိူဝ်းဢၼ်တူဝ်မၼ်းဢဝ်ၶမ်းဢုမ်ႇဝႆႉၸိူဝ်းၼၼ်ႉသေယဝ်ႉ၊သူင်ႇပၼ်တီႈ သၼႃႇၶရိပ်ႉ၊ ဢေႃႈ။-
ၶုၼ်ႁေႃၶမ်း ဢႃႇသီးရီးယႃး၊ ၼၼ်ႉ၊ပွႆႇၸႂ်ႉတပ်ႉသိုၵ်းလူင်လုၵ်ႉသေၵႃႈတီႈဝဵင်း လႃႇၶိသႃႉ၊ ၶီႇသိုၵ်းၶိုၼ်ႈၵႂႃႇႁႂ်ႈလႆႈတိုၵ်းတေႃး ႁေႇၸၵိ၊ တီႈဝဵင်း ယေႇရုသလႅမ်ႇ၊ ဢေႃႈ။ တပ်ႉသိုၵ်းလူင်ၼၼ်ႉမီးၶုၼ်ဢၼ်ပွင်ၵၢၼ်သၢမ်ၵေႃႉဢၼ်လႆႈႁၢပ်ႇၵၢၼ်သၢမ်မဵဝ်းဢၼ်ႁွင်ႉဝႃႈ၊ တႃႇတၼ်၊ ရႃႇပသႃႇရိတ်ႉ၊ ဢိၵ်ႇတင်း ရႃႇပသႃႇၶႃႉ၊ ၸိူဝ်းၼၼ်ႉဢွၼ်ႁူဝ်ၵႂႃႇလႄႈ၊မိူဝ်ႈဢၼ်ႁွတ်ႈထိုင်တီႈဝဵင်း ယေႇရုသလႅမ်ႇ၊ ၸိုင်၊ၶဝ်လႆႈသိမ်းဢဝ်သဵၼ်ႈတၢင်းဢၼ်ၵႂႃႇၸူးၵႃႈတီႈတႃႈၼမ်ႉၵူၼ်းသၵ်ႉၶူဝ်းဢၼ်ၼမ်ႉလႆမႃးသေၵႃႈတီႈၼမ်ႉၼွင်ဢၼ်မီးၵႃႈၼိူဝ်ၼၼ်ႉဢေႃႈ။-
ၶဝ်ပွႆႇၸႂ်ႉၵူၼ်းၵႂႃႇႁွင်ႉဢဝ် ႁေႇၸၵိ၊ မႃးလႄႈၶုၼ်ဢၼ်ပွင်ၵၢၼ်သၢမ်ၵေႃႉဢၼ်ဝႃႈ၊ ဢေးလျႃႇၵိမ်း၊ လုၵ်ႈၸၢႆး ႁိလၶိ၊ ဝုၼ်ႇလူင်ၽၢႆႇဢုပ်ႉႁေႃၶမ်း၊ဢိၵ်ႇတင်းၸရေးလူင် သေႇပၼႃႉ၊ တင်းဢတႂၢင်းဝုၼ်ႇ ယေႃႇဢႃႇ၊ လုၵ်ႈၸၢႆး ဢႃႇသပ်ႉ၊ ၸိူဝ်းၼၼ်ႉဢွၼ်ၵၼ်မႃးႁႂ်ႈလႆႈႁူပ်ႉထူပ်းၶဝ်ဢေႃႈ။-
ဝုၼ်ႇ ရႃႇပသႃႇၶႃႉ၊ ၵူၼ်းမဵဝ်း ဢႃႇသီးရီးယႃး၊ ၼၼ်ႉလၢတ်ႈတီႈၶဝ်လႄႈဝႃႈ၊ “သူၶိုၼ်းမွၵ်ႇလၢတ်ႈတီႈ ႁေႇၸၵိ၊ လႄႈဝႃႈ၊ ‘ၸဝ်ႈမုၼ်ယႂ်ႇၶုၼ်ႁေႃၶမ်း ဢႃႇသီးရီးယႃး၊ မီးဢမိင်ႉလႄႈဝႃႈၸမ်ႉ၊တီႈဢိင်တီႈပိုင်ႈမႂ်းၸမ်ႉ၊ပဵၼ်ဢၼ်လႂ်။-
မႂ်းဝႃႈ၊ “ၵဝ်ၼႆႉမီးၺၢၼ်ႇဢၼ်ၵတ်ႉဢၼ်ၶၼ်တင်းႁႅင်းသိုၵ်းဢၼ်ယႂ်ႇၼႃႇဢေႃႈ၊” ဝႃႈၼႆယဝ်ႉ။ ၵူၺ်းၵႃႈ၊ၵႂၢမ်းၼၼ်ႉပဵၼ်ၵႂၢမ်းပဝ်ႇၵႂၢမ်းလၢႆၵူၺ်းဢေႃႈ။ မႂ်းဢိင်ပိုင်ႈၽူႈလႂ်လႄႈႁတ်းလုၵ်ႉၽိုၼ်ႉၵဝ်။-
တူၺ်းလူး။ မႂ်းဢိင်ပိုင်ႈမိူင်း ဢေးၵျိပ်ႉ၊ ဢၼ်မိူၼ်ၸိူဝ်ႉၼင်ႇဢဝ်မႆႉဢေႃႈႁဵတ်းၶွၼ်ႉတဝ်ႉၼၼ်ႉလူင်ပႄႇ။ မႆႉဢေႃႈၼၼ်ႉၸၢင်ႈတမ်တႅင်းႁႂ်ႈမိုဝ်းၵေႃႉဢၼ်ဢိင်ပိုင်ႈၼၼ်ႉပွင်ႇပိဝ်ၵႂႃႇဢေႃႈ။ ၶုၼ်ႁေႃၶမ်းမိူင်း ဢေးၵျိပ်ႉ၊ ၼၼ်ႉၸၢင်ႈႁဵတ်းၸိူဝ်ႉၼင်ႇၼၼ်တီႈၵေႃႉဢၼ်ဢိင်ပိုင်ႈမၼ်းၼၼ်ႉဢေႃႈ။
“‘ပေႃးမႂ်းသမ်ႉလၢတ်ႈတီႈၵဝ်လႄႈဝႃႈ၊ “ႁဝ်းဢိင်ပိုင်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းဢေႃႈ၊” ဝႃႈၼႆၸိုင်၊မၼ်းၸဝ်ႈၼၼ်ႉပဵၼ်ၽြႃးဢၼ် ႁေႇၸၵိ၊ ပႄႇၽဵဝ်ႈထႃႇၼႃႉတီႈသုင်မၼ်းၸဝ်ႈ၊ဢိၵ်ႇတင်းၶဵင်ႇတၢင်းလူႇမၼ်းၸဝ်ႈတင်းလၢႆပႅတ်ႈၼႂ်းမိူဝ်ႈဢၼ်မၼ်းၸဝ်ႈသင်ႇလၢတ်ႈတီႈၵူၼ်းမဵဝ်း ယုတႃႉ၊ တင်းၵူၼ်းဝဵင်း ယေႇရုသလႅမ်ႇ၊ လႄႈဝႃႈ၊ “သူတၵ်းလႆႈဝႆႈသႃၵႃႈတီႈၽၢႆႇၼႃႈၶဵင်ႇတၢင်းလူႇၼႆႉၵႃႈၼႂ်းဝဵင်း ယေႇရုသလႅမ်ႇ၊ ၼႆႉၵူၺ်းဢေႃႈ၊” ဝႃႈၼင်ႇၼႆၼၼ်ႉဢမ်ႇၸႂ်ႈႁိုဝ်း။-
တေႃႈလဵဝ်ၼႆႉမႂ်းမႃးလႄႈသဵတ်ႈၵႃႈသဵတ်ႈၶၼ်မၼ်းတေႃႇၵၼ်တင်းၸဝ်ႈၵဝ်ၶုၼ်ႁေႃၶမ်း ဢႃႇသီးရီးယႃး၊ လႄႈဝႃႈ၊ပေႃးမႂ်းမီးၵူၼ်းသိုၵ်းဢၼ်ၶီႇမႃႉႁႂ်ႈပေႃးၵုမ်ႇလႆႈၸိုင်၊ၵဝ်တၵ်းပၼ်မႃႉသွင်ႁဵင်တီႈမႂ်းဢေႃႈ။-
မႂ်းယင်းဢမ်ႇၶေႉၶဵင်ႇၶုၼ်သိုၵ်းၵူၼ်းမဵဝ်း ဢႃႇသီးရီးယႃး၊ ဢၼ်တႅမ်ႇယေႃႈသေပိူၼ်ႈၼၼ်ႉလႆႈလႄႈမႂ်းသမ်ႉၵႂႃႇမုင်ႈမွင်းမဵဝ်း ဢေးၵျိပ်ႉ၊ ၶဝ်တၵ်းပွႆႇၸႂ်ႉတပ်ႉလေႃႉမႃႉသိုၵ်းလႂ်၊တပ်ႉမႃႉလႂ်မႃးၸွႆႈထႅမ်မႂ်းၼၼ်ႉလူင်ပႄႇ။-
လိူဝ်သေၼၼ်ႉဢမ်ႇၵႃး၊တၢင်းဢၼ်ၵဝ်မႃးတိုၵ်းတေႃးမိူင်းမႂ်းလႄႈယႃႉၽဵဝ်ႈပႅတ်ႈၼၼ်ႉမႂ်းထၢင်ႇဝႃႈ၊ ထႃႇဝရႃႉၽြႃး၊ ဢမ်ႇၸွႆႈထႅမ်ၵဝ်လႆႈႁိုဝ်း။ တူဝ် ထႃႇဝရႃႉၽြႃး၊ ၸႂ်ႉႁႂ်ႈၵဝ်ၶီႇၶိုၼ်ႈတိုၵ်းတေႃးမိူင်းၼႆႉလႄႈႁႂ်ႈယႃႉၽဵဝ်ႈပႅတ်ႈဢေႃႈ၊’ ဝႃႈၼႆယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ဢေးလျႃႇၵိမ်း၊ လုၵ်ႈၸၢႆး ႁိလၶိ၊သေႇပၼႃႉ၊ ဢိၵ်ႇတင်း ယေႃႇဢႃႇ၊ ၼၼ်ႉလၢတ်ႈတီႈ ရႃႇပသႃႇၶႃႉ၊ ၶုၼ်ဢၼ်ပွင်ၵၢၼ်ၼၼ်ႉလႄႈဝႃႈ၊ “ၶႅၼ်းတေႃႈလၢတ်ႈတင်းၵႂၢမ်း ဢႃႇရမိၵ်ႉ၊ တီႈႁဝ်းၶႃႈသေၵမ်းၶႃႈ။ ႁဝ်းၶႃႈႁုထွမ်ႇၵႂၢမ်းၼၼ်ႉၶႃႈဢေႃႈ။ ယႃႇပေလၢတ်ႈတင်းၵႂၢမ်း ႁေႇပြႄး၊ သေၵမ်း။ ၵူၼ်းၸိူဝ်းဢၼ်မီးယူႇၵႃႈၼိူဝ်လမ်းဝဵင်းၼၼ်ႉၵေႃႈဢွၼ်ၵၼ်ထွမ်ႇယူႇၶႃႈဢေႃႈ၊” ဝႃႈၼင်ႇၼႆဢေႃႈ။
မၼ်းၼၼ်ႉၶိုၼ်းလၢတ်ႈလႄႈဝႃႈ၊ “သူထၢင်ႇၸဝ်ႈမုၼ်ယႂ်ႇၶုၼ်ႁေႃၶမ်းပွႆႇၸႂ်ႉၵဝ်မႃးႁႂ်ႈလႆႈလၢတ်ႈတေႃႇၶုၼ်ႁေႃၶမ်းတင်းသူၼႆႉၵူၺ်းႁိုဝ်း။ ဢမ်ႇၸႂ်ႈၵူၺ်း။ ၵဝ်တၵ်းလႆႈလၢတ်ႈတေႃႇၵူၼ်းၸိူဝ်းဢၼ်မီးယူႇၵႃႈၼိူဝ်လမ်းဝဵင်းဢၼ်တၵ်းတေလႆႈၵိၼ်ၽၢႆႈလူင်ၶဝ်လႄႈၵိၼ်ၽၢႆႈဢွၼ်ႇၶဝ်လူၺ်ႈၵၼ်တင်းသူၸိူဝ်းၼႆႉၼၼ်ႉဢေႃႈ၊” ဝႃႈၼင်ႇၼႆသေယဝ်ႉ။
မၼ်းလုၵ်ႉၸုၵ်းလႄႈဢဝ်တင်းၵႂၢမ်း ႁေႇပြႄး၊ လၢတ်ႈတင်းသဵင်ဢၼ်ယႂ်ႇၼႃႇလႄႈဝႃႈ၊ “ဢွၼ်ၵၼ်ထွမ်ႇဢဝ်ဢမိင်ႉၸဝ်ႈမုၼ်ယႂ်ႇၶုၼ်ႁေႃၶမ်းမိူင်း ဢႃႇသီးရီးယႃး၊ တႃႉ။-
မၼ်းၸဝ်ႈသင်ႇလၢတ်ႈတီႈသူလႄႈဝႃႈၸမ်ႉ၊ယႃႇပေႁႂ်ႈ ႁေႇၸၵိ၊ လႆႈပႅတ်ႉလႅၼ်သူ။ ႁေႇၸၵိ၊ ဢမ်ႇၵႄႇသႄႇဢဝ်သူလႆႈၵူၺ်း။-
ယႃႇပေႁႂ်ႈ ႁေႇၸၵိ၊ ၸူဝ်းဢဝ်သူၵႂႃႇဢိင်ပိုင်ႈ ထႃႇဝရႃႉၽြႃး၊ ယႃႇပေထၢင်ႇ ထႃႇဝရႃႉၽြႃး၊ တၵ်းၵႄႇသႄႇဢဝ်သူ။ ယႃႇပေထၢင်ႇမၼ်းၸဝ်ႈတၵ်းႁႄႉၵင်ႈတပ်ႉသိုၵ်းၵူၼ်းမဵဝ်း ဢႃႇသီးရီးယႃး၊ ႁဝ်းၼႆႉႁႂ်ႈႁဝ်းဢမ်ႇလႆႈသိမ်းဢဝ်ဝဵင်းသူလႆႈၼၼ်ႉ။-
ယႃႇပေထွမ်ႇၵႂၢမ်း ႁေႇၸၵိ၊ ၼၼ်ႉ။ ၸဝ်ႈမုၼ်ယႂ်ႇၶုၼ်ႁေႃၶမ်းမိူင်း ဢႃႇသီးရီးယႃး၊ ဢၼ်ပူင်ဢမိင်ႉႁႂ်ႈသူဢွၵ်ႇဝဵင်းမႃးလႄႈၶၢမ်ႇသုမ်းၼၼ်ႉသူတၵ်းမီးဢၶႂၢင်ႉဢၼ်တၵ်းလႆႈၵိၼ်မၢၵ်ႇၸပိတ်ႉတီႈတူၼ်ႈၶိူဝ်းမၢၵ်ႇၸပိတ်ႉသူ၊ဢိၵ်ႇတင်းတၵ်းလႆႈၵိၼ်မၢၵ်ႇလိူဝ်ႇတီႈတူၼ်ႈမၢၵ်ႇလိူဝ်ႇသူလႄႈတၵ်းလႆႈတဵၵ်းၵိၼ်ၼမ်ႉတီႈၼမ်ႉမေႃႇသူႁင်းၽႂ်ႁင်းမၼ်း၊-
တေႃႇထိုင်ႁွတ်ႈၸဝ်ႈမုၼ်ယႂ်ႇၶုၼ်ႁေႃၶမ်းဢဝ်သူၶျႃးတီႈယူႇၵႃႈၼႂ်းမိူင်းဢၼ်မိူၼ်ၵၼ်တင်းမိူင်းသူ၊ဢၼ်ဝႃႈ၊မိူင်းဢၼ်မီးတူၼ်ႈၶိူဝ်းမၢၵ်ႇၸပိတ်ႉဢၼ်မၢၵ်ႇမၼ်းၵွၼ်ႈလီပူင်းလီ၊မိူင်းဢၼ်မီးၽွင်ၶဝ်ႈၵျုင်ႇဢၼ်ႁဵတ်းၶဝ်ႈမုၼ်းၵိၼ်၊မိူင်းဢၼ်မီးတူၼ်ႈမၢၵ်ႇသၢၼ်ႇလုၼ်ႇ၊မီးၼမ်ႉမၼ်းမၢၵ်ႇသၢၼ်ႇလုၼ်ႇ၊ဢိၵ်ႇတင်းၼမ်ႉၽိုင်ႈလိူင်ႇၼမ်ၼၼ်ႉဢေႃႈ။ ပေႃးသူႁဵတ်းၸွမ်းဢမိင်ႉမၼ်းၸဝ်ႈၸိုင်၊သူဢမ်ႇလႆႈတၢႆ၊တၵ်းဢသၢၵ်ႈလိပ်းဢေႃႈ။ ယႃႇပေႁႂ်ႈ ႁေႇၸၵိ၊ တိုၵ်းယူင်းၸူဝ်းဢဝ်သူႁႂ်ႈသူထၢင်ႇဝႃႈ၊ ထႃႇဝရႃႉၽြႃး၊ တၵ်းၵႄႇသႄႇဢဝ်သူၼၼ်ႉ။-
ၽြႃးၵူႈသိုင်ႇၵူႈမိူင်းၸိူဝ်းၼၼ်ႉ ၸွင်ႇၶဝ်ယၢမ်ႈၵႄႇသႄႇဢဝ်မိူင်းတူဝ်ၸဝ်ႈၵဝ်ႇလွတ်ႈသေၵႃႈၼႂ်းမိုဝ်းၸဝ်ႈမုၼ်ယႂ်ႇၶုၼ်ႁေႃၶမ်းမိူင်း ဢႃႇသီးရီးယႃး၊ လႆႈႁိုဝ်း။-
မိူဝ်ႈလဵဝ်ၼႆႉၽြႃးမိူင်း ႁႃႇမတ်ႉ၊ တင်းၽြႃးမိူင်း ဢႃႇပတ်ႉ၊ ၸိူဝ်းၼၼ်ႉၵႂႃႇမီးၵႃႈတီႈလႂ်ယဝ်ႉ၊ၽြႃးမိူင်း သေႇၽရႃႉဝိမ်း၊ ၽြႃးမိူင်း ႁေႇၼႃႉ၊ ၽြႃးမိူင်း ဢိဝႃႇ၊ ၸိူဝ်းၼၼ်ႉမီးၵႃႈလႂ်၊ၽြႃးၸိူဝ်းၼၼ်ႉသေပႃးပႃးၸွင်ႇၵႄႇသႄႇၼုၵ်ႈဢဝ်မိူင်း သမႃႇရိ၊ လွတ်ႈသေၵႃႈၼႂ်းမိုဝ်းၵဝ်ယဝ်ႉႁိုဝ်း။-
ၼႂ်းၽြႃးၵူႈသိုင်ႇၵူႈမိူင်းၸိူဝ်းၼၼ်ႉၽြႃးသူႇလႂ်ပႃးလႂ်ယၢမ်ႈတွၼ်ႉၵႄႇသႄႇဢဝ်မိူင်းတူဝ်ၸဝ်ႈၵဝ်ႇဢွၵ်ႇသေၵႃႈၼႂ်းမိုဝ်းၸဝ်ႈမုၼ်ယႂ်ႇၶုၼ်ႁေႃၶမ်းႁဝ်းယဝ်ႉ။ ႁဵတ်းၸိူဝ်ႉၼင်ႇႁိုဝ်လႄႈသူထၢင်ႇ ထႃႇဝရႃႉၽြႃး၊ တၵ်းၵႄႇသႄႇဢဝ်ဝဵင်း ယေႇရုသလႅမ်ႇ၊ လႆႈၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ၵူၼ်းၸိူဝ်းၼၼ်ႉဢမ်ႇတၵ်ႉသဵင်ၸွမ်းၼင်ႇဢၼ်ၶုၼ်ႁေႃၶမ်းသင်ႇလၢတ်ႈဝႆႉၼၼ်ႉၶဝ်ဢမ်ႇလၢတ်ႈၵႂၢမ်းသေၶေႃႈသေၵမ်းလႄႈယူႇဢေႃႈ။-
မိူဝ်ႈၼၼ်ႉ၊ ဢေးလျႃႇၵိမ်း၊သေႇပၼႃႉ၊ တင်း ယေႃႇဢႃႇ၊ မီးတၢင်းဢၼ်မႆႈၸႂ်လႄႈၸၵ်ႉသိၵ်ႇၶူဝ်းၼုင်ႈတူဝ်ၸဝ်ႈၵဝ်ႇသေယဝ်ႉ၊ၶိုၼ်းမိူဝ်းၵႂႃႇလၢတ်ႈၼႄတီႈၶုၼ်ႁေႃၶမ်းလွင်ႈဢၼ်ၶုၼ်လူင်ဢၼ်ပွင်ၵၢၼ်မိူင်း ဢႃႇသီးရီးယႃး၊ လႆႈလၢတ်ႈတင်းသဵင်ႈတင်းမူတ်းၼၼ်ႉဢေႃႈ။
မိူဝ်ႈဢၼ်ၶုၼ်ႁေႃၶမ်း ႁေႇၸၵိ၊ လႆႈငိၼ်းၵႂၢမ်းၼၼ်ႉၸိုင်၊မီးတၢင်းဢၼ်မႆႈၸႂ်ၼႃႇဢေႃႈ။ မၼ်းၸၵ်ႉသိၵ်ႇၶူဝ်းၼုင်ႈမၼ်းလႄႈၼုင်ႈမႆၶူဝ်းၼုင်ႈၼင်ပေႃသေယဝ်ႉ၊ၶဝ်ႈၵႂႃႇၵႃႈၼႂ်းၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ဢေႃႈ။-
မၼ်းပွႆႇၸႂ်ႉ ဢေးလျႃႇၵိမ်း၊ ဝုၼ်ႇလူင်ဢၼ်ဢုပ်ႉထိင်းၵႃႈၼႂ်းဝၢင်းႁေႃၶမ်း၊ဢိၵ်ႇတင်းၸရေးလူင် သေႇပၼႃႉ၊ ဢိၵ်ႇတင်းယဵၸ်ႈပရေႃးႁဵၵ်ႈ ဢၼ်ဢသၢၵ်ႈယႂ်ႇတင်းလၢႆ ၵႂႃႇၸူးတီႈပရေႃးၽႅတ်ႈ ဢိသႃႇယႃႉ၊ လုၵ်ႈၸၢႆး ဢႃႇမူတ်ႉ၊ ၼၼ်ႉဢေႃႈ။ ၶဝ်ၸိူဝ်းၼၼ်ႉၵေႃႈၼုင်ႈမႆၶူဝ်းၼုင်ႈၼင်ပေႃၼင်ႇၵဝ်ႇဢေႃႈ။-
ၶေႃႈၵႂၢမ်းဢၼ်မၼ်းသင်ႇလၢတ်ႈၵႂႃႇတီႈ ဢိသႃႇယႃႉ၊ ၼၼ်ႉၸမ်ႉ၊ “ဝၼ်းမိူဝ်ႈၼႆႉပဵၼ်ဝၼ်းတုၵ်ႉၶႃႉ၊ဝၼ်းဢၼ်လႆႈၶၢမ်ႇတၢမ်ႇ၊ဝၼ်းဢၼ်မႆႈၸႂ်ၶီၸႂ်ဢေႃႈ။ ႁဝ်းလႆႈပဵၼ်မိူၼ်ၸိူဝ်ႉၼင်ႇမႄႈယိင်းဢၼ်ၸမ်တၵ်းၵိူတ်ႇလဵင်ႉလုၵ်ႈလႄႈသမ်ႉဢမ်ႇမီးႁႅင်းဢၼ်ႁႂ်ႈၵိူတ်ႇလဵင်ႉလုၵ်ႈလႆႈဢေႃႈ။-
ၶုၼ်ႁေႃၶမ်းၵူၼ်းမဵဝ်း ဢႃႇသီးရီးယႃး၊ ပွႆႇၸႂ်ႉၶုၼ်ဢၼ်ပွင်ၵၢၼ်ၸဝ်ႈမႃးသႄႉသွမ်းၽြႃးပဵၼ်ၸဝ်ႈဢၼ်ဢသၢၵ်ႈလိပ်းၼၼ်ႉတီႈၶႃႈယဝ်ႉ။ ႁႂ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈမႂ်းၼၼ်ႉငိၼ်းၵႂၢမ်းဢၼ်သႄႉသွမ်းၼၼ်ႉသေလႄႈပၼ်တၢမ်ႇတီႈၵေႃႉဢၼ်လၢတ်ႈၼၼ်ႉသေၵမ်းလူၺ်ႈ။ ပိူဝ်ႈၼႆလႄႈမႂ်းသူးတွင်းတီႈၽြႃးပဵၼ်ၸဝ်ႈပုၼ်ႈၵူၼ်းႁဝ်းၸိူဝ်းဢၼ်ယင်းဢသၢၵ်ႈလိပ်းလႄႈၵိုတ်းၵျၢၼ်ႇယူႇၼႆႉသေၵမ်း၊” ဝႃႈၼင်ႇၼႆဢေႃႈ။
မိူဝ်ႈဢၼ် ဢိသႃႇယႃႉ၊ ငိၼ်းၵႂၢမ်းၶုၼ်ႁေႃၶမ်း ႁေႇၸၵိ၊ ယဝ်ႉၼၼ်ႉၸိုင်၊-
မၼ်းၶိုၼ်းသင်ႇလၢတ်ႈၵႂႃႇလႄႈဝႃႈ၊ “ထႃႇဝရႃႉၽြႃး၊ သင်ႇလၢတ်ႈတီႈမႂ်းလႄႈဝႃႈၸမ်ႉ၊ ‘ယႃႇပေၵူဝ်ပေႁႄၵွပ်ႈပိူဝ်ႈၵူၼ်းမဵဝ်း ဢႃႇသီးရီးယႃး၊ ၶဝ်သႄႉသွမ်းၵဝ်ၼၼ်ႉ။-
ၵဝ်တၵ်းႁဵတ်းႁႂ်ႈၶုၼ်ႁေႃၶမ်းၼၼ်ႉလႆႈငိၼ်းၶၢဝ်ႇငၢဝ်းဢၼ်တၵ်းယူင်းႁူဝ်ၸႂ်မၼ်းၶိုၼ်းပွၵ်ႈမိူဝ်းၵႂႃႇၵႃႈတီႈမိူင်းတူဝ်ၸဝ်ႈၵဝ်ႇသေယဝ်ႉ၊ၵႃႈတီႈၼၼ်ႈၸိုင်၊ၵဝ်တၵ်းႁဵတ်းႁႂ်ႈမၼ်းလႆႈတၢႆဢေႃႈ၊’ ဝႃႈၼႆယဝ်ႉ၊” ဝႃႈၼင်ႇၼႆဢေႃႈ။
ဝုၼ်ႇလူင် ရႃႇပသႃႇၶႃႉ၊ ၼၼ်ႉငိၼ်းလွင်ႈဢၼ်ၶုၼ်ႁေႃၶမ်းမိူင်း ဢႃႇသီးရီးယႃး၊ ဢွၵ်ႇသေၵႃႈတီႈဝဵင်း လႃႇၶိသႃႉ၊ လႄႈတိုၵ်းတေႃးၵၼ်တင်းၵူၼ်းဝဵင်း လိပၼႃႉ၊ ယူႇၼၼ်ႉဢေႃႈ။ ပိူဝ်ႈၼႆလႄႈမၼ်းၶိုၼ်းၵႂႃႇႁႂ်ႈလႆႈတွင်ႈထၢမ်ၵၼ်တင်းၶုၼ်ႁေႃၶမ်းၶဝ်ၼၼ်ႉဢေႃႈ။-
မိူဝ်ႈၼၼ်ႉၶၢဝ်ႇငၢဝ်းႁွတ်ႈထိုင်မႃးတီႈၵူၼ်းမဵဝ်း ဢႃႇသီးရီးယႃး၊ ၸိူဝ်းၼၼ်ႉလွင်ႈဢၼ်ၶုၼ်ႁေႃၶမ်း တိရိၵ်ႉၵႃႉ၊ မိူင်း ဢေႇတီႇဢူဝ်းပီးယႃး၊ ၼၼ်ႉၶီႇသိုၵ်းမႃးႁႂ်ႈလႆႈတိုၵ်းတေႃးၶဝ်ၼၼ်ႉဢေႃႈ။ မိူဝ်ႈဢၼ်ၶုၼ်ႁေႃၶမ်းၵူၼ်းမဵဝ်း ဢႃႇသီးရီးယႃး၊ ငိၼ်းလွင်ႈတၢင်းၼၼ်ႉၸိုင်၊မၼ်းတႅမ်ႈလိၵ်ႈပၼ်ၵႂႃႇတီႈၶုၼ်ႁေႃၶမ်း ႁေႇၸၵိ၊ လႄႈဝႃႈ၊-
“ၽြႃးဢၼ်မႂ်းဢိင်ပိုင်ႈၼၼ်ႉသင်ႇလၢတ်ႈတီႈမႂ်းဝႆႉလႄႈဝႃႈ၊မႂ်းတၵ်းဢမ်ႇလႆႈတူၵ်းသုမ်းၵႃႈၼႂ်းမိုဝ်းၵဝ်ၼၼ်ႉယဝ်ႉ။ ၵူၺ်းၵႃႈ၊ယႃႇပေႁႂ်ႈၵႂၢမ်းၼၼ်ႉလႆႈပႅတ်ႉလႅၼ်မႂ်း။-
မႂ်းယၢမ်ႈငိၼ်းလွင်ႈဢၼ်ၶုၼ်ႁေႃၶမ်းၵူၼ်းမဵဝ်း ဢႃႇသီးရီးယႃး၊ ၼၼ်ႉ ၵႃႈၼင်ႇဢၼ်မၼ်းတႅပ်းတတ်းဝႃႈ၊ ‘တၵ်းယႃႉပႅတ်ႈ’ ဝႃႈၼႆၼၼ်ႉ၊မၼ်းၵေႃႈယႃႉၽဵဝ်ႈပႅတ်ႈမိူင်းလႂ်မိူင်းၼၼ်ႉယူႇယဝ်ႉ။ မႂ်းထၢင်ႇမႂ်းတၵ်းလွတ်ႈလႆႈႁိုဝ်း။-
ပူႇမွၼ်ႇၵဝ်တင်းလၢႆယႃႉၽဵဝ်ႈပႅတ်ႈၵူၼ်းဝဵင်း ၵေႃးၸၼ်ႇ၊ ၵူၼ်းဝဵင်း ၶႃႇရၼ်ႇ၊ ဢိၵ်ႇတင်းၵူၼ်းဝဵင်း ရေႇၸပ်ႉ၊ ၸိူဝ်းၼၼ်ႉလႄႈဢဝ်တၢႆပႅတ်ႈၵူၼ်းဝဵင်း ပႅတ်ႉဢေႇတိၼ်ႇ၊ ဢၼ်ယူႇၼႂ်းမိူင်း တေႇလၸႃႇ၊ ၸိူဝ်းၼၼ်ႉယဝ်ႉ။ ၽြႃးၶဝ်သူႇလႂ်ပႃးလႂ်ၵေႃႈဢမ်ႇၵႄႇသႄႇဢဝ်ၶဝ်လႆႈလႃးလႃး။-
ၶုၼ်ႁေႃၶမ်းဝဵင်း ႁႃႇမတ်ႉ၊ ၶုၼ်ႁေႃၶမ်းဝဵင်း ဢႃႇပတ်ႉ၊ ၶုၼ်ႁေႃၶမ်းဝဵင်း သေႇၽရႃႉဝိမ်း၊ ၶုၼ်ႁေႃၶမ်းဝဵင်း ႁေႇၼႃႉ၊ ၶုၼ်ႁေႃၶမ်းဝဵင်း ဢိဝႃႇ၊ ၸိူဝ်းၼၼ်ႉမီးၵႃႈလႂ်ယဝ်ႉ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်း ႁေႇၸၵိ၊ ဢဝ်လိၵ်ႈသေၵႃႈတီႈသၢၼ်ႇတမၢၼ်ႇၸိူဝ်းၼၼ်ႉသေလႄႈၽတ်းဢၢၼ်ႇလူတူၺ်းသေယဝ်ႉ၊ၶဝ်ႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈလႄႈဢဝ်လိၵ်ႈၼၼ်ႉတမ်းဝၢင်းၵႃႈတီႈၽၢႆႇၼႃႈ ထႃႇဝရႃႉၽြႃး၊ ယဝ်ႉၸင်ႇ၊-
သူးတွင်းလႄႈဝႃႈ၊ “ ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ ၸဝ်ႈဢၼ်ၼင်ႈၵႃႈၼိူဝ်ပလၢင်ႇဢၼ်မီးယူႇၵႃႈၼိူဝ်ၶေႇရုၽဵမ်ႇ ၼၼ်ႉတီႈၶႃႈ။ ၸဝ်ႈႁဝ်းသူႇလဵဝ်ပႃးလဵဝ်ၵူၺ်းပဵၼ်ၽြႃးပဵၼ်ၸဝ်ႈ၊ၸဝ်ႈဢၼ်ဢုပ်ႉပိူင်ႇသိုင်ႇၸိုင်ႈဝၢၼ်ႈမိူင်းလေႃးၵႃႉၼႆႉတီႈၶႃႈဢေႃႈ။ ၸဝ်ႈႁဝ်းၽၢၼ်ႇသၢင်းႁဵတ်းပဵၼ်လိၼ်မိူင်း၊ဢိၵ်ႇတင်းၽႃႉၵၢင်ႁၢဝ်တီႈၶႃႈဢေႃႈ။-
ထႃႇဝရႃႉၽြႃး၊ တီႈၶႃႈ။ တေႃႈလဵဝ်ၼႆႉၶႅၼ်းတေႃႈၵူမ်ႈတူၺ်းၶႃႈၸဝ်ႈႁဝ်းၶဝ်သေၵမ်းတီႈၶႃႈ။ ၶႅၼ်းတေႃႈႁႄႈႁူထွမ်ႇလွင်ႈတၢင်းၵႃႈဢၼ် သၼႃႇၶရိပ်ႉ၊ လၢတ်ႈၵႂၢမ်းဢၼ်သႄႉသွမ်းၸဝ်ႈႁဝ်းၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼႆႉၼၼ်ႉသေၵမ်းတီႈၶႃႈ။-
ထႃႇဝရႃႉၽြႃး၊ တီႈၶႃႈ၊ၶႃႈၸဝ်ႈႁဝ်းၶဝ်တင်းသဵင်ႈတင်းမူတ်းႁုလွင်ႈဢၼ်ၶုၼ်ႁေႃၶမ်းမိူင်း ဢႃႇသီးရီးယႃး၊ ၵႃႈမီးၸိူဝ်းၼၼ်ႉယႃႉၽဵဝ်ႈၵူႈသိုင်ႇၵူႈမိူင်း၊ဢိၵ်ႇတင်းၼမ်ႉလိၼ်ႁိၼ်ၽႃမိူင်းပိူၼ်ႈပႅတ်ႈၼမ်ၼႃႇယဝ်ႉၼၼ်ႉတီႈၶႃႈဢေႃႈ။-
ၶဝ်ဢဝ်ၽြႃးပိူၼ်ႈတင်းလၢႆၽဝ်ၽႆးပႅတ်ႈတီႈၶႃႈယဝ်ႉ။ ၵွပ်ႈပိူဝ်ႈဢၼ်ၸိူဝ်းၼၼ်ႉဢမ်ႇၸႂ်ႈၽြႃးၵူၺ်း၊ပဵၼ်မႆႉပဵၼ်မၢၵ်ႇႁိၼ်ဢၼ်ၵူၼ်းဢဝ်မိုဝ်းႁဵတ်းၵူၺ်းလႄႈၶဝ်ယႃႉၽဵဝ်ႈပႅတ်ႈလႆႈတီႈၶႃႈဢေႃႈ။-
တေႃႈလဵဝ်ၼႆႉ ထႃႇဝရႃႉၽြႃး၊ ၽြႃးပဵၼ်ၸဝ်ႈၶႃႈၸဝ်ႈႁဝ်းၶဝ်တီႈၶႃႈ။ ၵႄႇသႄႇဢဝ်ၶႃႈၸဝ်ႈႁဝ်းၶဝ်လွတ်ႈသေၵႃႈၼႂ်းမိုဝ်းၵူၼ်းမဵဝ်း ဢႃႇသီးရီးယႃး၊ ၶဝ်သေၵမ်းတီႈၶႃႈ။ ၼင်ႇၼၼ်လႄႈၵူၼ်းမဵဝ်းလေႃးၵီႇၵႃႈမီးတင်းသဵင်ႈတင်းမူတ်းတၵ်းႁုလွင်ႈဢၼ်ၸဝ်ႈႁဝ်းသူႇလဵဝ်ပႃးလဵဝ်ၵူၺ်းပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ဢိသႃႇယႃႉ၊ သင်ႇလၢတ်ႈၶေႃႈၵႂၢမ်းၵႂႃႇတီႈၶုၼ်ႁေႃၶမ်း ႁေႇၸၵိ၊ လႄႈဝႃႈ၊ “ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉလႄႈဝႃႈၸမ်ႉ၊ၵွပ်ႈပိူဝ်ႈဢၼ်မႂ်းသူးတွင်းတီႈၵဝ်လူၺ်ႈလွင်ႈ သၼႃႇၶရိပ်ႉ၊ ၶုၼ်ႁေႃၶမ်းမိူင်း ဢႃႇသီးရီးယႃး၊ ၼၼ်ႉလႄႈၵဝ်ထွမ်ႇဢဝ်ၵႂၢမ်းမႂ်းယဝ်ႉ။-
ထႃႇဝရႃႉၽြႃး၊ မီးဢမိင်ႉလူၺ်ႈလွင်ႈမၼ်းလႄႈဝႃႈၸမ်ႉ၊ ‘ၵၼ်ႇၺႃႇလုၵ်ႈယိင်းသၢဝ်ဝဵင်း ၸိဢုၼ်ႇ၊ ၼၼ်ႉႁဵတ်းဢမ်ႇပေႃးၼင်ႇႁိုဝ်လႄႈႁဵတ်းပျၢၵ်ႈၶူဝ်မႂ်းယူႇဢေႃႈ။ လုၵ်ႈယိင်းသၢဝ်ဝဵင်း ယေႇရုသလႅမ်ႇ၊ သၼ်ႇႁူဝ်ၸွမ်းတၢင်းလင်မႂ်းမိူဝ်ႈဢၼ်မႂ်းဢွၵ်ႇပၢႆႈယူႇဢေႃႈ။-
မႂ်းသႄႉသွမ်းလႄႈလႃႇလင်ၽူႈလႂ်။ မႂ်းသႅၼ်ႇႁွင်ႉတေႃႇၽူႈလႂ်။ မႂ်းၵိုဝ်တႃဢၼ်ၽႅၼ်သုင်တေႃႇၽူႈလႂ်။ မႂ်းႁဵတ်းတီႈၽြႃးဢၼ်မူတ်းၸၢင်ႇၵူၼ်းမဵဝ်း ဢိသရေး၊ ၼၼ်ႉလူင်ပႄႇ။-
မႂ်းယင်းပွႆႇၸႂ်ႉတမၢၼ်ႇမႂ်းၸိူဝ်းၼၼ်ႉမႃးသႄႉသွမ်း ထႃႇဝရႃႉၽြႃး၊ လႄႈဝႃႈ၊ၵဝ်ပႃးဢဝ်လေႃႉမႃႉသိုၵ်းၵဝ်တင်းလၢႆလႄႈၶီႇၶိုၼ်ႈထိုင်ပၢႆၸိၵ်းလွႆၼမ်ၼႃႇ၊ထိုင်တီႈၸိၵ်းတီႈၸွမ်လွႆ လေႇပၼုၼ်ႇ၊ ပုၼ်ႉယဝ်ႉ။ ၵဝ်ပွမ်ႈတူၼ်ႈမႆႉဢႃႇရိတ်ႉမၼ်းဢၼ်သုင်ၼႃႇသေပိူၼ်ႈဢိၵ်ႇတင်းတူၼ်ႈမႆႉပႅၵ်ႇမၼ်းဢၼ်လဝ်းလီၼႃႇၸိူဝ်းၼၼ်ႉလူမ်ႉယဝ်ႉ။ ၵဝ်ၶဝ်ႈႁွတ်ႈထိုင်ၵႃႈၼႂ်းထိူၼ်ႇမၼ်းတီႈဢၼ်လိုၵ်ႉၼႃႇသေပိူၼ်ႈၼၼ်ႉယဝ်ႉ။-
ၵဝ်လႆႈၶုတ်းၼမ်ႉမေႃႇၵႃႈၼႂ်းမိူင်းပိူၼ်ႈလႄႈလႆႈၵိၼ်ၼမ်ႉဢၼ်လီၼႂ်းမိူင်းပိူၼ်ႈၼၼ်ႉယဝ်ႉ။ ၽႃႇတိၼ်ၵဝ်ႁဵတ်းႁႂ်ႈၼမ်ႉၵႃႈၼႂ်းၼမ်ႉႁွင်ႈၼမ်ႉၵႄးမိူင်း ဢေးၵျိပ်ႉ၊ ၼၼ်ႉႁႅင်ႈႁွင်ၵႂႃႇယဝ်ႉ၊’ ဝႃႈၼႆလူင်ပႄႇ။
“မႂ်းဢမ်ႇတွၼ်ႉလႆႈငိၼ်းလွင်ႈဢၼ်ၵဝ်ႁၢင်ႈႁႅၼ်းၶိုင်ပွင်လွင်ႈတၢင်းၸိူဝ်းၼႆႉ၊ၸဵမ်မိူဝ်ႈၵွၼ်ႇမိူဝ်ႈမိုၼ်ႉၼၼ်ႉႁိုဝ်း။ တေႃႈလဵဝ်ၼႆႉၸီႇယၢင်ႇႁဵတ်းႁႂ်ႈမၼ်းပဵၼ်ၸွမ်းမႃးယဝ်ႉလႄႈမႂ်းလႆႈပဵၼ်ၵေႃႉဢၼ်ယႃႉၽဵဝ်ႈပႅတ်ႈဝဵင်းဢၼ်မၼ်ႈၶိူင်ႇတင်းလၢႆႁႂ်ႈပဵၼ်ၵွင်မၢၵ်ႇႁိၼ်ၵႂႃႇယဝ်ႉ။-
ၵူၼ်းဝဵင်းၸိူဝ်းၼၼ်ႉႁႅင်းလဵၵ်ႉႁႅင်းၵေႇၵႂႃႇလႄႈၶဝ်လႆႈၵူဝ်ႁႄတူၵ်းၸႂ်လႂ်တိုၼ်ႇၵႂႃႇယဝ်ႉ။ ၶဝ်လႆႈပဵၼ်ၸိူဝ်ႉၼင်ႇတူၼ်ႈယိူဝ်ႈယႃႈၵႃႈၼႂ်းပၢင်ႇၼႂ်းပိုၼ်ၸိူဝ်ႉၼင်ႇတူၼ်ႈဝင်ဢၼ်ၶဵဝ်၊ၸိူဝ်ႉၼင်ႇတူၼ်ႈယိူဝ်ႈဢၼ်ဢွၵ်ႇၵႃႈၼိူဝ်ၵုင်းႁိူၼ်း၊လႆႈႁဵဝ်ႇႁႅင်ႈတၢႆၵႂႃႇၵွပ်ႈပိူဝ်ႈလူမ်းႁွၼ်ႉၽၢႆႇတၢင်းဝၼ်းဢွၵ်ႇထူဝ်းပတ်ႉသႂ်ႇၼၼ်ႉယဝ်ႉ။
“ၵူၺ်းၵႃႈ၊ၵဝ်ႁုလွင်ႈမႂ်းၵူႈၸိူဝ်ႉၵူႈပိူင်လွင်ႈဢၼ်မႂ်းၵႂႃႇမႂ်းႁဵတ်းၼၼ်ႉဢေႃႈ။ မႂ်းၶႂ်ႈၸႃႉၵဝ်ထၢၼ်ႇႁိုဝ်ၵေႃႈၵဝ်ႁုယူႇဢေႃႈ။-
ၵွပ်ႈပိူဝ်ႈမႂ်းၶႂ်ႈၸႃႉၵဝ်၊မႂ်းမီးၸႂ်ၽႅၼ်သုင်တီႈၵဝ်ၼၼ်ႉလႄႈတေႃႈလဵဝ်ၼႆႉၵဝ်တၵ်းဢဝ်သၢႆလင်သူၼ်သႂ်ႇတီႈၶူႈလင်မႂ်း၊ဢဝ်ၵၵ်ႉသႂ်ႇသူပ်းမႂ်းသေယဝ်ႉ၊ၸုင်ဢဝ်မႂ်းၶိုၼ်းမိူဝ်းၵႂႃႇၸွမ်းသဵၼ်ႈတၢင်းဢၼ်မႂ်းမႃးၼၼ်ႉဢေႃႈ၊ဝႃႈၼႆယဝ်ႉ၊” ဝႃႈၼင်ႇၼႆဢေႃႈ။
ဢိသႃႇယႃႉ၊ သမ်ႉလၢတ်ႈတီႈၶုၼ်ႁေႃၶမ်း ႁေႇၸၵိ၊ လႄႈဝႃႈ၊ “ဢူဝ်း၊ ႁေႇၸၵိ၊ ႟။ ပုၼ်ႈဢၼ်တၵ်းပဵၼ်ၼိမိၵ်ႈလၢၵ်ႈၶၼႃႇတီႈမႂ်းၸမ်ႉ၊ၼႂ်းပီၼႆႉတင်းပီၼႃႈၸိုင်၊သူတၵ်းတေလႆႈၵိၼ်မၢၵ်ႇၵိၼ်ႁူင်းဢၼ်မၢၵ်ႇမႃးၵူၺ်းမၼ်းၼၼ်ႉၵူၺ်းဢေႃႈ။ ၼႂ်းပီလိုၼ်းၼၼ်ႉၸင်ႇသူတၵ်းတေလႆႈဝၢၼ်ႇၸိူဝ်ႉဝၢၼ်ႇၽၼ်းလႄႈပၢတ်ႇဢဝ်၊တေလႆႈၽုၵ်ႇသွမ်ႈတူၼ်ႈၶိူဝ်းမၢၵ်ႇၸပိတ်ႉလႄႈၵိၼ်မၢၵ်ႇမၼ်းဢေႃႈ။-
ၵူၼ်းမဵဝ်း ယုတႃႉ၊ ဢၼ်လွတ်ႈတၢင်းတၢႆလႄႈၵိုတ်းၵျၢၼ်ႇယူႇၸိူဝ်းၼၼ်ႉ တၵ်းတေယင်ႇႁၢၵ်ႈလိုၵ်ႉလိုၵ်ႉလႄႈတေမီးမၢၵ်ႇမၼ်းမႃးဢေႃႈ။
ၵူၼ်းဢၼ်ဢသၢၵ်ႈလိပ်းၵိုတ်းၵျၢၼ်ႇဝႆႉၸိူဝ်းၼၼ်ႉ၊တၵ်းမီးယူႇၵႃႈၼႂ်းဝဵင်း ယေႇရုသလႅမ်ႇ၊ ဢိၵ်ႇတင်းၵႃႈၼိူဝ်လွႆ ၸိဢုၼ်ႇ၊ ၵွပ်ႈပိူဝ်ႈဢၼ် ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၶိုင်ပွင်ႁႂ်ႈပဵၼ်မႃးၸိူဝ်ႉၼင်ႇၼၼ်ဢေႃႈ၊” ဝႃႈၼင်ႇၼႆယဝ်ႉ။
“ၵွပ်ႈပိူဝ်ႈဢၼ်ပဵၼ်ၸိူဝ်ႉၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉလူၺ်ႈလွင်ႈၶုၼ်ႁေႃၶမ်းၵူၼ်းမဵဝ်း ဢႃႇသီးရီးယႃး၊ လႄႈဝႃႈၸမ်ႉ၊ ‘မၼ်းဢမ်ႇလႆႈၶဝ်ႈၵႃႈၼႂ်းဝဵင်းၼႆႉ၊ဢမ်ႇလႆႈယိုဝ်းပိုၼ်သႂ်ႇသေလႅမ်ႈ၊ၵူၼ်းသိုၵ်းဢၼ်ယိပ်းၵမ်ၶႅပ်းႁႄႉလၢၵ်ႈၼၢၵ်ႈဢမ်ႇလႆႈၸမ်ဝဵင်းၼၼ်ႉ၊ဢမ်ႇလႆႈၵေႃႇလႆႈၵွင်တႅၼ်လိၼ်လွမ်ႉဝဵင်းၼၼ်ႉလႃးလႃး။-
မၼ်းတၵ်းလႆႈၶိုၼ်းမိူဝ်းၸွမ်းသဵၼ်ႈတၢင်းဢၼ်မၼ်းမႃးၼၼ်ႉလႄႈ၊ဢမ်ႇလႆႈၶဝ်ႈၵႃႈၼႂ်းဝဵင်းၼႆႉ၊’ ဝႃႈၼႆ၊ ထႃႇဝရႃႉၽြႃး၊ မီးဢမိင်ႉဢေႃႈ။-
ၵဝ်တၵ်းထွၵ်ႈလူၺ်ႈၵတိဢၼ်ၵဝ်ဝႆႉတီႈၶႃႈၵဝ် တႃႇဝိတ်ႈ၊ ၼၼ်ႉလႄႈတၵ်းပႂ်ႉထိင်းၵုင်ႇသရေႇၵဝ်သေယဝ်ႉ၊တၵ်းၵႅတ်ႇၶႄႁႄႉၵင်ႈဝဵင်းၼႆႉဢေႃႈ၊” ဝႃႈၼင်ႇၼႆဢေႃႈ။
ၼႂ်းၶိုၼ်းၼၼ်ႉတမၢၼ်ႇၵၢင်ႁၢဝ် ထႃႇဝရႃႉၽြႃး၊ ၵႂႃႇတီႈတပ်ႉသိုၵ်းၵူၼ်းမဵဝ်း ဢႃႇသီးရီးယႃး၊ ၶဝ်သေလႄႈဢဝ်တၢႆပႅတ်ႈၵူၼ်းသိုၵ်းသႅၼ်ပႅတ်ႇမိုၼ်ႇႁႃႈႁဵင်ၵေႃႉဢေႃႈ။ ၶိင်ႇၵၢင်ၼႂ်ၸဝ်ႉၸဝ်ႉမိူဝ်ႈဢၼ်ထိုင်ၶိင်ႇၵူၼ်းလုၵ်ႉၼၼ်ႉၸိုင်၊ၶဝ်ၼၼ်ႉပဵၼ်တူဝ်တၢႆတင်းသဵင်ႈတင်းမူတ်းၵႂႃႇဢေႃႈ။
ၼင်ႇၼၼ်လႄႈၶုၼ်ႁေႃၶမ်း သၼႃႇၶရိပ်ႉ၊ ၵူၼ်းမဵဝ်း ဢႃႇသီးရီးယႃး၊ ၼၼ်ႉယုၵ်ႉသိမ်းဢဝ်တပ်ႉသိုၵ်းမၼ်းလႄႈၶိုၼ်းမိူဝ်းၵႂႃႇၵႃႈတီႈဝဵင်း ၼိၼေႇဝူၺ်ႇ၊ သေဢေႃႈ။-
ဝၼ်းၼိုင်ႈ၊ၼႂ်းမိူဝ်ႈဢၼ်မၼ်းယင်းတိုၵ်ႉဝႆႈၽြႃးမၼ်း ၼိၸရွၵ်ႉ၊ ၵႃႈၼႂ်းၵျွင်းဝၢတ်ႈယူႇၼၼ်ႉၸိုင်၊လုၵ်ႈၸၢႆးမၼ်းသွင်ၵေႃႉဢၼ်ပဵၼ် ဢႃႇတရမ်ႇမလႅၵ်ႉ၊ ဢိၵ်ႇတင်း သရေႇၸႃႇ၊ ဢဝ်မၼ်းတၢႆလူၺ်ႈလၢပ်ႇလူၺ်ႈလႅဝ်းသေယဝ်ႉ၊ဢွၵ်ႇပၢႆႈၵႂႃႇၵႃႈတီႈမိူင်း ဢႃႇရရတ်ႉ၊ ဢေႃႈ။ လုၵ်ႈၸၢႆးမၼ်းတၢင်ႇၵေႃႉဢၼ်ပဵၼ် ဢေႇသရႃႇႁတ်ႉတုၼ်ႇ၊ ၼၼ်ႉသိုပ်ႇၼင်ႈႁၢင်ႈၼင်ႈႁေႃဢေႃႈ။
ယၢမ်းမိူဝ်ႈၼၼ်ႉၶုၼ်ႁေႃၶမ်း ႁေႇၸၵိ၊ မီးတၢင်းၶႆႈတၢင်းပဵၼ်ထၢၼ်ႈပေႃးၸမ်တၵ်းတၢႆဢေႃႈ။ ပရေႃးၽႅတ်ႈ ဢိသႃႇယႃႉ၊ လုၵ်ႈၸၢႆး ဢႃႇမူတ်ႉ၊ ၼၼ်ႉၵႂႃႇသူႇၵႂႃႇၸႂ်းလႄႈလၢတ်ႈတီႈမၼ်းလႄႈဝႃႈ၊ “ ထႃႇဝရႃႉၽြႃး၊ မီးဢမိင်ႉဝႆႉတီႈမႂ်းလႄႈဝႃႈၸမ်ႉ၊ၸီႇယၢင်ႇၶိုင်ပွင်လွင်ႈတၢင်းၵူႈၸိူဝ်ႉၵူႈပိူင်ဝႆႉလီလီငၢမ်းငၢမ်းတႃႉ။ တၢင်းပဵၼ်မႂ်းတၵ်းဢမ်ႇႁၢႆ။ မႂ်းတေလႆႈတၢႆဢေႃႈ၊ဝႃႈၼႆယဝ်ႉ၊” ဝႃႈၼင်ႇၼႆဢေႃႈ။
ႁေႇၸၵိ၊ ၵေႃႈဝၢႆႇၼႃႈၸူးၽႃသေယဝ်ႉ၊သူးတွင်းလႄႈဝႃႈ၊-
“ ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈမၢတ်ႈတွင်းတၢင်းဢၼ်ၶႃႈၸဝ်ႈပႃးတင်းသဵတ်ႈၸႃႇတင်းၸႂ်ဢၼ်ၵူဝ်ယမ်ၸဝ်ႈႁဝ်းလႄႈႁဵတ်းဝၢတ်ႈၵူဝ်းၵႂၢႆႇတီႈၸဝ်ႈႁဝ်း၊ဢိၵ်ႇတင်းၶႃႈၸဝ်ႈၵမ်ၵျၢင်ႉၸွမ်းၵႃႈၼင်ႇဢၼ်ဢလူဝ်ႇၸဝ်ႈႁဝ်းမီးၼၼ်ႉသေၵမ်းတီႈၶႃႈ။ ၶႃႈၸဝ်ႈတွင်းပၢၼ်ႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။ ႁေႇၸၵိ၊ ၼၼ်ႉႁွင်ႉႁႆႈၼႃႇလူင်လၢင်ယူႇဢေႃႈ။
ဢိသႃႇယႃႉ၊ ဢွၵ်ႇသေၶုၼ်ႁေႃၶမ်းၵႂႃႇလႄႈၸူဝ်ႈဢၼ်မၼ်းဢမ်ႇပႆႇပူၼ်ႉၶိုင်ႈၵၢင်ပၢင်ႇဝၢင်းလုမ်းႁေႃၶမ်းၵႂႃႇၼၼ်ႉ၊ ထႃႇဝရႃႉၽြႃး၊ မီးဢမိင်ႉတီႈမၼ်းလႄႈဝႃႈ၊-
“ၶိုၼ်းပွၵ်ႈၵႂႃႇၸူးတီႈ ႁေႇၸၵိ၊ ၶုၼ်ဢၼ်ဢုပ်ႉပိူင်ႇၵူၼ်း ထႃႇဝရႃႉၽြႃး၊ ၼၼ်ႉသေယဝ်ႉ၊လၢတ်ႈတီႈမၼ်းလႄႈဝႃႈ၊ ‘ၵဝ်၊ ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇမွၼ်ႇမႂ်း တႃႇဝိတ်ႈ၊ ၼၼ်ႉ၊ငိၼ်းသဵင်ၵႂၢမ်းသူးတွင်းမႂ်းယဝ်ႉလႄႈႁၼ်မႂ်းၼမ်ႉတႃတူၵ်းယူႇၼၼ်ႉယဝ်ႉ။ ၵဝ်တၵ်းႁႂ်ႈမႂ်းၸိုၼ်ႈႁၢႆလႄႈမိူဝ်ႈဢၼ်ထူၼ်ႈသၢမ်ဝၼ်းၸိုင်၊မႂ်းတၵ်းတေလႆႈၶိုၼ်ႈၵႂႃႇၵႃႈတီႈၵျွင်းပိၵ်ႈမၢၼ်ႇၸဝ်ႈဢေႃႈ။-
ၵဝ်တၵ်းႁႂ်ႈဢသၢၵ်ႈမႂ်းယၢဝ်းလိူဝ်ထႅင်ႈသိပ်းႁႃႈပီဢေႃႈ။ ၵဝ်တၵ်းၵႄႇၼုၵ်ႈဢဝ်မႂ်းဢိၵ်ႇတင်းဝဵင်း ယေႇရုသလႅမ်ႇ၊ ၼႆႉလွတ်ႈသေၵႃႈၼႂ်းမိုဝ်းၶုၼ်ႁေႃၶမ်းၵူၼ်းမဵဝ်း ဢႃႇသီးရီးယႃး၊ သေယဝ်ႉ၊ၵႅတ်ႇၶႄႁႄႉၵင်ႈဝဵင်းၼႆႉပိူဝ်ႈဢၼ်ၵဝ်ထွၵ်ႈလူၺ်ႈၵုင်ႇသရေႇၵဝ်၊ဢိၵ်ႇတင်းၵတိဢၼ်ၵဝ်ဝႆႉတီႈၶႃႈၵဝ် တႃႇဝိတ်ႈ၊ ၼၼ်ႉဢေႃႈ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ဢိသႃႇယႃႉ၊ လၢတ်ႈတီႈၵူၼ်းဢွၼ်ႇၶုၼ်ႁေႃၶမ်းၸိူဝ်းၼၼ်ႉလႄႈဝႃႈ၊ “ဢဝ်မၢၵ်ႇလိူဝ်ႇတမ်ႁဵတ်းၵွၼ်ႈႁဵတ်းမမ်ႈ တႃႉ၊” ဝႃႈၼင်ႇၼႆလႄႈ၊ၶဝ်ဢဝ်မႃးသေယဝ်ႉ၊မၼ်းသမ်ႉလၢတ်ႈလႄႈဝႃႈ၊ “ဢဝ်ဢၼ်ၼၼ်ႉဢုမ်ႇသႂ်ႇတီႈတုမ်ႇၸဵပ်းၼၼ်ႉဝႆႉတႃႉ။ ၸဵပ်းၼၼ်ႉတၵ်းႁၢႆဢေႃႈ၊” ဝႃႈၼင်ႇၼႆဢေႃႈ။-
ႁေႇၸၵိ၊ ၵေႃႈထၢမ်လႄႈဝႃႈ၊ “လွင်ႈဢၼ် ထႃႇဝရႃႉၽြႃး၊ တၵ်းႁႂ်ႈၸဵပ်းၵဝ်ၶႃႈႁၢႆလႄႈမိူဝ်ႈဢၼ်ထူၼ်ႈသၢမ်ဝၼ်းၸိုင်၊ၵဝ်တၵ်းလႆႈၶိုၼ်ႈၵျွင်းပိၵ်ႈမၢၼ်ႇၸဝ်ႈၼၼ်ႉလၢၵ်ႈၶၼႃႇသၢၵ်ႈသေႇမၼ်းတေမီးၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ဢိသႃႇယႃႉ၊ ၵေႃႈလၢတ်ႈလႄႈဝႃႈ၊ “ ထႃႇဝရႃႉၽြႃး၊ တၵ်းၼႄပျႃးလၢၵ်ႈၶၼႃႇတီႈမႂ်းႁႂ်ႈပဵၼ်သၢၵ်ႈသေႇဢၼ်မၼ်းၸဝ်ႈတၵ်းႁဵတ်းၸွမ်းၵတိမၼ်းၸဝ်ႈၼၼ်ႉၸမ်ႉ၊ႁၢင်ႈငဝ်းဢၼ်ၼႄဢၶိင်ႇၼၼ်ႉႁႂ်ႈဝႆးၵႂႃႇတၢင်းၼႃႈသိပ်းၵမ်းႁိုဝ်း။ ဢမ်ႇၼၼ်ၵေႃႈတၵ်းႁႂ်ႈထိူင်းၵႂႃႇၽၢႆႇတၢင်းလင်သိပ်းၵမ်းႁိုဝ်း၊” ဝႃႈၼင်ႇၼႆဢေႃႈ။
ႁေႇၸၵိ၊ ၵေႃႈလၢတ်ႈလႄႈဝႃႈ၊ “တၢင်းဢၼ်ႁၢင်ႈငဝ်းဝႆးၵႂႃႇတၢင်းၼႃႈသိပ်းၵမ်းၼၼ်ႉ ပဵၼ်ဢၼ်ငၢႆႈဢေႃႈ။ ႁႂ်ႈႁၢင်ႈငဝ်းၼၼ်ႉထိူင်းၵႂႃႇၽၢႆႇလင်သိပ်းၵမ်းတႃႉ၊” ဝႃႈၼင်ႇၼႆဢေႃႈ။
ပရေႃးၽႅတ်ႈ ဢိသႃႇယႃႉ၊ ၵေႃႈၵၢဝ်ႇတိူင်ႇတီႈ ထႃႇဝရႃႉၽြႃး၊ လႄႈမၼ်းၸဝ်ႈႁႂ်ႈႁၢင်ႈငဝ်းထိူင်းၵႂႃႇၽၢႆႇလင်သိပ်းၵမ်း၊ၸွမ်းၼင်ႇဢၼ်တႃဝၼ်းၸၢႆႉၵႂႃႇၵႃႈၼိူဝ်ၼႃႈၼႃႇရီႇတႃဝၼ်းဢၼ်ၶုၼ်ႁေႃၶမ်း ဢႃႇၶတ်ႉ၊ ႁဵတ်းဝႆႉၼၼ်ႉဢေႃႈ။
မိူဝ်ႈယၢမ်းၼၼ်ႉၶုၼ်ႁေႃၶမ်း မေႇရေႃးတၵ်ႉပႃႇလတၼ်ႇ၊ လုၵ်ႈၸၢႆး ပႃႇလတၼ်ႇ၊ မိူင်း ပႃႇပုလုၼ်ႇ၊ လႆႈငိၼ်းၶၢဝ်ႇဢၼ် ႁေႇၸၵိ၊ ပဵၼ်တၢင်းၶႆႈတၢင်းပဵၼ်လႄႈၸိုၼ်ႈႁၢႆမႃးယဝ်ႉၼၼ်ႉၸိုင်၊မၼ်းတႅမ်ႈလိၵ်ႈမႅတ်ႈတႃႇ၊ဢိၵ်ႇတင်းဢဝ်လၢၵ်ႈသွင်ႇသူင်ႇပၼ်ၵႂႃႇတီႈ ႁေႇၸၵိ၊ ဢေႃႈ။-
ႁေႇၸၵိ၊ ႁပ်ႉတွၼ်ႈဢဝ်သၼ်ႇတမၢၼ်ႇၸိူဝ်းၼၼ်ႉသေယဝ်ႉ၊ၼႄပျႃးၸေးၸိမ်ႇဢုၵ်ႉၸႃႇၸဝ်ႈၵႃႈမီး၊ၵႃႈဢၼ်ပဵၼ်ငိုၼ်းၶမ်း၊မဵဝ်းၼၢမ်ႇသႃႇ၊ၼမ်ႉမၼ်းၼၢမ်ႇသႃႇဢၼ်လီဢၼ်ငၢမ်း၊ဢိၵ်ႇတင်းၶိူင်ႈလၢၵ်ႈၼၢၵ်ႈတင်းသဵင်ႈတင်းလူင်ၸိူဝ်းၼၼ်ႉတီႈၶဝ်ဢေႃႈ။ ၸႃႉၸဵမ်ၵႃႈၼႂ်းႁေႃၶမ်းလႄႈမိူင်းၸဝ်ႈၵူႈတီႈၵူႈလႅၼ်ၼၼ်ႉ၊လွင်ႈတၢင်းဢၼ် ႁေႇၸၵိ၊ ဢမ်ႇၼႄပျႃးတီႈၶဝ်ၼၼ်ႉဢမ်ႇမီးသေၸိူဝ်ႉသေပိူင်။-
မိူဝ်ႈၼၼ်ႉ၊ပရေႃးၽႅတ်ႈ ဢိသႃႇယႃႉ၊ ၶဝ်ႈၸူးတီႈၶုၼ်ႁေႃၶမ်း ႁေႇၸၵိ၊ လႄႈထၢမ်ဝႃႈ၊ “ၵူၼ်းၸိူဝ်းၼႆႉလုၵ်ႉသေၵႃႈတီႈလႂ်မႃးလႄႈၶဝ်လၢတ်ႈၵႃႈသင်တီႈၸဝ်ႈႁဝ်းတီႈၶႃႈ၊” ဝႃႈၼင်ႇၼႆဢေႃႈ။ ႁေႇၸၵိ၊ ၶိုၼ်းလၢတ်ႈလႄႈဝႃႈ၊ “ၶဝ်လုၵ်ႉသေၵႃႈတီႈမိူင်း ပႃႇပုလုၼ်ႇ၊ ဢၼ်ၵႆၼႃႇပုၼ်ႉၼၼ်ႉမႃးဢေႃႈ၊” ဝႃႈၼင်ႇၼႆဢေႃႈ။
မၼ်းသမ်ႉထၢမ်ထႅင်ႈလႄႈဝႃႈ၊ “ၵႃႈၼႂ်းႁေႃၶမ်းၼႆႉၶဝ်လႆႈႁၼ်ၵႃႈသင်ယဝ်ႉတီႈၶႃႈ၊” ဝႃႈၼင်ႇၼႆလႄႈ၊ ႁေႇၸၵိ၊ ၶိုၼ်းလၢတ်ႈလႄႈဝႃႈ။ “ၶဝ်လႆႈႁၼ်ၵႂႃႇတင်းမူတ်းယဝ်ႉ။ ၵႃႈၼႂ်းၽၼ်ႇတႃႇၸဝ်ႈၼႆႉလွင်ႈတၢင်းဢၼ်ၵဝ်ဢမ်ႇၼႄပျႃးၶဝ်ၼၼ်ႉဢမ်ႇမီးသေၸိူဝ်ႉသေပိူင်ယဝ်ႉ၊” ဝႃႈၼင်ႇၼႆဢေႃႈ။
ဢိသႃႇယႃႉ၊ ၵေႃႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “ထွမ်ႇငိၼ်းၼုၵ်ႈၵပၢတ်ႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ တႃႉ။-
ၶိင်ႇၵႃႇလႃႉမိုဝ်ႉဝၼ်းဢၼ်ဢုၵ်ႉၸႃႇၵႃႈဢၼ်မီးၼႂ်းႁေႃၶမ်း၊ဢိၵ်ႇတင်းၵႃႈဢၼ်ပူႇၸဝ်ႈမွၼ်ႇၸဝ်ႈၸုဝႆႉသိမ်းဝႆႉတေႃႇထိုင်ႁွတ်ႈဝၼ်းမိူဝ်ႈလဵဝ်ၼႆႉၼၼ်ႉၸိူဝ်းၼၼ်ႉတၵ်းလႆႈၶၢမ်ႇတၢင်းဢၼ်သိမ်းဢဝ်ၵႂႃႇၵႃႈတီႈမိူင်း ပႃႇပုလုၼ်ႇ၊ ၼၼ်ႉႁွတ်ႈထိုင်ယဝ်ႉ။ တၵ်းဢမ်ႇၵိုတ်းဢမ်ႇၵျၢၼ်ႇသေၸိူဝ်ႉသေပိူင်။-
ၼႂ်းလုၵ်ႈၸဝ်ႈလၢၼ်ၸဝ်ႈၵမ်ႈၽွင်ႈၼၼ်ႉတၵ်းလႆႈၶၢမ်ႇတၢင်းဢၼ်တိဢဝ်သိမ်းဢဝ်ၵႂႃႇပဵၼ်ၵူၼ်းတွၼ်ဢၼ်ထၢမ်းႁဵတ်းၵၢၼ်ၵႃႈၼႂ်းႁၢင်ႈႁေႃၶုၼ်ႁေႃၶမ်း ပႃႇပုလုၼ်ႇ၊ ပုၼ်ႉဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်း ႁေႇၸၵိ၊ ၶိုၼ်းလၢတ်ႈလႄႈဝႃႈ၊ “ၼုၵ်ႈၵပၢတ်ႈ ထႃႇဝရႃႉၽြႃး၊ ဢၼ်မႂ်းလႆႈပျၢၼ်ႇလႆႈလၢတ်ႈၼႆႉလီယဝ်ႉ၊” ဝႃႈၼင်ႇၼႆဢေႃႈ။ လွင်ႈမၼ်းၸမ်ႉ၊မၼ်းထၢင်ႇၼႂ်းၸႂ်လႄႈဝႃႈ၊ “ၼႂ်းၸူဝ်ႈပၢၼ်ၵဝ်ၼႆႉတၵ်းမီးတၢင်းဢၼ်ၼိမ်ဢၼ်လီ၊ဢိၵ်ႇတင်းတၢင်းဢၼ်လူင်ႉလီလွတ်ႈလီဢမၢၼ်ႇၶၼ်ပဵၼ်ဢေႃႈ၊” ဝႃႈၼင်ႇၼႆဢေႃႈ။
လွင်ႈတၢင်းဢၼ်ၶုၼ်ႁေႃၶမ်း ႁေႇၸၵိ၊ ႁဵတ်းၵူႈၸိူဝ်ႉၵူႈပိူင်၊တၢင်းဢၼ်တၼ်းၶူဝ်းမၼ်းယႂ်ႇ၊တၢင်းဢၼ်မၼ်းၵေႃႇတႅၼ်ႁဵတ်းၽၢႆၼမ်ႉၼွင်လႄႈၶုတ်းႁွင်ႈဢဝ်ၼမ်ႉသႂ်ႇၶဝ်ႈၼႂ်းဝဵင်းၸိူဝ်းၼၼ်ႉၸိုင်၊တႅမ်ႈမၢႆဝႆႉၵႃႈၼႂ်း ပိုၼ်းၶုၼ်ႁေႃၶမ်းမိူင်းယုတႃႉ၊ ဢေႃႈ။-
ႁေႇၸၵိ၊ ၼွၼ်းၽႄးယဝ်ႉလႄႈလုၵ်ႈၸၢႆးမၼ်း မၼႃႇသေႇ၊ သိုပ်ႇၼင်ႈႁၢင်ႈၼင်ႈႁေႃဢေႃႈ။
မၼႃႇသေႇ၊ ၼၼ်ႉမိူဝ်ႈဢၼ်မၼ်းၸႃႉၼင်ႈႁၢင်ႈၼင်ႈႁေႃမိူင်း ယုတႃႉ၊ ၼၼ်ႉၸိုင်၊ဢသၢၵ်ႈမၼ်းလႆႈသိပ်းသွင်ပီလႄႈဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရုသလႅမ်ႇ၊ ႁႃႈသိပ်းႁႃႈပီဢေႃႈ။ မႄႈၸဝ်ႈၸမ်ႉ၊ပဵၼ် ႁိပ်ႉသၽႃႉ၊ ဢေႃႈ။-
မၼ်းႁဵတ်းတုၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ႁဵတ်းၸွမ်းထုင်းၸၢမ်ႇဢၼ်လီႁင်ႈဢဵတ်ႇသဵတ်ႇၵူၼ်းမဵဝ်းဢၼ် ထႃႇဝရႃႉၽြႃး၊ ႁေႃႈဢွၵ်ႇပႅတ်ႈသေၵႃႈတီႈၽၢႆႇၼႃႈၵူၼ်းမဵဝ်း ဢိသရေး၊ တင်းလၢႆၼၼ်ႉဢေႃႈ။-
မၼ်းၶိုၼ်းမႄးၵုမ်းမႄးႁဵတ်းထႃႇၼႃႉတီႈဝႆႈၽြႃးၶဝ်ၸိူဝ်းဢၼ်ဢမ်ႇယုမ်ႇမၢတ်ႈ ထႃႇဝရႃႉၽြႃး၊ ၸိူဝ်းဢၼ်ပေႃႈမၼ်း ႁေႇၸၵိ၊ ယႃႉပႅတ်ႈၼၼ်ႉသေယဝ်ႉ၊မၼ်းတႄႇႁဵတ်းၶဵင်ႇတၢင်းလူႇပုၼ်ႈဢၼ်တၵ်းဝႆႈ ၽြႃးပႃႇလႃႉ၊ ဢိၵ်ႇတင်းသဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ မိူၼ်ၸိူဝ်ႉၼင်ႇၶုၼ်ႁေႃၶမ်း ဢႃႇႁပ်ႉ၊ မိူင်း ဢိသရေး၊ လႂ် ႁဵတ်းဝၢတ်ႈၵူဝ်းၵႂၢႆႇတီႈၶိူင်ႈပိူင်ၵၢင်ႁၢဝ်ၵႃႈမီးၼၼ်ႉဢေႃႈ။-
မၼ်းတႄႇႁဵတ်းၶဵင်ႇတၢင်းလူႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈတီႈဢၼ်မၼ်းၸဝ်ႈမီးဢမိင်ႉဝႆႉလႄႈဝႃႈ၊ “ၼႃႇမႃႉၸိုဝ်ႈသဵင်ၵဝ်တၵ်းလႆႈတႄႇယူႇၵႃႈၼႂ်းဝဵင်း ယေႇရုသလႅမ်ႇ၊ သေႇသေႇဢေႃႈ၊” ဝႃႈၼင်ႇၼႆဢေႃႈ။-
မၼ်းယင်းႁဵတ်းၶဵင်ႇတၢင်းလူႇတင်းလၢႆၵႃႈတီႈပၢင်ႇဝၢင်းၵျွင်းပိၵ်ႈမၢၼ်ႇၸဝ်ႈတင်းသွင်တီႈၼၼ်ႉပုၼ်ႈဢၼ်တၵ်းဝႆႈလၢဝ်ၵၢင်ႁၢဝ်တင်းလၢႆၼၼ်ႉဢေႃႈ။-
မၼ်းဢဝ်လုၵ်ႈၸၢႆးမၼ်းတုတ်ႇၽႆးႁႂ်ႈပဵၼ်ၶိူင်ႈတၢင်းလူႇဢေႃႈ။ မၼ်းၸၢင်ႈတူၺ်းပေႇတၢင်ႇၵႃႇလႃးလႄႈႁဵတ်းၸွမ်းထုင်းၸၢမ်ႇမႄႈမူတ်ႉမႄႈၽီလႂ်ဢေႃႈ။ မၼ်းႁဵတ်းတုၸရိူၵ်ႈၼမ်ၼႃႇသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ သေယဝ်ႉ၊ပဵၼ်တၢင်းဢၼ်တိုၵ်းယူင်းတေႃးသႃႉမၼ်းၸဝ်ႈဢေႃႈ။-
မၼ်းၶွၵ်းႁဵတ်းသဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ ၵႃႈၼႂ်းၵျွင်းပိၵ်ႈမၢၼ်ႇၸဝ်ႈဢေႃႈ။ တီႈထႃႇၼႃႉဢၼ် ထႃႇဝရႃႉၽြႃး၊ မီးဢမိင်ႉဝႆႉတီႈ တႃႇဝိတ်ႈ၊ တင်းလုၵ်ႈၸၢႆးမၼ်း သေႃးလမုၼ်ႇ၊ လႄႈဝႃႈ၊ “ၵႃႈတီႈၼႂ်းဝဵင်း ယေႇရုသလႅမ်ႇ၊ ၼႂ်းၵျွင်းပိၵ်ႈမၢၼ်ႇၸဝ်ႈၼႆႉပဵၼ်ထႃႇၼႃႉတီႈဢၼ်ၵဝ်လိူၵ်ႈဢဝ်သေၵႃႈၼႂ်းသိုင်ႇၼႂ်းတိူင်း ဢိသရေး၊ သိပ်းသွင်ဢိူင်ႇၼႆႉႁႂ်ႈလႆႈပဵၼ်ထႃႇၼႃႉတီႈဢၼ်ဝႆႈ ထႃႇဝရႃႉၽြႃး၊ သူႇလဵဝ်ပႃးလဵဝ်ၵူၺ်းတႃႉ။-
ပေႃးၵူၼ်းမဵဝ်း ဢိသရေး၊ တင်းလၢႆပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၵဝ်တင်းသဵင်ႈတင်းလူင်လႄႈၵမ်ၵျၢင်ႉၸွမ်းၼင်ႇထုင်းတြႃးဢၼ်ၵဝ်ပၼ်ဝႆႉတီႈၶႃႈၵဝ် မူဝ်းသေႇ၊ ၼၼ်ႉၸိုင်၊ၵဝ်တၵ်းဢမ်ႇႁႂ်ႈၶဝ်လႆႈၶၢမ်ႇတၢင်းဢၼ်ႁေႃႈဢွၵ်ႇသေၵႃႈၼႂ်းမိူင်းဢၼ်ၵဝ်ပၼ်ဝႆႉတီႈပူႇမွၼ်ႇၶဝ်ၼၼ်ႉလႃးလႃး၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊ၵူၼ်းမဵဝ်း ယုတႃႉ၊ တင်းလၢႆဢမ်ႇထွမ်ႇဢမ်ႇဢဝ်ၵႂၢမ်းမၼ်းၸဝ်ႈ။ မၼႃႇသေႇ၊ ဢွၼ်ၶဝ်ႁဵတ်းတုၸရိူၵ်ႈဢၼ်ယဵင်ႈၶႅၼ်းႁၢႆႉၼႃႇသေတုၸရိူၵ်ႈၵူၼ်းမဵဝ်းဢၼ် ထႃႇဝရႃႉၽြႃး၊ ႁေႃႈဢွၵ်ႇပႅတ်ႈသေၵႃႈၼႂ်းမိူင်းၼၼ်ႉၸိူဝ်းၼၼ်ႉဢေႃႈ။
ပိူဝ်ႈၼႆလႄႈ ထႃႇဝရႃႉၽြႃး၊ မီးဢမိင်ႉတီႈၶႃႈမၼ်းၸဝ်ႈပရေႃးၽႅတ်ႈ တင်းလၢႆလႄႈဝႃႈၸမ်ႉ၊-
“ၶုၼ်ႁေႃၶမ်း မၼႃႇသေႇ၊ ၵမ်ၵျၢင်ႉတၢင်းဢၼ်လီႁင်ႈဢဵတ်ႇသဵတ်ႇၸိူဝ်းၼၼ်ႉလႄႈႁဵတ်းတုၸရိူၵ်ႈလိူဝ်တွၼ်းၼႃႇသေၵူၼ်းမဵဝ်း ၶႃႇၼၼိ၊ တင်းလၢႆႁဵတ်းၼၼ်ႉသေယဝ်ႉ၊ဢဝ်တင်းႁုၼ်ႇႁၢင်ႈသၢင်းထုမၼ်းႁဵတ်းႁႂ်ႈၵူၼ်းမဵဝ်း ယုတႃႉ၊ တင်းလၢႆၽိတ်းပိူင်ႈယဝ်ႉ။-
ပိူဝ်ႈၼႆလႄႈၵဝ်၊ ထႃႇဝရႃႉၽြႃး၊ၽြႃးပဵၼ်ၸဝ်ႈ၊ ၵူၼ်းမဵဝ်း ဢိသရေး၊ ၼႆႉတၵ်းႁႂ်ႈၽေးဢုပၢတ်ႈတူၵ်းႁွတ်ႈၵႃႈၼိူဝ်ဝဵင်း ယေႇရုသလႅမ်ႇ၊ တင်းမိူင်း ယုတႃႉ၊ ႁႂ်ႈႁူၶဝ်ၸိူဝ်းဢၼ်လႆႈငိၼ်းၼၼ်ႉထၢၼ်ႈပေႃးၶူမ်းဢေႃႈ။-
ၵဝ်တၵ်းၶဵင်ႈမႆမီႈၵႃႈၼိူဝ်ဝဵင်း ယေႇရုသလႅမ်ႇ၊ ၸိူဝ်ႉၼင်ႇၵဝ်ၶဵင်ႈသႂ်ႇၵႃႈၼိူဝ်ဝဵင်း သမႃႇရိ၊ ၼၼ်ႉ၊ဢိၵ်ႇတင်းယွၼ်ႇၸိူၵ်ႈမၢၵ်ႇလုၵ်ႈယွၼ်ႇၸိူဝ်ႉၼင်ႇဢၼ်ယွၼ်ႇသႂ်ႇတီႈမဵဝ်းၸိူဝ်ႉၶိူဝ်း ဢႃႇႁပ်ႉ၊ ၼၼ်ႉဢေႃႈ။ ၵဝ်တၵ်းပတ်းၽဵဝ်ႈပႅတ်ႈၵူၼ်းဝဵင်း ယေႇရုသလႅမ်ႇ၊ ၵဵင်ႈၵဵင်ႈမိူၼ်ၸိူဝ်ႉၼင်ႇဢၼ်လၢင်ႉဝၢၼ်ႇလႄႈၸဵတ်ႉသေယဝ်ႉၶွမ်ႈဝႆႉၼၼ်ႉဢေႃႈ။-
ၵဝ်တၵ်းၸုၼ်ႉပႅတ်ႈၵူၼ်းၸိူဝ်းဢၼ်ဢသၢၵ်ႈယင်းလိပ်းယူႇတင်းလၢႆလႄႈဢၢပ်ႈပၼ်ၵႃႈၼႂ်းမိုဝ်းရၢၼ်ႇသူႇၶဝ်တင်းလၢႆၸိူဝ်းဢၼ်တၵ်းပႄႉၼႅင်ႇၶဝ်လႄႈတဵၵ်းငႅၼ်းၶဝ်ၼၼ်ႉဢေႃႈ။-
ၵဝ်တၵ်းႁဵတ်းလွင်ႈတၢင်းၼႆႉတီႈၵူၼ်းတင်းလၢႆၵွပ်ႈပိူဝ်ႈဢၼ်ၶဝ်ႁဵတ်းတုၸရိူၵ်ႈသိုဝ်ႈၼႃႈတႂ်ႈတႃၵဝ်လႄႈတိုၵ်းယူင်းတေႃးသႃႉၵဝ်ၸႃႉၸဵမ်မိုဝ်ႉဝၼ်းဢၼ်ပူႇမွၼ်ႇၶဝ်ဢွၵ်ႇမိူင်း ဢေးၵျိပ်ႉ၊ မႃးတေႃႇထိုင်ႁွတ်ႈဝၼ်းမိူဝ်ႈၼႆႉၼၼ်ႉဢေႃႈ၊” ဝႃႈၼင်ႇၼႆဢေႃႈ။
မၼႃႇသေႇ၊ ၼၼ်ႉၼွၵ်ႈသေတၢင်းဢၼ်မၼ်းဢွၼ်ႁူဝ်ၵူၼ်းမဵဝ်း ယုတႃႉ၊ ဝႆႈသႃႁုၼ်ႇႁၢင်ႈသၢင်းထုလႄႈႁႂ်ႈၵူၼ်းမဵဝ်း ယုတႃႉ၊ ၽိတ်းပိူင်ႈၼၼ်ႉသေယဝ်ႉ၊မၼ်းယင်းဢဝ်တၢႆၶဝ်ၸိူဝ်းဢၼ်ဢမ်ႇမီးဢပျတ်ႈတင်းလၢႆ၊တေႃႇထိုင်ႁွတ်ႈလိူတ်ႈထၢၼ်ႈပေႃးလႆၸွမ်းသဵၼ်ႈတၢင်းဝဵင်း ယေႇရုသလႅမ်ႇ၊ တင်းလၢႆၵႂႃႇဢေႃႈ။
လွင်ႈတၢင်းၵႃႈဢၼ် မၼႃႇသေႇ၊ ႁဵတ်းၵူႈၸိူဝ်ႉၵူႈပိူင်ဢိၵ်ႇတင်းဢပျတ်ႈဢၼ်မၼ်းၽိတ်းပိူင်ႈၸိူဝ်းၼၼ်ႉတႅမ်ႈမၢႆဝႆႉၵႃႈၼႂ်း လိၵ်ႈပိုၼ်းၶုၼ်ႁေႃၶမ်းမိူင်းယုတႃႉ၊ ဢေႃႈ။-
မၼႃႇသေႇ၊ ၼွၼ်းၽႄးယဝ်ႉလႄႈဢဝ်သၢင်းၵျူဝ်ႇဝႆႉၵႃႈၼႂ်းၶုမ်ပႃႇႁဵဝ်ႈသူၼ်ဢူးယဵၼ်ႇႁေႃၶမ်းဢၼ်ဝႃႈ၊သူၼ်ဢူးယဵၼ်ႇ ဢေႃႇၸႃႉ၊ ၼၼ်ႉသေယဝ်ႉ၊လုၵ်ႈၸၢႆးမၼ်း ဢႃႇမုၼ်ႇ၊ သိုပ်ႇၼင်ႈႁၢင်ႈၼင်ႈႁေႃဢေႃႈ။
ဢႃႇမုၼ်ႇ၊ ၼၼ်ႉမိူဝ်ႈဢၼ်မၼ်းၸႃႉပဵၼ်ၶုၼ်ႁေႃၶမ်းမိူင်း ယုတႃႉ၊ မႃးၼၼ်ႉဢသၢၵ်ႈမၼ်းလႆႈသၢဝ်းသွင်ပီလႄႈဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရုသလႅမ်ႇ၊ သွင်ပီဢေႃႈ။ မႄႈၸဝ်ႈၸမ်ႉ၊ပဵၼ် မေႇသုလမိတ်ႉ၊ လုၵ်ႈယိင်း ႁႃႇရုတ်ႉ၊ ၵူၼ်းယိင်းမဵဝ်း ယုတ်ႉပႃႇ၊ ဢေႃႈ။-
မၼ်းႁဵတ်းတုၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ၸိူဝ်ႉၼင်ႇပေႃႈၸဝ်ႈမၼ်း မၼႃႇသေႇ၊ ဢေႃႈ။-
မၼ်းၵမ်ၵျၢင်ႉၸွမ်းသဵၼ်ႈတၢင်းပေႃႈၸဝ်ႈမၼ်းလႄႈဝႆႈသႃႁုၼ်ႇႁၢင်ႈသၢင်းထုဢၼ်ပေႃႈၸဝ်ႈမၼ်းဝႆႈၼၼ်ႉဢေႃႈ။-
မၼ်းၸုၼ်ႉပႅတ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇမွၼ်ႇမၼ်းၼၼ်ႉသေလႄႈထဵင်ပႅတ်ႈပိင်းၺၢပ်ႈတြႃး ထႃႇဝရႃႉၽြႃး၊ ဢေႃႈ။
ၶုၼ်ဢၼ်ပွင်ၵၢၼ်တင်းလၢႆလုၵ်ႉၽိုၼ်ႉ ဢႃႇမုၼ်ႇ၊ လႄႈဢဝ်မၼ်းတၢႆၵႃႈၼႂ်းႁေႃၶမ်းဢေႃႈ။-
ၵူၼ်းဝၢၼ်ႈၵူၼ်းမိူင်း ယုတႃႉ၊ တင်းလၢႆဢဝ်ၶဝ်ၸိူဝ်းဢၼ်လုၵ်ႉၽိုၼ်ႉ ဢႃႇမုၼ်ႇ၊ ၼၼ်ႉတၢႆသေယဝ်ႉ၊ဢဝ်လုၵ်ႈၸၢႆးၸဝ်ႈ ယူဝ်းသိယႃႉ၊ ၼၼ်ႉသိုပ်ႇၼင်ႈႁၢင်ႈၼင်ႈႁေႃဢေႃႈ။
လွင်ႈတၢင်းၵႃႈဢၼ် ဢႃႇမုၼ်ႇ၊ ႁဵတ်းၵူႈၸိူဝ်ႉၵူႈပိူင်ၼၼ်ႉတႅမ်ႈမၢႆဝႆႉၵႃႈၼႂ်း လိၵ်ႈပိုၼ်းၶုၼ်ႁေႃၶမ်းမိူင်းယုတႃႉ၊ ဢေႃႈ။-
ဢႃႇမုၼ်ႇ၊ ၼၼ်ႉလႆႈဢဝ်သၢင်းၵျူဝ်ႇၵႃႈၼႂ်းၶုမ်ပႃႇႁဵဝ်ႈၵႃႈၼႂ်းသူၼ်ဢူးယဵၼ်ႇ ဢေႃႇၸႃႉ၊ သေယဝ်ႉ၊လုၵ်ႈၸၢႆးမၼ်း ယူဝ်းသိယႃႉ၊ သိုပ်ႇၼင်ႈႁၢင်ႈၼင်ႈႁေႃဢေႃႈ။
ယူဝ်းသိယႃႉ၊ ၼၼ်ႉမိူဝ်ႈဢၼ်မၼ်းပဵၼ်ၶုၼ်ႁေႃၶမ်းမိူင်း ယုတႃႉ၊ မႃးၼၼ်ႉဢသၢၵ်ႈမၼ်းလႆႈပႅတ်ႇပီလႄႈဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရုသလႅမ်ႇ၊ သၢမ်သိပ်းဢဵတ်းပီဢေႃႈ။ ၸိုဝ်ႈသဵင်မႄႈၸဝ်ႈၸမ်ႉ၊ပဵၼ် ယေႇတိတႃႉ၊ လုၵ်ႈယိင်း ဢတႃႇယႃႉ၊ ၵူၼ်းဝဵင်း ပေႃႇၸၵတ်ႉ၊ ဢေႃႈ။-
ယူဝ်းသိယႃႉ၊ ၵမ်ၵျၢင်ႉတၢင်းဢၼ်လီဢၼ်ငၢမ်းသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ လႄႈၵမ်ၵျၢင်ႉၸွမ်းသဵၼ်ႈတၢင်းပူႇမွၼ်ႇမၼ်း တႃႇဝိတ်ႈ၊ သေယဝ်ႉ၊ပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၽြႃးပဵၼ်ၸဝ်ႈသိူဝ်ႈသိူဝ်ႈယူဝ်းယူဝ်းဢေႃႈ။
ၼႂ်းပီဢၼ် ယူဝ်းသိယႃႉ၊ ၸၢမ်ႇႁၢင်ႈၸၢမ်ႇႁေႃလႆႈသိပ်းပႅတ်ႇပီၼၼ်ႉမၼ်းပွႆႇၸႂ်ႉၸရေးၸဝ်ႈ သႃႇၽၢၼ်ႇ၊ လုၵ်ႈၸၢႆး ဢႃႇၸႃႇၸိ၊ လႄႈပဵၼ်လၢၼ်ၸၢႆး မေႇသုလမ်ႇ၊ ၼၼ်ႉၵႂႃႇတီႈၵျွင်းပိၵ်ႈမၢၼ်ႇၸဝ်ႈလႄႈသင်ႇလၢတ်ႈဝႃႈ၊-
“မႂ်းၶဝ်ႈၸူးတီႈယဵၸ်ႈပရေႃးႁဵၵ်ႈ လူင် ႁိလၶိ၊ လႄႈၸႂ်ႉႁႂ်ႈမၼ်းၼပ်ႉဢၢၼ်ႇငိုၼ်းဢၼ်ယဵၸ်ႈပရေႃးႁဵၵ်ႈၸိူဝ်းဢၼ်တူၵ်းၼႃႈၵၢၼ်ၵႃႈတီႈၵျွင်းပိၵ်ႈမၢၼ်ႇၸဝ်ႈႁပ်ႉတုင်းဢဝ်ၵႃႈတီႈမိုဝ်းၵူၼ်းတင်းလၢႆၼၼ်ႉတႃႉ။-
မွၵ်ႇလၢတ်ႈႁႂ်ႈမၼ်းဢဝ်ငိုၼ်းၸိူဝ်းၼၼ်ႉဢၢပ်ႈပၼ်ၵႃႈၼႂ်းမိုဝ်းၶဝ်ၸိူဝ်းဢၼ်ႁၢပ်ႇထၢမ်းၼႃႈၵၢၼ်တၢင်းဢၼ်မႄးၵုမ်းမႄးႁဵတ်းၵျွင်းပိၵ်ႈမၢၼ်ႇၸဝ်ႈၼၼ်ႉတႃႉ။-
ၶဝ်ၸိူဝ်းၼၼ်ႉတၵ်းလႆႈၽႄမႅင်ႇပၼ်ၵႃႈႁႅင်းၵေႃႉဢၼ်ပဵၼ်မေႃတိၼ်မေႃမိုဝ်းလႂ်၊ၸၢင်ႈမႆႉလႂ်၊ၵူၼ်းၵမ်ဢၢင်းၵတေႇလႂ်၊ဢိၵ်ႇတင်းႁႂ်ႈလႆႈသိုဝ်ႉဢဝ်မႆႉၶိုဝ်ႇ၊မႆႉပႄ၊မႆႉတူင်၊မႆႉၵွၼ်လႂ်၊ဢိၵ်ႇတင်းမၢၵ်ႇႁိၼ်ဢၼ်သပ်းယဝ်ႉထၢၵ်ႇယဝ်ႉလႂ်၊ပုၼ်ႈဢၼ်တၵ်းမႄးၵုမ်းမႄးႁဵတ်းတီႈလုတီႈပင်းၵျွင်းပိၵ်ႈမၢၼ်ႇၸဝ်ႈၸိူဝ်းၼၼ်ႉဢေႃႈ။-
ၶဝ်ၸိူဝ်းဢၼ်ႁၢပ်ႇထၢမ်းၼႃႈၵၢၼ်ၼၼ်ႉၸမ်ႉ၊ၶဝ်မီးသဵတ်ႈၸႃႇလူၺ်ႈလွင်ႈငိုၼ်းၼၼ်ႉလီလီငၢမ်းငၢမ်းယူႇလႄႈဢမ်ႇလူဝ်ႇၸႅတ်ႈသေးၸရၢင်းငိုၼ်းတီႈၶဝ်ၼၼ်ႉ၊” ဝႃႈၼင်ႇၼႆဢေႃႈ။
မိူဝ်ႈဢၼ် သႃႇၽၢၼ်ႇ၊ ၵႂႃႇမွၵ်ႇလၢတ်ႈတီႈ ႁလၶိ၊ ၼၼ်ႉ၊ ႁိလၶိ၊ လၢတ်ႈလႄႈဝႃႈ၊ “ၵဝ်ထူပ်းႁၼ်ပပ်ႉၵျၢမ်းလိၵ်ႈပိင်းၺၢပ်ႈတြႃးၵႃႈၼႂ်းၵျွင်းပိၵ်ႈမၢၼ်ႇၸဝ်ႈဢေႃႈ၊” ဝႃႈၼင်ႇၼႆဢေႃႈ။ ႁိလၶိ၊ ဢဝ်ပပ်ႉၵျၢမ်းလိၵ်ႈၼၼ်ႉပၼ်တီႈ သႃႇၽၢၼ်ႇ၊ လႄႈမၼ်းၽတ်းဢၢၼ်ႇဢေႃႈ။-
ၵမ်းၼၼ်ႉ မၼ်းပွၵ်ႈၵႂႃႇမွၵ်ႇလၢတ်ႈတီႈၶုၼ်ႁေႃၶမ်းလႄႈဝႃႈ၊ “ၶႃႈၸဝ်ႈႁဝ်းၶဝ်ဢဝ်ငိုၼ်းဢၼ်မီးၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉၵႂႃႇဢၢပ်ႈပၼ်ၵႃႈၼႂ်းမိုဝ်းၶဝ်ၸိူဝ်းဢၼ်ႁၢပ်ႇထၢမ်းၼႃႈၵၢၼ်ဢၼ်မႄးၵုမ်းမႄးႁဵတ်းၼၼ်ႉတီႈၶႃႈယဝ်ႉ၊” ဝႃႈၼင်ႇၼႆဢေႃႈ။-
ၵမ်းၼၼ်ႉမၼ်းလဝ်ႈလၢတ်ႈလႄႈဝႃႈ၊ “ယဵၸ်ႈပရေႃးႁဵၵ်ႈ ႁိလၶိ၊ ဢဝ်ပပ်ႉၵျၢမ်းလိၵ်ႈတြႃးၼႆႉပၼ်တီႈၶႃႈၸဝ်ႈတီႈၶႃႈဢေႃႈ၊” ဝႃႈၼင်ႇၼႆသေယဝ်ႉ၊ဢဝ်ၽတ်းဢၢၼ်ႇၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။
ၶုၼ်ႁေႃၶမ်းငိၼ်းၵႂၢမ်းၵျၢမ်းလိၵ်ႈၼၼ်ႉသေယဝ်ႉ၊မီးတၢင်းဢၼ်မႆႈၸႂ်ၼႃႇ၊သိၵ်ႇၶူဝ်းၼုင်ႈမၼ်းသေလႄႈ၊-
ပူင်ဢမိင်ႉတီႈယဵၸ်ႈပရေႃးႁဵၵ်ႈ ႁိလၶိ၊ဢႁိၵမ်ႇ၊ လုၵ်ႈၸၢႆး သႃႇၽၢၼ်ႇ၊ဢႃႇၶပေႃႇ၊ လုၵ်ႈၸၢႆး မိၵ်ႉၶယႃႉ၊သႃႇၽၢၼ်ႇ၊ ၸရေးၸဝ်ႈ၊ဢိၵ်ႇတင်း ဢသႃႇယႃႉ၊ ၽူႈတမ်းၸႂ်ၸဝ်ႈၸိူဝ်းၼၼ်ႉလႄႈဝႃႈ၊-
“သူဢွၼ်ၵၼ်ၵႂႃႇလႄႈလဝ်ႈထၢမ်တီႈ ထႃႇဝရႃႉၽြႃး၊ လူၺ်ႈလွင်ႈၵႂၢမ်းၵျၢမ်းလိၵ်ႈၼႆႉပုၼ်ႈၵဝ်၊ပုၼ်ႈၵူၼ်းတင်းလၢႆ၊ပုၼ်ႈၵူၼ်းမဵဝ်း ယုတႃႉ၊ တင်းသဵင်ႈတင်းလူင်တႃႉ။ ၵွပ်ႈပိူဝ်ႈဢၼ်ပူႇမွၼ်ႇႁဝ်းတင်းလၢႆဢမ်ႇၵမ်ၵျၢင်ႉၸွမ်းၵႃႈၼင်ႇဢၼ်ၵႂၢမ်းၵျၢမ်းလိၵ်ႈသင်ႇလၢတ်ႈႁႂ်ႈၵမ်ၵျၢင်ႉၸွမ်းၼၼ်ႉလႄႈ ထႃႇဝရႃႉၽြႃး၊ ဢွၵ်ႇတေႃးသႃႉတေႃႇႁဝ်းယဝ်ႉ၊” ဝႃႈၼင်ႇၼႆဢေႃႈ။
ႁိလၶိ၊ဢႁိၵမ်ႇ၊ဢႃႇၶပေႃႇ၊သႃႇၽၢၼ်ႇ၊ ဢိၵ်ႇတင်း ဢသႃႇယႃႉ၊ ၸိူဝ်းၼၼ်ႉဢွၼ်ၵၼ်ၵႂႃႇႁႂ်ႈလႆႈတွင်ႈထၢမ်တီႈမႄႈယိင်းၵေႃႉၼိုင်ႈဢၼ်ၸိုဝ်ႈ ႁုလတႃႉ၊ ပရေႃးၽႅတ်ႈ ဢၼ်ယူႇၵႃႈၼႂ်းဝဵင်း ယေႇရုသလႅမ်ႇ၊ ထၢပ်ႈၼွၵ်ႈၼၼ်ႉဢေႃႈ။ (ၽူဝ်မၼ်းၸမ်ႉ၊ပဵၼ် သႃႇလုမ်ႇ၊ ဝုၼ်ႇဢၼ်ပႂ်ႉလူပႂ်ႉထိင်းၶူဝ်းၼုင်ႈၸဝ်ႈ၊ဢၼ်ပဵၼ်လုၵ်ႈၸၢႆး တိၵဝႃႉ၊ လႄႈပဵၼ်လၢၼ်ၸၢႆး ႁႃႇရႁတ်ႉ၊ ၼၼ်ႉဢေႃႈ။) ၶဝ်မွၵ်ႇလၢတ်ႈၼႄလွင်ႈဢၼ်ပဵၼ်မႃးၼၼ်ႉတီႈမႄႈယိင်းၼၼ်ႉလႄႈ၊-
မၼ်းၵေႃႈၶိုၼ်းလၢတ်ႈတီႈၶဝ်လႄႈဝႃႈ၊ “သူၶိုၼ်းမိူဝ်းလၢတ်ႈတီႈၶုၼ်ႁေႃၶမ်းၸိူဝ်ႉၼင်ႇၼႆတႃႉ။-
ထႃႇဝရႃႉၽြႃး၊ မီးဢမိင်ႉလႄႈဝႃႈ၊ ‘ၵဝ်တၵ်းပၼ်တၢမ်ႇတီႈဝဵင်း ယေႇရုသလႅမ်ႇ၊ ဢိၵ်ႇတင်းတီႈၵူၼ်းဝၢၼ်ႈၵူၼ်းဝဵင်းမၼ်းၵႃႈမီးတင်းသဵင်ႈတင်းလူင်မႅၼ်ႈၸွမ်းၵႃႈၼင်ႇဢၼ်ဝႃႈမႃးၵႃႈၼႂ်းၵႂၢမ်းၵျၢမ်းလိၵ်ႈဢၼ်ၶုၼ်ႁေႃၶမ်းၽတ်းဢၢၼ်ႇတူၺ်းယဝ်ႉၼၼ်ႉဢေႃႈ။-
ၶဝ်ဢွၼ်ၵၼ်ၸုၼ်ႉပႅတ်ႈၵဝ်၊ႁဵတ်းတၢင်းလူႇတီႈၽြႃးတၢင်ႇသူႇတၢင်ႇပႃးတင်းလၢႆသေယဝ်ႉ၊ဢဝ်လွင်ႈတၢင်းဢၼ်ၶဝ်ႁဵတ်းၸိူဝ်းၼၼ်ႉႁဵတ်းႁႂ်ႈတေႃးသႃႉၵဝ်ဢွၵ်ႇယဝ်ႉ။ တေႃးသႃႉၵဝ်မႆႈႁွၼ်ႉၼႃႇၵႃႈၼိူဝ်ဝဵင်း ယေႇရုသလႅမ်ႇ၊ ယဝ်ႉလႄႈမၼ်းဢမ်ႇထၢတ်ႇဢမ်ႇယဵၼ်လႆႈယဝ်ႉ။-
တီႈတူဝ်ၶုၼ်ႁေႃၶမ်းၼၼ်ႉၸမ်ႉ၊ၵဝ် ထႃႇဝရႃႉၽြႃး၊ၽြႃးပဵၼ်ၸဝ်ႈ၊ မီးဢမိင်ႉလႄႈဝႃႈ၊မႂ်းထွမ်ႇဢဝ်ၵႂၢမ်းၵျၢမ်းလိၵ်ႈၼႆႉသေယဝ်ႉ၊-
ၶုၵ်းၸႂ်လႆႈမႆႈၸႂ်ဢပျတ်ႈၶိုၼ်းလႄႈၶျႃးတူဝ်ၸဝ်ႈၵဝ်ႇတူၵ်းတႅမ်ႇၵႃႈတီႈၽၢႆႇၼႃႈၵဝ်၊သိၵ်ႇၶူဝ်းၼုင်ႈမႂ်းသေလႄႈႁွင်ႉႁႆႈယူႇယၢမ်းမိူဝ်ႈဢၼ်မႂ်းငိၼ်းၵႂၢမ်းဢၼ်ၵဝ်လွၵ်ႇငိုတ်ႈႁႂ်ႈလႆႈပၼ်တၢမ်ႇတီႈဝဵင်း ယေႇရုသလႅမ်ႇ၊ ဢိၵ်ႇတင်းတီႈၵူၼ်းဝၢၼ်ႈၵူၼ်းမိူင်းမၼ်းၼၼ်ႉလႄႈဝႃႈ၊ၶဝ်ၸိူဝ်းၼၼ်ႉတၵ်းလႆႈပဵၼ်တီႈဢၼ်ယႃႉပႅတ်ႈ၊ဢိၵ်ႇတင်းတီႈဢၼ်ၵိၼ်ႇလႃႇဢေႃႈ၊ဝႃႈၼႆၼၼ်ႉယဝ်ႉ။ ၵဝ်လႆႈငိၼ်းၵႂၢမ်းသူးတွင်းမႂ်းယဝ်ႉ။-
ပိူဝ်ႈၼႆလႄႈၽေးတၢမ်ႇဢၼ်တၵ်းႁႂ်ႈတူၵ်းႁွတ်ႈၵႃႈၼိူဝ်ဝဵင်း ယေႇရုသလႅမ်ႇ၊ ၼၼ်ႉၸူဝ်ႈဢၼ်မႂ်းဢမ်ႇပႆႇတၢႆၸိုင်၊ၵဝ်တၵ်းဢမ်ႇပႆႇႁႂ်ႈပဵၼ်။ ၵဝ်တၵ်းႁႂ်ႈမႂ်းလႆႈတၢႆၼိမ်ၼိမ်လီလီဢေႃႈ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။ ၶဝ်ၸိူဝ်းၼၼ်ႉဢွၼ်ၵၼ်ၶိုၼ်းမိူဝ်းလဝ်ႈလၢတ်ႈတီႈၶုၼ်ႁေႃၶမ်းဢေႃႈ။
ၶုၼ်ႁေႃၶမ်း ယူဝ်းသိယႃႉ၊ ႁွင်ႉဢဝ်ၵႃႈဢၼ်ပဵၼ်ၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းမိူင်း ယုတႃႉ၊ ၼႂ်းဝဵင်း ယေႇရုသလႅမ်ႇ၊ တင်းသဵင်ႈတင်းလူင်မႃးသေယဝ်ႉ၊-
ၶဝ်ဢွၼ်ၵၼ်ၵႂႃႇၵႃႈတီႈၵျွင်းပိၵ်ႈမၢၼ်ႇၸဝ်ႈႁူမ်ႈလူၺ်ႈၵၼ်တင်းယဵၸ်ႈပရေႃးႁဵၵ်ႈ လႂ်၊ပရေႃးၽႅတ်ႈ လႂ်၊တင်းၵူၼ်းဝၢၼ်ႈၵူၼ်းမိူင်း ယုတႃႉ၊ ၸဵမ်လဵၵ်ႉၸဵမ်ယႂ်ႇတင်းမူတ်းဢေႃႈ။ ၼင်ႇၼၼ်လႄႈၶုၼ်ႁေႃၶမ်းၽတ်းဢၢၼ်ႇၵႂၢမ်းၵျၢမ်းလိၵ်ႈပတိၺိၺ်ႇတြႃး၊ဢၼ်လႆႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈမႃးၼၼ်ႉႁႂ်ႈၶဝ်လႆႈဢွၼ်ၵၼ်ထွမ်ႇငိၼ်းဢေႃႈ။-
ၶုၼ်ႁေႃၶမ်းသမ်ႉၸုၵ်းၵႃႈတီႈႁိမ်းသဝ်ၸဝ်ႈသေလႄႈႁဵတ်းပတိၺိၺ်ႇတီႈ ထႃႇဝရႃႉၽြႃး၊ လူၺ်ႈလွင်ႈဢၼ်မၼ်းတၵ်းထွမ်ႇဢဝ်ၵႂၢမ်းဢမိင်ႉမၼ်းၸဝ်ႈတၵ်းဢဝ်တင်းႁူဝ်ၸႂ်သဵင်ႈသဵင်ႈပႂ်ႉၵမ်ပႂ်ႉၸွမ်းထုင်းတြႃး၊ဢိၵ်ႇတင်းပိင်းၺၢပ်ႈတြႃးမၼ်းၸဝ်ႈၸိူဝ်းၼၼ်ႉသေလႄႈၵမ်ၵျၢင်ႉၸွမ်းၵႃႈၼင်ႇဢၼ်ၵပ်းၵၢႆႇလူၺ်ႈၵၼ်တင်းၵႂၢမ်းပတိၺိၺ်ႇဢၼ်ပႃးၼႂ်းၵႂၢမ်းၵျၢမ်းလိၵ်ႈၼႆႉၼၼ်ႉဢေႃႈ။ ၵူၼ်းၵႃႈမီးတင်းသဵင်ႈတင်းလူင်ၵေႃႈၽွမ်ႉၵၼ်ဝႆႉၵတိႁႂ်ႈလႆႈပႂ်ႉၵမ်ပႂ်ႉၸွမ်းၵႂၢမ်းပတိၺိၺ်ႇၸဝ်ႈဢေႃႈ။
လိုၼ်းၼၼ်ႉ၊ၶုၼ်ႁေႃၶမ်း ယူဝ်းသိယႃႉ၊ ပူင်ဢမိင်ႉတီႈယဵၸ်ႈပရေႃးႁဵၵ်ႈလူင် ႁိလၶိ၊ ဢိၵ်ႇတင်းယဵၸ်ႈပရေႃးႁဵၵ်ႈၸိူဝ်းဢၼ်ၵမ်ႉၵႅမ်မၼ်း၊ဢိၵ်ႇတင်းၵူၼ်းပႂ်ႉဢၼ်တူၵ်းၼႃႈၵၢၼ်ၵႃႈတီႈၽၵ်းတူၵျွင်းပိၵ်ႈမၢၼ်ႇၸဝ်ႈၸိူဝ်းၼၼ်ႉႁႂ်ႈၶဝ်ဢဝ်ၶိူင်ႈပိူင်ဢၼ်သုင်းဢၼ်တိုဝ်းၼႂ်းတၢင်းဢၼ်ႁဵတ်းဝၢတ်ႈတီႈ ၽြႃးပႃႇလႃႉ၊ လႂ်တီႈသဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ လႂ်၊တင်းၶိူင်ႈဝႆႈသႃလၢဝ်ၵၢင်ႁၢဝ်လႂ်၊တင်းသဵင်ႈတင်းလူင်ဢွၵ်ႇသေၵႃႈၼႂ်းၵျွင်းပိၵ်ႈမၢၼ်ႇၸဝ်ႈမႃးဢေႃႈ။ ၶုၼ်ႁေႃၶမ်းဢဝ်ၽႆးတုတ်ႇၶိူင်ႈပိူင်ၸိူဝ်းၼၼ်ႉၵႃႈၼွၵ်ႈဝဵင်းၵႃႈတီႈၵၢင်ပၢင်ႇ ၵေႇတရုၼ်ႇ၊ လႄႈဢဝ်တဝ်ႈမၼ်းၵႂႃႇၵႃႈတီႈဝဵင်း ပေႇသလႃႉ၊ ဢေႃႈ။-
ၶုၼ်ႁေႃၶမ်းသမ်ႉပူတ်းပႅတ်ႈဢရႃႇယဵၸ်ႈပရေႃးႁဵၵ်ႈၸိူဝ်းဢၼ်ၶုၼ်ႁေႃၶမ်း ယုတႃႉ၊ ၶဝ်ၶၢၼ်းဝႆႉႁႂ်ႈႁဵတ်းတၢင်းဢၼ်သၢၵ်ႈလူႇတီႈၶဵင်ႇတၢင်းလူႇၶဝ်ၸိူဝ်းဢၼ်ဢမ်ႇယုမ်ႇမၢတ်ႈ ထႃႇဝရႃႉၽြႃး၊ ၵႃႈၼႂ်းဝဵင်း ယုတႃႉ၊ တင်းလၢႆ၊ဢိၵ်ႇတင်းၵႃႈတီႈႁိမ်းဝဵင်း ယေႇရုသလႅမ်ႇ၊ ၸိူဝ်းၼၼ်ႉဢိၵ်ႇတင်းယဵၸ်ႈပရေႃးႁဵၵ်ႈၸိူဝ်းဢၼ်ႁဵတ်းတၢင်းဢၼ်သၢၵ်ႈလူႇတီႈၽြႃးပႃႇလႃႉလႂ်၊တီႈတႃဝၼ်းလႂ်၊တီႈလိူၼ်လႂ်၊တီႈၵျူဝ်ႇလႂ်၊တီႈလၢဝ်လႂ်ၸိူဝ်းၼၼ်ႉဢေႃႈ။-
ႁုၼ်ႇႁၢင်ႈသၢင်းထုၼၢင်းၽီ ဢႃႇသရႃႉ၊ ၼၼ်ႉၵေႃႈမၼ်းဢဝ်ဢွၵ်ႇသေၵႃႈၼႂ်းၵျွင်းပိၵ်ႈမၢၼ်ႇၸဝ်ႈသေယဝ်ႉ၊ဢဝ်ၵႂႃႇၵႃႈၼွၵ်ႈဝဵင်းၵႃႈတီႈၵၢင်ပၢင်ႇ ၵေႇတရုၼ်ႇ၊ လႄႈဢဝ်ၽႆးတုတ်ႇပႅတ်ႈ၊တွႆႇလႅဝ်တမ်လႅဝ်ပဵၼ်မုၼ်ႈပဵၼ်ၽွင်ယဝ်ႉၸင်ႇ၊ၸၢတ်ႇပိုၼ်ၽၢဝ်ႇသႂ်ႇၵႃႈၼိူဝ်ပႃႇႁဵဝ်ႈၶႃႈဝၢၼ်ႈၵူၼ်းမိူင်းတင်းလၢႆဢေႃႈ။-
လုၵ်းၼွၼ်းတီႈဢၼ်ၵူၼ်းၸၢႆးဢၼ်ပဵၼ်ပေႃႈမွၵ်ႇယႃႈ ၵျွင်းပိၵ်ႈမၢၼ်ႇၸဝ်ႈဢၼ်ယူႇသဝ်းဢၼ်မီးၵႃႈၼႂ်းၵျွင်းၸိူဝ်းၼၼ်ႉ၊ဢိၵ်ႇတင်းလုၵ်းၼွၼ်းမႄႈယိင်းတင်းလၢႆဢၼ်တေႃးၽႃႈၵင်ႈပုၼ်ႈၼၢင်းၽီ ဢႃႇသရႃႉ၊ ၸိူဝ်းၼၼ်ႉၵေႃႈမၼ်းယႃႉတူၵ်းပႅတ်ႈဢေႃႈ။-
မၼ်းႁွင်ႉဢဝ်ယဵၸ်ႈပရေႃးႁဵၵ်ႈ တင်းလၢႆၵႃႈၼႂ်းဝဵင်း ယုတႃႉ၊ ၸိူဝ်းၼၼ်ႉမႃးၵႃႈတီႈဝဵင်း ယေႇရုသလႅမ်ႇ၊ ဢေႃႈ။ မၼ်းႁႂ်ႈၶဵင်ႇတၢင်းလူႇတီႈဢၼ်ယဵၸ်ႈပရေႃးႁဵၵ်ႈၶဝ်ဢဝ်ၼၢမ်ႇသႃႇၽဝ်ၽႆးၸိူဝ်းၼၼ်ႉၵူဝ်ႈၵိူၵ်ႇၸွတ်ႇတူဝ်ႈၵႂႃႇတင်းဝၢၼ်ႈတၢင်းမိူင်းဢေႃႈ။ သမ်ႉၵိူၼ်ႇယႃႉပႅတ်ႈၶဵင်ႇၽီလူင်ႈၸဝ်ႈမိူင်း ဢၼ်မဵဝ်ႉဝုၼ်ႇ ယေႃးသု၊ တႄႇႁဵတ်းဝႆႉၽၢႆႇတၢင်းသၢႆႉၽၵ်းတူလူင်ဢၼ်ၶဝ်ႈဝဵင်းၼၼ်ႉဢေႃႈ။-
ယဵၸ်ႈပရေႃးႁဵၵ်ႈၸိူဝ်းၼၼ်ႉဢမ်ႇမီးဢၶႂၢင်ႉဢၼ်တၵ်းႁဵတ်းၼႃႈၵၢၼ်တၢင်းလူႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈလႄႈ၊မီးဢၶႂၢင်ႉဢၼ်လႆႈၵိၼ်ၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈလူၺ်ႈၵၼ်တင်းပီႈၼွင်ႉၶဝ်ၵူၺ်းဢေႃႈ။
ၶုၼ်ႁေႃၶမ်း ယူဝ်းသိယႃႉ၊ သမ်ႉႁႂ်ႈ တေႃးၽႅတ်ႉ၊ ဢၼ်ပဵၼ်ထႃႇၼႃႉတီႈဢၼ်ဝႆႈၽြႃးပုၼ်ႈၵူၼ်းၸိူဝ်းဢၼ်ဢမ်ႇၵူဝ်းၵႂၢႆႇ ထႃႇဝရႃႉၽြႃး၊ ဢၼ်မီးၵႃႈတီႈပၢင်ႇႁူၺ်ႈ ႁိၼ်ႇၼုမ်ႇ၊ ၼၼ်ႉၵူဝ်ႈၵိူၵ်ႇဢေႃႈ။ ၼင်ႇႁိုဝ်တေဢမ်ႇႁႂ်ႈၽူႈလႂ်ဢဝ်လုၵ်ႈၸၢႆးလုၵ်ႈယိင်းၶဝ်တုတ်ႇၽႆးလႄႈသၢၵ်ႈလူႇတီႈၽြႃး မူးလွၵ်ႉ၊ ၼၼ်ႉဢေႃႈ။-
မႃႉၸိူဝ်းဢၼ်ၶုၼ်ႁေႃၶမ်း ယုတႃႉ၊ တင်းလၢႆသၢၵ်ႈလူႇဝႆႉပုၼ်ႈဢၼ်တၵ်းဝႆႈတႃဝၼ်းၼၼ်ႉ၊မၼ်းဢဝ်ၶၢႆႉပႅတ်ႈသေလႄႈဢဝ်ၽႆးတုတ်ႇလေႃႉမႃႉသိုၵ်းၸိူဝ်းဢၼ်သုင်းၸႂ်ႉၼႂ်းတၢင်းဢၼ်ဝႆႈတႃဝၼ်းၼၼ်ႉပႅတ်ႈဢေႃႈ။ ႁုၼ်ႇႁၢင်ႈသၢင်းထုၸိူဝ်းၼၼ်ႉၶဝ်ၵဵပ်းဝႆႉၵႃႈတီႈပၢင်ႇဝၢင်းဢၼ်ယူႇႁိမ်းၽၵ်းတူၵျွင်းပိၵ်ႈမၢၼ်ႇၸဝ်ႈလႄႈဢမ်ႇၵႆၵၼ်တင်းႁိူၼ်း ၼႃႇႀၼ်ႇမေႇလႅၵ်ႉ၊ ၶုၼ်ဢၼ်ပႂ်ႉထိင်းဝၢင်းၸဝ်ႈၼၼ်ႉဢေႃႈ။-
ၶဵင်ႇတၢင်းလူႇၸိူဝ်းဢၼ်ၶုၼ်ႁေႃၶမ်း ယုတႃႉ၊ တင်းလၢႆတႄႇႁဵတ်းဝႆႉၵႃႈၼိူဝ်ၵုင်းၼိူဝ်ၸွမ်ႁေႃတိူၵ်ႈၶုၼ်ႁေႃၶမ်း ဢႃႇၶတ်ႉ၊ ဢိၵ်ႇတင်းၶဵင်ႇတၢင်းလူႇၸိူဝ်းဢၼ်ၶုၼ်ႁေႃၶမ်း မၼႃႇသေႇ၊ တႄႇႁဵတ်းဝႆႉၵႃႈၼႂ်းပၢင်ႇဝၢင်းၵျွင်းပိၵ်ႈမၢၼ်ႇၸဝ်ႈသွင်တီႈၼၼ်ႉၵေႃႈၶုၼ်ႁေႃၶမ်း ယူဝ်းသိယႃႉ၊ ၵိူၼ်ႇယႃႉပႅတ်ႈလႄႈတွႆႇလႅဝ်တမ်လႅဝ်ပဵၼ်မုၼ်ႈပဵၼ်ၽွင်ယဝ်ႉၸင်ႇ၊ပႅတ်ႈတူၵ်းသႂ်ႇၵႃႈၼႂ်းၼမ်ႉႁူၺ်ႈ ၵေႇတရုၼ်ႇ၊ ဢေႃႈ။-
ၶဵင်ႇတၢင်းလူႇၸိူဝ်းဢၼ်ၶုၼ်ႁေႃၶမ်း သေႃးလမုၼ်ႇ၊ တႄႇႁဵတ်းဝႆႉၽၢႆႇၼႃႈဝၼ်းဢွၵ်ႇဝဵင်း ယေႇရုသလႅမ်ႇ၊ ၵႃႈတီႈၽၢႆႇတၢင်းၸၢၼ်းလွႆဢၼ်မီးၸိုဝ်ႈဝႃႈ၊ လွႆတၢင်းဢၼ်ယႃႉလႅဝ်၊ ပုၼ်ႈဢၼ်တၵ်းဝႆႈႁုၼ်ႇႁၢင်ႈသၢင်းထုဢၼ်လီႁင်ႈဢဵတ်ႇသဵတ်ႇတင်းလၢႆဢၼ်ပဵၼ်၊ ဢႃႇသတရိတ်ႉ၊ ၼၢင်းၽီဝဵင်း ၸိတုမ်ႇ၊ၶေးမုသႃႉ၊ ၽြႃးမိူင်း မေႃႇၽႃႉ၊ ဢိၵ်ႇတင်း မိလႃႉၵုမ်း၊ ၽြႃးမိူင်း ဢမ်ႇမုၼ်ႇ၊ ၸိူဝ်းၼၼ်ႉၵေႃႈၶုၼ်ႁေႃၶမ်းႁဵတ်းႁႂ်ႈၵူဝ်ႈၵိူၵ်ႇပႅတ်ႈသေဢေႃႈ။-
မၼ်းႁၵ်းပႅတ်ႈသဝ်တီႈၵူဝ်းၵႂၢႆႇတင်းလၢႆႁႂ်ႈပဵၼ်ပွတ်းပဵၼ်တွၼ်ႈလႄႈၽၼ်းပဵတ်ႈသဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ ၸိူဝ်းၼၼ်ႉလူမ်ႉပႅတ်ႈသေယဝ်ႉ၊ၵႃႈၼိူဝ်လိၼ်တီႈဢၼ်ႁုၼ်ႇႁၢင်ႈၸိူဝ်းၼၼ်ႉပူၵ်းတင်ႈၼၼ်ႉၵေႃႈမၼ်းဢဝ်လုပ်ႇၵူၼ်းတၢႆလႂ်ႁူမ်ႇၵူမ်ပႅတ်ႈသေဢေႃႈ။
ယူဝ်းသိယႃႉ၊ သမ်ႉၵိူၼ်ႇယႃႉပႅတ်ႈထႃႇၼႃႉတီႈႁဵတ်းဝၢတ်ႈၵူဝ်းၵႂၢႆႇဢၼ်မီးၵႃႈၼႂ်းဝဵင်း ပေႇသလႃႉ၊ ဢၼ်လုၵ်ႈၸၢႆး ၼေႇပတ်ႉ၊ ၶုၼ်ႁေႃၶမ်း ယေႇရူဝ်းပုမ်ႇ၊ ဢၼ်ဢွၼ်ဢဝ်ၵူၼ်းမဵဝ်း ဢိသရေး၊ ၽိတ်းပိူင်ႈတႄႇႁဵတ်းဝႆႉၼၼ်ႉသေယဝ်ႉ၊ၵိူၼ်ႇယႃႉပႅတ်ႈၶဵင်ႇတၢင်းလူႇလႄႈတွႆႇလႅဝ်တမ်လႅဝ်ပဵၼ်မုၼ်ႈပဵၼ်ၽွင်ဢေႃႈ။ သဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ ၵေႃႈဢဝ်တုတ်ႇၽႆးပႅတ်ႈသေဢေႃႈ။-
မိူဝ်ႈၼၼ်ႉ၊ ယူဝ်းသိယႃႉ၊ ဝၢႆႇတူၺ်းလဵပ်ႈႁွပ်ႈႁိမ်းႁွမ်းလႄႈမုင်ႈႁၼ်ၶုမ်ပႃႇႁဵဝ်ႈၼမ်ၼႃႇၵႃႈၼိူဝ်လွႆသေယဝ်ႉ၊မၼ်းၸႂ်ႉႁႂ်ႈၵႂႃႇဢဝ်လုပ်ႇၵူၼ်းတၢႆၸိူဝ်းၼၼ်ႉမႃးၽဝ်ၽႆးၵႃႈၼိူဝ်ၶဵင်ႇတၢင်းလူႇၼၼ်ႉဢေႃႈ။ မၼ်းႁဵတ်းၸိူဝ်ႉၼင်ႇၼၼ်ႁႂ်ႈၶဵင်ႇတၢင်းလူႇၵူဝ်ႈၵိူၵ်ႇၵႂႃႇၸွမ်းၵႃႈၼင်ႇဢၼ်ပရေႃးၽႅတ်ႈ ႁေႃးထႃႈဝႆႉႁိုင်ၼႃႇယဝ်ႉ၊ၸဵမ်မိူဝ်ႈဢၼ်ၶုၼ်ႁေႃၶမ်း ယေႇရူဝ်းပုမ်ႇ၊ ၶၢမ်ႇပွႆးလူႇပွႆးတၢၼ်းလႄႈၸုၵ်းယူႇၵႃႈႁိမ်းၶဵင်ႇတၢင်းလူႇၼၼ်ႉဢေႃႈ။ ၶုၼ်ႁေႃၶမ်း ယူဝ်းသိယႃႉ၊ ဝၢႆႇတူၺ်းလဵပ်ႈႁွပ်ႈလႄႈႁၼ်ၶုမ်ပႃႇႁဵဝ်ႈပရေႃးၽႅတ်ႈဢၼ်ႁေႃးလၢတ်ႈပျႃႇတိၵ်ႈၼၼ်ႉသေယဝ်ႉ၊-
ထၢမ်ဝႃႈ၊ “ဢၼ်ၼၼ်ႉပဵၼ်ၶုမ်ပႃႇႁဵဝ်ႈၽူႈလႂ်၊” ဝႃႈၼင်ႇၼႆဢေႃႈ။ ၵူၼ်းဝဵင်းၸိူဝ်းၼၼ်ႉၶိုၼ်းလၢတ်ႈလႄႈဝႃႈ၊ “ပဵၼ်ၶုမ်ပႃႇႁဵဝ်ႈပရေႃးၽႅတ်ႈဢၼ်လုၵ်ႉသေၵႃႈတီႈမိူင်း ယုတႃႉ၊ မႃးလႄႈႁေႃးလၢတ်ႈထႃႈလွင်ႈတၢင်းဢၼ်ၸဝ်ႈႁဝ်းတၵ်းလႆႈႁဵတ်းတီႈၶဵင်ႇတၢင်းလူႇ ပေႇသလႃႉ၊ ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ယူဝ်းသိယႃႉ၊ ၵေႃႈပူင်ဢမိင်ႉလႄႈဝႃႈ၊ “ဝႆႉႁႂ်ႈမၼ်းမီးယူႇၸိူဝ်ႉၼင်ႇၼၼ်တႃႉ။ ယႃႇပေႁႂ်ႈၽူႈလႂ်ဢဝ်လုပ်ႇၵေႃႉၼၼ်ႉၶၢႆႉတီႈမၼ်း၊” ဝႃႈၼင်ႇၼႆဢေႃႈ။ ပိူဝ်ႈၼႆလႄႈၸႃႉၸဵမ်လုပ်ႇမၼ်းတင်းလုပ်ႇပရေႃးၽႅတ်ႈၸိူဝ်းဢၼ်လုၵ်ႉသေၵႃႈတီႈဝဵင်း သမႃႇရိ၊ မႃးၼၼ်ႉဢမ်ႇလႆႈၶၢႆႉတီႈၶဝ်လႃးလႃး။
ထႃႇၼႃႉတီႈဝႆႈၽြႃးၶဝ်ၸိူဝ်းဢၼ်ဢမ်ႇယုမ်ႇမၢတ်ႈ ထႃႇဝရႃႉၽြႃး၊ ၵႃႈဢၼ်မီးၵႃႈၼႂ်းၵူႈဝဵင်းၼႂ်းမိူင်း ဢိသရေး၊ ဢၼ်ၶုၼ်ႁေႃၶမ်းမိူင်း ဢိသရေး၊ တႄႇႁဵတ်းဝႆႉလႄႈပဵၼ်တၢင်းဢၼ်တိုၵ်းယူင်းတေႃးသႃႉ ထႃႇဝရႃႉၽြႃး၊ ၼၼ်ႉၸိူဝ်းၼၼ်ႉၵေႃႈၶုၼ်ႁေႃၶမ်း ယူဝ်းသိယႃႉ၊ ပႄႇၽဵဝ်ႈပႅတ်ႈတင်းမူတ်းတင်းသဵင်ႈမိူၼ်ၸိူဝ်ႉၼင်ႇဢၼ်မၼ်းပႄႇၽဵဝ်ႈပႅတ်ႈၵႃႈၼႂ်းဝဵင်း ပေႇသလႃႉ၊ ၼၼ်ႉဢေႃႈ။-
ယဵၸ်ႈပရေႃးႁဵၵ်ႈ ၸိူဝ်းဢၼ်ဢမ်ႇယုမ်ႇမၢတ်ႈ ထႃႇဝရႃႉၽြႃး၊ လႄႈႁဵတ်းဝၢတ်ႈၵူဝ်းၵႂၢႆႇတီႈၶဵင်ႇတၢင်းလူႇၸိူဝ်းၼၼ်ႉၵေႃႈမၼ်းဢဝ်တၢႆပႅတ်ႈသေယဝ်ႉ၊ဢဝ်လုပ်ႇၵူၼ်းတၢႆၽဝ်ၽႆးၵႃႈၼိူဝ်ၶဵင်ႇတၢင်းလူႇဢေႃႈ။ လိုၼ်းၼၼ်ႉမၼ်းၶိုၼ်းပွၵ်ႈမိူဝ်းၵႂႃႇတီႈဝဵင်း ယေႇရုသလႅမ်ႇ၊ သေဢေႃႈ။
ၶုၼ်ႁေႃၶမ်း ယူဝ်းသိယႃႉ၊ ပူင်ဢမိင်ႉႁႂ်ႈၶၢမ်ႇပွႆး ပသၶႃႇ၊ ပုၼ်ႈဢၼ်တၵ်းႁဵတ်းရူဝ်ႇသေႇၵူဝ်ယမ် ထႃႇဝရႃႉၽြႃး၊ ၽြႃးပဵၼ်ၸဝ်ႈ၊ႁႂ်ႈမႅၼ်ႈၸွမ်းၵႂၢမ်းၵျၢမ်းလိၵ်ႈပတိၺိၺ်ႇတြႃးၼၼ်ႉဢေႃႈ။-
ၸႃႉဢဝ်ၸူဝ်ႈပၢၼ်ၵူၼ်းလူင်ဢၼ်ၸီႇယၢင်ႇတြႃးၸိူဝ်းဢၼ်ဢုပ်ႉပိူင်ႇၵူၼ်းမဵဝ်း ဢိသရေး၊ တင်းလၢႆမႃးလႄႈတေႃႇထိုင်ႁွတ်ႈၼႂ်းၸူဝ်ႈပၢၼ်ၶုၼ်ႁေႃၶမ်းမိူင်း ဢိသရေး၊ ဢိၵ်ႇတင်းၶုၼ်ႁေႃၶမ်းမိူင်း ယုတႃႉ၊ ၸိူဝ်းၼၼ်ႉ၊ဢမ်ႇတွၼ်ႉဢွၼ်ၵၼ်ပႂ်ႉၵမ်ၵျၢင်ႉၸွမ်းပွႆး ပသၶႃႇ၊ ၸိူဝ်ႉၼင်ႇၼႆသေပွၵ်ႈ။-
ၼႂ်းပီဢၼ် ယူဝ်းသိယႃႉ၊ ၸၢမ်ႇႁၢင်ႈၸၢမ်ႇႁေႃလႆႈသိပ်းပႅတ်ႇပီၼၼ်ႉၵူၺ်းၸင်ႇ၊ၶဝ်ဢွၼ်ၵၼ်ပႂ်ႉၵမ်ၵျၢင်ႉၸွမ်းပွႆး ပသၶႃႇ၊ ၵႃႈတီႈ ထႃႇဝရႃႉၽြႃး၊ ၵႃႈၼႂ်းဝဵင်း ယေႇရုသလႅမ်ႇ၊ ဢေႃႈ။
လိူဝ်သေၼၼ်ႉ၊ ယူဝ်းသိယႃႉ၊ ပႄႇၽဵဝ်ႈပႅတ်ႈၵူၼ်းဢၼ်ႁဵတ်းၽိူဝ်ႉႁဵတ်းၽီလႂ်၊ၽြႃးပုၼ်ႈႁူဝ်ႁိူၼ်းၶဝ်၊ႁုၼ်ႇႁၢင်ႈသၢင်းထုၶဝ်လႂ်၊ဢိၵ်ႇတင်းၶိူင်ႈပိူင်ဢၼ်လီႁင်ႈဢဵတ်ႇသဵတ်ႇဢၼ်ၸၢပ်ႈသႅင်ႇၵၼ်တင်းၶဝ်ၸိူဝ်းဢၼ်ဢမ်ႇယုမ်ႇမၢတ်ႈ ထႃႇဝရႃႉၽြႃး၊ ၼၼ်ႉၸိူဝ်းၼၼ်ႉပုၼ်ႈဢၼ်တၵ်းပႂ်ႉၵမ်ပႂ်ႉၸွမ်းၵႃႈၼင်ႇဢၼ်ပိင်းၺၢပ်ႈတြႃးဢၼ်တႅမ်ႈဝႆႉၵႃႈၼႂ်းပပ်ႉၵျၢမ်းလိၵ်ႈဢၼ်ယဵၸ်ႈပရေႃးႁဵၵ်ႈ ႁိလၶိ၊ ထူပ်းႁၼ်ၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။-
ၶုၼ်ႁေႃၶမ်းဢၼ်မိူၼ်ၼင်ႇ ယူဝ်းသိယႃႉ၊ ၼၼ်ႉဢမ်ႇတွၼ်ႉမီးသေၸဝ်ႈသေပႃး၊မၼ်းၼၼ်ႉပႃးၸႂ်သဵင်ႈသဵင်ႈ၊ဢိၵ်ႇတင်းတၢင်းၵတ်ႉတၢင်းၶၼ်ၵႃႈမီးလႄႈႁဵတ်းဝၢတ်ႈၵူဝ်းၵႂၢႆႇတီႈ ထႃႇဝရႃႉၽြႃး၊ သေယဝ်ႉ၊ပႂ်ႉၵမ်ပႂ်ႉၸွမ်းပိင်းၺၢပ်ႈတြႃး မူဝ်းသေႇ၊ ၸေးၸေးၼၼ်ႉလိုၼ်းသေမၼ်းၵေႃႈယင်းဢမ်ႇပႆႇတွၼ်ႉပေႃႇတွၼ်ႉမီး။
ၼႂ်းဝႃႈၼၼ်သေၵေႃႈတေႃးသႃႉတၢင်းဢၼ် ထႃႇဝရႃႉၽြႃး၊ ၸႂ်မႆႈၶႂ်ႈၸႃႉတေႃႇၵူၼ်းမဵဝ်း ယုတႃႉ၊ ၵွပ်ႈပိူဝ်ႈဢပျတ်ႈဢၼ် မၼႃႇသေႇ၊ ၽိတ်းပိူင်ႈၼၼ်ႉယင်းဢမ်ႇပႆႇထၢတ်ႇပႆႇယဵၼ်တေႃႇထိုင်ႁွတ်ႈမိူဝ်ႈလဵဝ်ၼႆႉ။-
ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ၵဝ်တၵ်းပႄႇၽဵဝ်ႈပႅတ်ႈၵူၼ်းမဵဝ်း ယုတႃႉ၊ သေၵႃႈတီႈၽၢႆႇၼႃႈၵဝ်၊တၵ်းပႄႇၽဵဝ်ႈပႅတ်ႈဝဵင်း ယေႇရုသလႅမ်ႇ၊ ဝဵင်းဢၼ်လိူၵ်ႈဢဝ်ဝႆႉ၊ဢိၵ်ႇတင်းၵျွင်းပိၵ်ႈမၢၼ်ႇၸဝ်ႈတီႈဢၼ်ၵဝ်လၢတ်ႈဝႃႈတၵ်းလႆႈပဵၼ်တီႈဢၼ်ဝႆႈသႃၵဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
လွင်ႈတၢင်းၵႃႈဢၼ်ၶုၼ်ႁေႃၶမ်း ယူဝ်းသိယႃႉ၊ ႁဵတ်းၵူႈၸိူဝ်ႉၵူႈပိူင်ၼၼ်ႉတႅမ်ႈမၢႆဝႆႉၵႃႈၼႂ်း လိၵ်ႈပိုၼ်းၶုၼ်ႁေႃၶမ်းမိူင်းယုတႃႉ၊ ဢေႃႈ။-
ၼႂ်းၸူဝ်ႈပၢၼ်မၼ်းၼၼ်ႉ ၼေႇၶေႃႇ၊ ၶုၼ်ႁေႃၶမ်းမိူင်း ဢေးၵျိပ်ႉ၊ ၶီႇသိုၵ်းၶိုၼ်ႈထိုင်ၼမ်ႉ ဢုၽရတ်ႉ၊ ႁႂ်ႈလႆႈၸွႆႈထႅမ်ၶုၼ်ႁေႃၶမ်းမိူင်း ဢႃႇသီးရီးယႃး၊ ဢေႃႈ။ ၶုၼ်ႁေႃၶမ်း ယူဝ်းသိယႃႉ၊ ဢွၵ်ႇၵႂႃႇႁႂ်ႈလႆႈႁႄႉတိုၵ်းတပ်ႉသိုၵ်းမဵဝ်း ဢေးၵျိပ်ႉ၊ ၼၼ်ႉၵႃႈတီႈဝဵင်း မေႇၵိတ်ႉတေႃႇ၊ လႄႈမၼ်းလႆႈတူၵ်းသုမ်းတၢႆၼႂ်းၼႃႈသိုၵ်းသေဢေႃႈ။-
ၶုၼ်ဢၼ်ပွင်ၵၢၼ်မၼ်းဢဝ်တူဝ်တၢႆမၼ်းတၢင်ႇၵႃႈၼိူဝ်လေႃႉမႃႉသိုၵ်းလႄႈဢဝ်ပွၵ်ႈၶိုၼ်းမိူဝ်းၸူးတီႈဝဵင်း ယေႇရုသလႅမ်ႇ၊ သေယဝ်ႉ၊ဢဝ်သၢင်းၵျူဝ်ႇဝႆႉၵႃႈၼႂ်းၶုမ်ပႃႇႁဵဝ်ႈၸဝ်ႈဢေႃႈ။ ၵူၼ်းဝၢၼ်ႈၵူၼ်းမိူင်းတင်းလၢႆဢွၼ်ၵၼ်ယုၵ်ႉယွင်ႈလုၵ်ႈၸၢႆးၸဝ်ႈ၊ ယႁေႃးၶတ်ႉ၊ ႁႂ်ႈပဵၼ်ၶုၼ်ႁေႃၶမ်းသေဢေႃႈ။
ယႁေႃးၶတ်ႉ၊ ၼၼ်ႉမိူဝ်ႈဢၼ်မၼ်းပဵၼ်ၶုၼ်ႁေႃၶမ်းမိူင်း ယုတႃႉ၊ မႃးၼၼ်ႉၸိုင်၊ဢသၢၵ်ႈမၼ်းလႆႈသၢဝ်းသၢမ်ပီလႄႈဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရုသလႅမ်ႇ၊ သၢမ်လိူၼ်ဢေႃႈ။ မႄႈၸဝ်ႈၸမ်ႉ၊ပဵၼ် ႁႃႇမုတလႃႉ၊ လုၵ်ႈယိင်း ယေႇရမိ၊ ၵူၼ်းဝဵင်း လိပၼႃႉ၊ ဢေႃႈ။-
မၼ်းႁဵတ်းတုၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ၸွမ်းပူႇမွၼ်ႇမၼ်းတင်းလၢႆၼၼ်ႉဢေႃႈ။-
တၢင်းဢၼ်မၼ်းဢုပ်ႉပိူင်ႇၸၢမ်ႇၸႃးၼၼ်ႉ သုတ်းဝၢႆးၵႂႃႇၼႂ်းမိူဝ်ႈဢၼ် ၼေႇၶေႃႇ၊ ၶုၼ်ႁေႃၶမ်းမိူင်း ဢေးၵျိပ်ႉ၊ တိဢဝ်မၼ်းၶင်ဝႆႉၵႃႈတီႈဝဵင်း ရိပလႃႉ၊ မိူင်း ႁႃႇမတ်ႉ၊ ၼၼ်ႉသေယဝ်ႉ၊မီးဢမိင်ႉႁႂ်ႈမိူင်း ယုတႃႉ၊ သၢၵ်ႈၶွၼ်ႇငိုၼ်းပၢၵ်ႇတလၢၼ်ႇတၢၼ်ႇ၊ ဢိၵ်ႇတင်းၶွၼ်ႇၶမ်းၼိုင်ႈတလၢၼ်ႇတၢၼ်ႇ ဢေႃႈ။-
ၶုၼ်ႁေႃၶမ်း ၼေႇၶေႃႇ၊ သမ်ႉဢဝ် ဢေးလျႃႇၵိမ်း၊ လုၵ်ႈၸၢႆး ယူဝ်းသိယႃႉ၊ ၼၼ်ႉႁႂ်ႈပဵၼ်ၶုၼ်ႁေႃၶမ်းမိူင်း ယုတႃႉ၊ တၢင်တူဝ် ယူဝ်းသိယႃႉ၊ သေယဝ်ႉ၊တၢင်ႇပၼ်ၸိုဝ်ႈမႂ်ႇဝႃႈ၊ ယေႃးယၵိမ်း၊ ဢေႃႈ။ ယႁေႃးၶတ်ႉ၊ ၸမ်ႉ၊ၶုၼ်ႁေႃၶမ်း ၼေႇၶေႃႇ၊ ဢဝ်မၼ်းၵႂႃႇၵႃႈတီႈမိူင်း ဢေးၵျိပ်ႉ၊ သေယဝ်ႉ၊မၼ်းၼၼ်ႉတၢႆၵႃႈတီႈၼၼ်ႈဢေႃႈ။
ၶုၼ်ႁေႃၶမ်း ယေႃးယၵိမ်း၊ ၼၼ်ႉၽႃႇၵဵပ်းဢဝ်ၶွၼ်ႇတီႈၶႃႈဝၢၼ်ႈၵူၼ်းမိူင်းၼမ်ၼမ်ၵေႇၵေႇၸွမ်းၵႃႈၼင်ႇဢၼ်ၶဝ်ၽၢၼ်ၶဝ်မီးပုၼ်ႈဢၼ်တၵ်းပေႃးၵုမ်ႇၶွၼ်ႇငိုၼ်းၶွၼ်ႇၶမ်းဢၼ်တၵ်းလႆႈသၢၵ်ႈပၼ်တီႈၶုၼ်ႁေႃၶမ်း ၼေႇၶေႃႇ၊ ၼၼ်ႉဢေႃႈ။
ယေႃးယၵိမ်း၊ ၼၼ်ႉမိူဝ်ႈဢၼ်မၼ်းၸႃႉပဵၼ်ၶုၼ်ႁေႃၶမ်းမိူင်း ယုတႃႉ၊ မႃးၼၼ်ႉဢသၢၵ်ႈမၼ်းလႆႈသၢဝ်းႁႃႈပီလႄႈဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရုသလႅမ်ႇ၊ သိပ်းဢဵတ်းပီဢေႃႈ။ မႄႈၸဝ်ႈၸမ်ႉ၊ပဵၼ် ၸေႇပုတႃႉ၊ လုၵ်ႈယိင်း ပေႇတႃႇယႃႉ၊ ၵူၼ်းဝဵင်း ရူဝ်းမႃႉ၊ ဢေႃႈ။-
ယေႃးယၵိမ်း၊ ႁဵတ်းတုၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ၸွမ်းပူႇမွၼ်ႇမၼ်းတင်းလၢႆဢေႃႈ။
ၼႂ်းၸူဝ်ႈပၢၼ် ယေႃးယၵိမ်း၊ ၼင်ႈႁၢင်ႈၼင်ႈႁေႃမိူင်း ယုတႃႉ၊ ၼၼ်ႉၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ မိူင်း ပႃႇပုလုၼ်ႇ၊ မႃးတိုၵ်းပႄႉသိမ်းဢဝ်မိူင်း ယုတႃႉ၊ လႄႈ ယေႃးယၵိမ်း၊ လႆႈၶၢမ်ႇႁဵတ်းၶႃႈမၼ်းသၢမ်ပီသေယဝ်ႉ၊သမ်ႉၶိုၼ်းလုၵ်ႉၽိုၼ်ႉဢေႃႈ။-
ထႃႇဝရႃႉၽြႃး၊ ပွႆႇၸႂ်ႉတပ်ႉသိုၵ်းၵူၼ်းမဵဝ်း ပႃႇပုလုၼ်ႇ၊ လႂ်၊ၵူၼ်းမဵဝ်း သီးရီးယႃး၊ လႂ်၊ၵူၼ်းမဵဝ်း မေႃႇၽႃႉ၊ လႂ်တင်းၵူၼ်းမဵဝ်း ဢမ်ႇမုၼ်ႇ၊ လႂ်ႁဵတ်းမုၵ်ႉႁဵတ်းၸုမ်းႁင်းၽႂ်ႁင်းမၼ်းလႄႈမႃးတိုၵ်းတေႃး ယေႃးယၵိမ်း၊ ႁႂ်ႈလႆႈယႃႉၽဵဝ်ႈပႅတ်ႈမိူင်း ယုတႃႉ၊ ပဵၼ်ၸွမ်းၵႂၢမ်း ထႃႇဝရႃႉၽြႃး၊ ဢၼ်ၸႂ်ႉႁႂ်ႈပရေႃးၽႅတ်ႈ မၼ်းၸဝ်ႈတင်းလၢႆႁေႃးဝႆႉထႃႈၼၼ်ႉဢေႃႈ။-
ဢၼ်ၼႆႉၸိုင်၊ပဵၼ်ၸွမ်းဢမိင်ႉ ထႃႇဝရႃႉၽြႃး၊ ဢၼ်မၼ်းၸဝ်ႈတၵ်းလပ်ႉမွတ်ႇပႅတ်ႈၵူၼ်းမဵဝ်း ယုတႃႉ၊ သေၵႃႈတီႈၽၢႆႇၼႃႈမၼ်းၸဝ်ႈၵွပ်ႈပိူဝ်ႈတုၸရိူၵ်ႈၶုၼ်ႁေႃၶမ်း မၼႃႇသေႇ၊ ႁဵတ်းၽိတ်းႁဵတ်းပိူင်ႈမႃးၼၼ်ႉ၊-
ဢိၵ်ႇတင်းၵွပ်ႈပိူဝ်ႈတုၸရိူၵ်ႈဢၼ်မၼ်းဢဝ်တၢႆၶဝ်ၸိူဝ်းဢၼ်ဢမ်ႇမီးဢပျတ်ႈၼၼ်ႉဢေႃႈ။ ထႃႇဝရႃႉၽြႃး၊ ဢမ်ႇၶႂ်ႈပွႆႇလွတ်ႈဢပျတ်ႈမၼ်းလႃးလႃး။
လွင်ႈတၢင်းၵႃႈဢၼ် ယေႃးယၵိမ်း၊ ႁဵတ်းၵူႈၸိူဝ်ႉၵူႈပိူင်ၼၼ်ႉတႅမ်ႈမၢႆဝႆႉၵႃႈၼႂ်း လိၵ်ႈပိုၼ်းၶုၼ်ႁေႃၶမ်းမိူင်းယုတႃႉ၊ ဢေႃႈ။-
ယေႃးယၵိမ်း၊ ၼွၼ်းၽႄးသေယဝ်ႉ၊လုၵ်ႈၸၢႆးမၼ်း ယေႇၶေႃးၼိ၊ သိုပ်ႇၼင်ႈႁၢင်ႈၼင်ႈႁေႃဢေႃႈ။
ၶုၼ်ႁေႃၶမ်းမိူင်း ဢေးၵျိပ်ႉ၊ တင်းတပ်ႉသိုၵ်းမၼ်းဢမ်ႇလႆႈၶီႇသိုၵ်းဢွၵ်ႇသေၵႃႈတီႈမိူင်း ဢေးၵျိပ်ႉ၊ ထႅင်ႈသေပွၵ်ႈ၊ၵွပ်ႈပိူဝ်ႈတေႃႈလဵဝ်ၼႆႉၶုၼ်ႁေႃၶမ်းမိူင်း ပႃႇပုလုၼ်ႇ၊ လႆႈဢုပ်ႉပိူင်ႇသိုင်ႇတိူင်းမိူင်း ဢေးၵျိပ်ႉ၊ တင်းမူတ်းဢဝ်တီႈၼမ်ႉ ဢုၽရတ်ႉ၊ လူင်းၵႂႃႇတေႃႇထိုင်ႁွတ်ႈလႅၼ်လိၼ်မိူင်း ဢေးၵျိပ်ႉ၊ ပွတ်းႁွင်ႇပုၼ်ႉၼၼ်ႉဢေႃႈ။
ယေႇၶေႃးၼိ၊ ၼၼ်ႉမိူဝ်ႈဢၼ်ၸႃႉပဵၼ်ၶုၼ်ႁေႃၶမ်းမိူင်း ယုတႃႉ၊ မႃးၼၼ်ႉဢသၢၵ်ႈမၼ်းလႆႈသိပ်းပႅတ်ႇပီလႄႈ၊ဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရုသလႅမ်ႇ၊ သၢမ်လိူၼ်ဢေႃႈ။ မႄႈၸဝ်ႈၸမ်ႉ၊ပဵၼ် ၼႁုတ်ႉတႃႉ၊ လုၵ်ႈယိင်း ဢေးလႃႉၼႃႇႀၼ်ႇ၊ ၵူၼ်းဝဵင်း ယေႇရုသလႅမ်ႇ၊ ဢေႃႈ။-
မၼ်းႁဵတ်းတုၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ၸွမ်းပေႃႈၸဝ်ႈမၼ်းဢေႃႈ။
ၼႂ်းၸူဝ်ႈပၢၼ်မၼ်းၼၼ်ႉတပ်ႉသိုၵ်းမိူင်း ပႃႇပုလုၼ်ႇ၊ ၶုၼ်ဢၼ်ပွင်ၵၢၼ်ၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ ဢုပ်ႉထိင်းၼၼ်ႉၶီႇသိုၵ်းၶိုၼ်ႈၸူးတီႈဝဵင်း ယေႇရုသလႅမ်ႇ၊ သေလႄႈလွမ်ႉႁွပ်ႈဝႆႉဢေႃႈ။-
ၼႂ်းၸူဝ်ႈၶၢဝ်းဢၼ်လွမ်ႉႁွပ်ႈဝႆႉယူႇၼၼ်ႉတူဝ် ၼေႇပုၶတ်ႉၼေႇၸႃႇ၊ မႃးၵႃႈတီႈဝဵင်း ယေႇရုသလႅမ်ႇ၊ လႄႈ၊-
ၶုၼ်ႁေႃၶမ်း ယေႇၶေႃးၼိ၊ ဢိၵ်ႇတင်းမႄႈၸဝ်ႈ၊လုၵ်ႈၸၢႆးၸဝ်ႈလႂ်၊မူးမၢတ်ႈၽွင်းမိူင်းလႂ်၊ဢိၵ်ႇတင်းၶုၼ်ဢၼ်ပွင်ၵၢၼ်ၶုၼ်ႁေႃၶမ်းလႂ်၊ဢွၼ်ၵၼ်ၶၢမ်ႇတူၵ်းသုမ်းတီႈၼႂ်းမိုဝ်းၵူၼ်းမဵဝ်း ပႃႇပုလုၼ်ႇ၊ ၶဝ်ၼႂ်းပီဢၼ် ၼေႇပုၶတ်ႉၼေႇၸႃႇ၊ ၸၢမ်ႇႁၢင်ႈၸၢမ်ႇႁေႃလႆႈပႅတ်ႇပီၼၼ်ႉဢေႃႈ။-
မၼ်းၼၼ်ႉသိမ်းဢဝ်ၽၼ်ႇတႃႇၵျွင်းပိၵ်ႈမၢၼ်ႇၸဝ်ႈ၊ၽၼ်ႇတႃႇႁေႃၶမ်းၵႃႈမီးၵႂႃႇသေယဝ်ႉ၊ပေႃႉလႅဝ်ၶိူင်ႈၶမ်းၸိူဝ်းဢၼ်ၶုၼ်ႁေႃၶမ်း သေႃးလမုၼ်ႇ၊ ႁဵတ်းပုၼ်ႈၵျွင်းပိၵ်ႈမၢၼ်ႇၸဝ်ႈလႄႈမႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ ပျႃႇတိၵ်ႈဝႆႉၼၼ်ႉဢေႃႈ။-
ၼေႇပုၶတ်ႉၼေႇၸႃႇ၊ သိမ်းဢဝ်ၵူၼ်းဝဵင်း ယေႇရုသလႅမ်ႇ၊ တင်းလၢႆ၊မူးမၢတ်ႈၽွင်းမိူင်းတင်းသဵင်ႈတင်းလူင်၊ဢိၵ်ႇတင်းၵူၼ်းသိုၵ်းဢၼ်ႁႅင်းယႂ်ႇတင်းသဵင်ႈတင်းလူင်ဢၼ်လႆႈၶၢမ်ႇတိဢဝ်ၵႃႈၼႂ်းပၢင်တိုၵ်းသိုၵ်းမီးၼိုင်ႈမိုၼ်ႇၵေႃႉဢေႃႈ။ မၼ်းယင်းသိမ်းဢဝ်ၵူၼ်းဢၼ်မီးၼမ်ႉတိၼ်လၢႆးမိုဝ်း၊ဢိၵ်ႇတင်းၸၢင်ႈလဵၵ်းတင်းလၢႆၵႂႃႇလႄႈ၊ဝႆႉၵိုတ်းၵျၢၼ်ႇဝႆႉၵူၼ်းဢၼ်ယၢၵ်ႈၽၢၼ်ၼႃႇတင်းလၢႆၵူၺ်းၵႃႈၼႂ်းမိူင်း ယုတႃႉ၊ ဢေႃႈ။
ၼေႇပုၶတ်ႉၼေႇၸႃႇ၊ သိမ်းဢဝ် ယေႇၶေႃးၼိ၊ ၵႂႃႇၵႃႈတီႈဝဵင်း ပႃႇပုလုၼ်ႇ၊ လူၺ်ႈၵၼ်တင်းမႄႈၸဝ်ႈ၊ၼၢင်းႁေႃၶမ်းလႂ်၊မူးမၢတ်ႈၽွင်းမိူင်းလႂ်၊ဢိၵ်ႇတင်းၶုၼ်ဢၼ်ပွင်ၵၢၼ်မိူင်း ယုတႃႉ၊ လႂ်ၸိူဝ်းၼၼ်ႉဢေႃႈ။-
မၼ်းသိမ်းဢဝ်ၵူၼ်းႁႅင်းယႂ်ႇၸဵတ်းႁဵင်၊ဢိၵ်ႇတင်းၵူၼ်းဢၼ်မီးၼမ်ႉတိၼ်လၢႆးမိုဝ်း၊ဢိၵ်ႇတင်းၸၢင်ႈလဵၵ်းႁဵင်ၼိုင်ႈ၊ၵႂႃႇၵႃႈတီႈဝဵင်း ပႃႇပုလုၼ်ႇ၊ ဢေႃႈ။ ၶဝ်ၸိူဝ်းၼၼ်ႉပဵၼ်ၵူၼ်းမီးႁႅင်းလႄႈႁဵတ်းၵၢၼ်သိုၵ်းၵေႃႈလႆႈဢေႃႈ။
ၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ ဢဝ်ၼႃႉ ယေႇၶေႃးၼိ၊ ဢၼ်မီးၸိုဝ်ႈဝႃႈ၊ မတ်ႉသၼိ၊ ၼၼ်ႉတင်ႈပဵၼ်ၶုၼ်ႁေႃၶမ်းမိူင်း ယုတႃႉ၊ သေယဝ်ႉ၊ပၼ်ၸိုဝ်ႈမႂ်ႇတီႈမၼ်းလႄႈႁွင်ႉဝႃႈ၊ ၸေႇတၵိ၊ ဢေႃႈ။
ၸေႇတၵိ၊ ၼၼ်ႉမိူဝ်ႈဢၼ်မၼ်းပဵၼ်ၶုၼ်ႁေႃၶမ်းမိူင်း ယုတႃႉ၊ မႃးၼၼ်ႉဢသၢၵ်ႈမၼ်းလႆႈသၢဝ်းဢဵတ်းပီလႄႈဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရုသလႅမ်ႇ၊ သိပ်းဢဵတ်းပီဢေႃႈ။ မႄႈၸဝ်ႈၸမ်ႉ၊ပဵၼ် ႁႃႇမုတလႃႉ၊ လုၵ်ႈယိင်း ယေႇရမိ၊ ၵူၼ်းဝဵင်း လိပၼႃႉ၊ ဢေႃႈ။-
မၼ်းႁဵတ်းတုၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ၸွမ်းဢၼ် ယေႃးယၵိမ်း၊ ႁဵတ်းၼၼ်ႉဢေႃႈ။-
ထႃႇဝရႃႉၽြႃး၊ ၸႂ်မႆႈၶႂ်ႈၸႃႉတေႃႇၵူၼ်းဝဵင်း ယေႇရုသလႅမ်ႇ၊ တင်းၵူၼ်းမိူင်း ယုတႃႉ၊ ၼႃႇလူင်လၢင်လႄႈမၼ်းၸဝ်ႈႁေႃႈၶဝ်ဢွၵ်ႇပႅတ်ႈသေၵႃႈတီႈၽၢႆႇၼႃႈမၼ်းၸဝ်ႈဢေႃႈ။
ၼႂ်းပီဢၼ် ၸေႇတၵိ၊ ၸၢမ်ႇႁၢင်ႈၸၢမ်ႇႁေႃလႆႈၵဝ်ႈပီၼႂ်းလိူၼ်သိပ်းမႂ်ႇသိပ်းဝၼ်းၼၼ်ႉမၼ်းလုၵ်ႉၽိုၼ်ႉၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ မိူင်း ပႃႇပုလုၼ်ႇ၊ ဢေႃႈ။ ပိူဝ်ႈၼႆလႄႈ ၼေႇပုၶတ်ႉၼေႇၸႃႇ၊ ပႃးဢဝ်တပ်ႉသိုၵ်းမၼ်းတိုၵ်းဝဵင်း ယေႇရုသလႅမ်ႇ၊ သေယဝ်ႉ၊ၶျႃးပၢင်တပ်ႉမၼ်းၵႃႈၼွၵ်ႈဝဵင်းသေလႄႈၶုတ်းၶုမ်လိၼ်လွမ်ႉႁွပ်ႈႁွပ်ႈဝဵင်းၼၼ်ႉဝႆႉ၊-
တေႃႇထိုင်ႁွတ်ႈပီဢၼ် ၸေႇတၵိ၊ ၸၢမ်ႇႁၢင်ႈၸၢမ်ႇႁေႃလႆႈသိပ်းဢဵတ်းပီတဵမ်တဵမ်ၼၼ်ႉဢေႃႈ။-
ဝၼ်းလိူၼ်သီႇမႂ်ႇၵဝ်ႈဝၼ်းၼႂ်းပီၼၼ်ႉၵွပ်ႈပိူဝ်ႈဢၼ်ပဵၼ်တၢင်းဢၼ်ၶဝ်ႈၵႃႈမၢၵ်ႇပႅင်းၼႃႇလူင်လၢင်တေႃႇထိုင်ႁွတ်ႈၵူၼ်းဝဵင်းတင်းလၢႆထၢၼ်ႈပေႃးဢမ်ႇမီးတၢင်းၵိၼ်တၢင်းၶူပ်းသေဢိတ်းယဝ်ႉလႄႈ၊-
ၶဝ်ၸီးမူင်ႇလမ်းဝဵင်းပဵၼ်ႁူးၵူင်ဝႆႉသေလႄႈ၊ပိၵ်ႉသမ်ႉၵူၼ်းမဵဝ်း ပႃႇပုလုၼ်ႇ၊ တင်းလၢႆလွမ်ႉႁွပ်ႈႁွပ်ႈဝႆႉသေၵေႃႈ၊ႁူဝ်ႁၢၼ်ၵူၼ်းသိုၵ်းၵႃႈမီးတင်းသဵင်ႈတင်းလူင်ဢွၼ်ၵၼ်ဢွၵ်ႇပၢႆႈၶိင်ႇၵၢင်ၶိုၼ်းၸွမ်းသဵၼ်ႈတၢင်းၵႄႈလမ်းဝဵင်းသွင်ထၢပ်ႈၵႃႈတီႈႁိမ်းသူၼ်ဢူးယဵၼ်ႇၸဝ်ႈၼၼ်ႉလႄႈဢွၵ်ႇပၢႆႈၵႂႃႇၸူးတီႈပၢင်ႇႁူၺ်ႈၼမ်ႉ ယေႃးတၢၼ်ႇ၊ ဢေႃႈ။-
ၵူၺ်းၵႃႈ၊တပ်ႉသိုၵ်းၵူၼ်းမဵဝ်း ပႃႇပုလုၼ်ႇ၊ ၶဝ်လိုပ်ႈၸွမ်းလမ်းၸွမ်းၶုၼ်ႁေႃၶမ်း ၸေႇတၵိ၊ လႄႈတိဢဝ်လႆႈမၼ်းၵႃႈတီႈပၢင်ႇပဵင်းႁိမ်းဝဵင်း ယေႇရိၶူဝ်း၊ ပုၼ်ႉသေလႄႈ၊ႁူဝ်ႁၢၼ်ၵူၼ်းသိုၵ်းမၼ်းတင်းလၢႆတႅၵ်ႇယၢႆႈၽၢတ်ႇၽႄၵၼ်ၵႂႃႇသေတင်းမၼ်းဢေႃႈ။-
ၶဝ်ဢွၼ်ၵၼ်ဢဝ်မၼ်းၵႂႃႇၸူးတီႈၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ ၵႃႈၼႂ်းဝဵင်း ရိပလႃႉ၊ သေလႄႈၸီႇယၢင်ႇဢမုမၼ်းၵႃႈတီႈဝဵင်းၼၼ်ႉဢေႃႈ။-
ၶဝ်ဢွၼ်ၵၼ်ဢဝ်လုၵ်ႈၸၢႆးမၼ်းတင်းလၢႆတၢႆသိုဝ်ႈၼႃႈတႂ်ႈတႃမၼ်းသေယဝ်ႉ၊ ၼေႇပုၶတ်ႉၼေႇၸႃႇ၊ ႁႂ်ႈၶဝ်ၶွၵ်းမၢၵ်ႇတႃမၼ်းပႅတ်ႈယဝ်ႉၸင်ႇ၊ဢဝ်ၸိူၵ်ႈတွင်းလိူင်မတ်ႉသေယဝ်ႉ၊ဢဝ်ၵႂႃႇၵႃႈတီႈဝဵင်း ပႃႇပုလုၼ်ႇ၊ ဢေႃႈ။
ၼႂ်းပီဢၼ်ၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ မိူင်း ပႃႇပုလုၼ်ႇ၊ ၸၢမ်ႇႁၢင်ႈၸၢမ်ႇႁေႃလႆႈသိပ်းၵဝ်ႈပီ၊ၼႂ်းလိူၼ်ႁႃႈမႂ်ႇၸဵတ်းဝၼ်းၼၼ်ႉ ၼေႇပုၸႃႇရႃႇတၢၼ်ႇ၊ ၵေႃႉပဵၼ်ၽူႈပၼ်တၢင်းၵျၢမ်ႇတီႈၶုၼ်ႁေႃၶမ်း၊ဢိၵ်ႇတင်းၸဝ်ႈၵွၼ်းတပ်ႉသိုၵ်းလူင်ၸိူဝ်းၼၼ်ႉၶဝ်ႈၵႃႈၼႂ်းဝဵင်း ယေႇရုသလႅမ်ႇ၊ သေယဝ်ႉ၊-
ဢဝ်ၽႆးတုတ်ႇၵျွင်းပိၵ်ႈမၢၼ်ႇၸဝ်ႈတင်းႁေႃၶမ်း၊ဢိၵ်ႇတင်းႁိူၼ်းယႂ်ႇႁိူၼ်းလူင်ၵႃႈဢၼ်မီးၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉပႅတ်ႈဢေႃႈ။-
ၵူၼ်းသိုၵ်းမၼ်းတင်းလၢႆဢွၼ်ၵၼ်ၵိူၼ်ႇယႃႉလမ်းဝဵင်းတင်းလၢႆႁႂ်ႈပင်းတူၵ်းဢေႃႈ။-
မိူဝ်ႈၼၼ်ႉ၊ ၼေႇပုၸႃႇရႃႇတၢၼ်ႇ၊ သမ်ႉသိမ်းဢဝ်ထႅင်ႈၵူၼ်းၸိူဝ်းဢၼ်ယင်းၵိုတ်းၵျၢၼ်ႇယူႇၵႃႈၼႂ်းဝဵင်း၊ၵူၼ်းဢၼ်မီးၼမ်ႉတိၼ်လၢႆးမိုဝ်းၸိူဝ်းဢၼ်ယင်းၵိုတ်းၵျၢၼ်ႇဝႆႉတင်းလၢႆ၊ဢိၵ်ႇတင်းၶဝ်ၸိူဝ်းဢၼ်ပၢႆႈၶဝ်ႈၵႂႃႇယူႇၼႂ်းၵူၼ်းမဵဝ်း ပႃႇပုလုၼ်ႇ၊ ၸိူဝ်းၼၼ်ႉဢဝ်ၵႂႃႇၵႃႈတီႈဝဵင်း ပႃႇပုလုၼ်ႇ၊ ဢေႃႈ။-
ၵူၺ်းၵႃႈ၊ၵူၼ်းယၢၵ်ႈၵူၼ်းၽၢၼ်တင်းလၢႆၸမ်ႉ၊မၼ်းဝႆႉၵိုတ်းယူႇၵႃႈတီႈမိူင်း ယုတႃႉ၊ ႁႂ်ႈၶဝ်လုမ်းလႃးသူၼ်မၢၵ်ႇၸပိတ်ႉဢိၵ်ႇတင်းႁႂ်ႈႁဵတ်းႁႆႈႁဵတ်းၼႃးဢေႃႈ။
ၵူၼ်းမဵဝ်း ပႃႇပုလုၼ်ႇ၊ ၸိူဝ်းၼၼ်ႉဢွၼ်ၵၼ်ပေႃႉထုပ်ႉသဝ်တွင်းလိူင်လႂ်၊လေႃႉရထႃးလႂ်၊ဢိၵ်ႇတင်းထၢင်ၼမ်ႉတွင်းလိူင်လႂ်၊ဢၼ်မီးၵႃႈၼႂ်းၵျွင်းပိၵ်ႈမၢၼ်ႇၸဝ်ႈၸိူဝ်းၼၼ်ႉလုလႅဝ်သေလႄႈဢဝ်တွင်းလိူင်ၸိူဝ်းၼၼ်ႉၵႂႃႇတီႈဝဵင်း ပႃႇပုလုၼ်ႇ၊ ဢေႃႈ။-
ၸႃႉၸဵမ်ၵူၵ်ႇၸေႃႉလႂ်၊မေႃႈဢၼ်သႂ်ႇတဝ်ႈလႂ်၊ၵိမ်းၵိပ်ႈၽႆးလႂ်၊မေႃႈဢၼ်တုင်းလိူတ်ႈဢၼ်လႆဢွၵ်ႇတီႈတူဝ်တၢင်းလူႇၼၼ်ႉလႂ်၊မေႃႈဢၼ်ၽဝ်ၼၢမ်ႇသႃႇလႂ်၊ဢိၵ်ႇတင်းၶိူင်ႈတွင်းလိူင်ၸိူဝ်းဢၼ်ၸႂ်ႉဢၼ်တိုဝ်းၵႃႈၼႂ်းၵျွင်းပိၵ်ႈမၢၼ်ႇၸဝ်ႈတင်းသဵင်ႈတင်းလူင်ၵေႃႈၶဝ်ဢဝ်ၵႂႃႇဢေႃႈ။-
ပၢၼ်ႉလႂ်၊ဢၢင်ႇဝၢၼ်ႇလႂ်၊ဢၼ်ပဵၼ်ၶိူင်ႈၶမ်းၶိူင်ႈငိုၼ်းၸိူဝ်းၼၼ်ႉ၊ဢိၵ်ႇတင်းၶိူင်ႈဢၼ်ပဵၼ်ၶမ်းပဵၼ်ငိုၼ်းၵူႈၸိူဝ်ႉၵူႈမဵဝ်းၵေႃႈၶဝ်သိမ်းဢဝ်ၵႂႃႇဢေႃႈ။-
ၶိူင်ႈတွင်းလိူင်ၸိူဝ်းဢၼ်ၶုၼ်ႁေႃၶမ်း သေႃးလမုၼ်ႇ၊ ႁဵတ်းဝႆႉၵႃႈၼႂ်းၵျွင်းပိၵ်ႈမၢၼ်ႇၸဝ်ႈဢၼ်ပဵၼ်သဝ်သွင်လႅမ်ႈ၊ၶဵင်ႇတင်းလၢႆ၊ဢိၵ်ႇတင်းထၢင်ၼမ်ႉလူင်ၸိူဝ်းၼၼ်ႉၼၵ်းၼႃႇလူင်လၢင်လႄႈဢမ်ႇၸၢင်ႈၸင်ႈတူၺ်းၼမ်ႉၼၵ်းမၼ်းလႆႈ။-
သဝ်လူင်သွင်လႅမ်ႈၼၼ်ႉလႅမ်ႈၼိုင်ႈတၢင်းသုင်မၼ်းမီးသိပ်းပႅတ်ႇသွၵ်ႇလႄႈၵႃႈတီႈပၢႆသဝ်သမ်ႉမီးႁူဝ်သဝ်ဢၼ်သုင်သၢမ်သွၵ်ႇၼၼ်ႉဢေႃႈ။ ၵႃႈတီႈလွမ်ႉႁွပ်ႈႁူဝ်သဝ်ၼၼ်ႉမီးတႃၶႄတွင်းလိူင်တင်းမၢၵ်ႇၸင်ႈတွင်းလိူင်ၵူၺ်းၵူၺ်းႁၢင်ႈၶိူင်ႈဝႆႉဢေႃႈ။
လိူဝ်သေၼၼ်ႉဢမ်ႇၵႃး၊ ၼေႇပုၸႃႇရႃႇတၢၼ်ႇ၊ ၸဝ်ႈၵွၼ်းတပ်ႉသိုၵ်းလူင်ၼၼ်ႉတိဢဝ်ယဵၸ်ႈပရေႃးႁဵၵ်ႈလူင် ၸရႃႇယႃႉ၊ တင်းယဵၸ်ႈပရေႃးႁဵၵ်ႈၽူႈၵမ်ႉၵႅမ် ၸေႇၽၼိ၊ ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵျွင်းပိၵ်ႈမၢၼ်ႇၸဝ်ႈသၢမ်ၵေႃႉၸိူဝ်းၼၼ်ႉဢေႃႈ။-
မၼ်းယင်းဢဝ်ၶုၼ်သိုၵ်းႁၢၼ်ဢၼ်ဢုပ်ႉၵူၼ်းသိုၵ်းတင်းလၢႆၼၼ်ႉၵေႃႉၼိုင်ႈ၊မူးမၢတ်ႈၽွင်းမိူင်းဢၼ်ၵိုတ်းၵျၢၼ်ႇယူႇၼႂ်းဝဵင်းၼၼ်ႉႁႃႈၵေႃႉ၊ၽူႈၵမ်ႉၵႅမ်ၸဝ်ႈၵွၼ်းတပ်ႉသိုၵ်းလူင်၊ဢၼ်ပဵၼ်ၽူႈမၢႆလူင်ဢၼ်ဢဝ်ၸရၢင်းၵူၼ်းဝၢၼ်ႈၵူၼ်းမိူင်းတင်းလၢႆၼၼ်ႉၵေႃႉၼိုင်ႈ၊တင်းၵူၼ်းဢၼ်မီးၼႃႈမီးတႃႁူၵ်းသိပ်းၵေႃႉၸိူဝ်းၼၼ်ႉဢေႃႈ။-
ၼေႇပုၸႃႇရႃႇတၢၼ်ႇ၊ ဢဝ်ၵႂႃႇသူင်ႇတီႈၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ ဢၼ်မီးယူႇၵႃႈၼႂ်းဝဵင်း ရိပလႃႉ၊-
ၵႃႈၼႂ်းဢိူင်ႇ ႁႃႇမတ်ႉ၊ ၼၼ်ႉဢေႃႈ။ ၶုၼ်ႁေႃၶမ်းၵေႃႈပၼ်တၢမ်ႇၶွၼ်ႉတီႈၶဝ်သေယဝ်ႉ၊ဢဝ်ၶဝ်တၢႆၵႃႈတီႈဝဵင်းၼၼ်ႉသေဢေႃႈ။ ၼင်ႇၼၼ်လႄႈၵူၼ်းမဵဝ်း ယုတႃႉ၊ လႆႈၶၢမ်ႇတၢင်းဢၼ်တိဢဝ်သိမ်းဢဝ်သေၵႃႈတီႈမိူင်းၶဝ်လႄႈလႆႈၵႂႃႇတူၵ်းၵႅၼ်းတုၵ်ႉၶႃႉယူႇဢေႃႈ။
ၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ မိူင်း ပႃႇပုလုၼ်ႇ၊ ယုၵ်ႉတၢင်ႇ ၵေႇတလိ၊ လုၵ်ႈၸၢႆး ဢႁိၵမ်ႇ၊ လၢၼ်ၸၢႆး သႃႇၽၢၼ်ႇ၊ ၼၼ်ႉဝႆႉၵႃႈၼႂ်းဢရႃႇၶုၼ်မိူင်း ယုတႃႉ၊ ႁႂ်ႈမၼ်းဢုပ်ႉပိူင်ႇၵႃႈၼိူဝ်ၶဝ်ၸိူဝ်းဢၼ်ဢမ်ႇလႆႈၶၢမ်ႇတၢင်းဢၼ်ဢဝ်ၵႂႃႇၵႃႈတီႈမိူင်း ပႃႇပုလုၼ်ႇ၊ ၼၼ်ႉဢေႃႈ။-
မိူဝ်ႈဢၼ်ၶုၼ်ဢၼ်ပွင်ၵၢၼ်ၵူၼ်းမဵဝ်း ယုတႃႉ၊ တင်းလၢႆဢိၵ်ႇတင်းႁူဝ်ႁၢၼ်ၵူၼ်းသိုၵ်းၶဝ်ၸိူဝ်းၼၼ်ႉဢမ်ႇၶၢမ်ႇတူၵ်းသုမ်းၼၼ်ႉလႆႈငိၼ်းလွင်ႈတၢင်းၼၼ်ႉၸိုင်၊ၶဝ်ဢွၼ်ၵၼ်မႃးႁူပ်ႉထူပ်း ၵေႇတလိ၊ ၵႃႈတီႈဝဵင်း မိၸပႃႇ၊ ဢေႃႈ။ ၶဝ်ၸိူဝ်းၼၼ်ႉပဵၼ် ဢိသမေႇလႃႉ၊ လုၵ်ႈၸၢႆး ၼႃႇႀၼ်ႇ၊ယေႃးႁၼၼ်ႇ၊ လုၵ်ႈၸၢႆး ၵႃႇရႃႇ၊ၸရႃႇယႃႉ၊ လုၵ်ႈၸၢႆး တႃႇၼုမိတ်ႉ၊ ၵူၼ်းဝဵင်း ၼေႇတေႃႇၽႃႉ၊ ဢိၵ်ႇတင်း ၼေႇသၼိ၊ ၵူၼ်းမဵဝ်း မႃႇၶႃႇသိ၊ ၸိူဝ်းၼၼ်ႉဢေႃႈ။-
ၵေႇတလိ၊ လၢတ်ႈလႄႈဝႃႈ၊ “ၵဝ်တိူင်ႇၵၢဝ်ႇၵတိလႄႈဝႃႈ၊သူဢမ်ႇလူဝ်ႇၵူဝ်ၶုၼ်ဢၼ်ပွင်ၵၢၼ်မိူင်း ပႃႇပုလုၼ်ႇ၊ ၸိူဝ်းၼၼ်ႉ။ ယူႇသဝ်းၵႃႈၼႂ်းမိူင်းၼႆႉလႄႈၵိုတ်ႉႁၢပ်ႇဢမုၶုၼ်ႁေႃၶမ်းမိူင်း ပႃႇပုလုၼ်ႇ၊ ယူႇတႃႉ။ ပေႃးသူႁဵတ်းၸိူဝ်ႉၼင်ႇၼၼ်ၸိုင်၊တၵ်းပဵၼ်တၢင်းဢၼ်ၵတ်းယဵၼ်ၶျၢမ်းသႃႇတီႈသူဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ၼႂ်းလိူၼ်ၸဵတ်းၼႂ်းပီၼၼ်ႉ ဢိသမေႇလႃႉ၊ လုၵ်ႈၸၢႆး ၼႃႇႀၼ်ႇ၊ လၢၼ်ၸၢႆး ဢေးလိသမႃႇ၊ ဢၼ်ပဵၼ်ၸိူဝ်ႉၶိူဝ်းၶုၼ်ၼၼ်ႉပႃးဢဝ်ၵူၼ်းမၼ်းသိပ်းၵေႃႉမႃးၵႃႈတီႈဝဵင်း မိၸပႃႇ၊ လႄႈတိုၵ်းတေႃး ၵေႇတလိ၊ သေယဝ်ႉ၊ဢဝ်မၼ်းတၢႆပႃးလူၺ်ႈၵၼ်တင်းၵူၼ်းမဵဝ်း ဢိသရေး၊ ဢိၵ်ႇတင်းၵူၼ်းမဵဝ်း ပႃႇပုလုၼ်ႇ၊ တင်းလၢႆၸိူဝ်းဢၼ်မီးယူႇလူၺ်ႈၵၼ်တင်းမၼ်းၼၼ်ႉဢေႃႈ။-
မိူဝ်ႈၼၼ်ႉ၊ၵူၼ်းဝၢၼ်ႈၵူၼ်းမိူင်းတင်းလၢႆလဵၵ်ႉလဵၵ်ႉယႂ်ႇယႂ်ႇဢိၵ်ႇတင်းၶုၼ်သိုၵ်းႁၢၼ်တင်းလၢႆဢွၵ်ႇသေလႄႈၵႂႃႇၵႃႈတီႈမိူင်း ဢေးၵျိပ်ႉ၊ ၵွပ်ႈပိူဝ်ႈဢၼ်ၶဝ်ၵူဝ်ႁႄၵူၼ်းမဵဝ်း ပႃႇပုလုၼ်ႇ၊ ၶဝ်ၼၼ်ႉဢေႃႈ။
ၼႂ်းပီဢၼ်ၶုၼ်ႁေႃၶမ်း ယေႇၶေႃးၼိ၊ မိူင်း ယုတႃႉ၊ တူၵ်းၶွၵ်ႈလႆႈသၢမ်သိပ်းၸဵတ်းပီၼၼ်ႉ၊ ဢေးဝိလႃႉမေႇရေႃးတၵ်ႉ၊ ပဵၼ်ၶုၼ်ႁေႃၶမ်းမိူင်း ပႃႇပုလုၼ်ႇ၊ ဢေႃႈ။ ၼႂ်းပီဢၼ်မၼ်းၸၢမ်ႇႁၢင်ႈၸၢမ်ႇႁေႃလိူၼ်သိပ်းသွင်လႆႈသၢဝ်းၸဵတ်းဝၼ်းၼၼ်ႉၸိုင်၊မၼ်းပွႆႇ ယေႇၶေႃးၼိ၊ ဢွၵ်ႇၶွၵ်ႈမႃးလႄႈပၼ်ၵတ်းယဵၼ်ၶျၢမ်းသႃႇဢေႃႈ။-
ဢေးဝိလႃႉမေႇရေႃးတၵ်ႉ၊ ၼၼ်ႉသိူၵ်ႈသမ်ႇလၢတ်ႈတေႃႇမၼ်းလီလီငၢမ်းငၢမ်းလႄႈယုၵ်ႉယွင်ႈဢရႃႇမၼ်းသုင်သေဢရႃႇၶုၼ်လူင်တၢင်ႇပႃးၸိူဝ်းဢၼ်လႆႈၶၢမ်ႇတၢင်းဢၼ်ပိူၼ်ႈတိဢဝ်သိမ်းဢဝ်ၵႂႃႇလႄႈလႆႈတူၵ်းၵႅၼ်းႁူမ်ႈလူၺ်ႈၵၼ်တင်းမၼ်းဢၼ်ယူႇၵႃႈၼႂ်းမိူင်း ပႃႇပုလုၼ်ႇ၊ ၼၼ်ႉဢေႃႈ။-
မၼ်းပုတ်ႈလၢႆႈၶူဝ်းၼုင်ႈမၼ်းဢၼ်သႂ်ႇၼႂ်းၶွၵ်ႈၼၼ်ႉသေယဝ်ႉ၊လႆႈၵိၼ်လႆႈၶူပ်းလူၺ်ႈၵၼ်တင်းၶုၼ်ႁေႃၶမ်းယူႇၸူဝ်ႈဢသၢၵ်ႈမၼ်းဢေႃႈ။-
ၸူဝ်ႈဢၼ်ဢသၢၵ်ႈမၼ်းယၢဝ်းယိုၼ်းၼၼ်ႉၶုၼ်ႁေႃၶမ်းဢဵတ်းလူၸွႆႈထႅမ်ပၼ်ၵႃႈဢၼ်မၼ်းလူဝ်ႇၸႂ်ႉၸၢႆႇဝၼ်းလႂ်ဝၼ်းၼၼ်ႉဢေႃႈ။ ၵျၢမ်းပိုၼ်းၶုၼ်ႁေႃၶမ်းၽိုၼ်တီႈသွင်ယဝ်ႉယဝ်ႉဢေႃႈ။
ဢႃႇတမ်ႇ၊ ပဵၼ်ပေႃႈ သေးထႃႉ၊သေးထႃႉ၊ ပဵၼ်ပေႃႈ ဢေႇၼုတ်ႉ၊ဢေႇၼုတ်ႉ၊ ပဵၼ်ပေႃႈ ၵႃႇဢိၼၼ်ႇ၊-
ၵႃႇဢိၼၼ်ႇ၊ ပဵၼ်ပေႃႈ မႁႃႇလေႇလေႇလႃႉ၊ မႁႃႇလေႇလေႇလႃႉ၊ ပဵၼ်ပေႃႈ ယႃႇရိတ်ႉ၊-
ယႃႇရိတ်ႉ၊ ပဵၼ်ပေႃႈ ဢေးၼွၵ်ႉ၊ ဢၼ်ပဵၼ်ပေႃႈ မႀုသလႃႉ၊မထုသလႃႉ၊ ပဵၼ်ပေႃႈ လႃႇမႅၵ်ႈ၊-
လႃႇမႅၵ်ႈ၊ ပဵၼ်ပေႃႈ ၼူဝ်းဢႃႇ ၊ဢၼ်မီးလုၵ်ႈၸၢႆးသၢမ်ၵေႃႉ၊ သေႇမႃႉ၊ႁႃႇမႃႉ၊ယႃႇၽႅတ်ႈ၊ ၼၼ်ႉဢေႃႈ။
လုၵ်ႈၸၢႆး ယႃႇၽႅတ်ႈ၊ ၸမ်ႉ၊ပဵၼ် ၵေႃးမႃႇ၊မႃႇၵေႃးၵႃႉ၊မႃႇတေႇ၊ယႃႇဝၼ်ႇ၊တုပလႃႉ၊မေႇသႅၵ်ႉ၊ ဢိၵ်ႇတင်း တိရတ်ႉ၊ ဢေႃႈ။ ၶဝ်ၼၼ်ႉပဵၼ်ပေႃႈၸိူဝ်ႉၶိူဝ်းၵူၼ်းမဵဝ်းဢၼ်ႁွင်ႉၸွမ်းၼင်ႇၸိုဝ်ႈသဵင်ၶဝ်ဢေႃႈ။-
ၸိူဝ်ႉၶိူဝ်း ၵေႃးမႃႇ၊ ၸမ်ႉ၊ပဵၼ်ၵူၼ်းမဵဝ်း ဢသၵေႇၼတ်ႉ၊ ၵူၼ်းမဵဝ်း ရိၽတ်ႉ၊ တင်းၵူၼ်းမဵဝ်း တေႃႇၵမႃႉ၊ ဢေႃႈ။-
ၸိူဝ်ႉၶိူဝ်း ယႃႇဝၼ်ႇ၊ ၸမ်ႉ၊ပဵၼ်ၵူၼ်းမဵဝ်း ဢေးလိသႃႇ၊ ၵူၼ်းမဵဝ်း သပဵၼ်ႇ၊ ၵူၼ်းမဵဝ်း သၢႆးပရၢတ်ႈ၊ တင်းၵူၼ်းမဵဝ်း ရူဝ်းတေႇ၊ ဢေႃႈ။
လုၵ်ႈၸၢႆး ႁႃႇမႃႉ၊ ၸမ်ႉ၊ပဵၼ် ၵုသႃႉ၊ဢေးၵျိပ်ႉ၊လိပ်ႉပီးယႃး၊ တင်း ၶႃႇၼၼ်ႇ၊ ဢေႃႈ။ ၶဝ်ၼၼ်ႉပဵၼ်ပေႃႈၸိူဝ်ႉၶိူဝ်းၵူၼ်းမဵဝ်းဢၼ်ႁွင်ႉၸွမ်းၼင်ႇၸိုဝ်ႈသဵင်ၶဝ်ဢေႃႈ။-
ၸိူဝ်ႉၶိူဝ်း ၵုသႃႉ၊ ၸမ်ႉ၊ပဵၼ်ၵူၼ်း သေးၽႃႉ၊ ၵူၼ်း ႁႃႇဝိလႃႉ၊ ၵူၼ်း သႃႇပတႃႉ၊ ၵူၼ်း ရႃႇမႃႉ၊ တင်း သပ်ႉတေႇၶႃႉ၊ ဢေႃႈ။ ၸိူဝ်ႉၶိူဝ်းဢၼ်သိုပ်ႇလူင်းမႃးတီႈ ရႃႇမႃႉ၊ ၸမ်ႉ၊ပဵၼ်ၵူၼ်း သေးပႃႉ၊ တင်းၵူၼ်း တေႇတၼ်ႇ၊ ဢေႃႈ။-
ၵုသႃႉ၊ မီးလုၵ်ႈၸၢႆးၵေႃႉၼိုင်ႈၸိုဝ်ႈႁွင်ႉဝႃႈ၊ ၼိမ်ႇရေႃးတႃႉ၊ ဢၼ်ပဵၼ်ၵူၼ်းႁႅင်းယႂ်ႇၼႃႇလႄႈတိုၵ်းပႄႉသိုၵ်းၼမ်ၼႃႇဢွၼ်တၢင်းသေပိူၼ်ႈၼႂ်းလေႃးၵႃႉၼႆႉၼၼ်ႉဢေႃႈ။-
ၸိူဝ်ႉၶိူဝ်းဢၼ်သိုပ်ႇလူင်းမႃးတီႈ ဢေးၵျိပ်ႉ၊ ၸမ်ႉ၊ပဵၼ်ၵူၼ်း လုတိမ်ႇ၊ ၵူၼ်း ဢၼမ်ႇ၊ ၵူၼ်း လႄးႁပ်ႉ၊ ၵူၼ်း ၼပ်ႉတုႁိမ်ႇ၊-
ၵူၼ်း ပႃႇသရုသိမ်ႇ၊ ၵူၼ်း ၵႃႇသလုႁိမ်ႇ၊ ၵူၼ်း ၵပ်းတေႃးရိမ်ႇ၊ ဢေႃႈ။ ၵူၼ်း ၽိလိတ်ႉတိ၊ ပဵၼ်မႃးၵႃႈၼႂ်းၵူၼ်း ၵႃႇသလုႁိမ်ႇ၊ ဢေႃႈ။-
လုၵ်ႈၸၢႆး ၶႃႇၼၼ်ႇ၊ ၸမ်ႉ၊ၵေႃႉယႂ်ႇပဵၼ် ၸိတုၼ်ႇ၊ ၵေႃႉသွင်ပဵၼ် ႁေႇထႃႉ၊ ဢေႃႈ။ ၶဝ်ၼၼ်ႉပဵၼ်ပေႃႈၸိူဝ်ႉၶိူဝ်းၵူၼ်းမဵဝ်းဢၼ်ႁွင်ႉၸွမ်းၼင်ႇၸိုဝ်ႈသဵင်ၶဝ်ဢေႃႈ။-
ၶႃႇၼၼ်ႇ၊ သမ်ႉယင်းပဵၼ်ပူႇပေႃႈၵူၼ်း ယေႇပုသိ၊ ၵူၼ်း ဢႃႇမေႃးရိ၊ ၵူၼ်း ၵိရၵႃႇသိ၊-
လုၵ်ႈၸၢႆး သေႇမႃႉ၊ ၸမ်ႉ၊ပဵၼ် ဢေႇလမ်ႇ၊ဢႃႇသုရိ၊ဢႃႇၽၵ်ႉၸတ်ႉ၊လုတႃႉ၊ဢႃႇရမ်ႇ၊ဢုၸႃႉ၊ႁုလႃႉ၊ၵေႇသႃႇ၊ တင်း မႄႇသႅၵ်ႉ၊ ဢေႃႈ။ ၶဝ်ၼၼ်ႉပဵၼ်ပေႃႈၸိူဝ်ႉၶိူဝ်းၵူၼ်းမဵဝ်းဢၼ်ႁွင်ႉၸွမ်းၼင်ႇၸိုဝ်ႈသဵင်ၶဝ်ဢေႃႈ။-
ဢႃႇၽၵ်ႉၸတ်ႉ၊ ၼၼ်ႉပဵၼ်ပေႃႈ သႃႇလႃႉ၊ ဢၼ်ပဵၼ်ပေႃႈ ႁေႇပႃႇ၊ ဢေႃႈ။-
ႁေႇပႃႇ၊ ၼၼ်ႉမီးလုၵ်ႈၸၢႆးသွင်ၵေႃႉလႄႈၵေႃႉၼိုင်ႈၸိုဝ်ႈ ၽႃႇလႅၵ်ႉ၊ ၵွပ်ႈပိူဝ်ႈၵူၼ်းမိူင်းလေႃးၵႃႉလႆႈၽၢတ်ႇၽႄၵၼ်ၼႂ်းၸူဝ်ႈပၢၼ်မၼ်းၼၼ်ႉလႄႈၼွင်ႉၸၢႆးမၼ်းၸိုဝ်ႈ ယွၵ်ႉတၼ်ႇ၊ ဢေႃႈ။-
ၸိူဝ်ႉၶိူဝ်းဢၼ်သိုပ်ႇလူင်းမႃးတီႈ ယွၵ်ႉတၼ်ႇ၊ ၼၼ်ႉပဵၼ်ၵူၼ်းမဵဝ်း ဢႃႇလမေႃႇတတ်ႉ၊ ၵူၼ်းမဵဝ်း သေႇလပ်ႉ၊ ၵူၼ်းမဵဝ်း ႁႃႇၸႃႇမႃႇဝိတ်ႉ၊ ၵူၼ်းမဵဝ်း ယေႇရႃႇ၊-
ၵူၼ်းမဵဝ်း ႁႃႇတေႃးရမ်ႇ၊ ၵူၼ်းမဵဝ်း ဢုၸလႃႉ၊ ၵူၼ်းမဵဝ်း တိၵ်ႉလႃႇ၊-
ၵူၼ်းမဵဝ်း ဢေႃႇပႃႇလႃႉ၊ ၵူၼ်းမဵဝ်း ဢပိမေႇလႃႉ၊ ၵူၼ်းမဵဝ်း သေးပႃႉ၊-
ၵူၼ်းမဵဝ်း ဢေႃႇၽိရႃႉ၊ ၵူၼ်းမဵဝ်း ႁႃႇဝိလႃႉ၊ တင်းၵူၼ်းမဵဝ်း ယေႃးပပ်ႉ၊ ဢေႃႈ။
ဢႃႇပြႃႇႁၢမ်ႇ၊ မီးလုၵ်ႈၸၢႆးသွင်ၵေႃႉ၊ဢၼ်ပဵၼ် ဢိၸၢၵ်ႈ၊ တင်း ဢိသမေႇလႃႉ၊ ဢေႃႈ။-
လုၵ်ႈၸၢႆး ဢိသမေႇလႃႉ၊ ၸိူဝ်းဢၼ်ပဵၼ်ပူႇပေႃႈၸိူဝ်ႉၶိူဝ်းမၼ်းသိပ်းသွင်မဵဝ်းၼၼ်ႉၸမ်ႉ၊လုၵ်ႈၸၢႆးတူၼ်ႈမၼ်းပဵၼ် ၼပႃႇယုတ်ႉ၊ လႄႈၼွင်ႉၸၢႆးမၼ်းတင်းလၢႆပဵၼ် ၵေႇတႃႇ၊ဢႃႇတပေႇလႃႉ၊မိပသမ်ႇ၊-
မေးၼွႆႉ ဢႃႇပြႃႇႁၢမ်ႇ၊ ဢၼ်လႆႈၸိုဝ်ႈ ၵေႇတုရႃႉ၊ ၼၼ်ႉမီးလုၵ်ႈၸၢႆးႁူၵ်းၵေႃႉ၊ဢၼ်ပဵၼ် ၸိမ်းရမ်ႇ၊ယွၵ်ႉသၢၼ်ႇ၊မေႇတၢၼ်ႇ၊မိတျၼ်ႇ၊ဢိသၽၵ်ႉ၊ တင်း သုဢႃႇ၊ ဢေႃႈ။ ယွၵ်ႉသၢၼ်ႇ၊ သမ်ႉမီးလုၵ်ႈၸၢႆးသွင်ၵေႃႉ၊ဢၼ်ပဵၼ် သေးပႃႉ၊ တင်း တေႇတၼ်ႇ၊ ဢေႃႈ။-
လုၵ်ႈၸၢႆး မိတျၼ်ႇ၊ မီးႁႃႈၵေႃႉ၊ဢၼ်ပဵၼ် ဢေႇၽႃႇ၊ဢေးၽေႇရႃႉ၊ႁႃႇၼုတ်ႉ၊ဢပိတႃႉ၊ တင်း ဢေးလတႃႇ၊ ဢေႃႈ။
ဢႃႇပြႃႇႁၢမ်ႇ၊ မီးလုၵ်ႈၸၢႆး ဢိၸၢၵ်ႈ၊ ဢၼ်မီးလုၵ်ႈၸၢႆးသွင်ၵေႃႉ၊ဢၼ်ပဵၼ် ဢေးသေႃး၊ တင်း ယႃႇၵုပ်ႈ၊ ဢေႃႈ။-
လုၵ်ႈၸၢႆး ဢေးသေႃး၊ ၸမ်ႉ၊ပဵၼ် ဢေးလိၽတ်ႉ၊ရုဢေးလႃႉ၊ယုသႃႉ၊ယႃးလၢမ်ႇ၊ တင်း ၵေႃးရႃႉ၊ ဢေႃႈ။-
ဢေးလိၽတ်ႉ၊ လႆႈပဵၼ်ပူႇပေႃႈၸိူဝ်ႉၶိူဝ်း တေႇမၼ်ႇ၊ ၵူၼ်းမဵဝ်း ဢေႃးမရႃႉ၊ ၵူၼ်းမဵဝ်း ၸေႇၽေႃႇ၊ ၵူၼ်းမဵဝ်း ၵႃႇတမ်ႇ၊ ၵူၼ်းမဵဝ်း ၵေးၼတ်ႉ၊ ၵူၼ်းမဵဝ်း တိမ်းၼႃႉ၊ တင်းၵူၼ်းမဵဝ်း ဢႃႇမလႅၵ်ႉ၊ ဢေႃႈ။-
ရုဢေးလႃႉ၊ သမ်ႉပဵၼ်ပူႇပေႃႈၸိူဝ်ႉၶိူဝ်းၵူၼ်း ၼႃႇႁတ်ႉ၊ ၵူၼ်း ၸေးရႃႉ၊ ၵူၼ်း သၢမ်ႇမႃႇ၊ တင်းၵူၼ်း မိတ်ႉၸႃႉ၊ ဢေႃႈ။
ၶုၼ်လူင်ဢၼ်ဢုပ်ႉပိူင်ႇၼႂ်းမိူင်း ဢေႇတုမ်ႇ၊ ၸူဝ်ႈဢၼ်ၶုၼ်လူင်ဢၼ်ဢုပ်ႉပိူင်ႇၼႂ်းၵူၼ်းမဵဝ်း ဢိသရေး၊ ဢမ်ႇပႆႇမီးၼၼ်ႉၸမ်ႉ၊ ပေႇလႃႉ၊ လုၵ်ႈၸၢႆး ပေႃးရႃႉ၊ ၼၼ်ႉႁဵတ်းၶုၼ်ၵႃႈတီႈဝဵင်း တိၼ်ႇႁႃႇပႃႉ၊ ဢေႃႈ။
ၶုၼ် ပေႇလႃႉ၊ တၢႆလႄႈ ယေႃးပပ်ႉ၊ လုၵ်ႈၸၢႆး ၸေးရႃႉ၊ ၵူၼ်းမိူင်း ပေႃႇၸရႃႉ၊ ၼၼ်ႉႁဵတ်းၶုၼ်တီႈၼင်ႈမၼ်းၼၼ်ႉဢေႃႈ။
ၶုၼ် ယေႃးပပ်ႉ၊ တၢႆလႄႈ ႁုသမ်ႇ၊ ၵူၼ်းမိူင်း တေႇမၼ်ႇ၊ ႁဵတ်းၶုၼ်တီႈၼင်ႈမၼ်းၼၼ်ႉဢေႃႈ။
ၶုၼ် ႁုသမ်ႇ၊ တၢႆလႄႈ ႁႃႇတတ်ႉ၊ လုၵ်ႈၸၢႆး ပေႇတတ်ႉ၊ ဢၼ်တိုၵ်းတေႃးယႃႉပႅတ်ႈၵူၼ်း မိတျၼ်ႇ၊ တင်းလၢႆၵႃႈၼႂ်းပၢင်ႇပဵင်း မေႃႇၽႃႉ၊ ၼၼ်ႉႁဵတ်းၶုၼ်တီႈဢရႃႇမၼ်းၼၼ်ႉဢေႃႈ။ ဝဵင်းမၼ်းၸမ်ႉ၊ပဵၼ်ဝဵင်း ဢႃႇဝိတ်ႉ၊ ဢေႃႈ။
ၶုၼ် ႁႃႇတတ်ႉ၊ တၢႆလႄႈ သမ်းလႃႉ၊ ၵူၼ်းဝဵင်း မႃႇသရိၵ်ႉ၊ ႁဵတ်းၶုၼ်တီႈၼင်ႈမၼ်းၼၼ်ႉဢေႃႈ။
ၶုၼ် သမ်းလႃႉ၊ တၢႆလႄႈ သေႃးလႃႉ၊ ၵူၼ်းဝဵင်း ရႁေႃႇၽူတ်ႉ၊ ဢၼ်မီးၵႃႈႁိမ်းၼမ်ႉႁွင်ႈၼၼ်ႉ၊ႁဵတ်းၶုၼ်တီႈၼင်ႈမၼ်းၼၼ်ႉဢေႃႈ။
ၶုၼ် သေႃးလႃႉ၊ တၢႆလႄႈ ပႃႇလႁႃႇၼၼ်ႇ၊ ဢၼ်ပဵၼ်လုၵ်ႈၸၢႆး ဢႃႇၶပေႃႇ၊ ၼၼ်ႉႁဵတ်းၶုၼ်တီႈၼင်ႈမၼ်းၼၼ်ႉဢေႃႈ။
ၶုၼ် ပႃႇလႁႃႇၼၼ်ႇ၊ တၢႆလႄႈ ႁႃႇတတ်ႉ၊ ႁဵတ်းၶုၼ်တီႈၼင်ႈမၼ်းၼၼ်ႉဢေႃႈ။ ဝဵင်းမၼ်းၸမ်ႉ၊ပဵၼ်ဝဵင်း ပေႃႇ၊ ဢေႃႈ။ ၸိုဝ်ႈသဵင်မေးမၼ်းၸမ်ႉ၊ပဵၼ် မႁေႇတႃႉပေႇလႃႉ၊ လုၵ်ႈယိင်း မႃႇတရိၵ်ႉ၊ ပဵၼ်လၢၼ်ယိင်း မေႇၸႁပ်ႉ၊ ဢေႃႈ။
ၶိူဝ်းၵူၼ်းႁိူၼ်း မိူင်း ဢေႇတုမ်ႇ၊ ၸမ်ႉ၊ပဵၼ်ၶိူဝ်းႁိူၼ်းၵူၼ်းမဵဝ်း တိမ်းၼႃႉ၊ ၵူၼ်းမဵဝ်း ဢႃႇလဝႃႉ၊ ၵူၼ်းမဵဝ်း ယေႇသိတ်ႉ၊-
ၵူၼ်းမဵဝ်း ဢႃႇႁေႃးလိပႃႇမႃႉ၊ ၵူၼ်းမဵဝ်း ဢေးလႃႇ၊ ၵူၼ်းမဵဝ်း ပိၼုၼ်ႇ၊-
ၵူၼ်းမဵဝ်း ၵေးၼတ်ႉ၊ ၵူၼ်းမဵဝ်း တေႇမၼ်ႇ၊ ၵူၼ်းမဵဝ်း မိပၸႃႇ၊-
ၵူၼ်း မႃႇၵတျေႇလႃႉ၊ တင်းၵူၼ်း ဢိရမ်ႇ၊ ဢေႃႈ။ ၶဝ်ၸိူဝ်းၼႆႉ၊ပဵၼ်ၶိူဝ်းႁိူၼ်းၵူၼ်းမဵဝ်း ဢေႇတုမ်ႇ၊ ဢေႃႈ။
ယႃႇၵုပ်ႈ၊ မီးလုၵ်ႈၸၢႆးသိပ်းသွင်ၵေႃႉ၊ဢၼ်ပဵၼ် ရုပိၼ်ႇ၊သိမုၼ်ႇ၊လေႇဝိ၊ယုတႃႉ၊ဢိသၶႃႇ၊ၸေႇပုလုၼ်ႇ၊-
တၢၼ်ႇ၊ယူဝ်းသႅပ်ႈ၊ပိၼ်ႇယႃႇမိၼ်ႇ၊ၼပ်ႉထလိ၊ၵၢတ်ႉ၊ ဢိၵ်ႇတင်း ဢႃႇသျႃႇ၊ ဢေႃႈ။
ယုတႃႉ၊ မီးလုၵ်ႈၸၢႆးႁႃႈၵေႃႉ၊ဢၼ်ပဵၼ် ၵေးရႃႇ၊ဢေႃးၼၼ်ႇ၊ တင်း သေႇလႃႉ၊ သၢမ်ၵေႃႉၼႆႉမၼ်းလႆႈတီႈမေးမၼ်း ပတ်ႉသုဢႃႇ၊ မႄႈယိင်း ၶႃႇၼၼိ၊ ၼၼ်ႉဢေႃႈ။ လုၵ်ႈၸၢႆးတူၼ်ႈမၼ်း ဢေးရႃႉ၊ ၼၼ်ႉႁၢႆႉမိူၵ်ႈၼႃႇၵႃႈတီႈၽၢႆႇၼႃႈ ထႃႇဝရႃႉၽြႃး၊ လႄႈမၼ်းၸဝ်ႈဢဝ်တၢႆသေဢေႃႈ။-
ယုတႃႉ၊ သမ်ႉလႆႈထႅင်ႈလုၵ်ႈၸၢႆးသွင်ၵေႃႉ၊တီႈလုၵ်ႈပႂ်ႉမၼ်း တႃႇမႃႇ၊ ဢၼ်ပဵၼ် ၽေးရိတ်ႉ၊ ဢိၵ်ႇတင်း ၸေးရႃႉ၊ ဢေႃႈ။
ၽေးရိတ်ႉ၊ မီးလုၵ်ႈၸၢႆးသွင်ၵေႃႉ၊ဢၼ်ပဵၼ် ႁေႇၸရုၼ်ႇ၊ တင်း ႁႃႇမုလႃႉ၊ ဢေႃႈ။-
ၼွင်ႉၸၢႆးမၼ်း ၸေးရႃႉ၊ မီးလုၵ်ႈၸၢႆးႁႃႈၵေႃႉ၊ဢၼ်ပဵၼ် ၸိမရိ၊ဢေးႀၼ်ႇ၊ႁေႇမၼ်ႇ၊ပႃႇလၵေႃးလႃႉ၊ ဢိၵ်ႇတင်း တႃႇရတႃႉ၊ ဢေႃႈ။-
ဢႃႇၶၼ်ႇ၊ လုၵ်ႈၸၢႆး ၵႃႇမိ၊ ဢၼ်ပဵၼ်ၸိူဝ်ႉၶိူဝ်း ၸေးရႃႉ၊ ၼၼ်ႉၸမ်ႉ၊ပဵၼ်ၵေႃႉဢၼ်ယႃႉဢၼ်ၵဝ်းၵူၼ်းမဵဝ်း ဢိသရေး၊ ၼႂ်းတၢင်းဢၼ်မၼ်းၵဵပ်းဝႆႉၶိူင်ႈပိူင်ဢၼ်ထုၵ်ႇတၢင်းဢၼ်ၵိၼ်ႇဝႃႈ၊ၵႃႈတီႈၽၢႆႇၼႃႈၽြႃးပဵၼ်ၸဝ်ႈၼၼ်ႉဢေႃႈ။
ဢေးႀၼ်ႇ၊ မီးလုၵ်ႈၸၢႆးၵေႃႉၼိုင်ႈ၊ဢၼ်ပဵၼ် ဢႃႇၸရိ၊ ဢေႃႈ။
ႁေႇၸရုၼ်ႇ၊ မီးလုၵ်ႈၸၢႆးသၢမ်ၵေႃႉ၊ဢၼ်ပဵၼ် ယေႇရမေးလႃႉ၊ရမ်ႇ၊ တင်း ၵႃႇလုပိ၊ ဢေႃႈ။
ၸိူဝ်ႉၶိူဝ်းလုၵ်ႈလၢၼ်တႄႇဢဝ်တီႈ ရမ်ႇ၊ သိုပ်ႇလူင်းထိုင် ယေႇသႄး၊ ၸမ်ႉ၊ ရမ်ႇ၊ဢမိၼတပ်ႉ၊ၼႃႇသုၼ်ႇ၊ ၵေႃႉဢၼ်ႁဵတ်းၶုၼ်ၼႂ်းၵူၼ်း ယုတႃႉ၊-
ဢၽိၵေးလႃႉ၊ တင်းၽူဝ်မၼ်း ယေႇႀႃႇ၊ ၵူၼ်းမဵဝ်း ဢိသမေႇလႃႉ၊ ၼၼ်ႉမီးလုၵ်ႈၸၢႆးၵေႃႉၼိုင်ႈ၊ၸိုဝ်ႈ ဢႃႇမသႃႇ၊ ဢေႃႈ။
ႁေႇၸရုၼ်ႇ၊ မီးလုၵ်ႈၸၢႆးမၼ်း ၵႃႇလႅပ်ႉ၊ ဢၼ်ဢဝ်ၵၼ်တင်း ဢၸုၽႃႉ၊ တင်း ယေႇရုတ်ႉ၊ ၼၼ်ႉမီးလုၵ်ႈၸၢႆးသၢမ်ၵေႃႉ၊ ယေႇသႃႇ၊သေႃးပပ်ႉ၊ တင်း ဢႃႇတုၼ်ႇ၊ ဢေႃႈ။-
လိုၼ်းသေ ဢၸုၽႃႉ၊ တၢႆယဝ်ႉၼၼ်ႉ ၵႃႇလႅပ်ႉ၊ သမ်ႉဢဝ်ၵၼ်တင်း ဢေႇၽရတ်ႉ၊ လႄႈသမ်ႉလႆႈလုၵ်ႈၸၢႆး ႁုရႃႉ၊ ဢေႃႈ။-
ႁုရႃႉ၊ မီးလုၵ်ႈၸၢႆး ဢုရိ၊ လႄႈ ဢုရိ၊ မီးလုၵ်ႈၸၢႆး ပေႇၸလေႇလႃႉ၊ ဢေႃႈ။
မိူဝ်ႈဢၼ် ႁေႇၸရုၼ်ႇ၊ လႆႈဢသၢၵ်ႈႁူၵ်းသိပ်းပီၼၼ်ႉမၼ်းဢဝ်ၵၼ်တင်းလုၵ်ႈယိင်း မႃႇၶိရႃႉ၊ ဢၼ်ပဵၼ်ၼွင်ႉယိင်း ၵိလတ်ႉ၊ ၼၼ်ႉလႄႈၶဝ်လႆႈလုၵ်ႈၸၢႆးဢၼ်ၸိုဝ်ႈ၊ ၸေးၵုပ်ႉ၊ ဢေႃႈ။-
ၸေးၵုပ်ႉ၊ မီးလုၵ်ႈၸၢႆး ယႃႇဢိရႃႉ၊ ဢၼ်လႆႈဢုပ်ႉပိူင်ႇဝဵင်းသၢဝ်းသၢမ်ဝဵင်း၊ၵႃႈၼႂ်းဢိူင်ႇ ၵိလတ်ႉ၊ ၼၼ်ႉဢေႃႈ။-
ၵူၺ်းၵႃႈ၊ၵူၼ်းမိူင်း ၵေႇသုရႃႉ၊ တင်းမိူင်း ဢႃႇရမ်ႇ၊ တိုၵ်းဢဝ်ဝဵင်းႁူၵ်းသိပ်းဝဵင်းၵႃႈတီႈၼၼ်ႈ၊ပႃးဢဝ်ဝဵင်း ယႃႇဢိရႃႉ၊ တင်းဝဵင်း ၵေးၼတ်ႉ၊ ဢိၵ်ႇတင်းဝၢၼ်ႈဝဵင်းဢၼ်မီးႁိမ်းႁွမ်းၸိူဝ်းၼၼ်ႉၵႂႃႇဢေႃႈ။ ၵူၼ်းၸိူဝ်းဢၼ်ယူႇၵႃႈၼႂ်းမိူင်းၼၼ်ႉတင်းသဵင်ႈတင်းလူင်ပဵၼ်ၸိူဝ်ႉၶိူဝ်းလုၵ်ႈလၢၼ် မႃႇၶိရႃႉ၊ ပေႃႈ ၵိလတ်ႉ၊ ၼၼ်ႉၵူၺ်းၵူၺ်းဢေႃႈ။-
လိုၼ်းသေ ႁေႇၸရုၼ်ႇ၊ တၢႆၵႃႈတီႈဝဵင်း ၵႃႇလႅပ်ႉဢေႇၽရတ်ႉ၊ ယဝ်ႉၼၼ်ႉ၊မႄႈမၢႆႈမၼ်း ဢၽိယႃႉ၊ ၵိူတ်ႇလဵင်းလုၵ်ႈၸၢႆး ဢႃႇသုရႃႉ၊ ၵေႃႉဢၼ်တႄႇတင်ႈဝဵင်း တေႇၵေႃႇ၊ ၼၼ်ႉဢေႃႈ။
လုၵ်ႈၸၢႆးတူၼ်ႈ ႁေႇၸရုၼ်ႇ၊ ဢၼ်ပဵၼ် ယေႇရမေးလႃႉ၊ ၼၼ်ႉမီးလုၵ်ႈၸၢႆးႁႃႈၵေႃႉၸမ်ႉ၊ပဵၼ် ရမ်ႇ၊ လုၵ်ႈၸၢႆးတူၼ်ႈမၼ်းဢိၵ်ႇတင်း ပုၼႃႉ၊ဢူဝ်းရိၼ်ႇ၊ဢူဝ်းၸိမ်ႇ၊ တင်း ဢႁိယႃႉ၊ ဢေႃႈ။-
ယေႇရမေးလႃႉ၊ မီးမေးတၢင်ႇၵေႃႉဢၼ်ၸိုဝ်ႈ ဢႃႇတရႃႉ၊ လႄႈ ဢႃႇတရႃႉ၊ ၵိူတ်ႇလဵင်ႉလုၵ်ႈၸၢႆး ဢေႃးၼမ်ႇ၊ ဢေႃႈ။-
လုၵ်ႈၸၢႆးတူၼ်ႈ ယေႇရမေးလႃႉ၊ ဢၼ်ပဵၼ် ရမ်ႇ၊ ၼၼ်ႉမီးလုၵ်ႈၸၢႆးသၢမ်ၵေႃႉ၊ မႃႇၸႃႉ၊ယႃႇမိၼ်ႇ၊ တင်း ဢေးၵႃႇ၊ ဢေႃႈ။-
ဢေႃးၼမ်ႇ၊ မီးလုၵ်ႈၸၢႆးသွင်ၵေႃႉ၊ သမ်ႇမေႇ၊ တင်း ယႃႇတႃႉ၊ ဢေႃႈ။ သမ်ႇမေႇ၊ သမ်ႉမီးလုၵ်ႈၸၢႆးသွင်ၵေႃႉ၊ ၼႃႇတပ်ႉ၊ တင်း ဢၽိသုရႃႉ၊ ဢေႃႈ။-
ဢၽိသုရႃႉ၊ ဢဝ်ၵၼ်တင်း ဢၽိႁေးလႃႉ၊ လႄႈၶဝ်မီးလုၵ်ႈၸၢႆးသွင်ၵေႃႉ၊ ဢႃႇပၼ်ႇ၊ တင်း မေႃႇလိတ်ႉ၊ ဢေႃႈ။-
ပီႈဢၢႆႈမၼ်း ၼႃႇတပ်ႉ၊ သမ်ႉမီးလုၵ်ႈၸၢႆးသွင်ၵေႃႉ၊ သေးလိတ်ႉ၊ တင်း ဢပ်ႉပိမ်း၊ ဢေႃႈ။ သေးလိတ်ႉ၊ ယင်းဢမ်ႇမီးလုၵ်ႈလႄႈတၢႆၵႂႃႇဢေႃႈ။-
လုၵ်ႈၸၢႆး ဢပ်ႉပိမ်း ၸမ်ႉ၊ပဵၼ် ဢိသိ၊ ဢၼ်ပဵၼ်ပေႃႈ သေႇသၼ်ႇ၊ ဢေႃႈ။ သေႇသၼ်ႇ၊ မီးလုၵ်ႈၸၢႆးဢၼ်ဝႃႈ၊ ဢႃႇလေႇ၊ ဢေႃႈ။-
ယႃႇတႃႉ၊ ၼွင်ႉၸၢႆး သမ်ႇမေႇ၊ ၼၼ်ႉမီးလုၵ်ႈၸၢႆးသွင်ၵေႃႉ၊ ယေႇႀႃႇ၊ တင်း ယေႃးၼႀၼ်ႇ၊ ဢေႃႈ။ ယေႇႀႃႇ၊ ယင်းဢမ်ႇမီးလုၵ်ႈလႄႈတၢႆၵႂႃႇဢေႃႈ။-
ယေႃးၼႀၼ်ႇ၊ မီးလုၵ်ႈၸၢႆးသွင်ၵေႃႉ၊ ပေးလိတ်ႉ၊ တင်း ၸႃႇၸႃႇ၊ ဢေႃႈ။ ၶဝ်ၸိူဝ်းၼႆႉၸမ်ႉ၊ပဵၼ်လုၵ်ႈပဵၼ်လၢၼ် ယေႇရမေးလႃႉ၊ ဢေႃႈ။
သေႇသၼ်ႇ၊ ဢမ်ႇမီးလုၵ်ႈၸၢႆး၊မီးလုၵ်ႈယိင်းၵူၺ်းၵူၺ်းဢေႃႈ။ မၼ်းၼၼ်ႉ၊မီးၶႃႈၵူၼ်းမဵဝ်း ဢေးၵျိပ်ႉ၊ ဢၼ်လႆႈၸိုဝ်ႈ ယႃႇႁႃႉ၊ ၼၼ်ႉၵေႃႉၼိုင်ႈလႄႈ၊-
မၼ်းဢဝ်လုၵ်ႈယိင်းမၼ်းၵေႃႉၼိုင်ႈ ပၼ်ၵၼ်တင်း ယႃႇႁႃႉ၊ သေယဝ်ႉ၊လုၵ်ႈယိင်းမၼ်းၵိူတ်ႇလဵင်ႉလုၵ်ႈၸၢႆးဢၼ်လႆႈၸိုဝ်ႈ ဢတ်ႉတေႇ၊ ၼၼ်ႉပုၼ်ႈပေႃႈမၼ်းဢေႃႈ။-
ၸိူဝ်ႉၶိူဝ်းၵူၼ်းႁိူၼ်းဢၼ်တႄႇဢဝ်တီႈ ဢတ်ႉတေႇ၊ သိုပ်ႇလူင်းမႃးတေႃႇထိုင် ဢေးလိသမႃႇ၊ ၸမ်ႉ၊ပဵၼ် ဢတ်ႉတေႇ၊ၼႃႇႀၼ်ႇ၊ၸႃႇပတ်ႉ၊-
လုၵ်ႈၸၢႆးတူၼ်ႈ ၵႃႇလႅပ်ႉ၊ ၼွင်ႉၸၢႆး ယေႇရမေးလႃႉ၊ ၼၼ်ႉပဵၼ် မေႇသႃႉ၊ ဢေႃႈ။ မေႇသႃႉ၊ ပဵၼ်ပေႃႈ ၸိၽႃႉ၊ ဢၼ်ပဵၼ်ပေႃႈ မရေးသႃႉ၊ ဢၼ်ပဵၼ်ပေႃႈ ႁေႇပရုၼ်ႇ၊ ဢေႃႈ။-
ႁေႇပရုၼ်ႇ၊ မီးလုၵ်ႈၸၢႆးသီႇၵေႃႉ၊ ၵေႃးရႃႉ၊တႃႇပွႃႇ၊ရေႇၵိမ်ႇ၊ တင်း သေႇမႃႉ၊ ဢေႃႈ။-
သေႇမႃႉ၊ ပဵၼ်ပေႃႈ ရႃႇႁမ်ႇ၊ ဢၼ်ပဵၼ်ပေႃႈ ယေႃႇၵွမ်ႇ၊ ၼၼ်ႉဢေႃႈ။ ရေႇၵိမ်ႇ၊ ပီႈဢၢႆႈ သေႇမႃႉ၊ ၸမ်ႉ၊မီးလုၵ်ႈၸၢႆး သမ်ႇမေႇ၊-
ဢၼ်ပဵၼ်ပေႃႈ မေႃႇၼႃႉ၊ ဢၼ်မီးလုၵ်ႈၸၢႆး ပႅတ်ႉၸုရႃႉ၊ ၼၼ်ႉဢေႃႈ။
ၵႃႇလႅပ်ႉ၊ မီးမေးၼွႆႉဢၼ်လႆႈၸိုဝ်ႈ ဢေးၽႃႇ၊ လႄႈၶဝ်သမ်ႉမီးလုၵ်ႈၸၢႆးသၢမ်ၵေႃႉထႅင်ႈဢၼ်ပဵၼ် ႁႃႇရၼ်ႇ၊မေႃးၸႃႉ၊ ဢိၵ်ႇတင်း ၵႃႇၸတ်ႉ၊ ဢေႃႈ။ လုၵ်ႈၸၢႆး ႁႃႇရၼ်ႇ၊ ၸမ်ႉ၊ပဵၼ် ၵႃႇၸတ်ႉ၊ ဢေႃႈ။
ၵူၼ်းၵေႃႉၼိုင်ႈဢၼ်လႆႈၸိုဝ်ႈ ယႃႇတေႇ၊ ၼၼ်ႉ၊မီးလုၵ်ႈၸၢႆးႁူၵ်းၵေႃႉ၊ဢၼ်ပဵၼ် ရေႇၵိမ်ႇ၊ယေႃးသမ်ႇ၊ၵေႇသမ်ႇ၊ပေးလိတ်ႉ၊ဢေးၽႃႇ၊ ဢိၵ်ႇတင်း သႃႇၽႃႉ၊ ဢေႃႈ။
ၵႃႇလႅပ်ႉ၊ ယင်းမီးမေးၼွႆႉဢၼ်လႆႈၸိုဝ်ႈ မႃႇၶႃႇ၊ ၼၼ်ႉလႄႈၶဝ်သမ်ႉမီးလုၵ်ႈၸၢႆးသွင်ၵေႃႉ၊ သေႇပႃႇ၊ တင်း တိရႁႃႇၼႃႉ၊ ဢေႃႈ။-
လိုၼ်းၼၼ်ႉၶဝ်သမ်ႉမီးလုၵ်ႈၸၢႆးထႅင်ႈသွင်ၵေႃႉ၊ သႃႇၽႃႉ၊ ဢၼ်တႄႇတင်ႈဝဵင်း မႃႇတမေးၼႃႉ၊ တင်း သေးဝႃႉ၊ ဢၼ်တႄႇတင်ႈဝဵင်း မႃႇၶပေးၼႃႉ၊ တင်းဝဵင်း ၵိပိယႃႉ၊ ၼၼ်ႉဢေႃႈ။ ၵႃႇလႅပ်ႉ၊ ယင်းမီးလုၵ်ႈယိင်းဢၼ်လႆႈၸိုဝ်ႈ ဢႃႇၶသႃႉ၊ ၼၼ်ႉလူးၵွၼ်ႇဢေႃႈ။
ၸိူဝ်ႉၶိူဝ်းလုၵ်ႈလၢၼ် ၵႃႇလႅပ်ႉ၊ ၸမ်ႉ၊လုၵ်ႈၸၢႆးတူၼ်ႈ ၵႃႇလႅပ်ႉ၊ တင်းမေးမၼ်း ဢေႇၽရတ်ႉ၊ ၸမ်ႉ၊ပဵၼ် ႁုရႃႉ၊ ဢၼ်မီးလုၵ်ႈၸၢႆး သေႃႇပႃႇလႃႉ၊ ၵေႃႉဢၼ်တႄႇတင်ႈဝဵင်း ၵိရယတ်ႉယႃႇရိမ်ႇ၊ ၼၼ်ႉလႄႈ၊-
လုၵ်ႈၸၢႆးထူၼ်ႈသွင်၊ပဵၼ် သႃႇလမႃႉ၊ ၵေႃႉဢၼ်တႄႇတင်ႈဝဵင်း ပႅတ်ႉလႁႅမ်ႇ၊ ဢိၵ်ႇတင်းလုၵ်ႈၸၢႆးၵေႃႉထူၼ်ႈသၢမ်၊ပဵၼ် ႁႃႇရပ်ႉ၊ ဢၼ်တႄႇတင်ႈဝဵင်း ပႅတ်ႉၵႃႇတႃႇ၊ ၼၼ်ႉဢေႃႈ။
သေႃႇပႃႇလႃႉ၊ ဢၼ်တႄႇတင်ႈဝဵင်း ၵိရယတ်ႉယႃႇရိမ်ႇ၊ ၼၼ်ႉပဵၼ်ပူႇပေႃႈၸိူဝ်ႉၶိူဝ်းၵူၼ်း ႁႃႇရေႃႇ၊ ဢိၵ်ႇတင်းၵူၼ်း မၼႃႇႁေႇသိ၊ ၶိုင်ႈၼိုင်ႈဢေႃႈ။-
ၶိူဝ်းႁိူၼ်းၵူၼ်းၸိူဝ်းဢၼ်ယူႇၼႂ်းဝဵင်း ၵိရယတ်ႉယႃႇရိမ်ႇ၊ ၼၼ်ႉၸမ်ႉ၊ပဵၼ်ၵူၼ်း ဢိသရိ၊ ၵူၼ်း ပုႁိ၊ ၵူၼ်း သုမသိ၊ တင်းၵူၼ်း မိသရိ၊ ဢေႃႈ။ ၵူၼ်းဝဵင်း ၸူဝ်းရႃႇ၊ တင်းဝဵင်း ဢေးသတေႃးလႃႉ၊ ၸိူဝ်းၼၼ်ႉၵေႃႈ၊ပဵၼ်ၶိူဝ်းႁိူၼ်းၼႆႉၼင်ႇၵဝ်ႇဢေႃႈ။
သႃႇလမႃႉ၊ ဢၼ်တႄႇတင်ႈဝဵင်း ပႅတ်ႉလႁႅမ်ႇ၊ သမ်ႉပဵၼ်ပူႇပေႃႈၸိူဝ်ႉၶိူဝ်းၵူၼ်းမဵဝ်း ၼေႇတေႃႇၽႃႉ၊ ၵူၼ်းမဵဝ်း ဢႃႇတရုတ်ႉပႅတ်ႉယေႃႇၽႃႉ၊ ၵူၼ်းမဵဝ်း မၼႃႇႁေႇသိ၊ ၶိုင်ႈၼိုင်ႈ၊ၵူၼ်းမဵဝ်း ၸေႃးရိ။
ဢိၵ်ႇတင်းၵူၼ်းၶိူဝ်းႁိူၼ်းၸရေးၽူႈတႅမ်ႈမၢႆၸိူဝ်းဢၼ်ယူႇၼႂ်းဝဵင်း ယႃႇပႅတ်ႉ၊ ၵူၼ်းမဵဝ်း တိရသိ၊ ၵူၼ်းမဵဝ်း သိမသိ၊ တင်းၵူၼ်းမဵဝ်း ၸုၶသိ၊ ဢေႃႈ။ ၶဝ်ၸိူဝ်းၼႆႉ၊ပဵၼ်ၵူၼ်းမဵဝ်း ၵိၼိ၊ ဢၼ်သိုပ်ႇလူင်းမႃးၵႃႈတီႈ ႁေႇမတ်ႉ၊ ပေႃႈၵူၼ်းမဵဝ်း ရေႇၶပ်ႉ၊ ၼၼ်ႉဢေႃႈ။
ၶဝ်တင်းႁူၵ်းၵေႃႉၼႆႉၵိူတ်ႇလဵင်ႉၸူဝ်ႈဢၼ် တႃႇဝိတ်ႈ၊ ၸၢမ်ႇႁၢင်ႈၸၢမ်ႇႁေႃၵႃႈၼႂ်းဝဵင်း ႁေႇပရုၼ်ႇ၊ ၸဵတ်းပီပၢႆၶိုင်ႈၼၼ်ႉဢေႃႈ။ မၼ်းၼၼ်ႉၸၢမ်ႇႁၢင်ႈၸၢမ်ႇႁေႃၵႃႈၼႂ်းဝဵင်း ယေႇရုသလႅမ်ႇ၊ သၢမ်သိပ်းသၢမ်ပီလႄႈ၊-
ၵႃႈၼႂ်းဝဵင်းၼၼ်ႉမၼ်းသမ်ႉလႆႈလုၵ်ႈၸၢႆးထႅင်ႈၼမ်ၼႃႇဢေႃႈ။ မေးၼၢင်းမၼ်း ပႃႇသသုဢႃႉ၊ လုၵ်ႈယိင်း ဢမျေးလႃႉ၊ ၼၼ်ႉမီးလုၵ်ႈၸၢႆးသီႇၵေႃႉ၊ သိမႃႇ၊သေႃးပပ်ႉ၊ၼႃႇႀၼ်ႇ၊ ဢိၵ်ႇတင်း သေႃးလမုၼ်ႇ၊ ဢေႃႈ။
မၼ်းသမ်ႉမီးထႅင်ႈလုၵ်ႈၸၢႆးၵဝ်ႈၵေႃႉ၊ဢၼ်ပဵၼ် ဢိပႁႃႇ၊ဢေးလိသမႃႇ၊ဢေႇလီႇၽလႅတ်ႉ၊-
လိူဝ်သေလုၵ်ႈၸၢႆးၸိူဝ်းၼႆႉၼၼ်ႉမၼ်းယင်းမီးလုၵ်ႈၸၢႆးၸိူဝ်းဢၼ်လႆႈလူၺ်ႈၵၼ်တင်းၸိူင်ႉၼၢင်းမၼ်းတင်းလၢႆၼၼ်ႉလူးၵွၼ်ႇဢေႃႈ။ မၼ်းမီးလုၵ်ႈယိင်းၵေႃႉၼိုင်ႈ၊ဢၼ်လႆႈၸိုဝ်ႈ တႃႇမႃႇ၊ ဢေႃႈ။
ၸိူဝ်းၼႆႉပဵၼ်ၸိူဝ်ႉၶိူဝ်းၶုၼ်ႁေႃၶမ်း သေႃးလမုၼ်ႇ၊ ဢၼ်သိုပ်ႇလူင်းမႃးၸွမ်းၼင်ႇပေႃႈလုၵ်ႈၵၼ်ၸမ်ႉ၊ သေႃးလမုၼ်ႇ၊ရူဝ်းပုမ်ႇ၊ဢၽိယႃႉ၊ဢႃႇသႃႉ၊ယူဝ်းသၽတ်ႉ၊-
ယေႃးယၵိမ်း၊ မီးလုၵ်ႈၸၢႆးသွင်ၵေႃႉ၊ ယေႇၶေႃးၼိ၊ တင်း ၸေႇတၵိ၊ ဢေႃႈ။
ၶုၼ်ႁေႃၶမ်း ယေႇၶေႃးၼိ၊ ဢၼ်လႆႈၵႂႃႇတူၵ်းၵႅၼ်းၵႃႈတီႈမိူင်း ပႃႇပုလုၼ်ႇ၊ ၼၼ်ႉမီးလုၵ်ႈၸၢႆးၸဵတ်းၵေႃႉ၊ဢၼ်ပဵၼ် သႃႇလထိဢေးလႃႉ၊-
မႃႇလၶိရမ်ႇ၊ပေႇတႃႇယႃႉ၊သေႇၼၸႃႇ၊ယေႇၵမိ၊ႁေႃးသမႃႇ၊ တင်း ၼေႇတၽိ၊ ဢေႃႈ။-
ပေႇတႃႇယႃႉ၊ မီးလုၵ်ႈၸၢႆးသွင်ၵေႃႉ၊ ၸေႇရုပႃႉပေႇလႃႉ၊ တင်း သိမိ၊ ဢေႃႈ။ ၸေႇရုပႃႉပေႇလႃႉ၊ ပဵၼ်ပေႃႈ မေႇသုလမ်ႇ၊ တင်း ႁႃႇၼၼိ၊ ဢိၵ်ႇတင်းၼွင်ႉယိင်းၶဝ် သေႇလေႃးမိတ်ႉ၊ ဢေႃႈ။-
လိူဝ်သေၼၼ်ႉ၊မၼ်းသမ်ႉမီးထႅင်ႈလုၵ်ႈၸၢႆးႁႃႈၵေႃႉ၊ဢၼ်ပဵၼ် ႁသုၽႃႉ၊ဢေႃးႁေႇလႃႉ၊ပေႇရၶိ၊ႁသတိ၊ တင်း ယုသတ်ႉႁေးသႅတ်ႉ၊ ဢေႃႈ။
ႁႃႇၼၼိ၊ မီးလုၵ်ႈၸၢႆးသွင်ၵေႃႉ၊ ပေႇလတိ၊ တင်း ယေႇသႃႇယႃႉ၊ ဢေႃႈ။ ယေႇသႃႇယႃႉ၊ မီးလုၵ်ႈၸၢႆး ရေႇၽႃႇယႃႉ၊ ဢၼ်ပဵၼ်ပေႃႈ ဢႃႇၼၼ်ႇ၊ဢႃႇၼၼ်ႇ၊ ပဵၼ်ပေႃႈ ဢေႃးပတိ၊ဢေႃးပတိ၊ ပဵၼ်ပေႃႈ သေႇၶၼိ၊ ဢေႃႈ။-
သေႇၶၼိ၊ မီးလုၵ်ႈၸၢႆးၵေႃႉလဵဝ် သေႇမႃႇယႃႉ၊ လႄႈမီးလၢၼ်ၸၢႆးႁႃႈၵေႃႉ၊ ႁတ်ႉတုတ်ႉ၊ဢိၵႃႇလႃႉ၊ပႃႇရိ၊ၼႃႇရိ၊ တင်း သႃႇၽတ်ႉ၊ ဢေႃႈ။-
ၼႃႇရိ၊ မီးလုၵ်ႈၸၢႆးသၢမ်ၵေႃႉ၊ ဢေးလိဢေႃးၼေႇ၊ႁေႇၸၵိ၊ တင်း ဢႃႇၸရိၵမ်ႇ၊ ဢေႃႈ။-
ဢေးလိဢေႃးၼေႇ၊ မီးလုၵ်ႈၸၢႆးၸဵတ်းၵေႃႉ၊ဢၼ်ပဵၼ် ႁေႃႇတႃႉဝႃႉ၊ဢေးလျႃႇသိပ်ႉ၊ပေႇလႃႇယႃႉ၊ဢၵ်ႉၵုပ်ႉ၊ယေႃးႁၼၼ်ႇ၊တလႃႇယႃႉ၊ တင်း ဢႃႇၼၼိ၊ ဢေႃႈ။
ၸိူဝ်ႉၶိူဝ်းလုၵ်ႈလၢၼ် ယုတႃႉ၊ ၵမ်ႈၽွင်ႈၸမ်ႉ၊ ၽေးရိတ်ႉ၊ႁေႇၸရုၼ်ႇ၊ၵႃႇမိ၊ႁုရႃႉ၊ တင်း သေႃႇပႃႇလႃႉ၊ ဢေႃႈ။-
သေႃႇပႃႇလႃႉ၊ မီးလုၵ်ႈၸၢႆး ရႃႇယႃႉ၊ ဢၼ်ပဵၼ်ပေႃႈ ယႃႇႁတ်ႉ၊ ဢၼ်မီးလုၵ်ႈၸၢႆး ဢႁုမေး၊ တင်း လႃႇႁတ်ႉ၊ ၼၼ်ႉဢေႃႈ။ ၶဝ်ၼႆႉပဵၼ်ပူႇပေႃႈၵူၼ်းၸိူဝ်းဢၼ်ယူႇၵႃႈတီႈ ၸူဝ်းရႃႇ၊ ၼၼ်ႉဢေႃႈ။
ဢႃႇသုရႃႉ၊ ၵေႃႉဢၼ်တႄႇတင်ႈဝဵင်း တေႇၵေႃႇ၊ ၼၼ်ႉမီးမေးသွင်ၵေႃႉ၊ဢၼ်လႆႈၸိုဝ်ႈ ႁေႇလႃႉ၊ တင်း ၼႃႇရႃႉ၊ ဢေႃႈ။-
မၼ်းတင်း ၼႃႇရႃႉ၊ မီးလုၵ်ႈၸၢႆးသီႇၵေႃႉ၊ဢၼ်ပဵၼ် ဢႁုၸမ်ႇ၊ႁေႇၽႃႇ၊တေႇမၼိ၊ တင်း ႁႃႇႁႃႉသတႃႇရိ၊ ဢေႃႈ။-
မၼ်းတင်း ႁေႇလႃႉ၊ သမ်ႉမီးလုၵ်ႈၸၢႆးဢၼ်ပဵၼ် ၸေးရိတ်ႉ၊ယေႇၸေႃႇ၊ဢေးႀၼၼ်ႇ၊ ဢေႃႈ။
ၵေႃးၸႃႉ၊ မီးလုၵ်ႈၸၢႆး ဢႃႇၼုပ်ႉ၊ တင်း ၸေႃႇပေႇပႃႉ၊ ဢိၵ်ႇတင်းပဵၼ်ပေႃႈၸိူဝ်ႉၶိူဝ်းႁိူၼ်း ဢႁႃႇရေးလႃႉ၊ လုၵ်ႈၸၢႆး ႁႃႇရုမ်ႇ၊ ၼၼ်ႉဢေႃႈ။
မီးၵူၼ်းၵေႃႉၼိုင်ႈ၊ဢၼ်လႆႈၸိုဝ်ႈ ယႃႇပႅတ်ႉ၊ ၼၼ်ႉမီးမုၼ်သရေႇယႂ်ႇၼႃႇသေပီႈၼွင်ႉၸိူဝ်ႉၶိူဝ်းမၼ်းတင်းလၢႆဢေႃႈ။ မႄႈမၼ်းႁွင်ႉႁဵၵ်ႈၸိုဝ်ႈမၼ်း ယႃႇပႅတ်ႉ၊ ၵွပ်ႈပိူဝ်ႈတၢင်းဢၼ်မၼ်းၵိူတ်ႇလဵင်ႉမႃးၼၼ်ႉႁႂ်ႈမႄႈမၼ်းလႆႈၶၢမ်ႇဝူၺ်ႇတၼႃႇဢၼ်ႁႅင်းယႂ်ႇၼႃႇလူင်လၢင်ၼၼ်ႉဢေႃႈ။-
ယႃႇပႅတ်ႉ၊ ၸၢင်ႈသူးတွင်းတီႈၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ လႄႈဝႃႈ၊ “ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈပၼ်တၢင်းလီတီႈၶႃႈၸဝ်ႈသေႇသေႇလႄႈပၼ်တီႈလိၼ်ဢၼ်ၵႂၢင်ႈလီလႃးလီၼၼ်ႉတီႈၶႃႈၸဝ်ႈသေၵမ်းတီႈၶႃႈ။ ၶႅၼ်းတေႃႈယူႇၽၢႆႇၶႃႈၸဝ်ႈသေလႄႈႁၢမ်ႈတၢပ်ႈႁႄႉၶႅၼ်ၽေးဢၼ်ဢမ်ႇလီဢမ်ႇငၢမ်း၊မဵဝ်းဢၼ်ၸၢင်ႈႁႂ်ႈၶႃႈၸဝ်ႈလႆႈၶၢမ်ႇဝူၺ်ႇတၼႃႇၼၼ်ႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။ ၽြႃးပဵၼ်ၸဝ်ႈၵေႃႈ၊ဢဵတ်းလူပၼ်သူးဢၼ်မၼ်းလဝ်ႈယွၼ်းၼၼ်ႉဢေႃႈ။
ၶေးလုပ်ႉ၊ ၼွင်ႉၸၢႆး သုဢႃႇ၊ ၼၼ်ႉမီးလုၵ်ႈၸၢႆး မႁိရႃႉ၊မႁိရႃႉ၊ ပဵၼ်ပေႃႈ ဢေးသတုၼ်ႇ၊-
ဢၼ်မီးလုၵ်ႈၸၢႆးသၢမ်ၵေႃႉ၊ ပႅတ်ႉရႃႇၽႃႉ၊ပႃႇသႃႇ၊ တင်း တေႇႁိၼ်ႇၼႃႉ၊ ဢေႃႈ။ တေႇႁိၼ်ႇၼႃႉ၊ တႄႇတင်ႈဝဵင်း ၼႁႃႇသႃႉ၊ ဢေႃႈ။ ၸိူဝ်ႉၶိူဝ်းလုၵ်ႈလၢၼ်ၶဝ်ၸိူဝ်းၼႆႉယူႇၵႃႈတီႈဝဵင်း ရေႇၶႃႇ၊ ဢေႃႈ။
ၵေးၼတ်ႉ၊ မီးလုၵ်ႈၸၢႆးသွင်ၵေႃႉ၊ ဢေႃးႀၼ်ႇယေႇလႃႉ၊ တင်း ၸရႃႇယႃႉ၊ ဢေႃႈ။ ဢေႃးႀၼ်ႇယေႇလႃႉ၊ ၵေႃႈမီးလုၵ်ႈၸၢႆးသွင်ၵေႃႉ ႁႃႇႀတ်ႉ၊ တင်း မေႃႇၼေႃႇႀေး၊ ဢေႃႈ။-
မေႃႇၼေႃႇႀေး၊ မီးလုၵ်ႈၸၢႆး ဢေႃႇၽရႃႉ၊ ဢေႃႈ။ ၸရႃႇယႃႉ၊ ပဵၼ်ပေႃႈ ယွႃႇၽႃႉ၊ ဢၼ်တႄႇဢဝ်ထူင်ႉႁူၺ်ႈဢၼ်ၵူၼ်းၸၢင်ႈမေႃၶႅၵ်းမႆႉ၊တီႈဢၼ်ၵူၼ်းတင်းသဵင်ႈတင်းလူင်ပဵၼ်ၵူၼ်းဢၼ်မေႃႁဵတ်းမေႃသၢင်ႈၵတ်ႉၶၼ်ၼႃႇၼၼ်ႉဢေႃႈ။
ၵႃႇလႅပ်ႉ၊ လုၵ်ႈၸၢႆး ယေႇၽုၼ်ႇၼႃႉ၊ ၼၼ်ႉမီးလုၵ်ႈၸၢႆးသၢမ်ၵေႃႉ၊ ဢိရု၊ဢေးလႃႇ၊ တင်း ၼႃႇမႃႇ၊ ဢေႃႈ။ ဢေးလႃႉ၊ သမ်ႉပဵၼ်ပေႃႈ ၵေးၼတ်ႉ၊ ဢေႃႈ။
ယေႇႁလႃႉလေးလႃႉ၊ မီးလုၵ်ႈၸၢႆးသီႇၵေႃႉ၊ ၸိၽႃႉ၊ၸိၽႃႇ၊တိရိ၊ တင်း ဢႃႇသရေး၊ ဢေႃႈ။
ႁူဝ်းတိယႃႉ၊ ဢဝ်ၵၼ်တင်းၼွင်ႉယိင်း ၼႃႇႁမ်ႇ၊ လႄႈၸိူဝ်ႉၶိူဝ်းလုၵ်ႈလၢၼ်ၶဝ်တႄႇတင်ႈၸိူဝ်ႉၶိူဝ်းႁိူၼ်းၵူၼ်း ၵႃႇမိ၊ ဢၼ်ယူႇၵႃႈတီႈဝဵင်း ၵိလႃႉ၊ ဢိၵ်ႇတင်းၵူၼ်းဝဵင်း မႃႇၶႃႉ၊ ဢၼ်ယူႇၵႃႈတီႈဝဵင်း ဢေႇသတမေႃႇ၊ ဢေႃႈ။
သိမုၼ်ႇ၊ မီးလုၵ်ႈၸၢႆးသီႇၵေႃႉ၊ ဢႃႇမၼုၼ်ႇ၊ရိၼ်းၼႃႉ၊ပိၼ်ႇႁႃႇၼၼ်ႇ၊ တင်း တိလုၼ်ႇ၊ ဢေႃႈ။ ဢိသိ၊ မီးလုၵ်ႈၸၢႆးသွင်ၵေႃႉ၊ ၸေႃႇႁိတ်ႉ၊ ဢိၵ်ႇတင်း ဝိၼ်ႇၸေႃႇႁိတ်ႉ၊ ဢေႃႈ။
သေးလႃႉ၊ ပဵၼ်လုၵ်ႈၸၢႆး ယုတႃႉ၊ ၼၼ်ႉၵေႃႉၼိုင်ႈဢေႃႈ။ ၸိူဝ်ႉၶိူဝ်းမၼ်းၸမ်ႉ၊ပဵၼ် ဢေးရႃႉ၊ ဢၼ်တႄႇတင်ႈဝဵင်း လေးၵႃႉ၊လႃႇတႃႉ၊ ဢၼ်တႄႇတင်ႈဝဵင်း မရေးသႃႉ၊ လႄႈပဵၼ်ၶိူဝ်းႁိူၼ်းဢၼ်ၸၢင်ႈတေႃးၽႃႈပၢၼ်ႇၶျေႃးၸိူဝ်းဢၼ်ယူႇၵႃႈတီႈဝဵင်း ပႅတ်ႉဢႃႇသၽႃႇ၊ ၼၼ်ႉ၊-
ယေႃႇယၵိမ်း၊ ဢိၵ်ႇတင်းၵူၼ်းဝဵင်း ၶေႃႇၸေးၽႃႉ၊ တင်းလၢႆ၊ဢိၵ်ႇတင်း ယေႃးသႃႉ၊ တင်း သႃႇရပ်ႉ၊ ဢၼ်ဢဝ်ၵၼ်တင်းမႄႈယိင်း မေႃႇၽႃႉ၊ လႄႈတႄႇသဝ်းယူႇၼႂ်းဝဵင်း ပႅတ်ႉလႁႅမ်ႇ၊ ၼၼ်ႉဢေႃႈ။ (ဢၼ်ဝႃႈၸိူဝ်ႉၼင်ႇၼႆၸိုင်၊ပဵၼ်ၵႂၢမ်းမိူဝ်ႈၵွၼ်ႇဢွၼ်ၼႆႉဢေႃႈ။-)
ၶဝ်ပဵၼ်ၵူၼ်းႁဵတ်းမေႃႈၸိူဝ်းဢၼ်ထၢမ်းႁဵတ်းၵၢၼ်ၶုၼ်ႁေႃၶမ်းလႄႈယူႇၵႃႈၼႂ်းဝဵင်း ၼေႇတိမ်း၊ တင်းဝဵင်း ၵေႇတေႇရႃႉ၊ ဢေႃႈ။
သိမုၼ်ႇ၊ မီးလုၵ်ႈၸၢႆးႁႃႈၵေႃႉ၊ဢၼ်ပဵၼ် ၼေႇမူၺ်ႇလႃႉ၊ယႃႇမိၼ်ႇ၊ယႃႇရိပ်ႉ၊ၸေးရႃႉ၊ ဢိၵ်ႇတင်း သေႃးလႃႉ၊ ဢေႃႈ။-
သေႃးလႃႉ၊ မီးလုၵ်ႈၸၢႆး သႃႇလုမ်ႇ၊ ဢၼ်ပဵၼ်ပေႃႈ မိပသမ်ႇ၊ ဢၼ်ပဵၼ်ပေႃႈ မိသမႃႉ၊ ဢေႃႈ။-
လုၵ်ႈလၢၼ်ဢၼ်သိုပ်ႇလူင်းမႃးၵႃႈတီႈ မိသမႃႉ၊ ၸမ်ႉ၊ ႁမူၺ်ႇလႃႉ၊ၸၵ်ႉၵုရႃႉ၊ တင်း သိမိ၊ ဢေႃႈ။-
သိမိ၊ မီးလုၵ်ႈၸၢႆးသိပ်းႁူၵ်းၵေႃႉ၊တင်းလုၵ်ႈယိင်းႁူၵ်းၵေႃႉဢေႃႈ။ ၵူၺ်းၵႃႈ၊ၼႂ်းၶဝ်ပီႈၼွင်ႉၼၼ်ႉလုၵ်ႈလၢင်းဢမ်ႇၼမ်လႄႈ၊ၸိူဝ်ႉၶိူဝ်းလုၵ်ႈလၢၼ် သိမုၼ်ႇ၊ ၼၼ်ႉဢမ်ႇၼမ်ဢမ်ႇၵိုၼ်းမိူၼ်ၸိူဝ်ႉၼင်ႇၸိူဝ်ႉၶိူဝ်းလုၵ်ႈလၢၼ် ယုတႃႉ။
ၸိူဝ်ႉၶိူဝ်းလုၵ်ႈလၢၼ် သိမုၼ်ႇ၊ ၸိူဝ်းဢၼ်သိုပ်ႇလူင်းမႃးတေႃႇႁွတ်ႈၶုၼ်ႁေႃၶမ်း တႃႇဝိတ်ႈ၊ ၼၼ်ႉဢွၼ်ၵၼ်ယူႇသဝ်းၵႃႈၼႂ်းဝဵင်း ပေႇရသေးၽႃႉ၊ ဝဵင်း မေႃႇလတႃႇ၊ ဝဵင်း ႁႃႇၸႃႉသုဢႃႇလႃႉ၊-
ဝဵင်း ပိလႁႃႇ၊ ဝဵင်း ဢႃႇၸိမ်ႇ၊ ဝဵင်း တေႃႇလတ်ႉ၊-
လိူဝ်သေၼၼ်ႉၶဝ်ယင်းဢွၼ်ၵၼ်ယူႇၼႂ်းဝဵင်းႁႃႈဝဵင်းဢၼ်ပဵၼ်ဝဵင်း ဢေးတမ်ႇ၊ ဝဵင်း ဢႃႇဢိၼ်ႇ၊ ဝဵင်း ရိမ်ႇၽၼ်ႇ၊ ဝဵင်း တေႃႇၶိမ်း၊ တင်းဝဵင်း ဢႃႇသၼ်ႇ၊-
ဢိၵ်ႇလူၺ်ႈၵၼ်တင်းဝၢၼ်ႈဢၼ်မီးႁိမ်းႁွမ်းမၼ်းတင်းလၢႆ၊လူင်းၵႂႃႇတၢင်းၸၢၼ်းတေႃႇထိုင်ႁွတ်ႈဝဵင်း ပႃႇလႃႉ၊ ဢေႃႈ။ ဢၼ်ၼႆႉၸမ်ႉ၊ပဵၼ်တၢင်းဢၼ်မၢတ်ႈမၢႆဝႆႉ၊လွင်ႈၸိူဝ်ႉၶိူဝ်းႁိူၼ်းၶဝ်၊ဢိၵ်ႇတင်းတီႈယူႇတီႈသဝ်းၶဝ်ၼၼ်ႉဢေႃႈ။
ၶဝ်ၽႄၸွတ်ႇၵႂႃႇၽၢႆႇၼႃႈဝၼ်းတူၵ်းၸမ်တၵ်းႁွတ်ႈထိုင်၊ၵႃႈတီႈဝဵင်း ၵေးတေႃး၊ သေလႄႈၶဝ်ဢွၼ်ၵၼ်လဵင်ႉၽုင်သူဝ်းၽုင်ပႄႉၶဝ်ၽၢႆႇတၢင်းဝၼ်းဢွၵ်ႇပၢင်ႇႁူၺ်ႈဝဵင်းဢၼ်ၶဝ်ယူႇၼၼ်ႉဢေႃႈ။-
ၶဝ်ၼၼ်ႉထူပ်းတီႈဢၼ်ပၢင်ႇယိူဝ်ႈယႃႈလီလႄႈလိူင်ႇၼမ်ၼႃႇ၊တီႈဢၼ်ၵႂၢင်ႈလီလႃးလီလႄႈယဵၼ်လီၼၼ်ႉဢေႃႈ။ ၵူၼ်းဢၼ်ယူႇၵႃႈတီႈၼၼ်ႈမိူဝ်ႈဢွၼ်တၢင်းၼၼ်ႉပဵၼ်ၵူၼ်းမဵဝ်း ႁႃႇမႃႉ၊ ဢေႃႈ။-
ၼႂ်းၸူဝ်ႈပၢၼ်ၶုၼ်ႁေႃၶမ်း ႁေႇၸၵိ၊ မိူင်း ယုတႃႉ၊ ၼၼ်ႉၼႃႇမႃႉၸိုဝ်ႈသဵင်ၵူၼ်းၸိူဝ်းဢၼ်ဝႃႈမႃးၼၼ်ႉ၊ဢွၼ်ၵၼ်ၵႂႃႇတိုၵ်းတေႃးဝဵင်း ၵေးတေႃး၊ လႄႈယႃႉပႅတ်ႈသုမ်ႉထဵင်ၶဝ်၊ဢိၵ်ႇတင်းၵူၼ်းမဵဝ်း မေႃႇၼိ၊ ဢၼ်ၶဝ်ထူပ်းႁၼ်ၵႃႈတီႈၼၼ်ႈၸိူဝ်းၼၼ်ႉသေယဝ်ႉ၊ဢွၼ်ၵၼ်ပုတ်ႈတီႈၶဝ်ၼၼ်ႉလႄႈယူႇၵႂႃႇသေႇသေႇမၼ်ႈမၼ်ႈၵွပ်ႈပိူဝ်ႈပဵၼ်တီႈဢၼ်ပၢင်ႇယိူဝ်ႈယႃႈလီၼႃႇပုၼ်ႈၽုင်သူဝ်းၽုင်ပႄႉၶဝ်ၼၼ်ႉဢေႃႈ။-
ၼႂ်းၸိူဝ်ႉၶိူဝ်း သိမုၼ်ႇ၊ ၼၼ်ႉၵူၼ်းႁႃႈပၢၵ်ႇဢွၼ်ၵၼ်ၶီႇသိုၵ်းၵႂႃႇၽၢႆႇတၢင်းဝၼ်းဢွၵ်ႇၵႂႃႇၸူးတီႈလွႆ ၸိရႃႉ၊ လႄႈၶုၼ်သိုၵ်းၶဝ်ၼၼ်ႉ၊ပဵၼ်လုၵ်ႈၸၢႆး ဢိသိ၊ ဢၼ်ဝႃႈ၊ ပေႇလတိ၊ၼႃႇရိ၊ရေႇၽႃႇယႃႉ၊ဢေႃးၸေးလႃႉ၊ ၸိူဝ်းၼၼ်ႉဢေႃႈ။-
ၶဝ်ၼၼ်ႉ၊တိုၵ်းတေႃးယႃႉပႅတ်ႈၵူၼ်းမဵဝ်း ဢႃႇမလႅၵ်ႉ၊ ဢၼ်ယင်းၵိုတ်းၵျၢၼ်ႇလႄႈလွတ်ႈယူႇဝႆႉလႄႈယူႇသဝ်းၵႃႈတီႈၼၼ်ႈတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
ဢၼ်ၼႆႉပဵၼ်ၸိူဝ်ႉၶိူဝ်းလုၵ်ႈလၢၼ် ရုပိၼ်ႇ၊ လုၵ်ႈၸၢႆးတူၼ်ႈ ယႃႇၵုပ်ႈ၊ ၼၼ်ႉဢေႃႈ။ ၵွပ်ႈပိူဝ်ႈဢၼ်မၼ်းလႆႈၼွၼ်းလူၺ်ႈၵၼ်တင်းမေးၼွႆႉပေႃႈမၼ်းၼၼ်ႉၵေႃႉၼိုင်ႈၼၼ်ႉလႄႈပိၵ်ႉသမ်ႉမၼ်းပဵၼ်လုၵ်ႈတူၼ်ႈသေၵေႃႈ၊ဢရႃႇလုၵ်ႈၸၢႆးတူၼ်ႈၼၼ်ႉလႆႈၶၢမ်ႇတၢင်းဢၼ်ၼုၵ်ႈဢဝ်သေလႄႈဢဝ်ဢရႃႇၼၼ်ႉပၼ်တီႈ ယူဝ်းသႅပ်ႈ၊ ဢေႃႈ။-
ပိၵ်ႉသမ်ႉပဵၼ်ၸိူဝ်ႉၼင်ႇၼၼ်သေၵေႃႈ၊ၸိူဝ်ႉၶိူဝ်း ယုတႃႉ၊ ၼၼ်ႉလႆႈပဵၼ်ၸိူဝ်ႉၶိူဝ်းဢၼ်ႁႅင်းယႂ်ႇသေပိူၼ်ႈ၊ဢိၵ်ႇတင်းလႆႈဢၶႂၢင်ႉဢၼ်ပဵၼ်ၸဝ်ႈၶုၼ်ဢၼ်ဢုပ်ႉၵႃႈၼိူဝ်ၸိူဝ်ႉၶိူဝ်းတင်းလၢႆၼၼ်ႉ၊ပေႃႇဢွၵ်ႇမႃးၵႃႈၼႂ်းမဵဝ်းမၼ်းဢေႃႈ။-
ရုပိၼ်ႇ၊ လုၵ်ႈၸၢႆးတူၼ်ႈ ယႃႇၵုပ်ႈ၊ ၼၼ်ႉမီးလုၵ်ႈၸၢႆးသီႇၵေႃႉ၊ ႁႃႇၼုတ်ႉ၊ၽႃႇလု၊ႁေႇၸရုၼ်ႇ၊ တင်း ၵႃႇမိ၊ ဢေႃႈ။
ပီႈၼွင်ႉၸိူဝ်ႉၶိူဝ်းဢၼ်ပဵၼ်တူၼ်ႈပဵၼ်ငဝ်ႈ၊ၸွမ်းၼင်ႇၶိူဝ်းႁိူၼ်းၶဝ်ႁင်းၽႂ်ႁင်းမၼ်း၊ၵႃႈၼႂ်းၵူၼ်းၸိူဝ်ႉၶိူဝ်း ရုပိၼ်ႇ၊ ၸမ်ႉ၊ပဵၼ် ယေႇယေႇလႃႉ၊ ဢၼ်ပဵၼ်ၵဝ်ႉပဵၼ်ငဝ်ႈဢိၵ်ႇတင်း ၸႃႇၶရိ၊-
ပေးလႃႉ၊ ဢၼ်ပဵၼ်လုၵ်ႈၸၢႆး ဢႃႇၸတ်ႉ၊ သမ်ႉပဵၼ်လၢၼ်ၸၢႆး သေႇမႃႉ၊ ၵႃႈၼႂ်းၵူၼ်းၶိူဝ်းႁိူၼ်း ယူဝ်းဢေးလႃႉ၊ ၼၼ်ႉဢေႃႈ။ ၵူၼ်းၶိူဝ်းႁိူၼ်းၼႆႉ၊ယူႇၵႃႈၼႂ်းဝဵင်း ဢႃႇရေႃႇ၊ ဢိၵ်ႇတင်းၵႃႈၼႂ်းဢိူင်ႇ၊ၸႃႉဢဝ်ၽၢႆႇတၢင်းႁွင်ႇၵႂႃႇတေႃႇထိုင်ႁွတ်ႈဝဵင်း ၼေႇပေႃႇ၊ တင်းဝဵင်း ပႃႇလမွင်ႇ၊ ဢေႃႈ။-
ၶဝ်မီးၽုင်သူဝ်းၽုင်ဝူဝ်းဢၼ်ၼမ်ၵိုၼ်းၼႃႇၵႃႈၼႂ်းမိူင်း ၵိလတ်ႉ၊ လႄႈၶဝ်လႆႈပိူင်ႇလိၼ်ၸႃႉၸဵမ်ထိူၼ်ႇလႅင်ႉၽၢႆႇတၢင်းဝၼ်းဢွၵ်ႇ၊ဢၼ်ၵႂၢင်ႈလႃးၵႂႃႇတေႃႇထိုင်ႁွတ်ႈၼမ်ႉလူင် ဢုၽရတ်ႉ၊ ပုၼ်ႉဢေႃႈ။
ၼႂ်းၸူဝ်ႈပၢၼ်ၶုၼ်ႁေႃၶမ်း သေႃးလု၊ ၼၼ်ႉၵူၼ်းၸိူဝ်ႉၶိူဝ်း ရုပိၼ်ႇ၊ တိုၵ်းတေႃးၵူၼ်း ႁႃႇၵရႃႉ၊ လႄႈၶႃႈၽၼ်းၶဝ်တၢႆၵႃႈၼႂ်းၼႃႈသိုၵ်းသေယဝ်ႉ၊တူၵ်းတီႈယူႇတီႈသဝ်းၵႃႈတီႈပွတ်းတၢင်းဝၼ်းဢွၵ်ႇမိူင်း ၵိလတ်ႉ၊ ဢေႃႈ။
ၸိူဝ်ႉၶိူဝ်းလုၵ်ႈလၢၼ် ၵၢတ်ႉ၊ ယူႇသဝ်းၵႃႈတီႈလႅၼ်လိၼ်ၽၢႆႇတၢင်းႁွင်ႇလႅၼ်လိၼ် ရုပိၼ်ႇ၊ ဢၼ်ပဵၼ်မိူင်း ပႃႇသၢၼ်ႇ၊ တေႃႇထိုင်ႁွတ်ႈၽၢႆႇဝၼ်းတၢင်းဢွၵ်ႇၵႃႈတီႈဝဵင်း သႃႇလၵႃႇ၊ ဢေႃႈ။-
ယူဝ်းဢေးလႃႉ၊ ပဵၼ်ၵဝ်ႉပဵၼ်ငဝ်ႈၵူၼ်းၶိူဝ်းႁိူၼ်းၶဝ်လႄႈ သႃႇၽၼ်ႇ၊ ပဵၼ်ၵူၼ်းၶိူဝ်းႁိူၼ်းတီႈသွင်သေယဝ်ႉ၊ၵူၼ်းၶိူဝ်းႁိူၼ်းတၢင်ႇၶိူဝ်း၊သမ်ႉပဵၼ် ယႃႇၼေႇ၊ ဢိၵ်ႇတင်း သႃႇၽတ်ႉ၊ ဢေႃႈ။-
ၵူၼ်းၸိူဝ်ႉၶိူဝ်းၶဝ်ထႅင်ႈတၢင်ႇၶိူဝ်းသမ်ႉၶဝ်ႈပႃးၼႂ်းၵူၼ်းၶိူဝ်းႁိူၼ်းၸဵတ်းမဵဝ်း၊ဢၼ်ပဵၼ် မိၵ်ႉၶေႇလႃႉ၊မေႇသုလမ်ႇ၊သေးပႃႉ၊ယေႃႇရေႇ၊ယႃႇၶၼ်ႇ၊ၸယႃႇ၊ တင်း ႁေႇပႃႇ၊ ဢေႃႈ။-
ၶဝ်ၼၼ်ႉပဵၼ်ၸိူဝ်ႉၶိူဝ်းလုၵ်ႈလၢၼ် ဢၽိႁေးလႃႉ၊ လုၵ်ႈၸၢႆး ႁုရိ၊ လႄႈသိုပ်ႇၸွမ်းၶိူဝ်းပူႇပေႃႈၶဝ်ၶိုၼ်ႈၵႂႃႇၸမ်ႉ၊ပဵၼ် ဢၽိႁေးလႃႉ၊ႁုရိ၊ယႃႇရေႃႇ၊ၵိလတ်ႉ၊မိၵ်ႉၶေႇလႃႉ၊ယေႇသိသေး၊ယႃႇတေႃႇ၊ပုၸႃႉ၊-
ဢႃႇႁိ၊ ပဵၼ်လုၵ်ႈ ဢႃႇပတျေႇလႃႉ၊ လႄႈပဵၼ်လၢၼ် ၵုၼိ၊ ဢေႃႈ။ ဢႃႇႁိ၊ ၼၼ်ႉပဵၼ်ၵဝ်ႉပဵၼ်ငဝ်ႈ၊ၵူၼ်းၶိူဝ်းႁိူၼ်းၼႆႉတင်းမူတ်းၼၼ်ႉဢေႃႈ။-
ၶဝ်ၸိူဝ်းၼႆႉယူႇသဝ်းၵႃႈၼႂ်းဝၢၼ်ႈၼႂ်းဝဵင်းမိူင်း ပႃႇသၢၼ်ႇ၊ တင်းမိူင်း ၵိလတ်ႉ၊ ဢိၵ်ႇတင်းၵႃႈတီႈပၢင်ႇယိူဝ်ႈယႃႈဝဵင်း သႃႇရုၼ်ႇ၊ တင်းသဵင်ႈတင်းမူတ်းဢေႃႈ။-
ၸရၢင်းၵူၼ်းၸိူဝ်ႉၶိူဝ်းၸိူဝ်းၼႆႉမၢတ်ႈမၢႆဝႆႉၼႂ်းၸူဝ်ႈပၢၼ်ၶုၼ်ႁေႃၶမ်း ယူဝ်းထမ်ႇ၊ မိူင်း ယုတႃႉ၊ ဢိၵ်ႇတင်းၶုၼ်ႁေႃၶမ်း ယေႇရူဝ်းပုမ်ႇ၊ မိူင်း ဢိသရေး၊ ဢေႃႈ။
ၵူၼ်းၸိူဝ်ႉၶိူဝ်း ရုပိၼ်ႇ၊ၵၢတ်ႉ၊ တင်း မၼႃႇသေႇ၊ ပွတ်းတၢင်းဝၼ်းဢွၵ်ႇၼၼ်ႉမီးႁူဝ်ႁၢၼ်ၵူၼ်းသိုၵ်းသီႇမိုၼ်ႇသီႇႁဵင်ၸဵတ်းပၢၵ်ႇႁူၵ်းသိပ်းဢၼ်ၽိုၵ်းဝႆႉလီလီ၊လၢႆးဢၼ်ယိပ်းၵမ်ၶႅပ်းႁႄႉလၢၵ်ႈၼၢၵ်ႈလႂ်၊လၢႆးလၢပ်ႇလႂ်၊လၢႆးယိုဝ်းၵၢင်ႇလႂ်ၸိူဝ်းၼၼ်ႉဢေႃႈ။-
ၶဝ်ၶီႇၶိုၼ်ႈတိုၵ်းသိုၵ်းလူၺ်ႈၵၼ်တင်းၵူၼ်းမဵဝ်း ႁႃႇၵရႃႉ၊ ၼႂ်းၸိူဝ်ႉၶိူဝ်း ယေႇတုရႃႉ၊ၼႃႇၽိသႃႉ၊ တင်း ၼေႃႇတပ်ႉ၊ ၸိူဝ်းၼၼ်ႉဢေႃႈ။-
ၶဝ်ဢိင်ပိုင်ႈၽြႃးပဵၼ်ၸဝ်ႈလႄႈသူးတွင်းယွၼ်းဢဝ်တၢင်းဢၼ်မၼ်းၸဝ်ႈၸွႆႈထႅမ်သေယဝ်ႉ၊ၽြႃးပဵၼ်ၸဝ်ႈထွမ်ႇဢဝ်ၵႂၢမ်းသူးတွင်းၶဝ်လႄႈပၼ်ဢၶႂၢင်ႉဢၼ်လႆႈဢွင်ႇသိုၵ်းၵႃႈၼႂ်းၵူၼ်းမဵဝ်း ႁႃႇၵရႃႉ၊ ဢိၵ်ႇတင်းၵႃႈဢၼ်ၶဝ်ႈပႃးၸွႆႈထႅမ်ၶဝ်ၼၼ်ႉဢေႃႈ။-
ၶဝ်ဢွၼ်ၵၼ်သိမ်းဢဝ်ၵလႃႇဢုၵ်ႈႁႃႈမိုၼ်ႇ၊သူဝ်းသွင်သႅၼ်ႁႃႈမိုၼ်ႇ၊မႃႉလီႈသွင်ႁဵင်၊ဢိၵ်ႇတင်းၵူၼ်းသႅၼ်ၼိုင်ႈဢေႃႈ။-
ၶဝ်လႆႈၶႃႈၽၼ်းရၢၼ်ႇသူႇတၢႆၼမ်ၼႃႇၵွပ်ႈပိူဝ်ႈသိုၵ်းၼၼ်ႉပဵၼ်ဢလူဝ်ႇၽြႃးပဵၼ်ၸဝ်ႈဢေႃႈ။ ၶဝ်ဢွၼ်ၵၼ်ယူႇသဝ်းၵႃႈၼႂ်းမိူင်းၼၼ်ႉတေႃႇထိုင်ႁွတ်ႈၶဝ်လႆႈၶၢမ်ႇတၢင်းဢၼ်တိဢဝ်သိမ်းဢဝ်ၵႂႃႇၼၼ်ႉဢေႃႈ။
ၵူၼ်းၸိူဝ်ႉၶိူဝ်း မၼႃႇသေႇ၊ ပွတ်းဝၼ်းဢွၵ်ႇၼၼ်ႉ၊ယူႇၵႃႈၼႂ်းမိူင်း ပႃႇသၢၼ်ႇ၊ လူင်းၵႂႃႇၽၢႆႇတၢင်းၸၢၼ်းၵႂႃႇထိုင်တီႈဝဵင်း ပႃႇလႃႉႁေႇရမုၼ်ႇ၊ ဝဵင်း ၸိၼိရႃႉ၊ တင်းလွႆ ႁေႇရမုၼ်ႇ၊ ဢေႃႈ။ ၶဝ်ၼၼ်ႉယႂ်ႇၽႄၼမ်ၵိုၼ်းမႃးၼႃႇလူင်လၢင်ဢေႃႈ။-
ၶဝ်ၸိူဝ်းဢၼ်ပဵၼ်တူၼ်ႈပဵၼ်ငဝ်ႈၵႃႈၼႂ်းၵူၼ်းၶိူဝ်းႁိူၼ်းတင်းလၢႆၸမ်ႉ၊ပဵၼ် ဢေးၽႃႇ၊ဢိသိ၊ဢေးလျႃႇလႃႉ၊ဢႃႇၸရေးလႃႉ၊ယေႇရမိ၊ႁေႃႇတဝိ၊ တင်း ယႃႇတျေႇလႃႉ၊ ဢေႃႈ။ ၶဝ်ၸိူဝ်းၼႆႉပဵၼ်ႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇလႄႈႁူင်ႁၢင်းၼႂ်းတၢင်းဢၼ်ပဵၼ်တူၼ်ႈပဵၼ်ငဝ်ႈၵႃႈၼႂ်းၵူၼ်းၶိူဝ်းႁိူၼ်းၶဝ်ၼၼ်ႉဢေႃႈ။
ၼႂ်းဝႃႈၼၼ်သေၵေႃႈ၊ၵူၼ်းတင်းလၢႆဢမ်ႇပႂ်ႉသဵတ်ႈၸႃႇတေႃႇၽြႃးပဵၼ်ၸဝ်ႈပူႇမွၼ်ႇၶဝ်ၼၼ်ႉလႄႈပႄႇပႅတ်ႈမၼ်းၸဝ်ႈႁႂ်ႈလႆႈၽိတ်းပိူင်ႈလူၺ်ႈၽြႃးၵူၼ်းမဵဝ်းၸိူဝ်းဢၼ်ၽြႃးပဵၼ်ၸဝ်ႈႁေႃႈဢွၵ်ႇသေၵႃႈတီႈမိူင်းၶဝ်ၼၼ်ႉဢေႃႈ။-
ပိူဝ်ႈၼႆလႄႈၽြႃးပဵၼ်ၸဝ်ႈၸႂ်ႉၶုၼ်ႁေႃၶမ်း ပုလႃႉ၊ မိူင်း ဢႃႇသီးရီးယႃး၊ (ဢၼ်ႁွင်ႉၸိုဝ်ႈထႅင်ႈဝႃႈ၊ တိၵလတ်ႉပိလေႇသႃႇ၊ ) ၼၼ်ႉမႃးတိုၵ်းတေႃးယႃႉပႅတ်ႈမိူင်းၶဝ်ဢေႃႈ။ ၶုၼ်ႁေႃၶမ်းၼၼ်ႉ၊သိမ်းဢဝ်ၵူၼ်းၸိူဝ်ႉၶိူဝ်း ရုပိၼ်ႇ၊ၵၢတ်ႉ၊ တင်း မၼႃႇသေႇ၊ ပွတ်းတၢင်းဝၼ်းဢွၵ်ႇၵႂႃႇသေယဝ်ႉ၊ႁႂ်ႈၶဝ်ယူႇသဝ်းၵႃႈၼႂ်းဝဵင်း ႁႃႇလႃႉ၊ ဝဵင်း ႁႃႇပေႃႇ၊ ဝဵင်း ႁႃႇရႃႉ၊ ဢိၵ်ႇတင်းႁိမ်းၼမ်ႉ ၵေႃးၸၼ်ႇ၊ တေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
လေႇဝိ၊ မီးလုၵ်ႈၸၢႆးသၢမ်ၵေႃႉ၊ ၵေႇရသုၼ်ႇ၊ၵေႃႇႁတ်ႉ၊ ဢိၵ်ႇတင်း မေႇရႃႇရိ၊ ဢေႃႈ။
ၵေႃႇႁတ်ႉ၊ မီးလုၵ်ႈၸၢႆးသီႇၵေႃႉ၊ ဢႃႇမရမ်ႇ၊ဢိၸႁႃႇ၊ႁေႇပရုၼ်ႇ၊ ဢိၵ်ႇတင်း ဢေႃးၸေးလႃႉ၊ ဢေႃႈ။
ဢႃႇမရမ်ႇ၊ မီးလုၵ်ႈၸၢႆးသွင်ၵေႃႉ၊ၸိုဝ်ႈ ဢႃႇရုၼ်ႇ၊ ဢိၵ်ႇတင်း မူဝ်းသေႇ၊ လႄႈမီးလုၵ်ႈယိင်းၵေႃႉၼိုင်ႈ၊ၸိုဝ်ႈ မေႇရီႇယမ်ႇ၊ ဢေႃႈ။ ဢႃႇရုၼ်ႇ၊ မီးလုၵ်ႈၸၢႆးသီႇၵေႃႉ၊ၸိုဝ်ႈႁွင်ႉဝႃႈ၊ ၼႃႇတပ်ႉ၊ဢၽိႁု၊ဢေးလႃႇၸႃႇ၊ ဢိၵ်ႇတင်း ဢိႀမႃႇ၊ ဢေႃႈ။
လုၵ်ႈၸၢႆး ဢေးလႃႇၸႃႇ၊ ၸမ်ႉ၊ပဵၼ် ၽိၼႁတ်ႉ၊ လႄႈ ၽိၼႁတ်ႉ၊ မီးလုၵ်ႈၸၢႆး ဢၽိသွႃႇ၊-
လေႇဝိ၊ မီးလုၵ်ႈၸၢႆးသၢမ်ၵေႃႉ၊ဢၼ်ပဵၼ် ၵေႇရသုၼ်ႇ၊ၵေႃႇႁတ်ႉ၊ တင်း မေႇရႃႇရိ၊ ဢေႃႈ။-
မေႇရႃႇရိ၊ မီးလုၵ်ႈၸၢႆး မႃႇလိ၊ ဢိၵ်ႇတင်း မုသိ၊ ဢေႃႈ။ ၶဝ်ၸိူဝ်းၼႆႉ၊ပဵၼ်မဵဝ်းၸိူဝ်ႉၶိူဝ်း လေႇဝိ၊ ၸွမ်းလူၺ်ႈၸိူဝ်ႉၶိူဝ်းပေႃႈၶဝ်ဢေႃႈ။
ၸိူဝ်ႉၶိူဝ်းလုၵ်ႈလၢၼ်ဢၼ်သိုပ်ႇလူင်းမႃးသေၵႃႈတီႈ ၵေႇရသုၼ်ႇ၊ ၸမ်ႉ၊ ၵေႇရသုၼ်ႇ၊ မီးလုၵ်ႈၸၢႆး လိပၼိ၊လိပၼိ၊ မီးလုၵ်ႈၸၢႆး ယႃႇႁတ်ႉ၊ယႃႇႁတ်ႉ၊ မီးလုၵ်ႈၸၢႆး ၸိမ်းမႃႉ၊-
ၸိမ်းမႃႉ၊ မီးလုၵ်ႈၸၢႆး ယေႃႇဢႃႇ၊ယေႃႇဢႃႇ၊ မီးလုၵ်ႈၸၢႆး ဢိတ်ႉတေႃႇ၊ဢိတ်ႉတေႃႇ၊ မီးလုၵ်ႈၸၢႆး ၸေးရႃႉ၊ၸေးရႃႉ၊ မီးလုၵ်ႈၸၢႆး ယႃႇတရေႇ၊ ဢေႃႈ။
ၸိူဝ်ႉၶိူဝ်းလုၵ်ႈလၢၼ်ဢၼ်သိုပ်ႇလူင်းမႃးၵႃႈတီႈ ၵေႃႇႁတ်ႉ၊ ၸမ်ႉ၊ ၵေႃႇႁတ်ႉ၊ မီးလုၵ်ႈၸၢႆး ဢမိၼတပ်ႉ၊ဢမိၼတပ်ႉ၊ မီးလုၵ်ႈၸၢႆး ၵေႃးရႃႉ၊ၵေႃးရႃႉ၊ မီးလုၵ်ႈၸၢႆး ဢတ်ႉသိရႃႉ၊-
ဢေးလႃႉၵႃႇၼႃႉ၊ မီးလုၵ်ႈၸၢႆးသွင်ၵေႃႉ၊ ဢႃႇမသေး၊ တင်း ဢႁိမုတ်ႉ၊ ဢေႃႈ။-
ၸိူဝ်ႉၶိူဝ်းလုၵ်ႈလၢၼ်ဢၼ်သိုပ်ႇလူင်းမႃးၵႃႈတီႈ ဢႁိမုတ်ႉ၊ ၸမ်ႉ၊ ဢႁိမုတ်ႉ၊ မီးလုၵ်ႈၸၢႆး ၸေႃးၽေး၊ၸေႃးၽေး၊ မီးလုၵ်ႈၸၢႆး ၼႃႇႁတ်ႉ၊ ဢေႃႈ၊-
ၼႃႇႁတ်ႉ၊ မီးလုၵ်ႈၸၢႆး ဢေးလျႃႇၽႃႉ၊ဢေးလျႃႇၽႃႉ၊ မီးလုၵ်ႈၸၢႆး ယေႇရေႃးႁမ်ႇ၊ယေႇရေႃးႁမ်ႇ၊ မီးလုၵ်ႈၸၢႆး ဢေးလႃႉၵႃႇၼႃႉ၊ ဢေႃႈ။
သမူၺ်ႇလႃႉ၊ မီးလုၵ်ႈၸၢႆးသွင်ၵေႃႉ၊ ယူဝ်းဢေးလႃႉ၊ ဢၼ်ပဵၼ်လုၵ်ႈၸၢႆးတူၼ်ႈတင်းၵေႃႉၼွင်ႉမၼ်း ဢၽိယႃႉ၊ ဢေႃႈ။
ၶဝ်ၸိူဝ်းၼႆႉၸမ်ႉ၊ပဵၼ်ၵူၼ်းၸိူဝ်းဢၼ်ၶုၼ်ႁေႃၶမ်း တႃႇဝိတ်ႈ၊ ၶၢၼ်းဝႆႉ၊ၼႂ်းၵၢၼ်ဢၼ်ႁဵတ်းၵႂၢမ်းၵႃႈတီႈထႃႇၼႃႉဢၼ်ႁဵတ်းဝၢတ်ႈၵူဝ်းၵႂၢႆႇၵႃႈၼႂ်းဝဵင်း ယေႇရုသလႅမ်ႇ၊ ဝၢႆးသေၶၢႆႉတိူၵ်ႈပတိၺိၺ်ႇၸဝ်ႈၵႂႃႇၵႃႈတီႈၼၼ်ႈဢေႃႈ။-
ၶဝ်ၼၼ်ႉ၊လႆႈထၢမ်းၼႃႈၵၢၼ်ဢၼ်ႁဵတ်းၵႂၢမ်းၵႃႈတီႈသုမ်ႉထဵင်ၸဝ်ႈဢၼ် ထႃႇဝရႃႉၽြႃး၊ ၵိင်းဝၢပ်ႈယူႇ၊တေႃႇထိုင်ႁွတ်ႈၶိင်ႇၵႃႇလႃႉဢၼ် ၶုၼ်ႁေႃၶမ်း သေႃးလမုၼ်ႇ၊ တႄႇႁဵတ်းၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။ လိုၼ်းၼၼ်ႉၵေႃႈ၊ၶဝ်ယင်းလႆႈဢွၼ်ၵၼ်ပုတ်ႈလၢႆႈၵၢၼ်ထၢမ်းႁဵတ်းၼႃႈၵၢၼ်ၼၼ်ႉ၊ၸွမ်းၼင်ႇပုၼ်ႈၽွၼ်းတူဝ်ၸဝ်ႈၵဝ်ႇမီးၼၼ်ႉဢေႃႈ။-
ၵူၼ်းၸိူဝ်းဢၼ်လႆႈထၢမ်းၼႃႈၵၢၼ်ၼၼ်ႉၸမ်ႉ၊ပဵၼ်ၶဝ်ၸိူဝ်းၼႆႉဢေႃႈ။ ၸွမ်းၼင်ႇၵူၼ်းၸိူဝ်ႉၶိူဝ်းႁိူၼ်း ၵေႃႇႁတ်ႉ၊ ၸမ်ႉ၊ၵူၼ်းႁဵတ်းၵႂၢမ်းမၼ်းပဵၼ် ႁေႇမၼ်ႇ၊ ၵေႃႉပဵၼ်လုၵ်ႈၸၢႆး ယူဝ်းဢေးလႃႉ၊ ၵေႃႉပဵၼ်လုၵ်ႈၸၢႆး သမူၺ်ႇလႃႉ၊-
ၵေႃႉပဵၼ်လုၵ်ႈၸၢႆး ဢေးလႃႉၵႃႇၼႃႉ၊ ၵေႃႉပဵၼ်လုၵ်ႈၸၢႆး ယေႇရေႃးႁမ်ႇ၊ ၵေႃႉပဵၼ်လုၵ်ႈၸၢႆး ဢေးလျႃႇလႃႉ၊ ၵေႃႉပဵၼ်လုၵ်ႈၸၢႆး တေႃႇဢႃႇ၊-
ၵေႃႉပဵၼ်လုၵ်ႈၸၢႆး ယႃႇႁတ်ႉ၊ ၵေႃႉပဵၼ်လုၵ်ႈၸၢႆး ၵေႇရသုၼ်ႇ၊ ၵေႃႉပဵၼ်လုၵ်ႈၸၢႆး လေႇဝိ၊ ၼၼ်ႉၵေႃႉၼိုင်ႈ။
ဢိၵ်ႇတင်းပီႈၼွင်ႉၶဝ်ဢၼ်သိုပ်ႇလူင်းမႃးၵႃႈတီႈ လေႇဝိ၊ တင်း မေႇရႃႇရိ၊ ဢၼ်လႆႈၸုၵ်းၵႃႈတီႈၽၢႆႇသၢႆႉ ဢေးႀၼ်ႇ၊ ၵေႃႉပဵၼ်လုၵ်ႈၸၢႆး ၵိသိ၊ ၵေႃႉပဵၼ်လုၵ်ႈၸၢႆး ဢႃႇၽတိ၊ ၵေႃႉပဵၼ်လုၵ်ႈၸၢႆး မႃႇလုၵ်ႉ၊-
ၵေႃႉပဵၼ်လုၵ်ႈၸၢႆး မႃႇလိ၊ လုၵ်ႈၸၢႆး မုသိ၊ ၵေႃႉပဵၼ်လုၵ်ႈၸၢႆး မေႇရႃႇရိ၊ ၵေႃႉပဵၼ်လုၵ်ႈၸၢႆး လေႇဝိ၊ ၼၼ်ႉၵေႃႉၼိုင်ႈဢေႃႈ။
ပီႈၼွင်ႉၸိူဝ်ႉၶိူဝ်းမဵဝ်း လေႇဝိ၊ တင်းလၢႆဢွၼ်ၵၼ်လႆႈၶၢမ်ႇတၢင်းဢၼ်ၶၢၼ်းဝႆႉ၊ၵႃႈၼႂ်းတၢင်းဢၼ်ထၢမ်းႁဵတ်းၼႃႈၵၢၼ်ၵူႈၸိူဝ်ႉၵူႈပိူင်ၵႃႈတီႈထႃႇၼႃႉဢၼ်ႁဵတ်းဝၢတ်ႈၵူဝ်းၵႂၢႆႇၼၼ်ႉဢေႃႈ။
ဢႃႇရုၼ်ႇ၊ ဢိၵ်ႇတင်းၸူဝ်ႈလုၵ်ႈပၢၼ်လၢၼ်မၼ်းၸမ်ႉ၊လႆႈထၢမ်းႁဵတ်းၵၢၼ်တၢင်းလူႇၵႃႈၼိူဝ်ၶဵင်ႇတၢင်းလူႇဢၼ်ဢဝ်တူဝ်တၢင်းလူႇၽဝ်ၽႆးလႂ်၊ဢိၵ်ႇတင်းၶဵင်ႇတၢင်းလူႇဢၼ်တုတ်ႇၼၢမ်ႇသႃႇလႂ်လႄႈထၢမ်းၼႃႈၵၢၼ်တီႈထႃႇၼႃႉတီႈဢၼ်မူတ်းၸၢင်ႇသေပိူၼ်ႈၼၼ်ႉလႂ်၊တင်းတၢင်းဢၼ်ၽေႇဢပျတ်ႈၵူၼ်းမဵဝ်း ဢိသရေး၊ လႂ်ၸွမ်းၵႃႈၼင်ႇဢၼ် မူဝ်းသေႇ၊ ၵေႃႉပဵၼ်ၶႃႈၽြႃးပဵၼ်ၸဝ်ႈသင်ႇလၢတ်ႈဝႆႉၼၼ်ႉဢေႃႈ။-
ၸိူဝ်ႉၶိူဝ်းလုၵ်ႈလၢၼ် ဢႃႇရုၼ်ႇ၊ သိုပ်ႇၼိုင်ႈယဝ်ႉသိုပ်ႇၼိုင်ႈၸမ်ႉ၊လုၵ်ႈၸၢႆး ဢႃႇရုၼ်ႇ၊ ၼၼ်ႉပဵၼ် ဢေးလႃႇၸႃႇ၊ လုၵ်ႈၸၢႆး ဢေးလႃႇၸႃႇ၊ ပဵၼ် ၽိၼႁတ်ႉ၊ လုၵ်ႈၸၢႆး ၽိၼႁတ်ႉ၊ ပဵၼ် ဢၽိသွႃႇ၊-
လုၵ်ႈၸၢႆး ဢႁိတုပ်ႉ၊ ပဵၼ် ၸႃႇတုၵ်ႉ၊ လုၵ်ႈၸၢႆး ၸႃႇတုၵ်ႉ၊ ပဵၼ် ဢႁိမတ်ႉ၊ ဢေႃႈ။
ဢိူင်ႇဢၼ်တႅပ်းမၢႆဝႆႉ၊ပုၼ်ႈၸိူဝ်ႉၶိူဝ်း ဢႃႇရုၼ်ႇ၊ ဢၼ်ပဵၼ်ၵူၼ်းၶိူဝ်းႁိူၼ်း ၵေႃႇႁတ်ႉ၊ ဢၼ်ၶဝ်လႆႈတူၵ်းၸႃႇၵွၵ်ႈ၊တီႈလိၼ်ဢၼ်တႅပ်းမၢႆပၼ်ဢွၼ်တၢင်းပိူၼ်ႈၼၼ်ႉၸမ်ႉ။-
ၶဝ်လႆႈဝဵင်း ႁေႇပရုၼ်ႇ၊ ၵႃႈၼႂ်းလႅၼ်လိၼ်မိူင်း ယုတႃႉ၊ ဢိၵ်ႇတင်းတီႈလိၼ်ပၢင်ႇယိူဝ်ႈလဵပ်ႈႁွပ်ႈမၼ်းတင်းလၢႆဢေႃႈ။-
တူင်ႈႁႆႈတူင်ႈၼႃးဝဵင်း၊ဢိၵ်ႇတင်းဝၢၼ်ႈမၼ်းတင်းလၢႆၸမ်ႉ၊ၶဝ်ပၼ်တီႈ ၵႃႇလႅပ်ႉ၊ လုၵ်ႈၸၢႆး ယေႇၽုၼ်ႇၼႃႉ၊ ဢေႃႈ။-
ဝဵင်းၸိူဝ်းဢၼ်တႅပ်းမၢႆဝႆႉ၊ပုၼ်ႈၸိူဝ်ႉၶိူဝ်းလုၵ်ႈလၢၼ် ဢႃႇရုၼ်ႇ၊ ၸမ်ႉ၊ပဵၼ်ဝဵင်း ႁေႇပရုၼ်ႇ၊ ဝဵင်းဢၼ်ၶဝ်လႆႈပၢႆႈၸူးသွၼ်ႈပိုင်ႈတီႈမၼ်းဝဵင်း ယတ်ႉတိရႃႉ၊ ဝဵင်း လိပၼႃႉ၊ ဝဵင်း ဢေႇသတမေႃႇ၊-
ၵႃႈၼႂ်းဢိူင်ႇ ပိၼ်ႇယႃႇမိၼ်ႇ၊ ၵေႃႈဝဵင်းၸိူဝ်းဢၼ်တႅပ်းမၢႆပုၼ်ႈၶဝ်ပႃးလူၺ်ႈၵၼ်တင်းလိၼ်ပၢင်ႇယိူဝ်ႈမၼ်းၸမ်ႉ၊ပဵၼ်ဝဵင်း ၵေးပႃႉ၊ ဝဵင်း ဢႃႇလမႅတ်ႉ၊ တင်းဝဵင်း ဢႃႇၼသုတ်ႉ၊ ဢေႃႈ။ ဝဵင်းၸိူဝ်းၼၼ်ႉတင်းသဵင်ႈပွင်းၵၼ်မီးသိပ်းသၢမ်ဝဵင်း၊ပုၼ်ႈၵူၼ်းၶိူဝ်းႁိူၼ်းၶဝ်လႆႈယူႇလႆႈသဝ်းၼၼ်ႉဢေႃႈ။-
ၵႃႈၼႂ်းဢိူင်ႇ မၼႃႇသေႇ၊ ပွတ်းဝၼ်းတူၵ်းၵေႃႈတူၵ်းၸႃႇၵွၵ်ႈလႄႈတတ်းမၢႆပၼ်ပုၼ်ႈၸိူဝ်ႉၶိူဝ်း ၵေႃႇႁတ်ႉ၊ ဢၼ်ယင်းၵိုတ်းယင်းၵျၢၼ်ႇၼၼ်ႉႁႂ်ႈလႆႈယူႇၸွမ်းလူၺ်ႈၵူၼ်းၶိူဝ်းႁိူၼ်းၽႂ်ၶိူဝ်းႁိူၼ်းမၼ်းဢေႃႈ။
ပုၼ်ႈပီႈၼွင်ႉၸိူဝ်ႉၶိူဝ်း ၵေႇရသုၼ်ႇ၊ ၵေႃႈၶဝ်လႆႈဢဝ်သိပ်းသၢမ်ဝဵင်းပၼ်ၵႃႈၼႂ်းဢိူင်ႇ ဢိသၶႃႇ၊ ဢိူင်ႇ ဢႃႇသျႃႇ၊ ဢိူင်ႇ ၼပ်ႉထလိ၊ တင်းဢိူင်ႇ မၼႃႇသေႇ၊ ၽၢႆႇဝၼ်းဢွၵ်ႇၼႂ်းမိူင်း ပႃႇသၢၼ်ႇ၊ ၸိူဝ်းၼၼ်ႉဢေႃႈ။
ပုၼ်ႈပီႈၼွင်ႉၸိူဝ်ႉၶိူဝ်း မေႇရႃႇရိ၊ ၸမ်ႉ၊ၶဝ်လႆႈပၼ်သိပ်းသွင်ဝဵင်းတီႈၵူၼ်းၸိူဝ်ႉၽႂ်ၶိူဝ်းမၼ်းၵႃႈတီႈဢိူင်ႇ ရုပိၼ်ႇ၊ ဢိူင်ႇ ၵၢတ်ႉ၊ တင်းဢိူင်ႇ ၸေႇပုလုၼ်ႇ၊ ဢေႃႈ။-
ၼင်ႇၼၼ်လႄႈၵူၼ်းမဵဝ်း ဢိသရေး၊ တင်းလၢႆလႆႈဢဝ်ဝဵင်းဢိၵ်ႇတင်းလိၼ်ပၢင်ႇယိူဝ်ႈဢၼ်လဵပ်ႈႁွပ်ႈဝဵင်းၸိူဝ်းၼၼ်ႉတႅပ်းမၢႆပၼ်ပုၼ်ႈၵူၼ်းမဵဝ်း လေႇဝိ၊ တင်းလၢႆဢေႃႈ။-
ဝဵင်းဢၼ်ဝႃႈမႃးၸိူဝ်းၼၼ်ႉၸိုင်၊ၶဝ်တူၵ်းၸႃႇၵွၵ်ႈသေၵႃႈၼႂ်းဢိူင်ႇၵူၼ်းမဵဝ်း ယုတႃႉ၊ ဢိူင်ႇၵူၼ်းမဵဝ်း သိမုၼ်ႇ၊ တင်းဢိူင်ႇၵူၼ်းမဵဝ်း ပိၼ်ႇယႃႇမိၼ်ႇ၊ သေလႄႈတႅပ်းမၢႆပုၼ်ႈၶဝ်ဢေႃႈ။
ၵႃႈၼႂ်းၸိူဝ်ႉၶိူဝ်း ၵေႃႇႁတ်ႉ၊ ၼၼ်ႉတီႈၵူၼ်းၶိူဝ်းႁိူၼ်းၵမ်ႈၽွင်ႈၸိုင်၊ၶဝ်လႆႈဢဝ်ဝဵင်းတင်းလၢႆတင်းလိၼ်ပၢင်ႇယိူဝ်ႈမၼ်းတႅပ်းမႅင်ႇပၼ်မၢႆပၼ်ၶဝ်သေၵႃႈတီႈဢိူင်ႇ ဢေႇၽရိမ်ႇ၊ ၼၼ်ႉၸမ်ႉ၊-
ပဵၼ်ဝဵင်း သေးၶိမ်ႇ၊ ဝဵင်းဢၼ်လႆႈပၢႆႈၵႂႃႇၸူးလႄႈသွၼ်ႈပိုင်ႈၵႃႈၼိူဝ်ႁၢၼ်ႉလွႆဢိူင်ႇ ဢေႇၽရိမ်ႇ၊ ဝဵင်း ၵေႇၸႃႇ၊-
ၵႃႈၼႂ်းဢိူင်ႇ မၼႃႇသေႇ၊ ပွတ်းဝၼ်းတူၵ်းၵေႃႈၶဝ်လႆႈတႅပ်းမႅင်ႇမၢႆပၼ်ဝဵင်း ဢၼေႇရႃႇ၊ တင်းဝဵင်း ပိလမ်ႇ၊ ဢိၵ်ႇတင်းလိၼ်ပၢင်ႇယိူဝ်ႈၶဝ်ဢေႃႈ။
ၵႃႈၼႂ်းၸိူဝ်ႉၶိူဝ်း ၵေႇရသုၼ်ႇ၊ ၼၼ်ႉတီႈၵူၼ်းၶိူဝ်းႁိူၼ်းၵမ်ႈၽွင်ႈၵေႃႈ၊ၶဝ်လႆႈဢဝ်ဝဵင်းတင်းလၢႆ၊ဢိၵ်ႇတင်းလိၼ်ပၢင်ႇယိူဝ်ႈမၼ်းၸိူဝ်းၼၼ်ႉတႅပ်းမၢႆပၼ်ၸိူဝ်ႉၼင်ႇၼႆဢေႃႈ။ ၵႃႈၼႂ်းဢိူင်ႇ မၼႃႇသေႇ၊ ပွတ်းဝၼ်းဢွၵ်ႇၼၼ်ႉဝဵင်း ၵေႃႇလၼ်ႇ၊ မိူင်း ပႃႇသၢၼ်ႇ၊ တင်းဝဵင်း ဢႃႇသတႃႇရုတ်ႉ၊ ဢေႃႈ။
ၵႃႈၼႂ်းဢိူင်ႇ ဢိသၶႃႇ၊ ၼၼ်ႉဝဵင်း ၵေႇတေးသႃႉ၊ ဝဵင်း တႃႇပရတ်ႉ၊-
ဝဵင်း ရႃႇမုတ်ႉ၊ တင်းဝဵင်း ဢႃႇၼိမ်ႇ၊ ဢေႃႈ။
ၵႃႈၼႂ်းဢိူင်ႇ ဢႃႇသျႃႇ၊ ၼၼ်ႉဝဵင်း မိသလႃႇ၊ ဝဵင်း ဢႃႇပတုၼ်ႇ၊-
ဝဵင်း ႁုၵုတ်ႉ၊ တင်းဝဵင်း ရေးႁွပ်ႉ၊ ဢေႃႈ။
ၵႃႈၼႂ်းဢိူင်ႇ ၼပ်ႉထလိ၊ ၼၼ်ႉဝဵင်း ၵေႇတေးသႃႉ၊ မိူင်း ၵႃႇလိလႄး၊ ဝဵင်း ႁမ်ႇမုၼ်ႇ၊ တင်းဝဵင်း ၵိရိယသိမ်း၊ ဢေႃႈ။
ပုၼ်ႈၵူၼ်းၶိူဝ်းႁိူၼ်း မေႇရႃႇရိ၊ ဢၼ်ယင်းၵိုတ်းၵျၢၼ်ႇယူႇဝႆႉၸမ်ႉ၊တႅပ်းမၢႆပၼ်ၵႃႈၼႂ်းဝဵင်းဢိၵ်ႇတင်းလိၼ်ပၢင်ႇယိူဝ်ႈမၼ်းတင်းလၢႆၸွမ်းၼင်ႇၼႆဢေႃႈ။ ၵႃႈၼႂ်းဢိူင်ႇ ၸေႇပုလုၼ်ႇ၊ ၼၼ်ႉဝဵင်း ရိမ်ႇမုၼ်ႇ၊ တင်းဝဵင်း တႃႇပေႃႇ၊ ဢေႃႈ။
ၵႃႈၼႂ်းဢိူင်ႇ ရုပိၼ်ႇ၊ ၼၼ်ႉၵႃႈတီႈပွတ်းဝၼ်းဢွၵ်ႇၼမ်ႉ ယေႃးတၢၼ်ႇ၊ သိုဝ်ႈၵၼ်တင်းဝဵင်း ယေႇရိၶူဝ်း၊ ဢၼ်ပဵၼ်ဝဵင်း ပေႇၸႃႇ၊ ၵႃႈၼိူဝ်ၵွင်းပဵင်းမၼ်းတင်းဝဵင်း ယႃႇၸႃႉ၊-
ဝဵင်း ၵေႇတမုတ်ႉ၊ တင်းဝဵင်း မေႇၽတ်ႉ၊ ဢေႃႈ။
ၵႃႈၼႂ်းဢိူင်ႇ ၵၢတ်ႉ၊ ၼၼ်ႉဝဵင်း ရႃႇမုတ်ႉ၊ မိူင်း ၵိလတ်ႉ၊ ဝဵင်း မႁႃႇၼိမ်ႇ၊-
ဝဵင်း ႁေႇသၽုၼ်ႇ၊ တင်းဝဵင်း ယႃႇၸႃႇ၊ ၸိူဝ်းၼၼ်ႉဢေႃႈ။
ဢိသၶႃႇ၊ မီးလုၵ်ႈၸၢႆးသီႇၵေႃႉ၊ တေႃးလႃႉ၊ၽုဝႃႇ၊ယႃႇသုပ်ႉ၊ တင်း သိမရုၼ်ႇ၊ ဢေႃႈ။
တေႃးလႃႉ၊ မီးလုၵ်ႈၸၢႆးႁူၵ်းၵေႃႉ၊ဢၼ်ပဵၼ် ဢေႃႇၸိ၊ရေႇၽႃႇယႃႉ၊ယေႇရေးလႃႉ၊ယႃႇမေး၊ယိပသမ်ႇ၊ ဢိၵ်ႇတင်း သေႇမူၺ်ႇလႃႉ၊ ဢေႃႈ။ ၶဝ်ၸိူဝ်းၼႆႉပဵၼ်တူၼ်ႈပဵၼ်ငဝ်ႈၼႂ်းမဵဝ်းၸိူဝ်ႉၶိူဝ်းပေႃႈၶဝ် တေႃးလႃႉ၊ လႄႈပဵၼ်ႁူဝ်ႁၢၼ်ၵူၼ်းသိုၵ်းဢၼ်ၸိုဝ်ႈသဵင်ဢွၵ်ႇတင်းလၢႆဢေႃႈ။ ၼႂ်းၸူဝ်ႈပၢၼ်ၶုၼ်ႁေႃၶမ်း တႃႇဝိတ်ႈ၊ ၼၼ်ႉၵူၼ်းၸိူဝ်ႉၶိူဝ်းၶဝ်ၼပ်ႉဢၢၼ်ႇပွင်းၵၼ်မီးသွင်မိုၼ်ႇသွင်ႁဵင်ႁူၵ်းပၢၵ်ႇၵေႃႉဢေႃႈ။
ဢေႃႇၸိ၊ မီးလုၵ်ႈၸၢႆးၵေႃႉလဵဝ်ဢၼ်လႆႈၸိုဝ်ႈ ဢိၸရႁိ၊ ဢေႃႈ။ ဢိၸရႁိ၊ တင်းလုၵ်ႈၸၢႆးမၼ်းသီႇၵေႃႉ၊ဢၼ်ပဵၼ် မိၵ်ႉၶေႇလႃႉ၊ဢေႃးပတိ၊ယေႃးလႃႉ၊ တင်း ဢိသိယႃႉ၊ ၸိူဝ်းၼႆႉပဵၼ်တူၼ်ႈပဵၼ်ငဝ်ႈမဵဝ်းၶိူဝ်းႁိူၼ်းၶဝ်ဢေႃႈ။-
ၶဝ်ၸိူဝ်းၼႆႉ၊မီးမေးမီးလုၵ်ႈၼမ်ၼႃႇတေႃႇထိုင်ႁွတ်ႈၸိူဝ်ႉၶိူဝ်းလုၵ်ႈလၢၼ်ၶဝ်ထၢၼ်ႈပေႃးလႆႈထၢမ်းၼႃႈၵၢၼ်ၵူၼ်းသိုၵ်းသၢမ်မိုၼ်ႇႁူၵ်းႁဵင်ၵေႃႉဢေႃႈ။
ႁူဝ်ႁၢၼ်ၵူၼ်းသိုၵ်းၸိူဝ်းဢၼ်မၢတ်ႈမၢႆၶဝ်ႈပႃးၼႂ်းၸရၢင်းၵူၼ်းၸိူဝ်ႉၶိူဝ်း ဢိသၶႃႇ၊ ၼၼ်ႉမီးပႅတ်ႇမိုၼ်ႇၸဵတ်းႁဵင်ဢၼ်ထၢမ်းၼႃႈၵၢၼ်ၵူၼ်းသိုၵ်းလႆႈၼၼ်ႉဢေႃႈ။
ပိၼ်ႇယႃႇမိၼ်ႇ၊ မီးလုၵ်ႈၸၢႆးသၢမ်ၵေႃႉ၊ ပေႇလႃႉ၊ပေႇၶႃႇ၊ တင်း ယေႇတယေးလႃႉ၊ ဢေႃႈ။
ပေႇလႃႉ၊ မီးလုၵ်ႈၸၢႆးႁႃႈၵေႃႉ၊ဢၼ်ပဵၼ် ဢေးၸပုၼ်ႇ၊ဢေႃႇၸိ၊ဢေႃးၸေးလႃႉ၊ယေႇရိမုတ်ႉ၊ တင်း ဢိရိ၊ ဢေႃႈ။ ၶဝ်ၸိူဝ်းၼႆႉ၊ပဵၼ်တူၼ်ႈပဵၼ်ငဝ်ႈၼႂ်းၶိူဝ်းႁိူၼ်းၶဝ်လႄႈပဵၼ်ႁူဝ်ႁၢၼ်ၵူၼ်းသိုၵ်းဢၼ်ၸိုဝ်ႈသဵင်ဢွၵ်ႇၼၼ်ႉဢေႃႈ။ ၵူၼ်းၸိူဝ်ႉၶိူဝ်းၶဝ်ဢၼ်မၢတ်ႈမၢႆၶဝ်ႈပႃးၼႂ်းၸရၢင်းၸမ်ႉ၊မီးသွင်မိုၼ်ႇသွင်ႁဵင်ပၢႆသၢမ်သိပ်းသီႇၵေႃႉ၊ဢၼ်ထၢမ်းၼႃႈၵၢၼ်ၵူၼ်းသိုၵ်းလႆႈၼၼ်ႉဢေႃႈ။
ပေႇၶႃႇ၊ မီးလုၵ်ႈၸၢႆးၵဝ်ႈၵေႃႉ၊ဢၼ်ပဵၼ် ၸေႇမရိ၊ယေႃးသႃႉ၊ဢေးလျေႇၸႃႇ၊ဢေးလိဢေႃးၼေႇ၊ဢေႃးမရိ၊ယေႇရိမုတ်ႉ၊ဢၽိယႃႉ၊ဢႃႇၼသုတ်ႉ၊ တင်း ဢႃႇလမိတ်ႉ၊ ဢေႃႈ။-
ႁူဝ်ႁၢၼ်ၵူၼ်းသိုၵ်းၸိူဝ်းဢၼ်မၢတ်ႈမၢႆၶဝ်ႈပႃးၼႂ်းၸရၢင်းၵူၼ်းၸိူဝ်ႉၶိူဝ်းၶဝ်ၸွမ်းၼင်ႇၸိူဝ်ႉၽႂ်ၶိူဝ်းမၼ်းမီးသွင်မိုၼ်ႇပၢႆသွင်ပၢၵ်ႇၵေႃႉ၊ဢၼ်ထၢမ်းၼႃႈၵၢၼ်ၵူၼ်းသိုၵ်းလႆႈၼၼ်ႉဢေႃႈ။
ယေႇတယေးလႃႉ၊ မီးလုၵ်ႈၸၢႆးၵေႃႉလဵဝ်ဢၼ်လႆႈၸိုဝ်ႈ ပိလႁၼ်ႇ၊ လႄႈ ပိလႁၼ်ႇ၊ မီးလုၵ်ႈၸၢႆးၸဵတ်းၵေႃႉ၊ဢၼ်ပဵၼ် ယုသႃႉ၊ပိၼ်ႇယႃႇမိၼ်ႇ၊ဢေႇႁုတ်ႉ၊ၶေးၼႃႇၼႃႉ၊ၸေႇႀၼ်ႇ၊ထႃႇသိသႃႉ၊ တင်း ဢႁိသႁႃႇ၊ ဢေႃႈ။-
ၶဝ်ၸိူဝ်းၼႆႉ၊ပဵၼ်တူၼ်ႈပဵၼ်ငဝ်ႈၼႂ်းၸိူဝ်ႉၶိူဝ်းၶဝ်လႄႈပဵၼ်ႁူဝ်ႁၢၼ်ၵူၼ်းသိုၵ်းဢၼ်ၸိုဝ်ႈသဵင်ဢွၵ်ႇၼၼ်ႉဢေႃႈ။ ႁူဝ်ႁၢၼ်ၵူၼ်းသိုၵ်းဢၼ်မၢတ်ႈမၢႆၶဝ်ႈပႃးၼႂ်းၸရၢင်းၵူၼ်းၸိူဝ်ႉၶိူဝ်းၶဝ်မီးမိုၼ်ႇၸဵတ်းႁဵင်ပၢႆသွင်ပၢၵ်ႇၵေႃႉ၊ဢၼ်ထၢမ်းၼႃႈၵၢၼ်ၵူၼ်းသိုၵ်းလႆႈၼၼ်ႉဢေႃႈ။-
လိူဝ်သေၼၼ်ႉ၊မဵဝ်း သုပိမ်း၊ တင်းမဵဝ်း ႁုပိမ်း၊ ၵေႃႈၶဝ်ႈပႃးၼႂ်းၸိူဝ်ႉၶိူဝ်းၼႆႉၼင်ႇၵဝ်ႇဢေႃႈ။ တၢၼ်ႇ၊ မီးလုၵ်ႈၸၢႆးၵေႃႉလဵဝ်ဢၼ်လႆႈၸိုဝ်ႈဝႃႈ၊ ႁုသိမ်း ဢေႃႈ။
ၼပ်ႉထလိ၊ မီးလုၵ်ႈၸၢႆးသီႇၵေႃႉ၊ဢၼ်ပဵၼ် ယႃႇၸေးလႃႉ၊ၵုၼိ၊ယေႇၸႃႉ၊ တင်း သႃႇလုမ်ႇ၊ ဢေႃႈ။ ၶဝ်ၸိူဝ်းၼႆႉပဵၼ်ၸိူဝ်ႉၶိူဝ်းလုၵ်ႈလၢၼ် ပိလႁႃႇ၊ ဢေႃႈ။
မေးၼွႆႉ မၼႃႇသေႇ၊ ၽူႈယိင်းၵူၼ်း သုရိ၊ ၼၼ်ႉၵိူတ်ႇလဵင်ႉမႃးလုၵ်ႈၸၢႆးသွင်ၵေႃႉ၊ ဢႃႇသရေးလႃႉ၊ တင်း မႃႇၶိရႃႉ၊ ဢေႃႈ။ မႃႇၶိရႃႉ၊ ၼၼ်ႉပဵၼ်ပေႃႈ ၵိလတ်ႉ၊ ဢေႃႈ။-
မႃႇၶိရႃႉ၊ ၼၼ်ႉႁူမ်ႈပွင်းၵၼ်တင်းၼွင်ႉယိင်း ႁုပိမ်း၊ တင်း သုပိမ်း၊ ဢၼ်လႆႈၸိုဝ်ႈ မႃႇၶႃႇ၊ ၼၼ်ႉဢေႃႈ။ လုၵ်ႈၸၢႆး မႃႇၶိရႃႉ၊ ဢၼ်ထူၼ်ႈထိုင်သွင်သိုပ်ႇၼၼ်ႉလႆႈၸိုဝ်ႈ ၸလေႃးၽတ်ႉ၊ လႄႈ ၸလေႃးၽတ်ႉ၊ မီးလုၵ်ႈယိင်းၵူၺ်းၵူၺ်းဢေႃႈ။
မႃႇၶႃႇ၊ ၵေႃႉပဵၼ်မေး မႃႇၶိရႃႉ၊ ၼၼ်ႉၵိူတ်ႇလဵင်ႉမႃးလုၵ်ႈၸၢႆးသွင်ၵေႃႉ၊ဢၼ်လႆႈၸိုဝ်ႈ ပေးရိတ်ႉ၊ တင်း သေးရိတ်ႉ၊ ၼၼ်ႉဢေႃႈ။ ပေးရိတ်ႉ၊ မီးလုၵ်ႈၸၢႆးသွင်ၵေႃႉ၊ ဢုလမ်ႇ၊ တင်း ရေႇၵိမ်ႇ၊ ဢေႃႈ။-
ဢုလမ်ႇ၊ မီးလုၵ်ႈၸၢႆးၵေႃႉလဵဝ်၊ဢၼ်လႆႈၸိုဝ်ႈ ပေႇတၼ်ႇ၊ ၼၼ်ႉဢေႃႈ။ ၶဝ်ၸိူဝ်းၼႆႉတင်းသဵင်ႈတင်းမူတ်းပဵၼ်ၸိူဝ်ႉၶိူဝ်းလုၵ်ႈလၢၼ် ၵိလတ်ႉ၊ လုၵ်ႈၸၢႆး မႃႇၶိရႃႉ၊ ဢၼ်ပဵၼ်လၢၼ် မၼႃႇသေႇ၊ ဢေႃႈ။
ၼွင်ႉယိင်း ၵိလတ်ႉ၊ ဢၼ်လႆႈၸိုဝ်ႈ ႁမ်ႇမေႃႇလေးၵိတ်ႉ၊ ၼၼ်ႉၵိူတ်ႇလဵင်ႉမႃးလုၵ်ႈၸၢႆးသၢမ်ၵေႃႉ၊ဢၼ်ပဵၼ် ဢိသေႃးတႃႉ၊ဢပျေႇၸႃႇ၊မႁႃႇလႃႉ၊ ဢေႃႈ။-
သမိတႃႉ၊ သမ်ႉမီးလုၵ်ႈၸၢႆးသီႇၵေႃႉ၊ဢၼ်ပဵၼ် ဢႁိဢၼ်ႇ၊သေးၶိမ်ႇ၊လိၵႁိ၊ တင်း ဢၼိဢမ်ႇ၊ ဢေႃႈ။
ဢၼ်ၸိူဝ်းၼႆႉ၊သမ်ႉပဵၼ်ၸိူဝ်ႉၶိူဝ်းလုၵ်ႈလၢၼ် ဢေႇၽရိမ်ႇ၊ ဢၼ်သိုပ်ႇလူင်းၵႂႃႇသိုပ်ႇၼိုင်ႈယဝ်ႉသိုပ်ႇၼိုင်ႈတၢမ်းၵၼ်ၸမ်ႉ၊ပဵၼ် သုသေးလႃႉ၊ပေးရိတ်ႉ၊တႃႇႁတ်ႉ၊ဢေးလျႃႇတႃႉ၊တႃႇႁတ်ႉ၊-
ၸႃႇပတ်ႉ၊သုသေးလႃႉ၊ ၸိူဝ်းၼႆႉဢေႃႈ။ လိူဝ်သေ သုသေးလႃႉ၊ ၼၼ်ႉ ဢေႇၽရိမ်ႇ၊ ယင်းမီးလုၵ်ႈၸၢႆးထႅင်ႈသွင်ၵေႃႉ၊ဢၼ်ပဵၼ် ဢေးၸႃႇ၊ တင်း ဢေးလတ်ႉ၊ လူးၵွၼ်ႇဢေႃႈ။ ၶဝ်သွင်ပီႈၼွင်ႉၸိုင်၊လႆႈၶၢမ်ႇတၢင်းဢၼ်ဢဝ်တၢႆ၊ယၢမ်းမိူဝ်ႈဢၼ်ၶတ်းၸႂ်ႁႂ်ႈလႆႈလၵ်ႉဢဝ်ၽုင်သူဝ်းၵူၼ်းဝဵင်း ၵတ်ႉတိ၊ ၼၼ်ႉဢေႃႈ။-
ပေႃႈၶဝ် ဢေႇၽရိမ်ႇ၊ ၶၢင်းၶီၶၢင်းၽၢၼ်ပုၼ်ႈလုၵ်ႈၸၢႆးသွင်ၵေႃႉၼၼ်ႉ၊မိုဝ်ႉဝၼ်းႁိုင်ၼႃႇလႄႈပီႈၼွင်ႉမၼ်းတင်းလၢႆ၊လႆႈမႃးႁဵတ်းႁႂ်ႈမၼ်းပျေႃႇၸႂ်ၼိမ်ၸႂ်ဢေႃႈ။-
လိုၼ်းၼၼ်ႉ၊မၼ်းၼွၼ်းလူၺ်ႈၵၼ်တင်းမေးမၼ်းလႄႈမႄႈယိင်းၼၼ်ႉ၊ပႃးပတိၵ်ႈသၼ်ႇထေႇၵိူတ်ႇလဵင်ႉမႃးလုၵ်ႈၸၢႆးဢၼ်လႆႈၸိုဝ်ႈ ပေႇရိယႃႉ၊ ၵွပ်ႈပိူဝ်ႈဢၼ်ဢႃႉမၢင်ႇၵလႃႇႁွတ်ႈထိုင်ၵႃႈတီႈႁိူၼ်းယေးမၼ်းၼၼ်ႉဢေႃႈ။
ဢေႇၽရိမ်ႇ၊ မီးလုၵ်ႈယိင်းၵေႃႉၼိုင်ႈ၊ဢၼ်လႆႈၸိုဝ်ႈ သေးရႃႇ၊ ဢၼ်တႄႇတင်ႈဝဵင်း ပႅတ်ႉႁေႃႇရုၼ်ႇ၊ ပွတ်းၼိူဝ်ဢိၵ်ႇတင်းပွတ်းတႂ်ႈတင်းဝဵင်း ဢေႃးၸႅၼ်ႇသေးရႃႇ၊ ၸိူဝ်းၼၼ်ႉဢေႃႈ။-
ဢေႇၽရိမ်ႇ၊ သမ်ႉမီးထႅင်ႈလုၵ်ႈၸၢႆးၵေႃႉၼိုင်ႈ၊ဢၼ်လႆႈၸိုဝ်ႈ ရေႇၽႃႉ၊ ဢၼ်ၸိူဝ်ႉၶိူဝ်းလုၵ်ႈလၢၼ်မၼ်းသိုပ်ႇလူင်းၵႂႃႇၸမ်ႉ၊ပဵၼ် ရေႇသႅပ်ႉ၊တေးလႃႉ၊တႃႇႁၢၼ်ႇ၊-
ဢိူင်ႇဢၼ်ၶဝ်ပိူင်ႇလႄႈယူႇသဝ်းၸမ်ႉ၊ပဵၼ်ဝဵင်း ပေႇသလႃႉ၊ ဢိၵ်ႇတင်းဝၢၼ်ႈမၼ်းတင်းလၢႆတႄႇဢဝ်ၽၢႆႇတၢင်းဝၼ်းဢွၵ်ႇၵႂႃႇႁွတ်ႈထိုင်ဝဵင်း ၼႃႇရၼ်ႇ၊ တႄႇဢဝ်ၽၢႆႇတၢင်းဝၼ်းတူၵ်းႁွတ်ႈတေႃႇထိုင်ဝဵင်း ၵႄႇၸႃႉ၊ ဢိၵ်ႇတင်းဝၢၼ်ႈမၼ်းတင်းလၢႆ၊ယင်းပႃးတင်းဝဵင်း သေးၶိမ်ႇ၊ တင်းဝဵင်း ဢႃႇယႃႉ၊ ဢိၵ်ႇတင်းဝၢၼ်ႈမၼ်းတင်းလၢႆၸိူဝ်းၼၼ်ႉဢေႃႈ။
ၸိူဝ်ႉၶိူဝ်းလုၵ်ႈလၢၼ် မၼႃႇသေႇ၊ ၸမ်ႉ၊ပိူင်ႇဢဝ်ဝဵင်း ပႅတ်ႉသၼ်ႇ၊ ဝဵင်း တႃႇၼၵ်ႉ၊ ဝဵင်း မေႇၵိတ်ႉတေႃႇ၊ တင်းဝဵင်း တေႃႇရႃႉ၊ ဢိၵ်ႇတင်းဝၢၼ်ႈၶဝ်တင်းလၢႆၸိူဝ်းၼၼ်ႉဢေႃႈ။ ၶွပ်ႇၼမ်ႉလႅၼ်လိၼ်ၸိူဝ်းၼႆႉတင်းသဵင်ႈတင်းလူင်ၸမ်ႉ၊ပဵၼ်တီႈယူႇတီႈသဝ်းၸိူဝ်ႉၶိူဝ်းလုၵ်ႈလၢၼ် ယူဝ်းသႅပ်ႈ၊ လုၵ်ႈၸၢႆး ယႃႇၵုပ်ႈ၊ ၼၼ်ႉဢေႃႈ။
ၸိူဝ်းၼႆႉသမ်ႉပဵၼ်ၸိူဝ်ႉၶိူဝ်းလုၵ်ႈလၢၼ် ဢႃႇသျႃႇ၊ ဢေႃႈ။ မၼ်းမီးလုၵ်ႈၸၢႆးသီႇၵေႃႉ၊ဢၼ်ပဵၼ် ဢိမၼႃႉ၊ဢိသွႃႇ၊ဢိသဝီႇ၊ တင်း ပေႇရိယႃႉ၊ ဢိၵ်ႇတင်းၼွင်ႉယိင်းၵေႃႉၼိုင်ႈမီးၸိုဝ်ႈဝႃႈ၊ ၸေးရႃႉ၊ ဢေႃႈ။
ပေႇရိယႃႉ၊ မီးလုၵ်ႈၸၢႆးသွင်ၵေႃႉ၊ဢၼ်ပဵၼ် ႁေႇပႃႇ၊ တင်း မႃႇလႃႉၵျေးလႃႉ၊ ဢေႃႈ။ မႃႇလႃႉၵျေးလႃႉ၊ တႄႇတင်ႈဝဵင်း ပိရႃႉၸႃႇဢိတ်ႉ၊ ဢေႃႈ။
ႁေႇပႃႇ၊ မီးလုၵ်ႈၸၢႆးသၢမ်ၵေႃႉ၊ဢၼ်ပဵၼ် ယႃႇၽလႅတ်ႉ၊သေႃးမႃႇရႃႉ၊ တင်း ႁေႃးႀမ်ႇ၊ ဢိၵ်ႇတင်းၼွင်ႉယိင်းၵေႃႉၼိုင်ႈ၊မီးၸိုဝ်ႈဝႃႈ၊ သုဢႃႇ၊ ဢေႃႈ။
ယႃႇၽလႅတ်ႉ၊ သမ်ႉမီးလုၵ်ႈၸၢႆးသၢမ်ၵေႃႉၼင်ႇၵဝ်ႇ၊ဢၼ်ပဵၼ် ပႃႇသၵ်ႉ၊ပိမႁႃႇလႃႉ၊ ဢိၵ်ႇတင်း ဢႃႇသဝတ်ႉ၊ ဢေႃႈ။
ၼွင်ႉၸၢႆးမၼ်း သေႃးမႃႇရႃႉ၊ မီးလုၵ်ႈၸၢႆးသီႇၵေႃႉ၊ဢၼ်ပဵၼ် ဢႃႇႁိ၊ရေႃးၵႃႉ၊ယေႇႁုပ်ႉပႃႉ၊ ဢိၵ်ႇတင်း ဢႃႇရမ်ႇ၊ ဢေႃႈ။-
ၼွင်ႉၸၢႆးမၼ်း ႁေႃးႀမ်ႇ မီးလုၵ်ႈၸၢႆးသီႇၵေႃႉ၊ဢၼ်ပဵၼ် ၸေႃးၽႃႉ၊ဢိမ်းၼႃႉ၊သေးလိတ်ႉ၊ တင်း ဢႃႇမလႃႉ၊ ဢေႃႈ။
ၸိူဝ်ႉၶိူဝ်းလုၵ်ႈလၢၼ် ၸေႃးၽႃႉ၊ ၸမ်ႉ၊ပဵၼ် သုဢႃႇ၊ႁႃႇၼေႇၽႃႇ၊သွႃႇလႃႉ၊ပေးရိ၊ဢိမ်းရႃႉ၊-
ပေးၸႃႇ၊ႁေႃးတႃႉ၊သမ်ႇမႃႇ၊သိလသႃႉ၊ဢိသရၼ်ႇ၊ ဢိၵ်ႇတင်း ပေးရႃႉ၊ ဢေႃႈ။
ၸိူဝ်ႉၶိူဝ်းလုၵ်ႈလၢၼ် ယေႇႀႃႇ၊ ၸမ်ႉ၊ပဵၼ် ယေႇၽုၼ်ႇၼႃႉ၊ပိသပႃႉ၊ ဢိၵ်ႇတင်း ဢႃႇရႃႉ၊ ဢေႃႈ။-
ၸိူဝ်ႉၶိူဝ်းလုၵ်ႈလၢၼ် ဢုလႃႉ၊ ၸမ်ႉ၊ပဵၼ် ဢႃႇရႃႉ၊ႁၼ်ႇယေႇလႃႉ၊ ဢိၵ်ႇတင်း ရေႇၸိယႃႉ၊ ဢေႃႈ။
ၶဝ်ၸိူဝ်းၼႆႉပဵၼ်ၸိူဝ်ႉၶိူဝ်းလုၵ်ႈလၢၼ် ဢႃႇသျႃႇ၊ ဢေႃႈ။ ၶဝ်ပဵၼ်တူၼ်ႈပဵၼ်ငဝ်ႈၼႂ်းၵူၼ်းၶိူဝ်းႁိူၼ်းၶဝ်တင်းလၢႆလႄႈပဵၼ်ႁူဝ်ႁၢၼ်ၵူၼ်းသိုၵ်းဢၼ်ၸိုဝ်ႈသဵင်ယႂ်ႇ၊ၵူၼ်းလူင်ဢၼ်မီးၼႃႈမီးတႃဢေႃႈ။ ၸိူဝ်ႉၶိူဝ်းလုၵ်ႈလၢၼ် ဢႃႇသျႃႇ၊ ဢၼ်လႆႈၶၢမ်ႇတၢင်းဢၼ်မၢတ်ႈမၢႆၶဝ်ႈပႃးၼႂ်းၸရၢင်းၵူၼ်းဢၼ်ထၢမ်းၼႃႈၵၢၼ်သိုၵ်းလႆႈၼၼ်ႉ၊မီးသွင်မိုၼ်ႇႁူၵ်းႁဵင်ၵေႃႉဢေႃႈ။
ဢၼ်ၶပ်ႉၸွမ်းၼင်ႇဢသၢၵ်ႈၶဝ်ၸမ်ႉ၊ပဵၼ် ပေႇလႃႉ၊ဢႃႇသႃႉပေးလႃႉ၊ဢႁႃႇရႃႉ၊-
ၼေႃးႁႃႉ၊ ဢိၵ်ႇတင်း ရႃႇၽႃႉ၊ ဢေႃႈ။
ၸိူဝ်ႉၶိူဝ်းလုၵ်ႈလၢၼ် ပေႇလႃႉ၊ ၸမ်ႉ၊ပဵၼ် ဢတ်ႉတႃႇ၊ၵေးရႃႉ၊ဢၽိႁုတ်ႉ၊-
ယုၸႃႉ၊သႃႇၶိ၊ တင်း မိရႃႉမႃႇ၊ ဢေႃႈ။ လုၵ်ႈၸၢႆးမၼ်းၸိူဝ်းၼႆႉပဵၼ်တူၼ်ႈပဵၼ်ငဝ်ႈၼႂ်းၶိူဝ်းႁိူၼ်းၶဝ်တင်းလၢႆဢေႃႈ။
ၵႃႈတီႈမေးမၼ်း ႁုသိမ်း၊ ၼၼ်ႉမၼ်းလႆႈလုၵ်ႈၸၢႆးသွင်ၵေႃႉဝႆႉလႄႈပဵၼ် ဢပိတုပ်ႉ၊ တင်း ဢေးလႃႉပႃႇလႃႉ၊ ဢေႃႈ။
ဢေးလႃႉပႃႇလႃႉ၊ မီးလုၵ်ႈၸၢႆးသၢမ်ၵေႃႉ၊ဢၼ်ပဵၼ် ဢေးပႃႇ၊မိသႁမ်ႇ၊ ဢိၵ်ႇတင်း သႃႇမိတ်ႉ ဢေႃႈ။ သႃႇမိတ်ႉ၊ ၼၼ်ႉပဵၼ်ၵေႃႉဢၼ်တႄႇတင်ႈဝဵင်း ဢေႃးၼေႃး၊ တင်းဝဵင်း လေႃးတႃႉ၊ ဢိၵ်ႇတင်းဝၢၼ်ႈၶဝ်တင်းလၢႆဢေႃႈ။
ပေႇရိယႃႉ၊ တင်း သေးမႃႉ၊ ၸိူဝ်းၼၼ်ႉပဵၼ်တူၼ်ႈပဵၼ်ငဝ်ႈၼႂ်းၵူၼ်းၶိူဝ်းႁိူၼ်းၶဝ်တင်းလၢႆ၊ဢၼ်ယူႇသဝ်းၵႃႈတီႈဝဵင်း ဢႃႇၸလုၼ်ႇ၊ သေယဝ်ႉ၊ႁေႃႈၵူၼ်းၸိူဝ်းဢၼ်ယူႇၼႂ်းဝဵင်း ၵတ်ႉတိ၊ ဢွၵ်ႇပႅတ်ႈၼၼ်ႉဢေႃႈ။-
ၸိူဝ်ႉၶိူဝ်းလုၵ်ႈလၢၼ် ပေႇရိယႃႉ၊ ၸမ်ႉ၊ပဵၼ် ဢႁိဢေႃး၊သႃႇသၵ်ႉ၊ယေႇရိမုတ်ႉ၊-
ၸိူဝ်ႉၶိူဝ်းလုၵ်ႈလၢၼ် ဢေးလႃႉပႃႇလႃႉ၊ ဢၼ်ၶဝ်ႈပႃးၼၼ်ႉပဵၼ် ၸေႇပတိ၊မေႇသုလမ်ႇ၊ႁေႇၸၵိ၊ႁေႇပႃႇ၊-
ဢိသမေႇရေႇ၊ယေႇၸလိ၊ တင်း ယေႃးပပ်ႉ၊ ၸိူဝ်းၼၼ်ႉဢေႃႈ။
ၸိူဝ်ႉၶိူဝ်းလုၵ်ႈလၢၼ် သိမႁိ၊ ဢၼ်ၶဝ်ႈပႃးၼၼ်ႉပဵၼ် ယႃႇၵိမ်း၊ၸိၶရိ၊ၸႃႇပတိ၊-
ၸိူဝ်ႉၶိူဝ်းလုၵ်ႈလၢၼ် သႃႇသၵ်ႉ၊ ဢၼ်ၶဝ်ႈပႃးၼၼ်ႉပဵၼ် ဢိသပၼ်ႇ၊ႁေႇပႃႇ၊ဢေးလျႃႇလႃႉ၊-
ၸိူဝ်ႉၶိူဝ်းလုၵ်ႈလၢၼ် ယေႇရေႃးႁမ်ႇ၊ ဢၼ်ၶဝ်ႈပႃးၼၼ်ႉပဵၼ် သမ်ႇသရေႇ၊သေႇႁႃႇရိ၊ဢႃႇထလိ၊-
ယႃႇရသိ၊ဢေးလိယႃႉ၊ၸိၶရိ၊ ၸိူဝ်းၼၼ်ႉဢေႃႈ။
ၶဝ်ၸိူဝ်းၼႆႉ၊ပဵၼ်တူၼ်ႈပဵၼ်ငဝ်ႈပူႇပေႃႈၵူၼ်းၶိူဝ်းႁိူၼ်းၶဝ်တင်းလၢႆလႄႈယူႇၵႃႈတီႈဝဵင်း ယေႇရုသလႅမ်ႇ၊ ဢေႃႈ။
ယေႇယေႇလႃႉ၊ တႄႇတင်ႈဝဵင်း ၵိပွင်ႇ၊ လႄႈယူႇၵႃႈတီႈဝဵင်းၼၼ်ႉဢေႃႈ။ မေးမၼ်းဢၼ်လႆႈၸိုဝ်ႈ မႃႇၶႃႇ၊ ၼၼ်ႉ၊-
ၵိူတ်ႇလဵင်ႉလုၵ်ႈၸၢႆးတူၼ်ႈမၼ်း ဢႃႇပတုၼ်ႇ၊ သေယဝ်ႉ၊လုၵ်ႈၸၢႆးတၢင်ႇၵေႃႉၸိူဝ်းၼၼ်ႉၸမ်ႉ၊ပဵၼ် ၸုရႃႉ၊ၵိသႃႉ၊ပႃႇလႃႉ၊ၼႃႇတပ်ႉ၊-
ၼေးရႃႉ၊ မီးလုၵ်ႈၸၢႆး ၵိသႃႉ၊ ၵိသႃႉ၊ မီးလုၵ်ႈၸၢႆးဢၼ်ပဵၼ်ၶုၼ်ႁေႃၶမ်း သေႃးလု ဢေႃႈ။ သေႃးလု၊ မီးလုၵ်ႈၸၢႆးသီႇၵေႃႉ၊ဢၼ်ပဵၼ် ယေႃးၼႀၼ်ႇ၊မေႇလၶိသွႃႇ၊ဢၽိၼတပ်ႉ၊ တင်း ဢိသပႃႇလႃႉ၊ ဢေႃႈ။-
ယေႃးၼႀၼ်ႇ၊ ပဵၼ်ပေႃႈမေး ရိပ်ႉပႃႇလႃႉ၊ ဢၼ်ပဵၼ်ပေႃႈ မိၵ်ႉၶႃႇ၊ ၼၼ်ႉဢေႃႈ။
မိၵ်ႉၶႃႇ၊ မီးလုၵ်ႈၸၢႆးသီႇၵေႃႉ၊ဢၼ်ပဵၼ် ၽိသုၼ်ႇ၊မေးလႅၵ်ႉ၊တႃႇရႃႇ၊ တင်း ဢႃႇၶတ်ႉ၊ ဢေႃႈ။-
ဢႃႇၶတ်ႉ၊ မီးလုၵ်ႈၸၢႆး ယေႇႁေႃးတႃႉ၊ယေႇႁေႃးတႃႉ၊ မီးလုၵ်ႈၸၢႆးသၢမ်ၵေႃႉ၊ဢၼ်ပဵၼ် ဢႃႇလမႅတ်ႉ၊ဢႃႇၸမႃႇဝိတ်ႉ၊ တင်း ၸိမရိ၊ ဢေႃႈ။ ၸိမရိ၊ ပဵၼ်ပေႃႈ မေႃးၸႃႉ၊-
မေႃးၸႃႉ၊ ပဵၼ်ပေႃႈ ပိၼႃႉ၊ပိၼႃႉ၊ ပဵၼ်ပေႃႈ ရႃႇၽႃႉ၊ရႃႇၽႃႉ၊ ပဵၼ်ပေႃႈ ဢေးလႃႇသႃႉ၊ဢေးလႃႇသႃႉ၊ ပဵၼ်ပေႃႈ ဢႃႇၸေးလႃႉ၊ ဢေႃႈ။
ဢႃႇၸေးလႃႉ၊ မီးလုၵ်ႈၸၢႆးႁူၵ်းၵေႃႉ၊ဢၼ်ပဵၼ် ဢႃႇၸရိၵမ်ႇ၊ပေႃးၶေႇရု၊ဢိသမေႇလႃႉ၊သရိယႃႉ၊ဢေႃးပတိ၊ တင်း ႁႃႇၼၼ်ႇ၊ ဢေႃႈ။-
ဢေးသႅၵ်ႉ၊ ၼွင်ႉၸၢႆး ဢႃႇၸေးလႃႉ၊ ၼၼ်ႉ မီးလုၵ်ႈၸၢႆးသၢမ်ၵေႃႉ၊ဢၼ်ပဵၼ် ဢုလမ်ႇ၊ယေႇႁုတ်ႉ၊ တင်း ဢေႇလီႇၽလႅတ်ႉ၊ ဢေႃႈ။
လုၵ်ႈၸၢႆး ဢုလမ်ႇ၊ ၸိူဝ်းၼၼ်ႉ၊ပဵၼ်ႁူဝ်ႁၢၼ်ၵူၼ်းသိုၵ်းလႄႈၸၢင်ႈယိုဝ်းၵၢင်ႇယိုဝ်းၵူင်ဢၼ်ၸိုဝ်ႈသဵင်ယႂ်ႇၼႃႇၼၼ်ႉဢေႃႈ။ မၼ်းမီးလုၵ်ႈလၢၼ်လဵၼ်ၼမ်ၼႃႇပွင်းၵၼ်မီးပၢၵ်ႇႁႃႈသိပ်းၵေႃႉလႄႈၸိုဝ်ႈသဵင်ဢၼ်ဝႃႈမႃးၸိူဝ်းၼႆႉတင်းသဵင်ႈတင်းလူင်၊ပဵၼ်ၵူၼ်းၸိူဝ်ႉၶိူဝ်းလုၵ်ႈလၢၼ်မဵဝ်း ပိၼ်ႇယႃႇမိၼ်ႇ၊ ဢေႃႈ။
ၵူၼ်းမဵဝ်း ဢိသရေး၊ တင်းသဵင်ႈတင်းမူတ်းလႆႈၶၢမ်ႇတၢင်းဢၼ်မၢတ်ႈမၢႆၶဝ်ႈပႃးၼႂ်း ပိုၼ်းၶုၼ်ႁေႃၶမ်းမိူင်းဢိသရေး၊ ဝႆႉၸွမ်းၼင်ႇၵူၼ်းၸိူဝ်ႉၶိူဝ်းႁိူၼ်းၶဝ်ၼၼ်ႉဢေႃႈ။ ၵူၼ်းမဵဝ်း ယုတႃႉ၊ တင်းလၢႆၸမ်ႉ၊လႆႈၶၢမ်ႇတၢင်းဢၼ်သိမ်းဢဝ်ၵႂႃႇၵႃႈတီႈဝဵင်း ပႃႇပုလုၼ်ႇ၊ ၸွမ်းၼင်ႇဢပျတ်ႈတၢမ်ႇဢၼ်ၶဝ်ၽိတ်းပိူင်ႈၼၼ်ႉဢေႃႈ။-
ၵူၼ်းၸိူဝ်းဢၼ်လႆႈၶိုၼ်းပွၵ်ႈမႃးဢွၼ်တၢင်းသေပိူၼ်ႈလႄႈတူၵ်းတီႈတူၵ်းလႅၼ်ၵႃႈတီႈဝၢၼ်ႈဝဵင်းၶဝ်ဢၼ်ၶဝ်ပိူင်ႇၼၼ်ႉၸမ်ႉ၊ပဵၼ်ၶႃႈဝၢၼ်ႈၵူၼ်းမဵဝ်း ဢိသရေး၊ လႂ်ယဵၸ်ႈပရေႃးႁဵၵ်ႈ လႂ်၊ၵူၼ်းမဵဝ်း လေႇဝိ၊ လႂ်တင်းၵူၼ်းထၢမ်းၼႃႈၵၢၼ်ၵျွင်းပိၵ်ႈမၢၼ်ႇၸဝ်ႈလႂ်၊ၸိူဝ်းၼၼ်ႉဢေႃႈ။-
ၵူၼ်းၸိူဝ်းဢၼ်ပဵၼ်ၸိူဝ်ႉၶိူဝ်း ယုတႃႉ၊ ၶဝ်ၸိူဝ်ႉၶိူဝ်း ပိၼ်ႇယႃႇမိၼ်ႇ၊ ၶဝ်ၸိူဝ်ႉၶိူဝ်း ဢေႇၽရိမ်ႇ၊ ၶဝ်တင်းၸိူဝ်ႉၶိူဝ်း မၼႃႇသေႇ၊ ၶဝ်ၸိူဝ်းၼၼ်ႉၸမ်ႉ၊ၶဝ်ႈယူႇၵႃႈၼႂ်းဝဵင်း ယေႇရုသလႅမ်ႇ၊ ဢေႃႈ။
တင်းသဵင်ႈတင်းမူတ်းမီးၵဝ်ႈပၢၵ်ႇႁႃႈသိပ်းႁူၵ်းၵေႃႉလႄႈၸိုဝ်ႈသဵင်ဢၼ်ဝႃႈမႃးၸိူဝ်းၼႆႉပဵၼ်တူၼ်ႈပဵၼ်ငဝ်ႈၶိူဝ်းႁိူၼ်းၶဝ်ဢေႃႈ။
ယဵၸ်ႈပရေႃးႁဵၵ်ႈၸိူဝ်းဢၼ်ပဵၼ်တူၼ်ႈပဵၼ်ငဝ်ႈၼႂ်းၶိူဝ်းႁိူၼ်းၶဝ်ၼၼ်ႉမီးၼိုင်ႈႁဵင်ၸဵတ်းပၢၵ်ႇႁူၵ်းသိပ်းဢေႃႈ။ ၵႃႈၼင်ႇဢၼ်ပဵၼ်ၵၢၼ်ငၢၼ်းၵျွင်းပိၵ်ႈမၢၼ်ႇၸဝ်ႈၵႃႈမီးၼၼ်ႉၶဝ်ၸိူဝ်းၼႆႉပႄႉၵၢၼ်ပႄႉငၢၼ်းလီလီဢေႃႈ။
ၵူၼ်းပႂ်ႉၽၵ်းတူၵျွင်းပိၵ်ႈမၢၼ်ႇၸဝ်ႈၸိူဝ်းၼၼ်ႉၸမ်ႉ၊ သႃႇလုမ်ႇ၊ဢၵ်ႉၵုပ်ႉ၊တႃႇလမုၼ်ႇ၊ဢႁိမၼ်ႇ၊ တင်းပီႈၼွင်ႉၶဝ်ၸုမ်းၼိုင်ႈ၊ သႃႇလုမ်ႇ၊ ပဵၼ်ႁူဝ်ၼႃႈၶဝ်လႄႈ၊-
လႆႈပႂ်ႉၽၵ်းတူၽၢႆႇဝၼ်းဢွၵ်ႇဢၼ်ၶုၼ်ႁေႃၶမ်းၶဝ်ႈၼၼ်ႉဢေႃႈ။ ၶဝ်ၸိူဝ်းၼႆႉလႆႈပႂ်ႉၽၵ်းတူပၢင်တပ်ႉၵူၼ်း လေႇဝိ၊ ၸိူဝ်းၼၼ်ႉဢေႃႈ။
သႃႇလုမ်ႇ၊ လုၵ်ႈၸၢႆး ၵေႃးရႃႉ၊ ၵေႃႉပဵၼ်လၢၼ် ဢေးပျႃႇသပ်ႉ၊ ဢိၵ်ႇတင်းပီႈၼွင်ႉမၼ်းၵူၼ်းမဵဝ်းမၼ်း ၵေႃႇရသိ၊ ၸိူဝ်းၼၼ်ႉတူၵ်းပုၼ်ႈၽွၼ်းၵၼ်ပႂ်ႉၽၵ်းတူဢၼ်ၶဝ်ႈၸူးသုမ်ႉထဵင်ၸဝ်ႈဢၼ် ထႃႇဝရႃႉၽြႃး၊ ၵိင်းဝၢပ်ႈၼၼ်ႉမိူၼ်ၸိူဝ်ႉၼင်ႇဢၼ်ပူႇပေႃႈၶဝ်လႆႈပႂ်ႉလူပႂ်ႉထိင်းပၢင်တပ်ႉ ထႃႇဝရႃႉၽြႃး၊ ၼၼ်ႉဢေႃႈ။-
မိူဝ်ႈၵွၼ်ႇဢွၼ်ၼႆႉၼၼ်ႉ ၽိၼႁတ်ႉ၊ လုၵ်ႈၸၢႆး ဢေးလႃႇၸႃႇ၊ လႆႈပဵၼ်ႁူဝ်ၼႃႈၵူၼ်းပႂ်ႉၽၵ်းတူမႃးလႄႈ ထႃႇဝရႃႉၽြႃး၊ မီးလူၺ်ႈၵၼ်တင်းမၼ်းၼၼ်ႉဢေႃႈ။
ၸႃႇၶရိ၊ လုၵ်ႈၸၢႆး မသေးလမိ၊ ၵေႃႈပဵၼ်ၵူၼ်းပႂ်ႉၽၵ်းတူဢၼ်ၶဝ်ႈၸူးသုမ်ႉထဵင်ၸဝ်ႈဢၼ် ထႃႇဝရႃႉၽြႃး၊ ၵိင်းဝၢပ်ႈၼၼ်ႉၵေႃႉၼိုင်ႈၼင်ႇၵဝ်ႇဢေႃႈ။
ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၶၢၼ်းဝႆႉ၊ႁႂ်ႈပႂ်ႉၽၵ်းတူၼၼ်ႉတင်းသဵင်ႈတင်းလူင်၊မီးသွင်ပၢၵ်ႇပၢႆသိပ်းသွင်ၵေႃႉလႄႈလႆႈၵဵပ်းဢဝ်ၸရၢင်းၶဝ်ၸွမ်းၼင်ႇၼႂ်းဝၢၼ်ႈၼႂ်းၶူင်ႇဢၼ်ၶဝ်ယူႇၼၼ်ႉဢေႃႈ။ ၶုၼ်ႁေႃၶမ်း တႃႇဝိတ်ႈ၊ တင်း သမူၺ်ႇလႃႉ၊ ဢၼ်ပဵၼ်ၵူၼ်းႁူပွင်ႇတႃလႅင်းၼၼ်ႉ၊ၶၢၼ်းၶဝ်ဝႆႉၸဵမ်မိူဝ်ႈၸူဝ်ႈပၢၼ်ပူႇပေႃႈၶဝ်ၼၼ်ႉဢေႃႈ။-
ၸူဝ်ႈလုၵ်ႈပၢၼ်လၢၼ်ၶဝ်ၵေႃႈ၊လႆႈပႂ်ႉၽၵ်းတူၵျွင်းပိၵ်ႈမၢၼ်ႇၸဝ်ႈသေႇသေႇဢေႃႈ။-
ၽၵ်းတူဢၼ်တေႃႇၼႃႈၵၼ်ၽၢႆႇတၢင်းႁွင်ႇၽၢႆႇတၢင်းၸၢၼ်း၊ၽၢႆႇတၢင်းဝၼ်းဢွၵ်ႇ၊ၽၢႆႇတၢင်းဝၼ်းတူၵ်းသီႇၼႃႈၼၼ်ႉမီးႁူဝ်ၼႃႈၵူၼ်းပႂ်ႉယေႈၵေႃႉယေႈၵေႃႉဢေႃႈ။-
ပီႈၼွင်ႉၶဝ်ဢၼ်ပဵၼ်ၵူၼ်းဝၢၼ်ႈၶဝ်ၸိူဝ်းၼၼ်ႉ၊လႆႈပဵၼ်ဢလေႉၵၼ်မႃးထၢမ်းၼႃႈၵၢၼ်ပႂ်ႉယေႈလႄႉယေႈၵမ်း၊ၸဵတ်းဝၼ်းၸဵတ်းဝၼ်းဢေႃႈ။-
ႁူဝ်ၼႃႈၵူၼ်းပႂ်ႉသီႇၵေႃႉၼၼ်ႉပဵၼ်ၵူၼ်းမဵဝ်း လေႇဝိ၊ ၶဝ်ဢၼ်ၶၢမ်ႇဢဝ်ပုၼ်ႈၽွၼ်းပႂ်ႉလုၵ်းတင်းလၢႆ၊ဢိၵ်ႇတင်းတိူၵ်ႈၽၼ်ႇတႃႇဢၼ်မီးၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။-
ၶဝ်လႆႈဢွၼ်ၵၼ်ယူႇၸမ်ႁိမ်းၽၵ်းတူၵျွင်းပိၵ်ႈမၢၼ်ႇၸဝ်ႈၵွပ်ႈပိူဝ်ႈၶဝ်မီးပုၼ်ႈၽွၼ်းဢၼ်ပႂ်ႉၽၵ်းတူ၊ဢိၵ်ႇတင်းဢၼ်ၽုၺ်ႇၽၵ်းတူပၼ်ၵူႈၼႂ်ၵူႈၼႂ်ၼၼ်ႉဢေႃႈ။
ၵူၼ်းမဵဝ်း လေႇဝိ၊ ၵမ်ႈၽွင်ႈလႆႈၶၢမ်ႇဢဝ်ပုၼ်ႈၽွၼ်းဢၼ်ပႂ်ႉထိင်းၶိူင်ႈပိူင်ဢၼ်ယိပ်းဢၼ်ၸႂ်ႉၼႂ်းၼႃႈၵၢၼ်ၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။ ၶဝ်လႆႈၼပ်ႉဢၢၼ်ႇတူၺ်း၊မိူဝ်ႈဢၼ်ဢဝ်ဢွၵ်ႇဢဝ်ၶဝ်ႈၼႂ်းတၢင်းဢၼ်ၶဝ်ဢဝ်ယိပ်းဢဝ်ၸႂ်ႉၵူႈပွၵ်ႈၼၼ်ႉဢေႃႈ။-
ၵမ်ႈၽွင်ႈသမ်ႉလႆႈႁပ်ႉပုၼ်ႈၽွၼ်းဢၼ်ပႂ်ႉထိင်းၶိူင်ႈမူတ်းၸၢင်ႇလႂ်၊ၽွင်ၶဝ်ႈၵျုင်ႇလႂ်၊ၼမ်ႉမၢၵ်ႇၸပိတ်ႉလႂ်၊ၼမ်ႉမၼ်းသၢၼ်ႇလုၼ်ႇလႂ်၊ၼၢမ်ႇသႃႇလႂ်၊ၼမ်ႉမၼ်းႁွမ်လႂ်၊ၸိူဝ်းၼၼ်ႉဢေႃႈ။-
လွင်ႈတၢင်းဢၼ်ၽေႃႇႁဵတ်းၼမ်ႉမၼ်းၼၢမ်ႇသႃႇၼၼ်ႉၸမ်ႉ၊ပဵၼ်ပုၼ်ႈၽွၼ်းယဵၸ်ႈပရေႃးႁဵၵ်ႈ တင်းလၢႆဢေႃႈ။
ၵူၼ်းမဵဝ်း လေႇဝိ၊ ၵေႃႉၼိုင်ႈ ဢၼ်လႆႈၸိုဝ်ႈ မတ်ႉတိသိ၊ လုၵ်ႈၸၢႆး သႃႇလုမ်ႇ၊ ဢၼ်ပဵၼ်ၸိူဝ်ႉၶိူဝ်းမဵဝ်း ၵေႃႇရသိ၊ ၼၼ်ႉလႆႈတူၵ်းပုၼ်ႈၽွၼ်းလူတူၺ်းၶဝ်ႈမုၼ်းဢၼ်ၶူဝ်ႈၼိူဝ်ၶႅပ်းလဵၵ်းပုၼ်ႈတၵ်းသၢၵ်ႈလူႇၼၼ်ႉလႄႈ၊-
ပီႈၼွင်ႉၶိူဝ်းႁိူၼ်း ၵေႃႇရသိ၊ တင်းလၢႆလႆႈၶၢမ်ႇဢဝ်ပုၼ်ႈၽွၼ်းဢၼ်မႄးႁႅၼ်းၶဝ်ႈမုၼ်းမူတ်းၸၢင်ႇပုၼ်ႈၵျွင်းပိၵ်ႈမၢၼ်ႇၸဝ်ႈၵူႈသိၼ်ၼၼ်ႉဢေႃႈ။
ၵူၼ်းၶိူဝ်းႁိူၼ်းမဵဝ်း လေႇဝိ၊ ၵမ်ႈၽွင်ႈတူၵ်းပုၼ်ႈၽွၼ်းဢၼ်ႁဵတ်းၵႂၢမ်းၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။ ၵူၼ်းဢၼ်ပဵၼ်တူၼ်ႈပဵၼ်ငဝ်ႈၼႂ်းၶိူဝ်းႁိူၼ်းၸိူဝ်းၼၼ်ႉ၊လႆႈယူႇၵႃႈတီႈလုၵ်းၵႃႈၼႂ်းၵျွင်းပိၵ်ႈမၢၼ်ႇၸဝ်ႈၸိူဝ်းၼၼ်ႉလႄႈလႆႈၵၢင်းလွတ်ႈတင်းၼႃႈၵၢၼ်တၢင်ႇၸိူဝ်ႉတၢင်ႇဢၼ်ၵွပ်ႈပိူဝ်ႈၶဝ်လႆႈပႂ်ႉႁဵတ်းယူႇၵူႈဝၼ်းၵူႈၶိုၼ်းၼၼ်ႉဢေႃႈ။
ၸိုဝ်ႈသဵင်ၵူၼ်းၸိူဝ်းဢၼ်ဝႃႈမႃးၼႆႉ၊ပဵၼ်တူၼ်ႈပဵၼ်ငဝ်ႈၼႂ်းၵူၼ်းၶိူဝ်းႁိူၼ်းမဵဝ်း လေႇဝိ၊ ၸိူဝ်းၼၼ်ႉ၊ၸွမ်းလူၺ်ႈတၢင်းဢၼ်လုၵ်ႉၵႃႈတီႈပူႇပေႃႈၶဝ်သိုပ်ႇလူင်းမႃးၼၼ်ႉလႄႈၶဝ်ၼၼ်ႉယူႇၼႂ်းဝဵင်း ယေႇရုသလႅမ်ႇ၊ ဢေႃႈ။
ယေႇယေႇလႃႉ၊ တႄႇတင်ႈဝဵင်း ၵိပွင်ႇ၊ လႄႈယူႇသဝ်းၵႃႈတီႈဝဵင်းၼၼ်ႉဢေႃႈ။ မေးမၼ်းပဵၼ် မႃႇၶႃႇ၊ လႄႈ၊-
လုၵ်ႈၸၢႆးတူၼ်ႈမၼ်းပဵၼ် ဢႃႇပတုၼ်ႇ၊ လႄႈသမ်ႉမီးလုၵ်ႈၸၢႆးထႅင်ႈ၊ ၸုရႃႉ၊ၵိသႃႉ၊ပႃႇလႃႉ၊ၼေးရႃႉ၊ၼႃႇတပ်ႉ၊-
ၵေးတေႃး၊ဢႁိဢေႃး၊ၸႃႇၶရိ၊ ဢိၵ်ႇတင်း မိၵလုတ်ႉ၊ ၵေႃႉဢၼ်ပဵၼ်ပေႃႈ သိမႃႉ၊ ၼၼ်ႉဢေႃႈ။
ၸိူဝ်ႉၶိူဝ်းလုၵ်ႈလၢၼ်ၶဝ်ယူႇၼႂ်းဝဵင်း ယေႇရုသလႅမ်ႇ၊ ၵႃႈတီႈႁိမ်းမူႇပီႈၸိူဝ်းၼွင်ႉၶဝ်တၢင်ႇၸိူဝ်ႉတၢင်ႇၶိူဝ်းၼၼ်ႉဢေႃႈ။
ၼေးရႃႉ၊ မီးလုၵ်ႈၸၢႆး ၵိသႃႉ၊ ဢၼ်ပဵၼ်ပေႃႈ သေႃးလု၊ ၼၼ်ႉဢေႃႈ။ သေႃးလု၊ သမ်ႉမီးလုၵ်ႈၸၢႆးသီႇၵေႃႉ၊ဢၼ်ပဵၼ် ယေႃးၼႀၼ်ႇ၊မေႇလၶိသွႃႇ၊ဢၽိၼတပ်ႉ၊ တင်း ဢိသပႃႇလႃႉ၊ ဢေႃႈ။-
ယေႃးၼႀၼ်ႇ၊ မီးလုၵ်ႈၸၢႆး မေးရိပ်ႉပႃႇလႃႉ၊ ဢၼ်ပဵၼ်ပေႃႈ မိၵ်ႉၶႃႇ၊ ၼၼ်ႉဢေႃႈ။-
မိၵ်ႉၶႃႇ၊ သမ်ႉမီးလုၵ်ႈၸၢႆးသီႇၵေႃႉ၊ဢၼ်ပဵၼ် ၽိသုၼ်ႇ၊မေးလႅၵ်ႉ၊တႃႇရႃႇ၊ တင်း ဢႃႇၶတ်ႉ၊ ဢေႃႈ။-
ဢႃႇၶတ်ႉ၊ ပဵၼ်ပေႃႈ ယေႇႁေႃးတႃႉ၊ ဢၼ်မီးလုၵ်ႈၸၢႆးသၢမ်ၵေႃႉ၊ဢၼ်ပဵၼ် ဢႃႇလမႅတ်ႉ၊ဢႃႇၸမႃႇဝိတ်ႉ၊ တင်း ၸိမရိ၊ ၼၼ်ႉဢေႃႈ။ ၸိမရိ၊ သမ်ႉပဵၼ်ပေႃႈ မေႃးၸႃႉ၊-
ဢၼ်မီးလုၵ်ႈၸၢႆး ပိၼႃႉ၊ပိၼႃႉ၊ မီးလုၵ်ႈၸၢႆး ရေႇၽႃႇယႃႉ၊ရေႇၽႃႇယႃႉ၊ မီးလုၵ်ႈၸၢႆး ဢေးလႃႇသႃႉ၊ဢေးလႃႇသႃႉ၊ မီးလုၵ်ႈၸၢႆး ဢႃႇၸေးလႃႉ၊ ဢေႃႈ။
ဢႃႇၸေးလႃႉ၊ မီးလုၵ်ႈၸၢႆးႁူၵ်းၵေႃႉ၊ဢၼ်ပဵၼ် ဢႃႇၸရိၵမ်ႇ၊ပေႃးၶေႇရု၊ဢိသမေႇလႃႉ၊သရိယႃႉ၊ဢေႃးပတိ၊ တင်း ႁႃႇၼၼ်ႇ၊ ဢေႃႈ။
မိူဝ်ႈၼၼ်ႉ၊ၵူၼ်းမဵဝ်း ၽိလိတ်ႉတိ၊ ၶဝ်တိုၵ်းၵၼ်တင်းၵူၼ်းမဵဝ်း ဢိသရေး၊ တင်းလၢႆ ၵႃႈတီႈလွႆ ၵိလပေႃႇ၊ လႄႈၵူၼ်းမဵဝ်း ဢိသရေး၊ လူမ်ႉတၢႆၵႃႈတီႈၼၼ်ႈၼမ်ၼႃႇသေယဝ်ႉ၊ၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇပႃးလူၺ်ႈၵၼ်တင်းၶုၼ်ႁေႃၶမ်း သေႃးလု၊ တင်းလုၵ်ႈၸၢႆးမၼ်းတင်းလၢႆဢွၼ်ၵၼ်ၼီပၢႆႈဢေႃႈ။-
ၵူၼ်း ၽိလိတ်ႉတိ၊ ၸိူဝ်းၼၼ်ႉလိုပ်ႈလမ်းၸွမ်းၵႂႃႇၶိုတ်းၶဝ်လႄႈၶႃႈၽၼ်း ယေႃးၼႀၼ်ႇ၊ဢၽိၼတပ်ႉ၊ တင်း မေႇလၶိသွႃႇ၊ တၢႆသေဢေႃႈ။-
သေႃးလု၊ လႆႈၶၢမ်ႇပိူၼ်ႈတိုၵ်းတေႃးႁႅင်းၼႃႇလူင်လၢင်ယူႇလႄႈပိုၼ်ၵၢင်ႇရၢၼ်ႇသူႇၸပ်းမႅၼ်ႈသႂ်ႇမၼ်းမၢတ်ႇၸဵပ်းႁႅင်းၼႃႇဢေႃႈ။-
မၼ်းလၢတ်ႈတီႈၵူၼ်းဢွၼ်ႇမၼ်းဢၼ်ပႃးၶိူင်ႈလၢၵ်ႈၼၢၵ်ႈမၼ်းၼၼ်ႉလႄႈဝႃႈ၊ “ထွတ်ႇလၢပ်ႇမႂ်းလႄႈတႅင်းၵဝ်တၢႆတႃႉ။ ပေႃးဢမ်ႇၼၼ်ၵူၼ်းဢၼ်ဢမ်ႇၶၢမ်ႇဢဝ်မၢင်ႇၵလႃႇတၢင်းဢၼ်ပၢတ်ႇပၢႆၼင်ၸိူဝ်းၼၼ်ႉတၵ်းမႃးလႄႈတၵ်းႁဵတ်းဢမ်ႇၼပ်ႉဢမ်ႇၶၢၼ်းတီႈၵဝ်ဢေႃႈ၊” ဝႃႈၼင်ႇၼႆဢေႃႈ။ ၼႂ်းဝႃႈၼၼ်သေၵေႃႈ၊ၵူၼ်းပႃးၶိူင်ႈလၢၵ်ႈၼၢၵ်ႈမၼ်းၼၼ်ႉၵူဝ်ႁႄၼႃႇလႄႈဢမ်ႇႁတ်းႁဵတ်းၵႃႈသင်လႄႈယူႇဢေႃႈ။ ပိူဝ်ႈၼႆလႄႈ သေႃးလု၊ ဢဝ်လၢပ်ႇတင်ႈဝႆႉသေယဝ်ႉ၊ဢဝ်တူဝ်မၼ်းထိမ်ႈလူမ်ႉသႂ်ႇပၢႆလၢပ်ႇလႄႈတၢႆၵႂႃႇဢေႃႈ။-
ၵူၼ်းဢွၼ်ႇၼၼ်ႉႁၼ်တၢင်းတၢႆ သေႃးလု၊ ၼၼ်ႉလႄႈမၼ်းၵေႃႈဢဝ်လၢပ်ႇတူဝ်ၸဝ်ႈၵဝ်ႇတင်ႈလႄႈထိမ်ႈတူဝ်လူမ်ႉသႂ်ႇပၢႆလၢပ်ႇသေလႄႈတၢႆၵႂႃႇဢေႃႈ။-
ၼင်ႇၼၼ်လႄႈ သေႃးလု၊ တင်းလုၵ်ႈၸၢႆးမၼ်းသၢမ်ၵေႃႉတၢႆယဝ်ႉလႄႈၵူၼ်းႁေႃၸဝ်ႈၸိူဝ်းၼၼ်ႉၵေႃႈလႆႈတၢႆသဵင်ႈဢေႃႈ။-
မိူဝ်ႈဢၼ်ၵူၼ်းမဵဝ်း ဢိသရေး၊ ၵႃႈဢၼ်မီးယူႇၵႃႈတီႈပၢင်ႇႁူၺ်ႈ ယေႇၸရေး၊ ၼၼ်ႉလႆႈငိၼ်းလွင်ႈဢၼ်တပ်ႉသိုၵ်းၶဝ်ၼီပၢႆႈ၊ဢိၵ်ႇတင်းလွင်ႈဢၼ် သေႃးလု၊ တင်းလုၵ်ႈၸၢႆးမၼ်းတင်းလၢႆတၢႆမူတ်းယဝ်ႉၼၼ်ႉၸိုင်၊ဢွၼ်ၵၼ်ပႅတ်ႈဝၢၼ်ႈပႅတ်ႈဝဵင်းၶဝ်သေယဝ်ႉ၊ၼီပၢႆႈဢွၵ်ႇၵႂႃႇလႄႈၵူၼ်း ၽိလိတ်ႉတိ၊ ၶဝ်မႃးသိမ်းဢဝ်ဝၢၼ်ႈၶဝ်ဝဵင်းၶဝ်သေဢေႃႈ။
မိူဝ်ႈဢၼ်ၼႃႈသိုၵ်းဝၢႆးလႄႈထႅင်ႈဝၼ်းၼိုင်ႈၼၼ်ႉၵူၼ်း ၽိလိတ်ႉတိ၊ ဢွၼ်ၵၼ်ၵႂႃႇႁႂ်ႈလႆႈထွတ်ႇဢဝ်ၶူဝ်းၼုင်ႈတၢင်းမႆတီႈတူဝ်တၢႆၸိူဝ်းၼၼ်ႉလႄႈၶဝ်ထူပ်းႁၼ်တူဝ်တၢႆ သေႃးလု၊ တင်းလုၵ်ႈၸၢႆးမၼ်းၸိူဝ်းၼၼ်ႉၵႃႈၼိူဝ်လွႆ ၵိလပေႃႇ၊ ၼၼ်ႉဢေႃႈ။-
ၶဝ်ထွတ်ႇဢဝ်ၶူဝ်းၼုင်ႈၸဝ်ႈ၊ဢဝ်ၵွၵ်းႁူဝ်ၸဝ်ႈတင်းလၢၵ်ႈၼၢၵ်ႈၸဝ်ႈသေယဝ်ႉ၊ပွႆႇၸႂ်ႉတမၢၼ်ႇတင်းလၢႆၵႂႃႇၵႃႈတီႈမိူင်း ၽိလိတ်ႉတိ၊ ၵူႈတီႈၵူႈလႅၼ်ႁႂ်ႈလႆႈပိုၼ်ၽၢဝ်ႇၶၢဝ်ႇၼၼ်ႉ၊တီႈႁုၼ်ႇႁၢင်ႈသၢင်းထုၽြႃးၶဝ်တင်းၵူၼ်းၶဝ်တင်းလၢႆဢေႃႈ။-
ၶဝ်ဢဝ်လၢၵ်ႈၼၢၵ်ႈၸဝ်ႈၼၼ်ႉ၊ဝႆႉၵႃႈၼႂ်းၵျွင်းၽြႃးၶဝ်လႄႈၵွၵ်းႁူဝ်ၸဝ်ႈၸိုင်၊ၶဝ်ဢဝ်ႁွႆႈဝႆႉၵႃႈၼႂ်းၵျွင်းၽြႃး တႃႇၵုၼ်ႇ၊ ဢေႃႈ။-
မိူဝ်ႈဢၼ်ၵူၼ်းဝဵင်း ယႃႇပႅတ်ႉ၊ မိူင်း ၵိလတ်ႉ၊ ၸိူဝ်းၼၼ်ႉလႆႈငိၼ်းလွင်ႈတၢင်းဢၼ်ၵူၼ်း ၽိလိတ်ႉတိ၊ ၶဝ်ႁဵတ်းတီႈ သေႃးလု၊ ၼၼ်ႉၸိုင်၊-
ၵူၼ်းၶဝ်ၸိူဝ်းဢၼ်ၸႂ်ယႂ်ႇႁတ်းႁၢၼ်ၵႃႈမီးၼၼ်ႉဢွၼ်ၵၼ်ၵႂႃႇလႄႈဢဝ်တူဝ်တၢႆ သေႃးလု၊ တင်းလုၵ်ႈၸၢႆးမၼ်းၸိူဝ်းၼၼ်ႉ၊မႃးၸူးတီႈဝဵင်း ယႃႇပႅတ်ႉ၊ သေယဝ်ႉ၊ဢဝ်သၢင်းၵျူဝ်ႇဝႆႉၵႃႈတီႈတူၼ်ႈမႆႉၼိမ်ယဝ်ႉၸင်ႇဢွၼ်ၵၼ်ၵမ်တၢင်းၵိၼ်ၸဵတ်းဝၼ်းတဵမ်တဵမ်ဢေႃႈ။
သေႃးလု၊ လႆႈတၢႆၵွပ်ႈပိူဝ်ႈဢၼ်မၼ်းဢမ်ႇပႂ်ႉသဵတ်ႈၸႃႇတေႃႇ ထႃႇဝရႃႉၽြႃး၊ ဢေႃႈ။ မၼ်းဢမ်ႇထွမ်ႇဢဝ်ၵႂၢမ်း ထႃႇဝရႃႉၽြႃး၊ ဢမ်ႇၵႃးမၼ်းယင်းဢမ်ႇတွင်ႈထၢမ်တီႈ ထႃႇဝရႃႉၽြႃး၊ ၵူၺ်းတွင်ႈထၢမ်တီႈၵေႃႉဢၼ်ၽီၶဝ်ႈၼၼ်ႉဢေႃႈ။-
ၵွပ်ႈပိူဝ်ႈၸိူဝ်ႉၼင်ႇၼႆလႄႈ ထႃႇဝရႃႉၽြႃး၊ ဢဝ်မၼ်းတၢႆသေယဝ်ႉ၊ဢဝ်သိုင်ႇၸိုင်ႈဝၢၼ်ႈမိူင်းမၼ်းဢၢပ်ႈပၼ်တီႈ တႃႇဝိတ်ႈ၊ လုၵ်ႈၸၢႆး ယေႇသႄး၊ သေဢေႃႈ။
မိူဝ်ႈၼၼ်ႉ၊ၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢွၼ်ၵၼ်ၵႂႃႇၸူးတီႈ တႃႇဝိတ်ႈ၊ ၵႃႈတီႈဝဵင်း ႁေႇပရုၼ်ႇ၊ သေလႄႈလဝ်ႈလၢတ်ႈဝႃႈ၊ “ႁဝ်းၶႃႈၸိူဝ်းၼႆႉပဵၼ်သၢႆၸိူဝ်ႉၼိူဝ်ႉလိူတ်ႈၸဝ်ႈႁဝ်းတီႈၶႃႈဢေႃႈ။-
မိူဝ်ႈဢွၼ်တၢင်းၸဵမ်မိူဝ်ႈ သေႃးလု၊ ယင်းတိုၵ်ႉပဵၼ်ၶုၼ်ႁေႃၶမ်းႁဝ်းၶႃႈယူႇၼၼ်ႉ၊ၸဝ်ႈႁဝ်းယင်းဢွၼ်ဢဝ်ၵူၼ်းမဵဝ်း ဢိသရေး၊ ၶီႇသိုၵ်းၶိုၼ်ႈမႃးတီႈၶႃႈယဝ်ႉ။ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၵေႃႈလၢတ်ႈၵႂၢမ်းသဵတ်ႈၸႃႇတီႈၸဝ်ႈႁဝ်းလႄႈဝႃႈ၊ ‘မႂ်းတၵ်းလႆႈဢွၼ်ႁူဝ်ဢွၼ်ၵၼ်ၵူၼ်းၵဝ်မဵဝ်း ဢိသရေး၊ လႄႈမႂ်းတၵ်းလႆႈဢုပ်ႉပိူင်ႇၶဝ်ဢေႃႈ၊’ ဝႃႈၼင်ႇၼႆဝႆႉတီႈၶႃႈယဝ်ႉ၊” ဝႃႈၼင်ႇၼႆဢေႃႈ။-
မိူဝ်ႈဢၼ်ၵူၼ်းဢၼ်ပဵၼ်ၵႄႇပဵၼ်ႁူဝ်ၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်မႃးၸူးတီႈ တႃႇဝိတ်ႈ၊ ၵႃႈတီႈဝဵင်း ႁေႇပရုၼ်ႇ၊ ၼၼ်ႉၸိုင်၊မၼ်းႁဵတ်းမိၵ်ႈသႁႃႇယႃႉလူၺ်ႈၵၼ်တင်းၶဝ်ၵႃႈတီႈၽၢႆႇၼႃႈ ထႃႇဝရႃႉၽြႃး၊ သေယဝ်ႉ၊ၶဝ်ဢွၼ်ၵၼ်ပၼ်ၽိၵ်ႈသိၵ်ႈတီႈ တႃႇဝိတ်ႈ၊ ႁႂ်ႈမၼ်းပဵၼ်ၶုၼ်ႁေႃၶမ်းၵူၼ်းမဵဝ်း ဢိသရေး၊ မႅၼ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ ဢဝ်တင်း သမူၺ်ႇလႃႉ၊ သေလႄႈပျႃႇတိၵ်ႈဝႆႉၼၼ်ႉဢေႃႈ။
တႃႇဝိတ်ႈ၊ ဢိၵ်ႇတင်းၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢွၼ်ၵၼ်ၶီႇသိုၵ်းၶိုၼ်ႈၸူးတီႈဝဵင်း ယေႇရုသလႅမ်ႇ၊ (ဢၼ်ဝႃႈဝဵင်း ယေႇပုတ်ႉ ) ဢၼ်ၵူၼ်းမဵဝ်း ယေႇပုသိ၊ ၶဝ်ယူႇသဝ်းၵဝ်ႇၵဝ်ႇၼၼ်ႉဢေႃႈ။-
ၵူၼ်း ယေႇပုသိ၊ ၸိူဝ်းၼၼ်ႉလၢတ်ႈတီႈ တႃႇဝိတ်ႈ၊ လႄႈဝႃႈ၊ “မႂ်းတေဢမ်ႇလႆႈၶဝ်ႈၵႃႈၼႂ်းဝဵင်းၼႆႉ၊” ဝႃႈၼင်ႇၼႆဢေႃႈ။ ၵူၺ်းၵႃႈ၊ တႃႇဝိတ်ႈ၊ တိုၵ်းဢဝ်တိူၵ်ႈတီႈတိုၵ်းသိုၵ်း ၸိဢုၼ်ႇ၊ သေယဝ်ႉ၊လႆႈႁွင်ႉႁဵၵ်ႈဝႃႈ၊ဝဵင်း တႃႇဝိတ်ႈ၊ သေဢေႃႈ။-
တႃႇဝိတ်ႈ၊ လၢတ်ႈလႄႈဝႃႈ၊ “ႁႂ်ႈၵေႃႉဢၼ်ၶႃႈၽၼ်းၵူၼ်း ယေႇပုသိ၊ တၢႆပႅတ်ႈဢွၼ်တၢင်းပိူၼ်ႈၼၼ်ႉပဵၼ်ၸဝ်ႈၵွၼ်းတပ်ႉသိုၵ်းသေ၊” ဝႃႈၼင်ႇၼႆဢေႃႈ။ ယွႃႇၽႃႉ၊ ဢၼ်ပဵၼ်လုၵ်ႈၸၢႆး ၸေႇရုယႃႇ၊ ၼၼ်ႉ ၶီႇၶိုၼ်ႈဢွၼ်တၢင်းပိူၼ်ႈသေလႄႈမၼ်းလႆႈဢရႃႇၸဝ်ႈၵွၼ်းတပ်ႉသိုၵ်းသေဢေႃႈ။
မိူဝ်ႈၼၼ်ႉ၊ တႃႇဝိတ်ႈ၊ ၵႂႃႇယူႇၵႃႈၼႂ်းတိူၵ်ႈတီႈတိုၵ်းသိုၵ်းၼၼ်ႉသေလႄႈဝဵင်းၼၼ်ႉလႆႈႁွင်ႉၸိုဝ်ႈဝႃႈ၊ဝဵင်း တႃႇဝိတ်ႈ၊ ဢေႃႈ။-
မၼ်းမႄးတႄႇမႄးႁဵတ်းဝဵင်းၼၼ်ႉၸႃႉဢဝ်တီႈဢၼ်ဢဝ်လိၼ်ထူမ် သႂ်ႇၽၢႆႇဝၼ်းဢွၵ်ႇၵုင်းလွႆလႄႈ၊ ယွႃႇၽႃႉ၊ သမ်ႉမႄးၵုမ်းမႄးႁဵတ်းတီႈဢၼ်ၵိုတ်းဢၼ်ၵျၢၼ်ႇဝဵင်းၼၼ်ႉဢေႃႈ။-
ၼင်ႇၼၼ်လႄႈ တႃႇဝိတ်ႈ၊ ၼၼ်ႉမုၼ်ၽုင်းတၼ်းၶူဝ်းယႂ်ႇၶိုၼ်ႈမႃးတိၵ်းတိၵ်းယူႇ၊ၵွပ်ႈပိူဝ်ႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးယူႇလူၺ်ႈၵၼ်တင်းမၼ်းဢေႃႈ။
ၼႆႉၸမ်ႉ၊ပဵၼ်ၸရၢင်းၵူၼ်းသိုၵ်း တႃႇဝိတ်ႈ၊ ဢၼ်ၸိုဝ်ႈသဵင်ဢွၵ်ႇၼၼ်ႉဢေႃႈ။ ၶဝ်ၸိူဝ်းၼႆႉၽွမ်ႉၵၼ်တင်းၵူၼ်းမဵဝ်း ဢိသရေး၊ တင်းသဵင်ႈတင်းလူင်သေလႄႈၸွႆႈၵမ်ႉၸွႆႈထႅမ်ႁႂ်ႈမၼ်းပဵၼ်ၶုၼ်ႁေႃၶမ်းမႃး၊ၸွမ်းၼင်ႇဢၼ် ထႃႇဝရႃႉၽြႃး၊ ဝႆႉၵတိၼၼ်ႉလႄႈၶဝ်ၶတ်းၸႂ်ဢဝ်ႁႅင်းဢွၵ်ႇ၊ႁႂ်ႈသိုင်ႇၸိုင်ႈဝၢၼ်ႈမိူင်းမၼ်းယႂ်ႇၽႄႈမႃးဢေႃႈ။
ဢွၼ်တၢင်းသေပိူၼ်ႈၸမ်ႉ၊ပဵၼ် ယႃႇသေႃးပမ်ႇ၊ ၵူၼ်းၶိူဝ်းႁိူၼ်း ႁၵ်ႉမေႃးၼိ၊ လႄႈမၼ်းပဵၼ်ၵေႃႉဢၼ်ပဵၼ်ၵႄႇပဵၼ်ႁူဝ်ၵႃႈၼိူဝ်ၶုၼ်သိုၵ်းသၢမ်ၵေႃႉ ဢေႃႈ။ မၼ်းၼၼ်ႉဢဝ်ႁွၵ်ႇမၼ်းတိုၵ်းတေႃးၵူၼ်းသၢမ်ပၢၵ်ႇလႄႈဢဝ်တၢႆပႅတ်ႈၵမ်းလဵဝ်ၵူၺ်းဢေႃႈ။
ၵေႃႉတၢမ်းမၼ်းၼၼ်ႉၸမ်ႉ၊ပဵၼ် ဢေးလႃႇၸႃႇ၊ လုၵ်ႈၸၢႆး တေႃႇတေႃႇ၊ ၵူၼ်းၶိူဝ်းႁိူၼ်း ဢႁေႃႇႁိ ဢေႃႈ။-
မၼ်းၼၼ်ႉယူႇၽၢႆႇ တႃႇဝိတ်ႈ၊ လႄႈတိုၵ်းတေႃးၵူၼ်း ၽိလိတ်ႉတိ၊ ၶဝ်ၵႃႈတီႈပၢင်သိုၵ်း ပႃႇသႃႉတမ်ႇမိမ်း၊ ဢေႃႈ။ ယၢမ်းမိူဝ်ႈဢၼ်ၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ၼီပၢႆႈၵႂႃႇယူႇၼၼ်ႉ၊မၼ်းၸုၵ်းယူႇၵႃႈၼႂ်းတူင်ႈၼႃးၶဝ်ႈမုယေႃးယူႇသေလႄႈ၊-
မၼ်းတင်းၵူၼ်းမၼ်းတင်းလၢႆၸုၵ်းၵႃႈၼႂ်းၵၢင်တူင်ႈၼႃးၼၼ်ႉ၊ၶၢမ်ႇတိုၵ်းၵူၼ်း ၽိလိတ်ႉတိ၊ တင်းလၢႆလႄႈ ထႃႇဝရႃႉၽြႃး၊ ပၼ်တၢင်းဢၼ်မၼ်းဢွင်ႇသိုၵ်းယႂ်ႇၼႃႇဢေႃႈ။
ဝၼ်းၼိုင်ႈၶုၼ်သိုၵ်းသၢမ်ၵေႃႉ၊ဢၼ်ၶဝ်ႈပႃးၼႂ်းၶုၼ်သိုၵ်းလူင်သၢမ်သိပ်းၼၼ်ႉ၊လူင်းၵႂႃႇၸူးတီႈမၢၵ်ႇႁိၼ်မၢၵ်ႇၽႃဢၼ် တႃႇဝိတ်ႈ၊ သွၼ်ႈယူႇၵႃႈတီႈႁူးထမ်ႈ ဢတုလမ်ႇ၊ ယၢမ်းမိူဝ်ႈဢၼ်တပ်ႉသိုၵ်း ၽိလိတ်ႉတိ၊ ၶဝ်ၶျႃးတပ်ႉၶဝ်မီးယူႇၵႃႈၼႂ်းထူင်ႉႁူၺ်ႈ ရေႇၽိမ်း၊ ၼၼ်ႉဢေႃႈ။-
ၼႂ်းၶိင်ႇၼၼ်ႉ၊ တႃႇဝိတ်ႈ၊ မီးယူႇၵႃႈတီႈတိူၵ်ႈတီႈတိုၵ်းသိုၵ်းၵႃႈၼိူဝ်လွႆၼၼ်ႉလႄႈတပ်ႉ ၽိလိတ်ႉတိ၊ ၶဝ်တပ်ႉၼိုင်ႈသိမ်းဢဝ်ဝဵင်း ပႅတ်ႉလႁႅမ်ႇ၊ ဝႆႉယဝ်ႉဢေႃႈ။-
တႃႇဝိတ်ႈ၊ မီးတၢင်းဢၼ်ၶႆႈၸႂ်ထိုင်ၼမ်ႉလႄႈလၢတ်ႈဝႃႈ၊ “ၵဝ်မီးၸႂ်ဢၼ်တူၵ်းဢၢင်ႈၶႂ်ႈႁႂ်ႈသေၵေႃႉသေၵူၼ်းတဵၵ်းဢဝ်ၼမ်ႉၵႃႈတီႈၼမ်ႉမေႃႇဢၼ်မီးႁိမ်းၽၵ်းတူဝဵင်း ပႅတ်ႉလႁႅမ်ႇ၊ ၼၼ်ႉပၼ်ၵဝ်ၵိၼ်ဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၶုၼ်သိုၵ်းသၢမ်ၵေႃႉၼၼ်ႉလေႃႇၽင်ႈလေႃႇၽႃႇတပ်ႉ ၽိလိတ်ႉတိ၊ ၶဝ်ၵႂႃႇတဵၵ်းဢဝ်ၼမ်ႉၵႃႈၼႂ်းၼမ်ႉမေႃႇဢၼ်မီးႁိမ်းၽၵ်းတူဝဵင်း ပႅတ်ႉလႁႅမ်ႇ၊ ၼၼ်ႉသေယဝ်ႉ၊ဢဝ်မႃးသၢၵ်ႈတီႈ တႃႇဝိတ်ႈ၊ ဢေႃႈ။ ၵူၺ်းၵႃႈ၊ တႃႇဝိတ်ႈ၊ ယင်းဢမ်ႇၵိၼ်လႄႈဢဝ်ထွၵ်ႇႁိုဝ်ႈႁႂ်ႈပဵၼ်ၶိူင်ႈသၢၵ်ႈလူႇတီႈ ထႃႇဝရႃႉၽြႃး၊ ဢေႃႈ။-
မၼ်းလဝ်ႈလၢတ်ႈလႄႈဝႃႈ၊ “ ထႃႇဝရႃႉၽြႃး၊ တီႈၶႃႈ၊ၼမ်ႉၼႆႉၶႃႈၸဝ်ႈဢမ်ႇၵိၼ်လႆႈလႃးလႃးတီႈၶႃႈ။ ၵူဝ်ပဵၼ်ၸိူဝ်ႉၼင်ႇၵိၼ်လိူတ်ႈၶဝ်ၸိူဝ်းဢၼ်ၸုၼ်ႉဢသၢၵ်ႈတူဝ်ၸဝ်ႈၵဝ်ႇၼႆႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။ ၵွပ်ႈပိူဝ်ႈဢၼ်ၶဝ်ၸိူဝ်းၼၼ်ႉၸုၼ်ႉဢသၢၵ်ႈတူဝ်ၸဝ်ႈၵဝ်ႇလႄႈဢဝ်ၼမ်ႉမႃးၼၼ်ႉ၊မၼ်းယင်းဢမ်ႇၵိၼ်လႄႈယူႇဢေႃႈ။ ၶုၼ်သိုၵ်းသၢမ်ၵေႃႉၼၼ်ႉႁဵတ်းလွင်ႈတၢင်းဢၼ်ႁတ်းဢၼ်ႁၢၼ်ၸိူဝ်ႉၼင်ႇၼၼ်ဢေႃႈ။
ဢၽိသေး၊ ၼွင်ႉၸၢႆး ယွႃႇၽႃႉ၊ ၼၼ်ႉၵေႃႈ၊ပဵၼ်ၽူႈဢုပ်ႉပိူင်ႇၶုၼ်သိုၵ်းလူင်သၢမ်သိပ်းၼၼ်ႉဢေႃႈ။ မၼ်းၼၼ်ႉ၊ဢဝ်ႁွၵ်ႇမႃးတိုၵ်းတေႃးၵူၼ်းသၢမ်ပၢၵ်ႇလႄႈဢဝ်ၶဝ်တၢႆပႅတ်ႈၸင်ႇ၊ပဵၼ်ၶုၼ်သိုၵ်းဢၼ်မီးၸိုဝ်ႈမီးသဵင်မိူၼ်ၸိူဝ်ႉၼင်ႇၼႂ်းၶဝ်သၢမ်ၵေႃႉၼၼ်ႉဢေႃႈ။-
မၼ်းပဵၼ်ၵေႃႉဢၼ်ၸိုဝ်ႈသဵင်ယႂ်ႇသေပိူၼ်ႈၼႂ်းၶဝ်သၢမ်သိပ်းၵေႃႉၼၼ်ႉလႄႈလႆႈဢုပ်ႉပိူင်ႇၶဝ်ဢေႃႈ။ ၵူၺ်းၵႃႈ၊ၸိုဝ်ႈသဵင်မၼ်းဢမ်ႇယႂ်ႇမိူၼ်ၶဝ်သၢမ်ၵေႃႉၼၼ်ႉ။
ပေႇၼႃႇယႃႉ၊ လုၵ်ႈၸၢႆး ယေႃႇယတႃႉ၊ ၵူၼ်းဝဵင်း ၵပ်ႉၸေးလႃႉ၊ ၼၼ်ႉပဵၼ်ၵူၼ်းသိုၵ်းဢၼ်ၸိုဝ်ႈသဵင်ယႂ်ႇၵေႃႉၼိုင်ႈဢေႃႈ။ မၼ်းႁဵတ်းလွင်ႈတၢင်းဢၼ်ႁတ်းဢၼ်ႁၢၼ်တင်းလၢႆဢၼ်ဝႃႈ၊ဢဝ်ၵူၼ်းသိုၵ်းဢၼ်ယႂ်ႇဢၼ်လူင်မဵဝ်း မေႃႇၽႃႉ၊ သွင်ၵေႃႉတၢႆ၊လိူဝ်သေၼၼ်ႉၼႂ်းၶိင်ႇဢၼ်မူၺ်တူၵ်းၼၼ်ႉမၼ်းလူင်းၵႃႈၼႂ်းႁူးလိၼ်လႄႈဢဝ်သၢင်ႇသီႈတူဝ်ၼိုင်ႈတၢႆ၊-
ၵူၼ်းမဵဝ်း ဢေးၵျိပ်ႉ၊ ၵေႃႉၼိုင်ႈဢၼ်ယႂ်ႇၶိုၵ်ႉၼႃႇလႄႈတၢင်းသုင်မၼ်းမီးႁႃႈသွၵ်ႇၼၼ်ႉၵေႃႈမၼ်းဢဝ်တၢႆဢေႃႈ။ ပိၵ်ႉသမ်ႉၵူၼ်းမဵဝ်း ဢေးၵျိပ်ႉ၊ ၼၼ်ႉယိပ်းၵမ်ႁွၵ်ႇဢၼ်ယႂ်ႇၼႃႇသေၵေႃႈ မၼ်းယိပ်းၵမ်ၶွၼ်ႉတဝ်ႉတိုၵ်းတေႃးလႄႈႁိမ်ဢဝ်ႁွၵ်ႇၵႃႈၼႂ်းမိုဝ်းမၼ်းမႃးသေယဝ်ႉ၊သမ်ႉဢဝ်ႁွၵ်ႇၼၼ်ႉတႅင်းမၼ်းတၢႆပႅတ်ႈဢေႃႈ။-
ပေႇၼႃႇယႃႉ၊ ႁဵတ်းလွင်ႈတၢင်းၸိူဝ်းၼၼ်ႉလႄႈၸိုဝ်ႈသဵင်ယႂ်ႇၼႂ်းၶဝ်သၢမ်သိပ်းၵေႃႉၼၼ်ႉဢေႃႈ။-
မၼ်းၼၼ်ႉ၊ၸိုဝ်ႈသဵင်ယႂ်ႇၼႃႇၵႃႈၼႂ်းၶဝ်သၢမ်သိပ်းၼၼ်ႉသေၵေႃႈ၊ၸိုဝ်ႈသဵင်မၼ်းဢမ်ႇၶိုတ်းဢမ်ႇပဵင်းၶဝ်သၢမ်ၵေႃႉၼၼ်ႉ။ တႃႇဝိတ်ႈ၊ ၶၢၼ်းမၼ်းဝႆႉ၊ၼႂ်းဢရႃႇဢၼ်ၵွၼ်းတပ်ႉပႂ်ႉဢသၢၵ်ႈၸဝ်ႈၼၼ်ႉဢေႃႈ။
ၵူၼ်းသိုၵ်းၸိူဝ်းဢၼ်ၸိုဝ်ႈသဵင်ယႂ်ႇတင်းလၢႆၸမ်ႉ၊ ပဵၼ် ဢသႃႇႁေးလႃႉ၊ ၼွင်ႉၸၢႆး ယွႃႇၽႃႉ၊ ဢေးလႁႃႇၼၼ်ႇ၊ လုၵ်ႈၸၢႆး တေႃႇတေႃႇ၊ ၵူၼ်းဝဵင်း ပႅတ်ႉလႁႅမ်ႇ။
သၢမ်မုတ်ႉ၊ ၵူၼ်းမဵဝ်း ႁေႇရေႃးရိ၊ ႁေးလိတ်ႉ၊ ၵူၼ်းမဵဝ်း ပေးလေႃးၼိ။
ဢိရႃႉ၊ လုၵ်ႈၸၢႆး ဢိၵေးသႃႉ၊ ၵူၼ်းဝဵင်း တေႇၵေႃႇ၊ ဢပျေႇၸႃႇ၊ ၵူၼ်းဝဵင်း ဢႃႇၼသုတ်ႉ။
သိပေႇၵေး၊ ၵူၼ်းမဵဝ်း ႁုသသိ၊ ဢိလေး၊ ၵူၼ်းမဵဝ်း ဢႁေႃႇႁိ။
မႁႃႇရေး၊ ၵူၼ်းဝဵင်း ၼေႇတေႃႇၽႃႉ၊ ႁေးလိတ်ႉ၊ လုၵ်ႈၸၢႆး ပႃႇၼႃႇ၊ ၵေႃႉဢၼ်ပဵၼ်ၵူၼ်းဝဵင်း ၼေႇတေႃႇၽႃႉ။
ဢိတေး လုၵ်ႈၸၢႆး ရိၽေး၊ ၵူၼ်းဝဵင်း ၵိပိယႃႉ၊ မဵဝ်း ပိၼ်ႇယႃႇမိၼ်ႇ၊ ပေႇၼႃႇယႃႉ၊ ၵူၼ်းဝဵင်း ပိရသေႃႇ။
ႁုရေး၊ ၵူၼ်းဢၼ်ယူႇၵႃႈတီႈၼမ်ႉႁူၺ်ႈၼမ်ႉႁွင်ႈ ၵႃႇဢတ်ႉ၊ ဢပျေႇလႃႉ၊ ၵူၼ်းဝဵင်း ဢႃႇပႃႉ။
ဢႃႇၸမႃႇဝိတ်ႉ၊ ၵူၼ်းဝဵင်း ပႃႇႁုရိမ်း၊ ဢေးလျႃႇၽႃႉ၊ ၵူၼ်းဝဵင်း သႃႇလပိမ်ႇ။
ႁႃႇသိမ်း၊ ၵူၼ်းဝဵင်း ၵိၸုၼ်ႇ၊ ယေႃးၼႀၼ်ႇ၊ လုၵ်ႈၸၢႆး သႃႇၵေး၊ ၵူၼ်းဝဵင်း ႁႃႇရႃႉ။
ဢႁိဢမ်ႇ၊ လုၵ်ႈၸၢႆး သႃႇၵရႃႉ၊ ၵူၼ်းဝဵင်း ႁႃႇရႃႉ၊ ဢေးလိၽလႃႉ၊ လုၵ်ႈၸၢႆး ဢုရႃႉ။
ႁေးၽႃႉ၊ ၵူၼ်းဝဵင်း မေႇၶေးရႃႉ၊ ဢႁိယႃႉ၊ ၵူၼ်းဝဵင်း ပေးလွၼ်ႇ။
ႁေႇၸရေႃႇ၊ ၵူၼ်းဝဵင်း ၵရမေႇလႃႉ၊ ၼႃႇရေး၊ လုၵ်ႈၸၢႆး ဢေးၸပေး။
ယေႃးလႃႉ၊ ၼွင်ႉၸၢႆး ၼႃႇႀၼ်ႇ၊ မိပ်ႉႁႃႇ၊ လုၵ်ႈၸၢႆး ႁၵ်ႉၵေးရိ။
ၸေးလႅၵ်ႉ၊ ၵူၼ်းဝဵင်း ဢမ်ႇမုၼ်ႇ၊ ၼႁႃႇရေး၊ ၵူၼ်းဝဵင်း ပေႇရေႃး၊ ၵူၼ်းဢၼ်ပႃးလၢၵ်ႈၼၢၵ်ႈ ယွႃႇၽႃႉ။
ဢိရႃႉ၊ တင်း ၵႃႇရိပ်ႉ၊ ၵူၼ်းဝဵင်း ယတ်ႉတိ။
ဢုရိယႃး၊ ၵူၼ်းမဵဝ်း ႁိတ်ႉတိ၊ ၸႃႇပတ်ႉ၊ လုၵ်ႈၸၢႆး ဢႃႇလေႇ။
ဢတိၼႃႉ၊ လုၵ်ႈၸၢႆး သိၸႃႉ၊ ၵူၼ်းဢၼ်ပဵၼ်ၵႄႇပဵၼ်ႁူဝ်ၵႃႈၼိူဝ်မဵဝ်း ရုပိၼ်ႇ၊ လႄႈ ဢုပ်ႉၵႃႈၼိူဝ်ၵူၼ်းသိုၵ်းမၼ်းသၢမ်သိပ်းၵေႃႉ။
ႁႃႇၼၼ်ႇ၊ လုၵ်ႈၸၢႆး မႃႇၶႃႇ၊ ယေႃးသၽတ်ႉ၊ ၵူၼ်းဝဵင်း မိႀၼ်ႇ။
ဢုၸိယႃႉ၊ ၵူၼ်းဝဵင်း ဢႃႇသတရႃႉ၊ သႃႇမႃႇ၊ ဢိၵ်ႇတင်း ယေႇယေႇလႃႉ၊ လုၵ်ႈၸၢႆး ႁေႃးႀၼ်ႇ၊ ၵူၼ်းဝဵင်း ဢႃႇရေႃႇ။
ယေႇတယေးလႃႉ၊ တင်း ယေႃးႁႃႉ၊ လုၵ်ႈၸၢႆး သိမရိ၊ ၵူၼ်းဝဵင်း တိၸိ။
ဢေးလျႃႇလႃႉ၊ ၵူၼ်းဝဵင်း မႁႃႇဝႃႉ၊ ယေႇရိပေး၊ တင်း ယေႃးသဝိ၊ လုၵ်ႈၸၢႆး ဢေးလၼၼ်ႇ၊ ဢိႀမႃႇ၊ ၵူၼ်းဝဵင်း မေႃႇၽႃႉ။
ဢေးလျႃႇလႃႉ၊ဢူဝ်းပႅတ်ႉ၊ ဢိၵ်ႇတင်း ယႃႇသေးလႃႉ၊ ၵူၼ်းဝဵင်း မေႇၸေႃးပဵတ်ႉ၊ ၸိူဝ်းၼၼ်ႉဢေႃႈ။
ယၢမ်းမိူဝ်ႈဢၼ် တႃႇဝိတ်ႈ၊ မီးၵႃႈၼႂ်းဝဵင်း ၸိၵလၵ်ႉ၊ တီႈဢၼ်မၼ်းငိူင်ႉဝႄႈ သေႃးလု၊ ယူႇၼၼ်ႉၸိုင်၊ၵူၼ်းသိုၵ်းဢၼ်ႁႅင်းယႂ်ႇလႄႈပဵၼ်တီႈလီဢိင်ပိုင်ႈဢႃးၵူဝ်းၼၼ်ႉ၊မႃးယူႇၽၢႆႇ တႃႇဝိတ်ႈ၊ ၼမ်ၼႃႇဢေႃႈ။-
ၶဝ်ၼၼ်ႉ၊ပဵၼ်ၵူၼ်းၸိူဝ်ႉၶိူဝ်းမဵဝ်း ပိၼ်ႇယႃႇမိၼ်ႇ၊ ပီႈၼွင်ႉၸိူဝ်ႉၶိူဝ်း သေႃးလု၊ ၼၼ်ႉဢေႃႈ။ ၶဝ်ၼၼ်ႉ၊ၸၢင်ႈပိုတ်းယိုဝ်းၵၢင်ႇတင်းပိုတ်းသၢႆၼင်မၢၵ်ႇႁိၼ်ၸဵမ်မိုဝ်းသၢႆႉမိုဝ်းၶႂႃဢေႃႈ။-
ၶုၼ်သိုၵ်းႁၢၼ်လူင်ၶဝ်ၼၼ်ႉ၊ပဵၼ် ဢႁေႇၸႃႇ၊ တင်း ယေႃးသႃႉ၊ လုၵ်ႈၸၢႆး သေးမႃႇ၊ ၵူၼ်းဝဵင်း ၵိပိယႃႉ၊ တင်းလၢႆၼၼ်ႉဢေႃႈ။ ၵူၼ်းသိုၵ်းတင်းလၢႆၸမ်ႉ၊ပဵၼ် ယေႇသေးလႃႉ၊ ဢိၵ်ႇတင်း ပေႇလိတ်ႉ၊ ဢၼ်ပဵၼ်လုၵ်ႈၸၢႆး ဢႃႇၸမႃႇဝိတ်ႉ၊ ပေႇရႃႇၶႃႉ၊ တင်း ယေႇႁု၊ ၵူၼ်းဝဵင်း ဢႃႇၼသုတ်ႉ။
ဢိသမႃႇယႃႉ၊ ၵူၼ်းဝဵင်း ၵိပွင်ႇ၊ ၵူၼ်းသိုၵ်းဢၼ်ၸိုဝ်ႈသဵင်ယႂ်ႇလႄႈပဵၼ်ၶုၼ်သိုၵ်းၵေႃႉၼိုင်ႈၼႂ်းၶဝ်သၢမ်သိပ်းၵေႃႉၼၼ်ႉ၊ ယေႇရမိ၊ယႁႃႇၸေးလႃႉ၊ယေႃးႁၼၼ်ႇ၊ ဢိၵ်ႇတင်း ယေႃးၸပတ်ႉ၊ ၵူၼ်းဝဵင်း ၵေးတရႃႉ၊ တင်းလၢႆ။
ဢေးလုၸေး၊ယေႇရမုတ်ႉ၊ပေးလျႃႇ၊သေႇမရိ၊ တင်း သေးၽတိ၊ ၵူၼ်းဝဵင်း ႁရပ်ႉ၊ တင်းလၢႆ။
ဢေးလႃႉၵႃႇၼႃႉ၊ဢိသႃႇ၊ဢႃႇၸရေႇလႃႉ၊ယေႃးၸႃႇ၊ တင်း ယႃႇသေႃးပမ်ႇ၊ ၵူၼ်းၶိူဝ်းႁိူၼ်း ၵေႃးရႃႉ၊ တင်းလၢႆ။
ယေႃးလႃႉ၊ တင်း ၸေႇပတိ၊ လုၵ်ႈၸၢႆး ယေႇရေႃးႁမ်ႇ၊ ၵူၼ်းဝဵင်း ၵေးတေႃး၊ ၼၼ်ႉ ၸိူဝ်းၼၼ်ႉဢေႃႈ။
ၵူၼ်းၸိူဝ်းၼႆႉ၊ပဵၼ်ၶဝ်ၸိူဝ်းဢၼ်မီးၸိုဝ်ႈသဵင်လႄႈႁႅင်းယႂ်ႇၵႃႈၼႂ်းၵူၼ်းၸိူဝ်ႉၶိူဝ်း ၵၢတ်ႉ၊ ဢၼ်မႃးၽွမ်ႉၽၢႆႇ တႃႇဝိတ်ႈ၊ ယၢမ်းမိူဝ်ႈဢၼ်မၼ်းယူႇၼႂ်းတိူၵ်ႈတီႈတိုၵ်းသိုၵ်းၵႃႈတီႈထိူၼ်ႇလႅင်ႉၼၼ်ႉဢေႃႈ။ ၶဝ်ၼၼ်ႉၵတ်ႉၼႃႇၼႂ်းတၢင်းဢၼ်ယိပ်းၵမ်ၶႅပ်းႁႄႉလၢၵ်ႈၼၢၵ်ႈတင်းႁွၵ်ႇၼၼ်ႉလႄႈၼႃႈတႃၶဝ်မိူၼ်ၸိူဝ်ႉၼင်ႇသၢင်ႇသီႈ၊သမ်ႉၶၼ်ၽႂ်းမိူၼ်ၸိူဝ်ႉၼင်ႇၵႂၢင်ၵႃႈၼိူဝ်လွႆၼၼ်ႉဢေႃႈ။
ၶဝ်ၸိူဝ်းၼႆႉပဵၼ်ၵူၼ်းၸိူဝ်ႉၶိူဝ်းမဵဝ်း ၵၢတ်ႉ၊ သေယဝ်ႉ၊ၵေႃႉဢၼ်ဢရႃႇယႂ်ႇၼၼ်ႉဢုပ်ႉၵူၼ်းပဵၼ်ႁဵင်လႄႈၵေႃႉဢၼ်ဢရႃႇဢွၼ်ႇသမ်ႉဢုပ်ႉၵူၼ်းပဵၼ်ပၢၵ်ႇဢေႃႈ။-
မီးပီၼိုင်ႈၼႂ်းလိူၼ်ထူၼ်ႈၼိုင်ႈၶၢဝ်းဢၼ်ၼမ်ႉ ယေႃးတၢၼ်ႇ၊ ၼွင်းလႄႈထူမ်ႈၽင်ႇတင်းသဵင်ႈတင်းမူတ်းယူႇၼၼ်ႉၸိုင်၊ၶဝ်ၶၢမ်ႈၼမ်ႉၼၼ်ႉၵႂႃႇလိုပ်ႈႁေႃႈၵူၼ်းၸိူဝ်းဢၼ်ယူႇၵႃႈတီႈပၢင်ႇတီႈပဵင်းၽၢႆႇတၢင်းဝၼ်းဢွၵ်ႇလႄႈၽၢႆႇတၢင်းဝၼ်းတူၵ်းၼၼ်ႉ၊ဢွၵ်ႇပၢႆႈၽူင်ႉၽၢင်းၵႂႃႇဢေႃႈ။
ၽဝ်ႇၼိုင်ႈမီးၵူၼ်းၸုမ်းၼိုင်ႈၼႂ်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ ဢိၵ်ႇတင်း ယုတႃႉ၊ ၵႂႃႇၸူးၵႃႈတီႈတိူၵ်ႈတီႈတိုၵ်းသိုၵ်းတီႈ တႃႇဝိတ်ႈ၊ ဢေႃႈ။-
တႃႇဝိတ်ႈ၊ ၵႂႃႇႁပ်ႉႁူဝ်တၢင်းၶဝ်လႄႈလၢတ်ႈဝႃႈ၊ “ပေႃးသူမႃးၸိူဝ်ႉၼင်ႇၵေႃႉသႄႈႁႂ်ႈလႆႈၸွႆႈလႆႈထႅမ်ၵဝ်ၸိုင်၊ၵဝ်တွၼ်ႈႁပ်ႉသူဢေႃႈ။ မႃးၽွမ်ႉၽၢႆႇၵဝ်တႃႉ။ ၵူၺ်းၵႃႈ၊ပေႃးသူၶတ်းၸႂ်ၵျူဝ်းၸႃးႁႂ်ႈလႆႈဢဝ်ၵဝ်ဢၢပ်ႈပၼ်ၵႃႈၼႂ်းမိုဝ်းရၢၼ်ႇသူႇၵဝ်ၸိုင်၊ပိၵ်ႉသမ်ႉဝႃႈ၊ၼႂ်းမိုဝ်းၵဝ်ဢမ်ႇမီးတၢင်းဢၼ်ႁဵတ်းဢပျတ်ႈသေၸိူဝ်ႉသေပိူင်သေၵေႃႈ၊ၽြႃးပဵၼ်ၸဝ်ႈပူႇမွၼ်ႇႁဝ်းၼၼ်ႉၸၢင်ႈႁုႁၼ်လႄႈတၵ်းပၼ်တၢမ်ႇဢပျတ်ႈတီႈသူဢေႃႈ၊” ဝႃႈၼင်ႇၼႆဢေႃႈ။
ဝိၺိၺ်ႇၽြႃးပဵၼ်ၸဝ်ႈတူၵ်းႁွတ်ႈၵႃႈၼိူဝ် ဢႃႇမသေး၊ ၵေႃႉဢၼ်ဝၢႆးလင်မႃးပဵၼ်ၸဝ်ႈၵွၼ်းတပ်ႉသိုၵ်းၼႂ်းၶဝ်သၢမ်သိပ်းၵေႃႉၼၼ်ႉသေလႄႈ၊မၼ်းၶိုၼ်းလဝ်ႈလၢတ်ႈဝႃႈ၊ “ တႃႇဝိတ်ႈ၊ ႟။ ႁဝ်းၶႃႈပဵၼ်ၵူၼ်းၸဝ်ႈႁဝ်း တီႈၶႃႈဢေႃႈ။ လုၵ်ႈၸၢႆး ယေႇသႄး၊ ႟။ ႁဝ်းၶႃႈမႃးယူႇလူၺ်ႈၵၼ်တင်းၸဝ်ႈႁဝ်းတီႈၶႃႈဢေႃႈ။ ႁႂ်ႈမီးတၢင်းဢၼ်ဢွင်ႇမႅင်ႇသေၵမ်းလူၺ်ႈ၊ ႁႂ်ႈတၢင်းဢၼ်ဢွင်ႇမႅင်ႇမီးတီႈၸဝ်ႈႁဝ်းဢိၵ်ႇတင်း ႁႂ်ႈမီးတီႈၶဝ်ၸိူဝ်းဢၼ်ၸွႆႈထႅမ်ၸဝ်ႈႁဝ်းၼၼ်ႉသေၵမ်းလူၺ်ႈ။ လွင်ႈမၼ်းၸမ်ႉ၊ၽြႃးပဵၼ်ၸဝ်ႈၸွႆႈၽၢႆႇ ၸဝ်ႈႁဝ်းတီႈၶႃႈဢေႃႈ။” ဝႃႈၼင်ႇၼႆဢေႃႈ။ တႃႇဝိတ်ႈ၊ ႁပ်ႉတွၼ်ႈဢဝ်ၶဝ်သေလႄႈၶၢၼ်းၶဝ်ဝႆႉၼႂ်းဢရႃႇၶုၼ်သိုၵ်းတင်းလၢႆၵႃႈၼႂ်းတပ်ႉမၼ်းသေဢေႃႈ။
ၵူၼ်းသိုၵ်းၵမ်ႈၽွင်ႈၵႃႈၼႂ်းၵူၼ်းၸိူဝ်ႉၶိူဝ်း မၼႃႇသေႇ၊ ၼၼ်ႉ ဢွၼ်ၵၼ်ၵႂႃႇၽွမ်ႉၽၢႆႇ တႃႇဝိတ်ႈ၊ မိူဝ်ႈဢၼ်မၼ်းၶီႇသိုၵ်းၸွမ်းၵူၼ်းမဵဝ်း ၽိလိတ်ႉတိ၊ ၶဝ်ၵႂႃႇတိုၵ်းၶုၼ်ႁေႃၶမ်း သေႃးလု၊ ၼၼ်ႉဢေႃႈ။ ဝႃႈတႄႉမၼ်းၸိုင်၊မၼ်းဢမ်ႇၸွႆႈၵူၼ်း ၽိလိတ်ႉတိ၊ ၶဝ်ၵွပ်ႈပိူဝ်ႈၶုၼ်ႁေႃၶမ်းၶဝ်ၵူဝ်မၼ်းၸူဝ်းဢဝ်ၶဝ်ၵႂႃႇဢၢပ်ႈပၼ်ၼႂ်းမိုဝ်းၸဝ်ႈမၼ်း သေႃးလု၊ ၼၼ်ႉ ၶဝ်ၸင်ႇပွႆႇမၼ်းၶိုၼ်းမိူဝ်းၸူးၵႂႃႇတီႈဝဵင်း ၸိၵလၵ်ႉ၊ သေဢေႃႈ။-
ၵူၼ်းသိုၵ်းၼႂ်းၸိူဝ်ႉၶိူဝ်း မၼႃႇသေႇ၊ ၸိူဝ်းဢၼ်ၵႂႃႇၽွမ်ႉၽၢႆႇ တႃႇဝိတ်ႈ၊ ၼႂ်းမိူဝ်ႈဢၼ်မၼ်းၶိုၼ်းပွၵ်ႈမိူဝ်းၵႂႃႇယူႇၼၼ်ႉၸမ်ႉ၊ပဵၼ် ဢႃႇတၼႃႉ၊ယေႃးၸပတ်ႉ၊ယေႇတယေးလႃႉ၊မိၵ်ႉၶေႇလႃႉ၊ယေႃးၸပတ်ႉ၊ဢေးလိႁု၊ တင်း ၸိလသေး၊ ၸိူဝ်းၼၼ်ႉဢေႃႈ။ ၵႃႈတီႈတပ်ႉ မၼႃႇသေႇ၊ ၵေႃႈ ၶဝ်ၸိူဝ်းၼႆႉပဵၼ်ၶုၼ်သိုၵ်းဢၼ်ဢုပ်ႉၵူၼ်းပဵၼ်ႁဵင်ၼၼ်ႉဢေႃႈ။-
ၶဝ်ၼၼ်ႉ ၸွႆႈ တႃႇဝိတ်ႈ၊ တိုၵ်းတေႃးၵူၼ်းႁၢႆႉၵူၼ်းၸူၼ်တင်းလၢႆ၊ၵွပ်ႈပိူဝ်ႈဢၼ်ၶဝ်ပဵၼ်ၵူၼ်းသိုၵ်းဢၼ်ႁတ်းႁၢၼ်ၼၼ်ႉလႄႈ ဝၢႆးလင်ၼၼ်ႉလႆႈပဵၼ်ၶုၼ်သိုၵ်းလူင်ၼႂ်းတပ်ႉ ဢိသရေး၊ ဢေႃႈ။-
ဝၼ်းၼိုင်ႈယဝ်ႉဝၼ်းၼိုင်ႈ ၵူၼ်းတင်းလၢႆဢွၼ်ၵၼ်မႃးၽွမ်ႉၽၢႆႇ တႃႇဝိတ်ႈ၊ ယူႇတေႃႇထိုင်ႁွတ်ႈတပ်ႉမၼ်းထၢၼ်ႈပေႃးပဵၼ်တပ်ႉဢၼ်ႁႅင်းယႂ်ႇၼႃႇလူင်လၢင်ၼၼ်ႉဢေႃႈ။
ၼႂ်းမိူဝ်ႈဢၼ် တႃႇဝိတ်ႈ၊ မီးယူႇၼႂ်းဝဵင်း ႁေႇပရုၼ်ႇ၊ ၼၼ်ႉမီးၵူၼ်းသိုၵ်းဢၼ်ၽိုၵ်းဝႆႉယဝ်ႉၼၼ်ႉၼမ်ၼႃႇလူင်လၢင်ဢွၼ်ၵၼ်မႃးၽွမ်ႉၽၢႆႇတပ်ႉသိုၵ်းမၼ်းႁႂ်ႈလႆႈၸွႆႈၵမ်ႉၸွႆႈထႅမ်မၼ်းႁႂ်ႈလႆႈပုတ်ႈႁၢင်ႈပုတ်ႈႁေႃ သေႃးလု၊ ၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးၵတိဝႆႉၼၼ်ႉဢေႃႈ။ ၸရၢင်းၶဝ်ၸိူဝ်းၼၼ်ႉၸမ်ႉ၊
ၵူၼ်းမဵဝ်း ယုတႃႉ၊ ဢၼ်ယိပ်းၵမ်ၶိူင်ႈႁႄႉလၢၵ်ႈၼၢၵ်ႈတင်းႁွၵ်ႇလႄႈပျေႉၸုမ်ႇဝႆႉတင်းလၢၵ်ႈၼၢၵ်ႈၼၼ်ႉမီးႁူၵ်းႁဵင်ပႅတ်ႇပၢၵ်ႇ။
ၵူၼ်းမဵဝ်း သိမုၼ်ႇ၊ ဢၼ်ပဵၼ်ၵူၼ်းသိုၵ်းၽိုၵ်းဝႆႉယဝ်ႉၼၼ်ႉမီးၸဵတ်းႁဵင်ပၢႆပၢၵ်ႇၵေႃႉ။
ၵူၼ်းမဵဝ်း လေႇဝိ၊ မီးသီႇႁဵင်ႁူၵ်းပၢၵ်ႇၵေႃႉ၊
တပႄး ယေႃႇယတႃႉ၊ ၸိူဝ်ႉၶိူဝ်း ဢႃႇရုၼ်ႇ၊ ၼၼ်ႉမီးသၢမ်ႁဵင်ၸဵတ်းပၢၵ်ႇၵေႃႉ။
ပီႈၼွင်ႉၸိူဝ်ႉၶိူဝ်း ၸႃႇတုၵ်ႉ၊ ၸိူဝ်းဢၼ်ပဵၼ်ၵူၼ်းသိုၵ်း၊ဢၼ်ယင်းၼုမ်ႇယင်းၵမ်လႄႈႁတ်းႁၢၼ်ၼၼ်ႉမီးသၢဝ်းသွင်ၵေႃႉ။
ၵူၼ်းမဵဝ်း ပိၼ်ႇယႃႇမိၼ်ႇ၊ ဢၼ်ပဵၼ်ၸိူဝ်ႉၶိူဝ်း သေႃးလု၊ မီးသၢမ်ႁဵင်ၵေႃႉ။ ၵူၺ်းၵႃႈ၊ၵူၼ်းမဵဝ်း ပိၼ်ႇယႃႇမိၼ်ႇ၊ ၵမ်ႈၼမ်ၼၼ်ႉ၊ယင်းတိုၵ်ႉမီးယူႇၽၢႆႇ သေႃးလု၊ ဢေႃႈ။
ၵူၼ်းမဵဝ်း ဢေႇၽရိမ်ႇ၊ ဢၼ်ၸိုဝ်ႈသဵင်ယႂ်ႇၼႂ်းၵူၼ်းၶိူဝ်းႁိူၼ်းၶဝ်ၼၼ်ႉမီးသွင်မိုၼ်ႇပၢႆပႅတ်ႇပၢၵ်ႇၵေႃႉ။
ၵူၼ်းမဵဝ်း မၼႃႇသေႇ၊ ပွတ်းဝၼ်းတူၵ်းဢၼ်လႆႈၶၢမ်ႇတၢင်းဢၼ်လိူၵ်ႈဢဝ်ႁႂ်ႈၵႂႃႇယုၵ်ႉယွင်ႈ တႃႇဝိတ်ႈ၊ ႁဵတ်းၶုၼ်ႁေႃၶမ်းၼၼ်ႉမီးၼိုင်ႈမိုၼ်ႇပႅတ်ႇႁဵင်ၵေႃႉ။
ၵူၼ်းမဵဝ်း ဢိသၶႃႇ၊ ၵူၼ်းဢၼ်ပဵၼ်ၵႄႇပဵၼ်ႁူဝ်သွင်ပၢၵ်ႇ၊ဢိၵ်ႇတင်းၵူၼ်းၸိူဝ်းဢၼ်မီးတႂ်ႈမိုဝ်းၶဝ်။ ၵူၼ်းဢၼ်ပဵၼ်ၵႄႇပဵၼ်ႁူဝ်ၸိူဝ်းၼႆႉၸၢင်ႈႁုလူၺ်ႈလွင်ႈဢၼ်ၵူၼ်းမဵဝ်း ဢိသရေး၊ ၶဝ်ထုၵ်ႇလီႁဵတ်းၸိူဝ်ႉၼင်ႇႁိုဝ်လႄႈထုၵ်ႇလီႁဵတ်းၶိင်ႇလႂ်ၼၼ်ႉဢေႃႈ။
ၵူၼ်းမဵဝ်း ၸေႇပုလုၼ်ႇ၊ ဢၼ်ပႂ်ႉသဵတ်ႈၸႃႇလႄႈပဵၼ်ၵူၼ်းႁႅင်းယႂ်ႇတၼ်းဝႆႉ၊ၼႂ်းတၢင်းဢၼ်တိုၵ်းသိုၵ်းလႄႈၽိုၵ်းယိပ်းၵမ်လၢၵ်ႈၼၢၵ်ႈၵူႈၸိူဝ်ႉၵူႈမဵဝ်းဝႆႉၼၼ်ႉမီးႁႃႈမိုၼ်ႇၵေႃႉ။
ၵူၼ်းမဵဝ်း ၼပ်ႉထလိ၊ ၵူၼ်းဢၼ်ပဵၼ်ၵႄႇပဵၼ်ႁူဝ်မီးႁဵင်ၼိုင်ႈ၊ဢိၵ်ႇတင်းၵူၼ်းသိုၵ်းယိပ်းၵမ်ၶိူင်ႈႁႄႉလၢၵ်ႈၼၢၵ်ႈတင်းႁွၵ်ႇၼၼ်ႉမီးသၢမ်မိုၼ်ႇၸဵတ်းႁဵင်ၵေႃႉ။
ၵူၼ်းမဵဝ်း တၢၼ်ႇ၊ ဢၼ်ၽိုၵ်းၵၢၼ်သိုၵ်းယဝ်ႉၼၼ်ႉမီးသွင်မိုၼ်ႇပႅတ်ႇႁဵင်ႁူၵ်းပၢၵ်ႇၵေႃႉ။
ၵူၼ်းမဵဝ်း ဢႃႇသျႃႇ၊ ဢၼ်တၼ်းဝႆႉပုၼ်ႈတၵ်းတိုၵ်းသိုၵ်းၼၼ်ႉမီးသီႇမိုၼ်ႇၵေႃႉ။
ၵူၼ်းၸိူဝ်ႉၶိူဝ်းၸိူဝ်းဢၼ်ယူႇပွတ်းၽၢႆႇဝၼ်းဢွၵ်ႇၼမ်ႉ ယေႃးတၢၼ်ႇ၊ ဢၼ်ပဵၼ်မဵဝ်း ရုပိၼ်ႇ၊ မဵဝ်း ၵၢတ်ႉ၊ မဵဝ်း မၼႃႇသေႇ၊ ပွတ်းၽၢႆႇဝၼ်းဢွၵ်ႇမီးသႅၼ်ပၢႆသွင်မိုၼ်ႇ။ ၶဝ်ၸိူဝ်းၼႆႉၽိုၵ်းယိပ်းၵမ်လၢၵ်ႈၼၢၵ်ႈၵူႈၸိူဝ်ႉၵူႈမဵဝ်းယဝ်ႉဢေႃႈ။
ၶဝ်ၸိူဝ်းၼႆႉတင်းသဵင်ႈတင်းလူင်ပဵၼ်ၵူၼ်းသိုၵ်းဢၼ်ပႃးၸႂ်ၸေႇတၼႃႇထၢမ်းၼႃႈၵၢၼ်သိုၵ်းၼၼ်ႉ၊ဢွၼ်ၵၼ်မႃးၵႃႈတီႈဝဵင်း ႁေႇပရုၼ်ႇ၊ ႁႂ်ႈလႆႈယုၵ်ႉယွင်ႈ တႃႇဝိတ်ႈ၊ ႁႂ်ႈမၼ်းႁဵတ်းၶုၼ်ႁေႃၶမ်းၵႃႈၼိူဝ်ၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢေႃႈ။ ၵူၼ်းမဵဝ်း ဢိသရေး၊ ဢၼ်ယင်းၵိုတ်းယင်းၵျၢၼ်ႇၸိူဝ်းၼၼ်ႉၵေႃႈၽွမ်ႉၸႂ်ၵၼ်ၶႂ်ႈယုၵ်ႉယွင်ႈၸိူဝ်ႉၼင်ႇၼၼ်ၼင်ႇၵဝ်ႇဢေႃႈ။-
ၶဝ်ၸိူဝ်းၼၼ်ႉမီးယူႇလူၺ်ႈၵၼ်တင်း တႃႇဝိတ်ႈ၊ သၢမ်ဝၼ်းတဵမ်တဵမ်လႄႈဢွၼ်ၵၼ်ၵိၼ်ၶူပ်းတၢင်းၵိၼ်တၢင်းၶူပ်းဢၼ်ပီႈၼွင်ႉၸိူဝ်ႉၶိူဝ်းလဵဝ်ၵၼ်တင်းၶဝ်မႄးႁႅၼ်းထႃႈဝႆႉပုၼ်ႈၶဝ်ၼၼ်ႉဢေႃႈ။-
ၶဝ်ၸိူဝ်းဢၼ်ယူႇၸႃႉၸဵမ်မိူင်းပွတ်းႁွင်ႇပုၼ်ႉဢၼ်ပဵၼ်ၸိူဝ်ႉၶိူဝ်း ဢိသၶႃႇ၊ ၶဝ် ၸေႇပုလုၼ်ႇ၊ ၶဝ်တင်း ၼပ်ႉထလိ၊ ၶဝ်ၸိူဝ်းၼၼ်ႉႁေႃႈမႃႉလီႈ၊ၵလႃႇဢုၵ်ႈ၊မႃႉလေႃႈ၊ဝူဝ်းဢၼ်တၢင်ႇၶဝ်ႈၼမ်ႉတၢင်းၵိၼ်ဢၼ်ပဵၼ်ၶဝ်ႈၵျုင်ႇလႂ်၊မၢၵ်ႇလိူဝ်ႇလႂ်၊မၢၵ်ႇၸပိတ်ႉႁႅင်ႈလႂ်၊ၼမ်ႉမၢၵ်ႇၸပိတ်ႉလႂ်၊ဢိၵ်ႇတင်းၼမ်ႉမၼ်းသၢၼ်ႇလုၼ်ႇၸိူဝ်းၼၼ်ႉမႃးပၼ်ဢေႃႈ။ ၶဝ်ယင်းႁေႃႈၸႃႉၸဵမ်ဝူဝ်းလႂ်၊သူဝ်းလႂ်၊မႃးပုၼ်ႈဢၼ်တၵ်းပဵၼ်တၢင်းၵိၼ်ၼၼ်ႉဢေႃႈ။ လွင်ႈတၢင်းၸိူဝ်းၼႆႉၼႄပျႃးလွင်ႈတၢင်းဢၼ်ၵူၼ်းမဵဝ်း ဢိသရေး၊ တင်းဝၢၼ်ႈတင်းမိူင်းမီးတၢင်းဢၼ်မူၼ်ႈပျေႃႇၼၼ်ႉဢေႃႈ။
တႃႇဝိတ်ႈ၊ တိူင်ႇပၢင်ႇၵၼ်တင်းၶုၼ်သိုၵ်းႁၢၼ်မၼ်းတင်းလၢႆ၊ၸိူဝ်းဢၼ်ဢုပ်ႉၵူၼ်းသိုၵ်းပဵၼ်ႁဵင်လႄႈဢၼ်ဢုပ်ႉပဵၼ်ပၢၵ်ႇၸိူဝ်းၼၼ်ႉဢေႃႈ။-
မိူဝ်ႈၼၼ်ႉ၊မၼ်းမီးဢမိင်ႉတီႈၵူၼ်းမဵဝ်း ဢိသရေး၊ ၵႃႈမီးတင်းသဵင်ႈတင်းလူင်လႄႈဝႃႈ၊ “ပေႃးသူၽွမ်ႉၸႂ်လႄႈ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းပၼ်ဢၶႂၢင်ႉၸိုင်၊ႁဝ်းဢွၼ်ၵၼ်သင်ႇၶေႃႈၵႂၢမ်းၵႂႃႇၵူႈတီႈၵူႈလႅၼ်ၸူးတီႈပီႈၼွင်ႉႁဝ်းဢၼ်ယင်းၵိုတ်းယင်းၵျၢၼ်ႇၵႃႈၼႂ်းသိုင်ႇၸိုင်ႈဝၢၼ်ႈမိူင်း ဢိသရေး၊ ႁႂ်ႈၸွတ်ႇတူဝ်ႈ၊ဢိၵ်ႇတင်းမဵဝ်းယဵၸ်ႈပရေႃးႁဵၵ်ႈ လႂ်၊တင်းမဵဝ်း လေႇဝိ၊ လႂ်ၸိူဝ်းဢၼ်ယူႇၼႂ်းဝၢၼ်ႈၼႂ်းဝဵင်းလူၺ်ႈၵၼ်ၸိူဝ်းၼၼ်ႉမႃးၸုၵၼ်တုမ်ၵၼ်တင်းႁဝ်းတႃႉ။-
ၼင်ႇၼၼ်လႄႈဢွၼ်ၵၼ်ၵႂႃႇဢဝ်တိူၵ်ႈပတိၺိၺ်ႇၸဝ်ႈၶိုၼ်းမႃးတီႈႁဝ်းတႃႉ။ လွင်ႈမၼ်းၸမ်ႉ၊ၽူႈလႂ်ၵေႃႈဢမ်ႇဝႆႉဢမုမၼ်းၼႂ်းၸူဝ်ႈပၢၼ် သေႃးလု၊ ႁဵတ်းၶုၼ်ႁေႃၶမ်းၼၼ်ႉလႄႈ ယူႇမႃးယဝ်ႉလူင်ပႄႇ၊” ဝႃႈၼင်ႇၼႆဢေႃႈ။-
ၵူၼ်းတင်းလၢႆဢွၼ်ၵၼ်ၽွမ်ႉၸႂ်ၵၼ်လႄႈမီးတၢင်းဢၼ်ၸူမ်းသိူဝ်းမူၼ်ႈပျေႃႇၼႃႇလူၺ်ႈၵႂၢမ်းၼၼ်ႉဢေႃႈ။
ၼင်ႇၼၼ်လႄႈ တႃႇဝိတ်ႈ၊ ႁႂ်ႈၵူၼ်းမဵဝ်း ဢိသရေး၊ ဢၼ်ယူႇၵႃႈတီႈၸႃႉၸဵမ်ၼမ်ႉ သီးႁေႃႇရႃႉ၊ လႅၼ်လိၼ်မိူင်း ဢေးၵျိပ်ႉ၊ ၽၢႆႇတၢင်းၸၢၼ်းတေႃႇထိုင်သူပ်းသဵၼ်ႈတင်း ႁႃႇမတ်ႉ၊ ဢၼ်မီးၽၢႆႇတၢင်းႁွင်ႇမႃးၸုတုမ်ၵၼ် ႁႂ်ႈလႆႈဢဝ်တိူၵ်ႈပတိၺိၺ်ႇၽြႃးပဵၼ်ၸဝ်ႈသေၵႃႈတီႈဝဵင်း ၵိရယတ်ႉယႃႇရိမ်ႇ၊ မႃးတီႈဝဵင်း ယေႇရုသလႅမ်ႇ၊ ဢေႃႈ။-
တႃႇဝိတ်ႈ၊ ဢိၵ်ႇတင်းၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢွၼ်ၵၼ်ၵႂႃႇၵႃႈတီႈဝဵင်း ပႃႇလႃႉ၊ ဢၼ်ဝႃႈ၊ဝဵင်း ၵိရယတ်ႉယႃႇရိမ်ႇ၊ ဢၼ်မီးၼႂ်းမိူင်း ယုတႃႉ၊ ႁႂ်ႈလႆႈဢဝ်တိူၵ်ႈပတိၺိၺ်ႇၽြႃးပဵၼ်ၸဝ်ႈဢၼ်လႆႈၶၢမ်ႇဢဝ်ၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ဢၼ်ၵိင်းဝၢပ်ႈယူႇၵႃႈၼိူဝ်ၶေႇရုၽဵမ်ႇ ၼၼ်ႉဢေႃႈ။-
ၶဝ်ဢဝ်တိူၵ်ႈပတိၺိၺ်ႇၸဝ်ႈၼၼ်ႉဢွၵ်ႇသေၵႃႈၼႂ်းႁိူၼ်း ဢၽိၼတပ်ႉ၊ မႃးလႄႈတၢင်ႇလေႃႉဢၼ်မႂ်ႇသေယဝ်ႉ၊ ဢေႃႇၸႃႉ၊ တင်း ဢႁိဢေႃး၊ ပဵၼ်ၵေႃႉဢၼ်ႁေႃႈလေႃႉဢေႃႈ။-
တႃႇဝိတ်ႈ၊ ဢိၵ်ႇတင်းၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢွၼ်ၵၼ်ဢွၵ်ႇႁႅင်းၵႃႈဝႅၼ်ႁႂ်ႈလႆႈယွင်ႈယေႃးၽြႃးပဵၼ်ၸဝ်ႈယူႇ၊ႁဵတ်းၵႂၢမ်းယူႇ၊ပဝ်ႇႁႆႇၶိူင်ႈတူႇရိယႃႇဢၼ်ဝႃႈ၊တိင်ႇလႄႈတရေႃးလႂ်၊ၵွင်ၶဵတ်ႇလႄႈသႅင်ႇလႂ်၊ဢိၵ်ႇတင်းပီႇလႂ်၊ၼႄးၶရႃႇလႂ်ဢေႃႈ။
မိူဝ်ႈဢၼ်ၶဝ်ႁွတ်ႈထိုင်ၵႃႈတီႈတလၢင်းယဵပ်ႇၶဝ်ႈ ၶိတုၼ်ႇ၊ ၼၼ်ႉၸိုင်၊ဝူဝ်းၶီႈလိုတ်းလႄႈ ဢေႃႇၸႃႉ၊ ယဵတ်ႇမိုဝ်းမၼ်းၵႂႃႇယိပ်းၵမ်မႅၼ်ႈတိူၵ်ႈပတိၺိၺ်ႇၸဝ်ႈဢေႃႈ။-
ထႃႇဝရႃႉၽြႃး၊ ၸႂ်မႆႈၶႂ်ႈၸႃႉ ဢေႃႇၸႃႉ၊ ၵွပ်ႈပိူဝ်ႈဢၼ်ယိပ်းၵမ်တိူၵ်ႈတႃႇၸဝ်ႈၼၼ်ႉလႄႈဢဝ်မၼ်းတၢႆၵမ်းလဵဝ်ဢေႃႈ။ မၼ်းၼၼ်ႉလႆႈတၢႆၵႃႈတီႈၽၢႆႇၼႃႈ ထႃႇဝရႃႉၽြႃး၊ ၵႃႈတီႈၼၼ်ႈဢေႃႈ။-
ၼင်ႇၼၼ်လႄႈ တီႈၼၼ်ႈလႆႈႁွင်ႉၸိုဝ်ႈဝႃႈ၊ ပေးရိတ်ႉဢေႃႇၸႃႉ၊ တေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။ တႃႇဝိတ်ႈ၊ ၸႂ်မႆႈၶႂ်ႈၸႃႉၵွပ်ႈပိူဝ်ႈ ထႃႇဝရႃႉၽြႃး၊ ပၼ်တၢမ်ႇတီႈ ဢေႃႇၸႃႉ၊ ၼၼ်ႉဢေႃႈ။
ၼႂ်းဝၼ်းၼၼ်ႉ၊ တႃႇဝိတ်ႈ၊ ၵူဝ်ႁႄၽြႃးပဵၼ်ၸဝ်ႈလႄႈလၢတ်ႈဝႃႈ၊ “ၵဝ်တၵ်းႁဵတ်းၸိူဝ်ႉၼင်ႇႁိုဝ်ဢဝ်တိူၵ်ႈပတိၺိၺ်ႇၸဝ်ႈမႃးတီႈၵဝ်၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ တႃႇဝိတ်ႈ၊ ဢမ်ႇဢဝ်တိူၵ်ႈတႃႇၸဝ်ႈမႃးၵႃႈတီႈမၼ်းၵႃႈၼႂ်းဝဵင်း ယေႇရုသလႅမ်ႇ၊ မၼ်းဢဝ်ငႅၵ်းၵႂႃႇၸူးတီႈႁိူၼ်း ဢူဝ်းပိတ်ႉဢေႇတုမ်ႇ၊ ၵူၼ်းၶိူဝ်းႁိူၼ်း ၵိတ်ႉတိ၊ သေယဝ်ႉ၊-
ဝႆႉၵႃႈတီႈၼၼ်ႈသၢမ်လိူၼ်သေဢေႃႈ။ ထႃႇဝရႃႉၽြႃး၊ ၵေႃႈပၼ်တၢင်းလီတီႈၵူၼ်းႁိူၼ်းၵူၼ်းယေး ဢူဝ်းပိတ်ႉဢေႇတုမ်ႇ၊ ဢိၵ်ႇတင်းၵႃႈဢၼ်မီးတီႈမၼ်းၵူႈၸိူဝ်ႉၵူႈမဵဝ်းၼၼ်ႉဢေႃႈ။
မိူဝ်ႈၼၼ်ႉၶုၼ်ႁေႃၶမ်း ႁိရမ်ႇ၊ မိူင်း တုရု၊ ပွႆႇသၢၼ်ႇတမၢၼ်ႇၸူးတီႈ တႃႇဝိတ်ႈ၊ ႁႂ်ႈၶဝ်ပႃးဢဝ်တင်းမႆႉ ဢႃႇရိတ်ႉ၊ လႂ်ၵူၼ်းၸၢင်ႈၵေႃႇႁိၼ်လႂ်၊ဢိၵ်ႇတင်းၸၢင်ႈမႆႉလႂ်၊မႃးႁႂ်ႈလႆႈတႄႇႁဵတ်းႁေႃပုၼ်ႈ တႃႇဝိတ်ႈ၊ ဢေႃႈ။-
မိူဝ်ႈၼၼ်ႉ၊ တႃႇဝိတ်ႈ၊ ႁုႁၼ်လွင်ႈဢၼ် ထႃႇဝရႃႉၽြႃး၊ တႄႇတင်ႈသၢင်ႈႁဵတ်းႁႂ်ႈ တႃႇဝိတ်ႈ၊ မၼ်ႈၶိူင်ႇယူႇၵႃႈၼႂ်းဢရႃႇၶုၼ်ႁေႃၶမ်း ဢိသရေး၊ ဢိၵ်ႇတင်းလွင်ႈဢၼ်မၼ်းၸဝ်ႈႁဵတ်းႁႂ်ႈသိုင်ႇၸိုင်ႈဝၢၼ်ႈမိူင်းမၼ်းၸဝ်ႈၶိုၼ်ႈယႂ်ႇမႂ်ႇသုင်ပုၼ်ႈၵူၼ်းမၼ်းၸဝ်ႈမဵဝ်း ဢိသရေး၊ ၼၼ်ႉဢေႃႈ။
ၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉ တႃႇဝိတ်ႈ၊ ဢဝ်မေးထႅင်ႈလႄႈမီးလုၵ်ႈၸၢႆးလုၵ်ႈယိင်းထႅင်ႈဢေႃႈ။-
လုၵ်ႈလၢင်းၶဝ်ၸိူဝ်းဢၼ်ၵိူတ်ႇလဵင်ႉမႃးၵႃႈၼႂ်းဝဵင်း ယေႇရုသလႅမ်ႇ၊ ၸိူဝ်းၼၼ်ႉၸမ်ႉ၊ပဵၼ် သမွႃႇ၊သေႃးပပ်ႉ၊ၼႃႇႀၼ်ႇ၊သေႃးလမုၼ်ႇ၊-
ဢေးလိသမႃႇ၊ပေးလျႃႇတႃႉ၊ တင်း ဢေႇလီႇၽလႅတ်ႉ၊ ဢေႃႈ။
မိူဝ်ႈဢၼ်ၵူၼ်း ၽိလိတ်ႉတိ၊ ၶဝ်ငိၼ်းလွင်ႈဢၼ်ပၼ်ၽိၵ်ႈသိၵ်ႈတီႈ တႃႇဝိတ်ႈ၊ ႁႂ်ႈပဵၼ်ၶုၼ်ႁေႃၶမ်းၵႃႈၼိူဝ်ၵူၼ်းမဵဝ်း ဢိသရေး၊ တင်းသဵင်ႈတင်းမူတ်းယဝ်ႉၼၼ်ႉၸိုင်၊တပ်ႉသိုၵ်းၶဝ်ၶီႇၶိုၼ်ႈႁႂ်ႈလႆႈတိုၵ်းတေႃးမၼ်းဢေႃႈ။ ပိူဝ်ႈၼႆလႄႈ တႃႇဝိတ်ႈ၊ ၶီႇသိုၵ်းၶိုၼ်ႈၸူးၶဝ်ဢေႃႈ။-
ၵူၼ်း ၽိလိတ်ႉတိ၊ ၸိူဝ်းၼၼ်ႉမႃးလႄႈသိမ်းဢဝ်ပၢင်ႇႁူၺ်ႈ ရေႇၽိမ်း၊ ဝႆႉဢေႃႈ။-
တႃႇဝိတ်ႈ၊ ၵေႃႈလဝ်ႈထၢမ်တီႈၽြႃးပဵၼ်ၸဝ်ႈလႄႈဝႃႈ၊ “ၶႃႈၸဝ်ႈတၵ်းလႆႈတိုၵ်းတေႃးၵူၼ်း ၽိလိတ်ႉတိ၊ ၸိူဝ်းၼၼ်ႉတီႈၶႃႈႁိုဝ်း။ ၸဝ်ႈႁဝ်းတၵ်းပၼ်ႁႂ်ႈၶႃႈၸဝ်ႈဢွင်ႇသိုၵ်းတီႈၶႃႈႁိုဝ်း၊” ဝႃႈၼင်ႇၼႆဢေႃႈ။ ထႃႇဝရႃႉၽြႃး၊ ၶိုၼ်းလၢတ်ႈတီႈမၼ်းလႄႈဝႃႈ၊ “ၶိုၼ်းတိုၵ်းတႃႉ။ ၵဝ်တၵ်းပၼ်ႁႂ်ႈမႂ်းဢွင်ႇသိုၵ်းဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ တႃႇဝိတ်ႈ၊ ႁႄႉတိုၵ်းၶဝ်ၵႃႈတီႈဝဵင်း ပႃႇလႃႉပေႇရၸိမ်း၊ လႄႈပႄႉၼႅင်ႇၶဝ်ဢေႃႈ။ မၼ်းလၢတ်ႈလႄႈဝႃႈ၊ “ၽြႃးပဵၼ်ၸဝ်ႈၸႂ်ႉၵဝ်ၵိူၼ်ႇယႃႉတပ်ႉရၢၼ်ႇသူႇပႅတ်ႈမိူၼ်ၸိူဝ်ႉၼင်ႇၼမ်ႉထူမ်ႈလႄႈၵိူၼ်ႇယႃႉၼၼ်ႉယဝ်ႉ၊” ဝႃႈၼင်ႇၼႆသေလႄႈ၊ႁွင်ႉႁဵၵ်ႈတီႈၼၼ်ႈၸိုဝ်ႈဝႃႈ၊ ပႃႇလႃႉပေးရၸိမ်း၊ ဢေႃႈ။-
မိူဝ်ႈဢၼ်ၵူၼ်း ၽိလိတ်ႉတိ၊ ၼီပၢႆႈၼၼ်ႉၶဝ်ပႅတ်ႈႁုၼ်ႇႁၢင်ႈသၢင်းထုၶဝ်ၵိုတ်းဝႆႉလႄႈ တႃႇဝိတ်ႈ၊ ၸႂ်ႉႁႂ်ႈၵူၼ်းမၼ်းဢဝ်တုတ်ႇၽႆးပႅတ်ႈဢေႃႈ။
ဢမ်ႇႁိုင်ဢမ်ႇၼၢၼ်းၵူၼ်း ၽိလိတ်ႉတိ၊ ၶဝ်သမ်ႉမႃးသိမ်းဢဝ်ပၢင်ႇထူင်ႉႁူၺ်ႈၼၼ်ႉထႅင်ႈဢေႃႈ။-
တႃႇဝိတ်ႈ၊ ၵေႃႈသမ်ႉလဝ်ႈထၢမ်တီႈၽြႃးပဵၼ်ၸဝ်ႈထႅင်ႈလႄႈမၼ်းၸဝ်ႈၶိုၼ်းလၢတ်ႈတီႈမၼ်းလႄႈဝႃႈ၊ “ယႃႇပေၶိုၼ်ႈၸူးၶဝ်သိုဝ်ႈသိုဝ်ႈ။ မႂ်းပႆငႅၵ်းလဵပ်ႈၵႂႃႇတၢင်ႇၽၢႆႇသေလႄႈတိုၵ်းတေႃးၶဝ်ၵႃႈတီႈပႃႇမႆႉမွၼ်းၼၼ်ႉတႃႉ။-
မိူဝ်ႈဢၼ်မႂ်းလႆႈငိၼ်းသဵင်ၶီႇသိုၵ်းဢၼ်ဢွၵ်ႇမႃးၵႃႈတီႈပၢႆမႆႉမွၼ်းၼၼ်ႉၸိုင်၊ဢွၵ်ႇၵႂႃႇတိုၵ်းတႃႉ။ ၵဝ်တၵ်းဢွၼ်ႁူဝ်မႂ်းႁႂ်ႈလႆႈတိုၵ်းပႄႉတပ်ႉ ၽိလိတ်ႉတိ၊ ၶဝ်ဢေႃႈ၊” ဝႃႈၼင်ႇၼႆဢေႃႈ။-
တႃႇဝိတ်ႈ၊ ၵေႃႈႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉၼၼ်ႉလႄႈမၼ်းလိုပ်ႈႁေႃႈၵူၼ်းမဵဝ်း ၽိလိတ်ႉတိ၊ ၶဝ်တႄႇဢဝ်တီႈဝဵင်း ၵိပွင်ႇ၊ ၵႂႃႇတေႃႇထိုင်ဝဵင်း ၵေႇၸႃႇ၊ ဢေႃႈ။-
သဵင်ၶၢဝ်ႇ တႃႇဝိတ်ႈ၊ ၼၼ်ႉႁူင်ႁၢင်းၸွတ်ႇတူဝ်ႈၵႂႃႇၵူႈသိုင်ႇၵူႈမိူင်းလႄႈ ထႃႇဝရႃႉၽြႃး၊ ႁဵတ်းႁႂ်ႈၵူၼ်းၵူႈမဵဝ်းၵူဝ်ႁႄမၼ်းဢေႃႈ။
လိုၼ်းၼၼ်ႉ၊ တႃႇဝိတ်ႈ၊ တႄႇႁဵတ်းႁေႃပုၼ်ႈတူဝ်ၸဝ်ႈၵဝ်ႇၵႃႈၼႂ်းဝဵင်း တႃႇဝိတ်ႈ၊ ဢေႃႈ။ မၼ်းသမ်ႉႁဵတ်းထႃႇၼႃႉတီႈပုၼ်ႈတိူၵ်ႈပတိၺိၺ်ႇၽြႃးပဵၼ်ၸဝ်ႈလႄႈမုင်းထဵင်ၸဝ်ႈဝႆႉဢေႃႈ။-
မိူဝ်ႈၼၼ်ႉ၊မၼ်းလၢတ်ႈလႄႈဝႃႈ၊ “ၵူၼ်း လေႇဝိ၊ မဵဝ်းလဵဝ်ၵူၺ်းတၵ်းလႆႈႁၢမ်တိူၵ်ႈပတိၺိၺ်ႇၸဝ်ႈဢေႃႈ။ လွင်ႈမၼ်းၸမ်ႉ၊ ထႃႇဝရႃႉၽြႃး၊ လိူၵ်ႈဢဝ်ၶဝ်ဝႆႉ၊ႁႂ်ႈလႆႈႁၢမ်တိူၵ်ႈပတိၺိၺ်ႇၸဝ်ႈလႄႈထၢမ်းႁဵတ်းၼႃႈၵၢၼ်မၼ်းၸဝ်ႈတႃႇသေႇဢမ်ႇထၢတ်ႇဢေႃႈ၊” ဝႃႈၼင်ႇၼႆဢေႃႈ။-
တႃႇဝိတ်ႈ၊ ႁွင်ႉဢဝ်ႁႂ်ႈၵူၼ်းမဵဝ်း ဢိသရေး၊ တင်းသဵင်ႈတင်းလူင်မႃးၸုတုမ်ၵၼ်ၵႃႈတီႈဝဵင်း ယေႇရုသလႅမ်ႇ၊ ပုၼ်ႈဢၼ်တၵ်းဢဝ်တိူၵ်ႈပတိၺိၺ်ႇၸဝ်ႈမႃးဝႆႉ၊တီႈထႃႇၼႃႉဢၼ်မၼ်းမႄးႁႅၼ်းဝႆႉၼၼ်ႉဢေႃႈ။-
လိုၼ်းၼၼ်ႉ၊မၼ်းသမ်ႉႁွင်ႉဢဝ်ၵူၼ်းၼႂ်းၸိူဝ်ႉၶိူဝ်းလုၵ်ႈလၢၼ် ဢႃႇရုၼ်ႇ၊ တင်းၵူၼ်း လေႇဝိ၊ တင်းလၢႆမႃးၸုတုမ်ၵၼ်ဢေႃႈ။-
ၵႃႈၼႂ်းၵူၼ်း လေႇဝိ၊ တင်းလၢႆဢၼ်ပဵၼ်ၸိူဝ်ႉၶိူဝ်းႁိူၼ်း ၵေႃႇႁတ်ႉ၊ ၼၼ်ႉၸမ်ႉ၊ ဢုရေးလႃႉ၊ ပဵၼ်ၽူႈဢုပ်ႉၵူၼ်းပၢၵ်ႇသၢဝ်းၵေႃႉ။-
ၵူၼ်းၶိူဝ်းႁိူၼ်း မေႇရႃႇရိ၊ ၼၼ်ႉၸမ်ႉ၊ ဢသႃႇယႃႉ၊ ပဵၼ်ၽူႈဢုပ်ႉၵူၼ်းသွင်ပၢၵ်ႇသၢဝ်းၵေႃႉ။-
ၵူၼ်းၶိူဝ်းႁိူၼ်း ၵေႇရသုၼ်ႇ၊ ၼၼ်ႉၸမ်ႉ၊ ယေႃးလႃႉ၊ ပဵၼ်ၽူႈဢုပ်ႉၵူၼ်းပၢၵ်ႇသၢမ်သိပ်းၵေႃႉ။-
ၵူၼ်းၶိူဝ်းႁိူၼ်း ဢေးလိၸႃႇၽၢၼ်ႇ၊ ၼၼ်ႉၸမ်ႉ၊ သေႇမႃႇယႃႉ၊ ပဵၼ်ၽူႈဢုပ်ႉၵူၼ်းသွင်ပၢၵ်ႇၵေႃႉ။-
ၵူၼ်းၶိူဝ်းႁိူၼ်း ႁေႇပရုၼ်ႇ၊ ၼၼ်ႉၸမ်ႉ၊ ဢေးလျႃႇလႃႉ၊ ပဵၼ်ၽူႈဢုပ်ႉၵူၼ်းပႅတ်ႇသိပ်းၵေႃႉဢိၵ်ႇတင်း၊-
ၵူၼ်းၶိူဝ်းႁိူၼ်း ဢေႃးၸေးလႃႉ၊ ၼၼ်ႉၸမ်ႉ၊ ဢမိၼတပ်ႉ၊ ပဵၼ်ၽူႈဢုပ်ႉၵူၼ်းပၢၵ်ႇပၢႆသိပ်းသွင်ၵေႃႉဢေႃႈ။
ၵမ်းၼၼ်ႉ၊ တႃႇဝိတ်ႈ၊ ႁွင်ႉဢဝ်ယဵၸ်ႈပရေႃးႁဵၵ်ႈ ၸႃႇတုၵ်ႉ၊ တင်း ဢပျႃႇထႃႇ၊ ဢိၵ်ႇတင်းၵူၼ်း လေႇဝိ၊ ႁူၵ်းၵေႃႉဢၼ်ဝႃႈ၊ ဢုရေးလႃႉ၊ဢႃႇသႃႉယႃႉ၊ယူဝ်းဢေးလႃႉ၊သေႇမႃႇယႃႉ၊ဢေးလျႃႇလႃႉ၊ ဢိၵ်ႇတင်း ဢမိၼတပ်ႉ၊ ၸိူဝ်းၼၼ်ႉမႃးသေယဝ်ႉ၊-
လၢတ်ႈတီႈၶဝ်လႄႈဝႃႈ၊ “သူၸိူဝ်းၼႆႉ ပဵၼ်ၵူၼ်းတူၼ်ႈၵူၼ်းႁူဝ်ၵႃႈၼႂ်းၵူၼ်းၶိူဝ်းႁိူၼ်းသူတင်းလၢႆဢေႃႈ။ ႁဵတ်းႁႂ်ႈတူဝ်သူတင်းပီႈၼွင်ႉသူတင်းလၢႆမူတ်းၸၢင်ႇပုၼ်ႈဢၼ်တၵ်းဢဝ်တိူၵ်ႈပတိၺိၺ်ႇ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မႃးတီႈထႃႇၼႃႉဢၼ်ၵဝ်မႄးႁဵတ်းဝႆႉပုၼ်ႈတိူၵ်ႈတႃႇၼၼ်ႉတႃႉ။-
ၵွပ်ႈပိူဝ်ႈၵမ်းဢွၼ်တၢင်းၼၼ်ႉသူဢမ်ႇႁၢမ်တိူၵ်ႈတႃႇၸဝ်ႈလႄႈ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းပၼ်တၢမ်ႇတီႈႁဝ်း၊ၵွပ်ႈပိူဝ်ႈဢၼ်ႁဝ်းယင်းဢမ်ႇထွမ်ႇၸွမ်းတၢင်းဢၼ်မၼ်းၸဝ်ႈၸီႇယၢင်ႇဝႆႉၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ယဵၸ်ႈပရေႃးႁဵၵ်ႈတင်းလၢႆ၊ဢိၵ်ႇတင်းၵူၼ်း လေႇဝိ၊ ၸိူဝ်းၼၼ်ႉႁဵတ်းႁႂ်ႈတူဝ်ၶဝ်မူတ်းၸၢင်ႇပုၼ်ႈဢၼ်တၵ်းၶၢႆႉတိူၵ်ႈပတိၺိၺ်ႇ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ၼၼ်ႉဢေႃႈ။-
ၵူၼ်း လေႇဝိ၊ ၸိူဝ်းၼၼ်ႉဢွၼ်ၵၼ်ဢဝ်ၵၢၼ်းသွတ်ႇတိူၵ်ႈတႃႇၸဝ်ႈသေယဝ်ႉ၊တၢင်ႇသႂ်ႇႁူဝ်မႃႇၶဝ်ႁၢမ်ၵႂႃႇၸွမ်းၼင်ႇဢၼ် ထႃႇဝရႃႉၽြႃး၊ သင်ႇဝႆႉၵႃႈတီႈ မူဝ်းသေႇ၊ ၼၼ်ႉဢေႃႈ။
တႃႇဝိတ်ႈ၊ ပူင်ဢမိင်ႉတီႈၵူၼ်းတူၼ်ႈၵူၼ်းႁူဝ်ၵူၼ်းမဵဝ်း လေႇဝိ၊ ၸိူဝ်းၼၼ်ႉႁႂ်ႈၶဝ်ၸႂ်ႉပီႈၼွင်ႉၶဝ်ႁဵတ်းၵႂၢမ်း၊ဢိၵ်ႇတင်းႁႂ်ႈၶဝ်ပဝ်ႇႁႆႇတူႇရိယႃႇ၊တိင်ႇ၊ၼႄးၶရႃႇတင်းလၢႆလႄႈ ႁႂ်ႈလႆႈၸူမ်းသိူဝ်းႁဵတ်းသဵင်ဢၼ်လင်ဢၼ်မေႃးဢေႃး။-
ၵူၼ်းမဵဝ်း လေႇဝိ၊ ၸိူဝ်းၼၼ်ႉ၊ဢွၼ်ၵၼ်ၶၢၼ်းဝႆႉ ႁေႇမၼ်ႇ၊ လုၵ်ႈၸၢႆး ယူဝ်းဢေးလႃႉ၊ ၵႃႈၼႂ်းမုၵ်ႉၸိူဝ်းပီႈၼွင်ႉမၼ်း ဢႃႇသပ်ႉ၊ ၵေႃႉဢၼ်ပဵၼ်လုၵ်ႈၸၢႆး ပေႇရၶိ၊ ဢိၵ်ႇတင်း ဢေးႀၼ်ႇ၊ လုၵ်ႈၸၢႆး ၵုသႃႇယႃႉ၊ ၼႂ်းမဵဝ်း မေႇရႃႇရိ၊ ၵႃႈၼႂ်းမုၵ်ႉၼႂ်းၸိူဝ်းပီႈၼွင်ႉၶဝ်၊-
ဢိၵ်ႇတင်းႁႂ်ႈပီႈၼွင်ႉၶဝ်ထႅင်ႈၸုမ်းၼိုင်ႈလဵၼ်ႈပဵၼ်ၸုမ်းတီႈသွင်၊ဢၼ်ပဵၼ် ၸႃႇၶရိ၊ပႅၼ်ႇ၊ယႃႇၸေႇလႃႉ၊သေႇမိရႃႇမုတ်ႉ၊ယေႇႁေႇလႃႉ၊ဢုၼ်ႇၼိ၊ဢေးလျႃႇၽႃႉ၊ပေႇၼႃႇယႃႉ၊မႃႇသေႇယႃႉ၊မတ်ႉတိသိ၊ဢေးလိၽလႄႇႁု၊မိၵ်ႉၼေႇယႃႉ၊ဢူဝ်းပိတ်ႉဢေႇတုမ်ႇ၊ယေႇလႃႉ၊ ဢေႃႈ။ ၵူၺ်းၵႃႈ၊ ဢူဝ်းပိတ်ႉဢေႇတုမ်ႇ၊ ဢိၵ်ႇတင်း ယေႇလႃႉ၊ ယင်းပဵၼ်ၵူၼ်းပႂ်ႉၽၵ်းတူၸွမ်းဢေႃႈ။-
ၼင်ႇၼၼ်လႄႈ ႁေႇမၼ်ႇ၊ဢႃႇသပ်ႉ၊ဢေးႀၼ်ႇ၊ ဢၼ်ပဵၼ်သြႃႇမေႃႁဵတ်းၵႂၢမ်းၸိူဝ်းၼၼ်ႉ၊လႆႈၶၢမ်ႇတၢင်းဢၼ်ၶၢၼ်းဝႆႉ၊ႁႂ်ႈလႆႈဢဝ်သႅင်ႇတွင်းလိူင်ႁဵတ်းသဵင်လင်သဵင်မေႃးဢေႃႈ။-
ၸႃႇၶရိ၊ယႃႇၸေႇလႃႉ၊သေႇမိရႃႇမုတ်ႉ၊ယေႇႁေႇလႃႉ၊ဢုၼ်ႇၼိ၊ဢေးလျႃႇၽႃႉ၊မႃႇသေႇယႃႉ၊ပေႇၼႃႇယႃႉ၊ ၸိူဝ်းၼၼ်ႉ၊လႆႈဢဝ်တရေႃးထူဝ်းႁဵတ်းသဵင် ဢႃႇလမုတ်ႉ ဢေႃႈ။-
မတ်ႉတိသိ၊ဢေးလိၽလႄႇႁု၊မိၵ်ႉၼေႇယႃႉ၊ဢူဝ်းပိတ်ႉဢေႇတုမ်ႇ၊ယေႇလႃႉ၊ဢႃႇၸၸိ၊ ၸိူဝ်းၼႆႉ၊လႆႈဢဝ်တိင်ႇလဵတ်းႁဵတ်းသဵင်သေႇမိလိတ်ႉသေလႄႈဢွၼ်ႁူဝ်ဢေႃႈ။
ၶေးၼၼိ၊ ၸိုင်၊ၵွပ်ႈပိူဝ်ႈဢၼ်မၼ်းၸၢင်ႈမၼ်းမေႃၼႂ်းတူႇရိယႃႇၼၼ်ႉၶဝ်ၶၢၼ်းမၼ်းႁႂ်ႈပဵၼ်သြႃႇလူင်မေႃၵႂၢမ်းဢၼ်ဢုပ်ႉၵႃႈၼိူဝ်ၵူၼ်းႁဵတ်းၵႂၢမ်းတင်းလၢႆဢေႃႈ။-
ၼင်ႇၼၼ်လႄႈၶုၼ်ႁေႃၶမ်း တႃႇဝိတ်ႈ၊ ဢိၵ်ႇတင်းၵူၼ်းတူၼ်ႈၵူၼ်းႁူဝ်ၵူၼ်းမဵဝ်း ဢိသရေး၊ တင်းလၢႆ၊ဢိၵ်ႇတင်းၸဝ်ႈၵွၼ်းတပ်ႉသိုၵ်းႁၢၼ်တင်းလၢႆ၊ဢွၼ်ၵၼ်ၵႂႃႇၸူးတီႈႁိူၼ်း ဢူဝ်းပိတ်ႉဢေႇတုမ်ႇ၊ ႁႂ်ႈလႆႈဢဝ်တိူၵ်ႈပတိၺိၺ်ႇၸဝ်ႈလႄႈၶဝ်ဢွၼ်ၵၼ်ႁဵတ်းတၢင်းဢၼ်ၸူမ်းဢၼ်သိူဝ်းဢေႃႈ။-
ပိူဝ်ႈဢၼ်ၽြႃးပဵၼ်ၸဝ်ႈၸွႆႈထႅမ်မႃႉၸႃႉၵူၼ်းမဵဝ်း လေႇဝိ၊ ဢၼ်ႁၢမ်တိူၵ်ႈပတိၺိၺ်ႇ ထႃႇဝရႃႉၽြႃး၊ ၼၼ်ႉၸိူဝ်းၼၼ်ႉလႄႈၶဝ်ၼၼ်ႉဢွၼ်ၵၼ်ဢဝ်ဝူဝ်း၊ဢိၵ်ႇတင်းသူဝ်းယေႈမဵဝ်းၸဵတ်းတူဝ်သၢၵ်ႈလူႇႁႂ်ႈပဵၼ်ၶိူင်ႈတၢင်းလူႇဢေႃႈ။-
တႃႇဝိတ်ႈ၊ ဢိၵ်ႇတင်းၵူၼ်းႁဵတ်းၵႂၢမ်းတင်းလၢႆ၊ ၶေးၼၼိ၊ ဢၼ်ပဵၼ်သြႃႇလူင်မေႃႁဵတ်းၵႂၢမ်း၊ဢိၵ်ႇတင်းၵူၼ်း လေႇဝိ၊ ဢၼ်ႁၢမ်တိူၵ်ႈၸဝ်ႈၼၼ်ႉ၊ဢွၼ်ၵၼ်ၼုင်ႈၶူဝ်းၽႃႈပၢၼ်ႇၶျေႃးဢေႃႈ။ တႃႇဝိတ်ႈ၊ ၵေႃႈၼုင်ႈသိူဝ်ႈသုပ်းၽႃႈပၢၼ်ႇၶျေႃးထၢပ်ႈထႅင်ႈၼင်ႇၵဝ်ႇဢေႃႈ။-
ၼင်ႇၼၼ်လႄႈၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢွၼ်ၵၼ်ႁွင်ႉသႅၼ်ႇသဵင်ဢၼ်ၸူမ်းသိူဝ်းလႂ်၊ပဝ်ႇတိုင်ႈၼႄးၶရႃႇလႂ်၊ပဝ်ႇတုတ်ႈလႂ်၊ၸၢပ်ႇသႅင်ႇလႂ်၊လဵတ်းတိင်ႇထူဝ်းတရေႃးလႂ်ယူႇသေလႄႈဢွၼ်ၵၼ်ပႆၸွမ်းတိူၵ်ႈပတိၺိၺ်ႇၸဝ်ႈၵႂႃႇၵႃႈတီႈဝဵင်း ယေႇရုသလႅမ်ႇ၊ ဢေႃႈ။
မိူဝ်ႈဢၼ်တိူၵ်ႈပတိၺိၺ်ႇၸဝ်ႈၶဝ်ႈၵႃႈၼႂ်းဝဵင်းမႃးယူႇၼၼ်ႉၸိုင်၊ မိၶႃႇလႃႉ၊ လုၵ်ႈယိင်း သေႃးလု၊ ၼၼ်ႉယူႇၵႃႈတီႈႁိမ်းႁူးလၢင်းတဵၼ်လႄႈႁၼ်ၶုၼ်ႁေႃၶမ်း တႃႇဝိတ်ႈ၊ ၵႃႈဝႅၼ်ၸူမ်းၸူမ်းသိူဝ်းသိူဝ်းမႃးယူႇၼၼ်ႉမၼ်းမီးၸႂ်ဢၼ်ဢမ်ႇရူဝ်ႇသေႇၵူဝ်ယမ်ၶုၼ်ႁေႃၶမ်းဢေႃႈ။
ၶဝ်ဢွၼ်ၵၼ်ဢဝ်တိူၵ်ႈပတိၺိၺ်ႇၸဝ်ႈၼၼ်ႉၵႂႃႇၵႃႈတီႈသုမ်ႉထဵင်ၸဝ်ႈဢၼ် တႃႇဝိတ်ႈ၊ ႁဵတ်းဝႆႉ၊ပုၼ်ႈတိူၵ်ႈတႃႇၸဝ်ႈၼၼ်ႉသေလႄႈဢဝ်ဝႆႉၵႃႈၼႂ်းသုမ်ႉထဵင်ၸဝ်ႈၼၼ်ႉသေဢေႃႈ။ မိူဝ်ႈၼၼ်ႉၶဝ်ဢွၼ်ၵၼ်သၢၵ်ႈၵၢပ်ႈၶိူင်ႈတၢင်းလူႇဢၼ်တုတ်ႇၽႆး၊ဢိၵ်ႇတင်းတၢင်းလူႇမိၵ်ႈသႁႃႇယႃႉတီႈၽြႃးပဵၼ်ၸဝ်ႈဢေႃႈ။-
ဝၢႆးသေ တႃႇဝိတ်ႈ၊ သၢၵ်ႈၵၢပ်ႈၶိူင်ႈတၢင်းလူႇၸိူဝ်းၼၼ်ႉယဝ်ႉတူဝ်ႈယဝ်ႉၼၼ်ႉၸိုင်၊မၼ်းပၼ်မၢင်ႇၵလႃႇတၢင်းလီတီႈၵူၼ်းတင်းလၢႆၵႃႈၼႂ်းၼႃႇမႃႉၸိုဝ်ႈသဵင် ထႃႇဝရႃႉၽြႃး၊ သေယဝ်ႉ၊-
ၸႃႇၵႃႉတၢင်းၵိၼ်တၢင်းၶူပ်းတီႈၶဝ်တင်းသဵင်ႈတင်းလူင်ၸဵမ်ယိင်းၸဵမ်ၸၢႆးယေႈၵေႃႉၶဝ်ႈမုၼ်းယေႈၶႅပ်း၊ၼိူဝ်ႉပိင်ႈယေႈၵွၼ်ႈ၊တင်းၶႅပ်းမၢၵ်ႇၸပိတ်ႉႁႅင်ႈယေႈၶႅပ်းၼင်ႇၵၼ်ဢေႃႈ။
တႃႇဝိတ်ႈ၊ ၶၢၼ်းၵူၼ်း လေႇဝိ၊ ၵမ်ႈၽွင်ႈႁႂ်ႈဢွၼ်ႁူဝ်ဢွၼ်ၵၼ်ၼႂ်းတၢင်းဢၼ်ႁဵတ်းဝၢတ်ႈၵူဝ်းၵႂၢႆႇ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ပုၼ်ႈဢၼ်တၵ်းႁဵတ်းၵႂၢမ်းယွင်ႈယေႃးထေႃးပၼႃႇၵႃႈတီႈၽၢႆႇၼႃႈတိူၵ်ႈပတိၺိၺ်ႇၸဝ်ႈၼၼ်ႉဢေႃႈ။-
မၼ်းၶၢၼ်း ဢႃႇသပ်ႉ၊ ႁႂ်ႈပဵၼ်တူၼ်ႈပဵၼ်ငဝ်ႈ၊ ၸႃႇၶရိ၊ ပဵၼ်ၵေႃႉၵမ်ႉၵႅမ်လႄႈ ယေးလႃႉ၊သေႇမိရႃႇမုတ်ႉ၊ယေႇႁေးလႃႉ၊မတ်ႉတိသိ၊ဢေးလျႃႇၽႃႉ၊ပေႇၼႃႇယႃႉ၊ဢူဝ်းပိတ်ႉဢေႇတုမ်ႇ၊ တင်း ယေႇလႃႉ၊ ၸိူဝ်းၼၼ်ႉပဵၼ်ၵူၼ်းလဵတ်းတိင်ႇ၊ ဢႃႇသပ်ႉ၊ သမ်ႉပဵၼ်ၵူၼ်းၸၢပ်ႇသႅင်ႇဢေႃႈ။-
ယဵၸ်ႈပရေႃးႁဵၵ်ႈ သွင်ၵေႃႉ ပေႇၼႃႇယႃႉ၊ တင်း ယႁႃႇၸေးလႃႉ၊ ပဝ်ႇတိုင်ႈၼႄးၶရႃႇယူႇတႃႇသေႇၵႃႈတီႈၽၢႆႇၼႃႈတိူၵ်ႈပတိၺိၺ်ႇၸဝ်ႈဢေႃႈ။-
ၼင်ႇၼႆလႄႈဢၼ်ၼႆႉပဵၼ်တၢင်းဢၼ် တႃႇဝိတ်ႈ၊ ၽႄမႅင်ႇပၼ်ၵၢၼ်ဢွၼ်တၢင်းသေပိူၼ်ႈတီႈ ဢႃႇသပ်ႉ၊ တင်းပီႈၼွင်ႉမၼ်းမဵဝ်း လေႇဝိ၊ ၸိူဝ်းၼၼ်ႉႁႂ်ႈလႆႈႁဵတ်းၵႂၢမ်းယွင်ႈယေႃးထေႃးပၼႃႇ ထႃႇဝရႃႉၽြႃး၊ ဢေႃႈ။
ယွင်ႈယေႃးၵျေးၸူး ထႃႇဝရႃႉၽြႃး တႃႉ။ ႁဵတ်းပထၼႃႇတီႈၸိုဝ်ႈသဵင်ၸဝ်ႈတႃႉ။ ႁဵတ်းႁႂ်ႈလွင်ႈတၢင်းဢၼ်မၼ်းၸဝ်ႈႁဵတ်းဝႆႉၸိူဝ်းၼၼ်ႉထၢင်ႇသႃးတီႈၵူၼ်းမဵဝ်းတင်းလၢႆတႃႉ။
ႁဵတ်းၵႂၢမ်းယွင်ႈယေႃးထေႃးပၼႃႇတီႈ မၼ်းၸဝ်ႈတႃႉ။ လၢတ်ႈၼႄလွင်ႈတၢင်းဢၼ်မၼ်းၸဝ်ႈ ႁဵတ်းဢၼ်လီဢၢမ်းတင်းသဵင်ႈ တင်းလူင်ၼၼ်ႉတႃႉ။
မီးႁူဝ်ၸႂ်ဢၼ်ၸူမ်းသိူဝ်းၵွပ်ႈပိူဝ်ႈႁဝ်းပဵၼ်ၵူၼ်းမၼ်းၸဝ်ႈတႃႉ။ ႁႂ်ႈၶဝ်ၸိူဝ်းဢၼ်ဝႆႈမၼ်းၸဝ်ႈၼၼ်ႉ သႂၢင်ႇသိူဝ်းတႃႉ။
ၶဝ်ႈၸူးတီႈ ထႃႇဝရႃႉၽြႃး၊ ႁႂ်ႈလႆႈတၢင်းဢၼ် ၸွႆႈထႅမ်လႄႈ၊ ႁဵတ်းဝၢတ်ႈၵူဝ်းၵႂၢႆႇမၼ်းၸဝ်ႈယူႇ သေႇသေႇတႃႉ။
မၼ်းၸဝ်ႈပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းလႄႈ ပိင်းၺၢပ်ႈတြႃးၸဝ်ႈၸိူဝ်းၼၼ်ႉပဵၼ်ပုၼ်ႈၵူၼ်းလေႃးၵီႇၵႃႈမီးဢေႃႈ။
သူဢွၼ်ၵၼ်ၶုၵ်းၸႂ်လႆႈၶႆႈၸႂ်ထူပ်းပတိၺိၺ်ႇတြႃးမၼ်းၸဝ်ႈ၊ ၼုၵ်ႈၵပၢတ်ႈဢၼ်မၼ်းၸဝ်ႈသင်ႇလၢတ်ႈတေႃႇထိုင်ႁွတ်ႈသိုပ်ႇမဵဝ်းၵူၼ်းႁဵင်သိုပ်ႇတႃႉ။
ပတိၺိၺ်ႇၸဝ်ႈဢၼ်ဝႆႉတီႈ ဢႃႇပြႃႇႁၢမ်ႇ၊ ၵတိသဵတ်ႈၸႃႇဢၼ်ဝႆႉၵႃႈတီႈ ဢိၸၢၵ်ႈ၊
ထႃႇဝရႃႉၽြႃး၊ ဝႆႉပတိၺိၺ်ႇတြႃးလူၺ်ႈၵၼ်တင်း ယႃႇၵုပ်ႈ၊ ႁႂ်ႈတႄႇမၼ်ႈၶိူင်ႇယူႇတႃႇသေႇ ဢမ်ႇထၢတ်ႇဢေႃႈ။
မၼ်းၸဝ်ႈလၢတ်ႈလႄႈဝႃႈ၊ “ၵဝ်တၵ်းဢဝ်မိူင်း ၶႃႇၼၼ်ႇ၊ ၼၼ်ႉပၼ်ႁႂ်ႈပဵၼ် ဢမူၺ်ႇဢၼ်သူထိူၵ်ႈၶၢမ်ႇဢဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵူၼ်းၽြႃးပဵၼ်ၸဝ်ႈတင်းလၢႆမီးၵေႇၼႃႇလႄႈ ပဵၼ်ၶႅၵ်ႇဢႃႇၵၼ်ႇတုၵႃႈၼႂ်းမိူင်း ၶႃႇၼၼ်ႇ၊ ဢေႃႈ။
ၶဝ်ၼၼ်ႉ၊လုၵ်ႉသေၵႃႈတီႈမိူင်းၼိုင်ႈလႄႇၵႂႃႇလႄႇမႃးၸူးၵႃႈတီႈမိူင်းၼိုင်ႈ၊ သမ်ႉလုၵ်ႉသေၵႃႈတီႈသိုင်ႇၸိုင်ႈဝၢၼ်းမိူင်းၼိုင်ႈၵႂႃႇၸူးတၢင်ႇမိူင်းယူႇဢေႃႈ။
ၵူၺ်းၵႃႈ၊ၽြႃးပဵၼ်ၸဝ်ႈဢမ်ႇပၼ်ဢၶႂၢင်ႉ ႁႂ်ႈၽူႈလႂ်လႆႈၼိၵ်ႈၸၢၵ်ႈငႅၼ်းသႄးၶဝ်လႄႈ မၼ်းၸဝ်ႈယင်းသုင်းမႃႉတီႈၶုၼ်ႁေႃၶမ်း တင်းလၢႆလႄႈဝႃႈ၊
“ယႃႇပေႁဵတ်းၽေးသႂ်ႇတီႈၶႃႈၵဝ်ၸိူဝ်းဢၼ်ၵဝ်လိူၵ်ႈဢဝ်ဝႆႉၼႆႉ၊ ယႃႇပေတိူဝ်ႉပေထုၵ်ႇပရေႃးၽႅတ်ႈ ၵဝ်တင်းလၢႆ” ဝႃႈၼင်ႇၼႆဢေႃႈ။
လိၼ်မိူင်းတင်းသဵင်ႈတင်းမူတ်း႟။ ႁဵတ်းၵႂၢမ်း တီႈ ထႃႇဝရႃႉၽြႃး၊ တႃႉ။ ပိုၼ်ၽၢဝ်ႇသဵင်ၶၢဝ်ႇဢၼ်မၼ်းၸဝ်ႈၵႄႇၶျွတ်ႈႁဝ်းၼၼ်ႉယူႇၵူႈဝၼ်းတႃႉ။
မွၵ်ႇလၢတ်ႈသဵင်ၶၢဝ်ႇမုၼ်ၽုင်းၸဝ်ႈတီႈ ၵူၼ်းၵူႈမဵဝ်းဢိၵ်ႇတင်း တၢင်းႁဵတ်းၸဝ်ႈဢၼ်ယႂ်ႇမျၢတ်ႈၼၼ်ႉတီႈ ၵူၼ်းတင်းလၢႆတႃႉ။
လွင်ႈမၼ်းၸမ်ႉ၊ ထႃႇဝရႃႉၽြႃး၊ ယႂ်ႇမျၢတ်ႈလႄႈထိူၵ်ႈလီယုၵ်ႉယွင်ႈ၊ယွင်ႈယေႃးလႄႈ ပဵၼ်ၸဝ်ႈဢၼ်ထိူၵ်ႈလီရူဝ်ႇသေႇၵူဝ်ယမ် လိူဝ်သေၽြႃးတင်းလၢႆဢေႃႈ။
ၽြႃးၵူၼ်းတၢင်ႇၸိူဝ်ႉတၢင်ႇမဵဝ်းတင်းလၢႆၼၼ်ႉပဵၼ်ႁုၼ်ႇႁၢင်ႈသၢင်းထုၵူၺ်းလႄႈ၊ ထႃႇဝရႃႉၽြႃး၊ ၸမ်ႉ၊ၽၢၼ်ႇသၢင်းႁဵတ်းပဵၼ်ၽႃႉၵၢင်ႁၢဝ်ဢေႃႈ။
မုၼ်ၽုင်းတင်းဢႃႇၼုၽေႃႇလွမ်ႉႁွပ်ႈ မၼ်းၸဝ်ႈဝႆႉလႄႈ တၼ်းၶူဝ်းတင်းတၢင်းဢၼ်သိူဝ်းပျေႃႇမီးတဵမ်ၵျွင်းပိၵ်ႈမၢၼ်ႇမၼ်းၸဝ်ႈဢေႃႈ။
ၵူၼ်းလေႃးၵီႇတင်းသဵင်ႈၶဝ်႟။ ယွင်ႈယေႃး ထႃႇဝရႃႉၽြႃး၊ တႃႉ။ ယွင်ႈယေႃးမုၼ်ၽုင်းဢိၵ်ႇတင်းႁႅင်းတၼ်းၶူဝ်းမၼ်းၸဝ်ႈတႃႉ။
ယွင်ႈယေႃးၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ဢၼ်မီးမုၼ်ၽုင်းၼၼ်ႉလႄႈ ဢဝ်ၶိူင်ႈတၢင်းလူႇတင်းလၢႆၶဝ်ႈၸူးတီႈၽၢႆႇၼႃႈမၼ်းၸဝ်ႈတႃႉ။ ဢွၼ်ၵၼ်ၶုပ်ႉမူပ်ႇဝႆႈ ထႃႇဝရႃႉၽြႃး၊ ၼႂ်းမိူဝ်ႈဢၼ်မၼ်းၸဝ်ႈထၢင်ႇသႃးမႃးၼႂ်းတၢင်းဢၼ်မူတ်းၸၢင်ႇၸဝ်ႈၼၼ်ႉတႃႉ။
လိၼ်မိူင်းတင်းသဵင်ႈ႟။ ၵူဝ်ႁႄသၼ်ႇသၢႆၽၢႆႇၼႃႈမၼ်းၸဝ်ႈတႃႉ။ လွင်ႈမၼ်းၸမ်ႉ၊လေႃးၵထၢတ်ႈတႄႇယူႇမၼ်ႈမၼ်ႈၶိူင်ႇၶိူင်ႇ၊ ထၢၼ်ႈပေႃးဢမ်ႇၼိုင်ဢမ်ႇၶွၼ်းလႆႈဢေႃႈ။
ၵၢင်ႁၢဝ်တင်းလိၼ်မိူင်း႟။ မီးတၢင်းဢၼ် ၸူမ်းသိူဝ်းတႃႉ။ မွၵ်ႇလၢတ်ႈလွင်ႈဢၼ် ထႃႇဝရႃႉၽြႃး၊ ပဵၼ်ၶုၼ်ႁေႃၶမ်းၼၼ်ႉတီႈၵူၼ်းမဵဝ်း တင်းလၢႆတႃႉ။
ၼမ်ႉပၢင်ႇလၢႆႇဢိၵ်ႇတင်းၵႃႈဢၼ်ယူႇၵႃႈၼႂ်းမၼ်း႟။ ႁဵတ်းသဵင်ဢၼ်လင်မေႃးတႃႉ။ ပၢင်ႇတူင်ႈၼႃးဢိၵ်ႇတင်းၵႃႈဢၼ်မီးၵႃႈၼႂ်းမၼ်း႟။ ႁႂ်ႈသႂၢင်ႇၸႂ်သိူဝ်းၸႂ်သေၵမ်းလူၺ်ႈ။
တူၼ်ႈမႆႉတူၼ်ႈတွၵ်ႇဢၼ်မီးၼႂ်းထိူၼ်ႇ ၼႂ်းၶိူဝ်းၼၼ်ႉ၊ တၵ်းဢွၼ်ၵၼ်ႁွင်ႉသႅၼ်ႇသႂၢင်ႇသႂၢင်ႇ သိူဝ်းသိူဝ်းတီႈ ထႃႇဝရႃႉၽြႃး၊ ၼႂ်းမိူဝ်ႈဢၼ်မၼ်းၸဝ်ႈမႃးဢုပ်ႉပိူင်ႇ လိၼ်မိူင်းၼၼ်ႉဢေႃႈ။
ဢွၼ်ၵၼ်ယွင်ႈယေႃးၵျေးၸူး ထႃႇဝရႃႉၽြႃး၊ ၵွပ်ႈပိူဝ်ႈဢၼ်မၼ်းၸဝ်ႈလီမျၢတ်ႈလႄႈ တၢင်းႁၵ်ႉၵရုၼႃႇမၼ်းၸဝ်ႈတႄႇယူႇထႃႇဝရႃႉၼၼ်ႉတႃႉ။
ဢွၼ်ၵၼ်လၢတ်ႈလႄႈဝႃႈ၊ “ဢူဝ်း၊ၽြႃးပဵၼ်ၸဝ်ႈဢၼ်ၵႄႇၶျွတ်ႈႁဝ်းၶႃႈၼၼ်ႉတီႈၶႃႈ၊ ၶႅၼ်းတေႃႈၵႄႇသႄႇဢဝ်ၶႃႈၸဝ်ႈႁဝ်းၶဝ် သေၵမ်းလူၺ်ႈ။ ၶႅၼ်းတေႃႈဢဝ်ၶႃႈၸဝ်ႈႁဝ်းၶဝ်ၸုတုမ်ၵၼ်လႄႈ၊ ၵႄႇၼုၵ်ႈဢဝ်ဢွၵ်ႇသေၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်း၊ ႁႂ်ႈၶႃႈၸဝ်ႈႁဝ်းၶဝ်လႆႈယွင်ႈယေႃး ၵျေးၸူးၸဝ်ႈယူႇ၊ ဢိၵ်ႇတင်းလႆႈယွင်ႈယေႃးၼႃႇမႃႉၸိုဝ်ႈသဵင်မူတ်းၸၢင်ႇၸဝ်ႈႁဝ်းယူႇသေၵမ်းလူၺ်ႈ၊” ဝႃႈၼင်ႇၼႆတႃႉ။
ယွင်ႈယေႃး ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ၼၼ်ႉတီႈၶႃႈဢေႃႈ။ ယွင်ႈယေႃးမၼ်းၸဝ်ႈယူႇၵူႈၵမ်ႇၽႃႇသိုပ်ႇသိုပ်ႇတၢမ်တၢမ်တီႈၶႃႈဢေႃႈ။ မိူဝ်ႈၼၼ်ႉ၊ၵူၼ်းၵႃႈမီးတင်းသဵင်ႈတင်းလူင်ဢွၼ်ၵၼ်ဝႃႈ၊ “ဢႃမိၼ်ႈ” ဝႃႈၼင်ႇၼႆလႄႈယွင်ႈယေႃး ထႃႇဝရႃႉၽြႃး၊ ဢေႃႈ။
ၶုၼ်ႁေႃၶမ်း တႃႇဝိတ်ႈ၊ ၶၢၼ်း ဢႃႇသပ်ႉ၊ တင်းပီႈၼွင်ႉမၼ်းမဵဝ်း လေႇဝိ၊ တင်းလၢႆႁႂ်ႈလႆႈထၢမ်းႁဵတ်းၼႃႈၵၢၼ်ဢၼ်ႁဵတ်းဝၢတ်ႈၵူဝ်းၵႂၢႆႇၵႃႈတီႈထႃႇၼႃႉဢၼ်ဝႆႉတိူၵ်ႈပတိၺိၺ်ႇၸဝ်ႈၼၼ်ႉၵူႈဝၼ်းၵူႈဝၼ်းဢေႃႈ။-
ဢူဝ်းပိတ်ႉဢေႇတုမ်ႇ၊ လုၵ်ႈၸၢႆး ယေႇတုႀုၼ်ႇ၊ တင်းၵူၼ်းၶိူဝ်းႁိူၼ်းမၼ်းႁူၵ်းသိပ်းပႅတ်ႇၵေႃႉ၊လႆႈပဵၼ်ၵေႃႉၵမ်ႉၵႅမ်ၶဝ်ၼၼ်ႉဢေႃႈ။ ႁေႃးသႃႉ၊ တင်း ဢူဝ်းပိတ်ႉဢေႇတုမ်ႇ၊ သမ်ႉလႆႈပႂ်ႉၽၵ်းတူဢၼ်မီးၵႃႈတီႈၽၢႆႇၼႃႈတိူၵ်ႈတႃႇၸဝ်ႈၼၼ်ႉဢေႃႈ။
ယဵၸ်ႈပရေႃးႁဵၵ်ႈ ၸႃႇတုၵ်ႉ၊ ဢိၵ်ႇတင်းပီႈၼွင်ႉမၼ်းယဵၸ်ႈပရေႃးႁဵၵ်ႈၸိူဝ်းၼၼ်ႉသမ်ႉလႆႈထၢမ်းႁဵတ်းၼႃႈၵၢၼ်ဢၼ်ႁဵတ်းဝၢတ်ႈၵူဝ်းၵႂၢႆႇ ထႃႇဝရႃႉၽြႃး၊ ၵႃႈၼႂ်းထႃႇၼႃႉတီႈဢၼ်ႁဵတ်းဝၢတ်ႈၼႂ်းဝဵင်း ၵိပွင်ႇ၊ ဢေႃႈ။-
ၶဝ်လႆႈႁဵတ်းတၢင်းလူႇဢၼ်တုတ်ႇၽႆးၵႃႈၼိူဝ်ၶဵင်ႇတၢင်းလူႇဢၼ်မႅၼ်ႈၸွမ်းၵႃႈၼင်ႇဢၼ်တႅမ်ႈဝႆႉၼႂ်းတြႃးဢၼ် ထႃႇဝရႃႉၽြႃး၊ ပိင်းၺၢပ်ႈဝႆႉတီႈၵူၼ်းမဵဝ်း ဢိသရေး၊ ၼၼ်ႉၶိင်ႇၵၢင်ၼႂ်ပွၵ်ႈၼိုင်ႈ၊ၶိင်ႇႁူဝ်ၶမ်ႈပွၵ်ႈၼိုင်ႈဢေႃႈ။-
ႁေႇမၼ်ႇ၊ တင်း ယေႇတုႀုၼ်ႇ၊ လႆႈမီးယူႇလူၺ်ႈၵၼ်တင်းၶဝ်ၸိူဝ်းၼၼ်ႉႁူမ်ႈလူၺ်ႈၵၼ်တင်းတၢင်ႇၵေႃႉတၢင်ႇၵူၼ်းၸိူဝ်းဢၼ်လိူၵ်ႈဝႆႉႁႂ်ႈႁဵတ်းၵႂၢမ်းယွင်ႈယေႃး ထႃႇဝရႃႉၽြႃး၊ ပိူဝ်ႈဢၼ်မႅတ်ႈတႃႇမၼ်းၸဝ်ႈတႄႇယူႇၼိၵ်ႈၸႃႉထႃႇဝရႃႉၼၼ်ႉဢေႃႈ။-
ႁေႇမၼ်ႇ၊ တင်း ယေႇတုႀုၼ်ႇ၊ ၼၼ်ႉယင်းလႆႈယိပ်းၵမ်ၸႃႉၸဵမ်ၼႄးၶရႃႇလႂ်၊တင်းသႅင်ႇလႂ်၊တင်းၶိူင်ႈတူႇရိယႃႇတၢင်ႇၸိူဝ်ႉတၢင်ႇဢၼ်တင်းလၢႆၸိူဝ်းဢၼ်ပဝ်ႇႁႆႇ၊ၼႂ်းမိူဝ်ႈဢၼ်ႁဵတ်းၵႂၢမ်းယွင်ႈယေႃးၼၼ်ႉဢေႃႈ။ ၵူၼ်းၶိူဝ်းႁိူၼ်း ယေႇတုႀုၼ်ႇ၊ ၸိူဝ်းၼၼ်ႉလႆႈပႂ်ႉၽၵ်းတူဢေႃႈ။
လိုၼ်းၼၼ်ႉ၊ၵူၼ်းတင်းသဵင်ႈတင်းမူတ်းဢွၼ်ၵၼ်မိူဝ်းၵႂႃႇၸူးၵႃႈတီႈႁိူၼ်းၽႂ်ႁိူၼ်းမၼ်းသေလႄႈ၊ တႃႇဝိတ်ႈ၊ ၵေႃႈမိူဝ်းၵႂႃႇႁႂ်ႈလႆႈယူႇတီႈႁၢင်ႈတီႈႁေႃႁူမ်ႈလူၺ်ႈၵၼ်တင်းၵူၼ်းႁၢင်ႈၵူၼ်းႁေႃတင်းလၢႆဢေႃႈ။
ၶုၼ်ႁေႃၶမ်း တႃႇဝိတ်ႈ၊ ၼၼ်ႉမိူဝ်ႈဢၼ်လႆႈယူႇၼႂ်းႁေႃၸဝ်ႈၼိမ်ၼိမ်လီလီၼၼ်ႉ၊မီးဝၼ်းၼိုင်ႈမၼ်းၸႂ်ႉႁွင်ႉဢဝ်ပရေႃးၽႅတ်ႈ ၼႃႇႀၼ်ႇ၊ မႃးလႄႈလၢတ်ႈဝႃႈ၊ “တေႃႈလဵဝ်ၼႆႉၵဝ်လႆႈယူႇၼႂ်းႁၢင်ႈၼႂ်းႁေႃမႆႉဢႃႇရိတ်ႉဢေႃႈ။ တိူၵ်ႈပတိၺိၺ်ႇ ထႃႇဝရႃႉၽြႃး၊ ၸမ်ႉ၊လႆႈမီးယူႇၼႂ်းသုမ်ႉၼႂ်းထဵင်ၵူၺ်းဢေႃႈ၊” ဝႃႈၼင်ႇၼႆဢေႃႈ။
ၼႃႇႀၼ်ႇ၊ လဝ်ႈလၢတ်ႈလႄႈဝႃႈ၊ “ႁဵတ်းၸွမ်းဢလူဝ်ႇၵၢင်ၸႂ်ၸဝ်ႈၵႃႈမီးၼၼ်ႉတႃႉ။ လွင်ႈမၼ်းၸမ်ႉ၊ၽြႃးပဵၼ်ၸဝ်ႈမီးယူႇလူၺ်ႈၵၼ်တင်းၸဝ်ႈႁဝ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၼႂ်းဝႃႈၼၼ်သေၵေႃႈ၊ၼႂ်းၶိုၼ်းၼၼ်ႉၽြႃးပဵၼ်ၸဝ်ႈမီးဢမိင်ႉတီႈ ၼႃႇႀၼ်ႇ၊ လႄႈဝႃႈ၊-
“ၵႂႃႇလႄႈလၢတ်ႈတီႈၶႃႈၵဝ် တႃႇဝိတ်ႈ၊ လွင်ႈဢၼ်ၵဝ်မီးဢမိင်ႉတီႈမၼ်းလႄႈဝႃႈ၊ ‘မႂ်းပဵၼ်ၵေႃႉဢၼ်တၵ်းတႄႇႁဵတ်းၵျွင်းပိၵ်ႈမၢၼ်ႇၸဝ်ႈပုၼ်ႈၵဝ်ဢမ်ႇၸႂ်ႈ။-
တႄႇဢဝ်ၸဵမ်မိူဝ်ႈဢၼ်ၵဝ်ၵႄႇၼုၵ်ႈဢဝ်ၵူၼ်းမဵဝ်း ဢိသရေး၊ တင်းလၢႆ၊ဢွၵ်ႇမိူင်း ဢေးၵျိပ်ႉ၊ မႃးတေႃႇထိုင်ႁွတ်ႈမိူဝ်ႈလဵဝ်ၼႆႉၼၼ်ႉၵဝ်ဢမ်ႇတွၼ်ႉလႆႈယူႇၵႃႈၼႂ်းၵျွင်းပိၵ်ႈမၢၼ်ႇသေပွၵ်ႈ။ ၵူၺ်းလႆႈယူႇၵႃႈၼႂ်းသုမ်ႉၼႂ်းထဵင်မႃးလႄႈၶၢႆႉတီႈၼိုင်ႈၵႂႃႇတီႈၼိုင်ႈယူႇဢေႃႈ။-
ၼႂ်းၸူဝ်ႈၶၢဝ်းဢၼ်ၵဝ်လႄႇလဵပ်ႈၵႂႃႇမႃးလူၺ်ႈၵၼ်တင်းၵူၼ်းမဵဝ်း ဢိသရေး၊ တင်းလၢႆၼၼ်ႉၵဝ်ဢမ်ႇတွၼ်ႉထၢမ်တီႈၵူၼ်းလူင်ဢၼ်ၵဝ်ၶၢၼ်းဝႆႉၸိူဝ်းၼၼ်ႉသေၵေႃႉသေၵူၼ်းလႄႈဝႃႈ၊ “ႁဵတ်းသင်လႄႈမႂ်းဢမ်ႇႁဵတ်းႁိူၼ်းမႆႉဢႃႇရိတ်ႉပုၼ်ႈၵဝ်ၼင်ႇႁိုဝ်၊” ဝႃႈၼင်ႇၼႆၼၼ်ႉသေပွၵ်ႈ။’
“ၵွပ်ႈပိူဝ်ႈလွင်ႈတၢင်းၸိူဝ်ႉၼင်ႇၼႆလႄႈမႂ်းသင်ႇလၢတ်ႈတီႈၶႃႈၵဝ် တႃႇဝိတ်ႈ၊ လွင်ႈဢၼ်ၵဝ်၊ ထႃႇဝရႃႉၽြႃး၊ ၸဝ်ႈဢၼၼ်ႇတႃႉတၼ်းၶူဝ်း၊မီးဢမိင်ႉတီႈမၼ်းလႄႈဝႃႈ၊ ‘ၵဝ်ဢဝ်မႂ်းဢွၵ်ႇသေၵႃႈတီႈတၢင်းဢၼ် လဵင်ႉထိင်းသူဝ်းၵႃႈၼႂ်းပၢင်ႇတူင်ႈၼႃးမႃးလႄႈၶၢၼ်းမႂ်းဝႆႉၼႂ်းဢရႃႇၶုၼ်ဢၼ်ဢုပ်ႉပိူင်ႇၵူၼ်းၵဝ်မဵဝ်း ဢိသရေး၊ တင်းလၢႆၼႆႉယဝ်ႉ။-
ၵဝ်လႆႈမီးယူႇလူၺ်ႈၵၼ်တင်းမႂ်းၵႃႈတီႈဢၼ်မႂ်းၵႂႃႇၼၼ်ႉလႄႈပႄႇၽဵဝ်ႈပႅတ်ႈရၢၼ်ႇသူႇမႂ်းၵႃႈမီးသေၵႃႈတီႈၽၢႆႇၼႃႈမႂ်းသေယဝ်ႉ၊ႁဵတ်းႁႂ်ႈၸိုဝ်ႈသဵင်မႂ်းယႂ်ႇမိူၼ်ၸိူဝ်ႉၼင်ႇၸိုဝ်ႈသဵင်ၵူၼ်းယႂ်ႇၵူၼ်းလူင်ၼႂ်းၵူၼ်းလေႃးၵီႇတင်းလၢႆၼၼ်ႉယဝ်ႉ။-
ၵဝ်တၵ်းပၼ်ဢမူၺ်ႇလိၼ်ပုၼ်ႈၵူၼ်းၵဝ်မဵဝ်း ဢိသရေး၊ တင်းလၢႆတၵ်းယူႇၼၼ်ႉလႄႈတၵ်းပူၵ်းတင်ႈၶဝ်ႁႂ်ႈၶဝ်မီးထႃႇၼႃႉတီႈယူႇပုၼ်ႈတူဝ်ၸဝ်ႈၵဝ်ႇသေယဝ်ႉ၊ၵမ်းလိုၼ်းဢမ်ႇလႆႈမီးၵေႃႉယႃႉၵေႃႉၵဝ်းၶဝ်ၼၼ်ႉဢေႃႈ။ ၵူၼ်းႁၢႆႉၵူၼ်းမိူၵ်ႈတၵ်းဢမ်ႇလႆႈၼိၵ်ႈၸၢၵ်ႈၶဝ်ထႅင်ႈမိူၼ်ၸိူဝ်ႉၼင်ႇဢၼ်ယႃႉၵဝ်းပူၼ်ႉမႃးမိူဝ်ႈဢွၼ်တၢင်းၼၼ်ႉ၊-
ဢိၵ်ႇတင်းယႃႉၵဝ်းၸဵမ်မိူဝ်ႈၶိင်ႇၵႃႇလႃႉဢၼ်ၵဝ်ၶၢၼ်းၵူၼ်းလူင်ဢၼ်ၸီႇယၢင်ႇတြႃးၸိူဝ်းၼၼ်ႉဝႆႉ၊ၵႃႈၼိူဝ်ၵူၼ်းၵဝ်မဵဝ်း ဢိသရေး၊ တင်းလၢႆၼၼ်ႉလႃးလႃး။ ၵဝ်သမ်ႉတၵ်းၶျႃးရၢၼ်ႇသူႇမႂ်းၵႃႈမီးတူၵ်းတီႈတႅမ်ႇလူးၵွၼ်ႇဢေႃႈ။ “လိူဝ်သေၼၼ်ႉဢမ်ႇၵႃး၊ၵဝ်မီးဢမိင်ႉတီႈမႂ်းလႄႈဝႃႈ၊ ‘ ထႃႇဝရႃႉၽြႃး၊ တၵ်းႁႂ်ႈမဵဝ်းၸိူဝ်ႉၶိူဝ်းၵူၼ်းမႂ်းတႄႇပဵၼ်ဢေႃႈ။-
မိူဝ်ႈဢၼ်ဢသၢၵ်ႈမႂ်းတဵမ်လႄႈမႂ်းတၵ်းၵႂႃႇႁႂ်ႈလႆႈယူႇလူၺ်ႈၵၼ်တင်းပူႇမွၼ်ႇမႂ်းၼၼ်ႉၸိုင်၊ၵဝ်တၵ်းယုၵ်ႉယွင်ႈၸိူဝ်ႉၶိူဝ်းမႂ်းဢၼ်ပဵၼ်ၵႃႈၼႂ်းလုၵ်ႈၸၢႆးမႂ်းတင်းလၢႆၼၼ်ႉၵေႃႉၼိုင်ႈ၊ပုတ်ႈႁၢင်ႈတၢင်တူဝ်မႂ်းလႄႈႁႂ်ႈသိုင်ႇၸိုင်ႈဝၢၼ်ႈမိူင်းမၼ်းတႄႇမၼ်ႈဢေႃႈ။-
မၼ်းတၵ်းပဵၼ်ၵေႃႉဢၼ်တႄႇႁဵတ်းၵျွင်းပိၵ်ႈမၢၼ်ႇပုၼ်ႈၵဝ်လႄႈၵဝ်တၵ်းႁႂ်ႈရႃႇၸႃႉပလၢင်ႇမၼ်းတႄႇယူႇသိုပ်ႇသိုပ်ႇတၢမ်တၢမ်ဢေႃႈ။-
ၵဝ်တၵ်းပဵၼ်ပေႃႈမၼ်းလႄႈမၼ်းၵေႃႈတၵ်းပဵၼ်လုၵ်ႈၸၢႆးၵဝ်ဢေႃႈ။ ၵဝ်တၵ်းဢမ်ႇၼုၵ်ႈဢမ်ႇထွၼ်တၢင်းဢၼ်ၵဝ်ၸွႆႈထႅမ်မၼ်းၼၼ်ႉ၊မိူၼ်ၸိူဝ်ႉၼင်ႇဢၼ်ၵဝ်ၼုၵ်ႈထွၼ်တီႈ သေႃးလု၊ ပုၼ်ႈဢၼ်မႂ်းတၵ်းပဵၼ်ၶုၼ်ႁေႃၶမ်းၼၼ်ႉ။-
ၵဝ်တၵ်းၶၢၼ်းမၼ်းဝႆႉ၊ႁႂ်ႈဢုပ်ႉထိင်းၵႃႈၼိူဝ်ၵူၼ်းၵဝ်တင်းလၢႆ၊ဢိၵ်ႇတင်းၵႃႈၼိူဝ်သိုင်ႇၸိုင်ႈဝၢၼ်ႈမိူင်းၵဝ်တႃႇသေႇဢမ်ႇထၢတ်ႇဢေႃႈ။ ရႃႇၸႃႉပလၢင်ႇမၼ်းၵေႃႈတၵ်းလႆႈတႄႇယူႇတႃႇသေႇဢမ်ႇသုတ်းဢမ်ႇသဵင်ႈဢေႃႈ’ ဝႃႈၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။
ၼင်ႇၼၼ်လႄႈ ၼႃႇႀၼ်ႇ၊ ဢဝ်ၵႂၢမ်းပျႃႇတိၵ်ႈၸဝ်ႈၵႃႈမီးၼႆႉဢိၵ်ႇတင်းၼိမိၵ်ႈတင်းသဵင်ႈတင်းလူင်ၶိုၼ်းမွၵ်ႇလၢတ်ႈတီႈ တႃႇဝိတ်ႈ၊ ဢေႃႈ။
မိူဝ်ႈၼၼ်ႉ၊ၶုၼ်ႁေႃၶမ်း တႃႇဝိတ်ႈ၊ ၶဝ်ႈၵႃႈၼႂ်းသုမ်ႉထဵင်တီႈ ထႃႇဝရႃႉၽြႃး၊ ၵိင်းဝၢပ်ႈလႄႈၼင်ႈသေယဝ်ႉ၊သူးတွင်းလႄႈဝႃႈ၊ “ ထႃႇဝရႃႉၽြႃး၊ ၽြႃးပဵၼ်ၸဝ်ႈတီႈၶႃႈ။ ၶႃႈၸဝ်ႈႁဝ်းဢိၵ်ႇလူၺ်ႈၵူၼ်းႁိူၼ်းၵူၼ်းယေးၶႃႈၸဝ်ႈတင်းလၢႆ၊ဢမ်ႇၵိုင်ႇဢမ်ႇထိူၵ်ႈၶၢမ်ႇဢဝ်တၢင်းလီဢၼ်ၸဝ်ႈႁဝ်းႁဵတ်းတီႈၶႃႈၸဝ်ႈႁဝ်းယဝ်ႉၸိူဝ်းၼၼ်ႉတီႈၶႃႈ။-
ၵူၺ်းၵႃႈ၊ၽြႃးပဵၼ်ၸဝ်ႈတီႈၶႃႈ၊ၵႃႈတီႈၽၢႆႇၼႃႈၸဝ်ႈႁဝ်းၸိုင်၊ၵျေးၸူးၸိူဝ်းၼၼ်ႉ၊ပဵၼ်ၸိူဝ်ႉၼင်ႇဢၼ်ယင်းလဵၵ်ႉယင်းၵေႇယူႇလႄႈ၊ၸဝ်ႈႁဝ်းယင်းတိူင်ႇလၢတ်ႈၵတိၸဝ်ႈ လူၺ်ႈလွင်ႈမဵဝ်းၸိူဝ်ႉၶိူဝ်းၶႃႈၸဝ်ႈႁဝ်း၊ပုၼ်ႈၶိင်ႇၵႃႇလႃႉၵမ်းလိုၼ်းၼၼ်ႉတီႈၶႃႈလူင်ပႄႇ။ ထႃႇဝရႃႉၽြႃး၊ၽြႃးပဵၼ်ၸဝ်ႈ၊ တီႈၶႃႈ။ ၸဝ်ႈႁဝ်းသမ်ႉယင်းမၢတ်ႈၶႃႈၸဝ်ႈႁဝ်းပဵၼ်ၸိူဝ်ႉၼင်ႇၵေႃႉဢၼ်မုၼ်ၽုင်းယႂ်ႇၼႃႇၼၼ်ႉတီႈၶႃႈလူင်ပႄႇ။-
တႃႇဝိတ်ႈ၊ တၵ်းလႆႈထၢပ်ႈထႅင်ႈလႄႈလဝ်ႈလၢတ်ႈလူၺ်ႈလွင်ႈမုၼ်ၽုင်းဢၼ်မီးၵႃႈတီႈၶႃႈၸဝ်ႈႁဝ်းၼႆႉၼၼ်ႉၸိူဝ်ႉၼင်ႇႁိုဝ်လူးၵွၼ်ႇတီႈၶႃႈ။ ၸဝ်ႈႁဝ်းႁုၸၵ်းၶႃႈၸဝ်ႈႁဝ်းလီလီလႄႈ၊ယင်းယုၵ်ႉယွင်ႈၶႃႈၸဝ်ႈႁဝ်းတီႈၶႃႈယဝ်ႉ။-
ထႃႇဝရႃႉၽြႃး၊ တီႈၶႃႈၸွမ်းၵႃႈၼင်ႇဢၼ်ဢလူဝ်ႇၵၢင်ၸႂ်ၸဝ်ႈႁဝ်းမီး၊ဢိၵ်ႇတင်းၸွမ်းၼင်ႇဢၼ်ၸဝ်ႈႁဝ်းဢဵၼ်းဢၢၼ်းဝႆႉၼၼ်ႉ၊ၸဝ်ႈႁဝ်းႁဵတ်းလွင်ႈတၢင်းဢၼ်ယႂ်ႇမျၢတ်ႈၼႃႇၼႆႉတီႈၶႃႈၸဝ်ႈလႄႈ၊ႁႂ်ႈလွင်ႈတၢင်းဢၼ်ၶႃႈၸဝ်ႈႁဝ်းတၵ်းပဵၼ်ၼႂ်းဝၼ်းလိုၼ်းမိူဝ်းၼႃႈၼၼ်ႉထၢင်ႇသႃးတီႈၶႃႈယဝ်ႉ။-
ထႃႇဝရႃႉၽြႃး၊ တီႈၶႃႈ၊ ထႃႇဝရႃႉၽြႃး၊ တီႈၶႃႈ။ ၸဝ်ႈဢၼ်မိူၼ်ၸိူဝ်ႉၼင်ႇၸဝ်ႈႁဝ်းၼၼ်ႉဢမ်ႇမီးသေသူႇသေပႃးလႄႈ၊ၶႃႈၸဝ်ႈႁဝ်းၶဝ်ႁုဝႃႈ၊လိူဝ်သေၸဝ်ႈႁဝ်းၼၼ်ႉဢမ်ႇမီးၽြႃးတၢင်ႇသူႇတၢင်းပႃးတီႈၶႃႈ။-
ၵႃႈၼႂ်းလေႃးၵႃႉၼႆႉမဵဝ်းၵူၼ်းဢၼ်မိူၼ်ၸိူဝ်ႉၼင်ႇၵူၼ်းမဵဝ်း ဢိသရေး၊ မဵဝ်းဢၼ်ၸဝ်ႈႁဝ်းၵႄႇၼုၵ်ႈဢဝ်ဢွၵ်ႇသေၵႃႈၼႂ်းတၢင်းဢၼ်ၶၢမ်ႇႁဵတ်းၶႃႈပိူၼ်ႈလႄႈႁႂ်ႈပဵၼ်မဵဝ်းၵူၼ်းၸဝ်ႈႁဝ်းၼႆႉၼၼ်ႉဢမ်ႇမီးသေၸိူဝ်ႉသေမဵဝ်းတီႈၶႃႈ။ လွင်ႈတၢင်းဢၼ်ၸဝ်ႈႁဝ်းႁဵတ်းဢၼ်ယႂ်ႇမျၢတ်ႈလီဢၢမ်းၼႃႇၸိူဝ်းၼၼ်ႉၶၢဝ်ႇမၼ်းၽႄႈၸွတ်ႇၵႂႃႇၵႃႈၼိူဝ်လိၼ်မိူင်းတီႈၶႃႈဢေႃႈ။ ၸဝ်ႈႁဝ်းၵႄႇၼုၵ်ႈဢဝ်ၵူၼ်းၸဝ်ႈႁဝ်းတင်းလၢႆဢွၵ်ႇမိူင်း ဢေးၵျိပ်ႉ၊ မႃးလႄႈႁေႃႈပႅတ်ႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းတင်းလၢႆ၊ဢွၵ်ႇပႅတ်ႈသေသိုဝ်ႈၼႃႈတႂ်ႈတႃၵူၼ်းၸဝ်ႈႁဝ်းၸိူဝ်းၼၼ်ႉတီႈၶႃႈဢေႃႈ။-
ၸဝ်ႈႁဝ်းႁဵတ်းႁႂ်ႈၵူၼ်းမဵဝ်း ဢိသရေး၊ ပဵၼ်ၵူၼ်းၸဝ်ႈႁဝ်းမႃးသေလႄႈ၊ ထႃႇဝရႃႉၽြႃး၊ တီႈၶႃႈ၊ၸဝ်ႈႁဝ်းသမ်ႉပဵၼ်ၽြႃးပဵၼ်ၸဝ်ႈၶဝ်တီႈၶႃႈဢေႃႈ။
“မိူဝ်ႈလဵဝ်ၼႆႉၸိုင်၊ ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈႁႂ်ႈၵတိၸဝ်ႈႁဝ်းဢၼ်ဝႆႉတီႈၶႃႈၸဝ်ႈႁဝ်း၊ဢိၵ်ႇတင်းတီႈမဵဝ်းၸိူဝ်ႉၶိူဝ်းၶႃႈၸဝ်ႈႁဝ်းၸိူဝ်းၼၼ်ႉပျေႉၸုမ်ႇဝႆႉတႃႇသေႇလႄႈ၊ႁႂ်ႈၵႂၢမ်းၸဝ်ႈႁဝ်းဢၼ်ဝႃႈ၊တၵ်းတေႁဵတ်းၼၼ်ႉပဵၼ်ၸွမ်းၵူႈၶေႃႈၵူႈၵမ်းသေၵမ်းလူၺ်ႈတီႈၶႃႈ။-
ႁႂ်ႈၼႃႇမႃႉၸိုဝ်ႈသဵင်ၸဝ်ႈႁဝ်းယႂ်ႇၼႃႇလႄႈႁႂ်ႈၵူၼ်းတင်းလၢႆယုၵ်ႉယွင်ႈၸဝ်ႈႁဝ်းလႄႈဝႃႈ၊ ‘ၸဝ်ႈဢၼၼ်ႇတႃႉတၼ်းၶူဝ်း၊ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း ၼၼ်ႉပဵၼ်ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ဢေႃႈ၊’ ဝႃႈၼင်ႇၼႆတႃႇသေႇဢမ်ႇထၢတ်ႇသေၵမ်းလူၺ်ႈ။ ၶႅၼ်းတေႃႈပႂ်ႉလူပႂ်ႉထိင်းရႃႇၸႃႉပလၢင်ႇၶႃႈၸဝ်ႈတႄႇယူႇတႃႇသေႇသေၵမ်းလူၺ်ႈ။-
ၶႃႈၸဝ်ႈၸႂ်ႁႅင်းယႂ်ႇၼႃႇႁႂ်ႈလႆႈသူးတွင်းၸိူဝ်ႉၼင်ႇၼႆၵွပ်ႈပိူဝ်ႈဢၼ်ၸဝ်ႈႁဝ်းလႆႈဢဝ်လွင်ႈတၢင်းၸိူဝ်းၼႆႉၼႄပျႃးၵႃႈတီႈၶႃႈၸဝ်ႈႁဝ်းဝႆႉယဝ်ႉ၊ဢိၵ်ႇတင်းၸဝ်ႈႁဝ်းလႆႈလၢတ်ႈဝႆႉ၊လွင်ႈဢၼ်ၸဝ်ႈႁဝ်းဢဝ်မဵဝ်းၸိူဝ်ႉၶိူဝ်းၶႃႈၸဝ်ႈတၢင်ႇပၼ်ႁႂ်ႈပဵၼ်ၶုၼ်ႁေႃၶမ်းၼၼ်ႉတီႈၶႃႈဢေႃႈ။-
ထႃႇဝရႃႉၽြႃး၊ တီႈၶႃႈ၊ၸဝ်ႈႁဝ်းပဵၼ်ၽြႃးပဵၼ်ၸဝ်ႈတီႈၶႃႈဢေႃႈ။ ၸဝ်ႈႁဝ်းဝႆႉၵတိဢၼ်လီဢၢမ်းၼႆႉတီႈၶႃႈၸဝ်ႈတီႈၶႃႈယဝ်ႉ။-
ၶႃႈၸဝ်ႈသူးတွင်းလဝ်ႈယွၼ်းတီႈၸဝ်ႈႁဝ်းႁႂ်ႈပၼ်တၢင်းလီတီႈမဵဝ်းၸိူဝ်ႉၶိူဝ်းၶႃႈၸဝ်ႈႁဝ်းၸိူဝ်းၼႆႉ၊ႁႂ်ႈၶဝ်လႆႈမူၼ်ႈပျေႃႇၼႂ်းၵျေးၸူးတၢင်းလီ ၸဝ်ႈႁဝ်းယူႇသိုပ်ႇသိုပ်ႇတၢမ်တၢမ်တီႈၶႃႈဢေႃႈ။ ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းပၼ်တၢင်းလီတီႈၶဝ်ယဝ်ႉတီႈၶႃႈ။ တၢင်းလီၼၼ်ႉတၵ်းတႄႇယူႇၵႃႈၼိူဝ်ၶဝ်တႃႇသေႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။
လိုၼ်းၼၼ်ႉ၊ဢမ်ႇႁိုင်ဢမ်ႇၼၢၼ်းၶုၼ်ႁေႃၶမ်း တႃႇဝိတ်ႈ၊ သမ်ႉတိုၵ်းပႄႉၵူၼ်း ၽိလိတ်ႉတိ၊ ၶဝ်လႄႈယႃႉပႅတ်ႈၶဝ်ဢေႃႈ။ မၼ်းသိမ်းဢဝ်ဝဵင်း ၵတ်ႉတိ၊ ဢိၵ်ႇတင်းဝၢၼ်ႈၼွၵ်ႈၼႃးပၢင်ႇမၼ်းသေၵႃႈၼႂ်းၶိူဝ်းၵူၼ်း ၽိလိတ်ႉတိ၊ ၶဝ်ဢေႃႈ။
မၼ်းသမ်ႉတိုၵ်းပႄႉၵူၼ်းမဵဝ်း မေႃႇၽႃႉ၊ ၶဝ်လႄႈၶဝ်ၼၼ်ႉလႆႈပဵၼ်ၵူၼ်းဝၢၼ်ႈၵူၼ်းမိူင်းတႂ်ႈမိုဝ်းမၼ်းဢၼ်လႆႈထၢမ်းၶွၼ်ႇတီႈမၼ်းၼၼ်ႉဢေႃႈ။
လိူဝ်သေၼၼ်ႉ၊ တႃႇဝိတ်ႈ၊ တိုၵ်းၶုၼ်ႁေႃၶမ်း ႁႃႇတရေးၸႃႇ၊ မိူင်း ၸေႃႇၽႃႉ၊ ၵႃႈတီႈႁိမ်းဢိူင်ႇ ႁႃႇမတ်ႉ၊ ၵွပ်ႈပိူဝ်ႈဢၼ် ႁႃႇတရေးၸႃႇ၊ ၶိုၼ်ႈမႃးဢၢင်ႈတၵ်းတိုၵ်းဢဝ်ဢိူင်ႇဢၼ်မီးတီႈပွတ်းတၢင်းၼိူဝ်ၼမ်ႉလူင် ဢုၽရတ်ႉ၊ ၼၼ်ႉဢေႃႈ။-
တႃႇဝိတ်ႈ၊ သိမ်းဢဝ်လေႃႉမႃႉမၼ်းႁဵင်ၼိုင်ႈၵူၼ်းသိုၵ်းၶီႇမႃႉၸဵတ်းႁဵင်တင်းၵူၼ်းသိုၵ်းတပ်ႉတိၼ်သွင်မိုၼ်ႇဢေႃႈ။ မၼ်းဢဝ်လေႃႉမႃႉပၢၵ်ႇၼိုင်ႈဝႆႉသေယဝ်ႉ၊ၽၼ်းပႅတ်ႈဢဵၼ်ၼွင်ႈမႃႉလေႃႉတၢင်ႇတူဝ်ၸိူဝ်းၼၼ်ႉတင်းမူတ်းဢေႃႈ။
မိူဝ်ႈဢၼ်ၵူၼ်းမဵဝ်း သီးရီးယႃး၊ ဝဵင်း တမ်ႇမတ်ႉသၵတ်ႉ၊ ပွႆႇၸႂ်ႉတပ်ႉသိုၵ်းမႃးၸွႆႈ ႁႃႇတရေးၸႃႇ၊ ၼၼ်ႉၸိုင်၊ တႃႇဝိတ်ႈ၊ ႁႄႉတိုၵ်းလႄႈဢဝ်ၵူၼ်းၶဝ်တၢႆသွင်မိုၼ်ႇသွင်ႁဵင်ဢေႃႈ။-
မိူဝ်ႈၼၼ်ႉမၼ်းၶျႃးပၢင်တပ်ႉၵႃႈၼႂ်းဢိူင်ႇၶဝ်ၼၼ်ႉလႄႈၶဝ်လႆႈပဵၼ်ၵူၼ်းဝၢၼ်ႈၵူၼ်းမိူင်းတႂ်ႈမိုဝ်းမၼ်းဢၼ်လႆႈထၢမ်းၶွၼ်ႇတီႈမၼ်းၼၼ်ႉဢေႃႈ။ ထႃႇဝရႃႉၽြႃး၊ ၵေႃႈပၼ်ႁႂ်ႈ တႃႇဝိတ်ႈ၊ ဢွင်ႇသိုၵ်းၵႃႈတီႈဢၼ်မၼ်းၶီႇသိုၵ်းၶိုၼ်ႈၵႂႃႇတိုၵ်းၵူႈတီႈၼၼ်ႉဢေႃႈ။-
တႃႇဝိတ်ႈ၊ သိမ်းဢဝ်ၶႅပ်းႁႄႉလၢၵ်ႈၼၢၵ်ႈၶမ်းဢၼ်ၶုၼ်ဢၼ်ပွင်ၵၢၼ်ၶုၼ်ႁေႃၶမ်း ႁႃႇတရေးၸႃႇ၊ ၸိူဝ်းၼၼ်ႉယိပ်းၵမ်ၼၼ်ႉသေယဝ်ႉ၊ဢဝ်မႃးၵႃႈတီႈဝဵင်း ယေႇရုသလႅမ်ႇ၊ ဢေႃႈ။-
ၵႃႈတီႈဝဵင်း တိပႁတ်ႉ၊ တင်းဝဵင်း ၶုၼ်း၊ ဢၼ်ၶုၼ်ႁေႃၶမ်း ႁႃႇတရေးၸႃႇ၊ ပိူင်ႇၼၼ်ႉၵေႃႈ တႃႇဝိတ်ႈ၊ သိမ်းဢဝ်တွင်းလိူင်ၼမ်ၼႃႇလူင်လၢင်ဢေႃႈ။ တွင်းလိူင်ၸိူဝ်းၼၼ်ႉၸိုင်၊ သေႃးလမုၼ်ႇ၊ ဢဝ်ႁဵတ်းထၢင်ၼမ်ႉလႂ်၊ဢဝ်ႁဵတ်းသဝ်လႂ်၊ဢိၵ်ႇတင်းၶိူင်ႈတွင်းလိူင်ၸိူဝ်းဢၼ်ၸႂ်ႉဢၼ်တိုဝ်းၵႃႈတီႈၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။
ၶုၼ်ႁေႃၶမ်း တေႃႇဢိ၊ မိူင်း ႁႃႇမတ်ႉ၊ ငိၼ်းလွင်ႈဢၼ် တႃႇဝိတ်ႈ၊ တိုၵ်းပႄႉတပ်ႉသိုၵ်း ႁႃႇတရေးၸႃႇ၊ တင်းမူတ်းၼၼ်ႉသေယဝ်ႉ၊-
မၼ်းပွႆႇၸႂ်ႉလုၵ်ႈၸၢႆးမၼ်း ႁႃႇတေႃးရမ်ႇ၊ ၵႂႃႇႁႂ်ႈလႆႈတၵ်ႉလၢတ်ႈၶုၼ်ႁေႃၶမ်း တႃႇဝိတ်ႈ၊ ဢိၵ်ႇတင်းႁႂ်ႈလႆႈယုၵ်ႉယွင်ႈ၊ယွင်ႈယေႃးတီႈတၢင်းဢၼ်မၼ်းပႄႉသိုၵ်းၵႃႈၼိူဝ်ၶုၼ်ႁေႃၶမ်း ႁႃႇတရေးၸႃႇ၊ ဢၼ်ယၢမ်ႈလႆႈပဵၼ်သိုၵ်းပဵၼ်သိူဝ်တီႈၵၼ်တင်းမၼ်းၼၼ်ႉဢေႃႈ။ ႁႃႇတေႃးရမ်ႇ၊ ပႃးဢဝ်ၶွင်ၽၢၵ်ႇလၢၵ်ႈသွင်ႇဢၼ်ပဵၼ်ၶိူင်ႈၶူဝ်းၶမ်း၊ၶူဝ်းငိုၼ်းတင်းၶိူင်ႈတွင်းလိူင်တင်းလၢႆ၊သၢၵ်ႈပၼ်တီႈ တႃႇဝိတ်ႈ၊ ဢေႃႈ။-
ၶုၼ်ႁေႃၶမ်း တႃႇဝိတ်ႈ၊ ဢဝ်ၶိူင်ႈၶူဝ်းၸိူဝ်းၼၼ်ႉသၢၵ်ႈၵၢပ်ႈႁႂ်ႈပဵၼ်ၶိူင်ႈဢၼ်ၸႂ်ႉဢၼ်တိုဝ်းၵႃႈၼႂ်းၵျွင်းပိၵ်ႈမၢၼ်ႇၸဝ်ႈႁူမ်ႈလူၺ်ႈၵၼ်တင်းငိုၼ်းၶမ်းဢၼ်မၼ်းသိမ်းဢဝ်လႆႈမႃးတီႈမိူင်း ဢေႇတုမ်ႇ၊ မိူင်း မေႃႇၽႃႉ၊ မိူင်း ဢမ်ႇမုၼ်ႇ၊ မိူင်း ၽိလိတ်ႉတိ၊ တင်းမိူင်း ဢႃႇမလႅၵ်ႉ၊ ၸိူဝ်းဢၼ်မၼ်းတိုၵ်းပႄႉယဝ်ႉၼၼ်ႉဢေႃႈ။
ဢၽိသေး၊ ဢၼ်မႄႈမၼ်းပဵၼ် ၸေႇရုယႃႇ၊ ၼၼ်ႉတိုၵ်းပႄႉၵူၼ်းမဵဝ်း ဢေႇတုမ်ႇ၊ ၵႃႈၼႂ်း ထူင်ႉႁူၺ်ႈၵိူဝ်၊ လႄႈဢဝ်ၶဝ်တၢႆမိုၼ်ႇပႅတ်ႇႁဵင်ၵေႃႉဢေႃႈ။-
မၼ်းတင်ႈတပ်ႉၼမ်ၼႃႇၸွတ်ႇမိူင်း ဢေႇတုမ်ႇ၊ ၵႂႃႇလႄႈၵူၼ်းမိူင်းၸိူဝ်းၼၼ်ႉလႆႈပဵၼ်ၵူၼ်းဝၢၼ်ႈၵူၼ်းမိူင်းတႂ်ႈမိုဝ်း တႃႇဝိတ်ႈ၊ ဢေႃႈ။ ထႃႇဝရႃႉၽြႃး၊ ၵေႃႈပၼ်ႁႂ်ႈ တႃႇဝိတ်ႈ၊ ပႄႉသိုၵ်းၵႃႈတီႈဢၼ်မၼ်းၶီႇသိုၵ်းၶိုၼ်ႈၵႂႃႇတိုၵ်းၵူႈတီႈၼၼ်ႉဢေႃႈ။
တႃႇဝိတ်ႈ၊ ဢုပ်ႉပိူင်ႇၸၢမ်ႇၸႃးမိူင်း ဢိသရေး၊ တင်းမူတ်းလႄႈၸီႇယၢင်ႇတႅပ်းတတ်းတြႃးသိုဝ်ႈသိုဝ်ႈၽဵင်ႇၽဵင်ႇတီႈၵူၼ်းမိူင်းၸဝ်ႈတင်းသဵင်ႈတင်းလူင်ဢေႃႈ။-
ယွႃႇၽႃႉ၊ ဢၼ်မႄႈမၼ်းပဵၼ် ၸေႇရုယႃႇ၊ ၼၼ်ႉပဵၼ်ၸဝ်ႈၵွၼ်းတပ်ႉသိုၵ်းဢေႃႈ။ ယေႇႁူဝ်းသၽတ်ႉ၊ လုၵ်ႈၸၢႆး ဢႁိလုတ်ႉ၊ ပဵၼ်ဢတႂၢင်းဝုၼ်ႇ၊-
ၸႃႇတုၵ်ႉ၊ လုၵ်ႈၸၢႆး ဢႁိတုပ်ႉ၊ တင်း ဢၽိမလႅၵ်ႉ၊ လုၵ်ႈၸၢႆး ဢပျႃႇထႃႇ၊ ၸိူဝ်းၼၼ်ႉ၊ပဵၼ်ယဵၸ်ႈပရေႃးႁဵၵ်ႈ ၸရႃႇယႃႉ၊ ပဵၼ်ၽူႈမၢႆလူင်။-
ပေႇၼႃႇယႃႉ၊ လုၵ်ႈၸၢႆး ယေႃႇယတႃႉ၊ ပဵၼ်ၶုၼ်သိုၵ်းႁၢၼ်ၼႂ်းတပ်ႉဢၼ်ပႂ်ႉဢသၢၵ်ႈ တႃႇဝိတ်ႈ၊ ဢိၵ်ႇတင်းလုၵ်ႈၸၢႆးၶုၼ်ႁေႃၶမ်း တႃႇဝိတ်ႈ၊ တင်းလၢႆ၊လႆႈဢရႃႇဢၼ်သုင်ဢၼ်ယႂ်ႇတႂ်ႈမိုဝ်းၶုၼ်ႁေႃၶမ်းဢေႃႈ။
လိုၼ်းၼၼ်ႉဢမ်ႇႁိုင်ဢမ်ႇၼၢၼ်းၶုၼ်ႁေႃၶမ်း ၼႃႇႁတ်ႉ၊ ၵူၼ်းမဵဝ်း ဢမ်ႇမုၼ်ႇ၊ တၢႆလႄႈလုၵ်ႈၸၢႆးမၼ်း ႁႃႇၼုၼ်ႇ၊ ပုတ်ႈႁၢင်ႈၼင်ႈႁေႃဢေႃႈ။-
ၶုၼ်ႁေႃၶမ်း တႃႇဝိတ်ႈ၊ ဝႃႈ၊ “ၵဝ်တၵ်းၼႄပျႃးမႅတ်ႈတႃႇဢၼ်ႁဵတ်းၵေႃႉသႄႈၵၼ်တင်း ႁႃႇၼုၼ်ႇ၊ မိူၼ်ၸိူဝ်ႉၼင်ႇဢၼ်ပေႃႈၸဝ်ႈမၼ်း ၼႃႇႁတ်ႉ၊ ႁဵတ်းၵေႃႉႁဵတ်းသႄႈၵၼ်တင်းၵဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။ တႃႇဝိတ်ႈ၊ ၵေႃႈပွႆႇၸႂ်ႉသၢၼ်ႇတမၢၼ်ႇတင်းလၢႆ၊ၵႂႃႇႁႂ်ႈလႆႈႁဵတ်းႁႂ်ႈမၼ်းၼိမ်ၸႂ်ယဵၼ်ၸႂ်ၵွပ်ႈလူၺ်ႈပေႃႈမၼ်းတၢႆၼၼ်ႉဢေႃႈ။ မိူဝ်ႈဢၼ်သၢၼ်ႇတမၢၼ်ႇၸိူဝ်းၼၼ်ႉႁွတ်ႈၽႅဝ်မိူင်း ဢမ်ႇမုၼ်ႇ၊ ႁႂ်ႈလႆႈၶဝ်ႈၸူးတီႈ ႁႃႇၼုၼ်ႇ၊ ၼၼ်ႉၸိုင်၊-
မူးမၢတ်ႈၽွင်းမိူင်းမဵဝ်း ဢႃႇမုၼ်ႇ၊ ၸိူဝ်းၼၼ်ႉလဝ်ႈလၢတ်ႈတီႈ ႁႃႇၼုၼ်ႇ၊ လႄႈဝႃႈ၊ “တၢင်းဢၼ် တႃႇဝိတ်ႈ၊ ပွႆႇၸႂ်ႉၶဝ်ၸိူဝ်းဢၼ်မႃးႁဵတ်းႁႂ်ႈၸဝ်ႈႁဝ်းၼိမ်ၸႂ်ယဵၼ်ၸႂ်ၼႆႉ၊ၸွင်ႇၸဝ်ႈႁဝ်းထၢင်ႇဝႃႈ၊ၶဝ်ရူဝ်ႇသေႇၵူဝ်ယမ်ပေႃႈၸဝ်ႈႁဝ်းတီႈၶႃႈႁိုဝ်း၊ဢမ်ႇၸႂ်ႈတီႈၶႃႈၵူၺ်း။ မၼ်းပွႆႇၸႂ်ႉၶဝ်မႃးႁႂ်ႈလူလွမ်တူၺ်းမိူင်းႁဝ်းပုၼ်ႈဢၼ်တၵ်းတိုၵ်းသိမ်းဢဝ်မိူင်းႁဝ်းၵူၺ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ႁႃႇၼုၼ်ႇ၊ ၵေႃႈတိဢဝ်ၵူၼ်း တႃႇဝိတ်ႈ၊ ၸိူဝ်းၼၼ်ႉသေယဝ်ႉ၊ထႃၼူတ်ႇၵၢင်းၶဝ်လႄႈတတ်းၶိုင်ႈၵၢင်ၶူဝ်းၼုင်ႈၶဝ်ၸၢၵ်ႇသိၵ်ႇတေႃႇထိုင်ၵုမ်ႇၵူၼ်ႈၶဝ်ယဝ်ႉၸင်ႇ၊ပွႆႇၶဝ်ၵႂႃႇပႅတ်ႈသေဢေႃႈ။-
ၶဝ်ၸိူဝ်းၼၼ်ႉဢၢႆၼႃႇထၢၼ်ႈပေႃးဢမ်ႇႁတ်းၶိုၼ်းပွၵ်ႈမိူဝ်းဢေႃႈ။ မိူဝ်ႈဢၼ် တႃႇဝိတ်ႈ၊ လႆႈငိၼ်းလွင်ႈတၢင်းၼၼ်ႉၸိုင်၊မၼ်းသင်ႇၵႂၢမ်းၵႂႃႇတီႈၶဝ်၊ႁႂ်ႈၶဝ်ယူႇသဝ်းၵႃႈတီႈဝဵင်း ယေႇရိၶူဝ်း၊ တေႃႇထိုင်ႁွတ်ႈၼူတ်ႇၵၢင်းၶဝ်ၶိုၼ်းယၢဝ်းမႃးၼၼ်ႉဢေႃႈ။
မိူဝ်ႈၼၼ်ႉ၊ၶုၼ်ႁေႃၶမ်း ႁႃႇၼုၼ်ႇ၊ တင်းၵူၼ်းမဵဝ်း ဢမ်ႇမုၼ်ႇ၊ ၸိူဝ်းၼၼ်ႉ၊ႁုႁၼ်လွင်ႈဢၼ်ၶဝ်ႁဵတ်းႁႂ်ႈ တႃႇဝိတ်ႈ၊ ပဵၼ်ရၢၼ်ႇသူႇၶဝ်ယဝ်ႉလႄႈ၊ၶဝ်ဢဝ်ငိုၼ်းၼိုင်ႈႁဵင်တလၢၼ်ႇတၢၼ်ႇ ၸၢင်ႈငႃလေႃႉမႃႉသိုၵ်းတင်းၵူၼ်းၶီႇလေႃႉမႃႉသိုၵ်းၵႃႈတီႈမိူင်း မေႇသူဝ်ႇပူဝ်ႇတေးမီးယႃး၊ ပွတ်းၼိူဝ်၊မိူင်း သီးရီးယႃး၊ ဢိူင်ႇ မႃႇၶႃႇ၊ တင်းမိူင်း ၸေႃႇၽႃႉ၊ ၸိူဝ်းၼၼ်ႉဢေႃႈ။-
လေႃႉမႃႉသိုၵ်းဢၼ်ၸၢင်ႈငႃဢဝ်သၢမ်မိုၼ်ႇပၢႆသွင်ႁဵင်၊ဢိၵ်ႇတင်းတပ်ႉသိုၵ်းၶုၼ်ႁေႃၶမ်းမိူင်း မႃႇၶႃႇ၊ တင်းလၢႆၶီႇၶိုၼ်ႈမႃးၶျႃးပၢင်တပ်ႉၵႃႈတီႈႁိမ်းဝဵင်း မေႇတေႇၽႃႉ၊ ဢေႃႈ။ ၵူၼ်းမဵဝ်း ဢႃႇမုၼ်ႇ၊ တင်းလၢႆၵေႃႈၶီႇသိုၵ်းဢွၵ်ႇသေၵႃႈတီႈၵူႈဝၢၼ်ႈၵူႈဝဵင်းမႃးႁႅၼ်းသိုၵ်းဝႆႉဢေႃႈ။
မိူဝ်ႈဢၼ် တႃႇဝိတ်ႈ၊ ငိၼ်းလွင်ႈတၢင်းဢၼ်ပဵၼ်မႃးၼၼ်ႉလႄႈ၊မၼ်းပွႆႇၸႂ်ႉ ယွႃႇၽႃႉ၊ တင်းတပ်ႉသိုၵ်းမၼ်းတင်းမူတ်းၶီႇသိုၵ်းၵႂႃႇဢေႃႈ။-
ၵူၼ်းမဵဝ်း ဢမ်ႇမုၼ်ႇ၊ ၸိူဝ်းၼၼ်ႉဢွၼ်ၵၼ်ယၼ်ႇတပ်ႉၶၢင်းတပ်ႉ၊ၵႃႈတီႈၼႃႈၽၵ်းတူဝဵင်းလူင် ရပ်ႉပႃႇ၊ ဝႆႉလႄႈၶုၼ်ႁေႃၶမ်းၸိူဝ်းဢၼ်မႃးၸွႆႈတိုၵ်းၼၼ်ႉသမ်ႉဢွၼ်ၵၼ်ဢဝ်တီႈၵႃႈတီႈပၢင်ႇတီႈပဵင်းဝႆႉဢေႃႈ။
ယွႃႇၽႃႉ၊ ႁုႁၼ်လွင်ႈဢၼ်တပ်ႉရၢၼ်ႇသူႇၸိူဝ်းၼၼ်ႉဢၢင်ႈတၵ်းတိုၵ်းတေႃးမၼ်းၽၢႆႇၼႃႈၽၢႆႇလင်ၼၼ်ႉသေယဝ်ႉ၊မၼ်းလိူၵ်ႈဢဝ်ၵူၼ်းသိုၵ်းမဵဝ်း ဢိသရေး၊ ဢၼ်ၵတ်ႉဢၼ်ၶၼ်တင်းလၢႆလႄႈယၼ်ႇတပ်ႉတေႃႇၼႃႈၵၼ်တင်းၵူၼ်းမဵဝ်း သီးရီးယႃး၊ ဢေႃႈ။-
တပ်ႉမၼ်းဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉၸမ်ႉ၊မၼ်းဢၢပ်ႈပၼ်တႂ်ႈမိုဝ်းၼွင်ႉၸၢႆးမၼ်း ဢၽိသေး၊ လႄႈၸႂ်ႉၶဝ်ယၼ်ႇတပ်ႉၶၢင်းတပ်ႉတေႃႇၼႃႈၵၼ်တင်းၵူၼ်းမဵဝ်း ဢမ်ႇမုၼ်ႇ၊ ၸိူဝ်းၼၼ်ႉဢေႃႈ။-
ၼင်ႇၼၼ်လႄႈ ယွႃႇၽႃႉ၊ သင်ႇလၢတ်ႈတီႈမၼ်းလႄႈဝႃႈ၊ “ပေႃးၵူၼ်း သီးရီးယႃး၊ ပႄႉၼႅင်ႇၵဝ်ၸိုင်၊မႂ်းမႃးၸွႆႈထႅမ်ၵဝ်တႃႉ၊ပေႃးၵူၼ်း ဢမ်ႇမုၼ်ႇ၊ ၶဝ်ပႄႉၼႅင်ႇမႂ်းၸိုင်၊ၵဝ်တၵ်းၵႂႃႇၸွႆႈထႅမ်မႂ်းဢေႃႈ။-
ဢွၼ်ၵၼ်မီးၸႂ်ဢၼ်ႁတ်းႁၢၼ်လႄႈဢဝ်ႁႅင်းဢွၵ်ႇတႃႉ။ ဢွၼ်ၵၼ်ၶတ်းၸႂ်ၵျူဝ်းၸႃးတိုၵ်းပုၼ်ႈၵူၼ်းမဵဝ်းႁဝ်းဢိၵ်ႇတင်းပုၼ်ႈဝၢၼ်ႈဝဵင်းၽြႃးပဵၼ်ၸဝ်ႈႁတ်းႁတ်းႁၢၼ်ႁၢၼ်တႃႉ။ ႁႂ်ႈဢလူဝ်ႇၵၢင်ၸႂ် ထႃႇဝရႃႉၽြႃး၊ ပျေႉၸုမ်ႇသေၵမ်းလူၺ်ႈ၊” ဝႃႈၼင်ႇၼႆဢေႃႈ။
ယွႃႇၽႃႉ၊ တင်းၵူၼ်းမၼ်းတင်းလၢႆၶီႇၶိုၼ်ႈတိုၵ်းတေႃးလႄႈၵူၼ်း သီးရီးယႃး၊ တင်းလၢႆၼီပၢႆႈဢေႃႈ။-
မိူဝ်ႈဢၼ်ၵူၼ်း ဢမ်ႇမုၼ်ႇ၊ ႁၼ်ၵူၼ်း သီးရီးယႃး၊ လႂ်ၼီပၢႆႈၼၼ်ႉၸိုင်၊ၶဝ်ၵေႃႈၼီပၢႆႈသေၵႃႈတီႈ ဢၽိသေး၊ သေလႄႈသုတ်ႉႁူၼ်ၶဝ်ႈၵႃႈၼႂ်းဝဵင်းၵႂႃႇဢေႃႈ။ မိူဝ်ႈၼၼ်ႉ ယွႃႇၽႃႉ၊ ၶိုၼ်းမိူဝ်းၵႂႃႇၵႃႈတီႈဝဵင်း ယေႇရုသလႅမ်ႇ၊ ဢေႃႈ။
ၵူၼ်း သီးရီးယႃး၊ ၸိူဝ်းၼၼ်ႉႁုႁၼ်လွင်ႈဢၼ်ၶဝ်သုမ်းသိုၵ်းတီႈၵူၼ်းမဵဝ်း ဢိသရေး၊ ၼၼ်ႉသေယဝ်ႉ၊ၶဝ်ႁွင်ႉဢဝ်တပ်ႉသိုၵ်းသေၵႃႈတီႈဢိူင်ႇ သီးရီးယႃး၊ ဢၼ်မီးၽၢႆႇဝၼ်းဢွၵ်ႇၼမ်ႉလူင် ဢုၽရတ်ႉ၊ ၸိူဝ်းၼၼ်ႉလႄႈဢၢပ်ႈပၼ်တႂ်ႈမိုဝ်းၸဝ်ႈၵွၼ်းတပ်ႉသိုၵ်းလူင် သေႃးပၵ်ႉ၊ တပ်ႉသိုၵ်းၶုၼ်ႁေႃၶမ်း ႁႃႇတရေးၸႃႇ၊ မိူင်း ၸေႃႇၽႃႉ၊ ၼၼ်ႉဢေႃႈ။-
မိူဝ်ႈဢၼ် တႃႇဝိတ်ႈ၊ ငိၼ်းလွင်ႈတၢင်းၼၼ်ႉၸိုင်၊မၼ်းၸုတုမ်ဢဝ်တပ်ႉသိုၵ်းမဵဝ်း ဢိသရေး၊ တင်းလၢႆ၊ၶၢမ်ႈၼမ်ႉ ယေႃးတၢၼ်ႇ၊ ၶီႇသိုၵ်းၶိုၼ်ႈၸူးၵူၼ်းမဵဝ်း သီးရီးယႃး၊ ၶဝ်ဢေႃႈ။ ၶဝ်တိုၵ်းတေႃးၵၼ်လႄႈ၊-
ၵူၼ်းမဵဝ်း ဢိသရေး၊ ၶဝ်လိုပ်ႈလမ်းၵူၼ်း သီးရီးယႃး၊ တင်းလၢႆၶိုၼ်းၵႂႃႇဢေႃႈ။ တႃႇဝိတ်ႈ၊ ဢိၵ်ႇတင်းၵူၼ်းမၼ်းဢဝ်တၢႆပႅတ်ႈၵူၼ်းႁေႃႈလေႃႉမႃႉသိုၵ်း သီးရီးယႃး၊ ၸဵတ်းႁဵင်ၵေႃႉတင်းၵူၼ်းသိုၵ်းတပ်ႉတိၼ်သီႇမိုၼ်ႇၵေႃႉဢေႃႈ။ သေႃးပၵ်ႉ၊ ၸဝ်ႈၵွၼ်းတပ်ႉသိုၵ်းလူင်ၵူၼ်းမဵဝ်း သီးရီးယႃး၊ ၼၼ်ႉၵေႃႈ ၶဝ်ဢဝ်တၢႆပႅတ်ႈဢေႃႈ။-
ၶုၼ်ႁေႃၶမ်းၸိူဝ်းဢၼ်ယူႇတႂ်ႈမိုဝ်း ႁႃႇတရေးၸႃႇ၊ ၼၼ်ႉႁုႁၼ်လွင်ႈဢၼ်ၶဝ်သုမ်းသိုၵ်းတီႈၵူၼ်းမဵဝ်း ဢိသရေး၊ ၶဝ်ၼၼ်ႉၸိုင်၊ၶဝ်ဢွၼ်ၵၼ်ႁဵတ်းမိၵ်ႈသႁႃႇယႃႉလူၺ်ႈၵၼ်တင်း တႃႇဝိတ်ႈ၊ လႄႈၶၢမ်ႇပဵၼ်ၵူၼ်းဝၢၼ်ႈၵူၼ်းမိူင်းတႂ်ႈမိုဝ်းမၼ်းသေဢေႃႈ။ လိုၼ်းၼၼ်ႉ၊ၵူၼ်းမဵဝ်း သီးရီးယႃး၊ ၶဝ်ဢမ်ႇတွၼ်ႉႁတ်းၸွႆႈထႅမ်တီႈသိုၵ်းၵူၼ်းမဵဝ်း ဢမ်ႇမုၼ်ႇ၊ ထႅင်ႈသေပွၵ်ႈယဝ်ႉဢေႃႈ။
မိူဝ်ႈဢၼ်ၶွပ်ႈၶူပ်ႇၶိင်ႇႁႅင်ႈလႄႈႁွတ်ႈထိုင်ၶိင်ႇဢၼ်ၶုၼ်ႁေႃၶမ်းတင်းလၢႆယၢမ်ႈတိုၵ်းသိုၵ်းၵၼ်ၼၼ်ႉၸိုင်၊ ယွႃႇၽႃႉ၊ ၼၼ်ႉဢွၼ်ႁူဝ်တပ်ႉသိုၵ်းမၼ်းၵႂႃႇတိုၵ်းတေႃးႁိမ်ဢဝ်လိၼ်မိူင်း ဢမ်ႇမုၼ်ႇ၊ ၶဝ်ဢေႃႈ။ ၶုၼ်ႁေႃၶမ်း တႃႇဝိတ်ႈ၊ ၸမ်ႉ၊ယူႇၵႃႈတီႈဝဵင်း ယေႇရုသလႅမ်ႇ၊ ဢေႃႈ။ ၶဝ်ၼၼ်ႉ လွမ်ႉႁွပ်ႈဝဵင်း ရပ်ႉပႃႇ၊ သေယဝ်ႉ၊တိုၵ်းတေႃးယႃႉပႅတ်ႈဝဵင်းၼၼ်ႉဢေႃႈ။-
ၵႃႈၼိူဝ်ႁူဝ်ႁုၼ်ႇႁၢင်ႈသၢင်းထု မိလၶုမ်း၊ ၵူၼ်းမဵဝ်း ဢႃႇမုၼ်ႇ၊ ၶဝ်ၼၼ်ႉမီးသရၽူႇၶမ်းဢၼ်ၼမ်ႉၼၵ်းမၼ်းမီးၼိုင်ႈတလၢၼ်ႇတၢၼ်ႇ လႄႈမီးသႅင်လီလုၵ်ႈၼိုင်ႈဢၼ် တႃႇဝိတ်ႈ၊ ဢဝ်သႂ်ႇၵႃႈတီႈသရၽူႇမၼ်းၼၼ်ႉဢေႃႈ။ မၼ်းသိမ်းဢဝ်ဢုၵ်ႉၸႃႇၼမ်ၼႃႇဢၼ်ႁိမ်ႁူင်ႇလႆႈၵႃႈတီႈဝဵင်းၼၼ်ႉၵေႃႈ၊မၼ်းဢဝ်ၵႂႃႇဢေႃႈ။-
ၵူၼ်းဝဵင်းၼမ်ၼႃႇၵေႃႈမၼ်းဢဝ်ၵႂႃႇၸႂ်ႉႁဵတ်းၵၢၼ်ငၢၼ်းဢၼ်ၸႂ်ႉလဵၵ်းလိူဝ်ႈလိူဝ်ႈလႂ်၊လေႃႇလဵၵ်းထႆလႂ်၊တင်းတႃမၢတ်ႇလႂ်ဢေႃႈ။ ၵူၼ်း ဢမ်ႇမုၼ်ႇ၊ ၼႂ်းဝၢၼ်ႈဝဵင်းတၢင်ႇဝဵင်းၸိူဝ်းၼၼ်ႉၵေႃႈ ယွႃႇၽႃႉ၊ ၸႂ်ႉၶဝ်ႁဵတ်းၵၢၼ်ၸိူဝ်ႉၼင်ႇၼၼ်ၼင်ႇၵဝ်ႇဢေႃႈ။ မၼ်းဢိၵ်ႇတင်းၵူၼ်းမၼ်းတင်းလၢႆ ၶိုၼ်းမိူဝ်းၵႂႃႇတီႈဝဵင်း ယေႇရုသလႅမ်ႇ၊ သေဢေႃႈ။
လိုၼ်းၼၼ်ႉ၊ၽဝ်ႇၼိုင်ႈပဵၼ်သိုၵ်းၵၼ်တင်းၵူၼ်း ၽိလိတ်ႉတိ၊ ထႅင်ႈၵႃႈတီႈဝဵင်း ၵေႇၸႃႇ၊ ဢေႃႈ။ ၼႂ်းၼႃႈသိုၵ်းၼၼ်ႉ သိပေႇၵေး၊ ဢၼ်ပဵၼ်ၵူၼ်းမဵဝ်း ႁုသသိ၊ ၼၼ်ႉဢဝ်တၢႆၵူၼ်းဢၼ်တူဝ်ယႂ်ႇတူဝ်သုင်ဢၼ်လႆႈၸိုဝ်ႈဝႃႈ၊ သိပ်ႉၽႄး၊ ၼၼ်ႉလႄႈၵူၼ်းမဵဝ်း ၽိလိတ်ႉတိ၊ ၶဝ်သုမ်းသိုၵ်းဢေႃႈ။
သမ်ႉပဵၼ်သိုၵ်းၵၼ်တင်းၵူၼ်း ၽိလိတ်ႉတိ၊ ထႅင်ႈလႄႈ ဢေးလႁႃႇၼၼ်ႇ၊ လုၵ်ႈၸၢႆး ယႃႇဢိရႃႉ၊ ၼၼ်ႉဢဝ်တၢႆပႅတ်ႈ လႃႇၶမိ၊ ၵေႃႉပဵၼ်ၼွင်ႉၸၢႆး ၵေႃးလျတ်ႈ၊ ၵူၼ်းဝဵင်း ၵတ်ႉတိ၊ ဢၼ်ယိပ်းၵမ်ၵၼ်းႁွၵ်ႇဢၼ်ယႂ်ႇတၢၼ်ႇသီႈပၼ်ႉႁမ်းႁုၵ်ႇၼၼ်ႉဢေႃႈ။
သမ်ႉပဵၼ်သိုၵ်းၵၼ်ထႅင်ႈပွၵ်ႈၼိုင်ႈၵႃႈတီႈဝဵင်း ၵတ်ႉတိ၊ လႄႈမီးၵူၼ်းဢၼ်တူဝ်ယႂ်ႇတူဝ်သုင်ၵေႃႉၼိုင်ႈ၊ဢၼ်ၵႃႈတီႈမိုဝ်းမၼ်းယေႈၶွၼ်မီးၼိဝ်ႉမိုဝ်းႁူၵ်းၼိဝ်ႉ၊ၵႃႈတီႈတိၼ်မၼ်းယေႈၶွၼ်မီးၼိဝ်ႉတိၼ်ႁူၵ်းၼိဝ်ႉၼၼ်ႉဢေႃႈ။ မၼ်းပဵၼ်ၵူၼ်းၸိူဝ်ႉၶိူဝ်းဢၼ်တူဝ်ယႂ်ႇတူဝ်သုင်ၼၼ်ႉဢေႃႈ။-
မၼ်းထၢမ်တႃႉထၢမ်ၶႅင်ႇၵူၼ်းမဵဝ်း ဢိသရေး၊ တင်းလၢႆယူႇလႄႈ ယေႃးၼႀၼ်ႇ၊ လုၵ်ႈၸၢႆး သိမႃႇ၊ ၵေႃႉဢၼ်ပဵၼ်ပီႈၸၢႆး တႃႇဝိတ်ႈ၊ ၼၼ်ႉဢဝ်မၼ်းတၢႆဢေႃႈ။-
ၶဝ်သၢမ်ၵေႃႉဢၼ် တႃႇဝိတ်ႈ၊ တင်းၵူၼ်းမၼ်းတင်းလၢႆဢဝ်တၢႆၼႆႉပဵၼ်ၵူၼ်းၸိူဝ်ႉၶိူဝ်းၵူၼ်းတူဝ်ယႂ်ႇတူဝ်သုင်ဝဵင်း ၵတ်ႉတိ၊ ၼၼ်ႉဢေႃႈ။
ၸႃႇတၢၼ်ႇမႃႇၼၢတ်ႈ၊ ၶႂ်ႈယႃႉၵဝ်းၵူၼ်းမဵဝ်း ဢိသရေး၊ တင်းလၢႆလႄႈတိုၵ်းယူင်းႁူဝ်ၸႂ် တႃႇဝိတ်ႈ၊ ႁႂ်ႈမၼ်းၵဵပ်းၸရၢင်းၵူၼ်းမိူင်းဢေႃႈ။-
တႃႇဝိတ်ႈ၊ ပူင်ဢမိင်ႉတီႈ ယွႃႇၽႃႉ၊ ဢိၵ်ႇတင်းၶုၼ်ဢၼ်ပွင်ၵၢၼ်တင်းလၢႆလႄႈဝႃႈ၊ “သူဢွၼ်ၵၼ်ၵႂႃႇၵႃႈၼႂ်းမိူင်း ဢိသရေး၊ ၼႆႉဢဝ်တီႈလႅၼ်လိၼ်ၸဵင်ႇၼိုင်ႈတေႃႇထိုင်ႁွတ်ႈလႅၼ်လိၼ်ၸဵင်ႇၼိုင်ႈသေလႄႈၼပ်ႉဢၢၼ်ႇၵူၼ်းတင်းလၢႆတႃႉ။ ၵဝ်ၶႂ်ႈႁုလွင်ႈဢၼ်မီးၵူၼ်းၼမ်ထၢၼ်ႇလႂ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ယွႃႇၽႃႉ၊ ၶိုၼ်းလဝ်ႈလၢတ်ႈလႄႈဝႃႈ၊ “ႁႂ်ႈ ထႃႇဝရႃႉၽြႃး၊ ႁဵတ်းႁႂ်ႈၵူၼ်းမဵဝ်း ဢိသရေး၊ တင်းလၢႆယဵင်ႈၶႅၼ်းၼမ်ၵိုၼ်းၼႃႇသေၵႃႈဢၼ်မီးယူႇၼႆႉပၢၵ်ႇပုၼ်ႈသေၵမ်းလူၺ်ႈ။ ၸဝ်ႈမုၼ်ယႂ်ႇၶုၼ်ႁေႃၶမ်းတီႈၶႃႈ၊ၵူၼ်းၵႃႈမီးၸိူဝ်းၼၼ်ႉပဵၼ်ၶႃႈၸဝ်ႈႁဝ်းတီႈၶႃႈဢေႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းၶႂ်ႈႁႂ်ႈဢပျတ်ႈတူၵ်းႁွတ်ႈၵႃႈၼိူဝ်ၵူၼ်းဝၢၼ်ႈၵူၼ်းမိူင်းတီႈၶႃႈ၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊ၶုၼ်ႁေႃၶမ်းတဵၵ်းၶေႃး ယွႃႇၽႃႉ၊ ႁႂ်ႈထွမ်ႇဢဝ်ဢမိင်ႉမၼ်းၼၼ်ႉဢေႃႈ။ ယွႃႇၽႃႉ၊ ၵေႃႈ ဢွၵ်ႇၵႂႃႇလႄႇလဵပ်ႈမိူင်း ဢိသရေး၊ တင်းမိူင်းသေယဝ်ႉ၊ၶိုၼ်းႁွတ်ႈမႃးၵႃႈတီႈဝဵင်း ယေႇရုသလႅမ်ႇ၊ ဢေႃႈ။
ယွႃႇၽႃႉ၊ ၵေႃႈဢဝ်ၸရၢင်းၵူၼ်းမိူင်းတင်းလၢႆ၊ဢၼ်ပွင်းၵၼ်ယဝ်ႉၼၼ်ႉ၊သၢၵ်ႈပၼ်တီႈ တႃႇဝိတ်ႈ၊ ဢေႃႈ။ ၵူၼ်းဢၼ်ယိပ်းၵမ်လၢၵ်ႈၼၢၵ်ႈတိုၵ်းသိုၵ်းလႆႈၵႃႈၼႂ်းမဵဝ်း ဢိသရေး၊ မီးလၢၼ်ႉပၢႆသႅၼ်ၼိုင်ႈ၊ၵႃႈၼႂ်းမဵဝ်း ယုတႃႉ၊ မီးသီႇသႅၼ်ပၢႆၸဵတ်းမိုၼ်ႇဢေႃႈ။-
ၵူၺ်းၵႃႈ၊ၵွပ်ႈပိူဝ်ႈ ယွႃႇၽႃႉ၊ ဢမ်ႇၵျိူၵ်ႈၸႂ်ထုၵ်ႇၸႂ်ဢမိင်ႉၶုၼ်ႁေႃၶမ်းၼၼ်ႉလႄႈမၼ်းဢမ်ႇၼပ်ႉဢၢၼ်ႇၵူၼ်းၸိူဝ်ႉၶိူဝ်းမဵဝ်း လေႇဝိ၊ တင်းမဵဝ်း ပိၼ်ႇယႃႇမိၼ်ႇ၊ ၼၼ်ႉ။
ၽြႃးပဵၼ်ၸဝ်ႈၵေႃႈ၊ဢမ်ႇၵျိူၵ်ႈလွင်ႈတင်းဢၼ်ၼပ်ႉဢၼ်ဢၢၼ်ႇၼၼ်ႉလႄႈမၼ်းၸဝ်ႈပၼ်တၢမ်ႇတီႈမဵဝ်း ဢိသရေး၊ ဢေႃႈ။-
တႃႇဝိတ်ႈ၊ တွင်းပၢၼ်ႇလဝ်ႈလၢတ်ႈတီႈၽြႃးပဵၼ်ၸဝ်ႈလႄႈဝႃႈ၊ “ၶႃႈၸဝ်ႈၽိတ်းပိူင်ႈၼႃႇလူင်လၢင်ၼႂ်းတၢင်းဢၼ်ၶႃႈၸဝ်ႈႁဵတ်းမႅၼ်ႈၼၼ်ႉတီႈၶႃႈယဝ်ႉ။ ၶႅၼ်းတေႃႈပွႆႇလွတ်ႈဢပျတ်ႈၶႃႈၸဝ်ႈသေၵမ်းတီႈၶႃႈ။ ၶႃႈၸဝ်ႈလႆႈႁဵတ်းႁၢႆႉမိူၵ်ႈၼႃႇလူင်လၢင်တီႈၶႃႈယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ မီးဢမိင်ႉတီႈ ၵၢတ်ႉ၊ ဢၼ်ပဵၼ်ၵူၼ်းႁူပွင်ႇတႃလႅင်းတီႈ တႃႇဝိတ်ႈ၊ ၼၼ်ႉလႄႈဝႃႈ၊-
“မႂ်းၵႂႃႇလၢတ်ႈတီႈ တႃႇဝိတ်ႈ၊ လႄႈဝႃႈ၊ ‘ ထႃႇဝရႃႉၽြႃး၊ မီးဢမိင်ႉၸဝ်ႈၸမ်ႉ၊ၵဝ်ပၼ်လွင်ႈတၢင်းသၢမ်ပိူင်ၼႆႉတီႈမႂ်းဢေႃႈ။ လိူၵ်ႈဢဝ်သေပိူင်ပိူင်ပုၼ်ႈဢၼ်ၵဝ်တၵ်းႁဵတ်းတီႈမႂ်းတႃႉ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ၵၢတ်ႉ၊ ၵေႃႈ ၵႂႃႇလဝ်ႈလၢတ်ႈထိုင်တီႈ တႃႇဝိတ်ႈ၊ လႄႈဝႃႈ၊ “ထႃႇဝရႃႉၽြႃး၊ မီးဢမိင်ႉၸဝ်ႈၸမ်ႉ၊-
ၽေးဢၼ်ၶဝ်ႈၵႃႈမၢၵ်ႇပႅင်းသၢမ်ပီတဵမ်တဵမ်၊ဢမ်ႇၼၼ်ၽေးဢၼ်လႅၼ်ႈပၢႆႈရၢၼ်ႇသူႇ၊ၸိူဝ်းဢၼ်ဢဝ်လၢပ်ႇလႅဝ်းလိုပ်ႈၽၼ်းမႂ်းသၢမ်လိူၼ်တဵမ်တဵမ်၊ဢမ်ႇၼၼ်ၵေႃႈၽေးလၢပ်ႇ ထႃႇဝရႃႉၽြႃး၊ ဢၼ်ဝႃႈ၊ၵႃႇလႃႉႁႃႈလႅင်မိူင်းႁွတ်ႈထိုင်ၵႃႈၼိူဝ်မိူင်းမႂ်းလႄႈတမၢၼ်ႇၵၢင်ႁၢဝ် ထႃႇဝရႃႉၽြႃး၊ ဢဝ်ၵူၼ်းမဵဝ်း ဢိသရေး၊ တၢႆၵူႈတီႈၵူႈလႅၼ်သၢမ်ဝၼ်းတဵမ်တဵမ်။ ၼႂ်းလွင်ႈတၢင်းသၢမ်ပိူင်ၼႆႉလိူၵ်ႈဢဝ်ပိူင်ၼိုင်ႈ ႁႂ်ႈၵဝ်ၶႃႈလႆႈၶိုၼ်းလဝ်ႈလၢတ်ႈတီႈ ထႃႇဝရႃႉၽြႃး၊ သေၵမ်းတီႈၶႃႈ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ၵေႃႈၶိုၼ်းလၢတ်ႈတီႈ ၵၢတ်ႉ၊ လႄႈဝႃႈ၊ “ၵဝ်ၼႆႉ၊တိူၵ်ႈၸႂ်ၵႅၼ်းၸႂ်ၼႃႇလူင်လၢင်ယဝ်ႉလူင်ပႄႇ။ ႁႂ်ႈၵဝ်ႁွတ်ႈထိုင်ၵႃႈၼႂ်းမိုဝ်း ထႃႇဝရႃႉၽြႃး၊ သေၵမ်းလူၺ်ႈ။ လွင်ႈမၼ်းၸမ်ႉ၊ၵရုၼႃႇမၼ်းၸဝ်ႈယႂ်ႇၼႃႇဢေႃႈ။ ယႃႇပေႁႂ်ႈၵဝ်ႁွတ်ႈထိုင်ၵႃႈၼႂ်းမိုဝ်းၵူၼ်းသေၵမ်း၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၵေႃႈပွႆႇၵႃႇလႃႉႁႃႈလႅင်မိူင်းသႂ်ႇၵႃႈၼိူဝ်မဵဝ်း ဢိသရေး၊ လႄႈၵူၼ်းတၢႆၸဵတ်းမိုၼ်ႇၵေႃႉဢေႃႈ။-
မၼ်းၸဝ်ႈသမ်ႉၸႂ်ႉတမၢၼ်ႇၵၢင်ႁၢဝ်ႁႂ်ႈယႃႉပႅတ်ႈဝဵင်း ယေႇရုသလႅမ်ႇ၊ ဢေႃႈ။ မိူဝ်ႈဢၼ်တမၢၼ်ႇၵၢင်ႁၢဝ်ငႃတၵ်းယႃႉပႅတ်ႈၼၼ်ႉမၼ်းၸဝ်ႈလူတူၺ်းသေယဝ်ႉ၊မႆႈၸႂ်ၵွပ်ႈၽေးဢုပၢတ်ႈၼၼ်ႉလႄႈမီးဢမိင်ႉတီႈတမၢၼ်ႇၵၢင်ႁၢဝ်ၼၼ်ႉလႄႈဝႃႈ၊ “ပေႃးယဝ်ႉ။ ယိုတ်းမိုဝ်းမႂ်းၶိုၼ်းသေ၊” ဝႃႈၼင်ႇၼႆဢေႃႈ။ မိူဝ်ႈၼၼ်ႉတမၢၼ်ႇၵၢင်ႁၢဝ် ထႃႇဝရႃႉၽြႃး၊ ၼၼ်ႉၸုၵ်းယူႇၵႃႈတီႈတလၢင်းယဵပ်ႇၶဝ်ႈ ဢေႃးၼၼ်ႇ၊ မဵဝ်း ယေႇပုသိ၊ ၼၼ်ႉဢေႃႈ။
တႃႇဝိတ်ႈ၊ ႁႅၼ်တူၺ်းလႄႈႁၼ်တမၢၼ်ႇၵၢင်ႁၢဝ် ထႃႇဝရႃႉၽြႃး၊ ၸုၵ်းယူႇၵႃႈတီႈဝူင်ႈၵၢင်ၽႃႉၵၢင်ႁၢဝ်တင်းလိၼ်မိူင်းသေလႄႈယိပ်းၵမ်လၢပ်ႇသေယဝ်ႉ၊ငႃယူႇၵႃႈၼိူဝ်ဝဵင်း ယေႇရုသလႅမ်ႇ၊ ဝႆႉယူႇၼၼ်ႉဢေႃႈ။ တႃႇဝိတ်ႈ၊ တင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆၼုင်ႈမႆၼင်ပေႃယူႇသေလႄႈဢွၼ်ၵၼ်ၶုပ်ႉမူပ်ႇၵူမ်ႈၼႃႈယူႇဢေႃႈ။-
တႃႇဝိတ်ႈ၊ တွင်းပၢၼ်ႇတီႈၽြႃးပဵၼ်ၸဝ်ႈလႄႈဝႃႈ၊ “ဢူဝ်းၽြႃးပဵၼ်ၸဝ်ႈတီႈၶႃႈ။ ၶႃႈၸဝ်ႈႁဝ်းၼႆႉပဵၼ်ၵေႃႉဢၼ်ၽိတ်းပိူင်ႈတီႈၶႃႈယဝ်ႉ။ ၶႃႈၸဝ်ႈပဵၼ်ၵေႃႉဢၼ်ပူင်ဢမိင်ႉႁႂ်ႈႁဵတ်းတၢင်းဢၼ်ၵဵပ်းၸရၢင်းၵူၼ်းမိူင်းတီႈၶႃႈဢေႃႈ။ ၶဝ်ၼၼ်ႉပဵၼ်ၸိူဝ်ႉၼင်ႇသူဝ်းလႄႈၶဝ်ၽိတ်းမႅၼ်ႈၵႃႈသင်တီႈၶႃႈ။ ထႃႇဝရႃႉၽြႃး၊ ၽြႃးပဵၼ်ၸဝ်ႈၶႃႈၸဝ်ႈတီႈၶႃႈ၊ပၼ်တၢမ်ႇတီႈၶႃႈၸဝ်ႈ၊ဢိၵ်ႇတင်းၵူၼ်းႁိူၼ်းၵူၼ်းယေးၶႃႈၸဝ်ႈသေၵမ်းတီႈၶႃႈ။ ၶႅၼ်းတေႃႈယႃႇပေႁႂ်ႈၽေးဢုပၢတ်ႈတူၵ်းသႂ်ႇၵႃႈၼိူဝ်ၵူၼ်းၸဝ်ႈႁဝ်းတင်းလၢႆၼႆႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ၼင်ႇၼၼ်လႄႈတမၢၼ်ႇၵၢင်ႁၢဝ် ထႃႇဝရႃႉၽြႃး၊ ၵေႃႈပူင်ဢမိင်ႉႁႂ်ႈ ၵၢတ်ႉ၊ ၵႂႃႇမွၵ်ႇလၢတ်ႈတီႈ တႃႇဝိတ်ႈ၊ လူၺ်ႈလွင်ႈဢၼ် တႃႇဝိတ်ႈ၊ တၵ်းလႆႈၶိုၼ်ႈၵႂႃႇလႄႈတႄႇႁဵတ်းၶဵင်ႇတၢင်းလူႇပုၼ်ႈ ထႃႇဝရႃႉၽြႃး၊ ၵႃႈတီႈတလၢင်းယဵပ်ႇၶဝ်ႈ ဢေႃးၼၼ်ႇ၊ ပုၼ်ႉဢေႃႈ။-
တႃႇဝိတ်ႈ၊ ၵေႃႈၶိုၼ်ႈၵႂႃႇၸွမ်းၵႃႈၼင်ႇဢမိင်ႉဢၼ် ထႃႇဝရႃႉၽြႃး၊ သင်ႇလၢတ်ႈဝႆႉတီႈ ၵၢတ်ႉ၊ ၼၼ်ႉဢေႃႈ။-
ၵႃႈတီႈတလၢင်းယဵပ်ႇၶဝ်ႈၼၼ်ႉ၊ ဢေႃးၼၼ်ႇ၊ တင်းလုၵ်ႈၸၢႆးမၼ်းသီႇၵေႃႉယဵပ်ႇၶဝ်ႈယူႇလႄႈမိူဝ်ႈဢၼ်ၶဝ်မုင်ႈႁၼ်တမၢၼ်ႇၵၢင်ႁၢဝ်ၼၼ်ႉၸိုင်၊လုၵ်ႈၸၢႆးမၼ်းၸိူဝ်းၼၼ်ႉဢွၼ်ၵၼ်လႅၼ်ႈပၢႆႈၵႂႃႇတဵတ်ႇမႅပ်းယူႇဢေႃႈ။-
မိူဝ်ႈၼၼ်ႉ၊ တႃႇဝိတ်ႈ၊ ႁွတ်ႈထိုင်မႃးလႄႈ ဢေႃးၼၼ်ႇ၊ တူၺ်းႁၼ် တႃႇဝိတ်ႈ၊ သေယဝ်ႉ၊လုၵ်ႉသေၵႃႈၼႂ်းတလၢင်းယဵပ်ႇၶဝ်ႈလႄႈၵႂႃႇၵူမ်ႈၵွမ်းဝၢင်းႁူဝ်ၸူးတီႈ တႃႇဝိတ်ႈ၊ ဢေႃႈ။-
တႃႇဝိတ်ႈ၊ ၵေႃႈလၢတ်ႈတီႈမၼ်းလႄႈဝႃႈ၊ “ၶၢႆတလၢင်းယဵပ်ႇၶဝ်ႈမႂ်းၼႆႉပၼ်ၵဝ်၊ပုၼ်ႈဢၼ်ၵဝ်တၵ်းတႄႇႁဵတ်းၶဵင်ႇတၢင်းလူႇပုၼ်ႈ ထႃႇဝရႃႉၽြႃး၊ လွင်ႈၼင်ႇႁိုဝ်ၽေးဢုပၢတ်ႈတၵ်းထၢတ်ႇယဵၼ်ၼၼ်ႉသေၵမ်း။ ၵဝ်တၵ်းပၼ်ၵႃႈၶၼ်မၼ်းႁႂ်ႈတဵမ်ထူၼ်ႈဢေႃႈ၊” ဝႃႈၼင်ႇၼႆဢေႃႈ။
ဢေႃးၼၼ်ႇ၊ ၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈမုၼ်ယႂ်ႇၶုၼ်လူင်တီႈၶႃႈ။ ၶႅၼ်းတေႃႈဢဝ်လႄႈႁဵတ်းၸွမ်းၵႃႈၼင်ႇဢၼ်ဢလူဝ်ႇၵၢင်ၸႂ်ၸဝ်ႈႁဝ်းမီးၼၼ်ႉသေၵမ်းတီႈၶႃႈ။ ဝူဝ်းၸိူဝ်းၼႆႉႁႂ်ႈပဵၼ်တူဝ်တၢင်းလူႇဢၼ်တုတ်ႇၽႆးၵႃႈၼိူဝ်ၶဵင်ႇတၢင်းလူႇလႄႈၶိူင်ႈပေႃႉၶဝ်ႈၼူတ်ႈၶဝ်ႈၸိူဝ်းၼႆႉႁႂ်ႈပဵၼ်ၽိုၼ်း၊ဢိၵ်ႇတင်းၶဝ်ႈၵျုင်ႇႁႂ်ႈပဵၼ်ပုၼ်ႈၶိူင်ႈတၢင်းလူႇမၢၵ်ႇၶဝ်ႈႁူင်းၶဝ်ႈၼၼ်ႉသေၵမ်းတီႈၶႃႈ။ ၶႃႈၸဝ်ႈပၼ်လၢႆလၢႆတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းၵေႃႈလၢတ်ႈလႄႈဝႃႈ၊ “ဢမ်ႇၸႂ်ႈၵူၺ်း။ ၵဝ်တၵ်းပၼ်ၵႃႈၶၼ်မၼ်းႁႂ်ႈတဵမ်ထူၼ်ႈဢေႃႈ။ ၵဝ်ဢမ်ႇမီးဢလူဝ်ႇဢၼ်သိမ်းဢဝ်ၶွင်မႂ်းလၢႆလၢႆ၊ဢၼ်ဢမ်ႇသဵင်ႈငိုၼ်းလႄႈသၢၵ်ႈလူႇၶိူင်ႈတၢင်းလူႇတီႈ ထႃႇဝရႃႉၽြႃး၊ ၼၼ်ႉ၊ၵဝ်ဢမ်ႇႁႂ်ႈသၢၵ်ႈလူႇၵူၺ်း၊” ဝႃႈၼင်ႇၼႆဢေႃႈ။-
တႃႇဝိတ်ႈ၊ ၵေႃႈ ၸင်ႈႁိဝ်ႈၶမ်းႁူၵ်းပၢၵ်ႇသၶေးလႃႉ သေလႄႈပၼ်ၵႃႈၶၼ်တလၢင်းယဵပ်ႇၶဝ်ႈ ဢေႃးၼၼ်ႇ၊ ဢေႃႈ။-
တႃႇဝိတ်ႈ၊ တႄႇတင်ႈၶဵင်ႇတၢင်းလူႇပုၼ်ႈ ထႃႇဝရႃႉၽြႃး၊ သေယဝ်ႉ၊ႁဵတ်းတၢင်းလူႇဢၼ်တုတ်ႇၽႆး၊ဢိၵ်ႇတင်းတၢင်းလူႇမိၵ်ႈသႁႃႇယႃႉဢေႃႈ။ မၼ်းၵၢဝ်ႇႁႃတီႈ ထႃႇဝရႃႉၽြႃး၊ လႄႈမၼ်းၸဝ်ႈၵေႃႈ ၶိုၼ်းဢိူဝ်လူၺ်ႈတၢင်းဢၼ်ႁႂ်ႈၽႆးလုၵ်ႉၵႃႈတီႈၵၢင်ႁၢဝ်တူၵ်းလူင်းမႃးၵႃႈၼိူဝ်ၶိူင်ႈတၢင်းလူႇၼၼ်ႉဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ မီးဢမိင်ႉတီႈတမၢၼ်ႇၵၢင်ႁၢဝ်ၼၼ်ႉ၊ႁႂ်ႈမၼ်းဢဝ်လၢပ်ႇမၼ်းၶိုၼ်းသႂ်ႇဝႆႉၵႃႈၼႂ်းၵပ်းမၼ်းလႄႈတမၢၼ်ႇၵၢင်ႁၢဝ်ၵေႃႈႁဵတ်းၸွမ်းဢေႃႈ။-
မိူဝ်ႈၼၼ်ႉ၊ တႃႇဝိတ်ႈ၊ ႁုႁၼ်လွင်ႈဢၼ် ထႃႇဝရႃႉၽြႃး၊ ဢိူဝ်မၼ်းသေယဝ်ႉ၊မၼ်းသၢၵ်ႈၵၢပ်ႈတၢင်းလူႇၵႃႈၼိူဝ်ၶဵင်ႇတၢင်းလူႇၵႃႈတီႈတလၢင်းယဵပ်ႇၶဝ်ႈ ဢေႃးၼၼ်ႇ၊ ၼၼ်ႉဢေႃႈ။-
လွင်ႈမၼ်းၸမ်ႉ၊ၶိင်ႇယၢမ်းၼၼ်ႉသုမ်ႉထဵင်ၸဝ်ႈဢၼ် ထႃႇဝရႃႉၽြႃး၊ ၵိင်းဝၢပ်ႈဢၼ် မူဝ်းသေႇ၊ တႄႇႁဵတ်းၵႃႈၼႂ်းထိူၼ်ႇမႃးၼၼ်ႉ၊ဢိၵ်ႇတင်းၶဵင်ႇတၢင်းလူႇဢၼ်တၵ်းသၢၵ်ႈၵၢပ်ႈၶိူင်ႈတၢင်းလူႇၼၼ်ႉ၊ယင်းတိုၵ်ႉမီးယူႇၵႃႈတီႈထႃႇၼႃႉဢၼ်ႁဵတ်းဝၢတ်ႈၵူဝ်းၵႂၢႆႇၵႃႈၼႂ်းဝဵင်း ၵိပွင်ႇ၊ ယူႇဢေႃႈ။-
ၵူၺ်းၵႃႈ၊ တႃႇဝိတ်ႈ၊ ဢမ်ႇႁတ်းၵႂႃႇဝႆႈသႃၽြႃးပဵၼ်ၸဝ်ႈၵႃႈတီႈၼၼ်ႈၵွပ်ႈပိူဝ်ႈမၼ်းၵူဝ်လၢပ်ႇတမၢၼ်ႇၵၢင်ႁၢဝ် ထႃႇဝရႃႉၽြႃး၊ ၼၼ်ႉဢေႃႈ။
ပိူဝ်ႈဢၼ်ပဵၼ်ၸိူဝ်ႉၼင်ႇၼႆလႄႈ တႃႇဝိတ်ႈ၊ လၢတ်ႈလႄႈဝႃႈ၊ “ၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ၽြႃးပဵၼ်ၸဝ်ႈတေမီးၵႃႈတီႈၼႆႈယူႇယဝ်ႉ။ ၶဵင်ႇတၢင်းလူႇတီႈဢၼ်ၵူၼ်းမဵဝ်း ဢိသရေး၊ တင်းလၢႆ၊ႁဵတ်းတၢင်းလူႇဢၼ်တုတ်ႇၽႆးၵေႃႈတေမီးၵႃႈတီႈၼႆႈယူႇယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၶုၼ်ႁေႃၶမ်း တႃႇဝိတ်ႈ၊ ပူင်ဢမိင်ႉႁႂ်ႈၵူၼ်းတၢင်ႇၸိူဝ်ႉတၢင်ႇမဵဝ်းဢၼ်မီးယူႇၵႃႈၼႂ်းမိူင်း ဢိသရေး၊ ၸိူဝ်းၼၼ်ႉ၊မႃးၸုတုမ်ၵၼ်သေလႄႈၸႂ်ႉႁႂ်ႈၶဝ်ႁဵတ်းၵၢၼ်ဢေႃႈ။ ၶဝ်ၵမ်ႈၽွင်ႈလႆႈထၢၵ်ႇမၢၵ်ႇႁိၼ်ပုၼ်ႈၵျွင်းပိၵ်ႈမၢၼ်ႇၸဝ်ႈဢေႃႈ။-
မၼ်းဢဝ်လဵၵ်းၽႄမႅင်ႇပၼ်ၼမ်ၼႃႇလူင်လၢင် ပုၼ်ႈဢၼ်တၵ်းႁဵတ်းလဵၵ်းမၢႆႇၼႃးတင်းလဵၵ်းၺၢပ်ႈ၊ဢၼ်တၵ်းသိုပ်ႇၸၢပ်ႈမႆႉတင်းလၢႆပုၼ်ႈဢၼ်တၵ်းႁဵတ်းမႂ်ၽၵ်းတူ၊ဢိၵ်ႇတင်းတွင်းလိူင်ၼမ်ၼႃႇထၢၼ်ႈပေႃးဢမ်ႇၸၢင်ႈၸင်ႈႁိဝ်ႈလႆႈၼၼ်ႉဢေႃႈ။-
မႆႉဢႃႇရိတ်ႉဢၼ်ၵူၼ်းဝဵင်း တုရု၊ တင်းၵူၼ်းဝဵင်း ၸိတုမ်ႇ၊ ၶဝ်ဢဝ်မႃးပၼ် တႃႇဝိတ်ႈ၊ ၸိူဝ်းၼၼ်ႉၵေႃႈမၼ်းဢဝ်ၽႄမႅင်ႇပၼ်ၼမ်ၼႃႇလူင်လၢင်ထၢၼ်ႈပေႃးဢမ်ႇၼပ်ႉဢမ်ႇဢၢၼ်ႇလႆႈဢေႃႈ။-
တႃႇဝိတ်ႈ၊ ၶႆႈၸႂ်လႄႈဝႃႈ၊ “ၵျွင်းပိၵ်ႈမၢၼ်ႇၸဝ်ႈဢၼ်လုၵ်ႈၸၢႆးၵဝ် သေႃးလမုၼ်ႇ၊ တၵ်းတႄႇႁဵတ်းၼၼ်ႉတၵ်းလႆႈပဵၼ်ဢၼ်လၢၵ်ႇလၢႆး၊ႁူင်ႁၢင်းလႄႈမီးမုၼ်သရေႇၸွတ်ႇတူဝ်ႈၵႂႃႇၵူႈသိုင်ႇၵူႈမိူင်းဢေႃႈ။ ၵူၺ်းၵႃႈ၊မၼ်းယင်းၼုမ်ႇလႄႈဢမ်ႇပႆႇၸၢင်ႈႁဵတ်းလီလီ။ ပိူဝ်ႈၼႆလႄႈၵဝ်တၵ်းမႄးႁႅၼ်းဝႆႉ၊ပုၼ်ႈၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။ ၸူဝ်ႈဢၼ် တႃႇဝိတ်ႈ၊ ဢမ်ႇပႆႇၼွၼ်းၽႄးၼၼ်ႉၸိုင်၊မၼ်းမႄးႁႅၼ်းထႃႈဝႆႉ၊ၶိူင်ႈပိူင်ၼမ်ၼႃႇဢေႃႈ။
ၼင်ႇၼၼ်လႄႈမၼ်းႁွင်ႉဢဝ်လုၵ်ႈၸၢႆးမၼ်း သေႃးလမုၼ်ႇ၊ မႃးလႄႈဢၢပ်ႈပၼ်ပုၼ်ႈၽွၼ်းဢၼ်တၵ်းတႄႇႁဵတ်းၵျွင်းပိၵ်ႈမၢၼ်ႇၸဝ်ႈပုၼ်ႈ ထႃႇဝရႃႉၽြႃး၊ ဢၼ်ပဵၼ်ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ၼၼ်ႉဢေႃႈ။-
တႃႇဝိတ်ႈ၊ သင်ႇလၢတ်ႈတီႈမၼ်းလႄႈဝႃႈ၊ “လုၵ်ႈၸၢႆးၵဝ်႟။ ၵဝ်မီးတၢင်းၵျၢမ်ႇဢၢင်ႈတၵ်းတႄႇႁဵတ်းၵျွင်းပိၵ်ႈမၢၼ်ႇၸဝ်ႈပုၼ်ႈၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ဢၼ်ပဵၼ်ၽြႃးပဵၼ်ၸဝ်ႈၵဝ်ဢေႃႈ။-
ၵူၺ်းၵႃႈ၊ ထႃႇဝရႃႉၽြႃး၊ မီးဢမိင်ႉတီႈၵဝ်လႄႈဝႃႈ၊ ‘မႂ်းလႆႈဢဝ်ၵူၼ်းတၢႆၼမ်ၼႃႇလႄႈလႆႈတိုၵ်းသိုၵ်းတိုၵ်းသိူဝ်ၼမ်ၼႃႇယဝ်ႉ။ ၵွပ်ႈပိူဝ်ႈဢၼ်မႂ်းလႆႈထွၵ်ႇပႅတ်ႈလိူတ်ႈၼမ်ၼႃႇၼၼ်ႉလႄႈမႂ်းဢမ်ႇမီးဢၶႂၢင်ႉတႃႇတေတႄႇႁဵတ်းၵျွင်းပိၵ်ႈမၢၼ်ႇပုၼ်ႈၵဝ်။-
ၼႂ်းဝႃႈၼၼ်သေၵေႃႈ၊မႂ်းတၵ်းမီးလုၵ်ႈၸၢႆးၵေႃႉၼိုင်ႈ၊ဢၼ်တၵ်းပဵၼ်ၵေႃႉဢၼ်ယူႇၼိမ်ၼိမ်လီလီၼၼ်ႉဢေႃႈ။ ၵဝ်တၵ်းပၼ်ဢၶႂၢင်ႉဢၼ်မၼ်းလႆႈယူႇၼိမ်ၼိမ်လီလီလႄႈလွတ်ႈၽေးရၢၼ်ႇသူႇဢၼ်လဵပ်ႈႁွပ်ႈမၼ်းယူႇၵူႈၽၢႆႇၵူႈပႃႈၼၼ်ႉလႄႈမၼ်းတၵ်းလႆႈၶၢမ်ႇတၢင်းဢၼ်ႁွင်ႉႁဵၵ်ႈၸိုဝ်ႈဝႃႈ၊ သေႃးလမုၼ်ႇ၊ ၵွပ်ႈပိူဝ်ႈဢၼ်မၼ်းတၵ်းလႆႈဢုပ်ႉပိူင်ႇၸၢမ်ႇၸႃးမိူင်း ဢိသရေး၊ ၼိမ်ၼိမ်လီလီလႄႈၵၢင်းလွတ်ႈတင်းၽေးသိုၵ်းၽေးသိူဝ်ဢေႃႈ။-
မၼ်းတၵ်းတႄႇႁဵတ်းၵျွင်းပိၵ်ႈမၢၼ်ႇၸဝ်ႈပုၼ်ႈၵဝ်ဢေႃႈ။ မၼ်းတၵ်းလႆႈပဵၼ်လုၵ်ႈၸၢႆးၵဝ်လႄႈ၊ၵဝ်တၵ်းလႆႈပဵၼ်ပေႃႈမၼ်းဢေႃႈ။ ၵဝ်တၵ်းႁႂ်ႈရႃႇၸႃႉပလၢင်ႇမၼ်းတႄႇယူႇၵႃႈၼိူဝ်ၵူၼ်းမဵဝ်း ဢိသရေး၊ မၼ်ႈၶိူင်ႇတႃႇသေႇဢေႃႈ၊’ ဝႃႈၼင်ႇၼႆယဝ်ႉ။
“ပိူဝ်ႈဢၼ်ပဵၼ်ၸိူဝ်ႉၼင်ႇၼႆလႄႈလုၵ်ႈၸၢႆးၵဝ်႟။ ႁႂ်ႈ ထႃႇဝရႃႉၽြႃး၊ မီးယူႇလူၺ်ႈၵၼ်တင်းမႂ်းသေၵမ်းလူၺ်ႈ။ ႁႂ်ႈၵတိမၼ်းၸဝ်ႈတႄႇယူႇၵႃႈၼိူဝ်မႂ်းလႄႈလႆႈတႄႇႁဵတ်းၵျွင်းပိၵ်ႈမၢၼ်ႇၸဝ်ႈပုၼ်ႈ ထႃႇဝရႃႉၽြႃး၊ ဢၼ်ပဵၼ်ၽြႃးပဵၼ်ၸဝ်ႈမႂ်းၼၼ်ႉလႆႈသေၵမ်းလူၺ်ႈ။-
လိူဝ်သေၼၼ်ႉႁႂ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈမႂ်းၼၼ်ႉပၼ်ၺၢၼ်ႇတင်းပိင်ႇၺႃႇပုၼ်ႈလွင်ႈၼင်ႇႁိုဝ်မႂ်းတၵ်းဢုပ်ႉပိူင်ႇၸၢမ်ႇၸႃးၵႃႈၼိူဝ်ၵူၼ်းမဵဝ်း ဢိသရေး၊ ၸွမ်းၵႃႈၼင်ႇတြႃးၸဝ်ႈမီးၼၼ်ႉသေၵမ်းလူၺ်ႈ။-
ပေႃးမႂ်းႁဵတ်းသတိပႂ်ႉၵမ်ပႂ်ႉၸွမ်းထုင်းၽိင်ႈတြႃးဢၼ် ထႃႇဝရႃႉၽြႃး၊ ဢၢပ်ႈဝႆႉတီႈ မူဝ်းသေႇ၊ ပုၼ်ႈမဵဝ်း ဢိသရေး၊ ၼၼ်ႉၸိုင်၊တၢင်းၵျၢမ်ႇတၢင်းပွင်မႂ်းတၵ်းပဵၼ်လႆႈဢေႃႈ။ ႁႂ်ႈမီးတၢင်းဢၼ်ႁတ်းႁၢၼ်တႃႉ။ ယႃႇပေၵူဝ်ပေႁႄလႄႈယႃႇပေၸႂ်လုႁႅင်းဢူၼ်ႈ။-
ပုၼ်ႈတႃႇၵျွင်းပိၵ်ႈမၢၼ်ႇၸဝ်ႈၼၼ်ႉ၊ၵဝ်ၶတ်းၸႂ်ႁဵတ်းတႄႉႁဵတ်းဝႃႈလႄႈႁၢင်ႈဝႆႉႁႅၼ်းဝႆႉၶမ်း၊ၼိုင်ႈသႅၼ်တလၢၼ်ႇတၢၼ်ႇ ငိုၼ်းလၢၼ်ႉတလၢၼ်ႇတၢၼ်ႇ ဢိၵ်ႇတင်းတွင်းလိူင်၊တင်းလဵၵ်းၼမ်ၼႃႇထၢၼ်ႈပေႃးဢမ်ႇၸၢင်ႈၸင်ႈႁိဝ်ႈလႆႈၼၼ်ႉယဝ်ႉ။ မႆႉလႂ်ဢိၵ်ႇတင်းမၢၵ်ႇႁိၼ်ၼမ်ၼႃႇၵေႃႈၵဝ်ႁႅၼ်းဝႆႉ၊ပုၼ်ႈၵျွင်းပိၵ်ႈမၢၼ်ႇၸဝ်ႈယဝ်ႉ။ မႂ်းၵေႃႈႁႃမႃးထႅင်ႈတႃႉ။-
ၼွၵ်ႈသေၼၼ်ႉ၊မႂ်းမီးၵူၼ်းႁဵတ်းၵၢၼ်ၼမ်ၼႃႇဝႆႉယဝ်ႉ။ မီးၸၢင်ႈမႆႉလႂ်၊ၸၢင်ႈၵေႃႈတိူၵ်ႈလႂ်၊ၸၢင်ႈထၢၵ်ႇမၢၵ်ႇႁိၼ်လႂ်၊ၵူၺ်းဢမ်ႇၵႃး၊မီးၸၢင်ႈဢၼ်ၵတ်ႉဢၼ်ၶႅၼ်ႇၼမ်ၼႃႇ၊-
ၸၢင်ႈဢၼ်မေႃႁဵတ်းၶိူင်ႈၶမ်း၊ၶိူင်ႈငိုၼ်း၊ၶိူင်ႈတွင်းလိူင်၊တင်းၶိူင်ႈလဵၵ်းတင်းလၢႆၸိူဝ်းၼၼ်ႉဢေႃႈ။ တႄႇၸႃႉႁဵတ်းၵႂႃႇမိူဝ်ႈလဵဝ်ၼႆႉတႃႉ။ ႁႂ်ႈ ထႃႇဝရႃႉၽြႃး၊ မီးယူႇလူၺ်ႈၵၼ်တင်းမႂ်းသေၵမ်းလူၺ်ႈ၊” ဝႃႈၼင်ႇၼႆဢေႃႈ။
တႃႇဝိတ်ႈ၊ ပူင်ဢမိင်ႉတီႈၵူၼ်းဢၼ်ပဵၼ်ၵႄႇပဵၼ်ႁူဝ်မဵဝ်း ဢိသရေး၊ ၸိူဝ်းၼၼ်ႉၵႃႈမီးတင်းသဵင်ႈတင်းလူင်ႁႂ်ႈၶဝ်ၸွႆႈထႅမ် သေႃးလမုၼ်ႇ၊ ဢေႃႈ။-
မၼ်းသင်ႇလၢတ်ႈတီႈၶဝ်လႄႈဝႃႈ၊ “ ထႃႇဝရႃႉၽြႃး၊ ၽြႃးပဵၼ်ၸဝ်ႈသူမီးယူႇလူၺ်ႈၵၼ်တင်းသူမႃးယဝ်ႉလႄႈပၼ်ႁႂ်ႈသူယူႇတဵတ်ႇလီၼိမ်လီၵူႈၽၢႆႇၵူႈပႃႈယဝ်ႉ။ မၼ်းၸဝ်ႈပၼ်ဢၶႂၢင်ႉ၊ႁႂ်ႈၵဝ်ပႄႉၼႅင်ႇၵူၼ်းၸိူဝ်းဢၼ်ယၢမ်ႈယူႇၵႃႈၼႂ်းမိူင်းၼႆႉၼၼ်ႉတင်းသဵင်ႈတင်းလူင်ယဝ်ႉလႄႈၶဝ်လႆႈပဵၼ်ၶႃႈဝၢၼ်ႈၵူၼ်းမိူင်းသူ၊ဢိၵ်ႇတင်းၶႃႈဝၢၼ်ႈၵူၼ်းမိူင်း ထႃႇဝရႃႉၽြႃး၊ ယဝ်ႉ။-
မိူဝ်ႈလဵဝ်ၼႆႉဢွၼ်ၵၼ်ပႃးၸႂ်ပႃးၶေႃးထၢမ်းႁဵတ်းပုၼ်ႈ ထႃႇဝရႃႉၽြႃး၊ ဢၼ်ပဵၼ်ၽြႃးပဵၼ်ၸဝ်ႈသူတႃႉ။ ဢွၼ်ၵၼ်တႄႇၸႃႉႁဵတ်းသၢင်ႈၵျွင်းပိၵ်ႈမၢၼ်ႇၸဝ်ႈပုၼ်ႈလွင်ႈၼင်ႇႁိုဝ်သူတၵ်းၸၢင်ႈဢဝ်တိူၵ်ႈပတိၺိၺ်ႇၸဝ်ႈ ထႃႇဝရႃႉၽြႃး၊ ဢိၵ်ႇတင်းၶိူင်ႈမူတ်းၸၢင်ႇၸိူဝ်းဢၼ်ၸႂ်ႉဢၼ်တိုဝ်းၼႂ်းမိူဝ်ႈဢၼ်ဝႆႈသႃမၼ်းၸဝ်ႈၼၼ်ႉ၊မႃးသႂၢင်းသႂ်ႇဝႆႉၵႃႈၼႂ်းၵျွင်းပိၵ်ႈမၢၼ်ႇၼၼ်ႉတႃႉ၊” ဝႃႈၼင်ႇၼႆဢေႃႈ။
မိူဝ်ႈဢၼ် တႃႇဝိတ်ႈ၊ ထဝ်ႈၵႄႇၼႃႇယဝ်ႉၼၼ်ႉမၼ်းယုၵ်ႉတၢင်ႇလုၵ်ႈၸၢႆးမၼ်း သေႃးလမုၼ်ႇ၊ ဝႆႉၵႃႈၼႂ်းဢရႃႇၶုၼ်ႁေႃၶမ်းမိူင်း ဢိသရေး၊ ဢေႃႈ။
ၶုၼ်ႁေႃၶမ်း တႃႇဝိတ်ႈ၊ ၼၼ်ႉသမ်ႉႁႂ်ႈၵူၼ်းဢၼ်ပဵၼ်ၵႄႇပဵၼ်ႁူဝ် ဢိသရေး၊ ၵႃႈမီးဢိၵ်ႇတင်းယဵၸ်ႈပရေႃးႁဵၵ်ႈ တင်းလၢႆတင်းၵူၼ်း လေႇဝိ၊ ၸိူဝ်းၼၼ်ႉၸုတုမ်ၵၼ်ဢေႃႈ။-
မၼ်းၵဵပ်းၸရၢင်းၵူၼ်း လေႇဝိ၊ ၸိူဝ်းဢၼ်ပဵၼ်ၵူၼ်းၸၢႆးဢၼ်ဢသၢၵ်ႈမီးသၢမ်သိပ်းၶိုၼ်ႈၼိူဝ်တင်းလၢႆ၊မီးသၢမ်မိုၼ်ႇပႅတ်ႇႁဵင်ၵေႃႉဢေႃႈ။-
ၼႂ်းၶဝ်ၸိူဝ်းၼၼ်ႉ၊မၼ်းၶၢၼ်းၵူၼ်းသွင်မိုၼ်ႇသီႇႁဵင်ၵေႃႉ၊ႁႂ်ႈၵိုတ်ႉႁၢပ်ႇၼႃႈၵၢၼ်ၵျွင်းပိၵ်ႈမၢၼ်ႇၸဝ်ႈ၊ၵူၼ်းႁူၵ်းႁဵင်ၵေႃႉ၊ႁႂ်ႈမၢတ်ႈမၢႆၸရၢင်းဢိၵ်ႇတင်းတႅပ်းတတ်းဢမု။-
ၵူၼ်းသီႇႁဵင်ၵေႃႉ၊ႁႂ်ႈပႂ်ႉတီႈၽၵ်းတူ၊ဢိၵ်ႇတင်းၵူၼ်းသီႇႁဵင်ၵေႃႉ၊သမ်ႉႁႂ်ႈဢဝ်ၶိူင်ႈပဝ်ႇၶိူင်ႈႁႆႇတူႇရိယႃႇဢၼ်ၶုၼ်ႁေႃၶမ်းမႄးႁႅၼ်းဝႆႉ၊ပုၼ်ႈတၵ်းပဝ်ႇႁႆႇယွင်ႈယေႃးမုၼ်ၽုင်း ထႃႇဝရႃႉၽြႃး၊ ဢေႃႈ။
တႃႇဝိတ်ႈ၊ ၽႄၵူၼ်း လေႇဝိ၊ တင်းလၢႆႁဵတ်းသၢမ်မူႇသၢမ်ၸုမ်း၊ၸွမ်းၼင်ႇၵူၼ်းၶိူဝ်းႁိူၼ်းၶဝ်ႁင်းၽႂ်ႁင်းမၼ်းဢၼ်ဝႃႈ၊ၵူၼ်းၶိူဝ်းႁိူၼ်း ၵေႇရသုၼ်ႇ၊ၵေႃႇႁတ်ႉ၊ ဢိၵ်ႇတင်း မေႇရႃႇရိ၊ ၸိူဝ်းၼၼ်ႉဢေႃႈ။
ၵေႇရသုၼ်ႇ၊ မီးလုၵ်ႈၸၢႆးသွင်ၵေႃႉဢၼ်ပဵၼ်၊ လႃႇတၼ်ႇ၊ ဢိၵ်ႇတင်း သိမိ၊ ဢေႃႈ။-
လႃႇတၼ်ႇ၊ မီးလုၵ်ႈၸၢႆးသၢမ်ၵေႃႉဢၼ်ပဵၼ်၊ ယေႇႁေးလႃႉ၊ ၵေႃႉယႂ်ႇဢိၵ်ႇတင်း ၸေးႀမ်ႇ၊ လႄႈ ယေႃးလႃႉ၊ ဢေႃႈ။-
ၶဝ်ၸိူဝ်းၼႆႉပဵၼ်တူၼ်ႈပဵၼ်ငဝ်ႈၵူၼ်းၶိူဝ်းႁိူၼ်း လႃႇတၼ်ႇ၊ ဢေႃႈ။ သိမိ၊ မီးလုၵ်ႈၸၢႆးသၢမ်ၵေႃႉဢၼ်ပဵၼ်၊ သေႇလေႃးမိတ်ႉ၊ႁႃႇၸေးလႃႉ၊ ဢိၵ်ႇတင်း ႁႃႇရၼ်ႇ၊ ဢေႃႈ။-
လုၵ်ႈၸၢႆး သိမိ၊ ၸမ်ႉ၊ပဵၼ် ယႃႇႁတ်ႉ၊ၸိၼႃႉ၊ယုသႃႉ၊ တင်း ပေႇရိယႃႉ၊ ပွင်းၵၼ်မီးသီႇၵေႃႉဢေႃႈ။-
ယႃႇႁတ်ႉ၊ ပဵၼ်ၵေႃႉယႂ်ႇ၊ ၸိၼႃႉ၊ ပဵၼ်ၵေႃႉတၢမ်းသွင်ဢေႃႈ။ ယုသႃႉ၊ တင်း ပေႇရိယႃႉ ဢမ်ႇမီးလုၵ်ႈၸၢႆးၼမ်လႄႈၶဝ်သွင်ၵေႃႉၼႆႉပွင်းၵၼ်ၼႂ်းၸရၢင်းၶိူဝ်းႁိူၼ်းလဵဝ်ၵူၺ်းဢေႃႈ။
လုၵ်ႈၸၢႆး ၵေႃႇႁတ်ႉ၊ ၸမ်ႉ၊ပဵၼ် ဢႃႇမရမ်ႇ၊ဢိၸႁႃႇ၊ႁေႇပရုၼ်ႇ၊ ဢိၵ်ႇတင်း ဢေႃးၸေးလႃႉ၊ ပွင်းၵၼ်မီးသီႇၵေႃႉဢေႃႈ။-
လုၵ်ႈၸၢႆး ဢႃႇမရမ်ႇ၊ ၸမ်ႉ၊ပဵၼ် ဢႃႇရုၼ်ႇ၊ တင်း မူဝ်းသေႇ၊ ဢေႃႈ။ ဢႃႇရုၼ်ႇ၊ တင်းၸိူဝ်ႉၶိူဝ်းလုၵ်ႈလၢၼ်မၼ်းၸိုင်၊ၸတ်းဝႆႉၶေႃၶေႃႁႂ်ႈလႆႈပႂ်ႉထိင်းၶိူင်ႈပိူင်မူတ်းၸၢင်ႇတင်းလၢႆ၊ႁႂ်ႈလႆႈၽဝ်ၼၢမ်ႇသႃႇၼႂ်းမိူဝ်ႈဢၼ်ဝႆႈသႃ၊ ထႃႇဝရႃႉၽြႃး၊ ႁႂ်ႈလႆႈဢဝ်ၼႃႇမႃႉၸိုဝ်ႈသဵင်ၸဝ်ႈပၼ်တၢင်းလီတႃႇသေႇဢေႃႈ။-
လုၵ်ႈၸၢႆး မူဝ်းသေႇ၊ ၵေႃႉဢၼ်ပဵၼ်ၵူၼ်းၽြႃးပဵၼ်ၸဝ်ႈၸမ်ႉ၊လႆႈသႂ်ႇပႃးၼႂ်းၸရၢင်းၵူၼ်းမဵဝ်း လေႇဝိ၊ ဢေႃႈ။-
မူဝ်းသေႇ၊ မီးလုၵ်ႈၸၢႆးသွင်ၵေႃႉဢၼ်ပဵၼ် ၵေႇရသုၼ်ႇ၊ ဢိၵ်ႇတင်း ဢေးလျေႇၸႃႇ၊ ဢေႃႈ။-
ၼႂ်းလုၵ်ႈၸၢႆး ၵေႇရသုၼ်ႇ၊ ၼၼ်ႉၵေႃႉဢၼ်ပဵၼ်ၵူၼ်းတူၼ်ႈၵူၼ်းငဝ်ႈၸမ်ႉ၊ပဵၼ် သေႇပူၺ်ႇလႃႉ၊ ဢေႃႈ။-
ဢေးလျေႇၸႃႇ၊ မီးလုၵ်ႈၸၢႆးၵေႃႉလဵဝ်ဢၼ်ၸိုဝ်ႈဝႃႈ၊ ရေႇႁၽိ၊ ၵူၺ်းသေၵေႃႈ၊ ရေႇႁၽိ၊ ၸမ်ႉ၊မီးလုၵ်ႈၸၢႆးၼမ်ၼႃႇဢေႃႈ။
ဢိၸႁႃႇ၊ လုၵ်ႈၸၢႆး ၵေႃႇႁတ်ႉ၊ ၵေႃႉထူၼ်ႈသွင်ၼၼ်ႉၸမ်ႉ၊မီးလုၵ်ႈၸၢႆးလဵဝ်ဢၼ်ပဵၼ်၊ သေႇလေႃးမိတ်ႉ၊ လႄႈပဵၼ်ၵူၼ်းတူၼ်ႈၵူၼ်းငဝ်ႈၼႂ်းၶိူဝ်းႁိူၼ်းမၼ်းဢေႃႈ။-
ႁေႇပရုၼ်ႇ၊ လုၵ်ႈၸၢႆး ၵေႃႇႁတ်ႉ၊ ၵေႃႉထူၼ်ႈသၢမ်ၼၼ်ႉၸမ်ႉ၊မီးလုၵ်ႈၸၢႆးသီႇၵေႃႉဢၼ်ပဵၼ် ယေႇရိယႃႉ၊ဢႃႇမရိ၊ယႁႃႇၸေးလႃႉ၊ ဢိၵ်ႇတင်း ယေႇၵမမ်ႇ၊ ဢေႃႈ။-
ဢေႃးၸေးလႃႉ၊ လုၵ်ႈၸၢႆး ၵေႃႇႁတ်ႉ၊ ၵေႃႉထူၼ်ႈသီႇၼၼ်ႉၸမ်ႉ၊မီးလုၵ်ႈၸၢႆးသွင်ၵေႃႉဢၼ်ပဵၼ် မိၵ်ႉၶႃႇ၊ ဢိၵ်ႇတင်း ဢိသိယႃႉ၊ ဢေႃႈ။-
လုၵ်ႈၸၢႆး မေႇရႃႇရိ၊ ၸမ်ႉ၊ပဵၼ် မႃႇလိ၊ ဢိၵ်ႇတင်း မုသိ၊ ဢေႃႈ။ မႃႇလိ၊ ၵေႃႈမီးလုၵ်ႈၸၢႆးသွင်ၵေႃႉ၊ဢၼ်ပဵၼ် ဢေးလႃႇၸႃႇ၊ ဢိၵ်ႇတင်း ၵိသႃႉ၊ ဢေႃႈ။-
ဢေးလႃႇၸႃႇ၊ ယင်းဢမ်ႇမီးလုၵ်ႈၸၢႆးသေၵေႃႉ၊မီးလုၵ်ႈယိင်းၵူၺ်းၵူၺ်းလႄႈတၢႆၵႂႃႇဢေႃႈ။ လုၵ်ႈယိင်းၸိူဝ်းၼၼ်ႉတႄႇၼႃႈႁိူၼ်းလူၺ်ႈၵၼ်တင်းပီႈၼွင်ႉၶဝ်ဢၼ်ပဵၼ်၊လုၵ်ႈၸၢႆး ၵိသႃႉ၊ ၸိူဝ်းၼၼ်ႉဢေႃႈ။-
မုသိ၊ လုၵ်ႈၸၢႆး မေႇရႃႇရိ၊ ၵေႃႉထူၼ်ႈသွင်ၼၼ်ႉၸမ်ႉ၊မီးလုၵ်ႈၸၢႆးသၢမ်ၵေႃႉ၊ဢၼ်ပဵၼ် မႃႇလိ၊ဢေးတႃႇ၊ ဢိၵ်ႇတင်း ယေႇရိမုတ်ႉ၊ ဢေႃႈ။
ၶဝ်ၸိူဝ်းၼႆႉ၊ပဵၼ်လုၵ်ႈလၢၼ် လေႇဝိ၊ ၸွမ်းလူၺ်ႈၶိူဝ်းႁိူၼ်းၶဝ်ၼၼ်ႉပဵၼ်ၵူၼ်းတူၼ်ႈၵူၼ်းငဝ်ႈပီႈၼွင်ႉၸိူဝ်ႉၶိူဝ်းပေႃႈၶဝ်လႄႈလႆႈၶဝ်ႈပႃးၼႂ်းၸရၢင်းပဵၼ်ၵေႃႉပဵၼ်ၵေႃႉ၊ဢၼ်ဢသၢၵ်ႈလႆႈသၢဝ်းပီၶိုၼ်ႈၼိူဝ်ၼၼ်ႉလႆႈၵိုတ်ႉႁၢပ်ႇၼႃႈၵၢၼ်ၵႃႈၼႂ်းၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ဢေႃႈ။
တႃႇဝိတ်ႈ၊ ၵေႃႈလၢတ်ႈလႄႈဝႃႈ၊ “ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ၼၼ်ႉပၼ်တၢင်းဢၼ်ၵတ်းယဵၼ်ၼိမ်ၸႂ်ၵႃႈတီႈၵူၼ်းမၼ်းၸဝ်ႈယဝ်ႉလႄႈမၼ်းၸဝ်ႈသမ်ႉတၵ်းယူႇသဝ်းၵႃႈတီႈဝဵင်း ယေႇရုသလႅမ်ႇ၊ တႃႇသေႇဢမ်ႇထၢတ်ႇယဝ်ႉ။-
ၵွပ်ႈၼႆလႄႈ ၵူၼ်းမဵဝ်း လေႇဝိ၊ တင်းလၢႆၵမ်းလိုၼ်းဢမ်ႇလႆႈႁၢမ်သုမ်ႉထဵင်ၸဝ်ႈဢၼ် ထႃႇဝရႃႉၽြႃး၊ ၵိင်းဝၢပ်ႈၼၼ်ႉ၊ဢိၵ်ႇတင်းၶိူင်ႈပိူင်ဢၼ်ၸႂ်ႉဢၼ်တိုဝ်းၵႃႈတီႈဢၼ်ဝႆႈသႃ ထႃႇဝရႃႉၽြႃး၊ ၼၼ်ႉယဝ်ႉ၊” ဝႃႈၼင်ႇၼႆဢေႃႈ။-
ၵွပ်ႈလူၺ်ႈၶေႃႈၵႂၢမ်းဢၼ် တႃႇဝိတ်ႈ၊ သင်ႇလၢတ်ႈလိုၼ်းလင်သုတ်းၼၼ်ႉလႄႈၵူၼ်းမဵဝ်း လေႇဝိ၊ တင်းလၢႆၸိူဝ်းဢၼ်ဢသၢၵ်ႈလႆႈသၢဝ်းပီၶိုၼ်ႈၼိူဝ်ၼၼ်ႉ၊လႆႈၼပ်ႉဢၢၼ်ႇပႃးၼႂ်းၸရၢင်းဢၼ်ၵိုတ်ႉႁၢပ်ႇၼႃႈၵၢၼ်ဢေႃႈ။-
ၼႃႈၵၢၼ်ဢၼ်ၵူၼ်းမဵဝ်း လေႇဝိ၊ တင်းလၢႆတၵ်းလႆႈၵိုတ်ႉႁၢပ်ႇၸမ်ႉ၊ၶဝ်တၵ်းလႆႈၸွႆႈထႅမ်ယဵၸ်ႈပရေႃးႁဵၵ်ႈ ၸိူဝ်ႉၶိူဝ်း ဢႃႇရုၼ်ႇ၊ တင်းလၢႆ၊ၼႂ်းၵၢၼ်ၵျွင်းပိၵ်ႈမၢၼ်ႇၸဝ်ႈ။ တၵ်းလႆႈပႂ်ႉလူလုမ်းလႃးၵျွင်းပိၵ်ႈမၢၼ်ႇ ထႃႇဝရႃႉၽြႃး၊ လႄႈပၢင်ႇဝၢင်းမၼ်းလႂ်၊လုၵ်းၵျွင်းပၢၵ်ႈမၢၼ်ႇလႂ်၊ဢိၵ်ႇတင်းၶိူင်ႈပိူင်ဢၼ်မူတ်းၸၢင်ႇၵႃႈမီးႁႂ်ႈမူတ်းသႂ်ဝႆႉၸိူဝ်းၼၼ်ႉ။-
တၵ်းလႆႈဢဝ်ပုၼ်ႈၽွၼ်းပုၼ်ႈတႃႇတေဢဝ်ၶဝ်ႈမုၼ်းၸိူဝ်းဢၼ်တၵ်းသၢၵ်ႈလူႇတီႈၽြႃးပဵၼ်ၸဝ်ႈ၊ၽွင်ၶဝ်ႈမုၼ်းပုၼ်ႈတၵ်းသၢၵ်ႈလူႇ၊ၶႅပ်းၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈပုၼ်ႈတၵ်းသၢၵ်ႈလူႇ၊ၽွင်ၶဝ်ႈမုၼ်းဢၼ်ၼွၵ်းလူၺ်ႈၼမ်ႉမၼ်းသၢၼ်ႇလုၼ်ႇ၊တၵ်းလႆႈၸင်ႈႁိဝ်ႈ၊တူင်တႅၵ်ႈ၊ၼပ်ႉဢၢၼ်ႇၵူႈၸိူဝ်ႉၵူႈပိူင်ပုၼ်ႈၶိူင်ႈတၢင်းလူႇတင်းလၢႆ။-
တၵ်းလႆႈႁဵတ်းတၢင်းဢၼ်ယွင်ႈယေႃးထေႃးပၼႃႇမုၼ်ၵုင်ႇ ထႃႇဝရႃႉၽြႃး၊ ၵူႈၼႂ်ၵူႈၶမ်ႈ။-
တၵ်းလႆႈယွင်ႈယေႃးထေႃးပၼႃႇၼႂ်းမိူဝ်ႈဢၼ်သၢၵ်ႈလူႇတီႈ ထႃႇဝရႃႉၽြႃး၊ ၼႂ်းဝၼ်းၵမ်သိၼ်လႂ်၊ဝၼ်းလိူၼ်မူၼ်းလႂ်၊တင်းဝၼ်းယႂ်ႇဝၼ်းလူင်လႂ်ဢေႃႈ။ ၶဝ်တၵ်းလႆႈထၢမ်းႁဵတ်းၵႃႈတီႈၽၢႆႇၼႃႈ ထႃႇဝရႃႉၽြႃး၊ ယူႇသေႇသေႇ၊ဢၼ်မႅၼ်ႈၸွမ်းၵႃႈၼင်ႇဢၼ်ၼပ်ႉဢၢၼ်ႇၼၼ်ႉလႄႈတၵ်းလႆႈႁဵတ်းၸွမ်းၵႃႈၼင်ႇဢၼ်သင်ႇလၢတ်ႈဝႆႉၼၼ်ႉလီလီငၢမ်းငၢမ်းဢေႃႈ။
ၵွပ်ႈၼႆလႄႈၵူၼ်းမဵဝ်း လေႇဝိ၊ တင်းလၢႆလႆႈထၢမ်းႁဵတ်းၼႃႈၵၢၼ်ၶဝ်ၵႃႈၼႂ်းသုမ်ႉထဵင်ၸဝ်ႈဢၼ် ထႃႇဝရႃႉၽြႃး၊ ၵိင်းဝၢပ်ႈဢိၵ်ႇတင်းၵျွင်းပိၵ်ႈမၢၼ်ႇၸဝ်ႈလႄႈၵမ်ႉၵႅမ်ပီႈၼွင်ႉၸိူဝ်ႉၶိူဝ်းၶဝ်ဢၼ်သိုပ်ႇလူင်းမႃးၵႃႈတီႈ ဢႃႇရုၼ်ႇ၊ ၼၼ်ႉယူႇၸိူဝ်ႉၼင်ႇၼၼ်ဢေႃႈ။
ဢၼ်ၸိူဝ်းၼႆႉၸမ်ႉ၊ပဵၼ်မုၵ်ႉၸုမ်းၸိူဝ်ႉၶိူဝ်းလုၵ်ႈလၢၼ် ဢႃႇရုၼ်ႇ၊ ဢေႃႈ။ ဢႃႇရုၼ်ႇ၊ မီးလုၵ်ႈၸၢႆးသီႇၵေႃႉ၊ဢၼ်ပဵၼ် ၼႃႇတပ်ႉ၊ဢၽိႁု၊ဢေးလႃႇၸႃႇ၊ ဢိၵ်ႇတင်း ဢိႀမႃႇ၊ ဢေႃႈ။-
ၼႃႇတပ်ႉ၊ တင်း ဢၽိႁု၊ တၢႆၵႂႃႇဢွၼ်တၢင်းပေႃႈၶဝ်ၼၼ်ႉလႄႈၸိူဝ်ႉၶိူဝ်းၶဝ်ဢမ်ႇၵိုတ်းဝႆႉယဝ်ႉၸင်ႇ၊ၼွင်ႉၸၢႆးၶဝ် ဢေးလႃႇၸႃႇ၊ တင်း ဢိႀမႃႇ၊ လႆႈၵိုတ်ႉႁၢပ်ႇၼႃႈၵၢၼ်ယဵၸ်ႈပရေႃးႁဵၵ်ႈ ဢေႃႈ။-
ၶုၼ်ႁေႃၶမ်း တႃႇဝိတ်ႈ၊ ဢိၵ်ႇတင်းၽူႈၵမ်ႉၵႅမ်မၼ်းသွင်ၵေႃႉဢၼ်ဝႃႈ၊ ၸႃႇတုၵ်ႉ၊ ၶိူဝ်း ဢေးလႃႇၸႃႇ၊ တင်း ဢႁိမလႅၵ်ႉ၊ ၶိူဝ်း ဢိႀမႃႇ၊ ၸိူဝ်းၼၼ်ႉႁႂ်ႈၸိူဝ်ႉၶိူဝ်းလုၵ်ႈလၢၼ် ဢႃႇရုၼ်ႇ၊ ပဵၼ်မုၵ်ႉပဵၼ်ၸုမ်း၊ၸွမ်းၼင်ႇၼႃႈၵၢၼ်ၶဝ်တင်းလၢႆၼၼ်ႉဢေႃႈ။-
ၶိူဝ်း ဢေးလႃႇၸႃႇ၊ ၼၼ်ႉပိူဝ်ႈဢၼ်ၵူၼ်းၸၢႆးဢၼ်ပဵၼ်တူၼ်ႈပဵၼ်ငဝ်ႈၶဝ်ယဵင်ႈၶႅၼ်းၼမ်ၼႃႇသေၶိူဝ်း ဢိႀမႃႇ၊ လႄႈၶဝ်ၶၢၼ်းၼႂ်းၶိူဝ်း ဢေးလႃႇၸႃႇ၊ သိပ်းႁူၵ်းၵေႃႉ၊ဢိၵ်ႇတင်းၼႂ်းၶိူဝ်း ဢိႀမႃႇ၊ ပႅတ်ႇၵေႃႉဢေႃႈ။-
ၸွမ်းလူၺ်ႈမီးၶုၼ်ၽၢႆႇၵျွင်းပိၵ်ႈမၢၼ်ႇၸဝ်ႈတင်းၶုၼ်ဢၼ်ပွင်ၵၢၼ်ၽြႃးပဵၼ်ၸဝ်ႈၼၼ်ႉ၊ၵႃႈၼႂ်းၸိူဝ်ႉၶိူဝ်းမဵဝ်း ဢေးလႃႇၸႃႇ၊ တင်းၸိူဝ်ႉၶိူဝ်း ဢိႀမႃႇ၊ ၼၼ်ႉလႄႈၶဝ်လႆႈတူၵ်းၸႃႇၵွၵ်ႈၽႄမႅင်ႇၼႃႈၵၢၼ်ႁင်းၽႂ်ႁင်းမၼ်းဢေႃႈ။-
ၵူၼ်းၶိူဝ်း ဢေးလႃႇၸႃႇ၊ တင်းၶိူဝ်း ဢိႀမႃႇ၊ ၸိူဝ်းၼၼ်ႉတူၵ်းၸႃႇၵွၵ်ႈၸွမ်းဢလေႉၵမ်းၽႂ်ၵမ်းမၼ်းဢေႃႈ။ သေႇမႃႇယႃႉ၊ လုၵ်ႈၸၢႆး ၼႃႇႀၼေႇလႃႉ၊ ပဵၼ်ၽူႈမၢႆလူင်မဵဝ်း လေႇဝိ၊ မၢတ်ႈမၢႆၸရၢင်းၵႃႈတီႈၽၢႆႇၼႃႈၶုၼ်ႁေႃၶမ်း၊ၽၢႆႇၼႃႈမူးမၢတ်ႈၽွင်းမိူင်း၊ၽၢႆႇၼႃႈယဵၸ်ႈပရေႃးႁဵၵ်ႈ ၸႃႇတုၵ်ႉ၊ဢႁိမလႅၵ်ႉ၊ လုၵ်ႈၸၢႆး ဢပျႃႇထႃႇ၊ ဢိၵ်ႇတင်းၵူၼ်းတူၼ်ႈၵူၼ်းငဝ်ႈမဵဝ်းယဵၸ်ႈပရေႃးႁဵၵ်ႈၶဝ်၊တင်းၵူၼ်းၶိူဝ်းႁိူၼ်းမဵဝ်း လေႇဝိ၊ ၸိူဝ်းၼၼ်ႉဢေႃႈ။
ၶဝ်ၸိူဝ်းၼႆႉ၊ၶဝ်ႈပႃးၼႂ်းၸရၢင်းၸွမ်းၵႃႈၼင်ႇဢၼ်ၶၢၼ်းဝႆႉ၊ႁႂ်ႈလႆႈထၢမ်းႁဵတ်းၼႂ်းတၢင်းဢၼ်ၶဝ်ႈလႄႈသၢင်ႈႁဵတ်းၵႃႈၼႂ်းၵျွင်းပိၵ်ႈမၢၼ်ႇၸဝ်ႈၸွမ်းၼင်ႇပူႇပေႃႈၶဝ် ဢႃႇရုၼ်ႇ၊ တႄႇႁဵတ်းပွင်ႁဵတ်းဝႆႉ၊ၸွမ်းၵႃႈၼင်ႇဢၼ် ထႃႇဝရႃႉၽြႃး၊ၽြႃးပဵၼ်ၸဝ်ႈ၊ ၵူၼ်းမဵဝ်း ဢိသရေး၊ သင်ႇလၢတ်ႈဝႆႉၼၼ်ႉဢေႃႈ။
ၸရၢင်းၵူၼ်းတူၼ်ႈၵူၼ်းငဝ်ႈၸိူဝ်ႉၶိူဝ်းမဵဝ်း လေႇဝိ၊ ဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉၸမ်ႉ၊ ၼႂ်းလုၵ်ႈၸၢႆး ဢႃႇမရမ်ႇ၊ ၸိူဝ်းၼၼ်ႉပဵၼ် သေႇပူၺ်ႇလႃႉ၊ ၼႂ်းလုၵ်ႈၸၢႆး သေႇပူၺ်ႇလႃႉ၊ ၸိူဝ်းၼၼ်ႉပဵၼ် ယေႇတႃႇယႃႉ။
ၼႂ်းလုၵ်ႈၸၢႆး ရေႇႁၽိ၊ ၸိူဝ်းၼၼ်ႉပဵၼ် ဢိသိယႃႉ။
ၼႂ်းလုၵ်ႈၸၢႆး ဢိၸႁႃႇ၊ ၸိူဝ်းၼၼ်ႉပဵၼ် သေးလေႃးမိတ်ႉ၊ ၼႂ်းလုၵ်ႈၸၢႆး သေးလေႃးမိတ်ႉ၊ ၸိူဝ်းၼၼ်ႉပဵၼ် ယႃႇႁတ်ႉ။
ၼႂ်းလုၵ်ႈၸၢႆး ႁေႇပရုၼ်ႇ၊ ၸိူဝ်းၼၼ်ႉပဵၼ် ယေႇရိယႃႉ၊ဢႃႇမရိ၊ယႁႃႇၸေးလႃႉ၊ ဢိၵ်ႇတင်း ယေႇၵမမ်ႇ၊ တၢမ်းၵၼ်သီႇပီႈၼွင်ႉ။
ၼႂ်းလုၵ်ႈၸၢႆး ဢေႃးၸေးလႃႉ၊ ၸိူဝ်းၼၼ်ႉပဵၼ် မိၵ်ႉၶႃႇ၊ ၼႂ်းလုၵ်ႈၸၢႆး မိၵ်ႉၶႃႇ၊ ၸိူဝ်းၼၼ်ႉပဵၼ် သမိရႃႉ။
ၼွင်ႉၸၢႆး မိၵ်ႉၶႃႇ၊ ၼၼ်ႉပဵၼ် ဢိသိယႃႉ၊ ၼႂ်းလုၵ်ႈၸၢႆး ဢိသိယႃႉ၊ ၸိူဝ်းၼၼ်ႉပဵၼ် ၸႃႇၶရိ။
ၼႂ်းလုၵ်ႈၸၢႆး မေႇရႃႇရိ၊ ၸိူဝ်းၼၼ်ႉပဵၼ် မႃႇလိ၊မုသိ၊ ဢိၵ်ႇတင်း ယႃႇၸိ၊-
ၼႂ်းလုၵ်ႈၸၢႆး ယႃႇၸိ၊ ၸိူဝ်းၼၼ်ႉပဵၼ် ပေးၼေႃး၊သေႃးႁမ်ႇ၊ၸၵ်ႉၵုရႃႉ၊ ဢိၵ်ႇတင်း ဢိပရိ၊-
ၼႂ်းလုၵ်ႈၸၢႆး မႃႇလိ၊ ၼၼ်ႉပဵၼ် ဢေးလႃႇၸႃႇ၊ ဢၼ်ဢမ်ႇမီးလုၵ်ႈၸၢႆး၊-
လုၵ်ႈၸၢႆး ၵိသႃႉ၊ ၼၼ်ႉပဵၼ် ယေႇရမေးလႃႉ၊-
လုၵ်ႈၸၢႆး မုသိ၊ ၸိူဝ်းၼၼ်ႉပဵၼ် မႃႇလိ၊ဢေးတႃႇ၊ ဢိၵ်ႇတင်း ယေႇရိမုတ်ႉ၊ ဢေႃႈ။ ၶဝ်ၸိူဝ်းၼႆႉၸမ်ႉ၊ပဵၼ်ၵူၼ်းၶိူဝ်းႁိူၼ်းမဵဝ်း လေႇဝိ။
ၵေႃႉဢၼ်ပဵၼ်တူၼ်ႈပဵၼ်ငဝ်ႈၶိူဝ်းႁိူၼ်းၶဝ်လႂ်၊ဢိၵ်ႇတင်းၼႂ်းၼွင်ႉၸၢႆးမၼ်းၵေႃႉၼိုင်ႈ၊ဢွၼ်ၵၼ်တူၵ်းၸႃႇၵွၵ်ႈဢဝ်ပုၼ်ႈၼႃႈၵၢၼ်ၶဝ်မိူၼ်ၸိူဝ်ႉၼင်ႇပီႈၼွင်ႉၶဝ်မဵဝ်း ဢႃႇရုၼ်ႇ၊ ႁဵတ်းၵႃႈတီႈၽၢႆႇၼႃႈၶုၼ်ႁေႃၶမ်း တႃႇဝိတ်ႈ၊ ဢိၵ်ႇတင်း ၸႃႇတုၵ်ႉ၊ဢႁိမလႅၵ်ႉ၊ ဢိၵ်ႇတင်းၵူၼ်းတူၼ်ႈၵူၼ်းငဝ်ႈၶိူဝ်းႁိူၼ်းယဵၸ်ႈပရေႃးႁဵၵ်ႈတင်းလၢႆ၊ဢိၵ်ႇတင်းမဵဝ်း လေႇဝိ၊ တင်းလၢႆၼၼ်ႉဢေႃႈ။
ၶုၼ်ႁေႃၶမ်း တႃႇဝိတ်ႈ၊ ဢိၵ်ႇတင်းၵူၼ်းတူၼ်ႈၵူၼ်းငဝ်ႈမဵဝ်း လေႇဝိ၊ ၶဝ်ဢွၼ်ၵၼ်လိူၵ်ႈဢဝ်ၵူၼ်းၶိူဝ်းႁိူၼ်း လေႇဝိ၊ ဢၼ်ပဵၼ် ဢႃႇသပ်ႉ၊ႁေႇမၼ်ႇ၊ ဢိၵ်ႇတင်း ယေႇတုႀုၼ်ႇ၊ ၸိူဝ်းၼႆႉဢွၼ်ႁူဝ်ၼႂ်းတၢင်းဢၼ်ႁဵတ်းဝၢတ်ႈၵူဝ်းၵႂၢႆႇၼၼ်ႉဢေႃႈ။ ၶဝ်ၸိူဝ်းၼႆႉလႆႈမွၵ်ႇလၢတ်ႈၼုၵ်ႈၵပၢတ်ႈတြႃး၊ၽြႃးပဵၼ်ၸဝ်ႈဢၼ်ပႃးတင်းၶိူင်ႈပဝ်ႇၶိူင်ႈႁႆႇတူႇရိယႃႇတိင်ႇတရေႃးလႂ်၊သႅင်ႇလႂ်၊လႆႈလဵတ်းၸွမ်းၼၼ်ႉဢေႃႈ။ ၸရၢင်းၵူၼ်းဢၼ်လႆႈၶၢမ်ႇတၢင်းဢၼ်လိူၵ်ႈဝႆႉ၊ႁႂ်ႈဢွၼ်ႁူဝ်ႁဵတ်းဝၢတ်ႈၵူဝ်းၵႂၢႆႇၼၼ်ႉၸမ်ႉ။
လုၵ်ႈၸၢႆး ဢႃႇသပ်ႉ၊ သီႇၵေႃႉ၊ဢၼ်ပဵၼ် ၸၵ်ႉၵုရႃႉ၊ယူဝ်းသႅပ်ႈ၊ၼေႇႀၼိ၊ ဢိၵ်ႇတင်း ဢႃႇသရေးလႃႉ၊ ဢေႃႈ။ ၶဝ်လႆႈယူႇတႂ်ႈမိုဝ်း ဢႃႇသပ်ႉ၊ ၵေႃႉဢၼ်ဢွၼ်ႁူဝ်မိူဝ်ႈဢၼ်မွၵ်ႇလၢတ်ႈၼုၵ်ႈၵပၢတ်ႈတြႃး၊ၽြႃးပဵၼ်ၸဝ်ႈၸွမ်းၵႃႈၼင်ႇဢၼ်ၶုၼ်ႁေႃၶမ်းၸီႇယၢင်ႇၼၼ်ႉဢေႃႈ။
လုၵ်ႈၸၢႆး ယေႇတုႀုၼ်ႇ၊ ႁူၵ်းၵေႃႉၸမ်ႉ၊ပဵၼ် ၵေႇတလိ၊ၸေးရိ၊သိမိ၊ယေႇသႃႇယႃႉ၊ႁႃႇသပိ၊ ဢိၵ်ႇတင်း မတ်ႉတိသိ၊ ဢေႃႈ။ ပေႃႈၶဝ်ၼၼ်ႉဢွၼ်ႁူဝ်ၶဝ်လႄႈမွၵ်ႇလၢတ်ႈၼုၵ်ႈၵပၢတ်ႈတြႃး၊ၽြႃးပဵၼ်ၸဝ်ႈဢဝ်တင်းတိင်ႇ၊တူႇရိယႃႇ၊လဵတ်းၸွမ်းဢိၵ်ႇတင်းယွင်ႈယေႃးတၢင်ႇၵျေးၸူး ထႃႇဝရႃႉၽြႃး၊ ဢေႃႈ။
လုၵ်ႈၸၢႆး ႁေႇမၼ်ႇ၊ သမ်ႉမီးသိပ်းသီႇၵေႃႉလႄႈပဵၼ် ပုၵ်ႉၵိ၊မတ်ႉသၼိ၊ဢေႃးၸေးလႃႉ၊သေႇပူၺ်ႇလႃႉ၊ယေႇရိမုတ်ႉ၊ႁႃႇၼၼိ၊ႁႃႇၼၼ်ႇ၊ဢေးလျႃႇသႃႉ၊ၵိတ်ႉတႃႇလတိ၊ရေႃးမၼ်ႇတေႇၸႃႇ၊ယေႃးသပေႇၵသႃႉ၊မႃႇလေႃးသိ၊ႁေႃးသိရႃႉ၊ ဢိၵ်ႇတင်း မႁႃႇၸုတ်ႉ၊ ဢေႃႈ။-
ၶဝ်ၸိူဝ်းၼႆႉ၊ပဵၼ်လုၵ်ႈၸၢႆး ႁေႇမၼ်ႇ၊ ၵေႃႉဢၼ်ႁူပွင်ႇတႃလႅင်းတီႈၶုၼ်ႁေႃၶမ်းလႄႈၽြႃးပဵၼ်ၸဝ်ႈပၼ်လုၵ်ႈၸၢႆးသိပ်းသီႇၵေႃႉ၊ဢိၵ်ႇတင်းလုၵ်ႈယိင်းသၢမ်ၵေႃႉၸိူဝ်းၼႆႉ၊ၵႃႈၼင်ႇဢၼ်ၽြႃးပဵၼ်ၸဝ်ႈပၼ်ၵတိဝႆႉတီႈမၼ်းႁႂ်ႈလႆႈယုၵ်ႉယွင်ႈယွင်ႈယေႃးမၼ်းၸဝ်ႈဢေႃႈ။-
ၶဝ်ၸိူဝ်းၼႆႉ၊ပေႃႈၶဝ်ဢွၼ်ႁူဝ်လႄႈလဵတ်းတူႇရိယႃႇၵႃႈၼႂ်းၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ဢၼ်ပႃးတင်းတိင်ႇလႂ်၊တရေႃးလႂ်၊သႅင်ႇလႂ်၊ယွင်ႈယေႃးၽြႃးပဵၼ်ၸဝ်ႈၼၼ်ႉဢေႃႈ။ ဢႃႇသပ်ႉ၊ယေႇတုႀုၼ်ႇ၊ ဢိၵ်ႇတင်း ႁေႇမၼ်ႇ၊ ၸိူဝ်းၼႆႉလႆႈႁဵတ်းၸွမ်းၼင်ႇၶုၼ်ႁေႃၶမ်းမီးဢမိင်ႉၼၼ်ႉဢေႃႈ။
ၶဝ်သၢဝ်းသီႇၵေႃႉၼႆႉပဵၼ်ၵူၼ်းၵတ်ႉၵူၼ်းၶၼ်ယဝ်ႉလႄႈပီႈၼွင်ႉမဵဝ်း လေႇဝိ၊ ၸိူဝ်းဢၼ်သွၼ်လဵတ်း၊သွၼ်ႁႆႇတိုင်ႈ၊တူႇရိယႃႇၸမ်ႉ၊မီးသွင်ပၢၵ်ႇပႅတ်ႇသိပ်းပႅတ်ႇၵေႃႉဢေႃႈ။
ၼႂ်းၶဝ်ၼၼ်ႉၵေႃႉဢၼ်ဢသၢၵ်ႈယႂ်ႇလႄႈၵေႃႉဢၼ်ဢသၢၵ်ႈလဵၵ်ႉ၊သြႃႇလႄႈတပႄးလႆႈတူၵ်းၸႃႇၵွၵ်ႈလႄႈထၢမ်းႁဵတ်းၼႃႈၵၢၼ်ၸွမ်းၼင်ႇမုၵ်ႉၽႂ်ၸိူဝ်းမၼ်းတူၵ်းပုၼ်ႈၽွၼ်းၼၼ်ႉဢေႃႈ။
တၢင်းဢၼ်ၸႃႇၵွၵ်ႈတူၵ်းၵမ်းတီႈၼိုင်ႈၸမ်ႉ၊ပဵၼ် ယူဝ်းသႅပ်ႈ၊ ၵေႃႉဢၼ်ၶဝ်ႈၼႂ်းမုၵ်ႉၼႂ်းၸိူဝ်း ဢႃႇသပ်ႉ၊ ဢေႃႈ။ ၵမ်းတီႈသွင်ၸမ်ႉ၊ပဵၼ် ၵေႇတလိ၊ ဢိၵ်ႇတင်းလုၵ်ႈၸၢႆးမၼ်းလႄႈၼွင်ႉၸၢႆးမၼ်းပွင်းၵၼ်ပဵၼ်သိပ်းသွင်ၵေႃႉ၊-
ၵမ်းတီႈသၢမ်ၸမ်ႉ၊ ၸၵ်ႉၵုရႃႉ၊ ဢိၵ်ႇတင်းလုၵ်ႈၸၢႆးမၼ်းလႄႈၼွင်ႉၸၢႆးမၼ်းပွင်းၵၼ်ပဵၼ်သိပ်းသွင်ၵေႃႉ၊-
ၵမ်းတီႈသီႇၸမ်ႉ၊ ဢိၸရိ၊ ဢိၵ်ႇတင်းလုၵ်ႈၸၢႆးမၼ်းလႄႈၼွင်ႉၸၢႆးမၼ်းပွင်းၵၼ်ပဵၼ်သိပ်းသွင်ၵေႃႉ၊-
ၵမ်းတီႈႁႃႈၸမ်ႉ၊ ၼေႇႀၼိ၊ ဢိၵ်ႇတင်းလုၵ်ႈၸၢႆးမၼ်းလႄႈၼွင်ႉၸၢႆးမၼ်းပွင်းၵၼ်ပဵၼ်သိပ်းသွင်ၵေႃႉ၊-
ၵမ်းတီႈႁူၵ်းၸမ်ႉ၊ ပုၵ်ႉၵိ၊ ဢိၵ်ႇတင်းလုၵ်ႈၸၢႆးမၼ်းလႄႈၼွင်ႉၸၢႆးမၼ်းပွင်းၵၼ်ပဵၼ်သိပ်းသွင်ၵေႃႉ၊-
ၵမ်းတီႈၸဵတ်းၸမ်ႉ၊ ဢႃႇသရေးလႃႉ၊ ဢိၵ်ႇတင်းလုၵ်ႈၸၢႆးမၼ်းလႄႈၼွင်ႉၸၢႆးမၼ်းပွင်းၵၼ်ပဵၼ်သိပ်းသွင်ၵေႃႉ၊-
ၵမ်းတီႈပႅတ်ႇၸမ်ႉ၊ ယေႇသႃႇယႃႉ၊ ဢိၵ်ႇတင်းလုၵ်ႈၸၢႆးမၼ်းလႄႈၼွင်ႉၸၢႆးမၼ်းပွင်းၵၼ်ပဵၼ်သိပ်းသွင်ၵေႃႉ၊-
ၵမ်းတီႈၵဝ်ႈၸမ်ႉ၊ မတ်ႉသၼိ၊ ဢိၵ်ႇတင်းလုၵ်ႈၸၢႆးမၼ်းလႄႈၼွင်ႉၸၢႆးမၼ်းပွင်းၵၼ်ပဵၼ်သိပ်းသွင်ၵေႃႉ၊-
ၵမ်းတီႈသိပ်းၸမ်ႉ၊ သိမိ၊ ဢိၵ်ႇတင်းလုၵ်ႈၸၢႆးမၼ်းလႄႈၼွင်ႉၸၢႆးမၼ်းပွင်းၵၼ်ပဵၼ်သိပ်းသွင်ၵေႃႉ၊-
ၵမ်းတီႈသိပ်းဢဵတ်းၸမ်ႉ၊ ဢႃႇၸရေးလႃႉ၊ ဢိၵ်ႇတင်းလုၵ်ႈၸၢႆးမၼ်း၊လႄႈၼွင်ႉၸၢႆးမၼ်းပွင်းၵၼ်ပဵၼ်သိပ်းသွင်ၵေႃႉ၊-
ၵမ်းတီႈသိပ်းသွင်ၸမ်ႉ၊ ႁႃႇသပိ၊ ဢိၵ်ႇတင်းလုၵ်ႈၸၢႆးမၼ်းလႄႈၼွင်ႉၸၢႆးမၼ်းပွင်းၵၼ်ပဵၼ်သိပ်းသွင်ၵေႃႉ၊-
ၵမ်းတီႈသိပ်းသၢမ်ၸမ်ႉ၊ သေႇပူၺ်ႇလႃႉ၊ ဢိၵ်ႇတင်းလုၵ်ႈၸၢႆးမၼ်းလႄႈၼွင်ႉၸၢႆးမၼ်းပွင်းၵၼ်ပဵၼ်သိပ်းသွင်ၵေႃႉ၊-
ၵမ်းတီႈသိပ်းသီႇၸမ်ႉ၊ မတ်ႉတိသိ၊ ဢိၵ်ႇတင်းလုၵ်ႈၸၢႆးမၼ်းလႄႈၼွင်ႉၸၢႆးမၼ်းပွင်းၵၼ်ပဵၼ်သိပ်းသွင်ၵေႃႉ၊-
ၵမ်းတီႈသိပ်းႁႃႈၸမ်ႉ၊ ယေႇရိမုတ်ႉ၊ ဢိၵ်ႇတင်းလုၵ်ႈၸၢႆးမၼ်းလႄႈၼွင်ႉၸၢႆးမၼ်းပွင်းၵၼ်ပဵၼ်သိပ်းသွင်ၵေႃႉ၊-
ၵမ်းတီႈသိပ်းႁူၵ်းၸမ်ႉ၊ ႁႃႇၼၼိ၊ ဢိၵ်ႇတင်းလုၵ်ႈၸၢႆးမၼ်းလႄႈၼွင်ႉၸၢႆးမၼ်းပွင်းၵၼ်ပဵၼ်သိပ်းသွင်ၵေႃႉ၊-
ၵမ်းတီႈသိပ်းၸဵတ်းၸမ်ႉ၊ ယေႃးသပေႇၵသႃႉ၊ ဢိၵ်ႇတင်းလုၵ်ႈၸၢႆးမၼ်းလႄႈၼွင်ႉၸၢႆးမၼ်းပွင်းၵၼ်ပဵၼ်သိပ်းသွင်ၵေႃႉ၊-
ၵမ်းတီႈသိပ်းပႅတ်ႇၸမ်ႉ၊ ႁႃႇၼၼ်ႇ၊ ဢိၵ်ႇတင်းလုၵ်ႈၸၢႆးမၼ်းလႄႈၼွင်ႉၸၢႆးမၼ်းပွင်းၵၼ်ပဵၼ်သိပ်းသွင်ၵေႃႉ၊-
ၵမ်းတီႈသိပ်းၵဝ်ႈၸမ်ႉ၊ မႃႇလေႃးသိ၊ ဢိၵ်ႇတင်းလုၵ်ႈၸၢႆးမၼ်းလႄႈၼွင်ႉၸၢႆးမၼ်းပွင်းၵၼ်ပဵၼ်သိပ်းသွင်ၵေႃႉ၊-
ၵမ်းတီႈသၢဝ်းၸမ်ႉ၊ ဢေးလျႃႇသႃႉ၊ ဢိၵ်ႇတင်းလုၵ်ႈၸၢႆးမၼ်းလႄႈၼွင်ႉၸၢႆးမၼ်းပွင်းၵၼ်ပဵၼ်သိပ်းသွင်ၵေႃႉ၊-
ၵမ်းတီႈသၢဝ်းဢဵတ်းၸမ်ႉ၊ ႁေႃးသိရႃႉ၊ ဢိၵ်ႇတင်းလုၵ်ႈၸၢႆးမၼ်းလႄႈၼွင်ႉၸၢႆးမၼ်းပွင်းၵၼ်ပဵၼ်သိပ်းသွင်ၵေႃႉ၊-
ၵမ်းတီႈသၢဝ်းသွင်ၸမ်ႉ၊ ၵိတ်ႉတႃႇလႃႉတိ၊ ဢိၵ်ႇတင်းလုၵ်ႈၸၢႆးမၼ်းလႄႈၼွင်ႉၸၢႆးမၼ်းပွင်းၵၼ်ပဵၼ်သိပ်းသွင်ၵေႃႉ၊-
ၵမ်းတီႈသၢဝ်းသၢမ်ၸမ်ႉ၊ မႁႃႇၸုတ်ႉ၊ ဢိၵ်ႇတင်းလုၵ်ႈၸၢႆးမၼ်းလႄႈၼွင်ႉၸၢႆးမၼ်းပွင်းၵၼ်ပဵၼ်သိပ်းသွင်ၵေႃႉ၊-
ၵမ်းတီႈသၢဝ်းသီႇၸမ်ႉ၊ ရေႃးမၼ်ႇတေႇၸႃႇ၊ ဢိၵ်ႇတင်းလုၵ်ႈၸၢႆးမၼ်းလႄႈၼွင်ႉၸၢႆးမၼ်းပွင်းၵၼ်ပဵၼ်သိပ်းသွင်ၵေႃႉၼၼ်ႉဢေႃႈ။
ၼႂ်းမဵဝ်း လေႇဝိ၊ ၸိူဝ်းဢၼ်ပႂ်ႉၽၵ်းတူၵျွင်းပိၵ်ႈမၢၼ်ႇၸဝ်ႈၼႂ်းၵူၼ်းၸိူဝ်ႉၶိူဝ်းႁိူၼ်း ၵေႃးရႃႉ၊ ၼၼ်ႉပဵၼ် မသေးလမိ၊ လုၵ်ႈၸၢႆး ၵေႃးရေး၊ ၶိူဝ်း ဢႃႇသပ်ႉ၊ ဢေႃႈ။-
မၼ်းမီးလုၵ်ႈၸၢႆးၸဵတ်းၵေႃႉလႄႈတၢမ်းၵၼ်လူင်းမႃးထိုင်ၵေႃႉလဵၵ်ႉၸမ်ႉ၊ ၸႃႇၶရိ၊ယေႇတယေးလႃႉ၊ၸေႇပတိ၊ယႃႇႀၼေးလႃႉ၊-
ဢေႇလမ်ႇ၊ယေႃးႁၼၼ်ႇ၊ တင်း ဢေႇလိဢေႃးၼေႇ၊ ဢေႃႈ။
ယင်းမီး ဢူဝ်းပိတ်ႉဢေႇတုမ်ႇ၊ ၵေႃႉဢၼ်ၽြႃးပဵၼ်ၸဝ်ႈပၼ်တၢင်းလီတီႈမၼ်း၊ႁႂ်ႈမီးလုၵ်ႈၸၢႆးပႅတ်ႇၵေႃႉၼၼ်ႉလႄႈၸိုဝ်ႈသဵင်လုၵ်ႈၸၢႆးမၼ်းၸမ်ႉ၊ပဵၼ် သေႇမႃႇယႃႉ၊ယႁေႃးၸပတ်ႉ၊ယေႃႇဢႃႇ၊သႃႇၵရႃႉ၊ၼႃႇႀၼေႇလႃႉ၊-
ဢမျေးလႃႉ၊ဢိသၶႃႇ၊ တင်း ပုလႀေး၊ ဢေႃႈ။
ၶိူဝ်း ဢူဝ်းပိတ်ႉဢေႇတုမ်ႇ၊ ၼႆႉပဵၼ်ၶဝ်ၸိူဝ်းဢၼ်မီးတၢင်းဢၼ်ၵတ်ႉၶႅၼ်ႇၼႂ်းတၢင်းဢၼ်ပွင်ထၢမ်းၼႃႈၵၢၼ်ၸဝ်ႈလႄႈပွင်းၵၼ်မီးႁူၵ်းသိပ်းသွင်ၵေႃႉဢေႃႈ။
ၶိူဝ်း မသေးလမိ၊ သမ်ႉမီးသိပ်းပႅတ်ႇၵေႃႉဢၼ်မီးတၢင်းဢၼ်ၵတ်ႉၶႅၼ်ႇၼႂ်းၼႃႈၵၢၼ်ၼၼ်ႉဢေႃႈ။
ၼႂ်းၵူၼ်းၶိူဝ်းႁိူၼ်း မေႇရႃႇရိ၊ ၼၼ်ႉပဵၼ် ႁေႃးသႃႉ၊ ဢၼ်မီးလုၵ်ႈၸၢႆးသီႇၵေႃႉ၊ဢၼ်ပဵၼ် သိမရိ၊ (ဢၼ်ပိၵ်ႉသမ်ႉဢမ်ႇၸႂ်ႈလုၵ်ႈတူၼ်ႈသေၵေႃႈပေႃႈမၼ်းၶၢၼ်းဝႆႉႁႂ်ႈပဵၼ်တူၼ်ႈပဵၼ်ငဝ်ႈ)၊-
ႁိလၶိ၊တေးပလိ၊ တင်း ၸႃႇၶရိ၊ ဢေႃႈ။ ၶိူဝ်း ႁေႃးသႃႉ၊ ဢၼ်ထၢမ်းၼႃႈၵၢၼ်ပႂ်ႉၽၵ်းတူၵျွင်းပိၵ်ႈမၢၼ်ႇၸဝ်ႈၼၼ်ႉတင်းမူတ်းမီးသိပ်းသၢမ်ၵေႃႉဢေႃႈ။
ၵူၼ်းပႂ်ႉၵျွင်းပိၵ်ႈမၢၼ်ႇၸဝ်ႈၸိူဝ်းၼၼ်ႉၽႄႁဵတ်းပဵၼ်မုၵ်ႉပဵၼ်မုၵ်ႉဝႆႉ၊ၸွမ်းၼင်ႇၶိူဝ်းႁိူၼ်းၶဝ်လႄႈလႆႈၶၢမ်ႇၸႂ်ႉႁဵတ်းၵၢၼ်ၼႂ်းၵျွင်းပိၵ်ႈမၢၼ်ႇၸဝ်ႈမိူၼ်မိူၼ်ၵၼ်တင်းပီႈၼွင်ႉမဵဝ်း လေႇဝိ၊ ၶဝ်တင်းလၢႆၼၼ်ႉဢေႃႈ။-
ၶိူဝ်းယႂ်ႇၶိူဝ်းလဵၵ်ႉဢမ်ႇဝႃႈ၊လႆႈဢွၼ်ၵၼ်တူၵ်းၸႃႇၵွၵ်ႈၸွမ်းၶိူဝ်းႁိူၼ်းၽႂ်မၼ်းပုၼ်ႈတၵ်းယူႇတီႈၽၵ်းတူလႂ်ၽၵ်းတူၼၼ်ႉၼၼ်ႉဢေႃႈ။-
သေႇလမိ၊ တူၵ်းၸႃႇၵွၵ်ႈပုၼ်ႈၽၵ်းတူၽၢႆႇတၢင်းဢွၵ်ႇ၊လုၵ်ႈၸၢႆးမၼ်း ၸႃႇၶရိ၊ ဢၼ်မီးပိင်ႇၺႃႇၼၼ်ႉတူၵ်းပုၼ်ႈၽွၼ်းၽၵ်းတူၽၢႆႇတၢင်းႁွင်ႇ၊-
ဢူဝ်းပိတ်ႉဢေႇတုမ်ႇ တူၵ်းပုၼ်ႈၽွၼ်းတီႈၽၵ်းတူၽၢႆႇတၢင်းၸၢၼ်း၊လုၵ်ႈၸၢႆးမၼ်းတင်းလၢႆတူၵ်းၸႃႇၵွၵ်ႈဢၼ်လႆႈပႂ်ႉႁိူၼ်းၽၼ်ႇတႃႇ၊-
သုပိမ်း၊ တင်း ႁေႃးသႃႉ၊ တူၵ်းပုၼ်ႈၽွၼ်းတီႈၽၵ်းတူၽၢႆႇဝၼ်းတူၵ်း၊ဢိၵ်ႇတင်းတီႈၽၵ်းတူ သလႄးၶႅၵ်ႉ၊ ၵႃႈတီႈႁူဝ်တၢင်းဢၼ်ၶိုၼ်ႈၸူးတီႈၵျွင်းပိၵ်ႈမၢၼ်ႇၸဝ်ႈၸိူဝ်းၼၼ်ႉဢေႃႈ။ ၵူၼ်းပႂ်ႉၸိူဝ်းၼၼ်ႉလႆႈပႂ်ႉၵေႃႉၼိုင်ႈယဝ်ႉၵေႃႉၼိုင်ႈၸွမ်းၼင်ႇမၵ်းၶၢၼ်းဝႆႉၸွမ်းၶိင်ႇမၼ်းၼၼ်ႉဢေႃႈ။-
ၼႂ်းၼိုင်ႈဝၼ်းၸိုင်၊ၽၵ်းတူၽၢႆႇဝၼ်းဢွၵ်ႇၼၼ်ႉလႆႈပႂ်ႉႁူၵ်းၵေႃႉ၊ၽၵ်းတူၽၢႆႇတၢင်းႁွင်ႇၼၼ်ႉသီႇၵေႃႉ၊ၽၢႆႇတၢင်းၸၢၼ်းၼၼ်ႉသီႇၵေႃႉလႄႈ၊ၵႃႈတီႈႁိူၼ်းၽၼ်ႇတႃႇၸိူဝ်းၼၼ်ႉၵေႃႈလႆႈပႂ်ႉသီႇၵေႃႉ၊ယေႈႁိူၼ်းသွင်ၵေႃႉသွင်ၵေႃႉ၊ၵူႈဝၼ်းဢေႃႈ။-
ၵႃႈတီႈၽၢႆႇၼွၵ်ႈၸၢၼ်းၽၢႆႇဝၼ်းတူၵ်းၵႃႈတီႈႁူဝ်တၢင်းဢၼ်ၶိုၼ်ႈၸူးတီႈၵျွင်းပိၵ်ႈမၢၼ်ႇၸဝ်ႈၼၼ်ႉလႆႈပႂ်ႉသီႇၵေႃႉ၊ဢိၵ်ႇတင်းၵႃႈတီႈၸၢၼ်းၼၼ်ႉလႆႈပႂ်ႉသွင်ၵေႃႉဢေႃႈ။-
ဢၼ်ၼႆႉၸမ်ႉ၊ပဵၼ်ပုၼ်ႈၽွၼ်းၵူၼ်းပႂ်ႉဢၼ်လႆႈၶၢမ်ႇတၢင်းဢၼ်ၶၢၼ်းဝႆႉတီႈၸိူဝ်ႉၶိူဝ်း ၵေႃးရႃႉ၊ တင်းၸိူဝ်ႉၶိူဝ်း မေႇရႃႇရိ၊ ၸိူဝ်းၼၼ်ႉဢေႃႈ။
ၼႂ်းၵူၼ်းမဵဝ်း လေႇဝိ၊ ၼၼ်ႉ၊ ဢႁိယႃႉ၊ လႆႈၵွၼ်းၽၼ်ႇတႃႇၵျွင်းပိၵ်ႈမၢၼ်ႇၸဝ်ႈ၊ဢိၵ်ႇတင်းႁိူၼ်းဢၼ်ၵဵပ်းသိမ်းၶူဝ်းလူႇၶူဝ်းတၢၼ်းတင်းလၢႆၼၼ်ႉဢေႃႈ။-
ၼႂ်းၸိူဝ်ႉၶိူဝ်းလုၵ်ႈလၢၼ် လႃႇတၼ်ႇ၊ ဢၼ်ပဵၼ်မဵဝ်း ၵေႇရသုၼ်ႇ၊ ဢၼ်ပဵၼ်တူၼ်ႈပဵၼ်ငဝ်ႈၼႂ်းၸိူဝ်ႉၶိူဝ်းၶဝ်တင်းလၢႆၼၼ်ႉၸမ်ႉ၊ပဵၼ် ယေႇႁေးလႃႉ၊ ဢေႃႈ။-
လုၵ်ႈၸၢႆး ယေႇႁေးလႃႉ၊ သွင်ၵေႃႉဢၼ်ဝႃႈ၊ ၸေးႀမ်ႇ၊ တင်း ယေႃးလႃႉ၊ ၼၼ်ႉလႆႈၵွၼ်းၽၼ်ႇတႃႇၵျွင်းပိၵ်ႈမၢၼ်ႇၸဝ်ႈ ထႃႇဝရႃႉၽြႃး၊ ဢေႃႈ။
ပုၼ်ႈၽွၼ်းၼမ်ၼႃႇသမ်ႉလႆႈၶၢၼ်းဝႆႉ၊တီႈၸိူဝ်ႉၶိူဝ်းလုၵ်ႈလၢၼ် ဢႃႇမရမ်ႇ၊ဢိၸႁႃႇ၊ႁေႇပရုၼ်ႇ၊ တင်း ဢေႃးၸေးလႃႉ၊ ၸိူဝ်းၼၼ်ႉလူးၵွၼ်ႇဢေႃႈ။
သေႇပူၺ်ႇလႃႉ၊ လုၵ်ႈၸၢႆး ၵေႇရသုၼ်ႇ၊ လုၵ်ႈၸၢႆး မူဝ်းသေႇ၊ ၼၼ်ႉသမ်ႉလႆႈပဵၼ်ၶုၼ်ၵွၼ်းၽၼ်ႇတႃႇၸဝ်ႈဢေႃႈ။-
ၼွင်ႉၸၢႆး ၵေႇရသုၼ်ႇ၊ ဢၼ်ဝႃႈ၊ ဢေးလျေႇၸႃႇ၊ ဢၼ်သိုပ်ႇလူင်းမႃးထိုင်၊ သေႇလေႃးမိတ်ႉ၊ ၸမ်ႉ၊လုၵ်ႈၸၢႆးမၼ်းၼၼ်ႉ ရေႇႁၽိ၊ လုၵ်ႈၸၢႆးမၼ်းၼၼ်ႉ ယေႇသႃႇယႃႉ၊ လုၵ်ႈၸၢႆးမၼ်းၼၼ်ႉ ယေႃးရမ်ႇ၊ လုၵ်ႈၸၢႆးမၼ်းၼၼ်ႉ ၸိၶရိ၊ လုၵ်ႈၸၢႆးမၼ်းၼၼ်ႉပဵၼ် သေႇလေႃးမိတ်ႉ၊ ဢေႃႈ။-
သေႇလေႃးမိတ်ႉ၊ တင်းပီႈၼွင်ႉမၼ်းတင်းလၢႆ၊လႆႈၵွၼ်းၶူဝ်းလူႇၶူဝ်းတၢၼ်းၵႃႈမီးတင်းသဵင်ႈတင်းလူင်ဢၼ်ၶုၼ်ႁေႃၶမ်း တႃႇဝိတ်ႈ၊ ဢိၵ်ႇတင်းၵူၼ်းတူၼ်ႈၵူၼ်းငဝ်ႈၶိူဝ်းႁိူၼ်းပေႃႈၶဝ်ၸိူဝ်းဢၼ်ပဵၼ်ၸဝ်ႈသိုၵ်းၸဝ်ႈႁၢၼ်ၵႃႈၼိူဝ်ၵူၼ်းယေႈႁဵင်၊ၵႃႈၼိူဝ်ၵူၼ်းယေႈပၢၵ်ႇတင်းၸဝ်ႈသိုၵ်းၸဝ်ႈႁၢၼ်တင်းလၢႆလူႇတၢၼ်းဝႆႉၼၼ်ႉဢေႃႈ။-
ၶုၼ်ၸိူဝ်းၼၼ်ႉ၊ဢွၼ်ၵၼ်သိမ်းဢဝ်ဢုၵ်ႉၸႃႇၸိူဝ်းဢၼ်ႁိမ်ႁူင်ႇလႆႈၵႃႈတီႈၼႃႈသိုၵ်းၼႃႈသိူဝ်တင်းလၢႆမႃးလူႇတၢၼ်း ႁႂ်ႈလႆႈၸႂ်ႉလႆႈသုင်းၵႃႈၼႂ်းၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ၼၼ်ႉဢေႃႈ။-
ၼႆႉၵူၺ်းဢမ်ႇၵႃး၊ၸႃႉၸဵမ်ၵႃႈဢၼ် သမူၺ်ႇလႃႉ၊ ၵေႃႉဢၼ်ႁူပွင်ႇတႃလႅင်း၊ၶုၼ်ႁေႃၶမ်း သေႃးလု၊ဢပ်ႉပၼႃး၊ လုၵ်ႈၸၢႆး ၼေးရႃႉ၊ တင်း ယွႃႇၽႃႉ၊ ဢၼ်မႄႈမၼ်းပဵၼ် ၸေႇရုယႃႇ၊ ဢိၵ်ႇတင်းၵႃႈဢၼ်တၢင်ႇၵေႃႉတၢင်ႇၵူၼ်းလူႇတၢၼ်းဝႆႉၸိူဝ်းၼၼ်ႉၵေႃႈ၊ သေႇလေႃးမိတ်ႉ၊ တင်းပီႈၼွင်ႉမၼ်းတင်းလၢႆဢွၼ်ၵၼ်လူတူၺ်းဢုပ်ႉထိင်းဢေႃႈ။
ၼႂ်းၵူၼ်းမဵဝ်း ဢိၸႁႃႇ၊ ၼၼ်ႉ ၶေးၼၼိ၊ တင်းလုၵ်ႈၸၢႆးမၼ်းတင်းလၢႆ၊လႆႈၶၢမ်ႇတၢင်းဢၼ်ၶၢၼ်းဝႆႉၼႂ်းဢရႃႇၶုၼ်ဢၼ်ဢုပ်ႉဝၢၼ်ႈဢုပ်ႉမိူင်းဢၼ်ဝႃႈ၊ၼႃႈၵၢၼ်ဢၼ်သိမ်းပႅင်းၸရၢင်းဢၢင်းလႂ်၊ၼႃႈၵၢၼ်ဢၼ်တႅပ်းတတ်းဢမုၼႂ်းၵူၼ်းမဵဝ်း ဢိသရေး၊ လႂ်ၼၼ်ႉဢေႃႈ။
ၼႂ်းၵူၼ်းမဵဝ်း ႁေႇပရုၼ်ႇ၊ ၶဝ်ၼၼ်ႉၸမ်ႉ၊ ႁႃႇသပိ၊ ဢိၵ်ႇတင်းပီႈၼွင်ႉၸိူဝ်ႉၶိူဝ်းမၼ်းႁဵင်ၸဵတ်းပၢၵ်ႇ၊ၸိူဝ်းဢၼ်ပဵၼ်ၵူၼ်းၸိုဝ်ႈသဵင်ယႂ်ႇၵူႈၵေႃႉၼၼ်ႉလႆႈၶၢမ်ႇတၢင်းဢၼ်ၶၢၼ်းဝႆႉၼႂ်းဢရႃႇၶုၼ်ဢၼ်ဢုပ်ႉဝၢၼ်ႈဢုပ်ႉမိူင်းၽၢႆႇၵူၼ်းဝၢၼ်ႈၵူၼ်းမိူင်း၊ဢိၵ်ႇတင်းၽၢႆႇသႃႇသၼႃႇၼႂ်းၵူၼ်းမဵဝ်း ဢိသရေး၊ ၸိူဝ်းဢၼ်မီးၽၢႆႇဝၼ်းတူၵ်းၼမ်ႉ ယေႃးတၢၼ်ႇ၊ ၼၼ်ႉဢေႃႈ။-
ယေႇရိယႃႉ၊ ပဵၼ်တူၼ်ႈပဵၼ်ငဝ်ႈၼႂ်းမဵဝ်း ႁေႇပရုၼ်ႇ၊ ၸိူဝ်းၼၼ်ႉဢေႃႈ။ ၼႂ်းပီဢၼ် တႃႇဝိတ်ႈ၊ ၸၢမ်ႇႁၢင်ႈၸၢမ်ႇႁေႃလႆႈသိပ်းသီႇပီၼၼ်ႉၶဝ်ဢွၼ်ၵၼ်ႁႃၵႃႈၼႂ်းမဵဝ်း ႁေႇပရုၼ်ႇ၊ ၼၼ်ႉလႄႈထူပ်းႁၼ်ႁူဝ်ႁၢၼ်ၵူၼ်းသိုၵ်းၸိူဝ်းဢၼ်ၸိုဝ်ႈသဵင်ယႂ်ႇၵႃႈၼႂ်းမဵဝ်းၼႆႉ၊မီးၵႃႈၼႂ်းဝဵင်း ယႃႇၸႃႇ၊ မိူင်း ၵိလတ်ႉ၊ ဢေႃႈ။-
ၶုၼ်ႁေႃၶမ်း တႃႇဝိတ်ႈ၊ ၸင်ႇလိူၵ်ႈဢဝ်ၵူၼ်းတူၼ်ႈၵူၼ်းငဝ်ႈၼႂ်းပီႈၼွင်ႉၸိူဝ်ႉၶိူဝ်း ယေႇရိယႃႉ၊ သွင်ႁဵင်ၸဵတ်းပၢၵ်ႇလႄႈၶၢၼ်းဝႆႉၼႂ်းဢရႃႇဢၼ်ဢုပ်ႉဝၢၼ်ႈဢုပ်ႉမိူင်း၊ၽၢႆႇၵူၼ်းဝၢၼ်ႈၵူၼ်းမိူင်း၊ဢိၵ်ႇတင်းၽၢႆႇသႃႇသၼႃႇၼႂ်းၵူၼ်းမဵဝ်း ဢိသရေး၊ ၸိူဝ်းဢၼ်မီးၽၢႆႇတၢင်းဝၼ်းဢွၵ်ႇၼမ်ႉ ယေႃးတၢၼ်ႇ၊ ဢၼ်ပဵၼ်ဢိူင်ႇ ရုပိၼ်ႇ၊ ဢိူင်ႇ ၵၢတ်ႉ၊ ဢိၵ်ႇတင်းဢိူင်ႇ မၼႃႇသေႇ၊ ပွတ်းတၢင်းဝၼ်းဢွၵ်ႇၸိူဝ်းၼၼ်ႉဢေႃႈ။
ၼႆႉၸမ်ႉ၊ပဵၼ်ၸရၢင်းၵူၼ်းမဵဝ်း ဢိသရေး၊ တင်းလၢႆ၊ဢၼ်ပဵၼ်တူၼ်ႈပဵၼ်ငဝ်ႈၼႂ်းၸိူဝ်ႉၶိူဝ်းပေႃႈၶဝ်၊ဢိၵ်ႇတင်းၵူၼ်းဢွၼ်ႁူဝ်ဢွၼ်ၵၼ်ၼႂ်းၵူၼ်းၶိူဝ်းႁိူၼ်းၶဝ်တင်းၶုၼ်ဢၼ်ပွင်ၵၢၼ်ၸိူဝ်းဢၼ်ဢုပ်ႉဢၼ်ထိင်းၼႃႈၵၢၼ်သိုင်ႇၸိုင်ႈဝၢၼ်ႈမိူင်းၸဝ်ႈဢေႃႈ။ ၼႂ်းယေႈပီလိူၼ်လႂ်လိူၼ်ၼၼ်ႉ၊မုၵ်ႉၸိူဝ်းၵူၼ်းဢၼ်ၶဝ်ႈပႃးယေႈၸုမ်းသွင်မိုၼ်ႇသီႇႁဵင်ၼင်ႇၵၼ်ၼၼ်ႉ၊တူၵ်းၼႃႈၵၢၼ်သိုၵ်းဢၼ်ၸဝ်ႈၵွၼ်းတပ်ႉသိုၵ်းပဵၼ်ႁူဝ်ၼႃႈၶဝ်၊ပုၼ်ႈယေႈလိူၼ်ယေႈလိူၼ်ၼင်ႇၵၼ်ဢေႃႈ။
ၶုၼ်ႁေႃၶမ်း တႃႇဝိတ်ႈ၊ ယင်းဢမ်ႇၵဵပ်းဢဝ်ၸရၢင်းၵူၼ်းဢၼ်ဢသၢၵ်ႈသၢဝ်းပီလူင်းတႂ်ႈၸိူဝ်းၼၼ်ႉၵွပ်ႈပိူဝ်ႈဢၼ် ထႃႇဝရႃႉၽြႃး၊ ဝႆႉၵတိတီႈၵူၼ်းမဵဝ်း ဢိသရေး၊ တင်းလၢႆလူၺ်ႈလွင်ႈဢၼ်မၼ်းၸဝ်ႈတၵ်းႁႂ်ႈၶဝ်ယႂ်ႇၽႄႈၼမ်ၵိုၼ်းမႃးၼမ်တၢၼ်ႇလၢဝ်ၵၢင်ႁၢဝ်ၼၼ်ႉဢေႃႈ။-
ယွႃႇၽႃႉ၊ လုၵ်ႈၸၢႆး ၸေႇရုယႃႇ၊ ၼၼ်ႉႁဵတ်းတၢင်းဢၼ်ၵဵပ်းၸရၢင်းၵူၼ်းမိူင်းဢေႃႈ။ ၵူၺ်းၵႃႈ၊မၼ်းဢမ်ႇၸၢင်ႈႁဵတ်းႁႂ်ႈယဝ်ႉတူဝ်ႈလႆႈ၊တၢင်းၸႂ်မႆႈၶႂ်ႈၸႃႉၽြႃးပဵၼ်ၸဝ်ႈတူၵ်းႁွတ်ႈၵႃႈၼိူဝ်ၵူၼ်းမဵဝ်း ဢိသရေး၊ ၵွပ်ႈပိူဝ်ႈဢပျတ်ႈၼၼ်ႉဢေႃႈ။ ၸရၢင်းၵူၼ်းမိူင်းၸိူဝ်းၼၼ်ႉၵေႃႈ ဢမ်ႇလႆႈၶဝ်ႈပႃးၵႃႈၼႂ်းၸရၢင်းဢၼ်ၶုၼ်ႁေႃၶမ်း တႃႇဝိတ်ႈ၊ မၢတ်ႈမၢႆဝႆႉၼၼ်ႉဢေႃႈ။
ယေႃးၼႀၼ်ႇ၊ ဢၼ်ပဵၼ်လုင်း တႃႇဝိတ်ႈ၊ ၼၼ်ႉပဵၼ်ဢမၢတ်ႈဢၼ်ၸၢင်ႈပၼ်တၢင်းၵျၢမ်ႇလၵ်းလၵ်းလႅမ်လႅမ်လႄႈပဵၼ်ၵူၼ်းမေႃလိၵ်ႈဢေႃႈ။ မၼ်းတင်း ယေႇႁေးလႃႉ၊ လုၵ်ႈၸၢႆး ႁၶမေႃးၼိ၊ ၼၼ်ႉပဵၼ်သြႃႇဢၼ်သွၼ်ပၼ်ပိင်ႇၺႃႇတီႈလုၵ်ႈၸၢႆးၶုၼ်ႁေႃၶမ်းတင်းလၢႆဢေႃႈ။-
ဢႁိသေႃႇၽေးလႃႉ၊ ပဵၼ်ဢမၢတ်ႈဢၼ်ၶုၼ်ႁေႃၶမ်းတိူင်ႇပၢင်ႇဢေႃႈ။ ႁုသေး၊ ၵူၼ်းမဵဝ်း ဢႃႇၶိ၊ သမ်ႉပဵၼ်ၵေႃႉသႄႈၶုၼ်ႁေႃၶမ်းဢေႃႈ။-
လိုၼ်းသေဢၼ် ဢႁိသေႃႇၽေးလႃႉ၊ တၢႆယဝ်ႉၼၼ်ႉ၊ ဢပျႃႇထႃႇ၊ တင်း ယေႃႇယတႃႉ၊ လုၵ်ႈၸၢႆး ပေႇၼႃႇယႃႉ၊ ပုတ်ႈဢဝ်ဢရႃႇၼၼ်ႉဢေႃႈ။ ယွႃႇၽႃႉ၊ သမ်ႉပဵၼ်ၸဝ်ႈၵွၼ်းတပ်ႉသိုၵ်းလူင်ဢေႃႈ။
ၽဝ်ႇၼိုင်ႈၶုၼ်ႁေႃၶမ်း တႃႇဝိတ်ႈ၊ မီးဢမိင်ႉႁႂ်ႈႁွင်ႉဢဝ်ၶုၼ် ဢိသရေး၊ တင်းသဵင်ႈတင်းလူင်ဢၼ်ပဵၼ်၊ၵူၼ်းတူၼ်ႈၵူၼ်းငဝ်ႈၼႂ်းၸိူဝ်ႉၶိူဝ်းၽႂ်ၸိူဝ်ႉၶိူဝ်းမၼ်းလႂ်၊ၶုၼ်ဢၼ်ပွင်ၵၢၼ်ဢၼ်ဢုပ်ႉဝၢၼ်ႈဢုပ်ႉမိူင်း၊ၽၢႆႇၵူၼ်းႁူဝ်ၵူၼ်းၵွၼ်းၼႂ်းၶိူဝ်းႁိူၼ်းလႂ်၊ၽၢႆႇဢုပ်ႉၽၼ်ႇတႃႇဢုၵ်ႉၸႃႇလႂ်၊ၽၢႆႇလဵင်ႉတူဝ်သတ်းလႂ်၊ၽၢႆႇဢၼ်ၵွၼ်းၼႂ်းႁၢင်ႈၼႂ်းႁေႃလႂ်၊ၽၢႆႇၶုၼ်ႁၢၼ်ၶုၼ်သိုၵ်းလႂ်၊ဢၼ်ႁႅင်းယႂ်ႇႁတ်းႁၢၼ်လႂ်ၸိူဝ်းၼၼ်ႉၸုတုမ်ၵၼ်ၵႃႈတီႈဝဵင်း ယေႇရုသလႅမ်ႇ၊ ဢေႃႈ။
တႃႇဝိတ်ႈ၊ လုၵ်ႉၸုၵ်းၵႃႈတီႈၽၢႆႇၼႃႈၶဝ်သေလႄႈမီးဢမိင်ႉလႄႈဝႃႈ၊ “ပီႈၼွင်ႉၵဝ်၊ၵူၼ်းၵဝ်တင်းလၢႆၶဝ်႟။ ဢွၼ်ၵၼ်ထွမ်ႇသေၵမ်း။ ၵဝ်ဢၢင်ႈဢၢၼ်းတၵ်းႁဵတ်းႁိူၼ်းဢၼ်သေႇဢၼ်မၼ်ႈပုၼ်ႈတိူၵ်ႈပတိၺိၺ်ႇၸဝ်ႈ၊ဢိၵ်ႇတင်းပုၼ်ႈတႃႇ ထႃႇဝရႃႉၽြႃး၊ ဢၼ်ပဵၼ်ၽြႃးပဵၼ်ၸဝ်ႈႁဝ်းတၵ်းတၢင်ႇတိၼ်မၼ်းၸဝ်ႈၼၼ်ႉလႄႈမႄးႁႅၼ်းဝႆႉထႃႈႁႂ်ႈလႆႈတႄႇလႆႈႁဵတ်းၼၼ်ႉယဝ်ႉ။-
ၵူၺ်းၵႃႈ၊မၼ်းၸဝ်ႈႁၢမ်ႈၵဝ်၊ဢမ်ႇႁႂ်ႈၵဝ်လႆႈတႄႇလႆႈႁဵတ်း၊ၵွပ်ႈပိူဝ်ႈၵဝ်ၼႆႉပဵၼ်ၵူၼ်းသိုၵ်းလႄႈလႆႈထွၵ်ႇလိူတ်ႈၵူၼ်းပႅတ်ႈၼမ်ၼႃႇၼၼ်ႉဢေႃႈ။-
ထႃႇဝရႃႉၽြႃး၊ ဢၼ်ပဵၼ်ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ၼၼ်ႉလိူၵ်ႈဢဝ်ၵဝ်၊ဢိၵ်ႇတင်းၸိူဝ်ႉၶိူဝ်းလုၵ်ႈလၢၼ်ၵဝ်ႁႂ်ႈလႆႈဢုပ်ႉပိူင်ႇမိူင်း ဢိသရေး ယူႇတႃႇသေႇယဝ်ႉ။ မၼ်းၸဝ်ႈလိူၵ်ႈဢဝ်ၸိူဝ်ႉၶိူဝ်း ယုတႃႉ၊ လႄႈဢၢပ်ႈပၼ်ဢရႃႇဢၼ်ဢုပ်ႉပိူင်ႇၼၼ်ႉယဝ်ႉ။ ၼႂ်းၸိူဝ်ႉၶိူဝ်း ယုတႃႉ၊ ၼၼ်ႉမၼ်းၸဝ်ႈလိူၵ်ႈဢဝ်ၼႃႈႁိူၼ်းပေႃႈၵဝ်သေယဝ်ႉ၊ၼႂ်းၶိူဝ်းႁိူၼ်းၼၼ်ႉမၼ်းၸဝ်ႈထုၵ်ႇၸႂ်ၵျိူၵ်ႈၸႂ်ၵဝ်လႄႈဢဝ်ၵဝ်ၶၢၼ်းဝႆႉၼႂ်းဢရႃႇၶုၼ်ႁေႃၶမ်းဢၼ်ဢုပ်ႉပိူင်ႇမိူင်း ဢိသရေး၊ ၼၼ်ႉယဝ်ႉ။-
မၼ်းၸဝ်ႈပၼ်လုၵ်ႈၸၢႆးတီႈၵဝ်ၼမ်ၼႃႇလႄႈ၊ၼႂ်းၶဝ်တင်းသဵင်ႈၼၼ်ႉၸမ်ႉ၊မၼ်းၸဝ်ႈလိူၵ်ႈဢဝ် သေႃးလမုၼ်ႇ၊ ႁႂ်ႈလႆႈဢုပ်ႉပိူင်ႇမိူင်း ဢိသရေး၊ ဢၼ်ဝႃႈ၊သိုင်ႇၸိုင်ႈဝၢၼ်ႈမိူင်း ထႃႇဝရႃႉၽြႃး၊ ၼၼ်ႉယဝ်ႉ။
“ထႃႇဝရႃႉၽြႃး၊ မီးဢမိင်ႉတီႈၵဝ်လႄႈဝႃႈၸမ်ႉ၊ ‘လုၵ်ႈၸၢႆးမႂ်း သေႃးလမုၼ်ႇ၊ ၼၼ်ႉပဵၼ်ၵေႃႉဢၼ်တၵ်းတႄႇႁဵတ်းၵျွင်းပိၵ်ႈမၢၼ်ႇၵဝ်ဢေႃႈ။ ၵဝ်လိူၵ်ႈဢဝ်မၼ်းႁႂ်ႈမၼ်းပဵၼ်လုၵ်ႈၸၢႆးၵဝ်ယဝ်ႉ၊ၵဝ်သမ်ႉပဵၼ်ပေႃႈမၼ်းဢေႃႈ။-
ပေႃးမၼ်းသိုပ်ႇၵမ်ၵျၢင်ႉၸွမ်းထုင်းၽိင်ႈတြႃး၊ဢိၵ်ႇတင်းပိင်းၺၢပ်ႈတြႃးၵဝ်တင်းလၢႆ၊မိူၼ်ၸိူဝ်ႉၼင်ႇဢၼ်မၼ်းၵမ်ၵျၢင်ႉယူႇတေႃႈလဵဝ်ၼႆႉၼၼ်ႉၸိုင်၊ၵဝ်တၵ်းႁႂ်ႈသိုင်ႇၸိုင်ႈဝၢၼ်ႈမိူင်းမၼ်းတႄႇယူႇသေႇသေႇဢေႃႈ၊’ ဝႃႈၼင်ႇၼႆဢေႃႈ။
“ပိူဝ်ႈဢၼ်ပဵၼ်ၸိူဝ်ႉၼင်ႇၼႆလႄႈ၊တေႃႈလဵဝ်ၼႆႉၵူၼ်းၵဝ်တင်းလၢႆၶဝ်႟။ ၵႃႈတီႈၽၢႆႇၼႃႈၽြႃးပဵၼ်ၸဝ်ႈႁဝ်း၊ဢိၵ်ႇတင်းသိုဝ်ႈၼႃႈတႂ်ႈတႃပရိၵ်ႈသၢတ်ႈၵူၼ်းမဵဝ်း ဢိသရေး၊ ၵူၼ်း ထႃႇဝရႃႉၽြႃး၊ ၸိူဝ်းၼႆႉၵဝ်တိုၵ်းယူင်းႁႂ်ႈသူၵမ်ၵျၢင်ႉၸွမ်းထုင်းၽိင်ႈတြႃးၵႃႈဢၼ်ၽြႃးပဵၼ်ၸဝ်ႈႁဝ်းပိင်းၺၢပ်ႈဝႆႉတီႈႁဝ်းပုၼ်ႈလွင်ႈၼင်ႇႁိုဝ်သူတၵ်းပိူင်ႇမိူင်းဢၼ်လီၼႃႇၼႆႉလႄႈသမ်ႉတၵ်းသိုပ်ႇပၼ်ဢမူၺ်ႇၼႆႉတီႈၸူဝ်ႈလုၵ်ႈပၢၼ်လၢၼ်သူသိုပ်ႇသိုပ်ႇတၢမ်တၢမ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
မၼ်းသမ်ႉလၢတ်ႈတီႈ သေႃးလမုၼ်ႇ၊ လႄႈဝႃႈ၊ “လုၵ်ႈၸၢႆးၵဝ်႟။ ႁုၸၵ်းၽြႃးပဵၼ်ၸဝ်ႈပေႃႈၸဝ်ႈမႂ်းတႃႉ။ ယင်းဢမ်ႇမီးႁူဝ်ၸႂ်ဢၼ်ဝၢင်ႇဝီႈဝၢင်ႇဝိူဝ်ႈလႄႈပႃးတင်းၸႂ်ၸေႇတၼႃႇသေယဝ်ႉ၊ႁဵတ်းဝၢတ်ႈတီႈမၼ်းၸဝ်ႈတႃႉ။ မၼ်းၸဝ်ႈႁုတၢင်းၵျၢမ်ႇတၢင်းပွင်၊ဢိၵ်ႇတင်းဢလူဝ်ႇၵၢင်ၸႂ်ႁဝ်းၸိူဝ်းၼၼ်ႉ၊ၵႃႈမီးတင်းသဵင်ႈတင်းလူင်ဢေႃႈ။ ပေႃးမႂ်းၶဝ်ႈၸူးတီႈမၼ်းၸဝ်ႈၸိုင်၊မၼ်းၸဝ်ႈတၵ်းႁပ်ႉဢဝ်မႂ်းဢေႃႈ။ ပေႃးမႂ်းဝၢႆႇၼႃႈပႅတ်ႈသေၵႃႈတီႈမၼ်းၸဝ်ႈၸိုင်၊မၼ်းၸဝ်ႈတၵ်းၸုၼ်ႉပႅတ်ႈမႂ်းတႃႇသေႇဢေႃႈ။-
မႂ်းတၵ်းလႆႈႁုမၢတ်ႈလွင်ႈဢၼ်မၼ်းၸဝ်ႈလိူၵ်ႈဢဝ်မႂ်းႁႂ်ႈတႄႇႁဵတ်းၵျွင်းပိၵ်ႈမၢၼ်ႇဢၼ်မူတ်းၸၢင်ႇၸဝ်ႈၼၼ်ႉဢေႃႈ။ ဢဝ်ႁႅင်းဢွၵ်ႇသေလႄႈတႄႇႁဵတ်းတႃႉ။” ဝႃႈၼင်ႇၼႆဢေႃႈ။
တႃႇဝိတ်ႈ၊ ဢဝ်ပုင်ႇႁၢင်ႈၵျွင်းပိၵ်ႈမၢၼ်ႇၸဝ်ႈလႂ်၊ႁိူၼ်းတိူၵ်ႈမၼ်းလႂ်၊လုၵ်းၽၼ်ႇတႃႇမၼ်းလႂ်၊လုၵ်းၸၼ်ႉတၢင်းၼိူဝ်မၼ်းလႂ်၊လုၵ်းတၢင်းၼႂ်းမၼ်းလႂ်တင်းထႃႇၼႃႉတီႈဢၼ်မူတ်းၸၢင်ႇလိူဝ်သေပိူၼ်ႈဢၼ်ဝႃႈ၊တီႈဢၼ်ၽေႇဢပျတ်ႈလႂ်ၸိူဝ်းၼႆႉဢၢပ်ႈပၼ်တီႈ သေႃးလမုၼ်ႇ၊ ဢေႃႈ။-
ဢိၵ်ႇတင်းဢဝ်ပုင်ႇႁၢင်ႈဢၼ်ၵျၢမ်ႇပွင်ဝႆႉၵႃႈၼႂ်းႁူဝ်ၸႂ်မၼ်း၊ပုၼ်ႈၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ၸိူဝ်းၼၼ်ႉ၊ဢိၵ်ႇတင်းလုၵ်းဢၼ်လွမ်ႉႁွပ်ႈမၼ်းလႂ်၊ပုၼ်ႈတိူၵ်ႈၽၼ်ႇတႃႇၵျွင်းပိၵ်ႈမၢၼ်ႇၽြႃးပဵၼ်ၸဝ်ႈလႂ်၊ဢိၵ်ႇတင်းတိူၵ်ႈၽၼ်ႇတႃႇၶိူင်ႈၶူဝ်းတၢင်းလူႇ ထႃႇဝရႃႉၽြႃး၊ ၸိူဝ်းၼၼ်ႉၵေႃႈဢၢပ်ႈပၼ်ဢေႃႈ။-
မၼ်းၼၼ်ႉ၊လၢတ်ႈၼႄတၢင်းၵျၢမ်ႇတၢင်းပွင်မၼ်းပုၼ်ႈယဵၸ်ႈပရေႃးႁဵၵ်ႈ ဢိၵ်ႇတင်းၵူၼ်း လေႇဝိ၊ ႁႂ်ႈပဵၼ်မုၵ်ႉပဵၼ်ၸုမ်းလႄႈထၢမ်းႁဵတ်းၵႃႈၼႂ်းၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ၵူႈၸိူဝ်ႉၵူႈပိူင်လႄႈလုမ်းလႃးၶိူင်ႈယိပ်းၶိူင်ႈတိုဝ်းၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။-
မၼ်းသမ်ႉမၵ်းၶၢၼ်းပၼ်ၼမ်ႉၼၵ်းၶမ်းလႄႈငိုၼ်းတႃႇတေႁဵတ်းၶိူင်ႈယိပ်းၶိူင်ႈတိုဝ်းၸွမ်းၼင်ႇၼမ်ႉၼၵ်းဢၼ်ၸင်ႈဢၼ်ႁိဝ်ႈႁင်းၽႂ်ႁင်းမၼ်းၼၼ်ႉ၊-
ဢၼ်ပဵၼ်၊ၶမ်းပုၼ်ႈၵွၵ်းၽႆးၶမ်းလႄႈၶႃတင်ႈၶမ်းတီႈဢၼ်ဝၢင်းၵွၵ်းၽႆးမၼ်းလႂ်၊-
ငိုၼ်းပုၼ်ႈၽိူၼ်ငိုၼ်းလႂ်လႄႈၶမ်းပုၼ်ႈၽိူၼ်ဢၼ်တၵ်းတမ်းဝၢင်းၶဝ်ႈမုၼ်းတၢင်းလူႇတီႈၽြႃးပဵၼ်ၸဝ်ႈလုၵ်ႈလႂ်လုၵ်ႈၼၼ်ႉ၊-
ၶမ်းလွတ်ႈငၢၼ်ႇပုၼ်ႈၶေႃၵွင်ႉၼိူဝ်ႉလႂ်၊ၵွၵ်းလႂ်၊ဢၢင်ႇလႂ်၊ဢိၵ်ႇတင်းၶမ်းလႄႈငိုၼ်းပုၼ်ႈဝၢၼ်ႇၶမ်းဝၢၼ်ႇငိုၼ်းလႂ်၊-
ၶမ်းလွတ်ႈငၢၼ်ႇၸွမ်းလူၺ်ႈၼမ်ႉၼၵ်းမၼ်းပုၼ်ႈၶဵင်ႇတၢင်းလူႇတီႈဢၼ်တၵ်းဢဝ်ၼၢမ်ႇသႃႇတုတ်ႇၽႆးၼၼ်ႉၶမ်းပုၼ်ႈတႃႇပုင်ႇႁၢင်ႈလေႃႉၶမ်းဢၼ်ပဵၼ်ႁၢင်ႈၶေႇရုၽဵမ်ႇဢၼ်ၵီႈပိၵ်ႇၶဝ်သေလႄႈႁူမ်ႇသုမ်ႇတိူၵ်ႈပတိၺိၺ်ႇ ထႃႇဝရႃႉၽြႃး၊ ယူႇၸိူဝ်းၼၼ်ႉဢဝ်ဢၢပ်ႈပၼ်တီႈလုၵ်ႈၸၢႆးမၼ်း သေႃးလမုၼ်ႇ၊ ဢေႃႈ။-
ၶုၼ်ႁေႃၶမ်း တႃႇဝိတ်ႈ၊ လၢတ်ႈလႄႈဝႃႈ၊ “ဢၼ်ၼႆႉၵႃႈမီးတင်းသဵင်ႈတင်းလူင်ပႃးၼႂ်းပုင်ႇႁၢင်ႈဢၼ်တႅမ်ႈမၢႆဝႆႉ၊ၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈၸႂ်ႉႁႂ်ႈၵဝ်ႁဵတ်းၼၼ်ႉယဝ်ႉ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်း တႃႇဝိတ်ႈ၊ မီးဢမိင်ႉတီႈလုၵ်ႈၸၢႆးမၼ်း သေႃးလမုၼ်ႇ၊ လႄႈဝႃႈ၊ “ပႃးတင်းၸႂ်ဢၼ်ႁတ်းႁၢၼ်လႄႈၶတ်းၸႂ်သၢင်ႈႁဵတ်းတႃႉ။ ယႃႇပေၵူဝ်၊ယႃႇပေၸႂ်လု။ ထႃႇဝရႃႉၽြႃး၊ ၽြႃးပဵၼ်ၸဝ်ႈၵဝ်ၼၼ်ႉမီးယူႇလူၺ်ႈၵၼ်တင်းမႂ်းဢေႃႈ။ မၼ်းၸဝ်ႈတၵ်းဢမ်ႇၸုၼ်ႉပႅတ်ႈမႂ်း၊တၵ်းမီးလူၺ်ႈၵၼ်တင်းမႂ်းယူႇတေႃႇထိုင်ႁွတ်ႈၵၢၼ်ဢၼ်သၢင်ႈႁဵတ်းၵျွင်းပိၵ်ႈမၢၼ်ႇၸဝ်ႈထၢၼ်ႈပေႃးယဝ်ႉတူဝ်ႈၵႂႃႇၼၼ်ႉဢေႃႈ။-
ယဵၸ်ႈပရေႃးႁဵၵ်ႈ လႂ်၊တင်းၵူၼ်း လေႇဝိ၊ တင်းလၢႆ၊လႆႈၶၢမ်ႇတၢင်းဢၼ်ၶၢၼ်းဝႆႉ၊ပုၼ်ႈဢၼ်တၵ်းၵိုတ်ႉႁၢပ်ႇၼႃႈၵၢၼ်ၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼႆႉယဝ်ႉ။ ၵူၼ်းႁဵတ်းၵၢၼ်ၸိူဝ်းဢၼ်ၵတ်ႉဢၼ်ၶႅၼ်ႇတင်းလၢႆၵေႃႈ၊ပႃးၸႂ်ပႃးၶေႃးပုၼ်ႈတၵ်းၸွႆႈတၵ်းထႅမ်မႂ်းဢေႃႈ။ ၵူၼ်းဝၢၼ်ႈၵူၼ်းမိူင်းတင်းသဵင်ႈတင်းမူတ်း၊ဢိၵ်ႇတင်းၶုၼ်တင်းလၢႆၵေႃႈ၊မီးယူႇတႂ်ႈဢမိင်ႉမႂ်းမူတ်းမူတ်းယဝ်ႉ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်း တႃႇဝိတ်ႈ၊ သမ်ႉမီးဢမိင်ႉတီႈပရိၵ်ႈသၢတ်ႈတင်းလၢႆလႄႈဝႃႈ၊ “လုၵ်ႈၸၢႆးၵဝ် သေႃးလမုၼ်ႇ၊ ဢၼ်ၽြႃးပဵၼ်ၸဝ်ႈလိူၵ်ႈဢဝ်ၼႆႉဢသၢၵ်ႈယင်းၼုမ်ႇလႄႈဢမ်ႇယၢမ်ႈႁဵတ်းၵၢၼ်။ ၵၢၼ်တၢင်းႁဵတ်းၼႆႉၸမ်ႉ၊ယႂ်ႇၼႃႇဢေႃႈ။ လွင်ႈမၼ်းၸမ်ႉ၊ဢၼ်ၼႆႉပဵၼ်ႁၢင်ႈပဵၼ်ႁေႃပုၼ်ႈၵူၼ်းဢမ်ႇၸႂ်ႈ၊မၼ်းပဵၼ်ၵျွင်းပိၵ်ႈမၢၼ်ႇၸဝ်ႈပုၼ်ႈ ထႃႇဝရႃႉၽြႃး၊ၽြႃးပဵၼ်ၸဝ်ႈ၊ ဢေႃႈ။-
ၵႃႈၼင်ႇဢၼ်ၵဝ်ပဵၼ်လႆႈၼၼ်ႉ၊ၵဝ်ပွင်ႁဵတ်းပွင်ႁႅၼ်းၶိူင်ႈပိူင်တင်းလၢႆပုၼ်ႈၵျွင်းပိၵ်ႈမၢၼ်ႇၸဝ်ႈ၊ဢၼ်ဝႃႈ၊ၶမ်း၊ငိုၼ်း၊တွင်းလိူင်၊လဵၵ်း၊မႆႉၸိင်၊သႅင်လီပတ်ႈတမျႃးဢၼ်ၵႃႈၶၼ်ယႂ်ႇ၊သႅင်ပုၼ်ႈဢၼ်တၵ်းၶပ်ႉ၊ႁိၼ်ၽိူၵ်ႇႁိၼ်ၶၢဝ်လႂ်၊တင်းသဵင်ႈတင်းလူင်ဝႆႉယဝ်ႉ။-
ၼွၵ်ႈသေဢုၵ်ႉၸႃႇၵႃႈဢၼ်ၵဝ်ပွင်ႁႅၼ်းပုၼ်ႈၵျွင်းပိၵ်ႈမၢၼ်ႇဢၼ်မူတ်းၸၢင်ႇၸဝ်ႈၼႆႉၼၼ်ႉ၊ၵဝ်ယင်းဢဝ်ငိုၼ်းၶမ်းၸိူဝ်းဢၼ်ၵဝ်ပိူင်ႇၼၼ်ႉလူႇတၢၼ်းၸွမ်းၼင်ႇဢၼ်ၵဝ်ႁၵ်ႉၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။-
ၵဝ်လူႇတၢၼ်းၶမ်းၸႅတ်ႈဢၼ်ဝႃႈ၊ၶမ်း ဢေႃႇၽိရႃႉ၊ ၼၼ်ႉသၢမ်ႁဵင်တလၢၼ်ႇတၢၼ်ႇ ဢိၵ်ႇတင်းငိုၼ်းၸႅတ်ႈပုၼ်ႈဢၼ်တၵ်းဢုမ်ႇၽႃႁိၼ်ၼၼ်ႉၸဵတ်းႁဵင်တလၢၼ်ႇတၢၼ်ႇ၊-
တင်းၶမ်းပုၼ်ႈၶိူင်ႈၶမ်း၊ငိုၼ်းပုၼ်ႈၶိူင်ႈငိုၼ်းလႄႈၶိူင်ႈၶူဝ်းဢၼ်သြႃႇၸၢင်ႈမႆႉၶဝ် တၵ်းယိပ်းတၵ်းသုင်းတင်းသဵင်ႈတင်းလူင်ၼၼ်ႉယဝ်ႉယဝ်ႉ။ တေႃႈလဵဝ်ၼႆႉ၊ၽူႈလႂ်ၵူၼ်းလႂ်မီးဢလူဝ်ႇၵၢင်ၸႂ် ၶႂ်ႈလူႇတၢၼ်းတီႈ ထႃႇဝရႃႉၽြႃး၊ ” ဝႃႈၼင်ႇၼႆဢေႃႈ။
မိူဝ်ႈၼၼ်ႉၵူၼ်းတူၼ်ႈၵူၼ်းငဝ်ႈၼႂ်းၶိူဝ်းႁိူၼ်းလႂ်၊ၶုၼ်ဢၼ်ပွင်ၵၢၼ်ၼႂ်းၸိူဝ်ႉၶိူဝ်းမဵဝ်း ဢိသရေး၊ လႂ်ၸဝ်ႈၵွၼ်းတပ်ႉသိုၵ်းၽၢႆႇတပ်ႉသိုၵ်းလႂ်၊ၶုၼ်ဢၼ်ဢုပ်ႉၽၢႆႇဝၢၼ်ႈမိူင်းလႂ်၊ဢွၼ်ၵၼ်ပႃးၸႂ်ၸေႇတၼႃႇလူႇတၢၼ်း၊-
ၶမ်းႁႃႈႁဵင်တလၢၼ်ႇတၢၼ်ႇ ၶႅပ်းၶမ်းတရႅၵ်ႉမိုၼ်ႇၼိုင်ႈ ၊ငိုၼ်းၼိုင်ႈမိုၼ်ႇတလၢၼ်ႇတၢၼ်ႇ ၊တွင်းလိူင်ၼိုင်ႈမိုၼ်ႇပႅတ်ႇႁဵင်တလၢၼ်ႇတၢၼ်ႇ ၊လဵၵ်းၼိုင်ႈသႅၼ်တလၢၼ်ႇတၢၼ်ႇ ပုၼ်ႈၼႃႈၵၢၼ်ဢၼ်တၵ်းသၢင်ႈႁဵတ်းၵျွင်းပိၵ်ႈမၢၼ်ႇၸဝ်ႈဢေႃႈ။-
ၶဝ်ၸိူဝ်းဢၼ်မီးသႅင်လီၵေႃႈ၊ဢွၼ်ၵၼ်ဢဝ်မႃးလူႇတၢၼ်းပုၼ်ႈၵျွင်းပိၵ်ႈမၢၼ်ႇၸဝ်ႈလႄႈဢၢပ်ႈပၼ်ၵႃႈၼႂ်းမိုဝ်း ယေႇႁေးလႃႉ၊ ၵူၼ်းၶိူဝ်းႁိူၼ်း ၵေႇရသုၼ်ႇ၊ ၼၼ်ႉဢေႃႈ။-
ၵူၼ်းတင်းလၢႆဢွၼ်ၵၼ်ပႃးၸႂ်ၸေႇတၼႃႇလူႇတၢၼ်းပုၼ်ႈ ထႃႇဝရႃႉၽြႃး၊ လႄႈမီးတၢင်းဢၼ်ၸူမ်းသိူဝ်းၵွပ်ႈပိူဝ်ႈဢၼ်လႆႈလူႇလႆႈတၢၼ်းၼမ်ၼႃႇၼၼ်ႉဢေႃႈ။ ၶုၼ်ႁေႃၶမ်း တႃႇဝိတ်ႈ၊ ၵေႃႈမီးတၢင်းဢၼ်ၸူမ်းသိူဝ်းၼႃႇလူင်လၢင်ဢေႃႈ။
ၶုၼ်ႁေႃၶမ်း တႃႇဝိတ်ႈ၊ ယွင်ႈယေႃးၽြႃးပဵၼ်ၸဝ်ႈသိုဝ်ႈၼႃႈတႂ်ႈတႃပရိၵ်ႈသၢတ်ႈတင်းလၢႆလႄႈဝႃႈ၊ “ ထႃႇဝရႃႉၽြႃး၊ၽြႃးပဵၼ်ၸဝ်ႈ၊ ပူႇပေႃႈၶႃႈၸဝ်ႈႁဝ်းၶဝ် ဢိသရေး၊ ၼၼ်ႉတီႈၶႃႈ ႁႂ်ႈၸဝ်ႈႁဝ်းလႆႈၶၢမ်ႇတၢင်းဢၼ်ယုၵ်ႉယွင်ႈၵမ်ႇၽႃႇသိုပ်ႇသိုပ်ႇတၢမ်တၢမ်သေၵမ်းလူၺ်ႈ။-
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းယႂ်ႇမျၢတ်ႈၼႃႇလႄႈမီးတၼ်းၶူဝ်းဢႃႇၼုၽေႃႇ၊မုၼ်သရေႇတၢင်းဢၼ်ပႄႉၼႅင်ႇ၊ဢႃႇၼႃႇၸၢၵ်ႈတီႈၶႃႈဢေႃႈ။ ၶိူင်ႈပိူင်ၵၢင်ႁၢဝ်လႄႈၶိူင်ႈပိူင်လိၼ်မိူင်းၵူႈၸိူဝ်ႉၵူႈပိူင်ပဵၼ်ၶွင်ၸဝ်ႈႁဝ်းလႄႈ၊ၸဝ်ႈႁဝ်းပဵၼ်ၸဝ်ႈဢၼ်ယႂ်ႇသုင်မျၢတ်ႈၼႃႇ၊ပဵၼ်ၸိၵ်းပဵၼ်ၸွမ်ၵႃႈၼိူဝ်ၵႃႈမီးတင်းသဵင်ႈတင်းလူင်တီႈၶႃႈဢေႃႈ။-
မုၼ်ၵုင်ႇသရေႇ၊ဢိၵ်ႇတင်းၸေးၸိမ်ႇဢုၵ်ႉၸႃႇပေႃႇပဵၼ်ၵႃႈတီႈၸဝ်ႈႁဝ်းမႃးၶႃႈဢေႃႈ။ ၸဝ်ႈႁဝ်းဢဝ်ႁႅင်းတၼ်းၶူဝ်းၸဝ်ႈႁဝ်းသေလႄႈဢုပ်ႉပိူင်ႇၵႃႈၼိူဝ်ၵူႈၸိူဝ်ႉၵူႈပိူင်တီႈၶႃႈဢေႃႈ။ ၸဝ်ႈႁဝ်းမီးႁႅင်းတၼ်းၶူဝ်းဢၼ်ပိူင်ႇယုၵ်ႉယွင်ႈႁႂ်ႈၵူၼ်းၵူႈၵေႃႉယႂ်ႇမျၢတ်ႈမၼ်ႈၶိူင်ႇတီႈၶႃႈဢေႃႈ။-
ၵွပ်ႈပိူဝ်ႈဢၼ်ပဵၼ်ၸိူဝ်ႉၼင်ႇၼႆလႄႈ၊ၽြႃးပဵၼ်ၸဝ်ႈႁဝ်းၶႃႈတီႈၶႃႈ။ ၶႃႈၸဝ်ႈႁဝ်းၶဝ်ဢွၼ်ၵၼ်ယုၵ်ႉယွင်ႈတၢင်ႇၵျေးၸူးၸဝ်ႈႁဝ်းလႄႈ၊ယွင်ႈယေႃးၼႃႇမႃႉၸိုဝ်ႈသဵင်ၸဝ်ႈႁဝ်းဢၼ်မုၼ်ယႂ်ႇၼၼ်ႉတီႈၶႃႈဢေႃႈ။
“ၵူၺ်းၵႃႈ၊ၶႃႈၸဝ်ႈဢိၵ်ႇတင်းၵူၼ်းၶႃႈၸဝ်ႈၸိူဝ်းၼႆႉပဵၼ်ၵေႃႉၸိူဝ်ႉၼင်ႇႁိုဝ်ထၢၼ်ႈပေႃးပႃးၸႂ်ၸေႇတၼႃႇလူႇတၢၼ်းထၢၼ်ႇၼႆႉတီႈၶႃႈ။ လွင်ႈတၢင်းၵႃႈမီးတင်းသဵင်ႈတင်းလူင်ပေႃႇပဵၼ်ၵႃႈတီႈၸဝ်ႈႁဝ်းမႃးတီႈၶႃႈလႄႈ၊ၶႃႈၸဝ်ႈႁဝ်းၶဝ်လႆႈဢဝ်ၼႂ်းဢုၵ်ႉၸႃႇၸဝ်ႈႁဝ်းၼႆႉၵူၺ်း၊ၶိုၼ်းလူႇတၢၼ်းပၼ်တီႈၸဝ်ႈႁဝ်းတီႈၶႃႈဢေႃႈ။-
ၶႃႈၸဝ်ႈႁဝ်းၶဝ်ပဵၼ်ၵူၼ်းတၢင်ႇဝၢၼ်ႈတၢင်ႇမိူင်းဢၼ်ယူႇၵႃႈတီႈၽၢႆႇၼႃႈၸဝ်ႈႁဝ်းမိူၼ်ၵၼ်တင်းပူႇမွၼ်ႇၶႃႈၸဝ်ႈႁဝ်းၶဝ်ၸိူဝ်းၼၼ်ႉတီႈၶႃႈဢေႃႈ။ မိုဝ်ႉဝၼ်းၶႃႈၸဝ်ႈႁဝ်းၶဝ်ၵႃႈၼိူဝ်လိၼ်မိူင်းၼႆႉပဵၼ်မိူၼ်ၸိူဝ်ႉၼင်ႇႁူမ်ႈငဝ်းၵူၺ်းတီႈၶႃႈလႄႈ၊ဢမ်ႇပူၼ်ႉဢမ်ႇလွတ်ႈသေၵႃႈတၢင်းတၢႆလႆႈတီႈၶႃႈ။-
ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၶႃႈတီႈၶႃႈ။ ၶႃႈၸဝ်ႈႁဝ်းၶဝ်ဢဝ်ၽၼ်ႇတႃႇဢုၵ်ႉၸႃႇၸိူဝ်းၼႆႉ၊မႃးလူႇတၢၼ်းႁႂ်ႈလႆႈသၢင်ႈႁဵတ်းၵျွင်းပိၵ်ႈမၢၼ်ႇပုၼ်ႈၼႃႇမႃႉၸိုဝ်ႈသဵင်ၸဝ်ႈႁဝ်းတီႈၶႃႈဢေႃႈ။ ၵူၺ်းၵႃႈ၊ဢၼ်ၸိူဝ်းၼႆႉပေႃႇပဵၼ်မႃးၵႃႈတီႈၸဝ်ႈႁဝ်းလႄႈပဵၼ်ၶွင်ၸဝ်ႈႁဝ်းပိူင်ႇတီႈၶႃႈဢေႃႈ။-
ၽြႃးပဵၼ်ၸဝ်ႈၵဝ်ၶႃႈတီႈၶႃႈ၊ၶႃႈၸဝ်ႈႁုလွင်ႈဢၼ်ၸဝ်ႈႁဝ်းၸၢမ်းတူၺ်းႁူဝ်ၸႂ်ၵူၼ်းၵူႈၵေႃႉလႄႈထုၵ်ႇၸႂ်ၵျိူၵ်ႈၸႂ်သၽေႃးၵူၼ်းတင်းလၢႆ၊ဢၼ်သိုဝ်ႈတေႃႇၼၼ်ႉတီႈၶႃႈဢေႃႈ။ ၶႃႈၸဝ်ႈၸမ်ႉ၊မီးၸႂ်သိုဝ်ႈၸႂ်ယူဝ်းလႄႈလူႇတၢၼ်းလူၺ်ႈၸႂ်ၸေႇတၼႃႇတီႈၶႃႈယဝ်ႉလႄႈ၊ၶႃႈၸဝ်ႈလႆႈႁၼ်ၵူၼ်းၸိူဝ်းဢၼ်ၸုတုမ်ၵၼ်ယူႇၵႃႈတီႈၼႆႈၼၼ်ႉ၊မီးတၢင်းဢၼ်ၸူမ်းသိူဝ်းၵွပ်ႈပိူဝ်ႈဢၼ်လႆႈလူႇလႆႈတၢၼ်းတီႈၸဝ်ႈႁဝ်းၼၼ်ႉတီႈၶႃႈဢေႃႈ။-
ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇပေႃႈႁဝ်း ဢႃႇပြႃႇႁၢမ်ႇ၊ဢိၸၢၵ်ႈ၊ယႃႇၵုပ်ႈ၊ တီႈၶႃႈ။ ၶႅၼ်းတေႃႈႁႂ်ႈၸႂ်သၽေႃးၼႆႉတႄႇယူႇၼႂ်းႁူဝ်ၸႂ်ၵူၼ်းၸဝ်ႈႁဝ်းတင်းလၢႆၼႆႉတႃႇသေႇဢမ်ႇထၢတ်ႇသေၵမ်းတီႈၶႃႈ၊ႁႂ်ႈႁူဝ်ၸႂ်ၶဝ်တႄႇမၼ်ႈယူႇတီႈၸဝ်ႈႁဝ်းသေၵမ်းတီႈၶႃႈ။-
ၶႅၼ်းတေႃႈႁႂ်ႈလုၵ်ႈၸၢႆးၶႃႈၸဝ်ႈႁဝ်း သေႃးလမုၼ်ႇ၊ ၼႆႉပႃးၸႂ်ပႃးၶေႃးၵမ်ၵျၢင်ႉၸွမ်းပိင်းၺၢပ်ႈတြႃးၸဝ်ႈႁဝ်းၵူႈၸိူဝ်ႉၵူႈပိူင်ယူႇသေလႄႈႁႂ်ႈမၼ်းသၢင်ႈႁဵတ်းၵျွင်းပိၵ်ႈမၢၼ်ႇၸဝ်ႈဢၼ်ၶႃႈၸဝ်ႈပွင်ႁဵတ်းပွင်ႁႅၼ်းဝႆႉၼႆႉၼၼ်ႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ၼင်ႇၼၼ်လႄႈ တႃႇဝိတ်ႈ၊ မီးဢမိင်ႉတီႈပရိၵ်ႈသၢတ်ႈတင်းလၢႆလႄႈဝႃႈ၊ “ဢွၼ်ၵၼ်ယွင်ႈယေႃး ထႃႇဝရႃႉၽြႃး၊ ၽြႃးပဵၼ်ၸဝ်ႈသူတႃႉ၊” ဝႃႈၼင်ႇၼႆဢေႃႈ။ ၵူၼ်းပရိၵ်ႈသၢတ်ႈၵႃႈမီးတင်းသဵင်ႈတင်းလူင်ၵေႃႈ၊ဢွၼ်ၵၼ်ယွင်ႈယေႃး ထႃႇဝရႃႉၽြႃး၊ ဢၼ်ပဵၼ်ၽြႃးပဵၼ်ၸဝ်ႈပူႇပေႃႈၶဝ်သေယဝ်ႉ၊ၶုပ်ႉမူပ်ႇဝၢင်းႁူဝ်လႄႈဝႆႈသႃၵူဝ်းၵႂၢႆႇ ထႃႇဝရႃႉၽြႃး၊ ဢိၵ်ႇတင်းၶုၼ်ႁေႃၶမ်းယူႇဢေႃႈ။
ၼႂ်းဝၼ်းမိူဝ်ႈၽုၵ်ႈၼၼ်ႉၶဝ်ဢွၼ်ၵၼ်ႁဵတ်းတၢင်းလူႇတီႈ ထႃႇဝရႃႉၽြႃး၊ လႄႈသၢၵ်ႈလူႇတၢင်းလူႇဢၼ်တုတ်ႇၽႆးတီႈမၼ်းၸဝ်ႈ၊ဝူဝ်းပေႃႈႁဵင်ၼိုင်ႈ၊သူဝ်းပေႃႈႁဵင်ၼိုင်ႈ၊သူဝ်းဢွၼ်ႇႁဵင်ၼိုင်ႈ၊လူၺ်ႈၵၼ်တင်းတၢင်းလူႇဢၼ်သွၼ်းလေႃႇတင်းတၢင်းလူႇတၢင်ႇၸိူဝ်ႉတၢင်ႇဢၼ်ၼမ်ၼႃႇပုၼ်ႈၵူၼ်း ဢိသရေး၊ တင်းသဵင်ႈတင်းလူင်ၼၼ်ႉဢေႃႈ။-
ၶဝ်ဢွၼ်ၵၼ်ၵိၼ်ၶူပ်းမူၼ်ႈမူၼ်ႈပျေႃႇပျေႃႇၼႃႇလူင်လၢင်ၵႃႈတီႈၽၢႆႇၼႃႈ ထႃႇဝရႃႉၽြႃး၊ ၼႂ်းဝၼ်းၼၼ်ႉဢေႃႈ။ ၶဝ်သမ်ႉဢွၼ်ၵၼ်ယုၵ်ႉယွင်ႈ သေႃးလမုၼ်ႇ၊ ဝႆႉၵႃႈၼႂ်းဢရႃႇၶုၼ်ႁေႃၶမ်းထႅင်ႈပွၵ်ႈထူၼ်ႈသွင်လႄႈပၼ်ၽိၵ်ႈသိၵ်ႈတီႈမၼ်းၼႂ်းၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ႁႂ်ႈမၼ်းပဵၼ်ၶုၼ်ႁေႃၶမ်းၶဝ်၊ဢိၵ်ႇတင်းႁႂ်ႈ ၸႃႇတုၵ်ႉ၊ ပဵၼ်ယဵၸ်ႈပရေႃးႁဵၵ်ႈ ဢေႃႈ။-
ပိူဝ်ႈၼႆလႄႈ သေႃးလမုၼ်ႇ၊ ၼင်ႈၵႃႈၼိူဝ်ရႃႇၸႃႉပလၢင်ႇဢၼ် ထႃႇဝရႃႉၽြႃး၊ တႄႇႁဵတ်းပၼ်ၼၼ်ႉလႄႈႁဵတ်းၶုၼ်ႁေႃၶမ်းတၢင်တူဝ်ပေႃႈမၼ်း တႃႇဝိတ်ႈ၊ ဢေႃႈ။ မၼ်းၼၼ်ႉၶိုၼ်ႈယႂ်ႇမႂ်ႇသုင်ယူႇလႄႈ ၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢွၼ်ၵၼ်ထွမ်ႇဢဝ်ၵႂၢမ်းမၼ်းဢေႃႈ။-
မူးမၢတ်ႈၽွင်းမိူင်းလႂ်၊ၶုၼ်သိုၵ်းလႂ်၊တင်းလုၵ်ႈၸၢႆးၸဝ်ႈ တႃႇဝိတ်ႈ၊ တင်းလၢႆဢွၼ်ၵၼ်ႁပ်ႉတုင်းဢဝ်ၶုၼ်ႁေႃၶမ်း သေႃးလမုၼ်ႇ၊ ဢုပ်ႉပိူင်ႇၼၼ်ႉဢေႃႈ။-
ထႃႇဝရႃႉၽြႃး၊ ယုၵ်ႉယွင်ႈ သေႃးလမုၼ်ႇ၊ ၼႃႇလူင်လၢင်သိုဝ်ႈၼႃႈတႂ်ႈတႃၵူၼ်းမဵဝ်း ဢိသရေး၊ တင်းသဵင်ႈတင်းလူင်လႄႈမၼ်းၸဝ်ႈပၼ်မုၼ်ၽုင်းဢႃႇၼုၽေႃႇတီႈ သေႃးလမုၼ်ႇ၊ ႁႂ်ႈမၼ်းႁိူဝ်ႈႁိူင်းပိူင်းသႂ်လိူဝ်တွၼ်းသေၶုၼ်ႁေႃၶမ်း ဢိသရေး၊ တၢင်ႇၸဝ်ႈတၢင်ႇပႃးၸိူဝ်းၼၼ်ႉဢေႃႈ။
တႃႇဝိတ်ႈ၊ လုၵ်ႈၸၢႆး ယေႇသႄး၊ ၼၼ်ႉဢုပ်ႉပိူင်ႇၸၢမ်ႇၸႃးမိူင်း ဢိသရေး၊ တင်းမိူင်းဢေႃႈ။-
မၼ်းလႆႈဢုပ်ႉပိူင်ႇၸၢမ်ႇၸႃးသီႇသိပ်းပီဢေႃႈ။ မၼ်းၸၢမ်ႇႁၢင်ႈၸၢမ်ႇႁေႃၵႃႈတီႈဝဵင်း ႁေႇပရုၼ်ႇ၊ ၸဵတ်းပီ၊ဢိၵ်ႇတင်းၵႃႈတီႈဝဵင်း ယေႇရုသလႅမ်ႇ၊ သၢမ်သိပ်းသၢမ်ပီဢေႃႈ။-
မၼ်းၼၼ်ႉမီးတၢင်းဢၼ်ဢသၢၵ်ႈၵႄႇထဝ်ႈယဝ်ႉလႄႈဢသၢၵ်ႈယၢဝ်းယိုၼ်းလူၺ်ႈတၢင်းမူၼ်ႈပျေႃႇတၢင်းဢၼ်မူၼ်ႈၸေးၸိမ်ႇမၢၵ်ႈမီးလီပဵၼ်ယဝ်ႉၸင်ႇၼွၼ်းၽႄးၵႂႃႇဢေႃႈ။ လုၵ်ႈၸၢႆးမၼ်း သေႃးလမုၼ်ႇ၊ ပုတ်ႈဢဝ်ဢရႃႇၶုၼ်ႁေႃၶမ်းလႄႈၼင်ႈႁၢင်ႈၼင်ႈႁေႃဢေႃႈ။-
လွင်ႈတၢင်းဢၼ်ၶုၼ်ႁေႃၶမ်း တႃႇဝိတ်ႈ၊ ႁဵတ်းၸဵမ်ငဝ်ႈတေႃႇပၢႆၵႃႈမီးတင်းသဵင်ႈတင်းလူင်ၸိူဝ်းၼၼ်ႉလႆႈတႅမ်ႈမၢႆဝႆႉ၊ၵႃႈၼႂ်းပိုၼ်းၽိုၼ်လိၵ်ႈၶဝ်ၸိူဝ်းဢၼ်ႁူပွင်ႇတႃလႅင်းသၢမ်ပႃး၊ဢၼ်ပဵၼ် သမူၺ်ႇလႃႉ၊ၼႃႇႀၼ်ႇ၊ ဢိၵ်ႇတင်း ၵၢတ်ႉ၊ ၸိူဝ်းၼၼ်ႉဢေႃႈ။-
ၵႃႈၼႂ်းတီႈဢၼ်မၢတ်ႈမၢႆဝႆႉၼၼ်ႉမီးလွင်ႈတၢင်းဢၼ်မၼ်းဢုပ်ႉပိူင်ႇၸၢမ်ႇၸႃးဢိၵ်ႇတင်းမုၼ်ၽုင်းတၼ်းၶူဝ်းမၼ်း၊ဢိၵ်ႇတင်းလွင်ႈတၢင်းၵႃႈဢၼ်ပဵၼ်မႃးၵႃႈတီႈမၼ်း၊ၵႃႈၼႂ်းမိူင်း ဢိသရေး၊ လႄႈၵႃႈတီႈသိုင်ႇၸိုင်ႈဝၢၼ်ႈမိူင်းႁိမ်းႁွမ်းတင်းလၢႆၸိူဝ်းၼၼ်ႉဢေႃႈ။ 1 ရႃႇၸဝၢင်ႇၶျုၵ်ႈၽိုၼ်တီႈၼိုင်ႈယဝ်ႉယဝ်ႉဢေႃႈ။
ၶုၼ်ႁေႃၶမ်း သေႃးလမုၼ်ႇ၊ လုၵ်ႈၸၢႆး တႃႇဝိတ်ႈ၊ ၼၼ်ႉဢုပ်ႉပိူင်ႇမိူင်း ဢိသရေး၊ ယူႇမၼ်ႈမၼ်ႈၶိူင်ႇၶိူင်ႇလႄႈၽြႃးပဵၼ်ၸဝ်ႈမၼ်း ထႃႇဝရႃႉၽြႃး၊ ပၼ်တၢင်းလီတီႈမၼ်းသေလႄႈႁႂ်ႈမၼ်းမီးၽုင်းတၼ်းၶူဝ်းယႂ်ႇၼႃႇဢေႃႈ။
ၶုၼ်ႁေႃၶမ်း သေႃးလမုၼ်ႇ၊ မီးဢမိင်ႉတီႈၶုၼ်ဢၼ်ဢုပ်ႉၵႃႈၼိူဝ်မူႇၵူၼ်းယေႈႁဵင်လႂ်၊မူႇၵူၼ်းယေႈပၢၵ်ႇလႂ်၊တင်းသဵင်ႈတင်းလူင်၊ဢိၵ်ႇတင်းမူးမၢတ်ႈၽွင်းမိူင်းလႂ်၊ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၸိူဝ်ႉၶိူဝ်းၵူၼ်းႁိူၼ်းပေႃႈၶဝ်၊ဢိၵ်ႇတင်းၵူၼ်းမဵဝ်း ဢိသရေး၊ တင်းသဵင်ႈတင်းလူင်၊-
ပူင်ဢမိင်ႉႁႂ်ႈၶဝ်ၵႂႃႇၸူးတီႈဝဵင်း ၵိပွင်ႇ၊ တီႈထႃႇၼႃႉဢၼ်ႁဵတ်းဝၢတ်ႈၵူဝ်းၵႂၢႆႇပုၼ်ႉဢေႃႈ။ ၶဝ်ဢွၼ်ၵၼ်ၵႂႃႇၵႃႈတီႈသုမ်ႉထဵင်ၸဝ်ႈတီႈဢၼ် ထႃႇဝရႃႉၽြႃး၊ ယူႇသဝ်းဢၼ် မူဝ်းသေႇ၊ ၶႃႈ ထႃႇဝရႃႉၽြႃး၊ တႄႇတင်ႈဝႆႉၵႃႈၼႂ်းထိူၼ်ႇလႅင်ႉၵႃႈတီႈၼၼ်ႈဢေႃႈ။-
(တိူၵ်ႈပတိၺိၺ်ႇၸဝ်ႈဢၼ်ၶုၼ်ႁေႃၶမ်း တႃႇဝိတ်ႈ၊ ဢဝ်မႃးသေၵႃႈတီႈဝဵင်း ၵိရယတ်ႉယႃႇရိမ်ႇ၊ လႄႈဝႆႉၵႃႈတီႈဝဵင်း ယေႇရုသလႅမ်ႇ၊ တီႈသုမ်ႉထဵင်ၸဝ်ႈဢၼ်ၶုၼ်ႁေႃၶမ်း တႃႇဝိတ်ႈ၊ ပူၵ်းတင်ႈဝႆႉၼၼ်ႉဢေႃႈ။-)
ၶဵင်ႇတၢင်းလူႇတွင်းလိူင်ဢၼ် ပေႇၸလေႇလႃႉ၊ လုၵ်ႈၸၢႆး ဢုရိ၊ ၵေႃႉပဵၼ်လၢၼ် ႁုရႃႉ၊ ႁဵတ်းဝႆႉၼၼ်ႉၵေႃႈမီးယူႇၵႃႈၼႂ်းဝဵင်း ၵိပွင်ႇ၊ လႆႈမီးယူႇၵႃႈတီႈၽၢႆႇၼႃႈသုမ်ႉထဵင်ၸဝ်ႈတီႈ ထႃႇဝရႃႉၽြႃး၊ ယူႇသဝ်းၼၼ်ႉဢေႃႈ။ ၶုၼ်ႁေႃၶမ်း သေႃးလမုၼ်ႇ၊ ဢိၵ်ႇတင်းၵူၼ်းတင်းသဵင်ႈတင်းလူင်ဢွၼ်ၵၼ်ႁဵတ်းဝၢတ်ႈၵူဝ်းၵႂၢႆႇ ထႃႇဝရႃႉၽြႃး၊ ၵႃႈတီႈၼၼ်ႈဢေႃႈ။-
ၶုၼ်ႁေႃၶမ်းၵေႃႈဢဝ်တူဝ်သတ်းႁဵင်ၼိုင်ႈလႄႈႁဵတ်းတၢင်းလူႇဢၼ်တုတ်ႇၽႆးၵႃႈၼိူဝ်ၶဵင်ႇတၢင်းလူႇတွင်းလိူင်ဢၼ်မီးၽၢႆႇၼႃႈသုမ်ႉထဵင်ၸဝ်ႈသေယဝ်ႉ၊ႁဵတ်းဝၢတ်ႈၵူဝ်းၵႂၢႆႇ ထႃႇဝရႃႉၽြႃး၊ ဢေႃႈ။
ၼႂ်းၶိုၼ်းၼၼ်ႉ၊ၽြႃးပဵၼ်ၸဝ်ႈပေႃႇမႃးၵႃႈတီႈ သေႃးလမုၼ်ႇ၊ သေယဝ်ႉ၊မီးဢမိင်ႉလႄႈဝႃႈ၊ “ယွၼ်းဢဝ်သူးဢၼ်ၵဝ်တၵ်းလႆႈပၼ်တီႈမႂ်းၼၼ်ႉတႃႉ၊” ဝႃႈၼင်ႇၼႆဢေႃႈ။
သေႃးလမုၼ်ႇ၊ ၵေႃႈလဝ်ႈလၢတ်ႈလႄႈဝႃႈ၊ “ၸဝ်ႈႁဝ်းႁဵတ်းၵျေးၸူးၼမ်ၼႃႇလူင်လၢင်တီႈပေႃႈၶႃႈၸဝ်ႈႁဝ်း တႃႇဝိတ်ႈ၊ ၼၼ်ႉလႄႈၸဝ်ႈႁဝ်းႁႂ်ႈၶႃႈၸဝ်ႈႁဝ်းၼႆႉလႆႈပဵၼ်ၶုၼ်ႁေႃၶမ်းဢၼ်သိုပ်ႇၼင်ႈႁၢင်ႈၼင်ႈႁေႃမၼ်းၼၼ်ႉတီႈၶႃႈယဝ်ႉ။-
ဢူဝ်း။ ထႃႇဝရႃႉၽြႃး၊ ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈႁႂ်ႈၵတိဢၼ်ၸဝ်ႈႁဝ်းဝႆႉၵႃႈတီႈပေႃႈၶႃႈၸဝ်ႈႁဝ်းၼၼ်ႉပျေႉၸုမ်ႇသေၵမ်းတီႈၶႃႈ။ ၸဝ်ႈႁဝ်းႁႂ်ႈၶႃႈၸဝ်ႈပဵၼ်ၶုၼ်ႁေႃၶမ်းဢၼ်ဢုပ်ႉပိူင်ႇၵူၼ်းဢၼ်ၼမ်ၼႃႇလူင်လၢင်ထၢၼ်ႈပေႃးဢမ်ႇပႄႉၼပ်ႉဢၢၼ်ႇလႆႈၼၼ်ႉတီႈၶႃႈယဝ်ႉ။-
ပိူဝ်ႈၼႆလႄႈၶႅၼ်းတေႃႈပၼ်ၺၢၼ်ႇပိင်ႇၺႃႇပုၼ်ႈဢၼ်ၶႃႈၸဝ်ႈႁဝ်းတၵ်းဢုပ်ႉပိူင်ႇၵႃႈၼိူဝ်ၶဝ်ၸိူဝ်းၼႆႉလႆႈၼၼ်ႉသေၵမ်းတီႈၶႃႈ။ ပေႃးဢမ်ႇၼၼ်ၶႃႈၸဝ်ႈႁဝ်းတၵ်းတေဢုပ်ႉပိူင်ႇၵႃႈၼိူဝ်ၵူၼ်းၸဝ်ႈႁဝ်းဢၼ်ၼမ်ၼႃႇထၢၼ်ႇၼႆႉလႆႈၸိူဝ်ႉၼင်ႇႁိုဝ်တီႈၶႃႈ၊” ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈၵေႃႈမီးဢမိင်ႉတီႈ သေႃးလမုၼ်ႇ၊ လႄႈဝႃႈ၊ “မႂ်းလိူၵ်ႈဢဝ်ဢၼ်မၢၼ်ႇဢၼ်မႅၼ်ႈယဝ်ႉ။ မႂ်းယင်းဢမ်ႇယွၼ်းဢမ်ႇဢဝ်ၸေးၸိမ်ႇဢုၵ်ႉၸႃႇ၊မုၼ်သရေႇ၊ဢမ်ႇယွၼ်းဢဝ်ဢသၢၵ်ႈရၢၼ်ႇသူႇမႂ်းတင်းလၢႆလႄႈယင်းဢမ်ႇယွၼ်းဢဝ်ဢသၢၵ်ႈဢၼ်ယိုၼ်းဢၼ်ယၢဝ်းၸိူဝ်းၼၼ်ႉလႄႈၵူၺ်းယွၼ်းဢဝ်ၺၢၼ်ႇပိင်ႇၺႃႇပုၼ်ႈတူဝ်ၸဝ်ႈၵဝ်ႇဢၼ်ၸၢင်ႈဢုပ်ႉပိူင်ႇၵႃႈၼိူဝ်ၵူၼ်းၵဝ်တင်းလၢႆ၊ဢၼ်ၵဝ်ၶၢၼ်းမႂ်းဝႆႉ၊ႁႂ်ႈပဵၼ်ၶုၼ်ႁေႃၶမ်းၶဝ်ၼၼ်ႉလႄႈ။-
ၵဝ်တၵ်းပၼ်ၺၢၼ်ႇပိင်ႇၺႃႇတီႈမႂ်းဢေႃႈ။ လိူဝ်သေၼၼ်ႉၵဝ်သမ်ႉတၵ်းဢဝ်ၸေးၸိမ်ႇဢုၵ်ႉၸႃႇ၊မုၼ်သရေႇဢၼ်ၶုၼ်ႁေႃၶမ်းဢၼ်ယၢမ်ႈပဵၼ်ဢွၼ်တၢင်းမႂ်း၊ဢိၵ်ႇတင်းၶုၼ်ႁေႃၶမ်းဢၼ်တၵ်းပဵၼ်မႃးၵမ်းလိုၼ်းမႂ်းသေၵေႃႉသေၵူၼ်း၊ဢမ်ႇတွၼ်ႉၶိုတ်းလႆႈၼၼ်ႉတေထၢပ်ႈသႂ်ႇထႅင်ႈပၼ်တီႈမႂ်းလူးၵွၼ်ႇဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ သေႃးလမုၼ်ႇ၊ ဢွၵ်ႇသေထႃႇၼႃႉတီႈဢၼ်ႁဵတ်းဝၢတ်ႈၵူဝ်းၵႂၢႆႇၵႃႈၼႂ်းဝဵင်း ၵိပွင်ႇ၊ တီႈသုမ်ႉထဵင်ၸဝ်ႈတီႈဢၼ် ထႃႇဝရႃႉၽြႃး၊ ယူႇသဝ်းၼၼ်ႉသေလႄႈၶိုၼ်ႈမိူဝ်းၵႂႃႇၸူးဝဵင်း ယေႇရုသလႅမ်ႇ၊ သေဢေႃႈ။ ၵႃႈတီႈၼၼ်ႈမၼ်းဢုပ်ႉပိူင်ႇၸၢမ်ႇၸႃးမိူင်း ဢိသရေး၊ ဢေႃႈ။-
မၼ်းတႄႇတင်ႈတပ်ႉလေႃႉမႃႉသိုၵ်းႁဵင်ပၢႆသီႇပၢၵ်ႇ၊ဢိၵ်ႇတင်းၵူၼ်းသိုၵ်းၶီႇမႃႉမိုၼ်ႇပၢႆသွင်ႁဵင်ဢေႃႈ။ မၼ်းဢဝ်ၵမ်ႈၽွင်ႈဝႆႉၵႃႈၼႂ်းဝဵင်း ယေႇရုသလႅမ်ႇ၊ လႄႈသမ်ႉဢဝ်ဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉဝႆႉၵႃႈတီႈတၢင်ႇဝဵင်းလႂ်ဢေႃႈ။-
ၼႂ်းၸူဝ်ႈပၢၼ်မၼ်းၸၢမ်ႇႁၢင်ႈၸၢမ်ႇႁေႃယူႇၼၼ်ႉငိုၼ်းၶမ်းၼမ်ၼႃႇၵႃႈၼႂ်းဝဵင်း ယေႇရုသလႅမ်ႇ၊ မိူၼ်ၸိူဝ်ႉၼင်ႇၵွၼ်ႈႁိၼ်လႄႈတူၼ်ႈမႆႉဢႃႇရိတ်ႉၵေႃႈလိူင်ၼမ်ၼႃႇမိူၼ်ၸိူဝ်ႉၼင်ႇတူၼ်ႈမၢၵ်ႇလိူဝ်ႇထိူၼ်ႇဢေႃႈ။-
မႃႉၼမ်ၼႃႇဢၼ်လႆႈဢဝ်ၵႃႈတီႈမိူင်း ဢေးၵျိပ်ႉ၊ မႃးပၼ်ၵႃႈတီႈ သေႃးလမုၼ်ႇ၊ ၸိူဝ်းၼၼ်ႉၵေႃႈ၊ၸဝ်ႈၵုၼ်ႇၸဝ်ႈသိၼ်ၶုၼ်ႁေႃၶမ်းတင်းလၢႆ၊လႆႈသိုဝ်ႉဢဝ်ၸွမ်းၵႃႈမၼ်းၶၼ်မၼ်းၽုင်လႂ်ၽုင်ၼၼ်ႉဢေႃႈ။-
ၶဝ်ၼၼ်ႉ၊ၸင်ႇဢွၼ်ၵၼ်ဢဝ်လေႃႉမႃးသိုၵ်းဢွၵ်ႇသေၵႃႈၼႂ်းမိူင်း ဢေးၵျိပ်ႉ၊ မႃးၶၢႆယေႈလမ်းပဵၼ်ငိုၼ်းႁူၵ်းပၢၵ်ႇၵျၢပ်ႈသၶေးလႃႉ၊မႃႉယေႈတူဝ်ၸမ်ႉ၊ၶၢႆပၢၵ်ႇပၢႆႁႃႈသိပ်းၵျၢပ်ႈသၶေးလႃႉဢေႃႈ။ ၼင်ႇၼၼ်လႄႈၶဝ်ဢွၼ်ၵၼ်ၶၢႆဢွၵ်ႇမႃးပုၼ်ႈၶုၼ်လူင် ႁိတ်ႉတိ၊ ဢိၵ်ႇတင်းၶုၼ်လူင် သီးရီးယႃး၊ တင်းလၢႆဢေႃႈ။
ၶုၼ်ႁေႃၶမ်း သေႃးလမုၼ်ႇ၊ တႅပ်းတတ်းၸႂ်တႃႇတေတႄႇတင်ႈၵျွင်းပိၵ်ႈမၢၼ်ႇၸဝ်ႈလင်ၼိုင်ႈပုၼ်ႈဢၼ်တၵ်းဝႆႈသႃ ထႃႇဝရႃႉၽြႃး၊ ဢိၵ်ႇတင်းတႃႇတေတႄႇႁဵတ်းႁေႃပုၼ်ႈတူဝ်ႈၸဝ်ႈၵဝ်ႇလင်ၼိုင်ႈဢေႃႈ။-
မၼ်းၸင်ႇၽႃႇၵဵပ်းၶၢၼ်းဝႆႉၵူၼ်းၸဵတ်းမိုၼ်ႇတႃႇတေႁၢပ်ႇတေႁၢမ်၊ဢိၵ်ႇတင်းၵူၼ်းပႅတ်ႇမိုၼ်ႇတႃႇတေပွမ်ႈမႆႉၽၼ်းမႆႉလႄႈၵူၼ်းသၢမ်ႁဵင်ႁူၵ်းပၢၵ်ႇၵေႃႉတႃႇတေၸႅတ်ႈသေးၵၢၼ်ငၢၼ်းၼၼ်ႉဢေႃႈ။
သေႃးလမုၼ်ႇ၊ သင်ႇလၢတ်ႈၵႂႃႇၵႃႈတီႈၶုၼ်ႁေႃၶမ်း ႁိရမ်ႇ၊ မိူင်း တုရု၊ လႄႈဝႃႈ၊ “ၶႅၼ်းတေႃႈသၢင်ႈႁဵတ်းလူၺ်ႈၵၼ်တင်းၵဝ်ၶႃႈၸိူဝ်ႉၼင်ႇဢၼ်ၸဝ်ႈႁဝ်းႁဵတ်းတီႈပေႃႈၵဝ်ၶႃႈ တႃႇဝိတ်ႈ၊ လႄႈၶၢႆပၼ်မႆႉဢႃႇရိတ်ႉပုၼ်ႈဢၼ်မၼ်းတၵ်းတႄႇႁဵတ်းႁေႃၸဝ်ႈၼၼ်ႉသေၵမ်းၶႃႈ။-
ၵဝ်ၶႃႈတၵ်းတႄႇႁဵတ်းၵျွင်းပိၵ်ႈမၢၼ်ႇၸဝ်ႈပုၼ်ႈဢၼ်တၵ်းဝႆႈသႃ ထႃႇဝရႃႉၽြႃး၊ ၽြႃးပဵၼ်ၸဝ်ႈၼၼ်ႉဢေႃႈ။ တီႈၼၼ်ႈတၵ်းပဵၼ်ထႃႇၼႃႉတီႈဢၼ်မူတ်းၸၢင်ႇပုၼ်ႈၵဝ်ၶႃႈ၊ဢိၵ်ႇတင်းၵူၼ်းၵဝ်ၶႃႈတင်းလၢႆတၵ်းဢဝ်ၼၢမ်ႇသႃႇဢၼ်ႁွမ်ဢၼ်ႁူၺ်းၽဝ်ၽႆးႁဵတ်းတၢင်းလူႇတီႈမၼ်းၸဝ်ႈ၊သမ်ႉဢဝ်ၶဝ်ႈမုၼ်းလႄႈသၢၵ်ႈၵၢပ်ႈတၢင်းလူႇဢၼ်မူတ်းၸၢင်ႇတီႈမၼ်းၸဝ်ႈသေႇသေႇ၊ဢိၵ်ႇတင်းႁႂ်ႈလႆႈႁဵတ်းတၢင်းလူႇဢၼ်တုတ်ႇၽႆးၵူႈၼႂ်ၵူႈၶမ်ႈ၊ဢိၵ်ႇလူၺ်ႈဝၼ်းၵမ်သိၼ်၊ဝၼ်းလိူၼ်မႂ်ႇတင်းဝၼ်းပွႆးတၢင်ႇၸိူဝ်ႉတၢင်ႇမဵဝ်းသေလႄႈႁဵတ်းဝၢတ်ႈၵူဝ်းၵႂၢႆႇ ထႃႇဝရႃႉၽြႃး၊ ၽြႃးပဵၼ်ၸဝ်ႈၵဝ်ၶႃႈဢေႃႈ။ မၼ်းၸဝ်ႈပူင်ဢမိင်ႉဝႆႉတီႈၵူၼ်းမဵဝ်း ဢိသရေး၊ တင်းလၢႆႁႂ်ႈလႆႈႁဵတ်းၸိူဝ်ႉၼင်ႇၼႆတႃႇသေႇဢေႃႈ။-
ၵဝ်ၶႃႈတႅပ်းတတ်းၸႂ်တႃႇတေတႄႇႁဵတ်းၵျွင်းပိၵ်ႈမၢၼ်ႇၸဝ်ႈဢၼ်ယႂ်ႇၼႃႇလူင်လၢင်၊ၵွပ်ႈပိူဝ်ႈၽြႃးပဵၼ်ၸဝ်ႈႁဝ်းၼႆႉယႂ်ႇမျၢတ်ႈၼႃႇသေၽြႃးတၢင်ႇသူႇတၢင်ႇပႃးဢေႃႈ။-
ၼႂ်းဝႃႈၼၼ်သေၵေႃႈၽူႈလႂ်ဢမ်ႇၸၢင်ႈႁဵတ်းၵျွင်းပိၵ်ႈမၢၼ်ႇပုၼ်ႈၽြႃးပဵၼ်ၸဝ်ႈလႆႈ၊ပိၵ်ႉသမ်ႉၽႃႉၵၢင်ႁၢဝ်ဢၼ်သုင်ၵႂၢင်ႈယႂ်ႇၼႃႇသေၵေႃႈ၊ဢမ်ႇပေႃးပုၼ်ႈတႃႇမၼ်းၸဝ်ႈတၵ်းယူႇတၵ်းသဝ်းလႆႈဢေႃႈ။ ၼွၵ်ႈသေထႃႇၼႃႉတီႈဢၼ်ဢဝ်တၢင်းလူႇတုတ်ႇၽႆးၵႃႈတီႈၽြႃးပဵၼ်ၸဝ်ႈၼၼ်ႉၵဝ်ၶႃႈတၵ်းတႄႇႁဵတ်းၵျွင်းပိၵ်ႈမၢၼ်ႇၸဝ်ႈလႆႈၸိူဝ်ႉၼင်ႇႁိုဝ်။-
ၵွပ်ႈပိူဝ်ႈလွင်ႈတၢင်းၼႆႉလႄႈႁဵတ်းၵျေးၸူးပွႆႇၸႂ်ႉၵူၼ်းဢၼ်မီးပိင်ႇၺႃႇ၊ၸၢင်ႈငိုၼ်း၊ၸၢင်ႈၶမ်း၊ၸၢင်ႈတွင်းလိူင်၊ၸၢင်ႈလဵၵ်း၊ၸၢင်ႈတေႃးၸၢင်ႈယဵပ်ႉၶူဝ်းဢၼ်ၵမ်ႇ၊ဢၼ်လႅင်၊ဢၼ်သွမ်ႇၼၼ်ႉမႃးတီႈၵဝ်ၶႃႈ ၵေႃႉၼိုင်ႈသေၵမ်း။ မၼ်းတေလႆႈမႃးပွင်ႁဵတ်းၵၢၼ်လူၺ်ႈၵၼ်တင်းသြႃႇဢၼ်မေႃဢၼ်ၸၢင်ႈဢၼ်မီးၵႃႈၼႂ်းမိူင်း ယုတႃႉ၊ ဢိၵ်ႇတင်းဢၼ်မီးၵႃႈတီႈဝဵင်း ယေႇရုသလႅမ်ႇ၊ ၸိူဝ်းဢၼ်ပေႃႈၸဝ်ႈၵဝ်ၶႃႈ တႃႇဝိတ်ႈ၊ လိူၵ်ႈဝႆႉယဝ်ႉၼၼ်ႉဢေႃႈ။-
ၵဝ်ၶႃႈႁုလွင်ႈဢၼ်ၵူၼ်းၸဝ်ႈႁဝ်းၸၢင်ႈပွမ်ႈၸၢင်ႈၽၼ်းမႆႉၵတ်ႉၶႅၼ်ႇၼႃႇလႄႈႁဵတ်းၵျေးၸူးဢဝ်မႆႉဢႃႇရိတ်ႉ၊မႆႉပႅၵ်ႇ၊မႆႉၼၢမ်ႇသႃႇသေၵႃႈတီႈလွႆ လေႇပၼုၼ်ႇ၊ လႄႈသူင်ႇပၼ်မႃးသေၵမ်းၶႃႈ။ ၵဝ်ၶႃႈတၵ်းပွႆႇၸႂ်ႉၵူၼ်းၵဝ်ၶႃႈၵႂႃႇႁႂ်ႈလႆႈၸွႆႈထႅမ်ၵူၼ်းၸဝ်ႈႁဝ်းၸိူဝ်းၼၼ်ႉ၊-
ႁႂ်ႈလႆႈပွင်ႁဵတ်းလႄႈႁႅၼ်းထႃႈဝႆႉမႆႉၼမ်ၼႃႇပုၼ်ႈတႃႇၵျွင်းပိၵ်ႈမၢၼ်ႇၸဝ်ႈဢၼ်ၵဝ်ၶႃႈဢၢင်ႈတၵ်းတႄႇႁဵတ်းဢၼ်လင်ယႂ်ႇႁၢင်ႈလီလႄႈလီဢၢမ်းၼႃႇၼၼ်ႉၶႃႈဢေႃႈ။-
ၵဝ်ၶႃႈတၵ်းဢဝ်သၢၼ်ၶဝ်ႈၵျုင်ႇၼိုင်ႈလၢၼ်ႉသၢမ်သႅၼ်ႁူၵ်းမိုၼ်ႇၸွႆႉ၊သၢၼ်ၶဝ်ႈမုယေႃးၼိုင်ႈလၢၼ်ႉသၢမ်သႅၼ်သွင်မိုၼ်ႇၸွႆႉ၊ၼမ်ႉမၢၵ်ႇၸပိတ်ႉသီႇသႅၼ်တဝ်ႈ၊တင်းၼမ်ႉမၼ်းသၢၼ်ႇလုၼ်ႇသီႇသႅၼ်တဝ်ႈ၊သူင်ႇပၼ်ၵႂႃႇပုၼ်ႈၵူၼ်းႁဵတ်းၵၢၼ်ၸဝ်ႈႁဝ်းတင်းလၢႆတၵ်းၵိၼ်ၶႃႈဢေႃႈ။”
ၶုၼ်ႁေႃၶမ်း ႁိရမ်ႇ၊ မိူင်း တုရု၊ ၼၼ်ႉၶိုၼ်းတႅမ်ႈလိၵ်ႈပၼ်ၵႂႃႇတီႈ သေႃးလမုၼ်ႇ၊ လႄႈဝႃႈ၊ “ၵွပ်ႈပိူဝ်ႈ ထႃႇဝရႃႉၽြႃး၊ ႁၵ်ႉၵူၼ်းမၼ်းၸဝ်ႈလႄႈမၼ်းၸဝ်ႈယုၵ်ႉယွင်ႈၸဝ်ႈႁဝ်းႁႂ်ႈပဵၼ်ၶုၼ်ႁေႃၶမ်းၶဝ်ယဝ်ႉ။-
ယွင်ႈယေႃး ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ပဵၼ်ၽြႃးဢၼ်ၽၢၼ်ႇသၢင်းႁဵတ်းပဵၼ်ၽႃႉၵၢင်ႁၢဝ်လႄႈလိၼ်မိူင်းၼၼ်ႉတီႈၶႃႈဢေႃႈ။ မၼ်းၸဝ်ႈဢဵတ်းလူၶုၼ်ႁေႃၶမ်း တႃႇဝိတ်ႈ၊ လႄႈပၼ်လုၵ်ႈၸၢႆးဢၼ်လၵ်းလႅမ်ဢၼ်ပျေႉၸုမ်ႇဝႆႉတင်းၺၢၼ်ႇပိင်ႇၺႃႇထၢၼ်ႈပေႃးၸၢင်ႈၶိုင်ပွင်ႁႂ်ႈလႆႈတႄႇႁဵတ်းၵျွင်းပိၵ်ႈမၢၼ်ႇၸဝ်ႈပုၼ်ႈ ထႃႇဝရႃႉၽြႃး၊ ဢိၵ်ႇတင်းႁေႃပုၼ်ႈတူဝ်ၸဝ်ႈၵဝ်ႇၼၼ်ႉတီႈၶႃႈယဝ်ႉ။-
မိူဝ်ႈလဵဝ်ၼႆႉၵဝ်ၶႃႈတၵ်းပွႆႇၸႂ်ႉ ႁိရမ်ႇဢၽိ၊ သြႃႇဢၼ်မီးပိင်ႇၺႃႇလႄႈလၵ်းလႅမ်ၼၼ်ႉၵႂႃႇဢေႃႈ။-
မႄႈမၼ်းၸိုင်၊ပဵၼ်ၵူၼ်းၼႂ်းၸိူဝ်ႉၶိူဝ်း တၢၼ်ႇ၊ လႄႈ၊ပေႃႈမၼ်းပဵၼ်ၵူၼ်းမဵဝ်း တုရု၊ ဢေႃႈ။ မၼ်းၼၼ်ႉမီးပိင်ႇၺႃႇၸၢင်ႈငိုၼ်းၸၢင်ႈၶမ်း၊ၸၢင်ႈတွင်းလိူင်၊ၸၢင်ႈလဵၵ်း၊ၸၢင်ႈမၢၵ်ႇႁိၼ်တင်းၸၢင်ႈမႆႉၸိူဝ်းၼၼ်ႉလႄႈ၊မၼ်းၸၢင်ႈတေႃးၸၢင်ႈယဵပ်ႉၶူဝ်းသွမ်ႇ၊ၶူဝ်းၵမ်ႇ၊ၶူဝ်းလႅင်တင်းၽႃႈပၢၼ်ႇၶျေႃးၸိူဝ်းၼၼ်ႉဢေႃႈ။ မၼ်းၸၢင်ႈၶွၵ်းၸၢင်ႈၶႅၵ်းၵူႈၸိူဝ်ႉၵူႈပိူင်လႄႈမၼ်းၸၢင်ႈႁဵတ်းၸွမ်းလၢႆးမွၵ်ႇလၢႆးမႂ်ဢၼ်ၸႂ်ႉမၼ်းႁဵတ်းၼၼ်ႉဢေႃႈ။ ႁႂ်ႈမၼ်းႁဵတ်းၵၢၼ်ၸွမ်းလူၺ်ႈၵၼ်တင်းသြႃႇသမႃႇၸဝ်ႈႁဝ်းတင်းလၢႆ၊ဢိၵ်ႇတင်းသြႃႇသမႃႇၶုၼ်ႁေႃၶမ်း တႃႇဝိတ်ႈ၊ ပေႃႈၸဝ်ႈႁဝ်းၼၼ်ႉတႃႉ။-
ပိူဝ်ႈၼႆလႄႈဢဝ်သၢၼ်ၶဝ်ႈၵျုင်ႇတင်းၶဝ်ႈမုယေႃး၊ၼမ်ႉမၢၵ်ႇၸပိတ်ႉတင်းၼမ်ႉမၼ်းသၢၼ်ႇလုၼ်ႇဢၼ်ၸဝ်ႈႁဝ်းဝႆႉၵတိဝႃႈတေသူင်ႇမႃးပၼ်ၼၼ်သူင်ႇမႃးပၼ်မိူဝ်ႈလဵဝ်ၼႆႉတႃႉ။-
ႁဝ်းတၵ်းပွမ်ႈတၵ်းတႅပ်းမႆႉၵႃႈဢၼ်ၸဝ်ႈႁဝ်းလူဝ်ႇၼၼ်ႉၵႃႈၼိူဝ်လွႆ လေႇပၼုၼ်ႇ၊ သေယဝ်ႉ၊ၶၢတ်ႈႁဵတ်းပႄးလႄႈလွင်ႈၸွမ်းသဵၼ်ႈတၢင်းၼမ်ႉပၢင်ႇလၢႆႇၵႂႃႇတေႃႇထိုင်ႁွတ်ႈဝဵင်း ယွပ်ႉပႃႉ၊ ဢေႃႈ။ ၸဝ်ႈႁဝ်းၸင်ႇတေႃႉဢဝ်ၵႂႃႇၸူးတီႈဝဵင်း ယေႇရုသလႅမ်ႇ၊ ပုၼ်ႉတႃႉ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်း သေႃးလမုၼ်ႇ၊ ႁဵတ်းတၢင်းဢၼ်ၵဵပ်းၸရၢင်းၵူၼ်းမိူင်းတၢင်ႇၸိူဝ်ႉတၢင်ႇမဵဝ်းၵႃႈဢၼ်ယူႇသဝ်းၵႃႈၼႂ်းမိူင်း ဢိသရေး၊ ၸွမ်းလူၺ်ႈၸဝ်ႈပေႃႈမၼ်း တႃႇဝိတ်ႈ၊ ၵဵပ်းၸရၢင်းၵူၼ်းမိူင်းၼၼ်ႉမၼ်းသမ်ႉၵဵပ်းထႅင်ႈလႄႈလႆႈႁုဝႃႈမီး၊ၼိုင်ႈသႅၼ်ႁႃႈမိုၼ်ႇပၢႆသၢမ်ႁဵင်ႁူၵ်းပၢၵ်ႇၵေႃႉဢေႃႈ။-
မၼ်းၸင်ႇၽႃႇၵဵပ်းၶၢၼ်းဝႆႉၵူၼ်းႁၢပ်ႇၵူၼ်းႁၢမ်ၼၼ်ႉၸဵတ်းမိုၼ်ႇ၊ၵူၼ်းပွမ်ႈမႆႉၽၼ်းမႆႉၵႃႈၼိူဝ်လွႆၼၼ်ႉပႅတ်ႇမိုၼ်ႇ၊ဢိၵ်ႇတင်းၵူၼ်းဢၼ်ၸႅတ်ႈသေးၵၢၼ်ငၢၼ်းၼၼ်ႉသၢမ်ႁဵင်ႁူၵ်းပၢၵ်ႇၵေႃႉဢေႃႈ။
ၶုၼ်ႁေႃၶမ်း တႃႇဝိတ်ႈ၊ ပေႃႈ သေႃးလမုၼ်ႇ၊ ၼၼ်ႉလႆႈပွင်ႁဵတ်းမႄးႁႅၼ်းထႃႇၼႃႉတီႈဢၼ်တၵ်းတႄႇႁဵတ်းၵျွင်းပိၵ်ႈမၢၼ်ႇၸဝ်ႈဝႆႉယဝ်ႉလႄႈ၊တီႈၼၼ်ႈမီးၵႃႈၼႂ်းဝဵင်း ယေႇရုသလႅမ်ႇ၊ ၵႃႈၼိူဝ်လွႆ မေႃးရိ၊ တီႈဢၼ် ထႃႇဝရႃႉၽြႃး၊ ပေႃႇမႃးတီႈ တႃႇဝိတ်ႈ၊ ၵႃႈၼႂ်းတလၢင်းယဵပ်ႇၶဝ်ႈ ဢေႃးၼၼ်ႇ၊ ၵေႃႉဢၼ်ပဵၼ်ၵူၼ်း ယေႇပုသိ၊ ၼၼ်ႉဢေႃႈ။-
ၶုၼ်ႁေႃၶမ်း သေႃးလမုၼ်ႇ၊ တႄႇၸႃႉႁဵတ်းၼႂ်းပီဢၼ်မၼ်းၸၢမ်ႇႁၢင်ႈၸၢမ်ႇႁေႃလႆႈသီႇပီပၢႆသွင်လိူၼ်ပၢႆသွင်ဝၼ်းၼၼ်ႉဢေႃႈ။-
ငဝ်ႈႁၢၵ်ႈတိူၵ်ႈၵျွင်းပိၵ်ႈမၢၼ်ႇၸဝ်ႈဢၼ်ၶုၼ်ႁေႃၶမ်း သေႃးလမုၼ်ႇ၊ ၶျႃးဝႆႉၼၼ်ႉ၊ၸွမ်းလူၺ်ႈသွၵ်ႇဢၼ်တႅၵ်ႈမိူဝ်ႈၵွၼ်ႇဢွၼ်ၼႆႉ၊ၼႃႈယၢဝ်းမၼ်းမီးႁူၵ်းသိပ်းသွၵ်ႇ၊ၼႃႈၵႂၢင်ႈမီးသၢဝ်းသွၵ်ႇဢေႃႈ။-
တုပ်ႈတၢင်းၶဝ်ႈၼႃႈၵျွင်းပိၵ်ႈမၢၼ်ႇၸဝ်ႈၼၼ်ႉမီးၼႃႈၵႂၢင်ႈသၢဝ်းသွၵ်ႇ၊ၵႂၢင်ႈတၢၼ်ႇၵၼ်တင်းၵျွင်းပိၵ်ႈမၢၼ်ႇၸဝ်ႈလႄႈတၢင်းသုင်မၼ်းမီးပၢၵ်ႇပၢႆသၢဝ်းသွၵ်ႇဢေႃႈ။ မၼ်းဢဝ်ၶမ်းလွတ်ႈငၢၼ်ႇဢုမ်ႇဝႆႉတၢင်းၼႂ်းမၼ်းဢေႃႈ။-
ၵႃးၼႂ်းလုၵ်းလူင်တၢင်းၼႂ်းၸမ်ႉ၊ဢဝ်ပႅၼ်ႈမႆႉပႅၵ်ႇၵင်ႈဝႆႉလႄႈဢဝ်ၶမ်းလွတ်ႈငၢၼ်ႇဢုမ်ႇဝႆႉသေယဝ်ႉ၊ၶွၵ်းႁဵတ်းပုင်ႇႁၢင်ႈတူၼ်ႈထၢၼ်လႂ်၊တင်းပုင်ႇႁၢင်ႈမွင်ႈၸိူၵ်ႈသေလႄႈႁၢင်ႈၶိူင်ႈဝႆႉဢေႃႈ။-
သမ်ႉဢဝ်သႅင်လီသႅင်မျၢတ်ႈလႂ်ႁၢင်ႈၶိူင်ႈၵျွင်းပိၵ်ႈမၢၼ်ႇၸဝ်ႈဝႆႉႁႂ်ႈႁၢင်ႈလီႁၢင်ႈငၢမ်းၼႃႇလႄႈဢဝ်ၶမ်းဢၼ်လႆႈၵႃႈတီႈမိူင်း ပႃႇလဝိမ်ႇ၊ မႃးၼၼ်ႉဢုမ်ႇဝႆႉဢေႃႈ။-
ဢဝ်တင်းၶမ်းဢုမ်ႇၽႃၵျွင်းပိၵ်ႈမၢၼ်ႇၸဝ်ႈ၊ဢိၵ်ႇတင်းတီႈၶိုဝ်ႇမၼ်း၊တီႈမႂ်ၽၵ်းတူမၼ်းၸိူဝ်းၼၼ်ႉဢေႃႈ။ ၵႃႈတီႈၽႃမၼ်းတင်းလၢႆၸမ်ႉ၊မၼ်းတွင်ႈႁဵတ်းႁၢင်ႈၶေႇရုၽဵမ်ႇ တင်းလၢႆသႂ်ႇဝႆႉဢေႃႈ။-
ၵႃႈတီႈလုၵ်းၸၼ်ႉၼႂ်းဢၼ်ဝႃႈထႃႇၼႃႉတီႈဢၼ်မူတ်းၸၢင်ႇသေပိူၼ်ႈၼၼ်ႉၼႃႈယၢဝ်းၼႃႈၵႂၢင်ႈမီးသၢဝ်းသွၵ်ႇၼင်ႇၵၼ်မိူၼ်ၵၼ်တင်းၼႃႈၵႂၢင်ႈၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။ ၵႃႈတီႈၽႃထႃႇၼႃႉတီႈဢၼ်မူတ်းၸၢင်ႇသေပိူၼ်ႈၼၼ်ႉမၼ်းဢဝ်ၶမ်းမိုၼ်ႇပၢႆသၢမ်ႁဵင်ႁူၵ်းပၢၵ်ႇၸွႆႉဢုမ်ႇဝႆႉလႄႈ၊-
ဢဝ်ၶမ်းႁႃႈသိပ်းၵျၢပ်ႈႁဵတ်းလဵၵ်းမၢႆႇၼႃးလႄႈၵႃႈတီႈၽႃလုၵ်းၸၼ်ႉၼိူဝ်ၸိူဝ်းၼၼ်ႉၵေႃႈဢဝ်ၶမ်းဢုမ်ႇဝႆႉၼင်ႇၵဝ်ႇဢေႃႈ။
ၶုၼ်ႁေႃၶမ်းပူင်ဢမိင်ႉႁႂ်ႈၶဝ်ဢဝ်မႆႉႁဵတ်းႁၢင်ႈၶေႇရုၽဵမ်ႇ သွင်တူဝ်လႄႈဢဝ်ၶမ်းဢုမ်ႇဝႆႉသေယဝ်ႉ၊ဢဝ်ဝႆႉၵႃႈၼႂ်းထႃႇၼႃႉတီႈဢၼ်မူတ်းၸၢင်ႇသေပိူၼ်ႈ၊-
ၽႃႈၵင်ႈပုၼ်ႈထႃႇၼႃႉတီႈမူတ်းၸၢင်ႇသေပိူၼ်ႈၼၼ်ႉၵေႃႈ၊ သေႃးလမုၼ်ႇ၊ ဢဝ်တင်းၽႃႈဢၼ်သွမ်ႇ၊ၽႃႈဢၼ်လႅင်ၵမ်ႇတင်းၽႃႈဢၼ်လႅင်ၸုင်းႁုင်း၊ဢိၵ်ႇတင်းၽႃႈပၢၼ်ႇၶျေႃးႁဵတ်းလႄႈတမ်းၵၢမ်းႁၢင်ႈၶိူင်ႈႁဵတ်းပုင်ႇႁၢင်ႈၶေႇရုၽဵမ်ႇသႂ်ႇဢေႃႈ။
ၶုၼ်ႁေႃၶမ်း သေႃးလမုၼ်ႇ၊ သမ်ႉႁဵတ်းသဝ်သွင်လႅမ်ႈ၊ဢၼ်ယေႈလႅမ်ႈသုင်သၢမ်သိပ်းႁႃႈသွၵ်ႇၼၼ်ႉသေလႄႈဢဝ်ပူၵ်းတင်ႈဝႆႉၵႃႈတီႈၽၢႆႇၼႃႈၵျွင်းပိၵ်ႈမၢၼ်ႇၸဝ်ႈဢေႃႈ။ ၵႃႈတီႈၸိၵ်းႁူဝ်သဝ်ယေႈလႅမ်ႈၵေႃႈ၊မီးဢၼ်ႁူမ်ႇႁူဝ်သဝ်ယေႈဢၼ်သုင်ႁႃႈသွၵ်ႇၼင်ႇၵၼ်ဢေႃႈ။-
ၵႃႈၼိူဝ်ၸိၵ်းႁူဝ်သဝ်ၸိူဝ်းၼၼ်ႉမၼ်းႁဵတ်းပဵၼ်မွင်ႈပဵၼ်မွင်ႈသၢၼ်ၵၼ်သေလႄႈႁၢင်ႈၶိူင်ႈဝႆႉ၊ဢဝ်မၢၵ်ႇၸင်ႈဢၼ်ဢဝ်တွင်းလိူင်ႁဵတ်းပၢၵ်ႇႁူၺ်ႇႁွႆႈၸွမ်းၵႃႈတီႈၸိူၵ်ႈၸိူဝ်းၼၼ်ႉဝႆႉဢေႃႈ။-
သဝ်သွင်လႅမ်ႈၼၼ်ႉပူၵ်းတင်ႈဝႆႉၵႃႈတီႈၸဵင်ႇလုၵ်းလူင်ၼႃႈၵျွင်းပိၵ်ႈမၢၼ်ႇၸဝ်ႈသွင်ၽၢႆႇသေလႄႈ၊လႅမ်ႈၽၢႆႇတၢင်းၸၢၼ်းၼၼ်ႉႁွင်ႉဝႃႈ၊ ယႃႇၶိၼ်ႇ၊ ဢိၵ်ႇတင်းၽၢႆႇတၢင်းႁွင်ႇၼၼ်ႉႁွင်ႉဝႃႈ၊ ပေႃႇၸႃႉ၊ ဢေႃႈ။
ၶုၼ်ႁေႃၶမ်း သေႃးလမုၼ်ႇ၊ ၸႂ်ႉၵူၼ်းဢဝ်တွင်းလိူင်ႁဵတ်းၶဵင်ႇတၢင်းလူႇဢၼ်ၼိုင်ႈဢၼ်မီးသၢဝ်းသွၵ်ႇသီႇၼႃႈပဵင်းၵၼ်ဝႆႉလႄႈသုင်သိပ်းသွၵ်ႇဢိၵ်ႇတင်း၊-
ဢဝ်တွင်းလိူင်ႁဵတ်းဢၢင်ႇၼမ်ႉလူင်လုၵ်ႈၼိုင်ႈဢၼ်မူၼ်းဝႆႉလႄႈၶွပ်ႇၽၢႆႇၼိုင်ႈတေႃႇထိုင်ၶွပ်ႇၽၢႆႇၼိုင်ႈတၢင်းၵႂၢင်ႈမၼ်းမီးသိပ်းသွၵ်ႇ၊တၢင်းလိုၵ်ႉမၼ်းမီးႁႃႈသွၵ်ႇ၊ၸွမ်းၶွပ်ႇမူၼ်းႁွပ်ႈႁွပ်ႈမၼ်းမီးသၢမ်သိပ်းသွၵ်ႇဢေႃႈ။-
ၵႃႈတႂ်ႈၶွပ်ႇလဵပ်ႈႁွပ်ႈဢၢင်ႇၼမ်ႉလူင်ၼၼ်ႉၼႂ်းဝူင်ႈၵၢင်ၼိုင်ႈသွၵ်ႇၼၼ်ႉလေႃႇႁဵတ်းႁၢင်ႈဝူဝ်းသိပ်းတူဝ်ႁဵတ်းပဵၼ်သွင်ထႅဝ်လႄႈလေႃႇၸပ်းပဵၼ်ၼိူဝ်ႉလဵဝ်ၵၼ်တင်းဢၢင်ႇၼမ်ႉလူင်ၼၼ်ႉဢေႃႈ။-
ဢၢင်ႇၼမ်ႉလူင်ၼၼ်ႉ တၢင်ႇဝႆႉၵႃႈၼိူဝ်လင်ဝူဝ်းပေႃႈတွင်းလိူင်သိပ်းသွင်တူဝ်ဢၼ်ဝၢႆႇလင်တေႃႇၵၼ်ဝႆႉလႄႈဝၢႆႇၼႃႈဢွၵ်ႇၸူးၽၢႆႇတၢင်းႁွင်ႇ၊ၽၢႆႇတၢင်းတူၵ်း၊ၽၢႆႇတၢင်းၸၢၼ်း၊ၽၢႆႇတၢင်းဝၼ်းဢွၵ်ႇယေႈၽၢႆႇသၢမ်တူဝ်ဢေႃႈ။-
တၢင်းၼႃဢၢင်ႇၼမ်ႉလူင်ၼၼ်ႉမီးၽႃႇမိုဝ်းၼိုင်ႈလႄႈၶွပ်ႇမၼ်းၼၼ်ႉႁဵတ်းလၢႆးမွၵ်ႇမူဝ်လဵပ်ႈႁွပ်ႈဝႆႉ၊မိူၼ်ၸိူဝ်ႉၼင်ႇၶွပ်ႇၵွၵ်းၼၼ်ႉဢေႃႈ။ ဢၢင်ႇၼမ်ႉလူင်ၼၼ်ႉသႂ်ႇၼမ်ႉလႆႈႁူၵ်းမိုၼ်ႇတဝ်ႈ ဢေႃႈ။-
ဢၢင်ႇၼမ်ႉဢွၼ်ႇသိပ်းလုၵ်ႈၵေႃႈမၼ်းႁဵတ်းလႄႈဢဝ်ဝႆႉၽၢႆႇတၢင်းၸၢၼ်းၵျွင်းပိၵ်ႈမၢၼ်ႇၸဝ်ႈႁႃႈလုၵ်ႈ၊ၽၢႆႇတၢင်းႁွင်ႇႁႃႈလုၵ်ႈဢေႃႈ။ ဢၢင်ႇၼမ်ႉဢွၼ်ႇၸိူဝ်းၼႆႉပဵၼ်ပုၼ်ႈဢၼ်တၵ်းသုၵ်ႈလၢင်ႉတူဝ်သတ်းဢၼ်တၵ်းဢဝ်တုတ်ႇၽႆးပုၼ်ႈတၢင်းလူႇၼၼ်ႉလႄႈ၊ဢၢင်ႇၼမ်ႉလူင်ၸမ်ႉ၊ပဵၼ်ပုၼ်ႈဢၼ်ယဵၸ်ႈပရေႃးႁဵၵ်ႈ ၶဝ်တၵ်းဢၢပ်ႇၼမ်ႉဢေႃႈ။
ၶဵင်ႇတီႈတႆႈၽႆးၶမ်းသိပ်းၼိုင်ႈၵေႃႈၶဝ်ႁဵတ်းၸွမ်းလူၺ်ႈပုင်ႇႁၢင်ႈဢၼ်ႁဵတ်းၵမ်းဢွၼ်တၢင်းၼၼ်ႉသေလႄႈဢဝ်ဝႆႉၵႃႈၼႂ်းလုၵ်းလူင်ၵျွင်းပိၵ်ႈမၢၼ်ႇၸဝ်ႈၽၢႆႇတၢင်းၸၢၼ်းႁႃႈဢၼ်၊ၽၢႆႇတၢင်းႁွင်ႇႁႃႈဢၼ်ဢေႃႈ။-
ၽိူၼ်သိပ်းဢၼ်ၵေႃႈမၼ်းႁဵတ်းလႄႈဢဝ်ဝႆႉၵႃႈၼႂ်းၵျွင်းပိၵ်ႈမၢၼ်ႇၸဝ်ႈၽၢႆႇၶႂႃႁႃႈဢၼ်၊ၽၢႆႇသၢႆႉႁႃႈဢၼ်ဢေႃႈ။ ဝၢၼ်ႇၶမ်းပၢၵ်ႇလုၵ်ႈၵေႃႈႁဵတ်းဝႆႉဢေႃႈ။
သမ်ႉႁဵတ်းပၢင်ႇဝၢင်းလုမ်းၽၢႆႇတၢင်းၼႂ်းပုၼ်ႈယဵၸ်ႈပရေႃးႁဵၵ်ႈတင်းလၢႆ၊ဢိၵ်ႇတင်းပၢင်ႇဝၢင်းလုမ်းၽၢႆႇတၢင်းၼွၵ်ႈထႅင်ႈဢၼ်ၼိုင်ႈဢေႃႈ။ မႂ်ၽၵ်းတူတင်းလၢႆၵေႃႈ ဢဝ်တွင်းလိူင်ဢုမ်ႇႁေႃႇဝႆႉဢေႃႈ။-
ဢၢင်ႇၼမ်ႉလူင်ၼၼ်ႉၸမ်ႉ၊ဢဝ်ၶျႃးဝၢင်းဝႆႉၵႃႈတီႈၽၢႆႇၶႂႃၵျွင်းပိၵ်ႈမၢၼ်ႇၸဝ်ႈၽၢႆႇၸဵင်ႇၸၢၼ်းဝၼ်းဢွၵ်ႇၼၼ်ႉဢေႃႈ။
ၶုၼ်ႁေႃၶမ်းၸႂ်ႉၵူၼ်းလေႃႇႁဵတ်းသွၼ်းႁဵတ်းၶိူင်ႈပိူင်ၸိူဝ်းၼႆႉၵႃႈတီႈပၢင်ႇလိၼ်ၼဵဝ်ဢၼ်မီးတီႈပၢင်ႇႁူၺ်ႈၼမ်ႉ ယေႃးတၢၼ်ႇ၊ ဝူင်ႈၵၢင်ဝဵင်း သုၵုတ်ႉ၊ တင်းဝဵင်း ၸႃႇႀၼ်ႇ၊ ၼၼ်ႉဢေႃႈ။-
သေႃးလမုၼ်ႇ၊ ႁဵတ်းၶိူင်ႈပိူင်ၵႃႈမီးၼၼ်ႉၼမ်ၼႃႇလူင်လၢင်လႄႈတွင်းလိူင်ဢၼ်လႆႈၸႂ်ႉၵႂႃႇၼၼ်ႉၼမ်ႉၼၵ်းမၼ်းမီးၵႃႈႁိုဝ်၊ဢမ်ႇမီးၽူႈလႂ်သေၵေႃႉသေၵူၼ်းႁုလႆႈဢေႃႈ။
ၵႃႈဢၼ်ၶုၼ်ႁေႃၶမ်း သေႃးလမုၼ်ႇ၊ ႁဵတ်းပုၼ်ႈၵျွင်းပိၵ်ႈမၢၼ်ႇၸဝ်ႈဢၼ်ဢဝ်ၶမ်းၸႅတ်ႈႁဵတ်းဝႆႉၶိူင်ႈပိူင်ၵႃႈမီးၸမ်ႉ၊ပဵၼ်ၶဵင်ႇတၢင်းလူႇ၊ဢိၵ်ႇတင်းၽိူၼ်ဢၼ်တၢင်ႇၶဝ်ႈမုၼ်းပုၼ်ႈတၵ်းသၢၵ်ႈၵၢပ်ႈတၢင်းလူႇတီႈၽြႃးပဵၼ်ၸဝ်ႈ၊-
ၶဵင်ႇတီႈတႆႈၽႆး၊ဢိၵ်ႇတင်းဝၢၼ်ႇတႆႈၽႆးၶမ်းမၼ်းလႂ်၊ပုၼ်ႈဢၼ်တၵ်းတႆႈၸွမ်းၼင်ႇထုင်းၽိင်ႈမၼ်းၵႃႈတီႈၽၢႆႇၼႃႈထႃႇၼႃႉတီႈဢၼ်မူတ်းၸၢင်ႇသေပိူၼ်ႈ၊-
မွၵ်ႇဢၼ်ႁၢင်ႈၶိူင်ႈ၊ဝၢၼ်ႇတႆႈၽႆး၊ၵိမ်းၺၢပ်ႈၽႆးဢၼ်ဢဝ်ၶမ်းလွတ်ႈငၢၼ်ႇႁဵတ်းဝႆႉၸိူဝ်းၼၼ်ႉ၊-
ၵိမ်းၵႅတ်းသႆႈၵွၵ်းၽႆး၊ဝၢၼ်ႇ၊ၸေႃႉ၊ၽၢင်ၽႆးဢၼ်ဢဝ်တင်းၶမ်းလွတ်ႈငၢၼ်ႇႁဵတ်းၸိူဝ်းၼၼ်ႉ၊ဢိၵ်ႇတင်းမႂ်ၽၵ်းတူလူင်ဢၼ်ၶဝ်ႈၸူးၵျွင်းပိၵ်ႈမၢၼ်ႇၸဝ်ႈလႂ်၊ဢိၵ်ႇတင်းမႂ်ၽၵ်းတူဢၼ်ၶဝ်ႈၸူးတီႈႁိူၼ်းၸဝ်ႈထႃႇၼႃႉတီႈမူတ်းၸၢင်ႇသေပိူၼ်ႈၸိူဝ်းၼၼ်ႉၵေႃႈဢဝ်ၶမ်းႁဵတ်းဝႆႉဢေႃႈ။
မိူဝ်ႈဢၼ်ၶုၼ်ႁေႃၶမ်း သေႃးလမုၼ်ႇ၊ ပွင်ႁဵတ်းၵူႈၸိူဝ်ႉၵူႈပိူင်ပုၼ်ႈၵျွင်းပိၵ်ႈမၢၼ်ႇယဝ်ႉတူဝ်ႈလီငၢမ်းၼၼ်ႉၸိုင်၊မၼ်းပႃးဢဝ်တင်းၶိူင်ႈပိူင်ဢၼ်ပေႃႈမၼ်း တႃႇဝိတ်ႈ၊ လူႇတၢၼ်းတီႈ ထႃႇဝရႃႉၽြႃး ဝႆႉဢၼ်ပဵၼ်ငိုၼ်း၊ၶမ်း၊ၶိူင်ႈပိူင်တၢင်ႇၸိူဝ်ႉတၢင်ႇမဵဝ်းၵႃႈမီးၸိူဝ်းၼၼ်ႉမႃးလႄႈသႂၢင်းသႂ်ႇဝႆႉၵႃႈၼႂ်းတိူၵ်ႈၽၼ်ႇတႃႇၵျွင်းပိၵ်ႈမၢၼ်ႇၸဝ်ႈသေဢေႃႈ။
မိူဝ်ႈၼၼ်ႉၶုၼ်ႁေႃၶမ်း သေႃးလမုၼ်ႇ၊ ႁွင်ႉဢဝ်ၵႃႈဢၼ်ပဵၼ်ၵူၼ်းဢၼ်ပဵၼ်ၵႄႇပဵၼ်ႁူဝ်ၵႃႈၼႂ်းၸိူဝ်ႉၶိူဝ်းလႂ်၊ဢိၵ်ႇတင်းၶိူဝ်းႁိူၼ်းလႂ်၊ၼႂ်းၵူၼ်းမဵဝ်း ဢိသရေး၊ တင်းသဵင်ႈတင်းလူင်မႃးၸုတုမ်ၵၼ်ၵႃႈတီႈဝဵင်း ယေႇရုသလႅမ်ႇ၊ ႁႂ်ႈလႆႈဢဝ်တိူၵ်ႈပတိၺိၺ်ႇၸဝ်ႈ ထႃႇဝရႃႉၽြႃး၊ ဢွၵ်ႇမႃးသေၵႃႈတီႈဝဵင်း တႃႇဝိတ်ႈ၊ ဢၼ်လႆႈၸိုဝ်ႈဝႃႈ၊ဝဵင်း ၸိဢုၼ်ႇ လႄႈဢဝ်ၵႂႃႇၵႃႈတီႈၵျွင်းပိၵ်ႈမၢၼ်ႇၸဝ်ႈဢေႃႈ။-
ၶဝ်တင်းသဵင်ႈတင်းလူင်ဢွၼ်ၵၼ်မႃးၸုၵၼ်တုမ်ၵၼ်၊ၼႂ်းဝၼ်းပွႆးသုမ်ႉထဵင်ၼႂ်းလိူၼ်ၸဵတ်းၼၼ်ႉဢေႃႈ။-
မိူဝ်ႈဢၼ်ၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆမႃးၽွမ်ႉၵၼ်ယဝ်ႉၼၼ်ႉၸိုင်၊ၵူၼ်းၸိူဝ်ႉၶိူဝ်း လေႇဝိ၊ တင်းလၢႆယွင်ႈႁၢမ်ဢဝ်တိူၵ်ႈပတိၺိၺ်ႇၸဝ်ႈသေလႄႈ၊-
ၵႂႃႇၵႃႈတီႈၵျွင်းပိၵ်ႈမၢၼ်ႇၸဝ်ႈဢေႃႈ။ ယဵၸ်ႈပရေႃးႁဵၵ်ႈ တင်းလၢႆ၊ဢိၵ်ႇတင်းၵူၼ်းၸိူဝ်ႉၶိူဝ်း လေႇဝိ၊ ၶဝ်ၵေႃႈဢွၼ်ၵၼ်ၶၢႆႉဢဝ်သုမ်ႉထဵင်ၸဝ်ႈ၊ဢိၵ်ႇတင်းၶိူင်ႈပိူင်ဢၼ်မူတ်းၸၢင်ႇၸဝ်ႈၵႃႈမီးၼၼ်ႉတင်းသဵင်ႈတင်းလူင်မႃးၵႃႈတီႈၵျွင်းပိၵ်ႈမၢၼ်ႇၸဝ်ႈဢေႃႈ။-
ၶုၼ်ႁေႃၶမ်း သေႃးလမုၼ်ႇ၊ ဢိၵ်ႇတင်းပရိၵ်ႈသၢတ်ႈ ဢိသရေး၊ တင်းသဵင်ႈတင်းမူတ်းဢွၼ်ၵၼ်ၸုတုမ်ၵႃႈတီႈၽၢႆႇၼႃႈတိူၵ်ႈပတိၺိၺ်ႇၸဝ်ႈသေလႄႈႁဵတ်းတၢင်းလူႇဢၼ်သၢၵ်ႈၵၢပ်ႈသူဝ်း၊ဝူဝ်း၊ၼမ်ၼႃႇထၢၼ်ႈပေႃးဢမ်ႇၼပ်ႉဢၢၼ်ႇလႆႈၼၼ်ႉဢေႃႈ။-
လိုၼ်းၼၼ်ႉ၊ယဵၸ်ႈပရေႃးႁဵၵ်ႈတင်းလၢႆယွင်ႈႁၢမ်ဢဝ်တိူၵ်ႈပတိၺိၺ်ႇၸဝ်ႈ ထႃႇဝရႃႉၽြႃး၊ သႂၢင်းၶဝ်ႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈလႄႈၶျႃးဝၢင်းဝႆႉၵႃႈၼႂ်းထႃႇၼႃႉတီႈဢၼ်မူတ်းၸၢင်ႇသေပိူၼ်ႈ၊ၵႃႈတႂ်ႈပိၵ်ႇၶေႇရုၽဵမ်ႇၼၼ်ႉဢေႃႈ။-
ပိၵ်ႇၶေႇရုၽဵမ်ႇဢၼ်ၵီႈၽႄႇဝႆႉၸိူဝ်းၼၼ်ႉႁူမ်ႇသုမ်ႇတိူၵ်ႈတႃႇၸဝ်ႈဢိၵ်ႇတင်းႁူမ်ႇသုမ်ႇၵၢၼ်းမၼ်းၸိူဝ်းၼၼ်ႉယူႇဢေႃႈ။-
ၵၢၼ်းမၼ်းၸိူဝ်းၼၼ်ႉယၢဝ်းၼႃႇလႄႈပေႃးယူႇၵႃႈတီႈၽၢႆႇၼႃႈထႃႇၼႃႉတီႈဢၼ်မူတ်းၸၢင်ႇသေပိူၼ်ႈသိုဝ်ႈသိုဝ်ႈသေယဝ်ႉတူၺ်းၸိုင်၊လႆႈႁၼ်ပၢႆၵၢၼ်းၸိူဝ်းၼၼ်ႉယူႇဢေႃႈ။ ပေႃးယူႇတၢင်ႇတီႈတူၺ်းၸိုင်၊ဢမ်ႇႁၼ်လႆႈ။ ၵၢၼ်းၸိူဝ်းၼၼ်ႉယင်းမီးယူႇတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။-
ၵႃႈၼႂ်းတိူၵ်ႈပတိၺိၺ်ႇၸဝ်ႈၼၼ်ႉမီးၶႅပ်းမၢၵ်ႇႁိၼ်သွင်ၶႅပ်းဢၼ် မူဝ်းသေႇ၊ ဢဝ်သႂ်ႇဝႆႉၵႃႈၼႂ်းမၼ်းၵႃႈတီႈလွႆ သိၼႃႉ၊ မိူဝ်ႈဢၼ် ထႃႇဝရႃႉၽြႃး၊ ႁဵတ်းပတိၺိၺ်ႇလူၺ်ႈၵၼ်တင်းၵူၼ်းမဵဝ်း ဢိသရေး၊ တင်းလၢႆယၢမ်းမိူဝ်ႈဢၼ်ၶဝ်ဢွၵ်ႇမိူင်း ဢေးၵျိပ်ႉ၊ မႃးၼၼ်ႉၸိူဝ်းၼၼ်ႉၵူၺ်း၊လိူဝ်သေၼၼ်ႉဢမ်ႇမီးၵႃႈသင်သေၸိူဝ်ႉသေပိူင်။
မိူဝ်ႈၼၼ်ႉ၊ၶုၼ်ႁေႃၶမ်း သေႃးလမုၼ်ႇ၊ သူးတွင်းလႄႈဝႃႈ၊ “ ထႃႇဝရႃႉၽြႃး၊ တီႈၶႃႈ၊ၸဝ်ႈႁဝ်းလိူၵ်ႈဢဝ်တီႈတၵ်းၵိင်းဝၢပ်ႈယူႇသဝ်းၵႃႈၼႂ်းမွၵ်ႇၵုမ်ႈဢၼ်ၼႃတၼ်မိုတ်ႈၼႃႇၼၼ်ႉ။
တေႃႈလဵဝ်ၼႆႉၶႃႈၸဝ်ႈတႄႇႁဵတ်းႁိူၼ်းၸဝ်ႈဢၼ်ၸဝ်ႈႁဝ်းတၵ်းၵိင်းဝၢပ်ႈယူႇသဝ်း၊ ပဵၼ်ထႃႇၼႃႉတီႈဢၼ်ၸဝ်ႈႁဝ်းတၵ်းၵိင်းဝၢပ်ႈယူႇတႃႇသေႇၼၼ်ႉဢေႃႈ။”
ၵူၼ်းမဵဝ်း ဢိသရေး၊ ၵႃႈမီးတင်းသဵင်ႈတင်းလူင်ဢွၼ်ၵၼ်ၸုၵ်းယူႇၵႃႈတီႈၼၼ်ႈဢေႃႈ။ ၶုၼ်ႁေႃၶမ်းဝၢႆႇၼႃႈၸူးပရိၵ်ႈသၢတ်ႈၸိူဝ်းၼၼ်ႉသေယဝ်ႉ၊ယွၼ်းဢဝ်မၢင်ႇၵလႃႇတၢင်းလီတီႈၽြႃးပဵၼ်ၸဝ်ႈႁႂ်ႈတူၵ်းႁွတ်ႈၵႃႈၼိူဝ်ၶဝ်ဢေႃႈ။-
မၼ်းလၢတ်ႈလႄႈဝႃႈ၊ “ယွင်ႈယေႃး ထႃႇဝရႃႉၽြႃး၊ၽြႃးပဵၼ်ၸဝ်ႈ၊ မဵဝ်း ဢိသရေး၊ တီႈၶႃႈဢေႃႈ။ မၼ်းၸဝ်ႈၼၼ်ႉပႂ်ႉၵတိဢၼ်မၼ်းၸဝ်ႈဝႆႉသဵတ်ႈၸႃႇတီႈပေႃႈၵဝ် တႃႇဝိတ်ႈ၊ ၼႂ်းမိူဝ်ႈဢၼ်မၼ်းၸဝ်ႈမီးဢမိင်ႉတီႈမၼ်းလႄႈဝႃႈ၊-
‘ၸႃႉၸဵမ်မိူဝ်ႈဝၼ်းဢၼ်ၵဝ်ထုတ်ႇဢဝ်ၵူၼ်းၵဝ်တင်းလၢႆဢွၵ်ႇမိူင်း ဢေးၵျိပ်ႉ၊ မႃးတေႃႇထိုင်ႁွတ်ႈၶိင်ႇမိူဝ်ႈလဵဝ်ၼႆႉၼၼ်ႉၵဝ်ဢမ်ႇလိူၵ်ႈဢဝ်ဝဵင်းၵႃႈၼႂ်းမိူင်း ဢိသရေး၊ ၼႆႉႁႂ်ႈလႆႈတႄႇႁဵတ်းၵျွင်းပိၵ်ႈမၢၼ်ႇၸဝ်ႈပုၼ်ႈတီႈဢၼ်ၵဝ်တၵ်းယူႇသဝ်းလႄႈႁႂ်ႈၵူၼ်းတင်းလၢႆလႆႈႁဵတ်းဝၢတ်ႈၵူဝ်းၵႂၢႆႇၵဝ်လႄႈၵဝ်ဢမ်ႇလႆႈလိူၵ်ႈၵဵပ်းဢဝ်ၵေႃႉဢၼ်တၵ်းဢုပ်ႉပိူင်ႇၵႃႈၼိူဝ်ၵူၼ်းၵဝ်ၵူၼ်းမဵဝ်း ဢိသရေး၊ ၼၼ်ႉ။-
ၵူၺ်းၵႃႈ၊မိူဝ်ႈလဵဝ်ၼႆႉၵဝ်လိူၵ်ႈဢဝ်ဝဵင်း ယေႇရုသလႅမ်ႇ၊ ႁႂ်ႈပဵၼ်ဝဵင်းတီႈဢၼ်ၵူၼ်းတင်းလၢႆ၊ႁဵတ်းဝၢတ်ႈၵူဝ်းၵႂၢႆႇၵဝ်၊ဢိၵ်ႇတင်းလိူၵ်ႈဢဝ်မႂ်းၵေႃႉပဵၼ် တႃႇဝိတ်ႈ၊ ႁႂ်ႈလႆႈဢုပ်ႉပိူင်ႇၵႃႈၼိူဝ်ၵူၼ်းၵဝ်ၵူၼ်းမဵဝ်း ဢိသရေး၊ ၼႆႉယဝ်ႉ၊’ ဝႃႈၼင်ႇၼႆၼၼ်ႉဢေႃႈ။
“ပေႃႈၵဝ် တႃႇဝိတ်ႈ၊ ၼၼ်ႉၶိုင်ပွင်ႁႂ်ႈလႆႈတႄႇႁဵတ်းၵျွင်းပိၵ်ႈမၢၼ်ႇၸဝ်ႈပုၼ်ႈၵူၼ်းတင်းလၢႆတၵ်းဢွၼ်ၵၼ်ႁဵတ်းဝၢတ်ႈၵူဝ်းၵႂၢႆႇ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ သေၵေႃႈ၊-
ထႃႇဝရႃႉၽြႃး၊ မီးဢမိင်ႉတီႈမၼ်းလႄႈဝႃႈ၊ ‘တၢင်းဢၼ်မႂ်းၵျၢမ်ႇပွင်ၶႂ်ႈတႄႇႁဵတ်းၵျွင်းပိၵ်ႈမၢၼ်ႇၸဝ်ႈပုၼ်ႈၵဝ်ၼၼ်ႉပဵၼ်ဢၼ်မၢၼ်ႇဢၼ်မႅၼ်ႈယဝ်ႉ။-
ၼႂ်းဝႃႈၼၼ်သေၵေႃႈမႂ်းဢမ်ႇလႆႈတႄႇလႆႈႁဵတ်းလႃးလႃး။ လုၵ်ႈၸၢႆးဢွၵ်ႇမႂ်းၼၼ်ႉတၵ်းပဵၼ်ၵေႃႉဢၼ်တႄႇႁဵတ်းၵျွင်းပိၵ်ႈမၢၼ်ႇၵဝ်ဢေႃႈ၊’ ဝႃႈၼင်ႇၼႆဢေႃႈ။
“တေႃႈလဵဝ်ၼႆႉ၊ ထႃႇဝရႃႉၽြႃး၊ ႁဵတ်းၸွမ်းၵႃႈၼင်ႇဢၼ်မၼ်းၸဝ်ႈဝႆႉၵတိၼၼ်ႉယဝ်ႉ။ ၵဝ်လႆႈသိုပ်ႇႁၢင်ႈသိုပ်ႇႁေႃပေႃႈၵဝ်ၼၼ်ႉသေယဝ်ႉ၊လႆႈဢရႃႇၶုၼ်ႁေႃၶမ်းၵူၼ်းမဵဝ်း ဢိသရေး၊ ယဝ်ႉ။ ၵဝ်သမ်ႉလႆႈတႄႇႁဵတ်းၵျွင်းပိၵ်ႈမၢၼ်ႇၸဝ်ႈလင်ၼိုင်ႈပုၼ်ႈၵူၼ်းတင်းလၢႆပုၼ်ႈတၵ်းႁဵတ်းဝၢတ်ႈၵူဝ်းၵႂၢႆႇ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ၼၼ်ႉယဝ်ႉ။-
ၵႃႈၼႂ်းၵျွင်းပိၵ်ႈမၢၼ်ႇၸဝ်ႈၵေႃႈၵဝ်လႆႈဢဝ်တိူၵ်ႈပတိၺိၺ်ႇၸဝ်ႈဢၼ်ပႃးၶႅပ်းမၢၵ်ႇႁိၼ်ဢၼ်ပဵၼ်ပတိၺိၺ်ႇ ထႃႇဝရႃႉၽြႃး၊ ဢၼ်မၼ်းၸဝ်ႈႁဵတ်းလူၺ်ႈၵၼ်တင်းၵူၼ်းမဵဝ်း ဢိသရေး၊ ၼၼ်ႉသႂ်ႇဝႆႉယဝ်ႉ၊” ဝႃႈၼင်ႇၼႆဢေႃႈ။
ၵမ်းၼၼ်ႉ၊ သေႃးလမုၼ်ႇ၊ ၵႂႃႇၸုၵ်းယူႇၵႃႈတီႈၽၢႆႇၼႃႈၶဵင်ႇတၢင်းလူႇ ထႃႇဝရႃႉၽြႃး၊ သိုဝ်ႈၼႃႈတႂ်ႈတႃပရိၵ်ႈသၢတ်ႈမဵဝ်း ဢိသရေး၊ တင်းသဵင်ႈတင်းလူင်သေလႄႈယုၵ်ႉမိုဝ်းမၼ်းသွင်ၶွၼ်ၶိုၼ်ႈၵႃႈၼိူဝ်ဢေႃႈ။-
ၵွပ်ႈပိူဝ်ႈ သေႃးလမုၼ်ႇ၊ ႁဵတ်းပလၢင်ႇတွင်းလိူင်ဢၼ်တၢင်းယၢဝ်းမၼ်းမီးႁႃႈသွၵ်ႇ၊တၢင်းၵႂၢင်ႈမၼ်းမီးႁႃႈသွၵ်ႇ၊တၢင်းသုင်မၼ်းမီးသၢမ်သွၵ်ႇၼၼ်ႉဝႆႉၵႃႈတီႈၼႂ်းပၢင်ႇဝၢင်းၼၼ်ႉသေလႄႈမၼ်းၶုပ်ႉၶဝ်ႇၵႃႈၼိူဝ်ပလၢင်ႇတီႈဢၼ်ၵူၼ်းၵူႈၵေႃႉႁၼ်မၼ်းလႆႈၼၼ်ႉသေယဝ်ႉ၊ယုၵ်ႉမိုဝ်းမၼ်းၶိုၼ်ႈၵႃႈၼိူဝ်ၽႃႉၵၢင်ႁၢဝ်လႄႈႁဵတ်းသူးတွင်းပထၼႃႇလႄႈဝႃႈ၊-
“ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ တီႈၶႃႈ။ ၵႃႈၼိူဝ်ၽႃႉၵၢင်ႁၢဝ်ၵႃႈၼိူဝ်လိၼ်မိူင်းၼႆႉၽြႃးဢၼ်မိူၼ်ၵၼ်တင်းၸဝ်ႈႁဝ်းဢမ်ႇမီးသေသူႇသေပႃးတီႈၶႃႈ။ ၸဝ်ႈႁဝ်းပႂ်ႉၸွမ်းပတိၺိၺ်ႇဢၼ်ၸဝ်ႈႁဝ်းႁဵတ်းသဵတ်ႈၸႃႇဝႆႉတီႈၵူၼ်းၸဝ်ႈႁဝ်းတင်းလၢႆၼၼ်ႉ၊ဢိၵ်ႇတင်းၼႄပျႃးတၢင်းႁၵ်ႉမႅတ်ႈတႃႇတီႈၶဝ်ယၢမ်းမိူဝ်ႈဢၼ်ၶဝ်ပႃးႁူဝ်ၸႂ်သဵင်ႈသဵင်ႈထွမ်ႇဢဝ်ၵႂၢမ်းၸဝ်ႈႁဝ်းယူႇၼၼ်ႉတီႈၶႃႈဢေႃႈ။-
ၸဝ်ႈႁဝ်းယင်းပႂ်ႉၸွမ်းၵတိၸဝ်ႈႁဝ်းဢၼ်ဝႆႉၵႃႈတီႈပေႃႈၶႃႈၸဝ်ႈ တႃႇဝိတ်ႈ၊ ၼၼ်ႉတီႈၶႃႈလႄႈလႆႈပျေႉၸုမ်ႇပဵၼ်ၸွမ်းၵူႈၶေႃႈၵူႈၵမ်းၼႂ်းဝၼ်းမိူဝ်ႈၼႆႉတီႈၶႃႈယဝ်ႉ။-
ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ တီႈၶႃႈ။ မိူဝ်ႈလဵဝ်ၼႆႉၵေႃႈၶႅၼ်းတေႃႈပႂ်ႉၸွမ်းၵတိတၢင်ႇမဵဝ်းဢၼ်ၸဝ်ႈႁဝ်းမီးဢမိင်ႉဝႆႉတီႈပေႃႈၶႃႈၸဝ်ႈလႄႈဝႃႈ၊ ‘ပေႃးလုၵ်ႈလၢၼ်မႂ်းၵမ်ၵျၢင်ႉၸွမ်းဢလူဝ်ႇၵဝ်လီလီငၢမ်းငၢမ်း မိူၼ်ၸိူဝ်ႉၼင်ႇဢၼ်မႂ်းၵမ်ၵျၢင်ႉၸွမ်းၼၼ်ႉၸိုင်၊မဵဝ်းၸိူဝ်ႉၶိူဝ်းမႂ်းတၵ်းတေလႆႈဢုပ်ႉပိူင်ႇၼႂ်းဢရႃႇၶုၼ်ႁေႃၶမ်းၵူၼ်းမဵဝ်း ဢိသရေး၊ ယူႇတႃႇသေႇဢေႃႈ၊’ ဝႃႈၼင်ႇၼႆၼၼ်ႉသေၵမ်းတီႈၶႃႈ။-
ၵွပ်ႈပိူဝ်ႈၸိူဝ်ႉၼင်ႇၼႆလႄႈ၊ ထႃႇဝရႃႉၽြႃး၊ၽြႃးပဵၼ်ၸဝ်ႈ၊ ၵူၼ်းမဵဝ်း ဢိသရေး၊ တီႈၶႃႈ၊ၶႅၼ်းတေႃႈႁႂ်ႈၵႂၢမ်းၵတိဢၼ်ၸဝ်ႈႁဝ်းမီးဝႆႉတီႈ တႃႇဝိတ်ႈ၊ ၵေႃႉဢၼ်ပဵၼ်ၵူၼ်းၸႂ်ႉတီႈၸဝ်ႈႁဝ်းၼၼ်ႉပျေႉၸုမ်ႇပဵၼ်ၸွမ်းၵူႈၸိူဝ်ႉၵူႈဢၼ်သေၵမ်းတီႈၶႃႈ။
“ၼႂ်းဝႃႈၼၼ်သေၵေႃႈ၊ၽြႃးပဵၼ်ၸဝ်ႈတီႈၶႃႈ။ ၸဝ်ႈႁဝ်းတၵ်းယူႇၸွမ်းၵူၼ်းတင်းလၢႆၵႃႈၼိူဝ်လိၼ်မိူင်းၼႆႉ၊ဢမၢၼ်ႇၶၼ်ပဵၼ်ၶႃႈႁိုဝ်း။ ၽႃႉၵၢင်ႁၢဝ်ဢၼ်ပဵၼ်ၸိၵ်းပဵၼ်ၸွမ်ၼၼ်ႉ၊ယင်းဢမ်ႇပေႃးၵုမ်ႇပုၼ်ႈတၵ်းႁပ်ႉၶၢမ်ႇဢဝ်ၸဝ်ႈႁဝ်းလႆႈလႄႈၵျွင်းပိၵ်ႈမၢၼ်ႇၸဝ်ႈဢၼ်ၶႃႈၸဝ်ႈတႄႇႁဵတ်းၼႆႉ၊ယဵင်ႈၶႅၼ်းတၵ်းဢမ်ႇပေႃးၵုမ်ႇႁပ်ႉၶၢမ်ႇဢဝ်ၸဝ်ႈႁဝ်းလႆႈတီႈၶႃႈ။-
ထႃႇဝရႃႉၽြႃး၊ ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ ၶႃႈၸဝ်ႈၼႆႉပဵၼ်ၶႃႈၵူၼ်းၸႂ်ႉၸဝ်ႈႁဝ်းတီႈၶႃႈဢေႃႈ။ ၶႅၼ်းတေႃႈထွမ်ႇငိၼ်းဢဝ်ၵႂၢမ်းသူးတွင်းၶႃႈၸဝ်ႈၼႆႉလႄႈၶျႃးပၼ်သူးဢၼ်ၶႃႈၸဝ်ႈလဝ်ႈယွၼ်းၼႆႉသေၵမ်းတီႈၶႃႈ။-
ၶႅၼ်းတေႃႈပႂ်ႉလူပႂ်ႉတူၺ်းၵျွင်းပိၵ်ႈမၢၼ်ႇၸဝ်ႈၼႆႉယူႇၵူႈဝၼ်းၵူႈၶိုၼ်းသေၵမ်းတီႈၶႃႈ။ ၵႃႈတီႈၼႆႈတၵ်းပဵၼ်တီႈဢၼ်ၶႃႈၸဝ်ႈႁဝ်းၶဝ်ႁဵတ်းဝၢတ်ႈၵူဝ်းၵႂၢႆႇၸဝ်ႈႁဝ်းဝႃႈၼႆၸဝ်ႈႁဝ်းမီးဢမိင်ႉဝႆႉတီႈၶႃႈယဝ်ႉလႄႈယၢမ်းမိူဝ်ႈဢၼ်ၶႃႈၸဝ်ႈဝၢႆႇၼႃႈၸူးၵျွင်းပိၵ်ႈမၢၼ်ႇၼႆႉသေလႄႈလဝ်ႈယွၼ်းသူးတွင်းၼၼ်ႉၸိုင်၊ၶႅၼ်းတေႃႈထွမ်ႇငိၼ်းၶႃႈၸဝ်ႈသေၵမ်းတီႈၶႃႈ။-
ယၢမ်းမိူဝ်ႈဢၼ်ၶႃႈၸဝ်ႈႁဝ်း၊ဢိၵ်ႇတင်းၵူၼ်းၸဝ်ႈႁဝ်းၵူၼ်းမဵဝ်း ဢိသရေး၊ တင်းလၢႆဝၢႆႇၼႃႈၸူးၵႃႈတီႈၼႆႈလႄႈလဝ်ႈယွၼ်းသူးတွင်းၼၼ်ႉၶႅၼ်းတေႃႈထွမ်ႇငိၼ်းၶႃႈၸဝ်ႈႁဝ်းၶဝ်သေၵမ်းတီႈၶႃႈ။ ၶႅၼ်းတေႃႈယူႇၵႃႈၼႂ်းႁိူၼ်းၸဝ်ႈၵႃႈတီႈမိူင်းၵၢင်ႁၢဝ်ပုၼ်ႉၼၼ်ႉထွမ်ႇငိၼ်းလႄႈပွႆႇလွတ်ႈဢပျတ်ႈၶႃႈၸဝ်ႈႁဝ်းၶဝ်သေၵမ်းတီႈၶႃႈ။
“မိူဝ်ႈဢၼ်သေၵေႃႉသေၵူၼ်းၽိတ်းပိူင်ႈၵူၼ်းတၢင်ႇၵေႃႉသေယဝ်ႉ၊လႆႈမႃးၵႃႈတီႈၶဵင်ႇတၢင်းလူႇၸဝ်ႈႁဝ်းၵႃႈၼႂ်းၵျွင်းပိၵ်ႈမၢၼ်ႇၼႆႉႁႂ်ႈလႆႈတိူင်ႇၵၢဝ်ႇလွင်ႈဢၼ်မၼ်းဢမ်ႇမီးဢပျတ်ႈၼၼ်ႉၸိုင်၊-
ဢူဝ်း၊ ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈယူႇၵႃႈၼႂ်းမိူင်းၵၢင်ႁၢဝ်ထွမ်ႇငိၼ်းသေလႄႈတႅပ်းတတ်းၸီႇယၢင်ႇတြႃးဢမုၶႃႈၸဝ်ႈႁဝ်းတင်းလၢႆသေယဝ်ႉ၊ပၼ်တၢမ်ႇတီႈၵေႃႉဢၼ်ထိူၵ်ႈၶၢမ်ႇဢပျတ်ႈၼၼ်ႉလႄႈတႅပ်းတတ်းၸီႇယၢင်ႇတၢင်းဢၼ်သိုဝ်ႈတေႃႇတီႈၵေႃႉဢၼ်ဢမ်ႇမီးဢပျတ်ႈၼၼ်ႉသေၵမ်းတီႈၶႃႈ။
“ယၢမ်းမိူဝ်ႈဢၼ်ၵူၼ်းၸဝ်ႈႁဝ်းၵူၼ်းမဵဝ်း ဢိသရေး၊ တင်းလၢႆတူၵ်းသုမ်းၵႃႈၼႂ်းမိုဝ်းရၢၼ်ႇသူႇ ၵွပ်ႈပိူဝ်ႈၶဝ်ၽိတ်းပိူင်ႈၸဝ်ႈႁဝ်းၼၼ်ႉ၊ပေႃးၶဝ်ၶိုၼ်းမႃးၸူးၸဝ်ႈႁဝ်းၵႃႈတီႈၵျွင်းပိၵ်ႈမၢၼ်ႇၸဝ်ႈၼႆႉသေလႄႈပႃးတင်းႁူဝ်ၸႂ်ဢၼ်ၶျႃးတႅမ်ႇသေယဝ်ႉ၊သူးတွင်းတီႈၸဝ်ႈႁဝ်းပုၼ်ႈတၵ်းႁႂ်ႈပွႆႇလွတ်ႈဢပျတ်ႈၶဝ်ၼၼ်ႉၸိုင်၊-
ၶႅၼ်းတေႃႈယူႇၵႃႈၼႂ်းမိူင်းၵၢင်ႁၢဝ်လႄႈထွမ်ႇငိၼ်းၶဝ်သေၵမ်းတီႈၶႃႈ။ ၶႅၼ်းတေႃႈပွႆႇလွတ်ႈဢပျတ်ႈၵူၼ်းၸဝ်ႈႁဝ်းတင်းလၢႆၼၼ်ႉသေလႄႈဢဝ်ၶဝ်ၶိုၼ်းမႃးၵႃႈတီႈမိူင်းဢၼ်ၸဝ်ႈႁဝ်းဢဵတ်းလူပၼ်တီႈၶဝ်၊ဢိၵ်ႇတင်းပၼ်တီႈပူႇမွၼ်ႇၶဝ်ၸိူဝ်းၼၼ်ႉသေၵမ်းတီႈၶႃႈ။
“ယၢမ်းမိူဝ်ႈဢၼ်ၸဝ်ႈႁဝ်းဢမ်ႇႁႂ်ႈၽူၼ်တူၵ်းလႄႈၽႃႉလႅင်ႉၵွပ်ႈပိူဝ်ႈဢၼ်ၶဝ်ၽိတ်းပိူင်ႈၸဝ်ႈႁဝ်းၼၼ်ႉပေႃးၶဝ်ၸုၼ်ႉပႅတ်ႈဢပျတ်ႈတၢင်းၽိတ်းၶဝ်သေလႄႈဝၢႆႇၶိုၼ်းၸူးၵျွင်းပိၵ်ႈမၢၼ်ႇၸဝ်ႈၼႆႉသေလႄႈပႃးတင်းႁူဝ်ၸႂ်ဢၼ်ၶျႃးတႅမ်ႇသေယဝ်ႉ၊သူးတွင်းတီႈၸဝ်ႈႁဝ်းၸိုင်၊-
ဢူဝ်း၊ ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈယူႇၵႃႈၼႂ်းမိူင်းၵၢင်ႁၢဝ်ထွမ်ႇငိၼ်းလႄႈပွႆႇလွတ်ႈဢပျတ်ႈၶႃႈၸဝ်ႈႁဝ်းၵူၼ်းမဵဝ်း ဢိသရေး၊ တင်းလၢႆၼႆႉသေယဝ်ႉ၊သင်ႇသွၼ်ပၼ်ႁႂ်ႈၶဝ်ၵမ်ၵျၢင်ႉဢၼ်လီဢၼ်ငၢမ်းသေၵမ်းတီႈၶႃႈ။ ၼင်ႇၼၼ်လႄႈ၊ဢူဝ်း ထႃႇဝရႃႉၽြႃး၊ တီႈၶႃႈ၊ၶႅၼ်းတေႃႈႁႂ်ႈၽူၼ်တူၵ်းၵႃႈၼိူဝ်လိၼ်ဢၼ်ၸဝ်ႈႁဝ်းပၼ်ဢမူၺ်ႇတီႈၵူၼ်းၸဝ်ႈႁဝ်းတင်းလၢႆၼႆႉသေၵမ်းတီႈၶႃႈ။
“ၼႂ်းမိူင်းၸဝ်ႈၼႆႉပေႃးပဵၼ်ၶဝ်ႈၵႃႈမၢၵ်ႇပႅင်း၊ပေႃးပဵၼ်ၵႃႇလႃႉႁႃႈလႅင်မိူင်း၊ပေႃးမၢၵ်ႇၶဝ်ႈႁူင်းၼမ်ႉလႆႈလုလႅဝ်ၵွပ်ႈပိူဝ်ႈၽေးလူမ်းၽႆးလႄႈသင်၊ၵွပ်ႈပိူဝ်ႈၽေးမႅင်းၸၵ်းတႅၼ်လႄႈသင်၊ပေႃးၵူၼ်းၸဝ်ႈႁဝ်းတင်းလၢႆထူပ်းၽေးဢၼ်ရၢၼ်ႇသူႇတိုၵ်းတေႃးလႄႈသင်၊ပေႃးပဵၼ်ၽေးဢုပၢတ်ႈမဵဝ်းလႂ်လႄႈသင်၊တၢင်းၶႆႈတၢင်းပဵၼ်မဵဝ်းလႂ်လႄႈသင်၊-
ၶႅၼ်းတေႃႈထွမ်ႇဢဝ်ၵႂၢမ်းသူးတွင်းၶဝ်သေၵမ်းတီႈၶႃႈ။ ပေႃးၵူၼ်းၸဝ်ႈႁဝ်းမဵဝ်း ဢိသရေး၊ သေၵေႃႉသေၵူၼ်းၶႆႈၸႂ်ထူပ်းၽေးတၢမ်ႇတုၵ်ႉၶႃႉဢၼ်လႆႈၶၢမ်ႇႁင်းၽႂ်ႁင်းမၼ်းၼၼ်ႉလႄႈယုၵ်ႉမိုဝ်းၶဝ်သူးတွင်းၵႃႈတီႈၵျွင်းပိၵ်ႈမၢၼ်ႇၸဝ်ႈၼႆႉၸိုင်၊-
ၶႅၼ်းတေႃႈထွမ်ႇဢဝ်ၵႂၢမ်းသူးတွင်းၶဝ်သေၵမ်းတီႈၶႃႈ။ ယူႇၵႃႈၼႂ်းႁိူၼ်းၸဝ်ႈၽုင်ႇၵၢင်ႁၢဝ်ပုၼ်ႉၼၼ်ႉလႄႈထွမ်ႇငိၼ်းသေယဝ်ႉ၊ပွႆႇလွတ်ႈဢပျတ်ႈၶဝ်သေလႄႈၸွႆႈထႅမ်မႃႉၸႃႉၶဝ်သေၵမ်းတီႈၶႃႈ။ လွင်ႈမၼ်းၸမ်ႉ၊ၸဝ်ႈႁဝ်းႁုသၽေႃးႁူဝ်ၸႂ်ၶဝ်ၵျၢမ်ႇပွင်ၼၼ်ႉတီႈၶႃႈဢေႃႈ။ ၸီႇယၢင်ႇတီႈၵေႃႉလႂ်ၵေႃႉၼၼ်ႉၸွမ်းၵႃႈၼင်ႇဢၼ်ထိူၵ်ႈၵိုင်ႇၵၼ်တင်းမၼ်းၼၼ်ႉ၊-
ႁဵတ်းၸိူဝ်ႉၼင်ႇၼၼ်လႄႈၵူၼ်းၸဝ်ႈႁဝ်းတင်းလၢႆတၵ်းဢွၼ်ၵၼ်ၵူဝ်ယမ်ၸဝ်ႈႁဝ်းလႄႈၵမ်ၵျၢင်ႉၸွမ်းတြႃးၸဝ်ႈႁဝ်းၼႂ်းၶိင်ႇၵႃႇလႃႉဢၼ်ၶဝ်ယူႇသဝ်းၼႂ်းမိူင်းဢၼ်ၸဝ်ႈႁဝ်းဢဵတ်းလူပၼ်တီႈပူႇမွၼ်ႇၶႃႈၸဝ်ႈႁဝ်းၸိူဝ်းၼႆႉၼၼ်ႉတီႈၶႃႈဢေႃႈ။
“မိူၼ်ၸိူဝ်ႉၼင်ႇၼၼ်၊ပေႃးၵူၼ်းတၢင်ႇသိုင်ႇတၢင်ႇမိူင်းဢၼ်ယူႇဝၢၼ်ႈၵႆမိူင်းယၢၼ်ၼၼ်ႉလႆႈငိၼ်းၶၢဝ်ႇၼႃႇမႃႉၸိုဝ်ႈသဵင်ၸဝ်ႈႁဝ်း၊ဢိၵ်ႇတင်းၶၢဝ်ႇတၢင်းႁဵတ်းၸဝ်ႈႁဝ်းဢၼ်ယႂ်ႇမျၢတ်ႈၼႃႇဢၼ်ႁဵတ်းပၼ်တီႈၵူၼ်းၸဝ်ႈႁဝ်းၼၼ်ႉသေလႄႈ၊မႃးဝႆႈသႃၵူဝ်းၵႂၢႆႇၸဝ်ႈႁဝ်း၊သူးတွင်းၵႃႈတီႈၵျွင်းပိၵ်ႈမၢၼ်ႇၼႆႉၸိုင်၊-
ၶႅၼ်းတေႃႈထွမ်ႇငိၼ်းၵႂၢမ်းသူးတွင်းၵူၼ်းတၢင်ႇၸိူဝ်ႉတၢင်ႇမဵဝ်းသေၵမ်းတီႈၶႃႈ။ ၶႅၼ်းတေႃႈယူႇၵႃႈၼႂ်းမိူင်းၵၢင်ႁၢဝ်တီႈဢၼ်ၸဝ်ႈႁဝ်းၵိင်းဝၢပ်ႈၼၼ်ႉထွမ်ႇငိၼ်းလႄႈႁဵတ်းပၼ်ၵႃႈၼင်ႇဢၼ်ၶဝ်လဝ်ႈယွၼ်းႁႂ်ႈၸဝ်ႈႁဝ်းႁဵတ်းၼၼ်ႉပုၼ်ႈလွင်ႈၼင်ႇႁိုဝ်ၵူၼ်းလိၼ်မိူင်းတင်းသဵင်ႈတင်းလူင်၊တၵ်းႁုၸၵ်းၸဝ်ႈႁဝ်းလႄႈၵူဝ်ယမ်ၸဝ်ႈႁဝ်းမိူၼ်ၸိူဝ်ႉၼင်ႇဢၼ်ၵူၼ်းၸဝ်ႈႁဝ်းၵူၼ်းမဵဝ်း ဢိသရေး၊ ၵူဝ်ယမ်ၼၼ်ႉသေၵမ်းတီႈၶႃႈ။ ႁႂ်ႈၶဝ်ႁုလွင်ႈဢၼ်ၵျွင်းပိၵ်ႈမၢၼ်ႇၸဝ်ႈဢၼ်ၶႃႈၸဝ်ႈႁဝ်းတႄႇႁဵတ်းၼႆႉ ပဵၼ်တီႈဢၼ်ႁဵတ်းဝၢတ်ႈၵူဝ်းၵႂၢႆႇၸဝ်ႈႁဝ်းၼၼ်ႉသေၵမ်းတီႈၶႃႈ။
“ယၢမ်းမိူဝ်ႈဢၼ်ၸဝ်ႈႁဝ်းၸႂ်ႉႁႂ်ႈၵူၼ်းၸဝ်ႈႁဝ်းၶီႇသိုၵ်းၶိုၼ်ႈတိုၵ်းရၢၼ်ႇသူႇၶဝ်တီႈလႂ်တၢင်းလႂ်သေဢမ်ႇဝႃႈ၊ပေႃးၶဝ်ဝၢႆႇႁူဝ်ၸူးတီႈဝဵင်းဢၼ်ၸဝ်ႈႁဝ်းလိူၵ်ႈဢဝ်ဝႆႉ၊ဢိၵ်ႇတင်းဝၢႆႇႁူဝ်ၸူးၵႃႈတီႈၵျွင်းပိၵ်ႈမၢၼ်ႇၸဝ်ႈဢၼ်ၶႃႈၸဝ်ႈႁဝ်းတႄႇႁဵတ်းဝႆႉပုၼ်ႈၼႃႇမႃႉၸိုဝ်ႈသဵင်ၸဝ်ႈႁဝ်းၼႆႉၼၼ်ႉသေလႄႈသူးတွင်းၸိုင်၊-
ၶႅၼ်းတေႃႈထွမ်ႇငိၼ်းၵႂၢမ်းသူးတွင်းၶဝ်သေၵမ်းတီႈၶႃႈ။ ၶႅၼ်းတေႃႈယူႇၵႃႈၼႂ်းမိူင်းၵၢင်ႁၢဝ်ထွမ်ႇငိၼ်းၶဝ်လႄႈဢဵတ်းလူပၼ်တၢင်းဢၼ်ပႄႉၼႅင်ႇၼၼ်ႉသေၵမ်းတီႈၶႃႈ။
“မိူဝ်ႈဢၼ်ၵူၼ်းၸဝ်ႈႁဝ်းၽိတ်းပိူင်ႈၸဝ်ႈႁဝ်း၊ဢမ်ႇမီးၽူႈလႂ်သေၵေႃႉသေၵူၼ်းဢၼ်ဢမ်ႇၽိတ်းဢမ်ႇပိူင်ႈၸဝ်ႈႁဝ်း၊ၼႂ်းတၢင်းဢၼ်ၸဝ်ႈႁဝ်းၸႂ်မႆႈၶႂ်ႈၸႃႉၶဝ်လႄႈပၼ်ႁႂ်ႈရၢၼ်ႇသူႇၶဝ်မႃးပႄႉၼႅင်ႇၶဝ်၊ဢဝ်ၶဝ်ၵႂႃႇတူၵ်းၵႅၼ်းၵႃႈၼႂ်းမိုဝ်းၵူၼ်းတၢင်ႇသိုင်ႇတၢင်ႇမိူင်း၊ပိၵ်ႉသမ်ႉပဵၼ်မိူင်းဢၼ်ၵႆ၊မိူင်းဢၼ်ၸမ်ၸိူဝ်ႉႁိုဝ်သေၵေႃႈ၊-
ၶႅၼ်းတေႃႈထွမ်ႇငိၼ်းၵႂၢမ်းသူးတွင်းၵူၼ်းၸဝ်ႈႁဝ်းၸိူဝ်းၼၼ်ႉသေၵမ်းတီႈၶႃႈ။ ၵႃႈတီႈၼႂ်းမိူင်းၼၼ်ႉပေႃးၶဝ်ၽုၺ်ႇဢွၵ်ႇတၢင်းၽိတ်းဢၼ်ၶဝ်လႆႈႁဵတ်းဢၼ်ႁၢႆႉမိူၵ်ႈမႃးထၼ်ႇႁိုဝ်ၼၼ်ႉသေယဝ်ႉ၊ၶုၵ်းၸႂ်လႆႈမႆႈၸႂ်ဢပျတ်ႈလႄႈသူးတွင်းတီႈၸဝ်ႈႁဝ်းၸိုင်၊ ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈထွမ်ႇငိၼ်းဢဝ်ၵႂၢမ်းသူးတွင်းၶဝ်သေၵမ်းတီႈၶႃႈ။-
ၵႃႈတီႈၼႂ်းမိူင်းၼၼ်ႉပေႃးၶဝ်ပႃးတင်းႁူဝ်ၸႂ်သဵင်ႈသဵင်ႈပိၼ်ႇၸႂ်သေလႄႈမႃးၸူးတီႈၸဝ်ႈႁဝ်းၼႂ်းမိူဝ်ႈဢၼ်ၶဝ်ယင်းမီးယူႇၼႂ်းမိူင်းရၢၼ်ႇသူႇဢၼ်သိမ်းဢဝ်ၶဝ်ၵႂႃႇၼၼ်ႉလႄႈသမ်ႉသူးတွင်းလဝ်ႈယွၼ်းထိုင်မိူင်းဢၼ်ၸဝ်ႈႁဝ်းပၼ်တီႈပူႇမွၼ်ႇၶဝ်၊ဝဵင်းဢၼ်ၸဝ်ႈႁဝ်းလိူၵ်ႈဢဝ်ဝႆႉ၊ဢိၵ်ႇတင်းၵျွင်းပိၵ်ႈမၢၼ်ႇဢၼ်ၶႃႈၸဝ်ႈတႄႇႁဵတ်းပုၼ်ႈၸဝ်ႈႁဝ်းဝႆႉၼႆႉၸိုင်၊-
ၶႅၼ်းတေႃႈထွမ်ႇငိၼ်းဢဝ်ၵႂၢမ်းသူးတွင်းၶဝ်သေၵမ်းတီႈၶႃႈ။ ယူႇၵႃႈၼႂ်းႁိူၼ်းၸဝ်ႈၽုင်ႇၵၢင်ႁၢဝ်ပုၼ်ႉၼၼ်ႉသေလႄႈထွမ်ႇငိၼ်းဢဵတ်းလူၶဝ်ၼၼ်ႉသေၵမ်းတီႈၶႃႈ။
“ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ ၶႅၼ်းတေႃႈလူတူၺ်းၶႃႈၸဝ်ႈႁဝ်းၶဝ်လႄႈႁႄႈႁူထွမ်ႇငိၼ်းၵႂၢမ်းသူးတွင်းဢၼ်ၶႃႈၸဝ်ႈႁဝ်းၶဝ်ယူႇၵႃႈတီႈထႃႇၼႃႉၼႆႉသေလႄႈလဝ်ႈယွၼ်းၼၼ်ႉသေၵမ်းတီႈၶႃႈ။-
ထႃႇဝရႃႉၽြႃး၊ ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈလုၵ်ႉသေလႄႈၶဝ်ႈမႃးၸွမ်းတိူၵ်ႈပတိၺိၺ်ႇၸဝ်ႈဢၼ်ပဵၼ်လၢၵ်ႈၶၼႃႇတၼ်းၶူဝ်းၸဝ်ႈၶဝ်ႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈလႄႈၵိင်းဝၢပ်ႈၵႃႈတီႈၼၼ်ႈတႃႇသေႇသေၵမ်းတီႈၶႃႈ။ ပၼ်မၢင်ႇၵလႃႇၵႃႈတီႈတၢင်းႁဵတ်းယဵၸ်ႈပရေႃးႁဵၵ်ႈ ၸဝ်ႈႁဝ်းၸိူဝ်းၼၼ်ႉ၊ႁႂ်ႈၵူၼ်းၸဝ်ႈႁဝ်းတင်းလၢႆလႆႈၸူမ်းသိူဝ်းၵွပ်ႈပိူဝ်ႈတၢင်းဢၼ်ၸဝ်ႈႁဝ်းမျၢတ်ႈလီတေႃႇၶဝ်ၼၼ်ႉသေၵမ်းတီႈၶႃႈ။-
ထႃႇဝရႃႉၽြႃး၊ ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈယႃႇပေၸုၼ်ႉပႅတ်ႈၶုၼ်ႁေႃၶမ်းဢၼ်ၸဝ်ႈႁဝ်းလိူၵ်ႈဢဝ်ဝႆႉၼၼ်ႉသေၵမ်းတီႈၶႃႈ။ ၶႅၼ်းတေႃႈၶုၵ်းၸႂ်လႆႈၵျေးၸူးၸဝ်ႈႁဝ်းဢၼ်ၸဝ်ႈႁဝ်းမီးတေႃႇၶႃႈၸဝ်ႈၵေႃႉပဵၼ် တႃႇဝိတ်ႈ၊ ၼၼ်ႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ် သေႃးလမုၼ်ႇ၊ သူးတွင်းယဝ်ႉတူဝ်ႈယဝ်ႉၼၼ်ႉၸိုင်၊ၽႆးလုၵ်ႉသေၵႃႈၼိူဝ်ၵၢင်ႁၢဝ်တူၵ်းမႃးလႄႈမႆႈၶိူင်ႈတၢင်းလူႇဢၼ်သၢၵ်ႈၵၢပ်ႈၸိူဝ်းၼၼ်ႉသေယဝ်ႉ၊မုၼ်ၽုင်း ထႃႇဝရႃႉၽြႃး၊ တဵမ်ဝႆႉၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။-
ၵွပ်ႈပိူဝ်ႈဢၼ်မုၼ်ၽုင်း ထႃႇဝရႃႉၽြႃး၊ တဵမ်ဝႆႉၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉလႄႈယဵၸ်ႈပရေႃးႁဵၵ်ႈ တင်းလၢႆဢမ်ႇၸၢင်ႈၶဝ်ႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉလႆႈ။-
ယၢမ်းမိူဝ်ႈဢၼ်ၵူၼ်းမဵဝ်း ဢိသရေး၊ တင်းလၢႆ၊ႁၼ်ၽႆးလုၵ်ႉသေၵႃႈၼိူဝ်ၵၢင်ႁၢဝ်တူၵ်းမႃး၊ဢိၵ်ႇတင်းမုၼ်ၽုင်း ထႃႇဝရႃႉၽြႃး၊ တဵမ်ဝႆႉၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉၸိုင်၊ၶဝ်ဢွၼ်ၵၼ်ၶုပ်ႉမူပ်ႇဝၢင်းႁူဝ်ၵႃႈၼိူဝ်မၢၵ်ႇႁိၼ်ဢၼ်သိူဝ်ႇဝႆႉၼၼ်ႉသေယဝ်ႉ၊ဝႆႈ ထႃႇဝရႃႉၽြႃး၊ လႄႈယွင်ႈယေႃးၵျေးၸူးမၼ်းၸဝ်ႈယူႇလႄႈဝႃႈ၊ “မၼ်းၸဝ်ႈမျၢတ်ႈလီတီႈၶႃႈဢေႃႈ။ ၵရုၼႃႇၸဝ်ႈတႄႇယူႇမၼ်ႈၶိူင်ႇတႃႇသေႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။
လိုၼ်းၼၼ်ႉ၊ သေႃးလမုၼ်ႇ၊ ဢိၵ်ႇတင်းၵူၼ်းတင်းသဵင်ႈတင်းလူင်ဢွၼ်ၵၼ်သၢၵ်ႈၵၢပ်ႈၶိူင်ႈတၢင်းလူႇတီႈ ထႃႇဝရႃႉၽြႃး၊ ဢေႃႈ။-
မၼ်းဢဝ်ဝူဝ်းသွင်မိုၼ်ႇပၢႆသွင်ႁဵင်၊သူဝ်းသႅၼ်ပၢႆသွင်မိုၼ်ႇသၢၵ်ႈၵၢပ်ႈတၢင်းလူႇမိၵ်ႈသႁႃႇယႃႉဢေႃႈ။ ၼင်ႇၼၼ်လႄႈမၼ်း၊ဢိၵ်ႇတင်းၵူၼ်းတင်းသဵင်ႈတင်းလူင်ဢွၼ်ၵၼ်ႁဵတ်းပွႆးဢၼုမေႃးတၼႃႇၵျွင်းပိၵ်ႈမၢၼ်ႇၸဝ်ႈဢေႃႈ။-
ယဵၸ်ႈပရေႃးႁဵၵ်ႈတင်းလၢႆၸုၵ်းၵႃႈတီႈတီႈဢၼ်မႄးႁႅၼ်းဝႆႉပုၼ်ႈၶဝ်ၼၼ်ႉသေလႄႈၵူၼ်းၸိူဝ်ႉၶိူဝ်း လေႇဝိ၊ ၶဝ်ၸုၵ်းတေႃႇၼႃႈၵၼ်တင်းၶဝ်ၼၼ်ႉသေယဝ်ႉ၊ဢဝ်တင်းတူႇရိယႃႇဢၼ်ၶုၼ်ႁေႃၶမ်း တႃႇဝိတ်ႈ၊ ႁဵတ်းဝႆႉပုၼ်ႈဢၼ်တၵ်းယွင်ႈယေႃး ထႃႇဝရႃႉၽြႃး၊ လႄႈဢွၼ်ၵၼ်ႁဵတ်းၵႂၢမ်းသေလႄႈဝႃႈ၊ “မႅတ်ႈတႃႇမၼ်းၸဝ်ႈတႄႇယူႇၼိၵ်ႈၸႃႉထႃႇဝရႃႉဢေႃႈ၊” ဝႃႈၼင်ႇၼႆၸွမ်းလူၺ်ႈဢၼ် တႃႇဝိတ်ႈ၊ ၶိုင်ပွင်ဝႆႉၼၼ်ႉဢေႃႈ။ ယဵၸ်ႈပရေႃးႁဵၵ်ႈတင်းလၢႆပဝ်ႇတိုင်ႈၼႄးၶရႃႇယၢမ်းမိူဝ်ႈဢၼ်ၵူၼ်းတင်းသဵင်ႈတင်းလူင်ၸုၵ်းယူႇၼၼ်ႉဢေႃႈ။
သေႃးလမုၼ်ႇ၊ ႁႂ်ႈၶိုင်ႈၵၢင်ပၢင်ႇဝၢင်းဢၼ်မီးၵႃႈတီႈၽၢႆႇၼႃႈၵျွင်းပိၵ်ႈမၢၼ်ႇၸဝ်ႈၼၼ်ႉမူတ်းၸၢင်ႇလႄႈသၢၵ်ႈၵၢပ်ႈတူဝ်တၢင်းလူႇဢၼ်ၽဝ်ပဵၼ်တူဝ်၊ဢိၵ်ႇတင်းတၢင်းလူႇမၢၵ်ႇၶဝ်ႈႁူင်းၶဝ်ႈ၊တင်းၵွၼ်ႈၶႆမၼ်းဢၼ်ပဵၼ်တၢင်းလူႇမိၵ်ႈသႁႃႇယႃႉၸိူဝ်းၼၼ်ႉဢေႃႈ။ မၼ်းႁဵတ်းၸိူဝ်ႉၼင်ႇၼၼ်ၵွပ်ႈပိူဝ်ႈၶဵင်ႇတၢင်းလူႇတွင်းလိူင်ဢၼ်မၼ်းႁဵတ်းၼၼ်ႉ၊လဵၵ်ႉၼႃႇပုၼ်ႈတႃႇၶိူင်ႈတၢင်းလူႇတင်းသဵင်ႈတင်းမူတ်းၼၼ်ႉဢေႃႈ။
သေႃးလမုၼ်ႇ၊ ဢိၵ်ႇတင်းၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢွၼ်ၵၼ်ႁဵတ်းပွႆးၸဵတ်းဝၼ်းတဵမ်တဵမ်ဢေႃႈ။ ပွႆးလူင်ၼၼ်ႉၵူၼ်းၵိုၼ်းၼႃႇလူင်လၢင်ၵွပ်ႈပိူဝ်ႈဢၼ်ၵူၼ်းတင်းလၢႆ၊လုၵ်ႉၵႃႈတီႈၸႃႉၸဵမ်သူပ်းတၢင်းဝဵင်း ႁႃႇမတ်ႉ၊ ဢၼ်မီးၽၢႆႇတၢင်းႁွင်ႇတေႃႇထိုင်ႁွတ်ႈလႅၼ်လိၼ်မိူင်း ဢေးၵျိပ်ႉ၊ ၽၢႆႇတၢင်းၸၢၼ်းပုၼ်ႉႁွတ်ႈမႃးၼၼ်ႉဢေႃႈ။-
ၶဝ်ႁဵတ်းပွႆးဢၼုမေႃးတၼႃႇၶဵင်ႇတၢင်းလူႇမႃးၸဵတ်းဝၼ်းယဝ်ႉလႄႈသမ်ႉႁဵတ်းထႅင်ႈပွႆးထမ်ႇမႃႉၸဵတ်းဝၼ်းလႄႈၼႂ်းဝၼ်းတီႈပႅတ်ႇၼၼ်ႉ၊ၶဝ်ယုၵ်ႉသိမ်းပွႆးသေဢေႃႈ။-
ၼႂ်းဝၼ်းမိူဝ်ႈၽုၵ်ႈဢၼ်ပဵၼ်လိူၼ်ၸဵတ်းလႆႈသၢဝ်းသၢမ်ဝၼ်းၼၼ်ႉၸိုင်၊ သေႃးလမုၼ်ႇ၊ ပွႆႇၸႂ်ႉၵူၼ်းတင်းလၢႆပွၵ်ႈၶိုၼ်းႁိူၼ်းၽႂ်ႁိူၼ်းမၼ်းသေဢေႃႈ။ ၶဝ်ဢွၼ်ၵၼ်ၸူမ်းသိူဝ်းသႂၢင်ႇၸႂ်ၵွပ်ႈလူၺ်ႈတၢင်းလီမၢင်ႇၵလႃႇဢၼ် ထႃႇဝရႃႉၽြႃး၊ ပၼ်ထိုင်ၵူၼ်းမဵဝ်း ဢိသရေး၊ ပၼ်ထိုင် တႃႇဝိတ်ႈ၊ ဢိၵ်ႇတင်းပၼ်ထိုင် သေႃးလမုၼ်ႇ၊ ၸိူဝ်းၼၼ်ႉဢေႃႈ။
ဝၢႆးသေၶုၼ်ႁေႃၶမ်း သေႃးလမုၼ်ႇ၊ ႁဵတ်းၵျွင်းပိၵ်ႈမၢၼ်ႇၸဝ်ႈတင်းႁေႃၸဝ်ႈယဝ်ႉတူဝ်ႈၵႂႃႇၸွမ်းၼင်ႇတၢင်းဢၼ်ၶိုင်ပွင်ဝႆႉတင်းမူတ်းပဵၼ်မႃးလီလီငၢမ်းငၢမ်းယဝ်ႉၼၼ်ႉၸိုင်၊-
ထႃႇဝရႃႉၽြႃး၊ ပေႃႇမႃးၵႃႈတီႈမၼ်းၼႂ်းၶိင်ႇၵၢင်ၶိုၼ်းၼၼ်ႉသေလႄႈလၢတ်ႈတီႈမၼ်းလႄႈဝႃႈ၊ “ၵဝ်ငိၼ်းၵႂၢမ်းဢၼ်မႂ်းသူးတွင်းၼၼ်ႉယဝ်ႉ။ ၵဝ်ႁပ်ႉဢဝ်ၵျွင်းပိၵ်ႈမၢၼ်ႇၸဝ်ႈၼႆႉႁႂ်ႈပဵၼ်တီႈဢၼ်သၢၵ်ႈၵၢပ်ႈၶိူင်ႈတၢင်းလူႇတီႈၵဝ်ယဝ်ႉ။-
မိူဝ်ႈဢၼ်ၵဝ်လႆႈႁဵတ်းႁႂ်ႈၽႃႉလႅင်ႉလႄႈၽူၼ်ဢမ်ႇတူၵ်းလႄႈသင်၊မိူဝ်ႈဢၼ်ၵဝ်ပွႆႇၸႂ်ႉမႅင်းၸၵ်းတႅၼ်တင်းလၢႆမႃးၶူပ်းၵိၼ်မၢၵ်ႇလိၼ်ႁူင်းလိၼ်လႄႈသင်၊မိူဝ်ႈဢၼ်ၵဝ်ပွႆႇၸႂ်ႉၽေးၵႃႇလႃႉႁႃႈလႅင်မိူင်းမႃးတီႈၵူၼ်းၵဝ်လႄႈသင်၊-
ပေႃးၶဝ်ၶုၵ်းၸႂ်လႆႈတၢင်းၽိတ်းၶဝ်လႄႈဝႄႈပႅတ်ႈသေတၢင်းၵမ်တၢင်းၵျၢင်ႉဢၼ်ၶဝ်ႁဵတ်းၼၼ်ႉသေယဝ်ႉ၊သူးတွင်းတီႈၵဝ်ၸိုင်၊ၵဝ်တၵ်းယူႇၵႃႈၼိူဝ်မိူင်းၵၢင်ႁၢဝ်သေလႄႈထွမ်ႇငိၼ်းသေယဝ်ႉ၊တၵ်းပွႆႇလွတ်ႈဢပျတ်ႈၶဝ်လႄႈႁႂ်ႈမိူင်းၶဝ်ၶိုၼ်ႈယႂ်ႇမႂ်ႇသုင်ဢေႃႈ။-
ၵဝ်တၵ်းပႂ်ႉလူပႂ်ႉတူၺ်းၵျွင်းပိၵ်ႈမၢၼ်ႇၸဝ်ႈၼႆႉလႄႈထွမ်ႇငိၼ်းၵႂၢမ်းဢၼ်ၶဝ်ပထၼႃႇသူးတွင်းၵႃႈတီႈၼႆႈၼၼ်ႉ၊-
ၵွပ်ႈပိူဝ်ႈဢၼ်ၵဝ်လိူၵ်ႈဢဝ်ၵျွင်းပိၵ်ႈမၢၼ်ႇၸဝ်ႈၼႆႉလႄႈႁႂ်ႈပဵၼ်တီႈဢၼ်မူတ်းၸၢင်ႇ၊တီႈဢၼ်ႁဵတ်းဝၢတ်ႈၵူဝ်းၵႂၢႆႇၵဝ်ၵႂႃႇတႃႇသေႇဢမ်ႇထၢတ်ႇၼၼ်ႉဢေႃႈ။ ၵဝ်တၵ်းပႂ်ႉလူပႂ်ႉတူၺ်းလႄႈၵႅတ်ႇၶႄႁႄႉၵင်ႈၵျွင်းပိၵ်ႈမၢၼ်ႇၸဝ်ႈၼႆႉ၊ၵူႈၶိင်ႇၵႃႇလႃႉဢမ်ႇထၢတ်ႇဢေႃႈ။-
မႂ်းၸမ်ႉ၊ပေႃးမႂ်းပႃးတင်းသဵတ်ႈၸႃႇလႄႈႁဵတ်းဝၢတ်ႈတီႈၵဝ်ၸွမ်းၵႃႈၼင်ႇထုင်းတြႃးၵဝ်၊ၵမ်ၵျၢင်ႉၸွမ်းၵႃႈၼင်ႇဢၼ်ၵဝ်သင်ႇလၢတ်ႈမိူၼ်ၸိူဝ်ႉၼင်ႇပေႃႈမႂ်း တႃႇဝိတ်ႈ၊ ႁဵတ်းမႃးယဝ်ႉၼၼ်ႉၸိုင်၊-
ၵဝ်တၵ်းပႂ်ႉၵတိဢၼ်ၵဝ်ဝႆႉတီႈပေႃႈမႂ်း တႃႇဝိတ်ႈ၊ မိူဝ်ႈဢၼ်ၵဝ်သင်ႇလၢတ်ႈတီႈမၼ်းလႄႈဝႃႈ၊ၸိူဝ်ႉၶိူဝ်းလုၵ်ႈလၢၼ်မၼ်းတၵ်းလႆႈဢုပ်ႉပိူင်ႇၸၢမ်ႇၸႃးၵႃႈၼိူဝ်ၵူၼ်းမဵဝ်း ဢိသရေး၊ တႃႇသေႇၼၼ်ႉဢေႃႈ။-
ပေႃးဢမ်ႇၼၼ်၊ပေႃးမႂ်းဢိၵ်ႇတင်းၵူၼ်းမႂ်းတင်းလၢႆၽိတ်းပိူင်ႈထုင်းတြႃးတင်းလၢႆ၊ဢိၵ်ႇတင်းၽိတ်းပိူင်ႈပိင်းၺၢပ်ႈတြႃးၵဝ်တင်းလၢႆဢၼ်ၵဝ်ဝႆႉၵႃႈတီႈသူသေယဝ်ႉ၊ၵႂႃႇဝႆႈၽြႃးတၢင်ႇသူႇတၢင်ႇပႃးၸိုင်၊-
ၵဝ်တၵ်းထူၺ်ႈထွၼ်ၶဝ်ဢွၵ်ႇပႅတ်ႈသေၵႃႈၼႂ်းမိူင်းဢၼ်ၵဝ်ပၼ်ၶဝ်ၼၼ်ႉလႄႈတၵ်းပႄႇပႅတ်ႈၵျွင်းပိၵ်ႈမၢၼ်ႇၸဝ်ႈဢၼ်ၵဝ်ႁဵတ်းႁႂ်ႈမူတ်းၸၢင်ႇတီႈဢၼ်ၶဝ်ႁဵတ်းဝၢတ်ႈၵူဝ်းၵႂၢႆႇၵဝ်ၼႆႉ၊ႁႂ်ႈပဵၼ်တီႈဢၼ်ၵူၼ်းၵူႈၸိူဝ်ႉၵူႈမဵဝ်းႁဵတ်းတၢင်းဢၼ်ၶႂ်ႈၶူဝ်လႄႈသႄႉသွမ်းၼၼ်ႉဢေႃႈ။
“မိူဝ်ႈလဵဝ်ၼႆႉ၊ၵျွင်းပိၵ်ႈမၢၼ်ႇၸဝ်ႈပဵၼ်ဢၼ်မီးမုၼ်သရေႇယႂ်ႇၼႃႇသေၵေႃႈ၊ၶဝ်ၸိူဝ်းဢၼ်ပႆတၢင်းၸွမ်းတၢင်းၼၼ်ႉတၵ်းဢၢမ်းလႄႈၵေႃႉၼိုင်ႈလႄႈၵေႃႉၼိုင်ႈတွင်ႈထၢမ်ၵၼ်လႄႈဝႃႈ၊ ‘ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ထႃႇဝရႃႉၽြႃး၊ ႁဵတ်းပၼ်တီႈမိူင်းၼႆႉတင်းၵျွင်းပိၵ်ႈမၢၼ်ႇၸဝ်ႈၼႆႉၸိူဝ်ႉၼင်ႇၼႆ၊’ ဝႃႈၼင်ႇၼႆဢေႃႈ။-
ပိူၼ်ႈတၵ်းဢွၼ်ၵၼ်ၶိုၼ်းလၢတ်ႈလႄႈဝႃႈ၊ ‘ဢၼ်ၼႆႉၸမ်ႉ၊ပဵၼ်ၵွပ်ႈပိူဝ်ႈၶဝ်ၸုၼ်ႉပႅတ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်ဢၼ်ၼုၵ်ႈဢဝ်ပူႇမွၼ်ႇၶဝ်ဢွၵ်ႇသေမိူင်း ဢေးၵျိပ်ႉ၊ မႃးၼၼ်ႉသေယဝ်ႉ၊သမ်ႉၵႂႃႇဝႆႈသႃၽြႃးတၢင်ႇသူႇတၢင်ႇပႃးၼၼ်ႉယဝ်ႉ၊’ ဝႃႈၼင်ႇၼႆၼၼ်ႉဢေႃႈ၊” ဝႃႈၼင်ႇၼႆဢေႃႈ။
သေႃးလမုၼ်ႇ၊ လႆႈတႄႇတင်ႈသၢင်ႈႁဵတ်းၵျွင်းပိၵ်ႈမၢၼ်ႇၸဝ်ႈ၊ဢိၵ်ႇတင်းႁေႃၸဝ်ႈႁိုင်သၢဝ်းပီတဵမ်တဵမ်ဢေႃႈ။-
မၼ်းၶိုၼ်းမႄးၵုမ်းမႄးႁဵတ်းဝဵင်းၸိူဝ်းဢၼ်ၶုၼ်ႁေႃၶမ်း ႁိရမ်ႇ၊ သၢၵ်ႈပၼ်တီႈမၼ်းၼၼ်ႉသေယဝ်ႉ၊ႁႂ်ႈၵူၼ်းမဵဝ်း ဢိသရေး၊ ၵႂႃႇယူႇၵႃႈၼႂ်းဝဵင်းၸိူဝ်းၼၼ်ႉဢေႃႈ။-
မၼ်းယင်းၶီႇသိုၵ်းတိုၵ်းတေႃးသိမ်းဢဝ်ဝဵင်း ႁႃႇမတ်ႉ၊ တင်းဝဵင်း ၸေႃႇၽႃႉ၊ သေယဝ်ႉ။-
တႄႇႁဵတ်းဝဵင်း တႃႇတမေႃႇ၊ ဢၼ်လမ်းဝဵင်းမၼ်းမၼ်ႈၶိူင်ႇလႄႈမီးၵႃႈၼႂ်းထိူၼ်ႇလႅင်ႉၼၼ်ႉဢေႃႈ။ မၼ်းၶိုၼ်းမႄးႁဵတ်းမႄးၵုမ်းဝဵင်းၸိူဝ်းဢၼ်မီးၵႃႈၼႂ်းမိူင်း ႁႃႇမတ်ႉ၊ ၼၼ်ႉႁႂ်ႈပဵၼ်တီႈဢၼ်သိမ်းပႅင်းၽၼ်ႇတႃႇၸဝ်ႈတင်းလၢႆဢေႃႈ။-
ဝဵင်းၸိူဝ်းဢၼ် သေႃးလမုၼ်ႇ၊ မႄးႁဵတ်းမႄးၵုမ်းတင်းလၢႆၸမ်ႉ၊ပွတ်းၼိူဝ်ဝဵင်း ပႅတ်ႉႁေႃႇရုၼ်ႇ၊ ဢိၵ်ႇတင်းပွတ်းတႂ်ႈဝဵင်း ပႅတ်ႉႁေႃႇရုၼ်ႇ၊ လႄႈပဵၼ်ဝဵင်းဢၼ်မၼ်ႈၶိူင်ႇဢၼ်မီးလမ်းဝဵင်းလႂ်၊ၽၵ်းတူလႂ်၊တင်းၵိူၼ်ႇၽၵ်းတူမၼ်းလႂ်၊-
ဢိၵ်ႇတင်းဝဵင်း ပႃႇလတ်ႉ၊ တင်းဝဵင်းၵႃႈဢၼ်သိမ်းပႅင်းၽၼ်ႇတႃႇၸဝ်ႈ၊ဝဵင်းဢၼ်ဝႆႉတပ်ႉမႃႉတင်းတပ်ႉလေႃႉမႃႉလႂ်ၼၼ်ႉဢေႃႈ။ မၼ်းတႄႇႁဵတ်းၵႃႈဢၼ်မၼ်းၶိုင်ပွင်ဝႆႉၸိူဝ်းၼၼ်ႉၵႃႈၼႂ်းဝဵင်း ယေႇရုသလႅမ်ႇ၊ ၵႃႈၼိူဝ်လွႆ လေႇပၼုၼ်ႇ၊ ၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈၵူႈတီႈၵူႈလႅၼ်ၵႃႈဢၼ်မၼ်းဢုပ်ႉပိူင်ႇၼၼ်ႉဢေႃႈ။-
ၵႃႈဢၼ်ပဵၼ်ၵူၼ်းမဵဝ်း ႁိတ်ႉတိ၊ ၵူၼ်းမဵဝ်း ဢႃႇမေႃးရိ၊ ၵူၼ်းမဵဝ်း ၽေႇရၸိ၊ ၵူၼ်းမဵဝ်း ႁိဝိ၊ ၵူၼ်းမဵဝ်း ယေႇပုသိ၊ ဢၼ်ဢမ်ႇၸႂ်ႈၵူၼ်းမဵဝ်း ဢိသရေး၊-
ဢၼ်ယင်းၵိုတ်းယင်းၵျၢၼ်ႇတီႈမိူင်းၸဝ်ႈဢၼ်ဝႃႈ၊ၸူဝ်ႈလုၵ်ႈပၢၼ်လၢၼ်ၶဝ်တင်းလၢႆၼၼ်ႉ သေႃးလမုၼ်ႇ၊ ၽႃႇဢဝ်ၵဵပ်းဢဝ်ႁႂ်ႈၶဝ်ပဵၼ်ၵူၼ်းႁဵတ်းၵၢၼ်ၸွမ်းၼင်ႇၶဝ်ပဵၼ်ၶႃႈၼၼ်ႉတေႃႇထိုင်ႁွတ်ႈဝၼ်းမိူဝ်ႈလဵဝ်ၼႆႉဢေႃႈ။-
ၵူၼ်းမဵဝ်း ဢိသရေး၊ တင်းလၢႆၸမ်ႉ၊ဢမ်ႇလႆႈႁဵတ်းၵၢၼ်တၢင်းဢၼ်ပဵၼ်ၶႃႈ။ ၶဝ်လႆႈႁဵတ်းၵူၼ်းသိုၵ်းလႂ်၊မူးမၢတ်ႈၽွင်းမိူင်းလႂ်၊ၶုၼ်သိုၵ်းၵွၼ်းတပ်ႉလေႃႉမႃႉလႂ်၊ၵူၼ်းသိုၵ်းၶီႇမႃႉလႂ်ဢေႃႈ။-
မူးမၢတ်ႈလူင်ၸိူဝ်းဢၼ်လႆႈၵွၼ်းၵူၼ်းဢၼ်ထၢမ်းႁဵတ်းၵၢၼ်ၸဝ်ႈတင်းလၢႆၼၼ်ႉ၊မီးသွင်ပၢၵ်ႇပၢႆႁႃႈသိပ်းၵေႃႉဢေႃႈ။
သေႃးလမုၼ်ႇ၊ ဢဝ်ၼၢင်းၸဝ်ႈဢၼ်ပဵၼ်လုၵ်ႈယိင်းၶုၼ်ႁေႃၶမ်းမိူင်း ဢေးၵျိပ်ႉ၊ ၼၼ်ႉ ဢွၵ်ႇသေၵႃႈတီႈဝဵင်း တႃႇဝိတ်ႈ၊ လႄႈမႃးဝႆႉၵႃႈၼႂ်းႁေႃဢၼ်မၼ်းတႄႇႁဵတ်းဝႆႉပုၼ်ႈမၼ်းၼၢင်းၼၼ်ႉသေယဝ်ႉ၊လၢတ်ႈဝႃႈ၊ “မေးၵဝ်ၼႆႉဢမ်ႇထုၵ်ႇလီယူႇၵႃႈၼႂ်းႁေႃၶုၼ်ႁေႃၶမ်း တႃႇဝိတ်ႈ၊ မိူင်း ဢိသရေး၊ ၼႆႉလွင်ႈမၼ်းၸမ်ႉ၊တီႈဢၼ်တိူၵ်ႈပတိၺိၺ်ႇၸဝ်ႈႁွတ်ႈမႃးၼၼ်ႉပဵၼ်တီႈဢၼ်မူတ်းၸၢင်ႇဢေႃႈ၊” ဝႃႈၼင်ႇၼႆဢေႃႈ။
သေႃးလမုၼ်ႇ၊ သၢၵ်ႈၵၢပ်ႈတၢင်းလူႇတီႈ ထႃႇဝရႃႉၽြႃး၊ ၵႃႈၼိူဝ်ၶဵင်ႇတၢင်းလူႇဢၼ်မၼ်းတႄႇႁဵတ်းဝႆႉၵႃႈတီႈၽၢႆႇၼႃႈၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။-
မၼ်းသၢၵ်ႈၵၢပ်ႈၶိူင်ႈတၢင်းလူႇဢၼ်တုတ်ႇၽႆးမႅၼ်ႈၸွမ်းၵႃႈၼင်ႇဢၼ်ပိင်းၺၢပ်ႈတြႃး မူဝ်းသေႇ၊ မီးၼၼ်ႉၵူႈဝၼ်း၊ဢၼ်ဝႃႈဝၼ်းၵမ်သိၼ်၊ဝၼ်းလိူၼ်မႂ်ႇၶမ်ႈၼိုင်ႈ၊ဢိၵ်ႇတင်းပွႆးၶွပ်ႈပီသၢမ်မဵဝ်း၊ဢၼ်ပဵၼ်ပွႆးၵိၼ်ၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈ၊ပွႆးဢၼ်ပၢတ်ႇဢဝ်သိမ်းဢဝ်၊ဢိၵ်ႇတင်းပွႆးသုမ်ႉထဵင်ၸိူဝ်းၼၼ်ႉဢေႃႈ။-
မၼ်းၸွမ်းထုင်းၸၢမ်ႇၵႃႈၼင်ႇဢၼ်ပေႃႈမၼ်း တႃႇဝိတ်ႈ၊ ၶပ်ႉၸႅၼ်ႇဝႆႉၸိူဝ်းၼၼ်ႉလႄႈၶၢၼ်းဝႆႉယဵၸ်ႈပရေႃးႁဵၵ်ႈ တင်းလၢႆ၊ဢိၵ်ႇတင်းၵူၼ်းၸိူဝ်ႉၶိူဝ်း လေႇဝိ၊ တင်းလၢႆဢၼ်ၵမ်ႉၵႅမ်ယဵၸ်ႈပရေႃးႁဵၵ်ႈၶဝ်ႁႂ်ႈပွင်ႁဵတ်းၵၢၼ်ၽႂ်ၵၢၼ်မၼ်းၵူႈဝၼ်းၵူႈဝၼ်းၸိူဝ်းၼၼ်ႉ၊ဢိၵ်ႇတင်းတၢင်းဢၼ်ႁဵတ်းၵႂၢမ်းၸိူဝ်းၼၼ်ႉဢေႃႈ။ ၵူၼ်းပႂ်ႉယၢမ်းၵျွင်းပိၵ်ႈမၢၼ်ႇၸဝ်ႈတင်းလၢႆၵေႃႈမၼ်းၶၢၼ်းပဵၼ်မုၵ်ႉၽႂ်ၸုမ်းမၼ်း၊ႁႂ်ႈပႂ်ႉယၢမ်းမိူဝ်ႈတူၵ်းလႄႉတူၵ်းၵမ်းတီႈႁူးၽၵ်းတူၽႂ်ၽၵ်းတူမၼ်း၊မႅၼ်ႈၸွမ်းၵႃႈၼင်ႇဢၼ်ၵူၼ်းၽြႃးပဵၼ်ၸဝ်ႈ တႃႇဝိတ်ႈ၊ ၶိုင်ပွင်ဝႆႉၼၼ်ႉဢေႃႈ။-
ၵႃႈၼင်ႇဢၼ် တႃႇဝိတ်ႈ၊ မီးဢမိင်ႉလႄႈၶိုင်ပွင်ပၼ်ၵၢၼ်တီႈယဵၸ်ႈပရေႃးႁဵၵ်ႈလႂ်၊တင်းၵူၼ်းၸိူဝ်ႉၶိူဝ်း လေႇဝိ၊ လႂ်၊ဢၼ်ၸၢပ်ႈသႅင်ႇၵၼ်တင်းတိူၵ်ႈၽၼ်ႇတႃႇၸဝ်ႈလႂ်၊ဢိၵ်ႇတင်းၼႃႈၵၢၼ်တၢင်ႇၸိူဝ်ႉတၢင်ႇဢၼ်ၵႃႈမီးၸိူဝ်းၼၼ်ႉလႆႈထၢမ်းႁဵတ်းၸေးၸေးၸွတ်ႇၸွတ်ႇဢေႃႈ။
ၼင်ႇၼၼ်လႄႈၵႃႈဢၼ် သေႃးလမုၼ်ႇ၊ တေလႆႈႁဵတ်းတေလႆႈသၢင်ႈတင်းသဵင်ႈတင်းလူင်ၼၼ်ႉယဝ်ႉတူဝ်ႈၵႂႃႇၸႃႉၸဵမ်မိုဝ်ႉဝၼ်းဢၼ်ၶျႃးငဝ်ႈႁၢၵ်ႈတိူၵ်ႈၵျွင်းပိၵ်ႈမၢၼ်ႇၸဝ်ႈတေႃႇထိုင်ႁွတ်ႈထၢၼ်ႈပေႃးယဝ်ႉတူဝ်ႈၼၼ်ႉ၊ၵၢၼ်တၢင်းႁဵတ်းဢွင်ႇမႅင်ႇယဝ်ႉတူဝ်ႈလီငၢမ်းတင်းမူတ်းဢေႃႈ။
မိူဝ်ႈၼၼ်ႉ သေႃးလမုၼ်ႇ၊ ၵႂႃႇၵႃႈတီႈဝဵင်း ဢေးၸယုၼ်းၵႃႇပႃႇ၊ တင်းဝဵင်း ဢေႇလုတ်ႉ၊ ဢၼ်မီးၵႃႈႁိမ်းၽင်ႇပၢင်ႇလၢႆႇမိူင်း ဢေႇတုမ်ႇ၊ ပုၼ်ႉဢေႃႈ။-
ၶုၼ်ႁေႃၶမ်း ႁိရမ်ႇ၊ ၵေႃႈသူင်ႇပၼ်ႁိူဝ်းသၢင်းၽေႃးတင်းလၢႆဢၼ်ႁႂ်ႈၶုၼ်သိုၵ်းႁၢၼ်မၼ်းတင်းလၢႆဢုပ်ႉထိင်းၼၼ်ႉၵႂႃႇလူၺ်ႈၵၼ်တင်းၵူၼ်းႁိူဝ်းသၢင်းၽေႃးဢၼ်ၸၢင်ႈလႄႈယၢမ်ႈမေႃၵႂႃႇတၢင်းၼမ်ႉပၢင်ႇလၢႆႇၼၼ်ႉဢေႃႈ။ ၶဝ်ၼၼ်ႉၶီႇႁိူဝ်းလူၺ်ႈၵၼ်တင်းၶုၼ်ဢၼ်ပွင်ၵၢၼ် သေႃးလမုၼ်ႇ၊ တင်းလၢႆသေလႄႈၵႂႃႇၵႃႈတီႈမိူင်း ဢေႃႇၽိရႃႉ၊ သေယဝ်ႉ၊ဢဝ်ၶမ်းဢၼ်ၼမ်သေၵဝ်ႈႁဵင်ပၢၵ်ႇပၢႆပႅတ်ႇသိပ်းၸွႆႉ၊ၶိုၼ်းမႃးတီႈၶုၼ်ႁေႃၶမ်း သေႃးလမုၼ်ႇ၊ ဢေႃႈ။
ၼၢင်းႁေႃၶမ်းဢၼ်ဢုပ်ႉပိူင်ႇမိူင်း သေးပႃႉ၊ ၼၼ်ႉငိၼ်းသတၢင်းသဵင်ၶၢဝ်ႇမုၼ်သရေႇၶုၼ်ႁေႃၶမ်း သေႃးလမုၼ်ႇ၊ သေယဝ်ႉ၊မႃးၵႃႈတီႈဝဵင်း ယေႇရုသလႅမ်ႇ၊ ႁႂ်ႈလႆႈဢဝ်ၵႂၢမ်းထၢမ်ဢၼ်လိုၵ်ႉလမ်ႇ၊ၵႂၢမ်းဢၼ်ယၢပ်ႇတင်းလၢႆၸၢမ်းတူၺ်း သေႃးလမုၼ်ႇ၊ ဢေႃႈ။ မၼ်းၼၢင်းႁွင်ႉပႃးၵူၼ်းၸွမ်းၼမ်ၼႃႇ၊ဢိၵ်ႇတင်းပႃးဢဝ်ၵလႃႇဢုၵ်ႈပုၼ်ႈတႃႇတေတၢင်ႇမဵဝ်းၼၢမ်ႇသႃႇ၊ၶမ်း၊ဢိၵ်ႇတင်းသႅင်ဢၼ်ထိူၵ်ႈၵႃႈၼမ်ၼႃႇမႃးဢေႃႈ။ မိူဝ်ႈဢၼ်မၼ်းၼၢင်းထူပ်းႁၼ် သေႃးလမုၼ်ႇ၊ ၸိုင်၊မၼ်းၼၢင်းထၢမ်ၵႃႈဢၼ်မီးၵႃႈၼႂ်းၸႂ်မၼ်းၼၢင်းၼၼ်ႉဢေႃႈ။-
သေႃးလမုၼ်ႇ၊ ၵေႃႈၵႄႈလိတ်ႈၵူႈၶေႃႈၵူႈၵမ်းလႄႈ၊လွင်ႈတၢင်းဢၼ်မၼ်းဢမ်ႇႁုလႄႈဢမ်ႇၵႄႈလိတ်ႈလႆႈၼၼ်ႉဢမ်ႇမီးသေၸိူဝ်ႉသေပိူင်။-
ၼၢင်းႁေႃၶမ်းမိူင်း သေးပႃႉ၊ ၼၼ်ႉႁုႁၼ်ပိင်ႇၺႃႇ သေႃးလမုၼ်ႇ၊ ဢိၵ်ႇတင်းႁေႃၸဝ်ႈဢၼ်မၼ်းတႄႇႁဵတ်း၊-
တၢင်းၵိၼ်တၢင်းၶူပ်းဢၼ်ႁႅၼ်းတႄႇႁႅၼ်းတမ်းၵႃႈၼိူဝ်ၽိူၼ်ၸဝ်ႈလႂ်၊တၢင်းဢၼ်ၶိုင်ပွင်ႁေႃႁိူၼ်းမူးမၢတ်ႈၽွင်းမိူင်းၸဝ်ႈလႂ်၊ၶူဝ်းၼုင်ႈတၢင်းမႆၶဝ်လႂ်၊ၶႃႈၵူၼ်းၸၢႆးဢွၼ်ႇၸိူဝ်းဢၼ်ၸုၵ်းၶႃးၸႃးၵႃႈတီႈပွႆးၵိၼ်ပွႆးၶူပ်းလႂ်ၸိူဝ်းၼၼ်ႉ၊မၼ်းၼၢင်းထၢၼ်ႈပေႃးလိုမ်းတူဝ်လိုမ်းႁၢင်ႈယူႇဢေႃႈ။-
ၸဝ်ႈၼၢင်းၼၼ်ႉလၢတ်ႈတီႈၶုၼ်ႁေႃၶမ်းလႄႈဝႃႈ၊ “သဵင်ၶၢဝ်ႇၵႃႈဢၼ်ၵဝ်ၶႃႈယူႇၵႃႈတီႈမိူင်းၵဝ်ၶႃႈလႄႈလႆႈငိၼ်းလွင်ႈဢၼ်ၸဝ်ႈႁဝ်းႁဵတ်း၊ဢိၵ်ႇတင်းပိင်ႇၺႃႇၸဝ်ႈႁဝ်းၼၼ်ႉမႅၼ်ႈၸွမ်းၵႃႈၼင်ႇဢၼ်ၶႃႈလႆႈငိၼ်းတီႈၶႃႈဢေႃႈ။-
ၼႂ်းဝႃႈၼၼ်သေၵေႃႈၸူဝ်ႈဢၼ်ၵဝ်ၶႃႈဢမ်ႇပႆႇႁွတ်ႈထိုင်လႄႈထူပ်းႁၼ်ၼၼ်ႉၵဝ်ၶႃႈဢမ်ႇယုမ်ႇၵႂၢမ်းပိူၼ်ႈၸိူဝ်းၼၼ်ႉ။ လွင်ႈဢၼ်ပိင်ႇၺႃႇၸဝ်ႈႁဝ်းယႂ်ႇၼႃႇၵႃႈႁိုဝ်ၼၼ်ႉ၊ၵဝ်ၶႃႈလႆႈငိၼ်းၶၢဝ်ႇၼၼ်ႉၶိုင်ႈၼိုင်ႈၵူၺ်းၵေႃႈယင်းဢမ်ႇမီးၶႃႈ။ ၸဝ်ႈႁဝ်းမီးၺၢၼ်ႇပိင်ႇၺႃႇဢၼ်ယႂ်ႇမျၢတ်ႈပူၼ်ႉလိူဝ်သေၶၢဝ်ႇသတၢင်းဢၼ်ၵဝ်ၶႃႈယၢမ်ႈငိၼ်းၼၼ်ႉၶႃႈဢေႃႈ။-
ၵူၼ်းၸိူဝ်းဢၼ်ထၢမ်းႁဵတ်းၼႃႈၵၢၼ်ၸဝ်ႈႁဝ်းလႂ်၊ဢၼ်မီးယူႇၵႃႈတီႈၽၢႆႇၼႃႈၸဝ်ႈႁဝ်းလႄႈမီးဢၶႂၢင်ႉဢၼ်လႆႈထွမ်ႇငိၼ်းၵႂၢမ်းပိင်ႇၺႃႇၸဝ်ႈႁဝ်းၸိူဝ်းၼၼ်ႉမီးမၢင်ႇၵလႃႇၶႃႈဢေႃႈ။-
ႁႂ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈ၊ၸဝ်ႈႁဝ်းဢၼ်ထုၵ်ႇၸႂ်ၸဝ်ႈႁဝ်းလႄႈဢဝ်ၸဝ်ႈႁဝ်းတၢင်ႇၵႃႈၼိူဝ်ရႃႇၸႃႉပလၢင်ႇမၼ်းၸဝ်ႈ၊ႁႂ်ႈပဵၼ်ၶုၼ်ႁေႃၶမ်းတၢင်တူဝ် ထႃႇဝရႃႉၽြႃး၊ ၽြႃးပဵၼ်ၸဝ်ႈ၊ၸဝ်ႈႁဝ်းၼၼ်ႉ၊မီးမၢင်ႇၵလႃႇသေၵမ်းလူၺ်ႈ။ ၵွပ်ႈပိူဝ်ႈဢၼ်ၽြႃးပဵၼ်ၸဝ်ႈ၊ၸဝ်ႈႁဝ်း၊ႁၵ်ႉၵူၼ်းမဵဝ်း ဢိသရေး၊ လႄႈႁႂ်ႈတႄႇယူႇသေႇသေႇၼၼ်ႉလႄႈမၼ်းၸဝ်ႈၶၢၼ်းၸဝ်ႈႁဝ်းဝႆႉ၊ႁႂ်ႈပဵၼ်ၶုၼ်ႁေႃၶမ်းၵႃႈၼိူဝ်ၶဝ်ၼၼ်ႉ၊ႁႂ်ႈလႆႈႁဵတ်းတၢင်းဢၼ်ၸီႇယၢင်ႇတြႃး၊ဢိၵ်ႇတင်းတၢင်းဢၼ်တႅပ်းတတ်းသိုဝ်ႈသိုဝ်ႈတေႃႇတေႃႇၼၼ်ႉၶႃႈယဝ်ႉ၊” ဝႃႈၼင်ႇၼႆလႄႈ။
မိူဝ်ႈၼၼ်ႉ၊မၼ်းၼၢင်းဢဝ်ၶမ်းသွင်ႁဵင်ပႅတ်ႇပၢၵ်ႇပႅတ်ႇသိပ်းၸွႆႉ၊ၼၢမ်ႇသႃႇၼမ်ၼႃႇဢိၵ်ႇတင်းသႅင်လီရတၼႃႇလႂ်သၢၵ်ႈပၼ်ဢေႃႈ။ ၼၢမ်ႇသႃႇဢၼ်လီမိူၼ်ၸိူဝ်ႉၼင်ႇၼၢမ်ႇသႃႇဢၼ်ၼၢင်းႁေႃၶမ်းမိူင်း သေးပႃႉ၊ သၢၵ်ႈပၼ်ၶုၼ်ႁေႃၶမ်း သေႃးလမုၼ်ႇ၊ ၼၼ်ႉဢမ်ႇမီး။
လိူဝ်သေၼၼ်ႉ၊ၶႃႈၵူၼ်းၶုၼ်ႁေႃၶမ်း ႁိရမ်ႇ၊ တင်းၶႃႈၵူၼ်းၶုၼ်ႁေႃၶမ်း သေႃးလမုၼ်ႇ၊ ဢၼ်ဢဝ်ၶမ်းၵႃႈတီႈမိူင်း ဢေႃႇၽိရႃႉ၊ မႃးၸိူဝ်းၼၼ်ႉဢွၼ်ၵၼ်ပႃးဢဝ်မႆႉၼၢမ်ႇသႃႇ၊ဢိၵ်ႇတင်းသႅင်လီၼမ်ၼႃႇမႃးဢေႃႈ။-
သေႃးလမုၼ်ႇ၊ ဢဝ်မႆႉၼၢမ်ႇသႃႇၸိူဝ်းၼၼ်ႉႁဵတ်းသိၵ်ႈၶိုၼ်ႈလႆၵျွင်းပိၵ်ႈမၢၼ်ႇၸဝ်ႈတင်းႁေႃၸဝ်ႈ၊ဢိၵ်ႇတင်းတိင်ႇ၊တရေႃးပုၼ်ႈၶဝ်ၸိူဝ်းဢၼ်ႁဵတ်းၵႂၢမ်းတင်းလၢႆၼၼ်ႉဢေႃႈ။ မႆႉၼၢမ်ႇသႃႇၸိူဝ်ႉၼင်ႇၼၼ်ၼၼ်ႉ၊ဢမ်ႇတွၼ်ႉႁၼ်ၵႃႈတီႈမိူင်း ယုတႃႉ၊ သေပွၵ်ႈ။
တၢင်းဢၼ်ၶုၼ်ႁေႃၶမ်း သေႃးလမုၼ်ႇ၊ ပၼ်တီႈၼၢင်းႁေႃၶမ်းမိူင်း သေးပႃႉ၊ ၼၼ်ႉၼမ်သေဢၼ်မၼ်းၼၢင်းဢဝ်မႃးသၢၵ်ႈတီႈၶုၼ်ႁေႃၶမ်း သေႃးလမုၼ်ႇ၊ လႄႈယင်းပၼ်ၸွမ်းထႅင်ႈၵႃႈၼင်ႇဢၼ်ၼၢင်းႁေႃၶမ်းမီးဢလူဝ်ႇၶႂ်ႈလႆႈလႄႈယွၼ်းဢဝ်ၼၼ်ႉဢေႃႈ။ လိုၼ်းၼၼ်ႉ၊မၼ်းၼၢင်းဢိၵ်ႇတင်းၶႃႈၵူၼ်းမၼ်းတင်းလၢႆ၊ပွၵ်ႈၶိုၼ်းမိူဝ်းၵႂႃႇၵႃႈတီႈမိူင်း သေးပႃႉ၊ သေဢေႃႈ။
ၼႂ်းယေႈပီယေႈပီၼၼ်ႉၶုၼ်ႁေႃၶမ်း သေႃးလမုၼ်ႇ၊ လႆႈၶမ်းဢၼ်ပိူၼ်ႈသၢၵ်ႈၵၢပ်ႈၼၼ်ႉ ၼမ်ႉၼၵ်းမၼ်းမီးၼိုင်ႈမိုၼ်ႇသၢမ်ႁဵင်ပႅတ်ႇပၢၵ်ႇၸွႆႉဢေႃႈ။-
ၼွၵ်ႈသေၼၼ်ႉ၊ယင်းမီးၶွၼ်ႇဢၼ်ၵူၼ်းၵႃႉၵူၼ်းၶၢႆလႂ်၊ၸဝ်ႈၵုၼ်ႇၸဝ်ႈသိၼ်လႂ်၊ၶုၼ်ႁေႃၶမ်းမိူင်း ဢရေးပီးယႃး၊ ၵႃႈမီးလႂ်၊ဝုၼ်ႇလူင်ၼႂ်းဢိူင်ႇၼႂ်းမိူင်း ဢိသရေး၊ လႂ်ၵေႃႈမႃးသၢၵ်ႈငိုၼ်းလႂ်ၶမ်းလႂ်ထႅင်ႈလူးၵွၼ်ႇဢေႃႈ။
ၶုၼ်ႁေႃၶမ်းတွင်ႈႁဵတ်းၶႅပ်းႁႄႉလၢၵ်ႈၼၢၵ်ႈၸႃႉဢၼ်ယႂ်ႇၼၼ်ႉသွင်ပၢၵ်ႇဢၼ်လႄႈယေႈဢၼ်ပႃးၶမ်းသီႇၸွႆႉပၢႆသွင်ၶၼ်ၼၼ်ႉ၊-
ဢိၵ်ႇတင်းၶႅပ်းႁႄႉလၢၵ်ႈၼၢၵ်ႈၸႃႉဢၼ်လဵၵ်ႉသၢမ်ပၢၵ်ႇဢၼ်၊ယေႈဢၼ်ပႃးၶမ်းၸွႆႉပၢႆပႅတ်ႇၶၼ်ၼၼ်ႉသေယဝ်ႉ၊ဢဝ်ဝႆႉၵႃႈၼႂ်း ႁေႃၸဝ်ႈထိူၼ်ႇလေႇပၼုၼ်ႇ၊ ပုၼ်ႉဢေႃႈ။
ၶုၼ်ႁေႃၶမ်းသမ်ႉႁဵတ်းရႃႇၸႃႉပလၢင်ႇငႃးၸၢင်ႉလူင်ဢၼ်ၼိုင်ႈလႄႈဢဝ်ၶမ်းလွတ်ႈငၢၼ်ႇဢုမ်ႇဝႆႉဢေႃႈ။-
မီးၶၼ်ႈလႆႁူၵ်းသိၵ်ႈတင်းၶူင်ႇတီႈတၢင်ႇတိၼ်ၶမ်းဢၼ်ပဵၼ်ဢၼ်လဵဝ်ၵၼ်တင်းရႃႇၸႃႉပလၢင်ႇလႄႈၵႃႈတီႈသွင်ၽၢႆႇရႃႇၸႃႉပလၢင်ႇတီႈၼင်ႈၼၼ်ႉမီးႁၢဝ်းတီႈတၢင်ႇမိုဝ်း၊ဢိၵ်ႇတင်းမီးႁုၼ်ႇႁၢင်ႈသၢင်ႇသီႈၸုၵ်းယူႇၵႃႈတီႈႁိမ်းႁၢဝ်းၼၼ်ႉယေႈၽၢႆႇယေႈတူဝ်ဢေႃႈ။-
ၵႃႈတီႈသိၵ်ႈၶၼ်ႈလႆၸိူဝ်းၼၼ်ႉမီးႁုၼ်ႇႁၢင်ႈသၢင်ႇသီႈသိပ်းသွင်တူဝ်၊ၵႃႈတီႈႁူဝ်ႁၢင်ၶိုၼ်ႈလႆယေႈသိၵ်ႈၼၼ်ႉမီးႁုၼ်ႇႁၢင်ႈသၢင်ႇသီႈယေႈတူဝ်ၼင်ႇၵဝ်ႇဢေႃႈ။ ၵႃႈတီႈသိုင်ႇၸိုင်ႈဝၢၼ်ႈမိူင်းတီႈလႂ်ၵေႃႈဢမ်ႇမီးပလၢင်ႇဢၼ်မိူၼ်ၸိူဝ်ႉၼင်ႇၼၼ်လႃးလႃး။
ၵွၵ်းၼမ်ႉၶုၼ်ႁေႃၶမ်း သေႃးလမုၼ်ႇ၊ ၵႃႈမီးတင်းသဵင်ႈတင်းလူင်၊ဢိၵ်ႇတင်းၵွၵ်းၵႃႈဢၼ်သုင်းတိုဝ်းၼႂ်း ႁေႃၸဝ်ႈပႃႇမႆႉလေႇပၼုၼ်ႇ၊ ၵႃႈမီးၼၼ်ႉဢမ်ႇၸႂ်ႈၵွၵ်းငိုၼ်း၊ပဵၼ်ၵွၵ်းၶမ်းလွၼ်ႉလွၼ်ႉဢေႃႈ။ ၼႂ်းၸူဝ်ႈပၢၼ်ၶုၼ်ႁေႃၶမ်း သေႃးလမုၼ်ႇ၊ ၼၼ်ႉဢမ်ႇမၢတ်ႈငိုၼ်းပဵၼ်ဢၼ်မီးၵႃႈမီးၶၼ်ၵႃႈသင်လႃးလႃး။-
ၶုၼ်ႁေႃၶမ်းသမ်ႉမီးႁိူဝ်းသၢင်းၽေႃးဢၼ်ၵႂႃႇၼႂ်းၼမ်ႉပၢင်ႇလၢႆႇၼၼ်ႉမူႇၼိုင်ႈလႄႈၶဝ်ၵႂႃႇလူၺ်ႈၵၼ်တင်းႁိူဝ်းသၢင်းၽေႃးၶုၼ်ႁေႃၶမ်း ႁိရမ်ႇ၊ လႄႈသၢမ်ပီယေႈပွၵ်ႈၶဝ်ပႃးဢဝ်ငိုၼ်းၶမ်းလႂ်၊ငႃးၸၢင်ႉလႂ်၊လိင်းလႂ်၊တင်းၼူၵ်ႉယုင်းလႂ်ပွၵ်ႈၶိုၼ်းမႃးဢေႃႈ။
ၶုၼ်ႁေႃၶမ်း သေႃးလမုၼ်ႇ၊ ၼၼ်ႉမီးၸေးၸိမ်ႇတင်းပိင်ႇၺႃႇယႂ်ႇမျၢတ်ႈၼႃႇသေၶုၼ်ႁေႃၶမ်းၵႃႈဢၼ်မီးၵႃႈၼိူဝ်လိၼ်မိူင်းၼႆႉဢေႃႈ။-
ၶုၼ်ႁေႃၶမ်းၵႃႈမီးၵႃႈၼိူဝ်လိၼ်မိူင်းၸိူဝ်းၼၼ်ႉဢွၼ်ၵၼ်မႃးၵႃႈတီႈ သေႃးလမုၼ်ႇ၊ ႁႂ်ႈလႆႈထွမ်ႇလႆႈငိၼ်းၵႂၢမ်းပိင်ႇၺႃႇဢၼ်ၽြႃးပဵၼ်ၸဝ်ႈသႂၢင်းသႂ်ႇပၼ်ၵႃႈၼႂ်းႁူဝ်ၸႂ်မၼ်းၼၼ်ႉဢေႃႈ။-
ၶဝ်ၸိူဝ်းၼၼ်ႉၵေႃႉလႂ်ၵေႃႈပႃးဢဝ်လၢၵ်ႈသွင်ႇတင်းလၢႆဢၼ်ပဵၼ်၊ၶိူင်ႈငိုၼ်းၶိူင်ႈၶမ်းလႂ်၊သိူဝ်ႈၶူဝ်းယၢဝ်းလႂ်၊ၶိူင်ႈလၢၵ်ႈၼၢၵ်ႈလႂ်၊ၼၢမ်ႇသႃႇလႂ်၊မႃႉလႂ်၊မႃႉလီႈလႂ်၊မႃးသၢၵ်ႈပၼ်တီႈ သေႃးလမုၼ်ႇ၊ ၵူႈပီၵူႈပီဢေႃႈ။
ၶုၼ်ႁေႃၶမ်း သေႃးလမုၼ်ႇ၊ မီးသုမ်ႉထဵင်မႃႉသီႇႁဵင်ပုၼ်ႈတႃႇဝႆႉလေႃႉမႃႉတင်းလၢႆ၊ဢိၵ်ႇတင်းမႃႉတင်းလၢႆ၊ဢိၵ်ႇတင်းမီးၵူၼ်းသိုၵ်းၶီႇမႃႉမိုၼ်ႇပၢႆသွင်ႁဵင်ဢေႃႈ။ မၼ်းဢဝ်ၵမ်ႈၽွင်ႈဝႆႉၵႃႈၼႂ်းဝဵင်း ယေႇရုသလႅမ်ႇ၊ လႄႈဢၼ်လိူဝ်ၸိူဝ်းၼၼ်ႉမၼ်းဢဝ်ၵႂႃႇဝႆႉၵႃႈၼႂ်းဝဵင်းဢၼ်ထိင်းလေႃႉမႃႉၵူႈတီႈၵူႈလႅၼ်ဢေႃႈ။
မၼ်းဢုပ်ႉပိူင်ႇၶုၼ်ႁေႃၶမ်းၵႃႈဢၼ်မီးၸႃႉၸဵမ်ၵႃႈတီႈၼမ်ႉ ဢုၽရတ်ႉ၊ တေႃႇထိုင်ႁွတ်ႈမိူင်း ၽိလိတ်ႉတိ၊ ဢိၵ်ႇတင်းၶွပ်ႇၼမ်ႉလႅၼ်လိၼ်မိူင်း ဢေးၵျိပ်ႉ၊ ပုၼ်ႉဢေႃႈ။-
ၼႂ်းၸူဝ်ႈပၢၼ်ၶုၼ်ႁေႃၶမ်း သေႃးလမုၼ်ႇ၊ ၼၼ်ႉငိုၼ်းဢမ်ႇမီးၵႃႈၶၼ်ၵႃႈသင်ၵႃႈၼႂ်းဝဵင်း ယေႇရုသလႅမ်ႇ၊ ထၢၼ်ႈပေႃးမိူၼ်ၸိူဝ်ႉၼင်ႇမၢၵ်ႇႁိၼ်မၢၵ်ႇသၢႆးလႄႈမႆႉဢႃႇရိတ်ႉလိူင်ႇၼမ်ၼႃႇမိူၼ်ၸိူဝ်ႉၼင်ႇမႆႉမၢၵ်ႇလိူဝ်ႇထိူၼ်ႇၼၼ်ႉဢေႃႈ။-
သေႃးလမုၼ်ႇ၊ သိုဝ်ႉဢဝ်မႃႉတင်းလၢႆၵႃႈတီႈမိူင်း ဢေးၵျိပ်ႉ၊ ဢိၵ်ႇတင်းၵႃႈတီႈတၢင်ႇဝၢၼ်ႈတၢင်ႇမိူင်းဢေႃႈ။
လွင်ႈပိုၼ်း သေႃးလမုၼ်ႇ၊ ဢၼ်ယင်းၵိုတ်းယင်းၵျၢၼ်ႇၸႃႉၸဵမ်ငဝ်ႈတေႃႇပၢႆၸိုင်၊တႅမ်ႈမၢႆဝႆႉၵႃႈၼႂ်းလိၵ်ႈပိုၼ်းပရေႃးၽႅတ်ႈ ၼႃႇႀၼ်ႇ၊ ၵႃႈၼႂ်းလိၵ်ႈပိုၼ်းပရေႃးၽႅတ်ႈ ဢႁိယႃႉ၊ ၵူၼ်းဝဵင်း သိလေႃႇ၊ ဢိၵ်ႇတင်းၵႃႈၼႂ်းလိၵ်ႈပျႃႇတိၵ်ႈ ဢိတ်ႉတေႃႇ၊ ၵေႃႉဢၼ်ႁူပွင်ႇတႃလႅင်းဢၼ်လၢတ်ႈလွင်ႈၶုၼ်ႁေႃၶမ်း ယေႇရူဝ်းပုမ်ႇ၊ မိူင်း ဢိသရေး၊ ၼၼ်ႉဢေႃႈ။-
သေႃးလမုၼ်ႇ၊ ၼၼ်ႉယူႇၵႃႈၼႂ်းဝဵင်း ယေႇရုသလႅမ်ႇ၊ လႄႈဢုပ်ႉပိူင်ႇၸၢမ်ႇၸႃးၵႃႈၼိူဝ်မိူင်း ဢိသရေး၊ တင်းသဵင်ႈတင်းမူတ်းသီႇသိပ်းပီတဵမ်တဵမ်ဢေႃႈ။-
မၼ်းၼွၼ်းၽႄးၸွမ်းပူႇမွၼ်ႇမၼ်းတင်းလၢႆၵႂႃႇသေလႄႈဢဝ်သၢင်းၵျူဝ်ႇဝႆႉၵႃႈၼႂ်းဝဵင်း တႃႇဝိတ်ႈ၊ ဢၼ်ပဵၼ်ဝဵင်းၸဝ်ႈပေႃႈမၼ်းၼၼ်ႉသေယဝ်ႉ၊လုၵ်ႈၸၢႆးမၼ်း ရူဝ်းပုမ်ႇ၊ သိုပ်ႇၼင်ႈႁၢင်ႈၼင်ႈႁေႃဢေႃႈ။
ရူဝ်းပုမ်ႇ၊ ၵႂႃႇၵႃႈတီႈဝဵင်း သေးၶိမ်ႇ၊ ၵွပ်ႈပိူဝ်ႈဢၼ်ၵူၼ်းမဵဝ်း ဢိသရေး၊ ဢၼ်ယူႇၽၢႆႇပွတ်းႁွင်ႇမိူင်း ဢိသရေး၊ ၸုတုမ်ၵၼ်ႁႂ်ႈလႆႈယုၵ်ႉယွင်ႈမၼ်းဝႆႉၼႂ်းဢရႃႇၶုၼ်ႁေႃၶမ်းဢေႃႈ။-
မိူဝ်ႈဢၼ် ယေႇရူဝ်းပုမ်ႇ၊ လုၵ်ႈၸၢႆး ၼေႇပတ်ႉ၊ ဢၼ်ဢွၵ်ႇပၢႆႈသေၽေးၶုၼ်ႁေႃၶမ်း သေႃးလမုၼ်ႇ၊ ၵႂႃႇတဵတ်ႇသွၼ်ႈယူႇၵႃႈၼႂ်းမိူင်း ဢေးၵျိပ်ႉ၊ ၼၼ်ႉလႆႈငိၼ်းၶၢဝ်ႇလွင်ႈၼႆႉၸိုင်၊မၼ်းပွၵ်ႈၶိုၼ်းမႃးဢေႃႈ။-
ၵူၼ်းၸိူဝ်ႉၶိူဝ်းမဵဝ်း ဢိသရေး၊ ဢၼ်ယူႇၽၢႆႇပွတ်းႁွင်ႇၸိူဝ်းၼၼ်ႉဢွၼ်ၵၼ်ႁွင်ႉပၢင်းမၼ်းမႃးလႄႈ၊ၶဝ်တင်းသဵင်ႈတင်းလူင်ဢွၼ်ၵၼ်ၶဝ်ႈၸူးတီႈ ရူဝ်းပုမ်ႇ၊ သေယဝ်ႉ၊လၢတ်ႈလႄႈဝႃႈ၊-
“ၸဝ်ႈပေႃႈၸဝ်ႈႁဝ်း သေႃးလမုၼ်ႇ၊ ၼၼ်ႉႁဵတ်းတီႈၶႃႈၸဝ်ႈႁဝ်းၶဝ်ၵျၢမ်းထၢမ်းၼႃႇလႄႈဢဝ်ၵၢၼ်းႁၢပ်ႇဢၼ်ၼၵ်းၼႃႇတၢင်ႇသႂ်ႇၵႃႈၼိူဝ်ၶႃႈၸဝ်ႈႁဝ်းၶဝ်တင်းလၢႆတီႈၶႃႈယဝ်ႉ၊ပေႃးၸဝ်ႈႁဝ်းႁႂ်ႈၵၢၼ်တၢင်းႁဵတ်းဢၼ်ၵိုတ်ႉႁၢပ်ႇယၢပ်ႇၸႂ်ၼႃႇလူင်လၢင်ဢၼ်ၸဝ်ႈပေႃႈႁဝ်း သေႃးလမုၼ်ႇ၊ တၢင်ႇသႂ်ႇၵႃႈၼိူဝ်ၶႃႈၸဝ်ႈႁဝ်းၶဝ်ၼၼ်ႉ၊ႁႂ်ႈမဝ်မႃးၸိုင်၊ၶႃႈၸဝ်ႈႁဝ်းၶဝ်တင်းလၢႆတၵ်းဢွၼ်ၵၼ်ၵိုတ်ႉႁၢပ်ႇၼႃႈၵၢၼ်ၸဝ်ႈႁဝ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ရူဝ်းပုမ်ႇ၊ ၶိုၼ်းတွပ်ႇလႄႈဝႃႈ၊ “ပူၼ်ႉသေသၢမ်ဝၼ်းၸင်ႇၶိုၼ်းမႃးၸူးတီႈၵဝ်တႃႉ။ ၵဝ်တၵ်းမွၵ်ႇလၢတ်ႈပၼ်တီႈသူဢေႃႈ၊” ဝႃႈၼင်ႇၼႆဢေႃႈ။ မိူဝ်ႈဢၼ်ၵူၼ်းတင်းသဵင်ႈတင်းလူင်ဢွၼ်ၵၼ်ၵႂႃႇယဝ်ႉၼၼ်ႉၸိုင်။
ၶုၼ်ႁေႃၶမ်း ရူဝ်းပုမ်ႇ၊ တိူင်ႇပၢင်ႇၵၼ်တင်းၶဝ်ၸိူဝ်းဢၼ်ထဝ်ႈဢၼ်ၵႄႇဢၼ်ၶဝ်ႈၶႃးၸႃးၵႃႈတီႈၸဝ်ႈပေႃႈမၼ်း သေႃးလမုၼ်ႇ၊ ၼၼ်ႉလႄႈတွင်ႈထၢမ်ဝႃႈ၊ “သူတၵ်းပၼ်တၢင်းၵျၢမ်ႇတၢင်းပွင်ၸိူဝ်ႉၼင်ႇႁိုဝ်တီႈၵဝ်ႁႂ်ႈၵဝ်လႆႈၶိုၼ်းမွၵ်ႇၶိုၼ်းလၢတ်ႈတီႈၵူၼ်းတင်းလၢႆၸိူဝ်းၼႆႉ၊” ဝႃႈၼင်ႇၼႆဢေႃႈ။
ၶဝ်ဢွၼ်ၵၼ်လဝ်ႈလၢတ်ႈလႄႈဝႃႈ၊ “ပေႃးဝႃႈ၊ၸဝ်ႈႁဝ်းမီးဢလူဝ်ႇၶႂ်ႈႁဵတ်းပၼ်တီႈၵူၼ်းတင်းလၢႆၸိူဝ်းၼႆႉလီလီငၢမ်းငၢမ်းၸိုင်၊မိူဝ်ႈဢၼ်ၸဝ်ႈႁဝ်းၶိုၼ်းလၢတ်ႈတီႈၶဝ်ၼၼ်ႉ၊လၢတ်ႈၵႂၢမ်းလီၵႂၢမ်းဝၢၼ်တီႈၶဝ်သေၵမ်း။ ၶဝ်တၵ်းဢွၼ်ၵၼ်ၶၢမ်ႇႁဵတ်းၵၢၼ်တီႈၸဝ်ႈႁဝ်းလူၺ်ႈတၢင်းဢၼ်သိုဝ်ႈယူဝ်းယူႇသေႇသေႇဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊မၼ်းဢမ်ႇႁပ်ႉဢမ်ႇဢဝ်တၢင်းၵျၢမ်ႇတၢင်းပွင်ဢၼ်ၵူၼ်းထဝ်ႈၵူၼ်းၵႄႇၸိူဝ်းၼၼ်ႉပၼ်ၼၼ်ႉလႄႈသမ်ႉၵႂႃႇတိူင်ႇပၢင်ႇၵၼ်တင်းၵူၼ်းၼုမ်ႇၵူၼ်းၵမ်ၸိူဝ်းဢၼ်ပဵၼ်ၵေႃႉသႄႈမၼ်းလႄႈမိူဝ်ႈလဵဝ်ၼႆႉပဵၼ်ၵူၼ်းပၼ်တၢင်းၵျၢမ်ႇတၢင်းပွင်တီႈမၼ်းၼၼ်ႉယဝ်ႉ။ မၼ်းတွင်ႈထၢမ်တီႈၶဝ်လႄႈဝႃႈ၊-
“သူတၵ်းပၼ်တၢင်းၵျၢမ်ႇတၢင်းပွင်ႁႂ်ႈၵဝ်ႁဵတ်းၸိူဝ်ႉၼင်ႇႁိုဝ်ၼၼ်ႉ။ ၵဝ်တၵ်းလႆႈၶိုၼ်းမွၵ်ႇၶိုၼ်းလၢတ်ႈၸိူဝ်ႉၼင်ႇႁိုဝ်တီႈၵူၼ်းတင်းလၢႆၸိူဝ်းဢၼ်ၶေႃယွၼ်းတီႈၵဝ်၊ႁႂ်ႈၵဝ်ႁဵတ်းႁႂ်ႈၵၢၼ်းဢၼ်ၸဝ်ႈပေႃႈၵဝ်တၢင်ႇသႂ်ႇၼၼ်ႉမဝ်မႃးၼၼ်ႉလႆႈၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ၵူၼ်းၼုမ်ႇၵူၼ်းၵမ်ၸိူဝ်းၼၼ်ႉၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈႁဝ်းၶႅၼ်းတေႃႈၶိုၼ်းလၢတ်ႈတီႈၵူၼ်းတင်းလၢႆၸိူဝ်းဢၼ်ၶေႃယွၼ်းတီႈၸဝ်ႈႁဝ်းလႄႈဝႃႈ၊ ‘ၸဝ်ႈပေႃႈၸဝ်ႈႁဝ်းတၢင်ႇသႂ်ႇၵၢၼ်းဢၼ်ႁၢပ်ႇၼၵ်းၼႃႇလူင်လၢင်တီႈၶႃႈၸဝ်ႈႁဝ်းၶဝ်ယဝ်ႉ။ ၶႅၼ်းတေႃႈၸဝ်ႈႁဝ်းႁဵတ်းႁႂ်ႈမဝ်မႃးသေၵမ်း၊’ ၵႂၢမ်းဢၼ်ဝႃႈၼင်ႇၼႆၼၼ်ႉ၊သမ်ႉၶိုၼ်းတွပ်ႇပၼ်ၶဝ်လႄႈဝႃႈ၊ ‘ၼိဝ်ႉၵွႆႈၵဝ်ၼႆႉယင်းယႂ်ႇသေဢႅဝ်ၸဝ်ႈပေႃႈၵဝ်ဢေႃႈ။-
ၸဝ်ႈပေႃႈၵဝ်ၼၼ်ႉဢဝ်ၵၢၼ်းဢၼ်ႁၢပ်ႇၼၵ်းၼႃႇတၢင်ႇသႂ်ႇသူယဝ်ႉ။ ၵဝ်တၵ်းဢဝ်တၢင်ႇသႂ်ႇထႅင်ႈၵၢၼ်းဢၼ်ယဵင်ႈၶႅၼ်းႁၢပ်ႇၼၵ်းၼႃႇၼၼ်ႉလူးၵွၼ်ႇဢေႃႈ။ ၸဝ်ႈပေႃႈၵဝ်ၼၼ်ႉဢဝ်ၶွၼ်ႉဝၢႆပေႃႉယႅၼ်ႉသူဢေႃႈ။ ၵဝ်သမ်ႉတၵ်းဢဝ်ၶွၼ်ႉၸိူၵ်ႈပေႃႉယႅၼ်ႉသူလူးၵွၼ်ႇဢေႃႈ၊’ ဝႃႈၼင်ႇၼႆသေၵမ်း၊” ဝႃႈၼင်ႇၼႆဢေႃႈ။
ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉ၊ ယေႇရူဝ်းပုမ်ႇ၊ ဢိၵ်ႇတင်းၵူၼ်းတင်းသဵင်ႈတင်းမူတ်းဢွၼ်ၵၼ်ၶိုၼ်းၶဝ်ႈၸူးတီႈၶုၼ်ႁေႃၶမ်း ရူဝ်းပုမ်ႇ၊ ၸွမ်းၵႃႈၼင်ႇဢၼ်မၼ်းမၵ်းၶဵၼ်းတီႈၶဝ်ဝႆႉၼၼ်ႉဢေႃႈ။-
ၶုၼ်ႁေႃၶမ်းယင်းဢမ်ႇၸွမ်းတၢင်းၵျၢမ်ႇတၢင်းပွင်ဢၼ်ၵူၼ်းထဝ်ႈၵူၼ်းၵႄႇပၼ်ၼၼ်ႉၵူၺ်းဢမ်ႇၵႃး၊ယင်းလၢတ်ႈတေႃႇၵူၼ်းတင်းလၢႆႁၢဝ်ႈၵျၢမ်းၼႃႇလူင်လၢင်သေယဝ်ႉ၊-
ႁဵတ်းၸွမ်းတၢင်းၵျၢမ်ႇတၢင်းပွင်ဢၼ်ၵူၼ်းၼုမ်ႇၵူၼ်းၵမ်ၸိူဝ်းၼၼ်ႉပၼ်ၼၼ်ႉဢေႃႈ။ မၼ်းလၢတ်ႈလႄႈဝႃႈ၊ “ၸဝ်ႈပေႃႈၵဝ်ၼၼ်ႉဢဝ်ၵၢၼ်းဢၼ်ႁၢပ်ႇၼၵ်းၼႃႇၼၼ်ႉတၢင်ႇသႂ်ႇၵႃႈၼိူဝ်သူယဝ်ႉ။ ၵဝ်တၵ်းဢဝ်ၵၢၼ်းဢၼ်ယဵင်ႈၶႅၼ်းႁၢပ်ႇၼၵ်းၼႃႇၼၼ်ႉတၢင်ႇသႂ်ႇထႅင်ႈလူးၵွၼ်ႇဢေႃႈ၊” ဝႃႈၼင်ႇၼႆဢေႃႈ။-
လွင်ႈတၢင်းဢၼ်ၶုၼ်ႁေႃၶမ်းဢမ်ႇထွမ်ႇဢမ်ႇဢဝ်ၵႂၢမ်းၵူၼ်းဝၢၼ်ႈၵူၼ်းမိူင်းၼၼ်ႉၸမ်ႉ၊ပဵၼ်ၸွမ်းဢလူဝ်ႇ ထႃႇဝရႃႉၽြႃး၊ၽြႃးပဵၼ်ၸဝ်ႈ၊ ဢၼ်မၼ်းၸဝ်ႈၸႂ်ႉပရေႃးၽႅတ်ႈ ဢႁိယႃႉ၊ ၵူၼ်းမဵဝ်း သိလေႃႇ၊ ၼၼ်ႉမီးဢမိင်ႉဝႆႉတီႈ ယေႇရူဝ်းပုမ်ႇ၊ လုၵ်ႈၸၢႆး ၼေႇပတ်ႉ၊ ၼၼ်ႉဢေႃႈ။
မိူဝ်ႈဢၼ်ၵူၼ်း ဢိသရေး၊ ၸိူဝ်းၼၼ်ႉႁုႁၼ်လွင်ႈဢၼ်ၶုၼ်ႁေႃၶမ်းဢမ်ႇထွမ်ႇဢမ်ႇဢဝ်ၵႂၢမ်းၶဝ်ၼၼ်ႉၸိုင်၊ၶဝ်ဢွၼ်ၵၼ်ၶိုၼ်းလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “ႁဝ်းဢမ်ႇမီးလွင်ႈဢၼ်တၵ်းၽွမ်ႉ တႃႇဝိတ်ႈ၊ ၵႃႈသင်၊ဢမ်ႇမီးလွင်ႈဢၼ်တၵ်းၶၢမ်ႇဢဝ်ဢမူၺ်ႇတီႈလုၵ်ႈ ယေႇသႄး၊ ၵႃႈသင်။ မဵဝ်း ဢိသရေး၊ ၶဝ်႟။ ဢွၼ်ၵၼ်ပွၵ်ႈၶိုၼ်းမိူဝ်းၵၼ်တႃႉႁဝ်း။ ႁႂ်ႈ ရူဝ်းပုမ်ႇ၊ လူတူၺ်းတူဝ်ၸဝ်ႈၵဝ်ႇတႃႉ။” ဝႃႈၼင်ႇၼႆသေယဝ်ႉ၊ၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ပွၵ်ႈမိူဝ်းၵႂႃႇသေဢေႃႈ။ ဝႃႈၼင်ႇၼႆသေယဝ်ႉ၊ၵူၼ်း ဢိသရေး၊ တင်းလၢႆဢွၼ်ၵၼ်လုၵ်ႉၽိုၼ်ႉမိူင်းဢေႃႈ။-
ရူဝ်းပုမ်ႇ၊ လႆႈဢုပ်ႉပိူင်ႇၵူၼ်း ဢိသရေး၊ ၸိူဝ်းဢၼ်ယူႇၼႂ်းဝၢၼ်ႈဝဵင်းၼႂ်းဢိူင်ႇ ယုတႃႉ၊ ၼၼ်ႉၵူၺ်းဢေႃႈ။
မိူဝ်ႈၼၼ်ႉ၊ၶုၼ်ႁေႃၶမ်း ရူဝ်းပုမ်ႇ၊ ပွႆႇၸႂ်ႉ ႁႃႇတေႃးရမ်ႇ၊ ဝုၼ်ႇၽၢႆႇၵူၼ်းႁဵတ်းၵၢၼ်ၼၼ်ႉၵႂႃႇၸူးၵႃႈတီႈၵူၼ်းမဵဝ်း ဢိသရေး၊ တင်းလၢႆသေၵေႃႈ၊ၶဝ်ၸိူဝ်းၼၼ်ႉဢဝ်မၢၵ်ႇႁိၼ်ပိုဝ်ႈသႂ်ႇမၼ်းတၢႆဢေႃႈ။ ၵွပ်ႈလူၺ်ႈလွင်ႈတၢင်းၼၼ်ႉလႄႈ ရူဝ်းပုမ်ႇ၊ ႁိပ်ႈၼႅတ်ႈၶိုၼ်ႈၶီႇလေႃႉမႃႉၸဝ်ႈသေလႄႈၼီပၢႆႈၵႂႃႇၸူးတီႈဝဵင်း ယေႇရုသလႅမ်ႇ၊ ဢေႃႈ။-
တႄႇဢဝ်ၶိင်ႇၵႃႇလႃႉယၢမ်းမိူဝ်ႈၼၼ်ႉလႄႈၵူၼ်းမဵဝ်း ဢိသရေး၊ ၵူၼ်းမိူင်းၽၢႆႇတၢင်းႁွင်ႇလုၵ်ႉၽိုၼ်ႉၶိူဝ်းၶုၼ်ႁေႃၶမ်း တႃႇဝိတ်ႈ၊ တေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
မိူဝ်ႈဢၼ်ၶုၼ်ႁေႃၶမ်း ရူဝ်းပုမ်ႇ၊ ႁွတ်ႈထိုင်ဝဵင်း ယေႇရုသလႅမ်ႇ၊ ၼၼ်ႉၸိုင်၊မၼ်းႁွင်ႉဢဝ်ႁူဝ်ႁၢၼ်ၵူၼ်းသိုၵ်းဢၼ်ၵတ်ႉဢၼ်ၶႅၼ်ႇသႅၼ်ပၢႆပႅတ်ႇမိုၼ်ႇသေၵႃႈၼႂ်းၵူၼ်းၸိူဝ်ႉၶိူဝ်း ယုတႃႉ၊ တင်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ ႁႂ်ႈမႃးၸုတုမ်ၵၼ်ႁႂ်ႈလႆႈတိုၵ်းတေႃးၵူၼ်းပွတ်းႁွင်ႇမိူင်း ဢိသရေး၊ ႁႂ်ႈသိုင်ႇၸိုင်ႈဝၢၼ်ႈမိူင်းၸဝ်ႈၶိုၼ်းတူၵ်းႁွတ်ႈမႃးၵႃႈၼႂ်းမိုဝ်းမၼ်းဢေႃႈ။-
ၵူၺ်းၵႃႈ၊ ထႃႇဝရႃႉၽြႃး၊ မီးဢမိင်ႉတီႈပရေႃးၽႅတ်ႈ သေႇမႃႇယႃႉ၊-
ႁႂ်ႈမၼ်းၵႂႃႇသင်ႇလၢတ်ႈတီႈၶုၼ်ႁေႃၶမ်း ရူဝ်းပုမ်ႇ၊ ဢိၵ်ႇတင်းၵူၼ်းၸိူဝ်ႉၶိူဝ်း ယုတႃႉ၊ တင်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ တင်းသဵင်ႈတင်းလူင်ၸိူဝ်းၼၼ်ႉလႄႈဝႃႈၸမ်ႉ၊-
“ယႃႇပေၶီႇသိုၵ်းတိုၵ်းတေႃးပီႈၼွင်ႉသူ။ ဢွၼ်ၵၼ်ပွၵ်ႈၶိုၼ်းမိူဝ်းၸူးတီႈႁိူၼ်းၽႂ်ႁိူၼ်းမၼ်းသေ။ ၵႃႈဢၼ်ပဵၼ်မႃးၼႆႉပဵၼ်ဢလူဝ်ႇၵဝ်ဢေႃႈ၊” ဝႃႈၼင်ႇၼႆဢေႃႈ။ ၶဝ်ဢွၼ်ၵၼ်ထွမ်ႇဢဝ်ၵႂၢမ်းဢၼ် ထႃႇဝရႃႉၽြႃး၊ မီးဢမိင်ႉၼၼ်ႉသေယဝ်ႉ၊ယင်းဢမ်ႇၶီႇသိုၵ်းၶိုၼ်းၸူး ယေႇရူဝ်းပုမ်ႇ၊ လႄႈပွၵ်ႈၶိုၼ်းမိူဝ်းၵႂႃႇသေဢေႃႈ။
ရူဝ်းပုမ်ႇ၊ ၼၼ်ႉယူႇၵႃႈၼႂ်းဝဵင်း ယေႇရုသလႅမ်ႇ၊ သေလႄႈပွင်ႁဵတ်းပွင်မႄးဝဵင်းတင်းလၢႆႁႂ်ႈပဵၼ်ဝဵင်းဢၼ်မၼ်ႈၶိူင်ႇၵႃႈၼႂ်းဝၢၼ်ႈဝဵင်း ယုတႃႉ၊ ဢိၵ်ႇတင်းဝၢၼ်ႈဝဵင်း ပိၼ်ႇယႃႇမိၼ်ႇ၊ ဢေႃႈ။-
ဝဵင်းၸိူဝ်းဢၼ်မၼ်းမႄးၵုမ်းမႄးႁဵတ်းတင်းလၢႆၸမ်ႉ၊ပဵၼ်ဝဵင်း ပႅတ်ႉလႁႅမ်ႇ၊ ဝဵင်း ဢေးတမ်ႇ၊ ဝဵင်း တေႇၵေႃႇ၊-
ဝဵင်း ပႅတ်ႉၸုရႃႉ၊ ဝဵင်း သေႃႇၶေႃႇ၊ ဝဵင်း ဢတုလမ်ႇ၊-
ဝဵင်း ၵႃႇသႃႉ၊ ဝဵင်း မရေးသႃႉ၊ ဝဵင်း ၸိၽႃႉ၊-
ဝဵင်း ဢတေႃးရမ်ႇ၊ ဝဵင်း လႃႇၶိသႃႉ၊ ဝဵင်း ဢၸေႇၵႃႇ၊-
ဝဵင်း ၸူဝ်းရႃႇ၊ ဝဵင်း ဢႃႇၸလုၼ်ႇ၊ ဝဵင်း ႁေႇပရုၼ်ႇ၊ ၸိူဝ်းၼၼ်ႉဢေႃႈ။-
မၼ်းႁဵတ်းႁႂ်ႈပဵၼ်ဝဵင်းဢၼ်မၼ်ႈၶိူင်ႇၼႃႇသေယဝ်ႉ၊ၶၢၼ်းၵူၼ်းငဝ်ႈၵူၼ်းႁူဝ်ၼႂ်းယေႈဝဵင်းယေႈၵေႃႉလႄႈဢဝ်ၶဝ်ႈၼမ်ႉတၢင်းၵိၼ်လႂ်၊ၼမ်ႉမၼ်းသၢၼ်ႇလုၼ်ႇလႂ်၊ၼမ်ႉမၢၵ်ႇၸပိတ်ႉလႂ်၊-
ဢိၵ်ႇတင်းၶႅပ်းႁႄႉလၢၵ်ႈၼၢၵ်ႈလႂ်၊ႁွၵ်ႇလႂ်၊သႂၢင်းသႂ်ႇဝႆႉၵႃႈၼႂ်းဝဵင်းၵူႈဝဵင်းဢေႃႈ။ ၼင်ႇၼၼ်လႄႈမၼ်းဢုပ်ႉပိူင်ႇၸၢမ်ႇၸႃးၵႃႈၼိူဝ်ၸိူဝ်ႉၶိူဝ်းမဵဝ်း ယုတႃႉ၊ တင်းၵူၼ်းမဵဝ်း ပိၼ်ႇယႃႇမိၼ်ႇ၊ ဢေႃႈ။
ယဵၸ်ႈပရေႃးႁဵၵ်ႈ တင်းလၢႆ၊ဢိၵ်ႇတင်းၸိူဝ်ႉၶိူဝ်းၵူၼ်းမဵဝ်း လေႇဝိ၊ ၶဝ်ဢွၼ်ၵၼ်လုၵ်ႉသေၵႃႈတီႈသိုင်ႇၸိုင်ႈဝၢၼ်ႈမိူင်း ဢိသရေး၊ ၵူႈတီႈၵူႈလႅၼ်ၼီပၢႆႈမႃးတီႈ ရူဝ်းပုမ်ႇ၊ ဢေႃႈ။-
ၸိူဝ်ႉၶိူဝ်းမဵဝ်း လေႇဝိ၊ တင်းလၢႆၸုၼ်ႉပႅတ်ႈၼမ်ႉလိၼ်တီႈယူႇဢၼ်ၶဝ်ထိူၵ်ႈပိူင်ႇၼၼ်ႉသေလႄႈၼီပၢႆႈၸူးတီႈမိူင်း ယုတႃႉ၊ ဢိၵ်ႇတင်းတီႈဝဵင်း ယေႇရုသလႅမ်ႇ၊ ၵွပ်ႈပိူဝ်ႈၶုၼ်ႁေႃၶမ်း ယေႇရူဝ်းပုမ်ႇ၊ မိူင်း ဢိသရေး၊ ဢိၵ်ႇတင်းလုၵ်ႈၸၢႆးမၼ်းတင်းလၢႆဢဝ်ၶဝ်ၶျႃးတူၵ်းသေဢရႃႇယဵၸ်ႈပရေႃးႁဵၵ်ႈဢၼ်ႁဵတ်းဝၢတ်ႈၽၢႆႇၼႃႈ ထႃႇဝရႃႉၽြႃး၊ ၼၼ်ႉဢေႃႈ။-
မၼ်းသမ်ႉၶၢၼ်းယဵၸ်ႈပရေႃးႁဵၵ်ႈဢၼ်ပဵၼ်ၵူၼ်းမၼ်းတင်းလၢႆ၊ႁႂ်ႈလႆႈထၢမ်းႁဵတ်းၵၢၼ်ပုၼ်ႈၽြႃးတၢင်ႇသူႇတၢင်ႇပႃးဢၼ်ဝႆႈၽီႁၢႆႉလႂ်၊ဝႆႈႁုၼ်ႇႁၢင်ႈဝူဝ်းဢၼ်မၼ်းႁဵတ်းဝႆႉလႂ်ၼၼ်ႉဢေႃႈ။-
ၵႃႈၼႂ်းၸိူဝ်ႉၶိူဝ်းၵူၼ်း ဢိသရေး၊ ၵူႈမဵဝ်းၸိူဝ်းဢၼ်တင်ႈၸႂ်တင်ႈၶေႃးႁႂ်ႈလႆႈႁဵတ်းဝၢတ်ႈၵူဝ်းၵႂၢႆႇ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ၼၼ်ႉဢွၼ်ၵၼ်ၸွမ်းၵူၼ်းမဵဝ်း လေႇဝိ၊ ၶဝ်ၵႂႃႇၵႃႈတီႈဝဵင်း ယေႇရုသလႅမ်ႇ၊ ႁႂ်ႈလႆႈသၢၵ်ႈၵၢပ်ႈၶိူင်ႈတၢင်းလူႇတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇမွၼ်ႇၶဝ်ဢေႃႈ။-
ၼင်ႇၼၼ်လႄႈပဵၼ်တၢင်းဢၼ်ထႅင်ႈႁႅင်းသိုင်ႇၸိုင်ႈဝၢၼ်ႈမိူင်း ယုတႃႉ၊ လႄႈၶဝ်ဢွၼ်ၵၼ်ၸွႆႈထႅမ် ရူဝ်းပုမ်ႇ၊ လုၵ်ႈၸၢႆး သေႃးလမုၼ်ႇ၊ ၼၼ်ႉသၢမ်ပီတဵမ်တဵမ်ဢေႃႈ။ လွင်ႈမၼ်းၸမ်ႉ၊ၶဝ်ဢွၼ်ၵၼ်ၸွမ်းသဵၼ်ႈတၢင်း တႃႇဝိတ်ႈ၊ ဢိၵ်ႇတင်းသဵၼ်ႈတၢင်း သေႃးလမုၼ်ႇ၊ လီလီငၢမ်းငၢမ်းဢေႃႈ။
ရူဝ်းပုမ်ႇ၊ ႁူမ်ႈပွင်းပဵၼ်ၵူႈပဵၼ်ႁိူၼ်းလူၺ်ႈၵၼ်တင်း မႁႃႇလတ်ႉ၊ ဢၼ်ပေႃႈမၼ်းပဵၼ် ယေႇရိမုတ်ႉ၊ လုၵ်ႈၸၢႆး တႃႇဝိတ်ႈ၊ လႄႈမႄႈမၼ်းပဵၼ် ဢၽိႁေးလႃႉ၊ လုၵ်ႈယိင်း ဢေးလျႃႇၽႃႉ၊ လၢၼ်ယိင်း ယေႇသႄး၊ ၼၼ်ႉဢေႃႈ။-
ၶဝ်မီးလုၵ်ႈၸၢႆးသၢမ်ၵေႃႉ၊ဢၼ်ပဵၼ် ယုသႃႉ၊သေမရိ၊ ဢိၵ်ႇတင်း ၸႃႇႁမ်ႇ၊ ၸိူဝ်းၼၼ်ႉဢေႃႈ။-
လိုၼ်းၼၼ်ႉ၊မၼ်းသမ်ႉႁူမ်ႈပွင်းပဵၼ်ႁိူၼ်းလူၺ်ႈၵၼ်တင်း မႃႇၶႃႇ၊ လုၵ်ႈယိင်း ဢပႃႉသလုမ်ႇ၊ လႄႈၶဝ်မီးၵူၼ်းၸၢႆးသီႇၵေႃႉ၊ဢၼ်ပဵၼ် ဢၽိယႃႉ၊ဢတ်ႉတေႇ၊ၸိၸႃႉ၊ တင်း သေႇလေႃးမိတ်ႉ၊ ၸိူဝ်းၼၼ်ႉဢေႃႈ။-
ရူဝ်းပုမ်ႇ၊ ၼၼ်ႉတင်းသဵင်ႈတင်းလူင်မီးမေးသိပ်းပႅတ်ႇၵေႃႉတင်းၸိူင်ႉၼၢင်းႁူၵ်းသိပ်းၵေႃႉလႄႈလႆႈလုၵ်ႈၸၢႆးသၢဝ်းပႅတ်ႇၵေႃႉတင်းလုၵ်ႈယိင်းႁူၵ်းသိပ်းၵေႃႉဢေႃႈ။ ၼႂ်းမေးမၼ်းဢိၵ်ႇတင်းၸိူင်ႉၼၢင်းမၼ်းတင်းသဵင်ႈတင်းလူင်ၼၼ်ႉမၼ်းႁၵ်ႉ မႃႇၶႃႇ၊ လိူဝ်တွၼ်းၼႃႇသေပိူၼ်ႈလႄႈ၊-
မၼ်းၵျိူၵ်ႈႁၵ်ႉထုၵ်ႇၸႂ် ဢၽိယႃႉ၊ ၼႃႇသေပိူၼ်ႈၵႃႈၼႂ်းလုၵ်ႈလၢင်းမၼ်းတင်းမူတ်းလႄႈလိူၵ်ႈဢဝ် ဢၽိယႃႉ၊ ႁႂ်ႈပဵၼ်ၵေႃႉဢၼ်တၵ်းပဵၼ်ၶုၼ်ႁေႃၶမ်းဢေႃႈ။-
ရူဝ်းပုမ်ႇ၊ ၸိုင်၊ပႃးတင်းပိင်ႇၺႃႇဢၼ်လၵ်းလႅမ်ၼႃႇၸၵ်းၽႄပၼ်ၼႃႈၵၢၼ်တီႈလုၵ်ႈၸၢႆးမၼ်းတင်းလၢႆလႄႈဢဝ်ၶဝ်ၶျႃးတီႈယူႇဝႆႉၵႃႈတီႈဝဵင်းဢၼ်မၼ်ႈၶိူင်ႇၵႃႈဢၼ်မီးၵႃႈၼႂ်းဢိူင်ႇ ယုတႃႉ၊ တင်းဢိူင်ႇ ပိၼ်ႇယႃႇမိၼ်ႇ၊ ထၢၼ်ႈပေႃးၸွတ်ႇတူဝ်ႈၵႂႃႇဢေႃႈ။ မၼ်းဢဝ်ၶဝ်ႈၼမ်ႉတၢင်းၵိၼ်ပၼ်တီႈၶဝ်လိူင်ႇၼမ်ၼႃႇ၊ဢိၵ်ႇတင်းႁႃပၼ်မေးၼမ်ၼႃႇပုၼ်ႈၶဝ်ၼၼ်ႉဢေႃႈ။
မိူဝ်ႈဢၼ် ရူဝ်းပုမ်ႇ၊ ႁႂ်ႈသိုင်ႇၸိုင်ႈဝၢၼ်ႈမိူင်းမၼ်းတႄႇပဵၼ်ယဝ်ႉလႄႈဢႃႇၼႃႇၶုၼ်ႁေႃၶမ်းမၼ်းၼၼ်ႉႁႅင်းယႂ်ႇမႃးယဝ်ႉၼၼ်ႉၸိုင်၊မၼ်းဢိၵ်ႇတင်းၵူၼ်းမဵဝ်း ဢိသရေး၊ ၵႃႈမီးၸုၼ်ႉပႅတ်ႈတြႃး ထႃႇဝရႃႉၽြႃး၊ ဢေႃႈ။-
ၼႂ်းပီဢၼ် ရူဝ်းပုမ်ႇ၊ ၸၢမ်ႇႁၢင်ႈၸၢမ်ႇႁေႃလႆႈႁႃႈပီၼၼ်ႉ၊ ထႃႇဝရႃႉၽြႃး၊ ပၼ်တၢမ်ႇတီႈတၢင်းၽိတ်းၶဝ်ၼၼ်ႉဢေႃႈ။-
ၶုၼ်ႁေႃၶမ်း သိသၵ်ႉ၊ မိူင်း ဢေးၵျိပ်ႉ၊ ပႃးဢဝ်လေႃႉမႃႉသိုၵ်းႁဵင်ပၢႆသွင်ပၢၵ်ႇတင်းၵူၼ်းသိုၵ်းၶီႇမႃႉႁူၵ်းမိုၼ်ႇ၊ဢိၵ်ႇတင်းၵူၼ်းသိုၵ်းဢၼ်ဢမ်ႇၼပ်ႉဢၢၼ်ႇလႆႈ၊ဢၼ်ပဵၼ်ၵူၼ်းမိူင်း လိပ်ႉပီးယႃး၊ ၵူၼ်းမိူင်း သုၵိ၊ တင်းၵူၼ်းမိူင်း ဢေႇတီႇဢူဝ်းပီးယႃး၊ ၸိူဝ်းၼၼ်ႉၶီႇသိုၵ်းၶိုၼ်ႈၸူးဝဵင်း ယေႇရုသလႅမ်ႇ၊ ဢေႃႈ။-
သိသၵ်ႉ၊ ၼၼ်ႉတိုၵ်းဢဝ်ဝဵင်းဢၼ်မၼ်ႈၶိူင်ႇၸိူဝ်းဢၼ်မီးၵႃႈၼႂ်းမိူင်း ယုတႃႉ၊ ၼၼ်ႉယဝ်ႉၸင်ႇ၊ၵႂႃႇႁွတ်ႈထိုင်ၵႃႈတီႈဝဵင်း ယေႇရုသလႅမ်ႇ၊ ဢေႃႈ။
မိူဝ်ႈၼၼ်ႉ၊ပရေႃးၽႅတ်ႈ သေႇမႃႇယႃႉ၊ ၶဝ်ႈၸူးၶုၼ်ႁေႃၶမ်း ရူဝ်းပုမ်ႇ၊ ဢိၵ်ႇတင်းၶုၼ် ယုတႃႉ၊ တင်းလၢႆ၊ဢၼ်ၸုၵၼ်တုမ်ၵၼ်ၵႃႈၼႂ်းဝဵင်း ယေႇရုသလႅမ်ႇ၊ ႁႂ်ႈလႆႈလွတ်ႈၽေး သိသၵ်ႉ၊ ၼၼ်ႉဢေႃႈ။ မၼ်းလၢတ်ႈတီႈၶဝ်လႄႈဝႃႈ၊ “ ထႃႇဝရႃႉၽြႃး၊ မီးဢမိင်ႉလႄႈဝႃႈၸမ်ႉ၊ ‘သူဢွၼ်ၵၼ်ၸုၼ်ႉပႅတ်ႈၵဝ်ယဝ်ႉ။ ပိူဝ်ႈၼႆလႄႈတေႃႈလဵဝ်ၼႆႉၵဝ်ဢဝ်သူဢၢပ်ႈပၼ်ၵႃႈၼႂ်းမိုဝ်း သိသၵ်ႉ၊ ယဝ်ႉ၊’ ဝႃႈၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းဢိၵ်ႇတင်းၶုၼ်ၸိူဝ်းၼၼ်ႉဢွၼ်ၵၼ်မီးႁူဝ်ၸႂ်ဢၼ်ၶျႃးတႅမ်ႇလႄႈလၢတ်ႈဝႃႈ၊ “ဢၼ် ထႃႇဝရႃႉၽြႃး၊ ၸီႇယၢင်ႇၶိုင်ပွင်ၼႆႉပဵၼ်ဢၼ်သိုဝ်ႈတေႃႇဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ် ထႃႇဝရႃႉၽြႃး၊ ႁၼ်လွင်ႈတၢင်းၼၼ်ႉၸိုင်၊မၼ်းၸဝ်ႈသမ်ႉမီးဢမိင်ႉတီႈ သေႇမႃႇယႃႉ၊ ထႅင်ႈလႄႈဝႃႈ၊ “ၶဝ်ၶျႃးႁူဝ်ၸႂ်ၶဝ်တူၵ်းတီႈတႅမ်ႇယဝ်ႉ။ ပိူဝ်ႈၼႆလႄႈၵဝ်တၵ်းဢမ်ႇယႃႉၶဝ်ပႅတ်ႈ။ ၼႂ်းဝႃႈၼၼ်သေၵေႃႈ မိူဝ်ႈဢၼ် သိသၵ်ႉ၊ တိုၵ်းတေႃးၶဝ်ၼၼ်ႉ၊ၶဝ်တၵ်းတေလႆႈၵတ်းယဵၼ်ၶျၢမ်းသႃႇဢိတ်းဢွၼ်ႇၼိုင်ႈဢေႃႈ။ ဝဵင်း ယေႇရုသလႅမ်ႇ၊ တၵ်းဢမ်ႇလႆႈၶၢမ်ႇဢဝ်တၢင်းၸႂ်မႆႈၶႂ်ႈၸႃႉၵဝ်ထူၼ်ႈထူၼ်ႈတဵမ်တဵမ်ၵူၺ်း။-
ၵူၺ်းၵႃႈ၊ သိသၵ်ႉ၊ တၵ်းပႄႉၼႅင်ႇၶဝ်သေယဝ်ႉ၊ၶဝ်တၵ်းလႆႈႁုၸႅင်ႈလွင်ႈတၢင်းဢၼ်ႁဵတ်းဝၢတ်ႈတီႈၵဝ်ၼၼ်ႉ၊ပႅၵ်ႇပိူင်ႈၵၼ်တင်းလွင်ႈတၢင်းဢၼ်ႁဵတ်းဝၢတ်ႈတီႈၶုၼ်လေႃးၵီႇၼၼ်ႉၵႃႈႁိုဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵွပ်ႈပိူဝ်ႈၼႆလႄႈၶုၼ်ႁေႃၶမ်း သိသၵ်ႉ၊ ၶီႇသိုၵ်းတိုၵ်းဢဝ်ဝဵင်း ယေႇရုသလႅမ်ႇ၊ သေယဝ်ႉ၊သိမ်းဢဝ်ဢုၵ်ႉၸႃႇၽၼ်ႇတႃႇၵႃႈတီႈၵျွင်းပိၵ်ႈမၢၼ်ႇၸဝ်ႈ၊ဢိၵ်ႇတင်းၵႃႈတီႈႁေႃၸဝ်ႈၵႂႃႇဢေႃႈ။ ၶဝ်သိမ်းဢဝ်ၵႃႈမီးတင်းသဵင်ႈတင်းလူင်၊ဢၼ်ပႃးၸဵမ်ၶႅပ်းႁႄႉလၢၵ်ႈၼၢၵ်ႈၶမ်းဢၼ်ၶုၼ်ႁေႃၶမ်း သေႃးလမုၼ်ႇ၊ ႁဵတ်းဝႆႉၸိူဝ်းၼၼ်ႉဢေႃႈ။-
ၶုၼ်ႁေႃၶမ်း ရူဝ်းပုမ်ႇ၊ သမ်ႉၶိုၼ်းႁဵတ်းၶႅပ်းႁႄႉလၢၵ်ႈၼၢၵ်ႈတွင်းလိူင်တႅၼ်းၶႅပ်းႁႄႉလၢၵ်ႈၼၢၵ်ႈၶမ်းၸိူဝ်းၼၼ်ႉသေယဝ်ႉ၊ဢၢပ်ႈပၼ်ၵႃႈၼႂ်းမိုဝ်းႁူဝ်သိုၵ်းႁူဝ်ႁၢၼ်ၸိူဝ်းဢၼ်တူၵ်းပုၼ်ႈၽွၼ်းပႂ်ႉၽၵ်းတူပေႃႈၸဝ်ႈၼၼ်ႉဢေႃႈ။-
ယၢမ်းမိူဝ်ႈဢၼ်ၶုၼ်ႁေႃၶမ်း ရူဝ်းပုမ်ႇ၊ ၶဝ်ႈၸူးၵႃႈၼႂ်းၵျွင်းပိၵ်ႈမၢၼ်ႇၸဝ်ႈၵူႈပွၵ်ႈၼၼ်ႉၵူၼ်းပႂ်ႉယၢမ်းတင်းလၢႆယိပ်းၵမ်ၶႅပ်းႁႄႉလၢၵ်ႈၼၢၵ်ႈၸိူဝ်းၼၼ်ႉၵႂႃႇၸွမ်းလႄႈမိူဝ်ႈဢၼ်ၶုၼ်ႁေႃၶမ်း ရူဝ်းပုမ်ႇ၊ ပွၵ်ႈၶိုၼ်းၵႂႃႇယဝ်ႉၸိုင်၊ၶိုၼ်းဢဝ်ၵဵပ်းသိမ်းဝႆႉၵႃႈၼႂ်းလုၵ်းပႂ်ႉယၢမ်းၼၼ်ႉဢေႃႈ။-
ၵွပ်ႈပိူဝ်ႈဢၼ်ၶုၼ်ႁေႃၶမ်း ရူဝ်းပုမ်ႇ၊ ၶျႃးႁူဝ်ၸႂ်မၼ်းတူၵ်းတႅမ်ႇတီႈ ထႃႇဝရႃႉၽြႃး၊ ၼၼ်ႉလႄႈ၊တၢင်းၸႂ်မႆႈၶႂ်ႈၸႃႉ ထႃႇဝရႃႉၽြႃး၊ ယင်းဢမ်ႇယႃႉမၼ်းပႅတ်ႈမူတ်းမူတ်းသဵင်ႈသဵင်ႈလႄႈၵႃႈၼႂ်းမိူင်း ယုတႃႉ၊ ၼၼ်ႉယင်းမီးတၢင်းဢၼ်ၼိမ်ၼိမ်လီလီယူႇဢေႃႈ။
ၼင်ႇၼၼ်လႄႈၶုၼ်ႁေႃၶမ်း ရူဝ်းပုမ်ႇ၊ ဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရုသလႅမ်ႇ၊ ႁႂ်ႈတၼ်းၶူဝ်းမၼ်းတႄႇမၼ်ႈယူႇၼႂ်းဢရႃႇၶုၼ်ႁေႃၶမ်းဢေႃႈ။ ယၢမ်းမိူဝ်ႈဢၼ်မၼ်းၸႃႉၼင်ႈႁၢင်ႈၼင်ႈႁေႃၼၼ်ႉဢသၢၵ်ႈလႆႈသီႇသိပ်းဢဵတ်းပီလႄႈဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရုသလႅမ်ႇ၊ သိပ်းၸဵတ်းပီ၊ဝဵင်းၼၼ်ႉပဵၼ်ဝဵင်းဢၼ် ထႃႇဝရႃႉၽြႃး၊ လိူၵ်ႈဢဝ်ၵႃႈၼႂ်းသိုင်ႇတိူင်းမိူင်း ဢိသရေး၊ ၵႃႈမီးတင်းသဵင်ႈတင်းလူင်ႁႂ်ႈပဵၼ်တီႈဢၼ်ၵူၼ်းတင်းလၢႆတၵ်းႁဵတ်းဝၢတ်ႈၵူဝ်းၵႂၢႆႇမၼ်းၸဝ်ႈၼၼ်ႉဢေႃႈ။ မႄႈ ရူဝ်းပုမ်ႇ၊ ပဵၼ် ၼေႇမႃႉ၊ ၵူၼ်းမဵဝ်း ဢမ်ႇမုၼ်ႇ၊ ဢေႃႈ။-
မၼ်းႁဵတ်းတုၸရိူၵ်ႈၵွပ်ႈပိူဝ်ႈဢၼ်မၼ်းဢမ်ႇႁႃဢဝ်ဢလူဝ်ႇ ထႃႇဝရႃႉၽြႃး၊ ၼၼ်ႉဢေႃႈ။
လွင်ႈတၢင်းဢၼ် ရူဝ်းပုမ်ႇ၊ ႁဵတ်းၸႃႉၸဵမ်ငဝ်ႈတေႃႇပၢႆ၊ဢိၵ်ႇတင်းလွင်ႈၸိူဝ်ႉၶိူဝ်းလုၵ်ႈလၢၼ်မၼ်းၸိူဝ်းၼၼ်ႉၸိုင်၊တႅမ်ႈမၢႆဝႆႉၵႃႈၼႂ်းလိၵ်ႈပိုၼ်းပရေႃးၽႅတ်ႈ သေႇမႃႇယႃႉ၊ ဢိၵ်ႇတင်းလိၵ်ႈပျႃႇတိၵ်ႈ ဢိတ်ႉတေႃႇ၊ ၵေႃႉဢၼ်ပဵၼ်ၵူၼ်းဢၼ်ႁူပွင်ႇတႃလႅင်းၼၼ်ႉဢေႃႈ။ ရူဝ်းပုမ်ႇ၊ ဢိၵ်ႇတင်း ယေႇရူဝ်းပုမ်ႇ၊ ၼၼ်ႉပဵၼ်သိုၵ်းပဵၼ်သိူဝ်ၵၼ်ယူႇသေႇသေႇဢေႃႈ။-
ရူဝ်းပုမ်ႇ၊ ၼၼ်ႉၼွၼ်းၽႄးၸွမ်းပူႇမွၼ်ႇမၼ်းတင်းလၢႆလႄႈဢဝ်သၢင်းၵျူဝ်ႇဝႆႉၵႃႈၼႂ်းပႃႇႁဵဝ်ႈၸဝ်ႈဝဵင်း တႃႇဝိတ်ႈ၊ ဢေႃႈ။ လုၵ်ႈၸၢႆးမၼ်း ဢၽိယႃႉ၊ သိုပ်ႇၼင်ႈႁၢင်ႈၼင်ႈႁေႃဢေႃႈ။
ၼႂ်းပီဢၼ်ၶုၼ်ႁေႃၶမ်း ယေႇရူဝ်းပုမ်ႇ၊ ၼင်ႈႁၢင်ႈၼင်ႈႁေႃသိပ်းပႅတ်ႇပီၼၼ်ႉ ဢၽိယႃႉ၊ ၶိုၼ်ႈပဵၼ်ၶုၼ်ႁေႃၶမ်းမိူင်း ယုတႃႉ၊ လႄႈဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရုသလႅမ်ႇ၊ သၢမ်ပီဢေႃႈ။-
မႄႈမၼ်းပဵၼ် မိၵ်ႉၶယႃႉ၊ လုၵ်ႈယိင်း ဢုရေးလႃႉ၊ ၵူၼ်းဝဵင်း ၵိပိယႃႉ၊ ဢေႃႈ။ ဢၽိယႃႉ၊ တင်း ယေႇရူဝ်းပုမ်ႇ၊ ပဵၼ်သိုၵ်းပဵၼ်သိူဝ်ၵၼ်ဢေႃႈ။-
ဢၽိယႃႉ၊ ၼၼ်ႉပႃးဢဝ်ႁူဝ်ႁၢၼ်ၵူၼ်းသိုၵ်းသီႇသႅၼ်ၶီႇသိုၵ်းၶိုၼ်ႈၵႂႃႇလႄႈ ယေႇရူဝ်းပုမ်ႇ၊ ၵေႃႈဢဝ်ႁူဝ်ႁၢၼ်ၵူၼ်းသိုၵ်းပႅတ်ႇသႅၼ်ႁႄႉတိုၵ်းတေႃးဢေႃႈ။
တပ်ႉသိုၵ်းသွင်ၽၢႆႇၼၼ်ႉႁူပ်ႉထူပ်းၵၼ်ၵႃႈၼိူဝ်မိူင်းလွႆ ဢေႇၽရိမ်ႇ၊ ဢေႃႈ။ မိူဝ်ႈၼၼ်ႉၶုၼ်ႁေႃၶမ်း ဢၽိယႃႉ၊ ၶိုၼ်ႈၵႂႃႇၵႃႈတီႈလွႆ ၸေႇမရိမ်ႇ၊ သေယဝ်ႉ၊ႁွင်ႉသႅၼ်ႇလၢတ်ႈလႄႈဝႃႈ၊ “ ယေႇရူဝ်းပုမ်ႇ၊ ဢိၵ်ႇတင်းၵူၼ်း ဢိသရေး၊ တင်းသဵင်ႈတင်းလူင်ၶဝ်႟။ ဢွၼ်ၵၼ်ထွမ်ႇငိၼ်းတႃႉ။-
သူဢမ်ႇႁုလွင်ႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ႁဵတ်းပတိၺိၺ်ႇဢၼ်ဢမ်ႇလုဢမ်ႇလႅဝ် ၼၼ်ႉဝႆႉလူၺ်ႈၵၼ်တင်း တႃႇဝိတ်ႈ၊ လႄႈဢဝ်ဢရႃႇၶုၼ်ႁေႃၶမ်းဢၢပ်ႈပၼ်တီႈမၼ်း၊ဢိၵ်ႇတင်းလုၵ်ႈလၢၼ်ၸဝ်ႈတင်းလၢႆႁႂ်ႈလႆႈဢုပ်ႉပိူင်ႇမိူင်း ဢိသရေး၊ တႃႇသေႇၼၼ်ႉႁိုဝ်း။-
ယေႇရူဝ်းပုမ်ႇ၊ လုၵ်ႈၸၢႆး ၼေႇပတ်ႉ၊ ၼၼ်ႉလုၵ်ႉၽိုၼ်ႉၶုၼ်လူင် သေႃးလမုၼ်ႇ၊ ဢၼ်ပဵၼ်ၶုၼ်ႁေႃၶမ်းမၼ်းၼၼ်ႉယဝ်ႉ။-
မၼ်းၼၼ်ႉၸူဝ်းဢဝ်ၶဝ်ၸိူဝ်းဢၼ်ယူႇမဝ်ၵိၼ်မၢင်လႄႈပဵၼ်ၵူၼ်းတိုဝ်ၵူၼ်းတၼ်တင်းလၢႆၸုတုမ်ၵႃႈတီႈမၼ်းသေယဝ်ႉ၊ၶေႉၶဵင်ႇ ရူဝ်းပုမ်ႇ၊ လုၵ်ႈၸၢႆးၸဝ်ႈမၼ်း သေႃးလမုၼ်ႇ၊ ၼႂ်းမိူဝ်ႈဢၼ် ရူဝ်းပုမ်ႇ၊ ယင်းလဵၵ်ႉယင်းၼုမ်ႇ၊ၸႂ်ဢမ်ႇပႆႇၶႅင်လႄႈဢမ်ႇႁၢမ်ႈတၢပ်ႈႁႄႉၶႅၼ်ၶဝ်လႆႈၼၼ်ႉဢေႃႈ။-
တေႃႈလဵဝ်ၼႆႉၵေႃႈသူယင်းတိုၵ်ႉဢၢင်ႈဢၢၼ်းၶေႉၶဵင်ႇဢႃႇၼႃႇႁၢင်ႈႁေႃဢၼ် ထႃႇဝရႃႉၽြႃး၊ ဢၢပ်ႈဝႆႉပၼ်တီႈလုၵ်ႈလၢၼ် တႃႇဝိတ်ႈ၊ ၼၼ်ႉယူႇလူင်ပႄႇ။ သူပဵၼ်မုၵ်ႉယႂ်ႇၸိူဝ်းလူင်ဢၼ်ပႃးဢဝ်ႁုၼ်ႇႁၢင်ႈဝူဝ်းၶမ်းဢၼ် ယေႇရူဝ်းပုမ်ႇ၊ ႁဵတ်းဝႆႉႁႂ်ႈပဵၼ်ၽြႃးသူၼၼ်ႉဢေႃႈ။-
သူဢွၼ်ၵၼ်လိုပ်ႈပႅတ်ႈယဵၸ်ႈပရေႃးႁဵၵ်ႈ ထႃႇဝရႃႉၽြႃး၊ ဢၼ်ပဵၼ်လုၵ်ႈလၢၼ် ဢႃႇရုၼ်ႇ၊ တင်းလၢႆတင်းၵူၼ်းၸိူဝ်ႉၶိူဝ်း လေႇဝိ၊ တင်းလၢႆဢွၵ်ႇပႅတ်ႈယဝ်ႉ။ ပုၼ်ႈတၢင်တူဝ်ၶဝ်ၼၼ်ႉသူသမ်ႉၶၢၼ်းယဵၸ်ႈပရေႃးႁဵၵ်ႈတၢင်ႇၵေႃႉၸိူဝ်းၼၼ်ႉၸွမ်းၵႃႈၼင်ႇဢၼ်ထုင်းၸၢမ်ႇၵူၼ်းတၢင်ႇၸိူဝ်ႉတၢင်ႇၶိူဝ်းမီးၼၼ်ႉယဝ်ႉ။ ၽူႈလႂ်သေဢမ်ႇဝႃႈ၊ၵေႃႉဢၼ်မႃးသၢၵ်ႈၵၢပ်ႈတူဝ်မၼ်းလူၺ်ႈၵၼ်တင်းဝူဝ်းဢွၼ်ႇတူဝ်ၼိုင်ႈ၊ဢမ်ႇၼၼ်သူဝ်းၸဵတ်းတူဝ်ၼၼ်ႉ၊မၼ်းလႆႈပဵၼ်ယဵၸ်ႈပရေႃးႁဵၵ်ႈထၢမ်းၼႃႈၵၢၼ်တီႈမဵဝ်းဢၼ်ဢမ်ႇၸႂ်ႈၽြႃးၼၼ်ႉဢေႃႈ။
“ႁဝ်းၼႆႉၸမ်ႉ၊ ထႃႇဝရႃႉၽြႃး၊ ပဵၼ်ၽြႃးပဵၼ်ၸဝ်ႈႁဝ်းယူႇလႄႈႁဝ်းဢမ်ႇၸုၼ်ႉပႅတ်ႈမၼ်းၸဝ်ႈ။ ယဵၸ်ႈပရေႃးႁဵၵ်ႈဢၼ်ပဵၼ်လုၵ်ႈလၢၼ် ဢႃႇရုၼ်ႇ၊ ၸိူဝ်းၼၼ်ႉၵိုတ်ႉႁၢပ်ႇၼႃႈၵၢၼ်ၶဝ်ယူႇလႄႈမဵဝ်းၸိူဝ်ႉၶိူဝ်း လေႇဝိ၊ တင်းလၢႆ ၵမ်ႉၵႅမ်ၶဝ်ယူႇဢေႃႈ။-
ၶဝ်ဢွၼ်ၵၼ်သၢၵ်ႈလူႇတၢင်းလူႇဢၼ်ႁွမ်ဢၼ်ႁူၺ်း၊ဢိၵ်ႇတင်းတၢင်းလူႇဢၼ်တုတ်ႇၽႆးတင်းတူဝ်ၼၼ်ႉၵူႈၶမ်ႈၵူႈၼႂ်ယူႇဢေႃႈ။ ၶဝ်သၢၵ်ႈလူႇတၢင်းလူႇၶဝ်ႈမုၼ်းၵႃႈၼိူဝ်ၽိူၼ်ၸဝ်ႈဢၼ်မူတ်းၸၢင်ႇၼၼ်ႉလႄႈတႆႈၽႆးၵႃႈတီႈၶဵင်ႇတႆႈၽႆးၶမ်းၼၼ်ႉယူႇၵူႈၶမ်ႈၵူႈၶမ်ႈဢေႃႈ။ ႁဝ်းပႂ်ႉၵမ်ႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉဝႆႉၼၼ်ႉယူႇဢေႃႈ။ သူၸမ်ႉ၊ၸုၼ်ႉပႅတ်ႈမၼ်းၸဝ်ႈယဝ်ႉ။-
တူဝ်ၽြႃးပဵၼ်ၸဝ်ႈၼၼ်ႉဢွၼ်ႁူဝ်ဢွၼ်ၵၼ်ႁဝ်းယူႇလႄႈ၊ယဵၸ်ႈပရေႃးႁဵၵ်ႈမၼ်းၸဝ်ႈတင်းလၢႆၵေႃႈယိပ်းၵမ်ၼႄးၶရႃႇပုၼ်ႈဢၼ်တၵ်းပဝ်ႇတိုင်ႈတိုၵ်းယူင်းႁဝ်းႁႂ်ႈလႆႈတိုၵ်းတေႃးသူၼၼ်ႉယူႇဢေႃႈ။ ၵူၼ်းမဵဝ်း ဢိသရေး၊ ၶဝ်႟။ ယႃႇပေတိုၵ်းတေႃး ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇမွၼ်ႇသူၼၼ်ႉ။ သူဢမ်ႇပႄႉလႆႈၵူၺ်း၊” ဝႃႈၼင်ႇၼႆဢေႃႈ။
မိူဝ်ႈယၢမ်းၼၼ်ႉ ယေႇရူဝ်းပုမ်ႇ၊ ပွႆႇတပ်ႉသိုၵ်းမူၵ်းမၼ်းၵမ်ႈၽွင်ႈႁႂ်ႈၵႂႃႇလွမ်တိုၵ်းၽၢႆႇတၢင်းလင်တပ်ႉသိုၵ်းၵူၼ်း ယုတႃႉ၊ ၶဝ်ၼၼ်ႉလႄႈ၊တပ်ႉသိုၵ်းမၼ်းတင်းလၢႆၸမ်ႉ၊မီးယူႇၽၢႆႇတၢင်းၼႃႈဝႆႉဢေႃႈ။-
ၵူၼ်း ယုတႃႉ၊ တင်းလၢႆႁၼ်လွင်ႈဢၼ်ၶဝ်လႆႈၶၢမ်ႇပိူၼ်ႈဝႅတ်ႉလွမ်ႉဝႆႉၼၼ်ႉလႄႈၶဝ်ဢွၼ်ၵၼ်ၵၢဝ်ႇႁႃ ထႃႇဝရႃႉၽြႃး၊ သေယဝ်ႉ၊ယဵၸ်ႈပရေႃးႁဵၵ်ႈတင်းလၢႆၵေႃႈပဝ်ႇတိုင်ႈၼႄးၶရႃႇၶဝ်ဢေႃႈ။-
ၵူၼ်း ယုတႃႉ၊ ၶဝ်ဢွၼ်ၵၼ်ႁွင်ႉသႅၼ်ႇလႄႈၶိုၼ်ႈတိုၵ်းၼႂ်းတၢင်းဢၼ် ဢၽိယႃႉ၊ ဢွၼ်ႁူဝ်ၶဝ်ၼၼ်ႉသေယဝ်ႉ၊ၽြႃးပဵၼ်ၸဝ်ႈႁႂ်ႈ ယေႇရူဝ်းပုမ်ႇ၊ တင်းတပ်ႉသိုၵ်းၵူၼ်း ဢိသရေး၊ ၶဝ်တူၵ်းသုမ်းဢေႃႈ။-
ၵူၼ်း ဢိသရေး၊ တင်းလၢႆၼီပၢႆႈသေၵႃႈတီႈၵူၼ်း ယုတႃႉ၊ ၵႂႃႇသေယဝ်ႉ၊ၽြႃးပဵၼ်ၸဝ်ႈႁႂ်ႈၵူၼ်း ယုတႃႉ၊ ဢုပ်ႉပိူင်ႇၵႃႈၼိူဝ်ၶဝ်သေဢေႃႈ။-
ဢၽိယႃႉ၊ တင်းၵူၼ်းသိုၵ်းမၼ်းတင်းလၢႆဢွၼ်ၵၼ်ၶႃႈၽၼ်းဢဝ်တၢႆရၢၼ်ႇသူႇၶဝ်ၼမ်ၼႃႇလူင်လၢင်လႄႈၵူၼ်းမဵဝ်း ဢိသရေး၊ ဢၼ်ၵတ်ႉဢၼ်ၶႅၼ်ႇတင်းလၢႆလႆႈတၢႆႁႃႈသႅၼ်ဢေႃႈ။-
ၼင်ႇၼၼ်လႄႈၵူၼ်း ယုတႃႉ၊ လႆႈပႄႉလႆႈၼႅင်ႇၵႃႈၼိူဝ်ၵူၼ်းမဵဝ်း ဢိသရေး၊ ၵွပ်ႈပိူဝ်ႈဢၼ်ၶဝ်ဢိင်သွၼ်ႈပိုင်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇမွၼ်ႇၶဝ်ၼၼ်ႉဢေႃႈ။
ဢၽိယႃႉ၊ လိုပ်ႈၸွမ်းလမ်းၸွမ်းတပ်ႉသိုၵ်း ယေႇရူဝ်းပုမ်ႇ၊ လႄႈပႄႉၼႅင်ႇသိမ်းဢဝ်ဝဵင်းမၼ်းၵမ်ႈၽွင်ႈဢၼ်ပဵၼ်ဝဵင်း ပေႇသလႃႉ၊ ဝဵင်း ယေႇသၼႃႉ၊ တင်းဝဵင်း ဢေႇၽရုၼ်ႇ၊ ပႃးလူၺ်ႈၵၼ်တင်းဝၢၼ်ႈၼွၵ်ႈၶဝ်တင်းလၢႆၼၼ်ႉဢေႃႈ။-
ၼႂ်းၸူဝ်ႈပၢၼ် ဢၽိယႃႉ၊ ဢုပ်ႉပိူင်ႇၸၢမ်ႇၸႃးၼၼ်ႉ၊ ယေႇရူဝ်းပုမ်ႇ၊ ဢမ်ႇၶိုၼ်းလႆႈဢႃႇၼႃႇတၼ်းၶူဝ်းမၼ်း။ ၵမ်းလိုၼ်းသုတ်း၊ ထႃႇဝရႃႉၽြႃး၊ ပၼ်တၢမ်ႇမၼ်းလႄႈမၼ်းတၢႆသေဢေႃႈ။
ဢၽိယႃႉ၊ ၸမ်ႉ၊တၼ်းၶူဝ်းယႂ်ႇမႃးတိၵ်းတိၵ်းဢေႃႈ။ မၼ်းမီးမေးသိပ်းသီႇၵေႃႉလႄႈလႆႈလုၵ်ႈၸၢႆးသၢဝ်းသွင်ၵေႃႉ၊လုၵ်ႈယိင်းသိပ်းႁူၵ်းၵေႃႉဢေႃႈ။-
လွင်ႈ ဢၽိယႃႉ၊ ဢၼ်ယင်းၵိုတ်းယင်းၵျၢၼ်ႇ၊ၵႃႈဢၼ်မၼ်းလၢတ်ႈမၼ်းႁဵတ်းၸိူဝ်းၼၼ်ႉ၊တႅမ်ႈမၢႆဝႆႉမီးယူႇၼႂ်းလိၵ်ႈပိုၼ်းပရေႃးၽႅတ်ႈ ဢိတ်ႉတေႃႇ၊ ဢေႃႈ။
ၶုၼ်ႁေႃၶမ်း ဢၽိယႃႉ၊ ၼွၼ်းၽႄးၸွမ်းပူႇမွၼ်ႇမၼ်းတင်းလၢႆသေယဝ်ႉ၊လႆႈဢဝ်သၢင်းၵျူဝ်ႇဝႆႉၵႃႈၼႂ်းပႃႇႁဵဝ်ႈဝဵင်း တႃႇဝိတ်ႈ၊ ဢေႃႈ။ လုၵ်ႈၸၢႆးမၼ်း ဢႃႇသႃႉ၊ သိုပ်ႇၼင်ႈႁၢင်ႈၼင်ႈႁေႃသေယဝ်ႉ၊ၼႂ်းၸူဝ်ႈပၢၼ်မၼ်းၼၼ်ႉမိူင်းၸဝ်ႈၼိမ်လီယဵၼ်လီသိပ်းပီတဵမ်တဵမ်ဢေႃႈ။-
ဢႃႇသႃႉ၊ ၼၼ်ႉၵမ်ၵျၢင်ႉလွင်ႈလီလွင်ႈသိုဝ်ႈတေႃႇလႄႈထုၵ်ႇၸႂ်ၵျိူၵ်ႈၸႂ် ထႃႇဝရႃႉၽြႃး၊ ၽြႃးပဵၼ်ၸဝ်ႈမၼ်းဢေႃႈ။-
မၼ်းပႄႇၽဵဝ်ႈပႅတ်ႈၶဵင်ႇတၢင်းလူႇၵူၼ်းတၢင်ႇၸိူဝ်ႉတၢင်ႇမဵဝ်းလႂ်၊ထႃႇၼႃႉတီႈဝႆႈၽြႃးတၢင်ႇသူႇတၢင်ႇပႃးလႂ်ဢေႃႈ။ မၼ်းၵိူၼ်ႇယႃႉပႅတ်ႈသဝ်တီႈၵူဝ်းၵႂၢႆႇလႂ်၊ဢိၵ်ႇတင်းၽၼ်းပႅတ်ႈသဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ လႂ်ဢေႃႈ။-
မၼ်းပူင်ဢမိင်ႉႁႂ်ႈၵူၼ်း ယုတႃႉ၊ တင်းလၢႆပႂ်ႉၵမ်ပႂ်ႉၸွမ်းဢလူဝ်ႇ ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇမွၼ်ႇၶဝ်ၼၼ်ႉလႄႈၵမ်ၵျၢင်ႉၸွမ်းတြႃးၸဝ်ႈ၊ဢိၵ်ႇတင်းပိင်းၺၢပ်ႈၸဝ်ႈဢေႃႈ။-
ၵွပ်ႈပိူဝ်ႈဢၼ်မၼ်းပႄႇၽဵဝ်ႈပႅတ်ႈထႃႇၼႃႉတီႈဝႆႈၽြႃးတၢင်ႇသူႇတၢင်ႇပႃးလႂ်၊ဢိၵ်ႇတင်းၶဵင်ႇတၢင်းလူႇဢၼ်တႆႈတဵၼ်းႁွမ်လႂ်၊သေၵႃႈတီႈမိူင်း ယုတႃႉ၊ ၵႃႈမီးတင်းသဵင်ႈတင်းလူင်ၼၼ်ႉလႄႈ ၼႂ်းၸူဝ်ႈပၢၼ်မၼ်းၼၼ်ႉသိုင်ႇၸိုင်ႈဝၢၼ်ႈမိူင်းတဵတ်ႇလီၼိမ်လီဢေႃႈ။-
မၼ်းသမ်ႉတႄႇႁဵတ်းဝဵင်းဢၼ်မၼ်ႈၶိူင်ႇတင်းလၢႆၵႃႈၼႂ်းမိူင်း ယုတႃႉ၊ ၵႃႈၼႂ်းၸူဝ်ႈပၢၼ်မၼ်းၼၼ်ႉလႄႈဢမ်ႇမီးသိုၵ်းမီးသိူဝ်ပီမိူင်းၼမ်ၼႃႇၵွပ်ႈပိူဝ်ႈဢၼ် ထႃႇဝရႃႉၽြႃး၊ ပၼ်တၢင်းၼိမ်တီႈမၼ်းၼၼ်ႉဢေႃႈ။-
လွင်ႈမၼ်းၸမ်ႉ၊မၼ်းမီးဢမိင်ႉတီႈၵူၼ်းမိူင်း ယုတႃႉ၊ တင်းလၢႆလႄႈဝႃႈ၊ “ဢွၼ်ၵၼ်ပွင်ႁဵတ်းပွင်မႄးဝဵင်းဢၼ်မၼ်ႈၶိူင်ႇလႄႈႁဵတ်းလမ်းဝဵင်းလႂ်၊သဝ်လၢင်းလႂ်၊တင်းၽၵ်းတူဢၼ်ဢိုတ်းႁပ်းလႄႈသွတ်ႇၵိူၼ်ႇဝႆႉၼၼ်ႉၸိူဝ်းၼၼ်ႉတႃႉႁဝ်း။ ႁဝ်းလႆႈဢုပ်ႉပိူင်ႇဢုပ်ႉထိင်းမိူင်းၸဝ်ႈယူႇၵွပ်ႈပိူဝ်ႈဢၼ်ႁဝ်းၵမ်ၵျၢင်ႉၸွမ်းဢလူဝ်ႇ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၼၼ်ႉဢေႃႈ။ မၼ်းၸဝ်ႈၵႅတ်ႇၶႄႁႄႉၵင်ႈႁဝ်းယူႇၵူႈၽၢႆႇၵူႈပႃႈလႄႈႁဝ်းလႆႈယူႇတဵတ်ႇလီၼိမ်လီဢေႃႈ၊” ဝႃႈၼင်ႇၼႆလႄႈၶဝ်ဢွၼ်ၵၼ်ပွင်ႁဵတ်းပွင်မႄးႁႂ်ႈယဝ်ႉတူဝ်ႈလီငၢမ်းဢေႃႈ။-
ၶုၼ်ႁေႃၶမ်း ဢႃႇသႃႉ၊ ၼၼ်ႉမီးႁူဝ်ႁၢၼ်ၵူၼ်းသိုၵ်းမဵဝ်း ယုတႃႉ၊ ဢၼ်ယိပ်းၵမ်ၶႅပ်းႁႄႉလၢၵ်ႈၼၢၵ်ႈတင်းႁွၵ်ႇၼၼ်ႉ၊ဢိၵ်ႇတင်းႁူဝ်ႁၢၼ်ၵူၼ်းသိုၵ်းမဵဝ်း ပိၼ်ႇယႃႇမိၼ်ႇ၊ ဢၼ်ယိပ်းၵမ်ၶိူင်ႈႁႄႉလၢၵ်ႈၼၢၵ်ႈဢွၼ်ႇလႂ်တင်းၵၢင်ႇလႂ်ၼၼ်ႉ၊မီးသွင်သႅၼ်ပၢႆပႅတ်ႇမိုၼ်ႇလႄႈၶဝ်တင်းသဵင်ႈတင်းလူင်ၼၼ်ႉ၊ပဵၼ်ၵူၼ်းႁတ်းၵူၼ်းႁၢၼ်ဢၼ်ၽိုၵ်းဝႆႉတင်းမူတ်းဢေႃႈ။
မီးၵူၼ်း ဢေႇတီႇဢူဝ်းပီးယႃး၊ ဢၼ်လႆႈၸိုဝ်ႈ ၸိရႃႉ၊ ၼၼ်ႉၶီႇသိုၵ်းလူၺ်ႈၵၼ်တင်းႁူဝ်ႁၢၼ်ၵူၼ်းသိုၵ်းမၼ်းလၢၼ်ႉၼိုင်ႈ၊တင်းတပ်ႉလေႃႉမႃႉသိုၵ်းသၢမ်ပၢၵ်ႇမႃးႁွတ်ႈထိုင်ၵႃႈတီႈဝဵင်း မရေးသႃႉ၊ ဢေႃႈ။-
ဢႃႇသႃႉ၊ ၵေႃႈၶီႇသိုၵ်းႁႂ်ႈလႆႈႁႄႉတိုၵ်းလႄႈတင်းသွင်ၽၢႆႇၵေႃႈဢဝ်တီႈယူႇယၼ်ႇတပ်ႉတေႃႇၼႃႈၸူးၵၼ်ၵႃႈတီႈပၢင်ႇႁူၺ်ႈ သေႇၽသႃႉ၊ ၵႃႈတီႈဝဵင်း မရေးသႃႉ၊ ၼၼ်ႉဢေႃႈ။-
ဢႃႇသႃႉ၊ ၼၼ်ႉသူးတွင်းတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈမၼ်းလႄႈဝႃႈ၊ “ ထႃႇဝရႃႉၽြႃး၊ တီႈၶႃႈ။ မိူၼ်ၸိူဝ်ႉၼင်ႇဢၼ်ၸဝ်ႈႁဝ်းၸွႆႈထႅမ်ၵေႃႉဢၼ်ႁႅင်းယႂ်ႇၼၼ်ႉတီႈၵေႃႉဢၼ်ႁႅင်းလဵၵ်ႉၵေႃႈၸဝ်ႈႁဝ်းၸွႆႈထႅမ်လႆႈငၢႆႈငၢႆႈတီႈၶႃႈဢေႃႈ။ တေႃႈလဵဝ်ၼႆႉၶႅၼ်းတေႃႈၸွႆႈထႅမ်ၶႃႈၸဝ်ႈႁဝ်းၶဝ်သေၵမ်းတီႈၶႃႈ။ ဢူဝ်း ထႃႇဝရႃႉၽြႃး၊ ၽြႃးပဵၼ်ၸဝ်ႈတီႈၶႃႈ။ ၶႃႈၸဝ်ႈႁဝ်းၶဝ်ဢိင်ပိုင်ႈၼႃႇမႃႉၸိုဝ်ႈသဵင်ၸဝ်ႈႁဝ်းသေလႄႈၶီႇသိုၵ်းႁႂ်ႈလႆႈတိုၵ်းတပ်ႉသိုၵ်းဢၼ်ယႂ်ႇဢၼ်လူင်ၼႆႉတီႈၶႃႈဢေႃႈ။ ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းပဵၼ်ၽြႃးပဵၼ်ၸဝ်ႈၶႃႈၸဝ်ႈႁဝ်းၶဝ်တီႈၶႃႈဢေႃႈ။ ၽူႈလႂ်ဢမ်ႇမီးတီႈမုင်ႈမွင်းတႃႇတေပႄႉၼႅင်ႇၸဝ်ႈႁဝ်းလႆႈၼၼ်ႉတီႈၶႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ပႄႉၼႅင်ႇၵူၼ်း ဢေႇတီႇဢူဝ်းပီးယႃး၊ တင်းလၢႆယၢမ်းမိူဝ်ႈဢၼ် ဢႃႇသႃႉ၊ တင်းတပ်ႉသိုၵ်းၵူၼ်း ယုတႃႉ၊ ၶီႇသိုၵ်းတိုၵ်းတေႃးၶဝ်ၼၼ်ႉလႄႈ၊ၵူၼ်း ဢေႇတီႇဢူဝ်းပီးယႃး၊ တင်းလၢႆဢွၼ်ၵၼ်ၼီပၢႆႈဢေႃႈ။-
ဢႃႇသႃႉ၊ ဢိၵ်ႇတင်းတပ်ႉသိုၵ်းမၼ်းၸိူဝ်းၼၼ်ႉလိုပ်ႈလမ်းၸွမ်းတေႃႇထိုင်ႁွတ်ႈဝဵင်း ၵေႇရႃႇ၊ ပုၼ်ႉဢေႃႈ။ ၵူၼ်း ဢေႇတီႇဢူဝ်းပီးယႃး၊ လႆႈလူမ်ႉတၢႆၼမ်ၼႃႇတပ်ႉသိုၵ်းၶဝ်ထၢၼ်ႈပေႃးဢမ်ႇႁတ်းၶိုၼ်းႁႄႉတိုၵ်းလႆႈလႃးလႃးယဝ်ႉဢေႃႈ။ လွင်ႈမၼ်းၸမ်ႉ၊ၶဝ်လႆႈၶၢမ်ႇတၢင်းဢၼ်ယႃႉပႅတ်ႈၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢိၵ်ႇတင်းႁူဝ်ႁၢၼ်တပ်ႉသိုၵ်းမၼ်းၸဝ်ႈၸိူဝ်းၼၼ်ႉဢေႃႈ။ တပ်ႉသိုၵ်းၸဝ်ႈၸိူဝ်းၼၼ်ႉဢွၼ်ၵၼ်သိမ်းဢဝ်ဢုၵ်ႉၸႃႇဢၼ်ႁိမ်ႁူင်ႇလႆႈမႃးၼမ်ၼႃႇၼၼ်ႉဢေႃႈ။-
မိူဝ်ႈၼၼ်ႉၶဝ်ဢွၼ်ၵၼ်၊တိုၵ်းတေႃးယႃႉပႅတ်ႈဝဵင်းၵႃႈဢၼ်မီးလဵပ်ႈႁွပ်ႈႁိမ်းႁွမ်းဝဵင်း ၵေႇရႃႇ၊ ၸိူဝ်းၼၼ်ႉ၊ၵွပ်ႈပိူဝ်ႈၵူၼ်းဝဵင်းၸိူဝ်းၼၼ်ႉၵူဝ်ႁႄ ထႃႇဝရႃႉၽြႃး၊ ဢေႃႈ။ ၼင်ႇၼၼ်လႄႈ တပ်ႉသိုၵ်းၸဝ်ႈၼၼ်ႉယႃႉပႅတ်ႈဝဵင်းၵႃႈမီးတင်းလၢႆသေယဝ်ႉ၊သိမ်းဢဝ်ဢုၵ်ႉၸႃႇဢၼ်ႁိမ်ႁူင်ႇဢဝ်လႆႈမႃးၼၼ်ႉမီးၼမ်ၼႃႇလူင်လၢင်ဢေႃႈ။-
ၶဝ်ယင်းၵႂႃႇတိုၵ်းဢဝ်ၶွၵ်ႈသူဝ်းတင်းလၢႆလႄႈသိမ်းလႆႈသူဝ်းတင်းၵလႃႇဢုၵ်ႈလႂ်မႃးၼမ်ၼႃႇဢေႃႈ။ လိုၼ်းၼၼ်ႉၶဝ်ပွၵ်ႈၶိုၼ်းမႃးၵႃႈတီႈဝဵင်း ယေႇရုသလႅမ်ႇ၊ သေဢေႃႈ။
ဝိၺိၺ်ႇၽြႃးပဵၼ်ၸဝ်ႈႁွတ်ႈထိုင်မႃးၵႃႈၼိူဝ် ဢႃႇၸရိ၊ လုၵ်ႈၸၢႆး ဢူဝ်းတိတ်ႉ၊ လႄႈ၊-
မၼ်းၵေႃႈၵႂႃႇႁႂ်ႈလႆႈႁပ်ႉႁူဝ်တၢင်း ဢႃႇသႃႉ၊ လႄႈလၢတ်ႈဝႃႈ၊ “ၶုၼ်ႁေႃၶမ်း ဢႃႇသႃႉ၊ ဢိၵ်ႇတင်းၵူၼ်းၸိူဝ်ႉၶိူဝ်း ယုတႃႉ၊ တင်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ တင်းသဵင်ႈတင်းလူင်ၶဝ်႟။ ဢွၼ်ၵၼ်ထွမ်ႇငိၼ်းၵႂၢမ်းၵဝ်တႃႉ။ ထႃႇဝရႃႉၽြႃး၊ မီးယူႇလူၺ်ႈၵၼ်တင်းသူၼႂ်းမိူဝ်ႈဢၼ်သူယင်းတိုၵ်ႉမီးယူႇလူၺ်ႈၵၼ်တင်းမၼ်းၸဝ်ႈၼၼ်ႉဢေႃႈ။ ပေႃးသူႁႃမၼ်းၸဝ်ႈၸိုင်၊မၼ်းၸဝ်ႈတၵ်းပၼ်ႁႂ်ႈသူထူပ်းႁၼ်မၼ်းၸဝ်ႈဢေႃႈ။ ၵူၺ်းၵႃႈ၊ပေႃးသူၸုၼ်ႉပႅတ်ႈမၼ်းၸဝ်ႈၸိုင်၊မၼ်းၸဝ်ႈတၵ်းၸုၼ်ႉပႅတ်ႈသူဢေႃႈ။-
ၶိင်ႇၵႃႇလႃႉႁိုင်ၼႃႇယဝ်ႉ၊ၵူၼ်းမဵဝ်း ဢိသရေး၊ ၶဝ်ယင်းဢမ်ႇမီးၽြႃးဢၼ်မၢၼ်ႇဢၼ်မႅၼ်ႈ၊ဢမ်ႇမီးယဵၸ်ႈပရေႃးႁဵၵ်ႈ ပုၼ်ႈတႃႇတေသင်ႇသွၼ်ပၼ်ၶဝ်၊ဢိၵ်ႇတင်းဢမ်ႇမီးပိင်းၺၢပ်ႈတြႃးဢေႃႈ။-
ၵူၺ်းၵႃႈ၊မိူဝ်ႈဢၼ်ၶဝ်မီးၽေးလႄႈဢွၼ်ၵၼ်ပွၵ်ႈမႃးႁႃ ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ ၼၼ်ႉၸိုင်၊ၶဝ်ထူပ်းႁၼ်မၼ်းၸဝ်ႈဢေႃႈ။-
ၶိင်ႇၵႃႇလႃႉမိူဝ်ႈယၢမ်းၼၼ်ႉၽူႈလႂ်ၵေႃႈဢမ်ႇၸၢင်ႈၵႂႃႇၸၢင်ႈမႃးလူင်ႈလီလွတ်ႈလီ၊ၵွပ်ႈပိူဝ်ႈဢၼ်မီးၽေးဢၼ်ႇတရေႇၵူႈဝၢၼ်ႈၵူႈမိူင်းၼၼ်ႉဢေႃႈ။-
ၵူၼ်းမဵဝ်းၼိုင်ႈလႄႈမဵဝ်းၼိုင်ႈ၊ဝဵင်းၼိုင်ႈလႄႈဝဵင်းၼိုင်ႈႁဵတ်းပႄႉႁဵတ်းၼႅင်ႇတီႈၵၼ်ၵွပ်ႈပိူဝ်ႈဢၼ်ၽြႃးပဵၼ်ၸဝ်ႈဢဝ်ၽေးၵူႈမဵဝ်းမဵဝ်းပၼ်တုၵ်ႉၶႃႉတီႈၶဝ်ၼၼ်ႉဢေႃႈ။-
သူၸမ်ႉ၊ဢွၼ်ၵၼ်ဢဝ်ႁႅင်းႁွမ်ႁႅင်းတႃႉ။ ယႃႇပေႁႂ်ႈၸႂ်လုႁႅင်းဢူၼ်ႈ။ သူတၵ်းတေလႆႈၶၢမ်ႇဢဝ်ဢၵျူဝ်းၵႃႈၼင်ႇဢၼ်သူၵမ်ၵျၢင်ႉၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ် ဢႃႇသႃႉ၊ ငိၼ်းၵႂၢမ်းဢၼ်ပဵၼ်ၵႂၢမ်းပရေႃးၽႅတ်ႈ ဢႃႇၸရိ၊ လုၵ်ႈၸၢႆး ဢူဝ်းတိတ်ႉ လၢတ်ႈၼၼ်ႉၸိုင်၊မၼ်းမီးၸႂ်ႁႅင်းယႂ်ႇသေယဝ်ႉ၊ပႄႇၽဵဝ်ႈႁုၼ်ႇႁၢင်ႈသၢင်းထုဢၼ်မီးၼႂ်းမိူင်း ယုတႃႉ၊ မိူင်း ပိၼ်ႇယႃႇမိၼ်ႇ၊ ၵူႈတီႈၵူႈလႅၼ်၊ဢိၵ်ႇတင်းၵႃႈတီႈဝဵင်းဢၼ်မၼ်းတိုၵ်းသိမ်းဢဝ်ၵႃႈၼိူဝ်လွႆ ဢေႇၽရိမ်ႇ၊ ၸိူဝ်းၼၼ်ႉပႅတ်ႈလႄႈမႄးၵုမ်းမႄးႁဵတ်းၶဵင်ႇတၢင်းလူႇ ထႃႇဝရႃႉၽြႃး၊ ဢၼ်မီးၵႃႈၼႂ်းပၢင်ႇဝၢင်းၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။
ၵူၼ်းၼမ်ၼႃႇဢွၼ်ၵၼ်ဢွၵ်ႇသေၵႃႈၼႂ်းၸိူဝ်ႉၶိူဝ်းမဵဝ်း ဢေႇၽရိမ်ႇ၊ မဵဝ်း မၼႃႇသေႇ၊ တင်းမဵဝ်း သိမုၼ်ႇ၊ ၶဝ်သေလႄႈမႃးယူႇၽၢႆႇ ဢႃႇသႃႉ၊ သေယဝ်ႉ၊သွၼ်ႈပိုင်ႈယူႇၵႃႈၼႂ်းသိုင်ႇတိူင်းမိူင်းမၼ်းၵွပ်ႈပိူဝ်ႈၶဝ်ႁုႁၼ်လွင်ႈဢၼ် ထႃႇဝရႃႉၽြႃး၊ မီးယူႇလူၺ်ႈၵၼ်တင်းမၼ်းၼၼ်ႉဢေႃႈ။ ဢႃႇသႃႉ၊ ၵေႃႈႁွင်ႉဢဝ်ၶဝ်ၵႃႈမီးတင်းသဵင်ႈတင်းလူင်၊ဢိၵ်ႇတင်းၸိူဝ်ႉၶိူဝ်းမဵဝ်း ယုတႃႉ၊ တင်းမဵဝ်း ပိၼ်ႇယႃႇမိၼ်ႇ၊ လႄႈ၊-
ၶဝ်ဢွၼ်ၵၼ်မႃးၸုၵၼ်တုမ်ၵၼ်ၵႃႈၼႂ်းဝဵင်း ယေႇရုသလႅမ်ႇ၊ ၼႂ်းပီဢၼ် ဢႃႇသႃႉ၊ ၼင်ႈႁၢင်ႈၼင်ႈႁေႃလႆႈသိပ်းႁႃႈပီၼႂ်းလိူၼ်သၢမ်ၼၼ်ႉဢေႃႈ။-
ၼႂ်းဝၼ်းၼၼ်ႉၶဝ်ဢဝ်ဢုၵ်ႉၸႃႇဢၼ်ၶဝ်ႁိမ်ႁူင်ႇလႆႈမႃးဢၼ်ပဵၼ်ဝူဝ်းၸဵတ်းပၢၵ်ႇတင်းသူဝ်းၸဵတ်းႁဵင်ႁဵတ်းတၢင်းလူႇတီႈ ထႃႇဝရႃႉၽြႃး၊ ဢေႃႈ။-
ၶဝ်ဢွၼ်ၵၼ်ႁဵတ်းပတိၺိၺ်ႇတၢင်းဢၼ်ၽွမ်ႉၸႂ်ၵၼ်လူၺ်ႈလွင်ႈဢၼ်ၶဝ်တၵ်းပႃးတင်းႁူဝ်ၸႂ်သဵင်ႈသဵင်ႈတင်းၸႂ်ဝိၺိၺ်ႇသဵင်ႈသဵင်ႈလႄႈ ႁဵတ်းဝၢတ်ႈၵူဝ်းၵႂၢႆႇတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇမွၼ်ႇၶဝ်၊-
လဵၵ်ႉယႂ်ႇ၊ယိင်းၸၢႆးၵေႃႉလႂ်သေဢမ်ႇဝႃႈ၊ပေႃးဢမ်ႇႁဵတ်းဝၢတ်ႈၵူဝ်းၵႂၢႆႇမၼ်းၸဝ်ႈၸိုင်၊တၵ်းလႆႈၶၢမ်ႇတၢင်းဢၼ်ဢဝ်တၢႆဢေႃႈ။-
ၶဝ်ဢွၼ်ၵၼ်ႁဵတ်းသဵင်ဢၼ်ယႂ်ႇၼႃႇႁွင်ႉပၢဝ်ႇႁွင်ႉသႅၼ်ႇယူႇ၊ပဝ်ႇတိုင်ႈၼႄးၶရႃႇယူႇသေလႄႈတိူင်ႇၵၢဝ်ႇသဵတ်ႈၸႃႇၵႃႈၼႂ်းၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ဢေႃႈ။-
ၵူၼ်းမဵဝ်း ယုတႃႉ၊ တင်းသဵင်ႈတင်းလူင်ဢွၼ်ၵၼ်ၸူမ်းသိူဝ်းၵွပ်ႈပိူဝ်ႈၶဝ်ပႃးတင်းႁူဝ်ၸႂ်သဵင်ႈသဵင်ႈတိူင်ႇၵၢဝ်ႇၵႂၢမ်းသဵတ်ႈၸႃႇလႄႈဢွၼ်ၵၼ်မီးၸႂ်ဢၼ်ႁႅင်းယႂ်ႇၼႃႇမႃးႁႃ ထႃႇဝရႃႉၽြႃး၊ လႄႈၶဝ်ၵေႃႈလႆႈထူပ်းႁၼ်မၼ်းၸဝ်ႈဢေႃႈ။ ထႃႇဝရႃႉၽြႃး၊ ၵေႃႈပၼ်ဢၶႂၢင်ႉႁႂ်ႈၶဝ်လႆႈထၢတ်ႇယဵၼ်သိုၵ်းၵူႈၽၢႆႇၽၢႆႇဢေႃႈ။
ၶုၼ်ႁေႃၶမ်း ဢႃႇသႃႉ၊ ၼၼ်ႉၶျႃးဢရႃႇၼၢႆးၸဝ်ႈ မႃႇၶႃႇ၊ ၼၼ်ႉတူၵ်းသေဢရႃႇၼၢင်းႁေႃၶမ်းၵွပ်ႈပိူဝ်ႈဢၼ်မၼ်းၼၢင်းပူၵ်းတင်ႈသဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ ဢၼ်လီႁင်ႈဢဵတ်ႇသဵတ်ႇၼႃႇၼၼ်ႉသေယဝ်ႉ၊ၶုၼ်ႁေႃၶမ်း ဢႃႇသႃႉ၊ ၽၼ်းသဝ်ႁုၼ်ႇႁၢင်ႈၼၢင်းၽီၼၼ်ႉလူမ်ႉပႅတ်ႈလႄႈဢဝ်ဢၼ်ပိတ်းဢၼ်ပွတ်းမၼ်းၵႂႃႇတုတ်ႇၽႆးပႅတ်ႈၵႃႈတီႈပၢင်ႇႁူၺ်ႈ ၵေႇတရုၼ်ႇ၊ ဢေႃႈ။-
ပိၵ်ႉသမ်ႉမၼ်းဢမ်ႇပႄႇၽဵဝ်ႈပႅတ်ႈထႃႇၼႃႉတီႈဝႆႈၽြႃးတၢင်ႇသူႇတၢင်ႇပႃးၵႃႈၼႂ်းမိူင်းၸဝ်ႈမူတ်းမူတ်းသေၵေႃႈ၊မၼ်းယင်းပႂ်ႉသဵတ်ႈၸႃႇတီႈ ထႃႇဝရႃႉၽြႃး၊ ယူႇၼႂ်းၸူဝ်ႈတႃႇဢသၢၵ်ႈမၼ်းတင်းမူတ်းဢေႃႈ။-
မၼ်းဢဝ်ဢုၵ်ႉၸႃႇဢၼ်ပေႃႈမၼ်း ဢၽိယႃႉ၊ လူႇတၢၼ်းလႂ်၊ဢိၵ်ႇတင်းဢုၵ်ႉၸႃႇဢၼ်မၼ်းလူႇတၢၼ်းၼၼ်ႉလႂ်၊ဢၼ်ပဵၼ်ၶိူင်ႈငိုၼ်းၶိူင်ႈၶမ်းၸိူဝ်းၼၼ်ႉသႂၢင်းသႂ်ႇဝႆႉၵႃႈၼႂ်းၵျွင်းပိၵ်ႈမၢၼ်ႇၸဝ်ႈဢေႃႈ။-
ယင်းဢမ်ႇမီးသိုၵ်းမီးသိူဝ်တေႃႇထိုင်ႁွတ်ႈမၼ်းၼင်ႈႁၢင်ႈၼင်ႈႁေႃ ထၢၼ်ႈပေႃးလႆႈသၢမ်သိပ်းႁႃႈပီဢေႃႈ။
ၼႂ်းပီဢၼ်ၶုၼ်ႁေႃၶမ်း ဢႃႇသႃႉ၊ ၼင်ႈႁၢင်ႈၼင်ႈႁေႃသၢမ်သိပ်းပၢႆႁူၵ်းပီၼၼ်ႉၶုၼ်ႁေႃၶမ်း ပႃႇသႃႇ၊ မိူင်း ဢိသရေး၊ ၶီႇသိုၵ်းၸူးမိူင်း ယုတႃႉ၊ လႄႈတႄႇႁဵတ်းဝဵင်း ရႃႇမႃႉ၊ ႁႂ်ႈပဵၼ်ဝဵင်းမၼ်ႈၶိူင်ႇပုၼ်ႈတၵ်းတႅပ်းၶၢတ်ႇပႅတ်ႈသဵၼ်ႈတၢင်းၶဝ်ႈသဵၼ်ႈတၢင်းဢွၵ်ႇဢၼ်ၶဝ်ႈၸူးမိူင်း ယုတႃႉ၊ ၼၼ်ႉဢေႃႈ။-
ပိူဝ်ႈၼႆလႄႈ ဢႃႇသႃႉ၊ ဢဝ်ငိုၼ်းၶမ်းၵႃႈၼႂ်းၽၼ်ႇတႃႇၵျွင်းပိၵ်ႈမၢၼ်ႇၸဝ်ႈတင်းၵႃႈၼႂ်းႁေႃၸဝ်ႈသေယဝ်ႉ၊ပၼ်ၵႂႃႇတီႈဝဵင်း တမ်ႇမတ်ႉသၵတ်ႉ၊ တီႈၶုၼ်ႁေႃၶမ်း ပိၼ်ႇႁႃႇတတ်ႉ၊ မိူင်း သီးရီးယႃး၊ လႄႈ၊-
မၼ်းမီးၵႂၢမ်းသင်ႇလၢတ်ႈၵႂႃႇလႄႈဝႃႈ၊ “ႁႃးဢွၼ်ၵၼ်ႁဵတ်းမိၵ်ႈသႁႃႇယႃႉတေႃႇၵၼ်မိူၼ်ၸိူဝ်ႉၼင်ႇဢၼ်ၸဝ်ႈပေႃႈႁဝ်းၶဝ်ႁဵတ်းမိၵ်ႈသႁႃႇယႃႉတေႃႇၵၼ်ၼၼ်ႉတႃႉႁဝ်း။ ငိုၼ်းၶမ်းၸိူဝ်းၼႆႉပဵၼ်လၢၵ်ႈသွင်ႇပုၼ်ႈၸဝ်ႈႁဝ်းဢေႃႈ။ တေႃႈလဵဝ်ၼႆႉၶႅၼ်းတေႃႈယႃႉပႅတ်ႈမိၵ်ႈသႁႃႇယႃႉ ဢၼ်ႁဵတ်းလူၺ်ႈၵၼ်တင်းၶုၼ်ႁေႃၶမ်း ပႃႇသႃႇ၊ မိူင်း ဢိသရေး၊ ၼၼ်ႉႁႂ်ႈမၼ်းလႆႈဢွၵ်ႇသေသိုင်ႇတိူင်းမိူင်းၵဝ်ၶႃႈၼႆႉၵႂႃႇသေၵမ်း၊” ဝႃႈၼင်ႇၼႆဢေႃႈ။
ပိၼ်ႇႁႃႇတတ်ႉ၊ ၵေႃႈၽွမ်ႉၸႂ်လူၺ်ႈၵႂၢမ်း ဢႃႇသႃႉ၊ လၢတ်ႈၼၼ်ႉလႄႈပွႆႇၸႂ်ႉၶုၼ်သိုၵ်းႁၢၼ်မၼ်းတင်းလၢႆလူၺ်ႈၵၼ်တင်းတပ်ႉသိုၵ်းၶဝ်ၶီႇသိုၵ်းတိုၵ်းတေႃးဝၢၼ်ႈဝဵင်း ဢိသရေး၊ ဢေႃႈ။ ၶဝ်တိုၵ်းပႄႉသိမ်းဢဝ်ဝဵင်း ဢိယုၼ်ႇ၊ ဝဵင်း တၢၼ်ႇ၊ ဝဵင်း ဢႃႇပေႇလႃႉမိမ်း၊ ဢိၵ်ႇတင်းဝဵင်းဢၼ်သိမ်းဝႆႉၽၼ်ႇတႃႇၵႃႈဢၼ်မီးၼႂ်းဢိူင်ႇ ၼပ်ႉထလိ၊ ၸိူဝ်းၼၼ်ႉဢေႃႈ။-
မိူဝ်ႈဢၼ်ၶုၼ်ႁေႃၶမ်း ပႃႇသႃႇ၊ ငိၼ်းလွင်ႈတၢင်းဢၼ်ပဵၼ်မႃးၼၼ်ႉၸိုင်၊မၼ်းဢမ်ႇသိုပ်ႇႁဵတ်းႁႂ်ႈဝဵင်း ရႃႇမႃႉ၊ ယဝ်ႉတူဝ်ႈလႄႈၵိုတ်းသဝ်းသေတၢင်းႁဵတ်းၼၼ်ႉဢေႃႈ။-
မိူဝ်ႈဢၼ်ၶုၼ်ႁေႃၶမ်း ဢႃႇသႃႉ၊ ႁွင်ႉဢဝ်ၵူၼ်းမိူင်း ယုတႃႉ၊ ၵူႈတီႈၵူႈလႅၼ်သေယဝ်ႉ၊ၸႂ်ႉၶဝ်ၵႂႃႇဢဝ်မၢၵ်ႇႁိၼ်တင်းတုမ်မႆႉၸိူဝ်းဢၼ် ပႃႇသႃႇ၊ ႁဵတ်းဝဵင်း ရႃႇမႃႉ၊ ၼၼ်ႉမႃးလႄႈတႄႇႁဵတ်းဝဵင်း ၵေးပႃႉ၊ တင်းဝဵင်း မိၸပႃႇ၊ သေဢေႃႈ။
ၼႂ်းၶိင်ႇၵႃႇလႃႉယၢမ်းၼၼ်ႉ၊ၵေႃႉဢၼ်ႁူပွင်ႇတႃလႅင်း ႁႃႇၼၼိ၊ ၶဝ်ႈၸူးၶုၼ်ႁေႃၶမ်း ဢႃႇသႃႉ၊ လႄႈလၢတ်ႈဝႃႈ၊ “ၵွပ်ႈပိူဝ်ႈဢၼ်ၸဝ်ႈၶုၼ်လူင်ဢိင်ပိုင်ႈၶုၼ်ႁေႃၶမ်းမိူင်း သီးရီးယႃး၊ သေယဝ်ႉ၊ဢမ်ႇဢိင်ပိုင်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈတူဝ်ၸဝ်ႈၵဝ်ႇလႄႈတပ်ႉသိုၵ်းၶုၼ်ႁေႃၶမ်းမဵဝ်း သီးရီးယႃး၊ လွတ်ႈသေၵႃႈၼႂ်းမိုဝ်းၸဝ်ႈၶုၼ်လူင်ၵႂႃႇယဝ်ႉ။-
ၵူၼ်းမဵဝ်း ဢေႇတီႇဢူဝ်းပီးယႃး၊ တင်းမဵဝ်း လိပ်ႉပီးယႃး၊ ပဵၼ်တပ်ႉသိုၵ်းဢၼ်ႁႅင်းယႂ်ႇၼႃႇလႄႈမီးလေႃႉမႃႉသိုၵ်းတင်းၵူၼ်းသိုၵ်းၶီႇမႃႉၼမ်ၼႃႇဢမ်ႇၸႂ်ႈႁိုဝ်း။ ၼႂ်းဝႃႈၼၼ်သေၵေႃႈ၊ၵွပ်ႈပိူဝ်ႈဢၼ်ၸဝ်ႈၶုၼ်လူင်ဢိင်ပိုင်ႈ ထႃႇဝရႃႉၽြႃး၊ လႄႈမၼ်းၸဝ်ႈပၼ်ႁႂ်ႈၸဝ်ႈၶုၼ်လူင်ပႄႉၼႅင်ႇၶဝ်ယဝ်ႉဢေႃႈ။-
သၢႆတႃ ထႃႇဝရႃႉၽြႃး၊ တူၺ်းၵႂႃႇတူၺ်းမႃးယူႇၵႃႈၼိူဝ်ၼႃႈလိၼ်မိူင်းလႄႈႁႂ်ႈလႆႈပၼ်ၸႂ်ႁႅင်းယႂ်ႇတီႈၶဝ်ၸိူဝ်းဢၼ်ပႂ်ႉသဵတ်ႈၸႃႇတီႈမၼ်းၸဝ်ႈၼၼ်ႉဢေႃႈ။ တီႈလွင်ႈတၢင်းၼႆႉၸဝ်ႈၶုၼ်လူင်ႁဵတ်းမိူၵ်ႈၼႃႇလူင်လၢင်တီႈၶႃႈယဝ်ႉ။ ၸႃႉၸဵမ်မိူဝ်ႈလဵဝ်ၼႆႉၵႂႃႇလႄႈဢမုသိုၵ်းတၵ်းမီးတီႈၶုၼ်လူင်တီႈၶႃႈဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ ဢႃႇသႃႉ၊ ၸႂ်မႆႈၶႂ်ႈၸႃႉတီႈၵေႃႉဢၼ်ႁူပွင်ႇတႃလႅင်းၼၼ်ႉလႄႈဢဝ်မၼ်းၶင်ဝႆႉၵႃႈၼႂ်းၶွၵ်ႈသေဢေႃႈ။ မိူဝ်ႈၽွင်းယၢမ်းၼၼ်ႉ၊ပဵၼ်ၶိင်ႇၵႃႇလႃႉဢၼ် ဢႃႇသႃႉ၊ ၼိၵ်ႈၸၢၵ်ႈငႅၼ်းသႄးၵူၼ်းဝၢၼ်ႈၵူၼ်းမိူင်းၵမ်ႈၽွင်ႈယူႇဢေႃႈ။
လွင်ႈတၢင်းၵႃႈဢၼ် ဢႃႇသႃႉ၊ ဢုပ်ႉပိူင်ႇၸၢမ်ႇၸႃးၼၼ်ႉၸႃႉၸဵမ်ငဝ်ႈတေႃႇပၢႆတႅမ်ႈမၢႆဝႆႉၵႃႈၼႂ်းပိုၼ်းၶုၼ်ႁေႃၶမ်းမိူင်း ယုတႃႉ၊ တင်းၶုၼ်ႁေႃၶမ်းမိူင်း ဢိသရေး၊ ၼၼ်ႉဢေႃႈ။-
ၼႂ်းပီဢၼ် ဢႃႇသႃႉ၊ ၸၢမ်ႇႁၢင်ႈၸၢမ်ႇႁေႃသၢမ်သိပ်းၵဝ်ႈပီၼၼ်ႉမၼ်းပဵၼ်တိၼ်ၸဵပ်းလႄႈၶႃလိပ်ႈၵႂႃႇဢေႃႈ။ မၼ်းပဵၼ်တၢင်းၶႆႈတၢင်းပဵၼ်ထၢၼ်ႇၼၼ်ႉသေၵေႃႈဢမ်ႇႁႃဢမ်ႇဢိင်ပိုင်ႈ ထႃႇဝရႃႉၽြႃး၊ လႄႈဢိင်ပိုင်ႈမေႃယႃၵူၺ်းဢေႃႈ။-
လိုၼ်းသေဢၼ်မၼ်းပဵၼ်ယေႃးၵႃႇသွင်ပီၼၼ်ႉၸိုင်၊မၼ်းၼွၼ်းၽႄးၸွမ်းပူႇမွၼ်ႇမၼ်းတင်းလၢႆလႄႈ၊-
ဢဝ်မၼ်းသၢင်းၵျူဝ်ႇဝႆႉၵႃႈၼႂ်းႁူးပိုင်ႈပႃႇႁဵဝ်ႈဢၼ်တူဝ်မၼ်းၶုတ်းႁဵတ်းဝႆႉပုၼ်ႈမၼ်းၵႃႈၼႂ်းဝဵင်း တႃႇဝိတ်ႈ၊ ၼၼ်ႉဢေႃႈ။ ၶဝ်ဢဝ်တူဝ်တၢႆမၼ်းသႂၢင်းသႂ်ႇၵႃႈၼႂ်းၵွမ်ႇၼႂ်းၸုင်းလႄႈဢဝ်ၼၢမ်ႇသႃႇဢၼ်ႁွမ်ဢၼ်ႁူၺ်းလႂ်သႂ်ႇတဵမ်ဝႆႉသေယဝ်ႉ၊ၶဝ်ႁဵတ်းပွႆးယႂ်ႇပွႆးလူင်ပုၼ်ႈတၵ်းတုတ်ႇၽႆးႁႂ်ႈပဵၼ်တင်းဢၼ်ယုၵ်ႉယွင်ႈၵုင်ႇသရေႇမၼ်းဢေႃႈ။
ယူဝ်းသၽတ်ႉ၊ ၼင်ႈႁၢင်ႈၼင်ႈႁေႃတၢင်တူဝ်ပေႃႈမၼ်းၶုၼ်ႁေႃၶမ်း ဢႃႇသႃႉ၊ လႄႈႁႂ်ႈမိူင်းမၼ်းမီးဢဵၼ်ႁႅင်းပုၼ်ႈတၵ်းႁႄႉၶႅၼ်တပ်ႉသိုၵ်းမိူင်း ဢိသရေး၊ ဢေႃႈ။-
မၼ်းဢဝ်တပ်ႉသိုၵ်းမၼ်းတင်းလၢႆဝႆႉၵႃႈၼႂ်းဝဵင်းဢၼ်မၼ်ႈၶိူင်ႇၵႃႈဢၼ်မီးၼႂ်းမိူင်း ယုတႃႉ၊ ၸိူဝ်းၼၼ်ႉလႄႈၶၢၼ်းတပ်ႉပႂ်ႉဝဵင်းၵႃႈၼႂ်းမိူင်း ယုတႃႉ၊ ၵူႈတီႈၵူႈလႅၼ်၊ဢိၵ်ႇတင်းၵႃႈၼႂ်းဝဵင်းၸိူဝ်းဢၼ်မီးၼႂ်းမိူင်း ဢေႇၽရိမ်ႇ၊ ဢၼ်ပေႃႈမၼ်း ဢႃႇသႃႉ၊ တိုၵ်းပႄႉသိမ်းဢဝ်ဝႆႉၼၼ်ႉဢေႃႈ။-
ထႃႇဝရႃႉၽြႃး၊ ပၼ်တၢင်းလီတီႈ ယူဝ်းသၽတ်ႉ၊ ၵွပ်ႈပိူဝ်ႈဢၼ်မၼ်းၸွမ်းသဵၼ်ႈတၢင်းဢၼ်ၸဝ်ႈပေႃႈမၼ်း တႃႇဝိတ်ႈ၊ ၵမ်ၵျၢင်ႉမိူဝ်ႈဢွၼ်တၢင်းၼၼ်ႉလႄႈဢမ်ႇဝႆႈၽြႃး ပႃႇလႃႉ၊-
မၼ်းႁဵတ်းဝၢတ်ႈၵူဝ်းၵႂၢႆႇတီႈၽြႃးပဵၼ်ၸဝ်ႈပေႃႈမၼ်းၼၼ်ႉ၊ဢိၵ်ႇတင်းပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၽြႃးပဵၼ်ၸဝ်ႈလႄႈဢမ်ႇၵမ်ဢမ်ႇၵျၢင်ႉၸွမ်းတၢင်းဢၼ်ၶုၼ်ႁေႃၶမ်းမဵဝ်း ဢိသရေး၊ ၶဝ်ႁဵတ်းၼၼ်ႉ။-
ၵွပ်ႈပိူဝ်ႈၸိူဝ်ႉၼင်ႇၼႆလႄႈ ထႃႇဝရႃႉၽြႃး၊ ႁႂ်ႈသိုင်ႇၸိုင်ႈဝၢၼ်ႈမိူင်းမၼ်းၼၼ်ႉမၼ်ႈၶိူင်ႇသေယဝ်ႉ၊ၵူၼ်းမဵဝ်း ယုတႃႉ၊ တင်းလၢႆဢွၼ်ၵၼ်သၢၵ်ႈၵၢပ်ႈလၢၵ်ႈသွင်ႇတီႈမၼ်းဢေႃႈ။ ပိူဝ်ႈၼႆလႄႈမၼ်းမၢၵ်ႇမီးလီပဵၼ်သေယဝ်ႉ၊မီးမုၼ်သရေႇယႂ်ႇၼႃႇဢေႃႈ။-
မၼ်းဢဝ်ၵုင်ႇဢဝ်မုၼ်လူၺ်ႈလွင်ႈဢၼ်မၼ်းႁဵတ်းဝၢတ်ႈၵူဝ်းၵႂၢႆႇ ထႃႇဝရႃႉၽြႃး၊ ၼၼ်ႉသေယဝ်ႉ၊ယႃႉၽဵဝ်ႈပႅတ်ႈထႃႇၼႃႉတီႈဢၼ်ဝႆႈၽြႃးတၢင်ႇသူႇတၢင်ႇပႃးၵႃႈမီး၊ဢိၵ်ႇတင်းသဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ ၸိူဝ်းဢၼ်မီးၼႂ်းမိူင်း ယုတႃႉ၊ ၼၼ်ႉဢေႃႈ။
ၼႂ်းပီဢၼ်မၼ်းၼင်ႈႁၢင်ႈၼင်ႈႁေႃလႆႈသၢမ်ပီၼၼ်ႉ၊မၼ်းပွႆႇၸႂ်ႉမူးမၢတ်ႈၽွင်းမိူင်းမၼ်းဢၼ်ပဵၼ် ဝိၼ်ႇႁေးလႃႉ၊ဢေႃးပတိ၊ၸႃႇၶရိ၊ၼႃႇႀၼေႇလႃႉ၊ ဢိၵ်ႇတင်း မိၵ်ႉၶယႃႉ၊ ၵႂႃႇႁႂ်ႈလႆႈပၼ်ဢေႃးဝႃႇတႃႉၵႃႈၼႂ်းဝၢၼ်ႈၼႂ်းဝဵင်းမိူင်း ယုတႃႉ၊ တင်းလၢႆဢေႃႈ။-
ၸိူဝ်ႉၶိူဝ်းမဵဝ်း လေႇဝိ၊ ၵဝ်ႈၵေႃႉတင်းယဵၸ်ႈပရေႃးႁဵၵ်ႈ သွင်ၵေႃႉၵေႃႈၵႂႃႇလူၺ်ႈၵၼ်တင်းၶဝ်ၸိူဝ်းၼၼ်ႉဢေႃႈ။ မဵဝ်း လေႇဝိ၊ ၸိူဝ်းၼၼ်ႉပဵၼ် သေႇမႃႇယႃႉ၊ၼေႇႀၼိ၊ၸေႇပတိ၊ဢသႃႇႁေးလႃႉ၊သေးမိရႃႇမုတ်ႉ၊ယေႃးၼႀၼ်ႇ၊ဢတေႃးၼိယႃး၊တေႃႇၽိယႃႉ၊တေႃႇပႃႇဢတေႃးၼိယႃႉ၊ လႄႈ၊ယဵၸ်ႈပရေႃးႁဵၵ်ႈသမ်ႉပဵၼ် ဢေးလိသမႃႇ၊ တင်း ယေႃးရမ်ႇ၊ ဢေႃႈ။-
ၶဝ်ပႃးဢဝ်ၵျၢမ်းလိၵ်ႈပိင်းၺၢပ်ႈတြႃး ထႃႇဝရႃႉၽြႃး၊ ၵႂႃႇလႄႈသင်ႇသွၼ်ပၼ်ၵူၼ်းဝၢၼ်ႈၵူၼ်းမိူင်း ယုတႃႉ၊ ၸွတ်ႇတူဝ်ႈၵႂႃႇဢေႃႈ။
ထႃႇဝရႃႉၽြႃး၊ ႁဵတ်းႁႂ်ႈသိုင်ႇတိူင်းမိူင်းဢၼ်ယူႇလဵပ်ႈႁွပ်ႈႁိမ်းႁွမ်းတင်းသဵင်ႈတင်းလူင်ၵူဝ်ႁႄတႃႇတေၵႂႃႇတိုၵ်းၵၼ်တင်းၶုၼ်ႁေႃၶမ်း ယူဝ်းသၽတ်ႉ၊ ဢေႃႈ။-
ၵူၼ်း ၽိလိတ်ႉတိ၊ ၵမ်ႈၽွင်ႈဢွၼ်ၵၼ်ဢဝ်လၢၵ်ႈသွင်ႇငိုၼ်းၶွၼ်ႇၸဝ်ႈသၢၵ်ႈပၼ် ယူဝ်းသၽတ်ႉ၊ လႄႈၵူၼ်း ဢႃႇရပ်ႉ၊ တင်းလၢႆၵေႃႈဢွၼ်ၵၼ်ဢဝ်သူဝ်းၸဵတ်းႁဵင်ၸဵတ်းပၢၵ်ႇ၊ဢိၵ်ႇတင်းပႄႉၸဵတ်းႁဵင်ၸဵတ်းပၢၵ်ႇမႃးသၢၵ်ႈဢေႃႈ။-
ၵွပ်ႈပိူဝ်ႈလွင်ႈတၢင်းၼႆႉလႄႈ ယူဝ်းသၽတ်ႉ၊ ယဵင်ႈၶႅၼ်းမီးႁႅင်းတၼ်းၶူဝ်းၶိုၼ်ႈယႂ်ႇမႃးတိၵ်းတိၵ်းသေယဝ်ႉ၊တႄႇႁဵတ်းတိူၵ်ႈတီႈတိုၵ်းသိုၵ်းလႂ်၊ဢိၵ်ႇတင်းဝဵင်းဢၼ်မၼ်ႈၶိူင်ႇ၊-
ပုၼ်ႈဢၼ်တၵ်းသိမ်းပႅင်းၽၼ်ႇတႃႇၸဝ်ႈလႂ်၊ႁႂ်ႈၸွတ်ႇတူဝ်ႈၵႂႃႇၵႃႈၼႂ်းမိူင်း ယုတႃႉ၊ ဢေႃႈ။ ၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉမၼ်းၶၢၼ်းမူးမၢတ်ႈၽွင်းမိူင်းဢၼ်ၸိုဝ်ႈသဵင်ယႂ်ႇတင်းလၢႆ၊-
ၸွမ်းၼင်ႇၸိူဝ်ႉၶိူဝ်းႁိူၼ်းၽႂ်ၸိူဝ်ႉၶိူဝ်းႁိူၼ်းမၼ်းဢေႃႈ။ ဢတ်ႉတၼႃႇ၊ ပဵၼ်ၽူႈၵွၼ်းတပ်ႉၼႂ်းတပ်ႉသိုၵ်းၸိူဝ်ႉၶိူဝ်း ယုတႃႉ၊ လႄႈႁူဝ်ႁၢၼ်ၵူၼ်းသိုၵ်းမၼ်းမီးသၢမ်သႅၼ်ဢေႃႈ။-
ၽူႈၵမ်ႉၵႅမ်မၼ်းၵေႃႉၼိုင်ႈပဵၼ် ယေႃးႁၼၼ်ႇ၊ ဢၼ်မီးႁူဝ်ႁၢၼ်ၵူၼ်းသိုၵ်းသွင်သႅၼ်ပႅတ်ႇမိုၼ်ႇၼၼ်ႉဢေႃႈ။-
ၽူႈၵမ်ႉၵႅမ်ၵေႃႉတီႈသွင်သမ်ႉပဵၼ် ဢႃႇမသိ၊ လုၵ်ႈၸၢႆး ၸိၶရိ၊ ဢိၵ်ႇတင်းႁူဝ်ႁၢၼ်ၵူၼ်းသိုၵ်းမၼ်းသွင်သႅၼ်ဢေႃႈ။ ဢႃႇမသိ၊ ၼၼ်ႉပဵၼ်ၵေႃႉဢၼ်ပႃးၸႂ်ၸေႇတၼႃႇလႄႈဢဝ်တူဝ်ၸဝ်ႈၵဝ်ႇသၢၵ်ႈလူႇတီႈ ထႃႇဝရႃႉၽြႃး၊ ဢေႃႈ။-
ၽူႈၵွၼ်းတပ်ႉသိုၵ်းၼႂ်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ ၼၼ်ႉပဵၼ် ဢေးလျႃႇတႃႉ၊ ပဵၼ်ႁူဝ်ႁၢၼ်ၵူၼ်းသိုၵ်းဢၼ်ၸိုဝ်ႈသဵင်ယႂ်ႇလႄႈဢုပ်ႉၵူၼ်းသိုၵ်းသွင်သႅၼ်ဢၼ်ယိပ်းၵမ်ၶႅပ်းႁႄႉလၢၵ်ႈၼၢၵ်ႈဢိၵ်ႇတင်းၵၢင်ႇလႂ်ဢေႃႈ။-
ၽူႈၵမ်ႉၵႅမ်မၼ်းၸမ်ႉ၊ပဵၼ် ယေႃးၸပတ်ႉ၊ ဢိၵ်ႇတင်းၵူၼ်းသိုၵ်းသႅၼ်ပၢႆပႅတ်ႇမိုၼ်ႇဢၼ်ၽိုၵ်းၵၢၼ်သိုၵ်းလီလီဝႆႉၼၼ်ႉဢေႃႈ။-
ၶဝ်ၸိူဝ်းၼႆႉၵိုတ်ႉႁၢပ်ႇၵၢၼ်ၶုၼ်ႁေႃၶမ်းၵႃႈၼႂ်းဝဵင်း ယေႇရုသလႅမ်ႇ၊ လႄႈၼွၵ်ႈသေၶဝ်ၸိူဝ်းၼၼ်ႉၶုၼ်ႁေႃၶမ်းသမ်ႉၶၢၼ်းႁူဝ်ႁၢၼ်ၵူၼ်းသိုၵ်းတင်းလၢႆဝႆႉၵႃႈၼႂ်းဝဵင်းဢၼ်မၼ်ႈၶိူင်ႇၵႃႈၼႂ်းမိူင်း ယုတႃႉ၊ ၵူႈတီႈၵူႈလႅၼ်ဢေႃႈ။
မိူဝ်ႈဢၼ်ၶုၼ်ႁေႃၶမ်း ယူဝ်းသၽတ်ႉ၊ မိူင်း ယုတႃႉ၊ မီးၸေးၸိမ်ႇဢုၵ်ႉၸႃႇမုၼ်ၵုင်ႇသရေႇယႂ်ႇမႃးၼၼ်ႉမၼ်းႁႂ်ႈၵူၼ်းႁိူၼ်းလုၵ်ႈလၢင်းမၼ်းၵူပ်ႉၵူႈပဵၼ်ႁိူၼ်းလူၺ်ႈၵၼ်တင်းၵူၼ်းႁိူၼ်းလုၵ်ႈလၢင်းၶုၼ်ႁေႃၶမ်း ဢႃႇႁပ်ႉ၊ မိူင်း ဢိသရေး၊ ဢေႃႈ။-
ပီမိူင်းပူၼ်ႉၵႂႃႇတၢၼ်ႇတၢၼ်ႇယဝ်ႉၸင်ႇ၊တူဝ်မၼ်းၵႂႃႇလႄႇၵႂႃႇၸႂ်း ဢႃႇႁပ်ႉ၊ ၵႃႈတီႈဝဵင်း သမႃႇရိ၊ ဢေႃႈ။ ဢႃႇႁပ်ႉ၊ ၵေႃႈႁႅမ်သူဝ်းဝူဝ်းၼမ်ၼႃႇလဵင်ႉလူမၼ်း၊ဢိၵ်ႇတင်းၵူၼ်းမၼ်းတင်းလၢႆပုၼ်ႈဢၼ်ယုၵ်ႉယွင်ႈမၼ်းဢေႃႈ။ ဢႃႇႁပ်ႉ၊ ၼၼ်ႉၸူဝ်းဢဝ်မၼ်းႁႂ်ႈမၼ်းၽွမ်ႉၽၢႆႇ ဢိသရေး၊ ၵႂႃႇတိုၵ်းဝဵင်း ရႃႇမုတ်ႉ၊ မိူင်း ၵိလတ်ႉ၊ ဢေႃႈ။-
ဢႃႇႁပ်ႉ၊ ထၢမ်လႄႈဝႃႈ၊ “ၸဝ်ႈတၵ်းၸွမ်းလူၺ်ႈၵၼ်တင်းၵဝ်ၶႃႈၵႂႃႇတိုၵ်းဝဵင်း ရႃႇမုတ်ႉ၊ ၶႃႈႁိုဝ်း၊” ဝႃႈၼင်ႇၼႆဢေႃႈ။ ယူဝ်းသၽတ်ႉ၊ ၶိုၼ်းလၢတ်ႈလႄႈဝႃႈ၊ “ၵဝ်ၶႃႈမီးယူႇလူၺ်ႈၵၼ်တင်းၸဝ်ႈဢေႃႈ။ ၵူၼ်းသိုၵ်းၵဝ်ၶႃႈတင်းလၢႆၵေႃႈပဵၼ်ၵူၼ်းသိုၵ်းၸဝ်ႈယဝ်ႉ။ ႁဝ်းၶႃႈတၵ်းၶီႇသိုၵ်းၵႂႃႇလူၺ်ႈၵၼ်တင်းၸဝ်ႈဢေႃႈ၊” ဝႃႈၼင်ႇၼႆဢေႃႈ။-
ယူဝ်းသၽတ်ႉ၊ သမ်ႉသိုပ်ႇလၢတ်ႈထႅင်ႈလႄႈဝႃႈ၊ “ၼႂ်းလွင်ႈတၢင်းၼႆႉၸိုင်၊ႁဝ်းဢွၼ်ၵၼ်တွင်ႈထၢမ် ထႃႇဝရႃႉၽြႃး၊ ဢွၼ်တၢင်းတႃႉႁဝ်း၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ဢႃႇႁပ်ႉ၊ ႁႂ်ႈပရေႃးၽႅတ်ႈ သီႇပၢၵ်ႇၵေႃႉၸုတုမ်ၵၼ်သေယဝ်ႉ၊ထၢမ်လႄႈဝႃႈ၊ “ႁဝ်းထုၵ်ႇလီၶီႇသိုၵ်းၶိုၼ်ႈၸူးဝဵင်း ရႃႇမုတ်ႉ၊ ႁိုဝ်း။ ဢမ်ႇထုၵ်ႇလီႁိုဝ်း၊” ဝႃႈၼင်ႇၼႆလႄႈ၊ၶဝ်ဢွၼ်ၵၼ်လဝ်ႈလၢတ်ႈလႄႈဝႃႈ။ “ၶီႇသိုၵ်းၶိုၼ်ႈသေၵမ်း။ ၽြႃးပဵၼ်ၸဝ်ႈတၵ်းႁႂ်ႈၸဝ်ႈႁဝ်းပႄႉၼႅင်ႇၶႃႈဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ ယူဝ်းသၽတ်ႉ၊ ထၢမ်လႄႈဝႃႈ၊ “ပရေႃးၽႅတ်ႈ ထႃႇဝရႃႉၽြႃး၊ ဢၼ်ႁဝ်းထုၵ်ႇလီတွင်ႈထၢမ်ၼၼ်ႉၵႃႈတီႈၼႆႈဢမ်ႇမီးထႅင်ႈသေၵေႃႉသေၵူၼ်းယဝ်ႉႁိုဝ်း၊” ဝႃႈၼင်ႇၼႆဢေႃႈ။
ဢႃႇႁပ်ႉ၊ ၶိုၼ်းလၢတ်ႈလႄႈဝႃႈ၊ “ယင်းမီးထႅင်ႈၵေႃႉၼိုင်ႈဢၼ်ပဵၼ် မိၵ်ႉၶႃး၊ လုၵ်ႈၸၢႆး ဢိမလႃႉ၊ လူးၵွၼ်ႇဢေႃႈ။ ၼႂ်းဝႃႈၼၼ်သေၵေႃႈ ၵဝ်ၶႃႈၸင်းမၼ်းၵွပ်ႈပိူဝ်ႈဢၼ်မၼ်းဢမ်ႇတွၼ်ႉႁေႃးလၢတ်ႈၵႂၢမ်းမၢင်ႇၵလႃႇပုၼ်ႈလွင်ႈၵဝ်ၶႃႈလႄႈ၊ၸၢင်ႈႁေႃးလၢတ်ႈၵႂၢမ်းဢႃႉမၢင်ႇၵလႃႇၵူၺ်းဢေႃႈ၊” ဝႃႈၼင်ႇၼႆဢေႃႈ။ ယူဝ်းသၽတ်ႉ၊ ၶိုၼ်းလၢတ်ႈလႄႈဝႃႈ၊ “ၶုၼ်လူင်ယႃႇပေလၢတ်ႈၸိူဝ်ႉၼင်ႇၼၼ်သေၵမ်း၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈၶုၼ်ႁေႃၶမ်း ဢႃႇႁပ်ႉ၊ ႁွင်ႉဢဝ်ၶုၼ်ဢၼ်ပွင်ၵၢၼ်ၵေႃႉၼိုင်ႈမႃးလႄႈလၢတ်ႈဝႃႈ၊ “ၵႂႃႇႁွင်ႉ မိၵ်ႉၶႃး၊ လုၵ်ႈၸၢႆး ဢိမလႃႉ၊ မႃးဝႆးဝႆးတႃႉ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းသွင်ပႃးၼၼ်ႉၼုင်ႈမႆႁၢင်ႈၶိူင်ႈတင်းၶူဝ်းၶုၼ်သေလႄႈၼင်ႈယူႇၵႃႈၼိူဝ်ရႃႇၸႃႉပလၢင်ႇႁင်းၽႂ်ႁင်းမၼ်းၼႂ်းတလၢင်းယဵပ်ႇၶဝ်ႈၽၢႆႇၼွၵ်ႈၽၵ်းတူဝဵင်း သမႃႇရိ၊ ၼၼ်ႉယူႇလႄႈ ပရေႃးၽႅတ်ႈၵႃႈမီးၸိူဝ်းၼၼ်ႉဢွၼ်ၵၼ်ႁေႃးလၢတ်ႈၵႃႈတီႈၽၢႆႇၼႃႈၶဝ်ၸဝ်ႈယူႇဢေႃႈ။-
ၼႂ်းၶဝ်ၼၼ်ႉ၊ ၸေႇတၵိ၊ လုၵ်ႈၸၢႆး ၶေးၼႃႇၼႃႉ၊ ၼၼ်ႉႁဵတ်းၶဝ်လႅမ်လဵၵ်းလႂ်သေယဝ်ႉ၊ႁေႃးလၢတ်ႈဝႃႈ၊ “ ထႃႇဝရႃႉၽြႃး၊ မီးဢမိင်ႉၸမ်ႉ၊ ‘ၸဝ်ႈႁဝ်းတၵ်းလႆႈဢဝ်ၶဝ်လႅမ်ၸိူဝ်းၼႆႉတႅင်းသႂ်ႇၵူၼ်းမဵဝ်း သီးရီးယႃး၊ တင်းလၢႆတေႃႇထိုင်ႁွတ်ႈထၢၼ်ႈပေႃးလုလႅဝ်ၵႂႃႇဢေႃႈ၊’ ဝႃႈၼႆတီႈၶႃႈယဝ်ႉ၊” ဝႃႈၼင်ႇၼႆဢေႃႈ။-
ပရေႃးၽႅတ်ႈတၢင်ႇၵေႃႉတၢင်ႇၵူၼ်းၸိူဝ်းၼၼ်ႉၵေႃႈႁေႃးလၢတ်ႈၶေႃႈလဵဝ်ၵၼ်လႄႈဝႃႈ၊ “ၶီႇသိုၵ်းၶိုၼ်ႈၸူးဝဵင်း ရႃႇမုတ်ႉ၊ သေၵမ်း၊ၸဝ်ႈႁဝ်းတၵ်းပႄႉၼႅင်ႇဢေႃႈ။ ထႃႇဝရႃႉၽြႃး၊ တၵ်းႁႂ်ႈၸဝ်ႈႁဝ်းပႄႉၼႅင်ႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၶိင်ႇၵႃႇလႃႉယၢမ်းၼၼ်ႉၶုၼ်ဢၼ်ပွင်ၵၢၼ်ၵေႃႉဢၼ်ၵႂႃႇႁွင်ႉ မိၵ်ႉၶႃး၊ ၼၼ်ႉလၢတ်ႈတီႈမၼ်းလႄႈဝႃႈ၊ “ပရေႃးၽႅတ်ႈ တင်းလၢႆၽွမ်ႉၵၼ်ႁေႃးလၢတ်ႈၵႂၢမ်းမၢင်ႇၵလႃႇတီႈၶုၼ်ႁေႃၶမ်းဢေႃႈ။ ၸဝ်ႈၵေႃႈထုၵ်ႇလီႁေႃးလၢတ်ႈၵႂၢမ်းမၢင်ႇၵလႃႇၸိူဝ်ႉၼင်ႇၼၼ်ၵူၺ်းဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ မိၵ်ႉၶႃး၊ ၶိုၼ်းလၢတ်ႈလႄႈဝႃႈ၊ “ၵႃႈၼင်ႇဢၼ် ထႃႇဝရႃႉၽြႃး၊ ဢသၢၵ်ႈလိပ်းယူႇၼၼ်ႉၵဝ်တၵ်းလၢတ်ႈၵႂၢမ်းဢၼ်ၽြႃးပဵၼ်ၸဝ်ႈၵဝ်မီးဢမိင်ႉၼၼ်ႉၵူၺ်းဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်မၼ်းႁွတ်ႈထိုင်ၵႃႈတီႈၽၢႆႇၼႃႈၶုၼ်ႁေႃၶမ်း ဢႃႇႁပ်ႉ၊ ၼၼ်ႉၶုၼ်ႁေႃၶမ်းထၢမ်မၼ်းလႄႈဝႃႈ၊ “ မိၵ်ႉၶႃး၊ ႟။ ၵဝ်တင်းၶုၼ်ႁေႃၶမ်း ယူဝ်းသၽတ်ႉ၊ ထုၵ်ႇလီၶီႇသိုၵ်းၶိုၼ်ႈတိုၵ်းဝဵင်း ရႃႇမုတ်ႉ၊ ႁိုဝ်း။ ဢမ်ႇထုၵ်ႇလီႁိုဝ်း၊” ဝႃႈၼင်ႇၼႆဢေႃႈ။ မိၵ်ႉၶႃး၊ ၶိုၼ်းလဝ်ႈလၢတ်ႈလႄႈဝႃႈ၊ “ၶီႇသိုၵ်းၶိုၼ်ႈတိုၵ်းသေၵမ်း။ ၸဝ်ႈႁဝ်းတၵ်းတေပႄႉၼႅင်ႇဢမၢၼ်ႇၶၼ်ပဵၼ်ဢေႃႈ။ ထႃႇဝရႃႉၽြႃး၊ တၵ်းႁႂ်ႈၸဝ်ႈႁဝ်းပႄႉၼႅင်ႇဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ ဢႃႇႁပ်ႉ၊ ၶိုၼ်းလၢတ်ႈတီႈမၼ်းလႄႈဝႃႈ၊ “ၵွပ်ႈပိူဝ်ႈဢၼ်မႂ်းဢဝ်တင်းၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ႁေႃးလၢတ်ႈပၼ်ၵဝ်ၼၼ်ႉၸိုင်၊လၢတ်ႈၵႂၢမ်းမၢၼ်ႇၵႂၢမ်းၵူၺ်းတႃႉ။ လွင်ႈၼႆႉၸိုင်၊ၵဝ်တၵ်းလႆႈမွၵ်ႇလၢတ်ႈတီႈမႂ်းလၢႆပွၵ်ႈလၢႆၽဝ်ႇႁိုဝ်း၊” ဝႃႈၼင်ႇၼႆဢေႃႈ။
မိၵ်ႉၶႃး၊ ၶိုၼ်းလဝ်ႈလၢတ်ႈလႄႈဝႃႈ၊ “ၵဝ်ၶႃႈလႆႈႁၼ်ၵူၼ်းသိုၵ်းၵူၼ်းမဵဝ်း ဢိသရေး၊ တင်းလၢႆၽၢတ်ႇၽႄၵၼ်ယူႇၵႃႈၼိူဝ်လွႆၼိူဝ်ၵွင်းတင်းလၢႆ မိူၼ်ၸိူဝ်ႉၼင်ႇသူဝ်းဢၼ်ဢမ်ႇမီးၽူႈလႂ်လဵင်ႉထိင်းၼၼ်ႉဢေႃႈ။ ၼင်ႇၼၼ်လႄႈ ထႃႇဝရႃႉၽြႃး၊ မီးဢမိင်ႉလႄႈဝႃႈ၊ ‘ၵူၼ်းၸိူဝ်းၼႆႉဢမ်ႇမီးၸဝ်ႈမီးၸွမ်ယဝ်ႉ။ ႁႂ်ႈၶဝ်ၶိုၼ်းမိူဝ်းၵႂႃႇၵႃႈတီႈႁိူၼ်းၽႂ်ႁိူၼ်းမၼ်းၼိမ်ၼိမ်လီလီသေ၊’ ဝႃႈၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ဢႃႇႁပ်ႉ၊ လၢတ်ႈတီႈ ယူဝ်းသၽတ်ႉ၊ လႄႈဝႃႈ၊ “ၸွင်ႇၵဝ်ၶႃႈဢမ်ႇလၢတ်ႈတီႈၸဝ်ႈလႄႈဝႃႈ၊ ‘မၼ်းဢမ်ႇတွၼ်ႉႁေႃးလၢတ်ႈၵႂၢမ်းမၢင်ႇၵလႃႇပုၼ်ႈၵဝ်ၶႃႈသေပွၵ်ႈလႄႈ၊ၸၢင်ႈႁေႃးလၢတ်ႈၵႂၢမ်းဢႃႉမၢင်ႇၵလႃႇၵူၺ်းဢေႃႈ၊’ ဝႃႈၼင်ႇၼႆဝႆႉယဝ်ႉဢမ်ႇၸႂ်ႈၶႃႈႁိုဝ်း၊” ဝႃႈၼင်ႇၼႆဢေႃႈ။
မိၵ်ႉၶႃး၊ သိုပ်ႇလၢတ်ႈလႄႈဝႃႈ၊ “ၵွပ်ႈပိူဝ်ႈၸိူဝ်ႉၼင်ႇၼႆလႄႈၶႅၼ်းတေႃႈထွမ်ႇငိၼ်းဢမိင်ႉ ထႃႇဝရႃႉၽြႃး၊ တႃႉ။ ၵဝ်ၶႃႈႁၼ် ထႃႇဝရႃႉၽြႃး၊ ၼင်ႈယူႇၵႃႈၼိူဝ်ရႃႇၸႃႉပလၢင်ႇၸဝ်ႈ၊ၵႃႈၼႂ်းမိူင်းၵၢင်ႁၢဝ်ၸဝ်ႈယူႇလူၺ်ႈၵၼ်တင်းတမၢၼ်ႇၵၢင်ႁၢဝ်မၼ်းၸဝ်ႈတင်းသဵင်ႈတင်းမူတ်းၸုၵ်းယူႇၵႃႈႁိမ်းမၼ်းၸဝ်ႈဢေႃႈ။-
ထႃႇဝရႃႉၽြႃး၊ ထၢမ်လႄႈဝႃႈ၊ ‘ၽူႈလႂ်တၵ်းၵႂႃႇလႄႈပႅတ်ႉလႅၼ် ဢႃႇႁပ်ႉ၊ ပုၼ်ႈဢၼ်မၼ်းတၵ်းၶီႇသိုၵ်းၵႂႃႇၸူးတီႈဝဵင်း ရႃႇမုတ်ႉ၊ သေယဝ်ႉ၊လႆႈၶၢမ်ႇတၢင်းဢၼ်ပိူၼ်ႈဢဝ်မၼ်းတၢႆၵႃႈတီႈၼၼ်ႈ၊’ ဝႃႈၼင်ႇၼႆဢေႃႈ။ တမၢၼ်ႇၵၢင်ႁၢဝ်ၵမ်ႈၽွင်ႈလဝ်ႈလၢတ်ႈယေႈၸိူဝ်ႉ၊ၵမ်ႈၽွင်ႈလဝ်ႈလၢတ်ႈယေႈမဵဝ်း၊-
တေႃႇထိုင်ႁွတ်ႈဝိၺိၺ်ႇပႃးၼိုင်ႈသုတ်ႉၸပ်းသုတ်ႉၸူးၵႃႈတီႈၽၢႆႇၼႃႈ ထႃႇဝရႃႉၽြႃး၊ လႄႈလဝ်ႈလၢတ်ႈဝႃႈ၊ ‘ၵဝ်ၶႃႈတၵ်းၵႂႃႇပႅတ်ႉလႅၼ်မၼ်းၶႃႈဢေႃႈ၊’ ဝႃႈၼင်ႇၼႆဢေႃႈ။ ထႃႇဝရႃႉၽြႃး၊ ၵေႃႈထၢမ်လႄႈဝႃႈ၊ ‘မႂ်းတၵ်းႁဵတ်းၸိူဝ်ႉၼင်ႇႁိုဝ်ပႅတ်ႉလႅၼ်မၼ်း၊’ ဝႃႈၼင်ႇၼႆလႄႈ၊-
ဝိၺိၺ်ႇၼၼ်ႉၶိုၼ်းလဝ်ႈလၢတ်ႈဝႃႈ၊ ‘ၵဝ်ၶႃႈတၵ်းၵႂႃႇလႄႈႁႂ်ႈပရေႃးၽႅတ်ႈဢၼ်မီးတီႈ ဢႃႇႁပ်ႉ၊ ၸိူဝ်းၼၼ်ႉႁေႃးလၢတ်ႈၵႂၢမ်းမုသႃႇတီႈၶႃႈဢေႃႈ၊’ ဝႃႈၼင်ႇၼႆဢေႃႈ။ ထႃႇဝရႃႉၽြႃး၊ ၵေႃႈမီးဢမိင်ႉလႄႈဝႃႈ၊ ‘ၵႂႃႇလႄႈပႅတ်ႉလႅၼ်ၶျေႃးဝွၼ်းမၼ်းၸိုင်၊မႂ်းတၵ်းပႄႉၼႅင်ႇဢေႃႈ၊’ ဝႃႈၼင်ႇၼႆၼၼ်ႉယဝ်ႉ၊” ဝႃႈၼင်ႇၼႆဢေႃႈ။
မိၵ်ႉၶႃး၊ ၶွတ်ႇယွတ်ႈၶေႃႈၵႂၢမ်းလႄႈဝႃႈ၊ “ၼႆႉၸမ်ႉပဵၼ်မႃးၸိူဝ်ႉၼင်ႇၼႆတီႈၶႃႈယဝ်ႉ။ ထႃႇဝရႃႉၽြႃး၊ ႁႂ်ႈပရေႃးၽႅတ်ႈၸဝ်ႈႁဝ်းၸိူဝ်းၼႆႉလၢတ်ႈၵႂၢမ်းမုသႃႇတီႈၸဝ်ႈႁဝ်းတီႈၶႃႈယဝ်ႉ။ ၼႆႉၸမ်ႉ၊တူဝ် ထႃႇဝရႃႉၽြႃး၊ တႅပ်းတတ်းၶိုင်ပွင်ႁႂ်ႈၸဝ်ႈႁဝ်းထူပ်းၽေးဢႃႉမၢင်ႇၵလႃႇတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ပရေႃးၽႅတ်ႈ ၸေႇတၵိ၊ ၼၼ်ႉသုတ်ႉၶိုၼ်ႈၸူးတီႈ မိၵ်ႉၶႃး၊ လႄႈတူပ်းတီႈၵႅမ်ႈမၼ်းသေယဝ်ႉထၢမ်လႄႈဝႃႈ၊ “ဝိၺိၺ်ႇ ထႃႇဝရႃႉၽြႃး၊ ဢွၵ်ႇသေၵႃႈၼႂ်းၵဝ်ၵႂႃႇမိူဝ်ႈလႂ်လႄႈသမ်ႉၵႂႃႇလၢတ်ႈတေႃႇၵၼ်တင်းမႂ်း၊” ဝႃႈၼင်ႇၼႆဢေႃႈ။
မိၵ်ႉၶႃး၊ ၵေႃႈၶိုၼ်းလၢတ်ႈလႄႈဝႃႈ၊ “မႂ်းတၵ်းႁုႁၼ်ၼႂ်းမိုဝ်ႉဝၼ်းဢၼ်မႂ်းပၢႆႈၵႂႃႇတဵတ်ႇမႅပ်းယူႇၵႃႈၼႂ်းလုၵ်းတၢင်းၼႂ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၶုၼ်ႁေႃၶမ်း ဢႃႇႁပ်ႉ၊ ပူင်ဢမိင်ႉတီႈၶုၼ်ဢၼ်ပွင်ၵၢၼ်ၵေႃႉၼိုင်ႈလႄႈဝႃႈ၊ “တိဢဝ် မိၵ်ႉၶႃး၊ လႄႈဢဝ်မၼ်းသူင်ႇၵႂႃႇၵႃႈတီႈၶုၼ် ဢႃႇမုၼ်ႇ၊ ဢၼ်ပဵၼ်ၸဝ်ႈမိူင်းၼၼ်ႉ၊ဢိၵ်ႇတင်း ယေႃးသႃႉ၊ ဢၼ်ပဵၼ်လုၵ်ႈၶုၼ်လုၵ်ႈၵွၼ်းၼၼ်ႉတႃႉ။-
သင်ႇလၢတ်ႈႁႂ်ႈၶဝ်ဢဝ်မၼ်းၶင်ထွင်ႇဝႆႉလႄႈဢဝ်ၶဝ်ႈမုၼ်းတင်းၼမ်ႉဢၼ်ဝႃႈ၊တၢင်းၵိၼ်တၢင်းၶူပ်းၼႂ်းထွင်ႇၼၼ်ႉလဵင်ႉပၼ်မၼ်းတေႃႇထိုင်ႁွတ်ႈၵဝ်လႆႈၶိုၼ်းပွၵ်ႈမႃးလူင်ႈလီလွတ်ႈလီၼၼ်ႉတႃႉ၊” ဝႃႈၼင်ႇၼႆဢေႃႈ။
မိၵ်ႉၶႃး၊ ၵေႃႈၶိုၼ်းလဝ်ႈလၢတ်ႈလႄႈဝႃႈ၊ “ပေႃးၸဝ်ႈႁဝ်းလႆႈၶိုၼ်းပွၵ်ႈမႃးလူင်ႈလီလွတ်ႈလီၸိုင်၊ ထႃႇဝရႃႉၽြႃး၊ ဢမ်ႇၸႂ်ႉၵဝ်ၶႃႈႁႂ်ႈမီးဢမိင်ႉတီႈၶႃႈ။ ၵူၼ်းၵႃႈမီးတင်းသဵင်ႈတင်းလူင်ၶဝ်႟။ ဢွၼ်ၵၼ်ထွမ်ႇငိၼ်းၵႂၢမ်းၵဝ်ဝႆႉတႃႉ၊” ဝႃႈၼင်ႇၼႆဢေႃႈ။
ၼင်ႇၼၼ်လႄႈၶုၼ်ႁေႃၶမ်း ဢႃႇႁပ်ႉ၊ မိူင်း ဢိသရေး၊ ဢိၵ်ႇတင်းၶုၼ်ႁေႃၶမ်း ယူဝ်းသၽတ်ႉ၊ မိူင်း ယုတႃႉ၊ ဢွၼ်ၵၼ်ၶီႇသိုၵ်းၶိုၼ်ႈတိုၵ်းဝဵင်း ရႃႇမုတ်ႉ၊ မိူင်း ၵိလတ်ႉ၊ ဢေႃႈ။-
ဢႃႇႁပ်ႉ၊ လၢတ်ႈတီႈ ယူဝ်းသၽတ်ႉ၊ လႄႈဝႃႈ၊ “ၵႃႈၼႂ်းၼႃႈသိုၵ်းၼၼ်ႉၵဝ်တၵ်းယႃႉႁၢင်ႈယႃႉၽၢင်ၵဝ်လႄႈ၊ၸဝ်ႈၸမ်ႉ၊ၼုင်ႈၶူဝ်းၶုၼ်ႁေႃၶမ်းလႄႈၶိုၼ်ႈတိုၵ်းတႃႉ၊” ဝႃႈၼင်ႇၼႆသေယဝ်ႉ၊ၶုၼ်ႁေႃၶမ်း ဢိသရေး၊ ၼၼ်ႉယႃႉႁၢင်ႈယႃႉၽၢင်သေလႄႈၶိုၼ်ႈတိုၵ်းသိုၵ်းဢေႃႈ။
ၶုၼ်ႁေႃၶမ်းမိူင်း သီးရီးယႃး၊ ၼၼ်ႉပူင်ဢမိင်ႉတီႈၶုၼ်သိုၵ်းႁၢၼ်ဢၼ်ၵွၼ်းတပ်ႉလေႃႉမႃႉသိုၵ်းတင်းလၢႆဝႆႉဢမ်ႇႁႂ်ႈၶဝ်တိုၵ်းတေႃးၽူႈလႂ်သေၵေႃႉသေၵူၼ်းလႄႈ၊ႁႂ်ႈၶဝ်တိုၵ်းတေႃးၶုၼ်ႁေႃၶမ်း ဢိသရေး၊ ၵေႃႉလဵဝ်ၵူၺ်းဢေႃႈ။-
ၵွပ်ႈပိူဝ်ႈၸိူဝ်ႉၼင်ႇၼႆလႄႈမိူဝ်ႈဢၼ်ၶဝ်ႁၼ်ၶုၼ်ႁေႃၶမ်း ယူဝ်းသၽတ်ႉ၊ ၸိုင်၊ၶဝ်ဢွၼ်ၵၼ်ထၢင်ႇမၼ်းပဵၼ်ၶုၼ်ႁေႃၶမ်း ဢိသရေး၊ လႄႈဢွၼ်ၵၼ်ဢုမ်ႇမႃးတိုၵ်းတေႃးမၼ်းဢေႃႈ။ ယူဝ်းသၽတ်ႉ၊ ၵေႃႈႁွင်ႉသႅၼ်ႇလႄႈ ထႃႇဝရႃႉၽြႃး၊ၽြႃးပဵၼ်ၸဝ်ႈ၊ ၵႄႇၼုၵ်ႈဢဝ်မၼ်း၊ႁႂ်ႈၶဝ်ၼၼ်ႉဝႄႈပိူင်ႈမၼ်းၵႂႃႇသေဢေႃႈ။-
ၶုၼ်သိုၵ်းႁၢၼ်ဢၼ်ၵွၼ်းတပ်ႉလေႃႉမႃႉသိုၵ်းၸိူဝ်းၼၼ်ႉႁုႁၼ်လွင်ႈဢၼ်ဢမ်ႇၸႂ်ႈၶုၼ်ႁေႃၶမ်း ဢိသရေး၊ သေယဝ်ႉ၊ယင်းဢမ်ႇဢုမ်ႇၸွမ်းမၼ်းလႄႈဝႄႈပိူင်ႈမၼ်းၵႂႃႇသေဢေႃႈ။-
ၵူၼ်းသိုၵ်း သီးရီးယႃး၊ ၵေႃႉၼိုင်ႈယင်းဢမ်ႇငႃဢမ်ႇယိူင်းလႄႈဢဝ်ၵၢင်ႇမၼ်းယိုဝ်းၵႂႃႇထုၵ်ႇမႅၼ်ႈၵႃႈတီႈၵႄႈပွင်ႈသိုပ်ႇၶႅပ်းလဵၵ်းဢၼ်ႁႄႉႁူဝ်ဢူၵ်းၶုၼ်ႁေႃၶမ်း ဢႃႇႁပ်ႉ၊ ဢေႃႈ။ မၼ်းႁွင်ႉလၢတ်ႈတီႈၵူၼ်းသိုၵ်းႁေႃႈလေႃႉမႃႉၸဝ်ႈၼၼ်ႉလႄႈဝႃႈ၊ “တူဝ်ၵဝ်လႆႈတိူဝ်ႉမၢတ်ႇယဝ်ႉ။ ဝၢႆႇႁူဝ်လေႃႉမႃႉလႄႈႁဝ်းဢွၵ်ႇပၢႆႈသေပၢင်သိုၵ်းၵႂႃႇတႃႉ၊” ဝႃႈၼင်ႇၼႆဢေႃႈ။-
ၼႂ်းဝၼ်းၼၼ်ႉတၢင်းဢၼ်တိုၵ်းၵၼ်တေႃးၵၼ်ႁႅင်းယႂ်ႇၼႃႇဢေႃႈ။ ၶုၼ်ႁေႃၶမ်း ဢိသရေး၊ ၵေႃႈဢိင်ယူႇၵႃႈၼႂ်းလေႃႉမႃႉမၼ်းဢဝ်ၼႃႈမၼ်းဝၢႆႇၸူးတီႈၵူၼ်း သီးရီးယႃး၊ ယူႇတေႃႇထိုင်ႁွတ်ႈၶိင်ႇႁူဝ်ၶမ်ႈလႄႈ၊ယၢမ်းမိူဝ်ႈဢၼ်ၵၢင်ဝၼ်းၸမ်တၵ်းတူၵ်းၼၼ်ႉဢသၢၵ်ႈမၼ်းလႆႈသဵင်ႈၵႂႃႇသေဢေႃႈ။
ၶုၼ်ႁေႃၶမ်း ယူဝ်းသၽတ်ႉ၊ ၶိုၼ်းပွၵ်ႈမိူဝ်းၼိမ်ၼိမ်လီလီ၊ၸူးတီႈႁေႃၸဝ်ႈဝဵင်း ယေႇရုသလႅမ်ႇ၊ ဢေႃႈ။-
ပရေႃးၽႅတ်ႈ ယေႇႁု၊ လုၵ်ႈၸၢႆး ႁႃႇၼၼိ၊ မႃးႁပ်ႉႁူဝ်တၢင်းၶုၼ်ႁေႃၶမ်းလႄႈလဝ်ႈလၢတ်ႈဝႃႈ၊ “ၸဝ်ႈၶုၼ်လူင်ထၢင်ႇပဵၼ်လွင်ႈလီၼႂ်းတၢင်းဢၼ်ၸွႆႈထႅမ်ၶဝ်ၸိူဝ်းဢၼ်ဢမ်ႇတြႃးၼၼ်ႉတီႈၶႃႈႁိုဝ်း။ ထုၵ်ႇလီၽွမ်ႉၽၢႆႇၶဝ်ၸိူဝ်းဢၼ်ၸင်း ထႃႇဝရႃႉၽြႃး၊ တီႈၶႃႈႁိုဝ်း။ ၸဝ်ႈၶုၼ်လူင်ႁဵတ်းႁႂ်ႈတၢင်းၸႂ်မႆႈၶႂ်ႈၸႃႉ ထႃႇဝရႃႉၽြႃး၊ တူၵ်းႁွတ်ႈၵႃႈၼိူဝ်ၸဝ်ႈၶုၼ်လူင်တီႈၶႃႈယဝ်ႉ။-
ၼႂ်းဝႃႈၼၼ်သေၵေႃႈ၊လႆႈထူပ်းႁၼ်လွင်ႈတၢင်းဢၼ်လီဢၼ်ငၢမ်းၼႂ်းၸဝ်ႈၶုၼ်လူင်၊ၵွပ်ႈပိူဝ်ႈဢၼ်ၸဝ်ႈၶုၼ်လူင်ပႄႇၽဵဝ်ႈပႅတ်ႈသဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ ဢၼ်ၵူၼ်းတင်းလၢႆဝႆႈၼၼ်ႉသေယဝ်ႉ၊ဝႆႉၸႂ်ႁႂ်ႈလႆႈၸွမ်းဢလူဝ်ႇၽြႃးပဵၼ်ၸဝ်ႈၼၼ်ႉတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
ပိၵ်ႉသမ်ႉၶုၼ်ႁေႃၶမ်း ယူဝ်းသၽတ်ႉ၊ ၼင်ႈႁၢင်ႈၼင်ႈႁေႃယူႇၵႃႈၼႂ်းဝဵင်း ယေႇရုသလႅမ်ႇ၊ သေၵေႃႈ၊မၼ်းယင်းဢွၵ်ႇၵႂႃႇလႄႇလဵပ်ႈၵႃႈၼႂ်းၵူၼ်းဝၢၼ်ႈၵူၼ်းမိူင်းယူႇမၢၼ်ႇမၢၼ်ႇ၊ၸႃႉၸဵမ်ဝဵင်း ပေႇရသေးၽႃႉ၊ ၽၢႆႇတၢင်းၸၢၼ်းတေႃႇထိုင်ႁွတ်ႈမိူင်းလွႆ ဢေႇၽရိမ်ႇ၊ ၽၢႆႇတၢင်းႁွင်ႇ၊ပုၼ်ႈလွင်ႈၼင်ႇႁိုဝ်တၵ်းႁွင်ႉဢဝ်ၵူၼ်းတင်းလၢႆမႃးတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇမွၼ်ႇၶဝ်ၼၼ်ႉဢေႃႈ။-
မၼ်းၶၢၼ်းၵူၼ်းလူင်ဢၼ်ၸီႇယၢင်ႇတြႃးတင်းလၢႆဝႆႉၵႃႈၼႂ်းဝဵင်းဢၼ်မၼ်ႈၶိူင်ႇမိူင်း ယုတႃႉ၊ ၸိူဝ်းၼၼ်ႉသေယဝ်ႉ၊-
သင်ႇသွၼ်ၶဝ်သေလႄႈဝႃႈ၊ “ဢွၼ်ၵၼ်ႁဵတ်းသတိလူၺ်ႈလွင်ႈဢၼ်သူတႅပ်းတတ်းဢမုၼၼ်ႉတႃႉ။ သူပွင်ႁဵတ်းၸွမ်းလူၺ်ႈဢမိင်ႉဢႃႇၼႃႇၵူၼ်းဢမ်ႇၸႂ်ႈလႄႈ၊သူလႆႈပွင်ႁဵတ်းၸွမ်းလူၺ်ႈဢမိင်ႉဢႃႇၼႃႇ ထႃႇဝရႃႉၽြႃး၊ ဢေႃႈ။ ၼင်ႇၼၼ်လႄႈမၼ်းၸဝ်ႈမီးယူႇလူၺ်ႈၵၼ်တင်းသူၼႂ်းမိူဝ်ႈဢၼ်သူၸီႇယၢင်ႇၼၼ်ႉဢေႃႈ။-
ဢွၼ်ၵၼ်ၵူဝ်ႁႄ ထႃႇဝရႃႉၽြႃး၊ လႄႈပႃးတင်းသတိပိင်ႇၺႃႇလႄႈပွင်ႁဵတ်းတႃႉ။ လွင်ႈမၼ်းၸမ်ႉ၊ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းဢမ်ႇယိူၼ်ႉၶၢမ်ႇတၢင်းဢၼ်ႁဵတ်းဢမုဢၼ်ဢမ်ႇတြႃး၊တၢင်းဢၼ်ထွၵ်ႈလူၺ်ႈၼႃႈၵူၼ်း၊ဢိၵ်ႇတင်းတၢင်းဢၼ်ၵိၼ်သူးၵိၼ်လၢပ်ႈၸိူဝ်းၼၼ်ႉ၊” ဝႃႈၼင်ႇၼႆဢေႃႈ။
လိူဝ်သေၼၼ်ႉဢမ်ႇၵႃး၊ၵႃႈၼႂ်းဝဵင်း ယေႇရုသလႅမ်ႇ၊ ၵေႃႈ ယူဝ်းသၽတ်ႉ၊ ၶၢၼ်းဝႆႉၵူၼ်းၸိူဝ်ႉၶိူဝ်း လေႇဝိ၊ လႂ်၊ယဵၸ်ႈပရေႃးႁဵၵ်ႈ လႂ်၊ဢိၵ်ႇတင်းၵူၼ်းတူၼ်ႈၵူၼ်းႁူဝ်ၼႂ်းၵူၼ်းဝၢၼ်ႈၵူၼ်းမိူင်းၵမ်ႈၽွင်ႈႁႂ်ႈၶဝ်ၸီႇယၢင်ႇဢမုတြႃး ထႃႇဝရႃႉၽြႃး၊ ဢိၵ်ႇတင်းဢမုဢၼ်ၵူၼ်းၼင်ႇၵၼ်ထူပ်းဢမုတီႈၵၼ်ၸိူဝ်းၼၼ်ႉဢေႃႈ။ ၶဝ်ၸိူဝ်းၼၼ်ႉၼင်ႈလုမ်းၵႃႈၼႂ်းဝဵင်း ယေႇရုသလႅမ်ႇ၊ ဢေႃႈ။-
မၼ်းသင်ႇသွၼ်ၶဝ်လႄႈဝႃႈ၊ “သူဢွၼ်ၵၼ်ပႃးတင်းၸႂ်ဢၼ်ၵူဝ်ယမ် ထႃႇဝရႃႉၽြႃး၊ ၼႂ်းတၢင်းဢၼ်သူၵိုတ်ႉႁၢပ်ႇၼႃႈၵၢၼ်သူလႄႈပႂ်ႉသဵတ်ႈၸႃႇၼႂ်းလွင်ႈတၢင်းဢၼ်သူပွင်ႁဵတ်းပွင်သၢင်ႈၼၼ်ႉတႃႉ။-
ၼႂ်းမိူဝ်ႈဢၼ်ၶႃႈဝၢၼ်ႈၵူၼ်းမိူင်းသူၼင်ႇၵၼ်ၵၼ်၊ဢၼ်ယူႇၵႃႈတီႈဝဵင်းသေဝဵင်းဝဵင်းၼၼ်ႉမီးဢမုတီႈၵၼ်ၼႂ်းတၢင်းဢၼ်ဢဝ်ဢသၢၵ်ႈၵူၼ်းတၢႆလႄႈသင်၊ၼႂ်းဢမုတၢင်းဢၼ်ပူၼ်ႉလိူဝ်ပိင်းၺၢပ်ႈတြႃးလႄႈသင်၊ဢမ်ႇၼၼ်ၽိတ်းပိူင်ႈထုင်းတြႃးၸဝ်ႈဢၼ်သင်ႇလၢတ်ႈဝႆႉၸိူဝ်းၼၼ်ႉလႄႈသင်၊ပေႃးထိုင်မႃးၵႃႈတီႈသူၸိုင်၊သူဢွၼ်ၵၼ်ပၼ်သတိတီႈၶဝ်လီလီငၢမ်းငၢမ်း၊ပုၼ်ႈလွင်ႈၼင်ႇႁိုဝ်ၶဝ်တၵ်းဢမ်ႇၽိတ်းပိူင်ႈ ထႃႇဝရႃႉၽြႃး၊ လႄႈတၢင်းၸႂ်မႆႈၶႂ်ႈၸႃႉမၼ်းၸဝ်ႈတၵ်းဢမ်ႇတူၵ်းႁွတ်ႈၵႃႈၼိူဝ်သူၼၼ်ႉတႃႉ။ ပေႃးဢွၼ်ၵၼ်ႁဵတ်းၸိူဝ်ႉၼင်ႇၼႆၸိုင်၊တူဝ်သူတၵ်းၵၢင်းလွတ်ႈတင်းဢပျတ်ႈဢေႃႈ။-
ၼႂ်းၵူႈၸိူဝ်ႉၵူႈပိူင်ၼၼ်ႉ၊ၶုၼ်ယဵၸ်ႈပရေႃးႁဵၵ်ႈ ဢႃႇမရိ၊ လႆႈဢုပ်ႉၵႃႈၼိူဝ်သူဢေႃႈ။ ၼႂ်းဢမုၶုၼ်ႁေႃၶမ်းၵူႈၸိူဝ်ႉၵူႈပိူင်ၼၼ်ႉ၊ ၸေႇပတိ၊ လုၵ်ႈၸၢႆး ဢိသမေႇလႃႉ၊ ဢၼ်ပဵၼ်ၶုၼ်ၵႃႈၼိူဝ်မဵဝ်း ယုတႃႉ၊ ၼၼ်ႉလႆႈဢုပ်ႉဢေႃႈ။ ၵူၼ်းမဵဝ်း လေႇဝိ၊ တင်းလၢႆၵေႃႈ၊တေဢွၼ်ၵၼ်ထၢမ်းၼႃႈၵၢၼ်ၵႃႈတီႈၽၢႆႇၼႃႈသူဢေႃႈ။ ဢွၼ်ၵၼ်ၸီႇယၢင်ႇႁတ်းႁတ်းႁၢၼ်ႁၢၼ်တႃႉ။ ထႃႇဝရႃႉၽြႃး၊ တၵ်းယူႇၽၢႆႇၶဝ်ၸိူဝ်းဢၼ်လီဢၼ်ငၢမ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
လိုၼ်းၼၼ်ႉဢမ်ႇႁိုင်ဢမ်ႇၼၢၼ်းတပ်ႉသိုၵ်းၵူၼ်းမဵဝ်း မေႃႇၽႃႉ၊ တင်းမဵဝ်း ဢမ်ႇမုၼ်ႇ၊ ဢိၵ်ႇတင်းၵူၼ်းမဵဝ်း ဢေႇတုမ်ႇ၊ ၵမ်ႈၽွင်ႈဢွၼ်ၵၼ်ၶီႇသိုၵ်းၶိုၼ်ႈတိုၵ်းမိူင်း ယုတႃႉ၊ ဢေႃႈ။-
ၵူၼ်းသူင်ႇၶၢဝ်ႇၵမ်ႈၽွင်ႈမႃးလဝ်ႈလၢတ်ႈတီႈၶုၼ်ႁေႃၶမ်း ယူဝ်းသၽတ်ႉ၊ လႄႈဝႃႈ၊ “တပ်ႉသိုၵ်းရၢၼ်ႇသူႇဢၼ်ႁႅင်းယႂ်ႇၼႃႇလုၵ်ႉသေၵႃႈတီႈမိူင်း ဢေႇတုမ်ႇ၊ ထိုင်မႃးၵႃႈတီႈၽၢႆႇပုၼ်ႉ ပၢင်ႇလၢႆႇတၢႆ၊ ၼၼ်ႉႁႂ်ႈလႆႈတိုၵ်းၸဝ်ႈၶုၼ်လူင်ႁဝ်းတီႈၶႃႈဢေႃႈ။ ၶဝ်ၸိူဝ်းၼၼ်ႉပေႃးတိုၵ်းပႄႉသိမ်းဢဝ်ဝဵင်း ႁႃႇၸၸုၼ်ႇတႃႇမႃႇ၊ ယဝ်ႉတီႈၶႃႈယဝ်ႉ၊” ဝႃႈၼင်ႇၼႆဢေႃႈ။ (ဝဵင်းၼၼ်ႉသမ်ႉမီးၸိုဝ်ႈဝႃႈ၊ ဢႅၼ်ႇၵေးတိ၊ ဝႃႈၼႆထႅင်ႈဢေႃႈ။-)
ယူဝ်းသၽတ်ႉ၊ တူၵ်းၸႂ်လႄႈၵၢဝ်ႇတိူင်ႇတီႈ ထႃႇဝရႃႉၽြႃး၊ ပုၼ်ႈတႃႇတေၼႄပၼ်သဵၼ်ႈတၢင်းဢေႃႈ။ မိူဝ်ႈၼၼ်ႉမၼ်းပူင်ဢမိင်ႉႁႂ်ႈၵူၼ်းတင်းလၢႆၵမ်သိၼ်ဢမ်ႇၵိၼ်တၢင်းၵိၼ်တင်းမိူင်းဢေႃႈ။-
ၵူၼ်းမဵဝ်း ယုတႃႉ၊ ၸိူဝ်းၼၼ်ႉဢွၼ်ၵၼ်ဢွၵ်ႇသေၵႃႈတီႈဝဵင်းၶဝ်လႄႈမႃးၵႃႈတီႈဝဵင်း ယေႇရုသလႅမ်ႇ၊ ႁႂ်ႈလႆႈတွင်ႈထၢမ်တီႈ ထႃႇဝရႃႉၽြႃး၊ ပုၼ်ႈတၢင်းဢၼ်ၼႄပၼ်သဵၼ်ႈတၢင်းဢေႃႈ။-
ၵူၼ်းမိူင်း ယုတႃႉ၊ ၸိူဝ်းၼၼ်ႉဢိၵ်ႇတင်းၵူၼ်းဝဵင်း ယေႇရုသလႅမ်ႇ၊ တင်းလၢႆဢွၼ်ၵၼ်ၸုတုမ်ၵၼ်ၵႃႈၼႂ်းပၢင်ႇဝၢင်းမႂ်ႇၵျွင်းပိၵ်ႈမၢၼ်ႇၸဝ်ႈဢေႃႈ။ ၶုၼ်ႁေႃၶမ်း ယူဝ်းသၽတ်ႉ၊ ၶဝ်ႈၵႂႃႇၸုၵ်းၵႃႈၼႂ်းၵၢင်ၶဝ်သေယဝ်ႉ၊-
သူးတွင်းလႄႈဝႃႈ၊ “ ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇမွၼ်ႇႁဝ်းၶႃႈတီႈၶႃႈ။ ၸဝ်ႈႁဝ်းပဵၼ်ၽြႃးပဵၼ်ၸဝ်ႈၽုင်ႇၵၢင်ႁၢဝ်လႄႈဢုပ်ႉပိူင်ႇၵူၼ်းလေႃးၵီႇၵႃႈမီးတင်းသဵင်ႈတင်းလူင်တီႈၶႃႈဢေႃႈ။ ၸဝ်ႈႁဝ်းမီးႁႅင်းတၼ်းၶူဝ်းယႂ်ႇၼႃႇထၢၼ်ႈပေႃးၽူႈလႂ်ဢမ်ႇၶတ်းၶႅင်ႇၸဝ်ႈႁဝ်းလႆႈတီႈၶႃႈဢေႃႈ။-
ၸဝ်ႈႁဝ်းပဵၼ်ၽြႃးပဵၼ်ၸဝ်ႈႁဝ်းၶႃႈတီႈၶႃႈဢေႃႈ။ ၼႂ်းမိူဝ်ႈဢၼ်ၵူၼ်းၸဝ်ႈႁဝ်းမဵဝ်း ဢိသရေး၊ ၶဝ်ႈမႃးၵႃႈၼႂ်းလိၼ်မိူင်းၼႆႉၼၼ်ႉၸိုင်၊ၸဝ်ႈႁဝ်းလိုပ်ႈၵူၼ်းမဵဝ်းဢၼ်ယူႇသဝ်းၵႃႈတီႈၼႆႈတင်းလၢႆဢွၵ်ႇပႅတ်ႈသေယဝ်ႉ၊ဢဝ်လိၼ်မိူင်းၼႆႉပၼ်တီႈလုၵ်ႈလၢၼ်ၸိူဝ်ႉၶိူဝ်း ဢႃႇပြႃႇႁၢမ်ႇ၊ ၵေႃႉသႄႈၸဝ်ႈႁဝ်း၊ႁႂ်ႈပဵၼ်ဢမူၺ်ႇၶဝ်ၵႂႃႇတႃႇသေႇတီႈၶႃႈယဝ်ႉ။-
ၶဝ်ၵေႃႈယူႇသဝ်းၵႃႈတီႈၼႆႈသေယဝ်ႉ၊တႄႇႁဵတ်းၵျွင်းပိၵ်ႈမၢၼ်ႇၸဝ်ႈပုၼ်ႈၼႃႇမႃႉၸိုဝ်ႈသဵင်ၸဝ်ႈႁဝ်းလႄႈလဝ်ႈလၢတ်ႈဝႆႉလႄႈဝႃႈ၊-
မိူဝ်ႈဢၼ်ၽေးဢုပၢတ်ႈဢၼ်ဝႃႈ၊ၽေးသိုၵ်းၽေးသိူဝ်ၽေးၵႃႇလႃႉႁႃႈလႅင်မိူင်း၊ၽေးၶဝ်ႈၵႃႈမၢၵ်ႇပႅင်းၸိူဝ်းၼၼ်ႉသေၸိူဝ်ႉသေပိူင်တူၵ်းႁွတ်ႈမႃးၵႃႈၼိူဝ်ၶဝ်ၸိုင်၊ၶဝ်တၵ်းဢွၼ်ၵၼ်လႆႈၸုၵ်းယူႇၵႃႈတီႈၽၢႆႇၼႃႈၵျွင်းပိၵ်ႈမၢၼ်ႇၸဝ်ႈတီႈဢၼ်တၵ်းႁဵတ်းဝၢတ်ႈၵူဝ်းၵႂၢႆႇၸဝ်ႈႁဝ်းၼႆႉ၊ဢိၵ်ႇတင်းႁႂ်ႈလႆႈသူးတွင်းပုၼ်ႈတုၵ်ႉၶႃႉတၢင်းၽၢၼ်ၶဝ်ပုၼ်ႈဢၼ်ၸဝ်ႈႁဝ်းတၵ်းထွမ်ႇငိၼ်းလႄႈၵႄႇၼုၵ်ႈဢဝ်ၶဝ်ၼၼ်ႉတီႈၶႃႈဢေႃႈ။
“တေႃႈလဵဝ်ၼႆႉၵူၼ်းမိူင်း ဢမ်ႇမုၼ်ႇ၊ မိူင်း မေႃႇၽႃႉ၊ တင်းၵူၼ်းမိူင်း ဢေႇတုမ်ႇ၊ တင်းလၢႆၶီႇသိုၵ်းမႃးတိုၵ်းၶႃႈၸဝ်ႈႁဝ်းၶဝ်တီႈၶႃႈယဝ်ႉ။ ယၢမ်းမိူဝ်ႈဢၼ်ပူႇမွၼ်ႇၶႃႈၸဝ်ႈႁဝ်းၶဝ်ဢွၵ်ႇမိူင်း ဢေးၵျိပ်ႉ၊ မႃးၼၼ်ႉ၊ၸဝ်ႈႁဝ်းဢမ်ႇႁႂ်ႈၶဝ်ၶဝ်ႈၵႃႈၼႂ်းမိူင်းၸိူဝ်းၼၼ်ႉလႄႈ၊ပူႇမွၼ်ႇၶႃႈၸဝ်ႈႁဝ်းၶဝ်လႆႈဝႄႈပိူင်ႈမိူင်းၶဝ်သေလႄႈဢမ်ႇယႃႉဢမ်ႇၵဝ်းမိူင်းၶဝ်တီႈၶႃႈဢေႃႈ။-
လွင်ႈတၢင်းဢၼ်ၶဝ်တွပ်ႇတႅၼ်းၶႃႈၸဝ်ႈႁဝ်းၶဝ်ၼၼ်ႉၸမ်ႉ၊ၶဝ်မႃးႁႂ်ႈလႆႈလိုပ်ႈၶႃႈၸဝ်ႈႁဝ်းၶဝ်ဢွၵ်ႇသေၵႃႈတီႈမိူင်းဢၼ်ၸဝ်ႈႁဝ်းပၼ်တီႈၶႃႈၸဝ်ႈႁဝ်းၼၼ်ႉတီႈၶႃႈဢေႃႈ။-
ၸဝ်ႈႁဝ်းပဵၼ်ၽြႃးပဵၼ်ၸဝ်ႈႁဝ်းၶႃႈတီႈၶႃႈဢေႃႈ။ ၸီႇယၢင်ႇပၼ်တၢမ်ႇၶဝ်သေၵမ်းတီႈၶႃႈ။ လွင်ႈမၼ်းၸမ်ႉ၊ၶႃႈၸဝ်ႈႁဝ်းၶဝ်ဢမ်ႇတၢတ်ႈၼိူင်ႇႁႂ်ႈလႆႈႁႄႉၶႅၼ်တိုၵ်းတပ်ႉယႂ်ႇတပ်ႉလူင်ဢၼ်ၶီႇသိုၵ်းမႃးတီႈၶႃႈၸဝ်ႈႁဝ်းၶဝ်ၼၼ်ႉတီႈၶႃႈ။ ၶႃႈၸဝ်ႈႁဝ်းၶဝ်ဢမ်ႇႁုလွင်ႈဢၼ်တေႁဵတ်းၸိူဝ်ႉၼင်ႇႁိုဝ်ၼၼ်ႉတီႈၶႃႈလႄႈမုင်ႈမွင်းတၢင်းဢၼ်ၸဝ်ႈႁဝ်းၸွႆႈထႅမ်ၵူၺ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၶိင်ႇၵႃႇလႃႉယၢမ်းၼၼ်ႉၵူၼ်းမဵဝ်း ယုတႃႉ၊ တင်းသဵင်ႈတင်းလူင်၊ဢိၵ်ႇတင်းမေးၶဝ်လုၵ်ႈၶဝ်တင်းလၢႆဢွၼ်ၵၼ်ၸုၵ်းယူႇၽၢႆႇၼႃႈ ထႃႇဝရႃႉၽြႃး၊ ဢေႃႈ။-
မိူဝ်ႈၼၼ်ႉ၊ဝိၺိၺ်ႇ ထႃႇဝရႃႉၽြႃး၊ တူၵ်းႁွတ်ႈၵႃႈၼိူဝ်ၵူၼ်းၸိူဝ်ႉၶိူဝ်း လေႇဝိ၊ ၵေႃႉၼိုင်ႈဢၼ်မီးယူႇၵႃႈၼႂ်းဝူင်ႈၵၢင်ပရိၵ်ႈသၢတ်ႈၼၼ်ႉဢေႃႈ။ မၼ်းၼၼ်ႉပဵၼ် ယႁႃႇၸေးလႃႉ၊ လုၵ်ႈၸၢႆး ၸႃႇၶရိ၊ ဢၼ်ၶဝ်ႈပႃးၼႂ်းၸိူဝ်ႉၶိူဝ်းႁိူၼ်း ဢႃႇသပ်ႉ၊ ဢၼ်လုၵ်ႈလၢၼ်သိုပ်ႇသေၵႃႈတီႈ မတ်ႉသၼိ၊ လူင်းမႃးတီႈ ယေႇယေႇလႃႉ၊ တေႃႇထိုင် ပေႇၼႃႇယႃႉ၊ ၵေႃႉပဵၼ်ပေႃႈ ၸႃႇၶရိ၊ ၼၼ်ႉဢေႃႈ။-
ယႁႃႇၸေးလႃႉ၊ လၢတ်ႈလႄႈဝႃႈ၊ “ၸဝ်ႈၶုၼ်လူင်ဢိၵ်ႇတင်းၵူၼ်းမဵဝ်း ယုတႃႉ၊ တင်းၵူၼ်းဝဵင်း ယေႇရုသလႅမ်ႇ၊ တင်းသဵင်ႈတင်းလူင်ၶဝ်႟။ ဢွၼ်ၵၼ်ထွမ်ႇငိၼ်းတႃႉ။ ထႃႇဝရႃႉၽြႃး၊ မီးဢမိင်ႉလႄႈဝႃႈ၊ ‘ယႃႇပေဢွၼ်ၵၼ်ၵူဝ်ႁႄ။ ယႃႇပေဢွၼ်ၵၼ်ၸႂ်လုၵွပ်ႈပိူဝ်ႈမူႇၽုင်မုၵ်ႉၸိူဝ်းလူင်ၼၼ်ႉ၊ၵၢၼ်တိုၵ်းသိုၵ်းၼၼ်ႉပဵၼ်ပုၼ်ႈတႃႇသူဢမ်ႇၸႂ်ႈ၊ပဵၼ်ပုၼ်ႈတႃႇၽြႃးပဵၼ်ၸဝ်ႈဢေႃႈ။-
ဝၼ်းမိူဝ်ႈၽုၵ်ႈဢွၼ်ၵၼ်ၶီႇသိုၵ်းၶိုၼ်ႈတိုၵ်းယၢမ်းမိူဝ်ႈဢၼ်ၶဝ်ယင်းတိုၵ်ႉၵႂႃႇၸွမ်းတၢင်းၵိဝ်ႇၵႅပ်ႈဢၼ်ၵႂႃႇၸူးတီႈဝဵင်း ၸိၸႃႉ၊ ၼၼ်ႉတႃႉ။ သူတၵ်းႁူပ်ႉထူပ်းၶဝ်ၵႃႈတီႈသူပ်းပၢင်ႇႁူၺ်ႈသိုဝ်ႈထိူၼ်ႇ ယေႇႁူၺ်ႇလႃႉ၊ ၼၼ်ႉဢေႃႈ။-
သူတေဢမ်ႇလႆႈတိုၵ်းၼႂ်းပၢင်သိုၵ်းၼႆႉ။ သူဢွၼ်ၵၼ်ဢဝ်ဢွင်ႈဢဝ်တီႈလႄႈပႂ်ႉတူၺ်းယူႇၵူၺ်းတႃႉ။ သူတၵ်းတေႁၼ်တၢင်းပႄႉၼႅင်ႇဢၼ် ထႃႇဝရႃႉၽြႃး၊ ပၼ်တီႈသူၼၼ်ႉဢေႃႈ၊’ ဝႃႈၼင်ႇၼႆဢေႃႈ။ ၵူၼ်းမဵဝ်း ယုတႃႉ၊ တင်းၵူၼ်းဝဵင်း ယေႇရုသလႅမ်ႇ၊ ၶဝ်႟။ ယႃႇပေၵူဝ်ႁႄ။ ယႃႇပေၸႂ်လု။ ဢွၼ်ၵၼ်ၶီႇသိုၵ်းၵႂႃႇၼႂ်းဝၼ်းမိူဝ်ႈၽုၵ်ႈတႃႉ။ ထႃႇဝရႃႉၽြႃး၊ တၵ်းမီးလူၺ်ႈၵၼ်တင်းသူဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၶုၼ်ႁေႃၶမ်း ယူဝ်းသၽတ်ႉ၊ ၶုပ်ႉမူပ်ႇငူပ်ႉႁူဝ်ၵႃႈၼိူဝ်လိၼ်လႄႈၵူၼ်းတင်းသဵင်ႈတင်းလူင်ၵေႃႈၶုပ်ႉမူပ်ႇငူပ်ႉႁူဝ်ၸွမ်းလူၺ်ႈၵၼ်တင်းမၼ်းသေလႄႈဝႆႈ ထႃႇဝရႃႉၽြႃး၊ ဢေႃႈ။-
ၵူၼ်းၶိူဝ်းႁိူၼ်း ၵေႃႇႁတ်ႉ၊ တင်းၶိူဝ်းႁိူၼ်း ၵေႃးရႃႉ၊ ၼႂ်းၸိူဝ်ႉၶိူဝ်းမဵဝ်း လေႇဝိ၊ ၸိူဝ်းၼၼ်ႉဢွၼ်ၵၼ်လုၵ်ႉၸုၵ်းသေလႄႈႁွင်ႉသႅၼ်ႇယွင်ႈယေႃး ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ လူၺ်ႈသဵင်ဢၼ်ႁႅင်းယႂ်ႇၼႃႇလူင်လၢင်ဢေႃႈ။
ၵၢင်ၼႂ်ဝၼ်းမိူဝ်ႈၽုၵ်ႈၼၼ်ႉၶဝ်ဢွၼ်ၵၼ်လုၵ်ႉၸဝ်ႉၸဝ်ႉလႄႈၵႂႃႇၵႃႈတီႈထိူၼ်ႇ တေႇၵေႃႇ၊ ဢေႃႈ။ ၼႂ်းမိူဝ်ႈဢၼ်ၶဝ်တႄႇၸႃႉဢွၵ်ႇၵႂႃႇယူႇၼၼ်ႉ ယူဝ်းသၽတ်ႉ၊ ၸုၵ်းယူႇသေလႄႈမီးဢမိင်ႉဝႃႈ၊ “ၵူၼ်းမိူင်း ယုတႃႉ၊ တင်းၵူၼ်းဝဵင်း ယေႇရုသလႅမ်ႇ၊ ၶဝ်႟။ ဢွၼ်ၵၼ်ယုမ်ႇမၢတ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူတႃႉ။ သူတၵ်းဢွၼ်ၵၼ်မၼ်ႈၶိူင်ႇဢေႃႈ။ ယုမ်ႇၵႂၢမ်းဢၼ်ပရေႃးၽႅတ်ႈ မၼ်းၸဝ်ႈႁေႃးလၢတ်ႈတီႈသူၼၼ်ႉတႃႉ။ သူတၵ်းဢွၼ်ၵၼ်ပႄႉၼႅင်ႇဢေႃႈ၊” ဝႃႈၼင်ႇၼႆဢေႃႈ။-
လိုၼ်းသေဢၼ်မၼ်းတိူင်ႇပၢင်ႇၵၼ်တင်းၵူၼ်းတင်းလၢႆယဝ်ႉၼၼ်ႉ၊ၶုၼ်ႁေႃၶမ်းပူင်ဢမိင်ႉႁႂ်ႈၵူၼ်းမေႃႁဵတ်းၵႂၢမ်းၵမ်ႈၽွင်ႈၼုင်ႈၶူဝ်းၼုင်ႈဢၼ်ၼုင်ႈၼႂ်းဝၼ်းယႂ်ႇဝၼ်းလူင်ၼၼ်ႉသေယဝ်ႉ၊မိူဝ်ႈဢၼ်ဢွၼ်ႁူဝ်တပ်ႉသိုၵ်းၵႂႃႇယူႇၼၼ်ႉႁႂ်ႈၶဝ်ႁဵတ်းၵႂၢမ်းဝႃႈ၊ “ဢွၼ်ၵၼ်ယွင်ႈယေႃးမုၼ်ၵျေးၸူး ထႃႇဝရႃႉၽြႃး၊ တႃႉ။ ၵရုၼႃႇမၼ်းၸဝ်ႈတႄႇယူႇတႃႇသေႇဢမ်ႇထၢတ်ႇဢေႃႈ၊” ဝႃႈၼင်ႇၼႆၼၼ်ႉဢေႃႈ။
ၼႂ်းမိူဝ်ႈဢၼ်ၶဝ်ႁဵတ်းၵႂၢမ်းယူႇၼၼ်ႉ ထႃႇဝရႃႉၽြႃး၊ ယႃႉၽဵဝ်ႈပႅတ်ႈတပ်ႉသိုၵ်းရၢၼ်ႇသူႇတင်းလၢႆလုလႅဝ်မူတ်းဢေႃႈ။-
လွင်ႈမၼ်းၸမ်ႉ၊တပ်ႉသိုၵ်းၵူၼ်းမဵဝ်း ဢမ်ႇမုၼ်ႇ၊ တင်းမဵဝ်း မေႃႇၽႃႉ၊ တိုၵ်းတပ်ႉသိုၵ်းၵူၼ်းမဵဝ်း ဢေႇတုမ်ႇ၊ ထၢၼ်ႈပေႃးတၢႆမူတ်းသေယဝ်ႉ၊ၶဝ်ၼင်ႇၵၼ်ဝၢႆႇတိုၵ်းၵၼ်ႁႅင်းၼႃႇလူင်လၢင်ထၢၼ်ႈပေႃးလုလႅဝ်လူမ်ႉတၢႆမူတ်းဢေႃႈ။-
မိူဝ်ႈဢၼ်တပ်ႉသိုၵ်းၵူၼ်းမဵဝ်း ယုတႃႉ၊ ၶဝ်ႁွတ်ႈထိုင်ၵႃႈတီႈသဝ်လၢင်းတီႈဢၼ်မုင်ႈတူၺ်းဢၼ်မီးၵႃႈၼႂ်းထိူၼ်ႇလႅင်ႉၼၼ်ႉၸိုင်၊ၶဝ်မုင်ႈတူၺ်းတပ်ႉသိုၵ်းရၢၼ်ႇသူႇၶဝ်လႄႈႁၼ်တူဝ်တၢႆဢၼ်လူမ်ႉသိူဝ်ႇၵႃႈၼိူဝ်လိၼ်ဝႆႉၼမ်ၼႃႇဢေႃႈ။ ဢမ်ႇလွတ်ႈသေၵေႃႉသေၵူၼ်း။
ယူဝ်းသၽတ်ႉ၊ တင်းၵူၼ်းသိုၵ်းမၼ်းတင်းလၢႆဢွၼ်ၵၼ်လူင်းၵႂႃႇသိမ်းဢဝ်ဢုၵ်ႉၸႃႇဢၼ်ႁိမ်လႆႈၼၼ်ႉလႄႈ၊ထူပ်းႁၼ်တူဝ်သတ်းဢၼ်ၼမ်ၼႃႇလႂ်၊တၢင်းၵိၼ်တၢင်းၶူပ်းလႂ်၊သိူဝ်ႈၶူဝ်းလႂ်၊ဢိၵ်ႇတင်းၶိူင်ႈပိူင်ဢၼ်ထိူၵ်ႈၵႃႈထိူၵ်ႈၶၼ်ၼမ်ၼႃႇလူင်လၢင်ဢေႃႈ။ ၶဝ်ထွတ်ႇဢဝ်ၵဵပ်းဢဝ်ဢုၵ်ႉၸႃႇဢၼ်ႁိမ်လႆႈၸိူဝ်းၼၼ်ႉလႆႈသၢမ်ဝၼ်းတဵမ်တဵမ်ယဝ်ႉသေၵေႃႈ၊ၵွပ်ႈပိူဝ်ႈဢၼ်ၼမ်ၼႃႇလႄႈၶဝ်ဢမ်ႇၸၢင်ႈဢဝ်လႆႈမူတ်းၵူႈၸိူဝ်ႉၵူႈပိူင်ဢေႃႈ။-
ၼႂ်းဝၼ်းဢၼ်ထူၼ်ႈထိုင်သီႇဝၼ်းၼၼ်ႉၸိုင်၊ၶဝ်ဢွၼ်ၵၼ်ၸုတုမ်ၵၼ်ၵႃႈတီႈပၢင်ႇႁူၺ်ႈ ပႃႇရၶႃႉ၊ လႄႈဢွၼ်ၵၼ်ယွင်ႈယေႃး ထႃႇဝရႃႉၽြႃး၊ ပုၼ်ႈလွင်ႈတၢင်းၵႃႈဢၼ်မၼ်းၸဝ်ႈႁဵတ်းယဝ်ႉမႃးၼၼ်ႉဢေႃႈ။ ၵွပ်ႈပိူဝ်ႈၸိူဝ်ႉၼင်ႇၼၼ်လႄႈၵႃႈတီႈၼၼ်ႈပိူၼ်ႈႁွင်ႉၸိုဝ်ႈဝႃႈ၊ပၢင်ႇႁူၺ်ႈ ပႃႇရၶႃႉ၊ ဢေႃႈ။-
မိူဝ်ႈၼၼ်ႉ၊ၵွပ်ႈပိူဝ်ႈဢၼ် ထႃႇဝရႃႉၽြႃး၊ ပၼ်ဢၶႂၢင်ႉဢၼ်ႁႂ်ႈၶဝ်ပႄႉၼႅင်ႇရၢၼ်ႇသူႇၶဝ်ယဝ်ႉၼၼ်ႉလႄႈ ယူဝ်းသၽတ်ႉ၊ ဢွၼ်ႁူဝ်ၵူၼ်းသိုၵ်းမၼ်းတင်းလၢႆၶိုၼ်းပွၵ်ႈမိူဝ်းၵႂႃႇၸူးတီႈဝဵင်း ယေႇရုသလႅမ်ႇ၊ ၸူမ်းၸူမ်းသိူဝ်းသိူဝ်းဢေႃႈ။-
မိူဝ်ႈဢၼ်ၶဝ်ႁွတ်ႈထိုင်ၵႃႈတီႈဝဵင်းၼၼ်ႉၶဝ်ၵႂႃႇၵႃႈတီႈၵျွင်းပိၵ်ႈမၢၼ်ႇၸဝ်ႈလူၺ်ႈတင်းသဵင်တူႇရိယႃႇတိင်ႇတရေႃး၊ၼႄးၶရႃႇလႂ်ဢေႃႈ။-
ၵူၼ်းၵူႈမိူင်းမိူင်းၸိူဝ်းဢၼ်လႆႈငိၼ်းၶၢဝ်ႇဢၼ် ထႃႇဝရႃႉၽြႃး၊ ယႃႉၽဵဝ်ႈပႅတ်ႈရၢၼ်ႇသူႇၵူၼ်းမဵဝ်း ဢိသရေး၊ ၸိူဝ်ႉၼင်ႇႁိုဝ်ၼၼ်ႉဢွၼ်ၵၼ်ၵူဝ်ႁႄၼႃႇလူင်လၢင်ဢေႃႈ။-
ပိူဝ်ႈၼႆလႄႈ ယူဝ်းသၽတ်ႉ၊ ၼၼ်ႉဢုပ်ႉပိူင်ႇၸၢမ်ႇၸႃးၼိမ်ၼိမ်လီလီလႄႈၽြႃးပဵၼ်ၸဝ်ႈပၼ်ဢၶႂၢင်ႉႁႂ်ႈသိုၵ်းထၢတ်ႇယဵၼ်ၵႂႃႇၵူႈၽၢႆႇၵူႈပႃႈဢေႃႈ။
ယူဝ်းသၽတ်ႉ၊ ပဵၼ်ၶုၼ်ႁေႃၶမ်းမိူင်း ယုတႃႉ၊ မႃးမိူဝ်ႈဢၼ်ဢသၢၵ်ႈမၼ်းလႆႈသၢမ်သိပ်းႁႃႈပီၼၼ်ႉသေယဝ်ႉ၊ဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရုသလႅမ်ႇ၊ သၢဝ်းႁႃႈပီဢေႃႈ။ မႄႈမၼ်းၸဝ်ႈၸိုင်၊ပဵၼ် ဢၸုၽႃႉ၊ လုၵ်ႈယိင်း သိလႁိ၊ ဢေႃႈ။-
ၸိူဝ်ႉၼင်ႇဢၼ်ၸဝ်ႈပေႃႈမၼ်း ဢႃႇသႃႉ၊ ၵမ်ၵျၢင်ႉၵႂႃႇဢွၼ်တၢင်းၼၼ်ႉ၊မၼ်းၵေႃႈၵမ်ၵျၢင်ႉသိုဝ်ႈသိုဝ်ႈတေႃႇတေႃႇသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ဢေႃႈ။-
ၼႂ်းဝႃႈၼၼ်သေၵေႃႈမၼ်းဢမ်ႇပႄႇၽဵဝ်ႈပႅတ်ႈထႃႇၼႃႉတီႈဝႆႈၽြႃးတၢင်ႇသူႇတၢင်ႇပႃးတင်းလၢႆၼၼ်ႉ။ ၵူၼ်းတင်းလၢႆၵေႃႈယင်းဢမ်ႇပႆႇဝႆႉၸႂ်လုမ်းလုမ်းၼႂ်းတၢင်းဢၼ်ႁဵတ်းဝၢတ်ႈၵူဝ်းၵႂၢႆႇတီႈၽြႃးပဵၼ်ၸဝ်ႈပူႇမွၼ်ႇၶဝ်ၼၼ်ႉလႄႈယူႇဢေႃႈ။
လွင်ႈတၢင်းႁဵတ်း ယူဝ်းသၽတ်ႉ၊ ၵူႈၸိူဝ်ႉၵူႈပိူင်ၸဵမ်ငဝ်ႈတေႃႇပၢႆတႅမ်ႈမၢႆဝႆႉၵႃႈၼႂ်းလိၵ်ႈဢၼ် ယေႇႁု၊ လုၵ်ႈၸၢႆး ႁႃႇၼၼိ၊ တႅမ်ႈဝႆႉၼႂ်းတွၼ်ႈ ပိုၼ်းၶုၼ်ႁေႃၶမ်းမိူင်းဢိသရေး၊ ၼၼ်ႉဢေႃႈ။
မီးၽဝ်ႇၼိုင်ႈၶုၼ်ႁေႃၶမ်း ယူဝ်းသၽတ်ႉ၊ မိူင်း ယုတႃႉ၊ ၼၼ်ႉႁဵတ်းမိၵ်ႈသႁႃႇယႃႉလူၺ်ႈၵၼ်တင်းၶုၼ်ႁေႃၶမ်း ဢႃႇၶၸိ၊ မိူင်း ဢိသရေး၊ ဢၼ်ႁဵတ်းႁၢႆႉႁဵတ်းမိူၵ်ႈၼၼ်ႉဢေႃႈ။-
ၶဝ်ႁူမ်ႈပွင်းၵၼ်လႄႈသၢင်ႈႁဵတ်းႁိူဝ်းသၢင်းၽေႃးဢၼ်ၶၢမ်ႈၼမ်ႉသမ်ႇမုၵ်ႈတြႃႇၼၼ်ႉၵႃႈတီႈတႃႈ ဢေးၸယုၼ်းၵႃႇပႃႇ၊ ဢေႃႈ။-
ၵူၺ်းၵႃႈ၊ ဢေးလျေႇၸႃႇ၊ လုၵ်ႈၸၢႆး တေႃႇတႃႇဝႃႇႁု၊ ၵူၼ်းဝဵင်း မရေးသႃႉ၊ ပၼ်သတိတီႈ ယူဝ်းသၽတ်ႉ၊ လႄႈဝႃႈ၊ “ၵွပ်ႈပိူဝ်ႈဢၼ်ၸဝ်ႈၶုၼ်လူင်ႁဵတ်းမိၵ်ႈသႁႃႇယႃႉလူၺ်ႈၵၼ်တင်း ဢႃႇၶၸိ၊ လႄႈ ထႃႇဝရႃႉၽြႃး၊ တၵ်းယႃႉၵႃႈဢၼ်ၸဝ်ႈၶုၼ်လူင်ႁဵတ်းၸိူဝ်းၼၼ်ႉပႅတ်ႈဢေႃႈ၊” ဝႃႈၼင်ႇၼႆဢေႃႈ။ ၼင်ႇၼၼ်လႄႈႁိူဝ်းသၢင်းၽေႃးၸိူဝ်းၼၼ်ႉႁၵ်းလုလႅဝ်ထၢၼ်ႈပေႃးဢမ်ႇၵႂႃႇၵႃႈတီႈလႂ်လႆႈဢေႃႈ။
ယူဝ်းသၽတ်ႉ၊ ၼွၼ်းၽႄးၸွမ်းပူႇမွၼ်ႇမၼ်းတင်းလၢႆလႄႈဢဝ်သၢင်းၵျူဝ်ႇဝႆႉၵႃႈၼႂ်းပႃႇႁဵဝ်ႈဝဵင်း တႃႇဝိတ်ႈ၊ ဢေႃႈ။ လုၵ်ႈၸၢႆးမၼ်း ယႁူဝ်းရမ်ႇ၊ သိုပ်ႇၼင်ႈႁၢင်ႈၼင်ႈႁေႃဢုပ်ႉပိူင်ႇၸၢမ်ႇၸႃးတၢင်တူဝ်ၸဝ်ႈပေႃႈမၼ်းဢေႃႈ။
ယႁူဝ်းရမ်ႇ၊ လုၵ်ႈၸၢႆးၶုၼ်ႁေႃၶမ်း ယူဝ်းသၽတ်ႉ၊ ၼၼ်ႉမီးၼွင်ႉၸၢႆးႁူၵ်းၵေႃႉ၊ဢၼ်ပဵၼ် ဢႃႇၸရိ၊ယေႇႁေးလႃႉ၊ၸႃႇၶရိ၊ဢႃႇၸရိ၊မိၵ်ႉၶေႇလႃႉ၊ တင်း သေးပတိ၊ ဢေႃႈ။-
ၸဝ်ႈပေႃႈၶဝ်ပၼ်ငိုၼ်းၶမ်း၊ဢိၵ်ႇတင်းဢုၵ်ႉၸႃႇဢၼ်မီးၵႃႈၶၼ်ၸိူဝ်းၼၼ်ႉၼမ်ၼႃႇၵႃႈတီႈၶဝ်သေယဝ်ႉ၊ၶၢၼ်းၶဝ်ဝႆႉႁႂ်ႈဢုပ်ႉဝဵင်းဢၼ်မၼ်ႈၶိူင်ႇမိူင်း ယုတႃႉ၊ ၼၼ်ႉယေႈၵေႃႉယေႈဝဵင်းဢေႃႈ။ ယႁူဝ်းရမ်ႇ၊ ၸမ်ႉ၊ပိူဝ်ႈဢၼ်ပဵၼ်လုၵ်ႈတူၼ်ႈလႄႈ ယူဝ်းသၽတ်ႉ၊ ႁႂ်ႈမၼ်းသိုပ်ႇၼင်ႈႁၢင်ႈၼင်ႈႁေႃတၢင်တူဝ်မၼ်းဢေႃႈ။-
မိူဝ်ႈဢၼ် ယႁူဝ်းရမ်ႇ၊ လႆႈမၼ်ႈၶိူင်ႇၵႃႈၼိူဝ်သိုင်ႇၸိုင်ႈဝၢၼ်ႈမိူင်းလီလီငၢမ်းငၢမ်းယဝ်ႉၼၼ်ႉၸိုင်၊ဢဝ်ၼွင်ႉၸၢႆးၸဝ်ႈၵူႈၵေႃႉတၢႆပႅတ်ႈလူၺ်ႈၵၼ်တင်းမူးမၢတ်ႈ ဢိသရေး၊ ၵမ်ႈၽွင်ႈဢေႃႈ။
ယႁူဝ်းရမ်ႇ၊ ၶိုၼ်ႈပဵၼ်ၶုၼ်ႁေႃၶမ်းမိူဝ်ႈဢၼ်ဢသၢၵ်ႈမၼ်းလႆႈသၢမ်သိပ်းသွင်ပီၼၼ်ႉသေယဝ်ႉ၊ဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရုသလႅမ်ႇ၊ ပႅတ်ႇပီဢေႃႈ။-
မၼ်းႁဵတ်းႁၢႆႉႁဵတ်းမိူၵ်ႈၸွမ်းၼင်ႇဢၼ်ၶုၼ်ႁေႃၶမ်း ဢႃႇႁပ်ႉ၊ ဢိၵ်ႇတင်းၶုၼ်ႁေႃၶမ်းမိူင်း ဢိသရေး၊ တၢင်ႇၸဝ်ႈတၢင်ႇပႃးလႆႈႁဵတ်းမႃးၼၼ်ႉၵွပ်ႈပိူဝ်ႈမၼ်းပဵၼ်ၵူပ်ႉၵူႈလူၺ်ႈၵၼ်တင်းလုၵ်ႈယိင်း ဢႃႇႁပ်ႉ၊ ၼၼ်ႉဢေႃႈ။ မၼ်းႁဵတ်းတုၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ဢေႃႈ။-
ၼႂ်းဝႃႈၼၼ်သေၵေႃႈ ထႃႇဝရႃႉၽြႃး၊ ယင်းဢမ်ႇမီးဢလူဝ်ႇဢၼ်ယႃႉပႅတ်ႈၶိူဝ်းၶုၼ်ႁေႃၶမ်း တႃႇဝိတ်ႈ၊ ၼၼ်ႉၵွပ်ႈပိူဝ်ႈဢၼ်မၼ်းၸဝ်ႈလႆႈႁဵတ်းပတိၺိၺ်ႇလူၺ်ႈၵၼ်တင်း တႃႇဝိတ်ႈ၊ လႄႈမီးၵတိဝႆႉလူၺ်ႈလွင်ႈဢၼ်မၼ်းၸဝ်ႈတၵ်းပၼ်ဢၶႂၢင်ႉလုၵ်ႈလၢၼ်ၸိူဝ်ႉၶိူဝ်းမၼ်းလႆႈဢုပ်ႉပိူင်ႇၸၢမ်ႇၸႃးတႃႇသေႇဢမ်ႇထၢတ်ႇၼၼ်ႉဢေႃႈ။
ၼႂ်းၸူဝ်ႈပၢၼ် ယႁူဝ်းရမ်ႇ၊ ၼၼ်ႉမိူင်း ဢေႇတုမ်ႇ၊ လုၵ်ႉၽိုၼ်ႉၶုၼ်ႁေႃၶမ်း ယုတႃႉ၊ သေယဝ်ႉ၊ပဵၼ်မိူင်းလွတ်ႈလႅဝ်းၵွၼ်းၶေႃၵႂႃႇဢေႃႈ။-
ပိူဝ်ႈၼႆလႄႈ ယႁူဝ်းရမ်ႇ၊ ဢိၵ်ႇတင်းႁူဝ်ႁၢၼ်ၵူၼ်းသိုၵ်းမၼ်းတင်းလၢႆဢဝ်တင်းတပ်ႉသိုၵ်းလေႃႉမႃႉလႂ်သေယဝ်ႉ၊ၶီႇသိုၵ်းၵႂႃႇႁႂ်ႈလႆႈတိုၵ်းဢဝ်မိူင်း ဢေႇတုမ်ႇ၊ ဢေႃႈ။ ၵႃႈတီႈၼၼ်ႈတပ်ႉသိုၵ်းၵူၼ်း ဢေႇတုမ်ႇ၊ ၶဝ်ဝႅတ်ႉလွမ်ႉၶဝ်ဝႆႉသေၵေႃႈ၊ၶဝ်လုၵ်ႉၽိုၼ်ႉတိုၵ်းတေႃးၶိင်ႇၵၢင်ၶိုၼ်းသေလႄႈပၢႆႈလွတ်ႈဢွၵ်ႇၵႂႃႇဢေႃႈ။-
တႄႇဢဝ်ဝၼ်းၼၼ်ႉမႃးလႄႈမိူင်း ဢေႇတုမ်ႇ၊ လႆႈလွတ်ႈလႅဝ်းၵွၼ်းၶေႃသေၵႃႈၼႂ်းမိုဝ်းၵူၼ်း ယုတႃႉ၊ ဢေႃႈ။ ၼႂ်းၶိင်ႇၵႃႇလႃႉယၢမ်းလဵဝ်ၵၼ်ၼၼ်ႉမိူင်း လိပၼႃႉ၊ ၵေႃႈလုၵ်ႉၽိုၼ်ႉ ယႁူဝ်းရမ်ႇ၊ ၵွပ်ႈပိူဝ်ႈမၼ်းၸုၼ်ႉပႅတ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇမွၼ်ႇမၼ်းဢေႃႈ။-
မၼ်းယင်းတႄႇႁဵတ်းထႃႇၼႃႉတီႈဝႆႈၽြႃးတၢင်ႇသူႇတၢင်ႇပႃးၵႃႈၼိူဝ်လွႆမိူင်း ယုတႃႉ၊ သေယဝ်ႉ၊ဢွၼ်ဢဝ်ၵူၼ်းမိူင်း ယုတႃႉ၊ တင်းၵူၼ်းဝဵင်း ယေႇရုသလႅမ်ႇ၊ တင်းလၢႆ ႁဵတ်းတုၸရိူၵ်ႈဢၼ်ၶတ်းၵၼ်တင်း ထႃႇဝရႃႉၽြႃး၊ ဢေႃႈ။
ပရေႃးၽႅတ်ႈ ဢေးလိယႃႉ၊ တႅမ်ႈလိၵ်ႈပၼ်ၵႂႃႇၵႃႈတီႈ ယႁူဝ်းရမ်ႇ၊ လႄႈဝႃႈၸမ်ႉ၊ “ထႃႇဝရႃႉၽြႃး၊ ၽြႃးပူႇမွၼ်ႇမႂ်း တႃႇဝိတ်ႈ၊ ၼၼ်ႉၸီႇယၢင်ႇပၼ်တၢမ်ႇတီႈမႂ်းၵွပ်ႈပိူဝ်ႈမႂ်းဢမ်ႇၵမ်ဢမ်ႇၵျၢင်ႉၸွမ်းတၢင်းႁဵတ်းၸဝ်ႈပေႃႈမႂ်းၶုၼ်ႁေႃၶမ်း ယူဝ်းသၽတ်ႉ၊ ဢိၵ်ႇတင်းတၢင်းႁဵတ်းၸဝ်ႈပူႇမႂ်းၶုၼ်ႁေႃၶမ်း ဢႃႇသႃႉ၊ ၼၼ်ႉလႄႈ၊-
မႂ်းသမ်ႉၵႂႃႇၵမ်ၵျၢင်ႉၸွမ်းတၢင်းႁဵတ်းၶုၼ်ႁေႃၶမ်း ဢိသရေး၊ တင်းလၢႆသေယဝ်ႉ၊ဢွၼ်ဢဝ်ၵူၼ်းမိူင်း ယုတႃႉ၊ တင်းၵူၼ်းဝဵင်း ယေႇရုသလႅမ်ႇ၊ တင်းလၢႆႁွတ်ႈထိုင်တၢင်းဢၼ်ဢမ်ႇပႂ်ႉသဵတ်ႈၸႃႇတေႃႇၽြႃးပဵၼ်ၸဝ်ႈ၊မိူၼ်ၸိူဝ်ႉၼင်ႇဢၼ် ဢႃႇႁပ်ႉ၊ တင်းၸိူဝ်ႉၶိူဝ်းမၼ်းတင်းလၢႆ ႁႂ်ႈမဵဝ်း ဢိသရေး၊ ၽွၵ်ႈသဵတ်ႈၸႃႇၵႂႃႇၼၼ်ႉယဝ်ႉ။ မႂ်းသမ်ႉယင်းဢဝ်ၼွင်ႉၸၢႆးဢွၵ်ႇမႂ်းဢၼ်ယဵင်ႈၶႅၼ်းလီၼႃႇသေမႂ်းၸိူဝ်းၼၼ်ႉတၢႆယဝ်ႉ။-
ၵွပ်ႈပိူဝ်ႈလွင်ႈတၢင်းၸိူဝ်းၼၼ်ႉလႄႈ ထႃႇဝရႃႉၽြႃး၊ တၵ်းဢဝ်ၽေးတၢမ်ႇဢၼ်ယႂ်ႇၼႃႇလူင်လၢင်ပၼ်တၢမ်ႇတီႈၵူၼ်းမႂ်းတင်းလၢႆ၊လုၵ်ႈမႂ်းတင်းလၢႆ၊မေးမႂ်းတင်းလၢႆသေလႄႈယႃႉၽဵဝ်ႈဢုၵ်ႉၸႃႇမႂ်းတင်းလၢႆပႅတ်ႈဢေႃႈ။-
တူဝ်မႂ်းၸမ်ႉ၊တၵ်းလႆႈၶၢမ်ႇဝူၺ်ႇတၼႃႇယေႃးၵႃႇတွင်ႉၸဵပ်းတွင်ႉပွင်းတေႃႇထိုင်ႁွတ်ႈသႆႈမႂ်းဢွၵ်ႇမႃးဝၼ်းၼိုင်ႈယဝ်ႉထႅင်ႈဝၼ်းၼိုင်ႈတိၵ်းတိၵ်းဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ တိုၵ်းယူင်းၵူၼ်း ၽိလိတ်ႉတိ၊ တင်းၵူၼ်း ဢႃႇရပ်ႉ၊ ဢၼ်ယူႇၸမ်ၵၼ်တင်းမိူင်း ဢေႇတီႇဢူဝ်းပီးယႃး၊ ၸိူဝ်းဢၼ်ယူႇၸွမ်းသၢပ်ႇပၢင်ႇလၢႆႇၼၼ်ႉၶီႇသိုၵ်းၶိုၼ်ႈမႃးတိုၵ်း ယႁူဝ်းရမ်ႇ၊ ဢေႃႈ။-
ၶဝ်ၸိူဝ်းၼၼ်ႉယဵပ်ႇၶဝ်ႈတိုၵ်းယႃႉမိူင်း ယုတႃႉ၊ သေယဝ်ႉ၊သိမ်းဢဝ်ဢုၵ်ႉၸႃႇၵႃႈဢၼ်ထူပ်းႁၼ်ၵႃႈၼႂ်းႁေႃၸဝ်ႈ၊ဢိၵ်ႇတင်းလုၵ်ႈၸၢႆးၸဝ်ႈတင်းလၢႆတင်းမေးၸဝ်ႈတင်းလၢႆဢေႃႈ။ လိူဝ်သေ ယႁေႃးၶတ်ႉ၊ လုၵ်ႈၸၢႆးၵေႃႉလိုၼ်းသုတ်းၼၼ်ႉဢမ်ႇၵိုတ်းဢမ်ႇၵျၢၼ်ႇဝႆႉလုၵ်ႈၸၢႆးသေၵေႃႉသေၵူၼ်း။
လိုၼ်းသေလွင်ႈတၢင်းၸိူဝ်းၼႆႉပဵၼ်မႃးယဝ်ႉမူတ်းၼၼ်ႉၸိုင်၊ ထႃႇဝရႃႉၽြႃး၊ ဢဝ်တွင်ႉၸဵပ်းဢၼ်ပဵၼ်ဝူၺ်ႇတၼႃႇၸဵပ်းသႅပ်ႇၼႃႇၼၼ်ႉပၼ်တၢမ်ႇတီႈၶုၼ်ႁေႃၶမ်း ယႁူဝ်းရမ်ႇ၊ ဢေႃႈ။-
ၼႂ်းသွင်ပီၸမ်ၸမ်၊ယေႃးၵႃႇတၢင်းၸဵပ်းၼၼ်ႉယဵင်ႈၶႅၼ်းႁၢႆႉမႃးတိၵ်းတိၵ်းလႄႈတေႃႇထိုင်ႁွတ်ႈသႆႈမၼ်းဢွၵ်ႇမႃးသေယဝ်ႉ၊ဢသၢၵ်ႈမၼ်းလႆႈသဵင်ႈၵႂႃႇၵွပ်ႈပိူဝ်ႈဝူၺ်ႇတၼႃႇၼၼ်ႉဢေႃႈ။ ၶႃႈမၼ်းၵူၼ်းမၼ်းယင်းဢမ်ႇၵေႃႇၽႆးပုၼ်ႈဢၼ်တၵ်းၼႄပျႃးတၢင်းဢၼ်မႆႈၸႂ်ၶီၸႂ်ပုၼ်ႈမၼ်း၊မိူၼ်ၸိူဝ်ႉၼင်ႇဢၼ်ယၢမ်ႈႁဵတ်းတီႈပူႇမွၼ်ႇမၼ်းၸိူဝ်းၼၼ်ႉဢေႃႈ။
ယႁူဝ်းရမ်ႇ၊ ၶိုၼ်ႈပဵၼ်ၶုၼ်ႁေႃၶမ်းမိူဝ်ႈဢၼ်ဢသၢၵ်ႈမၼ်းလႆႈသၢမ်သိပ်းႁႃႈပီၼၼ်ႉလႄႈဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရုသလႅမ်ႇ၊ ပႅတ်ႇပီဢေႃႈ။ မိူဝ်ႈဢၼ်မၼ်းတၢႆၵႂႃႇၼၼ်ႉၽူႈလႂ်ၵေႃႈ၊ဢမ်ႇသေလၢႆမၼ်းသေၵေႃႉသေၵူၼ်း။ ၶဝ်ဢဝ်မၼ်းသၢင်းၵျူဝ်ႇဝႆႉၵႃႈၼႂ်းပႃႇႁဵဝ်ႈဝဵင်း တႃႇဝိတ်ႈ၊ ၵူၺ်းလႄႈဢမ်ႇဢဝ်ၵႂႃႇသၢင်းၵျူဝ်ႇၵႃႈၼႂ်းပႃႇႁဵဝ်ႈၶုၼ်ႁေႃၶမ်းၼၼ်ႉ။
ၵွပ်ႈပိူဝ်ႈဢၼ်ၵူၼ်းမဵဝ်း ဢႃႇရပ်ႉ၊ ၶဝ်ဢွၼ်ႁူဝ်ပိူၼ်ႈမႃးတိုၵ်းမိူင်း ယုတႃႉ၊ လႄႈဢဝ်လုၵ်ႈၸၢႆး ယႁူဝ်းရမ်ႇ၊ တင်းလၢႆတၢႆသဵင်ႈမူတ်း၊ၵူၺ်းဝႆႉၵိုတ်းလုၵ်ႈၸၢႆးလိုၼ်းသုတ်းမၼ်း ဢႃႇၶၸိ၊ ယဝ်ႉၸင်ႇၵူၼ်းဝဵင်း ယေႇရုသလႅမ်ႇ၊ တင်းလၢႆဢွၼ်ၵၼ်ဢဝ် ဢႃႇၶၸိ၊ ၼၼ်ႉႁဵတ်းၶုၼ်ႁေႃၶမ်းတၢင်တူဝ်ၸဝ်ႈပေႃႈမၼ်းသေယဝ်ႉ၊မၼ်းလႆႈၼင်ႈႁၢင်ႈၼင်ႈႁေႃဢေႃႈ။-
မိူဝ်ႈဢၼ်မၼ်းတႄႇၸႃႉၼင်ႈႁၢင်ႈၼင်ႈႁေႃၼၼ်ႉဢသၢၵ်ႈမၼ်းလႆႈသီႇသိပ်းသွင်ပီ လႄႈဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရုသလႅမ်ႇ၊ ပီၼိုင်ႈဢေႃႈ။ ဢႃႇၶၸိ၊ ၼၼ်ႉၵမ်ၵျၢင်ႉၸွမ်းတၢင်းႁဵတ်းဢၼ်မဵဝ်းၸိူဝ်ႉၶိူဝ်းၶုၼ်ႁေႃၶမ်း ဢႃႇႁပ်ႉ၊ ၵမ်ၵျၢင်ႉၼၼ်ႉ၊-
ၵွပ်ႈပိူဝ်ႈမႄႈၸဝ်ႈၵေႃႉပဵၼ် ဢႃႇထလိ၊ လုၵ်ႈယိင်းၶုၼ်ႁေႃၶမ်း ဢႃႇႁပ်ႉ၊ လၢၼ်ယိင်း ဢေႃးမရိ၊ မဵဝ်း ဢိသရေး၊ ၼၼ်ႉပၼ်တၢင်းၵျၢမ်ႇတၢင်းပွင်ဢၼ်ဢမ်ႇလီတီႈမၼ်းဢေႃႈ။-
မၼ်းႁဵတ်းတုၸရိူၵ်ႈၽၢႆႇၼႃႈ ထႃႇဝရႃႉၽြႃး၊ မိူၼ်ၸိူဝ်ႉၼင်ႇၸိူဝ်ႉၶိူဝ်းႁိူၼ်း ဢႃႇႁပ်ႉ၊ ၼၼ်ႉဢေႃႈ။ လိုၼ်းသေဢၼ်ၸဝ်ႈပေႃႈမၼ်းတၢႆယဝ်ႉၼၼ်ႉ၊ၶဝ်ၸိူဝ်းဢၼ်မႃးပဵၼ်ၽူႈပၼ်တၢင်းၵျၢမ်ႇတီႈမၼ်းၼၼ်ႉပၼ်တၢင်းၵျၢမ်ႇတၢင်းပွင်ဢၼ်ဢမ်ႇလီတီႈမၼ်းလႄႈႁဵတ်းႁႂ်ႈမၼ်းတူၵ်းသုမ်းဢေႃႈ။-
မၼ်းထွမ်ႇဢဝ်တၢင်းၵျၢမ်ႇတၢင်းပွင်ၶဝ်ၼၼ်ႉလႄႈၵႂႃႇႁူမ်ႈပွင်းၵၼ်တင်းၶုၼ်ႁေႃၶမ်း ယူဝ်းရမ်ႇ၊ မိူင်း ဢိသရေး၊ သေယဝ်ႉ၊ၶီႇသိုၵ်းၵႂႃႇတိုၵ်းၶုၼ်ႁေႃၶမ်း ႁႃႇၸေႇလႃႉ၊ မိူင်း သီးရီးယႃး၊ ဢေႃႈ။ တပ်ႉသိုၵ်းသွင်ၽၢႆႇႁူပ်ႉၺႃးၵၼ်ၵႃႈတီႈဝဵင်း ရႃႇမုတ်ႉ၊ မိူင်း ၵိလတ်ႉ၊ လႄႈ ယူဝ်းရမ်ႇ၊ လႆႈတိူဝ်ႉမၢတ်ႇၵႃႈၼႂ်းပၢင်သိုၵ်းဢေႃႈ။-
မၼ်းၵေႃႈၶိုၼ်းပွၵ်ႈမိူဝ်းၵႃႈတီႈဝဵင်း ယေႇၸရေး၊ ႁႂ်ႈလႆႈယူတ်းယႃၸဵပ်းမၼ်းလႄႈ၊ ဢႃႇၶၸိ၊ ၵႂႃႇၸႂ်းမၼ်းၵႃႈတီႈဝဵင်းၼၼ်ႉဢေႃႈ။
လွင်ႈတၢင်းဢၼ် ဢႃႇၶၸိ၊ သုမ်းၸွမ်း၊ဢၼ်ၽြႃးပဵၼ်ၸဝ်ႈၸီႇယၢင်ႇၼႂ်းလွင်ႈဢၼ်မၼ်းၵႂႃႇၸူးၵႃႈတီႈ ယူဝ်းရမ်ႇ၊ ၼၼ်ႉၸမ်ႉ၊မၼ်းႁွတ်ႈထိုင်သေယဝ်ႉ၊ၸွမ်းလူၺ်ႈၵၼ်တင်း ယူဝ်းရမ်ႇ၊ ၼၼ်ႉ၊ဢွၵ်ႇၵႂႃႇႁႂ်ႈလႆႈႁႄႉႁပ်ႉ ယေႇႁု၊ လုၵ်ႈၸၢႆး ၼိမ်းသိ၊ ဢၼ် ထႃႇဝရႃႉၽြႃး၊ ပၼ်ၽိၵ်ႈသိၵ်ႈႁႂ်ႈလႆႈယႃႉၽဵဝ်ႈပႅတ်ႈမဵဝ်းၸိူဝ်ႉၶိူဝ်း ဢႃႇႁပ်ႉ၊ ၼၼ်ႉဢေႃႈ။-
ယေႇႁု၊ ၼၼ်ႉ၊မိူဝ်ႈဢၼ်ထၢမ်းႁဵတ်းၸွမ်းဢမိင်ႉၽြႃးပဵၼ်ၸဝ်ႈဢၼ်ပႄႇၽဵဝ်ႈမဵဝ်းၸိူဝ်ႉၶိူဝ်းၶုၼ်ႁေႃၶမ်းယူႇၼၼ်ႉၸိုင်၊မၼ်းႁူပ်ႉထူပ်းမူးမၢတ်ႈၽွင်းမိူင်းမဵဝ်း ယုတႃႉ၊ တင်းလၢႆ၊ဢိၵ်ႇတင်းလုၵ်ႈလၢၼ်၊ၼွင်ႉၸၢႆး ဢႃႇၶၸိ၊ ဢၼ်ပႂ်ႉၶႃးၸႃးတီႈ ဢႃႇၶၸိ၊ ၸိူဝ်းၼၼ်ႉလႄႈမၼ်းဢဝ်ၶဝ်တၢႆပႅတ်ႈတင်းမူတ်းဢေႃႈ။-
ၵူၼ်း ယေႇႁု၊ ဢွၼ်ၵၼ်သွၵ်ႈႁႃ ဢႃႇၶၸိ၊ လႄႈထူပ်းႁၼ်ၵႃႈတီႈဝဵင်း သမႃႇရိ၊ တီႈဢၼ်မၼ်းတဵတ်ႇမႅပ်းယူႇၼၼ်ႉလႄႈဢဝ်မႃးၸူးၵႃႈတီႈ ယေႇႁု၊ သေယဝ်ႉ၊ဢဝ်တၢႆသေဢေႃႈ။ ၶဝ်ၵေႃႈဢဝ်တူဝ်တၢႆမၼ်းသၢင်းၵျူဝ်ႇ၊ၵွပ်ႈပိူဝ်ႈဢၼ်ၶဝ်ၼၼ်ႉၼပ်ႉယမ်ၸဝ်ႈပူႇမၼ်းၶုၼ်ႁေႃၶမ်း ယူဝ်းသၽတ်ႉ၊ ဢၼ်ၶတ်းၸႂ်ၵျူဝ်းၸႃးႁဵတ်းဝၢတ်ႈတီႈ ထႃႇဝရႃႉၽြႃး၊ ၼၼ်ႉဢေႃႈ။ ၼႂ်းမဵဝ်းၸိူဝ်ႉၶိူဝ်း ဢႃႇၶၸိ၊ ဢၼ်တေသိုပ်ႇၼင်ႈႁၢင်ႈၼင်ႈႁေႃၼၼ်ႉဢမ်ႇၵိုတ်းဢမ်ႇၵျၢၼ်ႇဝႆႉသေၵေႃႉသေၵူၼ်း။
မိူဝ်ႈဢၼ် ဢႃႇထလိ၊ ဢၼ်ပဵၼ်ၸဝ်ႈမႄႈၶုၼ်ႁေႃၶမ်း ဢႃႇၶၸိ၊ ၼၼ်ႉလႆႈႁုငိၼ်းလွင်ႈဢၼ်လုၵ်ႈၸၢႆးမၼ်းတၢႆယဝ်ႉၼၼ်ႉၵမ်းလဵဝ်မၼ်းၼၢင်းပူင်ဢမိင်ႉႁႂ်ႈဢဝ်ၸိူဝ်ႉၸဝ်ႈၶိူဝ်းၶုၼ်မိူင်း ယုတႃႉ၊ တင်းသဵင်ႈတင်းလူင်တၢႆဢေႃႈ။-
ၵူၺ်းၵႃႈ၊ ယေႃးသေႇၽႃႉ၊ ၼွင်ႉယိင်း ဢႃႇၶၸိ၊ ဢၼ်ပဵၼ်မေးယဵၸ်ႈပရေႃးႁဵၵ်ႈ ယူဝ်းယတႃႉ၊ ၼၼ်ႉလွမ်ဢဝ် ယေႃးသႃႉ၊ လုၵ်ႈၸၢႆး ဢႃႇၶၸိ၊ သေၵႃႈၼႂ်းလုၵ်ႈၸၢႆးၶုၼ်ႁေႃၶမ်းဢၼ်ၸမ်တၵ်းလႆႈၶၢမ်ႇတၢႆၸိူဝ်းၼၼ်ႉၵႂႃႇသိူင်ႇမၼ်းဝႆႉတီႈမႄႈၸဝ်ႈၼူမ်းမၼ်းၵႃႈၼႂ်းလုၵ်းၼွၼ်းၸၼ်ႉၼႂ်းၵႃႈတီႈၵျွင်းပိၵ်ႈမၢၼ်ႇၸဝ်ႈဢေႃႈ။ ပိူဝ်ႈဢၼ်ဢဝ်မၼ်းသိူင်ႇဝႆႉၼၼ်ႉလႄႈ ယေႃးသေႇၽႃႉ၊ လႆႈၵႄႇသႄႇဢဝ်မၼ်းလွတ်ႈသေၵႃႈတီႈတၢင်းတၢႆၵႃႈၼႂ်းမိုဝ်းၼၢင်းႁေႃၶမ်း ဢႃႇထလိ၊ ၼၼ်ႉဢေႃႈ။-
ႁူၵ်းပီတဵမ်တဵမ်မၼ်းလႆႈၶၢမ်ႇတၢင်းဢၼ်သိူင်ႇဝႆႉၵႃႈတီႈၼၼ်ႈ၊ၼႂ်းၸူဝ်ႈပၢၼ် ဢႃႇထလိ၊ ဢုပ်ႉပိူင်ႇၸၢမ်ႇၸႃးၼႂ်းဢရႃႇၸဝ်ႈၼၢင်းႁေႃၶမ်းၼၼ်ႉဢေႃႈ။
ဝၢႆးသေဢၼ်ပႂ်ႉထႃႈႁူၵ်းပီယဝ်ႉၼၼ်ႉယဵၸ်ႈပရေႃးႁဵၵ်ႈ ယူဝ်းယတႃႉ၊ ႁႂ်ႈတူဝ်ၸဝ်ႈၵဝ်ႇမၼ်ႈၶိူင်ႇသေယဝ်ႉ၊မၼ်းႁဵတ်းတၢင်းဢၼ်ထုၵ်ႇၵၼ်တင်းၶုၼ်သိုၵ်းႁၢၼ်ႁႃႈၵေႃႉဢၼ်ပဵၼ် ဢႃႇၸရိ၊ လုၵ်ႈၸၢႆး ယေႇရေႃးႁမ်ႇ၊ဢိသမေႇလႃႉ၊ လုၵ်ႈၸၢႆး ယေႃးႁၼၼ်ႇ၊ဢႃႇၸရိႁု၊ လုၵ်ႈၸၢႆး ဢူဝ်းပိတ်ႉ၊မႃႇသေႇယႃႉ၊ လုၵ်ႈၸၢႆး ဢတႃႇယႃႉ၊ တင်း ဢေးလိသၽတ်ႉ၊ လုၵ်ႈၸၢႆး ၸိၶရိ၊ ၸိူဝ်းၼၼ်ႉဢေႃႈ။-
ၶဝ်ဢွၼ်ၵၼ်လႄႇလဵပ်ႈၵႃႈတီႈဝဵင်းဢၼ်မီးၵႃႈၼႂ်းမိူင်း ယုတႃႉ၊ ၵူႈဝဵင်း၊ႁႂ်ႈၸိူဝ်ႉၶိူဝ်းၵူၼ်းမဵဝ်း လေႇဝိ၊ လႂ်တင်းၵူၼ်းတူၼ်ႈၵူၼ်းႁူဝ်ၶိူဝ်းႁိူၼ်းလႂ်တင်းသဵင်ႈတင်းမူတ်းၶိုၼ်းမႃးၸုတုမ်ၵၼ်ၵႃႈၼႂ်းဝဵင်း ယေႇရုသလႅမ်ႇ၊ ဢေႃႈ။
ၶဝ်ၸိူဝ်းၼၼ်ႉဢွၼ်ၵၼ်ၸုတုမ်ၵၼ်ၵႃႈၼႂ်းၵျွင်းပိၵ်ႈမၢၼ်ႇၸဝ်ႈသေယဝ်ႉ၊ဢွၼ်ၵၼ်ႁဵတ်းပတိၺိၺ်ႇလူၺ်ႈၵၼ်တင်း ယေႃးသႃႉ၊ လုၵ်ႈၸၢႆးၶုၼ်ႁေႃၶမ်းၼၼ်ႉဢေႃႈ။ ယူဝ်းယတႃႉ၊ လၢတ်ႈတီႈၶဝ်လႄႈဝႃႈ၊ “လုၵ်ႈၸၢႆးၶုၼ်ႁေႃၶမ်းလိုၼ်းသုတ်းၼၼ်ႉမီးၵႃႈတီႈၼႆႈဢေႃႈ။ တေႃႈလဵဝ်ၼႆႉမၼ်းတၵ်းတေပဵၼ်ၶုၼ်ႁေႃၶမ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ ဝႆႉၵတိလွင်ႈဢၼ်မဵဝ်းၸိူဝ်ႉၶိူဝ်း တႃႇဝိတ်ႈ၊ တၵ်းလႆႈဢုပ်ႉပိူင်ႇၸၢမ်ႇၸႃးၼၼ်ႉယဝ်ႉ။-
လွင်ႈဢၼ်ႁဝ်းတၵ်းလႆႈပွင်ႁဵတ်းၼၼ်ႉၸမ်ႉ၊ၼႂ်းမိူဝ်ႈဢၼ်ယဵၸ်ႈပရေႃးႁဵၵ်ႈတင်းလၢႆတင်းမဵဝ်း လေႇဝိ၊ တင်းလၢႆမႃးထၢမ်းၼႃႈၵၢၼ်ၵႃႈၼႂ်းဝၼ်းၵမ်သိၼ်ၼၼ်ႉသၢမ်ပုၼ်ႈပုၼ်ႈၼိုင်ႈတၵ်းလႆႈပႂ်ႉၽၵ်းတူၵျွင်းပိၵ်ႈမၢၼ်ႇၸဝ်ႈ၊-
သၢမ်ပုၼ်ႈပုၼ်ႈၼိုင်ႈတၵ်းလႆႈပႂ်ႉႁေႃၶမ်းလႄႈဢၼ်ၵိုတ်းယူႇသၢမ်ပုၼ်ႈပုၼ်ႈၼိုင်ႈပႂ်ႉၵႃႈတီႈၽၵ်းတူ သုရႃႉ၊ ဢေႃႈ။ ၵူၼ်းတင်းသဵင်ႈတင်းလူင်သမ်ႉတၵ်းလႆႈဢွၼ်ၵၼ်ၸုတုမ်ယူႇၵႃႈၼႂ်းပၢင်ႇဝၢင်းၵျွင်းပိၵ်ႈမၢၼ်ႇၸဝ်ႈဢေႃႈ။-
ၼွၵ်ႈသေယဵၸ်ႈပရေႃးႁဵၵ်ႈတင်းၵူၼ်းမဵဝ်း လေႇဝိ၊ ၸိူဝ်းဢၼ်တူၵ်းပုၼ်ႈၽွၼ်းၼၼ်ႉ၊ၽူႈလႂ်ၵေႃႈယႃႇပေၶဝ်ႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈၵႂႃႇသေၵေႃႉသေၵူၼ်း။ လွင်ႈမၼ်းၸမ်ႉ၊ၶဝ်ၼၼ်ႉလႆႈၶဝ်ႈၵႂႃႇၵွပ်ႈပိူဝ်ႈဢၼ်ၶဝ်မူတ်းၸၢင်ႇယဝ်ႉလႄႈၵူၼ်းတင်းသဵင်ႈတင်းလူင်တၵ်းလႆႈယူႇၵႃႈၼွၵ်ႈလႄႈပႂ်ႉၸွမ်းၼင်ႇဢမိင်ႉ ထႃႇဝရႃႉၽြႃး၊ ဢေႃႈ။-
မဵဝ်း လေႇဝိ၊ တင်းလၢႆတၵ်းလႆႈၸုၵ်းပႂ်ႉၶုၼ်ႁေႃၶမ်းႁွပ်ႈႁွပ်ႈလႄႈထွတ်ႇလၢပ်ႇၶဝ်ပႂ်ႉၸွမ်းတီႈဢၼ်ၶုၼ်ႁေႃၶမ်းၵႂႃႇမႃးၼၼ်ႉဢေႃႈ။ ၽူႈလႂ်သေဢမ်ႇဝႃႈ ၵေႃႉဢၼ်ၶဝ်ႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉတၵ်းလႆႈဢဝ်တၢႆဢေႃႈ၊” ဝႃႈၼင်ႇၼႆဢေႃႈ။
ၵူၼ်းမဵဝ်း လေႇဝိ၊ တင်းလၢႆဢိၵ်ႇတင်းၵူၼ်းမဵဝ်း ယုတႃႉ၊ တင်းသဵင်ႈတင်းလူင်ႁဵတ်းၸွမ်းၵႃႈၼင်ႇဢၼ်ယဵၸ်ႈပရေႃးႁဵၵ်ႈ ယူဝ်းယတႃႉ၊ သင်ႇလၢတ်ႈဝႆႉၼၼ်ႉလႄႈၶဝ်ႁွင်ႉၵူၼ်းၸိူဝ်းဢၼ်တၵ်းလႆႈၶဝ်ႈၼႂ်းဝၼ်းၵမ်သိၼ်၊ဢိၵ်ႇတင်းၵူၼ်းၸိူဝ်းဢၼ်တၵ်းလႆႈဢွၵ်ႇၼႂ်းဝၼ်းၵမ်သိၼ်ႁင်းၽႂ်ႁင်းမၼ်းၼၼ်ႉမႃး၊ၵွပ်ႈပိူဝ်ႈဢၼ်ယဵၸ်ႈပရေႃးႁဵၵ်ႈ ယူဝ်းယတႃႉ၊ ဢမ်ႇပွႆႇမုၵ်ႉပွႆႇၸိူဝ်းၼၼ်ႉဢေႃႈ။-
ယူဝ်းယတႃႉ၊ ဢဝ်ႁွၵ်ႇတင်းၶႅပ်းႁႄႉလၢၵ်ႈၼၢၵ်ႈဢၼ်ယႂ်ႇဢၼ်လဵၵ်ႉၸိူဝ်းဢၼ်ပဵၼ်ၶွင်ၶုၼ်ႁေႃၶမ်း တႃႇဝိတ်ႈ၊ လႄႈဢဝ်သိမ်းဝႆႉၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉပၼ်တီႈၵူၼ်းတူၼ်ႈၵူၼ်းႁူဝ်တင်းလၢႆဢေႃႈ။-
မၼ်းသမ်ႉၶၢၼ်းၵူၼ်းယိပ်းလၢၵ်ႈၼၢၵ်ႈၸိူဝ်းၼၼ်ႉယူႇၽၢႆႇၼႃႈၵျွင်းပိၵ်ႈမၢၼ်ႇၸဝ်ႈ၊ႁႂ်ႈလႆႈၵႅတ်ႇၶႄႁႄႉၵင်ႈႁွပ်ႈႁွပ်ႈၶုၼ်ႁေႃၶမ်းဢေႃႈ။-
မိူဝ်ႈၼၼ်ႉ၊ ယူဝ်းယတႃႉ၊ ဢဝ် ယေႃးသႃႉ၊ ဢွၵ်ႇမႃးၵႃႈၼွၵ်ႈသေယဝ်ႉ၊တိုဝ်းရႃႇၸႃႉသရၽူႇပၼ်ၵႃႈၼိူဝ်ႁူဝ်မၼ်းလႄႈဢၢပ်ႈပၼ်ၵျၢမ်းပိင်းၺၢပ်ႈၶုၼ်ႁေႃၶမ်းၼၼ်ႉဢေႃႈ။ ယူဝ်းယတႃႉ၊ တင်းလုၵ်ႈၸၢႆးမၼ်းတင်းလၢႆ၊ပၼ်ၽိၵ်ႈသိၵ်ႈသေလႄႈဢွၼ်ၵၼ်ႁွင်ႉသႅၼ်ႇဝႃႈ၊ “ႁႂ်ႈၶုၼ်ႁေႃၶမ်းဢသၢၵ်ႈယၢဝ်းယိုၼ်းသေၵမ်းလူၺ်ႈ၊” ဝႃႈၼင်ႇၼႆဢေႃႈ။
ဢႃႇထလိ၊ ငိၼ်းသဵင်ၵူၼ်းတင်းလၢႆႁွင်ႉပၢဝ်ႇႁွင်ႉသႅၼ်ႇၸူမ်းၸူမ်းသိူဝ်းသိူဝ်းတီႈၶုၼ်ႁေႃၶမ်းၼၼ်ႉလႄႈၵႂႃႇၶၼ်ၶၼ်ၽႂ်းၽႂ်းၸူးၵႃႈတီႈၵျွင်းပိၵ်ႈမၢၼ်ႇၸဝ်ႈတီႈဢၼ်ၵူၼ်းတင်းလၢႆၸုတုမ်ၼၼ်ႉဢေႃႈ။-
ၵႃႈတီႈၼၼ်ႈမၼ်းၼၢင်းႁၼ်ၶုၼ်ႁေႃၶမ်းပႃးမႂ်ႇၸုၵ်းယူႇၵႃႈတီႈႁူးၽၵ်းတူဢၼ်ၶဝ်ႈၸူးတီႈၵျွင်းပိၵ်ႈမၢၼ်ႇၸဝ်ႈယူႇလႄႈၶုၼ်သိုၵ်းလႂ်တင်းၵူၼ်းပဝ်ႇတိုင်ႈၼႄးၶရႃႇလႂ်ၸုၵ်းတၢမ်းၵၼ်ယူႇႁိမ်းၶုၼ်ႁေႃၶမ်းၼၼ်ႉ၊ဢိၵ်ႇတင်းၵူၼ်းတင်းလၢႆဢွၼ်ၵၼ်ႁွင်ႉပၢဝ်ႇႁွင်ႉသႅၼ်ႇၸူမ်းၸူမ်းသိူဝ်းသိူဝ်းယူႇ၊ၵူၼ်းပဝ်ႇတိုင်ႈၼႄးၶရႃႇတင်းလၢႆၵေႃႈပဝ်ႇတိုင်ႈၼႄးၶရႃႇယူႇ၊ၵူၼ်းလဵတ်းတူႇရိယႃႇတီႈၵျွင်းပိၵ်ႈမၢၼ်ႇၸဝ်ႈတင်းလႆၵေႃႈလဵတ်းတိင်ႇလဵတ်းတရေႃးၶဝ်ယူႇလႄႈဢွၼ်ႁူဝ်ႁဵတ်းၵႂၢမ်းယွင်ႈယေႃးယူႇဢေႃႈ။ မိူဝ်ႈၼၼ်ႉမၼ်းၼၢင်းၸၵ်ႉသိၵ်ႇၶူဝ်းၼုင်ႈမၼ်းၼၢင်းလႄႈႁွင်ႉသႅၼ်ႇဝႃႈ၊ “ပဵၼ်တၢင်းဢၼ်လုၵ်ႉၽိုၼ်ႉလူင်ပႄႇ။ ပဵၼ်တၢင်းဢၼ်လုၵ်ႉၽိုၼ်ႉလူင်ပႄႇ၊” ဝႃႈၼင်ႇၼႆဢေႃႈ။
ယူဝ်းယတႃႉ၊ ဢမ်ႇၶႂ်ႈဢဝ်မၼ်းၼၢင်းၼၼ်ႉတၢႆၵႃႈတီႈထႃႇၼႃႉၵျွင်းပိၵ်ႈမၢၼ်ႇၸဝ်ႈသေလႄႈႁွင်ႉဢဝ်ၶုၼ်သိုၵ်းႁၢၼ်ၸိူဝ်းၼၼ်ႉမႃးလႄႈသင်ႇလၢတ်ႈဝႃႈ၊ “ဢဝ်မၼ်းဢွၵ်ႇသေၵႃႈၼႂ်းထႅဝ်ၵူၼ်းသိုၵ်းတႃႉ။ ၽူႈလႂ်သေဢမ်ႇဝႃႈ၊ပေႃးဢၢင်ႈတၵ်းၵႄႇၼုၵ်ႈဢဝ်မၼ်းၸိုင်၊ႁႂ်ႈဢဝ်ၵေႃႉၼၼ်ႉတၢႆပႅတ်ႈတႃႉ၊” ဝႃႈၼင်ႇၼႆဢေႃႈ။
ၶဝ်ၸိူဝ်းၼၼ်ႉတိဢဝ်မၼ်းၼၢင်းၵႂႃႇၵႃႈတီႈႁေႃၸဝ်ႈလႄႈဢဝ်မၼ်းတၢႆၵႃႈတီႈ ၽၵ်းတူမႃႉ၊ သေဢေႃႈ။
ယဵၸ်ႈပရေႃးႁဵၵ်ႈ ယူဝ်းယတႃႉ၊ ဢွၼ်ႁူဝ်ၶုၼ်ႁေႃၶမ်း ယေႃးသႃႉ၊ တင်းၵူၼ်းတင်းလၢႆႁဵတ်းပတိၺိၺ်ႇဝူင်ႈၵၢင်မၼ်းႁႂ်ႈၶဝ်ပဵၼ်ၵူၼ်း ထႃႇဝရႃႉၽြႃး၊ ဢေႃႈ။-
ၼင်ႇၼၼ်လႄႈၶဝ်ဢွၼ်ၵၼ်ၵႂႃႇၵႃႈတီႈၵျွင်း ၽြႃးပႃႇလႃႉ၊ လႄႈၵိူၼ်ႇယႃႉပႅတ်ႈၵျွင်းၼၼ်ႉဢေႃႈ။ ၶဝ်ဢွၼ်ၵၼ်ပေႃႉလႅဝ်ၶဵင်ႇတၢင်းလူႇလႂ်တင်းႁုၼ်ႇႁၢင်ႈသၢင်းထုလႂ်သေယဝ်ႉ၊ဢဝ် မတ်ႉတၼ်ႇ၊ ဢၼ်ပဵၼ်ယဵၸ်ႈပရေႃးႁဵၵ်ႈ ၽြႃးပႃႇလႃႉ၊ ၼၼ်ႉတၢႆၵႃႈတီႈၽၢႆႇၼႃႈၶဵင်ႇတၢင်းလူႇၸိူဝ်းၼၼ်ႉဢေႃႈ။-
ယူဝ်းယတႃႉ၊ ၶၢၼ်းယဵၸ်ႈပရေႃးႁဵၵ်ႈလႂ်တင်းၵူၼ်းမဵဝ်း လေႇဝိ၊ လႂ်ႁႂ်ႈၵိုတ်ႉႁၢပ်ႇၼႃႈၵၢၼ်ၵျွင်းပိၵ်ႈမၢၼ်ႇၸဝ်ႈဢေႃႈ။ ၶဝ်တၵ်းလႆႈၵိုတ်ႉႁၢပ်ႇၼႃႈၵၢၼ်ၵႃႈဢၼ်ၶုၼ်ႁေႃၶမ်း တႃႇဝိတ်ႈ၊ ၶိုင်ႁၢင်ႈသၢင်ႈပွင်ဝႆႉၼၼ်ႉသေလႄႈႁဵတ်းတၢင်းလူႇဢၼ်တုတ်ႇၽႆးတီႈ ထႃႇဝရႃႉၽြႃး၊ ၸွမ်းၵႃႈၼင်ႇဢၼ်ထုင်းတြႃး မူဝ်းသေႇ၊ မီးဝႆႉၸိူဝ်းၼၼ်ႉဢေႃႈ။ ၶဝ်ၼၼ်ႉႁဵတ်းတၢင်းဢၼ်သႂၢင်ႇသိူဝ်း၊တၢင်းဢၼ်ႁဵတ်းၵႂၢမ်းမႅၼ်ႈၸွမ်းၵႃႈၼင်ႇဢၼ် တႃႇဝိတ်ႈ၊ ၸီႇယၢင်ႇဝႆႉၼၼ်ႉဢေႃႈ။-
ၶဝ်ၸိူဝ်းဢၼ်ပႂ်ႉၽၵ်းတူၵျွင်းပိၵ်ႈမၢၼ်ႇၸဝ်ႈၵေႃႈမၼ်းၶၢၼ်းဝႆႉႁႂ်ႈၵေႃႉဢၼ်မီးလၢၵ်ႈၶၼႃႇဢၼ်ဢမ်ႇမူတ်းသႂ်သေၸိူဝ်ႉသေပိူင်ၼၼ်ႉဢမ်ႇလႆႈၶဝ်ႈမႃးၼၼ်ႉဢေႃႈ။
ႁူဝ်ႁၢၼ်ၶုၼ်သိုၵ်းလႂ်၊ၵူၼ်းတူၼ်ႈၵူၼ်းႁူဝ်ၽၢႆႇဝၢၼ်ႈမိူင်းလႂ်၊မူးမၢတ်ႈၽွင်းမိူင်းလႂ်၊ဢိၵ်ႇတင်းၵူၼ်းၵႃႈမီးတင်းသဵင်ႈတင်းလူင်ၽွမ်ႉၵၼ်တင်း ယူဝ်းယတႃႉ၊ ၼႂ်းပွႆးဢၼ်ဢဝ်ၶုၼ်ႁေႃၶမ်းဢွၵ်ႇသေၵႃႈတီႈၵျွင်းပိၵ်ႈမၢၼ်ႇၸဝ်ႈၵႂႃႇၵႃႈတီႈႁေႃၸဝ်ႈၼၼ်ႉဢေႃႈ။ ၶဝ်ဢဝ်မၼ်းၸဝ်ႈသူင်ႇၵႂႃႇၸွမ်းသဵၼ်ႈတၢင်းၽၵ်းတူလူင်လႄႈၶုၼ်ႁေႃၶမ်းၵေႃႈၼင်ႈၵႃႈၼိူဝ်ရႃႇၸႃႉပလၢင်ႇဢေႃႈ။-
ၵူၼ်းဝၢၼ်ႈၵူၼ်းမိူင်းၵႃႈမီးတင်းသဵင်ႈတင်းလူင်ၸူမ်းသိူဝ်းလႄႈ၊ဝဵင်းတင်းဝဵင်းၵေႃႈတဵတ်ႇလီၼိမ်လီ၊ဝၢႆးသေဢၼ်ဢဝ် ဢႃႇထလိ၊ တၢႆယဝ်ႉၼၼ်ႉဢေႃႈ။
ယေႃးသႃႉ၊ ၶိုၼ်ႈပဵၼ်ၶုၼ်ႁေႃၶမ်းမိူင်း ယုတႃႉ၊ မႃးမိူဝ်ႈဢၼ်ဢသၢၵ်ႈမၼ်းလႆႈၸဵတ်းပီၼၼ်ႉသေယဝ်ႉ၊ဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရုသလႅမ်ႇ၊ သီႇသိပ်းပီဢေႃႈ။ မႄႈၸဝ်ႈၸမ်ႉ၊ပဵၼ် ၸိပိ၊ ၵူၼ်းဝဵင်း ပေႇရသေးၽႃႉ၊ ဢေႃႈ။-
မၼ်းၵမ်ၵျၢင်ႉဢၼ်ထုၵ်ႇၸႂ်ၵျိူၵ်ႈၸႂ် ထႃႇဝရႃႉၽြႃး၊ ၼႂ်းၸူဝ်ႈပၢၼ်ဢၼ်ယဵၸ်ႈပရေႃးႁဵၵ်ႈ ယူဝ်းယတႃႉ၊ ဢသၢၵ်ႈလိပ်းယူႇၼၼ်ႉဢေႃႈ။-
ယူဝ်းယတႃႉ၊ လိူၵ်ႈဢဝ်မႄႈယိင်းသွင်ၵေႃႉႁႂ်ႈပဵၼ်မေးၶုၼ်ႁေႃၶမ်း ယေႃးသႃႉ၊ လႄႈၶဝ်ၼၼ်ႉၵိူတ်ႇလဵင်ႉလုၵ်ႈၸၢႆးလုၵ်ႈယိင်းလႂ်ပၼ်မၼ်းဢေႃႈ။
လိုၼ်းၼၼ်ႉ၊ ယေႃးသႃႉ၊ ပဵၼ်ၶုၼ်ႁေႃၶမ်းမႃးဢမ်ႇႁိုင်ဢမ်ႇၼၢၼ်းမၼ်းၵျၢမ်ႇဢၢင်ႈႁႂ်ႈလႆႈမႄးၵုမ်းမႄးႁဵတ်းၵျွင်းပိၵ်ႈမၢၼ်ႇၸဝ်ႈဢေႃႈ။-
မၼ်းၸင်ႇပူင်ဢမိင်ႉႁႂ်ႈယဵၸ်ႈပရေႃးႁဵၵ်ႈၶဝ်တင်းၵူၼ်းမဵဝ်း လေႇဝိ၊ တင်းလၢႆၵႂႃႇၵႃႈတီႈဝဵင်းဢၼ်မီးၵႃႈၼႂ်းမိူင်း ယုတႃႉ၊ တင်းလၢႆလႄႈၵဵပ်းတုင်းဢဝ်ငိုၼ်းဢၼ်တၵ်းပေႃးၵုမ်ႇပုၼ်ႈဢၼ်တၵ်းမႄးၵုမ်းမႄးႁဵတ်းၵျွင်းပိၵ်ႈမၢၼ်ႇၸဝ်ႈၵူႈပီၵူႈပီၼၼ်ႉဢေႃႈ။ မၼ်းသင်ႇလၢတ်ႈႁႂ်ႈၶဝ်ႁဵတ်းၶၼ်ႁဵတ်းၽႂ်းသေၵေႃႈ၊ၵူၼ်းမဵဝ်း လေႇဝိ၊ ၶဝ်ၵဵပ်းတုင်းဢဝ်တူၵ်းလိုၼ်းဢေႃႈ။-
မၼ်းၸင်ႇႁွင်ႉဢဝ် ယူဝ်းယတႃႉ၊ ၵေႃႉဢၼ်ပဵၼ်ၵူၼ်းၵႄႇၵူၼ်းႁူဝ်ၶဝ်ၼၼ်ႉမႃးလႄႈမီးဢမိင်ႉဝႃႈ၊ “ႁဵတ်းသင်လႄႈမႂ်းယင်းဢမ်ႇလူဢမ်ႇတူၺ်းတၢင်းဢၼ်ၵူၼ်းမဵဝ်း လေႇဝိ၊ ၶဝ်ၵဵပ်းတုင်းဢဝ်ငိုၼ်းၶွၼ်ႇၵႃႈတီႈၵူၼ်းမိူင်း ယုတႃႉ၊ တင်းၵူၼ်းဝဵင်း ယေႇရုသလႅမ်ႇ၊ ဢၼ် မူဝ်းသေႇ၊ ၵေႃႉပဵၼ်ၶႃႈ ထႃႇဝရႃႉၽြႃး၊ ၽႃႇၵဵပ်းၵႃႈတီႈၵူၼ်းတင်းလၢႆ၊ဢၼ်ၶဝ်တၵ်းလႆႈသႂ်ႇလႆႈပၼ်ပုၼ်ႈသုမ်ႉထဵင်ၸဝ်ႈတီႈ ထႃႇဝရႃႉၽြႃး၊ ယူႇသဝ်းၼၼ်ႉၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
(လွင်ႈမၼ်းၸမ်ႉ၊လုၵ်ႈလၢင်း ဢႃႇထလိ၊ ၵေႃႉပဵၼ်မႄႈယိင်းဢၼ်ႁဵတ်းဢထမ်ႇမႃႉၼၼ်ႉလႆႈဢွၼ်ၵၼ်ၵိူၼ်ႇယႃႉၵျွင်းပိၵ်ႈမၢၼ်ႇၸဝ်ႈလႄႈဢဝ်ၶိူင်ႈပိူင်ဢၼ်မူတ်းသႂ်ၵႃႈၼႂ်းၵျွင်းပိၵ်ႈမၢၼ်ႇၸဝ်ႈၵႂႃႇသေလႄႈႁဵတ်းတၢင်းလူႇတီႈ ၽြႃးပႃႇလႃႉ၊ ၼမ်ၼႃႇယဝ်ႉဢေႃႈ။)
ၶုၼ်ႁေႃၶမ်းပူင်ဢမိင်ႉႁႂ်ႈၵူၼ်းမဵဝ်း လေႇဝိ၊ ၶဝ်ႁဵတ်းတိူၵ်ႈငိုၼ်းလူႇလႄႈဝႆႉၵႃႈတီႈၼႃႈၽၵ်းတူၵျွင်းပိၵ်ႈမၢၼ်ႇၸဝ်ႈဢေႃႈ။-
ၶဝ်ဢွၼ်ၵၼ်လႄႇပၢဝ်ႇသေႃႇၵႃႈၼႂ်းဝဵင်း ယေႇရုသလႅမ်ႇ၊ တင်းမိူင်း ယုတႃႉ၊ ႁႂ်ႈၵူၼ်းၵူႈၵေႃႉဢဝ်ငိုၼ်းၶွၼ်ႇ ထႃႇဝရႃႉၽြႃး၊ ၸွမ်းၵႃႈၼင်ႇဢၼ် မူဝ်းသေႇ၊ ၵေႃႉပဵၼ်ၶႃႈၽြႃးပဵၼ်ၸဝ်ႈၽႃႇၵဵပ်းဢဝ်ပွၵ်ႈဢွၼ်တၢင်းသေပိူၼ်ႈၵႃႈၼႂ်းထိူၼ်ႇလႅင်ႉၼၼ်ႉဢေႃႈ။-
ၶုၼ်တင်းလၢႆဢိၵ်ႇတင်းၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင်ဢွၼ်ၵၼ်မီးၸႂ်ဢၼ်ၸူမ်းသိူဝ်းသေလႄႈဢဝ်မႃးသႂ်ႇၵႃႈၼႂ်းတိူၵ်ႈငိုၼ်းလူႇထၢၼ်ႈပေႃးတဵမ်ဢေႃႈ။-
ၵူၼ်းၸိူဝ်ႉၶိူဝ်းမဵဝ်း လေႇဝိ၊ ၶဝ်ဢဝ်တိူၵ်ႈငိုၼ်းလူႇၼၼ်ႉ၊မႃးတီႈမူးမၢတ်ႈၵေႃႉဢၼ်ၵွၼ်းငိုၼ်းလူႇၼၼ်ႉၵူႈဝၼ်းဢေႃႈ။ မိူဝ်ႈဢၼ်တိူၵ်ႈတႃႇၼၼ်ႉတဵမ်ယဝ်ႉၵူႈပွၵ်ႈၼၼ်ႉၽူႈမၢႆလူင်ၶုၼ်ႁေႃၶမ်းတင်းၽူႈမၢႆလူင်ယဵၸ်ႈပရေႃးႁဵၵ်ႈလူင် ထွၵ်ႇဢဝ်ငိုၼ်းလူႇသေယဝ်ႉ၊ဢဝ်တိူၵ်ႈငိုၼ်းလူႇၼၼ်ႉဝႆႉၶိုၼ်းတီႈၵဝ်ႇမၼ်းဢေႃႈ။ ၼင်ႇၼၼ်လႄႈၶဝ်ၸုသိမ်းဝႆႉငိုၼ်းၼမ်ၼႃႇဢေႃႈ။
ၶုၼ်ႁေႃၶမ်းဢိၵ်ႇတင်း ယူဝ်းယတႃႉ၊ ဢဝ်ငိုၼ်းလူႇၼၼ်ႉဢၢပ်ႈပၼ်တီႈၶဝ်ၸိူဝ်းဢၼ်ၵိုတ်ႉႁၢပ်ႇၼႃႈၵၢၼ်၊ဢၼ်မႄးၵုမ်းမႄးႁဵတ်းၵျွင်းပိၵ်ႈမၢၼ်ႇၸဝ်ႈသေယဝ်ႉ၊ၶဝ်ၼၼ်ႉၸၢင်ႈငႃဢဝ်သြႃႇၸၢင်ႈၵေႃႇႁိၼ်လႂ်၊သြႃႇၸၢင်ႈမႆႉလႂ်၊ၸၢင်ႈလဵၵ်းၸၢင်ႈတွင်းလႂ်ႁႂ်ႈၶဝ်မႄးႁဵတ်းမႄးၵုမ်းၵျွင်းပိၵ်ႈမၢၼ်ႇၸဝ်ႈဢေႃႈ။-
ၵူၼ်းႁဵတ်းၵၢၼ်ၸိူဝ်းၼၼ်ႉၵေႃႈဢွၼ်ၵၼ်ၵႆႉၶတ်းၸႂ်ႁဵတ်းသၢင်ႈလႄႈၵျွင်းပိၵ်ႈမၢၼ်ႇၸဝ်ႈပဵၼ်ၼင်ႇပၵ်းၵဝ်ႇပိူင်ၵဝ်ႇမၼ်းၶိူင်ႇၼႃႇဢေႃႈ။-
မိူဝ်ႈဢၼ်မႄးၵုမ်းမႄးႁဵတ်းၵျွင်းပိၵ်ႈမၢၼ်ႇယဝ်ႉတူဝ်ႈၵႂႃႇလီလီငၢမ်းငၢမ်းယဝ်ႉၼၼ်ႉၶဝ်ဢဝ်ငိုၼ်းၶမ်းဢၼ်လိူဝ်ၸိူဝ်းၼၼ်ႉၶိုၼ်းဢၢပ်ႈပၼ်တီႈၶုၼ်ႁေႃၶမ်းတင်း ယူဝ်းယတႃႉ၊ လႄႈၶဝ်သမ်ႉဢဝ်ႁဵတ်းၸေႃႉၵၢၵ်ႇလႂ်၊ၵွၵ်းငိုၼ်းၵွၵ်းၶမ်းလႂ်ၸႃႉဢၼ်သုင်းသွင်ႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။ ၸူဝ်ႈဢၼ် ယူဝ်းယတႃႉ၊ ဢသၢၵ်ႈယင်းလိပ်းယူႇၼၼ်ႉၶဝ်ဢွၼ်ၵၼ်ႁဵတ်းတၢင်းလူႇဢၼ်တုတ်ႇၽႆးၵႃႈၼႂ်းၵျွင်းပိၵ်ႈမၢၼ်ႇၸဝ်ႈယူႇမၢၼ်ႇမၢၼ်ႇဢေႃႈ။-
မိူဝ်ႈဢၼ်မၼ်းထဝ်ႈၵႄႇၼႃႇလႄႈဢသၢၵ်ႈလႆႈပၢၵ်ႇပၢႆသၢမ်သိပ်းပီၼၼ်ႉသဵင်ႈဢသၢၵ်ႈၵႂႃႇသေဢေႃႈ။-
ၶဝ်ဢဝ်မၼ်းသၢင်းၵျူဝ်ႇဝႆႉၵႃႈၼႂ်းပႃႇႁဵဝ်ႈၶုၼ်ႁေႃၶမ်းၼႂ်းဝဵင်း တႃႇဝိတ်ႈ၊ ၵွပ်ႈပိူဝ်ႈဢၼ်မၼ်းႁဵတ်းဢၼ်လီဢၼ်ငၢမ်းပုၼ်ႈၵူၼ်းမဵဝ်း ဢိသရေး၊ ပုၼ်ႈၽြႃးပဵၼ်ၸဝ်ႈလႄႈ၊ပုၼ်ႈၵျွင်းပိၵ်ႈမၢၼ်ႇၸဝ်ႈလႂ်ၸိူဝ်းၼၼ်ႉဢေႃႈ။
ၵူၺ်းၵႃႈ၊လိုၼ်းသေ ယူဝ်းယတႃႉ၊ တၢႆယဝ်ႉၼၼ်ႉၶုၼ် ယုတႃႉ၊ တင်းလၢႆဢွၼ်ၵၼ်မႃးတိုၵ်းယူင်းၸူဝ်းဢဝ်ႁႂ်ႈၶုၼ်ႁေႃၶမ်း ယေႃးသႃႉ၊ ထွမ်ႇဢဝ်ၵႂၢမ်းၶဝ်ဢေႃႈ။-
ၼင်ႇၼၼ်လႄႈၵူၼ်းတင်းလၢႆဢွၼ်ၵၼ်ၸုၼ်ႉပႅတ်ႈတၢင်းဢၼ်ႁဵတ်းဝၢတ်ႈၵူဝ်းၵႂၢႆႇၵႃႈၼႂ်းၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇမွၼ်ႇၶဝ်ၼၼ်ႉသေလႄႈဢွၼ်ၵၼ်ဝႆႈသဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ တင်းလၢႆဢေႃႈ။ ၵွပ်ႈပိူဝ်ႈဢပျတ်ႈၶဝ်ၼၼ်ႉလႄႈတၢင်းၸႂ်မႆႈၶႂ်ႈၸႃႉၽြႃးပဵၼ်ၸဝ်ႈတူၵ်းႁွတ်ႈၵႃႈၼိူဝ်ၵူၼ်းမိူင်း ယုတႃႉ၊ တင်းၵူၼ်းဝဵင်း ယေႇရုသလႅမ်ႇ၊ ဢေႃႈ။-
ထႃႇဝရႃႉၽြႃး၊ ပွႆႇၸႂ်ႉပရေႃးၽႅတ်ႈ တင်းလၢႆၵႂႃႇပၼ်သတိတီႈၶဝ်ႁႂ်ႈၶဝ်ဢွၼ်ၵၼ်ၶိုၼ်းမႃးၸူးတီႈမၼ်းၸဝ်ႈသေၵေႃႈ ၵူၼ်းတင်းလၢႆထဵင်ပႅတ်ႈၵႂၢမ်းပရေႃးၽႅတ်ႈၸိူဝ်းၼၼ်ႉဢေႃႈ။-
ၽဝ်ႇၼိုင်ႈဝိၺိၺ်ႇၽြႃးပဵၼ်ၸဝ်ႈတူၵ်းႁွတ်ႈၵႃႈၼိူဝ် ၸႃႇၶရိ၊ လုၵ်ႈၸၢႆးယဵၸ်ႈပရေႃးႁဵၵ်ႈ ယူဝ်းယတႃႉ၊ ၼၼ်ႉလႄႈမၼ်းၵေႃႈၸုၵ်းယူႇၵႃႈတီႈဢၼ်သုင်ၵႃႈၼႂ်းၵၢင်ပရိၵ်ႈသၢတ်ႈသေယဝ်ႉလၢတ်ႈၵႂၢမ်းလႄႈဝႃႈ၊ “ ထႃႇဝရႃႉၽြႃး၊ၽြႃးပဵၼ်ၸဝ်ႈ၊ မီးဢမိင်ႉလႄႈဝႃႈၸမ်ႉ၊ ‘ၵွပ်ႈသင်လႄႈသူဢမ်ႇထွမ်ႇဢမ်ႇဢဝ်ပိင်းၺၢပ်ႈ ထႃႇဝရႃႉၽြႃး၊ လႄႈႁႂ်ႈဢၵျူဝ်းသူလုၸိူဝ်ႉၼင်ႇႁိုဝ်။ သူၸုၼ်ႉပႅတ်ႈ ထႃႇဝရႃႉၽြႃး၊ ယဝ်ႉ။ မၼ်းၸဝ်ႈၵေႃႈၸုၼ်ႉပႅတ်ႈသူယဝ်ႉဢေႃႈ၊’ ဝႃႈၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။-
ၶုၼ်ႁေႃၶမ်းၶဝ်ႈပႃးၼႂ်းတၢင်းဢၼ်လွမ်ႁဵတ်းမုၵ်ႉႁဵတ်းၸိူဝ်းသေယဝ်ႉ၊ၶတ်းၵၼ်တင်း ၸႃႇၶရိ၊ လႄႈဢွၼ်ၵၼ်ဢဝ်မၢၵ်ႇႁိၼ်ထိမ်ႈသႂ်ႇမၼ်းတၢႆၵႃႈၼႂ်းပၢင်ႇဝၢင်းၵျွင်းပိၵ်ႈမၢၼ်ႇၸဝ်ႈၸွမ်းၵႃႈၼင်ႇဢၼ်ၶုၼ်ႁေႃၶမ်းပူင်ဢမိင်ႉၼၼ်ႉဢေႃႈ။-
ၶုၼ်ႁေႃၶမ်းၼၼ်ႉလူင်လိုမ်းၵျေးၸူး ယူဝ်းယတႃႉ၊ ပေႃႈ ၸႃႇၶရိ၊ ၼၼ်ႉလႄႈၸင်ႇလႆႈဢဝ် ၸႃႇၶရိ၊ တၢႆဢေႃႈ။ ယၢမ်းမိူဝ်ႈဢၼ် ၸႃႇၶရိ၊ ၸမ်တၵ်းပူတ်းၸႂ်တၢႆၼၼ်ႉမၼ်းလၢတ်ႈလႄႈဝႃႈ၊ “ႁႂ်ႈ ထႃႇဝရႃႉၽြႃး၊ တူၺ်းႁၼ်လွင်ႈတၢင်းႁဵတ်းၼႆႉလႄႈၸီႇယၢင်ႇပၼ်တၢမ်ႇတီႈမႂ်းသေၵမ်းလူၺ်ႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်ထိုင်ၶိင်ႇပၢႆပီၼၼ်ႉတပ်ႉသိုၵ်းၵူၼ်းမဵဝ်း သီးရီးယႃး၊ ၶဝ်ၶီႇသိုၵ်းတိုၵ်းပႄႉမိူင်း ယုတႃႉ၊ တင်းဝဵင်း ယေႇရုသလႅမ်ႇ၊ သေယဝ်ႉ၊ဢဝ်မူးမၢတ်ႈၽွင်းမိူင်းတၢႆပႅတ်ႈတင်းမူတ်းလႄႈသိမ်းဢဝ်ဢုၵ်ႉၸႃႇၼမ်ၼႃႇဢၼ်ၶဝ်ႁိမ်လႆႈၸိူဝ်းၼၼ်ႉၶိုၼ်းၵႂႃႇၵႃႈတီႈဝဵင်း တမ်ႇမတ်ႉသၵတ်ႉ၊ ဢေႃႈ။-
တပ်ႉသိုၵ်းၵူၼ်း သီးရီးယႃး၊ ၶဝ်ၼၼ်ႉ၊ပဵၼ်တပ်ႉဢွၼ်ႇၵူၺ်းသေၵေႃႈ၊ ထႃႇဝရႃႉၽြႃး၊ ႁႂ်ႈၶဝ်ပႄႉၼႅင်ႇတပ်ႉသိုၵ်းၵူၼ်း ယုတႃႉ၊ ဢၼ်ယႂ်ႇၼႃႇသေၶဝ်ၼၼ်ႉ၊ၵွပ်ႈပိူဝ်ႈဢၼ်ၵူၼ်းတင်းလၢႆၸုၼ်ႉပႅတ်ႈမၼ်းၸဝ်ႈဢၼ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇမွၼ်ႇၶဝ်ၼၼ်ႉဢေႃႈ။ ၼင်ႇၼၼ်လႄႈၶုၼ်ႁေႃၶမ်း ယေႃးသႃႉ၊ လႆႈၶၢမ်ႇတၢမ်ႇဢပျတ်ႈဢေႃႈ။-
မၼ်းလႆႈတိူဝ်ႉမၢတ်ႇဢၼ်ယႂ်ႇၼႃႇလႄႈ၊မိူဝ်ႈဢၼ်တပ်ႉသိုၵ်းရၢၼ်ႇသူႇသုတ်ႉႁူၼ်ၶိုၼ်းၵႂႃႇယဝ်ႉၼၼ်ႉၸိုင်၊ၶုၼ်သိုၵ်းႁၢၼ်မၼ်းသွင်ၵေႃႉလွမ်ႁဵတ်းၶတ်းၵၼ်တင်းမၼ်းလႄႈဢဝ်မၼ်းတၢႆပႅတ်ႈၵႃႈၼိူဝ်ၵူႇၼွၼ်းမၼ်း၊ႁႂ်ႈလႆႈတွပ်ႇတႅၼ်းတၢင်းဢၼ်မၼ်းဢဝ်တၢႆလုၵ်ႈၸၢႆး ယူဝ်းယတႃႉ၊ ယဵၸ်ႈပရေႃးႁဵၵ်ႈၼၼ်ႉဢေႃႈ။ ၶဝ်ဢဝ်မၼ်းသၢင်းၵျူဝ်ႇဝႆႉၵႃႈၼႂ်းဝဵင်း တႃႇဝိတ်ႈ၊ ၼၼ်ႉဢေႃႈ။ ၵူၺ်းၵႃႈ၊ဢမ်ႇၸႂ်ႈၵႃႈၼႂ်းပႃႇႁဵဝ်ႈၶုၼ်ႁေႃၶမ်းၼၼ်ႉဢေႃႈ။-
ၶဝ်ၸိူဝ်းဢၼ်လွမ်ဢဝ်မၼ်းတၢႆၼၼ်ႉၸမ်ႉ၊ပဵၼ် ၸႃႇပတ်ႉ၊ လုၵ်ႈၸၢႆး သိမတ်ႉ၊ ၽူႈယိင်းမဵဝ်း ဢမ်ႇမုၼ်ႇ၊ ဢိၵ်ႇတင်း ယႁေႃးၸပတ်ႉ၊ လုၵ်ႈၸၢႆး သိမရိတ်ႉ၊ ၽူႈယိင်းမဵဝ်း မေႃႇၽႃႉ၊ ဢေႃႈ။-
လွင်ႈလုၵ်ႈလၢင်းမၼ်း၊လွင်ႈတၢင်းဢၼ်ႁေႃးထႃႈဝႆႉ၊လွင်ႈဢၼ်ၶတ်းၶႅင်ႇၵၼ်တင်းမၼ်း၊ဢိၵ်ႇတင်းတၢင်းဢၼ်မၼ်းမႄးၵုမ်းမႄးႁဵတ်းၵျွင်းပိၵ်ႈမၢၼ်ႇၸဝ်ႈၼၼ်ႉတႅမ်ႈမၢႆဝႆႉၵႃႈၼႂ်း လိၵ်ႈပိုၼ်းၶုၼ်ႁေႃၶမ်း၊ တင်းလၢႆၼၼ်ႉဢေႃႈ။ လုၵ်ႈၸၢႆးၸဝ်ႈ ဢႃႇမၸိ၊ သိုပ်ႇၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။
ဢႃႇမၸိ၊ ၶိုၼ်ႈပဵၼ်ၶုၼ်ႁေႃၶမ်းမႃးမိူဝ်ႈဢၼ်ဢသၢၵ်ႈမၼ်းလႆႈသၢဝ်းႁႃႈပီၼၼ်ႉသေယဝ်ႉ၊ဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်း ယေႇရုသလႅမ်ႇ၊ သၢဝ်းၵဝ်ႈပီဢေႃႈ။ မႄႈၸဝ်ႈၸမ်ႉ၊ပဵၼ် ယေႇႁူဝ်းဢတ်ႉတၼ်ႇ၊ ၽူႈယိင်းဝဵင်း ယေႇရုသလႅမ်ႇ၊ ဢေႃႈ။-
မၼ်းၵမ်ၵျၢင်ႉဢၼ်ထုၵ်ႇၸႂ်ၵျိူၵ်ႈၸႂ် ထႃႇဝရႃႉၽြႃး၊ ၼၼ်ႉဢေႃႈ။ ၼႂ်းဝႃႈၼၼ်သေၵေႃႈဢမ်ႇလႆႈပႃးတင်းႁူဝ်ၸႂ်ဢၼ်တဵမ်ထူၼ်ႈ။-
မိူဝ်ႈဢၼ်ဢႃႇၼႃႇတၼ်းၶူဝ်းမီးၼႂ်းမိုဝ်းမၼ်းမၼ်ႈၶိူင်ႇယဝ်ႉၼၼ်ႉၸိုင်၊မၼ်းဢဝ်ၶုၼ်သိုၵ်းႁၢၼ်ဢၼ်ဢဝ်ၸဝ်ႈပေႃႈမၼ်းတၢႆၸိူဝ်းၼၼ်ႉတၢႆဢေႃႈ။-
ၵူၺ်းၵႃႈ၊မၼ်းဢမ်ႇဢဝ်လုၵ်ႈလၢင်းၶဝ်ၼၼ်ႉတၢႆၸွမ်းပိင်းၺၢပ်ႈတြႃးဢၼ် ထႃႇဝရႃႉၽြႃး၊ ပၼ်ဝႆႉတီႈၵျၢမ်းပိင်းၺၢပ်ႈတိ မူဝ်းသေႇ၊ ဢၼ်ဝႃႈ၊ “ပေႃႈမႄႈဢမ်ႇလႆႈၶၢမ်ႇတၢႆၵွပ်ႈပိူဝ်ႈဢပျတ်ႈလုၵ်ႈလၢင်းၶဝ်။ လုၵ်ႈလၢင်းၵေႃႈဢမ်ႇလႆႈၶၢမ်ႇတၢႆၵွပ်ႈပိူဝ်ႈဢပျတ်ႈပေႃႈမႄႈၶဝ်၊ၵူႈၵေႃႉၵူႈၵူၼ်းတၵ်းလႆႈၶၢမ်ႇတၢႆၵွပ်ႈပိူဝ်ႈဢပျတ်ႈတူဝ်ၸဝ်ႈၵဝ်ႇၵူၺ်းဢေႃႈ၊” ဝႃႈၼင်ႇၼႆၼၼ်ႉဢေႃႈ။
ၶုၼ်ႁေႃၶမ်း ဢႃႇမၸိ၊ ႁဵတ်းပဵၼ်မုၵ်ႉပဵၼ်ၸုမ်းၸွမ်းၼင်ႇၶိူဝ်းႁိူၼ်းၽႂ်ၶိူဝ်းႁိူၼ်းမၼ်းၵႃႈၼႂ်းၵူၼ်းၸိူဝ်ႉၶိူဝ်း ယုတႃႉ၊ တင်း ပိၼ်ႇယႃႇမိၼ်ႇ၊ ၵႃႈမီးတင်းသဵင်ႈတင်းလူင်သေယဝ်ႉ၊ၶၢၼ်းပဵၼ်ၶုၼ်သိုၵ်းႁၢၼ်ၸိူဝ်းဢၼ်ဢုပ်ႉၵႃႈၼိူဝ်ၵူၼ်းယေႈႁဵင်ၵူၼ်းယေႈပၢၵ်ႇၼၼ်ႉဢေႃႈ။ ၵူၼ်းသိုၵ်းၵႃႈမီးၸိူဝ်းၼၼ်ႉၸႃႉဢဝ်သၢဝ်းပီလႄႈသၢဝ်းပီၶိုၼ်ႈၼိူဝ်တင်းသဵင်ႈတင်းလူင်မီးသၢမ်သႅၼ်ၵေႃႉဢေႃႈ။ ၶဝ်ၸိူဝ်းၼၼ်ႉလႆႈၶၢမ်ႇတၢင်းဢၼ်လိူၵ်ႈဢဝ်ဝႆႉသေလႄႈတၼ်းဝႆႉတႃႇတေတိုၵ်းသိုၵ်းလႄႈမေႃယိပ်းတိုဝ်းႁွၵ်ႇဢိၵ်ႇတင်းၶိူင်ႈႁႄႉလၢၵ်ႈၼၢၵ်ႈလႂ်ဢေႃႈ။-
ၼွၵ်ႈသေၼၼ်ႉမၼ်းၸၢင်ႈငႃဢဝ်ၵူၼ်းသိုၵ်းမဵဝ်း ဢိသရေး၊ သႅၼ်ၼိုင်ႈဢၼ်ၵႃႈၸၢင်ႈမၼ်းၼၼ်ႉပဵၼ်ငိုၼ်းသွင်ႁဵင်ပၢႆႁႃႈသိပ်းၸွႆႉဢေႃႈ။-
ၵူၺ်းၵႃႈ၊ပရေႃးၽႅတ်ႈ ၵေႃႉၼိုင်ႈမႃးလဝ်ႈလၢတ်ႈတီႈမၼ်းလႄႈဝႃႈ၊ “ၸဝ်ႈၶုၼ်လူင်႟။ ယႃႇပေႁႂ်ႈတပ်ႉသိုၵ်း ဢိသရေး၊ လႆႈၵႂႃႇၸွမ်းလူၺ်ႈၵၼ်တင်းၸဝ်ႈႁဝ်း။ ထႃႇဝရႃႉၽြႃး၊ ဢမ်ႇမီးလူၺ်ႈၵၼ်တင်းၵူၼ်းမိူင်းၽၢႆႇတၢင်းႁွင်ႇၸိူဝ်းၼၼ်ႉ။-
ၸဝ်ႈႁဝ်းၸၢင်ႈၶႄးတၵ်းထၢင်ႇဝႃႈ၊ၶဝ်ႁဵတ်းႁႂ်ႈၸဝ်ႈႁဝ်းမီးႁႅင်းဢၼ်ယဵင်ႈၶႅၼ်းယႂ်ႇၼႃႇၵႃႈၼႂ်းၼႃႈသိုၵ်းၼၼ်ႉဢေႃႈ။ ၵူၺ်းၵႃႈ၊ၽြႃးပဵၼ်ၸဝ်ႈၼၼ်ႉပဵၼ်ၸဝ်ႈဢၼ်မီးႁႅင်းတၼ်းၶူဝ်းတႃႇတေႁႂ်ႈပႄႉ၊ဢမ်ႇၼၼ်ႁႂ်ႈသုမ်းၼၼ်ႉလႄႈ၊မၼ်းၸဝ်ႈတၵ်းႁႂ်ႈရၢၼ်ႇသူႇၸဝ်ႈႁဝ်းၸိူဝ်းၼၼ်ႉပႄႉၼႅင်ႇၸဝ်ႈႁဝ်းဢေႃႈ၊” ဝႃႈၼင်ႇၼႆဢေႃႈ။
ဢႃႇမၸိ၊ ၵေႃႈတွင်ႈထၢမ်တီႈပရေႃးၽႅတ်ႈၼၼ်ႉလႄႈဝႃႈ၊ “ငိုၼ်းၵႃႈၸၢင်ႈဢၼ်ၵဝ်သမ်ႉပေႃးလႆႈပၼ်ယဝ်ႉၼၼ်ႉသမ်ႉတၵ်းလႆႈႁဵတ်းၸိူဝ်ႉၼင်ႇႁိုဝ်၊” ဝႃႈၼင်ႇၼႆလႄႈ၊ ပရေႃးၽႅတ်ႈၼၼ်ႉၶိုၼ်းလၢတ်ႈလႄႈဝႃႈ၊ “ ထႃႇဝရႃႉၽြႃး၊ ပၼ်ဢၼ်ယဵင်ႈၶႅၼ်းၼမ်ၼႃႇသေၼၼ်ႉလႆႈယူႇဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ ဢႃႇမၸိ၊ ပွႆႇႁႂ်ႈၵူၼ်းသိုၵ်းဢၼ်ၸၢင်ႈငႃမႃးၸိူဝ်းၼၼ်ႉပွၵ်ႈၶိုၼ်းမိူဝ်းၵႂႃႇၵႃႈတီႈတီႈယူႇတီႈသဝ်းၶဝ်သေဢေႃႈ။ ၵွပ်ႈပိူဝ်ႈဢၼ်ၶဝ်လႆႈၶိုၼ်းမိူဝ်းၵႂႃႇၼၼ်ႉလႄႈၶဝ်ၶူမ်ၸႂ်ၶႂ်ႈၸႃႉၵူၼ်းမိူင်း ယုတႃႉ၊ ၼႃႇလူင်လၢင်ဢေႃႈ။
ဢႃႇမၸိ၊ ႁဵတ်းႁႂ်ႈတူဝ်ၸဝ်ႈၵဝ်ႇမီးႁႅင်းသေလႄႈဢွၼ်ႁူဝ်တပ်ႉသိုၵ်းမၼ်းၶီႇၶိုၼ်ႈၸူးတီႈ ပၢင်ႇႁူၺ်ႈၵိူဝ်၊ ဢေႃႈ။ ၵႃႈတီႈၼၼ်ႈၶဝ်တိုၵ်းလႄႈဢဝ်ၵူၼ်းသိုၵ်း ဢေႇတုမ်ႇ၊ ၶဝ်တၢႆမိုၼ်ႇၼိုင်ႈ၊-
သမ်ႉတိလႆႈမႃးမိုၼ်ႇၼိုင်ႈဢေႃႈ။ ၶဝ်ဢဝ်ၵူၼ်းဢၼ်တိလႆႈမႃးၸိူဝ်းၼၼ်ႉၵႂႃႇၵႃႈၼိူဝ်ပၢႆၸိၵ်းၽႃႁိၼ်ၵႃႈတီႈဝဵင်း သေးလႃႉ၊ လႄႈဢီးၶဝ်တူၵ်းႁႂ်ႈတၢႆၵႃႈၼိူဝ်မၢၵ်ႇႁိၼ်မၢၵ်ႇၽႃဢၼ်မီးၵႃႈတႂ်ႈၼၼ်ႉဢေႃႈ။
ၼႂ်းမိူဝ်ႈယၢမ်းၼၼ်ႉၵူၼ်းသိုၵ်း ဢိသရေး၊ ၸိူဝ်းဢၼ် ဢႃႇမၸိ၊ ဢမ်ႇႁႂ်ႈၶဝ် ၶဝ်ႈပႃးၼႂ်းပၢင်သိုၵ်းလူၺ်ႈၵၼ်တင်းမၼ်းၼၼ်ႉတိုၵ်းတေႃးဝဵင်းဢၼ်မီးၼႂ်းမိူင်း ယုတႃႉ၊ ၸိူဝ်းဢၼ်မီးဝူင်ႈၵၢင်ဝဵင်း သမႃႇရိ၊ တင်းဝဵင်း ပႅတ်ႉႁေႃႇရုၼ်ႇ၊ လႄႈဢဝ်ၵူၼ်းတၢႆသၢမ်ႁဵင်သေယဝ်ႉ၊သိမ်းဢဝ်ဢုၵ်ႉၸႃႇဢၼ်ၼမ်ၼႃႇၸိူဝ်းၼၼ်ႉၵႂႃႇဢေႃႈ။
ဢႃႇမၸိ၊ ၼၼ်ႉတိုၵ်းပႄႉၵူၼ်း ဢေႇတုမ်ႇ၊ ၶဝ်ယဝ်ႉလႄႈမိူဝ်ႈဢၼ်ၶိုၼ်းပွၵ်ႈမိူဝ်းမႃးၼၼ်ႉမၼ်းဢဝ်ႁုၼ်ႇႁၢင်ႈသၢင်းထုတင်းလၢႆမႃးတင်ႈဝႆႉႁႂ်ႈပဵၼ်ၽြႃးတီႈဢၼ်မၼ်းၵူဝ်းၵႂၢႆႇသေယဝ်ႉ၊ၽဝ်ၼၢမ်ႇသႃႇတီႈႁုၼ်ႇႁၢင်ႈသၢင်းထုၸိူဝ်းၼၼ်ႉဢေႃႈ။-
ပိူဝ်ႈဢၼ်ႁဵတ်းၸိူဝ်ႉၼင်ႇၼၼ်ၼၼ်ႉလႄႈ ထႃႇဝရႃႉၽြႃး၊ ၸႂ်မႆႈၶႂ်ႈၸႃႉလႄႈပွႆႇၸႂ်ႉပရေႃးၽႅတ်ႈၵေႃႉၼိုင်ႈၵႂႃႇၸူးတီႈ ဢႃႇမၸိ၊ ဢေႃႈ။ ပရေႃးၽႅတ်ႈၼၼ်ႉလၢတ်ႈလႄႈဝႃႈ၊ “ႁဵတ်းသင်လႄႈၸဝ်ႈၶုၼ်လူင်ဝႆႈၽြႃးမိူင်းၼွၵ်ႈၸိူဝ်းဢၼ်ဢမ်ႇၸၢင်ႈၸွႆႈထႅမ်ၵူၼ်းတူဝ်ၸဝ်ႈၵဝ်ႇဢွၵ်ႇသေၵႃႈတီႈတၼ်းၶူဝ်းၸဝ်ႈႁဝ်းလႆႈၼၼ်ႉၸိူဝ်ႉၼင်ႇႁိုဝ်တီႈၶႃႈ၊” ဝႃႈၼင်ႇၼႆဢေႃႈ။
ၼႂ်းမိူဝ်ႈဢၼ်ယင်းတိုၵ်ႉလၢတ်ႈယူႇၼၼ်ႉ ဢႃႇမၸိ၊ တတ်းႁႄႉႁူဝ်ၵႂၢမ်းမၼ်းလႄႈဝႃႈ၊ “ႁဝ်းႁႂ်ႈမႂ်းပဵၼ်မူးမၢတ်ႈဢၼ်ပၼ်တၢင်းၵျၢမ်ႇတၢင်းပွင်တီႈၶုၼ်ႁေႃၶမ်းမိူဝ်ႈလႂ်။ ပေႃးတႃႉ၊ယႃႇပေလၢတ်ႈယဝ်ႉ။ ပေႃးဢမ်ႇၼၼ်ၵဝ်တၵ်းဢဝ်မႂ်းတၢႆဢေႃႈ၊” ဝႃႈၼင်ႇၼႆဢေႃႈ။ ပရေႃးၽႅတ်ႈၼၼ်ႉၵေႃႈၵိုတ်းပေႃးသေလႄႈယူႇဢေႃႈ။ ၵူၺ်းၵႃႈ၊ၸူဝ်ႈဢၼ်ဢမ်ႇပႆႇၵိုတ်းၼၼ်ႉမၼ်းလၢတ်ႈလႄႈဝႃႈ၊ “ၵဝ်ၶႃႈႁုႁၼ်လွင်ႈဢၼ်ၽြႃးပဵၼ်ၸဝ်ႈတႅပ်းတတ်းၸႂ်ဝႆႉႁႂ်ႈလႆႈယႃႉၽဵဝ်ႈၸဝ်ႈၶုၼ်လူင်ပႅတ်ႈ၊ၵွပ်ႈပိူဝ်ႈဢၼ်ၸဝ်ႈႁဝ်းႁဵတ်းၸိူဝ်းၼၼ်ႉ၊ဢိၵ်ႇတင်းၵွပ်ႈပိူဝ်ႈဢၼ်ထဵင်ပႅတ်ႈတၢင်းၵျၢမ်ႇတၢင်းပွင်ဢၼ်ၵဝ်ၶႃႈပၼ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်း ဢႃႇမၸိ၊ မိူင်း ယုတႃႉ၊ ဢိၵ်ႇတင်းၶုၼ်ဢၼ်ပၼ်တၢင်းၵျၢမ်ႇၸဝ်ႈၸိူဝ်းၼၼ်ႉလွမ်ႁဵတ်းမုၵ်ႉႁဵတ်းၸုမ်းၶတ်းၵၼ်တင်းမိူင်း ဢိသရေး၊ ဢေႃႈ။ မိူဝ်ႈၼၼ်ႉမၼ်းသင်ႇလၢတ်ႈၵႂႃႇတီႈၶုၼ်ႁေႃၶမ်း ယႁေႃးသႃႉ၊ လုၵ်ႈၸၢႆး ယႁေႃးၶတ်ႉ၊ ၵေႃႉပဵၼ်လၢၼ် ယေႇႁု၊ မိူင်း ဢိသရေး၊ လႄႈဝႃႈ၊ “မႃးလႄႈတေႃႇၼႃႈႁူပ်ႉထူပ်းၵၼ်တႃႉႁဝ်း၊” ဝႃႈၼင်ႇၼႆဢေႃႈ။-
ယႁေႃးသႃႉ၊ ၶိုၼ်းတွပ်ႇၵႂၢမ်းလႄႈသင်ႇလၢတ်ႈမႃးဝႃႈ၊ “မီးၽဝ်ႇၼိုင်ႈ၊တူၼ်ႈၼၢမ်လွႆ လေႇပၼုၼ်ႇ၊ ပွႆႇၸႂ်ႉၵႂႃႇၸူးတီႈတူၼ်ႈ ဢႃႇရိတ်ႉ၊ လႄႈဝႃႈ၊ ‘ဢဝ်လုၵ်ႈယိင်းမႂ်းပၼ်ႁႂ်ႈပဵၼ်မေးလုၵ်ႈၸၢႆးၵဝ်တႃႉ၊’ ဝႃႈၼင်ႇၼႆဢေႃႈ။ တူဝ်ထိူၼ်ႇႁၢႆႉ လေႇပၼုၼ်ႇ၊ တူဝ်ၼိုင်ႈပႆတၢင်းၵႂႃႇလႄႈယဵပ်ႇမႅၼ်ႈတူၼ်ႈၼၢမ်ၼၼ်ႉဢေႃႈ။-
မိူဝ်ႈလဵဝ်ၼႆႉ၊ ဢႃႇမၸိ၊ ႟။ မႂ်းၼႆႉမီးၸႂ်ဢၼ်ၽႅၼ်သုင်ၼႃႇလူၺ်ႈလွင်ႈဢၼ်မႂ်းတိုၵ်းပႄႉၵူၼ်းမဵဝ်း ဢေႇတုမ်ႇ၊ ၶဝ်ၼၼ်ႉလူင်ပႄႇ။ ယူႇၵႃႈတီႈႁိူၼ်းမႂ်းယူႇတႃႉ။ ႁဵတ်းသင်လႄႈမႂ်းႁႃၽေးႁႂ်ႈႁွတ်ႈထိုင်ၵႃႈၼိူဝ်မႂ်း၊ဢိၵ်ႇတင်းၵူၼ်းဝၢၼ်ႈၵူၼ်းမိူင်းမႂ်းယူႇၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ ဢႃႇမၸိ၊ ဢမ်ႇထွမ်ႇဢဝ်ၵႂၢမ်းၼၼ်ႉ။ လွင်ႈမၼ်းၸမ်ႉ၊လွင်ႈတၢင်းၼႆႉပဵၼ်ဢလူဝ်ႇၽြႃးပဵၼ်ၸဝ်ႈႁႂ်ႈမၼ်းတူၵ်းသုမ်းလုလႅဝ်ၵွပ်ႈပိူဝ်ႈမၼ်းဝႆႈၽြႃးၵူၼ်းမဵဝ်း ဢေႇတုမ်ႇ၊ ၶဝ်ၼၼ်ႉဢေႃႈ။-
ၵွပ်ႈပိူဝ်ႈၼႆလႄႈၶုၼ်ႁေႃၶမ်း ယႁေႃးသႃႉ၊ မိူင်း ဢိသရေး၊ ၶီႇသိုၵ်းၶိုၼ်ႈတိုၵ်းၶုၼ်ႁေႃၶမ်း ဢႃႇမၸိ၊ မိူင်း ယုတႃႉ၊ ဢေႃႈ။ ၶဝ်ႁူပ်ႉထူပ်းၵၼ်ၵႃႈတီႈပၢင်ႇပဵင်း ပႅတ်ႉသေးမိတ်ႉ၊ မိူင်း ယုတႃႉ၊ ဢေႃႈ။-
တပ်ႉသိုၵ်းၵူၼ်း ယုတႃႉ၊ တူၵ်းသုမ်းလႄႈၵူၼ်းသိုၵ်းတင်းလၢႆဢွၼ်ၵၼ်ၼီပၢႆႈၸူးတီႈႁိူၼ်းၶဝ်သေဢေႃႈ။-
ယႁေႃးသႃႉ၊ တိဢဝ် ဢႃႇမၸိ၊ လႄႈဢဝ်မၼ်းၵႂႃႇၵႃႈတီႈဝဵင်း ယေႇရုသလႅမ်ႇ၊ ဢေႃႈ။ ၵႃႈတီႈၼၼ်ႈ ယႁေႃးသႃႉ၊ ၵိူၼ်ႇယႃႉလမ်းဝဵင်းတႄႇဢဝ်ၵႃႈတီႈ ၽၵ်းတူဢေႇၽရိမ်ႇ၊ တေႃႇထိုင်ႁွတ်ႈ ၽၵ်းတူၸဵင်ႇ၊ ဝဵင်းၼၼ်ႉလႄႈတၢင်းယၢဝ်းမၼ်းတင်းမူတ်းမီးသီႇပၢၵ်ႇသွၵ်ႇဢေႃႈ။-
မၼ်းသိမ်းဢဝ်ငိုၼ်းၶမ်းတင်းသဵင်ႈတင်းမူတ်းလႄႈၶိူင်ႈပိူင်ၵႃႈဢၼ်ထူပ်းႁၼ်ၵႃႈၼႂ်းမိုဝ်း ဢူဝ်းပိတ်ႉဢေႇတုမ်ႇ၊ ၵႃႈတီႈၵျွင်းပိၵ်ႈမၢၼ်ႇၸဝ်ႈ၊ဢိၵ်ႇတင်းၽၼ်ႇတႃႇႁေႃၸဝ်ႈ၊ဢိၵ်ႇတင်းၵူၼ်းၸိူဝ်းဢၼ်ဢဝ်ၵႂႃႇႁႂ်ႈပဵၼ်တူဝ်ဢႃႇမႃႉၶၢမ်ႇၵမ်ႈၽွင်ႈသေလႄႈၶိုၼ်းပွၵ်ႈမိူဝ်းၵႂႃႇၵႃႈတီႈဝဵင်း သမႃႇရိ၊ သေဢေႃႈ။
ၶုၼ်ႁေႃၶမ်း ဢႃႇမၸိ၊ မိူင်း ယုတႃႉ၊ ၼၼ်ႉ၊ဢသၢၵ်ႈယၢဝ်းယိုၼ်းသေၶုၼ်ႁေႃၶမ်း ယႁေႃးသႃႉ၊ မိူင်း ဢိသရေး၊ ထႅင်ႈသိပ်းႁႃႈပီလူးၵွၼ်ႇဢေႃႈ။-
လွင်ႈတၢင်းဢၼ် ဢႃႇမၸိ၊ သၢင်ႈပွင်ဢၼ်ယင်းၵိုတ်းယင်းၵျၢၼ်ႇဢဝ်ၸဵမ်ငဝ်ႈတေႃႇပၢႆၸိူဝ်းၼၼ်ႉၸိုင်၊တႅမ်ႈဝႆႉၵႃႈၼႂ်း ပိုၼ်းၶုၼ်ႁေႃၶမ်းမိူင်းယုတႃႉ၊ တင်း ပိုၼ်းၶုၼ်ႁေႃၶမ်းမိူင်းဢိသရေး၊ ဢေႃႈ။
ၸႃႉၸဵမ်မိူဝ်ႈဢၼ် ဢႃႇမၸိ၊ ယင်းဢမ်ႇၸွမ်းလင် ထႃႇဝရႃႉၽြႃး၊ လႄႈဝႄႈပိူင်ႈၵႂႃႇၼၼ်ႉ၊ၵူၼ်းဝဵင်း ယေႇရုသလႅမ်ႇ၊ လွမ်ႁဵတ်းမုၵ်ႉႁဵတ်းၸုမ်းသေလႄႈၶတ်းၵၼ်တင်းမၼ်းယူႇၵႃႈၼႂ်းဝဵင်း ယေႇရုသလႅမ်ႇ၊ ဢေႃႈ။ တီႈသုတ်းၼၼ်ႉမၼ်းၼီပၢႆႈၵႂႃႇၵႃႈတီႈဝဵင်း လႃႇၶိသႃႉ၊ သေၵေႃႈ၊ရၢၼ်ႇသူႇမၼ်းတင်းလၢႆၸွမ်းၵႂႃႇဢဝ်မၼ်းတၢႆၵႃႈတီႈဝဵင်းၼၼ်ႉဢေႃႈ။-
တူဝ်တၢႆမၼ်းၸမ်ႉ၊ၶဝ်ဢဝ်တၢင်ႇၵႃႈၼိူဝ်မႃႉသေလႄႈဢဝ်မႃးၵႃႈတီႈဝဵင်း ယေႇရုသလႅမ်ႇ၊ သေယဝ်ႉ၊ဢဝ်သၢင်းၵျူဝ်ႇဝႆႉလူၺ်ႈၵၼ်တင်းပူႇမွၼ်ႇမၼ်းတင်းလၢႆၵႃႈၼႂ်းပႃႇႁဵဝ်ႈဝဵင်း တႃႇဝိတ်ႈ၊ ၼၼ်ႉဢေႃႈ။
ၵူၼ်းမဵဝ်း ယုတႃႉ၊ တင်းသဵင်ႈတင်းလူင်ဢွၼ်ၵၼ်လိူၵ်ႈဢဝ် ဢူဝ်းၸိယႃႉ၊ လုၵ်ႈၸၢႆး ဢႃႇမၸိ၊ ဢၼ်ဢသၢၵ်ႈလႆႈသိပ်းႁူၵ်းပီၼၼ်ႉႁဵတ်းၶုၼ်ႁေႃၶမ်းတၢင်တူဝ်ၸဝ်ႈပေႃႈမၼ်းဢေႃႈ။-
လိုၼ်းသေၸဝ်ႈပေႃႈမၼ်း ဢႃႇမၸိ၊ ၼွၼ်းၽႄးယဝ်ႉၼၼ်ႉ၊ ဢူဝ်းၸိယႃႉ၊ ၶိုၼ်းတိုၵ်းသိမ်းဢဝ်ဝဵင်း ဢေႇလုတ်ႉ၊ လႄႈမႄးတႄႇမႄးတင်ႈဝဵင်းၼၼ်ႉဢေႃႈ။
ဢူဝ်းၸိယႃႉ၊ ၶိုၼ်ႈပဵၼ်ၶုၼ်ႁေႃၶမ်းမႃးမိူဝ်ႈဢၼ်ဢသၢၵ်ႈလႆႈသိပ်းႁူၵ်းပီၼၼ်ႉသေယဝ်ႉ၊ဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်း ယေႇရုသလႅမ်ႇ၊ ႁႃႈသိပ်းသွင်ပီဢေႃႈ။ မႄႈၸဝ်ႈၸမ်ႉ၊ပဵၼ် ယေႇၶေႃးလိ၊ ၽူႈယိင်းဝဵင်း ယေႇရုသလႅမ်ႇ၊ ဢေႃႈ။-
မၼ်းၵမ်ၵျၢင်ႉဢၼ်လီဢၼ်ငၢမ်းသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ၸွမ်းၵႃႈၼင်ႇဢၼ်ၸဝ်ႈပေႃႈမၼ်း ဢႃႇမၸိ၊ ႁဵတ်းၼၼ်ႉဢေႃႈ။-
ၼႂ်းၸူဝ်ႈပၢၼ် ၸႃႇၶရိ၊ ၽူႈပၼ်တၢင်းၵျၢမ်ႇၽၢႆႇၽႃႇသႃႇတြႃးတီႈမၼ်းၼၼ်ႉဢသၢၵ်ႈယင်းလိပ်းယူႇၼၼ်ႉၸိုင်၊ပႃးသဵတ်ႈၸႃႇလႄႈမၼ်းႁဵတ်းဝၢတ်ႈတီႈ ထႃႇဝရႃႉၽြႃး၊ သေယဝ်ႉ၊ၽြႃးပဵၼ်ၸဝ်ႈပၼ်တၢင်းလီတီႈမၼ်းဢေႃႈ။
ဢူဝ်းၸိယႃႉ၊ ၶီႇသိုၵ်းၶိုၼ်ႈတိုၵ်းၵူၼ်း ၽိလိတ်ႉတိ၊ တင်းလၢႆဢေႃႈ။ မၼ်းၵိူၼ်ႇယႃႉလမ်းဝဵင်း ၵႃႇသႃႉ၊ လမ်းဝဵင်း ယႃႇပၼိ၊ တင်းလမ်းဝဵင်း ဢႃႇၸတွတ်ႉ၊ ပႅတ်ႈသေယဝ်ႉ၊တႄႇႁဵတ်းဝဵင်းမႂ်ႇၵူၺ်းၵူၺ်း၊ၵႃႈႁိမ်းဝဵင်း ဢႃႇၸတွတ်ႉ၊ မိူင်း ၽိလိတ်ႉတိ၊ ၼၼ်ႉဢေႃႈ။-
ၽြႃးပဵၼ်ၸဝ်ႈၸွႆႈထႅမ်မၼ်းႁႂ်ႈတိုၵ်းပႄႉၵူၼ်းမဵဝ်း ၽိလိတ်ႉတိ၊ ၵူၼ်းမဵဝ်း ဢႃႇရပ်ႉ၊ ၸိူဝ်းဢၼ်ယူႇၵႃႈတီႈဝဵင်း ၵုရႃႉပႃႇလႃႇ၊ တင်းၵူၼ်းမဵဝ်း မႁုၼိမ်ႇ၊ ၸိူဝ်းၼၼ်ႉဢေႃႈ။-
ၵူၼ်းမဵဝ်း ဢမ်ႇမုၼ်ႇ၊ ၶဝ်ၵေႃႈသၢၵ်ႈၶွၼ်ႇၵႃႈတီႈ ဢူဝ်းၸိယႃႉ၊ လႄႈဢႃႇၼႃႇတၼ်းၶူဝ်းမၼ်းယႂ်ႇမႃးလႄႈသတၢင်းသဵင်ၶၢဝ်ႇၸိုဝ်ႈသဵင်မၼ်းႁူင်ႁၢင်းၸွတ်ႇတူဝ်ႈၵႂႃႇတေႃႇထိုင်ႁွတ်ႈမိူင်း ဢေးၵျိပ်ႉ၊ ဢေႃႈ။
ဢူဝ်းၸိယႃႉ၊ တႄႇႁဵတ်းတိူၵ်ႈတီႈတိုၵ်းသိုၵ်းၵႃႈတီႈ ၽၵ်းတူၸဵင်ႇ၊ ၵႃႈတီႈ ၽၵ်းတူၶူင်ႈႁူၺ်ႈ၊ ဢိၵ်ႇတင်းၵႃႈတီႈၽၵ်းတူလမ်းဝဵင်း ယေႇရုသလႅမ်ႇ၊ တီႈဢၼ်ၵူတ်ႉၼၼ်ႉႁႂ်ႈမၼ်ႈၶိူင်ႇဢေႃႈ။-
ၵႃႈၼႂ်းထိူၼ်ႇၵေႃႈမၼ်းတႄႇႁဵတ်းတိူၵ်ႈတီႈတိုၵ်းသိုၵ်းတင်းလၢႆလႄႈၶုတ်းထၢင်ၼမ်ႉဝႆႉၼမ်ၼႃႇဢေႃႈ။ လွင်ႈမၼ်းၸမ်ႉ၊မၼ်းမီးၽုင်သူဝ်းၽုင်ဝူဝ်းၼမ်ၼႃႇၵႃႈတီႈတိၼ်လွႆ၊ဢိၵ်ႇတင်းၵႃႈတီႈပၢင်ႇပဵင်းတင်းလၢႆၽၢႆႇတၢင်းဝၼ်းဢွၵ်ႇပုၼ်ႉဢေႃႈ။ ၵွပ်ႈပိူဝ်ႈဢၼ်မၼ်းၵျိူၵ်ႈၽၢႆႇၽုၵ်ႇသွမ်ႈလႄႈမၼ်းပၼ်ႁႅင်းႁႂ်ႈၵူၼ်းတင်းလၢႆၽုၵ်ႇသူၼ်မၢၵ်ႇၸပိတ်ႉၵႃႈတီႈမိူင်းလွႆတင်းလၢႆႁႂ်ႈႁဵတ်းႁႆႈႁဵတ်းၼႃးၵႃႈတီႈလိၼ်ဢၼ်လီလႂ်ဢေႃႈ။
ဢူဝ်းၸိယႃႉ၊ မီးႁူဝ်ႁၢၼ်ၵူၼ်းသိုၵ်းဢၼ်ပဵၼ်မုၵ်ႉပဵၼ်ၸိူဝ်းဝႆႉႁင်းၽႂ်ႁင်းမၼ်းၼမ်ၼႃႇဢေႃႈ။ ႁႃႇၼၼိ၊ ၶုၼ်သိုၵ်းၶုၼ်ႁေႃၶမ်းၼၼ်ႉ၊ဢွၼ်ႁူဝ်ၽူႈမၢႆလူင်မၼ်းဢၼ်ပဵၼ် ယေႇယေႇလႃႉ၊ ဢိၵ်ႇတင်း မႃႇသေႇယႃႉ၊ လႄႈၵဵပ်းဢဝ်ၸရၢင်းၵူၼ်းသိုၵ်းၸိူဝ်းၼၼ်ႉဝႆႉဢေႃႈ။-
ၶုၼ်သိုၵ်းၸိူဝ်းဢၼ်ဢုပ်ႉၵႃႈၼိူဝ်တပ်ႉသိုၵ်းၼၼ်ႉမီးသွင်ႁဵင်ႁူၵ်းပၢၵ်ႇၵေႃႉဢေႃႈ။-
ၵႃႈတႂ်ႈၶဝ်ၼၼ်ႉမီးႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇသၢမ်သႅၼ်ပၢႆၸဵတ်းႁဵင်ႁႃႈပၢၵ်ႇၵေႃႉသေယဝ်ႉ၊ၵမ်ႉထွၵ်ႈၸွႆႈထႅမ်ၶုၼ်ႁေႃၶမ်းႁႂ်ႈလႆႈတိုၵ်းတေႃးရၢၼ်ႇသူႇမၼ်းၸဝ်ႈဢေႃႈ။-
ဢူဝ်းၸိယႃႉ၊ ပွင်ႁဵတ်းၶိူင်ႈႁႄႉလၢၵ်ႈၼၢၵ်ႈလႂ်၊ႁွၵ်ႇလႂ်၊မွၵ်ႇႁူဝ်လဵၵ်းလႂ်၊သိူဝ်ႈလဵၵ်းလႂ်၊ၵၢင်ႇလႂ်၊ၵူင်ၵွၼ်ဢၼ်တၵ်းပိုတ်းယိုဝ်းမၢၵ်ႇႁိၼ်လႂ်၊ပုၼ်ႈတပ်ႉသိုၵ်းၵႃႈမီးၼၼ်ႉဢေႃႈ။-
ၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉ၊ၵူၼ်းမၼ်းၸိူဝ်းဢၼ်မီးၺၢၼ်ႇမေႃႁဵတ်းမဵဝ်းဢၼ်မႂ်ႇမႂ်ႇၼၼ်ႉၵေႃႈတႄႇႁဵတ်းၶိူင်ႈၸၢၵ်ႈဢၼ်ပိုတ်းပိုၼ်လႂ်၊ၶိူင်ႈဢၼ်ဢဝ်မၢၵ်ႇႁိၼ်လူင်ပိုတ်းယိုဝ်းၸိူဝ်းၼၼ်ႉတင်ႈဝႆႉၵႃႈၼိူဝ်သဝ်လၢင်းလႂ်၊ဢိၵ်ႇတင်းၵႃႈၼိူဝ်ၸဵင်ႇလမ်းဝဵင်းလႂ်ဝႆႉဢေႃႈ။ ၼင်ႇၼၼ်လႄႈသတၢင်းသဵင်ၶၢဝ်ႇၼႃႇမႃႉၸိုဝ်ႈသဵင်မၼ်းႁူင်ႁၢင်းၸွတ်ႇတူဝ်ႈၵႂႃႇၵူႈတီႈၵူႈလႅၼ်လႄႈ၊ဢႃႇၼႃႇတၼ်းၶူဝ်းမၼ်းယႂ်ႇၼႃႇၵွပ်ႈပိူဝ်ႈဢၼ်မၼ်းလႆႈၶၢမ်ႇတၢင်းဢၼ်ၽြႃးပဵၼ်ၸဝ်ႈၸွႆႈထႅမ်ၼၼ်ႉဢေႃႈ။
မိူဝ်ႈဢၼ် ဢူဝ်းၸိယႃႉ၊ မီးဢႃႇၼႃႇတၼ်းၶူဝ်းယႂ်ႇၼႃႇၼၼ်ႉၸိုင်၊မၼ်းမီးၸႂ်ဢၼ်ပူၵ်းပႅၼ်လုၵ်ႉၶိုၼ်ႈႁဵတ်းႁႂ်ႈတူဝ်ၸဝ်ႈၵဝ်ႇလုလႅဝ်ဢေႃႈ။ မၼ်းၽိတ်းပိူင်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈမၼ်းလူၺ်ႈတၢင်းဢၼ်ၶဝ်ႈၵႂႃႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈႁႂ်ႈလႆႈဢဝ်ၼၢမ်ႇသႃႇၽဝ်ၽႆးၵႃႈၼိူဝ်ၶဵင်ႇတၢင်းလူႇဢၼ်ၽဝ်ၼၢမ်ႇသႃႇၼၼ်ႉဢေႃႈ။-
ယဵၸ်ႈပရေႃးႁဵၵ်ႈ ဢႃႇၸရိ၊ ဢိၵ်ႇတင်းယဵၸ်ႈပရေႃးႁဵၵ်ႈၸိူဝ်းဢၼ်ႁႅင်းယႂ်ႇႁတ်းႁၢၼ်ၼၼ်ႉ၊ပႅတ်ႇသိပ်းၵေႃႉၶဝ်ႈၸွမ်းၶုၼ်ႁေႃၶမ်းၵႂႃႇလႄႈ၊-
ႁၢမ်ႈတၢပ်ႈႁႄႉၶႅၼ်မၼ်းလႄႈဝႃႈ၊ “ၸဝ်ႈၶုၼ်လူင် ဢူဝ်းၸိယႃႉ၊ ႟။ ၸဝ်ႈႁဝ်းဢမ်ႇမီးဢၶႂၢင်ႉတႃႇတေၽဝ်ၼၢမ်ႇသႃႇၵႃႈတီႈ ထႃႇဝရႃႉၽြႃး၊ တီႈၶႃႈ။ ယဵၸ်ႈပရေႃးႁဵၵ်ႈၸိူဝ်းဢၼ်ပဵၼ်လုၵ်ႈလၢၼ်ၸိူဝ်ႉၶိူဝ်း ဢႃႇရုၼ်ႇ၊ တင်းလၢႆၼႆႉၵူၺ်းလႆႈၶၢမ်ႇတၢင်းဢၼ်ၶၢၼ်းဝႆႉႁႂ်ႈလႆႈဢဝ်ၼၢမ်ႇသႃႇၽဝ်ၽႆးတီႈၶႃႈဢေႃႈ။ ဢွၵ်ႇသေၵႃႈတီႈထႃႇၼႃႉတီႈမူတ်းၸၢင်ႇၼႆႉၵႂႃႇသေၵမ်း။ ၸဝ်ႈႁဝ်းၽိတ်းပိူင်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈတီႈၶႃႈယဝ်ႉ။ ၸဝ်ႈႁဝ်းတၵ်းတေဢမ်ႇလႆႈၶၢမ်ႇတၢင်းဢၼ်ယုၵ်ႉယွင်ႈထႅင်ႈသေပွၵ်ႈတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
ဢူဝ်းၸိယႃႉ၊ ၼၼ်ႉယင်းတိုၵ်ႉၸုၵ်းယူႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈၵႃႈႁိမ်းၶဵင်ႇတၢင်းလူႇဢၼ်ၽဝ်ၼၢမ်ႇသႃႇၼၼ်ႉယူႇလႄႈယိပ်းၵမ်ၽၢင်ၽႆးႁႂ်ႈလႆႈၽဝ်ၼၢမ်ႇသႃႇယူႇဢေႃႈ။ မၼ်းၸႂ်လမ်ဢွၵ်ႇတေႃးသႃႉတီႈယဵၸ်ႈပရေႃးႁဵၵ်ႈၸိူဝ်းၼၼ်ႉယူႇလႄႈ၊မိူဝ်ႈၼၼ်ႉတုတ်ႈပေႃႇပဵၼ်မႃးၵႃႈတီႈၼႃႈၽၢၵ်ႇမၼ်းၵမ်းလဵဝ်ဢေႃႈ။-
ဢႃႇၸရိ၊ တင်းယဵၸ်ႈပရေႃးႁဵၵ်ႈၸိူဝ်းၼၼ်ႉလူတူၺ်းၼႃႈၽၢၵ်ႇၶုၼ်ႁေႃၶမ်းလႄႈတူၵ်းၸႂ်သေယဝ်ႉ၊ဢွၼ်ၵၼ်ဢီးမၼ်းဢွၵ်ႇသေၵျွင်းပိၵ်ႈမၢၼ်ႇၸဝ်ႈၵႂႃႇဢေႃႈ။ တူဝ်မၼ်းၵေႃႈႁိပ်ႈၼႅတ်ႈဢွၵ်ႇၵႂႃႇၵွပ်ႈပိူဝ်ႈဢၼ် ထႃႇဝရႃႉၽြႃး၊ ပၼ်တၢမ်ႇတီႈမၼ်းယဝ်ႉၼၼ်ႉဢေႃႈ။
ၼင်ႇၼၼ်လႄႈၶုၼ်ႁေႃၶမ်း ဢူဝ်းၸိယႃႉ၊ ႁွတ်ႈထိုင်တၢင်းဢၼ်ဢမ်ႇမူတ်းသႂ်ၵွပ်ႈပိူဝ်ႈယေႃးၵႃႇတုတ်ႈမၼ်းၼၼ်ႉလႄႈလႆႈယူႇၵႃႈတီႈႁေႃလင်ၼိုင်ႈၶေႃၶေႃၵူၺ်းမၼ်းတေႃႇထိုင်ႁွတ်ႈမၼ်းထၢၼ်ႈပေႃးတၢႆၵႂႃႇဢေႃႈ။ မၼ်းဢမ်ႇလႆႈဢၶႂၢင်ႉဢၼ်ၶဝ်ႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈယဝ်ႉလႄႈ ယူဝ်းထမ်ႇ၊ လုၵ်ႈၸၢႆးၸဝ်ႈၼၼ်ႉဢုပ်ႉၵႃႈၼိူဝ်ၵူၼ်းဝၢၼ်ႈၵူၼ်းမိူင်းမၼ်းဢေႃႈ။
လွင်ႈတၢင်း ဢူဝ်းၸိယႃႉ၊ ၵႃႈမီးတင်းသဵင်ႈတင်းလူင်ၼၼ်ႉပရေႃးၽႅတ်ႈ ဢိသႃႇယႃႉ၊ လုၵ်ႈၸၢႆး ဢႃႇမူတ်ႉ၊ ၼၼ်ႉတႅမ်ႈမၢႆဝႆႉၵႃႈဢၼ်ၶုၼ်ႁေႃၶမ်း ဢူဝ်းၸိယႃႉ၊ ႁဵတ်းသၢင်ႈၼႂ်းၸူဝ်ႈပၢၼ်ဢၼ်မၼ်းဢုပ်ႉပိူင်ႇၸၢမ်ႇၸႃးၼၼ်ႉဢေႃႈ။-
ဢူဝ်းၸိယႃႉ၊ ၼွၼ်းၽႄးၸွမ်းပူႇမွၼ်ႇမၼ်းတင်းလၢႆလႄႈဢဝ်သၢင်းၵျူဝ်ႇဝႆႉၵႃႈၼႂ်းၵႂၢၵ်ႈလိၼ်ပႃႇႁဵဝ်ႈၶုၼ်ႁေႃၶမ်းၼၼ်ႉၵူၺ်း၊ၵွပ်ႈပိူဝ်ႈဢၼ်မၼ်းမီးယေႃးၵႃႇတုတ်ႈၼၼ်ႉဢေႃႈ။ လုၵ်ႈၸၢႆးမၼ်း ယူဝ်းထမ်ႇ၊ သိုပ်ႇၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။
ယူဝ်းထမ်ႇ၊ ၶိုၼ်ႈပဵၼ်ၶုၼ်ႁေႃၶမ်းမိူဝ်ႈဢၼ်ဢသၢၵ်ႈမၼ်းလႆႈသၢဝ်းႁႃႈပီၼၼ်ႉသေယဝ်ႉ၊ဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်း ယေႇရုသလႅမ်ႇ၊ သိပ်းႁူၵ်းပီဢေႃႈ။ မႄႈၸဝ်ႈၸမ်ႉ၊ပဵၼ် ယေႇရုသႃႇ၊ လုၵ်ႈယိင်း ၸႃႇတုၵ်ႉ၊ ဢေႃႈ။-
မၼ်းၵမ်ၵျၢင်ႉဢၼ်လီဢၼ်ငၢမ်းသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ၸွမ်းၵႃႈၼင်ႇဢၼ်ၸဝ်ႈပေႃႈမၼ်း ဢူဝ်းၸိယႃႉ၊ ႁဵတ်းၼၼ်ႉၼွၵ်ႈသေမၼ်းဢမ်ႇၶဝ်ႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈလႄႈႁဵတ်းဢပျတ်ႈတၢင်းဢၼ်ဢဝ်ၼၢမ်ႇသႃႇၽဝ်ၽႆးမိူၼ်ၸိူဝ်ႉၼင်ႇၸဝ်ႈပေႃႈမၼ်းႁဵတ်းၼၼ်ႉဢေႃႈ။ ၵူၺ်းၵႃႈ၊ၵူၼ်းဝၢၼ်ႈၵူၼ်းမိူင်းတင်းလၢႆယင်းဢွၼ်ၵၼ်ႁဵတ်းတုၸရိူၵ်ႈယူႇဢေႃႈ။
ယူဝ်းထမ်ႇ၊ ပဵၼ်ၵေႃႉဢၼ်တႄႇႁဵတ်းၽၵ်းတူၽၢႆႇတၢင်းႁွင်ႇၵႃႈတီႈၵျွင်းပိၵ်ႈမၢၼ်ႇၼၼ်ႉလႄႈ ၶႂၢၵ်ႈၵႂၢင်ႈလမ်းဝဵင်းၵႃႈတီႈၵႂၢၵ်ႈလိၼ်ဝဵင်း ယေႇရုသလႅမ်ႇ၊ ဢၼ်ႁွင်ႉဝႃႈ၊ ဢေႃးၽေႇလႃႉ၊ ၼၼ်ႉဢေႃႈ။-
မၼ်းတႄႇတင်ႈဝဵင်းတင်းလၢႆၵႃႈၼိူဝ်သၼ်လွႆ ယုတႃႉ၊ ဢိၵ်ႇတင်းတိူၵ်ႈတီႈတိုၵ်းသိုၵ်းလႂ်၊တင်းသဝ်လၢင်းလႂ်၊ၵႃႈတီႈထိူၼ်ႇတီႈၶိူဝ်းဢေႃႈ။-
ယူဝ်းထမ်ႇ၊ ၶီႇသိုၵ်းၶိုၼ်ႈတိုၵ်းၶုၼ်ႁေႃၶမ်းမိူင်း ဢမ်ႇမုၼ်ႇ၊ လႄႈပႄႉၼႅင်ႇသေယဝ်ႉ၊မၼ်းႁႂ်ႈၵူၼ်းမဵဝ်း ဢမ်ႇမုၼ်ႇ၊ ၶဝ်သၢၵ်ႈၶွၼ်ႇတီႈမၼ်းယေႈပီငိုၼ်းသွင်ႁဵင်ပၢႆႁႃႈသိပ်းၸွႆႉ၊ၶဝ်ႈၵျုင်ႇၼိုင်ႈႁဵင်တၢၼ်ႇ၊ၶဝ်ႈမုယေႃးၼိုင်ႈႁဵင်တၢၼ်ႇ၊ႁႂ်ႈသၢၵ်ႈၶွၼ်ႇထိုင်သၢမ်ပီဢေႃႈ။-
ယူဝ်းထမ်ႇ၊ ၵေႃႈဢႃႇၼႃႇတၼ်းၶူဝ်းမၼ်းယႂ်ႇမႃးၵွပ်ႈပိူဝ်ႈမၼ်းပႃးတင်းသဵတ်ႈၸႃႇထွမ်ႇဢဝ် ထႃႇဝရႃႉၽြႃး၊ ၽြႃးပဵၼ်ၸဝ်ႈမၼ်းၼၼ်ႉဢေႃႈ။-
လွင်ႈတၢင်း ယူဝ်းထမ်ႇ၊ ဢုပ်ႉပိူင်ႇၸၢမ်ႇၸႃးလွင်ႈသိုၵ်းလွင်ႈသိူဝ်၊လွင်ႈပၢႆးမိူင်းၵႃႈမီးတၢင်ႇၸိူဝ်ႉတၢင်ႇမဵဝ်းၼၼ်ႉ၊တႅမ်ႈမၢႆဝႆႉၵႃႈၼႂ်း ပိုၼ်းၶုၼ်ႁေႃၶမ်းမိူင်းဢိသရေး၊ ဢိၵ်ႇတင်း ပိုၼ်းၶုၼ်ႁေႃၶမ်းမိူင်းယုတႃႉ၊ တင်းသဵင်ႈတင်းလူင်ၼၼ်ႉဢေႃႈ။-
ယူဝ်းထမ်ႇ၊ ၶိုၼ်ႈပဵၼ်ၶုၼ်ႁေႃၶမ်းမႃးမိူဝ်ႈဢၼ်ဢသၢၵ်ႈမၼ်းလႆႈသၢဝ်းႁႃႈပီၼၼ်ႉလႄႈဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်း ယေႇရုသလႅမ်ႇ၊ သိပ်းႁူၵ်းပီဢေႃႈ။-
မၼ်းၼွၼ်းၽႄးၸွမ်းပူႇမွၼ်ႇမၼ်းတင်းလၢႆလႄႈဢဝ်သၢင်းၵျူဝ်ႇဝႆႉၵႃႈၼႂ်းဝဵင်း တႃႇဝိတ်ႈ၊ ဢေႃႈ။ လုၵ်ႈၸၢႆးမၼ်း ဢႃႇၶတ်ႉ၊ သိုပ်ႇၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။
ဢႃႇၶတ်ႉ၊ ၶိုၼ်ႈပဵၼ်ၶုၼ်ႁေႃၶမ်းမိူဝ်ႈဢၼ်ဢသၢၵ်ႈမၼ်းလႆႈသၢဝ်းပီၼၼ်ႉလႄႈဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်း ယေႇရုသလႅမ်ႇ၊ သိပ်းႁူၵ်းပီဢေႃႈ။ မၼ်းဢမ်ႇၵမ်ၵျၢင်ႉၸွမ်းၵႃႈၼင်ႇဢၼ်ပူႇမွၼ်ႇမၼ်းၶုၼ်ႁေႃၶမ်း တႃႇဝိတ်ႈ၊ ႁဵတ်းဢၼ်လီဢၼ်ငၢမ်းၼၼ်ႉလႄႈမၼ်းၵမ်ၵျၢင်ႉမဵဝ်းဢၼ်ဢမ်ႇထုၵ်ႇၸႂ် ထႃႇဝရႃႉၽြႃး၊ ၼၼ်ႉဢေႃႈ။-
မၼ်းၸွမ်းသဵၼ်ႈတၢင်းဢၼ်ၶုၼ်ႁေႃၶမ်း ဢိသရေး၊ တင်းလၢႆၸွမ်းၼၼ်ႉလႄႈသွၼ်းလေႃႇႁဵတ်းႁုၼ်ႇႁၢင်ႈသၢင်းထု ၽြႃးပႃႇလႃႉ၊ တင်းလၢႆသေယဝ်ႉ၊-
ၽဝ်ၼၢမ်ႇသႃႇၵႃႈၼႂ်းထူင်ႉႁူၺ်ႈ ႁိၼ်ႇၼုမ်ႇ၊ လႄႈဢဝ်လုၵ်ႈၸၢႆးမၼ်းႁဵတ်းပဵၼ်ၶိူင်ႈတၢင်းလူႇဢၼ်တုတ်ႇၽႆးသေယဝ်ႉ၊သၢၵ်ႈလူႇတီႈႁုၼ်ႇႁၢင်ႈသၢင်းထုဢၼ်ႁဵတ်းၸွမ်းထုင်းၸၢမ်ႇဢၼ်လီႁင်ႈဢဵတ်ႇသဵတ်ႇမဵဝ်းၵူၼ်းတၢင်ႇၸိူဝ်ႉတၢင်ႇၶိူဝ်းဢၼ် ထႃႇဝရႃႉၽြႃး၊ လိုပ်ႈဢွၵ်ႇပႅတ်ႈသေၵႃႈတီႈၽၢႆႇၼႃႈၵူၼ်းမဵဝ်း ဢိသရေး၊ တင်းလၢႆၸိူဝ်းၼၼ်ႉဢေႃႈ။-
မၼ်းၸၢင်ႈႁဵတ်းတၢင်းလူႇလႄႈဢဝ်ၼၢမ်ႇသႃႇၽဝ်ၽႆးတီႈၽြႃးတၢင်ႇသူႇတၢင်ႇပႃးလႂ်၊ၵႃႈတီႈၼိူဝ်လွႆလႂ်၊ဢိၵ်ႇတင်းၵႃႈတီႈတူၼ်ႈမႆႉၶဵဝ်လႂ်ဢေႃႈ။
ၵွပ်ႈပိူဝ်ႈဢၼ်ၶုၼ်ႁေႃၶမ်း ဢႃႇၶတ်ႉ၊ ႁဵတ်းတုၸရိူၵ်ႈလႄႈ ထႃႇဝရႃႉၽြႃး၊ ၽြႃးပဵၼ်ၸဝ်ႈမၼ်းႁႂ်ႈၶုၼ်ႁေႃၶမ်းမိူင်း သီးရီးယႃး၊ တိုၵ်းပႄႉမၼ်းလႄႈဢဝ်ၵူၼ်းမဵဝ်း ယုတႃႉ၊ ၼမ်ၼႃႇၶိုၼ်းမိူဝ်းၵႂႃႇၵႃႈတီႈဝဵင်း တမ်ႇမတ်ႉသၵတ်ႉ၊ ဢေႃႈ။ မိူၼ်ၼင်ႇၼၼ် ထႃႇဝရႃႉၽြႃး၊ ႁႂ်ႈၶုၼ်ႁေႃၶမ်း ဢိသရေး၊ ဢၼ်ၸိုဝ်ႈ ပေႇၵႃႇ၊ လႄႈပဵၼ်လုၵ်ႈၸၢႆး ရေႇမလိ၊ ၼၼ်ႉတိုၵ်းပႄႉ ဢႃႇၶတ်ႉ၊ လႄႈဢဝ်ႁူဝ်ႁၢၼ်ၵူၼ်းသိုၵ်းမဵဝ်း ယုတႃႉ၊ ၸိူဝ်းဢၼ်ႁတ်းႁၢၼ်တင်းလၢႆတၢႆပႅတ်ႈသႅၼ်သွင်မိုၼ်ႇၵေႃႉဢေႃႈ။-
ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇမွၼ်ႇၶဝ်ၼၼ်ႉႁႂ်ႈလွင်ႈတၢင်းၸိူဝ်းၼႆႉပဵၼ်မႃးၵွပ်ႈပိူဝ်ႈဢၼ်ၵူၼ်းမဵဝ်း ယုတႃႉ၊ တင်းလၢႆၸုၼ်ႉပႅတ်ႈမၼ်းၸဝ်ႈၼၼ်ႉဢေႃႈ။-
ၵူၼ်းသိုၵ်းမဵဝ်း ဢိသရေး၊ ၵေႃႉၼိုင်ႈဢၼ်ၸိုဝ်ႈ ၸိၶရိ၊ ၼၼ်ႉဢဝ် မႃႇသေႇယႃႉ၊ လုၵ်ႈၸၢႆးၶုၼ်ႁေႃၶမ်း ဢႃႇႁတ်ႉ၊ တင်း ဢႃႇၸရိၵမ်ႇ၊ ၽူႈၵွၼ်းႁေႃၸဝ်ႈဢိၵ်ႇတင်း ဢေးလႃႉၵႃႇၼႃႉ၊ ၶုၼ်ဢႃႇၼႃႇတႂ်ႈၶုၼ်ႁေႃၶမ်းၸိူဝ်းၼၼ်ႉတၢႆဢေႃႈ။-
ပိၵ်ႉသမ်ႉၵူၼ်းမဵဝ်း ယုတႃႉ၊ ပဵၼ်ပီႈၼွင်ႉၸိူဝ်ႉၶိူဝ်းလဵဝ်ၵၼ်ၵူၺ်းသေၵေႃႈ ၵူၼ်းမဵဝ်း ဢိသရေး၊ ၸိူဝ်းၼၼ်ႉတိဢဝ်ၽူႈယိင်းလႄႈလုၵ်ႈဢွၼ်ႇသွင်သႅၼ်ၵေႃႉသေယဝ်ႉ၊ၶိုၼ်းပွၵ်ႈမိူဝ်းၵႂႃႇတီႈဝဵင်း သမႃႇရိ၊ ဢိၵ်ႇတင်းသိမ်းဢဝ်ဢုၵ်ႉၸႃႇဢၼ်ၼမ်ၼႃႇၸိူဝ်းၼၼ်ႉၵႂႃႇဢေႃႈ။
မိူဝ်ႈၼၼ်ႉ၊မီးၵူၼ်းၵေႃႉၼိုင်ႈဢၼ်လႆႈၸိုဝ်ႈ ဢူဝ်းတိတ်ႉ၊ ၼၼ်ႉပဵၼ်ပရေႃးၽႅတ်ႈ ဢၼ်ယူႇသဝ်းၵႃႈၼႂ်းဝဵင်း သမႃႇရိ၊ ဢေႃႈ။ မၼ်းဢွၵ်ႇၵႂႃႇႁပ်ႉႁူဝ်တၢင်းတပ်ႉသိုၵ်း ဢိသရေး၊ ဢၼ်ပႃးဢဝ်ၵူၼ်းမဵဝ်း ယုတႃႉ၊ ဢၼ်ၶဝ်တိလႆႈမႃးၼၼ်ႉလႄႈၸမ်တၵ်းၶဝ်ႈဝဵင်းၼၼ်ႉၸိုင်၊မၼ်းလၢတ်ႈလႄႈဝႃႈ၊ “ ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇမွၼ်ႇသူၼၼ်ႉၸႂ်မႆႈၶႂ်ႈၸႃႉၵူၼ်း ယုတႃႉ၊ လႄႈၸင်ႇႁႂ်ႈသူတိုၵ်းပႄႉၶဝ်ယဝ်ႉ။ ၵူၺ်းၵႃႈ၊မၼ်းၸဝ်ႈလႆႈငိၼ်းတၢင်းဢၼ်သူပႃးတင်းဢၢႆႁႅင်းတေႃးသႃႉလႄႈဢဝ်ၶဝ်တၢႆၼၼ်ႉယဝ်ႉ။-
မိူဝ်ႈလဵဝ်ၼႆႉသူယင်းဢၢင်ႈဢၢၼ်းဢဝ်ၽူႈယိင်းၵူၼ်းၸၢႆးဝဵင်း ယေႇရုသလႅမ်ႇ၊ တင်းမိူင်း ယုတႃႉ၊ ၸိူဝ်းၼႆႉႁဵတ်းၶႃႈသူလူင်ပႄႇ။ သူပေႃးၽိတ်းပိူင်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူလႄႈမီးဢပျတ်ႈယဝ်ႉၼၼ်ႉဢမ်ႇႁုႁိုဝ်း။-
ထွမ်ႇသေၵမ်း။ ၵူၼ်းဢၼ်သူတိမႃးၸိူဝ်းၼႆႉပဵၼ်ပီႈပဵၼ်ၼွင်ႉသူၵူၺ်းဢေႃႈ။ ပွႆႇႁႂ်ႈၶဝ်ၵႂႃႇတႃႉ။ ၵူဝ် ထႃႇဝရႃႉၽြႃး၊ ၸႂ်မႆႈၶႂ်ႈၸႃႉလႄႈပၼ်တၢမ်ႇတီႈသူဢေႃႈ၊” ဝႃႈၼင်ႇၼႆဢေႃႈ။
မူးမၢတ်ႈၽွင်းမိူင်း၊မိူင်းၽၢႆႇႁွင်ႇၶဝ်သီႇၵေႃႉဢၼ်ပဵၼ် ဢႃႇၸရိ၊ လုၵ်ႈၸၢႆး ယေႃးႁၼၼ်ႇ၊ပေႇရၶိ၊ လုၵ်ႈၸၢႆး မေႇသိလမုတ်ႉ၊ႁေႇၸၵိ၊ လုၵ်ႈၸၢႆး သႃႇလုမ်ႇ၊ ဢိၵ်ႇတင်း ဢႃႇမသႃႇ၊ လုၵ်ႈၸၢႆး ႁႃႇတလၢႆး၊ ၼၼ်ႉၵေႃႈႁၢမ်ႈတၢပ်ႈႁႄႉၶႅၼ်တၢင်းႁဵတ်းတပ်ႉသိုၵ်းဢၼ်ၶိုၼ်းမႃးၼၼ်ႉဢေႃႈ။-
ၶဝ်လၢတ်ႈလႄႈဝႃႈ၊ “ယႃႇပေဢဝ်ၵူၼ်းၸိူဝ်းဢၼ်တိလႆႈမႃးၼၼ်ႉၶဝ်ႈဝဵင်းမႃးသေၵမ်း။ ႁဝ်းၸိူဝ်းၼႆႉ ၽိတ်းပိူင်ႈ ထႃႇဝရႃႉၽြႃး၊ လႄႈမီးဢပျတ်ႈဢၼ်ထိူၵ်ႈၶၢမ်ႇဢဝ်တင်းၸႂ်မႆႈၶႂ်ႈၸႃႉဢၼ်မၼ်းၸဝ်ႈတၵ်းပၼ်တၢမ်ႇၼၼ်ႉဝႆႉယဝ်ႉ။ မိူဝ်ႈလဵဝ်ၼႆႉသူဢၢင်ႈဢၢၼ်းႁဵတ်းႁႂ်ႈတုၸရိူၵ်ႈႁဝ်းယဵင်ႈၶႅၼ်းယႂ်ႇမႃးၼၼ်ႉလူင်ပႄႇ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈတပ်ႉသိုၵ်းၼၼ်ႉဢဝ်ၵူၼ်းဢၼ်တိလႆႈမႃး၊ဢိၵ်ႇတင်းဢုၵ်ႉၸႃႇဢၼ်ႁိမ်လႆႈမႃးၸိူဝ်းၼၼ်ႉဢၢပ်ႈပၼ်တီႈပရိၵ်ႈသၢတ်ႈ၊ဢိၵ်ႇတင်းၶုၼ်ၶဝ်တင်းလၢႆသေဢေႃႈ။-
ၶဝ်ၸင်ႇၶၢၼ်းမူးမၢတ်ႈၽွင်းမိူင်းသီႇၵေႃႉၼၼ်ႉ၊ႁႂ်ႈၶဝ်ဢဝ်ၶူဝ်းလဵင်းဢၼ်ႁိမ်လႆႈမႃးၸိူဝ်းၼၼ်ႉၽႄမႅင်ႇပၼ်တီႈၵူၼ်းဢၼ်ၶဝ်တိလႆႈမႃးၸိူဝ်းၼၼ်ႉဢေႃႈ။ ၶဝ်သီႇၵေႃႉၼၼ်ႉၵေႃႈဢဝ်သိူဝ်ႈၶူဝ်းၼုင်ႈပၼ်၊ဢဝ်ၶႅပ်းတိၼ်လႂ်တိုဝ်းပၼ်၊ဢဝ်တၢင်းၵိၼ်တၢင်းၶူပ်းလဵင်ႉပၼ်၊ဢိၵ်ႇတင်းဢဝ်ၼမ်ႉမၼ်းသၢၼ်ႇလုၼ်ႇတႃးပၼ်ၸဵပ်းၶဝ်ဢေႃႈ။ ၶဝ်ၸိူဝ်းဢၼ်ဢမ်ႇပႆဢမ်ႇယၢင်ႈလႆႈၼၼ်ႉၵေႃႈၶဝ်ဢဝ်တၢင်ႇၵႃႈၼိူဝ်မႃႉလီႈလႂ်သေယဝ်ႉ၊ဢဝ်ၵူၼ်းၸိူဝ်းၼၼ်ႉတင်းမူတ်းသူင်ႇမိူဝ်းၶိုၼ်းၵႂႃႇတီႈဝဵင်း ယေႇရိၶူဝ်း၊ မိူင်း ယုတႃႉ၊ ဢၼ်ပဵၼ်ဝဵင်းတူၼ်ႈထၢၼ်ၼၼ်ႉဢေႃႈ။ မိူဝ်ႈၼၼ်ႉၵူၼ်း ဢိသရေး၊ တင်းလၢႆၶိုၼ်းပွၵ်ႈမိူဝ်းၵႂႃႇတီႈဝဵင်း သမႃႇရိ၊ သေဢေႃႈ။
ၼႂ်းမိူဝ်ႈၼၼ်ႉၶုၼ်ႁေႃၶမ်း ဢႃႇၶတ်ႉ၊ ပွႆႇၸႂ်ႉသၢၼ်ႇတမၢၼ်ႇၵႂႃႇၸူးၵႃႈတီႈၶုၼ်ႁေႃၶမ်းမိူင်း ဢႃႇသီးရီးယႃး၊ ႁႂ်ႈမႃးၸွႆႈထႅမ်မၼ်း၊-
ၵွပ်ႈပိူဝ်ႈၵူၼ်းမဵဝ်း ဢေႇတုမ်ႇ၊ ၶဝ်သမ်ႉၶိုၼ်းမႃးတိုၵ်းတေႃးပႄႉၼႅင်ႇမိူင်း ယုတႃႉ၊ သေလႄႈတိဢဝ်ၵူၼ်းၶဝ်ၵႃႈၼႂ်းပၢင်တိုၵ်းသိုၵ်းၵႂႃႇၼၼ်ႉဢေႃႈ။-
ၵူၼ်း ၽိလိတ်ႉတိ၊ ၶဝ်ၵေႃႈၶီႇသိုၵ်းၸူးဝဵင်းဢၼ်မီးႁိမ်းတိၼ်လွႆၽၢႆႇဝၼ်းဢွၵ်ႇတင်းၽၢႆႇတၢင်းၸၢၼ်းမိူင်း ယုတႃႉ၊ ၸိူဝ်းၼၼ်ႉသေယဝ်ႉ၊သိမ်းဢဝ်ဝဵင်း ပႅတ်ႉသေးမိတ်ႉ၊ ဝဵင်း ဢႃႇၸလုၼ်ႇ၊ တင်းဝဵင်း ၵေႇတရွတ်ႉ၊ ၸိူဝ်းၼၼ်ႉဢိၵ်ႇတင်းဝဵင်း သေႃႇၶေႃႇ၊ ဝဵင်း တိမၼႃႉ၊ တင်းဝဵင်း ၵိမသေႃႇ၊ ပႃးတင်းဝၢၼ်ႈၶဝ်တင်းလၢႆသေယဝ်ႉ၊ၶျႃးတီႈယူႇၶဝ်ဝႆႉၵႃႈတီႈၼၼ်ႈၵႂႃႇသေႇသေႇယဝ်ႉၼၼ်ႉဢေႃႈ။-
ၵွပ်ႈပိူဝ်ႈဢၼ်ၶုၼ်ႁေႃၶမ်း ဢႃႇၶတ်ႉ၊ ယႃႉၵဝ်းၵူႈဝၢၼ်ႈၵူႈမိူင်းမၼ်းသေလႄႈၽိတ်းပိူင်ႈ ထႃႇဝရႃႉၽြႃး၊ ၵျၢမ်းထၢမ်းၼႃႇလူင်လၢင်ၼၼ်ႉလႄႈ ထႃႇဝရႃႉၽြႃး၊ ႁႂ်ႈၽေးတုၵ်ႉၶႃႉႁွတ်ႈထိုင်ၵႃႈၼိူဝ်မိူင်း ယုတႃႉ၊ ဢေႃႈ။-
တိၵလတ်ႉပိလေႇသႃႇ၊ ၸဝ်ႈမုၼ်ယႂ်ႇၶုၼ်ႁေႃၶမ်းမိူင်း ဢႃႇသီးရီးယႃး၊ ၼၼ်ႉယင်းဢမ်ႇၸွႆႈဢမ်ႇထႅမ် ဢႃႇၶတ်ႉ၊ ၵူၺ်းဢမ်ႇၵႃးယင်းႁဵတ်းၶတ်းၵၼ်တင်းမၼ်းလႄႈႁဵတ်းၽေးသႂ်ႇမၼ်းလူးၵွၼ်ႇဢေႃႈ။-
ၵွပ်ႈပိူဝ်ႈၼႆလႄႈ ဢႃႇၶတ်ႉ၊ ဢဝ်ၶမ်းဢၼ်မီးၵႃႈၼႂ်းၵျွင်းပိၵ်ႈမၢၼ်ႇၸဝ်ႈ၊ၵႃႈၼႂ်းႁေႃၸဝ်ႈၵႃႈၼႂ်းႁိူၼ်းမူးမၢတ်ႈၽွင်းမိူင်းတင်းလၢႆသၢၵ်ႈပၼ်တီႈၸဝ်ႈမုၼ်ယႂ်ႇၶုၼ်ႁေႃၶမ်းသေၵေႃႈ၊ဢမ်ႇလႆႈႁပ်ႉဢၵျူဝ်းၵႃႈသင်လႃးလႃး။
မိူဝ်ႈဢၼ်ၶုၼ်ႁေႃၶမ်း ဢႃႇၶတ်ႉ၊ လႆႈထူပ်းၽေးတုၵ်ႉၶႃႉဢၼ်ယဵင်ႈၶႅၼ်းႁၢႆႉၵျၢမ်းမႃးတိၵ်းတိၵ်းယူႇၼၼ်ႉ၊မၼ်းယဵင်ႈၶႅၼ်းၽိတ်းပိူင်ႈ ထႃႇဝရႃႉၽြႃး၊ ၼႃႇသေဢွၼ်တၢင်းဢေႃႈ။-
မၼ်းသၢၵ်ႈၵၢပ်ႈၶိူင်ႈတၢင်းလူႇတီႈၽြႃးတင်းလၢႆဢၼ်ၵူၼ်းမဵဝ်း သီးရီးယႃး၊ ဝႆႈဢၼ်ပႄႉၼႅင်ႇမၼ်းၼၼ်ႉလႄႈဝႃႈ၊ “ၽြႃးတင်းလၢႆ ဢၼ်ၵူၼ်းမဵဝ်း သီးရီးယႃး၊ ၶဝ်ဝႆႈၼႆႉၸွႆႈထႅမ်ၶုၼ်ႁေႃၶမ်းမိူင်း သီးရီးယႃး၊ ဢေႃႈ။ ပိူဝ်ႈၼႆလႄႈပေႃးၵဝ်ႁဵတ်းတၢင်းလူႇတီႈၽြႃးၸိူဝ်းၼၼ်ႉၸိုင်၊ၽြႃးၸိူဝ်းၼၼ်ႉတၵ်းၸွႆႈထႅမ်ၵဝ်ဢေႃႈ၊” ဝႃႈၼင်ႇၼႆဢေႃႈ။ ၵူၺ်းၵႃႈ၊ၽြႃးၸိူဝ်းၼၼ်ႉဢဝ်တၢင်းဢၼ်တူၵ်းသုမ်းဢၼ်လုလႅဝ်ဢၼ်ယႂ်ႇၼႃႇလူင်လၢင်ၼၼ်ႉတူၵ်းႁွတ်ႈၵႃႈၼိူဝ်မၼ်း၊ဢိၵ်ႇတင်းၵူၼ်းဝၢၼ်ႈၵူၼ်းမိူင်းမၼ်းဢေႃႈ။-
လိူဝ်သေၼၼ်ႉမၼ်းဢဝ်ၶိူင်ႈပိူင်ၵႃႈဢၼ်သုင်းတိုဝ်းၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉၸုၵၼ်ၶွၼ်ႈၵၼ်ဝႆႉလႄႈပေႃႉထုပ်ႉပဵၼ်ပွတ်းပဵၼ်တွၼ်ႈသေယဝ်ႉ၊ဢိုတ်းႁပ်းၽၵ်းတူၵျွင်းပိၵ်ႈမၢၼ်ႇၸဝ်ႈလႄႈတႄႇႁဵတ်းၶဵင်ႇတၢင်းလူႇၵႃႈတီႈၸဵင်ႇဝဵင်း ယေႇရုသလႅမ်ႇ၊ ၵူႈၸဵင်ႇဢေႃႈ။-
ၵႃႈၼႂ်းဝဵင်းယႂ်ႇဝဵင်းၼွႆႉမိူင်း ယုတႃႉ၊ တင်းလၢႆၵေႃႈမၼ်းတႄႇႁဵတ်းထႃႇၼႃႉတီႈဝႆႈၽြႃးတၢင်ႇသူႇတၢင်ႇပႃးႁႂ်ႈလႆႈၽဝ်ၼၢမ်ႇသႃႇတီႈၽြႃးၵူၼ်းၼွၵ်ႈမိူင်းတင်းလၢႆဢေႃႈ။ ၵွပ်ႈပိူဝ်ႈလွင်ႈတၢင်းၼႆႉလႄႈမၼ်းတိုၵ်းယူင်းတၢင်းၸႂ်မႆႈၶႂ်ႈၸႃႉ ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇမွၼ်ႇမၼ်းဢေႃႈ။
လွင်ႈတၢင်း ဢႃႇၶတ်ႉ၊ ၵႃႈမီးတၢင်ႇၸိူဝ်ႉတၢင်ႇမဵဝ်းၸဵမ်ငဝ်ႈတေႃႇပၢႆၸိူဝ်းၼၼ်ႉၸိုင်၊တႅမ်ႈမၢႆဝႆႉၵႃႈၼႂ်း ပိုၼ်းၶုၼ်ႁေႃၶမ်းမိူင်းယုတႃႉ၊ ဢိၵ်ႇတင်း ပိုၼ်းၶုၼ်ႁေႃၶမ်းမိူင်းဢိသရေး၊ ဢေႃႈ။-
ၶုၼ်ႁေႃၶမ်း ဢႃႇၶတ်ႉ၊ ၼၼ်ႉၼွၼ်းၽႄးၸွမ်းပူႇမွၼ်ႇမၼ်းတင်းလၢႆလႄႈဢဝ်သၢင်းၵျူဝ်ႇဝႆႉၵႃႈၼႂ်းဝဵင်း တႃႇဝိတ်ႈ၊ ဢမ်ႇၸႂ်ႈၵႃႈၼႂ်းပႃႇႁဵဝ်ႈၶုၼ်ႁေႃၶမ်းဢေႃႈ။ လုၵ်ႈၸၢႆးမၼ်း ႁေႇၸၵိ၊ သိုပ်ႇၼင်ႈႁၢင်ႈၼင်ႈႁေႃၸဝ်ႈပေႃႈမၼ်းဢေႃႈ။
ႁေႇၸၵိ၊ ၶိုၼ်ႈပဵၼ်ၶုၼ်ႁေႃၶမ်းမိူင်း ယုတႃႉ၊ မႃးမိူဝ်ႈဢၼ်ဢသၢၵ်ႈမၼ်းလႆႈသၢဝ်းႁႃႈပီၼၼ်ႉလႄႈဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်း ယေႇရုသလႅမ်ႇ၊ သၢဝ်းၵဝ်ႈပီဢေႃႈ။ မႄႈၸဝ်ႈၸမ်ႉ၊ပဵၼ် ဢၽိယႃႉ၊ လုၵ်ႈယိင်း ၸႃႇရိ၊ ဢေႃႈ။-
မၼ်းၵမ်ၵျၢင်ႉဢၼ်လီဢၼ်ငၢမ်းသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ၸွမ်းၵႃႈၼင်ႇဢၼ်ပူႇမွၼ်ႇမၼ်းၶုၼ်ႁေႃၶမ်း တႃႇဝိတ်ႈ၊ ႁဵတ်းၼၼ်ႉဢေႃႈ။
လိူၼ်ဢွၼ်တၢင်းသုတ်းၼႂ်းပီဢၼ် ႁေႇၸၵိ၊ ၶိုၼ်ႈပဵၼ်ၶုၼ်ႁေႃၶမ်းၼၼ်ႉၵမ်းလဵဝ် မၼ်းၽုၺ်ႇပိုတ်ႇၽၵ်းတူၵျွင်းပိၵ်ႈမၢၼ်ႇၸဝ်ႈလႄႈမႄးၵုမ်းမႄးႁဵတ်းဢေႃႈ။-
မၼ်းႁႂ်ႈယဵၸ်ႈပရေႃးႁဵၵ်ႈ လႂ်၊တင်းမဵဝ်း လေႇဝိ၊ လႂ်၊ၸုၵၼ်တုမ်ၵၼ်ၵႃႈၼႂ်းပၢင်ႇဝၢင်းၽၢႆႇဝၼ်းဢွၵ်ႇၵျွင်းပိၵ်ႈမၢၼ်ႇၸဝ်ႈသေယဝ်ႉ၊-
လၢတ်ႈတီႈၶဝ်လႄႈဝႃႈ၊ “ၵူၼ်းမဵဝ်း လေႇဝိ၊ ၶဝ်႟။ ဢွၼ်ၵၼ်ထွမ်ႇတႃႉ။ ဢွၼ်ၵၼ်ႁႂ်ႈတူဝ်ၸဝ်ႈၵဝ်ႇမူတ်းၸၢင်ႇသေယဝ်ႉ၊ႁဵတ်းႁႂ်ႈၵျွင်းပိၵ်ႈမၢၼ်ႇၸဝ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇမွၼ်ႇသူမူတ်းၸၢင်ႇတႃႉ။ ဢွၼ်ၵၼ်ပတ်းၽဵဝ်ႈမုၼ်ႈၽွႆယိူဝ်ႈယႃႈပႅတ်ႈသေၵႃႈတီႈထႃႇၼႃႉတီႈမူတ်းၸၢင်ႇတႃႉ။-
ပူႇမွၼ်ႇႁဝ်းၸိူဝ်းၼၼ်ႉဢမ်ႇပႂ်ႉသဵတ်ႈၸႃႇတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းလႄႈၵမ်ၵျၢင်ႉမဵဝ်းဢၼ်ဢမ်ႇထုၵ်ႇၸႂ်မၼ်းၸဝ်ႈၼၼ်ႉယဝ်ႉ။ ၶဝ်ပႄႇပႅတ်ႈမၼ်းၸဝ်ႈလႄႈဝၢႆႇလင်ပၼ်ထႃႇၼႃႉတီႈဢၼ်မၼ်းၸဝ်ႈၵိင်းဝၢပ်ႈၼၼ်ႉယဝ်ႉ။-
ၶဝ်ဢိုတ်းႁပ်းၽၵ်းတူၵျွင်းပိၵ်ႈမၢၼ်ႇၸဝ်ႈလႄႈမွတ်ႇပႅတ်ႈၵွၵ်းၽႆးတင်းလၢႆသေယဝ်ႉ၊ဢမ်ႇႁဵတ်းတၢင်းဢၼ်ၽဝ်ၼၢမ်ႇသႃႇ၊ဢမ်ႇႁဵတ်းတၢင်းလူႇဢၼ်တုတ်ႇၽႆးၵႃႈၼႂ်းၵျွင်းပိၵ်ႈမၢၼ်ႇၸဝ်ႈၽြႃးပဵၼ်ၸဝ်ႈမဵဝ်း ဢိသရေး၊ ယဝ်ႉ။-
ၵွပ်ႈပိူဝ်ႈလွင်ႈတၢင်းၼႆႉလႄႈ ထႃႇဝရႃႉၽြႃး၊ ၸႂ်မႆႈၶႂ်ႈၸႃႉၵူၼ်းမဵဝ်း ယုတႃႉ၊ တင်းၵူၼ်းဝဵင်း ယေႇရုသလႅမ်ႇ၊ တင်းလၢႆယဝ်ႉလႄႈ၊ၵႃႈဢၼ်မၼ်းၸဝ်ႈႁဵတ်းတီႈၶဝ်ၼၼ်ႉပဵၼ်တၢင်းဢၼ်တူၵ်းၸႂ်လီၵူဝ်လီႁႄၼႃႇလူင်လၢင်တီႈၵူႈၵေႃႉၵူႈၵူၼ်းယဝ်ႉၼၼ်ႉ၊သူႁုလီလီယူႇဢေႃႈ။-
ပူႇႁဝ်းပေႃႈႁဝ်းတင်းလၢႆလႆႈတၢႆၵႃႈၼႂ်းၼႃႈသိုၵ်းယဝ်ႉ။ လုၵ်ႈလၢင်းႁဝ်းမေးႁဝ်းတင်းလၢႆလႆႈၶၢမ်ႇတၢင်းဢၼ်သိမ်းဢဝ်ၵႂႃႇယဝ်ႉ။
“မိူဝ်ႈလဵဝ်ၼႆႉၸမ်ႉ၊ၵဝ်တႅပ်းတတ်းၸႂ်ၵဝ် ႁႂ်ႈလႆႈႁဵတ်းပတိၺိၺ်ႇလူၺ်ႈၵၼ်တင်း ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ ပုၼ်ႈလွင်ႈၼင်ႇႁိုဝ်တေႃးသႃႉမၼ်းၸဝ်ႈတၵ်းထၢတ်ႇယဵၼ်တေႃႇၵၼ်တင်းႁဝ်းဢေႃႈ။-
လုၵ်ႈၸၢႆးၵဝ်တင်းလၢႆၶဝ်႟။ ယႃႇပေႁဵတ်းၵွႆႈႁဵတ်းထိူင်း။ ထႃႇဝရႃႉၽြႃး၊ လိူၵ်ႈဢဝ်သူဝႆႉႁႂ်ႈလႆႈၽဝ်ၼၢမ်ႇသႃႇၵႃႈတီႈမၼ်းၸဝ်ႈ၊ဢိၵ်ႇတင်းႁႂ်ႈလႆႈဢွၼ်ႁူဝ်ၵူၼ်းတင်းလၢႆႁဵတ်းဝၢတ်ႈၵူဝ်းၵႂၢႆႇမၼ်းၸဝ်ႈယဝ်ႉ၊” ဝႃႈၼင်ႇၼႆဢေႃႈ။
ၵူၼ်းမဵဝ်း လေႇဝိ၊ ဢၼ်ဝႃႈ၊ မႃႇႁတ်ႉ၊ ၵေႃႉပဵၼ်လုၵ်ႈၸၢႆး ဢႃႇမသေး၊ ဢိၵ်ႇတင်း ယူဝ်းဢေးလႃႉ၊ လုၵ်ႈၸၢႆး ဢႃႇၸရိ၊ ၼႂ်းၸိူဝ်ႉၶိူဝ်း ၵေႃႇႁတ်ႉ၊ ၵိသႃႉ၊ လုၵ်ႈၸၢႆး ဢႃႇပတိ၊ ဢိၵ်ႇတင်း ဢႃႇၸရိ၊ လုၵ်ႈၸၢႆး ယေႇႁလႃႉလေးလႃႉ၊ ၼႂ်းၸိူဝ်ႉၶိူဝ်း မေႇရႃႇရိ၊ယေႃးဢႃႇ၊ လုၵ်ႈၸၢႆး ၸိမ်းၼႃႉ၊ဢေႇတိၼ်ႇ၊ လုၵ်ႈၸၢႆး ယေႃးဢႃႇ၊ ၼႂ်းၸိူဝ်ႉၶိူဝ်း ၵေႇရသုၼ်ႇ၊-
သိမရိ၊ ဢိၵ်ႇတင်း ယေႇယေႇလႃႉ၊ ၼႂ်းၵူၼ်းမဵဝ်း ဢေးလိၸႃႇၽၢၼ်ႇ၊ၸႃႇၶရိ၊ ဢိၵ်ႇတင်း မတ်ႉသၼိ၊ ၼႂ်းၵူၼ်းမဵဝ်း ဢႃႇသပ်ႉ၊-
ယေႇႁေႇလႃႉ၊ ဢိၵ်ႇတင်း သိမိ၊ ၼႂ်းၵူၼ်းမဵဝ်း ႁေႇမၼ်ႇ၊သေႇမႃႇယႃႉ၊ ဢိၵ်ႇတင်း ဢေႃးၸေးလႃႉ၊ ၼႂ်းၵူၼ်းမဵဝ်း ယေႇတုသုၼ်ႇ၊ ၼၼ်ႉၸိူဝ်းၼၼ်ႉဢွၼ်ၵၼ်လုၵ်ႉလႄႈ။
ၶဝ်ဢွၼ်ၵၼ်ႁွင်ႉဢဝ်ပီႈၼွင်ႉမဵဝ်း လေႇဝိ၊ တင်းသဵင်ႈတင်းလူင်ၸုတုမ်ၵၼ်သေယဝ်ႉ၊ဢွၼ်ၵၼ်ႁဵတ်းႁႂ်ႈတူဝ်ၶဝ်မူတ်းၸၢင်ႇဢေႃႈ။ လိုၼ်းၼၼ်ႉၸွမ်းၼင်ႇဢၼ်ၶုၼ်ႁေႃၶမ်းပူင်ဢမိင်ႉႁႂ်ႈၶဝ်ႁဵတ်းၼၼ်ႉၶဝ်ဢွၼ်ၵၼ်ႁဵတ်းႁႂ်ႈၵျွင်းပိၵ်ႈမၢၼ်ႇၸဝ်ႈမူတ်းလီၵဵင်ႈလီ၊ၵႃႈၼင်ႇဢၼ်မႅၼ်ႈၸွမ်းပိင်းၺၢပ်ႈတြႃး ထႃႇဝရႃႉၽြႃး၊ မီးၼၼ်ႉဢေႃႈ။-
ယဵၸ်ႈပရေႃးႁဵၵ်ႈ တင်းလၢႆဢွၼ်ၵၼ်ၶဝ်ႈၵႂႃႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈႁႂ်ႈမူတ်းလီၵဵင်ႈလီလႄႈတေႃႉဢဝ်မုၼ်ႈၽွႆယိူဝ်ႈယႃႈၵႃႈဢၼ်မီးၵႃႈၼႂ်းၵျွင်းပိၵ်ႈမၢၼ်ႇၸဝ်ႈ ထႃႇဝရႃႉၽြႃး၊ ၼၼ်ႉဢွၵ်ႇမႃးၵွင်ဝႆႉၵႃႈတီႈပၢင်ႇဝၢင်းပိၵ်ႈမၢၼ်ႇၸဝ်ႈဢေႃႈ။ ၵူၼ်းမဵဝ်း လေႇဝိ၊ တင်းလၢႆလုၵ်ႉသေၵႃႈတီႈၼၼ်ႈသမ်ႉဢွၼ်ၵၼ်တေႃႉဢဝ်ဢွၵ်ႇၵႂႃႇၵႃႈၼွၵ်ႈၵႃႈတီႈၼမ်ႉ ၵေတရုၼ်ႇ၊ ဢေႃႈ။
ၶဝ်တႄႇၸႃႉႁဵတ်းၼႂ်းလိူၼ်တီႈၼိုင်ႈ၊ဝၼ်းတီႈၼိုင်ႈသေယဝ်ႉ၊ၼႂ်းဝၼ်းဢၼ်ထူၼ်ႈထိုင်ပႅတ်ႈဝၼ်းၼၼ်ႉၸိုင်၊ၶဝ်ႁဵတ်းယဝ်ႉတူဝ်ႈလီငၢမ်းတေႃႇထိုင်ႁွတ်ႈတီႈလုၵ်းလူင်ဢၼ်ၶဝ်ႈၸူးၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။ ၶဝ်သမ်ႉဢွၼ်ၵၼ်ႁဵတ်းထႅင်ႈပႅတ်ႇဝၼ်းတဵမ်တဵမ်လႄႈတၢင်းဢၼ်ၶဝ်မႄးႁဵတ်းမႄးႁႅၼ်းပုၼ်ႈတၢင်းဢၼ်ႁဵတ်းဝၢတ်ႈၵူဝ်းၵႂၢႆႇၼၼ်ႉယဝ်ႉတူဝ်ႈၵႂႃႇဝၼ်းတီႈသိပ်းႁူၵ်းၼႂ်းလိူၼ်ၼၼ်ႉလီလီငၢမ်းငၢမ်းဢေႃႈ။
မိူဝ်ႈၼၼ်ႉၵူၼ်း လေႇဝိ၊ တင်းလၢႆၶဝ်ႈၸူးတီႈၶုၼ်ႁေႃၶမ်း ႁေႇၸၵိ၊ လႄႈဢွၼ်ၵၼ်လဝ်ႈလၢတ်ႈဝႃႈ၊ “ၶႃႈၸဝ်ႈႁဝ်းၶဝ်ဢွၼ်ၵၼ်ႁဵတ်းႁႂ်ႈၵျွင်းပိၵ်ႈမၢၼ်ႇၸဝ်ႈတင်းသဵင်ႈတင်းလူင်မူတ်းလီၵဵင်ႈလီၸေးၸေးၸုမ်ႇၸုမ်ႇတီႈၶႃႈယဝ်ႉ။ ၶဵင်ႇတၢင်းလူႇပုၼ်ႈဢၼ်တၵ်းႁဵတ်းတၢင်းလူႇဢၼ်တုတ်ႇၽႆးလႂ်၊ၽိူၼ်ၸဝ်ႈပုၼ်ႈဢၼ်တၵ်းတၢင်ႇၶဝ်ႈမုၼ်းမူတ်းၸၢင်ႇလႂ်၊ဢိၵ်ႇတင်းၶိူင်ႈၸႂ်ႉၶိူင်ႈတိုဝ်းၶဝ်တင်းသဵင်ႈတင်းလူင်ၵေႃႈႁႂ်ႈမူတ်းသႂ်တီႈၶႃႈယဝ်ႉ။-
ၶိူင်ႈၸႂ်ႉၶိူင်ႈတိုဝ်းဢၼ်ၶုၼ်ႁေႃၶမ်း ဢႃႇၶတ်ႉ၊ ဢဝ်ဢွၵ်ႇၵႂႃႇၼႂ်းၸူဝ်ႈပၢၼ်ဢၼ်မၼ်းဢမ်ႇပႂ်ႉသဵတ်ႈၸႃႇတီႈၽြႃးပဵၼ်ၸဝ်ႈၸိူဝ်းၼၼ်ႉၵေႃႈ ၶႃႈၸဝ်ႈႁဝ်းၶဝ်ဢဝ်မႃးႁဵတ်းၶိုၼ်းမႄးၶိုၼ်းႁႂ်ႈမူတ်းၸၢင်ႇယဝ်ႉတီႈၶႃႈဢေႃႈ။ ၵႃႈဢၼ်မီးတင်းသဵင်ႈတင်းလူင်ၼၼ်ႉမီးယူႇၵႃႈတီႈၽၢႆႇၼႃႈၶဵင်ႇတၢင်းလူႇ ထႃႇဝရႃႉၽြႃး၊ ယဝ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၶုၼ်ႁေႃၶမ်း ႁေႇၸၵိ၊ လုၵ်ႉၸဝ်ႉၸဝ်ႉသေလႄႈႁွင်ႉမူးမၢတ်ႈၽွင်းမိူင်းတင်းလၢႆမႃးၸုတုမ်ၵၼ်လႄႈၶိုၼ်ႈၸူးၵႃႈတီႈၵျွင်းပိၵ်ႈမၢၼ်ႇၸဝ်ႈဢေႃႈ။-
ပုၼ်ႈဢၼ်ၽေႇဢပျတ်ႈၵူၼ်းၸဝ်ႈၵူၼ်းႁေႃတင်းလၢႆ၊တင်းၵူၼ်းဝၢၼ်ႈၵူၼ်းမိူင်း ယုတႃႉ၊ တင်းလၢႆ၊ဢိၵ်ႇတင်းႁႂ်ႈလႆႈႁဵတ်းႁႂ်ႈၵျွင်းပိၵ်ႈမၢၼ်ႇၸဝ်ႈမူတ်းၸၢင်ႇၸိုင်၊ၶဝ်ဢဝ်ဝူဝ်းပေႃႈၸဵတ်းတူဝ်၊သူဝ်းပေႃႈၸဵတ်းတူဝ်၊သူဝ်းဢွၼ်ႇၸဵတ်းတူဝ်တင်းပႄႉပေႃႈၸဵတ်းတူဝ်ဢေႃႈ။ ၶုၼ်ႁေႃၶမ်းၸႂ်ႉယဵၸ်ႈပရေႃးႁဵၵ်ႈ ဢၼ်ပဵၼ်ၸိူဝ်ႉၶိူဝ်းလုၵ်ႈလၢၼ် ဢႃႇရုၼ်ႇ၊ ၸိူဝ်းၼၼ်ႉဢဝ်တူဝ်သတ်းၸိူဝ်းၼၼ်ႉဢဝ်ႁဵတ်းပဵၼ်ၶိူင်ႈတၢင်းလူႇၵႃႈၼိူဝ်ၶဵင်ႇတၢင်းလူႇဢေႃႈ။-
ယဵၸ်ႈပရေႃးႁဵၵ်ႈၸိူဝ်းၼၼ်ႉႁႅမ်ဝူဝ်းပေႃႈတင်းလၢႆဢွၼ်တၢင်းပိူၼ်ႈဝၢႆးၼၼ်ႉႁႅမ်သူဝ်းပေႃႈသေယဝ်ႉ၊ႁႅမ်သူဝ်းဢွၼ်ႇၸိူဝ်းၼၼ်ႉလႄႈဢဝ်လိူတ်ႈမၼ်းၽႅတ်းသႂ်ႇၵႃႈၼိူဝ်ၶဵင်ႇတၢင်းလူႇႁင်းၽႂ်ႁင်းမၼ်းဢေႃႈ။-
လိုၼ်းလင်သုတ်းၼၼ်ႉၶဝ်ဢဝ်ပႄႉပေႃႈၸိူဝ်းၼၼ်ႉၵႂႃႇၸူးၵႃႈတီႈၶုၼ်ႁေႃၶမ်း၊ဢိၵ်ႇတင်းၵႃႈတီႈၶဝ်ၸိူဝ်းဢၼ်မႃးႁဵတ်းဝၢတ်ႈၵူဝ်းၵႂၢႆႇတင်းလၢႆၼၼ်ႉလႄႈၶဝ်ဢဝ်မိုဝ်းတၢင်ႇၵႃႈၼိူဝ်ပႄႉၸိူဝ်းၼၼ်ႉဢေႃႈ။-
မိူဝ်ႈဢၼ်ယဵၸ်ႈပရေႃးႁဵၵ်ႈတင်းလၢႆႁႅမ်ပႄႉပေႃႈၸိူဝ်းၼၼ်ႉယဝ်ႉၼၼ်ႉ၊သမ်ႉဢဝ်လိူတ်ႈၶဝ်လေႃႇၵႃႈၼိူဝ်ၶဵင်ႇတၢင်းလူႇႁႂ်ႈပဵၼ်တၢင်းလူႇဢၼ်ၽေႇဢပျတ်ႈၵူၼ်းတင်းသဵင်ႈတင်းလူင်ၵွပ်ႈပိူဝ်ႈဢၼ်ၶုၼ်ႁေႃၶမ်းပူင်ဢမိင်ႉႁႂ်ႈႁဵတ်းတၢင်းလူႇဢၼ်တုတ်ႇၽႆး၊ဢိၵ်ႇတင်းႁဵတ်းတၢင်းလူႇဢၼ်ၽေႇဢပျတ်ႈပုၼ်ႈၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢေႃႈ။
ၶုၼ်ႁေႃၶမ်းၵမ်ၵျၢင်ႉၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉတီႈၶုၼ်ႁေႃၶမ်း တႃႇဝိတ်ႈ၊ ဢၼ်ဢဝ်တင်းသူပ်းပရေႃးၽႅတ်ႈ ၵၢတ်ႉ၊ ဢိၵ်ႇတင်းသူပ်းပရေႃးၽႅတ်ႈ ၼႃႇႀၼ်ႇ၊ ႁေႃးလၢတ်ႈၸိူဝ်းၼၼ်ႉလႄႈမၼ်းၶၢၼ်းၵူၼ်း လေႇဝိ၊ တင်းလၢႆႁႂ်ႈပႃးဢဝ်သႅင်ႇလႂ်၊တိင်ႇလႂ်၊တရေႃးလႂ်ဝႆႉၵႃႈၼႂ်းၵျွင်းပိၵ်ႈမၢၼ်ႇၸဝ်ႈဢေႃႈ။-
ၶိူင်ႈတူႇရိယႃႇၸိူဝ်းၼၼ်ႉမိူၼ်ၵၼ်တင်းမဵဝ်းဢၼ်ၶုၼ်ႁေႃၶမ်း တႃႇဝိတ်ႈ၊ ယၢမ်ႈယိပ်းၵမ်ၼၼ်ႉဢေႃႈ။ ယဵၸ်ႈပရေႃးႁဵၵ်ႈတင်းလၢႆၵေႃႈဢွၼ်ၵၼ်ယိပ်းၵမ်ၼႄးၶရႃႇလႄႈၸုၵ်းယူႇဢေႃႈ။-
ႁေႇၸၵိ၊ ပူင်ဢမိင်ႉႁႂ်ႈသၢၵ်ႈၵၢပ်ႈတၢင်းလူႇဢၼ်တုတ်ႇၽႆးလႄႈမိူဝ်ႈဢၼ်ၸႃႉႁဵတ်းၼၼ်ႉၵူၼ်းတင်းလၢႆဢွၼ်ၵၼ်ႁဵတ်းၵႂၢမ်းယွင်ႈယေႃး ထႃႇဝရႃႉၽြႃး၊ ဢိၵ်ႇတင်းပဝ်ႇတိုင်ႈၼႄးၶရႃႇတင်းမဵဝ်းတူႇရိယႃႇတင်းမူတ်းၸိူဝ်းၼၼ်ႉဢေႃႈ။-
ၵူၼ်းၵူႈၵေႃႉၵူႈၵူၼ်းဢွၼ်ၵၼ်ၶဝ်ႈပႃးၼႂ်းတၢင်းဢၼ်ဝႆႈသႃၵူဝ်းၵႂၢႆႇယူႇ၊ၶဝ်ၸိူဝ်းဢၼ်ႁဵတ်းၵႂၢမ်းၵေႃႈႁဵတ်းၵႂၢမ်းယူႇ၊ၶဝ်ၸိူဝ်းဢၼ်ပဝ်ႇတိုင်ႈၼႄးၶရႃႇၵေႃႈပဝ်ႇတိုင်ႈယူႇတေႃႇထိုင်ႁွတ်ႈတၢင်းဢၼ်ႁဵတ်းတၢင်းလူႇဢၼ်တုတ်ႇၽႆးထၢၼ်ႈပေႃးယဝ်ႉတူဝ်ႈၵႂႃႇဢေႃႈ။-
မိူဝ်ႈဢၼ်ႁဵတ်းတၢင်းလူႇယဝ်ႉတူဝ်ႈၵႂႃႇၼၼ်ႉၶုၼ်ႁေႃၶမ်း ႁေႇၸၵိ၊ တင်းပရိၵ်ႈသၢတ်ႈၵႃႈမီးဢွၼ်ၵၼ်ၶုပ်ႉမူပ်ႇဝၢင်းႁူဝ်လႄႈၵူဝ်းၵႂၢႆႇဢေႃႈ။-
ၶုၼ်ႁေႃၶမ်းတင်းမူးမၢတ်ႈၽွင်းမိူင်းတင်းလၢႆၵေႃႈၸႂ်ႉႁႂ်ႈၵူၼ်း လေႇဝိ၊ ၸိူဝ်းၼၼ်ႉႁဵတ်းၵႂၢမ်းဢၼ်ယွင်ႈယေႃး ထႃႇဝရႃႉၽြႃး၊ ဢၼ် တႃႇဝိတ်ႈ၊ တင်းၵေႃႉဢၼ်ႁူပွင်ႇတႃလႅင်း ဢႃႇသပ်ႉ၊ တႅမ်ႈဝႆႉၸိူဝ်းၼၼ်ႉဢေႃႈ။ ပိူဝ်ႈၼႆလႄႈၶဝ်ဢွၼ်ၵၼ်မီးၸႂ်ဢၼ်သႂၢင်ႇသိူဝ်းႁဵတ်းၵႂၢမ်းယူႇသေလႄႈၵူမ်ႈၵွမ်းဝၢင်းႁူဝ်လႄႈၵူဝ်းၵႂၢႆႇဢေႃႈ။
လိုၼ်းၼၼ်ႉ၊ ႁေႇၸၵိ၊ သမ်ႉမီးဢမိင်ႉတီႈၵူၼ်းတင်းလၢႆလႄႈဝႃႈ၊ “တေႃႈလဵဝ်ၼႆႉသူႁႂ်ႈတူဝ်ၸဝ်ႈၵဝ်ႇမူတ်းသႂ်ယဝ်ႉ။ ပိူဝ်ႈၼႆလႄႈဢွၼ်ၵၼ်ဢဝ်ၶိူင်ႈတၢင်းလူႇဢၼ်တၢင်ႇၵျေးၸူးၽြႃးပဵၼ်ၸဝ်ႈမႃးတႃႉ၊” ဝႃႈၼင်ႇၼႆဢေႃႈ။ ၶဝ်ထွမ်ႇဢဝ်ၵႂၢမ်းၶုၼ်ႁေႃၶမ်းလႄႈပႃးတင်းၸႂ်ၸေႇတၼႃႇသေလႄႈဢဝ်တူဝ်သတ်းတင်းလၢႆမႃးပုၼ်ႈဢၼ်တၵ်းႁဵတ်းတၢင်းလူႇဢၼ်တုတ်ႇၽႆးဢေႃႈ။-
ၶဝ်ဢဝ်ဝူဝ်းပေႃႈၸဵတ်းသိပ်းတူဝ်၊သူဝ်းပေႃႈပၢၵ်ႇတူဝ်၊ဢိၵ်ႇတင်းသူဝ်းဢွၼ်ႇသွင်ပၢၵ်ႇႁႂ်ႈလႆႈႁဵတ်းတၢင်းလူႇဢၼ်တုတ်ႇၽႆးတီႈ ထႃႇဝရႃႉၽြႃး၊ ဢေႃႈ။-
ဝူဝ်းပေႃႈႁူၵ်းပၢၵ်ႇတူဝ်တင်းသူဝ်းပေႃႈသၢမ်ႁဵင်တူဝ်ၵေႃႈၶဝ်ဢဝ်မႃးႁႂ်ႈလႆႈႁဵတ်းတၢင်းလူႇပုၼ်ႈၵူၼ်းတင်းလၢႆတၵ်းၵိၼ်ဢေႃႈ။-
ၵွပ်ႈပိူဝ်ႈယဵၸ်ႈပရေႃးႁဵၵ်ႈ ၸိူဝ်းၼၼ်ႉၵေႇၼႃႇလႄႈၶဝ်ဢမ်ႇပႄႉလွၵ်ႈၼင်တူဝ်သတ်းတင်းလၢႆလႆႈ၊ၵူၼ်းမဵဝ်း လေႇဝိ၊ ၶဝ်လႆႈၸွႆႈထႅမ်ၶဝ်တေႃႇထိုင်ႁွတ်ႈၵၢၼ်ငၢၼ်းယဝ်ႉတူဝ်ႈၵႂႃႇဢေႃႈ။ လိုၼ်းၼၼ်ႉၸင်ႇယဵၸ်ႈပရေႃးႁဵၵ်ႈၸိူဝ်းၼၼ်ႉလႆႈႁဵတ်းႁႂ်ႈတူဝ်ၸဝ်ႈၵဝ်ႇမူတ်းၸၢင်ႇဢေႃႈ။ (ၵူၼ်း လေႇဝိ၊ ၸိူဝ်းၼၼ်ႉယဵင်ႈၶႅၼ်းမီးသဵတ်ႈၸႃႇႁႂ်ႈတူဝ်ၸဝ်ႈၵဝ်ႇမူတ်းၸၢင်ႇလိူဝ်တွၼ်းၼႃႇသေယဵၸ်ႈပရေႃးႁဵၵ်ႈတင်းလၢႆဢေႃႈ။-)
လိူဝ်သေတၢင်းဢၼ်သၢၵ်ႈၵၢပ်ႈတၢင်းလူႇဢၼ်တုတ်ႇၽႆးတင်းတူဝ်ၼၼ်ႉယဵၸ်ႈပရေႃးႁဵၵ်ႈၸိူဝ်းၼၼ်ႉ၊သမ်ႉလႆႈဢဝ်ၵွၼ်ႈၶႆၵွၼ်ႈမၼ်းဢၼ်ပႃးၸွမ်းတၢင်းလူႇဢၼ်သၢၵ်ႈၵၢပ်ႈပုၼ်ႈၵူၼ်းတင်းလၢႆၵိၼ်ၼၼ်ႉသေလႄႈဢဝ်ၽဝ်ၽႆးပႅတ်ႈ၊ဢိၵ်ႇတင်းလႆႈထွၵ်ႇၼမ်ႉမၢၵ်ႇၸပိတ်ႉဢၼ်သၢၵ်ႈၵၢပ်ႈလူၺ်ႈၵၼ်တင်းၶိူင်ႈတၢင်းလူႇဢၼ်တုတ်ႇၽႆးၼၼ်ႉဢေႃႈ။ ၼင်ႇၼၼ်လႄႈတၢင်းဢၼ်ၵူဝ်းၵႂၢႆႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉလႆႈၶိုၼ်းတႄႇၶိုၼ်းတင်ႈဝႆႉယဝ်ႉလႄႈ၊-
ၶုၼ်ႁေႃၶမ်း ႁေႇၸၵိ၊ တင်းၵူၼ်းတင်းလၢႆဢွၼ်ၵၼ်ၸူမ်းသိူဝ်းၵွပ်ႈပိူဝ်ႈဢၼ်ၽြႃးပဵၼ်ၸဝ်ႈလႆႈၸွႆႈထႅမ်ၵၢၼ်လူႇၵၢၼ်တၢၼ်းဢၼ်ႁိပ်ႈၼႅတ်ႈလႄႈလႆႈႁဵတ်းဝႆးၼႃႇၼၼ်ႉဢေႃႈ။
ၵူၼ်းတင်းလၢႆဢမ်ႇပႆႇတၼ်းႁဵတ်းပွႆး ပသၶႃႇ၊ ၸွမ်းၶိင်ႇမၼ်းၼႂ်းလိူၼ်တီႈၼိုင်ႈၼၼ်ႉၵွပ်ႈပိူဝ်ႈဢၼ်ယဵၸ်ႈပရေႃးႁဵၵ်ႈ ၶဝ်ဢမ်ႇပႆႇတၼ်းႁဵတ်းႁႂ်ႈတူဝ်ၸဝ်ႈၵဝ်ႇမူတ်းၸၢင်ႇႁႂ်ႈပေႃးၵုမ်ႇပေႃးႁဵတ်းၼႃႈၵၢၼ်ၸဝ်ႈ၊ဢိၵ်ႇတင်းၵူၼ်းဝၢၼ်ႈၵူၼ်းမိူင်းၵေႃႈဢမ်ႇပႆႇတၼ်းၸုၵၼ်တုမ်ၵၼ်ၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉဢေႃႈ။
ၵွပ်ႈပိူဝ်ႈၼႆလႄႈၶုၼ်ႁေႃၶမ်းတိူင်ႇပၢင်ႇၵၼ်တင်းမူးမၢတ်ႈၽွင်းမိူင်းလႂ်၊ဢိၵ်ႇတင်းၵူၼ်းဝဵင်း ယေႇရုသလႅမ်ႇ၊ တင်းလၢႆလႄႈၽွမ်ႉၵၼ်ႁႂ်ႈလႆႈႁဵတ်းပွႆးၼႂ်းလိူၼ်တီႈသွင်ယဝ်ႉၼၼ်ႉၸင်ႇ၊-
ၶုၼ်ႁေႃၶမ်းတႅမ်ႈလိၵ်ႈၽိတ်ႈပၢင်းၵူၼ်းမိူင်း ဢိသရေး၊ ၵူၼ်းမိူင်း ယုတႃႉ၊ ၵူၼ်းမိူင်း ဢေႇၽရိမ်ႇ၊ ဢိၵ်ႇတင်းၵူၼ်းမဵဝ်း မၼႃႇသေႇ၊ ၵႃႈမီးတင်းသဵင်ႈတင်းလူင်ႁႂ်ႈဢွၼ်ၵၼ်မႃးတီႈဝဵင်း ယေႇရုသလႅမ်ႇ၊ လႄႈၶဝ်ႈပွႆး ပသၶႃႇ၊ တီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ဢေႃႈ။-
ၶုၼ်ႁေႃၶမ်းဢိၵ်ႇတင်းၵူၼ်းတင်းလၢႆဢွၼ်ၵၼ်ၸူမ်းသိူဝ်းလူၺ်ႈလွင်ႈတၢင်းဢၼ်ၶဝ်ၶိုင်ပွင်ဝႆႉၼၼ်ႉသေယဝ်ႉ၊-
ၶဝ်ၸင်ႇၽိတ်ႈပၢင်းၵူၼ်းမဵဝ်း ဢိသရေး၊ တင်းသဵင်ႈတင်းလူင်တႄႇၸႃႉဢဝ်ၵူၼ်းဝဵင်း တၢၼ်ႇ၊ ၽၢႆႇတၢင်းႁွင်ႇတေႃႇထိုင်ႁွတ်ႈဝဵင်း ပေႇရသေးၽႃႉ၊ ၽၢႆႇတၢင်းၸၢၼ်းႁႂ်ႈဢွၼ်ၵၼ်မႃးတီႈဝဵင်း ယေႇရုသလႅမ်ႇ၊ ၼမ်သေဢွၼ်တွၼ်းသေၵဝ်ႇႁႂ်ႈလႆႈႁဵတ်းပွႆး ပသၶႃႇ၊ ဢၼ်မႅၼ်ႈၸွမ်းၼင်ႇထုင်းတြႃးၸဝ်ႈၼၼ်ႉဢေႃႈ။-
ပိူဝ်ႈၼႆလႄႈၵူၼ်းသူင်ႇၶၢဝ်ႇတင်းလၢႆဢွၼ်ၵၼ်ၶုၼ်ႇလႅၼ်ႈပႃးဢဝ်လိၵ်ႈပိုၼ်ၶၢဝ်ႇလႂ်သူင်ႇၸွတ်ႇတူဝ်ႈၵႂႃႇၵႃႈၼႂ်းမိူင်း ယုတႃႉ၊ တင်းမိူင်း ဢိသရေး၊ တင်းသဵင်ႈတင်းမူတ်းၸွမ်းၵႃႈၼင်ႇဢၼ်ၶုၼ်ႁေႃၶမ်းတင်းမူးမၢတ်ႈၽွင်းမိူင်းတင်းလၢႆပူင်ဢမိင်ႉၼၼ်ႉဢေႃႈ။ ၵႂၢမ်းဢၼ်ပႃးၼႂ်းလိၵ်ႈၸိူဝ်းၼၼ်ႉဝႃႈၸမ်ႉ၊ “ၵူၼ်းမဵဝ်း ဢိသရေး၊ ၶဝ်႟။ သူၸိူဝ်းၼႆႉလွတ်ႈသေၵႃႈၼႂ်းမိုဝ်းၶုၼ်ႁေႃၶမ်း ဢႃႇသီးရီးယႃး၊ ဢၼ်တိုၵ်းပႄႉမိူင်းႁဝ်းၼၼ်ႉယဝ်ႉ။ ဢွၼ်ၵၼ်ၶိုၼ်းမႃးၸူးတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈ ဢႃႇပြႃႇႁၢမ်ႇ၊ဢိၸၢၵ်ႈ၊ယႃႇၵုပ်ႈ၊ ၼၼ်ႉတႃႉ။ မၼ်းၸဝ်ႈသမ်ႉတၵ်းၶိုၼ်းမႃးၸူးတီႈသူဢေႃႈ။-
ယႃႇပေႁဵတ်းၸိူဝ်ႉၼင်ႇပူႇသူပေႃႈသူဢိၵ်ႇတင်းပီႈသူၼွင်ႉသူၵူၼ်းမဵဝ်း ဢိသရေး၊ ၸိူဝ်းဢၼ်ဢမ်ႇပႂ်ႉသဵတ်ႈၸႃႇတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်ၼၼ်ႉသေၵမ်း။ ၵႃႈၼင်ႇဢၼ်သူလႆႈႁၼ်ၼၼ်ႉမၼ်းၸဝ်ႈပၼ်တၢမ်ႇဢၼ်ၼၵ်းၼႃႇတီႈၶဝ်ယဝ်ႉ။-
ယႃႇပေဢွၼ်ၵၼ်ပဵၼ်ၵူၼ်းၶေႃးၶႅင် မိူၼ်ၸိူဝ်ႉၼင်ႇပူႇပေႃႈသူၸိူဝ်းၼၼ်ႉ၊ဢွၼ်ၵၼ်ဢဝ်တူဝ်ၸဝ်ႈၵဝ်ႇဢၢပ်ႈပၼ်တီႈ ထႃႇဝရႃႉၽြႃး၊ တႃႉ။ ဢွၼ်ၵၼ်ၶဝ်ႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈဢၼ်မီးၵႃႈၼႂ်းဝဵင်း ယေႇရုသလႅမ်ႇ၊ ဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူႁႂ်ႈမူတ်းၸၢင်ႇယူႇတႃႇသေႇၼၼ်ႉသေလႄႈႁဵတ်းဝၢတ်ႈၵူဝ်းၵႂၢႆႇမၼ်းၸဝ်ႈႁႂ်ႈတၢင်းဢၼ်မၼ်းၸဝ်ႈပၼ်တၢမ်ႇဢပျတ်ႈႁႅင်းၼႃႇၼၼ်ႉလႆႈဝႄႈပိူင်ႈသေၵႃႈတီႈသူၵႂႃႇသေတႃႉ။-
ပေႃးသူၶိုၼ်းမႃးၸူးတီႈ ထႃႇဝရႃႉၽြႃး၊ ၸိုင်၊ပီႈၼွင်ႉၸိူဝ်ႉၶိူဝ်းသူဢၼ်လႆႈၶၢမ်ႇတိဢဝ်ၵႂႃႇတူၵ်းၵႅၼ်းယူႇၸိူဝ်းၼၼ်ႉၵေႃႈပိူၼ်ႈတၵ်းဢဵတ်းလူၶဝ်လႄႈပွႆႇႁႂ်ႈၶဝ်ပွၵ်ႈၶိုၼ်းမႃးၵႃႈတီႈမိူင်းၼႆႉဢေႃႈ။ ထႃႇဝရႃႉၽြႃး၊ ၽြႃးပဵၼ်ၸဝ်ႈသူၼၼ်ႉမီးသၽေႃးဢၼ်ၶႂ်ႈႁဵတ်းၵျေးၸူးတင်းသၽေႃးဢၼ်ၸၢင်ႈဢဵတ်းလူလႄႈမၼ်းၸဝ်ႈဢမ်ႇဝၢႆႇၼႃႈမၼ်းၸဝ်ႈပႅတ်ႈသူ။ မၼ်းၸဝ်ႈတၵ်းႁပ်ႉတုင်းဢဝ်သူဢေႃႈ၊” ဝႃႈၼင်ႇၼႆဢေႃႈ။
ၵူၼ်းသူင်ႇၶၢဝ်ႇတင်းလၢႆဢွၼ်ၵၼ်ၵႂႃႇၵႃႈတီႈၵူႈဝဵင်းၼႂ်းဢိူင်ႇၸိူဝ်ႉၶိူဝ်းမဵဝ်း ဢေႇၽရိမ်ႇ၊ မဵဝ်း မၼႃႇသေႇ၊ တေႃႇထိုင်ႁွတ်ႈမဵဝ်း ၸေႇပုလုၼ်ႇ၊ ၽၢႆႇတၢင်းႁွင်ႇပုၼ်ႉဢေႃႈ။ ၵူၺ်းၵႃႈ၊ၵူၼ်းၸိူဝ်းၼၼ်ႉဢွၼ်ၵၼ်ႁဵတ်းပျၢၵ်ႈၶူဝ်တီႈၶဝ်သေလႄႈသႄႉသွမ်းဢေႃႈ။-
ၼႂ်းဝႃႈၼၼ်သေၵေႃႈ ၵူၼ်းၸိူဝ်ႉၶိူဝ်းမဵဝ်း ဢႃႇသျႃႇ၊ ၶဝ်၊မဵဝ်း မၼႃႇသေႇ၊ ၶဝ်တင်းမဵဝ်း ၸေႇပုလုၼ်ႇ၊ ၶဝ်ၵမ်ႈၽွင်ႈပႃးၸႂ်ပႃးၶေႃးၶႂ်ႈမႃးၵႃႈတီႈဝဵင်း ယေႇရုသလႅမ်ႇ၊ ယူႇဢေႃႈ။-
တၢင်းဢၼ်ၽြႃးပဵၼ်ၸဝ်ႈပွင်ႁဵတ်းၼၼ်ႉၵေႃႈမီးယူႇလူၺ်ႈၵၼ်တင်းၵူၼ်းမဵဝ်း ယုတႃႉ၊ တင်းလၢႆလႄႈႁႂ်ႈၶဝ်မီးၼမ်ႉၼိုင်ႈၸႂ်လဵဝ်ၵၼ်၊ၽွမ်ႉၵၼ်ႁဵတ်းၸွမ်းဢလူဝ်ႇမၼ်းၸဝ်ႈၸွမ်းၵႃႈၼင်ႇဢၼ်ၶုၼ်ႁေႃၶမ်းတင်းမူးမၢတ်ႈၽွင်းမိူင်းတင်းလၢႆၸီႇယၢင်ႇၶိုင်ပွင်ၼၼ်ႉဢေႃႈ။
ၵူၼ်းၼမ်ၼႃႇဢွၼ်ၵၼ်မႃးၸုတုမ်ၵၼ်ၵႃႈၼႂ်းဝဵင်း ယေႇရုသလႅမ်ႇ၊ ႁႂ်ႈလႆႈႁဵတ်းပွႆးၵိၼ်ၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈၼႂ်းလိူၼ်တီႈသွင်ၼၼ်ႉလႄႈပဵၼ်ပွႆးဢၼ်ၵူၼ်းၵိုၼ်းၼႃႇဢေႃႈ။-
ၶဝ်ၼၼ်ႉဢွၼ်ၵၼ်ဢဝ်ၶဵင်ႇတၢင်းလူႇဢၼ်တုတ်ႇၶိူင်ႈတၢင်းလူႇလႂ်၊တင်းၽဝ်ၼၢမ်ႇသႃႇလႂ်၊ဢၼ်မီးၵႃႈၼႂ်းဝဵင်း ယေႇရုသလႅမ်ႇ၊ ၸိူဝ်းၼၼ်ႉၵႂႃႇထိမ်ႈတူၵ်းပႅတ်ႈၵႃႈၼႂ်းထူင်ႉႁူၺ်ႈ ၵေႇတရုၼ်ႇ၊ သေဢေႃႈ။-
ၼင်ႇၼၼ်လႄႈၼႂ်းလိူၼ်ၼၼ်ႉလႆႈသိပ်းသီႇဝၼ်းၼၼ်ႉၶဝ်ဢွၼ်ၵၼ်ႁႅမ်သူဝ်းဢွၼ်ႇတင်းလၢႆပုၼ်ႈဢၼ်တၵ်းသၢၵ်ႈလူႇပွႆး ပသၶႃႇ၊ ဢေႃႈ။ ယဵၸ်ႈပရေႃးႁဵၵ်ႈ လႂ်တင်းၵူၼ်းမဵဝ်း လေႇဝိ၊ လႂ်ၸိူဝ်းဢၼ်ဢမ်ႇမူတ်းၸၢင်ႇၼၼ်ႉငိၼ်းဢူၵ်းငိၼ်းဢၢႆလႄႈဢွၼ်ၵၼ်ဢဝ်တူဝ်ၶဝ်သၢၵ်ႈၵၢပ်ႈတီႈ ထႃႇဝရႃႉၽြႃး၊ သေယဝ်ႉ၊ၶဝ်လႆႈဢၶႂၢင်ႉဢၼ်ႁဵတ်းတၢင်းလူႇဢၼ်တုတ်ႇၽႆးၵႃႈၼႂ်းၵျွင်းပိၵ်ႈမၢၼ်ႇၸဝ်ႈဢေႃႈ။-
ၶဝ်ဢွၼ်ၵၼ်ၵိုတ်ႉႁၢပ်ႇၼႃႈၵၢၼ်ၵႃႈၼႂ်းၵျွင်းပိၵ်ႈမၢၼ်ႇၸဝ်ႈၸွမ်းၼင်ႇၶဝ်မီးပုၼ်ႈၽွၼ်းႁင်းၽႂ်ႁင်းမၼ်းမႅၼ်ႈၼင်ႇပိင်းၺၢပ်ႈတြႃး မူဝ်းသေႇ၊ ၵေႃႉပဵၼ်ၵူၼ်းၽြႃးပဵၼ်ၸဝ်ႈၶိုင်ပွင်ဝႆႉၼၼ်ႉလႄႈယဵၸ်ႈပရေႃးႁဵၵ်ႈၸိူဝ်းၼၼ်ႉဢွၼ်ၵၼ်ဢဝ်လိူတ်ႈၵႃႈၼႂ်းမိုဝ်းၵူၼ်းမဵဝ်း လေႇဝိ၊ တင်းလၢႆသေလႄႈၽႅတ်းသႂ်ႇၵႃႈၼိူဝ်ၶဵင်ႇတၢင်းလူႇဢေႃႈ။-
ၵွပ်ႈပိူဝ်ႈဢၼ်ၵူၼ်းၼမ်ၼႃႇယင်းဢမ်ႇမူတ်းၸၢင်ႇလႄႈၶဝ်ဢမ်ႇမီးဢၶႂၢင်ႉဢၼ်လႆႈႁႅမ်သူဝ်းဢွၼ်ႇ ပသၶႃႇ၊ ၸိူဝ်းၼၼ်ႉၸင်ႇ၊ၵူၼ်းမဵဝ်း လေႇဝိ၊ တင်းလၢႆလႆႈႁႅမ်သူဝ်းဢွၼ်ႇ ပသၶႃႇ၊ ပုၼ်ႈၶဝ်ႁႂ်ႈလႆႈဢဝ်သူဝ်းဢွၼ်ႇၸိူဝ်းၼၼ်ႉသၢၵ်ႈၵၢပ်ႈတီႈ ထႃႇဝရႃႉၽြႃး၊ ဢေႃႈ။-
ၼွၵ်ႈသေၼၼ်ႉၵူၼ်းၼမ်ၼႃႇဢၼ်ပဵၼ်ၼႂ်းၸိူဝ်ႉၶိူဝ်းမဵဝ်း ဢေႇၽရိမ်ႇ၊ မဵဝ်း မၼႃႇသေႇ၊ မဵဝ်း ဢိသၶႃႇ၊ တင်းမဵဝ်း ၸေႇပုလုၼ်ႇ၊ ၸိူဝ်းၼၼ်ႉယင်းဢမ်ႇပႆႇႁဵတ်းႁႂ်ႈတူဝ်ၸဝ်ႈၵဝ်ႇမူတ်းၸၢင်ႇလႄႈဢွၼ်ၵၼ်ၵိၼ်ပွႆး ပသၶႃႇ၊ ဢမ်ႇမႅၼ်ႈၸွမ်းၵႃႈၼင်ႇဢၼ်ပိင်းၺၢပ်ႈဝႆႉၼၼ်ႉဢေႃႈ။ ၵူၺ်းၵႃႈ၊ၶုၼ်ႁေႃၶမ်း ႁေႇၸၵိ၊ သူးတွင်းပုၼ်ႈၶဝ်လႄႈဝႃႈ၊-
“ ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇပေႃႈၶႃႈၸဝ်ႈႁဝ်းၶဝ်တီႈၶႃႈ။ ပိၵ်ႉသမ်ႉၶဝ်ဢမ်ႇမီးတၢင်းဢၼ်မူတ်းၸၢင်ႇၸွမ်းၼင်ႇဢၼ်ပိင်းၺၢပ်ႈဝႆႉၼၼ်ႉသေၵေႃႈ၊ ထႃႇဝရႃႉၽြႃး၊ ဢၼ်မျၢတ်ႈလီၼၼ်ႉၶႅၼ်းတေႃႈပွႆႇလွတ်ႈဢပျတ်ႈၶဝ်ၸိူဝ်းဢၼ်ပႃးတင်းႁူဝ်ၸႂ်သဵင်ႈသဵင်ႈသေလႄႈႁဵတ်းဝၢတ်ႈၵူဝ်းၵႂၢႆႇၸဝ်ႈႁဝ်းၼႆႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။-
ထႃႇဝရႃႉၽြႃး၊ ထွမ်ႇဢဝ်ၵႂၢမ်းသူးတွင်း ႁေႇၸၵိ၊ သေယဝ်ႉ၊ပၼ်ၵတ်းယဵၼ်ၶျၢမ်းသႃႇတီႈၶဝ်ဢေႃႈ။-
ၵူၼ်းမဵဝ်း ဢိသရေး၊ ဢၼ်ၸုတုမ်ၵၼ်ၵႃႈတီႈဝဵင်း ယေႇရုသလႅမ်ႇ၊ ၸိူဝ်းၼၼ်ႉဢွၼ်ၵၼ်မီးတၢင်းဢၼ်မူၼ်ႈပျေႃႇသႂၢင်ႇသိူဝ်းၼႃႇလူင်လၢင်ႁဵတ်းပွႆးၵိၼ်ၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈၼၼ်ႉၸဵတ်းဝၼ်းတဵမ်တဵမ်လႄႈယဵၸ်ႈပရေႃးႁဵၵ်ႈတင်းလၢႆတင်းၵူၼ်းမဵဝ်း လေႇဝိ၊ တင်းလၢႆဝၼ်းၼိုင်ႈယဝ်ႉဝၼ်းၼိုင်ႈဢွၼ်ၵၼ်ဢဝ်ၶိူင်ႈတူႇရိယႃႇဢၼ်သဵင်ႁႅင်းယႂ်ႇၼၼ်ႉပဝ်ႇတိုင်ႈယွင်ႈယေႃးႁဵတ်းၵႂၢမ်းထေႃးပၼႃႇတီႈ ထႃႇဝရႃႉၽြႃး၊ ဢေႃႈ။-
ႁေႇၸၵိ၊ လၢတ်ႈၵႂၢမ်းဢၼ်ပၼ်ႁႅင်းတီႈၵူၼ်းမဵဝ်း လေႇဝိ၊ ၸိူဝ်းဢၼ်မေႃဢွၼ်ႁူဝ်လီလီၼႂ်းတၢင်းဢၼ်ႁဵတ်းဝၢတ်ႈၵူဝ်းၵႂၢႆႇတီႈ ထႃႇဝရႃႉၽြႃး၊ ၼၼ်ႉဢေႃႈ။ ဝၢႆးသေၶဝ်ႁဵတ်းပွႆးၸဵတ်းဝၼ်းတဵမ်တဵမ်ၸူဝ်ႈဢၼ်ၶဝ်ယင်းတိုၵ်ႉႁဵတ်းတၢင်းလူႇဢၼ်ယုၵ်ႉယွင်ႈယွင်ႈယေႃး ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇပေႃႈၶဝ်ယူႇၼၼ်ႉ၊-
ၶဝ်ဢွၼ်ၵၼ်တႅပ်းတတ်းၸႂ်ႁႂ်ႈလႆႈသိုပ်ႇႁဵတ်းပွႆးထႅင်ႈၸဵတ်းဝၼ်းဢေႃႈ။ ၶဝ်ၵေႃႈၽွမ်ႉၵၼ်ႁဵတ်းမူၼ်ႈမူၼ်ႈပျေႃႇပျေႃႇထႅင်ႈၸဵတ်းဝၼ်းဢေႃႈ။-
ၶုၼ်ႁေႃၶမ်း ႁေႇၸၵိ၊ လူႇဝူဝ်းပေႃႈႁဵင်ၼိုင်ႈ၊ဢိၵ်ႇတင်းသူဝ်းၸဵတ်းႁဵင်ပုၼ်ႈၵူၼ်းတင်းလၢႆတၵ်းဢွၼ်ၵၼ်ႁႅမ်ၵိၼ်လႄႈ၊မူးမၢတ်ႈၽွင်းမိူင်းတင်းလၢႆၵေႃႈသမ်ႉလူႇဝူဝ်းပေႃႈႁဵင်ၼိုင်ႈတင်းသူဝ်းမိုၼ်ႇၼိုင်ႈထႅင်ႈဢေႃႈ။ ယဵၸ်ႈပရေႃးႁဵၵ်ႈၼမ်ၼႃႇလူင်လၢင်ဢွၼ်ၵၼ်ႁဵတ်းႁႂ်ႈတူဝ်ၶဝ်မူတ်းၸၢင်ႇဢေႃႈ။-
ပရိၵ်ႈသၢတ်ႈၵူၼ်းမဵဝ်း ယုတႃႉ၊ လႂ်၊ယဵၸ်ႈပရေႃးႁဵၵ်ႈလႂ်၊ၵူၼ်း လေႇဝိ၊ လႂ်၊ၵူၼ်းဢၼ်လုၵ်ႉသေၵႃႈတီႈမိူင်းပွတ်းႁွင်ႇမႃးၸိူဝ်းၼၼ်ႉလႂ်၊ဢိၵ်ႇတင်းၵူၼ်းမိူင်းၼွၵ်ႈဢၼ်ယူႇသဝ်းၼႂ်းမိူင်း ဢိသရေး၊ တင်းမိူင်း ယုတႃႉ၊ လႂ်ၵႃႈမီးတင်းသဵင်ႈတင်းလူင်ဢွၼ်ၵၼ်မီးတၢင်းဢၼ်ၸူမ်းဢၼ်သိူဝ်းဢေႃႈ။-
ၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉမီးတၢင်းဢၼ်ၸူမ်းဢၼ်သိူဝ်းယႂ်ႇၼႃႇလူင်လၢင်၊ၵွပ်ႈပိူဝ်ႈဢၼ်ဢဝ်ၵႃႈတီႈၸႃႉၸဵမ်ၸူဝ်ႈပၢၼ်ၶုၼ်ႁေႃၶမ်း သေႃးလမုၼ်ႇ၊ လုၵ်ႈၸၢႆး တႃႇဝိတ်ႈ၊ ၼၼ်ႉမႃး၊ဢမ်ႇတွၼ်ႉမီးတၢင်းဢၼ်ၸူမ်းဢၼ်သိူဝ်းယႂ်ႇၼႃႇလူင်လၢင်ထၢၼ်ႇၼၼ်ႉသေပွၵ်ႈဢေႃႈ။-
မိူဝ်ႈၼၼ်ႉယဵၸ်ႈပရေႃးႁဵၵ်ႈ လႂ်၊တင်းၵူၼ်း လေႇဝိ၊ လႂ်ၸိူဝ်းၼၼ်ႉဢွၼ်ၵၼ်ယွၼ်းတၢင်းလီမၢင်ႇၵလႃႇတီႈ ထႃႇဝရႃႉၽြႃး၊ ပုၼ်ႈၵူၼ်းတင်းလၢႆဢေႃႈ။ သဵင်ၶဝ်ၼၼ်ႉမၼ်းၸဝ်ႈငိၼ်းလႄႈၵႂၢမ်းသူးတွင်းပထၼႃႇၼၼ်ႉၶိုၼ်ႈၵႂႃႇႁွတ်ႈထိုင်ၵႃႈတီႈထႃႇၼႃႉမူတ်းၸၢင်ႇဢၼ်မၼ်းၸဝ်ႈၵိင်းဝၢပ်ႈယူႇဢၼ်ဝႃႈ၊ၽုင်ႇၵၢင်ႁၢဝ်ၼၼ်ႉဢေႃႈ။
ဝၢႆးသေပွႆးၼၼ်ႉယဝ်ႉတူဝ်ႈယဝ်ႉၼၼ်ႉၸိုင်၊ၵူၼ်းမဵဝ်း ဢိသရေး၊ ဢၼ်မႃးၶဝ်ႈပွႆးၵႃႈမီးၸိူဝ်းၼၼ်ႉဢွၼ်ၵၼ်ဢွၵ်ႇၵႂႃႇၸူးတီႈဝဵင်း ယုတႃႉ၊ တင်းလၢႆလႄႈႁၵ်းႁိၵ်းသဝ်တီႈၵူဝ်းၵႂၢႆႇလႂ်၊ၽၼ်းလူမ်ႉပႅတ်ႈသဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ လႂ်၊ၵိူၼ်ႇယႃႉၶဵင်ႇတၢင်းလူႇလႂ်၊တင်းထႃႇၼႃႉတီႈဝႆႈၽြႃးတၢင်ႇသူႇတၢင်ႇပႃးလႂ်ၸိူဝ်းၼၼ်ႉပႅတ်ႈဢေႃႈ။ ၶဝ်ႁဵတ်းၸိူဝ်ႉၼင်ႇၼၼ်ၵႃႈၼႂ်းမိူင်း ယုတႃႉ၊ ၵူႈတီႈၵူႈလႅၼ်၊ၵႃႈၼႂ်းဢိူင်ႇ ပိၼ်ႇယႃႇမိၼ်ႇ၊ ဢိူင်ႇ ဢေႇၽရိမ်ႇ၊ ဢိူင်ႇ မၼႃႇသေႇ၊ မူတ်းမူတ်းသဵင်ႈသဵင်ႈသေယဝ်ႉ၊ၶိုၼ်းမိူဝ်းၵႂႃႇတီႈဝၢၼ်ႈဝဵင်းတီႈယူႇၶဝ်ႁင်းၽႂ်ႁင်းမၼ်းသေဢေႃႈ။
ၶုၼ်ႁေႃၶမ်း ႁေႇၸၵိ၊ ၶိုၼ်းမႄးတႄႇမႄးတင်ႈမုၵ်ႉၸုမ်းယဵၸ်ႈပရေႃးႁဵၵ်ႈတင်းမုၵ်ႉၸုမ်းၵူၼ်း လေႇဝိ၊ လႂ်ၸွမ်းၵႃႈၼင်ႇဢၼ်ၼႃႈၵၢၼ်ၽႂ်ၼႃႈၵၢၼ်မၼ်းတူၵ်းလႄႉတူၵ်းၵမ်းတီႈၽႂ်တီႈမၼ်းၼၼ်ႉဢေႃႈ။ ၼႃႈၵၢၼ်ဢၼ်တူၵ်းလႄႉတူၵ်းၵမ်းၸိူဝ်းၼၼ်ႉၸမ်ႉ၊ပဵၼ်တၢင်းဢၼ်သၢၵ်ႈလူႇတၢင်းလူႇဢၼ်တုတ်ႇၽႆးလႂ်၊တင်းတၢင်းလူႇမိၵ်ႈသႁႃႇယႃႉလႂ်၊တၢင်းဢၼ်ၵိုတ်ႉႁၢပ်ႇၼႂ်းတၢင်းဢၼ်ႁဵတ်းဝၢတ်ႈၵူဝ်းၵႂၢႆႇၼႂ်းၵျွင်းပိၵ်ႈမၢၼ်ႇၸဝ်ႈလႂ်၊တၢင်းဢၼ်ယွင်ႈယေႃးၸဝ်ႈလႂ်၊တၢင်းဢၼ်တၢင်ႇၵျေးၸူးၸဝ်ႈလႂ်၊ၵႃႈတီႈၵူႈလွင်ႈလွင်ႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈၸိူဝ်းၼၼ်ႉဢေႃႈ။-
ၵႃႈၼႂ်းၽုင်သူဝ်းၽုင်ဝူဝ်းၶုၼ်ႁေႃၶမ်းၼၼ်ႉ ႁေႇၸၵိ၊ လူႇတၢၼ်းတူဝ်သတ်းပုၼ်ႈဢၼ်တၵ်းႁဵတ်းတၢင်းလူႇဢၼ်တုတ်ႇၽႆးတင်းလၢႆ၊ဢၼ်ဝႃႈတၢင်းလူႇဢၼ်တုတ်ႇၽႆးၶိင်ႇႁူဝ်ၼႂ်၊ၶိင်ႇႁူဝ်ၶမ်ႈလႂ်၊တၢင်းလူႇဢၼ်ၽဝ်ၽႆးၼႂ်းဝၼ်းၵမ်သိၼ်လႂ်၊ဝၼ်းပွႆးလိူၼ်မူၼ်းလႂ်၊ဢိၵ်ႇတင်းတၢင်းလူႇတၢင်ႇၸိူဝ်ႉတၢင်ႇဢၼ်ၸွမ်းၵႃႈၼင်ႇဢၼ်တႅမ်ႈဝႆႉၼႂ်းၵျၢမ်းပိင်းၺၢပ်ႈ ထႃႇဝရႃႉၽြႃး၊ ၸိူဝ်းၼၼ်ႉဢေႃႈ။
ၼွၵ်ႈသေၼၼ်ႉၶုၼ်ႁေႃၶမ်းပူင်ဢမိင်ႉတီႈၵူၼ်းဝဵင်း ယေႇရုသလႅမ်ႇ၊ တင်းလၢႆႁႂ်ႈၶဝ်ဢဝ်တၢင်းလူႇတၢင်းတၢၼ်းမႃးပုၼ်ႈယဵၸ်ႈပရေႃးႁဵၵ်ႈတင်းလၢႆ၊ဢိၵ်ႇတင်းၵူၼ်း လေႇဝိ၊ တင်းလၢႆ၊ၼင်ႇႁိုဝ်ၶဝ်တၵ်းလႆႈၶတ်းၸႂ်လႄႈၵိုတ်ႉႁၢပ်ႇၼႃႈၵၢၼ်ၸွမ်းတြႃး ထႃႇဝရႃႉၽြႃး၊ ၼၼ်ႉဢေႃႈ။-
မိူဝ်ႈဢၼ်ဢမိင်ႉၸဝ်ႈၸွတ်ႇတူဝ်ႈၵႂႃႇယဝ်ႉၼၼ်ႉၸိုင်၊ၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ဢဝ်ၶိူင်ႈလူႇၶိူင်ႈတၢၼ်း တင်းမၢၵ်ႈမႆႉႁူင်းၶဝ်ႈဢၼ်မၢၵ်ႇဢွၼ်တၢင်းဢၼ်ပဵၼ်ၶဝ်ႈပိူၵ်ႇ၊ၼမ်ႉမၢၵ်ႇၸပိတ်ႉၼမ်ႉမၼ်းသၢၼ်ႇလုၼ်ႇ၊ၼမ်ႉၽိုင်ႈ၊ဢိၵ်ႇတင်းၵႃႈဢၼ်ဢွၵ်ႇတီႈႁႆႈတီႈၼႃးၸိူဝ်းၼၼ်ႉ၊ဢိၵ်ႇတင်းၵႃႈဢၼ်ၶဝ်မီးဢုၵ်ႉၸႃႇတၢင်ႇၸိူဝ်ႉတၢင်ႇမဵဝ်းၵေႃႈၶဝ်ဢဝ်သိပ်းပုၼ်ႈပုၼ်ႈၼိုင်ႈ မႃးလူႇဢေႃႈ။-
ၵူၼ်းမဵဝ်း ဢိသရေး၊ လႄႈၵူၼ်းမဵဝ်း ယုတႃႉ၊ တင်းလၢႆဢၼ်ယူႇၵႃႈၼႂ်းဝဵင်း ယုတႃႉ၊ ၸိူဝ်းၼၼ်ႉဢွၼ်ၵၼ်ဢဝ်သူဝ်းဝူဝ်းသိပ်းပုၼ်ႈပုၼ်ႈၼိုင်ႈ၊ဢိၵ်ႇတင်းၶိူင်ႈလူႇၶိူင်ႈတၢၼ်းၼမ်ၼႃႇၵႃႈဢၼ်ၶဝ်သၢၵ်ႈၵၢပ်ႈတီႈ ထႃႇဝရႃႉၽြႃး၊ ယဝ်ႉၼၼ်ႉမႃးလူႇဢေႃႈ။-
ၶိူင်ႈလူႇၶိူင်ႈတၢၼ်းၸိူဝ်းၼၼ်ႉတႄႇၸႃႉၼႂ်းလိူၼ်သၢမ်လႄႈဢွၼ်ၵၼ်ဢဝ်မႃးၵွင်ဝႆႉၶိူဝ်းၶိူဝ်းယႂ်းယႂ်း၊တေႃႇထိုင်ႁွတ်ႈလိူၼ်ၸဵတ်းဢေႃႈ။-
မိူဝ်ႈဢၼ်ၶုၼ်ႁေႃၶမ်း ႁေႇၸၵိ၊ တင်းမူးမၢတ်ႈၽွင်းမိူင်းတင်းလၢႆမႃးႁၼ်ၶိူင်ႈတၢင်းလူႇၸိူဝ်းၼၼ်ႉၸိုင်၊ၶဝ်ဢွၼ်ၵၼ်ယွင်ႈယေႃးၵျေးၸူး ထႃႇဝရႃႉၽြႃး၊ ဢိၵ်ႇတင်းယွင်ႈယေႃးၵူၼ်းမၼ်းၸဝ်ႈမဵဝ်း ဢိသရေး၊ ၸိူဝ်းၼၼ်ႉဢေႃႈ။-
ၶုၼ်ႁေႃၶမ်းတွင်ႈထၢမ်လွင်ႈၶိူင်ႈတၢင်းလူႇၸိူဝ်းၼၼ်ႉတီႈယဵၸ်ႈပရေႃးႁဵၵ်ႈဢိၵ်ႇတင်းၵူၼ်း လေႇဝိ၊ ၸိူဝ်းၼၼ်ႉသေယဝ်ႉ၊-
ၶုၼ်ယဵၸ်ႈပရေႃးႁဵၵ်ႈ ဢႃႇၸရိ၊ ၸိူဝ်ႉၶိူဝ်း ၸႃႇတုၵ်ႉ၊ ၼၼ်ႉလဝ်ႈလၢတ်ႈလႄႈဝႃႈ၊ “ၸႃႉဢဝ်ၸဵမ်မိူဝ်ႈဢၼ်ၵူၼ်းတင်းလၢႆတႄႇၸႃႉမႃးလူႇတၢၼ်းတီႈၵျွင်းပိၵ်ႈမၢၼ်ႇၸဝ်ႈၼၼ်ႉပဵၼ်ဢၼ်ၶႃႈၸဝ်ႈႁဝ်းၶဝ်ပေႃးၵုမ်ႇပေႃးၵိၼ်ၵူၺ်းဢမ်ႇၵႃး၊ယင်းပူၼ်ႉယင်းလိူဝ်ၼမ်ၼႃႇတီႈၶႃႈဢေႃႈ။ ႁဝ်းၶႃႈလႆႈၸိူဝ်ႉၼင်ႇၼႆၵွပ်ႈပိူဝ်ႈဢၼ် ထႃႇဝရႃႉၽြႃး၊ ပၼ်တၢင်းလီတီႈၵူၼ်းမၼ်းၸဝ်ႈတင်းလၢႆတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၶုၼ်ႁေႃၶမ်း ႁေႇၸၵိ၊ ပူင်ဢမိင်ႉႁႂ်ႈၶဝ်ပွင်ႁဵတ်းပွင်မႄးလုၵ်းဢၼ်ၵဵပ်းသိမ်းၽၼ်ႇတႃႇၵႃႈၼႂ်းဝၢင်းၵျွင်းပိၵ်ႈမၢၼ်ႇၸဝ်ႈသေယဝ်ႉ၊-
ၶဝ်ပႃးတင်းသဵတ်ႈၸႃႇလႄႈဢဝ်ၶိူင်ႈလူႇၶိူင်ႈတၢၼ်းတင်းဢုၵ်ႉၸႃႇသိပ်းပုၼ်ႈပုၼ်ႈၼိုင်ႈၸိူဝ်းၼၼ်ႉသိမ်းသႂ်ႇဝႆႉဢေႃႈ။ ၶုၼ်ဢၼ်ဢုပ်ႉထိင်းဢုၵ်ႉၸႃႇၸိူဝ်းၼၼ်ႉပဵၼ် ၵေႃးၼၼိ၊ ၵူၼ်း လေႇဝိ၊ လႄႈ၊ၼွင်ႉၸၢႆးမၼ်း သိမိ၊ သမ်ႉပဵၼ်ၽူႈၸွႆႈထႅမ်မၼ်းဢေႃႈ။-
ၵူၼ်း လေႇဝိ၊ သိပ်းၵေႃႉဢၼ်ၸွႆႈၵမ်ႉၸွႆႈထွၵ်ႈတႂ်ႈမိုဝ်းၶဝ်ၸမ်ႉ၊ပဵၼ် ယေႇႁေးလႃႉ၊ဢႃႇၸၸိ၊ၼႃႇႁတ်ႉ၊ဢသႃႇႁေးလႃႉ၊ယေႇရိမုတ်ႉ၊ယေႃးၸပတ်ႉ၊ဢေးလျႃႇလႃႉ၊ဢိသမၶိ၊မႃႇႁတ်ႉ၊ ဢိၵ်ႇတင်း ပေႇၼႃႇယႃႉ၊ ၸိူဝ်းၼၼ်ႉၸွမ်းၵႃႈၼင်ႇဢၼ်ၶုၼ်ႁေႃၶမ်း ႁေႇၸၵိ၊ တင်းၶုၼ်ယဵၸ်ႈပရေႃးႁဵၵ်ႈ ဢႃႇၸရိ၊ ၶၢၼ်းဝႆႉၼၼ်ႉဢေႃႈ။-
ၵေႃးရႃႉ၊ လုၵ်ႈၸၢႆး ဢိမၼႃႉ၊ ၵူၼ်း လေႇဝိ၊ ဢၼ်ပဵၼ်ႁူဝ်ၼႃႈပႂ်ႉၽၵ်းတူၽၢႆႇတၢင်းဝၼ်းဢွၵ်ႇၼၼ်ႉပဵၼ်ၵေႃႉဢၼ်ဢုပ်ႉထိင်းၵၢၼ်ဢၼ်ႁပ်ႉတုင်းဢဝ်ၶိူင်ႈလူႇၶိူင်ႈတၢၼ်းၵႃႈဢၼ်သၢၵ်ႈလူႇတီႈ ထႃႇဝရႃႉၽြႃး၊ ဢိၵ်ႇတင်းၵၢၼ်ဢၼ်ၽႄမႅင်ႇပၼ်ၼၼ်ႉဢေႃႈ။-
ၵႃႈၼႂ်းဝဵင်းၸိူဝ်းဢၼ်ယဵၸ်ႈပရေႃးႁဵၵ်ႈတင်းလၢႆ ယူႇသဝ်းၼၼ်ႉၵေႃႈ၊ ဢေႇတိၼ်ႇ၊ မိၼ်ႇၼိယႃႇမိၼ်ႇ၊ယေႇသွႃႇ၊သေႇမႃႇယႃႉ၊ဢႃႇမရိ၊သေးၶၼိ၊ ၸိူဝ်းၼၼ်ႉ၊ပႃးတင်းသဵတ်ႈၸႃႇၸွႆႈၵမ်ႉၸွႆႈထွၵ်ႈတႂ်ႈမိုဝ်း ၵေႃးရႃႉ၊ လႄႈမႅင်ႇပၼ်ၽႄပၼ်တၢင်းၵိၼ်တၢင်းၶူပ်းတီႈပီႈၼွင်ႉမဵဝ်း လေႇဝိ၊ ၶဝ်ၽဵင်ႇၽဵင်ႇၸွမ်းၼင်ႇၼႃႈၵၢၼ်ဢၼ်ၶဝ်ၵိုတ်ႉႁၢပ်ႇၼၼ်ႉလႄႈ၊-
ယင်းဢမ်ႇမႅင်ႇပၼ်ၸွမ်းၼင်ႇၸိူဝ်ႉၶိူဝ်းႁိူၼ်းၶဝ်ၼၼ်ႉဢေႃႈ။ ၶဝ်မႅင်ႇပၼ်ၽႄပၼ်တီႈၵူၼ်းၸၢႆးၵႃႈဢၼ်ဢသၢၵ်ႈလႆႈသၢမ်သိပ်းပီ လႄႈသၢမ်သိပ်းပီၶိုၼ်ႈၼိူဝ်ၸိူဝ်းဢၼ်ၵိုတ်ႉႁၢပ်ႇပုၼ်ႈၽွၼ်းၶဝ်ၵႃႈၼႂ်းၵျွင်းပိၵ်ႈမၢၼ်ႇၸဝ်ႈၵူႈဝၼ်းၵူႈဝၼ်း၊ၸွမ်းၼင်ႇဢရႃႇၶဝ်ႁင်းၽႂ်ႁင်းမၼ်းၼၼ်ႉဢေႃႈ။-
ယဵၸ်ႈပရေႃးႁဵၵ်ႈၸိုင်၊ၼႃႈၵၢၼ်ၶဝ်ၼၼ်ႉလႆႈၶၢၼ်းဝႆႉၸွမ်းၼင်ႇၸိူဝ်ႉၶိူဝ်းႁိူၼ်းၶဝ်လႄႈ၊ၵူၼ်း လေႇဝိ၊ ဢၼ်ဢသၢၵ်ႈလႆႈသၢဝ်းပီလႄႈသၢဝ်းပီၶိုၼ်ႈၼိူဝ်ၸမ်ႉ၊ၼႃႈၵၢၼ်ၶဝ်လႆႈၶၢၼ်းဝႆႉၸွမ်းၼင်ႇပဵၼ်မုၵ်ႉပဵၼ်ၸုမ်းၶဝ်ၼၼ်ႉဢေႃႈ။-
ၶဝ်ၸိူဝ်းၼၼ်ႉလႆႈၶၢမ်ႇတၢင်းဢၼ်ၼပ်ႉဢၢၼ်ႇဢဝ်ၸရၢင်းဝႆႉလူၺ်ႈၵၼ်တင်းမေးၶဝ်၊လုၵ်ႈလၢင်းၶဝ်၊ဢိၵ်ႇတင်းလုၵ်ႈလၢၼ်ၶဝ်တၢင်ႇၵေႃႉတၢင်ႇၵူၼ်းၸိူဝ်းၼၼ်ႉ၊ၵွပ်ႈပိူဝ်ႈဢၼ်ၶဝ်တၵ်းလႆႈတၼ်းဝႆႉသေႇသေႇပုၼ်ႈတႃႇတေၵိုတ်ႉႁၢပ်ႇၼႃႈၵၢၼ်ဢၼ်မူတ်းၸၢင်ႇတင်းလၢႆဢေႃႈ။-
မိူၼ်ၼင်ႇၼၼ်ပုၼ်ႈတႃႇလုၵ်ႈလၢၼ်ၸိူဝ်ႉၶိူဝ်း ဢႃႇရုၼ်ႇ၊ ဢၼ်ပဵၼ်ယဵၸ်ႈပရေႃးႁဵၵ်ႈၸိူဝ်းဢၼ်ယူႇၵႃႈၼႂ်းဝဵင်းၽႂ်ဝဵင်းမၼ်း၊ဢမ်ႇၼၼ်ယူႇၵႃႈတီႈဢၼ်လဵပ်ႈႁွပ်ႈဝဵင်းၸိူဝ်းၼၼ်ႉၸိုင်၊မီးၵူၼ်းၸိူဝ်းဢၼ်မၢႆၸိုဝ်ႈမၢႆသဵင်ၼၼ်ႉမႅင်ႇပၼ်ၽႄပၼ်တၢင်းၵိၼ်တၢင်းၶူပ်းတီႈၵူၼ်းၸၢႆးၵႃႈဢၼ်ၶဝ်ႈပႃးၼႂ်းၼႃႈႁိူၼ်းယဵၸ်ႈပရေႃးႁဵၵ်ႈတင်းလၢႆ၊ဢိၵ်ႇတင်းၵႃႈဢၼ်ၶဝ်ႈပႃးၼႂ်းၸရၢင်းၸိူဝ်ႉၶိူဝ်း လေႇဝိ၊ တင်းလၢႆၼၼ်ႉဢေႃႈ။
ၶုၼ်ႁေႃၶမ်း ႁေႇၸၵိ၊ ႁဵတ်းလွင်ႈတၢင်းၸိူဝ်းၼႆႉၸွတ်ႇတူဝ်ႈမိူင်း ယုတႃႉ၊ လႄႈမၼ်းၵမ်ၵျၢင်ႉသၢင်ႈႁဵတ်းဢၼ်သိုဝ်ႈဢၼ်တေႃႇဢၼ်ထုၵ်ႇၸႂ်ၵျိူၵ်ႈၸႂ် ထႃႇဝရႃႉၽြႃး၊ ၽြႃးပဵၼ်ၸဝ်ႈမၼ်းၼၼ်ႉဢေႃႈ။-
မၼ်းမီးတၢင်းဢၼ်ၶိုၼ်ႈယႂ်ႇမႂ်ႇသုင်မႃး၊ၵွပ်ႈပိူဝ်ႈၼႂ်းလွင်ႈတၢင်းဢၼ်မၼ်းပွင်ႁဵတ်းၵႃႈၼႂ်းၵျွင်းပိၵ်ႈမၢၼ်ႇၸဝ်ႈလႂ်၊ၼႂ်းတၢင်းဢၼ်ပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၸဝ်ႈလႂ်ၸိူဝ်းၼၼ်ႉမၼ်းပႃးဢဝ်တင်းႁူဝ်ၸႂ်သဵင်ႈသဵင်ႈလႄႈသွၵ်ႈႁႃၽြႃးပဵၼ်ၸဝ်ႈမၼ်းၼၼ်ႉဢေႃႈ။
လိုၼ်းသေဢၼ်ႁဵတ်းၸိူဝ်ႉၼင်ႇၼၼ်ၼႂ်းတၢင်းဢၼ်ၶုၼ်ႁေႃၶမ်း ႁေႇၸၵိ၊ ပႃးတင်းၸႂ်သဵတ်ႈၸႃႇလႄႈႁဵတ်းဝၢတ်ႈတီႈ ထႃႇဝရႃႉၽြႃး၊ ယဝ်ႉၼၼ်ႉ၊ သၼႃႇၶရိပ်ႉ၊ ၸဝ်ႈမုၼ်ယႂ်ႇၶုၼ်ႁေႃၶမ်းမိူင်း ဢႃႇသီးရီးယႃး၊ ၶီႇသိုၵ်းတိုၵ်းတေႃးမိူင်း ယုတႃႉ၊ လႄႈလွမ်ႉဝဵင်းဢၼ်မၼ်ႈၶိူင်ႇတင်းလၢႆဝႆႉသေယဝ်ႉ၊ပူင်ဢမိင်ႉႁႂ်ႈတပ်ႉသိုၵ်းမၼ်းၵိူၼ်ႇယႃႉလမ်းဝဵင်းပုၼ်ႈဢၼ်တၵ်းၶဝ်ႈသိမ်းဢဝ်ဢေႃႈ။-
မိူဝ်ႈဢၼ် ႁေႇၸၵိ၊ ႁုႁၼ်လွင်ႈဢၼ် သၼႃႇၶရိပ်ႉ၊ မီးတၢင်းၵျၢမ်ႇတၢင်းပွင်တၵ်းတိုၵ်းတေႃးဝဵင်း ယေႇရုသလႅမ်ႇ၊ ၼၼ်ႉၸိုင်၊-
မၼ်းတိူင်ႇပၢင်ႇၵၼ်တင်းမူးမၢတ်ႈမၼ်း၊ၶုၼ်သိုၵ်းမၼ်းတင်းလၢႆႁႂ်ႈလႆႈတဵင်လႆႈဢိုတ်းၼမ်ႉဢွၵ်ႇႁူးဢၼ်မီးၵႃႈတီႈၼွၵ်ႈဝဵင်းၼၼ်ႉလႄႈၶဝ်ၽွမ်ႉၵၼ်ၸွႆႈထႅမ်မၼ်းဢေႃႈ။-
ၵူၼ်းၼမ်ၼႃႇဢွၼ်ၵၼ်ဢွၵ်ႇၵႂႃႇတဵင်ဢိုတ်းႁူးၼမ်ႉၵႃႈမီး၊ဢိၵ်ႇတင်းၼမ်ႉႁွင်ႈဢၼ်လႆၵႂႃႇၵႃႈၼႂ်းၵၢင်မိူင်း၊ပုၼ်ႈလွင်ႈၼင်ႇႁိုဝ်ၵူၼ်းမဵဝ်း ဢႃႇသီးရီးယႃး၊ ၶဝ်တေဢမ်ႇလႆႈၼမ်ႉမိူဝ်ႈဢၼ်ၶဝ်မႃးၸမ်ႁိမ်းဝဵင်း ယေႇရုသလႅမ်ႇ၊ ၼၼ်ႉဢေႃႈ။-
ႁေႇၸၵိ၊ ႁဵတ်းတၢင်းဢၼ်ထႅင်ႈႁႅင်းၽၢႆႇၵႅတ်ႇၶႄဝဵင်းၼၼ်ႉလႄႈမႄးၵုမ်းမႄးႁဵတ်းလမ်းဝဵင်းဢၼ်လူမ်ႉပင်းလႂ်၊တႄႇႁဵတ်းသုမ်ႉပႂ်ႉယၢမ်းလႂ်ဝႆႉၵႃႈၼိူဝ်လမ်းဝဵင်း၊ၵေႃႇႁဵတ်းလမ်းဝဵင်းၸၼ်ႉၼွၵ်ႈလႂ်ဢေႃႈ။ ၼွၵ်ႈသေၼၼ်ႉမၼ်းမႄးၵုမ်းမႄးႁဵတ်းလမ်းဝဵင်းဢၼ်တႄႇႁဵတ်းဝႆႉၵႃႈတီႈလိၼ်ဢၼ်ထူမ်ဝႆႉၽၢႆႇတၢင်းဝၼ်းဢွၵ်ႇဢၼ်ပဵၼ်ဝဵင်းၵဝ်ႇဝဵင်း ယေႇရုသလႅမ်ႇ၊ ပုၼ်ႉဢေႃႈ။ မၼ်းသမ်ႉႁဵတ်းႁွၵ်ႇလႂ်၊ၶိူင်ႈႁႄႉလၢၵ်ႈၼၢၵ်ႈလႂ်ထႅင်ႈၼမ်ၼႃႇဢေႃႈ။-
မၼ်းၶၢၼ်းၵူၼ်းတင်းလၢႆဝႆႉတႂ်ႈမိုဝ်းၶုၼ်သိုၵ်းတင်းလၢႆသေလႄႈပူင်ဢမိင်ႉဝႆႉႁႂ်ႈၶဝ်ၸုတုမ်ၵၼ်ဝႆႉၵႃႈတီႈပၢင်ႇလူင်ႁိမ်းၽၵ်းတူဝဵင်းသေယဝ်ႉ၊လၢတ်ႈၵႂၢမ်းဢၼ်ပၼ်ႁႅင်းတီႈၶဝ်လႄႈဝႃႈ၊-
“ဢွၼ်ၵၼ်ဢဝ်ႁႅင်းလႄႈမီးတၢင်းဢၼ်ႁတ်းႁၢၼ်တႃႉ။ ယႃႇပေၵူဝ်ပေႁႄၸဝ်ႈမုၼ်ယႂ်ႇၶုၼ်ႁေႃၶမ်းမိူင်း ဢႃႇသီးရီးယႃး၊ ဢိၵ်ႇတင်းတပ်ႉသိုၵ်းဢၼ်မၼ်းဢွၼ်ႁူဝ်မႃးၼၼ်ႉလႃးလႃး။ ၽၢႆႇႁဝ်းၼႆႉယဵင်ႈၶႅၼ်းမီးႁႅင်းယႂ်ႇၼႃႇသေၽၢႆႇမၼ်းလူးၵွၼ်ႇဢေႃႈ။-
မၼ်းမီးႁႅင်းတၼ်းၶူဝ်းၵူၼ်းၵူၺ်းလႄႈ၊ႁဝ်းၸမ်ႉ၊မီး ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းဢၼ်ၸွႆႈထႅမ်တိုၵ်းတေႃးၽၢႆႇႁဝ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။ ၵူၼ်းတင်းလၢႆဢွၼ်ၵၼ်မီးႁႅင်းၸႂ်လူၺ်ႈၶေႃႈၵႂၢမ်းၶုၼ်ႁေႃၶမ်းၶဝ်ၼၼ်ႉဢေႃႈ။
လိုၼ်းၼၼ်ႉဢမ်ႇႁိုင်ဢမ်ႇၼၢၼ်း၊ၼႂ်းမိူဝ်ႈဢၼ် သၼႃႇၶရိပ်ႉ၊ တင်းတပ်ႉသိုၵ်းမၼ်းယင်းလွမ်ႉဝဵင်း လႃႇၶိသႃႉ၊ ယူႇၼၼ်ႉၸိုင်၊မၼ်းသင်ႇလၢတ်ႈၶေႃႈၵႂၢမ်းၵႂႃႇတီႈ ႁေႇၸၵိ၊ ဢိၵ်ႇတင်းၵူၼ်းမဵဝ်း ယုတႃႉ၊ ဢၼ်မီးယူႇၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉလႄႈဝႃႈ၊-
“ၵဝ် သၼႃႇၶရိပ်ႉ၊ ၸဝ်ႈမုၼ်ယႂ်ႇၶုၼ်ႁေႃၶမ်းမိူင်း ဢႃႇသီးရီးယႃး၊ မီးဢမိင်ႉၸမ်ႉ၊သူဢိင်ပိုင်ႈၵႃႈသင်ယူႇ သူႁတ်းၶၢမ်ႇတၢင်းဢၼ်ပိူၼ်ႈတၵ်းလွမ်ႉသူဝႆႉၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉ။-
ႁေႇၸၵိ၊ ၸူဝ်းဢဝ်သူလွင်ႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူတၵ်းၵႄႇသႄႇဢဝ်သူလွတ်ႈသေၵႃႈၼႂ်းမိုဝ်းႁဝ်းၼၼ်ႉယဝ်ႉ။ ၵူၺ်းၵႃႈ၊မၼ်းပႅတ်ႉလႅၼ်သူႁႂ်ႈသူလႆႈတၢႆလူၺ်ႈတၢင်းဢၼ်ဢိုပ်းၶဝ်ႈဢိုပ်းၼမ်ႉၼၼ်ႉဢေႃႈ။-
မၼ်းၼၼ်ႉယႃႉၽဵဝ်ႈပႅတ်ႈထႃႇၼႃႉတီႈသုင် ထႃႇဝရႃႉၽြႃး၊ တင်းၶဵင်ႇတၢင်းလူႇၸဝ်ႈသေယဝ်ႉ၊ၸူဝ်းဢဝ်ၵူၼ်းမိူင်း ယုတႃႉ၊ တင်းဝဵင်း ယေႇရုသလႅမ်ႇ၊ ႁႂ်ႈၶဝ်ဝႆႈၽြႃး၊ဢိၵ်ႇတင်းႁႂ်ႈၶဝ်ၽဝ်ၽႆးၼၢမ်ႇသႃႇၵႃႈၼိူဝ်ၶဵင်ႇတၢင်းလူႇဢၼ်လဵဝ်ၵူၺ်းၼၼ်ႉဢေႃႈ။-
သူဢမ်ႇႁုလွင်ႈတၢင်းဢၼ်ၵဝ်တင်းပူႇမွၼ်ႇၵဝ်ၸိူဝ်းၼၼ်ႉႁဵတ်းၸိူဝ်ႉၼင်ႇႁိုဝ်တီႈၵူၼ်းတၢင်ႇသိုင်ႇတၢင်ႇမိူင်းၼၼ်ႉႁိုဝ်း။ ၸွင်ႇၽြႃးၵူႈၸိူဝ်ႉၵူႈမဵဝ်းၼႂ်းမိူင်းၸိူဝ်းၼၼ်ႉၵႄႇသႄႇဢဝ်ၵူၼ်းၶဝ်ဢွၵ်ႇသေၵႃႈၼႂ်းမိုဝ်းၸဝ်ႈမုၼ်ယႂ်ႇၶုၼ်ႁေႃၶမ်း ဢႃႇသီးရီးယႃး၊ လႆႈႁိုဝ်း။-
ၽြႃးသူႇလႂ်ပႃးလႂ်ၵႃႈၼႂ်းမိူင်းၸိူဝ်းၼၼ်ႉယၢမ်ႈၵႄႇသႄႇၼုၵ်ႈဢဝ်မိူင်းၶဝ်သေၵႃႈၼႂ်းမိုဝ်းႁဝ်းႁိုဝ်း။ ပိူဝ်ႈၼႆလႄႈသူထၢင်ႇၽြႃးသူတၵ်းတၢတ်ႈၼိူင်ႇၵႄႇသႄႇၼုၵ်ႈဢဝ်သူလႆႈႁိုဝ်း။-
ပိူဝ်ႈဢၼ်ပဵၼ်ၼင်ႇၼႆလႄႈယႃႇပေႁႂ်ႈ ႁေႇၸၵိ၊ ပႅတ်ႉလႅၼ်သူလႄႈၸူဝ်းဢဝ်သူၸိူဝ်ႉၼင်ႇၼၼ်သေၵမ်း။ ယႃႇပေယုမ်ႇၵႂၢမ်းမၼ်း။ ၽြႃးၵူၼ်းတၢင်ႇၸိူဝ်ႉတၢင်ႇမဵဝ်း၊ၽြႃးတၢင်ႇသိုင်ႇတၢင်ႇမိူင်းၸိူဝ်းၼၼ်ႉဢမ်ႇတွၼ်ႉတၢတ်ႈၼိူင်ႇၵႄႇသႄႇၼုၵ်ႈဢဝ်ၵူၼ်းမၼ်းလွတ်ႈသေၵႃႈၼႂ်းမိုဝ်းၵဝ်၊ဢိၵ်ႇတင်းၵႃႈၼႂ်းမိုဝ်းပူႇမွၼ်ႇၵဝ်လႆႈသေသူႇသေပႃးလႄႈ၊ၽြႃးသူၵေႃႈယဵင်ႈၶႅၼ်းဢမ်ႇၵႄႇသႄႇၼုၵ်ႈဢဝ်သူလွတ်ႈသေၵႃႈၼႂ်းမိုဝ်းၵဝ်လႆႈ၊” ဝႃႈၼင်ႇၼႆဢေႃႈ။
မူးမၢတ်ႈၽွင်းမိူင်း ဢႃႇသီးရီးယႃး၊ ၸိူဝ်းၼၼ်ႉယဵင်ႈၶႅၼ်းလၢတ်ႈၵႂၢမ်းဢမ်ႇလီဢမ်ႇငၢမ်းလွင်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈတင်းလွင်ႈ ႁေႇၸၵိ၊ ၶႃႈ ထႃႇဝရႃႉၽြႃး၊ ၼၼ်ႉၼႃႇလူင်လၢင်ဢေႃႈ။-
လိူဝ်သေၼၼ်ႉ၊ သၼႃႇၶရိပ်ႉ၊ တႅမ်ႈလိၵ်ႈဢၼ်သႄႉသွမ်းတၢင်ႇဢပျတ်ႈတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ လႄႈဝႃႈ၊ “ၽြႃးၵူၼ်းၵူႈၸိူဝ်ႉၵူႈမဵဝ်းၵႃႈၼႂ်းသိုင်ႇၸိုင်ႈဝၢၼ်ႈမိူင်းၵူႈတီႈၵူႈလႅၼ်ၸိူဝ်းၼၼ်ႉဢမ်ႇၵႄႇသႄႇၼုၵ်ႈဢဝ်ၵူၼ်းၶဝ်တင်းလၢႆလွတ်ႈသေၵႃႈၼႂ်းမိုဝ်းၵဝ်လႆႈ။ မိူၼ်ၸိူဝ်ႉၼင်ႇၼၼ်ၽြႃးဢၼ် ႁေႇၸၵိ၊ ၵူဝ်းၵႂၢႆႇၼၼ်ႉၵေႃႈဢမ်ႇၵႄႇသႄႇၼုၵ်ႈဢဝ်ၵူၼ်းမၼ်းတင်းလၢႆလွတ်ႈသေၵႃႈၼႂ်းမိုဝ်းၵဝ်လႆႈ၊” ဝႃႈၼင်ႇၼႆဢေႃႈ။-
မူးမၢတ်ႈၽွင်းမိူင်း ဢႃႇသီးရီးယႃး၊ ၶဝ်ဢဝ်တင်းၵႂၢမ်းၽႃႇသႃႇ ႁေႇပြႄး၊ ႁွင်ႉပၢဝ်ႇႁွင်ႉလၢတ်ႈတင်းသဵင်ဢၼ်ႁႅင်းယႂ်ႇၼႃႇႁႂ်ႈလႆႈလွၵ်ႇငိုတ်ႈႁႂ်ႈၵူၼ်းဝဵင်း ယေႇရုသလႅမ်ႇ၊ ဢၼ်မီးယူႇၵႃႈၼိူဝ်လမ်းဝဵင်းၸိူဝ်းၼၼ်ႉထၢၼ်ႈပေႃးၸႂ်လုလႄႈႁႂ်ႈၶဝ်တိုၵ်းဢဝ်ဝဵင်းလႆႈငၢႆႈငၢႆႈၼၼ်ႉဢေႃႈ။-
ၶဝ်ဢွၼ်ၵၼ်လၢတ်ႈလွင်ႈၽြႃးပဵၼ်ၸဝ်ႈဝဵင်း ယေႇရုသလႅမ်ႇ၊ မိူၼ်ၸိူဝ်ႉၼင်ႇဢၼ်ၶဝ်လၢတ်ႈလွင်ႈၽြႃးၵူၼ်းတၢင်ႇၸိူဝ်ႉတၢင်ႇမဵဝ်းၵႃႈၼႂ်းမိူင်းလေႃးၵႃႉဢၼ်ပဵၼ်ႁုၼ်ႇႁၢင်ႈသၢင်းထုဢၼ်ဢဝ်တင်းမိုဝ်းၵူၼ်းႁဵတ်းပဵၼ်ၸိူဝ်းၼၼ်ႉဢေႃႈ။
မိူဝ်ႈၼၼ်ႉၶုၼ်ႁေႃၶမ်း ႁေႇၸၵိ၊ တင်းပရေႃးၽႅတ်ႈ ဢိသႃႇယႃႉ၊ ဢၼ်ပဵၼ်လုၵ်ႈၸၢႆး ဢႃႇမူတ်ႉ၊ ၼၼ်ႉသူးတွင်းတီႈၽြႃးပဵၼ်ၸဝ်ႈလႄႈႁွင်ႉသႅၼ်ႇၸူးတီႈမၼ်းၸဝ်ႈႁႂ်ႈလႆႈတၢင်းဢၼ်ၸွႆႈထႅမ်ဢေႃႈ။-
ထႃႇဝရႃႉၽြႃး၊ ပွႆႇၸႂ်ႉတမၢၼ်ႇၵၢင်ႁၢဝ်ပႃးၼိုင်ႈႁႂ်ႈၵႂႃႇဢဝ်ႁူဝ်ႁၢၼ်ၵူၼ်းသိုၵ်းတင်းၶုၼ်သိုၵ်းတင်းလၢႆတၢႆပႅတ်ႈၵႃႈၼႂ်းတပ်ႉသိုၵ်း ဢႃႇသီးရီးယႃး၊ ၶဝ်ဢေႃႈ။ ၵွပ်ႈပိူဝ်ႈၼႆလႄႈၸဝ်ႈမုၼ်ယႂ်ႇၶုၼ်ႁေႃၶမ်းၼႃႈလုယူႇလႄႈၶိုၼ်းပွၵ်ႈမိူဝ်းၵႂႃႇတီႈမိူင်း ဢႃႇသီးရီးယႃး၊ သေဢေႃႈ။ မီးဝၼ်းၼိုင်ႈၼႂ်းမိူဝ်ႈဢၼ်မၼ်းယင်းမီးယူႇၵႃႈၼႂ်းၵျွင်းပိၵ်ႈမၢၼ်ႇၽြႃးမၼ်းၼၼ်ႉလုၵ်ႈၸၢႆးဢွၵ်ႇမၼ်းၵမ်ႈၽွင်ႈဢဝ်မၼ်းတၢႆလူၺ်ႈလၢပ်ႇလူၺ်ႈလႅဝ်းၵႃႈတီႈၼၼ်ႈဢေႃႈ။
ၼင်ႇၼၼ်လႄႈ ထႃႇဝရႃႉၽြႃး၊ ထုတ်ႇၼုၵ်ႈဢဝ်ၶုၼ်ႁေႃၶမ်း ႁေႇၸၵိ၊ တင်းၵူၼ်းဝဵင်း ယေႇရုသလႅမ်ႇ၊ လွတ်ႈသေၵႃႈၼႂ်းမိုဝ်း သၼႃႇၶရိပ်ႉ၊ ၸဝ်ႈမုၼ်ယႂ်ႇၶုၼ်ႁေႃၶမ်းမိူင်း ဢႃႇသီးရီးယႃး၊ ဢိၵ်ႇတင်းၵႃႈၼႂ်းမိုဝ်းရၢၼ်ႇသူႇတၢင်ႇတီႈတၢင်ႇလႅၼ်ဢေႃႈ။ မၼ်းၸဝ်ႈပၼ်ဢၶႂၢင်ႉႁႂ်ႈၵူၼ်းတင်းလၢႆလႆႈယူႇၵတ်းလီၼိမ်လီလူၺ်ႈၵၼ်တင်းၵူၼ်းမိူင်းၸမ်ၵၼ်ၸိူဝ်းၼၼ်ႉဢေႃႈ။-
ၵူၼ်းၼမ်ၼႃႇပႃးဢဝ်ၶိူင်ႈတၢင်းလူႇပုၼ်ႈ ထႃႇဝရႃႉၽြႃး၊ မႃးၵႃႈတီႈဝဵင်း ယေႇရုသလႅမ်ႇ၊ လႄႈဢဝ်လၢၵ်ႈသွင်ႇဢၼ်မီးၵႃႈမီးၶၼ်မႃးၵႃႈတီႈ ႁေႇၸၵိ၊ ၶုၼ်ႁေႃၶမ်း ယုတႃႉ၊ ၼၼ်ႉႁႂ်ႈမၼ်းထၢၼ်ႈပေႃးမီးမုၼ်မီးၽုင်းဢၼ်ယႂ်ႇၼႃႇသိုဝ်ႈၼႃႈတႂ်ႈတႃၵူၼ်းၵူႈၸိူဝ်ႉၵူႈမဵဝ်း၊ၸႃႉၸဵမ်ၶိင်ႇၵႃႇလႃႉၼၼ်ႉၵႂႃႇဢေႃႈ။
ၼႂ်းၶိင်ႇယၢမ်းၼၼ်ႉၶုၼ်ႁေႃၶမ်း ႁေႇၸၵိ၊ ပဵၼ်ၶႆႈပဵၼ်ၼၢဝ်ထၢၼ်ႈပေႃးၸမ်တၵ်းတၢႆဢေႃႈ။ မၼ်းသူးတွင်းလႄႈ ထႃႇဝရႃႉၽြႃး၊ ပၼ်ပျႃႇတိၵ်ႈၼိမိၵ်ႈလွင်ႈဢၼ်ယေႃးၵႃႇမၼ်းတၵ်းႁၢႆၼၼ်ႉဢေႃႈ။-
ၵူၺ်းၵႃႈ၊ ႁေႇၸၵိ၊ မီးၸႂ်ဢၼ်ၽႅၼ်သုင်ၼႃႇထၢၼ်ႈပေႃးဢမ်ႇၶုၵ်းၸႂ်လႆႈၵျေးၸူး ထႃႇဝရႃႉၽြႃး၊ ဢၼ်မီးၵႃႈတီႈမၼ်းၼၼ်ႉလႄႈတၢင်းၸႂ်မႆႈၶႂ်ႈၸႃႉၸဝ်ႈတူၵ်းႁွတ်ႈၵႃႈၼိူဝ်မၼ်း၊ဢိၵ်ႇတင်းၵႃႈၼိူဝ်မိူင်း ယုတႃႉ၊ တင်းဝဵင်း ယေႇရုသလႅမ်ႇ၊ တင်းလၢႆဢေႃႈ။-
ၼႂ်းဝႃႈၼၼ်သေၵေႃႈၵွပ်ႈပိူဝ်ႈဢၼ် ႁေႇၸၵိ၊ ၶုၵ်းၸႂ်လႆႈတၢင်းဢၼ်မၼ်းဝႆႉႁူဝ်ၸႂ်ၽႅၼ်သုင်မႃးၼၼ်ႉလႄႈမၼ်းတင်းၵူၼ်းဝဵင်း ယေႇရုသလႅမ်ႇ၊ တင်းလၢႆၶျႃးတူဝ်ၸဝ်ႈၵဝ်ႇတူၵ်းတႅမ်ႇသေလႄႈ ထႃႇဝရႃႉၽြႃး၊ ဢမ်ႇပၼ်တၢမ်ႇဢပျတ်ႈတီႈၵူၼ်းတင်းလၢႆတေႃႇထိုင်ႁွတ်ႈ ႁေႇၸၵိ၊ ၼွၼ်းၽႄးၵႂႃႇၼၼ်ႉဢေႃႈ။
ၶုၼ်ႁေႃၶမ်း ႁေႇၸၵိ၊ မီးၸေးၸိမ်ႇဢုၵ်ႉၸႃႇတင်းမုၼ်ၵုင်ႇသရေႇၼမ်ၼႃႇလူင်လၢင်ဢေႃႈ။ မၼ်းတႄႇႁဵတ်းတိူၵ်ႈၽၼ်ႇတႃႇတီႈဢၼ်သိမ်းငိုၼ်း၊ၶမ်း၊သႅင်မျၢတ်ႈ၊မဵဝ်းၼၢမ်ႇသႃႇ၊ၶႅပ်းႁႄႉလၢၵ်ႈၼၢၵ်ႈ၊ဢိၵ်ႇတင်းၶိူင်ႈဢၼ်လီဢၼ်ငၢမ်းတၢင်ႇၸိူဝ်ႉတၢင်ႇမဵဝ်းၼၼ်ႉဢေႃႈ။-
ၼွၵ်ႈသေၼၼ်ႉမၼ်းတႄႇႁဵတ်းယွင်ႁဵတ်းယေးဢၼ်သိမ်းဝႆႉၶဝ်ႈပိူၵ်ႇလႂ်၊ၼမ်ႉမၢၵ်ႇၸပိတ်ႉလႂ်၊တင်းၼမ်ႉမၼ်းသၢၼ်ႇလုၼ်ႇလႂ်၊တႄႇႁဵတ်းသိုင်ႇဝူဝ်းလႂ်၊ၶွၵ်ႈသူဝ်းလႂ်တင်းလၢႆဢေႃႈ။-
လိူဝ်သေၸိူဝ်းၼႆႉၽြႃးပဵၼ်ၸဝ်ႈပၼ်ၽုင်သူဝ်းၽုင်ဝူဝ်းတီႈမၼ်းၼမ်ၼႃႇ၊ဢိၵ်ႇတင်းဢုၵ်ႉၸႃႇၽၼ်ႇတႃႇၼမ်ၼႃႇလႄႈလႆႈတႄႇတင်ႈဝဵင်းၼမ်ၼႃႇဢေႃႈ။-
ႁေႇၸၵိ၊ ဢိုတ်းပႅတ်ႈႁူးၼမ်ႉဢၼ်မီးပႃႈၼိူဝ်ၼမ်ႉဢွၵ်ႇႁူး ၵိႁုၼ်ႇ၊ သေယဝ်ႉ၊ၶုတ်းႁွင်ႈႁႂ်ႈၼမ်ႉလႆၵႂႃႇၸူးၽၢႆႇတၢင်းၼႂ်းလမ်းဝဵင်း ယေႇရုသလႅမ်ႇ၊ သိုဝ်ႈသိုဝ်ႈဢေႃႈ။ ၼင်ႇၼၼ်လႄႈၵႃႈဢၼ် ႁေႇၸၵိ၊ ၵျၢမ်ႇပွင်ၼၼ်ႉမၼ်းႁဵတ်းလႆႈပဵၼ်လႆႈဢေႃႈ။-
ၼႂ်းလွင်ႈၵၢၼ်ငၢၼ်းသၢၼ်ႇတမၢၼ်ႇၶုၼ်ႁေႃၶမ်း ပႃႇပုလုၼ်ႇ၊ ပွႆႇၸႂ်ႉမႃးတွင်ႈထၢမ်လူၺ်ႈလွင်ႈတၢင်းဢၼ်လီဢၢမ်းဢၼ်ပဵၼ်မႃးၵႃႈတီႈမိူင်းၸဝ်ႈၼၼ်ႉၵေႃႈ၊ၽြႃးပဵၼ်ၸဝ်ႈႁႂ်ႈပဵၼ်ၸွမ်းဢလူဝ်ႇၶုၼ်ႁေႃၶမ်း ႁေႇၸၵိ၊ ႁႂ်ႈလႆႈၸၢမ်းတူၺ်းမၼ်းလႄႈႁုႁၼ်ၸႂ်သၽေႃးတင်းႁဵတ်းမၼ်းတင်းသဵင်ႈတင်းမူတ်းၼၼ်ႉဢေႃႈ။
လွင်ႈတၢင်းဢၼ် ႁေႇၸၵိ၊ သၢင်ႈပွင်ၵၢၼ်ငၢၼ်းၽြႃးပဵၼ်ၸဝ်ႈဢၼ်လီဢၼ်ငၢမ်းၸိူဝ်းၼၼ်ႉၸမ်ႉ၊လႆႈတႅမ်ႈမၢႆဝႆႉၵႃႈၼႂ်း ၵျၢမ်းလိၵ်ႈရူႇပႃႇရူင်ႇပရေႃးၽႅတ်ႈ၊ ဢိသႃႇယႃႉ၊ ၵေႃႉပဵၼ်လုၵ်ႈၸၢႆး ဢႃႇမူတ်ႉ၊ ဢိၵ်ႇတင်းၵႃႈၼႂ်း ပိုၼ်းၶုၼ်ႁေႃၶမ်းမိူင်းယုတႃႉ၊ ဢိၵ်ႇတင်းၵႃႈၼႂ်း ပိုၼ်းၶုၼ်ႁေႃၶမ်းမိူင်းဢိသရေး၊ ၼၼ်ႉဢေႃႈ။-
ႁေႇၸၵိ၊ ၼၼ်ႉၼွၼ်းၽႄးၸွမ်းပူႇမွၼ်ႇမၼ်းတင်းလၢႆလႄႈဢဝ်သၢင်းၵျူဝ်ႇဝႆႉၵႃႈတီႈသဵၼ်ႈတၢင်းဢၼ်ၶိုၼ်ႈၸူးပႃႇႁဵဝ်ႈလုၵ်ႈၸဝ်ႈလၢၼ်ၸဝ်ႈ တႃႇဝိတ်ႈ၊ ၸိူဝ်းၼၼ်ႉဢေႃႈ။ ၵူၼ်းမိူင်း ယုတႃႉ၊ ၵူၼ်းဝဵင်း ယေႇရုသလႅမ်ႇ၊ တင်းသဵင်ႈတင်းလူင်ဢွၼ်ၵၼ်ယုၵ်ႉယွင်ႈမုၼ်ၵုင်ႇသရေႇ ႁေႇၸၵိ၊ မိူဝ်ႈဢၼ်မၼ်းၼွၼ်းၽႄးၼၼ်ႉဢေႃႈ။ မၼႃႇသေႇ၊ လုၵ်ႈၸၢႆးၸဝ်ႈၼၼ်ႉသိုပ်ႇၼင်ႈႁၢင်ႈၼင်ႈႁေႃပေႃႈၸဝ်ႈမၼ်းဢေႃႈ။
မၼႃႇသေႇ၊ ၼၼ်ႉမိူဝ်ႈဢၼ်တႄႇၸႃႉၼင်ႈႁၢင်ႈၼင်ႈႁေႃၼၼ်ႉၸိုင်၊ဢသၢၵ်ႈမၼ်းလႆႈသိပ်းသွင်ပီလႄႈဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်း ယေႇရုသလႅမ်ႇ၊ ႁႃႈသိပ်းႁႃႈပီဢေႃႈ။-
မၼ်းႁဵတ်းတုၸရိူၵ်ႈဢပျတ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ၸွမ်းၼင်ႇထုင်းၸၢမ်ႇဢၼ်လီႁင်ႈဢဵတ်ႇသဵတ်ႇၵူၼ်းတၢင်ႇၸိူဝ်ႉတၢင်ႇၶိူဝ်းဢၼ် ထႃႇဝရႃႉၽြႃး၊ လိုပ်ႈဢွၵ်ႇပႅတ်ႈသေၵႃႈတီႈၽၢႆႇၼႃႈၵူၼ်းမဵဝ်း ဢိသရေး၊ တင်းလၢႆၸိူဝ်းၼၼ်ႉဢေႃႈ။-
မၼ်းမႄးၵုမ်းမႄးႁဵတ်းထႃႇၼႃႉတီႈသုင်ဢၼ်ၸဝ်ႈပေႃႈမၼ်း ႁေႇၸၵိ၊ ယႃႉပႅတ်ႈၸိူဝ်းၼၼ်ႉလႄႈတႄႇႁဵတ်းၶဵင်ႇတၢင်းလူႇပုၼ်ႈၽြႃး ပႃႇလႃႉ၊ လႂ်၊ၶွၵ်းႁဵတ်းသဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ လႂ်သေလႄႈႁဵတ်းဝၢတ်ႈၵူဝ်းၵႂၢႆႇတီႈၶိူင်ႈပိူင်ၽႃႉၵၢင်ႁၢဝ်ၵႃႈမီးၼၼ်ႉဢေႃႈ။-
မၼ်းတႄႇႁဵတ်းၶဵင်ႇတၢင်းလူႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈ၊တီႈဢၼ်မၼ်းၸဝ်ႈမီးဢမိင်ႉဝႆႉလႄႈဝႃႈ၊ “ၼႃႇမႃႉၸိုဝ်ႈသဵင်ၵဝ်တၵ်းလႆႈတႄႇယူႇၵႃႈၼႂ်းဝဵင်း ယေႇရုသလႅမ်ႇ၊ သေႇသေႇဢေႃႈ၊” ဝႃႈၼင်ႇၼႆဢေႃႈ။-
မၼ်းသမ်ႉတႄႇႁဵတ်းၶဵင်ႇတၢင်းလူႇပုၼ်ႈတၵ်းဝႆႈၶိူင်ႈပိူင်ၽႃႉၵၢင်ႁၢဝ်ၵႃႈမီးၼၼ်ႉၵႃႈၼႂ်းပၢင်ႇဝၢင်းၵျွင်းပိၵ်ႈမၢၼ်ႇၸဝ်ႈတင်းသွင်တီႈဢေႃႈ။-
မၼ်းဢဝ်လုၵ်ႈလၢင်းမၼ်းသၢၵ်ႈၵၢပ်ႈလႄႈႁႂ်ႈပဵၼ်ၶိူင်ႈတၢင်းလူႇဢၼ်တုတ်ႇၽႆးၵႃႈၼႂ်းထူင်ႉႁူၺ်ႈ ႁိၼ်ႇၼုမ်ႇ၊ ဢေႃႈ။ မၼ်းတူၺ်းပေႇတၢင်ႇၵႃႇလႃးလႂ်၊ႁဵတ်းဢတၢတ်ႈၽီမေႃႇလႂ်လႄႈပၼ်ဢၶႂၢင်ႉတီႈၽိူဝ်ႉလႂ်ၽီလႂ်ၸိူဝ်းၼၼ်ႉဢေႃႈ။ မၼ်းႁဵတ်းတုၸရိူၵ်ႈၼမ်ၼႃႇသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ လႄႈပဵၼ်တၢင်းဢၼ်ႁဵတ်းႁႂ်ႈမၼ်းၸဝ်ႈမီးတၢင်းဢၼ်ၸႂ်မႆႈၶႂ်ႈၸႃႉဢေႃႈ။-
မၼ်းဢဝ်ႁုၼ်ႇႁၢင်ႈသၢင်းထုဢၼ်မၼ်းၶွၵ်းႁဵတ်းၼၼ်ႉတင်ႈဝႆႉၵႃႈၼႂ်းၵျွင်းပိၵ်ႈမၢၼ်ႇၸဝ်ႈဢၼ်ၽြႃးပဵၼ်ၸဝ်ႈမီးဢမိင်ႉတီႈ တႃႇဝိတ်ႈ၊ ဢိၵ်ႇတင်းလုၵ်ႈၸၢႆးၸဝ်ႈ သေႃးလမုၼ်ႇ၊ လႄႈဝႃႈ၊ “ၵဝ်တၵ်းႁႂ်ႈၼႃႇမႃႉၸိုဝ်ႈသဵင်ၵဝ်တႄႇယူႇတႃႇသေႇၵႃႈၼႂ်းႁိူၼ်းၸဝ်ႈၼႆႉ၊ဢိၵ်ႇတင်းၵႃႈၼႂ်းဝဵင်း ယေႇရုသလႅမ်ႇ၊ ပဵၼ်ထႃႇၼႃႉတီႈဢၼ်ၵဝ်လႆႈလိူၵ်ႈၵဵပ်းဢဝ်သေၵႃႈၼႂ်းသိုင်ႇၼႂ်းတိူင်းၸိူဝ်ႉၶိူဝ်း ဢိသရေး၊ သိပ်းသွင်ဢိူင်ႇၼႆႉႁႂ်ႈပဵၼ်တီႈဢၼ်ဝႆႈ ထႃႇဝရႃႉၽြႃး၊ သူႇလဵဝ်ပႃးလဵဝ်ၵူၺ်းတႃႉ။-”
မၼ်းၸဝ်ႈလၢတ်ႈလႄႈဝႃႈ၊ “ပေႃႈၵူၼ်းမဵဝ်း ဢိသရေး၊ တင်းလၢႆ ဝႆႉသတိလႄႈၵမ်ၵျၢင်ႉႁဵတ်းၸွမ်းၵႃႈဢၼ်ၵဝ်မီးဢမိင်ႉဝႆႉ၊ဢၼ်ပဵၼ်တြႃးၸဝ်ႈ၊ထုင်းၽိင်ႈတြႃးတင်းလၢႆ၊ဢၼ်ၵဝ်ပၼ်ဝႆႉတီႈ မူဝ်းသေႇ၊ ၸိူဝ်းၼၼ်ႉၸိုင်၊ၵမ်းလိုၼ်းၵဝ်တၵ်းဢမ်ႇႁႂ်ႈတိၼ်ၶဝ်လႆႈယၢင်ႈဢွၵ်ႇသေၵႃႈၼႂ်းမိူင်းဢၼ်ၵဝ်ပၼ်တီႈပူႇသူမွၼ်ႇသူၼၼ်ႉယဝ်ႉ၊” ဝႃႈၼင်ႇၼႆၼၼ်ႉသေၵေႃႈ၊-
မၼႃႇသေႇ၊ ၼၼ်ႉႁဵတ်းႁႂ်ႈၵူၼ်းမိူင်း ယုတႃႉ၊ ၵူၼ်းဝဵင်း ယေႇရုသလႅမ်ႇ၊ တင်းလၢႆၽိတ်းတၢင်းပိူင်ႈတၢင်းၵႂႃႇထၢၼ်ႈပေႃးယဵင်ႈၶႅၼ်းႁၢႆႉမိူၵ်ႈၼႃႇသေၵူၼ်းၵူႈၸိူဝ်ႉၵူႈမဵဝ်းဢၼ် ထႃႇဝရႃႉၽြႃး၊ လႆႈယႃႉၽဵဝ်ႈပႅတ်ႈသေၵႃႈတီႈၽၢႆႇၼႃႈၵူၼ်းမဵဝ်း ဢိသရေး၊ တင်းလၢႆၸိူဝ်းၼၼ်ႉမႃးယဝ်ႉ။
ထႃႇဝရႃႉၽြႃး၊ မီးဢမိင်ႉတီႈ မၼႃႇသေႇ၊ ဢိၵ်ႇတင်းၵူၼ်းမၼ်းတင်းလၢႆဢေႃႈ။ ၵူၺ်းၵႃႈ၊ၶဝ်ဢမ်ႇထွမ်ႇဢမ်ႇဢဝ်။-
ပိူဝ်ႈၼႆလႄႈ ထႃႇဝရႃႉၽြႃး၊ ႁႂ်ႈၸဝ်ႈၵွၼ်းတပ်ႉသိုၵ်းလူင်ၶုၼ်ႁေႃၶမ်း ဢႃႇသီးရီးယႃး၊ တင်းလၢႆၶီႇသိုၵ်းမႃးတိုၵ်းပႄႉၶဝ်သေယဝ်ႉ၊တိမတ်ႉဢဝ် မၼႃႇသေႇ၊ လႄႈဢဝ်ၶေႃတွင်းလိူင်ၵွင်ႉသႂ်ႇဝႆႉယဝ်ႉၸင်ႇ၊ဢဝ်ၸိူၵ်ႈလဵၵ်းမတ်ႉၶင်ဝႆႉသေယဝ်ႉ၊ဢဝ်မၼ်းၵႂႃႇၵႃႈတီႈဝဵင်း ပႃႇပုလုၼ်ႇ၊ သေဢေႃႈ။-
မၼႃႇသေႇ၊ ၼၼ်ႉၼႂ်းမိူဝ်ႈဢၼ်မၼ်းလႆႈၶၢမ်ႇတုၵ်ႉၶႃႉတၢင်းၽၢၼ်ၸိူဝ်ႉၼင်ႇၼၼ်ၼၼ်ႉၸိုင်၊မၼ်းတွင်းပၢၼ်ႇတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈလႄႈၶျႃးတူဝ်ၸဝ်ႈၵဝ်ႇတူၵ်းတီႈတႅမ်ႇၼႃႇလူင်လၢင်ၵႃႈတီႈၽၢႆႇၼႃႈၽြႃးပဵၼ်ၸဝ်ႈပူႇမၼ်းမွၼ်ႇမၼ်းသေလႄႈ၊-
မၼ်းသူးတွင်းတီႈၽြႃးပဵၼ်ၸဝ်ႈလႄႈၽြႃးပဵၼ်ၸဝ်ႈၵေႃႈထွမ်ႇငိၼ်းလႄႈႁပ်ႉတုင်းဢဝ်ၵႂၢမ်းသူးတွင်းပထၼႃႇမၼ်းၼၼ်ႉသေယဝ်ႉ၊သမ်ႉၶိုၼ်းဢဝ်မၼ်းမႃးသူင်ႇၵႃႈတီႈဝဵင်း ယေႇရုသလႅမ်ႇ၊ သိုင်ႇၸိုင်ႈဝၢၼ်ႈမိူင်းဢၼ်မၼ်းဢုပ်ႉပိူင်ႇယူႇၵဝ်ႇၵဝ်ႇၼၼ်ႉဢေႃႈ။ မိူဝ်ႈၼၼ်ႉ မၼႃႇသေႇ၊ လႆႈႁုလွင်ႈဢၼ် ထႃႇဝရႃႉၽြႃး၊ ၼၼ်ႉပဵၼ်ၽြႃးပဵၼ်ၸဝ်ႈဢေႃႈ။
လိုၼ်းၼၼ်ႉမၼ်းတႄႇႁဵတ်းလမ်းဝဵင်းထၢပ်ႈၼွၵ်ႈၵႃႈတီႈဝဵင်း တႃႇဝိတ်ႈ၊ ၵႃႈၼႂ်းၶူင်ႇႁူၺ်ႈၽၢႆႇတၢင်းဝၼ်းတူၵ်း ၵိႁုၼ်ႇ၊ တေႃႇထိုင်ႁွတ်ႈၵႃႈတီႈၽၵ်းတူဝဵင်းဢၼ်မီးၸိုဝ်ႈဝႃႈ၊ ၽၵ်းတူပႃ၊ ၼၼ်ႉလႄႈႁဵတ်းလဵပ်ႈႁွပ်ႈၸွမ်းႁိမ်းတိူၵ်ႈတီႈတိုၵ်းသိုၵ်း ဢေႃးၽေႇလႃႉ၊ ၼၼ်ႉသေလႄႈႁႂ်ႈသုင်ၼႃႇလူင်လၢင်ဢေႃႈ။ မၼ်းၶၢၼ်းၸဝ်ႈသိုၵ်းၵွၼ်းတပ်ႉတင်းလၢႆဝႆႉၵႃႈၼႂ်းဝဵင်းဢၼ်မၼ်ႈၶိူင်ႇၵႃႈဢၼ်မီးၵႃႈၼႂ်းမိူင်း ယုတႃႉ၊ ၸိူဝ်းၼၼ်ႉဢေႃႈ။-
မၼ်းပႄႇၽဵဝ်ႈပႅတ်ႈၽြႃးၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ၊ႁုၼ်ႇႁၢင်ႈသၢင်းထုဢၼ်မၼ်းႁဵတ်းၼၼ်ႉသေၵႃႈၼႂ်းၵျွင်းပိၵ်ႈမၢၼ်ႇၸဝ်ႈ၊ဢိၵ်ႇတင်းၶဵင်ႇတၢင်းလူႇၵႃႈဢၼ်မၼ်းတႄႇႁဵတ်းဝႆႉၵႃႈၼိူဝ်လွႆဢၼ်မီးၵျွင်းပိၵ်ႈမၢၼ်ႇၸဝ်ႈ၊ဢိၵ်ႇတင်းၵႃႈၼႂ်းဝဵင်း ယေႇရုသလႅမ်ႇ၊ ၸိူဝ်းၼၼ်ႉ၊မၼ်းဢဝ်ဢွၵ်ႇၵႂႃႇပႅတ်ႈၵႃႈၼွၵ်ႈဝဵင်းသေဢေႃႈ။-
မၼ်းမႄးၵုမ်းမႄးႁဵတ်းၶဵင်ႇတၢင်းလူႇ ထႃႇဝရႃႉၽြႃး၊ လႄႈသၢၵ်ႈၵၢပ်ႈၶိူင်ႈတၢင်းလူႇပုၼ်ႈမိၵ်ႈသႁႃႇယႃႉ၊ဢိၵ်ႇတင်းၶိူင်ႈတၢင်းလူႇဢၼ်တၢင်ႇၵျေးၸူးၽြႃးပဵၼ်ၸဝ်ႈၵႃႈၼိူဝ်ၼၼ်ႉဢေႃႈ။ မၼ်းသင်ႇလၢတ်ႈတီႈၵူၼ်းမိူင်း ယုတႃႉ၊ တင်းလၢႆ၊ႁႂ်ႈႁဵတ်းဝၢတ်ႈတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ၼၼ်ႉဢေႃႈ။-
ၼႂ်းဝႃႈၼၼ်သေၵေႃႈၵူၼ်းဝၢၼ်ႈၵူၼ်းမိူင်းၸိူဝ်းၼၼ်ႉယင်းသၢၵ်ႈလူႇၶိူင်ႈတၢင်းလူႇၵႃႈၼိူဝ်ထႃႇၼႃႉတီႈသုင်တင်းလၢႆယူႇသေၵေႃႈ၊ၶဝ်ဢွၼ်ၵၼ်သၢၵ်ႈလူႇၵႃႈတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်ၵူၺ်းဢေႃႈ။
လွင်ႈတၢင်းႁဵတ်း မၼႃႇသေႇ၊ ဢၼ်ယင်းၵိုတ်းယင်းၵျၢၼ်ႇ၊လွင်ႈတၢင်းဢၼ်မၼ်းသူးတွင်းတီႈၽြႃးပဵၼ်ၸဝ်ႈမၼ်းဢိၵ်ႇတင်းၵႂၢမ်းဢၼ်ၶဝ်ၸိူဝ်းဢၼ်ႁူပွင်ႇတႃလႅင်းဢၼ်ဢိင်ၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ သေလႄႈႁေႃးလၢတ်ႈတီႈမၼ်းၸိူဝ်းၼၼ်ႉတႅမ်ႈမၢႆဝႆႉၵႃႈၼႂ်း ပိုၼ်းၶုၼ်ႁေႃၶမ်းမိူင်းဢိသရေး၊ ဢေႃႈ။-
လွင်ႈတၢင်းဢၼ်မၼ်းသူးတွင်း၊လွင်ႈတၢင်းဢၼ်ၽြႃးပဵၼ်ၸဝ်ႈထွမ်ႇဢဝ်ၵႂၢမ်းမၼ်း၊လွင်ႈတၢင်းဢၼ်မၼ်းၽိတ်းပိူင်ႈပူၼ်ႉလိူဝ်၊လွင်ႈတၢင်းဢၼ်မၼ်းတႄႇႁဵတ်းထႃႇၼႃႉတီႈသုင်တင်းလၢႆလႄႈပူၵ်းတင်ႈသဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ လႂ်ဢိၵ်ႇတင်းႁုၼ်ႇႁၢင်ႈသၢင်းထုလႂ်၊ၸူဝ်ႈဢၼ်မၼ်းဢမ်ႇပႆႇၶျႃးတူဝ်ၸဝ်ႈၵဝ်ႇတူၵ်းတီႈတႅမ်ႇၸိူဝ်းၼၼ်ႉၸိုင်၊တႅမ်ႈမၢႆဝႆႉၵႃႈၼႂ်းလိၵ်ႈပိုၼ်းၵေႃႉဢၼ်ႁူပွင်ႇတႃလႅင်းၼၼ်ႉဢေႃႈ။-
မၼႃႇသေႇ၊ ၼၼ်ႉၼွၼ်းၽႄးၸွမ်းပူႇမွၼ်ႇမၼ်းတင်းလၢႆလႄႈဢဝ်သၢင်းၵျူဝ်ႇဝႆႉၵႃႈၼႂ်းႁေႃမၼ်းဢေႃႈ။ ဢႃႇမုၼ်ႇ၊ ၵေႃႉပဵၼ်လုၵ်ႈၸၢႆးၸဝ်ႈၼၼ်ႉသိုပ်ႇၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။
ဢႃႇမုၼ်ႇ၊ ၼၼ်ႉမိူဝ်ႈဢၼ်ၶိုၼ်ႈၼင်ႈႁၢင်ႈၼင်ႈႁေႃၼၼ်ႉၸိုင်၊ဢသၢၵ်ႈမၼ်းလႆႈသၢဝ်းသွင်ပီလႄႈဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်း ယေႇရုသလႅမ်ႇ၊ သွင်ပီဢေႃႈ။-
မၼ်းႁဵတ်းတုၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ မိူၼ်ၸိူဝ်ႉၼင်ႇဢၼ်ၸဝ်ႈပေႃႈမၼ်း မၼႃႇသေႇ၊ ႁဵတ်းၼၼ်ႉဢေႃႈ။ ဢႃႇမုၼ်ႇ၊ ၼၼ်ႉသၢၵ်ႈလူႇၶိူင်ႈတၢင်းလူႇတီႈႁုၼ်ႇႁၢင်ႈသၢင်းထုဢၼ်ပေႃႈၸဝ်ႈမၼ်းသၢင်ႈႁဵတ်းဝႆႉၸိူဝ်းၼၼ်ႉလႄႈၵူဝ်းၵႂၢႆႇဝႆႈသႃဢေႃႈ။-
မၼ်းယင်းဢမ်ႇၶျႃးတူဝ်ၸဝ်ႈၵဝ်ႇတူၵ်းတီႈတႅမ်ႇၵႃႈတီႈၽၢႆႇၼႃႈ ထႃႇဝရႃႉၽြႃး၊ မိူၼ်ၸိူဝ်ႉၼင်ႇဢၼ်ၸဝ်ႈပေႃႈမၼ်း မၼႃႇသေႇ၊ ၶျႃးတူဝ်ၸဝ်ႈၵဝ်ႇတူၵ်းတီႈတႅမ်ႇၼၼ်ႉလႄႈ ဢႃႇမုၼ်ႇ၊ ၼၼ်ႉယဵင်ႈၶႅၼ်းႁဵတ်းဢၼ်ၽိတ်းပိူင်ႈၼမ်ၶိုၼ်ႈတိၵ်းတိၵ်းဢေႃႈ။
ၶႃႈမၼ်းၵူၼ်းမၼ်းတင်းလၢႆ၊ဢွၼ်ၵၼ်လွမ်ႁဵတ်းတၢင်းဢၼ်လုၵ်ႉၽိုၼ်ႉမၼ်းလႄႈဢဝ်မၼ်းတၢႆၵႃႈၼႂ်းႁေႃၸဝ်ႈဢေႃႈ။-
ၵူၺ်းၵႃႈ၊ၶႃႈဝၢၼ်ႈၵူၼ်းမိူင်းတင်းလၢႆ၊ဢွၼ်ၵၼ်ၶႃႈၽၼ်းပႅတ်ႈၶဝ်ၸိူဝ်းဢၼ်လုၵ်ႉၽိုၼ်ႉၶုၼ်လူင် ဢႃႇမုၼ်ႇ၊ ၼၼ်ႉသေလႄႈၵူၼ်းဝၢၼ်ႈၵူၼ်းမိူင်းၸိူဝ်းၼၼ်ႉယုၵ်ႉတၢင်ႇလုၵ်ႈၸၢႆးမၼ်း ယူဝ်းသိယႃႉ၊ ႁႂ်ႈလႆႈသိုပ်ႇၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။
ယူဝ်းသိယႃႉ၊ ၼၼ်ႉမိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉၸိုင်၊ဢသၢၵ်ႈမၼ်းလႆႈပႅတ်ႇပီလႄႈဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်း ယေႇရုသလႅမ်ႇ၊ သၢမ်သိပ်းဢဵတ်းပီဢေႃႈ။-
မၼ်းႁဵတ်းတၢင်းဢၼ်ထုၵ်ႇဢၼ်မႅၼ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ လႄႈၸွမ်းသဵၼ်ႈတၢင်းဢၼ် တႃႇဝိတ်ႈ၊ ပူႇမွၼ်ႇမၼ်းၸွမ်းၼၼ်ႉသေလႄႈပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၽြႃးပဵၼ်ၸဝ်ႈသိုဝ်ႈသိုဝ်ႈယူဝ်းယူဝ်းဢေႃႈ။
ၼႂ်းပီဢၼ်ၶုၼ်ႁေႃၶမ်း ယူဝ်းသိယႃႉ၊ ၸၢမ်ႇႁၢင်ႈၸၢမ်ႇႁေႃလႆႈပႅတ်ႇပီၼၼ်ႉၼႂ်းမိူဝ်ႈဢသၢၵ်ႈမၼ်းယင်းလဵၵ်ႉယင်းၼုမ်ႇယူႇၼၼ်ႉလႄႈ၊မၼ်းတႄႇၸႃႉၶဝ်ႈႁႃၽြႃးပဵၼ်ၸဝ်ႈဢၼ်ပဵၼ်ၽြႃးပူႇမွၼ်ႇမၼ်း တႃႇဝိတ်ႈ၊ ၼၼ်ႉဢေႃႈ။ ၼႂ်းပီဢၼ်ထူၼ်ႈထိုင်သိပ်းသွင်ပီၼၼ်ႉ၊မၼ်းတႄႇၸႃႉယႃႉၽဵဝ်ႈပႅတ်ႈထႃႇၼႃႉတီႈသုင်လႂ်၊သဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ လႂ်၊ႁုၼ်ႇႁၢင်ႈသၢင်းထုဢၼ်တွင်ႈႁဵတ်းၶွၵ်းႁဵတ်းလႂ်၊ႁုၼ်ႇႁၢင်ႈသၢင်းထုဢၼ်သွၼ်းႁဵတ်းလေႃႇႁဵတ်းလႂ်သေၵႃႈၼႂ်းမိူင်း ယုတႃႉ၊ တင်းဝဵင်း ယေႇရုသလႅမ်ႇ၊ ဢေႃႈ။-
ၶဝ်ဢွၼ်ၵၼ်ၵိူၼ်ႇယႃႉၶဵင်ႇတၢင်းလူႇၽြႃး ပႃႇလႃႉ၊ တင်းလၢႆတူၵ်းပႅတ်ႈသေၵႃႈတီႈၽၢႆႇၼႃႈမၼ်းလႄႈယႃႉပႅတ်ႈလူမ်ႉပႅတ်ႈၶဵင်ႇဢၼ်ၽဝ်ၼၢမ်ႇသႃႇဢၼ်မီးၵႃႈၼိူဝ်ၼၼ်ႉဢေႃႈ။ မၼ်းႁၵ်းႁိၵ်းပႅတ်ႈသဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ လႂ်၊ႁုၼ်ႇႁၢင်ႈသၢင်းထုဢၼ်တွင်ႈႁဵတ်းၶွၵ်းႁဵတ်းလႂ်၊ဢိၵ်ႇတင်းႁုၼ်ႇႁၢင်ႈသၢင်းထုဢၼ်သွၼ်းႁဵတ်းလေႃႇႁဵတ်းလႂ်ပႅတ်ႈလႄႈတမ်ႁႂ်ႈပဵၼ်မုၼ်ႈပဵၼ်ၽွင်သေယဝ်ႉ၊ဢဝ်ၽၢဝ်ႇဢဝ်ပိုၼ်ၵႃႈၼိူဝ်ၶုမ်ပႃႇႁဵဝ်ႈၶဝ်ၸိူဝ်းဢၼ်ဝႆႈလႄႈသၢၵ်ႈလူႇတီႈႁုၼ်ႇႁၢင်ႈသၢင်းထုၸိူဝ်းၼၼ်ႉဢေႃႈ။-
မၼ်းဢဝ်လုပ်ႇယဵၸ်ႈပရေႃးႁဵၵ်ႈၽြႃးတၢင်ႇမဵဝ်းတင်းလၢႆ၊တုတ်ႇၽႆးၵႃႈၼိူဝ်ၶဵင်ႇတၢင်းလူႇၶဝ်ၸိူဝ်းၼၼ်ႉသေလႄႈႁႂ်ႈမိူင်း ယုတႃႉ၊ တင်းဝဵင်း ယေႇရုသလႅမ်ႇ၊ မူတ်းသႂ်ဢေႃႈ။-
မိူၼ်ၼင်ႇၼၼ်မၼ်းႁဵတ်းတီႈဝဵင်းတင်းလၢႆ၊ၵႃႈၼႂ်းဢိူင်ႇ မၼႃႇသေႇ၊ ဢိူင်ႇ ဢေႇၽရိမ်ႇ၊ ဢိူင်ႇ သိမူၼ်ႇ၊ တေႃႇထိုင်ႁွတ်ႈဢိူင်ႇ ၼပ်ႉထလိ၊ ၵႃႈၼႂ်းဝၢၼ်ႈလုဝဵင်းႁၢမ်းၸိူဝ်းၼၼ်ႉလႄႈ၊-
ႁၵ်းႁိၵ်းၶဵင်ႇတၢင်းလူႇလႂ်ပႅတ်ႈ၊ဢဝ်ပႅတ်ႈသဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ လႂ်ဢိၵ်ႇတင်းႁုၼ်ႇႁၢင်ႈသၢင်းသုဢၼ်တွင်ႈႁဵတ်းၶွၵ်းႁဵတ်းလႂ်၊တွႆႇတမ်ႁႂ်ႈပဵၼ်မုၼ်ႈပဵၼ်ၽွင်၊ပွမ်ႈပႅတ်ႈႁုၼ်ႇႁၢင်ႈၵႃႈဢၼ်မီးၵႃႈၼႂ်းမိူင်း ဢိသရေး၊ ၵႃႈမီးတင်းသဵင်ႈတင်းမူတ်းၼၼ်ႉလူမ်ႉပႅတ်ႈသေလႄႈၶိုၼ်းမိူဝ်းၵႂႃႇၵႃႈတီႈဝဵင်း ယေႇရုသလႅမ်ႇ၊ သေဢေႃႈ။
ၼႂ်းပီဢၼ်မၼ်းၸၢမ်ႇႁၢင်ႈၸၢမ်ႇႁေႃထူၼ်ႈထိုင်သိပ်းပႅတ်ႇပီၼၼ်ႉ၊မၼ်းႁႂ်ႈသိုင်ႇၸိုင်ႈဝၢၼ်ႈမိူင်းၸဝ်ႈတင်းၵျွင်းပိၵ်ႈမၢၼ်ႇၸဝ်ႈမူတ်းသႂ်သေယဝ်ႉ၊ၸႂ်ႉ သႃႇၽၢၼ်ႇ၊ လုၵ်ႈၸၢႆး ဢႃႇၸၸိ၊ မဵဝ်ႉဝုၼ်ႇ မႃႇသေႇယႃႉ၊ ဢိၵ်ႇတင်းဢတႂၢင်းဝုၼ်ႇ ယူဝ်းဢေးလႃႉ၊ လုၵ်ႈၸၢႆး ယေႃးၶတ်ႉ၊ ႁႂ်ႈၶဝ်မႄးၵုမ်းမႄးႁဵတ်းၵျွင်းပိၵ်ႈမၢၼ်ႇၽြႃးပဵၼ်ၸဝ်ႈမၼ်းဢေႃႈ။-
ၶဝ်ၼၼ်ႉဢွၼ်ၵၼ်မႃးၸူးၵႃႈတီႈၶုၼ်ယဵၸ်ႈပရေႃးႁဵၵ်ႈ ႁိလၶိ၊ လႄႈဢဝ်ငိုၼ်းဢၼ်ၵူၼ်းတင်းလၢႆမႃးလူႇၵႃႈတီႈၵျွင်းပိၵ်ႈမၢၼ်ႇၸဝ်ႈ၊ဢၼ်ၵူၼ်းပႂ်ႉၽၵ်းတူၵူၼ်းမဵဝ်း လေႇဝိ၊ ၶဝ်ၵဵပ်းၶၢမ်ႇဢဝ်ၵႃႈတီႈမိုဝ်းၵူၼ်းမဵဝ်း မၼႃႇသေႇ၊ ၵူၼ်းမဵဝ်း ဢေႇၽရိမ်ႇ၊ ၵူၼ်းမဵဝ်း ဢိသရေး၊ ဢၼ်ၵိုတ်းဢၼ်ၵျၢၼ်ႇၵႃႈမီး၊ဢိၵ်ႇတင်းၵႃႈတီႈၵူၼ်းမဵဝ်း ယုတႃႉ၊ ၵူၼ်းမဵဝ်း ပိၼ်ႇယႃႇမိၼ်ႇ၊ ဢိၵ်ႇတင်းၵူၼ်းဝဵင်း ယေႇရုသလႅမ်ႇ၊ တင်းသဵင်ႈတင်းလူင်ၼၼ်ႉသေလႄႈ၊-
ဢၢပ်ႈပၼ်ၵႃႈၼႂ်းမိုဝ်းၶဝ်ၸိူဝ်းဢၼ်ဢုပ်ႉထိင်းလူတူၺ်းၵျွင်းပိၵ်ႈမၢၼ်ႇၸဝ်ႈၸိူဝ်းၼၼ်ႉသေယဝ်ႉ၊ၶဝ်ၼၼ်ႉသမ်ႉဢွၼ်ၵၼ်ဢၢပ်ႈပၼ်မႅင်ႇပၼ်တီႈၶဝ်ၸိူဝ်းဢၼ်သၢင်ႈႁဵတ်းႁႂ်ႈလႆႈမႄႈၵုမ်းမေးႁဵတ်းၵျွင်းပိၵ်ႈမၢၼ်ႇၸဝ်ႈႁႂ်ႈမၼ်ႈၶိူင်ႇ၊-
ၶဝ်ဢဝ်ဢၢပ်ႈပၼ်တီႈၸၢင်ႈမႆႉလႂ်၊တင်းတီႈၵူၼ်းဢၼ်ႁဵတ်းဢၼ်သၢင်ႈၼၼ်ႉလႂ်၊ပုၼ်ႈတႃႇတၵ်းသိုဝ်ႉမၢၵ်ႇႁိၼ်ဢၼ်သပ်းယဝ်ႉထၢၵ်ႇယဝ်ႉလႂ်၊ဢိၵ်ႇတင်းမႆႉၶိုဝ်ႇ၊မႆႉပႄ၊မႆႉတူင်၊မႆႉၵွၼ်၊မႄးႁဵတ်းမႄးသၢင်ႈႁိူၼ်းတိူၵ်ႈဢၼ်ၶုၼ်ႁေႃၶမ်း ယုတႃႉ၊ တင်းလၢႆပွႆႇပႅတ်ႈဝႆႉလႄႈလုလႅဝ်ၵႂႃႇၼၼ်ႉဢေႃႈ။-
ၶဝ်ၸိူဝ်းဢၼ်သၢင်ႈႁဵတ်းၼၼ်ႉၵေႃႈပႃးတင်းၸႂ်သိုဝ်ႈယူဝ်းၸႂ်သဵတ်ႈၸႃႇသေလႄႈသၢင်ႈႁဵတ်းဢေႃႈ။ ၵူၼ်းဢၼ်ဢုပ်ႉထိင်းၵႃႈၼိူဝ်ၵၢၼ်ငၢၼ်းၼၼ်ႉပဵၼ်ၵူၼ်းမဵဝ်း လေႇဝိ၊ ဢၼ်ပဵၼ် ယႃႇႁတ်ႉ၊ တင်း ဢေႃးပတိ၊ လုၵ်ႈလၢၼ် မေႇရႃႇရိ၊ ဢိၵ်ႇတင်း ၸႃႇၶရိ၊ လႄႈ မေႇသုလမ်ႇ၊ ၵေႃႉပဵၼ်လၢၼ် ၵေႃႇႁတ်ႉ၊ ၼၼ်ႉၶဝ်ၸိူဝ်းၼၼ်ႉပဵၼ်ၵူၼ်းဢၼ်ဢွၼ်ႁူဝ်လႄႈၵူၼ်းမဵဝ်း လေႇဝိ၊ တင်းလၢႆၼၼ်ႉၵတ်ႉၶႅၼ်ႇၽၢႆႇႁႆႇတိုင်ႈတူႇရိယႃႇလႂ်ဢေႃႈ။-
ၵူၼ်း လေႇဝိ၊ တၢင်ႇၵေႃႉလႆႈဢုပ်ႉထိင်းလူတူၺ်း ၵႃႈၼိူဝ်ၶဝ်ၸိူဝ်းဢၼ်လႆႈႁၢပ်ႇလႆႈႁၢမ်ၼၼ်ႉလႄႈၵူၼ်းႁဵတ်းၵၢၼ်ၸိူဝ်းၼၼ်ႉလႆႈႁဵတ်းလႆႈသၢင်ႈၵူႈလွင်ႈလွင်ႈဢေႃႈ။ ၵူၼ်း လေႇဝိ၊ ၵမ်ႈၽွင်ႈၵေႃႈလႆႈပဵၼ်ၽူႈမၢႆလႂ်၊ၵူၼ်းလူင်ဢၼ်ပွင်ၵၢၼ်ၼႂ်းႁေႃလႂ်၊ၵူၼ်းႁူဝ်ၼႃႈဢၼ်ပႂ်ႉၽၵ်းတူလႂ်ဢေႃႈ။
မိူဝ်ႈဢၼ်ၶဝ်ဢဝ်ငိုၼ်းဢွၵ်ႇမႃးသေၵႃႈတီႈၵျွင်းပိၵ်ႈမၢၼ်ႇၸဝ်ႈၼၼ်ႉၸိုင်၊ယဵၸ်ႈပရေႃးႁဵၵ်ႈ ႁိလၶိ၊ ထူပ်းႁၼ်လိၵ်ႈပိင်းၺၢပ်ႈတြႃးဢၼ် ထႃႇဝရႃႉၽြႃး၊ ပၼ်မႃးၵႃႈတီႈ မူဝ်းသေႇ၊ ၼၼ်ႉလႄႈ၊-
ႁိလၶိ၊ ၼၼ်ႉမွၵ်ႇလၢတ်ႈလွင်ႈဢၼ်ထူပ်းႁၼ်ၼၼ်ႉတီႈ သႃႇၽၢၼ်ႇ၊ ၵေႃႉပဵၼ်ၽူႈမၢႆၸဝ်ႈလႄႈဝႃႈ၊ “ၵဝ်ထူပ်းလိၵ်ႈပိင်းၺၢပ်ႈတြႃးၵႃႈၼႂ်းၵျွင်းပိၵ်ႈမၢၼ်ႇၸဝ်ႈယဝ်ႉ၊” ဝႃႈၼင်ႇၼႆသေလႄႈ၊ ႁိလၶိ၊ ၵေႃႈဢဝ်လိၵ်ႈပိင်းၺၢပ်ႈတြႃးဢၢပ်ႈပၼ်တီႈ သႃႇၽၢၼ်ႇ၊ သေဢေႃႈ။-
သႃႇၽၢၼ်ႇ၊ ၵေႃႈဢဝ်လိၵ်ႈပိင်းၺၢပ်ႈတြႃးၼၼ်ႉၵႂႃႇၸူးၵႃႈတီႈၶုၼ်ႁေႃၶမ်းသေလႄႈလဝ်ႈလၢတ်ႈဝႃႈ၊ “တၢင်းႁဵတ်းၵႃႈဢၼ်ၸဝ်ႈႁဝ်းသင်ႇလၢတ်ႈတီႈၶႃႈၸႂ်ႉၸဝ်ႈႁဝ်းၼၼ်ႉ၊ၶဝ်ဢွၼ်ၵၼ်ႁဵတ်းတီႈၶႃႈဢေႃႈ။-
ၶဝ်ဢဝ်ငိုၼ်းဢၼ်ထူပ်းႁၼ်ၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉဢွၵ်ႇသေယဝ်ႉ၊ဢဝ်ဢၢပ်ႈပၼ်ၵႃႈၼႂ်းမိုဝ်းၵူၼ်းဢၼ်ဢုပ်ႉထိင်းလႂ်၊ဢိၵ်ႇတင်းတီႈၵူၼ်းဢၼ်ႁဵတ်းၵၢၼ်ႁဵတ်းငၢၼ်းၸိူဝ်းၼၼ်ႉတီႈၶႃႈယဝ်ႉ၊-”
ၽူႈမၢႆလူင် သႃႇၽၢၼ်ႇ၊ သမ်ႉလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “ယဵၸ်ႈပရေႃးႁဵၵ်ႈ ႁိလၶိ၊ ၼၼ်ႉဢဝ်ၽိုၼ်လိၵ်ႈဢၢပ်ႈပၼ်တီႈၶႃႈၸဝ်ႈတီႈၶႃႈဢေႃႈ၊” ဝႃႈၼင်ႇၼႆသေယဝ်ႉ၊ၽတ်းႁေႃးၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။
ၶုၼ်ႁေႃၶမ်းငိၼ်းၵႂၢမ်းတြႃးၼၼ်ႉသေယဝ်ႉ၊သိၵ်ႇၶူဝ်းၼုင်ႈမၼ်းၸဝ်ႈလႄႈ၊-
ၶုၼ်ႁေႃၶမ်းမီးဢမိင်ႉတီႈယဵၸ်ႈပရေႃးႁဵၵ်ႈ ႁိလၶိ၊ဢႁိၵမ်ႇ၊ လုၵ်ႈၸၢႆး သႃႇၽၢၼ်ႇ၊ဢႃႇပတုၼ်ႇ၊ လုၵ်ႈၸၢႆး မိၵ်ႉၶႃႇ၊သႃႇၽၢၼ်ႇ၊ ဢၼ်ပဵၼ်ၽူႈမၢႆလူင်ၸဝ်ႈ၊ ဢသႃႇယႃႉ၊ ၶႃႈၶုၼ်ႁေႃၶမ်းၸိူဝ်းၼၼ်ႉလႄႈဝႃႈ၊-
“သူဢွၼ်ၵၼ်ၵႂႃႇလႄႈလဝ်ႈထၢမ်တီႈ ထႃႇဝရႃႉၽြႃး၊ လူၺ်ႈလွင်ႈၵႂၢမ်းၵျၢမ်းလိၵ်ႈဢၼ်ထူပ်းႁၼ်မိူဝ်ႈလဵဝ်ၼႆႉၼၼ်ႉပုၼ်ႈၵဝ်၊ဢိၵ်ႇတင်းပုၼ်ႈၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇၵႃႈၼႂ်းမိူင်း ဢိသရေး၊ ဢိၵ်ႇတင်းၵႃႈၼႂ်းမိူင်း ယုတႃႉ၊ တင်းလၢႆၼၼ်ႉသေၵမ်း။ လွင်ႈမၼ်းၸမ်ႉ၊ၵွပ်ႈပိူဝ်ႈဢၼ်ပူႇမွၼ်ႇႁဝ်းၸိူဝ်းၼၼ်ႉယင်းဢမ်ႇထွမ်ႇဢမ်ႇဢဝ်ဢမိင်ႉ၊ ထႃႇဝရႃႉၽြႃး၊ ၵူၺ်းဢမ်ႇၵႃး၊ယင်းဢမ်ႇၵမ်ၵျၢင်ႉၸွမ်းၵႃႈဢၼ်တႅမ်ႈဝႆႉၵႃႈၼႂ်းၵျၢမ်းလိၵ်ႈၼႆႉလႄႈ၊တၢင်းၸႂ်မႆႈၶႂ်ႈၸႃႉ ထႃႇဝရႃႉၽြႃး၊ ဢၼ်တူၵ်းႁွတ်ႈၵႃႈၼိူဝ်ႁဝ်းၼၼ်ႉ၊ပဵၼ်ဢၼ်ႁႅင်းယႂ်ႇၼႃႇလူင်လၢင်ဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ႁိလၶိ၊ ဢိၵ်ႇတင်းၶဝ်ၸိူဝ်းဢၼ်ၶုၼ်ႁေႃၶမ်းပွႆႇၸႂ်ႉၵႂႃႇၼၼ်ႉ ဢွၼ်ၵၼ်ၵႂႃႇလႄႈလၢတ်ႈၼႄလွင်ႈတၢင်းဢၼ်ပဵၼ်မႃးၵႃႈတီႈပရေႃးၽႅတ်ႈမႄႈယိင်း ႁုလတႃႉ၊ ၵေႃႉပဵၼ်မေး သႃႇလူမ်ႇ၊ ဢၼ်ပဵၼ်လုၵ်ႈၸၢႆး တိၵဝႃႉ၊ လၢၼ်ၸၢႆး ရႃႇႁတ်ႉ၊ ဢၼ်ယူႇၵႃႈၼႂ်းဝဵင်း ယေႇရုသလႅမ်ႇ၊ ထၢပ်ႈၼွၵ်ႈၼၼ်ႉလႄႈမီးဢရႃႇပႂ်ႉလူပႂ်ႉထိင်းၶူဝ်းၼုင်ႈၸဝ်ႈၼၼ်ႉဢေႃႈ။-
မႄႈယိင်းၼၼ်ႉၵေႃႈၶိုၼ်းလၢတ်ႈတီႈၶဝ်လႄႈဝႃႈ၊ “ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉႁႂ်ႈသူၶိုၼ်းမိူဝ်းလၢတ်ႈတီႈၵေႃႉဢၼ်ပွႆႇၸႂ်ႉသူမႃးတီႈၵဝ်ၼၼ်ႉလႄႈဝႃႈ၊-
ထႃႇဝရႃႉၽြႃး၊ လၢတ်ႈလႄႈဝႃႈ၊ ‘တူၺ်းလူး၊ၵဝ်တၵ်းႁႂ်ႈၽေးတူၵ်းႁွတ်ႈၵႃႈတီႈၼႆႈ၊ဢိၵ်ႇတင်းၵူၼ်းဢၼ်ယူႇၵႃႈတီႈၼႆႈၸွမ်းၼင်ႇၵႂၢမ်းဢၼ်ၵိၼ်ႇဝႃႈၵႃႈဢၼ်တႅမ်ႈမၢႆဝႆႉၵႃႈၼႂ်းၵျၢမ်းလိၵ်ႈလႄႈလႆႈၽတ်းႁေႃးၵႃႈတီႈၽၢႆႇၼႃႈၶုၼ်ႁေႃၶမ်း ယုတႃႉ၊ ၼၼ်ႉဢေႃႈ။-
လွင်ႈမၼ်းၸမ်ႉ၊ၶဝ်ဢွၼ်ၵၼ်ၸုၼ်ႉပႅတ်ႈၵဝ်လႄႈဢဝ်ၼၢမ်ႇသႃႇၽဝ်ၽႆးတီႈၽြႃးတၢင်ႇသူႇတၢင်ႇပႃးလႄႈၵၢၼ်တၢင်းဢၼ်မိုဝ်းၶဝ်ႁဵတ်းၸိူဝ်းၼၼ်ႉႁဵတ်းႁႂ်ႈၵဝ်လႆႈၸႂ်မႆႈၶႂ်ႈၸႃႉယဝ်ႉ။ ၵွပ်ႈၸိူဝ်ႉၼင်ႇၼၼ်လႄႈၽႆးတၢင်းၸႂ်မႆႈၶႂ်ႈၸႃႉၵဝ်တၵ်းတူၵ်းႁွတ်ႈၵႃႈတီႈၼႆႈလႄႈဢမ်ႇမွတ်ႇလႆႈလႃးလႃး။’ ဝႃႈၼင်ႇၼႆဝႆႉယဝ်ႉ။-
ၵူၺ်းၵႃႈ၊သူတၵ်းလႆႈၶိုၼ်းလဝ်ႈလၢတ်ႈတီႈၶုၼ်ႁေႃၶမ်း ယုတႃႉ၊ ဢၼ်ပွႆႇၸႂ်ႉသူမႃးႁႂ်ႈလႆႈလဝ်ႈထၢမ်တီႈ ထႃႇဝရႃႉၽြႃး၊ ၼၼ်ႉလႄႈဝႃႈ၊ ‘ ထႃႇဝရႃႉၽြႃး၊ၽြႃးပဵၼ်ၸဝ်ႈ၊ ၵူၼ်းမဵဝ်း ဢိသရေး၊ ဢဝ်လွင်ႈၵႂၢမ်းၵျၢမ်းလိၵ်ႈဢၼ်ၸဝ်ႈလႆႈငိၼ်းၼၼ်ႉလႄႈမီးဢမိင်ႉလႄႈဝႃႈၸမ်ႉ၊-
ၵွပ်ႈပိူဝ်ႈဢၼ်မႂ်းမီးၸႂ်ဢၼ်ဢူၼ်ႈဢွၼ်ႇၶျႃးတူဝ်ၸဝ်ႈၵဝ်ႇတူၵ်းတီႈတႅမ်ႇၵႃႈတီႈၽၢႆႇၼႃႈၵဝ်၊ၼႂ်းမိူဝ်ႈဢၼ်မႂ်းငိၼ်းၵႂၢမ်းဢၼ်ၵဝ်လွၵ်ႇငိုတ်ႈဝႃႈတၵ်းႁဵတ်းတီႈထႃႇၼႃႉၼႆႉ၊ဢိၵ်ႇတင်းတီႈၵူၼ်းၵႃႈတီႈၼႆႈၸိူဝ်းၼၼ်ႉလႄႈမႂ်းသိၵ်ႇၶူဝ်းၼုင်ႈမႂ်းသေယဝ်ႉ၊ႁွင်ႉႁႆႈယူႇၵႃႈတီႈၽၢႆႇၼႃႈၵဝ်ၼၼ်ႉလႄႈၵဝ်ထွမ်ႇဢဝ်ၵႂၢမ်းမႂ်းဢေႃႈ။-
ၵူၺ်းၵႃႈ၊ၵဝ်တၵ်းဢဝ်မႂ်းသူင်ႇႁွတ်ႈၵႂႃႇတီႈဢၼ်ပူႇမွၼ်ႇမႂ်းၸုတုမ်ၼၼ်ႉလႄႈမႂ်းတၵ်းလႆႈလပ်းတႃတၢႆၵႂႃႇၼိမ်ၼိမ်လီလီဢေႃႈ။ တႃမႂ်းတၵ်းဢမ်ႇလႆႈတူၺ်းလႆႈႁၼ်ၽေးတုၵ်ႉၶႃႉဢၼ်ၵဝ်တေႁႂ်ႈတူၵ်းႁွတ်ႈထိုင်ၵႃႈတီႈၼႆႈ၊ဢိၵ်ႇတင်းၶဝ်ၸိူဝ်းဢၼ်ယူႇၵႃႈတီႈၼႆႈၼၼ်ႉဢေႃႈ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။ ၶဝ်ၸိူဝ်းၼၼ်ႉဢဝ်ၼုၵ်ႈၵပၢတ်ႈၸဝ်ႈပွၵ်ႈၵႂႃႇလဝ်ႈလၢတ်ႈတီႈၶုၼ်ႁေႃၶမ်းဢေႃႈ။
မိူဝ်ႈၼၼ်ႉ၊ၶုၼ်ႁေႃၶမ်းပွႆႇၸႂ်ႉႁႂ်ႈၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမိူင်း ယုတႃႉ၊ ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ဝဵင်း ယေႇရုသလႅမ်ႇ၊ တင်းသဵင်ႈတင်းလူင်မႃးၸုၵၼ်တုမ်ၵၼ်လႄႈ၊-
ၶုၼ်ႁေႃၶမ်းၶဝ်ႈၵႂႃႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈလူၺ်ႈၵၼ်တင်းၵူၼ်းမိူင်း ယုတႃႉ၊ တင်းၵူၼ်းဝဵင်း ယေႇရုသလႅမ်ႇ၊ တင်းသဵင်ႈတင်းလူင်၊ဢိၵ်ႇတင်းယဵၸ်ႈပရေႃးႁဵၵ်ႈလႂ်၊ၵူၼ်းမဵဝ်း လေႇဝိ၊ လႂ်၊ၵူၼ်းတင်းသဵင်ႈတင်းလူင်ၸဵမ်လဵၵ်ႉၸဵမ်ယႂ်ႇၸိူဝ်းၼၼ်ႉလႄႈဢဝ်လိၵ်ႈပတိၺိၺ်ႇတြႃးဢၼ်ထူပ်းႁၼ်ၵႃႈတီႈၵျွင်းပိၵ်ႈမၢၼ်ႇၸဝ်ႈၼၼ်ႉၽတ်းဢၢၼ်ႇႁႂ်ႈၶဝ်လႆႈထွမ်ႇလႆႈငိၼ်းဢေႃႈ။-
ၶုၼ်ႁေႃၶမ်းၵေႃႈၸုၵ်းယူႇသေလႄႈႁဵတ်းပတိၺိၺ်ႇၵတိသဵတ်ႈၸႃႇၵႃႈတီႈၽၢႆႇၼႃႈ ထႃႇဝရႃႉၽြႃး၊ လူၺ်ႈလွင်ႈဢၼ်မၼ်းတၵ်းႁဵတ်းၸွမ်း ထႃႇဝရႃႉၽြႃး၊ လႄႈဢဝ်တင်းႁူဝ်ၸႂ်သဵင်ႈသဵင်ႈပႂ်ႉၵမ်ပႂ်ႉၸွမ်းပိင်းၺၢပ်ႈတြႃးမၼ်းၸဝ်ႈ၊ထုင်းၽိင်ႈတြႃးမၼ်းၸဝ်ႈၸိူဝ်းၼၼ်ႉသေလႄႈၵမ်ၵျၢင်ႉၸွမ်းၵႂၢမ်းပတိၺိၺ်ႇဢၼ်ပႃးၵႃႈၼႂ်းလိၵ်ႈၼၼ်ႉဢေႃႈ။-
မၼ်းၸီႇယၢင်ႇႁႂ်ႈၶဝ်ၵႃႈဢၼ်ယူႇၵႃႈၼႂ်းဝဵင်း ယေႇရုသလႅမ်ႇ၊ ဢိၵ်ႇတင်းယူႇၵႃႈၼႂ်းဢိူင်ႇ ပိၼ်ႇယႃႇမိၼ်ႇ၊ ၸိူဝ်းၼၼ်ႉႁပ်ႉတုင်းဢဝ်ၵႂၢမ်းၼၼ်ႉဢေႃႈ။ ၵူၼ်းဝဵင်း ယေႇရုသလႅမ်ႇ၊ ၸိူဝ်းၼၼ်ႉၵေႃႈဢွၼ်ၵၼ်ၵမ်ၵျၢင်ႉၸွမ်းပတိၺိၺ်ႇတြႃးၽြႃးပဵၼ်ၸဝ်ႈဢၼ်ပဵၼ်ၽြႃးပဵၼ်ၸဝ်ႈပူႇၶဝ်မွၼ်ႇၶဝ်ၼၼ်ႉဢေႃႈ။-
ယူဝ်းသိယႃႉ၊ ပႄႇၽဵဝ်ႈပႅတ်ႈလွင်ႈတၢင်းဢၼ်လီႁင်ႈဢဵတ်ႇသဵတ်ႇၵႃႈမီးသေၵႃႈၼႂ်းမိူင်းဢၼ်ၵူၼ်းမဵဝ်း ဢိသရေး၊ ပိူင်ႇၵူႈတီႈၵူႈလႅၼ်ၼၼ်ႉလႄႈၸီႇယၢင်ႇႁႂ်ႈၶဝ်ၸိူဝ်းဢၼ်ယူႇၵႃႈၼႂ်းမိူင်း ဢိသရေး၊ တင်းလၢႆၼၼ်ႉႁဵတ်းဝၢတ်ႈတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်ၼၼ်ႉသေလႄႈၸူဝ်ႈပၢၼ်ဢၼ်မၼ်းပဵၼ်ၶုၼ်ၼၼ်ႉတင်းၸူဝ်ႈ၊ၶဝ်ၼၼ်ႉယင်းဢမ်ႇသုတ်ႉၶိုၼ်းပွၵ်ႈၶိုၼ်းသေၵႃႈတီႈတၢင်းဢၼ်ၵႂႃႇၸွမ်းပႆၸွမ်း ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇၶဝ်မွၼ်ႇၶဝ်ၼၼ်ႉလႄႈယူႇဢေႃႈ။
ယူဝ်းသိယႃႉ၊ ႁဵတ်းပွႆး ပသၶႃႇ၊ ပုၼ်ႈ ထႃႇဝရႃႉၽြႃး၊ ၵႃႈၼႂ်းဝဵင်း ယေႇရုသလႅမ်ႇ၊ ၼႂ်းလိူၼ်တီႈၼိုင်ႈၼႂ်းဝၼ်းတီႈသိပ်းသီႇၼၼ်ႉၶဝ်ဢဝ်သူဝ်းဢွၼ်ႇ ပသၶႃႇ၊ တၢႆဢေႃႈ။-
မၼ်းယုၵ်ႉတၢင်ႇယဵၸ်ႈပရေႃးႁဵၵ်ႈ တင်းလၢႆ ဝႆႉၵႃႈၼႂ်းဢရႃႇၶဝ်လႄႈတိုၵ်းယူင်းပၼ်ႁႅင်းႁႂ်ႈၶဝ်ပွင်ႁဵတ်းၵၢၼ်ငၢၼ်းၵႃႈၼႂ်းၵျွင်းပိၵ်ႈမၢၼ်ႇၸဝ်ႈဢေႃႈ။-
မၼ်းပူင်ဢမိင်ႉတီႈၵူၼ်းမဵဝ်း လေႇဝိ၊ ၶဝ်ၸိူဝ်းဢၼ်မူတ်းၸၢင်ႇပုၼ်ႈ ထႃႇဝရႃႉၽြႃး၊ လႄႈသင်ႇသွၼ်ပၼ်ၵူၼ်းမဵဝ်း ဢိသရေး၊ ၸိူဝ်းၼၼ်ႉလႄႈဝႃႈ၊ “ဢွၼ်ၵၼ်ဢဝ်တိူၵ်ႈပတိၺိၺ်ႇၸဝ်ႈဢၼ်မူတ်းၸၢင်ႇၼၼ်ႉသႂၢင်းသႂ်ႇဝႆႉၵႃႈၼႂ်းၵျွင်းပိၵ်ႈမၢၼ်ႇၸဝ်ႈဢၼ် သေႃးလမုၼ်ႇ၊ လုၵ်ႈၸၢႆး တႃႇဝိတ်ႈ၊ ၶုၼ်ႁေႃၶမ်းမိူင်း ဢိသရေး၊ တႄႇႁဵတ်းၼၼ်ႉတႃႉ။ ၵမ်းလိုၼ်းဢမ်ႇလူဝ်ႇတၢင်ႇၵႃႈၼိူဝ်ႁူဝ်မႃႇသူလႄႈႁၢမ်ထႅင်ႈယဝ်ႉ။ မိူဝ်ႈလဵဝ်ၼႆႉၸိုင်၊သူဢွၼ်ၵၼ်ႁဵတ်းဝၢတ်ႈတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူ၊ဢိၵ်ႇတင်းႁဵတ်းပၼ်တီႈၵူၼ်းမၼ်းၸဝ်ႈၵူၼ်းမဵဝ်း ဢိသရေး၊ တႃႉ။-
ဢွၼ်ၵၼ်မႄးႁႅၼ်းတူဝ်သူဝႆႉ၊ၸွမ်းလူၺ်ႈမဵဝ်းပူႇမဵဝ်းပေႃႈသူပဵၼ်မုၵ်ႉပဵၼ်ၸိူဝ်းဝႆႉ၊ၸွမ်းၵႃႈၼင်ႇဢၼ် တႃႇဝိတ်ႈ၊ ၶုၼ်ႁေႃၶမ်းမိူင်း ဢိသရေး၊ ဢိၵ်ႇတင်း သေႃးလမုၼ်ႇ၊ လုၵ်ႈၸၢႆးၸဝ်ႈလႆႈၸိသင်ႇလၢတ်ႈဝႆႉၼၼ်ႉလႄႈ၊-
ၸုၵ်းယူႇၵႃႈၼႂ်းထႃႇၼႃႉတီႈမူတ်းၸၢင်ႇၸဝ်ႈ၊ၸွမ်းၵႃႈၼင်ႇဢၼ်မဵဝ်းပူႇမဵဝ်းပေႃႈပီႈၼွင်ႉသူဢၼ်ပဵၼ်၊ၵူၼ်းဝၢၼ်ႈၵူၼ်းမိူင်းၸိူဝ်းၼၼ်ႉ၊လႆႈၶၢမ်ႇတၢင်းဢၼ်ၽႄဝႆႉႁင်းၽႂ်ႁင်းမၼ်းသေလႄႈႁႂ်ႈမဵဝ်းပူႇမဵဝ်းပေႃႈၵူၼ်းမဵဝ်း လေႇဝိ၊ ယေႈပုၼ်ႈပဵၼ်ယေႈမဵဝ်းႁင်းၽႂ်ႁင်းမၼ်းၼၼ်ႉတႃႉ။-
ၼင်ႇၼၼ်လႄႈဢွၼ်ၵၼ်ဢဝ်သူဝ်းဢွၼ်ႇ ပသၶႃႇ၊ တၢႆလႄႈႁႂ်ႈတူဝ်သူမူတ်းၸၢင်ႇသေလႄႈမႄးႁႅၼ်းပုၼ်ႈပီႈၼွင်ႉသူၸိူဝ်းၼၼ်ႉဝႆႉ ႁႂ်ႈလႆႈႁဵတ်းၸွမ်းၵႂၢမ်းၼုၵ်ႈၵပၢတ်ႈတြႃး ထႃႇဝရႃႉၽြႃး၊ ဢၼ်ပၼ်ဝႆႉတီႈ မူဝ်းသေႇ၊ ၼၼ်ႉတႃႉ၊” ဝႃႈၼင်ႇၼႆဢေႃႈ။
ယူဝ်းသိယႃႉ၊ ဢဝ်သူဝ်းဢွၼ်ႇပႄႉဢွၼ်ႇၵႃႈၼႂ်းၽုင်သူဝ်းၽုင်ပႄႉသၢမ်မိုၼ်ႇ၊ဢိၵ်ႇတင်းဝူဝ်းသၢမ်ႁဵင်၊ဢၢပ်ႈပၼ်တီႈၵူၼ်းဝၢၼ်ႈၵူၼ်းမိူင်းတင်းလၢႆဢၼ်ၸုတုမ်ၵၼ်ယူႇၼၼ်ႉပုၼ်ႈတၵ်းသၢၵ်ႈလူႇၶိူင်ႈတၢင်းလူႇ ပသၶႃႇ၊ ဢေႃႈ။ ဢၼ်ၸိူဝ်းၼၼ်ႉၸမ်ႉ၊ပဵၼ်ဢုၵ်ႉၸႃႇၶုၼ်ႁေႃၶမ်းဢေႃႈ။-
မူးမၢတ်ႈၽွင်းမိူင်းမၼ်းတင်းလၢႆၵေႃႈဢွၼ်ၵၼ်မီးၸႂ်ၸေႇတၼႃႇသေလႄႈပၼ်တီႈၵူၼ်းတင်းလၢႆဢိၵ်ႇတင်းယဵၸ်ႈပရေႃးႁဵၵ်ႈ တင်းလၢႆတင်းၵူၼ်းမဵဝ်း လေႇဝိ၊ ၸိူဝ်းၼၼ်ႉဢေႃႈ။ ႁိလၶိ၊ၸႃႇၶရိ၊ယေႇႁေးလႃႉ၊ ဢၼ်ဢုပ်ႉထိင်းၵႃႈၼိူဝ်ႁိူၼ်းၽြႃးပဵၼ်ၸဝ်ႈၸိူဝ်းၼၼ်ႉၵေႃႈ၊ဢွၼ်ၵၼ်ဢဝ်သူဝ်းတင်းပႄႉဢွၼ်ႇသွင်ႁဵင်ႁူၵ်းပၢၵ်ႇတူဝ်၊တင်းဝူဝ်းပေႃႈသၢမ်ပၢၵ်ႇတူဝ်၊ဢၢပ်ႈပၼ်တီႈယဵၸ်ႈပရေႃးႁဵၵ်ႈတင်းလၢႆ၊ပုၼ်ႈတႃႇတၵ်းသၢၵ်ႈၵၢပ်ႈၶိူင်ႈတၢင်းလူႇပွႆး ပသၶႃႇ၊ ဢေႃႈ။-
ၵေႃးၼၼိ၊ ဢိၵ်ႇတင်း သေႇမႃႇယႃႉ၊ တင်း ၼႃႇသၼေႇလႃႉ၊ ဢၼ်ပဵၼ်ၼွင်ႉၸၢႆးမၼ်း၊ ႁႃႇသပိ၊ယေႇယေႇလႃႉ၊ယေႃးသပတ်ႉ၊ ဢၼ်ပဵၼ်ငဝ်ႈပဵၼ်ႁူဝ်ၵူၼ်းမဵဝ်း လေႇဝိ၊ ၼၼ်ႉၸိူဝ်းၼၼ်ႉၵေႃႈဢွၼ်ၵၼ်ဢဝ်သူဝ်းတင်းပႄႉဢွၼ်ႇႁႃႈႁဵင်တူဝ်၊ဢိၵ်ႇတင်းဝူဝ်းပေႃႈႁႃႈပၢၵ်ႇတူဝ်ဢၢပ်ႈပၼ်တီႈၵူၼ်းမဵဝ်း လေႇဝိ၊ တင်းလၢႆ၊ပုၼ်ႈတႃႇသၢၵ်ႈၵၢပ်ႈၶိူင်ႈတၢင်းလူႇပွႆး ပသၶႃႇ၊ ဢေႃႈ။
မိူဝ်ႈဢၼ်ၶဝ်ဢွၼ်ၵၼ်မႄးႁႅၼ်းပွႆး ပသၶႃႇ၊ ယဝ်ႉၼၼ်ႉၸိုင်၊ပုၼ်ႈဢၼ်တၵ်းႁဵတ်းဝၢတ်ႈၼၼ်ႉယဵၸ်ႈပရေႃးႁဵၵ်ႈလႂ်ၵေႃႈဢွၼ်ၵၼ်ၸုၵ်းယူႇၵႃႈၼႂ်းတီႈယူႇၶဝ်သေလႄႈၵူၼ်းမဵဝ်း လေႇဝိ၊ ၸိူဝ်းၼၼ်ႉၵေႃႈဢွၼ်ၵၼ်ႁဵတ်းပဵၼ်မုၵ်ႉပဵၼ်ၸိူဝ်းၸွမ်းၵႃႈၼင်ႇဢၼ်ဢမိင်ႉၶုၼ်ႁေႃၶမ်းမီးၼၼ်ႉဢေႃႈ။-
ၶဝ်ဢွၼ်ၵၼ်ဢဝ်သူဝ်းဢွၼ်ႇ ပသၶႃႇ၊ တၢႆလႄႈယဵၸ်ႈပရေႃးႁဵၵ်ႈၸိူဝ်းၼၼ်ႉဢွၼ်ၵၼ်ဢဝ်လိူတ်ႈဢၼ်လႆႈႁပ်ႉဢဝ်မႃးၵႃႈတီႈမိုဝ်းၶဝ်ၸိူဝ်းၼၼ်ႉၽႅတ်းသႂ်ႇလႄႈ၊ၵူၼ်းမဵဝ်း လေႇဝိ၊ ၸိူဝ်းၼၼ်ႉၵေႃႈ၊ဢွၼ်ၵၼ်လွၵ်ႈၼင်တူဝ်တၢင်းလူႇၸိူဝ်းၼၼ်ႉဢေႃႈ။-
ၶဝ်ဢွၼ်ၵၼ်ၽႄဢဝ်တူဝ်တၢင်းလူႇဢၼ်တုတ်ႇၽႆးတင်းလၢႆ ႁႂ်ႈလႆႈမႅင်ႇပၼ်ၸွမ်းလူၺ်ႈတၢင်းဢၼ်မဵဝ်းပူႇမဵဝ်းပေႃႈၵူၼ်းဝၢၼ်ႈၵူၼ်းမိူင်းတင်းလၢႆလႆႈၶၢမ်ႇတၢင်းဢၼ်ၽႄဝႆႉႁင်းၽႂ်ႁင်းမၼ်းႁႂ်ႈလႆႈသၢၵ်ႈလူႇတီႈ ထႃႇဝရႃႉၽြႃး၊ မႅၼ်ႈၸွမ်းၵႃႈၼင်ႇဢၼ်တႅမ်ႈဝႆႉၵႃႈၼႂ်းၵျၢမ်းလိၵ်ႈ မူဝ်းသေႇ၊ ၼၼ်ႉဢေႃႈ။ ဝူဝ်းပေႃႈတင်းလၢႆၵေႃႈၶဝ်ဢဝ်ႁဵတ်းၸိူဝ်ႉၼင်ႇၼၼ်ဢေႃႈ။-
ၶဝ်ဢွၼ်ၵၼ်ဢဝ်သူဝ်းဢွၼ်ႇ ပသၶႃႇ၊ ပိင်ႈၽႆးႁၢင်းၽႆးၸွမ်းၵႃႈၼင်ႇဢၼ်ထုင်းၽိင်ႈတြႃးမီးၼၼ်ႉလႄႈဢဝ်ၶိူင်ႈတၢင်းလူႇဢၼ်မူတ်းၸၢင်ႇၸိူဝ်းၼၼ်ႉ၊တူမ်ႈၵႃႈၼႂ်းမေႃႈလိၼ်၊မေႃႈလဵၵ်းဢွမ်လဵၵ်းလႂ်သေလႄႈဢဝ်ၽႄမႅင်ႇပၼ်တီႈၵူၼ်းတင်းသဵင်ႈတင်းလူင်ၶၼ်ၶၼ်ၽႂ်းၽႂ်းဢေႃႈ။-
လိုၼ်းၼၼ်ႉ၊ၶဝ်ဢွၼ်ၵၼ်မႄးႁဵတ်းမႄးႁႅၼ်းပုၼ်ႈတူဝ်ၸဝ်ႈၵဝ်ႇ၊ဢိၵ်ႇတင်းပုၼ်ႈယဵၸ်ႈပရေႃးႁဵၵ်ႈတင်းလၢႆဢေႃႈ။ ၵွပ်ႈပိူဝ်ႈယဵၸ်ႈပရေႃးႁဵၵ်ႈၸိူဝ်းဢၼ်ပဵၼ်လုၵ်ႈလၢၼ် ဢႃႇရုၼ်ႇ၊ ၼၼ်ႉ၊မီးၵၢၼ်ၼမ်ၼႃႇလူၺ်ႈတၢင်းဢၼ်ႁဵတ်းၶိူင်ႈတၢင်းလူႇဢၼ်တုတ်ႇၽႆး၊ဢိၵ်ႇတင်းၵွၼ်ႈၶႆၵွၼ်ႈမၼ်းလႂ်၊တေႃႇထိုင်ႁွတ်ႈၶိင်ႇႁူဝ်ၶမ်ႈလႄႈၵူၼ်းမဵဝ်း လေႇဝိ၊ ၸိူဝ်းၼၼ်ႉ၊လႆႈဢွၼ်ၵၼ်မႄးႁဵတ်းမႄးႁႅၼ်းဝႆႉပုၼ်ႈတူဝ်ၸဝ်ႈၵဝ်ႇ၊ဢိၵ်ႇတင်းပုၼ်ႈယဵၸ်ႈပရေႃးႁဵၵ်ႈဢၼ်ပဵၼ်လုၵ်ႈလၢၼ် ဢႃႇရုၼ်ႇ၊ ၸိူဝ်းၼၼ်ႉဢေႃႈ။-
ၵူၼ်းႁဵတ်းၵႂၢမ်းဢၼ်ပဵၼ်လုၵ်ႈလၢၼ် ဢႃႇသပ်ႉ၊ ၸိူဝ်းၼၼ်ႉ၊ဢွၼ်ၵၼ်ယူႇၵႃႈၼႂ်းတီႈယူႇၶဝ်ၸွမ်းၼင်ႇဢမိင်ႉ တႃႇဝိတ်ႈ၊ ဢမိင်ႉ ဢႃႇသပ်ႉ၊ ဢမိင်ႉ ႁေႇမၼ်ႇ၊ ဢိၵ်ႇတင်း ယေႇတုသုၼ်ႇ၊ ဢၼ်ပဵၼ်ၵေႃႉဢၼ်ႁူပွင်ႇတႃလႅင်းၵႃႈၼႂ်းဝၢင်းၶုၼ်ႁေႃၶမ်းၼၼ်ႉဢေႃႈ။ ၵူၼ်းပႂ်ႉၽၵ်းတူၸိူဝ်းၼၼ်ႉၵေႃႈ၊ဢွၼ်ၵၼ်မီးယူႇၵႃႈတီႈႁူးၽၵ်းတူၽႂ်၊ႁူးၽၵ်းတူမၼ်းလႄႈဢမ်ႇလႆႈပွႆႇပႅတ်ႈၵၢၼ်ငၢၼ်းၶဝ်ၵွပ်ႈပိူဝ်ႈပီႈၼွင်ႉၶဝ်ၵူၼ်းမဵဝ်း လေႇဝိ၊ ၸိူဝ်းၼၼ်ႉ၊လႆႈမႄးႁႅၼ်းဝႆႉပုၼ်ႈၶဝ်ယဝ်ႉဢေႃႈ။-
ၶဝ်ဢွၼ်ၵၼ်လႆႈမႄးႁဵတ်းမႄးႁႅၼ်းလႄႈလႆႈႁဵတ်းဝၢတ်ႈတီႈ ထႃႇဝရႃႉၽြႃး၊ ၼႂ်းဝၼ်းၼၼ်ႉၵမ်းလဵဝ်ႁႂ်ႈလႆႈၶၢမ်ႇပွႆး ပသၶႃႇ၊ လႄႈသၢၵ်ႈလူႇတၢင်းလူႇဢၼ်တုတ်ႇၽႆးၵႃႈၼိူဝ်ၶဵင်ႇတၢင်းလူႇ ထႃႇဝရႃႉၽြႃး၊ ၸွမ်းၵႃႈၼင်ႇဢၼ်ၶုၼ်လူင် ယူဝ်းသိယႃႉ၊ မီးဢမိင်ႉၼၼ်ႉဢေႃႈ။-
ၵူၼ်းမိူင်း ဢိသရေး၊ ဢၼ်ၸုတုမ်ၵၼ်ယူႇၵႃႈတီႈၼၼ်ႈၸိူဝ်းၼၼ်ႉလႆႈၶၢမ်ႇပွႆး ပသၶႃႇ၊ ဢိၵ်ႇတင်းပွႆးၵိၼ်ၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈၼၼ်ႉၸဵတ်းဝၼ်းတဵမ်တဵမ်ၼႂ်းၶိင်ႇၵႃႇလႃႉၼၼ်ႉဢေႃႈ။-
ပွႆးဢၼ်မိူၼ်ၸိူဝ်ႉၼင်ႇပွႆး ပသၶႃႇ၊ ဢၼ် ယူဝ်းသိယႃႉ၊ ဢိၵ်ႇတင်းယဵၸ်ႈပရေႃးႁဵၵ်ႈလႂ်၊ၵူၼ်းမဵဝ်း လေႇဝိ၊ လႂ်၊ၵူၼ်းမိူင်း ယုတႃႉ၊ တင်းၵူၼ်းမိူင်း ဢိသရေး၊ ဢၼ်မႃးၸုတုမ်ၵၼ်လႂ်၊ၵူၼ်းဝဵင်း ယေႇရုသလႅမ်ႇ၊ လႂ်၊လႆႈၶၢမ်ႇၼၼ်ႉၸမ်ႉ၊တႄႇၸႃႉဢဝ်ၵၢပ်ႈပၢၼ်ပရေႃးၽႅတ်ႈ သမူၺ်ႇလႃႉ၊ မႃးၼၼ်ႉဢမ်ႇတွၼ်ႉမီးၶုၼ်ႁေႃၶမ်း ဢိသရေး၊ ၸဝ်ႈလႂ်ပႃးလႂ်ၶၢမ်ႇပွႆး ပသၶႃႇ၊ ၸိူဝ်ႉၼင်ႇၼၼ်ၵႃႈၼႂ်းသိုင်ႇၸိုင်ႈဝၢၼ်ႈမိူင်း ဢိသရေး၊ ၼၼ်ႉဢေႃႈ။-
ၼႂ်းပီဢၼ် ယူဝ်းသိယႃႉ၊ ၸၢမ်ႇႁၢင်ႈၸၢမ်ႇႁေႃလႆႈသိပ်းပႅတ်ႇပီၼၼ်ႉၶဝ်ဢွၼ်ၵၼ်ၶၢမ်ႇပွႆး ပသၶႃႇ၊ ဢေႃႈ။
လိုၼ်းၼၼ်ႉမိူဝ်ႈဢၼ် ယူဝ်းသိယႃႉ၊ မႄးၵုမ်းမႄးႁဵတ်းၵျွင်းပိၵ်ႈမၢၼ်ႇၸဝ်ႈယဝ်ႉၼၼ်ႉၸိုင်၊ ၼေႇၶေႃႇ၊ ၶုၼ်ႁေႃၶမ်းမိူင်း ဢေးၵျိပ်ႉ၊ ၶီႇသိုၵ်းၶိုၼ်ႈၸူးၵႃႈတီႈဝဵင်း ၶႃႇသေႇမိတ်ႉ၊ ၵႃႈတီႈႁိမ်းမႄႈၼမ်ႉ ဢုၽရတ်ႉ၊ ၼၼ်ႉလႄႈ ယူဝ်းသိယႃႉ၊ ဢွၵ်ႇၵႂႃႇႁႂ်ႈလႆႈႁႄႉတၢင်းမၼ်းၼၼ်ႉဢေႃႈ။-
မၼ်းၼၼ်ႉပွႆႇၸႂ်ႉသၢၼ်ႇတမၢၼ်ႇတင်းလၢႆမႃးတီႈမၼ်းလႄႈႁႂ်ႈလၢတ်ႈဝႃႈ၊ “ၶုၼ်ႁေႃၶမ်းမိူင်း ယုတႃႉ၊ ႟။ မႂ်းၸၢပ်ႈသႅင်ႇၵၼ်တင်းၵဝ်ၸိူဝ်ႉၼင်ႇႁိုဝ်။ ၵဝ်ၶီႇသိုၵ်းၸူးတီႈမႂ်းဝၼ်းမိူဝ်ႈၼႆႉဢမ်ႇၸႂ်ႈ။ ၵဝ်ၶီႇသိုၵ်းၸူးတီႈၶဝ်ၸိူဝ်းဢၼ်တိုၵ်းတေႃးၵၼ်တင်းၵဝ်ၼၼ်ႉဢေႃႈ။ ၽြႃးပဵၼ်ၸဝ်ႈသင်ႇလၢတ်ႈဝႆႉႁႂ်ႈၵဝ်ႁဵတ်းၶၼ်ၶၼ်ၽႂ်းၽႂ်းယဝ်ႉ။ ယႃႇပေႁဵတ်းၶတ်းၵၼ်တင်းၽြႃးပဵၼ်ၸဝ်ႈဢၼ်မီးယူႇၽၢႆႇၵဝ်ၼႆႉသေၵမ်း။ ပေႃးဢမ်ႇၼၼ်မၼ်းၸဝ်ႈတၵ်းယႃႉမႂ်းပႅတ်ႈဢေႃႈ၊” ဝႃႈၼင်ႇၼႆဢေႃႈ။-
ပဵၼ်ၸိူဝ်ႉႁိုဝ်သေၵေႃႈ ယူဝ်းသိယႃႉ၊ ဢမ်ႇဝၢႆႇၼႃႈမၼ်းပႅတ်ႈသေၵႃႈတီႈမၼ်းၼၼ်ႉလႄႈယႃႉႁၢင်ႈယႃႉၽၢင်မၼ်းသေယဝ်ႉ၊ႁႂ်ႈလႆႈတိုၵ်းသိုၵ်းၵၼ်တင်း ၼေႇၶေႃႇ၊ လႄႈဢမ်ႇထွမ်ႇဢမ်ႇဢဝ်ၵႂၢမ်းမၼ်းဢၼ်ပဵၼ်ၵႂၢမ်းဢၼ်ဢွၵ်ႇမႃးတီႈၽြႃးပဵၼ်ၸဝ်ႈၼၼ်ႉ၊မၼ်းၶဝ်ႈတိုၵ်းၵႃႈတီႈပၢင်ႇ မေႇၵိတ်ႉတေႃႇ၊ ဢေႃႈ။
ႁူဝ်ႁၢၼ်ၵူၼ်းသိုၵ်းမိူင်း ဢေးၵျိပ်ႉ၊ ပိုတ်းယိုဝ်းၵၢင်ႇထုၵ်ႇမႅၼ်ႈသႂ်ႇၶုၼ်လူင် ယူဝ်းသိယႃႉ၊ လႄႈၶုၼ်လူင် ယူဝ်းသိယႃႉ၊ လၢတ်ႈတီႈၶႃႈမၼ်းၵူၼ်းမၼ်းလႄႈဝႃႈ၊ “ဢဝ်ၵဝ်ၵႂႃႇတႃႉ။ ၵဝ်လႆႈၶၢမ်ႇတၢင်းဢၼ်တိူဝ်ႉမၢတ်ႇဢၼ်ၸဵပ်းၼႃႇလူင်လၢင်ယဝ်ႉ၊” ဝႃႈၼင်ႇၼႆလႄႈ၊-
ၶႃႈမၼ်းၵူၼ်းမၼ်းဢွၼ်ၵၼ်ဢဝ်မၼ်းၶျႃးလူင်းသေၵႃႈၼိူဝ်လေႃႉမႃႉသိုၵ်းမၼ်းလႄႈတၢင်ႇၵႃႈၼိူဝ်လေႃႉမႃႉသိုၵ်းလမ်းတီႈသွင်ၼၼ်ႉသေယဝ်ႉ၊ဢဝ်မၼ်းၵႂႃႇၵႃႈတီႈဝဵင်း ယေႇရုသလႅမ်ႇ၊ သေဢေႃႈ။ မၼ်းလႆႈၼွၼ်းၽႄးၵႂႃႇသေလႄႈၶၢမ်ႇတၢင်းဢၼ်သၢင်းၵျူဝ်ႇဝႆႉၵႃႈၼႂ်းပႃႇႁဵဝ်ႈပူႇမွၼ်ႇမၼ်းတင်းလၢႆဢေႃႈ။ ၵူၼ်းမိူင်း ယုတႃႉ၊ တင်းၵူၼ်းဝဵင်း ယေႇရုသလႅမ်ႇ၊ တင်းသဵင်ႈတင်းလူင်ဢွၼ်ၵၼ်ႁဵတ်းတၢင်းဢၼ်ႁွင်ႉႁႆႈၵွပ်ႈပိူဝ်ႈ ယူဝ်းသိယႃႉ၊ ၼွၼ်းၽႄးၵႂႃႇၼၼ်ႉဢေႃႈ။
ယေႇရမိ၊ ၵေႃႈတႅမ်ႈၸၢပ်ႈၵႂၢမ်းဢၼ်ပွင်ႉၶၢင်းပွင်ႉမိုၼ်ႇပုၼ်ႈ ယူဝ်းသိယႃႉ၊ ဢေႃႈ။ ၵူၼ်းမေႃႁဵတ်းၵႂၢမ်းၵူၼ်းၸၢႆးၵူၼ်းယိင်းၵႃႈမီးၼၼ်ႉဢွၼ်ၵၼ်လၢတ်ႈလွင်ႈ ယူဝ်းသိယႃႉ၊ ၵႃႈၼႂ်းၵႂၢမ်းဢၼ်ပွင်ႉၶၢင်းပွင်ႉမိုၼ်ႇၶဝ်တေႃႇထိုင်ႁွတ်ႈဝၼ်းမိူဝ်ႈၼႆႉၼၼ်ႉပုၼ်ႈလွင်ႈႁႂ်ႈပဵၼ်ထုင်းၸၢမ်ႇတီႈၵူၼ်းမဵဝ်း ဢိသရေး၊ ၵႂႃႇလႄႈတႅမ်ႈမၢႆဝႆႉၵႃႈၼႂ်းၵျၢမ်းလိၵ်ႈ ပွင်ႉၶၢင်းပွင်ႇဝႃႈ၊ ၼၼ်ႉဢေႃႈ။
လွင်ႈၵၢၼ်ငၢၼ်းဢၼ် ယူဝ်းသိယႃႉ၊ လႆႈႁဵတ်းမႃးၸိူဝ်းဢၼ်ၵိုတ်းၵျၢၼ်ႇယူႇ၊ဢိၵ်ႇတင်းဢၼ်မၼ်းမီးသဵတ်ႈၸႃႇၼၼ်ႉ၊ၸွမ်းၵႃႈၼင်ႇဢၼ်တႅမ်ႈမၢႆမီးဝႆႉၵႃႈၼႂ်းၵျၢမ်းပိင်းၺၢပ်ႈတိ ထႃႇဝရႃႉၽြႃး၊-
လွင်ႈတၢင်းၵၢၼ်ငၢၼ်းဢၼ်မၼ်းသၢင်ႈႁဵတ်းမႃးၸဵမ်ငဝ်ႈတေႃႇပၢႆၸိူဝ်းၼၼ်ႉၸိုင်၊တႅမ်ႈမၢႆဝႆႉၵႃႈၼႂ်း ပိုၼ်းၶုၼ်ႁေႃၶမ်းမိူင်းဢိသရေး၊ ဢိၵ်ႇတင်းၵႃႈၼႂ်း ပိုၼ်းၶုၼ်ႁေႃၶမ်းမိူင်းယုတႃႉ၊ ဢေႃႈ။
ၵူၼ်းဝၢၼ်ႈၵူၼ်းမိူင်းတင်းလၢႆဢွၼ်ၵၼ်ယုၵ်ႉတၢင်ႇ ယႁေႃးၶတ်ႉ၊ ၵေႃႉပဵၼ်လုၵ်ႈၸၢႆး ယူဝ်းသိယႃႉ၊ ႁႂ်ႈပဵၼ်ၶုၼ်ႁေႃၶမ်းတၢင်တူဝ်ၸဝ်ႈပေႃႈမၼ်းၵႃႈၼႂ်းဝဵင်း ယေႇရုသလႅမ်ႇ၊ ဢေႃႈ။-
ယႁေႃးၶတ်ႉ၊ ၼၼ်ႉမိူဝ်ႈဢၼ်မၼ်းတႄႇၸႃႉၼင်ႈႁၢင်ႈၼင်ႈႁေႃၼၼ်ႉဢသၢၵ်ႈမၼ်းလႆႈသၢဝ်းသၢမ်ပီယဝ်ႉလႄႈမၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်း ယေႇရုသလႅမ်ႇ၊ သၢမ်လိူၼ်ဢေႃႈ။-
ၶုၼ်ႁေႃၶမ်း ဢေးၵျိပ်ႉ၊ ဢဝ်မၼ်းၶျႃးတူၵ်းသေဢရႃႇၶုၼ်ႁေႃၶမ်းၵႃႈၼႂ်းဝဵင်း ယေႇရုသလႅမ်ႇ၊ သေလႄႈမီးဢမိင်ႉႁႂ်ႈမိူင်းၼၼ်ႉသၢၵ်ႈၶွၼ်ႇလူၺ်ႈငိုၼ်းၼမ်ႉၼၵ်းသွင်ႁဵင်ၸွႆႉ၊ဢိၵ်ႇတင်းၶမ်းသၢဝ်းၸွႆႉဢေႃႈ။-
ၶုၼ်ႁေႃၶမ်း ဢေးၵျိပ်ႉ၊ ၼၼ်ႉယုၵ်ႉတၢင်ႇ ဢေးလျႃႇၵိမ်း၊ ၵေႃႉပဵၼ်ပီႈၸၢႆး ယႁေႃးၶတ်ႉ၊ ၼၼ်ႉႁဵတ်းၶုၼ်ႁေႃၶမ်းၵႃႈၼိူဝ်မိူင်း ယုတႃႉ၊ တင်းဝဵင်း ယေႇရုသလႅမ်ႇ၊ လႄႈတၢင်ႇပၼ်ၸိုဝ်ႈမႂ်ႇသဵင်မႂ်ႇ ယေႃးယၵိမ်း၊ သေယဝ်ႉ၊ ၼေႇၶေႃႇ၊ ၶုၼ်ႁေႃၶမ်း ဢေးၵျိပ်ႉ၊ ၼၼ်ႉဢဝ် ယႁေႃးၶတ်ႉ၊ ၼွင်ႉၸၢႆးၸဝ်ႈၵႂႃႇၵႃႈတီႈမိူင်း ဢေးၵျိပ်ႉ၊ သေဢေႃႈ။
ယေႃးယၵိမ်း၊ ၼၼ်ႉ၊မိူဝ်ႈဢၼ်တႄႇၸႃႉၼင်ႈႁၢင်ႈၼင်ႈႁေႃၼၼ်ႉၸိုင်၊ဢသၢၵ်ႈမၼ်းလႆႈသၢဝ်းႁႃႈပီယဝ်ႉလႄႈမၼ်းဢုပ်ႉပိူင်ႇၸၢမ်ႇၸႃးယူႇၵႃႈၼိူဝ်ဝဵင်း ယေႇရုသလႅမ်ႇ၊ လႆႈသိပ်းဢဵတ်းပီဢေႃႈ။ မၼ်းႁဵတ်းတုၸရိူၵ်ႈဢၼ်ဢမ်ႇလီဢမ်ႇငၢမ်းသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ၽြႃးပဵၼ်ၸဝ်ႈဢေႃႈ။-
ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်း ပႃႇပုလုၼ်ႇ၊ ၶီႇသိုၵ်းမႃးတိုၵ်းတေႃးမၼ်းလႄႈဢဝ်ၸိူၵ်ႈလဵၵ်းမတ်ႉၽုၵ်ႇသေယဝ်ႉ၊ဢဝ်ၵႂႃႇၵႃႈတီႈဝဵင်း ပႃႇပုလုၼ်ႇ၊ သေဢေႃႈ။-
ၶိူင်ႈပိူင်ဢၼ်ၸႂ်ႉၵႃႈၼႂ်းၵျွင်းပိၵ်ႈမၢၼ်ႇၸဝ်ႈၵမ်ႈၽွင်ႈၵေႃႈ ၼေႇပုၶတ်ႉၼေႇၸႃႇ၊ ဢဝ်ၵႂႃႇၵႃႈတီႈဝဵင်း ပႃႇပုလုၼ်ႇ၊ သေလႄႈဝႆႉၵႃႈၼႂ်းႁေႃၶမ်းၸဝ်ႈၵႃႈတီႈဝဵင်း ပႃႇပုလုၼ်ႇ၊ ဢေႃႈ။-
လွင်ႈၵၢၼ်တၢင်းႁဵတ်းဢၼ် ယေႃးယၵိမ်း၊ ႁဵတ်းမႃးလႄႈလွင်ႈတၢင်းဢၼ်လီႁင်ႈဢဵတ်ႇသဵတ်ႇဢၼ်မၼ်းလႆႈႁဵတ်းမႃးဢၼ်ယင်းၵိုတ်းယင်းၵျၢၼ်ႇယူႇ၊ဢိၵ်ႇတင်းလွင်ႈတၢင်းဢမ်ႇလီဢၼ်ၸၢပ်ႇသႅင်ႇၵၼ်တင်းမၼ်းၸိူဝ်းၼၼ်ႉ၊တႅမ်ႈမၢႆဝႆႉၵႃႈၼႂ်း ပိုၼ်းၶုၼ်ႁေႃၶမ်းမိူင်းဢိသရေး၊ ဢိၵ်ႇတင်းၵႃႈၼႂ်း ပိုၼ်းၶုၼ်ႁေႃၶမ်းမိူင်းယုတႃႉ၊ ဢေႃႈ။ ယေႇၶေႃးၼိ၊ လုၵ်ႈၸၢႆးၸဝ်ႈၼၼ်ႉၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။
ယေႇၶေႃးၼိ၊ ၼၼ်ႉမိူဝ်ႈဢၼ်တႄႇၸႃႉၼင်ႈႁၢင်ႈၼင်ႈႁေႃၼၼ်ႉၸိုင်၊ဢသၢၵ်ႈမၼ်းလႆႈသိပ်းပႅတ်ႇပီ ယဝ်ႉလႄႈမၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်း ယေႇရုသလႅမ်ႇ၊ သၢမ်လိူၼ်ပၢႆသိပ်းဝၼ်းဢေႃႈ။ မၼ်းႁဵတ်းတုၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ဢေႃႈ။-
မိူဝ်ႈထိုင်ၶိင်ႇႁႅင်ႈၼၼ်ႉၸိုင်၊ၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ ၼၼ်ႉၶီႇသိုၵ်းမႃးတိုၵ်းလႄႈတိဢဝ်မၼ်း၊ဢိၵ်ႇတင်းဢဝ်ၶိူင်ႈပိူင်ဢၼ်သုင်းတိုဝ်းၵႃႈၼႂ်းၵျွင်းပိၵ်ႈမၢၼ်ႇၸဝ်ႈဢၼ်မီးၵႃႈမီးၶၼ်တင်းလၢႆၵႂႃႇၵႃႈတီႈဝဵင်း ပႃႇပုလုၼ်ႇ၊ သေယဝ်ႉ၊ယုၵ်ႉတၢင်ႇပေႃႈဢၢဝ်မၼ်း ၸေႇတၵိ၊ ႁႂ်ႈပဵၼ်ၶုၼ်ႁေႃၶမ်းၵႃႈၼိူဝ်မိူင်း ယုတႃႉ၊ တင်းဝဵင်း ယေႇရုသလႅမ်ႇ၊ ဢေႃႈ။
ၸေႇတၵိ၊ ၼၼ်ႉမိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉၸိုင်၊ဢသၢၵ်ႈမၼ်းလႆႈသၢဝ်းဢဵတ်းပီယဝ်ႉလႄႈမၼ်းဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရုသလႅမ်ႇ၊ သိပ်းဢဵတ်းပီဢေႃႈ။-
မၼ်းႁဵတ်းတုၸရိူၵ်ႈဢၼ်ႁၢႆႉမိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ၽြႃးပဵၼ်ၸဝ်ႈမၼ်းဢေႃႈ။ မၼ်းဢမ်ႇၶျႃးတူဝ်ၸဝ်ႈၵဝ်ႇတူၵ်းတီႈတႅမ်ႇၵႃႈတီႈၽၢႆႇၼႃႈပရေႃးၽႅတ်ႈ ယေႇရမိ၊ ဢၼ်ဢဝ်ဢမိင်ႉ ထႃႇဝရႃႉၽြႃး၊ သင်ႇလၢတ်ႈဝႆႉၼၼ်ႉ။-
ၸေႇတၵိ၊ လုၵ်ႉၽိုၼ်ႉၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ ဢၼ်တဵၵ်းၶေႃးႁႂ်ႈမၼ်းတိူင်ႇၵၢဝ်ႇဝႆႉၵတိၼႂ်းၼႃႇမႃႉၸိုဝ်ႈသဵင်ၽြႃးပဵၼ်ၸဝ်ႈလႄႈဝႃႈ၊တၵ်းပႂ်ႉသဵတ်ႈၸႃႇဢေႃႈ။ မၼ်းသမ်ႉၸႂ်ၵႅၼ်ႇၶေႃးၶႅင်လႄႈဢမ်ႇပွၵ်ႈၶိုၼ်းမႃးၸူးၵႃႈတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ ၼၼ်ႉဢေႃႈ။
လိူဝ်သေၼၼ်ႉၵူၼ်းဢွၼ်ႁူဝ်ဢၼ်ပဵၼ်ယဵၸ်ႈပရေႃးႁဵၵ်ႈ ဢိၵ်ႇတင်းၵူၼ်းဝၢၼ်ႈၵူၼ်းမိူင်းတင်းလၢႆၵေႃႈဢမ်ႇသိုဝ်ႈတေႃႇလႄႈဢွၼ်ၵၼ်ၸွမ်းသဵၼ်ႈတၢင်းဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်းၶဝ်ႁဵတ်းဢၼ်လီႁင်ႈဢဵတ်ႇသဵတ်ႇၵႃႈမီးၼၼ်ႉဢေႃႈ။ ၶဝ်ႁႂ်ႈၵျွင်းပိၵ်ႈမၢၼ်ႇၸဝ်ႈဢၼ်မၼ်းၸဝ်ႈႁႂ်ႈမူတ်းၸၢင်ႇဝႆႉၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉၵူဝ်ႈၵိူၵ်ႇဢေႃႈ။-
ပိၵ်ႉသမ်ႉ ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇၶဝ်မွၼ်ႇၶဝ်ၸႂ်ႉသၢၼ်ႇတမၢၼ်ႇတင်းလၢႆ၊ၵႂႃႇၸူးတီႈၶဝ်ဢမ်ႇထၢတ်ႇၵွပ်ႈပိူဝ်ႈဢၼ်မၼ်းၸဝ်ႈမီးၸႂ်ဢဵတ်းလူၵူၼ်းမၼ်းၸဝ်ႈဢိၵ်ႇတင်းထႃႇၼႃႉတီႈဢၼ်မၼ်းၸဝ်ႈၵိင်းဝၢပ်ႈယူႇၼၼ်ႉသေၵေႃႈ၊-
ၵူၺ်းၵႃႈ၊ၶဝ်ဢွၼ်ၵၼ်ႁဵတ်းပျၢၵ်ႈၶူဝ်တီႈတမၢၼ်ႇၽြႃးပဵၼ်ၸဝ်ႈၸိူဝ်းၼၼ်ႉ၊ဢိၵ်ႇတင်းသႄႉသွမ်းၼုၵ်ႈၵပၢတ်ႈမၼ်းၸဝ်ႈ၊လႃႇလင်ပရေႃးၽႅတ်ႈ ၸိူဝ်းၼၼ်ႉလႄႈတၢင်းၸႂ်မႆႈၶႂ်ႈၸႃႉ ထႃႇဝရႃႉၽြႃး၊ ၼၼ်ႉလႆႈတူၵ်းႁွတ်ႈတီႈၵူၼ်းမၼ်းၸဝ်ႈတင်းလၢႆတေႃႇထိုင်ႁွတ်ႈထၢၼ်ႈပေႃးဢမ်ႇထၢတ်ႇလႆႈယဵၼ်လႆႈယဝ်ႉဢေႃႈ။-
ၵွပ်ႈပိူဝ်ႈၸိူဝ်ႉၼင်ႇၼႆလႄႈမၼ်းၸဝ်ႈႁႂ်ႈၶုၼ်ႁေႃၶမ်း ပႃႇပုလုၼ်ႇ၊ ၶီႇသိုၵ်းၶိုၼ်ႈၵႂႃႇၵႃႈတီႈၶဝ်လႄႈဢဝ်ၵူၼ်းၸၢႆးၼုမ်ႇၶဝ်တၢႆလူၺ်ႈလၢပ်ႇလူၺ်ႈလႅဝ်းၵႃႈၼႂ်းႁိူၼ်းထႃႇၼႃႉတီႈၶဝ်ႁဵတ်းဝၢတ်ႈၵူဝ်းၵႂၢႆႇၼၼ်ႉဢေႃႈ။ မၼ်းဢမ်ႇဢဵတ်းလူၵူၼ်းၸၢႆးၼုမ်ႇ၊ၵူၼ်းယိင်းၼုမ်ႇ၊ၵူၼ်းထဝ်ႈၵေႃႉဢၼ်ဢသၢၵ်ႈယႂ်ႇလႄႈလင်ၵွမ်းၼၼ်ႉ ၽြႃးပဵၼ်ၸဝ်ႈဢဝ်ၶဝ်ၵႃႈမီးတင်းသဵင်ႈတင်းလူင်ဢၢပ်ႈပၼ်ၵႃႈၼႂ်းမိုဝ်းၶုၼ်ႁေႃၶမ်း ပႃႇပုလုၼ်ႇ၊ ဢေႃႈ။-
မၼ်းသိမ်းဢဝ်ၶိူင်ႈၸႂ်ႉၶိူင်ႈတိုဝ်းၽၼ်ႇတႃႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈမဵဝ်းဢၼ်ယႂ်ႇဢၼ်လဵၵ်ႉၵႃႈမီး၊ၽၼ်ႇတႃႇႁေႃၸဝ်ႈ၊ၽၼ်ႇတႃႇမူးမၢတ်ႈၽွင်းမိူင်းၵႃႈမီးၸိူဝ်းၼၼ်ႉ ၵႂႃႇၵႃႈတီႈဝဵင်း ပႃႇပုလုၼ်ႇ၊ သေဢေႃႈ။-
ၶဝ်ဢွၼ်ၵၼ်ဢဝ်ၽႆးတုတ်ႇၵျွင်းပိၵ်ႈမၢၼ်ႇၸဝ်ႈပႅတ်ႈ၊ၵိူၼ်ႇယႃႉပႅတ်ႈလမ်းဝဵင်း ယေႇရုသလႅမ်ႇ၊ သေလႄႈဝၢင်းႁေႃၶမ်းတင်းမူတ်းၵေႃႈတုတ်ႇၽႆးပႅတ်ႈ၊ဢိၵ်ႇတင်းယႃႉၽဵဝ်ႈပႅတ်ႈၶိူင်ႈပိူင်ဢၼ်လီဢၼ်မျၢတ်ႈၵႃႈမီးတင်းလၢႆဢေႃႈ။-
မၼ်းတိၺွပ်းဢဝ်ၶဝ်ၸိူဝ်းဢၼ်လွတ်ႈၽေးလၢပ်ႇၽေးလႅဝ်းၼၼ်ႉၵႂႃႇၵႃႈတီႈဝဵင်း ပႃႇပုလုၼ်ႇ၊ လႄႈၶဝ်ၼၼ်ႉလႆႈဢွၼ်ၵၼ်ၶၢမ်ႇႁဵတ်းၶႃႈတီႈမၼ်း၊ဢိၵ်ႇတင်းၸူဝ်ႈလုၵ်ႈပၢၼ်လၢၼ်မၼ်းၼၼ်ႉ၊ယူႇတေႃႇထိုင်ႁွတ်ႈသိုင်ႇၸိုင်ႈဝၢၼ်ႈမိူင်း ပႃးသျႃး၊ တႄႇတင်ႈမၼ်ႈၶိူင်ႇၼၼ်ႉလႄႈ၊-
ဢမိင်ႉ ထႃႇဝရႃႉၽြႃး၊ ဢၼ်ပရေႃးၽႅတ်ႈ ယေႇရမိ၊ သင်ႇလၢတ်ႈဝႆႉၼၼ်ႉလႆႈပျေႉၸုမ်ႇတေႃႇထိုင်ႁွတ်ႈမိူင်းၸဝ်ႈၼၼ်ႉမူၼ်ႈပျေႃႇၼႂ်းဝၼ်းၵမ်သိၼ်မၼ်းတင်းလၢႆၼၼ်ႉဢေႃႈ။ “မိူင်းၸဝ်ႈၼၼ်ႉၼႂ်းမိူဝ်ႈဢၼ်မၼ်းယင်းတိုၵ်ႉမီးတၢင်းဢၼ်သဵတ်ႇၵူၼ်းယဵၼ်ၵူၼ်းယူႇၼၼ်ႉၸိုင်၊မၼ်းလႆႈပႂ်ႉဝၼ်းၵမ်သိၼ်မၼ်းယူႇႁႂ်ႈထၢၼ်ႈပေႃးထူၼ်ႈပေႃးတဵမ်ၸဵတ်းသိပ်းပီဢေႃႈ။”
ၼႂ်းပီဢၼ် သႆးရတ်ႉ၊ ၶုၼ်ႁေႃၶမ်းမိူင်း ပႃးသျႃး၊ ၸၢမ်ႇႁၢင်ႈၸၢမ်ႇႁေႃပီတီႈၼိုင်ႈၼၼ်ႉလွင်ႈၼင်ႇႁိုဝ်ဢမိင်ႉ ထႃႇဝရႃႉၽြႃး၊ ဢၼ်ပရေႃးၽႅတ်ႈ ယေႇရမိ၊ သင်ႇလၢတ်ႈဝႆႉၼၼ်ႉတၵ်းပျေႉၸုမ်ႇၸိုင်၊ ထႃႇဝရႃႉၽြႃး၊ တိုၵ်းယူင်းၸူဝ်းဢဝ်ႁူဝ်ၸႂ် သႆးရတ်ႉ၊ ၶုၼ်ႁေႃၶမ်းမိူင်း ပႃးသျႃး၊ ႁႂ်ႈမၼ်းၼၼ်ႉပူင်ဢမိင်ႉပၢဝ်ႇသေႃႇၵႃႈၼႂ်းသိုင်ႇၸိုင်ႈဝၢၼ်ႈမိူင်းမၼ်းၵူႈတီႈၵူႈလႅၼ်သေလႄႈတႅမ်ႈသႂ်ႇၵႃႈၼႂ်းလိၵ်ႈၼႂ်းလၢႆးလႄႈဝႃႈ။
“ သႆးရတ်ႉ၊ ၶုၼ်ႁေႃၶမ်းမိူင်း ပႃးသျႃး၊ မီးဢမိင်ႉလႄႈဝႃႈၸမ်ႉ၊ ထႃႇဝရႃႉၽြႃး၊ ၽြႃးပဵၼ်ၸဝ်ႈၽုင်ႇၵၢင်ႁၢဝ်ၼၼ်ႉဢဝ်သိုင်ႇၸိုင်ႈဝၢၼ်ႈမိူင်းၵႃႈဢၼ်မီးၵႃႈၼိူဝ်လိၼ်မိူင်းၼႆႉ၊ပၼ်တီႈၵဝ်လႄႈသင်ႇလၢတ်ႈဝႆႉလွင်ႈဢၼ်ၵဝ်တၵ်းလႆႈတႄႇႁဵတ်းႁိူၼ်းၸဝ်ႈပုၼ်ႈမၼ်းၸဝ်ႈၵႃႈၼႂ်းဝဵင်း ယေႇရုသလႅမ်ႇ၊ မိူင်း ယုတႃႉ၊ ၼၼ်ႉယဝ်ႉ။ ၽူႈလႂ်ဢၼ်ပဵၼ်ၵူၼ်းမၼ်းၸဝ်ႈလႄႈယူႇၵႃႈၼႂ်းၵႄႈၵၢင်သူတင်းလၢႆၼၼ်ႉၵေႃႈ၊ႁႂ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်ၼၼ်ႉမီးယူႇလူၺ်ႈၵၼ်တင်းၶဝ်ၼၼ်ႉသေၵမ်းလူၺ်ႈ။ ႁႂ်ႈၶဝ်ၼၼ်ႉပွၵ်ႈမိူဝ်းၵႂႃႇၵႃႈတီႈဝဵင်း ယေႇရုသလႅမ်ႇ၊ သေၵမ်းလူၺ်ႈ၊” ဝႃႈၼင်ႇၼႆဢေႃႈ။ 1 ရႃႇၸဝၢင်ႇၶျုၵ်ႈၽိုၼ်တီႈသွင်ယဝ်ႉယဝ်ႉဢေႃႈ။
ၼႂ်းပီဢၼ် သႆးရတ်ႉ၊ လႆႈပဵၼ်ၸဝ်ႈမုၼ်ယႂ်ႇၶုၼ်ႁေႃၶမ်းမိူင်း ပႃးသျႃး၊ ၼႂ်းပီတီႈၼိုင်ႈၼၼ်ႉ၊လွင်ႈၼင်ႇႁိုဝ်ၼုၵ်ႈၵပၢတ်ႈၸဝ်ႈ ထႃႇဝရႃႉၽြႃး၊ ဢၼ်ပရေႃးၽႅတ်ႈ ယေႇရမိ၊ ႁေႃးလၢတ်ႈဝႆႉၼၼ်ႉတၵ်းပျေႉၸုမ်ႇၸိုင်၊ ထႃႇဝရႃႉၽြႃး၊ တိုၵ်းယူင်းၸူဝ်းဢဝ်ႁူဝ်ၸႂ် သႆးရတ်ႉ၊ ၶုၼ်ႁေႃၶမ်းမိူင်း ပႃးသျႃး၊ ႁႂ်ႈပူင်ဢမိင်ႉပၢဝ်ႇသေႃႇၵႃႈၼႂ်းသိုင်ႇၸိုင်ႈဝၢၼ်ႈမိူင်းမၼ်းၸဝ်ႈလႄႈႁႂ်ႈတႅမ်ႈပဵၼ်လိၵ်ႈလၢႆးလႄႈဝႃႈ၊-
“ သႆးရတ်ႉ၊ ၶုၼ်ႁေႃၶမ်းမိူင်း ပႃးသျႃး၊ မီးဢမိင်ႉလႄႈဝႃႈၸမ်ႉ၊ ထႃႇဝရႃႉၽြႃး၊ ၽြႃးပဵၼ်ၸဝ်ႈၽုင်ႇၵၢင်ႁၢဝ်ၼၼ်ႉဢဝ်သိုင်ႇၸိုင်ႈဝၢၼ်ႈမိူင်းၵႃႈဢၼ်မီးၵႃႈၼိူဝ်လိၼ်မိူင်းၼႆႉပၼ်တီႈၵဝ်လႄႈသင်ႇလၢတ်ႈဝႆႉလွင်ႈဢၼ်ၵဝ်တၵ်းလႆႈတႄႇႁဵတ်းႁိူၼ်းၸဝ်ႈပုၼ်ႈမၼ်းၸဝ်ႈၵႃႈၼႂ်းဝဵင်း ယေႇရုသလႅမ်ႇ၊ မိူင်း ယုတႃႉ၊ ၼၼ်ႉယဝ်ႉ။-
ၵူၼ်းၽြႃးပဵၼ်ၸဝ်ႈဢၼ်မီးယူႇၵႃႈၼႂ်းသူၼႆႉႁႂ်ႈၽြႃးပဵၼ်ၸဝ်ႈၶဝ်မီးယူႇလူၺ်ႈၵၼ်တင်းၶဝ်သေၵမ်းလူၺ်ႈ။ ႁႂ်ႈၶဝ်ၵႂႃႇၵႃႈတီႈဝဵင်း ယေႇရုသလႅမ်ႇ၊ မိူင်း ယုတႃႉ၊ လႄႈတႄႇႁဵတ်းႁိူၼ်း ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ သေၵမ်း။ ၽြႃးဢၼ်မီးယူႇၵႃႈတီႈဝဵင်း ယေႇရုသလႅမ်ႇ၊ ၼၼ်ႉပဵၼ်ၽြႃးပဵၼ်ၸဝ်ႈဢေႃႈ။-
ၵေႃႉလႂ်သေဢမ်ႇဝႃႈ၊ၵေႃႉဢၼ်ၵိုတ်းၵျၢၼ်ႇဝႆႉသေတီႈသေလႅၼ်တီႈဢၼ်မၼ်းသွၼ်ႈပိုင်ႈယူႇၼၼ်ႉၸမ်ႉ၊ႁႂ်ႈၵူၼ်းၸိူဝ်းဢၼ်ယူႇႁိမ်းႁွမ်းၶဝ်ၼၼ်ႉၸွႆႈထႅမ်ၶဝ်ၸႃႉၸဵမ်ဢုၵ်ႉၸႃႇငိုၼ်းၶမ်းလႄႈသတ်းတရိၵ်ႈသၢၼ်ႇ၊ၼွၵ်ႈသေၼၼ်ႉတၢင်းလူႇတၢင်းတၢၼ်းဢၼ်မီးၸႂ်ၸေႇတၼႃႇသေလႄႈလူႇတၢၼ်းပုၼ်ႈႁိူၼ်းၽြႃးပဵၼ်ၸဝ်ႈၵႃႈတီႈဝဵင်း ယေႇရုသလႅမ်ႇ၊ ၼၼ်ႉသေၵမ်း၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၶဝ်ၸိူဝ်းဢၼ်ပဵၼ်ငဝ်ႈပဵၼ်ႁူဝ်ၼႂ်းၸိူဝ်ႉၶိူဝ်း ယုတႃႉ၊ တင်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ ယဵၸ်ႈပရေႃးႁဵၵ်ႈတင်းၵူၼ်းမဵဝ်း လေႇဝိ၊ တင်းလၢႆဢၼ်ဝႃႈ၊ၶဝ်ၵႃႈဢၼ်ၽြႃးပဵၼ်ၸဝ်ႈတိုၵ်းယူင်းၸူဝ်းဢဝ်ၸိူဝ်းၼၼ်ႉဢွၼ်ၵၼ်လုၵ်ႉႁႂ်ႈလႆႈၵႂႃႇလႄႈၶိုၼ်းတႄႇႁဵတ်းႁိူၼ်း ထႃႇဝရႃႉၽြႃး၊ ဢၼ်မီးၵႃႈတီႈဝဵင်း ယေႇရုသလႅမ်ႇ၊ ၼၼ်ႉဢေႃႈ။-
ၵူၼ်းႁိူၼ်းၸမ်ၵၼ်တင်းၶဝ်ၵႃႈမီးၼၼ်ႉ၊ၼွၵ်ႈသေတၢင်းလူႇတၢင်းတၢၼ်းဢၼ်မီးၸႂ်ၸေႇတၼႃႇသေလႄႈလူႇတၢၼ်းၼၼ်ႉဢွၼ်ၵၼ်ဢဝ်တင်းၶိူင်ႈငိုၼ်း၊ၶိူင်ႈၶမ်း၊ဢုၵ်ႉၸႃႇသတ်းတရိၵ်ႈသၢၼ်ႇတင်းၶိူင်ႈပိူင်ဢၼ်ထိူၵ်ႈၵႃႈထိူၵ်ႈၶၼ်တင်းလၢႆၸွႆႈထႅမ်မႃႉၸႃႉၶဝ်ဢေႃႈ။
လိူဝ်သေၼၼ်ႉၶုၼ်လူင် သႆးရတ်ႉ၊ ဢဝ်ဢွၵ်ႇၶိူင်ႈပိူင်ၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ဢၼ် ၼေႇပုၶတ်ႉၼေႇၸႃႇ၊ သိမ်းဢဝ်ဢွၵ်ႇသေၵႃႈတီႈဝဵင်း ယေႇရုသလႅမ်ႇ၊ ၵႂႃႇလႄႈသႂၢင်းသႂ်ႇဝႆႉၵႃႈၼႂ်းၵျွင်းပိၵ်ႈမၢၼ်ႇၽြႃးမၼ်းၸိူဝ်းၼၼ်ႉလႄႈ၊-
သႆးရတ်ႉ၊ ၶုၼ်ႁေႃၶမ်းမိူင်း ပႃးသျႃး၊ ၼၼ်ႉပူင်ဢမိင်ႉႁႂ်ႈ မိသရေႇတတ်ႉ၊ ၵေႃႉဢၼ်ပႂ်ႉတိူၵ်ႈၶမ်းၸဝ်ႈၼၼ်ႉဢဝ်ၶိူင်ႈပိူင်ၸိူဝ်းၼၼ်ႉဢွၵ်ႇလႄႈၼပ်ႉဢၢၼ်ႇသေလႄႈဢၢပ်ႈပၼ်တီႈ သေႇသပႃႇၸႃႇ၊ ၶုၼ်ဢၼ်ဢုပ်ႉပိူင်ႇမိူင်း ယုတႃႉ၊ ၼၼ်ႉဢေႃႈ။-
ၶိူင်ႈပိူင်ဢၼ်ဢဝ်ၶမ်းႁဵတ်းတင်းၶိူင်ႈပိူင်ဢၼ်ဢဝ်ငိုၼ်းႁဵတ်းတင်းမူတ်းပွင်းၵၼ်ၼပ်ႉဢၢၼ်ႇလႆႈႁႃႈႁဵင်သီႇပၢၵ်ႇဢၼ်ဢေႃႈ။ ၶိူင်ႈပိူင်တင်းသဵင်ႈတင်းလူင်ၼႆႉၸမ်ႉ၊ သေႇသပႃႇၸႃႇ၊ ဢဝ်ၶိုၼ်းမိူဝ်းၵႂႃႇမိူဝ်ႈဢၼ်မၼ်းဢွၼ်ႁူဝ်ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ပိူၼ်ႈတိဢဝ်သိမ်းဢဝ်ၵႂႃႇလႄႈတူၵ်းၵႅၼ်းယူႇၵႃႈၼႂ်းဝဵင်း ပႃႇပုလုၼ်ႇ၊ ၼၼ်ႉၶိုၼ်းၸူးၵႃႈတီႈဝဵင်း ယေႇရုသလႅမ်ႇ၊ ၼၼ်ႉဢေႃႈ။
ၵူၼ်းၸိူဝ်းၼႆႉပဵၼ်ၵူၼ်းမိူင်းၸဝ်ႈဢၼ်ဢွၵ်ႇသေၵႃႈၼႂ်းၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ မိူင်း ပႃႇပုလုၼ်ႇ၊ တိဢဝ်သိမ်းဢဝ်ၵႂႃႇလႄႈၶိုၼ်းပွၵ်ႈမႃးႁွတ်ႈထိုင်ၵႃႈတီႈဝဵင်း ယေႇရုသလႅမ်ႇ၊ ဢိၵ်ႇတင်းၵႃႈတီႈမိူင်း ယုတႃႉ၊ တီႈဝၢၼ်ႈဝဵင်းတီႈၶဝ်ယူႇႁင်းၽႂ်ႁင်းမၼ်းလႄႈ၊-
ၸွမ်းလူၺ်ႈၵၼ်တင်း ၸေႇရုပႃႉပေႇလႃႉ၊ယေႃးသု၊ၼေႇႁမိ၊သရႃႇယႃႉ၊ၸရႃႇယႃႉ၊မေႃႇတၵႄး၊ပိလသၼ်ႇ၊မီႇၸပႃႇ၊ပိၵဝေႇ၊ရေႇႁုမ်ႇ၊ပႃႇၼႃႇ၊ ၸိူဝ်းၼၼ်ႉမႃးဢေႃႈ။ ၸရၢင်းၵူၼ်းမဵဝ်း ဢိသရေး၊ ဢၼ်ၼပ်ႉဢၢၼ်ႇၸွမ်းၼင်ႇၶိူဝ်းႁိူၼ်းၽႂ်ၶိူဝ်းႁိူၼ်းမၼ်းလႄႈဢွၵ်ႇမႃးသေၵႃႈတီႈဢၼ်လႆႈၶၢမ်ႇတၢင်းဢၼ်တိဢဝ်သိမ်းဢဝ်ၵႂႃႇၼၼ်ႉၸမ်ႉ၊-
ၸရၢင်းဢၼ်ၼပ်ႉဢၼ်ဢၢၼ်ႇၼႂ်းလုၵ်ႈၼႂ်းလၢၼ်ၶဝ်ၸိူဝ်းဢၼ်ၶၢမ်ႇႁဵတ်းၶႃႈၼႂ်းၵျွင်းပိၵ်ႈမၢၼ်ႇၸဝ်ႈ၊ဢိၵ်ႇတင်းၶႃႈ သေႃးလမုၼ်ႇ၊ ဢၼ်လႆႈပွၵ်ႈၶိုၼ်းမႃးသေၵႃႈတီႈတၢင်းဢၼ်ပိူၼ်ႈတိဢဝ်သိမ်းဢဝ်ၵႂႃႇမီးသၢမ်ပၢၵ်ႇၵဝ်ႈသိပ်းသွင်ၵေႃႉဢေႃႈ။
ၸိူဝ်ႉၶိူဝ်းႁိူၼ်းယဵၸ်ႈပရေႃးႁဵၵ်ႈ ၸိူဝ်းဢၼ်ဢမ်ႇၽုၺ်ႇၼႄငဝ်ႈၶိူဝ်းပူႇပေႃႈၶဝ်လႆႈၼၼ်ႉၸမ်ႉ၊ပဵၼ်ၸိူဝ်ႉၶိူဝ်းႁိူၼ်း ႁႃႇပယႃႉ၊ ၸိူဝ်ႉၶိူဝ်းႁိူၼ်း ႁၵေႃႇၸႃႉ၊ တင်းၸိူဝ်ႉၶိူဝ်းႁိူၼ်း ပႃႇၸိလေး၊ ၸိူဝ်းၼၼ်ႉဢေႃႈ။ ( ပႃႇၸိလေး၊ ဢၼ်ပဵၼ်ပူႇပေႃႈၸိူဝ်ႉၶိူဝ်းႁိူၼ်းယဵၸ်ႈပရေႃးႁဵၵ်ႈၼၼ်ႉဢဝ်မေးၼႂ်းၸိူဝ်ႉၶိူဝ်းႁိူၼ်း ပႃႇၸိလေး၊ ၵူၼ်းမိူင်း ၵိလတ်ႉ၊ လႄႈမၼ်းၶၢမ်ႇဢဝ်ၸိုဝ်ႈသဵင်ၸိူဝ်ႉၶိူဝ်းႁိူၼ်းပူႇၼၢႆးမၼ်းဢေႃႈ။-)
ၵွပ်ႈပိူဝ်ႈဢၼ်ၶဝ်ဢမ်ႇၽုၺ်ႇၼႄငဝ်ႈၶိူဝ်းပူႇမွၼ်ႇၶဝ်လႆႈၼၼ်ႉလႄႈၶဝ်ၶၢမ်ႇတၢင်းဢၼ်ၼုၵ်ႈဢွၵ်ႇသေၵႃႈၼႂ်းဢရႃႇယဵၸ်ႈပရေႃးႁဵၵ်ႈဢေႃႈ။-
ဝုၼ်ႇလူင်ၵူၼ်းမဵဝ်း ၵျူး၊ ၶဝ်ၼၼ်ႉၸီႇယၢင်ႇလႄႈဝႃႈ၊ “ၸူဝ်ႈဢၼ်ယဵၸ်ႈပရေႃးႁဵၵ်ႈဢၼ်ပႃးဢုရိမ်းတင်းႀုမိမ်း ၸီႇယၢင်ႇလႆႈၼၼ်ႉဢမ်ႇပႆႇပေႃႇမႃးၼၼ်ႉၸိုင်၊ၶဝ်ဢမ်ႇလႆႈၵိၼ်တၢင်းၵိၼ်တၢင်းၶူပ်းဢၼ်သၢၵ်ႈလူႇတီႈၽြႃးပဵၼ်ၸဝ်ႈယဝ်ႉၼၼ်ႉ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၵူၼ်းၸိူဝ်းဢၼ်လႆႈၶၢမ်ႇတၢင်းဢၼ်ပိူၼ်ႈတိဢဝ်သိမ်းဢဝ်ၵႂႃႇတင်းလၢႆၼၼ်ႉလႆႈႁွတ်ႈထိုင်မႃးၶိုၼ်းၵႃႈတီႈၵျွင်းပိၵ်ႈမၢၼ်ႇၸဝ်ႈၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉၸိုင်၊ၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၸိူဝ်ႉၶိူဝ်းႁိူၼ်းၶဝ်ၵမ်ႈၽွင်ႈမီးၸႂ်ၸေႇတၼႃႇသေလႄႈလူႇတၢၼ်းပုၼ်ႈဢၼ်တၵ်းၶိုၼ်းတႄႇၶိုၼ်းႁဵတ်းၵျွင်းပိၵ်ႈမၢၼ်ႇၸဝ်ႈတီႈၵဝ်ႇမၼ်းၼၼ်ႉဢေႃႈ။-
ၵႃႈၼင်ႇဢၼ်တၢတ်ႈၼိူင်ႇလႆႈၼၼ်ႉၶဝ်ဢွၼ်ၵၼ်ဢဝ်ၶႅပ်းၶမ်းသၢမ်ပၢၵ်ႇၸွႆႉ၊ငိုၼ်းႁဵင်ႁူၵ်းပၢၵ်ႇပၢႆပႅတ်ႇသိပ်းၸွႆႉ၊ဢိၵ်ႇတင်းသိူဝ်ႈယၢဝ်းယဵၸ်ႈပရေႃးႁဵၵ်ႈပၢၵ်ႇၽိုၼ်လူႇတၢၼ်းပၼ်တီႈၽၼ်ႇတႃႇၸဝ်ႈဢေႃႈ။
ၼင်ႇၼၼ်လႄႈ၊ယဵၸ်ႈပရေႃးႁဵၵ်ႈလႂ်၊တင်းၵူၼ်း လေႇဝိ၊ လႂ်ဢိၵ်ႇတင်းၵူၼ်းဝၢၼ်ႈၵူၼ်းမိူင်းၵမ်ႈၽွင်ႈယူႇသဝ်းၵႃႈၼႂ်းဝဵင်း ယေႇရုသလႅမ်ႇ၊ ဢိၵ်ႇတင်းယူႇသဝ်းတီႈႁိမ်းႁွမ်းဝဵင်းၼၼ်ႉသေယဝ်ႉ၊ၵူၼ်းမေႃႁဵတ်းၵႂၢမ်းလႂ်၊တင်းၵူၼ်းပႂ်ႉၽၵ်းတူၵျွင်းပိၵ်ႈမၢၼ်ႇၸဝ်ႈလႂ်၊ဢိၵ်ႇတင်းၵူၼ်းဢၼ်ထၢမ်းၼႃႈၵၢၼ်ၼႂ်းၵျွင်းပိၵ်ႈမၢၼ်ႇၸဝ်ႈလႂ်၊သမ်ႉယူႇသဝ်းၵႃႈၼႂ်းဝၢၼ်ႈၶဝ်ဝဵင်းၶဝ်လႄႈ၊ၵူၼ်းမဵဝ်း ဢိသရေး၊ တင်းသဵင်ႈတင်းလူင်သမ်ႉယူႇသဝ်းၵႃႈၼႂ်းဝၢၼ်ႈၼႂ်းဝဵင်းပူႇပေႃႈၶဝ်ႁင်းၽႂ်ႁင်းမၼ်းၼၼ်ႉဢေႃႈ။
မိူဝ်ႈဢၼ်ႁွတ်ႈထိုင်လိူၼ်တီႈၸဵတ်းလႄႈ၊ၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်လႆႈယူႇမၼ်ႈမၼ်ႈၶိူင်ႇၶိူင်ႇၵႃႈၼႂ်းဝၢၼ်ႈၽႂ်ဝဵင်းမၼ်းယဝ်ႉၼၼ်ႉၸိုင်၊ၵူၼ်းတင်းလၢႆ ဢွၼ်ၵၼ်မႃးၸုၵၼ်တုမ်ၵၼ်ၵႃႈတီႈဝဵင်း ယေႇရုသလႅမ်ႇ၊ မိူၼ်ၸိူဝ်ႉၼင်ႇပဵၼ်တူဝ်လဵဝ်ၸႂ်လဵဝ်ၵူၺ်းၼၼ်ႉဢေႃႈ။-
မိူဝ်ႈၼၼ်ႉ၊ ယေႃးသု၊ လုၵ်ႈၸၢႆး ယေႃးၸတၵ်ႉ၊ ဢိၵ်ႇတင်းၸိူဝ်းဢၼ်ပဵၼ်ယဵၸ်ႈပရေႃးႁဵၵ်ႈ လူၺ်ႈၵၼ်တင်းမၼ်းလႄႈ ၸေႇရုပႃႉပေႇလႃႉ၊ လုၵ်ႈၸၢႆး သႃႇလထိဢေးလႃႉ၊ ဢိၵ်ႇတင်းပီႈၼွင်ႉမၼ်းတင်းလၢႆၸိူဝ်းၼၼ်ႉဢွၼ်ၵၼ်လုၵ်ႉလႄႈတႄႇႁဵတ်းၶဵင်ႇတၢင်းလူႇၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ႁႂ်ႈလႆႈႁဵတ်းတၢင်းလူႇဢၼ်တုတ်ႇၽႆးၵႃႈၼိူဝ်မၼ်းၸွမ်းၵႃႈၼင်ႇဢၼ်တႅမ်ႈဝႆႉမီးယူႇၵႃႈၼႂ်းၵျၢမ်းပိင်းၺၢပ်ႈတြႃး မူဝ်းသေႇ၊ ၵေႃႉပဵၼ်ၵူၼ်းၽြႃးပဵၼ်ၸဝ်ႈၼၼ်ႉဢေႃႈ။-
ပိၵ်ႉသမ်ႉၶဝ်ၵူဝ်ႁႄၵူၼ်းၸိူဝ်းဢၼ်ယူႇၵႃႈၼႂ်းမိူင်းၼၼ်ႉၵူႈတီႈၵူႈလႅၼ်သေၵေႃႈ ၶဝ်ယင်းဢွၼ်ၵၼ်ၶိုၼ်းတႄႇၶိုၼ်းႁဵတ်းၶဵင်ႇတၢင်းလူႇၵႃႈၼိူဝ်ၶဵင်ႇႁၢၼ်ႉမၼ်းၵဝ်ႇၵဝ်ႇၼၼ်ႉသေယဝ်ႉ၊ဢဝ်ၶိူင်ႈတၢင်းလူႇဢၼ်တုတ်ႇၽႆးၶိင်ႇႁူဝ်ၼႂ်၊ဢိၵ်ႇတင်းၶိူင်ႈတၢင်းလူႇဢၼ်တုတ်ႇၽႆးၶိင်ႇႁူဝ်ၶမ်ႈၼၼ်ႉသၢၵ်ႈလူႇတီႈ ထႃႇဝရႃႉၽြႃး၊ ယူႇသေႇသေႇဢေႃႈ။-
ၶဝ်ဢွၼ်ၵၼ်ႁဵတ်းပွႆးသုမ်ႉထဵင်ၸွမ်းၵႃႈၼင်ႇဢၼ်မီးၼႂ်းၵျၢမ်းလိၵ်ႈၼၼ်ႉသေလႄႈသၢၵ်ႈလူႇၶိူင်ႈတၢင်းလူႇတၢင်းတၢၼ်းၵူႈမိုဝ်ႉၵူႈဝၼ်းၵႃႈၼင်ႇဢၼ်ထုၵ်ႇလီႁဵတ်းၸွမ်းၼင်ႇထုင်းၽိင်ႈတြႃးမီးဝႆႉၼၼ်ႉဢေႃႈ။-
လိုၼ်းၼၼ်ႉၶဝ်ဢွၼ်ၵၼ်ဢဝ်တၢင်းလူႇဢၼ်တုတ်ႇၽႆးလႆႈသၢၵ်ႈလူႇသေႇသေႇ၊တၢင်းလူႇဢၼ်လႆႈသၢၵ်ႈလူႇၼႂ်းဝၼ်းလိူၼ်မႂ်ႇ၊ဢိၵ်ႇတင်းပွႆးထမ်ႇမႃႉၵႃႈဢၼ်ႁႂ်ႈမူတ်းၸၢင်ႇပုၼ်ႈ ထႃႇဝရႃႉၽြႃး၊ တၢင်းလူႇဢၼ်ၶဝ်ၸိူဝ်းဢၼ်မီးၸေႇတၼႃႇသေလႄႈဢဝ်ၶိူင်ႈတၢင်းလူႇမႃးၵႃႈတီႈ ထႃႇဝရႃႉၽြႃး၊ ႁင်းၽႂ်ႁင်းမၼ်းၸိူဝ်းၼၼ်ႉသၢၵ်ႈလူႇဢေႃႈ။-
ပိၵ်ႉသမ်ႉဢမ်ႇလႆႈၶျႃးငဝ်ႈႁၢၵ်ႈတိူၵ်ႈၵျွင်းပိၵ်ႈမၢၼ်ႇ ထႃႇဝရႃႉၽြႃး၊ သေၵေႃႈ၊ၶဝ်ဢွၼ်ၵၼ်ဢဝ်ၶိူင်ႈတၢင်းလူႇဢၼ်တုတ်ႇၽႆးသၢၵ်ႈလူႇတီႈ ထႃႇဝရႃႉၽြႃး၊ တႄႇၸႃႉဢဝ်ၼႂ်းလိူၼ်တီႈၸဵတ်းမႂ်ႇဝၼ်းၼိုင်ႈၼၼ်ႉဢေႃႈ။
ၶဝ်ဢွၼ်ၵၼ်ဢဝ်ငိုၼ်းပၼ်တီႈၵူၼ်းၸိူဝ်းဢၼ်ၸၢင်ႈမေႃတႄႇမေႃႁဵတ်း၊ဢိၵ်ႇတင်းၸၢင်ႈမႆႉတင်းလၢႆလႄႈဢွၼ်ၵၼ်ဢဝ်ၸရိပ်ႈတၢင်းၵိၼ်၊ဢိၵ်ႇတင်းၼမ်ႉမၼ်းပၼ်တီႈၵူၼ်းဝဵင်း ၸိတုမ်ႇ၊ တင်းၵူၼ်းဝဵင်း တုရု၊ ၸိူဝ်းၼၼ်ႉႁႂ်ႈလႆႈဢဝ်မႆႉဢႃႇရိတ်ႉသေၵႃႈၼိူဝ်လွႆ လေႇပၼုၼ်ႇ၊ လူင်းမႃးတီႈပၢင်ႇလၢႆႇလႄႈသူင်ႇၵႂႃႇၵႃႈတီႈတႃႈၼမ်ႉ ယွပ်ႉပႃႉ၊ ၸွမ်းၵႃႈၼင်ႇဢၼ်ၶဝ်လႆႈဢၶႂၢင်ႉတီႈၶုၼ် သႆးရတ်ႉ၊ ၶုၼ်ႁေႃၶမ်းမိူင်း ပႃးသျႃး၊ ၼၼ်ႉဢေႃႈ။
ၼႂ်းပီတီႈသွင်၊လိူၼ်တီႈသွင်ဝၢႆးသေၶဝ်ႁွတ်ႈထိုင်ၵႃႈတီႈႁိူၼ်းၽြႃးပဵၼ်ၸဝ်ႈၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉ၊ ၸေႇရုပႃႉပေႇလႃႉ၊ လုၵ်ႈၸၢႆး သႃႇလထိဢေးလႃႉ၊ယေႃးသု၊ လုၵ်ႈၸၢႆး ယေႃးၸတၵ်ႉ၊ တင်းပီႈၼွင်ႉၶဝ်တင်းလၢႆ ဢၼ်ပဵၼ်ယဵၸ်ႈပရေႃးႁဵၵ်ႈဢိၵ်ႇတင်းၵူၼ်းမဵဝ်း လေႇဝိ၊ ဢိၵ်ႇပႃးတင်းၵူၼ်းၸိူဝ်းဢၼ်လႆႈၶၢမ်ႇတၢင်းဢၼ်တိဢဝ်သိမ်းဢဝ်ၵႂႃႇလႄႈပွၵ်ႈမႃးၶိုၼ်းၵႃႈတီႈဝဵင်း ယေႇရုသလႅမ်ႇ၊ ၸိူဝ်းၼၼ်ႉၶၢၼ်းၵူၼ်း လေႇဝိ၊ ဢၼ်ဢသၢၵ်ႈလႆႈသၢဝ်းၶိုၼ်ႈၵႂႃႇၸိူဝ်းၼၼ်ႉႁႂ်ႈၶဝ်လႆႈဢုပ်ႉထိင်းၵႃႈၼိူဝ်တၢင်းဢၼ်တႄႇဢၼ်ႁဵတ်းႁိူၼ်း ထႃႇဝရႃႉၽြႃး၊ ၼၼ်ႉဢေႃႈ။-
မိူဝ်ႈၼၼ်ႉ၊ ယေႃးသု၊ ဢိၵ်ႇတင်းလုၵ်ႈၸၢႆးလႄႈပီႈၼွင်ႉမၼ်းတင်းလၢႆ၊ ၵႃႇတမေႇလႃႉ၊ ဢိၵ်ႇတင်းလုၵ်ႈၸၢႆးမၼ်းတင်းလၢႆဢၼ်ပဵၼ်ၵူၼ်းမဵဝ်း ယုတႃႉ၊ ၵူၼ်း ႁေႇၼတတ်ႉ၊ တင်းလၢႆဢိၵ်ႇတင်းလုၵ်ႈၸၢႆးၶဝ်၊ပီႈၼွင်ႉၶဝ်၊ဢၼ်ပဵၼ်ၵူၼ်းမဵဝ်း လေႇဝိ၊ ၸိူဝ်းၼၼ်ႉဢွၼ်ၵၼ်ဢုပ်ႉထိင်းၵႃႈၼိူဝ်ၶဝ်ၸိူဝ်းဢၼ်သၢင်ႈႁဵတ်းႁိူၼ်းၽြႃးပဵၼ်ၸဝ်ႈၼၼ်ႉဢေႃႈ။
ၶဝ်ၸိူဝ်းဢၼ်သၢင်ႈႁဵတ်းၼၼ်ႉ၊မိူဝ်ႈဢၼ်ၶဝ်ၶျႃးငဝ်ႈႁၢၵ်ႈတိူၵ်ႈၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ၼၼ်ႉၸိုင်၊ယဵၸ်ႈပရေႃးႁဵၵ်ႈၼုင်ႈမႆႁၢင်ႈၶိူင်ႈၶူဝ်းၼုင်ႈၶဝ်သေယဝ်ႉ၊ယိပ်းၵမ်ၼႄးၶရႃႇယူႇ၊ၵူၼ်း လေႇဝိ၊ ၶိူဝ်းႁိူၼ်း ဢႃႇသပ်ႉ၊ ၵေႃႈယိပ်းၵမ်သႅင်ႇယူႇသေယဝ်ႉ၊ၸုၵ်းယူႇတီႈၽႂ်တီႈမၼ်းလႄႈႁႂ်ႈလႆႈယွင်ႈယေႃး ထႃႇဝရႃႉၽြႃး၊ ၸွမ်းၵႃႈၼင်ႇဢၼ် တႃႇဝိတ်ႈ၊ ၶုၼ်ႁေႃၶမ်း ဢိသရေး၊ ၸီႇယၢင်ႇႁဵတ်းဝႆႉၼၼ်ႉဢေႃႈ။-
ၶဝ်ဢွၼ်ၵၼ်ယွင်ႈယေႃး ထႃႇဝရႃႉၽြႃး၊ လႄႈႁဵတ်းၵႂၢမ်းတွပ်ႇၵၼ်ပဵၼ်လႄႉပဵၼ်ၵမ်းလႄႈဝႃႈ၊ “ ထႃႇဝရႃႉၽြႃး၊ မျၢတ်ႈလီဢေႃႈ။ ၵရုၼႃႇၸဝ်ႈတႄႇယူႇမၼ်ႈၶိူင်ႇၼႃႇ၊ ၵႃႈၼိူဝ်ၵူၼ်းမဵဝ်း ဢိသရေး၊ တႃႇသေႇဢေႃႈ။” ဝႃႈၼင်ႇၼႆဢေႃႈ။ ၼင်ႇၼၼ်လႄႈၵူၼ်းတင်းသဵင်ႈတင်းလူင် ဢွၼ်ၵၼ်ယွင်ႈယေႃး ထႃႇဝရႃႉၽြႃး၊ လူၺ်ႈတင်းသဵင်ဢၼ်ယႂ်ႇၼႃႇႁွင်ႉႁုၼ်ႈႁွင်ႉသႅၼ်ႇၵွပ်ႈပိူဝ်ႈလႆႈၶျႃးငဝ်ႈႁၢၵ်ႈတိူၵ်ႈၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။-
ၵူၺ်းၵႃႈ၊ယဵၸ်ႈပရေႃးႁဵၵ်ႈ၊ဢိၵ်ႇတင်းၵူၼ်း လေႇဝိ၊ လႄႈၵူၼ်းဢၼ်ပဵၼ်ငဝ်ႈပဵၼ်ႁူဝ်ၼႂ်းၸိူဝ်ႉၼႂ်းၶိူဝ်းၶဝ်ဢၼ်ဝႃႈ၊ၶဝ်ၸိူဝ်းဢၼ်ဢသၢၵ်ႈထဝ်ႈၵႄႇလႄႈယၢမ်ႈလႆႈႁၼ်ၵျွင်းပိၵ်ႈမၢၼ်ႇၸဝ်ႈဢၼ်ပူၼ်ႉမႃးမိူဝ်ႈဢွၼ်တၢင်းၸိူဝ်းၼၼ်ႉဢွၼ်ၵၼ်ႁဵတ်းတင်းသဵင်ဢၼ်ယႂ်ႇၼႃႇႁွင်ႉႁႆႈၼႂ်းမိူဝ်ႈဢၼ်ၶျႃးငဝ်ႈႁၢၵ်ႈၵျွင်းပိၵ်ႈမၢၼ်ႇၸဝ်ႈၼၼ်ႉသိုဝ်ႈၼႃႈတႂ်ႈတႃၶဝ်ၼၼ်ႉဢေႃႈ။ ၵူၼ်းၼမ်ၼႃႇဢၼ်မီးၵႃႈတီႈၼၼ်ႈၵေႃႈဢွၼ်ၵၼ်မီးၸႂ်ဢၼ်ၸူမ်းသိူဝ်းသေလႄႈႁွင်ႉႁုၼ်ႈႁွင်ႉသႅၼ်ႇ၊-
ထၢၼ်ႈပေႃးဢမ်ႇမီးၽူႈလႂ်ၸၵ်ႉၽႄလႄႈႁုသဵင်လႂ်ပဵၼ်သဵင်ဢၼ်ၸူမ်းသိူဝ်းလႄႈသဵင်လႂ်ပဵၼ်သဵင်ဢၼ်ႁွင်ႉသႅၼ်ႇ၊ဢိၵ်ႇတင်းသဵင်လႂ်ပဵၼ်သဵင်ဢၼ်ႁွင်ႉႁႆႈၼၼ်ႉလႆႈ။ လွင်ႈမၼ်းၸမ်ႉ၊ၶဝ်ႁွင်ႉႁုၼ်ႈႁွင်ႉသႅၼ်ႇလူၺ်ႈသဵင်ဢၼ်ယႂ်ႇၼႃႇထၢၼ်ႈပေႃးသဵင်ၼၼ်ႉလႆႈငိၼ်းႁွတ်ႈၵႂႃႇတီႈဢၼ်ၵႆၼႃႇၼၼ်ႉဢေႃႈ။
လွင်ႈတၢင်းဢၼ်ၵူၼ်းမဵဝ်းဢၼ်လႆႈၶၢမ်ႇတၢင်းဢၼ်ပိူၼ်ႈတိဢဝ်သိမ်းဢဝ်ၵႂႃႇသေယဝ်ႉသမ်ႉလႆႈပွၵ်ႈၶိုၼ်းမႃးၸိူဝ်းၼၼ်ႉဢွၼ်ၵၼ်တႄႇႁဵတ်းၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မိူဝ်ႈဢၼ်ရၢၼ်ႇသူႇၵူၼ်းမဵဝ်း ယုတႃႉ၊ တင်းရၢၼ်ႇသူႇၵူၼ်းမဵဝ်း ပိၼ်ႇယႃႇမိၼ်ႇ၊ ၸိူဝ်းၼၼ်ႉလႆႈငိၼ်းၼၼ်ႉၸိုင်၊-
ၶဝ်ဢွၼ်ၵၼ်မႃးၸူးတီႈ ၸေႇရုပႃႉပေႇလႃႉ၊ တင်းတီႈၶဝ်ၸိူဝ်းဢၼ်ပဵၼ်ငဝ်ႈပဵၼ်ႁူဝ်ၼႂ်းၸိူဝ်ႉၼႂ်းၶိူဝ်းၸိူဝ်းၼၼ်ႉသေယဝ်ႉ၊လၢတ်ႈလႄႈဝႃႈ၊ “ႁႂ်ႈႁဝ်းလႆႈၶဝ်ႈပႃးတႄႇႁဵတ်းလူၺ်ႈၵၼ်တင်းသူသေၵမ်းလူၺ်ႈ။ ႁဝ်းၵေႃႈဢွၼ်ၵၼ်ဝႆႈၽြႃးပဵၼ်ၸဝ်ႈသူႇလဵဝ်ၵၼ်တင်းသူဝႆႈၼၼ်ႉဢေႃႈ။ ႁဝ်းဢွၼ်ၵၼ်သၢၵ်ႈၵၢပ်ႈႁဵတ်းတၢင်းလူႇတီႈမၼ်းၸဝ်ႈမႃး၊ၸႃႉၸဵမ်ၸူဝ်ႈပၢၼ် ဢေႇသရႃႇႁတ်ႉတုၼ်ႇ၊ ၸဝ်ႈမုၼ်ယႂ်ႇၶုၼ်ႁေႃၶမ်းမိူင်း ဢႃႇသီးရီးယႃး၊ ဢၼ်ဢဝ်ႁဝ်းမႃးယူႇၵႃႈတီႈမိူင်းၼႆႉၼၼ်ႉဢေႃႈ၊” မိူဝ်ႈဢၼ်ဝႃႈၼင်ႇၼႆၸိုင်။
ၸေႇရုပႃႉပေႇလႃႉ၊ ဢိၵ်ႇတင်း ယေႃးသု၊ ဢိၵ်ႇတင်းၶဝ်ၸိူဝ်းဢၼ်ယင်းၵိုတ်းၵျၢၼ်ႇယူႇလႄႈပဵၼ်ငဝ်ႈပဵၼ်ႁူဝ်ၼႂ်းၸိူဝ်ႉၼႂ်းၶိူဝ်း ဢိသရေး၊ ၸိူဝ်းၼၼ်ႉဢွၼ်ၵၼ်ၶိုၼ်းလၢတ်ႈတီႈၶဝ်လႄႈဝႃႈ၊ “သူဢမ်ႇလႆႈၶဝ်ႈပႃးလူၺ်ႈၵၼ်တင်းႁဝ်းသေလႄႈတႄႇႁဵတ်းၵျွင်းပိၵ်ႈမၢၼ်ႇၸဝ်ႈ ထႃႇဝရႃႉၽြႃး၊ ၼၼ်ႉတူဝ်ႁဝ်းတၵ်းလႆႈတႄႇႁဵတ်းပုၼ်ႈၽြႃးပဵၼ်ၸဝ်ႈႁဝ်းမဵဝ်း ဢိသရေး၊ ၸွမ်းၵႃႈၼင်ႇဢၼ် သႆးရတ်ႉ၊ ၸဝ်ႈမုၼ်ယႂ်ႇၶုၼ်ႁေႃၶမ်းမိူင်း ပႃးသျႃး၊ မီးဢမိင်ႉၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၵူၼ်းၸိူဝ်းဢၼ်ယူႇၼႂ်းဝၢၼ်ႈမိူင်းၼၼ်ႉဢွၼ်ၵၼ်ႁဵတ်းႁႂ်ႈၵူၼ်းမဵဝ်း ယုတႃႉ၊ ၸိူဝ်းၼၼ်ႉၸႂ်လုႁႅင်းဢူၼ်ႈလႄႈလႆႈၵူဝ်လႆႈႁႄၼႂ်းတၢင်းဢၼ်တႄႇႁဵတ်းၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။-
ၶဝ်ယင်းၸၢင်ႈငႃဢဝ်မူးမၢတ်ႈၽွင်းမိူင်း ပႃးသျႃး၊ ၶဝ်ႁႂ်ႈလႆႈႁႄႉၶႅၼ်တၢင်းၵျၢမ်ႇတၢင်းပွင်ၵူၼ်းမဵဝ်း ယုတႃႉ၊ ၶဝ်ဢေႃႈ။ ၶဝ်ႁဵတ်းၸိူဝ်ႉၼင်ႇၼၼ်ၸႃႉၸဵမ်ၸူဝ်ႈပၢၼ်ၶုၼ်ႁေႃၶမ်း သႆးရတ်ႉ၊ ၸၢမ်ႇႁၢင်ႈၸၢမ်ႇႁေႃမႃးတေႃႇထိုင်ႁွတ်ႈၸူဝ်ႈပၢၼ် တႃႇရိ၊ ၶုၼ်ႁေႃၶမ်းမိူင်း ပႃးသျႃး၊ ၼၼ်ႉဢေႃႈ။
ၼႂ်းမိူဝ်ႈဢၼ် ဢႃႇသူၺ်ႇရု၊ တႄႇၸႃႉၸၢမ်ႇႁၢင်ႈၸၢမ်ႇႁေႃၼၼ်ႉရၢၼ်ႇသူႇၵူၼ်းမိူင်း ယုတႃႉ၊ တင်းရၢၼ်ႇသူႇဝဵင်း ယေႇရုသလႅမ်ႇ၊ တင်းလၢႆၸိူဝ်းၼၼ်ႉဢွၼ်ၵၼ်တႅမ်ႈလိၵ်ႈတၢင်ႇဢပျတ်ႈသေလႄႈသူင်ႇၵႂႃႇဢေႃႈ။
ၵႃႈၼႂ်းၸူဝ်ႈပၢၼ် ဢႃႇတႃႇၸေႇရိတ်ႉ၊ ၸဝ်ႈမုၼ်ယႂ်ႇၶုၼ်ႁေႃၶမ်းမိူင်း ပႃးသျႃး၊ ၼၼ်ႉၵေႃႈ၊ ပိသလမ်ႇ၊မိသရေႇတတ်ႉ၊တပႄႇလႃႉ၊ ဢိၵ်ႇတင်းၵေႃႉသႄႈၶဝ်ၸိူဝ်းၼၼ်ႉဢွၼ်ၵၼ်တႅမ်ႈလိၵ်ႈၵႃႈၼႂ်းၵႂၢမ်း ဢႃႇရမိၵ်ႉ၊ လႄႈၽတ်းဢၢၼ်ႇၼႂ်းၵျၢမ်း ဢႃႇရမိၵ်ႉ၊ ပၼ်တီႈၸဝ်ႈမုၼ်ယႂ်ႇၶုၼ်ႁေႃၶမ်းဢေႃႈ။
ဝုၼ်ႇလူင် ရေႇႁုမ်ႇ၊ တင်းၽူႈမၢႆလူင် သိမသေး၊ ၵေႃႈတႅမ်ႈလွင်ႈဝဵင်း ယေႇရုသလႅမ်ႇ၊ လႄႈတၢင်ႇလဝ်ႈတီႈၸဝ်ႈမုၼ်ယႂ်ႇၶုၼ်ႁေႃၶမ်း ဢႃႇတႃႇၸေႇရိတ်ႉ၊ ဢေႃႈ။
လိၵ်ႈၼၼ်ႉၸမ်ႉ၊ဝုၼ်ႇလူင် ရေႇႁုမ်ႇ၊ ၽူႈမၢႆလူင် သိမသေး၊ ဢိၵ်ႇတင်းၵေႃႉသႄႈၶဝ်တင်းလၢႆ၊ၶုၼ်ဢၼ်ၸီႇယၢင်ႇတြႃးတင်းလၢႆ၊တင်းမူးမၢတ်ႈၽွင်းမိူင်းတၢင်ႇၵေႃႉတၢင်ႇၵူၼ်းတင်းသဵင်ႈတင်းလူင်ဢၼ်ပဵၼ်ၵူၼ်းမိူင်း ဢေးရိသႃႉ၊ ၵူၼ်းမိူင်း ပႃႇပုလုၼ်ႇ၊ တင်းၵူၼ်းမိူင်း သုသႃႇ၊ ဢၼ်မီးၵႃႈၼႂ်းမိူင်း ဢေႇလမ်ႇ၊-
ဢိၵ်ႇလူၺ်ႈၵၼ်တင်းၵူၼ်းတၢင်ႇၸိူဝ်ႉတၢင်ႇမဵဝ်းဢၼ်ၶုၼ် ဢႃႇသၼပ်ႉပႃႇ၊ ဢၼ်ယႂ်ႇမျၢတ်ႈၶျႃးပၼ်တီႈယူႇတီႈသဝ်းၶဝ်ၵႃႈၼႂ်းဝဵင်း သမႃႇရိ၊ ဢိၵ်ႇတင်းၵႃႈၼႂ်းဢိူင်ႇၽၢႆႇတၢင်းဝၼ်းတူၵ်းမႄႈၼမ်ႉ ဢုၽရတ်ႉ၊ ၵူႈတီႈၵူႈလႅၼ်ၼၼ်ႉၸိူဝ်းၼၼ်ႉတင်းမူတ်းဢွၼ်ၵၼ်တႅမ်ႈလိၵ်ႈဢေႃႈ။-
လိၵ်ႈဢၼ်မိူၼ်ၵၼ်တင်းလိၵ်ႈၽိုၼ်ဢၼ်ၶဝ်သူင်ႇၵႂႃႇတီႈၶုၼ်လူင် ဢႃႇတႃႇၸေႇရိတ်ႉ၊ ၼၼ်ႉဝႃႈၸမ်ႉ၊ “ၶႃႈၸဝ်ႈႁဝ်းၸိူဝ်းဢၼ်ပဵၼ်ၵူၼ်းမိူင်းၽၢႆႇတၢင်းဝၼ်းတူၵ်းမႄႈၼမ်ႉ ဢုၽရတ်ႉ၊ မီးလိၵ်ႈတၢင်ႇလဝ်ႈထိုင်ၸဝ်ႈမုၼ်ယႂ်ႇၶုၼ်ႁေႃၶမ်း ဢႃႇတႃႇၸေႇရိတ်ႉ၊ တီႈၶႃႈဢေႃႈ။
“ၶႃႈၸဝ်ႈႁဝ်းၶဝ်ၶႂ်ႈႁႂ်ႈၸဝ်ႈမုၼ်ယႂ်ႇၶုၼ်လူင်ႁုလွင်ႈဢၼ်ၵူၼ်းမဵဝ်း ၵျူး၊ ဢၼ်လုၵ်ႉသေၵႃႈတီႈသိုင်ႇၸိုင်ႈမိူင်းၸဝ်ႈႁဝ်းမႃးလႄႈယူႇသဝ်းၵႃႈတီႈဝဵင်း ယေႇရုသလႅမ်ႇ၊ ၸိူဝ်းၼၼ်ႉ ၶိုၼ်းတႄႇၶိုၼ်းႁဵတ်းဝဵင်းဢၼ်ႁၢႆႉယုတ်ႈလႄႈၸၢင်ႈလုၵ်ႉၽိုၼ်ႉၼၼ်ႉတီႈၶႃႈဢေႃႈ။ ၶဝ်ၼၼ်ႉၶိုၼ်းတႄႇၶိုၼ်းႁဵတ်းလမ်းဝဵင်းတင်းလၢႆလႄႈၸမ်တၵ်းယဝ်ႉတူဝ်ႈတီႈၶႃႈယဝ်ႉ။-
ၸဝ်ႈမုၼ်ယႂ်ႇၶုၼ်ႁေႃၶမ်းတီႈၶႃႈ။ ပေႃးဝဵင်းၼၼ်ႉၶိုၼ်းတႄႇၶိုၼ်းႁဵတ်းယဝ်ႉလႄႈလမ်းဝဵင်းမၼ်းတင်းလၢႆယဝ်ႉတူဝ်ႈယဝ်ႉၼၼ်ႉၸိုင်၊ၶဝ်တၵ်းဢမ်ႇသၢၵ်ႈၶွၼ်ႇဝၢၼ်ႈၶွၼ်ႇမိူင်း၊ၶွၼ်ႇၵႃႉၶွၼ်ႇၶၢႆ၊ၶွၼ်ႇတႃႈၶွၼ်ႇတၢင်းလႄႈဢၵျူဝ်းၶုၼ်ႁေႃၶမ်းၵူႈၸူဝ်ႈၵူႈပၢၼ်တၵ်းၵေႇတၵ်းယွမ်းတီႈၶႃႈယဝ်ႉ။-
တေႃႈလဵဝ်ၼႆႉၵွပ်ႈပိူဝ်ႈဢၼ်ၶႃႈၸဝ်ႈႁဝ်းၶဝ်ပဵၼ်ၵေႃႉဢၼ်လႆႈၶၢမ်ႇဢၵျူဝ်းႁေႃၸဝ်ႈလႄႈ၊ၶႃႈၸဝ်ႈႁဝ်းၶဝ်ဢမ်ႇၶႂ်ႈႁၼ်လွင်ႈတၢင်းၸိူဝ်းၼၼ်ႉပဵၼ်မႃးၼၼ်ႉတီႈၶႃႈ။ ပိူဝ်ႈၼႆလႄႈၶႃႈၸဝ်ႈႁဝ်းၶဝ်ပၼ်တၢင်းၵျၢမ်ႇတၢင်းပွင်၊-
ႁႂ်ႈၸဝ်ႈႁဝ်းၸႅတ်ႈသေးတူၺ်းလိၵ်ႈဢၼ်ပူႇမွၼ်ႇၸဝ်ႈတင်းလၢႆမၢတ်ႈမၢႆဝႆႉၸိူဝ်းၼၼ်ႉတီႈၶႃႈဢေႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ၸဝ်ႈႁဝ်းတၵ်းထူပ်းႁၼ်လွင်ႈဢၼ်ၸဵမ်မိူဝ်ႈၵွၼ်ႇဢွၼ်ၼႆႉၼၼ်ႉဝဵင်းၼႆႉပဵၼ်ဝဵင်းဢၼ်ၵႆႉလုၵ်ႉၽိုၼ်ႉသေႇသေႇ၊ဢိၵ်ႇတင်းၸၢင်ႈပၼ်ၽေးတုၵ်ႉၶႃႉတီႈၶုၼ်ႁေႃၶမ်းတင်းတီႈသိုင်ႇၸိုင်ႈဝၢၼ်ႈမိူင်းၸဝ်ႈလႄႈၵူၼ်းဝၢၼ်ႈၵူၼ်းမိူင်းမၼ်းၵႆႉၶတ်းၶႅင်ႇတေႃႇၶုၼ်မိူင်းဢေႃႈ။ ၵွပ်ႈၸိူဝ်ႉၼင်ႇၼႆလႄႈဝဵင်းၼၼ်ႉလႆႈၶၢမ်ႇတၢင်းဢၼ်တိုၵ်းဢၼ်ယႃႉပႅတ်ႈဢေႃႈ။-
ၶႃႈၸဝ်ႈႁဝ်းၶဝ်လဝ်ႈလၢတ်ႈႁႂ်ႈလႆႈငိၼ်းလွင်ႈဢၼ်ပေႃးသမ်ႉၶိုၼ်းတႄႇႁဵတ်းဝဵင်းၼၼ်ႉလႄႈလမ်းဝဵင်းယဝ်ႉတူဝ်ႈယဝ်ႉၸိုင်၊ၸဝ်ႈမုၼ်ယႂ်ႇၶုၼ်လူင်ႁဝ်းတၵ်းဢမ်ႇပႄႉဢုပ်ႉထိင်းဢိူင်ႇၽၢႆႇတၢင်းဝၼ်းတူၵ်းမႄႈၼမ်ႉ ဢုၽရတ်ႉ၊ လႆႈတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
ၸဝ်ႈမုၼ်ယႂ်ႇၶုၼ်ႁေႃၶမ်းၶိုၼ်းပၼ်လိၵ်ႈၵႂႃႇလႄႈဝႃႈၸမ်ႉ၊ “မီးလိၵ်ႈၶိုၼ်းပၼ်ၵႂႃႇတီႈဝုၼ်ႇလူင် ရေႇႁုမ်ႇ၊ တင်းၽူႈမၢႆလူင် သိမသေး၊ ဢိၵ်ႇတင်းၵေႃႉသႄႈၶဝ်ဢၼ်မီးၵႃႈတီႈဝဵင်း သမႃႇရိ၊ ဢိၵ်ႇတင်းတၢင်ႇၵေႃႉတၢင်ႇၵူၼ်းဢၼ်ယူႇၽၢႆႇဝၼ်းတူၵ်းမႄႈၼမ်ႉ ဢုၽရတ်ႉ၊ ၸိူဝ်းၼၼ်ႉဢေႃႈ။ ႁႂ်ႈသူၵတ်းယဵၼ်ၶျၢမ်းသႃႇသေၵမ်းလူၺ်ႈ။
“လိၵ်ႈဢၼ်သူတႅမ်ႈမႃးၼၼ်ႉလႆႈပျၢၼ်ႇဢထိၵ်ႈပႄႇမၼ်းလႄႈၽတ်းဢၢၼ်ႇတီႈၵဝ်ယဝ်ႉ။-
ၵဝ်ပူင်ဢမိင်ႉႁႂ်ႈသွၵ်ႈႁႃလူတူၺ်းလႄႈ၊ၸႂ်ႈတႄႉယဝ်ႉ။ လႆႈႁုလွင်ႈဢၼ်ၸဵမ်မိူဝ်ႈၵွၼ်ႇဢွၼ်ၼႆႉၼၼ်ႉဝဵင်း ယေႇရုသလႅမ်ႇ၊ ၸၢင်ႈၶတ်းၶႅင်ႁႅင်းတႃႉဢႃႇၼႃႇၸၢၵ်ႈၸဝ်ႈ၊ဢိၵ်ႇတင်းၸၢင်ႈလုၵ်ႉၽိုၼ်ႉယူႇသေႇသေႇလႄႈပၼ်တုၵ်ႉၶႃႉတီႈၶုၼ်ၼၼ်ႉဢေႃႈ။-
ၶုၼ်ႁေႃၶမ်းဢၼ်တၼ်းၶူဝ်းယႂ်ႇၼႃႇလႄႈယၢမ်ႈၸၢမ်ႇႁၢင်ႈၸၢမ်ႇႁေႃယူႇၵႃႈၼႂ်းဝဵင်းၼၼ်ႉသေယဝ်ႉ၊ဢုပ်ႉပိူင်ႇၵႃႈၼိူဝ်သိုင်ႇၸိုင်ႈဝၢၼ်ႈမိူင်းၽၢႆႇဝၼ်းတူၵ်းမႄႈၼမ်ႉ ဢုၽရတ်ႉ၊ တင်းသဵင်ႈတင်းမူတ်းလႄႈၵဵပ်းၵိၼ်ၶွၼ်ႇဝၢၼ်ႈၶွၼ်ႇမိူင်း၊ၶွၼ်ႇၵႃႉၶွၼ်ႇၶၢႆ၊ၶွၼ်ႇတႃႈၶွၼ်ႇတၢင်းလႂ်ဢေႃႈ။-
ပိူဝ်ႈၼႆလႄႈသူဢွၼ်ၵၼ်ပူင်ဢမိင်ႉယႃႇႁႂ်ႈၶဝ်သိုပ်ႇတႄႇဝဵင်းႁဵတ်းဝဵင်းၼၼ်ႉထႅင်ႈ တေႃႇထိုင်ၵဝ်ၸဝ်ႈပူင်ဢမိင်ႉထႅင်ႈၼၼ်ႉတႃႉ။-
ၼင်ႇႁိုဝ်ဢၵျူဝ်းဝၢၼ်ႈမိူင်းၸဝ်ႈတေဢမ်ႇလႆႈလုၼၼ်ႉလႄႈႁႂ်ႈဝႆႉသတိသေႁဵတ်းၵႂႃႇၵမ်းလဵဝ်တႃႉ။” ဝႃႈၼင်ႇၼႆဢေႃႈ။
လိၵ်ႈဢၼ် ဢႃႇတႃႇၸေႇရိတ်ႉ၊ ပၼ်ၵႂႃႇၼၼ်ႉၽတ်းဢၢၼ်ႇၵႃႈတီႈၽၢႆႇၼႃႈဝုၼ်ႇလူင် ရေႇႁုမ်ႇ၊ တင်းၽူႈမၢႆလူင် သိမသေး၊ ဢိၵ်ႇတင်းၵေႃႉသႄႈၶဝ်ၸိူဝ်းၼၼ်ႉယဝ်ႉၵေႃႈ၊ၶဝ်ၼၼ်ႉဢွၼ်ၵၼ်လုၵ်ႉၵမ်းလဵဝ်လႄႈႁိပ်ႈၼႅတ်ႈၵႂႃႇၸူးတီႈဝဵင်း ယေႇရုသလႅမ်ႇ၊ ႁႂ်ႈလႆႈႁၢမ်ႈတၢပ်ႈၵူၼ်းမဵဝ်း ၵျူး၊ ၸိူဝ်းၼၼ်ႉဢမ်ႇႁႂ်ႈၶဝ်သိုပ်ႇႁဵတ်းဝဵင်းၼၼ်ႉဢေႃႈ။
ၼင်ႇၼၼ်လႄႈတၢင်းဢၼ်တႄႇႁဵတ်းၵျွင်းပိၵ်ႈမၢၼ်ႇၸဝ်ႈၼၼ်ႉလႆႈၵိုတ်းဝႆႉလႄႈဢမ်ႇလႆႈႁဵတ်းလႆႈသၢင်ႈတေႃႇထိုင်ႁွတ်ႈ တႃႇရိ၊ ၸဝ်ႈမုၼ်ယႂ်ႇၶုၼ်ႁေႃၶမ်းမိူင်း ပႃးသျႃး၊ ၸၢမ်ႇႁၢင်ႈၸၢမ်ႇႁေႃလႆႈသွင်ပီၼၼ်ႉဢေႃႈ။
မိူဝ်ႈၼၼ်ႉပရေႃးၽႅတ်ႈ ႁၵ်ႉၵႄး၊ ဢိၵ်ႇတင်းပရေႃးၽႅတ်ႈ ၸႃႇၶရိ၊ လုၵ်ႈၸၢႆး ဢိတ်ႉတေႃႇ၊ ၼၼ်ႉဢိင်ပိုင်ႈၼႃႇမႃႉၸိုဝ်ႈသဵင်ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ သေလႄႈႁေႃးလၢတ်ႈတီႈၵူၼ်း ယုတႃႉ၊ တင်းလၢႆဢၼ်မီးၵႃႈၼႂ်းမိူင်း ယုတႃႉ၊ တင်းၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉဢေႃႈ။-
ၵမ်းၼၼ်ႉ၊ ၸေႇရုပႃႉပေႇလႃႉ၊ လုၵ်ႈၸၢႆး သႃႇလထိဢေးလႃႉ၊ ဢိၵ်ႇတင်း ယေႃးသု၊ လုၵ်ႈၸၢႆး ယေႃးၸတၵ်ႉ၊ လႆႈငိၼ်းၵႂၢမ်းပရေႃးၽႅတ်ႈၼၼ်ႉလႄႈဢွၼ်ၵၼ်ၶိုၼ်းၸႃႉတႄႇႁဵတ်းၵျွင်းပိၵ်ႈမၢၼ်ႇၸဝ်ႈၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉဢေႃႈ။ ပရေႃးၽႅတ်ႈသွင်ၵေႃႉၼၼ်ႉၵေႃႈၸွႆႈထႅမ်ၶဝ်ဢေႃႈ။
မိူဝ်ႈၼၼ်ႉၵမ်းလဵဝ်၊ တႃႇတၼေး၊ ဝုၼ်ႇလူင်ၽၢႆႇဝၼ်းတူၵ်းမႄႈၼမ်ႉ ဢုၽရတ်ႉ၊ တင်း သေးႀႃႇပေႃးၸၼေး၊ ဢိၵ်ႇတင်းၵေႃႉသႄႈၶုၼ်ဢၼ်ပွင်ၵၢၼ်ၶဝ်ဢွၼ်ၵၼ်မႃးၵႃႈတီႈဝဵင်း ယေႇရုသလႅမ်ႇ၊ လႄႈထၢမ်ၶဝ်လႄႈဝႃႈ၊ “ၽူႈလႂ်ပၼ်ဢမိင်ႉႁႂ်ႈသူလႆႈသိုပ်ႇႁဵတ်းၵျွင်းပိၵ်ႈမၢၼ်ႇ၊ဢိၵ်ႇတင်းလမ်းဝဵင်းၼႆႉႁႂ်ႈယဝ်ႉတူဝ်ႈ၊” ဝႃႈၼင်ႇၼႆဢေႃႈ။-
ၶဝ်သမ်ႉယင်းထၢမ်ဢဝ်ၸိုဝ်ႈဢဝ်သဵင်ၶဝ်ၸိူဝ်းဢၼ်ၽွမ်ႉၵၼ်ၸွႆႈၵၼ်တႄႇႁဵတ်းၵျွင်းပိၵ်ႈမၢၼ်ႇၸဝ်ႈၼၼ်ႉလူးၵွၼ်ႇဢေႃႈ။-
ၵူၺ်းၵႃႈ၊ ထႃႇဝရႃႉၽြႃး၊ ပႂ်ႉလူပႂ်ႉတူၺ်းၵႃႈၼိူဝ်ၵူၼ်းဢၼ်ပဵၼ်ၵႄႇပဵၼ်ႁူဝ်ၵူၼ်းမဵဝ်း ဢိသရေး၊ ၶဝ်လႄႈၶုၼ်ဢၼ်မီးဢႃႇၼႃႇၵူၼ်းမဵဝ်း ပႃးသျႃး၊ ၸိူဝ်းၼၼ်ႉဢမ်ႇႁၢမ်ႈဢမ်ႇၶႅၼ်ႁႂ်ႈတၢင်းႁဵတ်းၶဝ်လႆႈထၢတ်ႇလႆႈၵိုတ်းၵႂႃႇၼႂ်းၸူဝ်ႈဢၼ်ၶုၼ်မီးဢႃႇၼႃႇၸိူဝ်းၼၼ်ႉယင်းတိုၵ်ႉတႅမ်ႈလိၵ်ႈတၢင်ႇလဝ်ႈထိုင်တီႈၶုၼ်ႁေႃၶမ်း တႃႇရိ၊ လႄႈလိၵ်ႈၶုၼ်ၼၼ်ႉဢမ်ႇပႆႇတွပ်ႇၶိုၼ်းမႃးၼၼ်ႉဢေႃႈ။-
ၽိုၼ်လိၵ်ႈဢၼ်မိူၼ်ၵၼ်တင်းၽိုၼ်လိၵ်ႈဢၼ်ၶဝ်တႅမ်ႈပၼ်ၵႂႃႇတီႈၸဝ်ႈမုၼ်ယႂ်ႇၶုၼ်ႁေႃၶမ်းၼၼ်ႉတႅမ်ႈဝႆႉၸမ်ႉ။
“မီးလိၵ်ႈတၢင်ႇလဝ်ႈထိုင်ၶုၼ်ႁေႃၶမ်း တႃႇရိ၊ တီႈၶႃႈဢေႃႈ။ ႁႂ်ႈၸဝ်ႈႁဝ်းၵတ်းယဵၼ်ၶျၢမ်းသႃႇသေၵမ်းလူၺ်ႈ။
“ၶႅၼ်းတေႃႈႁႂ်ႈၸဝ်ႈမုၼ်ယႂ်ႇၶုၼ်ႁေႃၶမ်းႁုလွင်ႈဢၼ်ၶႃႈၸဝ်ႈႁဝ်းၶဝ်ႁွတ်ႈထိုင်ၵႃႈတီႈဢိူင်ႇ ယုတႃႉ၊ လႄႈထူပ်းႁၼ်ၵျွင်းပိၵ်ႈမၢၼ်ႇၽြႃးပဵၼ်ၸဝ်ႈဢၼ်ယႂ်ႇမျၢတ်ႈၼႃႇၼၼ်ႉဢၼ်မီးတၢင်းဢၼ်ဢဝ်တင်းၵွၼ်ႈႁိၼ်လူင်တႄႇႁဵတ်းယူႇ၊ဢဝ်မႆႉၶိုဝ်ႇတၢင်ႇသႂ်ႇၵႃႈၼိူဝ်ၽႃႁိၼ်ၼၼ်ႉသေၵမ်းတီႈၶႃႈ။ တၢင်းဢၼ်ပွင်ႁဵတ်းၼၼ်ႉပဵၼ်ဢၼ်ၶိုၵ်ႉၶမ်ႇလႄႈၶိုၼ်ႈယႂ်ႇၶၼ်ၽႂ်းၼႃႇဢေႃႈ။
“ၶႃႈၸဝ်ႈႁဝ်းၶဝ်တွင်ႈထၢမ်ၵႃႈတီႈၵူၼ်းဢၼ်ပဵၼ်ၵႄႇပဵၼ်ႁူဝ်ၶဝ် ႁႂ်ႈၶဝ်လၢတ်ႈၼႄလွင်ႈဢၼ်ၽူႈလႂ်ပၼ်ဢၶႂၢင်ႉဢႃႇၼႃႇဢၼ်ႁႂ်ႈၶဝ်လႆႈတႄႇႁဵတ်းၵျွင်းပိၵ်ႈမၢၼ်ႇၼႆႉ၊ဢိၵ်ႇတင်းလမ်းဝဵင်းမၼ်းၼၼ်ႉဢေႃႈ။-
ၶႃႈၸဝ်ႈႁဝ်းၶဝ်သမ်ႉယင်းထၢမ်ၸိုဝ်ႈသဵင်ၶဝ်ႁႂ်ႈလႆႈဢဝ်ၸိုဝ်ႈဢဝ်သဵင်ၵူၼ်းဢၼ်ပဵၼ်ၵႄႇပဵၼ်ႁူဝ်ၶဝ်မႃးတၢင်ႇလဝ်ႈတီႈၸဝ်ႈႁဝ်းတီႈၶႃႈဢေႃႈ။
“ၶဝ်ၼၼ်ႉဢွၼ်ၵၼ်ၶိုၼ်းလၢတ်ႈလႄႈဝႃႈ၊ ‘ႁဝ်းၼႆႉပဵၼ်ၶႃႈၽြႃးပဵၼ်ၸဝ်ႈ၊ၸဝ်ႈၽုင်ႇၵၢင်ႁၢဝ်တင်းလိၼ်မိူင်းၼၼ်ႉလႄႈဢွၼ်ၵၼ်မႄးၵုမ်းမႄးႁဵတ်းၵျွင်းပိၵ်ႈမၢၼ်ႇၸဝ်ႈဢၼ်ၶုၼ်ႁေႃၶမ်းမိူင်း ဢိသရေး၊ ပႃးၼိုင်ႈဢၼ်တၼ်းၶူဝ်းယႂ်ႇၼႃႇလူင်လၢင်ၼၼ်ႉတႄႇႁဵတ်းဝႆႉၸဵမ်မိူဝ်ႈၵွၼ်ႇဢွၼ်ၼၼ်ႉဢေႃႈ။-
ၵူၺ်းၵႃႈ၊ၵွပ်ႈပိူဝ်ႈဢၼ်ပူႇမွၼ်ႇႁဝ်းၸိူဝ်းၼၼ်ႉႁဵတ်းႁႂ်ႈၽြႃးပဵၼ်ၸဝ်ႈ၊ၸဝ်ႈၽုင်ႇၵၢင်ႁၢဝ်ၼၼ်ႉၸႂ်မႆႈၶႂ်ႈၸႃႉလႄႈ၊မၼ်းၸဝ်ႈႁႂ်ႈၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ မိူင်း ပႃႇပုလုၼ်ႇ၊ ဢၼ်ပဵၼ်ၶိူဝ်းၶုၼ် ၶႃႇလတေး၊ ၼၼ်ႉမႃးတိုၵ်းသိမ်းဢဝ်ပူႇမွၼ်ႇႁဝ်းၶဝ်ၵႂႃႇသေယဝ်ႉ၊ယႃႉၽဵဝ်ႈပႅတ်ႈၵျွင်းပိၵ်ႈမၢၼ်ႇၸဝ်ႈလႄႈတိဢဝ်သိမ်းဢဝ်ၵူၼ်းဝၢၼ်ႈၵူၼ်းမိူင်းတင်းလၢႆၵႂႃႇႁႂ်ႈၶၢမ်ႇတူၵ်းၵႅၼ်းၵႃႈၼႂ်းဝဵင်း ပႃႇပုလုၼ်ႇ၊ ဢေႃႈ။-
မိူဝ်ႈဢၼ်ၶုၼ်ႁေႃၶမ်း သႆးရတ်ႉ၊ မိူင်း ပႃႇပုလုၼ်ႇ၊ ၸၢမ်ႇႁၢင်ႈၸၢမ်ႇႁေႃလႆႈပီၼိုင်ႈၼၼ်ႉၸိုင်၊ၶုၼ်လူင် သႆးရတ်ႉ၊ ၼၼ်ႉမီးဢမိင်ႉႁႂ်ႈမႄးၵုမ်းမႄးႁဵတ်းၵျွင်းပိၵ်ႈမၢၼ်ႇၸဝ်ႈၼႆႉဢေႃႈ။-
မၼ်းၸဝ်ႈဢဝ်ၶိူင်ႈငိုၼ်းၶိူင်ႈၶမ်းဢၼ်ၸၢပ်ႈသႅင်ႇၵၼ်တင်းၵျွင်းပိၵ်ႈမၢၼ်ႇၸဝ်ႈၸိူဝ်းဢၼ် ၼေႇပုၶတ်ႉၼေႇၸႃႇ၊ ဢဝ်ဢွၵ်ႇသေၵႃႈၼႂ်းၵျွင်းပိၵ်ႈမၢၼ်ႇဢၼ်မီးၵႃႈတီႈဝဵင်း ယေႇရုသလႅမ်ႇ၊ မႃးၼၼ်ႉသိမ်းဝႆႉၵႃႈၼႂ်းၵျွင်းပိၵ်ႈမၢၼ်ႇဝဵင်း ပႃႇပုလုၼ်ႇ၊ ဢေႃႈ။ ၶုၼ်လူင် သႆးရတ်ႉ၊ ဢဝ်ၶိူင်ႈပိူင်ၸိူဝ်းၼၼ်ႉဢၢပ်ႈပၼ်ၵႃႈၼႂ်းမိုဝ်းၵေႃႉဢၼ်မီးၸိုဝ်ႈဝႃႈ သေႇသပႃႇၸႃႇ၊ ဢၼ်လႆႈၶၢမ်ႇတၢင်းဢၼ်ၶၢၼ်းဝႆႉၼႂ်းဢရႃႇဝုၼ်ႇလူင်မဵဝ်း ယုတႃႉ၊ ၶဝ်ၼၼ်ႉသေယဝ်ႉ၊-
ၶုၼ်ႁေႃၶမ်းမီးဢမိင်ႉလႄႈဝႃႈ၊ “ဢဝ်ၶိူင်ႈပိူင်ၸိူဝ်းၼႆႉၵႂႃႇဝႆႉၵႃႈၼႂ်းၵျွင်းပိၵ်ႈမၢၼ်ႇၸဝ်ႈဢၼ်မီးၵႃႈၼႂ်းဝဵင်း ယေႇရုသလႅမ်ႇ၊ သေယဝ်ႉ၊ႁႂ်ႈၶိုၼ်းတႄႇၶိုၼ်းႁဵတ်းၵျွင်းပိၵ်ႈမၢၼ်ႇၸဝ်ႈၵႃႈၼႂ်းတီႈၵဝ်ႇမၼ်းတႃႉ၊” ဝႃႈၼင်ႇၼႆသေယဝ်ႉ၊-
ပိူဝ်ႈၼႆလႄႈ သေႇသပႃႇၸႃႇ၊ ၼၼ်ႉမႃးလႄႈၶျႃးဝႆႉငဝ်ႈႁၢၵ်ႈႁိူၼ်းၽြႃးပဵၼ်ၸဝ်ႈသေယဝ်ႉ၊ၵၢၼ်ဢၼ်သၢင်ႈဢၼ်ႁဵတ်းၼၼ်ႉသိုပ်ႇႁဵတ်းယူႇတေႃႇထိုင်ႁွတ်ႈမိူဝ်ႈလဵဝ်ၼႆႉလႄႈၵျွင်းပိၵ်ႈမၢၼ်ႇၸဝ်ႈၼၼ်ႉတႄႇႁဵတ်းယူႇဢမ်ႇပႆႇယဝ်ႉတူဝ်ႈဢေႃႈ။’
“တေႃႈလဵဝ်ၼႆႉပေႃးၸဝ်ႈၶုၼ်လူင်မီးဢလူဝ်ႇၸိုင်၊ၶႅၼ်းတေႃႈႁႂ်ႈသွၵ်ႈႁႃၼႂ်းလိၵ်ႈပိုၼ်းၸဝ်ႈဢၼ်သိမ်းဝႆႉၵႃႈၼႂ်းမိူင်း ပႃႇပုလုၼ်ႇ၊ ႁႂ်ႈလႆႈႁုလွင်ႈဢၼ်ၶုၼ်လူင် သႆးရတ်ႉ၊ လႆႈပူင်ဢမိင်ႉႁိုဝ်းဢမ်ႇလႆႈပူင်ႁိုဝ်း၊လွင်ႈဢၼ်ႁႂ်ႈတႄႇႁဵတ်းၵျွင်းပိၵ်ႈမၢၼ်ႇၼႆႉၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉသေၵမ်းတီႈၶႃႈ။ ၼင်ႇၼၼ်လႄႈၸွမ်းၼင်ႇၸဝ်ႈၶုၼ်လူင်မီးဢလူဝ်ႇၶႂ်ႈႁဵတ်းၼၼ်ႉၶႅၼ်းတေႃႈပူင်ဢမိင်ႉမႃးတီႈၶႃႈၸဝ်ႈႁဝ်းၶဝ်သေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈၸဝ်ႈမုၼ်ယႂ်ႇၶုၼ်ႁေႃၶမ်း တႃႇရိ၊ ပူင်ဢမိင်ႉႁႂ်ႈသွၵ်ႈႁႃၵႃႈၼႂ်းလိၵ်ႈပိုၼ်းၸဝ်ႈဢၼ်သိမ်းဝႆႉၵႃႈၼႂ်းမိူင်း ပႃႇပုလုၼ်ႇ၊ ၼၼ်ႉဢေႃႈ။-
ၶဝ်လႆႈဢွၼ်ၵၼ်ထူပ်းႁၼ်လိၵ်ႈၵဵၼ်ၼိုင်ႈၵႃႈၼႂ်းဝဵင်း ဢၵ်ႉပႃႇထႃႇၼႃႇ၊ မိူင်း မေႇတိ၊ လႄႈၵႂၢမ်းဢၼ်ပႃးၼႂ်းလိၵ်ႈၼၼ်ႉၸမ်ႉ။
“ၼႂ်းပီဢၼ်ၸဝ်ႈမုၼ်ယႂ်ႇၶုၼ်ႁေႃၶမ်း သႆးရတ်ႉ၊ ၸၢမ်ႇႁၢင်ႈၸၢမ်ႇႁေႃပီတီႈၼိုင်ႈၼၼ်ႉ မၼ်းၸဝ်ႈပူင်ဢမိင်ႉလူၺ်ႈလွင်ႈၵၢၼ်ငၢၼ်းၵျွင်းပိၵ်ႈမၢၼ်ႇၽြႃးပဵၼ်ၸဝ်ႈၵႃႈတီႈဝဵင်း ယေႇရုသလႅမ်ႇ၊ လႄႈဝႃႈ၊ႁႂ်ႈၵျွင်းပိၵ်ႈမၢၼ်ႇၸဝ်ႈၼႆႉလႆႈၶိုၼ်းတႄႇၶိုၼ်းတင်ႈပဵၼ်တီႈဢၼ်သၢၵ်ႈၵၢပ်ႈၶိူင်ႈတၢင်းလူႇလႂ်၊သၢၵ်ႈၵၢပ်ႈၶိူင်ႈတၢင်းလူႇဢၼ်ၽဝ်ၽႆးလႂ်ၼၼ်ႉသေ။ ၵျွင်းပိၵ်ႈမၢၼ်ႇၸဝ်ႈၼၼ်ႉႁႂ်ႈတၢင်းသုင်မၼ်းမီးႁူၵ်းသိပ်းသွၵ်ႇလႄႈၼႃႈၵႂၢင်ႈမၼ်းႁူၵ်းသိပ်းသွၵ်ႇသေ။-
ႁႂ်ႈႁဵတ်းၽႃလူၺ်ႈမၢၵ်ႇႁိၼ်သၢမ်ႁၢၼ်ႉလႄႈလူၺ်ႈမႆႉႁၢၼ်ႉၼိုင်ႈ။ ၵႃႈၶၼ်ၸရိပ်ႈမၼ်းၵႃႈမီးၼၼ်ႉႁႂ်ႈဢဝ်ၼႂ်းၽၼ်ႇတႃႇႁေႃၸဝ်ႈၸႂ်ႉၸၢႆႇသေ။-
ၶိူင်ႈငိုၼ်းၶိူင်ႈၶမ်းၸိူဝ်းဢၼ်ၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ ဢဝ်ဢွၵ်ႇသေၵႃႈတီႈၵျွင်းပိၵ်ႈမၢၼ်ႇၸဝ်ႈဝဵင်း ယေႇရုသလႅမ်ႇ၊ မႃးၵႃႈတီႈဝဵင်း ပႃႇပုလုၼ်ႇ၊ ၼၼ်ႉၵေႃႈႁႂ်ႈဢဝ်ပွၵ်ႈၶိုၼ်းမႃးဝႆႉတီႈၽႂ်တီႈမၼ်း၊တီႈၵျွင်းပိၵ်ႈမၢၼ်ႇၸဝ်ႈၼႂ်းဝဵင်း ယေႇရုသလႅမ်ႇ၊ သေ၊” ဝႃႈၼင်ႇၼႆဢေႃႈ။
ပိူဝ်ႈဢၼ်ပဵၼ်ၼင်ႇၼႆလႄႈၶုၼ်ႁေႃၶမ်း တႃႇရိ၊ တႅမ်ႈလိၵ်ႈၶိုၼ်းပူင်ဢမိင်ႉလႄႈဝႃႈၸမ်ႉ၊ “မီးလိၵ်ႈတႅမ်ႈထိုင် တႃႇတၼေး၊ ဝုၼ်ႇလူင်ၽၢႆႇတၢင်းဝၼ်းတူၵ်းမႄႈၼမ်ႉ ဢုၽရတ်ႉ၊ တင်း သေးႀႃႇပေႃးၸၼေး၊ ဢိၵ်ႇတင်းၵေႃႉသႄႈသူၶုၼ်ဢၼ်ပွင်ၵၢၼ်ၶဝ်႟။ “ဢွၼ်ၵၼ်ယူႇၵႆၵႆသေၵျွင်းပိၵ်ႈမၢၼ်ႇၸဝ်ႈၼၼ်ႉတႃႉ။-
ယႃႇပေယႃႉၵဝ်းႁႄႉၶႅၼ်လူၺ်ႈလွင်ႈတၢင်းဢၼ်တႄႇႁဵတ်းႁိူၼ်းၽြႃးပဵၼ်ၸဝ်ႈၼၼ်ႉ။ ႁႂ်ႈဝုၼ်ႇလူင်မဵဝ်း ယုတႃႉ၊ ဢိၵ်ႇတင်းၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ၵူၼ်းမဵဝ်း ၵျူး၊ ၶဝ်ၶိုၼ်းတႄႇၶိုၼ်းႁဵတ်းၵျွင်းပိၵ်ႈမၢၼ်ႇၽြႃးပဵၼ်ၸဝ်ႈၼၼ်ႉၵႃႈၼႂ်းတီႈယူႇၵဝ်ႇၵဝ်ႇမၼ်းတႃႉ။-
ၵဝ်ၸဝ်ႈသမ်ႉပူင်ဢမိင်ႉတီႈသူၸမ်ႉ၊ဢွၼ်ၵၼ်ၸွႆႈထႅမ်ၶဝ်လႄႈႁဵတ်းသၢင်ႈတႃႉ။ ၵႃႈၶၼ်ၸရိပ်ႈမၼ်းၵႃႈမီးၼၼ်ႉဢဝ်ၼႂ်းၽၼ်ႇတႃႇႁေႃၸဝ်ႈၵႃႈၼႂ်းၶွၼ်ႇငိုၼ်းဢၼ်ၵဵပ်းလႆႈၵႃႈတီႈဢိူင်ႇၽၢႆႇတၢင်းဝၼ်းတူၵ်းမႄႈၼမ်ႉ ဢုၽရတ်ႉ၊ ၼၼ်ႉၸၢႆႇပၼ်ၵမ်းလဵဝ်၊ႁႂ်ႈၵၢၼ်ၼၼ်ႉဢမ်ႇမီးတၢင်းဢၼ်ယႃႉဢၼ်ၵဝ်းတႃႉ။-
ၼွၵ်ႈသေၼၼ်ႉႁႂ်ႈဢဝ်ၵႃႈဢၼ်ၶဝ်မီးဢလူဝ်ႇလႄႈၶႂ်ႈလႆႈၶိူင်ႈပိူင်တင်းသဵင်ႈတင်းလူင်ဢၼ်ပဵၼ်၊ဝူဝ်းလႂ်၊သူဝ်းပေႃႈလႂ်၊သူဝ်းဢွၼ်ႇလႂ်၊ဝူဝ်းဢၼ်တၵ်းသၢၵ်ႈလူႇပုၼ်ႈတၢင်းလူႇဢၼ်တုတ်ႇၽႆးတီႈၽြႃးပဵၼ်ၸဝ်ႈ၊ၸဝ်ႈၽုင်ႇၵၢင်ႁၢဝ်ၼၼ်ႉ၊ဢိၵ်ႇတင်းၶဝ်ႈၵျုင်ႇ၊ၵိူဝ်၊ၼမ်ႉမၢၵ်ႇၸပိတ်ႉ၊ၼမ်ႉမၼ်းသၢၼ်ႇလုၼ်ႇပၼ်ၵူႈဝၼ်းၸွမ်းၵႃႈၼင်ႇဢၼ်ယဵၸ်ႈပရေႃးႁဵၵ်ႈ ဝဵင်း ယေႇရုသလႅမ်ႇ၊ ၶဝ်လူဝ်ႇၼၼ်ႉဢေႃႈ။-
ဢၼ်ၼႆႉၸိုင်၊ပဵၼ်ပုၼ်ႈဢၼ်တၵ်းသၢၵ်ႈလူႇၶိူင်ႈတၢင်းလူႇဢၼ်ႁွမ်ဢၼ်ႁူၺ်းတီႈၽြႃးပဵၼ်ၸဝ်ႈၽုင်ႇၵၢင်ႁၢဝ်၊ဢိၵ်ႇတင်းႁႂ်ႈလႆႈသူးတွင်းယွၼ်းတၢင်းလီတီႈမၼ်းၸဝ်ႈ ပုၼ်ႈၵဝ်ၸဝ်ႈတင်းလုၵ်ႈလၢၼ်ၵဝ်ၸဝ်ႈတင်းလၢႆၼၼ်ႉဢေႃႈ။-
ၵဝ်ၸဝ်ႈသမ်ႉပူင်ဢမိင်ႉလႄႈဝႃႈၸမ်ႉ၊ၵေႃႉလႂ်သေဢမ်ႇဝႃႈ၊ပေႃးဢမ်ႇထွမ်ႇဢဝ်ၵႂၢမ်းဢမိင်ႉၸဝ်ႈၼႆႉၸိုင်၊တၵ်းလႆႈထွတ်ႇထွၼ်ဢဝ်မႆႉၶိုဝ်ႇႁိူၼ်းၵေႃႉၼၼ်ႉလႄႈဢဝ်တူဝ်မၼ်းသဵပ်ႇယူႇၵႃႈၼိူဝ်ပၢႆမႆႉၶိုဝ်ႇၼၼ်ႉယဝ်ႉ။ ႁိူၼ်းမၼ်းၵေႃႈႁႂ်ႈပဵၼ်ၵွင်ၶီႈဝူဝ်းသေ။ ဝႃႈၼင်ႇၼႆဢေႃႈ။-
ႁႂ်ႈၽြႃးပဵၼ်ၸဝ်ႈ၊ၸဝ်ႈဢၼ်လိူၵ်ႈဢဝ်ဝဵင်း ယေႇရုသလႅမ်ႇ၊ ႁႂ်ႈပဵၼ်တီႈဢၼ်ႁဵတ်းဝၢတ်ႈၵူဝ်းၵႂၢႆႇမၼ်းၸဝ်ႈၼၼ်ႉယႃႉၽဵဝ်ႈပႅတ်ႈၶုၼ်ႁေႃၶမ်း၊ဢမ်ႇၼၼ်ၵေႃႈ ၶႃႈဝၢၼ်ႈၵူၼ်းမိူင်းဢၼ်ဢၢင်ႈၶတ်းၶႅင်ဢမိင်ႉၸဝ်ႈၼႆႉလႄႈၶႂ်ႈယႃႉပႅတ်ႈၵျွင်းပိၵ်ႈမၢၼ်ႇၸဝ်ႈၵႃႈတီႈၼၼ်ႈၼၼ်ႉသေၵမ်းလူၺ်ႈ။ ၵဝ်ၸဝ်ႈ တႃႇရိ၊ ပူင်ဢမိင်ႉၸဝ်ႈဢေႃႈ။ ႁႂ်ႈဢွၼ်ၵၼ်ႁဵတ်းၸွမ်းဢမိင်ႉၸဝ်ႈၼႆႉတႄႉတႄႉဝႃႈဝႃႈတႃႉ။” ဝႃႈၼင်ႇၼႆဢေႃႈ။
မိူဝ်ႈၼၼ်ႉဝုၼ်ႇလူင် တႃႇတၼေး၊ တင်း သေးႀႃႇပေႃးၸၼေး၊ ဢိၵ်ႇတင်းၵေႃႉသႄႈၶုၼ်ဢၼ်ပွင်ၵၢၼ်ၶဝ်ၸိူဝ်းၼၼ်ႉဢွၼ်ၵၼ်ႁဵတ်းၸွမ်းမႅၼ်ႈၵႃႈၼင်ႇဢၼ်ၸဝ်ႈမုၼ်ယႂ်ႇၶုၼ်ႁေႃၶမ်းပူင်ဢမိင်ႉၼၼ်ႉဢေႃႈ။-
ၵူၼ်းပဵၼ်ၵႄႇပဵၼ်ႁူဝ်မဵဝ်း ၵျူး၊ ၸိူဝ်းၼၼ်ႉၵေႃႈႁဵတ်းႁႂ်ႈၵျွင်းပိၵ်ႈမၢၼ်ႇၸဝ်ႈယဝ်ႉတူဝ်ႈၵႂႃႇတိၵ်းတိၵ်းၵွပ်ႈပိူဝ်ႈပရေႃးၽႅတ်ႈ ႁၵ်ႉၵႄး၊ တင်းပရေႃးၽႅတ်ႈ ၸႃႇၶရိ၊ ၸွႆႈဢဵၼ်ၸွႆႈႁႅင်းၼၼ်ႉဢေႃႈ။ ၶဝ်ဢွၼ်ၵၼ်တႄႇႁဵတ်းႁႂ်ႈယဝ်ႉတူဝ်ႈၸွမ်းၵႃႈၼင်ႇဢၼ်ဢမိင်ႉၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ဢိၵ်ႇတင်းဢမိင်ႉၸဝ်ႈမုၼ်ယႂ်ႇၶုၼ်ႁေႃၶမ်း သႆးရတ်ႉ၊ ၶုၼ်ႁေႃၶမ်း တႃႇရိ၊ ဢိၵ်ႇတင်းၶုၼ်ႁေႃၶမ်း ဢႃႇတႃႇၸေႇရိတ်ႉ၊ မိူင်း ပႃးသျႃး၊ ပူင်ဢမိင်ႉၼၼ်ႉဢေႃႈ။-
ၵျွင်းပိၵ်ႈမၢၼ်ႇၸဝ်ႈၼၼ်ႉယဝ်ႉတူဝ်ႈလီငၢမ်းၵႂႃႇၼႂ်းပီဢၼ်ၸဝ်ႈမုၼ်ယႂ်ႇၶုၼ်ႁေႃၶမ်း တႃႇရိ၊ ၸၢမ်ႇႁၢင်ႈၸၢမ်ႇႁေႃလႆႈႁူၵ်းပီၼႂ်းလိူၼ် ဢတ်ႉတႃႇ၊ ဝၼ်းတီႈသၢမ်ၼၼ်ႉဢေႃႈ။
ၼင်ႇၼၼ်လႄႈၵူၼ်းမဵဝ်း ဢိသရေး၊ တင်းလၢႆၵႃႈပဵၼ်ယဵၸ်ႈပရေႃးႁဵၵ်ႈလႂ်၊တင်းၵူၼ်း လေႇဝိ၊ လႂ်ဢိၵ်ႇတင်းၶဝ်ၸိူဝ်းဢၼ်လႆႈၶၢမ်ႇတၢင်းဢၼ်တိဢဝ်သိမ်းဢဝ်ၵႂႃႇလႄႈပွၵ်ႈၶိုၼ်းမႃးၸိူဝ်းၼၼ်ႉဢွၼ်ၵၼ်ႁဵတ်းပွႆးဢၼုမေႃးတၼႃႇသၢၵ်ႈၵၢပ်ႈလူႇတၢၼ်းၵျွင်းပိၵ်ႈမၢၼ်ႇၸဝ်ႈၸူမ်းၸူမ်းသိူဝ်းသိူဝ်းဢေႃႈ။-
ပုၼ်ႈတႃႇပွႆးဢၼုမေႃးတၼႃႇၼၼ်ႉၶဝ်ဢွၼ်ၵၼ်ဢဝ်ဝူဝ်းပၢၵ်ႇတူဝ်၊သူဝ်းပေႃႈသွင်ပၢၵ်ႇတင်းသူဝ်းဢွၼ်ႇသီႇပၢၵ်ႇႁဵတ်းတၢင်းလူႇ၊ဢိၵ်ႇတင်းပႄႉသိပ်းသွင်တူဝ်ႁဵတ်းတၢင်းလူႇဢၼ်ၽေႇဢပျတ်ႈပုၼ်ႈၵူၼ်းမဵဝ်း ဢိသရေး၊ သိပ်းသွင်ၸိူဝ်ႉၶိူဝ်း၊ယေႈၸိူဝ်ႉၶိူဝ်းယေႈတူဝ်ဢေႃႈ။-
ၶဝ်သမ်ႉၶၢၼ်းယဵၸ်ႈပရေႃးႁဵၵ်ႈတင်းလၢႆဝႆႉတီႈၽႂ်တီႈမၼ်း၊ဢိၵ်ႇတင်းၵူၼ်း လေႇဝိ၊ တင်းလၢႆပဵၼ်မုၵ်ႉပဵၼ်ၸိူဝ်းဝႆႉႁႂ်ႈလႆႈႁဵတ်းဝၢတ်ႈတီႈၽြႃးပဵၼ်ၸဝ်ႈၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉ ၸွမ်းၵႃႈၼင်ႇဢၼ်တႅမ်ႈမၢႆဝႆႉၵႃႈၼႂ်းၵျၢမ်းလိၵ်ႈ မူဝ်းသေႇ၊ ၼၼ်ႉဢေႃႈ။
ၼႂ်းလိူၼ်တီႈၼိုင်ႈဝၼ်းတီႈသိပ်းသီႇၼၼ်ႉၶဝ်ၸိူဝ်းဢၼ်လုၵ်ႉသေၵႃႈတီႈတၢင်းဢၼ်ပိူၼ်ႈတိဢဝ်သိမ်းဢဝ်ၵႂႃႇလႄႈၶိုၼ်းပွၵ်ႈမႃးၸိူဝ်းၼၼ်ႉဢွၼ်ၵၼ်ႁဵတ်းပွႆး ပသၶႃႇ၊ ဢေႃႈ။-
ယဵၸ်ႈပရေႃးႁဵၵ်ႈတင်းၵူၼ်း လေႇဝိ၊ တင်းသဵင်ႈတင်းလူင်လႆႈဢွၼ်ၵၼ်ႁဵတ်းႁႂ်ႈတူဝ်ၸဝ်ႈၵဝ်ႇမူတ်းၸၢင်ႇၽွမ်ႉၽွမ်ႉၵၼ်ယဝ်ႉလႄႈ၊ၵူၼ်း လေႇဝိ၊ တင်းလၢႆဢွၼ်ၵၼ်ႁႅမ်သူဝ်းဢွၼ်ႇ ပသၶႃႇ၊ ပုၼ်ႈၶဝ်ၸိူဝ်းဢၼ်ၶိုၼ်းပွၵ်ႈမႃးလႂ်၊ဢိၵ်ႇတင်းပုၼ်ႈယဵၸ်ႈပရေႃးႁဵၵ်ႈလႂ်၊ဢိၵ်ႇတင်းပုၼ်ႈတူဝ်ၸဝ်ႈၵဝ်ႇလႂ်ဢေႃႈ။-
ၵႃႈဢၼ်ပဵၼ်ၵူၼ်းမဵဝ်း ဢိသရေး၊ ၸိူဝ်းဢၼ်ပွၵ်ႈၶိုၼ်းသေၵႃႈတီႈတၢင်းဢၼ်လႆႈၶၢမ်ႇတိဢဝ်သိမ်းဢဝ်ၵႂႃႇ၊ဢိၵ်ႇတင်းၶဝ်ၸိူဝ်းဢၼ်ၸုၼ်ႉပႅတ်ႈတြႃးၽြႃးတၢင်ႇသူႇတၢင်ႇပႃးဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်းဝႆႈယူႇၵႃႈၼႂ်းမိူင်းၼၼ်ႉသေယဝ်ႉ၊မႃးဝႆႈ ထႃႇဝရႃႉၽြႃး၊ၽြႃးပဵၼ်ၸဝ်ႈ၊ ၵူၼ်းမဵဝ်း ဢိသရေး၊ ၼၼ်ႉတင်းသဵင်ႈတင်းလူင်၊-
ၶဝ်ဢွၼ်ၵၼ်ႁဵတ်းပွႆးၵိၼ်ၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈၼၼ်ႉၸူမ်းၸူမ်းသိူဝ်းသိူဝ်းၸဵတ်းဝၼ်းတဵမ်တဵမ်ဢေႃႈ။ ၶဝ်လႆႈၸူမ်းသိူဝ်းၵွပ်ႈပိူဝ်ႈ ထႃႇဝရႃႉၽြႃး၊ ႁႂ်ႈၸဝ်ႈမုၼ်ယႂ်ႇၶုၼ်ႁေႃၶမ်း ဢႃႇသီးရီးယႃး၊ ၽွမ်ႉၸႂ်ၽၢႆႇၶဝ်မႃးၸွႆႈထႅမ်မႃႉၸႃႉၶဝ်ၼႂ်းလွင်ႈတၢင်းဢၼ်တႄႇႁဵတ်းၵျွင်းပိၵ်ႈမၢၼ်ႇၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ၼၼ်ႉဢေႃႈ။
လိုၼ်းသေၼၼ်ႉပီမိူင်းႁိုင်တၢၼ်ႇတၢၼ်ႇၼႂ်းၸူဝ်ႈပၢၼ် ဢႃႇတႃႇၸေႇရိတ်ႉ၊ ပဵၼ်ၸဝ်ႈမုၼ်ယႂ်ႇၶုၼ်ႁေႃၶမ်းမိူင်း ပႃးသျႃး၊ ၼၼ်ႉမီးၵူၼ်းၵေႃႉၼိုင်ႈဢၼ်လႆႈၸိုဝ်ႈ ဢေးၸရႃႇ၊ ၼၼ်ႉဢေႃႈ။ ပေႃးဢဝ်ၸွမ်းၸိူဝ်ႉၶိူဝ်းပူႇမွၼ်ႇမၼ်းယဵၸ်ႈပရေႃးႁဵၵ်ႈလူင် ဢႃႇရုၼ်ႇ၊ ၼၼ်ႉၸမ်ႉ၊ ဢေးၸရႃႇ၊ ပဵၼ်လုၵ်ႈၸၢႆး ၸရႃႇယႃႉ၊ ဢၼ်ပဵၼ်လုၵ်ႈၸၢႆး ဢႃႇၸရိ၊ ဢၼ်ပဵၼ်လုၵ်ႈၸၢႆး ႁိလၶိ၊-
ဢၼ်ပဵၼ်လုၵ်ႈၸၢႆး သႃႇလုမ်ႇ၊ ဢၼ်ပဵၼ်လုၵ်ႈၸၢႆး ၸႃႇတုၵ်ႉ၊ ဢၼ်ပဵၼ်လုၵ်ႈၸၢႆး ဢႁိတုပ်ႉ၊-
ဢၼ်ပဵၼ်လုၵ်ႈၸၢႆး ဢႃႇမရိ၊ ဢၼ်ပဵၼ်လုၵ်ႈၸၢႆး ဢႃႇၸရိ၊ ဢၼ်ပဵၼ်လုၵ်ႈၸၢႆး မရႃႇယုတ်ႉ၊-
ဢၼ်ပဵၼ်လုၵ်ႈၸၢႆး ၸေႇရႁိ၊ ဢၼ်ပဵၼ်လုၵ်ႈၸၢႆး ဢေႃႇၸိ၊ ဢၼ်ပဵၼ်လုၵ်ႈၸၢႆး ပုၵ်ႉၵိ၊-
ဢၼ်ပဵၼ်လုၵ်ႈၸၢႆး ဢၽိသွႃႇ၊ ဢၼ်ပဵၼ်လုၵ်ႈၸၢႆး ၽိၼႁတ်ႉ၊ ဢၼ်ပဵၼ်လုၵ်ႈၸၢႆး ဢေးလႃႇၸႃႇ၊ ဢၼ်ပဵၼ်လုၵ်ႈၸၢႆးယဵၸ်ႈပရေႃးႁဵၵ်ႈလူင် ဢႃႇရုၼ်ႇ၊ ၼၼ်ႉဢေႃႈ။
ဢေးၸရႃႇ၊ ၼၼ်ႉပဵၼ်ၵေႃႉဢၼ်ဝႆႉၸႂ်တမ်းၸႂ်သွၼ်ဢဝ်တြႃး ထႃႇဝရႃႉၽြႃး၊ ႁႂ်ႈလႆႈပႂ်ႉၵမ်ပႂ်ႉၸွမ်း၊ဢိၵ်ႇတင်းႁႂ်ႈလႆႈဢဝ်တြႃးၸဝ်ႈတင်းထုင်းၽိင်ႈတြႃးၸိူဝ်းၼၼ်ႉသင်ႇသွၼ်ပၼ်တီႈၵူၼ်းမဵဝ်း ဢိသရေး၊ ဢေႃႈ။
လိၵ်ႈဢမိင်ႉဢၼ် ဢႃႇတႃႇၸေႇရိတ်ႉ၊ ပၼ်တီႈ ဢေးၸရႃႇ၊ ဢၼ်ပဵၼ်ယဵၸ်ႈပရေႃးႁဵၵ်ႈသြႃႇဢၼ်မေႃၵျၢမ်းလႄႈယင်းပဵၼ်ၵေႃႉဢၼ်ႁုဢၼ်ၸႅင်ႈထုင်းၽိင်ႈတြႃးတင်းပိင်းၺၢပ်ႈတြႃး ထႃႇဝရႃႉၽြႃး၊ ဢၼ်ပၼ်ဝႆႉတီႈၵူၼ်းမဵဝ်း ဢိသရေး၊ ၼၼ်ႉလႄႈဝႃႈၸမ်ႉ။
“ၸဝ်ႈမုၼ်ယႂ်ႇၶုၼ်ႁေႃၶမ်း ဢႃႇတႃႇၸေႇရိတ်ႉ၊ မီးလိၵ်ႈပၼ်ထိုင် တီႈယဵၸ်ႈပရေႃးႁဵၵ်ႈ ဢေးၸရႃႇ၊ သြႃႇဢၼ်ၸၢင်ႈမေႃၵျၢမ်းပိင်းၺၢပ်ႈတြႃးၽြႃးပဵၼ်ၸဝ်ႈၽုင်ႇၵၢင်ႁၢဝ်ၼၼ်ႉဢေႃႈ။ ႁႂ်ႈမီးတၢင်းၼိမ်ၶျၢမ်းသႃႇသေၵမ်းလူၺ်ႈ။
“ၵဝ်ၸဝ်ႈမီးဢမိင်ႉႁႂ်ႈၵူၼ်းမဵဝ်း ဢိသရေး၊ တင်းလၢႆပႃးတင်းယဵၸ်ႈပရေႃးႁဵၵ်ႈတင်းၵူၼ်းမဵဝ်း လေႇဝိ၊ ဢၼ်မီးၵႃႈၼႂ်းသိုင်ႇၸိုင်ႈဝၢၼ်ႈမိူင်းၵဝ်ၸိူဝ်းၼၼ်ႉ၊ၵႃႈၼင်ႇဢၼ်ၶဝ်ၸွမ်းၼင်ႇဢလူဝ်ႇၵၢင်ၸႂ်တူဝ်ၸဝ်ႈၵဝ်ႇလႄႈၶႂ်ႈၵႂႃႇၵႃႈတီႈဝဵင်း ယေႇရုသလႅမ်ႇ၊ ၼၼ်ႉတၵ်းမီးဢၶႂၢင်ႉဢၼ်တၵ်းလႆႈၸွမ်းမႂ်းၵႂႃႇဢေႃႈ။-
ၵဝ်ၸဝ်ႈဢိၵ်ႇတင်းဢတႂၢင်းဝုၼ်ႇၸဵတ်းၵေႃႉပွႆႇၸႂ်ႉမႂ်းၵႂႃႇ ႁႂ်ႈမႂ်းလႆႈၸႅတ်ႈသေးတူၺ်းလူၺ်ႈလွင်ႈၵူၼ်းမိူင်း ယုတႃႉ၊ တင်းၵူၼ်းဝဵင်း ယေႇရုသလႅမ်ႇ၊ ၶဝ်ပႂ်ႉၵမ်ပႂ်ႉၸွမ်းပိင်းၺၢပ်ႈတြႃးဢၼ်ၽြႃးပဵၼ်ၸဝ်ႈမႂ်းဢၢပ်ႈဝႆႉၵႃႈၼႂ်းမိုဝ်းမႂ်းၸိူဝ်ႉၼင်ႇႁိုဝ်ၼၼ်ႉဢေႃႈ။-
မႂ်းတၵ်းလႆႈဢဝ်ၶိူင်ႈလူႇၶိူင်ႈတၢၼ်းငိုၼ်းၶမ်းၸိူဝ်းဢၼ်ၵဝ်ၸဝ်ႈ၊ဢိၵ်ႇတင်းဢတႂၢင်းဝုၼ်ႇၵဝ်ၸဝ်ႈတင်းလၢႆမီးဢလူဝ်ႇၵၢင်ၸႂ်ၼၼ်ႉၵႂႃႇလူႇတၢၼ်းတီႈၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ဢၼ်ၵျွင်းပိၵ်ႈမၢၼ်ႇမၼ်းၸဝ်ႈမီးၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉဢေႃႈ။-
မႂ်းသမ်ႉတၵ်းလႆႈဢဝ်ၶိူင်ႈငိုၼ်းၶိူင်ႈၶမ်းၵႃႈဢၼ်မႂ်းလႆႈဢဝ်ၵႃႈၼႂ်းမိူင်း ပႃႇပုလုၼ်ႇ၊ ၼႆႉဢိၵ်ႇတင်းတႃႇၼႃႉတၢင်းလူႇဢၼ်ၵူၼ်းမဵဝ်း ဢိသရေး၊ ၶဝ်တင်းယဵၸ်ႈပရေႃးႁဵၵ်ႈ ၶဝ်တင်းလၢႆပႃးၸႂ်ၸေႇတၼႃႇလူႇတၢၼ်းၸိူဝ်းၼၼ်ႉၵႂႃႇလူႇတၢၼ်းပုၼ်ႈၵျွင်းပိၵ်ႈမၢၼ်ႇၸဝ်ႈၶဝ်ဢၼ်မီးၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉဢေႃႈ။
“မႂ်းတၵ်းလႆႈၸၢႆႇငိုၼ်းၸိူဝ်းၼႆႉလီလီ ၼႂ်းတၢင်းဢၼ်သိုဝ်ႉဝူဝ်းပေႃႈလႂ်၊သူဝ်းပေႃႈလႂ်၊သူဝ်းဢွၼ်ႇလႂ်၊ဢိၵ်ႇတင်းမၢၵ်ႇၶဝ်ႈႁူင်းၶဝ်ႈ ဢိၵ်ႇတင်းၼမ်ႉမၢၵ်ႇၸပိတ်ႉသေလႄႈဢဝ်ၸိူဝ်းၼၼ်ႉႁဵတ်းတၢင်းလူႇၵႃႈၼိူဝ်ၶဵင်ႇတၢင်းလူႇၵျွင်းပိၵ်ႈမၢၼ်ႇၸဝ်ႈဢၼ်မီးၵႃႈၼႂ်းဝဵင်း ယေႇရုသလႅမ်ႇ၊ ဢေႃႈ။-
မႂ်းမီးဢၶႂၢင်ႉဢၼ်သုင်းတိုဝ်းငိုၼ်းၶမ်းဢၼ်ၵိုတ်းဢၼ်ၵျၢၼ်ႇၼၼ်ႉမႂ်းဢိၵ်ႇတင်းပီႈၼွင်ႉၵူၼ်းမဵဝ်းမႂ်းႁၼ်လီၸိူဝ်ႉႁိုဝ်ၵေႃႈၸႂ်ႉသုင်းႁႂ်ႈမႅၼ်ႈၸွမ်းၼင်ႇဢလူဝ်ႇၽြႃးပဵၼ်ၸဝ်ႈသူတႃႉ။-
ၶိူင်ႈပိူင်ဢၼ်ဢၢပ်ႈပၼ်တီႈမႂ်းပုၼ်ႈဢၼ်တၵ်းႁဵတ်းဝၢတ်ႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈၵႃႈမီးၼၼ်ႉၵေႃႈဢဝ်ၶျႃးဝႆႉၵႃႈတီႈၽၢႆႇၼႃႈၽြႃးပဵၼ်ၸဝ်ႈဝဵင်း ယေႇရုသလႅမ်ႇ၊ တႃႉ။-
ၼင်ႇၼၼ်လႄႈၵႃႈဢၼ်ယင်းလူဝ်ႇထႅင်ႈပုၼ်ႈၵျွင်းပိၵ်ႈမၢၼ်ႇၸဝ်ႈဢၼ်မႂ်းမီးတီႈတၵ်းသုင်းၼၼ်ႉၸိုင်၊မႂ်းမီးဢၶႂၢင်ႉဢၼ်ထုတ်ႇဢဝ်ၵႃႈၼႂ်းတိူၵ်ႈၽၼ်ႇတႃႇၶုၼ်ႁေႃၶမ်းလႄႈသုင်းတိုဝ်းတႃႉ။
“ၵဝ်ၸဝ်ႈမုၼ်ယႂ်ႇၶုၼ်ႁေႃၶမ်း ဢႃႇတႃႇၸေႇရိတ်ႉ၊ ပူင်ဢမိင်ႉတီႈဝုၼ်ႇထိင်းၽၼ်ႇတႃႇၸဝ်ႈၵႃႈဢၼ်မီးၽၢႆႇတၢင်းဝၼ်းတူၵ်းမႄႈၼမ်ႉ ဢုၽရတ်ႉ၊ ၸိူဝ်းၼၼ်ႉႁႂ်ႈၶဝ်ပၼ်တီႈ ဢေးၸရႃႇ၊ ၵမ်းလဵဝ်၊ၵႃႈဢၼ် ဢေးၸရႃႇ၊ ဢၼ်ပဵၼ်ယဵၸ်ႈပရေႃးႁဵၵ်ႈ၊ဢိၵ်ႇတင်းပဵၼ်သြႃႇဢၼ်ႁုဢၼ်မေႃၵျၢမ်းလိၵ်ႈပိင်းၺၢပ်ႈၽြႃးပဵၼ်ၸဝ်ႈၸဝ်ႈၽုင်ႇၵၢင်ႁၢဝ်ယွၼ်းဢဝ်ၼၼ်ႉ၊-
တေႃႇထိုင်ႁွတ်ႈငိုၼ်းသွင်ႁဵင်ၸွႆႉ၊ၶဝ်ႈသၢၼ်ၵျုင်ႇႁူၵ်းႁဵင်ၸွႆႉ၊ၼမ်ႉမၢၵ်ႇၸပိတ်ႉပၢၵ်ႇပုင်း၊ၼမ်ႉမၼ်းသၢၼ်ႇလုၼ်ႇပၢၵ်ႇပုင်း ဢိၵ်ႇတင်းၵိူဝ်ၵႃႈဢၼ်လူဝ်ႇၼၼ်ႉတႃႉ။-
ၵႃႈဢၼ်ၽြႃးပဵၼ်ၸဝ်ႈၸဝ်ႈၽုင်ႇၵၢင်ႁၢဝ်သင်ႇလၢတ်ႈဝႆႉၼၼ်ႉႁႂ်ႈဢွၼ်ၵၼ်သၢင်ႈႁဵတ်းပုၼ်ႈၵျွင်းပိၵ်ႈမၢၼ်ႇမၼ်းၸဝ်ႈၼၼ်ႉမၢၼ်ႇမၢၼ်ႇမႅၼ်ႈမႅၼ်ႈသေလႄႈ၊ႁဵတ်းႁႂ်ႈသေႇၶျႃႇလီငၢမ်းၼင်ႇႁိုဝ်မၼ်းၸဝ်ႈတၵ်းဢမ်ႇဢွၵ်ႇတေႃးသႃႉတၢင်းၸႂ်မႆႈၶႂ်ႈၸႃႉတေႃႇၵဝ်ၸဝ်ႈ၊ဢိၵ်ႇတင်းၸူဝ်ႈလုၵ်ႈပၢၼ်လၢၼ်ၵဝ်ၸဝ်ႈၼၼ်ႉသေ။-
ၵဝ်ၸဝ်ႈသမ်ႉပၼ်သတိတီႈမႂ်းထႅင်ႈလွင်ႈဢၼ်ၽူႈလႂ်တၵ်းဢမ်ႇလႆႈၵဵပ်းဢဝ်ၶွၼ်ႇသေၸိူဝ်ႉသေမဵဝ်းၵႃႈတီႈယဵၸ်ႈပရေႃးႁဵၵ်ႈ၊ၵႃႈတီႈၵူၼ်းမဵဝ်း လေႇဝိ၊ ၵႃႈတီႈၵူၼ်းမေႃႁဵတ်းၵႂၢမ်း၊ၵႃႈတီႈၵူၼ်းပႂ်ႉၽၵ်းတူၵျွင်းပိၵ်ႈမၢၼ်ႇၸဝ်ႈ၊ဢိၵ်ႇတင်းၶဝ်ၸိူဝ်းဢၼ်ၸၢပ်ႈသႅင်ႇၵၼ်တင်းၵျွင်းပိၵ်ႈမၢၼ်ႇၸဝ်ႈၸိူဝ်းၼၼ်ႉသေၵေႃႉသေၵူၼ်း။
“မႂ်း ဢေးၸရႃႇ၊ ၵေႃႈတၵ်းလႆႈဢဝ်တင်းၺၢၼ်ႇဢၼ်ၽြႃးပဵၼ်ၸဝ်ႈပၼ်ဝႆႉတီႈမႂ်းၼၼ်ႉသေလႄႈၶၢၼ်းၶုၼ်လႂ်တင်းၵူၼ်းဢၼ်ၸီႇယၢင်ႇတြႃးလႂ်ႁႂ်ႈလႆႈဢုပ်ႉၵႃႈၼိူဝ်ၶဝ်ၸိူဝ်းဢၼ်ယူႇၽၢႆႇတၢင်းဝၼ်းတူၵ်းမႄႈၼမ်ႉ ဢုၽရတ်ႉ၊ တင်းသဵင်ႈတင်းလူင်ဢၼ်ႁုတြႃးၽြႃးပဵၼ်ၸဝ်ႈမႂ်းၼၼ်ႉသေယဝ်ႉ၊မႂ်းတၵ်းလႆႈဢဝ်ပိင်းၺၢပ်ႈတြႃးၸဝ်ႈၼၼ်ႉသွၼ်ပၼ်တီႈၶဝ်ၸိူဝ်းဢၼ်ဢမ်ႇႁုၼၼ်ႉဢေႃႈ။-
ပေႃးသေၵေႃႉသေၵူၼ်းတွပ်ႇထဵင်ပူၼ်ႉလိူဝ်တြႃးၽြႃးပဵၼ်ၸဝ်ႈ၊ဢိၵ်ႇတင်းဢမိင်ႉၸဝ်ႈၶုၼ်ႁေႃၶမ်းၼၼ်ႉၸိုင်၊ႁႂ်ႈမၼ်းလႆႈၶၢမ်ႇတၢမ်ႇဢပျတ်ႈဢၼ်ဢဝ်တၢႆ၊ဢမ်ႇၼၼ်လႆႈၶၢမ်ႇတၢင်းဢၼ်လိုပ်ႈဢွၵ်ႇသေၵႃႈၼႂ်းမိူင်းပႅတ်ႈ၊ဢမ်ႇၼၼ်လႆႈၶၢမ်ႇတၢင်းဢၼ်သိမ်းဢဝ်ဢုၵ်ႉၸႃႇမၼ်း၊ဢမ်ႇၼၼ်လႆႈၶၢမ်ႇတၢင်းဢၼ်ဢဝ်သႂ်ႇၶွၵ်ႈဝႆႉၶၼ်ၶၼ်ၽႂ်းၽႂ်းသေ၊” ဝႃႈၼင်ႇၼႆဢေႃႈ။
ဢေးၸရႃႇ၊ လၢတ်ႈလႄႈဝႃႈ၊ “ယွင်ႈယေႃး ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇမွၼ်ႇႁဝ်းၼၼ်ႉတီႈၶႃႈဢေႃႈ။ မၼ်းၸဝ်ႈႁဵတ်းႁႂ်ႈၸဝ်ႈမုၼ်ယႂ်ႇၶုၼ်ႁေႃၶမ်းမီးၸႂ်ဢၼ်ၶႂ်ႈႁဵတ်းႁႂ်ႈၵျွင်းပိၵ်ႈမၢၼ်ႇၸဝ်ႈဝဵင်း ယေႇရုသလႅမ်ႇ၊ ႁၢင်ႈလီႁၢင်ႈငၢမ်းၸိူဝ်ႉၼင်ႇၼႆတီႈၶႃႈယဝ်ႉ။-
ၵွပ်ႈလူၺ်ႈၵျေးၸူးတၢင်းလီၽြႃးပဵၼ်ၸဝ်ႈလႄႈၵဝ်လႆႈၶၢမ်ႇတၢင်းဢၼ်ၸဝ်ႈမုၼ်ယႂ်ႇၶုၼ်ႁေႃၶမ်း၊ဢိၵ်ႇတင်းၶုၼ်ဢၼ်ၶုၼ်ႁေႃၶမ်းတိူင်ႇပၢင်ႇတင်းလၢႆ၊ဢိၵ်ႇတင်းမူးမၢတ်ႈၽွင်းမိူင်းတင်းလၢႆယုၵ်ႉယွင်ႈၼၼ်ႉယဝ်ႉ။ ထႃႇဝရႃႉၽြႃး၊ ၽြႃးပဵၼ်ၸဝ်ႈၵဝ်ပၼ်ဢဵၼ်ပၼ်ႁႅင်းတီႈၵဝ်လႄႈၵဝ်လႆႈတိုၵ်းယူင်းၸူဝ်းဢဝ်ၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၸိူဝ်ႉၶိူဝ်းၵူၼ်းမဵဝ်း ဢိသရေး၊ ၵမ်ႈၽွင်ႈႁႂ်ႈပွၵ်ႈၶိုၼ်းမႃးလူၺ်ႈၵၼ်တင်းၵဝ်ဢေႃႈ၊” ဝႃႈၼင်ႇၼႆဢေႃႈ။
ၸရၢင်းၵူၼ်းဢၼ်ပဵၼ်ၵႄႇပဵၼ်ႁူဝ်ၸိူဝ်ႉၶိူဝ်းႁိူၼ်း၊ၸိူဝ်းဢၼ်လႆႈၶၢမ်ႇတၢင်းဢၼ်ပိူၼ်ႈတိဢဝ်သိမ်းဢဝ်ၵႂႃႇလႄႈတူၵ်းၵႅၼ်းၵႃႈၼႂ်းမိူင်း ပႃႇပုလုၼ်ႇ၊ လႄႈဢွၼ်ၵၼ်ပွၵ်ႈမႃးၶိုၼ်းၵႃႈတီႈဝဵင်း ယေႇရုသလႅမ်ႇ၊ လူၺ်ႈၵၼ်တင်းၵဝ်၊ၼႂ်းၸူဝ်ႈပၢၼ် ဢႃႇတႃႇၸေႇရိတ်ႉ၊ ပဵၼ်ၸဝ်ႈမုၼ်ယႂ်ႇၶုၼ်ႁေႃၶမ်းၼၼ်ႉၸမ်ႉ၊-
ၵဝ်ႁႂ်ႈၶဝ်ၸိူဝ်းၼၼ်ႉၸုၵၼ်တုမ်ၵၼ်ၵႃႈတီႈႁိမ်းၼမ်ႉဢၼ်လႆၵႂႃႇၸူးၵႃႈတီႈဝဵင်း ဢႁႃႇဝႃႉ၊ ၼၼ်ႉလႄႈႁဝ်းဢွၼ်ၵၼ်ၶျႃးပၢင်ၵႃႈတီႈၼၼ်ႈသၢမ်ဝၼ်းတဵမ်တဵမ်ဢေႃႈ။ ၵဝ်ၸႅတ်ႈထၢမ်တီႈၵူၼ်းတင်းလၢႆ၊ဢိၵ်ႇတင်းယဵၸ်ႈပရေႃးႁဵၵ်ႈ ၸိူဝ်းၼၼ်ႉလႄႈလႆႈႁုလွင်ႈဢၼ်ဢမ်ႇပႃးၵူၼ်းမဵဝ်း လေႇဝိ၊ သေၵေႃႉသေၵူၼ်းၼၼ်ႉၸိုင်၊-
ၵဝ်ၸင်ႇႁွင်ႉဢဝ်ၵူၼ်းဢၼ်ပဵၼ်ၵႄႇပဵၼ်ႁူဝ်ၵဝ်ႈၵေႃႉ၊ဢၼ်ပဵၼ် ဢေးလျေႇၸႃႇ၊ဢရေႇလႃႉ၊သေႇမႃႇယႃႉ၊ဢေးလႃႉၼႃႇႀၼ်ႇ၊ယေႃးယရိပ်ႉ၊ဢေးလႃႉၼႃႇႀၼ်ႇ၊ၼႃႇႀၼ်ႇ၊ၸႃႇၶရိ၊မေႇသုလမ်ႇ၊ ဢိၵ်ႇတင်းသွင်ၵေႃႉဢၼ်ပဵၼ် ယွႃႇရိပ်ႉ၊ တင်း ဢေးလႃႉၼႃႇႀၼ်ႇ၊ ဢၼ်မီးတၢင်းႁုၼမ်ၼၼ်ႉမႃးလႄႈ၊-
ပွႆႇၸႂ်ႉၶဝ်ၵႂႃႇၵႃႈတီႈ ဢိတ်ႉတေႃႇ၊ ၵေႃႉဢၼ်ပဵၼ်ၵႄႇပဵၼ်ႁူဝ်ၵႃႈၼႂ်းမိူင်း ၵသိၽိ၊ လႄႈႁႂ်ႈၵႂႃႇမွၵ်ႇလၢတ်ႈတီႈမၼ်း၊ဢိၵ်ႇတင်းပီႈၼွင်ႉမၼ်းဢၼ်ယၢမ်ႈၵိုတ်ႉႁၢပ်ႇၼႃႈၵၢၼ်ၽြႃးၼႂ်းၵျွင်းပိၵ်ႈမၢၼ်ႇၸဝ်ႈၸိူဝ်းၼၼ်ႉလႄႈဝႃႈ၊ၶႅၼ်းတေႃႈသူင်ႇၵူၼ်းဢၼ်တၵ်းႁဵတ်းၼႃႈၵၢၼ်ၽြႃးပဵၼ်ၸဝ်ႈၼႂ်းၵျွင်းပိၵ်ႈမၢၼ်ႇၸဝ်ႈမႃးပၼ်တီႈႁဝ်းၶႃႈသေၵမ်းၶႃႈ။-
ၵွပ်ႈလူၺ်ႈၵျေးၸူးတၢင်းလီၽြႃးပဵၼ်ၸဝ်ႈလႄႈၶဝ်သူင်ႇပၼ် သေႇရၽိ၊ ဢၼ်ပဵၼ်ၵူၼ်းမီးတၢင်းႁုတၢင်းႁၼ်ၵေႃႉၼိုင်ႈလႄႈပဵၼ်ၵူၼ်း လေႇဝိ၊ ၼႂ်းၶိူဝ်းႁိူၼ်း မႃႇလိ၊ တင်းပီႈၼွင်ႉမၼ်းလႄႈလုၵ်ႈလၢင်းၶဝ်သိပ်းပႅတ်ႇၵေႃႉ။-
ႁႃႇသပိ၊ တင်း ယေႇသႃႇယႃႉ၊ ၶိူဝ်းႁိူၼ်း မေႇရႃႇရိ၊ ဢိၵ်ႇတင်းပီႈၼွင်ႉမၼ်းလႄႈလုၵ်ႈလၢင်းၶဝ်သၢဝ်းၵေႃႉဢေႃႈ။-
ၼွၵ်ႈသေၼၼ်ႉၶႃႈၸႂ်ႉၼႂ်းၵျွင်းၽြႃးပဵၼ်ၸဝ်ႈၸိူဝ်းဢၼ် တႃႇဝိတ်ႈ၊ တင်းမူးမၢတ်ႈၽွင်းမိူင်းမၼ်းၶၢၼ်းဝႆႉႁႂ်ႈၶဝ်လႆႈႁဵတ်းၵၢၼ်ပၼ်ၵူၼ်းမဵဝ်း လေႇဝိ၊ တင်းလၢႆၼၼ်ႉ၊ၸိုဝ်ႈသဵင်ၶဝ်တင်းသဵင်ႈတင်းလူင်ၶဝ်ႈပႃးၼႂ်းၸရၢင်းလႄႈမီးသွင်ပၢၵ်ႇပၢႆသၢဝ်းၵေႃႉဢေႃႈ။
မိူဝ်ႈၼၼ်ႉၵဝ်မီးဢမိင်ႉႁႂ်ႈၶဝ်တင်းသဵင်ႈတင်းလူင်ဢွၼ်ၵၼ်ၵမ်သိၼ်ဢမ်ႇၵိၼ်တၢင်းၵိၼ်လႄႈႁႂ်ႈႁဝ်းလႆႈဝႆႉတူဝ်တႅမ်ႇယေႃႈၵႃႈတီႈၽၢႆႇၼႃႈၽြႃးပဵၼ်ၸဝ်ႈႁဝ်းၵႃႈႁိမ်းၼမ်ႉႁွင်ႈ ဢႁႃႇဝႃႉ၊ ၼၼ်ႉႁႂ်ႈလႆႈလဝ်ႈယွၼ်းသူးတွင်းပုၼ်ႈလွင်ႈၼင်ႇႁိုဝ်မၼ်းၸဝ်ႈတၵ်းဢွၼ်သူင်ႇၸွမ်းသဵၼ်ႈတႃသၢႆတၢင်းႁဝ်းလႄႈၵႅတ်ႇၶႄႁႄႉၵင်ႈပၼ်ႁဝ်းတင်းလုၵ်ႈလၢင်းႁဝ်း၊ဢိၵ်ႇတင်းဢုၵ်ႉၸႃႇၶူဝ်းလဵင်းႁဝ်းၵႃႈမီးၼၼ်ႉဢေႃႈ။-
လွင်ႈမၼ်းၸမ်ႉ၊ၵဝ်ဢူၵ်းဢၢႆလွင်ႈဢၼ်တၵ်းယွၼ်းဢဝ်တပ်ႉၵူၼ်းသိုၵ်း၊တပ်ႉၵူၼ်းၶီႇမႃႉသေတပ်ႉၼိုင်ႈၵႃႈတီႈၶုၼ်ႁေႃၶမ်း ႁႂ်ႈလႆႈၸွမ်းသူင်ႇႁဝ်းႁႂ်ႈလႆႈၸွႆႈထႅမ်ႁၢမ်ႈတၢပ်ႈႁႄႉၶႅၼ်ရၢၼ်ႇသူႇၵႃႈတီႈသဵၼ်ႈတၢင်းၼၼ်ႉ၊ၵွပ်ႈပိူဝ်ႈၵဝ်လႆႈလဝ်ႈလၢတ်ႈတီႈၶုၼ်ႁေႃၶမ်းဝႆႉလႄႈဝႃႈ၊ “ၽြႃးပဵၼ်ၸဝ်ႈပၼ်ၵျေးၸူးတၢင်းလီတီႈၵေႃႉဢၼ်ယုမ်ႇမၢတ်ႈဢိင်ပိုင်ႈမၼ်းၸဝ်ႈၼၼ်ႉလႄႈ၊တီႈၵေႃႉဢၼ်ၸုၼ်ႉပႅတ်ႈမၼ်းၸဝ်ႈၼၼ်ႉၸမ်ႉ၊မၼ်းၸဝ်ႈဢမ်ႇထုၵ်ႇၸႂ်ၵျိူၵ်ႈၸႂ်လႄႈပၼ်တၢမ်ႇတီႈၵေႃႉၼၼ်ႉဢေႃႈ၊” ဝႃႈၼင်ႇၼႆဝႆႉၼၼ်ႉဢေႃႈ။
ၼင်ႇၼၼ်လႄႈႁဝ်းဢွၼ်ၵၼ်ၵမ်သိၼ်ဢမ်ႇၵိၼ်တၢင်းၵိၼ်လႄႈသူးတွင်းလဝ်ႈယွၼ်းလွင်ႈၼၼ်ႉတီႈၽြႃးပဵၼ်ၸဝ်ႈႁဝ်းဢေႃႈ။ မၼ်းၸဝ်ႈၵေႃႈထွမ်ႇဢဝ်ဢေႃႈ။
ၵႃႈၼႂ်းယဵၸ်ႈပရေႃးႁဵၵ်ႈ ဢၼ်ပဵၼ်ငဝ်ႈပဵၼ်ႁူဝ်တင်းလၢႆၼၼ်ႉၵဝ်လိူၵ်ႈဢဝ် သေႇရၽိ၊ တင်း ႁႃႇသပိ၊ တင်းယဵၸ်ႈပရေႃးႁဵၵ်ႈထႅင်ႈသိပ်းၵေႃႉသေယဝ်ႉ၊-
ၸင်ႈႁိဝ်ႈငိုၼ်းၶမ်းၶိူင်ႈပိူင်တင်းလၢႆဢၼ်ၸဝ်ႈမုၼ်ယႂ်ႇၶုၼ်ႁေႃၶမ်း၊ဢိၵ်ႇတင်းဝုၼ်ႇလူင်တင်းလၢႆတင်းမူးမၢတ်ႈၽွင်းမိူင်းတင်းလၢႆ၊ဢိၵ်ႇတင်းၵူၼ်းမဵဝ်း ဢိသရေး၊ ၸိူဝ်းၼၼ်ႉလူႇတၢၼ်းမႃးႁႂ်ႈလႆႈၸႂ်ႉသုင်းၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉဢၢပ်ႈပၼ်တီႈၶဝ်ဢေႃႈ။-
ၵဝ်လၢတ်ႈတီႈၶဝ်လႄႈဝႃႈ၊ “သူၼႆႉပဵၼ်ၵေႃႉဢၼ်မူတ်းၸၢင်ႇပုၼ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇမွၼ်ႇႁဝ်းၼၼ်ႉဢေႃႈ။ ၶိူင်ႈပိူင်ငိုၼ်းၶမ်းၸိူဝ်းၼႆႉၵေႃႈပဵၼ်ၶိူင်ႈတၢင်းလူႇဢၼ်မူတ်းၸၢင်ႇလႄႈၶဝ်ၸိူဝ်းဢၼ်မီးၸႂ်ၸေႇတၼႃႇၼၼ်ႉလူႇတၢၼ်းတီႈမၼ်းၸဝ်ႈဢေႃႈ။-
သူဢွၼ်ၵၼ်ပႂ်ႉထိင်းၸိူဝ်းၼႆႉလီလီ တေႃႇထိုင်ႁဝ်းႁွတ်ႈၽႅဝ်ၵႂႃႇၵႃႈတီႈဝဵင်း ယေႇရုသလႅမ်ႇ၊ တႃႉ။ ၵႃႈတီႈၼၼ်ႈၸင်ႈႁဵဝ်ႈၵႃႈတီႈၽၢႆႇၼႃႈယဵၸ်ႈပရေႃးႁဵၵ်ႈသေလႄႈဢၢပ်ႈပၼ်ၵႃႈၼႂ်းမိုဝ်းၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ယဵၸ်ႈပရေႃးႁဵၵ်ႈလႂ်၊ၵူၼ်း လေႇဝိ၊ လႂ် ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်မဵဝ်း ဢိသရေး၊ လႂ်ၸိူဝ်းၼၼ်ႉၵႃႈတီႈၵျွင်းပိၵ်ႈမၢၼ်ႇၸဝ်ႈၵႃႈၼႂ်းဝဵင်း ယေႇရုသလႅမ်ႇ၊ ပုၼ်ႉတႃႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈယဵၸ်ႈပရေႃးႁဵၵ်ႈတင်းလၢႆတင်းၵူၼ်း လေႇဝိ၊ ၸိူဝ်းၼၼ်ႉဢွၼ်ၵၼ်ပႂ်ႉထိင်းငိုၼ်းၶမ်းတင်းၶိူင်ႈပိူင်ၸိူဝ်းၼၼ်ႉႁႂ်ႈလႆႈဢဝ်ၵႂႃႇတီႈၵျွင်းပိၵ်ႈမၢၼ်ႇၸဝ်ႈၵႃႈၼႂ်းဝဵင်း ယေႇရုသလႅမ်ႇ၊ ဢေႃႈ။
ၼႂ်းလိူၼ်တီႈၼိုင်ႈဝၼ်းတီႈသိပ်းသွင်ၼၼ်ႉႁဝ်းဢွၼ်ၵၼ်ဢွၵ်ႇသေၵႃႈတီႈၼမ်ႉ ဢႁႃႇဝႃႉ၊ လႄႈၵႂႃႇၸူးဝဵင်း ယေႇရုသလႅမ်ႇ၊ ဢေႃႈ။ ၽြႃးပဵၼ်ၸဝ်ႈမီးလူၺ်ႈၵၼ်တင်းႁဝ်းယူႇ၊ၵႅတ်ႇၶႄႁႄႉၵင်ႈပၼ်ႁႂ်ႈႁဝ်းလွတ်ႈသေၵႃႈၼႂ်းမိုဝ်းရၢၼ်ႇသူႇဢိၵ်ႇတင်းၵေႃႉဢၼ်လွမ်ပႂ်ႉၸူၼ်ဢဝ်ၸွမ်းတႃႈၸွမ်းတၢင်းၼၼ်ႉဢေႃႈ။-
မိူဝ်ႈဢၼ်ႁဝ်းႁွတ်ႈထိုင်ၵႃႈတီႈဝဵင်း ယေႇရုသလႅမ်ႇ၊ ၼၼ်ႉၸိုင်၊ႁဝ်းလိုဝ်ႈယူႇသၢမ်ဝၼ်းသေယဝ်ႉ၊-
ၼႂ်းဝၼ်းဢၼ်ထူၼ်ႈထိုင်သီႇဝၼ်းၼၼ်ႉႁဝ်းဢွၼ်ၵၼ်ၵႂႃႇၵႃႈတီႈၵျွင်းပိၵ်ႈမၢၼ်ႇၸဝ်ႈလႄႈၸင်ႈႁဵဝ်ႈငိုၼ်းၶမ်းၶိူင်ႈပိူင်ၸိူဝ်းၼၼ်ႉသေယဝ်ႉ၊ဢၢပ်ႈပၼ်ၵႃႈၼႂ်းမိုဝ်းယဵၸ်ႈပရေႃးႁဵၵ်ႈ မေႇရမုတ်ႉ၊ လုၵ်ႈၸၢႆး ဢုရိယႃး၊ ၼၼ်ႉဢေႃႈ။ ဢေးလႃႇၸႃႇ၊ လုၵ်ႈၸၢႆး ၽိၼႁတ်ႉ၊ ဢိၵ်ႇတင်းၵူၼ်း လေႇဝိ၊ သွင်ၵေႃႉဢၼ်ပဵၼ် ယေႃးၸပတ်ႉ၊ လုၵ်ႈၸၢႆး ယေႇသွႃႇ၊ တင်း ၼေႃႇတိ၊ လုၵ်ႈၸၢႆး ပိၼုၺ်ႇ၊ ၸိူဝ်းၼၼ်ႉၵေႃႈ မီးယူႇလူၺ်ႈၵၼ်တင်း မေႇရမုတ်ႉ၊ ဢေႃႈ။-
ဢဝ်ၶိူင်ႈပိူင်ၸိူဝ်းၼၼ်ႉၸင်ႈႁိဝ်ႈလႄႈၼပ်ႉဢၢၼ်ႇတင်းမူတ်းသေယဝ်ႉ၊မၢတ်ႈမၢႆတႅမ်ႈဝႆႉၼမ်ႉၼၵ်းမၼ်းတင်းသဵင်ႈတင်းလူင်ၵႃႈၼႂ်းဝၼ်းၼၼ်ႉၵမ်းလဵဝ်ဢေႃႈ။
ၶဝ်ၸိူဝ်းဢၼ်ပွၵ်ႈၶိုၼ်းမႃးသေတၢင်းဢၼ်လႆႈၶၢမ်ႇတိဢဝ်သိမ်းဢဝ်ၵႂႃႇလႄႈတူၵ်းၵႅၼ်းၼၼ်ႉတင်းသဵင်ႈတင်းလူင်ဢွၼ်ၵၼ်ႁဵတ်းတၢင်းလူႇဢၼ်တုတ်ႇၽႆးၵႃႈတီႈၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ၼၼ်ႉဢေႃႈ။ ၶဝ်သၢၵ်ႈလူႇဝူဝ်းပေႃႈသိပ်းသွင်တူဝ်ပုၼ်ႈၵူၼ်းမဵဝ်း ဢိသရေး၊ တင်းသဵင်ႈတင်းလူင်၊သူဝ်းပေႃႈၵဝ်ႈသိပ်းႁူၵ်းတူဝ်၊သူဝ်းဢွၼ်ႇၸဵတ်းသိပ်းၸဵတ်းတူဝ်ဢေႃႈ။ ပုၼ်ႈဢၼ်ႁဵတ်းတၢင်းလူႇဢၼ်ၽေႇဢပျတ်ႈၸိုင်၊ဢဝ်ပႄႉသိပ်းသွင်တူဝ်ဢေႃႈ။ တင်းသဵင်ႈတင်းမူတ်းၸမ်ႉ၊ႁဵတ်းတၢင်းလူႇဢၼ်တုတ်ႇၽႆးတီႈ ထႃႇဝရႃႉၽြႃး၊ ဢေႃႈ။-
ၶဝ်သမ်ႉဢဝ်လိၵ်ႈဢမိင်ႉၸဝ်ႈမုၼ်ယႂ်ႇၶုၼ်ႁေႃၶမ်းဢၼ်ပၼ်တီႈၶဝ်မႃးၼၼ်ႉ ဢၢပ်ႈပၼ်ၵႃႈၼႂ်းမိုဝ်းဝုၼ်ႇတင်းလၢႆ၊ဢိၵ်ႇတင်းၶုၼ်ဢၼ်ဢုပ်ႉမိူင်းတင်းလၢႆၵႃႈတီႈၽၢႆႇတၢင်းဝၼ်းတူၵ်းမႄႈၼမ်ႉ ဢုၽရတ်ႉ၊ ၼၼ်ႉလႄႈၶဝ်ၸိူဝ်းၼၼ်ႉဢွၼ်ၵၼ်ၸွႆႈၵမ်ႉၸွႆႈထႅမ်ၵူၼ်းတင်းလၢႆဢိၵ်ႇတင်းၵႃႈၼႂ်းၵျွင်းပိၵ်ႈမၢၼ်ႇၸဝ်ႈဢေႃႈ။
ၼႂ်းမိူဝ်ႈဢၼ်လွင်ႈတၢင်းၸိူဝ်းၼႆႉယဝ်ႉတူဝ်ႈလီငၢမ်းယဝ်ႉၼၼ်ႉ၊ၵူၼ်းဢၼ်ပဵၼ်ၵႄႇပဵၼ်ႁူဝ်ၵူၼ်းမဵဝ်း ဢိသရေး၊ ၶဝ်ဢွၼ်ၵၼ်မႃးတီႈၵဝ်လႄႈလၢတ်ႈဝႃႈ၊ “ၵူၼ်းမဵဝ်း ဢိသရေး၊ တင်းလၢႆတင်းယဵၸ်ႈပရေႃးႁဵၵ်ႈ ဢိၵ်ႇတင်းၵူၼ်း လေႇဝိ၊ တင်းလၢႆၸိူဝ်းၼၼ်ႉယင်းဢမ်ႇယူႇၽၢတ်ႇယၢၼ်ၵၼ်တင်းၵူၼ်းဢၼ်ယူႇၵဝ်ႇၵဝ်ႇၵႃႈတီႈမိူင်းၼႆႉၼၼ်ႉလႄႈယင်းၵမ်ၵျၢင်ႉၸွမ်းတၢင်းၵမ်တၢင်းၵျၢင်ႉဢၼ်လီႁင်ႈဢဵတ်ႇသဵတ်ႇဢၼ်ၵူၼ်း ၶႃႇၼၼိ၊ ၵူၼ်း ႁိတ်ႉတိ၊ ၵူၼ်း ၽေႇရၸိ၊ ၵူၼ်း ယေႇပုသိ၊ ၵူၼ်း ဢမ်ႇမုၼ်ႇ၊ ၵူၼ်း မေႃႇၽႃႉ၊ ၵူၼ်း ဢေးၵျိပ်ႉ၊ ၵူၼ်း ဢႃႇမေႃးရိ၊ ၶဝ်ၵမ်ၵျၢင်ႉၸိူဝ်းၼၼ်ႉဢေႃႈ။-
ၵူၼ်းၸၢႆးမဵဝ်း ၵျူး၊ တင်းလၢႆယင်းဢဝ်လုၵ်ႈယိင်းၶဝ်ၸိူဝ်းၼၼ်ႉလႄႈႁဵတ်းႁႂ်ႈၵူၼ်းမဵဝ်းမူတ်းၸၢင်ႇၽြႃးပဵၼ်ၸဝ်ႈမီးတၢင်းဢၼ်လေႃးလႄးၵၼ်တင်းပိူၼ်ႈယဝ်ႉ။ ၵူၼ်းဢၼ်ပဵၼ်ၵႄႇပဵၼ်ႁူဝ်လႂ်၊ၶုၼ်ဢၼ်ပွင်ၵၢၼ်လႂ်ယဵင်ႈၶႅၼ်းႁဵတ်းတုၸရိူၵ်ႈၼႆႉၼႃႇသေပိူၼ်ႈတီႈၶႃႈယဝ်ႉဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈဢၼ်ၵဝ်ငိၼ်းၵႂၢမ်းၼၼ်ႉၸိုင်၊ၵဝ်ၸႂ်လုလႄႈၸၵ်ႉသိၵ်ႇၶူဝ်းၼုင်ႈၶူဝ်းမႆၵဝ်၊ထူၺ်ႈၶူၼ်ႁူဝ်တင်းၼူတ်ႇၵၢင်းၵဝ်သေယဝ်ႉ၊ငိူဝ်ႈငဝ်ၵႂၢင်ၸႂ်လႄႈၼင်ႈယူႇဢေႃႈ။-
ၵဝ်ငိူဝ်ႈငဝ်ၵႂၢင်ၸႂ်လႄႈၼင်ႈယူႇၵႃႈတီႈၼၼ်ႈတေႃႇထိုင်ႁွတ်ႈၶိင်ႇဢၼ်ႁဵတ်းတၢင်းလူႇၶိင်ႇႁူဝ်ၶမ်ႈၼၼ်ႉဢေႃႈ။ ၶဝ်ၸိူဝ်းဢၼ်ၵူဝ်ႁႄၵွပ်ႈပိူဝ်ႈဢမိင်ႉၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ လႆႈလၢတ်ႈဝႆႉလူၺ်ႈလွင်ႈတုၸရိူၵ်ႈၵူၼ်းၸိူဝ်းဢၼ်ပွၵ်ႈၶိုၼ်းသေၵႃႈတီႈတၢင်းဢၼ်လႆႈၶၢမ်ႇတိဢဝ်သိမ်းဢဝ်ၵႂႃႇၸိူဝ်းၼၼ်ႉ၊ဢွၼ်ၵၼ်မႃးၸုၵၼ်တုမ်ၵၼ်ၵႃႈတီႈၵဝ်သၼ်ႇသၼ်ႇဝႆဝႆယူႇဢေႃႈ။
မိူဝ်ႈထိုင်ၶိင်ႇဢၼ်ႁဵတ်းတၢင်းလူႇႁူဝ်ၶမ်ႈၼၼ်ႉၵဝ်လုၵ်ႉသေၵႃႈတီႈတၢင်းဢၼ်ၵဝ်တမ်ႇၼွႆႉမွင်ၸႂ်ၼၼ်ႉလႄႈယင်းတိုၵ်ႉၼုင်ႈၶူဝ်းလဵင်းဢၼ်ယွၵ်းၶၢတ်ႇယူႇၼၼ်ႉသေယဝ်ႉၶုပ်ႉၶဝ်ႇလႄႈယုၵ်ႉမိုဝ်းၶိုၼ်ႈၸူးတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၵဝ်သေလႄႈ၊-
သူးတွင်းလႄႈဝႃႈ၊ “ၽြႃးပဵၼ်ၸဝ်ႈတီႈၶႃႈ။ ၶႃႈၸဝ်ႈဢူၵ်းဢၢႆၼႃႇလူင်လၢင်လႄႈဢမ်ႇႁတ်းမုင်ႈတူၺ်းၸဝ်ႈႁဝ်းတီႈၶႃႈဢေႃႈ။ တုၸရိူၵ်ႈဢၼ်ၶႃႈၸဝ်ႈႁဝ်းၶဝ်ႁဵတ်းမႅၼ်ႈၸိူဝ်းၼႆႉယႂ်ႇမႃးၽႄႈမႃးထူမ်ႈႁူမ်ႇႁူဝ်ၶႃႈၸဝ်ႈႁဝ်းၶဝ်လႄႈဢပျတ်ႈၶႃႈၸဝ်ႈႁဝ်းၶဝ်ၼၼ်ႉယႂ်ႇၽႄႈတူဝ်းတွၼ်းၶိုတ်းထိုင်ၽႃႉၵၢင်ႁၢဝ်တီႈၶႃႈဢေႃႈ။-
ၸႃႉၸဵမ်ၸူဝ်ႈပူႇၸူဝ်ႈမွၼ်ႇၶႃႈၸဝ်ႈႁဝ်းၶဝ်မႃးတေႃႇထိုင်ႁွတ်ႈဝၼ်းမိူဝ်ႈၼႆႉၼၼ်ႉၶႃႈၸဝ်ႈႁဝ်းၶဝ်ဢၼ်ပဵၼ်ၵူၼ်းၸဝ်ႈႁဝ်းၼႆႉၽိတ်းပိူင်ႈၼႃႇလူင်လၢင်တီႈၶႃႈဢေႃႈ။ ၵွပ်ႈပိူဝ်ႈတုၸရိူၵ်ႈၶႃႈၸဝ်ႈႁဝ်းၶဝ်ၼၼ်ႉလႄႈၶႃႈၸဝ်ႈႁဝ်းၶဝ်ဢိၵ်ႇတင်းၶုၼ်ႁေႃၶမ်းၶႃႈၸဝ်ႈႁဝ်းၶဝ်တင်းလၢႆတင်းယဵၸ်ႈပရေႃးႁဵၵ်ႈၶႃႈၸဝ်ႈႁဝ်းၶဝ်ၸိူဝ်းၼၼ်ႉလႆႈတူၵ်းၵႂႃႇၵႃႈၼႂ်းမိုဝ်းၶုၼ်ႁေႃၶမ်းတၢင်ႇသိုင်ႇတၢင်ႇမိူင်း၊လႆႈၶၢမ်ႇၽေးတၢင်းတၢႆလူၺ်ႈလၢပ်ႇလူၺ်ႈလႅဝ်း၊တၢင်းဢၼ်ႁိမ်ႁူင်ႇတၢင်းဢၼ်ဢဝ်ၵႂႃႇၶၢမ်ႇတူၵ်းၵႅၼ်းသေယဝ်ႉ၊လႆႈသရေႇလုယူႇမိူၼ်ၸိူဝ်ႉၼင်ႇဢၼ်ပဵၼ်ယူႇဝၼ်းမိူဝ်ႈၼႆႉၼၼ်ႉတီႈၶႃႈဢေႃႈ။-
မိူဝ်ႈလဵဝ်ၼႆႉၸူဝ်ႈၵႅပ်ႈၵမ်းဢွၼ်ႇၼိုင်ႈၼႆႉၵေႃႈ၊ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၶႃႈတီႈၶႃႈ။ ၸဝ်ႈႁဝ်းၼႄပျႃးၵျေးၸူးၵရုၼႃႇၸဝ်ႈႁဝ်းၼၼ်ႉတီႈၶႃႈၸဝ်ႈႁဝ်းၶဝ်လႄႈႁႂ်ႈၶႃႈၸဝ်ႈႁဝ်းၶဝ်ၵမ်ႈၽွင်ႈၵၢင်းလွတ်ႈၽေးတၢင်းဢၼ်ပဵၼ်ၶႃႈၼၼ်ႉလႄႈလႆႈယူႇလူင်ႉလီလွတ်ႈလီၼႂ်းမိူင်းၸဝ်ႈဢၼ်မူတ်းၸၢင်ႇၼႆႉတီႈၶႃႈဢေႃႈ။-
ၶႃႈၸဝ်ႈႁဝ်းၶဝ်လႆႈၶၢမ်ႇႁဵတ်းၶႃႈသေၵေႃႈ ၸဝ်ႈႁဝ်းဢမ်ႇပွႆႇပႅတ်ႈၶႃႈၸဝ်ႈႁဝ်းၶဝ်ဝႆႉၵႃႈၼႂ်းတၢင်းဢၼ်ပဵၼ်ၶႃႈၼၼ်ႉတီႈၶႃႈ။ ၸဝ်ႈႁဝ်းႁႂ်ႈၸဝ်ႈမုၼ်ယႂ်ႇၶုၼ်ႁေႃၶမ်းမိူင်း ပႃးသျႃး၊ ၼၼ်ႉၵျိူၵ်ႈၸႂ်ထုၵ်ႇၸႂ်ၶႃႈၸဝ်ႈႁဝ်းၶဝ်သေယဝ်ႉ၊ပွႆႇပၼ်ၶႃႈၸဝ်ႈႁဝ်းၶဝ်သမ်ႉၶိုၼ်းလႆႈထူၺ်ႈၸႂ်လူမ်၊ဢိၵ်ႇတင်းသမ်ႉၶိုၼ်းလႆႈပူၵ်းတင်ႈၵျွင်းပိၵ်ႈမၢၼ်ႇၸဝ်ႈႁဝ်းၶႃႈဢၼ်လုလႅဝ်လူမ်ႉပင်းၵႂႃႇ၊ဢိၵ်ႇတင်းသမ်ႉၶိုၼ်းလႆႈၵေႃႇလမ်းဝဵင်းၵႃႈတီႈဝဵင်း ယေႇရုသလႅမ်ႇ၊ မိူင်း ယုတႃႉ၊ ၼၼ်ႉတီႈၶႃႈဢေႃႈ။
“ႁဵတ်းမႅၼ်ႈၸိူဝ်ႉၼင်ႇၼႆယဝ်ႉ၊ၵူၺ်းၵႃႈ၊မိူဝ်ႈလဵဝ်ၼႆႉၸိုင်၊ၽြႃးပဵၼ်ၸဝ်ႈတီႈၶႃႈ။ ၶႃႈၸဝ်ႈႁဝ်းၶဝ်တၵ်းလဝ်ႈလၢတ်ႈလႆႈၸိူဝ်ႉၼင်ႇႁိုဝ်တီႈၶႃႈ။ ၶႃႈၸဝ်ႈႁဝ်းၶဝ်လႆႈဢွၼ်ၵၼ်ၸုၼ်ႉပႅတ်ႈပိင်းၺၢပ်ႈတြႃးၸဝ်ႈႁဝ်း၊-
ၸဝ်ႈႁဝ်းလႆႈသင်ႇလၢတ်ႈဝႆႉတီႈၶႃႈၸဝ်ႈႁဝ်းၶဝ်လူၺ်ႈတင်းပရေႃးၽႅတ်ႈ တင်းလၢႆၼၼ်ႉတီႈၶႃႈယဝ်ႉ။ ၶဝ်ၸိူဝ်းၼၼ်ႉမွၵ်ႇလၢတ်ႈၶႃႈၸဝ်ႈႁဝ်းၶဝ်လွင်ႈမိူင်းဢၼ်ၶႃႈၸဝ်ႈႁဝ်းၶဝ်တေၵႂႃႇသိမ်းဢဝ်ၼၼ်ႉပဵၼ်မိူင်းဢၼ်ၵူဝ်ႈၵိူၵ်ႇၵွပ်ႈပိူဝ်ႈၵူၼ်းၸိူဝ်းဢၼ်ယူႇၵဝ်ႇၵဝ်ႇၼၼ်ႉႁဵတ်းႁႂ်ႈဢၼ်ဝူၺ်ႇဢၼ်လီႁင်ႈဢဵတ်ႇသဵတ်ႇၼၼ်ႉတဵမ်ဝႆႉၵႃႈၼႂ်းမိူင်းၸႃႉၸဵမ်ၽၢႆႇၼိုင်ႈတေႃႇထိုင်ႁွတ်ႈၽၢႆႇၼိုင်ႈၼၼ်ႉဢေႃႈ။-
ပရေႃးၽႅတ်ႈၶဝ်မွၵ်ႇလၢတ်ႈၶႃႈၸဝ်ႈႁဝ်းၶဝ်လႄႈဝႃႈ၊ ‘ယႃႇပေႁႂ်ႈလုၵ်ႈယိင်းသူပဵၼ်ၵူပ်ႉပဵၼ်ၵူႈၵၼ်တင်းလုၵ်ႈၸၢႆးၵူၼ်းမိူင်းၼၼ်ႉလႄႈယႃႇႁႂ်ႈလုၵ်ႈၸၢႆးသူပဵၼ်ၵူပ်ႉပဵၼ်ၵူႈလူၺ်ႈၵၼ်တင်းလုၵ်ႈယိင်းၶဝ်။ ဢိၵ်ႇတင်းတေဢမ်ႇလႆႈၸွႆႈၵမ်ႉၸွႆႈထႅမ်ႁႂ်ႈၶဝ်မၼ်ႈၶိူင်ႇလႄႈလႆႈလီလႆႈပဵၼ်ၼၼ်ႉပုၼ်ႈလွင်ႈၼင်ႇႁိုဝ်သူတေမီးတၢင်းဢၼ်ႁႅင်းယႂ်ႇလႄႈလႆႈၵိၼ်မၢၵ်ႇၶဝ်ႈႁူင်းၼမ်ႉဢၼ်လီလီၵႃႈၼႂ်းလိၼ်မိူင်းၼၼ်ႉလႄႈသမ်ႉလႆႈဢၢပ်ႈပၼ်ႁႂ်ႈပဵၼ်ဢမူၺ်ႇပုၼ်ႈလုၵ်ႈလၢၼ်သူတင်းလၢႆၵႂႃႇတႃႇသေႇၼၼ်ႉၸိုင်၊ၵမ်ၵျၢင်ႉၸိူဝ်ႉၼင်ႇၼၼ်လႄႈယူႇတႃႉ၊’ ဝႃႈၼင်ႇၼႆဢေႃႈ။-
ပိၵ်ႉသမ်ႉၸဝ်ႈႁဝ်းၶႃႈဢၼ်ပဵၼ်ၽြႃးပဵၼ်ၸဝ်ႈၶႃႈၸဝ်ႈႁဝ်းၶဝ်တင်းလၢႆလႄႈပၼ်တၢမ်ႇဢပျတ်ႈၵႃႈၼိူဝ်ႁဝ်းၶႃႈဢၼ်ၵေႇလဵၵ်ႉသေတၢမ်ႇဢပျတ်ႈဢၼ်ၶႃႈၸဝ်ႈႁဝ်းၶဝ်တင်းလၢႆထိူၵ်ႈလီလႆႈၶၢမ်ႇဢဝ်ၵွပ်ႈပိူဝ်ႈတုၸရိူၵ်ႈဢၼ်ႁၢႆႉမိူၵ်ႈ၊ဢၼ်ႁဝ်းၶႃႈလႆႈႁဵတ်းၽိတ်းမႃးလႄႈၸဝ်ႈႁဝ်းယင်းပၼ်ၶႃႈၸဝ်ႈႁဝ်းၶဝ်တင်းလၢႆၵိုတ်းၵျၢၼ်ႇဝႆႉ၊ပဵၼ်ၵူၼ်းမုၵ်ႉဢွၼ်ႇၸိူဝ်းဢွၼ်ႇယူႇတီႈၶႃႈဢေႃႈ။-
ပိူဝ်ႈၼႆလႄႈၶႃႈၸဝ်ႈႁဝ်းၶဝ်တၵ်းၸုၼ်ႉပႅတ်ႈပိင်းၺၢပ်ႈတြႃးၸဝ်ႈႁဝ်းထႅင်ႈလႄႈၵူပ်ႉၵူႈပဵၼ်ႁိူၼ်းလူၺ်ႈၵၼ်တင်းၶဝ်ၸိူဝ်းဢၼ်ၸၢင်ႈႁဵတ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇၸိူဝ်းၼၼ်ႉလႆႈၸိူဝ်ႉၼင်ႇႁိုဝ်ၶႃႈ။ ပေႃးၶႃႈၸဝ်ႈႁဝ်းၶဝ်သမ်ႉယင်းႁဵတ်းၸိုင်၊ၸဝ်ႈႁဝ်းတၵ်းၸႂ်မႆႈၶႂ်ႈၸႃႉၼႃႇလူင်လၢင်လႄႈၸဝ်ႈႁဝ်းတၵ်းယႃႉၽဵဝ်ႈၶႃႈၸဝ်ႈႁဝ်းၶဝ်ပႅတ်ႈလုမ်းလုမ်း၊ဢမ်ႇႁႂ်ႈၵိုတ်းႁႂ်ႈၵျၢၼ်ႇသေၵေႃႉသေၵူၼ်းတီႈၶႃႈယဝ်ႉဢေႃႈ။-
ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ တီႈၶႃႈ။ ၸဝ်ႈႁဝ်းသိုဝ်ႈတေႃႇတီႈၶႃႈဢေႃႈ။ ၼႂ်းဝႃႈၼၼ်သေၵေႃႈၸဝ်ႈႁဝ်းႁႂ်ႈၶႃႈၸဝ်ႈႁဝ်းၶဝ်ၵိုတ်းၵျၢၼ်ႇဝႆႉလႄႈလႆႈလွတ်ႈပူၼ်ႉမႃးထိုင်ဝၼ်းမိူဝ်ႈၼႆႉဢေႃႈ။ တူၺ်းတီႈၶႃႈလူး။ ၶႃႈၸဝ်ႈႁဝ်းၶဝ်တင်းလၢႆပႃးတင်းဢပျတ်ႈတုၸရိူၵ်ႈဢၼ်ႁၢႆႉမိူၵ်ႈသေလႄႈမီးယူႇၵႃႈတီႈၽၢႆႇၼႃႈၸဝ်ႈႁဝ်းတီႈၶႃႈဢေႃႈ။ ၶႃႈၸဝ်ႈႁဝ်းၶဝ်ဢမ်ႇၵိုင်ႇဢမ်ႇတၢၼ်ႇႁႂ်ႈလႆႈၶဝ်ႈၸူးၵႃႈတီႈၽၢႆႇၼႃႈၸဝ်ႈႁဝ်းတီႈၶႃႈ၊” ဝႃႈၼင်ႇၼႆဢေႃႈ။
ၼႂ်းမိူဝ်ႈဢၼ် ဢေးၸရႃႇ၊ ယင်းၼမ်ႉတႃတူၵ်းယူႇ၊ၶုပ်ႉမူပ်ႇသူးတွင်းယူႇၵႃႈတီႈၽၢႆႇၼႃႈၵျွင်းပိၵ်ႈမၢၼ်ႇၸဝ်ႈလႄႈဝုၼ်ႇၶၢမ်ႇတွင်းပၢၼ်ႇဢပျတ်ႈယူႇၼၼ်ႉၸိုင်၊ပရိၵ်ႈသၢတ်ႈဢၼ်ၼမ်ၼႃႇလူင်လၢင်၊ၽူႈၸၢႆး၊ၽူႈယိင်း၊လုၵ်ႈဢွၼ်ႇမဵဝ်း ဢိသရေး၊ ၶဝ်ဢွၼ်ၵၼ်မႃးၸုတုမ်လဵပ်ႈႁွပ်ႈမၼ်းလႄႈဢွၼ်ၵၼ်ႁွင်ႉႁႆႈယူႇၶူမ်ၸႂ်ၶူမ်ၶေႃးၼႃႇလူင်လၢင်ဢေႃႈ။-
မိူဝ်ႈၼၼ်ႉ သေႇၶၼိ၊ လုၵ်ႈၸၢႆး ယေႇႁေးလႃႉ၊ ၼႂ်းၶိူဝ်းႁိူၼ်း ဢေႇလမ်ႇ၊ လၢတ်ႈတီႈ ဢေးၸရႃႇ၊ လႄႈဝႃႈ၊ “ႁဝ်းၼႆႉဢွၼ်ၵၼ်ၽိတ်းပိူင်ႈၽြႃးပဵၼ်ၸဝ်ႈႁဝ်းလူၺ်ႈတၢင်းဢၼ်ၵူပ်ႉၵူႈပဵၼ်ႁိူၼ်းလူၺ်ႈၵၼ်တင်းၽူႈယိင်းၵူၼ်းတၢင်ႇၸိူဝ်ႉတၢင်ႇမဵဝ်းယဝ်ႉ။ ၼႂ်းဝႃႈၼၼ်သေၵေႃႈယင်းမီးတီႈမုင်ႈမွင်းပုၼ်ႈမဵဝ်း ဢိသရေး၊ ယူႇလူးၵွၼ်ႇဢေႃႈ။-
တေႃႈလဵဝ်ၼႆႉ၊ႁဝ်းတၵ်းလႆႈႁဵတ်းပတိၺိၺ်ႇလူၺ်ႈၵၼ်တင်းၽြႃးပဵၼ်ၸဝ်ႈႁဝ်းလူၺ်ႈလွင်ႈဢၼ်ႁဝ်းတၵ်းဢွၼ်ၵၼ်ၸုၼ်ႉပႅတ်ႈၽူႈယိင်းၸိူဝ်းၼၼ်ႉ၊ဢိၵ်ႇတင်းလုၵ်ႈလၢင်းၶဝ်တင်းလၢႆၼၼ်ႉဢေႃႈ။ ႁဝ်းတၵ်းႁဵတ်းၸွမ်းၵႃႈၼင်ႇဢၼ်ၸဝ်ႈႁဝ်းတင်းၶဝ်ၸိူဝ်းဢၼ်ရူဝ်ႇသေႇၵူဝ်ယမ်ထုင်းၽိင်ႈတြႃးၽြႃးပဵၼ်ၸဝ်ႈၸိူဝ်းၼၼ်ႉပၼ်တၢင်းၵျၢမ်ႇတၢင်းပွင်ၼၼ်ႉဢေႃႈ။ ႁဝ်းတၵ်းႁဵတ်းၸွမ်းၵႃႈၼင်ႇဢၼ်ပိင်းၺၢပ်ႈတြႃးၽြႃးပဵၼ်ၸဝ်ႈမီးဢမိင်ႉဝႆႉၼၼ်ႉဢေႃႈ။-
ၸဝ်ႈႁဝ်းမီးပုၼ်ႈၽွၼ်းတႃႇတေပွင်ႁဵတ်းဢေႃႈ။ ႁဝ်းၶႃႈမီးယူႇၽၢႆႇၸဝ်ႈႁဝ်းဢေႃႈ။ မီးၸႂ်ဢၼ်ႁတ်းႁၢၼ်သေလႄႈႁဵတ်းသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆ ဢေးၸရႃႇ၊ လုၵ်ႉလႄႈၸႂ်ႉၶဝ်ၸိူဝ်းဢၼ်ပဵၼ်ငဝ်ႈပဵၼ်ႁူဝ်ယဵၸ်ႈပရေႃးႁဵၵ်ႈ တင်းၵူၼ်း လေႇဝိ၊ ဢိၵ်ႇတင်းၵူၼ်းမဵဝ်း ဢိသရေး၊ တင်းသဵင်ႈတင်းလူင်ၼၼ်ႉတိူင်ႇဝႃႈၵတိလူၺ်ႈလွင်ႈဢၼ်ၶဝ်တၵ်းႁဵတ်းၸွမ်းၵႃႈၼင်ႇဢၼ် သေႇၶၼိ၊ ပၼ်တၢင်းၵျၢမ်ႇၼၼ်ႉလႄႈၶဝ်ၵေႃႈဢွၼ်ၵၼ်တိူင်ႇဝႃႈၵတိဢေႃႈ။-
ၼင်ႇၼၼ်လႄႈ ဢေးၸရႃႇ၊ လုၵ်ႉသေၵႃႈတီႈဢၼ်မၼ်းယူႇၽၢႆႇၼႃႈၵျွင်းပိၵ်ႈမၢၼ်ႇၸဝ်ႈၼၼ်ႉသေလႄႈၶဝ်ႈၵႂႃႇၵႃႈၼႂ်းလုၵ်း ယေႃးႁၼၼ်ႇ၊ လုၵ်ႈၸၢႆး ဢေးလျႃႇသိပ်ႉ၊ ၼၼ်ႉသေယဝ်ႉ၊ၶၢင်းၶီၶၢင်းၽၢၼ်ယူႇၵႃႈတီႈၼၼ်ႈတင်းၶိုၼ်းၵွပ်ႈပိူဝ်ႈဢပျတ်ႈၶဝ်ၸိူဝ်းဢၼ်ပွၵ်ႈၶိုၼ်းမႃးသေၵႃႈတီႈတၢင်းဢၼ်လႆႈၶၢမ်ႇတိဢဝ်သိမ်းဢဝ်ၵႂႃႇၼၼ်ႉဢေႃႈ။ မၼ်းယင်းဢမ်ႇၵိၼ်ၶဝ်ႈၵိၼ်ၼမ်ႉသေဢိတ်းလႄႈယူႇဢေႃႈ။
ၶဝ်ၸိူဝ်းဢၼ်ပဵၼ်ငဝ်ႈပဵၼ်ႁူဝ်ၼႂ်းၵူၼ်းတင်းလၢႆၼၼ်ႉၶဝ်ဢွၼ်ၵၼ်ပၢဝ်ႇသေႃႇၵႃႈၼႂ်းမိူင်း ယုတႃႉ၊ တင်းဝဵင်း ယေႇရုသလႅမ်ႇ၊ ႁႂ်ႈၶဝ်ၸိူဝ်းဢၼ်ပွၵ်ႈၶိုၼ်းသေတၢင်းဢၼ်လႆႈၶၢမ်ႇပိူၼ်ႈတိသိမ်းဢဝ်ၵႂႃႇၼၼ်ႉမႃးၸုၵၼ်တုမ်ၵၼ်ၵႃႈတီႈဝဵင်း ယေႇရုသလႅမ်ႇ၊ ဢေႃႈ။-
ပေႃးသေၵေႃႉသေၵူၼ်းလုတ်ႈၵႂႃႇႁၢမ်းၵႂႃႇလႄႈဢမ်ႇမႃးႁွတ်ႈမႃးထိုင်ၼႂ်းၸူဝ်ႈသၢမ်ဝၼ်းၸိုင်၊ႁႂ်ႈဢုၵ်ႉၸႃႇၶဝ်လႆႈၶၢမ်ႇတၢင်းဢၼ်သိမ်းဢဝ်၊တူဝ်ၶဝ်လႆႈၶၢမ်ႇတၢင်းဢၼ်ပႄႇပႅတ်ႈသေၵႃႈၼႂ်းၸရၢင်းပရိၵ်ႈသၢတ်ႈဢေႃႈ။-
ၼႂ်းၸူဝ်ႈသၢမ်ဝၼ်းၵူၺ်းၵူၼ်းဢၼ်မီးၼႂ်းဢိူင်ႇ ယုတႃႉ၊ တင်းဢိူင်ႇ ပိၼ်ႇယႃႇမိၼ်ႇ၊ မႃးႁွတ်ႈမႃးထိုင်ၵႃႈၼႂ်းဝဵင်း ယေႇရုသလႅမ်ႇ၊ တင်းသဵင်ႈတင်းလူင်လႄႈၸုၵၼ်တုမ်ၵၼ်ၵႃႈၼႂ်းၵၢင်ပၢင်ႇဝၢင်းၵျွင်းပိၵ်ႈမၢၼ်ႇၸဝ်ႈၼႂ်းလိူၼ်ၵဝ်ႈလႆႈသၢဝ်းဝၼ်းၼၼ်ႉဢေႃႈ။ ၵူၼ်းၵူႈၵေႃႉၵူႈၵူၼ်းသၼ်ႇဝႆၵွပ်ႈပိူဝ်ႈပၢင်တုမ်ၼၼ်ႉဢယေးယႂ်ႇၼႃႇဢိၵ်ႇတင်းၽူၼ်တူၵ်းၽူၼ်သိင်းၼႃႇလူင်လၢင်ၼၼ်ႉဢေႃႈ။-
ယဵၸ်ႈပရေႃးႁဵၵ်ႈ ဢေးၸရႃႇ၊ လုၵ်ႉလႄႈလၢတ်ႈတီႈၶဝ်လႄႈဝႃႈ၊ “သူၼႆႉၽိတ်းပိူင်ႈယဝ်ႉ။ သူဢဝ်မေးၼႂ်းၵူၼ်းတၢင်ႇၸိူဝ်ႉတၢင်ႇမဵဝ်းလႄႈႁႂ်ႈတုၸရိူၵ်ႈႁွတ်ႈထိုင်ၵႃႈၼိူဝ်ၵူၼ်းမဵဝ်း ဢိသရေး၊ ယဝ်ႉ။-
ပိူဝ်ႈၼႆလႄႈဢွၼ်ၵၼ်ဝုၼ်ႇၶၢမ်ႇတွင်းပၢၼ်ႇတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈပူႇသူမွၼ်ႇသူတႃႉ။ ဢွၼ်ၵၼ်ႁဵတ်းၸွမ်းဢလူဝ်ႇမၼ်းၸဝ်ႈယူႇသေလႄႈၽၢတ်ႇယၢၼ်ၵၼ်တင်းၵူၼ်းမိူင်းၼႆႉ ဢိၵ်ႇတင်းၸုၼ်ႉပႅတ်ႈမေးသူဢၼ်ပဵၼ်ၵူၼ်းတၢင်ႇၸိူဝ်ႉတၢင်ႇမဵဝ်းၼၼ်ႉတႃႉ၊” ဝႃႈၼင်ႇၼႆဢေႃႈ။
ၵူၼ်းတင်းလၢႆဢွၼ်ၵၼ်ၶိုၼ်းလၢတ်ႈလူၺ်ႈသဵင်ဢၼ်ယႂ်ႇၼႃႇလူင်လၢင်လႄႈဝႃႈ၊ “ႁဝ်းၶႃႈတၵ်းႁဵတ်းၸွမ်းၵႃႈၼင်ႇဢၼ်ၸဝ်ႈႁဝ်းမီးဢမိင်ႉၼၼ်ႉၶႃႈဢေႃႈ။-”
ၵူၺ်းၵႃႈ၊ၶဝ်သမ်ႉလၢတ်ႈဝႃႈ၊ “ၽုင်ၵူၼ်းပရိၵ်ႈသၢတ်ႈပဵၼ်ဢၼ်ယႂ်ႇၼႃႇၶႃႈဢေႃႈ။ ၽူၼ်တူၵ်းႁႅင်းၼႃႇလူင်လၢင်လႄႈႁဝ်းၶႃႈဢမ်ႇၸုၵ်းဢမ်ႇၶၢမ်ႇလႆႈ ၵႃႈတီႈပၢင်ႇတီႈပိဝ်ၼႆႉၶႃႈ။ ၵွပ်ႈပိူဝ်ႈဢၼ်ႁဝ်းၶႃႈၼမ်ၼႃႇလႆႈၽိတ်းပိူင်ႈဢမုၼႆႉလႄႈတေယဝ်ႉတူဝ်ႈလႆႈၼႂ်းၼိုင်ႈဝၼ်းသွင်ဝၼ်းၵူၺ်းဢမ်ႇၸႂ်ႈၶႃႈ။-
ႁႂ်ႈၶုၼ်ႁဝ်းၶႃႈၼၼ်ႉႁပ်ႉဢဝ်ပုၼ်ႈၽွၼ်းဢမုၼႆႉသေၵမ်းၶႃႈ။ ၼင်ႇၼၼ်လႄႈႁႂ်ႈၵေႃႉဢၼ်မီးမေးၵူၼ်းတၢင်ႇၸိူဝ်ႉတၢင်ႇမဵဝ်းၸိူဝ်းၼၼ်ႉၸွမ်းလူၺ်ႈၵၼ်တင်းၵူၼ်းဢၼ်ပဵၼ်ၵႄႇပဵၼ်ႁူဝ်ၶဝ်တင်းၶုၼ်ဢၼ်ၸီႇယၢင်ႇတြႃးဝဵင်းၶဝ်ၼၼ်ႉမႃးၼႂ်းၶိင်ႇဢၼ်မၵ်းၶိၼ်းဝႆႉၼၼ်ႉသေၵမ်းၶႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊တၢင်းၸႂ်မႆႈၶႂ်ႈၸႃႉၽြႃးပဵၼ်ၸဝ်ႈၵွပ်ႈပိူဝ်ႈဢမုၼႆႉၼၼ်ႉတၵ်းထၢတ်ႇယဵၼ်ၶႃႈဢေႃႈ၊” ဝႃႈၼင်ႇၼႆဢေႃႈ။-
ၼွၵ်ႈသေ ယေႃးၼႀၼ်ႇ၊ လုၵ်ႈၸၢႆး ဢသႃႇႁေးလႃႉ၊ ဢိၵ်ႇတင်း ယႁႃႇၸိ၊ လုၵ်ႈၸၢႆး တိၵဝႃႉ၊ ၼၼ်ႉၵူၺ်း၊ၽူႈလႂ်ၵေႃႈဢမ်ႇၶတ်းဢမ်ႇၶဵင်ႇသေၵေႃႉသေၵူၼ်း။ မီး မေႇသုလမ်ႇ၊ တင်း သပ်ႉပသေး၊ ၵူၼ်းမဵဝ်း လေႇဝိ၊ ၼၼ်ႉၽွမ်ႉၵၼ်သေလႄႈၸွႆႈၵမ်ႉၸွႆႈထႅမ်ၶဝ်သွင်ၵေႃႉၼၼ်ႉဢေႃႈ။
ၶဝ်ၸိူဝ်းဢၼ်ပွၵ်ႈၶိုၼ်းမႃးသေတၢင်းဢၼ်ပိူၼ်ႈတိဢဝ်သိမ်းဢဝ်ၵႂႃႇၼၼ်ႉဢွၼ်ၵၼ်ႁပ်ႉတုင်းဢဝ်လွင်ႈတၢင်းၼၼ်ႉလႄႈယဵၸ်ႈပရေႃးႁဵၵ်ႈ ဢေးၸရႃႇ၊ လိူၵ်ႈဢဝ်ၵူၼ်းတင်းလၢႆဢၼ်ပဵၼ်ၵႄႇပဵၼ်ႁူဝ်ၼႂ်းၶိူဝ်းႁိူၼ်းၶဝ်သေလႄႈတႅမ်ႈမၢႆၸိုဝ်ႈၶဝ်ဝႆႉဢေႃႈ။ ၼႂ်းလိူၼ်သိပ်းဝၼ်းတီႈၼိုင်ႈၼၼ်ႉၶဝ်တႄႇၸႃႉၸႅတ်ႈသေးဢမုၼၼ်ႉလႄႈ၊-
ၶဝ်ဢွၼ်ၵၼ်ႁဵတ်းႁႂ်ႈဢမုၶဝ်ၸိူဝ်းဢၼ်ဢဝ်မေးၵူၼ်းတၢင်ႇၸိူဝ်ႉတၢင်ႇမဵဝ်းၼၼ်ႉယဝ်ႉတူဝ်ႈၼႂ်းလိူၼ်တီႈၼိုင်ႈဝၼ်းတီႈၼိုင်ႈၼၼ်ႉဢေႃႈ။
ဢၼ်ၼႆႉပဵၼ်ၸရၢင်းၵူၼ်းၸိူဝ်းဢၼ်မီးမေးၵူၼ်းတၢင်ႇၸိူဝ်ႉတၢင်ႇမဵဝ်းၼၼ်ႉဢေႃႈ။ ယဵၸ်ႈပရေႃးႁဵၵ်ႈၸွမ်းၼင်ႇၸိူဝ်ႉၶိူဝ်းႁိူၼ်းၸမ်ႉ၊ၼႂ်းၸိူဝ်ႉၶိူဝ်းႁိူၼ်း ယေႃးသု၊ တင်းၼွင်ႉၸၢႆးမၼ်းတင်းလၢႆဢၼ်ပဵၼ်လုၵ်ႈၸၢႆး ယေႃးၸတၵ်ႉ၊ ဢၼ်ပဵၼ် မႃႇသေႇယႃႉ၊ဢေးလျေႇၸႃႇ၊ယႃႇရိပ်ႉ၊ တင်း ၵေႇတလိ၊ ဢေႃႈ။-
ၶဝ်ဝႆႉၵတိလွင်ႈဢၼ်ၶဝ်တေၸုၼ်ႉပႅတ်ႈမေးၶဝ်ၼၼ်ႉသေလႄႈဢဝ်သူဝ်းပေႃႈႁဵတ်းတၢင်းလူႇပုၼ်ႈတၵ်းၽေႇဢပျတ်ႈၶဝ်ဢေႃႈ။
ၼႂ်းၸိူဝ်ႉၶိူဝ်းႁိူၼ်း ဢိမေႇရႃႉ၊ ၼၼ်ႉပဵၼ် ႁႃႇၼၼိ၊ ဢိၵ်ႇတင်း ၸေႇပတိ၊ ဢေႃႈ။
ၼႂ်းၸိူဝ်ႉၶိူဝ်းႁိူၼ်း ႁႃႇရိမ်း၊ ၼၼ်ႉပဵၼ် မႃႇသေႇယႃႉ၊ဢေးလိယႃႉ၊သေႇမႃႇယႃႉ၊ယေႇႁေးလႃႉ၊ ဢိၵ်ႇတင်း ဢူဝ်းၸိယႃႉ၊ ဢေႃႈ။
ၼႂ်းၸိူဝ်ႉၶိူဝ်းႁိူၼ်း ပႃႇသုရႃႉ၊ ၼၼ်ႉပဵၼ် ဢေးလိဢေႃးၼေႇ၊မေႇသေႇယႃႉ၊ဢိသမေႇလႃႉ၊ၼႃႇႀၼေႇလႃႉ၊ယေႃးၸပတ်ႉ၊ ဢိၵ်ႇတင်း ဢေးလႃႇသႃႉ၊ ဢေႃႈ။
ၵူၼ်းၶိူဝ်းႁိူၼ်းမဵဝ်း လေႇဝိ၊ ၸမ်ႉ၊ပဵၼ် ယေႃၸပတ်ႉ၊သိမိ၊ၵေႇလႃႇယႃႉ၊ ဢၼ်ဝႃႈ၊ ၵေႇလိတႃႉ၊ပေႇႀႁိ၊ယုတႃႉ၊ ဢိၵ်ႇတင်း ဢေးလျေႇၸႃႇ၊ ဢေႃႈ။
ၵူၼ်းဢၼ်မေႃႁဵတ်းၵႂၢမ်းၸမ်ႉ၊ပဵၼ် ဢေးလျႃႇသိပ်ႉ၊ ဢေႃႈ။ ၵူၼ်းၸိူဝ်းဢၼ်ပႂ်ႉၽၵ်းတူၵျွင်းပိၵ်ႈမၢၼ်ႇၸမ်ႉ၊ပဵၼ် သႃႇလုမ်ႇ၊တေႇလိမ်ႇ၊ ဢိၵ်ႇတင်း ဢုရိ၊ ဢေႃႈ။
ၵူၼ်းမဵဝ်း ဢိသရေး၊ တၢင်ႇၵေႃႉတၢင်ႇၵူၼ်းၸမ်ႉ၊ပဵၼ်ၼႂ်းၸိူဝ်ႉၶိူဝ်းႁိူၼ်း ပႃႇရုတ်ႉ၊ ဢၼ်ၸိုဝ်ႈ ရႃႇမိ၊ယေႇၸိ၊မႃႇလၶိ၊မိယမိၼ်ႇ၊ဢေးလႃႇၸႃႇ၊မႃႇလၶိယႃႉ၊ ဢိၵ်ႇတင်း ပေႇၼႃႇယႃႉ၊ ဢေႃႈ။
ၼႂ်းၸိူဝ်ႉၶိူဝ်းႁိူၼ်း ဢေႇလမ်ႇ၊ ၼၼ်ႉပဵၼ် မတ်ႉသၼိ၊ၸႃႇၶရိ၊ယေႇႁေးလႃႉ၊ဢႃႇပတိ၊ယေႇရိမုတ်ႉ၊ ဢိၵ်ႇတင်း ဢေးလိယႃႉ၊ ဢေႃႈ။
ၼႂ်းၸိူဝ်ႉၶိူဝ်းႁိူၼ်း ၸတ်ႉတု၊ ၼၼ်ႉပဵၼ် ဢေးလိဢေႃးၼေႇ၊ဢေးလျႃႇသိပ်ႉ၊မတ်ႉသၼိ၊ယေႇရိမုတ်ႉ၊ၸႃႇပတ်ႉ၊ ဢိၵ်ႇတင်း ဢၸိၸႃႉ၊ ဢေႃႈ။
ၼႂ်းၸိူဝ်ႉၶိူဝ်းႁိူၼ်း ပေႇပေႇ၊ ၼၼ်ႉပဵၼ် ယေႃးႁၼၼ်ႇ၊ႁႃႇၼၼိ၊ၸပ်ႉပေႇ၊ ဢိၵ်ႇတင်း ဢႃႇႀလေႇ၊ ဢေႃႈ။
ၼႂ်းၸိူဝ်ႉၶိူဝ်းႁိူၼ်း ပႃႇၼီႇ၊ ၼၼ်ႉပဵၼ် မေႇသုလမ်ႇ၊မႃႇလုၵ်ႉ၊ဢတႃႇယႃႉ၊ယႃႇသုပ်ႉ၊သႃႇလႃႉ၊ ဢိၵ်ႇတင်း ရမုတ်ႉ၊ ဢေႃႈ။
ၼႂ်းၸိူဝ်ႉၶိူဝ်းႁိူၼ်း ပႃႇႁတ်ႉမေႃႇၽႃႉ၊ ၼၼ်ႉပဵၼ် ဢတ်ႉၼႃႇ၊ၶေႇလႃႇယႃႉ၊ပေႇၼႃႇယႃႉ၊မႃႇသေႇယႃႉ၊မတ်ႉသၼိ၊ပေႇၸလေႇလႃႉ၊ပိၼုၺ်ႇ၊ ဢိၵ်ႇတင်း မၼႃႇသေႇ၊ ဢေႃႈ။
ၼႂ်းၸိူဝ်ႉၶိူဝ်းႁိူၼ်း ႁႃႇသုမ်ႇ၊ ၼၼ်ႉပဵၼ် မတ်ႉတၼေႇ၊မတ်ႉတထႃႉ၊ၸႃႇပတ်ႉ၊ဢေႇလီႇၽလႅတ်ႉ၊ယေႇရမေႇ၊မၼႃႇသေႇ၊ ဢိၵ်ႇတင်း သိမိ၊ ဢေႃႈ။
ၼႂ်းၸိူဝ်ႉၶိူဝ်းႁိူၼ်း ၼေႇပေႃႇ၊ ၼၼ်ႉပဵၼ် ယေႇယေႇလႃႉ၊မတ်ႉတိသိ၊ၸႃႇပတ်ႉ၊ၸေးပိၼႃႉ၊ယႃႇတေႃး၊ယူဝ်းဢေးလႃႉ၊ ဢိၵ်ႇတင်း ပေႇၼႃႇယႃႉ၊ ဢေႃႈ။
ၶဝ်ၸိူဝ်းၼႆႉတင်းမူတ်းဢဝ်မေးဢၼ်ပဵၼ်ၵူၼ်းတၢင်ႇၸိူဝ်ႉတၢင်ႇၶိူဝ်းဢေႃႈ။ ၶဝ်ၸုၼ်ႉပႅတ်ႈမေးၶဝ်ၸိူဝ်းၼၼ်ႉ၊ဢိၵ်ႇတင်းလုၵ်ႈလၢင်းၶဝ်တင်းလၢႆသေဢေႃႈ။ လိၵ်ႈမၢတ်ႈလွင်ႈဢေးၸရႃႇယဝ်ႉယဝ်ႉဢေႃႈ။
ၵႂၢမ်းဢၼ် ၼေႇႁမိ၊ လုၵ်ႈၸၢႆး ႁႃႇၶလိ၊ ဝႃႈၼၼ်ႉၸမ်ႉ၊ ၼႂ်းပီဢၼ်ၸဝ်ႈမုၼ်ယႂ်ႇၶုၼ်ႁေႃၶမ်း ဢႃႇတႃႇၸေႇရိတ်ႉ၊ ၸၢမ်ႇႁၢင်ႈၸၢမ်ႇႁေႃမိူင်း ပႃးသျႃး၊ လႆႈသၢဝ်းပီ၊လိူၼ် ၶိသလု၊ ၼၼ်ႉၵဝ် ၼေႇႁမိ၊ ယင်းတိုၵ်ႉမီးယူႇၵႃႈၼႂ်းဝဵင်း သုသႃႇ၊ ဝဵင်းႁေႃၸဝ်ႈၼၼ်ႉဢေႃႈ။-
ၼႂ်းၼွင်ႉၸၢႆးၵဝ်ၸိူဝ်းၼၼ်ႉၵေႃႉၼိုင်ႈဢၼ်ပဵၼ် ႁႃႇၼၼိ၊ လုၵ်ႉသေၵႃႈတီႈမိူင်း ယုတႃႉ၊ ႁွတ်ႈမႃးလူၺ်ႈၵၼ်တင်းၵူၼ်းၵမ်ႈၽွင်ႈၼၼ်ႉ၊ၵဝ်တွင်ႈထၢမ်လွင်ႈဝဵင်း ယေႇရုသလႅမ်ႇ၊ ဢိၵ်ႇတင်းလွင်ႈပီႈၼွင်ႉၵူၼ်းမဵဝ်း ၵျူး၊ ဢၼ်လွတ်ႈသေတၢင်းဢၼ်လႆႈၶၢမ်ႇတိဢဝ်သိမ်းဢဝ်ၵႂႃႇၵႃႈတီႈမိူင်း ပႃႇပုလုၼ်ႇ၊ ၼၼ်ႉဢေႃႈ။-
ၶဝ်ဢွၼ်ၵၼ်မွၵ်ႇလၢတ်ႈၼႄလွင်ႈၶဝ်ၸိူဝ်းဢၼ်ဢမ်ႇလႆႈၶၢမ်ႇတၢင်းဢၼ်တိဢဝ်ၵႂႃႇလႄႈၵိုတ်းၵျၢၼ်ႇယူႇၸိူဝ်းၼၼ်ႉလႆႈဢွၼ်ၵၼ်ၶၢမ်ႇတုၵ်ႉၶႃႉၶၢၼ်ၸႂ်လွင်ႈတၢင်းဢၼ်ပိူၼ်ႈသႄႉသွမ်းဢၼ်ယႂ်ႇၼႃႇလူင်လၢင်ဢေႃႈ။ လမ်းဝဵင်း၊ဝဵင်း ယေႇရုသလႅမ်ႇ၊ ၵေႃႈယင်းလုလႅဝ်လူမ်ႉပင်းယူႇ၊ၽၵ်းတူဝဵင်းတင်းလၢႆၵေႃႈၽႆးမႆႈလႄႈဢမ်ႇပႆႇလႆႈမႄးၶိုၼ်းၼၼ်ႉဢေႃႈ။-
မိူဝ်ႈဢၼ်ၵဝ်ငိၼ်းၵႂၢမ်းၸိူဝ်းၼၼ်ႉၸိုင်၊ၵဝ်ၼင်ႈလႄႈႁွင်ႉႁႆႈဢေႃႈ။ ၵဝ်ႁဵတ်းတၢင်းဢၼ်ႁွင်ႉႁႆႈပွင်ႉၶၢင်း၊ယင်းဢမ်ႇၵိၼ်တၢင်းၵိၼ်ယူႇႁိုင်တၢၼ်ႇတၢၼ်ႇလႄႈသူးတွင်းၵႃႈတီႈၽြႃးပဵၼ်ၸဝ်ႈလႄႈဝႃႈ၊
“ ထႃႇဝရႃႉၽြႃး၊ ၽြႃးပဵၼ်ၸဝ်ႈၽုင်ႇၵၢင်ႁၢဝ်တီႈၶႃႈ။ ၸဝ်ႈႁဝ်းပဵၼ်ၽြႃးဢၼ်ယႂ်ႇမျၢတ်ႈလႄႈထိူၵ်ႈၶၢမ်ႇဢဝ်တၢင်းဢၼ်ရူဝ်ႇသေႇၵူဝ်ယမ်တီႈၶႃႈဢေႃႈ။ ၸဝ်ႈႁဝ်းပႂ်ႉၸွမ်းပတိၺိၺ်ႇ၊ဢိၵ်ႇတင်းၸႂ်ၵရုၼႃႇဢၼ်ႁဵတ်းလူၺ်ႈၵၼ်တင်းၶဝ်ၸိူဝ်းဢၼ်ႁၵ်ႉပႅင်းၸဝ်ႈႁဝ်းလႄႈၵမ်ၵျၢင်ႉပိင်းၺၢပ်ႈၸဝ်ႈႁဝ်းၸိူဝ်းၼၼ်ႉတီႈၶႃႈဢေႃႈ။-
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈတူၺ်းထိုင်ၶႃႈၸဝ်ႈသေလႄႈထွမ်ႇငိၼ်းၵႂၢမ်းပထၼႃႇဢၼ်ၶႃႈၸဝ်ႈသူးတွင်းယူႇၵူႈဝၼ်းၵူႈၶိုၼ်းပုၼ်ႈၶႃႈၸဝ်ႈႁဝ်းၵူၼ်းမဵဝ်း ဢိသရေး၊ တင်းလၢႆၼၼ်ႉသေၵမ်းတီႈၶႃႈ။ ၶႃႈၸဝ်ႈဝုၼ်ႇၶၢမ်ႇတွင်းပၢၼ်ႇဢပျတ်ႈလွင်ႈဢၼ်ၶႃႈၸဝ်ႈႁဝ်းၶဝ်ၵူၼ်းမဵဝ်း ဢိသရေး၊ တင်းလၢႆၼႆႉလႆႈၽိတ်းပိူင်ႈၸဝ်ႈႁဝ်းတီႈၶႃႈဢေႃႈ။ ၶႃႈၸဝ်ႈဢိၵ်ႇတင်းမဵဝ်းၸိူဝ်ႉၶိူဝ်းပူႇမွၼ်ႇၶႃႈၸဝ်ႈတင်းလၢႆၽိတ်းပိူင်ႈတီႈၶႃႈယဝ်ႉ။-
ၶႃႈၸဝ်ႈႁဝ်းၶဝ်ဢွၼ်ၵၼ်ၽိတ်းပိူင်ႈၸဝ်ႈႁဝ်းလႄႈႁဵတ်းတၢင်းဢၼ်ႁၢႆႉယုတ်ႈၼႃႇလူင်လၢင်လႄႈဢမ်ႇၵမ်ဢမ်ႇၵျၢင်ႉၸွမ်းၵႃႈဢၼ်ၸဝ်ႈႁဝ်းပိင်းၺၢပ်ႈဝႆႉၼၼ်ႉတီႈၶႃႈယဝ်ႉ။ ၶႃႈၸဝ်ႈႁဝ်းၶဝ်ဢမ်ႇပႂ်ႉၵမ်ၸွမ်းၼႄးဢုပတေႇတြႃးၸိူဝ်းဢၼ်ၸဝ်ႈႁဝ်းႁႂ်ႈ မူဝ်းသေႇ၊ ၵေႃႉဢၼ်ပဵၼ်ၶႃႈၸႂ်ႉၸဝ်ႈႁဝ်းသင်ႇလၢတ်ႈဝႆႉၼၼ်ႉတီႈၶႃႈယဝ်ႉ။-
တေႃႈလဵဝ်ၼႆႉၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းၵႂၢမ်းၵတိၸဝ်ႈႁဝ်းဢၼ်သင်ႇလၢတ်ႈဝႆႉတီႈ မူဝ်းသေႇ၊ လႄႈဝႃႈ၊ ‘ပေႃးသူပူၼ်ႉလိူဝ်ၸိုင်၊ၵဝ်တၵ်းႁႂ်ႈသူၽၢတ်ႇၽႄၵၼ်ၵႂႃႇၵႃႈၼႂ်းၵူၼ်းတၢင်ႇၸိူဝ်ႉတၢင်ႇမဵဝ်းတင်းလၢႆဢေႃႈ။-
ၵူၺ်းၵႃႈ၊ပေႃးသူသမ်ႉၶိုၼ်းမႃးတီႈၵဝ်လႄႈပႂ်ႉၵမ်ပႂ်ႉၸွမ်းပိင်းၺၢပ်ႈၵဝ်တင်းလၢႆၸိုင်၊ပိၵ်ႉသမ်ႉသူလႆႈၽၢတ်ႇၽႄၵၼ်ၸွတ်ႇတူဝ်ႈၵႂႃႇတေႃႇထိုင်ႁွတ်ႈတီႈသုတ်းလိၼ်မိူင်းသေၵေႃႈ ၵဝ်တၵ်းသမ်ႉၶိုၼ်းဢဝ်သူမႃးၸူးၵႃႈတီႈတီႈဢၼ်ၵဝ်လိူၵ်ႈဢဝ်ဝႆႉ၊ႁႂ်ႈလႆႈပဵၼ်တီႈဢၼ်ၼႃႇမႃႉၸိုဝ်ႈသဵင်ၵဝ်တၵ်းတႄႇယူႇၼၼ်ႉဢေႃႈ၊’ ဝႃႈၼင်ႇၼႆၼၼ်ႉသေၵမ်းတီႈၶႃႈ။”
“ ထႃႇဝရႃႉၽြႃး၊ တီႈၶႃႈ။ ၶဝ်ၸိူဝ်းၼႆႉပဵၼ်ၶႃႈၸႂ်ႉၸဝ်ႈႁဝ်း၊ပဵၼ်ၵူၼ်းၸဝ်ႈႁဝ်းတီႈၶႃႈဢေႃႈ။ ၸဝ်ႈႁဝ်းဢဝ်တင်းမႁႃႇတၼ်းၶူဝ်းၸဝ်ႈႁဝ်း၊ဢိၵ်ႇတင်းမုၼ်ၽုင်းဢႃႇၼုၽေႃႇၸဝ်ႈႁဝ်းၼၼ်ႉၵႄႇသႄႇၼုၵ်ႈဢဝ်ၶဝ်တီႈၶႃႈဢေႃႈ။-
မိူဝ်ႈလဵဝ်ၼႆႉ၊ၶႅၼ်းတေႃႈထွမ်ႇငိၼ်းဢဝ်ၵႂၢမ်းပထၼႃႇၶႃႈၸဝ်ႈ၊ဢိၵ်ႇတင်းၵႂၢမ်းပထၼႃႇဢၼ်ၶႃႈၸဝ်ႈႁဝ်းၶဝ်ၸိူဝ်းဢၼ်ရူဝ်ႇသေႇၵူဝ်ယမ်ၸဝ်ႈႁဝ်းလႄႈသူးတွင်းၼႆႉၼၼ်ႉသေၵမ်းတီႈၶႃႈ။ ၶႅၼ်းတေႃႈပၼ်တၢင်းလီတီႈၶႃႈၸဝ်ႈႁဝ်းဝၼ်းမိူဝ်ႈၼႆႉသေလႄႈၶႅၼ်းတေႃႈႁႂ်ႈၸဝ်ႈမုၼ်ယႂ်ႇၶုၼ်ႁေႃၶမ်းမီးၸႂ်ၵရုၼႃႇတၢင်းဢၼ်ဢဵတ်းလူၶႃႈၸဝ်ႈႁဝ်းသေၵမ်းတီႈၶႃႈ၊” ဝႃႈၼင်ႇၼႆဢေႃႈ။ မိူဝ်ႈယၢမ်းၼၼ်ႉၵဝ်ပဵၼ်ၵေႃႉဢၼ်သၢၵ်ႈၵွၵ်းၼမ်ႉမၢၵ်ႇၸပိတ်ႉတီႈၸဝ်ႈမုၼ်ယႂ်ႇၶုၼ်ႁေႃၶမ်းယူႇဢေႃႈ။
ၼႂ်းပီဢၼ်ၶုၼ်ႁေႃၶမ်း ဢႃႇတႃႇၸေႇရိတ်ႉ၊ ၸၢမ်ႇႁၢင်ႈၸၢမ်ႇႁေႃလႆႈသၢဝ်းပီ၊လိူၼ် ၼိသၼ်ႇ၊ ၼၼ်ႉၵဝ်ဢဝ်ၵွၵ်းၼမ်ႉမၢၵ်ႇၸပိတ်ႉသေလႄႈသၢၵ်ႈပၼ်ဢေႃႈ။ မိူဝ်ႈၵွၼ်ႇဢွၼ်ၼၼ်ႉၸဝ်ႈၶုၼ်လူင်ဢမ်ႇတွၼ်ႉႁၼ်ၵဝ်မီးၼႃႈၶီၼႃႈငဝ်သေပွၵ်ႈလႄႈ၊-
ၶုၼ်ႁေႃၶမ်းထၢမ်လႄႈဝႃႈ၊ “မႂ်းယူႇလီၵိၼ်ဝၢၼ်ယူႇလႄႈသမ်ႉမီးတၢင်းဢၼ်ၼႃႈၶီၼႃႈငဝ်ယူႇၵွပ်ႈပိူဝ်ႈလွင်ႈၵႃႈသင်။ မိူၼ်ၼင်ႇႁၢင်ႈမႂ်းမီးတၢင်းဢၼ်မႆႈၸႂ်ၶီၸႂ်ဝႆႉ၊” ဝႃႈၼင်ႇၼႆဢေႃႈ။ ၵဝ်တူၵ်းၸႂ်ၼႃႇလူင်လၢင်လႄႈ၊-
ၵဝ်လဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “ႁႂ်ႈဢသၢၵ်ႈၸဝ်ႈၶုၼ်လူင်ယိုၼ်းယၢဝ်းယူႇတႃႇသေႇသေၵမ်းတီႈၶႃႈ။ ၵွပ်ႈပိူဝ်ႈဝဵင်းတီႈဢၼ်လႆႈသၢင်းၵျူဝ်ႇပူႇမွၼ်ႇၶႃႈၸဝ်ႈတင်းလၢႆၼၼ်ႉလုယူႇ၊ႁၢမ်းယူႇသေလႄႈၽၵ်းတူဝဵင်းတင်းလၢႆၵေႃႈၽႆးမႆႈပႅတ်ႈမူတ်းတီႈၶႃႈယဝ်ႉ။ ၶႃႈၸဝ်ႈၼႃႈယင်းဢမ်ႇၶီဢမ်ႇငဝ်လႄႈတၵ်းယူႇလႆႈၸိူဝ်ႉၼင်ႇႁိုဝ်တီႈၶႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းၵေႃႈတွင်ႈထၢမ်လႄႈဝႃႈ၊ “မႂ်းၶႂ်ႈလဝ်ႈယွၼ်းဢဝ်ၵႃႈသင်၊” ဝႃႈၼင်ႇၼႆလႄႈ၊ ၶႃႈၸဝ်ႈသူးတွင်းတီႈၽြႃးပဵၼ်ၸဝ်ႈ၊ၸဝ်ႈၽုင်ႇၵၢင်ႁၢဝ်သေယဝ်ႉ၊-
ၵဝ်လဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “ပေႃးမႅၼ်ႈၸွမ်းဢလူဝ်ႇၸဝ်ႈႁဝ်းလႄႈၶႃႈၸဝ်ႈလႆႈထူပ်းၵျေးၸူးၽၢႆႇၼႃႈၸဝ်ႈႁဝ်းၸိုင်၊ၶႅၼ်းတေႃႈပွႆႇၸႂ်ႉၶႃႈၸဝ်ႈႁဝ်းၵႂႃႇၵႃႈတီႈမိူင်း ယုတႃႉ၊ တီႈဢၼ်ပႃႇႁဵဝ်ႈသၢင်းၶႅင်းပူႇမွၼ်ႇၶႃႈၸဝ်ႈႁဝ်းမီးယူႇၸိူဝ်းၼၼ်ႉလႄႈႁႂ်ႈလႆႈမႄးႁဵတ်းမႄးၵုမ်းဝဵင်းၼၼ်ႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၼၢင်းႁေႃၶမ်းယင်းတိုၵ်ႉၼင်ႈယူႇၵႃႈတီႈႁိမ်းၶုၼ်ႁေႃၶမ်းယူႇၼၼ်ႉၸိုင်၊ၶုၼ်ႁေႃၶမ်းၵေႃႈမီးဢမိင်ႉတီႈၵဝ်လႄႈဝႃႈ၊ “ပေႃးမႂ်းၵႂႃႇၸိုင်၊တၵ်းႁိုင်ၵႃႈႁိုဝ်။ တၵ်းၶိုၼ်းမႃးမိူဝ်ႈလႂ်၊” ဝႃႈၼင်ႇၼႆလႄႈ၊ၶုၼ်ႁေႃၶမ်းမီးဢလူဝ်ႇၶႂ်ႈပွႆႇၸႂ်ႉၵဝ်ၵႂႃႇ၊ၵဝ်ၵေႃႈမၵ်းၶိၼ်းဝႆႉမိုဝ်ႉဝၼ်းမၼ်းဢေႃႈ။
ၵဝ်သမ်ႉလဝ်ႈယွၼ်းတီႈၶုၼ်ႁေႃၶမ်းလႄႈဝႃႈ၊ “ပေႃးဢလူဝ်ႇၸဝ်ႈၶုၼ်လူင်မီးၸိုင်၊ၶႅၼ်းတေႃႈဢဵတ်းလူပၼ်လိၵ်ႈဢမိင်ႉၸဝ်ႈတီႈၶႃႈၸဝ်ႈပုၼ်ႈမဵဝ်ႉဝုၼ်ႇၸိူဝ်းဢၼ်မီးၽၢႆႇတၢင်းဝၼ်းတူၵ်းမႄႈၼမ်ႉ ဢုၽရတ်ႉ၊ ၼၼ်ႉၼင်ႇႁိုဝ်ၶဝ်တေဢမ်ႇလႆႈႁႄႉလႆႈႁၢမ်ႈလႄႈပွႆႇၶႃႈၸဝ်ႈၵႂႃႇၸူးမိူင်း ယုတႃႉ၊ ပုၼ်ႉသေၵမ်းတီႈၶႃႈ။-
ၶႅၼ်းတေႃႈဢဵတ်းလူပၼ်ထႅင်ႈလိၵ်ႈဢမိင်ႉၸဝ်ႈတၢင်ႇၽိုၼ်ဢၼ်ႁႂ်ႈ ဢႃႇသပ်ႉ၊ ၵူၼ်းပႂ်ႉပႃႇမႆႉၸဝ်ႈၼၼ်ႉတၵ်းပၼ်မႆႉပုၼ်ႈဢၼ်တၵ်းမႄးႁဵတ်းၽၵ်းတူတိူၵ်ႈတီႈတိုၵ်းသိုၵ်းဢၼ်ပႂ်ႉၵျွင်းပိၵ်ႈမၢၼ်ႇၸဝ်ႈလႂ်၊ပုၼ်ႈလမ်းဝဵင်းလႂ်၊ဢိၵ်ႇတင်းပုၼ်ႈႁိူၼ်းဢၼ်ၶႃႈၸဝ်ႈတၵ်းယူႇၼၼ်ႉသေၵမ်းတီႈၶႃႈ၊” ဝႃႈၼင်ႇၼႆလႄႈၶုၼ်ႁေႃၶမ်းၵေႃႈပၼ်တီႈၵဝ်ၵူႈမဵဝ်းဢၼ်ၵဝ်ယွၼ်းၼၼ်ႉၵွပ်ႈပိူဝ်ႈဢၼ်ၽြႃးပဵၼ်ၸဝ်ႈမီးယူႇလူၺ်ႈၵၼ်တင်းၵဝ်ၼၼ်ႉဢေႃႈ။
ၶုၼ်ႁေႃၶမ်းပွႆႇၸႂ်ႉၽူႈၵွၼ်းတပ်ႉလႂ်တင်းႁူဝ်ႁၢၼ်ၵူၼ်းသိုၵ်းဢၼ်ၶီႇမႃႉလႂ်ၵႂႃႇၸွမ်းၵဝ်လႄႈၵဝ်ဢွၵ်ႇတၢင်းၵႂႃႇၸူးၽၢႆႇတၢင်းဝၼ်းတူၵ်းမႄႈၼမ်ႉ ဢုၽရတ်ႉ၊ ပုၼ်ႉဢေႃႈ။ ၵဝ်ဢဝ်လိၵ်ႈဢမိင်ႉၸဝ်ႈမုၼ်ယႂ်ႇၶုၼ်ႁေႃၶမ်းၼႄတီႈမဵဝ်ႉဝုၼ်ႇၸိူဝ်းၼၼ်ႉဢေႃႈ။-
ၵူၺ်းၵႃႈ၊ သၼ်ႇပႃးလတ်ႉ၊ ၵူၼ်းဝဵင်း ပႅတ်ႉႁေႃႇရုၼ်ႇ၊ ဢိၵ်ႇတင်း တေႃႇၽိယႃႉ၊ ၶုၼ်ဢၼ်ပွင်ၵၢၼ်ၵႃႈၼႂ်းဢိူင်ႇ ဢမ်ႇမုၼ်ႇ၊ လႆႈငိၼ်းလွင်ႈဢၼ်ၵူၼ်းၵေႃႉၼိုင်ႈမႃးႁႂ်ႈလႆႈပွင်ႁဵတ်းဢၵျူဝ်းၵူၼ်းမဵဝ်း ဢိသရေး၊ တင်းလၢႆၼၼ်ႉၸိုင်၊ၶဝ်သွင်ၵေႃႉဢမ်ႇၵျိူၵ်ႈၸႂ်ပေႃးၸႂ်ၼႃႇလူင်လၢင်ဢေႃႈ။
ၵဝ်ႁွတ်ႈထိုင်ၵႃႈတီႈဝဵင်း ယေႇရုသလႅမ်ႇ၊ သေယဝ်ႉ၊ယူႇသၢမ်ဝၼ်းလႄႈ၊-
ၵဝ်ယင်းဢမ်ႇမွၵ်ႇလၢတ်ႈလွင်ႈဢၼ်ၽြႃးပဵၼ်ၸဝ်ႈတိုၵ်းယူင်းၸႂ်ၵဝ်ႁႂ်ႈလႆႈပွင်လႆႈႁဵတ်းပုၼ်ႈဝဵင်း ယေႇရုသလႅမ်ႇ၊ ၼၼ်ႉတီႈၽူႈလႂ်လႄႈယူႇဢေႃႈ။ မိူဝ်ႈၼၼ်ႉၵဝ်ႁွင်ႉဢဝ်ၶဝ်ၸိူဝ်းဢၼ်မႃးၸွမ်းၵဝ်ၵမ်ႈၽွင်ႈၼၼ်ႉလုၵ်ႉၶိင်ႇၵၢင်ၶိုၼ်းသေလႄႈဢွၵ်ႇၵႂႃႇၸွမ်းၵဝ်၊ၼွၵ်ႈသေမႃႉဢၼ်ၵဝ်ၶီႇၼၼ်ႉဢမ်ႇမီးမႃႉသေတူဝ်ၵႂႃႇၸွမ်းဢေႃႈ။-
ယင်းတိုၵ်ႉပဵၼ်ၶိင်ႇၵၢင်ၶိုၼ်းယူႇလႄႈၵဝ်ဢွၵ်ႇဝဵင်းၵႂႃႇၸွမ်းတၢင်း ၽၵ်းတူၶူင်ႈႁူၺ်ႈ၊ ၽၢႆႇတၢင်းဝၼ်းတူၵ်းသေယဝ်ႉ၊ၵႂႃႇၸူးၽၢႆႇတၢင်းၸၢၼ်းသေလတ်းပူၼ်ႉ ၼမ်ႉမေႃႇၼၵႃး၊ ၵႂႃႇႁွတ်ႈထိုင်တီႈ ၽၵ်းတူၶီႈဝူဝ်း၊ ဢေႃႈ။ မိူဝ်ႈဢၼ်ၵႂႃႇယူႇၼၼ်ႉၵဝ်ၸႅတ်ႈတူၺ်းလမ်းဝဵင်းဢၼ်ၵိူၼ်ႇပင်းၸိူဝ်းၼၼ်ႉ၊ဢိၵ်ႇတင်းၽၵ်းတူၸိူဝ်းဢၼ်ၽႆးမႆႈပႅတ်ႈယဝ်ႉၼၼ်ႉဢေႃႈ။-
ၼင်ႇၼၼ်လႄႈၵဝ်ပူၼ်ႉၵႂႃႇၸူးတီႈ ၽၵ်းတူၼမ်ႉဢွၵ်ႇႁူး၊ ဢိၵ်ႇတင်း ၼမ်ႉၼွင်ၶုၼ်ႁေႃၶမ်း၊ ပုၼ်ႉဢေႃႈ။ ၵွပ်ႈပိူဝ်ႈဢၼ်ဢမ်ႇမီးသဵၼ်ႈတၢင်းပုၼ်ႈတႃႇမႃႉတေၵႂႃႇလႆႈၼၼ်ႉလႄႈ၊-
ၵဝ်ပႆလူင်းၵႂႃႇၽၢႆႇႁိမ်းၼမ်ႉႁွင်ႈ ၵိတရူၼ်ႇ၊ လႄႈတႆႇၸွမ်းၵႂႃႇလႄႇတူၺ်းလမ်းဝဵင်းဢေႃႈ။ မိူဝ်ႈၼၼ်ႉၵဝ်သမ်ႉဝၢႆႇၶိုၼ်းလႄႈပွၵ်ႈမိူဝ်းၸွမ်းတၢင်းဢၼ်မႃးၼၼ်ႉသေယဝ်ႉ၊ၶိုၼ်းၶဝ်ႈဝဵင်းၸွမ်း ၽၵ်းတူၶူင်ႈႁူၺ်ႈ၊ ၵႂႃႇဢေႃႈ။
ၶုၼ်ဢၼ်ပွင်ၵၢၼ်ၸဝ်ႈတင်းလၢႆဢမ်ႇႁုလွင်ႈဢၼ်ၵဝ်ၵႂႃႇၵႃႈတီႈလႂ်လႄႈ၊ႁဵတ်းၵႃႈသင်ယဝ်ႉၼၼ်ႉသေၵေႃႉသေၵူၼ်း။ ၵဝ်ယင်းဢမ်ႇပႆႇမွၵ်ႇလၢတ်ႈလွင်ႈတၢင်းၼၼ်ႉတီႈၵူၼ်းပီႈၼွင်ႉ ၵျူး၊ တင်းလၢႆဢၼ်ပဵၼ်ယဵၸ်ႈပရေႃးႁဵၵ်ႈ လႂ်၊ၵူၼ်းဢၼ်ပဵၼ်ၵႄႇပဵၼ်ႁူဝ်လႂ်၊မူးမၢတ်ႈၽွင်းမိူင်းလႂ်၊ဢိၵ်ႇတင်းၵူၼ်းဢၼ်တႄႇႁဵတ်းတႄႇသၢင်ႈၸိူဝ်းၼၼ်ႉသေၵေႃႉသေၵူၼ်းလႄႈယူႇဢေႃႈ။-
မိူဝ်ႈလဵဝ်ၸမ်ႉ၊ၵဝ်လၢတ်ႈတီႈၶဝ်လႄႈဝႃႈ၊ “သူႁုႁၼ်လွင်ႈဢၼ်ႁဝ်းလႆႈၶၢမ်ႇတုၵ်ႉၶႃႉတၢင်းဢၼ်ၶၢၼ်ၸႂ်ၵွပ်ႈပိူဝ်ႈဢၼ်ဝဵင်း ယေႇရုသလႅမ်ႇ၊ လုယူႇႁၢမ်းယူႇ၊ဢိၵ်ႇတင်းၽႆးမႆႈပႅတ်ႈၽၵ်းတူဝဵင်းတင်းလၢႆယဝ်ႉၼၼ်ႉယူႇဢေႃႈ။ မႃးမႃး႟။ ဢွၼ်ၵၼ်မႄးတႄႇမႄးႁဵတ်းဝဵင်း ယေႇရုသလႅမ်ႇ၊ ႁႂ်ႈႁဝ်းၵၢင်းလွတ်ႈတင်းတၢင်းဢၼ်ဢူၵ်းဢၼ်ဢၢႆတႃႉႁဝ်း၊” ဝႃႈၼင်ႇၼႆဢေႃႈ။-
ၵဝ်သမ်ႉၽုၺ်ႇမွၵ်ႇလၢတ်ႈၼႄတီႈၶဝ်လွင်ႈဢၼ်ၽြႃးပဵၼ်ၸဝ်ႈမီးယူႇလူၺ်ႈၵၼ်တင်းၵဝ်လႄႈၸွႆႈထႅမ်မႃႉၸႃႉၵဝ်၊ဢိၵ်ႇတင်းလွင်ႈဢၼ်ၸဝ်ႈမုၼ်ယႂ်ႇၶုၼ်ႁေႃၶမ်းမီးဢမိင်ႉတီႈၵဝ်ၼၼ်ႉဢေႃႈ။ ၶဝ်ဢွၼ်ၵၼ်ၶိုၼ်းလၢတ်ႈလႄႈဝႃႈ၊ “ႁဝ်းဢွၼ်ၵၼ်လုၵ်ႉလႄႈမႄးတႄႇမႄးႁဵတ်းတႃႉႁဝ်း၊” ဝႃႈၼင်ႇၼႆသေလႄႈၵေႃႉၼိုင်ႈတိုၵ်းယူင်းၸူဝ်းဢဝ်ၵေႃႉၼိုင်ႈႁႂ်ႈလႆႈႁဵတ်းၼႃႈၵၢၼ်ဢၼ်လီဢၼ်ငၢမ်းၼၼ်ႉႁႂ်ႈယဝ်ႉတူဝ်ႈဢေႃႈ။
မိူဝ်ႈဢၼ် သၼ်ႇပႃးလတ်ႉ၊ တင်း တေႃႇၽိယႃႉ၊ ဢိၵ်ႇတင်း ၵေႇသိမ်ႇ၊ ၵူၼ်းမဵဝ်း ဢႃႇရပ်ႉ၊ ၸိူဝ်းၼၼ်ႉလႆႈႁုလႆႈငိၼ်းၼၼ်ႉၸိုင်၊ဢွၼ်ၵၼ်ႁဵတ်းပျၢၵ်ႈႁဵတ်းၶူဝ်ဢမ်ႇၼပ်ႉဢမ်ႇၶၢၼ်းလႄႈလၢတ်ႈဝႃႈ၊ “သူတၵ်းဢွၼ်ၵၼ်ႁဵတ်းၸိူဝ်ႉၼင်ႇႁိုဝ်။ သူဢၢင်ႈတၵ်းလုၵ်ႉၽိုၼ်ႉၸဝ်ႈမုၼ်ယႂ်ႇၶုၼ်ႁေႃၶမ်းႁိုဝ်း၊” ဝႃႈၼင်ႇၼႆဢေႃႈ။
ၵဝ်ၵေႃႈၶိုၼ်းလၢတ်ႈလႄႈဝႃႈ၊ “ၽြႃးပဵၼ်ၸဝ်ႈၸဝ်ႈၽုင်ႇၵၢင်ႁၢဝ်ၼၼ်ႉတၵ်းပၼ်ဢၶႂၢင်ႉႁႂ်ႈႁဝ်းႁဵတ်းယဝ်ႉတူဝ်ႈလီငၢမ်းဢေႃႈ။ ပိူဝ်ႈၼႆလႄႈႁဝ်းဢၼ်ပဵၼ်ၶႃႈမၼ်းၸဝ်ႈၼၼ်ႉတၵ်းဢွၼ်ၵၼ်လုၵ်ႉလႄႈမႄႈတႄႇမႄးႁဵတ်းဢေႃႈ။ သူၸမ်ႉ၊ဢမ်ႇမီးပုၼ်ႈမီးတႃႇ၊ဢမ်ႇမီးဢၶႂၢင်ႉဢၼ်တေယွၼ်းဢဝ်ၵႃႈသင်ၵႃႈၼႂ်းဝဵင်း ယေႇရုသလႅမ်ႇ၊ ၼႆႉလႃးလႃး၊” ဝႃႈၼင်ႇၼႆဢေႃႈ။
ဢၼ်ၼႆႉၸမ်ႉ၊ပဵၼ်လွင်ႈတၢင်းဢၼ်မႄးၵုမ်းမႄးႁဵတ်းလမ်းဝဵင်းဢေႃႈ။ ၶုၼ်ယဵၸ်ႈပရေႃးႁဵၵ်ႈ ဢေးလျႃႇသိပ်ႉ၊ ဢိၵ်ႇတင်းပီႈၼွင်ႉမၼ်းယဵၸ်ႈပရေႃးႁဵၵ်ႈတင်းလၢႆ၊ဢွၼ်ၵၼ်မႄးၵုမ်းမႄးႁဵတ်း ၽၵ်းတူသူဝ်း၊ လႄႈသၢၵ်ႈၵၢပ်ႈသေယဝ်ႉ၊ဢဝ်မႂ်ၽၵ်းတူတင်းလၢႆပူၵ်းတင်ႈဝႆႉဢေႃႈ။ ၶဝ်ဢွၼ်ၵၼ်တႄႇဢဝ်လမ်းဝဵင်းၵႃႈတီႈ ႁေႃလၢင်းၸီးမေႇဢႃႇ၊ တေႃႇထိုင်ႁွတ်ႈ ႁေႃလၢင်းၸီးႁႃႇၼၼေႇလႃႉ၊ ၸိူဝ်းၼၼ်ႉသေယဝ်ႉ၊ဢဝ်သၢၵ်ႈၵၢပ်ႈဢေႃႈ။
ဢၼ်သိုပ်ႇတၢမ်မႃး၊ၵူၼ်းဝဵင်း ယေႇရိၶူဝ်း၊ ၶဝ်ဢွၼ်ၵၼ်မႄးၵုမ်းမႄးႁဵတ်းလမ်းဝဵင်းၼၼ်ႉဢေႃႈ။ ဢၼ်သိုပ်ႇတၢမ်မႃး ၸၵ်ႉၵုရႃႉ၊ လုၵ်ႈၸၢႆး ဢိမရိ၊ လႆႈမႄးၵုမ်းမႄးႁဵတ်းဢေႃႈ။
လုၵ်ႈလၢၼ်ၸိူဝ်ႉၶိူဝ်း ႁတ်ႉသေႇၼႃႉ၊ ၶဝ်မႄးၵုမ်းမႄးႁဵတ်း ၽၵ်းတူပႃ၊ လႄႈ၊ဢွၼ်ၵၼ်သႂ်ႇၶိုဝ်ႇမၼ်းလႄႈဢဝ်မႂ်ၽၵ်းတူတင်းလၢႆတင်ႈဝႆႉပႃးလူၺ်ႈၵၼ်တင်းမၢၵ်ႇသေႃးမၼ်းလႂ်တင်းၵိူၼ်ႇမၼ်းတင်းလၢႆဢေႃႈ။
ဢၼ်သိုပ်ႇတၢမ်မႃး မေႇရမုတ်ႉ၊ လုၵ်ႈၸၢႆး ဢုရိယႃး၊ ဢၼ်ပဵၼ်လၢၼ်ၸၢႆး ၵေႃႇၸႃႉ၊ ၼၼ်ႉသိုပ်ႇမႄးၵုမ်းမႄးႁဵတ်းၵႂႃႇဢေႃႈ။ ဢၼ်သိုပ်ႇတၢမ်မႃး မေႇသုလမ်ႇ၊ လုၵ်ႈၸၢႆး ပေႇရၶိ၊ လၢၼ်ၸၢႆး မေႇသၸႃႉပေႇလႃႉ၊ ၼၼ်ႉသိုပ်ႇမႄးၵုမ်းမႄးႁဵတ်းၵႂႃႇဢေႃႈ။ ဢၼ်သိုပ်ႇတၢမ်မႃး ၸႃႇတုၵ်ႉ၊ လုၵ်ႈၸၢႆး ပႃႇၼႃႉ၊ သိုပ်ႇမႄးၵုမ်းမႄးႁဵတ်းၵႂႃႇဢေႃႈ။
ဢၼ်သိုပ်ႇတၢမ်မႃး၊ၵူၼ်းဝဵင်း တေႇၵေႃႇ၊ တင်းလၢႆသိုပ်ႇမႄးၵုမ်းမႄးႁဵတ်းၵႂႃႇဢေႃႈ။ ၵူၺ်းၵႃႈ၊ၶုၼ်ၶဝ်ၸိူဝ်းၼၼ်ႉဢမ်ႇၶဝ်ႈပႃးၼႂ်းတၢင်းဢၼ်ၵိုတ်ႉႁၢပ်ႇဢဝ်ၵၢၼ်ငၢၼ်းၸဝ်ႈၽြႃးၶဝ်ၼၼ်ႉ။
ယူဝ်းယတႃႉ၊ လုၵ်ႈၸၢႆး ပႃႇသႃႇ၊ ဢိၵ်ႇတင်း မေႇသုလမ်ႇ၊ လုၵ်ႈၸၢႆး ပေႇသေႃးတေႇယႃႉ၊ ဢွၼ်ၵၼ်သိုပ်ႇမႄးၵုမ်းမႄးႁဵတ်းၽၵ်းတူဢၼ်မီးၸိုဝ်ႈႁွင်ႉဝႃႈ၊ ၽၵ်းတူၵဝ်ႇ၊ ၼၼ်ႉဢေႃႈ။ ၶဝ်ဢွၼ်ၵၼ်သႂ်ႇၶိုဝ်ႇမၼ်းလႄႈဢဝ်မႂ်ၽၵ်းတူတင်းလၢႆပူၵ်းတင်ႈဝႆႉပႃးလူၺ်ႈၵၼ်တင်းမၢၵ်ႇသေႃးမၼ်းလႂ်တင်းၵိူၼ်ႇမၼ်းလႂ်ဢေႃႈ။
မေႇလတိ၊ ၵူၼ်းဝဵင်း ၵိပွင်ႇ၊ယႃႇတုၼ်ႇ၊ ၵူၼ်းဝဵင်း မေႇႁေႃးၼွတ်ႉ၊ ဢိၵ်ႇတင်းၵူၼ်း ၵိပွင်ႇ၊ တင်းလၢႆ၊ၵူၼ်းဝဵင်း မိၸပႃႇ၊ တင်းလၢႆ ဢွၼ်ၵၼ်လႆႈယူႇတႂ်ႈမိုဝ်းမဵဝ်ႉဝုၼ်ႇဢၼ်ယူႇၽၢႆႇတၢင်းဝၼ်းတူၵ်းမႄႈၼမ်ႉ ဢုၽရတ်ႉ၊ သေလႄႈမႄးၵုမ်းမႄးႁဵတ်းဢေႃႈ။
ၸၢင်ႈၶမ်း ဢေႃးၸေးလႃႉ၊ လုၵ်ႈၸၢႆး ႁႃႇႁႃႇယႃႉ၊ သမ်ႉမႄးၵုမ်းမႄးႁဵတ်းဢၼ်သိုပ်ႇတၢမ်မႃးၼၼ်ႉဢေႃႈ။ သြႃႇႁဵတ်းၼမ်ႉႁွမ်ဢၼ်မီးၸိုဝ်ႈဝႃႈ၊ ႁႃႇၼၼိ၊ သိုပ်ႇမႄးၵုမ်းမႄးႁဵတ်း၊ႁႂ်ႈဝဵင်း ယေႇရုသလႅမ်ႇ၊ မၼ်ႈၶိူင်ႇလႄႈသိုပ်ႇမႄးႁဵတ်းၵႂႃႇတေႃႇထိုင်ႁွတ်ႈတီႈဢၼ်မီးၸိုဝ်ႈဝႃႈ၊ လမ်းဝဵင်းၵႂၢင်ႈ၊ ၼၼ်ႉဢေႃႈ။
ဢၼ်သိုပ်ႇတေႃႇမႃး ရေႇၽႃႇယႃႉ၊ လုၵ်ႈၸၢႆး ႁုရႃႉ၊ ၶုၼ်ဢၼ်ဢုပ်ႉဢိူင်ႇ ယေႇရုသလႅမ်ႇ၊ ၽၢၵ်ႇၼိုင်ႈၼၼ်ႉသိုပ်ႇမႄးၵုမ်းမႄးႁဵတ်းဢေႃႈ။
ယေႇတႃႇယႃႉ၊ လုၵ်ႈၸၢႆး ႁႃႇရုမပ်ႉ၊ သိုပ်ႇမႄးၵုမ်းမႄးႁဵတ်းတီႈဢၼ်ၸမ်ႁိူၼ်းမၼ်းၼၼ်ႉဢေႃႈ။ ဢၼ်သိုပ်ႇတၢမ်မႃး ႁတ်ႉတုတ်ႉ၊ လုၵ်ႈၸၢႆး ႁႃႇသႃႉပၼိ၊ သိုပ်ႇမႄးၵုမ်းမႄးႁဵတ်းဢေႃႈ။
မႃႇလၶိ၊ လုၵ်ႈၸၢႆး ႁႃႇရိမ်း၊ တင်း ႁႃႇသုပ်ႉ၊ လုၵ်ႈၸၢႆး ပႃႇႁတ်ႉမေႃႇၽႃႉ၊ သိုပ်ႇမႄးၵုမ်းမႄးႁဵတ်းပႃး လၢင်းၸီးတဝ်ႈၽႆး၊ ၼၼ်ႉဢေႃႈ။
သႃႇလုမ်ႇ၊ လုၵ်ႈၸၢႆး ႁႃႇလေႃးႁိတ်ႉ၊ ၶုၼ်ဢၼ်ဢုပ်ႉပိူင်ႇဢိူင်ႇဝဵင်း ယေႇရုသလႅမ်ႇ၊ တၢင်ႇၽၢၵ်ႇၼၼ်ႉသိုပ်ႇမႄးၵုမ်းမႄးႁဵတ်းဢေႃႈ။ လုၵ်ႈယိင်းမၼ်းၸွႆႈမၼ်းဢေႃႈ။
ႁႃႇၼုၼ်ႇ၊ တင်းၵူၼ်းဝဵင်း ၸႃႇၼေႃႇ၊ ၶဝ်ဢွၼ်ၵၼ်မႄးၵုမ်းမႄးႁဵတ်း ၽၵ်းတူၶူင်ႈႁူၺ်ႈ၊ ဢေႃႈ။ ၶဝ်ဢဝ်မႂ်ၽၵ်းတူပႃးလူၺ်ႈၵၼ်တင်းမၢၵ်ႇသေႃးမၼ်းတင်းၵိူၼ်ႇမၼ်းပူၵ်းတင်ႈသေယဝ်ႉ၊ဢွၼ်ၵၼ်မႄးႁဵတ်းလမ်းဝဵင်းယၢဝ်းႁဵင်သွၵ်ႇတေႃႇထိုင်ႁွတ်ႈ ၽၵ်းတူၶီႈဝူဝ်း၊ ဢေႃႈ။
မႃႇလၶိယႃႉ၊ လုၵ်ႈၸၢႆး ရေႇၶပ်ႉ၊ ၶုၼ်ဢၼ်ဢုပ်ႉဢိူင်ႇ ပႅတ်ႉႁၵ်ႉၶရိမ်ႇ၊ ၼၼ်ႉသိုပ်ႇမႄးၵုမ်းမႄးႁဵတ်း ၽၵ်းတူၶီႈဝူဝ်း၊ လႄႈၶဝ်ဢဝ်မႂ်ၽၵ်းတူပႃးလူၺ်ႈၵၼ်တင်းမၢၵ်ႇသေႃးမၼ်းတင်းၵိူၼ်ႇမၼ်းပူၵ်းတင်ႈဝႆႉဢေႃႈ။
သႃႇလုမ်ႇ၊ လုၵ်ႈၸၢႆး ၵေႃးလႃႉႁေႃႇၸႃႉ၊ ၶုၼ်ဢၼ်ဢုပ်ႉဢိူင်ႇ မိၸပႃႇ၊ ၽၢၵ်ႇၼိုင်ႈၼၼ်ႉ မႄးၵုမ်းမႄးႁဵတ်း ၽၵ်းတူၼမ်ႉဢွၵ်ႇႁူး၊ လႄႈမုင်းဝႆႉသေယဝ်ႉ၊ဢဝ်မႂ်ၽၵ်းတူပႃးလူၺ်ႈၵၼ်တင်းမၢၵ်ႇသေႃးမၼ်းတင်းၵိူၼ်ႇမၼ်းပူၵ်းတင်ႈဝႆႉဢေႃႈ။ ၵႃႈတီႈၼမ်ႉၼွင် သေးလႃႉ၊ ၼၼ်ႉမၼ်းတႄႇႁဵတ်းလမ်းဝဵင်းဢၼ်ၸပ်းသူၼ်ဢူးယဵၼ်ႇၶုၼ်ႁေႃၶမ်းၵႂႃႇတေႃႇထိုင်ႁွတ်ႈၶၼ်ႈလႆဢၼ်လူင်းၸူးဝဵင်း တႃႇဝိတ်ႈ၊ ၼၼ်ႉဢေႃႈ။
ၼေႇႁမိ၊ လုၵ်ႈၸၢႆး ဢႃႇၸပုၵ်ႉ၊ ၶုၼ်ဢၼ်ဢုပ်ႉဢိူင်ႇ ပႅတ်ႉၸုရႃႉ၊ ၽၢၵ်ႇၼိုင်ႈၼၼ်ႉမႄးၵုမ်းမႄးႁဵတ်းသိုပ်ႇတီႈၼၼ်ႈၵႂႃႇၸူးပႃႇႁဵဝ်ႈ တႃႇဝိတ်ႈ၊ တေႃႇထိုင်ႁွတ်ႈၼမ်ႉၼွင်ဢၼ်ႁဵတ်းဝႆႉ၊ဢိၵ်ႇတင်းႁိူၼ်းၵူၼ်းသိုၵ်းၶဝ်ၼၼ်ႉဢေႃႈ။
ၵူၼ်း လေႇဝိ၊ ၶဝ်ၵေႃႈသိုပ်ႇမႄးၵုမ်းမႄးႁဵတ်းလမ်းဝဵင်းၵႂႃႇဢေႃႈ။ ရေႇႁုမ်ႇ၊ လုၵ်ႈၸၢႆး ပႃႇၼီႇ၊ သိုပ်ႇမႄးၵုမ်းမႄးႁဵတ်းၵႂႃႇဢေႃႈ။ ႁႃႇသပိ၊ ၶုၼ်ဢၼ်ဢုပ်ႉဢိူင်ႇ ၵိလႃႉ၊ ၽၢၵ်ႇၼိုင်ႈၼၼ်ႉသိုပ်ႇမႄးၵုမ်းမႄးႁဵတ်းပုၼ်ႈဢိူင်ႇမၼ်းၵႂႃႇဢေႃႈ။
ပႃႇဝေႇ၊ လုၵ်ႈၸၢႆး ႁေႇၼတတ်ႉ၊ ဢၼ်ဢုပ်ႉဢိူင်ႇ ၵိလႃႉ၊ ထႅင်ႈၽၢၵ်ႇၼိုင်ႈၼၼ်ႉသိုပ်ႇမႄးၵုမ်းမႄးႁဵတ်းၵႂႃႇဢေႃႈ။
ဢေးၸႃႇ၊ လုၵ်ႈၸၢႆး ယေႇသွႃႇ၊ ၶုၼ်ဢၼ်ဢုပ်ႉဢိူင်ႇ မိၸပႃႇ၊ သမ်ႉမႄးၵုမ်းမႄးႁဵတ်းပွတ်းၼိုင်ႈသိုပ်ႇၵႂႃႇၵႃႈတီႈၽၢႆႇၼႃႈတိူၵ်ႈလၢၵ်ႈၼၢၵ်ႈၸုမ်ႇၶိုၼ်ႈၵႂႃႇတေႃႇထိုင်ႁွတ်ႈၸဵင်ႇလမ်းဝဵင်းဢေႃႈ။
ပႃႇရုၵ်ႉ၊ လုၵ်ႈၸၢႆး ၸပ်ႉပေႇ၊ မႄးၵုမ်းမႄးႁဵတ်းဢဝ်တီႈၸဵင်ႇလမ်းဝဵင်းၵႂႃႇတေႃႇထိုင်ႁွတ်ႈၽၵ်းတူႁိူၼ်းၶုၼ်ယဵၸ်ႈပရေႃးႁဵၵ်ႈ ဢေးလျႃႇသိပ်ႉ၊ ဢေႃႈ။
မေႇရမုတ်ႉ၊ လုၵ်ႈၸၢႆး ဢုရိယႃး၊ လၢၼ်ၸၢႆး ၵေႃႇၸႃႉ၊ ၼၼ်ႉမႄးႁဵတ်းမႄးၵုမ်းဢဝ်တီႈၽၵ်းတူႁိူၼ်း ဢေးလျႃႇသိပ်ႉ၊ သိုပ်ႇၵႂႃႇတေႃႇထိုင်ႁွတ်ႈၸဵင်ႇႁိူၼ်း ဢေးလျႃႇသိပ်ႉ၊ ဢေႃႈ။
ယဵၸ်ႈပရေႃးႁဵၵ်ႈ ၸိူဝ်းဢၼ်ယူႇလဵပ်ႈႁွပ်ႈႁိမ်းႁွမ်းဝဵင်း ယေႇရုသလႅမ်ႇ၊ တႄႇႁဵတ်းသိုပ်ႇတၢမ်သေၵႃႈတီႈၼၼ်ႈၵႂႃႇဢေႃႈ။
ပိၼ်ႇယႃႇမိၼ်ႇ၊ တင်း ႁႃႇသုပ်ႉ၊ ဢွၼ်ၵၼ်မႄးၵုမ်းမႄးႁဵတ်းသိုပ်ႇၵႂႃႇၵႃႈတီႈၼႃႈႁိူၼ်းၶဝ်ဢေႃႈ။ သိုပ်ႇတီႈၼၼ်ႈၵႂႃႇ ဢႃႇၸရိ၊ လုၵ်ႈၸၢႆး မႃႇသေႇယႃႉ၊ ဢၼ်ပဵၼ်လုၵ်ႈၸၢႆး ဢႃႇၼၼိ၊ မႄးၵုမ်းမႄးႁဵတ်းၵႃႈတီႈဢၼ်မီးႁိမ်းႁိူၼ်းမၼ်းၼၼ်ႉဢေႃႈ။
ပိၼုၺ်ႇ၊ လုၵ်ႈၸၢႆး ႁေႇၼတတ်ႉ၊ သိုပ်ႇမႄးၵုမ်းမႄးႁဵတ်းၵႂႃႇထိုင်ၵႃႈတီႈႁိူၼ်း ဢႃႇၸရိ၊ သိုပ်ႇၵႂႃႇတေႃႇထိုင်ႁွတ်ႈၸဵင်ႇလမ်းဝဵင်းဢေႃႈ။
ပႃႇလႃႇလႃႉ၊ လုၵ်ႈၸၢႆး ဢုၸေႇ၊ မႄးၵုမ်းမႄးႁဵတ်းသိုပ်ႇၵႃႈတီႈၸဵင်ႇလမ်းဝဵင်းၵႂႃႇ၊ဢိၵ်ႇတင်းမႄးၵုမ်းမႄးႁဵတ်းသဝ်လၢင်းလူင်ဢၼ်မီးပွတ်းၼိူဝ်ႁေႃၸဝ်ႈၵႃႈတီႈႁိမ်းဝၢင်းထွင်ႇၼၼ်ႉဢေႃႈ။ ပေႇတႃႇယႃႉ၊ လုၵ်ႈၸၢႆး ပႃႇရုတ်ႉ၊ ၼၼ်ႉမႄးၵုမ်းမႄးႁဵတ်းတီႈဢၼ်သိုပ်ႇတၢမ်ၵႂႃႇၼၼ်ႉဢေႃႈ။
ၼွၵ်ႈသေၼၼ်ႉၶႃႈၽြႃးတင်းလၢႆ ဢွၼ်ၵၼ်သိုပ်ႇမႄးၵုမ်းမႄးႁဵတ်းတီႈပွၵ်ႈဢၼ်ႁွင်ႉဝႃႈ၊ ဢေႃးၽေႇလႃႉ၊ တီႈဢၼ်ၶဝ်ယူႇၶဝ်သဝ်းၼၼ်ႉတေႃႇထိုင်ႁွတ်ႈၽၢႆႇတၢင်းဝၼ်းဢွၵ်ႇၵႃႈတီႈႁိမ်း ၽၵ်းတူၼမ်ႉ၊ ဢိၵ်ႇတင်းသဝ်လၢင်းဢၼ်ပႅၼ်ဢွၵ်ႇမႃးၵႃႈၼွၵ်ႈၼၼ်ႉဢေႃႈ။
ၵူၼ်းဝဵင်း တေႇၵေႃႇ၊ ၶဝ်ဢွၼ်ၵၼ်မႄးၵုမ်းမႄးႁဵတ်းထႅင်ႈပွတ်းၼိုင်ႈ၊ဢဝ်ၵႃႈတီႈတေႃႇၼႃႈၵၼ်တင်းသဝ်လၢင်းလူင်ဢၼ်ပႅၼ်ဢွၵ်ႇၵႃႈၼွၵ်ႈၼၼ်ႉတေႃႇထိုင်ႁွတ်ႈပွၵ်ႈဢၼ်ႁွင်ႉဝႃႈ၊ ဢေႃးၽေႇလႃႉ၊ ၼၼ်ႉဢေႃႈ။
ဢၼ်သိုပ်ႇတၢမ်မႃးၼၼ်ႉယဵၸ်ႈပရေႃးႁဵၵ်ႈမူႇၼိုင်ႈ ဢွၼ်ၵၼ်သိုပ်ႇမႄးၵုမ်းမႄးႁဵတ်းတႄႇဢဝ် ၽၵ်းတူမႃႉ၊ ၵႂႃႇၸူးၽၢႆႇတၢင်းႁွင်ႇတီႈဢၼ်သိုဝ်ႈၵၼ်တင်းႁိူၼ်းၽႂ်ႁိူၼ်းမၼ်းၼၼ်ႉဢေႃႈ။
ဢၼ်သိုပ်ႇတၢမ်မႃး ၸႃႇတုၵ်ႉ၊ လုၵ်ႈၸၢႆး ဢိမေႇရႃႉ၊ သိုပ်ႇမႄးၵုမ်းမႄးႁဵတ်းပွတ်းၼိုင်ႈတီႈဢၼ်သိုဝ်ႈၵၼ်တင်းႁိူၼ်းမၼ်းဢေႃႈ။ ႁူဝ်ၼႃႈဢၼ်ပႂ်ႉၽၵ်းတူၽၢႆႇတၢင်းဝၼ်းဢွၵ်ႇဢၼ်ၸိုဝ်ႈ သေႇမႃႇယႃႉ၊ လုၵ်ႈၸၢႆး သေႇၵၼိ၊ ၼၼ်ႉသိုပ်ႇမႄးၵုမ်းမႄးႁဵတ်းပွတ်းၼိုင်ႈဢေႃႈ။
ဢၼ်သိုပ်ႇတၢမ်မႃး ႁႃႇၼၼိ၊ လုၵ်ႈၸၢႆး သေႇလမိ၊ ဢိၵ်ႇတင်း ႁႃႇၼုၼ်ႇ၊ ဢၼ်ပဵၼ်လုၵ်ႈၸၢႆး ၸႃႇလပ်ႉ၊ ၵေႃႉထူၼ်ႈႁူၵ်းၼၼ်ႉသိုပ်ႇမႄးၵုမ်းမႄးႁဵတ်းပွတ်းၼိုင်ႈဢေႃႈ။ မေႇသုလမ်ႇ၊ လုၵ်ႈၸၢႆး ပေႇရၶိ၊ ၵေႃႈလႆႈသိုပ်ႇႁဵတ်းပွတ်းဢၼ်မီးၽၢႆႇၼႃႈႁိူၼ်းမၼ်းၼၼ်ႉဢေႃႈ။
ဢၼ်သိုပ်ႇတၢမ်မႃးၼၼ်ႉၸၢင်ႈၶမ်း မႃႇလၶိယႃႉ၊ သိုပ်ႇမႄးၵုမ်းမႄးႁဵတ်းႁွတ်ႈထိုင်ၵႂႃႇတီႈႁိူၼ်းဢၼ်ၶႃႈၸႂ်ႉၼႂ်းၵျွင်းပိၵ်ႈမၢၼ်ႇၸဝ်ႈတင်းလၢႆယူႇ၊ဢိၵ်ႇတင်းၸဝ်ႈၵုၼ်ႇၸဝ်ႈသိၼ်ယူႇဢၼ်သိုဝ်ႈၵၼ်တင်း ၽၵ်းတူမိၽၵတ်ႉ၊ တီႈဢၼ်ၶိုၼ်ႈၸူးလုၵ်းၸၼ်ႉၼိူဝ်ၸဵင်ႇႁွင်ႇဝၼ်းဢွၵ်ႇလမ်းဝဵင်းၼၼ်ႉဢေႃႈ။
ၸၢင်ႈၶမ်းတင်းလၢႆဢိၵ်ႇတင်းၸဝ်ႈၵုၼ်ႇၸဝ်ႈသိၼ်တင်းလၢႆ ဢွၼ်ၵၼ်မႄးၵုမ်းမႄးႁဵတ်းသိုပ်ႇၵႃႈတီႈၸဵင်ႇလမ်းဝဵင်းၼၼ်ႉၵႂႃႇတေႃႇထိုင်ႁွတ်ႈ ၽၵ်းတူသူဝ်း၊ ဢၼ်ပဵၼ်ပွတ်းတီႈသုတ်းပိူၼ်ႈၼၼ်ႉဢေႃႈ။
မိူဝ်ႈဢၼ် သၼ်ႇပႃးလတ်ႉ၊ ငိၼ်းလွင်ႈဢၼ်ႁဝ်းၸႃႉတႄႇႁဵတ်းလမ်းဝဵင်းၼၼ်ႉၸိုင်၊တေႃးသႃႉမၼ်းဢွၵ်ႇၼႃႇလူင်လၢင်သေယဝ်ႉ၊ႁဵတ်းပျၢၵ်ႈႁဵတ်းၶူဝ်တီႈႁဝ်းလႄႈ၊-
လၢတ်ႈၵႃႈတီႈၽၢႆႇၼႃႈပီႈၼွင်ႉမၼ်း၊ဢိၵ်ႇတင်းၵူၼ်းသိုၵ်းမဵဝ်း သမႃႇရိ၊ ၶဝ်လႄႈဝႃႈ၊ “ၵူၼ်းမဵဝ်း ၵျူး၊ ဢၼ်ႁႅင်းလဵၵ်ႉႁႅင်းၵႄႇၸိူဝ်းၼႆႉတၵ်းဢွၼ်ၵၼ်ႁဵတ်းၵႃႈသင်။ ၶဝ်ဢၢင်ႈတၵ်းမႄးတႄႇတင်ႈဝဵင်းလူင်ႁိုဝ်း။ ၶဝ်တၵ်းသၢၵ်ႈၵၢပ်ႈတၢင်းလူႇႁိုဝ်း။ ၶဝ်တၵ်းႁႂ်ႈယဝ်ႉတူဝ်ႈၼႂ်းဝၼ်းလဵဝ်ႁိုဝ်း။ ၶဝ်တၵ်းဢဝ်မၢၵ်ႇႁိၼ်ဢၼ်ၽႆးမႆႈယဝ်ႉၸိူဝ်းၼၼ်ႉဢွၵ်ႇသေၵႃႈၼႂ်းၵွင်လိၼ်ၵွင်ၽုၼ်ႇသေလႄႈမႃးတႄႇႁဵတ်းႁိုဝ်း။” ဝႃႈၼင်ႇၼႆဢေႃႈ။
တေႃႇၽိယႃႉ၊ ၵေႃႈၸုၵ်းယူႇၵႃႈတီႈႁိမ်းမၼ်းလႄႈလၢတ်ႈဝႃႈ၊ “ၶဝ်တႄႇႁဵတ်းလမ်းဝဵင်းၸိူဝ်ႉၼင်ႇႁိုဝ်။ ပေႃးမႃထိူၼ်ႇယဵပ်ႇၶိုၼ်ႈၵႂႃႇၵႃႈၼိူဝ်မၼ်းၵူၺ်းၵေႃႈတၵ်းတေၵိူၼ်ႇတူၵ်းပင်းတူၵ်းဢေႃႈ၊” ဝႃႈၼင်ႇၼႆဢေႃႈ။
ၵဝ်သူးတွင်းလႄႈဝႃႈ၊ “ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈထွမ်ႇငိၼ်းသေၵမ်းတီႈၶႃႈ။ ၶႃႈၸဝ်ႈႁဝ်းၶဝ်လႆႈၶၢမ်ႇတၢင်းဢၼ်ႁဵတ်းဢမ်ႇပေႃးၼင်ႇႁိုဝ်တီႈၶႃႈဢေႃႈ။ ႁႂ်ႈၵႂၢမ်းဢၼ်ၶဝ်သႄႉသွမ်းၼၼ်ႉၶိုၼ်းႁွတ်ႈၵႃႈၼိူဝ်ႁူဝ်ၶဝ်သေၵမ်းလူၺ်ႈ။ ႁႂ်ႈၶဝ်လႆႈၶၢမ်ႇတၢင်းဢၼ်ပိူၼ်ႈတိဢဝ်သိမ်းဢဝ်ၵႂႃႇလႄႈတူၵ်းၵႅၼ်းၵႃႈၼႂ်းမိူင်းၵူၼ်းတၢင်ႇၸိူဝ်ႉတၢင်ႇၶိူဝ်းၼၼ်ႉသေၵမ်းလူၺ်ႈ။
ယႃႇပေပွႆႇလွတ်ႈဢပျတ်ႈဢၼ်ၶဝ်ႁဵတ်းၼၼ်ႉသေၵမ်းတီႈၶႃႈ။ ယႃႇပေလူင်လိုမ်းတုၸရိူၵ်ႈဢပျတ်ႈၶဝ်ၼၼ်ႉသေၵမ်းတီႈၶႃႈ။ လွင်ႈမၼ်းၸမ်ႉ၊ၶဝ်ဢွၼ်ၵၼ်သႄႉသွမ်းၶႃႈၸဝ်ႈႁဝ်းၶဝ်ၸိူဝ်းဢၼ်တႄႇႁဵတ်းယူႇၼႆႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ႁဝ်းၶႃႈဢွၼ်ၵၼ်တႄႇႁဵတ်းလမ်းဝဵင်းယူႇလႄႈလမ်းဝဵင်းယဝ်ႉတူဝ်ႈၵႂႃႇတေႃႇထိုင်ႁွတ်ႈတၢင်းသုင်လမ်းဝဵင်းၶိုင်ႈၼိုင်ႈ ၵွပ်ႈပိူဝ်ႈဢၼ်ၵူၼ်းတင်းလၢႆပႃးၸႂ်ၸေႇတၼႃႇသေလႄႈႁဵတ်းၼၼ်ႉဢေႃႈ။
မိူဝ်ႈဢၼ် သၼ်ႇပႃးလတ်ႉ၊ ဢိၵ်ႇတင်း တေႃႇၽိယႃႉ၊ တင်းၵူၼ်း ဢႃႇရပ်ႉ၊ လႂ်၊ၵူၼ်း ဢမ်ႇမုၼ်ႇ၊ လႂ်၊ၵူၼ်း ဢႃႇၸုတ်ႉ၊ လႂ်ၸိူဝ်းၼၼ်ႉငိၼ်းလွင်ႈဢၼ်ႁဝ်းမႄးၵုမ်းမႄးႁဵတ်းလမ်းဝဵင်း ယေႇရုသလႅမ်ႇ၊ ၶိုၼ်ႈယူႇတိၵ်းတိၵ်း၊ဢိၵ်ႇတင်းမႄးဢိုတ်းမႄးယႃတီႈဢၼ်ၵိူၼ်ႇပင်းလုလႅဝ်ၸိူဝ်းၼၼ်ႉယူႇၼၼ်ႉၸိုင်၊ၶဝ်ဢွၵ်ႇတေႃးသႃႉၸႂ်မႆႈၶႂ်ႈၸႃႉၼႃႇလူင်လၢင်ဢေႃႈ။-
ပိူဝ်ႈၼႆလႄႈၶဝ်ဢွၼ်ၵၼ်တိူင်ႇပၢင်ႇၵၼ်ႁႂ်ႈလႆႈၽွမ်ႉၵၼ်ၶီႇသိုၵ်းမႃးလႄႈတိုၵ်းတေႃးဝဵင်း ယေႇရုသလႅမ်ႇ၊ ယႃႉၵဝ်းၼႃႈၵၢၼ်ႁဝ်းဢေႃႈ။-
ၵူၺ်းၵႃႈ၊ႁဝ်းသူးတွင်းတီႈၽြႃးပဵၼ်ၸဝ်ႈႁဝ်းသေလႄႈၶၢၼ်းၵူၼ်းပႂ်ႉယၢမ်းပႂ်ႉယူႇဝၼ်းဝၼ်းၶိုၼ်းၶိုၼ်းၵွပ်ႈပိူဝ်ႈရၢၼ်ႇသူႇၸိူဝ်းၼၼ်ႉဢေႃႈ။
ၵူၼ်းမဵဝ်း ယုတႃႉ၊ တင်းလၢႆမီးလိၵ်ႈႁဵတ်းၵႂၢမ်းတွၼ်ႈၼိုင်ႈဢၼ်ၶဝ်ႁွင်ႉဝႃႈ၊ “ၵူၼ်းတေႃႉၵူၼ်းႁၢပ်ႇႁဝ်းႁႅင်းယွမ်းႁႅင်းဢူၼ်ႈ ၶီႈၽုၼ်ႇယိူဝ်ႈယႃႈၵေႃႈမီးၼမ်ပူၼ်ႉ တၵ်းႁဵတ်းၸိူဝ်ႉႁိုဝ်ႁႂ်ႈလမ်းဝဵင်းယဝ်ႉတူဝ်ႈ တဵမ်ထူၼ်ႈ၊” ဝႃႈၼင်ႇၼႆဢေႃႈ။
ရၢၼ်ႇသူႇႁဝ်းၸိူဝ်းၼၼ်ႉထၢင်ႇဝႃႈ၊ႁဝ်းတေဢမ်ႇႁုဢမ်ႇႁၼ်လွင်ႈဢၼ်တၵ်းပဵၼ်မႃးၼၼ်ႉတေႃႇထိုင်ႁွတ်ႈၶဝ်ထၢၼ်ႈပေႃးၶဝ်ႈထိုင်ၵႃႈၼႂ်းၵႄႈၵၢင်ႁဝ်းမႃးသေလႄႈၶႃႈၽၼ်းဢဝ်ႁဝ်းတၢႆသေယဝ်ႉ၊ႁႂ်ႈတၢင်းႁဵတ်းႁဝ်းၵိုတ်းၵႂႃႇထၢတ်ႇၵႂႃႇၼၼ်ႉဢေႃႈ။-
ၵူၺ်းၵႃႈ၊ၵူၼ်းမဵဝ်း ၵျူး၊ ၸိူဝ်းဢၼ်ယူႇၸွမ်းၵႄႈဝူင်ႈၵၢင်ရၢၼ်ႇသူႇႁဝ်းၸိူဝ်းၼၼ်ႉဢွၼ်ၵၼ်ၵႆႉၵႆႉမႃးပၼ်သတိတီႈႁဝ်းလွင်ႈဢၼ်ရၢၼ်ႇသူႇႁဝ်းၸိူဝ်းၼၼ်ႉဢၢင်ႈတၵ်းမႃးႁဵတ်းၸိူဝ်ႉၼင်ႇႁိုဝ်ၼၼ်ႉဢေႃႈ။-
ၵွပ်ႈပိူဝ်ႈၼင်ႇၼၼ်လႄႈၵဝ်ၶၢၼ်းၵူၼ်းတင်းလၢႆဢၼ်ပႃးလၢၵ်ႈၼၢၵ်ႈဢၼ်ပဵၼ်လၢပ်ႇ၊ႁွၵ်ႇ၊ၵၢင်ႇတင်းလၢႆ၊ပႂ်ႉၵႃႈတီႈလမ်းဝဵင်းဢၼ်ဢမ်ႇပႆႇလႆႈမႄးၵုမ်းမႄးႁဵတ်းၸိူဝ်းၼၼ်ႉၸွမ်းၼင်ႇၶိူဝ်းႁိူၼ်းၽႂ်ၶိူဝ်းႁိူၼ်းမၼ်းဢေႃႈ။
ၵဝ်လူတူၺ်းသေယဝ်ႉ၊လုၵ်ႉလႄႈလၢတ်ႈတီႈမူးမၢတ်ႈၽွင်းမိူင်း၊ၶုၼ်ဢၼ်ပွင်ၵၢၼ်တင်းလၢႆလႄႈဝႃႈ၊ “သူယႃႇပေၵူဝ်ႁႄရၢၼ်ႇသူႇႁဝ်းၸိူဝ်းၼၼ်ႉ။ ဢွၼ်ၵၼ်ၶုၵ်းၸႂ်လႆႈလွင်ႈဢၼ် ထႃႇဝရႃႉၽြႃး၊ ယႂ်ႇမျၢတ်ႈလႄႈလီၵူဝ်လီႁႄထၼ်ႇႁိုဝ်ၼၼ်ႉသေလႄႈလုၵ်ႉတိုၵ်းပုၼ်ႈပီႈၼွင်ႉၸိူဝ်ႉၶိူဝ်းသူ၊လုၵ်ႈလၢင်းသူ၊မေးသူတင်းႁိူၼ်းယေးတႃႉ၊” ဝႃႈၼင်ႇၼႆဢေႃႈ။-
ရၢၼ်ႇသူႇႁဝ်းၸိူဝ်းၼၼ်ႉငိၼ်းလွင်ႈဢၼ်ႁဝ်းႁုတၢင်းၵျၢမ်ႇတၢင်းပွင်ၶဝ်ၼၼ်ႉသေလႄႈ၊ၶဝ်ႁုတူဝ်ဝႃႈၽြႃးပဵၼ်ၸဝ်ႈယႃႉတၢင်းၵျၢမ်ႇၶဝ်ၼၼ်ႉဢေႃႈ။ မိူဝ်ႈၼၼ်ႉႁဝ်းၵႃႈမီးတင်းသဵင်ႈတင်းလူင်ဢွၼ်ၵၼ်ၶိုၼ်းၵႂႃႇလႄႈမႄးၵုမ်းမႄးႁဵတ်းလမ်းဝဵင်းတီႈၽႂ်တီႈမၼ်းဢေႃႈ။
ၸႃႉၸဵမ်ၶိင်ႇၼၼ်ႉၵႂႃႇလႄႈၵူၼ်းၵဝ်ၶိုင်ႈၼိုင်ႈဢွၼ်ၵၼ်ႁဵတ်းၵၢၼ်လႄႈၶိုင်ႈၼိုင်ႈဢွၼ်ၵၼ်ယိပ်းၵမ်ႁွၵ်ႇ၊ၶိူင်ႈႁႄႉလၢၵ်ႈၼၢၵ်ႈ၊ၵၢင်ႇလႄႈၼုင်ႈၶူဝ်းၶႅပ်းလဵၵ်းပႂ်ႉယူႇဢေႃႈ။ ၶုၼ်ႁဝ်းတင်းလၢႆၵေႃႈယူႇၽၢႆႇတၢင်းလင်ၵမ်ႉၸွႆႈထႅမ်ၵူၼ်း ယုတႃႉ၊ -
ၸိူဝ်းဢၼ်တႄႇႁဵတ်းလမ်းဝဵင်းယူႇၼၼ်ႉဢေႃႈ။ ၵူၼ်းၸိူဝ်းဢၼ်ႁၢပ်ႇဢၼ်တေႃႉၶိူင်ႈလမ်းဝဵင်းၼၼ်ႉဢဝ်မိုဝ်းၶွၼ်ၼိုင်ႈၵူၺ်းႁဵတ်းလႄႈဢဝ်မိုဝ်းၶွၼ်ၼိုင်ႈယိပ်းၵမ်လၢၵ်ႈၼၢၵ်ႈယူႇဢေႃႈ။-
ၵူၼ်းႁဵတ်းၵၢၼ်ၸိူဝ်းၼၼ်ႉဢွၼ်ၵၼ်ဢဝ်လၢပ်ႇၶတ်းဢႅဝ်ဝႆႉၵူႈၵေႃႉၵူႈၵူၼ်းဢေႃႈ။ ၵေႃႉဢၼ်ပဝ်ႇၶရႃႇၼၼ်ႉၵေႃႈၸုၵ်းယူႇၵႃႈတီႈႁိမ်းၵဝ်ဢေႃႈ။
ၵဝ်လၢတ်ႈတီႈၵူၼ်းတင်းလၢႆ၊ဢိၵ်ႇတင်းမူးမၢတ်ႈၽွင်းမိူင်းတင်းၶုၼ်ဢၼ်ပွင်ၵၢၼ်တင်းလၢႆလႄႈဝႃႈ၊ “ၵၢၼ်ႁဝ်းၼႆႉယႂ်ႇၵႂၢင်ႈၼႃႇလူင်လၢင်လႄႈႁဝ်းလႆႈႁဵတ်းၵႃႈၼိူဝ်လမ်းဝဵင်းယေႈၵေႃႉယေႈတီႈၵႆၵၼ်ယၢၼ်ၵၼ်ဢေႃႈ။-
ပေႃးသူငိၼ်းသဵင်ပဝ်ႇၶရႃႇၸိုင်၊ဢွၼ်ၵၼ်မႃးၸုၵၼ်တုမ်ၵၼ်ၵႃႈတီႈၵဝ်တႃႉ။ ၽြႃးပဵၼ်ၸဝ်ႈႁဝ်းတၵ်းတိုၵ်းပုၼ်ႈႁဝ်းဢေႃႈ၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈၸႃႉၸဵမ်ၶိင်ႇမိူင်းၸႃႉလႅင်းမႃးတေႃႇထိုင်ႁွတ်ႈၶိင်ႇဢၼ်လၢဝ်ဢွၵ်ႇၼၼ်ႉၵူၼ်းႁဝ်းၶိုင်ႈၼိုင်ႈတႄႇႁဵတ်းလမ်းဝဵင်းလႄႈၶိုင်ႈၼိုင်ႈသမ်ႉယိပ်းလၢၵ်ႈၼၢၵ်ႈသေၸုၵ်းပႂ်ႉယူႇဢေႃႈ။
ၼႂ်းမိူဝ်ႈၼၼ်ႉၵဝ်သင်ႇလၢတ်ႈတီႈၵူၼ်းတင်းလၢႆဝႆႉလႄႈဝႃႈ၊ “ႁႂ်ႈၵူၼ်းၵူႈၵေႃႉဢိၵ်ႇတင်းၶႃႈၶဝ်ၼွၼ်းယူႇၵႃႈၼႂ်းဝဵင်း ယေႇရုသလႅမ်ႇ၊ ၶိင်ႇၵၢင်ၶိုၼ်းၼၼ်ႉႁႂ်ႈလႆႈပဵၼ်တၢင်းဢၼ်ပႂ်ႉဝဵင်းၶိင်ႇၵၢင်ၶိုၼ်းလႄႈလႆႈႁဵတ်းလႆႈသၢင်ႈၼႂ်းၶိင်ႇၵၢင်ဝၼ်းသေ၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈၸႃႉၸဵမ်ၵဝ်ဢိၵ်ႇတင်းၵူၼ်းၸွႆႈၵူၼ်းထႅမ်ၵဝ်တင်းလၢႆလႄႈၶႃႈၵဝ်၊ၵူၼ်းပႂ်ႉဢသၢၵ်ႈၵဝ်ၸိူဝ်းၼႆႉ၊ၽူႈလႂ်ယင်းဢမ်ႇပုတ်ႈလၢႆႈၶူဝ်းၼုင်ႈတူဝ်ၸဝ်ႈၵဝ်ႇသေၵေႃႉသေၵူၼ်းလႄႈၵူႈၵေႃႉၵူႈၵူၼ်းယိပ်းလၢၵ်ႈၼၢၵ်ႈ ဝႆႉဢေႃႈ။
ဝၢႆးၼၼ်ႉဢမ်ႇႁိုင်ဢမ်ႇၼၢၼ်းၵူၼ်းတင်းလၢႆၸဵမ်ယိင်းၸဵမ်ၸၢႆးဢွၼ်ၵၼ်ပွင်ႉၶၢင်းပွင်ႉမိုၼ်ႇတၢင်ႇဢပျတ်ႈတီႈပီႈၼွင်ႉၵူၼ်းမဵဝ်း ၵျူး၊ ၶဝ်ၼင်ႇၵၼ်ဢေႃႈ။-
ၵမ်ႈၽွင်ႈလၢတ်ႈလႄႈဝႃႈ၊ “ႁဝ်းမီးၵူၼ်းႁိူၼ်းၼမ်ၼႃႇလႄႈႁဝ်းလူဝ်ႇမီးၶဝ်ႈၵိၼ်ႁႂ်ႈလႆႈလဵင်ႉဢသၢၵ်ႈႁဝ်းဢေႃႈ၊” ဝႃႈၼင်ႇၼႆဢေႃႈ။
ၵမ်ႈၽွင်ႈၵေႃႈဝႃႈ၊ “ႁဝ်းၼႆႉဢဝ်ႁႆႈၼႃးႁဝ်း၊ဢဝ်သူၼ်မၢၵ်ႇၸပိတ်ႉႁဝ်း၊ဢိၵ်ႇတင်းႁိူၼ်းႁဝ်းပွင်ႇဝႆႉတၢင်ဝႆႉ၊ႁႂ်ႈလႆႈၶဝ်ႈပိူၵ်ႇၶဝ်ႈသၢၼ်ပုၼ်ႈဢၼ်တၵ်းပူၼ်ႉလွတ်ႈတၢင်းဢၼ်ဢိုပ်းဢၼ်ယၢၵ်ႈဢေႃႈ၊” ဝႃႈၼင်ႇၼႆဢေႃႈ။
ၵမ်ႈၽွင်ႈသမ်ႉယင်းဝႃႈ၊ “ႁဝ်းၼႆႉတၵ်းလႆႈၵူႈဢဝ်ငိုၼ်းတီႈပိူၼ်ႈသေယဝ်ႉ၊တေလႆႈထၢမ်းၶွၼ်ႇပုၼ်ႈႁႆႈၼႃးႁဝ်း၊သူၼ်မၢၵ်ႇၸပိတ်ႉႁဝ်းယဝ်ႉ။-
ႁဝ်းၼႆႉပဵၼ်ၸိူဝ်ႉၸၢတ်ႈႁိူဝ်ႇၶႆးဢၼ်လဵဝ်ၵၼ်တင်းပီႈၼွင်ႉ ၵျူး၊ ႁဝ်းၸိူဝ်းၼၼ်ႉလူင်လၢင်။ လုၵ်ႈလၢင်းႁဝ်းၵေႃႈပဵၼ်ၵူၼ်းလီမိူၼ်ၸိူဝ်ႉၼင်ႇလုၵ်ႈလၢင်းၶဝ်ဢေႃႈ။ ၵူၺ်းၵႃႈ၊ႁဝ်းတၵ်းလႆႈၶၢႆလုၵ်ႈလၢင်းႁဝ်းႁႂ်ႈၶဝ်လႆႈပဵၼ်ၶႃႈပိူၼ်ႈလႄႈလုၵ်ႈယိင်းႁဝ်းမၢင်ၵေႃႉပေႃးလႆႈၶၢမ်ႇၶၢႆၵႂႃႇႁႂ်ႈပဵၼ်ၶႃႈပိူၼ်ႈယဝ်ႉ။ ႁဝ်းဢမ်ႇထုတ်ႇဢဝ်ထႆႇဢဝ်ၶဝ်လႆႈၵွပ်ႈပိူဝ်ႈဢၼ်ႁႆႈၼႃးႁဝ်း၊ဢိၵ်ႇတင်းသူၼ်မၢၵ်ႇၸပိတ်ႉဢၼ်ႁဝ်းပိူင်ႇၼၼ်ႉတူၵ်းၵႃႈၼႂ်းမိုဝ်းပိူၼ်ႈယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၵဝ်ငိၼ်းၵႂၢမ်းဢၼ်ပွင်ႉၶၢင်းပွင်ႉမိုၼ်ႇသေလႄႈတၢင်ႇဢပျတ်ႈၸိူဝ်းၼၼ်ႉၸိုင်၊ၵဝ်ၸႂ်မႆႈၶႂ်ႈၸႃႉၼႃႇလႄႈ၊-
ၵဝ်ၶီၸႂ်မႆႈၸႂ်သေလႄႈသင်ႇသွၼ်မူးမၢတ်ႈၽွင်းမိူင်းတင်းၶုၼ်ဢၼ်ပွင်ၵၢၼ်တင်းလၢႆလႄႈဝႃႈ၊ “သူၼႆႉၸၢင်ႈၵိၼ်ၶီႈၶဝ်ႈၶီႈငိုၼ်းတီႈပီႈၼွင်ႉသူၼင်ႇၵၼ်လူင်ပႄႇ၊” ဝႃႈၼင်ႇၼႆသေယဝ်ႉ။ ၵဝ်ႁွင်ႉဢဝ်ၵူၼ်းတင်းလၢႆမႃးၸုတုမ်ၵၼ်ပဵၼ်ၵူၼ်းပရိၵ်ႈသၢတ်ႈဢၼ်ၼမ်ၼႃႇႁႂ်ႈလႆႈၵႄႈလိတ်ႈဢမုၼၼ်ႉဢေႃႈ။-
ၵဝ်လၢတ်ႈတီႈၶဝ်လႄႈဝႃႈ၊ “ၵႃႈၼင်ႇဢၼ်ႁဝ်းတၢတ်ႈၼိူင်ႇလႆႈၼၼ်ႉႁဝ်းၶိုၼ်းထုတ်ႇဢဝ်သိုဝ်ႉဢဝ်ပီႈၼွင်ႉႁဝ်းၵူၼ်းမဵဝ်း ၵျူး၊ ၼင်ႇၵၼ်ဢၼ်လႆႈၶၢမ်ႇႁဵတ်းၶႃႈတီႈၵူၼ်းတၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉမႃးသေယဝ်ႉ၊သူသမ်ႉတၵ်းတဵၵ်းၶေႃးပီႈၼွင်ႉသူၼင်ႇၵၼ် ႁႂ်ႈၶဝ်ၶၢႆတူဝ်ၶဝ်ပၼ်ၵႃႈတီႈသူဢၼ်ပဵၼ်ပီႈပဵၼ်ၼွင်ႉယူႇၼၼ်ႉႁိုဝ်း၊” ဝႃႈၼင်ႇၼႆဢေႃႈ။ ၶုၼ်ၸိူဝ်းၼၼ်ႉယင်းဢမ်ႇတၵ်းသဵင်လႄႈဢမ်ႇမီးၵႂၢမ်းတီႈဢၼ်တၵ်းၶိုၼ်းလၢတ်ႈသေၶေႃႈသေၵမ်း။
မိူဝ်ႈၼၼ်ႉၵဝ်လၢတ်ႈလႄႈဝႃႈ၊ “လွင်ႈတၢင်းဢၼ်သူႁဵတ်းၼႆႉဢမ်ႇလီသေဢိတ်း။ သူထုၵ်ႇလီၵူဝ်ႁႄၽြႃးပဵၼ်ၸဝ်ႈလႄႈႁဵတ်းဢၼ်သိုဝ်ႈဢၼ်တေႃႇပုၼ်ႈလွင်ႈၼင်ႇႁိုဝ်ၵူၼ်းတၢင်ႇၸိူဝ်ႉတၢင်ႇမဵဝ်းဢၼ်ပဵၼ်ရၢၼ်ႇသူႇႁဝ်းတၵ်းဢမ်ႇသႄႉသွမ်းႁဝ်းလႆႈၼၼ်ႉဢေႃႈ။-
ၸႃႉၸဵမ်ၵဝ်ဢိၵ်ႇတင်းၵူၼ်းၸွႆႈၵူၼ်းထႅမ်ၵဝ်တင်းလၢႆ၊ဢိၵ်ႇတင်းၶႃႈၵဝ်ၸိူဝ်းၼႆႉၵေႃႈလႆႈပၼ်ၵူႈပၼ်ယိမ်ငိုၼ်း၊ၶဝ်ႈပိူၵ်ႇ၊ၶဝ်ႈသၢၼ်တီႈၶဝ်ယူႇ။ ႁဝ်းဢွၼ်ၵၼ်ဝႄႈပႅတ်ႈတၢင်းဢၼ်ၵိၼ်ၶီႈၶဝ်ႈၶီႈငိုၼ်းၼၼ်ႉတႃႉႁဝ်း။-
ၼႂ်းဝၼ်းမိူဝ်ႈၼႆႉဢွၼ်ၵၼ်ၶႂၢင်းလွတ်ႈပၼ်ၼီႈၵႃႈဢၼ်ၶဝ်ထုၵ်ႇတီႈသူဢၼ်ဝႃႈ၊ငိုၼ်း၊ၶဝ်ႈပိူၵ်ႇ၊ၶဝ်ႈသၢၼ်၊ၼမ်ႉမၢၵ်ႇၸပိတ်ႉ၊ၼမ်ႉမၼ်းမၢၵ်ႇသၢၼ်ႇလုၼ်ႇၸိူဝ်းၼၼ်ႉသေယဝ်ႉ၊ဢွၼ်ၵၼ်ဢဝ်ႁႆႈၼႃးၶဝ်၊သူၼ်မၢၵ်ႇၸပိတ်ႉၶဝ်၊သူၼ်မၢၵ်ႇသၢၼ်ႇလုၼ်ႇၶဝ်၊ႁိူၼ်းယေးၶဝ်ၸိူဝ်းၼၼ်ႉၶိုၼ်းပၼ်တီႈၶဝ်ၵမ်းလဵဝ်တႃႉႁဝ်း၊” ဝႃႈၼင်ႇၼႆဢေႃႈ။
ၶုၼ်ၸိူဝ်းၼၼ်ႉၵေႃႈဢွၼ်ၵၼ်ႁပ်ႉတုင်းဢဝ်လႄႈဝႃႈ၊ “ႁဝ်းၶႃႈတၵ်းၶိုၼ်းပၼ်ဢေႃႈ။ တၵ်းဢမ်ႇယွၼ်းဢဝ်ၼီႈၵႃႈသင်လႄႈ၊တၵ်းႁဵတ်းၸွမ်းၵႂၢမ်းၸဝ်ႈႁဝ်းဢေႃႈ၊” ဝႃႈၼင်ႇၼႆဢေႃႈ။ မိူဝ်ႈၼၼ်ႉၵဝ်ႁွင်ႉဢဝ်ယဵၸ်ႈပရေႃးႁဵၵ်ႈ တင်းလၢႆမႃးလႄႈၸႂ်ႉႁႂ်ႈၶုၼ်ၸိူဝ်းၼၼ်ႉမႃးတိူင်ႇၵၢဝ်ႇၵတိ၊လွင်ႈဢၼ်ၶဝ်တၵ်းလႆႈႁဵတ်းၸွမ်းၵႃႈၼင်ႇဢၼ်ဝႆႉၵတိၼၼ်ႉၵႃႈတီႈၽၢႆႇၼႃႈယဵၸ်ႈပရေႃးႁဵၵ်ႈၸိူဝ်းၼၼ်ႉဢေႃႈ။-
မိူဝ်ႈၼၼ်ႉၵဝ်ၽႅတ်းသၼ်ႇပိၵ်ႇသိူဝ်ႈၵဝ်ဢၼ်တူပ်ႉဝႆႉၼၼ်ႉလႄႈလၢတ်ႈဝႃႈ၊ “ႁႂ်ႈၽြႃးပဵၼ်ၸဝ်ႈၽႅတ်းသၼ်ႇၶဝ်ၸိူဝ်းဢၼ်ဢမ်ႇႁဵတ်းၸွမ်းၵတိၼႆႉၼၼ်ႉသၼ်ႇဢွၵ်ႇပႅတ်ႈသေၵႃႈတီႈႁိူၼ်းၶဝ်၊ဢိၵ်ႇတင်းၵႃႈတီႈဢုၵ်ႉၸႃႇၶူဝ်းလဵင်းၶဝ်သေၵမ်းလူၺ်ႈ။ ႁႂ်ႈၶဝ်လႆႈၶၢမ်ႇတၢင်းဢၼ်ၽႅတ်းသၼ်ႇၸိူဝ်ႉၼင်ႇၼႆလႄႈပဵၼ်ဢၼ်ပဝ်ႇဢၼ်လၢပ်ႈသေၵမ်းလူၺ်ႈ၊” ဝႃႈၼင်ႇၼႆဢေႃႈ။ ပရိၵ်ႈသၢတ်ႈတင်းသဵင်ႈတင်းလူင်ဢွၼ်ၵၼ်ႁပ်ႉတုင်းဢဝ်လႄႈလၢတ်ႈဝႃႈ၊ “ဢႃမိၼ်ႈ” ဝႃႈၼင်ႇၼႆလႄႈယွင်ႈယေႃး ထႃႇဝရႃႉၽြႃး၊ ဢေႃႈ။ ၶုၼ်တင်းလၢႆၵေႃႈဢွၼ်ၵၼ်ႁဵတ်းၸွမ်းၵႃႈၼင်ႇဢၼ်ၶဝ်ဝႆႉၵတိၼၼ်ႉဢေႃႈ။
ၼႂ်းၸူဝ်ႈၶၢဝ်းဢၼ်ၵဝ်လႆႈၶၢမ်ႇဢဝ်ဢရႃႇမဵဝ်ႉဝုၼ်ႇမိူင်း ယုတႃႉ၊ ၼႆႉၸႃႉၸဵမ်ပီဢၼ်ၸဝ်ႈမုၼ်ယႂ်ႇၶုၼ်ႁေႃၶမ်း ဢႃႇတႃႇၸေႇရိတ်ႉ၊ ၸၢမ်ႇႁၢင်ႈၸၢမ်ႇႁေႃသၢဝ်းပီတေႃႇထိုင်ႁွတ်ႈသၢမ်သိပ်းပၢႆသွင်ပီၼၼ်ႉတဵမ်တဵမ်၊ၵဝ်ဢိၵ်ႇတင်းပီႈဢၢႆႈၼွင်ႉၸၢႆးၵဝ်တင်းလၢႆ ဢမ်ႇလႆႈၵိၼ်ၸရိပ်ႈတၢင်းၵိၼ်ၼႂ်းဢရႃႇမဵဝ်ႉဝုၼ်ႇသိပ်းသွင်ပီဢေႃႈ။-
မဵဝ်ႉဝုၼ်ႇဢွၼ်တၢင်းၸိူဝ်းၼၼ်ႉဢွၼ်ၵၼ်ၶၢမ်ႇဢဝ်တၢင်းဢၼ်ၵူၼ်းတင်းလၢႆလဵင်ႉလူၶဝ်လူၺ်ႈၶဝ်ႈမုၼ်း၊ၼမ်ႉမၢၵ်ႇၸပိတ်ႉတင်းငိုၼ်းသီႇသိပ်းၵျၢပ်ႈၵူႈဝၼ်းၵူႈဝၼ်းဢေႃႈ။ ၶႃႈၶဝ်ၵူၼ်းၶဝ်တင်းလၢႆၵေႃႈ ဝႆႉဢႃႇၼႃႇၵႃႈၼိူဝ်ၵူၼ်းတင်းလၢႆလူးၵွၼ်ႇဢေႃႈ။ ၵဝ်ၸမ်ႉ၊ဢမ်ႇႁဵတ်းၸိူဝ်ႉၼင်ႇၼၼ်၊ၵွပ်ႈပိူဝ်ႈဢၼ်ၵဝ်ၵူဝ်ႁႄၽြႃးပဵၼ်ၸဝ်ႈဢေႃႈ။-
ၵဝ်ဢဝ်ဢဵၼ်ႁႅင်းၵဝ်ၵႃႈမီးၸႂ်ႉၼႂ်းတၢင်းဢၼ်တႄႇႁဵတ်းလမ်းဝဵင်းလႄႈဢမ်ႇသိုဝ်ႉဢဝ်ႁႆႈၼႃးလႃးလႃး။ ၶဝ်ၸိူဝ်းဢၼ်ႁဵတ်းဢၼ်ပွင်ပုၼ်ႈၵဝ်ၼၼ်ႉတင်းသဵင်ႈတင်းလူင်ဢွၼ်ၵၼ်ၽွမ်ႉႁူမ်ႈၸွႆႈထႅမ်ပွင်ႁဵတ်းလမ်းဝဵင်းၵူၺ်းဢေႃႈ။-
ၵူၼ်းမဵဝ်း ယုတႃႉ၊ လႂ်တင်းၶုၼ်ဢၼ်ပွင်ၵၢၼ်ၸိူဝ်းဢၼ်ၵိၼ်ၵႃႈတီႈၽိူၼ်ၵဝ်ယူႇသေႇသေႇၼၼ်ႉမီးပၢၵ်ႇပၢႆႁႃႈသိပ်းၵေႃႉဢေႃႈ။ ၼွၵ်ႈသေၶဝ်ၸိူဝ်းၼၼ်ႉၵဝ်သမ်ႉယင်းလႆႈလဵင်ႉလူၶႅၵ်ႇၵူၼ်းတၢင်ႇၸိူဝ်ႉတၢင်ႇမဵဝ်းဢၼ်ယူႇႁိမ်းႁွမ်းလႄႈမႃးၸူးတီႈၵဝ်ၸိူဝ်းၼၼ်ႉလူးၵွၼ်ႇဢေႃႈ။-
ၼႂ်းယေႈဝၼ်းယေႈဝၼ်းလႆႈႁႅမ်ဝူဝ်းယေႈတူဝ်၊သူဝ်းဢၼ်ပီးလီမၼ်းလီႁူၵ်းတူဝ်၊ဢိၵ်ႇတင်းၵႆႇၼမ်ၼႃႇၼၼ်ႉလႆႈမႄးႁႅၼ်းပုၼ်ႈၶဝ်ဢေႃႈ။ ၼွၵ်ႈသေၼၼ်ႉသိပ်းဝၼ်းယေႈပွၵ်ႈၵဝ်ႁႅၼ်းတႄႇႁႅၼ်းတမ်းပၼ်ၼမ်ႉမၢၵ်ႇၸပိတ်ႉၼမ်ၼႃႇဢေႃႈ။ ပိၵ်ႉသမ်ႉၼမ်ထၢၼ်ႇၼၼ်ႉသေၵေႃႈၵဝ်ဢမ်ႇယွၼ်းဢဝ်ၸရိပ်ႈၵႃႈတီႈမဵဝ်ႉဝုၼ်ႇ၊ၵွပ်ႈပိူဝ်ႈၵၢၼ်တၢင်းႁဵတ်းဢၼ်ၼၵ်းၼႃႇဢၼ်မီးယူႇၵႃႈၼိူဝ်ၵူၼ်းတင်းလၢႆၼၼ်ႉဢေႃႈ။
ၽြႃးပဵၼ်ၸဝ်ႈတီႈၶႃႈ။ ၶႃႈၸဝ်ႈသူးတွင်းတီႈၸဝ်ႈႁဝ်းတီႈၶႃႈဢေႃႈ။ ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းၵႃႈဢၼ်ၶႃႈၸဝ်ႈႁဵတ်းပုၼ်ႈၵူၼ်းတင်းလၢႆၸိူဝ်းၼႆႉလႄႈႁဵတ်းၵျေးၸူးတီႈၵဝ်ၶႃႈသေၵမ်းတီႈၶႃႈ။
မိူဝ်ႈၼၼ်ႉ သၼ်ႇပႃးလတ်ႉ၊တေႃႇၽိယႃႉ၊ၵေႇသိမ်ႇ၊ ဢိၵ်ႇတင်းရၢၼ်ႇသူႇႁဝ်းဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉငိၼ်းလွင်ႈတၢင်းဢၼ်ႁဝ်းတႄႇႁဵတ်းလမ်းဝဵင်းလႄႈပိၵ်ႉသမ်ႉဢမ်ႇပႆႇလႆႈပူၵ်းၵင်ႈမႂ်ၽၵ်းတူဝဵင်းသေၵေႃႈလမ်းဝဵင်းဢမ်ႇမီးႁူးပွင်ႇႁူးပိဝ်သေဢိတ်းယဝ်ႉၼၼ်ႉဢေႃႈ။-
ပိူဝ်ႈၼႆလႄႈ သၼ်ႇပႃးလတ်ႉ၊ တင်း ၵေႇသိမ်ႇ၊ သင်ႇလၢတ်ႈမႃးတီႈၵဝ်လႄႈဝႃႈ၊ “မႃးသေၵမ်း။ ႁူပ်ႉထူပ်းၵၼ်ၵႃႈတီႈဝၢၼ်ႈၼိုင်ႈဝၢၼ်ႈလႂ်ၵႃႈၼႂ်းပၢင်ႇႁူၺ်ႈ ဢေႃးၼေႃး၊ တႃႉႁဝ်း၊” ဝႃႈၼင်ႇၼႆဢေႃႈ။ ၶဝ်သွင်ၵေႃႉမီးတၢင်းၵျၢမ်ႇတၢင်းပွင်ဢၼ်ၶႂ်ႈႁဵတ်းလွင်ႈဢမ်ႇလီတီႈၵဝ်ဢေႃႈ။-
ၵဝ်ၵေႃႈ၊ၶိုၼ်းပွႆႇၸႂ်ႉၵူၼ်းၵႂႃႇၸူးတီႈၶဝ်သွင်ၵေႃႉၼၼ်ႉလႄႈဝႃႈ၊ “ၵဝ်မီးၼႃႈၵၢၼ်ဢၼ်ယႂ်ႇၼႃႇလႄႈဢမ်ႇတၼ်းလူင်းၵႂႃႇၸူးတီႈသူ။ တေႁႂ်ႈၵဝ်လူင်းၵႂႃႇႁူပ်ႉထူပ်းသူလႄႈႁႂ်ႈၼႃႈၵၢၼ်ၵဝ်ၵိုတ်းသဝ်းၵႂႃႇလႆႈၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ၶဝ်သွင်ၵေႃႉသင်ႇလၢတ်ႈမႃးတီႈၵဝ်ထူၼ်ႈထိုင်သီႇပွၵ်ႈယဝ်ႉလႄႈၵဝ်ၵေႃႈၶိုၼ်းလၢတ်ႈၵႂႃႇမိူၼ်ၸိူဝ်ႉၼင်ႇပွၵ်ႈဢွၼ်တၢင်းၼၼ်ႉဢေႃႈ။
ပွၵ်ႈထူၼ်ႈတီႈႁႃႈၼၼ်ႉ သၼ်ႇပႃးလတ်ႉ၊ ပွႆႇၸႂ်ႉၶႃႈမၼ်းမႃးမိူၼ်ၸိူဝ်ႉၼင်ႇပွၵ်ႈဢွၼ်တၢင်းၼၼ်ႉလႄႈပွၵ်ႈၼႆႉၸမ်ႉ၊ၽိုၼ်လိၵ်ႈဢၼ်ၶႃႈမၼ်းပႃးမႃးၼၼ်ႉပဵၼ်လိၵ်ႈဢၼ်ၽုၺ်ႇဝႆႉၼၼ်ႉဢေႃႈ။-
ၶေႃႈၵႂၢမ်းၼႂ်းလိၵ်ႈၼၼ်ႉဝႃႈၸမ်ႉ၊ “ ၵေႇသိမ်ႇ၊ မွၵ်ႇလၢတ်ႈတီႈၵဝ်လွင်ႈဢၼ်ၵူၼ်းၵူႈၸိူဝ်ႉၵူႈမဵဝ်းဢွၼ်ၵၼ်လၢတ်ႈလွင်ႈဢၼ်မႂ်း၊ဢိၵ်ႇတင်းၵူၼ်းမဵဝ်း ၵျူး၊ တင်းလၢႆဢၢင်ႈတၵ်းလုၵ်ႉၽိုၼ်ႉမိူင်းဢေႃႈ။ ၵွပ်ႈပိူဝ်ႈလွင်ႈၼႆႉလႄႈသူဢွၼ်ၵၼ်တႄႇႁဵတ်းလမ်းဝဵင်းလႄႈၶိုင်ပွင်ႁႂ်ႈမႂ်းပဵၼ်ၶုၼ်ႁေႃၶမ်းဢေႃႈ။-
ၼင်ႇၼၼ်လႄႈမႂ်းၶၢၼ်းပရေႃးၽႅတ်ႈ တင်းလၢႆဝႆႉ ႁႂ်ႈလႆႈႁေႃးလၢတ်ႈၶၢဝ်ႇၵႃႈၼႂ်းဝဵင်း ယေႇရုသလႅမ်ႇ၊ လွင်ႈဢၼ်ဝႃႈ၊မႂ်းပဵၼ်ၶုၼ်ႁေႃၶမ်းမိူင်း ယုတႃႉ၊ ယဝ်ႉၼၼ်ႉဢေႃႈ။ မီးတီႈဢၼ်တၵ်းလႆႈလဝ်ႈလၢတ်ႈထိုင်တီႈၸဝ်ႈမုၼ်ယႂ်ႇၶုၼ်ႁေႃၶမ်းလႄႈႁႂ်ႈမႂ်းမႃးတိူင်ႇပၢင်ႇၵၼ်တင်းၵဝ်၊” ဝႃႈၼင်ႇၼႆဢေႃႈ။
ၵဝ်ပွႆႇၸႂ်ႉၵူၼ်းၵႂႃႇၶိုၼ်းလၢတ်ႈတီႈမၼ်းလႄႈဝႃႈ၊ “ၵႂၢမ်းဢၼ်မႂ်းလၢတ်ႈၼၼ်ႉဢမ်ႇမၢၼ်ႇဢမ်ႇမႅၼ်ႈသေၶေႃႈသေၵမ်း။ မႂ်းၵျၢမ်ႇပွင်ၵႃႈၼႂ်းၸႂ်လႄႈဝႃႈၵူၺ်းဢေႃႈ၊” ဝႃႈၼင်ႇၼႆဢေႃႈ။
ၶဝ်ၼၼ်ႉလွၵ်ႇငိုတ်ႈႁဝ်းႁႂ်ႈၵၢၼ်ငၢၼ်းႁဝ်းၵိုတ်းၵႂႃႇသဝ်းၵႂႃႇၵူၺ်းဢေႃႈ။ ၵဝ်သူးတွင်းလႄႈဝႃႈ၊ “ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈႁႂ်ႈႁႅင်းမိုဝ်းၶႃႈၸဝ်ႈယဵင်ႈၶႅၼ်းႁႅင်းယႂ်ႇမႃးသေၵမ်းလူၺ်ႈတီႈၶႃႈ၊” ဝႃႈၼင်ႇၼႆဢေႃႈ။
ယၢမ်းမိူဝ်ႈၼၼ်ႉၵဝ်ၵႂႃႇလႄႇၵႃႈတီႈႁိူၼ်း သေႇမႃႇယႃႉ၊ လုၵ်ႈၸၢႆး တေႇလႃႇယႃႉ၊ ဢၼ်ပဵၼ်လၢၼ်ၸၢႆး မႁေႇတႃႉပေႇလႃႉ၊ တီႈဢၼ်မၼ်းတဵတ်ႇမႅပ်းယူႇၼၼ်ႉဢေႃႈ။ မၼ်းလၢတ်ႈတီႈၵဝ်လႄႈဝႃႈ၊ “ႁဝ်းသွင်ၵေႃႉတၵ်းလႆႈၵႂႃႇတဵတ်ႇမႅပ်းယူႇလူၺ်ႈၵၼ်ၵႃႈၼႂ်းလုၵ်းၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉသေလႄႈဢိုတ်းၽၵ်းတူဝႆႉဢေႃႈ။ လွင်ႈမၼ်းၸမ်ႉ၊ၶဝ်တၵ်းဢွၼ်ၵၼ်မႃးဢဝ်ၸဝ်ႈႁဝ်းတၢႆၼႂ်းၶိင်ႇၵၢင်ၶိုၼ်းဢေႃႈ၊” ဝႃႈၼင်ႇၼႆဢေႃႈ။
ၵဝ်ၵေႃႈၶိုၼ်းလၢတ်ႈလႄႈဝႃႈ၊ “ၵဝ်ဢမ်ႇၸႂ်ႈၵူၼ်းၸႃႉဢၼ်ၼီပၢႆႈတဵတ်ႇမႅပ်းၼၼ်ႉ။ မႂ်းထၢင်ႇၵဝ်တေပၢႆႈတဵတ်ႇပၢႆႈမႅပ်းၵႃႈၼႂ်းၵျွင်းပိၵ်ႈမၢၼ်ႇၸဝ်ႈႁႂ်ႈဢသၢၵ်ႈလႆႈၵတ်းယဵၼ်ၶျၢမ်းသႃႇၼၼ်ႉႁိုဝ်း။ ၵဝ်ဢမ်ႇႁဵတ်းၵူၺ်း၊” ဝႃႈၼင်ႇၼႆဢေႃႈ။
ၵဝ်ႁုသၢႆငၢႆလွင်ႈဢၼ်ၽြႃးပဵၼ်ၸဝ်ႈဢမ်ႇမီးဢမိင်ႉတီႈ သေႇမႃႇယႃႉ၊ မၼ်းပဵၼ်ၵေႃႉဢၼ် တေႃႇၽိယႃႉ၊ တင်း သၼ်ႇပႃးလတ်ႉ၊ ၸၢင်ႈငႃႁႂ်ႈမၼ်းမႃးၸူဝ်းဢဝ်ၵဝ်ဢေႃႈ။-
လွင်ႈဢၼ်ၸၢင်ႈငႃၼၼ်ႉပဵၼ်လွင်ႈဢၼ်လွၵ်ႇငိုတ်ႈၵဝ်ႁႂ်ႈၽိတ်းပိူင်ႈသေယဝ်ႉ၊ၶဝ်တၵ်းမီးဢၶႂၢင်ႉဢၼ်တၵ်းလႆႈလၢတ်ႈဢၼ်ဢမ်ႇလီဢမ်ႇငၢမ်းလႄႈတၵ်းသႄႉသွမ်းၵဝ်ဢေႃႈ။
ၵဝ်သူးတွင်းလႄႈဝႃႈ၊ “ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈမၢတ်ႈတွင်းတၢင်းဢၼ် တေႃႇၽိယႃႉ၊ တင်း သၼ်ႇပႃးလတ်ႉ၊ ႁဵတ်းၼၼ်ႉသေလႄႈပၼ်တၢမ်ႇတီႈၶဝ်ၸွမ်းလူၺ်ႈတၢင်းႁဵတ်းၶဝ်ၼၼ်ႉသေၵမ်းတီႈၶႃႈ။ ၶႅၼ်းတေႃႈမၢတ်ႈတွင်းလွင်ႈဢၼ် ၼေႃႇတိ၊ ပရေႃးၽႅတ်ႈမႄႈယိင်း တင်းပရေႃးၽႅတ်ႈၸိူဝ်းၼၼ်ႉလႆႈလွၵ်ႇငိုတ်ႈၶႃႈၸဝ်ႈၼၼ်ႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ၵၢၼ်ငၢၼ်းဢၼ်တႄႇႁဵတ်းလမ်းဝဵင်းၼၼ်ႉလႆႈႁဵတ်းႁႃႈသိပ်းပၢႆသွင်ဝၼ်းတဵမ်တဵမ်၊မၼ်းယဝ်ႉတူဝ်ႈလီငၢမ်းဝၼ်းတီႈသၢဝ်းႁႃႈ၊လိူၼ် ဢေႇလုလႃႉ၊ ၼၼ်ႉဢေႃႈ။-
မိူဝ်ႈဢၼ်ရၢၼ်ႇသူႇႁဝ်းၸိူဝ်းဢၼ်ပဵၼ်ၵူၼ်းတၢင်ႇၸိူဝ်ႉတၢင်ႇမဵဝ်းဢၼ်မီးယူႇလဵပ်ႈႁွပ်ႈႁဝ်းၼၼ်ႉလႆႈငိၼ်းလွင်ႈမၼ်းၸိုင်၊ၵူဝ်ႁႄလႄႈဢွၼ်ၵၼ်မီးတၢင်းဢၼ်ၸႂ်လုၸႂ်ဢွၼ်ႇၵႂႃႇ၊ၵွပ်ႈပိူဝ်ႈဢၼ်ၶဝ်ႁုသၢႆငၢႆလွင်ႈဢၼ်ၵၢၼ်ငၢၼ်းၼၼ်ႉယဝ်ႉတူဝ်ႈလူၺ်ႈတၢင်းၸွႆႈတၢင်းထႅမ်ၽြႃးပဵၼ်ၸဝ်ႈႁဝ်းၼၼ်ႉဢေႃႈ။
ၼႂ်းၶိင်ႇၸူဝ်ႈၶၢဝ်းၼၼ်ႉမူးမၢတ်ႈၽွင်းမိူင်း ယုတႃႉ၊ တင်းလၢႆၸၢင်ႈတႅမ်ႈလိၵ်ႈမႅတ်ႈတႃႇၵႂႃႇၸူးတီႈ တေႃႇၽိယႃႉ၊ ၼမ်ၼႃႇလႄႈလိၵ်ႈမၼ်းၵေႃႈမႃးတီႈၶဝ်ၼမ်ၼႃႇဢေႃႈ။-
ၵူၼ်း ယုတႃႉ၊ ၼမ်ၼႃႇၶၢမ်ႇသဵတ်ႈၸႃႇတီႈ တေႃႇၽိယႃႉ၊ ၵွပ်ႈပိူဝ်ႈဢၼ်မၼ်းၼၼ်ႉပဵၼ်လုၵ်ႈၶူၺ် သေႇၶၼိ၊ လုၵ်ႈၸၢႆး ဢႃႇရႃႉ၊ ၼၼ်ႉၵူၺ်းဢမ်ႇၵႃး၊လုၵ်ႈၸၢႆးမၼ်း ယေႃးႁၼၼ်ႇ၊ သမ်ႉၵူပ်ႉၵူႈပဵၼ်ႁိူၼ်းလူၺ်ႈၵၼ်တင်းလုၵ်ႈယိင်း မေႇသုလမ်ႇ၊ လုၵ်ႈၸၢႆး ပေႇရၶိ၊ ဢေႃႈ။-
ၶဝ်ၸိူဝ်းၼၼ်ႉၸင်ႇဢွၼ်ၵၼ်မႃးလၢတ်ႈၼႄၵဝ်လွင်ႈတၢင်းဢၼ်လီဢၼ်ငၢမ်းဢၼ် တေႃႇၽိယႃႉ၊ ႁဵတ်းၼၼ်ႉသေလႄႈ၊သမ်ႉဢဝ်ၵႂၢမ်းဢၼ်ၵဝ်လၢတ်ႈၼၼ်ႉၵႂႃႇၶိုၼ်းလၢတ်ႈတီႈမၼ်းဢေႃႈ။ မၼ်းၵေႃႈၵႆႉတႅမ်ႈလိၵ်ႈဢၼ်လွၵ်ႇငိုတ်ႈပၼ်မႃးတီႈၵဝ်ႁႂ်ႈၵဝ်ၵူဝ်ႁႄၼၼ်ႉဢေႃႈ။
တေႃႈလဵဝ်ၼႆႉၸမ်ႉ၊လမ်းဝဵင်းယဝ်ႉတူဝ်ႈယဝ်ႉ။ ၽၵ်းတူတင်းလၢႆၵေႃႈၵဝ်ပူၵ်းတင်ႈဝႆႉယဝ်ႉလႄႈၶၢၼ်းၵူၼ်းပႂ်ႉၽၵ်းတူလႂ်၊ၵူၼ်းမေႃႁဵတ်းၵႂၢမ်းလႂ်၊တင်းၵူၼ်းမဵဝ်း လေႇဝိ၊ ၸိူဝ်းဢၼ်ပွင်ထၢမ်းၼႃႈၵၢၼ်ၶဝ်ၼၼ်ႉယဝ်ႉယဝ်ႉဢေႃႈ။-
ၵဝ်ၶၢၼ်းၵူၼ်းသွင်ၵေႃႉႁႂ်ႈဢုပ်ႉပိူင်ႇဢုပ်ႉထိင်းဝဵင်း ယေႇရုသလႅမ်ႇ၊ ဢေႃႈ။ ၶဝ်ၼၼ်ႉပဵၼ် ႁႃႇၼၼိ၊ ၼွင်ႉၸၢႆးၵဝ်တင်း ႁႃႇၼၼိယႃႉ၊ ၵေႃႉဢၼ်ဢုပ်ႉထိင်းတိူၵ်ႈတီႈတိုၵ်းသိုၵ်းၼၼ်ႉဢေႃႈ။ ႁႃႇၼၼိယႃႉ၊ ပဵၼ်ၵေႃႉဢၼ်ရူဝ်ႇသေႇၵူဝ်ယမ်ၽြႃးပဵၼ်ၸဝ်ႈလိူဝ်တွၼ်းၼႃႇသေၵူၼ်းတင်းလၢႆလႄႈလီဝႆႉၸႂ်လႆႈၼၼ်ႉဢေႃႈ။-
ၵဝ်သင်ႇလၢတ်ႈဝႆႉတီႈၶဝ်လႄႈဝႃႈ၊ “ၸူဝ်ႈဢၼ်ၵၢင်ဝၼ်းဢမ်ႇပႆႇဢွၵ်ႇလႄႈလႅတ်ႇဢမ်ႇပႆႇမႆႈၸိုင်၊ယႃႇပေၽုၺ်ႇပိုတ်ႇၽၵ်းတူဝဵင်း ယေႇရုသလႅမ်ႇ၊ ၸိူဝ်းၼၼ်ႉသမ်ႉတၵ်းလႆႈဢိုတ်းႁပ်းဝႆႉလႄႈသွတ်ႇၵိူၼ်ႇၽၵ်းတူၸိူဝ်းၼၼ်ႉၸူဝ်ႈဢၼ်ၵူၼ်းပႂ်ႉတင်းလၢႆဢမ်ႇပႆႇသိမ်းၵၢၼ်ၶိင်ႇၵၢင်ဝၼ်းတူၵ်းၼၼ်ႉဢေႃႈ။ ႁႂ်ႈၵူၼ်းဝဵင်း ယေႇရုသလႅမ်ႇ၊ တင်းလၢႆဝႆႉပဵၼ်မုၵ်ႉပဵၼ်ၸုမ်းလႄႈႁႂ်ႈၵမ်ႈၽွင်ႈပႂ်ႉတီႈၽႂ်တီႈမၼ်းလႄႈႁႂ်ႈၵမ်ႈၽွင်ႈပႂ်ႉတီႈႁိမ်းႁွမ်းႁိူၼ်းၽႂ်ႁိူၼ်းမၼ်းတႃႉ၊” ဝႃႈၼင်ႇၼႆဢေႃႈ။
ဝဵင်း ယေႇရုသလႅမ်ႇ၊ ပဵၼ်ဝဵင်းယႂ်ႇဝဵင်းၵႂၢင်ႈသေၵေႃႈ၊ၵူၼ်းဢၼ်ယူႇၵႃႈၼႂ်းမၼ်းယင်းၵေႇမၢင်လႄႈဢမ်ႇပႆႇလႆႈတႄႇႁဵတ်းႁိူၼ်းၶဝ်ယေးၶဝ်လူးၵွၼ်ႇဢေႃႈ။-
မိူဝ်ႈၼၼ်ႉၽြႃးပဵၼ်ၸဝ်ႈႁႂ်ႈပဵၼ်မႃးၼႂ်းႁူဝ်ၸႂ်ၵဝ်ႁႂ်ႈၵဝ်ၸုတုမ်ၵူၼ်းဝၢၼ်ႈၵူၼ်းမိူင်းတင်းလၢႆ တင်းမူးမၢတ်ႈၽွင်းမိူင်းလႂ်၊ၶုၼ်ဢၼ်ပွင်ၵၢၼ်လႂ်၊မႃးၼပ်ႉဢၢၼ်ႇၸရၢင်းၵူၼ်းၸွမ်းၼင်ႇၶိူဝ်းႁိူၼ်းၽႂ်ၶိူဝ်းႁိူၼ်းမၼ်းၼၼ်ႉဢေႃႈ။ ၵဝ်ထူပ်းႁၼ်ၸရၢင်းၶဝ်ၸိူဝ်းဢၼ်ပွၵ်ႈၶိုၼ်းမႃးမိူဝ်ႈဢွၼ်တၢင်းၼၼ်ႉလႄႈၵႂၢမ်းဢၼ်ၵဝ်ထူပ်းႁၼ်တႅမ်ႈဝႆႉမီးယူႇၵႃႈၼႂ်းလိၵ်ႈၸရၢင်းၼၼ်ႉဝႃႈၸမ်ႉ၊
ၵူၼ်းဢၼ်လႆႈၶၢမ်ႇတၢင်းဢၼ်တိဢဝ်သိမ်းဢဝ်ၵႂႃႇၼၼ်ႉဢၼ်ၼပ်ႉဢၢၼ်ႇၼမ်ၼႃႇလူင်လၢင်လႆႈဢွၼ်ၵၼ်ဢွၵ်ႇသေၵႃႈတီႈသိုင်ႇၸိုင်ႈဝၢၼ်ႈမိူင်း ပႃႇပုလုၼ်ႇ၊ မႃးလႄႈၶိုၼ်းမိူဝ်းၵႂႃႇၵႃႈတီႈဝဵင်း ယေႇရုသလႅမ်ႇ၊ တင်းမိူင်း ယုတႃႉ၊ ၵႂႃႇၸူးတီႈဝၢၼ်ႈၽႂ်ဝၢၼ်ႈမၼ်းဢေႃႈ။ ၸိူဝ်ႉၶိူဝ်းၵူၼ်းႁိူၼ်းၵူၼ်းယေးၶဝ်ၼၼ်ႉလႆႈတူၵ်းၵႅၼ်းၵႃႈၼႂ်းမိူင်း ပႃႇပုလုၼ်ႇ၊ ၸဵမ်မိူဝ်ႈၸူဝ်ႈပၢၼ်ၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ ၼၼ်ႉဢေႃႈ။-
ၵူၼ်းဢၼ်ပဵၼ်ၵႄႇပဵၼ်ႁူဝ်ၶဝ်တင်းလၢႆၸမ်ႉ၊ပဵၼ် ၸေႇရုပႃႉပေႇလႃႉ၊ယေႃးသု၊ၼေႇႁမိ၊ဢႃႇၸရိ၊ရႃႇမိ၊ၼႃႇႁမႃႇၼိ၊မေႃႇတၵႄး၊ပိလသၼ်ႇ၊မိၸပေႇရိတ်ႈ၊ပိၵဝေႇ၊ၼေႇႁုမ်ႇ၊ပႃႇၼႃႇ၊ ၸိူဝ်းၼၼ်ႉဢေႃႈ။
ၸရၢင်းဢၼ်ၼပ်ႉဢၢၼ်ႇၼႂ်းလုၵ်ႈၼႂ်းလၢၼ်ၶဝ်ၸိူဝ်းဢၼ်ၶၢမ်ႇႁဵတ်းၶႃႈၸႂ်ႉၼႂ်းၵျွင်းပိၵ်ႈမၢၼ်ႇၸဝ်ႈတင်းၶႃႈ သေႃးလမုၼ်ႇ၊ ဢၼ်လႆႈပွၵ်ႈၶိုၼ်းမႃးသေတၢင်းဢၼ်ပိူၼ်ႈတိဢဝ်သိမ်းဢဝ်ၵႂႃႇမီးသၢမ်ပၢၵ်ႇၵဝ်ႈသိပ်းသွင်ၵေႃႉဢေႃႈ။
ဝုၼ်ႇလူင်မဵဝ်း ၵျူး၊ ၶဝ်ၼၼ်ႉၸီႇယၢင်ႇလႄႈဝႃႈ၊ “ၸူဝ်ႈဢၼ်ယဵၸ်ႈပရေႃးႁဵၵ်ႈဢၼ်ပႃးဢုရိမ်းတင်းႀုမိမ်း ၸီႇယၢင်ႇလႆႈၼၼ်ႉယင်းဢမ်ႇပႆႇပေႃႇမႃးၼၼ်ႉၸိုင်၊ၶဝ်ဢမ်ႇလႆႈၵိၼ်တၢင်းၵိၼ်တၢင်းၶူပ်းဢၼ်သၢၵ်ႈလူႇတီႈၽြႃးပဵၼ်ၸဝ်ႈယဝ်ႉၼၼ်ႉ၊” ဝႃႈၼင်ႇၼႆဢေႃႈ။
ၼင်ႇၼၼ်လႄႈယဵၸ်ႈပရေႃးႁဵၵ်ႈလႂ်၊ၵူၼ်း လေႇဝိ၊ လႂ်၊ၵူၼ်းပႂ်ႉၵျွင်းပိၵ်ႈမၢၼ်ႇၸဝ်ႈလႂ်၊ၵူၼ်းမေႃႁဵတ်းၵႂၢမ်းလႂ်၊ၵူၼ်းဝၢၼ်ႈၵူၼ်းမိူင်းလႂ်၊ၶႃႈၵျွင်းပိၵ်ႈမၢၼ်ႇၸဝ်ႈလႂ်ဢၼ်ပဵၼ်ၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢွၼ်ၵၼ်ယူႇသဝ်းၵႃႈတီႈဝၢၼ်ႈၽႂ်ဝဵင်းမၼ်းၵႃႈၼႂ်းမိူင်း ယုတႃႉ၊ ဢေႃႈ။
မိူဝ်ႈဢၼ်ႁွတ်ႈထိုင်လိူၼ်တီႈၸဵတ်းၼၼ်ႉၵူၼ်းမဵဝ်း ဢိသရေး၊ တင်းလၢႆတူၵ်းတီႈတူၵ်းလႅၼ်ၵႃႈၼႂ်းဝၢၼ်ႈၼႂ်းဝဵင်းတီႈယူႇၶဝ်ယဝ်ႉဢေႃႈ။ ၼႂ်းလိူၼ်ၸဵတ်းမႂ်ႇဝၼ်းၼိုင်ႈၼၼ်ႉၶဝ်ၵႃႈမီးတင်းသဵင်ႈတင်းလူင်ဢွၼ်ၵၼ်မႃးၸုၵၼ်တုမ်ၵၼ်ၵႃႈတီႈၼႂ်းၵၢင်ပၢင်ႇဢၼ်မီးၽၢႆႇၼႃႈ ၽၵ်းတူၼမ်ႉ၊ ၼၼ်ႉဢေႃႈ။ ၶဝ်ဢွၼ်ၵၼ်လဝ်ႈယွၼ်းႁႂ်ႈယဵၸ်ႈပရေႃးႁဵၵ်ႈ ဢေးၸရႃႇ၊ သြႃႇမေႃၵျၢမ်းၼၼ်ႉဢဝ်ၵျၢမ်းလိၵ်ႈပိင်းၺၢပ်ႈတြႃး မူဝ်းသေႇ၊ ဢၼ် ထႃႇဝရႃႉၽြႃး၊ သင်ႇလၢတ်ႈဝႆႉတီႈၵူၼ်းမဵဝ်း ဢိသရေး၊ မႃးၼၼ်ႉဢေႃႈ။-
ယဵၸ်ႈပရေႃးႁဵၵ်ႈ ဢေးၸရႃႇ၊ ဢဝ်ၵျၢမ်းလိၵ်ႈတြႃးၼၼ်ႉမႃးၵႃႈတီႈၽၢႆႇၼႃႈပရိၵ်ႈသၢတ်ႈၵူၼ်းၸၢႆး၊မႄႈယိင်း၊လုၵ်ႈဢွၼ်ႇၸိူဝ်းဢၼ်ထွမ်ႇလႄႈႁုလႆႈၼၼ်ႉဢေႃႈ။-
မၼ်းႁေႃးၵျၢမ်းတြႃးၼၼ်ႉၵႃႈၼႂ်းၵၢင်ပၢင်ႇၵႃႈတီႈၽၢႆႇၼႃႈ ၽၵ်းတူၼမ်ႉ၊ ၸႃႉၸဵမ်ၶိင်ႇၵၢင်ၼႂ်တေႃႇထိုင်ႁွတ်ႈၶိင်ႇၵၢင်ဝၼ်းတဵင်ႈလႄႈၵူၼ်းတင်းသဵင်ႈတင်းလူင်ဢွၼ်ၵၼ်ပႃးၸႂ်ပႃးၶေႃးထွမ်ႇငိၼ်းဢဝ်ဢေႃႈ။-
ဢေးၸရႃႇ၊ ၸုၵ်းယူႇၵႃႈၼိူဝ်ပလၢင်ႇမႆႉၸိင်တီႈဢၼ်ၶဝ်ႁဵတ်းဝႆႉပုၼ်ႈဢၼ်ႁေႃးတြႃးၼၼ်ႉဢေႃႈ။ ၶဝ်ၸိူဝ်းဢၼ်ၸုၵ်းယူႇၽၢႆႇၶႂႃမၼ်းပဵၼ် မတ်ႉတိသိ၊သေႇမႃႉ၊ဢၼႃႇယႃႉ၊ဢုရိယႃး၊ႁိလၶိ၊ တင်း မႃႇသေႇယႃႉ၊ ဢေႃႈ။ ၶဝ်ၸိူဝ်းဢၼ်ၸုၵ်းယူႇၽၢႆႇသၢႆႉမၼ်းပဵၼ် ပေႇတႃႇယႃႉ၊မိသေႇလႃႉ၊မႃႇလၶိယႃႉ၊ႁႃႇသုမ်ႇ၊ႁႃႇသႃႉပတၼႃႉ၊ၸႃႇၶရိ၊ တင်း မေႇသုလမ်ႇ၊ ဢေႃႈ။
ၸွမ်းၼင်ႇဢၼ် ဢေးၸရႃႇ၊ ၸုၵ်းယူႇၵႃႈၼိူဝ်ပလၢင်ႇသုင်ႁႂ်ႈပူၼ်ႉၵူၼ်းတင်းလၢႆၼၼ်ႉၸိုင်၊ၶဝ်ဢွၼ်ၵၼ်ယႅၵ်ႉတူၺ်းမၼ်းယူႇဢေႃႈ။ မိူဝ်ႈဢၼ် ဢေးၸရႃႇ၊ ၽုၺ်ႇၵျၢမ်းလိၵ်ႈၼၼ်ႉၶဝ်ဢွၼ်ၵၼ်လုၵ်ႉၸုၵ်းၵမ်းလဵဝ်ဢေႃႈ။-
ဢေးၸရႃႇ၊ လၢတ်ႈဝႃႈ၊ “ယွင်ႈယေႃး ထႃႇဝရႃႉၽြႃး၊ ၽြႃးပဵၼ်ၸဝ်ႈဢၼ်ယႂ်ႇမျၢတ်ႈၼႃႇဢေႃႈ၊” ဝႃႈၼင်ႇၼႆလႄႈ၊ ၵူၼ်းတင်းသဵင်ႈတင်းလူင်ဢွၼ်ၵၼ်ယုၵ်ႉမိုဝ်းၶဝ်သေလႄႈႁပ်ႉတုင်းဢဝ်လႄႈဝႃႈ၊ “ဢႃမိၼ်ႈ။ ဢႃမိၼ်ႈ” ဝႃႈၼင်ႇၼႆလႄႈၵူမ်ႈႁူဝ်ၶုပ်ႉမူပ်ႇၸပ်းတီႈလိၼ်ယူႇသေလႄႈဝႆႈသႃ ထႃႇဝရႃႉၽြႃး၊ ဢေႃႈ။
ၶဝ်ဢွၼ်ၵၼ်လုၵ်ႉၸုၵ်းယူႇတီႈၽႂ်တီႈမၼ်းသေယဝ်ႉ၊ၵူၼ်း လေႇဝိ၊ ဢၼ်ပဵၼ် ယေႇသွႃႇ၊ပႃႇၼီႇ၊သေႇရၽိ၊ယႃႇမိၼ်ႇ၊ဢၵ်ႉၵုပ်ႉ၊သပ်ႉပသေး၊ႁူဝ်းတိယႃႉ၊မႃႇသေႇယႃႉ၊ၵေႇလိတႃႉ၊ဢႃႇၸရိ၊ယေႃးၸပတ်ႉ၊ႁႃႇၼၼ်ႇ၊ပေႇလႃႇယႃႉ၊ ၸိူဝ်းၼၼ်ႉဢွၼ်ၵၼ်ၽုၺ်ႇၼႄလၢတ်ႈၼႄဢၼၢၵ်ႈဢထိၵ်ႈပႄႇပိင်းၺၢပ်ႈတြႃးတီႈၵူၼ်းတင်းလၢႆဢေႃႈ။-
ၶဝ်ပျၢၼ်ႇၵႂၢမ်းပၼ်လႄႈၽုၺ်ႇဢွၵ်ႇလၢတ်ႈၼႄဢထိၵ်ႈပႄႇမၼ်းႁႂ်ႈၵူၼ်းတင်းလၢႆႁုထွမ်ႇဢေႃႈ။
မိူဝ်ႈဢၼ်ၵူၼ်းတင်းလၢႆငိၼ်းပိင်းၺၢပ်ႈတြႃးၸဝ်ႈဢၼ်ထုၵ်ႇလီၵမ်ၵျၢင်ႉၸွမ်းၸိူဝ်ႉၼင်ႇႁိုဝ်ၼၼ်ႉၸိုင်၊ထုၵ်ႇၸႂ်တိူဝ်ႉၸႂ်ၶဝ်လႄႈဢွၼ်ၵၼ်ႁွင်ႉႁႆႈဢေႃႈ။ ပိူဝ်ႈၼႆလႄႈဝုၼ်ႇလူင် ၼေႇႁမိ၊ ဢိၵ်ႇတင်းယဵၸ်ႈပရေႃးႁဵၵ်ႈ ဢေးၸရႃႇ၊ သြႃႇမေႃၵျၢမ်းတင်းၵူၼ်းမဵဝ်း လေႇဝိ၊ ဢၼ်သင်ႇသွၼ်တီႈၵူၼ်းတင်းလၢႆၸိူဝ်းၼၼ်ႉလၢတ်ႈတီႈၵူၼ်းတင်းသဵင်ႈတင်းလူင်လႄႈဝႃႈ၊ “ဝၼ်းမိူဝ်ႈၼႆႉပဵၼ်ဝၼ်းဢၼ်မူတ်းၸၢင်ႇပုၼ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။ ယႃႇပေဢွၼ်ၵၼ်ႁွင်ႉႁႆႈလႄႈၶၢင်းၶီၶၢင်းၽၢၼ်ယူႇ။-
တေႃႈလဵဝ်ၼႆႉၶိုၼ်းပွၵ်ႈၵႂႃႇလႄႈႁဵတ်းပွႆးဢၼ်ၵိၼ်ဢၼ်ၶူပ်းတႃႉ။ ဢွၼ်ၵၼ်ဢဝ်တၢင်းၵိၼ်တၢင်းၶူပ်းတင်းၼမ်ႉမၢၵ်ႇၸပိတ်ႉသူမႅင်ႇပၼ်ၶဝ်ၸိူဝ်းဢၼ်ဢမ်ႇၵုမ်ႇၵိၼ်ၼၼ်ႉတႃႉ။ ဝၼ်းမိူဝ်ႈၼႆႉပဵၼ်ဝၼ်းဢၼ်မူတ်းၸၢင်ႇၸဝ်ႈၽြႃးႁဝ်းဢေႃႈ။ ယႃႇပေဢွၼ်ၵၼ်ငိၼ်းၶီငိၼ်းၽၢၼ်။ တၢင်းၸူမ်းသိူဝ်းဢၼ် ထႃႇဝရႃႉၽြႃး၊ ပၼ်ၼၼ်ႉပဵၼ်ဢဵၼ်ပဵၼ်ႁႅင်းသူဢေႃႈ၊” ဝႃႈၼင်ႇၼႆဢေႃႈ။
ၵူၼ်းမဵဝ်း လေႇဝိ၊ ၸိူဝ်းၼၼ်ႉပႆလႄႇၵႂႃႇၼႂ်းၵႄႈၵူၼ်းတင်းလၢႆလႄႈလၢတ်ႈၼႄၶဝ်လွင်ႈဢၼ်ၶဝ်ဢမ်ႇထုၵ်ႇလီငိၼ်းၶီငိၼ်းၽၢၼ်ၼႂ်းဝၼ်းဢၼ်မူတ်းၸၢင်ႇၼၼ်ႉလႄႈႁႂ်ႈၶဝ်တင်းသဵင်ႈတင်းမူတ်းယူႇတဵတ်ႇတဵတ်ႇၼိမ်ၼိမ်ယူႇဢေႃႈ။-
ပိူဝ်ႈၼႆလႄႈၵူၼ်းတင်းလၢႆဢွၼ်ၵၼ်ၶိုၼ်းပွၵ်ႈၵႂႃႇၵိၼ်ၶူပ်းတၢင်းၵိၼ်မူၼ်ႈမူၼ်ႈပျေႃႇပျေႃႇလႄႈဢဝ်ၵႃႈဢၼ်ၶဝ်မီးၼၼ်ႉမႅင်ႇပၼ်တၢင်ႇၵေႃႉတၢင်ႇၵူၼ်းၵွပ်ႈပိူဝ်ႈဢၼ်ၶဝ်ႁုထွမ်ႇတြႃးၸဝ်ႈဢၼ်ႁေႃးလၢတ်ႈၼႄယဝ်ႉၼၼ်ႉဢေႃႈ။
ၼႂ်းဝၼ်းမိူဝ်ႈၽုၵ်ႈၼၼ်ႉၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၶိူဝ်းႁိူၼ်းလႂ်ၸိူဝ်းၼၼ်ႉ၊ဢိၵ်ႇတင်းယဵၸ်ႈပရေႃးႁဵၵ်ႈတင်းလၢႆ၊ဢိၵ်ႇတင်းၵူၼ်းမဵဝ်း လေႇဝိ၊ တင်းလၢႆ၊ဢွၼ်ၵၼ်ၶဝ်ႈၸူးတီႈ ဢေးၸရႃႇ၊ သြႃႇမေႃၵျၢမ်းၼၼ်ႉႁႂ်ႈလႆႈသွၼ်ဢဝ်ပိင်းၺၢပ်ႈတြႃးၸဝ်ႈၸေးၸေးၸွတ်ႇၸွတ်ႇဢေႃႈ။-
ၶဝ်ဢွၼ်ၵၼ်ထူပ်းႁၼ်ၵျၢမ်းပိင်းၺၢပ်ႈတြႃး မူဝ်းသေႇ၊ ဢၼ် ထႃႇဝရႃႉၽြႃး၊ မီးဢမိင်ႉတီႈ ၵူၼ်းမဵဝ်း ဢိသရေး၊ တင်းလၢႆႁႂ်ႈၶဝ်ယူႇၵႃႈၼႂ်းသုမ်ႉၼႂ်းထဵင်ၸူဝ်ႈဢၼ်ၶဝ်ယင်းတိုၵ်ႉႁဵတ်းပွႆးသုမ်ႉထဵင်ယူႇၼၼ်ႉဢေႃႈ။-
ပိူဝ်ႈၼႆလႄႈၶဝ်ဢွၼ်ၵၼ်ပၢဝ်ႇသေႃႇၵႃႈၼႂ်းဝဵင်း ယေႇရုသလႅမ်ႇ၊ ဢိၵ်ႇတင်းဝၢၼ်ႈဝဵင်းၵႃႈမီးလူၺ်ႈဢမိင်ႉဢၼ်ဝႃႈ၊ “ဢွၼ်ၵၼ်ဢွၵ်ႇၵႂႃႇၸူးၵႃႈတီႈလွႆလႄႈဢဝ်ၵိင်ႇမႆႉၶႃႈမႆႉပႅၵ်ႇ၊ၵိင်ႇမႆႉၶႃႈမႆႉသၢၼ်ႇလုၼ်ႇ၊ၵိင်ႇမႆႉၶႃႈမႆႉမုရတု၊ၵိင်ႇမႆႉၶႃႈမႆႉတူၼ်ႈထၢၼ်တင်းၵိင်ႇမႆႉၶႃႈမႆႉဢၼ်ၽိူဝ်လီပူင်းလီၼၼ်ႉမႃးႁႂ်ႈလႆႈႁဵတ်းသုမ်ႉႁဵတ်းထဵင်ၸွမ်းၵႃႈၼင်ႇဢၼ်တႅမ်ႈဝႆႉၼႂ်းၵျၢမ်းလိၵ်ႈၼၼ်ႉတႃႉ၊” ဝႃႈၼင်ႇၼႆဢေႃႈ။
ၼင်ႇၼၼ်လႄႈၵူၼ်းတင်းလၢႆဢွၼ်ၵၼ်ဢဝ်ၵိင်ႇမႆႉၶႃႈမႆႉမႃးႁဵတ်းသုမ်ႉႁဵတ်းထဵင်ၵႃႈၼိူဝ်လင်ၶႃးႁိူၼ်း ၶဝ်ၼၼ်ႉလႂ်၊ၵႃႈၼႂ်းၵၢင်ဝၢၼ်ႈၶဝ်လႂ်၊ၵႃႈၼႂ်းပၢင်ႇဝၢင်းၵျွင်းပိၵ်ႈမၢၼ်ႇၸဝ်ႈလႂ်၊ဢိၵ်ႇတင်းၵႃႈတီႈၵၢင်ပၢင်ႇ ၽၵ်းတူၼမ်ႉ၊ တင်းၵႃႈတီႈၵၢင်ပၢင်ႇ ၽၵ်းတူဢေႇၽရိမ်ႇ၊ ဢေႃႈ။-
ၵူၼ်းၸိူဝ်းဢၼ်ပွၵ်ႈၶိုၼ်းမႃးသေတၢင်းဢၼ်ၶၢမ်ႇပိူၼ်ႈတိဢဝ်သိမ်းဢဝ်ၵႂႃႇၼၼ်ႉတင်းသဵင်ႈတင်းလူင်ဢွၼ်ၵၼ်ႁဵတ်းသုမ်ႉႁဵတ်းထဵင်သေလႄႈယူႇသဝ်းၵႃႈၼႂ်းသုမ်ႉထဵင်ၸိူဝ်းၼၼ်ႉဢေႃႈ။ ၸႃႉၸဵမ်ၸူဝ်ႈပၢၼ် ယေႃးသု၊ ၵေႃႉပဵၼ်လုၵ်ႈၸၢႆး ၼုၼ်ႇ၊ ၼၼ်ႉ၊တေႃႇထိုင်ႁွတ်ႈဝၼ်းၼၼ်ႉၵူၼ်းမဵဝ်း ဢိသရေး၊ ၶဝ်ဢမ်ႇတွၼ်ႉႁဵတ်းၸိူဝ်ႉၼင်ႇၼၼ်သေၽဝ်ႇသေပွၵ်ႈလႄႈၶဝ်ဢွၼ်ၵၼ်မီးတၢင်းဢၼ်ၸူမ်းသိူဝ်းမူၼ်ႈပျေႃႇၼႃႇဢေႃႈ။-
ၸႃႉၸဵမ်ဝၼ်းဢၼ်တင်ႈပွႆးတေႃႇထိုင်ႁွတ်ႈဝၼ်းတီႈသုတ်းၼၼ်ႉၶဝ်ႁေႃးဢၢၼ်ႇၵျၢမ်းပိင်းၺၢပ်ႈတြႃးၸဝ်ႈၵူႈဝၼ်းၵူႈဝၼ်းဢေႃႈ။ ၶဝ်ႁဵတ်းပွႆးၼၼ်ႉၸဵတ်းဝၼ်းတဵမ်တဵမ်လႄႈၼႂ်းဝၼ်းဢၼ်ထူၼ်ႈထိုင်ပႅတ်ႇဝၼ်းၼၼ်ႉဢွၼ်ၵၼ်ႁဵတ်းပွႆးထမ်ႇမႃႉၸွမ်းၵႃႈၼင်ႇဢၼ်တြႃးၸဝ်ႈမီးၼၼ်ႉဢေႃႈ။
မီးတၢင်းဢၼ်ၽတ်းဢၢၼ်ႇၵျၢမ်းလိၵ်ႈပိင်းၺၢပ်ႈတြႃး ထႃႇဝရႃႉၽြႃး၊ ဢၼ်ပဵၼ်ၽြႃးပဵၼ်ၸဝ်ႈၶဝ်ႁိုင်သၢမ်မွင်းသေယဝ်ႉ၊ႁဵတ်းတၢင်းဢၼ်ၽုၺ်ႇဢွၵ်ႇၼႄပျႃးဢပျတ်ႈၶဝ်လႄႈၵူဝ်းၵႂၢႆႇဝႆႈသႃ ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်ယူႇထႅင်ႈသၢမ်မွင်းဢေႃႈ။
ၵူၼ်းမဵဝ်း လေႇဝိ၊ တင်းလႆႈဢိၵ်ႇတင်း ယေႇသွႃႇ၊ပႃႇၼီႇ၊ၵႃႇတမေႇလႃႉ၊သေးပၼိ၊ပုၼ်ႇၼိ၊သေႇရၽိ၊ပႃႇၼီႇ၊ တင်း ၶေႇၼၼိ၊ ၸိူဝ်းၼၼ်ႉၸုၵ်းယူႇၵႃႈၼိူဝ်ၶၼ်ႈလႆသေလႄႈဢွၼ်ၵၼ်ႁဵတ်းတင်းသဵင်ဢၼ်ယႂ်ႇၼႃႇႁွင်ႉႁႃ ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်ဢေႃႈ။
ယေႇသွႃႇ၊ၵႃႇတမေႇလႃႉ၊ပႃႇၼီႇ၊ႁႃႇသႃႉပၼိ၊သေႇရၽိ၊ႁူဝ်းတိယႃႉ၊သေးပၼိ၊ပေႇႀႁိ၊ ၵူၼ်းမဵဝ်း လေႇဝိ၊ ၸိူဝ်းၼၼ်ႉ၊ဢွၼ်ၵၼ်မွၵ်ႇလၢတ်ႈလႄႈဝႃႈ၊ “ဢွၼ်ၵၼ်လုၵ်ႉလႄႈယွင်ႈယေႃးပၼ်တၢင်းလီတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူလႄႈဝႃႈ၊ ‘ႁႂ်ႈမၼ်းၸဝ်ႈမီးမၢင်ႇၵလႃႇသိုပ်ႇသိုပ်ႇ တၢမ်တၢမ်တႃႇသေႇဢမ်ႇထၢတ်ႇသေၵမ်းလူၺ်ႈ၊’ ဝႃႈၼင်ႇၼႆတႃႉ။ ႁႂ်ႈၼႃႇမႃႉၸိုဝ်ႈသဵင်ၸဝ်ႈႁဝ်းဢၼ်ယႂ်ႇသုင်လိူဝ် တွၼ်းၼႃႇသေတၢင်းဢၼ်ပၼ်တၢင်းလီ၊ တၢင်းဢၼ်ယွင်ႈယေႃးၵူႈၸိူဝ်ႉၵူႈမဵဝ်းလႄႈ မုၼ်ၽုင်းယႂ်ႇၼၼ်ႉမီးမၢင်ႇၵလႃႇ သေၵမ်းလူၺ်ႈ၊” ဝႃႈၼင်ႇၼႆဢေႃႈ။
ၼင်ႇၼၼ်လႄႈၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢွၼ်ၵၼ်ႁဵတ်းပထၼႃႇတၢင်းသူးတွင်းလႄႈဝႃႈ၊ “ၸဝ်ႈႁဝ်းပဵၼ် ထႃႇဝရႃႉၽြႃး၊ ပဵၼ်ၸဝ်ႈၽြႃးပႃးလဵဝ်ၵူၺ်းတီႈၶႃႈဢေႃႈ။ ၸဝ်ႈႁဝ်းႁဵတ်းပဵၼ်ၽႃႉၵၢင်ႁၢဝ်တင်းလၢဝ်ၵၢင်ႁၢဝ်တင်းလၢႆ၊ ႁဵတ်းပဵၼ်လိၼ်မိူင်းတင်းပၢင်ႇလၢႆႇဢိၵ်ႇတင်းၶိူင်ႈပိူင်ဢၼ်မီးၵႃႈၼႂ်းမၼ်းတင်းလၢႆလႄႈ၊ ပၼ်ဢသၢၵ်ႈတီႈၵႃႈမီးတင်းသဵင်ႈတင်းလူင်တီႈၶႃႈဢေႃႈ။ ပူဝ်ႇပႃႇၵၢင်ႁၢဝ်ၵႃႈမီးၵေႃႈၶုပ်ႉမူပ်ႇဝႆႈသႃၸဝ်ႈႁဝ်းတီႈၶႃႈဢေႃႈ။
ၸဝ်ႈႁဝ်း ထႃႇဝရႃႉၽြႃး၊ ၽြႃးပဵၼ်ၸဝ်ႈလိူၵ်ႈဢဝ် ဢႃႇပြမ်ႇ၊ သေယဝ်ႉ၊ ဢဝ်မၼ်းဢွၵ်ႇသေၵႃႈၼႂ်းဝဵင်း ဢုရႃႉ၊ မိူင်း ၶႃႇရတေး၊ မႃးလႄႈတၢင်ႇပၼ်ၸိုဝ်ႈသဵင်မႂ်ႇပဵၼ် ဢႃႇပြႃႇႁၢမ်ႇ၊ တီႈၶႃႈဢေႃႈ။
ၸဝ်ႈႁဝ်းထူပ်းႁၼ်မၼ်းမီးၸႂ်ဢၼ်ပႂ်ႉသဵတ်ႈၸႃႇတေႃႇၸဝ်ႈႁဝ်းလႄႈ ၸဝ်ႈႁဝ်းႁဵတ်းပတိၺိၺ်ႇလူၺ်ႈၵၼ်တင်းမၼ်းတီႈၶႃႈဢေႃႈ။ ၸဝ်ႈႁဝ်းဝႆႉၵတိလူၺ်ႈလွင်ႈဢၼ်တၵ်းဢဝ်မိူင်းၵူၼ်း ၶႃႇၼၼိ၊ မိူင်းၵူၼ်း ႁိတ်ႉတိ၊ မိူင်းၵူၼ်း ဢႃႇမေႃးရိ၊ မိူင်းၵူၼ်း ၽေႇရၸိ၊ မိူင်းၵူၼ်း ယေႇပုသိ၊ တင်းမိူင်းၵူၼ်း ၵိရၵႃႇသိ၊ ၸိူဝ်းၼၼ်ႉပၼ်တီႈမဵဝ်းၸိူဝ်ႉၶိူဝ်းမၼ်းႁႂ်ႈပဵၼ်တီႈယူႇၶဝ်ဢေႃႈ။ ၸဝ်ႈႁဝ်းပႂ်ႉၵတိၸဝ်ႈၵွပ်ႈပိူဝ်ႈဢၼ်ၸဝ်ႈႁဝ်းမီးသဵတ်ႈၸႃႇၼၼ်ႉဢေႃႈ။
ၸဝ်ႈႁဝ်းႁၼ်တၢင်းဢၼ်ပူႇမွၼ်ႇၶႃႈၸဝ်ႈႁဝ်းၶဝ်လႆႈၶၢမ်ႇတၢင်းဢၼ်၊ ၼိၵ်ႈၸၢၵ်ႈငႅၼ်းသႄးၵႃႈၼႂ်းမိူင်း ဢေးၵျိပ်ႉ၊ လႄႈ လႆႈငိၼ်းသဵင်ဢၼ်ၶဝ်ႁွင်ႉသႅၼ်ႇယွၼ်းတၢင်းၸွႆႈတၢင်းထႅမ်ၵႃႈတီႈႁိမ်း ပၢင်ႇလၢႆႇလႅင်၊ ၼၼ်ႉတီႈၶႃႈဢေႃႈ။
ၸဝ်ႈႁဝ်းႁဵတ်းၼႄၼိမိၵ်ႈလၢၵ်ႈၶၼႃႇလွင်ႈတၢင်းဢၼ်လီဢၢမ်းလႂ်ၵႃႈၼိူဝ်ၶုၼ်ႁေႃၶမ်း၊ ၵႃႈၼိူဝ်မူးမၢတ်ႈၽွင်းမိူင်းမၼ်းတင်းၶႃႈဝၢၼ်ႈၵူၼ်းမိူင်းမၼ်းတင်းလၢႆ၊ ၵွပ်ႈပိူဝ်ႈဢၼ်ၸဝ်ႈႁဝ်းႁုလွင်ႈတၢင်းဢၼ်ၶဝ်သႄႉသွမ်းႁဵတ်းပႄႉႁဵတ်းၼႅင်ႇတီႈၵူၼ်းၸဝ်ႈႁဝ်းၸိူဝ်းၼၼ်ႉဢေႃႈ။ သတၢင်းသဵင်ၶၢဝ်ႇၸဝ်ႈႁဝ်းၸွတ်ႇသႃႇႁူင်ႁၢင်းယူႇတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
ၸဝ်ႈႁဝ်းၽႃႇၼမ်ႉပၢင်ႇလၢႆႇႁႂ်ႈပဵၼ်သဵၼ်ႈတၢင်းပုၼ်ႈၶဝ်လႄႈ ႁႂ်ႈၶဝ်ပႆၽႃႇလတ်းၵႂႃႇၵႃႈၼိူဝ်လိၼ်ႁႅင်ႈတီႈၶႃႈဢေႃႈ။ ၶဝ်ၸိူဝ်းဢၼ်လိုပ်ႈၸွမ်းလမ်းၸွမ်းၸိူဝ်းၼၼ်ႉၸမ်ႉ၊ လႆႈတူၵ်းတၢႆၵႃႈၼႂ်းၼမ်ႉဢၼ်လိုၵ်ႉလိုၵ်ႉ မိူၼ်ၸိူဝ်ႉၼင်ႇဢၼ်မၢၵ်ႇႁိၼ်တူၵ်းသႂ်ႇၵႃႈၼႂ်းၼမ်ႉသမ်ႇမုၵ်ႈတြႃႇၼၼ်ႉတီႈၶႃႈဢေႃႈ။
ၸဝ်ႈႁဝ်းဢဝ်မွၵ်ႇၵုမ်ႈဢွၼ်သူင်ႇၶဝ်ၶိင်ႇၵၢင်ဝၼ်းလႄႈသမ်ႉဢဝ်သဝ်ၽႆးထွင်ႇႁိူဝ်ႈသဵၼ်ႈတၢင်းဢၼ်ၶဝ်ၵႂႃႇၼႂ်းၶိင်ႇၵၢင်ၶိုၼ်းဢေႃႈ။
ၸဝ်ႈႁဝ်းလူင်းသေၽုင်ႇၵၢင်ႁၢဝ်မႃးၵႃႈၼိူဝ်လွႆ သိၼႃႉ၊ လႄႈလၢတ်ႈတေႃႇၵူၼ်းၸဝ်ႈႁဝ်းၸိူဝ်းၼၼ်ႉသေယဝ်ႉ၊ ဢၢပ်ႈပၼ်ထုင်းတြႃးဢၼ်ၸိုဝ်ႈဢၼ်ၸႂ်ႈ၊ဢိၵ်ႇတင်းၵႂၢမ်းဢေႃးဝႃႇတႃႉဢၼ်မၢၼ်ႇမႅၼ်ႈၸိုဝ်ႈၸႂ်ႈၼၼ်ႉဢေႃႈ။
ၸဝ်ႈႁဝ်းသင်ႇသွၼ်ႁႂ်ႈၶဝ်ပႂ်ႉဝၼ်းၵမ်သိၼ်ၸဝ်ႈႁဝ်းဢၼ်မူတ်းၸၢင်ႇလႄႈ ဢဝ်တင်း မူဝ်းသေႇ၊ သင်ႇလၢတ်ႈဝႆႉၼႄးဢုပတေႇလႂ်၊ထုင်းၽိင်ႈတြႃးလႂ်၊တြႃးၸဝ်ႈလႂ်တီႈၶႃႈဢေႃႈ။
မိူဝ်ႈဢၼ်ၶဝ်တွင်ႉမႆႈၶႂ်ႈၵိၼ်ၼၼ်ႉၸိုင်၊ၸဝ်ႈႁဝ်းဢဝ်ၶဝ်ႈမုၼ်းၽႃႉၵၢင်ႁၢဝ်မႃးလဵင်ႉပၼ်ၶဝ်လႄႈမိူဝ်ႈဢၼ်ၶဝ်ယၢၵ်ႇၼမ်ႉၼၼ်ႉၵေႃႈ၊ ၸဝ်ႈႁဝ်း၊ႁႂ်ႈၼမ်ႉဢွၵ်ႇမႃးသေၵႃႈတီႈၼႂ်းမၢၵ်ႇႁိၼ်ၼၼ်ႉသေယဝ်ႉပၼ်ၶဝ်ၵိၼ်ဢေႃႈ။ ၸဝ်ႈႁဝ်းသင်ႇလၢတ်ႈႁႂ်ႈၶဝ်သိမ်းဢဝ်မိူင်းဢၼ်ၸဝ်ႈႁဝ်းယုၵ်ႉမိုဝ်းၸဝ်ႈႁဝ်းသေလႄႈတိူင်ႇဝႃႈၵတိလွင်ႈဢၼ်တၵ်းပၼ်တီႈၶဝ်ၼၼ်ႉတီႈၶႃႈဢေႃႈ။
ၵူၺ်းၵႃႈ၊ပူႇမွၼ်ႇၶႃႈၸဝ်ႈႁဝ်းၶဝ်ၸိူဝ်းၼၼ်ႉဢွၼ်ၵၼ်မီးၸႂ်မႃႇၼႃႉပူၵ်းပႅၼ်ၶေႃးၶႅင်လႄႈ ဢမ်ႇထွမ်ႇဢမ်ႇဢဝ်ပိင်းၺၢပ်ႈတြႃးၸဝ်ႈႁဝ်းတီႈၶႃႈ။
ၶဝ်တွပ်ႇထဵင်ပႅတ်ႈသေယဝ်ႉ၊လူင်လိုမ်းၵႃႈဢၼ်ၸဝ်ႈႁဝ်းႁဵတ်း၊ ဢမ်ႇၶုၵ်းၸႂ်လႆႈတၢင်းဢၼ်လီဢၢမ်းဢၼ်ၸဝ်ႈႁဝ်းႁဵတ်းၼႄၼၼ်ႉတီႈၶႃႈ၊ ၶဝ်ၸႂ်ၽႅၼ်သုင်လႄႈယုၵ်ႉၵူၼ်းၵေႃႉၼိုင်ႈႁဵတ်းႁူဝ်ႁဵတ်းၵၼ်းႁႂ်ႈလႆႈၶိုၼ်းမိူဝ်းၵႂႃႇၶၢမ်ႇႁဵတ်းၶႃႈၼႂ်းမိူင်း ဢေးၵျိပ်ႉ၊ ဢေႃႈ။ ၵူၺ်းၵႃႈ၊ၸဝ်ႈႁဝ်းပဵၼ်ၽြႃးဢၼ်ၸၢင်ႈပွႆႇလွတ်ႈဢပျတ်ႈၽြႃးဢၼ်ၸၢင်ႈႁဵတ်းၵျေးၸူးလႄႈ မီးတၢင်းႁၵ်ႉမႅတ်ႈတႃႇလႄႈပဵၼ်ၽြႃးဢၼ်ၸႂ်ယႂ်ႇၸႂ်ယၢဝ်းတီႈၶႃႈဢေႃႈ။ ၵျေးၸူးၵရုၼႃႇၸဝ်ႈႁဝ်းယႂ်ႇၼႃႇလႄႈဢမ်ႇပႄႇဢမ်ႇပႅတ်ႈၶဝ်လႃးလႃးတီႈၶႃႈ။
ၶဝ်ယင်းလေႃႇႁဵတ်းႁုၼ်ႇႁၢင်ႈဝူဝ်းသေလႄႈလၢတ်ႈဝႃႈ၊ဢၼ်ၼၼ်ႉပဵၼ်ၽြႃးၶဝ်ဢၼ်၊ ၼုၵ်ႈဢဝ်ၶဝ်ဢွၵ်ႇသေၵႃႈၼႂ်းမိူင်း ဢေးၵျိပ်ႉ၊ မႃးၼၼ်ႉလူးၵွၼ်ႇဢေႃႈ။ ထႃႇဝရႃႉၽြႃး၊ တီႈၶႃႈ။ ၶဝ်ႁဵတ်းၽိတ်းႁဵတ်းပိူင်ႈၼႃႇလူင်လၢင်တီႈၶႃႈဢေႃႈ။
ၵူၺ်းၵႃႈ၊ၸဝ်ႈႁဝ်းဢမ်ႇၸုၼ်ႉဢမ်ႇပႅတ်ႈၶဝ်ဝႆႉၵႃႈၼႂ်းထိူၼ်ႇလႅင်ႉ၊ ၵွပ်ႈပိူဝ်ႈဢၼ်ၸဝ်ႈႁဝ်းမီးၸႂ်ၵရုၼႃႇယႂ်ႇၼႃႇၼၼ်ႉဢေႃႈ။ သဝ်မွၵ်ႇၵုမ်ႈလႄႈသဝ်ၽႆးဢၼ်ၼႄပၼ်သဵၼ်ႈတၢင်းၶဝ်ဝၼ်းဝၼ်းၶိုၼ်းၶိုၼ်းၼၼ်ႉၵေႃႈၸဝ်ႈႁဝ်းဢမ်ႇၽဵဝ်ႈပႅတ်ႈတီႈၶႃႈ။
ပၼ်ဝိၺိၺ်ႇၸဝ်ႈဢၼ်လီဢၼ်ငၢမ်းသင်ႇသွၼ်ပၼ်ၶဝ်တီႈၶႃႈဢေႃႈ။ ၸဝ်ႈႁဝ်းယင်းဢဝ်ၶဝ်ႈမုၼ်းမၼ်ႇၼႃႉတင်းၼမ်ႉလဵင်ႉလူပၼ်ၶဝ်တီႈၶႃႈဢေႃႈ။
ၼႂ်းၸူဝ်ႈၶၢဝ်းတၢင်းၼႂ်းထိူၼ်ႇလႅင်ႉသီႇသိပ်းပီတဵမ်တဵမ်ၼၼ်ႉၸဝ်ႈႁဝ်းပၼ်ၵႃႈဢၼ်ၶဝ်လူဝ်ႇၵူႈၸိူဝ်ႉၵူႈပိူင်လႄႈ ၶူဝ်းၼုင်ႈၶူဝ်းမႆၶဝ်ဢမ်ႇၵဝ်ႇဢမ်ႇမွင်ၵႂႃႇ၊ၽႃႇတိၼ်ၶဝ်ၵေႃႈဢမ်ႇၵႂ်ႈဢမ်ႇပွင်းတီႈၶႃႈဢေႃႈ။
ၸဝ်ႈႁဝ်းႁႂ်ႈၶဝ်ပႄႉၼႅင်ႇၵူၼ်းတၢင်ႇၸိူဝ်ႉတၢင်ႇမဵဝ်း၊ဢိၵ်ႇတင်းသိုင်ႇၸိုင်ႈဝၢၼ်ႈမိူင်းၶဝ်တင်းလိၼ်ဢၼ်ၶဝ်ပိူင်ႇၼၼ်ႉတီႈၶႃႈဢေႃႈ။ ၶဝ်ၵေႃႈတိုၵ်းပႄႉသိမ်းဢဝ်မိူင်း ႁေႇသၽုၼ်ႇ၊ ဢၼ် သိႁုၼ်ႇ၊ ဢုပ်ႉပိူင်ႇဢိၵ်ႇတင်း မိူင်း ပႃႇသၢၼ်ႇ၊ ဢၼ် ဢေႃႇၶႃႉ၊ ပဵၼ်ၶုၼ်ႁေႃၶမ်းၼၼ်ႉတီႈၶႃႈဢေႃႈ။
ၸဝ်ႈႁဝ်းႁႂ်ႈလုၵ်ႈၶဝ်လၢၼ်ၶဝ်ၼမ်ၵိုၼ်းမိူၼ်ၸိူဝ်ႉၼင်ႇလၢဝ်ၵၢင်ႁၢဝ်ၼၼ်ႉလႄႈ ႁႂ်ႈၶဝ်ပႄႉၼႅင်ႇသိမ်းဢဝ်လႄႈပိူင်ႇဢဝ်မိူင်းဢၼ်ၸဝ်ႈႁဝ်းလႆႈဝႆႉၵတိတီႈပူႇမွၼ်ႇၶဝ်လွင်ႈဢၼ်တၵ်းပၼ်တီႈၶဝ်ၼၼ်ႉတီႈၶႃႈဢေႃႈ။
ၶဝ်တိုၵ်းတေႃးပႄႉၼႅင်ႇသိမ်းဢဝ်မိူင်း ၶႃႇၼၼ်ႇ၊ လႄႈၸဝ်ႈႁဝ်းႁဵတ်းပႄႉႁဵတ်းၼႅင်ႇၵူၼ်းမိူင်းၼၼ်ႉ၊ သမ်ႉႁႂ်ႈၵူၼ်းၸဝ်ႈႁဝ်းမီးဢႃႇၼႃႇၵႃႈၼိူဝ်ၵူၼ်းမဵဝ်း ၶႃႇၼၼိ၊ တင်းလၢႆ၊ဢိၵ်ႇတင်းၶုၼ်ႁေႃၶမ်းၶဝ်ၼၼ်ႉၸွမ်းၵႃႈၼင်ႇဢၼ်ၶဝ်ၶႂ်ႈႁဵတ်းၼၼ်ႉဢေႃႈ။
ၵူၼ်းၸဝ်ႈႁဝ်းၸိူဝ်းၼၼ်ႉသိမ်းဢဝ်ဝဵင်းဢၼ်မၼ်ႈၶိူင်ႇလႂ်၊မိူင်းဢၼ်ၶွၼ်ႇၼမ်ႉမၼ်းလိၼ်လီလႂ်၊ ႁိူၼ်းယေးဢၼ်တဵမ်ဝႆႉတင်းဢုၵ်ႉၸႃႇလႂ်၊ၼမ်ႉမေႃႇဢၼ်ၶုတ်းယဝ်ႉလႂ်၊ တူၼ်ႈမၢၵ်ႇသၢၼ်ႇလုၼ်ႇလႂ်၊တူၼ်ႈမၢၵ်ႇတၢင်ႇမဵဝ်းလႂ်၊တူၼ်ႈၶိူဝ်းမၢၵ်ႇၸပိတ်ႉလႂ်တီႈၶႃႈဢေႃႈ။ ၶဝ်လႆႈၵိၼ်ၵႃႈဢၼ်ၶဝ်မၵ်ႉလႄႈယူႇလီပီးမၼ်းဢွၼ်ၵၼ်မူၼ်ႈပျေႃႇၵႃႈၼႂ်းတၢင်းဢၼ်ၵျေးၸူးၸဝ်ႈလိူင်ၼမ်ယႂ်ႇၼႃႇၼၼ်ႉယူႇတီႈၶႃႈဢေႃႈ။
ၵူၺ်းၵႃႈ၊ၵူၼ်းၸဝ်ႈႁဝ်းၸိူဝ်းၼၼ်ႉလုၵ်ႉၽိုၼ်ႉလႄႈၶဝ်ဢမ်ႇထွမ်ႇဢမ်ႇဢဝ်ၵႂၢမ်းၸဝ်ႈႁဝ်း၊ ဢဝ်တြႃးၸဝ်ႈႁဝ်းပႅတ်ႈဝႆႉၵႃႈတီႈၽၢႆႇတၢင်းလင်ၶဝ်တီႈၶႃႈဢေႃႈ။ ၶဝ်ဢဝ်တၢႆပရေႃးၽႅတ်ႈ ၸိူဝ်းဢၼ်ပၼ်သတိတီႈၶဝ်ႁႂ်ႈၶဝ်ဝၢႆႇၶိုၼ်းၸူးတီႈၸဝ်ႈႁဝ်းၼၼ်ႉလႄႈ ၶဝ်ႁဵတ်းၽိတ်းပိူင်ႈၸဝ်ႈႁဝ်းၼႃႇလူင်လၢင်ဢေႃႈ။
ၸဝ်ႈႁဝ်းႁႂ်ႈရၢၼ်ႇသူႇၶဝ်တိုၵ်းပႄႉၶဝ်လႄႈဢုပ်ႉပိူင်ႇၵႃႈၼိူဝ်ၶဝ်တီႈၶႃႈဢေႃႈ။ ယၢမ်းမိူဝ်ႈဢၼ်ၶဝ်ၶၢမ်ႇတုၵ်ႉၶႃႉတၢင်းၽၢၼ်လႄႈႁွင်ႉသႅၼ်ႇတီႈၸဝ်ႈႁဝ်းၼၼ်ႉ၊ ၸဝ်ႈႁဝ်းယူႇၵႃႈၼိူဝ်ၽုင်ႇၵၢင်ႁၢဝ်လႄႈထွမ်ႇငိၼ်းဢဝ်ဢေႃႈ။ ၸဝ်ႈႁဝ်းမီးၸႂ်ၵရုၼႃႇလႄႈပွႆႇၸႂ်ႉၵူၼ်းငဝ်ႈၵူၼ်းႁူဝ်တင်းလၢႆၸိူဝ်းဢၼ်မႃးၵႄႇၼုၵ်ႈဢဝ်ၶဝ်ဢွၵ်ႇသေၵႃႈၼႂ်းမိုဝ်းရၢၼ်ႇသူႇၶဝ်ဢေႃႈ။
မိူဝ်ႈဢၼ်လႆႈယူႇၼိမ်လီလွတ်ႈၽေးၼၼ်ႉၶဝ်သမ်ႉၶိုၼ်းႁဵတ်းတုၸရိူၵ်ႈတီႈၶႃႈဢေႃႈ။ ၼင်ႇၼၼ်လႄႈၸဝ်ႈႁဝ်းသမ်ႉၶိုၼ်းႁႂ်ႈရၢၼ်ႇသူႇၶဝ်ပႄႉၼႅင်ႇၶဝ်ဢေႃႈ။ ၼႂ်းဝႃႈၼၼ်သေၵေႃႈမိူဝ်ႈဢၼ်ၶဝ်ၶုၵ်းၸႂ်လႆႈမႆႈၸႂ်ဢပျတ်ႈတူဝ်ၸဝ်ႈၵဝ်ႇလႄႈႁွင်ႉႁႃၸဝ်ႈႁဝ်းၼၼ်ႉၸဝ်ႈႁဝ်းယူႇၵႃႈၼိူဝ်ၽုင်ႇၵၢင်ႁၢဝ်လႄႈထွမ်ႇငိၼ်းသေယဝ်ႉ၊ ၵႄႇသႄႇၶျွတ်ႈဢဝ်ၶဝ်ၸွမ်းၵႃႈၼင်ႇၵရုၼႃႇဢၼ်ယႂ်ႇလူင်ၸဝ်ႈႁဝ်းၼၼ်ႉတီႈၶႃႈဢေႃႈ။
ၸဝ်ႈႁဝ်းပၼ်သတိႁႂ်ႈၶဝ်ဢွၼ်ၵၼ်ၵမ်ၵျၢင်ႉၸွမ်းတြႃးၸဝ်ႈႁဝ်းသေၵေႃႈ၊ ပိူဝ်ႈဢၼ်ၶဝ်မီးၸႂ်မႃႇၼႃႉပူၵ်းပႅၼ်လႄႈထဵင်ပႅတ်ႈတြႃးၸဝ်ႈ၊ ဢၼ်ပဵၼ်တြႃးဢၼ်ပၼ်ဢသၢၵ်ႈတီႈၵေႃႉဢၼ်ၵမ်ၵျၢင်ႉၼၼ်ႉသေယဝ်ႉ၊ ၶဝ်ဢွၼ်ၵၼ်ၼူၵ်ႇၼႃတိုဝ်တၼ်ဢမ်ႇထွမ်ႇဢမ်ႇဢဝ်ၵႂၢမ်းၸဝ်ႈႁဝ်းလႄႈယူႇဢေႃႈ။
ၸဝ်ႈႁဝ်းယိူၼ်ႉၶၢမ်ႇၶဝ်ပီၼိုင်ႈယဝ်ႉပီၼိုင်ႈတီႈၶႃႈဢေႃႈ။ ပိၵ်ႉသမ်ႉၸဝ်ႈႁဝ်းဢဝ်တင်းဝိၺိၺ်ႇၸဝ်ႈသင်ႇသွၼ်ႇပၼ်သတိၶဝ်လူၺ်ႈပရေႃးၽႅတ်ႈၸဝ်ႈႁဝ်းသေၵေႃႈ၊ ၶဝ်ဢမ်ႇထွမ်ႇဢမ်ႇဢဝ်တီႈၶႃႈ။ ပိူဝ်ႈၼႆလႄႈၸဝ်ႈႁဝ်းႁႂ်ႈၵူၼ်းတၢင်ႇၸိူဝ်ႉတၢင်ႇမဵဝ်းမႃးပႄႉမႃးၼႅင်ႇၶဝ်တီႈၶႃႈဢေႃႈ။
ၼႂ်းဝႃႈၼၼ်သေၵေႃႈ၊ၵွပ်ႈပိူဝ်ႈၵရုၼႃႇၸဝ်ႈႁဝ်းဢၼ်ယႂ်ႇလူင်ၼၼ်ႉၸဝ်ႈႁဝ်းဢမ်ႇၸုၼ်ႉဢမ်ႇပႅတ်ႈၶဝ်၊ ဢမ်ႇယႃႉၽဵဝ်ႈၶဝ်ပႅတ်ႈတီႈၶႃႈ။ ၸဝ်ႈႁဝ်းပဵၼ်ၽြႃးပဵၼ်ၸဝ်ႈဢၼ်ၸၢင်ႈႁဵတ်းၵျေးၸူးလႄႈမီးၸႂ်ၵရုၼႃႇတီႈၶႃႈဢေႃႈ။
ၽြႃးပဵၼ်ၸဝ်ႈႁဝ်းၶႃႈတီႈၶႃႈ။ ၸဝ်ႈႁဝ်းယႂ်ႇမျၢတ်ႈၼႃႇတီႈၶႃႈဢေႃႈ။ ၸဝ်ႈႁဝ်းပျေႉၸုမ်ႇဝႆႉတင်းမႁႃႇတၼ်းၶူဝ်းလႄႈလီၵူဝ်လီႁႄတီႈၶႃႈဢေႃႈ။ ၸဝ်ႈႁဝ်းမီးသဵတ်ႈၸႃႇလႄႈပႂ်ႉပတိၺိၺ်ႇၸဝ်ႈႁဝ်းတီႈၶႃႈဢေႃႈ။ ၸႃႉၸဵမ်မိူဝ်ႈၸူဝ်ႈပၢၼ်ၶုၼ်ႁေႃၶမ်းမိူင်း ဢႃႇသီးရီးယႃး၊ ၶဝ် ၼိၵ်ႈၸၢၵ်ႈငႅၼ်းသႄးၶႃႈၸဝ်ႈႁဝ်းၶဝ်တေႃႇထိုင်ႁွတ်ႈ၊ ဝၼ်းမိူဝ်ႈၼႆႉၶႃႈၸဝ်ႈႁဝ်းၶဝ်လႆႈၶၢမ်ႇၽေးတၢမ်ႇဢၼ်ယႂ်ႇၼႃႇလူင်လၢင်တီႈၶႃႈဢေႃႈ။ ၶုၼ်ႁေႃၶမ်းၶႃႈၸဝ်ႈႁဝ်းၶဝ်လႂ်၊မူးမၢတ်ႈၽွင်းမိူင်းလႂ်၊ယဵၸ်ႈပရေႃးႁဵၵ်ႈ လႂ်၊တင်းပရေႃးၽႅတ်ႈၶႃႈၸဝ်ႈႁဝ်းၶဝ်လႂ်၊ပူႇပေႃႈၶႃႈၸဝ်ႈႁဝ်းၶဝ်တင်းၵူၼ်းၸဝ်ႈႁဝ်းလႂ်၊ ၵႃႈမီးတင်းသဵင်ႈတင်းလူင်လႆႈၶၢမ်ႇၽေးတၢမ်ႇတီႈၶႃႈဢေႃႈ။ ၶႅၼ်းတေႃႈမၢတ်ႈတွင်းၽေးတၢမ်ႇဢၼ်ယႂ်ႇၼႃႇၼႆႉသေၵမ်းတီႈၶႃႈ။
ၸဝ်ႈႁဝ်းပၼ်တၢမ်ႇတီႈၶႃႈၸဝ်ႈႁဝ်းၶဝ်ၼႆႉပဵၼ်တၢင်းဢၼ်ၸီႇယၢင်ႇသိုဝ်ႈသိုဝ်ႈတေႃႇတေႃႇတီႈၶႃႈဢေႃႈ။ ၶႃႈၸဝ်ႈႁဝ်းၶဝ်ဢွၼ်ၵၼ်ႁဵတ်းဢမ်ႇတြႃးတီႈၶႃႈဢေႃႈ၊ၸဝ်ႈႁဝ်းၸမ်ႉ၊ပႂ်ႉသဵတ်ႈၸႃႇတီႈၶႃႈဢေႃႈ။
ၶုၼ်ႁေႃၶမ်းၶႃႈၸဝ်ႈႁဝ်းၶဝ်၊မူးမၢတ်ႈၽွင်းမိူင်းၶႃႈၸဝ်ႈႁဝ်းၶဝ်လႂ်၊ယဵၸ်ႈပရေႃးႁဵၵ်ႈလႂ်၊ပူႇမွၼ်ႇၶႃႈၸဝ်ႈႁဝ်းၶဝ်လႂ်၊ ဢမ်ႇဢွၼ်ၵၼ်ပႂ်ႉၵမ်ပႂ်ႉၸွမ်းတြႃးၸဝ်ႈႁဝ်းတီႈၶႃႈ၊ဢမ်ႇဢွၼ်ၵၼ်ထွမ်ႇဢဝ်ပိင်းၺၢပ်ႈၸဝ်ႈႁဝ်း၊ဢိၵ်ႇတင်းၵႂၢမ်းဢၼ်ၸဝ်ႈႁဝ်းပၼ်သတိၸိူဝ်းၼၼ်ႉတီႈၶႃႈ။
ၵွပ်ႈပိူဝ်ႈၵျေးၸူးၸဝ်ႈႁဝ်းလႄႈၶုၼ်ႁေႃၶမ်းတင်းလၢႆလႆႈဢုပ်ႉပိူင်ႇၵူၼ်းၸဝ်ႈႁဝ်းတင်းလၢႆ၊ယၢမ်းမိူဝ်ႈဢၼ် ၶဝ်လႆႈယူႇၵႃႈၼႂ်းသိုင်ႇတိူင်းမိူင်းယႂ်ႇဢၼ်လီဢၼ်ငၢမ်းဢၼ်ၸဝ်ႈႁဝ်းဢဵတ်းလူပၼ်တီႈၶဝ်ၼၼ်ႉသေၵေႃႈ၊ ၶဝ်ဢမ်ႇပႄႇပႅတ်ႈတုၸရိူၵ်ႈႁႂ်ႈလႆႈမႃးႁဵတ်းဝၢတ်ႈတီႈၸဝ်ႈႁဝ်းလႄႈယူႇတီႈၶႃႈဢေႃႈ။
တေႃႈလဵဝ်ၼႆႉၸမ်ႉ၊ၶႃႈၸဝ်ႈႁဝ်းၶဝ်လႆႈပဵၼ်ၶႃႈပိူၼ်ႈယူႇၵႃႈၼႂ်းမိူင်းဢၼ်ၸဝ်ႈႁဝ်းဢဝ်ပၼ်တီႈပူႇမွၼ်ႇၶႃႈၸဝ်ႈႁဝ်းၶဝ်၊ ႁႂ်ႈၶဝ်လႆႈၵိၼ်မၢၵ်ႇၵိၼ်ႁူင်းမၼ်းဢၼ်လီဢၼ်ငၢမ်းတီႈၶႃႈဢေႃႈ။
ၵႃႈဢၼ်ယႂ်ႇၽႄတူဝ်းတွၼ်းမႃးၵႃႈတီႈမိူင်းၼႆႉၼၼ်ႉလႆႈပဵၼ်ပုၼ်ႈၶုၼ်ႁေႃၶမ်းၸိူဝ်းဢၼ်ၸဝ်ႈႁဝ်းၶၢၼ်းဝႆႉ၊ ႁႂ်ႈဢုပ်ႉပိူင်ႇၶႃႈၸဝ်ႈႁဝ်းၶဝ် ၵွပ်ႈပိူဝ်ႈဢပျတ်ႈၶႃႈၸဝ်ႈႁဝ်းၶဝ်ၼမ်ၼႃႇၼၼ်ႉလႄႈ ၶဝ်မီးၸႂ်ဢၼ်ၶႂ်ႈႁဵတ်းၸိူဝ်ႉႁိုဝ်တီႈၶႃႈၸဝ်ႈႁဝ်းၶဝ်တင်းတရိၵ်ႈသၢၼ်ႇၶႃႈၸဝ်ႈႁဝ်းၶဝ်ၼၼ်ႉၵေႃႈၶဝ်ႁဵတ်းလႄႈ၊ ၶႃႈၸဝ်ႈႁဝ်းၶဝ်လႆႈၶၢမ်ႇယၢၵ်ႈၽၢၼ်ၶၢၼ်ၸႂ်ၼႃႇတီႈၶႃႈဢေႃႈ။” ဝႃႈၼင်ႇၼႆဢေႃႈ။
ၵွပ်ႈပိူဝ်ႈဢၼ်ပဵၼ်ၸိူဝ်ႉၼင်ႇၼၼ်လႄႈႁဝ်းၵႃႈဢၼ်ပဵၼ်ၵူၼ်းမဵဝ်း ဢိသရေး၊ ဢွၼ်ၵၼ်တႅမ်ႈမၢႆလိၵ်ႈဢၼ်ဝႆႉၵတိသဵတ်ႈၸႃႇဢၼ်မၼ်ႈၶိူင်ႇတီႈၵၼ်ၼၼ်ႉသေယဝ်ႉ၊ၵူၼ်းဢၼ်ပဵၼ်ၵႄႇပဵၼ်ႁူဝ်ႁဝ်းလႂ်၊ၵူၼ်း လေႇဝိ၊ ႁဝ်းလႂ်၊တင်းယဵၸ်ႈပရေႃးႁဵၵ်ႈႁဝ်းလႂ်ၸိူဝ်းၼၼ်ႉၽွမ်ႉၵၼ်တွၵ်ႇၸုမ်ႈသႂ်ႇဢေႃႈ။
ၵေႃႉဢၼ်တွၵ်ႇၸုမ်ႈဢွၼ်တၢင်းသေပိူၼ်ႈၼၼ်ႉပဵၼ်ဝုၼ်ႇလူင် ၼေႇႁမိ၊ လုၵ်ႈၸၢႆး ႁႃႇၶလိ၊ လႄႈယဵၸ်ႈပရေႃးႁဵၵ်ႈ ၸိတၵိယႃႉ၊ ဢေႃႈ။ ၶဝ်ၸိူဝ်းဢၼ်တွၵ်ႇၸုမ်ႈၵမ်းလိုၼ်းၸမ်ႉ၊
ႁဝ်းၵႃႈဢၼ်ပဵၼ်ၵူၼ်းမဵဝ်း ဢိသရေး၊ ဢၼ်ဝႃႈ၊ယဵၸ်ႈပရေႃးႁဵၵ်ႈ လႂ်၊ၵူၼ်းမဵဝ်း လေႇဝိ၊ လႂ်၊ၵူၼ်းပႂ်ႉၵျွင်းပိၵ်ႈမၢၼ်ႇၸဝ်ႈလႂ်၊ၵူၼ်းမေႃႁဵတ်းၵႂၢမ်းလႂ်၊ၶႃႈၸႂ်ႉၼႂ်းၵျွင်းပိၵ်ႈမၢၼ်ႇၸဝ်ႈလႂ်၊ၵူၼ်းဢၼ်ယူႇၽၢတ်ႇၽႄၵၼ်တင်းၸိူဝ်ႉၶိူဝ်းၵူၼ်းဢၼ်ယူႇၵဝ်ႇၵဝ်ႇၵႃႈတီႈမိူင်းၼႆႉလႄႈဝႆႉၸႂ်ၵမ်ၵျၢင်ႉၸွမ်းတြႃးၽြႃးပဵၼ်ၸဝ်ႈၸိူဝ်းၼၼ်ႉလႂ်၊ဢိၵ်ႇတင်းမေးႁဝ်းတင်းလုၵ်ႈလၢင်းႁဝ်းၸိူဝ်းဢၼ်ထွမ်ႇလႄႈမီးၺၢၼ်ႇပိင်ႇၺႃႇဢၼ်ႁုလႆႈၼၼ်ႉ၊-
ၽွမ်ႉလူၺ်ႈၵၼ်တင်းမူးမၢတ်ႈၽွင်းမိူင်းႁဝ်းဢွၼ်ၵၼ်တိူင်ႇၵၢဝ်ႇ၊ဝႆႉၵတိသဵတ်ႈၸႃႇလူၺ်ႈလွင်ႈဢၼ်ႁဝ်းတၵ်းၵမ်ၵျၢင်ႉၸွမ်းတြႃးၽြႃးပဵၼ်ၸဝ်ႈဢၼ်မၼ်းၸဝ်ႈၸႂ်ႉ မူဝ်းသေႇ၊ ဢၼ်ပဵၼ်ၶႃႈမၼ်းၸဝ်ႈဢၢပ်ႈဝႆႉ၊လူၺ်ႈလွင်ႈဢၼ်ႁဝ်းတၵ်းထွမ်ႇဢဝ်ၵႂၢမ်းၵႃႈဢၼ် ထႃႇဝရႃႉၽြႃး၊ ၸဝ်ႈၽြႃးႁဝ်းပိင်းၺၢပ်ႈဝႆႉတီႈႁဝ်း၊ဢိၵ်ႇလူၺ်ႈလွင်ႈဢၼ်ႁဝ်းတၵ်းပႂ်ႉၵမ်ပႂ်ႉၸွမ်းတြႃးၸဝ်ႈတင်းလၢႆတင်းထုင်းၽိင်ႈတြႃးတင်းလၢႆလူၺ်ႈၵႂၢမ်းတိူင်ႇၵၢဝ်ႇဢၼ်ဝႃႈ၊ “ပေႃးႁဝ်းပူၼ်ႉလိူဝ်ၸိုင်၊ႁႂ်ႈမီးဢႃႉမၢင်ႇၵလႃႇသေၵမ်းလူၺ်ႈ၊” ဝႃႈၼႆၼၼ်ႉဢေႃႈ။
ႁဝ်းတေဢမ်ႇဢဝ်လုၵ်ႈယိင်းႁဝ်းပၼ်တီႈလုၵ်ႈၸၢႆးၵူၼ်းတၢင်ႇၸိူဝ်ႉတၢင်ႇၶိူဝ်း၊ဢမ်ႇၼၼ်တေဢမ်ႇဢဝ်လုၵ်ႈၸၢႆးႁဝ်းပၼ်တီႈလုၵ်ႈယိင်းၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ယူႇၵႃႈၼႂ်းမိူင်းႁဝ်း။
ပေႃးၵူၼ်းတၢင်ႇၸိူဝ်ႉတၢင်ႇၶိူဝ်းဢဝ်ဢုၵ်ႉၸႃႇၶူဝ်းလဵင်း၊တၢင်းၵိၼ်တၢင်းၶူပ်းမႃးၶၢႆပၼ်ႁဝ်းၼႂ်းဝၼ်းၵမ်သိၼ်၊ဢမ်ႇၼၼ်ၼႂ်းဝၼ်းဢၼ်မူတ်းၸၢင်ႇသေဝၼ်းဝၼ်းၸိုင်၊ႁဝ်းတၵ်းဢမ်ႇသိုဝ်ႉဢမ်ႇလႅၵ်ႈ။ မိူဝ်ႈပီဢၼ်ထူၼ်ႈထိုင်ၸဵတ်းပီၼၼ်ႉၵူႈပွၵ်ႈႁဝ်းတေဢမ်ႇႁဵတ်းႁႆႈႁဵတ်းၼႃး၊တေပွႆႇၶႂၢင်းပၼ်ဢၼ်ပဵၼ်ၼီႈပဵၼ်ၶွတ်ႇတင်းလၢႆဢေႃႈ။
ႁဝ်းၵူႈၵေႃႉၵူႈၵူၼ်းယေႈပီယေႈပီ၊ယေႈၵေႃႉတၵ်းလူႇတၢၼ်းငိုၼ်းသၢမ်ၵျၢပ်ႈပုၼ်ႈဢၼ်တၵ်းႁဵတ်းၵႃႈၼႂ်းၵျွင်းပိၵ်ႈမၢၼ်ႇၸဝ်ႈ။
ႁဝ်းတၵ်းဢွၼ်ၵၼ်လူႇတၢၼ်းပုၼ်ႈဢၼ်တၵ်းႁဵတ်းဝၢတ်ႈၵူဝ်းၵႂၢႆႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈဢၼ်ဝႃႈၶဝ်ႈမုၼ်းမူတ်းၸၢင်ႇႁဵတ်းတၢင်းလူႇမၢၵ်ႇၶဝ်ႈႁူင်းၶဝ်ႈဢၼ်လူဝ်ႇႁဵတ်းၵူႈဝၼ်းၵူႈဝၼ်း၊တူဝ်တရိၵ်ႈသၢၼ်ႇဢၼ်လူဝ်ႇႁဵတ်းတၢင်းလူႇဢၼ်တုတ်ႇၽႆးဝၼ်းလႂ်ဝၼ်းၼၼ်ႉ၊ၶိူင်ႈတၢင်းလူႇဢၼ်မူတ်းၸၢင်ႇဢၼ်တေလႆႈသၢၵ်ႈလူႇၼႂ်းဝၼ်းၵမ်သိၼ်လႂ်၊ၼႂ်းဝၼ်းပွႆးလိူၼ်မႂ်ႇလႂ်၊ၼႂ်းဝၼ်းပွႆးထမ်ႇမႃႉလႂ်၊ႁဵတ်းတၢင်းလူႇဢၼ်ၽေႇဢပျတ်ႈလႂ်၊ဢိၵ်ႇတင်းၶိူင်ႈယိပ်းၶိူင်ႈတိုဝ်းဢၼ်မူတ်းၸၢင်ႇပုၼ်ႈၵျွင်းပိၵ်ႈမၢၼ်ႇၸဝ်ႈၸိူဝ်းၼၼ်ႉ။
ႁဝ်းတင်းလၢႆၸႃႉၸဵမ်ယဵၸ်ႈပရေႃးႁဵၵ်ႈလႂ်၊တင်းၵူၼ်းမဵဝ်း လေႇဝိ၊ လႂ်၊တင်းၵူၼ်းဝၢၼ်ႈၵူၼ်းမိူင်းလႂ်၊တၵ်းဢွၼ်ၵၼ်တူၵ်းၸႃႇၵွၵ်ႈလူၺ်ႈလွင်ႈဢၼ်ၶိူဝ်းႁိူၼ်းလႂ်တူၵ်းပုၼ်ႈၽွၼ်းတႃႇတေလူႇၽိုၼ်းပုၼ်ႈတၵ်းတုတ်ႇၶိူင်ႈတၢင်းလူႇဢၼ်သၢၵ်ႈၵၢပ်ႈတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၸွမ်းၵႃႈၼင်ႇဢၼ်ထုင်းၽိင်ႈတြႃးမီးဝႆႉၼၼ်ႉ။
ႁဝ်းတၵ်းဢဝ်ႁူင်းၶဝ်ႈဢၼ်ပၢတ်ႇဢွၼ်တၢင်းသေပိူၼ်ႈတင်းမၢၵ်ႇဢၼ်သုၵ်းဢွၼ်တၢင်းသေပိူၼ်ႈၵႃႈတီႈတူၼ်ႈမၢၵ်ႇႁဝ်းၼၼ်ႉသၢၵ်ႈလူႇတီႈၵျွင်းပိၵ်ႈမၢၼ်ႇၸဝ်ႈၵူႈပီ။
ႁဝ်းတၵ်းဢဝ်လုၵ်ႈၸၢႆးတူၼ်ႈႁဝ်းမႃးၸူးတီႈယဵၸ်ႈပရေႃးႁဵၵ်ႈ ၵႃႈၼႂ်းၵျွင်းပိၵ်ႈမၢၼ်ႇၸဝ်ႈႁႂ်ႈလႆႈသၢၵ်ႈၵၢပ်ႈတီႈၽြႃးပဵၼ်ၸဝ်ႈၸွမ်းၵႃႈၼင်ႇဢၼ်ထုင်းၽိင်ႈတြႃးမီးဝႆႉၼၼ်ႉ။ ဢိၵ်ႇတင်းႁဝ်းတၵ်းသၢၵ်ႈၵၢပ်ႈဝူဝ်းပေႃႈတူဝ်ဢၼ်ၵိူတ်ႇလဵင်ႉမႃးဢွၼ်တၢင်းသေပိူၼ်ႈ၊သူဝ်းပေႃႈဢမ်ႇၼၼ်ပႄႉပေႃႈတူဝ်ဢၼ်ၵိူတ်ႇလဵင်ႉမႃးဢွၼ်တၢင်းသေပိူၼ်ႈၼၼ်ႉၵူႈပီၵူႈပီ။
ႁဝ်းတၵ်းဢဝ်ၵွၼ်ႈၶဝ်ႈမုၼ်းလိပ်းဢၼ်ႁဵတ်းလူၺ်ႈမၢၵ်ႇၶဝ်ႈႁူင်းၶဝ်ႈဢၼ်ႁဝ်းပၢတ်ႇဢဝ်ဢွၼ်တၢင်းပိူၼ်ႈၼၼ်ႉ၊ဢိၵ်ႇတင်းၶိူင်ႈတၢင်းလူႇတၢင်ႇၸိူဝ်ႉတၢင်ႇမဵဝ်းဢၼ်ဝႃႈ၊ၼမ်ႉမၢၵ်ႇၸပိတ်ႉ၊ၼမ်ႉမၼ်းမၢၵ်ႇသၢၼ်ႇလုၼ်ႇ၊ဢိၵ်ႇတင်းမၢၵ်ႇမႆႉမၢၵ်ႇတွၵ်ႇႁဝ်းၵူႈၸိူဝ်ႉၵူႈမဵဝ်းၼၼ်ႉသၢၵ်ႈလူႇတီႈယဵၸ်ႈပရေႃးႁဵၵ်ႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈဢေႃႈ။ ဢိၵ်ႇတင်းလွင်ႈဢၼ်တၵ်းလႆႈဢဝ်မၢၵ်ႇၶဝ်ႈႁူင်းၶဝ်ႈႁဝ်းသိပ်းပုၼ်ႈပုၼ်ႈၼိုင်ႈမႃးတီႈၵူၼ်းမဵဝ်း လေႇဝိ၊ တင်းလၢႆၵွပ်ႈပိူဝ်ႈၵူၼ်းမဵဝ်း လေႇဝိ၊ ၸိူဝ်းၼၼ်ႉပဵၼ်ၵူၼ်းဢၼ်ၵဵပ်းဢဝ်သိပ်းပုၼ်ႈပုၼ်ႈၼိုင်ႈၵႃႈၼႂ်းဝၢၼ်ႈၼႂ်းမိူင်းတီႈဢၼ်ႁဝ်းႁဵတ်းသူၼ်ႁဵတ်းၼႃးၼၼ်ႉဢေႃႈ။-
ယဵၸ်ႈပရေႃးႁဵၵ်ႈၸိူဝ်းဢၼ်ပဵၼ်လုၵ်ႈလၢၼ်ၸိူဝ်ႉၶိူဝ်း ဢႃႇရုၼ်ႇ၊ ၼၼ်ႉတၵ်းလႆႈမီးလူၺ်ႈၵၼ်တင်းၵူၼ်းမဵဝ်း လေႇဝိ၊ တင်းလၢႆယၢမ်းမိူဝ်ႈဢၼ်ၵဵပ်းတုင်းဢဝ်သိပ်းပုၼ်ႈပုၼ်ႈၼိုင်ႈၼၼ်ႉလႄႈ၊ၵႃႈၼႂ်းသိပ်းပုၼ်ႈပုၼ်ႈၼိုင်ႈဢၼ်ၵဵပ်းတုင်းလႆႈမႃးၼၼ်ႉၵူၼ်းမဵဝ်း လေႇဝိ၊ ၶဝ်သမ်ႉတၵ်းလႆႈၸတ်းဢဝ်သိပ်းပုၼ်ႈပုၼ်ႈၼိုင်ႈသေလႄႈသႂၢင်းသႂ်ႇၵႃႈၼႂ်းလုၵ်းၽၼ်ႇတႃႇၵျွင်းပိၵ်ႈမၢၼ်ႇၸဝ်ႈဢေႃႈ။-
ၵူၼ်းမဵဝ်း ဢိသရေး၊ ဢိၵ်ႇတင်းၵူၼ်းမဵဝ်း လေႇဝိ၊ တင်းလၢႆတၵ်းလႆႈဢွၼ်ၵၼ်ဢဝ်ၶိူင်ႈလူႇၶိူင်ႈတၢၼ်းလႂ်၊ဢၼ်ပဵၼ်ၶဝ်ႈပိူၵ်ႇၶဝ်ႈသၢၼ်၊ၼမ်ႉမၢၵ်ႇၸပိတ်ႉမႂ်ႇ၊ၼမ်ႉမၼ်းမၢၵ်ႇသၢၼ်ႇလုၼ်ႇၸိူဝ်းၼၼ်ႉသႂၢင်းၶဝ်ႈၵႃႈၼႂ်းလုၵ်းဢၼ်သိမ်းပႅင်းၶိူင်ႈယိပ်းၶိူင်ႈတိုဝ်းၵျွင်းပိၵ်ႈမၢၼ်ႇၸဝ်ႈ၊တီႈဢၼ်ယဵၸ်ႈပရေႃးႁဵၵ်ႈၸိူဝ်းဢၼ်တူၵ်းပုၼ်ႈၽွၼ်းလႂ်၊ၵူၼ်းပႂ်ႉၵျွင်းလႂ်၊ၵူၼ်းမေႃႁဵတ်းၵႂၢမ်းလႂ်ယူႇၸိူဝ်းၼၼ်ႉ။ ႁဝ်းတၵ်းဢမ်ႇပွႆႇပႅတ်ႈႁိူၼ်းၽြႃးပဵၼ်ၸဝ်ႈႁဝ်းဝႆႉ။
ၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆဢွၼ်ၵၼ်ယူႇၵႃႈၼႂ်းဝဵင်း ယေႇရုသလႅမ်ႇ၊ ဢေႃႈ။ ၵူၼ်းမိူင်းဢၼ်ၵိုတ်းၵျၢၼ်ႇၼၼ်ႉဢွၼ်ၵၼ်တူၵ်းၸႃႇၵွၵ်ႈႁႂ်ႈလႆႈလိူၵ်ႈဢဝ်ၼိုင်ႈၼႃႈႁိူၼ်းသေၼႂ်းသိပ်းၼႃႈႁိူၼ်းႁႂ်ႈလႆႈၵႂႃႇလႄႈယူႇသဝ်းၵႃႈၼႂ်းဝဵင်း ယေႇရုသလႅမ်ႇ၊ ဝဵင်းဢၼ်မူတ်းၸၢင်ႇၼၼ်ႉ၊ဢိၵ်ႇတင်းၸိူဝ်းဢၼ်ၵိုတ်းၵျၢၼ်ႇတင်းလၢႆႁႂ်ႈလႆႈယူႇသဝ်းၵႃႈၼႂ်းတၢင်ႇဝၢၼ်ႈတၢင်ႇဝဵင်းတင်းလၢႆဢေႃႈ။-
ၵူၼ်းတင်းလၢႆဢွၼ်ၵၼ်ယွင်ႈယေႃးၵေႃႉဢၼ်မီးၸေႇတၼႃႇသေလႄႈယူႇသဝ်းၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉဢေႃႈ။-
ၵႃႈၼႂ်းတၢင်ႇဝၢၼ်ႈတၢင်ႇဝဵင်းတင်းလၢႆၸမ်ႉ၊ၵူၼ်းမဵဝ်း ဢိသရေး၊ လႂ်၊ယဵၸ်ႈပရေႃးႁဵၵ်ႈ လႂ်၊ၵူၼ်း လေႇဝိ၊ လႂ်၊ၶႃႈၸႂ်ႉၼႂ်းၵျွင်းပိၵ်ႈမၢၼ်ႇၸဝ်ႈလႂ်၊တင်းၸိူဝ်ႉၶိူဝ်းၶႃႈ သေႃးလမုၼ်ႇ၊ လႂ်ၸိူဝ်းၼၼ်ႉဢွၼ်ၵၼ်ယူႇသဝ်းၵႃႈၼႂ်းဝၢၼ်ႈဝဵင်းတီႈလိၼ်ဢၼ်ၶဝ်ပိူင်ႇႁင်းၽႂ်ႁင်းမၼ်းၼၼ်ႉဢေႃႈ။ ၶဝ်ၸိူဝ်းၼႆႉၸမ်ႉ၊ပဵၼ်ၶုၼ်တင်းလၢႆၵႃႈၼႂ်းၵူၼ်းဝၢၼ်ႈၵူၼ်းမိူင်း ယုတႃႉ၊ ဢၼ်ယူႇသဝ်းၵႃႈၼႂ်းဝဵင်း ယေႇရုသလႅမ်ႇ၊ ဢေႃႈ။
ၵူၼ်းၸိူဝ်ႉၶိူဝ်း ယုတႃႉ၊ ဢၼ်ယူႇၵႃႈၼႂ်းဝဵင်း ယေႇရုသလႅမ်ႇ၊ ဢၼ်ပဵၼ် ဢသႃႇယႃႉ၊ လုၵ်ႈၸၢႆး ဢူဝ်းၸိယႃႉ၊ လၢၼ် ၸႃႇၶရိ၊ ဢေႃႈ။ ပူႇပေႃႈမၼ်းတၢင်ႇၵေႃႉၸိူဝ်းၼၼ်ႉ၊သမ်ႉပဵၼ် ဢႃႇမရိ၊သေႇပတိ၊မႁႃႇလေႇလေႇလႃႉ၊ၽေးရိတ်ႉ၊ ဢၼ်ပဵၼ်ၸိူဝ်ႉၶိူဝ်း ယုတႃႉ၊ ၼၼ်ႉ။
ဢိၵ်ႇတင်း မႃႇသေႇယႃႉ၊ လုၵ်ႈၸၢႆး ပႃႇရုၵ်ႉ၊ လၢၼ် ၵေႃးလႃႉႁေႃႇၸႃႉ၊ ဢေႃႈ။ ပူႇပေႃႈမၼ်းတၢင်ႇၵေႃႉၸိူဝ်းၼၼ်ႉသမ်ႉပဵၼ် ႁၸႃႇယႃႉ၊ဢတႃႇယႃႉ၊ယေႃးယရိပ်ႉ၊ၸႃႇၶရိ၊သေးလႃႇ၊ ဢၼ်ပဵၼ်ၸိူဝ်ႉၶိူဝ်းလုၵ်ႈၸၢႆး ယုတႃႉ၊ ၼၼ်ႉဢေႃႈ။
ႁူဝ်ႁၢၼ်ၵူၼ်းသိုၵ်းၵႃႈၼႂ်းလုၵ်ႈလၢၼ်ၸိူဝ်ႉၶိူဝ်း ၽႃႇရိတ်ႉ၊ ၸိူဝ်းၼၼ်ႉမီးသီႇပၢၵ်ႇႁူၵ်းသိပ်းပႅတ်ႇၵေႃႉလႄႈယူႇသဝ်းၼႂ်းဝဵင်း ယေႇရုသလႅမ်ႇ၊ ဢေႃႈ။
ၵူၼ်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ ဢၼ်ပဵၼ် သႃႇလု၊ လုၵ်ႈၸၢႆး မေႇသုလမ်ႇ၊ လၢၼ်ၸၢႆး ယေႃႇတႃႉ၊ ဢေႃႈ။ ပူႇပေႃႈမၼ်းတၢင်ႇၵေႃႉၸိူဝ်းၼၼ်ႉပဵၼ် ပေႇတႃႇယႃႉ၊ၵေႃးလႃႇယႃႉ၊မႃႇသေႇယႃႉ၊ဢိႀေးလႃႉ၊ယေႇသႃႇယႃႉ၊ ၼၼ်ႉ။
ဢိၵ်ႇတင်း ၵပ်ႉပေႇ၊ တင်း သႃႇလႆႇ၊ ဢၼ်ပဵၼ်ပီႈၼွင်ႉဢွၵ်ႇၵၼ် တင်း သႃႇလု၊ ၵေႃႈ ယူႇၵႃႈၼႂ်းဝဵင်း ယေႇရုသလႅမ်ႇ၊ လႄႈ၊ တင်းမူတ်းမီးၵဝ်ႈပၢၵ်ႇသၢဝ်းပႅတ်ႇၵေႃႉဢေႃႈ။-
ယေႃးလႃႉ၊ လုၵ်ႈၸၢႆး ၸိၶရိ၊ ၼၼ်ႉပဵၼ်ၶုၼ်ၶဝ်ဢေႃႈ။ ယုတႃႉ၊ လုၵ်ႈၸၢႆး ႁသေးၼွႃႇ၊ ၼၼ်ႉသမ်ႉပဵၼ်ၽူႈၵႅမ်ၶုၼ်ၵႃႈၼႂ်းဝဵင်းဢေႃႈ။
ယဵၸ်ႈပရေႃးႁဵၵ်ႈဢၼ်ယူႇၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉၸမ်ႉ၊ပဵၼ် ယေႇတႃႇယႃႉ၊ လုၵ်ႈၸၢႆး ယေႃးယရိပ်ႉ၊ ဢိၵ်ႇတင်း ယႃႇၶိၼ်ႇ၊
ၸရႃႇယႃႉ၊ ဢၼ်ပဵၼ်လုၵ်ႈၸၢႆး ႁိလၶိ၊ လႄႈပဵၼ်လၢၼ်ၸၢႆး မေႇသုလမ်ႇ၊ ဢေႃႈ။ ပူႇပေႃႈမၼ်းတၢင်ႇၵေႃႉၸိူဝ်းၼၼ်ႉပဵၼ် ၸႃႇတုၵ်ႉ၊မရႃႇယုတ်ႉ၊ဢႁိတုပ်ႉ၊ လႄႈပဵၼ်ၶုၼ်ယဵၸ်ႈပရေႃးႁဵၵ်ႈ ဢၼ်ဢုပ်ႉၵႃႈၼိူဝ်ႁိူၼ်းၽြႃးပဵၼ်ၸဝ်ႈၼၼ်ႉ။-
ဢိၵ်ႇတင်းပီႈၶဝ်ၼွင်ႉၶဝ်ဢၼ်ၵိုတ်ႉႁၢပ်ႇဢမုႁိူၼ်းၸဝ်ႈပႅတ်ႇပၢၵ်ႇသၢဝ်းသွင်ၵေႃႉၸိူဝ်းၼၼ်ႉဢေႃႈ။ ၼွၵ်ႈသေၼၼ်ႉမီး ဢတႃႇယႃႉ၊ လုၵ်ႈၸၢႆး ယေႇရေႃးႁမ်ႇ၊ လၢၼ်ၸၢႆး ပေႇလလိ၊ ဢေႃႈ။ ပူႇပေႃႈမၼ်းၸိူဝ်းၼၼ်ႉပဵၼ် ဢမ်ႇၸိ၊ၸႃႇၶရိ၊ပႃႇသုရႃႉ၊မႃႇလၶိယႃႉ၊ ၼၼ်ႉဢေႃႈ။-
ဢိၵ်ႇတင်းပီႈမၼ်းၼွင်ႉမၼ်းဢၼ်ဝႃႈ၊ၶဝ်ၸိူဝ်းဢၼ်ပဵၼ်ငဝ်ႈပဵၼ်ႁူဝ်မဵဝ်းပူႇမဵဝ်းပေႃႈၶဝ်သွင်ပၢၵ်ႇသီႇသိပ်းပၢႆသွင်ၵေႃႉ၊တင်း ဢႃႇမသေႇ၊ လုၵ်ႈၸၢႆး ဢႃႇၸရေႇလႃႉ၊ လုၵ်ႈၸၢႆး ဢႁႃႇသေႇ၊ လုၵ်ႈၸၢႆး မေႇသိလမုတ်ႉ၊ လုၵ်ႈၸၢႆး ဢိမေႇရႃႉ၊ ၼၼ်ႉ၊-
ဢိၵ်ႇတင်းပီႈမၼ်းၼွင်ႉမၼ်းဢၼ်ပဵၼ်ႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇပၢၵ်ႇပၢႆသၢဝ်းပႅတ်ႇၵေႃႉၸိူဝ်းၼၼ်ႉဢေႃႈ။ ၸႃႇပတေးလႃႉ၊ လုၵ်ႈၸၢႆး ႁႃႇၵတေႃးလိမ်ႇ၊ ၼၼ်ႉပဵၼ်ၵေႃႉဢၼ်လႆႈဢုပ်ႉၵႃႈၼိူဝ်ၶဝ်ၼၼ်ႉဢေႃႈ။
ၵူၼ်းၸိူဝ်ႉၶိူဝ်း လေႇဝိ၊ ဢၼ်ယူႇၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉၸမ်ႉ၊ပဵၼ် သေႇမႃႇယႃႉ၊ လုၵ်ႈၸၢႆး ႁႃႇသုပ်ႉ၊ လုၵ်ႈၸၢႆး ဢႃႇၸရိၵမ်ႇ၊ လုၵ်ႈၸၢႆး ႁႃႇသပိ၊ လုၵ်ႈၸၢႆး ပုၼ်ႇၼိၼၼ်ႇ။
သမ်ႉမီး သပ်ႉပသေး၊ တင်း ယေႃးၸပတ်ႉ၊ ၸိူဝ်းဢၼ်ပဵၼ်ငဝ်ႈပဵၼ်ႁူဝ်ၵူၼ်းမဵဝ်း လေႇဝိ၊ ၸိူဝ်းဢၼ်ၵိုတ်ႉႁၢပ်ႇၼႃႈၵၢၼ်ၵႃႈၼွၵ်ႈၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။
မတ်ႉသၼိ၊ လုၵ်ႈၸၢႆး မိၵ်ႉၶႃႇ၊ လၢၼ်ၸၢႆး ၸႃႇပတိ၊ ဢၼ်ပဵၼ်ၸိူဝ်ႉၶိူဝ်းလုၵ်ႈလၢၼ် ဢႃႇသပ်ႉ၊ ၼၼ်ႉဢေႃႈ။ မၼ်းဢွၼ်ႁူဝ်ဢွၼ်ၵၼ်ၵူၼ်းမေႃၵႂၢမ်းသူးတွင်းလႄႈယွင်ႈယေႃးၵျေးၸူးၸဝ်ႈဢေႃႈ။ ပႃႇၵပုၵိ၊ ပဵၼ်ၵေႃႉဢၼ်ၵမ်ႉၵႅမ် မတ်ႉသၼိ၊ ဢိၵ်ႇတင်း ဢႃႇပတႃႉ၊ လုၵ်ႈၸၢႆး သမွႃႇ၊ လၢၼ်ၸၢႆး ၵလႃးလႃႉ၊ ၼၼ်ႉၸမ်ႉ၊ပဵၼ်ၸိူဝ်ႉၶိူဝ်းလုၵ်ႈလၢၼ် ယေႇတုႀုၼ်ႇ၊ ဢေႃႈ။
ၵူၼ်းမဵဝ်း လေႇဝိ၊ တင်းမူတ်းမီးသွင်ပၢၵ်ႇပႅတ်ႇသိပ်းပၢႆသီႇၵေႃႉယူႇၵႃႈၼႂ်းဝဵင်း ယေႇရုသလႅမ်ႇ၊ ဢေႃႈ။
မီး ဢၵ်ႉၵုပ်ႉ၊ တင်း တႃႇလမုၼ်ႇ၊ ဢိၵ်ႇတင်းပီႈၶဝ်ၼွင်ႉၶဝ်မီးပၢၵ်ႇၸဵတ်းသိပ်းသွင်ၵေႃႉဢေႃႈ။
ၵူၼ်းမဵဝ်း ဢိသရေး၊ လႂ်ယဵၸ်ႈပရေႃးႁဵၵ်ႈလႂ်၊ဢိၵ်ႇတင်းၵူၼ်း လေႇဝိ၊ ၸိူဝ်းဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉဢွၼ်ၵၼ်ယူႇၵႃႈၼႂ်းဝၢၼ်ႈၼႂ်းဝဵင်း ယုတႃႉ၊ ၵူႈတီႈၵူႈလႅၼ်တီႈလိၼ်ဢၼ်ၶဝ်ပိူင်ႇႁင်းၽႂ်ႁင်းမၼ်းၼၼ်ႉဢေႃႈ။-
ၶႃႈၸႂ်ႉၼႂ်းၵျွင်းပိၵ်ႈမၢၼ်ႇၸဝ်ႈၸိူဝ်းၼၼ်ႉလႆႈယူႇၵႃႈတီႈပွၵ်ႈဢၼ်ႁွင်ႉဝႃႈ၊ ဢေႃးၽေႇလႃႉ၊ ၼၼ်ႉ ၸိႁႃႉ၊ တင်း ၵိသပႃႇ၊ ပဵၼ်ၵူၼ်းဢၼ်ဢုပ်ႉထိင်းၶဝ်ဢေႃႈ။
ၵေႃႉဢၼ်ဢုပ်ႉထိင်းၵူၼ်း လေႇဝိ၊ ၸိူဝ်းဢၼ်ယူႇၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉပဵၼ် ဢေႃႇၸိ၊ ဢၼ်ပဵၼ်လုၵ်ႈၸၢႆး ပႃႇၼီႇ၊ လၢၼ်ၸၢႆး ႁႃႇသပိ၊ ဢေႃႈ။ ပူႇပေႃႈမၼ်းၸိူဝ်းၼၼ်ႉပဵၼ် မတ်ႉသၼိ၊ တင်း မိၵ်ႉၶႃႇ၊ ဢေႃႈ။ မၼ်းပဵၼ်ၵူၼ်းၶိူဝ်းႁိူၼ်း ဢႃႇသပ်ႉ၊ လႄႈၵူၼ်းၶိူဝ်းႁိူၼ်းၼႆႉလႆႈၵိုတ်ႉႁၢပ်ႇပုၼ်ႈၽွၼ်းဢၼ်ႁဵတ်းၵႂၢမ်းၵႃႈၼႂ်းတၢင်းဢၼ်ႁဵတ်းဝၢတ်ႈၵူဝ်းၵႂၢႆႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။-
လွင်ႈမၼ်းၸမ်ႉ၊ၶုၼ်ႁေႃၶမ်းမီးဢမိင်ႉဝႆႉႁႂ်ႈၵူၼ်းႁဵတ်းၵႂၢမ်းတင်းလၢႆလႆႈၶၢမ်ႇဢဝ်ၸရိပ်ႈတၢင်းၵိၼ်ၶဝ်ၸွမ်းၵႃႈၼင်ႇဢၼ်မိုဝ်ႉဝၼ်းသိုပ်ႇတၢမ်းၵၼ်ၼၼ်ႉဢေႃႈ။
ပေႇႀႁိ၊ လုၵ်ႈၸၢႆး မေႇသၸႃႉပေႇလႃႉ၊ ၼႂ်းၶိူဝ်းႁိူၼ်း ၸေးရႃႉ၊ ၸိူဝ်ႉၶိူဝ်း ယုတႃႉ၊ ၼၼ်ႉလႆႈပဵၼ်ၽူႈတၢင်တူဝ်ၶုၼ်ႁေႃၶမ်းၼႂ်းလွင်ႈဢၼ်ၸၢပ်ႈသႅင်ႇၵၼ်တင်းၵူၼ်းမဵဝ်း ဢိသရေး၊ တင်းလၢႆဢေႃႈ။
ၵူၼ်းၼမ်ၼႃႇဢွၼ်ၵၼ်ယူႇၼႂ်းဝၢၼ်ႈၼႂ်းဝဵင်းဢၼ်မီးၸမ်ႁႆႈၼႃးၶဝ်ၼၼ်ႉဢေႃႈ။ ၶဝ်ၸိူဝ်းဢၼ်ပဵၼ်ၸိူဝ်ႉၶိူဝ်း ယုတႃႉ၊ ၼၼ်ႉဢွၼ်ၵၼ်ယူႇၵႃႈၼႂ်းဝဵင်း ၵိရိယႃႉဢႃႇပႃႇ၊ ဝဵင်း တိၽုၼ်ႇ၊ တင်းဝဵင်း ယေႇၵတ်ႉၸေးလႃႉ၊ ဢိၵ်ႇတင်းၵႃႈၼႂ်းဝၢၼ်ႈၼွၵ်ႈၼႃးပၢင်ႇႁိမ်းဝဵင်းၶဝ်လႂ်၊-
ၶဝ်ၵေႃႈဢွၼ်ၵၼ်ယူႇၵႃႈၼႂ်းဝဵင်း ယေႇသွႃႇ၊ ဝဵင်း မေႃႇလတႃႇ၊ ဝဵင်း ပႅတ်ႉပႃႇလိတ်ႉ၊-
ဝဵင်း ႁႃႇၸႃႉသုဢႃႇလႃႉ၊ ဝဵင်း ပေႇရသေးၽႃႉ၊ ဢိၵ်ႇတင်းၵႃႈၼႂ်းဝၢၼ်ႈၼွၵ်ႈၼႃးပၢင်ႇႁိမ်းဝဵင်းၶဝ်လႂ်၊-
ဢွၼ်ၵၼ်ယူႇၵႃႈၼႂ်းဝဵင်း ၸိၵလၵ်ႉ၊ တင်းဝဵင်း မေႇၵေႃးၼႃႉ၊ ဢိၵ်ႇတင်းၵႃႈၼႂ်းဝၢၼ်ႈၼွၵ်ႈၼႃးပၢင်ႇႁိမ်းဝဵင်းၶဝ်လႂ်၊-
ဢွၼ်ၵၼ်ယူႇၵႃႈၼႂ်းဝဵင်း ဢိၼ်ႇရိမ်ႇမုၼ်ႇ၊ ဝဵင်း ၸူဝ်းရႃႇ၊ ဝဵင်း ယႃႇမုတ်ႉ၊-
ဝဵင်း ၸႃႇၼေႃႇ၊ ဝဵင်း ဢတုလမ်ႇ၊ ဢိၵ်ႇတင်းၵႃႈၼႂ်းဝၢၼ်ႈၼွၵ်ႈၼႃးပၢင်ႇႁိမ်းဝဵင်းၶဝ်လႂ်၊ဢွၼ်ၵၼ်ယူႇၵႃႈၼႂ်းဝဵင်း လႃႇၶိသႃႉ၊ ဢိၵ်ႇတင်းၵႃႈၼႂ်းႁႆႈၼႃးႁိမ်းႁွမ်းဝဵင်းၼၼ်ႉလႂ်၊ဢိၵ်ႇတင်းၵႃႈၼႂ်းဝဵင်း ဢၸေႇၵႃႇ၊ ဢိၵ်ႇတင်းၵႃႈၼႂ်းဝၢၼ်ႈၼွၵ်ႈတင်းလၢႆဢေႃႈ။ ၵူၼ်း ယုတႃႉ၊ ၸိူဝ်းၼၼ်ႉယူႇၵႃႈၼႂ်းသိုင်ႇၸိုင်ႈဝူင်ႈၵၢင်ဝဵင်း ပေႇရသေးၽႃႉ၊ ၽၢႆႇတၢင်းၸၢၼ်းတေႃႇထိုင်ႁွတ်ႈထူင်ႉ ႁိၼ်ႇၼုမ်ႇ၊ ၽၢႆႇတၢင်းႁွင်ႇဢေႃႈ။
ၵူၼ်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ ၸမ်ႉ၊ဢွၼ်ၵၼ်ယူႇၵႃႈၼႂ်းဝဵင်း ၵေးပႃႉ၊ ဝဵင်း မိၵ်ႉမတ်ႉ၊ ဝဵင်း ဢႃႇဢိ၊ ဝဵင်း ပေႇသလႃႉ၊ ဢိၵ်ႇတင်းၵႃႈတီႈဝၢၼ်ႈၼွၵ်ႈဝၢၼ်ႈပၢင်ႇလႂ်၊-
ဝဵင်း လေႃးတႃႉ၊ ဝဵင်း ဢေႃးၼေႃး၊ ဢၼ်ပဵၼ်ထူင်ႉႁူၺ်ႈဢၼ်သြႃႇမေႃမိုဝ်းၶဝ်ယူႇၼၼ်ႉဢေႃႈ။-
ၵူၼ်းမဵဝ်း လေႇဝိ၊ ၵမ်ႈၽွင်ႈၸိူဝ်းဢၼ်ယူႇၵႃႈၼႂ်းသိုင်ႇၸိုင်ႈ ယုတႃႉ၊ ၼၼ်ႉၵေႃႈၶဝ်ႈပႃးယူႇလူၺ်ႈၵၼ်တင်းၵူၼ်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ ၶဝ်ဢေႃႈ။
ၶဝ်ၸိူဝ်းၼႆႉၸမ်ႉ၊ပဵၼ်ယဵၸ်ႈပရေႃးႁဵၵ်ႈ လႂ်၊ဢိၵ်ႇတင်းၵူၼ်းမဵဝ်း လေႇဝိ၊ ၸိူဝ်းဢၼ်ပွၵ်ႈၶိုၼ်းမႃးသေၵႃႈတီႈတၢင်းဢၼ်လႆႈၶၢမ်ႇတိဢဝ်သိမ်းဢဝ်ၵႂႃႇလူၺ်ႈၵၼ်တင်း ၸေႇရုပႃႉပေႇလႃႉ၊ လုၵ်ႈၸၢႆး သႃႇလထိဢေးလႃႉ၊ ဢိၵ်ႇတင်းၶုၼ်ယဵၸ်ႈပရေႃးႁဵၵ်ႈ ယေႃးသု၊ ၼၼ်ႉဢေႃႈ။
ယေႇသွႃႇ၊ပိၼုၺ်ႇ၊ၵႃႇတမေႇလႃႉ၊ သေႇရၽိ၊ယုတႃႉ၊ ဢိၵ်ႇတင်း မတ်ႉသၼိ၊ လႄႈၶဝ်သမ်ႉပဵၼ်ၽူႈဢၼ်ဢုပ်ႉပိူင်ႇၶဝ်ၸိူဝ်းဢၼ်ႁဵတ်းၵႂၢမ်းယွင်ႈယေႃးၵျေးၸူးၸဝ်ႈၼၼ်ႉဢေႃႈ။
သမ်ႉမီး ပႃႇၵပုၵိ၊ တင်း ဢုၼ်းၼိ၊ ဢိၵ်ႇတင်းပီႈၶဝ်ၼွင်ႉၶဝ်လႄႈၶဝ်သမ်ႉပဵၼ်ၶဝ်ၸိူဝ်းဢၼ်ႁဵတ်းၵႂၢမ်းသဵင်ၸုမ်ႇၶိုၼ်းတွပ်ႇၼၼ်ႉဢေႃႈ။
ယေႃးသု၊ မီးလုၵ်ႈၸၢႆး ယေႃးယၵိမ်ႇ၊ယေႃးယၵိမ်ႇ၊ သမ်ႉမီးလုၵ်ႈၸၢႆး ဢေးလျႃႇသိပ်ႉ၊ဢေးလျႃႇသိပ်ႉ၊ သမ်ႉမီးလုၵ်ႈၸၢႆး ယေႃးယတႃႉ၊-
ယေႃးယတႃႉ၊ မီးလုၵ်ႈၸၢႆး ယေႃးၼႀၼ်ႇ၊ယေႃးၼႀၼ်ႇ၊ သမ်ႉမီးလုၵ်ႈၸၢႆး ယႃႇတွႃႇ၊ ဢေႃႈ။-
ၸိုဝ်ႈၵူၼ်းဢၼ်ပဵၼ်ငဝ်ႈပဵၼ်ႁူဝ်ၵႃႈၼႂ်းၸိူဝ်ႉၶိူဝ်းႁိူၼ်းၵူၼ်းမဵဝ်း လေႇဝိ၊ တင်းယဵၸ်ႈပရေႃးႁဵၵ်ႈတင်းလၢႆၼၼ်ႉလႆႈမၢတ်ႈလႆႈတႅမ်ႈဝႆႉၼႂ်းၸူဝ်ႈပၢၼ်ၶုၼ်ယဵၸ်ႈပရေႃးႁဵၵ်ႈ ဢေးလျႃႇသိပ်ႉ၊ယေႃးယတႃႉ၊ယေႃးႁၼၼ်ႇ၊ တင်း ယႃႇတွႃႇ၊ ၸိူဝ်းၼၼ်ႉဝႆႉ တေႃႇထိုင်ႁွတ်ႈၸူဝ်ႈပၢၼ်ၸဝ်ႈမုၼ်ယႂ်ႇၶုၼ်ႁေႃၶမ်း တႃႇရိ၊ မိူင်း ပႃးသျႃး၊ ၼၼ်ႉဢေႃႈ။
ၵူၼ်းငဝ်ႈၵူၼ်းႁူဝ်ၼႂ်းၸိူဝ်ႉၶိူဝ်းႁိူၼ်း လေႇဝိ၊ တင်းလၢႆၸိုင်၊လႆႈမၢတ်ႈမၢႆတႅမ်ႈသႂ်ႇဝႆႉ ၵႃႈၼႂ်းလိၵ်ႈပိုၼ်းၶိူဝ်းၶုၼ်တေႃႇထိုင်ႁွတ်ႈၸူဝ်ႈပၢၼ် ယေႃးၼႀၼ်ႇ၊ လၢၼ်ၸၢႆး ဢေးလျႃႇသိပ်ႉ၊ ၼၼ်ႉဢေႃႈ။
ၵူၼ်းငဝ်ႈၵူၼ်းႁူဝ်ဢၼ်ပဵၼ် ႁႃႇသပိ၊သေႇရၽိ၊ ဢိၵ်ႇတင်း ယေႇသွႃႇ၊ပိၼုၺ်ႇ၊ တင်း ၵႃႇတမေႇလႃႉ၊ ၸိူဝ်းၼၼ်ႉလႆႈၽႄၵူၼ်း လေႇဝိ၊ တင်းလၢႆ ပဵၼ်လၢႆမူႇလၢႆၸိူဝ်းဝႆႉသေယဝ်ႉ၊သွင်မူႇယေႈလႄႉ၊သွင်မူႇယေႈၵမ်းဢွၼ်ၵၼ်ယွင်ႈယေႃးမုၼ်ၽုင်းၽြႃးပဵၼ်ၸဝ်ႈလႄႈတၢင်ႇၵျေးၸူးမၼ်းၸဝ်ႈပဵၼ်လႄႉပဵၼ်ၵမ်းၸွမ်းၵႃႈၼင်ႇဢၼ်ၶုၼ်ႁေႃၶမ်း တႃႇဝိတ်ႈ၊ ၵူၼ်းၽြႃးပဵၼ်ၸဝ်ႈၶိုင်ပွင်ဝႆႉၼၼ်ႉဢေႃႈ။
ၶဝ်ၸိူဝ်းဢၼ်ပႂ်ႉၵျွင်းပိၵ်ႈမၢၼ်ႇၸဝ်ႈၼၼ်ႉပဵၼ် မတ်ႉသၼိ၊ပႃႇၵပုၵိ၊ဢေႃးပတိ၊မေႇသုလမ်ႇ၊တႃႇလမုၼ်ႇ၊ ဢိၵ်ႇတင်း ဢၵ်ႉၵုပ်ႉ၊ လႄႈၶဝ်လႆႈဢွၼ်ၵၼ်ပႂ်ႉယူႇၵႃႈတီႈတိူၵ်ႈၽၼ်ႇတႃႇၵႃႈႁိမ်းၽၵ်းတူဢေႃႈ။
ၶဝ်ၼၼ်ႉမီးၼႂ်းၸူဝ်ႈပၢၼ် ယေႃးယၵိမ်ႇ၊ လုၵ်ႈၸၢႆး ယေႃးသု၊ လၢၼ် ယေႃးၸတၵ်ႉ၊ ဢိၵ်ႇတင်းၼႂ်းၸူဝ်ႈပၢၼ်မဵဝ်ႉဝုၼ်ႇ ၼေႇႁမိ၊ တင်းၸူဝ်ႈပၢၼ်ယဵၸ်ႈပရေႃးႁဵၵ်ႈ ဢေးၸရႃႇ၊ သြႃႇမေႃၵျၢမ်းထမ်ႇမႃႉၼၼ်ႉၸိူဝ်းၼၼ်ႉဢေႃႈ။
မိူဝ်ႈဢၼ်ႁဵတ်းဢၼုမေႃးတၼႃႇလမ်းဝဵင်း ယေႇရုသလႅမ်ႇ၊ ၼၼ်ႉၸိုင်၊ၶဝ်ဢွၼ်ၵၼ်ႁွင်ႉဢဝ်ၵႃႈဢၼ်ပဵၼ်ၵူၼ်းမဵဝ်း လေႇဝိ၊ ဢၼ်ယူႇၵူႈတီႈၵူႈလႅၼ်ၼၼ်ႉမႃးၽွမ်ႉၵၼ်ၵႃႈၼႂ်းပွႆးဢၼုမေႃးတၼႃႇႁႂ်ႈလႆႈႁႆႇၵွင်၊ၸၢပ်ႇသႅင်ႇ၊လဵတ်းတိင်ႇ၊သီတရေႃးလႄႈႁဵတ်းၵႂၢမ်းဢၼ်ယွင်ႈယေႃးၵျေးၸူးၸဝ်ႈဢေႃႈ။-
ၵူၼ်းမဵဝ်းဢၼ်ၸၢင်ႈႁဵတ်းၵႂၢမ်းထမ်ႇမႃႉၸိူဝ်းၼၼ်ႉဢွၼ်ၵၼ်လုၵ်ႉသေၵႃႈတီႈပၢင်ႇပဵင်းဢၼ်လဵပ်ႈႁွပ်ႈဝဵင်း ယေႇရုသလႅမ်ႇ၊ ဢိၵ်ႇတင်းဝၢၼ်ႈၼွၵ်ႈၸိူဝ်းဢၼ်မီးၼႂ်းတူင်ႇဝဵင်း ၼေႇတေႃႇၽႃႉ၊ ဝဵင်း ၵိလႃႉၵႃႇလႃႉ၊ ဝဵင်း ၵေးပႃႉ၊ တင်းဝဵင်း ဢႃႇၸမႃႇဝိတ်ႉ၊ ၸိူဝ်းၼၼ်ႉမႃးၸုၵၼ်တုမ်ၵၼ်ဢေႃႈ။-
လွင်ႈမၼ်းၸမ်ႉ၊ၶဝ်ၸိူဝ်းဢၼ်မေႃႁဵတ်းၵႂၢမ်းၼၼ်ႉဢွၼ်ၵၼ်တႄႇႁဵတ်းဝၢၼ်ႈႁဵတ်းဝဵင်းသေလႄႈယူႇၵႃႈတီႈလဵပ်ႈႁွပ်ႈဝဵင်း ယေႇရုသလႅမ်ႇ၊ ၼၼ်ႉဢေႃႈ။-
ၼင်ႇၼၼ်လႄႈယဵၸ်ႈပရေႃးႁဵၵ်ႈတင်းလၢႆဢိၵ်ႇတင်းၵူၼ်း လေႇဝိ၊ ၶဝ်ဢွၼ်ၵၼ်ႁဵတ်းႁႂ်ႈတူဝ်ၸဝ်ႈၵဝ်ႇမူတ်းၸၢင်ႇသေလႄႈ၊ႁႂ်ႈၵူၼ်းတင်းလၢႆ၊ၽၵ်းတူဝဵင်းတင်းလၢႆ၊ဢိၵ်ႇတင်းလမ်းဝဵင်းၸိူဝ်းၼၼ်ႉမူတ်းၸၢင်ႇဢေႃႈ။
မိူဝ်ႈၼၼ်ႉ၊ၵဝ်ႁွင်ႉဢဝ်ၵူၼ်းဢၼ်ပဵၼ်ၵႄႇပဵၼ်ႁူဝ်မဵဝ်း ယုတႃႉ၊ တင်းလၢႆၶိုၼ်ႈမႃးၵႃႈၼိူဝ်လမ်းဝဵင်းသေယဝ်ႉ၊ၶၢၼ်းႁဵတ်းသွင်မုၵ်ႉသွင်ၸိူဝ်းပုၼ်ႈဢၼ်တၵ်းပႆလဵပ်ႈႁွပ်ႈဝဵင်းႁဵတ်းၵႂၢမ်းယွင်ႈယေႃးၽြႃးပဵၼ်ၸဝ်ႈဢေႃႈ။ မုၵ်ႉၼိုင်ႈလဵပ်ႈၵႂႃႇၽၢႆႇတၢင်းၶႂႃလႄႈတႆႇၸွမ်းၵႃႈၼိူဝ်လမ်းဝဵင်းၵႂႃႇၸူးၵႃႈတီႈ ၽၵ်းတူၶီႈဝူဝ်း၊ ဢေႃႈ။-
လိုၼ်းလင်ၵူၼ်းႁဵတ်းၵႂၢမ်းၼၼ်ႉ ႁေႃးသႃႇယႃႉ၊ ပႆၸွမ်းလႄႈၵူၼ်းဢၼ်ပဵၼ်ၵႄႇပဵၼ်ႁူဝ်မဵဝ်း ယုတႃႉ၊ ၶိုင်ႈၼိုင်ႈသမ်ႉပႆၸွမ်းဢေႃႈ။-
လိုၼ်းလင်မၼ်းၼၼ်ႉၵူၼ်းၸိူဝ်ႉၶိူဝ်းႁိူၼ်းမၼ်းဢၼ်ပဵၼ် သေႇမႃႇယႃႉ၊ဢႃႇၸရေႇလႃႉ၊မိလလေႇ၊ၵိလလေႇ၊မႃႇဢိ၊ၼႃႇႀၼေႇလႃႉ၊ယုတႃႉ၊ႁႃႇၼၼိ၊ ၸိူဝ်းၼၼ်ႉဢွၼ်ၵၼ်ယိပ်းၵမ်တူႇရိယႃႇမဵဝ်းဢၼ်ၶုၼ်ႁေႃၶမ်း တႃႇဝိတ်ႈ၊ ၵူၼ်းၽြႃးပဵၼ်ၸဝ်ႈလဵတ်းၼၼ်ႉသေလႄႈပႆၸွမ်းဢေႃႈ။ ဢေးၸရႃႇ၊ သြႃႇမေႃၵျၢမ်းထမ်ႇမႃႉၼၼ်ႉဢွၼ်ႁူဝ်မုၵ်ႉၸုမ်းၼၼ်ႉၵႂႃႇဢေႃႈ။-
ၶဝ်တႆႇၸွမ်းၵႃႈတီႈႁိမ်း ၽၵ်းတူၼမ်ႉဢွၵ်ႇႁူး၊ လႄႈၶိုၼ်ႈၶၼ်ႈလႆဢၼ်ၵႂႃႇသိုဝ်ႈသိုဝ်ႈၸူးၵႃႈတီႈဝဵင်း တႃႇဝိတ်ႈ၊ သေယဝ်ႉ၊ပူၼ်ႉႁေႃ တႃႇဝိတ်ႈ၊ ၵႂႃႇယဝ်ႉၸင်ႇ၊ဝၢႆႇၸွမ်းလမ်းဝဵင်းၵႃႈတီႈ ၽၵ်းတူၼမ်ႉ၊ ၽၢႆႇတၢင်းဝၼ်းဢွၵ်ႇဝဵင်းပုၼ်ႉဢေႃႈ။
မုၵ်ႉၸုမ်းတၢင်ႇၸုမ်းဢၼ်ဝႃႈ၊ၶဝ်ၸိူဝ်းဢၼ်တၢင်ႇၵျေးၸူးၸဝ်ႈၼၼ်ႉသမ်ႉလဵပ်ႈၽၢႆႇတၢင်းသၢႆႉလႄႈၵဝ်ဢိၵ်ႇတင်းၵူၼ်းတင်းလၢႆၶိုင်ႈၼိုင်ႈတႆႇၸွမ်းၵႃႈၼိူဝ်လမ်းဝဵင်းၵႂႃႇဢေႃႈ။ ႁဝ်းဢွၼ်ၵၼ်ပႆပူၼ်ႉ သဝ်လၢင်းတဝ်ႈၽႆး၊ ၵႂႃႇၸူးတီႈလမ်းဝဵင်းတီႈဢၼ်မီးၸိုဝ်ႈဝႃႈ၊ “လမ်းဝဵင်းဢၼ်ၵႂၢင်ႈ” ၼၼ်ႉသေယဝ်ႉ၊-
လုၵ်ႉသေၵႃႈတီႈၼၼ်ႈႁဝ်းသမ်ႉပႆပူၼ်ႉ ၽၵ်းတူဢေႇၽရိမ်ႇ၊ၽၵ်းတူၵဝ်ႇ၊ၽၵ်းတူပႃ၊ သဝ်လၢင်းႁႃႇၼၼေႇလႃႉ၊ ဢိၵ်ႇတင်းသဝ်လၢင်းဢၼ်မီးၸိုဝ်ႈဝႃႈ၊ ပၢၵ်ႇၼိုင်ႈ၊ လႄႈၵႂႃႇထိုင်ႁွတ်ႈ ၽၵ်းတူသူဝ်း၊ ဢေႃႈ။ ႁဝ်းပႆၵႂႃႇသုတ်းၵႃႈႁိမ်း ၽၵ်းတူပႂ်ႉယၢမ်း၊ ဢေႃႈ။
ၵွပ်ႈပိူဝ်ႈၼႆလႄႈတင်းသွင်မုၵ်ႉသွင်ၸုမ်းၸိူဝ်းဢၼ်ႁဵတ်းၵႂၢမ်းယွင်ႈယေႃးၽြႃးပဵၼ်ၸဝ်ႈၸိူဝ်းၼၼ်ႉႁွတ်ႈထိုင်ၵႂႃႇၵႃႈတီႈပၢင်ႇဝၢင်းၵျွင်းပိၵ်ႈမၢၼ်ႇၸဝ်ႈဢေႃႈ။ ၼွၵ်ႈသေၵူၼ်းဢၼ်ပဵၼ်ၵႄႇပဵၼ်ႁူဝ်ၸိူဝ်းဢၼ်ပႃးလူၺ်ႈၵၼ်တင်းၵဝ်ၼၼ်ႉ၊-
ၼႂ်းမုၵ်ႉၸုမ်းၵဝ်ၼၼ်ႉယင်းၶဝ်ႈပႃးယဵၸ်ႈပရေႃးႁဵၵ်ႈ ၸိူဝ်းဢၼ်ပဝ်ႇၼႄးၶရႃႇ၊ဢၼ်ပဵၼ် ဢေးလျႃႇၵိမ်း၊မႃႇသေႇယႃႉ၊မိၼ်ႇၼိယႃႇမိၼ်ႇ၊မိၵ်ႉၶယႃႉ၊ဢေးလိဢေႃးၼေႇ၊ၸႃႇၶရိ၊ ဢိၵ်ႇတင်း ႁႃႇၼၼိ၊ ၸိူဝ်းၼၼ်ႉဢေႃႈ။-
လိုၼ်းလင်ၶဝ်ၼၼ်ႉ မႃႇသေႇယႃႉ၊သေႇမႃႇယႃႉ၊ဢေးလႃႇၸႃႇ၊ဢေႃႇၸိ၊ယေႃးႁၼၼ်ႇ၊မႃႇလၶိ၊ဢေႇလမ်ႇ၊ တင်း ဢေးၸႃႇ၊ ပႆၸွမ်းဢေႃႈ။ ၵူၼ်းႁဵတ်းၵႂၢမ်းၸိူဝ်းၼၼ်ႉဢွၼ်ၵၼ်ႁဵတ်းၵႂၢမ်းလူၺ်ႈၵၼ်တင်းသြႃႇၶဝ် ယေႇၸရႃႇႁိ၊ ၼၼ်ႉဢေႃႈ။
ၼႂ်းဝၼ်းၼၼ်ႉၶဝ်ဢွၼ်ၵၼ်သၢၵ်ႈလူႇၶိူင်ႈတၢင်းလူႇၼမ်ၼႃႇလႄႈၵူၼ်းတင်းလၢႆဢွၼ်ၵၼ်ၸူမ်းသိူဝ်းမူၼ်ႈပျေႃႇၵွပ်ႈပိူဝ်ႈဢၼ်ၽြႃးပဵၼ်ၸဝ်ႈပၼ်ဢၶႂၢင်ႉႁႂ်ႈၶဝ်လႆႈၸူမ်းသိူဝ်းမူၼ်ႈပျေႃႇၼႃႇလူင်လၢင်ၼၼ်ႉဢေႃႈ။ မႄႈယိင်းဢိၵ်ႇတင်းလုၵ်ႈလၢင်းတင်းလၢႆၵေႃႈ ဢွၼ်ၵၼ်ၶဝ်ႈပႃးၼႂ်းပွႆးဢၼ်ၸူမ်းသိူဝ်းမူၼ်ႈပျေႃႇၼၼ်ႉလႄႈသဵင်ဢၼ်ၶဝ်ၸူမ်းသိူဝ်းမူၼ်ႈပျေႃႇၼၼ်ႉထၢၼ်ႈပေႃးငိၼ်းၵႂႃႇတေႃႇထိုင်ႁွတ်ႈတီႈဢၼ်ၵႆၼႃႇၼၼ်ႉဢေႃႈ။
ၼႂ်းဝၼ်းၼၼ်ႉၶဝ်ဢွၼ်ၵၼ်ၶၢၼ်းၵူၼ်းၵမ်ႈၽွင်ႈဝႆႉႁႂ်ႈဢုပ်ႉထိင်းတိူၵ်ႈၽၼ်ႇတႃႇၸဝ်ႈတင်းလၢႆ၊တီႈဢၼ်သိမ်းပႅင်းဢုၵ်ႉၸႃႇတၢင်းလူႇၵျွင်းပိၵ်ႈမၢၼ်ႇၸဝ်ႈလႂ်၊မၢၵ်ႇဢၼ်မၢၵ်ႇဢွၼ်တၢင်းလႂ်၊တၢင်းလူႇသိပ်းပုၼ်ႈပုၼ်ႈၼိုင်ႈလႂ်ၸိူဝ်းၼၼ်ႉဢေႃႈ။ ၶဝ်ၸိူဝ်းၼႆႉမီးပုၼ်ႈၽွၼ်းတႃႇတေၵဵပ်းတုင်းဢဝ်တၢင်းလူႇၵႃႈတီႈၼမ်ႉလိၼ်ဝၢၼ်ႈၼွၵ်ႈၼႃးပၢင်ႇႁႂ်ႈပဵၼ်ပုၼ်ႈပဵၼ်တႃႇယဵၸ်ႈပရေႃးႁဵၵ်ႈတင်းလၢႆ၊တင်းၵူၼ်း လေႇဝိ၊ တင်းလၢႆ၊ၸွမ်းၼင်ႇဢၼ်တြႃးၸဝ်ႈၸီႇယၢင်ႇဝႆႉၼၼ်ႉဢေႃႈ။ ၵူၼ်းမဵဝ်း ယုတႃႉ၊ တင်းလၢႆဢွၼ်ၵၼ်မီးတၢင်းဢၼ်ၸူမ်းသိူဝ်းမူၼ်ႈပျေႃႇလူၺ်ႈၵၼ်တင်းယဵၸ်ႈပရေႃးႁဵၵ်ႈတင်းၵူၼ်း လေႇဝိ၊ ၸိူဝ်းၼၼ်ႉ။-
ၵွပ်ႈပိူဝ်ႈဢၼ်ၶဝ်ထၢမ်းႁဵတ်းၵၢၼ်ၽြႃးပဵၼ်ၸဝ်ႈ၊ဢိၵ်ႇတင်းႁဵတ်းတၢင်းဢၼ်ႁႂ်ႈမူတ်းၸၢင်ႇဢေႃႈ။ ၵူၼ်းႁဵတ်းၵႂၢမ်းၼႂ်းၵျွင်းပိၵ်ႈမၢၼ်ႇၸဝ်ႈတင်းလၢႆတင်းၵူၼ်းပႂ်ႉယၢမ်းၵျွင်းပိၵ်ႈမၢၼ်ႇၸဝ်ႈတင်းလၢႆၵေႃႈဢွၼ်ၵၼ်ၵိုတ်ႉႁၢပ်ႇပုၼ်ႈၽွၼ်းၶဝ်ၸွမ်းၵႃႈၼင်ႇဢၼ်ၶုၼ်ႁေႃၶမ်း တႃႇဝိတ်ႈ၊ တင်းလုၵ်ႈၸၢႆးမၼ်းၸဝ်ႈ သေႃးလမုၼ်ႇ၊ မီးဢမိင်ႉဝႆႉၼၼ်ႉဢေႃႈ။-
တႄႇၸႃႉဢဝ်ၸဵမ်မိူဝ်ႈၵွၼ်ႇၼႂ်းၸူဝ်ႈပၢၼ်ၶုၼ်ႁေႃၶမ်း တႃႇဝိတ်ႈ၊ တင်းသြႃႇမေႃႁဵတ်းၵႂၢမ်း ဢႃႇသပ်ႉ၊ ၼၼ်ႉမီးၵူၼ်းမေႃႁဵတ်းၵႂၢမ်းဢွၼ်ႁူဝ်ဢွၼ်ၵၼ်ဢၼ်ႁဵတ်းၵႂၢမ်းယွင်ႈယေႃးလႄႈ ၵႂၢမ်းတၢင်ႇၵျေးၸူးၽြႃးပဵၼ်ၸဝ်ႈၼၼ်ႉဢေႃႈ။-
ၼႂ်းၸူဝ်ႈပၢၼ် ၸေႇရုပႃႉပေႇလႃႉ၊ ဢိၵ်ႇတင်းၸူဝ်ႈပၢၼ် ၼေႇႁမိ၊ ၵေႃႈၵူၼ်းမဵဝ်း ဢိသရေး၊ တင်းသဵင်ႈတင်းလူင်ဢွၼ်ၵၼ်ပၼ်ၶိူင်ႈလူႇတၢင်းတၢၼ်းၵမ်ႉထွၵ်ႈၵူၼ်းမေႃႁဵတ်းၵႂၢမ်းတင်းလၢႆတင်းၵူၼ်းပႂ်ႉၵျွင်းပိၵ်ႈမၢၼ်ႇၸဝ်ႈတင်းလၢႆဢၼ်ၶဝ်ထုၵ်ႇလီလႆႈႁပ်ႉဢဝ်ၵူႈဝၼ်းၵူႈဝၼ်းၼၼ်ႉဢေႃႈ။ ၵူၼ်းတင်းလၢႆဢွၼ်ၵၼ်သၢၵ်ႈလူႇၶိူင်ႈတၢင်းလူႇဢၼ်မူတ်းၸၢင်ႇတီႈၵူၼ်း လေႇဝိ၊ တင်းလၢႆသေယဝ်ႉ၊ၵူၼ်း လေႇဝိ၊ ၸိူဝ်းၼၼ်ႉ သမ်ႉၽႄမႅင်ႇပၼ်တီႈယဵၸ်ႈပရေႃးႁဵၵ်ႈတင်းလၢႆၵႃႈၼင်ႇဢၼ်ၶဝ်လူဝ်ႇၼၼ်ႉဢေႃႈ။
ယၢမ်းမိူဝ်ႈဢၼ်ၶဝ်ၽတ်းဢၢၼ်ႇၵျၢမ်းလိၵ်ႈပိင်းၺၢပ်ႈတြႃး မူဝ်းသေႇ၊ ႁႂ်ႈၵူၼ်းတင်းလၢႆထွမ်ႇၼၼ်ႉၸိုင်၊ၶဝ်ထူပ်းႁၼ်တွၼ်ႈဢၼ်ဝႃႈ၊ၵူၼ်းမဵဝ်း ဢမ်ႇမုၼ်ႇ၊ တင်းၵူၼ်းမဵဝ်း မေႃႇၽႃႉ၊ ဢမ်ႇမီးဢၶႂၢင်ႉဢၼ်လႆႈၶဝ်ႈပႃးၵႃႈၼႂ်းၶဝ်ၸိူဝ်းဢၼ်ပဵၼ်ၵူၼ်းၽြႃးပဵၼ်ၸဝ်ႈၼၼ်ႉဢေႃႈ။-
လွင်ႈမၼ်းၸမ်ႉ၊ၵူၼ်းမဵဝ်း ဢမ်ႇမုၼ်ႇ၊ တင်းၵူၼ်းမဵဝ်း မေႃႇၽႃႉ၊ ၶဝ်ဢမ်ႇပၼ်ၶဝ်ႈၼမ်ႉတၢင်းၵိၼ်တီႈၵူၼ်းမဵဝ်း ဢိသရေး၊ တင်းလၢႆၼႂ်းၶၢဝ်းတၢင်းဢၼ်ဢွၵ်ႇမိူင်း ဢေးၵျိပ်ႉ၊ မႃးၼၼ်ႉ။ ၶဝ်ယင်းၸၢင်ႈငႃ ပႃႇလၢမ်ႇ၊ ႁႂ်ႈမၼ်းၵိၼ်ႇလႃႇၵူၼ်းမဵဝ်း ဢိသရေး၊ ဢေႃႈ။ ၵူၺ်းၵႃႈ၊ၽြႃးပဵၼ်ၸဝ်ႈပိၼ်ႇႁႂ်ႈၵႂၢမ်းဢၼ်ၵိၼ်ႇလႃႇၼၼ်ႉႁႂ်ႈပဵၼ်ၵႂၢမ်းဢၼ်ပၼ်မၢင်ႇၵလႃႇတၢင်းလီသေဢေႃႈ။-
မိူဝ်ႈဢၼ်ၵူၼ်းမဵဝ်း ဢိသရေး၊ တင်းလၢႆလႆႈငိၼ်းၵႂၢမ်းတြႃးၼၼ်ႉၸိုင်၊ၶဝ်ဢွၼ်ၵၼ်ၽႄၵူၼ်းတၢင်ႇၸိူဝ်ႉတၢင်ႇမဵဝ်းၵႃႈမီးၼၼ်ႉဢွၵ်ႇသေၵႃႈၼႂ်းၵူၼ်းၽြႃးပဵၼ်ၸဝ်ႈသေဢေႃႈ။
မိူဝ်ႈဢွၼ်တၢင်းၼၼ်ႉယဵၸ်ႈပရေႃးႁဵၵ်ႈ ဢေးလျႃႇသိပ်ႉ၊ လႆႈပဵၼ်ၵေႃႉဢၼ်ဢုပ်ႉထိင်းလုၵ်းၽၼ်ႇတႃႇၵျွင်းပိၵ်ႈမၢၼ်ႇၸဝ်ႈၸိူဝ်းၼၼ်ႉလႄႈမိုတ်ႈၵိုဝ်းၵၼ်တင်း တေႃႇၽိယႃႉ၊ ဢေႃႈ။-
မၼ်းမႄးႁႅၼ်းလုၵ်းလူင်ဢၼ်ယၢမ်ႈၵဵပ်းယၢမ်ႈသိမ်းၶိူင်ႈတၢင်းလူႇမၢၵ်ႇၶဝ်ႈႁူင်းၶဝ်ႈလႂ်၊ၼၢမ်ႇသႃႇလႂ်၊ၶိူင်ႈယိပ်းၶိူင်ႈၵႅမ်လႂ်၊ၶိူင်ႈလူႇတၢင်းတၢၼ်းပုၼ်ႈယဵၸ်ႈပရေႃးႁဵၵ်ႈလႂ်၊တၢင်းလူႇသိပ်းပုၼ်ႈပုၼ်ႈၼိုင်ႈၵႃႈၼႂ်းၶဝ်ႈပိူၵ်ႇၶဝ်ႈသၢၼ်လႂ်၊ၼမ်ႉမၢၵ်ႇၸပိတ်ႉလႂ်၊ၼမ်ႉမၼ်းမၢၵ်ႇသၢၼ်ႇလုၼ်ႇပုၼ်ႈတႃႇၵူၼ်း လေႇဝိ၊ ၶဝ်လႂ်၊ပုၼ်ႈၵူၼ်းမေႃႁဵတ်းၵႂၢမ်းၶဝ်လႂ်၊ၵူၼ်းပႂ်ႉယၢမ်းတီႈၵျွင်းပိၵ်ႈမၢၼ်ႇၸဝ်ႈၶဝ်လႂ်ၼၼ်ႉႁႂ်ႈပဵၼ်လုၵ်းပုၼ်ႈ တေႃႇၽိယႃႉ၊ ယူႇဢေႃႈ။-
ၼႂ်းၶိင်ႇဢၼ်ပဵၼ်ၸိူဝ်ႉၼင်ႇၼႆၼၼ်ႉၵဝ်ဢမ်ႇယူႇၵႃႈၼႂ်းဝဵင်း ယေႇရုသလႅမ်ႇ၊ ၵွပ်ႈပိူဝ်ႈၼႂ်းပီဢၼ် ဢႃႇတႃႇၸေႇရိတ်ႉ၊ ၶုၼ်ႁေႃၶမ်း ပႃႇပုလုၼ်ႇ၊ ၸၢမ်ႇႁၢင်ႈၸၢမ်ႇႁေႃသၢမ်သိပ်းပၢႆသွင်ပီၼၼ်ႉၵဝ်လႆႈၶိုၼ်ႈၵႂႃႇၵႃႈတီႈၶုၼ်ႁေႃၶမ်းဢေႃႈ။ ႁိုင်တၢၼ်ႇတၢၼ်ႇသေယဝ်ႉၵဝ်လႆႈဢၶႂၢင်ႉလႄႈ၊-
ၶိုၼ်းမႃးၵႃႈတီႈဝဵင်း ယေႇရုသလႅမ်ႇ၊ ဢေႃႈ။ ၵႃႈတီႈၼၼ်ႈၵဝ်လႆႈႁုႁၼ်တုၸရိူၵ်ႈဢပျတ်ႈဢၼ် ဢေးလျႃႇသိပ်ႉ၊ လႆႈႁဵတ်းလွင်ႈဢၼ်မၼ်းမႄးႁဵတ်းမႄးႁႅၼ်းလုၵ်းပုၼ်ႈတႃႇ တေႃႇၽိယႃႉ၊ ၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။-
မိူဝ်ႈၼၼ်ႉၵဝ်မီးတၢင်းဢၼ်ၸႂ်မႆႈၶႂ်ႈၸႃႉၼႃႇလႄႈဢဝ်ဢုၵ်ႉၸႃႇၶူဝ်းလဵင်း တေႃႇၽိယႃႉ၊ ၵႃႈမီးထိမ်ႈဢွၵ်ႇပႅတ်ႈသေၵႃႈၼႂ်းလုၵ်းၼၼ်ႉသေယဝ်ႉ၊-
ပူင်ဢမိင်ႉႁႂ်ႈၶဝ်ၶိုၼ်းႁဵတ်းလုၵ်းၼၼ်ႉမူတ်းသႂ်သေလႄႈသမ်ႉၶိုၼ်းဢဝ်ၶိူင်ႈပိူင်ၵျွင်းပိၵ်ႈမၢၼ်ႇၸဝ်ႈလႂ်၊ၶိူင်ႈတၢင်းလူႇမၢၵ်ႇၶဝ်ႈႁူင်းၶဝ်ႈလႂ်၊ၼၢမ်ႇသႃႇလႂ်မႃးသႂ်ႇဝႆႉသေဢေႃႈ။
ၵဝ်သမ်ႉလႆႈႁုသၢႆငၢႆ လွင်ႈဢၼ်ၵူၼ်းမေႃႁဵတ်းၵႂၢမ်းတင်းလၢႆ၊ဢိၵ်ႇတင်းၵူၼ်း လေႇဝိ၊ ၶဝ်ဢွၼ်ၵၼ်ဢွၵ်ႇပၢႆႈၵႂႃႇယူႇတီႈႁႆႈၶဝ်ၼႃးၶဝ်ႁင်းၽႂ်ႁင်းမၼ်း၊ၵွပ်ႈပိူဝ်ႈတၢင်းလူႇဢၼ်ၵူၼ်းတင်းလၢႆလူႇတၢၼ်းၼၼ်ႉဢမ်ႇပေႃးပုၼ်ႈတႃႇၶဝ်ဢေႃႈ။-
ၵဝ်တၢင်ႇဢပျတ်ႈတီႈၶုၼ်ဢၼ်ပွင်ၵၢၼ်တင်းလၢႆလႄႈဝႃႈ၊ “ႁဵတ်းသင်လႄႈသူပွႆႇပႅတ်ႈၵျွင်းပိၵ်ႈမၢၼ်ႇၸဝ်ႈဝႆႉ၊” ဝႃႈၼႆလႄႈႁွင်ႉဢဝ်ၵူၼ်း လေႇဝိ၊ တင်းၵူၼ်းမေႃႁဵတ်းၵႂၢမ်းၸိူဝ်းၼၼ်ႉမႃးတီႈၵျွင်းပိၵ်ႈမၢၼ်ႇၸဝ်ႈသေယဝ်ႉ၊သမ်ႉၶိုၼ်းၶၢၼ်းၶဝ်ဝႆႉၼႂ်းၼႃႈၵၢၼ်ၶဝ်ဢေႃႈ။-
ၼင်ႇၼၼ်လႄႈၵူၼ်း ယုတႃႉ၊ တင်းလၢႆၸင်ႇၶိုၼ်းဢွၼ်ၵၼ်ဢဝ်ၶိူင်ႈလူႇၶိူင်ႈတၢၼ်းၶဝ်ဢၼ်ဝႃႈ၊တၢင်းလူႇသိပ်းပုၼ်ႈပုၼ်ႈၼိုင်ႈဢၼ်လႆႈၵႃႈတီႈၶဝ်ႈပိူၵ်ႇၶဝ်ႈသၢၼ်လႂ်၊ၼမ်ႉမၢၵ်ႇၸပိတ်ႉလႂ်၊တင်းၼမ်ႉမၼ်းမၢၵ်ႇသၢၼ်ႇလုၼ်ႇလႂ်၊မႃးတီႈတိူၵ်ႈၽၼ်ႇတႃႇၸဝ်ႈဢေႃႈ။-
ၵဝ်ၶၢၼ်းၵူၼ်းယိပ်းငိုၼ်းတင်းလၢႆ ႁႂ်ႈပႂ်ႉထိင်းတိူၵ်ႈၽၼ်ႇတႃႇၸဝ်ႈတင်းလၢႆဢၼ်ပဵၼ် သေႇလမိ၊ ယဵၸ်ႈပရေႃးႁဵၵ်ႈၵေႃႉၼိုင်ႈ၊ ၸႃႇတုၵ်ႉ၊ ဢၼ်ပဵၼ်သြႃႇမေႃၵျၢမ်းထမ်ႇမႃႉၵေႃႉၼိုင်ႈတင်း ပေႇတႃႇယႃႉ၊ ၵူၼ်း လေႇဝိ၊ ၵေႃႉၼိုင်ႈဢေႃႈ။ ႁႃႇၼၼ်ႇ၊ လုၵ်ႈၸၢႆး ၸၵ်ႉၵုရႃႉ၊ ဢၼ်ပဵၼ်လၢၼ်ၸၢႆး မတ်ႉသၼိ၊ ၼၼ်ႉသမ်ႉၶၢၼ်းမၼ်းဝႆႉႁႂ်ႈပဵၼ်ၽူႈၵမ်ႉၵႅမ်ၶဝ်ဢေႃႈ။ ၶဝ်ၼၼ်ႉမီးသရေႇလူၺ်ႈလွင်ႈဢၼ်ပႂ်ႉသဵတ်ႈၸႃႇၼႂ်းတၢင်းဢၼ်ၽႄမႅင်ႇပၼ်တၢင်းၵိၼ်တၢင်းၶူပ်းတီႈၶဝ်ၸိူဝ်းဢၼ်ထၢမ်းၼႃႈၵၢၼ်လူၺ်ႈၵၼ်ၼၼ်ႉဢေႃႈ။
ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ ၶႅၼ်းတေႃႈၶုၵ်းၸႂ်လႆႈၶႃႈၸဝ်ႈသေၵမ်းတီႈၶႃႈ။ ယႃႇပေမွတ်ႇပႅတ်ႈတၢင်းလီၶႃႈၸဝ်ႈၸိူဝ်းဢၼ်ၶႃႈၸဝ်ႈႁဵတ်းပုၼ်ႈၵျွင်းပိၵ်ႈမၢၼ်ႇၸဝ်ႈ၊ဢိၵ်ႇတင်းပုၼ်ႈၼႃႈၵၢၼ်တၢင်းႁဵတ်းၸဝ်ႈၸိူဝ်းၼၼ်ႉသေၵမ်းတီႈၶႃႈ။
ၼႂ်းမိုဝ်ႉဝၼ်းၸိူဝ်းၼၼ်ႉၵဝ်လႆႈႁၼ်ၵူၼ်းမိူင်း ယုတႃႉ၊ ၵမ်ႈၽွင်ႈယဵပ်ႇၼူတ်ႈမၢၵ်ႇၸပိတ်ႉၼႂ်းဝၼ်းၵမ်သိၼ်ယူႇ၊ၵမ်ႈၽွင်ႈဢဝ်မႃႉလီႈတၢင်ႇၶဝ်ႈပိူၵ်ႇၶဝ်ႈသၢၼ်လႂ်၊တၢင်ႇၼမ်ႉမၢၵ်ႇၸပိတ်ႉလႂ်၊ဢိၵ်ႇတင်းမၢၵ်ႇၸပိတ်ႉလႂ်၊မၢၵ်ႇလိူဝ်ႇလႂ်၊တင်းၶူဝ်းလဵင်းၶဝ်လႂ်၊ၶဝ်ႈမႃးၵႃႈၼႂ်းဝဵင်း ယေႇရုသလႅမ်ႇ၊ ၼႂ်းဝၼ်းၵမ်သိၼ်ၼၼ်ႉဢေႃႈ။ ၵဝ်လႆႈႁၢမ်ႈတၢပ်ႈၶဝ်ဢမ်ႇႁႂ်ႈၶဝ်ၶၢႆၵႃႈသင်သေၸိူဝ်ႉသေမဵဝ်းၼႂ်းဝၼ်းၵမ်သိၼ်ဢေႃႈ။-
ၵူၼ်းဝဵင်း တုရု၊ ၸိူဝ်းဢၼ်ယူႇၼႂ်းဝဵင်း ယေႇရုသလႅမ်ႇ၊ ၼၼ်ႉၵေႃႈ ၸၢင်ႈဢဝ်ပႃလႂ်တင်းၶူဝ်းၵုၼ်ႇၶူဝ်းသိၼ်ၵူႈၸိူဝ်ႉၵူႈပိူင်လႂ်မႃးၵႃႈၼႂ်းဝဵင်းလႄႈၶၢႆပၼ်ၵူၼ်းႁဝ်းၵႃႈၼႂ်းဝၼ်းၵမ်သိၼ်ဢေႃႈ။-
မိူဝ်ႈၼၼ်ႉၵဝ်တၢင်ႇဢပျတ်ႈတီႈၵူၼ်းဢၼ်ပဵၼ်ၵႄႇပဵၼ်ႁူဝ်မဵဝ်း ၵျူး၊ တင်းလၢႆၼၼ်ႉလႄႈဝႃႈ၊ “ၶႆႈၸႂ်တူၺ်းတုၸရိူၵ်ႈဢၼ်သူႁဵတ်းၼႆႉလူး။ သူႁဵတ်းႁႂ်ႈဝၼ်းၵမ်သိၼ်ဢမ်ႇမူတ်းၸၢင်ႇယဝ်ႉ။-
တၢင်းႁဵတ်းသူၼႆႉမိူၼ်ၸိူဝ်ႉၼင်ႇဢၼ်ပူႇသူမွၼ်ႇသူႁဵတ်းမိူဝ်ႈဢၼ်ၽြႃးပဵၼ်ၸဝ်ႈပၼ်တၢမ်ႇတီႈၶဝ်လႄႈ ၸီႇယၢင်ႇႁႂ်ႈဝဵင်းၼႆႉလုလႅဝ်ၵႂႃႇၼၼ်ႉယဝ်ႉ။ သူယႃႉဝၼ်းၵမ်သိၼ်လႄႈတၵ်းႁႂ်ႈတၢင်းၸႂ်မႆႈၶႂ်ႈၸႃႉၸဝ်ႈဢၼ်ယဵင်ႈၶႅၼ်းယႂ်ႇၼႃႇၼၼ်ႉႁွတ်ႈထိုင်ၵႃႈၼိူဝ်ၵူၼ်းမဵဝ်း ဢိသရေး၊ ယဝ်ႉ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ၵဝ်ပူင်ဢမိင်ႉႁႂ်ႈဢိုတ်းႁပ်းၽၵ်းတူတင်းလၢႆမိူဝ်ႈဢၼ်တႄႇၸႃႉလပ်းသိင်ႇဝွၼ်းဝႅင်းၼႂ်းဝၼ်းၽိတ်ႈလႄႈဢမ်ႇႁႂ်ႈၽုၺ်ႇၽၵ်းတူဝဵင်းတေႃႇထိုင်ႁွတ်ႈဝၢႆးဝၼ်းၵမ်သိၼ်ဢေႃႈ။ ၵဝ်ၶၢၼ်းၵူၼ်းၵမ်ႈၽွင်ႈဝႆႉၵႃႈတီႈၽၵ်းတူဝဵင်းတင်းလၢႆ ဢမ်ႇႁႂ်ႈလႆႈဢဝ်ဢီႈသင်သေၸိူဝ်ႉသေပိူင်ၶဝ်ႈၵႃႈၼႂ်းဝဵင်းၼႂ်းဝၼ်းၵမ်သိၼ်ဢေႃႈ။-
လိုၼ်းၼၼ်ႉၵူၼ်းၵႃႉၵူၼ်းၶၢႆၸိူဝ်းဢၼ်ၵႃႉၶၢႆၶူဝ်းၵုၼ်ႇၶူဝ်းသိၼ်ၵူႈၸိူဝ်ႉၵူႈပိူင်ၼၼ်ႉယင်းဢွၼ်ၵၼ်မႃးၼွၼ်းၵႃႈတီႈၼွၵ်ႈဝဵင်း ယေႇရုသလႅမ်ႇ၊ ပွၵ်ႈၼိုင်ႈသွင်ပွၵ်ႈလူးၵွၼ်ႇဢေႃႈ။-
ၵဝ်ၵေႃႈပၼ်သတိတီႈၶဝ်လႄႈလၢတ်ႈဝႃႈ၊ “ႁဵတ်းသင်လႄႈသူဢွၼ်ၵၼ်မႃးၼွၼ်းႁိမ်းလမ်းဝဵင်းယူႇၸိူဝ်ႉၼင်ႇၼၼ်။ ၵမ်းလိုၼ်းပေႃးသူႁဵတ်းထႅင်ႈၸိုင်၊ၵဝ်တၵ်းတိဢဝ်သူဢေႃႈ၊” ဝႃႈၼင်ႇၼႆဢေႃႈ။ ၸႃႉၸဵမ်မိူဝ်ႈၼၼ်ႉၵႂႃႇလႄႈၶဝ်ဢမ်ႇၶိုၼ်းမႃးၼႂ်းဝၼ်းၵမ်သိၼ်လႄႈယူႇဢေႃႈ။-
ၵဝ်ပူင်ဢမိင်ႉတီႈၵူၼ်းမဵဝ်း လေႇဝိ၊ တင်းလၢႆႁႂ်ႈၶဝ်ႁဵတ်းႁႂ်ႈတူဝ်ၸဝ်ႈၵဝ်ႇမူတ်းၸၢင်ႇသေလႄႈမႃးပႂ်ႉၽၵ်းတူဝဵင်းပုၼ်ႈတႃႇတေပႂ်ႉထိင်းႁႂ်ႈဝၼ်းၵမ်သိၼ်လႆႈမူတ်းၸၢင်ႇဢေႃႈ။ ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ ၶႅၼ်းတေႃႈၶုၵ်းၸႂ်လႆႈၶႃႈၸဝ်ႈၵွပ်ႈပိူဝ်ႈလွင်ႈတၢင်းၼႆႉလႄႈ၊ၶႅၼ်းတေႃႈဢဵတ်းလူၵႄႇသႄႇၶျွတ်ႈဢဝ်ၶႃႈၸဝ်ႈၸွမ်းၵႃႈၼင်ႇဢၼ်ၵရုၼႃႇၸဝ်ႈၼမ်ၼႃႇၼၼ်ႉသေၵမ်းတီႈၶႃႈ။
ၼႂ်းမိုဝ်ႉဝၼ်းၸိူဝ်းၼၼ်ႉၼင်ႇၵဝ်၊ၵဝ်ႁၼ်ၵူၼ်းၸၢႆးမဵဝ်း ၵျူး၊ ၼမ်ၼႃႇဢွၼ်ၵၼ်ဢဝ်မေးၵႃႈၼႂ်းၵူၼ်းမဵဝ်း ဢႃႇၸုတ်ႉ၊ ၵႃႈၼႂ်းၵူၼ်းမဵဝ်း ဢႃႇမုၼ်ႇ၊ ၵႃႈၼႂ်းၵူၼ်းမဵဝ်း မေႃႇၽႃႉ၊ တင်းလၢႆဢေႃႈ။-
လုၵ်ႈၶဝ်လၢင်းၶဝ်ၶိုင်ႈၼိုင်ႈၼၼ်ႉၵူၺ်းမေႃလၢတ်ႈၵႂၢမ်း ဢႃႇၸုတ်ႉ၊ တင်းၵႂၢမ်းတၢင်ႇမဵဝ်းလႄႈဢမ်ႇမေႃလၢတ်ႈၵႂၢမ်းမဵဝ်း ယုတႃႉ၊ ယဝ်ႉ။-
ၵဝ်တၢင်ႇဢပျတ်ႈတီႈၵူၼ်းၸၢႆးၸိူဝ်းၼၼ်ႉလႄႈၵိၼ်ႇလႃႇၶဝ်၊ပေႃႉယႅၼ်ႉၶဝ်၊ထူၺ်ႈၶူၼ်ႁူဝ်ၶဝ်ပႅတ်ႈသေယဝ်ႉ၊ၵဝ်ႁႂ်ႈၶဝ်တိူင်ႇၵၢဝ်ႇၵႃႈၼႂ်းၼႃႇမႃႉၸိုဝ်ႈသဵင်ၽြႃးပဵၼ်ၸဝ်ႈလႄႈဝႃႈ၊ “သူတေဢမ်ႇလႆႈႁႂ်ႈလုၵ်ႈၸၢႆးသူဢဝ်မေးၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်း။ လုၵ်ႈသၢဝ်သူၵေႃႈဢမ်ႇလႆႈဢဝ်ၽူဝ်ၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်း။ တူဝ်သူၵေႃႈတေဢမ်ႇလႆႈဢဝ်လႃးလႃး။-
မႄႈယိင်းၵူၼ်းတၢင်ႇၸိူဝ်ႉတၢင်ႇၶိူဝ်းၼၼ်ႉႁဵတ်းႁႂ်ႈၶုၼ်ႁေႃၶမ်း သေႃးလမုၼ်ႇ၊ ႁွတ်ႈထိုင်တၢင်းဢၼ်ၽိတ်းပိူင်ႈမႃးယဝ်ႉဢေႃႈ။ မၼ်းပဵၼ်ၶုၼ်ႁေႃၶမ်းဢၼ်ယႂ်ႇမျၢတ်ႈၼႃႇသေၶုၼ်ႁေႃၶမ်းၵႃႈၼႂ်းၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းတင်းလၢႆယဝ်ႉ။ ၽြႃးပဵၼ်ၸဝ်ႈၵျိူၵ်ႈႁၵ်ႉထုၵ်ႇၸႂ်မၼ်းလႄႈၶၢၼ်းႁႂ်ႈမၼ်းပဵၼ်ၶုၼ်ႁေႃၶမ်းမိူင်း ဢိသရေး၊ ယဝ်ႉ။ ၼႂ်းဝႃႈၼၼ်သေၵေႃႈမၼ်းလႆႈႁွတ်ႈထိုင်တၢင်းဢၼ်ၽိတ်းပိူင်ႈ ၵွပ်ႈပိူဝ်ႈဢၼ်ဢဝ်မေးၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းၼၼ်ႉဢေႃႈ။-
တၵ်းႁႂ်ႈႁဝ်းတင်းလၢႆၼႆႉႁဵတ်းမိူၼ်ၸိူဝ်ႉၼင်ႇသူလႄႈႁဵတ်းတုၸရိူၵ်ႈဢၼ်ယႂ်ႇၼႃႇဢၼ်ဝႃႈ၊ဢဝ်မေးၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းလႄႈၽိတ်းပိူင်ႈၽြႃးပဵၼ်ၸဝ်ႈႁိုဝ်း၊” ဝႃႈၼင်ႇၼႆဢေႃႈ။
ယေႃးယတႃႉ၊ ပဵၼ်လုၵ်ႈၸၢႆးၶုၼ်ယဵၸ်ႈပရေႃးႁဵၵ်ႈ ဢေးလျႃႇသိပ်ႉ၊ ဢေႃႈ။ ၼႂ်းလုၵ်ႈၸၢႆး ယေႃးယတႃႉ၊ ၼၼ်ႉၵေႃႉၼိုင်ႈပဵၼ်လုၵ်ႈၶူၺ် သၼ်ႇပႃးလတ်ႉ၊ ၵူၼ်းဝဵင်း ပႅတ်ႉႁေႃႇရုၼ်ႇ၊ ၼၼ်ႉလႄႈၵဝ်လိုပ်ႈမၼ်းဢွၵ်ႇပႅတ်ႈသေၵႃႈၼႂ်းဝဵင်း ယေႇရုသလႅမ်ႇ၊ ဢေႃႈ။
ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ ၶႅၼ်းတေႃႈမၢတ်ႈတွင်းၶဝ်ၸိူဝ်းဢၼ်ႁဵတ်းႁႂ်ႈဢရႃႇယဵၸ်ႈပရေႃးႁဵၵ်ႈ၊ဢိၵ်ႇတင်းပတိၺိၺ်ႇဢၼ်ၸဝ်ႈႁဝ်းႁဵတ်းဝႆႉလူၺ်ႈၵၼ်တင်းယဵၸ်ႈပရေႃးႁဵၵ်ႈတင်းလၢႆ၊ဢိၵ်ႇတင်းၵူၼ်း လေႇဝိ၊ တင်းလၢႆၼၼ်ႉလႆႈၵူဝ်ႈၵိူၵ်ႇၵႂႃႇၼၼ်ႉသေၵမ်းတီႈၶႃႈ။
ၼင်ႇၼၼ်လႄႈၵဝ်ႁႂ်ႈၶဝ်မူတ်းသႂ်ၵၢင်းလွတ်ႈတင်းၵူၼ်းတၢင်ႇၸိူဝ်ႉတၢင်ႇမဵဝ်းသေယဝ်ႉ၊ၶိုၼ်းၶၢၼ်းယဵၸ်ႈပရေႃးႁဵၵ်ႈလႂ်၊တင်းၵူၼ်းမဵဝ်း လေႇဝိ၊ လႂ်ႁႂ်ႈၶဝ်ၵိုတ်ႉႁၢပ်ႇၼႃႈၵၢၼ်ၽႂ်ၼႃႈၵၢၼ်မၼ်းသေဢေႃႈ။-
ပုၼ်ႈဢၼ်တၵ်းႁဵတ်းတၢင်းလူႇဢၼ်တုတ်ႇၽႆးၼၼ်ႉၸိုင်၊ၵဝ်ၶိုင်ပွင်ၽိုၼ်းဝႆႉ ႁႂ်ႈၶဝ်ဢွၼ်ၵၼ်ဢဝ်မႃးသႂၢင်းၼႂ်းၶိင်ႇဢၼ်မၵ်းၶၢၼ်းဝႆႉၼၼ်ႉ၊ဢိၵ်ႇတင်းလူၺ်ႈၵၼ်တင်းၶိူင်ႈတၢင်းလူႇၶဝ်ဢၼ်ပဵၼ်ၶဝ်ႈပိူၵ်ႇဢၼ်ပၢတ်ႇဢွၼ်တၢင်းပိူၼ်ႈလႂ်၊မၢၵ်ႇဢၼ်သုၵ်းဢွၼ်တၢင်းပိူၼ်ႈလႂ်ၸိူဝ်းၼၼ်ႉဢေႃႈ။ ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ ၶႅၼ်းတေႃႈၶုၵ်းၸႂ်လႆႈလွင်ႈတၢင်းၸိူဝ်းၼႆႉသေလႄႈပၼ်တၢင်းလီတီႈၶႃႈၸဝ်ႈသေၵမ်းတီႈၶႃႈ။ လိၵ်ႈမၢတ်ႈလွင်ႈၼေႇႁမိယဝ်ႉယဝ်ႉဢေႃႈ။
လွင်ႈတၢင်းၼႆႉပဵၼ်ၼႂ်းၸူဝ်ႈပၢၼ် ဢႃႇသူၺ်ႇရု၊ ဢၼ်ဢုပ်ႉပိူင်ႇၸၢမ်ႇၸႃးၵႃႈၼိူဝ်ပၢၵ်ႇပၢႆသၢဝ်းၸဵတ်းမိူင်းၸႃႉဢဝ်မိူင်း ဢိၼ်ႇတရိယႃႉ၊ တေႃႇထိုင်ႁွတ်ႈမိူင်း ဢေႇတီႇဢူဝ်းပီးယႃး၊ လႄႈ၊-
ၼႂ်းၶိင်ႇၵႃႇလႃႉၼၼ်ႉၶုၼ်ႁေႃၶမ်း ဢႃႇသူၺ်ႇရု၊ ၼင်ႈႁၢင်ႈၼင်ႈႁေႃၵႃႈၼႂ်းဝဵင်းလူင် သုသႃႇ၊ ဢေႃႈ။
ၼႂ်းပီဢၼ်မၼ်းၸဝ်ႈၸၢမ်ႇႁၢင်ႈၸၢမ်ႇႁေႃလႆႈသၢမ်ပီၼၼ်ႉၸိုင်၊မၼ်းၸဝ်ႈႁဵတ်းပွႆးလဵင်ႉပွႆးလူပုၼ်ႈမူးမၢတ်ႈၽွင်းမိူင်းတင်းလၢႆ၊ၶုၼ်ဢၼ်ပွင်ၵၢၼ်ၸဝ်ႈတင်းလၢႆလႄႈ၊ၶုၼ်သိုၵ်းႁၢၼ်တင်းလၢႆၵႃႈၼႂ်းမိူင်း ပႃးသျႃး၊ တင်းမိူင်း မေႇတိ၊ လႂ်မူးမၢတ်ႈၽွင်းမိူင်းလႂ်၊တင်းၶုၼ်မိူင်းၵူႈသိုင်ႇၵူႈတိူင်းလႂ်၊ဢွၼ်ၵၼ်မႃးၶဝ်ႈပႃးဢေႃႈ။-
မိူဝ်ႈၼၼ်ႉ၊မၼ်းၸဝ်ႈၼႄပျႃးၸေးၸိမ်ႇသိုင်ႇၸိုင်ႈဝၢၼ်ႈမိူင်းၸဝ်ႈဢၼ်မၢၵ်ႈမီးလီပဵၼ်ၼႃႇ၊မုၼ်ၽုင်းဢႃႇၼုၽေႃႇၸဝ်ႈဢၼ်မျၢတ်ႈလီၼႃႇၼၼ်ႉႁူၵ်းလိူၼ်တဵမ်တဵမ်ဢေႃႈ။
ၼႂ်းၶိင်ႇမိူဝ်ႈဢၼ်ပွႆးဝၢႆးၵႂႃႇၼၼ်ႉ၊ၶုၼ်ႁေႃၶမ်းသမ်ႉႁဵတ်းပွႆးလဵင်ႉပွႆးလူပုၼ်ႈၵူၼ်းဝဵင်းလူင် သုသႃႇ၊ ၸဵမ်ၵူၼ်းလဵၵ်ႉၵူၼ်းယႂ်ႇတင်းသဵင်ႈတင်းလူင်ၵႃႈၼႂ်းဝၢင်းသူၼ်ဢူးယဵၼ်ႇႁေႃၶမ်းၼၼ်ႉၸဵတ်းဝၼ်းတဵမ်တဵမ်ဢေႃႈ။-
ၵႃႈၼႂ်းပၢင်ႇဝၢင်းၼၼ်ႉ၊ႁၢင်ႈၶိူင်ႈဝႆႉတင်းၽႃႈၵင်ႈဢၼ်ပဵၼ်ၽႃႈပၢၼ်ႇဢၼ်သွမ်ႇဢၼ်ၶၢဝ်ဢၼ်ဢဝ်ၸိူၵ်ႈၽႃႈပၢၼ်ႇဢၼ်လႅင်ၵမ်ႇမတ်ႉၸပ်းတီႈမွင်ႈငိုၼ်းၵႃႈတီႈသဝ်ႁိၼ်ၶၢဝ်တင်းလၢႆ၊ဢိၵ်ႇတင်းတင်ႇငူင်းတင်းလၢႆဢၼ်ဢဝ်ငိုၼ်းတင်းၶမ်းႁဵတ်းလႄႈတၢင်ႇဝႆႉၵႃႈၼိူဝ်ၶႅပ်းႁိၼ်ဢၼ်ၶၢဝ်၊ဢၼ်လႅင်၊ဢၼ်သွမ်ႇ၊ဢၼ်လမ်ဢၼ်သိူဝ်ႇဝႆႉၼၼ်ႉဢေႃႈ။-
ပုၼ်ႈဢၼ်တၵ်းသူတ်ႉတၵ်းၵိၼ်ၸိုင်၊ၶဝ်ဢဝ်ၵွၵ်းၶမ်းဢၼ်ဢမ်ႇမိူၼ်ၵၼ်ၼၼ်ႉ၊ပၼ်သူတ်ႉပၼ်ၵိၼ်ၼမ်ႉမၢၵ်ႇၸပိတ်ႉလူၼ်ႉလူၼ်ႉလိူဝ်လိူဝ်မႅၼ်ႈၸွမ်းၸႂ်ၸေႇတၼႃႇၶုၼ်ႁေႃၶမ်းၼၼ်ႉဢေႃႈ။-
ပုၼ်ႈဢၼ်တၵ်းသူတ်ႉတၵ်းၵိၼ်ၸိုင်၊ၽူႈလႂ်ဢမ်ႇတိုၵ်းယူင်းၶဝ်၊ၶုၼ်ႁေႃၶမ်းပူင်ဢမိင်ႉတီႈၵူၼ်းၸႂ်ႉၵူၼ်းသွႆမၼ်းတင်းလၢႆပွႆႇႁႂ်ႈၶႅၵ်ႇၵူႈၵေႃႉသူတ်ႉသူတ်ႉၵိၼ်ၵိၼ်ၸွမ်းၼင်ႇဢၼ်မၼ်းသူတ်ႉၵိၼ်လႆႈၼမ်လႆႈၵေႇၼၼ်ႉဢေႃႈ။
ယၢမ်းမိူဝ်ႈၼၼ်ႉ၊ၼၢင်းႁေႃၶမ်း ဝႃႇသတိ၊ ၵေႃႈႁပ်ႉၶၢမ်ႇပွႆးလဵင်ႉပွႆးလူပုၼ်ႈမႄႈယိင်းတင်းလၢႆ ဢၼ်ႁဵတ်းၵႃႈၼႂ်းႁေႃၶမ်းၼၼ်ႉဢေႃႈ။
ၼႂ်းဝၼ်းပွႆးလဵင်ႉပွႆးလူထူၼ်ႈထိုင်ၸဵတ်းဝၼ်းၼၼ်ႉ၊ၶုၼ်ႁေႃၶမ်းသူတ်ႉၵိၼ်ၼမ်ႉမၢၵ်ႇၸပိတ်ႉလႄႈမီးၸႂ်ဢၼ်သႂၢင်ႇဢၼ်သိူဝ်းသေယဝ်ႉ၊မၼ်းၸဝ်ႈႁွင်ႉဢဝ်ၵူၼ်းၸိူဝ်းဢၼ်ထိင်းၼၢင်းဢၼ်မီးၸိုဝ်ႈဝႃႈ၊ မႁုမၼ်ႇ၊ပိၸသႃႉ၊ႁႃႇပေႃႇၼႃႉ၊ပိၵသႃႉ၊ဢပႃႇၵသႃႉ၊ၸေႇသႃႇ၊ ဢိၵ်ႇတင်း ၵႃႇၵတ်ႉ၊ ၶဝ်ၸဵတ်းၵေႃႉၼၼ်ႉၶဝ်ႈၶႃးၸႃးၵႃႈတီႈၽၢႆႇၼႃႈမၼ်းၸဝ်ႈဢေႃႈ။-
မၼ်းၸဝ်ႈပူင်ဢမိင်ႉႁႂ်ႈၶဝ်ၵႂႃႇပၢင်းဢဝ်ၼၢင်းႁေႃၶမ်း ဝႃႇသတိ၊ ႁႂ်ႈတိုဝ်းရႃႇၸႃႉသရၽူႇသေလႄႈမႃးတီႈမၼ်းၸဝ်ႈဢေႃႈ။ ၼၢင်းႁေႃၶမ်းၼၼ်ႉပဵၼ်မႄႈယိင်းဢၼ်ႁၢင်ႈလီၼႃႇလူင်လၢင်လႄႈမၼ်းၸဝ်ႈႁွင်ႉမႃးႁႂ်ႈလႆႈၼႄပျႃးတၢင်းႁၢင်ႈလီၼၢင်းၼၼ်ႉ တီႈမူးမၢတ်ႈၽွင်းမိူင်းတင်းလၢႆ၊ဢိၵ်ႇတင်းတီႈၶႅၵ်ႇတင်းလၢႆဢေႃႈ။-
ၵူၺ်းၵႃႈ၊မိူဝ်ႈဢၼ်ၵူၼ်းၸႂ်ႉၵူၼ်းသွႆၸိူဝ်းၼၼ်ႉၵႂႃႇမွၵ်ႇလၢတ်ႈလွင်ႈဢမိင်ႉၶုၼ်ႁေႃၶမ်းတီႈၼၢင်းႁေႃၶမ်း ဝႃႇသတိ၊ ၼၼ်ႉၸိုင်၊မၼ်းၼၢင်းၼၼ်ႉထဵင်ပႅတ်ႈသေယဝ်ႉ၊ယင်းဢမ်ႇမႃးလႄႈယူႇဢေႃႈ။ ၵွပ်ႈပိူဝ်ႈၼင်ႇၼၼ်လႄႈၶုၼ်ႁေႃၶမ်းၸႂ်မႆႈၶႂ်ႈၸႃႉဢွၵ်ႇတေႃးသႃႉယႂ်ႇၼႃႇဢေႃႈ။
ၸွမ်းၼင်ႇၶုၼ်ႁေႃၶမ်းမီးထုင်းၸၢမ်ႇဢၼ်တွင်ႈထၢမ်တီႈၶုၼ်ဢၼ်ပွင်ၵၢၼ်လႄႈမီးတၢင်းႁုၸိူဝ်းၼၼ်ႉၼၼ်ႉၸိုင်၊မၼ်းၸဝ်ႈႁွင်ႉဢဝ်ၵူၼ်းဢၼ်ပၼ်တၢင်းၵျၢမ်ႇတၢင်းပွင်တင်းလၢႆမႃးတိူင်ႇပၢင်ႇလၢတ်ႈၸႃၵၼ်တင်းမၼ်းၸဝ်ႈဢေႃႈ။-
ၵူၼ်းမေႃတြႃးလႄႈၸၢင်ႈၸီႇယၢင်ႇၸိူဝ်းၼၼ်ႉၸမ်ႉ၊ပဵၼ် ၵႃႇသေႇၼႃႉ၊သေးႀႃႇ၊ဢတ်ႉမႃႇႀႃႇ၊တႃႇရသိ၊မေႇရိၸ်ႈ၊မႃႇသေႇၼႃႉ၊ တင်း မမုၵၼ်ႇ၊ ၶဝ်ၸဵတ်းၵေႃႉၼႆႉပဵၼ်ၶုၼ်ဢၼ်ပွင်ၵၢၼ်မိူင်း ပႃးသျႃး၊ တင်းမိူင်း မေႇတိ၊ ဢၼ်သုင်မျၢတ်ႈသေပိူၼ်ႈၵႃႈၼႂ်းမိူင်းၸဝ်ႈၼၼ်ႉဢေႃႈ။-
မၼ်းၸဝ်ႈလၢတ်ႈတီႈၵူၼ်းၸိူဝ်းၼၼ်ႉလႄႈဝႃႈ၊ “ၵဝ်ၸဝ်ႈၶုၼ်ႁေႃၶမ်း ဢႃႇသူၺ်ႇရု၊ မီးဢမိင်ႉလႄႈပွႆႇၸႂ်ႉၵူၼ်းၸႂ်ႉၵူၼ်းသွႆၵဝ်တင်းလၢႆၵႂႃႇပၢင်းဢဝ်ၼၢင်းႁေႃၶမ်း ဝႃႇသတိ၊ မႃးသေၵေႃႈမၼ်းၼၢင်းထဵင်ပႅတ်ႈဢမိင်ႉၵဝ်ယဝ်ႉ။ ၸွမ်းၼင်ႇထုင်းတြႃးမီးဝႆႉၼၼ်ႉတၵ်းၸီႇယၢင်ႇၵႃႈၼိူဝ်မၼ်းၼၢင်းၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ မမုၵၼ်ႇ၊ လဝ်ႈလၢတ်ႈတီႈၶုၼ်ႁေႃၶမ်းၽၢႆႇၼႃႈမူးမၢတ်ႈၽွင်းမိူင်းတင်းလၢႆလႄႈဝႃႈ၊ “ၼၢင်းႁေႃၶမ်း ဝႃႇသတိ၊ ၼၼ်ႉၽိတ်းပိူင်ႈၸဝ်ႈၶုၼ်လူင်ပႃးလဵဝ်ၵူၺ်းဢမ်ႇၸႂ်ႈတီႈၶႃႈ။ ၽိတ်းပိူင်ႈပႃးၸွမ်းမူးမၢတ်ႈၽွင်းမိူင်းတင်းလၢႆဢိၵ်ႇတင်းၶႃႈဝၢၼ်ႈၵူၼ်းမိူင်းၵႃႈဢၼ်မီးၵႃႈၼႂ်းသိုင်ႇၸိုင်ႈဝၢၼ်ႈမိူင်းၵူႈတီႈၵူႈလႅၼ်ဢၼ်ၸဝ်ႈၶုၼ်လူင် ဢႃႇသူၺ်ႇရု၊ ဢုပ်ႉပိူင်ႇၼၼ်ႉတီႈၶႃႈယဝ်ႉ။-
လွင်ႈတၢင်းဢၼ်ၼၢင်းႁေႃၶမ်းႁဵတ်းၼႆႉတၵ်းလႆႈငိၼ်းၸွတ်ႇၵႂႃႇၵႃႈတီႈမႄႈယိင်းတင်းသဵင်ႈတင်းလူင်လႄႈႁႂ်ႈၽူဝ်ၶဝ်ပဵၼ်ဢၼ်တႅမ်ႇယေႃႈမဝ်မၢင်သိုဝ်ႈၼႃႈတႂ်ႈတႃၶဝ်ၼႂ်းမိူဝ်ႈဢၼ်ပိူၼ်ႈလၢတ်ႈလႄႈဝႃႈ၊ ‘ၶုၼ်ႁေႃၶမ်း ဢႃႇသူၺ်ႇရု၊ မီးဢမိင်ႉႁႂ်ႈၼၢင်းႁေႃၶမ်း ဝႃႇသတိ၊ ၶဝ်ႈၶႃးၸႃးၵႃႈတီႈၽၢႆႇၼႃႈမၼ်းၸဝ်ႈသေၵေႃႈ မၼ်းၼၢင်းယင်းဢမ်ႇမႃးလႄႈယူႇဢေႃႈ၊’ ဝႃႈၼႆၼၼ်ႉၸိုင်၊-
မႄႈယိင်းဢၼ်ပဵၼ်ၸိုင်ႈပဵၼ်ၼၢင်းမိူင်း ပႃးသျႃး၊ တင်းမိူင်း မေႇတိ၊ ၸိူဝ်းၼၼ်ႉတၵ်းဢွၼ်ၵၼ်ငိၼ်းလွင်ႈတၢင်းဢၼ်ၼၢင်းႁေႃၶမ်းႁဵတ်းၼႆႉသေလႄႈတၵ်းၶိုၼ်းတွပ်ႇၶိုၼ်းထဵင်ၽူဝ်ၶဝ်သေယဝ်ႉ၊ၽူဝ်ၶဝ်ၵေႃႈတၵ်းပဵၼ်တေႃးသႃႉတၢင်းၸႂ်မႆႈၶႂ်ႈၸႃႉႁႅင်းၼႃႇတီႈၶႃႈဢေႃႈ။-
ပေႃးၸဝ်ႈၶုၼ်လူင်မီးဢလူဝ်ႇၸိုင်၊ၶႅၼ်းတေႃႈပူင်ဢမိင်ႉလူၺ်ႈလွင်ႈဢၼ် ဝႃႇသတိ၊ ၼၼ်ႉၵမ်းလိုၼ်းတၵ်းဢမ်ႇလႆႈၶဝ်ႈၶႃးၸႃးၵႃႈတီႈၽၢႆႇၼႃႈၸဝ်ႈၶုၼ်လူင်ၼၼ်ႉသေယဝ်ႉ၊ပူင်ဢမိင်ႉႁႂ်ႈတႅမ်ႈမၢႆဝႆႉၵႃႈၼႂ်းၽိုၼ်လိၵ်ႈဢုပတေႇမိူင်း ပႃးသျႃး၊ တင်းမိူင်း မေႇတိ၊ လႄႈယႃႇပေႁႂ်ႈဢမိင်ႉၼၼ်ႉလႆႈၶၢႆႉလႆႈပုတ်ႈသေၵမ်းတီႈၶႃႈ။ ႁႂ်ႈၸဝ်ႈၶုၼ်လူင်ဢဝ်ဢရႃႇၼၢင်းႁေႃၶမ်းၼၼ်ႉပၼ်တီႈမႄႈယိင်းဢၼ်ယဵင်ႈၶႅၼ်းလီၼႃႇသေမၼ်းၼၼ်ႉသေၵမ်းတီႈၶႃႈ၊ဝႃႈၼင်ႇၼႆဢေႃႈ။-
မိူဝ်ႈဢၼ်ဢမိင်ႉၸဝ်ႈၶုၼ်လူင်ၼၼ်ႉသႃႇၸွတ်ႇၵႂႃႇၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈဢၼ်ယႂ်ႇၵႂၢင်ႈၼႃႇၵူႈတီႈၵူႈလႅၼ်ယဝ်ႉၼၼ်ႉၸိုင်၊မႄႈယိင်းတင်းသဵင်ႈတင်းလူင်တၵ်းဢွၼ်ၵၼ်ႁဵတ်းရူဝ်ႇသေႇၵူဝ်ယမ်တီႈၽူဝ်ၶဝ်ဢမ်ႇဝႃႈၵူၼ်းၸၼ်ႉသုင်၊ဢမ်ႇဝႃႈၵူၼ်းၸၼ်ႉတႅမ်ႇတေလႆႈႁဵတ်းဢေႃႈ၊” ဝႃႈၼင်ႇၼႆဢေႃႈ။
ၵႂၢမ်းၼၼ်ႉပဵၼ်ၵႂၢမ်းဢၼ်ထုၵ်ႇၸႂ်ၵျိူၵ်ႈၸႂ်ၶုၼ်ႁေႃၶမ်း၊ဢိၵ်ႇတင်းမူးမၢတ်ႈၽွင်းမိူင်းၸဝ်ႈတင်းလၢႆလႄႈၶုၼ်ႁေႃၶမ်းႁဵတ်းၸွမ်းၵႃႈၼင်ႇဢၼ် မမုၵၼ်ႇ၊ လဝ်ႈလၢတ်ႈၼၼ်ႉဢေႃႈ။-
မၼ်းၸဝ်ႈပၼ်လိၵ်ႈဢမိင်ႉၵႂႃႇၵႃႈၼႂ်းသိုင်ႇၸိုင်ႈဝၢၼ်ႈမိူင်းၵူႈတီႈၵူႈလႅၼ်၊ၵူႈသိုင်ႇၵူႈမိူင်းၸွမ်းလူၺ်ႈလိၵ်ႈဢႅၵ်ႉၶရႃႇၶဝ်ႁင်းၽႂ်ႁင်းမၼ်း၊ၵႃႈတီႈၵူၼ်းၵူႈၸိူဝ်ႉၵူႈမဵဝ်းၸွမ်းလူၺ်ႈၵႂၢမ်းၽႃႇသႃႇၶဝ်ႁင်းၽႂ်ႁင်းမၼ်းၼၼ်ႉ၊လူၺ်ႈလွင်ႈဢၼ်ၵူၼ်းၸၢႆးၵူႈၵေႃႉၵူႈၵူၼ်းတၵ်းလႆႈပဵၼ်ငဝ်ႈပဵၼ်ႁူဝ်ၼႂ်းႁိူၼ်းတူဝ်ၸဝ်ႈၵဝ်ႇၼၼ်ႉဢေႃႈ။
လိုၼ်းၼၼ်ႉ၊ဝၢႆးသေတၢင်းၸႂ်မႆႈၶႂ်ႈၸႃႉၶုၼ်ႁေႃၶမ်း ဢႃႇသူၺ်ႇရု၊ ထၢတ်ႇယဵၼ်ယဝ်ႉၼၼ်ႉၸိုင်၊ၶုၼ်ႁေႃၶမ်းၶုၵ်းၸႂ်လႆႈ ဝႃႇသတိ၊ လႄႈၶႆႈၸႂ်ထူပ်းလွင်ႈတၢင်းဢၼ်မၼ်းႁဵတ်း၊ဢိၵ်ႇတင်းတၢင်းဢၼ်ၸီႇယၢင်ႇတီႈမၼ်းၼၼ်ႉဢေႃႈ။-
ၵူၼ်းပၼ်တၢင်းၵျၢမ်ႇၸဝ်ႈၵမ်ႈၽွင်ႈၸိူဝ်းဢၼ်ၶႃးၸႃးယူႇၼၼ်ႉဢွၼ်ၵၼ်လၢတ်ႈလႄႈဝႃႈ၊ “ၶႅၼ်းတေႃႈပွႆႇၸႂ်ႉႁႂ်ႈလႆႈႁႃဢဝ်သၢဝ်ၵၼ်ႇၺႃႇဢၼ်ႁၢင်ႈလီတင်းလၢႆပုၼ်ႈၸဝ်ႈၶုၼ်ႁေႃၶမ်းသေၵမ်းတီႈၶႃႈ။-
ႁႂ်ႈၸဝ်ႈၶုၼ်လူင်ၶၢၼ်းၶုၼ်ဢၼ်ပွင်ၵၢၼ်ၵႃႈၼႂ်းၵူႈသိုင်ႇၸိုင်ႈဝၢၼ်ႈမိူင်းၸဝ်ႈတင်းလၢႆၼၼ်ႉ၊ၸႂ်ႉၶဝ်ႁႂ်ႈဢဝ်သၢဝ်ၵၼ်ႇၺႃႇဢၼ်ႁၢင်ႈလီတင်းသဵင်ႈတင်းလူင် မႃးၸုတုမ်ၵၼ်ဝႆႉၵႃႈၼႂ်းႁေႃၸိူင်ႉၼၢင်းတင်းလၢႆ၊ၵႃႈတီႈႁေႃၸဝ်ႈ သုသႃႇ၊ လႄႈဢၢပ်ႈဝႆႉၵႃႈတီႈ ႁေႇၵႄး၊ ၵူၼ်းဢၼ်ဢုပ်ႉထိင်းၵႃႈၼိူဝ်ၸိူင်ႉၼၢင်းၼၼ်ႉ၊ႁႂ်ႈဢဝ်ၽွင်ယႃႈယႃတႃးၽိဝ်ၼင်လႄႈလုမ်းလႃးႁႂ်ႈၶဝ်ႁၢင်ႈလီမူတ်းသႂ်သေၵမ်းတီႈၶႃႈ။-
ၼင်ႇၼၼ်လႄႈဢဝ်သၢဝ်ၵၼ်ႇၺႃႇဢၼ်ၸဝ်ႈၶုၼ်လူင်ထုၵ်ႇၸႂ်ၵျိူၵ်ႈၸႂ်ၼၼ်ႉ၊ယွင်ႈတၢင်ႇပဵၼ်ၼၢင်းႁေႃၶမ်းတၢင်တူဝ် ဝႃႇသတိ၊ သေၵမ်းတီႈၶႃႈ၊” ဝႃႈၼင်ႇၼႆလႄႈ။ ၶုၼ်ႁေႃၶမ်းၶႆႈၸႂ်ဝူၼ်ႉတူၺ်းသေယဝ်ႉ၊ႁုဝႃႈပဵၼ်တၢင်းဢၼ်လီလႄႈမၼ်းၸဝ်ႈၵေႃႈႁဵတ်းၸွမ်းၸိူဝ်ႉၼင်ႇၼၼ်ဢေႃႈ။
ၵႃႈတီႈဝဵင်း သုသႃႇ၊ ၼၼ်ႉမီးၵူၼ်းမဵဝ်း ၵျူး၊ ၵေႃႉၼိုင်ႈဢၼ်လႆႈၸိုဝ်ႈ မေႃႇတၵႄး၊ ဢၼ်ပဵၼ်လုၵ်ႈၸၢႆး ယႃႇဢိရႃႉ၊ယႃႇဢိရႃႉ၊ ဢၼ်ပဵၼ်လုၵ်ႈၸၢႆး သိမိ၊သိမိ၊ ဢၼ်ပဵၼ်လုၵ်ႈၸၢႆး ၵိသႃႉ၊ ဢၼ်လုၵ်ႉၵႃႈတီႈၸိူဝ်ႉၶိူဝ်း ပိၼ်ႇယႃႇမိၼ်ႇ၊ သိုပ်ႇလူင်းမႃးၼၼ်ႉဢေႃႈ။-
မၼ်းၼၼ်ႉပဵၼ်ၵေႃႉဢၼ်ပႃးၼႂ်းမုၵ်ႉၼႂ်းၸိူဝ်းၵူၼ်းမိူင်း ယုတႃႉ၊ ၸိူဝ်းဢၼ်လႆႈၶၢမ်ႇတၢင်းဢၼ်ၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ မိူင်း ပႃႇပုလုၼ်ႇ၊ တိဢဝ်သိမ်းဢဝ်ၵႂႃႇသေၵႃႈတီႈဝဵင်း ယေႇရုသလႅမ်ႇ၊ ၼႂ်းၸူဝ်ႈပၢၼ်ၶုၼ်ႁေႃၶမ်း ယေႇၶေႃႇၼိ၊ မိူင်း ယုတႃႉ၊ ၼၼ်ႉဢေႃႈ။-
မေႃႇတၵႄး၊ ၼၼ်ႉလႆႈၵဵပ်းလဵင်ႉလုၵ်ႈယိင်းၵႃႈၼႂ်းပီႈၼႂ်းၼွင်ႉမၼ်း၊ဢၼ်မီးၸိုဝ်ႈဝႃႈ၊ ဢေးသတႃႇ၊ ဢၼ်မီးၸိုဝ်ႈၼႂ်းၵႂၢမ်း ႁေႇပြႄး၊ ၼၼ်ႉႁွင်ႉႁဵၵ်ႈဝႃႈ၊ ႁတတ်ႉသႃႉ၊ ၼၼ်ႉဢေႃႈ။ ၵွပ်ႈပိူဝ်ႈပေႃႈမႄႈမၼ်းတၢႆယဝ်ႉလႄႈ မေႃႇတၵႄး၊ ဢဝ်မၼ်းလဵင်ႉဝႆႉမိူၼ်ၸိူဝ်ႉၼင်ႇလုၵ်ႈယိင်းဢွၵ်ႇတူဝ်ၸဝ်ႈၵဝ်ႇဢေႃႈ။ ဢေးသတႃႇ၊ ၼၼ်ႉ ပဵၼ်ၵေႃႉဢၼ်ႁၢင်ႈၽၢင်တူဝ်ၶိင်းလီတူၺ်းလႄႈၼိူဝ်ႉၼင်ႁၢင်ႈလီဢေႃႈ။
မိူဝ်ႈဢၼ်ၶုၼ်ႁေႃၶမ်းၸႂ်ႉႁႂ်ႈပၢဝ်ႇသေႃႇဢမိင်ႉၸဝ်ႈယဝ်ႉၼၼ်ႉ၊ၶဝ်ဢွၼ်ၵၼ်ဢဝ်ၼၢင်းယိင်းသၢဝ်ၼမ်ၼႃႇမႃးၵႃႈတီႈဝဵင်း သုသႃႇ၊ ဢေႃႈ။ ဢေးသတႃႇ၊ ၵေႃႈပႃးမႃးၵႃႈၼႂ်းၶဝ်ၼၼ်ႉသေယဝ်ႉ၊ႁႂ်ႈမႃးၸုတုမ်ၵၼ်ၵႃႈၼႂ်းႁေႃၶမ်းၸဝ်ႈ၊ဢၢပ်ႈဝႆႉၵႃႈၼႂ်းမိုဝ်း ႁေႇၵႄး၊ ၵူၼ်းဢၼ်ထိင်းႁေႃၸိူင်ႉၼၢင်းၼၼ်ႉဢေႃႈ။-
ႁေႇၵႄး၊ ၼၼ်ႉထုၵ်ႇၸႂ်ၵျိူၵ်ႈၸႂ် ဢေးသတႃႇ၊ လႄႈ ဢေးသတႃႇ၊ လႆႈၼႃႈလႆႈတႃတီႈမၼ်းသေယဝ်ႉ၊မၼ်းဢဝ်ၽွင်ယႃႈယႃပုၼ်ႈဢၼ်တၵ်းႁႂ်ႈၽိဝ်ၼိူဝ်ႉမူတ်းသႂ်၊ဢိၵ်ႇတင်းတၢင်းၵိၼ်တၢင်းၶူပ်းဢၼ်လီဢၼ်ငၢမ်းၼၼ်ႉမႃးလုမ်းလႃးဢေႃႈ။ မၼ်းပၼ်တီႈယူႇဢၼ်မျၢတ်ႈဢၼ်လီတီႈ ဢေးသတႃႇ၊ ၵႃႈၼႂ်းႁေႃၸိူင်ႉၼၢင်းၼၼ်ႉလႄႈၶၢၼ်းၶႃႈမႄႈယိင်းၸဵတ်းၵေႃႉဢၼ်လိူၵ်ႈဢဝ်ဢၼ်ထုၵ်ႇဢၼ်လီသေပိူၼ်ႈၵႃႈၼႂ်းႁေႃၶမ်းၸဝ်ႈၼၼ်ႉသေယဝ်ႉ၊ႁႂ်ႈပႂ်ႉလူလုမ်းလႃး ဢေးသတႃႇ၊ ဢေႃႈ။
ၸွမ်းၼင်ႇဢၼ် မေႃႇတၵႄး၊ ႁၢမ်ႈတၢပ်ႈဝႆႉၼၼ်ႉ၊ ဢေးသတႃႇ၊ ၵေႃႈဢမ်ဝႆႉသိူင်ႇဝႆႉလွင်ႈဢၼ်မၼ်းပဵၼ်ၵူၼ်းမဵဝ်း ၵျူး၊ ၼၼ်ႉဢေႃႈ။-
ၼင်ႇၼၼ်လႄႈ မေႃႇတၵႄး၊ ပႆၵႂႃႇပႆမႃးၵႃႈတီႈၽၢႆႇၼႃႈပၢင်ႇဝၢင်းႁေႃၸိူင်ႉၼၢင်းၼၼ်ႉယူႇၵူႈဝၼ်းႁႂ်ႈလႆႈႁုလွင်ႈဢၼ် ဢေးသတႃႇ၊ ယူႇလီယူႇၸႃႉၸိူဝ်ႉၼင်ႇႁိုဝ်၊ဢိၵ်ႇတင်းလွင်ႈဢၼ်ပိူၼ်ႈတၵ်းႁဵတ်းၵႃႈသင်တီႈမၼ်းၼၼ်ႉဢေႃႈ။
တၢင်းဢၼ်လုမ်းလႃးၼၢင်းယိင်းႁႂ်ႈႁၢင်ႈလီႁၢင်ႈငၢမ်းၼၼ်ႉႁိုင်ပီၼိုင်ႈတဵမ်တဵမ်ဢေႃႈ။ လႆႈဢဝ်ယၢင်မုရၼ်ႇတႃးပၼ်ၼူတ်ႈပၼ်ႁူၵ်းလိူၼ်သေယဝ်ႉ၊သမ်ႉလႆႈဢဝ်ၼၢမ်ႇသႃႇ၊ဢိၵ်ႇတင်းၽွင်ယႃႈယႃပုၼ်ႈဢၼ်တၵ်းႁႂ်ႈမူတ်းသႂ်ၼၼ်ႉလုမ်းလႃးထႅင်ႈႁူၵ်းလိူၼ်ယဝ်ႉၸင်ႇ၊လႆႈဢဝ်ၼၢင်းယိင်းၸိူဝ်းၼၼ်ႉၶဝ်ႈၸူးတီႈၶုၼ်ႁေႃၶမ်း ဢႃႇသူၺ်ႇရု၊ ယေႈၵမ်းယေႈၵေႃႉဢေႃႈ။-
လိုၼ်းၼၼ်ႉ၊မိူဝ်ႈဢၼ်ႁွတ်ႈထိုင်ၶိင်ႇဢၼ်ၵၼ်ႇၺႃႇလုၵ်ႈယိင်းသၢဝ်ၸိူဝ်းၼၼ်ႉတၵ်းလႆႈၶဝ်ႈၸူးၵႃႈတီႈၶုၼ်ႁေႃၶမ်းၼၼ်ႉၸိုင်၊ၵႃႈဢၼ်ၶဝ်မီးဢလူဝ်ႇလႄႈယွၼ်းဢဝ်ၼၼ်ႉႁႂ်ႈၶဝ်ဢဝ်လႄႈဢွၵ်ႇသေၵႃႈၼႂ်းႁေႃမႄႈယိင်းၼၼ်ႉသေယဝ်ႉ၊ၵႂႃႇၸူးတီႈၶုၼ်ႁေႃၶမ်းဢေႃႈ။-
ၶိင်ႇႁူဝ်ၶမ်ႈၼၢင်းယိင်းၼၼ်ႉလႆႈၶဝ်ႈၸူးသေယဝ်ႉၸင်ႇၶိင်ႇၵၢင်ၼႂ်လႆႈဢွၵ်ႇၵႂႃႇၸူးၵႃႈတီႈႁေႃၸိူင်ႉၼၢင်းတၢင်ႇႁေႃသေဢဝ်ဢၢပ်ႈဝႆႉၵႃႈၼႂ်းမိုဝ်း သႃႇၵၸႃႉ၊ ၵူၼ်းၸၢႆးတွၼ်ၵေႃႉဢၼ်ဢုပ်ႉထိင်းႁေႃၸိူင်ႉၼၢင်းၶုၼ်ႁေႃၶမ်းၼၼ်ႉဢေႃႈ။ ပေႃးၶုၼ်ႁေႃၶမ်းဢမ်ႇထုၵ်ႇၸႂ်ၵျိူၵ်ႈၸႂ်လႄႈယင်းဢမ်ႇႁွင်ႉၸိုဝ်ႈႁွင်ႉသဵင်မၼ်းၸိုင်၊ၵမ်းလိုၼ်းၼၢင်းယိင်းၵေႃႉၼၼ်ႉဢမ်ႇလႆႈၶဝ်ႈၸူးတီႈၶုၼ်ႁေႃၶမ်းထႅင်ႈယဝ်ႉ။
ၶိင်ႇဢၼ် ဢေးသတႃႇ၊ လုၵ်ႈယိင်း ဢၽိႁေးလႃႉ၊ ၼွင်ႉယိင်း မေႃႇတၵႄး၊ ဢၼ်မၼ်းၵဵပ်းလဵင်ႉၸိူဝ်ႉၼင်ႇလုၵ်ႈယိင်းဢွၵ်ႇတူဝ်ၸဝ်ႈၵဝ်ႇတူၵ်းလႄႉတူၵ်းၵမ်းဢၼ်တၵ်းလႆႈၶဝ်ႈၸူးၵႃႈတီႈၶုၼ်ႁေႃၶမ်း ဢႃႇသူၺ်ႇရု၊ ၼၼ်ႉမႃးထိုင်ယဝ်ႉဢေႃႈ။ ဢေးသတႃႇ၊ ၼၼ်ႉၽူႈလႂ်သေဢမ်ႇဝႃႈ၊ၵေႃႉဢၼ်ထူပ်းႁၼ်မၼ်းၼၼ်ႉၵျိူၵ်ႈၸႂ်ထုၵ်ႇၸႂ်ဢေႃႈ။ မိူဝ်ႈဢၼ် ဢေးသတႃႇ၊ တူၵ်းလႄႉတူၵ်းၵမ်းၼၼ်ႉ ၸိုင်၊ၼွၵ်ႈသေလွင်ႈတၢင်းဢၼ် ႁေႇၵႄး၊ ၵူၼ်းပႂ်ႉထိင်းႁေႃၸိူင်ႉၼၢင်းပၼ်တၢင်းၵျၢမ်ႇၼၼ်ႉ ဢေးသတႃႇ၊ ဢမ်ႇယွၼ်းဢဝ်သေၸိူဝ်ႉသေပိူင်ဢေႃႈ။-
ပိူဝ်ႈၼႆလႄႈၼႂ်းပီဢၼ် ဢႃႇသူၺ်ႇရု၊ ၸၢမ်ႇႁၢင်ႈၸၢမ်ႇႁေႃလႆႈၸဵတ်းပီၼႂ်းလိူၼ်တီႈသိပ်းၼၼ်ႉ၊ ဢေးသတႃႇ၊ လႆႈၶဝ်ႈၸူးတီႈၶုၼ်ႁေႃၶမ်း ဢႃႇသူၺ်ႇရု၊ ၵႃႈၼႂ်းႁေႃၶမ်းၸဝ်ႈဢေႃႈ။-
ၶုၼ်ႁေႃၶမ်းႁၵ်ႉမၼ်းလိူဝ်တွၼ်းၼႃႇသေၼၢင်းသၢဝ်တၢင်ႇၵေႃႉတၢင်ႇၵူၼ်းၸိူဝ်းၼၼ်ႉလႄႈမၼ်းလႆႈၼႃႈလႆႈတႃထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈၼႃႇသေၼၢင်းသၢဝ်ၵူႈၵေႃႉၼၼ်ႉဢေႃႈ။ ၶုၼ်ႁေႃၶမ်းၵေႃႈဢဝ်ရႃႇၸႃႉသရၽူႇတိုဝ်းပၼ်မၼ်းႁႂ်ႈလႆႈပဵၼ်ၼၢင်းႁေႃၶမ်းတႅၼ်း ဝႃႇသတိ၊ ဢေႃႈ။-
မိူဝ်ႈၼၼ်ႉ၊ၶုၼ်ႁေႃၶမ်းႁဵတ်းပွႆးလဵင်ႉပွႆးလူယႂ်ႇၼႃႇဢၼ်ႁွင်ႉဝႃႈ၊ပွႆး ဢေးသတႃႇ၊ ၼၼ်ႉပၼ်တီႈမူးမၢတ်ႈၽွင်းမိူင်းမၼ်းတင်းၶုၼ်ဢၼ်ပွင်ၵၢၼ်မၼ်းၵႃႈမီးတင်းသဵင်ႈတင်းလူင်ဢေႃႈ။ မၼ်းၸဝ်ႈပွႆႇလွတ်ႈဢမုတၢင်းၽိတ်းၶုၼ်မိူင်းၸဝ်ႈၵူႈသိုင်ႇၵူႈမိူင်းၵူႈတီႈၵူႈလႅၼ်၊ဢိၵ်ႇတင်းပၼ်ၶွင်ၽၢၵ်ႇလၢၵ်ႈသွင်ႇၸွမ်းၸေးၸိမ်ႇဢၼ်ၶုၼ်ႁေႃၶမ်းမီးၼၼ်ႉဢေႃႈ။
ယၢမ်းမိူဝ်ႈဢၼ်ၵၼ်ႇၺႃႇၼၢင်းယိင်းၸိူဝ်းၼၼ်ႉၸုတုမ်ၵၼ်ပွၵ်ႈတီႈသွင်ၼၼ်ႉ၊ မေႃႇတၵႄး၊ လႆႈပႂ်ႉထိင်းၵႃႈတီႈၽၵ်းတူၸဝ်ႈၼၼ်ႉဢေႃႈ။-
ဢေးသတႃႇ၊ ၼၼ်ႉၸမ်ႉ၊မၼ်းယင်းဢမ်ႇပႆႇၽုၺ်ႇဢွၵ်ႇၼႄပျႃးလွင်ႈဢၼ်မၼ်းပဵၼ်ၵူၼ်းမဵဝ်း ၵျူး၊ ၸွမ်းၼင်ႇဢၼ် မေႃႇတၵႄး၊ ပၼ်သတိဝႆႉၼၼ်ႉၵွပ်ႈပိူဝ်ႈဢၼ် ဢေးသတႃႇ၊ ယင်းတိုၵ်ႉထွမ်ႇဢဝ်ၵႂၢမ်း မေႃႇတၵႄး၊ မိူၼ်ၸိူဝ်ႉၼင်ႇဢၼ်မၼ်းထွမ်ႇဢဝ်ၸဵမ်မိူဝ်ႈယင်းလဵၵ်ႉယင်းၼွႆႉၼၼ်ႉယူႇဢေႃႈ။
ၼႂ်းၶိင်ႇၵႃႇလႃႉဢၼ် မေႃႇတၵႄး၊ ယင်းတိုၵ်ႉၵိုတ်ႉႁၢပ်ႇၼႃႈၵၢၼ်ပႂ်ႉၽၵ်းတူၸဝ်ႈယူႇၼၼ်ႉ၊ ပိၵသၼ်ႇ၊ ဢိၵ်ႇတင်း တေႇရိတ်ႉ၊ ၶဝ်သွင်ၵေႃႉဢၼ်ပဵၼ်ၵူၼ်းၸၢႆးတွၼ်ဢၼ်ထိင်းႁေႃၸိူင်ႉၼၢင်းဢၼ်ပႂ်ႉၽၵ်းတူဢၼ်ၶဝ်ႈၸူးလုၵ်းၶုၼ်ႁေႃၶမ်းၼၼ်ႉ၊မီးၸႂ်တေႃးသႃႉလႄႈဢွၼ်ၵၼ်ၶတ်းၸႂ်ၵျၢမ်ႇပွင်ႁႂ်ႈလႆႈဢဝ်ၶုၼ်ႁေႃၶမ်း ဢႃႇသူၺ်ႇရု၊ တၢႆဢေႃႈ။-
မေႃႇတၵႄး၊ လႆႈႁုလႆႈငိၼ်းလွင်ႈတၢင်းၼၼ်ႉလႄႈမွၵ်ႇလၢတ်ႈထိုင် ဢေးသတႃႇ၊ သေယဝ်ႉ၊ ဢေးသတႃႇ၊ ၵေႃႈဢဝ်လွင်ႈတၢင်းဢၼ် မေႃႇတၵႄး၊ လႆႈႁုလႆႈငိၼ်းမႃးၼၼ်ႉတၢင်ႇလဝ်ႈမွၵ်ႇလၢတ်ႈထိုင်ၶုၼ်ႁေႃၶမ်းဢေႃႈ။-
မိူဝ်ႈဢၼ်ၸႅတ်ႈထၢမ်ၸႅတ်ႈတူၺ်းလွင်ႈတၢင်းၼၼ်ႉလႄႈႁုလွင်ႈဢၼ်မၢၼ်ႇမႅၼ်ႈၸိုဝ်ႈၸႂ်ႈယဝ်ႉၼၼ်ႉၸိုင်၊ၶဝ်ဢဝ်သွင်ၵေႃႉၼၼ်ႉႁွႆႈၶႅၼ်ၶေႃးၵႃႈၼိူဝ်သဝ်မႆႉသေဢေႃႈ။ လွင်ႈဢမုၼၼ်ႉတႅမ်ႈမၢႆဝႆႉၵႃႈၼႂ်းၽိုၼ်လိၵ်ႈပိုၼ်းမိူင်းၸဝ်ႈၼၼ်ႉၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။
လိုၼ်းၼၼ်ႉ၊ဢမ်ႇႁိုင်ဢမ်ႇၼၢၼ်းၶုၼ်ႁေႃၶမ်းယုၵ်ႉတၢင်ႇဢရႃႇ ႁႃႇမၢၼ်ႇ၊ လုၵ်ႈၸၢႆး ႁမ်ႇမေႇတႃႇသႃႉ၊ မဵဝ်း ဢႃႇၵတ်ႉ၊ ၼၼ်ႉၼႂ်းဢရႃႇဝုၼ်ႇၶျုၵ်ႈလူင်ဢေႃႈ။-
ၶုၼ်ႁေႃၶမ်းပူင်ဢမိင်ႉဝႆႉႁႂ်ႈမူးမၢတ်ႈၽွင်းမိူင်းၸိူဝ်းဢၼ်ၵိုတ်ႉႁၢပ်ႇၼႃႈၵၢၼ်ၸဝ်ႈၼၼ်ႉၵူႈၵေႃႉၵူႈၵူၼ်းဢၼ်ယူႇၵႃႈတီႈၽၵ်းတူႁေႃၸဝ်ႈၼၼ်ႉတၵ်းလႆႈဢွၼ်ၵၼ်ၵူမ်ႈႁူဝ်ၵွမ်းႁူဝ်ဝႆႈ ႁႃႇမၢၼ်ႇ၊ ဢေႃႈ။ မေႃႇတၵႄး၊ ၸမ်ႉ၊ဢမ်ႇၵူမ်ႈႁူဝ်ၵွမ်းႁူဝ်လႄႈဢမ်ႇဝႆႈ။-
မူးမၢတ်ႈၽွင်းမိူင်းၸိူဝ်းဢၼ်ၵိုတ်ႉႁၢပ်ႇၼႃႈၵၢၼ်ၸဝ်ႈၼၼ်ႉတွင်ႈထၢမ် မေႃႇတၵႄး၊ လူၺ်ႈလွင်ႈဢၼ်မၼ်းႁဵတ်းသင်လႄႈထဵင်ပႅတ်ႈဢမိင်ႉၶုၼ်ႁေႃၶမ်းၼၼ်ႉသေယဝ်ႉ၊-
ၶဝ်ဢွၼ်ၵၼ်ပၼ်သတိတီႈမၼ်းၵူႈဝၼ်းႁႂ်ႈမၼ်းၼွမ်းၶၢမ်ႇဢေႃႈ။ ၵူၺ်းၵႃႈ၊မၼ်းဢမ်ႇထွမ်ႇဢဝ်ၵႂၢမ်းၶဝ်ၵူၺ်းဢမ်ႇၵႃး၊ယင်းလၢတ်ႈဝႃႈ၊ “ၵဝ်ပဵၼ်ၵူၼ်းမဵဝ်း ၵျူး၊ လႄႈၵဝ်ဢမ်ႇၵူမ်ႈၵွမ်းၸူးတီႈ ႁႃႇမၢၼ်ႇ၊ ၵူၺ်း၊” ဝႃႈၼင်ႇၼႆဢေႃႈ။ ပိူဝ်ႈၼႆလႄႈၶဝ်ဢွၼ်ၵၼ်ဢဝ်လွင်ႈတၢင်းၼၼ်ႉမွၵ်ႇလၢတ်ႈထိုင် ႁႃႇမၢၼ်ႇ၊ သေယဝ်ႉ၊သမ်ႉပႂ်ႉထွမ်ႇတူၺ်းဝႃႈ၊ ႁႃႇမၢၼ်ႇ၊ ၸွင်ႇတၵ်းယိူၼ်ႉၶၢမ်ႇ မေႃႇတၵႄး၊ ႁိုဝ်၊ဢမ်ႇယိူၼ်ႉၶၢမ်ႇႁိုဝ်ၼၼ်ႉယူႇဢေႃႈ။-
မိူဝ်ႈဢၼ် ႁႃႇမၢၼ်ႇ၊ လႆႈႁုငိၼ်းလွင်ႈဢၼ် မေႃႇတၵႄး၊ ဢမ်ႇၵူမ်ႈႁူဝ်ၵွမ်းႁူဝ်ဢမ်ႇဝႆႈမၼ်းၼၼ်ႉၸိုင်၊မၼ်းၸႂ်မႆႈၶႂ်ႈၸႃႉၼႃႇလူင်လၢင်လႄႈ၊-
မိူဝ်ႈဢၼ်မၼ်းႁုဝႃႈ၊ မေႃႇတၵႄး၊ ပဵၼ်ၵူၼ်းမဵဝ်း ၵျူး၊ ၼၼ်ႉတၢင်းဢၼ်ဢဝ် မေႃႇတၵႄး၊ တၢႆၵေႃႉလဵဝ်ၵူၺ်းၼၼ်ႉ ဢမ်ႇၶိုတ်းၸႂ်ပဵင်းၸႂ်မၼ်းလႄႈၵျၢမ်ႇႁႃႁႂ်ႈလႆႈယႃႉၽဵဝ်ႈၵူၼ်းမဵဝ်း ၵျူး၊ ၵႃႈဢၼ်မီးၵႃႈၼႂ်းသိုင်ႇၸိုင်ႈဝၢၼ်ႈမိူင်း ပႃးသျႃး၊ ၼၼ်ႉပႅတ်ႈမူတ်းမူတ်းဢေႃႈ။
ၼႂ်းပီဢၼ်ၶုၼ်ႁေႃၶမ်း ဢႃႇသူၺ်ႇရု၊ ၸၢမ်ႇႁၢင်ႈၸၢမ်ႇႁေႃသိပ်းသွင်ပီ၊ၼႂ်းလိူၼ်တီႈၼိုင်ႈဢၼ်ဝႃႈ၊လိူၼ် ၼိသၼ်ႇ၊ ၼၼ်ႉ ႁႃႇမၢၼ်ႇ၊ မီးဢမိင်ႉႁႂ်ႈဢွၼ်ၵၼ်တူၵ်းၸႃႇၵွၵ်ႈ (ဢၼ်ႁွင်ႉဝႃႈပုရႃႉ) ၵႃႈတီႈၽၢႆႇၼႃႈမၼ်း၊ႁႂ်ႈလႆႈႁုလိူၼ်လႂ်ဝၼ်းလႂ်ထုၵ်ႇလီႁဵတ်းၸွမ်းတၢင်းဢၼ်မၼ်းၵျၢမ်ႇပွင်လွမ်ႁဵတ်းၼၼ်ႉဢေႃႈ။ ၶဝ်ဢွၼ်ၵၼ်တႅပ်းတတ်းႁႂ်ႈပဵၼ်ၼႂ်းလိူၼ်သိပ်းသွင်ဢၼ်ဝႃႈ၊လိူၼ် ဢတ်ႉတႃႇ၊ လႆႈသိပ်းသၢမ်ဝၼ်းၼၼ်ႉဢေႃႈ။
မိူဝ်ႈၼၼ်ႉ၊ ႁႃႇမၢၼ်ႇ၊ လဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “မီးၵူၼ်းမဵဝ်းၼိုင်ႈဢၼ်ယူႇၸွတ်ႇတူဝ်ႈၵူႈတီႈၵူႈလႅၼ်ၵႂႃႇၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈၵူႈသိုင်ႇၵူႈမိူင်းၵူႈတီႈၵူႈလႅၼ်လႄႈထုင်းၸၢမ်ႇတၢင်းဢၼ်ၶဝ်ၵမ်ၶဝ်ၵျၢင်ႉၼၼ်ႉဢမ်ႇမိူၼ်ၵၼ်တင်းထုင်းၸၢမ်ႇၵူၼ်းတၢင်ႇၸိူဝ်ႉတၢင်ႇမဵဝ်းတင်းလၢႆၼၼ်ႉတီႈၶႃႈ။ လိူဝ်တွၼ်းၼႃႇသေပိူၼ်ႈ ၶဝ်ဢမ်ႇထွမ်ႇဢမ်ႇဢဝ်ဢုပတေႇဢၼ်ၸဝ်ႈၶုၼ်လူင်ၸီႇယၢင်ႇဝႆႉၼၼ်ႉဢေႃႈ။ ၵွပ်ႈပိူဝ်ႈၼႆလႄႈတၢင်းဢၼ်ၸဝ်ႈၶုၼ်လူင်ႁဝ်းယိူၼ်ႉၶၢမ်ႇၵူၼ်းမဵဝ်းၼၼ်ႉၸိုင်၊ဢမ်ႇမီးဢၵျူဝ်းၵျေးၸူးၵႃႈသင်လႃးလႃးတီႈၶႃႈ။-
ပေႃးၸဝ်ႈၶုၼ်လူင်မီးဢလူဝ်ႇၸိုင်၊ပူင်ဢမိင်ႉႁႂ်ႈယႃႉၽဵဝ်ႈၵူၼ်းမဵဝ်းၼၼ်ႉပႅတ်ႈသေၵမ်းတီႈၶႃႈ။ ၶႃႈၸဝ်ႈတၵ်းဢဝ်ငိုၼ်းသွင်သႅၼ်ပၢႆသီႇႁဵင်ၸွႆႉသႂၢင်းသႂ်ႇၵႃႈၼႂ်းမိုဝ်းၶဝ်ၸိူဝ်းဢၼ်ၵိုတ်ႉႁၢပ်ႇၼႃႈၵၢၼ်ၸဝ်ႈႁဝ်းႁႂ်ႈၶဝ်လႆႈဢဝ်သႂၢင်းသႂ်ႇၵႃႈၼႂ်းတိူၵ်ႈၽၼ်ႇတႃႇၸဝ်ႈႁဝ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းၵေႃႈထွတ်ႇဢဝ်မွင်းၵူၺ်းၸဝ်ႈဢၼ်တွၵ်ႇၸုမ်ႈဢမိင်ႉၸဝ်ႈၼၼ်ႉပၼ်တီႈ ႁႃႇမၢၼ်ႇ၊ လုၵ်ႈၸၢႆး ႁမ်ႇမေႇတႃႇသႃႉ၊ မဵဝ်း ဢႃႇၵတ်ႉ၊ ဢၼ်ပဵၼ်ရၢၼ်ႇသူႇမဵဝ်း ၵျူး၊ ၶဝ်ၼၼ်ႉသေဢေႃႈ။-
ၶုၼ်ႁေႃၶမ်းမီးဢမိင်ႉတီႈ ႁႃႇမၢၼ်ႇ၊ လႄႈဝႃႈ၊ “ၵူၼ်းမဵဝ်းၼၼ်ႉဢိၵ်ႇတင်းငိုၼ်းၶဝ်ၸိုင်၊ၵဝ်ပၼ်တီႈမႂ်းယဝ်ႉ၊ႁဵတ်းၵႃႈၼင်ႇဢၼ်မႂ်းၶႂ်ႈႁဵတ်းၼၼ်ႉတႃႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၼႂ်းလိူၼ်တီႈၼိုင်ႈသိပ်းသၢမ်ဝၼ်းၼၼ်ႉ ႁႃႇမၢၼ်ႇ၊ ႁွင်ႉဢဝ်ၸရေးလူင်ၸဝ်ႈတင်းလၢႆမႃးသေလႄႈတိုၵ်းယူင်းႁႂ်ႈၶဝ်တႅမ်ႈလိၵ်ႈဢမိင်ႉသေယဝ်ႉ၊ပျၢၼ်ႇပဵၼ်ၽႃႇသႃႇၵႂၢမ်းၵူႈၸိူဝ်ႉၵူႈမဵဝ်းဢၼ်လၢတ်ႈယူႇၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈၸိူဝ်းၼၼ်ႉလႄႈၸွမ်းလူၺ်ႈလဵၵ်းဢႅၵ်ႉၶရႃႇၶဝ်ႁင်းၽႂ်ႁင်းမၼ်းၼႂ်းၸိုဝ်ႈသဵင်ၶုၼ်ႁေႃၶမ်းသေယဝ်ႉ၊ဢဝ်မွင်းၵူၺ်းၶုၼ်ႁေႃၶမ်းတွၵ်ႇၸုမ်ႈလႄႈၸႂ်ႉႁႂ်ႈၶဝ်သူင်ႇၵႂႃႇတီႈၸဝ်ႈၽႃႉ၊မဵဝ်ႉဝုၼ်ႇ၊ၶုၼ်ဢၼ်ပွင်ၵၢၼ်ၸဝ်ႈဢၼ်မီးၵႃႈၼႂ်းသိုင်ႇၸိုင်ႈဝၢၼ်ႈမိူင်းၵူႈတီႈၵူႈလႅၼ်ၼၼ်ႉဢေႃႈ။-
ၵူၼ်းဢွၼ်ႇၶဝ်တင်းလၢႆဢွၼ်ၵၼ်ဢဝ်လိၵ်ႈဢမိင်ႉၼၼ်ႉၵႂႃႇသူင်ႇၵႃႈတီႈသိုင်ႇၸိုင်ႈဝၢၼ်ႈမိူင်းၵူႈတီႈၵူႈလႅၼ်ဢေႃႈ။ ၼႂ်းလိၵ်ႈဢမိင်ႉၼၼ်ႉမီးဝႆႉဝႃႈ၊ “ၼႂ်းလိူၼ်သိပ်းသွင်ဢၼ်ဝႃႈ၊လိူၼ် ဢတ်ႉတႃႇ၊ သိပ်းသၢမ်ဝၼ်းၼၼ်ႉတၵ်းလႆႈၶႃႈၽၼ်းဢဝ်တၢႆပႄႇၽဵဝ်ႈပႅတ်ႈၵူၼ်းမဵဝ်း ၵျူး၊ ၸဵမ်ၼုမ်ႇၸဵမ်ထဝ်ႈ၊လုၵ်ႈဢွၼ်ႇမႄႈယိင်း၊ၵႃႈမီးတင်းသဵင်ႈတင်းလူင်ၼႂ်းၶိုၼ်းလဵဝ်ၵူၺ်းသေလႄႈတၵ်းလႆႈႁိမ်ႁူင်ႇသိမ်းဢဝ်ဢုၵ်ႉၸႃႇငိုၼ်းၶမ်းၶဝ်ဢေႃႈ။-
လိၵ်ႈဢမိင်ႉၸဝ်ႈဢၼ်လႆႈမွၵ်ႇလၢတ်ႈၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈၵူႈသိုင်ႇၵူႈမိူင်းၵူႈတီႈၵူႈလႅၼ်ၼၼ်ႉလႆႈပိုၼ်ၽၢဝ်ႇၶၢဝ်ႇတီႈၵူၼ်းၵူႈၸိူဝ်ႉၵူႈမဵဝ်းႁႂ်ႈၶဝ်မႄးႁႅၼ်းတၼ်းဝႆႉထႃႈပုၼ်ႈဝၼ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
လိၵ်ႈဢမိင်ႉၶုၼ်ႁေႃၶမ်းၼၼ်ႉလႆႈပိုၼ်ၽၢဝ်ႇၶၢဝ်ႇၸွတ်ႇၵႂႃႇၵႃႈၼႂ်းဝဵင်း သုသႃႇ၊ သေယဝ်ႉ၊ၵူၼ်းဢွၼ်ႇတင်းလၢႆၵေႃႈဢဝ်ၶၢဝ်ႇၼၼ်ႉပိုၼ်ၽၢဝ်ႇဢွၵ်ႇၵႂႃႇၶၼ်ၶၼ်ၽႂ်းၽႂ်းၵႃႈၼႂ်းၵူႈသိုင်ႇၵူႈမိူင်းၵူႈတီႈၵူႈလႅၼ်ဢေႃႈ။ ၶုၼ်ႁေႃၶမ်းဢိၵ်ႇတင်း ႁႃႇမၢၼ်ႇ၊ ၸမ်ႉ၊ၵိၼ်သူတ်ႉၼမ်ႉမၢၵ်ႇၸပိတ်ႉယူႇယၢမ်းမိူဝ်ႈဢၼ်ၵူၼ်းဝဵင်း သုသႃႇ၊ ႁွတ်ႈထိုင်တၢင်းဢၼ်ယၢပ်ႇၸႂ်ယုင်ႈၸႂ်ယူႇၼၼ်ႉဢေႃႈ။
မိူဝ်ႈဢၼ် မေႃႇတၵႄး၊ ႁုလွင်ႈဢၼ်ပဵၼ်မႃးၼၼ်ႉၸိုင်၊မၼ်းၸၵ်ႉသိၵ်ႇၶူဝ်းၼုင်ႈမၼ်းလူၺ်ႈတၢင်းဢၼ်ၶၢင်းၶီၶၢင်းၽၢၼ်ဢေႃႈ။ မိူဝ်ႈၼၼ်ႉမၼ်းၼုင်ႈမႆၼင်ပေႃလႄႈဢဝ်တဝ်ႈၽွၵ်းသႂ်ႇၵႃႈၼိူဝ်ႁူဝ်မၼ်းသေယဝ်ႉ၊ၶဝ်ႈၵႂႃႇၵႃႈၼႂ်းဝဵင်းလႄႈၶီၸႂ်ၶူမ်ၸႂ်ၼႃႇလူင်လၢင်လႄႈႁွင်ႉႁႆႈလူၺ်ႈတင်းသဵင်ဢၼ်ယႂ်ႇၼႃႇလူင်လၢင်ဢေႃႈ။-
မိူဝ်ႈဢၼ်မၼ်းႁွတ်ႈထိုင်ၵႃႈတီႈၽၵ်းတူႁေႃၸဝ်ႈၸိုင်၊မၼ်းဢမ်ႇၶဝ်ႈၵႃႈၼႂ်းႁေႃၵွပ်ႈပိူဝ်ႈဝႃႈ၊ပေႃးၼုင်ႈမႆၼင်ပေႃၸိုင်၊တၵ်းဢမ်ႇလႆႈၶဝ်ႈၵႃႈၼႂ်းႁေႃၸဝ်ႈၼၼ်ႉဢေႃႈ။-
ၵႃႈၼႂ်းၵူႈသိုင်ႇၵူႈမိူင်းၵူႈတီႈၵူႈလႅၼ်ၵႃႈဢၼ်ဢမိင်ႉၶုၼ်ႁေႃၶမ်းႁွတ်ႈထိုင်ၵႂႃႇၼၼ်ႉပဵၼ်တၢင်းဢၼ်ၶဝ်ၶၢင်းၶီၶၢင်းၽၢၼ်ၼႃႇလူင်လၢင်ၵႃႈၼႂ်းၵူၼ်းမဵဝ်း ၵျူး၊ တင်းလၢႆဢေႃႈ။ ၶဝ်ဢွၼ်ၵၼ်ၵမ်သိၼ်ဢမ်ႇၵိၼ်တၢင်းၵိၼ်လႄႈမီးတၢင်းဢၼ်ႁႆႈဢၼ်ႁွင်ႉ၊တၢင်းဢၼ်ပွင်ႉၶၢင်းပွင်ႉမိုၼ်ႇယူႇလႄႈၶဝ်ၵမ်ႈၼမ်ဢွၼ်ၵၼ်ၼုင်ႈမႆၼင်ပေႃလႄႈၼွၼ်းယူႇၵႃႈၼႂ်းတဝ်ႈဢေႃႈ။
မိူဝ်ႈဢၼ်ၶႃႈမႄႈယိင်း ဢေးသတႃႇ၊ တင်းလၢႆတင်းၵူၼ်းထိင်းၸိူင်ႉၼၢင်းတင်းလၢႆမႃးလဝ်ႈလၢတ်ႈလွင်ႈ မေႃႇတၵႄး၊ ၼၼ်ႉၸိုင်၊မၼ်းၼၢင်းမႆႈၸႂ်ယၢပ်ႇၸႂ်ၼႃႇလူင်လၢင်သေလႄႈဢဝ်ၶူဝ်းၼုင်ႈတၢင်းမႆပၼ်ၵႂႃႇႁႂ်ႈ မေႃႇတၵႄး၊ ပုတ်ႈလၢႆႈပႅတ်ႈၶူဝ်းၼုင်ႈၼင်ပေႃၼၼ်ႉသေၵေႃႈ မၼ်းယင်းဢမ်ႇႁပ်ႉဢမ်ႇဢဝ်လႄႈယူႇဢေႃႈ။-
ၼင်ႇၼၼ်လႄႈ ဢေးသတႃႇ၊ ၸႂ်ႉ ႁႃႇတိၵ်ႉ၊ ၵူၼ်းထိင်းၸိူင်ႉၼၢင်းဢၼ်ၶုၼ်ႁေႃၶမ်းၶၢၼ်းဝႆႉႁႂ်ႈပဵၼ်ၶႃႈၸဝ်ႈၼၢင်းၼၼ်ႉ ၵႂႃႇတီႈ မေႃႇတၵႄး၊ လႄႈတွင်ႈထၢမ်လွင်ႈဢီႈသင်ပဵၼ်မႃး၊ဢိၵ်ႇတင်းပဵၼ်မႃးၵွပ်ႈပိူဝ်ႈဢီႈသင်ၼၼ်ႉဢေႃႈ။-
ႁႃႇတိၵ်ႉ၊ ၵေႃႈၵႂႃႇၸူးတီႈ မေႃႇတၵႄး၊ ၵႃႈၼႂ်းတီႈပၢင်ႇၵၢင်ဝဵင်းဢၼ်မီးၵႃႈတီႈတၢင်းၶဝ်ႈၸူးႁေႃၸဝ်ႈၼၼ်ႉဢေႃႈ။-
မေႃႇတၵႄး၊ ၼၼ်ႉမွၵ်ႇလၢတ်ႈလွင်ႈတၢင်းဢၼ်ပဵၼ်မႃးတီႈမၼ်း၊ဢိၵ်ႇတင်းလွင်ႈငိုၼ်းၵႃႈႁိုဝ်ဢၼ် ႁႃႇမၢၼ်ႇ၊ ဝႆႉၵတိတၵ်းဢဝ်သႂၢင်းသႂ်ႇၼႂ်းတိူၵ်ႈၽၼ်ႇတႃႇၶုၼ်ႁေႃၶမ်းပုၼ်ႈဢၼ်တၵ်းလႆႈဢၶႂၢင်ႉဢၼ်ယႃႉၽဵဝ်ႈပႅတ်ႈၵူၼ်းမဵဝ်း ၵျူး၊ တင်းလၢႆၼၼ်ႉဢေႃႈ။-
မေႃႇတၵႄး၊ ဢဝ်လိၵ်ႈလၢၵ်ႈၶၢမ်ႇဢမိင်ႉၸဝ်ႈဢၼ်ထုတ်ႇဢွၵ်ႇၵႃႈၼႂ်းဝဵင်း သုသႃႇ၊ ပုၼ်ႈတၵ်းယႃႉၽဵဝ်ႈပႅတ်ႈၵူၼ်းမဵဝ်း ၵျူး၊ တင်းလၢႆၼၼ်ႉ၊ႁႂ်ႈ ႁႃႇတိၵ်ႉ၊ ဢဝ်လိၵ်ႈၼၼ်ႉၵႂႃႇပၼ်တီႈၼၢင်းႁေႃၶမ်း ဢေးသတႃႇ၊ ႁႂ်ႈ ႁႃႇတိၵ်ႉ၊ မွၵ်ႇလၢတ်ႈလွင်ႈတၢင်းၼၼ်ႉတီႈၸဝ်ႈၼၢင်း၊ဢိၵ်ႇတင်းႁႂ်ႈၸဝ်ႈၼၢင်းၶဝ်ႈၸူးတီႈၶုၼ်ႁေႃၶမ်းလႄႈလဝ်ႈယွၼ်းပုၼ်ႈၵူၼ်းမဵဝ်းတူဝ်ၸဝ်ႈၵဝ်ႇတီႈၶုၼ်ႁေႃၶမ်းဢေႃႈ။-
ႁႃႇတိၵ်ႉ၊ ၵေႃႈၵႂႃႇလႄႈဢဝ်ၵႂၢမ်း မေႃႇတၵႄး၊ ၶိုၼ်းလဝ်ႈလၢတ်ႈတီႈၼၢင်းႁေႃၶမ်း ဢေးသတႃႇ၊ ဢေႃႈ။-
ၼၢင်းႁေႃၶမ်း ဢေးသတႃႇ၊ ၵေႃႈၸႂ်ႉ ႁႃႇတိၵ်ႉ၊ ၶိုၼ်ႈၵႂႃႇသင်ႇလၢတ်ႈတီႈ မေႃႇတၵႄး၊ လႄႈဝႃႈၸမ်ႉ၊-
“ပဵၼ်ၽူႈယိင်းသေဢမ်ႇဝႃႈ၊ၵူၼ်းၸၢႆးသေဢမ်ႇဝႃႈ၊ပဵၼ်ၵေႃႉလႂ်ၵူၼ်းလႂ်သေဢမ်ႇဝႃႈ၊ၵေႃႉဢၼ်ၶုၼ်ႁေႃၶမ်းယင်းဢမ်ႇႁွင်ႉလႄႈၶဝ်ႈၵႃႈၼႂ်းဝၢင်းလုမ်းၸဝ်ႈၸၼ်ႉၼႂ်းၼၼ်ႉ၊တၵ်းလႆႈတၢႆဢမၢၼ်ႇၶၼ်ပဵၼ်ဢၼ်ဝႃႈၼၼ်ႉ၊ၵူႈၵေႃႉၵူႈၵူၼ်းၸႃႉၸဵမ်မူးမၢတ်ႈၽွင်းမိူင်းတေႃႇထိုင်ႁွတ်ႈၶႃႈဝၢၼ်ႈၵူၼ်းမိူင်း၊ၵႃႈၼႂ်းသိုင်ႇၸိုင်ႈဝၢၼ်ႈမိူင်းၵူႈတီႈၵူႈလႅၼ်ႁုထုင်းတြႃးၼၼ်ႉဢေႃႈ။ မီးတၢင်းလဵဝ်ၵူၺ်းပုၼ်ႈတၵ်းႁႂ်ႈၵေႃႉဢၼ်ၶဝ်ႈၸူးၼၼ်ႉလႆႈၵတ်းယဵၼ်ၶျၢမ်းသႃႇၼၼ်ႉၸိုင်၊ၶုၼ်ႁေႃၶမ်းတေလႆႈယိုၼ်ႈပၼ်ၵၼ်းလၢပ်ႇသၼ်ႇလႅၵ်ႈတီႈမၼ်းၼၼ်ႉဢေႃႈ။ ၵဝ်ႈၶႃႈၼႆႉၶုၼ်ႁေႃၶမ်းယင်းဢမ်ႇႁွင်ႉၶဝ်ႈၸူးမၼ်းၸဝ်ႈလႄႈယူႇလႆႈလိူၼ်ၼိုင်ႈတဵမ်တဵမ်ယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈဢၼ် မေႃႇတၵႄး၊ လႆႈႁပ်ႉဢဝ်ၵႂၢမ်းဢၼ်ၼၢင်းႁေႃၶမ်း ဢေးသတႃႇ၊ သင်ႇလၢတ်ႈမႃးၼၼ်ႉယဝ်ႉၸိုင်၊-
မၼ်းသမ်ႉၶိုၼ်းသင်ႇလၢတ်ႈၵႂႃႇတီႈၼၢင်းႁေႃၶမ်း ဢေးသတႃႇ၊ လႄႈဝႃႈ၊ “မႂ်းယႃႇပေထၢင်ႇပေထိူမ်လွင်ႈဢၼ်မႂ်းတၵ်းယဵင်ႈၶႅၼ်းလူင်ႉလွတ်ႈလီသေၵူၼ်းမဵဝ်း ၵျူး၊ တင်းလၢႆ၊ၵွပ်ႈပိူဝ်ႈဢၼ်မႂ်းမီးယူႇၵႃႈၼႂ်းႁေႃၶမ်းၸဝ်ႈၼၼ်ႉ။-
ပေႃးမႂ်းယင်းဢမ်ႇတၵ်းသဵင်ၼႂ်းၶိင်ႇမိူဝ်ႈလဵဝ်ၼႆႉလႄႈယူႇၸိုင်၊တၢင်းဢၼ်မႃႉၸႃႉၸွႆႈထႅမ်တၵ်းလုၵ်ႉသေတၢင်ႇတီႈတၢင်ႇလႅၼ်ပေႃႇမႃးၸွႆႈထႅမ်ၵူၼ်းမဵဝ်း ၵျူး၊ တင်းလၢႆႁႂ်ႈလႆႈလွတ်ႈသေလႄႈမႂ်းဢိၵ်ႇတင်းမဵဝ်းၸိူဝ်ႉၶိူဝ်းပေႃႈမႂ်းၸမ်ႉ၊တၵ်းတၢႆဢမၢၼ်ႇၶၼ်ပဵၼ်ဢေႃႈ။ လွင်ႈဢၼ်မႂ်းလႆႈပဵၼ်ၼၢင်းႁေႃၶမ်းၼၼ်ႉပဵၼ်ပုၼ်ႈတၵ်းၸွႆႈထႅမ်ၼႂ်းၶိင်ႇမိူဝ်ႈလဵဝ်ၼႆႉၸႂ်ႈဢမ်ႇၸႂ်ႈဝႃႈၼႆ၊မီးၽူႈလႂ်ႁုလႆႈ၊” ဝႃႈၼင်ႇၼႆဢေႃႈ။
ၼၢင်းႁေႃၶမ်း ဢေးသတႃႇ၊ ၵေႃႈသင်ႇလၢတ်ႈၵႂႃႇႁႂ်ႈလႆႈၶိုၼ်းမွၵ်ႇလၢတ်ႈတီႈ မေႃႇတၵႄး၊ လႄႈဝႃႈ၊-
“ၵႂႃႇလႄႈႁွင်ႉဢဝ်ၵူၼ်းမဵဝ်း ၵျူး၊ ၵႃႈမီးတင်းသဵင်ႈတင်းလူင်ၵႃႈၼႂ်းဝဵင်း သုသႃႇ၊ ၼႆႉႁႂ်ႈၸုတုမ်ၵၼ်သေလႄႈ၊ႁဵတ်းတၢင်းဢၼ်ၵမ်တၢင်းၵိၼ်သူးတွင်းပုၼ်ႈၵဝ်တႃႉ။ ယင်းဢမ်ႇၵိၼ်ဢမ်ႇသူတ်ႉၵႃႈသင်သေၸိူဝ်ႉသေပိူင်လႄႈယူႇသၢမ်ဝၼ်းသၢမ်ၶိုၼ်းတႃႉ။ ၵဝ်ၶႃႈဢိၵ်ႇတင်းၶႃႈမႄႈယိင်းၵဝ်ၶႃႈတင်းလၢႆၵေႃႈတၵ်းႁဵတ်းၸိူဝ်ႉၼင်ႇၼၼ်ဢေႃႈ။ လွင်ႈၼၼ်ႉပိၵ်ႉသမ်ႉပဵၼ်လွင်ႈဢၼ်ပူၼ်ႉလိူဝ်ၵႂၢမ်းသင်ႇၸဝ်ႈသေၵေႃႈ၊ၵဝ်ၶႃႈတၵ်းၶဝ်ႈၸူးတီႈၶုၼ်ႁေႃၶမ်းဢေႃႈ။ ပေႃးၵဝ်ၶႃႈတၵ်းလႆႈတၢႆၵွပ်ႈပိူဝ်ႈတၢင်းဢၼ်ႁဵတ်းၸိူဝ်ႉၼင်ႇၼၼ်ၸိုင်၊ၵဝ်ၶႃႈတၵ်းၶၢမ်ႇတၢႆဢေႃႈ၊” ဝႃႈၼင်ႇၼႆဢေႃႈ။
မေႃႇတၵႄး၊ ၵႂႃႇလႄႈႁဵတ်းၸွမ်းၵႃႈၼင်ႇဢၼ်ၼၢင်းႁေႃၶမ်း ဢေးသတႃႇ၊ သင်ႇလၢတ်ႈဝႆႉၼၼ်ႉဢေႃႈ။
ၼႂ်းဝၼ်းဢၼ်ၼၢင်းႁေႃၶမ်း ဢေးသတႃႇ၊ ၵမ်သိၼ်ဢမ်ႇၵိၼ်တၢင်းၵိၼ်လႄႈထူၼ်ႈထိုင်သၢမ်ဝၼ်းၼၼ်ႉ၊မၼ်းၼၢင်းႁၢင်ႈၶိူင်ႈၶူဝ်းၼုင်ႈတၢင်းမႆၼၢင်းႁေႃၶမ်းသေယဝ်ႉ၊ၶဝ်ႈၵႂႃႇၸုၵ်းၵႃႈတီႈဝၢင်းလုမ်းၸၼ်ႉၼႂ်းႁေႃၶမ်းၸဝ်ႈဢၼ်တေႃႇၼႃႈၵၼ်တင်းႁေႃရႃႇၸႃႉပလၢင်ႇၸဝ်ႈၼၼ်ႉဢေႃႈ။ ၶုၼ်ႁေႃၶမ်းၵေႃႈ မီးၵႃႈၼႂ်းႁေႃၼၼ်ႉၼင်ႈယူႇၵႃႈၼိူဝ်ရႃႇၸႃႉပလၢင်ႇဢၼ်တေႃႇၼႃႈၵၼ်တင်းႁူးၽၵ်းတူၼၼ်ႉဢေႃႈ။-
မိူဝ်ႈဢၼ်ၶုၼ်ႁေႃၶမ်းႁၼ်ၼၢင်းႁေႃၶမ်း ဢေးသတႃႇ၊ ၸုၵ်းယူႇၵႃႈၼွၵ်ႈၼၼ်ႉၸိုင်၊ပဵၼ်ဢၼ်ထုၵ်ႇၸႂ်ၵျိူၵ်ႈၸႂ်ၶုၼ်ႁေႃၶမ်းလႄႈၶုၼ်ႁေႃၶမ်းဢဝ်ၵၼ်းလၢပ်ႇသၼ်ႇလႅၵ်ႈၶမ်းယိုၼ်ႈပၼ်တီႈ ဢေးသတႃႇ၊ လႄႈမၼ်းၼၢင်းသုတ်ႉၸပ်းသုတ်ႉၸူးသေလႄႈတိူဝ်ႉသႂ်ႇပၢႆၵၼ်းလၢပ်ႇသၼ်ႇလႅၵ်ႈၸဝ်ႈဢေႃႈ။-
ၶုၼ်ႁေႃၶမ်းၵေႃႈမီးဢမိင်ႉလႄႈဝႃႈ၊ “ၼၢင်းႁေႃၶမ်း ဢေးသတႃႇ၊ ႟။ မႂ်းမီးလွင်ႈတၢင်းၵႃႈသင်မႂ်းၶႂ်ႈယွၼ်းဢဝ်သူးလၢပ်ႈၵႃႈသင်။ ၵဝ်ၸဝ်ႈတၵ်းပၼ်ၵႃႈဢၼ်မႂ်းၼၢင်းယွၼ်းၼၼ်ႉတေႃႇထိုင်ႁွတ်ႈသိုင်ႇၸိုင်ႈဝၢၼ်ႈမိူင်းၸဝ်ႈၶိုင်ႈၼိုင်ႈဢေႃႈ၊” ဝႃႈၼင်ႇၼႆဢေႃႈ။
ဢေးသတႃႇ၊ ၶိုၼ်းလဝ်ႈလၢတ်ႈလႄႈဝႃႈ၊ “ပေႃးၸဝ်ႈၶုၼ်လူင်ထုၵ်ႇၸႂ်ၸိုင်၊ဝၼ်းမိူဝ်ႈၼႆႉၸဝ်ႈၶုၼ်လူင်ဢိၵ်ႇတင်း ႁႃႇမၢၼ်ႇ၊ ၶႅၼ်းတေႃႈမႃးၵိၼ်ပွႆးလဵင်ႉလူဢၼ်ၶိင်းပဵၼ်ၶႃႈပွင်ႁဵတ်းပွင်ႁႅၼ်းဝႆႉ၊ပုၼ်ႈၸဝ်ႈၶုၼ်လူင်ၼၼ်ႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းၵေႃႈပူင်ဢမိင်ႉႁႂ်ႈ ႁႃႇမၢၼ်ႇ၊ မႃးၶၼ်ၶၼ်ၽႂ်းၽႂ်း၊ႁႂ်ႈလႆႈၵႂႃႇပဵၼ်ၶႅၵ်ႇၼၢင်းႁေႃၶမ်း ဢေးသတႃႇ၊ ဢေႃႈ။ ပိူဝ်ႈၼႆလႄႈၶုၼ်ႁေႃၶမ်း၊ဢိၵ်ႇတင်း ႁႃႇမၢၼ်ႇ၊ ၵႂႃႇၵိၼ်ပွႆးဢၼ်မၼ်းၼၢင်းလဵင်ႉလူၼၼ်ႉဢေႃႈ။-
ၼႂ်းပွႆးၼမ်ႉမၢၵ်ႇၸပိတ်ႉၼၼ်ႉၶုၼ်ႁေႃၶမ်းမီးဢမိင်ႉတီႈၼၢင်းႁေႃၶမ်း ဢေးသတႃႇ၊ လႄႈဝႃႈ၊ “မႂ်းၶႂ်ႈလႆႈဢီႈသင်။ ၵဝ်ၸဝ်ႈတၵ်းပၼ်ၸွမ်းၵႃႈၼင်ႇဢၼ်မႂ်းၶႂ်ႈလႆႈၼၼ်ႉဢေႃႈ။ ၵဝ်ၸဝ်ႈတၵ်းပၼ်ၵႃႈဢၼ်မႂ်းယွၼ်းၼၼ်ႉတေႃႇထိုင်ႁွတ်ႈသိုင်ႇၸိုင်ႈဝၢၼ်ႈမိူင်းၵဝ်ၸဝ်ႈၶိုင်ႈၼိုင်ႈဢေႃႈ၊” ဝႃႈၼင်ႇၼႆဢေႃႈ။
ၼၢင်းႁေႃၶမ်း ဢေးသတႃႇ၊ ၶိုၼ်းလဝ်ႈလၢတ်ႈလႄႈဝႃႈ၊ “သူးလၢပ်ႈဢၼ်ၶိင်းပဵၼ်ၶႃႈၶႂ်ႈယွၼ်းၼၼ်ႉၸမ်ႉ၊-
ပေႃးၶိင်းပဵၼ်ၶႃႈလႆႈၼႃႈလႆႈတႃတီႈၸဝ်ႈၶုၼ်လူင်ယူႇ၊ပေႃးဝႃႈၸဝ်ႈၶုၼ်လူင်ထုၵ်ႇၸႂ်ၵျိူၵ်ႈၸႂ်သူးလၢပ်ႈဢၼ်ၶိင်းပဵၼ်ၶႃႈၶႂ်ႈလႆႈၼၼ်ႉလႄႈၶႂ်ႈႁႂ်ႈဢလူဝ်ႇၵၢင်ၸႂ်ၶိင်းပဵၼ်ၶႃႈပျေႉၸုမ်ႇၸိုင်၊ၶႅၼ်းတေႃႈၸဝ်ႈၶုၼ်လူင်၊ဢိၵ်ႇတင်း ႁႃႇမၢၼ်ႇ၊ သမ်ႉဢွၼ်ၵၼ်မႃးၵိၼ်ပွႆးလဵင်ႉလူဢၼ်ၶိင်းပဵၼ်ၶႃႈတၵ်းပွင်ႁဵတ်းပွင်ႁႅၼ်းဝႆႉၼၼ်ႉထႅင်ႈၼႂ်းဝၼ်းမိူဝ်ႈၽုၵ်ႈသေၵမ်းတီႈၶႃႈ။ မိူဝ်ႈၼၼ်ႉၶိင်းပဵၼ်ၶႃႈတၵ်းလဝ်ႈလၢတ်ႈလွင်ႈတၢင်းဢၼ်ၶိင်းပဵၼ်ၶႃႈၶႂ်ႈလႆႈၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၼႂ်းဝၼ်းၼၼ်ႉ၊ ႁႃႇမၢၼ်ႇ၊ မီးၸႂ်ဢၼ်သႂၢင်ႇသႂၢင်ႇသိူဝ်းသိူဝ်းလႄႈဢွၵ်ႇၵႂႃႇဢေႃႈ။ ၵူၺ်းၵႃႈ၊မိူဝ်ႈဢၼ်မၼ်းႁၼ် မေႃႇတၵႄး၊ ယင်းဢမ်ႇလုၵ်ႉၸုၵ်း၊ဢမ်ႇတူင်ႉဢမ်ႇၼိုင်ပုၼ်ႈတၵ်းႁဵတ်းရူဝ်ႇသေႇမၼ်းလႄႈၵူၺ်းယူႇၵႃႈတီႈတၢင်းၶဝ်ႈႁေႃၸဝ်ႈယူႇၼၼ်ႉၸိုင်၊ ႁႃႇမၢၼ်ႇ၊ မီးတၢင်းဢၼ်ၶႂ်ႈၸႃႉၼႃႇလူင်လၢင်တီႈ မေႃႇတၵႄး၊ ဢေႃႈ။-
ၼႂ်းဝႃႈၼၼ်သေၵေႃႈ၊ ႁႃႇမၢၼ်ႇ၊ ၵၼ်ႈၸႂ်ထိင်းၸႂ်မၼ်းသေလႄႈမိူဝ်းၵႂႃႇတီႈႁိူၼ်းမၼ်းဢေႃႈ။ မိူဝ်ႈၼၼ်ႉမၼ်းၽိတ်ႈႁွင်ႉၵေႃႉသႄႈမၼ်းတင်းလၢႆမႃးၵႃႈတီႈႁိူၼ်းမၼ်းလႄႈမေးမၼ်း ၸေးရိတ်ႉ၊ ၵေႃႈမၼ်းႁႂ်ႈမႃးၶဝ်ႈပႃးလူၺ်ႈၵၼ်တင်းၶဝ်ဢေႃႈ။-
မၼ်းဢုပ်ႇဝၢဝ်းလႄႈလၢတ်ႈၼႄလွင်ႈဢၼ်မၼ်းမၢၵ်ႈမီးလီပဵၼ်ၵႃႈႁိုဝ်၊လွင်ႈလုၵ်ႈလၢင်းမၼ်းၼမ်ၼႃႇ၊လွင်ႈဢၼ်ၶုၼ်ႁေႃၶမ်းယုၵ်ႉယွင်ႈဢရႃႇမၼ်းၶိုၼ်ႈသုင်ၼႃႇလူင်လၢင်လႄႈၶၢၼ်းမၼ်းဝႆႉၵႃႈၼႂ်းဢရႃႇဢၼ်မျၢတ်ႈလိူဝ်တွၼ်းၼႃႇသေမူးမၢတ်ႈၽွင်းမိူင်းၸဝ်ႈတင်းလၢႆ၊ဢိၵ်ႇတင်းၶုၼ်ဢၼ်ပွင်ၵၢၼ်ၸဝ်ႈတင်းလၢႆၵႃႈႁိုဝ်ၼၼ်ႉဢေႃႈ။-
လိူဝ်သေၼၼ်ႉ ႁႃႇမၢၼ်ႇ၊ လၢတ်ႈလႄႈဝႃႈ၊ “တၢင်းဢၼ်ၼၢင်းႁေႃၶမ်း ဢေးသတႃႇ၊ ပွင်ႁဵတ်းပွင်ႁႅၼ်းပွႆးလဵင်ႉပွႆးလူပုၼ်ႈၶုၼ်ႁေႃၶမ်းတင်းၵဝ်ၵူၺ်းလႆႈၵိၼ်ၼၼ်ႉမီးဢၼ်လႂ်မျၢတ်ႈလီလိူဝ်တွၼ်းၼႃႇသေၼႆႉလူးၵွၼ်ႇ။ ၵဝ်သမ်ႉယင်းလႆႈၶၢမ်ႇတၢင်းဢၼ်ၽိတ်ႈပၢင်းဝႆႉၼႂ်းဝၼ်းမိူဝ်ႈၽုၵ်ႈထႅင်ႈယဝ်ႉ။-
ၵူၺ်းၵႃႈ၊ၵႃႈဢၼ်ၵဝ်လၢတ်ႈမိူဝ်ႈလဵဝ်ၼႆႉၼၼ်ႉဢမ်ႇပွင်ႇလွင်ႈၵႃႈသင်တီႈၵဝ်၊ၸူဝ်ႈဢၼ်ၵဝ်ယင်းလႆႈႁၼ် မေႃႇတၵႄး၊ ဢၼ်ပဵၼ်ၵူၼ်းမဵဝ်း ၵျူး၊ ၼင်ႈယူႇၵႃႈတီႈတၢင်းၶဝ်ႈႁေႃၸဝ်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵွပ်ႈပိူဝ်ႈၼႆလႄႈမေး ႁႃႇမၢၼ်ႇ၊ တင်းၵေႃႉသႄႈမၼ်းတင်းသဵင်ႈတင်းလူင်ၼၼ်ႉဢွၼ်ၵၼ်ပၼ်တၢင်းၵျၢမ်ႇလႄႈဝႃႈ၊ “ႁႂ်ႈပူၵ်းသဝ်ၵၢင်ႉပုၼ်ႈတၵ်းၶႅၼ်ၶေႃးတၢႆဢၼ်တၢင်းသုင်မၼ်းမီးႁႃႈသိပ်းသွၵ်ႇၼၼ်ႉသေၵမ်း။ ဝၼ်းမိူဝ်ႈၽုၵ်ႈၵၢင်ၼႂ်လဝ်ႈလၢတ်ႈတီႈၶုၼ်ႁေႃၶမ်းႁႂ်ႈဢဝ် မေႃႇတၵႄး၊ မႃးၶႅၼ်ၶေႃးတၢႆၵႃႈတီႈသဝ်ၼၼ်ႉပႅတ်ႈသေၵမ်း။ ၼင်ႇၼၼ်လႄႈပႃးတင်းၸႂ်ဢၼ်သႂၢင်ႇဢၼ်သိူဝ်းၵႂႃႇၶဝ်ႈပွႆးလူၺ်ႈၵၼ်တင်းၶုၼ်ႁေႃၶမ်းသေၵမ်း၊” ဝႃႈၼင်ႇၼႆဢေႃႈ။ ၵႂၢမ်းဢၼ်လၢတ်ႈဝႃႈၼၼ်ႉထုၵ်ႇၸႂ်ၵျိူၵ်ႈၸႂ် ႁႃႇမၢၼ်ႇ၊ လႄႈမၼ်းႁႂ်ႈမႄးႁႅၼ်းဝႆႉသဝ်ၵၢင်ႉပုၼ်ႈဢၼ်ၶႅၼ်ၶေႃးၼၼ်ႉဢေႃႈ။
ၼႂ်းၶိုၼ်းၼၼ်ႉၶုၼ်ႁေႃၶမ်းၼွၼ်းဢမ်ႇလပ်းလႆႈလႄႈမၼ်းၸဝ်ႈပူင်ဢမိင်ႉႁႂ်ႈဢဝ်ၽိုၼ်လိၵ်ႈပိုၼ်းသိုင်ႇၸိုင်ႈဝၢၼ်ႈမိူင်းၸဝ်ႈဢၼ်တႅမ်ႈမၢႆဝႆႉၼၼ်ႉမႃးႁႂ်ႈလႆႈၽတ်းဢၢၼ်ႇတီႈမၼ်းၸဝ်ႈဢေႃႈ။-
မိူဝ်ႈဢၼ်ထူပ်းႁၼ်တွၼ်ႈဢၼ်တႅမ်ႈမၢႆဝႆႉလွင်ႈ မေႃႇတၵႄး၊ ၽုၺ်ႇဢွၵ်ႇၼႄပျႃးလွင်ႈဢၼ် ပိၵသၼ်ႇ၊ ဢိၵ်ႇတင်း တေႇရိတ်ႉ၊ ၵူၼ်းတွၼ်ဢၼ်ဢုပ်ႉထိင်းႁေႃၸိူင်ႉၼၢင်း၊ဢိၵ်ႇတင်းပဵၼ်ၵူၼ်းပႂ်ႉၽၵ်းတူၸဝ်ႈသွင်ၵေႃႉသေယဝ်ႉ၊သမ်ႉလွမ်ၵျၢမ်ႇပွင်ႁႂ်ႈလႆႈဢဝ်ၶုၼ်ႁေႃၶမ်းတၢႆၼၼ်ႉၼၼ်ႉၸိုင်၊-
ၶုၼ်ႁေႃၶမ်းထၢမ်လႄႈဝႃႈ၊ “ၵွပ်ႈပိူဝ်ႈလွင်ႈၼႆႉလႄႈလႆႈပၼ်သူးလၢပ်ႈၵႃႈသင်ယဝ်ႉ။ လႆႈပၼ်ဢရႃႇၵႃႈသင်တီႈ မေႃႇတၵႄး၊ ယဝ်ႉ၊” ဝႃႈၼင်ႇၼႆဢေႃႈ။ ၶႃႈၵူၼ်းၶုၼ်ႁေႃၶမ်းဢၼ်ၶႃးၸႃးယူႇၸိူဝ်းၼၼ်ႉၶိုၼ်းလဝ်ႈလၢတ်ႈလႄႈဝႃႈ၊ “ဢမ်ႇပႆႇလႆႈပၼ်သူးလၢပ်ႈၵႃႈသင်တီႈမၼ်းသေၸိူဝ်ႉသေပိူင်တီႈၶႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းၵေႃႈထၢမ်လႄႈဝႃႈ၊ “မီးၶုၼ်ဢၼ်ပွင်ၵၢၼ်ၸဝ်ႈသေၵေႃႉသေၵူၼ်းၵႃႈၼႂ်းႁေႃၶမ်းၸဝ်ႈၼႆႉႁိုဝ်း၊” ဝႃႈၼင်ႇၼႆဢေႃႈ။ ၼႂ်းမိူဝ်ႈယၢမ်းၼၼ်ႉမႅၼ်ႈယၢမ်းဢၼ် ႁႃႇမၢၼ်ႇ၊ ၶဝ်ႈမႃးၵႃႈၼႂ်းဝၢင်းလုမ်းၸၼ်ႉၼႂ်းႁႂ်ႈလႆႈယွၼ်းဢၶႂၢင်ႉတီႈၶုၼ်ႁေႃၶမ်းပုၼ်ႈတႃႇတၵ်းဢဝ် မေႃႇတၵႄး၊ ၶႅၼ်ၶေႃးၵႃႈၼိူဝ်သဝ်ၵၢင်ႉဢၼ်မၼ်းပူၵ်းႁဵတ်းထႃႈဝႆႉၼၼ်ႉလႄႈ၊-
ၶႃႈၵူၼ်းၶုၼ်ႁေႃၶမ်းၸိူဝ်းၼၼ်ႉဢွၼ်ၵၼ်ၶိုၼ်းလဝ်ႈလၢတ်ႈလႄႈဝႃႈ၊ “ ႁႃႇမၢၼ်ႇ၊ မီးယူႇၵႃႈတီႈၼၼ်ႈ၊ပႂ်ႉထႃႈႁႂ်ႈလႆႈထူပ်းႁၼ်ၸဝ်ႈၶုၼ်လူင်တီႈၶႃႈဢေႃႈ၊” ဝႃႈၼင်ႇၼႆဢေႃႈ။ ၶုၼ်ႁေႃၶမ်းၵေႃႈမီးဢမိင်ႉလႄႈဝႃႈ၊ “ႁႂ်ႈမၼ်းၶဝ်ႈမႃးၵႃႈၼႂ်းၼႆႉတႃႉ၊” ဝႃႈၼင်ႇၼႆဢေႃႈ။
ႁႃႇမၢၼ်ႇ၊ ၶဝ်ႈၵႂႃႇၵႃႈၼႂ်းသေယဝ်ႉ၊ၶုၼ်ႁေႃၶမ်းထၢမ်တီႈမၼ်းလႄႈဝႃႈ၊ “မီးၵူၼ်းဢၼ်ၵဝ်ၶႂ်ႈယုၵ်ႉယွင်ႈၼႃႇလူင်လၢင်ၼၼ်ႉၵေႃႉၼိုင်ႈဢေႃႈ။ ၵဝ်ထုၵ်ႇလီႁဵတ်းၸိူဝ်ႉၼင်ႇႁိုဝ်တီႈၵေႃႉၼၼ်ႉ၊” ဝႃႈၼင်ႇၼႆဢေႃႈ။ ႁႃႇမၢၼ်ႇ၊ ၶႆႈၸႂ်တူၺ်းၵႃႈၼႂ်းၸႂ်တူဝ်ၸဝ်ႈၵဝ်ႇလႄႈဝႃႈ၊ “လိူဝ်သေၵဝ်ၼႆႉၶုၼ်ႁေႃၶမ်းတၵ်းယုၵ်ႉယွင်ႈၽူႈလႂ်ထႅင်ႈ၊” ဝႃႈၼႆသေလႄႈ။
မၼ်းၶိုၼ်းလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “တီႈၵေႃႉဢၼ်ၶုၼ်ႁေႃၶမ်းၶႂ်ႈယုၵ်ႉယွင်ႈၼၼ်ႉၸိုင်၊-
ထုၵ်ႇလီဢဝ်ၶူဝ်းၼုင်ႈၶူဝ်းမႆဢၼ်ၶုၼ်ႁေႃၶမ်းယၢမ်ႈၼုင်ႈမႆယူႇ၊မႃႉဢၼ်ၶုၼ်ႁေႃၶမ်းယၢမ်ႈၶီႇယူႇ၊ရႃႇၸႃႉသရၽူႇဢၼ်ၶုၼ်ႁေႃၶမ်းတိုဝ်းယူႇၼၼ်ႉမႃးလႄႈ၊-
ႁႂ်ႈမူးမၢတ်ႈၽွင်းမိူင်းဢၼ်သုင်မျၢတ်ႈၼႃႇသေပိူၼ်ႈၼၼ်ႉဢဝ်ၶူဝ်းၼုင်ႈတၢင်းမႆၸဝ်ႈၼုင်ႈပၼ်တီႈၵေႃႉဢၼ်ၸဝ်ႈၶုၼ်လူင်ၶႂ်ႈယုၵ်ႉယွင်ႈၼၼ်ႉသေယဝ်ႉ၊ႁႂ်ႈမၼ်းၼၼ်ႉၶီႇမႃႉၸဝ်ႈလႄႈဢွၼ်သူင်ႇၸွမ်းသဵၼ်ႈတၢင်းလူင်ၵႃႈၼႂ်းဝဵင်းၸဝ်ႈၼၼ်ႉ၊ႁွင်ႉပၢဝ်ႇႁွင်ႉလၢတ်ႈယူႇလႄႈဝႃႈ၊ ‘လႆႈႁဵတ်းၸိူဝ်ႉၼင်ႇၼႆတီႈၵေႃႉဢၼ်ၶုၼ်ႁေႃၶမ်းၶႂ်ႈယုၵ်ႉယွင်ႈၼၼ်ႉဢေႃႈ၊’ ဝႃႈၼႆတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၶုၼ်ႁေႃၶမ်းမီးဢမိင်ႉတီႈ ႁႃႇမၢၼ်ႇ၊ လႄႈဝႃႈ၊ “မႂ်းၵႂႃႇၶၼ်ၶၼ်ၽႂ်းၽႂ်းလႄႈဢဝ်ၶူဝ်းၼုင်ႈတၢင်းမႆၸဝ်ႈတင်းမႃႉၸဝ်ႈၸွမ်းၵႃႈၼင်ႇဢၼ်မႂ်းလဝ်ႈလၢတ်ႈၼၼ်ႉႁဵတ်းတီႈ မေႃႇတၵႄး၊ ၵူၼ်းမဵဝ်း ၵျူး၊ ဢၼ်ၼင်ႈယူႇၵႃႈတီႈတၢင်းၶဝ်ႈႁေႃၸဝ်ႈၼၼ်ႉတႃႉ။ ယႃႇပေႁႂ်ႈၵႃႈဢၼ်မႂ်းလဝ်ႈလၢတ်ႈၼၼ်ႉလႆႈယုတ်ႈလႆႈယွမ်းသေၸိူဝ်ႉသေပိူင်၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ႁႃႇမၢၼ်ႇ၊ ဢဝ်ၶူဝ်းၼုင်ႈတၢင်းမႆၸဝ်ႈတင်းမႃႉၸဝ်ႈသေလႄႈၼုင်ႈပၼ် မေႃႇတၵႄး၊ သေယဝ်ႉ၊ႁႂ်ႈ မေႃႇတၵႄး၊ ၶီႇမႃႉၸဝ်ႈသေလႄႈ ႁႃႇမၢၼ်ႇ၊ ဢွၼ်သူင်ႇၸွမ်းသဵၼ်ႈတၢင်းလူင်ဝဵင်းၸဝ်ႈယူႇ၊ႁွင်ႉပၢဝ်ႇႁွင်ႉလၢတ်ႈယူႇလႄႈဝႃႈ၊ “လႆႈႁဵတ်းၸိူဝ်ႉၼင်ႇၼႆတီႈၵေႃႉဢၼ်ၶုၼ်ႁေႃၶမ်းၶႂ်ႈယုၵ်ႉယွင်ႈၼၼ်ႉယဝ်ႉယဝ်ႉဢေႃႈ၊” ဝႃႈၼင်ႇၼႆဢေႃႈ။
ႁဵတ်းၸိူဝ်ႉၼင်ႇၼၼ်သေယဝ်ႉ၊ မေႃႇတၵႄး၊ ၶိုၼ်းမႃးၸူးတီႈတၢင်းၶဝ်ႈႁေႃၸဝ်ႈသေဢေႃႈ။ ႁႃႇမၢၼ်ႇ၊ ၸမ်ႉ၊ၶၢင်းၶီၶၢင်းၽၢၼ်ယူႇ၊ႁူမ်ႇသုမ်ႇၼႃႈမၼ်းယူႇသေလႄႈႁိပ်ႈၼႅတ်ႈမိူဝ်းၵႂႃႇၸူးတီႈႁိူၼ်းမၼ်းဢေႃႈ။-
မၼ်းၶိုၼ်းမွၵ်ႇလၢတ်ႈလွင်ႈတၢင်းဢၼ်ပဵၼ်မႃးတီႈမၼ်းၸိူဝ်းၼၼ်ႉတီႈမေးမၼ်း၊ဢိၵ်ႇတင်းၵေႃႉသႄႈမၼ်းၵႃႈမီးၸိူဝ်းၼၼ်ႉဢေႃႈ။ မိူဝ်ႈၼၼ်ႉမေးမၼ်းဢိၵ်ႇတင်းၵေႃႉသႄႈမၼ်းၸိူဝ်းဢၼ်မီးပိင်ႇၺႃႇၼၼ်ႉဢွၼ်ၵၼ်လၢတ်ႈတီႈမၼ်းလႄႈဝႃႈ၊ “ၸဝ်ႈႁဝ်းတႄႇၸႃႉတူၵ်းသုမ်းတၼ်းၶူဝ်း မေႃႇတၵႄး၊ ယဝ်ႉ။ မၼ်းပဵၼ်ၵူၼ်းမဵဝ်း ၵျူး၊ လႄႈၸဝ်ႈႁဝ်းဢမ်ႇပႄႉဢမ်ႇၼႅင်ႇမၼ်းလႆႈယဝ်ႉ။ မၼ်းတၵ်းပႄႉၼႅင်ႇၸဝ်ႈႁဝ်းဢမၢၼ်ႇၶၼ်ပဵၼ်ဢေႃႈ၊” ဝႃႈၼင်ႇၼႆဢေႃႈ။
ယၢမ်းမိူဝ်ႈဢၼ်ၶဝ်ယင်းတိုၵ်ႉလၢတ်ႈတေႃႇၵၼ်ယူႇၼၼ်ႉ၊ၵူၼ်းၸၢႆးတွၼ်ဢၼ်ပဵၼ်ၵူၼ်းထိင်းႁေႃၸိူင်ႉၼၢင်းၸဝ်ႈၸိူဝ်းၼၼ်ႉႁွတ်ႈမႃးလႄႈႁွင်ႉဢဝ် ႁႃႇမၢၼ်ႇ၊ ၵႂႃႇၵႃႈတီႈပွႆးဢၼ်ၼၢင်းႁေႃၶမ်း ဢေးသတႃႇ၊ ပွင်ႁဵတ်းပွင်ႁႅၼ်းဝႆႉၼၼ်ႉၶၼ်ၶၼ်ၽႂ်းၽႂ်းသေဢေႃႈ။
ၼင်ႇၼၼ်လႄႈၶုၼ်ႁေႃၶမ်းဢိၵ်ႇတင်း ႁႃႇမၢၼ်ႇ၊ ဢွၼ်ၵၼ်ၵႂႃႇႁႂ်ႈလႆႈၵိၼ်လႆႈသူတ်ႉၼမ်ႉမၢၵ်ႇၸပိတ်ႉလူၺ်ႈၵၼ်တင်းၼၢင်းႁေႃၶမ်း ဢေးသတႃႇ၊ ထႅင်ႈပွၵ်ႈၼိုင်ႈဢေႃႈ။-
ၼႂ်းပွႆးၼမ်ႉမၢၵ်ႇၸပိတ်ႉၼၼ်ႉ၊ၶုၼ်ႁေႃၶမ်းသမ်ႉထၢမ်ၼၢင်းႁေႃၶမ်းထႅင်ႈလႄႈဝႃႈ၊ “ၼၢင်းႁေႃၶမ်း ဢေးသတႃႇ၊ ႟။ မႂ်းၶႂ်ႈလႆႈဢီႈသင်။ ၵဝ်တၵ်းပၼ်ၵႃႈဢၼ်မႂ်းၶႂ်ႈလႆႈၼၼ်ႉဢေႃႈ။ ၵဝ်တၵ်းပၼ်ၵႃႈဢၼ်မႂ်းယွၼ်းၼၼ်ႉတေႃႇထိုင်ႁွတ်ႈသိုင်ႇၸိုင်ႈဝၢၼ်ႈမိူင်းၸဝ်ႈၽၢၵ်ႇၼိုင်ႈဢေႃႈ၊” ဝႃႈၼင်ႇၼႆဢေႃႈ။
ၼၢင်းႁေႃၶမ်း ဢေးသတႃႇ၊ ၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈၶုၼ်လူင်တီႈၶႃႈ။ ပေႃးၶိင်းပဵၼ်ၶႃႈၼႆႉထုၵ်ႇၸႂ်မႅၼ်ႈၸႂ်ၸဝ်ႈႁဝ်းလႄႈၸဝ်ႈႁဝ်းၶႂ်ႈႁဵတ်းပၼ်ၸိုင်၊ၶႅၼ်းတေႃႈပၼ်ႁႂ်ႈဢသၢၵ်ႈၶိင်းပဵၼ်ၶႃႈၵတ်းယဵၼ်ၶျၢမ်းသႃႇၸွမ်းၵႃႈၼင်ႇဢၼ်ၶိင်းပဵၼ်ၶႃႈၶႂ်ႈလႆႈၼၼ်ႉ၊ဢိၵ်ႇတင်းႁႂ်ႈဢသၢၵ်ႈမဵဝ်းၸိူဝ်ႉၶိူဝ်းၶိင်းပဵၼ်ၶႃႈလႆႈၵတ်းယဵၼ်ၶျၢမ်းသႃႇၸွမ်းၵႃႈၼင်ႇဢၼ်ၶိင်းပဵၼ်ၶႃႈယွၼ်းတွင်းပၢၼ်ႇၼၼ်ႉသေၵမ်းတီႈၶႃႈ။-
ၶိင်းပဵၼ်ၶႃႈဢိၵ်ႇတင်းမဵဝ်းၸိူဝ်ႉၶိူဝ်းၶိင်းပဵၼ်ၶႃႈလႆႈၶၢမ်ႇတၢင်းဢၼ်ပိူၼ်ႈၶၢႆပႅတ်ႈပုၼ်ႈတၵ်းႁႂ်ႈလႆႈၶႃႈၽၼ်းဢဝ်တၢႆပႅတ်ႈတီႈၶႃႈယဝ်ႉ။ ပေႃးလွင်ႈတၢင်းၼႆႉယင်းဢမ်ႇၶိုၵ်ႉၶမ်ႇသေလွင်ႈတၢင်းဢၼ်ၵႃႉၶၢႆ ႁႂ်ႈလႆႈၶၢမ်ႇပဵၼ်ၶႃႈၵူၺ်းၸိုင်၊ၶိင်းပဵၼ်ၶႃႈတၵ်းယူႇတဵတ်ႇတဵတ်ႇဢမ်ႇတၵ်ႉသဵင်လႄႈတၵ်းဢမ်ႇယႃႉယူၵ်ႉဢၵျူဝ်းၸဝ်ႈ ၶုၼ်လူင်တီႈၶႃႈယဝ်ႉ။ လွင်ႈတၢင်းၼႆႉၸမ်ႉ၊ၶိင်းပဵၼ်ၶႃႈၸဝ်ႈႁဝ်းၶဝ်တင်းလၢႆတၵ်းလႆႈၶၢမ်ႇတၢင်းဢၼ်ၶႃႈၽၼ်းဢဝ်တၢႆလႄႈယႃႉၽဵဝ်ႈပႅတ်ႈလုမ်းလုမ်းတီႈၶႃႈယဝ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၶုၼ်ႁေႃၶမ်း ဢႃႇသူၺ်ႇရု၊ ထၢမ်တီႈၼၢင်းႁေႃၶမ်း ဢေးသတႃႇ၊ လႄႈဝႃႈ၊ “ၵေႃႉဢၼ်ၵျၢမ်ႇပွင်တၵ်းႁဵတ်းၸိူဝ်ႉၼင်ႇၼၼ်ၼၼ်ႉပဵၼ်ၽူႈလႂ်။ မီးၵႃႈတီႈလႂ်၊” ဝႃႈၼင်ႇၼႆဢေႃႈ။
ၼၢင်းႁေႃၶမ်း ဢေးသတႃႇ၊ ၶိုၼ်းလဝ်ႈလၢတ်ႈလႄႈဝႃႈ၊ “ရၢၼ်ႇသူႇႁဝ်းၶႃႈဢၼ်ႁဵတ်းတၢင်းၽိတ်းၼၼ်ႉ၊ပဵၼ် ႁႃႇမၢၼ်ႇ၊ ဢၼ်ႁၢႆႉမိူၵ်ႈၼႃႇၼႆႉတီႈၶႃႈဢေႃႈ၊” မိူဝ်ႈဢၼ်ဝႃႈၼင်ႇၼႆၸိုင်။ ႁႃႇမၢၼ်ႇ၊ ၼၼ်ႉမီးတၢင်းဢၼ်ၵူဝ်ႁႄၼႃႇၵႃႈတီႈၽၢႆႇၼႃႈၶုၼ်ႁေႃၶမ်းတင်းၼၢင်းႁေႃၶမ်းဢေႃႈ။-
မိူဝ်ႈၼၼ်ႉ၊ၶုၼ်ႁေႃၶမ်းမီးတၢင်းဢၼ်ၸႂ်မႆႈၶႂ်ႈၸႃႉသေယဝ်ႉ၊လုၵ်ႉသေၵႃႈတီႈပွႆးၵိၼ်ၼမ်ႉမၢၵ်ႇၸပိတ်ႉသေလႄႈၶဝ်ႈၵႂႃႇၵႃႈၼႂ်းသူၼ်ဢူးယဵၼ်ႇႁေႃၸဝ်ႈဢေႃႈ။ ႁႃႇမၢၼ်ႇ၊ ႁုသၢႆငၢႆလွင်ႈဢၼ်ၶုၼ်ႁေႃၶမ်းတႅပ်းတတ်းၸႂ်ႁႂ်ႈလႆႈပၼ်တၢမ်ႇဢပျတ်ႈတီႈမၼ်းၼၼ်ႉလႄႈၵိုတ်းယူႇႁႂ်ႈလႆႈယွၼ်းတွင်းပၢၼ်ႇတီႈၼၢင်းႁေႃၶမ်း ဢေးသတႃႇ၊ ႁႂ်ႈဢသၢၵ်ႈမၼ်းလႆႈၵတ်းယဵၼ်ၶျၢမ်းသႃႇၼၼ်ႉဢေႃႈ။-
မိူဝ်ႈဢၼ်ၶုၼ်ႁေႃၶမ်းလုၵ်ႉသေၵႃႈတီႈသူၼ်ဢူးယဵၼ်ႇၶိုၼ်းၶဝ်ႈမႃးၵႃႈၼႂ်းပွႆးၵိၼ်လဵင်ႉၼၼ်ႉၸိုင်၊မႅၼ်ႈယၢမ်းဢၼ် ႁႃႇမၢၼ်ႇ၊ ဢဝ်တူဝ်မၼ်းၶုပ်ႉမူပ်ႇယူႇၵႃႈၼိူဝ်ၵူႇတီႈဢိင်ဢၼ်ၼၢင်းႁေႃၶမ်း ဢေးသတႃႇ၊ ဢိင်ယူႇၼၼ်ႉဢေႃႈ။ ၶုၼ်ႁေႃၶမ်းႁၼ်လႄႈမီးဢမိင်ႉလႄႈဝႃႈ၊ “ၵေႃႉၼႆႉၵျၢမ်ႇႁဵတ်းဢထမ်ႇမႃႉတီႈၼၢင်းႁေႃၶမ်းၵႃႈတီႈၽၢႆႇၼႃႈၵဝ်ၵႃႈၼႂ်းႁေႃၵဝ်ၼႆႉႁိုဝ်း၊” ဝႃႈၼင်ႇၼႆဢေႃႈ။ မိူဝ်ႈဢၼ်ၶုၼ်ႁေႃၶမ်းယင်းတိုၵ်ႉမီးဢမိင်ႉၸိူဝ်ႉၼင်ႇၼႆယူႇၼၼ်ႉၸိုင်၊ၵူၼ်းတွၼ်ၸိူဝ်းဢၼ်ထိင်းႁေႃၸိူင်ႉၼၢင်းၼၼ်ႉ၊ဢွၼ်ၵၼ်ႁူမ်ႇသုမ်ႇၼႃႈ ႁႃႇမၢၼ်ႇ၊ သေဢေႃႈ။-
ၼႂ်းၶဝ်ၼၼ်ႉၵေႃႉၼိုင်ႈဢၼ်ၸိုဝ်ႈဝႃႈ ႁႃႇပေႃႇၼႃႉ၊ ၼၼ်ႉလဝ်ႈလၢတ်ႈလႄႈဝႃႈ၊ “ ႁႃႇမၢၼ်ႇ၊ ၼၼ်ႉသမ်ႉပေႃးပူၵ်းသဝ်ၵၢင်ႉပုၼ်ႈတၵ်းၶႅၼ်ၶေႃးတၢႆၼၼ်ႉၵႃႈတီႈႁိူၼ်းမၼ်းပုၼ်ႈတႃႇတၵ်းၶႅၼ်ၶေႃး မေႃႇတၵႄး၊ ဢၼ်ၵႄႇသႄႇဢသၢၵ်ႈၸဝ်ႈၶုၼ်လူင်ဝႆႉၼၼ်ႉတီႈၶႃႈယဝ်ႉဢေႃႈ။ တၢင်းသုင်မၼ်းမီးႁႃႈသိပ်းသွၵ်ႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။ ၶုၼ်ႁေႃၶမ်းၵေႃႈပူင်ဢမိင်ႉလႄႈဝႃႈ၊ “ဢဝ် ႁႃႇမၢၼ်ႇ၊ ၵႂႃႇၶႅၼ်ၶေႃးႁႂ်ႈတၢႆၵႃႈတီႈၼၼ်ႈတႃႉ၊” ဝႃႈၼင်ႇၼႆဢေႃႈ။
ၵွပ်ႈပိူဝ်ႈၼႆလႄႈ ႁႃႇမၢၼ်ႇ၊ လႆႈၶၢမ်ႇတၢင်းဢၼ်ၶႅၼ်ၶေႃးတၢႆၵႃႈၼိူဝ်သဝ်ၵၢင်ႉဢၼ်တူဝ်ၸဝ်ႈၵဝ်ႇလႆႈပူၵ်းဝႆႉပုၼ်ႈတႃႇတေၶႅၼ်ၶေႃး မေႃႇတၵႄး၊ ၼၼ်ႉဢေႃႈ။ တၢင်းၸႂ်မႆႈၶႂ်ႈၸႃႉၶုၼ်ႁေႃၶမ်းထၢတ်ႇၵႂႃႇယဵၼ်ၵႂႃႇသေဢေႃႈ။
ၼႂ်းဝၼ်းၼၼ်ႉၵမ်းလဵဝ်ၶုၼ်ႁေႃၶမ်း ဢႃႇသူၺ်ႇရု၊ ဢဝ်ဢုၵ်ႉၸႃႇၶူဝ်းႁိူၼ်း ႁႃႇမၢၼ်ႇ၊ ၵေႃႉပဵၼ်ရၢၼ်ႇသူႇၵူၼ်းမဵဝ်း ၵျူး၊ ၶဝ်ၵႃႈမီးၼၼ်ႉပၼ်ၼၢင်းႁေႃၶမ်း ဢေးသတႃႇ၊ သေဢေႃႈ။ မၼ်းၼၢင်းမွၵ်ႇလၢတ်ႈလွင်ႈဢၼ် မေႃႇတၵႄး၊ ပဵၼ်ပီႈၼွင်ႉၸိူဝ်ႉၶိူဝ်းမၼ်းၼၢင်းၼၼ်ႉသေယဝ်ႉ၊တႄႇၸႃႉဢဝ်ဝၼ်းမိူဝ်ႈၼၼ်ႉမႃး မေႃႇတၵႄး၊ မီးဢၶႂၢင်ႉဢၼ်လႆႈၶဝ်ႈၸူးၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။-
ၶုၼ်ႁေႃၶမ်းၵေႃႈထွတ်ႇဢဝ်မွင်းၵူၺ်းၸဝ်ႈဢၼ်ပႃးၸုမ်ႈ (ဢၼ်ၼုၵ်ႈဢဝ်ၵႃႈတီႈမိုဝ်း ႁႃႇမၢၼ်ႇ၊ ) ၼၼ်ႉသေယဝ်ႉ၊ပၼ်တီႈ မေႃႇတၵႄး၊ ဢေႃႈ။ ၼၢင်းႁေႃၶမ်း ဢေးသတႃႇ၊ ၵေႃႈႁႂ်ႈ မေႃႇတၵႄး၊ ဢုပ်ႉထိင်းၵႃႈၼိူဝ်ဢုၵ်ႉၸႃႇႁိူၼ်း ႁႃႇမၢၼ်ႇ၊ ၼၼ်ႉဢေႃႈ။
ၵမ်းၼၼ်ႉ၊ၼၢင်းႁေႃၶမ်း ဢေးသတႃႇ၊ သမ်ႉလဝ်ႈလၢတ်ႈတီႈၶုၼ်ႁေႃၶမ်းထႅင်ႈလႄႈၶုပ်ႉမူပ်ႇၵႃႈႁိမ်းတိၼ်မၼ်းၸဝ်ႈယူႇ၊ၼမ်ႉတႃတူၵ်းယူႇသေလႄႈတွင်းပၢၼ်ႇႁႂ်ႈမၼ်းၸဝ်ႈႁဵတ်းသေၸိူဝ်ႉသေမဵဝ်းပုၼ်ႈတၵ်းႁႄႉၶႅၼ်ၽေးဢၼ် ႁႃႇမၢၼ်ႇ၊ ၸိူဝ်ႉၶိူဝ်း ဢႃႇၵတ်ႉ၊ လွမ်ၵျၢမ်ႇႁဵတ်းႁၢႆႉႁဵတ်းၵျၢမ်းတီႈၵူၼ်းမဵဝ်း ၵျူး၊ တင်းလၢႆၼၼ်ႉဢေႃႈ။-
ၶုၼ်ႁေႃၶမ်းၵေႃႈယိုၼ်ႈၵၼ်းလၢပ်ႇသၢၼ်ႇလႅၵ်ႈၶမ်းပၼ်တီႈၼၢင်းႁေႃၶမ်း ဢေးသတႃႇ၊ လႄႈမၼ်းၼၢင်းလုၵ်ႉၸုၵ်းသေလႄႈလဝ်ႈလၢတ်ႈဝႃႈ၊-
“ပေႃးၸဝ်ႈၶုၼ်လူင်မီးဢလူဝ်ႇလႄႈပေႃးၶိင်းပဵၼ်ၶႃႈၼႆႉထုၵ်ႇၸႂ်မႅၼ်ႈၸႂ်ၸဝ်ႈႁဝ်းလႄႈ၊ၸဝ်ႈၶုၼ်လူင်ႁဝ်းဝႆႉဢမုလွင်ႈၶိင်းပဵၼ်ၶႃႈယူႇလႄႈပေႃးပဵၼ်ဢၼ်ထုၵ်ႇဢၼ်လီၵႃႈတီႈၽၢႆႇၼႃႈၸဝ်ႈၶုၼ်လူင်ႁဝ်းၸိုင်၊ၶႅၼ်းတေႃႈထၢပ်ႈထႅင်ႈဢမိင်ႉႁႂ်ႈပႄႇပႅတ်ႈလိၵ်ႈဢၼ် ႁႃႇမၢၼ်ႇ၊ လုၵ်ႈၸၢႆး ႁမ်ႇမေႇတႃႇသႃႉ၊ မဵဝ်း ဢႃႇၵတ်ႉ၊ ၸီႇယၢင်ႇတႅမ်ႈႁႂ်ႈလႆႈယႃႉၽဵဝ်ႈၵူၼ်းမဵဝ်း ၵျူး၊ ၵႃႈဢၼ်မီးၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈၶုၼ်လူင်ၵူႈသိုင်ႇၵူႈမိူင်းၵူႈတီႈၵူႈလႅၼ်ၼၼ်ႉသေၵမ်းတီႈၶႃႈ။-
မိူဝ်ႈဢၼ်ၵူၼ်းမဵဝ်းၶိင်းပဵၼ်ၶႃႈတင်းလၢႆထူပ်းၽေးဢၢၼ်ႇတရေႇ၊ဢိၵ်ႇတင်းမိူဝ်ႈဢၼ်ပီႈၼွင်ႉၸိူဝ်ႉၶိူဝ်းၶိင်းပဵၼ်ၶႃႈလႆႈၶၢမ်ႇတၢင်းဢၼ်ၶႃႈၽၼ်းဢဝ်တၢႆယူႇၼၼ်ႉၶိင်းပဵၼ်ၶႃႈတၵ်းႁဵတ်းၸိူဝ်ႉႁိုဝ်ယိူၼ်ႉၶၢမ်ႇလႆႈတီႈၶႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်း ဢႃႇသူၺ်ႇရု၊ ၵေႃႈမီးဢမိင်ႉတီႈၼၢင်းႁေႃၶမ်း ဢေးသတႃႇ၊ တင်း မေႃႇတၵႄး၊ ၵူၼ်းမဵဝ်း ၵျူး၊ ၼၼ်ႉလႄႈဝႃႈ၊ “တူၺ်းလူး။ ၵွပ်ႈပိူဝ်ႈ ႁႃႇမၢၼ်ႇ၊ လွမ်ၵျၢမ်ႇယႃႉပႅတ်ႈၵူၼ်းမဵဝ်း ၵျူး၊ ၼၼ်ႉလႄႈၵဝ်ဢဝ်မၼ်းၶႅၼ်ၶေႃးတၢႆပႅတ်ႈသေယဝ်ႉ၊သမ်ႉဢဝ်ဢုၵ်ႉၸႃႇႁိူၼ်းမၼ်းပၼ်ၼၢင်းႁေႃၶမ်း ဢေးသတႃႇ၊ ယဝ်ႉယဝ်ႉ။-
ၵူၺ်းၵႃႈ၊လိၵ်ႈဢမိင်ႉဢၼ်ၶုၼ်ႁေႃၶမ်းပိုၼ်ဢွၵ်ႇၼႂ်းၸိုဝ်ႈသဵင်ၸဝ်ႈလႄႈတွၵ်ႇၸုမ်ႈၸဝ်ႈဝႆႉၼၼ်ႉဢမ်ႇၶိုၼ်းၼုၵ်ႈၶိုၼ်းထွၼ်လႆႈ။ ပိူဝ်ႈၼႆလႄႈသူသမ်ႉတႅမ်ႈလိၵ်ႈဢမိင်ႉၸဝ်ႈပုၼ်ႈၵူၼ်းမဵဝ်း ၵျူး၊ တင်းလၢႆ၊ၸွမ်းၵႃႈၼင်ႇၵၢင်ၸႂ်သူမီးၼၼ်ႉတႅမ်ႈၼႂ်းၸိုဝ်ႈသဵင်ၶုၼ်ႁေႃၶမ်းသေလႄႈဢဝ်မွင်းၵူၺ်းၸဝ်ႈတွၵ်ႇၸုမ်ႈတႃႉ၊” ဝႃႈၼင်ႇၼႆဢေႃႈ။
လွင်ႈတၢင်းၼႆႉပဵၼ်ၼႂ်းလိူၼ်သၢမ်ဢၼ်ႁွင်ႉဝႃႈ၊လိူၼ် ၸိဝၼ်ႇ၊ လႆႈသၢဝ်းသၢမ်ဝၼ်းလႄႈ မေႃႇတၵႄး၊ ႁွင်ႉဢဝ်ၽူႈမၢႆလူင်ၶုၼ်ႁေႃၶမ်းတင်းလၢႆမႃးလႄႈႁႂ်ႈၶဝ်တႅမ်ႈၸွမ်းၵႃႈၼင်ႇဢၼ် မေႃႇတၵႄး၊ သင်ႇလၢတ်ႈၼၼ်ႉတီႈၵူၼ်းမဵဝ်း ၵျူး၊ လႂ်၊မဵဝ်ႉဝုၼ်ႇလႂ်၊ၶုၼ်ဢၼ်ဢုပ်ႉၵႃႈၼိူဝ်သိုင်ႇၸိုင်ႈဝၢၼ်ႈမိူင်းလႂ်၊ဢိၵ်ႇတင်းၶုၼ်ဢၼ်ပွင်ၵၢၼ်ၸဝ်ႈလႂ်၊ၵႃႈၼႂ်းၵူႈသိုင်ႇၵူႈမိူင်းၵူႈတီႈၵူႈလႅၼ်ဢၼ်မီးပၢၵ်ႇပၢႆသၢဝ်းၸဵတ်းမိူင်းၸႃႉဢဝ်ၵႃႈတီႈမိူင်း ဢိၼ်ႇတရိယႃႉ၊ တေႃႇထိုင်ႁွတ်ႈမိူင်း ဢေႇတီႇဢူဝ်းပီးယႃး၊ ဢေႃႈ။ လိၵ်ႈၸိူဝ်းၼၼ်ႉတႅမ်ႈပၼ်တီႈသိုင်ႇၸိုင်ႈဝၢၼ်ႈမိူင်း ဢိူင်ႇမိူင်းၽႂ်ဢိူင်ႇမိူင်းမၼ်းၵႃႈၼႂ်းၵႂၢမ်းၽႃႇသႃႇၶဝ်ၸွမ်းလူၺ်ႈလိၵ်ႈဢႅၵ်ႉၶရႃႇၶဝ်ႁင်းၽႂ်ႁင်းမၼ်းလႄႈၵႂၢမ်းၽႃႇသႃႇၽႂ်မၼ်း၊ဢိၵ်ႇတင်းတီႈၵူၼ်းမဵဝ်း ၵျူး၊ တင်းလၢႆၸွမ်းလိၵ်ႈၽႃႇသႃႇၶဝ်ၼႂ်းၵႂၢမ်းၽႃႇသႃႇၶဝ်ၼၼ်ႉဢေႃႈ။-
မေႃႇတၵႄး၊ ၵေႃႈတႅမ်ႈလိၵ်ႈၵႃႈၼႂ်းၸိုဝ်ႈသဵင်ၶုၼ်ႁေႃၶမ်း ဢႃႇသူၺ်ႇရု၊ လႄႈဢဝ်ၸုမ်ႈၸဝ်ႈတွၵ်ႇသေယဝ်ႉ၊ပွႆႇၸႂ်ႉၵူၼ်းဢွၼ်ႇဢၼ်သူင်ႇလိၵ်ႈတင်းလၢႆပႃးဢဝ်လိၵ်ႈၸိူဝ်းၼၼ်ႉသေယဝ်ႉ၊ၶီႇမႃႉ၊ၶီႇမႃႉလေႃႈ၊ၶီႇၵလႃႇဢုၵ်ႈလႂ်ၵႂႃႇၶၼ်ၶၼ်ၽႂ်းၽႂ်းဢေႃႈ။
ၶေႃႈၵႂၢမ်းဢမိင်ႉၸဝ်ႈၼၼ်ႉလၢတ်ႈလူၺ်ႈလွင်ႈဢၼ်ၶုၼ်ႁေႃၶမ်းပၼ်ဢၶႂၢင်ႉတီႈၵူၼ်းမဵဝ်း ၵျူး၊ ဢၼ်မီးၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈၵူႈဝၢၼ်ႈၵူႈဝဵင်း၊ႁႂ်ႈၶဝ်လႆႈၸုတုမ်ၵၼ်လႄႈႁႄႉၶႅၼ်ဢသၢၵ်ႈတူဝ်ၸဝ်ႈၵဝ်ႇဢေႃႈ။ ပေႃးၵူၼ်းသေမဵဝ်းမဵဝ်းၵူႈသိုင်ႇၸိုင်ႈဝၢၼ်ႈမိူင်းသေဢိူင်ႇဢိူင်ႇယိပ်းၵမ်လၢၵ်ႈၼၢၵ်ႈသေလႄႈမႃးတိုၵ်းတေႃးၶဝ်ၸိုင်၊ၶဝ်မီးဢၶႂၢင်ႉဢၼ်လႆႈၶႃႈၽၼ်းဢဝ်တၢႆႁူဝ်ႁၢၼ်ၵူၼ်းသိုၵ်းၸိူဝ်းၼၼ်ႉ၊ဢိၵ်ႇတင်းလုၵ်ႈၶဝ်မေးၶဝ်သေလႄႈႁိမ်ႁူင်ႇသိမ်းဢဝ်ဢုၵ်ႉၸႃႇၶဝ်ဢေႃႈ။-
လိၵ်ႈဢမိင်ႉၼၼ်ႉ ႁႂ်ႈၸွတ်ႇတူဝ်ႈၵႂႃႇၵႃႈၼႂ်းသိုင်ႇၸိုင်ႈဝၢၼ်ႈမိူင်းၶုၼ်ႁေႃၶမ်း ဢႃႇသူၺ်ႇရု၊ ၵမ်းလဵဝ်ၼႂ်းလိူၼ်သိပ်းသွင်ဝၼ်းတီႈသိပ်းသၢမ်ဢၼ်ပဵၼ်လိူၼ် ဢႃႇတႃႇ၊ ၼၼ်ႉဢေႃႈ။-
လိၵ်ႈဢမိင်ႉၼၼ်ႉတၵ်းလႆႈပိုၼ်ၽၢဝ်ႇၶၢဝ်ႇၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈၵူႈသိုင်ႇၵူႈမိူင်းၵူႈတီႈၵူႈလႅၼ်ပုၼ်ႈလွင်ႈၼင်ႇႁိုဝ်ၵူၼ်းမဵဝ်း ၵျူး၊ တင်းလၢႆတၵ်းဢွၼ်ၵၼ်မႄးႁႅၼ်းတၼ်းဝႆႉတႃႇတေၶိုၼ်းတွပ်ႇတီႈရၢၼ်ႇသူႇၶဝ်ၼႂ်းဝၼ်းၼၼ်ႉဢေႃႈ။-
ၼင်ႇၼၼ်လႄႈၵူၼ်းဢွၼ်ႇဢၼ်သူင်ႇလိၵ်ႈလႄႈၶီႇမႃႉ၊ၶီႇမႃႉလေႃႈ၊ၶီႇၵလႃႇဢုၵ်ႈၸိူဝ်းၼၼ်ႉဢွၼ်ၵၼ်ဢွၵ်ႇၵႂႃႇၸွမ်းၵႃႈၼင်ႇဢၼ်ဢမိင်ႉၶုၼ်ႁေႃၶမ်းႁိပ်ႈၼႅတ်ႈၼႃႇလူင်လၢင်လႄႈႁႂ်ႈၵႂႃႇၶၼ်ၶၼ်ၽႂ်းၽႂ်းၼၼ်ႉဢေႃႈ။ ဢမိင်ႉၸဝ်ႈၼၼ်ႉၵေႃႈၸွတ်ႇတူဝ်ႈၵႂႃႇၵႃႈၼႂ်းဝဵင်း သုသႃႇ၊ ၼၼ်ႉဢေႃႈ။
မေႃႇတၵႄး၊ ၼၼ်ႉၼုင်ႈၶူဝ်းၼုင်ႈတၢင်းမႆၶုၼ်ႁေႃၶမ်းဢၼ်ၽိူၵ်ႇဢၼ်သွမ်ႇၼၼ်ႉယူႇ၊ဢိၵ်ႇတင်းၼုင်ႈသိူဝ်ႈၽႃႈပၢၼ်ႇယၢဝ်းဢၼ်လႅင်ၵမ်ႇယူႇ၊တိုဝ်းသရၽူႇၶမ်းဢၼ်မျၢတ်ႈလီၼႃႇၼၼ်ႉသေလႄႈဢွၵ်ႇသေၵႃႈတီႈႁေႃၶမ်းၵႂႃႇဢေႃႈ။ မိူဝ်ႈၼၼ်ႉၵႃႈတီႈဝဵင်း သုသႃႇ၊ မီးသဵင်ဢၼ်ႁုၼ်ႈဢၼ်မေႃးလႄႈမီးတၢင်းဢၼ်ၸူမ်းဢၼ်သိူဝ်းဢေႃႈ။-
ပုၼ်ႈတႃႇၵူၼ်းမဵဝ်း ၵျူး၊ တင်းလၢႆၵေႃႈ လႆႈတၢင်းဢၼ်သႃႇၸႂ်၊တၢင်းဢၼ်မူၼ်ႈပျေႃႇ၊တၢင်းဢၼ်ၸူမ်းသိူဝ်းလႄႈမီးၵုင်ႇသရေႇမႃးဢေႃႈ။-
ၵႃႈပဵၼ်ၵူႈသိုင်ႇၵူႈမိူင်းၵူႈတီႈၵူႈလႅၼ်ဢၼ်လိၵ်ႈဢမိင်ႉၸဝ်ႈႁွတ်ႈထိုင်ၼၼ်ႉၵေႃႈၵူၼ်းမဵဝ်း ၵျူး၊ ၶဝ်လႆႈမီးတၢင်းဢၼ်ၸူမ်းၸႂ်သိူဝ်းၸႂ်၊ၼႂ်းတၢင်းဢၼ်ၶၢမ်ႇပွႆး၊တၢင်းဢၼ်ပႂ်ႉဝၼ်းမၢင်ႇၵလႃႇလူၺ်ႈပွႆးၵိၼ်ပွႆးသူတ်ႉဢၼ်မူၼ်ႈၸႂ်ပျေႃႇၸႂ်ၼၼ်ႉဢေႃႈ။ ၼင်ႇၼၼ်လႄႈၵူၼ်းတၢင်ႇၸိူဝ်ႉတၢင်ႇမဵဝ်းၼမ်ၼႃႇဢွၼ်ၵၼ်ၶဝ်ႈၽႃႇသႃႇ ၵျူး၊ မႃးၵွပ်ႈပိူဝ်ႈဢၼ်ၶဝ်ၵူဝ်ႁႄၵူၼ်းမဵဝ်း ၵျူး၊ ၼၼ်ႉဢေႃႈ။
ၼႂ်းလိူၼ်သိပ်းသွင်ဢၼ်ၶဝ်ႁွင်ႉဝႃႈ၊လိူၼ် ဢႃႇတႃႇ၊ လႆႈသိပ်းသၢမ်ဝၼ်း၊ပဵၼ်ဝၼ်းဢၼ်ၶိင်ႇၶႃႇဢၼ်တၵ်းလႆႈႁဵတ်းၸွမ်းဢမိင်ႉၶုၼ်ႁေႃၶမ်းၼၼ်ႉထိုင်မႃးလႄႈရၢၼ်ႇသူႇၵူၼ်းမဵဝ်း ၵျူး၊ ၶဝ်ၼၼ်ႉဢၢင်ႈဢၢၼ်းတၵ်းပဵၼ်ယႂ်ႇပဵၼ်ၸဝ်ႈၵႃႈၼိူဝ်ၶဝ်သေၵေႃႈ၊ၵူၼ်းမဵဝ်း ၵျူး၊ တင်းလၢႆလႆႈပဵၼ်ၸဝ်ႈပဵၼ်ယႂ်ႇၵႃႈၼိူဝ်ၶဝ်သေဢေႃႈ။-
ၵူၼ်းမဵဝ်း ၵျူး၊ ၸိူဝ်းဢၼ်ယူႇၼႂ်းၵူႈဝၢၼ်ႈၵူႈဝဵင်းၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈၼၼ်ႉ၊ဢွၼ်ၵၼ်ၸုၵၼ်တုမ်ၵၼ်ႁႂ်ႈလႆႈႁႄႉတိုၵ်းႁႄႉတေႃးၶဝ်ၸိူဝ်းဢၼ်ဢၢင်ႈမႃးႁဵတ်းၽေးသႂ်ႇတီႈၶဝ်ၼၼ်ႉဢေႃႈ။ ၵူၼ်းၵူႈတီႈၵူႈလႅၼ်ဢွၼ်ၵၼ်ၵူဝ်ႁႄၶဝ်လႄႈ၊ၽူႈလႂ်သေၵေႃႉသေၵူၼ်းဢမ်ႇၸုၵ်းဢမ်ႇၶၢမ်ႇၶဝ်လႆႈ။-
ၼင်ႇၼၼ်လႄႈၶုၼ်ဢၼ်ဢုပ်ႉၵႃႈၼိူဝ်ၵူႈသိုင်ႇၵူႈမိူင်းၵူႈတီႈၵူႈလႅၼ်လႂ်၊ၸဝ်ႈၽႃႉလႂ်၊မဵဝ်ႉဝုၼ်ႇလႂ်၊ၶုၼ်ပွင်ၵၢၼ်ဢၼ်ပႂ်ႉဢမုၶုၼ်ႁေႃၶမ်းလႂ်၊တင်းသဵင်ႈတင်းလူင်ၵေႃႈဢွၼ်ၵၼ်ၸွႆႈထႅမ်မႃႉၸႃႉၵူၼ်းမဵဝ်း ၵျူး၊ တင်းလၢႆၵွပ်ႈပိူဝ်ႈဢၼ်ၶဝ်ၵူဝ်ႁႄ မေႃႇတၵႄး၊ ၼၼ်ႉဢေႃႈ။-
လွင်ႈမၼ်းၸမ်ႉ၊ၵူႈဝၢၼ်ႈၵူႈမိူင်းၵူႈတီႈၵူႈလႅၼ်ႁုလွင်ႈဢၼ် မေႃႇတၵႄး၊ ၼၼ်ႉမုၼ်ၽုင်းယႂ်ႇၼႃႇၵႃႈၼႂ်းႁေႃၸဝ်ႈယူႇသေလႄႈဢႃႇၼႃႇမၼ်းယဵင်ႈၶႅၼ်းယႂ်ႇၽႄတူဝ်းတွၼ်းမႃးယူႇတိၵ်းတိၵ်းၼၼ်ႉဢေႃႈ။-
ၵွပ်ႈပိူဝ်ႈၼႆလႄႈၵူၼ်းမဵဝ်း ၵျူး၊ တင်းလၢႆ၊ၶႂ်ႈႁဵတ်းၸိူဝ်ႉၼင်ႇႁိုဝ်တီႈရၢၼ်ႇသူႇၶဝ်ဢၼ်ၸင်းၶဝ်ၼၼ်ႉၵေႃႈၶဝ်ႁဵတ်းလႆႈဢေႃႈ။ ၶဝ်ဢွၼ်ၵၼ်တိုၵ်းတေႃးယႃႉၽဵဝ်ႈပႅတ်ႈရၢၼ်ႇသူႇၶဝ်တင်းသဵင်ႈတင်းလူင်လူၺ်ႈလၢပ်ႇလူၺ်ႈလႅဝ်း၊လူၺ်ႈတၢင်းဢၼ်ၶႃႈၽၼ်းဢဝ်တၢႆဢေႃႈ။
ၵႃႈၼႂ်းဝဵင်းလူင် သုသႃႇ၊ ၼၼ်ႉၵူၼ်းမဵဝ်း ၵျူး၊ တင်းလၢႆၶႃႈၽၼ်းဢဝ်တၢႆၵူၼ်းႁႃႈပၢၵ်ႇၵေႃႉဢေႃႈ။-
ၼႂ်းဝၼ်းၼၼ်ႉ၊ၸရၢင်းၵူၼ်းဢၼ်လႆႈၶၢမ်ႇတၢင်းဢၼ်ဢဝ်တၢႆၵႃႈၼႂ်းဝဵင်း သုသႃႇ၊ ၼၼ်ႉ၊လႆႈတၢင်ႇလဝ်ႈထိုင်ၶုၼ်ႁေႃၶမ်းဢေႃႈ။-
ၶုၼ်ႁေႃၶမ်းမီးဢမိင်ႉတီႈၼၢင်းႁေႃၶမ်း ဢေးသတႃႇ၊ လႄႈဝႃႈ၊ “ၵႃႈၼႂ်းဝဵင်း သုသႃႇ၊ ၼႆႉၵူၺ်းၵူၼ်းမဵဝ်း ၵျူး၊ တင်းလၢႆ ဢွၼ်ၵၼ်မႃးၶႃႈၽၼ်းၵူၼ်းႁႃႈပၢၵ်ႇတၢႆလူၺ်ႈၵၼ်တင်းလုၵ်ႈၸၢႆး ႁႃႇမၢၼ်ႇ၊ သိပ်းၵေႃႉၼၼ်ႉယဝ်ႉ။ ၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈၼႆႉၵူႈသိုင်ႇၵူႈမိူင်းၵူႈတီႈၵူႈလႅၼ်ၸိူဝ်းၼၼ်ႉၶဝ်ႁဵတ်းၸိူဝ်ႉၼင်ႇႁိုဝ်ယဝ်ႉဢမ်ႇႁု။ မႂ်းယင်းၶႂ်ႈလႆႈထႅင်ႈဢီႈသင်လူးၵွၼ်ႇ။ ၵဝ်တၵ်းႁႂ်ႈဢလူဝ်ႇမႂ်းလႆႈပျေႉၸုမ်ႇဢေႃႈ။ မႂ်းယင်းၶႂ်ႈယွၼ်းဢဝ်သူးလၢပ်ႈၵႃႈသင်ထႅင်ႈ။ ၵဝ်တၵ်းပၼ်ၵႃႈဢၼ်မႂ်းယွၼ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၼၢင်းႁေႃၶမ်း ဢေးသတႃႇ၊ ၶိုၼ်းလဝ်ႈလၢတ်ႈလႄႈဝႃႈ၊ “ပေႃးၸဝ်ႈၶုၼ်လူင်ထုၵ်ႇၸႂ်မႅၼ်ႈၸႂ်ၸိုင်၊ၶႅၼ်းတေႃႈႁႂ်ႈၵူၼ်းမဵဝ်း ၵျူး၊ ၼႂ်းဝဵင်း သုသႃႇ၊ ၼႆႉလႆႈဢၶႂၢင်ႉဢၼ်ႁဵတ်းထႅင်ႈဝၼ်းမိူဝ်ႈၽုၵ်ႈမိူၼ်ၸိူဝ်ႉၼင်ႇဢၼ်ၶဝ်မီးဢၶႂၢင်ႉဢၼ်ႁဵတ်းၼႂ်းဝၼ်းမိူဝ်ႈၼႆႉၼၼ်ႉ၊ဢိၵ်ႇတင်းႁႂ်ႈဢဝ်တူဝ်တၢႆလုၵ်ႈၸၢႆး ႁႃႇမၢၼ်ႇ၊ တင်းသိပ်းၵေႃႉၼၼ်ႉဢဝ်ႁွႆႈၶႅၼ်ဝႆႉၵႃႈၼိူဝ်သဝ်ၵၢင်ႉဢၼ်ၶႅၼ်ၶေႃးႁႂ်ႈတၢႆၼၼ်ႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။-
ၶုၼ်ႁေႃၶမ်းပူင်ဢမိင်ႉႁႂ်ႈႁဵတ်းၸိူဝ်ႉၼင်ႇၼၼ်ၵႃႈတီႈၼႂ်းဝဵင်း သုသႃႇ၊ ၼၼ်ႉလႄႈၶဝ်ဢွၼ်ၵၼ်ဢဝ်တူဝ်တၢႆလုၵ်ႈၸၢႆး ႁႃႇမၢၼ်ႇ၊ တင်းသိပ်းၵေႃႉၼၼ်ႉမတ်ႉႁွႆႈၶႅၼ်ဝႆႉဢေႃႈ။-
ၼႂ်းဝၼ်းဢၼ်လိူၼ် ဢႃႇတႃႇ၊ လႆႈသိပ်းသီႇဝၼ်းၼၼ်ႉၵေႃႈၵူၼ်းမဵဝ်း ၵျူး၊ ၶဝ်ဢွၼ်ၵၼ်ၸုၵၼ်တုမ်ၵၼ်ၵႃႈၼႂ်းဝဵင်း သုသႃႇ၊ ထႅင်ႈသေယဝ်ႉ၊ဢဝ်ၵူၼ်းတၢႆသၢမ်ပၢၵ်ႇဢေႃႈ။ ၵူၺ်းၵႃႈ၊ၶဝ်ယင်းဢမ်ႇႁိမ်ႁူင်ႇဢမ်ႇသိမ်းဢဝ်ဢုၵ်ႉၸႃႇပိူၼ်ႈသေလႄႈယူႇဢေႃႈ။
ၵူၼ်းမဵဝ်း ၵျူး၊ ၸိူဝ်းဢၼ်ယူႇၵႃႈၼႂ်းဢိူင်ႇတင်းလၢႆလႂ်ၵေႃႈ ဢွၼ်ၵၼ်ၸုတုမ်ၵၼ်သေလႄႈႁႄႉၶႅၼ်ဢသၢၵ်ႈတူဝ်ၸဝ်ႈၵဝ်ႇဢေႃႈ။ ၶဝ်လႆႈၵတ်းယဵၼ်ၶျၢမ်းသႃႇလွတ်ႈဢသၢၵ်ႈသေၵႃႈၼႂ်းမိုဝ်းရၢၼ်ႇသူႇၶဝ်ဢၼ်ၸင်းၶဝ်ၼၼ်ႉလႄႈၶဝ်ဢဝ်တၢႆရၢၼ်ႇသူႇၶဝ်ၸဵတ်းမိုၼ်ႇႁႃႈႁဵင်ၵေႃႉဢေႃႈ။ ၵူၺ်းၵႃႈ၊ၶဝ်ဢမ်ႇႁိမ်ႁူင်ႇဢမ်ႇသိမ်းဢဝ်ဢုၵ်ႉၸႃႇၶဝ်လႄႈယူႇဢေႃႈ။-
ၶဝ်ႁဵတ်းၸိူဝ်ႉၼင်ႇၼၼ်ၼႂ်းလိူၼ် ဢႃႇတႃႇ၊ သိပ်းသၢမ်ဝၼ်းၼၼ်ႉလႄႈ၊ၼႂ်းဝၼ်းမိူဝ်ႈၽုၵ်ႈသိပ်းသီႇဝၼ်းၼၼ်ႉၸမ်ႉ၊ၶဝ်ဢမ်ႇႁဵတ်းတၢင်းဢၼ်ၶႃႈၽၼ်းဢဝ်တၢႆယဝ်ႉလႄႈၶဝ်ဢွၼ်ၵၼ်ႁဵတ်းပွႆးၵိၼ်ပွႆးသူတ်ႉမူၼ်ႈမူၼ်ႈပျေႃႇပျေႃႇဢေႃႈ။-
ၵူၼ်းမဵဝ်းဝဵင်း သုသႃႇ၊ တင်းလၢႆၸမ်ႉ၊ၶဝ်ဢွၼ်ၵၼ်ႁဵတ်းတၢင်းဢၼ်ၶႃႈၽၼ်းဢဝ်ရၢၼ်ႇသူႇၶဝ်တၢႆၼႂ်းဝၼ်းတီႈသိပ်းသၢမ်၊ဢိၵ်ႇတင်းဝၼ်းတီႈသိပ်းသီႇသေယဝ်ႉ၊ၼႂ်းဝၼ်းတီႈသိပ်းႁႃႈၼၼ်ႉၸိုင်၊ၶဝ်ဢမ်ႇၶႃႈၽၼ်းဢမ်ႇဢဝ်တၢႆလႄႈဝႆႉပဵၼ်ဝၼ်းလိုဝ်ႈၶဝ်လႄႈႁဵတ်းပွႆးၵိၼ်ပွႆးသူတ်ႉမူၼ်ႈမူၼ်ႈပျေႃႇပျေႃႇဢေႃႈ။-
ၵွပ်ႈပိူဝ်ႈလွင်ႈတၢင်းၼႆႉလႄႈၵူၼ်းမဵဝ်း ၵျူး၊ ဢၼ်ယူႇၵႃႈၼႂ်းဝၢၼ်ႈလဵၵ်ႉဝဵင်းၼွႆႉၸိူဝ်းၼၼ်ႉဢွၼ်ၵၼ်ပႂ်ႉဝၼ်းလိူၼ် ဢႃႇတႃႇ၊ ဝၼ်းတီႈသိပ်းသီႇၼၼ်ႉႁႂ်ႈပဵၼ်ဝၼ်းဢၼ်ၸူမ်းသိူဝ်းမူၼ်ႈပျေႃႇ၊ဝၼ်းပွႆးၵိၼ်ပွႆးသူတ်ႉ၊ဝၼ်းဢၼ်ၵေႃႉၼိုင်ႈလႄႈၵေႃႉၼိုင်ႈပၼ်လၢၵ်ႈသွင်ႇတီႈၵၼ်ဢေႃႈ။
ၼင်ႇၼၼ်လႄႈ မေႃႇတၵႄး၊ တႅမ်ႈလွင်ႈတၢင်းၸိူဝ်းၼႆႉသေလႄႈပၼ်ၵႂႃႇၵႃႈတီႈၵူၼ်းမဵဝ်း ၵျူး၊ ၵႃႈဢၼ်မီးတီႈၸမ်တီႈၵႆ၊ၵႃႈၼႂ်းသိုင်ႇၸိုင်ႈဝၢၼ်ႈမိူင်း ပႃးသျႃး၊ ၵူႈသိုင်ႇၵူႈမိူင်းၵူႈတီႈၵူႈလႅၼ်လႄႈ၊-
သင်ႇလၢတ်ႈၵႂႃႇႁႂ်ႈၶဝ်ပႂ်ႉဝၼ်းလိူၼ် ဢႃႇတႃႇ၊ ဝၼ်းတီႈသိပ်းသီႇတင်းဝၼ်းတီႈသိပ်းႁႃႈ၊ပဵၼ်ဝၼ်းလိုဝ်ႈၵူႈပီၵူႈပီဢေႃႈ။-
ဝၼ်းၸိူဝ်းၼၼ်ႉ၊ပဵၼ်ဝၼ်းဢၼ်ၵူၼ်းမဵဝ်း ၵျူး၊ တင်းလၢႆ၊လႆႈၵတ်းယဵၼ်ၶျၢမ်းသႃႇလွတ်ႈဢသၢၵ်ႈသေၵႃႈၼႂ်းမိုဝ်းရၢၼ်ႇသူႇၶဝ်၊ပဵၼ်လိူၼ်ဢၼ်မီးတၢင်းဢၼ်ၸႂ်လုႁႅင်းဢူၼ်ႈလႄႈၶၢင်းၶီၶၢင်းၽၢၼ်ၼၼ်ႉလႅၵ်ႈလၢႆႈမႃးပဵၼ်တၢင်းဢၼ်ၸူမ်းသိူဝ်းမူၼ်ႈပျေႃႇလႄႈပဵၼ်ဝၼ်းမၢင်ႇၵလႃႇ၊ဢိၵ်ႇတင်းႁႂ်ႈပဵၼ်ဝၼ်းပွႆးၵိၼ်ပွႆးသူတ်ႉ၊ဝၼ်းဢၼ်ၵေႃႉၼိုင်ႈလႄႈၵေႃႉၼိုင်ႈပၼ်လၢၵ်ႈသွင်ႇတီႈၵၼ်၊ဝၼ်းဢၼ်ၽေးၸွၼ်းယိုၼ်ႈမႅင်ႇတီႈၵူၼ်းယၢၵ်ႈၵူၼ်းၽၢၼ်ဢေႃႈ။-
ပိူဝ်ႈၼႆလႄႈၵူၼ်းမဵဝ်း ၵျူး၊ တင်းလၢႆဢွၼ်ၵၼ်ႁဵတ်းၸွမ်းၵႃႈၼင်ႇဢၼ် မေႃႇတၵႄး၊ သင်ႇလၢတ်ႈၼၼ်ႉသေယဝ်ႉ၊ပဵၼ်ထုင်းၸၢမ်ႇဢၼ်ႁဵတ်းပွႆးၼၼ်ႉၵူႈပီၵူႈပီဢေႃႈ။
လွင်ႈမၼ်းၸမ်ႉ၊ ႁႃႇမၢၼ်ႇ၊ လုၵ်ႈၸၢႆး ႁမ်ႇမေႇတႃႇသႃႉ၊ မဵဝ်း ဢႃႇၵတ်ႉ၊ လႄႈပဵၼ်ရၢၼ်ႇသူႇၵူၼ်းမဵဝ်း ၵျူး၊ ၶဝ်ၼၼ်ႉႁဵတ်းတၢင်းဢၼ်တူၵ်းၸႃႇၵွၵ်ႈဢၼ်ၶဝ်ႁွင်ႉဝႃႈ၊ ပုရႃႉ၊ ၼၼ်ႉႁႂ်ႈလႆႈတႅပ်းတတ်းမိုဝ်ႉဝၼ်းဢၼ်တၵ်းယႃႉၽဵဝ်ႈၵူၼ်းမဵဝ်း ၵျူး၊ တင်းလၢႆပႅတ်ႈၼၼ်ႉဢေႃႈ။-
ၵူၺ်းၵႃႈ၊ၼၢင်းႁေႃၶမ်း ဢေးသတႃႇ၊ ၶဝ်ႈၸူးတီႈၶုၼ်ႁေႃၶမ်းလႄႈၶုၼ်ႁေႃၶမ်းသမ်ႉပူင်ဢမိင်ႉႁႂ်ႈ ႁႃႇမၢၼ်ႇ၊ လႆႈၶၢမ်ႇဢဝ်ၽေးၵႃႈဢၼ်မၼ်းၵျၢမ်ႇႁဵတ်းတီႈၵူၼ်းမဵဝ်း ၵျူး၊ ၶဝ်ၼၼ်ႉသေယဝ်ႉ၊မၼ်းဢိၵ်ႇတင်းလုၵ်ႈၸၢႆးမၼ်းလႆႈၶၢမ်ႇတၢင်းဢၼ်မတ်ႉၶႅၼ်ၶေႃးဝႆႉၵႃႈၼိူဝ်သဝ်ၵၢင်ႉဢၼ်ၼၼ်ႉဢေႃႈ။-
ၵွပ်ႈပိူဝ်ႈလွင်ႈတၢင်းၼႆႉလႄႈဝၼ်းလိုဝ်ႈႁိူဝ်ႉၼၼ်ႉၶဝ်ႁွင်ႉဝႃႈ၊ ပုရိမ်း၊ ၸွမ်းလူၺ်ႈၵႂၢမ်းဢၼ်ဝႃႈ၊ ပုရႃႉ၊ ၼၼ်ႉဢေႃႈ။ ၵွပ်ႈပိူဝ်ႈလိၵ်ႈ မေႃႇတၵႄး၊ ဢိၵ်ႇတင်းၵွပ်ႈပိူဝ်ႈလွင်ႈတၢင်းဢၼ်ပဵၼ်မႃးၵႃႈမီးတင်းသဵင်ႈတင်းလူင်တီႈၶဝ်ၼၼ်ႉလႄႈ၊-
ၵူၼ်းမဵဝ်း ၵျူး၊ တင်းလၢႆဢွၼ်ၵၼ်ၸီႇယၢင်ႇႁႂ်ႈပဵၼ်ထုင်းၸၢမ်ႇၸူဝ်ႈလုၵ်ႈပၢၼ်လၢၼ်ၶဝ်၊ဢိၵ်ႇတင်းၶဝ်ၸိူဝ်းဢၼ်ၶဝ်ႈၽႃႇသႃႇၶဝ်ၵႃႈမီးၼၼ်ႉယင်းဢမ်ႇႁႂ်ႈလုတ်ႈႁၢမ်း၊လႄႈတၵ်းဢွၼ်ၵၼ်ပႂ်ႉဝၼ်းသွင်ဝၼ်းၼၼ်ႉၵူႈပီၵူႈပီ၊ၼႂ်းၶိင်ႇဢၼ်မၵ်းၶၢၼ်းဝႆႉ၊ၸွမ်းၵႃႈၼင်ႇဢၼ် မေႃႇတၵႄး၊ သင်ႇလၢတ်ႈဝႆႉၼၼ်ႉဢေႃႈ။-
ၼႆႉၸမ်ႉ၊ပဵၼ်တၢင်းဢၼ်တႅပ်းတတ်းဝႆႉ လူၺ်ႈလွင်ႈဢၼ်ၵူၼ်းႁိူၼ်းၵူၼ်းယေးမဵဝ်း ၵျူး၊ တင်းသဵင်ႈတင်းလူင်ၸူဝ်ႈလုၵ်ႈပၢၼ်လၢၼ်ၶဝ်ၵူႈၸူဝ်ႈၵူႈပၢၼ်ဢၼ်မီးၵႃႈၼႂ်းၵူႈသိုင်ႇၵူႈမိူင်းၵူႈတီႈၵူႈလႅၼ်၊တၵ်းလႆႈၶုၵ်းၸႂ်လႆႈၶႆႈၸႂ်ထူပ်းဝၼ်းၸိူဝ်းဢၼ်ဝႃႈ၊ ပုရိမ်း၊ ၼၼ်ႉလႄႈတၵ်းဢမ်ႇလႆႈလုတ်ႈလႆႈႁၢမ်းတၵ်းလႆႈပႂ်ႉၵမ်ပႂ်ႉၸွမ်းတႃႇသေႇဢမ်ႇထၢတ်ႇဢေႃႈ။
မိူဝ်ႈၼၼ်ႉ၊ၼၢင်းႁေႃၶမ်း ဢေးသတႃႇ၊ လုၵ်ႈယိင်း ဢၽိႁေးလႃႉ၊ ဢိၵ်ႇတင်း မေႃႇတၵႄး၊ ဢွၼ်ၵၼ်ဝႆႉဢႃႇၼႃႇဢၼ်ႁႅင်းၼႃႇလူင်လၢင်လႄႈတႅမ်ႈလွင်ႈဝၼ်း ပုရိမ်း၊ ဢၼ်ၵပ်းၵၢႆႇလူၺ်ႈလိၵ်ႈဢၼ် မေႃႇတၵႄး၊ တႅမ်ႈၵမ်းဢွၼ်တၢင်းၼၼ်ႉဢေႃႈ။-
လိၵ်ႈၼၼ်ႉၸိုင်၊တႅမ်ႈပၼ်ၵႂႃႇတီႈၵူၼ်းမဵဝ်း ၵျူး၊ တင်းလၢႆလႄႈလိၵ်ႈလၢၵ်ႈၶၢမ်ႇမၼ်းတင်းလၢႆသမ်ႉပၼ်ၵႂႃႇၵႃႈတီႈပၢၵ်ႇပၢႆသၢဝ်းၸဵတ်းမိူင်းၵႃႈၼႂ်းသိုင်ႇၸိုင်ႈဝၢၼ်ႈမိူင်း ပႃးသျႃး၊ ၼၼ်ႉဢေႃႈ။ လိၵ်ႈၼၼ်ႉမီးၵႂၢမ်းဢၼ်သူင်ႇမႅတ်ႈတႃႇပုၼ်ႈတႃႇႁႂ်ႈၵူၼ်းမဵဝ်း ၵျူး၊ တင်းလၢႆလႆႈမီးတၢင်းၼိမ်၊ဢိၵ်ႇတင်းတၢင်းဢၼ်လူင်ႉလီလွတ်ႈလီ၊-
ဢိၵ်ႇတင်းၵႂၢမ်းဢၼ်သင်ႇလၢတ်ႈႁႂ်ႈၶဝ်ပႂ်ႉၵမ်ၼႂ်းဝၼ်း ပုရိမ်း၊ လႄႈႁဵတ်းပွႆးၼၼ်ႉၼႂ်းၶိင်ႇၶႃႇမၼ်းဢၼ်မၵ်းၶၢၼ်းဝႆႉၼၼ်ႉမႅၼ်ႈၸွမ်းၵႃႈၼင်ႇဢၼ်ၸီႇယၢင်ႇၶိုင်ပွင်ဝႆႉတၢင်းဢၼ်ၵမ်တၢင်းၵိၼ်ဢၼ်သူးတွင်းပုၼ်ႈၶဝ်၊ဢိၵ်ႇတင်းပုၼ်ႈၸူဝ်ႈလုၵ်ႈပၢၼ်လၢၼ်ၶဝ်ၼၼ်ႉဢေႃႈ။ ဢမိင်ႉၼႆႉၸိုင်၊ပဵၼ်ဢမိင်ႉ မေႃႇတၵႄး၊ တင်းၼၢင်းႁေႃၶမ်း ဢေးသတႃႇ၊ ဢေႃႈ။-
ဢမိင်ႉၼၢင်းႁေႃၶမ်း ဢေးသတႃႇ၊ ၼၼ်ႉပဵၼ်ထုင်းၸၢမ်ႇဢၼ်မၼ်ႈၶိူင်ႇပုၼ်ႈဝၼ်း ပုရိမ်း၊ လႄႈမီးတၢင်းဢၼ်တႅမ်ႈမၢႆဝႆႉၵႃႈၼႂ်းၽိုၼ်လိၵ်ႈဢေႃႈ။
ၶုၼ်ႁေႃၶမ်း ဢႃႇသူၺ်ႇရု၊ ၽႃႇၵဵပ်းဢဝ်ငိုၼ်းၶွၼ်ႇၸႃႉၸဵမ်ၵႃႈၼိူဝ်လိၼ်ၼိူဝ်ၵုင်း၊ဢိၵ်ႇတင်းၵႃႈၼိူဝ်ၵုၼ်ဢၼ်မီးၵႃႈၼႂ်းပၢင်ႇလၢႆႇတင်းလၢႆဢေႃႈ။-
လွင်ႈတၢင်းၵႃႈဢၼ်မၼ်းၸဝ်ႈၸီႇယၢင်ႇႁဵတ်းသၢင်ႈဢႃႇၼႃႇ၊ဢိၵ်ႇတင်းတၼ်းၶူဝ်းမၼ်းၸဝ်ႈတင်းသဵင်ႈတင်းလူင်၊ဢိၵ်ႇတင်းလွင်ႈတၢင်းဢၼ်မၼ်းၸဝ်ႈယုၵ်ႉယွင်ႈ မေႃႇတၵႄး၊ ၼႂ်းဢရႃႇဢၼ်သုင်ဢၼ်မျၢတ်ႈၼႃႇၸိူဝ်းၼၼ်ႉမၢတ်ႈမၢႆတႅမ်ႈသႂ်ႇဝႆႉ၊ၵႃႈၼႂ်းပိုၼ်းၶုၼ်ႁေႃၶမ်းမိူင်း ပႃးသျႃး၊ တင်းမိူင်း မေႇတိ၊ ၼၼ်ႉဢေႃႈ။-
မေႃႇတၵႄး၊ ၵူၼ်းမဵဝ်း ၵျူး၊ ၼၼ်ႉလႆႈဢရႃႇဢၼ်သုင်မျၢတ်ႈသေပိူၼ်ႈတႂ်ႈၶုၼ်ႁေႃၶမ်း ဢႃႇသူၺ်ႇရု၊ ဢေႃႈ။ မၼ်းပဵၼ်ၵေႃႉဢၼ်ပႂ်ႉသဵတ်ႈၸႃႇၵႃႈၼိူဝ်ၵူၼ်းမဵဝ်းမၼ်းလႄႈပွင်ႁဵတ်းလုမ်းလႃးပၼ်တီႈၵူၼ်းမဵဝ်း ၵျူး၊ ဢၼ်ပဵၼ်ၵူၼ်းမဵဝ်းမၼ်းၼၼ်ႉဢေႃႈ။ မၼ်းၸၢင်ႈပွင်ႁဵတ်းလွင်ႈလီလွင်ႈငၢမ်းပုၼ်ႈၵူၼ်းမၼ်းတင်းလၢႆ၊ဢိၵ်ႇတင်းပုၼ်ႈၸူဝ်ႈလုၵ်ႈပၢၼ်လၢၼ်ၶဝ်လႆႈယူႇလူင်ႉလီလွတ်ႈလီၼၼ်ႉဢေႃႈ။ ၵျၢမ်းပရေႃးၽႅတ်ႈၼၢင်းဢေးသတႃႇယဝ်ႉယဝ်ႉဢေႃႈ။
မိူဝ်ႈၼၼ်ႉ၊မီးၵူၼ်းၵေႃႉၼိုင်ႈဢၼ်လႆႈၸိုဝ်ႈ ယေႃးၽႃႉ၊ လႄႈယူႇၵႃႈၼႂ်းမိူင်း ဢုၸႃႉ၊ ဢေႃႈ။ မၼ်းပဵၼ်ၵေႃႉဢၼ်ၸေးၸုမ်ႇ၊ၼႂ်းတၢင်းလီလႄႈပဵၼ်ၵေႃႉဢၼ်သိုဝ်ႈတေႃႇ၊ၵေႃႉဢၼ်ၵူဝ်ယမ်ၽြႃးပဵၼ်ၸဝ်ႈလႄႈပဵၼ်ၵေႃႉဢၼ်ဝႄႈပႅတ်ႈတၢင်းႁဵတ်းဢၼ်ဢမ်ႇလီဢေႃႈ။-
မၼ်းမီးလုၵ်ႈၸၢႆးၸဵတ်းၵေႃႉတင်းလုၵ်ႈယိင်းသၢမ်ၵေႃႉဢေႃႈ။-
ဢုၵ်ႉၸႃႇမၼ်းၸမ်ႉ၊မီးသူဝ်းၸဵတ်းႁဵင်၊ၵလႃႇဢုၵ်ႈသၢမ်ႁဵင်၊ဝူဝ်းႁႃႈပၢၵ်ႇၵူႈ၊မႃႉလီႈမႄႈႁႃႈပၢၵ်ႇလႄႈမီးၶႃႈၵူၼ်းၸႂ်ႉၵူၼ်းသွႆလႂ်ၼမ်ၼႃႇလူင်လၢင်လႄႈပဵၼ်ၵေႃႉဢၼ်မၢၵ်ႈမီးလီပဵၼ်သေပိူၼ်ႈၵႃႈၼႂ်းၵူၼ်းမိူင်းဢၼ်ယူႇၽၢႆႇတၢင်းဝၼ်းဢွၵ်ႇၼၼ်ႉဢေႃႈ။
လုၵ်ႈၸၢႆး ယေႃးၽႃႉ၊ ၸိူဝ်းၼၼ်ႉယၢမ်ႈဢွၼ်ၵၼ်ႁဵတ်းပွႆးၵိၼ်ပွႆးလဵင်ႉၵႃႈတီႈႁိူၼ်းၽႂ်ႁိူၼ်းမၼ်းၸွမ်းၼင်ႇဝၼ်းဢၼ်ၶဝ်မၵ်းၶၢၼ်းဝႆႉႁင်းၽႂ်ႁင်းမၼ်းလႄႈၸၢင်ႈႁွင်ႉဢဝ်ၼွင်ႉယိင်းၶဝ်သၢမ်ၵေႃႉမႃးႁႂ်ႈလႆႈၵိၼ်လူၺ်ႈၵၼ်တင်းၶဝ်ဢေႃႈ။-
မိူဝ်ႈဢၼ်ပွႆးၵိၼ်လဵင်ႉယဝ်ႉတူဝ်ႈလႄႈၼႂ်းဝၼ်းမိူဝ်ႈၽုၵ်ႈၵၢင်ၼႂ်ၼၼ်ႉ၊ ယေႃးၽႃႉ၊ လုၵ်ႉၸဝ်ႉၸဝ်ႉလႄႈသၢၵ်ႈၵၢပ်ႈတၢင်းလူႇဢၼ်တုတ်ႇၽႆးပုၼ်ႈလုၵ်ႈလၢင်းမၼ်းၵေႃႉၼိုင်ႈယဝ်ႉၵေႃႉၼိုင်ႈပုၼ်ႈတၵ်းႁႂ်ႈၶဝ်မူတ်းၸၢင်ႇဢေႃႈ။ မၼ်းႁဵတ်းၸိူဝ်ႉၼင်ႇၼႆတႃႇသေႇ၊ၵွပ်ႈပိူဝ်ႈဢၼ်မၼ်းၵူဝ်လုၵ်ႈလၢင်းမၼ်းႁဵတ်းမႅၼ်ႈဢပျတ်ႈဢၼ်ဢမ်ႇထၢင်ႇဢမ်ႇထိူမ်လႄႈသႄႉသွမ်းမႅၼ်ႈၽြႃးပဵၼ်ၸဝ်ႈၼၼ်ႉဢေႃႈ။
မီးဝၼ်းၼိုင်ႈမိူဝ်ႈဢၼ်ပဵၼ်ဝၼ်းဢၼ်တမၢၼ်ႇၵၢင်ႁၢဝ် တင်းလၢႆလႆႈမႃးၶႃးၸႃးၵႃႈတီႈၽၢႆႇၼႃႈ ထႃႇဝရႃႉၽြႃး၊ ၼၼ်ႉၸိုင်၊ၸႃႇတၢၼ်ႇမႃႇၼၢတ်ႈၵေႃႈပႃးလူၺ်ႈၵၼ်တင်းၶဝ်ဢေႃႈ။-
ထႃႇဝရႃႉၽြႃး၊ ၵေႃႈထၢမ်တီႈၸႃႇတၢၼ်ႇလႄႈဝႃႈ၊ “မႂ်းလုၵ်ႉၵႃႈတီႈလႂ်မႃး၊” ဝႃႈၼင်ႇၼႆသေယဝ်ႉ၊ ၸႃႇတၢၼ်ႇၶိုၼ်းလဝ်ႈလၢတ်ႈလႄႈဝႃႈ၊ “ၶႃႈၸဝ်ႈၵႂႃႇၵႂႃႇမႃးမႃးၵႃႈတီႈၼၼ်ႈၵႃႈတီႈၼႆႈလႄႈလႄႇလဵပ်ႈၵႃႈၼိူဝ်လိၼ်မိူင်းမႃးတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉတီႈၸႃႇတၢၼ်ႇလႄႈဝႃႈ၊ “ၸွင်ႇမႂ်းၶႆႈၸႂ်ထူပ်းထိုင်ၶႃႈၵဝ် ယေႃးၽႃႉ၊ ၼၼ်ႉယဝ်ႉႁိုဝ်း။ ၵႃႈၼိူဝ်လိၼ်မိူင်းၼႆႉၵေႃႉဢၼ်မိူၼ်ၵၼ်တင်းမၼ်းဢမ်ႇမီးသေၵေႃႉသေၵူၼ်း။ မၼ်းပဵၼ်ၵေႃႉဢၼ်ၸေးၸုမ်ႇၼႂ်းတၢင်းလီလႄႈပဵၼ်ၵေႃႉဢၼ်သိုဝ်ႈတေႃႇ၊ပဵၼ်ၵေႃႉဢၼ်ၵူဝ်ယမ်ၽြႃးပဵၼ်ၸဝ်ႈလႄႈဝႄႈပႅတ်ႈတၢင်းႁဵတ်းဢၼ်ဢမ်ႇလီဢေႃႈ၊” ဝႃႈၼင်ႇၼႆဢေႃႈ။
ၸႃႇတၢၼ်ႇၶိုၼ်းလဝ်ႈလၢတ်ႈတီႈ ထႃႇဝရႃႉၽြႃး၊ လႄႈဝႃႈ၊ “ပေႃး ယေႃးၽႃႉ၊ ယင်းဢမ်ႇလႆႈဢၵျူဝ်းၵႃႈသင်ၸိုင်၊မၼ်းတေၵူဝ်ယမ်ၽြႃးပဵၼ်ၸဝ်ႈလူးၵွၼ်ႇတီႈၶႃႈႁိုဝ်း။-
ၸဝ်ႈႁဝ်းၵႅတ်ႇၶႄႁႄႉၵင်ႈမၼ်းတင်းၵူၼ်းႁိူၼ်းၵူၼ်းယေးမၼ်း၊ဢိၵ်ႇတင်းဢုၵ်ႉၸႃႇမၼ်းၵႃႈမီးတင်းသဵင်ႈတင်းလူင်ၼၼ်ႉတီႈၶႃႈယဝ်ႉ။ ၸဝ်ႈႁဝ်းပၼ်တၢင်းလီၵႃႈတီႈဢၼ်မၼ်းႁဵတ်း၊ဢိၵ်ႇတင်းႁႂ်ႈတရိၵ်ႈသၢၼ်ႇမၼ်းမီးၼမ်ၼႃႇၵႃႈၼိူဝ်ၼႃႈလိၼ်မိူင်းတီႈၶႃႈယဝ်ႉ။-
တေႃႈလဵဝ်ၼႆႉပေႃးၸဝ်ႈႁဝ်းယုၵ်ႉသိမ်းဢဝ်ဢုၵ်ႉၸႃႇမၼ်းၵႃႈမီးၸိုင်၊မၼ်းတၵ်းၵိၼ်ႇလႃႇၸဝ်ႈႁဝ်းသိုဝ်ႈၼႃႈတႂ်ႈတႃၸဝ်ႈႁဝ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၵေႃႈမီးဢမိင်ႉတီႈၸႃႇတၢၼ်ႇလႄႈဝႃႈ၊ “ဢုၵ်ႉၸႃႇမၼ်းၵႃႈမီးၸိူဝ်းၼၼ်ႉမီးၵႃႈၼႂ်းမိုဝ်းမႂ်းဢေႃႈ။ ၵူၺ်းၵႃႈ၊ယႃႇပေတိူဝ်ႉထုၵ်ႇတူဝ်မၼ်း၊” ဝႃႈၼင်ႇၼႆသေယဝ်ႉ၊ၸႃႇတၢၼ်ႇဢွၵ်ႇသေၵႃႈတီႈၽၢႆႇၼႃႈ ထႃႇဝရႃႉၽြႃး၊ ၵႂႃႇဢေႃႈ။
ဝၼ်းၼိုင်ႈၼႂ်းမိူဝ်ႈဢၼ်လုၵ်ႈလၢင်း ယေႃးၽႃႉ၊ ၸိူဝ်းၼၼ်ႉယင်းတိုၵ်ႉဢွၼ်ၵၼ်ႁဵတ်းပွႆးၵိၼ်လဵင်ႉယူႇၵႃႈၼႂ်းႁိူၼ်းပီႈဢၢႆႈလူင်ၶဝ်ယူႇၼၼ်ႉ၊-
ၵူၼ်းၸႂ်ႉၵူၼ်းသွႆၶဝ်ၵေႃႉၼိုင်ႈလႅၼ်ႈမႃးၵႃႈတီႈ ယေႃးၽႃႉ၊ လႄႈမွၵ်ႇလၢတ်ႈဝႃႈ၊ “ၼႂ်းမိူဝ်ႈဢၼ်ႁဝ်းၶႃႈဢွၼ်ၵၼ်ဢဝ်တင်းဝူဝ်းထႆၼႃးယူႇလႄႈမႃႉလီႈမႄႈလႂ်ၵေႃႈဢွၼ်ၵၼ်ၵိၼ်ယိူဝ်ႈယႃႈယူႇၵႃႈႁိမ်းႁဝ်းၶႃႈၼၼ်ႉ၊-
ၵူၼ်းမဵဝ်း သေႇၽႃႉ၊ ၶဝ်မႃးတိုၵ်းတေႃးလႄႈသိမ်းဢဝ်ၵႂႃႇၶႃႈယဝ်ႉ။ ၵူၼ်းၸႂ်ႉၵူၼ်းသွႆၸဝ်ႈႁဝ်းၸိူဝ်းၼၼ်ႉၵေႃႈၶဝ်ဢဝ်လၢပ်ႇၶႃႈၽၼ်းတၢႆပႅတ်ႈၵူႈၵေႃႉၵူႈၵူၼ်းလႄႈၵိုတ်းၵျၢၼ်ႇဝႆႉၵဝ်ၶႃႈၵေႃႉလဵဝ်ၵူၺ်းၸင်ႇလႆႈမႃးမွၵ်ႇလၢတ်ႈတီႈၸဝ်ႈႁဝ်းၶႃႈယဝ်ႉ၊” ဝႃႈၼင်ႇၼႆဢေႃႈ။
ၼႂ်းမိူဝ်ႈဢၼ်မၼ်းတိုၵ်ႉလၢတ်ႈယူႇယင်းဢမ်ႇပႆႇသုတ်းၼၼ်ႉၵူၼ်းၸႂ်ႉၵူၼ်းသွႆတၢင်ႇၵေႃႉမႃးလႄႈမွၵ်ႇလၢတ်ႈဝႃႈ၊ “ၽႆးၽြႃးပဵၼ်ၸဝ်ႈတူၵ်းသေၵႃႈၼိူဝ်ၽႃႉၵၢင်ႁၢဝ်မႃးသေလႄႈမႆႈသူဝ်းတင်းလၢႆ၊ဢိၵ်ႇတင်းၵူၼ်းလဵင်ႉသူဝ်းတင်းလၢႆတၢႆမူတ်းၶႃႈယဝ်ႉလႄႈၵိုတ်းၵျၢၼ်ႇဝႆႉၵဝ်ၶႃႈၵေႃႉလဵဝ်ၵူၺ်းၸင်ႇလႆႈမႃးမွၵ်ႇလၢတ်ႈတီႈၸဝ်ႈႁဝ်းၶႃႈယဝ်ႉ၊” ဝႃႈၼင်ႇၼႆဢေႃႈ။
ၼႂ်းမိူဝ်ႈဢၼ်မၼ်းတိုၵ်ႉလၢတ်ႈယူႇယင်းဢမ်ႇပႆႇသုတ်းၼၼ်ႉၵူၼ်းၸႂ်ႉၵူၼ်းသွႆတၢင်ႇၵေႃႉမႃးလႄႈမွၵ်ႇလၢတ်ႈဝႃႈ၊ “ၵူၼ်းမဵဝ်း ၶႃႇလတေး၊ ၶဝ်ၽႄႁဵတ်းသၢမ်မုၵ်ႉသၢမ်ၸိူဝ်းသေလႄႈၶီႇမႃႉတိုၵ်းတေႃးႁိမ်ဢဝ်ၵလႃႇဢုၵ်ႈတင်းလၢႆၵႂႃႇၶႃႈယဝ်ႉ။ ၵူၼ်းၸႂ်ႉၵူၼ်းသွႆၸိူဝ်းၼၼ်ႉၵေႃႈၶဝ်ဢဝ်လၢပ်ႇၶႃႈၽၼ်းတၢႆပႅတ်ႈၵူႈၵေႃႉၵူႈၵူၼ်းလႄႈၵိုတ်းၵျၢၼ်ႇဝႆႉၵဝ်ၶႃႈၵေႃႉလဵဝ်ၵူၺ်းၸင်ႇလႆႈမႃးမွၵ်ႇလၢတ်ႈတီႈၸဝ်ႈႁဝ်းၶႃႈယဝ်ႉ၊” ဝႃႈၼင်ႇၼႆဢေႃႈ။
ၼႂ်းမိူဝ်ႈဢၼ်မၼ်းတိုၵ်ႉလၢတ်ႈယူႇယင်းဢမ်ႇပႆႇသုတ်းၼၼ်ႉၵူၼ်းၸႂ်ႉၵူၼ်းသွႆတၢင်ႇၵေႃႉမႃးလႄႈမွၵ်ႇလၢတ်ႈဝႃႈ၊ “ၼႂ်းမိူဝ်ႈဢၼ်လုၵ်ႈလၢင်းၸဝ်ႈႁဝ်းယင်းတိုၵ်ႉႁဵတ်းပွႆးၵိၼ်လဵင်ႉယူႇၵႃႈတီႈႁိူၼ်းလုၵ်ႈၸၢႆးလူင်ၸဝ်ႈႁဝ်းၼၼ်ႉ၊-
လူမ်းလူင်လုၵ်ႉသေၵႃႈတီႈထိူၼ်ႇလႅင်ႉပတ်ႉထူဝ်းမႃးတီႈသီႇၸဵင်ႇႁိူၼ်းလႄႈႁိူၼ်းၼၼ်ႉပင်းတူၵ်းတဵင်လုၵ်ႈလၢင်းၸဝ်ႈႁဝ်းတၢႆမူတ်းၶႃႈယဝ်ႉ။ ၵိုတ်းၵျၢၼ်ႇဝႆႉၵဝ်ၶႃႈၵေႃႉလဵဝ်ၵူၺ်းၸင်ႇလႆႈမႃးမွၵ်ႇလၢတ်ႈတီႈၸဝ်ႈႁဝ်းၶႃႈယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ ယေႃးၽႃႉ၊ လုၵ်ႉလႄႈၸၵ်ႉသိၵ်ႇသိူဝ်ႈယၢဝ်းမၼ်းသေယဝ်ႉ၊ထႃၶူၼ်ႁူဝ်မၼ်းပႅတ်ႈယဝ်ႉၸင်ႇၶုပ်ႉမူပ်ႇယူႇၵႃႈၼိူဝ်လိၼ်သေလႄႈဝႆႈသႃၵူဝ်းၵႂၢႆႇယူႇလႄႈဝႃႈ၊-
“ၵဝ်ၼႆႉၵိူတ်ႇမႃးတူဝ်ပူၺ်သေၵႃႈတီႈတွင်ႉမႄႈၵဝ်ယဝ်ႉ၊တၵ်းၶိုၼ်းၵႂႃႇတူဝ်ပူၺ်ဢေႃႈ။ ထႃႇဝရႃႉၽြႃး၊ ပၼ်ယဝ်ႉ၊ ထႃႇဝရႃႉၽြႃး၊ ၶိုၼ်းၵူႈသိမ်းဢဝ်ဢေႃႈ။ ႁႂ်ႈၼႃႇမႃႉၸိုဝ်ႈသဵင် ထႃႇဝရႃႉၽြႃး၊ မီးတၢင်းဢၼ်ယုၵ်ႉယွင်ႈယွင်ႈယေႃးသေၵမ်းလူၺ်ႈ၊” ဝႃႈၼင်ႇၼႆဢေႃႈ။
ၼႂ်းလွင်ႈတၢင်းၼႆႉတင်းသဵင်ႈတင်းလူင် ယေႃးၽႃႉ၊ ယင်းဢမ်ႇၽိတ်းပိူင်ႈ၊ယင်းဢမ်ႇတၢင်ႇဢပျတ်ႈတီႈ ထႃႇဝရႃႉၽြႃး၊ လႄႈယူႇဢေႃႈ။
မိူဝ်ႈဢၼ်ထိုင်မိုဝ်ႉဝၼ်းဢၼ်တမၢၼ်ႇၵၢင်ႁၢဝ် တင်းလၢႆမႃးၶႃးၸႃးၵႃႈတီႈၽၢႆႇၼႃႈ ထႃႇဝရႃႉၽြႃး၊ ထႅင်ႈၼၼ်ႉၸႃႇတၢၼ်ႇမႃႇၼၢတ်ႈၵေႃႈပႃးလူၺ်ႈၵၼ်တင်းၼႂ်းၶဝ်၊ႁႂ်ႈလႆႈၶႃးၸႃးၵႃႈတီႈၽၢႆႇၼႃႈ ထႃႇဝရႃႉၽြႃး၊ ထႅင်ႈဢေႃႈ။-
ထႃႇဝရႃႉၽြႃး၊ ထၢမ်တီႈၸႃႇတၢၼ်ႇမႃႇၼၢတ်ႈလႄႈဝႃႈ၊ “မႂ်းၵႂႃႇၵႃႈတီႈလႂ်မႃး၊” ဝႃႈၼင်ႇၼႆလႄႈ၊ ၸႃႇတၢၼ်ႇမႃႇၼၢတ်ႈၶိုၼ်းလဝ်ႈလၢတ်ႈလႄႈဝႃႈ၊ “ၶႃႈၸဝ်ႈၵႂႃႇၵႂႃႇမႃးမႃးၵႃႈတီႈၼၼ်ႈၵႃႈတီႈၼႆႈလႄႈလႄႇလဵပ်ႈၵႃႈၼိူဝ်လိၼ်မိူင်းမႃးတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉတီႈၸႃႇတၢၼ်ႇမႃႇၼၢတ်ႈလႄႈဝႃႈ၊ “ၸွင်ႇမႂ်းၶႆႈၸႂ်ထူပ်းထိုင်ၶႃႈၵဝ် ယေႃးၽႃႉ၊ ၼၼ်ႉႁိုဝ်း။ ၵႃႈၼိူဝ်လိၼ်မိူင်းၼႆႉၵူၼ်းၵေႃႉဢၼ်မိူၼ်ၵၼ်တင်းမၼ်းဢမ်ႇမီးသေၵေႃႉသေၵူၼ်း၊မၼ်းပဵၼ်ၵေႃႉဢၼ်ၸေးၸုမ်ႇၼႂ်းတၢင်းလီ၊ပဵၼ်ၵေႃႉဢၼ်သိုဝ်ႈတေႃႇ၊ပဵၼ်ၵေႃႉဢၼ်ၵူဝ်ယမ်ၽြႃးပဵၼ်ၸဝ်ႈလႄႈပဵၼ်ၵေႃႉဢၼ်ဝႄႈပႅတ်ႈတၢင်းႁဵတ်းဢၼ်ဢမ်ႇလီဢေႃႈ။ ယင်းဢမ်ႇမီးလွင်ႈတၢင်းၵႃႈသင်လႄႈမႂ်းတိုၵ်းယူင်းႁႂ်ႈၵဝ်ပွႆႇၸႂ်ႉမႂ်းၵႂႃႇယႃႉယူၵ်ႉမၼ်းသေၵေႃႈ၊ ယေႃးၽႃႉ၊ ၼၼ်ႉယင်းတႄႇယူႇၼႂ်းတၢင်းဢၼ်သိုဝ်ႈတေႃႇတႃႇသေႇဢေႃႈ၊” ဝႃႈၼင်ႇၼႆဢေႃႈ။
ၸႃႇတၢၼ်ႇမႃႇၼၢတ်ႈၵေႃႈၶိုၼ်းလဝ်ႈလၢတ်ႈတီႈ ထႃႇဝရႃႉၽြႃး၊ လႄႈဝႃႈ၊ “ၸိူဝ်ႉၼင်ႇဢၼ်ဝႃႈ၊ ‘ၽိဝ်ၼိူဝ်ႉၼင်ပုၼ်ႈၽိဝ်ၼိူဝ်ႉၼင်’ ဝႃႈၼႆၼၼ်ႉ၊ၵူၼ်းၸၢင်ႈဢဝ်ၵႃႈဢၼ်မၼ်းမီးၼၼ်ႉတၵ်းၵႄႇသႄႇဢဝ်ဢသၢၵ်ႈတူဝ်ၸဝ်ႈၵဝ်ႇဢေႃႈ။-
တေႃႈလဵဝ်ၼႆႉပေႃးၸဝ်ႈႁဝ်းႁဵတ်းၽေးသႂ်ႇၵႃႈတီႈတူဝ်ၶၼ်ႇထႃႇမၼ်းၸိုင်၊မၼ်းတၵ်းၵိၼ်ႇလႃႇၸဝ်ႈႁဝ်းသိုဝ်ႈၼႃႈတႂ်ႈတႃၸဝ်ႈႁဝ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၵေႃႈမီးဢမိင်ႉတီႈၸႃႇတၢၼ်ႇမႃႇၼၢတ်ႈလႄႈဝႃႈ၊ “လီယဝ်ႉ။ မၼ်းၼၼ်ႉမီးၵႃႈၼႂ်းမိုဝ်းမႂ်းဢေႃႈ။ ၵူၺ်းၵႃႈ၊ဝႆႉဢသၢၵ်ႈမၼ်းႁႂ်ႈလွတ်ႈၵူၺ်းတႃႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၸႃႇတၢၼ်ႇမႃႇၼၢတ်ႈဢွၵ်ႇသေၵႃႈတီႈၽၢႆႇၼႃႈ ထႃႇဝရႃႉၽြႃး၊ ၵႂႃႇသေယဝ်ႉ၊ႁႂ်ႈတုမ်ႇၸဵပ်းတုမ်ႇၽီဢွၵ်ႇၵႃႈတီႈ ယေႃးၽႃႉ၊ တႄႇဢဝ်တီႈၽႃႇတိၼ်တေႃႇၸိၵ်းႁူဝ်ဢေႃႈ။-
ယေႃးၽႃႉ၊ ၵေႃႈၵႂႃႇၼင်ႈယူႇၵႃႈၼႂ်းတဝ်ႈၽီးၽႆးလႄႈဢဝ်တင်းၽၢၵ်ႇမေႃႈဢၼ်တႅၵ်ႇၼၼ်ႉသေယဝ်ႉ၊ၶုတ်ႇယၢႆးတုမ်ႇၸဵပ်းတုမ်ႇၽီမၼ်းယူႇဢေႃႈ။-
မိူဝ်ႈၼၼ်ႉမေးမၼ်းလၢတ်ႈတီႈမၼ်းလႄႈဝႃႈ၊ “မႂ်းယင်းတိုၵ်ႉတႄႇယူႇၼႂ်းတၢင်းဢၼ်သိုဝ်ႈတေႃႇယူႇလူးၵွၼ်ႇႁိုဝ်း၊ၵိၼ်ႇလႃႇၽြႃးပဵၼ်ၸဝ်ႈသေလႄႈတၢႆတႃႉ၊” ဝႃႈၼင်ႇၼႆဢေႃႈ။-
ယေႃးၽႃႉ၊ ၵေႃႈၶိုၼ်းလၢတ်ႈလႄႈဝႃႈ၊ “မႂ်းၼႆႉလၢတ်ႈမိူၼ်ၸိူဝ်ႉၼင်ႇဢၼ်ၽူႈယိင်းမိူၵ်ႈၸၢင်ႈလၢတ်ႈၼၼ်ႉဢေႃႈ။ မိူဝ်ႈဢၼ်ၽြႃးပဵၼ်ၸဝ်ႈပၼ်သုၵ်ႉၶႃႉၵတ်းယဵၼ်ၶျၢမ်းသႃႇၸိုင်၊ႁဝ်းႁပ်ႉတုင်းဢဝ်ဢေႃႈ။ မိူဝ်ႈဢၼ်မၼ်းၸဝ်ႈပၼ်တုၵ်ႉၶႃႉတၢင်းၶၢၼ်ၸႂ်ၸိုင်၊ႁဝ်းတၵ်းပွင်ႉမိုၼ်ႇပွင်ႉၶၢင်းၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။ ၼႂ်းလွင်ႈတၢင်းၵႃႈမီးတင်းသဵင်ႈတင်းလူင်ၼၼ်ႉ ယေႃးၽႃႉ၊ ယင်းဢမ်ႇၽိတ်းပိူင်ႈလူၺ်ႈသူပ်းလူၺ်ႈၵႂၢမ်းမၼ်းသေၶေႃႈသေၵမ်းလႄႈယူႇဢေႃႈ။
ယေႃးၽႃႉ၊ မီးၵေႃႉသႄႈသၢမ်ၵေႃႉဢၼ်ပဵၼ် ဢေးလိၽတ်ႉ၊ ၵူၼ်းဝဵင်း တေႇမၼ်ႇ၊ပိလတတ်ႉ၊ ၵူၼ်းမိူင်း သုဢႃႇ၊ တင်း ၸေႃႇၽႃႇ ၵူၼ်းမိူင်း ၼေႇမတ်ႉ၊ ၸိူဝ်းၼၼ်ႉဢေႃႈ။ မိူဝ်ႈဢၼ်ၶဝ်လႆႈငိၼ်းလွင်ႈဢၼ် ယေႃးၽႃႉ၊ လႆႈၶၢမ်ႇတုၵ်ႉၶႃႉဝူၺ်ႇတၼႃႇႁႅင်းၼႃႇၼၼ်ႉၸိုင်၊ၶဝ်တႅပ်းတတ်းၸႂ်ႁႂ်ႈလႆႈၵႂႃႇသူႇၵႂႃႇၸႂ်းလႄႈပၼ်ဢဵၼ်ပၼ်ႁႅင်းမၼ်းဢေႃႈ။-
ၶဝ်မုင်ႈႁၼ် ယေႃးၽႃႉ၊ ၸဵမ်မိူဝ်ႈဢၼ်ၶဝ်ယင်းမီးယူႇတီႈၵႆၼၼ်ႉလႄႈၶဝ်ဢမ်ႇတွင်းမၼ်း။ မိူဝ်ႈဢၼ်ၶဝ်ႁုဝႃႈပဵၼ်မၼ်းယဝ်ႉၸိုင်၊ၶဝ်ဢွၼ်ၵၼ်ၵိဝ်သဵင်လႄႈႁွင်ႉႁႆႈဢေႃႈ။ ၶဝ်ဢွၼ်ၵၼ်ၸၵ်ႉသိၵ်ႇသိူဝ်ႈယၢဝ်းၶဝ်ႁင်းၽႂ်ႁင်းမၼ်းလႄႈဢဝ်မုၼ်ႈလိၼ်ပိုၼ်ၶိုၼ်ႈၵႃႈၼိူဝ်ၽႃႉႁႂ်ႈတူၵ်းသႂ်ႇၵႃႈၼိူဝ်ႁူဝ်ၶဝ်ဢေႃႈ။-
ႁဵတ်းၼၼ်လႄႈၶဝ်ဢွၼ်ၵၼ်ၼင်ႈၵႃႈၼိူဝ်လိၼ်လူၺ်ႈၵၼ်တင်းမၼ်းယူႇၸဵတ်းဝၼ်းၸဵတ်းၶိုၼ်းလႄႈၽူႈလႂ်ၵေႃႈယင်းဢမ်ႇလၢတ်ႈၵႂၢမ်းၵွပ်ႈပိူဝ်ႈဢၼ်ၶဝ်လႆႈႁၼ်တၢင်းဢၼ်မၼ်းလႆႈၶၢမ်ႇတုၵ်ႉၶႃႉဝူၺ်ႇတၼႃႇႁႅင်းၼႃႇၼၼ်ႉဢေႃႈ။
လိုၼ်းၼၼ်ႉ၊ ယေႃးၽႃႉ၊ ပိုတ်ႇပၢၵ်ႇမၼ်းလႄႈၵိၼ်ႇလႃႇမိုဝ်ႉဝၼ်းဢၼ်မၼ်းၵိူတ်ႇလဵင်ႉမႃးၼၼ်ႉ၊-
လႄႈဝႃႈၸမ်ႉ။
“ႁႂ်ႈမိုဝ်ႉဝၼ်းဢၼ်ၶႃႈၸဝ်ႈၵိူတ်ႇလဵင်ႉမႃးၼၼ်ႉ လုလႅဝ်သေၵမ်းၶႃႈ။ ႁႂ်ႈၵၢင်ၶိုၼ်းဢၼ်မွၵ်ႇလၢတ်ႈလႄႈဝႃႈ၊ ‘ပႃး ပတိၵ်ႈသၼ်ႇထေႇလုၵ်ႈၸၢႆးယဝ်ႉ၊’ ဝႃႈၼင်ႇၼႆၼၼ်ႉလုလႅဝ်သေၵမ်းၶႃႈ။
ႁႂ်ႈမိုဝ်ႉဝၼ်းၼၼ်ႉပဵၼ်ဝၼ်းဢၼ်လပ်းသိင်ႇ သေၵမ်းတီႈၶႃႈ။ ႁႂ်ႈၽြႃးပဵၼ်ၸဝ်ႈယင်းဢမ်ႇၶိုၼ်းႁႃဝၼ်းၼၼ်ႉလႄႈ ဢမ်ႇႁႂ်ႈဢၼ်လႅင်းႁိူဝ်ႈလႅင်းထွင်ႇတီႈဝၼ်းၼၼ်ႉသေၵမ်းၶႃႈ။
ႁႂ်ႈလပ်းသိင်ႇဢၼ်မိုတ်ႈၼႃႇ၊ဢိၵ်ႇတင်းမွၵ်ႇၵုမ်ႈႁူမ်ႇသုမ်ႇမၼ်း၊ ႁႂ်ႈတၢင်းဢၼ်ၽႃႉမိုတ်ႈၽူၼ်ဢုမ်ႇၶိင်ႇၵၢင်ဝၼ်းၼၼ်ႉပဵၼ်ဢၼ်လီၵူဝ်လီႁႄၼႃႇလူင်လၢင်တီႈမၼ်းသေၵမ်းၶႃႈ။
ႁႂ်ႈဢၼ်လပ်းသိင်ႇတိၵမ်ဢဝ်ၶိုၼ်းၼၼ်ႉလႄႈ ယႃႇႁႂ်ႈမၼ်းလႆႈၶၢမ်ႇတၢင်းဢၼ်ၼပ်ႉဢၢၼ်ႇပႃးၼႂ်းပီ၊ ယႃႇပေႁႂ်ႈမၼ်းၶဝ်ႈပႃးၼႂ်းလိူၼ်သေၵမ်းၶႃႈ။
ဢလူဝ်း၊ႁႂ်ႈၶိုၼ်းၼၼ်ႉပဵၼ်ဢၼ်သဵတ်ႇဢၼ်ငႅဝ်၊ ယႃႇႁႂ်ႈမီးသဵင်ဢၼ်သႂၢင်ႇဢၼ်သိူဝ်းသေၵမ်းၶႃႈ။
ႁႂ်ႈၶဝ်ၸိူဝ်းဢၼ်ၸၢင်ႈလိူၵ်ႈမိုဝ်ႉလိူၵ်ႈဝၼ်းၼၼ်ႉၵိၼ်ႇလႃႇဝၼ်းၼၼ်ႉ၊ ႁႂ်ႈၶဝ်ၸိူဝ်းဢၼ်ၸၢင်ႈပူၵ်းႁႂ်ႈငိူၵ်ႈလုၵ်ႉၶိုၼ်ႈမႃးၼၼ်ႉၵိၼ်ႇလႃႇသေၵမ်းၶႃႈ။
ႁႂ်ႈလၢဝ်ႁူဝ်ၶမ်ႈမၼ်းၼၼ်ႉလပ်းသိင်ႇ၊ ႁႂ်ႈၶိုၼ်းၼၼ်ႉမွင်းထႃႈဢၼ်လႅင်းယူႇ လၢႆလၢႆလွၵ်ႇလွၵ်ႇ ဢမ်ႇႁႂ်ႈလႆႈႁၼ်သၢႆလႅတ်ႇႁူဝ်ၼႂ်ၼၼ်ႉ သေၵမ်းၶႃႈ။
လွင်ႈမၼ်းၸမ်ႉ၊ၶိုၼ်းၼၼ်ႉႁႂ်ႈၵဝ်ၵိူတ်ႇလဵင်ႉ မႃးလႄႈ ၽုၺ်ႇပိုတ်ႇႁႂ်ႈၵဝ်လႆႈထူပ်းတုၵ်ႉၶႃႉတၢင်းၽၢၼ်လႄႈႁွင်ႉႁႆႈၼၼ်ႉဢေႃႈ။
ၵွပ်ႈသင်လႄႈၵဝ်ဢမ်ႇတၢႆမိူဝ်ႈဢၼ်ၵိူတ်ႇမႃးသေတွင်ႉမႄႈၵဝ်ၼၼ်ႉ၊ ၵွပ်ႈသင်လႄႈၵဝ်ဢမ်ႇတၢႆယၢမ်းမိူဝ်ႈဢၼ် ၵိူတ်ႇဢွၵ်ႇမႃးၼၼ်ႉၵမ်းလဵဝ်။
ၵွပ်ႈသင်လႄႈမီးတၵ်းမီးၶႃဢၼ်ဢုမ်ႈႁွပ်ႇၵဝ်ဝႆႉ၊ ၵွပ်ႈသင်လႄႈမီးတဝ်ႈၼူမ်းႁႂ်ႈၵဝ်ၸုပ်ႇၵိၼ်။
သင်ဢမ်ႇၼၼ်ၵဝ်ပေႃးလႆႈၼွၼ်းလႄႈ ၵတ်းယဵၼ်ယဝ်ႉ၊ ၵဝ်ပေႃးလႆႈလပ်းလႄႈၼိမ်လီယဝ်ႉ။
လႆႈၼွၼ်းလႆႈလပ်းမိူၼ်ၼင်ႇၶုၼ်ႁေႃၶမ်းလႂ်၊ မူးမၢတ်ႈၽွင်းမိူင်းလႂ်၊ ၸိူဝ်းဢၼ်တႄႇႁဵတ်းဝဵင်းဢၼ်လုဢၼ်ႁၢမ်း တင်းလၢႆလႄႈ။
မိူၼ်လုၵ်ႈၶုၼ်လုၵ်ႈၵွၼ်းလႂ်မီးငိုၼ်းမီးၶမ်း တဵမ်ႁေႃတဵမ်ႁိူၼ်းၵႂႃႇၼၼ်ႉယဝ်ႉ။
ဢမ်ႇၼၼ်ၵေႃႈၵဝ်ပေႃးလႆႈၶၢမ်ႇတၢင်းဢၼ်ၽင်ဝႆႉမိူၼ်လုၵ်ႈဢွၼ်ႇ ဢၼ်ဢမ်ႇပႆႇၸေးလိူၼ်ၸေးဝၼ်းလႄႈၵိူတ်ႇမႃႈ မိူၼ်လုၵ်ႈဢွၼ်ႇဢၼ်ဢမ်ႇတွၼ်ႉႁၼ် သၢႆလႅင်းဝၼ်းၼၼ်ႉယဝ်ႉ။
ၵူၼ်းႁၢႆႉမိူၵ်ႈၶဝ်လႆႈထၢတ်ႇလႆႈယဵၼ်သေတၢင်းဢၼ်ယႃႉယုၵ်ႉပိူၼ်ႈလႄႈလႆႈယူႇၵႃႈၼႂ်း ၶုမ်ပႃႇႁဵဝ်ႈယဝ်ႉ၊ ၵူၼ်းႁဵတ်းၵၢၼ်ဢၼ်ႁိူဝ်ႉၼူၼ်းလႆႈထူပ်းတၢင်းဢၼ်လိုဝ်ႈယူႇၼိမ်လီၼၼ်ႉဢေႃႈ။
ၵူၼ်းဢၼ်ၶၢမ်ႇတၢင်းဢၼ်ၶျုၵ်ႈဝႆႉတင်းလၢႆ၊ယင်းလႆႈမူၼ်ႈပျေႃႇလူၺ်ႈတၢင်းၼိမ်၊ ၵၢင်းလွတ်ႈသေတၢင်းဢၼ်ပိူၼ်ႈႁိုတ်းႁတ်းလူၺ်ႈဢမိင်ႉဢႃႇၼႃႇဢေႃႈ။
ၵူၼ်းၸိုဝ်ႈသဵင်ယႂ်ႇၶဝ်ဢိၵ်ႇတင်းၵူၼ်းဢမ်ႇဢွၵ်ႇၸိုဝ်ႈဢွၵ်ႇသဵင်ၶဝ်ၵႂႃႇမီးၵႃႈတီႈၼၼ်ႈလႄႈ ၶႃႈတင်းလၢႆၵေႃႈလွတ်ႈသေၵႃႈၼႂ်းမိုဝ်း ၸဝ်ႈၶဝ်ဢေႃႈ။
ၵွပ်ႈသင်လႄႈပၼ်ႁႂ်ႈၵူၼ်းၵႂႃႇဢသၢၵ်ႈလိပ်းယူႇတီႈဢၼ်မႆႈၸႂ်ၶီၸႂ်ၼၼ်ႉ၊ ၵွပ်ႈသင်လႄႈပၼ်ဢၼ်လႅင်းတီႈၵေႃႉဢၼ် ၶူမ်ၸႂ်ၶီၸႂ်ၼၼ်ႉၸိူဝ်ႉၼင်ႇႁိုဝ်။
ၶဝ်ၼၼ်ႉပႂ်ႉထႃႈတၢင်းတၢႆသေၵေႃႈ၊တၢင်းတၢႆဢမ်ႇႁွတ်ႈဢမ်ႇထိုင်မႃး၊ ၶဝ်ၶုတ်းႁႃတၢင်းတၢႆလိူဝ်တွၼ်းၼႃႇသေၶုတ်းႁႃၽၼ်ႇတႃႇဢၼ်ႁူမ်ႇဝႆႉၼၼ်ႉဢေႃႈ။
ၶဝ်ၼၼ်ႉၸၢင်ႈမူၼ်ႈပျေႃႇလႄႈလႆႈၸူမ်းသိူဝ်း၊ မိူဝ်ႈဢၼ်ၶဝ်ႁွတ်ႈထိုင်ၶုမ်ပႃႇႁဵဝ်ႈၼၼ်ႉဢေႃႈ။
ၵွပ်ႈသင်လႄႈပၼ်ဢၼ်လႅင်းတီႈၵေႃႉဢၼ်သဵၼ်ႈတၢင်းမၼ်းတၼ်ၵႂႃႇ၊ ၵေႃႉဢၼ်ၽြႃးပဵၼ်ၸဝ်ႈႁႄႉၵင်ႈလႄႈ ၶင်ဝႆႉၼၼ်ႉၸိူဝ်ႉၼင်ႇႁိုဝ်။
တၢင်းဢၼ်ၶၢင်းၶီၶၢင်းၽၢၼ်ပေႃႇမႃးၸူးတီႈၵဝ်ႁႂ်ႈတႅၼ်းပုၼ်ႈတၢင်းၵိၼ်တၢင်းၶူပ်းပုၼ်ႈ ၵဝ်လႄႈ တၢင်းဢၼ်ၵဝ်ႁွင်ႉႁႆႈပွင်ႉၶၢင်းၼၼ်ႉလႆဢွၵ်ႇမိူၼ်ၸိူဝ်ႉၼင်ႇၼမ်ႉဢေႃႈ။
မဵဝ်းဢၼ်ၵဝ်ၵူဝ်ႁႄတူၵ်းၸႂ်ၼႃႇၼၼ်ႉပဵၼ်မႃးတီႈၵဝ်လႄႈ
ၵဝ်ဢမ်ႇမီးတၢင်းဢၼ်ၸႂ်ၼိမ်၊ၸႂ်ယဵၼ်လႃးလႃး၊ မီးတုၵ်ႉၶႃႉတၢင်းၽၢၼ်လွၼ်ႉလွၼ်ႉ ၸႅတ်ႈၸႅတ်ႈဢေႃႈ၊” ဝႃႈၼင်ႇၼႆဢေႃႈ။
တူၺ်းလူး။ မႂ်းသင်ႇသွၼ်သုင်းမႃႉၵူၼ်းၼမ်ၼႃႇယဝ်ႉ။ မႂ်းပၼ်ဢဵၼ်ပၼ်ႁႅင်းတီႈၵေႃႉဢၼ် ႁႅင်းၶႅၼ်ႁႅင်းမိုဝ်းဢူၼ်ႈၸိူဝ်းၼၼ်ႉမႃးယဝ်ႉ။
ၵႂၢမ်းမႂ်းၵမ်ႉထွၵ်ႈၵေႃႉဢၼ်ၶီႈလိုတ်း ၸိူဝ်းၼၼ်ႉလႄႈ ပၼ်ဢဵၼ်ပၼ်ႁႅင်းတီႈႁူဝ်ၶဝ်ႇဢၼ်ဢူၼ်ႈဢွၼ်ႇ ထွပ်ႉထီႈထွပ်ႉထႅပ်ႉၼၼ်ႉယဝ်ႉယဝ်ႉ။
မိူဝ်ႈလဵဝ်ၼႆႉၽေးတုၵ်ႉၶႃႉႁွတ်ႈထိုင်မႃး တီႈမႂ်းလႄႈ မႂ်းမီးတၢင်းဢၼ်ၸႂ်လဵၵ်ႉႁႅင်းဢူၼ်ႈဢေႃႈ။ ၽေးတုၵ်ႉၶႃႉၼၼ်ႉတိူဝ်ႉထုၵ်ႇသႂ်ႇမႂ်းလႄႈမႂ်းၵိုတ်းမိူင်းၵႂင်ၸႂ်ၵႂႃႇဢေႃႈ။
ၵွပ်ႈလူၺ်ႈတၢင်းဢၼ်မႂ်းၵူဝ်ယမ်ၽြႃးပဵၼ်ၸဝ်ႈၼၼ်ႉ၊ ပဵၼ်တၢင်းဢၼ်မႂ်းတမ်းၸႂ်ၶျႃးၸႂ်လႄႈ ၵွပ်ႈလူၺ်ႈတၢင်းဢၼ်မႂ်းၵမ်ၵျၢင်ႉၸွမ်းၼင်ႇ တြႃးၼၼ်ႉ၊ ပဵၼ်တီႈမုင်ႈထႃႈမွင်းထႃႈမႂ်းဢမ်ႇၸႂ်ႈႁိုဝ်း။
ၶႆႈၸႂ်ဝူၼ်ႉၸႂ်တူၺ်းလူး။ မီးၽူႈလႂ်ဢၼ်ၵၢင်းလွတ်ႈဢပျတ်ႈလႄႈ လႆႈႁွတ်ႈထိုင်တၢင်းလုတၢင်းလႅဝ်၊ ၵူၼ်းသိုဝ်ႈတေႃႇၵေႃႉလႂ်ယၢမ်ႈလႆႈလုလႆႈသုမ်း။
ၵဝ်ယၢမ်ႈလႆႈႁၼ်ၵေႃႉဢၼ်ထႆဢဝ်ဝူတ်ႈဢပျတ်ႈ၊ ဢိၵ်ႇတင်းၵေႃႉဢၼ်ဝၢၼ်ႇၸိူဝ်ႉဝၢၼ်ႇၽၼ်းဢထမ်ႇမႃႉၼၼ်ႉ၊ လႆႈပၢတ်ႇဢဝ်ၵႃႈဢၼ်ၶဝ်ထႆၶဝ်ဝၢၼ်ႇ ၼၼ်ႉဢေႃႈ။
ၽြႃးပဵၼ်ၸဝ်ႈယႃႉပႅတ်ႈၶဝ်လူၺ်ႈတၢင်း ၸႂ်မႆႈၶႂ်ႈၸႃႉၸဝ်ႈ၊ မိူၼ်ၸိူဝ်ႉၼင်ႇဢၼ်လူမ်းၽိဝ်ႁုင်ပတ်ႉထူဝ်း မႃးၼၼ်ႉဢေႃႈ။
ၵူၼ်းဢထမ်ႇမႃႉတင်းလၢႆႁွင်ႉႁဝ်ႇႁွင်ႉၶၢင်း မိူၼ်သၢင်ႇသီႈတင်းလၢႆဢေႃႈ။ ၵူၺ်းၵႃႈ၊ၽြႃးပဵၼ်ၸဝ်ႈႁႂ်ႈၶဝ်တဵတ်ႇယဵၼ်ၵႂႃႇလႄႈႁၵ်းၶဵဝ်ႈၶဝ်ပႅတ်ႈဢေႃႈ။
မိူၼ်ၸိူဝ်ႉၼင်ႇသၢင်ႇသီႈတင်းလၢႆဢမ်ႇမီးတီႈတၵ်းတိၵိၼ်ဢဝ်ၵိၼ်လႄႈ ၶဝ်ဢိုပ်းတၢႆသေယဝ်ႉ၊လုၵ်ႈဢွၼ်ႇသၢင်ႇသီႈတင်းလၢႆလႆႈၽၢတ်ႇၽႄၵၼ်ၵႂႃႇၼၼ်ႉယဝ်ႉ။
ၽဝ်ႇၼိုင်ႈသဵင်ၵႂၢမ်းၸဝ်ႈႁွတ်ႈမႃးတီႈၵဝ်တဵတ်ႇတဵတ်ႇလႄႈ ၵဝ်လႆႈငိၼ်းသဵင်သွပ်ႉသႅပ်ႉၼၼ်ႉဢေႃႈ။
ၼႂ်းမိူဝ်ႈဢၼ်ၵဝ်ယင်းတိုၵ်ႉၶႆႈၸႂ်ဝူၼ်ႉၸႂ်လူၺ်ႈလွင်ႈရူႇပႃႇရူင်ႇဢၼ်လႆႈပေႃႇမႃး ၶိင်ႇၵၢင်ၶိုၼ်း၊ မိူဝ်ႈဢၼ်တၢင်းဢၼ်ၼွၼ်းလပ်းၼွၼ်းလီ၊ယင်းတိုၵ်ႉတူၵ်းႁွတ်ႈၵႃႈၼိူဝ်ၵူၼ်းတင်းလၢႆ ယူႇၼၼ်ႉၸိုင်။
ၵဝ်မီးတၢင်းဢၼ်တူၵ်းၸႂ်ၵူဝ်ႁႄလႄႈ သၼ်ႇသၼ်ႇသၢႆသၢႆ ႁႂ်ႈလုပ်ႇၵဝ်တင်းသဵင်ႈတင်းလူင် ထၢၼ်ႈပေႃး သၼ်ႇၶွၼ်းဝႆဢေႃႈ။
လူမ်းယဵၼ်ဢွၼ်ႇ ပဝ်ႇသိုဝ်ႈၼႃႈၵဝ်ၵႂႃႇလွႆးလွႆးလႄႈ တုမ်ႇၶူၼ်ၼိူဝ်ႉၵဝ်လုၵ်ႉဢေႃႈ။
ၵဝ်ႁၼ်မဵဝ်းၼိုင်ႈၸုၵ်းသဝ်းယူႇၵႃႈတီႈၼၼ်ႈလႄႈ ၵဝ်တူၺ်းသေၵေႃႈ၊ပဵၼ်ၵႃႈသင်ၼၼ်ႉၵဝ်ဢမ်ႇၸၢင်ႈလၢတ်ႈၸၢင်ႈဝႃႈ၊ မိူဝ်ႈၼၼ်ႉပဵၼ်တၢင်းဢၼ်သဵတ်ႇဢၼ်ယဵၼ်လႄႈၵဝ်လႆႈငိၼ်းသဵင်လၢတ်ႈဝႃႈၸမ်ႉ၊
‘ၵူၼ်းဢၼ်ၸၢင်ႈတၢႆၼႆႉသိုဝ်ႈတေႃႇၼႃႇသေၽြႃးပဵၼ်ၸဝ်ႈႁိုဝ်း၊’ ၵူၼ်းသတ်ႉတဝႃႇၼႆႉမူတ်းသႂ်ၼႃႇသေၸဝ်ႈဢၼ်ၽၢၼ်ႇသၢင်းႁဵတ်းပဵၼ်မၼ်းၼၼ်ႉႁိုဝ်း။
မၼ်းၸဝ်ႈဢမ်ႇယုမ်ႇၶဝ်ၸိူဝ်းဢၼ်ၵိုတ်ႉႁၢပ်ႇ ၼႃႈၵၢၼ်မၼ်းၸဝ်ႈၼၼ်ႉ၊ မၼ်းၸဝ်ႈယင်းတၢင်ႇဢပျတ်ႈတီႈတမၢၼ်ႇၵၢင်ႁၢဝ်တင်းလၢႆယူႇဢေႃႈ။
မႂ်းထၢင်ႇမၼ်းၸဝ်ႈတေယုမ်ႇၵူၼ်းလိၼ် ဢၼ်ဢဝ်မုၼ်ႈလိၼ်ႁဵတ်းဝႆႉလႄႈၼူတ်ႈပႅတ်ႈထူပႅတ်ႈ မိူၼ်ၸိူဝ်ႉၼင်ႇမူင်ႈဢွၼ်ႇမႅင်းဢွၼ်ႇၼၼ်ႉႁိုဝ်း။
ဢဝ်ၸႃႉၸဵမ်ၶိင်ႇႁူဝ်ၼႂ်တေႃႇႁွတ်ႈၶိင်ႇႁူဝ်ၶမ်ႈၼၼ်ႉၵူၺ်းၵူၼ်းၸၢင်ႈႁွတ်ႈထိုင်တၢင်းဢၼ်ယႃႉၽဵဝ်ႈပႅတ်ႈဢေႃႈ။ ၽူႈလႂ်ယင်းဢမ်ႇထၢင်ႇဢမ်ႇထိူမ်လႃးလႃးလႄႈၶဝ်ၸၢင်ႈႁွတ်ႈထိုင်တၢင်းလုတၢင်းလႅဝ်တႃႇသေႇဢမ်ႇထၢတ်ႇဢေႃႈ။
ၵုင်ႇသရေႇမၼ်းတင်းလၢႆၼၼ်ႉၸၢင်ႈလပ်ႉ ၸၢင်ႈႁၢႆၵႂႃႇဢေႃႈ။ မၼ်းယင်းဢမ်ႇမီးပိင်ႇၺႃႇလႄႈၸၢင်ႈတၢႆၵႂႃႇ ဝၢႆးၵႂႃႇဢေႃႈ၊” ဝႃႈၼင်ႇၼႆဢေႃႈ။
“မႂ်းႁွင်ႉသႅၼ်ႇမိူဝ်ႈလဵဝ်ၼႆႉတူၺ်းလူး။ ၽူႈလႂ် တၵ်းဢိူဝ်မႂ်း၊ ၸွင်ႇတေမီးတမၢၼ်ႇဢၼ်မူတ်းၸၢင်ႇပႃးလႂ်ပဵၼ်တီႈဢၼ်မႂ်းမုင်ႈမွင်းႁိုဝ်း။
တေႃးသႃႉၸၢင်ႈယႃႉၵူၼ်းမိူၵ်ႈပႅတ်ႈလႄႈ သၽေႃးဢၼ်သီႈၵေႉႁေႈတႃၼၼ်ႉၸၢင်ႈဢဝ်ၵေႃႉဢၼ်ဢမ်ႇမီးၺၢၼ်ႇၼၼ်ႉတၢႆဢေႃႈ။
ၵဝ်ယၢမ်ႈလႆႈႁၼ်ၵူၼ်းငိူဝ်ႈငႃႉယင်ႇႁၢၵ်ႈ မၼ်းဢေႃႈ။ ၵူၺ်းၵႃႈ၊ၵဝ်ၵိုင်ႉၵၢင်ႉၵိၼ်ႇလႃႇတီႈယူႇတီႈ သဝ်းမၼ်းဢေႃႈ။
လုၵ်ႈလၢင်းမၼ်းတင်းလၢႆဢမ်ႇမီးတၢင်းဢၼ် ၵၢင်းလွတ်ႈၽေး လႆႈၶၢမ်ႇတၢင်းဢၼ်ပိူၼ်ႈၼိၵ်ႈၸၢၵ်ႈငႅၼ်းသႄးၵႃႈတီႈလုမ်းလႄႈ ဢမ်ႇမီးသေၵေႃႉသေၵူၼ်း၊ၵေႃႉဢၼ်တၵ်းၵႄႇသႄႇဢဝ်ၶဝ်ၼၼ်ႉ။
ၵူၼ်းဢိုပ်းၵူၼ်းယၢၵ်ႈတင်းလၢႆၸၢင်ႈႁိမ်ႁူင်ႇဢဝ်ၶဝ်ႈၼမ်ႉတၢင်းၵိၼ်ၵူၼ်းငိူဝ်ႈငႃႉၸိူဝ်းၼၼ်ႉ၊ ပိၵ်ႉသမ်ႉၶဝ်ႈပိူၵ်ႇၼၼ်ႉယူႇတီႈတူၼ်ႈၼၢမ်ဢၼ်လွမ်ႉဝႆႉသေၵေႃႈၶဝ်ၵေႃႈ ယင်းဢဝ်ၵိၼ်ဢေႃႈ၊ ၶဝ်ၸိူဝ်းဢၼ်ယၢၵ်ႇၼမ်ႉတင်းလၢႆၼၼ်ႉယင်းၶွႆဢုၵ်ႉၸႃႇၶဝ်ၼၼ်ႉဢေႃႈ။
လွင်ႈမၼ်းၸမ်ႉ၊တၢင်းဢၼ်ယၢပ်ႇယဵၼ်းၶၢၼ်ၸႂ်ၸၢင်ႈပေႃႇဢွၵ်ႇမႃး၊ သေၵႃႈတီႈမုၼ်ႈလိၼ်ဢမ်ႇၸႂ်ႈ၊ တုၵ်ႉၶႃႉတၢင်းၽၢၼ်ၸၢင်ႈငွၵ်ႈဢွၵ်ႇမႃးသေၵႃႈတီႈၼႂ်းလိၼ်ဢမ်ႇၸႂ်ႈ။
ၼႂ်းဝႃႈၼၼ်သေၵေႃႈၵူၼ်းၸိုင်၊ၵိူတ်ႇလဵင်ႉမႃး ပုၼ်ႈဢၼ်တၵ်းၶၢမ်ႇတုၵ်ႉၶႃႉ၊ မိူၼ်ၸိူဝ်ႉၼင်ႇဢၼ်ၶႆႇၽႆးၸၢင်ႈမိၼ်ၶိုၼ်ႈၵႃႈၼိူဝ်ၼၼ်ႉဢေႃႈ။
ၵူၺ်းၵႃႈ၊သင်ပဵၼ်ၵဝ်ၸိုင်၊ၵဝ်တၵ်းၶဝ်ႈၸူးတီႈၽြႃးပဵၼ်ၸဝ်ႈလႄႈ ဢဝ်ဢမုၼႆႉတၢင်ႇလဝ်ႈလၢတ်ႈထိုင်တီႈမၼ်းၸဝ်ႈဢေႃႈ။
မၼ်းၸဝ်ႈႁဵတ်းလွင်ႈတၢင်းဢၼ်လီဢၢမ်းဢၼ်ဢမ်ႇသုတ်းဢမ်ႇသဵင်ႈလႆႈ၊ ဢိၵ်ႇတင်းလွင်ႈတၢင်းဢၼ်လၢၵ်ႇဢၼ်လၢႆးဢၼ်ဢမ်ႇၼပ်ႉဢမ်ႇဢၢၼ်ႇလႆႈဢေႃႈ။
မၼ်းၸဝ်ႈႁႂ်ႈၽူၼ်တူၵ်းၵႃႈၼိူဝ်လိၼ်မိူင်းလႄႈ ပၼ်ၼမ်ႉၵႃႈတီႈတူင်ႈၼႃးဢေႃႈ။
မၼ်းၸဝ်ႈယုၵ်ႉတၢင်ႇၵေႃႉဢၼ်တႅမ်ႇယေႃႈၼၼ်ႉၶိုၼ်ႈတီႈဢၼ်သုင်လႄႈ၊ ပၼ်ႁႂ်ႈၵေႃႉဢၼ်ၶၢင်းၶီၶၢင်းၽၢၼ်ၼၼ်ႉ လႆႈလွတ်ႈၽေးလွတ်ႈရၢၼ်ႇဢေႃႈ။
မၼ်းၸဝ်ႈယႃႉပႅတ်ႈတၢင်းၵျၢမ်ႇတၢင်းပွင် ၶဝ်ၸိူဝ်းဢၼ်ႁဵတ်းပရိယႄႇ ၼင်ႇႁိုဝ်မိုဝ်းၶဝ်တၵ်းလႆႈႁဵတ်းႁႂ်ႈ ဢွင်ႇမႅင်ႇလႆႈဢေႃႈ။
မၼ်းၸဝ်ႈတိၵမ်ဢဝ်ၵူၼ်းဢၼ်မီးပိင်ႇၺႃႇၼၼ်ႉလူၺ်ႈပရိယႄႇမၼ်းၶိုၼ်းလႄႈ ႁႂ်ႈတၢင်းဢၼ်ၶဝ်ၵျၢမ်ႇပွင်ႁႂ်ႈလႆႈပႅတ်ႉလႅၼ်ၼၼ်ႉလူမ်ႉပင်းပႅတ်ႈဢေႃႈ။
ႁႂ်ႈတၢင်းဢၼ်လပ်းသိင်ႇတူၵ်းႁွတ်ႈၵႃႈၼိူဝ်ၶဝ်ၼႂ်းမိူဝ်ႈၶိင်ႇၵၢင်ဝၼ်းလႄႈ ၶဝ်လႆႈငူမ်းသူးငူမ်းသႃးၵႂႃႇမႃးၼႂ်းၶိင်ႇၵၢင်ဝၼ်းတဵင်ႈမိူၼ်ၸိူဝ်ႉၼင်ႇၶိင်ႇၵၢင်ၶိုၼ်းၼၼ်ႉဢေႃႈ။
မၼ်းၸဝ်ႈၵႄႇသႄႇဢဝ်ၵူၼ်းၽၢၼ်တင်းလၢႆသေၵႃႈတီႈတၢင်းတၢႆလႄႈ ၵႄႇသႄႇဢဝ်ၵူၼ်းၸုတ်ႈၵူၼ်းလုတ်ႈသေၵႃႈတီႈဢၼ်ပိူၼ်ႈၼိၵ်ႈၸၢၵ်ႈၼၼ်ႉဢေႃႈ။
ပိူဝ်ႈၼႆလႄႈၵူၼ်းၽၢၼ်တင်းလၢႆလႆႈမီးတၢင်းဢၼ်မုင်ႈမွင်းလႄႈ ဢထမ်ႇမႃႉသမ်ႉလႆႈဢိုတ်းသူပ်း တူဝ်ၸဝ်ႈၵဝ်ႇဢေႃႈ။
တူၺ်းလူး။ ၵေႃႉဢၼ်လႆႈၶၢမ်ႇတၢင်းဢၼ် ၽြႃးပဵၼ်ၸဝ်ႈမႄးၸႂ်လၢႆႈၸႂ်ပၼ်ၼၼ်ႉ မီးမၢင်ႇၵလႃႇဢေႃႈ။ ပိူဝ်ႈၼႆလႄႈယႃႇပေႁဵတ်းတၢင်းဢၼ်လူလၢႆတီႈတၢင်းဢၼ် ၸဝ်ႈဢၼၼ်ႇတႃႉတၼ်းၶူဝ်းသင်ႇသွၼ် သုင်းမႃႉၼၼ်ႉသေၵမ်း။
လွင်ႈမၼ်းၸမ်ႉ၊မၼ်းၸဝ်ႈႁႂ်ႈပဵၼ်ၸဵပ်းပဵၼ်သႅပ်ႇလႄႈသမ်ႉမတ်ႉႁေႃႇၶဵၼ်းပၼ်ဢေႃႈ။ မၼ်းၸဝ်ႈႁႂ်ႈပဵၼ်ၽေးပဵၼ်တၢမ်ႇလႄႈသမ်ႉဢဝ်မိုဝ်းၸဝ်ႈယႃပၼ်ႁႂ်ႈၶႅၼ်းမႃးဢေႃႈ။
မၼ်းၸဝ်ႈတၵ်းၵႄႇသႄႇဢဝ်မႂ်းလွတ်ႈၵၢင်းသေၵႃႈတီႈၽေးဢုပၢတ်ႈႁူၵ်းပႃးၵူၺ်းဢမ်ႇၵႃး၊ ၽေးဢုပၢတ်ႈၸဵတ်းပႃးတေဢမ်ႇလႆႈတိူဝ်ႉလႆႈထုၵ်ႇမႂ်းဢေႃႈ။
မိူဝ်ႈဢၼ်ပဵၼ်ၽေးၶဝ်ႈၵႃႈမၢၵ်ႇပႅင်းၼၼ်ႉမၼ်းၸဝ်ႈႁႂ်ႈဢသၢၵ်ႈမႂ်းလႆႈၵတ်းယဵၼ်ၶျၢမ်းသႃႇလႄႈ၊ မိူဝ်ႈဢၼ်ပဵၼ်သိုၵ်းပဵၼ်သိူဝ်ၵေႃႈႁႄႉၵင်ႈႁႂ်ႈလွတ်ႈတၢင်းတၢႆဢေႃႈ။
ၽြႃးပဵၼ်ၸဝ်ႈတၵ်းထုတ်ႇၼုၵ်ႈဢဝ်မႂ်းလွတ်ႈၽေးတၢင်းဢၼ်ၶႃႉၸိုဝ်ႈၶၢႆသဵင်လႄႈ မၼ်းၸဝ်ႈတၵ်းၵႄႇသႄႇဢဝ်မႂ်းၼႂ်းမိူဝ်ႈဢၼ်တၢင်းလုတၢင်းလႅဝ်ႁွတ်ႈထိုင်မႃးၼၼ်ႉဢေႃႈ။
မႂ်းတေယွၵ်ႇယဝ်ႈၽေးဢၼ်လုလႅဝ်တင်းၽေး ၶဝ်ႈၵႃႈမၢၵ်ႇပႅင်းၼၼ်ႉလႄႈ ဢမ်ႇလႆႈၵူဝ်လႆႈႁႄတူဝ်ထိူၼ်ႇတူဝ်ႁၢႆႉ တင်းလၢႆၼၼ်ႉ။
လွင်ႈမၼ်းၸမ်ႉ၊တူင်ႈႁႆႈတူင်ႈၼႃးဢၼ်မႂ်းထႆၼၼ်ႉတၵ်းဢမ်ႇမီးမၢၵ်ႇႁိၼ်လႄႈ တူဝ်ထိူၼ်ႇတူဝ်ႁၢႆႉတင်းလၢႆတၵ်းဢမ်ႇၶူပ်းဢမ်ႇၵၢပ်ႈမႂ်းဢေႃႈ။
မႂ်းတၵ်းတေလႆႈယူႇၵတ်းယဵၼ်ၼိမ်လီၵႃႈၼႂ်း သုမ်ႉထဵင်မႂ်းလႄႈ မိူဝ်ႈဢၼ်မႂ်းၸႅတ်ႈသေးတူၺ်းၽုင်သူဝ်း ၽုင်ဝူဝ်းမႂ်းၼၼ်ႉ ဢမ်ႇမီးတၢင်းဢၼ်ႁူင်ႈႁၢႆသေတူဝ်ဢေႃႈ။
လုၵ်ႈလၢၼ်ၸိူဝ်ႉၶိူဝ်းမႂ်းတၵ်းၼမ်ၵိုၼ်းၼႃႇ ထၢၼ်ႈပေႃးမိူၼ်ယိူဝ်ႈယႃႈၵႃႈတီႈၼိူဝ်လိၼ်မိူင်းၼၼ်ႉဢေႃႈ။
မႂ်းတၵ်းမီးဢၶႂၢင်ႉဢၼ်လႆႈထဝ်ႈလႆႈၵႄႇယဝ်ႉၸင်ႇႁွတ်ႈၵႂႃႇထိုင်ၵႃႈတီႈပႃႇႁဵဝ်ႈမႂ်း မိူၼ်ၸိူဝ်ႉၼင်ႇသိမ်းဢဝ်လိုၼ်ႈၶဝ်ႈမႃးၵႃႈတီႈတလၢင်းယဵပ်ႇၶဝ်ႈၸွမ်းၼင်ႇၶိင်ႇၶႃႇမၼ်းၼၼ်ႉဢေႃႈ။
ယေႃးၽႃႉ၊ ႟။ ႁဝ်းသွၵ်ႈႁႃၸႅတ်ႈတူၺ်း လီလီယဝ်ႉလႄႈ ႁုလွင်ႈဢၼ်ပဵၼ်ဢၼ်မၢၼ်ႇမႅၼ်ႈ ၸိုဝ်ႈၸႂ်ႈဢေႃႈ။ ပိူဝ်ႈၼႆထွမ်ႇဢဝ်လႄႈသႂၢင်းသႂ်ႇၵႃႈၼႂ်းႁူဝ်ၸႂ်မႂ်းဝႆႉသေၵမ်း၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ ယေႃးၽႃႉ၊ ၶိုၼ်းတွပ်ႇလႄႈဝႃႈၸမ်ႉ၊
“ပေႃးဢဝ်တုၵ်ႉၶႃႉတၢင်းၽၢၼ်ၵဝ်၊ဢိၵ်ႇတင်းလွင်ႈဢၼ်ၵဝ်ငိၼ်းၶီငိၼ်းၽၢၼ်ၼႆႉ၊ ၸင်ႈႁိဝ်ႈတူၺ်းၵႃႈတီႈယႃႇၸူႇၸိုင်၊
တၵ်းယဵင်ႈၶႅၼ်းၼၵ်းၼႃႇသေသၢႆးၼမ်ႉ သမ်ႇမုၵ်ႈတြႃႇဢေႃႈ။ ၵွပ်ႈပိူဝ်ႈၼင်ႇၼၼ်လႄႈၵႂၢမ်းၵဝ်ဢၼ်လႆႈပူၼ်ႉလႆႈလိူဝ်ၼႆႉ၊ဢမ်ႇပဵၼ်လွင်ႈလီဢၢမ်းၵူၺ်း။
ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ ၼၼ်ႉဢဝ်ပိုၼ်ပိုတ်းယိုဝ်းသႂ်ႇၵဝ်လႄႈ၊ ၵွင်ႉမၼ်းယၢင်မၼ်းသၢၼ်ႈၶဝ်ႈၵႃႈၼႂ်းတူဝ်ၵဝ်ၸွတ်ႇတူဝ်ႈၵႂႃႇယဝ်ႉ။ လွင်ႈတၢင်းဢၼ်လီၵူဝ်လီႁႄဢၼ်ၽြႃးပဵၼ်ၸဝ်ႈႁဵတ်းၸိူဝ်းၼၼ်ႉ၊ ၶၢင်းတပ်ႉၶၢင်းငႃးယူႇၽၢႆႇၼိုင်ႈတင်းၵဝ်ဢေႃႈ။
မႃႉလီႈထိူၼ်ႇၸၢင်ႈဢိမ်ႇၸႂ်တဵမ်ၸႂ်ၼႂ်းမိူဝ်ႈဢၼ်မီးယိူဝ်ႈယႃႈလႄႈ ဝူဝ်းငၢၼ်ၸၢင်ႈတဵတ်ႇလီၼိမ်လီၼႂ်းမိူဝ်ႈဢၼ်မီးၽိူင်းၼၼ်ႉဢေႃႈ။
တၢင်းၵိၼ်ဢၼ်ၸိုတ်ႇဢၼ်ၸၢင်ၼၼ်ႉယင်းဢမ်ႇပႃးၵိူဝ်လႄႈၵိၼ်လႆႈႁိုဝ်း၊ ၵိူမ်ႈၶႆႇၵႆႇၼၼ်ႉမီးဢရႃႉသႃႇဢၼ်ဝၢၼ် ဢၼ်မၼ်းႁိုဝ်း။
တၢင်းၵိၼ်ၸိူဝ်ႉၼင်ႇၼၼ်ၼၼ်ႉၵဝ်ယင်းဢမ်ႇတိူဝ်ႉဢမ်ႇယိပ်းလႄႈပဵၼ်တၢင်းၵိၼ်ဢၼ်ၵဝ်မိူဝ်ႇဢေႃႈ။
ႁႂ်ႈၵဝ်လႆႈတၢင်းဢၼ်ၵဝ်ယွၼ်းၼၼ်ႉသေၵမ်း။ ႁႂ်ႈၽြႃးပဵၼ်ၸဝ်ႈဢဵတ်းလူပၼ်လွင်ႈတၢင်းဢၼ်ၵဝ်မုင်ႈမွင်းၼၼ်ႉသေၵမ်း။
လွင်ႈတၢင်းဢၼ်ၵဝ်မုင်ႈမွင်းၸမ်ႉ၊ႁႂ်ႈၽြႃးပဵၼ်ၸဝ်ႈယႃႉၽဵဝ်ႈၵဝ်ပႅတ်ႈသေၵမ်း။ ႁႂ်ႈမၼ်းၸဝ်ႈယဵတ်ႇမိုဝ်းမၼ်းၸဝ်ႈၸူးလႄႈ ႁႂ်ႈၵဝ်သုမ်းၸွမ်းသေၵမ်း။
ပေႃးမၼ်းၸဝ်ႈႁဵတ်းၸိူဝ်ႉၼင်ႇၼၼ်ၸိုင်၊ ၵဝ်တၵ်းၵျွၵ်းဝႅၼ်ၸူမ်းၸူမ်းသိူဝ်းသိူဝ်းဢေႃႈ။ ၸႂ်ႈတႄႉ။ ၵဝ်တၵ်းသႂၢင်ႇသိူဝ်းၼႂ်းတၢင်းဢၼ် ၶူပ်းၶိုၼ်ႈၸဵပ်းသႅပ်ႇၼၼ်ႉဢေႃႈ။ ၵဝ်ဢမ်ႇတွပ်ႇထဵင်ပူၼ်ႉလိူဝ်ၵႂၢမ်းၽြႃးပဵၼ်ၸဝ်ႈဢၼ်မူတ်းၸၢင်ႇၼၼ်ႉဢေႃႈ။
ဢဵၼ်ႁႅင်းၵဝ်ပဵၼ်ၸိူဝ်ႉၼင်ႇႁိုဝ်လႄႈႁႂ်ႈၵဝ် လႆႈမီးဢၶႂၢင်ႉဢၼ်မုင်းမွင်းယူႇ၊ ဢၵျူဝ်းဢၼ်တၵ်းလႆႈၶၢမ်ႇၵမ်းလိုၼ်းသုတ်းၼၼ်ႉပဵၼ်ၸိူဝ်ႉၼင်ႇႁိုဝ်လႄႈၵဝ်လႆႈ ယိူၼ်ႉယူႇၵၼ်ႈယူႇ။
ဢဵၼ်ႁႅင်းၵဝ်ၼႆႉပဵၼ်ဢဵၼ်ႁႅင်းမၢၵ်ႇႁိၼ်ႁိုဝ်း၊ ၼိူဝ်ႉၵဝ်ၼႆႉပဵၼ်ၼိူဝ်ႉတွင်းလိူင်ႁိုဝ်း။
ၵဝ်ဢမ်ႇမီးႁႅင်းဢၼ်တၵ်းၵႄႇသႄႇဢဝ် တူဝ်ၸဝ်ႈၵဝ်ႇယဝ်ႉ၊ တၢင်းဢၼ်သၢၵ်ႈသႃႇၶႅၼ်းမႃးၼၼ်ႉလႆႈၶၢမ်ႇ တၢင်းဢၼ်လိုပ်ႈဢွၵ်ႇပႅတ်ႈသေၵႃႈတီႈ ၵဝ်ယဝ်ႉ။
ၵေႃႉဢၼ်ဢမ်ႇဢဵတ်းလူၵေႃႉသႄႈမၼ်းၼၼ်ႉ၊ ပဵၼ်ၵေႃႉဢၼ်ၸုၼ်ႉပႅတ်ႈတၢင်းဢၼ်ၵူဝ်ယမ်ၸဝ်ႈဢၼ်တဵမ်ဝႆႉတင်းဢၼၼ်ႇတႃႉတၼ်းၶူဝ်းၼၼ်ႉဢေႃႈ။
ၼႂ်းဝႃႈၼၼ်သေၵေႃႈၵေႃႉသႄႈၵဝ်ၶဝ်႟။ သူဢွၼ်ၵၼ်ပႅတ်ႉလႅၼ်ၵဝ်၊ မိူၼ်ၸိူဝ်ႉၼင်ႇၼမ်ႉႁွင်ႈၼမ်ႉၵႄးယူတ်းႁႅင်ႈၵႂႃႇမိူဝ်ႈဢၼ်ဢမ်ႇမီးၽူၼ်ၼၼ်ႉဢေႃႈ။
ၼမ်ႉႁွင်ႈၼမ်ႉၵႄးၸိူဝ်းၼၼ်ႉၶုၼ်ႇၵႂႃႇဢူၼ်ၵႂႃႇလူၺ်ႈၼမ်ႉၶႅင်ၼမ်ႉၵၢမ်ႈ၊ ဢိၵ်ႇတင်းမူၺ်ႁႃႇမူၵ်းယူႇတဵတ်ႇမႅပ်းယူႇၵႃႈၼႂ်းမၼ်းၼၼ်ႉဢေႃႈ။
ၵူၺ်းၵႃႈ၊ၸၢင်ႈသဵင်ႈႁၢႆၵႂႃႇၼႂ်းမိူဝ်ႈဢၼ်သၢႆလႅတ်ႇမႆႈႁွၼ်ႉၼၼ်ႉလႄႈ ပိုၼ်ႉၼမ်ႉႁွင်ႈမၼ်းၸၢင်ႈယူတ်းၵႂႃႇႁႅင်ႈၵႂႃႇဢေႃႈ။
မုၵ်ႉၵူၼ်းၸိူဝ်းၵူၼ်းဢၼ်ၵႂႃႇတႃႈၵႂႃႇတၢင်းၸွမ်းၼမ်ႉၼၼ်ႉ၊ ၸၢင်ႈဝႄႈငႅၵ်းဢွၵ်ႇၵႂႃႇသေလႄႈ ဢွၼ်ၵၼ်ၶဝ်ႈၵႃႈၼႂ်းပၢင်ႇပလႁႃႇသေယဝ်ႉ၊လုသုမ်းၵႂႃႇဢေႃႈ။
မုၵ်ႉၵူၼ်းၸိူဝ်းၵူၼ်းမဵဝ်း တေႇမၼ်ႇ၊ ဢၼ်ၵႂႃႇတႃႈၵႂႃႇတၢင်းၸွမ်းၼမ်ႉၼၼ်ႉ ဢွၼ်ၵၼ်သွၵ်ႈႁႃၼမ်ႉဢေႃႈ။ ၸဝ်ႈၵုၼ်ႇၸဝ်ႈသိၼ်မိူင်း သေးပႃႉ၊ ဢၼ် ၵႂႃႇတႃႈပႆတၢင်းၸိူဝ်းၼၼ်ႉၵေႃႈ၊ ဢွၼ်ၵၼ်မုင်ႈမွင်းၼမ်ႉဢေႃႈ။
ၵူၺ်းၵႃႈ၊တၢင်းဢၼ်ၶဝ်မုင်ႈမွင်းၼၼ်ႉလႅၵ်ႈလၢႆႈပဵၼ်ၸႂ်လု၊ ၶဝ်ႁွတ်ႈထိုင်တီႈၼၼ်ႈလႄႈလႆႈဢူၵ်း လႆႈဢၢႆဢေႃႈ။
သူၵေႃႈမိူၼ်ၸိူဝ်ႉၼင်ႇၼမ်ႉႁွင်ႈၼမ်ႉၵႄး ၸိူဝ်းၼၼ်ႉတီႈၵဝ်ယဝ်ႉ၊ သူႁၼ်တၢင်းဢၼ်လီၵူဝ်လီႁႄလႄႈ တူၵ်းၸႂ်ဢေႃႈ။
ၸွင်ႇၵဝ်ယၢမ်းလၢတ်ႈဝႃႈ၊ ‘ဢွၼ်ၵၼ်ဢဝ် သေၸိူဝ်ႉသေပိူင်ပၼ်ၵဝ်သေၵမ်း။ ဢွၼ်ၵၼ်ဢဝ်ၼႂ်းၸေးၸိမ်ႇဢုၵ်ႉၸႃႇသူလႄႈထုတ်ႇၼုၵ်ႈဢဝ်ၵဝ်သေၵမ်း။
ဢွၼ်ၵၼ်ၵႄႇၼုၵ်ႈဢဝ်ၵဝ်ဢွၵ်ႇသေၵႃႈတီႈ မိုဝ်းရၢၼ်ႇသူႇၵဝ်သေၵမ်း။ ဢွၼ်ၵၼ်ထုတ်ႇၼုၵ်ႈၵဝ်ဢွၵ်ႇသေၵႃႈတီႈၶဝ်ၸိူဝ်းဢၼ်ၼိၵ်ႈၸၢၵ်ႈငႅၼ်းသႄးၵဝ်ၼၼ်ႉသေၵမ်း၊’ ၸွင်ႇယၢမ်ႈဝႃႈၼင်ႇၼႆႁိုဝ်း။
လီယဝ်ႉ။ သင်ႇသွၼ်သုင်းမႃႉၵဝ်တႃႉ။ ၵဝ်တၵ်းယူႇတဵတ်ႇတဵတ်ႇယဵၼ်ယဵၼ်ဢေႃႈ။ ၽုၺ်ႇၼႄတၢင်းၽိတ်းၵဝ်တႃႉ။ ၵဝ်တၵ်းထွမ်ႇဢဝ်ဢေႃႈ။
ၵႂၢမ်းဢၼ်ၸိုဝ်ႈၸႂ်ႈမၢၼ်ႇမႅၼ်ႈၼၼ်ႉ မီးတၼ်းၶူဝ်းဢေႃႈ။ ၵူၺ်းၵႃႈ၊ၵႂၢမ်းဢၼ်သႄႉဢၼ်သွမ်းၼၼ်ႉပဵၼ်ၵႂၢမ်းပဝ်ႇၵႂၢမ်းလၢႆဢေႃႈ။
သူဢၢင်ႈတၵ်းတၢင်ႇဢပျတ်ႈတီႈၵႂၢမ်းၵဝ်ၼႆႉ ၸိူဝ်ႉၼင်ႇႁိုဝ်၊ မိူဝ်ႈၵႂၢမ်းၵေႃႉဢၼ်ဢမ်ႇမီးတီႈမုင်ႈမွင်းၼၼ်ႉပဵၼ်လူမ်းလွၼ်ႉလွၼ်ႉၵူၺ်းၼၼ်ႉ။
သူဢွၼ်ၵၼ်တူၵ်းၸႃႇၵွၵ်ႈပုၼ်ႈဢၼ်တၵ်းပိူင်ႇဢဝ်လုၵ်ႈၽၢၼ်ပေႃႈၽၢၼ်မႄႈဢေႃႈ။ သူဢွၼ်ၵၼ်ၵိၼ်ၼမ်ႉမျၢတ်ႈၼမ်ႉတွၼ်းၵႃႈၼိူဝ်ၵေႃႉသႄႈသူၼၼ်ႉဢေႃႈ။
မိူဝ်ႈလဵဝ်ၼႆႉဢွၼ်ၵၼ်လူတူၺ်းတီႈၵဝ်တႃႉ။ ၵဝ်ဢမ်ႇပႅတ်ႉဢမ်ႇလႅၼ်ၵႃႈတီႈၽၢႆႇၼႃႈသူ။
ယိူၼ်ႉၸႂ်ယိူၼ်ႉၶေႃးတႃႉ။ ယႃႇပေႁဵတ်းဢၼ်ဢမ်ႇတြႃးသေၵမ်း။ ဢွၼ်ၵၼ်ၶႆႈၸႂ်ဝူၼ်ႉၸႂ်ထႅင်ႈသေၵမ်း။ ၵဝ်ယင်းမၼ်ႈၶိူင်ႇယူႇၼႂ်းတၢင်းဢၼ် သိုဝ်ႈတေႃႇဢေႃႈ။
သူထၢင်ႇဝႃႈၵဝ်ပႅတ်ႉလႅၼ်ႁိုဝ်း၊သူထၢင်ႇၵဝ်ၼႆႉ ဢမ်ႇၸၢင်ႈၸၵ်းၽႄလွင်ႈလီလွင်ႈၸႃႉလႆႈႁိုဝ်း။
ၵူၼ်းၸိုင်၊လႆႈၵိုတ်ႉႁၢပ်ႇၼႃႈၵၢၼ်ယၢပ်ႇၽိုတ်ႇၼႃႇၵႃႈၼိူဝ်လိၼ်မိူင်းယူႇ၊ ပဵၼ်မိူၼ်ၸိူဝ်ႉၼင်ႇၵေႃႉဢၼ်ၶၢမ်ႇၵိၼ်ၸၢင်ႈၵိၼ်ငႃၼၼ်ႉလႄႈ။
ပဵၼ်မိူၼ်ၸိူဝ်ႉၼင်ႇၶႃႈဢၼ်မုင်ႈမွင်း ၶိင်ႇႁူဝ်ၶမ်ႈၼၼ်ႉယူႇ၊ ဢိၵ်ႇတင်းမိူၼ်ၸိူဝ်ႉၼင်ႇလုၵ်ႈၸၢင်ႈမုင်ႈမွင်း ၵႃႈႁႅင်းဝၼ်းမၼ်းၼၼ်ႉဢေႃႈ။
လိူၼ်ၼိုင်ႈယဝ်ႉလိူၼ်ၼိုင်ႈၵဝ်ဢမ်ႇမီးၵႃႈသင်တႃႇတေလဵင်ႉဢသၢၵ်ႈ၊ ၶိုၼ်းၼိုင်ႈယဝ်ႉၶိုၼ်းၼိုင်ႈႁႂ်ႈၵဝ်လႆႈ မႆႈၸႂ်ၶီၸႂ်ဢေႃႈ။
မိူဝ်ႈဢၼ်ၵဝ်ၼွၼ်းၼၼ်ႉၸိုင်၊ၵဝ်လႆႈလၢတ်ႈလႄႈဝႃႈ၊ၵဝ်တေလႆႈလုၵ်ႉၶိုၼ်ႈမိူဝ်ႈလႂ်၊ၶိင်ႇၵၢင်ၶိုၼ်းတၵ်းသဵင်ႈမိူဝ်ႈလႂ်၊ ၵဝ်ၵိင်ႈၵိူၵ်ႇယူႇတင်းၶိုၼ်းတေႃႇထိုင်ႁွတ်ႈ မိူင်းလႅင်းဢေႃႈ။
တူဝ်ၶိင်းၵဝ်ၼႆႉတဵမ်ဝႆႉတင်းၼွၼ်လႄႈ ၶၢပ်ႈၸဵပ်းၵေႃႈ ႁူမ်ႇၼင်ၵဝ်ဝႆႉသေယဝ်ႉ၊ၼွင်လႆဢွၵ်ႇသေၵႃႈတီႈတုမ်ႇၸဵပ်းတုမ်ႇၽီၸိူဝ်းၼၼ်ႉယူႇဢေႃႈ။
မိုဝ်ႉဝၼ်းၵဝ်ၸိူဝ်းၼၼ်ႉယင်းဢမ်ႇမီးတီႈလီမုင်ႈမွင်းလႄႈပူၼ်ႉၵႂႃႇဢေႃႈ။ ပူၼ်ႉၵႂႃႇၶၼ်ၽႂ်းၼႃႇသေလွၼ်းႁုၵ်ႇဢေႃႈ။
ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈၶုၵ်းၸႂ်လႆႈ၊ လွင်ႈဢၼ်ဢသၢၵ်ႈၶႃႈၸဝ်ႈၼႆႉပဵၼ်လူမ်းပဵၼ်လႅင်ႉလွၼ်ႉလွၼ်ႉၵူၺ်းၼၼ်ႉသေၵမ်းတီႈၶႃႈ၊ မၢၵ်ႇတႃၶႃႈၸဝ်ႈတေဢမ်ႇလႆႈႁၼ်တၢင်းလီထႅင်ႈသေပွၵ်ႈယဝ်ႉ။
ၸဝ်ႈႁဝ်းဢၼ်ႁၼ်ၶႃႈၸဝ်ႈမိူဝ်ႈလဵဝ်ၼႆႉၼၼ်ႉၵမ်းလိုၼ်းတေဢမ်ႇလႆႈႁၼ်၊ မိူဝ်ႈဢၼ်ၸဝ်ႈႁဝ်းလူတူၺ်းၶႃႈၸဝ်ႈၼၼ်ႉၶႃႈၸဝ်ႈတၵ်းဢမ်ႇမီးယဝ်ႉ။
ၸိူဝ်ႉၼင်ႇဢၼ်မွၵ်ႇၵုမ်ႈပၢင်ႇလႄႈႁၢႆၵႂႃႇၼၼ်ႉ၊ ၵေႃႉဢၼ်လူင်းၵႂႃႇၵႃႈၼႂ်းမိူင်းမရၼႃႉၼၼ်ႉ၊ၵမ်းလိုၼ်းတၵ်းဢမ်ႇလႆႈၶိုၼ်းမႃး။
မၼ်းတၵ်းဢမ်ႇၶိုၼ်းမိူဝ်းၸူးတီႈႁိူၼ်းမၼ်းထႅင်ႈသေပွၵ်ႈလႄႈ တီႈယူႇၵဝ်ႇၵဝ်ႇမၼ်းၼၼ်ႉၵမ်းလိုၼ်းဢမ်ႇႁုၸၵ်းမၼ်း။
ပိူဝ်ႈၼႆလႄႈၵဝ်ယင်းဢမ်ႇတၵ်ႉသဵင်လႄႈဢမ်ႇယူႇလႆႈယဝ်ႉ၊ ၵဝ်တၵ်းမီးတင်းႁူဝ်ၸႂ်ဢၼ်ယၢပ်ႇၽိုတ်ႇယူႇလႄႈလၢတ်ႈၵႂၢမ်းဢေႃႈ။ ၵဝ်တၵ်းမီးတင်းႁူဝ်ၸႂ်ဢၼ်ၶူမ်ၸႂ်ၶီၸႂ်လႄႈပွင်ႉမိုၼ်ႇဢေႃႈ။
ၸဝ်ႈႁဝ်းထၢင်ႇၶႃႈၸဝ်ႈပဵၼ်ၼၵႃးဢၼ်ယူႇၵႃႈၼႂ်းပၢင်ႇလၢႆႇႁိုဝ်း။ ၸဝ်ႈႁဝ်းႁႂ်ႈၵူၼ်းပႂ်ႉယၢမ်းပႂ်ႉၶႃႈၸဝ်ႈယူႇၶႃႈႁိုဝ်း။
ၶႃႈၸဝ်ႈၼွၼ်းႁႂ်ႈလႆႈလိုဝ်ႈယူႇလႄႈမုင်ႈမွင်း တၢင်းဢၼ်ၸဵပ်းဢၼ်သႅပ်ႇၶႃႈၸဝ်ႈတၵ်းၶႅၼ်းမႃးဢေႃႈ။
ၵူၺ်းၵႃႈ၊ၸဝ်ႈႁဝ်းပၼ်တၢင်းဢၼ်ၼွၼ်းၽၼ်ႁၼ်ဢၼ်လီၵူဝ်လီႁႄ၊ ႁႂ်ႈၶႃႈၸဝ်ႈလႆႈတူၵ်းၸႂ်လူၺ်ႈရူႇပႃႇရူင်ႇ။
ၼႂ်းၸႂ်ၶႃႈၸဝ်ႈၼၼ်ႉထၢၼ်ႈပေႃးၶႂ်ႈလိူၵ်ႈဢဝ်တၢင်းဢၼ်ၶၢမ်ႇငႅၼ်းၶေႃးတၢႆၼၼ်ႉ၊ လီၼႃႇသေတၢင်းဢၼ်ဢသၢၵ်ႈလိပ်းယူႇၼႂ်းတူဝ်တုၵ်ႉၶႃႉၼႆႉဢေႃႈ။
ၵဝ်ၼႆႉမီးတၢင်းဢၼ်ႁႅင်းဢူၼ်ႈႁႅင်းယွမ်းယူႇလႄႈဢမ်ႇလႆႈဢသၢၵ်ႈလိပ်းယူႇတႃႇသေႇ၊ ယႃႇၵဝ်တႃႉ။ ဢသၢၵ်ႈၵဝ်ၼႆႉပဵၼ်မိူၼ်ၼင်ႇဢၢႆၵႂၼ်းၵူၺ်းဢေႃႈ။
ၵူၼ်းၸိုင်၊ပဵၼ်ၵေႃႉၸိူဝ်ႉၼင်ႇႁိုဝ်လႄႈၸဝ်ႈႁဝ်းဝႆႉပဵၼ်ဢယေးယႂ်ႇလႄႈၶႆႈၸႂ်ထူပ်းမၼ်းယူႇ။
ထၢၼ်ႈပေႃးမႃးလူမႃးတူၺ်းမၼ်းယူႇၵူႈၼႂ် ၸၢမ်းတူၺ်းမၼ်းယူႇၵူႈၸူဝ်ႈၵူႈယၢမ်းၶႃႈဢေႃႈ။
တေႁိုင်ထႅင်ႈၵႃႈႁိုဝ်ၸဝ်ႈႁဝ်းတၵ်းဢမ်ႇဝၢႆႇပႅတ်ႈၶႃႈၸဝ်ႈႁႂ်ႈၶႃႈၸဝ်ႈလႆႈယူႇၵေႃႉလဵဝ်လႄႈ၊ လႆႈဢိုၼ်ၵိၼ်ၼမ်ႉလၢႆးတူဝ်ၸဝ်ႈၵဝ်ႇယူႇၼၼ်ႉတီႈၶႃႈ။
ၸဝ်ႈဢၼ်ပႂ်ႉလူပႂ်ႉတူၺ်းၵူၼ်းယူႇတီႈၶႃႈ႟။ သင်ၶႃႈၸဝ်ႈမီးဢပျတ်ႈၸိုင်၊ၶႃႈၸဝ်ႈတၵ်းလႆႈႁဵတ်းၸိူဝ်ႉၼင်ႇႁိုဝ်တီႈၸဝ်ႈႁဝ်းတီႈၶႃႈ။ ၵွပ်ႈသင်လႄႈၸဝ်ႈႁဝ်းႁႂ်ႈၶႃႈၸဝ်ႈပဵၼ်ၸၢၵ်ႈ ပဵၼ်တီႈမၢႆပုၼ်ႈၸဝ်ႈႁဝ်းတၵ်းယဵင်း တၵ်းယိုဝ်းၼၼ်ႉ၊ ၵွပ်ႈသင်လႄႈၶႃႈၸဝ်ႈလႆႈပဵၼ်တၢင်းယၢပ်ႇတၢင်းယဵၼ်းတီႈၸဝ်ႈႁဝ်း။
ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းဢမ်ႇပွႆႇလွတ်ႈဢပျတ်ႈၶႃႈၸဝ်ႈၼၼ်ႉ၊ ဢမ်ႇၽေႇပၼ်တၢင်းၽိတ်းၶႃႈၸဝ်ႈၼၼ်ႉ၊ မိူဝ်ႈလဵဝ်ၼႆႉၶႃႈၸဝ်ႈတၵ်းလႆႈၼွၼ်းၵႃႈတီႈမုၼ်ႈလိၼ်တီႈၶႃႈယဝ်ႉ၊ မိူဝ်ႈဢၼ်ၸဝ်ႈႁဝ်းသွၵ်ႈႁႃၶႃႈၸဝ်ႈၼၼ်ႉ၊ၶႃႈၸဝ်ႈတၵ်းဢမ်ႇမီးတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ပိလတတ်ႉ၊ ၵူၼ်းမဵဝ်း သုဢႃႇ၊ ၶိုၼ်းလၢတ်ႈလႄႈဝႃႈၸမ်ႉ၊
“မႂ်းတၵ်းလၢတ်ႈၸိူဝ်ႉၼင်ႇၼႆယူႇႁိုင်ထႅင်ႈၵႃႈႁိုဝ်လူးၵွၼ်ႇ၊ ၵႂၢမ်းဢၼ်မႂ်းလၢတ်ႈယူႇၸိူဝ်းၼႆႉပဵၼ်ၸိူဝ်ႉၼင်ႇလူမ်းဢၼ်ႁႅင်းယႂ်ႇၼႃႇဢေႃႈ။
ၽြႃးပဵၼ်ၸဝ်ႈဢမ်ႇႁဵတ်းလွင်ႈဢၼ်ဢမ်ႇတြႃး၊ ၸဝ်ႈဢၼၼ်ႇတႃႉတၼ်းၶူဝ်းဢမ်ႇတွၼ်ႉ ယႃႉပႅတ်ႈတၢင်းဢၼ်ႁဵတ်းဢၼ်ၸိုဝ်ႈ ဢၼ်ၸႂ်ႈၼၼ်ႉ။
ပိၵ်ႉသမ်ႉလုၵ်ႈလၢၼ်မႂ်းၽိတ်းပိူင်ႈမၼ်းၸဝ်ႈသေလႄႈ မၼ်းၸဝ်ႈပၼ်တၢမ်ႇဢပျတ်ႈၸွမ်းၼင်ႇတၢင်းၽိတ်းၶဝ်သေၵေႃႈ။
ပေႃးမႂ်းဝၢႆႇၸူးတီႈ ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ လႄႈတွင်းပၢၼ်ႇ။
ပေႃးမႂ်းမီးၸႂ်သၽေႃးဢၼ်မူတ်းၸၢင်ႇ သိုဝ်ႈတေႃႇယူႇၸိုင်၊ ၽြႃးပဵၼ်ၸဝ်ႈတၵ်းမႃးလႄႈၸွႆႈထႅမ်မႂ်း၊ ႁႂ်ႈၵူၼ်းႁိူၼ်းမႂ်းလႆႈဢၶႂၢင်ႉဢၼ်ၶိုၼ်းလုၵ်ႉလႄႈ ႁႂ်ႈပဵၼ်သုၵျေးၸူးတီႈမႂ်းဢေႃႈ။
ပိၵ်ႉသမ်ႉမိူဝ်ႈတႄႇၸႃႉႁူဝ်ပိုင်းၸူဝ်ႈဢသၢၵ်ႈမႂ်းၼၼ်ႉပဵၼ်ဢၼ်လဵၵ်ႉဢၼ်ၵေႇသေၵေႃႈ ၼႂ်းတီႈသုတ်းမႂ်းတၵ်းယဵင်ႈၶႅၼ်းယႂ်ႇၽႄႈတူဝ်းတွၼ်းသေၼၼ်ႉလူးၵွၼ်ႇဢေႃႈ။
ႁႂ်ႈမႂ်းထၢမ်တူၺ်းၵူၼ်းမိူဝ်ႈၵွၼ်ႇပၢၼ်မွၼ်ႇ ၼၼ်ႉလႄႈ ႁႂ်ႈႁုဝႃႈ၊ပူႇမွၼ်ႇႁဝ်းၶဝ်လႆႈထူပ်းၺႃး သဵတ်ႈၸႃႇတြႃးၼၼ်ႉတႃႉ။
ႁဝ်းၼႆႉမိူၼ်ၵူၼ်းဢၼ်ၵိူတ်ႇမႃးမိူဝ်ႈဝႃးၵူၺ်းလႄႈဢမ်ႇႁုၵႃႈသင်လႃးလႃး၊ မိုဝ်ႉဝၼ်းဢၼ်ႁဝ်းယူႇၼိူဝ်လိၼ်မိူင်းၼႆႉမိူၼ်ၼင်ႇႁူမ်ႈၼင်ႇငဝ်းၵူၺ်းဢေႃႈ။
ပိူဝ်ႈၼႆလႄႈႁႂ်ႈၸဝ်ႈပိင်ႇၺႃႇမိူဝ်ႈၵွၼ်ႇၵွၼ်ႇၸိူဝ်းၼၼ်ႉသင်ႇသွၼ်သုင်းမႃႉမႂ်းလႄႈ၊ ထွမ်ႇဢဝ်ၵႂၢမ်းဢၼ်ၶဝ်တၵ်းလၢတ်ႈၼၼ်ႉတႃႉ။
တူၼ်ႈၶႅမ်ၼၼ်ႉယင်းဢမ်ႇမီးၵူမ်ႇမီးငႂ်ႈလႄႈ ဢမ်ႇယႂ်ႇမႃးလႆႈ၊ မႆႉဢေႃႈၼၼ်ႉယင်းဢမ်ႇမီးၼမ်ႉလႄႈ ဢမ်ႇယူႇလႆႈ။
ပေႃးၼမ်ႉႁႅင်ႈၵႂႃႇၸိုင်၊ၶဝ်ၸၢင်ႈႁဵဝ်ႇႁႅင်ႈၵႂႃႇဢွၼ်တၢင်းတူၼ်ႈတၢင်ႇမဵဝ်း၊ ၸူဝ်ႈဢၼ်ယင်းၼုမ်ႇလႄႈဢမ်ႇပႆႇသုင်းပႆႇၸႂ်ႉလႆႈၼၼ်ႉဢေႃႈ။
ၵူၼ်းၸိူဝ်းဢၼ်လူင်လိုမ်းၽြႃးပဵၼ်ၸဝ်ႈၼၼ်ႉပဵၼ်ၸိူဝ်ႉၼင်ႇတူၼ်ႈၸိူဝ်းၼၼ်ႉယဝ်ႉ။ တၢင်းဢၼ်မုင်ႈထႃႈမွင်းထႃႈၶဝ်ၸိူဝ်းဢၼ်ဢမ်ႇမီးၽြႃးပဵၼ်ၸဝ်ႈၼၼ်ႉ လပ်ႉႁၢႆၵႂႃႇဢေႃႈ။
တၢင်းဢၼ်ၶဝ်ဝႆႉၸႂ်တမ်းၸႂ်ၼၼ်ႉပဵၼ်မိူၼ်သဵၼ်ႈမႆၽွႆႇဢၼ်ၶၢတ်ႇငၢႆႈလႄႈ၊ တၢင်းဢၼ်ၶဝ်သွၼ်ႈပိုင်ႈၼၼ်ႉၵေႃႈတၵ်းပဵၼ်မိူၼ်ယႂ်းၵူင်ႇၵၢဝ်ဢေႃႈ။
ပေႃးၶဝ်ဢိင်ယႂ်းၵူင်ႇၵၢဝ်ၸိုင်၊ယႂ်းၵူင်ႇၵၢဝ်ၼၼ်ႉတၵ်းၶၢမ်ႇလႆႈႁိုဝ်း၊ ပေႃးၶဝ်ႁွႆႈၸပ်းသဵၼ်ႈမႆၽွႆႇၼၼ်ႉၸိုင်၊သဵၼ်ႈမႆၽွႆႇၼၼ်ႉတၵ်းပႄႉတူဝ်ၶဝ်လႆႈႁိုဝ်း။
ၵူၼ်းႁၢႆႉၵူၼ်းမိူၵ်ႈၸိုင်၊ပဵၼ်ၸိူဝ်ႉၼင်ႇတူၼ်ႈယိူဝ်ႈဢၼ်ႁုၼ်ႈယူႇၵႃႈၼႂ်းလႅတ်ႇ၊ မိူၼ်ၸိူဝ်ႉၼင်ႇတူၼ်ႈယႃႈဢၼ်ပူင်ႇၽိူဝ်ၸွတ်ႇတူဝ်ႈၵႂႃႇၵႃႈၼႂ်းသူၼ်ယူႇလႄႈ။
ႁၢၵ်ႈမၼ်းၵွတ်ႇၵဵဝ်ႈလဵပ်ႈႁွပ်ႈၵွင်မၢၵ်ႇႁိၼ် သေယဝ်ႉ၊ မၼ်းၸပ်းမၢၵ်ႇႁိၼ်ဝႆႉမၼ်ႈမၼ်ႈၵႅၼ်ႇၵႅၼ်ႇ သေၵေႃႈ။
မိူဝ်ႈဢၼ်ပိူၼ်ႈထူၺ်ႈဢဝ်ဢွၵ်ႇပႅတ်ႈၼၼ်ႉၸိုင်၊ ၽူႈလႂ်ၵေႃႈတေဢမ်ႇႁုဝႃႈ၊ယိူဝ်ႈယႃႈၸိူဝ်းၼၼ်ႉယၢမ်ႈမီးၵႃႈတီႈၼၼ်ႈၼၼ်ႉဢေႃႈ။
တူၺ်းလူး။ တၢင်းၸူမ်းသိူဝ်းၵူၼ်းႁၢႆႉၵူၼ်းမိူၵ်ႈၼၼ်ႉပဵၼ်ၸိူဝ်ႉၼင်ႇၼႆယဝ်ႉ၊ ပိူၼ်ႈတၢင်ႇၵေႃႉတၢင်ႇၵူၼ်းဢွၼ်ၵၼ်မႃးတႅၼ်းတီႈယူႇၶဝ်ၼၼ်ႉဢေႃႈ။
ၵေႃႉဢၼ်မီးသဵတ်ႈၸႃႇၸမ်ႉ၊ၽြႃးပဵၼ်ၸဝ်ႈတၵ်းဢမ်ႇၸုၼ်ႉပႅတ်ႈသေပွၵ်ႈ၊ တီႈၵူၼ်းႁၢႆႉၵူၼ်းမိူၵ်ႈၸိူဝ်းၼၼ်ႉၸမ်ႉ၊မၼ်းၸဝ်ႈဢမ်ႇၸွႆႈဢမ်ႇထႅမ်။
မၼ်းၸဝ်ႈတၵ်းပၼ်ဢၶႂၢင်ႉႁႂ်ႈမႂ်းလႆႈၶိုၼ်းယုမ်ႉၶူဝ်လႄႈၸူမ်းသိူဝ်းၼႃႇလူင်လၢင်ဢေႃႈ။
တီႈၶဝ်ၸိူဝ်းဢၼ်ၸင်းမႂ်းၼၼ်ႉၸမ်ႉ၊မၼ်းၸဝ်ႈတၵ်းႁႂ်ႈၶဝ်လႆႈဢူၵ်းလႆႈဢၢႆလႄႈ၊ ၼႃႈႁိူၼ်းၵူၼ်းႁၢႆႉၵူၼ်းမိူၵ်ႈၸိူဝ်းၼၼ်ႉ သမ်ႉတၵ်းတေလုတေသုမ်းဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ယေႃးၽႃႉ၊ ၶိုၼ်းလၢတ်ႈလႄႈဝႃႈၸမ်ႉ၊
“ၸိုဝ်ႈၸႂ်ႈမၢၼ်ႇမႅၼ်ႈဢေႃႈ။ လွင်ႈတၢင်းၸိူဝ်းၼႆႉၵဝ်ႁုမူတ်းယဝ်ႉယဝ်ႉ၊ ၼႂ်းဝႃႈၼၼ်သေၵေႃႈ၊ၵူၼ်းၸိုင်၊တၵ်း သိုဝ်ႈတေႃႇၽၢႆႇၼႃႈၽြႃးပဵၼ်ၸဝ်ႈ လႆႈၸိူဝ်ႉၼင်ႇႁိုဝ်။
ၽူႈလႂ်တၵ်းႁဵတ်းၸိူဝ်ႉၼင်ႇႁိုဝ်တွပ်ႇထဵင်ၵၼ်တင်းမၼ်းၸဝ်ႈလႆႈ၊ ၼႂ်းတၢင်းဢၼ်မၼ်းၸဝ်ႈထၢမ်ၵႂၢမ်း ႁဵင်ၶေႃႈၼၼ်ႉ၊ ၽူႈလႂ်ၵေႃႈဢမ်ႇၶိုၼ်းတွပ်ႇလႆႈသေၶေႃႈသေၵမ်း။
ၽြႃးပဵၼ်ၸဝ်ႈမီးပိင်ႇၺႃႇလႄႈမီးတၼ်းၶူဝ်းဢၼ်ယႂ်ႇၼႃႇလူင်လၢင်ဢေႃႈ။ ၽူႈလႂ်တၵ်းၶတ်းၶႅင်ႁႅင်းတႃႉမၼ်းၸဝ်ႈလႆႈ။
မၼ်းၸဝ်ႈၶၢႆႉလွႆတင်းလၢႆလႄႈၽူႈလႂ်ဢမ်ႇတၼ်းႁုတူဝ်ႁုႁၢင်ႈ၊ မၼ်းၸဝ်ႈၸႂ်မႆႈၶႂ်ႈၸႃႉလႄႈဢဝ်ၶဝ်ၶွမ်ႈပိၼ်ႈပႅတ်ႈဢေႃႈ။
မၼ်းၸဝ်ႈၸႂ်ႉဢိင်ႇသၼ်ႇႁႂ်ႈၶဝ်ႇႁႂ်ႈၶွၼ်း လိၼ်မိူင်းလႄႈ သဝ်လၵ်းမၼ်းတင်းလၢႆၵေႃႈ သၼ်ႇၶွၼ်းဝႆဢေႃႈ။
မၼ်းၸဝ်ႈႁၢမ်ႈတၢပ်ႈၵၢင်ဝၼ်းလႄႈၵၢင်ဝၼ်းဢမ်ႇၸၢင်ႈဢွၵ်ႇမႃးလႆႈ၊ ဢိၵ်ႇတင်းလၢဝ်တင်းလၢႆၵေႃႈဢမ်ႇႁိူဝ်ႈလႅင်းၶိင်ႇၵၢင်ၶိုၼ်းလႆႈ။
မၼ်းၸဝ်ႈသူႇလဵဝ်ပႃးလဵဝ်ၵူၺ်းပိုတ်ႇၵီႈ မုင်းၽႃႉၵၢင်ႁၢဝ်လႄႈ ယဵပ်ႇယမ်ႈၵႃႈၼိူဝ်ပိူပ်ႈၼမ်ႉလႅင်းၼမ်ႉ၊ ၼမ်ႉသမ်ႇမုၵ်ႈတြႃႇဢေႃႈ။
ၽြႃးပဵၼ်ၸဝ်ႈၽၢၼ်ႇသၢင်းႁဵတ်းပဵၼ်လၢဝ်ၸၢင်ႉတၢင်းလၢဝ်တဝ်ႇ၊ ႁဵတ်းပဵၼ်လၢဝ်ဝီးဢိၵ်ႇတင်းလၢဝ်တင်းလၢႆၽၢႆႇတၢင်းၸၢၼ်းဢေႃႈ။
မၼ်းၸဝ်ႈႁဵတ်းလွင်ႈတၢင်းဢၼ်ယႂ်ႇၼႃႇလူင်လၢင်မဵဝ်းဢၼ်ႁဝ်းဢမ်ႇၸၢင်ႈႁုလႆႈ၊ ဢိၵ်ႇတင်းလွင်ႈတၢင်းဢၼ်လီဢၢမ်းၼႃႇလူင်လၢင်ဢၼ်ဢမ်ႇၼပ်ႉဢၢၼ်ႇလႆႈၼၼ်ႉဢေႃႈ။
မၼ်းၸဝ်ႈၵၢႆၵႂႃႇၵႃႈႁိမ်းၵဝ်လႄႈၵဝ်ဢမ်ႇႁၼ်မၼ်းၸဝ်ႈ မၼ်းၸဝ်ႈၽၢတ်ႈၵႃႈတီႈႁိမ်းၵဝ်ၵႂႃႇလႄႈၵဝ်ဢမ်ႇႁုသၢႆငၢႆမၼ်းၸဝ်ႈ။
မၼ်းၸဝ်ႈၸၵ်ႉဢဝ်သိမ်းဢဝ်ၵႂႃႇလႄႈၽူႈလႂ်ဢမ်ႇႁၢမ်ႈတၢပ်ႈမၼ်းၸဝ်ႈလႆႈ၊ ‘ၸဝ်ႈႁဝ်းႁဵတ်းၸိူဝ်ႉၼင်ႇၼႆၼင်ႇႁိုဝ်’ ဝႃႈၼႆၽူႈလႂ်ဢမ်ႇႁတ်းလဝ်ႈႁတ်းထၢမ်။
တၢင်းၸႂ်မႆႈၶႂ်ႈၸႃႉၽြႃးပဵၼ်ၸဝ်ႈၼၼ်ႉ ဢမ်ႇႁၢႆၵႂႃႇ၊ မၼ်းၸဝ်ႈယႃႉၽဵဝ်ႈပႅတ်ႈရၢၼ်ႇသူႇဢၼ် ၸွႆႈထႅမ် ရႃႇႁပ်ႉ၊ ဢၼ်လုၵ်ႉၽိုၼ်ႉ မၼ်းၸဝ်ႈၼၼ်ႉဢေႃႈ။
ၵွပ်ႈပိူဝ်ႈၼႆလႄႈၵဝ်တၵ်းတွပ်ႇထဵင်မၼ်းၸဝ်ႈလႆႈၸိူဝ်ႉၼင်ႇႁိုဝ်၊ ၵဝ်တၵ်းႁႃဢဝ်ၵႂၢမ်းၸိူဝ်ႉၼင်ႇႁိုဝ်လႄႈၶိုၼ်းတွပ်ႇလၢတ်ႈတီႈမၼ်းၸဝ်ႈ။
ပိၵ်ႉသမ်ႉၵဝ်သိုဝ်ႈတေႃႇယူႇသေၵေႃႈၵဝ်ဢမ်ႇၶိုၼ်းလဝ်ႈလၢတ်ႈတီႈမၼ်းၸဝ်ႈလႆႈ၊ ၵဝ်မီးတီႈဢၼ်တၵ်းတွင်းပၢၼ်ႇတီႈၸဝ်ႈဢၼ်ၸီႇယၢင်ႇတြႃးၵဝ်ၼၼ်ႉၵူၺ်းဢေႃႈ။
ပေႃးၵဝ်ၶႃႈႁွင်ႉမၼ်းၸဝ်ႈလႄႈမၼ်းၸဝ်ႈဢိူဝ်ၸိုင်၊ ၵဝ်ဢမ်ႇယုမ်ႇလွင်ႈဢၼ်မၼ်းၸဝ်ႈတၵ်းထွမ်ႇဢဝ်ၵႂၢမ်းၵဝ်။
မၼ်းၸဝ်ႈတၵ်းဢဝ်တင်းၽူၼ်လူင်လူမ်းလူင်တဵၵ်းငႅၼ်းၵဝ်လႄႈ ယင်းဢမ်ႇမီးလွင်ႈမီးတၢင်းသေၵေႃႈမၼ်းၸဝ်ႈႁႂ်ႈတၢင်းၸဵပ်းၵဝ်ၼမ်မႃးတူဝ်းမႃးဢေႃႈ။
မၼ်းၸဝ်ႈႁႂ်ႈၵဝ်ဢမ်ႇထူၺ်ႈၸႂ်လႆႈလႄႈ ႁႂ်ႈၵဝ်တဵမ်ဝႆႉတင်းဝူၺ်ႇတၼႃႇဢၼ်ၶူမ်ၸႂ် ၼႃႇၼၼ်ႉဢေႃႈ။
ပေႃးပဵၼ်တၢင်းဢၼ်ၶေႉၶဵင်ႇၵၼ်လူၺ်ႈဢဵၼ်ႁႅင်းၸိုင်၊မၼ်းၸဝ်ႈပဵၼ်ၸဝ်ႈဢၼ်မီးႁႅင်းတၼ်းၶူဝ်းယႂ်ႇၼႃႇဢေႃႈ။ ပေႃးပဵၼ်တၢင်းဢၼ်ၶိုၼ်ႈလုမ်းၸိုင်၊ၽူႈလႂ်ႁတ်းႁဵတ်းဢမုၵၼ်တင်းမၼ်းၸဝ်ႈ။
ပိၵ်ႉသမ်ႉၵဝ်ပဵၼ်ဢၼ်သိုဝ်ႈတေႃႇသေၵေႃႈသူပ်းၵဝ်တၵ်းၸီႇယၢင်ႇႁႂ်ႈၵဝ်သုမ်းတြႃးဢေႃႈ။ ပိၵ်ႉသမ်ႉၵဝ်ၵၢင်းလွတ်ႈတၢင်းဢၼ်တၢင်ႇဢပျတ်ႈသေၵေႃႈ၊ မၼ်းၸဝ်ႈတၵ်းလၢတ်ႈဝႃႈ၊ၵဝ်မီးသၽေႃးဢၼ်ၵူတ်ႉငေႃးဢေႃႈ။
ၵဝ်ၵၢင်းလွတ်ႈတၢင်းဢၼ်တၢင်ႇဢပျတ်ႈသေၵေႃႈၵဝ်ယင်းဢမ်ႇမႆႈၸႂ်ပုၼ်ႈတူဝ်ၸဝ်ႈၵဝ်ႇ၊ ၵဝ်ငိၼ်းမိူဝ်ႇငိၼ်းၸၢၼ်ႈတူဝ်ၸဝ်ႈၵဝ်ႇဢေႃႈ။
ပဵၼ်မိူၼ်မိူၼ်ၵၼ်တင်းသဵင်ႈတင်းမူတ်းယဝ်ႉ၊ပိူဝ်ႈၼႆလႄႈ ၵဝ်လၢတ်ႈလႄႈဝႃႈ၊ ‘မၼ်းၸဝ်ႈၸၢင်ႈယႃႉပႅတ်ႈၶဝ်ၸိူဝ်းဢၼ်ၸေးၸုမ်ႇၼႂ်းတၢင်းလီလႂ်၊ ဢိၵ်ႇတင်းၶဝ်ၸိူဝ်းဢၼ်ႁၢႆႉယုတ်ႈလႂ်ၼၼ်ႉဢေႃႈ။’
မိူဝ်ႈဢၼ်ၵူၼ်းသိုဝ်ႈတေႃႇၵိုင်ႉၵၢင်ႉထူပ်းၽေးလႄႈတၢႆၼၼ်ႉၸိုင်၊ မၼ်းၸဝ်ႈယုမ်ႉၶူဝ်ဢေႃႈ။
ၽြႃးပဵၼ်ၸဝ်ႈဢဝ်လိၼ်မိူင်းဢၢပ်ႈပၼ်တီႈၵူၼ်းႁၢႆႉယုတ်ႈယဝ်ႉ၊ မၼ်းၸဝ်ႈႁႄႉလပ်ႉတႃၵူၼ်းလူင်ဢၼ်ၸီႇယၢင်ႇတြႃးတင်းလၢႆယဝ်ႉ၊ ပေႃးဢမ်ႇၸႂ်ႈမၼ်းၸဝ်ႈႁဵတ်းၸိုင်၊သမ်ႉပဵၼ်ၽူႈလႂ်ႁဵတ်း။
မိုဝ်ႉဝၼ်းၵဝ်ၸိူဝ်းၼႆႉၶၼ်ၽႂ်းၼႃႇ လူင်လၢင်လႄႈ ဢမ်ႇမီးလွင်ႈလီလွင်ႈငၢမ်းသေမိုဝ်ႉသေဝၼ်း။
မိုဝ်ႉဝၼ်းၵဝ်ၸိူဝ်းၼႆႉပူၼ်ႉၵႂႃႇၶၼ်ၽႂ်းၼႃႇ မိူၼ်ၸိူဝ်ႉၼင်ႇႁိူဝ်းဢၼ်ၶၼ်ၽႂ်းၼႃႇ ၼၼ်ႉဢေႃႈ။ ဢိၵ်ႇတင်းၶၼ်ၽႂ်းၼႃႇမိူၼ်ၸိူဝ်ႉၼင်ႇၼူၵ်ႉၶၢင်ႇလေႃႉဢၼ်လေႃႇလူင်းၸၵ်ႉဢဝ်တူဝ်သတ်းလဵၵ်ႉၼၼ်ႉဢေႃႈ။
ပေႃးၵဝ်ဝႃႈ ‘ၵဝ်တၵ်းလူင်လိုမ်းၵႂၢမ်းဢၼ်ပွင်ႉဢၼ်ၶၢင်း၊ တၵ်းၶၢႆႉပုတ်ႈၼႃႈလုတႃလုႁႂ်ႈပဵၼ်တၢင်းဢၼ်ယုမ်ႉၶူဝ်ဢေႃႈ၊’ ဝႃႈၼႆသေၵေႃႈ။
ၵဝ်ယင်းတိုၵ်ႉၵူဝ်ႁႄတုၵ်ႉၶႃႉဝူၺ်ႇတၼႃႇယူႇ၊ၵွပ်ႈပိူဝ်ႈၵဝ်ႁုႁၼ်လွင်ႈဢၼ် မၼ်းၸဝ်ႈမၢတ်ႈဝႃႈၵဝ်မီးဢပျတ်ႈဢေႃႈ။
ၵဝ်ၼႆႉထုၵ်ႇဢပျတ်ႈယဝ်ႉ။ ပိူဝ်ႈၼႆလႄႈ၊ၵဝ်တၵ်း ၶတ်းၸႂ်ၵျူဝ်းၸႃးဢၼ်ဢမ်ႇမီးဢၵျူဝ်းၼၼ်ႉၸိူဝ်ႉၼင်ႇႁိုဝ်။
သပ်ႉပျႃႇမဵဝ်းလႂ်ၵေႃႈဢမ်ႇသုၵ်ႈဢမ်ႇလၢင်ႉဢပျတ်ႈၵဝ်လႆႈ၊
မၼ်းၸဝ်ႈဢီးၵဝ်တူၵ်းၵႃႈၼႂ်းၶုမ်ၵူမ်ႇ ၶုမ်လိၼ်လႄႈ ၶူဝ်းၼုင်ႈၵဝ်တၵ်းလီႁင်ႈၵဝ်ဢေႃႈ။
ပေႃးၽြႃးပဵၼ်ၸဝ်ႈပဵၼ်ၵူၼ်းၸိုင်၊ၵဝ်ၸၢင်ႈၶိုၼ်းလဝ်ႈလၢတ်ႈတီႈမၼ်းၸဝ်ႈလႄႈ ႁဝ်းၸၢင်ႈၶိုၼ်ႈလုမ်းလႄႈတႅပ်းတတ်းလူၺ်ႈလွင်ႈဢၼ်ႁဝ်းၽိတ်းၵၼ်ၼၼ်ႉဢေႃႈ။
ၵူၺ်းၵႃႈ၊ဢမ်ႇမီးၽူႈလႂ်ဢၼ်တၵ်းႁဵတ်း ၵူၼ်းဝူင်ႈၵၢင်၊ ဢမ်ႇမီးၽူႈလႂ်ဢၼ်တၵ်းၸီႇယၢင်ႇၵႃႈၼိူဝ်ၽြႃးပဵၼ်ၸဝ်ႈတင်းၵႃႈၼိူဝ်ၵဝ်လႆႈ သေၵေႃႉသေၵူၼ်း။
ၽြႃးပဵၼ်ၸဝ်ႈတီႈၶႃႈ။ ယႃႇပေၸီႇယၢင်ႇပၼ်တၢမ်ႇၶႃႈၸဝ်ႈသေၵမ်းတီႈၶႃႈ၊ ၶႅၼ်းတေႃႈၶိုၼ်းယိုတ်းဢဝ်တၢင်းဢၼ်လီၵူဝ်လီႁႄၸဝ်ႈႁဝ်းဢၼ်ႁႂ်ႈၶႃႈၸဝ်ႈတူၵ်းၸႂ်ၼၼ်ႉသေၵမ်းတီႈၶႃႈ။
ပေႃးႁဵတ်းၸိူဝ်ႉၼင်ႇၼၼ်ၸိုင်၊ၶႃႈၸဝ်ႈ ဢမ်ႇၵူဝ်ႁႄၸဝ်ႈႁဝ်းလႄႈတၵ်းႁတ်း လဝ်ႈလၢတ်ႈဢေႃႈ။ မိူဝ်ႈလဵဝ်ၼႆႉၸမ်ႉ၊ဢမ်ႇပဵၼ်ၸိူဝ်ႉၼင်ႇၼၼ် ၵႃႈၼႂ်းတူဝ်ၶႃႈၸဝ်ႈၼႆႉဢေႃႈ။
ၵဝ်မိူဝ်ႇၸၢၼ်ႈတၢင်းဢၼ်ၵဝ်ဢသၢၵ်ႈလိပ်းယူႇၼႆႉဢေႃႈ။ ထွမ်ႇငိၼ်းၵႂၢမ်းဢၼ်ၶႃႈၸဝ်ႈပႃးတင်းၸႂ်ဢၼ်ၶူမ်လႄႈပွင်ႉၶၢင်းၼႆႉသေၵမ်း။
ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈယႃႇပေၸီႇယၢင်ႇပၼ်တၢမ်ႇတီႈၶႃႈၸဝ်ႈသေၵမ်း၊ ၶႃႈၸဝ်ႈမီးဢမုဢၼ်လႂ်၊မွၵ်ႇလၢတ်ႈတီႈၶႃႈၸဝ်ႈသေၵမ်းတီႈၶႃႈ။
ၸွင်ႇၸဝ်ႈႁဝ်းထုၵ်ႇလီၼိၵ်ႈၸၢၵ်ႈငႅၼ်းသႄး တီႈၶႃႈႁိုဝ်း၊ ၸဝ်ႈႁဝ်းႁဵတ်းဢမ်ႇပေႃးၼင်ႇႁိုဝ်တီႈၵေႃႉဢၼ်ၸဝ်ႈႁဝ်းၽၢၼ်ႇသၢင်း၊ ဢိၵ်ႇတင်းပၼ်တၢင်းလီတီႈတၢင်းၵျၢမ်ႇတၢင်းပွင်ၵူၼ်းႁၢႆႉၵူၼ်းႁုၵ်းၶဝ်ၼၼ်ႉၶႃႈႁိုဝ်း။
ၸွင်ႇမၢၵ်ႇတႃၸဝ်ႈႁဝ်းမိူၼ်မၢၵ်ႇတႃၵူၼ်းၶႃႈႁိုဝ်း၊ၸွင်ႇၸဝ်ႈႁဝ်းႁၼ်မိူၼ်ၸိူဝ်ႉၼင်ႇဢၼ်ၵူၼ်းႁၼ်ၼၼ်ႉၶႃႈႁိုဝ်း။
ၸွင်ႇမိုဝ်ႉဝၼ်းၸဝ်ႈႁဝ်းပဵၼ်မိူၼ်ၸိူဝ်ႉၼင်ႇ မိုဝ်ႉဝၼ်းၵူၼ်းၶႃႈႁိုဝ်း၊ ၶူပ်ႇပီၸဝ်ႈႁဝ်းမိူၼ်ၸိူဝ်ႉၼင်ႇၶူပ်ႇပီၵူၼ်းလႄႈ။
ၸဝ်ႈႁဝ်းၸွမ်းႁႃတၢင်းၽိတ်းၶႃႈၸဝ်ႈယူႇလႄႈ ၸွမ်းၸႅတ်ႈႁႃတူၺ်းဢပျတ်ႈၶႃႈၸဝ်ႈ ယူႇတီႈၶႃႈႁိုဝ်း။
ၸဝ်ႈႁဝ်းႁုလွင်ႈဢၼ်ၶႃႈၸဝ်ႈဢမ်ႇၸႂ်ႈၵူၼ်းႁၢႆႉဢိၵ်ႇတင်း ႁုလွင်ႈဢၼ်ဢမ်ႇမီးၽူႈလႂ်ဢၼ်တၵ်း ၵႄႇသႄႇဢဝ်ၶႃႈၸဝ်ႈ ဢွၵ်ႇသေၵႃႈၼႂ်းမိုဝ်းၸဝ်ႈႁဝ်းၼၼ်ႉ ယူႇတီႈၶႃႈဢေႃႈ။
ၸဝ်ႈႁဝ်းဢဝ်တင်းမိုဝ်းၸဝ်ႈႁဝ်းလႄႈပၼ်ႈႁဵတ်းၶႃႈၸဝ်ႈသေယဝ်ႉ၊ တေႃႈလဵဝ်ၼႆႉၸဝ်ႈႁဝ်းတၵ်းၶိုၼ်းယႃႉပႅတ်ႈၶႃႈၸဝ်ႈတီႈၶႃႈႁိုဝ်း။
ၶႅၼ်းတေႃႈၸဝ်ႈႁဝ်းၶုၵ်းၸႂ်လႆႈတၢင်းဢၼ် ၸဝ်ႈႁဝ်းဢဝ်တင်း၊ လိၼ်ၼဵဝ်သေလႄႈႁဵတ်းပဵၼ်ၶႃႈၸဝ်ႈၼၼ်ႉသေၵမ်းတီႈၶႃႈ၊ ၸဝ်ႈႁဝ်းသမ်ႉတၵ်းႁႂ်ႈၶႃႈၸဝ်ႈၶိုၼ်းပဵၼ်မုၼ်ႈလိၼ်တီႈၶႃႈႁိုဝ်း။
ၸဝ်ႈႁဝ်းထွၵ်ႇႁိုဝ်ႈၶႃႈၸဝ်ႈမိူၼ်ၸိူဝ်ႉၼင်ႇ ၼမ်ႉၼူမ်းလႄႈ ႁဵတ်းႁႂ်ႈၶႃႈၸဝ်ႈၵတ်းၶႅင်မိူၼ်ၸိူဝ်ႉၼင်ႇၶႆၼမ်ႉၼူမ်းၵၢမ်ႈၼၼ်ႉယဝ်ႉဢမ်ႇၸႂ်ႈတီႈၶႃႈႁိုဝ်း။
ၸဝ်ႈႁဝ်းႁဵတ်းႁႂ်ႈတူဝ်ၶၼ်ႇထႃႇၶႃႈၸဝ်ႈတဵမ်ဝႆႉတင်းလုပ်ႇတင်းဢဵၼ်သေယဝ်ႉ၊ ဢဝ်ၼင်တင်းၼိူဝ်ႉႁေႃႇတူဝ်ၶၼ်ႇထႃႇ ၶႃႈၸဝ်ႈဝႆႉဢေႃႈ။
ၸဝ်ႈႁဝ်းပၼ်ၸီႇဝႃႉဢသၢၵ်ႈဢိၵ်ႇတင်းတၢင်းႁၵ်ႉဢၼ်မၼ်ႈၶိူင်ႇတီႈၶႃႈၸဝ်ႈလႄႈ၊ တၢင်းဢၼ်ၸဝ်ႈႁဝ်းလူလွမ်လုမ်းလႃးၼၼ်ႉႁႂ်ႈဝိၺိၺ်ႇၶႃႈၸဝ်ႈလႆႈၶျၢမ်းသႃႇဢေႃႈ။
လွင်ႈဢၼ်သိုပ်ႇမႃးတေႃႈလဵဝ်ၼႆႉၵေႃႈပဵၼ်လွင်ႈဢၼ်ၸဝ်ႈႁဝ်းသိူင်ႇလပ်ႉဝႆႉၼႂ်းၸႂ်လႄႈ ပဵၼ်မႃးၸွမ်းၼင်ႇဢလူဝ်ႇၸဝ်ႈႁဝ်းၼၼ်ႉ ၶႃႈဢေႃႈ။
ၸဝ်ႈႁဝ်းပႂ်ႉလွမ်တူၺ်းႁႂ်ႈလႆႈထူပ်းႁၼ်တၢင်းၽိတ်းၶႃႈၸဝ်ႈ၊ ပုၼ်ႈလွင်ႈၼင်ႇႁိုဝ်ၸဝ်ႈႁဝ်းတၵ်းဢမ်ႇပွႆႇလွတ်ႈဢပျတ်ႈၶႃႈၸဝ်ႈၼၼ်ႉတီႈၶႃႈဢေႃႈ။
ပေႃးၶႃႈၸဝ်ႈႁၢႆႉယုတ်ႈၸိုင်၊ၶႃႈၸဝ်ႈမီး ဢႃႉမၢင်ႇၵလႃႇဢေႃႈ။ ပိၵ်ႉသမ်ႉၶႃႈၸဝ်ႈသိုဝ်ႈတေႃႇသေၵေႃႈ ၶႃႈၸဝ်ႈဢမ်ႇမီးဢၵျူဝ်း၊ ၶႃႈၸဝ်ႈထူပ်းတုၵ်ႉၶႃႉဝူၺ်ႇတၼႃႇလႄႈ လႆႈဢူၵ်းလႆႈဢၢႆတီႈၶႃႈဢေႃႈ။
ၸဝ်ႈႁဝ်းလႄႇလဵပ်ႈလွမ်ႁႃၶႃႈၸဝ်ႈမိူၼ်ၸိူဝ်ႉၼင်ႇသၢင်ႇသီႈဢၼ်ၵျၢမ်းထၢမ်းလႄႈ ၼႄပျႃးတၢင်းဢၼ်လီဢၢမ်းဢၼ်ၸဝ်ႈႁဝ်းတိုၵ်းတေႃးၶႃႈၸဝ်ႈလၢႆၽဝ်ႇလၢႆပွၵ်ႈဢေႃႈ။
ၸဝ်ႈႁဝ်းဢဝ်သၢၵ်ႈသေႇဢၼ်မႂ်ႇမႃးယူႇၽၢႆႇၼိုင်ႈတင်းၶႃႈၸဝ်ႈလႄႈ တေႃးသႃႉတၢင်းၸႂ်မႆႈၶႂ်ႈၸႃႉၸဝ်ႈႁဝ်းၵေႃႈ၊ ယဵင်ႈၶႅၼ်းယႂ်ႇၼမ်မႃးတိၵ်းတိၵ်းတီႈ ၶႃႈၸဝ်ႈသေယဝ်ႉ၊ ႁႂ်ႈၶဝ်ၸိူဝ်းဢၼ်ႁဵတ်းရၢၼ်ႇသူႇတီႈၶႃႈၸဝ်ႈၼမ်ယဝ်ႉၼမ်ထႅင်ႈဢေႃႈ။
ၽြႃးပဵၼ်ၸဝ်ႈတီႈၶႃႈ။ ႁဵတ်းသင်လႄႈၸဝ်ႈႁဝ်းႁႂ်ႈၶႃႈၸဝ်ႈၵိူတ်ႇမႃးတီႈၶႃႈ၊ သင်ဢမ်ႇၼၼ်၊ၸႂ်ၶႃႈၸဝ်ႈပေႃးၶၢတ်ႇ ၸဵမ်မိူဝ်ႈၽူႈလႂ်ဢမ်ႇပႆႇလႆႈႁၼ်ၶႃႈၸဝ်ႈ သေၵေႃႉသေၵူၼ်းၼၼ်ႉယဝ်ႉ။
ၼင်ႇၼၼ်လႄႈ၊ၶႃႈၸဝ်ႈတၵ်းပဵၼ်ၸိူဝ်ႉၼင်ႇဢၼ်ယင်းဢမ်ႇပႆႇလႆႈပဵၼ်ၵူၼ်းသေယဝ်ႉ၊ လုၵ်ႉသေၵႃႈတီႈတွင်ႉမႄႈသေလႄႈဢဝ်သူင်ႇၵႂႃႇၸူးၵႃႈတီႈပႃႇႁဵဝ်ႈၵမ်းလဵဝ်ၼၼ်ႉယဝ်ႉ။
ၸူဝ်ႈတႃႇဢသၢၵ်ႈတၢၼ်းၶႃႈၸဝ်ႈၼၼ်ႉၵေႇၼႃႇပွတ်းၼႃႇတီႈၶႃႈဢေႃႈ။ ၶႅၼ်းတေႃႈပွႆႇၶႃႈၸဝ်ႈဝႆႉၵေႃႉလဵဝ်ၵူၺ်းႁႂ်ႈလႆႈသၢၵ်ႈသႃႇၸႂ်ၵမ်းဢွၼ်ႇၼိုင်ႈသေၵမ်းတီႈၶႃႈ။
ၸူဝ်ႈဢၼ်ၶႃႈၸဝ်ႈဢမ်ႇပႆႇၵႂႃႇၵႃႈတီႈတီႈဢၼ်ဢမ်ႇၸၢင်ႈၶိုၼ်းပွၵ်ႈမႃးလႆႈ၊ ၵႂႃႇၸူးတီႈမိူင်းလပ်းသိင်ႇဢၼ်ႁူမ်ႈငဝ်းတၢင်းတၢႆႁူမ်ႇသုမ်ႇဝႆႉ။
မိူင်းဢၼ်လပ်းသိင်ႇမိုတ်ႉၼႃႇ၊မိူင်းဢၼ်ႁူမ်ႈၵွင်ႉငဝ်းတၢင်းတၢႆ၊မိူင်းဢၼ်သုၵ်ႉသၢၵ်ႉ၊ မိူင်းဢၼ်တၢင်းလႅင်းယင်းပဵၼ်ဢၼ်လပ်းသိင်ႇလွၼ်ႉလွၼ်ႉၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ၸေႃႇၽႃႇ၊ ၵူၼ်းမဵဝ်း ၼေႇမတ်ႉ၊ လၢတ်ႈလႄႈဝႃႈၸမ်ႉ၊
“ၵႂၢမ်းပဝ်ႇၵႂၢမ်းလၢႆၸိူဝ်ႉၼင်ႇၼႆၼၼ်ႉၽူႈလႂ်တၵ်းဢမ်ႇၶိုၼ်းတွပ်ႇႁိုဝ်း၊ ၵေႃႉဢၼ်သူပ်းၼမ်ၵႂၢမ်းၶိူဝ်းၼႆႉၸၢင်ႈတၵ်းၵၢင်းလွတ်ႈဢပျတ်ႈလႆႈႁိုဝ်း။
ယေႃးၽႃႉ၊ ႟။ ပိူဝ်ႈၵႂၢမ်းဢၼ်မႂ်းလၢတ်ႈၼၼ်ႉထၢင်ႇႁဝ်းတေယူႇတဵတ်ႇတဵတ်ႇႁိုဝ်း၊ မိူဝ်ႈဢၼ်မႂ်းသႄႉသွမ်းၼၼ်ႉႁဝ်းဢမ်ႇၵိုင်ႇတၢၼ်ႇႁဵတ်းႁႂ်ႈမႂ်းဢူၵ်းဢၢႆႁိုဝ်း။
မႂ်းဢုပ်ႇဢၢတ်ႇဝႃႈ၊ၵႂၢမ်းမႂ်းပဵၼ်ၵႂၢမ်းဢၼ် မၢၼ်ႇမႅၼ်ႈၸိုဝ်ႈၸႂ်ႈလႄႈ မႂ်းဝႃႈမႂ်းပဵၼ်ၵေႃႉဢၼ်မူတ်းသႂ်ၵႃႈတီႈၽၢႆႇၼႃႈ ၽြႃးပဵၼ်ၸဝ်ႈဢေႃႈ။
ဢူဝ်း၊ႁႂ်ႈၽြႃးပဵၼ်ၸဝ်ႈမီးဢမိင်ႉသေၵမ်းလူၺ်ႈ၊ ႁႂ်ႈမၼ်းၸဝ်ႈၶိုၼ်းတွပ်ႇၵႂၢမ်းမႂ်းသေၵမ်းလူၺ်ႈ။
ႁႂ်ႈမၼ်းၸဝ်ႈဢဝ်ပိင်ႇၺႃႇဢၼ်လိုၵ်ႉဢၼ်လမ်ႇၼၼ်ႉၼႄပျႃးတီႈမႂ်းသေၵမ်းလူၺ်ႈ၊ လွင်ႈမၼ်းၸမ်ႉ၊ပိင်ႇၺႃႇၼၼ်ႉမီးလၢႆၸိူဝ်ႉ လၢႆမဵဝ်းဢေႃႈ။ ၽြႃးပဵၼ်ၸဝ်ႈပၼ်တၢမ်ႇဢပျတ်ႈဢၼ်ယင်းလဵၵ်ႉၵေႇသေဢၼ်မႂ်းတၵ်းလႆႈထိူၵ်ႈၶၢမ်ႇၼၼ်ႉဢေႃႈ။
မႂ်းၸႅတ်ႈထၢမ်ၸႅတ်ႈတူၺ်းလႄႈႁုႁၼ်လွင်ႈၽြႃးပဵၼ်ၸဝ်ႈလႆႈႁိုဝ်း၊ မႂ်းသွၵ်ႈႁႃတီႈသုတ်းတီႈတိူၵ်ႈၸဝ်ႈဢၼၼ်ႇတႃႉတၼ်းၶူဝ်းလႆႈႁိုဝ်း၊
ပိူဝ်ႈမၼ်းသုင်ၼႃႇသေတၢင်းသုင်ၽႃႉၵၢင်ႁၢဝ်လႄႈမႂ်းတၵ်းႁဵတ်းသင်လႆႈ၊ လိုၵ်ႉၼႃႇသေမိူင်းမရၼႃႉလႄႈမႂ်းတၵ်းႁဵတ်းၸိူဝ်ႉၼင်ႇႁိုဝ်ႁုလႆႈ။
တၢင်းဢၼ်ဢၢၼ်ႇဢၼ်တႅၵ်ႈမၼ်းၼၼ်ႉ ယၢဝ်းၼႃႇသေၼႃႈလိၼ်မိူင်းလႄႈ ယဵင်ႈၶႅၼ်းၵႂၢင်ႈၼႃႇသေၼမ်ႉ သမ်ႇမုၵ်ႈတြႃႇဢေႃႈ။
ပေႃးၽြႃးပဵၼ်ၸဝ်ႈတိၵမ်ဢဝ်လႄႈၸွႆးတၢင်ႇ ဢမုသႂ်ႇၸိုင်၊ ၽူႈလႂ်တၵ်းႁၢမ်ႈတၢပ်ႈႁႄႉၶႅၼ်မၼ်းၸဝ်ႈလႆႈ။
လွင်ႈမၼ်းၸမ်ႉ၊မၼ်းၸဝ်ႈႁုၸၵ်းၵေႃႉဢၼ်ႁၢႆႉဢၼ်မိူၵ်ႈၼၼ်ႉယူႇလႄႈ မၼ်းၸဝ်ႈႁုႁၼ်တုၸရိူၵ်ႈၵႃႈဢၼ်ၶဝ်ႁဵတ်းၼၼ်ႉဢေႃႈ။
ၵူၼ်းငိူဝ်ႈငႃႉတၵ်းပဵၼ်ၵေႃႉဢၼ်မီးပိင်ႇၺႃႇ လႆႈၼၼ်ႉ၊ တေႃႇမိူဝ်ႈဢၼ်မႃႉလီႈထိူၼ်ႇၵိူတ်ႇလုၵ်ႈ ပဵၼ်ၵူၼ်းမႃးၼၼ်ႉဢေႃႈ။
ယေႃးၽႃႉ၊ ႟။ မႄးႁူဝ်ၸႂ်မႂ်းႁႂ်ႈသိုဝ်ႈတေႃႇတႃႉ။ ယိုၼ်းမိုဝ်းၸူးတီႈၽြႃးပဵၼ်ၸဝ်ႈတႃႉ။
ပႄႇပႅတ်ႈတုၸရိူၵ်ႈဢၼ်မႂ်းႁဵတ်းလႄႈယႃႇႁႂ်ႈဢမုလွင်ႈဢၼ်ဢမ်ႇတြႃးမီးၼႂ်းႁိူၼ်းမႂ်းသေၵမ်း။
ပေႃးႁဵတ်းၸိူဝ်ႉၼင်ႇၼၼ်ၸိုင်၊မႂ်းတၵ်းလႆႈ ႁႅၼ်ၼႃႈမႂ်း၊ ဢၼ်ၵၢင်းလွတ်ႈတၢင်းဢၼ်ၵူဝ်ႈၵိူၵ်ႇ၊ဢမ်ႇမီးတၢင်းၵူဝ်လႄႈလႆႈတႄႇၼိမ်ယူႇဢေႃႈ။
မႂ်းတၵ်းလူင်လိုမ်းတုၵ်ႉၶႃႉတၢင်းၶၢၼ်ၸႂ်မႂ်း ၵႃႈမီးလႄႈ မႂ်းတေမၢတ်ႈတွင်းလႆႈမိူၼ်ၼမ်ႉဢၼ် လႆပူၼ်ႉၵႂႃႇၼၼ်ႉသေယဝ်ႉ။
ၸူဝ်ႈဢသၢၵ်ႈမႂ်းတၵ်းႁိူဝ်ႈႁိူင်းၼႃႇသေ ဢရွင်ႇၵၢင်ဝၼ်းတဵင်ႈ၊ ပိၵ်ႉသမ်ႉမိူဝ်ႈလဵဝ်ၼႆႉလပ်းသိင်ႇသေၵေႃႈတၵ်းပၢင်ႇၸိုၼ်ႈမိူၼ်ၶိင်ႇၵၢင်ၼႂ်ဢေႃႈ။
မႂ်းတၵ်းလႆႈယူႇလူင်ႉလီလွတ်ႈလီမီးတီႈမုင်ႈမွင်း၊ ပိူဝ်ႈဢၼ်ၽြႃးပဵၼ်ၸဝ်ႈတၵ်းၵႅတ်ႇၶႄႁႄႉၵင်ႈပၼ်မႂ်းလႄႈ ႁႂ်ႈမႂ်းလႆႈလိုဝ်ႈယူႇၼိမ်ၼိမ်လီလီၼၼ်ႉဢေႃႈ။
မိူဝ်ႈဢၼ်မႂ်းၼွၼ်းၼၼ်ႉမႂ်းတၵ်းတေဢမ်ႇလႆႈၵူဝ်ႁႄရၢၼ်ႇသူႇမႂ်းၸိူဝ်းၼၼ်ႉလႄႈ ၵူၼ်းၼမ်ၼႃႇတၵ်းဢွၼ်ၵၼ်ဝွၼ်းမႂ်းလႄႈယွၼ်းတၢင်းၸွႆႈထႅမ်ဢေႃႈ။
ႁႅင်းမၢၵ်ႇတႃၵူၼ်းႁၢႆႉၵူၼ်းမိူၵ်ႈၸိူဝ်းၼၼ်ႉတၵ်းဢူၼ်ႈၵႂႃႇ သဵၼ်ႈတၢင်းဢၼ်ၶဝ်တၵ်းလႆႈလွတ်ႈၼၼ်ႉလပ်ႉႁၢႆၵႂႃႇလႄႈ တၢင်းဢၼ်ၶဝ်မုင်ႈမွင်းၸိုင်၊ပဵၼ်တၢင်းတၢႆမဵဝ်းလဵဝ်ၵူၺ်းဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ယေႃးၽႃႉ၊ ၶိုၼ်းလၢတ်ႈလႄႈဝႃႈၸမ်ႉ၊
“သူပဵၼ်ၵူၼ်းဢၼ်တၢင်တူဝ်ၵူၼ်းတင်းလၢႆလႄႈပိင်ႇၺႃႇၺၢၼ်ႇၵႃႈမီးတင်းလၢႆၵေႃႈတၵ်းတၢႆလူၺ်ႈၵၼ်တင်းသူၵႂႃႇဝႃႈၼႆ၊ ဢမ်ႇလူဝ်ႇထၢင်ႇထိူမ်ယဝ်ႉ။
ၵႃႈဢၼ်သူၸၢင်ႈႁုႁၼ်ၼၼ်ႉၵဝ်ၵေႃႈ ႁုႁၼ်ယူႇလႄႈ ၵဝ်ယဵင်ႈၶႅၼ်းယုတ်ႈယွမ်းၼႃႇသေသူဢမ်ႇၸႂ်ႈ။
ၵဝ်ၼႆႉ၊လႆႈၶၢမ်ႇတၢင်းဢၼ်ၵေႃႉသႄႈၵဝ်တင်းလၢႆႁဵတ်းပျၢၵ်ႈၶူဝ်၊ ၵဝ်ပဵၼ်ၵေႃႉဢၼ်ၵၢဝ်ႇႁႃၽြႃးပဵၼ်ၸဝ်ႈလႄႈမၼ်းၸဝ်ႈဢိူဝ်သေၵေႃႈ၊ ၵေႃႉဢၼ်သိုဝ်ႈတေႃႇ၊ၵေႃႉဢၼ်ၵၢင်းလွတ်ႈ ဢပျတ်ႈၼၼ်ႉ၊ လႆႈၶၢမ်ႇတၢင်းဢၼ်ပိူၼ်ႈႁဵတ်းပျၢၵ်ႈ ႁဵတ်းၶူဝ်ဢေႃႈ။
ၼႂ်းၵၢင်ၸႂ်ၵေႃႉဢၼ်ၶျၢမ်းသႃႇၼၼ်ႉႁဵတ်းဢမ်ႇပေႃးၼင်ႇႁိုဝ်တီႈၵူၼ်းဢၼ်ၶၢမ်ႇတုၵ်ႉၶႃႉတၢင်းၽၢၼ်ၼၼ်ႉ၊ တၢင်းတုၵ်ႉၶႃႉမႄးႁႅၼ်းဝႆႉပုၼ်ႈၶဝ်ၸိူဝ်းဢၼ်ၸၢင်ႈပရၢတ်ႈလူမ်ႉၼၼ်ႉဢေႃႈ။
ၶဝ်ၸိူဝ်းဢၼ်ပဵၼ်ၽူႈလၵ်ႉၵူၼ်းၸူၼ်လႄႈလႆႈယူႇလီၵိၼ်လီသေယဝ်ႉ၊ ၶဝ်ၸိူဝ်းဢၼ်ပူၼ်ႉလိူဝ်ဢႃႇၼႃႇၽြႃးပဵၼ်ၸဝ်ႈၼၼ်ႉၸၢင်ႈလွတ်ႈၽေးဢၼ်ဝႃႈ၊ ၶဝ်ၸိူဝ်းဢၼ်ဢဝ်ၽြႃးၶဝ်ဝႆႉ ၵႃႈၼႂ်းမိုဝ်းၶဝ်ၼၼ်ႉ။
တွင်ႈထၢမ်တီႈတူဝ်သတ်းတင်းလၢႆတႃႉ။ ၶဝ်တၵ်းသွၼ်ပၼ်တီႈသူဢေႃႈ။ ၼူၵ်ႉတင်းလၢႆၵေႃႈတၵ်းမွၵ်ႇလၢတ်ႈၼႄ သူဢေႃႈ။
တွင်ႈထၢမ်တီႈလိၼ်မိူင်းတႃႉ။ မၼ်းတၵ်းသွၼ်ပၼ်သူဢေႃႈ။ ပႃပၢင်ႇလၢႆႇတင်းလၢႆၵေႃႈတၵ်းႁေႃးလၢတ်ႈပၼ်တီႈသူဢေႃႈ။
ၶဝ်ၸိူဝ်းၼႆႉတင်းသဵင်ႈတင်းလူင်ႁုလွင်ႈဢၼ်ၽြႃးပဵၼ်ၸဝ်ႈ၊ ဢဝ်မိုဝ်းႁဵတ်းပဵၼ်လွင်ႈတၢင်းၸိူဝ်းၼႆႉၼၼ်ႉယူႇဢေႃႈ။
ၸီႇဝႃႉဢသၢၵ်ႈသတ်ႉတဝႃႇၵူႈမဵဝ်းဢၼ် ဢသၢၵ်ႈလိပ်းယူႇ၊ ဢိၵ်ႇတင်းၵူၼ်းတင်းလၢႆဢၼ်ထူၺ်ႈၸႂ်ၶဝ်ႈထူၺ်ႈၸႂ်ဢွၵ်ႇၼၼ်ႉမီးၼႂ်းမိုဝ်း မၼ်းၸဝ်ႈဢေႃႈ။
ၸိူဝ်ႉၼင်ႇဢၼ်လိၼ်ႉၸိမ်းတူၺ်းဢရႃႉသႃႇတၢင်းၵိၼ်တၢင်းၶူပ်းၼၼ်ႉ၊ ႁူသူၸၢင်ႈထွမ်ႇတူၺ်းထွမ်ႇဢဝ် ၼမ်ႉၵႂၢမ်းဢေႃႈ။
ၵူၼ်းထဝ်ႈၵူၼ်းၵႄႇမီးပိင်ႇၺႃႇလႄႈ တၢင်းဢၼ်ဢသၢၵ်ႈယၢဝ်းယိုၼ်းၼၼ်ႉ ႁႂ်ႈမီးၺၢၼ်ႇဢေႃႈ။
ၽြႃးပဵၼ်ၸဝ်ႈၸမ်ႉ၊မီးပိင်ႇၺႃႇဢိၵ်ႇတင်း တၼ်းၶူဝ်းလႄႈ မီးတၢင်းႁုတၢင်းႁၼ်ပုၼ်ႈတႃႇပၼ်တၢင်းၵျၢမ်ႇ တၢင်းပွင်ဢေႃႈ။
ပေႃးၽြႃးပဵၼ်ၸဝ်ႈၵိူၼ်ႇယႃႉပႅတ်ႈၸိုင်၊ၽူႈလႂ်တၵ်းၶိုၼ်းတႄႇၶိုၼ်းတင်ႈလႆႈ၊ ပေႃးၽြႃးပဵၼ်ၸဝ်ႈတိၶင်ၵူၼ်းဝႆႉလႄႈၽူႈလႂ်တၵ်းပွႆႇလွတ်ႈပၼ်လႆႈ။
ပေႃးၽြႃးပဵၼ်ၸဝ်ႈႁၢမ်ႈၽူၼ်ဝႆႉၼၼ်ႉ၊ပဵၼ်တၢင်းဢၼ်ၽႃႉလႅင်ႉလႄႈ ပေႃးမၼ်းၸဝ်ႈၶိုၼ်းပွႆႇပၼ်ၼမ်ႉၸိုင်၊ပဵၼ်တၢင်းဢၼ်ၼမ်ႉထူမ်ႈဢေႃႈ။
ၽြႃးပဵၼ်ၸဝ်ႈပျေႉၸုမ်ႇဝႆႉတၼ်းၶူဝ်းဢိၵ်ႇတင်းၺၢၼ်ႇလႄႈ ၸႃႉၸဵမ်ၵေႃႉဢၼ်လႆႈၶၢမ်ႇတၢင်းဢၼ်ပႅတ်ႉလႅၼ်ဢိၵ်ႇတင်းၵေႃႉဢၼ်ပႅတ်ႉလႅၼ်ၼၼ်ႉ၊ မီးၼႂ်းမိုဝ်းမၼ်းၸဝ်ႈဢေႃႈ။
မၼ်းၸဝ်ႈယုၵ်ႉသိမ်းဢဝ်ပိင်ႇၺႃႇၵႃႈတီႈမူးမၢတ်ႈၽွင်းမိူင်းတင်းလၢႆလႄႈ ႁဵတ်းႁႂ်ႈၵူၼ်းလူင်ဢၼ်ၸီႇယၢင်ႇတြႃးတင်းလၢႆပဵၼ်ဢၼ်ငိူဝ်ႈငႃႉၵႂႃႇဢေႃႈ။
မၼ်းၸဝ်ႈၶျႃးဢရႃႇၶုၼ်ႁေႃၶမ်းတင်းလၢႆ တူၵ်းပႅတ်ႈလႄႈ ဢဝ်ၶဝ်ၶင်ဝႆႉၶျုၵ်ႈဝႆႉဢေႃႈ။
မၼ်းၸဝ်ႈတိၵမ်သိမ်းဢဝ်ယဵၸ်ႈပရေႃးႁဵၵ်ႈ တင်းလၢႆၵႂႃႇလႄႈႁႂ်ႈၶဝ်ၸိူဝ်းဢၼ်ႁႅင်းယႂ်ႇၼႃႇၼၼ်ႉတူၵ်းသုမ်းဢေႃႈ။
မၼ်းၸဝ်ႈႁႂ်ႈသူပ်းၶဝ်ၸိူဝ်းဢၼ်မီးတၢင်းၵတ်ႉတၢင်းၶၼ်ၼၼ်ႉဢႃႉလႄႈ ယုၵ်ႉသိမ်းဢဝ်ပိင်ႇၺႃႇၵူၼ်းထဝ်ႈၵူၼ်းၵႄႇတင်းလၢႆဢေႃႈ။
မၼ်းၸဝ်ႈႁႂ်ႈသရေႇၶဝ်ၸိူဝ်းဢၼ်ပဵၼ်ၸဝ်ႈပဵၼ်ၸွမ်ၼၼ်ႉလုလႅဝ်လႄႈ၊ တႅပ်းပႅတ်ႈဢဵၼ်ႁႅင်းၵေႃႉဢၼ်မီးႁႅင်းၼၼ်ႉ ႁႂ်ႈသုမ်းႁႂ်ႈလုဢေႃႈ။
မၼ်းၸဝ်ႈႁႂ်ႈလွင်ႈဢၼ်လိုၵ်ႉဢၼ်လမ်ႇၼၼ်ႉထၢင်ႇသႃးမႃးသေၵႃႈၼႂ်းတၢင်းဢၼ် လပ်းသိင်ႇလႄႈ ဢဝ်ႁူမ်ႈတၢင်းတၢႆၼႄပျႃးၵႃႈၼႂ်း ဢၼ်လႅင်းဢေႃႈ။
မၼ်းၸဝ်ႈႁဵတ်းႁႂ်ႈၸိူဝ်ႉၶိူဝ်းမဵဝ်းၵူၼ်း ၶိုၼ်ႈယႂ်ႇမႂ်ႇသုင်သေယဝ်ႉ၊ သမ်ႉယႃႉၽဵဝ်ႈပႅတ်ႈမဵဝ်းၵူၼ်း ၸိူဝ်းၼၼ်ႉဢေႃႈ။ မၼ်းၸဝ်ႈႁႂ်ႈမဵဝ်းၵူၼ်းယႂ်ႇၽႄၼမ်ၵိုၼ်းမႃးလႄႈ သမ်ႉႁႂ်ႈၶဝ်ၵႂႃႇတူၵ်းပဵၼ်ၶႃႈဢေႃႈ။
မၼ်းၸဝ်ႈႁဵတ်းႁႂ်ႈၵူၼ်းဢၼ်ပဵၼ်ၵႄႇပဵၼ်ႁူဝ်ၶဝ်ငိူဝ်ႈငႃႉလႄႈ ပွႆႇပႅတ်ႈႁႂ်ႈၶဝ်ၵႂင်ၵႂႃႇၵႂင်မႃးယူႇၼႂ်းထိူၼ်ႇဢၼ်ဢမ်ႇမီးသဵၼ်ႈတၢင်းၼၼ်ႉဢေႃႈ။
ၶဝ်ၼၼ်ႉယင်းဢမ်ႇမီးဢၼ်လႅင်းလႄႈလႆႈဢွၼ်ၵၼ်ငူမ်းသူးငူမ်းသႃးယူႇၵႃႈၼႂ်းဢၼ်လပ်းသိင်ႇဢေႃႈ။ မၼ်းၸဝ်ႈႁႂ်ႈၶဝ်ဝၢင်ႇဝီႈဝၢင်ႇဝိူဝ်ႈယူႇမိူၼ်ၸိူဝ်ႉၼင်ႇၵူၼ်းမဝ်းလဝ်ႈဢေႃႈ။
တူၺ်းလူး။ ၵူႈၸိူဝ်ႉၵူႈပိူင်ၼႆႉမၢၵ်ႇတႃၵဝ်လႆႈႁၼ် ႁူၵဝ်ၵေႃႈလႆႈငိၼ်းလႄႈႁုၸႅင်ႈယဝ်ႉ။
ၵႃႈဢၼ်သူၸၢင်ႈႁုႁၼ်ၼၼ်ႉၵဝ်ၵေႃႈ ၸၢင်ႈႁုႁၼ်ဢေႃႈ။ ၵဝ်ယဵင်ႈၶႅၼ်းယုတ်ႈယွမ်းၼႃႇသေသူဢမ်ႇၸႂ်ႈ။
ၵဝ်မီးဢလူဝ်ႇၶႂ်ႈလၢတ်ႈတီႈၸဝ်ႈဢၼၼ်ႇတႃႉတၼ်းၶူဝ်းလႄႈ ၵဝ်ၶႂ်ႈတိူင်ႇပၢင်ႇတွင်ႈထၢမ်ၵၼ်တင်း ၽြႃးပဵၼ်ၸဝ်ႈဢေႃႈ။
သူၸမ်ႉ၊ဢဝ်မုသႃႇႁဵတ်းပဵၼ်ထုၼ်ၽိူၵ်ႇ တႃးလႄႈ ပဵၼ်မေႃယႃဢၼ်ဢမ်ႇပွင်ႇလွင်ႈၵႃႈသင် ၼၼ်ႉဢေႃႈ။
ယင်းဢမ်ႇတၵ်ႉသဵင်လႄႈယူႇတဵတ်ႇတဵတ်ႇတႃႉ။ ပိူၼ်ႈယင်းတေထၢင်ႇဝႃႈ၊သူမီးပိင်ႇၺႃႇဢေႃႈ။
ဢွၼ်ၵၼ်ထွမ်ႇငိၼ်းမိူဝ်ႈဢၼ်ၵဝ်လၢတ်ႈၼႄ ဢမုၵဝ်ၼႆႉလႄႈ ပႂ်ႉထွမ်ႇငိၼ်းၵႂၢမ်းဢၼ်ၵဝ်တွပ်ႇလၢတ်ႈၼႆႉလူး။
သူတၵ်းယူႇၽၢႆႇၽြႃးပဵၼ်ၸဝ်ႈသေလႄႈလၢတ်ႈၵႂၢမ်းဢၼ်ဢမ်ႇၸိုဝ်ႈဢမ်ႇၸႂ်ႈႁိုဝ်း၊ သူတၵ်းယူႇၽၢႆႇမၼ်းၸဝ်ႈသေလႄႈလၢတ်ႈၵႂၢမ်းမုသႃႇႁိုဝ်း။
သူတၵ်းၽွမ်ႉၽၢႆႇမၼ်းၸဝ်ႈသေလႄႈ ၵႂႃႇတွပ်ႇလၢတ်ႈပုၼ်ႈဢမုမၼ်းၸဝ်ႈၵႃႈၼႂ်းလုမ်းႁိုဝ်း။
ပေႃးၽြႃးပဵၼ်ၸဝ်ႈသွၵ်ႈႁႃၸႅတ်ႈတူၺ်းသူ ၸေးၸေးၸိုင်၊ မၼ်းၸဝ်ႈတေထူပ်းႁၼ်သူပဵၼ် ၵူၼ်းလီယူႇႁိုဝ်း၊ ၸိူဝ်ႉၼင်ႇဢၼ်သူပႅတ်ႉလႅၼ်ၵူၼ်းၼၼ်ႉ၊ သူထၢင်ႇသူတေပႅတ်ႉလႅၼ် ၽြႃးပဵၼ်ၸဝ်ႈလႆႈႁိုဝ်း။
ပေႃးသူသိူင်ႇမႅပ်းၸႂ်သၽေႃးဢၼ်ထွၵ်ႈလူၺ်ႈၼႃႈပိူၼ်ႈလႄႈဢဝ်ၸႂ်ပိူၼ်ႈၸိုင်၊ မၼ်းၸဝ်ႈတၵ်းသင်ႇသွၼ်သုင်းမႃႉသူဢမၢၼ်ႇၶၼ်ပဵၼ်ဢေႃႈ။
တၼ်းၶူဝ်းဢႃႇၼုၽေႃႇမၼ်းၸဝ်ႈတၵ်းႁႂ်ႈသူၵူဝ်ႁႄဢမ်ႇၸႂ်ႈႁိုဝ်း၊ မုၼ်ၵုင်ႇမၼ်းၸဝ်ႈဢၼ်လီၵူဝ်လီႁႄတၵ်းႁႂ်ႈသူတူၵ်းၸႂ်ဢမ်ႇၸႂ်ႈႁိုဝ်း။
ထုင်းၵႂၢမ်းတီႈလီမၢတ်ႈလီတွင်းသူၼၼ်ႉပဵၼ်ၸိူဝ်ႉၼင်ႇတဝ်ႈၼၼ်ႉလႄႈ ၵႂၢမ်းတွပ်ႇၵႂၢမ်းထဵင်သူၼၼ်ႉဢူၼ်ႈဢွၼ်ႇမိူၼ်လိၼ်ၼဵဝ်ဢေႃႈ။
ယင်းဢမ်ႇတၵ်ႉသဵင်လႄႈယူႇတဵတ်ႇတဵတ်ႇႁႂ်ႈၵဝ်လႆႈဢၶႂၢင်ႉဢၼ်လၢတ်ႈၵႂၢမ်းလူး၊ မၼ်းတေပဵၼ်ၸိူဝ်ႉႁိုဝ်တီႈၵဝ်မႃးၵေႃႈ ႁႂ်ႈမၼ်းပဵၼ်တႃႉ။
ၵဝ်တၼ်းဝႆႉပုၼ်ႈတႃႇတေၸုၼ်ႉဢသၢၵ်ႈၵဝ်ယဝ်ႉ၊ မိုဝ်းၵဝ်ၼၼ်ႉသမ်ႉတၵ်းယိပ်းၵမ်ဢဝ်ဢသၢၵ်ႈၵဝ်ဝႆႉၸိူဝ်ႉၼင်ႇႁိုဝ်။
ၵဝ်ၼႆႉဢမ်ႇမီးတီႈလီမုင်ႈမွင်းၵႃႈသင်ယဝ်ႉလႄႈ ပေႃးၽြႃးပဵၼ်ၸဝ်ႈၶႂ်ႈဢဝ်ၵဝ်တၢႆၵေႃႈႁႂ်ႈဢဝ်တၢႆသေၵမ်းၶႃႈ၊ ၵဝ်တၵ်းဢဝ်ဢမုၵဝ်ၼႆႉတၢင်ႇလဝ်ႈထိုင် မၼ်းၸဝ်ႈဢေႃႈ။
ဢၼ်ၼႆႉၵူၺ်းတၵ်းပဵၼ်လွင်ႈတၢင်းဢၼ် တၵ်းၵႄႇၶျွတ်ႈဢဝ်ၵဝ်ဢေႃႈ။ ၵူၼ်းၵေႃႉဢၼ်ဢမ်ႇၵူဝ်ယမ်ၽြႃးပဵၼ်ၸဝ်ႈၼၼ်ႉ တေဢမ်ႇလႆႈၶဝ်ႈၸူးၵႃႈတီႈၽၢႆႇၼႃႈ မၼ်းၸဝ်ႈလႆႈ။
တေႃႈလဵဝ်ၼႆႉထွမ်ႇငိၼ်းၵႂၢမ်းဢၼ်ၵဝ်လၢတ်ႈၼႆႉသေလႄႈမၢတ်ႈတွင်းဝႆႉလီလီတႃႉ။
ၵဝ်တၼ်းဝႆႉတႃႇတေဢဝ်ဢမုၵဝ်ၼႆႉလဝ်ႈလၢတ်ႈ၊ ၵွပ်ႈပိူဝ်ႈဢၼ်ၵဝ်ႁုလွင်ႈဢၼ်ၵဝ်ၵၢင်းလွတ်ႈတင်းဢပျတ်ႈၼၼ်ႉဢေႃႈ။
ၵေႃႉဢၼ်တၵ်းယူႇၽၢႆႇၼိုင်ႈတင်းၵဝ်လႄႈၽုၺ်ႇဢွၵ်ႇၼႄဢမုၵဝ်ၼၼ်ႉၸမ်ႉ၊ပဵၼ်ၽူႈလႂ်၊ ပေႃးမီးၸိုင်၊ၵဝ်တၵ်းတၼ်းဝႆႉတႃႇသေႇလႄႈၶၢမ်ႇတၢႆတဵတ်ႇတဵတ်ႇယဵၼ်ယဵၼ်ဢေႃႈ။
ၶႅၼ်းတေႃႈၵိုတ်းပႅတ်ႈသွင်မဵဝ်းၼႆႉသေတီႈၶႃႈၸဝ်ႈသေၵမ်းတီႈၶႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ၶႃႈၸဝ်ႈ တၵ်းဢမ်ႇပၢႆႈမႅပ်းသေၵႃႈတီႈၸဝ်ႈႁဝ်းၶႃႈ။
ၶႅၼ်းတေႃႈယိုတ်းပႅတ်ႈတၢင်းဢၼ်ပၼ်တၢမ်ႇ တီႈၶႃႈၸဝ်ႈ၊ဢိၵ်ႇတင်း ယိုတ်းပႅတ်ႈတၢင်းဢၼ်လီၵူဝ်လီႁႄဢၼ်ၸဝ်ႈႁဝ်းႁႂ်ႈၶႃႈၸဝ်ႈလႆႈတူၵ်းၸႂ်ၼၼ်ႉ သေၵမ်းတီႈၶႃႈ။
ၼင်ႇၼၼ်လႄႈၶႅၼ်းတေႃႈမီးဢမိင်ႉတီႈၶႃႈၸဝ်ႈသေၵမ်းတီႈၶႃႈ၊ ၶႃႈၸဝ်ႈတၵ်းၶိုၼ်းလဝ်ႈလၢတ်ႈတီႈၶႃႈဢေႃႈ။ ဢမ်ႇၼၼ်ၵေႃႈႁႂ်ႈၶႃႈၸဝ်ႈလဝ်ႈလၢတ်ႈလႄႈ ၸဝ်ႈႁဝ်းၶႅၼ်းတေႃႈၶိုၼ်းဢိူဝ်သေၵမ်းတီႈၶႃႈ။
တုၸရိူၵ်ႈဢၼ်ၶႃႈၸဝ်ႈႁဵတ်းမႅၼ်ႈၼၼ်ႉၼမ်ထၢၼ်ႇလႂ်တီႈၶႃႈ၊ ႁႂ်ႈၶႃႈၸဝ်ႈလႆႈႁုတၢင်းၽိတ်းဢိၵ်ႇတင်းဢပျတ်ႈၶႃႈၸဝ်ႈၸိူဝ်းၼၼ်ႉသေၵမ်းတီႈၶႃႈ။
ႁဵတ်းသင်လႄႈၸဝ်ႈႁဝ်းဝၢႆႇၼႃႈပႅတ်ႈသေ ၵႃႈတီႈၶႃႈၸဝ်ႈလႄႈ မၢတ်ႈၶႃႈၸဝ်ႈပဵၼ်ရၢၼ်ႇသူႇၸဝ်ႈႁဝ်း ၸိူဝ်ႉၼင်ႇႁိုဝ်တီႈၶႃႈ။
ၸဝ်ႈႁဝ်းၶႂ်ႈႁဵတ်းႁႂ်ႈၶႃႈၸဝ်ႈလႆႈတူၵ်းၸႂ်ႁိုဝ်း၊ၶႃႈၸဝ်ႈပဵၼ်ၼင်ႇမႂ်မႆႉဢၼ်လူမ်းထူဝ်းပတ်ႉ ၼၼ်ႉၵူၺ်းၶႃႈဢေႃႈ။ ၸဝ်ႈႁဝ်းတၵ်းလိုပ်ႈၸွမ်းလမ်းၸွမ်း တူဝ်ၶႃႈၸဝ်ႈဢၼ်မိူၼ်ၸိူဝ်ႉၼင်ႇၽိူင်းႁႅင်ႈ ၼၼ်ႉၶႃႈႁိုဝ်း။
ၸဝ်ႈႁဝ်းတၢင်ႇဢပျတ်ႈဢၼ်ၶူမ်ၼႃႇတီႈၶႃႈၸဝ်ႈလႄႈဢဝ်လွင်ႈတၢင်းၼၼ်ႉ၊ တႅမ်ႈမၢႆဝႆႉ၊ႁႂ်ႈၶႃႈၸဝ်ႈၶၢမ်ႇတၢမ်ႇဢပျတ်ႈ ဢၼ်ၶႃႈၸဝ်ႈႁဵတ်းမႅၼ်ႈၸဵမ်မိူဝ်ႈဢၼ်ဢသၢၵ်ႈယင်းလဵၵ်ႉယင်းၼုမ်ႇၼၼ်ႉ တီႈၶႃႈဢေႃႈ။
ၸဝ်ႈႁဝ်းဢဝ်တိၼ်ၶႃႈၸဝ်ႈသႂ်ႇထိၵ်ႈသႂ်ႇထၢင်ႇ ဝႆႉလႄႈ ပႂ်ႉတူၺ်းယၢင်ႈတိၼ်ၶႃႈၸဝ်ႈၵူႈယၢင်ႈၵူႈယၢင်ႈ ဢိၵ်ႇတင်း ၸႅတ်ႈသေးႁွႆးတိၼ်ၶႃႈၸဝ်ႈတီႈၶႃႈဢေႃႈ။
ၵွပ်ႈပိူဝ်ႈဢၼ်ႁဵတ်းၸိူဝ်ႉၼင်ႇၼၼ်လႄႈ၊ၶႃႈၸဝ်ႈလႆႈယွၵ်းယွႆႈၵႂႃႇမိူၼ်ၸိူဝ်ႉၼင်ႇ၊ မႆႉဢၼ်ၽင်ႉဢုလုလႅဝ်၊ဢိၵ်ႇတင်းမိူၼ်ၸိူဝ်ႉၼင်ႇၶူဝ်းၼုင်ႈဢၼ်မႅင်းၶူပ်းၵိၼ်ၼၼ်ႉ တီႈၶႃႈယဝ်ႉ။
ၵူၼ်းႁဝ်းၵႃႈဢၼ်ၵိူတ်ႇလဵင်ႉမႃးတီႈမႄႈယိင်းၼၼ်ႉယူႇလႆႈဢမ်ႇပေႃးႁိုင်လႄႈ တဵမ်ဝႆႉတင်းတုၵ်ႉၶႃႉတၢင်းၽၢၼ် လွၼ်ႉလွၼ်ႉဢေႃႈ။
ႁဝ်းၸၢင်ႈယႂ်ႇမႃးလႄႈသမ်ႉႁဵဝ်ႇႁႅင်ႈၵႂႃႇၶၼ်ၽႂ်းၼႃႇမိူၼ်ၸိူဝ်ႉၼင်ႇလူင်ႇမွၵ်ႇဢေႃႈ။ ႁဝ်းၸၢင်ႈႁၢႆၵႂႃႇမိူၼ်ၸိူဝ်ႉၼင်ႇ ႁူမ်ႈၵွင်ႉငဝ်းဢေႃႈ။
ၽြႃးပဵၼ်ၸဝ်ႈတီႈၶႃႈ။ ၸဝ်ႈႁဝ်းတၵ်းလူတူၺ်းၵူၼ်းၸိူဝ်ႉၼင်ႇၼႆတီႈၶႃႈႁိုဝ်း၊ ဢမ်ႇၼၼ်ၵေႃႈၸဝ်ႈႁဝ်းတၵ်းၸႅတ်ႈထၢမ်ၸႅတ်ႈတူၺ်းၶႃႈၸဝ်ႈလႄႈ ၸီႇယၢင်ႇတြႃးတီႈၶႃႈၸဝ်ႈတီႈၶႃႈႁိုဝ်း။
ၽူႈလႂ်ႁႂ်ႈလွင်ႈတၢင်းဢၼ်မူတ်းသႂ်ဢွၵ်ႇသေ ၵႃႈၼႂ်းလွင်ႈတၢင်းဢၼ်၊ ဢမ်ႇမူတ်းသႂ်မႃးလႆႈတီႈၶႃႈ။ ဢမ်ႇမီးၽူႈလႂ် ႁႂ်ႈဢွၵ်ႇမႃးလႆႈတီႈၶႃႈ။
ၵွပ်ႈပိူဝ်ႈၸဝ်ႈႁဝ်းမၢတ်ႈမၢႆမိုဝ်ႉဝၼ်းမၼ်းတင်းလၢႆလႄႈ ႁုတၢင်းဢၼ်မၼ်းတၵ်းလႆႈယူႇလၢႆလိူၼ်ၼၼ်ႉသေယဝ်ႉ၊ ဝႆႉတၢင်းဢၼ်ၶၼ်ႈဢၼ်ၶႅၼ်ႈဢၼ်မၼ်းဢမ်ႇပူၼ်ႉဢမ်ႇပႅၼ်လႆႈၼၼ်ႉလႄႈ။
ၶႅၼ်းတေႃႈဝၢႆႇၼႃႈၸဝ်ႈႁဝ်းပႅတ်ႈသေ ၵႃႈတီႈမၼ်းလႄႈ ႁႂ်ႈမၼ်းလႆႈမူၼ်ႈလႆႈသိူဝ်းၼႂ်းမိုဝ်ႉဝၼ်းမၼ်းၵႂႃႇ မိူၼ်ၸိူဝ်ႉၼင်ႇၵေႃႉဢၼ်ၵိၼ်ၸၢင်ႈ ၵိၼ်ငႃၼၼ်ႉသေၵမ်းတီႈၶႃႈ။
တူၼ်ႈမႆႉဢၼ်ပွမ်ႈလူမ်ႉၼၼ်ႉယင်းမီးတီႈလီမုင်ႈမွင်းဝႃႈ၊ မၼ်းတၵ်းတႅၵ်ႇဢွၵ်ႇယွတ်ႈလႄႈႁုၼ်ႈမႃးယူႇလူးၵွၼ်ႇဢေႃႈ။
ပိၵ်ႉသမ်ႉႁၢၵ်ႈမၼ်းၵႄႇၵႂႃႇမွင်ၵႂႃႇသေလႄႈ တေႃမၼ်းၵႃႈၼိူဝ်လိၼ်တၢႆၵႂႃႇယဝ်ႉ သေၵေႃႈ။
ၵွပ်ႈပိူဝ်ႈဢၢႆၼမ်ႉလႄႈမၼ်းၸၢင်ႈတႅၵ်ႇၵိင်ႇဢွၵ်ႇၽိူဝ်ႁုၼ်ႈမႃး၊ မိူၼ်ၸိူဝ်ႉၼင်ႇတူၼ်ႈမႆႉၼုမ်ႇဢေႃႈ။
ၵူၼ်းၸမ်ႉ၊တၢႆယဝ်ႉလႄႈပူၺ်ႇလၢၼ်ႈ လုလႅဝ်ၵႂႃႇသေယဝ်ႉ၊ ၶျုၵ်ႈဢသၢၵ်ႈမၼ်းယဝ်ႉလႄႈမၼ်းသမ်ႉ မီးယူႇၵႃႈတီႈလႂ်။
မိူၼ်ၸိူဝ်ႉၼင်ႇဢၼ်ၼမ်ႉႁႅင်ႈသေၵႃႈတီႈ ဢိူင်ႇၼမ်ႉ၊ဢိၵ်ႇတင်း ၸိူဝ်ႉၼင်ႇဢၼ်ၼမ်ႉႁွင်ႈယူတ်းၵႂႃႇ ႁႅင်ႈၵႂႃႇၼၼ်ႉ။
ၵူၼ်းၵေႃႈတၢႆၵႂႃႇလႄႈၵမ်းလိုၼ်းဢမ်ႇလုၵ်ႉၶိုၼ်း၊ ၵမ်းလိုၼ်းဢမ်ႇတိုၼ်ႇမႃးတေႃႇထိုင်ႁွတ်ႈၽႃႉၵၢင်ႁၢဝ်သဵင်ႈႁၢႆသုတ်းၵႂႃႇလႄႈ ဢမ်ႇလႆႈၶၢမ်ႇတၢင်းဢၼ်ပူၵ်းတိုၼ်ႇသေၵႃႈၼႂ်းတၢင်းဢၼ်ၼွၼ်းလပ်းၼၼ်ႉတီႈၶႃႈ။
ၶႃႈၸဝ်ႈၶႂ်ႈႁႂ်ႈၸဝ်ႈႁဝ်းဢဝ်ၶႃႈၸဝ်ႈသိူင်ႇဝႆႉၵႃႈၼႂ်းမိူင်းမရၼႃႉလႄႈ ႁႂ်ႈၶႃႈၸဝ်ႈလႆႈတဵတ်ႇမႅပ်းယူႇတေႃႇထိုင်ႁွတ်ႈတေႃးသႃႉၸဝ်ႈႁဝ်းထၢတ်ႇယဵၼ်ၵႂႃႇသေၵမ်းၶႃႈ၊ ႁႂ်ႈၸဝ်ႈႁဝ်းမၵ်းၶိၼ်းဝႆႉၶိင်ႇမၼ်းတီႈၶႃႈၸဝ်ႈသေလႄႈ ၶုၵ်းၸႂ်လႆႈၶႆႈၸႂ်ထူပ်းၶႃႈၸဝ်ႈသေၵမ်းတီႈၶႃႈ။
ၵူၼ်းၼႆႉပေႃးတၢႆၸိုင်၊ဢသၢၵ်ႈတၵ်းၶိုၼ်းလိပ်းတီႈၶႃႈႁိုဝ်း၊ ၼႂ်းၸူဝ်ႈဢၼ်ၶႃႈၸဝ်ႈယင်းၵိုတ်ႉႁၢပ်ႇ ၼႃႈၵၢၼ်ယူႇၼႆႉၼၼ်ႉ ၶႃႈၸဝ်ႈတၵ်းပႂ်ႉထႃႈတေႃႇထိုင်ႁွတ်ႈ ၶိင်ႇဢၼ်လႆႈလွတ်ႈၼၼ်ႉတီႈၶႃႈဢေႃႈ။”
ၸဝ်ႈႁဝ်းႁွင်ႉၶႃႈၸဝ်ႈသေၵမ်းတီႈၶႃႈ၊ ၶႃႈၸဝ်ႈတၵ်းၶိုၼ်းဢိူဝ်တီႈၶႃႈဢေႃႈ။ ၼင်ႇၼၼ်လႄႈၸဝ်ႈႁဝ်းတၵ်းၸူမ်းၸႂ် လူၺ်ႈၵၼ်တင်းၶႃႈၸဝ်ႈဢၼ်၊ ၸဝ်ႈႁဝ်းၽၢၼ်ႇသၢင်းႁဵတ်းပဵၼ်ဝႆႉၼၼ်ႉ တီႈၶႃႈဢေႃႈ။
ၸဝ်ႈႁဝ်းၼပ်ႉဢၢၼ်ႇယၢင်ႈတိၼ်ၶႃႈၸဝ်ႈ ၵူႈယၢင်ႈၵူႈယၢင်ႈ၊ ၵူၺ်းၵႃႈ၊ၸဝ်ႈႁဝ်းပႂ်ႉတူၺ်းတၢင်းၽိတ်း ၶႃႈၸဝ်ႈဢမ်ႇၸႂ်ႈတီႈၶႃႈ။
ၸဝ်ႈႁဝ်းဢဝ်လွင်ႈတၢင်းဢၼ်ၶႃႈၸဝ်ႈ ၽိတ်းပိူင်ႈၸိူဝ်းၼၼ်ႉသႂ်ႇၵႃႈၼႂ်းထူင်သေလႄႈ တွၵ်ႇတၼ်းသိၵ်ႈဝႆႉလႄႈ၊ ၸဝ်ႈႁဝ်းမတ်ႉတုၸရိူၵ်ႈဢပျတ်ႈ ၶႃႈၸဝ်ႈဝႆႉဢေႃႈ။
“လွႆဢၼ်ၵိူၼ်ႇယၢတ်ႇတူၵ်းၼၼ်ႉၸၢင်ႈ ယၢႆႈႁၢႆၵႂႃႇလႄႈ မၢၵ်ႇႁိၼ်မၢၵ်ႇၽႃယင်းၸၢင်ႈၶၢႆႉၵႂႃႇသေ တီႈယူႇမၼ်းဢေႃႈ။
ၼမ်ႉဢၼ်လႆၼၼ်ႉၸၢင်ႈၽတ်ႉသႂ်ႇမၢၵ်ႇႁိၼ် ၶၢႆႉၵႂႃႇ၊ၼမ်ႉဢၼ်ၼွင်းၸၢင်ႈပႃး လိၼ်ငႂ်ႈၵႂႃႇဢေႃႈ။ မိူၼ်ၼင်ႇၼၼ်ၸဝ်ႈႁဝ်းယႃႉတၢင်းဢၼ် ၵူၼ်းမုင်ႈမွင်းၼၼ်ႉပႅတ်ႈဢေႃႈ။
ၸဝ်ႈႁဝ်းပႄႉၼႅင်ႇၵူၼ်းလႄႈမၼ်းလႆႈ ပူၼ်ႉႁၢႆတၢႆၵႂႃႇဢေႃႈ။ ၸဝ်ႈႁဝ်းႁဵတ်းႁႂ်ႈမၼ်းပဵၼ်ၼႃႈႁူႇၼႃႈႁမ်းၼႂ်းတၢင်းဢၼ်မၼ်းတၢႆၼၼ်ႉဢေႃႈ။
ပိၵ်ႉသမ်ႉလုၵ်ႈၸၢႆးမၼ်းတင်းလၢႆႁွတ်ႈထိုင် တၢင်းဢၼ်ယုၵ်ႉယွင်ႈသေၵေႃႈ မၼ်းဢမ်ႇႁုလႆႈလႃးလႃး၊ ဢမ်ႇၼၼ်ၵေႃႈၶဝ်ႁွတ်ႈထိုင်တၢင်းဢၼ် ၶျႃးတူၵ်းတီႈတႅမ်ႇသေၵေႃႈ၊ မၼ်းဢမ်ႇႁုသၢႆငၢႆလွင်ႈတၢင်းၼၼ်ႉတီႈၶႃႈ။
မၼ်းႁုလွင်ႈတၢင်းဢၼ်တူဝ်ၶိင်းမၼ်း ၶူပ်းၶိုၼ်ႈၵူၺ်းလႄႈ မၼ်းၸၢင်ႈၶၢင်းၶီၶၢင်းၽၢၼ်ပုၼ်ႈ တူဝ်ၸဝ်ႈၵဝ်ႇ၊ ၵူၺ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ဢေးလိၽတ်ႉ၊ ၵူၼ်းမဵဝ်း တေႇမၼ်ႇ၊ ၶိုၼ်းလၢတ်ႈလႄႈဝႃႈၸမ်ႉ၊
“ ယေႃးၽႃႉ၊ ႟။ ၵူၼ်းဢၼ်မီးပိင်ႇၺႃႇ ၸွင်ႇထုၵ်ႇလီလၢတ်ႈ၊ ၵႂၢမ်းပဝ်ႇၵႂၢမ်းလၢႆဢၼ်မိူၼ်ၸိူဝ်ႉၼင်ႇလူမ်း မႆႈၼၼ်ႉႁိုဝ်း၊ထုၵ်ႇလီႁႂ်ႈတွင်ႉမၼ်း တဵမ်လူၺ်ႈလူမ်းတၢင်းဝၼ်းဢွၵ်ႇၼၼ်ႉႁိုဝ်း။
ထုၵ်ႇလီဢဝ်ၵႂၢမ်းဢၼ်ဢမ်ႇမီးဢၵျူဝ်း၊ ၵႂၢမ်းဢၼ်ဢမ်ႇႁဵတ်းၵျေးၸူးလႆႈၼၼ်ႉ မႃးတိူင်ႇပၢင်ႇလၢတ်ႈၸႃၵၼ်ႁိုဝ်း။
မႂ်းၼႆႉယုတ်ႈယွမ်းၼႂ်းတၢင်းဢၼ်ရူဝ်ႇသေႇၵူဝ်ယမ်ၽြႃးပဵၼ်ၸဝ်ႈလႄႈ ႁၢမ်ႈတၢပ်ႈႁႄႉၶႅၼ်ဢၵျၢင်ႉတၢင်းဢၼ်ႁဵတ်းသူးတွင်းပထၼႃႇတီႈမၼ်းၸဝ်ႈယဝ်ႉ။
ပိူဝ်ႈဢၼ်မႂ်းပဵၼ်ၵူၼ်းႁၢႆႉၵူၼ်းမိူၵ်ႈလႄႈ မႂ်းလၢတ်ႈၸႃၸိူဝ်ႉၼင်ႇၼႆယဝ်ႉ၊ မႂ်းဢဝ်ၵႂၢမ်းပရိယႄႇလႄႈႁူမ်ႇသုမ်ႇ တၢင်းၽိတ်းမႂ်းလူင်ပႄႇ။
ၵႂၢမ်းဢၼ်မႂ်းလၢတ်ႈၸႃၼၼ်ႉပဵၼ်ၵႂၢမ်းဢၼ်တၢင်ႇဢပျတ်ႈမႂ်းယဝ်ႉလႄႈ ၵဝ်ယင်းဢမ်ႇလူဝ်ႇၽုၺ်ႇၼႄတၢင်းၽိတ်း မႂ်းၼၼ်ႉယဝ်ႉ။
မႂ်းပဵၼ်ၵေႃႉဢၼ်ၵိူတ်ႇလဵင်ႉဢွၼ်တၢင်းသုတ်းပိူၼ်ႈႁိုဝ်း၊ မႂ်းၵိူတ်ႇလဵင်ႉမႃးၸဵမ်မိူဝ်ႈၸူဝ်ႈဢၼ်လွႆတင်းလၢႆဢမ်ႇပႆႇပေႃႇပႆႇမီးၼၼ်ႉႁိုဝ်း။
မႂ်းယၢမ်ႈလႆႈထွမ်ႇလႆႈငိၼ်းလွင်ႈတၢင်းဢၼ်တိူင်ႇပၢင်ႇလၢတ်ႈၸႃၵၼ်၊ ၵႃႈၼႂ်းပၢင်ၵုမ်ၽြႃးပဵၼ်ၸဝ်ႈၼၼ်ႉႁိုဝ်း၊ မႂ်းၵေႃႉလဵဝ်ၵူၺ်းပဵၼ်ၵူၼ်းဢၼ်မီးပိင်ႇၺႃႇႁိုဝ်း။
လွင်ႈတၢင်းဢၼ်မႂ်းႁုလႄႈႁဝ်းဢမ်ႇႁုၼၼ်ႉ မီးၵႃႈသင်၊ လွင်ႈတၢင်းဢၼ်မႂ်းႁုၸႅင်ႈလႄႈႁဝ်းဢမ်ႇပွင်ႇလႅင်းၼၼ်ႉမီးၵႃႈသင်။
ၶဝ်ၸိူဝ်းဢၼ်ႁူဝ်ႁွၵ်ႇလႄႈဢသၢၵ်ႈယႂ်ႇလိူဝ်သေပေႃႈမႂ်းၼၼ်ႉမီးယူႇၽၢႆႇႁဝ်းဢေႃႈ။
ၽြႃးပဵၼ်ၸဝ်ႈပၼ်တၢင်းသၢၵ်ႈသႃႇတီႈမႂ်းလႄႈမႂ်းထၢင်ႇပဵၼ်လွင်ႈဢၼ်လဵၵ်ႉဢၼ်ၵေႇႁိုဝ်း၊ လၢတ်ႈၵႂၢမ်းဢူၼ်ႈၵႂၢမ်းဢွၼ်ႇတေႃႇမႂ်းၼႆႉဢမ်ႇပွင်ႇလွင်ႈၵႃႈသင်ႁိုဝ်း။
ႁဵတ်းသင်လႄႈမႂ်းၸွမ်းဢလူဝ်ႇတူဝ်ၸဝ်ႈၵဝ်ႇလႄႈဝႄႈပိူင်ႈၵႂႃႇ၊ ၼႃႈလႅင်တႃလႅင်တေႃႇႁဝ်းၼင်ႇႁိုဝ်။
ႁဵတ်းသင်လႄႈမႂ်းၶတ်းၶႅင်ႇႁႅင်းတႃႉတေႃႇ ၽြႃးပဵၼ်ၸဝ်ႈလႄႈ လၢတ်ႈၵႂၢမ်းၸိူဝ်ႉၼင်ႇၼႆတီႈမၼ်းၸဝ်ႈ ၸိူဝ်ႉၼင်ႇႁိုဝ်။
ၵူၼ်းၸိုင်၊တေႁဵတ်းၸိူဝ်ႉၼင်ႇႁိုဝ်လႄႈ မၼ်းမူတ်းသႂ်လႆႈ ၵေႃႉဢၼ်ၵိူတ်ႇလဵင်ႉမႃးတီႈမႄႈယိင်းၼၼ်ႉ၊ တေပဵၼ်ၵေႃႉဢၼ်သိုဝ်ႈတေႃႇလႆႈၸိူဝ်ႉၼင်ႇႁိုဝ်။
တူၺ်းလူး။ ၽြႃးပဵၼ်ၸဝ်ႈယင်းဢမ်ႇယုမ်ႇယမ်တမ်းၸႂ်၊ တမၢၼ်ႇၵၢင်ႁၢဝ်မၼ်းၸဝ်ႈတင်းလၢႆၼၼ်ႉလႆႈ၊ ၽုင်ႇၵၢင်ႁၢဝ်ၵေႃႈဢမ်ႇမူတ်းသႂ်သိုဝ်ႈၼႃႈတႂ်ႈတႃမၼ်းၸဝ်ႈ။
ပေႃးပဵၼ်ၸိူဝ်ႉၼင်ႇၼႆၸိုင်၊ၵူၼ်းဢၼ်သူတ်ႉၵိၼ်တုၸရိူၵ်ႈမိူၼ်ၸိူဝ်ႉၼင်ႇဢၼ်မၼ်းသူတ်ႉၵိၼ်ၼမ်ႉၼၼ်ႉ၊ ဢၼ်ပဵၼ်ၵေႃႉဢၼ်ႁၢႆႉယုတ်ႈလီႁင်ႈဢဵတ်ႇသဵတ်ႇၼၼ်ႉတၵ်းမီးတီႈလၢတ်ႈၸိူဝ်ႉၼင်ႇႁိုဝ်။
ယေႃးၽႃႉ၊ ႟။ ထွမ်ႇငိၼ်းတႃႉ။ ၵႃႈဢၼ်ၵဝ်ႁုၼၼ်ႉၵဝ်တၵ်းမွၵ်ႇလၢတ်ႈ တီႈမႂ်းၸမ်ႉ။
လွင်ႈဢၼ်ၵူၼ်းမီးပိင်ႇၺႃႇၶဝ်လၢတ်ႈၵၼ်မႃးၸဵမ်မိူဝ်ႈၸူဝ်ႈပၢၼ်ပူႇမွၼ်ႇၶဝ်၊ ဢၼ်ယင်းဢမ်ႇလပ်ႉဢမ်ႇသိူင်ႇဝႆႉၼၼ်ႉဢေႃႈ။
ၶဝ်ၼၼ်ႉဢမ်ႇလေႃးလႄးလူၺ်ႈၵၼ်တင်းၵူၼ်းတၢင်ႇၸိူဝ်ႉတၢင်ႇၶိူဝ်းလႄႈ ၶဝ်ၵူၺ်းလႆႈပိူင်ႇမိူင်းၶဝ်ဢေႃႈ။
ၵူၼ်းႁၢႆႉၵူၼ်းမိူၵ်ႈၸိူဝ်းဢၼ်တဵၵ်းငႅၼ်းၶေႃးပိူၼ်ႈၼၼ်ႉ၊ တၵ်းလႆႈၶၢမ်ႇတုၵ်ႉၶႃႉတၢင်းၽၢၼ်ၸူဝ်ႈဢသၢၵ်ႈၶဝ်ဢေႃႈ။
သဵင်ဢၼ်လီၵူဝ်လီႁႄတၵ်းမေႃးလင်ယူႇၵႃႈၼႂ်း ႁူမၼ်းလႄႈ ၼႂ်းမိူဝ်ႈဢၼ်မၼ်းယင်းတိုၵ်ႉၸၢမ်ႇၸႃး ၸေးၸိမ်ႇယူႇၼၼ်ႉ၊ ၵူၼ်းဢၼ်ႁိမ်ႁူင်ႇဢဝ်ၼၼ်ႉပေႃႇမႃးဢေႃႈ။
မၼ်းဢမ်ႇမီးတီႈမုင်ႈမွင်းတႃႇတေလွတ်ႈၽေးဢၼ်လပ်းသိင်ႇ၊ ပိူဝ်ႈဢၼ်လၢပ်ႇလႅဝ်းလွမ်ပႂ်ႉယူႇသေတီႈတီႈႁႂ်ႈလႆႈဢဝ်မၼ်းတၢႆဢေႃႈ။
မၼ်းလႆႈလႄႇၵႂႃႇလႄႇႁႃပုၼ်ႈတၢင်းၵိၼ်တၢင်းၶူပ်းမၼ်းလႄႈဝႃႈ၊ ‘မီးၵႃႈလႂ်ၼေႃ၊’ ဝႃႈၼင်ႇၼႆလႄႈမၼ်းႁုလွင်ႈဢၼ်မိုဝ်ႉဝၼ်းဢၼ်လပ်းသိင်ႇၼၼ်ႉမီးၸမ်ၼႃႇယဝ်ႉဢေႃႈ။
တုၵ်ႉၶႃႉတၢင်းၶၢၼ်ၸႂ်၊ဢိၵ်ႇတင်းဝူၺ်ႇတၼႃႇတၢင်းဢၼ်ၸဵပ်းသႅပ်ႇၼၼ်ႉႁဵတ်းႁႂ်ႈမၼ်းၵူဝ်ႁႄလႄႈပႄႉၼႅင်ႇၵႃႈၼိူဝ်မၼ်း၊ မိူၼ်ၸိူဝ်ႉၼင်ႇၶုၼ်ႁေႃၶမ်းမႄးႁႅၼ်းၽွမ်ႉဝႆႉ ပုၼ်ႈတၵ်းတိုၵ်းသိုၵ်းၼၼ်ႉဢေႃႈ။
လွင်ႈမၼ်းၸမ်ႉ၊မၼ်းလႆႈၶွတ်ႇၵမ်တႃမိုဝ်းၸူး တီႈၽြႃးပဵၼ်ၸဝ်ႈလႄႈ ၶတ်းတႃႉၵၼ်တင်းၸဝ်ႈဢၼၼ်ႇတႃႉ တၼ်းၶူဝ်းၼၼ်ႉဢေႃႈ။
မၼ်းၼၼ်ႉမီးသၽေႃးဢၼ်လုၵ်ႉၽိုၼ်ႉလႄႈ ပႃးတင်းၸႂ်ဢၼ်တိုဝ်သေယိပ်းၵမ်ၶိူင်ႈႁႄႉလၢၵ်ႈၼၢၵ်ႈလႄႈ ၶုၼ်ႇလႅၼ်ႈၶိုၼ်ႈၵႂႃႇႁႂ်ႈလႆႈတိုၵ်းတေႃး ၽြႃးပဵၼ်ၸဝ်ႈဢေႃႈ။
လွင်ႈမၼ်းၸမ်ႉ၊မၼ်းဢဝ်တၢင်းဢၼ်ပီးလီမၼ်းလီႁူမ်ႇသုမ်ႇၼႃႈမၼ်းဝႆႉလႄႈ ႁႂ်ႈၼင်တွင်ႉၼင်ပုမ်မၼ်းပီးမၼ်းလီထၢၼ်ႈပေႃးပဵၼ်ၸၼ်ႉပဵၼ်ႁၢၼ်ႉဝႆႉဢေႃႈ။
မၼ်းလႆႈယူႇၵႃႈၼႂ်းဝဵင်းႁၢမ်းဢၼ်ဢမ်ႇမီး ၽူႈလႂ်ယူႇသဝ်း ဢၼ်ၸမ်တၵ်းလူမ်ႉပင်းလုလႅဝ် ယဝ်ႉၼၼ်ႉဢေႃႈ။
မၼ်းဢမ်ႇလႆႈမၢၵ်ႈမီးယူႇသေႇသေႇ၊ၸေးၸိမ်ႇမၼ်းဢမ်ႇလႆႈမၼ်ႈၶိူင်ႇ၊ ဢုၵ်ႉၸႃႇၶူဝ်းလဵင်းမၼ်းဢမ်ႇလႆႈၽႄၵႂၢင်ႈ ၵႃႈၼိူဝ်လိၼ်မိူင်း။
မၼ်းဢမ်ႇလႆႈလွတ်ႈၽေးလပ်းသိင်ႇ၊ မၼ်းတၵ်းပဵၼ်မိူၼ်ၵိင်ႇမႆႉၶႃႈမႆႉဢၼ် ပိဝ်ၽႆးႁုပ်ႈမႆႈၼၼ်ႉလႄႈ မွၵ်ႇမၼ်းတၵ်းလႆႈၶၢမ်ႇတၢင်းဢၼ် လူမ်းထူဝ်းပိဝ်ၵႂႃႇၼၼ်ႉဢေႃႈ။
ယႃႇပေႁႂ်ႈမၼ်းပႅတ်ႉလႅၼ်တူဝ်ၸဝ်ႈၵဝ်ႇသေလႄႈဢိင်ပိုင်ႈဢၼတ်ႉတႃႉသေၵမ်း၊ ပေႃးဢမ်ႇၼၼ်ၸိုင်၊မၼ်းတၵ်းလႆႈၶၢမ်ႇဢၵျူဝ်းဢၼတ်ႉတႃႉဢေႃႈ။
ၸူဝ်ႈဢၼ်ၶိင်ႇမၼ်းယင်းဢမ်ႇထူၼ်ႈၼၼ်ႉမၼ်းတၵ်းႁဵဝ်ႇႁႅင်ႈၵႂႃႇလႄႈ ႁဵဝ်ႇႁႅင်ႈၵႂႃႇမိူၼ်ၵိင်ႇမႆႉဢၼ်ဢမ်ႇၶိုၼ်းလိပ်းၶိုၼ်းၶဵဝ်လႆႈၼၼ်ႉဢေႃႈ။
မၼ်းတၵ်းပဵၼ်ၸိူဝ်ႉၼင်ႇတူၼ်ႈၶိူဝ်းမၢၵ်ႇၸပိတ်ႉဢၼ်မၢၵ်ႇမၼ်းတင်းလၢႆ လူၼ်ႇႁူင်ႈၵႂႃႇၸူဝ်ႈဢၼ်ဢမ်ႇပႆႇၵႄႇပႆႇသုၵ်းၼၼ်ႉလႄႈ ပဵၼ်ၸိူဝ်ႉၼင်ႇတူၼ်ႈသၢၼ်ႇလုၼ်ႇဢၼ်တုမ်ႇမွၵ်ႇမၼ်းလူၼ်ႇႁူင်ႈၵႂႃႇၼၼ်ႉဢေႃႈ။
ၵူၼ်းဢၼ်ဢမ်ႇမီးၽြႃးတြႃးၼၼ်ႉ ဢမ်ႇမီးၸိူဝ်ႉမီးၶိူဝ်းလႄႈ ၽႆးတၵ်းမႆႈတီႈယူႇတီႈသဝ်းၶဝ်ၸိူဝ်းဢၼ်ၵိၼ်သူး ၵိၼ်လၢပ်ႈၼၼ်ႉဢေႃႈ။
ၶဝ်ၸိူဝ်းၼႆႉပဵၼ်ၵူၼ်းဢၼ်ၵျၢမ်ႇပွင်ဢၼ်ဢမ်ႇလီလႄႈႁဵတ်းတုၸရိူၵ်ႈၼၼ်ႉဢေႃႈ။ ၵႃႈၼႂ်းၸႂ်ၶဝ်ၵေႃႈတဵမ်ဝႆႉတင်းမုသႃႇဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ယေႃးၽႃႉ၊ ၶိုၼ်းလၢတ်ႈလႄႈဝႃႈၸမ်ႉ၊
“ၵဝ်ယၢမ်ႈလႆႈငိၼ်းၵႂၢမ်းၸိူဝ်ႉၼင်ႇၼႆ ၼမ်ၼႃႇယဝ်ႉယဝ်ႉ၊ တၢင်းဢၼ်သူတင်းမူတ်းလၢတ်ႈႁႂ်ႈပျေႇၸႂ် ၼိမ်ၸႂ်ၼၼ်ႉ၊ ပဵၼ်တၢင်းဢၼ်ထႅင်ႈႁႂ်ႈၶၢၼ်ၸႂ် ယၢပ်ႇၸႂ်ၵူၺ်းလူင်ပႄႇ။
သူလၢတ်ႈၵႂၢမ်းပဝ်ႇၵႂၢမ်းလၢႆဢမ်ႇသဵင်ႈဢမ်ႇမူတ်းလႆႈယဝ်ႉႁိုဝ်း။ သူပဵၼ်ဢီႈသင်ၵႂႃႇလႄႈသူၸိုင်လၢတ်ႈၵႂၢမ်းၶိူဝ်းၶိူဝ်း။
ပေႃးသူၶဝ်ႈယူႇတီႈၵဝ်လႄႈၵဝ်သမ်ႉ ၶဝ်ႈယူႇတီႈသူၸိုင်၊ ၵဝ်တၵ်းၸၢင်ႈလၢတ်ႈၸိူဝ်ႉၼင်ႇဢၼ်သူ လၢတ်ႈၼၼ်ႉလႆႈယူႇဢေႃႈ။ ၵဝ်ၸၢင်ႈဢဝ်တင်းပိင်ႇၺႃႇသၼ်ႇႁူဝ် ၶွၼ်းႁူဝ်သေလႄႈ ဢဝ်တင်းၵႂၢမ်းၼမ်ၼႃႇလၢတ်ႈႁႂ်ႈထူမ်ႈႁူဝ်ထူမ်ႈႁၢင်ႈသူလူးၵွၼ်ႇဢေႃႈ။
ၵဝ်ယင်းၸၢင်ႈပၼ်တၢင်းၵျၢမ်ႇတီႈသူၼမ်ၼႃႇ ႁႂ်ႈလႆႈပၼ်ႁႅင်းသူလႄႈ ၵႂၢမ်းၵဝ်ၼၼ်ႉတၵ်းဝၢၼ်ၼႃႇႁႂ်ႈတၢင်းဢၼ်ၸဵပ်းသူသၢၵ်ႈသႃႇဢေႃႈ။
ပိၵ်ႉသမ်ႉၵဝ်လၢတ်ႈသေၵေႃႈတၢင်းၸဵပ်းၵဝ်ၼၼ်ႉဢမ်ႇသၢၵ်ႈသႃႇမႃး၊ ၵဝ်ဢမ်ႇတၵ်ႉသဵင်လႄႈယူႇသေၵေႃႈဢမ်ႇမီးတၢင်းဢၼ်လၢၵ်ႇမႃးပိူင်ႈမႃး။
ၽြႃးပဵၼ်ၸဝ်ႈႁဵတ်းႁႂ်ႈၵဝ်ႁိူဝ်ႉၼူၼ်းၶၢၼ်ၸႂ်ယဝ်ႉ၊ မၼ်းၸဝ်ႈ တီႇပႅတ်ႈၽဵဝ်ႈပႅတ်ႈၵူၼ်းၵဝ် ၵႃႈမီးၸိူဝ်းၼၼ်ႉယဝ်ႉ။
မၼ်းၸဝ်ႈတိၵမ်ဢဝ်ၵဝ်လႄႈၶတ်းတႃႉၶတ်းၶႂၢင်ၵၼ်တင်းၵဝ်ယူႇယဝ်ႉ၊ တၢင်းဢၼ်ၵဝ်ယွမ်ႁဵဝ်ႇၼၼ်ႉၵေႃႈၼႄပျႃးလွင်ႈဢၼ်ၵဝ်ႁဵတ်းၽိတ်းဢပျတ်ႈယူႇယဝ်ႉ။
မၼ်းၸဝ်ႈပႃးတင်းၸႂ်မႆႈၶႂ်ႈၸႃႉလႄႈၸၵ်ႉသိၵ်ႇၵဝ်ယွၵ်းယွႆႈၵႂႃႇ၊ မၼ်းၸဝ်ႈငိၼ်းၸင်းၵဝ်လႄႈ ၵၢပ်ႈၶဵဝ်ႈၵၢပ်ႈၽၼ်းတေႃႇၵဝ်ယူႇသေယဝ်ႉ၊ရၢၼ်ႇသူႇၵဝ်ယႅၵ်ႉယဵင်းတူၺ်းၵဝ်ယူႇဢေႃႈ။
ၵူၼ်းတင်းလၢႆဢွၼ်ၵၼ်ဢႃႈသူပ်းဢႃႈပၢၵ်ႇ ၸူးတီႈၵဝ်လႄႈ ၽွမ်ႉၵၼ်ၸုတုမ်ယူႇလွမ်ႉႁွပ်ႈၵဝ်လႄႈ တူပ်းၵႅမ်ႈယႃႉသရေႇၵဝ်ဢေႃႈ။
ၽြႃးပဵၼ်ၸဝ်ႈဢဝ်ၵဝ်ဢၢပ်ႈဝႆႉၵႃႈၼႂ်းမိုဝ်းၶဝ်ၸိူဝ်းဢၼ်ဢမ်ႇတြႃးလႄႈ မၼ်းၸဝ်ႈဢဝ်ၵဝ်ထိမ်ႈသႂ်ႇၵႃႈၼႂ်းမိုဝ်း ၵူၼ်းႁၢႆႉၵူၼ်းမိူၵ်ႈတင်းလၢႆယဝ်ႉ။
ၵဝ်လႆႈယူႇၼိမ်ၶျၢမ်းသႃႇမႃးသေၵေႃႈ ၽြႃးပဵၼ်ၸဝ်ႈတိုတ်ႉၵဝ်ၶၢတ်ႇပဵၼ်သွင်ပွတ်းၵႂႃႇယဝ်ႉလႄႈ မၼ်းၸဝ်ႈငႅၼ်းၶေႃးၵဝ်ပေႃႉၽတ်ႉႁႂ်ႈၶၢတ်ႇပဵၼ်ပွတ်းပဵၼ်တွၼ်ႈယဝ်ႉ၊ ၽြႃးပဵၼ်ၸဝ်ႈဢဝ်ၵဝ်ႁဵတ်းပဵၼ်တီႈမၢႆယိူင်းပုၼ်ႈတႃႇတေပိုတ်းယိုဝ်းလႄႈ။
ၸဝ်ႈၵၢင်ႇမၼ်းၸဝ်ႈတင်းလၢႆဢဝ်ပိုၼ်ၵၢင်ႇပိုတ်းယိုဝ်းသႂ်ႇၵဝ်ၵူႈၽၢႆႇၵူႈပႃႈယဝ်ႉ၊ ပိုၼ်ၵၢင်ႇၸိူဝ်းၼၼ်ႉသဵပ်ႇသႂ်ႇမၢၵ်ႇလၼ်းၵဝ် ယင်းဢမ်ႇဢဵတ်းလူၵဝ်လႄႈသဵပ်ႇတႅင်းသႂ်ႇ ၼမ်ႉႁူင်းလီၵဝ်ထွၵ်ႇလႆၵႃႈၼိူဝ်လိၼ် ၵႂႃႇယဝ်ႉဢေႃႈ။
မၼ်းၸဝ်ႈၸၵ်ႉသိၵ်ႇၵဝ်ပွတ်းၼိုင်ႈယဝ်ႉပွတ်းၼိုင်ႈ၊ လေႃႇၽင်ႈသႂ်ႇၵဝ်မိူၼ်ၸိူဝ်ႉၼင်ႇႁူဝ်ႁၢၼ်ၵူၼ်းသိုၵ်းလေႃႇၽင်ႈသႂ်ႇၼၼ်ႉဢေႃႈ။
ၵဝ်ၶၢင်းၶီၶၢင်းၽၢၼ်လႄႈၼုင်ႈၶူဝ်း ၼင်ပေႃယူႇသေယဝ်ႉ၊ လႆႈၼင်ႈထုပ်ႉၼင်ႈထူယူႇၵႃႈၼႂ်းၽုၼ်ႇမုၵ်ႉၼႆႉယဝ်ႉဢေႃႈ။
ၵဝ်ႁွင်ႉႁႆႈတေႃႇထိုင်ႁွတ်ႈၼႃႈၵဝ် ထၢၼ်ႈပေႃးလႅင်၊ ၼင်တႃၵဝ်ထၢၼ်ႈပေႃးၵမ်ႇပေႃးၵႂ်ႈ ၼႃႇလူင်လၢင်ယဝ်ႉ။
ၼႂ်းဝႃႈၼၼ်သေၵေႃႈၵဝ်ဢမ်ႇႁဵတ်း တၢင်းဢၼ်ဢမ်ႇတြႃး၊ ပထၼႃႇဢၼ်ၵဝ်သူးတွင်းၼၼ်ႉၵေႃႈ မူတ်းသႂ်ယူႇဢေႃႈ။
လိၼ်မိူင်း႟။ ယႃႇပေႁူမ်ႇလိူတ်ႈၵဝ်ဝႆႉသေၵမ်း၊ ယႃႇပေႁႂ်ႈသဵင်ႁွင်ႉၵဝ်ၵိုတ်းသဝ်းယူႇ တီႈမႂ်းသေၵမ်း။
တူၺ်းလူး။ မိူဝ်ႈလဵဝ်ၼႆႉသၢၵ်ႈသေႇၵဝ်မီးယူႇၵႃႈၼိူဝ်မိူင်းၵၢင်ႁၢဝ်လႄႈ ၵေႃႉဢၼ်ယူႇၽၢႆႇၵဝ်ၼၼ်ႉမီးၵႃႈတီႈဢၼ်သုင်ဢေႃႈ။
ၵေႃႉသႄႈၵဝ်တင်းလၢႆၸိုင်၊ဢွၼ်ၵၼ် သႄႉသွမ်းၵဝ်လႄႈ ၼမ်ႉတႃၵဝ်လႆႈတူၵ်းၽၢႆႇၼႃႈ ၽြႃးပဵၼ်ၸဝ်ႈဢေႃႈ။
ၵဝ်ၶႂ်ႈႁႂ်ႈၵေႃႉဢၼ်ၶၢမ်ႇသၢၵ်ႈသေႇၽၢႆႇၵဝ်ၼၼ်ႉတွင်းပၢၼ်ႇၽြႃးပဵၼ်ၸဝ်ႈပုၼ်ႈၵဝ်၊ မိူၼ်ၸိူဝ်ႉၼင်ႇၵေႃႉဢၼ်တွင်းပၢၼ်ႇ ပုၼ်ႈၵေႃႉသႄႈမၼ်းၼၼ်ႉဢေႃႈ။
ၶူပ်ႇၼီႈပီမိူင်းၵဝ်ဢမ်ႇပေႃးႁိုင်ပေႃးၼၢၼ်း ၵဝ်တၵ်းတၢႆၵႂႃႇသေလႄႈဢသၢၵ်ႈတၵ်းဢမ်ႇၶိုၼ်းလိပ်းထႅင်ႈသေပွၵ်ႈယဝ်ႉ။
ဢသၢၵ်ႈၵဝ်ၸမ်တၵ်းသုတ်းသဵင်ႈယဝ်ႉလႄႈ မိုဝ်ႉဝၼ်းၵဝ်ၵေႃႈပူၼ်ႉၵႂႃႇမူတ်းၵႂႃႇယဝ်ႉ၊ ၶုမ်ပႃႇႁဵဝ်ႈၵေႃႈမႄးႁႅၼ်းထႃႈဝႆႉပုၼ်ႈၵဝ်ယဝ်ႉ။
ၵႃႈတီႈလဵပ်ႈႁွပ်ႈၵဝ်ၼၼ်ႉမီးၶဝ်ၸိူဝ်းဢၼ် ႁဵတ်းပျၢၵ်ႈၶူဝ်ၵဝ်လႄႈ ၵဝ်တိုၼ်းလႆႈပႂ်ႉတူၺ်းတၢင်းဢၼ်ၶဝ်ယႃႉယူၵ်ႉၵဝ် ႁၢဝ်ႈၵျၢမ်းၼႃႇၼၼ်ႉဢေႃႈ။
ၶႅၼ်းတေႃႈဢဝ်ၶိူင်ႈၶူဝ်းပွင်ႇဝႆႉတၢင်ဝႆႉတီႈၸဝ်ႈႁဝ်းပုၼ်ႈၶႃႈၸဝ်ႈသေၵမ်းတီႈၶႃႈ၊ ဢမ်ႇမီးၽူႈလႂ်သေၵေႃႉသေၵူၼ်းဢၼ်တေႁဵတ်းပုၼ်ႈၶႃႈၸဝ်ႈတီႈၶႃႈ။
ၸဝ်ႈႁဝ်းႁႄႉလပ်ႉႁူဝ်ၸႂ်ၶဝ်ဝႆႉယဝ်ႉလႄႈ ၶဝ်ဢမ်ႇၸၢင်ႈၶႆႈၸႂ်ယဝ်ႉ၊ ပိူဝ်ႈၼႆလႄႈၸဝ်ႈႁဝ်းဢမ်ႇႁႂ်ႈၶဝ်ပႄႉၼႅင်ႇ ၶႃႈၸဝ်ႈလႆႈတီႈၶႃႈ။
ၵေႃႉဢၼ်ဢဝ်ၵေႃႉသႄႈမၼ်းဢၢပ်ႈပုၼ်ႈတႃႇတေလႆႈၶၢမ်ႇဢဝ်ဢၵျူဝ်းၼၼ်ႉ၊ မၢၵ်ႇတႃလုၵ်ႈလၢင်းမၼ်းၼၼ်ႉတေမူဝ်းၵႂႃႇမိုတ်ႈၵႂႃႇဢေႃႈ။
တေႃႈလဵဝ်ၼႆႉမၼ်းၸဝ်ႈႁႂ်ႈၵဝ်ပဵၼ်တီႈဢၼ်၊ ပိူၼ်ႈသႄႉသွမ်းလႄႈပိူၼ်ႈဢွၼ်ၵၼ်၊ ထူမ်ႇၼမ်ႉလၢႆးသႂ်ႇတီႈၼႃႈၵဝ်ဢေႃႈ။
တၢင်းဢၼ်ၵဝ်ငိၼ်းၽၢၼ်ထိုင်ၸႂ်ႁႅင်းၼႃႇၼၼ်ႉ၊ ႁဵတ်းႁႂ်ႈမၢၵ်ႇတႃၵဝ်မူၼ်ႇၵႂႃႇမူဝ်းၵႂႃႇယဝ်ႉ၊ ဢၢင်ႇၵႃႇတူဝ်ၶိင်းၵဝ်ၵေႃႈလႆႈပဵၼ်မိူၼ်ၸိူဝ်ႉၼင်ႇႁူမ်ႈၼင်ႇငဝ်းၵႂႃႇယဝ်ႉ။
ၵူၼ်းၸိူဝ်းဢၼ်သိုဝ်ႈတေႃႇၼၼ်ႉတၵ်းဢွၼ်ၵၼ်ၵႂင်ၸႂ်ၵွပ်ႈပိူဝ်ႈဢမုၼႆႉလႄႈ ၶဝ်ၸိူဝ်းဢၼ်ၵၢင်းလွတ်ႈတင်းဢပျတ်ႈၼၼ်ႉတၵ်းဢွၼ်ၵၼ်ၶတ်းၵၼ်တင်းၵူၼ်း ဢထမ်ႇမႃႉတင်းလၢႆဢေႃႈ။
ၼႂ်းဝႃႈၼၼ်သေၵေႃႈၵူၼ်းသိုဝ်ႈတေႃႇတၵ်းမီးတၢင်းဢၼ်တႄႇၼိမ်လႄႈ ၵေႃႉဢၼ်မိုဝ်းမၼ်းမူတ်းသႂ်ၼၼ်ႉႁႅင်းတၵ်းၶႅင်မႃးတိၵ်းတိၵ်းဢေႃႈ။
သူဢွၼ်ၵၼ်ၶိုၼ်းမႃးၵူႈၵေႃႉၵူႈၵူၼ်းထႅင်ႈလူး၊ ၵဝ်တၵ်းဢမ်ႇထူပ်းၵေႃႉဢၼ်မီးပိင်ႇၺႃႇ ၵႃႈၼႂ်းသူၸိူဝ်းၼႆႉ။
မိုဝ်ႉဝၼ်းၵဝ်ပူၼ်ႉၵႂႃႇယဝ်ႉလႄႈ တၢင်းၵျၢမ်ႇတၢင်းပွင်ၵဝ်သုမ်းႁၢႆ၊ တၢင်းမုင်ႈမွင်းၵဝ်သုတ်းဝၢႆးယဝ်ႉ။
ၶဝ်ၸိူဝ်းၼၼ်ႉႁဵတ်းၵၢင်ၶိုၼ်းမိူၼ်ပဵၼ် ၵၢင်ဝၼ်းလႄႈ ၶဝ်ဝႃႈဢၼ်လႅင်းၼၼ်ႉၸမ်တေပဵၼ်ဢၼ် လပ်းသိင်ႇဢေႃႈ။
တီႈဢၼ်ၵဝ်မုင်ႈမွင်းၼၼ်ႉပဵၼ်တီႈၼႂ်း မိူင်းမရၼႃႉၵူၺ်းလႄႈ တီႈၼၼ်ႈၵဝ်တၵ်းၼွၼ်းလပ်းၵႃႈၼႂ်း လပ်းသိင်ႇဢေႃႈ။
ၵဝ်တၵ်းႁွင်ႉႁူးပႃႇႁဵဝ်ႈဝႃႈ၊ ‘ပေႃႈ’ ဢိၵ်ႇတင်း ၼွၼ်ဢၼ်သႆႉၵိၼ်ၵဝ်ၼၼ်ႉဝႃႈ၊ ‘မႄႈၵဝ်၊ ၼွင်ႉယိင်းၵဝ်’ ဢေႃႈ။
ပိူဝ်ႈၼႆလႄႈတီႈဢၼ်ၵဝ်လီမုင်ႈမွင်းၼၼ်ႉ မီးၵႃႈလႂ်၊ ၽူႈလႂ်လႆႈႁၼ်တီႈဢၼ်ၵဝ်လီမုင်ႈမွင်းၼၼ်ႉ။
လွင်ႈတၢင်းၼၼ်ႉတၵ်းလူင်းၵႂႃႇၸူးတီႈ ၵိူၼ်ႇၽၵ်းတူမိူင်း မရၼႃႉ၊ လႄႈ ႁဝ်းၵေႃႈတၵ်းဢွၼ်ၵၼ်လူင်းၵႂႃႇၸူးတီႈ မုၼ်ႈလိၼ်လွၼ်ႉလွၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ပိလတတ်ႉ၊ ၵူၼ်းမဵဝ်း သုဢႃႇ၊ ၶိုၼ်းလၢတ်ႈလႄႈဝႃႈၸမ်ႉ၊
“သူတေၶူၼ်ႉႁႃၵႂၢမ်းလၢတ်ႈၼၼ်ႉႁိုင်ၵႃႈႁိုဝ်၊ ပေႃးမႂ်းပႂ်ႉထွမ်ႇၸိုင်၊ႁဝ်းၸၢင်ႈတၵ်း လၢတ်ႈတေႃႇမႂ်းဢေႃႈ။
ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းမၢတ်ႈႁဝ်း မိူၼ်ၸိူဝ်ႉၼင်ႇသတ်း၊ ၵွပ်ႈသင်လႄႈမႂ်းမၢတ်ႈႁဝ်းပဵၼ်ၵူၼ်းငိူဝ်ႈငႃႉ။
ၵေႃႉဢၼ်ၸႂ်မႆႈၶႂ်ႈၸႃႉဢွၵ်ႇလႄႈၶူပ်းတူဝ်ၸဝ်ႈၵဝ်ႇၶၢတ်ႇၼႆႉ႟။ လိၼ်မိူင်းတၵ်းလႆႈၶၢမ်ႇတၢင်းဢၼ်ၸုၼ်ႉပႅတ်ႈၵွပ်ႈပိူဝ်ႈမႂ်းႁိုဝ်း၊ ဢမ်ႇၼၼ်ၵေႃႈမၢၵ်ႇႁိၼ်မၢၵ်ႇၽႃၵေႃႈ တၵ်းလႆႈၶၢမ်ႇတၢင်းဢၼ်ၶၢႆႉပႅတ်ႈသေ ၵႃႈတီႈတီႈယူႇမၼ်းႁိုဝ်း။
တၢင်းဢၼ်လႅင်းၵေႃႉဢၼ်ႁၢႆႉမိူၵ်ႈၼၼ်ႉ၊ တၵ်းလပ်ႉႁၢႆၵႂႃႇဢမၢၼ်ႇၶၼ်ပဵၼ်လႄႈ ပိဝ်ၽႆးမၼ်းဢမ်ႇလႆႈလုၵ်ႉလႆႈႁိူဝ်ႈ။
ဢၼ်လႅင်းၵႃႈၼႂ်းသုမ်ႉထဵင်မၼ်းတၵ်း လပ်းသိင်ႇၵႂႃႇလႄႈ ၵွၵ်းၽႆးဢၼ်ယူႇၼိူဝ်မၼ်းတၵ်းမွတ်ႇဢေႃႈ။
ယၢင်ႈတိၼ်မၼ်းမၼ်ႈၶိူင်ႇသေၵေႃႈတေႃႈလဵဝ်ၼႆႉမၼ်းၶီႈလိုတ်းလႄႈ တၢင်းၵျၢမ်ႇတၢင်းပွင်မၼ်းၼၼ်ႉႁႂ်ႈမၼ်း တူၵ်းသုမ်းဢေႃႈ။
တိၼ်မၼ်းၸၢင်ႈပႃးမၼ်းၶဝ်ႈၵႃႈၼႂ်းၼႅင်ႈ ၼႂ်းၶႄၵူၺ်းမၼ်းလႄႈ ၸၢင်ႈယဵပ်ႇသႂ်ႇၵႃႈၼိူဝ်တူင်ႇႁႅဝ်ႉ တူင်ႇၶိုမ်းဢေႃႈ။
ၼဵၼ်မၼ်းလုတ်းလႄႈထုၵ်ႇမႅၼ်ႈသႂ်ႇ သူၼ်ႈတိၼ်မၼ်း၊ တူင်ႇႁႅဝ်ႉတူင်ႇၶိုမ်းႁုတ်ႉဢဝ်တိၼ်မၼ်း ဝႆႉဢေႃႈ။
ၵၢင်ၸိူၵ်ႈသိူင်ႇဝႆႉၵႃႈၼႂ်းလိၼ်သေလႄႈ တူင်ႇႁႅဝ်ႉတူင်ႇၶိုမ်းႁၢင်ႈဝႆႉၵႃႈတီႈ သဵၼ်ႈတၢင်းမၼ်းယဝ်ႉ။
လွင်ႈတၢင်းဢၼ်လီၵူဝ်လီႁႄတင်းလၢႆလွမ်ႉႁွပ်ႈမၼ်းဝႆႉၵူႈၽၢႆႇၵူႈပႃႈလႄႈ လိုပ်ႈၸွမ်းလမ်းၸွမ်းယၢင်ႈတိၼ်မၼ်း ၵူႈယၢင်ႈၵူႈယၢင်ႈယဝ်ႉ။
ႁႅင်းမၼ်းဢူၼ်ႈယွမ်းၵႂႃႇၵွပ်ႈပိူဝ်ႈဢၼ်ဢိုပ်း ဢၼ်ယၢၵ်ႈၼၼ်ႉလႄႈ ၽေးတၢင်းဢၼ်လုလႅဝ်ၼၼ်ႉပႂ်ႉထႃႈယူႇ ၵႃႈတီႈႁိမ်းမၼ်းဢေႃႈ။
ၽေးတၢင်းၸဵပ်းတၢင်းသႅပ်ႇဢၼ်ၸၢင်ႈႁႂ်ႈမၼ်းတၢႆလႆႈၼၼ်ႉ၊ ၸွတ်ႇတူဝ်ႈၵႃႈၼိူဝ်တူဝ်ၶိင်းမၼ်းလႄႈ ၶူပ်းငၢၼ်ႈတိၼ်မၼ်းမိုဝ်းမၼ်းႁႂ်ႈၼဝ်ႈၵႂႃႇယဝ်ႉ။
မၼ်းလႆႈၶၢမ်ႇတၢင်းဢၼ်ထူၺ်ႈဢဝ်ဢွၵ်ႇသေ ၵႃႈတီႈသုမ်ႉထဵင်၊ ဢၼ်မၼ်းယူႇလူင်ႉလီလွတ်ႈလီၼၼ်ႉလႄႈ လႆႈၶၢမ်ႇလၢၵ်ႈဢဝ်ၵႂႃႇသူင်ႇၵႃႈတီႈၶုၼ်ႁေႃၶမ်းၽေးလုၽေးလႅဝ်ဢၼ်လီၵူဝ်လီႁႄယဝ်ႉ။
ၽူႈလႂ်သေဢမ်ႇဝႃႈ၊မီးဢၶႂၢင်ႉဢၼ် လႆႈၶဝ်ႈယူႇၵႃႈၼႂ်းသုမ်ႉထဵင်ဢၼ်မၼ်း ပႅတ်ႈႁၢမ်းဝႆႉၼၼ်ႉ၊ ပိူဝ်ႈဢၼ်လႆႈဢဝ်ၵၢၼ်ႉ ဢွႆသႂ်ႇၵႃႈၼိူဝ်သုမ်ႉထဵင်ဝႆႉယဝ်ႉၼၼ်ႉဢေႃႈ။
ငဝ်ႈမၼ်းႁၢၵ်ႈမၼ်းၵႃႈတီႈတႂ်ႈၼၼ်ႉ ယုတ်ႈႁႅင်ႈၵႂႃႇလႄႈ ၵိင်ႇမၼ်းၶႃႈမၼ်းၵႃႈတီႈၼိူဝ်ၼၼ်ႉ လွၵ်ႇၵႂႃႇတၢႆၵႂႃႇဢေႃႈ။
တၢင်းဢၼ်ၶုၵ်းၸႂ်လႆႈၶႆႈၸႂ်ထူပ်းမၼ်းၼၼ်ႉ ႁၢႆၵႂႃႇသေၵႃႈၼိူဝ်လိၼ်မိူင်း၊ ဢမ်ႇမီးၽူႈလႂ်လၢတ်ႈလွင်ႈၸိုဝ်ႈသဵင်မၼ်း ၸွမ်းတႃႈၸွမ်းတၢင်းထႅင်ႈယဝ်ႉ။
မၼ်းတၵ်းတေလႆႈၶၢမ်ႇတၢင်းဢၼ်လိုပ်ႈဢွၵ်ႇသေၵႃႈၼႂ်းမိူင်းၵူၼ်းလႄႈ လႆႈၶၢမ်ႇတၢင်းဢၼ်လိုပ်ႈဢွၵ်ႇသေ ၵႃႈၼႂ်းဢၼ်လႅင်း၊ ၸူးၵႃႈၼႂ်းဢၼ်လပ်းသိင်ႇဢေႃႈ။
ၼႂ်းမဵဝ်းမၼ်းၼၼ်ႉတၵ်းဢမ်ႇလႆႈ မီးလုၵ်ႈမီးလၢၼ်၊ ၵူၼ်းႁိူၼ်းၵူၼ်းယေးမၼ်းဢမ်ႇလႆႈၵိုတ်းၵျၢၼ်ႇ ဝႆႉသေၵေႃႉသေၵူၼ်း။
ၵူၼ်းမိူင်းတၢင်းဝၼ်းတူၵ်းၵေႃႈတူၵ်းၸႂ် ၵွပ်ႈပိူဝ်ႈဢၼ်ပဵၼ်မႃးတီႈမၼ်း၊ ၵူၼ်းမိူင်းတၢင်းဝၼ်းဢွၵ်ႇၵေႃႈၵူဝ်ႁႄ ၵွပ်ႈပိူဝ်ႈလွင်ႈမၼ်းဢေႃႈ။
ၸႂ်ႈတႄႉ။ ၵူၼ်းႁၢႆႉၵူၼ်းမိူၵ်ႈတင်းလၢႆ တၵ်းလႆႈၶၢမ်ႇၸိူဝ်ႉၼင်ႇၼႆလႄႈ ၵေႃႉဢၼ်ဢမ်ႇႁုၸၵ်းၽြႃးပဵၼ်ၸဝ်ႈ ၼၼ်ႉၵေႃႈ၊ တၵ်းလႆႈၶၢမ်ႇမိူၼ်မိူၼ်ၵၼ်ဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ယေႃးၽႃႉ၊ ၶိုၼ်းလၢတ်ႈလႄႈဝႃႈၸမ်ႉ၊
“သူတၵ်းဢွၼ်ၵၼ်ယႃႉယူၵ်ႉၵဝ်လႄႈဢဝ်တင်းၵႂၢမ်းသေလႄႈႁၵ်းႁိၵ်းၵဝ်ယူႇႁိုင်ၵႃႈႁိုဝ်၊
သူသႄႉသွမ်းၵဝ်ထိုင်သိပ်းပွၵ်ႈယဝ်ႉ၊ သူဢမ်ႇမီးတၢင်းဢူၵ်းတၢင်းဢၢႆလူၺ်ႈလွင်ႈဢၼ်၊ သူႁဵတ်းတီႈၵဝ်ၸိူဝ်ႉၼင်ႇၼႆၼၼ်ႉလူင်ပႄႇ။
ပိၵ်ႉသမ်ႉၵဝ်ႁဵတ်းၽိတ်းမႅၼ်ႈတႄႉသေၵေႃႈ၊ ဢပျတ်ႈၵဝ်ၼၼ်ႉၸၢပ်ႈသႅင်ႇၵၼ်တင်းၵဝ်ၵူၺ်းဢေႃႈ။
သူထၢင်ႇဝႃႈတူဝ်သူယဵင်ႈၶႅၼ်းလီၼႃႇသေၵဝ်လႄႈ မၢတ်ႈဝႃႈတုၵ်ႉၶႃႉဝူၺ်ႇတၼႃႇဢၼ် ၵဝ်လႆႈၶၢမ်ႇၼႆႉ ပဵၼ်သၢၵ်ႈသေႇလွင်ႈဢၼ်ဝႃႈ၊ ၵဝ်ၽိတ်းၼၼ်ႉဢေႃႈ။
သူထုၵ်ႇလီႁုၸႅင်ႈလွင်ႈတၢင်းဢၼ်ၽြႃးပဵၼ်ၸဝ်ႈပဵၼ်ၽူႈဢၼ်၊ ႁဵတ်းႁႂ်ႈၵဝ်လႆႈတုၵ်ႉၶႃႉဢိၵ်ႇတင်း ဢဝ်ၶႄၸဝ်ႈႁူမ်ႇသုမ်ႇၵဝ်ဝႆႉၼၼ်ႉဢေႃႈ။
ၵဝ်ႁွင်ႉသႅၼ်ႇဝႃႈ၊ ‘ပိူၼ်ႈၼိၵ်ႈၸၢၵ်ႈငႅၼ်းသႄး ၵဝ်ဢေႃႈ။’ ဝႃႈၼႆသေၵေႃႈ၊ၽူႈလႂ်ဢမ်ႇထွမ်ႇဢမ်ႇငိၼ်း ၵဝ်ႁွင်ႉႁႃတၢင်းၸွႆႈတၢင်းထႅမ်သေၵေႃႈ၊ ဢမ်ႇမီးၵေႃႉၸီႇယၢင်ႇၸွမ်းၼင်ႇတြႃး။
ၽြႃးပဵၼ်ၸဝ်ႈလွမ်ႉႁႄႉၵင်ႈတၢင်းၵဝ်ဝႆႉ ဢမ်ႇႁႂ်ႈၵဝ်လႆႈၵႂႃႇ၊ မၼ်းၸဝ်ႈဢဝ်တင်းလပ်းသိင်ႇႁူမ်ႇဝႆႉဢမ်ႇႁႂ်ႈ ၵဝ်လႆႈႁၼ်တၢင်းဢေႃႈ။
မၼ်းၸဝ်ႈၸၵ်ႉဢဝ်တၢင်းဢၼ်ၵဝ်မၢၵ်ႈမီး လီပဵၼ်ၼၼ်ႉပႅတ်ႈလႄႈ ပူတ်းမုၼ်သရေႇဢၼ်ပဵၼ်ပၢၼ်းၵုမ်းၵဝ်ၼၼ်ႉ ၶျႃးတူၵ်းဢေႃႈ။
မၼ်းၸဝ်ႈၵိူၼ်ႇယႃႉၵဝ်တူၵ်းၵူႈၽၢႆႇၵူႈပႃႈလႄႈ ၵဝ်လႆႈႁၢႆၵႂႃႇသဵင်ႈၵႂႃႇမူတ်းမူတ်းယဝ်ႉ၊ မၼ်းၸဝ်ႈထူၺ်ႈထွၼ်ဢၶႂၢင်ႉဢၼ်ၵဝ် လႆႈမုင်ႈမွင်းၼၼ်ႉပႅတ်ႈ၊ မိူၼ်ၸိူဝ်ႉၼင်ႇဢၼ်ထူၺ်ႈတူၼ်ႈမႆႉပႅတ်ႈ ၼၼ်ႉဢေႃႈ။
မၼ်းၸဝ်ႈၶႂ်ႈၸႃႉလႄႈဝႆႉတေႃးသႃႉတေႃႇၵဝ်၊ မၢတ်ႈၵဝ်ပဵၼ်ရၢၼ်ႇသူႇမၼ်းၸဝ်ႈဢေႃႈ။
မၼ်းၸဝ်ႈပွႆႇၸႂ်ႉတပ်ႉသိုၵ်းၸဝ်ႈႁႂ်ႈလႆႈမႃးတိုၵ်းၵဝ်၊ ၵေႃႇတႅၼ်လိၼ်တႄးလိၼ်လႄႈၶျႃးပၢင်တပ်ႉၶဝ်လွမ်ႉႁွပ်ႈသုမ်ႉထဵင်ၵဝ်ဝႆႉဢေႃႈ။
ၽြႃးပဵၼ်ၸဝ်ႈႁဵတ်းႁႂ်ႈပီႈၸၢႆးၼွင်ႉၸၢႆးၵဝ်ယူႇႁၢင်ႇၵႆၵၼ်တင်းၵဝ်လႄႈ ႁႂ်ႈၵူၼ်းဢၼ်ယၢမ်ႈႁုၸၵ်းၵဝ်ၼၼ်ႉ ဝၢႆႇၼႃႈပႅတ်ႈၵဝ်ဢေႃႈ။
ၼင်ႇၼၼ်လႄႈပီႈၼွင်ႉၸိူဝ်ႉၶိူဝ်းၵဝ်၊ဢိၵ်ႇတင်း ၵေႃႉသႄႈၵဝ်တင်းလၢႆဢွၼ်ၵၼ် လူင်လိုမ်းၵဝ်ယဝ်ႉ။
ၶႅၵ်ႇဢၼ်မီးၼႂ်းႁိူၼ်းၵဝ်ၼၼ်ႉလိုမ်းပႅတ်ႈၵဝ်ယဝ်ႉ၊ မႄႈယိင်းဢၼ်ပဵၼ်ၶႃႈၵဝ်ၸိူဝ်းၼၼ်ႉၵေႃႈ မၢတ်ႈၵဝ်ပဵၼ်ၸိူဝ်ႉၼင်ႇၶႅၵ်ႇပႅၵ်ႇၼႃႈ ၼၼ်ႉယဝ်ႉ၊ ၵဝ်လႆႈပဵၼ်ၵူၼ်းတၢင်ႇသိုင်ႇတၢင်ႇမိူင်းသိုဝ်ႈၼႃႈတႂ်ႈတႃၶဝ်ယဝ်ႉ။
ၵဝ်ႁွင်ႉၶႃႈၸႂ်ႉၵဝ်သေၵေႃႈမၼ်းဢမ်ႇၶိုၼ်းတွပ်ႇၶိုၼ်းဢိူဝ်၊ ၵဝ်လႆႈဢဝ်သူပ်းလႄႈတွင်းပၢၼ်ႇဢေႃႈ။
လူမ်းထူၺ်ႈၸႂ်ၵဝ်ပဵၼ်ဢၼ်ဢမ်ႇထုၵ်ႇၸႂ်ၵျိူၵ်ႈၸႂ်မေးၵဝ်လႄႈ ၵဝ်ပဵၼ်တီႈဢၼ်ပီႈဢၢႆႈၼွင်ႉၸၢႆးၵဝ်ၸိူဝ်းၼၼ်ႉလီႁင်ႈဢဵတ်ႇသဵတ်ႇယဝ်ႉ။
လုၵ်ႈဢွၼ်ႇတင်းလၢႆဢွၼ်ၵၼ် ႁဵတ်းပျၢၵ်ႈႁဵတ်းၶူဝ်၊ ယၢမ်းမိူဝ်ႈဢၼ်ၵဝ်လုၵ်ႉၼၼ်ႉၶဝ်ဢွၼ်ၵၼ် သႄႉသွမ်းၵဝ်ဢေႃႈ။
ၵေႃႉသႄႈၵဝ်ၵႃႈမီးၸိူဝ်းၼၼ်ႉဢွၼ်ၵၼ် လီႁင်ႈၵဝ်လႄႈ ၶဝ်ၸိူဝ်းဢၼ်ၵဝ်ႁၵ်ႉၼႃႇၸိူဝ်းၼၼ်ႉၵေႃႈ ဢွၼ်ၵၼ်ဝၢႆႇလင်တေႃႇၵဝ်ယဝ်ႉ။
ၵဝ်ၼႆႉမီးၼင်ႁေႃႇလုပ်ႇဝႆႉၵူၺ်းယဝ်ႉ၊ ဢမ်ႇတၢႆလႄႈမီးဢသၢၵ်ႈလိပ်းယူႇၼႆႉ ၵူၺ်းယဝ်ႉ။
ၵေႃႉသႄႈၵဝ်ၶဝ်႟။ ဢွၼ်ၵၼ်ဢဵတ်းလူၵဝ် သေၵမ်း၊ဢဵတ်းလူၵဝ်ၶႃႈသေၵမ်း၊ မိုဝ်းၽြႃးပဵၼ်ၸဝ်ႈတိူဝ်ႉထုၵ်ႇၵဝ်ယဝ်ႉ။
ႁဵတ်းသင်လႄႈသူဢွၼ်ၵၼ်လိုပ်ႈၸွမ်း လမ်းၸွမ်းၵဝ်၊ မိူၼ်ၸိူဝ်ႉၼင်ႇဢၼ်ၽြႃးပဵၼ်ၸဝ်ႈလိုပ်ႈၸွမ်း လမ်းၸွမ်းၵဝ်ၼၼ်ႉလႄႈ သူၼိၵ်ႈၸၢၵ်ႈငႅၼ်းသႄးၵဝ်ထၼ်ႇၼႆႉၼၼ်ႉ ယင်းဢမ်ႇပႆႇပျေႇၸႂ်လူးၵွၼ်ႇႁိုဝ်း။
ဢူဝ်း။ ႁႂ်ႈမီးၵေႃႉဢၼ်တႅမ်ႈမၢႆၵႂၢမ်းၵဝ်ဝႆႉသေၵမ်း၊ ႁႂ်ႈၵႂၢမ်းၵဝ်ၸိူဝ်းၼၼ်ႉတႅမ်ႈသႂ်ႇဝႆႉၼႂ်းပပ်ႉသေၵမ်းလူၺ်ႈ။
ႁႂ်ႈဢဝ်ၵၼ်းတႅမ်ႈလဵၵ်းဢိၵ်ႇတင်းၵၼ်းတႅမ်ႈၸိုၼ်းတႅမ်ႈပဵၼ်တူဝ်လိၵ်ႈဝႆႉလႄႈ တွၵ်ႇတူဝ်လိၵ်ႈသႂ်ႇၵႃႈတီႈမၢၵ်ႇႁိၼ်ႁႂ်ႈမၼ်ႈၶိူင်ႇယူႇသေႇသေႇသေၵမ်းလူၺ်ႈ။
လွင်ႈမၼ်းၸမ်ႉ၊ၵဝ်ႁုလွင်ႈဢၼ်ၸဝ်ႈဢၼ်ထုတ်ႇၼုၵ်ႈဢဝ်ၵဝ်ၼၼ်ႉ၊ ဢသၢၵ်ႈလိပ်းယူႇလႄႈမိူဝ်ႈၶိင်ႇၵႃႇလႃႉၵမ်းလိုၼ်းသုတ်းၼၼ်ႉ၊ တၵ်းမႃးၸုၵ်းယူႇၵႃႈၼိူဝ်လိၼ်မိူင်းဢေႃႈ။
ပိၵ်ႉသမ်ႉၼိူဝ်ႉၼင်ၵဝ်လႆႈလုလႅဝ်သဵင်ႈမူတ်း သေၵေႃႈ၊ ၵဝ်ၼႆႉတၵ်းယူႇၵႃႈၼႂ်းတူဝ်ၶၼ်ႇထႃႇ သေလႄႈ ႁၼ်ၽြႃးပဵၼ်ၸဝ်ႈၼၼ်ႉယူႇဢေႃႈ။
ၵဝ်တၵ်းႁၼ်မၼ်းၸဝ်ႈသိုဝ်ႈၼႃႈတႂ်ႈတႃၵဝ်လႄႈ ထူပ်းႁၼ်မၼ်းၸဝ်ႈဢၼ်ၵဝ်ႁုၸၵ်းဢေႃႈ။ ၼႂ်းၸႂ်ၼႂ်းၶေႃးၵဝ်မီးတၢင်းဢၼ်ႁိူဝ်ႉၼူၼ်းၵႂႃႇ။
ပေႃးသူလၢတ်ႈဝႃႈ၊ ‘ႁဝ်းထူပ်းႁၼ်ငဝ်ႈႁၢၵ်ႈမၼ်းၵႃႈၼႂ်းမၼ်းယဝ်ႉလႄႈ ႁဝ်းတၵ်းၼိၵ်ႈၸၢၵ်ႈမၼ်းၸိူဝ်ႉၼင်ႇႁိုဝ်၊’ ဝႃႈၼႆၸိုင်။
သူဢွၼ်ၵၼ်ၵူဝ်ႁႄၽေးလၢပ်ႇၽေးလႅဝ်းတႃႉ။ လွင်ႈမၼ်းၸမ်ႉ၊ၽေးလၢပ်ႇၽေးလႅဝ်းၼၼ်ႉ ၸၢင်ႈပႃးဢဝ်တင်းၸႂ်မႆႈၶႂ်ႈၸႃႉၽြႃးပဵၼ်ၸဝ်ႈ၊ မႃးပၼ်တၢမ်ႇတီႈဢပျတ်ႈႁႂ်ႈသူထၢၼ်ႈပေႃးႁုၸႅင်ႈ လွင်ႈဢၼ်မီးၸဝ်ႈဢၼ်ၸီႇယၢင်ႇတြႃး” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ၸေႃႇၽႃႇ၊ ၵူၼ်းမဵဝ်း ၼေႇမတ်ႉ၊ ၶိုၼ်းလၢတ်ႈလႄႈဝႃႈၸမ်ႉ၊
“ပိူဝ်ႈဢၼ်ႁူဝ်ၸႂ်ၵဝ်ၶိုၼ်းတိုၵ်းယူင်းၵဝ် ႁႂ်ႈၶိုၼ်းလၢတ်ႈလႄႈ ၵဝ်မီးၸႂ်ဢၼ်ၶႂ်ႈလၢတ်ႈႁႅင်းယႂ်ႇၼႃႇ လူင်လၢင်ဢေႃႈ။
တၢင်းဢၼ်မႂ်းလၢတ်ႈၼၼ်ႉပဵၼ်ၵႂၢမ်းသႄႉသွမ်းတၢင်ႇဢပျတ်ႈဢေႃႈ။ ၵူၺ်းၵႃႈ၊ၵဝ်တၵ်းလၢတ်ႈၸိူဝ်ႉၼင်ႇႁိုဝ်ၼၼ်ႉၵဝ်ႁုၸႅင်ႈလီလီယူႇဢေႃႈ။
ၸႃႉၸဵမ်ၶိင်ႇၵႃႇလႃႉမိူဝ်ႈဢွၼ်ၼႆႉ၊ ၶိင်ႇၵႃႇလႃႉဢၼ်တႄႇၸႃႉဢဝ်ၵူၼ်းတၢင်ႇဝႆႉၵႃႈၼိူဝ်လိၼ်မိူင်းၼၼ်ႉ။
လွင်ႈဢၼ်ၵူၼ်းႁၢႆႉမိူၵ်ႈဢမ်ႇလႆႈဢုပ်ႇဝၢဝ်းႁိုင်ႁိုင်၊ ဢိၵ်ႇတင်းၵူၼ်းဢၼ်ဢမ်ႇမီးၽြႃးမီးတြႃးတင်းလၢႆ၊ လႆႈၸူမ်းသိူဝ်းမူၼ်ႈပျေႃႇၸူဝ်ႈၵမ်းဢွၼ်ႇၼိုင်ႈၵူၺ်းၼၼ်ႉၸိုင်၊မႂ်းဢမ်ႇႁုႁိုဝ်း။
ပိၵ်ႉသမ်ႉမၼ်းၶိုၼ်ႈယႂ်ႇမႂ်ႇသုင် ထၢၼ်ႈပေႃးႁူဝ်မၼ်း၊ ပဵင်းၽႃႉပဵင်းမွၵ်ႇသေၵေႃႈ။
မၼ်းတၵ်းလုလႅဝ်မိူၼ်ၸိူဝ်ႉၼင်ႇၽၢႆႈလူင်တူဝ်ၸဝ်ႈၵဝ်ႇၼၼ်ႉယူႇသေလႄႈ ၶဝ်ၸိူဝ်းဢၼ်ယၢမ်ႈႁၼ်မၼ်းၼၼ်ႉ တၵ်းထၢမ်ဝႃႈ၊ ‘မၼ်းမီးတီႈလႂ်’ ဝႃႈၼင်ႇၼႆဢေႃႈ။
မၼ်းတၵ်းၵိုင်ႉၵၢင်ႉႁၢႆၵႂႃႇမိူၼ်ၸိူဝ်ႉၼင်ႇ တၢင်းဢၼ်ၼွၼ်းၽၼ်လႄႈ ၵမ်းလိုၼ်းဢမ်ႇလႆႈထူပ်းလႆႈႁၼ်မၼ်းထႅင်ႈ၊ မၼ်းတၵ်းလပ်ႉၵႂႃႇႁၢႆၵႂႃႇမိူၼ်ၸိူဝ်ႉၼင်ႇရူႇပႃႇရူင်ႇဢၼ်လႆႈၶိင်ႇၵၢင်ၶိုၼ်းၼၼ်ႉဢေႃႈ။
မၢၵ်ႇတႃဢၼ်ယၢမ်ႈလႆႈႁၼ်မၼ်းၼၼ်ႉ ၵမ်းလိုၼ်းဢမ်ႇလႆႈႁၼ်မၼ်းယဝ်ႉ။ မၼ်းတၵ်းလပ်ႉႁၢႆၵႂႃႇသေၵႃႈတီႈဢၼ်မၼ်း၊ ယၢမ်ႈယူႇယၢမ်ႈသဝ်းမႃးၼၼ်ႉသေလႄႈ။
လုၵ်ႈလၢၼ်မၼ်းတေလႆႈၵႂႃႇယွၼ်းတၢင်းၸွႆႈ တၢင်းထႅမ်တီႈၵူၼ်းယၢၵ်ႈၵူၼ်းၽၢၼ်၊ လုၵ်ႈလၢၼ်မၼ်းၸိူဝ်းၼၼ်ႉတၵ်းလႆႈ ၶိုၼ်းသၢႆႈၶိုၼ်းတႅၼ်း၊ ဢုၵ်ႉၸႃႇၸေးၸိမ်ႇဢၼ်မၼ်းႁိမ်ဢဝ် ဝႆႉၼၼ်ႉဢေႃႈ။
ပိၵ်ႉသမ်ႉမၼ်းယင်းမီးဢဵၼ်ႁႅင်းၸိူဝ်ႉၼင်ႇၵူၼ်းၼုမ်ႇသေၵေႃႈ၊ ဢဵၼ်ႁႅင်းၸိူဝ်းၼၼ်ႉတၵ်းၶိုၼ်းမိူဝ်းၸူးတီႈလိၼ်လူၺ်ႈၵၼ်တင်းမၼ်းဢေႃႈ။
ပိၵ်ႉသမ်ႉဢရႃႉသႃႇတုၸရိူၵ်ႈပဵၼ်ဢၼ်ဝၢၼ်ဢၼ်ၸဵမ်းပုၼ်ႈမၼ်းလႄႈ မၼ်းဢဝ်သိူင်ႇဝႆႉသိမ်းဝႆႉၵႃႈတႂ်ႈလိၼ်ႉမၼ်း။
မၼ်းသေလၢႆဢမ်ႇထူမ်ႇပႅတ်ႈလႄႈဢူမ်ဝႆႉ ၵႃႈၼႂ်းသူပ်းမၼ်းဢေႃႈ။
ၵူၺ်းၵႃႈ၊တၢင်းၵိၼ်ၵႃႈၼႂ်းတွင်ႉမၼ်းၼၼ်ႉ လႅၵ်ႈလၢႆႈ၊ မိူၼ်ပဵၼ်ၵွင်ႉပဵၼ်ယၢင်ငူးႁၢႆႉၵႃႈၼႂ်း တူဝ်မၼ်းဢေႃႈ။
မၼ်းဢိုၼ်ၵိၼ်ၸေးၸိမ်ႇဢုၵ်ႉၸႃႇသေယဝ်ႉ၊သမ်ႉတၵ်းလႆႈၶိုၼ်းႁၢၵ်ႈဢွၵ်ႇမႃး၊ ၽြႃးပဵၼ်ၸဝ်ႈၼုၵ်ႈဢွၵ်ႇဢဝ်ဢွၵ်ႇသေ ၵႃႈၼႂ်းတွင်ႉမၼ်းဢေႃႈ။
မၼ်းၸုပ်ႇၵိၼ်ၵွင်ႉယၢင်ငူးႁၢႆႉလႄႈ ၵွင်ႉယၢင်ၼၼ်ႉတၵ်းဢဝ်မၼ်းတၢႆမိူၼ်ၸိူဝ်ႉၼင်ႇဢၼ်ငူးႁၢႆႉတွတ်ႇၼၼ်ႉဢေႃႈ။
မၼ်းဢမ်ႇလႆႈႁၼ်ႁွင်ႈဢၼ်ၼမ်ႉမၼ်း မၢၵ်ႇသၢၼ်ႇလုၼ်ႇလႆဢိၵ်ႇတင်း၊ ႁွင်ႈဢၼ်ၼမ်ႉၼူမ်းတင်းၼမ်ႉၽိုင်ႈ လႆယူႇၼၼ်ႉဢေႃႈ။
ဢုၵ်ႉၸႃႇဢၼ်မၼ်းႁဵတ်းလႄႈလႆႈၼၼ်ႉ တူဝ်မၼ်းဢမ်ႇလႆႈသုင်းလႆႈၸႂ်ႉလႄႈ တၵ်းလႆႈၶိုၼ်းပၼ်ဢေႃႈ။ မၼ်းဢမ်ႇမီးဢၶႂၢင်ႉဢၼ်လႆႈမူၼ်ႈပျေႃႇ လူၺ်ႈၸေးၸိမ်ႇမၼ်းၼၼ်ႉ။
ၵွပ်ႈပိူဝ်ႈဢၼ်မၼ်းတဵၵ်းငႅၼ်းၵူၼ်းၽၢၼ်လႄႈၸုၼ်ႉၶဝ်ပႅတ်ႈ၊ သမ်ႉႁိမ်ဢဝ်ႁိူၼ်းဢၼ်ပိူၼ်ႈတႄႇႁဵတ်း ဝႆႉၼၼ်ႉဢေႃႈ။
ၵွပ်ႈပိူဝ်ႈဢၼ်လေႃးၽႃႉမၼ်းဢမ်ႇပျေႇလႆႈလႄႈဢုၵ်ႉၸႃႇဢၼ်ၵျိူၵ်ႈၸႂ်ထုၵ်ႇၸႂ်မၼ်းၼၼ်ႉ၊ ဢမ်ႇလႆႈၵိုတ်းၵျၢၼ်ႇဝႆႉတီႈမၼ်းသေၸိူဝ်ႉ သေဢၼ်။
မိူဝ်ႈမၼ်းၵိၼ်ၼၼ်ႉၸိုင်၊ဢမ်ႇႁႂ်ႈၵႃႈသင် ၵိုတ်းၵျၢၼ်ႇဝႆႉ၊ ပိူဝ်ႈၼႆလႄႈဢုၵ်ႉၸႃႇၸေးၸိမ်ႇမၼ်း ဢမ်ႇသေႇဢမ်ႇမၼ်ႈလႆႈ။
မိူဝ်ႈဢၼ်မၼ်းယင်းတိုၵ်ႉမၢၵ်ႈမီးလီပဵၼ်ယူႇၼၼ်ႉ၊ မၼ်းတၵ်းၵိုင်ႉၵၢင်ႉႁူပ်ႉထူပ်း တၢင်းယၢၵ်ႈတၢင်းၽၢၼ်၊ တၼ်းၶူဝ်းတၢင်းဢၼ်ယၢပ်ႇယဵၼ်းၵိၼ်းၸႂ်ၼၼ်ႉတၵ်းမႃးၸူးမၼ်းဢေႃႈ။
ပွႆႇႁႂ်ႈမၼ်းၵိၼ်ဢိမ်ႇၵိၼ်တဵမ်တွင်ႉမၼ်းတႃႉ။ ၽြႃးပဵၼ်ၸဝ်ႈတၵ်းဢဝ်တေႃးသႃႉ ဢၼ်မႆႈႁွၼ်ႉၼႃႇ၊ တူၵ်းႁွတ်ႈၵႃႈၼိူဝ်မၼ်းႁႂ်ႈၽူၼ်တၢင်းၸႂ်မႆႈ ၶႂ်ႈၸႃႉမၼ်းၸဝ်ႈတူၵ်းပုၼ်ႈဢၼ်မၼ်း တၵ်းၵိၼ်ဢေႃႈ။
ပိၵ်ႉသမ်ႉမၼ်းဝႄႈပိူင်ႈၼီပၢႆႈသေလၢၵ်ႈၼၢၵ်ႈလဵၵ်းသေၵေႃႈ၊ ပိုၼ်တွင်းလိူင်တၵ်းယိုဝ်းမႅၼ်ႈသႂ်ႇမၼ်းပွင်ႇပိဝ်ၵႂႃႇသေယဝ်ႉ။
ပၢႆလႅမ်ပိုၼ်မႅၼ်းဢွၵ်ႇတီႈပႄလင်မၼ်းမႃးလႄႈ ၶူမ်းဢၼ်ႁိူဝ်ႈမၢပ်ႈၼၼ်ႉသဵပ်ႇသႂ်ႇႁူင်းလီလႄႈၽုတ်းပေႃႇဢွၵ်ႇမႃး တၢင်းဢၼ်လီၵူဝ်လီႁႄမႃးၸူးမၼ်းဢေႃႈ။
လပ်းသိင်ႇၵႃႈမီးၼၼ်ႉႁူမ်ႇသုမ်ႇဢုၵ်ႉၸႃႇ ဢၼ်မၼ်းသိမ်းဝႆႉ၊ ၽႆးဢၼ်ၵူၼ်းဢမ်ႇသႂ်ႇဢမ်ႇသုမ်ၼၼ်ႉ၊ တၵ်းႁုပ်ႈမႆႈမၼ်း၊ဢိၵ်ႇတင်းၵႃႈဢၼ်မီးၵႃႈၼႂ်းႁိူၼ်းမၼ်းၼၼ်ႉပႅတ်ႈဢေႃႈ။
ၽႃႉၵၢင်ႁၢဝ်ၽုၺ်ႇပိုတ်ႇၼႄပျႃးဢပျတ်ႈ မၼ်းလႄႈ လိၼ်မိူင်းၶၢမ်ႇသၢၵ်ႈသေႇၽၢႆႇၼိုင်ႈ တင်းမၼ်းဢေႃႈ။
ၸေးၸိမ်ႇဢုၵ်ႉၸႃႇမၼ်းၵႃႈမီးၼၼ်ႉ တၵ်းလုလႅဝ်ႁၢႆၵႂႃႇ၊ လွင်ႈၵႂႃႇလႆၵႂႃႇၸွမ်းၼႂ်းၼမ်ႉတေႃးသႃႉ ၽြႃးပဵၼ်ၸဝ်ႈ၊ ဢၼ်လႆၼွင်းၼၼ်ႉဢေႃႈ။
ဢၼ်ၼႆႉပဵၼ်သူးလၢပ်ႈဢၼ်ၽြႃးပဵၼ်ၸဝ်ႈပၼ်တီႈၵူၼ်းႁၢႆႉၵူၼ်းမိူၵ်ႈလႄႈ ပဵၼ်ပုၼ်ႈပဵၼ်တႃႇဢၼ်ၽြႃးပဵၼ်ၸဝ်ႈ ၸီႇယၢင်ႇၶၢၼ်းဝႆႉပုၼ်ႈမၼ်းဢေႃႈ။” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ယေႃးၽႃႉ၊ ၶိုၼ်းလၢတ်ႈလႄႈဝႃႈၸမ်ႉ၊
“ဢွၼ်ၵၼ်ထွမ်ႇငိၼ်းၵႂၢမ်းၵဝ်ၸေးၸေး ၸွတ်ႇၸွတ်ႇသေၵမ်း၊ ဢၼ်ၼႆႉပဵၼ်တၢင်းဢၼ်ၵဝ်ယွၼ်းတီႈသူႁႂ်ႈပဵၼ်တၢင်းဢၼ်ပျေႇၸႂ်ၼိမ်ၸႂ်ၵဝ်ဢေႃႈ။
ဢွၼ်ၵၼ်ယိူၼ်ႉၶၢမ်ႇႁႂ်ႈၵဝ်မီးဢၶႂၢင်ႉဢၼ် လႆႈလၢတ်ႈသေၵမ်း။ မိူဝ်ႈၵဝ်လၢတ်ႈယဝ်ႉၼၼ်ႉသူၶႂ်ႈၶူဝ်ၵေႃႈ ႁဵတ်းပျၢၵ်ႈႁဵတ်းၶူဝ်တႃႉ။
တၢင်းဢၼ်ၵဝ်တွပ်ႇထဵင်ၼႆႉၵဝ်ၽိတ်းၵၼ် တင်းၵူၼ်းဢမ်ႇၸႂ်ႈ၊ ၵွပ်ႈပိူဝ်ႈၼႆလႄႈၵဝ်ထုၵ်ႇလီၸႂ်လိူတ်ႇ ၸႂ်မႆႈဢေႃႈ။
ဢွၼ်ၵၼ်လူတူၺ်းၵဝ်လႄႈၵိုတ်းမိုင်ၵႂင်ၸႂ် ယူႇသေလႄႈ ဢဝ်တင်းမိုဝ်းသူတူမ်းသူပ်းသူယူႇသေၵမ်းတႃႉ။
မိူဝ်ႈဢၼ်ၵဝ်ၶႆႈၸႂ်ထူပ်းလွင်ႈတၢင်းဢၼ်ပဵၼ်မႃးတီႈၵဝ်ၼၼ်ႉၸိုင်၊ ၵဝ်မီးတၢင်းဢၼ်တူၵ်းၸႂ်ၼႃႇလႄႈ ၵဝ်ပဵၼ်တၢင်းဢၼ်သၼ်ႇသၢႆၶွၼ်းဝႆၵႂႃႇဢေႃႈ။
ၵွပ်ႈသင်လႄႈႁႂ်ႈၵူၼ်းႁၢႆႉၵူၼ်းမိူၵ်ႈ ဢသၢၵ်ႈလိပ်းယူႇ၊ တေႃႇထိုင်ႁွတ်ႈဢသၢၵ်ႈထဝ်ႈၵႄႇလႄႈပျေႉၸုမ်ႇဝႆႉတင်းဢဵၼ်ႁႅင်းတၼ်းၶူဝ်း။
ၶဝ်လႆႈႁၼ်လုၵ်ႈၶဝ်လၢၼ်ၶဝ်ၵတ်းယဵၼ်ၶျၢမ်းသႃႇႁိမ်းၶဝ်လႄႈ ၸိူဝ်ႉၶိူဝ်းၶဝ်ၸုၵ်းမၼ်ႈယူႇသိုဝ်ႈၼႃႈ တႂ်ႈတႃၶဝ်။
ၽြႃးပဵၼ်ၸဝ်ႈယင်းဢမ်ႇႁႂ်ႈၽေးတုၵ်ႉၶႃႉ တူၵ်းႁွတ်ႈၵႃႈၼိူဝ်ႁိူၼ်းၶဝ်၊ ၶဝ်ၵၢင်းလွတ်ႈသေတၢင်းဢၼ်ၽြႃးပဵၼ်ၸဝ်ႈပၼ်ၽေးပၼ်တၢမ်ႇၼၼ်ႉ။
ဝူဝ်းငၢၼ်ၶဝ်မီးၸိူဝ်ႉမီးၽၼ်းသေယဝ်ႉ၊ ဢမ်ႇလုတ်ႈဢမ်ႇႁၢမ်း၊ ဝူဝ်းမႄႈၶဝ်ၵေႃႈၸၢင်ႈၵိူတ်ႇလုၵ်ႈၽႄႈလုၵ်ႈလႄႈဢမ်ႇယွတ်ႇဢမ်ႇတူၵ်း။
လုၵ်ႈလၢင်းၶဝ်ၶုၼ်ႇလႅၼ်ႈလဵၼ်ႈယူႇမိူၼ်ၸိူဝ်ႉၼင်ႇသူဝ်းဢွၼ်ႇတင်းလၢႆ။
ဢွၼ်ၵၼ်ၵႃႈဝႅၼ်ၵျွၵ်းဝႅၼ်လူၺ်ႈသဵင်ႁႆႇၵွင်ၶဵတ်ႇ၊ ဢိၵ်ႇတင်းလဵတ်းတိင်ႇလႄႈၸူမ်းသိူဝ်းလူၺ်ႈသဵင်တူႇရိယႃႇယူႇဢေႃႈ။
ၶဝ်ၸၢင်ႈဢွၼ်ၵၼ်လႆႈလီလႆႈပဵၼ်ယူႇလႄႈ ၸူဝ်ႈပၢၼ်ၶဝ်လႆႈသဵတ်ႇလီၼိမ်လီယဝ်ႉၸင်ႇ၊ လူင်းၸူးတီႈမိူင်းမရၼႃႉဢေႃႈ။
ၶဝ်ယင်းၸၢင်ႈလၢတ်ႈတီႈၽြႃးပဵၼ်ၸဝ်ႈ လႄႈဝႃႈ ‘ဢွၵ်ႇသေၵႃႈတီႈႁဝ်းၼႆႉၵႂႃႇတႃႉ။ ႁဝ်းဢမ်ႇမီးဢလူဝ်ႇၶႂ်ႈႁုသဵၼ်ႈတၢင်းၸဝ်ႈႁဝ်း။
ၸဝ်ႈဢၼၼ်ႇတႃႉတၼ်းၶူဝ်းၼၼ်ႉပဵၼ်ၵေႃႉၸိူဝ်ႉၼင်ႇႁိုဝ်လႄႈ ႁဝ်းတၵ်းလႆႈႁဵတ်းဝၢတ်ႈတီႈမၼ်းၸဝ်ႈ၊ ပေႃးႁဝ်းသူးတွင်းတီႈမၼ်းၸဝ်ႈၸိုင်၊ တၵ်းမီးဢၵျူဝ်းၵႃႈသင်၊’ ဝႃႈၼင်ႇၼႆဢေႃႈ။
ၶဝ်ၸၢင်ႈဢုပ်ႇဢၢတ်ႇဝႃႈ၊ၶဝ်လႆႈလီလႆႈပဵၼ်မႃး၊ ၵွပ်ႈပိူဝ်ႈဢဵၼ်ႁႅင်းၶဝ်ဢေႃႈ။ တၢင်းၵျၢမ်ႇတၢင်းပွင်ၶဝ်ၸိူဝ်းဢၼ်ဢမ်ႇတြႃးၼၼ်ႉပဵၼ်ဢၼ်ၵႆၵၼ်တင်းၵဝ်ဢေႃႈ။
ၵွၵ်းၽႆးၶဝ်ၸိူဝ်းဢၼ်ဢမ်ႇတြႃးၼၼ်ႉ ဢမ်ႇတွၼ်ႉမွတ်ႇတွၼ်ႉတၢႆလႄႈ ၽေးတၢင်းဢၼ်ယႃႉပႅတ်ႈၶဝ်ၼၼ်ႉ ယၢမ်ႈႁွတ်ႈထိုင်ၵႃႈၼိူဝ်ၶဝ်ႁိုဝ်း၊ ၽြႃးပဵၼ်ၸဝ်ႈယၢမ်ႈဢွၵ်ႇတေႃးသႃႉလႄႈယၢမ်ႈၸီႇယၢင်ႇၽေးဢုပၢတ်ႈတၢင်းဢၼ်ယၢပ်ႇၸႂ်ၽိုတ်ႇၸႂ်တီႈၶဝ်လၢႆၽဝ်ႇလၢႆပွၵ်ႈယဝ်ႉ။
ယၢမ်ႈပဝ်ႇၶဝ်ပႅတ်ႈမိူၼ်ပဝ်ႇၽိူင်းႁႅင်ႈဢၼ် ပိဝ်ၵႃႈၼႂ်းလူမ်း၊ မိူၼ်ၵႅပ်ႇဢၼ်ပိဝ်ၸွမ်းၽူၼ်လူင်လူမ်းလူင်ၼၼ်ႉမီးလၢႆၽဝ်ႇလၢႆပွၵ်ႈ။
သူလၢတ်ႈလႄႈဝႃႈ၊ ‘ၽြႃးပဵၼ်ၸဝ်ႈပၼ်တၢမ်ႇ ဢပျတ်ႈတီႈလုၵ်ႈလၢင်း၊ ပုၼ်ႈတၢင်တူဝ်ဢပျတ်ႈပေႃႈၶဝ်’ ဝႃႈၼင်ႇၼႆဢေႃႈ။ ႁႂ်ႈၽြႃးပဵၼ်ၸဝ်ႈတွပ်ႇတႅၼ်းပၼ်တၢမ်ႇ ဢပျတ်ႈတီႈၶဝ်၊ ႁႂ်ႈၶဝ်လႆႈႁုၸႅင်ႈလွင်ႈဢၼ်မၼ်းၸဝ်ႈ ႁဵတ်းၸိူဝ်ႉၼင်ႇၼၼ်၊ ၵွပ်ႈပိူဝ်ႈတုၸရိူၵ်ႈဢပျတ်ႈၶဝ်ၼၼ်ႉသေၵမ်း။
ႁႂ်ႈမၢၵ်ႇတႃၶဝ်လႆႈႁၼ်တၢင်းဢၼ်ၶဝ်လုလႅဝ် သေၵမ်းလူၺ်ႈ။ ႁႂ်ႈၶဝ်လႆႈသူတ်ႉလႆႈၵိၼ်တၢင်းၸႂ်မႆႈၶႂ်ႈၸႃႉ ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉ တၼ်းၶူဝ်း၊ သေၵမ်း။
လွင်ႈမၼ်းၸမ်ႉ၊မိူဝ်ႈဢၼ်ၸူဝ်ႈဢသၢၵ်ႈၵူၼ်းသုတ်းသဵင်ႈယဝ်ႉၼၼ်ႉ၊ မၼ်းယင်းမႆႈၸႂ်လူၺ်ႈလုၵ်ႈလၢၼ်မၼ်းတၵ်းပဵၼ်ၸိူဝ်ႉၼင်ႇႁိုဝ်ၼၼ်ႉလႆႈႁိုဝ်း။
ၽူႈလႂ်ၸၢင်ႈတၵ်းသင်ႇသွၼ်ပၼ်ပိင်ႇၺႃႇ တီႈၽြႃးပဵၼ်ၸဝ်ႈ၊ ၸဝ်ႈဢၼ်ၸီႇယၢင်ႇတြႃးတီႈၶဝ်ၸိူဝ်းဢၼ်သုင်မျၢတ်ႈၼၼ်ႉလႆႈ။
ၵူၼ်းၵေႃႉၼိုင်ႈတၢႆၵႂႃႇၼႂ်းမိူဝ်ႈဢၼ် မၼ်းယင်းတိုၵ်ႉ၊ မၢၵ်ႈမီးလီပဵၼ်လႄႈၵတ်းယဵၼ် ၶျၢမ်းသႃႇၼၼ်ႉဢေႃႈ။
တူဝ်ၶၼ်ႇထႃႇမၼ်းပီးလီမၼ်းလီလႄႈ ဢွၵ်းလုပ်ႇမၼ်းပိူဝ်ႉလီယမ်းလီဝႆႉဢေႃႈ။
မီးထႅင်ႈၵေႃႉၼိုင်ႈၸမ်ႉ၊မီးတၢင်းဢၼ်ၶီၸႂ် ၶူမ်ၸႂ်လႄႈတၢႆၵႂႃႇဢေႃႈ။ မၼ်းဢမ်ႇတွၼ်ႉလႆႈၸိမ်းတၢင်းၵိၼ် ဢၼ်လီဢၼ်ဝၢၼ်၊ သေၽဝ်ႇသေပွၵ်ႈဢေႃႈ။
ၶဝ်သွင်ၵေႃႉၼၼ်ႉတၢႆၵႂႃႇလႄႈၶၢမ်ႇတၢင်းဢၼ်ဢဝ်ၵႂႃႇသၢင်းၵျူဝ်ႇမိူၼ်မိူၼ်ၵၼ်လႄႈ လႆႈၶၢမ်ႇတၢင်းဢၼ်ၼွၼ်ႁူမ်ႇသုမ်ႇဢေႃႈ။
ၵဝ်ႁုလွင်ႈတၢင်းဢၼ်သူၵျၢမ်ႇပွင်ဢိၵ်ႇတင်း လွင်ႈတၢင်းဢၼ်သူၶိုင်ပွင်ႁဵတ်းဢမ်ႇတြႃး ႁႂ်ႈလႆႈယႃႉယူၵ်ႉၵဝ်ၼၼ်ႉ။
သူထၢမ်လႄႈဝႃႈ၊ ‘ႁိူၼ်းၶုၼ်လူင်ၼၼ်ႉမီးၵႃႈလႂ်၊ တီႈယူႇတီႈသဝ်းၶဝ်ၸိူဝ်းဢၼ်ဢမ်ႇတြႃးၼၼ်ႉမီးၵႃႈတီႈလႂ်၊’ ဝႃႈၼႆၼၼ်ႉဢေႃႈ။
သူဢမ်ႇတွၼ်ႉထၢမ်တူၺ်းတီႈၶဝ်ၸိူဝ်းဢၼ် ၵႂႃႇတႃႈပႆတၢင်းၼၼ်ႉႁိုဝ်း၊ သူဢမ်ႇယုမ်ႇၵႂၢမ်းဢၼ်ၶဝ်မႃးမွၵ်ႇ မႃးလၢတ်ႈၼႄၼၼ်ႉႁိုဝ်း။
လွင်ႈမၼ်းၸမ်ႉ၊ၵူၼ်းၵႂႃႇတႃႈပႆတၢင်းၸိူဝ်းၼၼ်ႉၶၢမ်ႇသၢၵ်ႈသေႇလႄႈဝႃႈ၊ ‘ၼႂ်းမိုဝ်ႉဝၼ်းဢၼ်ၽြႃးပဵၼ်ၸဝ်ႈ ဢွၵ်ႇတေႃးသႃႉလႄႈ ၸီႇယၢင်ႇပၼ်တၢမ်ႇတီႈၵူၼ်းတင်းလၢႆၼၼ်ႉၸိုင်၊ ၵူၼ်းဢၼ်ဢမ်ႇတြႃးတင်းလၢႆၼၼ်ႉ၊ တၵ်းၵၢင်းလွတ်ႈၽေးတၢမ်ႇဢေႃႈ၊’ ဝႃႈၼင်ႇၼႆဢေႃႈ။
ၽူႈလႂ်ႁတ်းၸိၼႃႈတမ်တႃၵေႃႉဢၼ် ဢမ်ႇတြႃးၼၼ်ႉသေလႄႈ ၽုၺ်ႇၼႄသဵၼ်ႈတၢင်းဢၼ်မၼ်း ပႆၽိတ်းၼၼ်ႉ၊ ၽူႈလႂ်ႁတ်းၸီႇယၢင်ႇပၼ်တၢမ်ႇဢပျတ်ႈ ၵႃႈၼိူဝ်မၼ်း။
မိူဝ်ႈဢၼ်ပိူၼ်ႈႁၢမ်မၼ်းၵႂႃႇၵႃႈတီႈၶုမ်ပႃႇႁဵဝ်ႈ၊ ဢၼ်မီးၵူၼ်းပႂ်ႉယူႇၵၢင်ယူႇဝႆႉလီလီၼၼ်ႉၸိုင်။
ၵူၼ်းတင်းသဵင်ႈတင်းလူင်ၵေႃႈၸွမ်းလင်မၼ်းၵႂႃႇ၊ ၵူၼ်းၸိူဝ်းဢၼ်ၵႂႃႇတၢင်းၼႃႈမၼ်းၵေႃႈ ၼမ်ၼႃႇဢမ်ႇၼပ်ႉဢမ်ႇဢၢၼ်ႇလႆႈယဝ်ႉဢေႃႈ။ ၵွၼ်ႈလိၼ်ႁူမ်ႇၵႃႈၼိူဝ်တူဝ်မၼ်း ဢူၼ်ႈလီၼူၼ်းလီဢေႃႈ။
သူဢဝ်တင်းၵႂၢမ်းပဝ်ႇၵႂၢမ်းလၢႆလႄႈၶတ်းၸႂ် ပၼ်ဢဵၼ်ပၼ်ႁႅင်းၵဝ်လူင်ပႄႇ၊ ၵႂၢမ်းဢၼ်သူၶိုၼ်းတွပ်ႇလၢတ်ႈၼၼ်ႉ ပဵၼ်ၵႂၢမ်းမုသႃႇလွၼ်ႉလွၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ဢေးလိၽတ်ႉ၊ ၵူၼ်းမဵဝ်း တေႇမၼ်ႇ၊ ၶိုၼ်းလၢတ်ႈလႄႈဝႃႈ၊
“ၸွင်ႇမီးၵူၼ်းဢၼ်မီးပိင်ႇၺႃႇယႂ်ႇ သေၵေႃႉသေၵူၼ်း ပဵၼ်ဢၵျူဝ်းပုၼ်ႈၽြႃးပဵၼ်ၸဝ်ႈ လႆႈၼၼ်ႉႁိုဝ်း။
တၢင်းဢၼ်မႂ်းသိုဝ်ႈတေႃႇၼၼ်ႉပဵၼ် ဢၼ်ၸူမ်းဢၼ်သိူဝ်း၊ တီႈၸဝ်ႈဢၼၼ်ႇတႃႉတၼ်းၶူဝ်းႁိုဝ်း၊ တၢင်းဢၼ်မႂ်းၵၢင်းလွတ်ႈတင်းတၢင်းဢၼ် တၢင်ႇဢပျတ်ႈၼၼ်ႉ၊ ပဵၼ်ဢၵျူဝ်းတီႈမၼ်းၸဝ်ႈႁိုဝ်း။
မႂ်းထၢင်ႇဝႃႈ၊မႂ်းပဵၼ်ၵေႃႉဢၼ်ပႂ်ႉသဵတ်ႈၸႃႇ ယူႇလႄႈ သမ်ႉလႆႈၶၢမ်ႇတၢင်းဢၼ်ၽြႃးပဵၼ်ၸဝ်ႈ ၸီႇယၢင်ႇပၼ်တၢမ်ႇႁိုဝ်း။
တုၸရိူၵ်ႈဢၼ်မႂ်းႁဵတ်းၼၼ်ႉယႂ်ႇၼႃႇ လူင်လၢင်ဢမ်ႇၸႂ်ႈႁိုဝ်း၊ ဢပျတ်ႈဢၼ်မႂ်းႁဵတ်းတင်းလၢႆၼၼ်ႉဢမ်ႇမီး တီႈသုတ်းတီႈသဵင်ႈလႆႈ။
မႂ်းသိမ်းဢဝ်ဢုၵ်ႉၸႃႇဢၼ်ပီႈၼွင်ႉမႂ်း ပွင်ႇတၢင်ဝႆႉၼၼ်ႉလႄႈ သမ်ႉဢဝ်ၶူဝ်းၼုင်ႈၵႂႃႇလႄႈပွႆႇႁႂ်ႈၶဝ်ယူႇ တူဝ်ပူၺ်ဝႆႉလူင်ပႄႇ။
မႂ်းဢမ်ႇပၼ်ၼမ်ႉၵိၼ်တီႈၵေႃႉဢၼ်ႁိူဝ်ႉ ဢၼ်ၼူၼ်း၊ ဢမ်ႇလဵင်ႉပၼ်တၢင်းၵိၼ်တီႈၵေႃႉဢၼ် ဢိုပ်းဢၼ်ယၢၵ်ႈၼၼ်ႉ။
ၵေႃႉဢၼ်ႁႅင်းယႂ်ႇၼၼ်ႉၸမ်ႉ၊လႆႈပိုင်ႈၼမ်ႉ ပိုင်ႈလိၼ်ဢေႃႈ။ ၵေႃႉဢၼ်မီးၵုင်ႇသရေႇၼၼ်ႉလႆႈဢၶႂၢင်ႉဢၼ်ယူႇၵႃႈၼႂ်းမၼ်းဢေႃႈ။
မႂ်းဢမ်ႇၸွႆႈဢမ်ႇထႅမ်မႄႈမၢႆႈတင်းလၢႆဢမ်ႇၵႃး၊ မႂ်းယင်းႁိမ်ဢဝ်ၸူၼ်ဢဝ်တီႈလုၵ်ႈၽၢၼ်ပေႃႈၽၢၼ်မႄႈၸိူဝ်းၼၼ်ႉဢေႃႈ။
ၵွပ်ႈပိူဝ်ႈၼႆလႄႈတူင်ႇႁႅဝ်ႉတူင်ႇၶိုမ်းလွမ်ႉႁွပ်ႈ မႂ်းဝႆႉလႄႈ တၢင်းဢၼ်ၵိုင်ႉၵၢင်ႉတူၵ်းၸႂ်ၼၼ်ႉ ႁႂ်ႈမႂ်းၵူဝ်ႁႄဢေႃႈ။
ဢၼ်လႅင်းမႂ်းၼၼ်ႉပဵၼ်ဢၼ်လပ်းသိင်ႇယဝ်ႉလႄႈမႂ်းဢမ်ႇႁၼ်လႆႈသေယဝ်ႉ၊ ၼမ်ႉဢၼ်ၼွင်းၼႃႇၼၼ်ႉထူမ်ႈႁူမ်ႇမႂ်းဢေႃႈ။
‘ၽြႃးပဵၼ်ၸဝ်ႈမီးယူႇၵႃႈၼိူဝ်ၸိၵ်းၸွမ် ၵၢင်ႁၢဝ်သေလႄႈ ၵူမ်ႈတူၺ်းလၢဝ်တင်းလၢႆဢၼ်မီးၵႃႈတီႈ ဢၼ်သုင်ၼၼ်ႉဢမ်ႇၸႂ်ႈႁိုဝ်း။
ၵူၺ်းၵႃႈ၊မႂ်းယင်းထၢမ်လႄႈဝႃႈ၊ ၽြႃးပဵၼ်ၸဝ်ႈတၵ်းႁုလႆႈၸိူဝ်ႉၼင်ႇႁိုဝ်၊ မွၵ်ႇၵုမ်ႈဢၼ်ၼႃတၼ်ၼႃႇႁူမ်ႇသုမ်ႇ မၼ်းၸဝ်ႈယူႇလႄႈ တၵ်းၸီႇယၢင်ႇႁဝ်းလႆႈၸိူဝ်ႉၼင်ႇႁိုဝ်၊’ ဝႃႈၼင်ႇၼႆဢေႃႈ။
မႂ်းထၢင်ႇမွၵ်ႇၵုမ်ႈဢၼ်ၼႃတၼ်ၼႃႇၼၼ်ႉ ၸၢင်ႈႁႄႉလပ်ႉဝႆႉ၊ ႁႂ်ႈမၼ်းၸဝ်ႈဢမ်ႇႁၼ်လႆႈလႄႈမၼ်းၸဝ်ႈ လႄႇလဵပ်ႈၵႃႈၼိူဝ်၊ ပၢႆၸိၵ်းၸၵျႃႇဝလႃႇၵၢင်ႁၢဝ်ယူႇၼၼ်ႉဢေႃႈ။
မႂ်းတႅပ်းတတ်းၸႂ်ႁႂ်ႈလႆႈၵမ်ၵျၢင်ႉၸွမ်း သဵၼ်ႈတၢင်းၵဝ်ႇ ဢၼ်ၵူၼ်းဢမ်ႇတြႃးၶဝ်ၵမ်ၵျၢင်ႉ ၼၼ်ႉယဝ်ႉႁိုဝ်း။
ၶဝ်ၼၼ်ႉၸိုင်၊ၸဵမ်မိူဝ်ႈၸူဝ်ႈပၢၼ်ၶဝ် ဢမ်ႇပႆႇထူၼ်ႈပႆႇတဵမ်ၼၼ်ႉ၊ ၶဝ်လႆႈၶၢမ်ႇတၢင်းဢၼ်ၼမ်ႉၼွင်း ထူဝ်းဢဝ်ပႃးဢဝ်၊ ၵႂႃႇပႅတ်ႈမူတ်းမူတ်းသဵင်ႈသဵင်ႈယဝ်ႉ။
ၶဝ်ပဵၼ်ၵူၼ်းဢၼ်လၢတ်ႈတီႈၽြႃးပဵၼ်ၸဝ်ႈ လႄႈဝႃႈ၊ ‘ဢွၵ်ႇသေၵႃႈတီႈႁဝ်းၼႆႉၵႂႃႇတႃႉ၊’ ဝႃႈၼႆ သမ်ႉလၢတ်ႈထႅင်ႈလႄႈဝႃႈ၊ ‘ၸဝ်ႈဢၼၼ်ႇတႃႉတၼ်းၶူဝ်းၼၼ်ႉ တၵ်းႁဵတ်းၵႃႈသင်လႆႈပုၼ်ႈႁဝ်း၊’ ဝႃႈၼင်ႇၼႆၼၼ်ႉဢေႃႈ။
ၼႂ်းဝႃႈၼၼ်သေၵေႃႈမၼ်းၸဝ်ႈယင်းႁႂ်ႈ ၶဝ်မၢၵ်ႈမီးလီပဵၼ်ဢေႃႈ။ ၵူၺ်းၵႃႈ၊တၢင်းၵျၢမ်ႇတၢင်းပွင်ၵူၼ်းဢၼ်ဢမ်ႇတြႃးၼၼ်ႉမီးၵႆၵၼ်တင်းၵဝ်ဢေႃႈ။
မိူဝ်ႈဢၼ်ၵူၼ်းဢၼ်ဢမ်ႇတြႃးလႆႈၶၢမ်ႇတၢင်းဢၼ်ၸီႇယၢင်ႇတြႃးၼၼ်ႉ၊ ၵူၼ်းသိုဝ်ႈတေႃႇဢွၼ်ၵၼ်တူၺ်းႁၼ်လႄႈၸူမ်းသိူဝ်း၊ ၵူၼ်းဢၼ်ၵၢင်းလွတ်ႈတင်းဢပျတ်ႈၼၼ်ႉ ၶူဝ်ၶဝ်လႄႈဝႃႈ။
‘ရၢၼ်ႇသူႇႁဝ်းၸိူဝ်းၼၼ်ႉလႆႈၶၢမ်ႇယႃႉၽဵဝ်ႈပႅတ်ႈတႄႉယဝ်ႉ၊ ၵႃႈဢၼ်ယင်းၵိုတ်းယင်းၵျၢၼ်ႇဝႆႉသေ တီႈၶဝ်ၼၼ်ႉၵေႃႈ၊ ၽႆးမႆႈပႅတ်ႈယဝ်ႉ၊’ ဝႃႈၼႆဢေႃႈ။
ယေႃးၽႃႉ၊ ႟။ ႁႂ်ႈမီးတၢင်းဢၼ်ထုၵ်ႇၵၼ်တင်းၽြႃးပဵၼ်ၸဝ်ႈလႄႈ ႁဵတ်းမိၵ်ႈသႁႃႇယႃႉလူၺ်ႈၵၼ်တင်း မၼ်းၸဝ်ႈတႃႉ၊ ပေႃးႁဵတ်းၸိူဝ်ႉၼင်ႇၼၼ်ၸိုင်၊ မၼ်းၸဝ်ႈတၵ်းပၼ်၊ တၢင်းလီမၢင်ႇၵလႃႇတီႈမႂ်းဢေႃႈ။
ႁပ်ႉတုင်းဢဝ်တၢင်းဢၼ်မၼ်းၸဝ်ႈ သင်ႇသွၼ်သုင်းမႃႉၼၼ်ႉလႄႈ ဢဝ်ၵႂၢမ်းမၼ်းၸဝ်ႈသႂၢင်းသႂ်ႇဝႆႉၵႃႈၼႂ်း ႁူဝ်ၸႂ်မႂ်းတႃႉ။
ပေႃးမႂ်းၶိုၼ်းမႃးၸူးတီႈၸဝ်ႈဢၼၼ်ႇတႃႉ တၼ်းၶူဝ်းလႄႈ ပႄႇပႅတ်ႈတုၸရိူၵ်ႈႁႂ်ႈယၢၼ်ၵႆၵၼ်တင်း ႁိူၼ်းမႂ်းၸိုင်၊မႂ်းတေလႆႈၶၢမ်ႇ တၢင်းဢၼ်ၶိုၼ်းတႄႇႁဵတ်းဢေႃႈ။
ဢဝ်ၶူဝ်းၶမ်းမႂ်းပႅတ်ႈၵႃႈၼႂ်းမုၼ်ႈလိၼ်တႃႉ၊ ဢဝ်ၶမ်းလွတ်ႈငၢၼ်ႇမႂ်းထိမ်ႈသႂ်ႇၵႃႈၼႂ်းၵႄႈ မၢၵ်ႇႁိၼ်ႁႄႈတီႈၼမ်ႉႁွင်ႈၼမ်ႉၵႄးတႃႉ။
ႁႂ်ႈ ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ ပဵၼ်ၽၼ်ႇတႃႇၶမ်းပုၼ်ႈမႂ်းလႄႈ ႁႂ်ႈမၼ်းၸဝ်ႈပဵၼ်ၽၼ်ႇတႃႇငိုၼ်းပုၼ်ႈမႂ်းတႃႉ။
မိူဝ်ႈၼၼ်ႉမႂ်းတၵ်းမူၼ်ႈပျေႃႇတီႈၸဝ်ႈဢၼၼ်ႇတႃႉတၼ်းၶူဝ်းလႄႈ လႆႈငွၵ်းၸူးႁႅၼ်ၸူးတီႈၽြႃးပဵၼ်ၸဝ်ႈဢေႃႈ။
မႂ်းတၵ်းမီးဢၶႂၢင်ႉဢၼ်လႆႈသူးတွင်းတီႈၽြႃးပဵၼ်ၸဝ်ႈ၊ မၼ်းၸဝ်ႈၵေႃႈတၵ်းထွမ်ႇဢဝ်ၵႂၢမ်းမႂ်းလႄႈ မႂ်းတၵ်းမီးဢၶႂၢင်ႉဢၼ်လႆႈႁဵတ်းၸွမ်း ၵႂၢမ်းဢၼ်မႂ်းဝႆႉၵတိၼၼ်ႉဢေႃႈ။
မႂ်းတၵ်းမီးဢၶႂၢင်ႉဢၼ်လႆႈပဵၼ်ၸွမ်းၵႃႈၼင်ႇ ဢၼ်မႂ်းၵျၢမ်ႇပွင်လႄႈ သၢႆလႅင်းတၵ်းထွင်ႇႁိူဝ်ႈၵႃႈတီႈ သဵၼ်ႈတၢင်းမႂ်းဢေႃႈ။
ၽြႃးပဵၼ်ၸဝ်ႈဢဝ်ၵူၼ်းႁူဝ်ၸႂ်ဢၼ်ၽႅၼ်သုင်ၼၼ်ႉတူၵ်းတီႈတႅမ်ႇလႄႈ ၵႄႇသႄႇဢဝ်ၵူၼ်းဢၼ်ႁူဝ်ၸႂ်ၶျႃးတႅမ်ႇ ၼၼ်ႉဢေႃႈ။
မၼ်းၸဝ်ႈတၵ်းၵႄႇၼုၵ်ႈဢဝ်ၵေႃႉဢၼ် ၵၢင်းလွတ်ႈဢပျတ်ႈၼၼ်ႉလႄႈ ပေႃးတၢင်းဢၼ်မႂ်းႁဵတ်းၼၼ်ႉသိုဝ်ႈတေႃႇၸိုင်၊ မၼ်းၸဝ်ႈတၵ်းၵႄႇသႄႇၼုၵ်ႈဢဝ်မႂ်းဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ယေႃးၽႃႉ၊ ၶိုၼ်းလၢတ်ႈလႄႈဝႃႈၸမ်ႉ၊
“တၢင်းဢၼ်ၵဝ်ပွင်ႉၶၢင်းပွင်ႉမိုၼ်ႇၼၼ်ႉ ပဵၼ်ဢၼ်ၶူမ်ၼႃႇၼႂ်းဝၼ်းမိူဝ်ႈၼႆႉ၊ တၢမ်ႇဢၼ်ၵဝ်လႆႈၶၢမ်ႇၼႆႉယဵင်ႈၶႅၼ်း ၼၵ်းၼႃႇသေတၢင်းဢၼ်ၵဝ်ၶၢင်းၶီ ၶၢင်းၽၢၼ်ၼၼ်ႉဢေႃႈ။
ဢလူဝ်းၼေႃ။ ၵဝ်ယင်းၶႂ်ႈႁုတီႈဢၼ် ထူပ်းႁၼ်မၼ်းၸဝ်ႈလႆႈ၊ ဢိၵ်ႇတင်းၶႂ်ႈႁုတၢင်းဢၼ်ၵႂႃႇၸူးတီႈဢၼ်မၼ်းၸဝ်ႈမီးၼၼ်ႉဢေႃႈ။
ပေႃးလႆႈႁုၸိုင်၊ၵဝ်တၵ်းၵႂႃႇလၢတ်ႈၼႄဢမုၵဝ်တီႈမၼ်းၸဝ်ႈလႄႈ တၵ်းတၢင်ႇလဝ်ႈၵႂၢမ်းဢၼ်လီလဝ်ႈလီလၢတ်ႈၼမ်ၼႃႇဢေႃႈ။
ၵဝ်ၶႂ်ႈႁုၸႅင်ႈဝႃႈ၊မၼ်းၸဝ်ႈတၵ်းမီးဢမိင်ႉ ၸိူဝ်ႉၼင်ႇႁိုဝ်၊ ဢိၵ်ႇတင်းမၼ်းၸဝ်ႈတၵ်းၶိုၼ်းတွပ်ႇ ၸိူဝ်ႉၼင်ႇႁိုဝ်ၼၼ်ႉဢေႃႈ။
မၼ်းၸဝ်ႈတၵ်းဢဝ်မႁႃႇတၼ်းၶူဝ်းမၼ်းၸဝ်ႈတွပ်ႇထဵင်ၵၼ်တင်းၵဝ်ၶႃႈႁိုဝ်း၊ မၼ်းၸဝ်ႈတၵ်းဢမ်ႇႁဵတ်းၸိူဝ်ႉၼင်ႇၼၼ်၊ မၼ်းၸဝ်ႈတၵ်းထွမ်ႇဢဝ်ၵႂၢမ်းၵဝ်ဢေႃႈ။
ၵႃႈတီႈၼၼ်ႈၵေႃႉဢၼ်သိုဝ်ႈတေႃႇၼၼ်ႉ မီးဢၶႂၢင်ႉဢၼ်လႆႈတိူင်ႇပၢင်ႇတွင်ႈထၢမ် ၵၼ်တင်းမၼ်းၸဝ်ႈလႄႈ ၽြႃးပဵၼ်ၸဝ်ႈ၊ၸဝ်ႈဢၼ်ၸီႇယၢင်ႇတြႃးတီႈၵဝ်ၼၼ်ႉတၵ်းပွႆႇလွတ်ႈၵဝ်တႃႇသေႇလႄႈ လၢတ်ႈဝႃႈ၊ၵဝ်ၵၢင်းလွတ်ႈဢပျတ်ႈဢေႃႈ။
တူၺ်းလူး။ ၵဝ်ၵႂႃႇၽၢႆႇတၢင်းၼႃႈဢေႃႈ။ ၵူၺ်းၵႃႈ၊မၼ်းၸဝ်ႈဢမ်ႇမီးၵႃႈတီႈၼၼ်ႈ။ ပႆၵႂႃႇၽၢႆႇတၢင်းလင်ၵေႃႈၵဝ်ဢမ်ႇလႆႈႁုလႆႈႁၼ်သၢႆငၢႆမၼ်းၸဝ်ႈ။
ပေႃးၵႂႃႇၵႃႈတီႈၽၢႆႇတၢင်းသၢႆႉတီႈဢၼ်မၼ်းၸဝ်ႈသၢင်ႈႁဵတ်းၼၼ်ႉၸိုင်၊ ၵဝ်ဢမ်ႇလႆႈထူပ်းလႆႈႁၼ်မၼ်းၸဝ်ႈ။ မၼ်းၸဝ်ႈတဵတ်ႇမႅပ်းယူႇ၊ ၵႃႈတီႈၽၢႆႇတၢင်းၶႂႃၵေႃႈၵဝ်ဢမ်ႇလႆႈ ႁၼ်မၼ်းၸဝ်ႈ။
ၼႂ်းဝႃႈၼၼ်သေၵေႃႈမၼ်းၸဝ်ႈႁုသဵၼ်ႈတၢင်းဢၼ်ၵဝ်ၵႂႃႇၼၼ်ႉယူႇဢေႃႈ။ ၵဝ်ၶၢမ်ႇတၢင်းဢၼ်မၼ်းၸဝ်ႈၸႅတ်ႈသေးတူၺ်းသေယဝ်ႉ၊တၵ်းပေႃႇဢွၵ်ႇမႃးမိူၼ်ၸိူဝ်ႉၼင်ႇၶမ်းဢေႃႈ။
တိၼ်ၵဝ်ၼႆႉၸပ်းၸွမ်းတႆႇၸွမ်းႁွႆးတိၼ်မၼ်းၸဝ်ႈယူႇယင်းဢမ်ႇဝႄႈဢမ်ႇပိူင်ႈလႄႈ ၸွမ်းသဵၼ်ႈတၢင်းဢၼ်မၼ်းၸဝ်ႈၵႂႃႇ ၼၼ်ႉယူႇဢေႃႈ။
ၵဝ်ဢမ်ႇၽၢတ်ႇဢမ်ႇၽႄသေၵႃႈတီႈပိင်းၺၢပ်ႈဢၼ်ဢွၵ်ႇတီႈသူပ်းမၼ်းၸဝ်ႈၼၼ်ႉလႄႈ ၵဝ်ထုၵ်ႇၸႂ်ၵျိူၵ်ႈၸႂ်ၵႂၢမ်းဢၼ်ဢွၵ်ႇသူပ်းမၼ်းၸဝ်ႈၼၼ်ႉလိူဝ်တွၼ်းၼႃႇသေ၊ ၵႃႈဢၼ်ပဵၼ်ထုင်းပဵၼ်ၽိင်ႈဝႆႉတီႈ ၵဝ်ၼၼ်ႉဢေႃႈ။
မၼ်းၸဝ်ႈမီးၸႂ်သၽေႃးဢၼ်လဵဝ် ဢၼ်ဢမ်ႇလႅၵ်ႈလၢႆႈ၊ ၽူႈလႂ်တၵ်းႁႂ်ႈမၼ်းၸဝ်ႈၶၢႆႉပုတ်ႈလႅၵ်ႈလၢႆႈလႆႈ၊ မၼ်းၸဝ်ႈတၵ်းႁဵတ်းၵႃႈၼင်ႇဢၼ်ဢလူဝ်ႇၵၢင်ၸႂ်မၼ်းၸဝ်ႈမီးၼၼ်ႉဢေႃႈ။
ၵႃႈဢၼ်မၼ်းၸဝ်ႈၸီႇယၢင်ႇႁၢင်ႈႁႅၼ်းဝႆႉ ပုၼ်ႈၵဝ်ၼၼ်ႉ၊ မၼ်းၸဝ်ႈတၵ်းႁႂ်ႈပျေႉၸုမ်ႇပဵၼ်ၸွမ်းလႄႈ တၢင်းၵျၢမ်ႇတၢင်းပွင်ၸဝ်ႈမီးဝႆႉပုၼ်ႈၵဝ် ၼမ်ၼႃႇဢေႃႈ။
ၵွပ်ႈပိူဝ်ႈၸိူဝ်ႉၼင်ႇၼၼ်လႄႈၵဝ်လႆႈ တူၵ်းၸႂ်ၵူဝ်ႁႄ၊ ၵႃႈတီႈၽၢႆႇၼႃႈမၼ်းၸဝ်ႈလႄႈယၢမ်းမိူဝ်ႈဢၼ်ၶဝ်ၶႆႈၸႂ်ဝူၼ်ႉၸႂ်ၼၼ်ႉၵဝ်လႆႈၵူဝ်ႁႄမၼ်းၸဝ်ႈဢေႃႈ။
ၽြႃးပဵၼ်ၸဝ်ႈႁဵတ်းႁႂ်ႈၵဝ်ၸႂ်လုႁႅင်းဢူၼ်ႈလႄႈ ၸဝ်ႈဢၼၼ်ႇတႃႉတၼ်းၶူဝ်းႁဵတ်းႁႂ်ႈၵဝ် ၵူဝ်ႁႄဢေႃႈ။
လွင်ႈမၼ်းၸမ်ႉ၊တူဝ်ၵဝ်ဢမ်ႇလႆႈၶၢမ်ႇတၢင်းဢၼ်ဢဝ်ဢွၵ်ႇသေၵႃႈၼႂ်းတၢင်းဢၼ်လပ်းသိင်ႇ၊ မၼ်းၸဝ်ႈဢမ်ႇလႆႈဢဝ်ပႅတ်ႈတၢင်းလပ်းသိင်ႇဢၼ်ၼႃတၼ်ၼႃႇၼၼ်ႉဢွၵ်ႇသေ ၵႃႈတီႈၼႃႈၵဝ်။
ၵွပ်ႈၸိူဝ်ႉၼင်ႇႁိုဝ်လႄႈၽြႃးပဵၼ်ၸဝ်ႈဢမ်ႇမၵ်းၶၢၼ်းၶိင်ႇၵႃႇလႃႉပုၼ်ႈတၵ်းၸီႇယၢင်ႇတြႃး၊ ပုၼ်ႈတႃႇၶဝ်ၸိူဝ်းဢၼ်ႁၢပ်ႇၼႃႈၵၢၼ်မၼ်းၸဝ်ႈၼၼ်ႉဢေႃႈ။
ၵူၼ်းၵမ်ႈၽွင်ႈၶၢႆႉသဝ်ဢၼ်မၢတ်ႈမၢႆလႅၼ်လိၼ်တင်းလၢႆလႄႈ ႁိမ်ဢဝ်ၽုင်သူဝ်းပိူၼ်ႈသေယဝ်ႉ၊လဵင်ႉဝႆႉပုၼ်ႈတူဝ်ၸဝ်ႈၵဝ်ႇဢေႃႈ။
ၶဝ်ႁိမ်ဢဝ်မႃႉလီႈၵႃႈတီႈလုၵ်ႈဢွၼ်ႇဢၼ်ၽၢၼ်ပေႃႈၽၢၼ်မႄႈလႄႈ သိမ်းဢဝ်ဝူဝ်းငၢၼ်ၵႃႈတီႈမႄႈမၢႆႈႁႂ်ႈပဵၼ်ဢၼ်ပွင်ႇဢၼ်ၵမ်ႉပုၼ်ႈၼီႈၶဝ်ၼၼ်ႉဢေႃႈ။
ၶဝ်လိုပ်ႈၵူၼ်းဢၼ်ၸုတ်ႈဢၼ်လုတ်ႈလႂ်ဢွၵ်ႇၼွၵ်ႈတႃႈၼွၵ်ႈတၢင်းလႄႈ ၵူၼ်းယၢၵ်ႈၵူၼ်းၽၢၼ်ဢၼ်ယူႇၵႃႈၼိူဝ်လိၼ်မိူင်းတင်းလၢႆ ဢွၼ်ၵၼ်ပၢႆႈတဵတ်ႇ ပၢႆႈမႅပ်းယူႇဢေႃႈ။
ပိူဝ်ႈၼႆလႄႈၵူၼ်းယၢၵ်ႈၵူၼ်းၽၢၼ်လႆႈၶတ်းၸႂ်၊ ႁဵတ်းၵၢၼ်ႁဵတ်းငၢၼ်းၼႂ်းထိူၼ်ႇလႅင်ႉယူႇ၊ မိူၼ်ၸိူဝ်ႉၼင်ႇမႃႉလီႈထိူၼ်ႇၼၼ်ႉသေလႄႈ ႁႃတၢင်းၵိၼ်တၢင်းၶူပ်းပုၼ်ႈလုၵ်ႈလၢင်းၶဝ်။
ၶဝ်လႆႈဢွၼ်ၵၼ်ပၢတ်ႇဢဝ်မၢၵ်ႇႁူင်းၵႃႈတီႈႁႆႈၼႃးပိူၼ်ႈလႄႈ လႆႈဝိတ်းဢဝ်မၢၵ်ႇၸပိတ်ႉဢၼ်ၵိုတ်းဢၼ်ၵျၢၼ်ႇၵႃႈတီႈသူၼ်ၵူၼ်းႁၢႆႉၵူၼ်းမိူၵ်ႈဢေႃႈ။
ၶဝ်ယင်းဢမ်ႇမီးၶူဝ်းၼုင်ႈၶူဝ်းမႆလႄႈ ၼွၼ်းယူႇတင်းၶိုၼ်း၊ ဢမ်ႇမီးၽႃႈမီးၽႅၼ်ႇပုၼ်ႈဢၼ်တၵ်းႁူမ်ႇၶဝ်ၼႂ်းၶိင်ႇမိူဝ်ႈဢၼ်ၵတ်းဢၼ်ၼၢဝ်ၼၼ်ႉ။
ၶဝ်လႆႈၶၢမ်ႇယမ်းၽူၼ်ဢၼ်တူၵ်းၵႃႈၼိူဝ်လွႆၼၼ်ႉလႄႈ ယင်းဢမ်ႇမီးတီႈဢၼ်တၵ်းသွၼ်ႈတၵ်းပိုင်ႈ၊ လႆႈဢွၼ်ၵၼ်သွၼ်ႈယူႇမႅပ်းယူႇၵႃႈၼႂ်းၵႄႈမၢၵ်ႇႁိၼ်မၢၵ်ႇၽႃဢေႃႈ။
မီးၵူၼ်းဢၼ်ၸၢင်ႈႁိမ်ဢဝ်လုၵ်ႈဢွၼ်ႇဢၼ်ၽၢၼ်ပေႃႈၽၢၼ်မႄႈၼၼ်ႉၵႂႃႇသေလႄႈ ဢဝ်လုၵ်ႈဢွၼ်ႇၵူၼ်းယၢၵ်ႈၵူၼ်းၽၢၼ်ၵႂႃႇပဵၼ်တၢင်းဢၼ်ပွင်ႇဢၼ်ၵမ်ႉၼီႈဝႆႉဢေႃႈ။
ၵူၼ်းယၢၵ်ႈၵူၼ်းၽၢၼ်ၼၼ်ႉယင်းဢမ်ႇမီး ၶူဝ်းၼုင်ႈၶူဝ်းမႆလႄႈ လႆႈလႄႇၵႂႃႇလႄႇမႃးယူႇလူၺ်ႈတူဝ်ပူၺ် သေယဝ်ႉ၊ တွင်ႉမႆႈသႆႈလိူတ်ႇယူႇသေလႄႈ လႆႈတေႃႉလႆႈႁၢပ်ႇပၼ်၊ ၶဝ်ႈပိူၵ်ႇပိူၼ်ႈဢေႃႈ။
ၶဝ်ဢိတ်ႇမၢၵ်ႇသၢၼ်ႇလုၼ်ႇႁႂ်ႈလႆႈၼမ်ႉမၼ်းလႄႈ ယဵပ်ႇၼူတ်ႈမၢၵ်ႇၸပိတ်ႉႁႂ်ႈလႆႈၼမ်ႉမၢၵ်ႇၸပိတ်ႉယူႇသေၵေႃႈ၊ တူဝ်ၶဝ်ၸမ်ႉ၊ယၢၵ်ႇၼမ်ႉယၢၵ်ႇၼၢႆးယူႇဢေႃႈ။
ၵႃႈၼႂ်းဝၢၼ်ႈၼႂ်းဝဵင်းၼၼ်ႉၵူၼ်းဢၼ်ၸမ်တေတၢႆၼၼ်ႉႁွင်ႉယူႇၶၢင်းယူႇ၊ ၶဝ်ၸိူဝ်းဢၼ်ၸဵပ်းသႅပ်ႇၼၼ်ႉႁွင်ႉၵၢဝ်ႇႁွင်ႉႁႃပုၼ်ႈတၢင်းၸွႆႈတၢင်းထႅမ်ယူႇ၊ ၵူၺ်းၵႃႈ၊ၽြႃးပဵၼ်ၸဝ်ႈဢမ်ႇထွမ်ႇဢဝ် ၵႂၢမ်းသူးတွင်းၶဝ်ၼၼ်ႉ။
မီးၵူၼ်းဢၼ်လုၵ်ႉၽိုၼ်ႉလႄႈငိၼ်းၸင်း တၢင်းဢၼ်လႅင်း၊ ၶဝ်ဢမ်ႇမိုတ်ႈဢမ်ႇၵိုဝ်းသဵၼ်ႈတၢင်း ဢၼ်လႅင်းလႄႈ ဢမ်ႇမီးၸႂ်ဢၼ်ၶႂ်ႈၵႂႃႇၶႂ်ႈၸွမ်းသဵၼ်ႈတၢင်းၼၼ်ႉ။
ၵူၼ်းဢၼ်ဢဝ်ဢသၢၵ်ႈပိူၼ်ႈတၢႆၼၼ်ႉ ၸၢင်ႈလုၵ်ႉၵႂႃႇမိူဝ်ႈဢၼ်မိူင်းဢမ်ႇပႆႇပၢင်ႇ ပႆႇလႅင်းလႄႈ ဢဝ်ၵူၼ်းယၢၵ်ႈၵူၼ်းၽၢၼ်တၢႆဢေႃႈ။ မိူဝ်ႈၶိင်ႇၵၢင်ၶိုၼ်းၸမ်ႉ၊မၼ်းၼၼ်ႉပဵၼ်မိူၼ် ၽူႈလၵ်ႉၽူႈလွမ်ဢေႃႈ။
မၢၵ်ႇတႃၵေႃႉဢၼ်ၸၢင်ႈၵူတ်ႉမေးပိူၼ်ႈၼၼ်ႉ၊ မွင်းထႃႈၶိင်ႇႁူဝ်ၶမ်ႈလႄႈႁူမ်ႇသုမ်ႇ ၼႃႈမၼ်းသေ၊ ၸၢင်ႈလၢတ်ႈဝႃႈ ‘မၢၵ်ႇတႃၽူႈလႂ် သေၵေႃႉသေၵူၼ်း ဢမ်ႇႁၼ်ၵဝ်ၵူၺ်း’ ဝႃႈၼင်ႇၼႆဢေႃႈ။
ၽူႈလၵ်ႉၽူႈလွမ်ၸိုင်၊ၸၢင်ႈၶုတ်းမုၵ်း ၽႃႁိူၼ်းပိူၼ်ႈၶိင်ႇၵၢင်ၶိုၼ်းလႄႈ ၶိင်ႇၵၢင်ဝၼ်းၸမ်ႉ၊ၶဝ်ဢိုတ်းႁပ်း ၽၵ်းတူႁိူၼ်းလႄႈ တဵတ်ႇမႅပ်းယူႇသေယဝ်ႉ၊ပၢႆႈဢၼ်လႅင်းယူႇ။
လွင်ႈမၼ်းၸမ်ႉ၊ၶဝ်ၵူဝ်ဢၼ်လႅင်းၵၢင်ဝၼ်းလႄႈ ဢၼ်လပ်းသိင်ႇၸမ်ႉ၊ဢမ်ႇပဵၼ်တီႈဢၼ်လီၵူဝ် လီႁႄပုၼ်ႈၶဝ်။
ၵူၼ်းႁၢႆႉၵူၼ်းမိူၵ်ႈၼၼ်ႉပဵၼ်ဢၼ်မဝ်ထွင်ယွင်ၵႃႈၼိူဝ်ၼႃႈၼမ်ႉ၊ တီႈယူႇတီႈသဝ်းမၼ်းၼၼ်ႉလႆႈၶၢမ်ႇတၢင်းဢၼ်ၽြႃးပဵၼ်ၸဝ်ႈၵိၼ်ႇဝႃႈယဝ်ႉလႄႈ မၼ်းဢမ်ႇလႆႈၵႂႃႇႁဵတ်းၵႃႈတီႈသူၼ်မၢၵ်ႇၸပိတ်ႉမၼ်းထႅင်ႈ။
ၸိူဝ်ႉၼင်ႇဢၼ်လႅတ်ႇဢိၵ်ႇတင်းတၢင်းဢၼ် ၽႃႉလႅင်ႉ၊ ၸၢင်ႈၵိၼ်ပႅတ်ႈၼမ်ႉမူၺ်ႁႃႇၼၼ်ႉ၊ မိူင်းမရၼႃႉၸၢင်ႈၵိၼ်ၵေႃႉဢၼ်ဢမ်ႇတြႃးၼၼ်ႉပႅတ်ႈဢေႃႈ။
တွင်ႉဢၼ်ၵိူတ်ႇလဵင်ႉမၼ်းၼၼ်ႉလူင်လိုမ်းပႅတ်ႈမၼ်းသေယဝ်ႉ၊ ၼွၼ်သႆႉၵိၼ်တူဝ်မၼ်းလႄႈၽူႈလႂ်ဢမ်ႇမၢတ်ႈဢမ်ႇတွင်းမၼ်း၊ မၼ်းလႆႈၶၢမ်ႇတၢင်းဢၼ်ႁၵ်းႁိၵ်းမိူၼ်ၸိူဝ်ႉၼင်ႇ၊ တူၼ်ႈမႆႉဢၼ်လူမ်ႉယူႇၼၼ်ႉဢေႃႈ။
လႆႈပဵၼ်မႃးၸိူဝ်ႉၼင်ႇၼႆၵွပ်ႈပိူဝ်ႈမၼ်းႁဵတ်းဢမ်ႇတြႃးတီႈမႄႈမၢႆႈလႂ်၊ သမ်ႉၼိၵ်ႈၸၢၵ်ႈငႅၼ်းသႄးမႄႈယိင်းဢၼ်ဢမ်ႇမီးလုၵ်ႈမီးလၢင်းၼၼ်ႉဢေႃႈ။
ၽြႃးပဵၼ်ၸဝ်ႈၸင်ႇဢဝ်တၼ်းၶူဝ်းၸဝ်ႈပႄႇၽဵဝ်ႈၶဝ်ၸိူဝ်းဢၼ်ႁႅင်းယႂ်ႇၼၼ်ႉလႄႈ ယၢမ်းမိူဝ်ႈဢၼ်မၼ်းၸဝ်ႈႁဵတ်းၼၼ်ႉၵူၼ်းဢၼ်ဢမ်ႇတြႃးၼၼ်ႉလူမ်ႉတၢႆဢေႃႈ။
ၽြႃးပဵၼ်ၸဝ်ႈၸၢင်ႈၶႄးတေပၼ်ဢၶႂၢင်ႉ တီႈၶဝ်ႁႂ်ႈယူႇလူင်ႉလီလွတ်ႈလီ၊ ၵူၺ်းၵႃႈ၊မၢၵ်ႇတႃမၼ်းၸဝ်ႈယင်း လူတူၺ်းၶဝ်ယူႇဢေႃႈ။
ၶဝ်လႆႈၶၢမ်ႇတၢင်းဢၼ်ယုၵ်ႉယွင်ႈၵမ်းၼိုင်ႈၵူၺ်းလႄႈသုတ်းၵႂႃႇ၊ ဢသၢၵ်ႈၶဝ်လႆႈလုသုမ်းမိူၼ်ၸိူဝ်ႉၼင်ႇပိူၼ်ႈလႄႈ ၶၢမ်ႇတၢင်းဢၼ်ပၢတ်ႇဢၼ်ထိူဝ်မိူၼ်ၸိူဝ်ႉၼင်ႇပၢႆႁူင်းၶဝ်ႈၼၼ်ႉဢေႃႈ။
ပေႃးၵႂၢမ်းၵဝ်ၼႆႉဢမ်ႇၸႂ်ႈၸိုင်၊ၽူႈလႂ် တၵ်းတွပ်ႇထဵင်လႆႈ ၽူႈလႂ်တၵ်းၼႄပျႃးသၢၵ်ႈသေႇလွင်ႈဢၼ် ၵႂၢမ်းၵဝ်ပဵၼ်ၵႂၢမ်းမုသႃႇလႆႈ။” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ပိလတတ်ႉ၊ မဵဝ်း သုဢႃႇ၊ ၶိုၼ်းလၢတ်ႈလႄႈဝႃႈၸမ်ႉ၊
“ၽြႃးပဵၼ်ၸဝ်ႈပျေႉၸုမ်ႇဝႆႉတင်းဢႃႇၼႃႇဢိၵ်ႇတင်းမုၼ်ၵုင်ႇဢၼ်လီၵူဝ်လီႁႄသေယဝ်ႉ၊ ပွင်ႁဵတ်းလုမ်းလႃးတၢင်းဢၼ်တဵတ်ႇလီၼိမ်လီ၊ ၵႃႈတီႈၵၢင်ႁၢဝ်ဢၼ်သုင်မၼ်းၸဝ်ႈၼၼ်ႉဢေႃႈ။
ၽူႈလႂ်ၼပ်ႉဢၢၼ်ႇတပ်ႉပူဝ်ႇပႃႇမၼ်းၸဝ်ႈ ၸိူဝ်းၼၼ်ႉလႆႈ၊ ၽူႈလႂ်ၵၢင်းလွတ်ႈတၢင်းဢၼ်လႅင်းမၼ်းၸဝ်ႈထွင်ႇသႂ်ႇၼၼ်ႉ။
ၵွပ်ႈပိူဝ်ႈပဵၼ်ၸိူဝ်ႉၼင်ႇၼႆလႄႈၵူၼ်းၸိုင်၊တၵ်းမီးတၢင်းဢၼ်သိုဝ်ႈတေႃႇၵႃႈတီႈၽၢႆႇၼႃႈၽြႃးပဵၼ်ၸဝ်ႈလႆႈၸိူဝ်ႉၼင်ႇႁိုဝ်။ ၵူၼ်းဢၼ်ၵိူတ်ႇလဵင်ႉမႃးၵႃႈတီႈမႄႈယိင်းၼၼ်ႉတၵ်းမူတ်းၸၢင်ႇလႆႈၸိူဝ်ႉၼင်ႇႁိုဝ်။
တူၺ်းလူး။ လိူၼ်ၵေႃႈဢမ်ႇမီးတၢင်းဢၼ် သႂ်လီလႅင်းလီ၊ လၢဝ်တင်းလၢႆၵေႃႈဢမ်ႇမူတ်းၸၢင်ႇၶၢဝ်သႂ် ၵႃႈၼႂ်းသၢႆတႃမၼ်းၸဝ်ႈ။
ပိူဝ်ႈၼႆလႄႈၵူၼ်းႁဝ်းဢၼ်ပဵၼ်တူဝ်ၼွၼ်၊လုၵ်ႈၵူၼ်းဢၼ်ပဵၼ်တိူၵ်ႇလိူၼ်ၼႆႉ၊ တၵ်းမီးတီႈလၢတ်ႈၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ယေႃးၽႃႉ၊ ၶိုၼ်းလၢတ်ႈလႄႈဝႃႈၸမ်ႉ၊
“မႂ်းလႆႈၸွႆႈထႅမ်မႃႉၸႃႉၵေႃႉဢၼ်ႁႅင်းလဵၵ်းႁႅင်းၵေႇၼၼ်ႉၸိူဝ်ႉၼင်ႇႁိုဝ်ယဝ်ႉ၊ မႂ်းလႆႈၵမ်ႉထွၵ်ႈၶႅၼ်မိုဝ်းဢၼ်ဢမ်ႇမီးဢဵၼ်ႁႅင်းၼၼ်ႉၸိူဝ်ႉၼင်ႇႁိုဝ်ယဝ်ႉ။
မႂ်းၼႄတၢင်းပၼ်ဢၵျၢမ်ႇၺၢၼ်ႇတီႈၵေႃႉဢၼ်ဢမ်ႇမီးပိင်ႇၺႃႇၼၼ်ႉၸိူဝ်ႉၼင်ႇႁိုဝ်ယဝ်ႉ။ မႂ်းၼႄပျႃးပိင်ႇၺႃႇၼမ်ၵႃႈႁိုဝ်ယဝ်ႉ။
ၽူႈလႂ်ၸွႆႈႁႂ်ႈမႂ်းလၢတ်ႈၵႂၢမ်းၸိူဝ်ႉၼင်ႇၼႆ၊ ဝိၺိၺ်ႇၽူႈလႂ်ႁဵတ်းႁႂ်ႈမႂ်းၸၢင်ႈလၢတ်ႈ ၵႂၢမ်းၸိူဝ်ႉၼင်ႇၼႆ၊” ဝႃႈၼင်ႇၼႆဢေႃႈ။
“ဝိၺိၺ်ႇၶဝ်ၸိူဝ်းဢၼ်တၢႆၼၼ်ႉ၊ဢိၵ်ႇတင်းၶဝ်ၸိူဝ်းဢၼ်ယူႇတႂ်ႈၼမ်ႉၼၼ်ႉ၊ ဢွၼ်ၵၼ်သၼ်ႇၶွၼ်းသၼ်ႇဝႆယူႇဢေႃႈ။
မိူင်းမရၼႃႉၼၼ်ႉပဵၼ်ဢၼ်ၽုၺ်ႇပိုတ်ႇဝႆႉၵႃႈတီႈၽၢႆႇၼႃႈၽြႃးပဵၼ်ၸဝ်ႈလႄႈ တၢင်းလုတၢင်းလႅဝ်ဢမ်ႇမီးဢၼ်ႁူမ်ႇဢၼ်ငမ်းမၼ်းဝႆႉ။
မၼ်းၸဝ်ႈပိုတ်ႇၵီႈၼႃႈတၢင်းႁွင်ႇၵႃႈၼိူဝ်တီႈဢၼ်ပၢင်ႇပလႁႃႇၼၼ်ႉလႄႈ မၼ်းၸဝ်ႈဢဝ်ၵမ်ႇၽႃႇလိၼ်မိူင်းႁွႆႈၽႅၼ်ဝႆႉၵႃႈၼိူဝ်တီႈဢၼ်ဢမ်ႇမီးၵႃႈသင်လႃးလႃးၼၼ်ႉဢေႃႈ။
မၼ်းၸဝ်ႈဢဝ်ၼမ်ႉပူၵ်ႉႁေႃႇဝႆႉၵႃႈၼႂ်းမွၵ်ႇၵုမ်ႈဢၼ်ၼႃတၼ်ၼၼ်ႉလႄႈ ၼမ်ႉၼၼ်ႉယင်းဢမ်ႇႁႂ်ႈမွၵ်ႇၵုမ်ႈတႅၵ်ႇၵႂႃႇ သိၵ်ႇၵႂႃႇလႃးလႃး။
မၼ်းၸဝ်ႈဢဝ်တင်းမွၵ်ႇၵုမ်ႈႁူမ်ႇသုမ်ႇလိူၼ်မူၼ်း ဢၼ်ႁိူဝ်ႈလႅင်းၼၼ်ႉဢေႃႈ။
မၼ်းၸဝ်ႈၽႄဢၼ်လႅင်းဢွၵ်ႇသေၵႃႈတီႈ ဢၼ်လပ်းသိင်ႇ၊ လူၺ်ႈတၢင်းဢၼ်ၶၼ်ႈၶႅၼ်ႈဝူင်းမူၼ်းၵႃႈၼိူဝ်ၼႃႈၼမ်ႉပၢင်ႇလၢႆႇဢေႃႈ။
မိူဝ်ႈဢၼ်မၼ်းၸဝ်ႈသင်ႇသွၼ်သုင်းမႃႉ သဝ်ၵမ်ႉၽႃႉၵၢင်ႁၢဝ်ၼၼ်ႉ၊ ၶဝ်ဢွၼ်ၵၼ်သၼ်ႇၶွၼ်းဝႆလႄႈမိင်းမဝ်းၵႂႃႇ လူၺ်ႈတၢင်းၵူဝ်ႁႄဢေႃႈ။
မၼ်းၸဝ်ႈဢဝ်တၼ်းၶူဝ်းမၼ်းၸဝ်ႈပႄႉၼႅင်ႇၼမ်ႉသမ်ႇမုၵ်ႈတြႃႇ လႄႈ ဢဝ်ပိင်ႇၺႃႇမၼ်းၸဝ်ႈႁၵ်းယႃႉပႅတ်ႈ ၼၵႃး ရႃႇႁပ်ႉ ဢေႃႈ။
မၼ်းၸဝ်ႈဢဝ်ဝိၺိၺ်ႇမၼ်းၸဝ်ႈပွင်ႁဵတ်းႁႂ်ႈ တွင်ႉၽႃႉပၢင်ႇလႄႈ ဢဝ်မိုဝ်းမၼ်းၸဝ်ႈသေဢဝ်တၢႆၼၵႃး ဢၼ်ၼီပၢႆႈၼၼ်ႉဢေႃႈ။
ဢၼ်ၼႆႉၸမ်ႉ၊ပဵၼ်ပၢႆပဵၼ်ၽူၺ်းဢၼ်ႁႂ်ႈႁု ဢိတ်းဢွၼ်ႇၼိုင်ႈလွင်ႈတၼ်းၶူဝ်း မၼ်းၸဝ်ႈၵူၺ်းလႄႈ ႁႂ်ႈလႆႈငိၼ်းသဵင်သွပ်ႉသႅပ်ႉၸဝ်ႈဢိတ်းဢွၼ်ႇၼိုင်ႈၼၼ်ႉၵူၺ်းဢေႃႈ။ သဵင်ၽႃႉလင်တၼ်းၶူဝ်းမၼ်းၸဝ်ႈၼၼ်ႉၸိုင်၊ ၽူႈလႂ်တၵ်းႁုလႆႈၸႅင်ႈလႆႈ။” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ယေႃးၽႃႉ၊ သမ်ႉၶိုၼ်းတွပ်ႇလၢတ်ႈထႅင်ႈလႄႈဝႃႈ၊
“ၸွမ်းၼင်ႇဢၼ်ၽြႃးပဵၼ်ၸဝ်ႈဢသၢၵ်ႈလိပ်းယူႇၼၼ်ႉ၊မၼ်းၸဝ်ႈႁႂ်ႈၵဝ်သုမ်းဢမုၸဝ်ႈလႄႈ၊ ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ ႁဵတ်းႁႂ်ႈၸႂ်ဝိၺိၺ်ႇၵဝ်မီးတၢင်းဢၼ် ၸႂ်ၶူမ်ၼႃႇ။
ၸူဝ်ႈဢၼ်ၽြႃးပဵၼ်ၸဝ်ႈပၼ်ဢၶႂၢင်ႉႁႂ်ႈၵဝ်ယင်း လႆႈထူၺ်ႈၸႂ်ၶဝ်ႈထူၺ်ႈၸႂ်ဢွၵ်ႇယူႇၼႆႉၼၼ်ႉ။
သူပ်းၵဝ်ယင်းဢမ်ႇလၢတ်ႈၵႂၢမ်းႁၢႆႉၵႂၢမ်းမိူၵ်ႈ၊ လိၼ်ႉၵဝ်ယင်းတၵ်းဢမ်ႇလၢတ်ႈမုသႃႇ သေပွၵ်ႈဢေႃႈ။
ၵဝ်ယင်းတၵ်းဢမ်ႇဝႃႈ၊သူမီးၸႂ်သၽေႃးဢၼ်သိုဝ်ႈတေႃႇၼၼ်ႉသေပွၵ်ႈ၊ ၵဝ်တၵ်းဢမ်ႇၸုၼ်ႉပႅတ်ႈတၢင်းဢၼ်ၵဝ်သိုဝ်ႈတေႃႇၼၼ်ႉတေႃႇပေႃးတၢႆ။
ၵဝ်တၵ်းယိပ်းၵမ်တၢင်းသိုဝ်ႈတေႃႇၵဝ်ၼၼ်ႉမၼ်ႈမၼ်ႈၶိူင်ႇၶိူင်ႇလႄႈတၵ်းဢမ်ႇပွႆႇပႅတ်ႈသေၵႃႈၼႂ်းမိုဝ်းၵဝ် ၸူဝ်ႈဢၼ်ၵဝ်ယင်းဢသၢၵ်ႈလိပ်းယူႇၼႆႉတဵမ်တဵမ်၊ ႁူဝ်ၸႂ်ၵဝ်ဢမ်ႇတၢင်ႇဢပျတ်ႈတီႈတူဝ်ၸဝ်ႈၵဝ်ႇ။
ႁႂ်ႈရၢၼ်ႇသူႇၵဝ်ပဵၼ်ၸိူဝ်ႉၼင်ႇၵေႃႉဢၼ်ႁုၵ်းဢၼ်ႁၢႆႉၼၼ်ႉသေၵမ်း။ ၵေႃႉဢၼ်လုၵ်ႉၽိုၼ်ႉၶတ်းၵဝ်ၼၼ်ႉႁႂ်ႈပဵၼ် ၸိူဝ်ႉၼင်ႇၵေႃႉဢၼ်ဢမ်ႇသိုဝ်ႈတေႃႇ ၼၼ်ႉသေၵမ်း။
ၵူၼ်းဢၼ်ဢမ်ႇၵူဝ်ယမ်ၽြႃးပဵၼ်ၸဝ်ႈၼၼ်ႉမိူဝ်ႈဢၼ်ၽြႃးပဵၼ်ၸဝ်ႈၼုၵ်ႈဢဝ်ၸႂ်ဝိၺိၺ်ႇမၼ်းၼၼ်ႉၸိုင်၊ မၼ်းယင်းမီးတီႈဢၼ်တၵ်းမုင်ႈမွင်း ၸိူဝ်ႉၼင်ႇႁိုဝ်။
မိူဝ်ႈဢၼ်တုၵ်ႉၶႃႉဝူၺ်ႇတၼႃႇႁွတ်ႈထိုင်ၵႃႈၼိူဝ်မၼ်းၼၼ်ႉၸိုင်၊ ၽြႃးပဵၼ်ၸဝ်ႈတၵ်းထွမ်ႇဢဝ်တၢင်းဢၼ်မၼ်းႁွင်ႉသႅၼ်ႇၼၼ်ႉႁိုဝ်း။
ၵေႃႉၼၼ်ႉတၵ်းမူၼ်ႈပျေႃႇၼႂ်းၸဝ်ႈဢၼၼ်ႇတႃႉတၼ်းၶူဝ်းႁိုဝ်း၊ မၼ်းတၵ်းႁဵတ်းပထၼႃႇသူးတွင်းတီႈၽြႃးပဵၼ်ၸဝ်ႈယူႇသေႇသေႇႁိုဝ်း။
ႁႂ်ႈၵဝ်ဢဝ်လွင်ႈတၼ်းၶူဝ်းၽြႃးပဵၼ်ၸဝ်ႈယႂ်ႇၼႃႇၵႃႈႁိုဝ်ၼၼ်ႉသင်ႇသွၼ်ပၼ်သူလႄႈ ႁႂ်ႈလႆႈၽုၺ်ႇမွၵ်ႇလၢတ်ႈၼႄလွင်ႈၸဝ်ႈဢၼၼ်ႇတႃႉတၼ်းၶူဝ်း၊ ဢၼ်ၶိုင်ပွင်ႁၢင်ႈႁႅၼ်းဝႆႉၸိူဝ်ႉၼင်ႇႁိုဝ်ၼၼ်ႉတီႈသူသေၵမ်း။
ၼႂ်းဝႃႈၼၼ်သေၵေႃႈသူၵူႈၵေႃႉႁုႁၼ်လွင်ႈမၼ်းတၢင်းမၼ်းယူႇယဝ်ႉ၊ ႁဵတ်းသင်လႄႈသူယင်းလၢတ်ႈၵႂၢမ်းလၢႆလၢႆဢၼ်ဢမ်ႇပွင်ႇလွင်ႈၵႃႈသင်ၼၼ်ႉ၊ ယူႇထၢၼ်ႇၼႆႉၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
“သူးလၢပ်ႈဢၼ်ၽြႃးပဵၼ်ၸဝ်ႈပၼ်တီႈ ၵူၼ်းႁၢႆႉၵူၼ်းမိူၵ်ႈ၊ ဢမူၺ်ႇဢုၵ်ႉၸႃႇၵေႃႉဢၼ်ၸၢင်ႈ ၼိၵ်ႈၸၢၵ်ႈငႅၼ်းသႄးၼၼ်ႉ၊ လႆႈႁပ်ႉၶၢမ်ႇဢဝ်တီႈမိုဝ်းၸဝ်ႈဢၼၼ်ႇတႃႉတၼ်းၶူဝ်းၼၼ်ႉၸမ်ႉ။
ပိၵ်ႉသမ်ႉၶဝ်တေမီးလုၵ်ႈမီးလၢင်းၼမ်ၼႃႇသေၵေႃႈ၊ ၶဝ်တၵ်းတၢႆလူၺ်ႈလၢပ်ႇလူၺ်ႈလႅဝ်းလႄႈ လုၵ်ႈလၢင်းၸိူဝ်းၼၼ်ႉဢမ်ႇလႆႈၵိၼ်ဢိမ်ႇ ၵိၼ်တဵမ်။
ၶဝ်ၸိူဝ်းဢၼ်ယင်းၵိုတ်းၵျၢၼ်ႇယူႇၼၼ်ႉသမ်ႉတၵ်းတၢႆလူၺ်ႈၽေးၵႃႇလႃႉႁႃႈလႅင်မိူင်းလႄႈ မႄႈမၢႆႈၶဝ်ၸိူဝ်းၼၼ်ႉတၵ်းဢမ်ႇလႆႈ ႁွင်ႉႁႆႈပွင်ႉၶၢင်း။
ပိၵ်ႉသမ်ႉၵေႃႉဢၼ်ႁၢႆႉမိူၵ်ႈၸိူဝ်းၼၼ်ႉဢဝ်ငိုၼ်းၵွင်ဝႆႉၼမ်ၼႃႇမိူၼ်ၸိူဝ်ႉၼင်ႇမုၼ်ႈလိၼ်လႄႈ မီးသိူဝ်ႈၶူဝ်းၼုင်ႈတၢင်းမႆၵွင်ဝႆႉမိူၼ်ၸိူဝ်ႉၼင်ႇၵွင်လိၼ်ၼဵဝ်သေၵေႃႈ။
ၶဝ်ၸုသိမ်းဝႆႉၵူၺ်းလႄႈၵူၼ်းသိုဝ်ႈတေႃႇတင်းလၢႆတၵ်းဢဝ်ၼုင်ႈဢိၵ်ႇတင်း ၵေႃႉဢၼ်ၵၢင်းလွတ်ႈတင်းဢပျတ်ႈတၵ်းသိမ်းဢဝ်ငိုၼ်းၶဝ်ၼၼ်ႉဢေႃႈ။
ၶဝ်ၸၢင်ႈတႄႇႁဵတ်းႁိူၼ်းၶဝ်မိူၼ်ၸိူဝ်ႉၼင်ႇ ယႂ်းၵူင်ႇၵၢဝ် ဢိၵ်ႇတင်း မိူၼ်သုမ်ႉထဵင်ပုၼ်ႈၶႃႈၵူၼ်းၸႂ်ႉတၵ်းပႂ်ႉ ႁႆႈၶဝ်ႈၼၼ်ႉဢေႃႈ။
ၶဝ်ၼွၼ်းလပ်းၵႂႃႇပဵၼ်ၵူၼ်းမၢၵ်ႈၵူၼ်းမီးပွၵ်ႈတီႈလိုၼ်းသုတ်းၼၼ်ႉ လႄႈ မိူဝ်ႈဢၼ်တိုၼ်ႇမႃးၼၼ်ႉၸိုင်၊ဢုၵ်ႉၸႃႇ ၸေးၸိမ်ႇၶဝ်ႁၢႆၵႂႃႇဢေႃႈ။
ၽေးဢုပၢတ်ႈၸၢင်ႈလိုပ်ႈၸွမ်းၶဝ်ၸိူဝ်ႉၼင်ႇၼမ်ႉဢၼ်ၵိုင်ႉၵၢင်ႉၼွင်းမႃးၼၼ်ႉဢေႃႈ။ ၽူၼ်လူင်လူမ်းလူင်ၶိင်ႇၵၢင်ၶိုၼ်းၼၼ်ႉၸၢင်ႈပတ်ႉထူဝ်းဢဝ်ၶဝ်ၵႂႃႇဢေႃႈ။
လူမ်းတၢင်းဝၼ်းဢွၵ်ႇပတ်ႉထူဝ်းပႃးဢဝ်ၶဝ် ပိဝ်သဵၼ်ၸွမ်းႁႅင်းလူမ်း၊ ဢွၵ်ႇသေၵႃႈတီႈတီႈယူႇၶဝ်ၼၼ်ႉၵႂႃႇဢေႃႈ။
လူမ်းၼၼ်ႉ၊ ယင်းဢမ်ႇဢဵတ်းလူလႄႈ ပတ်ႉထူဝ်းသႂ်ႇၶဝ်ၼၼ်ႉ၊ ၶဝ်ၵေႃႈၶတ်းၸႂ်တေၼီပၢႆႈဢွၵ်ႇသေၵႃႈတီႈ လူမ်းၼၼ်ႉၵႂႃႇဢေႃႈ။
လူမ်းၼၼ်ႉပတ်ႉထူဝ်းလူၺ်ႈတင်းသဵင်ဢၼ် ယႂ်ႇသေလႄႈသႄႉသွမ်းၶဝ်၊ လိုပ်ႈႁေႃႈၶဝ်ဢွၵ်ႇပႅတ်ႈသေၵႃႈတီႈ တီႈယူႇၶဝ်ၼၼ်ႉဢေႃႈ။
ၸႂ်ႈတႄႉ။ မီးမေႃႇဢၼ်ၶုတ်းဢဝ်ငိုၼ်းလႆႈၼၼ်ႉ၊ဢိၵ်ႇတင်း မီးမေႃႇဢၼ်ၶုတ်းဢဝ်ၶမ်းလႆႈလႄႈၸၢင်ႈၶႃႇဢဝ်ၸႅတ်ႈဢဝ်ဢေႃႈ။
ၵူၼ်းၸၢင်ႈၶုတ်းဢဝ်လဵၵ်းၵႃႈၼႂ်းလိၼ်လႄႈ ၸၢင်ႈၶႃႇဢဝ်ထူဝ်းဢဝ်တွင်းလႅင်ၵႃႈၼႂ်း မၢၵ်ႇႁိၼ်ဢေႃႈ။
ၵူၼ်းၸၢင်ႈႁဵတ်းႁႂ်ႈဢၼ်လပ်းသိင်ႇၵႃႈၼႂ်း မေႃႇၼၼ်ႉႁၢႆလႄႈ ၸၢင်ႈၶႆႈၸၢင်ႈႁႃၸွမ်းတီႈဢၼ်လိုၵ်ႉ ၵႃႈၼႂ်းလိၼ်၊ ႁႂ်ႈလႆႈၶုတ်းဢဝ်ၵွၼ်ႈႁိၼ်ၸိူဝ်းၼၼ်ႉ ၵႃႈၼႂ်းဢၼ်လပ်းသိင်ႇဢေႃႈ။
မၼ်းၶုတ်းႁူးတင်းလၢႆၵႃႈတီႈမေႃႇဢၼ်ၵႆၵၼ်တင်းတီႈယူႇၵူၼ်းၼၼ်ႉလႄႈ ၵူၼ်းဢၼ်ၵႂႃႇၵႂႃႇမႃးမႃးၸိူဝ်းၼၼ်ႉၵေႃႈ လိုမ်းမၼ်းယဝ်ႉ၊ မၼ်းဢွင်ႇဢွႆႈႁွႆႈၽႅၼ်ယူႇသေလႄႈ ၵႆၵၼ်တင်းၵူၼ်းဢေႃႈ။
ၵႃႈၼိူဝ်လိၼ်ၸိုင်၊ယင်းၽုၵ်ႇသွမ်ႈမၢၵ်ႇၶဝ်ႈ ႁူင်းၼမ်ႉယူႇဢေႃႈ။ ၵႃႈတႂ်ႈလိၼ်ၸမ်ႉ၊ပဵၼ်မိူၼ်ၸိူဝ်ႉၼင်ႇဢၼ် ၽႆးယႃႉပႅတ်ႈၵူႈၸိူဝ်ႉၵူႈပိူင်ၼၼ်ႉဢေႃႈ။
မၢၵ်ႇႁိၼ်မၼ်းၸိူဝ်းၼၼ်ႉပဵၼ်တီႈယူႇ သႅင်ၼီႇလႃႇလႄႈ မုၼ်ႈလိၼ်မၼ်းၵေႃႈ မီးၶမ်းဢေႃႈ။
သဵၼ်ႈတၢင်းမၼ်းၸိုင်၊ၼူၵ်ႉႁၢႆႉၼူၵ်ႉလိူင်း တင်းလၢႆဢမ်ႇႁု မၢၵ်ႇတႃမဵဝ်းႁုင်ႉၵေႃႈဢမ်ႇပႆႇတွၼ်ႉလႆႈႁၼ်။
တူဝ်ထိူၼ်ႇႁၢႆႉဢမ်ႇပႆႇတွၼ်ႉလႆႈယဵပ်ႇလႆႈၶၢမ်ႈလႄႈ သၢင်ႇသီႈဢမ်ႇပႆႇလႆႈပႆၽႃႇလတ်းၵႂႃႇတီႈၼၼ်ႈ။
ၵူၼ်းၸၢင်ႈၶုတ်းမူင်ႇႁိၼ်ၽႃဢၼ်ၵႅၼ်ႇၶႅင်လႄႈ ဢဝ်လွႆတင်းလၢႆၶွမ်ႈပိၼ်ႈပႅတ်ႈတေႃႇထိုင်ႁွတ်ႈပိုၼ်ႉမၼ်းဢေႃႈ။
မၼ်းၸၢင်ႈၶုတ်းႁူးၶုတ်းႁွင်ႈၶဝ်ႈၵႃႈၼႂ်း ႁိၼ်ၽႃတင်းလၢႆလႄႈ မၼ်းၸၢင်ႈထူပ်းႁၼ်ဢၼ်ထိူၵ်ႈၵႃႈထိူၵ်ႈၶၼ် ၵႃႈမီးဢေႃႈ။
ၶဝ်သွၵ်ႈႁႃၸွမ်းၵႂႃႇထိုင်ၵႃႈတီႈႁူဝ်ၼမ်ႉ ၼၼ်ႉလႄႈ ဢဝ်လွင်ႈတၢင်းဢၼ်သိူင်ႇဝႆႉမႅပ်းဝႆႉၼၼ်ႉ ဢွၵ်ႇမႃးဢေႃႈ။
ၼႂ်းဝႃႈၼၼ်သေၵေႃႈ တၵ်းထူပ်းပိင်ႇၺႃႇ ၵႃႈတီႈလႂ်၊ တီႈဢၼ်ၺၢၼ်ႇပိင်ႇၺႃႇယူႇသဝ်းၼၼ်ႉ မီးၵႃႈတီႈလႂ်။
ၵူၼ်းဢမ်ႇႁုၵႃႈၶၼ်ပိင်ႇၺႃႇလႆႈ၊ႁႃဢဝ်ၵႃႈတီႈဢၼ်ၵူၼ်းလေႃးၵီႇယူႇၼႆႉဢမ်ႇထူပ်းႁၼ်လႆႈ။
တီႈဢၼ်လိုၵ်ႉဢၼ်လမ်ႇၼမ်ႉသမ်ႇမုၵ်ႈတြႃႇၼၼ်ႉၵေႃႈ၊ႁႃဢဝ်ဢမ်ႇထူပ်းလႆႈ။
ဢဝ်ၶမ်းသိုဝ်ႉဢဝ်ပိင်ႇၺႃႇၵေႃႈဢမ်ႇလႆႈ၊ ဢဝ်ငိုၼ်းၸင်ႈႁိဝ်ႈသေၵေႃႈဢမ်ႇၶိုတ်းပဵင်း ၵႃႈၶၼ်မၼ်းလႆႈ။
ဢဝ်တင်းၶမ်းမိူင်း ဢေႃႇၽိရႃႉ၊ သႅင်ၸၢႆးၶႃးယွတ်ႇတင်းသႅင်သွမ်ႇဢၼ်မျၢတ်ႈၼၼ်ႉ၊ သိုဝ်ႉဢဝ်သေၵေႃႈဢမ်ႇလႆႈ။
ပိင်ႇၺႃႇလိူဝ်တွၼ်းၼႃႇသေၶမ်း၊ မျၢတ်ႈသေၶမ်းလွတ်ႈငၢၼ်ႇတင်း သႅင်ၸိင်ႇဢေႃႈ။
ႁိၼ်မွၵ်ႇႁိၼ်မႂ်တင်းသႅင်ၶၢဝ်ဢမ်ႇမီးတီႈဢၼ်တၵ်းလၢတ်ႈလႃးလႃး၊ ၵႃႈၶၼ်ပိင်ႇၺႃႇၼၼ်ႉယဵင်ႈၶႅၼ်းထိူၵ်ႈၵႃႈသေသႅင်ပုလႄးဢေႃႈ။
သႅင်ဢုႀၽယႃးဢၼ်ၼမ်ႉလီမိူင်း ဢေႇတီႇဢူဝ်းပီးယႃး၊ ၵေႃႈဢမ်ႇပဵင်းတၢၼ်ႇပိင်ႇၺႃႇၼၼ်ႉလႆႈ၊ တေဢဝ်ၶမ်းလွတ်ႈငၢၼ်ႇတႂၢၵ်ႈႁႂ်ႈပဵၼ်ၵႃႈၶၼ်ၵေႃႈဢမ်ႇလႆႈ။
ပိူဝ်ႈဢၼ်ပဵၼ်ၼင်ႇၼႆလႄႈပိင်ႇၺႃႇ လုၵ်ႉၵႃႈတီႈလႂ်မႃး၊ တီႈယူႇၺၢၼ်ႇပိင်ႇၺႃႇၼၼ်ႉမီးၵႃႈတီႈလႂ်။
သတ်ႉတဝႃႇဢၼ်ဢသၢၵ်ႈလိပ်းၵႃႈမီးၼၼ်ႉဢမ်ႇႁၼ်ပိင်ႇၺႃႇလႆႈ၊ ၼူၵ်ႉၵၢင်ႁၢဝ်ဢၼ်မိၼ်ယူႇၸိူဝ်းၼၼ်ႉၵေႃႈဢမ်ႇႁၼ်လႆႈ။
လိၼ်လႅၼ်တၢင်းဢၼ်လုလႅဝ်ဢိၵ်ႇတင်းတၢင်းတၢႆၼၼ်ႉႁပ်ႉတုင်းဢဝ်လႄႈလၢတ်ႈဝႃႈ၊ ႁဝ်းလႆႈငိၼ်းသဵင်ၶၢဝ်ႇမၼ်းလူၺ်ႈႁူႁဝ်း ၵူၺ်းဢေႃႈ။
ၽြႃးပဵၼ်ၸဝ်ႈသူႇလဵဝ်ပႃးလဵဝ်ၵူၺ်းႁုသဵၼ်ႈတၢင်းပိင်ႇၺႃႇလႄႈ မၼ်းၸဝ်ႈၵူၺ်းႁုတီႈယူႇတီႈသဝ်းမၼ်းဢေႃႈ။
လွင်ႈမၼ်းၸမ်ႉ၊မၼ်းၸဝ်ႈလူတူၺ်းထိုင်တီႈသုတ်းလိၼ်မိူင်းလႄႈ ႁၼ်ၵႃႈဢၼ်မီးၵႃႈတႂ်ႈၽႃႉၵၢင်ႁၢဝ်လႂ်ဢေႃႈ။
ၼႂ်းမိူဝ်ႈဢၼ်ၽြႃးပဵၼ်ၸဝ်ႈတႅပ်းတတ်းၼမ်ႉၼၵ်းလူမ်းဝႆႉ၊ ဢိၵ်ႇတင်းတူင်ၼမ်ႉလူၺ်ႈၶိူင်ႈတူင်ၼၼ်ႉ။
မိူဝ်ႈဢၼ်မၼ်းၸဝ်ႈတႅပ်းတတ်းဝႆႉပၼ်ၼႄးလၢႆးပုၼ်ႈၽူၼ်တၵ်းတူၵ်းလႄႈ ႁဵတ်းပၼ်သဵၼ်ႈတၢင်းပုၼ်ႈသၢႆလႅင်း ၽႃႉမႅပ်ႈၽႃႉၽႃႇၼၼ်ႉ။
မၼ်းၸဝ်ႈႁၼ်ပိင်ႇၺႃႇလႄႈၽုၺ်ႇဢွၵ်ႇ လၢတ်ႈၼႄလွင်ႈမၼ်းသေယဝ်ႉ၊ ၶၢၼ်းမၼ်းဝႆႉလႄႈၸႅတ်ႈသေးမၼ်းဢေႃႈ။
မၼ်းၸဝ်ႈမွၵ်ႇလၢတ်ႈတီႈၵူၼ်းလႄႈဝႃႈ၊ ‘တူၺ်းလူးပိင်ႇၺႃႇၸိုင်၊ပဵၼ်တၢင်းဢၼ် ၵူဝ်ယမ်ၸဝ်ႈၽြႃးလႄႈ ၺၢၼ်ႇသမ်ႉပဵၼ်တၢင်းဢၼ်ဝႄႈပႅတ်ႈ တုၸရိူၵ်ႈဢေႃႈ။’ ” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ယေႃးၽႃႉ၊ သမ်ႉသိုပ်ႇလၢတ်ႈထႅင်ႈလႄႈဝႃႈၸမ်ႉ၊
“ဢူဝ်း။ ၵဝ်ပႄႉၶႂ်ႈၶိုၼ်းပဵၼ်ၸိူဝ်ႉၼင်ႇဢၼ်ပဵၼ် ၼႂ်းပီ၊လိူၼ်ဢၼ်ပူၼ်ႉမႃးၼၼ်ႉ၊ မိုဝ်ႉဝၼ်းဢၼ်ၽြႃးပဵၼ်ၸဝ်ႈပႂ်ႉၸွႆႈပႂ်ႉထႅမ် ၵဝ်ယူႇၼၼ်ႉ။
မိုဝ်ႉဝၼ်းၼၼ်ႉဝၢၼ်ႇၽႆးတဵၼ်းမၼ်းၸဝ်ႈ ႁိူဝ်ႈလႅင်းယူႇ၊ မိူဝ်ႈဢၼ်ဝၢၼ်ႇၽႆးမၼ်းၸဝ်ႈထွင်ႇၵႃႈၼိူဝ်ႁူဝ်ၵဝ်ၼၼ်ႉၵဝ်ဢိင်ဢၼ်လႅင်းမၼ်းၸဝ်ႈ ၼၼ်ႉသေလႄႈ ပႆလတ်းၵႂႃႇၵႃႈၼႂ်းဢၼ်လပ်းသိင်ႇဢေႃႈ။
မိုဝ်ႉဝၼ်းဢၼ်ၵဝ်ယင်းၼုမ်ႇယင်းၵမ်ယူႇၼၼ်ႉ၊ ၽြႃးပဵၼ်ၸဝ်ႈႁဵတ်းၵေႃႉသႄႈလူၺ်ႈၵၼ်တင်းၵဝ်လႄႈ ၵႅတ်ႇၶႄႁႄႉၵင်ႈပၼ်သုမ်ႉထဵင်ၵဝ်ဢေႃႈ။
မိူဝ်ႈၼၼ်ႉ၊ ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ မီးယူႇလူၺ်ႈၵၼ်တင်းၵဝ်လႄႈ လုၵ်ႈလၢၼ်ၵဝ်ၵေႃႈဢုမ်ႇလွမ်ႉၵဝ်ယူႇ။
ဝူဝ်းမႄႈဢိၵ်ႇတင်းပႄႉမႄႈၵဝ်တင်းလၢႆပၼ်ၼမ်ႉၼူမ်းၶဝ်ၼမ်ၼႃႇဢိၵ်ႇတင်း ၼမ်ႉမၼ်းလႆဢွၵ်ႇၵႄႈမၢၵ်ႇႁိၼ်မႃးပုၼ်ႈၵဝ် ယူႇၼၼ်ႉဢေႃႈ။
ၼႂ်းမိူဝ်ႈဢၼ်ၵဝ်ၶိုၼ်ႈၸူးတီႈပၢင်ဢုပ်ႇပၢင်ၵုမ်ၵူၼ်းလူင်ၼႂ်းဝဵင်းလႄႈ မႄးႁႅၼ်းတီႈၼင်ႈၵဝ်ၵႃႈတီႈပၢင်ႇ ၽၵ်းတူဝဵင်းၼၼ်ႉၸိုင်။
ၵူၼ်းၼုမ်ႇတင်းလၢႆႁၼ်ၵဝ်လႄႈသုတ်ႉပၢႆႈၵႂႃႇ၊ ၵူၼ်းထဝ်ႈတင်းလၢႆလုၵ်ႉၸုၵ်းႁႂ်ႈလႆႈပၼ်တၢင်းၼပ်ႉယမ်တီႈၵဝ်ဢေႃႈ။
ၶုၼ်တင်းလၢႆဢွၼ်ၵၼ်တဵတ်ႇယဵၼ်ယူႇသေလႄႈ ဢဝ်မိုဝ်းၶဝ်တူမ်းသူပ်းၶဝ်ယူႇဢေႃႈ။
မူးမၢတ်ႈၽွင်းမိူင်းၸိူဝ်းၼၼ်ႉဢွၼ်ၵၼ် ယူႇတဵတ်ႇတဵတ်ႇ၊ ဢမ်ႇႁတ်းတၵ်ႉသဵင်တၵ်ႉပၢၵ်ႇၵႃႈသင်ဢေႃႈ။
ၶဝ်ၸိူဝ်းဢၼ်လႆႈငိၼ်းလွင်ႈၵဝ်ၼၼ်ႉဢွၼ်ၵၼ်ယုၵ်ႉယွင်ႈၵဝ်လႄႈ ၶဝ်ၸိူဝ်းဢၼ်လႆႈႁၼ်ၵဝ်ၼၼ်ႉ သမ်ႉၶၢမ်ႇသၢၵ်ႈသေႇလွင်ႈၵဝ်ဢေႃႈ။
လွင်ႈမၼ်းၸမ်ႉ၊ၵဝ်ၽေးၸွၼ်းတီႈၵူၼ်းၽၢၼ်ဢၼ်မႃးၶေႃယွၼ်းတီႈၵဝ်၊ ဢိၵ်ႇတင်းတီႈလုၵ်ႈၽၢၼ်ပေႃႈၽၢၼ်မႄႈဢၼ်ဢမ်ႇမီးၵေႃႉၸွႆႈၵေႃႉထႅမ်မၼ်းၼၼ်ႉဢေႃႈ။
တၢင်းဢၼ်ၵေႃႉဢၼ်ၸမ်တၵ်းလုတၵ်းလႅဝ်ပၼ်တၢင်းလီႁႂ်ႈႁွတ်ႈထိုင်ၵႃႈၼိူဝ်ၵဝ်ၼၼ်ႉ၊ ၵဝ်ၸၢင်ႈႁႂ်ႈမႄႈမူၵ်းမႄႈမၢႆႈသႂၢင်ႇသိူဝ်းလႄႈႁဵတ်းၵႂၢမ်းဢေႃႈ။
ၵဝ်ၼုင်ႈမႆတၢင်းသိုဝ်ႈတေႃႇလႄႈတၢင်းဢၼ်ႁဵတ်းၸွမ်းၼင်ႇတြႃးၼၼ်ႉ၊ ပဵၼ်သိူဝ်ႈလူင်သိူဝ်ႈယၢဝ်းၵဝ်လႄႈပဵၼ် ၽႃႈၶဵၼ်းႁူဝ်ၵဝ်ဢေႃႈ။
ၵဝ်ပဵၼ်ၸိူဝ်ႉၼင်ႇမၢၵ်ႇတႃပုၼ်ႈ ၵူၼ်းတႃမွတ်ႇလႄႈ ပဵၼ်ၸိူဝ်ႉၼင်ႇတိၼ်ပုၼ်ႈၵေႃႉဢၼ် တိၼ်ၵႅင်ႉတိၼ်ၵုၵ်ႉၼၼ်ႉဢေႃႈ။
ၵဝ်ပဵၼ်ၸိူဝ်ႉၼင်ႇပေႃႈတီႈၵူၼ်းၽၢၼ်လႄႈ ၸၢင်ႈၸွမ်းႁႃၸွႆႈထႅမ်ၵေႃႉဢၼ်ၵဝ်ဢမ်ႇမိုတ်ႈဢမ်ႇၵိုဝ်းၼၼ်ႉဢေႃႈ။
ၵဝ်ႁၵ်းငႃးၵေႃႉဢၼ်ဢမ်ႇတြႃးၼၼ်ႉပႅတ်ႈလႄႈ ၼုၵ်ႈထွၼ်ဢဝ်ဢၼ်ၶဝ်ႁိမ်ဢဝ်လႄႈၶူပ်းၵိၼ်ၼၼ်ႉဢွၵ်ႇသေၵႃႈတီႈၶဵဝ်ႈၶဝ်ဢေႃႈ။
ၵဝ်ထၢင်ႇယူႇတႃႇသေႇဝႃႈ၊ၵဝ်တေမီးဢသၢၵ်ႈဢၼ်ယိုၼ်းယၢဝ်းလႄႈ လႆႈတၢႆၵႂႃႇယဵၼ်ယဵၼ်ၵႃႈၼႂ်းႁိူၼ်းၵဝ်။
ႁႂ်ႈၸူဝ်ႈတႃႇဢသၢၵ်ႈၵဝ်မိူၼ်ၸိူဝ်ႉၼင်ႇတူၼ်ႈမႆႉ၊ ဢၼ်ႁၢၵ်ႈမၼ်းယၼ်ႇလူင်းၼႂ်းၼမ်ႉယူႇ၊ ဢၼ်ၵိင်ႇမၼ်းယမ်းလူၺ်ႈၼမ်ႉမူၺ် ၼမ်ႉၼၢႆးယူႇၼၼ်ႉ။
မုၼ်ၽုင်းၵဝ်ၵေႃႈယင်းမီးတၢင်းဢၼ် မၼ်ႈၶိူင်ႇယူႇ၊ ၵၢင်ႇၵဝ်ၵေႃႈမီးတၢင်းဢၼ်ႁွမ်ႁႅင်းယူႇ ၼႂ်းမိုဝ်းၵဝ်ဢေႃႈ။
မိူဝ်ႈဢၼ်ၵဝ်ပၼ်တၢင်းၵျၢမ်ႇၼၼ်ႉပိူၼ်ႈယူႇတဵတ်ႇတဵတ်ႇလႄႈ ပႂ်ႉထႃႈထွမ်ႇဢဝ်ၵႂၢမ်းၵဝ်ယူႇလီလီ ငၢမ်းငၢမ်းဢေႃႈ။
လိုၼ်းသေၵဝ်လၢတ်ႈယဝ်ႉၼၼ်ႉၶဝ်ဢမ်ႇမီးတီႈဢၼ်တၵ်းလၢတ်ႈထႅင်ႈၵႃႈသင်ယဝ်ႉ၊ ၵႂၢမ်းၵဝ်မိူၼ်ၸိူဝ်ႉၼင်ႇၼမ်ႉယွတ်ႇသႂ်ႇတူၵ်းသႂ်ႇၵႃႈၼိူဝ်ၶဝ်ၼၼ်ႉဢေႃႈ။
ၶဝ်ၵူႈၵေႃႉၵူႈၵူၼ်းပႂ်ႉထႃႈမုင်ႈမွင်းၵဝ်၊မိူၼ်ၸိူဝ်ႉၼင်ႇၸဝ်ႈႁႆႈၸဝ်ႈၼႃးပႂ်ႉထႃႈၼမ်ႉၽူၼ်ဢၼ်တူၵ်းပၢႆပီၼၼ်ႉဢေႃႈ။
ၵဝ်ယုမ်ႉၶူဝ်တေႃႇၶဝ်ၸိူဝ်းဢၼ်ဢမ်ႇမီးတီႈဢိင်တီႈပိုင်ႈၼၼ်ႉလႄႈ တၢင်းဢၼ်ၵဝ်မီးၼႃႈသႂ်ၸႂ်ၵီႈၼၼ်ႉပၼ်ဢဵၼ်ပၼ်ႁႅင်းၶဝ်ဢေႃႈ။
ၵဝ်ပဵၼ်ၵူၼ်းလူင်လႄႈၼႄပၼ်သဵၼ်ႈတၢင်းၶဝ်၊ၵဝ်ဢွၼ်ႁူဝ်ၶဝ်မိူၼ်ၸိူဝ်ႉၼင်ႇၶုၼ်ႁေႃၶမ်းဢွၼ်ႁူဝ်တပ်ႉသိုၵ်းၸဝ်ႈၼၼ်ႉ၊ ဢိၵ်ႇတင်းႁဵတ်းႁႂ်ႈၸႂ်ၶဝ်မီးတၢင်းၼိမ်တၢင်းလီၵႃႈၼႂ်းတၢင်းဢၼ်ၶဝ်ဢမ်ႇမီး တၢင်းမုင်ႈမွင်းၼၼ်ႉဢေႃႈ။
မိူဝ်ႈလဵဝ်ၼႆႉၸမ်ႉ၊ၶဝ်ၸိူဝ်းဢၼ်ဢသၢၵ်ႈယင်းၼုမ်ႇသေၵဝ်ၼၼ်ႉ၊ဢွၼ်ၵၼ်ႁဵတ်းပျၢၵ်ႈၶူဝ်တီႈၵဝ်ဢေႃႈ။ ၵဝ်ႁၼ်ပေႃႈၶဝ်ၸိူဝ်းၼၼ်ႉယင်းဢမ်ႇထိူၵ်ႈဢမ်ႇတၢၼ်ႇ ႁႂ်ႈလႆႈယူႇလူၺ်ႈၵၼ်တင်းမႃဢၼ်ပႂ်ႉထိင်း ၽုင်သူဝ်းၵဝ်ၼၼ်ႉဢေႃႈ။
တၢင်းၵတ်ႉတၢင်းၶၼ်မိုဝ်းၶဝ်ဢၼ်ႁႅင်းဢူၼ်ႈ ယဝ်ႉၼၼ်ႉ၊ တၵ်းတေပွင်ဢၵျူဝ်းပုၼ်ႈၵဝ်လႆႈၵႃႈသင်။
ၶဝ်ၼၼ်ႉယၢၵ်ႈၽၢၼ်ဢိုပ်းယၢၵ်ႈၼႃႇလႄႈတွင်ႉမႆႈသႆႈလိူတ်ႇသေယဝ်ႉ၊ ဢွၼ်ၵၼ်ၶူပ်းၵိၼ်ႁူဝ်မႆႉႁၢၵ်ႈတွၵ်ႇၵႃႈၼႂ်းထိူၼ်ႇလႅင်ႉလႂ်။
ၶဝ်ၸၢင်ႈဝိတ်းဢဝ်တူၼ်ႈဢၼ်ယူႇၼႂ်းထိူၼ်ႇလႅင်ႉ၊ ဢိၵ်ႇတင်းႁႂ်ႈဢိမ်ႇတွင်ႉလူၺ်ႈယွတ်ႈတူၼ်ႈၶႅမ်ဢၼ်ဢမ်ႇမီးဢရႃႉသႃႇၼၼ်ႉဢေႃႈ။
ၶဝ်လႆႈၶၢမ်ႇတၢင်းဢၼ်ပိူၼ်ႈႁေႃႈဢွၵ်ႇပႅတ်ႈ၊ လူၺ်ႈသဵင်ဢၼ်ႁွင်ႉဢၼ်သႅၼ်ႇမိူၼ်ၸိူဝ်ႉၼင်ႇ၊ ဢၼ်ပိူၼ်ႈႁွင်ႉပၢဝ်ႇလိုပ်ႈႁေႃႈၽူႈလၵ်ႉ ၼၼ်ႉဢေႃႈ။
ၶဝ်လႆႈပၢႆႈတဵတ်ႇပၢႆႈသွၼ်ႈယူႇၵႃႈၼႂ်းႁူးထမ်ႈလႂ်၊ ၵႃႈၼႂ်းငၢပ်ႇႁိၼ်ငၢပ်ႇၽႃလႂ်၊ၵႃႈၼႂ်းလုၵ်းၼႂ်းၶုမ်လႂ်ဢေႃႈ။
ၶဝ်ဢွၼ်ၵၼ်ပွင်ႉၶၢင်းပွင်ႉမိုၼ်ႇၵႃႈၼႂ်းယုမ်းၼႂ်းယွမ်ႇလႄႈ ၸုတုမ်ၽိုတ်ႉဢီးၵၼ်ယူႇၵႃႈတႂ်ႈ တူၼ်ႈၼၢမ်ဢေႃႈ။
ၶဝ်ပဵၼ်လုၵ်ႈလၢင်းၵူၼ်းငိူဝ်ႈငႃႉလုၵ်ႈလၢင်း ၵူၼ်းယုတ်ႈလႄႈ လႆႈၶၢမ်ႇတၢင်းဢၼ်လိုပ်ႈပႅတ်ႈသေၵႃႈၼႂ်းဝၢၼ်ႈ ၼႂ်းမိူင်းဢေႃႈ။
တေႃႈလဵဝ်ၼႆႉၸမ်ႉ၊ၶဝ်မႃးလႄႈဢွၼ်ၵၼ်ယွၵ်ႇယဝ်ႈပျၢၵ်ႈၶူဝ်ၵဝ်လႄႈ ၵဝ်လႆႈတူၵ်းပဵၼ်တီႈဢၼ်ၶဝ်ႁဵတ်းၵႂၢမ်းပျၢၵ်ႈၵႂၢမ်းၶူဝ်သႄႉသွမ်းဢေႃႈ။
ၶဝ်ဢွၼ်ၵၼ်လီႁင်ႈဢဵတ်ႇသဵတ်ႇၵဝ်လႄႈ ဝႄႈပႅတ်ႈၵဝ်ၵႆၵႆဢေႃႈ။ ၶဝ်ယင်းဢမ်ႇႁဵတ်းၵွႆႈႁဵတ်းထိူင်းပုၼ်ႈတၵ်း ထူမ်ႇၼမ်ႉလၢႆးသႂ်ႇၼႃႈၵဝ်။
ၵွပ်ႈပိူဝ်ႈၽြႃးပဵၼ်ၸဝ်ႈႁႂ်ႈသၢႆၵၢင်ႇၵဝ် ၶၢတ်ႇယဝ်ႉလႄႈ ႁႂ်ႈၵဝ်လႆႈတူၵ်းတႅမ်ႇယဝ်ႉၸင်ႇၶဝ်ဢွၼ်ၵၼ်ပွႆႇၵၵ်ႉပွႆႇၵိုဝ်ၶုၼ်ႇၽင်ႈသႂ်ႇၵဝ်ဢေႃႈ။
မုၵ်ႉၵူၼ်းၸိူဝ်းၵူၼ်းလုၵ်ႉၵႃႈတီႈၽၢႆႇတၢင်း ၶႂႃၵဝ်မႃးသေလႄႈ ၶတ်းတိၼ်ၵဝ်လူမ်ႉလႄႈႁဵတ်းလွင်ႈတၢင်း ႁႂ်ႈလႆႈယႃႉၵဝ်ပႅတ်ႈဢေႃႈ။
ၶဝ်ဢွၼ်ၵၼ်ယႃႉသဵၼ်ႈတၢင်းၵဝ်ပႅတ်ႈႁႂ်ႈလႆႈ ယႃႉယူၵ်ႉၵဝ်၊ ၽႂ်ယင်းဢမ်ႇႁႄႉဢမ်ႇၵင်ႈၶဝ်လႄႈၶဝ်ႁဵတ်း ၸိူဝ်ႉၼင်ႇၼႆလႆႈဢေႃႈ။
ၶဝ်ဢွၼ်ၵၼ်မႃးမိူၼ်ၸိူဝ်ႉၼင်ႇၶဝ်ႈၸွမ်းႁူးပွင်ႇဢၼ်ၵႂၢင်ႈၼၼ်ႉလႄႈ ၶုၼ်ႇၽင်ႈလႅၼ်ႈၸွမ်းၵႃႈတီႈဢၼ်ၵိူၼ်ႇပင်း လုလႅဝ်ၼၼ်ႉဢေႃႈ။
တၢင်းဢၼ်လီၵူဝ်လီႁႄတူၵ်းႁွတ်ႈ ၵႃႈၼိူဝ်ၵဝ်လႄႈ မုၼ်သရေႇၵဝ်ႁၢႆၵႂႃႇမိူၼ်ၸိူဝ်ႉၼင်ႇလူမ်း ပတ်ႉထူဝ်းပႅတ်ႈ၊ဢိၵ်ႇတင်း ၸေးၸိမ်ႇၵဝ်ၽူင်ႉပိဝ်သဵၼ်ၵႂႃႇမိူၼ် မွၵ်ႇၵုမ်ႈၼၼ်ႉယဝ်ႉ။
မိူဝ်ႈလဵဝ်ၼႆႉၸမ်ႉ၊ႁူဝ်ၸႂ်ၵဝ်တႅၵ်ႇလႅဝ်ၵႂႃႇယဝ်ႉ၊ တၢင်းဢၼ်ၵဝ်လႆႈၶၢမ်ႇတုၵ်ႉၶႃႉ တၢင်းၽၢၼ်ၼၼ်ႉ၊ ဢမ်ႇမီးတီႈသၢၵ်ႈသႃႇလႃးလႃး။
ၶိင်ႇၵၢင်ၶိုၼ်းလုပ်ႇၵဝ်ၸိူဝ်းၼႆႉၶူပ်းၶိုၼ်ႈ ၼႃႇလူင်လၢင်လႄႈ တၢင်းဢၼ်ၸဵပ်းဢၼ်သႅပ်ႇၵႃႈၼႂ်းၵဝ်ၼၼ်ႉဢမ်ႇထၢတ်ႇဢမ်ႇယဵၼ်လႃးလႃး။
မၼ်းၸဝ်ႈယိပ်းၵမ်ၵဝ်ႁႅင်းယႂ်ႇၼႃႇလႄႈၶူဝ်းၼုင်ႈၵဝ်ထၢၼ်ႈပေႃးယွၵ်းၶၢတ်ႇၵႂႃႇ၊ မိူၼ်ၸိူဝ်ႉၼင်ႇဢၼ်ဝၵ်ႉဢဝ်ၶေႃးသိူဝ်ႈၵဝ်ၼၼ်ႉဢေႃႈ။
မၼ်းၸဝ်ႈတွၵ်ႈဢီးၵဝ်တူၵ်းၵႃႈၼႂ်းၵူမ်ႇ ၼႂ်းဢုင်လႄႈ ၵဝ်ၼႆႉလႆႈပဵၼ်ၸိူဝ်ႉၼင်ႇမုၼ်ႈလိၼ် တင်းတဝ်ႈၼၼ်ႉယဝ်ႉ။
ဢူဝ်းၽြႃးပဵၼ်ၸဝ်ႈတီႈၶႃႈ၊ၶႃႈၸဝ်ႈ ႁွင်ႉသႅၼ်ႇတီႈၸဝ်ႈႁဝ်းလႄႈ ၸဝ်ႈႁဝ်းဢမ်ႇဢိူဝ်တီႈၶႃႈ၊ မိူဝ်ႈဢၼ်ၶႃႈၸဝ်ႈသူးတွင်းၵေႃႈၸဝ်ႈႁဝ်း ဢမ်ႇထွမ်ႇတီႈၶႃႈ။
ၸဝ်ႈႁဝ်းႁဵတ်းၵျၢမ်းထၢမ်းၼႃႇလူင်လၢင် တီႈၶႃႈၸဝ်ႈလႄႈ ဢဝ်တင်းႁႅင်းတၼ်းၶူဝ်းၸဝ်ႈႁဝ်းၼၼ်ႉ တဵၵ်းငႅၼ်းၶႃႈၸဝ်ႈတီႈၶႃႈဢေႃႈ။
ၸဝ်ႈႁဝ်းၸႂ်ႉလူမ်းပတ်ႉထူဝ်းၶႃႈၸဝ်ႈပႅတ်ႈ၊ ႁႂ်ႈၶႃႈၸဝ်ႈပိဝ်သဵၼ်ၵႂႃႇၸွမ်းလူမ်းၼၼ်ႉလႄႈ ၸဝ်ႈႁဝ်းယုၵ်ႉဢဝ်ၶႃႈၸဝ်ႈပႅတ်ႈသႂ်ႇ ၼႂ်းႁႅင်းလူမ်းလႄႈ ၶႃႈၸဝ်ႈလႆႈပိဝ်ၶိုၼ်ႈပိဝ်လူင်းယူႇဢေႃႈ။
ၶႃႈၸဝ်ႈႁုလွင်ႈဢၼ်ၸဝ်ႈႁဝ်းတၵ်းဢဝ် ၶႃႈၸဝ်ႈတၢႆလႄႈ တၵ်းသူင်ႇၵႂႃႇၵႃႈတီႈဢၼ်မၵ်းၶၢၼ်းလႄႈ ႁဵတ်းဝႆႉပုၼ်ႈၵူၼ်းၵူႈၵေႃႉၵူႈၵူၼ်း၊ ၵႃႈဢၼ်ဢသၢၵ်ႈယင်းလိပ်းမိူဝ်ႈလဵဝ်ၼႆႉ တၵ်းယူႇသဝ်းၼၼ်ႉဢေႃႈ။
ၸႂ်ႈတႄႉ။ ၽူႈလႂ်ဢမ်ႇတွၼ်ႉဢဝ်မိုဝ်းထုပ်ႉသႂ်ႇၵူၼ်းဢၼ်ယၢပ်ႇၸႂ်၊ ၼႂ်းမိူဝ်ႈဢၼ်မၼ်းႁွင်ႉသႅၼ်ႇယွၼ်းတၢင်းၸွႆႈတၢင်းထႅမ်ပုၼ်ႈတုၵ်ႉၶႃႉမၼ်းၼၼ်ႉ။
ၸွင်ႇၵဝ်ဢမ်ႇယၢမ်ႈႁွင်ႉႁႆႈပုၼ်ႈၶဝ်ၸိူဝ်းဢၼ်ႁွတ်ႈတုၵ်ႉၶႃႉၼၼ်ႉႁိုဝ်း၊ ၸွင်ႇၵဝ်ဢမ်ႇယၢမ်ႈၸဵပ်းၸႂ်ပုၼ်ႈၶဝ်ၸိူဝ်းဢၼ်ၸုတ်ႈဢၼ်လုတ်ႈၼၼ်ႉႁိုဝ်း။
ၵူၺ်းၵႃႈ၊မိူဝ်ႈဢၼ်ၵဝ်ပႂ်ႉမွင်းတၢင်းလီတၢင်းငၢမ်းၼၼ်ႉတၢင်းႁၢႆႉၵေႃႈႁွတ်ႈမႃး၊ ယၢမ်းမိူဝ်ႈဢၼ်ၵဝ်ပႂ်ႉမွင်းဢၼ်ပၢင်ႇဢၼ်လႅင်းၼၼ်ႉဢၼ်လပ်းသိင်ႇၵေႃႈႁွတ်ႈမႃးဢေႃႈ။
ႁူဝ်ၸႂ်ၵဝ်မႆႈႁွၼ်ႉလႄႈဢမ်ႇၸၢင်ႈ ထၢတ်ႇယဵၼ်ၵႂႃႇ၊ မိုဝ်ႉဝၼ်းဢၼ်လႆႈၶၢမ်ႇတုၵ်ႉၶႃႉၼၼ်ႉ ထူပ်းမႅၼ်ႈၵဝ်ယဝ်ႉ။
ၸူဝ်ႈဢသၢၵ်ႈတၢၼ်းၵဝ်မိုတ်ႉမူဝ်းၵႂႃႇယဝ်ႉလႄႈဢမ်ႇမီးသၢႆလႅင်းဝၼ်း၊ ၵဝ်လုၵ်ႉၸုၵ်းယူႇၵႃႈၼႂ်းၵၢင်ပရိၵ်ႈသၢတ်ႈလႄႈႁွင်ႉၶၢင်းတီႈၶဝ်ပုၼ်ႈတၢင်းၸွႆႈထႅမ်ဢေႃႈ။
သဵင်ၵဝ်ပဵၼ်သဵင်ဢၼ်ၶီၸႂ်၊သဵင်ဢၼ်ငႅဝ်ၵူၼ်း မိူၼ်ၵၼ်တင်းသဵင်ႁွင်ႉမႃလိၼ်တင်း သဵင်ႁွင်ႉၼူၵ်ႉၵလႃႇဢုၵ်ႈဢေႃႈ။
ၼိူဝ်ႉၼင်ၵဝ်ၵမ်ႇၵႂႃႇလမ်ၵႂႃႇလႄႈ ယၢတ်ႇတူၵ်းသေတူဝ်ၵဝ်၊ လုပ်ႇၵဝ်ၵေႃႈမႆႈႁွၼ်ႉၼႃႇမိူၼ်ၽႆးမႆႈဢေႃႈ။
တိင်ႇၵဝ်ၸၢင်ႈလင်ဢွၵ်ႇသဵင်ဢၼ် ၶၢင်းၶီၶၢင်းၽၢၼ်လႄႈ ပီႇၵဝ်ၼႄးၵဝ်ၸၢင်ႈလင်ဢွၵ်ႇသဵင် ဢၼ်ႁႆႈဢၼ်ႁွင်ႉဢေႃႈ။
ၵဝ်ႁဵတ်းၵတိလူၺ်ႈၵၼ်တင်း မၢၵ်ႇတႃၵဝ်ဝႆႉယဝ်ႉ။ ပိူဝ်ႈၼႆလႄႈ ၵဝ်တၵ်းလူတူၺ်းမႄႈယိင်းဢၼ်ပဵၼ် သၢဝ်လႆႈၸိူဝ်ႉၼင်ႇႁိုဝ်။
ၽြႃးပဵၼ်ၸဝ်ႈဢၼ်ယူႇၵႃႈၼိူဝ်ၼၼ်ႉ ပၼ်ၵႃႈသင်မႃးပုၼ်ႈၵဝ်၊ ဢမူၺ်ႇဢၼ်ၸဝ်ႈဢၼၼ်ႇတႃႉတၼ်းၶူဝ်းပၼ်မႃးပုၼ်ႈၵဝ်ၼၼ်ႉပဵၼ်ၵႃႈသင်။
ၶဝ်ၸိူဝ်းဢၼ်မိူၵ်ႈလိူင်းၼၼ်ႉမၼ်းၸဝ်ႈႁႂ်ႈၶဝ်လုလႅဝ်ၵႂႃႇဢေႃႈ။ ၶဝ်ၸိူဝ်းဢၼ်ႁဵတ်းဢမ်ႇတြႃးၼၼ်ႉ တၵ်းလုတၵ်းသုမ်းၵႂႃႇဢေႃႈ။
မၼ်းၸဝ်ႈႁုၵႃႈဢၼ်ၵဝ်ႁဵတ်းၼၼ်ႉ ၵူႈၸိူဝ်ႉၵူႈပိူင်လႄႈ ႁၼ်ယၢင်ႈတိၼ်ၵဝ်ၼၼ်ႉၵူႈယၢင်ႈဢေႃႈ။
ပေႃးၵဝ်လႆႈၸွမ်းသဵၼ်ႈတၢင်းမုသႃႇမႅၼ်ႈလႄႈ လႆႈၵျၢမ်ႇပွင်တၢင်းဢၼ်ပႅတ်ႉလႅၼ်ပိူၼ်ႈ ၼၼ်ႉၸိုင်။
ႁႂ်ႈၽြႃးပဵၼ်ၸဝ်ႈဢဝ်ယႃႇၸူႇဢၼ်မၢၼ်ႇ ဢၼ်မႅၼ်ႈၼၼ်ႉၸင်ႈႁိဝ်ႈတူၺ်းၵဝ်လႄႈ ႁႂ်ႈမၼ်းၸဝ်ႈႁုတၢင်းဢၼ်ၵဝ်သိုဝ်ႈတေႃႇၼၼ်ႉသေၵမ်းလူၺ်ႈ။
ပေႃးယၢင်ႈတိၼ်ၵဝ်လႆႈၽိတ်းတၢင်းပိူင်ႈတၢင်းမႅၼ်ႈလႄႈ ႁူဝ်ၸႂ်ၵဝ်လႆႈၸွမ်းၵႂႃႇၼႂ်းဢလူဝ်ႇတူဝ်ၸဝ်ႈၵဝ်ႇမႅၼ်ႈ၊ ပေႃးမိုဝ်းၵဝ်လႆႈဢိူၵ်ႇမႅၼ်ႈဢပျတ်ႈၸိုင်။
ႁႂ်ႈပိူၼ်ႈတၢင်ႇၵေႃႉလႆႈဢဝ်ၶဝ်ႈၼမ်ႉတၢင်းၵိၼ်ၵဝ်ပႅတ်ႈသေၵမ်း။ ႁႂ်ႈမၢၵ်ႇၶဝ်ႈႁူင်းၼမ်ႉၵဝ်လႆႈၶၢမ်ႇတၢင်းဢၼ်ပိူၼ်ႈယႃႉၵဝ်းသေၵမ်း။
ပေႃးၵဝ်လႆႈမီးၸႂ်ဢၼ်ၸပ်းၸွႆးမေးပိူၼ်ႈ မႅၼ်ႈလႄႈ ၵႂႃႇပႂ်ႉလွမ်ပႂ်ႉတူၺ်းၵႃႈတီႈႁိမ်းၽၵ်းတူၵူၼ်းႁိူၼ်းၸမ်ၵၼ်တင်းၵဝ်ၼၼ်ႉမႅၼ်ႈၸိုင်၊
ႁႂ်ႈမေးၵဝ်လႆႈတူၵ်းပဵၼ်ၵေႃႉဢၼ်လူၺ်ၶဝ်ႈပိူၵ်ႇ ပိူၼ်ႈလႄႈ ႁႂ်ႈၵူၼ်းၸၢႆးၼွၼ်းလူၺ်ႈၵၼ်တင်းမေးၵဝ် သေၵမ်းလူၺ်ႈ။
ဢပျတ်ႈၸိူဝ်ႉၼင်ႇၼႆၼၼ်ႉပဵၼ်ဢၼ် ယႂ်ႇၼႃႇလႄႈ ထိူၵ်ႈၶၢမ်ႇဢဝ်တၢင်းဢၼ်တြႃးၸီႇယၢင်ႇ ပၼ်တၢမ်ႇၼၼ်ႉဢေႃႈ။
လွင်ႈမၼ်းၸမ်ႉ၊တၢင်းဢၼ်ၽိတ်းၵႃႇမေႇသုၼၼ်ႉ၊ပဵၼ်တၢင်းဢၼ်လုဢၼ်သုမ်း ဢၼ်ဝႃႈၽႆးငရၢႆး၊ ဢၼ်မႆႈၶႅမ်ႈၸေးၸိမ်ႇၵႃႈဢၼ်ၵဝ် မီးၼၼ်ႉပႅတ်ႈဢေႃႈ။
ပေႃးၶႃႈၵဝ်သေၵေႃႉၵေႃႉၸွႆးတၢင်ႇဢမု သႂ်ႇၵဝ်လႄႈ ပေႃးၵဝ်ယင်းဢမ်ႇႁပ်ႉဢမ်ႇၶၢမ်ႇဢဝ်ၸိုင်။
ၵဝ်တၵ်းႁဵတ်းၸိူဝ်ႉၼင်ႇႁိုဝ်တေႃႇၼႃႈၵၼ်တင်းၽြႃးပဵၼ်ၸဝ်ႈလႆႈ၊ မိူဝ်ႈဢၼ်မၼ်းၸဝ်ႈၸႅတ်ႈဢမုတီႈၵဝ်ၼၼ်ႉၵဝ်တၵ်းၶိုၼ်းလဝ်ႈလၢတ်ႈလႆႈၸိူဝ်ႉၼင်ႇႁိုဝ်။
လွင်ႈမၼ်းၸမ်ႉ၊ၽြႃးပဵၼ်ၸဝ်ႈဢၼ် ၽၢၼ်ႇသၢင်းႁဵတ်းပဵၼ်ၵဝ်ၼၼ်ႉ၊ ၽၢၼ်ႇသၢင်းႁဵတ်းပဵၼ်ၶႃႈၵဝ်ၼင်ႇၵဝ်ႇဢေႃႈ။
ပေႃးၵဝ်ယၢမ်ႈပႄႇပႅတ်ႈဢလူဝ်ႇၵၢင်ၸႂ် ၵူၼ်းယၢၵ်ႈၵူၼ်းၽၢၼ်လႄႈသင်၊ ယၢမ်ႈႁဵတ်းႁႂ်ႈမၢၵ်ႇတႃမႄႈမၢႆႈလုလႄႈသင်။
ပေႃးယၢမ်ႈၵိၼ်တႃႇၶဝ်ႈၵမ်းၶဝ်ႈၵဝ်ယူႇၵေႃႉလဵဝ်ၵူၺ်းလႄႈ ယင်းဢမ်ႇမႅင်ႇပၼ်ၵေႃႉဢၼ်ၽၢၼ်ပေႃႈၽၢၼ်မႄႈၵိၼ်လႄႈသင်။
(ၵူၺ်းၵႃႈ၊ၸႃႉၸဵမ်မိူဝ်ႈဢၼ်ၵဝ်ဢသၢၵ်ႈယင်းၼုမ်ႇၼၼ်ႉ၊ လဵင်ႉလူမၼ်းမႃးမိူၼ်ၸိူဝ်ႉၼင်ႇဢၼ်ပဵၼ် ပေႃႈမၼ်းယဝ်ႉ၊ ၸႃႉၸဵမ်မိူဝ်ႈၵဝ်ၵိူတ်ႇလဵင်ႉမႃးၼၼ်ႉ ၵဝ်ၸွႆႈထႅမ်မႃႉၸႃႉမႄႈမၢႆႈၼၼ်ႉမႃးယဝ်ႉ။)
ပေႃးၵဝ်ႁၼ်သေၵေႃႉၵေႃႉဢၼ်ႁွတ်ႈထိုင် တၢင်းလုတၢင်းလႅဝ်၊ ၵွပ်ႈပိူဝ်ႈဢၼ်မၼ်းဢမ်ႇမီးၶူဝ်းၼုင်ႈတၢင်းမႆ ဢိၵ်ႇတင်း ၵေႃႉဢၼ်ၸုတ်ႈဢၼ်လုတ်ႈသေၵေႃႉၵေႃႉ ယင်းဢမ်ႇမီးၽႃႈဢၼ်တၵ်းႁူမ်ႇ တၵ်းမႆလႄႈယူႇ။
ပိၵ်ႉသမ်ႉႁူဝ်ၸႂ်မၼ်းဢမ်ႇမီးတၢင်းဢၼ် တၢင်ႇၵျေးၸူးတီႈၵဝ်၊ ပိူဝ်ႈဢၼ်မၼ်းလႆႈၼုင်ႈဢုၼ်ႇလူၺ်ႈၶူၼ်သူဝ်း ၵဝ်ၼၼ်ႉလႄႈသင်။
ပေႃးၵဝ်ယၢမ်ႈလႆႈပႅတ်ႉလႅၼ်ၵိၼ်ၵေႃႉဢၼ်ၽၢၼ်ပေႃႈၽၢၼ်မႄႈ၊ ၵွပ်ႈပိူဝ်ႈၵဝ်ႁုလွင်ႈဢၼ်လုမ်းၽၵ်းတူမိူင်းပၼ်ဢဵၼ်ပဵၼ်ႁႅင်းၵဝ်ၼၼ်ႉၸိုင်။
ႁႂ်ႈၶႅၼ်မိုဝ်းၵဝ်ႁၵ်းလႄႈလုတ်ႈတူၵ်းသေ ႁူဝ်မႃႇၵဝ်ၵႂႃႇသေၵမ်း။ ႁႂ်ႈၶေႃႈမိုဝ်းၵဝ်ႁၵ်းသေၵႃႈတီႈလုပ်ႇမၼ်း သေၵမ်း။
လွင်ႈမၼ်းၸမ်ႉ၊ၵဝ်ၵူဝ်ႁႄတၢင်းဢၼ်ၽြႃးပဵၼ်ၸဝ်ႈၸီႇယၢင်ႇယႃႉၽဵဝ်ႈပႅတ်ႈ၊ ၵွပ်ႈပိူဝ်ႈတၼ်းၶူဝ်းဢႃႇၼုၽေႃႇမၼ်းၸဝ်ႈၼၼ်ႉလႄႈၵဝ်ဢမ်ႇႁတ်းႁဵတ်းၸိူဝ်ႉၼင်ႇၼႆလႃးလႃး။
ပေႃးၵဝ်ၸႂ်လီလူၺ်ႈၶမ်းလႄႈလၢတ်ႈတီႈၶမ်းလွတ်ႈငၢၼ်ႇလႄႈဝႃႈ၊ ‘မႂ်းၼႆႉပဵၼ်တီႈဢၼ်ၵဝ်သွၼ်ႈပိုင်ႈဢေႃႈ၊’ ဝႃႈၼင်ႇၼႆမႅၼ်ႈလႄႈ။
ပေႃးၵဝ်ဢုပ်ႇဝၢဝ်းၸူမ်းသိူဝ်းၵွပ်ႈပိူဝ်ႈဢၼ် ၸေးၸိမ်ႇၵဝ်ယႂ်ႇလႄႈ မိုဝ်းၵဝ်လႆႈဢဝ်သိမ်းဝႆႉၼမ်ၼႃႇ ၼၼ်ႉလႄႈသင်။
ပေႃးၵဝ်ယၢမ်ႈတွၼ်ႉဝႆႈသႃသၢႆဢရွင်ႇၵၢင်ဝၼ်း၊ ဢမ်ႇၼၼ်လိူၼ်ဢၼ်ႁိူဝ်ႈႁိူင်းပိူင်းသႂ် ၼၼ်ႉလႄႈ။
ပေႃးၵဝ်ယၢမ်ႈလွင်ႈၵႂႃႇၸွမ်းၵႂႃႇၼႂ်းတၢင်းဢၼ်ရူဝ်ႇသေႇၶဝ်လႄႈ ယၢမ်ႈၸုပ်ႇမိုဝ်းၵဝ်ၼႂ်းတၢင်းဢၼ် ပၼ်ၵုင်ႇသရေႇၶဝ်ၼၼ်ႉၸိုင်၊
ဢပျတ်ႈၸိူဝ်ႉၼင်ႇၼႆၼၼ်ႉပဵၼ်ဢၼ်ထိူၵ်ႈၶၢမ်ႇတၢင်းဢၼ်ၸီႇယၢင်ႇတြႃး၊ ၵွပ်ႈပိူဝ်ႈပဵၼ်တၢင်းဢၼ်ထဵင်ပႅတ်ႈ ၽြႃးပဵၼ်ၸဝ်ႈဢၼ်မီးယူႇၵႃႈၼိူဝ်ဢေႃႈ။
မိူဝ်ႈဢၼ်ရၢၼ်ႇသူႇၵဝ်ႁွတ်ႈထိုင်တၢင်းဢၼ်လုလႅဝ်ၼၼ်ႉၵဝ်ဢမ်ႇတွၼ်ႉၸူမ်းသိူဝ်း၊ မိူဝ်ႈဢၼ်မၼ်းထူပ်းၽေးၼၼ်ႉၵေႃႈ ၵဝ်ဢမ်ႇမူၼ်ႈပျေႃႇ။
ၵဝ်ဢမ်ႇတွၼ်ႉႁဵတ်းဢပျတ်ႈၼႂ်းတၢင်းဢၼ်သူးတွင်းဝႃႈ၊ႁႂ်ႈၶဝ်တၢႆၼၼ်ႉသေပွၵ်ႈ၊
ၵူၼ်းၼႂ်းႁိူၼ်းယေးၵဝ်ႁုလွင်ႈဢၼ်ၵဝ်ႁပ်ႉႁူမ်ၸူမ်းတွၼ်ႈလဵင်ႉလူၵူၼ်းၵူႈၵေႃႉၵူႈၵူၼ်းယူႇၼၼ်ႉဢေႃႈ။
ၵဝ်ႁွင်ႉပၢင်းဢဝ်ၶဝ်ၸိူဝ်းဢၼ်ၵႂႃႇတႃႈပၢႆတၢင်းၼၼ်ႉၶဝ်ႈၵႃႈၼႂ်းႁိူၼ်းၵဝ်လႄႈ ဢမ်ႇတွၼ်ႉႁႂ်ႈၶဝ်လႆႈၼွၼ်းၵႃႈတီႈ သဵၼ်ႈတႃသၢႆတၢင်း။
ပေႃးၵဝ်ယၢမ်ႈတွၼ်ႉႁူမ်ႇသုမ်ႇတုၸရိူၵ်ႈၵဝ်ဝႆႉ မိူၼ်ၸိူဝ်ႉၼင်ႇ ဢႃႇတမ်ႇ၊ ၼၼ်ႉလႄႈ ဢဝ်ဢပျတ်ႈၵဝ်သိူင်ႇမႅပ်းဝႆႉၵႃႈၼႂ်းႁူဝ်ဢူၵ်းၵဝ်ၸိုင်။
ပိူဝ်ႈဢၼ်ၵဝ်ၵူဝ်ႁႄမူႇၵူၼ်းၸိူဝ်းၵူၼ်းဢၼ် ၼမ်ၼႃႇၼၼ်ႉလႄႈ ၵူဝ်ၸိူဝ်ႉၶိူဝ်းၶဝ်သႄႉသွမ်းလႄႈ၊ၵဝ်ဢမ်ႇဢွၵ်ႇ ၽၵ်းတူႁိူၼ်းလႄႈတဵတ်ႇမႅပ်းယူႇ။
ႁႂ်ႈသေၵေႃႉၵေႃႉ ထွမ်ႇငိၼ်းၵႂၢမ်းၵဝ်သေၵမ်း၊ ၵဝ်လူင်းလၢႆးမိုဝ်းယဝ်ႉ၊ႁႂ်ႈ ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ ၶိုၼ်းတွပ်ႇလၢတ်ႈတီႈၵဝ်သေၵမ်း။ ႁႂ်ႈၵေႃႉဢၼ်ၸွႆးတြႃးၵၼ်တင်းၵဝ်ၼၼ်ႉတႅမ်ႈလိၵ်ႈလွင်ႈဢၼ်ၵဝ်မီးတီႈၼႄးတီႈဝႃႈၼၼ်ႉ။
ၵဝ်တၵ်းဢဝ်လိၵ်ႈၼၼ်ႉတၢင်ႇဝႆႉၵႃႈၼိူဝ် ႁူဝ်မႃႇၵဝ်ဢမၢၼ်ႇၶၼ်ပဵၼ်လႄႈ တၵ်းတိုဝ်းဝႆႉမိူၼ်ၸိူဝ်ႉၼင်ႇသရၽူႇဢေႃႈ။
ၵဝ်တၵ်းၽုၺ်ႇဢွၵ်ႇၼႄပျႃးၵႃႈဢၼ်ၵဝ်ႁဵတ်းၼၼ်ႉတီႈၽြႃးပဵၼ်ၸဝ်ႈလႄႈ ၵဝ်တၵ်းသုတ်ႉၸပ်းသုတ်ႉၸူးတီႈမၼ်းၸဝ်ႈမိူၼ်ၸိူဝ်ႉၼင်ႇၵဝ်ပဵၼ်ၶုၼ်ဢေႃႈ။
ပေႃးၵႂၢၵ်ႈလိၼ်ၵဝ်ႁွင်ႉႁႆႈသေလႄႈ တၢင်ႇဢပျတ်ႈတီႈၵဝ်ၸိုင်၊ ႁွႆးထႆမၼ်းၸိူဝ်းၼၼ်ႉတၵ်းဢွၼ်ၵၼ် ႁွင်ႉႁႆႈပွင်ႉၶၢင်းလူၺ်ႈၵၼ်။
ပေႃးၵဝ်ယင်းဢမ်ႇလႆႈသဵင်ႈငိုၼ်းသဵင်ႈတွင်း သေယဝ်ႉ၊လႆႈၵိၼ်မၢၵ်ႇၶဝ်ႈႁူင်းၼမ်ႉ ဢၼ်ဢွၵ်ႇသေၵႃႈတီႈၵႂၢၵ်ႈလိၼ်ၼၼ်ႉလႄႈ သမ်ႉႁဵတ်းႁႂ်ႈၵေႃႉဢၼ်ပဵၼ်ၸဝ်ႈၵႂၢၵ်ႈလိၼ်ၵေႃႉဢွၼ်တၢင်းၼၼ်ႉလႆႈတၢႆၵႂႃႇၸိုင်။
တႅၼ်းတူၼ်ႈၶဝ်ႈၵျုင်ႇ၊ဢိၵ်ႇတင်း တူၼ်ႈၶဝ်ႈမုယေႃးၸိူဝ်းၼၼ်ႉ၊ ႁႂ်ႈတူၼ်ႈဝင်တင်းတူၼ်ႈၼၢမ် ဢွၵ်ႇမႃးသေၵမ်း၊” ဝႃႈၼင်ႇၼႆဢေႃႈ။ ၵႂၢမ်း ယေႃးၽႃႉ၊ သုတ်းယဝ်ႉဢေႃႈ။
ၼင်ႇၼၼ်လႄႈၶဝ်တင်းသၢမ်ၵေႃႉယင်းဢမ်ႇၶိုၼ်းတွပ်ႇၶိုၼ်းလၢတ်ႈၵႃႈသင်တီႈ ယေႃးၽႃႉ၊ ၵွပ်ႈပိူဝ်ႈ ယေႃးၽႃႉ၊ ႁၼ်ဝႃႈ၊တူဝ်မၼ်းသိုဝ်ႈတေႃႇၼႃႇၼၼ်ႉဢေႃႈ။-
ၵူၺ်းၵႃႈ၊ ဢေးလိႁု၊ လုၵ်ႈၸၢႆး ပႃႇရၶေးလႃႉ၊ မဵဝ်း ပုၸႃႉ၊ ဢၼ်ပဵၼ်ၸိူဝ်ႉၶိူဝ်း ရမ်ႇ၊ ၼၼ်ႉၸႂ်မႆႈၶႂ်ႈၸႃႉတေႃႇ ယေႃးၽႃႉ၊ ၵွပ်ႈပိူဝ်ႈမၼ်းထၢင်ႇဝႃႈ၊မၼ်းပဵၼ်ၵေႃႉဢၼ်ယူႇၽၢႆႇထုၵ်ႇလိူဝ်သေၽြႃးပဵၼ်ၸဝ်ႈၼၼ်ႉဢေႃႈ။-
ၵေႃႉသႄႈ ယေႃးၽႃႉ၊ သၢမ်ၵေႃႉၼၼ်ႉၵေႃႈ ဢေးလိႁု၊ ၸႂ်မႆႈၶႂ်ႈၸႃႉတေႃႇၶဝ်ၵွပ်ႈပိူဝ်ႈၶဝ်ဢမ်ႇၸၢင်ႈၶိုၼ်းတွပ်ႇၶိုၼ်းလၢတ်ႈတီႈ ယေႃးၽႃႉ၊ လႄႈသမ်ႉၸီႇယၢင်ႇဝႃႈ၊ ယေႃးၽႃႉ၊ ပဵၼ်ၵေႃႉဢၼ်ၽိတ်းၼၼ်ႉဢေႃႈ။-
ဢေးလိႁု၊ ၼၼ်ႉပႂ်ႉထႃႈယူႇႁႂ်ႈလႆႈလၢတ်ႈတေႃႇ ယေႃးၽႃႉ၊ ၵွပ်ႈပိူဝ်ႈဢၼ်ၶဝ်သၢမ်ၵေႃႉၼၼ်ႉဢသၢၵ်ႈယႂ်ႇသေမၼ်းၼၼ်ႉဢေႃႈ။-
မိူဝ်ႈဢၼ်မၼ်းႁၼ်ၵူၼ်းသၢမ်ၵေႃႉၼၼ်ႉဢမ်ႇၸၢင်ႈၶိုၼ်းတွပ်ႇလၢတ်ႈၵႃႈသင်တီႈ ယေႃးၽႃႉ၊ ယဝ်ႉၼၼ်ႉၸိုင်၊မၼ်းၸႂ်မႆႈၶႂ်ႈၸႃႉၼႃႇလႄႈ၊-
ဢေးလိႁု၊ လုၵ်ႈၸၢႆး ပႃႇရၶေးလႃႉ၊ မဵဝ်း ပုၸႃႉ၊ ၸိူဝ်ႉၶိူဝ်း ရမ်ႇ၊ လၢတ်ႈဝႃႈ၊ “ၵဝ်ၶႃႈၼႆႉဢသၢၵ်ႈလဵၵ်ႉလႄႈ၊သူၸဝ်ႈၸမ်ႉ၊ ဢသၢၵ်ႈယႂ်ႇဢေႃႈ။ ၵွပ်ႈပိူဝ်ႈၼႆလႄႈၵဝ်ၶႃႈဢမ်ႇႁတ်းလၢတ်ႈ ၵႃႈဢၼ်ၵဝ်ၶႃႈႁၼ်ထိုင်၊
ၵဝ်ၶႃႈဝႃႈ၊ ‘ၵူၼ်းထဝ်ႈၵူၼ်းၵႄႇထုၵ်ႇလီ လၢတ်ႈၵႂၢမ်းလႄႈ ၵေႃႉဢၼ်ဢသၢၵ်ႈယႂ်ႇထုၵ်ႇလီသွၼ်ပၼ် ပိင်ႇၺႃႇ’ ဝႃႈၼင်ႇၼႆဢေႃႈ။
ၵူၼ်းၸိုင်၊မီးဝိၺိၺ်ႇလႄႈလူမ်းထူၺ်ႈၸႂ် ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ ၼၼ်ႉပၼ်ႁႂ်ႈၵူၼ်းလႆႈၺၢၼ်ႇဢေႃႈ။
ပိၵ်ႉသမ်ႉပဵၼ်ၵူၼ်းထဝ်ႈၵူၼ်းၵႄႇယဝ်ႉသေၵေႃႈ မီးပိင်ႇၺႃႇဢမ်ႇၸႂ်ႈ၊ ပိၵ်ႉသမ်ႉပဵၼ်ၵေႃႉဢၼ်ဢသၢၵ်ႈယႂ်ႇလႄႈႁုႁၼ်တြႃးဢၼ်မၢၼ်ႇဢၼ်မႅၼ်ႈဢမ်ႇၸႂ်ႈ။
ပိူဝ်ႈဢၼ်ပဵၼ်ၸိူဝ်ႉၼင်ႇၼႆလႄႈၵဝ်ၶႃႈဝႃႈ၊ ‘ဢွၼ်ၵၼ်ထွမ်ႇငိၼ်းၵႂၢမ်းၵဝ်ၶႃႈသေၵမ်း။ ႁႂ်ႈၵဝ်ၶႃႈၵေႃႈလႆႈၼႄပျႃးသၽေႃးၵဝ်ၶႃႈ သေၵမ်း၊’ ဝႃႈၼင်ႇၼႆဢေႃႈ။
ၵဝ်ၶႃႈပႂ်ႉထွမ်ႇၵႂၢမ်းဢၼ်သူၸဝ်ႈ လၢတ်ႈၼၼ်ႉယူႇဢေႃႈ။ ၵဝ်ၶႃႈပႂ်ႉထွမ်ႇၵႂၢမ်းဢၼ်သူၸဝ်ႈႁႃဢဝ်တႃႇတေၶိုၼ်းတွပ်ႇၶိုၼ်းလၢတ်ႈၼၼ်ႉဢေႃႈ။
ၵဝ်ၶႃႈပႃးၸႂ်ထွမ်ႇဢဝ်ၸေးၸေး ၸွတ်ႇၸွတ်ႇလႄႈ လႆႈငိၼ်းၵႂၢမ်းဢၼ်သူၸဝ်ႈဢမ်ႇပႄႉၼႅင်ႇ ယေႃးၽႃႉ၊ ၼၼ်ႉဢေႃႈ။ ၽူႈလႂ်သေၵေႃႉသေၵူၼ်းဢမ်ႇၵႄႈလိတ်ႈ ၵႂၢမ်းမၼ်းလႆႈ။
ပေႃးပဵၼ်ၼႆၸိုင်၊သူတၵ်းဝႃႈ၊ ‘ႁဝ်းထူပ်း ပိင်ႇၺႃႇယဝ်ႉ’ ဝႃႈၼႆလႆႈႁိုဝ်း၊ ၵေႃႉဢၼ်ဢဝ် ယေႃးၽႃႉ၊ ၶျႃးတူၵ်း တီႈတႅမ်ႇၼၼ်ႉပဵၼ်ၵူၼ်းဢမ်ႇၸႂ်ႈ၊ ပဵၼ်ၽြႃးပဵၼ်ၸဝ်ႈဢေႃႈ။
ယေႃးၽႃႉ၊ ဝႆႉၸႂ်လၢတ်ႈၶတ်းၵၼ်တင်း ၵဝ်ၶႃႈဢမ်ႇၸႂ်ႈ၊ ၵဝ်ၶႃႈၵေႃႈတၵ်းဢမ်ႇၶိုၼ်းတွပ်ႇလၢတ်ႈ မိူၼ်ၸိူဝ်ႉၼင်ႇသူၸဝ်ႈလၢတ်ႈၼၼ်ႉ။
ယေႃးၽႃႉ၊ ႟။ ၶဝ်ၸိူဝ်းၼႆႉၵိုတ်းမိုင် ၵႂၢင်ၸႂ်ၵႂႃႇယဝ်ႉ၊ ၶဝ်ဢမ်ႇၸၢင်ႈၶိုၼ်းတွပ်ႇသေၶေႃႈ သေၵမ်းယဝ်ႉ။
ၵွပ်ႈပိူဝ်ႈဢၼ်ၶဝ်ဢမ်ႇတၵ်ႉသဵင်၊ၵႂႃႇၸုၵ်းယူႇၵႃႈတီႈၼၼ်ႈလႄႈ ယင်းဢမ်ႇတွပ်ႇဢမ်ႇလၢတ်ႈၼၼ်ႉ၊ ၵဝ်ၶႃႈတၵ်းလႆႈၵိုတ်းပႂ်ႉထႃႈယူႇလူးၵွၼ်ႇႁိုဝ်း။
ဢမ်ႇပႂ်ႉထႃႈယဝ်ႉ။ ၵဝ်ၶႃႈဢဝ်ၵႂၢမ်း တူဝ်ၸဝ်ႈၵဝ်ႇလႄႈ ၽုၺ်ႇမွၵ်ႇလၢတ်ႈၼႄၵႃႈဢၼ်ၵဝ်ၶႃႈ ႁၼ်ထိုင်ၼၼ်ႉဢေႃႈ။
လွင်ႈမၼ်းၸမ်ႉ၊ၼႂ်းတူဝ်ၵဝ်ၶႃႈတဵမ်ဝႆႉတင်း ၵႂၢမ်းဢၼ်တၵ်းလၢတ်ႈလႄႈ ဝိၺိၺ်ႇဢၼ်မီးၵႃႈၼႂ်းၵဝ်တိုၵ်းယူင်း ၵဝ်ၶႃႈဢေႃႈ။
ပေႃးၵဝ်ၶႃႈဢမ်ႇမီးဢၶႂၢင်ႉဢၼ်လႆႈလၢတ်ႈၸိုင်၊ ၵဝ်ၶႃႈၼႆႉတၵ်းတႅၵ်ႇၵႂႃႇမိူၼ် ၸိူဝ်ႉၼင်ႇထူင်ၼင်၊ ဢၼ်တဵမ်ဝႆႉတင်းၼမ်ႉမၢၵ်ႇၸပိတ်ႉ ဢၼ်မႂ်ႇၼၼ်ႉဢေႃႈ။
ပုၼ်ႈတႃႇၵဝ်ၶႃႈတၵ်းလႆႈသၢၵ်ႈသႃႇၼၼ်ႉ၊ ၵဝ်ၶႃႈတၵ်းၽုၺ်ႇသူပ်းလႄႈ ၶိုၼ်းလၢတ်ႈဢေႃႈ။
ၵဝ်ၶႃႈတၵ်းဢမ်ႇထွၵ်ႈလူၺ်ႈၼႃႈၽူႈလႂ် လႃးလႃး၊ ၵဝ်ၶႃႈတၵ်းဢမ်ႇၶျေႃးဝွၼ်းၽူႈလႂ်လႃးလႃး။
ၵဝ်ၶႃႈဢမ်ႇၸၢင်ႈၶျေႃးၸၢင်ႈဝွၼ်း ပိူၼ်ႈတၢင်ႇၵေႃႉ၊ ပေႃးၵဝ်ၶႃႈႁဵတ်းၸိူဝ်ႉၼင်ႇၼၼ်ၸိုင်၊ၸဝ်ႈဢၼ်ၽၢၼ်ႇသၢင်းႁဵတ်းပဵၼ်ၵဝ်ၶႃႈၼၼ်ႉတၵ်းပၼ်တၢမ်ႇတီႈၵဝ်ၶႃႈၵမ်းလဵဝ်ဢေႃႈ။
ယေႃးၽႃႉ၊ ႟။ တေႃႈလဵဝ်ၼႆႉၶႅၼ်းတေႃႈ ထွမ်ႇငိၼ်းၵႂၢမ်းၵဝ်ၶႃႈ၊ ဢၼ်ၵဝ်ၶႃႈတၵ်းလၢတ်ႈၼႆႉၸေးၸေး ၸွတ်ႇၸွတ်ႇသေၵမ်း။
ၵဝ်ၶႃႈတၼ်းဝႆႉပုၼ်ႈတႃႇတေလၢတ်ႈဢွၵ်ႇၵႃႈဢၼ်မီးၵႃႈၼႂ်းၸႂ်ၵဝ်ၶႃႈၼႆႉယဝ်ႉ၊
ၵႂၢမ်းၵဝ်ၶႃႈပဵၼ်ၵႂၢမ်းဢၼ်သိုဝ်ႈလီယူဝ်းလီ ၵူႈၶေႃႈၵူႈၵမ်းလႄႈ ၵဝ်ၶႃႈတၵ်းလၢတ်ႈၵႂၢမ်းဢၼ်မၢၼ်ႇ ဢၼ်မႅၼ်ႈၵူၺ်းၵူၺ်းဢေႃႈ။
ဝိၺိၺ်ႇၽြႃးပဵၼ်ၸဝ်ႈႁဵတ်းပဵၼ်ၵဝ်ၶႃႈလႄႈ လူမ်းဢသၢၵ်ႈၸဝ်ႈဢၼၼ်ႇတႃႉတၼ်းၶူဝ်းၼၼ်ႉႁႂ်ႈၵဝ်ၶႃႈဢသၢၵ်ႈလိပ်းယူႇဢေႃႈ။
ပေႃးၸဝ်ႈတၢတ်ႈၼိူင်ႇလႆႈၸိုင်၊ၶိုၼ်းတွပ်ႇလၢတ်ႈတီႈၵဝ်ၶႃႈတႃႉ။ မႄးႁႅၼ်းဝႆႉၵႂၢမ်းတႃႇတေတွပ်ႇထဵင်ၼၼ်ႉတႃႉ။
ၵႃႈတီႈၽၢႆႇၼႃႈၽြႃးပဵၼ်ၸဝ်ႈၵဝ်ၶႃႈၼႆႉ မိူၼ်ၵၼ်တင်းၸဝ်ႈ ပဵၼ်ၵေႃႉဢၼ်မၼ်းၸဝ်ႈဢဝ်မုၼ်ႈလိၼ် ႁဵတ်းပဵၼ်ၼင်ႇၵဝ်ႇဢေႃႈ။
ပိူဝ်ႈၼႆလႄႈၸဝ်ႈဢမ်ႇမီးတီႈတၵ်းၵူဝ်ႁႄၵဝ်ၶႃႈ၊ ၵဝ်ၶႃႈတၵ်းဢမ်ႇႁဵတ်းပႄႉႁဵတ်းၼႅင်ႇတီႈၸဝ်ႈလႃးလႃး။
တေႃႈလဵဝ်ၼႆႉၵဝ်ၶႃႈလႆႈငိၼ်းၵႂၢမ်းဢၼ် ၸဝ်ႈလၢတ်ႈလႄႈဝႃႈ၊
‘ၵဝ်ဢမ်ႇႁဵတ်းတုၸရိူၵ်ႈ၊ၵဝ်ဢမ်ႇႁဵတ်းၽိတ်း ၵႃႈသင်လႃးလႃး၊ ၵဝ်မီးတၢင်းဢၼ်ၶၢဝ်ၸၢင်ႇလႄႈ ၵၢင်းလွတ်ႈဢပျတ်ႈဢေႃႈ။
ၼႂ်းဝႃႈၼၼ်သေၵေႃႈၽြႃးပဵၼ်ၸဝ်ႈ ႁႃတၢင်းၽိတ်းသႂ်ႇၵဝ်၊ ႁႂ်ႈလႆႈမၢတ်ႈၵဝ်ပဵၼ်ရၢၼ်ႇသူႇမၼ်းၸဝ်ႈဢေႃႈ။
မၼ်းၸဝ်ႈဢဝ်တိၼ်ၵဝ်သႂ်ႇထိၵ်ႈသႂ်ႇထၢင်ႇဝႆႉလႄႈ ပႂ်ႉသဵၼ်ႈတၢင်းၵဝ်ၵႃႈမီးၼၼ်ႉဝႆႉဢေႃႈ၊’ ဝႃႈၼႆၼၼ်ႉဢေႃႈ။
ၵူၺ်းၵႃႈ၊ ယေႃးၽႃႉ၊ ႟။ ၸဝ်ႈၽိတ်းဢေႃႈ။ ၵဝ်ၶႃႈတၵ်းၶိုၼ်းလၢတ်ႈတီႈၸဝ်ႈဢေႃႈ။ လွင်ႈမၼ်းၸမ်ႉ၊ၽြႃးပဵၼ်ၸဝ်ႈယဵင်ႈၶႅၼ်းယႂ်ႇမျၢတ်ႈၼႃႇသေၵူၼ်းဢေႃႈ။
ၵွပ်ႈသင်လႄႈၸဝ်ႈၶတ်းၵၼ်တင်း မၼ်းၸဝ်ႈလႄႈလၢတ်ႈဝႃႈ၊ ‘မၼ်းၸဝ်ႈတၵ်းဢမ်ႇထွမ်ႇဢဝ်ၵႂၢမ်းသေၶေႃႈသေၵမ်း၊’ ဝႃႈၼႆၸိူဝ်ႉၼင်ႇႁိုဝ်။
ပိၵ်ႉသမ်ႉၽြႃးပဵၼ်ၸဝ်ႈမီးဢမိင်ႉလူၺ်ႈလွၵ်းလၢႆးမဵဝ်းၼိုင်ႈယဝ်ႉမဵဝ်းၼိုင်ႈသေၵေႃႈ၊ ၵူၼ်းဢမ်ႇႁုဢမ်ႇပွင်ႇလႆႈ။
ၶိင်ႇၵၢင်ၶိုၼ်းယၢမ်းမိူဝ်ႈဢၼ်ၵူၼ်းႁဝ်းယင်း ၼွၼ်းလီၼွၼ်းဝၢၼ်ယူႇၼၼ်ႉ၊ ၽြႃးပဵၼ်ၸဝ်ႈမီးဢမိင်ႉၼႂ်းတၢင်းဢၼ်ၼွၼ်းၽၼ်ဢိၵ်ႇတင်းၼႂ်းရူႇပႃႇရူင်ႇဢေႃႈ။
မၼ်းၸဝ်ႈႁႂ်ႈၶဝ်ထွမ်ႇဢဝ်ဢမိင်ႉမၼ်းၸဝ်ႈ သေလႄႈ ၶဝ်ဢွၼ်ၵၼ်တူၵ်းၸႂ်ၵွပ်ႈၵႂၢမ်းသင်ႇသွၼ် သုင်းမႃႉၸိူဝ်းၼၼ်ႉဢေႃႈ။
မၼ်းၸဝ်ႈႁႂ်ႈၶဝ်ၸုၼ်ႉပႅတ်ႈတၢင်းဢၼ်ႁဵတ်း တုၸရိူၵ်ႈဢပျတ်ႈ၊ဢိၵ်ႇတင်း ႁႂ်ႈလႆႈၵႄႇသႄႇဢဝ်ၶဝ်သေၵႃႈၼႂ်း မႃႇၼႃႉၸႂ်သုင်ၶဝ်ဢေႃႈ။
မၼ်းၸဝ်ႈၵႄႇၼုၵ်ႈဢဝ်ဢသၢၵ်ႈၶဝ်သေၵႃႈတီႈၶုမ်ပႃႇႁဵဝ်ႈလႄႈ ၵႄႇသႄႇဢဝ်ၶဝ်လွတ်ႈသေၵႃႈတီႈ တၢင်းတၢႆဢေႃႈ။
ၽြႃးပဵၼ်ၸဝ်ႈသင်ႇသွၼ်သုင်းမႃႉၵူၼ်းလူၺ်ႈ။ တၢင်းဢၼ်ႁႂ်ႈမၼ်းပဵၼ်ၶႆႈပဵၼ်ၼၢဝ်ဢမ်ႇၼၼ်၊ ႁႂ်ႈပဵၼ်ၶိုၼ်ႈပဵၼ်ၸဵပ်းတီႈတူဝ်တီႈၶိင်းမၼ်း။
ၸႂ်မၼ်းထၢၼ်ႈပေႃးမိူဝ်ႇၸၢၼ်ႈတၢင်းၵိၼ် တၢင်းၶူပ်းလႄႈၶၢၼ်ႉၵိၼ်တၢင်းၵိၼ် ဢၼ်လီဢၼ်ဝၢၼ်ၼႃႇလူင်လၢင် ၼၼ်ႉဢေႃႈ။
ၼိူဝ်ႉၼင်မၼ်းယုၵ်ႈယွမ်းႁၢႆၵႂႃႇလႄႈလုပ်ႇမၼ်းထၢၼ်ႈပေႃးမႅၼ်းဢွၵ်ႇပေႃႇဢွၵ်ႇမႃးယဝ်ႉ။
ဝိၺိၺ်ႇမၼ်းသုတ်ႉၸပ်းသုတ်ႉၸူးၵႃႈတီႈႁိမ်း ၶုမ်ပႃႇႁဵဝ်ႈလႄႈ ဢသၢၵ်ႈမၼ်းၸမ်တၵ်းႁွတ်ႈထိုင်ၵႃႈၼႂ်းမိုဝ်းတမၢၼ်ႇဢၼ်ယႃႉပႅတ်ႈၼၼ်ႉဢေႃႈ။
ၼႂ်းဝႃႈၼၼ်သေၵေႃႈၵႃႈၼႂ်းတမၢၼ်ႇၵၢင်ႁၢဝ်ႁဵင်ၼိုင်ႈၼၼ်ႉပေႃးမီးသေပႃးပႃး၊ ဢၼ်ၸၢင်ႈလၢတ်ႈၼႄသဵၼ်ႈတၢင်းတြႃးတီႈၵူၼ်းလႄႈပဵၼ်ၽူႈဢၼ်ယူႇဝူင်ႈၵၢင်ပၼ်ၸိုင်။
တမၢၼ်ႇၵၢင်ႁၢဝ်ၼၼ်ႉတၵ်းမီးၸႂ်ၵရုၼႃႇ တီႈမၼ်းလႄႈလၢတ်ႈဝႃႈ၊ ‘ဝႆႉႁႂ်ႈမၼ်းလွတ်ႈသေတၢင်းဢၼ်လူင်းၸူး တီႈမိူင်းမရၼႃႉတႃႉ။ ၵဝ်ထူပ်းႁၼ်လွင်ႈဢၼ်တၵ်းထုတ်ႇဢဝ်မၼ်းယဝ်ႉ’ ဝႃႈၼႆသေယဝ်ႉ။
တူဝ်ၶၼ်ႇထႃႇမၼ်းတၵ်းၶိုၼ်းၼုမ်ႇလိူဝ်သေ လုၵ်ႈဢွၼ်ႇလႄႈ ၶိုၼ်းမီးဢဵၼ်ႁႅင်းမိူၼ်ၼင်ႇမိူဝ်ႈဢၼ် ယင်းၼုမ်ႇယင်းၵမ်ၼၼ်ႉဢေႃႈ။
မိူဝ်ႈဢၼ်မၼ်းသူးတွင်းၼၼ်ႉၽြႃးပဵၼ်ၸဝ်ႈတၵ်းထွမ်ႇဢဝ်လႄႈ မၼ်းတၵ်းတေလႆႈႁဵတ်းဝၢတ်ႈတီႈၽြႃးပဵၼ်ၸဝ်ႈၸူမ်းၸူမ်းသိူဝ်းသိူဝ်းဢေႃႈ။ ၽြႃးပဵၼ်ၸဝ်ႈတၵ်းၶိုၼ်းတႅၼ်းပၼ်ဢၵျူဝ်းတၢင်းဢၼ်သိုဝ်ႈဢၼ်တေႃႇတီႈမၼ်းဢေႃႈ။
မၼ်းတၵ်းႁဵတ်းၵႂၢမ်းၽၢႆႇၼႃႈၵူၼ်းတင်းလၢႆ လႄႈဝႃႈ၊ ‘ၵဝ်ၽိတ်းပိူင်ႈယဝ်ႉ၊ၵဝ်ႁၼ်လွင်ႈဢၼ် ဢမ်ႇတြႃးၼၼ်ႉပဵၼ်လွင်ႈဢၼ် မၢၼ်ႇမႅၼ်ႈၼၼ်ႉပႅတ်ႈယဝ်ႉ၊ ၵူၺ်းၵႃႈ၊ၵဝ်ဢမ်ႇလႆႈၶၢမ်ႇဢပျတ်ႈဢၼ်ၵဝ် ထိူၵ်ႈၶၢမ်ႇၼၼ်ႉ။
မၼ်းၸဝ်ႈဢမ်ႇပွႆႇပႅတ်ႈၵဝ်ႁႂ်ႈလႆႈႁွတ်ႈၵႂႃႇ ၵႃႈတီႈမိူင်းမရၼႃႉလႄႈ ဢသၢၵ်ႈၵဝ်ယင်းတေထူပ်းႁၼ်ဢၼ်လႅင်း ယူႇဢေႃႈ၊’ ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈႁဵတ်းလွင်ႈၸိူဝ်းၼႆႉတီႈၵူၼ်း ပွၵ်ႈၼိုင်ႈယဝ်ႉပွၵ်ႈၼိုင်ႈဢေႃႈ။
ႁႂ်ႈလႆႈဢဝ်မၼ်းလွတ်ႈသေတၢင်းဢၼ်လူင်းၸူးၵႃႈတီႈမိူင်းမရၼႃႉလႄႈ ႁႂ်ႈမၼ်းလႆႈႁၼ်ဢၼ်လႅင်းဢသၢၵ်ႈဢေႃႈ။
ဢူဝ်း ယေႃးၽႃႉ၊ ႟။ ႁဵတ်းသတိထွမ်ႇငိၼ်း ၵႂၢမ်းၵဝ်ၶႃႈသေၵမ်း၊ ယူႇတဵတ်ႇတဵတ်ႇသေၵမ်း။ ၵဝ်ၶႃႈ တၵ်းလၢတ်ႈဢေႃႈ။
ၼႂ်းဝႃႈၼၼ်သေၵေႃႈပေႃးၸဝ်ႈမီးတီႈတၵ်းလၢတ်ႈၸိုင်၊ႁႂ်ႈလၢတ်ႈမႃးသေၵမ်း၊ ၵဝ်ၶႃႈတၵ်းၸွႆႈၵႄႈလိတ်ႈဢမုၸဝ်ႈလႄႈလၢတ်ႈၵႂၢမ်းပၼ်ဢေႃႈ။
ပေႃးဢမ်ႇမီးၵႂၢမ်းလၢတ်ႈၸိုင်၊ယူႇတဵတ်ႇတဵတ်ႇလႄႈထွမ်ႇၵဝ်ၶႃႈသေၵမ်း၊ ၵဝ်ၶႃႈတၵ်းသင်ႇသွၼ်ပၼ်ပိင်ႇၺႃႇ တီႈၸဝ်ႈဢေႃႈ၊” ဝႃႈၼင်ႇၼႆဢေႃႈ။
ဢေးလိႁု၊ သမ်ႉသိုပ်ႇလၢတ်ႈထႅင်ႈလႄႈဝႃႈၸမ်ႉ၊
“ၵူၼ်းဢၼ်မီးပိင်ႇၺႃႇၶဝ်႟။ ဢွၼ်ၵၼ်ထွမ်ႇငိၼ်းၵႂၢမ်းၵဝ်ၶႃႈသေၵမ်း၊ ၵူၼ်းဢၼ်မီးတၢင်းႁုတၢင်းႁၼ်ၼမ်ၶဝ်႟။ ႁေႈႁူထွမ်ႇၵဝ်ၶႃႈသေၵမ်း။
လွင်ႈမၼ်းၸမ်ႉ၊ႁူၸၢင်ႈၸႅတ်ႈတူၺ်းၵႂၢမ်း မိူၼ်ၸိူဝ်ႉၼင်ႇ၊ ဢၼ်သူပ်းၸၢင်ႈၸိမ်းတူၺ်းတၢင်းၵိၼ် တၢင်းၶူပ်းၼၼ်ႉဢေႃႈ။
ႁႂ်ႈႁဝ်းလိူၵ်ႈဢဝ်ဢၼ်လႂ်ထုၵ်ႇ၊ႁႂ်ႈႁဝ်း ဢွၼ်ၵၼ်ၸႅတ်ႈတူၺ်းလႄႈႁုဝႃႈ၊ ဢၼ်လႂ်လီၼၼ်ႉတႃႉႁဝ်း။
ယေႃးၽႃႉ၊ ယင်းလၢတ်ႈဝႃႈ၊ ‘ၵဝ်ၼႆႉ ၶၢဝ်ၸၢင်ႇဢေႃႈ။ ၵူၺ်းၵႃႈ၊ၽြႃးပဵၼ်ၸဝ်ႈပႄႇပႅတ်ႈတၢင်းသိုဝ်ႈတေႃႇၵဝ်ၼၼ်ႉယဝ်ႉ၊’ ဝႃႈၼႆလူင်ပႄႇ။
မၼ်းသမ်ႉလၢတ်ႈလႄႈဝႃႈ၊ ‘ပိၵ်ႉသမ်ႉ ၵဝ်သိုဝ်ႈတေႃႇသေၵေႃႈ၊ လႆႈၶၢမ်ႇတၢင်းဢၼ်ၼပ်ႉဢၢၼ်ႇ ပဵၼ်ၵူၼ်းမုသႃႇ။ ပိၵ်ႉသမ်ႉၵဝ်ဢမ်ႇမီးဢပျတ်ႈသေၵေႃႈ၊ ၵဝ်ၸပ်းတၢင်းၶႆႈတၢင်းပဵၼ်ဢၼ်ဢမ်ႇႁၢႆလႆႈ ၼၼ်ႉယဝ်ႉ၊’ ဝႃႈၼင်ႇၼႆလူးၵွၼ်ႇဢေႃႈ။
ၵူၼ်းဢၼ်မိူၼ်ၵၼ်တင်း ယေႃးၽႃႉ၊ ၼႆႉ တၵ်းမီးသေၵေႃႉသေၵူၼ်းႁိုဝ်း။ မၼ်းၸၢင်ႈဢိုၼ်ၵိၼ်တၢင်းဢၼ်သႄႉသွမ်းမိူၼ်ၸိူဝ်ႉၼင်ႇဢၼ်ၵိၼ်ၼမ်ႉၼၼ်ႉဢေႃႈ။
မၼ်းၸၢင်ႈႁူမ်ႈပွင်းလူၺ်ႈၵၼ်တင်းၵူၼ်းဢၼ်ဢမ်ႇတြႃးတင်းလၢႆလႄႈ ၵႂႃႇမႃးလူၺ်ႈၵၼ်တင်းၵူၼ်းႁၢႆႉၵူၼ်းမိူၵ်ႈ တင်းလၢႆဢေႃႈ။
လွင်ႈမၼ်းၸမ်ႉ၊မၼ်းလၢတ်ႈဝႃႈ၊ ‘တၢင်းဢၼ်ၵူၼ်း မူၼ်ႈပျေႃႇၼႂ်းၽြႃးပဵၼ်ၸဝ်ႈၼၼ်ႉ ဢမ်ႇမီးဢၵျူဝ်း၊’ ဝႃႈၼင်ႇၼႆဢေႃႈ။
ပိူဝ်ႈၼႆလႄႈၵူၼ်းၺၢၼ်ႇလီၶဝ်႟။ ထွမ်ႇၵဝ်ၶႃႈသေၵမ်း၊ ၽြႃးပဵၼ်ၸဝ်ႈႁဵတ်းတၢင်းႁၢႆႉဢၼ်ဝႃႈၼၼ်ႉ ဢမ်ႇပဵၼ်လႆႈ၊ ၸဝ်ႈဢၼၼ်ႇတႃႉတၼ်းၶူဝ်းႁဵတ်းတၢင်းၽိတ်းဢၼ်ဝႃႈၼၼ်ႉဢမ်ႇပဵၼ်လႆႈ။
မၼ်းၸဝ်ႈတွပ်ႇတႅၼ်းပၼ်ၸွမ်းၵႃႈၼင်ႇဢၼ်ၵူၼ်းႁဵတ်းၼၼ်ႉဢေႃႈ။ မၼ်းၸဝ်ႈႁႂ်ႈၵူၼ်းၵူႈၵေႃႉၶၢမ်ႇဢဝ်ၸွမ်း ၵႃႈၼင်ႇဢၼ်ထိူၵ်ႈတၢၼ်ႇၵၼ် တင်းဢၼ်ၶဝ်ႁဵတ်းၼၼ်ႉဢေႃႈ။
ၸႂ်ႈတႄႉတႄႉဢေႃႈ။ ၽြႃးပဵၼ်ၸဝ်ႈ ဢမ်ႇႁဵတ်းတုၸရိူၵ်ႈ၊ ၸဝ်ႈဢၼၼ်ႇတႃႉတၼ်းၶူဝ်းဢမ်ႇၸီႇယၢင်ႇၸွမ်းၼင်ႇဢၼ်ဢမ်ႇတြႃး။
ၽူႈလႂ်ပဵၼ်ၵေႃႉဢၼ်ပၼ်တၼ်းၶူဝ်း ၽြႃးပဵၼ်ၸဝ်ႈ၊ ၽူႈလႂ်ပဵၼ်ၵေႃႉဢၼ်ၶၢၼ်းပၼ်ႁႂ်ႈမၼ်းၸဝ်ႈဢုပ်ႉထိင်းလေႃးၵထၢတ်ႈ။
ပေႃးၽြႃးပဵၼ်ၸဝ်ႈသိမ်းဢဝ်ဢသၢၵ်ႈ ဝိၺိၺ်ႇၸိုင်၊
ၵူၼ်းသတ်ႉတဝႃႇတင်းသဵင်ႈတင်းလူင် တၵ်းဢွၼ်ၵၼ်တၢႆလႄႈ တၵ်းဢွၼ်ၵၼ်ၶိုၼ်းပဵၼ်မုၼ်ႈလိၼ်ဢေႃႈ။
မိူဝ်ႈလဵဝ်ၼႆႉပေႃးၸဝ်ႈမီးၺၢၼ်ႇၸိုင်၊ ထွမ်ႇငိၼ်းဢဝ်တႃႉ။
ၵေႃႉဢၼ်ၸင်းတြႃးဢၼ်သိုဝ်ႈတေႃႇၼၼ်ႉၸၢင်ႈလႆႈဢုပ်ႉလႆႈပိူင်ႇႁိုဝ်း၊ ၸဝ်ႈတၵ်းတၢင်ႇဢပျတ်ႈတီႈၽြႃးဢၼ်သိုဝ်ႈတေႃႇလႄႈမီးတၼ်းၶူဝ်းၼၼ်ႉႁိုဝ်း။
မၼ်းၸဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊ ‘မႂ်းၼႆႉ ဢမ်ႇပွင်ႇလွင်ႈၵႃႈသင်၊’ ဢိၵ်ႇတင်းလၢတ်ႈတီႈမူးမၢတ်ႈၽွင်းမိူင်းလႄႈဝႃႈ၊ ‘သူၼႆႉပဵၼ်ၵူၼ်းဢထမ်ႇမႃႉဢေႃႈ၊’ ဝႃႈၼင်ႇၼႆၼၼ်ႉ။
မၼ်းၸဝ်ႈၼၼ်ႉဢမ်ႇထွၵ်ႈလူၺ်ႈၼႃႈၶုၼ်လႄႈ ဢမ်ႇယူႇၽၢႆႇၵေႃႉဢၼ်မၢၵ်ႈမီးၼၼ်ႉလိူဝ်တွၼ်းၼႃႇသေၵေႃႉဢၼ်ယၢၵ်ႈဢၼ်ၽၢၼ်ၼၼ်ႉ၊ လွင်ႈမၼ်းၸမ်ႉ၊မၼ်းၸဝ်ႈၽၢၼ်ႇသၢင်းႁဵတ်းပဵၼ်ၶဝ်ၵူႈၵေႃႉၵူႈၵူၼ်းဢေႃႈ။
ၼႂ်းၵႅပ်ႉၼိုင်ႈၵမ်းၼိုင်ႈၵူၺ်းၶဝ်ၸၢင်ႈဢွၼ်ၵၼ်တၢႆၵႂႃႇၼႂ်းၶိင်ႇတဵင်ႈၶိုၼ်းဢေႃႈ။ ၵူၼ်းတင်းလၢႆမီးတၢင်းဢၼ်တူဝ်သၼ်ႇသေတၢႆၵႂႃႇလႄႈ ၶဝ်ၸိူဝ်းဢၼ်ႁႅင်းယႂ်ႇၼႃႇၼၼ်ႉၵေႃႈၶၢမ်ႇတၢင်းဢၼ်ဢဝ်ၵႂႃႇလူၺ်ႈမိုဝ်းဢၼ်ဢမ်ႇၸႂ်ႈ မိုဝ်းၵူၼ်းၼၼ်ႉဢေႃႈ။
မၼ်းၸဝ်ႈလူတူၺ်းသဵၼ်ႈတၢင်းဢၼ် ၵူၼ်းၵႂႃႇၸိူဝ်းၼၼ်ႉလႄႈ လူတူၺ်းယၢင်ႈတိၼ်ၵူၼ်းႁဝ်းၵူႈယၢင်ႈ ၵူႈယၢင်ႈဢေႃႈ။
တီႈဢၼ်လပ်းသိင်ႇၽိတ်းၽိတ်းဢၼ် ၵူၼ်းမီးဢပျတ်ႈ၊ တၵ်းပၢႆႈတဵတ်ႇပၢႆႈမႅပ်းၼၼ်ႉဢမ်ႇမီးလႃးလႃး။
ၽြႃးပဵၼ်ၸဝ်ႈဢမ်ႇလူဝ်ႇမၵ်းၶၢၼ်းဢၶိင်ႇ ပုၼ်ႈတႃႇၵူၼ်း၊ တေလႆႈၵႂႃႇၶၢမ်ႇဢဝ်တၢင်းဢၼ်မၼ်းၸဝ်ႈ ၸီႇယၢင်ႇတြႃးၼၼ်ႉ။
မၼ်းၸဝ်ႈဢမ်ႇလူဝ်ႇသွၵ်ႈႁႃၸႅတ်ႈထၢမ်လႄႈ ၶျႃးၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆ တူၵ်းပႅတ်ႈလႄႈ သမ်ႉၶၢၼ်းတၢင်ႇၵေႃႉတၢင်ႇၵူၼ်း တၢင်တူဝ်ၶဝ်ၼၼ်ႉ။
လွင်ႈမၼ်းၸမ်ႉ၊မၼ်းၸဝ်ႈႁုလွင်ႈတၢင်းႁဵတ်း ၶဝ်ၼၼ်ႉယူႇလႄႈ ဢဝ်ၶဝ်ၶွမ်ႈပိၼ်ႈပႅတ်ႈမိူဝ်ႈၶိင်ႇၵၢင်ၶိုၼ်းၼၼ်ႉထၢၼ်ႈပေႃးလုလႅဝ်ၵႂႃႇဢေႃႈ။
မၼ်းၸဝ်ႈၸီႇယၢင်ႇၵူၼ်းဢၼ်မီး ဢပျတ်ႈၸိူဝ်းၼၼ်ႉ၊ ၽၢႆႇၼႃႈၵူၼ်းတင်းလၢႆထၢင်ႇထၢင်ႇသႃးသႃး။
ၵွပ်ႈပိူဝ်ႈဢၼ်ၶဝ်ဝႄႈပိူင်ႈသေတၢင်းဢၼ် ၸွမ်းလင်မၼ်းၸဝ်ႈ၊ ဢိၵ်ႇတင်းၶဝ်ပႄႇပႅတ်ႈပိင်းၺၢပ်ႈတြႃး မၼ်းၸဝ်ႈမူတ်းမူတ်းၼၼ်ႉဢေႃႈ။
ၵွပ်ႈပိူဝ်ႈဢၼ်ႁဵတ်းၸိူဝ်ႉၼင်ႇၼၼ်လႄႈသဵင်ၶဝ် ၸိူဝ်းဢၼ်ႁႅင်းလဵၵ်ႉႁႅင်းဢူၼ်ႈႁွင်ႉႁႆႈၼၼ်ႉ ၶိုၼ်ႈၸူးထိုင်တီႈမၼ်းၸဝ်ႈလႄႈမၼ်းၸဝ်ႈလႆႈငိၼ်း သဵင်ၶဝ်ၸိူဝ်းဢၼ်လႆႈၶၢမ်ႇတၢင်းဢၼ် ၼိၵ်ႈၸၢၵ်ႈငႅၼ်းသႄးၼၼ်ႉႁွင်ႉႁႆႈၼၼ်ႉဢေႃႈ။
ပေႃးမၼ်းၸဝ်ႈယူႇတဵတ်ႇတဵတ်ႇၸိုင်၊ၽူႈလႂ် တၵ်းၸီႇယၢင်ႇဢပျတ်ႈတီႈမၼ်းၸဝ်ႈ၊ ပေႃးမၼ်းၸဝ်ႈသိူင်ႇၼႃႈမၼ်းၸဝ်ႈဝႆႉၸိုင်၊ ၽူႈလႂ်တေႁၼ်မၼ်းၸဝ်ႈလႆႈ၊ ဢမ်ႇဝႃႈတေပဵၼ်ၵူၼ်းတင်းမိူင်းဢမ်ႇၼၼ် ၵူၼ်းၵေႃႉလဵဝ်။
ပုၼ်ႈလွင်ႈၼင်ႇႁိုဝ်ၵူၼ်းဢၼ်ဢမ်ႇတြႃးၶဝ်တေဢမ်ႇလႆႈဢုပ်ႉပိူင်ႇၸၢမ်ႇၸႃးၼၼ်ႉ၊ ဢိၵ်ႇတင်းၶဝ်တေဢမ်ႇလႆႈႁႂ်ႈၽူႈလႂ်တူၵ်းၵႃႈၼႂ်းတူင်ႇႁႅဝ်ႉတူင်ႇၶိုမ်းၶဝ်ၼၼ်ႉဢေႃႈ။
ထုၵ်ႇလီလဝ်ႈလၢတ်ႈတီႈၽြႃးပဵၼ်ၸဝ်ႈလႄႈဝႃႈ၊ ‘ၶႃႈၸဝ်ႈၼႆႉလႆႈၶၢမ်ႇတၢင်းဢၼ်ၸဝ်ႈႁဝ်းသင်ႇသွၼ်သုင်းမႃႉတီႈၶႃႈယဝ်ႉ၊ ၵမ်းလိုၼ်းၶႃႈၸဝ်ႈတၵ်းဢမ်ႇႁဵတ်းၽိတ်းႁဵတ်းပိူင်ႈတီႈၶႃႈယဝ်ႉ။
ၶႅၼ်းတေႃႈသင်ႇသွၼ်ပၼ်လွင်ႈတၢင်းဢၼ်ၶႃႈၸဝ်ႈဢမ်ႇႁုဢမ်ႇႁၼ်ၼၼ်ႉသေၵမ်းတီႈၶႃႈ၊ ပေႃးၶႃႈၸဝ်ႈလႆႈႁဵတ်းတုၸရိူၵ်ႈမႅၼ်ႈၸိုင်၊ ၵမ်းလိုၼ်းယင်းဢမ်ႇႁဵတ်းထႅင်ႈတီႈၶႃႈယဝ်ႉ၊’ ထုၵ်ႇလီဝႃႈၸိူဝ်ႉၼင်ႇၼႆဢမ်ႇၸႂ်ႈႁိုဝ်း။
တၢင်းဢၼ်ၽြႃးပဵၼ်ၸဝ်ႈၸီႇယၢင်ႇၼၼ်ႉတၵ်းလႆႈပဵၼ်ၸွမ်းဢလူဝ်ႇၸဝ်ႈၵူၺ်းၵူၺ်းႁိုဝ်း၊ မၼ်းၸဝ်ႈပၼ်တၢမ်ႇဢပျတ်ႈလႄႈ ၸဝ်ႈထဵင်ပႅတ်ႈႁိုဝ်း။ တႃႇတေတႅပ်းတတ်းၸိုင်၊ပဵၼ်ၵဝ်ၶႃႈဢမ်ႇၸႂ်ႈ၊ ပဵၼ်ၸဝ်ႈၵူၺ်းဢေႃႈ။ ပိူဝ်ႈၼႆလႄႈၸဝ်ႈႁၼ်ထိုင်ၸိူဝ်ႉႁိုဝ်ၵေႃႈ လၢတ်ႈတီႈႁဝ်းသေၵမ်း။
ၶဝ်ၸိူဝ်းဢၼ်ၺၢၼ်ႇလီၼၼ်ႉတၵ်းၽွမ်ႉၽၢႆႇ ၵဝ်ၶႃႈလႄႈ ၵေႃႉဢၼ်မီးပိင်ႇၺႃႇဢၼ်လႆႈငိၼ်းၵႂၢမ်း ၵဝ်ၶႃႈၼၼ်ႉတၵ်းလၢတ်ႈဝႃႈ၊
‘ ယေႃးၽႃႉ၊ ၼႆႉယင်းဢမ်ႇႁုလႄႈ လၢတ်ႈမႅၼ်ႈယဝ်ႉ၊ ၵႂၢမ်းမၼ်းၸိူဝ်းၼၼ်ႉဢမ်ႇၸႂ်ႈပိင်ႇၺႃႇၵူၺ်း၊’ ဝႃႈၼင်ႇၼႆဢေႃႈ။
ၵဝ်ၶႃႈမီးဢလူဝ်ႇၶႂ်ႈႁႂ်ႈ ယေႃးၽႃႉ၊ ၶၢမ်ႇတၢင်းဢၼ်ၸၢမ်းတူၺ်းတေႃႇထိုင်ႁွတ်ႈ တီႈသုတ်းတီႈၵွႆ၊ ၵွပ်ႈပိူဝ်ႈဢၼ်မၼ်းၸၢင်ႈၶိုၼ်းလၢတ်ႈမိူၼ်ၸိူဝ်ႉၼင်ႇၶဝ်ၸိူဝ်းဢၼ်ဢမ်ႇတြႃးၼၼ်ႉဢေႃႈ။
မၼ်းဢဝ်ဢပျတ်ႈတၢင်းဢၼ်လုၵ်ႉၽိုၼ်ႉၼၼ်ႉ၊ ထၢပ်ႈသႂ်ႇထႅင်ႈၵႃႈၼိူဝ် တုၸရိူၵ်ႈတူဝ်ၸဝ်ႈၵဝ်ႇဢေႃႈ။ ၵႃႈတီႈၽၢႆႇၼႃႈႁဝ်းၼၼ်ႉ ပဵၼ်တၢင်းဢၼ်မၼ်းလၢတ်ႈသႄႉသွမ်း၊ ၽြႃးပဵၼ်ၸဝ်ႈလွၼ်ႉလွၼ်ႉဢေႃႈ၊” ဝႃႈၼင်ႇၼႆဢေႃႈ။
ဢေးလိႁု၊ သိုပ်ႇလၢတ်ႈထႅင်ႈလႄႈဝႃႈၸမ်ႉ၊
“ ယေႃးၽႃႉ၊ ႟။ တၢင်းဢၼ်ၸဝ်ႈထၢင်ႇၵႂၢမ်းဢၼ်ၸဝ်ႈလၢတ်ႈဝႃႈ၊ ‘ၵဝ်ယဵင်ႈၶႅၼ်းသိုဝ်ႈတေႃႇၼႃႇသေၽြႃးပဵၼ်ၸဝ်ႈ၊’ ဝႃႈၼႆၼၼ်ႉၸိုဝ်ႈၸႂ်ႈတႄႉႁိုဝ်း။
ၸဝ်ႈယင်းလဝ်ႈထၢမ်ၽြႃးပဵၼ်ၸဝ်ႈလႄႈဝႃႈ၊ ‘တေမီးဢၵျူဝ်းၸိူဝ်ႉႁိုဝ်ပုၼ်ႈၶႃႈၸဝ်ႈ၊ၶႃႈၸဝ်ႈဢမ်ႇႁဵတ်းတုၸရိူၵ်ႈဢပျတ်ႈလႄႈသမ်ႉလႆႈဢၵျူဝ်းၵႃႈသင်၊’ ဝႃႈၼင်ႇၼႆဢေႃႈ။
ၵဝ်ၶႃႈတၵ်းတွပ်ႇလၢတ်ႈၵႂၢမ်းၸဝ်ႈဢိၵ်ႇတင်း ၵေႃႉသႄႈၸဝ်ႈၸိူဝ်းၼၼ်ႉဢေႃႈ။
ႁႅၼ်တူၺ်းၽႃႉၵၢင်ႁၢဝ်သေၵမ်း၊ မွၵ်ႇၵုမ်ႈၸိူဝ်းၼၼ်ႉသုင်ၼႃႇလူင်လၢင်သေၸဝ်ႈဢေႃႈ။
ပေႃးၸဝ်ႈႁဵတ်းတုၸရိူၵ်ႈၸိုင်၊တၵ်းတိူဝ်ႉထုၵ်ႇၽြႃးပဵၼ်ၸဝ်ႈဢမ်ႇၸႂ်ႈ၊ ၸဝ်ႈႁဵတ်းၽိတ်းလၢႆပွၵ်ႈလၢႆၵမ်းသေၵေႃႈ၊ တၵ်းတိူဝ်ႉမႅၼ်ႈမၼ်းၸဝ်ႈၸိူဝ်ႉၼင်ႇႁိုဝ်လႆႈ။
ပေႃးၸဝ်ႈပဵၼ်ၵူၼ်းသိုဝ်ႈတေႃႇၸိုင်၊ၸဝ်ႈသမ်ႉပၼ်ဢၵျူဝ်းၵႃႈသင်တီႈမၼ်းၸဝ်ႈ၊ မၼ်းၸဝ်ႈလႆႈႁပ်ႉဢဝ်ဢီႈသင်ၵႃႈၼႂ်းမိုဝ်းၸဝ်ႈ။
တုၸရိူၵ်ႈဢၼ်ၸဝ်ႈႁဵတ်းၼၼ်ႉၵေႃႈ ပဵၼ်ၽေးဢၼ်ႇတရေႇတီႈၵူၼ်းဢၼ်မိူၼ်ၸိူဝ်ႉၼင်ႇၸဝ်ႈၼႆႉဢေႃႈ၊ တၢင်းသိုဝ်ႈတေႃႇၸဝ်ႈၼၼ်ႉ၊ပဵၼ်ဢၵျူဝ်းပုၼ်ႈၵူၼ်းတင်းလၢႆဢေႃႈ။
ၵွပ်ႈပိူဝ်ႈတၢင်းဢၼ်ၼိၵ်ႈၸၢၵ်ႈငႅၼ်းသႄးၼမ်ၼႃႇလူင်လၢင်ၼၼ်ႉလႄႈၶဝ်ၸင်ႇ ဢွၼ်ၵၼ်ႁွင်ႉသႅၼ်ႇဢေႃႈ။ ၵွပ်ႈပိူဝ်ႈၶႅၼ်မိုဝ်းၵူၼ်းၸိူဝ်းဢၼ် ႁႅင်းယႂ်ႇၼၼ်ႉလႄႈ ၶဝ်ၸင်ႇဢွၼ်ၵၼ်ႁွင်ႉသႅၼ်ႇယွၼ်းတၢင်းဢၼ် ၸွႆႈထႅမ်မႃႉၸႃႉဢေႃႈ။
ၵူၺ်းၵႃႈ၊ၶဝ်ဢမ်ႇတွၼ်ႉထၢမ်ႁႃၽြႃးပဵၼ်ၸဝ်ႈ၊ ၸဝ်ႈဢၼ်ၽၢၼ်ႇသၢင်းႁဵတ်းပဵၼ် ၶဝ်ၼၼ်ႉ၊မၼ်းၸဝ်ႈၼၼ်ႉပဵၼ်တီႈၶဝ်လီမုင်ႈမွင်း ၼႂ်းၶိင်ႇၼႃႇရီႇဢၼ်လပ်းသိင်ႇ မိုတ်ႈၼႃႇၼၼ်ႉဢေႃႈ။
ၽြႃးပဵၼ်ၸဝ်ႈသွၼ်ပၼ်ႁဝ်းၼမ်သေသွၼ်ပၼ်သတ်းလႄႈႁႂ်ႈႁဝ်းမီးပိင်ႇၺႃႇလိူဝ်သေ တူဝ်သတ်းၵႃႈၼိူဝ်လိၼ်မိူင်းလႄႈၼူၵ်ႉဢၼ်မိၼ်ၵႃႈၼိူဝ်ၽႃႉၵၢင်ႁၢဝ်ၼၼ်ႉဢေႃႈ။
ၶဝ်ႁွင်ႉႁႃတၢင်းဢၼ်မႃႉၸႃႉၸွႆႈထႅမ်သေၵေႃႈၽြႃးပဵၼ်ၸဝ်ႈဢမ်ႇဢိူဝ်ၶဝ်၊ ၵွပ်ႈပိူဝ်ႈၶဝ်မႃႇၼႃႉၸႂ်ၽႅၼ်သုင်၊ပဵၼ် ၵူၼ်းဢထမ်ႇမႃႉၼၼ်ႉဢေႃႈ။
ၽြႃးပဵၼ်ၸဝ်ႈဢမ်ႇထွမ်ႇဢမ်ႇဢဝ်ၵႂၢမ်းဢၼ်လၢႆလၢႆဢမ်ႇပွင်ႇလွင်ႈၵႃႈသင်ၼၼ်ႉဢမၢၼ်ႇၶၼ်ပဵၼ်ဢေႃႈ။ ၸဝ်ႈဢၼၼ်ႇတႃႉတၼ်းၶူဝ်းယင်းဢမ်ႇမၢတ်ႈဢမ်ႇတွင်းၵႂၢမ်းၸိူဝ်ႉၼင်ႇၼၼ်ဢေႃႈ။
လိူဝ်သေၼၼ်ႉဢမ်ႇၵႃး၊ယဵင်ႈၶႅၼ်း တၵ်းဢမ်ႇမၢတ်ႈဢမ်ႇတွင်း မိူဝ်ႈဢၼ်ၸဝ်ႈလၢတ်ႈလႄႈဝႃႈ၊ ၵဝ်ၼႆႉဢမ်ႇလႆႈထူပ်းလႆႈႁၼ်မၼ်းၸဝ်ႈ၊ဢမုမီးၵႃႈတီႈၽၢႆႇၼႃႈမၼ်းၸဝ်ႈလႄႈၵဝ်လႆႈမုင်ႈမွင်းမၼ်းၸဝ်ႈယူႇလူင်ပႄႇ။
မိူဝ်ႈလဵဝ်ၼႆႉၵွပ်ႈပိူဝ်ႈတၢင်းၸႂ်မႆႈၶႂ်ႈၸႃႉမၼ်းၸဝ်ႈဢမ်ႇပၼ်တၢမ်ႇ၊ ဢမ်ႇပေႃးမၢတ်ႈပေႃးတွင်းဢပျတ်ႈ ၵႃႈႁိုဝ်လႄႈ၊
ယေႃးၽႃႉ၊ ၸၢင်ႈလၢတ်ႈဝႃႈၵႂၢမ်းပဝ်ႇၵႂၢမ်းလၢႆ၊ မၼ်းယင်းဢမ်ႇမီးတၢင်းႁုလႄႈ လၢတ်ႈၵႂၢမ်းၼမ်ၼႃႇလူင်လၢင်ဢေႃႈ၊” ဝႃႈၼင်ႇၼႆဢေႃႈ။
ဢေးလိႁု၊ သမ်ႉသိုပ်ႇလၢတ်ႈၵႂၢမ်းထႅင်ႈ လႄႈဝႃႈၸမ်ႉ၊
“ယိူၼ်ႉၶၢမ်ႇၵဝ်ၶႃႈဢိတ်းၼိုင်ႈသေၵမ်း၊ ၵဝ်ၶႃႈတၵ်းၼႄပျႃးလွင်ႈမၼ်းတၢင်းမၼ်းတီႈၸဝ်ႈထႅင်ႈလူးၵွၼ်ႇဢေႃႈ။ ၵဝ်ၶႃႈယင်းမီးထႅင်ႈလွင်ႈဢၼ်တၵ်းတၢင်တူဝ် ၽြႃးပဵၼ်ၸဝ်ႈလႄႈလၢတ်ႈၼၼ်ႉဢေႃႈ။
ၵဝ်ၶႃႈတၵ်းဢဝ်ပိင်ႇၺႃႇၵဝ်ၶႃႈသေၵႃႈတီႈ ဢၼ်ၵႆၼၼ်ႉမႃးလႄႈ ၵႃႈၼင်ႇဢၼ်ၵဝ်ၶႃႈႁုၼၼ်ႉၵဝ်ၶႃႈ တၵ်းၽုၺ်ႇဢွၵ်ႇၼႄပျႃး၊ တၢင်းဢၼ်ၽြႃးပဵၼ်ၸဝ်ႈ၊ၸဝ်ႈဢၼ် သိုဝ်ႈတေႃႇၼၼ်ႉၽၢၼ်ႇသၢင်း ႁဵတ်းပဵၼ်ၵဝ်ၼၼ်ႉဢေႃႈ။
ၵႂၢမ်းၵဝ်ၶႃႈပဵၼ်ဢၼ်မၢၼ်ႇမႅၼ်ႈၸိုဝ်ႈၸႂ်ႈ ဢမၢၼ်ႇၶၼ်ပဵၼ်၊ ၵေႃႉဢၼ်ၸေးၸုမ်ႇဝႆႉတင်းဢတၢတ်ႈပိင်ႇၺႃႇၼၼ်ႉမီးယူႇၵႃႈတီႈႁိမ်းၸဝ်ႈဢေႃႈ။
ၽြႃးပဵၼ်ၸဝ်ႈတၼ်းၶူဝ်းယႂ်ႇဢေႃႈ။ ၼႂ်းဝႃႈၼၼ်သေၵေႃႈ၊ မၼ်းၸဝ်ႈဢမ်ႇႁဵတ်းဢမ်ႇပေႃးၼင်ႇႁိုဝ် တီႈၽူႈလႂ်၊ လွင်ႈတၢင်းဢၼ်မၼ်းၸဝ်ႈဢမ်ႇႁုၼၼ်ႉ ဢမ်ႇမီးသေၸိူဝ်ႉသေပိူင်။
မၼ်းၸဝ်ႈဢမ်ႇႁႂ်ႈၵူၼ်းဢၼ်ဢမ်ႇတြႃးၼၼ်ႉ ဢသၢၵ်ႈလိပ်းယူႇ၊ မၼ်းၸဝ်ႈတႅပ်းတတ်းတြႃးၽဵင်ႇၽဵင်ႇ ၽၢႆႇၶဝ်ၸိူဝ်းဢၼ်လႆႈၶၢမ်ႇ တုၵ်ႉၶႃႉတၢင်းၽၢၼ်ၼၼ်ႉဢေႃႈ။
မၼ်းၸဝ်ႈၵႅတ်ႇၶႄႁႄႉၵင်ႈၶဝ်ၸိူဝ်းဢၼ် သိုဝ်ႈတေႃႇလႄႈ ပၼ်ဢၶႂၢင်ႉႁႂ်ႈၶဝ်လႆႈဢုပ်ႉပိူင်ႇ မိူၼ်ၸိူဝ်ႉၼင်ႇၶုၼ်ႁေႃၶမ်း၊ ဢိၵ်ႇတင်းႁႂ်ႈၶဝ်လႆႈၶၢမ်ႇဢဝ်တၢင်းဢၼ် ယုၵ်ႉယွင်ႈဢေႃႈ။
ၵူၺ်းၵႃႈ၊ပေႃးၶဝ်လႆႈၶၢမ်ႇတၢင်းဢၼ်ဢဝ် ၸိူၵ်ႈလဵၵ်းမတ်ႉၽုၵ်ႇလႄႈ လႆႈၶၢမ်ႇဝူၺ်ႇတၼႃႇလူၺ်ႈတၢင်းၽိတ်းၶဝ် ယူႇၼၼ်ႉၸိုင်။
ၽြႃးပဵၼ်ၸဝ်ႈၼႄပျႃးဢပျတ်ႈၶဝ်၊ ဢိၵ်ႇတင်းၼႄပျႃး တၢင်းဢၼ်ၶဝ်မီးမႃႇၼႃႉၸႂ်သုင်ၼၼ်ႉ တီႈၶဝ်ဢေႃႈ။
မၼ်းၸဝ်ႈႁဵတ်းႁႂ်ႈၶဝ်ၸၢင်ႈထွမ်ႇၸၢင်ႈငိၼ်းၵႂၢမ်းဢၼ်သင်ႇသွၼ်သုင်းမႃႉၼၼ်ႉလႄႈ ပိင်းၺၢပ်ႈႁႂ်ႈၶဝ်ၸုၼ်ႉပႅတ်ႈတုၸရိူၵ်ႈဢေႃႈ။
ပေႃးၶဝ်ထွမ်ႇဢဝ်ၵႂၢမ်းမၼ်းၸဝ်ႈလႄႈၵိုတ်ႉႁၢပ်ႇၼႃႈၵၢၼ်မၼ်းၸဝ်ႈၸိုင်၊ ဝၼ်းလိူၼ်ပီၶဝ်တၵ်းလႆႈလီလႆႈပဵၼ်လႄႈယူႇၼိမ်ၼိမ်လီလီတေႃႇၸူဝ်ႈဢသၢၵ်ႈဢေႃႈ။
ပေႃးၶဝ်ဢမ်ႇထွမ်ႇဢမ်ႇဢဝ်ၸိုင်၊ ၶဝ်တၵ်းဢွၼ်ၵၼ်သုမ်းၸွမ်းလူၺ်ႈ ၽေးလၢပ်ႇၽေးလႅဝ်းလႄႈ ယင်းဢမ်ႇမီးဢတၢတ်ႈပိင်ႇၺႃႇလႄႈ တၢႆၵႂႃႇဢေႃႈ။
ၶဝ်ၸိူဝ်းဢၼ်မီးသၽေႃးဢၼ်ဢမ်ႇၵူဝ်ယမ် ၽြႃးပဵၼ်ၸဝ်ႈၼၼ်ႉ၊ၸၢင်ႈသိမ်းဝႆႉတၢင်း ၸႂ်မႆႈၶႂ်ႈၸႃႉၸဝ်ႈလႄႈ ပိၵ်ႉသမ်ႉလႆႈၶၢမ်ႇတၢမ်ႇဢပျတ်ႈသေၵေႃႈ၊ ၶဝ်ယင်းဢမ်ႇၸၢင်ႈသူးတွင်းပုၼ်ႈ တၢင်းမႃႉၸႃႉၸွႆႈထႅမ်ဢေႃႈ။
ၶဝ်ၼၼ်ႉၸၢင်ႈလႆႈတၢႆမိူဝ်ႈဢၼ်ဢသၢၵ်ႈၶဝ်ယင်းလဵၵ်ႉယင်းၼုမ်ႇလႄႈ ဢသၢၵ်ႈၶဝ်ၸၢင်ႈသုတ်းသဵင်ႈၵႂႃႇ ၼႂ်းတၢင်းဢၼ်ဢူၵ်းဢၢႆဢေႃႈ။
ၵူၺ်းၵႃႈ၊ၽြႃးပဵၼ်ၸဝ်ႈၸၢင်ႈဢဝ်တင်းတုၵ်ႉၶႃႉဝူၺ်ႇတၼႃႇၵႄႇသႄႇဢဝ်ၶဝ်၊ ဢဝ်တင်းၽေးတုၵ်ႉၶႃႉတၢင်းၽၢၼ် ၽုၺ်ႇႁူၽုၺ်ႇတႃၶဝ်ဢေႃႈ။
ၼင်ႇၼၼ်လႄႈၽြႃးပဵၼ်ၸဝ်ႈၸူဝ်းဢဝ်ၸဝ်ႈ ဢွၵ်ႇသေၵႃႈတီႈဢၼ်တုၵ်ႉၶႃႉ ၶၢၼ်ၸႂ်ၼၼ်ႉ၊ ၶဝ်ႈၸူးတီႈဢၼ်ပၢင်ႇလီၵႂၢင်ႈလီတီႈဢၼ်ဢမ်ႇမီးတၢင်းဢၼ်ၵိတ်ႇဢၼ်ၵိၼ်းၼၼ်ႉလႄႈ ႁႂ်ႈၽိူၼ်ၶဝ်ႈၸဝ်ႈတဵမ်ဝႆႉတင်းတၢင်းၵိၼ်တၢင်းၶူပ်းဢၼ်မီးဢရႃႉသႃႇၼၼ်ႉဢေႃႈ။
ၵူၺ်းၵႃႈ၊ၸဝ်ႈလႆႈၶၢမ်ႇတၢင်းဢၼ် ၸီႇယၢင်ႇဢပျတ်ႈ၊ ၸွမ်းၵႃႈၼင်ႇဢၼ်ၸဝ်ႈ ထိူၵ်ႈလႆႈၶၢမ်ႇၼၼ်ႉဢေႃႈ။
ၵူၺ်းၵႃႈ၊ၵူဝ်တၢင်းၸႂ်မႆႈၶႂ်ႈၸႃႉမၼ်းၸဝ်ႈၼၼ်ႉ၊တၵ်းတိုၵ်းယူင်းၸူဝ်းဢဝ်ၸဝ်ႈႁႂ်ႈၸဝ်ႈလႆႈႁဵတ်းၶတ်းတီႈ၊ တၢင်းဢၼ်မၼ်းၸဝ်ႈပၼ်တၢမ်ႇၼၼ်ႉလႄႈဢမုႁွတ်ႈထိုင်သေယဝ်ႉ၊ ပိၵ်ႉသမ်ႉပၼ်ၵႃႈၶၼ်ၼမ်ၼႃႇလူင်လၢင်သေၵေႃႈ၊ဢမ်ႇထုတ်ႇဢမ်ႇၼုၵ်ႈဢဝ်တူဝ်ၸဝ်ႈၵဝ်ႇလႆႈၵူၺ်း။
သဵင်ႁွင်ႉသဵင်သႅၼ်ႇၼၼ်ႉတၵ်းၸွႆႈႁႂ်ႈၸဝ်ႈ လွတ်ႈတၢင်းတုၵ်ႉၶႃႉလႆႈႁိုဝ်း၊ ႁႅင်းတၼ်းၶူဝ်းၸဝ်ႈၵေႃႈတၵ်းၸွႆႈ တၵ်းထႅမ်ၸဝ်ႈလႆႈႁိုဝ်း။
ယႃႇပေမွင်းထႃႈၶိင်ႇၵၢင်ၶိုၼ်းၶိင်ႇဢၼ် ၵူၼ်းတင်းလၢႆ၊ လႆႈၶၢမ်ႇတၢင်းဢၼ်ယႃႉၽဵဝ်ႈပႅတ်ႈသေၵႃႈတီႈ တီႈယူႇၶဝ်ၼၼ်ႉ။
ႁဵတ်းသတိသေၵမ်း။ ယႃႇပေဝၢႆႇၸူးတီႈ တုၸရိူၵ်ႈဢပျတ်ႈၼၼ်ႉ၊ တုၵ်ႉၶႃႉတၢင်းၽၢၼ်ဢၼ်ၸဝ်ႈလႆႈ ၶၢမ်ႇယူႇၼၼ်ႉ၊ ပဵၼ်လွင်ႈတၢင်းဢၼ်ႁၢမ်ႈတၢပ်ႈၸဝ်ႈႁႂ်ႈဝႄႈ တုၸရိူၵ်ႈဢပျတ်ႈၼၼ်ႉယဝ်ႉ။
တူၺ်းလူး။ မုၼ်ၽုင်းဢႃႇၼုၽေႃႇၽြႃးပဵၼ်ၸဝ်ႈၼၼ်ႉယႂ်ႇၼႃႇၶႃႈဢေႃႈ။ ၽူႈလႂ်သင်ႇသွၼ်ပၼ်မိူၼ်ၸိူဝ်ႉၼင်ႇ မၼ်းၸဝ်ႈၼၼ်ႉလႆႈ။
ၽူႈလႂ်ၸၢင်ႈၸႂ်ႉႁႂ်ႈၽြႃးပဵၼ်ၸဝ်ႈႁဵတ်းဢၼ်ၼၼ်ႉဢၼ်ၼႆႉ၊ ၽူႈလႂ်ၸၢင်ႈလၢတ်ႈလႄႈဝႃႈ၊ ‘ၸဝ်ႈႁဝ်းႁဵတ်းၽိတ်းမႅၼ်ႈယဝ်ႉ’ ဝႃႈၼႆၼၼ်ႉလႆႈ။
မၼ်းၸဝ်ႈလႆႈၶၢမ်ႇတၢင်းဢၼ်ၵူၼ်းတင်းလၢႆႁဵတ်းၵႂၢမ်းယွင်ႈယေႃး၊ၵႃႈဢၼ်မၼ်းၸဝ်ႈသၢင်ႈႁဵတ်းၼၼ်ႉလႄႈ ၸဝ်ႈၵေႃႈၶုၵ်းၸႂ်လႆႈႁႂ်ႈလႆႈယွင်ႈယေႃး မၼ်းၸဝ်ႈတႃႉ။
ၵူၼ်းတင်းသဵင်ႈတင်းလူင်ႁၼ်ၵႃႈဢၼ်မၼ်းၸဝ်ႈသၢင်ႈႁဵတ်းၼၼ်ႉလႄႈ ယူႇတီႈဢၼ်ၵႆသေယဝ်ႉလူတူၺ်းယူႇဢေႃႈ။
တူၺ်းလူး။ ၽြႃးပဵၼ်ၸဝ်ႈယႂ်ႇမျၢတ်ႈလႄႈႁဝ်းဢမ်ႇႁုမၼ်းၸဝ်ႈလႆႈ၊ တၢင်းဢၼ်ၼပ်ႉဢၼ်ဢၢၼ်ႇၶူပ်ႇၼီႈပီမိူင်းမၼ်းၸဝ်ႈၼၼ်ႉဢမ်ႇသဵင်ႈလႆႈ။
မၼ်းၸဝ်ႈတိုတ်ႉၸၼ်ဢဝ်ၼမ်ႉသေၵႃႈတီႈလိၼ်ၶိုၼ်ႈၵႂႃႇၵႃႈၼိူဝ်လႄႈ ႁဵတ်းပဵၼ်မဵတ်ႉၽူၼ်ယဝ်ႉၸင်ႇ။
ႁႂ်ႈၼမ်ႉၽူၼ်တူၵ်းလူင်းမႃးသေၵႃႈတီႈမွၵ်ႇၵုမ်ႈ၊ ပဵၼ်ႁႃႇယႂ်ႇႁႃႇလူင်ပုၼ်ႈမဵဝ်းၵူၼ်းတင်းသဵင်ႈတင်းလူင်ဢေႃႈ။
ၽူႈလႂ်ႁုလွင်ႈတၢင်းဢၼ်မွၵ်ႇၵုမ်ႈၽႄၸွတ်ႇတူဝ်ႈၵႂႃႇၼၼ်ႉဢိၵ်ႇတင်း သဵင်ၽႃႉလင်ဢၼ်မေႃးၵႃႈၼႂ်းတီႈယူႇ တၼ်းသဝ်းမၼ်းၸဝ်ႈၼၼ်ႉလႆႈ။
မၼ်းၸဝ်ႈပိုတ်ႇၽႃႉမႅပ်ႈၸဝ်ႈၸွတ်ႇတူဝ်ႈ ၽႃႉၵၢင်ႁၢဝ်ၵႂႃႇဢေႃႈ။ ၵူၺ်းၵႃႈ၊သမ်ႉဢဝ်ဢၼ်လပ်းသိင်ႇႁူမ်ႇသုမ်ႇပိုၼ်ႉပၢင်ႇလၢႆႇဝႆႉဢေႃႈ။
မၼ်းၸဝ်ႈဢဝ်လွင်ႈၸိူဝ်ႉၼင်ႇၼၼ်ၸီႇယၢင်ႇတြႃးတီႈၵူၼ်းမဵဝ်းတင်းလၢႆလႄႈ ပၼ်ဢႁႃႇယႃႉတၢင်းၵိၼ်ဢၼ်လူၼ်ႉ ဢၼ်လိူဝ်ၼမ်ၼႃႇဢေႃႈ။
မၼ်းၸဝ်ႈယိပ်းဢဝ်ၽႃႉမႅပ်ႈႁႂ်ႈတဵမ်ဢူင်ႈ မိုဝ်းၸဝ်ႈသေယဝ်ႉ၊ ပူင်ဢမိင်ႉတီႈၽႃႉမႅပ်ႈၼၼ်ႉၵႂႃႇတီႈဢၼ် မၼ်းၸဝ်ႈယိူင်းမၢႆဝႆႉၼၼ်ႉဢေႃႈ။
သဵင်ၽႃႉလင်မၼ်းၸဝ်ႈမွၵ်ႇလၢတ်ႈၼႄလွင်ႈဢၼ်ၽူၼ်လူင်လူမ်းလူင်တၵ်းပေႃႇ ပဵၼ်မႃးၼၼ်ႉလႄႈ ၽုင်သူဝ်းၽုင်ဝူဝ်းယင်းႁုလွင်ႈဢၼ်လူမ်းလူင် တၵ်းမႃးၼၼ်ႉဢေႃႈ။
ၵွပ်ႈပိူဝ်ႈလွင်ႈတၢင်းၼႆႉလႄႈႁူဝ်ၸႂ်ၵဝ်ၶႃႈသၼ်ႇဝႆၼႃႇ၊ၸႂ်ၵဝ်ၶႃႈပေႃးႁၢႆၵႂႃႇဢေႃႈ။
ဢွၼ်ၵၼ်ထွမ်ႇငိၼ်းသဵင်ၽြႃးပဵၼ်ၸဝ်ႈဢၼ်မေႃးလင်ဢိၵ်ႇတင်း သဵင်ၽႃႉလင်ဢၼ်ႁုၼ်ႈမေႃးဢွၵ်ႇမႃးၵႃႈၼႂ်းသူပ်းမၼ်းၸဝ်ႈၼၼ်ႉလူး။
မၼ်းၸဝ်ႈပွႆႇၽႃႉမႅပ်ႈႁႂ်ႈမၢပ်ႈၸွတ်ႇတူဝ်ႈ ၽႃႉၵၢင်ႁၢဝ်လႄႈ၊ ႁႂ်ႈႁွတ်ႈထိုင်တီႈသုတ်းလိၼ်မိူင်းဢေႃႈ။
မိူဝ်ႈၼၼ်ႉသဵင်ၸဝ်ႈဢၼ်ဝႃႈသဵင်ၽႃႉလင်ဢၼ်ပဵၼ်သဵင်ဢႃႇၼုၽေႃႇၸဝ်ႈ၊ မေႃးလင်မႃးႁူမ်ႈလူၺ်ႈၵၼ်တင်းၽႃႉမႅပ်ႈမၢပ်ႈမႃးၼၼ်ႉဢေႃႈ။
သဵင်ဢမိင်ႉၽြႃးပဵၼ်ၸဝ်ႈၼၼ်ႉပဵၼ်သဵင်ဢၼ်မိူၼ်ၸိူဝ်ႉၼင်ႇသဵင်ၽႃႉလင်လႄႈပဵၼ်ဢၼ်လီဢၢမ်းၼႃႇလူင်လၢင်၊ မၼ်းၸဝ်ႈႁဵတ်းလွင်ႈဢၼ်ယႂ်ႇဢၼ်လူင် ဢၼ်ႁဝ်းဢမ်ႇႁုလႆႈၼၼ်ႉဢေႃႈ။
မၼ်းၸဝ်ႈပူင်ဢမိင်ႉတီႈမူၺ်ႁႃႇ၊ဢိၵ်ႇတင်း ၽူၼ်ဢၼ်ႁႅင်းယႂ်ႇၼႃႇၼၼ်ႉ၊ ႁႂ်ႈတူၵ်းသႂ်ႇၵႃႈၼိူဝ်လိၼ်မိူင်းဢေႃႈ။
မၼ်းၸဝ်ႈႁႂ်ႈၵၢၼ်တၢင်းႁဵတ်းၵူၼ်းတင်းလၢႆ ၵိုတ်းထၢတ်ႇၵႂႃႇလႄႈ ၼႄပျႃးႁႂ်ႈၶဝ်ႁုလွင်ႈဢၼ်မၼ်းၸဝ်ႈတၢတ်ႈၼိူင်ႇၽၢၼ်ႇသၢင်းႁဵတ်းပဵၼ်လႆႈၼၼ်ႉဢေႃႈ။
မိူဝ်ႈၼၼ်ႉတူဝ်ထိူၼ်ႇတင်းလၢႆဢွၼ်ၵၼ်ၶဝ်ႈ ၵႃႈၼႂ်းႁူးထမ်ႈႁူးလိၼ်လႄႈ ထင်ယူႇၵႃႈၼႂ်းတီႈဢၼ်ၶဝ်ယူႇၼၼ်ႉဢေႃႈ။
လူမ်းၽိဝ်ႁုင်ၸၢင်ႈလုၵ်ႉဢွၵ်ႇသေၽၢႆႇတၢင်းၸၢၼ်းမႃးလႄႈ တၢင်းၵတ်းတၢင်းၼၢဝ်ၸၢင်ႈလုၵ်ႉသေ ၽၢႆႇတၢင်းႁွင်ႇမႃးဢေႃႈ။
ၽြႃးပဵၼ်ၸဝ်ႈပဝ်ႇလူမ်းၵတ်းမႃးတေႃႇထိုင်ႁွတ်ႈ၊ ၼမ်ႉတင်းလၢႆထၢၼ်ႈပေႃးပဵၼ်ၼမ်ႉၵၢမ်ႈၼမ်ႉၶႅင်ၵႂႃႇဢေႃႈ။
မၼ်းၸဝ်ႈႁႂ်ႈၽႃႉၽူၼ်ဢၼ်ၼႃတၼ်ၼႃႇၼၼ်ႉသဝ်းဝႆႉၵႃႈတီႈမွၵ်ႇၵုမ်ႈလႄႈ ၽႃႉမႅပ်ႈၸိုင်၊မၢပ်ႈဢွၵ်ႇသေၵႃႈၼႂ်းမွၵ်ႇၵုမ်ႈမႃး။
မၼ်းၸဝ်ႈၸိၼႄႁႂ်ႈၽႃႉၽူၼ်လႄႇလဵပ်ႈယူႇ သေလႄႈႁႂ်ႈလႆႈႁဵတ်းၸွမ်း၊ ၵႃႈၼင်ႇဢၼ်မၼ်းၸဝ်ႈသင်ႇလၢတ်ႈဝႆႉၼၼ်ႉၵႃႈၼိူဝ်လိၼ်မိူင်းဢေႃႈ။
ၽြႃးပဵၼ်ၸဝ်ႈႁႂ်ႈၽူၼ်တူၵ်းသႂ်ႇၵႃႈၼိူဝ်လိၼ်ၼႆႉ၊ ၸၢင်ႈပဵၼ်တၢင်းဢၼ်ပၼ်တၢမ်ႇတီႈၵူၼ်းတင်းလၢႆဢမ်ႇၼၼ်ၸၢင်ႈပဵၼ်တၢင်းဢၼ်လုမ်းလႃးလိၼ်မိူင်း၊ ဢမ်ႇၼၼ်ပဵၼ်တၢင်းဢၼ်ၼႄပျႃး မႅတ်ႈတႃႇၸဝ်ႈဢေႃႈ။
ယေႃးၽႃႉ၊ ႟။ ယူႇၼိမ်ၼိမ်လီလီၵမ်းဢွၼ်ႇၼိုင်ႈလႄႈထွမ်ႇငိၼ်းၵႂၢမ်းၼႆႉသေၵမ်း၊ ၶႆႈၸႂ်ဝူၼ်ႉၸႂ်လူၺ်ႈတၢင်းဢၼ်ၽြႃးပဵၼ်ၸဝ်ႈႁဵတ်းဢၼ်လီဢၢမ်းတင်းလၢႆသေၵမ်း။
ၸဝ်ႈႁုလႆႈလွင်ႈဢၼ်ၽြႃးပဵၼ်ၸဝ်ႈဢုပ်ႉထိင်းမွၵ်ႇၵုမ်ႈလႂ်လႄႈ ႁႂ်ႈၽႃႉမႅပ်ႈႁိူဝ်ႈလႅင်းမႃးၼၼ်ႉၸိူဝ်ႉၼင်ႇႁိုဝ်။
ၸဝ်ႈၸွင်ႇႁုလွင်ႈဢၼ်မၼ်းၸဝ်ႈႁႂ်ႈမွၵ်ႇၵုမ်ႈပိဝ်ယူႇၵႃႈၼႂ်းၼႃႈၽႃႉၵၢင်ႁၢဝ်ၼၼ်ႉႁိုဝ်း၊ ဢိၵ်ႇတင်းလွင်ႈဢၼ်မၼ်းၸဝ်ႈ မီးပိင်ႇၺႃႇႁဵတ်းၶိူင်ႈပိူင်ဢၼ်လီဢၢမ်း တင်းလၢႆၼၼ်ႉႁိုဝ်း။
ၸဝ်ႈဢမ်ႇႁုၵူၺ်း။ ၸဝ်ႈႁုတၢင်းဢၼ်မႆႈ ဢၼ်ႁွၼ်ႉၵူၺ်း၊ မိူဝ်ႈဢၼ်လူမ်းမႆႈတၢင်းၸၢၼ်းထူဝ်းပတ်ႉမႃးၵႃႈၼိူဝ်ၼႃႈလိၼ်ၼၼ်ႉဢေႃႈ။
ၸွင်ႇၸဝ်ႈၶဵင်ႈၽႃႉၵၢင်ႁၢဝ်မိူၼ်ၸိူဝ်ႉၼင်ႇ မၼ်းၸဝ်ႈလႆႈႁိုဝ်း၊ ႁႂ်ႈၵႅၼ်ႇၶႅင်မိူၼ်ၸိူဝ်ႉၼင်ႇတွင်းသေလႄႈ ပွတ်ႈသီႁႂ်ႈဢွၵ်ႇငဝ်းၼၼ်ႉလႆႈႁိုဝ်း။
ၸဝ်ႈသွၼ်ပၼ်ႁဝ်းပုၼ်ႈတၵ်းလႆႈလၢတ်ႈၸိူဝ်ႉၼင်ႇႁိုဝ်တီႈၽြႃးပဵၼ်ၸဝ်ႈၼၼ်ႉသေၵမ်း၊ ႁူဝ်ၸႂ်ႁဝ်းပဝ်ႇလၢပ်ႈဝႆႉလႄႈ ဢမ်ႇမေႃလဝ်ႈလၢတ်ႈၵႃႈသင်ယဝ်ႉ။
ၸွင်ႇၵဝ်ထုၵ်ႇလီလဝ်ႈယွၼ်းဢၶႂၢင်ႉႁႂ်ႈလႆႈ လၢတ်ႈတေႃႇၽြႃးပဵၼ်ၸဝ်ႈႁိုဝ်း၊ ပေႃးၽူႈလႂ်ႁတ်းႁဵတ်းၸိူဝ်ႉၼင်ႇၼၼ်ၸိုင်၊မၼ်းတေလႆႈလုလႆႈတၢႆဢေႃႈ။
ၵူၼ်းႁဝ်းၼႆႉဢမ်ႇတူၺ်းသၢႆဢရွင်ႇတႃဝၼ်းဢၼ်ႁိူဝ်ႈလႅင်းၼႃႇၼၼ်ႉလႆႈ၊ ယၢမ်းမိူဝ်ႈဢၼ်လူမ်းပတ်ႉထူဝ်းလႄႈၽႃႉၵၢင်ႁၢဝ်ပၢင်ႇလီလႅင်းလီၼၼ်ႉဢေႃႈ။
သၢႆဢရွင်ႇၶမ်းၸၢင်ႈဢွၵ်ႇသေၵႃႈတီႈ ၽၢႆႇတၢင်းႁွင်ႇမႃးသေလႄႈ လဵပ်ႈႁွပ်ႈၽြႃးပဵၼ်ၸဝ်ႈၼၼ်ႉပျေႉၸုမ်ႇဝႆႉ တင်းမုၼ်ၽုင်းဢႃႇၼုၽေႃႇဢၼ် လီၵူဝ်လီႁႄဢေႃႈ။
မုၼ်ၽုင်းၸဝ်ႈဢၼၼ်ႇတႃႉတၼ်းၶူဝ်း ယႂ်ႇၼႃႇလူင်လၢင်လႄႈ ႁဝ်းဢမ်ႇသုတ်ႉၸပ်းသုတ်ႉၸူးၸမ်တီႈ မၼ်းၸဝ်ႈလႆႈ၊ မၼ်းၸဝ်ႈပဵၼ်ၸဝ်ႈဢၼ်သိုဝ်ႈတေႃႇ၊ၸဝ်ႈဢၼ်တႅပ်းတတ်းတြႃးၽဵင်ႇ၊ ၼႂ်းတၢင်းဢၼ်ၸီႇယၢင်ႇတႅပ်းတတ်းတြႃး ၵႃႈၼိူဝ်ၵူၼ်းတင်းလၢႆၼၼ်ႉဢေႃႈ။
ပိူဝ်ႈၼႆလႄႈၵူၼ်းတင်းလၢႆၵူဝ်ႁႄမၼ်းၸဝ်ႈလႄႈ မၼ်းၸဝ်ႈဢမ်ႇလူဢမ်ႇတူၺ်းၵူၼ်းဢၼ်ထၢင်ႇဝႃႈ၊ တူဝ်ၸဝ်ႈၵဝ်ႇမီးၺၢၼ်ႇပိင်ႇၺႃႇၼၼ်ႉ သေၵေႃႉသေၵူၼ်း” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ ယူႇၵႃႈၼႂ်းၽူၼ်လူင်လူမ်းလူင်သေလႄႈ ၶိုၼ်းလၢတ်ႈတီႈ ယေႃးၽႃႉ၊ လႄႈဝႃႈၸမ်ႉ။
“ၵေႃႉဢၼ်ယင်းဢမ်ႇမီးၺၢၼ်ႇလႄႈဢဝ်ၵႂၢမ်းပဝ်ႇၵႂၢမ်းလၢႆသေလႄႈ၊ ၸႅတ်ႈထၢမ်ပိင်ႇၺႃႇၵဝ်ၼႆႉပဵၼ်ၽူႈလႂ်။
လုၵ်ႉၸုၵ်းမိူၼ်ၸိူဝ်ႉၼင်ႇဢၼ်ပဵၼ် ၵေႃႉၸၢႆးသေလႄႈ ၵႄႈလိတ်ႈၵႂၢမ်းဢၼ်ၵဝ်တၵ်းထၢမ်ၼၼ်ႉတႃႉ။
ယၢမ်းမိူဝ်ႈဢၼ်ၵဝ်တႄႇတင်ႈငဝ်ႈႁၢၵ်ႈ လိၼ်မိူင်းၼၼ်ႉမႂ်းမီးၵႃႈလႂ်၊ ပေႃးမႂ်းႁုထၢၼ်ႇၼႆႉၸိုင်၊လၢတ်ႈၼႄၵဝ်လူး။
ၽူႈလႂ်မၢႆပၼ်တၢင်းဢၼ်ၶပ်ႉဢၼ်တႅၵ်ႈမၼ်းဝႆႉ၊ ၽူႈလႂ်ၶဵင်ႈၸိူၵ်ႈမႆမီႈသေလႄႈၶျႃးမၼ်းဝႆႉ၊ ၸွင်ႇမႂ်းႁုလႄႈမွၵ်ႇလၢတ်ႈလႆႈႁိုဝ်း။
ငဝ်ႈႁၢၵ်ႈတိၼ်သဝ်မၼ်းတႄႇတင်ႈဝႆႉ ၵႃႈၼိူဝ်ဢၼ်လႂ်လႄႈ ၽူႈလႂ်ဢဝ်မၢၵ်ႇႁိၼ်ႁူဝ်ၸဵင်ႇတိူၵ်ႈမၼ်း တၢင်ႇသႂ်ႇဝႆႉ။
ၼႂ်းမိူဝ်ႈဢၼ်လၢဝ်လႅင်းႁူဝ်မိူင်းတင်းလၢႆဢွၼ်ၵၼ်ႁဵတ်းၵႂၢမ်း၊ ဢိၵ်ႇတင်းတမၢၼ်ႇၵၢင်ႁၢဝ် တင်းလၢႆၸူမ်းသိူဝ်းလႄႈႁွင်ႉသႅၼ်ႇၼၼ်ႉဢေႃႈ။
ၽူႈလႂ်ဢဝ်ၽၵ်းတူဢိုတ်းၼမ်ႉသမ်ႇမုၵ်ႈတြႃႇဝႆႉ၊ ၼႂ်းမိူဝ်ႈဢၼ်မၼ်းၵိူတ်ႇလဵင်ႉဢွၵ်ႇမႃးသေၵႃႈတီႈတွင်ႉလိၼ်မိူင်းၼၼ်ႉ။
မိူဝ်ႈဢၼ်ၵဝ်ဢဝ်မွၵ်ႇၵုမ်ႈႁူမ်ႇသုမ်ႇပၢင်ႇလၢႆႇလႄႈ ဢဝ်ဢၼ်လပ်းသိင်ႇပူၵ်ႉႁေႃႇမၼ်းၼၼ်ႉ။
ၵဝ်မၵ်းမၢႆၵႅတ်ႇၶၼ်ႈၶွပ်ႇၼမ်ႉပၢင်ႇလၢႆႇလႄႈ ဢဝ်ၽၵ်းတူၵိူၼ်ႇတင်းလၢႆဢိုတ်းႁပ်း ဝႆႉသေယဝ်ႉ။
ပိင်းၺၢပ်ႈဝႆႉလႄႈဝႃႈ၊ ‘မႂ်းၼႆႉလႆႈမႃးထိုင် ၵႃႈတီႈၼႆႈၵူၺ်းဢေႃႈ။ ဢမ်ႇလႆႈပူၼ်ႉလႆႈပႅၼ်၊လႅင်းၼမ်ႉပိူပ်ႈၼမ်ႉမႂ်းဢၼ်ပူၵ်းပႅၼ်ၸိူဝ်းၼၼ်ႉ၊ တၵ်းလႆႈသုတ်းလႆႈတိူၵ်ႈၵႃႈတီႈၼႆႈၵူၺ်းဢေႃႈ၊’ ဝႃႈၼႆဝႆႉယဝ်ႉ။
ယေႃးၽႃႉ၊ ႟။ ၸူဝ်ႈဢသၢၵ်ႈမႂ်းၼႆႉ ၸွင်ႇမႂ်းယၢမ်ႈသင်ႇလၢတ်ႈ၊ ႁႂ်ႈၶိင်ႇၵၢင်ၼႂ်ပေႃႇမႃးလႄႈယၢမ်ႈၶျႃးတီႈယူႇတီႈသဝ်းပၼ်ဢႃႇရူင်ႇမိူင်းလႅင်းႁိုဝ်း။
မႂ်းလႆႈပူင်ဢမိင်ႉႁႂ်ႈၶိင်ႇၵၢင်ၼႂ်ယိပ်းၵမ်ဢဝ် လိၼ်မိူင်းလႄႈ ၽႅတ်းသၼ်ႇၵူၼ်းႁၢႆႉတင်းလၢႆပႅတ်ႈႁိုဝ်း။
လိၼ်မိူင်းဢဝ်ပုင်ႇႁၢင်ႈၽၢင်မၼ်းလႅၵ်ႈလၢႆႈပဵၼ်မိူၼ်ၸိူဝ်ႉၼင်ႇလိၼ်ၼဵဝ်၊ ဢၼ်တွၵ်ႇတၼ်းသိၵ်ႈဝႆႉၼၼ်ႉလႄႈပဵၼ်ၸိူဝ်ႉၼင်ႇၶူဝ်းၼုင်ႈဢၼ်ယွမ်ႉဝႆႉၼၼ်ႉဢေႃႈ။
သၢႆလႅင်းၵၢင်ဝၼ်းဢၼ်ႁိူဝ်ႈလႅင်းၼႃႇၼၼ်ႉ၊ ႁၢမ်ႈတၢပ်ႈတၢင်းဢၼ်ၵူၼ်းႁၢႆႉၵူၼ်းမိူၵ်ႈၶဝ်ႁဵတ်းႁၢႆႉႁဵတ်းမိူၵ်ႈၼၼ်ႉဢေႃႈ။
ၸွင်ႇမႂ်းယၢမ်ႈၶဝ်ႈၸူးတီႈၼမ်ႉဢွၵ်ႇႁူး ၵႃႈၼႂ်းၼမ်ႉပၢင်ႇလၢႆႇႁိုဝ်း၊ ၸွင်ႇမႂ်းယၢမ်ႈပႆယၢင်ႈၵႃႈတီႈပိုၼ်ႉ ၼမ်ႉသမ်ႇမုၵ်ႈတြႃႇႁိုဝ်း။
ႁူးၽၵ်းတူမိူင်းမရၼႃႉယၢမ်ႈၽုၺ်ႇပိုတ်ႇ ၼႄမႂ်းႁိုဝ်း၊ ၸွင်ႇမႂ်းယၢမ်ႈႁၼ်ႁူးၽၵ်းတူဢၼ်ၶဝ်ႈၸူး ႁူမ်ႈတၢင်းတၢႆၼၼ်ႉႁိုဝ်း။
ၸွင်ႇမႂ်းယၢမ်ႈႁုတၢင်းဢၼ်ၵမ်ႇၽႃႇၼႆႉယႂ်ႇၵႂၢင်ႈထၢၼ်ႇႁိုဝ်ၼၼ်ႉႁိုဝ်း၊ ပေႃးမႂ်းႁုၸိုင်၊ၶိုၼ်းတွပ်ႇလၢတ်ႈၼႄၵဝ်လူး။
သဵၼ်ႈတၢင်းဢၼ်လႂ်ပွင်ႇႁွတ်ႈထိုင်တီႈဢၼ်လႅင်းယူႇၼၼ်ႉ၊ တီႈဢၼ်လပ်းသိင်ႇယူႇၼၼ်ႉလူးမီးၵႃႈလႂ်။
မႂ်းတၵ်းဢဝ်ဢၼ်လႅင်းတင်းဢၼ်လပ်းသိင်ႇဢွၼ်သူင်ႇႁွတ်ႈၽႅဝ်တီႈယူႇၶဝ်လႆႈႁိုဝ်း၊ မႂ်းႁုသဵၼ်ႈတၢင်းဢၼ်ၵႂႃႇၸူးတီႈယူႇ ၶဝ်ၼၼ်ႉယူႇႁိုဝ်း။
ၵွပ်ႈပိူဝ်ႈဢၼ်မႂ်းလႆႈၵိူတ်ႇလဵင်ႉမႃးမိူဝ်ႈၵွၼ်ႇဢွၼ်ၼႆႉၼၼ်ႉလႄႈ ဢသၢၵ်ႈမႂ်းယႂ်ႇၼမ်ၼႃႇလူင်လၢင်ယဝ်ႉ မႂ်းႁုတႄႉတႄႉဢေႃႈ။
ၸွင်ႇမႂ်းယၢမ်ႈၶဝ်ႈၵႂႃႇလႄႇတူၺ်း ၵႃႈၼႂ်းႁွင်ႈႁိူၼ်း၊ တီႈဢၼ်ၵဝ်ဢဝ်မူၺ်ႁႃႇဢိၵ်ႇတင်းမၢၵ်ႇႁဵပ်းသိမ်းဝႆႉၼၼ်ႉႁိုဝ်း။
ဢၼ်ၵဝ်သိမ်းဝႆႉပုၼ်ႈၶိင်ႇၵႃႇလႃႉဢၼ် ၽေးႁွတ်ႈထိုင်မႃး၊ ဢိၵ်ႇတင်းၶိင်ႇၵႃႇလႃႉဢၼ်ပဵၼ်သိုၵ်းလႄႈတိုၵ်းတေႃးၼၼ်ႉႁိုဝ်း။
ၸွင်ႇမႂ်းယၢမ်ႈႁွတ်ႈထိုင်ၵႃႈတီႈဢၼ် တႃဝၼ်းဢွၵ်ႇၼၼ်ႉ၊ ၵႃႈတီႈဢၼ်လူမ်းၽၢႆႇတၢင်းဢွၵ်ႇၸၢင်ႈပတ်ႉထူဝ်းမႃးၼၼ်ႉႁိုဝ်း။
ၽူႈလႂ်ၽုၺ်ႇပိုတ်ႇပၼ်သဵၼ်ႈတၢင်းၼမ်ႉၽူၼ်ဢၼ်လေႃႇလႆၸႅဝ်ႈၼႃႇၼၼ်ႉလႄႈ ၽူႈလႂ်ၽဵဝ်ႈပၼ်သဵၼ်ႈတၢင်းႁႂ်ႈ ၽႃႉၽႃႇၼၼ်ႉ။
ၽူႈလႂ်ႁႂ်ႈၽူၼ်တူၵ်းသႂ်ႇၵႃႈၼိူဝ်လိၼ်ဢၼ်ၵူၼ်းဢမ်ႇယူႇဢမ်ႇသဝ်းၼၼ်ႉလႄႈ ၼႂ်းထိူၼ်ႇလႅင်ႉဢၼ်ဢမ်ႇမီးၽူႈမီးၵူၼ်းၼၼ်ႉ။
ၽူႈလႂ်ဢဝ်ၼမ်ႉႁူတ်းပၼ်ၵႃႈတီႈ လိၼ်ႁႅင်ႈလိၼ်ႁွင်၊ ႁႂ်ႈယွတ်ႈယိူဝ်ႈထၢၼ်ႈပေႃးႁုၼ်ႈမႃး ၼမ်ၼႃႇၼၼ်ႉ။
ၽူႈလႂ်ပဵၼ်ပေႃႈၼမ်ႉၽူၼ်၊ၽူႈလႂ်ႁႂ်ႈမဵတ်ႉၼမ်ႉၼၢႆးတင်းလၢႆၵိူတ်ႇပဵၼ်မႃး။
ၼမ်ႉၶႅင်ဢိၵ်ႇတင်းၼမ်ႉမူၺ်လုၵ်ႉၵႃႈတီႈတွင်ႉ ၽူႈလႂ်ဢွၵ်ႇမႃး။ ၽူႈလႂ်ပႃးတွင်ႉလႄႈၵိူတ်ႇလဵင်ႉမႃးၼမ်ႉၶႅင်တင်း ၼမ်ႉမူၺ်ၽႃႉၵၢင်ႁၢဝ်ၼၼ်ႉ။
ဢၼ်ႁႂ်ႈၼမ်ႉတင်းလၢႆၶႅင်ၵႂႃႇမိူၼ်ၸိူဝ်ႉၼင်ႇ မၢၵ်ႇႁိၼ်လႄႈ ႁႂ်ႈၼႃႈပၢင်ႇလၢႆႇၵၢမ်ႈၵႂႃႇၶႅင်ၵႂႃႇၼၼ်ႉ။
ၸွင်ႇမႂ်းဢဝ်ၸိူၵ်ႈလဵၵ်းမတ်ႉၶွတ်ႇမုၵ်ႉလၢဝ်ဝီး ၸုတုမ်ၵၼ်လႆႈႁိုဝ်း၊ ၸွင်ႇမႂ်းၵႄႈၸိူၵ်ႈပႄးလၢဝ်ငူင်းထႆလႆႈႁိုဝ်း။
ၸွင်ႇမႂ်းၼႄပၼ်သဵၼ်ႈတၢင်းလၢဝ်တင်းလၢႆၸွမ်းၶိင်ႇၶႃႇမၼ်းလႆႈႁိုဝ်း၊ ၸွင်ႇမႂ်းဢွၼ်သူင်ႇလၢဝ်ၸၢင်ႉ၊ဢိၵ်ႇတင်းလုၵ်ႈလၢင်းမၼ်းတင်းလၢႆလႆႈႁိုဝ်း။
ၸွင်ႇမႂ်းႁုၸႅင်ႈၼႄးဢုပတေႇတင်းလၢႆဢၼ်ထိင်းၽႃႉၵၢင်ႁၢဝ်ၼၼ်ႉႁိုဝ်း၊ ၸွင်ႇမႂ်းဢဝ်ၼႄးဢုပတေႇၸိူဝ်းၼၼ်ႉ ပိူင်ႇလိၼ်မိူင်းလႆႈႁိုဝ်း။
ၸွင်ႇမႂ်းႁွင်ႉသႅၼ်ႇသဵင်ဢၼ်ပၼ်ဢမိင်ႉတီႈ မွၵ်ႇၵုမ်ႈတင်းလၢႆ၊ ႁႂ်ႈၼမ်ႉၽူၼ်ဢၼ်ၼမ်ၼႃႇႁူမ်ႇသုမ်ႇမႂ်းလႆႈႁိုဝ်း။
ၸွင်ႇမႂ်းပွႆႇၸႂ်ႉၽႃႉမႅပ်ႈႁႂ်ႈမၢပ်ႈလႅင်း ဢွၵ်ႇၵႂႃႇလႆႈႁိုဝ်း၊ မၼ်းၸွင်ႇၶိုၼ်းလဝ်ႈလၢတ်ႈတီႈမႂ်းလႄႈဝႃႈ၊ ‘ႁဝ်းၶႃႈမီးယူႇၵႃႈတီႈၼႆႈၶႃႈဢေႃႈ၊’ ဝႃႈၼင်ႇၼႆၼၼ်ႉႁိုဝ်း။
ၽူႈလႂ်ဢဝ်ပိင်ႇၺႃႇသႂၢင်းသႂ်ႇၵႃႈၼႂ်း တူဝ်ၶၼ်ႇထႃႇ၊ ၽူႈလႂ်ဢဝ်ၺၢၼ်ႇဢၼ်ႁုလႆႈၼၼ်ႉ ပၼ်တီႈဝိၺိၺ်ႇ။
ၽူႈလႂ်မီးပိင်ႇၺႃႇဢၼ်ၼပ်ႉဢၢၼ်ႇ မွၵ်ႇၵုမ်ႈတင်းလၢႆလႆႈ၊ ၽူႈလႂ်ထွၵ်ႇႁိုဝ်ႈၼမ်ႉတဝ်ႈၵၢင်ႁၢဝ်တင်းလၢႆလႆႈ။
ၼႂ်းမိူဝ်ႈဢၼ်မုၼ်ႈလိၼ်ၶႅင်မိူၼ်ၼင်ႇလဵၵ်းလွမ်၊ မိူဝ်ႈၵွၼ်ႈလိၼ်မမ်ႈလိၼ်ၸပ်းၵၼ် ၼႅၼ်ႈယူႇၼၼ်ႉ။
ၸွင်ႇမႂ်းသွၵ်ႈႁႃတူဝ်ထိူၼ်ႇပုၼ်ႈသၢင်ႇသီႈတင်းလၢႆတၵ်းၵိၼ်ဢိၵ်ႇတင်း မႂ်းဢွႆႇပၼ်ႁႂ်ႈသၢင်ႇသီႈၼုမ်ႇတင်းလၢႆ ထၢၼ်ႈပေႃးဢိမ်ႇ။
ၼႂ်းမိူဝ်ႈဢၼ်ၶဝ်တဵတ်ႇမႅပ်းယူႇၼႂ်းႁူးထမ်ႈသေလႄႈ မူပ်ႇလႄႈပႂ်ႉယူႇၵႃႈတီႈတႂ်ႈယုမ်းတႂ်ႈယွမ်ႇ ၼၼ်ႉလႆႈႁိုဝ်း။
ၽူႈလႂ်လဵင်ႉပၼ်တၢင်းၵိၼ်တီႈၵႃလမ်တင်းလၢႆ၊ ၼႂ်းမိူဝ်ႈဢၼ်ၶဝ်တွင်ႉမႆႈလႄႈမိၼ်ၵႂႃႇမိၼ်မႃး၊ဢိၵ်ႇတင်း ၼႂ်းမိူဝ်ႈဢၼ်ၵႃလမ်ဢွၼ်ႇတင်းလၢႆ ႁွင်ႉသႅၼ်ႇလႄႈယွၼ်းတၢင်းၵိၼ်ၵႃႈတီႈ ၽြႃးပဵၼ်ၸဝ်ႈယူႇၼၼ်ႉ။
ၸွင်ႇမႂ်းႁုၶိင်ႇဢၼ်ယိူင်းတင်းလၢႆၵိူတ်ႇလဵင်ႉမႃးမိူဝ်ႈလႂ်ၼၼ်ႉလႄႈ မႂ်းယၢမ်ႈပႂ်ႉတူၺ်းတၢင်းဢၼ်ၵႂၢင်မႄႈၵိူတ်ႇလဵင်ႉလုၵ်ႈမၼ်းၼၼ်ႉႁိုဝ်း။
ၸွင်ႇမႂ်းႁုၶိင်ႇဢၼ်ၶဝ်ပႃးပတိၵ်ႈသၼ်ႇထေႇ ႁိုင်ၵႃႈႁိုဝ်ၼၼ်ႉသေယဝ်ႉ၊ မႂ်းႁုၶိင်ႇဢၼ်ၶဝ်ၵိူတ်ႇလဵင်ႉလုၵ်ႈၼၼ်ႉႁိုဝ်း။
ၸွင်ႇမႂ်းႁုၶိင်ႇဢၼ်ၶဝ်ၵွင်ႇဢႅဝ်ၶူတ်းဢႅဝ်ၶဝ် သေလႄႈ ၶျႃးလုၵ်ႈဢွၼ်ႇၶဝ်တူၵ်းၵႃႈၼိူဝ်လိၼ် ၼၼ်ႉႁိုဝ်း။
လုၵ်ႈဢွၼ်ႇၶဝ်ၸိူဝ်းၼၼ်ႉၸၢင်ႈဢွၼ်ၵၼ် ယူႇလီလႄႈ ယႂ်ႇမႃးၵႃႈတီႈၵၢင်ပၢင်ႇၵၢင်ပဵင်းဢေႃႈ။ ၶဝ်ၼၼ်ႉၸၢင်ႈဢွၼ်ၵၼ်ၵႂႃႇလႄႈယင်းဢမ်ႇၶိုၼ်းဢမ်ႇမႃးၵႃႈတီႈမႄႈၶဝ်ဢေႃႈ။
ၽူႈလႂ်ပွႆႇပိုၼ်ႉပွႆႇပႅတ်ႈမႃႉလီႈထိူၼ်ႇႁႂ်ႈၵႂႃႇ လွတ်ႈလွတ်ႈလႅဝ်းလႅဝ်း၊ ၽူႈလႂ်ၵႄႈလိတ်ႈတၢင်းဢၼ်မတ်ႉၽုၵ်ႇၶဝ်ၼၼ်ႉ ႁႂ်ႈလႆႈလႄႇၵႂႃႇလၢဝ်းၵႂႃႇ။
ၵဝ်မၵ်းၶၢၼ်းဝႆႉထိူၼ်ႇလႅင်ႉႁႂ်ႈပဵၼ်ႁိူၼ်းၶဝ်လႄႈ ပွႆႇႁႂ်ႈၶဝ်ယူႇသဝ်းၵႃႈတီႈလိၼ်ၵိူဝ်ၼၼ်ႉဢေႃႈ။
ၶဝ်ၸၢင်ႈယူႇၵႆၵၼ်တင်းဝဵင်းဢၼ်သဵင်လင် သဵင်မေႃးၼၼ်ႉလႄႈ ၽူႈလႂ်ဢမ်ႇၸၢင်ႈႁဵတ်းႁႂ်ႈၶဝ်ငႄႈမႃးလႄႈ ၸႂ်ႉၵိၼ်လႆႈ။
သၼ်လွႆတႄးလွႆပဵၼ်ပၢင်ႇတီႈၵိၼ်ၶဝ်လႄႈ ၶဝ်ၸၢင်ႈသွၵ်ႈႁႃၵိၼ်မႂ်လိပ်းမႂ်ၶဵဝ် ၵူႈၸိူဝ်ႉၵူႈမဵဝ်းဢေႃႈ။
ဝူဝ်းထိူၼ်ႇၼၼ်ႉတၵ်းၶႂ်ႈၵိုတ်ႉႁၢပ်ႇၵၢၼ်မႂ်းႁိုဝ်း၊ မၼ်းတၵ်းၼွၼ်းၼႂ်းသိုင်ႇမႂ်းၶွၵ်ႈမႂ်း ၶိုၼ်းၼိုင်ႈႁိုဝ်း။
ၸွင်ႇမႂ်းဢဝ်ၸိူၵ်ႈမတ်ႉဝူဝ်းထိူၼ်ႇႁႂ်ႈမၼ်း ထႆၸွမ်းႁွႆးထႆလႆႈႁိုဝ်း၊ ဢမ်ႇၼၼ်ၵေႃႈမႂ်းတၵ်းႁႂ်ႈမၼ်းလၢၵ်ႈၽိူဝ်ၽိုၼ်ႉတိူၵ်ႇၼႃးမႂ်းလႆႈႁိုဝ်း။
ၵွပ်ႈပိူဝ်ႈဢၼ်ႁႅင်းမၼ်းယႂ်ႇလႄႈမႂ်းတၵ်းပိုင်ႈမၼ်း မုင်ႈမွင်းမၼ်းတၵ်းႁဵတ်းၵၢၼ်ၼၵ်း ၵၢၼ်ၼႃမႂ်းၼၼ်ႉႁိုဝ်း။
ၸွင်ႇမႂ်းဝႆႉၸႂ်တမ်းၸႂ်မၼ်းတၵ်း ပွၵ်ႈမႃးၶိုၼ်းသေလႄႈ ဢဝ်လိုၼ်ႈၶဝ်ႈမႂ်းမႃးၸုမႃးသိမ်းဝႆႉၵႃႈတီႈ တလၢင်းယဵပ်ႇၶဝ်ႈမႂ်းၼၼ်ႉႁိုဝ်း။
ၼူၵ်ႉၵလႃႇဢုၵ်ႈၸၢင်ႈဝီးပိၵ်ႇမၼ်းဝႆးၼႃႇဢေႃႈ။ ၵူၺ်းၵႃႈ၊ၼူၵ်ႉၵလႃႇဢုၵ်ႈၼၼ်ႉဢမ်ႇမိၼ်လႆႈ။
ၼူၵ်ႉၵလႃႇဢုၵ်ႈၸၢင်ႈၸုၼ်ႉပႅတ်ႈၶႆႇမၼ်းဝႆႉ ၵႃႈၼိူဝ်လိၼ်လႄႈ ၸၢင်ႈႁႂ်ႈၶႆႇၸိူဝ်းၼၼ်ႉဢုၼ်ႇလီၵႃႈၼႂ်း မုၼ်ႈလိၼ်ဢေႃႈ။
မၼ်းဢမ်ႇဝႆႉဢယေးလွင်ႈဢၼ်ၸၢင်ႈၶႄးတိၼ်ပိူၼ်ႈတၵ်းယဵပ်ႇသႂ်ႇၶႆႇမၼ်းလႄႈ တူဝ်ထိူၼ်ႇတၵ်းယဵပ်ႇႁႂ်ႈတႅၵ်ႇပႅတ်ႈၼၼ်ႉ။
မၼ်းၸၢင်ႈႁဵတ်းၵျၢမ်းထၢမ်းတီႈလုၵ်ႈလၢင်းမၼ်းမိူၼ်ၸိူဝ်ႉၼင်ႇဢမ်ႇၸႂ်ႈလုၵ်ႈလၢင်းမၼ်း၊ မၼ်းဢမ်ႇၵူဝ်လွင်ႈဢၼ်မၼ်းလႆႈၶၢမ်ႇဝူၺ်ႇတၼႃႇၵိူတ်ႇလုၵ်ႈလၢင်းၼၼ်ႉတၵ်းပဵၼ်ဢၼ်လၢႆလၢႆလွၵ်ႇလွၵ်ႇၵႂႃႇ။
လွင်ႈမၼ်းၸမ်ႉ၊ၵဝ်ႁဵတ်းႁႂ်ႈမၼ်းငိူဝ်ႈငႃႉလႄႈ ဢမ်ႇပၼ်ၺၢၼ်ႇတီႈမၼ်းၼၼ်ႉဢေႃႈ။
ၵူၺ်းၵႃႈ၊မိူဝ်ႈဢၼ်မၼ်းယုၵ်ႉတူဝ်မၼ်းလႄႈ ၼီပၢႆႈၼၼ်ႉ၊ မၼ်းၸၢင်ႈႁဵတ်းပျၢၵ်ႈၶူဝ်တီႈမႃႉ၊ဢိၵ်ႇတင်းၵေႃႉဢၼ်ၶီႇမႃႉၼၼ်ႉဢေႃႈ။
ယေႃးၽႃႉ၊ ႟။ မႂ်းပဵၼ်ၵေႃႉဢၼ်ႁဵတ်းႁႂ်ႈ မႃႉမီးႁႅင်းယႂ်ႇၼၼ်ႉႁိုဝ်း၊ မႂ်းဢဝ်ၵုၵ်ႉမႃႉသႂ်ႇဝႆႉၵႃႈတီႈၶေႃးမၼ်းႁိုဝ်း။
မႂ်းႁဵတ်းႁႂ်ႈမၼ်းၵျွၵ်းဝႅၼ်မိူၼ်ၸိူဝ်ႉၼင်ႇမႅင်းၸၵ်းတႅၼ်ၵျွၵ်းဝႅၼ်ၼၼ်ႉႁိုဝ်း၊ သဵင်ၶူႈလင်မၼ်းထင်ႇဢွၵ်ႇၼၼ်ႉ ၸၢင်ႈလွၵ်ႇငိုတ်ႈၵူၼ်းဝႆႉဢေႃႈ။
မၼ်းၸၢင်ႈၶုတ်းယၢႆးၵႃႈတီႈပၢင်ႇတီႈႁူၺ်ႈလႄႈၵျွၵ်းဝႅၼ်၊ လူၺ်ႈဢဵၼ်ႁႅင်းမၼ်းလႄႈဢွၵ်ႇၸူး ၵႃႈတီႈပၢင်တိုၵ်းသိုၵ်းဢေႃႈ။
မၼ်းဢမ်ႇႁုတၢင်းၵူဝ်တၢင်းႁႄလၢပ်ႇလႅဝ်းဢမ်ႇၸၢင်ႈႁဵတ်းႁႂ်ႈမၼ်းဝၢႆႇလင်ၼီပၢႆႈလႆႈ။
လၢၵ်ႈၼၢၵ်ႈၸိူဝ်းဢၼ်ၵူၼ်းၶီႇမႃႉတင်းလၢႆ ပႃးဝႆႉၼၼ်ႉ၊ တုမ်ႉသႂ်ႇၵၼ်မေႃးသဵင်ၶွၵ်ႉၶွၵ်ႉၶႅၵ်ႉၶႅၵ်ႉယူႇလႄႈမၢပ်ႈမႅပ်ႈယူႇၵႃႈၼႂ်းသၢႆလႅတ်ႇဢေႃႈ။
မိူဝ်ႈဢၼ်မၼ်းငိၼ်းသဵင်ပဝ်ႇၼႄးၶရႃႇ ႁႂ်ႈၶီႇသိုၵ်းၶိုၼ်ႈၼၼ်ႉ၊ မၼ်းဢမ်ႇယူႇၼိမ်လႆႈ၊မၼ်းၸၢင်ႈမီးၸႂ် ဢၼ်မႃႇၼႃႉယႂ်ႇ၊ ဢိၵ်ႇတင်းၸႂ်ဢၼ်ႁၢဝ်ႈၵျၢမ်းၼႃႇသေလႄႈ ၶုၼ်ႇလႅၼ်ႈၶိုၼ်ႈၵႂႃႇဢေႃႈ။
မိူဝ်ႈဢၼ်ပဝ်ႇၼႄးၶရႃႇၼၼ်ႉမၼ်းၸၢင်ႈႁဵတ်း သဵင်ႁႄႇလႄႈ ၼူမ်ႁႃသၢပ်ႇပၢင်ပွႆးတိုၵ်းသိုၵ်းဢၼ်မီး တီႈၵႆတီႈယၢၼ်၊ ဢိၵ်ႇတင်းသဵင်ႁုၼ်ႈသဵင်ႁိူဝ်ႉၶုၼ်သိုၵ်းႁၢၼ်တင်းလၢႆႁွင်ႉပၢဝ်ႇႁွင်ႉသႅၼ်ႇၼၼ်ႉဢေႃႈ။
ၵွပ်ႈပိူဝ်ႈပိင်ႇၺႃႇဢၼ်မႂ်းပၼ်ၼၼ်ႉလႄႈ ၼူၵ်ႉယဵဝ်ႈၸွၵ်ႇ၊ ၵီႈပိၵ်ႇမၼ်းမိၼ်ၶိုၼ်ႈၵႃႈၼိူဝ်တီႈသုင်လႄႈၵႂႃႇၸူးတီႈၽၢႆႇတၢင်းၸၢၼ်းႁိုဝ်း။
ယဵဝ်ႈႁုင်ႉပႂ်ႉထွမ်ႇဢဝ်ဢမိင်ႉမႂ်း၊ ႁႂ်ႈလႆႈႁဵတ်းႁင်းၵႃႈၼိူဝ်လွႆသုင်ပုၼ်ႉႁိုဝ်း။
မၼ်းၸၢင်ႈၵေႃႇႁဵတ်းႁင်းမၼ်းၵႃႈၼိူဝ်ႁၢၼ်ႉ ၽင်ႇႁိုၵ်းၵႃႈၼိူဝ်လွႆမၢၵ်ႇႁိၼ် ဢၼ်သုင်ၼႃႇၼၼ်ႉလႄႈ ၵႃႈတီႈၼၼ်ႈမၼ်းလႆႈမီးတီႈယူႇဢၼ် လူင်ႉလီလွတ်ႈလီဢေႃႈ။
မၼ်းၼၼ်ႉယူႇၵႃႈတီႈၼၼ်ႈလႄႈလူတူၺ်း တူဝ်ဢၼ်တၵ်းလႆႈၵိၼ်၊ ဢၼ်မီးယူႇၵႃႈတီႈတီႈၸမ်တီႈၵႆၼၼ်ႉဢေႃႈ။
လုၵ်ႈလၢင်းမၼ်းၸၢင်ႈသူတ်ႉၸၢင်ႈၵိၼ်လိူတ်ႈ လႄႈတူဝ်တၢႆမီးၵႃႈလႂ်ၵေႃႈၼူၵ်ႉၸိူဝ်းၼၼ်ႉမီး ၵႃႈတီႈၼၼ်ႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉတီႈ ယေႃးၽႃႉ၊ လႄႈဝႃႈၸမ်ႉ၊
“ ယေႃးၽႃႉ၊ ႟။ ၵေႃႉဢၼ်တွပ်ႇထဵင်ၼၼ်ႉယင်းၶတ်းၶႅင်ႁႅင်းတႃႉၸဝ်ႈဢၼၼ်ႇတႃႉတၼ်းၶူဝ်းလူးၵွၼ်ႇႁိုဝ်း။ ႁႂ်ႈၵေႃႉဢၼ်ၼႄးဢၼ်ဝႃႈၽြႃးပဵၼ်ၸဝ်ႈၼၼ်ႉ၊ၶိုၼ်းတွပ်ႇၶိုၼ်းလၢတ်ႈတႃႉ၊” ဝႃႈၼင်ႇၼႆဢေႃႈ။
ယေႃးၽႃႉ၊ ၶိုၼ်းလဝ်ႈလၢတ်ႈတီႈ ထႃႇဝရႃႉၽြႃး၊ လႄႈဝႃႈ၊
“တူၺ်းတီႈၶႃႈလူး။ ၶႃႈၸဝ်ႈၼႆႉလႆႈလၢတ်ႈမဝ်လၢတ်ႈမၢင်တီႈၶႃႈယဝ်ႉ။ တၵ်းၶိုၼ်းလဝ်ႈလၢတ်ႈၸိူဝ်ႉၼင်ႇႁိုဝ် လူးၵွၼ်ႇၶႃႈ။ ၶႃႈၸဝ်ႈဢဝ်မိုဝ်းတူဝ်ၸဝ်ႈၵဝ်ႇတူမ်းသူပ်းတူဝ်ၸဝ်ႈၵဝ်ႇယူႇတီႈၶႃႈဢေႃႈ။
ၶႃႈၸဝ်ႈလၢတ်ႈမႅၼ်ႈပွၵ်ႈၼိုင်ႈၵူၺ်းဢမ်ႇၵႃးလၢတ်ႈမႅၼ်ႈသွင်ပွၵ်ႈယဝ်ႉ၊ တေႃႈလဵဝ်ၼႆႉၶႃႈၸဝ်ႈတၵ်းဢမ်ႇတွပ်ႇဢမ်ႇလၢတ်ႈတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉသဵင် ထႃႇဝရႃႉၽြႃး၊ လုၵ်ႉသေၵႃႈၼႂ်းၽူၼ်လူင်လူမ်းလူင်သေလႄႈ မီးဢမိင်ႉတီႈ ယေႃးၽႃႉ၊ လႄႈဝႃႈၸမ်ႉ၊
“လုၵ်ႉၸုၵ်းမိူၼ်ၸိူဝ်ႉၼင်ႇဢၼ်ပဵၼ်ၵေႃႉၸၢႆးသေလႄႈ ၵႄႈလိတ်ႈၵႂၢမ်းဢၼ်ၵဝ်ထၢမ်ၼၼ်ႉတႃႉ။
မႂ်းၶတ်းၸႂ်ၵျူဝ်းၸႃးႁႃသၢၵ်ႈသေႇလႄႈဝႃႈ၊ ၵဝ်ဢမ်ႇတြႃးၼႆႁိုဝ်း၊ မႂ်းၸီႇယၢင်ႇဝႃႈ၊ၵဝ်ၽိတ်းဝႃႈၼႆလႄႈသမ်ႉဝႃႈ၊မႂ်းထုၵ်ႇမႅၼ်ႈယဝ်ႉဝႃႈၼႆႁိုဝ်း။
မႂ်းမီးဢဵၼ်ႁႅင်းမိူၼ်ၸိူဝ်ႉၼင်ႇၵဝ်ႁိုဝ်း၊ မႂ်းၵိဝ်သဵင်ဢၼ်ယႂ်ႇၼႃႇမိူၼ်ၸိူဝ်ႉၼင်ႇ သဵင်ၽႃႉလင်ၵဝ်လႆႈႁိုဝ်း။
ပေႃးမႂ်းႁဵတ်းလႆႈၸိုင်၊ၼႄပျႃးလွင်ႈတၢင်းဢၼ်မႂ်းမီးၽုင်းဢႃႇၼုၽေႃႇတႃႉ။ ၼႄပျႃးလွင်ႈတၢင်းဢၼ်မႂ်းမီးမုၼ်သရေႇ ဢၼ်ၶိုၵ်ႉၶမ်ႇၼၼ်ႉတႃႉ။
ထွၵ်ႇႁိုဝ်ႈတၢင်းဢၼ်တေႃးသႃႉတၢင်းၸႂ်မႆႈၶႂ်ႈၸႃႉမႂ်းထူမ်ႈႁူမ်ႇၼၼ်ႉတႃႉ။ တူၺ်းၶဝ်ၸိူဝ်းဢၼ်မႃႇၼႃႉပူၵ်းပႅၼ်ၵႃႈမီးၼၼ်ႉသေလႄႈၶျႃးၶဝ်တူၵ်းတီႈတႅမ်ႇတႃႉ။
တူၺ်းၶဝ်ၸိူဝ်းဢၼ်မႃႇၼႃႉပူၵ်းပႅၼ်ၵႃႈမီးၼၼ်ႉသေလႄႈယႃႉသရေႇၶဝ်တႃႉ။ တဵၵ်းယဵပ်ႇၵူၼ်းဢထမ်ႇမႃႉၼႂ်းတီႈဢၼ်ၶဝ်ယူႇၶဝ်သဝ်းၼၼ်ႉတႃႉ။
ဢဝ်ၶဝ်ၸိူဝ်းၼၼ်ႉတင်းမူတ်းၽင်ဝႆႉၵႃႈၼႂ်းလိၼ်လူၺ်ႈၵၼ်လႄႈ မတ်ႉၶဵၼ်းၼႃႈၶဝ်ဝႆႉလူၺ်ႈၵၼ်ၵႃႈၼႂ်းမိူင်းမရၼႃႉတႃႉ။
ၼင်ႇၼၼ်လႄႈၵဝ်တၵ်းပဵၼ်ၵေႃႉဢွၼ်တၢင်းသုတ်းႁႂ်ႈလႆႈယုၵ်ႉယွင်ႈမႂ်းလႄႈ တၵ်းႁပ်ႉတုင်းဢဝ်လွင်ႈတၢင်းဢၼ်ႁႅင်းမိုဝ်းၶႂႃမႂ်းပႄႉၼႅင်ႇဢွင်ႇမႅင်ႇၼၼ်ႉဢေႃႈ။
တူၺ်းၸူင် ဢၼ်ၵဝ်ၽၢၼ်ႇသၢင်းမၼ်းမိူၼ်ၸိူဝ်ႉၼင်ႇၵဝ်ၽၢၼ်ႇသၢင်းမႂ်းၼၼ်ႉလူး၊ မၼ်းၸၢင်ႈၵိၼ်ယိူဝ်ႈမိူၼ်ဝူဝ်းဢေႃႈ။
ၵူၺ်းၵႃႈ၊တၼ်းၶူဝ်းမၼ်းတႄႇယူႇၵႃႈတီႈ ဢႅဝ်မၼ်းလႄႈ ႁႅင်းမၼ်းတႄႇယူႇၵႃႈတီႈဢဵၼ်တွင်ႉ မၼ်းဢေႃႈ။
မၼ်းၸၢင်ႈႁႂ်ႈႁၢင်မၼ်းၵႅၼ်ႇၶႅင်မိူၼ်တူၼ်ႈမႆႉ ဢႃႇရိတ်ႉလႄႈ ဢဵၼ်ၶႃမၼ်းတင်းလၢႆသၢၼ်ၶႂႆႈၵၼ်ယူႇဢေႃႈ။
လုပ်ႇမၼ်းၸိူဝ်းၼၼ်ႉပဵၼ်ၸိူဝ်ႉၼင်ႇ ပွင်ႈတွင်းလိူင်လႄႈ ၶႃမၼ်းတင်းလၢႆပဵၼ်ၸိူဝ်ႉၼင်ႇ တုမ်လဵၵ်းဢေႃႈ။
မၼ်းပဵၼ်သတ်ႉတဝႃႇဢၼ်လီဢၢမ်းဢေႃးသေပိူၼ်ႈၼႂ်းသတ်းဢၼ်ၽြႃးပဵၼ်ၸဝ်ႈၽၢၼ်ႇသၢင်းႁဵတ်းပဵၼ်ၼၼ်ႉဢေႃႈ။ ၸဝ်ႈဢၼ်ၽၢၼ်ႇသၢင်းႁဵတ်းပဵၼ်မၼ်းၼၼ်ႉၵူၺ်းပႄႉၼႅင်ႇမၼ်းလႆႈဢေႃႈ။
မၼ်းၵိၼ်ယိူဝ်ႈဢၼ်ဢွၵ်ႇၵႃႈတီႈ သၼ်လွႆတႄးလွႆ၊ တီႈဢၼ်တူဝ်ထိူၼ်ႇတင်းလၢႆယွၵ်ႇယဝ်ႈၵၼ်လဵၼ်ႈၵၼ်ၼၼ်ႉဢေႃႈ။
မၼ်းၸၢင်ႈၼွၼ်းယူႇၵႃႈတႂ်ႈတူၼ်ႈမူဝ်လႂ်၊ ၵႃႈၼႂ်းပုင်ႇၶႅမ်ပုင်ႇလၢဝ်းလႂ်၊ၵႃႈတီႈဢၼ်ၼမ်ႉယမ်းဢွၵ်ႇသွၵ်ႉလႂ်ၼၼ်ႉဢေႃႈ။
ႁူမ်ႈငဝ်းတူၼ်ႈမူဝ်ၸိူဝ်းၼၼ်ႉႁူမ်ႇသုမ်ႇ ၵႃႈၼိူဝ်မၼ်းယူႇလႄႈ တူၼ်ႈမႆႉၶႆႉဢၼ်မီးၵႃႈတီႈႁိမ်းၼမ်ႉႁွင်ႈၼမ်ႉၵႄးၸိူဝ်းၼၼ်ႉလွမ်ႉႁွပ်ႈမၼ်းဝႆႉဢေႃႈ။
ပိၵ်ႉသမ်ႉၼမ်ႉႁွင်ႈလႆၼွင်းၸႅဝ်ႈၼႃႇသေၵေႃႈမၼ်းဢမ်ႇတူၵ်းၸႂ်၊ ပိၵ်ႉသမ်ႉၼမ်ႉ ယေႃးတၢၼ်ႇ၊ လုပ်ႇထူမ်ႈပုင်ႈသႂ်ႇသူပ်းမၼ်းသေၵေႃႈမၼ်းဢမ်ႇၵူဝ်ဢမ်ႇႁႄ။
ၽူႈလႂ်တၵ်းတိဢဝ်မၼ်းလႆႈလႄႈတႅင်း မၢၵ်ႇတႃမၼ်းမွတ်ႇလႆႈ၊ ၽူႈလႂ်တၵ်းဢဝ်ၶေႃလဵၵ်းၸီးၶူႈလင် မၼ်းပွင်ႇလႆႈ။
မႂ်းတၵ်းဢဝ်တင်းၶေႃမဵတ်းတိုတ်ႉၸၼ် ဢဝ်တူဝ်ငိူၵ်ႈလႄႈ ဢဝ်တင်းၸိူၵ်ႈမတ်ႉသူပ်းမၼ်းဝႆႉလႆႈႁိုဝ်း။
မႂ်းတၵ်းဢဝ်တင်းၸိူၵ်ႈသူၼ်ပိဝ်တီႈ ၶူႈလင်မၼ်းလႄႈ ဢဝ်တင်းတူင်ႇလဵၵ်းသွတ်ႇသႂ်ႇလုပ်ႇၵၢင်းမၼ်း လႆႈႁိုဝ်း။
မၼ်းၼၼ်ႉတၵ်းတွင်းပၢၼ်ႇတီႈမႂ်း ၼႃႇလူင်လၢင်လႄႈ တၵ်းဢဝ်တင်းၵႂၢမ်းဢူၼ်ႈၵႂၢမ်းဢွၼ်ႇ ၶျေႃးဝွၼ်းမႂ်းႁိုဝ်း။
မၼ်းတၵ်းႁဵတ်းသဵတ်ႈၸႃႇတီႈမႂ်းလႄႈ ဝႆႉၵတိတႃႇတေၵိုတ်ႉႁၢပ်ႇၼႃႈၵၢၼ်မႂ်း သေႇသေႇၼၼ်ႉႁိုဝ်း။
မႂ်းတၵ်းယွၵ်ႇယဝ်ႈလဵၼ်ႈၵၼ်တင်းမၼ်း မိူၼ်ၸိူဝ်ႉၼင်ႇဢၼ်၊ မႂ်းယွၵ်ႇယဝ်ႈလဵၼ်ႈၵၼ် တင်းၼူၵ်ႉၼၼ်ႉသေလႄႈ မတ်ႉၽုၵ်ႇမၼ်းဝႆႉႁႂ်ႈပဵၼ်ၶွင်လဵၼ်ႈပုၼ်ႈၼၢင်းသၢဝ်ဢွၼ်ႇမႂ်းတင်းလၢႆႁိုဝ်း။
ၵူၼ်းၵႃႉၵူၼ်းၶၢႆၶဝ်တေမႃးသဵတ်ႈၵႃႈသဵတ်ႈၶၼ်လႄႈသိုဝ်ႉဢဝ်မၼ်းၵႂႃႇႁိုဝ်း၊ ၶဝ်တၵ်းဢဝ်မၼ်းၵႂႃႇမႅင်ႇၵၼ်ၵႃႈၼႂ်းၸဝ်ႈၵုၼ်ႇၸဝ်ႈသိၼ်တင်းလၢႆႁိုဝ်း။
ဢဝ်ႁွၵ်ႇတႅင်းသႂ်ႇၼင်မၼ်းလႄႈဢဝ်သီ ဢၼ်တႅင်းပႃၼၼ်ႉ၊ တႅင်းသႂ်ႇၵွၵ်းႁူဝ်မၼ်းႁႂ်ႈထၢၼ်ႈပေႃးပွင်ႇ ၵူႈတီႈၵူႈလႅၼ်လႆႈႁိုဝ်း။
ဢဝ်မိုဝ်းမႂ်းတၢင်ႇသႂ်ႇၵႃႈၼိူဝ်မၼ်းလူး၊ တၢင်းဢၼ်ပဵၼ်သိုၵ်းပဵၼ်သိူဝ်ၵၼ် တင်းမၼ်းၼၼ်ႉ၊ ၵမ်းလိုၼ်းမႂ်းဢမ်ႇၸၢင်ႈႁဵတ်း ၸိူဝ်ႉၼင်ႇၼၼ်ထႅင်ႈ။
တၢင်းမုင်ႈမွင်းၵေႃႉဢၼ်တေတိုၵ်းတေႃးမၼ်းၼၼ်ႉပဵၼ်ဢၼ်လၢႆလၢႆၵူၺ်းလႄႈ၊ လွင်ႈမၼ်းၸမ်ႉ၊ၵေႃႉဢၼ်ႁၼ်ငိူၵ်ႈ၊ ၼၼ်ႉတၵ်းလူမ်ႉတူၵ်းၵႃႈၼိူဝ်လိၼ်ၵႂႃႇဢေႃႈ။
ဢမ်ႇမီးၽူႈလႂ်ႁၢဝ်ႈၵျၢမ်းႁတ်းတႃႉ၊ ႁတ်းတိုၵ်းယူင်းမၼ်း၊ ၽူႈလႂ်သေၵေႃႉသေၵူၼ်းဢမ်ႇႁတ်း ၸုၵ်းၶၢမ်ႇၽၢႆႇၼႃႈၵဝ်လႆႈ။
ၽူႈလႂ်ယၢမ်ႈတွၼ်ႉႁဵတ်းၵျေးၸူးတီႈၵဝ်ႁႂ်ႈၵဝ် တွပ်ႇတႅၼ်းၵျေးၸူးတီႈမၼ်း၊ ၵႃႈဢၼ်မီးၵႃႈတႂ်ႈၽႃႉၵၢင်ႁၢဝ်တင်းမူတ်း ၸိူဝ်းၼႆႉပဵၼ်ဢုၵ်ႉၸႃႇၵဝ်ဢေႃႈ။
ၵဝ်တၵ်းလၢတ်ႈၼႄလွင်ႈငိူၵ်ႈ ၊လွင်ႈတိၼ်မၼ်း၊ လွင်ႈတူဝ်ဢၼ်လီဢၢမ်းမၼ်း၊လွင်ႈႁႅင်းမၼ်းၼၼ်ႉတီႈမႂ်းဢေႃႈ။
ၽူႈလႂ်ဢမ်ႇတၢတ်ႈၼိူင်ႇႁႂ်ႈလႆႈၽုၺ်ႇပိုတ်ႇ ၶူဝ်းၼုင်ႈထၢပ်ႈၼွၵ်ႈမၼ်းလႆႈ၊ ၽူႈလႂ်တၵ်းတႅင်းသႂ်ႇသိူဝ်ႈမၼ်းဢၼ်ပဵၼ်၊ သွင်ၸၼ်ႉသွင်ထၢပ်ႈၼၼ်ႉ ပွင်ႇလူင်ႉၵႂႃႇလႆႈ။
ၽူႈလႂ်တၵ်းငၢၵ်ႈဢႃႈပၢၵ်ႇဢႃႈၵၢင်းမၼ်းလႆႈ၊ ထႅဝ်ၶဵဝ်ႈမၼ်းၸိူဝ်းၼၼ်ႉပဵၼ်ဢၼ် လီၵူဝ်လီႁႄၼႃႇဢေႃႈ။
ၵဵတ်းၼိူဝ်ၵွင်လင်မၼ်းၸိူဝ်းၼၼ်ႉပဵၼ်ထႅဝ်ပဵၼ်ထႅဝ်လႄႈ ၵိူပ်ႇၼိုင်ႈလႄႈၵိူပ်ႇၼိုင်ႈသွၼ်ႉၸပ်းၵၼ်ဝႆႉမိူၼ်ၸိူဝ်ႉၼင်ႇတွၵ်ႇတၼ်းသိၵ်ႈၼၼ်ႉဢေႃႈ။
ၵိူပ်ႇၸိူဝ်းၼၼ်ႉသွၼ်ႉၸပ်းၵၼ်ထၢၼ်ႈပေႃး လူမ်းဢမ်ႇၶဝ်ႈလႆႈ၊
ၵိူပ်ႇဢၼ်ၼိုင်ႈလႄႈဢၼ်ၼိုင်ႈၸပ်းၵၼ်ဝႆႉ၊ ထၢၼ်ႈပေႃးဢမ်ႇၵွၵ်းၽၢတ်ႇၵၼ်လႆႈ။
မိူဝ်ႈဢၼ်မၼ်းၶီႈၸၢမ်ၸိုင်၊ဢၼ်လႅင်း လုၵ်ႉႁိူဝ်ႈလႄႈ မၢၵ်ႇတႃမၼ်းပဵၼ်ၸိူဝ်ႉၼင်ႇသၢႆဝၼ်း ဢၼ်ဢွၵ်ႇမႃးၼၼ်ႉဢေႃႈ။
ပိဝ်ၽႆးဢွၵ်ႇသေၵႃႈၼႂ်းသူပ်းမၼ်းလႄႈ ၶႆႇၽႆးတင်းလၢႆၽူင်ႉပိဝ်သဵၼ်ဢွၵ်ႇဢေႃႈ။
ၵႂၼ်းၽႆးတိုင်ႈဢွၵ်ႇသေၵႃႈၼႂ်းၶူႈလင်မၼ်း၊ မိူၼ်ၸိူဝ်ႉၼင်ႇမေႃႈၶၢင်မႆႈၽႆးလႄႈ လိူတ်ႇယူႇၼၼ်ႉဢေႃႈ။
လူမ်းထူၺ်ႈၸႂ်မၼ်းၼၼ်ႉၸၢင်ႈႁႂ်ႈ ထၢၼ်ႇၽႆးလုၵ်ႉလႄႈ ပိဝ်ၽႆးၸၢင်ႈဢွၵ်ႇသေၵႃႈၼႂ်းသူပ်းမၼ်းဢေႃႈ။
လမ်းၶေႃးမၼ်းမီးႁႅင်းဢၼ်ယႂ်ႇၼႃႇလႄႈ ၶဝ်ၸိူဝ်းဢၼ်ထူပ်းႁၼ်မၼ်းၼၼ်ႉ ၵူဝ်ႁႄၼႃႇဢေႃႈ။
ၸၼ်ႉၼိူဝ်ႉၸၼ်ႉၼင်မၼ်းၵွပ်ႈၸပ်းၵၼ်ယူႇလႄႈ ၵႃႈၼိူဝ်တူဝ်မၼ်းၵႅၼ်ႇၶႅင်မၼ်ႈၶိူင်ႇၼႃႇ၊ ထၢၼ်ႈပေႃးဢမ်ႇၶၢႆႉဢမ်ႇၼိုင်လႆႈဢေႃႈ။
ႁူဝ်ၸႂ်မၼ်းၵႅၼ်ႇၶႅင်ၸိူဝ်ႉၼင်ႇမၢၵ်ႇႁိၼ်၊ ၵႅၼ်ႇၶႅင်ၸိူဝ်ႉၼင်ႇမၢၵ်ႇႁိၼ်လူၺ် ၵၢႆတႂ်ႈၼၼ်ႉဢေႃႈ။
ယၢမ်းမိူဝ်ႈဢၼ်မၼ်းလုၵ်ႉၶိုၼ်းၼၼ်ႉၸိုင်၊ၵူၼ်းႁႅင်းယႂ်ႇၶဝ် ယင်းလီၵူဝ်လီႁႄလႄႈ ပဵၼ်ၸိူဝ်ႉၼင်ႇၵူၼ်းယွင်ႇၵူၼ်းမႃႈၵႂႃႇ ၵွပ်ႈပိူဝ်ႈဢၼ်တူၵ်းၸႂ်ႁႅင်းၼႃႇ လူင်လၢင်ၼၼ်ႉဢေႃႈ။
ဢဝ်တင်းလၢပ်ႇတင်းလႅဝ်းတိုၵ်းတေႃးမၼ်းၵေႃႈဢမ်ႇၶဝ်ႈဢမ်ႇမၢတ်ႇမၼ်း၊ ႁွၵ်ႇလႂ်၊ပိုၼ်လႂ်၊ႁွၵ်ႇဢၼ်ပိုၼ်သႂ်ႇလႂ် ဢမ်ႇၸၢင်ႈသဵပ်ႇတႅင်းမၼ်းလႆႈ။
ပုၼ်ႈတႃႈမၼ်းၼၼ်ႉလဵၵ်းၸိုင်၊ပဵၼ်မိူၼ်ၸိူဝ်ႉၼင်ႇၽိူင်းၵူၺ်းလႄႈ တွင်းလိူင်ပဵၼ်မိူၼ်ၸိူဝ်ႉၼင်ႇမႆႉဢု မႆႉၽင်ႉၼၼ်ႉဢေႃႈ။
ပိုၼ်ၵၢင်ႇဢမ်ႇႁႂ်ႈမၼ်းၼီပၢႆႈလႆႈ၊ မၢၵ်ႇႁိၼ်ဢၼ်ဢဝ်တင်းၵူင်ၵွၼ် ပိုတ်းယိုဝ်းၼၼ်ႉ၊ ပဵၼ်ၸိူဝ်ႉၼင်ႇမုၼ်ႈယိူဝ်ႈမုၼ်ႈယႃႈ တီႈမၼ်းဢေႃႈ။
ပုၼ်ႈမၼ်းၼၼ်ႉၶွၼ်ႉလူင်တင်းလၢႆၵေႃႈ ပဵၼ်ၸိူဝ်ႉၼင်ႇၵႅပ်ႇလႄႈ မၼ်းၸၢင်ႈၶူဝ်တၢင်းဢၼ်ဢဝ်ႁွၵ်ႇ ငႃသႂ်ႇမၼ်းၼၼ်ႉဢေႃႈ။
ၵဵတ်းဢၼ်မီးၵႃႈတီႈႁၢဝ်းတွင်ႉမၼ်းၵေႃႈ ၽၢႆမိူၼ်ၽၢၵ်ႇမေႃႈလႄႈ ၽၵ်ႉၽႃႇၵူမ်ႇၵႂႃႇမိူၼ်ႁွႆးၽိူဝ်ဢေႃႈ။
မၼ်းၸၢင်ႈၶူၼ်းၼမ်ႉပၢင်ႇလၢႆႇႁႂ်ႈပဵၼ် မိူၼ်ၸိူဝ်ႉၼင်ႇၼမ်ႉၽူတ်ႉလႄႈ ၸၢင်ႈႁႂ်ႈၼမ်ႉသမ်ႇမုၵ်ႈတြႃႇပုၼ်းဢွၵ်ႇပူၵ်ႇ မႃးဢေႃႈ။
မိူဝ်ႈဢၼ်မၼ်းၽႃႇလတ်းၼမ်ႉၵႂႃႇၼၼ်ႉၸိုင်၊ မၼ်းၸၢင်ႈႁႂ်ႈသဵၼ်ႈတၢင်းမၼ်းပဵၼ်ပူၵ်ႇ ၼမ်ႉဢၼ်ၽိူၵ်ႇဢၼ်ၶၢဝ်လႄႈ ႁိူဝ်ႈမၢပ်ႈယူႇၽၢႆႇတၢင်းလင်မၼ်းၼၼ်ႉဢေႃႈ။
ၵႃႈၼိူဝ်လိၼ်မိူင်းၼႆႉဢမ်ႇမီးသတ်ႉတဝႃႇဢၼ် မိူၼ်ၵၼ်တင်းမၼ်း၊ ပဵၼ်သတ်ႉတဝႃႇဢၼ်ဢမ်ႇမီးတၢင်းဢၼ် ၵူဝ်ဢၼ်ႁႄၼၼ်ႉဢေႃႈ။
မၼ်းၸၢင်ႈႁဵတ်းဢမ်ႇပေႃးၼင်ႇႁိုဝ်တီႈတူဝ်သတ်းဢၼ်မႃႇၼႃႉပူၵ်းပႅၼ်တင်းလၢႆလႄႈ မၼ်းပဵၼ်ၶုၼ်ႁေႃၶမ်းၵႃႈၼိူဝ်တူဝ်သတ်းတရိၵ်ႈသၢၼ်ႇၵႃႈမီးၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ယေႃးၽႃႉ၊ ၶိုၼ်းလဝ်ႈလၢတ်ႈတီႈ ထႃႇဝရႃႉၽြႃး၊ လႄႈဝႃႈၸမ်ႉ၊
“ၶႃႈၸဝ်ႈႁုလွင်ႈတၢင်းဢၼ်ၸဝ်ႈႁဝ်း တၢတ်ႈၼိူင်ႇလႆႈၵူႈၸိူဝ်ႉၵူႈပိူင်၊ ဢိၵ်ႇတင်းလွင်ႈဢၼ်ၽူႈလႂ်ဢမ်ႇႁၢမ်ႈတၢပ်ႈ ႁႄႉၶႅၼ်တၢင်းၵျၢမ်ႇတၢင်းပွင်ၸဝ်ႈႁဝ်း လႆႈၼၼ်ႉယူႇတီႈၶႃႈဢေႃႈ။
ၸဝ်ႈႁဝ်းထၢမ်လႄႈဝႃႈ၊ ‘ၵေႃႉဢၼ်ယင်း ဢမ်ႇမီးပိင်ႇၺႃႇလႄႈ ႁႂ်ႈတၢင်းၵျၢမ်ႇတၢင်းပွင်ၵဝ်မိုတ်ႈလပ်းသိင်ႇ ၵႂႃႇၼၼ်ႉၸမ်ႉ၊ ပဵၼ်ၽူႈလႂ်၊’ ဝႃႈၼႆတီႈၶႃႈဢေႃႈ။ ၶႃႈၸဝ်ႈလႆႈလၢတ်ႈမႅၼ်ႈလွင်ႈတၢင်း ဢၼ်ဢမ်ႇပွင်ႇၸႂ်၊ လွင်ႈတၢင်းဢၼ်လီဢၢမ်းဢၼ် ပူၼ်ႉလိူဝ်ၶႃႈၸဝ်ႈ၊ ဢၼ်ၶႃႈၸဝ်ႈဢမ်ႇႁုၸိူဝ်းၼၼ်ႉတီႈၶႃႈယဝ်ႉ။
ၸဝ်ႈႁဝ်းမီးဢမိင်ႉလႄႈဝႃႈ၊ ‘ထွမ်ႇတႃႉ။ ၵဝ်တၵ်းလၢတ်ႈဢေႃႈ။ ၵဝ်တၵ်းထၢမ်မႂ်းဢေႃႈ။ မႂ်းၵႄႈလိတ်ႈတႃႉ’ ဝႃႈၼႆတီႈၶႃႈဢေႃႈ။
မိူဝ်ႈၵွၼ်ႇဢွၼ်ၼႆႉၼၼ်ႉၶႃႈၸဝ်ႈၵူၺ်းယၢမ်ႈငိၼ်းလွင်ႈၸဝ်ႈႁဝ်းတီႈၶႃႈဢေႃႈ။ တေႃႈလဵဝ်ၼႆႉၸမ်ႉ၊မၢၵ်ႇတႃၶႃႈၸဝ်ႈ လႆႈႁၼ်ၸဝ်ႈႁဝ်းတီႈၶႃႈယဝ်ႉ။
ၵွပ်ႈပိူဝ်ႈၼႆလႄႈၶႃႈၸဝ်ႈဢူၵ်းဢၢႆလူၺ်ႈၵႂၢမ်းဢၼ်ၶႃႈၸဝ်ႈလၢတ်ႈယဝ်ႉၸိူဝ်းၼၼ်ႉလႄႈ ၼင်ႈၵႃႈၼိူဝ်မုၼ်ႈလိၼ်ဢိၵ်ႇတင်းၵႃႈၼိူဝ်တဝ်ႈ လူၺ်ႈတၢင်းဢၼ်ၶုၵ်းၸႂ်လႆႈမႆႈၸႂ် တၢင်းၽိတ်းၶႃႈၸဝ်ႈတီႈၶႃႈဢေႃႈ၊” ဝႃႈၼင်ႇၼႆဢေႃႈ။
လိုၼ်းသေ ထႃႇဝရႃႉၽြႃး၊ မီးဢမိင်ႉတီႈ ယေႃးၽႃႉ၊ ယဝ်ႉတူဝ်ႈယဝ်ႉၼၼ်ႉ၊မၼ်းၸဝ်ႈမီးဢမိင်ႉတီႈ ဢေးလိၽတ်ႉ၊ ၵူၼ်းဝဵင်း တေႇမၼ်ႇ၊ လႄႈဝႃႈ၊ “ၵဝ်ၸႂ်မႆႈၶႂ်ႈၸႃႉတီႈမႂ်း၊ဢိၵ်ႇတင်းၵေႃႉသႄႈမႂ်းသွင်ၵေႃႉၼၼ်ႉဢေႃႈ။ လွင်ႈမၼ်းၸမ်ႉ၊သူဢမ်ႇလၢတ်ႈလွင်ႈၵဝ်ဢၼ်ၸိုဝ်ႈဢၼ်ၸႂ်ႈမိူၼ်ၸိူဝ်ႉၼင်ႇဢၼ်ၶႃႈၵဝ် ယေႃးၽႃႉ၊ လၢတ်ႈၼၼ်ႉ။-
ပိူဝ်ႈၼႆလႄႈဢွၼ်ၵၼ်ဢဝ်ဝူဝ်းပေႃႈၸဵတ်းတူဝ်တင်းသူဝ်းပေႃႈၸဵတ်းတူဝ်သေလႄႈၵႂႃႇၸူးတီႈၶႃႈၵဝ် ယေႃးၽႃႉ၊ ႁႂ်ႈမၼ်းဢဝ်ၸိူဝ်းၼၼ်ႉသၢၵ်ႈၵၢပ်ႈတၢင်းလူႇဢၼ်တုတ်ႇၽႆးပုၼ်ႈသူတႃႉ။ ၶႃႈၵဝ် ယေႃးၽႃႉ၊ တၵ်းသူးတွင်းပုၼ်ႈသူဢေႃႈ။ ၵဝ်တၵ်းထွမ်ႇဢဝ်ၵႂၢမ်းသူးတွင်းမၼ်းလႄႈဢမ်ႇၸီႇယၢင်ႇၸွမ်းၼင်ႇဢပျတ်ႈသူၼၼ်ႉဢေႃႈ။ လွင်ႈမၼ်းၸမ်ႉ၊သူဢမ်ႇလၢတ်ႈလွင်ႈၵဝ်ဢၼ်ၸိုဝ်ႈဢၼ်ၸႂ်ႈမိူၼ်ၸိူဝ်ႉၼင်ႇဢၼ်မၼ်းလၢတ်ႈၼၼ်ႉလူင်ပႄႇ၊” ဝႃႈၼင်ႇၼႆဢေႃႈ။
ဢေးလိၽတ်ႉ၊ပိလတတ်ႉ၊ တင်း ၸေႃႇၽႃႇ၊ ၵေႃႈႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉတီႈၶဝ်ၼၼ်ႉလႄႈ၊ ထႃႇဝရႃႉၽြႃး၊ ၵေႃႈထွမ်ႇဢဝ်ၵႂၢမ်းသူးတွင်း ယေႃးၽႃႉ၊ ဢေႃႈ။
မိူဝ်ႈၼၼ်ႉ၊ဝၢႆးသေဢၼ် ယေႃးၽႃႉ၊ သူးတွင်းပုၼ်ႈၵေႃႉသႄႈမၼ်းသၢမ်ၵေႃႉၼၼ်ႉယဝ်ႉၸိုင်၊ ထႃႇဝရႃႉၽြႃး၊ ၶိုၼ်းပၼ်ႁႂ်ႈမၼ်းမီးဢုၵ်ႉၸႃႇၼမ်ၼႃႇသေဢၼ်မၼ်းမီးမိူဝ်ႈဢွၼ်တၢင်းၼၼ်ႉသွင်ပုၼ်ႈဢေႃႈ။-
ၼင်ႇၼၼ်လႄႈပီႈဢၢႆႈမၼ်း၊ၼွင်ႉၸၢႆးမၼ်း၊ပီႈၼၢင်းမၼ်း၊ၼွင်ႉယိင်းမၼ်း၊ၵႃႈမီးတင်းသဵင်ႈတင်းလူင်၊ဢိၵ်ႇတင်းၶဝ်ၸိူဝ်းဢၼ်ႁုၸၵ်းမိုတ်ႈၵိုဝ်းမၼ်းမိူဝ်ႈၵွၼ်ႇဢွၼ်တၢင်းၵႃႈမီးၸိူဝ်းၼၼ်ႉဢွၼ်ၵၼ်မႃးသူႇမႃးၸႂ်းမၼ်းသေလႄႈၵိၼ်ၶူပ်းလူၺ်ႈၵၼ်တင်းမၼ်းၵႃႈတီႈႁိူၼ်းမၼ်းဢေႃႈ။ ၶဝ်ဢွၼ်ၵၼ်ၼႄပျႃးၸႂ်မႅတ်ႈတႃႇတီႈမၼ်းလႄႈဢွၼ်ၵၼ်လၢတ်ႈၵႂၢမ်းပၼ်ဢဵၼ်ပၼ်ႁႅင်းတီႈမၼ်းလူၺ်ႈလွင်ႈတုၵ်ႉၶႃႉတၢင်းၽၢၼ်ဢၼ် ထႃႇဝရႃႉၽြႃး၊ ႁႂ်ႈတူၵ်းႁွတ်ႈထိုင်ၵႃႈၼိူဝ်မၼ်းသေယဝ်ႉ၊ဢွၼ်ၵၼ်ပၼ်ငိုၼ်းယေႈၵေႃႉယေႈၶႅပ်း၊ဢိၵ်ႇတင်းမွင်းၵူၺ်းၶမ်းယေႈၵေႃႉယေႈဢၼ်တီႈမၼ်းဢေႃႈ။
ၼင်ႇၼၼ်လႄႈ ထႃႇဝရႃႉၽြႃး၊ ပၼ်တၢင်းလီဢၼ်ယဵင်ႈၶႅၼ်းၼမ်ၼႃႇသေဢၼ်မၼ်းမီးၵမ်းဢွၼ်တၢင်းၼၼ်ႉသေယဝ်ႉ၊မၼ်းမၢၵ်ႈမီးသူဝ်းၼိုင်ႈမိုၼ်ႇပၢႆသီႇႁဵင်၊ၵလႃႇဢုၵ်ႈႁူၵ်းႁဵင်၊ဝူဝ်းႁဵင်ၵူႈ၊မႃႉလီႈမႄႈႁဵင်ၼိုင်ႈဢေႃႈ။-
မၼ်းသမ်ႉလႆႈထႅင်ႈလုၵ်ႈၸၢႆးၸဵတ်းၵေႃႉတင်းလုၵ်ႈယိင်းသၢမ်ၵေႃႉဢေႃႈ။-
မၼ်းႁွင်ႉႁဵၵ်ႈၸိုဝ်ႈလုၵ်ႈယိင်းလူင်မၼ်း ယေႇမိမႃႉ၊ လုၵ်ႈယိင်းၵၢင်မၼ်း ၵေႇၸိ၊ တင်းလုၵ်ႈယိင်းဢွၼ်ႇမၼ်းၸိုဝ်ႈဝႃႈ၊ ၵေႇရိၼ်ႇႁပ်ႉပုၵ်ႉ၊ ဢေႃႈ။-
ၵႃႈၼႂ်းမိူင်းတင်းမိူင်းၼၼ်ႉမႄႈယိင်းဢၼ်ႁၢင်ႈလီမိူၼ်လုၵ်ႈယိင်း ယေႃးၽႃႉ၊ ၸိူဝ်းၼၼ်ႉဢမ်ႇမီးသေၵေႃႉသေၵူၼ်း။ ပေႃႈၶဝ်ၽႄဢမူၺ်ႇလႄႈမႅင်ႇပၼ်ဢုၵ်ႉၸႃႇတီႈၶဝ်ပဵင်းတၢၼ်ႇၵၼ်တင်းပီႈၸၢႆးၼွင်ႉၸၢႆးၶဝ်ၼၼ်ႉဢေႃႈ။
လိုၼ်းသေလွင်ႈတၢင်းၸိူဝ်းၼၼ်ႉ ယေႃးၽႃႉ၊ ဢသၢၵ်ႈလိပ်းထႅင်ႈပၢၵ်ႇသီႇသိပ်းပီလႄႈလႆႈႁၼ်လၢၼ်မၼ်းလဵၼ်မၼ်းတေႃႇထိုင်ႁွတ်ႈသီႇသိုပ်ႇဢေႃႈ။-
လိုၼ်းၼၼ်ႉ၊မၼ်းထဝ်ႈၵႄႇၼႃႇယဝ်ႉလႄႈလႆႈသဵင်ႈဢသၢၵ်ႈၵႂႃႇသေဢေႃႈ။ ၵျၢမ်းပိုၼ်းယေႃးၽႃႉယဝ်ႉယဝ်ႉဢေႃႈ။
ၵေႃႉဢၼ်ပႄႇပႅတ်ႈထဵင်ပႅတ်ႈတၢင်းၵျၢမ်ႇၶဝ်ၸိူဝ်းဢၼ်ဢမ်ႇတြႃးတိုၵ်းယူင်းလႄႈ ဢမ်ႇၵႂႃႇဢမ်ႇၸွမ်းၵႃႈၼႂ်းသဵၼ်ႈတၢင်းၶဝ်ၸိူဝ်းဢၼ်ႁၢႆႉမိူၵ်ႈ၊ ဢမ်ႇႁဵတ်းၵေႃႉသႄႈလူၺ်ႈၵၼ်တင်းၶဝ်ၸိူဝ်းဢၼ်သႄႉသွမ်းၽြႃးပဵၼ်ၸဝ်ႈသေယဝ်ႉ။
မၼ်းၸၢင်ႈမူၼ်ႈပျေႃႇၼႂ်းတၢင်းဢၼ်ၵမ်ၵျၢင်ႉတြႃး ထႃႇဝရႃႉၽြႃး၊ လႄႈ ၸၢင်ႈသွၼ်ဢၢၼ်ႇၵိုတ်ႉဢဝ်တြႃးၸဝ်ႈယူႇၵူႈဝၼ်းၵူႈၶိုၼ်းၼၼ်ႉမီးမၢင်ႇၵလႃႇဢေႃႈ။
မၼ်းၼၼ်ႉပဵၼ်မိူၼ်ၼင်ႇတူၼ်ႈမႆႉဢၼ်ဢွၵ်ႇၵႃႈႁိမ်းၼမ်ႉႁွင်ႈၼမ်ႉၵႄး၊ ၸၢင်ႈမၢၵ်ႇမၢၵ်ႇမၼ်းမႃးၸွမ်းၶိင်ႇၸွမ်းၶႃႇမၼ်းလႄႈမႂ်မၼ်းဢမ်ႇၸၢင်ႈႁဵဝ်ႇၵႂႃႇၼၼ်ႉဢေႃႈ။ ၵႃႈဢၼ်မၼ်းႁဵတ်းၼၼ်ႉၸၢင်ႈလႆႈလီလႆႈပဵၼ်ဢေႃႈ။
ၶဝ်ၸိူဝ်းဢၼ်ႁၢႆႉမိူၵ်ႈၼၼ်ႉၸမ်ႉ၊ဢမ်ႇပဵၼ်ၸိူဝ်ႉၼင်ႇၼၼ်၊ ပဵၼ်မိူၼ်ၼင်ႇၵႅပ်ႇဢၼ်ပိဝ်ၵႂႃႇၵႃႈၼႂ်းလူမ်းၼၼ်ႉဢေႃႈ။
ၶဝ်ၸိူဝ်းဢၼ်ဢမ်ႇတြႃးၼၼ်ႉတၵ်းလႆႈၶၢမ်ႇတၢမ်ႇဢၼ်ၽြႃးပဵၼ်ၸဝ်ႈ၊ ၸီႇယၢင်ႇပၼ်တၢမ်ႇၼၼ်ႉသေလႄႈ၊ လႆႈၶၢမ်ႇၽႄဢွၵ်ႇသေၵႃႈၼႂ်းမူႇၵူၼ်း ၽြႃးပဵၼ်ၸဝ်ႈဢေႃႈ။
ၶဝ်ၸိူဝ်းဢၼ်သိုဝ်ႈတေႃႇၼၼ်ႉၸိုင်၊ လႆႈၶၢမ်ႇဢဝ်တၢင်းဢၼ် ထႃႇဝရႃႉၽြႃး၊ ၵႅတ်ႇၶႄႁႄႉၵင်ႈလႄႈဢွၼ်သူင်ႇဢေႃႈ။ ၶဝ်ၸိူဝ်းဢၼ်ႁၢႆႉမိူၵ်ႈၸမ်ႉ၊တၵ်းႁွတ်ႈထိုင်တၢင်းလုတၢင်းလႅဝ်ဢေႃႈ။
ၵွပ်ႈသင်ၵူၼ်းမဵဝ်းတင်းလၢႆၵျၢမ်ႇလုၵ်ႉၽိုၼ်ႉ။ ၵွပ်ႈသင်ၵူၼ်းတင်းလၢႆၵျၢမ်ႇပွင်ဢၼ်လၢႆလၢႆ၊ဢမ်ႇပွင်ႇလွင်ႈၵႃႈသင်ၼၼ်ႉၼင်ႇႁိုဝ်။
ၶုၼ်ႁေႃၶမ်းလေႃးၵီႇတင်းလၢႆႁဵတ်းၶတ်းလႄႈ၊ မူးမၢတ်ႈၽွင်းမိူင်းတင်းလၢႆၽွမ်ႉၵၼ်ၶတ်းၶႅင်ႁႅင်းတႃႉ ထႃႇဝရႃႉၽြႃး။ ဢိၵ်ႇတင်းၸဝ်ႈဢၼ်မၼ်းၸဝ်ႈလိူၵ်ႈဢဝ်ဝႆႉၼၼ်ႉလႄႈဝႃႈ။
“ဢွၼ်ၵၼ်ႁဵတ်းႁႂ်ႈတူဝ်ၸဝ်ႈၵဝ်ႇလွတ်ႈဢွၵ်ႇ သေၵႃႈၼႂ်းတၢင်းဢၼ်ၶဝ်ဢုပ်ႉပိူင်ႇၼၼ်ႉတႃႉႁဝ်း။ ဢွၼ်ၵၼ်ပႄႇပႅတ်ႈတၢင်းဢၼ်ၶဝ်ဢုပ်ႉၶျုၵ်ႈႁဝ်းဝႆႉၼၼ်ႉတႃႉႁဝ်း၊” ဝႃႈၼင်ႇၼႆဢေႃႈ။
ၸဝ်ႈၽြႃးဢၼ်ၼင်ႈယူႇၵႃႈၼိူဝ်ၽုင်ႇၵၢင်ႁၢဝ်ၼၼ်ႉယုမ်ႉၶူဝ်သေလႄႈ မၼ်းၸဝ်ႈႁဵတ်းပျၢၵ်ႈသႄႉသွမ်းၶဝ်ဢေႃႈ။
မၼ်းၸဝ်ႈၵေႃႈၸႂ်မႆႈၶႂ်ႈၸႃႉသေလႄႈ ပၼ်သတိတီႈၶဝ်၊ဢွၵ်ႇတေႃးသႃႉသေလႄႈႁဵတ်းၶဵၼ်တီႈၶဝ်လႄႈလၢတ်ႈဝႃႈ၊
“ၵဝ်လႆႈယုၵ်ႉတၢင်ႇၶုၼ်ႁေႃၶမ်းၵဝ်ဝႆႉ ၵႃႈၼိူဝ် ၸိဢုၼ်ႇ၊ လွႆမူတ်းၸၢင်ႇ ၵဝ်ၼၼ်ႉယဝ်ႉ၊”
ၵဝ်တၵ်းမွၵ်ႇလၢတ်ႈၼႄၵႃႈဢၼ် ထႃႇဝရႃႉၽြႃး၊ မီးဢမိင်ႉဝႆႉၼၼ်ႉဢေႃႈ။ မၼ်းၸဝ်ႈလၢတ်ႈတီႈၵဝ်လႄႈဝႃႈ၊ “မႂ်းပဵၼ်လုၵ်ႈၸၢႆးၵဝ်ဢေႃႈ။ ဝၼ်းမိူဝ်ႈၼႆႉၵဝ်လႆႈပဵၼ်ပေႃႈမႂ်းယဝ်ႉ။
ယွၼ်းတႃႉ။ ၵဝ်တၵ်းဢဝ်ၵူၼ်းၵူႈၸိူဝ်ႉၵူႈမဵဝ်းဢၢပ်ႈပၼ်မႂ်းဢေႃႈ။ ၵမ်ႇၽႃႇလိၼ်မိူင်းၵေႃႈၵဝ်တၵ်းပၼ်ႁႂ်ႈမႂ်းပိူင်ႇဢဝ်တင်းမူတ်းဢေႃႈ။
မႂ်းတၵ်းဢဝ်ၶဝ်တႅၵ်ႇလႅဝ်လူၺ်ႈၵၼ်းႁွၵ်ႇလဵၵ်းလႄႈတူပ်းတႅၵ်ႇပဵၼ်ၽၢၵ်ႇပဵၼ်ၽႅၵ်ႇပႅတ်ႈ၊ မိူၼ်ၸိူဝ်ႉၼင်ႇဢၼ်ဢဝ်မေႃႈလိၼ်တႅၵ်ႇလႅဝ်ပႅတ်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈၶုၼ်ႁေႃၶမ်းၶဝ်႟။ ထွမ်ႇဢဝ်တၢင်းဢၼ်ပၼ်သတိၼႆႉတႃႉ။ ၶုၼ်လေႃးၵီႇၶဝ်႟။ ဢွၼ်ၵၼ်ၶၢမ်ႇဢဝ်တၢင်းဢၼ်သင်ႇသွၼ်သုင်းမႃႉတႃႉ။
ဢွၼ်ၵၼ်မီးၸႂ်ဢၼ်ၵူဝ်ႁႄသေလႄႈၵိုတ်ႉႁၢပ်ႇၼႃႈၵၢၼ် ထႃႇဝရႃႉၽြႃး၊ တႃႉ။
ဢွၼ်ၵၼ်မီးတၢင်းဢၼ်သၼ်ႇဢၼ်ဝႆသေလႄႈၵူမ်ႈၵွမ်းၸူးမၼ်းၸဝ်ႈတႃႉ။ ပေႃးဢမ်ႇၼၼ်၊တၵ်းၸဵဝ်းၸီႇယၢင်ႇပၼ်တၢမ်ႇဢပျတ်ႈၽႂ်းၼႃႇလႄႈ သူတၵ်းၶိုၵ်းၶၢၵ်းႁွတ်ႈထိုင်တၢင်းလုတၢင်းလႅဝ်ဢေႃႈ။ ၶဝ်ၸိူဝ်းဢၼ်ၵႂႃႇၸူးမၼ်းၸဝ်ႈ၊ ႁႂ်ႈလႆႈၶၢမ်ႇဢဝ်တၢင်းဢၼ်မၼ်းၸဝ်ႈၵႅတ်ႇၶႄႁႄႉၵင်ႈပၼ် ၵႃႈမီးတင်းသဵင်ႈတင်းလူင်ၼၼ်ႉ မီးမၢင်ႇၵလႃႇဢေႃႈ။
ထႃႇဝရႃႉၽြႃး၊ တီႈၶႃႈ။ တီႈၶႃႈၸဝ်ႈၼႆႉမီးရၢၼ်ႇသူႇၼမ်ၼႃႇလူင်လၢင်ဢေႃႈ။ မီးၵူၼ်းၼမ်ၼႃႇလုၵ်ႉၽိုၼ်ႉယူႇၽၢႆႇၼိုင်ႈတင်းၶႃႈၸဝ်ႈဢေႃႈ။
ၶဝ်လၢတ်ႈၸႃလွင်ႈၶႃႈၸဝ်ႈလႄႈဝႃႈ၊ “ၽြႃးပဵၼ်ၸဝ်ႈတၵ်းဢမ်ႇၸွႆႈထႅမ်မၼ်း၊” ဝႃႈၼင်ႇၼႆတီႈၶႃႈဢေႃႈ။
ၵူၺ်းၵႃႈ၊ ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းပဵၼ်ဢၼ်ႁႄႉဢၼ်ၵင်ႈၶႃႈၸဝ်ႈလႄႈ ၸဝ်ႈႁဝ်းႁႂ်ႈၶႃႈၸဝ်ႈလႆႈပႄႉၼႅင်ႇသေယဝ်ႉ၊ ပၼ်ႁႂ်ႈႁူဝ်ၸႂ်ၶႃႈၸဝ်ႈၼိမ်လီဢေႃႈ။
ၵဝ်ႁွင်ႉၵၢဝ်ႇတီႈ ထႃႇဝရႃႉၽြႃး၊ ပုၼ်ႈတၢင်းၸွႆႈတၢင်းထႅမ်လႄႈ မၼ်းၸဝ်ႈယူႇၵႃႈၼိူဝ်လွႆၸဝ်ႈဢၼ်မူတ်းၸၢင်ႇၼၼ်ႉထွမ်ႇယူႇဢေႃႈ။
ၵဝ်လႆႈၼွၼ်းလီၼွၼ်းဝၢၼ်တင်းၶိုၼ်းၵွပ်ႈပိူဝ်ႈမၼ်းၸဝ်ႈၵႅတ်ႇၶႄႁႄႉၵင်ႈၵဝ်ဢေႃႈ။
ၵဝ်ယင်းဢမ်ႇလႆႈၵူဝ်ၵူၼ်းမိုၼ်ႇၵူၼ်းသႅၼ် ဢၼ်ပဵၼ်ရၢၼ်ႇသူႇၵဝ်သေလႄႈလွမ်ႉႁွပ်ႈၵဝ်ယူႇၵူႈၽၢႆႇၵူႈပႃႈၼၼ်ႉဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈမႃးသေၵမ်းတီႈၶႃႈ။ ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈသေၵမ်းတီႈၶႃႈ။ ၸဝ်ႈႁဝ်းပၼ်တၢမ်ႇတီႈရၢၼ်ႇသူႇၶႃႈၸဝ်ႈတင်းလၢႆသေယဝ်ႉ၊ ႁၵ်းပႅတ်ႈတၼ်းၶူဝ်းၶဝ်ဢၼ်ၸၢင်ႈယႃႉၵဝ်းၶႃႈၸဝ်ႈၼၼ်ႉတီႈၶႃႈဢေႃႈ။
တၢင်းဢၼ်ပႄႉၼႅင်ႇၼၼ်ႉပဵၼ်မႃးၵႃႈတီႈ ထႃႇဝရႃႉၽြႃး၊ တီႈၶႃႈဢေႃႈ။ ၶႅၼ်းတေႃႈၸဝ်ႈႁဝ်းပၼ်တၢင်းလီတီႈၵူၼ်းၸဝ်ႈႁဝ်းသေၵမ်းလူၺ်ႈတီႈၶႃႈ။
ဢူဝ်းၽြႃးပဵၼ်ၸဝ်ႈ၊ၸဝ်ႈဢၼ်ႁႄႉၶႅၼ်ၶႃႈၸဝ်ႈတီႈၶႃႈ႟။ ၶႅၼ်းတေႃႈထွမ်ႇဢဝ်မိူဝ်ႈဢၼ်ၶႃႈၸဝ်ႈသူးတွင်းၼၼ်ႉသေၵမ်းတီႈၶႃႈ။ ၼႂ်းမိူဝ်ႈဢၼ်ၶႃႈၸဝ်ႈယင်းတိုၵ်ႉမီးတုၵ်ႉၶႃႉတၢင်းၽၢၼ်ယူႇၼၼ်ႉၸိုင်၊ ၸဝ်ႈႁဝ်းၸွႆႈထႅမ်မႃႉၸႃႉၶႃႈၸဝ်ႈ တီႈၶႃႈဢေႃႈ။ ၶႅၼ်းတေႃႈဢဵတ်းလူၶႃႈၸဝ်ႈလႄႈထွမ်ႇဢဝ်ၵႂၢမ်းသူးတွင်းၶႃႈၸဝ်ႈသေၵမ်းတီႈၶႃႈ။
ၵူၼ်းတင်းလၢႆၶဝ်႟။ သူတေယႃႉၵဝ်းၵဝ်ယူႇႁိုင်ထၼ်ႇႁိုဝ်။ သူတေၵျိူၵ်ႈႁၵ်ႉထုၵ်ႇၸႂ်လွင်ႈတၢင်းဢၼ်လၢႆလၢႆဢမ်ႇပွင်ႇလွင်ႈၵႃႈသင်ၼၼ်ႉလႄႈ တေၸွမ်းတၢင်းဢၼ်ၽိတ်းပိူင်ႈၼၼ်ႉႁိုင်ထၼ်ႇႁိုဝ်။
ႁုၸႅင်ႈလွင်ႈတၢင်းဢၼ် ထႃႇဝရႃႉၽြႃး၊ လိူၵ်ႈဢဝ်ၵေႃႉဢၼ်သိုဝ်ႈတေႃႇၼၼ်ႉ ဝႆႉပုၼ်ႈမၼ်းၸဝ်ႈၼၼ်ႉတႃႉ။ ထႃႇဝရႃႉၽြႃး၊ တၵ်းထွမ်ႇဢဝ်မိူဝ်ႈဢၼ်ၵဝ်ႁွင်ႉၵၢဝ်ႇတီႈမၼ်းၸဝ်ႈၼၼ်ႉဢေႃႈ။
မီးတၢင်းဢၼ်ၵူဝ်ႁႄသၼ်ႇဝႆယူႇသေလႄႈဝႄႈပႅတ်ႈတုၸရိူၵ်ႈဢပျတ်ႈတႃႉ။ ၶႆႈၸႂ်ဝူၼ်ႉၸႂ်လွင်ႈတၢင်းၼႆႉလိုၵ်ႉလိုၵ်ႉလမ်ႇလမ်ႇ ၼႂ်းမိူဝ်ႈဢၼ်မႂ်းၼွၼ်းၼိမ်ယူႇလီလီၵႃႈၼိူဝ်ၵူႇမႂ်းၼၼ်ႉတႃႉ။
သၢၵ်ႈလူႇၶိူင်ႈတၢင်းလူႇဢၼ်မၢၼ်ႇမႅၼ်ႈၸိုဝ်ႈၸႂ်ႈၼၼ်ႉ၊တီႈ ထႃႇဝရႃႉၽြႃး၊ သေလႄႈ ဢိင်ပိုင်ႈမၼ်းၸဝ်ႈယူႇတႃႉ။
မီးၵူၼ်းၼမ်ၼႃႇၸၢင်ႈသူးတွင်းလႄႈဝႃႈ၊ “ ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈပၼ်တၢင်းလီဢၼ်ယဵင်ႈၶႅၼ်းၼမ်ၼႃႇၼၼ်ႉတီႈႁဝ်းၶႃႈသေၵမ်းတီႈၶႃႈ။ ၶႅၼ်းတေႃႈဢဝ်တင်းၵရုၼႃႇၸဝ်ႈႁဝ်းလႄႈ လူတူၺ်းၶႃႈၸဝ်ႈႁဝ်းၶဝ်သေၵမ်းတီႈၶႃႈ။” ဝႃႈၼင်ႇၼႆဢေႃႈ။
ၵူၺ်းၵႃႈ၊ၸဝ်ႈႁဝ်းယင်းပၼ်တၢင်းဢၼ်ႁူဝ်ၸႂ်ၵဝ်ၶႃႈ၊လႆႈၸူမ်းသိူဝ်းၼႃႇ ဢၼ်ယဵင်ႈၶႅၼ်းလိူဝ်တွၼ်းၼႃႇသေတၢင်းဢၼ်ၶဝ်ၸူမ်းသိူဝ်း၊ ၼႂ်းမိူဝ်ႈဢၼ်ၶဝ်လႆႈၶဝ်ႈပိူၵ်ႇလႄႈၼမ်ႉမၢၵ်ႇၸပိတ်ႉၼမ်ၼႃႇၼၼ်ႉလူးၵွၼ်ႇဢေႃႈ။
မိူဝ်ႈဢၼ်ၶႃႈၸဝ်ႈၼွၼ်းလႄႈလပ်းယူႇၼိမ်ၼိမ်လီလီၼၼ်ႉၸဝ်ႈႁဝ်း ထႃႇဝရႃႉၽြႃး၊ ၵူၺ်း၊ ပၼ်ဢၶႂၢင်ႉဢၼ်ၶႃႈၸဝ်ႈလႆႈယူႇလူင်ႉလီလွတ်ႈလီတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ထွမ်ႇဢဝ်ၵႂၢမ်းၶႃႈၸဝ်ႈသေလႄႈၶႅၼ်းတေႃႈႁုမၢတ်ႈ တၢင်းဢၼ်ၶႃႈၸဝ်ႈၶၢင်းၼၼ်ႉသေၵမ်းတီႈၶႃႈ။
ၶုၼ်ႁေႃၶမ်းၵဝ်ၶႃႈ၊ၽြႃးပဵၼ်ၸဝ်ႈ ၵဝ်ၶႃႈတီႈၶႃႈ။ ၶႅၼ်းတေႃႈထွမ်ႇဢဝ်တၢင်းဢၼ်၊ၶႃႈၸဝ်ႈ ႁွင်ႉၵၢဝ်ႇပုၼ်ႈတၢင်းၸွႆႈတၢင်းထႅမ် သေၵမ်းတီႈၶႃႈ။ ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈသူးတွင်းတီႈၸဝ်ႈႁဝ်းတီႈၶႃႈဢေႃႈ။
ၶႅၼ်းတေႃႈထွမ်ႇငိၼ်းသဵင်ၵႂၢမ်းၶႃႈၸဝ်ႈၵႃႈၼႂ်းၶိင်ႇၵၢင်ၼႂ်သေၵမ်းတီႈၶႃႈ။ ၶိင်ႇယၢမ်းဢၼ်လႅတ်ႇဢွၵ်ႇၼၼ်ႉၶႃႈၸဝ်ႈႁဵတ်းပထၼႃႇတၢင်းသူးတွင်းလႄႈ၊ မုင်ႈထႃႈမွင်းထႃႈတၢင်းဢၼ်ၸဝ်ႈႁဝ်းတၵ်းၶိုၼ်းဢိူဝ်တီႈၶႃႈဢေႃႈ။
ၸဝ်ႈႁဝ်းပဵၼ်ၽြႃးဢၼ်ထုၵ်ႇၸႂ်ၵျိူၵ်ႈၸႂ်လူၺ်ႈလွင်ႈတၢင်းႁဵတ်း ဢၼ်ဢမ်ႇတြႃးၼၼ်ႉဢမ်ႇၸႂ်ႈတီႈၶႃႈ။ ၸဝ်ႈႁဝ်းဢမ်ႇပၼ်ဢၶႂၢင်ႉႁႂ်ႈၶဝ်ၸိူဝ်းဢၼ်ဢမ်ႇတြႃးၼၼ်ႉ လႆႈယူႇၵႃႈၼႂ်းဢထမ်ႇၸဝ်ႈႁဝ်းတီႈၶႃႈ။
ၸဝ်ႈႁဝ်းၶၢၼ်ႉႁၼ်ၶဝ်ၸိူဝ်းဢၼ်မိူၵ်ႈဢၼ်ယုတ်ႈၼၼ်ႉတီႈၶႃႈလႄႈ၊ ငိၼ်းၸင်းၶဝ်ၸိူဝ်းဢၼ်ႁၢႆႉဢၼ်ႁုၵ်းတင်းသဵင်ႈတင်းလူင်ၼၼ်ႉတီႈၶႃႈဢေႃႈ။
ၸဝ်ႈႁဝ်းယႃႉၽဵဝ်ႈပႅတ်ႈၶဝ်ၸိူဝ်းဢၼ်ၸၢင်ႈလၢတ်ႈပႅတ်ႉလၢတ်ႈလႅၼ်ၼၼ်ႉလႄႈ၊ ၸဝ်ႈႁဝ်းလီႁင်ႈဢဵတ်ႇသဵတ်ႇ ၶဝ်ၸိူဝ်းဢၼ်ဢဝ်ဢသၢၵ်ႈၵူၼ်းတၢႆ ဢိၵ်ႇတင်းၶဝ်ၸိူဝ်းဢၼ်ၸၢင်ႈပႅတ်ႉၸၢင်ႈလႅၼ်ၼၼ်ႉတီႈၶႃႈဢေႃႈ။
ၵူၺ်းၵႃႈ၊ၵွပ်ႈပိူဝ်ႈတၢင်းႁၵ်ႉမႅတ်ႈတႃႇၸဝ်ႈႁဝ်းဢၼ်ယႂ်ႇမျၢတ်ႈၼႃႇၼၼ်ႉလႄႈ ၶႃႈၸဝ်ႈလႆႈဢၶႂၢင်ႉၶဝ်ႈၸူးၵႃႈၼႂ်းႁိူၼ်းၸဝ်ႈ၊လႆႈဢၶႂၢင်ႉဢၼ်ဝႆႈသႃၸဝ်ႈႁဝ်း ၵႃႈၼႂ်းၵျွင်းပိၵ်ႈမၢၼ်ႇၸဝ်ႈ၊လႆႈဢၶႂၢင်ႉဢၼ်ပႃးၸႂ်ဢၼ်ၵူဝ်ယမ်ၵူမ်ႈၵွမ်းၸူးၸဝ်ႈႁဝ်းတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ တီႈၶႃႈၸဝ်ႈၼႆႉမီးရၢၼ်ႇသူႇၼမ်ၼႃႇလူင်လၢင်ဢေႃႈ။ ၶႅၼ်းတေႃႈဢွၼ်ၶႃႈၸဝ်ႈသူင်ႇႁႂ်ႈလႆႈႁဵတ်းၸွမ်းၼင်ႇဢလူဝ်ႇၸဝ်ႈႁဝ်းလႄႈ၊ ၶႅၼ်းတေႃႈႁႂ်ႈသဵၼ်ႈတၢင်းၸဝ်ႈႁဝ်းသိုဝ်ႈလီပုၼ်ႈၶႃႈၸဝ်ႈတၵ်းပႆၸွမ်းသေၵမ်းတီႈၶႃႈ။
ၵႃႈဢၼ်ရၢၼ်ႇသူႇၶႃႈၸဝ်ႈလၢတ်ႈၼၼ်ႉဢမ်ႇလီယုမ်ႇလႃးလႃးတီႈၶႃႈ။ ၶဝ်ၵူၺ်းၶႂ်ႈယႃႉႁႂ်ႈလုလႅဝ်ၵႂႃႇတီႈၶႃႈဢေႃႈ။ ၵႂၢမ်းၶဝ်ၼၼ်ႉဝၢၼ်ႁူဝၢၼ်ၸႂ်သေၵေႃႈ၊ပဵၼ်ၵႂၢမ်းပႅတ်ႉၵႂၢမ်းလႅၼ် ဢၼ်ၸၢင်ႈႁွတ်ႈထိုင်တၢင်းတၢႆၵူၺ်းဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈၸီႇယၢင်ႇပၼ်တၢမ်ႇတီႈၶဝ်သေၵမ်းတီႈၶႃႈ။ ၶႅၼ်းတေႃႈႁႂ်ႈတၢင်းၵျၢမ်ႇတၢင်းပွင်ၶဝ်ၼၼ်ႉဝၢႆႇၶိုၼ်းၸူးတီႈၶဝ်လႄႈ ႁႂ်ႈၶဝ်လႆႈလုလႆႈလႅဝ်ၸွမ်းသေၵမ်းတီႈၶႃႈ။ ၶႅၼ်းတေႃႈႁေႃႈၶဝ်ဢွၵ်ႇပႅတ်ႈၵွပ်ႈပိူဝ်ႈဢပျတ်ႈၶဝ်ဢၼ်ၽိတ်းပိူင်ႈၼမ်ၼႃႇၼၼ်ႉ၊ ဢိၵ်ႇတင်းၵွပ်ႈပိူဝ်ႈၶဝ်လုၵ်ႉၽိုၼ်ႉၸဝ်ႈႁဝ်းၼၼ်ႉသေၵမ်းတီႈၶႃႈ။
ၶဝ်ၸိူဝ်းဢၼ်သွၼ်ႈပိုင်ႈၸဝ်ႈႁဝ်းယူႇၼၼ်ႉၸမ်ႉ၊လႆႈၸူမ်းသိူဝ်းတီႈၶႃႈဢေႃႈ။ ၶဝ်လႆႈဢၶႂၢင်ႉဢၼ်ၸူမ်းသိူဝ်းလႄႈႁဵတ်းၵႂၢမ်းယူႇသေႇသေႇဢေႃႈ။ ၵႅတ်ႇၶႄႁႄႉၵင်ႈၶဝ်ၸိူဝ်းဢၼ်ႁၵ်ႉၸဝ်ႈႁဝ်းၼၼ်ႉသေၵမ်းတီႈၶႃႈ။ ၵွပ်ႈပိူဝ်ႈၸဝ်ႈႁဝ်းၼၼ်ႉလႄႈၶဝ်လႆႈၸူမ်းသိူဝ်းတႄႉတႄႉဝႃႈဝႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းပၼ်တၢင်းလီတီႈၶဝ်ၸိူဝ်းဢၼ်ထွမ်ႇဢဝ်ၸဝ်ႈႁဝ်းၼၼ်ႉတီႈၶႃႈဢေႃႈ။ တၢင်းႁၵ်ႉမႅတ်ႈတႃႇၸဝ်ႈႁဝ်းၼၼ်ႉၵေႃႈ၊ ၵႅတ်ႇၶႄႁႄႉၵင်ႈၶဝ်မိူၼ်ၸိူဝ်ႉၼင်ႇၶႅပ်းႁႄႉလၢၵ်ႈၼၢၵ်ႈၼၼ်ႉတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈယႃႇပေဢွၵ်ႇတေႃးသႃႉလႄႈတၢင်ႇဢပျတ်ႈၵႃႈၼိူဝ်ၶႃႈၸဝ်ႈသေၵမ်းတီႈၶႃႈ။ ၶႅၼ်းတေႃႈယႃႇပေၸႂ်မႆႈၶႂ်ႈၸႃႉလႄႈပၼ်တၢမ်ႇၶႃႈၸဝ်ႈသေၵမ်းတီႈၶႃႈ။
ၵွပ်ႈပိူဝ်ႈၶႃႈၸဝ်ႈႁႅင်းလဵၵ်ႉႁႅင်းၵေႇၼႃႇၼၼ်ႉ၊ ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈဢဵတ်းလူၸွႆႈထႅမ်ၶႃႈၸဝ်ႈသေၵမ်းတီႈၶႃႈ။ ၶႃႈၸဝ်ႈႁႅင်းဢူၼ်ႈႁႅင်းၸွပ်ႈၼႃႇလူင်လၢင်ယဝ်ႉလႄႈ ၶႅၼ်းတေႃႈပၼ်ဢဵၼ်ပၼ်ႁႅင်းတီႈၶႃႈၸဝ်ႈသေၵမ်းတီႈၶႃႈ။
ၸႂ်ဝိၺိၺ်ႇၶႃႈၸဝ်ႈၼႆႉၵူဝ်ႁႄသၼ်ႇဝႆၼႃႇလူင်လၢင်တီႈၶႃႈဢေႃႈ။ ထႃႇဝရႃႉၽြႃးတီႈၶႃႈ။ တႃႇတေၸွႆႈထႅမ်ၶႃႈၸဝ်ႈၸိုင်၊ ၸဝ်ႈႁဝ်းတေပႂ်ႉယူႇႁိုင်ၵႃႈႁိုဝ်တီႈၶႃႈ။
ထႃႇဝရႃႉၽြႃး၊ တီႈၶႃႈ။ မႃးၶျွတ်ႈဢဝ်ၶႃႈၸဝ်ႈသေၵမ်းတီႈၶႃႈ။ ဢဝ်တင်းၸႂ်ၵရုၼႃႇၸဝ်ႈႁဝ်းၼၼ်ႉလႄႈၵႄႇသႄႇဢဝ်ၶႃႈၸဝ်ႈသေၵမ်းတီႈၶႃႈ။
ၵႃႈၼႂ်းမိူင်းတၢင်းတၢႆၼၼ်ႉဢမ်ႇမီးတၢင်းဢၼ်ၶုၵ်းၸႂ်လႆႈၶႆႈၸႂ်ထိုင်ၸဝ်ႈႁဝ်းတီႈၶႃႈ။ ၵႃႈၼႂ်းမိူင်းမရၼႃႉၼၼ်ႉဢမ်ႇမီးၵေႃႉဢၼ်ယွင်ႈယေႃးၸဝ်ႈႁဝ်းတီႈၶႃႈ။
ၶႃႈၸဝ်ႈၼႆႉၶီၸႂ်ၼႃႇလႄႈႁိူဝ်ႉၸႂ်ၼူၼ်းၸႂ်ယူႇတီႈၶႃႈဢေႃႈ။ ၼမ်ႉတႃၶႃႈၸဝ်ႈလႆႈယမ်းၵူႇၼွၼ်းၶႃႈၸဝ်ႈဝႆႉၵူႈၶိုၼ်းလႄႈ ၵွပ်ႈပိူဝ်ႈၶႃႈၸဝ်ႈႁႆႈႁွင်ႉၼၼ်ႉမွၼ်ႁူဝ်ၶႃႈၸဝ်ႈလႆႈယမ်းယူႇဢေႃႈ။
ၶႃႈၸဝ်ႈဢမ်ႇၸၢင်ႈႁၼ်လႆႈလီလီ၊ပိူဝ်ႈဢၼ်မၢၵ်ႇတႃၶႃႈၸဝ်ႈတူၺ်ႇမႃး၊ ၵွပ်ႈပိူဝ်ႈရၢၼ်ႇသူႇၶႃႈၸဝ်ႈႁဵတ်းႁႂ်ႈၶႃႈၸဝ်ႈလႆႈႁႆႈႁွင်ႉၼၼ်ႉတီႈၶႃႈဢေႃႈ။
ၶဝ်ၸိူဝ်းဢၼ်ႁဵတ်းဢၼ်ဢမ်ႇတြႃးတင်းသဵင်ႈတင်းလူင်ၶဝ်႟။ ဢွၵ်ႇသေၵႃႈတီႈၵဝ်လႄႈၵႂႃႇတႃႉ။ ထႃႇဝရႃႉၽြႃး၊ လႆႈငိၼ်းသဵင်ႁႆႈၵဝ်ယဝ်ႉ။
မၼ်းၸဝ်ႈထွမ်ႇငိၼ်းတၢင်းဢၼ်ၵဝ်ႁွင်ႉၵၢဝ်ႇပုၼ်ႈတၢင်းၸွႆႈတၢင်းထႅမ်ၼၼ်ႉယဝ်ႉလႄႈ မၼ်းၸဝ်ႈတၵ်းၶိုၼ်းဢိူဝ်ၵႂၢမ်းသူးတွင်းၵဝ်ဢေႃႈ။
ရၢၼ်ႇသူႇၵဝ်တင်းလၢႆတၵ်းတေလႆႈဢူၵ်းဢၢႆၵွပ်ႈလူၺ်ႈၶဝ်လႆႈသုမ်းၼၼ်ႉသေယဝ်ႉ၊ ၶဝ်တၵ်းၶိုၵ်းၶၢၵ်းယုင်ႈၸႂ်ၵႂင်ၸႂ်လႄႈတေလႆႈၶၢမ်ႇတၢင်းဢၼ်ႁေႃႈဢွၵ်ႇပႅတ်ႈဢေႃႈ။
ထႃႇဝရႃႉၽြႃး၊ ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ ၶႃႈၸဝ်ႈမႃးသွၼ်ႈပိုင်ႈတီႈၸဝ်ႈႁဝ်းတီႈၶႃႈဢေႃႈ။ ၶႅၼ်းတေႃႈၵႄႇသႄႇဢဝ်ၶႃႈၸဝ်ႈသေ ၵႃႈၼႂ်းမိုဝ်းၶဝ်ၸိူဝ်းဢၼ်လိုပ်ႈၸွမ်းလမ်းၸွမ်းၶႃႈၸဝ်ႈၼၼ်ႉသေၵမ်းတီႈၶႃႈ။
ပေႃးဢမ်ႇၼၼ်ၶဝ်တၵ်းပဵၼ်ၸိူဝ်ႉၼင်ႇသၢင်ႇသီႈဢၼ်တိုတ်ႉလၢၵ်ႈဢဝ်ၶႃႈၸဝ်ႈ ၵႂႃႇၵႃႈတီႈဢၼ်ဢမ်ႇမီးၵေႃႉဢၼ်တေၵႄႇသႄႇဢဝ်ၼၼ်ႉသေလႄႈ ၸၵ်ႉသိၵ်ႇၶႃႈၸဝ်ႈၶၢတ်ႇပႅတ်ႈပဵၼ်ပွတ်းပဵၼ်တွၼ်ႈၼၼ်ႉတီႈၶႃႈဢေႃႈ။
ထႃႇဝရႃႉၽြႃး၊ ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ ပေႃးၶႃႈၸဝ်ႈႁဵတ်းၸိူဝ်ႉၼင်ႇၼႆ၊ ဢၼ်ဝႃႈပေႃးၶႃႈၸဝ်ႈလႆႈႁဵတ်းၽိတ်းႁဵတ်းပိူင်ႈတီႈသေၵေႃႉၵေႃႉ။
ပေႃးၶႃႈၸဝ်ႈလႆႈတွပ်ႇတႅၼ်းၶိုၼ်းဢၼ်ဢမ်ႇလီတီႈၵေႃႉသႄႈၶႃႈၸဝ်ႈ၊ လွင်ႈမၼ်းယင်းဢမ်ႇမီးလႄႈ၊ၶႃႈၸဝ်ႈလႆႈႁဵတ်းမိူၵ်ႈတီႈရၢၼ်ႇသူႇၶႃႈၸဝ်ႈၼၼ်ႉၸိုင်၊
ႁႂ်ႈရၢၼ်ႇသူႇတင်းလၢႆလိုပ်ႈလမ်းၸွမ်းၶႃႈၸဝ်ႈလႄႈတိဢဝ်ၶႃႈၸဝ်ႈသေၵမ်း။ ႁႂ်ႈၶဝ်ၽၼ်းၶႃႈၸဝ်ႈတူၵ်းလႄႈဢဝ်ဢသၢၵ်ႈၶႃႈၸဝ်ႈတၢႆပႅတ်ႈသေယဝ်ႉ ပွႆႇပႅတ်ႈတူဝ်တၢႆၶႃႈၸဝ်ႈၼၼ်ႉ ၵႃႈၼိူဝ်လိၼ်ဝႆႉသေၵမ်းတီႈၶႃႈ။
ထႃႇဝရႃႉၽြႃး၊ တီႈၶႃႈ။ ႁႂ်ႈတၢင်းၸႂ်မႆႈၶႂ်ႈၸႃႉၸဝ်ႈႁဝ်းဢွၵ်ႇသေလႄႈၶႅၼ်းတေႃႈလုၵ်ႉသေၵမ်းတီႈၶႃႈ။ ၶႅၼ်းတေႃႈဝႆႉၸႂ်ႁႄႉၶႅၼ် တၢင်းဢၼ်ရၢၼ်ႇသူႇၶႃႈၸဝ်ႈတင်းလၢႆႁၢဝ်ႈၵျၢမ်းၼႃႇၼၼ်ႉသေၵမ်းတီႈၶႃႈ။ ၶႅၼ်းတေႃႈလုၵ်ႉမႃးလႄႈၸွႆႈထႅမ်မႃႉၸႃႉၶႃႈၸဝ်ႈသေၵမ်းတီႈၶႃႈ။ ၸဝ်ႈႁဝ်းမီးဢလူဝ်ႇဢၼ်ၸီႇယၢင်ႇၸွမ်းၼင်ႇတြႃးတီႈၶႃႈဢေႃႈ။
ပိူဝ်ႈၼႆလႄႈ၊ႁႂ်ႈၵူၼ်းတင်းလၢႆၸုၵၼ်တုမ်ၵၼ်လွမ်ႉႁွပ်ႈၸဝ်ႈႁဝ်းယူႇသေယဝ်ႉ ၸဝ်ႈႁဝ်းၶိုၼ်ႈၵႂႃႇၵႃႈတီႈၼိူဝ်သေလႄႈဢုပ်ႉပိူင်ႇသေၵမ်းတီႈၶႃႈ။
ၸဝ်ႈႁဝ်းပဵၼ်ၸဝ်ႈဢၼ်ၸီႇယၢင်ႇတြႃးၵႃႈၼိူဝ်ၵူၼ်းမဵဝ်းတင်းလၢႆဢေႃႈ။ ထႃႇဝရႃႉၽြႃး၊ တီႈၶႃႈ။ ထွၵ်ႈလူၺ်ႈတၢင်းဢၼ်ၶႃႈၸဝ်ႈသိုဝ်ႈတေႃႇၼၼ်ႉလႄႈၸီႇယၢင်ႇတႅပ်းတတ်းသေၵမ်းတီႈၶႃႈ။ ၸဝ်ႈႁဝ်းႁုလွင်ႈဢၼ်ၶႃႈၸဝ်ႈဢမ်ႇမီးဢပျတ်ႈၵႃႈသင်ၼၼ်ႉယူႇတီႈၶႃႈဢေႃႈ။
ၸဝ်ႈႁဝ်းပဵၼ်ၽြႃးပဵၼ်ၸဝ်ႈဢၼ်သိုဝ်ႈတေႃႇတီႈၶႃႈလႄႈၸၢင်ႈၸႅတ်ႈထၢမ်တူၺ်း တၢင်းၵျၢမ်ႇ ဢိၵ်ႇတင်းဢလူဝ်ႇၵၢင်ၸႂ်ၶႃႈၸဝ်ႈတီႈၶႃႈဢေႃႈ။ ၸဝ်ႈႁဝ်းၸၢင်ႈႁႂ်ႈဢမုဢၼ်ဢမ်ႇတြႃးၼၼ်ႉသုမ်းလႄႈၸၢင်ႈႁႂ်ႈၶဝ်ၸိူဝ်းဢၼ်သိုဝ်ႈတေႃႇၼၼ်ႉ တႄႇယူႇမၼ်ႈၶိူင်ႇၶႃႈဢေႃႈ။
ၽြႃးပဵၼ်ၸဝ်ႈပဵၼ်ၸဝ်ႈဢၼ်ၵႅတ်ႇၶႄႁႄႉၵင်ႈၵဝ်လႄႈ၊ၵႄႇသႄႇၶျွတ်ႈဢဝ် ၶဝ်ၸိူဝ်းဢၼ်ထွမ်ႇဢဝ်မၼ်းၸဝ်ႈၼၼ်ႉဢေႃႈ။
ၽြႃးပဵၼ်ၸဝ်ႈ ပဵၼ်ၸဝ်ႈဢၼ်ၸီႇယၢင်ႇၸွမ်းၼင်ႇတြႃးလႄႈ၊ ၸီႇယၢင်ႇပၼ်တၢမ်ႇတီႈၶဝ်ၸိူဝ်းဢၼ်ဢမ်ႇတြႃးၼၼ်ႉသေႇသေႇဢေႃႈ။
ပေႃးၶဝ်ယင်းဢမ်ႇပိၼ်ႇၸႂ်ၶဝ်ၸိုင်၊မၼ်းၸဝ်ႈတၵ်းလပ်ႉလၢပ်ႇမၼ်းၸဝ်ႈဢေႃႈ။ မၼ်းၸဝ်ႈဝူတ်ႈတၢင်ႇၵၢင်ႇမၼ်းၸဝ်ႈဝႆႉသေလႄႈမႄႈႁႅၼ်းဝႆႉယဝ်ႉဢေႃႈ။
မၼ်းၸဝ်ႈႁႅၼ်းဝႆႉၶိုင်ဝႆႉလၢၵ်ႈၼၢၵ်ႈဢၼ်ၸၢင်ႈႁႂ်ႈတၢႆၼၼ်ႉဝႆႉလႄႈ၊ ဢဝ်ပိုၼ်ဢၼ်ပဵၼ်ၽႆးၼၼ်ႉယိူင်းဝႆႉယဝ်ႉဢေႃႈ။
တူၺ်းလူး။ ၵူၼ်းႁၢႆႉၵူၼ်းမိူၵ်ႈတင်းလၢႆၸၢင်ႈၵျၢမ်ႇပွင်ၶိုင်ႁဵတ်းဢၼ်ႁၢႆႉဢၼ်မိူၵ်ႈဢေႃႈ။ ၶဝ်ၸၢင်ႈၶိုင်ပွင်ဢၼ်ပဵၼ်ၽေးလႄႈႁဵတ်းတၢင်းဢၼ်ပႅတ်ႉဢၼ်လႅၼ်ဢေႃႈ။
ၶဝ်ၸၢင်ႈႁၢင်ႈႁႅဝ်ႉ ႁႂ်ႈပိူၼ်ႈၶမ်ၼၼ်ႉသေယဝ်ႉ၊တူဝ်ၶဝ်ၸၢင်ႈၵႂႃႇၶဝ်ႈၼႂ်းႁႅဝ်ႉၶဝ်ၼၼ်ႉဢေႃႈ။
ပိူဝ်ႈၼႆလႄႈ၊ၶဝ်လႆႈၶၢမ်ႇဢဝ်တၢမ်ႇဢၼ်တူဝ်ၶဝ်ၶိုင်ပွင်ဝႆႉ ႁၢႆႉမိူၵ်ႈၼႃႇၼၼ်ႉ၊ ဢိၵ်ႇတင်း ၶဝ်လႆႈၶၢမ်ႇတၢင်းဢၼ်တိူဝ်ႉမၢတ်ႇဢဝ်တူဝ်ၶဝ်ႁၢဝ်ႉၵျၢမ်းၼႃႇၼၼ်ႉဢေႃႈ။
ၵဝ်ၸမ်ႉ၊လႆႈယွင်ႈယေႃးတၢင်ႇၵျေးၸူး ထႃႇဝရႃႉၽြႃး၊ ၵွပ်ႈလူၺ်ႈတၢင်းဢၼ်၊မၼ်းၸဝ်ႈသိုဝ်ႈတေႃႇၼၼ်ႉတီႈၶႃႈဢေႃႈ။ ၶႃႈၸဝ်ႈလႆႈႁဵတ်းၵႂၢမ်းယွင်ႈယေႃး ထႃႇဝရႃႉၽြႃး၊ ဢၼ်သုင်မျၢတ်ႈၼႃႇသေပိူၼ်ႈၼၼ်ႉဢေႃႈ။
ၸဝ်ႈႁဝ်းၶႃႈ ထႃႇဝရႃႉၽြႃး၊ တီႈၶႃႈ။ တၢင်းဢၼ်ယႂ်ႇမျၢတ်ႈၸဝ်ႈႁဝ်းၼၼ်ႉ၊ လႆႈႁၼ်ထၢင်ႇသႃးဝႆႉၵႃႈၼိူဝ်လိၼ်မိူင်းတင်းသဵင်ႈၼႆႉတီႈၶႃႈဢေႃႈ။ တၢင်းဢၼ်ယုၵ်ႉယွင်ႈယွင်ႈယေႃးၸဝ်ႈႁဝ်းၼၼ်ႉၶိုၼ်ႈထိုင်ၽႃႉထိုင်မွၵ်ႇတီႈၶႃႈဢေႃႈ။
လွင်ႈတၢင်းၼႆႉၸိုင်၊လုၵ်ႈဢွၼ်ႇလၢင်းဢွၼ်ႇတင်းလၢႆဢိၵ်ႇတင်းလုၵ်ႈဢွၼ်ႇလႅင်တင်းလၢႆ ဢွၼ်ၵၼ်ႁဵတ်းၵႂၢမ်းယွင်ႈယေႃးၶႃႈဢေႃႈ။ ၸဝ်ႈႁဝ်းၵၢင်းလွတ်ႈတင်းတၢင်းဢၼ်ရၢၼ်ႇသူႇတင်းလၢႆတိုၵ်းတေႃးလႄႈ ၸဝ်ႈႁဝ်းႁႂ်ႈၶဝ်ၸိူဝ်းဢၼ်ၶတ်းၵၼ်တင်းၸဝ်ႈႁဝ်းၼၼ်ႉထၢတ်ႇယဵၼ်ဢေႃႈ။
မိူဝ်ႈဢၼ်ၶႃႈၸဝ်ႈလူတူၺ်းၽႃႉၵၢင်ႁၢဝ်ႁဵတ်းလူၺ်ႈၼမ်ႉတိၼ်လၢႆးမိုဝ်းၸဝ်ႈႁဝ်း ဢိၵ်ႇတင်းလိူၼ်လၢဝ်ဢၼ်ၸဝ်ႈႁဝ်းႁဵတ်းႁႂ်ႈတႄႇဝႆႉပဵၼ်ဝႆႉၸိူဝ်းၼၼ်ႉၼၼ်ႉ၊
ၵူၼ်းသတ်ႉတဝႃႇၸိုင်၊ပဵၼ်ၵေႃႉၸိူဝ်ႉၼင်ႇႁိုဝ်လႄႈၸဝ်ႈႁဝ်းၶႆႈၸႂ်ထူပ်းမၼ်းတီႈၶႃႈ။ ၵူၼ်းဢၼ်ၸၢင်ႈၽင်ႉဢုတူႇၼဝ်ႈၸိုင်၊ ပဵၼ်ၵေႃႉၸိူဝ်ႉၼင်ႇႁိုဝ်လႄႈၸဝ်ႈႁဝ်းပႂ်ႉလူပႂ်ႉတူၺ်းမၼ်းတီႈၶႃႈ။
ၸဝ်ႈႁဝ်းၶျႃးမၼ်းတႅမ်ႇသေတူဝ်ၸဝ်ႈႁဝ်းဢိတ်းၼိုင်ႈ တီႈၶႃႈဢေႃႈ။ ၸဝ်ႈႁဝ်းဢဝ်မုၼ်ၽုင်းသရေႇတိုဝ်းပၼ်ၵႃႈၼိူဝ်ႁူဝ်မၼ်းသေလႄႈ၊
ၸဝ်ႈႁဝ်းယွင်ႈတၢင်ႇႁႂ်ႈမၼ်းလႆႈဢုပ်ႉပိူင်ႇၶိူင်ႈပိူင် ဢၼ်ၸဝ်ႈႁဝ်း၊ၽၢၼ်ႇသၢင်းဝႆႉၵႃႈမီးတင်းသဵင်ႈတင်းလူင်၊
ၶဝ်ႈပႃးၸႃႉၸဵမ် သူဝ်း၊ဝူဝ်း၊တင်းတူဝ်ထိူၼ်ႇလႂ်၊
ဢိၵ်ႇတင်းၼူၵ်ႉလႂ်၊ပႃလႂ်တင်းတူဝ်ဢၼ်မီးၼႂ်းပၢင်ႇလၢႆႇတင်းလၢႆဢေႃႈ။
ၸဝ်ႈႁဝ်းၶႃႈ၊ ထႃႇဝရႃႉၽြႃး၊ တီႈၶႃႈ။ တၢင်းဢၼ်ယႂ်ႇမျၢတ်ႈၸဝ်ႈႁဝ်းၼၼ်ႉ၊ လႆႈႁၼ်ထၢင်ႇသႃးဝႆႉၵႃႈၼိူဝ်လိၼ်မိူင်း တင်းသဵင်ႈၼႆႉတီႈၶႃႈဢေႃႈ။
ၶႃႈၸဝ်ႈတၵ်းပႃးတင်းႁူဝ်ၸႂ်သဵင်ႈသဵင်ႈသေလႄႈ ယွင်ႈယေႃးၸဝ်ႈ ထႃႇဝရႃႉၽြႃး၊ တီႈၶႃႈဢေႃႈ။ ၶႃႈၸဝ်ႈတၵ်းမွၵ်ႇလၢတ်ႈၼႄပျႃး လွင်ႈတၢင်းဢၼ်လီဢၢမ်းၸဝ်ႈႁဝ်းၵႃႈမီးတင်းသဵင်ႈတင်းလူင်တီႈၶႃႈဢေႃႈ။
ၶႃႈၸဝ်ႈတၵ်းၸူမ်းသိူဝ်းၵွပ်ႈလူၺ်ႈၸဝ်ႈႁဝ်းလႄႈႁဵတ်းၵႂၢမ်းတီႈၶႃႈဢေႃႈ။ ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ တီႈၶႃႈ။ ၶႃႈၸဝ်ႈတၵ်းႁဵတ်းၵႂၢမ်းထေႃးပၼႃႇတီႈၸဝ်ႈႁဝ်းတီႈၶႃႈဢေႃႈ။
မိူဝ်ႈဢၼ်ၸဝ်ႈႁဝ်းပေႃႇမႃးၼၼ်ႉရၢၼ်ႇသူႇၶႃႈၸဝ်ႈတင်းလၢႆ ဝၢႆႇႁူဝ်သုတ်ႉႁူၼ်လႄႈၶဝ်ၼၼ်ႉပိၼ်ႈလူမ်ႉတၢႆၵႂႃႇဢေႃႈ။
ၸဝ်ႈႁဝ်းယူႇၽၢႆႇၵဝ်ၶႃႈလႄႈတႅပ်းတတ်းတြႃးတီႈၶႃႈယဝ်ႉ၊ ၸဝ်ႈႁဝ်းၼင်ႈယူႇၵႃႈၼိူဝ်ပလၢင်ႇသေလႄႈ ပဵၼ်ၸဝ်ႈဢၼ်ၸီႇယၢင်ႇတႅပ်းတတ်းၸွမ်းၼင်ႇ တၢင်းဢၼ်သိုဝ်ႈတေႃႇတီႈၶႃႈဢေႃႈ။
ၸဝ်ႈႁဝ်းၸီႇယၢင်ႇပၼ်တၢမ်ႇတီႈၵူၼ်း တၢင်ႇၸိူဝ်ႉတၢင်ႇၶိူဝ်းသေလႄႈ ပႄႇၽဵဝ်ႈပႅတ်ႈၵူၼ်းႁၢႆႉမိူၵ်ႈတင်းလၢႆသေယဝ်ႉ၊ ၶဝ်ၼၼ်ႉပိူၼ်ႈတၵ်းဢမ်ႇၶိုၼ်းၶုၵ်းၸႂ်လႆႈထႅင်ႈသေပွၵ်ႈဢေႃႈ။
ရၢၼ်ႇသူႇတင်းလၢႆလႆႈႁွတ်ႈထိုင်တၢင်းလု တၢင်းလႅဝ်သေယဝ်ႉ၊ ဝဵင်းၶဝ်တင်းလၢႆလႆႈႁၢမ်းၵႂႃႇထၢၼ်ႈပေႃးဢမ်ႇမီးတီႈမၢတ်ႈတီႈတွင်းလႃးလႃးတီႈၶႃႈဢေႃႈ။
ထႃႇဝရႃႉၽြႃး၊ ၸမ်ႉ၊ပဵၼ်ၶုၼ်ႁေႃၶမ်းယူႇတႃႇသေႇဢမ်ႇထၢတ်ႇသေလႄႈ မၼ်းၸဝ်ႈတႄႇတင်ႈပလၢင်ႇဝႆႉ ပုၼ်ႈတႃႇတေၸီႇယၢင်ႇတြႃးတီႈၶႃႈဢေႃႈ။
မၼ်းၸဝ်ႈၸီႇယၢင်ႇၵူၼ်းလေႃးၵီႇတင်းလၢႆၸွမ်းၼင်ႇတြႃးလႄႈ မၼ်းၸဝ်ႈတႅပ်းတတ်းတီႈၵူၼ်းမဵဝ်းတင်းလၢႆသိုဝ်ႈသိုဝ်ႈတေႃႇတေႃႇတီႈၶႃႈဢေႃႈ။
ထႃႇဝရႃႉၽြႃး၊ ပဵၼ်တီႈသွၼ်ႈပိုင်ႈၶဝ်ၸိူဝ်းဢၼ်လႆႈၶၢမ်ႇတၢင်းဢၼ်တဵၵ်းငႅၼ်းၼၼ်ႉလႄႈ ပဵၼ်တီႈယူႇဢၼ်လူင်ႉလီလွတ်ႈလီၼႂ်းမိူဝ်ႈဢၼ်ၽေးႁွတ်ႈမႃးၼၼ်ႉတီႈၶႃႈဢေႃႈ။
ၶဝ်ၸိူဝ်းဢၼ်ႁုၸၵ်းၸဝ်ႈႁဝ်း ထႃႇဝရႃႉၽြႃး၊ ၼၼ်ႉယုမ်ႇမၢတ်ႈၸဝ်ႈႁဝ်းတီႈၶႃႈဢေႃႈ။ ၸဝ်ႈႁဝ်းဢမ်ႇၸုၼ်ႉပႅတ်ႈၶဝ်ၸိူဝ်းဢၼ်မႃးႁႃၸဝ်ႈႁဝ်းၼၼ်ႉတီႈၶႃႈ။
ႁဵတ်းၵႂၢမ်းယွင်ႈယေႃး ထႃႇဝရႃႉၽြႃး၊ ဢၼ်ၵိင်းဝၢပ်ႈယူႇၼႂ်းဝဵင်း ၸိဢုၼ်ႇ၊ ၼၼ်ႉတႃႉ။ မွၵ်ႇလၢတ်ႈလွင်ႈတၢင်းဢၼ်မၼ်းၸဝ်ႈႁဵတ်းၸိူဝ်းၼၼ်ႉတီႈၵူၼ်းတင်းလၢႆတႃႉ။
ၽြႃးပဵၼ်ၸဝ်ႈၶႆႈၸႂ်ထူပ်းၶဝ်ၸိူဝ်းဢၼ်လႆႈၶၢမ်ႇတုၵ်ႉၶႃႉတၢင်းၽၢၼ်ၼၼ်ႉသေလႄႈ၊ မၼ်းၸဝ်ႈဢမ်ႇလူင်ဢမ်ႇလိုမ်းသဵင်ဢၼ်ၶဝ်ႁွင်ႉႁႆႈၼၼ်ႉ။ မၼ်းၸဝ်ႈယင်းပၼ်တၢမ်ႇတီႈၵေႃႉဢၼ်ႁဵတ်းတၢင်းၽိတ်းသႂ်ႇတီႈၶဝ်ၼၼ်ႉဢေႃႈ။
ထႃႇဝရႃႉၽြႃး၊ တီႈၶႃႈ။ ဢဵတ်းလူၶႃႈၸဝ်ႈသေၵမ်းတီႈၶႃႈ။ ၶႅၼ်းတေႃႈတူၺ်းႁၼ်ရၢၼ်ႇသူႇၶႃႈၸဝ်ႈ ဢၼ်ၼိၵ်ႈၸၢၵ်ႈငႅၼ်းသႄးၶႃႈၸဝ်ႈၼၼ်ႉသေၵမ်းတီႈၶႃႈ။ ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းပဵၼ်ၸဝ်ႈဢၼ်ၵႄႇသႄႇဢဝ်ၶႃႈၸဝ်ႈဢွၵ်ႇသေၵႃႈတီႈတၢင်းတၢႆမႃးတီႈၶႃႈဢေႃႈ။
ႁႂ်ႈၶႃႈၸဝ်ႈလႆႈၸုၵ်းၵႃႈတီႈၽၢႆႇၼႃႈၵူၼ်းဝဵင်း ယေႇရုသလႅမ်ႇ၊ တင်းလၢႆသေယဝ်ႉ၊ ႁႂ်ႈၶႃႈၸဝ်ႈလႆႈမွၵ်ႇလၢတ်ႈၼႄပျႃးလွင်ႈတၢင်းဢၼ်ၶႃႈၸဝ်ႈလႆႈယွင်ႈယေႃးၸဝ်ႈႁဝ်း ၵႃႈမီးတင်းသဵင်ႈတင်းလူင်ၼၼ်ႉသေၵမ်းတီႈၶႃႈ။ ၶႃႈၸဝ်ႈတၵ်းသႂၢင်ႇသိူဝ်း ၵႃႈၼႂ်းၵျေးၸူးတၢင်းဢၼ်ၸဝ်ႈႁဝ်းၵႄႇၶျွတ်ႈဢဝ်ၼၼ်ႉတီႈၶႃႈဢေႃႈ။
ၵူၼ်းတၢင်ႇၸိူဝ်ႉတၢင်ႇၶိူဝ်းတၢင်းလၢႆတူၵ်းၵႃႈၼႂ်းလုၵ်းၼႂ်းၶုမ်ဢၼ်ၶုတ်းၼၼ်ႉ၊ ဢိၵ်ႇတင်းဢွၼ်ၵၼ်ၶဝ်ႈၼႂ်းႁႅဝ်ႉၼႂ်းၶိုမ်းဢၼ်ၶဝ်ႁၢင်ႈၼၼ်ႉယဝ်ႉဢေႃႈ။
ထႃႇဝရႃႉၽြႃး၊ ႁဵတ်းႁႂ်ႈတူဝ်ၸဝ်ႈၵဝ်ႇထၢင်ႇသႃးမႃးယဝ်ႉ။ မၼ်းၸဝ်ႈၽုၺ်ႇၼႄတၢင်းဢၼ်သိုဝ်ႈတေႃႇမၼ်းၸဝ်ႈၼၼ်ႉယဝ်ႉလႄႈ၊ ၶဝ်ၸိူဝ်းဢၼ်ဢမ်ႇတြႃးၼၼ်ႉ လႆႈၶမ်ၼႂ်းႁႅဝ်ႉ ၼႂ်းၶိုမ်းၼႂ်းတၢင်းဢၼ်ၶဝ်ႁဵတ်း ၼၼ်ႉယဝ်ႉဢေႃႈ။
တၢင်းတၢႆၸိုင်၊ပဵၼ်တီႈသုတ်းတီႈတိူၵ်ႈ ၵူၼ်းႁၢႆႉၵူၼ်းမိူၵ်ႈတင်းလၢႆ ၸိူဝ်းဢၼ်ထဵင်ပႅတ်ႈၽြႃးပဵၼ်ၸဝ်ႈတင်းသဵင်ႈ တင်းမူတ်းၼၼ်ႉဢေႃႈ။
ၶဝ်ၸိူဝ်းဢၼ်ၸုတ်ႈဢၼ်လုတ်ႈၼၼ်ႉဢမ်ႇလႆႈၶၢမ်ႇတၢင်းဢၼ်ၸုၼ်ႉပႅတ်ႈဝႆႉသေႇသေႇလႄႈ၊ တၢင်းမုင်ႈထႃႈမွင်းထႃႈၵူၼ်းယၢၵ်ႈ ၵူၼ်းၽၢၼ်ၼၼ်ႉဢမ်ႇလႆႈလုလႆႈသုမ်း ယူႇသေႇသေႇ။
ထႃႇဝရႃႉၽြႃး၊ တီႈၶႃႈ။ ၵျွမႃးသေၵမ်းတီႈၶႃႈ။ ၶႅၼ်းတေႃႈယႃႇပေႁႂ်ႈၵူၼ်းလႆႈပႄႉလႆႈၼႅင်ႇသေၵမ်းတီႈၶႃႈ။ ၶႅၼ်းတေႃႈဢဝ်ၵူၼ်းမဵဝ်းတင်းလၢႆ မႃးၸူးတီႈၽၢႆႇၼႃႈၸဝ်ႈႁဝ်းလႄႈ၊ ၸီႇယၢင်ႇတႅပ်းတတ်းၼိူဝ်ၶဝ်သေၵမ်းတီႈၶႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈလွၵ်ႇငိုတ်ႈၶဝ်သေၵမ်းတီႈၶႃႈ။ ၶႅၼ်းတေႃႈႁႂ်ႈၶဝ်လႆႈႁုလွင်ႈဢၼ်ၶဝ်ပဵၼ်ၵူၼ်းသတ်ႉတဝႃႇ ဢၼ်ၸၢင်ႈၽင်ႉဢုတူႇၼဝ်ႈၵူၺ်းၼၼ်ႉ သေၵမ်းတီႈၶႃႈ။
ထႃႇဝရႃႉၽြႃး၊ တီႈၶႃႈ။ ၵွပ်ႈသင်လႄႈၸဝ်ႈႁဝ်းမီးယူႇတီႈဢၼ်ၵႆၼႃႇၼၼ်ႉတီႈၶႃႈ။ ၵွပ်ႈသင်လႄႈၸဝ်ႈႁဝ်းတဵတ်ႇမႅပ်းယူႇ ၼႂ်းမိူဝ်ႈဢၼ်ၶႃႈၸဝ်ႈထူပ်းၽေးၼၼ်ႉတီႈၶႃႈ။
ၵူၼ်းႁၢႆႉၵူၼ်းမိူၵ်ႈၶဝ်မီးမႃႇၼႃႉၸႂ်သုင်လႄႈပႄႉၵိၼ်ၵူၼ်းယၢၵ်ႈၵူၼ်းၽၢၼ်တီႈၶႃႈဢေႃႈ။ ႁႂ်ႈတူဝ်ၶဝ်လႆႈၶမ်ၵႃႈၼႂ်းၶိုမ်းဢၼ်ၶဝ်ႁဵတ်းၼၼ်ႉသေၵမ်းတီႈၶႃႈ။
ၵူၼ်းႁၢႆႉၵူၼ်းမိူၵ်ႈၸိူဝ်းၼၼ်ႉမီးတၢင်းဢၼ်မႃႇၼႃႉၸႂ်သုင် လူၺ်ႈလွင်ႈဢလူဝ်ႇႁူဝ်ၸႂ်ၶဝ်ဢၼ်ဢမ်ႇတြႃးၼၼ်ႉဢေႃႈ။ ၵူၼ်းဢၼ်လေႃးၽႃႉပူၼ်ႉလိူဝ်ၼၼ်ႉၸၢင်ႈလႃႇၸၢင်ႈလင်လႄႈ ၸၢင်ႈထဵင်ပႅတ်ႈ ထႃႇဝရႃႉၽြႃး၊ ဢေႃႈ။
ၵူၼ်းႁၢႆႉၵူၼ်းမိူၵ်ႈၸိုင်၊ဢမ်ႇၸၢင်ႈဝႆႉဢမုလွင်ႈ ထႃႇဝရႃႉၽြႃး၊ ၼႂ်းတၢင်းၸႂ်ပူၵ်းပႅၼ်မၼ်းၼၼ်ႉမၼ်းထၢင်ႇၽြႃးပဵၼ်ၸဝ်ႈဢမ်ႇမီးဢေႃႈ။
ၵူၼ်းႁၢႆႉၵူၼ်းမိူၵ်ႈၼၼ်ႉလႆႈလီလႆႈပဵၼ်ၼႂ်းလွင်ႈတၢင်းၵူႈမဵဝ်းမဵဝ်းလႄႈ၊ မၼ်းဢမ်ႇၸၢင်ႈပွင်ႇလႅင်းလွင်ႈတၢင်းဢၼ်ၽြႃးပဵၼ်ၸဝ်ႈၸီႇယၢင်ႇတြႃးၼၼ်ႉ။ မၼ်းၸၢင်ႈမိတ်းသူပ်းမိတ်းၵၢင်းသႂ်ႇၵႃႈတီႈရၢၼ်ႇသူႇမၼ်းတင်းလၢႆၼၼ်ႉဢေႃႈ။
မၼ်းၸၢင်ႈလၢတ်ႈတီႈတူဝ်ၸဝ်ႈၵဝ်ႇလႄႈဝႃႈ၊ “ၵဝ်တေဢမ်ႇတွၼ်ႉလႆႈသုမ်းၵူၺ်း။ ၵဝ်တေဢမ်ႇတွၼ်ႉလႆႈထူပ်းၽေးၵူၺ်း၊” ဝႃႈၼင်ႇၼႆဢေႃႈ။
ၵႃႈဢၼ်မၼ်းလၢတ်ႈမၼ်းၸႃၼၼ်ႉ ပဵၼ်ၵႂၢမ်းလႃႇၵႂၢမ်းလင်၊ၵႂၢမ်းပႅတ်ႉၵႂၢမ်းလႅၼ်၊ၵႂၢမ်းဢၼ်ၶႃႉၸိုဝ်ႈၶၢႆသဵင်ပိူၼ်ႈဢေႃႈ။ မၼ်းၸၢင်ႈၶၼ်ၸၢင်ႈၽႂ်းၼႂ်းတၢင်းဢၼ်လၢတ်ႈႁႂ်ႈပိူၼ်ႈငိၼ်းၸင်း ဢိၵ်ႇတင်းၵႂၢမ်းဢၼ်လီႁင်ႈၼၼ်ႉဢေႃႈ။
မၼ်းၸၢင်ႈတဵတ်ႇၸၢင်ႈမႅပ်းႁိမ်းဝၢၼ်ႈႁိမ်းၼႃး ႁႂ်ႈလႆႈပႂ်ႉထႃႈဢဝ်တၢႆၵူၼ်းဢၼ်ဢမ်ႇမီးဢပျတ်ႈၼၼ်ႉဢေႃႈ။ မၼ်းၸၢင်ႈပႂ်ႉလွမ်ပႂ်ႉတူၺ်းၵေႃႉဢၼ်ဢမ်ႇမီး တီႈဢႃးၵူဝ်းၼၼ်ႉဢေႃႈ။
မၼ်းၸၢင်ႈတဵတ်ႇမႅပ်းယူႇၵႃႈၼႂ်းတီႈ ဢၼ်သဵတ်ႇဢၼ်ငႅဝ်ၼၼ်ႉ မိူၼ်ၸိူဝ်ႉၼင်ႇသၢင်ႇသီႈဢေႃႈ။ မၼ်းၸၢင်ႈမူပ်ႇယူႇႁႂ်ႈလႆႈတိဢဝ်ၵေႃႉဢၼ်ယၢၵ်ႈဢၼ်ၽၢၼ်ၼၼ်ႉဢေႃႈ။ မၼ်းၸၢင်ႈတိၺွပ်းဢဝ်ၶဝ်ၵႃႈၼႂ်းႁႅဝ်ႉၼႂ်းၶိုမ်းမၼ်းသေလႄႈတိုတ်ႉၸၼ်ဢဝ်ၶဝ်ၵႂႃႇဢေႃႈ။
ၶဝ်ၸိူဝ်းဢၼ်ဢမ်ႇမီးတီႈဢႃးၵူဝ်းၼၼ်ႉ လႆႈမူပ်ႇမၢပ်ႇၵႂႃႇလႄႈ၊ ဢူၼ်ႈတူၵ်းၵႂႃႇၵွပ်ႈပိူဝ်ႈၵေႃႉဢၼ်မီး ႁႅင်းတၼ်းၶူဝ်းၼၼ်ႉဢေႃႈ။
ၵူၼ်းႁၢႆႉၵူၼ်းမိူၵ်ႈၸိုင်၊ၸၢင်ႈလၢတ်ႈတီႈတူဝ်ၸဝ်ႈၵဝ်ႇလႄႈဝႃႈ၊ “ၽြႃးပဵၼ်ၸဝ်ႈလိုမ်းပႅတ်ႈယဝ်ႉ၊ မၼ်းၸဝ်ႈဝၢႆႇၼႃႈမၼ်းၸဝ်ႈပႅတ်ႈယဝ်ႉလႄႈ မၼ်းၸဝ်ႈဢမ်ႇႁၼ်လႃးလႃး၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ တီႈၶႃႈ၊ပၼ်တၢမ်ႇတီႈၵူၼ်းႁၢႆႉၵူၼ်းမိူၵ်ႈၸိူဝ်းၼၼ်ႉသေၵမ်းတီႈၶႃႈ။ ၶုၵ်းၸႂ်လႆႈၶဝ်ၸိူဝ်းဢၼ်လႆႈၶၢမ်ႇတုၵ်ႉၶႃႉၼၼ်ႉသေၵမ်းတီႈၶႃႈ။
ၵွပ်ႈလွင်ႈၸိူဝ်ႉၼင်ႇႁိုဝ်လႄႈၵူၼ်းႁၢႆႉ ၵူၼ်းမိူၵ်ႈၼၼ်ႉ ႁဵတ်းဢမ်ႇပေႃးၼင်ႇႁိုဝ်တီႈၽြႃးပဵၼ်ၸဝ်ႈသေလႄႈလၢတ်ႈၵႃႈၼႂ်းတူဝ်ၸဝ်ႈၵဝ်ႇလႄႈဝႃႈ၊ “မၼ်းၸဝ်ႈတေဢမ်ႇပၼ်တၢမ်ႇၵႃႈတီႈၵဝ်၊” ဝႃႈၼင်ႇၼႆၼင်ႇႁိုဝ်တီႈၶႃႈ။
ၵူၺ်းၵႃႈ၊ၸဝ်ႈႁဝ်းလႆႈႁၼ်ယဝ်ႉတီႈၶႃႈဢေႃႈ။ ၸဝ်ႈႁဝ်းဝႆႉဢမုတီႈၶဝ်ၸိူဝ်းဢၼ်ထူပ်းၽေးလႄႈလႆႈၶၢမ်ႇတုၵ်ႉၶႃႉၼၼ်ႉသေယဝ်ႉ ၸဝ်ႈႁဝ်းမႄးႁႅၼ်းတၼ်းဝႆႉတႃႇတေၸွႆႈထႅမ်ယူႇသေႇသေႇတီႈၶႃႈဢေႃႈ။ ၶဝ်ၸိူဝ်းဢၼ်ဢမ်ႇမီးတီႈဢႃးၵူဝ်းၼၼ်ႉၸၢင်ႈဢဝ်တူဝ်ၸဝ်ႈၵဝ်ႇဢၢပ်ႈပၼ်ၸဝ်ႈႁဝ်းလႄႈ၊ ၸဝ်ႈႁဝ်းၸွႆႈထႅမ်ၵေႃႉဢၼ်ၸုတ်ႈဢၼ်လုတ်ႈၼၼ်ႉသေႇသေႇတီႈၶႃႈဢေႃႈ။
ၶႅၼ်းတေႃႈႁၵ်းပႅတ်ႈတၼ်းၶူဝ်းၵူၼ်းႁၢႆႉၵူၼ်းမိူၵ်ႈ ဢိၵ်ႇတင်းၶဝ်ၸိူဝ်းဢၼ်ႁဵတ်းဢမ်ႇတြႃးၼၼ်ႉသေၵမ်းတီႈၶႃႈ။ ၶႅၼ်းတေႃႈပၼ်တၢမ်ႇတီႈၶဝ်ၵွပ်ႈလူၺ်ႈတၢင်းႁဵတ်းၶဝ်ဢၼ်ၽိတ်းပိူင်ႈၼၼ်ႉ တေႃႇထိုင်ႁွတ်ႈထၢၼ်ႈပေႃးဢမ်ႇၸၢင်ႈႁဵတ်းထႅင်ႈလႃးလႃးသေၵမ်းတီႈၶႃႈ။
ထႃႇဝရႃႉၽြႃး၊ ပဵၼ်ၶုၼ်ႁေႃၶမ်းယူႇၵူႈၵမ်ႇၽႃႇသိုပ်ႇသိုပ်ႇတၢမ်တၢမ်လႄႈ၊ ၶဝ်ၸိူဝ်းဢၼ်ၵူဝ်းၵႂၢႆႇၽြႃးတၢင်ႇသူႇတၢင်ႇပႃးၼၼ်ႉလႆႈလပ်ႉႁၢႆၵႂႃႇသေၵႃႈၼႂ်းမိူင်းၸဝ်ႈဢေႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းလႆႈငိၼ်းသဵင်ၶဝ်ၸိူဝ်းဢၼ်တႅမ်ႇယေႃႈ သူးတွင်းလဝ်ႈယွၼ်းၼၼ်ႉယူႇလႄႈ၊ၸဝ်ႈႁဝ်းႁႂ်ႈႁူဝ်ၸႂ်ၶဝ်မီးဢဵၼ်မီးႁႅင်းယူႇတီႈၶႃႈဢေႃႈ။
ၸဝ်ႈႁဝ်းလႆႈငိၼ်းသဵင်တၢင်းဢၼ်ႁွင်ႉဢၼ်ႁႆႈၶဝ်ၸိူဝ်းဢၼ် လႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသႄး ဢိၵ်ႇတင်းလုၵ်ႈဢွၼ်ႇဢၼ်ၽၢၼ်ပေႃႈၽၢၼ်မႄႈတင်းလၢႆၼၼ်ႉယူႇသေလႄႈ၊ ၸဝ်ႈႁဝ်းထွၵ်ႈလူၺ်ႈတၢင်းဢၼ်ၶဝ်သိုဝ်ႈတေႃႇၼၼ်ႉလႄႈၸီႇယၢင်ႇတႅပ်းတတ်း၊ ႁႂ်ႈၵူၼ်းဢၼ်ဢွၵ်ႇပဵၼ်မႃးၵႃႈတီႈလိၼ်မိူင်းဢမ်ႇလႆႈလွၵ်ႇလႆႈငိုတ်ႈထႅင်ႈတီႈၶႃႈဢေႃႈ။
ၵဝ်ဢိင်ပိုင်ႈ ထႃႇဝရႃႉၽြႃး၊ ယူႇဢေႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းလၢတ်ႈတီႈၵဝ်လႄႈဝႃႈ၊ “မိၼ်ပၢႆႈၵႂႃႇမိူၼ်ၸိူဝ်ႉၼင်ႇၼူၵ်ႉမိၼ်ၵႂႃႇၸူး ၵႃႈတီႈလွႆတႃႉ။
တူၺ်းလူး။ ၵူၼ်းႁၢႆႉၵူၼ်းမိူၵ်ႈၸိူဝ်းၼၼ်ႉဝူတ်ႈၵၢင်ႇသေလႄႈဢဝ်ပိုၼ်တၢင်ႇဝႆႉ ၵႃႈတီႈသၢႆၵၢင်ႇၵႃႈၼႂ်းလပ်းသိင်ႇ ႁႂ်ႈလႆႈယိုဝ်းသႂ်ႇၶဝ်ၸိူဝ်းဢၼ်ၸႂ်သၽေႃးသိုဝ်ႈယူဝ်းၼၼ်ႉဢေႃႈ။
ပေႃးငဝ်ႈႁၢၵ်ႈမၼ်းလုလႅဝ်ၸိုင်၊ၵေႃႉဢၼ် သိုဝ်ႈတေႃႇၼၼ်ႉ၊ ဢမ်ႇၸၢင်ႈႁဵတ်းၸိူဝ်ႉၼင်ႇႁိုဝ်ယဝ်ႉ၊” ဝႃႈၸိူဝ်ႉၼင်ႇၼႆယူႇၼင်ႇႁိုဝ်။
ထႃႇဝရႃႉၽြႃး၊ မီးယူႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈဢၼ်မူတ်းၸၢင်ႇၼၼ်ႉဢေႃႈ။ ပလၢင်ႇ ထႃႇဝရႃႉၽြႃး၊ မီးယူႇၵႃႈၼိူဝ်မိူင်းၵၢင်ႁၢဝ်သေယဝ်ႉ၊ မၼ်းၸဝ်ႈပႂ်ႉလူလွမ်တူၺ်းၵူၼ်းတင်းလၢႆၵူႈတီႈၵူႈလႅၼ်လႄႈ ႁုႁၼ်တၢင်းဢၼ်ၶဝ်ႁဵတ်းယူႇၼၼ်ႉတီႈၶႃႈဢေႃႈ။
မၼ်းၸဝ်ႈၸႅတ်ႈထၢမ်ၸၢမ်းတူၺ်းၵူၼ်းလီ ၵူၼ်းႁၢႆႉမိူၼ်မိူၼ်ၵၼ်တီႈၶႃႈဢေႃႈ။ မၼ်းၸဝ်ႈၸင်းၵေႃႉဢၼ်ဢမ်ႇမီးၽြႃးတြႃးၼၼ်ႉတီႈၶႃႈဢေႃႈ။
မၼ်းၸဝ်ႈတၵ်းပွႆႇထၢၼ်ႇၽႆးလႅင်ဢိၵ်ႇတင်းၽႆးၵၢၼ်ႉ ႁႂ်ႈတူၵ်းသႂ်ႇၵႃႈၼိူဝ်၊ၵူၼ်းႁၢႆႉၵူၼ်းမိူၵ်ႈဢေႃႈ။ မၼ်းၸဝ်ႈဢဝ်တင်းလူမ်းၽႆးလႄႈပၼ်တၢမ်ႇၶဝ်ဢေႃႈ။
ထႃႇဝရႃႉၽြႃး၊ ႁဵတ်းၸွမ်းၼင်ႇတြႃးလႄႈၵျိူၵ်ႈတၢင်းႁဵတ်းဢၼ်တြႃးဢေႃႈ။ ၵေႃႉဢၼ်ၸႂ်သၽေႃးသိုဝ်ႈယူဝ်းၼၼ်ႉတၵ်းလႆႈႁၼ်ၼႃႈမၼ်းၸဝ်ႈဢေႃႈ။
ထႃႇဝရႃႉၽြႃး၊ တီႈၶႃႈ။ ၸွႆႈထႅမ်သေၵမ်းတီႈၶႃႈ။ ၵူၼ်းသိုဝ်ႈတေႃႇဝၢႆးၵႂႃႇယဝ်ႉလႄႈ၊ၵူၼ်းဢၼ်မီးသဵတ်ႈၸႃႇၼၼ်ႉ၊လပ်ႉႁၢႆၵႂႃႇသေ ၵႃႈတီႈၵူၼ်းမဵဝ်းတင်းလၢႆယဝ်ႉတီႈၶႃႈဢေႃႈ။
ၶဝ်ၵႃႈမီးတင်းသဵင်ႈတင်းလူင်ၼၼ်ႉၵေႃႉၼိုင်ႈလႄႈၵေႃႉၼိုင်ႈပႅတ်ႉၵၼ်လႅၼ်ၵၼ်ယူႇ၊ ဢဝ်တင်းၸႂ်သွင်ငၢမ်ႈၶျေႃးၵိၼ်ဝွၼ်းၵိၼ်ၵၼ်ယူႇဢေႃႈ။
ထႃႇဝရႃႉၽြႃး၊ တီႈၶႃႈ။ ႁၢမ်ႈတၢပ်ႈႁႄႉၶႅၼ်ၸႂ်သွင်ငၢမ်ႈၸိူဝ်းၼၼ်ႉ၊ႁႂ်ႈၶဝ်တဵတ်ႇယဵၼ်သေၵမ်းတီႈၶႃႈ။ ဢိုတ်းသူပ်းၸိူဝ်းဢၼ်ၸၢင်ႈဢုပ်ႇဢၢတ်ႇလႄႈလၢတ်ႈဝႃႈ၊
“ႁဝ်းဢဝ်တင်းသူပ်းၵႂၢမ်းလၢတ်ႈလႄႈလႆႈၵႃႈဢၼ်ႁဝ်းမီးဢလူဝ်ႇၼၼ်ႉဢေႃႈ။ ႁဝ်းမီးဢလူဝ်ႇၸိူဝ်ႉၼင်ႇႁိုဝ်ၵေႃႈႁဝ်းလၢတ်ႈဝႃႈလႄႈ၊ၽူႈလႂ်တၵ်းႁႄႉၶႅၼ်ႁဝ်းလႆႈ၊” ဝႃႈၼင်ႇၼႆၼၼ်ႉသေၵမ်းတီႈၶႃႈ။
ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ၵွပ်ႈပိူဝ်ႈတၢင်းဢၼ်ၼိၵ်ႈၸၢၵ်ႈငႅၼ်းသႄးဢၼ်၊ၵေႃႉဢၼ်ယၢၵ်ႈဢၼ်ၽၢၼ်လႆႈၶၢမ်ႇ၊ ဢိၵ်ႇတင်းတၢင်းဢၼ်ထူၺ်ႈၸႂ်သဝ်ႈၸႂ်လူင်၊ၵေႃႉဢၼ်ဢိုပ်းယၢၵ်ႈၼၼ်ႉလႄႈ၊ မိူဝ်ႈလဵဝ်ၼႆႉၵဝ်တၵ်းလူင်းမႃးဢေႃႈ။ ၵဝ်တၵ်းပၼ်ႁႂ်ႈမၼ်းလႆႈၸွမ်းၵႃႈၼင်ႇဢၼ်မၼ်းတူၵ်းဢၢင်ႈၶႂ်ႈလႆႈ တၢင်းဢၼ်ယူႇလူင်ႉလီလွတ်ႈလီၼၼ်ႉဢေႃႈ၊” ဝႃႈၼင်ႇၼႆတီႈၶႃႈဢေႃႈ။
ၵႂၢမ်းၵတိ ထႃႇဝရႃႉၽြႃး၊ ၼၼ်ႉပဵၼ်ၵႂၢမ်းဢၼ်လီယုမ်ႇဢေႃႈ။ ၵတိၸိူဝ်းၼၼ်ႉပဵၼ်ၸိူဝ်ႉၼင်ႇငိုၼ်းဢၼ်ၶႃႇၵႃႈၼႂ်းမိုင်ႈလိၼ် ႁႂ်ႈမူတ်းသႂ်ထိုင်ၸဵတ်းပွၵ်ႈၼၼ်ႉတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းလူပႂ်ႉထိင်းၶႃႈၸဝ်ႈႁဝ်းၶဝ်သေလႄႈ၊ ႁႄႉၵင်ႈၶႃႈၸဝ်ႈႁဝ်းၶဝ် ၵႃႈၼႂ်းၵူၼ်းၸိူဝ်းၼႆႉယူႇတႃႇသေႇတီႈၶႃႈဢေႃႈ။
ၵူၼ်းႁၢႆႉၵူၼ်းမိူၵ်ႈတင်းလၢႆလႄႇလၢဝ်းၵူႈၽၢႆႇၵူႈပႃႈ ယူႇၼႂ်းမိူဝ်ႈဢၼ်ၵူၼ်းတင်းလၢႆ ယုၵ်ႉယွင်ႈတၢင်းဢၼ်ႁၢႆႉယုတ်ႈယူႇၼၼ်ႉတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းတၵ်းလူင်လိုမ်းပႅတ်ႈၶႃႈၸဝ်ႈယူႇႁိုင်ၵႃႈႁိုဝ်တီႈၶႃႈ။ တၵ်းလူင်လိုမ်းယူႇသေႇသေႇတီႈၶႃႈႁိုဝ်း။ ၸဝ်ႈႁဝ်းတၵ်းလပ်ႉၼႃႈၸဝ်ႈႁဝ်းသေၵႃႈတီႈၶႃႈၸဝ်ႈယူႇႁိုင်ၵႃႈႁိုဝ်တီႈၶႃႈ။
ၶႃႈၸဝ်ႈတၵ်းလႆႈယိူၼ်ႉၶၢမ်ႇတုၵ်ႉၶႃႉယူႇႁိုင်ၵႃႈႁိုဝ်တီႈၶႃႈ။ တၢင်းမႆႈၸႂ်ၶီၸႂ်ဢၼ်တဵမ်ဢူၵ်းတဵမ်ၸႂ်ၶႃႈၸဝ်ႈယူႇဝၼ်းဝၼ်းၶိုၼ်းၶိုၼ်းၼၼ်ႉ၊ တၵ်းပဵၼ်ယူႇႁိုင်ၵႃႈႁိုဝ်တီႈၶႃႈ။ ရၢၼ်ႇသူႇၶႃႈၸဝ်ႈၼၼ်ႉတၵ်းပႄႉၼႅင်ႇ၊ၶႃႈၸဝ်ႈယူႇႁိုင်ၵႃႈႁိုဝ်တီႈၶႃႈ။
ထႃႇဝရႃႉၽြႃး၊ ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ ၶႅၼ်းတေႃႈဝၢႆႇၼႃႈၸူးၶႃႈၸဝ်ႈလႄႈဢိူဝ်ၶႃႈၸဝ်ႈသေၵမ်းတီႈၶႃႈ။ ၶႅၼ်းတေႃႈၶိုၼ်းပၼ်ဢဵၼ်ပၼ်ႁႅင်းတီႈၶႃႈၸဝ်ႈသေၵမ်းတီႈၶႃႈ။ ပေႃးဢမ်ႇၼၼ်ၶႃႈၸဝ်ႈတၵ်းတၢႆတီႈၶႃႈယဝ်ႉ။
ၶႅၼ်းတေႃႈယႃႇပေႁႂ်ႈရၢၼ်ႇသူႇၶႃႈၸဝ်ႈလႆႈလၢတ်ႈဝႃႈ၊ “ႁဝ်းပႄႉၼႅင်ႇမၼ်းယဝ်ႉ၊” ဝႃႈၼင်ႇၼႆသေၵမ်းတီႈၶႃႈ။ ၶႅၼ်းတေႃႈယႃႇပေႁႂ်ႈၶဝ်သႂၢင်ႇသိူဝ်း၊ ၵွပ်ႈပိူဝ်ႈဢၼ်ၶႃႈၸဝ်ႈတူၵ်းလူမ်ႉၼၼ်ႉသေၵမ်းတီႈၶႃႈဢေႃႈ။
ၶႃႈၸဝ်ႈဢိင်ပိုင်ႈၵရုၼႃႇၸဝ်ႈႁဝ်းတီႈၶႃႈဢေႃႈ။ ၶႃႈၸဝ်ႈသႂၢင်ႇသိူဝ်း၊ၵွပ်ႈပိူဝ်ႈဢၼ်ၸဝ်ႈႁဝ်းၵႄႇၼုၵ်ႈဢဝ်ၶႃႈၸဝ်ႈၼၼ်ႉတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈတၵ်းႁဵတ်းၵႂၢမ်းယွင်ႈယေႃးၸဝ်ႈႁဝ်း၊ ၵွပ်ႈပိူဝ်ႈဢၼ်ၸဝ်ႈႁဝ်းႁဵတ်းၵျေးၸူးၼမ်ၼႃႇတီႈၶႃႈၸဝ်ႈၼၼ်ႉတီႈၶႃႈဢေႃႈ။
ၵူၼ်းဢၼ်မိူၵ်ႈၼၼ်ႉၸၢင်ႈလၢတ်ႈၵႃႈၼႂ်းႁူဝ်ၸႂ်မၼ်းလႄႈဝႃႈ၊ “ၽြႃးပဵၼ်ၸဝ်ႈဢမ်ႇမီး၊” ဝႃႈၼင်ႇၼႆဢေႃႈ။ ၶဝ်ၸိူဝ်ႉၼင်ႇၼၼ်ၼၼ်ႉပဵၼ်ဢၼ်ႁၢႆႉမိူၵ်ႈၼႃႇလႄႈ ၸၢင်ႈႁဵတ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇၼၼ်ႉဢေႃႈ။ ၵေႃႉဢၼ်ႁဵတ်းလွင်ႈလီလွင်ႈငၢမ်းၼၼ်ႉဢမ်ႇမီးသေၵေႃႉသေၵူၼ်းယဝ်ႉ။
ထႃႇဝရႃႉၽြႃး၊ ယူႇၵႃႈၼိူဝ်ၽုင်ႇၵၢင်ႁၢဝ်လႄႈၵူမ်ႈတူၺ်းမဵဝ်းၵူၼ်းတင်းလၢႆ ႁႂ်ႈလႆႁုႁၼ်လွင်ႈဢၼ်ၵေႃႉဢၼ်ႁုၸႅင်ႈ၊ၵေႃႉဢၼ်ႁႃၽြႃးပဵၼ်ၸဝ်ႈ ယင်းမီးယူႇသေၵေႃႉသေၵူၼ်းႁိုဝ်း၊ဢမ်ႇမီးႁိုဝ်ၼၼ်ႉတီႈၶႃႈဢေႃႈ။
ၵူၼ်းတင်းသဵင်ႈတင်းလူင်ၽိတ်းတၢင်းယဝ်ႉ။ ၶဝ်ပဵၼ်ဢၼ်ႁၢႆႉမိူၵ်ႈမိူၼ်မိူၼ်ၵၼ်ဢေႃႈ။ ၵေႃႉဢၼ်ၵမ်ၵျၢင်ႉၸွမ်းတြႃးလီလီငၢမ်းငၢမ်းဢမ်ႇမီး။ သေၵေႃႉၼိုင်ႈၵေႃႈဢမ်ႇမီး။
ထႃႇဝရႃႉၽြႃး၊ ထၢမ်လႄႈဝႃႈ၊ “ၶဝ်ဢမ်ႇႁုၵႃႈသင်ႁိုဝ်း။ ၵူၼ်းၸိူဝ်းဢၼ်ႁဵတ်းႁၢႆႉႁဵတ်းမိူၵ်ႈ၊တင်းသဵင်ႈတင်းလူင်ၼၼ်ႉဢမ်ႇမီးဢွၵ်းဢေႃႁိုဝ်း။ ၶဝ်ၼၼ်ႉဢသၢၵ်ႈလိပ်းလူၺ်ႈ၊တၢင်းဢၼ်ႁိမ်ႁူင်ႇၸူၼ်ၵိၼ်ၵူၼ်းၵဝ်တင်းလၢႆလႄႈ၊ ၶဝ်ဢမ်ႇႁဵတ်းပထၼႃႇတီႈၵဝ်သေပွၵ်ႈ၊” ဝႃႈၼင်ႇၼႆဢေႃႈ။
ၵႃႈတီႈၶဝ်ၼၼ်ႉတၵ်းမီးတၢင်းဢၼ်ၵူဝ်ဢၼ်ႁႄဢေႃႈ။ လွင်ႈမၼ်းၸမ်ႉ၊ၽြႃးပဵၼ်ၸဝ်ႈမီးယူႇၽၢႆႇမဵဝ်းၵူၼ်းဢၼ်သိုဝ်ႈတေႃႇၼၼ်ႉဢေႃႈ။
ၵူၼ်းဢၼ်ႁဵတ်းႁၢႆႉႁဵတ်းမိူၵ်ႈၼၼ်ႉၸၢင်ႈယႃႉပႅတ်ႈတၢင်းၵျၢမ်ႇတၢင်းပွင်၊ ၵေႃႉဢၼ်ႁူဝ်ၸႂ်ၶျႃးတႅမ်ႇၼၼ်ႉဢေႃႈ။ ၼႂ်းဝႃႈၼၼ်သေၵေႃႈ၊ ထႃႇဝရႃႉၽြႃး၊ ၵႅတ်ႇၶႄႁႄႉၵင်ႈၵေႃႉၼၼ်ႉယူႇဢေႃႈ။
ႁႂ်ႈၵျေးၸူးတၢင်းဢၼ်ၵႄႇၶျွတ်ႈဢဝ်မဵဝ်း ဢိသရေး၊ ၼၼ်ႉပေႃႇဢွၵ်ႇ ၵႃႈၼိူဝ်လွႆ ၸိဢုၼ်ႇ၊ မႃးသေၵမ်းလူၺ်ႈ။ ၵူၼ်းမဵဝ်း ဢိသရေး၊ တင်းလၢႆ၊တၵ်းတေလႆႈ သႂၢင်ႇသိူဝ်းၼႃႇလူင်လၢင် ၼႂ်းမိူဝ်ႈဢၼ် ထႃႇဝရႃႉၽြႃး၊ ႁဵတ်းႁႂ်ႈၶဝ်၊သမ်ႉၶိုၼ်ႈယႂ်ႇမႂ်ႇသုင်ထႅင်ႈၼၼ်ႉဢေႃႈ။
ထႃႇဝရႃႉၽြႃး၊ တီႈၶႃႈ။ ၽူႈလႂ်တၵ်းတေလႆႈၶဝ်ႈၸူးၵျွင်းပိၵ်ႈမၢၼ်ႇၸဝ်ႈႁဝ်းတီႈၶႃႈ။ ၽူႈလႂ်တၵ်းတေဝႆႈသႃၸဝ်ႈႁဝ်း ၵႃႈၼိူဝ် ၸိဢုၼ်ႇ၊ လွႆဢၼ်မူတ်းၸၢင်ႇၼၼ်ႉတီႈၶႃႈ။
ပဵၼ်ၵေႃႉဢၼ်ထွမ်ႇဢဝ်ၽြႃးပဵၼ်ၸဝ်ႈၼႂ်း လွင်ႈတၢင်းၵူႈၸိူဝ်ႉၵူႈပိူင်၊ ၵေႃႉဢၼ်ၵမ်ၵျၢင်ႉၸွမ်းတြႃးလႄႈလၢတ်ႈၵႂၢမ်းသဵတ်ႈၸႃႇ၊ၵႂၢမ်းဢၼ်မၢၼ်ႇဢၼ်မႅၼ်ႈ၊
ၵေႃႉဢၼ်ဢမ်ႇၶႃႉၸိုဝ်ႈၶၢႆသဵင်ပိူၼ်ႈမႅၼ်ႈၼၼ်ႉ၊ မၼ်းဢမ်ႇႁဵတ်းလွင်ႈဢၼ်ဢမ်ႇလီဢမ်ႇငၢမ်းတီႈၵေႃႉသႄႈမၼ်းလႄႈ ဢမ်ႇတွၼ်ႉသႄႉသွမ်းၵေႃႉဢၼ်ၸၢပ်ႈသႅင်ႇၵၼ်တင်းမၼ်းၼၼ်ႉ။
မၼ်းဢမ်ႇမၢတ်ႈၵေႃႉဢၼ်ၽြႃးပဵၼ်ၸဝ်ႈ ပႄႇပႅတ်ႈဝႆႉၼၼ်ႉသေလႄႈ ရူဝ်ႇသေႇၵူဝ်ယမ်ၵေႃႉဢၼ်ၵူဝ်ႁႄ ထႃႇဝရႃႉၽြႃး၊ ၼၼ်ႉဢေႃႈ။ မၼ်းႁဵတ်းၸွမ်းၵႂၢမ်းဢၼ်မၼ်းဝႆႉၵတိၼၼ်ႉသေႇသေႇယူႇ၊ ပိၵ်ႉသမ်ႉဢၵျူဝ်းတူဝ်ၸဝ်ႈၵဝ်ႇသုမ်းသေၵေႃႈမၼ်းဢမ်ႇယႃႉသဵတ်ႈၸႃႇမၼ်း။
မၼ်းပၼ်ၵူႈပၼ်ယိမ်လႄႈဢမ်ႇဢဝ်ၶီႈမၼ်း၊ မၼ်းဢမ်ႇဢဝ်သူးလၢပ်ႈႁႂ်ႈလႆႈယူႇၽၢႆႇၼိုင်ႈတင်းတီႈၵေႃႉဢၼ်ဢမ်ႇမီးဢပျတ်ႈၼၼ်ႉ။ ၵေႃႉဢၼ်ၵမ်ၵျၢင်ႉလွင်ႈတၢင်းၸိူဝ်းၼႆႉၼၼ်ႉတၵ်းဢမ်ႇလႆႈသၼ်ႇၶွၼ်းလႄႈ တႄႇမၼ်ႈယူႇတႃႇသေႇဢမ်ႇထၢတ်ႇဢေႃႈ။
ၽြႃးပဵၼ်ၸဝ်ႈတီႈၶႃႈ႟။ ၵႅတ်ႇၶႄႁႄႉၵင်ႈၶႃႈၸဝ်ႈသေၵမ်းတီႈၶႃႈ။ ၶႃႈၸဝ်ႈဢိင်ပိုင်ႈၸဝ်ႈႁဝ်းတီႈၶႃႈဢေႃႈ။
ၶႃႈၸဝ်ႈလဝ်ႈလၢတ်ႈတီႈ ထႃႇဝရႃႉၽြႃး၊ လႄႈဝႃႈ၊ “ၸဝ်ႈႁဝ်းပဵၼ်ၸဝ်ႈၵဝ်ၶႃႈတီႈၶႃႈဢေႃႈ။ တၢင်းလီမၢင်ႇၵလႃႇၵႃႈဢၼ်၊ၶႃႈၸဝ်ႈလႆႈၶၢမ်ႇဢဝ်ၼၼ်ႉ လႆႈမႃးၵႃႈတီႈၸဝ်ႈႁဝ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၵူၼ်းၸိူဝ်းဢၼ်ပႂ်ႉသဵတ်ႈၸႃႇၵႃႈၼိူဝ် ထႃႇဝရႃႉၽြႃး၊ ၼၼ်ႉပဵၼ်ၶဝ်ၸိူဝ်းဢၼ်မျၢတ်ႈလီလိူဝ်တွၼ်းၼႃႇလႄႈ ၶႃႈၸဝ်ႈၸူမ်းသိူဝ်းၼႃႇလူင်လၢင်ႁႂ်ႈလႆႈယူႇလူၺ်ႈၵၼ်တင်းၶဝ်ၼၼ်ႉဢေႃႈ။
ၶဝ်ၸိူဝ်းဢၼ်ၼႅတ်ႈၸွမ်းလင်ၽြႃးတၢင်ႇသူႇတၢင်ႇပႃးၼၼ်ႉ၊ ၸၢင်ႈႁႂ်ႈတုၵ်ႉၶႃႉၼမ်ၼႃႇတူၵ်းႁွတ်ႈၼိူဝ်တူဝ်ၸဝ်ႈၵဝ်ႇဢေႃႈ။ ၵဝ်တၵ်းဢမ်ႇၶဝ်ႈပႃးၸွမ်းတၢင်းဢၼ်ၶဝ်သၢၵ်ႈလူႇၼၼ်ႉ။ ၵဝ်တၵ်းဢမ်ႇဝႆႈၽြႃးၶဝ်ၼၼ်ႉလႃးလႃး။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းပဵၼ်ပုၼ်ႈပဵၼ်တႃႇဢၼ်ၶႃႈၸဝ်ႈလႆႈၶၢမ်ႇဢဝ်ၼၼ်ႉ၊ ဢိၵ်ႇတင်းၸဝ်ႈႁဝ်းပၼ်ၵႃႈဢၼ်ၶႃႈၸဝ်ႈလူဝ်ႇၼၼ်ႉၵႃႈမီးတင်းသဵင်ႈတင်းလူင်ဢေႃႈ။ ဢသၢၵ်ႈတၢၼ်းၶႃႈၸဝ်ႈမိူဝ်းၼႃႈၼၼ်ႉ၊မီးၼႂ်းမိုဝ်းၸဝ်ႈႁဝ်းတီႈၶႃႈဢေႃႈ။
သုၵျေးၸူးၸဝ်ႈႁဝ်းၼၼ်ႉပဵၼ်ဢၼ်လီဢၢမ်းၼႃႇတီႈၶႃႈၸဝ်ႈလႄႈ၊ ပဵၼ်ဢၼ်လီငၢမ်းပုၼ်ႈၶႃႈၸဝ်ႈတီႈၶႃႈဢေႃႈ။
ၵဝ်ယွင်ႈယေႃး ထႃႇဝရႃႉၽြႃး၊ ၵွပ်ႈပိူဝ်ႈမၼ်းၸဝ်ႈဢွၼ်သူင်ႇၵဝ်ၼၼ်ႉဢေႃႈ။ ၼႂ်းၶိင်ႇၵၢင်ၶိုၼ်းၵေႃႈၸႂ်ဢၼ်ႁုတူဝ်ၸဝ်ႈၵဝ်ႇၼၼ်ႉပၼ်သတိတီႈၵဝ်ယူႇဢေႃႈ။
ၵဝ်ဢဝ် ထႃႇဝရႃႉၽြႃး၊ ဝႆႉသိုဝ်ႈၼႃႈတႂ်ႈတႃၵဝ်ယူႇသေႇသေႇဢေႃႈ။ ၵွပ်ႈပိူဝ်ႈဢၼ်မၼ်းၸဝ်ႈမီးၸမ်လႄႈ ၵဝ်ဢမ်ႇလႆႈတူင်ႉလႆႈၶွၼ်း။
ပိူဝ်ႈၼႆလႄႈႁူဝ်ၸႂ်ၵဝ်မီးတၢင်းဢၼ်ၸူမ်းသိူဝ်း၊ ဝိၺိၺ်ႇၵဝ်ၵေႃႈ၊မီးတၢင်းဢၼ်မူၼ်ႈပျေႃႇလႄႈ တူဝ်ၶၼ်ႇထႃႇၵဝ်၊လႆႈလိုဝ်ႈယူႇလူင်ႉလီလွတ်ႈလီဢေႃႈ။
လွင်ႈမၼ်းၸမ်ႉ၊ၸဝ်ႈႁဝ်းၵႅတ်ႇၶႄႁႄႉၵင်ႈ ၶႃႈၸဝ်ႈသေၵႃႈတီႈတၼ်းၶူဝ်း တၢင်းတၢႆတီႈၶႃႈဢေႃႈ။ ၵေႃႉဢၼ်ၸဝ်ႈႁဝ်းႁၵ်ႉပႅင်းၼၼ်ႉၵေႃႈၸဝ်ႈႁဝ်းဢမ်ႇပၼ်ႁွတ်ႈထိုင်၊တၢင်းဢၼ်တူႇ ဢၼ်ၼဝ်ႈတီႈၶႃႈ။
ၸဝ်ႈႁဝ်းယင်းၼႄပၼ်သဵၼ်ႈတၢင်းဢၼ်ႁွတ်ႈထိုင် တီႈဢၼ်ဢသၢၵ်ႈလိပ်းၼၼ်ႉတီႈၶႃႈၸဝ်ႈ တီႈၶႃႈဢေႃႈ။ တၢင်းဢၼ်ၸဝ်ႈႁဝ်းမီးယူႇႁိမ်းၶႃႈၸဝ်ႈၼၼ်ႉႁႂ်ႈႁူဝ်ၸႂ်ၶႃႈၸဝ်ႈၸူမ်းသိူဝ်းလႄႈ ၶႃႈၸဝ်ႈမီးဢၶႂၢင်ႉဢၼ်လႆႈသႃႇယႃႇမူၼ်ႈပျေႃႇယူႇသေႇသေႇတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈထွမ်ႇငိၼ်းတၢင်းဢၼ်ၶႃႈၸဝ်ႈလဝ်ႈယွၼ်း၊ ပုၼ်ႈတၢင်းဢၼ်တြႃးၼၼ်ႉ ဢိၵ်ႇတင်းႁေႈႁူထွမ်ႇဢဝ်သဵင်ဢၼ်ၶႃႈၸဝ်ႈႁွင်ႉၵၢဝ်ႇ ပုၼ်ႈတၢင်းၸွႆႈတၢင်းထႅမ်ၼႆႉသေၵမ်းတီႈၶႃႈ။ ၶႅၼ်းတေႃႈထွမ်ႇငိၼ်းတၢင်းဢၼ်၊ၶႃႈၸဝ်ႈမီးၸႂ်ယူဝ်းယူဝ်းလႄႈသူးတွင်းၼၼ်ႉသေၵမ်းတီႈၶႃႈ။
ၸဝ်ႈႁဝ်းတၵ်းထွၵ်ႈလူၺ်ႈတၢင်းဢၼ်ၶႃႈၸဝ်ႈသိုဝ်ႈတေႃႇၼၼ်ႉလႄႈၸီႇယၢင်ႇတႅပ်းတတ်း၊ ၵွပ်ႈပိူဝ်ႈၸဝ်ႈႁဝ်းႁုႁၼ်လွင်ႈတၢင်းဢၼ်သိုဝ်ႈလီယူဝ်းလီၼၼ်ႉတီႈၶႃႈဢေႃႈ။
ၸဝ်ႈႁဝ်းႁုႁၼ်ႁူဝ်ၸႂ်ၶႃႈၸဝ်ႈတီႈၶႃႈဢေႃႈ။ ၶိင်ႇၵၢင်ၶိုၼ်းၸဝ်ႈႁဝ်းမႃးလူမႃးတူၺ်းၶႃႈၸဝ်ႈသေယဝ်ႉ၊ ၸဝ်ႈႁဝ်းၸႅတ်ႈသေးတူၺ်းၶႃႈၸဝ်ႈၸေးၸေးလႄႈ ဢမ်ႇထူပ်းဢမ်ႇႁၼ်၊သၽေႃးဢၼ်မိူၵ်ႈ ၵႃႈၼႂ်းၶႃႈၸဝ်ႈၵႃႈသင်လႃးလႃး။
ၶႃႈၸဝ်ႈဢမ်ႇလၢတ်ႈၵႂၢမ်းႁၢဝ်ႈၵျၢမ်းမိူၼ်ပိူၼ်ႈတၢင်ႇၵေႃႉလႄႈ ၶႃႈၸဝ်ႈထွမ်ႇဢဝ်ဢမိင်ႉၸဝ်ႈႁဝ်း၊သမ်ႉဢမ်ႇၵႂႃႇဢမ်ႇပႆၸွမ်း၊ ၼႂ်းသဵၼ်ႈတၢင်းၶဝ်ၸိူဝ်းဢၼ်ႁၢဝ်ႈၵျၢမ်းၼၼ်ႉတီႈၶႃႈ။
ၶႃႈၸဝ်ႈၸပ်းၸွမ်းႁွမ်းပႆၼႂ်းသဵၼ်ႈတၢင်းၸဝ်ႈႁဝ်းယူႇသေႇသေႇလႄႈ ၶႃႈၸဝ်ႈဢမ်ႇလွင်ႈဢွၵ်ႇၵႂႃႇသေၵႃႈတီႈသဵၼ်ႈတၢင်းၼၼ်ႉလႃးလႃး။
ၽြႃးပဵၼ်ၸဝ်ႈတီႈၶႃႈ။ ၶႃႈၸဝ်ႈသူးတွင်းတီႈၸဝ်ႈႁဝ်း၊ၵွပ်ႈပိူဝ်ႈၸဝ်ႈႁဝ်းၸၢင်ႈဢိူဝ်ၶႃႈၸဝ်ႈၼၼ်ႉတီႈၶႃႈဢေႃႈ။ ၶႅၼ်းတေႃႈႁေႈႁူၸဝ်ႈႁဝ်းၸူးၶႃႈၸဝ်ႈလႄႈထွမ်ႇဢဝ်ၵႂၢမ်းၶႃႈၸဝ်ႈသေၵမ်းတီႈၶႃႈ။
ၶႅၼ်းတေႃႈၼႄပျႃးမႅတ်ႈတႃႇဢၼ်လီဢၢမ်းၼၼ်ႉသေလႄႈ ၵႄႇသႄႇၶျွတ်ႈဢဝ်ၶႃႈၸဝ်ႈႁဝ်းၶဝ်သေၵမ်းတီႈၶႃႈ။ ၵႃႈတီႈႁိမ်းၶၢင်ႈၸဝ်ႈႁဝ်းၼၼ်ႉၶႃႈၸဝ်ႈႁဝ်းၶဝ်လႆႈလွတ်ႈၽေးရၢၼ်ႇသူႇတင်းလၢႆတီႈၶႃႈဢေႃႈ။
ၵႅတ်ႇၶႄႁႄႉၵင်ႈၶႃႈၸဝ်ႈ မိူၼ်ၸိူဝ်ႉၼင်ႇဢၼ်ၸဝ်ႈႁဝ်း၊ႁႄႉၵင်ႈႁူၺ်ႇတႃၸဝ်ႈႁဝ်းၼၼ်ႉလႄႈ၊ ဢဝ်ၶႃႈၸဝ်ႈႁူမ်ႇသုမ်ႇဝႆႉ၊ၵႃႈတီႈ ႁူမ်ႈပိၵ်ႇၸဝ်ႈႁဝ်း၊
သေၵႃႈတီႈတၢင်းဢၼ်ၵူၼ်းႁၢႆႉၵူၼ်းမိူၵ်ႈတိုၵ်းတေႃးၼၼ်ႉ၊သေၵမ်းတီႈၶႃႈ။ ရၢၼ်ႇသူႇဢၼ်ၶႂ်ႈဢဝ်ၶႃႈၸဝ်ႈတၢႆၼၼ်ႉ၊မီးဝႆႉလဵပ်ႈႁွပ်ႈၶႃႈၸဝ်ႈသေယဝ်ႉ၊
ၶဝ်ဢမ်ႇမီးၸႂ်ဢၼ်ၸၢင်ႈဢဵတ်းလူလႄႈ၊ၶဝ်မီးသူပ်းဢၼ်လၢတ်ႈပူၵ်းပႅၼ်ၽႅၼ်သုင်ယူႇတီႈၶႃႈဢေႃႈ။
မိူဝ်ႈလဵဝ်ၶဝ်လွမ်ႉႁွပ်ႈၶႃႈၸဝ်ႈယူႇတီႈဢၼ်ၶႃႈၸဝ်ႈၵႂႃႇတီႈလႂ်တၢင်းလႂ်ၼၼ်ႉလႄႈ လွမ်ႉပႂ်ႉထႃႈဢၶႂၢင်ႉဢၼ်တၵ်းတိုတ်ႉၸၼ်ၶႃႈၸဝ်ႈတူၵ်းတီႈၶႃႈဢေႃႈ။
ၶဝ်ၼၼ်ႉပဵၼ်မိူၼ်ၸိူဝ်ႉၼင်ႇသၢင်ႇသီႈဢၼ်လွမ်ၶႃႈၸဝ်ႈယူႇ၊ ပုၼ်ႈဢၼ်တၵ်းယႃႉသိၵ်ႇၶႃႈၸဝ်ႈႁႂ်ႈပဵၼ်ပွတ်းပဵၼ်တွၼ်ႈတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈမႃးႁႄႉၶႅၼ်ရၢၼ်ႇသူႇၶႃႈၸဝ်ႈၸိူဝ်းၼၼ်ႉလႄႈ ပႄႇပႅတ်ႈၶဝ်သေၵမ်းတီႈၶႃႈၶႅၼ်းတေႃႈဢဝ်လၢပ်ႇၸဝ်ႈႁဝ်း၊ ၵႄႇသႄႇၶျွတ်ႈဢဝ်ၶႃႈၸဝ်ႈလွတ်ႈသေၵႃႈၼႂ်းမိုဝ်းၵူၼ်းႁၢႆႉၵူၼ်းမိူၵ်ႈ။
ဢိၵ်ႇတင်းၵႃႈၼႂ်းမိုဝ်းၶဝ်ၸိူဝ်းဢၼ် ၸူဝ်ႈၼႆႉၸၢတ်ႈၼႆႉလႆႈမီးၸေးၸိမ်ႇလေႃးၵီႇၼၼ်ႉ၊သေၵမ်းတီႈၶႃႈ။ ၶႅၼ်းတေႃႈဢဝ်တင်းၽေးတုၵ်ႉၶႃႉဢၼ် ၸဝ်ႈႁဝ်း၊ၸုဝႆႉသိမ်းဝႆႉပုၼ်ႈၶဝ်ၼၼ်ႉ ပၼ်တၢမ်ႇတီႈၶဝ်၊ ႁႂ်ႈမၼ်းပေႃးၵုမ်ႇပုၼ်ႈလုၵ်ႈၶဝ်၊ၵူၺ်းဢမ်ႇၵႃး သမ်ႉႁႂ်ႈမၼ်းၵိုတ်းၵျၢၼ်ႇဝႆႉပုၼ်ႈတီႈလၢၼ်ၶဝ်ၼၼ်ႉသေၵမ်းတီႈၶႃႈ။
ၶႃႈၸဝ်ႈၸမ်ႉ၊တၵ်းတေလႆႈႁၼ်ၼႃႈၸဝ်ႈႁဝ်း ၵွပ်ႈပိူဝ်ႈၶႃႈၸဝ်ႈဢမ်ႇလႆႈ၊ႁဵတ်းၽိတ်းႁဵတ်းပိူင်ႈၵႃႈသင်ၼၼ်ႉဢေႃႈ။ မိူဝ်ႈဢၼ်ၶႃႈၸဝ်ႈတိုၼ်ႇမႃးၼၼ်ႉတၢင်းဢၼ်ၸဝ်ႈႁဝ်းမီးယူႇႁိမ်းၶႃႈၸဝ်ႈၼၼ်ႉ တၵ်းႁႂ်ႈၶႃႈၸဝ်ႈလႆႈသႂၢင်ႇသိူဝ်းတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈႁၵ်ႉပႅင်းၸဝ်ႈႁဝ်း၊ဢၼ်ပဵၼ်ႁႅင်း တၼ်းၶူဝ်းၶႃႈၸဝ်ႈတီႈၶႃႈဢေႃႈ။
ထႃႇဝရႃႉၽြႃး၊ ပဵၼ်ၸဝ်ႈၵႅတ်ႇၶႄႁႄႉၵင်ႈၶႃႈၸဝ်ႈလႄႈမၼ်းၸဝ်ႈ ပဵၼ်တီႈၶႃႈၸဝ်ႈသွၼ်ႈပိုင်ႈတီႈၶႃႈဢေႃႈ။ ၽြႃးပဵၼ်ၸဝ်ႈပဵၼ်တီႈႁႄႉတီႈၵင်ႈၶႃႈၸဝ်ႈလႄႈ ၶႃႈၸဝ်ႈလႆႈယူႇလူင်ႉလီလွတ်ႈလီၵႃႈၼႂ်း မၼ်းၸဝ်ႈတီႈၶႃႈဢေႃႈ။ မၼ်းၸဝ်ႈၵႅတ်ႇၶႄႁႄႉၵင်ႈၶႃႈၸဝ်ႈမိူၼ်ၸိူဝ်ႉၼင်ႇၶႅပ်းႁႄႉလၢၵ်ႈၼၢၵ်ႈလႄႈ မၼ်းၸဝ်ႈႁႄႉၶႅၼ်ၶႃႈၸဝ်ႈႁႂ်ႈၶႃႈၸဝ်ႈလႆႈယူႇလူင်ႉလီလွတ်ႈလီဢေႃႈ။
ၶႃႈၸဝ်ႈၵၢဝ်ႇႁႃ ထႃႇဝရႃႉၽြႃး၊ လႄႈ၊မၼ်းၸဝ်ႈၵႄႇသႄႇၶျွတ်ႈဢဝ် လွတ်ႈဢွၵ်ႇၼႂ်းမိုဝ်းရၢၼ်ႇသူႇတင်းလၢႆဢေႃႈ။ ယွင်ႈယေႃး ထႃႇဝရႃႉၽြႃး၊ တီႈၶႃႈဢေႃႈ။
ၸိူၵ်ႈၶုၼ်မရၼႃႉၼၼ်ႉမတ်ႉၽုၵ်ႇၶႃႈၸဝ်ႈဝႆႉလႄႈ၊ လႅင်းၼမ်ႉပိူပ်ႈၼမ်ႉ၊ဢၼ်ၸၢင်ႈယႃႉလႅဝ်ၼၼ်ႉႁူမ်ႇသုမ်ႇၵႃႈၼိူဝ်ၶႃႈၸဝ်ႈဢေႃႈ။
ၸိူၵ်ႈမိူင်းမရၼႃႉၵေႃႈၵွတ်ႇၶဵၼ်းၶႃႈၸဝ်ႈဝႆႉလႄႈ ၶုမ်ပႃႇႁဵဝ်ႈႁၢင်ႈႁႅဝ်ႉႁၢင်ႈၶိုမ်းမၼ်းဝႆႉတီႈၶႃႈၸဝ်ႈဢေႃႈ။
ၼႂ်းမိူဝ်ႈဢၼ်ၶႃႈၸဝ်ႈထူပ်းၽေးၼၼ်ႉၶႃႈၸဝ်ႈၵၢဝ်ႇႁႃ ထႃႇဝရႃႉၽြႃး၊ ဢေႃႈ။ ၶႃႈၸဝ်ႈသႅၼ်ႇႁွင်ႉတီႈၽြႃးပဵၼ်ၸဝ်ႈၶႃႈၸဝ်ႈပုၼ်ႈတၢင်းၸွႆႈတၢင်းထႅမ်ဢေႃႈ။ မၼ်းၸဝ်ႈယူႇၼႂ်းၵျွင်းပိၵ်ႈမၢၼ်ႇမၼ်းၸဝ်ႈငိၼ်းသဵင်ၶႃႈၸဝ်ႈလႄႈ သဵင်ဢၼ်ၶႃႈၸဝ်ႈသႅၼ်ႇႁွင်ႉၼၼ်ႉမၼ်းၸဝ်ႈထွမ်ႇငိၼ်းဢေႃႈ။
မိူဝ်ႈၼၼ်ႉလိၼ်မိူင်းတူင်ႉၼိုင်ၵႂႃႇသၼ်ႇသၼ်ႇသၢႆသၢႆယူႇ၊ ငဝ်ႈႁၢၵ်ႈလွႆတင်းလၢႆၶွၼ်းၶဝ်းဝႆၵႂႃႇဝႆမႃးယူႇ ၵွပ်ႈပိူဝ်ႈၽြႃးပဵၼ်ၸဝ်ႈၸီႇယၢင်ႇပၼ်တၢမ်ႇၼၼ်ႉဢေႃႈ။
ၵႂၼ်းၽႆးဢွၵ်ႇၶူႈလင်မၼ်းၸဝ်ႈယူႇ၊ မုၵ်ႉၽႆးတင်းထၢၼ်ႇၽႆးလႅင် ဢွၵ်ႇသူပ်းမၼ်းၸဝ်ႈယူႇဢေႃႈ။
မၼ်းၸဝ်ႈၸၵ်ႉသိၵ်ႇတွင်ႉၽႃႉသေယဝ်ႉ၊ တိၼ်မၼ်းၸဝ်ႈယဵပ်ႇၼိူဝ်မွၵ်ႇၵုမ်ႈဢၼ် လပ်းသိင်ႇလႄႈလူင်းမႃးဢေႃႈ။
မၼ်းၸဝ်ႈၶီႇ ၶေႇရုၽဵမ်ႇ၊ ဢၼ်မိၼ်ယူႇၶၼ်ၽႂ်းၼႃႇၼၼ်ႉလႄႈ မၼ်းၸဝ်ႈၵႂႃႇမႃးယူႇၵႃႈၼိူဝ်ပိၵ်ႇလူမ်းဢေႃႈ။
မၼ်းၸဝ်ႈဢဝ်ဢၼ်လပ်းသိင်ႇႁူမ်ႇသုမ်ႇ တူဝ်ၸဝ်ႈၵဝ်ႇယူႇ၊ ႁႂ်ႈမွၵ်ႇၵုမ်ႈဢၼ်ၼႃတၼ်ၼႃႇ၊တဵမ်ဝႆႉတင်းၼမ်ႉၼၼ်ႉလွမ်ႉႁွပ်ႈမၼ်းၸဝ်ႈယူႇဢေႃႈ။
မၢၵ်ႇႁဵပ်းတင်းသၢႆလႅင်းၽႆးႁိူဝ်ႈဢွၵ်ႇၵႃႈတီႈၽႃႉၽႅတ်ႇၽႃႉမႅပ်ႈ၊ ၵႃႈတီႈၽၢႆႇၼႃႈမၼ်းၸဝ်ႈမႃးလႄႈ၊ၽႃႇလတ်းမွၵ်ႇၵုမ်ႈဢၼ်ၵၢမ်ႈမိုတ်ႈၼၼ်ႉဢေႃႈ။
မိူဝ်ႈၼၼ်ႉ ထႃႇဝရႃႉၽြႃး၊ ႁႂ်ႈၽႃႉလင်ယူႇၵႃႈၼိူဝ်တွင်ႉၽႃႉလႄႈ ၽြႃးဢၼ်သုင်ၼႃႇသေပိူၼ်ႈၼၼ်ႉပွႆႇသဵင်မၼ်းၸဝ်ႈ၊ဢၼ်ပဵၼ်သဵင်မၢၵ်ႇႁဵပ်း တင်းသၢႆလႅင်းၽႆးၼၼ်ႉဢေႃႈ။
မၼ်းၸဝ်ႈပိုတ်းပိုၼ်ၵၢင်ႇမၼ်းၸဝ်ႈသေလႄႈ ႁႂ်ႈရၢၼ်ႇသူႇမၼ်းၸဝ်ႈတင်းလၢႆ ၽူင်ႉပၢႆႈယၢႆႈၼီၵႂႃႇဢေႃႈ။ မၼ်းၸဝ်ႈဢဝ်တင်း သၢႆလႅင်းၽႃႉၽႅတ်ႇၽႃႉမႅပ်ႈသေလႄႈ ႁေႃႈၶဝ်ပႅတ်ႈႁႂ်ႈၶဝ်လႅၼ်ႈပၢႆႈဢေႃႈ။
ၵႃႈတီႈပိုၼ်ႉၼမ်ႉသမ်ႇမုၵ်ႈတြႃႇၼၼ်ႉလႆႈပိုတ်ႇပၢင်ႇလႄႈၵႃႈတီႈငဝ်ႈႁၢၵ်ႈလိၼ်မိူင်းၼၼ်ႉ လႆႈပိုတ်ႇဢွၵ်ႇၵႂႃႇ၊ဢူဝ်း ထႃႇဝရႃႉၽြႃး၊ တီႈၶႃႈ။ ၼႂ်းမိူဝ်ႈဢၼ်ၸဝ်ႈႁဝ်းတၢင်ႇဢပျတ်ႈရၢၼ်ႇသူႇၸဝ်ႈႁဝ်းဢိၵ်ႇတင်း၊ မိူဝ်ႈဢၼ်ၸဝ်ႈႁဝ်းထင်ႇတိုင်ႈတၢင်းဢၼ် ထူၺ်ႈၸႂ်ၵႃႈၼႂ်းၶူႈလင်ၸဝ်ႈႁဝ်း ဢွၵ်ႇၼၼ်ႉတီႈၶႃႈဢေႃႈ။
ထႃႇဝရႃႉၽြႃး၊ ယိုၼ်းမိုဝ်းၸဝ်ႈၵႃႈၼိူဝ်ၼၼ်ႉသေလႄႈယိပ်းၵမ်ၵဝ်သေယဝ်ႉ၊ တိုတ်ႉၸၼ်ဢဝ်ၵဝ်ဢွၵ်ႇၵႃႈၼႂ်းၼမ်ႉဢၼ်လိုၵ်ႉၼႃႇမႃးတီႈၶႃႈဢေႃႈ။
မၼ်းၸဝ်ႈၵႄႇသႄႇၵဝ်ဢွၵ်ႇမႃးသေၵႃႈၼႂ်းမိုဝ်းရၢၼ်ႇသူႇၵဝ်ဢၼ်ႁႅင်းယႂ်ႇၼႃႇလႄႈ ပဵၼ်ၶဝ်ၸိူဝ်းဢၼ်ၸင်းၵဝ်ဢေႃႈ။ လွင်ႈမၼ်းၸမ်ႉ၊ၶဝ်ၼၼ်ႉယဵင်ႈၶႅၼ်းႁႅင်း ယႂ်ႇၼႃႇသေၵဝ်ဢေႃႈ။
မိူဝ်ႈဢၼ်ၵဝ်ထူပ်းၽေးဢုပၢတ်ႈယူႇၼၼ်ႉ ၶဝ်ၸၢင်ႈၽုတ်းၽၢတ်းဢွၵ်ႇမႃး တိုၵ်းတေႃးၵဝ်ဢေႃႈ။ ၼႂ်းဝႃႈၼၼ်သေၵေႃႈ၊ ထႃႇဝရႃႉၽြႃး၊ ႁႄႉၵင်ႈပၼ်ၵဝ်ဢေႃႈ။
မၼ်းၸဝ်ႈၸွႆႈထႅမ်ၵဝ်ႁႂ်ႈလွတ်ႈဢွၵ်ႇသေၵႃႈၼႂ်းၽေးဢုပၢတ်ႈလႄႈ မၼ်းၸဝ်ႈၵႄႇသႄႇတိုတ်ႉၸၼ်ဢဝ်ၵဝ် ၵွပ်ႈပိူဝ်ႈဢၼ်မၼ်းၸဝ်ႈထုၵ်ႇၸႂ် ႁၵ်ႉပႅင်းၵဝ်ၼၼ်ႉဢေႃႈ။
ထႃႇဝရႃႉၽြႃး၊ တႅၼ်းပၼ်ဢၵျူဝ်းတီႈၵဝ် ၵွပ်ႈပိူဝ်ႈဢၼ်ၵဝ်ၵမ်ၵျၢင်ႉ၊သိုဝ်ႈသိုဝ်ႈ ယူဝ်းယူဝ်းလႄႈ မၼ်းၸဝ်ႈပၼ်တၢင်းလီတီႈၵဝ်ၵွပ်ႈပိူဝ်ႈဢၼ်ၵဝ်ဢမ်ႇႁဵတ်းဢပျတ်ႈၼၼ်ႉဢေႃႈ။
လွင်ႈမၼ်းၸမ်ႉ၊ၵဝ်ၵမ်ၵျၢင်ႉၸွမ်းၼင်ႇတြႃး ၸဝ်ႈ ထႃႇဝရႃႉၽြႃး၊ လႄႈ ၵဝ်ဢမ်ႇဝႄႈပႅတ်ႈသေၵႃႈတီႈၽြႃးပဵၼ်ၸဝ်ႈၵဝ်ၵႂႃႇႁႂ်ႈလႆႈႁဵတ်းႁၢႆႉမိူၵ်ႈၼၼ်ႉဢေႃႈ။
ၵဝ်ပႂ်ႉၵမ်ပႂ်ႉၸွမ်းပိင်းၺၢပ်ႈတြႃးမၼ်းၸဝ်ႈၵႃႈမီးတင်းသဵင်ႈတင်းလူင်လႄႈ ၵဝ်ဢမ်ႇပႄႇဢမ်ႇထဵင်ပႅတ်ႈသေၶေႃႈ သေၵမ်းလႃးလႃး။
မၼ်းၸဝ်ႈႁုႁၼ်လွင်ႈဢၼ်ၵဝ်ၵၢင်းလွတ်ႈတင်းတီႈဢၼ်တၢင်ႇဢပျတ်ႈၼၼ်ႉ၊ ဢိၵ်ႇတင်းလွင်ႈဢၼ်ၵဝ်ဝႄႈပႅတ်ႈတုၸရိူၵ်ႈတူဝ်ၸဝ်ႈၵဝ်ႇယူႇၼၼ်ႉဢေႃႈ။
ပိူဝ်ႈၼႆလႄႈ ထႃႇဝရႃႉၽြႃး၊ တႅၼ်းပၼ်ဢၵျူဝ်းတီႈၵဝ်ၵွပ်ႈပိူဝ်ႈဢၼ် ၵဝ်ၵမ်ၵျၢင်ႉ၊သိုဝ်ႈသိုဝ်ႈယူဝ်းယူဝ်းၼၼ်ႉ ဢိၵ်ႇတင်း၊ၵွပ်ႈပိူဝ်ႈဢၼ်ၵဝ်ဢမ်ႇႁဵတ်း ဢပျတ်ႈၼၼ်ႉဢေႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်း မီးသဵတ်ႈၸႃႇၵႃႈၼိူဝ်ၵေႃႉဢၼ်ပႂ်ႉသဵတ်ႈၸႃႇတီႈၸဝ်ႈႁဝ်းၼၼ်ႉလႄႈ ၸဝ်ႈႁဝ်းမီးၸႂ်လီၸႂ်ဝၢၼ်တေႃႇၵေႃႉဢၼ်ၸေးၸုမ်ႇၼၼ်ႉတီႈၶႃႈဢေႃႈ။
ၸဝ်ႈႁဝ်းသႂ်ၸၢင်ႇတေႃႇၵေႃႉဢၼ်မီးၸႂ်ဢၼ်သႂ်ဢၼ်ၸၢင်ႇၼၼ်ႉလႄႈ ၸဝ်ႈႁဝ်းႁဵတ်းၶတ်းတီႈၵေႃႉဢၼ်ႁၢႆႉဢၼ်မိူၵ်ႈၼၼ်ႉတီႈၶႃႈဢေႃႈ။
ၸဝ်ႈႁဝ်းၵႄႇသႄႇၶျွတ်ႈဢဝ်ၵေႃႉဢၼ်ႁူဝ်ၸႂ်ၶျႃးတႅမ်ႇၼၼ်ႉတီႈၶႃႈဢေႃႈ။ ၵူၺ်းၵႃႈ၊ၵေႃႉဢၼ်ႁူဝ်ၸႂ်ၽႅၼ်သုင်ၸမ်ႉ၊ၸဝ်ႈႁဝ်းဢဝ်ၶျႃးတူၵ်းတီႈတႅမ်ႇတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းပၼ်ဢၼ်လႅင်းတီႈၶႃႈၸဝ်ႈသေလႄႈ ၸဝ်ႈႁဝ်းႁႂ်ႈဢၼ်လပ်းသိင်ႇၶႃႈၸဝ်ႈလႅင်းတီႈၶႃႈဢေႃႈ။
ၸဝ်ႈႁဝ်းပၼ်ဢဵၼ်ပၼ်ႁႅင်းတီႈၶႃႈၸဝ်ႈႁႂ်ႈလႆႈတိုၵ်းပႄႉရၢၼ်ႇသူႇတင်းလၢႆ ဢိၵ်ႇတင်းပၼ်တၼ်းၶူဝ်းဢၼ်ပႄႉၼႅင်ႇပႅတ်ႈ တၢင်းဢၼ်ၶဝ်ၵႅတ်ႇၶႄဝႆႉၼၼ်ႉ တီႈၶႃႈဢေႃႈ။
ၽြႃးပဵၼ်ၸဝ်ႈသူႇၼႆႉၸိုင်၊သဵၼ်ႈတၢင်းမၼ်းၸဝ်ႈၸေးၸုမ်ႇလႄႈ ၵႂၢမ်းၵတိမၼ်းၸဝ်ႈမၢၼ်ႇမႅၼ်ႈတီႈၶႃႈဢေႃႈ။ မၼ်းၸဝ်ႈပဵၼ်မိူၼ်ၸိူဝ်ႉၼင်ႇၶႅပ်းဢၼ်ႁႄႉလၢၵ်ႈၼၢၵ်ႈ၊ ပုၼ်ႈတႃႇၶဝ်ၸိူဝ်းဢၼ်ႁႃသွၼ်ႈပိုင်ႈ တီႈမၼ်းၸဝ်ႈၼၼ်ႉဢေႃႈ။
ထႃႇဝရႃႉၽြႃး၊ သူႇလဵဝ်တူၼ်လဵဝ်ၵူၺ်းပဵၼ်ၽြႃးပဵၼ်ၸဝ်ႈလႄႈ ၽြႃးပဵၼ်ၸဝ်ႈသူႇလဵဝ်ပႃးလဵဝ်ၵူၺ်းပဵၼ်ၸဝ်ႈဢၼ်ႁႄႉဢၼ်ၵင်ႈႁဝ်းဢေႃႈ။
မၼ်းၸဝ်ႈပဵၼ်ၽြႃးပဵၼ်ၸဝ်ႈဢၼ်ႁဵတ်းႁႂ်ႈၵဝ်မီးဢဵၼ်မီးႁႅင်းလႄႈ ပဵၼ်ၽြႃးပဵၼ်ၸဝ်ႈဢၼ်ႁႂ်ႈသဵၼ်ႈတၢင်းၵဝ်လူင်ႉလီလွတ်ႈလီဢေႃႈ။
မၼ်းၸဝ်ႈႁႂ်ႈယၢင်တိၼ်ၵဝ်မၼ်ႈယူႇမိူၼ်ၸိူဝ်ႉၼင်ႇတိၼ်ပႄႉၽႃလႄႈ ႁႂ်ႈၵဝ်လႆႈယူႇလူင်ႉလီလွတ်ႈလီၵႃႈၼိူဝ်လွႆလူင်တင်းလၢႆဢေႃႈ။
မၼ်းၸဝ်ႈသွၼ်ပၼ်ပိင်ႇၺႃႇ ႁႂ်ႈၵဝ်မေႃတိုၵ်းသိုၵ်းလႄႈႁႂ်ႈၵဝ်ဝူတ်ႈတၢင်ႇၵၢင်ႇဢၼ်ၶႅင်ၼႃႇလႆႈဢေႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းၵႅတ်ႇၶႄႁႄႉၵင်ႈၶႃႈၸဝ်ႈသေလႄႈ ၵႄႇသႄႇၶျွတ်ႈဢဝ်ၶႃႈၸဝ်ႈတီႈၶႃႈဢေႃႈ။ တၢင်းဢၼ်ၸဝ်ႈႁဝ်းပႂ်ႉလူလုမ်းလႃးၼၼ်ႉႁႂ်ႈၶႃႈၸဝ်ႈယႂ်ႇမျၢတ်ႈတီႈၶႃႈလႄႈ မိုဝ်းၶွၼ်ၶႂႃၸဝ်ႈႁဝ်းသမ်ႉႁႂ်ႈၶႃႈၸဝ်ႈလႆႈယူႇလူင်ႉလီလွတ်ႈလီတီႈၶႃႈဢေႃႈ။
ၸဝ်ႈႁဝ်းပၼ်တီႈၵႂၢင်ႈလီပုၼ်ႈယၢင်ႈတိၼ်ၶႃႈၸဝ်ႈတၵ်းယဵပ်ႇၼၼ်ႉသေလႄႈ တိၼ်ၶႃႈၸဝ်ႈဢမ်ႇလႆႈပရၢတ်ႈၵႂႃႇတီႈၶႃႈဢေႃႈ။
ၶႃႈၸဝ်ႈလိုပ်ႈၸွမ်းလမ်းၸွမ်းရၢၼ်ႇသူႇ ၶႃႈၸဝ်ႈတင်းလၢႆယူႇ၊ ယင်းဢမ်ႇၵိုတ်းဢမ်ႇသဝ်းတေႃႇထိုင်ႁွတ်ႈလႆႈယႃႉၽဵဝ်ႈၶဝ်ပႅတ်ႈတီႈၶႃႈဢေႃႈ။
ၶႃႈၸဝ်ႈပေႃႉထုပ်ႉၶဝ်တူၵ်းလူမ်ႉၵႂႃႇတေႃႇထိုင်ႁွတ်ႈၶဝ်ဢမ်ႇၶိုၼ်းလုၵ်ႉလႆႈသေလႄႈ တူၵ်းသုမ်းၽၢႆႇၼႃႈၶႃႈၸဝ်ႈယူႇတီႈၶႃႈဢေႃႈ။
ၸဝ်ႈႁဝ်းပၼ်ဢဵၼ်ႁႅင်းပုၼ်ႈတႃႇၶႃႈၸဝ်ႈတိုၵ်းသိုၵ်းလႄႈ ႁႂ်ႈၶႃႈၸဝ်ႈလႆႈပႄႉလႆႈၼႅင်ႇရၢၼ်ႇသူႇတင်းလၢႆတီႈၶႃႈဢေႃႈ။
ၸဝ်ႈႁဝ်းႁႂ်ႈရၢၼ်ႇသူႇၶႃႈၸဝ်ႈတင်းလၢႆ လႆႈလႅၼ်ႈပၢႆႈသေၵႃႈတီႈၶႃႈၸဝ်ႈၵႂႃႇလႄႈ ၶႃႈၸဝ်ႈယႃႉၽဵဝ်ႈၶဝ်ၸိူဝ်းဢၼ်ၸင်းၶႃႈၸဝ်ႈၼၼ်ႉပႅတ်ႈတီႈၶႃႈဢေႃႈ။
ၶဝ်ၼၼ်ႉႁွင်ႉသႅၼ်ႇႁွင်ႉႁႃပုၼ်ႈတၢင်းၸွႆႈတၢင်းထႅမ်သေၵေႃႈ၊ၵေႃႉဢၼ်ၵႄႇသႄႇၶျွတ်ႈဢဝ်ဢမ်ႇမီးလႄႈ၊ ၶဝ်သမ်ႉႁွင်ႉသႅၼ်ႇႁွင်ႉႁႃ ထႃႇဝရႃႉၽြႃး၊ သေၵေႃႈ၊မၼ်းၸဝ်ႈဢမ်ႇဢိူဝ်။
ၵဝ်ၶိုတ်ႈၶဝ်ဢွၼ်ႇပဵၼ်ၽွင်ၵႂႃႇမိူၼ်ၸိူဝ်ႉၼင်ႇမုၼ်ႈလိၼ်ဢၼ်လူမ်းထူဝ်းလႄႈပိဝ်ၵႂႃႇၼၼ်ႉဢေႃႈ။ ၵဝ်ယဵပ်ႇသႂ်ႇၶဝ်မိူၼ်ၸိူဝ်ႉၼင်ႇဢၼ်ယဵပ်ႇတဝ် ၼႂ်းဢုင်ၼႂ်းၵူမ်ႇၵႃႈတီႈ ၵၢင်တၢင်းၼၼ်ႉဢေႃႈ။
ၸဝ်ႈႁဝ်းၵႄႇသႄႇၶျွတ်ႈဢဝ်ၶႃႈၸဝ်ႈဢွၵ်ႇသေၵႃႈၼႂ်းမိုဝ်း၊ၶဝ်ၸိူဝ်းဢၼ်လုၵ်ႉၽိုၼ်ႉယူႇၼၼ်ႉသေယဝ်ႉ၊ ၸဝ်ႈႁဝ်းႁႂ်ႈၶႃႈၸဝ်ႈပဵၼ်ၶုၼ်ဢၼ်ဢုပ်ႉပိူင်ႇမဵဝ်းၵူၼ်းတင်းလၢႆလႄႈ မုၵ်ႉၵူၼ်းၸိူဝ်းၵူၼ်းဢၼ်ၶႃႈၸဝ်ႈဢမ်ႇတွၼ်ႉႁုၸၵ်းၼၼ်ႉ၊လႆႈမႃးၶၢမ်ႇပဵၼ် ၵူၼ်းဝၢၼ်ႈၵူၼ်းမိူင်းၶႃႈၸဝ်ႈတီႈၶႃႈဢေႃႈ။
ၵူၼ်းတၢင်ႇသိုင်ႇတၢင်ႇမိူင်းလႆႈၵူမ်ႈၵွမ်းတီႈၶႃႈၸဝ်ႈတီႈၶႃႈလႄႈ မိူဝ်ႈဢၼ်ၶဝ်ငိၼ်းၵႂၢမ်းၶႃႈၸဝ်ႈၵေႃႈၶဝ်ဢွၼ်ၵၼ်ထွမ်ႇဢဝ်တီႈၶႃႈဢေႃႈ။
ၶဝ်ၸႂ်လုႁႅင်းဢူၼ်ႈၼႃႇသေလႄႈ၊ဢွၼ်ၵၼ်လုၵ်ႉသေၵႃႈၼႂ်းတိူၵ်ႈတိုၵ်းသိုၵ်းၶဝ်ၼၼ်ႉ ဢွၵ်ႇမႃးသၼ်ႇသၼ်ႇသၢႆသၢႆတီႈၶႃႈဢေႃႈ။
ထႃႇဝရႃႉၽြႃး၊ ဢသၢၵ်ႈလိပ်းယူႇတီႈၶႃႈဢေႃႈ။ ႁႂ်ႈၸဝ်ႈဢၼ်ၵႅတ်ႇၶႄႁႄႉၵင်ႈၵဝ်ၼၼ်ႉမီးမၢင်ႇၵလႃႇသေၵမ်းလူၺ်ႈ။ ႁႂ်ႈၸဝ်ႈဢၼ်ၵႄႇၶျွတ်ႈဢဝ်ၵဝ်ၼၼ်ႉမီးတၢင်းဢၼ်ယုၵ်ႉယွင်ႈသေၵမ်းလူၺ်ႈ။
မၼ်းၸဝ်ႈပၼ်ႁႂ်ႈၵဝ်လႆႈပႄႉလႆႈၼႅင်ႇရၢၼ်ႇသူႇတင်းလၢႆလႄႈ ဢဝ်မုၵ်ႉၵူၼ်းၸိူဝ်းၵူၼ်းၶျႃးတူၵ်းဝႆႉၵႃႈတႂ်ႈၵဝ်ယဝ်ႉဢေႃႈ။
မၼ်းၸဝ်ႈၵႄႇသႄႇဢဝ်ၵဝ်ဢွၵ်ႇသေၵႃႈၼႂ်းမိုဝ်းရၢၼ်ႇသူႇတၢင်းလၢႆဢေႃႈ။ ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းပၼ်ႁႂ်ႈၶႃႈၸဝ်ႈလႆႈပႄႉလႆႈၼႅင်ႇရၢၼ်ႇသူႇၶႃႈၸဝ်ႈ၊တင်းလၢႆသေလႄႈ၊ ၵႅတ်ႇၶႄႁႄႉၵင်ႈၶႃႈၸဝ်ႈ၊သေၵႃႈတီႈၵေႃႉဢၼ်ႁိမ်ႁူင်ႇယႃႉယုၵ်ႉၼၼ်ႉတီႈၶႃႈဢေႃႈ။
ပိူဝ်ႈၼႆလႄႈ ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈယုၵ်ႉယွင်ႈယွင်ႈယေႃးၸဝ်ႈႁဝ်း၊ၵႃႈၼႂ်းမဵဝ်းၵူၼ်းတင်းလၢႆတီႈၶႃႈလႄႈ ၶႃႈၸဝ်ႈႁဵတ်းၵႂၢမ်းထေႃးပၼႃႇတီႈၸဝ်ႈႁဝ်းတီႈၶႃႈဢေႃႈ။
ၽြႃးပဵၼ်ၸဝ်ႈပၼ်တၢင်းပႄႉၼႅင်ႇ ဢၼ်ယႂ်ႇၼႃႇလူင်လၢင်၊တီႈၶုၼ်ႁေႃၶမ်း မၼ်းၸဝ်ႈၼၼ်ႉဢေႃႈ။ မၼ်းၸဝ်ႈႁဵတ်းၵျေးၸူးၵရုၼႃႇတီႈၵေႃႉဢၼ်မၼ်းၸဝ်ႈလိူၵ်ႈဢဝ်ဝႆႉယဝ်ႉ၊ ဢၼ်ဝႃႈ တႃႇဝိတ်ႈ၊ ဢိၵ်ႇတင်းၸိူဝ်ႉၶိူဝ်းမၼ်းတင်းလၢႆယူႇၶိင်ႇၵႃႇလႃႉသိုပ်ႇသိုပ်ႇတၢမ်တၢမ်တႃႇသေႇဢေႃႈ။
ၽႃႉၵၢင်ႁၢဝ်မွၵ်ႇလၢတ်ႈလွင်ႈမုၼ်သရေႇၽြႃးပဵၼ်ၸဝ်ႈလႄႈ ၼႃၽႃႉၽုၺ်ႇမွၵ်ႇလၢတ်ႈၼႄလွင်ႈၼမ်ႉတိၼ်လၢႆးမိုဝ်းၸဝ်ႈဢေႃႈ။
ဝၼ်းၼိုင်ႈတေႃႇဝၼ်းၼိုင်ႈလၢတ်ႈယူႇ၊ ၶိုၼ်းၼိုင်ႈတေႃႇၶိုၼ်းၼိုင်ႈၵေႃႈသင်ႇသွၼ်ပၼ်ယူႇဢေႃႈ။
ဢမ်ႇမီးတၢင်းဢၼ်လၢတ်ႈဢၼ်ၸႃ၊ဢမ်ႇမီးၶေႃႈၵႂၢမ်း၊ဢမ်ႇလႆႈငိၼ်းသဵင်ဢွၵ်ႇသူပ်းၶဝ်။
ၼႂ်းဝႃႈၼၼ်သေၵေႃႈသဵင်ၶဝ်ၼၼ်ႉၸွတ်ႇတူဝ်ႈၵမ်ႇၽႃႇၵႂႃႇသေလႄႈ ၵႂၢမ်းၶဝ်ၼၼ်ႉလႆႈငိၼ်းထိုင်တီႈႁိမ်းလိၼ်သုတ်းပုၼ်ႉဢေႃႈ။ ၵႃႈၼႂ်းတီႈတွင်ႉၽႃႉၼၼ်ႉၽြႃးပဵၼ်ၸဝ်ႈႁဵတ်းႁိူၼ်းပုၼ်ႈတႃဝၼ်းဝႆႉဢေႃႈ။
တႃဝၼ်းၼၼ်ႉဢွၵ်ႇမႃးၼႂ်းၶိင်ႇၵၢင်ၼႂ်ယူႇ မိူၼ်ၸိူဝ်ႉၼင်ႇလုၵ်ႈၶူၺ်မႂ်ႇ၊ဢၼ်ဢွၵ်ႇႁိူၼ်းမၼ်းမႃးလႄႈၸူမ်းသိူဝ်း၊ ႁႂ်ႈလႆႈၶုၼ်ႇလႅၼ်ႈၸွမ်းသဵၼ်ႈတၢင်းမၼ်းမိူၼ်ၸိူဝ်ႉၼင်ႇဢၼ်ၵေႃႉဢၼ်ႁႅင်းယႂ်ႇၼႃႇၼၼ်ႉဢေႃႈ။
မၼ်းဢွၵ်ႇမႃးသေၵႃႈတီႈလႅၼ်သုတ်းတွင်ႉၽႃႉၽၢႆႇၼိုင်ႈ၊ၽႃႇလတ်းၵႂႃႇ တေႃႇထိုင်ႁွတ်ႈ တီႈလႅၼ်သုတ်းတၢင်ႇၽၢႆႇဢေႃႈ။ လွင်ႈတၢင်းဢၼ်တဵတ်ႇဢၼ်မႅပ်းႁႂ်ႈလွတ်ႈသေတၢင်းဢၼ်၊မႆႈႁွၼ်ႉမၼ်းၼၼ်ႉဢမ်ႇမီးသေၸိူဝ်ႉသေပိူင်။
တြႃးၸဝ်ႈ ထႃႇဝရႃႉၽြႃး၊ ပဵၼ်ဢၼ်ၸေးၸုမ်ႇလႄႈ၊ၸၢင်ႈပၼ်ဢဵၼ်ႁႅင်းဢၼ်မႂ်ႇဢေႃႈ။ ပိင်းၺၢပ်ႈတြႃး ထႃႇဝရႃႉၽြႃး၊ ပဵၼ်ဢၼ်လီယုမ်ႇယမ်တမ်းၸႂ်လႄႈ ၸၢင်ႈႁႂ်ႈၶဝ်ၸိူဝ်းဢၼ်ငိူဝ်ႈငႃႉၼၼ်ႉလၵ်းလႅမ်မႃးဢေႃႈ။
ၼႄးဢုပတေႇ ထႃႇဝရႃႉၽြႃး၊ ၸိူဝ်းၼၼ်ႉပဵၼ်ဢၼ်မၢၼ်ႇမႅၼ်ႈၸိုဝ်ႈၸႂ်ႈလႄႈ ႁႂ်ႈၶဝ်ၸိူဝ်းဢၼ်ထွမ်ႇဢဝ်ၼၼ်ႉမီးတၢင်းဢၼ်ၸူမ်းသိူဝ်းဢေႃႈ။ ပိင်းၺၢပ်ႈတြႃး ထႃႇဝရႃႉၽြႃး၊ ပဵၼ်ဢၼ်သႂ်ၸၢင်ႇလႄႈၸၢင်ႈႁႂ်ႈႁူဝ်ၸႂ်မေႃႁုမေႃၸႅင်ႈမႃးဢေႃႈ။
တၢင်းဢၼ်ၵူဝ်ယမ် ထႃႇဝရႃႉၽြႃး၊ ၼၼ်ႉပဵၼ်ဢၼ်လီငၢမ်းလႄႈတႄႇယူႇသေႇသေႇဢေႃႈ။ တၢင်းဢၼ် ထႃႇဝရႃႉၽြႃး၊ ၸီႇယၢင်ႇၸိူဝ်းၼၼ်ႉမႅၼ်ႈၼင်ႇတြႃးသိုဝ်ႈသိုဝ်ႈလႄႈ ပဵၼ်ဢၼ်ၽဵင်ႇပဵင်းယူႇတႃႇသေႇဢေႃႈ။
ပဵၼ်ဢၼ်လီထုၵ်ႇၸႂ်ၵျိူၵ်ႈၸႂ်ၼႃႇလိူဝ်တွၼ်းၼႃႇသေၶမ်းလွတ်ႈငၢၼ်ႇလႄႈ ပဵၼ်ဢၼ်ဝၢၼ်ၼႃႇလိူဝ်တွၼ်းသေႁူဝ်ၼမ်ႉႁူင်းၽိုင်ႈဢေႃႈ။
တြႃးၸဝ်ႈၸိူဝ်းၼၼ်ႉပၼ်ၺၢၼ်ႇပိင်ႇၺႃႇ တီႈၶႃႈၸဝ်ႈဢၼ်ပဵၼ်ၵူၼ်းဢွၼ်ႇ ၸဝ်ႈႁဝ်းၼႆႉဢေႃႈ။ ၵွပ်ႈပိူဝ်ႈဢၼ်ပႂ်ႉၸွမ်းၸိူဝ်းၼၼ်ႉလႄႈၶႃႈၸဝ်ႈလႆႈဢၵျူဝ်းယႂ်ႇၼႃႇတီႈၶႃႈဢေႃႈ။
ၽူႈလႂ်ဢမ်ႇသူႈႁုႁၼ်တၢင်းၽိတ်းတူဝ်ၸဝ်ႈၵဝ်ႇၸိူဝ်းၼၼ်ႉလႆႈ၊ ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈထုတ်ႇၼုၵ်ႈဢဝ်ၶႃႈၸဝ်ႈသေ၊ ၵႃႈတီႈဢပျတ်ႈၶႃႈၸဝ်ႈ ဢၼ်ဢမ်ႇထၢင်ႇဢမ်ႇသႃးၼၼ်ႉ သေၵမ်းတီႈၶႃႈ။
တီႈဢပျတ်ႈဢၼ်တင်ႈၸႂ်ႁဵတ်းၼၼ်ႉၵေႃႈၶႅၼ်းတေႃႈႁႂ်ႈၶႃႈၸဝ်ႈၵၢင်းလွတ်ႈသေၵမ်းတီႈၶႃႈ။ ယႃႇပေႁႂ်ႈၸိူဝ်းၼၼ်ႉဢုပ်ႉပိူင်ႇၶႃႈၸဝ်ႈသေၵမ်းတီႈၶႃႈ။ ႁဵတ်းၼၼ်လႄႈ၊ၶႃႈၸဝ်ႈၸၢင်ႈတေမီးတၢင်းဢၼ်ၸေးၸုမ်ႇလႄႈ ၸၢင်ႈတေၵၢင်းလွတ်ႈတၢင်းဢၼ်ၽိတ်းပိူင်ႈယႂ်ႇၼႃႇလူင်လၢင်ၼၼ်ႉတီႈၶႃႈဢေႃႈ။
ၶႅၼ်းတေႃႈႁႂ်ႈၵႂၢမ်းၶႃႈၸဝ်ႈဢိၵ်ႇတင်းတၢင်းၵျၢမ်ႇတၢင်းပွင်ၶႃႈၸဝ်ႈၸိူဝ်းၼၼ်ႉ၊ ပဵၼ်တၢင်းဢၼ်ထုၵ်ႇၸႂ်ၵျိူၵ်ႈၸႂ်ၸဝ်ႈႁဝ်း သေၵမ်းတီႈၶႃႈ။ ထႃႇဝရႃႉၽြႃး၊ ၸဝ်ႈဢၼ်ႁႄႉၵင်ႈၶႃႈၸဝ်ႈ၊ ၸဝ်ႈဢၼ်ထႆႇဢဝ်ၶႃႈၸဝ်ႈတီႈၶႃႈ။
ႁႂ်ႈ ထႃႇဝရႃႉၽြႃး၊ ဢိူဝ်မႂ်း ၼႂ်းမိူဝ်ႈဢၼ်မႂ်းထူပ်းၽေးဢုပၢတ်ႈၼၼ်ႉလႄႈ ႁႂ်ႈၽြႃးပဵၼ်ၸဝ်ႈ ယႃႇၵုပ်ႈ၊ ၼၼ်ႉႁႄႉၵင်ႈမႂ်းသေၵမ်းလူၺ်ႈ။
ႁႂ်ႈမၼ်းၸဝ်ႈပွႆႇပၼ်တၢင်းၸွႆႈတၢင်းထႅမ်သေ ၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉ မႃးတီႈမႂ်းလႄႈႁႂ်ႈဢဝ်ၵႃႈတီႈလွႆ ၸိဢုၼ်ႇ၊ ၼၼ်ႉထွၵ်ႈၵမ်ႉမႂ်းသေၵမ်းလူၺ်ႈ။
ႁႂ်ႈမၼ်းၸဝ်ႈႁပ်ႉတုင်းဢဝ်ၶိူင်ႈတၢင်းလူႇမႂ်း ၵူႈၸိူဝ်ႉၵူႈပိူင်ၼၼ်ႉလႄႈ ထုၵ်ႇၸႂ်ၵျိူၵ်ႈၸႂ်တၢင်းဢၼ်သၢၵ်ႈလူႇမႂ်း ၸိူဝ်းၼၼ်ႉသေၵမ်းလူၺ်ႈ။
ႁႂ်ႈမၼ်းၸဝ်ႈပၼ်ၸွမ်းၵႃႈၼင်ႇဢၼ်ဢလူဝ်ႇမႂ်းမီးၼၼ်ႉလႄႈ ႁႂ်ႈတၢင်းဢၼ်မႂ်းၶိုင်ပွင်ဝႆႉၸိူဝ်းၼၼ်ႉ ပဵၼ်ၸွမ်းၵူႈဢၼ်သေၵမ်းလူၺ်ႈ။
ၼင်ႇၼၼ်လႄႈ၊ႁဝ်းၶႃႈတၵ်းႁွင်ႉပၢဝ်ႇတၢင်းသိူဝ်းပျေႃႇလူၺ်ႈတၢင်းပႄႉၼႅင်ႇမႂ်းၼၼ်ႉလႄႈ တၵ်းၶၢမ်ႇပွႆးယွင်ႈယေႃးၽြႃးပဵၼ်ၸဝ်ႈ ၵွပ်ႈပိူဝ်ႈမႂ်းပႄႉၼႅင်ႇၼၼ်ႉတီႈၶႃႈဢေႃႈ။ ႁႂ်ႈ ထႃႇဝရႃႉၽြႃး၊ ႁဵတ်းႁႂ်ႈၵႃႈဢၼ်မႂ်းသူးတွင်းတင်းသဵင်ႈတင်းလူင်ၼၼ်ႉ ပျေႉၸုမ်ႇသေၵမ်းလူၺ်ႈ။
မိူဝ်ႈလဵဝ်ၼႆႉၵဝ်ႁုလွင်ႈဢၼ် ထႃႇဝရႃႉၽြႃး၊ ပၼ်တၢင်းဢၼ်ပႄႉၼႅင်ႇ၊ တီႈၵေႃႉဢၼ်မၼ်းၸဝ်ႈလိူၵ်ႈဢဝ် ၼၼ်ႉယူႇဢေႃႈ။ ထႃႇဝရႃႉၽြႃး၊ လုၵ်ႉသေၵႃႈတီႈမိူင်းၵၢင်ႁၢဝ်ဢၼ်မူတ်းၸၢင်ႇၸဝ်ႈၼၼ်ႉသေလႄႈ ၶိုၼ်းဢိူဝ်မၼ်းသေယဝ်ႉ၊ပႃးတင်းတၼ်းၶူဝ်းသေလႄႈပၼ်တၢင်းဢၼ်ပႄႉၼႅင်ႇ ဢၼ်ယႂ်ႇၼႃႇလူင်လၢင်တီႈမၼ်းဢေႃႈ။
ၵူၼ်းၵမ်ႈၽွင်ႈၸၢင်ႈဢိင်ပိုင်ႈလေႃႉရထႃး ၶဝ်လႄႈ၊ၵမ်ႈၽွင်ႈသမ်ႉဢိင်ပိုင်ႈမႃႉ တင်းလၢႆဢေႃႈ။ ႁဝ်းၸမ်ႉ၊ဢိင်ပိုင်ႈတၼ်းၶူဝ်း ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းဢေႃႈ။
ၶဝ်ၼၼ်ႉႁႅင်းဢူၼ်ႈၵႂႃႇလႄႈလူမ်ႉတူၵ်းဢေႃႈ။ ႁဝ်းၸမ်ႉ၊တၵ်းလုၵ်ႉလႄႈၸုၵ်းယူႇမၼ်ႈမၼ်ႈၶိူင်ႇၶိူင်ႇဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈပၼ်တၢင်းပႄႉၼႅင်ႇတီႈၶုၼ်ႁေႃၶမ်းသေၵမ်းတီႈၶႃႈ။ ၶႅၼ်းတေႃႈဢိူဝ်ၶႃႈၸဝ်ႈႁဝ်းၶဝ်ၼႂ်းမိူဝ်ႈဢၼ်ၶႃႈၸဝ်ႈႁဝ်းၶဝ်ႁွင်ႉၼၼ်ႉသေၵမ်းတီႈၶႃႈ။
ထႃႇဝရႃႉၽြႃး၊ တီႈၶႃႈ။ ၶုၼ်ႁေႃၶမ်းၼၼ်ႉ မီးတၢင်းဢၼ်ၸူမ်းပျေႃႇၼႃႇ ၵွပ်ႈပိူဝ်ႈတၢင်းဢၼ်ၸဝ်ႈႁဝ်းပၼ်ဢဵၼ်ပၼ်ႁႅင်းၼၼ်ႉလႄႈမီးတၢင်းဢၼ်သႂၢင်ႇသိူဝ်းၼႃႇ၊ ၵွပ်ႈပိူဝ်ႈဢၼ်ၸဝ်ႈႁဝ်းပၼ်ႁႂ်ႈလႆႈပႄႉလႆႈၼႅင်ႇၼၼ်ႉတီႈၶႃႈဢေႃႈ။
ၸဝ်ႈႁဝ်းလႆႈပၼ်ၵႃႈဢၼ်ဢလူဝ်ႇၵၢင်ၸႂ်မၼ်းမီးၼၼ်ႉယဝ်ႉလႄႈ ၸဝ်ႈႁဝ်းပၼ်ၵႃႈဢၼ်မၼ်းလဝ်ႈယွၼ်းၼၼ်ႉတီႈၶႃႈယဝ်ႉ။
ၸဝ်ႈႁဝ်းဢဝ်မၢင်ႇၵလႃႇဢၼ်မျၢတ်ႈဢၼ်လီပၼ်ႁႂ်ႈမၼ်းလႆႈထူပ်းဢဝ်ယဝ်ႉလႄႈ ၸဝ်ႈႁဝ်းဢဝ်သရၽူႇၶမ်းတိုဝ်းပၼ်ၵႃႈၼိူဝ်ႁူဝ်မၼ်းတီႈၶႃႈယဝ်ႉ။
မၼ်းသူးတွင်းယွၼ်းဢဝ်ဢသၢၵ်ႈလႄႈ ၸဝ်ႈႁဝ်းပၼ်ဢသၢၵ်ႈဢၼ်ယၢဝ်း ဢၼ်ယိုၼ်းတီႈၶႃႈယဝ်ႉ။
မၼ်းၼၼ်ႉမုၼ်ယႂ်ႇၵွပ်ႈပိူဝ်ႈၸဝ်ႈႁဝ်းၸွႆႈထႅမ်ပၼ်ၼၼ်ႉယဝ်ႉလႄႈ ၵုင်ႇသရေႇတင်းတၼ်းၶူဝ်းဢႃႇၼုၽေႃႇၵေႃႈၸဝ်ႈႁဝ်းပၼ်မၼ်းတီႈၶႃႈယဝ်ႉ။
တၢင်းလီမၢင်ႇၵလႃႇၸဝ်ႈႁဝ်း မီးလူၺ်ႈၵၼ်တင်းမၼ်းတႃႇသေႇယဝ်ႉလႄႈ တၢင်းဢၼ်ၸဝ်ႈႁဝ်းတႄႇဝႆႉမီးယူႇလူၺ်ႈၵၼ်တင်းမၼ်းၼၼ်ႉ ႁႂ်ႈမၼ်းၸူမ်းသိူဝ်းမူၼ်ႈပျေႃႇတီႈၶႃႈယဝ်ႉ။
ၶုၼ်ႁေႃၶမ်းၼၼ်ႉယုမ်ႇယမ်ဢိင်ပိုင်ႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ယူႇယဝ်ႉလႄႈ ၵွပ်ႈပိူဝ်ႈတၢင်းႁၵ်ႉမႅတ်ႈတႃႇ ထႃႇဝရႃႉၽြႃး၊ ၼၼ်ႉမၼ်းဢမ်ႇလႆႈတူင်ႉလႆႈၶွၼ်း တီႈၶႃႈယဝ်ႉ။
ၶႅၼ်မိုဝ်းၸဝ်ႈႁဝ်းတၵ်းတေတိဢဝ်ရၢၼ်ႇသူႇၸဝ်ႈတင်းလၢႆလႄႈ မိုဝ်းၶွၼ်ၶႂႃၸဝ်ႈတၵ်းတိဢဝ်ၶဝ်ၸိူဝ်းဢၼ်ၸင်းၸဝ်ႈၼၼ်ႉ ၵူႈၵေႃႉၵူႈၵူၼ်းဢေႃႈ။
ၸဝ်ႈႁဝ်းတၵ်းတေယႃႉၽဵဝ်ႈၶဝ်ပႅတ်ႈမိူၼ်ၸိူဝ်ႉၼင်ႇမုၵ်ႉၽႆးၼၼ်ႉ၊ ၼႂ်းမိူဝ်ႈဢၼ်ၸဝ်ႈႁဝ်းပေႃႇမႃးၼၼ်ႉဢေႃႈ။ ထႃႇဝရႃႉၽြႃး၊ တၵ်းတေဢိုၼ်ၶဝ်ၵွပ်ႈပိူဝ်ႈတၢင်းၸႂ်မႆႈၶႂ်ႈၸႃႉမၼ်းၸဝ်ႈလႄႈ ၽႆးတၵ်းတေမႆႈၵိၼ်ၶဝ်တီႈၶႃႈဢေႃႈ။
လုၵ်ႈလၢၼ်ၸိူဝ်ႉၶိူဝ်းၶဝ်တၵ်းဢမ်ႇလႆႈဢသၢၵ်ႈလိပ်းၵိုတ်းၵျၢၼ်ႇသေဢိတ်းလႄႈ ၶုၼ်ႁေႃၶမ်းၼၼ်ႉ တၵ်းတေဢဝ်ၶဝ်တၢႆပႅတ်ႈတင်းသဵင်ႈတင်းမူတ်းဢေႃႈ။
ၶဝ်ၵျၢမ်ႇႁႃၶိုင်ပွင်ႁႂ်ႈလႆႈႁဵတ်းၶတ်းၵၼ်တင်း မၼ်းၸဝ်ႈသေၵေႃႈ၊ ၶဝ်တၵ်းတေဢမ်ႇလႆႈပႄႉၼႅင်ႇလႃးလႃး။
မၼ်းၸဝ်ႈတၵ်းတေဢဝ်ပိုၼ်ၵၢင်ႇမၼ်းၸဝ်ႈ ပိုတ်းသႂ်ႇၶဝ်သေလႄႈ ၶဝ်တၵ်းတေဢွၼ်ၵၼ်ဝၢႆႇႁူဝ်လႅၼ်ႈပၢႆႈ တီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ႁႂ်ႈၸဝ်ႈႁဝ်းမီးတၢင်းဢၼ်ယုၵ်ႉယွင်ႈယွင်ႈယေႃး၊ ၵွပ်ႈပိူဝ်ႈတၼ်းၶူဝ်းတၢင်းၵတ်ႉတၢင်းၶၼ်ၸဝ်ႈႁဝ်းၼၼ်ႉသေၵမ်းလူၺ်ႈ။ ၶႃႈၸဝ်ႈႁဝ်းၶဝ်တၵ်းတေႁဵတ်းၵႂၢမ်းထေႃးပၼႃႇတီႈတၼ်းၶူဝ်းၸဝ်ႈႁဝ်းတီႈၶႃႈဢေႃႈ။
ၽြႃးၵဝ်ၶႃႈ။ ၽြႃးၵဝ်ၶႃႈတီႈၶႃႈ။ ၵွပ်ႈသင်လႄႈၸဝ်ႈႁဝ်းၸုၼ်ႉပႅတ်ႈၶႃႈၸဝ်ႈတီႈၶႃႈ။ ၶႃႈၸဝ်ႈမီးၸႂ်ဢၼ်မႆႈႁွၼ်ႉၼႃႇလႄႈႁွင်ႉသႅၼ်ႇပုၼ်ႈတၢင်းၸွႆႈတၢင်းထႅမ်သေၵေႃႈ၊ ၸဝ်ႈႁဝ်းယင်းဢမ်ႇမႃးတီႈၶႃႈ။
ၽြႃးၵဝ်ၶႃႈတီႈၶႃႈ။ ၶိင်ႇၵၢင်ဝၼ်းၶႃႈၸဝ်ႈ ႁွင်ႉသႅၼ်ႇသေၵေႃႈ၊ၸဝ်ႈႁဝ်းယင်း ဢမ်ႇဢိူဝ်တီႈၶႃႈ။ ၶိင်ႇၵၢင်ၶိုၼ်းၵေႃႈၶႃႈၸဝ်ႈႁွင်ႉသႅၼ်ႇတီႈၶႃႈယဝ်ႉ။ ၵူၺ်းၵႃႈ၊ယင်းဢမ်ႇပႆႇလႆႈတၢင်းဢၼ်လိုဝ်ႈၼိမ်ၼိမ်လီလီတီႈၶႃႈ။
ၸဝ်ႈႁဝ်းၸိုင်၊လႆႈၼင်ႈပလၢင်ႇယူႇ၊ပဵၼ်ၸဝ်ႈဢၼ်မူတ်းၸၢင်ႇတီႈၶႃႈလႄႈ ၵူၼ်းမဵဝ်း ဢိသရေး၊ လႆႈယွင်ႈယေႃးၸဝ်ႈႁဝ်းတီႈၶႃႈဢေႃႈ။
ပူႇမွၼ်ႇၶႃႈၸဝ်ႈႁဝ်းၶဝ်ၸိူဝ်းၼၼ်ႉဢိင်ပိုင်ႈၸဝ်ႈႁဝ်းတီႈၶႃႈဢေႃႈ။ ၶဝ်ဢိင်ပိုင်ႈၸဝ်ႈႁဝ်းလႄႈ၊ၸဝ်ႈႁဝ်းၵႄႇသႄႇဢဝ်ၶဝ်လွတ်ႈတီႈၶႃႈဢေႃႈ။
ၶဝ်ႁွင်ႉၵၢဝ်ႇတီႈၸဝ်ႈႁဝ်းလႄႈၶဝ်လႆႈလွတ်ႈၽေးဢၢၼ်ႇတရေႇတီႈၶႃႈယဝ်ႉ။ ၶဝ်ဢိင်ပိုင်ႈၸဝ်ႈႁဝ်းလႄႈၶဝ်လႆႈၵၢင်းလွတ်ႈတင်းတၢင်းဢၼ်ၸႂ်လုႁႅင်းဢူၼ်ႈဢေႃႈ။
ၶႃႈၸဝ်ႈၸမ်ႉ၊ပဵၼ်ၵူၼ်းဢမ်ႇၸႂ်ႈ။ ပဵၼ်တူဝ်မူင်ႈၵူၺ်းဢေႃႈ။ ပဵၼ်တီႈဢၼ်၊ပိူၼ်ႈသႄႉသွမ်း၊တီႈဢၼ်ၵူၼ်းၵူႈၵေႃႉႁဵတ်းဢမ်ႇပေႃးၼင်ႇႁိုဝ်တီႈၶႃႈဢေႃႈ။
ၶဝ်ၸိူဝ်းဢၼ်ႁၼ်ၶႃႈၸဝ်ႈၵႃႈမီးတင်းသဵင်ႈတင်းလူင်ၼၼ်ႉႁဵတ်းပျၢၵ်ႈၶူဝ်ၶႃႈၸဝ်ႈဢေႃႈ။ ၶဝ်ဢွၼ်ၵၼ်မိတ်းသူပ်းမိတ်းပၢၵ်ႇၸူးလႄႈဝၢႆႇႁူဝ်ၶွၼ်းႁူဝ်ၸူးတီႈၶႃႈဢေႃႈ။
ၶဝ်ၼၼ်ႉဢွၼ်ၵၼ်လၢတ်ႈလႄႈဝႃႈ၊ “မႂ်းဢိင်ပိုင်ႈ ထႃႇဝရႃႉၽြႃး၊ သေၵေႃႈ၊ ၵွပ်ႈသင်လႄႈမၼ်းၸဝ်ႈဢမ်ႇၵႄႇသႄႇဢဝ်မႂ်းၼင်ႇႁိုဝ်။ ပေႃး ထႃႇဝရႃႉၽြႃး၊ ၵျိူၵ်ႈႁၵ်ႉထုၵ်ႇၸႂ်မႂ်းၸိုင်၊ ၵွပ်ႈသင်လႄႈမၼ်းၸဝ်ႈဢမ်ႇၸွႆႈထႅမ်မႂ်းၼင်ႇႁိုဝ်၊” ဝႃႈၼင်ႇၼႆတီႈၶႃႈဢေႃႈ။
ၸဝ်ႈႁဝ်းတိုတ်ႉဢဝ်ၶႃႈၸဝ်ႈဢွၵ်ႇသေၵႃႈၼႂ်းတွင်ႉမႄႈသေလႄႈ ၸဝ်ႈႁဝ်းပႂ်ႉလူလုမ်းလႃးၶႃႈၸဝ်ႈမိူဝ်ႈဢၼ်ၵိၼ်ၼူမ်းမႄႈယူႇၼၼ်ႉတီႈၶႃႈဢေႃႈ။
ၶႃႈၸဝ်ႈဢိင်ပိုင်ႈဢႃးၵူဝ်းၸဝ်ႈႁဝ်းမႃးၸဵမ်မိူဝ်ႈဢၼ်ၵိူတ်ႇဢွၵ်ႇမႃးၼၼ်ႉလႄႈ ၸဝ်ႈႁဝ်းသမ်ႉပဵၼ်ၽြႃးပဵၼ်ၸဝ်ႈၵဝ်ၶႃႈမႃးသေႇသေႇတီႈၶႃႈယဝ်ႉ။
ယႃႇပေယူႇၵႆၶႃႈၸဝ်ႈသေၵမ်းတီႈၶႃႈ။ ၽေးဢၢၼ်ႇတရေႇမီးၸမ်တီႈၶႃႈဢေႃႈ။ ၵေႃႉဢၼ်မႃႉၸႃႉၸွႆႈထႅမ်ဢမ်ႇမီးလႃးလႃးတီႈၶႃႈ။
ရၢၼ်ႇသူႇၼမ်ၼႃႇဢၼ်မိူၼ်ၸိူဝ်ႉၼင်ႇဝူဝ်းတင်းလၢႆလွမ်ႉႁွပ်ႈၶႃႈၸဝ်ႈဝႆႉဢေႃႈ။ ၶဝ်ၼၼ်ႉပဵၼ်ၸိူဝ်ႉၼင်ႇဝူဝ်းသူဝ်းလူင်မိူင်း ပႃႇသၢၼ်ႇ၊ ၼၼ်ႉလႄႈ လွမ်ႉဢုမ်ႇလဵပ်ႈႁွပ်ႈၶႃႈၸဝ်ႈယူႇတီႈၶႃႈဢေႃႈ။
ၶဝ်ဢႃႈသူပ်းဢႃႈပၢၵ်ႇၸူးၶႃႈၸဝ်ႈယူႇမိူၼ်ၸိူဝ်ႉၼင်ႇသၢင်ႇသီႈလႄႈႁွင်ႉသႅၼ်ႇယူႇ ႁႂ်ႈလႆႈၶူပ်းၶၢတ်ႇၶႃႈၸဝ်ႈပႅတ်ႈတီႈၶႃႈဢေႃႈ။
ဢဵၼ်ႁႅင်းၶႃႈၸဝ်ႈဢူၼ်ႈၵႂႃႇၸွပ်ႈၵႂႃႇမိူၼ်ၸိူဝ်ႉၼင်ႇၼမ်ႉႁူတ်းသၢႆး ၼၼ်ႉဢေႃႈ။ လုပ်ႇၵပ်းလုပ်ႇတေႃႇၶႃႈၸဝ်ႈၵႃႈမီးတင်းသဵင်ႈတင်းလူင်သွၼ်ႇတူၵ်းတီႈၶႃႈဢေႃႈ။ ႁူဝ်ၸႂ်ၶႃႈၸဝ်ႈပဵၼ်မိူၼ်ၸိူဝ်ႉၼင်ႇၶီႈၽိုင်ႈဢၼ်ၸိူမ်ႈပဵၼ်ၼမ်ႉၵႂႃႇၼၼ်ႉတီႈၶႃႈဢေႃႈ။
ၵူင်ၶေႃးၶႃႈၸဝ်ႈ ႁႅင်ႈႁွင်ၵႂႃႇမိူၼ်ၸိူဝ်ႉၼင်ႇမုၼ်ႈလိၼ်လႄႈ၊ လိၼ်ႉၶႃႈၸဝ်ႈၸပ်းႁိူၵ်ႇၵႂႃႇတီႈၶႃႈဢေႃႈ။ ၸဝ်ႈႁဝ်းပွႆႇပႅတ်ႈႁႂ်ႈၶႃႈၸဝ်ႈတၢႆ ၵႃႈၼႂ်းမုၼ်ႈလိၼ်တီႈၶႃႈဢေႃႈ။
ၵူၼ်းႁၢႆႉၵူၼ်းမိူၵ်ႈတင်းလၢႆလွမ်ႉႁွပ်ႈၶႃႈၸဝ်ႈယူႇ၊ မိူၼ်ၸိူဝ်ႉၼင်ႇၽုင်မႃလွမ်ႉဢုမ်ႇလဵပ်ႈႁွပ်ႈၶႃႈၸဝ်ႈသေလႄႈ ဢွၼ်ၵၼ်ၸီးတႅင်းတိၼ်မိုဝ်းၶႃႈၸဝ်ႈပွင်ႇတီႈၶႃႈဢေႃႈ။
လုပ်ႇၶႃႈၸဝ်ႈၵႃႈမီးတင်းသဵင်ႈတင်းလူင်ပေႃႇဢွၵ်ႇႁၼ်လႆႈယူႇဢေႃႈ။ ရၢၼ်ႇသူႇၶႃႈၸဝ်ႈၸိူဝ်းၼၼ်ႉဢွၼ်ၵၼ်ယႅၵ်ႉယဵင်းတူၺ်းၶႃႈၸဝ်ႈယူႇဢေႃႈ။
ၶဝ်ဢဝ်ၶူဝ်းၼုင်ႈၶႃႈၸဝ်ႈၽႄမႅင်ႇၵၼ်လႄႈ ဢဝ်သိူဝ်ႈၶႃႈၸဝ်ႈတူၵ်းၸႃႇၵွၵ်ႈႁႂ်ႈလႆႈမႅင်ႇၵၼ်တီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈယႃႇပေယူႇၵႆၶႃႈၸဝ်ႈသေၵမ်းတီႈၶႃႈ။ မႃးၵႄႇသႄႇၶျွတ်ႈဢဝ်ၶႃႈၸဝ်ႈၶၼ်ၶၼ်ၽႂ်းၽႂ်းသေၵမ်းတီႈၶႃႈ။
ၵႄႇသႄႇၶျွတ်ႈဢဝ်ၶႃႈၸဝ်ႈသေၵႃႈတီႈၽေးလၢပ်ႇၽေးလႅဝ်းသေၵမ်း။ ၵႄႇသႄႇၶျွတ်ႈဢဝ်ဢသၢၵ်ႈၶႃႈၸဝ်ႈသေၵႃႈတီႈမႃၸိူဝ်းၼၼ်ႉသေၵမ်းတီႈၶႃႈ။
ၵႄႇၼုၵ်ႈဢဝ်ၶႃႈၸဝ်ႈသေၵႃႈတီႈသၢင်ႇသီႈတင်းလၢႆသေၵမ်းတီႈၶႃႈ။ ၶႃႈၸဝ်ႈဢမ်ႇမီးၵေႃႉၸွႆႈၵေႃႉထႅမ် လႄႈမီးယူႇၵႃႈတီႈၽၢႆႇၼႃႈဝူဝ်းထိူၼ်ႇ၊ၸိူဝ်းၼႆႉ တီႈၶႃႈဢေႃႈ။
ၶႃႈၸဝ်ႈတၵ်းမွၵ်ႇလၢတ်ႈလွင်ႈဢၼ်ၸဝ်ႈႁဝ်းႁဵတ်းၼၼ်ႉတီႈၵူၼ်းၶႃႈၸဝ်ႈတင်းလၢႆလႄႈ ၶႃႈၸဝ်ႈတၵ်းယွင်ႈယေႃးၸဝ်ႈႁဝ်းၵႃႈတီႈၼႂ်းၵၢင်ပရိၵ်ႈသၢတ်ႈလႄႈဝႃႈ၊
“သူၸိူဝ်းဢၼ်ၵူဝ်ယမ် ထႃႇဝရႃႉၽြႃး၊ ၶဝ်႟။ ဢွၼ်ၵၼ်ယွင်ႈယေႃးမၼ်းၸဝ်ႈတႃႉ။ ၸိူဝ်ႉၶိူဝ်း ယႃႇၵုပ်ႈ၊ တင်းသဵင်ႈတင်းလူင်ၶဝ်႟။ ဢွၼ်ၵၼ်ယုၵ်ႉယွင်ႈၵုင်ႇၵျေးၸူးၸဝ်ႈတႃႉ။ ၵူၼ်းမဵဝ်း ဢိသရေး၊ ၶဝ်႟။ ဢွၼ်ၵၼ်ဝႆႈ ထႃႇဝရႃႉၽြႃး၊ တႃႉ။
လွင်ႈမၼ်းၸမ်ႉ၊မၼ်းၸဝ်ႈဢမ်ႇႁဵတ်းဢမ်ႇပေႃးၼင်ႇႁိုဝ်တီႈၵူၼ်းယၢၵ်ႈၵူၼ်းၽၢၼ်၊ မၼ်းၸဝ်ႈဢမ်ႇဝၢႆႇပႅတ်ႈၶဝ်ၸိူဝ်းၼၼ်ႉလႄႈ ယင်းၶိုၼ်းဢိူဝ် မိူဝ်ႈဢၼ်ၶဝ်ႁွင်ႉၵၢဝ်ႇတီႈမၼ်းၸဝ်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵႃႈၼႂ်းၵၢင်မူႇၵူၼ်းၸိူဝ်းဢၼ်ၵိုၼ်းၼႃႇ လူင်လၢင်ၼၼ်ႉ၊ၶႃႈၸဝ်ႈတၵ်းတေ ယွင်ႈယေႃးၸဝ်ႈႁဝ်းပုၼ်ႈလွင်ႈတၢင်းဢၼ် ၸဝ်ႈႁဝ်းႁဵတ်းၼၼ်ႉဢေႃႈ။ ၵႃႈတီႈၽၢႆႇၼႃႈၶဝ်ၸိူဝ်းဢၼ်ဝႆႈၸဝ်ႈႁဝ်း ၼၼ်ႉၵေႃႈ၊ၶႃႈၸဝ်ႈတၵ်းတေ သၢၵ်ႈလူႇၸွမ်းၵႃႈၼင်ႇဢၼ်ၶႃႈၸဝ်ႈ ဝႆႉၵတိၼၼ်ႉဢေႃႈ။
ၶဝ်ၸိူဝ်းဢၼ်ယၢၵ်ႈၽၢၼ်တၵ်းတေလႆႈၵိၼ်ဢိမ်ႇဢိမ်ႇတဵမ်တဵမ်လႄႈ ၶဝ်ၸိူဝ်းဢၼ်မႃးၸူး ထႃႇဝရႃႉၽြႃး၊ ၼၼ်ႉတၵ်းတေယွင်ႈယေႃးမၼ်းၸဝ်ႈဢေႃႈ။ ႁႂ်ႈႁူဝ်ၸႂ်ၶဝ်ႁွမ်ႁႅင်းယူႇတႃႇသေႇဢမ်ႇထၢတ်ႇသေၵမ်းလူၺ်ႈ။
မဵဝ်းၵူၼ်းၵႃႈမီးတင်းသဵင်ႈတင်းလူင်တၵ်းတေဢွၼ်ၵၼ်ၶုၵ်းၸႂ်လႆႈ ထႃႇဝရႃႉၽြႃး၊ ဢေႃႈ။ ၶဝ်တၵ်းတေလုၵ်ႉသေၵႃႈတီႈၸဵင်ႇလိၼ်မိူင်းၵူႈတီႈဝၢတ်ႈမႃးၸူးမၼ်းၸဝ်ႈလႄႈ ၸိူဝ်ႉၶိူဝ်းၵူၼ်းၵူႈမဵဝ်းတၵ်းတေဢွၼ်ၵၼ်ဝႆႈမၼ်းၸဝ်ႈဢေႃႈ။
ထႃႇဝရႃႉၽြႃး၊ ပဵၼ်ၶုၼ်ႁေႃၶမ်းလႄႈမၼ်းၸဝ်ႈဢုပ်ႉပိူင်ႇၵႃႈၼိူဝ်ၵူၼ်းမဵဝ်းတင်းလၢႆဢေႃႈ။
ၶဝ်ၸိူဝ်းဢၼ်ႁူဝ်ၸႂ်ၽႅၼ်သုင်တင်းလၢႆတၵ်းတေဢွၼ်ၵၼ်ၵူမ်ႈၵွမ်းၸူးမၼ်းၸဝ်ႈလႄႈ ၶဝ်ၸိူဝ်းဢၼ်ပဵၼ်ၵူၼ်းၽင်ႉဢုတူႇၼဝ်ႈတင်းလၢႆၵေႃႈတၵ်းတေၶုပ်ႉမူပ်ႇၽၢႆႇၼႃႈ မၼ်းၸဝ်ႈဢေႃႈ။
ၸိူဝ်ႉၶိူဝ်းၶဝ်ၵေႃႈတၵ်းတေဢွၼ်ၵၼ်ႁဵတ်းဝၢတ်ႈတီႈမၼ်းၸဝ်ႈလႄႈ ၵူၼ်းတင်းလၢႆတၵ်းလၢတ်ႈလွင်ႈ ထႃႇဝရႃႉၽြႃး၊ တီႈၵူၼ်းသိုပ်ႇသိုပ်ႇတၢမ်တၢမ်ဢေႃႈ။
တီႈၵူၼ်းဢၼ်ယင်းဢမ်ႇပႆႇၵိူတ်ႇမႃးၸိူဝ်းၼၼ်ႉ ပိူၼ်ႈတၵ်းတေမွၵ်ႇလၢတ်ႈလႄႈဝႃႈ၊ “ ထႃႇဝရႃႉၽြႃး၊ ၵႄႇသႄႇၶျွတ်ႈဢဝ် ၵူၼ်းမၼ်းၸဝ်ႈဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ပဵၼ်ၸဝ်ႈဢၼ်လဵင်ႉထိင်းၵဝ်ဢၼ်ပဵၼ်မိူၼ်ၼင်ႇသူဝ်းၼၼ်ႉဢေႃႈ။ ၵဝ်ဢမ်ႇလူဝ်ႇၵႃႈသင်ထႅင်ႈလႃးလႃး။
မၼ်းၸဝ်ႈႁႂ်ႈၵဝ်လႆႈလိုဝ်ႈၵႃႈတီႈပၢင်ႇဢၼ်ယၢမ်ႈၵိၼ်ဢၼ်ၶဵဝ်ဝႆႉၸိဝ်းငိဝ်းၸိူဝ်းၼၼ်ႉလႄႈ မၼ်းၸဝ်ႈဢွၼ်ၵဝ်သူင်ႇၸူးၵႃႈတီႈႁိမ်းၼမ်ႉသႂ်ဢၼ်ၼိမ်လီၼၼ်ႉဢေႃႈ။
မၼ်းၸဝ်ႈထႅင်ႈႁႅင်းပၼ်ႁႅင်းဢၼ်မႂ်ႇတီႈၵဝ်လႄႈ၊ မၼ်းၸဝ်ႈဢွၼ်ၵဝ်ၵႂႃႇၸွမ်းၼႂ်းသဵၼ်ႈတၢင်းဢၼ်တြႃးတင်းလၢႆၼၼ်ႉ ၸွမ်းၵႃႈၼင်ႇဢၼ်မၼ်းၸဝ်ႈဝႆႉၵတိၼၼ်ႉဢေႃႈ။
ပိၵ်ႉသမ်ႉၵဝ်လႆႈပႆၵႂႃႇၵႃႈၼႂ်းလပ်းသိင်ႇၽိတ်းၽိတ်းၼၼ်ႉ သေၵေႃႈ၊ ၵဝ်ဢမ်ႇလႆႈၵူဝ်ၽေးဢၢၼ်ႇတရေႇတီႈၶႃႈ။ လွင်ႈမၼ်းၸမ်ႉ၊ ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းမီးယူႇလူၺ်ႈၵၼ်တင်းၶႃႈၸဝ်ႈလႄႈ ၸဝ်ႈႁဝ်းဢဝ်ၶွၼ်ႉယႅၼ်ႉၸဝ်ႈႁဝ်းတင်းၶွၼ်ႉတဝ်ႉၸဝ်ႈႁဝ်းသေလႄႈ ၵႅတ်ႇၶႄႁႄႉၵင်ႈပၼ်ၶႃႈၸဝ်ႈတီႈၶႃႈဢေႃႈ။
ၸဝ်ႈႁဝ်းႁႅၼ်းပၼ်ၽိူၼ်တၢင်းၵိၼ်ပုၼ်ႈၶႃႈၸဝ်ႈ၊ ၵႃႈတီႈဢၼ်ရၢၼ်ႇသူႇၶႃႈၸဝ်ႈတင်းလၢႆႁၼ်ၶႃႈၸဝ်ႈလႆႈၼၼ်ႉတီႈၶႃႈဢေႃႈ။ ၸဝ်ႈႁဝ်းၽိတ်ႈႁွင်ႉဢဝ်ၶႃႈၸဝ်ႈ ၸိူဝ်ႉၼင်ႇပီႈၼွင်ႉၶႅၵ်ႇဢၼ်မီးသရေႇၼၼ်ႉသေယဝ်ႉ၊ သႂ်ႇပၼ်ထႅမ်ပၼ်ႁႂ်ႈၵွၵ်းဝၢၼ်ႇၶႃႈၸဝ်ႈတဵမ်လူၼ်ႉဝႆႉတီႈၶႃႈဢေႃႈ။
ၶႃႈၸဝ်ႈႁုလွင်ႈဢၼ်တၢင်းလီၸဝ်ႈႁဝ်းဢိၵ်ႇတင်းတၢင်းႁၵ်ႉၸဝ်ႈႁဝ်း၊ တၵ်းတေမီးယူႇလူၺ်ႈၶႃႈၸဝ်ႈတႃႇသေႇဢမ်ႇထၢတ်ႇတီႈၶႃႈလႄႈ ၶႃႈၸဝ်ႈတၵ်းယူႇၵႃႈၼႂ်းႁိူၼ်း ထႃႇဝရႃႉၽြႃး၊ ယူႇတႃႇသေႇတီႈၶႃႈဢေႃႈ။
လိၼ်မိူင်းဢိၵ်ႇတင်းၵႃႈဢၼ်မီးၼႂ်းမၼ်းတင်းသဵင်ႈတင်းလူင်၊ လေႃးၵႃႉဢိၵ်ႇတင်းၵူၼ်းလေႃးၵီႇတင်းသဵင်ႈတင်းလူင်ပဵၼ်ၶွင် ထႃႇဝရႃႉၽြႃး၊ ဢေႃႈ။
လွင်ႈမၼ်းၸမ်ႉ၊မၼ်းၸဝ်ႈဢဝ်မၼ်းတႄႇဝႆႉၵႃႈၼိူဝ်ၼမ်ႉပၢင်ႇလၢႆႇတင်းလၢႆလႄႈ ႁႂ်ႈမၼ်းမၼ်ႈၶိူင်ႇယူႇၵႃႈၼိူဝ်ၼမ်ႉသမ်ႇမုၵ်ႈတြႃႇတင်းလၢႆဢေႃႈ။
ၽူႈလႂ်တၵ်းမီးဢၶႂၢင်ႉဢၼ်လႆႈၶိုၼ်ႈၵႃႈၼိူဝ်လွႆ ထႃႇဝရႃႉၽြႃး၊ ၼၼ်ႉ။ ၽူႈလႂ်တၵ်းႁႂ်ႈလႆႈၶဝ်ႈၸူးၵျွင်းပိၵ်ႈမၢၼ်ႇဢၼ်မူတ်းၸၢင်ႇၸဝ်ႈၼၼ်ႉ၊ဝႃႈၼႆၸမ်ႉ၊
ပဵၼ်ၶဝ်ၸိူဝ်းဢၼ်တၢင်းၵမ်တၢင်းၵျၢင်ႉၶဝ်တင်းတၢင်းၵျၢမ်ႇတၢင်းပွင်ၶဝ်မူတ်းသႂ်၊ ၶဝ်ၸိူဝ်းဢၼ်ဢမ်ႇဝႆႈႁုၼ်ႇႁၢင်ႈသၢင်းထုလႂ်၊သမ်ႉဢမ်ႇႁဵတ်းၵတိဢၼ်ၽိတ်းဢၼ်ပိူင်ႈၸိူဝ်းၼၼ်ႉဢေႃႈ။
ထႃႇဝရႃႉၽြႃး၊ တၵ်းတေပၼ်တၢင်းလီမၢင်ႇၵလႃႇတီႈၶဝ်လႄႈတၵ်းတေၵႄႇသႄႇၶျွတ်ႈဢဝ်ၶဝ်ဢေႃႈ။ ၽြႃးပဵၼ်ၸဝ်ႈတၵ်းတေၼႄပျႃးလွင်ႈဢၼ်ၶဝ်ဢမ်ႇမီးဢပျတ်ႈၼၼ်ႉဢေႃႈ။
ၵူၼ်းၸိူဝ်ႉၼင်ႇၼၼ်ၼၼ်ႉပဵၼ်ၶဝ်ၸိူဝ်းဢၼ်မႃးၸူးတီႈၽြႃးပဵၼ်ၸဝ်ႈ၊ ပဵၼ်ၶဝ်ၸိူဝ်းဢၼ်မႃးၸူးတီႈၽၢႆႇၼႃႈၽြႃးပဵၼ်ၸဝ်ႈ ယႃႇၵုပ်ႈ၊ ၼၼ်ႉဢေႃႈ။
ၽၵ်းတူတင်းလၢႆၶဝ်႟။ ဢွၼ်ၵၼ်ယူၵ်ႉတူဝ်သူသုင်သုင်တႃႉ။ ၽၵ်းတူထႃႇဝရႃႉၶဝ်႟။ ဢွၼ်ၵၼ်ၽုၺ်ႇယူၵ်ႉတႃႉ။ ၶုၼ်ႁေႃၶမ်းဢၼ်မုၼ်ယႂ်ႇၼႃႇၼၼ်ႉ တၵ်းတေၶဝ်ႈမႃးဢေႃႈ။
ၶုၼ်ႁေႃၶမ်းဢၼ်မုၼ်ၽုင်းယႂ်ႇၼႃႇၼၼ်ႉပဵၼ်ၽူႈလႂ်။ ပဵၼ်ၸဝ်ႈ ထႃႇဝရႃႉၽြႃး၊ ဢၼ်မီးႁႅင်း တၼ်းၶူဝ်းယႂ်ႇၼႃႇ၊ ထႃႇဝရႃႉၽြႃး၊ ဢၼ်ပႄႉၼႅင်ႇၵႃႈၼႂ်း ၼႃႈသိုၵ်းၼၼ်ႉဢေႃႈ။
ၽၵ်းတူတင်းလၢႆၶဝ်႟။ ဢွၼ်ၵၼ်ယူၵ်ႉတူဝ်သူသုင်သုင်တႃႉ။ ၽၵ်းတူထႃႇဝရႃႉၶဝ်႟။ ဢွၼ်ၵၼ်ၽုၺ်ႇယူၵ်ႉတႃႉ။ ၶုၼ်ႁေႃၶမ်းဢၼ်မုၼ်ၽုင်းယႂ်ႇၼႃႇၼၼ်ႉ တၵ်းတေၶဝ်ႈမႃးဢေႃႈ။
ၶုၼ်ႁေႃၶမ်းဢၼ်မုၼ်ၽုင်းယႂ်ႇၼႃႇၼၼ်ႉပဵၼ်ၽူႈလႂ်။ ပဵၼ် ထႃႇဝရႃႉၽြႃး၊ ၸဝ်ႈဢၼ်ပႄႉၼႅင်ႇဢုပ်ႉပိူင်ႇ၊ ပဵၼ်ၶုၼ်ႁေႃၶမ်းဢၼ်မီးမုၼ်ၽုင်းတၼ်းၶူဝ်းယႂ်ႇၼႃႇဢေႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈႁဵတ်းပထၼႃႇသူးတွင်းတီႈၸဝ်ႈႁဝ်းတီႈၶႃႈဢေႃႈ။
ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ ၶႃႈၸဝ်ႈဢိင်ပိုင်ႈၸဝ်ႈႁဝ်းတီႈၶႃႈဢေႃႈ။ ယႃႇပေႁႂ်ႈၶႃႈၸဝ်ႈလႆႈႁွတ်ႈထိုင်တၢင်းဢၼ်ဢူၵ်းဢၢႆသေၵမ်းတီႈၶႃႈ။ ယႃႇပေႁႂ်ႈရၢၼ်ႇသူႇၶႃႈၸဝ်ႈတင်းလၢႆလႆႈပႄႉၼႅင်ႇၶႃႈၸဝ်ႈလႄႈၸူမ်းသိူဝ်းသေၵမ်းတီႈၶႃႈ။
ၸႂ်ႈတႄႉတီႈၶႃႈဢေႃႈ။ ၶဝ်ၸိူဝ်းဢၼ်မုင်ႈထႃႈမွင်းထႃႈၸဝ်ႈႁဝ်းၼၼ်ႉဢမ်ႇလႆႈထိုင်တီႈဢၼ်ဢူၵ်းဢၢႆတီႈၶႃႈ။ တၢင်းဢၼ်ဢူၵ်းဢၢႆၼၼ်ႉၸၢင်ႈလႆႈထိုင်တီႈၶဝ်ၸိူဝ်းဢၼ်ၸၢင်ႈယႃႉသဵတ်ႈၸႃႇၼၼ်ႉ တီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈသင်ႇသွၼ်ပၼ်သဵၼ်ႈတၢင်းၸဝ်ႈႁဝ်းတင်းလၢႆတီႈၶႃႈၸဝ်ႈလႄႈ၊ ႁႂ်ႈၶႃႈၸဝ်ႈႁုသဵၼ်ႈတႃသၢႆတၢင်းၸိူဝ်းၼၼ်ႉ သေၵမ်းတီႈၶႃႈ။
ၶႅၼ်းတေႃႈသင်ႇသွၼ်ပၼ်ႁႂ်ႈၶႃႈၸဝ်ႈမေႃၵမ်ၵျၢင်ႉ ၸွမ်းၼႂ်းသမ်ႇမႃႇတြႃးၸဝ်ႈႁဝ်း၊သေၵမ်းတီႈၶႃႈ။ လွင်ႈမၼ်းၸမ်ႉ၊ၸဝ်ႈႁဝ်းပဵၼ်ၽြႃးပဵၼ်ၸဝ်ႈၶႃႈၸဝ်ႈ၊ဢၼ်ၵႄႇသႄႇဢဝ်ၶႃႈၸဝ်ႈၼၼ်ႉတီႈၶႃႈဢေႃႈ။ ၶႃႈၸဝ်ႈယုမ်ႇယမ်ဢိင်ပိုင်ႈၸဝ်ႈႁဝ်းတႃႇသေႇဢမ်ႇထၢတ်ႇတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈၶုၵ်းၸႂ်လႆႈသၽေႃးၵရုၼႃႇဢိၵ်ႇတင်းသၽေႃးမႅတ်ႈတႃႇၸဝ်ႈႁဝ်းၼၼ်ႉ ၵွပ်ႈပိူဝ်ႈမီးမႃးၸဵမ်မိူဝ်ႈၵွၼ်ႇဢွၼ်ၼႆႉၼၼ်ႉသေၵမ်းတီႈၶႃႈ။
ၶႅၼ်းတေႃႈပွႆႇၶႂၢင်းပၼ်ဢပျတ်ႈဢၼ်ၶႃႈၸဝ်ႈၽိတ်းပိူင်ႈမႅၼ်ႈ၊ ၼႂ်းမိူဝ်ႈဢၼ်ဢသၢၵ်ႈၶႃႈၸဝ်ႈယင်းၼုမ်ႇၼၼ်ႉသေၵမ်းတီႈၶႃႈ။ ၶႅၼ်းတေႃႈၸွမ်းလူၺ်ႈၵရုၼႃႇၸဝ်ႈႁဝ်းဢိၵ်ႇတင်းၸႂ်လီၸႂ်ဝၢၼ်ၸဝ်ႈႁဝ်းၼၼ်ႉသေလႄႈ ၶုၵ်းၸႂ်လႆႈၶႃႈၸဝ်ႈသေၵမ်းတီႈၶႃႈ ထႃႇဝရႃႉၽြႃး၊ တီႈၶႃႈ။
ထႃႇဝရႃႉၽြႃး၊ မီးၸႂ်သၽေႃးဢၼ်လီ ဢၼ်ငၢမ်း၊ဢိၵ်ႇတင်းၸႂ်သၽေႃးဢၼ်သိုဝ်ႈတေႃႇဢေႃႈ။ ၵွပ်ႈပိူဝ်ႈၸိူဝ်ႉၼင်ႇၼႆလႄႈမၼ်းၸဝ်ႈသွၼ်ပၼ်ၶဝ်ၸိူဝ်းဢၼ်မီးဢပျတ်ႈ၊ ႁႂ်ႈႁုသဵၼ်ႈတၢင်းဢၼ်ၶဝ်ထုၵ်ႇလီလႆႈပႆၸွမ်းၼၼ်ႉဢေႃႈ။
မၼ်းၸဝ်ႈဢွၼ်ၶဝ်ၸိူဝ်းဢၼ်ႁူဝ်ၸႂ်ၶျႃးတႅမ်ႇၼၼ်ႉ သူင်ႇၵႂႃႇၵႃႈၼႂ်းသဵၼ်ႈတၢင်းဢၼ်မၢၼ်ႇဢၼ်မႅၼ်ႈ၊ဢိၵ်ႇတင်း သင်ႇသွၼ်ဢလူဝ်ႇမၼ်းၸဝ်ႈတီႈၶႃႈဢေႃႈ။
သဵၼ်ႈတၢင်း ထႃႇဝရႃႉၽြႃး၊ ၵႃႈမီးတင်းသဵင်ႈတင်းလူင်ပဵၼ်ၵရုၼႃႇ ဢိၵ်ႇတင်းသဵတ်ႈၸႃႇတီႈၶဝ်ၸိူဝ်းဢၼ်ပႂ်ႉၵမ်ပႂ်ႉၸွမ်းပတိၺိၺ်ႇတြႃးၸဝ်ႈ ဢိၵ်ႇတင်းတီႈဢၼ်ၵမ်ၵျၢင်ႉၸွမ်းၼင်ႇတြႃးမၼ်းၸဝ်ႈယူႇၸိူဝ်းၼၼ်ႉဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈထွၵ်ႈလူၺ်ႈၼႃႇမႃႉၸိုဝ်ႈသဵင်ၸဝ်ႈႁဝ်းသေလႄႈ ပွႆႇလွတ်ႈဢပျတ်ႈၶႃႈၸဝ်ႈသေၵမ်းတီႈၶႃႈ။ လွင်ႈမၼ်းၸမ်ႉ၊ဢပျတ်ႈၶႃႈၸဝ်ႈပဵၼ်ဢၼ်ယႂ်ႇၼႃႇလူင်လၢင်တီႈၶႃႈဢေႃႈ။
ၶဝ်ၸိူဝ်းဢၼ်ထွမ်ႇဢဝ် ထႃႇဝရႃႉၽြႃး၊ ၼၼ်ႉၸိုင်၊တၵ်းတေဢွၼ်ၵၼ်သွၼ်ဢဝ်၊ သဵၼ်ႈတၢင်းဢၼ်ၶဝ်ထုၵ်ႇလီပႆၸွမ်းၼၼ်ႉတီႈမၼ်းၸဝ်ႈဢေႃႈ။
ၶဝ်ၼၼ်ႉတေလႆႈဢၶႂၢင်ႉဢၼ်ၶိုၼ်ႈယႂ်ႇမႂ်ႇသုင်ယူႇတႃႇသေႇလႄႈ လုၵ်ႈလၢၼ်ၸိူဝ်ႉၶိူဝ်းၶဝ်သမ်ႉတေလႆႈၶၢမ်ႇဢဝ်ဢမူၺ်ႇမိူင်းၸဝ်ႈဢေႃႈ။
ထႃႇဝရႃႉၽြႃး၊ ပဵၼ်ၵေႃႉသႄႈတီႈၶဝ်ၸိူဝ်းဢၼ်ထွမ်ႇဢဝ်မၼ်းၸဝ်ႈၼၼ်ႉလႄႈ မၼ်းၸဝ်ႈႁႂ်ႈပတိၺိၺ်ႇတြႃးၸဝ်ႈတႄႇမၼ်ႈၵႃႈၼိူဝ်ၶဝ်ၸိူဝ်းၼၼ်ႉဢေႃႈ။
ၶႃႈၸဝ်ႈႁႅၼ်တူၺ်း ထႃႇဝရႃႉၽြႃး၊ ပုၼ်ႈတႃႇတၢင်းဢၼ်ၸွႆႈထႅမ်ယူႇတႃႇသေႇဢေႃႈ။ မၼ်းၸဝ်ႈၵေႃႈထုတ်ႇၼုၵ်ႈဢဝ်ၶႃႈၸဝ်ႈလွတ်ႈသေၵႃႈတီႈၽေးဢၢၼ်ႇတရေႇဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈဝၢႆႇၼႃႈတေႃႇၶႃႈၸဝ်ႈလႄႈဢဵတ်းလူၶႃႈၸဝ်ႈ၊သေၵမ်းတီႈၶႃႈ။ လွင်ႈမၼ်းၸမ်ႉ၊ၶႃႈၸဝ်ႈၵိုတ်းၵျၢၼ်ႇယူႇ ၵေႃႉလဵဝ်ၵူၺ်းလႄႈၸႂ်လဵၵ်ႉ ႁႅင်းဢူၼ်ႈၼႃႇတီႈၶႃႈဢေႃႈ။
ႁူဝ်ၸႂ်ၶႃႈၸဝ်ႈမီးတၢင်းဢၼ်မႆႈၶီတီႈၶႃႈဢေႃႈ။ ၶႅၼ်းတေႃႈပၼ်တၢင်းဢၼ်သၢၵ်ႈသႃႇၸႂ်တီႈၶႃႈၸဝ်ႈလႄႈ ၵႄႇသႄႇၶျွတ်ႈဢဝ်ၶႃႈၸဝ်ႈသေၵႃႈၼႂ်းတုၵ်ႉၶႃႉတၢင်းၽၢၼ်သေၵမ်းတီႈၶႃႈ။
ၶႅၼ်းတေႃႈဝူၼ်ႉတူၺ်းတၢင်းဢၼ်ၶႃႈၸဝ်ႈယၢၵ်ႈၽၢၼ်၊ဢိၵ်ႇတင်း တၢင်းဢၼ်ယၢပ်ႇၸႂ်ၶၢၼ်ၸႂ်ၼၼ်ႉလႄႈ ပွႆႇလွတ်ႈဢပျတ်ႈၶႃႈၸဝ်ႈၵႃႈမီးတင်းသဵင်ႈတင်းလူင်သေၵမ်းတီႈၶႃႈ။
ၶႅၼ်းတေႃႈႁၼ်ရၢၼ်ႇသူႇၶႃႈၸဝ်ႈဢၼ်မီးၼမ်ၼႃႇၼၼ်ႉလႄႈ ၸင်းၶႃႈၸဝ်ႈၼႃႇလူင်လၢင်ၸိူဝ်းၼၼ်ႉ သေၵမ်းတီႈၶႃႈ။
ၶႅၼ်းတေႃႈၵႅတ်ႇၶႄႁႄႉၵင်ႈၶႃႈၸဝ်ႈ၊ၵႄႇသႄႇၶျွတ်ႈဢဝ်ၶႃႈၸဝ်ႈသေၵမ်းတီႈၶႃႈ။ ၵွပ်ႈပိူဝ်ႈၶႃႈၸဝ်ႈမႃးဢိင်ပိုင်ႈၸဝ်ႈႁဝ်းၼၼ်ႉ၊ၶႅၼ်းတေႃႈယႃႇႁႂ်ႈတူၵ်းသုမ်းသေၵမ်းတီႈၶႃႈ။
ၵွပ်ႈပိူဝ်ႈၶႃႈၸဝ်ႈယုမ်ႇယမ်ဢိင်ပိုင်ႈၸဝ်ႈႁဝ်း ယူႇၼၼ်ႉလႄႈႁႂ်ႈတၢင်းဢၼ်လီဢၼ်ငၢမ်းၶႃႈၸဝ်ႈ၊ဢိၵ်ႇတင်း သၽေႃးၶႃႈၸဝ်ႈ၊ဢၼ်သိုဝ်ႈတေႃႇၼၼ်ႉ ပႂ်ႉလူပႂ်ႉတူၺ်းၶႃႈၸဝ်ႈယူႇ သေၵမ်းတီႈၶႃႈ။
ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈထုတ်ႇၼုၵ်ႈဢဝ်ၵူၼ်းမဵဝ်း ဢိသရေး။ ဢွၵ်ႇသေၵႃႈၼႂ်းတုၵ်ႉၶႃႉတၢင်းၽၢၼ်ၶဝ် တင်းသဵင်ႈတင်းလူင်သေၵမ်းတီႈၶႃႈ။
ထႃႇဝရႃႉၽြႃး၊ တီႈၶႃႈ။ ၵွပ်ႈပိူဝ်ႈၶႃႈၸဝ်ႈၵမ်ၵျၢင်ႉဢၼ်သိုဝ်ႈဢၼ်တေႃႇလႄႈဢိင်ပိုင်ႈၸဝ်ႈႁဝ်းလုမ်းလုမ်းၼၼ်ႉ၊ ၶႅၼ်းတေႃႈမၵ်းမၼ်ႈပၼ်ဝႃႈၶႃႈၸဝ်ႈဢမ်ႇမီးဢပျတ်ႈၼၼ်ႉသေၵမ်းတီႈၶႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈၸႅတ်ႈထၢမ်လႄႈၸၢမ်းတူၺ်းၶႃႈၸဝ်ႈသေၵမ်းတီႈၶႃႈ။ ၶႅၼ်းတေႃႈၸႅတ်ႈသေးတူၺ်းဢလူဝ်ႇၵၢင်ၸႂ် ဢိၵ်ႇတင်းတၢင်းၵျၢမ်ႇတၢင်းပွင်ၶႃႈၸဝ်ႈၼၼ်ႉသေၵမ်းတီႈၶႃႈ။
ၵျေးၸူးမႅတ်ႈတႃႇၸဝ်ႈႁဝ်းပဵၼ်ဢၼ်ၼႄတၢင်းၶႃႈၸဝ်ႈလႄႈ သဵတ်ႈၸႃႇတြႃးၸဝ်ႈႁဝ်းၼၼ်ႉသမ်ႉဢွၼ်ႁူဝ်ၼႄတၢင်းၶႃႈၸဝ်ႈတီႈၶႃႈဢေႃႈ။
ၶႃႈၸဝ်ႈဢမ်ႇႁဵတ်းၵေႃႉႁဵတ်းသႄႈလူၺ်ႈၵၼ်တင်းၶဝ်ၸိူဝ်းဢၼ်ဢမ်ႇပွင်ႇၶေႃႈပွင်ႇတႃၼၼ်ႉလႄႈ၊ ၶႃႈၸဝ်ႈဢမ်ႇၶဝ်ႈၵႃႈၼႂ်းမုၵ်ႉၸုမ်းၶဝ်ၸိူဝ်းဢၼ်ၼႃႈသိုဝ်ႈၸႂ်ၵူတ်ႉၼၼ်ႉတီႈၶႃႈ။
ၶႃႈၸဝ်ႈၸင်းမူႇၸုမ်းၵူၼ်းႁၢႆႉၵူၼ်းမိူၵ်ႈလႄႈ ၶႃႈၸဝ်ႈဝႄႈပႅတ်ႈလွင်ႈတၢင်းဢၼ်ႁုၵ်းဢၼ်ႁၢႆႉၼၼ်ႉတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈသုၵ်ႈမိုဝ်းႁႂ်ႈလႆႈၼႄပျႃးတၢင်းဢၼ်ၶႃႈၸဝ်ႈဢမ်ႇမီးဢပျတ်ႈသေလႄႈ ၶဝ်ႈၵႂႃႇပႆလဵပ်ႈႁွပ်ႈၶဵင်ႇတၢင်းလူႇႁႂ်ႈလႆႈဝႆႈၸဝ်ႈႁဝ်းတီႈၶႃႈဢေႃႈ။
ၶႃႈၸဝ်ႈႁဵတ်းၵႂၢမ်းဢၼ်ယွင်ႈယေႃးၵျေးၸူးၸဝ်ႈသေလႄႈ မွၵ်ႇလၢတ်ႈလွင်ႈတၢင်းႁဵတ်းၸဝ်ႈႁဝ်းဢၼ်လီဢၢမ်းတင်းလၢႆတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈမူၼ်ႈၸႂ်ပျေႃႇၸႂ်ၼႂ်းႁိူၼ်း၊တီႈဢၼ်ၸဝ်ႈႁဝ်းယူႇၼၼ်ႉ၊ ဢိၵ်ႇတင်းၵႃႈတီႈဢၼ်မုၼ်သရေႇၸဝ်ႈႁဝ်းတႄႇယူႇတီႈၶႃႈဢေႃႈ။
ၶႅၼ်းတေႃႈယႃႇပေပၢၵ်ႈၶႃႈၸဝ်ႈပႅတ်ႈၵႂႃႇ ႁူမ်ႈလူၺ်ႈၵၼ်တင်းၶဝ်ၸိူဝ်းဢၼ် မီးဢပျတ်ႈလႄႈ၊ ၶႅၼ်းတေႃႈၵႄႇသႄႇၶျွတ်ႈဢဝ် ဢသၢၵ်ႈၶႃႈၸဝ်ႈ၊ ၵႃႈတီႈဢႃႉၵုသူဝ်ႇၶဝ်ၸိူဝ်းဢၼ်ဢဝ်ဢသၢၵ်ႈၵူၼ်းတၢႆၼၼ်ႉသေၵမ်းတီႈၶႃႈ။
ၶဝ်ၼၼ်ႉပဵၼ်ၵေႃႉဢၼ်ၸၢင်ႈၵမ်ၵျၢင်ႉဢၼ်ႁုၵ်းဢၼ်ႁၢႆႉသေႇသေႇလႄႈ ၸၢင်ႈႁပ်ႉဢဝ်လၢၵ်ႈသွင်ႇသူးလၢပ်ႈတႃႇသေႇတီႈၶႃႈဢေႃႈ။
ၶႃႈၸဝ်ႈၸမ်ႉ၊ၸၢင်ႈၵမ်ၵျၢင်ႉဢၼ်သိုဝ်ႈဢၼ်တေႃႇတီႈၶႃႈဢေႃႈ။ ၶႅၼ်းတေႃႈဢဵတ်းလူၵႄႇသႄႇၶျွတ်ႈဢဝ် ၶႃႈၸဝ်ႈသေၵမ်းၶႃႈ။
ၶႃႈၸဝ်ႈလႆႈယူႇလူင်ႉလီလွတ်ႈလီသေၵႃႈတီႈၽေးဢၢၼ်ႇတရေႇတင်းလၢႆလႄႈ ၵႃႈၼႂ်းၵႄႈၵၢင်ပရိၵ်ႈသၢတ်ႈၵူၼ်းမၼ်းၸဝ်ႈၼၼ်ႉ ၶႃႈၸဝ်ႈယွင်ႈယေႃး ထႃႇဝရႃႉၽြႃး၊ တီႈၶႃႈဢေႃႈ။
ထႃႇဝရႃႉၽြႃး၊ ပဵၼ်ဢၼ်လႅင်းၵဝ်၊ၸဝ်ႈဢၼ်ၵႄႇၶျွတ်ႈဢဝ်ၵဝ်ဢေႃႈ။ ၵဝ်တၵ်းတေဢမ်ႇလႆႈၵူဝ်လႆႈႁႄၽူႈလႂ်။ ထႃႇဝရႃႉၽြႃး၊ ၵႅတ်ႇၶႄႁႄႉၵင်ႈၵဝ်သေၵႃႈတီႈၽေးဢၢၼ်ႇတရေႇဢေႃႈ။ ၵဝ်တၵ်းတေဢမ်ႇလႆႈတူၵ်းၸႂ်ၽူႈလႂ်။
မိူဝ်ႈဢၼ်ၵူၼ်းႁၢႆႉၵူၼ်းမိူၵ်ႈတိုၵ်းတေႃးၵဝ်ႁႂ်ႈလႆႈဢဝ်ၵဝ်တၢႆၸိုင်၊ၶဝ်ၶီႈလိုတ်းလႄႈလူမ်ႉဢေႃႈ။
ပိၵ်ႉသမ်ႉၵူၼ်းတပ်ႉၵူၼ်းသိုၵ်းၶျႃးတပ်ႉ လွမ်ႉဝႅင်းၵဝ်သေၵေႃႈႁူဝ်ၸႂ်ၵဝ် ဢမ်ႇၸၢင်ႈၵူဝ်ၸၢင်ႈႁႄ။ ပိၵ်ႉသမ်ႉရၢၼ်ႇသူႇလႂ်တိုၵ်းတေႃးၵဝ်သေၵေႃႈ၊ ႁူဝ်ၸႂ်ၵဝ်ယင်းတၵ်းယုမ်ႇယမ်ဢိင်ပိုင်ႈ ၽြႃးပဵၼ်ၸဝ်ႈယူႇဢေႃႈ။
ၵဝ်ယွၼ်းဢၶႂၢင်ႉဢၼ်ၼိုင်ႈ၊တီႈ ထႃႇဝရႃႉၽြႃး၊ မဵဝ်းဢၼ်ၵဝ်မီးဢလူဝ်ႇၶႂ်ႈလႆႈဢၼ်လဵဝ်ၵူၺ်း၊ ဢၼ်ဝႃႈႁႂ်ႈၵဝ်လႆႈယူႇၼႂ်းႁိူၼ်း ထႃႇဝရႃႉၽြႃး၊ ၸူဝ်ႈဢသၢၵ်ႈၵဝ် ပုၼ်ႈဢၼ်တၵ်းဢၢမ်းဢေႃးသရေႇ ထႃႇဝရႃႉၽြႃး၊ ဢၼ်ႁၢင်ႈလီႁၢင်ႈငၢမ်းၼၼ်ႉ ဢိၵ်ႇတင်းႁႂ်ႈလႆႈယွၼ်းဢဝ်တၢင်းဢၼ်မၼ်းၸဝ်ႈဢွၼ်သူင်ႇၼၼ်ႉဢေႃႈ။
ၼႂ်းမိူဝ်ႈဢၼ်ၽေးတုၵ်ႉၶႃႉႁွတ်ႈထိုင်ၼၼ်ႉၸိုင်၊မၼ်းၸဝ်ႈႁူမ်ႇသုမ်ႇၵဝ်ဝႆႉလႄႈ ပႂ်ႉထိင်းၵဝ်ႁႂ်ႈလႆႈယူႇလူင်ႉလီလွတ်ႈလီၵႃႈၼႂ်းၵျွင်းပိၵ်ႈမၢၼ်ႇမၼ်းၸဝ်ႈသေယဝ်ႉ၊ သမ်ႉဢဝ်ၵဝ်တၢင်ႇဝႆႉၵႃႈၼိူဝ်ႁိၼ်ၽႃဢၼ်သုင်ၼၼ်ႉႁႂ်ႈၵဝ်လႆႈလွတ်ႈၽေးဢေႃႈ။
ပိူဝ်ႈၼႆလႄႈၵဝ်လႆႈဢၶႂၢင်ႉဢၼ်ပႄႉဢၼ်ၼႅင်ႇၵႃႈၼိူဝ်ရၢၼ်ႇသူႇၵဝ်၊ ၸိူဝ်းဢၼ်လွမ်ႉႁွပ်ႈၵဝ်ဝႆႉၼၼ်ႉဢေႃႈ။ ၵဝ်တၵ်းႁွင်ႉသႅၼ်ႇၸူမ်းသိူဝ်းၼႃႇလႄႈ သၢၵ်ႈလူႇၶိူင်ႈတၢင်းလူႇၵႃႈၼႂ်း ၵျွင်းပိၵ်ႈမၢၼ်ႇမၼ်းၸဝ်ႈဢေႃႈ။ ၵဝ်တၵ်းႁဵတ်းၵႂၢမ်းလႄႈယွင်ႈယေႃး ထႃႇဝရႃႉၽြႃး၊ ဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈ ထွမ်ႇငိၼ်းမိူဝ်ႈဢၼ်ၶႃႈၸဝ်ႈ ႁွင်ႉၵၢဝ်ႇတီႈၸဝ်ႈႁဝ်းၼၼ်ႉသေၵမ်းတီႈၶႃႈ။ ၶႅၼ်းတေႃႈဢဵတ်းလူသေလႄႈ ဢိူဝ်ၶႃႈၸဝ်ႈသေၵမ်းတီႈၶႃႈ။
မိူဝ်ႈဢၼ်ၸဝ်ႈႁဝ်းမီးဢမိင်ႉလႄႈဝႃႈ၊ “မႃးဝႆႈၵဝ်တႃႉ၊” ဝႃႈၼင်ႇၼႆၼၼ်ႉၸိုင်၊ ၶႃႈၸဝ်ႈၶိုၼ်းလၢတ်ႈဝႃႈ၊ “ ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈတေမႃး တီႈၶႃႈဢေႃႈ။
ၶႅၼ်းတေႃႈယႃႇပေဝၢႆႇၼႃႈပႅတ်ႈၶႃႈၸဝ်ႈသေၵမ်းတီႈၶႃႈ၊” ဝႃႈၼင်ႇၼႆဢေႃႈ။ ၶႅၼ်းတေႃႈယႃႇပေၶႂ်ႈၸႃႉၶႃႈၸဝ်ႈသေၵမ်း။ ယႃႇပေပႄႇပႅတ်ႈၶႃႈၸဝ်ႈသေၵမ်းတီႈၶႃႈ။ ၸဝ်ႈႁဝ်းပဵၼ်ၸဝ်ႈဢၼ်ၸွႆႈထႅမ်မႃႉၸႃႉၶႃႈၸဝ်ႈမႃးယဝ်ႉလႄႈ ယႃႇပေၸုၼ်ႉပႅတ်ႈၶႃႈၸဝ်ႈသေၵမ်းတီႈၶႃႈ ဢူဝ်းၽြႃးပဵၼ်ၸဝ်ႈ၊ၸဝ်ႈၵႄႇၶျွတ်ႈတီႈၶႃႈ။
ပိၵ်ႉသမ်ႉပေႃႈမႄႈၶႃႈၸဝ်ႈၸိူဝ်းၼၼ်ႉၸုၼ်ႉပႅတ်ႈၶႃႈၸဝ်ႈသေၵေႃႈ၊ ထႃႇဝရႃႉၽြႃး၊ တၵ်းပႂ်ႉလူလုမ်းလႃးၶႃႈၸဝ်ႈတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈသင်ႇသွၼ်ပၼ်လွင်ႈတၢင်းဢၼ်ၸဝ်ႈႁဝ်းမီးဢလူဝ်ႇ၊ ၶႂ်ႈႁႂ်ႈၶႃႈၸဝ်ႈၵမ်ၵျၢင်ႉၼၼ်ႉသေလႄႈယိပ်းၸုင်ဢဝ်ၶႃႈၸဝ်ႈဢွၼ်သူင်ႇ၊ ၼႂ်းသဵၼ်ႈတၢင်းဢၼ်လူင်ႉလီလွတ်ႈလီၵွပ်ႈပိူဝ်ႈရၢၼ်ႇသူႇၶႃႈၸဝ်ႈမီးၼမ်ၼႃႇၼၼ်ႉ သေၵမ်းတီႈၶႃႈ။
ၶႅၼ်းတေႃႈယႃႇပေဢဝ်ၶႃႈၸဝ်ႈဢၢပ်ႈပၼ် ၼႂ်းမိုဝ်းရၢၼ်ႇသူႇၶႃႈၸဝ်ႈၸိူဝ်းဢၼ် ဢဝ်ၵႂၢမ်းမုသႃႇ တင်းတၢင်းဢၼ်လွၵ်ႇငိုတ်ႈတိုၵ်းတေႃးၶႃႈၸဝ်ႈယူႇၼၼ်ႉသေၵမ်းတီႈၶႃႈ။
ၶႃႈၸဝ်ႈယုမ်ႇလွင်ႈဢၼ်ၶႃႈၸဝ်ႈတေမီးဢၶႂၢင်ႉဢၼ်လႆႈထူပ်းႁၼ်ၵျေးၸူး ထႃႇဝရႃႉၽြႃး။ ၵႃႈၼႂ်းမိူင်းၶဝ်ၸိူဝ်းဢၼ်ဢသၢၵ်ႈလိပ်းယူႇၼၼ်ႉဢေႃႈ။
ယုမ်ႇယမ်ဢိင်ပိုင်ႈ ထႃႇဝရႃႉၽြႃး၊ တႃႉ။ မီးတင်းၸႂ်ဢၼ်ယုမ်ႇမၢတ်ႈတႃႉ။ ယႃႇပေမီးတၢင်းဢၼ်ၸႂ်လုၸႂ်လဵၵ်ႉ။ ယုမ်ႇယမ်ဢိင်ပိုင်ႈ ထႃႇဝရႃႉၽြႃး၊ တႃႉ။
ဢူဝ်း၊ ထႃႇဝရႃႉၽြႃး၊ ၸဝ်ႈဢၼ်ႁႄႉၵင်ႈၶႃႈၸဝ်ႈတီႈၶႃႈ။ ၶႃႈၸဝ်ႈႁွင်ႉၵၢဝ်ႇတီႈၸဝ်ႈႁဝ်းတီႈၶႃႈဢေႃႈ။ ၶႅၼ်းတေႃႈ ဢိူဝ်သေၵမ်းတီႈၶႃႈ။ ပေႃးၸဝ်ႈႁဝ်းယင်းဢမ်ႇတၵ်းသဵင်ၸိုင်၊ၶႃႈၸဝ်ႈတၵ်းတေလႆႈၶဝ်ႈပႃးၸွမ်း ၼႂ်းၶဝ်ၸိူဝ်းဢၼ်လူင်းၸူးမိူင်းဢၼ်ၵူၼ်းတၢႆၶဝ်ယူႇၼၼ်ႉတီႈၶႃႈဢေႃႈ။
ၶႅၼ်းတေႃႈထွမ်ႇသဵင်ဢၼ်ၶႃႈၸဝ်ႈလဝ်ႈယွၼ်း၊ မိူဝ်ႈဢၼ်ၶႃႈၸဝ်ႈႁွင်ႉၵၢဝ်ႇတီႈၸဝ်ႈႁဝ်းပုၼ်ႈတၢင်းၸွႆႈတၢင်းထႅမ်ၼၼ်ႉလႄႈ ၶႃႈၸဝ်ႈယူၵ်ႉမိုဝ်းၸူးတီႈၵျွင်းပိၵ်ႈမၢၼ်ႇၸဝ်ႈဢၼ်မူတ်းၸၢင်ႇၸဝ်ႈႁဝ်းၼၼ်ႉသေၵမ်းတီႈၶႃႈ။
ၶႅၼ်းတေႃႈယႃႇပေၸုၼ်ႉပႅတ်ႈၶႃႈၸဝ်ႈဝႆႉၵႃႈၼႂ်းၵူၼ်းႁၢႆႉၵူၼ်းမိူၵ်ႈၸိူဝ်းဢၼ်ႁဵတ်းတၢင်းႁၢႆႉ ဢၼ်ၸၢင်ႈမေႃလၢတ်ႈၵႂၢမ်းသူပ်းဝၢၼ်တီႈၵေႃႉသႄႈၶဝ်ယူႇလႄႈ ၸၢင်ႈမီးႁူဝ်ၸႂ်ဢၼ်ငိၼ်းၸင်းပိူၼ်ႈၼၼ်ႉဢေႃႈ။
ၶႅၼ်းတေႃႈတွပ်ႇတႅၼ်းပၼ်တၢမ်ႇတီႈၶဝ်ၸွမ်းၵႃႈၼင်ႇဢၼ် ၶဝ်ႁဵတ်းသၢင်ႈၵျၢမ်ႇပွင်တၢင်းဢၼ်ႁၢႆႉယုတ်ႈၼၼ်ႉသေၵမ်းတီႈၶႃႈ။ ၶႅၼ်းတေႃႈပၼ်တၢမ်ႇတီႈၶဝ်ၸွမ်းၵႃႈၼင်ႇတၢင်းႁဵတ်းတၢင်းသၢင်ႈၶဝ်ၼၼ်ႉလႄႈ ၸီႇယၢင်ႇၸွမ်းလူၺ်ႈဢပျတ်ႈဢၼ်ၶဝ်ထိူၵ်ႈၶၢမ်ႇၼၼ်ႉသေၵမ်းတီႈၶႃႈ။
ၶဝ်ယင်းဢမ်ႇမၢတ်ႈဢမ်ႇတွင်းလွင်ႈတၢင်းဢၼ် ထႃႇဝရႃႉၽြႃး၊ ပွင်ႁဵတ်းၼၼ်ႉ၊ ဢိၵ်ႇတင်းၼမ်ႉတိၼ်လၢႆမိုဝ်းမၼ်းၸဝ်ႈၼၼ်ႉလႄႈယူႇဢေႃႈ။ ပိူဝ်ႈၼႆလႄႈ၊မၼ်းၸဝ်ႈတၵ်းပၼ်တၢမ်ႇဢပျတ်ႈတီႈၶဝ်လႄႈၵိူၼ်ႇယႃႉႁႂ်ႈၶဝ်လုလႅဝ်ယူႇသေႇသေႇဢေႃႈ။
ႁႂ်ႈ ထႃႇဝရႃႉၽြႃး၊ မီးမၢင်ႇၵလႃႇသေၵမ်းလူၺ်ႈ။ မၼ်းၸဝ်ႈငိၼ်းသဵင်ဢၼ်ၶႃႈၸဝ်ႈႁွင်ႉၵၢဝ်ႇပုၼ်ႈတၢင်းၸွႆႈတၢင်းထႅမ်ၼၼ်ႉယဝ်ႉ။
ထႃႇဝရႃႉၽြႃး၊ ႁႄႉၶႅၼ်လႄႈၵႅတ်ႇၶႄၵဝ်ဢေႃႈ။ ၵဝ်ၵေႃႈယုမ်ႇယမ်ဢိင်ပိုင်ႈမၼ်းၸဝ်ႈဢေႃႈ။ မၼ်းၸဝ်ႈၸွႆႈထႅမ်မႃႉၸႃႉၵဝ်လႄႈႁႂ်ႈၵဝ်သႂၢင်ႇသိူဝ်းဢေႃႈ။ ၵဝ်ၵေႃႈႁဵတ်းၵႂၢမ်းဢၼ်ယွင်ႈယေႃးမုၼ်မၼ်းၸဝ်ႈဢေႃႈ။
ထႃႇဝရႃႉၽြႃး၊ ပၼ်ႁႅင်းတၼ်းၶူဝ်းတီႈၵူၼ်းမၼ်းၸဝ်ႈယူႇႁႄႉၵင်ႈလႄႈ ၵႄႇသႄႇၶျွတ်ႈဢဝ်ၶုၼ်ႁေႃၶမ်းဢၼ်မၼ်းၸဝ်ႈလိူၵ်ႈဢဝ်ဝႆႉၼၼ်ႉဢေႃႈ။
ထႃႇဝရႃႉၽြႃး၊ တီႈၶႃႈ။ ၵႄႇသႄႇၶျွတ်ႈဢဝ်ၵူၼ်းၸဝ်ႈႁဝ်းသေၵမ်းတီႈၶႃႈ။ ပၼ်တၢင်းလီမၢင်ႇၵလႃႇတီႈၵူၼ်းၸဝ်ႈႁဝ်းတင်းလၢႆသေၵမ်းတီႈၶႃႈ။ ၶႅၼ်းတေႃႈလဵင်ႉထိင်းတီႈၶဝ်သေလႄႈ၊ပႂ်ႉလူ လုမ်းလႃးၶဝ်တႃႇသေႇဢမ်ႇထၢတ်ႇ သေၵမ်းတီႈၶႃႈ။
ၶိူင်ႈပိူင်ၵၢင်ႁၢဝ်တင်းလၢႆၶဝ်႟။ ယွင်ႈယေႃး ထႃႇဝရႃႉၽြႃး၊ တႃႉ။ ဢွၼ်ၵၼ်ယွင်ႈယေႃးမုၼ်ၽုင်းဢိၵ်ႇတင်းတၼ်းၶူဝ်းမၼ်းၸဝ်ႈတႃႉ။
ယွင်ႈယေႃးၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ဢၼ်မီးမုၼ်သရေႇၼၼ်ႉတႃႉ။ ၶုပ်ႉဝႆႈတီႈၸဝ်ႈဢၼ်မူတ်းၸၢင်ႇၼႂ်းမိူဝ်ႈဢၼ်မၼ်းၸဝ်ႈပေႃႇမႃးၼၼ်ႉတႃႉ။
သဵင် ထႃႇဝရႃႉၽြႃး၊ မီးယူႇၵႃႈၼိူဝ်ၼမ်ႉသမ်ႇမုၵ်ႈတြႃႇလႄႈၽြႃးပဵၼ်ၸဝ်ႈဢၼ်မုၼ်ယႂ်ႇၼၼ်ႉ ႁႂ်ႈၽႃႉလင်မေႃးယူႇဢေႃႈ။ သဵင်မၼ်းၸဝ်ႈလင်မေႃးယူႇၵႃႈၼိူဝ်ၼမ်ႉပၢင်ႇလၢႆႇဢေႃႈ။
သဵင် ထႃႇဝရႃႉၽြႃး၊ ပျေႉၸုမ်ႇဝႆႉတင်းႁႅင်းတၼ်းၶူဝ်းဢိၵ်ႇတင်းဢႃႇၼုၽေႃႇဢေႃႈ။
သဵင် ထႃႇဝရႃႉၽြႃး၊ ၼၼ်ႉႁၵ်းႁိၵ်းတူၼ်ႈ ဢႃႇရိတ်ႉ၊ တင်းလၢႆပႅတ်ႈ၊ ထႃႇဝရႃႉၽြႃး၊ ႁၵ်းႁိၵ်းတူၼ်ႈ ဢႃႇရိတ်ႉလွႆလေႇပၼုၼ်ႇ၊ ပႅတ်ႈဢေႃႈ။
မၼ်းၸဝ်ႈႁႂ်ႈလွႆ လေႇပၼုၼ်ႇ၊ ဝႅၼ်ၵျွၵ်းၸိူဝ်ႉၼင်ႇဝူဝ်းပေႃႈဢွၼ်ႇလႄႈ သမ်ႉႁႂ်ႈလွႆ ၸိရုၼ်ႇ၊ ဝႅၼ်ၵျွၵ်းၸိူဝ်ႉၼင်ႇ ဝူဝ်းထိူၼ်ႇဢေႃႈ။
သဵင်ၸဝ်ႈ ထႃႇဝရႃႉၽြႃး၊ ၼၼ်ႉပဵၼ်ဢွၵ်ႇမုၵ်ႉၽႆးပိဝ်ၽႆးဢေႃႈ။
သဵင် ထႃႇဝရႃႉၽြႃး၊ ၼၼ်ႉႁဵတ်းႁႂ်ႈထိူၼ်ႇလႅင်ႉတူင်ႉဝႆၶွၼ်းၶဝ်းလႄႈ ႁႂ်ႈထိူၼ်ႇ ၵႃႇတေးသႃႉ၊ တူင်ႉဝႆၶွၼ်းၶဝ်ႇဢေႃႈ။
သဵင် ထႃႇဝရႃႉၽြႃး၊ ၼၼ်ႉႁႂ်ႈတူၼ်ႈမႆႉၼိမ်တူင်ႉဝႆၶွၼ်းၶဝ်းလႄႈ ႁႂ်ႈမႂ်မႆႉမႂ်တွၵ်ႇတင်းလၢႆႁူင်ႈတူၵ်းၵႃႈတီႈ တူၼ်ႈမၼ်းမူတ်းဢေႃႈ။ ၶဝ်ၸိူဝ်းဢၼ်မီးၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉႁွင်ႉသႅၼ်ႇၵူႈၵေႃႉလႄႈဝႃႈ၊ “ႁႂ်ႈမုၼ်ၽုင်းမီးတီႈၽြႃးပဵၼ်ၸဝ်ႈသေၵမ်းလူၺ်ႈ၊” ဝႃႈၼင်ႇၼႆၼၼ်ႉဢေႃႈ။
ထႃႇဝရႃႉၽြႃး၊ ဢုပ်ႉပိူင်ႇၵႃႈၼႂ်းၼမ်ႉလိုၵ်ႉတင်းလၢႆယူႇ၊ဢုပ်ႉပိူင်ႇၼႂ်းဢရႃႇၶုၼ်ႁေႃၶမ်း ယူႇတႃႇသေႇဢမ်ႇထၢတ်ႇဢေႃႈ။
ထႃႇဝရႃႉၽြႃး၊ ပၼ်ႁႅင်းတီႈၵူၼ်းမၼ်းၸဝ်ႈတင်းလၢႆလႄႈဢဝ်တၢင်းၼိမ် ပၼ်တၢင်းလီမၢင်ႇၵလႃႇတီႈၶဝ်ဢေႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈယွင်ႈယေႃးၸဝ်ႈႁဝ်း၊ၵွပ်ႈပိူဝ်ႈၸဝ်ႈႁဝ်းၵႄႇသႄႇၶျွတ်ႈဢဝ်ၶႃႈၸဝ်ႈသေလႄႈ၊ ဢမ်ႇပၼ်ဢၶႂၢင်ႉဢၼ်၊ရၢၼ်ႇသူႇၶႃႈၸဝ်ႈတင်းလၢႆ လႆႈသိူဝ်းပျေႃႇလူၺ်ႈလွင်ႈၶႃႈၸဝ်ႈတီႈၶႃႈဢေႃႈ။
ထႃႇဝရႃႉၽြႃး၊ ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ ၶႃႈၸဝ်ႈႁွင်ႉၵၢဝ်ႇတီႈၸဝ်ႈႁဝ်းပုၼ်ႈတၢင်းၸွႆႈတၢင်းထႅမ်တီႈၶႃႈလႄႈ၊ ၸဝ်ႈႁဝ်းပၼ်ၵတ်းယဵၼ်ၶျၢမ်းသႃႇတီႈၶႃႈဢေႃႈ။
ၸဝ်ႈႁဝ်းဢမ်ႇပၼ်ႁႂ်ႈၶႃႈၸဝ်ႈလႆႈလူင်းၵႂႃႇၵႃႈၼႂ်းၶုမ်ပႃႇႁဵဝ်ႈတီႈၶႃႈဢေႃႈ။ ပိၵ်ႉသမ်ႉၶႃႈၸဝ်ႈပႆတၢင်းၵႂႃႇၸူးၵႃႈတီႈမိူင်းမရၼႃႉသေၵေႃႈ၊ ၸဝ်ႈႁဝ်းၵႄႇသႄႇၼုၵ်ႈဢဝ်ဢသၢၵ်ႈၶႃႈၸဝ်ႈတီႈၶႃႈဢေႃႈ။
ၵူၼ်းမၼ်းၸဝ်ႈဢၼ်မီးသဵတ်ႈၸႃႇတင်းလၢႆၶဝ်႟။ ဢွၼ်ၵၼ်ႁဵတ်းၵႂၢမ်းယွင်ႈယေႃးတီႈ ထႃႇဝရႃႉၽြႃး၊ တႃႉ။ ဢွၼ်ၵၼ်ယွင်ႈယေႃးၼႃႇမႃႉၸိုဝ်ႈသဵင်ဢၼ်မူတ်းၸၢင်ႇမၼ်းၸဝ်ႈတႃႉ။
တၢင်းၸႂ်မႆႈၶႂ်ႈၸႃႉမၼ်းၸဝ်ႈၼၼ်ႉဢွၵ်ႇၵမ်းဢွၼ်ႇၼိုင်ႈၵူၺ်းသေလႄႈၵျေးၸူးမၼ်းၸဝ်ႈၸမ်ႉ၊ တႄႇယူႇၸူဝ်ႈဢသၢၵ်ႈဢေႃႈ။ ၼမ်ႉတႃတူၵ်းမိူဝ်ႈၶိင်ႇႁူဝ်ၶမ်ႈသေၵေႃႈမီးဢၶႂၢင်ႉၸူမ်းသိူဝ်းၶိင်ႇၵၢင်ၼႂ်ဢေႃႈ။
ယၢမ်းမိူဝ်ႈဢၼ်ၶႃႈၸဝ်ႈလႆႈလီလႆႈပဵၼ်ၼၼ်ႉ၊ ၶႃႈၸဝ်ႈလၢတ်ႈလႄႈဝႃႈ၊ “ၵဝ်တၵ်းတေဢမ်ႇလႆႈသုမ်းၵူၺ်း၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းမီးၸႂ်လီၸႂ်ဝၢၼ်တီႈၶႃႈၸဝ်ႈလႄႈ ႁႄႉၶႅၼ်ပၼ်ၶႃႈၸဝ်ႈမိူၼ်ၸိူဝ်ႉၼင်ႇလွႆဢၼ်မၼ်ႈၶိူင်ႇတီႈၶႃႈဢေႃႈ။ ၸဝ်ႈႁဝ်းဝၢႆႇပႅတ်ႈၶႃႈၸဝ်ႈသေလႄႈ၊ၶႃႈၸဝ်ႈလႆႈလီၵူဝ်လီႁႄတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈႁွင်ႉၵၢဝ်ႇတီႈၸဝ်ႈႁဝ်း၊ လဝ်ႈယွၼ်းတၢင်းဢၼ်ၸဝ်ႈႁဝ်းၸွႆႈထႅမ် မႃႉၸႃႉလႄႈဝႃႈၸမ်ႉ။
“ပေႃးၶႃႈၸဝ်ႈလူင်းၵႂႃႇၸူးၶုမ်ပႃႇႁဵဝ်ႈၸိုင်၊ တၢင်းတၢႆၶႃႈၸဝ်ႈၼၼ်ႉတၵ်းမီးဢၵျူဝ်းၵႃႈသင်တီႈၶႃႈ။ ၵူၼ်းဢၼ်တၢႆယဝ်ႉၼၼ်ႉယွင်ႈယေႃးၸဝ်ႈႁဝ်းလႆႈၶႃႈႁိုဝ်း။ ၸၢင်ႈၽုၺ်ႇဢွၵ်ႇမွၵ်ႇလၢတ်ႈလွင်ႈတၢင်းလီတၢင်းငၢမ်းၸဝ်ႈႁဝ်းလႆႈၶႃႈႁိုဝ်း။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈ ထွမ်ႇငိၼ်းလႄႈႁဵတ်းၵျေးၸူးတီႈ ၶႃႈၸဝ်ႈသေၵမ်း၊တီႈၶႃႈ။ ထႃႇဝရႃႉၽြႃး၊ တီႈၶႃႈ။ ၸွႆႈၵမ်ႉၸွႆႈထႅမ်သေၵမ်းတီႈၶႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၸဝ်ႈႁဝ်းပိၼ်ႇႁႂ်ႈတၢင်းၶီတၢင်းၽၢၼ် ၶႃႈၸဝ်ႈပဵၼ်တၢင်းဢၼ်ၸူမ်းသိူဝ်း ၵႃႈဝႅၼ်၊တီႈၶႃႈဢေႃႈ။ ၸဝ်ႈႁဝ်းထွတ်ႇလွၼ်ႈၶူဝ်းႁူဝ်ၸႂ်ၼင်ပေႃ ဢၼ်ပဵၼ်တၢင်းမႆႈၸႂ်ၶီၸႂ်ၶႃႈၸဝ်ႈၼၼ်ႉပႅတ်ႈသေလႄႈ ဢဝ်တင်းၶူဝ်းၼုင်ႈဢၼ်ၸူမ်းသိူဝ်းၼၼ်ႉၼုင်ႈမႆႈပၼ်ၶႃႈၸဝ်ႈတီႈၶႃႈဢေႃႈ။
ပိူဝ်ႈၼႆလႄႈၶႃႈၸဝ်ႈဢမ်ႇယူႇတဵတ်ႇတဵတ်ႇလႄႈ ၶႃႈၸဝ်ႈတၵ်းတေႁဵတ်းၵႂၢမ်းယွင်ႈယေႃးၸဝ်ႈႁဝ်းတီႈၶႃႈဢေႃႈ။ ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းပဵၼ်ၽြႃးပဵၼ်ၸဝ်ႈၶႃႈၸဝ်ႈတီႈၶႃႈလႄႈ ၶႃႈၸဝ်ႈတၵ်းယွင်ႈယေႃးၵျေးၸူးၸဝ်ႈႁဝ်းယူႇတႃႇသေႇဢမ်ႇထၢတ်ႇတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈမႃးႁႂ်ႈလႆႈသွၼ်ႈပိုင်ႈၸဝ်ႈႁဝ်းတီႈၶႃႈဢေႃႈ။ ၶႅၼ်းတေႃႈယႃႇပေႁႂ်ႈၶႃႈၸဝ်ႈလႆႈတူၵ်းသုမ်းသေၵမ်းတီႈၶႃႈ။ ထွၵ်ႈလူၺ်ႈတၢင်းဢၼ်ၸဝ်ႈႁဝ်းသိုဝ်ႈတေႃႇၼၼ်ႉလႄႈၵႄႇသႄႇၶျွတ်ႈဢဝ်ၶႃႈၸဝ်ႈသေၵမ်းတီႈၶႃႈ။
ၶႅၼ်းတေႃႈႁေႈႁူၸဝ်ႈႁဝ်းၸူးၶႃႈၸဝ်ႈသေလႄႈ ထုတ်ႇၼုၵ်ႈဢဝ်ၶႃႈၸဝ်ႈၶၼ်ၶၼ်ၽႂ်းၽႂ်းသေၵမ်းတီႈၶႃႈ။ ၸဝ်ႈႁဝ်းၶႅၼ်းတေႃႈပဵၼ်တီႈပိုင်ႈသွၼ်ႈၶႃႈၸဝ်ႈပုၼ်ႈဢၼ်ႁႄႉၶႅၼ်ပၼ်ၶႃႈၸဝ်ႈလႄႈ ပဵၼ်ၸဝ်ႈဢၼ်ၵႅတ်ႇၶႄႁႄႉၵင်ႈပုၼ်ႈဢၼ်ၵႄႇသႄႇၶျွတ်ႈဢဝ်ၶႃႈၸဝ်ႈသေၵမ်းတီႈၶႃႈ။
ၸဝ်ႈႁဝ်းပဵၼ်တီႈပိုင်ႈသွၼ်ႈဢိၵ်ႇတင်းတီႈဢၼ်ႁႄႉဢၼ်ၵင်ႈ၊ၶႃႈၸဝ်ႈတီႈၶႃႈဢေႃႈ။ ၶႅၼ်းတေႃႈၸုင်ဢဝ်လႄႈဢွၼ်သူင်ႇၶႃႈၸဝ်ႈ၊ၸွမ်းၵႃႈၼင်ႇဢၼ် ၸဝ်ႈႁဝ်းဝႆႉၵတိၼၼ်ႉသေၵမ်းတီႈၶႃႈ။
ၶႅၼ်းတေႃႈပႂ်ႉတူၺ်းၶႃႈၸဝ်ႈႁႂ်ႈလႆႈလွတ်ႈသေတူင်ႇႁႅဝ်ႉတူင်ႇၶိုမ်းဢၼ်ႁၢင်ႈဝႆႉ ပုၼ်ႈၶႃႈၸဝ်ႈၼၼ်ႉသေၵမ်းတီႈၶႃႈ။ လွင်ႈမၼ်းၸမ်ႉ၊ၸဝ်ႈႁဝ်းပဵၼ်တီႈဢၼ်ပိုင်ႈသွၼ်ႈၶႃႈၸဝ်ႈတီႈၶႃႈဢေႃႈ။
ၶႃႈၸဝ်ႈဢဝ်ဝိၺိၺ်ႇၶႃႈၸဝ်ႈဢၢပ်ႈပၼ်ၵႃႈၼႂ်းမိုဝ်းၸဝ်ႈႁဝ်းတီႈၶႃႈယဝ်ႉ။ ထႃႇဝရႃႉၽြႃး၊ ၽြႃးပဵၼ်ၸဝ်ႈဢၼ်ပႂ်ႉသဵတ်ႈၸႃႇတီႈၶႃႈ။ ၸဝ်ႈႁဝ်းထုတ်ႇၼုၵ်ႈဢဝ်ၶႃႈၸဝ်ႈတီႈၶႃႈဢေႃႈ။
ၸဝ်ႈႁဝ်းငိၼ်းၸင်းၶဝ်ၸိူဝ်းဢၼ်ဝႆႈၽြႃးတၢင်ႇသူႇတၢင်ႇပႃး၊ၼၼ်ႉတီႈၶႃႈဢေႃႈ။ ၶႃႈၸဝ်ႈၸမ်ႉ၊ယုမ်ႇယမ်ဢိင်ပိုင်ႈၸဝ်ႈႁဝ်းတီႈၶႃႈဢေႃႈ။
ၶႃႈၸဝ်ႈတၵ်းမီးတၢင်းဢၼ်ၸူမ်းသိူဝ်းသႂၢင်ႇၸႂ် ၼႂ်းတၢင်းႁၵ်ႉမႅတ်ႈတႃႇဢၼ်မၼ်ႈၶိူင်ႇၸဝ်ႈႁဝ်းၼၼ်ႉတီႈၶႃႈဢေႃႈ။ ၸဝ်ႈႁဝ်းႁၼ်တၢင်းယၢၵ်ႈတၢင်းၽၢၼ် ၶႃႈၸဝ်ႈလႄႈႁုတုၵ်ႉၶႃႉတၢင်းယၢပ်ႇၶႃႈၸဝ်ႈတီႈၶႃႈဢေႃႈ။
ၸဝ်ႈႁဝ်းယင်းဢမ်ႇပၼ်ဢၶႂၢင်ႉဢၼ်ရၢၼ်ႇသူႇတင်းလၢႆတိဢဝ်ၶႃႈၸဝ်ႈဝႆႉလႄႈ ၸဝ်ႈႁဝ်းပၼ်တၢင်းဢၼ်လွတ်ႈဢၼ်လႅဝ်း ႁႂ်ႈလႆႈၵႂႃႇၵႃႈတီႈဢၼ်ၶႃႈၸဝ်ႈမီးဢလူဝ်ႇၼၼ်ႉတီႈၶႃႈဢေႃႈ။
ၸဝ်ႈ ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈဢဵတ်းလူၶႃႈၸဝ်ႈ၊ ၵွပ်ႈပိူဝ်ႈဢၼ်ၶႃႈၸဝ်ႈထူပ်းၽေးတုၵ်ႉၶႃႉၼၼ်ႉသေၵမ်းတီႈၶႃႈ။ မၢၵ်ႇတႃၶႃႈၸဝ်ႈတူၺ်ႇယူႇၵွပ်ႈလႆႈႁႆႈလႆႈႁွင်ႉၼမ်ၼႃႇၼၼ်ႉလႄႈ ၶႃႈၸဝ်ႈလုၵႂႃႇလႅဝ်ၵႂႃႇတင်းတူဝ်တင်းၶိင်းယဝ်ႉတီႈၶႃႈဢေႃႈ။
ၶႃႈၸဝ်ႈႁိူဝ်ႉၼူၼ်းၵွပ်ႈပိူဝ်ႈၶႃႈၸဝ်ႈမီးတၢင်းဢၼ်မႆႈၸႂ်ႁွၼ်ႉၸႂ်သေလႄႈ ၵွပ်ႈပိူဝ်ႈဢၼ်ႁႆႈဢၼ်ႁွင်ႉၼၼ်ႉဢသၢၵ်ႈ ၶႃႈၸဝ်ႈပွတ်းၵႂႃႇတီႈၶႃႈဢေႃႈ။ ႁႅင်းၶႃႈၸဝ်ႈဢူၼ်ႈၵႂႃႇၵွပ်ႈပိူဝ်ႈ ၽေးတုၵ်ႉၶႃႉတင်းလၢႆ၊တေႃႇထိုင်ႁွတ်ႈလုပ်ႇၶႃႈၸဝ်ႈတင်းလၢႆ ၽင်ႉဢုၵႂႃႇၼၼ်ႉတီႈၶႃႈဢေႃႈ။
ၵွပ်ႈပိူဝ်ႈရၢၼ်ႇသူႇၶႃႈၸဝ်ႈတင်းသဵင်ႈ တင်းလူင်ၼၼ်ႉလႄႈၶႃႈၸဝ်ႈ ပဵၼ်တီႈဢၼ်သႄႉဢၼ်သွမ်း တီႈၵူၼ်းႁိူၼ်းၸမ်ၵၼ်၊ဢိၵ်ႇတင်းတၢင်းဢၼ်လီႁင်ႈ၊ဢဵတ်ႇသဵတ်ႇ တီႈၶဝ်ၸိူဝ်းဢၼ်မိုတ်ႈၵိုဝ်းၵၼ်တင်းၶႃႈၸဝ်ႈၼၼ်ႉဢေႃႈ။ ၶဝ်ၸိူဝ်းဢၼ်ႁုၸၵ်းၶႃႈၸဝ်ႈၼၼ်ႉၵူဝ်ႁႄၶႃႈၸဝ်ႈဢေႃႈ။ ၶဝ်ၸိူဝ်းဢၼ်ထူပ်းႁၼ်ၶႃႈၸဝ်ႈၵႃႈတီႈၵၢင်တႃႈၵၢင်တၢင်းၼၼ်ႉ၊ ဢွၼ်ၵၼ်ဢွၵ်ႇပၢႆႈၶႃႈၸဝ်ႈတီႈၶႃႈဢေႃႈ။
ၶဝ်လူင်လိုမ်းပႅတ်ႈၶႃႈၸဝ်ႈထၢၼ်ႈပေႃး တၢၼ်ႇဝႃႈၶႃႈၸဝ်ႈတၢႆယဝ်ႉလႄႈ ၶႃႈၸဝ်ႈလႆႈပဵၼ်မိူၼ်ၸိူဝ်ႉၼင်ႇၽၢၵ်ႇမေႃႈ ၼၼ်ႉတီႈၶႃႈဢေႃႈ။
ၶႃႈၸဝ်ႈလႆႈငိၼ်းသဵင်သွပ်ႉသႅပ်ႉ ဢၼ်ရၢၼ်ႇသူႇ ၶႃႈၸဝ်ႈတင်းလၢႆၶႃႉၸိုဝ်ႈၶၢႆသဵင် ၶႃႈၸဝ်ႈ၊သေလႄႈ၊ လွင်ႈတၢင်းဢၼ်လီၵူဝ်လီႁႄမီးယူႇၵူႈၽၢႆႇၵူႈပႃႈတီႈၶႃႈဢေႃႈ။ ၶဝ်ဢွၼ်ၵၼ်တိူင်ႇပၢင်ႇလၢတ်ႈၸႃယူႇၽၢႆႇၼိုင်ႈတင်းၶႃႈၸဝ်ႈသေလႄႈ ၵျၢမ်ႇဢဝ်ဢသၢၵ်ႈၶႃႈၸဝ်ႈတၢႆတီႈၶႃႈဢေႃႈ။
ၼႂ်းဝႃႈၼၼ်သေၵေႃႈ၊ ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈယုမ်ႇယမ်ဢိင်ပိုင်ႈၸဝ်ႈႁဝ်း၊တီႈၶႃႈဢေႃႈ။ ၶႃႈၸဝ်ႈလဝ်ႈလၢတ်ႈလႄႈဝႃႈ၊ “ၸဝ်ႈႁဝ်းပဵၼ်ၽြႃးပဵၼ်ၸဝ်ႈၵဝ်ၶႃႈတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ဢၶိင်ႇၶႃႈၸဝ်ႈမီးၼႂ်းမိုဝ်းၸဝ်ႈႁဝ်းတီႈၶႃႈဢေႃႈ။ ၶႅၼ်းတေႃႈၵႄႇသႄႇထွတ်ႇထူၺ်ႈဢဝ်ၶႃႈၸဝ်ႈဢွၵ်ႇသေၵႃႈၼႂ်းမိုဝ်းရၢၼ်ႇသူႇၶႃႈၸဝ်ႈ၊ ဢိၵ်ႇတင်းၶဝ်ၸိူဝ်းဢၼ်ၼိၵ်ႈၸၢၵ်ႈငႅၼ်းသႄးၶႃႈၸဝ်ႈၼၼ်ႉသေၵမ်းတီႈၶႃႈ။
ၶႅၼ်းတေႃႈပႃးၸႂ်ဢၼ်ဢဵတ်းလူလႄႈလူတူၺ်းၶႃႈၸဝ်ႈႁဝ်းသေၵမ်းတီႈၶႃႈ။ ၸွမ်းလူၺ်ႈၵရုၼႃႇၸဝ်ႈႁဝ်းသေလႄႈၵႄႇသႄႇၶျွတ်ႈဢဝ်ၶႃႈၸဝ်ႈသေၵမ်းတီႈၶႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈႁွင်ႉၵၢဝ်ႇတီႈၸဝ်ႈႁဝ်းယူႇလႄႈ ယႃႇပေႁႂ်ႈၶႃႈၸဝ်ႈလႆႈဢူၵ်းလႆႈဢၢႆသေၵမ်းတီႈၶႃႈ။ ၶႅၼ်းတေႃႈႁႂ်ႈၵူၼ်းႁၢႆႉၵူၼ်းမိူၵ်ႈၸိူဝ်းၼၼ်ႉလႆႈဢူၵ်းလႆႈဢၢႆလႄႈ ႁႂ်ႈၶဝ်လူင်းၵႂႃႇတဵတ်ႇတဵတ်ႇၸူးၵႃႈတီႈမိူင်းမရၼႃႉၼၼ်ႉသေၵမ်းတီႈၶႃႈ။
ၶဝ်ၸိူဝ်းဢၼ်မႃႇၼႃႉၸႂ်သုင်လႄႈလၢတ်ႈၵႂၢမ်းမုသႃႇၵႂၢမ်းဢၼ်ဢမ်ႇၼပ်ႉဢမ်ႇၶၢၼ်း၊ တီႈၵူၼ်းသိုဝ်ႈတေႃႇၼၼ်ႉႁႂ်ႈသူပ်းၶဝ်ယူႇတဵတ်ႇတဵတ်ႇယဵၼ်ယဵၼ်သေၵမ်းတီႈၶႃႈ။
ၵျေးၸူးဢၼ်ၸဝ်ႈႁဝ်းသိမ်းဝႆႉပုၼ်ႈၶဝ်ၸိူဝ်းဢၼ်ၵူဝ်ယမ်ၸဝ်ႈႁဝ်း၊ ဢၼ်ၸဝ်ႈႁဝ်းမႄးပၼ် ပုၼ်ႈၶဝ်ၸိူဝ်းဢၼ်ယုမ်ႇယမ်ဢိင်ပိုင်ႈၸဝ်ႈႁဝ်း၊ ၵႃႈတီႈၽၢႆႇၼႃႈၵူၼ်းတင်းလၢႆၼၼ်ႉလီဢၢမ်းၼႃႇလူင်လၢင်တီႈၶႃႈဢေႃႈ။
ၸဝ်ႈႁဝ်းဢဝ်ၶဝ်သိူင်ႇဝႆႉလပ်ႉဝႆႉလူင်ႉလီလွတ်ႈလီၵႃႈၼႂ်းတီႈဢၼ်ၸဝ်ႈႁဝ်းၵိင်းဝၢပ်ႈယူႇၼၼ်ႉ၊ ႁႂ်ႈၶဝ်လႆႈၵၢင်းလွတ်ႈတင်းပရိယႄႇၵူၼ်းတင်းလၢႆၼၼ်ႉတီႈၶႃႈဢေႃႈ။ ၸဝ်ႈႁဝ်းႁွပ်ႇဢုမ်ႈဢဝ်ၶဝ်ဝႆႉလူင်ႉလီလွတ်ႈလီၵႃႈၼႂ်းသုမ်ႉထဵင်ၸဝ်ႈႁဝ်းယူႇ၊ ႁႂ်ႈၶဝ်လႆႈၵၢင်းလွတ်ႈတင်းသူပ်းဢၼ်ပႅတ်ႉလႅၼ်ၵၼ်ၽိတ်းၵၼ်ၼၼ်ႉတီႈၶႃႈဢေႃႈ။
ယွင်ႈယေႃး ထႃႇဝရႃႉၽြႃး၊ တီႈၶႃႈဢေႃႈ။ မၼ်းၸဝ်ႈၼႄပျႃးမႅတ်ႈတႃႇၵရုၼႃႇၸဝ်ႈဢၼ်လီဢၢမ်းၼႃႇၼၼ်ႉတီႈၶႃႈၸဝ်ႈ၊ ၼႂ်းမိူဝ်ႈဢၼ်ရၢၼ်ႇသူႇလွမ်ႉႁွပ်ႈတိုၵ်းတေႃးၶႃႈၸဝ်ႈၼၼ်ႉတီႈၶႃႈဢေႃႈ။
ၶႃႈၸဝ်ႈလႆႈၵူဝ်ႁႄလႄႈထၢင်ႇၼႂ်းၸႂ်လႄႈဝႃႈ၊ “ၵဝ်ၼႆႉလႆႈၶၢမ်ႇတၢင်းဢၼ်ႁေႃႈဢွၵ်ႇပႅတ်ႈသေ ၵႃႈတီႈၽၢႆႇၼႃႈမၼ်းၸဝ်ႈယဝ်ႉ၊” ဝႃႈၼင်ႇၼႆဢေႃႈ။ ၵူၺ်းၵႃႈ၊မိူဝ်ႈဢၼ်ၶႃႈၸဝ်ႈႁွင်ႉၵၢဝ်ႇတီႈမၼ်းၸဝ်ႈပုၼ်ႈတၢင်းၸွႆႈတၢင်းထႅမ်ၼၼ်ႉၸိုင်၊ မၼ်းၸဝ်ႈထွမ်ႇငိၼ်းၵႂၢမ်းသူးတွင်းပထၼႃႇ ၶႃႈၸဝ်ႈတီႈၶႃႈဢေႃႈ။
ၵူၼ်းမူတ်းၸၢင်ႇမၼ်းၸဝ်ႈတင်းသဵင်ႈတင်းလူင်ၶဝ်႟။ ဢွၼ်ၵၼ်ႁၵ်ႉ ထႃႇဝရႃႉၽြႃး၊ တႃႉ။ ထႃႇဝရႃႉၽြႃး၊ ႁႄႉၶႅၼ်ပၼ်ၶဝ်ၸိူဝ်းဢၼ်ပႂ်ႉသဵတ်ႈၸႃႇၼၼ်ႉတီႈၶႃႈဢေႃႈ။ ၶဝ်ၸိူဝ်းဢၼ်မႃႇၼႃႉၸႂ်သုင်ၼၼ်ႉၸမ်ႉ၊မၼ်းၸဝ်ႈတႅၼ်းပၼ်တၢမ်ႇဢပျတ်ႈၶဝ်ဢေႃႈ။
ၶဝ်ၸိူဝ်းဢၼ်မုင်ႈထႃႈမွင်းထႃႈ ထႃႇဝရႃႉၽြႃး၊ တင်းသဵင်ႈတင်းလူင်ၶဝ်႟။ ဢွၼ်ၵၼ်ဢဝ်ႁႅင်းလႄႈမီးႁူဝ်ၸႂ် ဢၼ်ႁတ်းႁၢၼ်တႃႉ။
ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ပွႆႇလွတ်ႈဢပျတ်ႈပၼ်ယဝ်ႉ၊ ဢိၵ်ႇတင်းဢပျတ်ႈၶဝ်လႆႈၶၢမ်ႇတၢင်းဢၼ်သုမ်ႇႁူမ်ႇဝႆႉၸိူဝ်းၼၼ်ႉမီးမၢင်ႇၵလႃႇဢေႃႈ။
ၵေႃႉဢၼ်ၵၢင်းလွတ်ႈတင်းတၢင်းဢၼ် ထႃႇဝရႃႉၽြႃး၊ တၢင်ႇဢပျတ်ႈလႄႈ ဢမ်ႇမီးၸႂ်သၽေႃးဢၼ်ၸၢင်ႈပႅတ်ႉၸၢင်ႈလႅၼ်ၼၼ်ႉမီးမၢင်ႇၵလႃႇဢေႃႈ။
ယၢမ်းမိူဝ်ႈဢၼ်ၶႃႈၸဝ်ႈဢမ်ႇတၵ်ႉသဵင်လွင်ႈဢပျတ်ႈၶႃႈၸဝ်ႈၼၼ်ႉၸိုင်၊တူဝ်ၶၼ်ႇထႃႇၶႃႇၸဝ်ႈ ၽင်ႉဢုၵႂႃႇၵွပ်ႈပိူဝ်ႈၶႃႈၸဝ်ႈလႆႈၶၢင်းၶီၶၢင်းၽၢၼ်ယူႇ၊တင်းဝၼ်းၼၼ်ႉဢေႃႈ။
ၸဝ်ႈႁဝ်းပၼ်တၢမ်ႇတီႈၶႃႈၸဝ်ႈၵူႈဝၼ်းၵူႈၶိုၼ်းတီႈၶႃႈဢေႃႈ။ ထႃႇဝရႃႉၽြႃး၊ တီႈၶႃႈ။ ဢဵၼ်ႁႅင်းၶႃႈၸဝ်ႈယူတ်းႁႅင်ႈၵႂႃႇလုမ်းလုမ်းမိူၼ်ၸိူဝ်ႉၼင်ႇဢၢႆႁိူဝ်ႇဢၢႆၵႂၼ်းႁႅင်ႈၵႂႃႇႁွင်ၵႂႃႇ ၼႂ်းလႅတ်ႇၶိင်ႇမႆႈၼၼ်ႉတီႈၶႃႈဢေႃႈ။
မိူဝ်ႈၼၼ်ႉၶႃႈၸဝ်ႈၽုၺ်ႇၼႄဢပျတ်ႈၶႃႈၸဝ်ႈတီႈၸဝ်ႈႁဝ်းလႄႈ ၶႃႈၸဝ်ႈဢမ်ႇသိူင်ႇဢမ်ႇမႅပ်းတုၸရိူၵ်ႈဢပျတ်ႈၶႃႈၸဝ်ႈဝႆႉတီႈၶႃႈ။ ၶႃႈၸဝ်ႈလဝ်ႈလၢတ်ႈလႄႈဝႃႈ၊ “ၶႃႈၸဝ်ႈတၵ်းတေၽုၺ်ႇၼႄလွင်ႈတၢင်းဢၼ်ၶႃႈၸဝ်ႈပူၼ်ႉလိူဝ်ၼၼ်ႉလႄႈ တွင်းပၢၼ်ႇတီႈ ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။ ၸဝ်ႈႁဝ်းၵေႃႈပွႆႇလွတ်ႈဢပျတ်ႈၶႃႈၸဝ်ႈ တင်းသဵင်ႈတင်းလူင်ဢေႃႈ။
ပိူဝ်ႈၼႆလႄႈၶဝ်ၸိူဝ်းဢၼ်ၵူဝ်ယမ်ၸဝ်ႈႁဝ်းတင်းသဵင်ႈတင်းလူင် ထုၵ်ႇလီႁဵတ်းသူးတွင်းပထၼႃႇတီႈၸဝ်ႈႁဝ်း ၼႂ်းၶိင်ႇဢၼ်ၽေးတုၵ်ႉၶႃႉႁွတ်ႈမႃး ၼၼ်ႉဢေႃႈ။ ၼႂ်းမိူဝ်ႈဢၼ်ၼမ်ႉယႂ်ႇၼမ်ႉသုင်ထူမ်ႈႁူမ်ႇၼၼ်ႉတၵ်းဢမ်ႇလႆႈၵၢႆမႃးႁိမ်းၶဝ်တီႈၶႃႈဢေႃႈ။
ၸဝ်ႈႁဝ်းပဵၼ်တီႈဢၼ်တဵတ်ႇမႅပ်းၶႃႈၸဝ်ႈလႄႈ ၸဝ်ႈႁဝ်းၵႄႇသႄႇၶျွတ်ႈဢဝ်ၶႃႈၸဝ်ႈႁႂ်ႈလႆႈၵၢင်းလွတ်ႈတင်းၽေးတီႈၶႃႈဢေႃႈ။ ၶႃႈၸဝ်ႈႁဵတ်းသဵင်ဢၼ်ယႂ်ႇၼႃႇႁဵတ်းၵႂၢမ်းလူၺ်ႈတၢင်းဢၼ်ၵႄႇသႄႇၶျွတ်ႈဢဝ်ၼၼ်ႉ၊ ၵွပ်ႈပိူဝ်ႈၸဝ်ႈႁဝ်းႁႄႉၶႅၼ်ပၼ်ၶႃႈၸဝ်ႈၼၼ်ႉတီႈၶႃႈဢေႃႈ။
ထႃႇဝရႃႉၽြႃး၊ မီးဢမိင်ႉဝႃႈ၊ “ၵဝ်တၵ်းတေသင်ႇသွၼ်ပၼ်သဵၼ်ႈတၢင်းဢၼ် မႂ်းထုၵ်ႇလီပႆၸွမ်းၼၼ်ႉလႄႈတၵ်းတေသင်ႇသွၼ်လႄႈပၼ်တၢင်းၵျၢမ်ႇမႂ်းဢေႃႈ။
ယႃႇပေပဵၼ်ၸိူဝ်ႉၼင်ႇမႃႉတင်းလေႃႈလႃးဢၼ်ဢမ်ႇမီးၺၢၼ်ႇပိင်ႇၺႃႇၼၼ်ႉ။ ၶဝ်ၼၼ်ႉပေႃးယင်းဢမ်ႇဢဝ်ၵိုဝ်သႂ်ႇဝႆႉတီႈသူပ်းဢမ်ႇႁၢင်ႈသၢႆၵၵ်ႉလႄႈတိုတ်ႉၸၼ်ၸိုင်၊ ၶဝ်ဢမ်ႇငႄႈယူႇၼႂ်းမိုဝ်းမႂ်း။”
ၵူၼ်းႁၢႆႉၵူၼ်းမိူၵ်ႈလႆႈၶၢမ်ႇတုၵ်ႉၶႃႉတၢင်းၽၢၼ်ၼမ်ၼႃႇလႄႈ၊ ၶဝ်ၸိူဝ်းဢၼ်ယုမ်ႇယမ်ဢိင်ပိုင်ႈ ထႃႇဝရႃႉၽြႃး၊ ၸမ်ႉ၊မႅတ်ႈတႃႇၵရုၼႃႇၸဝ်ႈႁႄႉၶႅၼ်ပၼ်ၶဝ်ဢေႃႈ။
ၵူၼ်းဢၼ်သိုဝ်ႈတေႃႇၶဝ်႟။ ဢွၼ်ၵၼ်ၸူမ်းသိူဝ်းမူၼ်ႈပျေႃႇတီႈ ထႃႇဝရႃႉၽြႃး၊ တႃႉ။ ၵူၼ်းဢၼ်ၸႂ်သၽေႃးသိုဝ်ႈယူဝ်းၶဝ်႟။ ဢွၼ်ၵၼ်ႁဵတ်းၵႂၢမ်းသဵင်ယႂ်ႇဢၼ်သႂၢင်ႇသိူဝ်းတႃႉ။
ၵူၼ်းဢၼ်သိုဝ်ႈတေႃႇၶဝ်႟။ ဢွၼ်ၵၼ် ႁဵတ်းၵႂၢမ်းဢၼ်သႂၢင်ႇဢၼ်သိူဝ်းတီႈ ထႃႇဝရႃႉၽြႃး၊ တႃႉ။ သူၸိူဝ်းဢၼ်ထွမ်ႇဢဝ်မၼ်းၸဝ်ႈၼၼ်ႉၶဝ်႟။ ယွင်ႈယေႃးမၼ်းၸဝ်ႈတႃႉ။
ဢွၼ်ၵၼ်လဵတ်းတိင်ႇသေလႄႈယွင်ႈယေႃး ၵျေးၸူး ထႃႇဝရႃႉၽြႃး၊ တႃႉ။ ဢဝ်တိင်ႇဢၼ်မီးသၢႆသိပ်းသဵၼ်ႈၼၼ်ႉသေလႄႈ ႁဵတ်းၵႂၢမ်းထေႃးပၼႃႇတႃႉ။
ဢွၼ်ၵၼ်ႁဵတ်းၵႂၢမ်းဢၼ်မႂ်ႇတီႈမၼ်းၸဝ်ႈတႃႉ။ ဢွၼ်ၵၼ်လဵတ်းတိင်ႇသဵင်လီသဵင်ဝၢၼ်သေလႄႈႁွင်ႉပၢဝ်ႇသဵင်ဢၼ်ယႂ်ႇၼႃႇတႃႉ။
လွင်ႈမၼ်းၸမ်ႉ၊ၼုၵ်ႈၵပၢတ်ႈ ထႃႇဝရႃႉၽြႃး၊ သိူဝ်ႈယူဝ်းလႄႈ လွင်ႈတၢင်းဢၼ်မၼ်းၸဝ်ႈႁဵတ်းသၢင်ႈ ၵႃႈမီးတင်းသဵင်ႈတင်းလူင်ၼၼ်ႉၵေႃႈပဵၼ်တၢင်းသဵတ်ႈၸႃႇတြႃးဢေႃႈ။
ထႃႇဝရႃႉၽြႃး၊ ၵျိူၵ်ႈႁၵ်ႉထုၵ်ႇၸႂ်လွင်ႈတၢင်းဢၼ်သိုဝ်ႈတေႃႇ ဢိၵ်ႇတင်းတၢင်းဢၼ်ၸွမ်းၼင်ႇတြႃးၼၼ်ႉယူႇလႄႈ၊ မႅတ်ႈတႃႇၵရုၼႃႇမၼ်းၸဝ်ႈၸွတ်ႇတဵမ်ပထဝီႇလိၼ်မိူင်းၼႆႉဝႆႉဢေႃႈ။
ထႃႇဝရႃႉၽြႃး၊ ဢဝ်တင်းၼုၵ်ႈၵပၢတ်ႈ မၼ်းၸဝ်ႈလႄႈၽၢၼ်ႇသၢင်းႁဵတ်းပဵၼ် ၽႃႉၵၢင်ႁၢဝ်ဢေႃႈ။ လိူၼ်လၢဝ်ၵၢင်ဝၼ်းၸိူဝ်းၼၼ်ႉၵေႃႈ၊လႆႈၶၢမ်ႇတၢင်းဢၼ်ႁဵတ်းပဵၼ် ၵွပ်ႈလူၺ်ႈၵႂၢမ်းဢွၵ်ႇသူပ်းၸဝ်ႈဢေႃႈ။
မၼ်းၸဝ်ႈႁႂ်ႈၼမ်ႉပၢင်ႇလၢႆႇၵႃႈမီးတင်းသဵင်ႈတင်းလူင်ၸုၵၼ်တုမ်ၵၼ်ဝႆႉတီႈလဵဝ်သေလႄႈ မၼ်းၸဝ်ႈဢိုတ်းႁပ်းတၢင်းဢၼ်လိုၵ်ႉဢၼ်လမ်ႇၼမ်ႉသမ်ႇမုၵ်ႈတြႃႇဝႆႉ ၸိူဝ်ႉၼင်ႇၵႃႈၼႂ်းယွင်ၼႂ်းယေးဢေႃႈ။
ႁႂ်ႈတင်းသဵင်ႈတင်းတင်းလူင်ၵႃႈၼိူဝ်ၽႅၼ်ႇလိၼ်မိူင်းဢွၼ်ၵၼ်ၵူဝ်ႁႄ ထႃႇဝရႃႉၽြႃး၊ တႃႉ။ ႁႂ်ႈၵူၼ်းလေႃးၵီႇတင်းသဵင်ႈတင်းလူင်ဢွၼ်ၵၼ်ၵူဝ်ယမ်မၼ်းၸဝ်ႈတႃႉ။
လွင်ႈမၼ်းၸမ်ႉ၊မၼ်းၸဝ်ႈလၢတ်ႈဢွၵ်ႇသူပ်းလႄႈၵမ်ႇၽႃႇလေႃးၵႃႉပဵၼ်မႃးဢေႃႈ။ မၼ်းၸဝ်ႈမီးဢမိင်ႉလႄႈၵႃႈမီးၵူႈၸိူဝ်ႉၵူႈပိူင်ပေႃႇပဵၼ်မႃးဢေႃႈ။
ထႃႇဝရႃႉၽြႃး၊ ပႄႇပႅတ်ႈတၢင်းဢၼ်မဵဝ်းၵူၼ်းတင်းလၢႆတိူင်ႇပၢင်ႇလၢတ်ႈၸႃၼၼ်ႉလႄႈ မၼ်းၸဝ်ႈယႃႉပႅတ်ႈတၢင်းဢၼ်ၵူၼ်းတင်းလၢႆၵျၢမ်ႇပွင်ၼၼ်ႉဢေႃႈ။
တၢင်းဢၼ် ထႃႇဝရႃႉၽြႃး၊ တႅပ်းတတ်းဝႆႉၼၼ်ႉၸမ်ႉ၊တႄႇယူႇတႃႇသေႇဢမ်ႇထၢတ်ႇလႄႈ တၢင်းၵျၢမ်ႇတၢင်းပွင်မၼ်းၸဝ်ႈၸိူဝ်းၼၼ်ႉမီးယူႇၼိၵ်ႈၸႃႉထႃႇဝရႃႉဢေႃႈ။
မဵဝ်းၵူၼ်းဢၼ်ၽြႃးပဵၼ်ၸဝ်ႈပဵၼ် ထႃႇဝရႃႉၽြႃး၊ ၶဝ် ၵူၼ်းတင်းလၢႆဢၼ်မၼ်းၸဝ်ႈလိူၵ်ႈဢဝ်ဝႆႉ ႁႂ်ႈပဵၼ်ၵူၼ်းမၼ်းၸဝ်ႈၸိူဝ်းၼၼ်ႉမီး မၢင်ႇၵလႃႇဢေႃႈ။
ထႃႇဝရႃႉၽြႃး၊ ယူႇၵႃႈၼိူဝ်ၽုင်ႇၵၢင်ႁၢဝ် လူတူၺ်းလႄႈ ႁၼ်ၵူၼ်းလေႃးၵီႇတင်းသဵင်ႈတင်းလူင်ဢေႃႈ။
မၼ်းၸဝ်ႈယူႇၵႃႈတီႈပလၢင်ႇဢၼ်မၼ်းၸဝ်ႈၼင်ႈၼၼ်ႉသေလႄႈ တူၺ်းႁၼ်ၶဝ်ၸိူဝ်းဢၼ်ယူႇၵႃႈၼႂ်းမိူင်းလေႃးၵႃႉၼႆႉတင်းသဵင်ႈတင်းလူင်ဢေႃႈ။
မၼ်းၸဝ်ႈႁဵတ်းပဵၼ်ႁူဝ်ၸႂ်ၶဝ်ၵႃႈမီးလႄႈႁုၵႃႈဢၼ်ၶဝ်ၵမ်ၵျၢင်ႉၵူႈၸိူဝ်ႉၵူႈပိူင်ၼၼ်ႉဢေႃႈ။
ၶုၼ်ႁေႃၶမ်းပႃးလႂ်သေဢမ်ႇဝႃႈ၊ ဢမ်ႇလႆႈပႄႉၼႅင်ႇ ၵွပ်ႈပိူဝ်ႈတပ်ႉသိုၵ်းမၼ်းဢၼ်ႁႅင်းတၼ်းၶူဝ်းယႂ်ႇၼႃႇၼၼ်ႉ။ ၵူၼ်းသိုၵ်းၵေႃႉလႂ်သေၵေႃႈဢမ်ႇၸၢင်ႈပႄႉၸၢင်ႈၼႅင်ႇၵွပ်ႈပိူဝ်ႈဢဵၼ်ႁႅင်းတူဝ်ၸဝ်ႈၵဝ်ႇၼၼ်ႉ။
မႃႉသိုၵ်းတင်းလၢႆၵေႃႈဢမ်ႇပွင်ႇလွင်ႈၵႃႈသင်လူၺ်ႈလွင်ႈဢၼ်ၸၢင်ႈပႄႉၼႅင်ႇၼၼ်ႉလႄႈ ဢဵၼ်ႁႅင်းၶဝ်ၼၼ်ႉဢမ်ႇၸၢင်ႈၵႄႇသႄႇၶျွတ်ႈဢဝ်လႆႈ။
ထႃႇဝရႃႉၽြႃး၊ ပႂ်ႉလူပႂ်ႉတူၺ်းၵႃႈတီႈၶဝ်ၸိူဝ်းဢၼ်ထွမ်ႇဢဝ်မၼ်းၸဝ်ႈ ၶဝ်ၸိူဝ်းဢၼ်ယုမ်ႇယမ်ဢိင်ပိုင်ႈမႅတ်ႈတႃႇၵရုၼႃႇမၼ်းၸဝ်ႈၸိူဝ်းၼၼ်ႉဢေႃႈ။
မၼ်းၸဝ်ႈၵႄႇသႄႇၶျွတ်ႈဢဝ်ၶဝ်ၵၢင်းလွတ်ႈတင်းၽေးတၢင်းတၢႆသေလႄႈ ႁႂ်ႈၶဝ်လႆႈဢသၢၵ်ႈလိပ်းယူႇၼႂ်းၶိင်ႇၵႃႇလႃႉဢၼ်ၶဝ်ႈၵႃႈမၢၵ်ႇပႅင်းၼၼ်ႉဢေႃႈ။
ၸႂ်ဝိၺိၺ်ႇၶႃႈၸဝ်ႈႁဝ်းၶဝ်တင်းလၢႆမုင်ႈထႃႈမွင်းထႃႈ ထႃႇဝရႃႉၽြႃး၊ လႄႈ မၼ်းၸဝ်ႈပဵၼ်ၸဝ်ႈဢၼ်ႁႄႉၶႅၼ်ႁဝ်းၸဝ်ႈဢၼ်ၸွႆႈထႅမ်မႃႉၸႃႉႁဝ်းဢေႃႈ။
ၵွပ်ႈပိူဝ်ႈဢၼ်ႁဝ်းယုမ်ႇယမ်ဢိင်ပိုင်ႈၼႃႇမႃႉၸိုဝ်ႈသဵင်ဢၼ်မူတ်းၸၢင်ႇၸဝ်ႈၼၼ်ႉလႄႈ ႁူဝ်ၸႂ်မီးတၢင်းဢၼ်ၸူမ်းသိူဝ်း တီႈ ထႃႇဝရႃႉၽြႃး၊ ဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈႁႂ်ႈ မႅတ်ႈတႃႇၵရုၼႃႇၸဝ်ႈႁဝ်း မီးယူႇလူၺ်ႈၵၼ်တင်းၶႃႈၸဝ်ႈႁဝ်းၶဝ် ၸွမ်းၵႃႈၼင်ႇဢၼ်ၶႃႈၸဝ်ႈႁဝ်းၶဝ်ဢိင်ပိုင်ႈဢႃးၵူဝ်းၸဝ်ႈႁဝ်းယူႇၼၼ်ႉသေၵမ်းတီႈၶႃႈ။
ၶႃႈၸဝ်ႈတၵ်းယွင်ႈယေႃးၵျေးၸူး ထႃႇဝရႃႉၽြႃး၊ ယူႇတႃႇသေႇလႄႈ တၵ်းတေဢမ်ႇႁႂ်ႈတၢင်းဢၼ်ယွင်ႈယေႃးမၼ်းၸဝ်ႈၼၼ်ႉလႆႈထၢတ်ႇလႆႈၵိုတ်းၵႂႃႇ။
ၶႃႈၸဝ်ႈတၵ်းတေဢဝ်ၵုင်ႇဢဝ်မုၼ် ထႃႇဝရႃႉၽြႃး၊ ၼၼ်ႉဢုပ်ႇယွင်ႈယူႇလႄႈ ႁႂ်ႈၶဝ်ၸိူဝ်းဢၼ်လႆႈၶၢမ်ႇပိူၼ်ႈပႄႉၵိၼ်ၼၼ်ႉလႆႈငိၼ်းလႄႈၸူမ်းသိူဝ်းသေၵမ်းလူၺ်ႈ။
ဢွၼ်ၵၼ်ယွင်ႈယေႃး ထႃႇဝရႃႉၽြႃး၊ ႁူမ်ႈလူၺ်ႈၵၼ်တင်းၵဝ်တႃႉ။ ၽွမ်ႉၵၼ်ယုၵ်ႉယွင်ႈၼႃႇမႃႉၸိုဝ်ႈသဵင်မၼ်းၸဝ်ႈတႃႉႁဝ်း။
ၵဝ်သူးတွင်းတီႈ ထႃႇဝရႃႉၽြႃး၊ လႄႈမၼ်းၸဝ်ႈဢိူဝ်ၵဝ်သေယဝ်ႉ၊ မၼ်းၸဝ်ႈပွႆႇပၼ်ၵဝ်လွတ်ႈသေတၢင်းဢၼ်လီၵူဝ်လီႁႄၼၼ်ႉဢေႃႈ။
ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ပိူၼ်ႈပႄႉၵိၼ်ၼၼ်ႉတူၺ်းႁၼ်မၼ်းၸဝ်ႈလႄႈလႆႈၸူမ်းသိူဝ်းသေယဝ်ႉ၊ ၶဝ်ဢမ်ႇလႆႈႁွတ်ႈထိုင်တၢင်းဢၼ်ၸႂ်လုႁႅင်းဢူၼ်ႈဢေႃႈ။
ၶဝ်ၸိူဝ်းဢၼ်ဢမ်ႇမီးတီႈဢိင်ပိုင်ႈၼၼ်ႉႁွင်ႉၵၢဝ်ႇမၼ်းၸဝ်ႈလႄႈမၼ်းၸဝ်ႈဢိူဝ်ဢေႃႈ။ မၼ်းၸဝ်ႈၵႄႇသႄႇၶျွတ်ႈဢဝ်ႁႂ်ႈၶဝ်လွတ်ႈသေတုၵ်ႉၶႃႉတၢင်းၽၢၼ်ဢေႃႈ။
တမၢၼ်ႇၵၢင်ႁၢဝ် ထႃႇဝရႃႉၽြႃး၊ ၸၢင်ႈၶျႃးပၢင်တပ်ႉ လဵပ်ႈႁွပ်ႈႁိမ်းႁွမ်းၶဝ်ၸိူဝ်းဢၼ်ထွမ်ႇဢဝ်ၵႂၢမ်းမၼ်းၸဝ်ႈၼၼ်ႉသေလႄႈ ၵႄႇသႄႇပွႆႇၶဝ်လွတ်ႈသေၽေးဢၢၼ်ႇတရေႇတင်းလၢႆဢေႃႈ။
ဢွၼ်ၵၼ်ၸိမ်းတူၺ်းလႄႈႁုလွင်ႈဢၼ် ထႃႇဝရႃႉၽြႃး၊ လီမျၢတ်ႈၼႃႇၼၼ်ႉတႃႉ။ ၵေႃႉဢၼ်သွၼ်ႈပိုင်ႈမၼ်းၸဝ်ႈၼၼ်ႉမီးမၢင်ႇၵလႃႇဢေႃႈ။
ၵူၼ်းမူတ်းၸၢင်ႇမၼ်းၸဝ်ႈၶဝ်႟။ ဢွၼ်ၵၼ်ထွမ်ႇဢဝ် ထႃႇဝရႃႉၽြႃး၊ တႃႉ။ လွင်ႈမၼ်းၸမ်ႉ၊ၶဝ်ၸိူဝ်းဢၼ်ထွမ်ႇဢဝ်မၼ်းၸဝ်ႈၼၼ်ႉ၊ၸၢင်ႈလႆႈၵႃႈဢၼ်ၶဝ်မီးဢလူဝ်ႇၼၼ်ႉဢေႃႈ။
သၢင်ႇသီႈယင်းၸၢင်ႈလႆႈၸုတ်ႈလုတ်ႈလႄႈဢိုပ်းတၢင်းၵိၼ်ဢေႃႈ။ ၶဝ်ၸိူဝ်းဢၼ်ထွမ်ႇဢဝ် ထႃႇဝရႃႉၽြႃး၊ ၸမ်ႉ၊ ဢမ်ႇလႆႈၸုတ်ႈလုတ်ႈလွင်ႈတၢင်းဢၼ်လီဢၼ်ငၢမ်းၼၼ်ႉသေၸိူဝ်ႉသေပိူင်။
ၵူၼ်းၼုမ်ႇၶဝ်တင်းလၢႆ႟။ ဢွၼ်ၵၼ်မႃးထွမ်ႇဢဝ်ၵႂၢမ်းၵဝ်တႃႉ။ ၵဝ်တၵ်းတေသွၼ်ပၼ်တြႃး လွင်ႈတၢင်းဢၼ်ၸၢင်ႈရူဝ်ႇသေႇၵူဝ်ယမ် ထႃႇဝရႃႉၽြႃး၊ ၼၼ်ႉတီႈသူဢေႃႈ။
ၸွင်ႇမႂ်းမုင်ႈမွင်းၶႂ်ႈလႆႈတၢင်းဢၼ်သိူဝ်းပျေႃႇၼႂ်းၸူဝ်ႈတႃႇဢသၢၵ်ႈႁိုဝ်း။ ၸွင်ႇမႂ်းၶႂ်ႈလႆႈတၢင်းဢၼ်ဢႃႇယုယၢဝ်းယိုၼ်းလႄႈသႂၢင်ႇသိူဝ်းၼၼ်ႉႁိုဝ်း။
ပေႃးမုင်ႈမွင်းၶႂ်ႈလႆႈၸိုင်၊ ဝႄႈပႅတ်ႈတၢင်းဢၼ်လၢတ်ႈၵႂၢမ်းယုတ်ႈၵႂၢမ်းႁၢႆႉ၊ဢိၵ်ႇတင်းၵႂၢမ်းမုသႃႇတင်းလၢႆတႃႉ။
ဝႄႈပႅတ်ႈတုၸရိူၵ်ႈသေလႄႈဢွၼ်ၵၼ်ႁဵတ်းသုၸရိူၵ်ႈတႃႉ။ ႁႃတၢင်းဢၼ်ႁႂ်ႈယူႇထုၵ်ႇထုၵ်ႇၵၼ်တင်းပိူၼ်ႈတၢင်ႇၵေႃႉၼၼ်ႉသေလႄႈ ၸွမ်းႁႂ်ႈၶိုတ်းပိူၼ်ႈတႃႉ။
ထႃႇဝရႃႉၽြႃး၊ ပႂ်ႉလူပႂ်ႉတူၺ်းၶဝ်ၸိူဝ်းဢၼ်သိုဝ်ႈတေႃႇၼၼ်ႉယူႇသေလႄႈထွမ်ႇငိၼ်းဢဝ် သဵင်ဢၼ်ၶဝ်ႁွင်ႉသႅၼ်ႇၼၼ်ႉယူႇဢေႃႈ။
တီႈၶဝ်ၸိူဝ်းဢၼ်ႁဵတ်းတုၸရိူၵ်ႈၼၼ်ႉၸမ်ႉ၊မၼ်းၸဝ်ႈႁဵတ်းၶတ်းၵၼ်တင်းၶဝ်သေလႄႈ လိုၼ်းသေဢၼ်ၶဝ်တၢႆယဝ်ႉၼၼ်ႉမၼ်းၸဝ်ႈႁႂ်ႈပိူၼ်ႈၸဵဝ်းလူင်လိုမ်းၶဝ်ပႅတ်ႈဢေႃႈ။
ၶဝ်ၸိူဝ်းဢၼ်သိုဝ်ႈတေႃႇၼၼ်ႉႁွင်ႉၵၢဝ်ႇတီႈ ထႃႇဝရႃႉၽြႃး၊ လႄႈ မၼ်းၸဝ်ႈၶိုၼ်းတွပ်ႇတီႈၶဝ်သေယဝ်ႉ၊ ၵႄႇၼုၵ်ႈဢဝ်ၶဝ်ဢွၵ်ႇသေတုၵ်ႉၶႃႉတၢင်းၽၢၼ်တင်းလၢႆဢေႃႈ။
ထႃႇဝရႃႉၽြႃး၊ မီးၸမ်ႁိမ်းၶဝ်ၸိူဝ်းဢၼ်ၸႂ်လုႁႅင်းဢူၼ်ႈၼၼ်ႉသေလႄႈ မၼ်းၸဝ်ႈၵႄႇသႄႇၶျွတ်ႈဢဝ် ၶဝ်ၸိူဝ်းဢၼ်ဢမ်ႇမီးတီႈဢၼ်တၵ်းမုင်ႈမွင်းလႃးလႃးယဝ်ႉၼၼ်ႉဢေႃႈ။
ၵူၼ်းလီၸိုင်၊လႆႈၶၢမ်ႇတုၵ်ႉၶႃႉတၢင်းၽၢၼ်ၼမ်ၼႃႇဢေႃႈ။ ၵူၺ်းၵႃႈ၊ ထႃႇဝရႃႉၽြႃး၊ ၵႄႇသႄႇၶျွတ်ႈဢဝ် ႁႂ်ႈမၼ်းလွတ်ႈၽေးတုၵ်ႉၶႃႉၸိူဝ်းၼၼ်ႉဢေႃႈ။
ထႃႇဝရႃႉၽြႃး၊ ပႂ်ႉလူလုမ်းလႃးမၼ်း လီလီငၢမ်းငၢမ်းလႄႈလုပ်ႇမၼ်းဢမ်ႇလႆႈႁၵ်းလႆႈလုသေလႅမ်ႈတီႈၶႃႈဢေႃႈ။
တုၸရိူၵ်ႈတၵ်းတေဢဝ်ၵူၼ်းႁၢႆႉၵူၼ်းမိူၵ်ႈ ၼၼ်ႉတၢႆလႄႈ ၶဝ်ၸိူဝ်းဢၼ်ၸင်းၵူၼ်းသိုဝ်ႈတေႃႇၼၼ်ႉလႆႈၶၢမ်ႇတၢင်းဢၼ်ၸီႇယၢင်ႇဢပျတ်ႈဢေႃႈ။
ထႃႇဝရႃႉၽြႃး၊ တၵ်းတေၵႄႇၶျွတ်ႈဢဝ်ၵူၼ်းမၼ်းၸဝ်ႈလႄႈ ၶဝ်ၸိူဝ်းဢၼ်ၵႂႃႇသွၼ်ႈပိုင်ႈမၼ်းၸဝ်ႈၼၼ်ႉ၊ တၵ်းၵၢင်းလွတ်ႈတင်းတၢင်းဢၼ်ၸီႇယၢင်ႇဢပျတ်ႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈႁဵတ်းၶတ်းၵၼ်တင်းၶဝ်ၸိူဝ်းဢၼ် ႁဵတ်းၶတ်းၵၼ်တင်းၶႃႈၸဝ်ႈၼၼ်ႉသေၵမ်းတီႈၶႃႈ။ ၶႅၼ်းတေႃႈတိုၵ်းတေႃးၶဝ်ၸိူဝ်းဢၼ်တိုၵ်းတေႃးၶႃႈၸဝ်ႈၼၼ်ႉသေၵမ်းတီႈၶႃႈ။
ၶႅၼ်းတေႃႈယိပ်းၵမ်ၶႅပ်းႁႄႉလၢၵ်ႈၼၢၵ်ႈဢိၵ်ႇတင်းလၢၵ်ႈၼၢၵ်ႈလၢပ်ႇလႅဝ်းသေလႄႈ မႃးၸွႆႈမႃးထႅမ်ၶႃႈၸဝ်ႈသေၵမ်းတီႈၶႃႈ။
ၶႅၼ်းတေႃႈဢဝ်ႁွၵ်ႇတင်းတႃမႅတ်းငႃသေလႄႈ ႁႄႉတၢင်းၶဝ်ၸိူဝ်းဢၼ်လိုပ်ႈၸွမ်းၶႃႈၸဝ်ႈၼၼ်ႉသေၵမ်းတီႈၶႃႈ။ ၶႅၼ်းတေႃႈႁႂ်ႈၶႃႈၸဝ်ႈလႆႈငိၼ်းသဵင်ဢမိင်ႉၸဝ်ႈႁဝ်းဢၼ်ဝႃႈ၊ “ၵဝ်ပဵၼ်ၸဝ်ႈဢၼ်ၵႄႇၶျွတ်ႈဢဝ်မႂ်းဢေႃႈ၊” ဝႃႈၼင်ႇၼႆသေၵမ်းတီႈၶႃႈ။
ႁႂ်ႈၶဝ်ၸိူဝ်းဢၼ်ၵျူဝ်းၸႃးဢၢင်ႈတၵ်းဢဝ်ၶႃႈၸဝ်ႈတၢႆၼၼ်ႉ၊ လႆႈတူၵ်းသုမ်းလႄႈၼႃႈလုသေၵမ်းလူၺ်ႈ။ ႁႂ်ႈၶဝ်ၸိူဝ်းဢၼ်ၵျၢမ်ႇဢၢင်ႈႁဵတ်းတၢင်းမိူၵ်ႈတီႈၶႃႈၸဝ်ႈၼၼ်ႉ လႆႈဝၢႆႇၶိုၼ်းလႄႈၽိတ်းတၢင်းသေၵမ်းလူၺ်ႈ။
ႁႂ်ႈၶဝ်ပဵၼ်ၸိူဝ်ႉၼင်ႇၵႅပ်ႇဢၼ်ပိဝ်ၵႂႃႇၼႂ်းလူမ်း၊ ၸိူဝ်ႉၼင်ႇဢၼ်တမၢၼ်ႇၵၢင်ႁၢဝ် ထႃႇဝရႃႉၽြႃး၊ လိုပ်ႈႁေႃႈလိုပ်ႈလမ်းၶဝ်ၼၼ်ႉသေၵမ်းလူၺ်ႈ။
ႁႂ်ႈသဵၼ်ႈတၢင်းၶဝ်လပ်းသိင်ႇလႄႈမိုၼ်ႈယူႇ ယၢမ်းမိူဝ်ႈဢၼ်တမၢၼ်ႇၵၢင်ႁၢဝ်လိုပ်ႈၸွမ်းလမ်းၸွမ်းၶဝ်ၼၼ်ႉသေၵမ်းလူၺ်ႈ။
လွင်ႈတၢင်းယင်းဢမ်ႇမီးလႄႈၶဝ်ႁၢင်ႈတူင်ႇႁႅဝ်ႉတူင်ႇၶိုမ်းပုၼ်ႈၶႃႈၸဝ်ႈဢိၵ်ႇတင်း ၶုတ်းၶုမ်ၶုတ်းလုၵ်းႁႂ်ႈလႆႈတိဢဝ်ၶႃႈၸဝ်ႈဢေႃႈ။
ၼႂ်းဝႃႈၼၼ်သေၵေႃႈ၊ၸူဝ်ႈဢၼ်ၶဝ်ဢမ်ႇပႆႇတၼ်းႁုတူဝ်ႁုႁၢင်ႈၼၼ်ႉၸိုင်၊ ႁႂ်ႈတၢင်းလုတၢင်းလႅဝ်ႁွတ်ႈထိုင်ၵႃႈၼိူဝ်ၶဝ်သေၵမ်းလူၺ်ႈ။ ႁႂ်ႈတူင်ႇႁႅဝ်ႉတူင်ႇၶိုမ်းဢၼ်ၶဝ်သိူင်ႇဝႆႉႁၢင်ႈဝႆႉၼၼ်ႉထုၵ်ႇၶဵၼ်းမႅၼ်ႈ ႁႂ်ႈၶဝ်တူၵ်းလုတူၵ်းသုမ်းသေၵမ်းလူၺ်ႈ။
ပေႃးပဵၼ်ၸိူဝ်ႉၼင်ႇၼၼ်ၸိုင်၊ၵဝ်တၵ်းတေလႆႈသႂၢင်ႇသိူဝ်း၊ၵွပ်ႈပိူဝ်ႈ ထႃႇဝရႃႉၽြႃး၊ လႄႈ ၵဝ်တၵ်းတေလႆႈၸူမ်းသိူဝ်းၵွပ်ႈပိူဝ်ႈမၼ်းၸဝ်ႈၵႄႇၶျွတ်ႈၵဝ်ၼၼ်ႉဢေႃႈ။
တူဝ်ၶၼ်ႇထႃႇၵဝ်တင်းတူဝ်တင်းၶိင်း ဢွၼ်ၵၼ်လဝ်ႈလၢတ်ႈလႄႈဝႃႈ၊ “ ထႃႇဝရႃႉၽြႃး၊ တီႈၶႃႈ။ ဢမ်ႇမီးၽူႈလႂ်ဢၼ်မိူၼ်ၸဝ်ႈႁဝ်းသေၵေႃႉသေၵူၼ်းတီႈၶႃႈ။ ၸဝ်ႈႁဝ်းၸိုင်၊ႁႄႉၶႅၼ်ပၼ်ႁႂ်ႈၵေႃႉဢၼ် ႁႅင်းလဵၵ်ႉႁႅင်းၼွႆႉလွတ်ႈသေ ၵႃႈၼႂ်းမိုဝ်းၵေႃႉဢၼ်ပႄႉၵိၼ်ၶဝ်ၼၼ်ႉဢိၵ်ႇတင်းႁႂ်ႈၵေႃႉဢၼ်ယၢၵ်ႈၽၢၼ်ၼၼ်ႉ လွတ်ႈသေၵႃႈၼႂ်းမိုဝ်းၵေႃႉဢၼ်တဵၵ်းငႅၼ်းၼၼ်ႉဢေႃႈ၊” ဝႃႈၼင်ႇၼႆတီႈၶႃႈဢေႃႈ။
ၵူၼ်းႁၢႆႉၵူၼ်းမိူၵ်ႈၸိူဝ်းၼၼ်ႉၶၢမ်ႇသၢၵ်ႈသေႇဢၼ်ဢမ်ႇတြႃးတီႈၵဝ်လႄႈ ၶဝ်ၸွႆးတၢင်ႇဢမုဢၼ်ၵဝ်ယင်းဢမ်ႇလႆႈႁုလွင်ႈမၼ်းၼၼ်ႉဢေႃႈ။
ၶဝ်ဢဝ်လွင်ႈတၢင်းဢၼ်ႁုၵ်းဢၼ်ႁၢႆႉတွပ်ႇတႅၼ်းပုၼ်ႈလွင်ႈတၢင်းဢၼ်လီတီႈၵဝ်လႄႈ ႁႂ်ႈၵဝ်တူၵ်းၸူမ်ၼႂ်းတၢင်းဢၼ်ၸႂ်လုႁႅင်းဢူၼ်ႈဢေႃႈ။
ၵဝ်ၸမ်ႉ၊မိူဝ်ႈဢၼ်ၶဝ်မီးတၢင်းၶႆႈတၢင်းပဵၼ်ၸိုင်၊ ၼုင်ႈၶူဝ်းလဵင်းဢၼ်ၼႄပျႃးတၢင်းဢၼ်မႆႈၸႂ်ၼၼ်ႉယူႇ၊ ၶျုၵ်ႈၵၼ်ႈတူဝ်ၸဝ်ႈၵဝ်ႇ၊ၵမ်တၢင်းၵိၼ်ယူႇ၊ဢဝ်ႁူဝ်ၵူမ်ႈၼႃႈဝၢင်ႈဢူၵ်းသူးတွင်းယူႇ။
မိူၼ်ၸိူဝ်ႉၼင်ႇဢၼ်သူးတွင်းပုၼ်ႈပီႈၼွင်ႉၵေႃႉသႄႈၼၼ်ႉယူႇ၊ ၵူမ်ႈၼႃႈလႄႇၵႂႃႇတင်းၸႂ်ဢၼ်ငိူဝ်ႈဢၼ်ငဝ်ယူႇ၊ မိူၼ်ၸိူဝ်ႉၼင်ႇၵေႃႉဢၼ်ႁူဝ်ၸႂ်ဢမ်ႇသႃႇၵွပ်ႈပိူဝ်ႈမႄႈမၼ်းသဵင်ႈၵႂႃႇယဝ်ႉၼၼ်ႉဢေႃႈ။
ၵူၺ်းၵႃႈ၊ၼႂ်းမိူဝ်ႈဢၼ်ၵဝ်ထူပ်းၽေးတုၵ်ႉၶႃႉၼၼ်ႉၸိုင်၊ၶဝ်ၸူမ်းသိူဝ်းၵူႈၵေႃႉၵူႈၵူၼ်းယူႇ၊ ၸုတုမ်ၵၼ်ႁဵတ်းပျၢၵ်ႈၶူဝ်တေႃႇၵဝ်ယူႇ၊ၵေႃႉဢၼ် ၵဝ်ဢမ်ႇႁုၸၵ်းၼၼ်ႉပေႃႉယႅၼ်ႉၵဝ်ယူႇ ဢွၼ်ၵၼ်ပေႃႉထုပ်ႉၵဝ်ၶိူဝ်းၶိူဝ်းယႂ်းယႂ်းယူႇဢေႃႈ။
ၶဝ်မိူၼ်ၸိူဝ်ႉၼင်ႇၵူၼ်းႁၢႆႉမိူၵ်ႈဢၼ်ႁဵတ်းပျၢၵ်ႈသႄႉသွမ်းတီႈၵူၼ်းတုၵ်ႉၶိတႃႉယူႇ၊ ၶဝ်ဢဝ်တင်းမၢၵ်ႇတႃဢၼ်ၸင်းလႄႈတူၺ်းၵဝ်ယူႇဢေႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းတၵ်းတေတူၺ်းယူႇၸိူဝ်ႉၼင်ႇၼႆႁိုင်ၵႃႈႁိုဝ်တီႈၶႃႈ။ ၶႅၼ်းတေႃႈၵႄႇသႄႇဢဝ်ၶႃႈၸဝ်ႈသေၵႃႈၼႂ်းတၢင်းဢၼ်ၶဝ်တိုၵ်းတေႃးၼႆႉ၊ ဢိၵ်ႇတင်းၵႄႇသႄႇၶျွတ်ႈဢဝ်ဢသၢၵ်ႈၶႃႈၸဝ်ႈဢွၵ်ႇသေ ၵႃႈၼႂ်းမိုဝ်းၶဝ်ၸိူဝ်းဢၼ်မီးႁႅင်းတၼ်းၶူဝ်း မိူၼ်သၢင်ႇသီႈၼၼ်ႉသေၵမ်းတီႈၶႃႈ။
ပေႃးႁဵတ်းၸိူဝ်ႉၼင်ႇၼၼ်ၸိုင်၊ၶႃႈၸဝ်ႈတၵ်းယွင်ႈယေႃးၵျေးၸူးၸဝ်ႈႁဝ်း၊ ၵႃႈၼႂ်းၵၢင်ပရိၵ်ႈသၢတ်ႈၵူၼ်းၼမ်ၼႃႇၼၼ်ႉတီႈၶႃႈဢေႃႈ။ ၶႃႈၸဝ်ႈတၵ်းယွင်ႈယေႃးၸဝ်ႈႁဝ်းၵႃႈတီႈၽၢႆႇၼႃႈၶဝ်ၵႃႈမီးတင်းသဵင်ႈတင်းလူင်ၼၼ်ႉတီႈၶႃႈဢေႃႈ။
ယင်းဢမ်ႇၸိုဝ်ႈဢမ်ႇၸႂ်ႈလႄႈယႃႇပေႁႂ်ႈရၢၼ်ႇသူႇၶႃႈၸဝ်ႈၸိူဝ်းၼၼ်ႉလႆႈၸူမ်းလႆႈသိူဝ်း ၵႃႈၼိူဝ်တၢင်းဢၼ်ၶႃႈၸဝ်ႈတူၵ်းသုမ်းၼၼ်ႉသေၵမ်းတီႈၶႃႈ။ လွင်ႈမၼ်းယင်းဢမ်ႇမီးလႄႈယႃႇပေႁႂ်ႈၶဝ်ၸိူဝ်းဢၼ်ၸင်းၶႃႈၸဝ်ႈၼၼ်ႉမႅပ်ႈလိၼ်ႉပိၼ်ႈတႃ ၵႃႈတီႈတၢင်းဢၼ်ၶႃႈၸဝ်ႈလႆႈမႆႈၸႂ်ၶီၸႂ်ၼၼ်ႉသေၵမ်းတီႈၶႃႈ။
ၶဝ်ဢမ်ႇတွၼ်ႉလၢတ်ႈတေႃႇမိူၼ်ၸိူဝ်ႉၼင်ႇဢၼ်ပဵၼ်ၵေႃႉသႄႈၵၼ်ၼၼ်ႉ။ ၶဝ်ယင်းၵျၢမ်ႇပွင်မဵဝ်းဢၼ်ပဵၼ်မုသႃႇလွၼ်ႉလွၼ်ႉလႄႈ ပႅတ်ႉလႅၼ်ၶဝ်ၸိူဝ်းဢၼ်ၸၢင်ႈယူႇထုၵ်ႇထုၵ်ႇမေႃမေႃၵၼ်ၼၼ်ႉဢေႃႈ။
ၶဝ်တၢင်ႇဢပျတ်ႈတီႈၶႃႈၸဝ်ႈလႄႈပၢဝ်ႇသႅၼ်ႇလၢတ်ႈဝႃႈ၊ “ဢႁိ။ ဢႁိ။ ႁဝ်းႁၼ်တၢင်းႁဵတ်းမႂ်းယူႇယဝ်ႉ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းႁုလွင်ႈတၢင်းၼႆႉယူႇတီႈၶႃႈဢေႃႈ။ ပိူဝ်ႈၼႆလႄႈ၊ယင်းဢမ်ႇတၵ်းသဵင်လႄႈယႃႇပေယူႇသေၵမ်း၊ ၸဝ်ႈၽြႃးတီႈၶႃႈ။ ယႃႇပေယူႇၵႆၵၼ်တင်းၶႃႈၸဝ်ႈသေၵမ်း။
ဢူဝ်း ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈပူၵ်းတူဝ်ၸဝ်ႈၵဝ်ႇလုၵ်ႉလႄႈၵႅတ်ႇၶႄႁႄႉၵင်ႈၶႃႈၸဝ်ႈသေၵမ်း။ ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ တိုၼ်ႇမႃးလႄႈၸွႆႈလၢတ်ႈပၼ်ပုၼ်ႈဢမုၶႃႈၸဝ်ႈသေၵမ်း။
ထႃႇဝရႃႉၽြႃး၊ တီႈၶႃႈ။ ၸွမ်းလူၺ်ႈတၢင်းသိုဝ်ႈတေႃႇၸဝ်ႈႁဝ်းၼၼ်ႉလႄႈ ၽုၺ်ႇၼႄလွင်ႈဢၼ်ၶႃႈၸဝ်ႈဢမ်ႇမီးဢပျတ်ႈၼၼ်ႉသေၵမ်းတီႈၶႃႈ။ ယႃႇပေႁႂ်ႈရၢၼ်ႇသူႇၶႃႈၸဝ်ႈၸိူဝ်းၼၼ်ႉလႆႈၸူမ်းလႆႈသိူဝ်းၵႃႈၼိူဝ်ၶႃႈၸဝ်ႈသေၵမ်း။
ၶႅၼ်းတေႃႈယႃႇပေႁႂ်ႈၶဝ်လႆႈလၢတ်ႈတီႈၶဝ်ၼင်ႇၵၼ်လႄႈဝႃႈ၊ “ဢႁိ။ ႁဝ်းလႆႈယႃႉမၼ်းလုလႅဝ်ပႅတ်ႈယဝ်ႉ။ ဢၼ်ၼႆႉပဵၼ်တၢင်းဢၼ်ႁဝ်းမီးဢလူဝ်ႇ ၶႂ်ႈလႆႈၼၼ်ႉယဝ်ႉ၊” ဝႃႈၼင်ႇၼႆၼၼ်ႉ သေၵမ်းတီႈၶႃႈ။
ႁႂ်ႈၶဝ်ၸိူဝ်းဢၼ်ၸူမ်းသိူဝ်းၵွပ်ႈပိူဝ်ႈဢၼ်ၶႃႈၸဝ်ႈထူပ်းၽေးယူႇၼၼ်ႉ၊ လႆႈတူၵ်းသုမ်းလႄႈယုင်ႈၸႂ်ၵႂင်ၸႂ်ၵႂႃႇလုမ်းလုမ်းသေၵမ်းတီႈၶႃႈ။ ႁႂ်ႈၶဝ်ၸိူဝ်းဢၼ်ထၢင်ႇတူဝ်ၸဝ်ႈၵဝ်ႇယဵင်ႈၶႅၼ်းမျၢတ်ႈလီသေၶႃႈၸဝ်ႈၼၼ်ႉလႆႈၶၢမ်ႇတၢင်းဢၼ်သရေႇလု ဢိၵ်ႇတင်းႁႂ်ႈလႆႈၶၢမ်ႇတၢင်းဢၼ်ဢူၵ်းဢၢႆၼႃႇၼၼ်ႉသေၵမ်းတီႈၶႃႈ။
ႁႂ်ႈၶဝ်ၸိူဝ်းဢၼ်ၶႂ်ႈႁၼ်ဢၼ်ၸိုဝ်ႈဢၼ်ၸႂ်ႈၶႃႈၸဝ်ႈထၢင်ႇသႃးၼၼ်ႉ၊ လႆႈႁဵတ်းၵႂၢမ်းသဵင်ယႂ်ႇဢၼ်သႂၢင်ႇဢၼ်သိူဝ်းယူႇသေၵမ်းလူၺ်ႈ။ ႁႂ်ႈၶဝ်လႆႈဢွၼ်ၵၼ်မွၵ်ႇလၢတ်ႈယူႇလႄႈဝႃႈ၊ “ ထႃႇဝရႃႉၽြႃး၊ ပဵၼ်ၸဝ်ႈဢၼ်မုၼ်ၽုင်းယႂ်ႇၼႃႇတီႈၶႃႈဢေႃႈ။ မၼ်းၸဝ်ႈၵျိူၵ်ႈႁၵ်ႉထုၵ်ႇၸႂ်တၢင်းဢၼ် ၶႃႈမၼ်းၸဝ်ႈၵတ်းယဵၼ်ၶျၢမ်းသႃႇၼၼ်ႉတီႈၶႃႈဢေႃႈ၊” ဝႃႈၼင်ႇၼႆယူႇသေႇသေႇသေၵမ်းတီႈၶႃႈ။
ပေႃးပဵၼ်ၸိူဝ်ႉၼင်ႇၼၼ်ၸိုင်၊ၶႃႈၸဝ်ႈတေမွၵ်ႇလၢတ်ႈလွင်ႈတၢင်းဢၼ်ၸဝ်ႈႁဝ်း ပဵၼ်ၸဝ်ႈဢၼ်သိုဝ်ႈတေႃႇၼၼ်ႉသေလႄႈယွင်ႈယေႃးၸဝ်ႈႁဝ်းယူႇတင်းဝၼ်း တင်းဝၼ်းတီႈၶႃႈဢေႃႈ။
တုၸရိူၵ်ႈဢပျတ်ႈၸၢင်ႈလၢတ်ႈတီႈၵူၼ်းႁၢႆႉ ၵူၼ်းမိူၵ်ႈလိုၵ်ႉလိုၵ်ႉလမ်ႇလမ်ႇ၊ ၵႃႈၼႂ်းႁူဝ်ၸႂ်မၼ်းၼၼ်ႉဢေႃႈ။ မၼ်းၸၢင်ႈပႄႇပႅတ်ႈၽြႃးပဵၼ်ၸဝ်ႈလႄႈႁဵတ်းဢမ်ႇရူဝ်ႇဢမ်ႇသေႇမၼ်းၸဝ်ႈဢေႃႈ။
မၼ်းၸၢင်ႈထၢင်ႇတူဝ်ၸဝ်ႈၵဝ်ႇပဵၼ်ဢၼ်သုင်မျၢတ်ႈၼႃႇဢိၵ်ႇတင်းၸၢင်ႈထၢင်ႇဝႃႈ ၽြႃးပဵၼ်ၸဝ်ႈတေဢမ်ႇထူပ်းႁၼ်ဢပျတ်ႈမၼ်းႁဵတ်းၼၼ်ႉလႄႈ ၸၢင်ႈထၢင်ႇဝႃႈမၼ်းၸဝ်ႈတေဢမ်ႇၸီႇယၢင်ႇပၼ်တၢမ်ႇၵႃႈၼိူဝ်မၼ်းဢေႃႈ။
ၵႂၢမ်းဢၼ်မၼ်းလၢတ်ႈၼၼ်ႉပဵၼ်ၵႂၢမ်းႁၢႆႉ ၵႂၢမ်းမိူၵ်ႈၵူၺ်းလႄႈပဵၼ်ၵႂၢမ်းမုသႃႇ လွၼ်ႉလွၼ်ႉဢေႃႈ။ တၢင်းႁဵတ်းမၼ်းၵေႃႈပဵၼ်တၢင်းႁဵတ်းဢၼ်ဢမ်ႇမီးပိင်ႇၺႃႇလႄႈ မၼ်းဢမ်ႇၸၢင်ႈၵမ်ၸၢင်ႈၵျၢင်ႉဢၼ်လီဢၼ်ငၢမ်းဢေႃႈ။
မၼ်းၸၢင်ႈၵျၢမ်ႇပွင်လွင်ႈဢၼ်ဢမ်ႇတြႃးၼၼ်ႉ၊ ၶိင်ႇယၢမ်းမိူဝ်ႈဢၼ်ငႅၵ်ႈၼွၼ်းယူႇၵႃႈၼိူဝ်ၵူႇမၼ်းၼၼ်ႉဢေႃႈ။ ၵႃႈဢၼ်မၼ်းႁဵတ်းၼၼ်ႉပဵၼ်ဢၼ်ဢမ်ႇလီဢမ်ႇငၢမ်းၵူၺ်းလႄႈ၊ မၼ်းဢမ်ႇတွၼ်ႉလီႁင်ႈတၢင်းၵမ်တၢင်းၵျၢင်ႉဢၼ်ႁၢႆႉဢၼ်ယုတ်ႈၼၼ်ႉ။
ထႃႇဝရႃႉၽြႃး၊ တီႈၶႃႈ။ မႅတ်ႈတႃႇၵရုၼႃႇၸဝ်ႈႁဝ်းၼၼ်ႉၶိုတ်းထိုင်ၽႃႉၵၢင်ႁၢဝ်လႄႈ သဵတ်ႈၸႃႇၸဝ်ႈႁဝ်းၼၼ်ႉၵေႃႈၶိုတ်းထိုင်တွင်ႉၽႃႉတီႈၶႃႈဢေႃႈ။
တၢင်းသိုဝ်ႈတေႃႇၸဝ်ႈႁဝ်းၼၼ်ႉပဵၼ်မိူၼ်ၼင်ႇလွႆၽြႃးပဵၼ်ၸဝ်ႈလႄႈ တၢင်းဢၼ်ၸဝ်ႈႁဝ်းၸီႇယၢင်ႇတႅပ်းတတ်းၽဵင်ႇၼၼ်ႉၵေႃႈ၊ ပဵၼ်လွင်ႈတၢင်းဢၼ်လိုၵ်ႉလမ်ႇၼႃႇလူင်လၢင်တီႈၶႃႈဢေႃႈ။ ၸဝ်ႈႁဝ်းၸွႆႈထႅမ်မႃႉၸႃႉၵူၼ်းတင်းတရိၵ်ႈသၢၼ်ႇတီႈၶႃႈဢေႃႈ။
ၽြႃးပဵၼ်ၸဝ်ႈတီႈၶႃႈ။ မႅတ်ႈတႃႇၵရုၼႃႇၸဝ်ႈႁဝ်းဢၼ်ဢမ်ႇတွၼ်ႉသုတ်ႉယွမ်းလႆႈၼၼ်ႉ ပဵၼ်ဢၼ်မျၢတ်ႈလီတီႈၶႃႈဢေႃႈ။ ၵူၼ်းတင်းလၢႆဢွၼ်ၵၼ်သွၼ်ႈႁူမ်ႈပိၵ်ႇၸဝ်ႈႁဝ်းတီႈၶႃႈဢေႃႈ။
ၶႃႈၸဝ်ႈႁဝ်းလႆႈၵိၼ်ဢိမ်ႇၵိၼ်တဵမ်တၢင်းၵိၼ်ဢၼ်ၸဝ်ႈႁဝ်းႁႅၼ်းပၼ်ၼၼ်ႉဢိၵ်ႇတင်းၸဝ်ႈႁဝ်း ႁႂ်ႈၶႃႈၸဝ်ႈႁဝ်းၶဝ်လႆႈၵိၼ်ၼမ်ႉဢၼ်ႁွင်ႈၵတ်းယဵၼ်ၶျၢမ်းသႃႇၸဝ်ႈႁဝ်းၼၼ်ႉတီႈၶႃႈဢေႃႈ။
လွင်ႈမၼ်းၸမ်ႉ၊ၸဝ်ႈႁဝ်းပဵၼ်ၼမ်ႉဢွၵ်ႇႁူးဢၼ်လဵင်ႉဢသၢၵ်ႈၵူၼ်းၵႃႈမီးတင်းသဵင်ႈတင်းလူင်လႄႈ ၶႃႈၸဝ်ႈႁဝ်းၶဝ်လႆႈထူပ်းႁၼ်ဢၼ်လႅင်းၵွပ်ႈပိူဝ်ႈဢၼ်လႅင်းၸဝ်ႈႁဝ်းၼၼ်ႉတီႈၶႃႈဢေႃႈ။
ၶႅၼ်းတေႃႈၸဝ်ႈႁဝ်းသိုပ်ႇႁၵ်ႉၶဝ်ၸိူဝ်းဢၼ်ႁုၸၵ်းၸဝ်ႈႁဝ်းၼၼ်ႉ၊ဢိၵ်ႇတင်း သိုပ်ႇႁဵတ်းတၢင်းဢၼ်လီဢၼ်ငၢမ်းတီႈၶဝ်ၸိူဝ်းဢၼ်သိုဝ်ႈတေႃႇၼၼ်ႉသေၵမ်းတီႈၶႃႈ။
ၶႅၼ်းတေႃႈယႃႇပေႁႂ်ႈၶဝ်ၸိူဝ်းဢၼ်မႃႇၼႃႉၸႂ်သုင်ၼၼ်ႉတိုၵ်းတေႃးၶႃႈၸဝ်ႈသေၵမ်း။ ယႃႇပေႁႂ်ႈၵူၼ်းႁၢႆႉၵူၼ်းမိူၵ်ႈၸိူဝ်းၼၼ်ႉႁဵတ်းႁႂ်ႈၶႃႈၸဝ်ႈလႆႈလႅၼ်ႈပၢႆႈသေၵမ်းတီႈၶႃႈ။
ၶဝ်ၸိူဝ်းဢၼ်ႁဵတ်းတုၸရိူၵ်ႈၼၼ်ႉလႆႈလူမ်ႉပင်းတီႈၶႃႈယဝ်ႉ။ ၶဝ်လႆႈၶၢမ်ႇတၢင်းဢၼ်ၶျႃးလူမ်ႉလႄႈဢမ်ႇၶိုၼ်းၽုတ်းလုၵ်ႉလႆႈလႃးလႃးတီႈၶႃႈဢေႃႈ။
ယႃႇပေႁႂ်ႈမီးတၢင်းဢၼ်မႆႈၸႂ်ယၢပ်ႇၸႂ်လူၺ်ႈလွင်ႈၵူၼ်းႁၢႆႉၵူၼ်းမိူၵ်ႈလႄႈ ယႃႇပေသီႈၵေႉႁေႈတႃၶဝ်ၸိူဝ်းဢၼ်ႁဵတ်းႁၢႆႉႁဵတ်းမိူၵ်ႈၼၼ်ႉ။
လွင်ႈမၼ်းၸမ်ႉ၊ၶဝ်ၼၼ်ႉတၵ်းတေၸဵဝ်းႁၢႆၵႂႃႇမိူၼ်ယိူဝ်ႈယႃႈဢၼ်ႁႅင်ႈၵႂႃႇၼၼ်ႉလႄႈ မိူၼ်ပၢင်ႇယိူဝ်ႈဢၼ်ၶဵဝ်ဝႆႉၸိဝ်းငိဝ်းႁႅင်ႈၵႂႃႇႁဵဝ်ႇၵႂႃႇၼၼ်ႉဢေႃႈ။
ဢွၼ်ၵၼ်ယုမ်ႇယမ်ဢိင်ပိုင်ႈ ထႃႇဝရႃႉၽြႃး၊ လႄႈၵမ်ၵျၢင်ႉဢၼ်လီငၢမ်းယူႇတႃႉ။ ယူႇၼႂ်းမိူင်းဢၼ်မၼ်းၸဝ်ႈဝႆႉၵတိၼၼ်ႉလႄႈလႆႈယူႇလူင်ႉလီလွတ်ႈလီၼၼ်ႉတႃႉ။
ႁႃတၢင်းဢၼ်မူၼ်ႈပျေႃႇၼႂ်း ထႃႇဝရႃႉၽြႃး၊ တႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ မၼ်းၸဝ်ႈတၵ်းပၼ်တၢင်းဢၼ်ႁူဝ်ၸႂ်မႂ်းမီးဢလူဝ်ႇၼၼ်ႉပျေႉၸုမ်ႇဢေႃႈ။
ဢၢပ်ႈပၼ်သဵၼ်ႈတၢင်းဢၼ်မႂ်းၵႂႃႇၼၼ်ႉတီႈ ထႃႇဝရႃႉၽြႃး၊ တႃႉ။ ယုမ်ႇယမ်ဢိင်ပိုင်ႈမၼ်းၸဝ်ႈယူႇတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊မၼ်းၸဝ်ႈတၵ်းၸွႆႈထႅမ်မႃႉၸႃႉဢေႃႈ။
မၼ်းၸဝ်ႈတၵ်းႁႂ်ႈလွင်ႈတၢင်းဢၼ်မႂ်းသိုဝ်ႈတေႃႇၼၼ်ႉ၊ ႁိူဝ်ႈလႅင်းမိူၼ်ၸိူဝ်ႉၼင်ႇသၢႆလႅတ်ႇ ၵၢင်ဝၼ်းတဵင်ႈၼၼ်ႉဢေႃႈ။
ယူႇတဵတ်ႇတဵတ်ႇယဵၼ်ယဵၼ်လႄႈပႂ်ႉထႃႈတၢင်းဢၼ် ထႃႇဝရႃႉၽြႃး၊ သၢင်ႈႁဵတ်းၼၼ်ႉတႃႉ။ ယႃႇပေႁႂ်ႈႁူဝ်ၸႂ်သူမႆႈၸႂ်ယၢပ်ႇၸႂ် လူၺ်ႈလွင်ႈၵေႃႉဢၼ်လႆႈလီလႆႈပဵၼ်၊ ဢိၵ်ႇတင်းလူၺ်ႈလွင်ႈ ၶဝ်ၸိူဝ်းဢၼ်ၶိုၼ်ႈယႂ်ႇမႂ်ႇသုင်ၵွပ်ႈပိူဝ်ႈတၢင်းၵျၢမ်ႇတၢင်းပွင်ဢၼ်ဢမ်ႇတြႃးၼၼ်ႉ။
ၶျုၵ်ႈၵၼ်ႈတၢင်းဢၼ်ၸႂ်မႆႈၶႂ်ႈၸႃႉဢိၵ်ႇတင်းတၢင်းဢၼ်တေႃးသႃႉဢွၵ်ႇၼၼ်ႉတႃႉ။ မၼ်းၸၢင်ႈဢွၼ်သူင်ႇႁႂ်ႈထူပ်းၽေးတုၵ်ႉၶႃႉၵူၺ်းဢေႃႈ။
ၶဝ်ၸိူဝ်းဢၼ်ယုမ်ႇယမ်ဢိင်ပိုင်ႈ ထႃႇဝရႃႉၽြႃး၊ ၼၼ်ႉတေလႆႈဢုပ်ႉပိူင်ႇမိူင်း ဢၼ်မၼ်းၸဝ်ႈဝႆႉၵတိၼၼ်ႉလႄႈၶဝ်ၸိူဝ်းဢၼ်ႁၢႆႉမိူၵ်ႈၸမ်ႉ၊တေလႆႈၶၢမ်ႇတၢင်းဢၼ်ႁေႃႈဢွၵ်ႇပႅတ်ႈဢေႃႈ။
ၵေႃႉဢၼ်ႁၢႆႉမိူၵ်ႈၼၼ်ႉတၵ်းၸဵဝ်းႁၢႆၵႂႃႇလႄႈ မႂ်းသွၵ်ႈႁႃၶဝ်ၵႃႈႁိုဝ်သေၵေႃႈတေဢမ်ႇထူပ်းဢမ်ႇႁၼ်။
ၶဝ်ၸိူဝ်းဢၼ်ႁူဝ်ၸႂ်ၶျႃးတႅမ်ႇၼၼ်ႉတေလႆႈ ဢုပ်ႉပိူင်ႇမိူင်းဢၼ်မၼ်းၸဝ်ႈဝႆႉၵတိ တီႈၶဝ်ၼၼ်ႉလႄႈ မူၼ်ႈပျေႃႇလူၺ်ႈတၢင်းဢၼ်လိူင်ႇၸႂ်တင်းတၢင်းဢၼ်ၼိမ်ဢၼ်လီၼၼ်ႉဢေႃႈ။
ၵေႃႉဢၼ်ႁၢႆႉမိူၵ်ႈၼၼ်ႉၵျၢမ်ႇပွင်ၶတ်းၵၼ်တင်းၵူၼ်းဢၼ်သိုဝ်ႈတေႃႇလႄႈ ၵတ်းၶဵဝ်ႈၵတ်းၽၼ်းတေႃႇမၼ်းယူႇဢေႃႈ။
ၵူၺ်းၵႃႈ၊ ထႃႇဝရႃႉၽြႃး၊ ႁုႁၼ်လွင်ႈဢၼ်ၶဝ်တေလႆႈၶၢမ်ႇတၢင်းဢၼ်ၸဵဝ်းယႃႉၽဵဝ်ႈပႅတ်ႈၼၼ်ႉလႄႈ မၼ်းၸဝ်ႈယုမ်ႉၶူဝ်တီႈၶဝ်ၼၼ်ႉယူႇဢေႃႈ။
ၵေႃႉဢၼ်ႁၢႆႉမိူၵ်ႈၼၼ်ႉၸၢင်ႈထွတ်ႇလၢပ်ႇသေလႄႈဝူတ်ႈၵၢင်ၶဝ်၊ ႁႂ်ႈလႆႈဢဝ်ၶဝ်ၸိူဝ်းဢၼ်ယၢၵ်ႈၽၢၼ်ၸုတ်ႈလုတ်ႈယူႇၼၼ်ႉတၢႆ ဢိၵ်ႇတင်းႁႂ်ႈလႆႈႁႅမ်ၶဝ်ၸိူဝ်းဢၼ်ႁူဝ်ၸႂ်သိုဝ်ႈယူဝ်းၼၼ်ႉတၢႆဢေႃႈ။
ၼႂ်းဝႃႈၼၼ်သေၵေႃႈ၊ၶဝ်တေလႆႈတၢႆလူၺ်ႈ လၢပ်ႇၶဝ်လႄႈၵၢင်ႇၶဝ်ၵေႃႈတေလႆႈ ၶၢမ်ႇတၢင်းဢၼ်ႁၵ်းပႅတ်ႈဢေႃႈ။
ဢုၵ်ႉၸႃႇဢၼ်ၵူၼ်းသိုဝ်ႈတေႃႇပိူင်ႇဢိတ်းဢွၼ်ႇၼိုင်ႈၼၼ်ႉ၊ယဵင်ႈၶႅၼ်းမီးၵႃႈၶၼ်ယႂ်ႇၼႃႇသေ ဢုၵ်ႉၸႃႇၸေးၸိမ်ႇဢၼ်ၵူၼ်းႁၢႆႉမိူၵ်ႈမီးၼမ်ၼႃႇၼၼ်ႉလူးၵွၼ်ႇဢေႃႈ။
လွင်ႈမၼ်းၸမ်ႉ၊ ထႃႇဝရႃႉၽြႃး၊ တၵ်းၼုၵ်ႈဢဝ်ဢဵၼ်ႁႅင်း၊ၵေႃႉဢၼ်ႁၢႆႉမိူၵ်ႈၼၼ်ႉလႄႈ၊ ၵႅတ်ႇၶႄႁႄႉၵင်ႈ၊ၶဝ်ၸိူဝ်းဢၼ်သိုဝ်ႈတေႃႇၼၼ်ႉဢေႃႈ။
ထႃႇဝရႃႉၽြႃး၊ ပႂ်ႉလူလုမ်းလႃးၶဝ်ၸိူဝ်းဢၼ်ထွမ်ႇဢဝ်မၼ်းၸဝ်ႈၼၼ်ႉလႄႈ ဢမူၺ်ႇဢုၵ်ႉၸႃႇၶဝ်ၼၼ်ႉတၵ်းတႄႇယူႇ သေႇသေႇဢေႃႈ။
ၼႂ်းၶိင်ႇၵႃႇလႃႉဢၼ်ႁၢႆႉယုတ်ႈၼၼ်ႉၶဝ်တေဢမ်ႇလႆႈၶၢမ်ႇၽေးတုၵ်ႉၶႃႉလႄႈ ၼႂ်းၶိင်ႇၵႃႇလႃႉဢၼ်ၶဝ်ႈၵႃႈမၢၵ်ႇပႅင်းၼၼ်ႉၶဝ်တေလႆႈၵိၼ်ဢိမ်ႇၵိၼ်တဵမ်ဢေႃႈ။
ၵေႃႉဢၼ်ႁၢႆႉမိူၵ်ႈၼၼ်ႉတေလႆႈတၢႆလႄႈ ရၢၼ်ႇသူႇ ထႃႇဝရႃႉၽြႃး၊ တင်းလၢႆ၊တေႁၢႆၵႂႃႇ မိူၼ်ၸိူဝ်ႉၼင်ႇမွၵ်ႇယႃႈထိူၼ်ႇၼၼ်ႉသေယဝ်ႉ၊ ၶဝ်တေႁၢႆၵႂႃႇပိဝ်ၵႂႃႇမိူၼ်ၸိူဝ်ႉၼင်ႇ ၵႂၼ်းၽႆးၼၼ်ႉဢေႃႈ။
ၵေႃႉဢၼ်ႁၢႆႉမိူၵ်ႈၼၼ်ႉမၼ်းၸၢင်ႈၵူႈဢဝ်ယိမ်ဢဝ်လႄႈဢမ်ႇတွၼ်ႉၶိုၼ်းယေႃႇၶိုၼ်းတႅၼ်းသေပွၵ်ႈ။ ၵေႃႉဢၼ်သိုဝ်ႈတေႃႇၸမ်ႉ၊မီးၸႂ်ၸေႇတၼႃႇလႄႈၸၢင်ႈပၼ်ဢေႃႈ။
ၶဝ်ၸိူဝ်းဢၼ်လႆႈၶၢမ်ႇဢဝ်မၢင်ႇၵလႃႇတီႈ ထႃႇဝရႃႉၽြႃး၊ ၼၼ်ႉ၊ တေဢွၼ်ၵၼ်လႆႈဢုပ်ႉပိူင်ႇမိူင်းဢၼ်မၼ်းၸဝ်ႈဝႆႉၵတိၼၼ်ႉလႄႈ၊ ၶဝ်ၸိူဝ်းဢၼ်မၼ်းၸဝ်ႈၵိၼ်ႇဝႃႈၼၼ်ႉၸမ်ႉ၊တေလႆႈၶၢမ်ႇတၢင်းဢၼ်ႁေႃႈဢွၵ်ႇပႅတ်ႈဢေႃႈ။
ထႃႇဝရႃႉၽြႃး၊ ဢွၼ်သူင်ႇၼႄပၼ်သဵၼ်ႈတၢင်းဢၼ်ၵူၼ်းထုၵ်ႇလီၵႂႃႇလီပႆၼၼ်ႉလႄႈ ႁႄႉၵင်ႈႁႄႉၶႅၼ်ပၼ်ယၢင်ႈတိၼ်ၶဝ်ၸိူဝ်းဢၼ်ထုၵ်ႇၸႂ်ၵျိူၵ်ႈၸႂ်မၼ်းၸဝ်ႈၼၼ်ႉဢေႃႈ။
ၶဝ်ၼၼ်ႉပိၵ်ႉသမ်ႉလူမ်ႉသေၵေႃႈ ဢမ်ႇထိုင်တီႈဢူပ်ႇပူပ်ႇ ၵွပ်ႈပိူဝ်ႈၸဝ်ႈ ထႃႇဝရႃႉၽြႃး၊ ယိပ်းၵမ်မိုဝ်းၶဝ်ယူႇဢေႃႈ။
မိူဝ်ႈလဵဝ်ၼႆႉၵဝ်ပဵၼ်ၵူၼ်းထဝ်ႈယဝ်ႉ၊ၵဝ်ယူႇမႃးပီမိူင်းႁိုင်ၼႃႇထၼ်ႇၼႆႉယဝ်ႉသေၵေႃႈ၊ ၵဝ်ဢမ်ႇတွၼ်ႉလႆႈႁၼ်ၵူၼ်းဢၼ်သိုဝ်ႈတေႃႇလႆႈၶၢမ်ႇတၢင်းဢၼ်ၸုၼ်ႉပႅတ်ႈလႄႈ လုၵ်ႈမၼ်းလၢၼ်မၼ်းထၢၼ်ႈပေႃးလႆႈၶေႃၵိၼ်ယွၼ်းၵိၼ်ၼၼ်ႉသေပွၵ်ႈ။
ၵဝ်ၵူၺ်းလႆႈႁၼ်မၼ်းၸၢင်ႈမီးၸႂ်ဢၼ်ဢဵတ်းလူလႄႈပၼ်ပိူၼ်ႈလၢႆလၢႆ၊ ဢိၵ်ႇတင်းၵူႈပၼ်ယိမ်ပၼ်ပိူၼ်ႈယူႇတင်းဝၼ်းတင်းဝၼ်းဢေႃႈ။ လုၵ်ႈလၢၼ်မၼ်းၵေႃႈလႆႈၶၢမ်ႇဢဝ် တၢင်းလီမၢင်ႇၵလႃႇဢေႃႈ။
ပႄႇပႅတ်ႈတုၸရိူၵ်ႈလႄႈႁဵတ်းသုၸရိူၵ်ႈတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊လုၵ်ႈလၢၼ်ၸိူဝ်ႉၶိူဝ်းမႂ်းတင်းလၢႆတေလႆႈယူႇ ၼႂ်းမိူင်းဢၼ်မၼ်းၸဝ်ႈဝႆႉၵတိၼၼ်ႉ သေႇသေႇဢေႃႈ။
ထႃႇဝရႃႉၽြႃး၊ ထုၵ်ႇၸႂ်ၵျိူၵ်ႈၸႂ်လွင်ႈတၢင်းဢၼ်ၸီႇယၢင်ႇၸွမ်းၼင်ႇတြႃးၼၼ်ႉလႄႈ၊ ဢမ်ႇၸုၼ်ႉဢမ်ႇပႅတ်ႈၵူၼ်းမၼ်းၸဝ်ႈၸိူဝ်းဢၼ်မီးသဵတ်ႈၸႃႇၼၼ်ႉ၊ မၼ်းၸဝ်ႈႁႄႉၶႅၼ်ပၼ်ၶဝ်ယူႇတႃႇသေႇဢမ်ႇထၢတ်ႇဢေႃႈ။ လုၵ်ႈလၢၼ်ၸိူဝ်ႉၶိူဝ်းၵေႃႉဢၼ်ႁၢႆႉမိူၵ်ႈၼၼ်ႉၸမ်ႉ၊တေလႆႈၶၢမ်ႇတၢင်းဢၼ်ႁေႃႈဢွၵ်ႇပႅတ်ႈဢေႃႈ။
ၵေႃႉဢၼ်သိုဝ်ႈတေႃႇၼၼ်ႉတေလႆႈဢုပ်ႉပိူင်ႇမိူင်းဢၼ်မၼ်းၸဝ်ႈဝႆႉၵတိၼၼ်ႉလႄႈ တေလႆႈယူႇလႆႈသဝ်းၼႂ်းမိူင်းၼၼ်ႉတႃႇသေႇဢမ်ႇထၢတ်ႇဢေႃႈ။
ၵႂၢမ်းၵေႃႉဢၼ်သိုဝ်ႈတေႃႇၼၼ်ႉ ပဵၼ်ၵႂၢမ်းပိင်ႇၺႃႇလႄႈမၼ်းမီးၸႂ်မႅတ်ႈတႃႇဢၼ်ၽဵင်ႇပဵင်းၵၼ်တႃႇသေႇဢေႃႈ။
မၼ်းဢဝ်တြႃးၽြႃးပဵၼ်ၸဝ်ႈၼၼ်ႉသိမ်းဝႆႉၵႃႈၼႂ်းႁူဝ်ၸႂ်မၼ်းလႄႈ မၼ်းဢမ်ႇတွၼ်ႉႁႂ်ႈၽၢတ်ႇႁႂ်ႈယၢၼ်ၵၼ် တင်းတြႃးၸဝ်ႈၼၼ်ႉ။
ၵူၼ်းႁၢႆႉၵူၼ်းမိူၵ်ႈၸမ်ႉ၊ၸၢင်ႈပႂ်ႉလွမ်ၵေႃႉဢၼ်သိုဝ်ႈတေႃႇၼၼ်ႉလႄႈ ၵျၢမ်ႇႁႃႁႂ်ႈလႆႈဢဝ်မၼ်းတၢႆဢေႃႈ။
ၼႂ်းဝႃႈၼၼ်သေၵေႃႈ၊ ထႃႇဝရႃႉၽြႃး၊ ဢမ်ႇၸုၼ်ႉမၼ်းပႅတ်ႈဝႆႉ ၵႃႈၼႂ်းမိုဝ်း ရၢၼ်ႇသူႇမၼ်းၼၼ်ႉ၊ မၼ်းၸဝ်ႈတၵ်းတေဢမ်ႇၸီႇယၢင်ႇ ဢပျတ်ႈမၼ်းၼႂ်းမိူဝ်ႈဢၼ်မၼ်းလႆႈၶၢမ်ႇတၢင်းၸႅတ်ႈတူၺ်းၼၼ်ႉ။
မုင်ႈထႃႈမွင်းထႃႈ ထႃႇဝရႃႉၽြႃး၊ လႄႈပႂ်ႉၵမ်ပႂ်ႉၵျၢင်ႉပိင်းၺၢပ်ႈမၼ်းၸဝ်ႈတႃႉ။ မၼ်းၸဝ်ႈတၵ်းယုၵ်ႉယွင်ႈမႂ်းႁႂ်ႈမႂ်းလႆႈဢုပ်ႉပိူင်ႇမိူင်းဢၼ်မၼ်းၸဝ်ႈဝႆႉၵတိၼၼ်ႉလႄႈ မႂ်းသမ်ႉတၵ်းလႆႈႁၼ်ၶဝ်ၸိူဝ်းဢၼ်ႁၢႆႉမိူၵ်ႈ လႆႈဢွၵ်ႇပၢႆႈၼၼ်ႉဢေႃႈ။
မိူဝ်ႈဢွၼ်တၢင်းၼၼ်ႉၵဝ်လႆႈႁုၸၵ်းၵူၼ်းႁၢႆႉၵူၼ်းမိူၵ်ႈၵေႃႉၼိုင်ႈ၊ ဢၼ်ႁၢဝ်ႉၵျၢမ်းၼႃႇလူင်လၢင်ၼၼ်ႉဢေႃႈ။ မၼ်းၼၼ်ႉႁဵတ်းႁႂ်ႈတူဝ်ၸဝ်ႈၵဝ်ႇ၊ ၶိုၼ်ႈယႂ်ႇမႂ်ႇသုင်မႃးမိူၼ်ၸိူဝ်ႉၼင်ႇတူၼ်ႈ ဢႃႇရိတ်ႉ၊ လွႆ လေႇပၼုၼ်ႇ၊ ၼၼ်ႉဢေႃႈ။
လိုၼ်းၼၼ်ႉၵဝ်သမ်ႉၵၢႆပူၼ်ႉၵႂႃႇလႄႈ၊မၼ်းၵေႃႈဢမ်ႇမီးယဝ်ႉ။ ၵဝ်ႁႃမၼ်းသေၵေႃႈ၊ဢမ်ႇထူပ်းဢမ်ႇႁၼ်မၼ်းယဝ်ႉဢေႃႈ။
ၶႆႈၸႂ်တူၺ်းၵူၼ်းၸႂ်လီၸႂ်ဝၢၼ်ၼၼ်ႉလူး၊လူတူၺ်းၵူၼ်းဢၼ်သိုဝ်ႈတေႃႇၼၼ်ႉလူး၊ ၵေႃႉဢၼ်ႁူဝ်ၸႂ်ၼိမ်သိမ်ႇၼၼ်ႉတၵ်းမီးလုၵ်ႈလၢၼ်ၸိူဝ်ႉၶိူဝ်းယႂ်ႇဢေႃႈ။
ၶဝ်ၸိူဝ်းဢၼ်မီးဢပျတ်ႈၼၼ်ႉၸမ်ႉ၊လႆႈႁွတ်ႈထိုင်တၢင်းဢၼ်လုလႅဝ်လုမ်းလုမ်းလႄႈ လုၵ်ႈလၢၼ်ၸိူဝ်ႉၶိူဝ်းမၼ်းလႆႈၶၢမ်ႇတၢင်းဢၼ်ပႄႇၽဵဝ်ႈပႅတ်ႈဢေႃႈ။
ထႃႇဝရႃႉၽြႃး၊ ၵႄႇသႄႇၶျွတ်ႈဢဝ်ၵူၼ်းဢၼ်သိုဝ်ႈတေႃႇတင်းလၢႆလႄႈ ႁႄႉၶႅၼ်ပၼ်ၼႂ်းမိူဝ်ႈဢၼ်ၶဝ်ထူပ်းၽေးတုၵ်ႉၶႃႉၼၼ်ႉဢေႃႈ။
မၼ်းၸဝ်ႈၸွႆႈထႅမ်ၶဝ်၊ထုတ်ႇၼုၵ်ႈဢဝ်ၶဝ်လႄႈၵႄႇသႄႇၶျွတ်ႈဢဝ်ၶဝ်လွတ်ႈသေ ၵႃႈၼႂ်းမိုဝ်းၵေႃႉဢၼ်ႁၢႆႉမိူၵ်ႈ၊ၵွပ်ႈပိူဝ်ႈၶဝ်လႆႈၵႂႃႇ သွၼ်ႈပိုင်ႈၵႃႈတီႈမၼ်းၸဝ်ႈၼၼ်ႉဢေႃႈ။
ထႃႇဝရႃႉၽြႃး၊ တီႈၶႃႈ။ ၼႂ်းတၢင်းဢၼ်တေႃးသႃႉၸဝ်ႈႁဝ်းဢွၵ်ႇၼၼ်ႉ၊ ၶႅၼ်းတေႃႈယႃႇပေၸီႇယၢင်ႇပၼ်တၢမ်ႇ ၶႃႈၸဝ်ႈသေၵမ်းတီႈၶႃႈ။
ပိုၼ်ၵၢင်ႇၸဝ်ႈႁဝ်းသဵပ်ႇၸပ်းၶႃႈၸဝ်ႈယူႇလႄႈ မိုဝ်းၸဝ်ႈႁဝ်းတဵၵ်းၶႃႈၸဝ်ႈၼၵ်းၼႃႇယူႇတီႈၶႃႈဢေႃႈ။
ၵွပ်ႈပိူဝ်ႈတၢင်းဢၼ်ၸႂ်မႆႈၶႂ်ႈၸႃႉၸဝ်ႈႁဝ်းဢွၵ်ႇၼၼ်ႉလႄႈ ၶႃႈၸဝ်ႈလႆႈၶၢမ်ႇတၢင်းဢၼ်ၸဵပ်းသႅပ်ႇၼႃႇလူင်လၢင်တီႈၶႃႈဢေႃႈ။ ၶႃႈၸဝ်ႈပဵၼ်တၢင်းၶႆႈတၢင်းပဵၼ်တင်းတူဝ်တင်းၶိင်းယူႇ၊ၵွပ်ႈပိူဝ်ႈဢပျတ်ႈၶႃႈၸဝ်ႈၼၼ်ႉတီႈၶႃႈဢေႃႈ။
ၶႃႈၸဝ်ႈလႆႈတူၵ်းၸူမ်ယူႇၵႃႈၼႂ်းတုၸရိူၵ်ႈဢပျတ်ႈၶႃႈၸဝ်ႈလႄႈ ပဵၼ်ဝူတ်ႈပဵၼ်တၢမ်ႇဢၼ်ၼၵ်းၼႃႇထၢၼ်ႈပေႃးဢမ်ႇႁၢပ်ႇပႄႉလႆႈတီႈၶႃႈဢေႃႈ။
ၵွပ်ႈပိူဝ်ႈတၢင်းဢၼ်ၶႃႈၸဝ်ႈႁဵတ်းမိူၵ်ႈမႃးၼၼ်ႉ၊ တုမ်ႇၸဵပ်းၶႃႈၸဝ်ႈတင်းလၢႆၼဝ်ႈၵႂႃႇလႄႈမဵၼ်တူႇတီႈၶႃႈဢေႃႈ။
ၶႃႈၸဝ်ႈလႆႈၶၢမ်ႇၵူမ်ႈၵွမ်းၼွမ်းၶၢမ်ႇယူႇ၊လႆႈၶၢမ်ႇတၢင်းဢၼ်တဵၵ်းငႅၼ်းယူႇလႄႈ လႆႈမီးတၢင်းဢၼ်ၶၢင်းၶီၶၢင်းၽၢၼ်ယူႇတင်းဝၼ်းတင်းဝၼ်းတီႈၶႃႈဢေႃႈ။
ၶႃႈၸဝ်ႈလႆႈၶၢမ်ႇတၢင်းဢၼ်ၼၢဝ်လႄႈ ၼိူဝ်ႉမႆႈႁွၼ်ႉၼႃႇထၢၼ်ႈပေႃးၸမ်တၵ်းတၢႆၵႂႃႇတီႈၶႃႈဢေႃႈ။
ၶႃႈၸဝ်ႈလၢင်ႈၵႂႃႇၶႅင်ၵႂႃႇလႄႈဢူၼ်ႈၵႂႃႇဢွၼ်ႇၵႂႃႇတီႈၶႃႈဢေႃႈ။ ႁူဝ်ၸႂ်ၶႃႈၸဝ်ႈႁွတ်ႈတုၵ်ႉၶႃႉၶၢၼ်ၸႂ်လႄႈ၊ၶႃႈၸဝ်ႈၸဵပ်းၸႂ်လႄႈ ၶၢင်းၶီၶၢင်းၽၢၼ်ယူႇတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းႁုဢလူဝ်ႇၶႃႈၸဝ်ႈမီးၸိူဝ်ႉၼင်ႇႁိုဝ်ၼၼ်ႉယူႇလႄႈ ၸဝ်ႈႁဝ်းငိၼ်းသဵင်ဢၼ်ၶႃႈၸဝ်ႈပွင်ႉၶၢင်းယူႇၼၼ်ႉတီႈၶႃႈဢေႃႈ။
ၶႃႈၸဝ်ႈပဵၼ်ႁူဝ်ၸႂ်သၼ်ႇလႄႈႁႅင်းၶႃႈၸဝ်ႈၵေႃႈသဵင်ႈၵႂႃႇတီႈၶႃႈယဝ်ႉ။ ဢၼ်လႅင်းမၢၵ်ႇတႃၶႃႈၸဝ်ႈၵေႃႈလပ်ႉႁၢႆၵႂႃႇတီႈၶႃႈယဝ်ႉ။
တႆးၵေႃႉတႆးသႄႈၶႃႈၸဝ်ႈဢိၵ်ႇတင်းၶဝ်ၸိူဝ်းဢၼ်ႁၵ်ႉၶႃႈၸဝ်ႈၼၼ်ႉ၊ ဢမ်ႇသုတ်ႉဢမ်ႇမႃးၸမ်ႁိမ်းၶႃႈၸဝ်ႈ၊ ၵွပ်ႈပိူဝ်ႈတုမ်ႇၸဵပ်းတုမ်ႇယဵၼ်းၶႃႈၸဝ်ႈၸိူဝ်းၼၼ်ႉတီႈၶႃႈယဝ်ႉ၊ ၵူၼ်းႁိူၼ်းၵူၼ်းယေးၶႃႈၸဝ်ႈ ယင်းပႄႇပႅတ်ႈၶႃႈၸဝ်ႈတီႈၶႃႈယဝ်ႉ။
ၶဝ်ၸိူဝ်းဢၼ်ၶႂ်ႈဢဝ်ၶႃႈၸဝ်ႈတၢႆၼၼ်ႉဢွၼ်ၵၼ်ႁၢင်ႈႁႅဝ်ႉၶဝ်ၶိုမ်းၶဝ်ဝႆႉပုၼ်ႈၶႃႈၸဝ်ႈလႄႈ ၶဝ်ၸိူဝ်းဢၼ်ၶႂ်ႈႁဵတ်းမိူၵ်ႈသႂ်ႇၵႃႈတီႈၶႃႈၸဝ်ႈၼၼ်ႉၵေႃႈ လွၵ်ႇငိုတ်ႈႁႂ်ႈလႆႈယႃႉၵဝ်းၶႃႈၸဝ်ႈသေယဝ်ႉ၊ ၶဝ်ၵျၢမ်ႇပွင်ၶတ်းၵၼ်တင်းၶႃႈၸဝ်ႈယူႇတင်းဝၼ်းတင်းဝၼ်းတီႈၶႃႈဢေႃႈ။
ၶႃႈၸဝ်ႈၼႆႉပဵၼ်ၸိူဝ်ႉၼင်ႇၵူၼ်းႁူၼူၵ်ႇလႄႈဢမ်ႇလႆႈငိၼ်းၵႃႈသင်၊ ပဵၼ်ၸိူဝ်ႉၼင်ႇၵူၼ်းဢႃႉလႄႈဢမ်ႇၸၢင်ႈလၢတ်ႈၵႃႈသင်လႆႈတီႈၶႃႈဢေႃႈ။
ၸႂ်တႄႉ။ ၶႃႈၸဝ်ႈလႆႈပဵၼ်ၸိူဝ်ႉၼင်ႇၵေႃႉဢၼ်ဢမ်ႇၶိုၼ်းတွပ်ႇၶိုၼ်းလၢတ်ႈၼၼ်ႉ၊ ၵွပ်ႈပိူဝ်ႈဢၼ်မၼ်းဢမ်ႇလႆႈငိၼ်းၵႃႈသင်ၼၼ်ႉတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈၸမ်ႉ၊ယုမ်ႇယမ်ဢိင်ပိုင်ႈၸဝ်ႈႁဝ်းယူႇလႄႈၸဝ်ႈၽြႃးပဵၼ်ၸဝ်ႈၵဝ်ၶႃႈတီႈၶႃႈ။ ၸဝ်ႈႁဝ်းတၵ်းတေ၊ၶိုၼ်းဢိူဝ်တီႈၶႃႈၸဝ်ႈတီႈၶႃႈဢေႃႈ။
လွင်ႈမၼ်းၸမ်ႉ၊ၶႃႈၸဝ်ႈႁဵတ်းပထၼႃႇတၢင်းဢၼ်သူးတွင်းလႄႈဝႃႈ၊ “ၶႅၼ်းတေႃႈယႃႇပေႁႂ်ႈရၢၼ်ႇသူႇၶႃႈၸဝ်ႈတင်းလၢႆလႆႈၸူမ်းလႆႈသိူဝ်း၊ ၵႃႈၼိူဝ်တၢင်းဢၼ်ၶႃႈၸဝ်ႈလႆႈၸႂ်လုႁႅင်းဢူၼ်ႈၼၼ်ႉ၊ဢိၵ်ႇတင်း ၶႅၼ်းတေႃႈယႃႇပေႁႂ်ႈၶဝ်လႆႈဢုပ်ႇယွင်ႈတူဝ်ၶဝ် ၵွပ်ႈပိူဝ်ႈၶႃႈၸဝ်ႈလႆႈပြၢတ်ႈၵႂႃႇၼၼ်ႉသေၵမ်းလူၺ်ႈ၊” ဝႃႈၸိူဝ်ႉၼင်ႇၼႆတီႈၶႃႈယဝ်ႉ။
ၶႃႈၸဝ်ႈၸမ်တၵ်းတေလူမ်ႉလႄႈ၊ၶႃႈၸဝ်ႈၶူပ်းၶိုၼ်ႈၼႃႇလူင်လၢင်တီႈၶႃႈဢေႃႈ။
ၶႃႈၸဝ်ႈတၵ်းၽုၺ်ႇဢွၵ်ႇၼႄပျႃးဢပျတ်ႈၶႃႈၸဝ်ႈတင်းလၢႆတီႈၶႃႈယဝ်ႉ။ ဢပျတ်ႈၸိူဝ်းၼၼ်ႉႁဵတ်းႁႂ်ႈၶႃႈၸဝ်ႈလႆႈမႆႈၸႂ်ၶီၸႂ်တီႈၶႃႈဢေႃႈ။
ရၢၼ်ႇသူႇၶႃႈၸဝ်ႈၸိူဝ်းၼၼ်ႉယူႇလီပီးမၼ်းလႄႈႁႅင်းယႂ်ႇၼႃႇတီႈၶႃႈဢေႃႈ။ လွင်ႈတၢင်းယင်းဢမ်ႇမီးလႄႈမီးၵူၼ်းဢၼ်ၸင်းၶႃႈၸဝ်ႈၼၼ်ႉၼမ်ၼႃႇတီႈၶႃႈဢေႃႈ။
ၶဝ်ၸိူဝ်းဢၼ်ႁဵတ်းဢၼ်ဢမ်ႇလီတွပ်ႇပုၼ်ႈဢၼ်လီၼၼ်ႉ၊ပဵၼ်ၶဝ်ၸိူဝ်းဢၼ်ၶတ်းၵၼ်တင်းၶႃႈၸဝ်ႈယူႇ၊ ၵွပ်ႈပိူဝ်ႈဢၼ်ၶႃႈၸဝ်ႈၵျူဝ်းၸႃးႁဵတ်းဢၼ်လီၼၼ်ႉတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈယႃႇပေၸုၼ်ႉပႅတ်ႈၶႃႈၸဝ်ႈ သေၵမ်းတီႈၶႃႈ။ ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ ယႃႇပေယူႇၵႆၵၼ်တင်းၶႃႈၸဝ်ႈသေၵမ်းတီႈၶႃႈ။
ၸဝ်ႈၽြႃးဢၼ်ၵႄႇၶျွတ်ႈဢဝ်ၵဝ်ၶႃႈတီႈၶႃႈ၊ ၶႅၼ်းတေႃႈႁိပ်ႈၼႅတ်ႈႁႂ်ႈလႆႈၸွႆႈထႅမ်မႃႉၸႃႉၶႃႈၸဝ်ႈသေၵမ်းတီႈၶႃႈ။
ၵဝ်လၢတ်ႈလႄႈဝႃႈ၊ “ၵဝ်တၵ်းတေႁဵတ်းသတိလူၺ်ႈတၢင်းၵမ်တၢင်းၵျၢင်ႉၵဝ်၊ ဢိၵ်ႇတင်းတၵ်းတေပႂ်ႉထိင်းၼင်ႇႁိုဝ်လိၼ်ႉၵဝ်တေဢမ်ႇႁႂ်ႈၵဝ်ႁဵတ်းဢပျတ်ႈလႄႈ ၵဝ်တၵ်းတေဢမ်ႇတၵ်းသဵင် ၼႂ်းမိူဝ်ႈဢၼ် ၵူၼ်းႁၢႆႉၵူၼ်းမိူၵ်ႈၶဝ်ယူႇၸမ်ၼၼ်ႉ၊” ဝႃႈၼင်ႇၼႆဢေႃႈ။
ၵဝ်ယင်းဢမ်ႇတၵ်ႉသဵင်တၵ်ႉပၢၵ်ႇလႄႈယူႇတဵတ်ႇတဵတ်ႇယူႇဢေႃႈ။ တေႃႈၵႃႈလွင်ႈတၢင်းဢၼ်လီဢၼ်ငၢမ်းၼၼ်ႉၵဝ်ယင်းယူႇတဵတ်ႇတဵတ်ႇယူႇဢေႃႈ။ ၼႂ်းဝႃႈၼၼ်သေၵေႃႈတုၵ်ႉၶႃႉဢၼ်ၶမ်ၸႂ်ၶမ်ၶေႃးၵဝ်ၼၼ်ႉ ယဵင်ႈၶႅၼ်းတူဝ်းတွၼ်းမႃးယူႇၵူၺ်းလႄႈ။
ႁူဝ်ၸႂ်ၵဝ်မႆႈႁွၼ်ႉမႃးယူႇတိၵ်းတိၵ်းဢေႃႈ။ မိူဝ်ႈၵဝ်ၶႆႈၸႂ်ဝူၼ်ႉၸႂ်ၼၼ်ႉ၊ၽႆးလုၵ်ႉလႄႈမႆႈယူႇတေႃႇထိုင်ႁွတ်ႈၵဝ်လၢတ်ႈလႄႈဝႃႈ။
“ ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈႁႂ်ႈၶႃႈၸဝ်ႈႁုတီႈသုတ်းတီႈၵွႆၶႃႈၸဝ်ႈ၊ ဢိၵ်ႇတင်းလွင်ႈၸူဝ်ႈတႃႇဢသၢၵ်ႈၶႃႈၸဝ်ႈပဵၼ်ၸိူဝ်ႉၼင်ႇႁိုဝ်ၼၼ်ႉ၊ ႁႂ်ႈၶႃႈၸဝ်ႈႁုလွင်ႈတူဝ်ၸဝ်ႈၵဝ်ႇၸၢင်ႈတၢႆၼၼ်ႉသေၵမ်းတီႈၶႃႈ။
တူၺ်းလူး။ ၸဝ်ႈႁဝ်းမၵ်းၶၢၼ်းဝႆႉၸူဝ်ႈတႃႇဢသၢၵ်ႈၶႃႈၸဝ်ႈပွတ်း၊ မွၵ်ႈသွင်သၢမ်ၽႃႇမိုဝ်းၵူၺ်းလႄႈ၊ၸူဝ်ႈတႃႇဢသၢၵ်ႈၶႃႈၸဝ်ႈၼၼ်ႉ၊ ဢမ်ႇၸႂ်ႈၵႃႈသင်လႃးလႃး ၵႃႈတီႈၽၢႆႇၼႃႈၸဝ်ႈႁဝ်းတီႈၶႃႈဢေႃႈ။ ၸႂ်ႈတႄႉ။ ၵူၼ်းၸိုင်၊ဢမ်ႇယူႇႁိုင်သေၸူဝ်ႈလူမ်းဝုၵ်ႈၼိုင်ႈၼၼ်ႉတီႈၶႃႈဢေႃႈ။
ၵူၼ်းၸိုင်၊ၸၢင်ႈၶၢႆႉၵႂႃႇၸိူဝ်ႉၼင်ႇၵွင်ႉငဝ်းၵူၺ်းတီႈၶႃႈဢေႃႈ။ ၵႃႈဢၼ်မၼ်းႁဵတ်းမၼ်းသၢင်ႈၵေႃႈဢမ်ႇပွင်ႇလွင်ႈၵႃႈသင်လႃးလႃးလႄႈ ဢုၵ်ႉၸႃႇၸေးၸိမ်ႇဢၼ်မၼ်း သိမ်းဝႆႉၼၼ်ႉၵေႃႈ ယင်းဢမ်ႇႁုလွင်ႈဢၼ်ၽူႈလႂ်တၵ်းလႆႈၼၼ်ႉတီႈၶႃႈ။
ထႃႇဝရႃႉၽြႃး၊ တီႈၶႃႈ။ ပေႃးပဵၼ်ၸိူဝ်ႉၼင်ႇၼႆၸိုင်၊ၶႃႈၸဝ်ႈမီးတီႈမုင်ႈမွင်းၵႃႈသင်လူးၵွၼ်ႇတီႈၶႃႈ။ တၢင်းဢၼ်မုင်ႈထႃႈမွင်းထႃႈၶႃႈၸဝ်ႈၼၼ်ႉ၊မီးတီႈၸဝ်ႈႁဝ်းၵူၺ်းတီႈၶႃႈဢေႃႈ။
ၶႅၼ်းတေႃႈၵႄႇၶျွတ်ႈဢဝ်ၶႃႈၸဝ်ႈလွတ်ႈသေ ၵႃႈၼႂ်းဢပျတ်ႈၶႃႈၸဝ်ႈၵႃႈမီး ၼၼ်ႉသေၵမ်းတီႈၶႃႈ။ ယႃႇပေႁႂ်ႈၵူၼ်းမိူၵ်ႈၵူၼ်းလိူင်း၊လႆႈႁဵတ်းပျၢၵ်ႈႁဵတ်းၶူဝ်တီႈၶႃႈၸဝ်ႈသေၵမ်းတီႈၶႃႈ။
ၶႃႈၸဝ်ႈတၵ်းတေဢမ်ႇတၵ်ႉသဵင်လႄႈ ယူႇတဵတ်ႇတဵတ်ႇတီႈၶႃႈဢေႃႈ။ လွင်ႈမၼ်းၸမ်ႉ၊ၸဝ်ႈႁဝ်းပဵၼ်ၵေႃႉဢၼ် ႁဵတ်းႁႂ်ႈၶႃႈၸဝ်ႈလႆႈၶၢမ်ႇတုၵ်ႉၶႃႉ ၸိူဝ်ႉၼင်ႇၼႆတီႈၶႃႈဢေႃႈ။
ၶႅၼ်းတေႃႈယႃႇပေၸီႇယၢင်ႇပၼ်တၢမ်ႇၶႃႈၸဝ်ႈထႅင်ႈသေၵမ်းတီႈၶႃႈ။ ၶႃႈၸဝ်ႈၸမ်တၵ်းတၢႆၵႂႃႇၵွပ်ႈပိူဝ်ႈၸဝ်ႈႁဝ်းပေႃႉယႅၼ်ႉၶႃႈၸဝ်ႈၼၼ်ႉတီႈၶႃႈယဝ်ႉ။
မိူဝ်ႈဢၼ်ၸဝ်ႈႁဝ်းသင်ႇသွၼ်သုင်းမႃႉပၼ်တၢမ်ႇတီႈၵူၼ်းၵွပ်ႈပိူဝ်ႈဢပျတ်ႈမၼ်းၼၼ်ႉၸိုင်၊ ၸဝ်ႈႁဝ်းႁႂ်ႈလွင်ႈတၢင်းဢၼ်မၼ်းထုၵ်ႇၸႂ်ၵျိူၵ်ႈၸႂ်ၼၼ်ႉ၊ႁၢႆၵႂႃႇမိူၼ်ၸိူဝ်ႉၼင်ႇမူင်ႈၼင်ႇမႅင်း တီႈၶႃႈဢေႃႈ။ ၸႂ်ႈတႄႉ။ ဢမ်ႇယူႇႁိုင်သေၸူဝ်ႈထူၺ်ႈၸႂ်ၵမ်းဢွၼ်ႇၼိုင်ႈၼၼ်ႉတီႈၶႃႈဢေႃႈ။
ဢူဝ်း ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈ ထွမ်ႇငိၼ်းတၢင်းဢၼ်ၶႃႈၸဝ်ႈသူးတွင်း၊ႁဵတ်းပထၼႃႇၼႆႉသေလႄႈ၊ ဝၢႆႇႁူၸဝ်ႈႁဝ်းလႄႈထွမ်ႇငိၼ်းသဵင်ဢၼ်ၶႃႈၸဝ်ႈႁွင်ႉၵၢဝ်ႇၼႆႉသေၵမ်းတီႈၶႃႈ။ ၶႅၼ်းတေႃႈမႃးၸွႆႈထႅမ်မႃႉၸႃႉၶႃႈၸဝ်ႈ ၼႂ်းမိူဝ်ႈဢၼ်ၼမ်ႉတႃၶႃႈၸဝ်ႈတူၵ်းၼၼ်ႉသေၵမ်းတီႈၶႃႈ။ ၶႃႈၸဝ်ႈၵူၺ်းလႆႈပဵၼ်ၶႅၵ်ႇဢႃႇၵၼ်ႇတုယူႇၵႃႈတီႈၽၢႆႇၼႃႈၸဝ်ႈႁဝ်း၊ မိူၼ်ၸိူဝ်ႉၼင်ႇပူႇမွၼ်ႇၶႃႈၸဝ်ႈတင်းသဵင်ႈတင်းလူင်လႆႈပဵၼ်ၼၼ်ႉတီႈၶႃႈဢေႃႈ။
ၶႅၼ်းတေႃႈပွႆႇႁႂ်ႈၶႃႈၸဝ်ႈလႆႈယူႇၶေႃၶေႃ၊ ပုၼ်ႈလွင်ႈၼင်ႇႁိုဝ်ၶႃႈၸဝ်ႈတၵ်းတေသၢၵ်ႈသႃႇၶႅၼ်းၸႂ်မႃးဢိတ်းဢီႈ၊ ၼႂ်းၸူဝ်ႈဢၼ်ၶႃႈၸဝ်ႈဢမ်ႇပႆႇၶၢႆႉၵႂႃႇလႄႈ ႁၢႆလၢႆၵႂႃႇၼၼ်ႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ၵဝ်ၶႃႈပႃးတင်းၸႂ်ယိုၼ်းၸႂ်ယၢဝ်းမုင်ႈမွင်းပႂ်ႉထႃႈ တၢင်းဢၼ် ထႃႇဝရႃႉၽြႃး၊ ၸွႆႈထႅမ်မႃႉၸႃႉၵဝ်ၶႃႈ၊သေယဝ်ႉ၊ မၼ်းၸဝ်ႈႁေႈႁူထွမ်ႇဢဝ်လႄႈငိၼ်းသဵင်ဢၼ်ၵဝ်ႁွင်ႉၵၢဝ်ႇၼၼ်ႉတီႈၶႃႈဢေႃႈ။
မၼ်းၸဝ်ႈတိုတ်ႉဢဝ်ၵဝ်ဢွၵ်ႇသေၵႃႈၼႂ်းၶုမ်ၽေးဢုပၢတ်ႈဢိၵ်ႇတင်း ၵႃႈၼႂ်းၵူမ်ႇဢုင်ၶၢႆးၼၼ်ႉသေလႄႈ၊ဢဝ်တိၼ်ၵဝ်တၢင်ႇပၼ်ၵႃႈၼိူဝ်မၢၵ်ႇႁိၼ်မၢၵ်ႇၽႃ၊ ႁႂ်ႈယၢင်ႈတိၼ်ၵဝ်လႆႈတႄႇလီမၼ်ႈလီဢေႃႈ။
မၼ်းၸဝ်ႈသွၼ်ပၼ်တၢင်းဢၼ်ႁဵတ်းၵႂၢမ်းဢၼ်မႂ်ႇ ဢၼ်ဝႃႈတၢင်းဢၼ်ႁဵတ်းၵႂၢမ်းယွင်ႈယေႃးၽြႃးပဵၼ်ၸဝ်ႈၼၼ်ႉတီႈၵဝ်ဢေႃႈ။ ၵူၼ်းၼမ်ၼႃႇတၵ်းတေလႆႈႁုႁၼ်လႄႈဢွၼ်ႇၵၼ်ရူဝ်ႇသေႇၵူဝ်ယမ်သေယဝ်ႉ၊ ယုမ်ႇယမ်ဢိင်ပိုင်ႈ ထႃႇဝရႃႉၽြႃး၊ ဢေႃႈ။
ၶဝ်ၸိူဝ်းဢၼ်ယုမ်ႇယမ်ဢိင်ပိုင်ႈ ထႃႇဝရႃႉၽြႃး၊ ယူႇ၊ ယင်းဢမ်ႇဝႄႉၶဝ်ႈဝႄႉၸူးတီႈႁုၼ်ႇႁၢင်ႈသၢင်းထု ဢိၵ်ႇတင်းဢမ်ႇၶဝ်ႈၸွမ်းပိူၼ်ႈတၢင်ႇၵေႃႉ ဢၼ်ဝႆႈၽြႃးမိၵ်ႉသႃႇၼၼ်ႉၼၼ်ႉ မီးမၢင်ႇၵလႃႇဢေႃႈ။
ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၶႃႈတီႈၶႃႈ။ ၸဝ်ႈႁဝ်းႁဵတ်းပၼ်လွင်ႈတၢင်းဢၼ်လီဢၼ်ငၢမ်းၼမ်ၼႃႇတီႈၶႃႈၸဝ်ႈႁဝ်းၶဝ်ယဝ်ႉလႄႈ ဢမ်ႇမီးတၢင်ႇသူႇတၢင်ႇပႃးဢၼ်မိူၼ်ၸဝ်ႈႁဝ်းလႆႈၼၼ်ႉတီႈၶႃႈ။ ၸဝ်ႈႁဝ်းၵျၢမ်ႇပွင်လွင်ႈတၢင်းဢၼ်လီဢၢမ်းၼမ်ၼႃႇတီႈၶႃႈၸဝ်ႈႁဝ်းၶဝ်၊ တေႃႇထိုင်ႁွတ်ႈၶႃႈၸဝ်ႈဢမ်ႇၸၢင်ႈ ဢဝ်တင်းသူပ်းလၢတ်ႈလႆႈ၊ ၵွပ်ႈပိူဝ်ႈၼပ်ႉဢၢၼ်ႇဢမ်ႇသုတ်းဢမ်ႇသဵင်ႈ လႆႈတီႈၶႃႈဢေႃႈ။
ၸဝ်ႈႁဝ်းဢမ်ႇမီးဢလူဝ်ႇၶႂ်ႈလႆႈၶိူင်ႈတၢင်းလူႇဢိၵ်ႇတင်းၶိူင်ႈပိူင်သၢၵ်ႈလူႇတင်းလၢႆလႄႈ ၸဝ်ႈႁဝ်းဢမ်ႇယွၼ်းဢမ်ႇဢဝ်တူဝ်သတ်းပုၼ်ႈဢၼ်တၵ်းသၢၵ်ႈလူႇၼိူဝ်ၶဵင်ႇတၢင်းလူႇ ဢိၵ်ႇတင်းၶိူင်ႈပိူင်ဢၼ်သၢၵ်ႈလူႇပုၼ်ႈဢၼ် ၽႄႇဢပျတ်ႈၼၼ်ႉလႄႈ ၸဝ်ႈႁဝ်းယင်းၽုၺ်ႇႁူၶႃႈၸဝ်ႈႁႂ်ႈလႆႈထွမ်ႇငိၼ်းၵႂၢမ်းၸဝ်ႈႁဝ်းယူႇဢေႃႈ။
ပိူဝ်ႈၼႆလႄႈ၊ၶႃႈၸဝ်ႈၶိုၼ်းလဝ်ႈလၢတ်ႈလႄႈဝႃႈ၊ “ၶႃႈၸဝ်ႈမီးယူႇတီႈၶႃႈဢေႃႈ။ တြႃးဢၼ်ၸဝ်ႈႁဝ်းသင်ႇသွၼ်ၼႄတၢင်းတီႈၶႃႈၸဝ်ႈၼၼ်ႉ၊ မီးဝႆႉၼႂ်းၵဵၼ်ၵျၢမ်းလိၵ်ႈတီႈၶႃႈဢေႃႈ။
ဢူဝ်းၽြႃးပဵၼ်ၸဝ်ႈၵဝ်ၶႃႈ။ ၶႃႈၸဝ်ႈၵျိူၵ်ႈၸႂ်ၵျိူၵ်ႈၶေႃးၼႂ်း တၢင်းဢၼ်ၵမ်ၵျၢင်ႉ၊ၸွမ်းၼင်ႇဢလူဝ်ႇ ၸဝ်ႈႁဝ်းၼၼ်ႉသေလႄႈ၊ ၶႃႈၸဝ်ႈဢဝ်တြႃးၸဝ်ႈႁဝ်းၸိူဝ်းၼၼ်ႉ သိမ်းပႅင်းဝႆႉၵႃႈၼႂ်းႁူဝ်ၸႂ်ၶႃႈၸဝ်ႈ တီႈၶႃႈဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈႁေႃးလၢတ်ႈၶၢဝ်ႇတြႃးသိူဝ်းပျေႃႇ လွင်ႈဢၼ်ၸဝ်ႈႁဝ်းၵႄႇသႄႇၶျွတ်ႈဢဝ်ၶႃႈၸဝ်ႈႁဝ်းၶဝ်ၼၼ်ႉ ၵႃႈၼႂ်းၵၢင်ပရိၵ်ႈသၢတ်ႈလူင်တီႈၶႃႈယဝ်ႉ။ ၸဝ်ႈႁဝ်းႁုလွင်ႈတၢင်းဢၼ်ၶႃႈၸဝ်ႈတၵ်းတေဢမ်ႇၵိုတ်းဢမ်ႇသဝ်းလႄႈ လၢတ်ႈလွင်ႈၸဝ်ႈႁဝ်းၼၼ်ႉဢေႃႈ။
ၶႃႈၸဝ်ႈဢမ်ႇဢဝ်ၶၢဝ်ႇတြႃးတၢင်းဢၼ်ၸဝ်ႈႁဝ်းၵႄႇၶျွတ်ႈဢဝ်ၼၼ်ႉ၊ သိမ်းဝႆႉပုၼ်ႈတူဝ်ၸဝ်ႈၵဝ်ႇၵူၺ်းလႄႈ၊ ၶႃႈၸဝ်ႈမွၵ်ႇလၢတ်ႈလွင်ႈတၢင်းဢၼ်ၸဝ်ႈႁဝ်းပႂ်ႉသဵတ်ႈၸႃႇဢိၵ်ႇတင်း လွင်ႈတၢင်းဢၼ်ၸဝ်ႈႁဝ်းၸွႆႈထႅမ်မႃႉၸႃႉၼၼ်ႉတႃႇသေႇဢမ်ႇထၢတ်ႇဢေႃႈ။ လွင်ႈသဵတ်ႈၸႃႇဢိၵ်ႇတင်းမႅတ်ႈတႃႇၵရုၼႃႇၸဝ်ႈႁဝ်းၼၼ်ႉ ယင်းလၢတ်ႈယူႇလႄႈဢမ်ႇယူႇတဵတ်ႇတဵတ်ႇၵႃႈၼႂ်းၵၢင်ပရိၵ်ႈသၢတ်ႈလူင်လႆႈတီႈၶႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်း တၵ်းတေဢမ်ႇၵိုတ်းတၢင်းဢၼ် ႁၵ်ႉပႅင်းတီႈၶႃႈၸဝ်ႈသေပွၵ်ႈၸိုင်၊ ၶႃႈၸဝ်ႈႁုယူႇတီႈၶႃႈဢေႃႈ။ မႅတ်ႈတႃႇဢိၵ်ႇတင်းသဵတ်ႈၸႃႇၸဝ်ႈႁဝ်းၼၼ်ႉတၵ်းတေပႂ်ႉလူပႂ်ႉတူၺ်း၊ ၵႃႈတီႈၶႃႈၸဝ်ႈႁဝ်းယူႇတႃႇသေႇဢမ်ႇထၢတ်ႇတီႈၶႃႈဢေႃႈ။
ၽေးဢုပၢတ်ႈၼမ်ၼႃႇဢမ်ႇႁုၼမ်ၵႃႈႁိုဝ်ၼၼ်ႉဢွၼ်ၵၼ်လွမ်ႉႁွပ်ႈၶႃႈၸဝ်ႈဝႆႉတီႈၶႃႈယဝ်ႉ။ ဢပျတ်ႈၶႃႈၸဝ်ႈဢၼ်ၼမ်ၼႃႇၼၼ်ႉႁူမ်ႇသုမ်ႇၶႃႈၸဝ်ႈယူႇ၊ တေႃႇထိုင်ႁွတ်ႈၶႃႈၸဝ်ႈဢမ်ႇၸၢင်ႈႁႅၼ်တူၺ်းလႆႈတီႈၶႃႈယဝ်ႉ။ ဢပျတ်ႈၼၼ်ႉယင်းၼမ်ၼႃႇသေၶူၼ်ႁူဝ်ၶႃႈၸဝ်ႈလႄႈ ႁူဝ်ၸႂ်ၶႃႈၸဝ်ႈႁႅင်းဢူၼ်ႈၵႂႃႇတီႈၶႃႈယဝ်ႉ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈသေၵမ်းတီႈၶႃႈ။ ၶႅၼ်းတေႃႈႁိပ်ႈၼႅတ်ႈၸွႆႈထႅမ်ၶႃႈၸဝ်ႈသေၵမ်းတီႈၶႃႈ။
ႁႂ်ႈၶဝ်ၸိူဝ်းဢၼ်ၵျၢမ်ႇႁႃဢဝ်ဢသၢၵ်ႈၶႃႈၸဝ်ႈတၢႆၼၼ်ႉႁႂ်ႈၶဝ်လႆႈတူၵ်းသုမ်းလႄႈ ယုင်ႈၸႂ်ၵႂၢင်ၸႂ်သေၵမ်းလူၺ်ႈ။ ႁႂ်ႈၶဝ်ၸိူဝ်းဢၼ်ၸူမ်းသိူဝ်းၵွပ်ႈပိူဝ်ႈဢၼ်ၶႃႈၸဝ်ႈထူပ်းၽေးတုၵ်ႉၶႃႉၼၼ်ႉ၊ လႆႈဝၢႆႇပၢႆႈလႄႈသရေႇလုၵႂႃႇသေၵမ်းလူၺ်ႈ။
ႁႂ်ႈၶဝ်ၸိူဝ်းဢၼ်သႄႉသွမ်းၵဝ်လႄႈဝႃႈ၊ “ဢႁိ။ ဢႁိ၊” ဝႃႈၼႆၸိူဝ်းၼၼ်ႉ၊ လႆႈငိူဝ်ႈငဝ်ယူႇၵွပ်ႈပိူဝ်ႈတၢင်းဢၼ်ၶဝ်တူၵ်းသုမ်းၼၼ်ႉသေၵမ်းလူၺ်ႈ။
ႁႂ်ႈၶဝ်ၸိူဝ်းဢၼ်မႃးၸူးၸဝ်ႈႁဝ်းၵႃႈမီးတင်းသဵင်ႈတင်းလူင်ၼၼ်ႉလႆႈၸူမ်းသိူဝ်းလႄႈ လႆႈသႂၢင်ႇသိူဝ်းၸႂ်ယူႇသေၵမ်းလူၺ်ႈ။ ႁႂ်ႈၶဝ်ၸိူဝ်းဢၼ်ယွင်ႈယေႃးၵျေးၸူးတၢင်းဢၼ်ၸဝ်ႈႁဝ်းၵႄႇၶျွတ်ႈဢဝ်ၼၼ်ႉ၊ ၵႃႈမီးတင်းသဵင်ႈတင်းလူင်လႆႈဢွၼ်ၵၼ်လၢတ်ႈဝႃႈ၊ “ ထႃႇဝရႃႉၽြႃး၊ မုၼ်ယႂ်ႇၼႃႇဢေႃႈ၊” ဝႃႈၼင်ႇၼႆယူႇၶိူဝ်းၶိူဝ်းသေၵမ်းလူၺ်ႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈၸမ်ႉ၊ပိၵ်ႉသမ်ႉႁႅင်းဢူၼ်ႈလႄႈယၢၵ်ႈၽၢၼ်သေၵေႃႈ၊ ၸဝ်ႈႁဝ်းယင်းဢမ်ႇလူင်လိုမ်းပႅတ်ႈၶႃႈၸဝ်ႈတီႈၶႃႈ။ ၸဝ်ႈႁဝ်းပဵၼ်ၸဝ်ႈဢၼ်ၵႄႇၶျွတ်ႈၶႃႈၸဝ်ႈလႄႈပဵၼ်ၽြႃးပဵၼ်ၸဝ်ႈၶႃႈၸဝ်ႈတီႈၶႃႈဢေႃႈ။ ၶႅၼ်းတေႃႈၸဵဝ်းမႃးၸွႆႈထႅမ်မႃႉၸႃႉၶႃႈၸဝ်ႈသေၵမ်းတီႈၶႃႈ။
ၶဝ်ၸိူဝ်းဢၼ်ၶႆႈၸႂ်ဝူၼ်ႉၸႂ်ပုၼ်ႈၵူၼ်းယၢၵ်ႈၽၢၼ်ၼၼ်ႉမီးမၢင်ႇၵလႃႇဢေႃႈ။ ထႃႇဝရႃႉၽြႃး၊ တၵ်းမႃႉၸႃႉၸွႆႈထႅမ်ၶဝ်ၼႂ်းမိုဝ်ႉဝၼ်းဢၼ်ထူပ်းၽေးၼၼ်ႉဢေႃႈ။
ထႃႇဝရႃႉၽြႃး၊ တၵ်းတေႁႄႉၵင်ႈပၼ် ၶဝ်သေလႄႈပၼ်ႁႂ်ႈဢသၢၵ်ႈၶဝ် ၵတ်းယဵၼ်ၶျၢမ်းသႃႇဢေႃႈ။ မၼ်းၸဝ်ႈတၵ်းတေႁႂ်ႈၶဝ်မီးမၢင်ႇၵလႃႇၵႃႈၼႂ်းမိူင်းၸဝ်ႈလႄႈ မၼ်းၸဝ်ႈတၵ်းတေဢမ်ႇဢဝ်ၶဝ်ဢၢပ်ႈၼႂ်း တၼ်းၶူဝ်းရၢၼ်ႇသူႇၶဝ်ၼၼ်ႉ။
ထႃႇဝရႃႉၽြႃး၊ တၵ်းတေၸွႆႈထႅမ်ၶဝ်မိူဝ်ႈဢၼ်ၶဝ်ပဵၼ်ၶႆႈပဵၼ်ၼၢဝ်ၼွၼ်းယဵတ်ႇယူႇ ၵႃႈၼိူဝ်ၵူႇၶဝ်ၼၼ်ႉသေလႄႈတၵ်းတေမႄးၽိုၼ်ႉပၼ်ႁႂ်ႈမၼ်းယူႇလီၶိုၼ်းမႃးဢေႃႈ။
ၶႃႈၸဝ်ႈလဝ်ႈလၢတ်ႈလႄႈဝႃႈ၊ “ ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈမီးဢပျတ်ႈၵႃႈတီႈၽၢႆႇၼႃႈၸဝ်ႈႁဝ်းတီႈၶႃႈဢေႃႈ။ ၶႅၼ်းတေႃႈဢဵတ်းလူလႄႈႁႂ်ႈၶႃႈၸဝ်ႈ လႆႈၸိုၼ်ႈႁၢႆသေၵမ်းတီႈၶႃႈ၊” ဝႃႈၼင်ႇၼႆတီႈၶႃႈဢေႃႈ။
ရၢၼ်ႇသူႇၶႃႈၸဝ်ႈၸိူဝ်းၼၼ်ႉၸၢင်ႈဢွၼ်ၵၼ်လၢတ်ႈလွင်ႈ ဢၼ်ဢမ်ႇလီၶႃႈၸဝ်ႈၼၼ်ႉလႄႈဝႃႈ၊ “မၼ်းတၵ်းတၢႆလႄႈ ၸိုဝ်ႈသဵင်မၼ်းတၵ်းသုမ်းႁၢႆမိူဝ်ႈလႂ်၊” ဝႃႈၼင်ႇၼႆဢေႃႈ။
ၶဝ်ၸိူဝ်းဢၼ်မႃးသူႇမႃးၸႂ်းၶႃႈၸဝ်ႈၼၼ်ႉၶဝ်ဢမ်ႇမီးၸႂ်ဢၼ်ၸိုၼ်ႈဢၼ်ၸၢင်ႇ။ ၶဝ်ၸၢင်ႈၸုၸၢင်ႈႁွမ်ဢဝ်ၶၢဝ်ႇဢၼ်ဢမ်ႇလီဢမ်ႇငၢမ်းလွင်ႈၶႃႈၸဝ်ႈသေယဝ်ႉ၊ ၵႂႃႇမွၵ်ႇၵႂႃႇလၢတ်ႈၵူႈတီႈၵူႈလႅၼ်ဢေႃႈ။
ၶဝ်ၸိူဝ်းဢၼ်ၸင်းၶႃႈၸဝ်ႈၼၼ်ႉၸၢင်ႈဢွၼ်ၵၼ်သွပ်ႉသႅပ်ႉလွင်ႈၶႃႈၸဝ်ႈလႄႈ ၸၢင်ႈၵျၢမ်ႇပွင်လွင်ႈဢၼ်ဢမ်ႇလီဢမ်ႇငၢမ်းသႂ်ႇၶႃႈၸဝ်ႈဢေႃႈ။
ၶဝ်ဝႃႈ၊ “မၼ်းၸပ်းတၢင်းပဵၼ်ဢၼ်ၵိၼ်းၼႃႇလူင်လၢင်ယဝ်ႉ။ မၼ်းတေဢမ်ႇလုၵ်ႉသေၵႃႈတီႈၵူႇမၼ်းလႆႈလႃးလႃးယဝ်ႉ၊” ဝႃႈၼင်ႇၼႆဢေႃႈ။
တေႃႈၵႃႈတႆးၵေႃႉတႆးသႄႈၶႃႈၸဝ်ႈဢၼ်ၶႃႈၸဝ်ႈယုမ်ႇ၊ ၵေႃႉဢၼ်ပွင်းၵိၼ်တၢင်းၵိၼ်ၶႃႈၸဝ်ႈၼၼ်ႉဢဝ်တိၼ်ပိတ်ႉၶႃႈၸဝ်ႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈဢဵတ်းလူၶႃႈၸဝ်ႈလႄႈႁႂ်ႈၶႃႈၸဝ်ႈလႆႈၸိုၼ်ႈႁၢႆ၊ယူႇလီပီးမၼ်းသေၵမ်းတီႈၶႃႈ။ ႁႂ်ႈၶႃႈၸဝ်ႈလႆႈၶိုၼ်းတွပ်ႇတႅၼ်းဢပျတ်ႈရၢၼ်ႇသူႇၶႃႈၸဝ်ႈၸိူဝ်းၼၼ်ႉသေၵမ်းတီႈၶႃႈ။
ၶဝ်တၵ်းဢမ်ႇလႆႈဢၶႂၢင်ႉဢၼ်ပႄႉဢၼ်ၼႅင်ႇၼိူဝ်ၶႃႈၸဝ်ႈသေယဝ်ႉ၊ ၶႃႈၸဝ်ႈသမ်ႉတေလႆႈႁုလွင်ႈဢၼ်ၸဝ်ႈႁဝ်းႁၵ်ႉပႅင်းၶႃႈၸဝ်ႈၼၼ်ႉတီႈၶႃႈဢေႃႈ။
ၸဝ်ႈႁဝ်းတၵ်းၸွႆႈထႅမ်ၵွပ်ႈပိူဝ်ႈၶႃႈၸဝ်ႈၵမ်ၵျၢင်ႉသိုဝ်ႈသိုဝ်ႈတေႃႇတေႃႇၼၼ်ႉတီႈၶႃႈဢေႃႈ။ ၸဝ်ႈႁဝ်းသမ်ႉၶျႃးပၼ်တီႈယူႇၶႃႈၸဝ်ႈသိုဝ်ႈၼႃႈတႂ်ႈတႃၸဝ်ႈႁဝ်းယူႇ၊ ၶိင်ႇၵႃႇလႃႉသိုပ်ႇသိုပ်ႇတၢမ်တၢမ်တီႈၶႃႈဢေႃႈ။
ႁႂ်ႈ ထႃႇဝရႃႉၽြႃး၊ ပဵၼ်ၸဝ်ႈမဵဝ်း ဢိသရေး၊ ၼၼ်ႉမီးမၢင်ႇၵလႃႇသေၵမ်းလူၺ်ႈ။ တႄႇၸႃႉဢဝ်မိူဝ်ႈလဵဝ်လႄႈ ယွင်ႈယေႃးမၼ်းၸဝ်ႈယူႇၵူႈၵမ်ႇၽႃႇ သိုပ်ႇသိုပ်ႇတၢမ်တၢမ်သေၵမ်းလူၺ်ႈ။ ဢႃမိၼ်ႈလႄႈဢႃမိၼ်ႈ။
ၸိူဝ်ႉၼင်ႇဢၼ်ၸၢတ်ႇၶၢႆးမုင်ႈမွင်းၼမ်ႉႁွင်ႈ ၼမ်ႉၵႄးၼၼ်ႉၶႃႈၸဝ်ႈမုင်ႈမွင်း ၸဝ်ႈႁဝ်းယူႇတီႈၶႃႈဢေႃႈ။ ဢူဝ်းၽြႃးပဵၼ်ၸဝ်ႈတီႈၶႃႈ။
ၶႃႈၸဝ်ႈဢိုပ်းယၢၵ်ႈတွင်ႉမႆႈၽြႃးပဵၼ်ၸဝ်ႈ ဢၼ်ဝႃႈၽြႃးဢၼ်ဢသၢၵ်ႈလိပ်းယူႇၼၼ်ႉၼႃႇလူင်လၢင်တီႈၶႃႈဢေႃႈ။ ၶႃႈၸဝ်ႈတၵ်းတေလႆႈၶဝ်ႈဝႆႈၸဝ်ႈႁဝ်းၵႃႈတီႈၽၢႆႇၼႃႈၸဝ်ႈႁဝ်းမိူဝ်ႈလႂ်ၶႃႈ။
ၶႃႈၸဝ်ႈႁွင်ႉႁႆႈယူႇၵူႈဝၼ်းၵူႈၶိုၼ်းလႄႈ ၼမ်ႉတႃၶႃႈၸဝ်ႈၼၼ်ႉလႆႈပဵၼ် တၢင်းၵိၼ်ၶႃႈၸဝ်ႈယူႇ၊ ယၢမ်းမိူဝ်ႈဢၼ်ရၢၼ်ႇသူႇၶႃႈၸဝ်ႈထၢမ် ၶႃႈၸဝ်ႈယူႇၶိူဝ်းၶိူဝ်းလႄႈဝႃႈ၊ “ၽြႃးပဵၼ်ၸဝ်ႈမႂ်းမီးၵႃႈလႂ်” ဝႃႈၼင်ႇၼႆၼၼ်ႉဢေႃႈ။
ၶႃႈၸဝ်ႈၶႆႈၸႂ်ထူပ်းလွင်ႈတၢင်းဢၼ်ပဵၼ်ပူၼ်ႉမႃးၸိူဝ်းၼၼ်ႉလႄႈ ႁူဝ်ၸႂ်ၶႃႈၸဝ်ႈတႅၵ်ႇၵႂႃႇလႅဝ်ၵႂႃႇတီႈၶႃႈဢေႃႈ။ ၶုၵ်းၸႂ်လႆႈတၢင်းဢၼ်ၶႃႈၸဝ်ႈပႆၸွမ်းတၢင်းႁူမ်ႈလူၺ်ႈၵၼ်တင်းမူႇၵူၼ်းၸိူဝ်းၵူၼ်း ဢၼ်ပႃးၸႂ်ဢၼ်သႂၢင်ႇဢၼ်သိူဝ်း ႁဵတ်းၵႂၢမ်းယူႇတင်းသဵင်ဢၼ်ယႂ်ႇၼႃႇယွင်ႈယေႃးၽြႃးပဵၼ်ၸဝ်ႈယူႇလႄႈ ဢွၼ်ႁူဝ်ၶဝ်ႈၵႂႃႇၸူးႁိူၼ်းၽြႃးပဵၼ်ၸဝ်ႈယဝ်ႉၸိူဝ်းၼၼ်ႉဢေႃႈ။
ၵွပ်ႈသင်လႄႈၵဝ်လႆႈမႆႈၸႂ်ၶေႃးၶူမ်ယူႇ၊ၵွပ်ႈသင်လႄႈၵဝ်ဢမ်ႇတႄႇဢမ်ႇၼိမ်ယူႇ၊ ၵဝ်တၵ်းမုင်ႈထႃႈမွင်းထႃႈ ၽြႃးပဵၼ်ၸဝ်ႈဢေႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ၵဝ်သမ်ႉတၵ်းတေၶိုၼ်းလႆႈယွင်ႈယေႃးမၼ်းၸဝ်ႈ၊ ၸဝ်ႈဢၼ်ၵႄႇၶျွတ်ႈဢဝ်ၵဝ်၊ၽြႃးပဵၼ်ၸဝ်ႈၵဝ်ၼၼ်ႉထႅင်ႈလူးၵွၼ်ႇဢေႃႈ။
ၼႂ်းတီႈဢၼ်ၶႃႈၸဝ်ႈတူၵ်းၵႅၼ်းယူႇၼႆႉ၊ႁူဝ်ၸႂ်ၶႃႈၸဝ်ႈတႅၵ်ႇၵႂႃႇလႅဝ်ၵႂႃႇတီႈၶႃႈဢေႃႈ။ လွင်ႈမၼ်းၸမ်ႉ၊ၶႃႈၸဝ်ႈၶႆႈၸႂ်ထူပ်းၸဝ်ႈႁဝ်းၵႃႈတီႈၽင်ႇၼမ်ႉ ယေႃးတၢၼ်ႇ၊ ဢိၵ်ႇတင်းၵႃႈၼိူဝ်လွႆ ႁေႇရမုၼ်ႇ၊ တင်းၵုင်း မိၸႃႉ၊ ၼၼ်ႉတီႈၶႃႈဢေႃႈ။
တၢင်းမႆႈတၢင်းၶီဢၼ်ပဵၼ်ၸိူဝ်ႉၼင်ႇလႅင်းၼမ်ႉပိူပ်ႈၼမ်ႉၼၼ်ႉႁူမ်ႇသႂ်ႇၶႃႈၸဝ်ႈယူႇ၊ ၼမ်ႉဢၼ်ပဵၼ်ၵူၵ်ႉပဵၼ်ႁွၼ်ထူမ်ႈႁူမ်ႇၵႃႈၼိူဝ်ၶႃႈၸဝ်ႈယူႇ၊ မိူၼ်ၸိူဝ်ႉၼင်ႇၼမ်ႉတူၵ်းတၢတ်ႇဢၼ်မေႃးသဵင်ယႂ်ႇသဵင်လူင်ၼၼ်ႉတီႈၶႃႈဢေႃႈ။
ႁႂ်ႈ ထႃႇဝရႃႉၽြႃး၊ ၼႄပျႃးမႅတ်ႈတႃႇမၼ်းၸဝ်ႈၶိင်ႇၵၢင်ဝၼ်းလႄႈ ပုၼ်ႈဢၼ်ၶႃႈၸဝ်ႈတၵ်းလႆႈႁဵတ်းၵႂၢမ်း ၶိင်ႇၵၢင်ၶိုၼ်းဢၼ်ဝႃႈ၊တၢင်းဢၼ် သူးတွင်းလဝ်ႈယွၼ်း ၵႃႈတီႈၽြႃးပဵၼ်ၸဝ်ႈ၊ဢၼ်ပဵၼ်ၸဝ်ႈဢသၢၵ်ႈၵဝ်ၼၼ်ႉသေၵမ်းလူၺ်ႈ။
တီႈၽြႃးပဵၼ်ၸဝ်ႈ၊ၸဝ်ႈဢၼ်ၵႅတ်ႇၶႄႁႄႉၵင်ႈၵဝ်ၼၼ်ႉၵဝ်လဝ်ႈလၢတ်ႈလႄႈဝႃႈ၊ “ၵွပ်ႈသင်လႄႈၸဝ်ႈႁဝ်းလူင်လိုမ်းပႅတ်ႈၶႃႈၸဝ်ႈတီႈၶႃႈ။ ၵွပ်ႈသင်လႄႈၶႃႈၸဝ်ႈတၵ်းလႆႈၶၢမ်ႇတုၵ်ႉၶႃႉယူႇ ၵႃႈၼႂ်းမိုဝ်းရၢၼ်ႇသူႇဢၼ်ၵျၢမ်းၼႃႇၼၼ်ႉယူႇတီႈၶႃႈ၊” ဝႃႈၼင်ႇၼႆဢေႃႈ။
ၶႃႈၸဝ်ႈလႆႈၶၢမ်ႇတၢင်းဢၼ်ၶဝ်သႄႉသွမ်းတၢင်ႇဢပျတ်ႈယူႇ ၸဵပ်းၸႂ်ၼႃႇၼႂ်းတၢင်းဢၼ်ၶဝ်ထၢမ်ၵဝ်ယူႇၶိူဝ်းၶူဝ်းလႄႈဝႃႈ၊ “ၽြႃးပဵၼ်ၸဝ်ႈမႂ်းမီးၵႃႈလႂ်၊” ဝႃႈၼင်ႇၼႆၼၼ်ႉတီႈၶႃႈဢေႃႈ။
ၵွပ်ႈသင်လႄႈၵဝ်လႆႈမႆႈၸႂ်ၶေႃးၶူမ်ယူႇ၊ၵွပ်ႈသင်လႄႈၵဝ်ဢမ်ႇတႄႇဢမ်ႇၼိမ်ယူႇ၊ ၵဝ်တၵ်းမုင်ႈမွင်းပႂ်ႉထႃႈၽြႃးပဵၼ်ၸဝ်ႈဢေႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ၵဝ်သမ်ႉတၵ်းတေၶိုၼ်းလႆႈယွင်ႈယေႃးမၼ်းၸဝ်ႈ၊ ၸဝ်ႈဢၼ်ၵႄႇၶျွတ်ႈဢဝ်ၵဝ်၊ၽြႃးပဵၼ်ၸဝ်ႈၵဝ်ၼၼ်ႉ ထႅင်ႈလူးၵွၼ်ႇဢေႃႈ။
ဢူဝ်းၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈၽုၺ်ႇမွၵ်ႇလၢတ်ႈၼႄလွင်ႈဢၼ်၊ၶႃႈၸဝ်ႈဢမ်ႇမီးဢပျတ်ႈလႄႈ၊ ၵႅတ်ႇၶႄႁႄႉလၢတ်ႈလွင်ႈဢမုၶႃႈၸဝ်ႈ၊ဢၼ်ၶတ်းၵၼ်တင်းၵူၼ်း ဢၼ်ဢမ်ႇမီးၽြႃးတြႃးၸိူဝ်းၼၼ်ႉသေယဝ်ႉ၊ၵႄႇသႄႇထုတ်ႇၼုၵ်ႈဢဝ်ၶႃႈၸဝ်ႈ ႁႂ်ႈလွတ်ႈသေၵႃႈတီႈၵူၼ်းဢၼ်ၸၢင်ႈပႅတ်ႉလႅၼ်၊တင်းၵူၼ်းႁၢႆႉၵူၼ်းမိူၵ်ႈတင်းလၢႆ သေၵမ်းတီႈၶႃႈ။
ၸဝ်ႈႁဝ်းပဵၼ်ၽြႃးပဵၼ်ၸဝ်ႈၶႃႈၸဝ်ႈ၊တီႈဢၼ်ၶႃႈၸဝ်ႈသွၼ်ႈပိုင်ႈတီႈၶႃႈဢေႃႈ။ ၵွပ်ႈသင်လႄႈၸဝ်ႈႁဝ်းၸုၼ်ႉပႅတ်ႈၶႃႈၸဝ်ႈတီႈၶႃႈ။ ၵွပ်ႈသင်လႄႈၶႃႈၸဝ်ႈတၵ်းလႆႈၶၢမ်ႇတုၵ်ႉၶႃႉယူႇ၊ ၵႃႈၼႂ်းမိုဝ်းရၢၼ်ႇသူႇဢၼ်ၵျၢမ်းၼႃႇၼၼ်ႉ ယူႇတီႈၶႃႈ။
ၶႅၼ်းတေႃႈပွႆႇၸႂ်ႉဢၼ်လႅင်းၸဝ်ႈႁဝ်းဢိၵ်ႇတင်းသဵတ်ႈၸႃႇၸဝ်ႈႁဝ်းမႃးသေၵမ်းတီႈၶႃႈ။ ၶႅၼ်းတေႃႈႁႂ်ႈၸိူဝ်းၼၼ်ႉဢွၼ်သူင်ႇၶႃႈၸဝ်ႈၵႂႃႇၸူးၵႃႈတီႈ၊လွႆ ၸိဢုၼ်ႇ၊ ဢၼ်ပဵၼ်လွႆမူတ်းၸၢင်ႇၸဝ်ႈႁဝ်းၼၼ်ႉဢိၵ်ႇတင်းၵႃႈတီႈၵျွင်းပိၵ်ႈမၢၼ်ႇၸဝ်ႈ တီႈဢၼ်ၸဝ်ႈႁဝ်းၵိင်းဝၢပ်ႈယူႇၼၼ်ႉသေၵမ်းတီႈၶႃႈ။
ပေႃးႁဵတ်းၸိူဝ်ႉၼင်ႇၼၼ်ၸိုင်၊ၶႃႈၸဝ်ႈတၵ်းႁွတ်ႈထိုင်ၵႃႈတီႈၶဵင်ႇတၢင်းလူႇ ၽြႃးပဵၼ်ၸဝ်ႈၼၼ်ႉ၊ ဢိၵ်ႇတင်းၵႃႈတီႈၽြႃးပဵၼ်ၸဝ်ႈဢၼ်ပဵၼ်တီႈဢၼ်ၶႃႈၸဝ်ႈၸူမ်းသိူဝ်းသႂၢင်ႇၸႂ်ၼႃႇလူင်လၢင်ၼၼ်ႉလႄႈ၊ ၶႃႈၸဝ်ႈတၵ်းလဵတ်းတိင်ႇသေလႄႈယွင်ႈယေႃးႁဵတ်းထေႃးပၼႃႇတီႈၽြႃးပဵၼ်ၸဝ်ႈ၊ ၽြႃးၵဝ်ၶႃႈၼၼ်ႉတီႈၶႃႈဢေႃႈ။
ၵွပ်ႈသင်လႄႈၵဝ်လႆႈမႆႈၸႂ်ၶေႃးၶူမ်ယူႇ၊ၵွပ်ႈသင်လႄႈၵဝ်လႆႈဢမ်ႇတႄႇဢမ်ႇၼိမ်ယူႇ၊ ၵဝ်တၵ်းမုင်ႈမွင်းပႂ်ႉထႃႈၽြႃးပဵၼ်ၸဝ်ႈဢေႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ၵဝ်သမ်ႉတၵ်းတေၶိုၼ်းလႆႈယွင်ႈယေႃးမၼ်းၸဝ်ႈ၊ ၸဝ်ႈဢၼ်ၵႄႇၶျွတ်ႈဢဝ်ၵဝ်၊ၽြႃးပဵၼ်ၸဝ်ႈၵဝ် ၼၼ်ႉထႅင်ႈလူးၵွၼ်ႇဢေႃႈ။
ၽြႃးပဵၼ်ၸဝ်ႈတီႈၶႃႈ။ ႁူၶႃႈၸဝ်ႈႁဝ်းၶဝ်လႆႈငိၼ်း၊ ပူႇမွၼ်ႇၶႃႈၸဝ်ႈႁဝ်းၶဝ်မွၵ်ႇလၢတ်ႈလွင်ႈဢၼ်ၸဝ်ႈႁဝ်းႁဵတ်းဢၼ်ယႂ်ႇဢၼ်မျၢတ်ႈ၊ ၼႂ်းၸူဝ်ႈပၢၼ်ၶဝ်မိူဝ်ႈၵွၼ်ႇဢွၼ်ၼၼ်ႉတီႈၶႃႈဢေႃႈ။
လွင်ႈဢၼ်ဝႃႈတူဝ်ၸဝ်ႈႁဝ်းႁေႃႈၵူၼ်းတၢင်ႇၸိူဝ်ႉတၢင်ႇၶိူဝ်းဢွၵ်ႇပႅတ်ႈသေယဝ်ႉ၊ ၶျႃးပၼ်တီႈယူႇၵူၼ်းၸဝ်ႈႁဝ်းၶဝ်ၼႂ်းမိူင်းၶဝ်၊ ဢိၵ်ႇတင်းလွင်ႈၸဝ်ႈႁဝ်းပၼ်တၢမ်ႇတီႈမိူင်းၵူၼ်းတၢင်ႇမဵဝ်းလႄႈ သမ်ႉႁႂ်ႈၵူၼ်းၸဝ်ႈႁဝ်းယႂ်ႇၽႄၼမ်ၵိုၼ်းမႃးၼၼ်ႉတီႈၶႃႈဢေႃႈ။
ၵူၼ်းၸဝ်ႈႁဝ်းၶဝ်ၼၼ်ႉဢဝ်တင်းလၢပ်ႇၶဝ်လႄႈလႆႈပႄႉၼႅင်ႇမိူင်းၼၼ်ႉဢမ်ႇၸႂ်ႈတီႈၶႃႈ၊ ဢဝ်တင်းႁႅင်းတၼ်းၶူဝ်းၶဝ်လႄႈလႆႈပႄႉၼႅင်ႇၵေႃႈဢမ်ႇၸႂ်ႈတီႈၶႃႈ။ ၶဝ်လႆႈပႄႉၼႅင်ႇၵွပ်ႈပိူဝ်ႈမိုဝ်းၶွၼ်ၶႂႃၸဝ်ႈႁဝ်းဢိၵ်ႇတင်းၶႅၼ်ၸဝ်ႈႁဝ်း၊ တင်းဢၼ်ၼႃႈၸဝ်ႈႁဝ်းႁိူဝ်ႈလႅင်းၼၼ်ႉ ၼႄပျႃးလွင်ႈဢၼ်ၸဝ်ႈႁဝ်း ႁၵ်ႉပႅင်းၶဝ်ၼၼ်ႉတီႈၶႃႈဢေႃႈ။
ၸဝ်ႈႁဝ်းပဵၼ်ၶုၼ်ႁေႃၶမ်းၶႃႈၸဝ်ႈ၊ၽြႃးပဵၼ်ၸဝ်ႈၶႃႈၸဝ်ႈတီႈၶႃႈဢေႃႈ။ ၸဝ်ႈႁဝ်းပၼ်ဢၶႂၢင်ႉဢၼ်ပႄႉဢၼ်ၼႅင်ႇၼၼ်ႉတီႈၵူၼ်းၸဝ်ႈႁဝ်းတီႈၶႃႈဢေႃႈ။
ၵွပ်ႈပိူဝ်ႈတၼ်းၶူဝ်းၸဝ်ႈႁဝ်းလႄႈၶႃႈၸဝ်ႈႁဝ်းၶဝ်လႆႈတိုၵ်းပႄႉရၢၼ်ႇသူႇတင်းလႆႈဢေႃႈ။
ၶႃႈၸဝ်ႈဢမ်ႇဢိင်ပိုင်ႈၵၢင်ႇၶႃႈၸဝ်ႈတီႈၶႃႈ။ လၢပ်ႇၶႃႈၸဝ်ႈၵေႃႈဢမ်ႇၵႄႇသႄႇၶျွတ်ႈဢဝ်ၶႃႈၸဝ်ႈလႆႈတီႈၶႃႈ။
ၸဝ်ႈႁဝ်းၵူၺ်းၵႄႇသႄႇၶျွတ်ႈဢဝ်ၶႃႈၸဝ်ႈႁဝ်းၶဝ်လွတ်ႈသေၵႃႈတီႈရၢၼ်ႇသူႇတင်းလႆႈလႄႈ ၸဝ်ႈႁဝ်းတိုၵ်းပႄႉၶဝ်ၸိူဝ်းဢၼ်ၸင်းၶႃႈၸဝ်ႈႁဝ်းၶဝ်ၼၼ်ႉပႅတ်ႈဢေႃႈ။
ပိူဝ်ႈၼႆလႄႈ၊ၶႃႈၸဝ်ႈႁဝ်းၶဝ်တၵ်းယွင်ႈယေႃးၸဝ်ႈႁဝ်းယူႇတႃႇသေႇ ဢိၵ်ႇတင်းယွင်ႈယေႃးၵျေးၸူးၸဝ်ႈႁဝ်းယူႇသေႇသေႇတီႈၶႃႈဢေႃႈ။
ၵူၺ်းၵႃႈ၊မိူဝ်ႈလဵဝ်ၼႆႉၸဝ်ႈႁဝ်းပႄႇပႅတ်ႈၶႃႈၸဝ်ႈႁဝ်းၶဝ်သေလႄႈႁႂ်ႈတူၵ်းသုမ်းတီႈၶႃႈယဝ်ႉ၊ ၸဝ်ႈႁဝ်းဢမ်ႇၶီႇသိုၵ်းၶိုၼ်ႈၵႂႃႇလူၺ်ႈၵၼ်တင်းတပ်ႉသိုၵ်းၶႃႈၸဝ်ႈႁဝ်းၶဝ်တီႈၶႃႈယဝ်ႉ။
ၸဝ်ႈႁဝ်းႁႂ်ႈၶႃႈၸဝ်ႈႁဝ်းၶဝ်လႆႈသုတ်ႉႁူၼ်ပၢႆႈရၢၼ်ႇသူႇတင်းလၢႆတီႈၶႃႈယဝ်ႉ။ ရၢၼ်ႇသူႇၸိူဝ်းၼၼ်ႉၵေႃႈလႆႈႁိမ်ႁူင်ႇသိမ်းဢဝ်ဢုၵ်ႉၸႃႇၶႃႈၸဝ်ႈႁဝ်းၶဝ်တီႈၶႃႈယဝ်ႉ။
ၸဝ်ႈႁဝ်းႁႂ်ႈၶႃႈၸဝ်ႈႁဝ်းၶဝ်လႆႈၶၢမ်ႇႁႅမ်ၵိၼ်မိူၼ်ၸိူဝ်ႉၼင်ႇသူဝ်းၼၼ်ႉတီႈၶႃႈယဝ်ႉ။ ၸဝ်ႈႁဝ်းႁႂ်ႈၶႃႈၸဝ်ႈႁဝ်းၶဝ်လႆႈၽၢတ်ႇၽႄ ၽူင်ႉၽၢင်းၵႂႃႇၵႃႈၼႂ်း ပႃႇၽိူင်းမိူင်းပိူၼ်ႈတီႈၶႃႈယဝ်ႉ။
ၸဝ်ႈႁဝ်းဢဝ်ၵူၼ်းၸဝ်ႈႁဝ်းၼၼ်ႉၶၢႆပႅတ်ႈပေႃးပေႃး၊ ထၢၼ်ႈပေႃးမိူၼ်ၸိူဝ်ႉၼင်ႇဢၼ်ဢမ်ႇမီးၵႃႈမီးၶၼ်ၵႃႈသင်ၼၼ်ႉတီႈၶႃႈယဝ်ႉ။
ၵူၼ်းႁိူၼ်းဢၼ်ၸမ်ၵၼ်တင်းၶႃႈၸဝ်ႈႁဝ်းၶဝ်ၸိူဝ်းၼၼ်ႉႁၼ်လွင်ႈတၢင်းဢၼ်၊ ၸဝ်ႈႁဝ်းႁဵတ်းတီႈၶႃႈၸဝ်ႈႁဝ်းၶဝ်သေလႄႈ ၶဝ်သႄႉသွမ်း၊ႁဵတ်းပျၢၵ်ႈႁဵတ်းၶူဝ်တီႈၶႃႈၸဝ်ႈႁဝ်းၶဝ်တီႈၶႃႈဢေႃႈ။
ၸဝ်ႈႁဝ်းႁဵတ်းႁႂ်ႈၶႃႈၸဝ်ႈႁဝ်းၶဝ်ပဵၼ်တီႈဢၼ် ၵူၼ်းတၢင်ႇမဵဝ်းတၵ်းႁဵတ်းဢုပမႃႇဢၼ်တႅၵ်ႈဢၼ်ၼိူင်း၊ ဢိၵ်ႇတင်းတီႈဢၼ်ၶဝ်တၵ်းငွၵ်ႈႁူဝ်ၶွၼ်းႁူဝ်လႄႈသႄႉသွမ်းၼၼ်ႉတီႈၶႃႈဢေႃႈ။
ၶႃႈၸဝ်ႈလႆႈသုမ်းသရေႇယူႇ၊လႆႈဢူၵ်းလႆႈဢၢႆတင်းဝၼ်းတင်းဝၼ်း၊
ၵွပ်ႈပိူဝ်ႈလႆႈငိၼ်းၵႂၢမ်းဢၼ်ယႃႉသရေႇတင်းၵႂၢမ်းဢၼ်သႄႉသွမ်း၊ တီႈရၢၼ်ႇသူႇတင်းလၢႆတင်းၶဝ်ၸိူဝ်းဢၼ်ၸင်းၶႃႈၸဝ်ႈၸိူဝ်းၼၼ်ႉတီႈၶႃႈဢေႃႈ။
လွင်ႈတၢင်းၸိူဝ်းၼၼ်ႉပဵၼ်တီႈၶႃႈၸဝ်ႈႁဝ်းၶဝ်ထၼ်ႇၼၼ်ႉသေၵေႃႈ၊ ၶႃႈၸဝ်ႈႁဝ်းၶဝ်ယင်းဢမ်ႇလူင်ဢမ်ႇလိုမ်းၸဝ်ႈႁဝ်းတီႈၶႃႈ၊ ဢမ်ႇယႃႉသဵတ်ႈၸႃႇပတိၺိၺ်ႇတြႃးၸဝ်ႈႁဝ်းပႅတ်ႈတီႈၶႃႈ။
ၶႃႈၸဝ်ႈႁဝ်းၶဝ်ယင်းဢမ်ႇယႃႉသဵတ်ႈၸႃႇတီႈၸဝ်ႈႁဝ်းလႃးလႃးတီႈၶႃႈ။ ၶႃႈၸဝ်ႈႁဝ်းၶဝ်ဢမ်ႇပိုၼ်ႉဢမ်ႇပႅတ်ႈပိင်းၺၢပ်ႈတြႃးၸဝ်ႈႁဝ်းတီႈၶႃႈ။
ၼႂ်းဝႃႈၼၼ်သေၵေႃႈ၊ၸဝ်ႈႁဝ်းယင်းပွႆႇပႅတ်ႈၶႃႈၸဝ်ႈႁဝ်းၶဝ် ႁႂ်ႈဢမ်ႇမီးတီႈဢႃးၵူဝ်းၵႃႈၼႂ်းၵၢင်တူဝ်ထိူၼ်ႇတင်းလၢႆတီႈၶႃႈဢေႃႈ။ ၸဝ်ႈႁဝ်းၸုၼ်ႉပႅတ်ႈၶႃႈၸဝ်ႈႁဝ်းၶဝ်ဝႆႉ ၵႃႈၼႂ်းတီႈဢၼ်လပ်းသိင်ႇၽိတ်းၽိတ်းၼၼ်ႉတီႈၶႃႈဢေႃႈ။
ပေႃးၶႃႈၸဝ်ႈႁဝ်းၶဝ်လူင်လိုမ်းၼႃႇမႃႉၸိုဝ်ႈသဵင် ၽြႃးပဵၼ်ၸဝ်ႈၶႃႈၸဝ်ႈႁဝ်းၶဝ် သေလႄႈ၊ၵႂႃႇႁွမ်းမိုဝ်းဝႆႈၽြႃးၵူၼ်း တၢင်ႇၸိူဝ်ႉတၢင်ႇမဵဝ်းၼၼ်ႉၸိုင်၊
ၸဝ်ႈႁဝ်းတၵ်းထူပ်းတၵ်းႁၼ်လွင်ႈတၢင်းၼၼ်ႉဢမၢၼ်ႇၶၼ်ပဵၼ်၊ ၵွပ်ႈပိူဝ်ႈၸဝ်ႈႁဝ်းၸၢင်ႈႁုႁၼ်တၢင်းၵျၢမ်ႇတၢင်းပွင်ဢၼ်ၶႃႈၸဝ်ႈႁဝ်းၶဝ်၊ လၵ်ႉသိူင်ႇလၵ်ႉမႅပ်းဝႆႉၼၼ်ႉတီႈၶႃႈဢေႃႈ။
ၵွပ်ႈပိူဝ်ႈပုၼ်ႈဢၵျူဝ်းၸဝ်ႈႁဝ်းလႄႈ ၶႃႈၸဝ်ႈႁဝ်းၶဝ်လႆႈၶၢမ်ႇတၢင်းဢၼ်ဢဝ်တၢႆတႃႇသေႇတီႈၶႃႈဢေႃႈ။ ပိူၼ်ႈမၢတ်ႈၶႃႈၸဝ်ႈႁဝ်းၶဝ်ပဵၼ်ၸိူဝ်ႉၼင်ႇ သူဝ်းဢၼ်ႁႅၼ်းဝႆႉတႃႇတေႁႅမ်ၵိၼ်ၼၼ်ႉ တီႈၶႃႈဢေႃႈ။
ၸဝ်ႈၽြႃးတီႈၶႃႈ။ တိုၼ်ႇမႃးသေၵမ်းတီႈၶႃႈ။ ၵွပ်ႈသင်လႄႈၸဝ်ႈႁဝ်းလပ်းယူႇတီႈၶႃႈ။ လုၵ်ႉသေၵမ်းတီႈၶႃႈ။ ယႃႇပေပႄႇပႅတ်ႈၶႃႈၸဝ်ႈႁဝ်းၶဝ်သေႇသေႇသေၵမ်းတီႈၶႃႈ။
ၵွပ်ႈသင်လႄႈၸဝ်ႈႁဝ်းပၢႆႈတဵတ်ႇပၢႆႈမႅပ်းၶႃႈၸဝ်ႈႁဝ်းၶဝ်ယူႇတီႈၶႃႈ။ ယႃႇပေလူင်လိုမ်းတၢင်းဢၼ်ၶႃႈၸဝ်ႈႁဝ်းၶဝ်လႆႈထူပ်းၽေးလႄႈ လႆႈႁွတ်ႈတုၵ်ႉၶႃႉယူႇၼႆႉသေၵမ်းတီႈၶႃႈ။
ၶႃႈၸဝ်ႈႁဝ်းၶဝ်လႆႈၶၢမ်ႇပေႃႉထုပ်ႉတူၵ်းဢူပ်ႇပူပ်ႇၸပ်းလိၼ်ယူႇတီႈၶႃႈယဝ်ႉ။ ၶႃႈၸဝ်ႈႁဝ်းၶဝ်လႆႈၼွၼ်းမူပ်ႇယူႇၵႃႈၼႂ်းမုၼ်ႈလိၼ်တီႈၶႃႈဢေႃႈ။
ၶႅၼ်းတေႃႈၸဝ်ႈႁဝ်းမႃးၸွႆႈမႃးထႅမ်ၶႃႈၸဝ်ႈႁဝ်းၶဝ်သေၵမ်းတီႈၶႃႈ။ ၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈႁဝ်းၶဝ် ၸွမ်းလူၺ်ႈမႅတ်ႈတႃႇၵရုၼႃႇၸဝ်ႈႁဝ်းၼၼ်ႉ သေၵမ်းတီႈၶႃႈ။
ၶေႃႈၵႂၢမ်းဢၼ်လီဢၼ်ဝၢၼ်တဵမ်ဝႆႉၼႂ်းႁူဝ်ၸႂ်ၵဝ် ၸွမ်းၼင်ႇဢၼ်ၵဝ်ၸၢပ်ႈလိၵ်ႈႁဵတ်းၵႂၢမ်းၼႆႉပုၼ်ႈၶုၼ်ႁေႃၶမ်းၼၼ်ႉဢေႃႈ။ မိူၼ်ၸိူဝ်ႉၼင်ႇၵၼ်းတႅမ်ႈ ဢၼ်မီးၼႂ်းမိုဝ်းၵေႃႉဢၼ်မေႃတႅမ်ႈလီလီငၢမ်းငၢမ်းၼၼ်ႉ၊ လိၼ်ႉၵဝ်တၼ်းဝႆႉတႃႇတေၸၢပ်ႈၵႂၢမ်း လၢင်ႇၵႃႇဢေႃႈ။
ၸဝ်ႈႁဝ်းႁၢင်ႈလီသေပိူၼ်ႈၵႃႈၼႂ်းမဵဝ်းၵူၼ်းတင်းလၢႆတီႈၶႃႈဢေႃႈ။ ၸဝ်ႈႁဝ်းၸၢင်ႈလၢတ်ႈၵႂၢမ်းဢၼ်လၵ်းလႅမ်ၼႃႇတီႈၶႃႈလႄႈ ၽြႃးပဵၼ်ၸဝ်ႈပၼ်တၢင်းလီတီႈႁဝ်းယူႇတႃႇသေႇဢမ်ႇထၢတ်ႇတီႈၶႃႈဢေႃႈ။
ၸဝ်ႈဢၼၼ်ႇတႃႉတၼ်းၶူဝ်းတီႈၶႃႈ။ ဢဝ်လၢပ်ႇ ၸဝ်ႈႁဝ်းဢၼ်ပဵၼ်၊မုၼ်ၽုင်းဢႃႇၼုၽေႃႇၼၼ်ႉမတ်ႉႁွႆႈဝႆႉသေၵမ်းတီႈၶႃႈ။
ၶီႇၵႃႈၼိူဝ်မုၼ်ၽုင်းဢႃႇၼုၽေႃႇတၢင်းဢၼ်ႁဵတ်းပႄႉႁဵတ်းၼႅင်ႇသေလႄႈ ၶိုၼ်ႈၵႂႃႇပုၼ်ႈဢၼ်တၵ်းၵႅတ်ႇၶႄႁႄႉၵင်ႈတြႃးသဵတ်ႈၸႃႇတင်း၊ တြႃးဢၼ်သိုဝ်ႈတေႃႇၼၼ်ႉသေၵမ်းတီႈၶႃႈ။ ႁႅင်းတၼ်းၶူဝ်းၸဝ်ႈႁဝ်းတၵ်းၼႄပျႃး တၢင်းဢၼ်လီၵူဝ်လီႁႄၼၼ်ႉတီႈ ၸဝ်ႈႁဝ်းတီႈၶႃႈဢေႃႈ။
ပိုၼ်ၸဝ်ႈႁဝ်းၸိူဝ်းၼၼ်ႉလႅမ်လီၼႃႇလႄႈ သဵပ်ႇသႂ်ႇမၢၵ်ႇႁူဝ်ၸႂ်ရၢၼ်ႇသူႇၸဝ်ႈႁဝ်း ၸိူဝ်းၼၼ်ႉသေယဝ်ႉ၊ မဵဝ်းၵူၼ်းတင်းလၢႆတူၵ်းသုမ်းၵႃႈတီႈတိၼ် ၸဝ်ႈႁဝ်းတီႈၶႃႈဢေႃႈ။
မိူင်းၸဝ်ႈဢၼ်ၽြႃးပဵၼ်ၸဝ်ႈဢၢပ်ႈပၼ်တီႈ ၸဝ်ႈႁဝ်းၼၼ်ႉပဵၼ်မိူင်း ဢၼ်တႄႇယူႇၼိၵ်ႈၸႃႉထႃႇဝရႃႉတီႈၶႃႈလႄႈ ၸဝ်ႈႁဝ်းဢုပ်ႉပိူင်ႇၵႃႈၼိူဝ်ၵူၼ်းမိူင်းၸဝ်ႈႁဝ်း သိုဝ်ႈသိုဝ်ႈတေႃႇတေႃႇတီႈၶႃႈဢေႃႈ။
ၸဝ်ႈႁဝ်းၵျိူၵ်ႈႁၵ်ႉထုၵ်ႇၸႂ်လွင်ႈတၢင်းဢၼ်သိုဝ်ႈတေႃႇလႄႈ ၸင်းလွင်ႈတၢင်းဢၼ် ဢမ်ႇတြႃးၼၼ်ႉတီႈၶႃႈဢေႃႈ။ ၵွပ်ႈပိူဝ်ႈလွင်ႈတၢင်းၼႆႉလႄႈၽြႃးပဵၼ်ၸဝ်ႈ၊ၽြႃးၸဝ်ႈႁဝ်းၼၼ်ႉလိူၵ်ႈဢဝ်ၸဝ်ႈႁဝ်းသေယဝ်ႉ၊ သွၼ်းလေႃႇပၼ်မၢင်ႇၵလႃႇၵႃႈၼိူဝ်ၸဝ်ႈႁဝ်းယဵင်ႈၶႅၼ်းၼမ်ၼႃႇသေ၊ ၵႃႈၼိူဝ်ၶုၼ်ႁေႃၶမ်းတၢင်ႇပႃးတီႈၶႃႈဢေႃႈ။
ဢၢႆႁွမ်မုရၼ်ႇတင်းၼၢမ်ႇသႃႇႁွမ်ႁူၺ်းၵႃႈတီႈၶူဝ်းၼုင်ႈၸဝ်ႈႁဝ်းလႄႈတၢင်းဢၼ်ႁႆႇဢၼ်ပဝ်ႇ ဢွၵ်ႇသေၵႃႈၼႂ်းႁေႃငႃးၸၢင်ႉတင်းလၢႆမႃးႁႂ်ႈၸဝ်ႈႁဝ်းၸူမ်းသိူဝ်းတီႈၶႃႈဢေႃႈ။
ၸိူင်ႉၼၢင်းဢၼ်ၶဝ်ႈပႃးၵႃႈၼႂ်းႁေႃၸဝ်ႈႁဝ်း ၸိူဝ်းၼၼ်ႉပဵၼ်လုၵ်ႈသၢဝ် ၶုၼ်ႁေႃၶမ်းတင်းလၢႆလႄႈ၊ၵႃႈတီႈ ၽၢႆႇၶႂႃပလၢင်ႇၸဝ်ႈႁဝ်းၼၼ်ႉ မီးၼၢင်းႁေႃၶမ်းမေးၸဝ်ႈႁဝ်း၊ ဢၼ်ဢဝ်တင်းၶူဝ်းၶမ်းၸႅတ်ႈၸႅတ်ႈႁၢင်ႈၶိူင်ႈ ဝႆႉၼၼ်ႉၸုၵ်းယူႇတီႈၶႃႈဢေႃႈ။
လုၵ်ႈယိင်းဢၼ်သွင်ႇမၢင်ႇၵလႃႇတီႈ ၶုၼ်ႁေႃၶမ်းၼႆႉ႟။ ထွမ်ႇငိၼ်းၵႂၢမ်းဢၼ် ၵဝ်လၢတ်ႈၼႆႉတႃႉ။ လူင်လိုမ်းၸိူဝ်ႉၶိူဝ်းတူဝ်ၸဝ်ႈၵဝ်ႇတင်းပီႈၼွင်ႉ ၵူၼ်းႁိူၼ်းတူဝ်ၸဝ်ႈၵဝ်ႇတႃႉ။
ပေႃးႁဵတ်းၸိူဝ်ႉၼင်ႇၼၼ်ၸိုင်၊ၶုၼ်ႁေႃၶမ်းတၵ်းႁၵ်ႉႁွမ်ၸူမ်းတွၼ်ႈ၊ တၢင်းႁၢင်ႈလီၼၢင်းႁဝ်းၼၼ်ႉဢေႃႈ။ ပိူဝ်ႈဢၼ်မၼ်းၸဝ်ႈပဵၼ်ၸဝ်ႈတီႈၼၢင်းႁဝ်းလႄႈထွမ်ႇဢဝ်မၼ်းၸဝ်ႈတႃႉ။
ၵူၼ်းမိူင်း တုရု၊ ၶဝ်တၵ်းတေပႃးဢဝ်လၢၵ်ႈသွင်ႇပၼ်ႇၼႃႇမႃးပၼ်ၼၢင်းႁဝ်း၊ ဢိၵ်ႇတင်းၵူၼ်းမၢၵ်ႈၵူၼ်းမီးၶဝ်တၵ်းတေၸူဝ်းဢဝ်ႁႂ်ႈၼၢင်းႁဝ်းၽွမ်ႉၸႂ်ၶဝ်ဢေႃႈ။
လုၵ်ႈယိင်းၶုၼ်ႁေႃၶမ်းၼၼ်ႉမီးၵႃႈၼႂ်း ႁေႃယူႇသေလႄႈမီးမုၼ်ၵုင်ႇသရေႇ ၵူၺ်းၵူၺ်းသေယဝ်ႉ၊ မၼ်းၼၢင်းၼုင်ႈမႆၶူဝ်းဢၼ်ဢဝ်မႆၶမ်းတေႃးႁဵတ်းၼၼ်ႉႁၢင်ႈၶိူင်ႈႁၢင်ႈၽၢင်ဝႆႉဢေႃႈ။
မၼ်းၼၢင်းၼုင်ႈၶူဝ်းဢၼ်မီးလၢႆးႁၢင်ႈလီ ၵူႈမဵဝ်းမဵဝ်းလႄႈလႆႈဢဝ်ၶဝ်ႈၸူး ၵႃႈတီႈၶုၼ်ႁေႃၶမ်းဢေႃႈ။ ၸိူင်ႉၼၢင်းမၼ်းၼၢင်းတင်းလၢႆၵေႃႈ လႆႈဢဝ်ၶဝ်ႈၸူးၵႃႈတီႈမၼ်းၸဝ်ႈၵႂႃႇ ၸွမ်းတၢင်းလင်မၼ်းၼၢင်းဢေႃႈ။
ပႃးတင်းၸႂ်ဢၼ်သႂၢင်ႇဢၼ်သိူဝ်းသေယဝ်ႉၸဝ်ႈၼၢင်းတင်းလၢႆမႃးလႄႈ ၶဝ်ဢွၼ်ၵၼ်ၶဝ်ႈၵႂႃႇၸူးၵႃႈၼႂ်းႁေႃ ၶုၼ်ႁေႃၶမ်းဢေႃႈ။
ၶုၼ်ႁေႃၶမ်းၵဝ်ၶႃႈတီႈၶႃႈ။ ၸဝ်ႈႁဝ်းၸမ်ႉ၊ တၵ်းမီးလုၵ်ႈၸၢႆးၼမ်ၼႃႇပုၼ်ႈဢၼ်တၵ်းပုတ်ႈႁၢင်ႈတၢင်တူဝ်ပူႇမွၼ်ႇၸဝ်ႈႁဝ်း ၵႃႈၼႂ်းဢႃႇၼႃႇၶုၼ်ႁေႃၶမ်းတင်းလၢႆသေလႄႈၸဝ်ႈႁဝ်းတၵ်းႁႂ်ႈၶဝ် ဢုပ်ႉပိူင်ႇၵႃႈၼိူဝ်လိၼ်မိူင်းၼႆႉတင်းသဵင်ႈ တင်းမူတ်းတီႈၶႃႈဢေႃႈ။
လိၵ်ႈႁဵတ်းၵႂၢမ်းၶႃႈၸဝ်ႈၼႆႉတၵ်းႁႂ်ႈ မုၼ်သရေႇၸဝ်ႈႁဝ်းႁိူဝ်ႈႁိူင်းယူႇ တႃႇသေႇဢမ်ႇထၢတ်ႇလႄႈ ၵူၼ်းၵူႈၵေႃႉၵူႈၵူၼ်းတၵ်းဢွၼ်ၵၼ်ယွင်ႈယေႃး၊ ထေႃးပၼႃႇတီႈၸဝ်ႈႁဝ်းယူႇ ၵူႈၵမ်ႇၽႃႇသိုပ်ႇသိုပ်ႇတၢမ်တၢမ်တီႈၶႃႈဢေႃႈ။
ၽြႃးပဵၼ်ၸဝ်ႈပဵၼ်တီႈဢၼ်ႁဝ်းသွၼ်ႈပိုင်ႈ ဢိၵ်ႇတင်းႁႅင်းတၼ်းၶူဝ်းႁဝ်းလႄႈ ပဵၼ်လွင်ႈဢၼ်မႃႉၸႃႉၸွႆႈထႅမ်ႁဝ်း ၼႃႇလူင်လၢင် ၼႂ်းၶိင်ႇယၢမ်းမိူဝ်ႈဢၼ်ႁဝ်းထူပ်းၽေး ၼၼ်ႉဢေႃႈ။
ပိူဝ်ႈၼႆလႄႈ၊ပိၵ်ႉသမ်ႉပထဝီႇလိၼ်မိူင်းၼႆႉ သၼ်ႇၶွၼ်းလႄႈလွႆလူင်တင်းလၢႆ တူၵ်းၶဝ်ႈၵႃႈၼႂ်းၼမ်ႉသမ်ႇမုၵ်ႈတြႃႇ ဢၼ်လိုၵ်ႉဢၼ်လမ်ႇ။
ပိၵ်ႉသမ်ႉပၢင်ႇလၢႆႇတင်းလၢႆမေႃးႁိုင်ႈႁိုင်ႈႁၢင်ႈႁၢင်ႈသေလႄႈၶုၼ်ႇၵႂႃႇဢူၼ်ၵႂႃႇ၊ ၵုင်းလွႆတင်းလၢႆသၼ်ႇၶွၼ်းတူင်ႉၼိုင် ၵွပ်ႈပိူဝ်ႈလႅင်းၼမ်ႉပိူပ်ႈၼမ်ႉထိပ်ႇၽၢင်ႈႁႅင်းၼႃႇသေၵေႃႈႁဝ်းတၵ်းဢမ်ႇၵူဝ်ဢမ်ႇႁႄ။
မီးမႄႈၼမ်ႉမႄႈၼိုင်ႈဢၼ်လႆၼၼ်ႉၸၢင်ႈဢဝ်တၢင်းဢၼ်ၸူမ်းသိူဝ်း လႆၶဝ်ႈၵႃႈၼႂ်းဝဵင်းၽြႃးပဵၼ်ၸဝ်ႈ၊ၸူးၵႃႈတီႈႁိူၼ်းဢၼ်မူတ်းၸၢင်ႇ ၽြႃးဢၼ်သုင်ၼႃႇသေပိူၼ်ႈ၊ၵိင်းဝၢပ်ႈယူႇၼၼ်ႉဢေႃႈ။
ၽြႃးပဵၼ်ၸဝ်ႈၵိင်းဝၢပ်ႈယူႇၼႂ်းဝဵင်းၼၼ်ႉလႄႈ ဝဵင်းၼၼ်ႉတၵ်းဢမ်ႇလႆႈမီးတၢင်းဢၼ်ယႃႉလႅဝ်လႃးလႃး။ ၽြႃးပဵၼ်ၸဝ်ႈတၵ်းၸွႆႈထႅမ်မႃႉၸႃႉမၼ်း ၶိင်ႇၵၢင်ၼႂ်ၸဝ်ႉၸဝ်ႉဢေႃႈ။
မဵဝ်းၵူၼ်းတင်းလၢႆဢွၼ်ၵၼ်မေႃးၼၼ်းယူႇ ႁိုင်းႁိုင်းႁၢင်းႁၢင်းလႄႈ သိုင်ႇၸိုင်ႈဝၢၼ်ႈမိူင်းတင်းလၢႆဢွၼ်ၵၼ် သၼ်ႇဝႆယူႇဢေႃႈ။ ၽြႃးပဵၼ်ၸဝ်ႈပွႆႇသဵင်ၽႃႉလင်မၼ်းၸဝ်ႈလႄႈလိၼ်မိူင်းၼႆႉၸိူမ်ႈၵႂႃႇဢေႃႈ။
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၼၼ်ႉမီးယူႇလူၺ်ႈၵၼ်တင်းႁဝ်းလႄႈ ၽြႃးပဵၼ်ၸဝ်ႈမဵဝ်း ယႃႇၵုပ်ႈ၊ ၼၼ်ႉပဵၼ်တီႈဢၼ်ႁဝ်းဢိင်သွၼ်ႈပိုင်ႈဢေႃႈ။
ဢွၼ်ၵၼ်မႃးလူတူၺ်းလွင်ႈတၢင်းဢၼ် ထႃႇဝရႃႉၽြႃး၊ ႁဵတ်းပဵၼ်ဝႆႉၼၼ်ႉတႃႉ။ မၼ်းၸဝ်ႈလႆႈႁဵတ်းပဵၼ်မႃးလွင်ႈတၢင်း ဢၼ်လီဢၢမ်းၼႃႇလူင်လၢင် ၵႃႈၼိူဝ်လိၼ်မိူင်းၼႆႉဢေႃႈ။
မၼ်းၸဝ်ႈႁႂ်ႈသိုၵ်းဢၼ်တိုၵ်းတေႃးၵႃႈၼိူဝ်လိၼ်မိူင်းၼႆႉတင်းမူတ်းထၢတ်ႇယဵၼ်ယဝ်ႉ။ မၼ်းၸဝ်ႈႁၵ်းၵၢင်ႇတင်းလၢႆပႅတ်ႈ၊တႅပ်းႁွၵ်ႇတင်းလၢႆပဵၼ်ပွတ်းပဵၼ်ပိတ်း၊ တုတ်ႇလေႃႉမႃႉသိုၵ်းတင်းလၢႆပႅတ်ႈဢေႃႈ။
မၼ်းၸဝ်ႈမီးဢမိင်ႉဝႃႈ၊ “ဢွၼ်ၵၼ်ၵိုတ်းပႅတ်ႈတၢင်းဢၼ်တိုၵ်းတေႃးၵၼ်တႃႉ။ ႁုၸႅင်ႈလွင်ႈဢၼ်ၵဝ်ပဵၼ်ၽြႃးပဵၼ်ၸဝ်ႈ ၼၼ်ႉတႃႉ။ ၵဝ်ပဵၼ်ၸဝ်ႈဢၼ်သုင်မျၢတ်ႈသေပိူၼ်ႈၵႃႈၼႂ်းမဵဝ်းၵူၼ်းတင်းလၢႆ၊ ပဵၼ်ၸဝ်ႈဢၼ်သုင်မျၢတ်ႈသေပိူၼ်ႈ ၵႃႈၼိူဝ် လိၼ်မိူင်းၼႆႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၼၼ်ႉမီးယူႇလူၺ်ႈၵၼ်တင်းႁဝ်းဢေႃႈ။ ၽြႃးပဵၼ်ၸဝ်ႈမဵဝ်း ယႃႇၵုပ်ႈ၊ ၼၼ်ႉပဵၼ်တီႈဢၼ်ႁဝ်းဢိင်သွၼ်ႈပိုင်ႈဢေႃႈ။
ၵူၼ်းမဵဝ်းတင်းသဵင်ႈတင်းလူင်ၶဝ်႟။ ဢွၼ်ၵၼ်တူပ်းမိုဝ်းၸူမ်းၸူမ်းသိူဝ်းသိူဝ်းတႃႉ။ ဢွၼ်ၵၼ်ႁဵတ်းၵႂၢမ်းသဵင်ယႂ်ႇၼႃႇယွင်ႈယေႃးၽြႃးပဵၼ်ၸဝ်ႈတႃႉ။
လွင်ႈမၼ်းၸမ်ႉ၊ ထႃႇဝရႃႉၽြႃး၊ ဢၼ်ပဵၼ်ၸဝ်ႈဢၼ်သုင်ၼႃႇသေပိူၼ်ႈၼၼ်ႉ၊ ပဵၼ်ၸဝ်ႈဢၼ်ထုၵ်ႇလီလီၵူဝ်လီႁႄဢေႃႈ။ မၼ်းၸဝ်ႈပဵၼ်မႁႃႇၶုၼ်ႁေႃၶမ်းဢၼ်ဢုပ်ႉပိူင်ႇလိၼ်မိူင်းတင်းသဵင်ႈတင်းမူတ်းၼႆႉဢေႃႈ။
မၼ်းၸဝ်ႈပၼ်ဢၶႂၢင်ႉႁႂ်ႈႁဝ်းလႆႈပႄႉလႆႈၼႅင်ႇ ၵႃႈၼိူဝ်ၵူၼ်းတင်းလၢႆသေလႄႈပၼ်ႁႂ်ႈႁဝ်းလႆႈဢုပ်ႉပိူင်ႇၵႃႈၼိူဝ်မဵဝ်းၵူၼ်းတင်းလၢႆဢေႃႈ။
မၼ်းၸဝ်ႈလိူၵ်ႈဢဝ်မိူင်းတီႈဢၼ်ႁဝ်းယူႇယူႇၼႆႉ၊ ႁႂ်ႈပဵၼ်ဢမူၺ်ႇၵူၼ်းမၼ်းၸဝ်ႈၸိူဝ်းဢၼ် မၼ်းၸဝ်ႈႁၵ်ႉၼၼ်ႉဢေႃႈ။
ၽြႃးပဵၼ်ၸဝ်ႈၶိုၼ်ႈၵႂႃႇၼင်ႈပလၢင်ႇ မၼ်းၸဝ်ႈၼၼ်ႉယဝ်ႉ။ မိူဝ်ႈဢၼ် ထႃႇဝရႃႉၽြႃး၊ ၶိုၼ်ႈၵႂႃႇယူႇၼၼ်ႉမီးသဵင်ဢၼ်ႁွင်ႉၸူမ်းႁွင်ႉသိူဝ်း ဢိၵ်ႇတင်းသဵင်ဢၼ်ပဝ်ႇတိုင်ႈၼႄးၶရႃႇ တီႈၶႃႈဢေႃႈ။
ဢွၼ်ၵၼ်ႁဵတ်းၵႂၢမ်းယွင်ႈယေႃးၵႃႈတီႈ ၽြႃးပဵၼ်ၸဝ်ႈတႃႉ။ ႁဵတ်းၵႂၢမ်းယွင်ႈယေႃးၶုၼ်ႁေႃၶမ်းႁဝ်းတႃႉ။
ၽြႃးပဵၼ်ၸဝ်ႈပဵၼ်ၶုၼ်ႁေႃၶမ်းဢၼ်ဢုပ်ႉပိူင်ႇလိၼ်မိူင်းတင်းသဵင်ႈတင်းမူတ်းၼႆႉဢေႃႈ။ ဢွၼ်ၵၼ်ဢဝ်တၢင်းဢၼ်ႁဵတ်းၵႂၢမ်းလႄႈယွင်ႈယေႃးမၼ်းၸဝ်ႈတႃႉ။
ၽြႃးပဵၼ်ၸဝ်ႈၼင်ႈယူႇၵႃႈၼိူဝ်ပလၢင်ႇဢၼ်မူတ်းၸၢင်ႇမၼ်းၸဝ်ႈသေလႄႈ မၼ်းၸဝ်ႈဢုပ်ႉပိူင်ႇၵႃႈၼိူဝ်မဵဝ်းၵူၼ်း တင်းသဵင်ႈတင်းမူတ်းဢေႃႈ။
ၶုၼ်ဢၼ်ဢုပ်ႉပိူင်ႇမဵဝ်းၵူၼ်းတင်းလၢႆၸိူဝ်းၼၼ်ႉဢွၼ်ၵၼ်ၸုတုမ်ၵၼ်ယူႇ၊ ၵႃႈတီႈမဵဝ်းၵူၼ်းၽြႃးပဵၼ်ၸဝ်ႈ၊ၸဝ်ႈဢၼ် ဢႃႇပြႃႇႁၢမ်ႇ၊ ၵူဝ်းၵႂၢႆႇၼၼ်ႉဢေႃႈ။ လွင်ႈမၼ်းၸမ်ႉ၊မၼ်းၸဝ်ႈပဵၼ်ၸဝ်ႈဢၼ်မီးႁႅင်းတၼ်းၶူဝ်းဢၼ်ယဵင်ႈၶႅၼ်းယႂ်ႇၼႃႇသေ၊ တပ်ႉသိုၵ်းတင်းလၢႆလႄႈ၊မၼ်းၸဝ်ႈဢုပ်ႉပိူင်ႇယူႇသုင်မျၢတ်ႈၼႃႇဢေႃႈ။
ထႃႇဝရႃႉၽြႃး၊ ယႂ်ႇမျၢတ်ႈၼႃႇလႄႈထိူၵ်ႈၶၢမ်ႇတၢင်းဢၼ်ႁဵတ်းထေႃးပၼႃႇ ယွင်ႈယေႃးၼႃႇလူင်လၢင် ၵႃႈၼႂ်းဝဵင်းၽြႃးပဵၼ်ၸဝ်ႈႁဝ်းၵႃႈၼိူဝ်လွႆဢၼ်မူတ်းၸၢင်ႇမၼ်းၸဝ်ႈၼၼ်ႉဢေႃႈ။
လွႆ ၸိဢုၼ်ႇ၊ လွႆၽြႃးပဵၼ်ၸဝ်ႈၼၼ်ႉသုင်ၼႃႇလႄႈႁၢင်ႈလီႁၢင်ႈငၢမ်းၼႃႇလူင်လၢင်ဢေႃႈ။ ပဵၼ်ဝဵင်းလူင်မႁႃႇၶုၼ်ႁေႃၶမ်းလႄႈပၼ်တၢင်းဢၼ်ၸူမ်းသိူဝ်းတီႈလိၼ်မိူင်းတင်းသဵင်ႈတင်းမူတ်းၼႆႉဢေႃႈ။
ၽြႃးပဵၼ်ၸဝ်ႈႁႂ်ႈႁုလွင်ႈဢၼ်မီးတၢင်းဢၼ်လူင်ႉလီလွတ်ႈလီလူၺ်ႈၵၼ်တင်းမၼ်းၸဝ်ႈ ၵႃႈၼႂ်းႁေႃဝဵင်းၼၼ်ႉဢေႃႈ။
ယေႃႈ။ တူၺ်းလူး။ ၶုၼ်ႁေႃၶမ်းတင်းလၢႆဢွၼ်ၵၼ်ၸုတုမ်ၵၼ်သေလႄႈ မႃးႁႂ်ႈလႆႈတိုၵ်းတေႃးလွႆ ၸိဢုၼ်ႇ၊ ဢေႃႈ။
ၵူၺ်းၵႃႈ၊မိူဝ်ႈဢၼ်ၶဝ်ႁၼ်ၼၼ်ႉဢွၼ်ၵၼ်ဢၢမ်းၼႃႇလူင်လၢင်ဢေႃႈ။ ၶဝ်တူၵ်းၸႂ်လႄႈလႅၼ်ႈပၢႆႈၵႂႃႇဢေႃႈ။
ၶဝ်ၼၼ်ႉလႆႈၵူဝ်ႁႄၼႃႇလႄႈမီးတၢင်းဢၼ်သၼ်ႇသၼ်ႇသၢႆသၢႆ၊ မီးဝူၺ်ႇတၼႃႇမိူၼ်ၼင်ႇမႄႈယိင်းဢၼ် ၸမ်တၵ်းၵိူတ်ႇလဵင်ႉလုၵ်ႈၼၼ်ႉ
မိူၼ်ၸိူဝ်ႉၼင်ႇႁိူဝ်းသၢင်းၽေႃးဢၼ်ၸူမ်ၽုတ်းၸူမ်ၽုတ်းယူႇၼႂ်းလူမ်းၽိဝ်ႁုင်ၼၼ်ႉဢေႃႈ။
ၵႃႈၼင်ႇဢၼ်ႁဝ်းယၢမ်ႈငိၼ်းလွင်ႈတၢင်းဢၼ်ၽြႃးပဵၼ်ၸဝ်ႈႁဵတ်းၼၼ်ႉမိူဝ်ႈလဵဝ်ၼႆႉ ႁဝ်းလႆႈႁၼ်ၵႃႈၼႂ်းဝဵင်းလူင်ၽြႃးပဵၼ်ၸဝ်ႈႁဝ်း ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၼၼ်ႉယဝ်ႉ။ မၼ်းၸဝ်ႈတၵ်းႁႂ်ႈဝဵင်းၼၼ်ႉတႄႇယူႇ တႃႇသေႇဢမ်ႇထၢတ်ႇဢေႃႈ။
ၽြႃးပဵၼ်ၸဝ်ႈတီႈၶႃႈ၊ၶႃႈၸဝ်ႈႁဝ်းၶဝ် ၶႆႈၸႂ်ဝူၼ်ႉၸႂ်လူၺ်ႈလွင်ႈမႅတ်ႈတႃႇ ၵရုၼႃႇၸဝ်ႈႁဝ်းၵႃႈၼႂ်းၵျွင်းပိၵ်ႈမၢၼ်ႇ ၸဝ်ႈႁဝ်းၼၼ်ႉတီႈၶႃႈဢေႃႈ။
ၸဝ်ႈႁဝ်းလႆႈၶၢမ်ႇတၢင်းဢၼ်ၵူၼ်းတင်းလၢႆ ယွင်ႈယေႃးၵူႈတီႈၵူႈလႅၼ်လႄႈ မုၼ်သရေႇၸဝ်ႈႁဝ်းၼၼ်ႉၸွတ်ႇၸႅတ်ႇၵႂႃႇ ၵႃႈၼိူဝ်ၽႅၼ်ႇလိၼ်မိူင်းတင်းသဵင်ႈ တင်းမူတ်းၼႆႉဢေႃႈ။ ၸဝ်ႈႁဝ်းဢုပ်ႉပိူင်ႇယူႇသိုဝ်ႈသိုဝ်ႈတေႃႇတေႃႇ ယူႇတီႈၶႃႈဢေႃႈ။
ႁႂ်ႈၵူၼ်းဢၼ်မီးၵႃႈတီႈလွႆ ၸိဢုၼ်ႇ၊ လႆႈမူၼ်ႈပျေႃႇသေၵမ်းလူၺ်ႈ။ ၸဝ်ႈႁဝ်းၸီႇယၢင်ႇတြႃးသိုဝ်ႈသိုဝ်ႈတေႃႇတေႃႇတီႈၶႃႈဢေႃႈ။ ပိူဝ်ႈၼႆလႄႈႁႂ်ႈမီးတၢင်းဢၼ်သႂၢင်ႇသိူဝ်းၵႃႈၼႂ်းဝဵင်း ယုတႃႉ၊ တင်းလၢႆသေၵမ်းလူၺ်ႈ။
ၵူၼ်းၽြႃးပဵၼ်ၸဝ်ႈၶဝ်႟။ ဢွၼ်ၵၼ်ပႆလဵပ်ႈႁွပ်ႈဝဵင်း ၸိဢုၼ်ႇ၊ သေလႄႈ ၼပ်ႉဢၢၼ်ႇသဝ်လၢင်းမၼ်းတင်းလၢႆတႃႉ။
ဢွၼ်ၵၼ်မၢတ်ႈမၢႆတွင်းဝႆႉလမ်းဝဵင်းမၼ်းတင်းလၢႆ၊ဢိၵ်ႇတင်းၸႅတ်ႈသေးဝႆႉ တိူၵ်ႈတီႈတိုၵ်းသိုၵ်းမၼ်းတင်းလၢႆတႃႉ။ ႁဵတ်းၸိူဝ်ႉၼင်ႇၼၼ်ၸင်ႇသူတၵ်းၸၢင်ႈမွၵ်ႇလၢတ်ႈတီႈ၊လုၵ်ႈလၢၼ်သိုပ်ႇသိုပ်ႇတၢမ်တၢမ်လႄႈဝႃႈ။
“ၽြႃးပဵၼ်ၸဝ်ႈသူႇၼႆႉပဵၼ်ၽြႃးႁဝ်းယူႇတႃႇသေႇသိုပ်ႇသိုပ်ႇတၢမ်တၢမ်လႄႈ မၼ်းၸဝ်ႈတၵ်းဢွၼ်ႁဝ်းသူင်ႇၵႂႃႇယူႇ ၶိင်ႇၵႃႇလႃႉသိုပ်ႇသိုပ်ႇတၢမ်တၢမ်ဢေႃႈ။”
ၵူႈၵေႃႉၵူႈၵူၼ်းၶဝ်႟။ ထွမ်ႇငိၼ်းတႃႉ။ ၵူၼ်းလေႃးၵီႇတင်းလၢႆၶဝ်႟။ ဢွၼ်ၵၼ်ႁေႈႁူထွမ်ႇငိၼ်းတႃႉ။
ၵူၼ်းယူဝ်းယူဝ်း၊ၵူၼ်းဢၼ်မျၢတ်ႈလီ၊ ၵူၼ်းဢၼ်မၢၵ်ႈမီး၊ၵူၼ်းဢၼ်ယၢၵ်ႈၽၢၼ်တင်းလၢႆဢွၼ်ၵၼ်ၽွမ်ႉၵၼ်တႃႉ။
တၢင်းဢၼ်ႁူဝ်ၸႂ်ၵဝ်ၵျၢမ်ႇပွင်ၼၼ်ႉ ပဵၼ်ဢၼ်လိုၵ်ႉလမ်ႇလႄႈၵဝ်တၵ်း လၢတ်ႈၵႂၢမ်းပိင်ႇၺႃႇဢေႃႈ။
ၵဝ်တၵ်းႁေႈႁူၵဝ်ၸူးၵႂၢမ်းဢၼ်ပႃးပိင်ႇၺႃႇလႄႈ ၵဝ်တၵ်းလဵတ်းတိင်ႇၽုၺ်ႇဢွၵ်ႇၼႄပျႃးဢၼၢၵ်ႈဢထိၵ်ႈပႄႇမၼ်းဢေႃႈ။
ၵဝ်တၵ်းတေဢမ်ႇမီးတၢင်းဢၼ်ၵူဝ်ဢၼ်ႁႄၼႂ်းၶိင်ႇဢၼ်ၵဝ်ထူပ်းၽေးယူႇ၊ ယၢမ်းမိူဝ်ႈဢၼ်ရၢၼ်ႇသူႇတင်းလၢႆ လွမ်ႉႁွပ်ႈၵဝ်ယူႇၼၼ်ႉလႃးလႃး။
ၵူၼ်းမိူၵ်ႈတင်းလၢႆဢိင်ပိုင်ႈၸေးၸိမ်ႇသေလႄႈ ဢုပ်ႇလွင်ႈတၢင်းဢၼ်ၶဝ်မၢၵ်ႈမီးလီပဵၼ်ယူႇၸိူဝ်းၼၼ်ႉဢေႃႈ။
ၵူၼ်းၵေႃႉလႂ်သေဢမ်ႇဝႃႈ၊ဢမ်ႇထုတ်ႇဢဝ်တူဝ်ၸဝ်ႈၵဝ်ႇလႆႈလႃးလႃး၊ ဢမ်ႇဢဝ်ၵႃႈၶၼ်ပၼ်တီႈၽြႃးပဵၼ်ၸဝ်ႈပုၼ်ႈဢၼ်တၵ်းထုတ်ႇဢဝ်ဢသၢၵ်ႈမၼ်းလႆႈ။
လွင်ႈမၼ်းၸမ်ႉ၊ၵႃႈၶၼ်ဢၼ်တၵ်းထုတ်ႇဢဝ်ဢသၢၵ်ႈၵူၼ်းၼၼ်ႉ၊ယႂ်ႇၼႃႇလူင်လၢင်ဢေႃႈ။ ၵႃႈဢၼ်မၼ်းမီးၼၼ်ႉဢမ်ႇပေႃးဢမ်ႇၵုမ်ႇ၊ပုၼ်ႈဢၼ်တၵ်းထုတ်ႇဢဝ်။
ႁႂ်ႈမၼ်းလွတ်ႈသေၵႃႈတီႈၶုမ်ပႃႇႁဵဝ်ႈလႄႈ ႁႂ်ႈမၼ်းဢသၢၵ်ႈလိပ်းယူႇသေႇသေႇ ၼၼ်ႉလႆႈလႃးလႃး။
ၸႂ်ႈတႄႉ။ လွင်ႈဢၼ်မၼ်းႁၼ်ၼၼ်ႉၸမ်ႉ၊ ၶဝ်ၸိူဝ်းဢၼ်မီးပိင်ႇၺႃႇၼၼ်ႉ ၸၢင်ႈတၢႆၵႂႃႇဢေႃႈ။ ၵူၼ်းမိူၵ်ႈတင်းၵူၼ်းတိုဝ်တင်းလၢႆၵေႃႈ၊ၸၢင်ႈတၢႆၵႂႃႇမိူၼ်မိူၼ်ၵၼ်ၼၼ်ႉဢေႃႈ။ ၶဝ်ႁႂ်ႈဢုၵ်ႉၸႃႇၸေးၸိမ်ႇၶဝ်ၵိုတ်းၵျၢၼ်ႇဝႆႉပုၼ်ႈလုၵ်ႈၶဝ်လၢၼ်ၶဝ်ၵူၺ်းဢေႃႈ။
ၶုမ်ပႃႇႁဵဝ်ႈတင်းလၢႆပဵၼ်ႁိူၼ်းၶဝ်ဝႆႉ သေႇသေႇလႄႈ၊ၵႃႈတီႈၼၼ်ႈ၊ ၶဝ်တၵ်းတေလႆႈယူႇၶိင်ႇၵႃႇလႃႉ သိုပ်ႇသိုပ်ႇတၢမ်တၢမ်ယူႇ၊ ပိၵ်ႉသမ်ႉၸိုဝ်ႈသဵင်ၶဝ်ၼၼ်ႉလႆႈႁွင်ႉၵူပ်ႉၵူႈဝႆႉၵႃႈတီႈလိၼ်ၶဝ်ၼၼ်ႉဢေႃႈ။
တၢင်းဢၼ်ယႂ်ႇဢၼ်မျၢတ်ႈၵူၼ်းၼၼ်ႉ ဢမ်ႇၸၢင်ႈၵႄႇသႄႇၶျွတ်ႈဢဝ်တူဝ်မၼ်း၊လွတ်ႈသေၵႃႈတီႈတၢင်းတၢႆၼၼ်ႉလႆႈ၊ မၼ်းတၵ်းတေလႆႈတၢႆၵႂႃႇမိူၼ်မိူၼ်ၵၼ်တင်းသတ်းတင်းလၢႆၼၼ်ႉဢေႃႈ။
ၶႆႈၸႂ်တူၺ်းလွင်ႈတၢင်းဢၼ်ၸၢင်ႈပဵၼ်မႃး ၵႃႈတီႈၶဝ်ၸိူဝ်းဢၼ်ဢႃးၵူဝ်း၊ တူဝ်ၸဝ်ႈၵဝ်ႇၼၼ်ႉတႃႉ။ သဵၼ်ႈတၢင်းၶဝ်ၸိူဝ်းဢၼ်ဢိမ်ႇတဵမ်လူၺ်ႈဢုၵ်ႉၸႃႇၸေးၸိမ်ႇၼၼ်ႉၸမ်ႉ။
ၶဝ်ၼၼ်ႉတၵ်းတေလႆႈတၢႆမိူၼ်မိူၼ်ၵၼ် တင်းသူဝ်းလႄႈၶုၼ်မရၼႃႉ လဵင်ႉထိင်းၶဝ်ဢေႃႈ။ ၶဝ်ၸၢင်ႈလူင်းၸူး ၶုမ်ပႃႇႁဵဝ်ႈၵႂႃႇသိုဝ်ႈသိုဝ်ႈလႄႈ တူဝ်ႁၢင်ႈၶဝ်တၵ်းလုလႅဝ်ႁၢႆၵႂႃႇသေယဝ်ႉ၊ မိူင်းမရၼႃႉတၵ်းပဵၼ်ႁိူၼ်းၶဝ်ဢေႃႈ။
ၼႂ်းဝႃႈၼၼ်သေၵေႃႈၽြႃးပဵၼ်ၸဝ်ႈ တၵ်းၵႄႇသႄႇၶျွတ်ႈဢဝ်ၸႂ်ဝိၺိၺ်ႇၵဝ်၊လွတ်ႈသေၵႃႈတီႈတၼ်းၶူဝ်းမရၼႃႉဢေႃႈ။ မၼ်းၸဝ်ႈတၵ်းႁပ်ႉၶၢမ်ႇဢဝ်ၵဝ်ဢေႃႈ။
မိူဝ်ႈဢၼ်ပိူၼ်ႈမၢၵ်ႈမီးမႃးလႄႈၵုင်ႇသရေႇႁိူၼ်းမၼ်းၶိုၼ်ႈယႂ်ႇမႃးၼၼ်ႉၸိုင်၊ မႂ်းယႃႇပေတိူဝ်ႉၸႂ်ၼႅင်ၸႂ်။
လွင်ႈမၼ်းၸမ်ႉ၊မိူဝ်ႈဢၼ်မၼ်းတၢႆၵႂႃႇၸိုင်၊ ဢမ်ႇၸၢင်ႈပႃးဢဝ်ဢုၵ်ႉၸႃႇမၼ်း ၵႂႃႇလႆႈသေဢိတ်း။ ၵုင်ႇသရေႇမၼ်းၵေႃႈဢမ်ႇၸၢင်ႈၸွမ်းမၼ်း ၵႂႃႇလႆႈလႃးလႃး။
ပိၵ်ႉသမ်ႉ၊ၼႂ်းမိူဝ်ႈဢၼ်မၼ်းယင်းတိုၵ်ႉ ဢသၢၵ်ႈလိပ်းယူႇၼၼ်ႉ၊ မၼ်းၸၢင်ႈမၢတ်ႈဝႃႈမၼ်းပျေႉၸုမ်ႇဝႆႉတင်း မၢင်ႇၵလႃႇတၢင်းလီယူႇ၊ မၼ်းၸၢင်ႈလႆႈၶၢမ်ႇဢဝ်တၢင်းဢၼ်ပိူၼ်ႈယွင်ႈယေႃး ၵွပ်ႈပိူဝ်ႈတၢင်းဢၼ်မၼ်းလႆႈလီလႆႈပဵၼ် ယူႇၼၼ်ႉသေၵေႃႈ။
မၼ်းတၵ်းလႆႈတၢႆႁူမ်ႈလူၺ်ႈၵၼ်တင်းပူႇမွၼ်ႇမၼ်းတင်းလၢႆၼၼ်ႉလႄႈ တၵ်းလႆႈယူႇၼႂ်းတီႈဢၼ်လပ်းသိင်ႇထႃႇဝရႃႉၼၼ်ႉဢေႃႈ။
တၢင်းဢၼ်ယႂ်ႇမျၢတ်ႈၵူၼ်းၼၼ်ႉ ဢမ်ႇၸၢင်ႈၵႄႇၶျွတ်ႈဢဝ်တူဝ်မၼ်းလွတ်ႈသေၵႃႈတီႈတၢင်းတၢႆၼၼ်ႉလႆႈ။ မၼ်းတၵ်းတေလႆႈတၢႆၵႂႃႇမိူၼ်ၸိူဝ်ႉၼင်ႇ သတ်းတင်းလၢႆၸိူဝ်းၼၼ်ႉဢေႃႈ။
ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ ဢၼ်ဝႃႈ၊ ထႃႇဝရႃႉၽြႃး၊ ၼၼ်ႉ မီးဢမိင်ႉလႄႈ ႁွင်ႉဢဝ်လိၼ်မိူင်းၸႃႉၸဵမ်တီႈၸဵင်ႇ ဝၼ်းဢွၵ်ႇတေႃႇထိုင်ႁွတ်ႈၸဵင်ႇ ဝၼ်းတူၵ်းၼၼ်ႉဢေႃႈ။
သၢႆဢရွင်ႇၽြႃးပဵၼ်ၸဝ်ႈ ႁိူဝ်ႈလႅင်းဢွၵ်ႇ ၵႃႈၼိူဝ်လွႆ ၸိဢုၼ်ႇ၊ တီႈဢၼ်ၸေးၸုမ်ႇဝႆႉတင်းတၢင်းဢၼ် ႁၢင်ႈလီႁၢင်ႈငၢမ်းၼၼ်ႉဢေႃႈ။
ၽြႃးပဵၼ်ၸဝ်ႈႁဝ်းမႃးလႄႈမၼ်းၸဝ်ႈဢမ်ႇယူႇတဵတ်ႇတဵတ်ႇ၊ ၵႃႈတီႈၽၢႆႇၼႃႈမၼ်းၸဝ်ႈၼၼ်ႉမီးမုၵ်ႉၽႆးဢၼ်လုၵ်ႉမႆႈယူႇ၊ ၵႃႈတီႈႁိမ်းႁွမ်းမၼ်းၸဝ်ႈ သမ်ႉမီးၽူၼ်လူင်လူမ်းလူင်ယူႇဢေႃႈ။
မၼ်းၸဝ်ႈႁွင်ႉဢဝ်ၽႃႉၵၢင်ႁၢဝ် ဢိၵ်ႇတင်းလိၼ်မိူင်း ႁႂ်ႈလႆႈပဵၼ်သၢၵ်ႈသေႇဢၼ်လႆႈႁၼ် မၼ်းၸဝ်ႈၸႅတ်ႈထၢမ်ၸီႇယၢင်ႇ ၵူၼ်းမၼ်းၸဝ်ႈတင်းလၢႆလႄႈဝႃႈ။
“ႁႂ်ႈၵူၼ်းၵဝ်ၸိူဝ်းဢၼ်ပႂ်ႉသဵတ်ႈၸႃႇ တေႃႇၵဝ်ၸိူဝ်းဢၼ်သၢၵ်ႈၵၢပ်ႈ တၢင်းလူႇလႄႈ ႁဵတ်းပတိၺိၺ်ႇတြႃးလူၺ်ႈၵၼ်တင်းၵဝ်ၸိူဝ်းၼၼ်ႉၸုၵၼ်တုမ်ၵၼ်ၵႃႈတီႈၵဝ်တႃႉ၊” ဝႃႈၼင်ႇၼႆဢေႃႈ။
ၽႃႉၵၢင်ႁၢဝ်ၸိူဝ်းၼၼ်ႉဢွၼ်ၵၼ်ၽုၺ်ႇမွၵ်ႇ လၢတ်ႈၼႄလွင်ႈတၢင်းဢၼ်ၽြႃးပဵၼ်ၸဝ်ႈသိုဝ်ႈတေႃႇၼၼ်ႉ၊ ၵွပ်ႈပိူဝ်ႈတူဝ်မၼ်းၸဝ်ႈပဵၼ်ၸဝ်ႈဢၼ်ၸီႇယၢင်ႇတြႃးၼၼ်ႉဢေႃႈ။
“ၵူၼ်းၵဝ်တင်းလၢႆၶဝ်႟။ ဢွၼ်ၵၼ်ထွမ်ႇတႃႉ။ ၵဝ်တၵ်းလၢတ်ႈဢေႃႈ။ မဵဝ်း ဢိသရေး၊ ႟။ ၵဝ်တၵ်းၶၢမ်ႇသၢၵ်ႈသေႇၶတ်းၵၼ်တင်းမႂ်းဢေႃႈ။ ၵဝ်ပဵၼ်ၽြႃးပဵၼ်ၸဝ်ႈဢေႃႈ။ ၵဝ်ပဵၼ် ၽြႃးပဵၼ်ၸဝ်ႈမႂ်းဢေႃႈ။
ၵဝ်ဢမ်ႇတၢင်ႇဢပျတ်ႈတီႈမႂ်းၵွပ်ႈပိူဝ်ႈဢၼ်မႂ်းသၢၵ်ႈလူႇၶိူင်ႈတၢင်းလူႇမႂ်း၊ ဢိၵ်ႇတင်းတူဝ်တၢင်းလူႇဢၼ်ၽဝ်ၽႆး ၸိူဝ်းဢၼ်မႂ်းဢဝ်မႃးသၢၵ်ႈလူႇတီႈၵဝ် သေႇသေႇၸိူဝ်းၼၼ်ႉ။
ၵူၺ်းၵႃႈ၊ၵဝ်ဢမ်ႇလူဝ်ႇဝူဝ်းၵႃႈၼႂ်းၼႃးမႂ်း၊ဢိၵ်ႇတင်းပႄႉၵႃႈၼႂ်းၶွၵ်ႈမႂ်းၸိူဝ်းၼၼ်ႉ။
တူဝ်သတ်းၼႂ်းထိူၼ်ႇၼႂ်းၶိူဝ်းၵႃႈမီးတင်းသဵင်ႈ တင်းလူင်၊ဢိၵ်ႇတင်းၽုင်သူဝ်းၽုင်ဝူဝ်း၊ ဢၼ်ပဵၼ်ပၢၵ်ႇပဵၼ်ႁဵင်ၵႃႈၼိူဝ်လွႆၼိူဝ်ၵုင်းၼၼ်ႉပဵၼ်ဢုၵ်ႉၸႃႇၵဝ်ဢေႃႈ။
ၸႃႉၸဵမ်ၼူၵ်ႉၵႃႈမီးတင်းသဵင်ႈတင်းလူင်၊ ဢိၵ်ႇတင်းတူဝ်ဢၼ်ၸၢင်ႈတူင်ႉယူႇၼိုင်ယူႇ၊ ၵႃႈၼႂ်းတူင်ႈၼႃးၵႃႈမီးတင်းသဵင်ႈတင်းလူင်ၵေႃႈပဵၼ်ဢုၵ်ႉၸႃႇၵဝ်ဢေႃႈ။
ပေႃးၵဝ်ဢိုပ်းယၢၵ်ႈတွင်ႉမႆႈၸိုင်၊ၵဝ် ဢမ်ႇလၢတ်ႈထိုင်တီႈမႂ်း။ လွင်ႈမၼ်းၸမ်ႉ၊လေႃးၵႃႉဢိၵ်ႇတင်း ၵႃႈဢၼ်မီးၼႂ်းမၼ်းၼႆႉပဵၼ်ဢုၵ်ႉၸႃႇၵဝ် မူတ်းမူတ်းဢေႃႈ။
ၸွင်ႇၵဝ်ၵိၼ်ၼိူဝ်ႉဝူဝ်းဢိၵ်ႇတင်းလိူတ်ႈပႄႉႁိုဝ်း။
ဢဝ်ၶိူင်ႈတၢင်းလူႇဢၼ်ယွင်ႈယေႃးၵျေးၸူးၸဝ်ႈၼၼ်ႉသၢၵ်ႈလူႇတီႈၽြႃးပဵၼ်ၸဝ်ႈ။ ၸွမ်းၼင်ႇဢၼ်မႂ်းဝႆႉၵတိသဵတ်ႈၸႃႇၼၼ်ႉၽႄႇဝၢတ်ႈသဵတ်ႈၸႃႇ၊ တီႈၽြႃးဢၼ်သုင်ၼႃႇသေပိူၼ်ႈၼၼ်ႉတႃႉ။
ၼႂ်းမိူဝ်ႈဢၼ်ထူပ်းၽေးၼၼ်ႉႁွင်ႉၵၢဝ်ႇတီႈၵဝ်တႃႉ။ ၵဝ်တၵ်းၵႄႇသႄႇၶျွတ်ႈဢဝ်မႂ်းဢေႃႈ။ မႂ်းၵေႃႈတၵ်းယွင်ႈယေႃးၵဝ်ဢေႃႈ၊” ဝႃႈၼင်ႇၼႆဢေႃႈ။
“ၵူၺ်းၵႃႈ၊ၽြႃးပဵၼ်ၸဝ်ႈလၢတ်ႈတီႈၵူၼ်းဢၼ်ႁၢႆႉမိူၵ်ႈၸိူဝ်းၼၼ်ႉလႄႈဝႃႈ၊ ႁဵတ်းသင်လႄႈမႂ်းဢဝ်ပိင်းၺၢပ်ႈတြႃးၵဝ်တင်းလၢႆဢူမ်သူပ်းလၢတ်ႈဢွၵ်ႇယူႇ၊ ႁဵတ်းသင်လႄႈမႂ်းလၢတ်ႈၸႃလွင်ႈပတိၺိၺ်ႇတြႃးၵဝ်ယူႇၸိူဝ်ႉၼင်ႇႁိုဝ်။
မႂ်းဢမ်ႇၶၢမ်ႇဢမ်ႇဢဝ်တၢင်းဢၼ်ၵဝ်သင်ႇသွၼ်သုင်းမႃႉမႂ်းၼၼ်ႉလႄႈ မႂ်းပႄႇပႅတ်ႈပိင်းၺၢပ်ႈတြႃးၵဝ်တင်းလၢႆ ယဝ်ႉလူင်ပႄႇ။
ပေႃးမႂ်းႁၼ်ၽူႈလၵ်ႉၸိုင်၊မႂ်းႁဵတ်းၵေႃႉႁဵတ်းသႄႈမၼ်းသေယဝ်ႉ၊ မႂ်းၸၢင်ႈႁူမ်ႈပွင်းၵၼ်တင်းၶဝ်ၸိူဝ်းဢၼ် ၵူတ်ႉမေးပိူၼ်ႈၼၼ်ႉလူင်ပႄႇ။
မႂ်းတၼ်းဝႆႉႁႂ်ႈလႆႈလၢတ်ႈၵႂၢမ်းဢၼ်ႁၢႆႉယုတ်ႈယူႇတႃႇသေႇလႄႈ မႂ်းဢမ်ႇၸၢင်ႈထိူင်းၸၢင်ႈၼၢၼ်းႁႂ်ႈလႆႈ လၢတ်ႈမုသႃႇလူင်ပႄႇ။
မႂ်းတၼ်းဝႆႉႁႂ်ႈလၢတ်ႈၶတ်းၵၼ်ထဵင်ၵၼ်တင်းပီႈၼွင်ႉမႂ်းယူႇလႄႈ မႂ်းႁႃဢပျတ်ႈတၢင်းၽိတ်းၶဝ်ယူႇလူင်ပႄႇ။
မႂ်းႁဵတ်းလွင်ႈတၢင်းၸိူဝ်းၼႆႉလႄႈၵဝ်ဢမ်ႇတၵ်းသဵင်ၵႃႈသင်လႄႈယူႇဢေႃႈ။ ပိူဝ်ႈၼႆလႄႈမႂ်းသမ်ႉထၢင်ႇဝႃႈ၊ၵဝ် မိူၼ်ၵၼ်တင်းမႂ်းဢေႃႈ။ ၵမ်းၼႆႉၸိုင်၊ၵဝ်တၵ်းၽုၺ်ႇဢွၵ်ႇၼႄပျႃး ဢပျတ်ႈမႂ်းၸိူဝ်းၼၼ်ႉလႄႈ ၵီႈၽႄႇဝႆႉသိုဝ်ႈၼႃႈတႂ်ႈတႃမႂ်းဢေႃႈ။
သူၸိူဝ်းဢၼ်ဢမ်ႇဝႆႉဢယေးတီႈၵဝ်ၶဝ်႟။ ဢွၼ်ၵၼ်ထွမ်ႇဢဝ်လွင်ႈတၢင်းၼႆႉတႃႉ။ ပေႃးဢမ်ႇၼၼ်ၵဝ်တၵ်းယႃႉသူပႅတ်ႈလႄႈ၊ ၵေႃႉဢၼ်တၵ်းၵႄႇသႄႇၶျွတ်ႈဢဝ်သူၼၼ်ႉဢမ်ႇမီးယဝ်ႉ။
တၢင်းဢၼ်ယွင်ႈယေႃးၵျေးၸူးၸဝ်ႈၼၼ်ႉ ပဵၼ်ၶိူင်ႈတၢင်းလူႇ၊ဢၼ်ႁႂ်ႈ မုၼ်ၽုင်းၵဝ်ထၢင်ႇသႃးဢေႃႈ။ ၵဝ်သမ်ႉတၵ်းၵႄႇသႄႇၶျွတ်ႈဢဝ်ၶဝ် ၸိူဝ်းဢၼ်ထွမ်ႇဢဝ်ၵဝ်ၼၼ်ႉတင်းသဵင်ႈ တင်းမူတ်းဢေႃႈ။”
ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈဢဵတ်းလူၶႃႈၸဝ်ႈ ၵွပ်ႈပိူဝ်ႈၸဝ်ႈႁဝ်းမီးၸႂ်မႅတ်ႈတႃႇၵရုၼႃႇၼၼ်ႉသေၵမ်းတီႈၶႃႈ။ ၵွပ်ႈပိူဝ်ႈၵျေးၸူးတၢင်းဢၼ်ၸဝ်ႈႁဝ်းၸၢင်ႈဢဵတ်းလူ၊ၼၼ်ႉယႂ်ႇၼႃႇလႄႈ၊ ၶႅၼ်းတေႃႈမွတ်ႇပႅတ်ႈဢပျတ်ႈၶႃႈၸဝ်ႈတင်းလၢႆသေၵမ်းတီႈၶႃႈ။
ၶႅၼ်းတေႃႈသုၵ်ႈပွတ်ႈပႅတ်ႈတုၸရိူၵ်ႈၵႃႈဢၼ်ၶႃႈၸဝ်ႈမီးၼၼ်ႉလႄႈ ႁႂ်ႈၶႃႈၸဝ်ႈမူတ်းသႂ်သေၵႃႈတီႈဢပျတ်ႈၶႃႈၸဝ်ႈသေၵမ်းတီႈၶႃႈ။
ၶႃႈၸဝ်ႈႁပ်ႉတုင်းဢဝ်တၢင်းဢၼ်ၶႃႈၸဝ်ႈၽိတ်းပိူင်ႈၸိူဝ်းၼၼ်ႉလႄႈ ၶႃႈၸဝ်ႈၶႆႈၸႂ်ထူပ်းဢပျတ်ႈၶႃႈၸဝ်ႈယူႇတႃႇသေႇဢမ်ႇထၢတ်ႇဢေႃႈ။
ၶႃႈၸဝ်ႈၽိတ်းပိူင်ႈၸဝ်ႈႁဝ်းတီႈၶႃႈယဝ်ႉ။ ၽိတ်းပိူင်ႈၸဝ်ႈႁဝ်းၵူၺ်းၵူၺ်းလႄႈ ၸၢင်ႈႁဵတ်းတၢင်းဢၼ်ၸဝ်ႈႁဝ်း မၢတ်ႈပဵၼ်လွင်ႈတၢင်းဢၼ် ဢမ်ႇတြႃးၼၼ်ႉ၊တီႈၶႃႈဢေႃႈ။ ပိူဝ်ႈၼႆလႄႈတၢင်းဢၼ်ၸဝ်ႈႁဝ်းၸီႇယၢင်ႇ တႅပ်းတတ်းၵႃႈၼိူဝ်ၶႃႈၸဝ်ႈၼၼ်ႉ သိုဝ်ႈတေႃႇလႄႈ၊ တၢင်းဢၼ်ၸဝ်ႈႁဝ်းၸီႇယၢင်ႇပၼ်တၢမ်ႇ ၵႃႈၼိူဝ်ၶႃႈၸဝ်ႈၼၼ်ႉသိုဝ်ႈတြႃးလီ တီႈၶႃႈဢေႃႈ။
ၶႃႈၸဝ်ႈလႆႈၶၢမ်ႇတၢင်းဢၼ်ပဵၼ်ပုင်ႇႁၢင်ႈမႃး ၵႃႈၼႂ်းဢပျတ်ႈတုၸရိူၵ်ႈလႄႈ မႄႈၶႃႈၸဝ်ႈလႆႈပႃးပတိၵ်ႈသၼ်ႇထေႇ ၶႃႈၸဝ်ႈၼႂ်းဢပျတ်ႈၶႃႈဢေႃႈ။
ၸဝ်ႈႁဝ်းၵျိူၵ်ႈႁၵ်ႉထုၵ်ႇၸႂ်သဵတ်ႈၸႃႇၽၢႆႇတၢင်းၼႂ်းၸႂ်ၵူၼ်းလႄႈ ၶႅၼ်းတေႃႈထႅမ်သႂ်ႇပိင်ႇၺႃႇၵႃႈၼႂ်းႁူဝ်ၸႂ် ၶႃႈၸဝ်ႈသေၵမ်းတီႈၶႃႈ။
ၶႅၼ်းတေႃႈထွၼ်ပႅတ်ႈတုၸရိူၵ်ႈဢပျတ်ႈၶႃႈၸဝ်ႈလႄႈႁႂ်ႈၶႃႈၸဝ်ႈလႆႈမူတ်းၸၢင်ႇလီ၊ ဢိၵ်ႇတင်းသုၵ်ႈပွတ်ႈ ႁႂ်ႈၶႃႈၸဝ်ႈလႆႈၽိူၵ်ႇၶၢဝ်သေမူၺ်ႁႃႇသေၵမ်းတီႈၶႃႈ။
ၶႅၼ်းတေႃႈႁႂ်ႈၶႃႈၸဝ်ႈလႆႈငိၼ်းသဵင်ၵႂၢမ်း ဢၼ်ဝၢၼ်လႄႈၸၢင်ႈႁႂ်ႈ သႂၢင်ႇသိူဝ်းၼၼ်ႉသေၵမ်းတီႈၶႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ပိၵ်ႉသမ်ႉၸဝ်ႈႁဝ်းပေႃႉထုပ်ႉၶႃႈၸဝ်ႈလႄႈ ႁၵ်းပႅတ်ႈၶႃႈၸဝ်ႈယၢႆႈၵႂႃႇယဝ်ႉသေၵေႃႈ၊ၶႃႈၸဝ်ႈတၵ်းတေၶိုၼ်းလႆႈၸူမ်းသိူဝ်း၊ထႅင်ႈယူႇလူးၵွၼ်ႇဢေႃႈ။
ၶႅၼ်းတေႃႈဝၢႆႇၼႃႈၸဝ်ႈႁဝ်းပႅတ်ႈသေ ၵႃႈတီႈတၢင်းဢၼ်ၶႃႈၸဝ်ႈ ပူၼ်ႉလိူဝ်ၸိူဝ်းၼၼ်ႉလႄႈ မွတ်ႇထူပႅတ်ႈဢပျတ်ႈၶႃႈၸဝ်ႈၵႃႈမီးၸိူဝ်းၼၼ်ႉသေၵမ်းတီႈၶႃႈ။
ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈၽၢၼ်ႇသၢင်းႁဵတ်းပဵၼ်ႁူဝ်ၸႂ်ဢၼ်မူတ်းသႂ်ၼၼ်ႉ၊ ၵႃႈၼႂ်းၶႃႈၸဝ်ႈသေလႄႈ၊ သႂ်ႇပၼ်ၸႂ်သၽေႃးဢၼ်သိုဝ်ႈတေႃႇၼၼ်ႉ ပဵၼ်ဢၼ်မႂ်ႇသေၵမ်းတီႈၶႃႈ။
ၶႅၼ်းတေႃႈယႃႇပေႁေႃႈၶႃႈၸဝ်ႈဢွၵ်ႇပႅတ်ႈ သေၵႃႈတီႈဢထမ်ႇတေႃႇၸဝ်ႈႁဝ်း သေၵမ်းတီႈၶႃႈ။ ယႃႇပေၼႅတ်ႈသိမ်းဢဝ်ဝိၺိၺ်ႇဢၼ် မူတ်းၸၢင်ႇၸဝ်ႈႁဝ်းၼၼ်ႉသေၵႃႈတီႈ ၶႃႈၸဝ်ႈသေၵမ်းတီႈၶႃႈ။
ၶႅၼ်းတေႃႈၶိုၼ်းပၼ်ဢၶႂၢင်ႉတၢင်းဢၼ်သိူဝ်းပျေႃႇ ဢၼ်ပဵၼ်မႃးသေၵႃႈတီႈၵျေးၸူးတြႃးတၢင်းဢၼ်ၵႄႇၶျွတ်ႈဢဝ်ၼၼ်ႉသေၵမ်းတီႈၶႃႈ။ သမ်ႉႁႂ်ႈၶႃႈၸဝ်ႈမီးၸႂ်ဢၼ်ၶႂ်ႈထွမ်ႇဢဝ်ၸဝ်ႈႁဝ်းသေၵမ်းတီႈၶႃႈ။
မိူဝ်ႈၼၼ်ႉၶႃႈၸဝ်ႈတၵ်းဢဝ်ပိင်းၺၢပ်ႈတြႃးၸဝ်ႈႁဝ်း၊ သင်ႇသွၼ်ပၼ်ၶဝ်ၸိူဝ်းဢၼ်မီးဢပျတ်ႈၼၼ်ႉသေလႄႈ ၶဝ်ၼၼ်ႉတၵ်းၶိုၼ်းဝၢႆႇၸူးၸဝ်ႈႁဝ်းမႃးတီႈၶႃႈဢေႃႈ။
ၽြႃးပဵၼ်ၸဝ်ႈတီႈၶႃႈ။ ႁႂ်ႈဢသၢၵ်ႈၶႃႈၸဝ်ႈလွတ်ႈတၢင်းတၢႆလႄႈ ၵႄႇသႄႇၶျွတ်ႈဢဝ်ၶႃႈၸဝ်ႈသေၵမ်းတီႈၶႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ၶႃႈၸဝ်ႈတၵ်းၽုၺ်ႇမွၵ်ႇလၢတ်ႈၼႄ၊ လွင်ႈတၢင်းဢၼ်သိုဝ်ႈတေႃႇၸဝ်ႈႁဝ်းၼၼ်ႉၸူမ်းၸူမ်းသိူဝ်းသိူဝ်းဢေႃႈ။
ၸဝ်ႈၽြႃးတီႈၶႃႈ။ ၸွႆႈထႅမ်ႁႂ်ႈၶႃႈၸဝ်ႈမေႃလၢတ်ႈၸႃသေၵမ်းတီႈၶႃႈ။ ၶႃႈၸဝ်ႈတၵ်းယွင်ႈယေႃးၸဝ်ႈႁဝ်းတီႈၶႃႈဢေႃႈ။
ၸဝ်ႈႁဝ်းဢမ်ႇမီးဢလူဝ်ႇၶႂ်ႈလႆႈၶိူင်ႈတၢင်းလူႇၼၼ်ႉတီႈၶႃႈ။ သင်ဢမ်ႇၼၼ်၊ၶႃႈၸဝ်ႈတၵ်းသၢၵ်ႈလူႇၶိူင်ႈတၢင်းလူႇၸိူဝ်းၼၼ်ႉတီႈၶႃႈဢေႃႈ။ ၸဝ်ႈႁဝ်းဢမ်ႇထုၵ်ႇၸႂ်ၵျိူၵ်ႈၸႂ်တူဝ်တၢင်းလူႇတၢင်းဢၼ်ၽဝ်ၽႆးၼၼ်ႉတီႈၶႃႈ။
ၽြႃးပဵၼ်ၸဝ်ႈတီႈၶႃႈ။ ၶိူင်ႈတၢင်းလူႇၶႃႈၸဝ်ႈၸမ်ႉ၊ပဵၼ်ႁူဝ်ၸႂ်ဢၼ်ဢူၼ်ႈဢွၼ်ႇၶျႃးတႅမ်ႇတီႈၶႃႈဢေႃႈ။ ၸဝ်ႈႁဝ်းဢမ်ႇပႄႇပႅတ်ႈႁူဝ်ၸႂ်ဢၼ် ဢူၼ်ႈဢွၼ်ႇၶျႃးတႅမ်ႇ၊ ဢိၵ်ႇတင်းတၢင်းဢၼ်ၶုၵ်းၸႂ်လႆႈမႆႈၸႂ် ဢပျတ်ႈၼၼ်ႉတီႈၶႃႈ။
ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈပႃးၸႂ်ၸေႇတၼႃႇၸဝ်ႈႁဝ်းသေလႄႈ ႁဵတ်းၵျေးၸူးတီႈလွႆ ၸိဢုၼ်ႇ၊ သေၵမ်းတီႈၶႃႈ။ ၶႅၼ်းတေႃႈမႄးတႄႇမႄးႁဵတ်းလမ်းဝဵင်း ယေႇရုသလႅမ်ႇ၊ သေၵမ်းတီႈၶႃႈ။
မိူဝ်ႈၼၼ်ႉၸဝ်ႈႁဝ်းတၵ်းမူၼ်ႈပျေႃႇလူၺ်ႈၶိူင်ႈတၢင်းလူႇ၊ဢၼ်သၢၵ်ႈလူႇၸွမ်းၼင်ႇတြႃး ဢၼ်ဝႃႈတူဝ်တၢင်းလူႇဢၼ်ၽဝ်ၽႆးလႂ်၊ ဢိၵ်ႇတင်းဝူဝ်းငၢၼ်ဢၼ်သၢၵ်ႈလူႇ ၵႃႈၼိူဝ်ၶဵင်ႇတၢင်းလူႇၸဝ်ႈႁဝ်းၸိူဝ်းၼၼ်ႉ တီႈၶႃႈဢေႃႈ။
ၵူၼ်းဢၼ်ႁႅင်းယႂ်ႇၼႃႇ႟။ ႁဵတ်းသင်လႄႈမႂ်းဢုပ်ႇဢၢတ်ႇၼႂ်းလွင်ႈတၢင်းဢၼ်ဢမ်ႇတြႃးမႂ်းၼၼ်ႉၼင်ႇႁိုဝ်။ မႅတ်ႈတႃႇၽြႃးပဵၼ်ၸဝ်ႈၼၼ်ႉတႄႇယူႇတႃႇသေႇဢမ်ႇထၢတ်ႇဢေႃႈ။
လိၼ်ႉမႂ်းပဵၼ်ၸိူဝ်ႉၼင်ႇမိတ်ႈဢၼ်ၽၢႆၼႃႇလူင်လၢင်ၼၼ်ႉလႄႈၵျၢမ်ႇယႃႉဢၵျူဝ်းပိူၼ်ႈယူႇ၊ မႂ်းၵျၢမ်ႇပွင်ႁႂ်ႈလႆႈလၢတ်ႈမုသႃႇယူႇသေႇသေႇဢေႃႈ။
မႂ်းၵျိူၵ်ႈႁၵ်ႉထုၵ်ႇၸႂ်တုၸရိူၵ်ႈၼႃႇသေသုၸရိူၵ်ႈယူႇ၊ ၵႂၢမ်းမုသႃႇၼႃႇသေၵႂၢမ်းဢၼ်သိုဝ်ႈတေႃႇၼၼ်ႉယူႇဢေႃႈ။
ၵူၼ်းဢၼ်ၸၢင်ႈပႅတ်ႉၸၢင်ႈလႅၼ်႟။ မႂ်းၸၢင်ႈၵျိူၵ်ႈႁၵ်ႉထုၵ်ႇၸႂ်ၵႂၢမ်းဢၼ် တိူဝ်ႉၶိူၵ်ႈပိူၼ်ႈၼၼ်ႉဢေႃႈ။
ပိူဝ်ႈၼႆလႄႈ၊ၽြႃးပဵၼ်ၸဝ်ႈတၵ်းႁႂ်ႈမႂ်းလုလႅဝ်ဝႆႉယူႇသေႇသေႇလႄႈ မၼ်းၸဝ်ႈတၵ်းတိၺွပ်းမႂ်းႁႂ်ႈလႆႈဢဝ်မႂ်းဢွၵ်ႇႁိူၼ်းမႂ်းၵႂႃႇပႅတ်ႈဢေႃႈ။ မၼ်းၸဝ်ႈတၵ်းထူၺ်ႈဢဝ်မႂ်းဢွၵ်ႇသေၵႃႈၼႂ်းတီႈယူႇၶဝ်ၸိူဝ်းဢၼ်ဢသၢၵ်ႈလိပ်းယူႇၼၼ်ႉပႅတ်ႈဢေႃႈ။
ၵူၼ်းသိုဝ်ႈတေႃႇတင်းလၢႆတၵ်းႁၼ်လွင်ႈတၢင်းၼႆႉလႄႈၵူဝ်ႁႄဢေႃႈ။ မိူဝ်ႈၼၼ်ႉၶဝ်တၵ်းၶူဝ်မႂ်းသေလႄႈလၢတ်ႈဝႃႈ၊
“တူၺ်းတႃႉ၊ၵေႃႉၼႆႉပဵၼ်ၵေႃႉဢၼ်ဢမ်ႇဢိင်ပိုင်ႈၽြႃးပဵၼ်ၸဝ်ႈ ပုၼ်ႈဢၼ်မၼ်းတၵ်းလူင်ႉလွတ်ႈလီၼၼ်ႉသေလႄႈ၊ ဢႃးၵူဝ်းဢုၵ်ႉၸႃႇၸေးၸိမ်ႇဢၼ်လိူင်ႇၸႂ်ၼၼ်ႉသေယဝ်ႉ၊ ႁႂ်ႈတူဝ်မၼ်းလႆႈဢိင်ပိုင်ႈလူၺ်ႈတၢင်းဢၼ်မၢၵ်ႈမီးမၼ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵဝ်ၸမ်ႉ၊ပဵၼ်ၸိူဝ်ႉၼင်ႇတူၼ်ႈသၢၼ်ႇလုၼ်ႇဢၼ်ၶဵဝ်လီၵႃႈၼႂ်းႁိူၼ်းၽြႃးပဵၼ်ၸဝ်ႈၼၼ်ႉလႄႈ ယုမ်ႇမၢတ်ႈဢိင်ပိုင်ႈမႅတ်ႈတႃႇၵရုၼႃႇမၼ်းၸဝ်ႈယူႇတႃႇသေႇဢမ်ႇထၢတ်ႇဢေႃႈ။
ၽြႃးပဵၼ်ၸဝ်ႈတီႈၶႃႈ။ ၶႃႈၸဝ်ႈတၵ်းယွင်ႈယေႃးၵျေးၸူးၸဝ်ႈႁဝ်းယူႇ၊ ပုၼ်ႈလွင်ႈတၢင်းဢၼ်ၸဝ်ႈႁဝ်းႁဵတ်းၼၼ်ႉသေႇသေႇတီႈၶႃႈဢေႃႈ။ ၶႃႈၸဝ်ႈတၵ်းၽုၺ်ႇမွၵ်ႇလၢတ်ႈၼႄၼႃႇမႃႉၸိုဝ်ႈသဵင်ၸဝ်ႈႁဝ်း၊ ၵွပ်ႈပိူဝ်ႈမၼ်းပဵၼ်ဢၼ်လီဢၼ်မျၢတ်ႈၼႃႇၼၼ်ႉ၊ ၵႃႈတီႈၽၢႆႇၼႃႈၵူၼ်းၸဝ်ႈႁဝ်းၸိူဝ်းၼၼ်ႉ တီႈၶႃႈဢေႃႈ။
ၵူၼ်းဢၼ်မိူၵ်ႈၼၼ်ႉၸၢင်ႈလၢတ်ႈတီႈတူဝ်ၸဝ်ႈၵဝ်ႇလႄႈဝႃႈ၊ “ဢမ်ႇမီးၽြႃးပဵၼ်ၸဝ်ႈၵူၺ်း၊” ဝႃႈၼင်ႇၼႆဢေႃႈ။ ၶဝ်ၼၼ်ႉၸၢင်ႈႁၢႆႉမိူၵ်ႈဝႆႉလႄႈ၊ႁဵတ်းတုၸရိူၵ်ႈဢၼ်လီႁင်ႈဢဵတ်ႇသဵတ်ႇဢေႃႈ။ ၵေႃႉဢၼ်ၸၢင်ႈႁဵတ်းတၢင်းဢၼ်သိုဝ်ႈတေႃႇၼၼ်ႉဢမ်ႇမီးသေၵေႃႉသေၵူၼ်း။
ၽြႃးပဵၼ်ၸဝ်ႈယူႇၵႃႈၼိူဝ်ၽုင်ႇၵၢင်ႁၢဝ်လႄႈ ၵူမ်ႈတူၺ်းၵူၼ်းတင်းလၢႆ၊ ႁႂ်ႈလႆႈႁၼ်လွင်ႈဢၼ်ၵေႃႉဢၼ်ႁုၸႅင်ႈ၊ ၵေႃႉဢၼ်ႁႃၽြႃးပဵၼ်ၸဝ်ႈ၊ မီးသေၵေႃႉသေၵူၼ်းႁိုဝ်၊ဢမ်ႇမီးႁိုဝ်ၼၼ်ႉဢေႃႈ။
ၵူၼ်းတင်းသဵင်ႈတင်းလူင်သဵတ်ႈၸႃႇလုယဝ်ႉ၊ ၶဝ်ႁၢႆႉမိူၵ်ႈမိူၼ်မိူၼ်ၵၼ်ဢေႃႈ။ ၼႂ်းၶဝ်ၼၼ်ႉၵေႃႉဢၼ်ၸၢင်ႈၵမ်ၵျၢင်ႉဢၼ်လီဢၼ်ငၢမ်းဢမ်ႇမီး၊သေၵေႃႉၵေႃႈဢမ်ႇမီး။
ၽြႃးပဵၼ်ၸဝ်ႈထၢမ်လႄႈဝႃႈ၊ “ၶဝ်ဢမ်ႇမီးၸႂ်ဢၼ်ႁုဢၼ်ၸႅင်ႈႁိုဝ်း၊ ၶဝ်ၸိူဝ်းဢၼ်ႁဵတ်းဢမ်ႇတြႃးတင်းသဵင်ႈတင်းလူင်ၼႆႉပဵၼ်ၵူၼ်းဢထမ်ႇမႃႉႁိုဝ်း၊ ၶဝ်ၸၢင်ႈၸူၼ်ၵိၼ်ၵူၼ်းၵဝ်တင်းလၢႆမိူၼ်ၸိူဝ်ႉၼင်ႇဢၼ်ၶဝ်ႁဵတ်းၵိၼ်ၶဝ်ႈမုၼ်းၼၼ်ႉလႄႈ၊ ၶဝ်ဢမ်ႇတွၼ်ႉႁဵတ်းပထၼႃႇတၢင်းဢၼ်သူးတွင်းတီႈၵဝ်၊” ဝႃႈၼင်ႇၼႆဢေႃႈ။
ၶဝ်ၼၼ်ႉတၵ်းမီးတၢင်းဢၼ်ၵူဝ်ႁႄၼႃႇလူင်လၢင် ထၢၼ်ႈပေႃးပဵၼ်တၢင်းၵူဝ်ဢၼ်ၶဝ် ဢမ်ႇတွၼ်ႉလႆႈၶၢမ်ႇသေပွၵ်ႈၼၼ်ႉဢေႃႈ။ လွင်ႈမၼ်းၸမ်ႉ၊ၽြႃးပဵၼ်ၸဝ်ႈတၵ်းႁႂ်ႈလုပ်ႇၶဝ်ၸိူဝ်းဢၼ်၊ဢမ်ႇမီးၽြႃးတြႃးၼၼ်ႉ ၽၢတ်ႇၽႄၵၼ်မၢၵ်ႇမိူဝ်ၵႂႃႇဢေႃႈ။ ၽြႃးပဵၼ်ၸဝ်ႈပႄႇပႅတ်ႈၶဝ်ယဝ်ႉလႄႈမဵဝ်း ဢိသရေး၊ တၵ်းပႄႉၼႅင်ႇၶဝ်လုမ်းလုမ်းဢေႃႈ။
ႁႂ်ႈၵျေးၸူးတၢင်းဢၼ်ၵႄႇၶျွတ်ႈဢဝ်မဵဝ်း ဢိသရေး၊ ၼၼ်ႉပေႃႇဢွၵ်ႇ ၵႃႈၼိူဝ်လွႆ ၸိဢုၼ်ႇ၊ မႃးသေၵမ်းလူၺ်ႈ။ မိူဝ်ႈဢၼ်ၽြႃးပဵၼ်ၸဝ်ႈႁႂ်ႈၶဝ်ၶိုၼ်းၶိုၼ်ႈယႂ်ႇလႆႈလီလႆႈပဵၼ်ထႅင်ႈၼၼ်ႉၸိုင်၊ ၵူၼ်းမဵဝ်း ဢိသရေး၊ တင်းလၢႆတၵ်းတေလႆႈ သႂၢင်ႇသိူဝ်းမူၼ်ႈပျေႃႇၼႃႇလူင်လၢင်ဢေႃႈ။
ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈဢဝ်တင်းတၼ်းၶူဝ်းၼႃႇမႃႉၸိုဝ်ႈသဵင်ၸဝ်ႈႁဝ်း ၵႄႇသႄႇၶျွတ်ႈဢဝ်ၶႃႈၸဝ်ႈသေၵမ်းတီႈၶႃႈ။ ၶႅၼ်းတေႃႈဢဝ်တင်းႁႅင်းဢႃႇၼုၽေႃႇၸဝ်ႈႁဝ်းပွႆႇႁႂ်ႈၶႃႈၸဝ်ႈလွတ်ႈသေၵမ်းတီႈၶႃႈ။
ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈထွမ်ႇဢဝ်ၵႂၢမ်းသူးတွင်းၶႃႈၸဝ်ႈလႄႈ ဢဝ်ႁူထွမ်ႇငိၼ်းၵႂၢမ်းဢၼ်ဢွၵ်ႇသူပ်းၶႃႈၸဝ်ႈၼၼ်ႉသေၵမ်းတီႈၶႃႈ။
လွင်ႈမၼ်းၸမ်ႉ၊ၵူၼ်းဢၼ်မႃႇၼႃႉၸႂ်သုင်ၶဝ် ဢွၼ်ၵၼ်မႃးတိုၵ်းတေႃးၶႃႈၸဝ်ႈဢေႃႈ။ ၵူၼ်းဢၼ်ႁၢဝ်ႈၵျၢမ်းတင်းလၢႆ ၵျၢမ်ႇႁႃဢဝ်ၶႃႈၸဝ်ႈတၢႆတီႈၶႃႈဢေႃႈ။ ၶဝ်ၼၼ်ႉဢမ်ႇထွၵ်ႈလူၺ်ႈၼႃႈ ၽြႃးပဵၼ်ၸဝ်ႈတီႈၶႃႈ။
ၽြႃးပဵၼ်ၸဝ်ႈၸမ်ႉ၊ပဵၼ်ၽြႃးဢၼ် ၸွႆႈထႅမ်မႃႉၸႃႉၵဝ်၊ပဵၼ်ၽြႃးဢၼ် ၵႅတ်ႇၶႄႁႄႉၵင်ႈၵဝ်ဢေႃႈ။
ႁႂ်ႈၽြႃးပဵၼ်ၸဝ်ႈဢဝ်ဢၼ်ႁၢႆႉဢၼ်မိူၵ်ႈၶဝ်ၼၼ်ႉၶိုၼ်းတွပ်ႇတႅၼ်းပၼ်တၢမ်ႇ၊ တီႈရၢၼ်ႇသူႇၵဝ်တင်းလၢႆၼၼ်ႉသေၵမ်းလူၺ်ႈ။ ၶႅၼ်းတေႃႈထွၵ်ႈလူၺ်ႈသဵတ်ႈၸႃႇၸဝ်ႈႁဝ်းၼၼ်ႉသေလႄႈပႄႇပႅတ်ႈၶဝ်သေၵမ်းတီႈၶႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈတၵ်းပႃးၸႂ်ၸေႇတၼႃႇဢၼ်ၸူမ်းသိူဝ်းလႄႈ ႁဵတ်းတၢင်းဢၼ်သၢၵ်ႈလူႇတီႈၸဝ်ႈႁဝ်းတီႈၶႃႈဢေႃႈ။ ထႃႇဝရႃႉၽြႃး၊ တီႈၶႃႈၶႃႈၸဝ်ႈတၵ်းယွင်ႈယေႃးၼႃႇမႃႉၸိုဝ်ႈသဵင်ၸဝ်ႈႁဝ်း၊ ၵွပ်ႈပိူဝ်ႈမၼ်းပဵၼ်ဢၼ်လီဢၼ်မျၢတ်ႈၼႃႇၼၼ်ႉတီႈၶႃႈဢေႃႈ။
လွင်ႈမၼ်းၸမ်ႉ၊ၸဝ်ႈႁဝ်းၵႄႇၼုၵ်ႈဢဝ် ၶႃႈၸဝ်ႈဢွၵ်ႇသေၵႃႈၼႂ်း ၽေးတုၵ်ႉၶႃႉၵႃႈမီးသေလႄႈ၊ ၶႃႈၸဝ်ႈလႆႈႁၼ်လွင်ႈတၢင်းဢၼ်ရၢၼ်ႇသူႇၵဝ်တင်းလၢႆတူၵ်းသုမ်းၼၼ်ႉယဝ်ႉတီႈၶႃႈဢေႃႈ။
ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈထွမ်ႇဢဝ်ၵႂၢမ်းသူးတွင်းၶႃႈၸဝ်ႈသေၵမ်းတီႈၶႃႈ။ ယႃႇပေဝၢႆႇၼႃႈၸဝ်ႈႁဝ်းသေၵႃႈတီႈတၢင်းဢၼ်ၶႃႈၸဝ်ႈလဝ်ႈယွၼ်းၼႆႉသေၵမ်းတီႈၶႃႈ။
ၶႅၼ်းတေႃႈထွမ်ႇငိၼ်းသေလႄႈ ၶိုၼ်းဢိူဝ်သေၵမ်းတီႈၶႃႈ။ ၶႃႈၸဝ်ႈလႆႈမီးၸႂ်ဢၼ်တႅၵ်ႇယၢႆႈၵွပ်ႈပိူဝ်ႈၶႃႈၸဝ်ႈမွင်ၸႂ်ၼၼ်ႉလႄႈ။
ၶႃႈၸဝ်ႈလႆႈၵူဝ်ႁႄသဵင်ဢၼ်လွၵ်ႇဢၼ်ငိုတ်ႈရၢၼ်ႇသူႇၶႃႈၸဝ်ႈၸိူဝ်းၼၼ်ႉ၊ဢိၵ်ႇတင်း လႆႈၵူဝ်ႁႄတၢင်းဢၼ်ၵူၼ်းဢၼ်ႁၢႆႉဢၼ်မိူၵ်ႈၶဝ်ၼိၵ်ႈၸၢၵ်ႈလႄႈတဵၵ်းငႅၼ်းၼၼ်ႉဢေႃႈ။ ၶဝ်ၼၼ်ႉႁႂ်ႈၽေးတုၵ်ႉၶႃႉတူၵ်းသႂ်ႇၵႃႈၼိူဝ်ၶႃႈၸဝ်ႈလႄႈ ၶဝ်ပႃးတင်းၸႂ်တေႃးသႃႉယႃႉယုၵ်ႉၶႃႈၸဝ်ႈတီႈၶႃႈဢေႃႈ။
ၶႃႈၸဝ်ႈၸဵပ်းၸႂ်ၼႃႇၵႃႈတီႈတၢင်းၼႂ်း ၶႃႈၸဝ်ႈၼၼ်ႉလႄႈတၢင်းဢၼ်ၵူဝ် ဢၼ်ႁႄၽေးတၢင်းတၢႆၼၼ်ႉ တူၵ်းႁွတ်ႈမႃးၼိူဝ်ၶႃႈၸဝ်ႈတီႈၶႃႈဢေႃႈ။
တၢင်းဢၼ်ၵူဝ်ႁႄသၼ်ႇဝႆၼၼ်ႉတူၵ်းႁွတ်ႈတီႈၶႃႈၸဝ်ႈလႄႈ တၢင်းဢၼ်တူၵ်းၸႂ်တိုၼ်ႇၸႂ်ၼႃႇလူင်လၢင်ၼၼ်ႉႁူမ်ႇသုမ်ႇၶႃႈၸဝ်ႈဝႆႉတီႈၶႃႈဢေႃႈ။
ၶႃႈၸဝ်ႈၶႂ်ႈမီးပိၵ်ႇမိူၼ်ၸိူဝ်ႉၼင်ႇၼူၵ်ႉတူႈ တီႈၶႃႈဢေႃႈ။ ပေႃးၶႃႈၸဝ်ႈမီး၊ၶႃႈၸဝ်ႈတေမိၼ်ပၢႆႈၵႂႃႇႁႂ်ႈလႆႈႁႃတီႈလိုဝ်ႈတီႈၶႃႈဢေႃႈ။
ၸႂ်ႈတီႈၶႃႈယဝ်ႉ။ ၶႃႈၸဝ်ႈတေမိၼ်ၵႂႃႇၵႃႈတီႈဢၼ်ၵႆသေလႄႈတႄႇႁဵတ်းႁိူၼ်းယေး ၵႃႈၼႂ်းထိူၼ်ႇလႅင်ႉပုၼ်ႉဢေႃႈ။
ၶႃႈၸဝ်ႈတေႁိပ်ႈၼႅတ်ႈပၢႆႈၸူးၵႃႈတီႈႁူမ်ႈၽူၺ်း၊ ႁႂ်ႈလႆႈၵၢင်းလွတ်ႈတင်းၽူၼ်လူင်လူမ်းလူင် ဢၼ်ႁႅင်းယႂ်ႇၼႃႇၼၼ်ႉဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈ ႁႂ်ႈၽႃႇသႃႇၵႂၢမ်းၶဝ်ပႅၵ်ႇပိူင်ႈယုင်ႈယၢင်ႈၵၼ်ၵႂႃႇသေၵမ်းတီႈၶႃႈ။ လွင်ႈမၼ်းၸမ်ႉ၊ၶႃႈၸဝ်ႈလႆႈႁၼ်တၢင်း ဢၼ်ႁၢဝ်ႈဢၼ်ၵျၢမ်း၊ ဢိၵ်ႇတင်းတၢင်းဢၼ်လုၵ်ႉၽိုၼ်ႉၼၼ်ႉၵႃႈၼႂ်းဝဵင်းယဝ်ႉတီႈၶႃႈယဝ်ႉ။
ၶဝ်တႆႇၸွမ်းလဵပ်ႈၸွမ်းလမ်းဝဵင်းယူႇ ဢမ်ႇထၢတ်ႇသေဝၼ်းသေၶိုၼ်းလႄႈ တၢင်းဢၼ်ႁၢႆႉဢၼ်ယုတ်ႈ ဢိၵ်ႇတင်းတၢင်းဢၼ်ယႃႉဢၼ်ယုၵ်ႉမီးၵႃႈၼႂ်းဝဵင်းၼၼ်ႉတီႈၶႃႈဢေႃႈ။
တၢင်းဢၼ်လုဢၼ်သုမ်းမီးၵႂႃႇၵူႈတီႈၵူႈလႅၼ်လႄႈ၊ၵႃႈတီႈၵၢင်ၵၢတ်ႇၸိူဝ်းၼၼ်ႉၵေႃႈ မီးတၢင်းဢၼ်တဵၵ်းဢၼ်ငႅၼ်း ဢိၵ်ႇတင်းတၢင်းဢၼ်ၵူတ်ႉၵိၼ်ၵၼ်ယူႇတီႈၶႃႈဢေႃႈ။
ၵေႃႉဢၼ်သႄႉသွမ်းၵဝ်ၼၼ်ႉပေႃးမၼ်း ပဵၼ်ရၢၼ်ႇသူႇၵဝ်ၸိုင်၊ ၵဝ်ယိူၼ်ႉၶၢမ်ႇလႆႈယူႇဢေႃႈ။ ၵေႃႉဢၼ်သႄႉသွမ်းတေႃႇၵဝ်ၼၼ်ႉ ပေႃးမၼ်းသမ်ႉပဵၼ်ၵေႃႉဢၼ်ၶတ်းၵဝ်ၸိုင်၊ၵဝ်ငိူင်ႉဝႄႈပႅတ်ႈမၼ်းလႆႈယူႇဢေႃႈ။
ၵူၺ်းၵႃႈ၊ပဵၼ်မႂ်း၊ၵေႃႉဢၼ်ၽေႃႇၽၢၵ်ႈ ၵၼ်တင်းၵဝ်၊ၵေႃႉသႄႈၵဝ်၊ ၵေႃႉဢၼ်မိုတ်ႈၵိုဝ်းၵၼ်တင်းၵဝ်ဢေႃႈ။
ႁဝ်းလႆႈဢုပ်ႇၵုမ်လၢတ်ႈၸႃတေႃႇၵၼ်ဝၢၼ်ဝၢၼ်မၼ်းမၼ်းလႄႈ ၸွမ်းၵၼ်ၵႂႃႇႁဵတ်းဝၢတ်ႈၽြႃးၵႃႈၼႂ်း ၵျွင်းပိၵ်ႈမၢၼ်ႇၸဝ်ႈ၊ႁူမ်ႈလူၺ်ႈၵၼ်ယဝ်ႉ။
ႁႂ်ႈတၢင်းတၢႆၶိုၵ်းၶၢၵ်းႁွတ်ႈထိုင်တီႈၶဝ်သေၵမ်းလူၺ်ႈ။ ႁႂ်ႈၶဝ်လူင်းၵႂႃႇၵႃႈတီႈမိူင်းမရၼႃႉတင်းလိပ်းသေၵမ်းလူၺ်ႈ။ လွင်ႈမၼ်းၸမ်ႉ၊တုၸရိူၵ်ႈမီးယူႇၵႃႈၼႂ်းႁိူၼ်းၶဝ်ၵႃႈၼႂ်းႁူဝ်ၸႂ်ၶဝ်ၼၼ်ႉဢေႃႈ။
ၵဝ်ၸမ်ႉ၊ႁွင်ႉၵၢဝ်ႇတီႈၽြႃးပဵၼ်ၸဝ်ႈလႄႈ ထႃႇဝရႃႉၽြႃး၊ တၵ်းၵႄႇသႄႇၶျွတ်ႈဢဝ်ၵဝ်ဢေႃႈ။
ၶိင်ႇၵၢင်ၼႂ်၊ၶိင်ႇတဵင်ႈဝၼ်း၊ၶိင်ႇႁူဝ်ၶမ်ႈ၊ၵဝ် တမ်ႇၼွႆႉမွင်ၸႂ်၊ၶၢင်းၶီၶၢင်းၽၢၼ်ယူႇလႄႈ၊ မၼ်းၸဝ်ႈငိၼ်းသဵင်ၵဝ်ဢေႃႈ။
မၼ်းၸဝ်ႈတၵ်းတေထုတ်ႇၼုၵ်ႈဢဝ်ၵဝ်ႁႂ်ႈလႆႈယူႇ လူင်ႉလီလွတ်ႈလီသေၵႃႈတီႈပၢင်သိုၵ်း၊ ဢၼ်ၵဝ်တိုၵ်းတေႃးၵၼ်တင်းရၢၼ်ႇသူႇ ဢၼ်မီးၼမ်ၼႃႇၼၼ်ႉဢေႃႈ။
ၽြႃးပဵၼ်ၸဝ်ႈဢၼ်ဢုပ်ႉပိူင်ႇယူႇၼိၵ်ႈၸႃႉထႃႇဝရႃႉၼၼ်ႉတၵ်းထွမ်ႇငိၼ်းၵဝ်သေလႄႈ တိုၵ်းတေႃးၶဝ်ပႅတ်ႈၵွပ်ႈပိူဝ်ႈၶဝ်ဢမ်ႇၶၢမ်ႇၶၢႆႉပုတ်ႈ၊ဢမ်ႇၵူဝ်ႁႄၽြႃးပဵၼ်ၸဝ်ႈၼၼ်ႉဢေႃႈ။
ၵေႃႉဢၼ်ယၢမ်ႈမိုတ်ႈၵိုဝ်းၵဝ်ၼၼ်ႉ၊ဝၢတ်ႈတိုၵ်းတေႃးၵေႃႉသႄႈမၼ်းတင်းလၢႆယဝ်ႉလႄႈ ယႃႉၵတိသဵတ်ႈၸႃႇမၼ်းယဝ်ႉ။
ၵႂၢမ်းမၼ်းၼၼ်ႉၸၢင်ႈမိုၼ်ႈၼႃႇသေ ၼမ်ႉမၼ်းထေႃးပၢတ်ႈသေၵေႃႈ ၵႃႈၼႂ်းႁူဝ်ၸႂ်မၼ်းၸမ်ႉ၊မီးတၢင်းဢၼ်ၸင်းဢေႃႈ။ ၶေႃႈၵႂၢမ်းမၼ်းၸၢင်ႈမိုၼ်ႈၼႃႇသေ ၼမ်ႉမၼ်းသေၵေႃႈပဵၼ်လၢပ်ႇပဵၼ်လႅဝ်း ဢၼ်ၽၢႆဝႆႉဢေႃႈ။
ဢဝ်တုၵ်ႉၶႃႉတၢင်းၶၢၼ်ၸႂ်မႂ်းၼၼ်ႉဢၢပ်ႈပၼ်တီႈ ထႃႇဝရႃႉၽြႃး၊ တႃႉ။ မၼ်းၸဝ်ႈတၵ်းၵႅတ်ႇၶႄႁႄႉၵင်ႈမႂ်းဢေႃႈ။ မၼ်းၸဝ်ႈဢမ်ႇတွၼ်ႉပၼ်ႁႂ်ႈၵူၼ်းဢၼ် သိုဝ်ႈတေႃႇၼၼ်ႉလႆႈတူၵ်းသုမ်း။
ၽြႃးပဵၼ်ၸဝ်ႈတီႈၶႃႈ။ ၸဝ်ႈႁဝ်းတၵ်းဢဝ်ၶဝ်ၸိူဝ်းဢၼ်ဢဝ် ဢသၢၵ်ႈၵူၼ်းတၢႆလႄႈပႅတ်ႉၵိၼ် လႅၼ်ၵိၼ်ၸိူဝ်းၼၼ်ႉ၊ ၶျႃးတူၵ်းသႂ်ႇၵႃႈၼႂ်းၶုမ်ပႃႇႁဵဝ်ႈၶဝ် ၸဵမ်မိူဝ်ႈၶဝ်ယင်းဢမ်ႇပႆႇလႆႈယူႇ၊ ၼႂ်းၸူဝ်ႈတႃႇဢသၢၵ်ႈၶဝ်ၶိုင်ႈၼိုင်ႈၼၼ်ႉဢေႃႈ။ ၶႃႈၸဝ်ႈၸမ်ႉ၊ယုမ်ႇယမ်ဢိင်ပိုင်ႈၸဝ်ႈႁဝ်းယူႇ တီႈၶႃႈဢေႃႈ။
ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈဢဵတ်းလူၶႃႈၸဝ်ႈ ၵွပ်ႈပိူဝ်ႈၶႃႈၸဝ်ႈလႆႈၶၢမ်ႇတၢင်းဢၼ်ပိူၼ်ႈ တိုၵ်းတေႃးၼၼ်ႉသေၵမ်းတီႈၶႃႈ။ ရၢၼ်ႇသူႇၶႃႈၸဝ်ႈၸိူဝ်းၼၼ်ႉ ၼိၵ်ႈၸၢၵ်ႈငႅၼ်းသႄးၶႃႈၸဝ်ႈယူႇၵူႈၶိင်ႇ ၵူႈၶႃႇတီႈၶႃႈဢေႃႈ။
ၶဝ်ၸိူဝ်းဢၼ်ၶတ်းၵၼ်တင်းၶႃႈၸဝ်ႈၼၼ်ႉ တိုၵ်းတေႃးၶႃႈၸဝ်ႈယူႇ၊ တင်းဝၼ်းတင်းဝၼ်းဢေႃႈ။ ၶဝ်ၼၼ်ႉမီးၼမ်ၼႃႇလူင်လၢင်တီႈၶႃႈဢေႃႈ။
ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ တီႈၶႃႈ။ မိူဝ်ႈဢၼ်ၶႃႈၸဝ်ႈ ၵူဝ်ႁႄၼၼ်ႉၶႃႈၸဝ်ႈတၵ်းယုမ်ႇမၢတ်ႈဢိင်ပိုင်ႈ ၸဝ်ႈႁဝ်းတီႈၶႃႈဢေႃႈ။
ၵဝ်ယုမ်ႇယမ်ဢိင်ပိုင်ႈၽြႃးပဵၼ်ၸဝ်ႈလႄႈၵဝ်ဢမ်ႇလႆႈၵူဝ်လႆႈႁႄ၊ ၵဝ်ယွင်ႈယေႃးၵတိမၼ်းၸဝ်ႈၼၼ်ႉဢေႃႈ။ ၵူၼ်းဢၼ်ၸၢင်ႈၽင်ႉဢုတူႇၼဝ်ႈၼႆႉ၊တၵ်းႁဵတ်းၸိူဝ်ႉၼင်ႇႁိုဝ်တီႈၵဝ်လႆႈ။
ရၢၼ်ႇသူႇၵဝ်ၸိူဝ်းၼၼ်ႉႁဵတ်းႁႂ်ႈၵဝ်ထူပ်းၽေးယူႇတင်းဝၼ်းတင်းဝၼ်းလႄႈ ၶဝ်ၵျၢမ်ႇပွင်ႁႂ်ႈလႆႈတိူဝ်ႉၶိူၵ်ႈၵဝ်ယူႇၵူၺ်းၵူၺ်းဢေႃႈ။
ၶဝ်ၸုတုမ်ၵၼ်ၵႃႈတီႈဢၼ်တဵတ်ႇဢၼ်မႅပ်းသေယဝ်ႉ၊လွမ်တူၺ်း ၵႃႈဢၼ်ၵဝ်ႁဵတ်းၵဝ်သၢင်ႈ၊ၵူႈၸိူဝ်ႉၵူႈပိူင်ၼၼ်ႉ၊လွမ်ပႂ်ႉႁႂ်ႈလႆႈဢဝ်ဢသၢၵ်ႈၵဝ်တၢႆဢေႃႈ။
ၽြႃးပဵၼ်ၸဝ်ႈတီႈၶႃႈ။ တႅၼ်းပၼ်ဢပျတ်ႈတၢမ်ႇၵွပ်ႈပိူဝ်ႈၶဝ်ႁၢႆႉမိူၵ်ႈၼၼ်ႉသေၵမ်းတီႈၶႃႈ။ ပႃးတင်းၸႂ်မႆႈၶႂ်ႈၸႃႉသေလႄႈႁႂ်ႈမဵဝ်းၵူၼ်းတင်းလၢႆတူၵ်းသုမ်းပႅတ်ႈသေၵမ်းတီႈၶႃႈ။
ၸဝ်ႈႁဝ်းႁုလွင်ႈဢၼ်ၶႃႈၸဝ်ႈလႆႈၶၢမ်ႇတုၵ်ႉၶႃႉၶၢၼ်ၸႂ်ထၼ်ႇႁိုဝ်ၼၼ်ႉယူႇလႄႈ ၶႅၼ်းတေႃႈဢဝ်ၼမ်ႉတႃၶႃႈၸဝ်ႈတင်းလၢႆ ထႅမ်သႂ်ႇၵႃႈၼႂ်းၼမ်ႉတဝ်ႈၸဝ်ႈႁဝ်းသေၵမ်းတီႈၶႃႈ။ တႅမ်ႈမၢႆဝႆႉၵႃႈၼႂ်းလိၵ်ႈၸရၢင်းၸဝ်ႈႁဝ်း ဢမ်ႇၸႂ်ႈတီႈၶႃႈႁိုဝ်း။
ၼႂ်းဝၼ်းဢၼ်ၶႃႈၸဝ်ႈႁွင်ႉၵၢဝ်ႇတီႈ ၸဝ်ႈႁဝ်းၼၼ်ႉ ရၢၼ်ႇသူႇၶႃႈၸဝ်ႈတင်းလၢႆတၵ်းတေ သုတ်ႉႁူၼ်ပၢႆႈဢေႃႈ။ ၶႃႈၸဝ်ႈႁုဝႃႈၽြႃးပဵၼ်ၸဝ်ႈမီးယူႇၽၢႆႇ ၶႃႈၸဝ်ႈလႄႈ
ၵႃႈတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၼၼ်ႉ ၶႃႈၸဝ်ႈယွင်ႈယေႃးၵတိသဵတ်ႈၸႃႇ မၼ်းၸဝ်ႈတီႈၶႃႈဢေႃႈ။
ၶႃႈၸဝ်ႈယုမ်ႇယမ်ဢိင်ပိုင်ႈမၼ်းၸဝ်ႈလႄႈ ၶႃႈၸဝ်ႈဢမ်ႇလႆႈၵူဝ်လႆႈႁႄ၊ ၵူၼ်းဢၼ်ၸၢင်ႈၽင်ႉဢုတူႇၼဝ်ႈၼႆႉတၵ်းႁဵတ်း ၸိူဝ်ႉၼင်ႇႁိုဝ်တီႈၵဝ်လႆႈ။
ၽြႃးပဵၼ်ၸဝ်ႈတီႈၶႃႈ။ ၵႃႈၼင်ႇဢၼ်ၶႃႈၸဝ်ႈမီးၵတိဝႆႉၼၼ်ႉ၊ ၶႃႈၸဝ်ႈတၵ်းသၢၵ်ႈလူႇတီႈၸဝ်ႈႁဝ်းတီႈၶႃႈဢေႃႈ။ ၶႃႈၸဝ်ႈတၵ်းႁဵတ်းတၢင်းလူႇဢၼ်တၢင်ႇၵျေးၸူးတီႈၸဝ်ႈႁဝ်း။
ၵွပ်ႈပိူဝ်ႈၸဝ်ႈႁဝ်းၵႄႇၼုၵ်ႈဢဝ်ၶႃႈၸဝ်ႈသေၵႃႈတီႈတၢင်းတၢႆလႄႈ ဢမ်ႇပၼ်ဢၶႂၢင်ႉႁႂ်ႈတိၼ်ၶႃႈၸဝ်ႈ လႆႈပြၢတ်ႈၵႂႃႇတီႈၶႃႈဢေႃႈ။ ပိူဝ်ႈၼႆလႄႈ၊ၶႃႈၸဝ်ႈလႆႈပႆၵႂႃႇၽၢႆႇၼႃႈ ၽြႃးပဵၼ်ၸဝ်ႈၵႃႈၼႂ်းဢၼ်လႅင်း၊ ဢၼ်ထွင်ႇၸူးၵႃႈၼိူဝ်ၶဝ်ၸိူဝ်းဢၼ်ဢသၢၵ်ႈ လိပ်းၼၼ်ႉတီႈၶႃႈဢေႃႈ။
ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈဢဵတ်းလူၶႃႈၸဝ်ႈသေၵမ်းတီႈၶႃႈ။ ဢဵတ်းလူၶႃႈၸဝ်ႈၵွပ်ႈပိူဝ်ႈဢၼ်ၶႃႈၸဝ်ႈမႃးသွၼ်ႈႁူမ်ႈၸဝ်ႈႁဝ်းၼၼ်ႉသေၵမ်းတီႈၶႃႈ။ ၵႃႈတႂ်ႈႁူမ်ႈပိၵ်ႇၸဝ်ႈႁဝ်းၼၼ်ႉၶႃႈၸဝ်ႈသွၼ်ႈယူႇ၊ တေႃႇထိုင်ႁွတ်ႈၽူၼ်လူင်လူမ်းလူင်ပူၼ်ႉၵႂႃႇၼၼ်ႉတီႈၶႃႈဢေႃႈ။
ၵဝ်ႁွင်ႉၵၢဝ်ႇတီႈၽြႃးပဵၼ်ၸဝ်ႈဢၼ်သုင်ၼႃႇသေပိူၼ်ႈဢၼ်ဝႃႈ၊ ၽြႃးပဵၼ်ၸဝ်ႈဢၼ်ပၼ်ဢၵျူဝ်းၵႃႈဢၼ်ၵဝ်လူဝ်ႇၼၼ်ႉတီႈၶႃႈဢေႃႈ။
မၼ်းၸဝ်ႈတၵ်းဢိူဝ်ၵဝ်သေၵႃႈတီႈၵၢင်ႁၢဝ်လႄႈ ၵႄႇသႄႇၶျွတ်ႈဢဝ်ၵဝ်၊တိုၵ်းပႅတ်ႈၶဝ်ၸိူဝ်းဢၼ်တဵၵ်းငႅၼ်းၵဝ်ယူႇၼၼ်ႉဢေႃႈ။ ၽြႃးပဵၼ်ၸဝ်ႈတၵ်းၼႄပျႃးမႅတ်ႈတႃႇၵရုၼႃႇမၼ်းၸဝ်ႈ ဢိၵ်ႇတင်းသဵတ်ႈၸႃႇမၼ်းၸဝ်ႈတီႈၵဝ်ဢေႃႈ။
ၵဝ်လႆႈၶၢမ်ႇတၢင်းဢၼ်ရၢၼ်ႇသူႇတင်းလၢႆ ၸိူဝ်းဢၼ်မိူၼ်ၸိူဝ်ႉၼင်ႇသၢင်ႇသီႈ ဢၼ်ၵိၼ်ၵူၼ်းၼၼ်ႉလွမ်ႉႁွပ်ႈဝႆႉဢေႃႈ။ ၶဵဝ်ႈၶဝ်ပဵၼ်ၸိူဝ်ႉၼင်ႇႁွၵ်ႇတင်းပိုၼ်လႄႈ လိၼ်ႉၶဝ်ပဵၼ်ၸိူဝ်ႉၼင်ႇလၢပ်ႇဢၼ် ၽၢႆၼႃႇၼၼ်ႉဢေႃႈ။
ၽြႃးပဵၼ်ၸဝ်ႈတီႈၶႃႈ။ ႁႂ်ႈၸဝ်ႈႁဝ်းမီးတၢင်းဢၼ်ယုၵ်ႉယွင်ႈ သုင်ၼႃႇသေၵၢင်ႁၢဝ်သေၵမ်းလူၺ်ႈ။ ႁႂ်ႈမုၼ်ၽုင်းၸဝ်ႈႁဝ်းမီးယူႇၵႃႈၼိူဝ်လိၼ်မိူင်းၼႆႉ၊ၵူႈတီႈၵူႈလႅၼ်သေၵမ်းလူၺ်ႈ။
ၶဝ်ႁၢင်ႈၶိုမ်းၵႃႈတီႈယၢင်ႈတိၼ်ၶႃႈၸဝ်ႈဝႆႉယဝ်ႉ။ ၵဝ်လႆႈမီးတၢင်းၸႂ်လဵၵ်ႉႁႅင်းဢူၼ်ႈၼႃႇယဝ်ႉ။ ၶဝ်ၶုတ်းၶုမ်ဝႆႉၵႃႈၼႂ်းသဵၼ်ႈတၢင်းၵဝ်ယဝ်ႉ။ ၵူၺ်းၵႃႈ၊တူဝ်ၶဝ်တူၵ်းၶဝ်ႈၵႃႈၼႂ်းၶုမ် ၸိူဝ်းၼၼ်ႉဢေႃႈ။
ၽြႃးပဵၼ်ၸဝ်ႈတီႈၶႃႈ။ ႁူဝ်ၸႂ်ၶႃႈၸဝ်ႈတႄႇမၼ်ႈယူႇတီႈၶႃႈဢေႃႈ။ ႁူဝ်ၸႂ်ၶႃႈၸဝ်ႈတႄႇယူႇတီႈၶႃႈဢေႃႈ။ ၶႃႈၸဝ်ႈတၵ်းႁဵတ်းၵႂၢမ်းယွင်ႈယေႃးၸဝ်ႈႁဝ်း တီႈၶႃႈဢေႃႈ။
ၸႂ်ဝိၺိၺ်ႇၵဝ်႟။ တိုၼ်ႇမႃးတႃႉ။ တိင်ႇၵဝ်၊ တရေႃးၵဝ်ၶဝ်႟။ တိုၼ်ႇမႃးတႃႉ။ ၵဝ်ၵေႃႈတၵ်းတိုၼ်ႇမႃးၸဝ်ႉၸဝ်ႉၸဵဝ်းၸဵဝ်း ယူႇဢေႃႈ။
ၸဝ်ႈၽြႃးတီႈၶႃႈ။ ၶႃႈၸဝ်ႈ တၵ်းယွင်ႈယေႃးၵျေးၸူးၸဝ်ႈႁဝ်း၊ ၵႃႈၼႂ်းၵၢင်မဵဝ်းၵူၼ်းတင်းလၢႆလႄႈ၊ ၶႃႈၸဝ်ႈတၵ်းယွင်ႈယေႃးၸဝ်ႈႁဝ်း၊ ၵႃႈၼႂ်းၵၢင်ၵူၼ်းၸဝ်ႈႁဝ်းတင်းလၢႆ တီႈၶႃႈဢေႃႈ။
မႅတ်ႈတႃႇၵရုၼႃႇၸဝ်ႈႁဝ်းၼၼ်ႉၶိုတ်းထိုင် ၽႃႉၵၢင်ႁၢဝ်လႄႈ သဵတ်ႈၸႃႇၸဝ်ႈႁဝ်းၵေႃႈၶိုတ်းထိုင် တွင်ႉၽႃႉတင်းလၢႆတီႈၶႃႈဢေႃႈ။
ၽြႃးပဵၼ်ၸဝ်ႈတီႈၶႃႈ။ ႁႂ်ႈၸဝ်ႈႁဝ်းမီး တၢင်းဢၼ်ယုၵ်ႉယွင်ႈသုင်ၼႃႇသေ ၵၢင်ႁၢဝ်သေၵမ်းလူၺ်ႈ။ ႁႂ်ႈမုၼ်သရေႇၸဝ်ႈႁဝ်းႁူမ်ႇသုမ်ႇၵႃႈၼိူဝ်လိၼ်မိူင်းၵူႈတီႈၵူႈလႅၼ်သေၵမ်းလူၺ်ႈ။
ၶုၼ်ဢၼ်ဢုပ်ႉပိူင်ႇၶဝ်႟။ ၸွင်ႇသူတႅပ်းတတ်းသိုဝ်ႈသိုဝ်ႈယူႇႁိုဝ်း၊ ၸွင်ႇသူတႅပ်းတတ်းၽဵင်ႇၽဵင်ႇ ၼႂ်းတၢင်းဢၼ်ၸီႇယၢင်ႇတြႃးတီႈၵူၼ်းတင်းလၢႆၼၼ်ႉႁိုဝ်း။
ဢမ်ႇၸႂ်ႈၵူၺ်း။ သူၵျၢမ်ႇပွင်ဢၼ်ဢမ်ႇတြႃးၵူၺ်းၵူၺ်းလႄႈ မိုဝ်းသူႁဵတ်းတၢင်းဢၼ်မိူၵ်ႈဢၼ်လိူင်းၵူၺ်းၵူၺ်းၵႃႈၼိူဝ်လိၼ်မိူင်းၼႆႉဢေႃႈ။
ၵူၼ်းႁၢႆႉၵူၼ်းမိူၵ်ႈၸၢင်ႈၵႂႃႇၸွမ်းသဵၼ်ႈတၢင်းဢၼ်ၽိတ်းပိူင်ႈ ၼႂ်းၸူဝ်ႈတႃႇဢသၢၵ်ႈ ၶဝ်ၼၼ်ႉလႄႈ၊ ၶဝ်လၢတ်ႈၵႂၢမ်းမုသႃႇၸႃႉၸဵမ်မိူဝ်ႈဝၼ်းဢၼ်ၶဝ်ၵိူတ်ႇလဵင်ႉမႃးၼၼ်ႉဢေႃႈ။
ၶဝ်မီးၵွင်ႉဢၼ်မိူၼ်ၸိူဝ်ႉၼင်ႇၵွင်ႉငူးလႄႈၶဝ်ဢိုတ်းႁူၶဝ်ဝႆႉ မိူၼ်ၸိူဝ်ႉၼင်ႇငူးႁဝ်ႇၵၢၵ်ႇဢၼ်ႁူၼူၵ်ႇ။
ဢၼ်ဢမ်ႇၸၢင်ႈငိၼ်းသဵင်ၵႂၢမ်းဢလမ်ႇပႄႇ ဢိၵ်ႇတင်းသဵင်ၵႃႇထႃႇသြႃႇမေႃၽီလၵ်းလႅမ်ၼႃႇၼၼ်ႉႁေႃးၼၼ်ႉဢေႃႈ။
ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈႁၵ်းႁိၵ်းၶဵဝ်ႈဢိၵ်ႇတင်းငႃးသၢင်ႇသီႈႁၢႆႉၸိူဝ်းၼၼ်ႉပႅတ်ႈသေၵမ်းတီႈၶႃႈ။
ႁႂ်ႈၶဝ်ႁၢႆလၢႆၵႂႃႇမိူၼ်ၸိူဝ်ႉၼင်ႇၼမ်ႉဢၼ်လႆၵႃႈၼႂ်းသၢႆးၼၼ်ႉသေၵမ်းလူၺ်ႈ။ ႁႂ်ႈၶဝ်လႆႈပဵၼ်မိူၼ်ၸိူဝ်ႉၼင်ႇယိူဝ်ႈယႃႈဢၼ်ပိူၼ်ႈယဵပ်ႇသႂ်ႇယၢႆႈၵႂႃႇဢႅၵ်းယႅၵ်း၊ ၵႃႈၼိူဝ်ၵၢင်တၢင်းၼၼ်ႉသေၵမ်းလူၺ်ႈ။
ႁႂ်ႈၶဝ်ပဵၼ်ၸိူဝ်ႉၼင်ႇတၢၵ်ႇတၢၼ်ဢၼ် သုတ်ႈယွမ်းၼႂ်းမိူဝ်ႈဢၼ်မၼ်းယင်းတိုၵ်ႉ လိူၼ်ႈၵႂႃႇယူႇၼၼ်ႉ၊ ဢိၵ်ႇတင်းႁႂ်ႈၶဝ်ပဵၼ်ၸိူဝ်ႉၼင်ႇလုၵ်ႈဢွၼ်ႇဢၼ်လုၼႂ်းတွင်ႉမႄႈမၼ်းလႄႈ ဢမ်ႇတၼ်းလႆႈႁၼ်ဢၼ်လႅင်းၼၼ်ႉ သေၵမ်းလူၺ်ႈ။
ၸူဝ်ႈဢၼ်ၶဝ်ဢမ်ႇပႆႇတၼ်းႁုၼၼ်ႉၶဝ်လႆႈၶၢမ်ႇတၢင်းဢၼ်တီႇပႅတ်ႈ၊ မိူၼ်ၸိူဝ်ႉၼင်ႇယုမ်းၼၢမ်တၢင်းလၢႆဢၼ်ၶဵဝ်ယူႇၸိဝ်းငိဝ်းသေဢမ်ႇဝႃႈ၊ သမ်ႉပဵၼ်ဢၼ်မႆႈၽႆးယူႇသေဢမ်ႇဝႃႈၸိူဝ်းၼၼ်ႉတၵ်းလႆႈၶၢမ်ႇတၢင်းဢၼ် ပတ်းၽဵဝ်ႈပႅတ်ႈဢေႃႈ။
ၶဝ်ၸိူဝ်းဢၼ်သိုဝ်ႈတေႃႇၼၼ်ႉတၵ်းဢွၼ်ၵၼ်ၸူမ်းသိူဝ်းမိူဝ်ႈဢၼ်ႁၼ်၊ တၢင်းဢၼ်ပၼ်တၢမ်ႇၸိူဝ်ႉၼင်ႇၼၼ်ၼၼ်ႉလႄႈ၊ ၶဝ်တၵ်းဢွၼ်ၵၼ်ယဵပ်ႇၵႂႃႇတဝ်ၵႂႃႇၵႃႈၼႂ်းလိူတ်ႈၵူၼ်းဢၼ်ႁၢႆႉမိူၵ်ႈၸိူဝ်းၼၼ်ႉဢေႃႈ။
ၵူၼ်းတင်းလၢႆတၵ်းဢွၼ်ၵၼ်လၢတ်ႈလႄႈဝႃႈ၊ “မီးဢၵျူဝ်းၵျေးၸူးပုၼ်ႈၵေႃႉဢၼ်သိုဝ်ႈတေႃႇၼၼ်ႉတႄႉဢေႃႈ။ မီးၽြႃးပဵၼ်ၸဝ်ႈဢၼ်ၸီႇယၢင်ႇတြႃးၵႃႈၼိူဝ်လိၼ်မိူင်းၼႆႉတႄႉဢေႃႈ၊” ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ ၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈႁႂ်ႈလွတ်ႈသေ ၵႃႈၼႂ်းမိုဝ်းရၢၼ်ႇသူႇၶႃႈၸဝ်ႈတင်းလၢႆသေၵမ်းတီႈၶႃႈ။ ၶႅၼ်းတေႃႈၵႅတ်ႇၶႄႁႄႉၵင်ႈပၼ်ၶႃႈၸဝ်ႈသေ ၵႃႈတီႈၽေးၶဝ်ၸိူဝ်းဢၼ်တိုၵ်းတေႃး ၶႃႈၸဝ်ႈၼၼ်ႉသေၵမ်းတီႈၶႃႈ။
ၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈသေၵႃႈၼႂ်းမိုဝ်းၵူၼ်းႁၢႆႉၵူၼ်းမိူၵ်ႈတၢင်းလၢႆလႄႈ ထုတ်ႇၼုၵ်ႈဢဝ်ၶႃႈၸဝ်ႈသေ ၵႃႈၼႂ်းမိုဝ်းၶဝ်ၸိူဝ်းဢၼ်ဢဝ်ဢသၢၵ်ႈၵူၼ်းတၢႆၼၼ်ႉ၊သေၵမ်းတီႈၶႃႈ။
တူၺ်းတီႈၶႃႈလူး။ ၶဝ်ဢွၼ်ၵၼ်လွမ်ပႂ်ႉ ႁႂ်ႈလႆႈဢဝ်ၶႃႈၸဝ်ႈတၢႆလႄႈ ၵူၼ်းဢၼ်လိူင်းၵျၢမ်းၸိူဝ်းၼၼ်ႉဢွၼ်ၵၼ်ၸုတုမ်ၵၼ်ႁဵတ်းၶတ်းၶႃႈၸဝ်ႈတီႈၶႃႈဢေႃႈ။ ပဵၼ်ၵွပ်ႈပိူဝ်ႈၶႃႈၸဝ်ႈၽိတ်းပိူင်ႈဢမ်ႇၸႂ်ႈတီႈၶႃႈ။ ပဵၼ်ၵွပ်ႈပိူဝ်ႈဢပျတ်ႈၶႃႈၸဝ်ႈ ဢမ်ႇၸႂ်ႈတီႈၶႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈယင်းဢမ်ႇမီးဢပျတ်ႈၵႃႈသင်လႄႈ ၶဝ်ၶုၼ်ႇလႅၼ်ႈမႃးမႄးႁႅၼ်းပႂ်ႉထႃႈဝႆႉယူႇၶႃႈဢေႃႈ။
ထႃႇဝရႃႉၽြႃး၊ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈမဵဝ်း ဢိသရေး၊ တီႈၶႃႈ။ ၶႅၼ်းတေႃႈတိုၼ်ႇမႃးလႄႈလူတူၺ်းႁႂ်ႈလႆႈၸွႆႈထႅမ်မႃႉၸႃႉၶႃႈၸဝ်ႈသေၵမ်းတီႈၶႃႈ။ လုၵ်ႉလႄႈပၼ်တၢမ်ႇတီႈၵူၼ်းတၢင်ႇၸိူဝ်ႉ တၢင်ႇၶိူဝ်းၸိူဝ်းၼၼ်ႉလႄႈ ယႃႇပေဢဵတ်းလူၵူၼ်းမိူၵ်ႈၸိူဝ်းဢၼ်ယႃႉသဵတ်ႈၸႃႇၼၼ်ႉသေၵမ်းတီႈၶႃႈ။
ၶဝ်ၼၼ်ႉဢွၼ်ၵၼ်ၶိုၼ်းမႃးၶိင်ႇႁူဝ်ၶမ်ႈလႄႈ ၵိုဝ်တႃငႃးၶဵဝ်ႈယူႇမိူၼ်မႃဢၼ် ႁဝ်ႇႁွၼ်သေလႄႈၵႂႃႇမႃးလႄႇလၢဝ်းယူႇ ၵႃႈၼႂ်းဝဵင်းၼၼ်ႉဢေႃႈ။
ပၢၵ်ႇၶဝ်လၢတ်ႈၵႂၢမ်းဢၼ်သႄႉသွမ်းလႄႈ လိၼ်ႉၶဝ်ပဵၼ်ၸိူဝ်ႉၼင်ႇလႅဝ်းၵႃႈၼႂ်း ပၢၵ်ႇၶဝ်ၼၼ်ႉဢေႃႈ။ ၶဝ်ထၢင်ႇဝႃႈ၊ “ၽူႈလႂ်တၵ်းငိၼ်း၊” ဝႃႈၼင်ႇၼႆတီႈၶႃႈဢေႃႈ။
ၵူၺ်းၵႃႈ၊ ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းၶူဝ်ၶဝ်လႄႈလၢတ်ႈပျၢၵ်ႈလွင်ႈၵူၼ်းတၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉဢေႃႈ။
ၶႃႈၸဝ်ႈယုမ်ႇယမ်တမ်းၸႂ်ၵႃႈၼႂ်းႁႅင်းတၼ်းၶူဝ်းၸဝ်ႈႁဝ်းလႄႈၽြႃးပဵၼ်ၸဝ်ႈတီႈၶႃႈ။ ၸဝ်ႈႁဝ်းပဵၼ်တီႈဢိင်သွၼ်ႈပိုင်ႈ၊ၶႃႈၸဝ်ႈတီႈၶႃႈဢေႃႈ။
ၽြႃးပဵၼ်ၸဝ်ႈၵဝ်ႁၵ်ႉပႅင်းၵဝ်လႄႈတၵ်းမႃးႁပ်ႉႁူဝ်တၢင်းၵဝ်ဢေႃႈ။ မၼ်းၸဝ်ႈတၵ်းပၼ်ဢၶႂၢင်ႉဢၼ်လႆႈႁၼ် ရၢၼ်ႇသူႇၵဝ်တင်းလၢႆတူၵ်းသုမ်းၼၼ်ႉဢေႃႈ။
ၽြႃးပဵၼ်ၸဝ်ႈတီႈၶႃႈ။ ယႃႇပေဢဝ်ၶဝ်တၢႆသေၵမ်းတီႈၶႃႈ။ ၵူဝ်ၵူၼ်းၶႃႈၸဝ်ႈတင်းလၢႆတေလိုမ်းပႅတ်ႈတီႈၶႃႈဢေႃႈ။ ၸဝ်ႈၽြႃးဢၼ်ႁႄႉၶႅၼ်ပၼ်ၶႃႈၸဝ်ႈႁဝ်းၶဝ်ၼၼ်ႉတီႈၶႃႈ။ ဢဝ်တင်းႁႅင်းတၼ်းၶူဝ်းၸဝ်ႈႁဝ်းလႄႈႁႂ်ႈၶဝ်လႆႈလႄႇၵႂႃႇလႄႇမႃးၵူႈတီႈၵူႈလႅၼ်သေၵမ်းတီႈၶႃႈ။ ႁႂ်ႈၶဝ်လႆႈတူၵ်းသုမ်းသေၵမ်းတီႈၶႃႈ။
ဢပျတ်ႈမီးယူႇၵႃႈၼႂ်းသူပ်းၶဝ်လႄႈၵႂၢမ်းၶဝ်ပဵၼ်ဢပျတ်ႈၵူၺ်းၵူၺ်းဢေႃႈ။ ႁႂ်ႈၶဝ်ထုၵ်ႇၶဵၼ်းမႅၼ်ႈၼႂ်းမႃႇၼႃႉၶဝ် ၵွပ်ႈပိူဝ်ႈၶဝ်ၵိၼ်ႇလႃႇပိူၼ်ႈလႄႈလၢတ်ႈမုသႃႇၼၼ်ႉသေၵမ်းတီႈၶႃႈ။
ၶႅၼ်းတေႃႈၸီႇယၢင်ႇပၼ်တၢမ်ႇဢပျတ်ႈတီႈၶဝ်ႁႂ်ႈၶဝ်လႆႈလုႁၢႆပႅတ်ႈသေၵမ်းတီႈၶႃႈ။ ႁႂ်ႈၶဝ်လႆႈလုႁၢႆပႅတ်ႈလုမ်းလုမ်းသေၵမ်းတီႈၶႃႈ။ ႁႂ်ႈၶဝ်ႁုလွင်ႈဢၼ်ၽြႃးပဵၼ်ၸဝ်ႈဢုပ်ႉပိူင်ႇ၊ ၸႃႉၸဵမ်မိူင်း ဢိသရေး၊ တေႃႇထိုင်ႁွတ်ႈတီႈသုတ်းလိၼ်မိူင်းၼၼ်ႉသေၵမ်းတီႈၶႃႈ။
ရၢၼ်ႇသူႇၶႃႈၸဝ်ႈတင်းလၢႆၶိုၼ်းမႃး ၶိင်ႇႁူဝ်ၶမ်ႈလႄႈ ၵိုဝ်တႃငႃးၶဵဝ်ႈယူႇမိူၼ်မႃဢၼ်ႁဝ်ႇႁွၼ်သေလႄႈၵႂႃႇမႃးယူႇၵႃႈၼႂ်းဝဵင်းၼၼ်ႉဢေႃႈ။
ၶဝ်ၼၼ်ႉမိူၼ်မႃဢၼ်လႄႇၵႂႃႇႁႃၵိၼ်တၢင်းၵိၼ်ယူႇလႄႈ ၸၢင်ႈႁဝ်ႇႁွၼ်မိူဝ်ႈဢၼ်ဢမ်ႇလႆႈၵိၼ် ဢိမ်ႇတွင်ႉၼၼ်ႉဢေႃႈ။
ၶႃႈၸဝ်ႈၸမ်ႉ၊တၵ်းႁဵတ်းၵႂၢမ်းလူၺ်ႈလွင်ႈ တၼ်းၶူဝ်းၸဝ်ႈႁဝ်းလႄႈ သမ်ႉတၵ်းႁဵတ်းၵႂၢမ်းသဵင်ယႂ်ႇၼႃႇလူၺ်ႈလွင်ႈမႅတ်ႈတႃႇၵရုၼႃႇၸဝ်ႈႁဝ်းၼၼ်ႉ၊ ၵူႈၼႂ်ၵူႈၼႂ်ဢေႃႈ။ ၸဝ်ႈႁဝ်းပဵၼ်တီႈဢိင်သွၼ်ႈပိုင်ႈၶႃႈၸဝ်ႈ၊ပဵၼ်ႁူမ်ႈၽူၺ်းဢၼ်လႆႈသွၼ်ႈယူႇ ၼႂ်းၶိင်ႇဢၼ်ၶႃႈၸဝ်ႈထူပ်းၽေးၼၼ်ႉ တီႈၶႃႈဢေႃႈ။
ၸဝ်ႈဢၼ်ၵႅတ်ႇၶႄပၼ်ၵဝ်ၶႃႈတီႈၶႃႈ။ ၶႃႈၸဝ်ႈတၵ်းယွင်ႈယေႃး၊ၸဝ်ႈႁဝ်းတီႈၶႃႈဢေႃႈ။ တီႈဢိင်သွၼ်ႈပိုင်ႈၶႃႈၸဝ်ႈၸိုင်၊ပဵၼ်ၽြႃးပဵၼ်ၸဝ်ႈ၊ၽြႃးဢၼ်ႁၵ်ႉပႅင်းၶႃႈၸဝ်ႈၼၼ်ႉတီႈၶႃႈဢေႃႈ။
ၽြႃးပဵၼ်ၸဝ်ႈတီႈၶႃႈ။ ၸဝ်ႈႁဝ်းၸုၼ်ႉပႅတ်ႈၶႃႈၸဝ်ႈႁဝ်းၶဝ်လႄႈ ႁႂ်ႈၶႃႈၸဝ်ႈႁဝ်းၶဝ်တူၵ်းသုမ်းပႅတ်ႈတီႈၶႃႈယဝ်ႉ။ ၸဝ်ႈႁဝ်းဢွၵ်ႇတေႃးသႃႉတေႃႇၶႃႈၸဝ်ႈႁဝ်းၶဝ်တီႈၶႃႈယဝ်ႉ။ ၵူၺ်းၵႃႈ၊မိူဝ်ႈလဵဝ်ၼႆႉၶႅၼ်းတေႃႈၸဝ်ႈႁဝ်းၶိုၼ်းမႃးၸူးၶႃႈၸဝ်ႈႁဝ်းၶဝ်သေၵမ်းတီႈၶႃႈ။
ၸဝ်ႈႁဝ်းႁႂ်ႈလိၼ်မိူင်းသၼ်ႇဝႆလႄႈႁႂ်ႈတႅၵ်ႇဢႃႈပႅတ်ႈတီႈၶႃႈယဝ်ႉ။ ၶႅၼ်းတေႃႈႁႂ်ႈႁွႆးဢၼ်တႅၵ်ႇၶၢပ်ႇၸိူဝ်းၼၼ်ႉသမ်ႉၶိုၼ်းငီႇငႅၼ်ႇမႃး၊ ၵွပ်ႈပိူဝ်ႈဢၼ်မၼ်းႁေႈၵႂႃႇၸၢႆႉၵႂႃႇၼၼ်ႉသေၵမ်းတီႈၶႃႈ။
ၸဝ်ႈႁဝ်းႁႂ်ႈၵူၼ်းၸဝ်ႈႁဝ်းတင်းလၢႆလႆႈၶၢမ်ႇယၢပ်ႇၽိုတ်ႇၼႃႇလူင်လၢင်၊ တေႃႇထိုင်ႁွတ်ႈၶႃႈၸဝ်ႈႁဝ်းၶဝ်ပႆၸၢႆႉပႆၸိူၼ်းၵႂႃႇပေႃးထၼ်ႇၵူၼ်းမဝ်းလဝ်ႈတီႈၶႃႈယဝ်ႉ။
ၸဝ်ႈႁဝ်းပၼ်သတိတီႈၶဝ်ၸိူဝ်းဢၼ်ရူဝ်ႇသေႇၵူဝ်ယမ်ၸဝ်ႈႁဝ်း၊ ပုၼ်ႈဢၼ်ၶဝ်တၵ်းလွတ်ႈသေတၢင်းဢၼ်ၸီႇယၢင်ႇပၼ်တၢမ်ႇၼၼ်ႉတီႈၶႃႈဢေႃႈ။
ၶႅၼ်းတေႃႈဢဝ်တင်းႁႅင်းတၼ်းၶူဝ်းၸဝ်ႈႁဝ်းသေလႄႈၵႄႇသႄႇၶျွတ်ႈဢဝ်ၶႃႈၸဝ်ႈႁဝ်းၶဝ်၊ ထွမ်ႇဢဝ်ၵႂၢမ်းသူးတွင်းၶႃႈၸဝ်ႈႁဝ်းၶဝ်ပုၼ်ႈဢၼ်ၶဝ်ၸိူဝ်းဢၼ်ၸဝ်ႈႁဝ်းႁၵ်ႉပႅင်းတင်းလၢႆ၊ တၵ်းလႆႈၶၢမ်ႇတၢင်းဢၼ်ၵႄႇသႄႇဢဝ်ၼၼ်ႉသေၵမ်းတီႈၶႃႈ။
လုၵ်ႉသေၵႃႈတီႈဢၼ်မူတ်းၸၢင်ႇၸဝ်ႈၼၼ်ႉ ၽြႃးပဵၼ်ၸဝ်ႈလၢတ်ႈလႄႈဝႃႈ၊ “ၵဝ်တၵ်းႁဵတ်းပွႆးဢွင်ႇသိုၵ်းဢၼ်ၸၵ်းၽႄ ဝဵင်း သေးၶိမ်ႇ၊ ဢေႃႈ။ ၵဝ်တၵ်းတႅပ်းမႅင်ႇပၢင်ႇႁူၺ်ႈ သုၵုတ်ႉ၊ ပၼ်တီႈ ၵူၼ်းၵဝ်တင်းလၢႆဢေႃႈ။
မိူင်း ၵိလိတ်ႉ၊ ပဵၼ်မိူင်းၵဝ်ဢေႃႈ။ မိူင်း မၼႃႇသေႇ၊ ၵေႃႈၵဝ်လႆႈပိူင်ႇဢေႃႈ။ မိူင်း ဢေႇၽရိမ်ႇ၊ ပဵၼ်မွၵ်ႇႁူဝ်လဵၵ်းၵဝ်လႄႈမိူင်း ယုတႃႉ၊ သမ်ႉပဵၼ်ၵၼ်းႁွၵ်ႇရႃႇၸႃႉၵဝ်ဢေႃႈ။
မိူင်း မေႃႇၽႃႉ၊ ၸမ်ႉ၊ပဵၼ်ဢၢင်ႇဢၢပ်ႇၼမ်ႉၵဝ်ဢေႃႈ။ ၵဝ်တၵ်းဢဝ်ၶႅပ်းတိၼ်ၵဝ်ထိမ်ႈသႂ်ႇ မိူင်း ဢေႇတုမ်ႇ၊ ႁႂ်ႈပဵၼ်သၢၵ်ႈသေႇ တၢင်းဢၼ်ၵဝ်ပိူင်ႇဢေႃႈ။ ၵဝ်တၵ်းႁွင်ႉသႅၼ်ႇသဵင်ပႄႉၼႅင်ႇၵႃႈၼိူဝ် မိူင်း ၽိလိတ်ႉတိ၊ ဢေႃႈ။”
ၽြႃးပဵၼ်ၸဝ်ႈတီႈၶႃႈ။ ၽူႈလႂ်တၵ်းဢဝ်ၶႃႈၸဝ်ႈသူင်ႇၸူးၵႃႈၼႂ်းဝဵင်းဢၼ်ႁႅင်းယႂ်ႇၼႃႇၼၼ်ႉ။ ၽူႈလႂ်တၵ်းဢဝ်ၶႃႈၸဝ်ႈသူင်ႇၵႂႃႇၵႃႈတီႈ၊မိူင်း ဢေႇတုမ်ႇ၊ တီႈၶႃႈ။
ၸဝ်ႈႁဝ်းပႄႇပႅတ်ႈၶႃႈၸဝ်ႈႁဝ်းၶဝ်ယဝ်ႉၸႂ်ႈတႄႉတီႈၶႃႈႁိုဝ်း။ ၸဝ်ႈႁဝ်းတေဢမ်ႇၶီႇသိုၵ်းၵႂႃႇလူၺ်ႈၵၼ်တင်းတပ်ႉသိုၵ်းၶႃႈၸဝ်ႈႁဝ်းၶဝ်တီႈၶႃႈႁိုဝ်း။
ၶႅၼ်းတေႃႈၸွႆႈထႅမ်ၶႃႈၸဝ်ႈႁဝ်းၶဝ်လႆႈၶတ်းၵၼ်တင်းရၢၼ်ႇသူႇသေၵမ်းတီႈၶႃႈ။ တၢင်းဢၼ်ၵူၼ်းၸွႆႈထႅမ်ၼၼ်ႉဢမ်ႇပွင်ႇလွင်ႈၵႃႈသင်တီႈၶႃႈ။
ၵွပ်ႈပိူဝ်ႈၽြႃးပဵၼ်ၸဝ်ႈမီးယူႇၽၢႆႇႁဝ်းလႄႈႁဝ်းတၵ်းပႄႉဢေႃႈ။ မၼ်းၸဝ်ႈတၵ်းတိုၵ်းတေႃးပႄႉၼႅင်ႇ ရၢၼ်ႇသူႇႁဝ်းတင်းလၢႆဢေႃႈ။
ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈထွမ်ႇဢဝ်သဵင်ဢၼ်ၶႃႈၸဝ်ႈႁွင်ႉၵၢဝ်ႇၼၼ်ႉသေလႄႈ ထွမ်ႇငိၼ်းဢဝ်ၵႂၢမ်းသူးတွင်းၶႃႈၸဝ်ႈ သေၵမ်းတီႈၶႃႈ။
ၼႂ်းမိူဝ်ႈဢၼ်ႁူဝ်ၸႂ်ႁဵဝ်ႇၸွပ်ႈလႄႈၽၢတ်ႇၵႂႃႇၵႆၵၼ်တင်းႁိူၼ်းယေးယူႇၼၼ်ႉ၊ ၶႃႈၸဝ်ႈႁွင်ႉၵၢဝ်ႇတီႈၸဝ်ႈႁဝ်းတီႈၶႃႈဢေႃႈ။ ၶႅၼ်းတေႃႈဢွၼ်ဢဝ်ၶႃႈၸဝ်ႈ၊သူင်ႇၸူးတီႈႁိၼ်ၽႃဢၼ်သုင်ၼႃႇသေၶႃႈၸဝ်ႈၼၼ်ႉ သေၵမ်းတီႈၶႃႈ။
လွင်ႈမၼ်းၸမ်ႉ၊ၸဝ်ႈႁဝ်းပဵၼ်ၸဝ်ႈဢၼ်ၶႃႈၸဝ်ႈဢိင်သွၼ်ႈပိုင်ႈ၊ ပဵၼ်တိူၵ်ႈတီႈတိုၵ်းသိုၵ်းဢၼ်မၼ်ႈၶိူင်ႇၼႃႇၵႃႈတီႈၽၢႆႇၼႃႈရၢၼ်ႇသူႇတင်းလၢႆတီႈၶႃႈဢေႃႈ။
ႁႂ်ႈၶႃႈၸဝ်ႈလႆႈယူႇၵႃႈတီႈထႃႇၼႃႉဢၼ် မူတ်းၸၢင်ႇၸဝ်ႈႁဝ်းၼၼ်ႉ ၸူဝ်ႈဢသၢၵ်ႈၶႃႈၸဝ်ႈသေလႄႈ၊ ႁႂ်ႈၶႃႈၸဝ်ႈလႆႈယူႇလူင်ႉလီလွတ်ႈလီ၊ၵႃႈတႂ်ႈႁူမ်ႈပိၵ်ႇၸဝ်ႈႁဝ်းသေၵမ်းတီႈၶႃႈ။
ၽြႃးပဵၼ်ၸဝ်ႈတီႈၶႃႈ။ ၸဝ်ႈႁဝ်းငိၼ်းၵႂၢမ်းၵတိသဵတ်ႈၸႃႇၶႃႈၸဝ်ႈၼၼ်ႉလႄႈ ၸဝ်ႈႁဝ်းဢဝ်ဢမူၺ်ႇၶဝ်ၸိူဝ်းဢၼ်ၵူဝ်ယမ်ၼႃႇမႃႉၸိုဝ်ႈသဵင်ၸဝ်ႈႁဝ်းၼၼ်ႉ၊ ပၼ်တီႈၶႃႈၸဝ်ႈတီႈၶႃႈဢေႃႈ။
ၸဝ်ႈႁဝ်းသိုပ်ႇပၼ်ဢသၢၵ်ႈၶုၼ်ႁေႃၶမ်း ႁႂ်ႈယၢဝ်းယိုၼ်းလႄႈ ႁႂ်ႈၶူပ်ႇၼီႈပီမိူင်းမၼ်းၼၼ်ႉတႄႇယူႇ ၵူႈၸူဝ်ႈၵူႈပၢၼ်တီႈၶႃႈဢေႃႈ။
ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈႁႂ်ႈမၼ်းလႆႈဢုပ်ႉပိူင်ႇယူႇ တႃႇသေႇတႃႇပၢၼ်၊သိုဝ်ႈၼႃႈတႂ်ႈတႃ ၸဝ်ႈႁဝ်းသေလႄႈ၊ ဢဝ်တင်းမႅတ်ႈတႃႇၵရုၼႃႇဢိၵ်ႇတင်းသဵတ်ႈၸႃႇၸဝ်ႈႁဝ်းၼၼ်ႉၵႅတ်ႇၶႄႁႄႉၵင်ႈပၼ်မၼ်းသေၵမ်းတီႈၶႃႈ။
ၼင်ႇၼၼ်လႄႈ၊ၶႃႈၸဝ်ႈတၵ်းႁဵတ်းၵႂၢမ်း ယွင်ႈယေႃးတီႈၼႃႇမႃႉၸိုဝ်ႈသဵင် ၸဝ်ႈႁဝ်းယူႇသေႇသေႇ ႁႂ်ႈလႆႈၽႄႇဝၢတ်ႈသဵတ်ႈၸႃႇ ၵူႈမိုဝ်ႉၵူႈဝၼ်းတီႈၶႃႈဢေႃႈ။
ၵဝ်မီးတၢင်းဢၼ်သဵတ်ႇယဵၼ်လႄႈ ပႂ်ႉထႃႈတၢင်းဢၼ်ၽြႃးပဵၼ်ၸဝ်ႈတၵ်း ၵႄႇသႄႇၶျွတ်ႈဢဝ်ၵဝ်ဢေႃႈ။ ၵဝ်ဢိင်ပိုင်ႈမၼ်းၸဝ်ႈသူႇလဵဝ်ပႃးလဵဝ်ၵူၺ်းဢေႃႈ။
မၼ်းၸဝ်ႈၵူၺ်းၵုမ်ႈၶႅၼ်မႃႉၸႃႉၵဝ်လႄႈၵႄႇသႄႇၶျွတ်ႈဢဝ်ၵဝ်ဢေႃႈ။ မၼ်းၸဝ်ႈပဵၼ်တီႈဢၼ်ၵဝ်ဢိင်ပိုင်ႈလႄႈၵဝ်တၵ်းဢမ်ႇလႆႈတူၵ်းသုမ်းလႃးလႃး။
သူၵႃႈမီးတင်းသဵင်ႈတင်းလူင်တၵ်းဢွၼ်ၵၼ်တိုၵ်းတေႃးၵူၼ်းၵေႃႉၼိုင်ႈ၊ ဢၼ်ႁႅင်းဢူၼ်ႈႁႅင်းၸွပ်ႈယူႇမိူၼ်ၸိူဝ်ႉၼင်ႇႁူဝ်ႉဢၼ်လူမ်ႉဢၼ်ပင်းၼၼ်ႉႁိုင်ၵႃႈႁိုဝ်။
သူၵူၺ်းၵျၢမ်ႇပွင်ႁႂ်ႈလႆႈဢီးမၼ်းတူၵ်းသေၵႃႈတီႈဢၼ်မျၢတ်ႈသုင်မၼ်းၼၼ်ႉလႄႈ သူမူၼ်ႈပျေႃႇလူၺ်ႈၵႂၢမ်းမုသႃႇဢေႃႈ။ သူၸၢင်ႈလၢတ်ႈဢွၵ်ႇၵႂၢမ်းမၢင်ႇၵလႃႇယူႇသေၵေႃႈ၊ၵႃႈၼႂ်းႁူဝ်ၸႂ်သူၼၼ်ႉသူၵိၼ်ႇလႃႇမၼ်းယူႇဢေႃႈ။
ၵဝ်ဢိင်ပိုင်ႈၽြႃးပဵၼ်ၸဝ်ႈသူႇလဵဝ်ပႃးလဵဝ်ၵူၺ်းလႄႈ၊ၵဝ်မုင်ႈထႃႈမွင်းထႃႈမၼ်းၸဝ်ႈၵူၺ်းဢေႃႈ။
မၼ်းၸဝ်ႈၵူၺ်းၵႅတ်ႇၶႄႁႄႉၵင်ႈပၼ်ၵဝ်လႄႈၵႄႇသႄႇၶျွတ်ႈဢဝ်ၵဝ်ဢေႃႈ။ မၼ်းၸဝ်ႈပဵၼ်တီႈဢၼ်ၵဝ်ဢိင်ပိုင်ႈလႄႈၵဝ်တၵ်းဢမ်ႇလႆႈတူၵ်းသုမ်းလႃးလႃး။
လွင်ႈတၢင်းဢၼ်ၵႄႇသႄႇၶျွတ်ႈဢဝ်ၵဝ် ဢိၵ်ႇတင်းမုၼ်ၽုင်းၵဝ်ၸမ်ႉ၊ တႄႇၼိူဝ်ၽြႃးပဵၼ်ၸဝ်ႈလႄႈ၊ မၼ်းၸဝ်ႈပဵၼ်ၸဝ်ႈဢၼ်ႁႄႉဢၼ်ၶႅၼ်ဢၼ် ႁႅင်းယႂ်ႇၼႃႇပဵၼ်ႁူမ်ႈၽူၺ်းတီႈၵဝ်ဢေႃႈ။
ၵူၼ်းတင်းလၢႆၶဝ်႟။ ဢွၼ်ၵၼ်ယုမ်ႇယမ်ဢိင်ပိုင်ႈၽြႃးပဵၼ်ၸဝ်ႈယူႇၵူႈၶိင်ႇၵူႈၶႃႇတႃႉ။ ၽေးတုၵ်ႉၶႃႉသူၵႃႈမီးတင်းသဵင်ႈတင်းမူတ်းၼၼ်ႉမွၵ်ႇလၢတ်ႈထိုင်တီႈမၼ်းၸဝ်ႈတႃႉ။ လွင်ႈမၼ်းၸမ်ႉ၊မၼ်းၸဝ်ႈပဵၼ်တီႈဢၼ်ဢိင်သွၼ်ႈပိုင်ႈႁဝ်းဢေႃႈ။
ၵူၼ်းၵႃႈမီးတင်းသဵင်ႈတင်းလူင်ပဵၼ်ယူႇၸူဝ်ႈထူၺ်ႈၸႂ်ၼိုင်ႈၵူၺ်းလႄႈ ၸဵမ်လဵၵ်ႉၸဵမ်ယႂ်ႇပဵၼ်ဢၼတ်ႉတႃႉ မိူၼ်မိူၼ်ၵၼ်ဢေႃႈ။ ဢဝ်ၶဝ်တၢင်ႇသႂ်ႇၵႃႈၼိူဝ်ယႃႇၸူႇၽၢင်ယွႆးၵႂႃႇလႄႈၸင်ႈႁိဝ်ႈတူၺ်းၵေႃႈ၊ ၶဝ်ၵႃႈမီးတင်းသဵင်ႈတင်းလူင်ၼၼ်ႉယင်းမဝ်ၼႃႇသေဢၼတ်ႉတႃႉဢေႃႈ။
ယႃႇပေၸႂ်လီလူၺ်ႈတၢင်းဢၼ်ႁၢဝ်ႉၵျၢမ်းၼၼ်ႉ၊ ယႃႇပေမုင်ႈမွင်းတႃႇတေၶိုၼ်ႈယႂ်ႇလူၺ်ႈတၢင်းဢၼ်ႁိမ်ဢဝ်ၸူၼ်ဢဝ်ၼၼ်ႉ၊ တေႃႈၵႃႈ၊တၢင်းဢၼ်မႂ်းမၢၵ်ႈမီးၼၼ်ႉၶိုၼ်ႈယႂ်ႇမႃးယူႇသေၵေႃႈ၊ ယႃႇပေဢႃးၵူဝ်းဢုၵ်ႉၸႃႇၸိူဝ်းၼၼ်ႉ။
ၵဝ်လႆႈငိၼ်းပျႃႇတိၵ်ႈၸဝ်ႈပွၵ်ႈလဵဝ်ၵူၺ်းဢမ်ႇၵႃး၊ ၵဝ်သမ်ႉငိၼ်းဢၼ်ၽြႃးပဵၼ်ၸဝ်ႈ၊လၢတ်ႈထႅင်ႈပွၵ်ႈတီႈသွင်လႄႈဝႃႈ၊ “တၼ်းၶူဝ်းမီးတီႈၽြႃးပဵၼ်ၸဝ်ႈဢေႃႈ။
မႅတ်ႈတႃႇမၼ်းၸဝ်ႈတႄႇမၼ်ႈယူႇဢေႃႈ၊” ဝႃႈၼင်ႇၼႆၼၼ်ႉဢေႃႈ။ ၸဝ်ႈၽြႃးတီႈၶႃႈ။ ၸဝ်ႈႁဝ်းတွပ်ႇတႅၼ်းပၼ်ဢၵျူဝ်းဢပျတ်ႈတီႈၵူႈၵေႃႉၵူႈၵူၼ်း၊ ၸွမ်းလူၺ်ႈတၢင်းၵမ်တၢင်းၵျၢင်ႉၶဝ်ႁင်းၽႂ် ႁင်းမၼ်းၼၼ်ႉတီႈၶႃႈဢေႃႈ။
ၽြႃးပဵၼ်ၸဝ်ႈတီႈၶႃႈ။ ၸဝ်ႈႁဝ်းပဵၼ်ၽြႃးပဵၼ်ၸဝ်ႈၵဝ်ၶႃႈတီႈၶႃႈဢေႃႈ။ ၶႃႈၸဝ်ႈၶႆႈၸႂ်ထိုင်ၸဝ်ႈႁဝ်းတီႈၶႃႈဢေႃႈ။ တူဝ်ၸႂ်ၶႃႈၸဝ်ႈၵႃႈမီးတင်းမူတ်း၊ၸႂ်ၸပ်း ၸႂ်ၸွႆးၶႂ်ႈလႆႈၸဝ်ႈႁဝ်း၊ ပေႃးထၢၼ်ႇလိၼ်ႁႅင်ႈဢၼ်တႅၵ်ႇၶၢပ်ႇလႄႈဢိုပ်းၼမ်ႉၼၼ်ႉတီႈၶႃႈဢေႃႈ။
ႁႂ်ႈၶႃႈၸဝ်ႈလႆႈႁၼ်ၸဝ်ႈႁဝ်း ၵႃႈၼႂ်းထႃႇၼႃႉတီႈမူတ်းၸၢင်ႇၸဝ်ႈသေၵမ်းတီႈၶႃႈ။ ႁႂ်ႈၶႃႈၸဝ်ႈလႆႈႁၼ်မုၼ်ၽုင်းတၼ်းၶူဝ်းဢႃႇၼုၽေႃႇၸဝ်ႈႁဝ်းသေၵမ်းတီႈၶႃႈ။
မႅတ်ႈတႃႇၵရုၼႃႇၸဝ်ႈႁဝ်းယဵင်ႈၶႅၼ်း လီၼႃႇသေဢသၢၵ်ႈလႄႈ ၶႃႈၸဝ်ႈတၵ်းယွင်ႈယေႃးၸဝ်ႈႁဝ်း တီႈၶႃႈဢေႃႈ။
ၶႃႈၸဝ်ႈတၵ်းယွင်ႈယေႃးၵျေးၸူးၸဝ်ႈႁဝ်း ၸူဝ်ႈဢသၢၵ်ႈၶႃႈၸဝ်ႈလႄႈ ၶႃႈၸဝ်ႈတၵ်းႁွမ်းမိုဝ်းသူးတွင်းတီႈၼႃႇမႃႉၸိုဝ်ႈသဵင်ၸဝ်ႈႁဝ်း တီႈၶႃႈဢေႃႈ။
ဝိၺိၺ်ႇၶႃႈၸဝ်ႈတေလႆႈဢိမ်ႇတဵမ်မိူၼ်ၼင်ႇၵူၼ်းဢၼ်ၵိၼ်လီၼႂ်းပွႆးလႄႈ ၶႃႈၸဝ်ႈတၵ်းႁဵတ်းၵႂၢမ်းဢၼ်သႂၢင်ႇဢၼ်သိူဝ်းယွင်ႈယေႃးၸဝ်ႈႁဝ်း တီႈၶႃႈဢေႃႈ။
မိူဝ်ႈဢၼ်ၶႃႈၸဝ်ႈၵိင်ႈၼွၼ်းယူႇၵႃႈၼိူဝ်ၵူႇၼၼ်ႉၶႃႈၸဝ်ႈၶႆႈၸႂ်ထိုင်ၸဝ်ႈႁဝ်းယူႇလႄႈ ၶႃႈၸဝ်ႈၶႆႈၸႂ်ဝူၼ်ႉၸႂ်လူၺ်ႈလွင်ႈၸဝ်ႈႁဝ်းတင်းၶိုၼ်းတင်းၶိုၼ်းတီႈၶႃႈဢေႃႈ။
ၵွပ်ႈပိူဝ်ႈၸဝ်ႈႁဝ်းၸွႆႈထႅမ်မႃႉၸႃႉၶႃႈၸဝ်ႈ ယူႇသေႇသေႇၼၼ်ႉ၊ ၶႃႈၸဝ်ႈတၵ်းႁဵတ်းၵႂၢမ်းဢၼ်သႂၢင်ႇဢၼ်သိူဝ်းၵႃႈတီႈတႂ်ႈႁူမ်ႈပိၵ်ႇၸဝ်ႈႁဝ်းတီႈၶႃႈဢေႃႈ။
ဝိၺိၺ်ႇၶႃႈၸဝ်ႈၵွတ်ႇၸပ်းၸဝ်ႈႁဝ်းယူႇလႄႈမိုဝ်းၸဝ်ႈႁဝ်းၼၼ်ႉ ႁွပ်ႇဢဝ်ၶႃႈၸဝ်ႈယူႇတီႈၶႃႈဢေႃႈ။
ၶဝ်ၸိူဝ်းဢၼ်ၵျၢမ်ႇႁႃဢဝ်ၶႃႈၸဝ်ႈတၢႆၼၼ်ႉ၊ တၵ်းဢွၼ်ၵၼ်လူင်းၵႂႃႇၵႃႈၼႂ်းမိူင်းမရၼႃႉ တီႈၶႃႈဢေႃႈ။
ၶဝ်တၵ်းတေလႆႈတၢႆၵႃႈၼႂ်းပၢင်သိုၵ်းလႄႈ၊ တူဝ်တၢႆၶဝ်ၼၼ်ႉၵေႃႈမႃလိၼ်တင်းလၢႆ တၵ်းၵိၼ်ပႅတ်ႈဢေႃႈ။
ၵွပ်ႈပိူဝ်ႈၽြႃးပဵၼ်ၸဝ်ႈႁႂ်ႈၶုၼ်ႁေႃၶမ်းၼၼ်ႉ လႆႈပႄႉလႆႈၼႅင်ႇလႄႈမၼ်းၸဝ်ႈ လႆႈၸူမ်းသိူဝ်းဢေႃႈ။ ၶဝ်ၸိူဝ်းဢၼ်ဝႆႉၵတိသဵတ်ႈၸႃႇၵႃႈၼႂ်း ၼႃႇမႃႉၸိုဝ်ႈသဵင်ၽြႃးပဵၼ်ၸဝ်ႈၼၼ်ႉ၊ တၵ်းတေဢွၼ်ၵၼ်ယွင်ႈယေႃးမၼ်းၸဝ်ႈဢေႃႈ။ သူပ်းၶဝ်ၸိူဝ်းဢၼ်လၢတ်ႈမုသႃႇၸမ်ႉ၊လႆႈၶၢမ်ႇ တၢင်းဢၼ်ဢိုတ်းဝႆႉဢေႃႈ။
ၽြႃးပဵၼ်ၸဝ်ႈတီႈၶႃႈ။ ၶႃႈၸဝ်ႈလႆႈထူပ်းၽေးတုၵ်ႉၶႃႉယူႇတီႈၶႃႈဢေႃႈ။ ၶႅၼ်းတေႃႈထွမ်ႇငိၼ်းၵႂၢမ်းသူးတွင်းၶႃႈၸဝ်ႈသေၵမ်းတီႈၶႃႈ။ ၶႃႈၸဝ်ႈၵူဝ်ႁႄရၢၼ်ႇသူႇၶႃႈၸဝ်ႈၸိူဝ်းၼၼ်ႉ တီႈၶႃႈဢေႃႈ။ ၶႅၼ်းတေႃႈၵႄႇသႄႇၶျွတ်ႈဢဝ်ဢသၢၵ်ႈ ၶႃႈၸဝ်ႈသေၵမ်းတီႈၶႃႈ။
ၶႅၼ်းတေႃႈႁႄႉၶႅၼ်ပၼ်ၶႃႈၸဝ်ႈသေၵႃႈတီႈတၢင်းဢၼ်ၵူၼ်းႁၢႆႉၵူၼ်းမိူၵ်ႈၶဝ်ၵျၢမ်ႇပွင် ၶိုင်ႁႃၵၼ်ၼၼ်ႉ၊ ဢိၵ်ႇတင်းၵႃႈၼႂ်းတီႈၸုတီႈတုမ်ၶဝ်ၸိူဝ်းဢၼ်ဢမ်ႇတြႃးၼၼ်ႉသေၵမ်းတီႈၶႃႈ။
ၶဝ်လပ်ႉလိၼ်ႉၶဝ်ႁႂ်ႈၽၢႆမိူၼ်ၸိူဝ်ႉၼင်ႇလၢပ်ႇလႄႈ၊ ဢဝ်ၵႂၢမ်းဢၼ်လိူင်းဢၼ်ၵျၢမ်းယိူင်းၸူးငႃၸူးမိူၼ်ၸိူဝ်ႉၼင်ႇပိုၼ်တင်းလၢႆတီႈၶႃႈဢေႃႈ။
လုၵ်ႉသေၵႃႈတီႈဢၼ်တဵတ်ႇမႅပ်းၼၼ်ႉပိုတ်းသႂ်ႇတီႈၵေႃႉဢၼ်ဢမ်ႇမီးဢပျတ်ႈလႄႈ ၶိုၵ်းၶၢၵ်းပိုတ်းသႂ်ႇမၼ်းလႄႈ၊ယင်းဢမ်ႇမီး တၢင်းဢၼ်ၵူဝ်ဢၼ်ႁႄ။
ၶဝ်ၼင်ႇၵၼ်ၵၼ်ၸၢင်ႈတိုၵ်းယူင်းၵၼ်ၼႂ်း တၢင်းဢၼ်ဢမ်ႇတြႃးၼၼ်ႉလႄႈ ၶဝ်ၶိုင်ပွင်ၵျၢမ်ႇႁႃတီႈဢၼ်တၵ်း ႁၢင်ႈၶိုမ်းၶဝ်ဢေႃႈ။ ၶဝ်ၸၢင်ႈဝႃႈ၊ “ၽူႈလႂ်တၵ်းႁၼ်၊” ဝႃႈၼင်ႇၼႆဢေႃႈ။
ၶဝ်ၶိုင်ပွင်ဢၼ်ဢမ်ႇလီဢမ်ႇတြႃးသေလႄႈ လၢတ်ႈဝႃႈ၊ “ႁဝ်းၶိုင်ဝႆႉႁဵတ်းဝႆႉဢမုဢၼ် ဢမ်ႇတြႃးၼႆႉသေႇၶျႃႇလီငၢမ်းယဝ်ႉ၊” ဝႃႈၼင်ႇၼႆဢေႃႈ။ ႁူဝ်ၸႂ်ဢိၵ်ႇတင်းသၽေႃးၵူၼ်းပဵၼ်ဢၼ်လိုၵ်ႉဢၼ်လမ်ႇၼႃႇဢေႃႈ။
ၵူၺ်းၵႃႈ၊ၽြႃးပဵၼ်ၸဝ်ႈပိုတ်းပိုၼ်မၼ်းၸဝ်ႈသႂ်ႇ တီႈၶဝ်လႄႈၶဝ်လႆႈတိူဝ်ႉမၢတ်ႇၵႂႃႇ ၵမ်းလဵဝ်ဢေႃႈ။
မၼ်းၸဝ်ႈတၵ်းယႃႉၽဵဝ်ႈၶဝ်ပႅတ်ႈၵွပ်ႈပိူဝ်ႈၵႂၢမ်းၸိူဝ်းၼၼ်ႉသေယဝ်ႉ၊ ၵူၼ်းၸိူဝ်းဢၼ်ႁၼ်ၶဝ်ၼၼ်ႉတင်းသဵင်ႈ တင်းမူတ်းတၵ်းဢွၼ်ၵၼ်မိတ်းသူပ်း မိတ်းၵၢင်းဢေႃႈ။
ၶဝ်တၵ်းဢွၼ်ၵၼ်ၵူဝ်ႁႄလႄႈတၵ်းၶႆႈၸႂ် ဝူၼ်ႉတူၺ်းလွင်ႈတၢင်းႁဵတ်း ၽြႃးပဵၼ်ၸဝ်ႈၼၼ်ႉသေယဝ်ႉ၊ တၵ်းမွၵ်ႇလၢတ်ႈၼႄလွင်ႈတၢင်း ၸိူဝ်းၼၼ်ႉဢေႃႈ။
ၵူၼ်းၸိူဝ်းဢၼ်သိုဝ်ႈတေႃႇတင်းသဵင်ႈတင်းလူင်တၵ်းၸူမ်းသိူဝ်းၼႃႇလူင်လၢင်၊ ၵွပ်ႈပိူဝ်ႈလွင်ႈတၢင်းဢၼ် ထႃႇဝရႃႉၽြႃး၊ ၸီႇယၢင်ႇႁဵတ်းဝႆႉၼၼ်ႉဢေႃႈ။ ၶဝ်တၵ်းတေလႆႈယူႇလူင်ႉလီလွတ်ႈလီၵႃႈတီႈၽၢႆႇၼႃႈၸဝ်ႈလႄႈ ၵူၼ်းသိုဝ်ႈတေႃႇတင်းလၢႆတၵ်းတေ ယွင်ႈယေႃးမၼ်းၸဝ်ႈဢေႃႈ။
ၽြႃးပဵၼ်ၸဝ်ႈတီႈၶႃႈ။ တၢင်းဢၼ်ယွင်ႈယေႃးၸဝ်ႈႁဝ်းၵႃႈၼႂ်းဝဵင်း ၸိဢုၼ်ႇ၊ ဢိၵ်ႇတင်းတၢင်းဢၼ်ပႂ်ႉၵတိသဵတ်ႈၸႃႇတီႈၸဝ်ႈႁဝ်းၼၼ်ႉပဵၼ်ဢၼ်လီဢၼ်ထုၵ်ႇပုၼ်ႈၶႃႈၸဝ်ႈႁဝ်းၶဝ်။
ၵွပ်ႈပိူဝ်ႈၸဝ်ႈႁဝ်းထွမ်ႇဢဝ် တၢင်းသူးတွင်းတင်းလၢႆၼၼ်ႉလႄႈ ၵူၼ်းၵူႈတီႈၵူႈလႅၼ်ဢွၼ်ၵၼ်မႃးၸူး တီႈၸဝ်ႈႁဝ်း။
ၵွပ်ႈလူၺ်ႈဢပျတ်ႈတၢင်းၽိတ်းၶဝ်ၼၼ်ႉ တီႈၶႃႈဢေႃႈ။ ဢပျတ်ႈတုၸရိူၵ်ႈႁူမ်ႇတဵင်ၶႃႈၸဝ်ႈႁဝ်းၶဝ် ဝႆႉယူႇသေၵေႃႈၸဝ်ႈႁဝ်းပွႆႇဝၢင်းပၼ်တင်းမူတ်းဢေႃႈ။
ၶဝ်ၸိူဝ်းဢၼ်ၸဝ်ႈႁဝ်းလိူၵ်ႈဢဝ်လႄႈ ႁႂ်ႈၶဝ်ႈၸူးယူႇသဝ်းၵႃးၼႂ်းတီႈမူတ်းၸၢင်ႇၸဝ်ႈၼၼ်ႉၸိူဝ်းၼၼ်ႉမီးမၢင်ႇၵလႃႇဢေႃႈ။ ၶႃႈၸဝ်ႈႁဝ်းၶဝ်လႆႈပေႇၸႂ်ၼိမ်ၸႂ်လူၺ်ႈလွင်ႈတၢင်းဢၼ်လီဢၼ်ငၢမ်း ၵႃႈၼႂ်းႁိူၼ်းၸဝ်ႈႁဝ်း၊ ဢၼ်ဝႃႈမၢင်ႇၵလႃႇတီႈၵျွင်းပိၵ်ႈမၢၼ်ႇဢၼ်မူတ်းၸၢင်ႇ၊ၸဝ်ႈၼၼ်ႉတီႈၶႃႈဢေႃႈ။
ၸဝ်ႈႁဝ်းဢဝ်တင်းပွႆးဢၼ်ပႄႉၼႅင်ႇသိုၵ်းသေလႄႈၶိုၼ်းဢိူဝ်ၶႃႈၸဝ်ႈႁဝ်းၶဝ်၊ ဢိၵ်ႇတင်းႁဵတ်းလွင်ႈတၢင်းဢၼ်လီဢၢမ်း သေလႄႈၵႄႇၶျွတ်ႈဢဝ်ၶႃႈၸဝ်ႈႁဝ်းၶဝ် တီႈၶႃႈဢေႃႈ။ ၵူၼ်းလေႃးၵီႇတင်းသဵင်ႈတင်းလူင်ဢိၵ်ႇတင်းၶဝ်ၸိူဝ်းဢၼ်မီးၵႆၼႃႇ ၵႃႈတီႈၽၢႆႇပုၼ်ႉပၢင်ႇလၢႆႇၼၼ်ႉဢွၼ်ၵၼ်ယုမ်ႇမၢတ်ႈဢိင်ပိုင်ႈၸဝ်ႈႁဝ်း တီႈၶႃႈဢေႃႈ။
ၸဝ်ႈႁဝ်းၼႄပျႃးႁႅင်းတၼ်းၶူဝ်းဢႃႇၼုၽေႃႇၸဝ်ႈႁဝ်းၼၼ်ႉ ၼႂ်းတၢင်းဢၼ်ဢဝ်တင်းႁႅင်းဢၼ်ယႂ်ႇၼႃႇၸဝ်ႈႁဝ်းသေလႄႈ ႁႂ်ႈလွႆတင်းလၢႆတႄႇယူႇတီႈၶႃႈဢေႃႈ။
ၸဝ်ႈႁဝ်းႁႂ်ႈသဵင်ၼမ်ႉသမ်ႇမုၵ်ႈတြႃႇဢိၵ်ႇတင်းသဵင်လႅင်းၼမ်ႉပိူပ်ႈၼမ်ႉ၊ ဢၼ်ႁုၼ်ႈမေႃးဢိုင်ႈဢိုင်ႈဢၢင်ႈဢၢင်ႈၼၼ်ႉထၢတ်ႇယဵၼ်ၼိမ်မႃးတီႈၶႃႈလႄႈ ႁႂ်ႈသဵင်ၵူၼ်းဢၼ်ဢူၼ်ဢဵၼ်မေႃးမႄးၸိူဝ်းၼၼ်ႉၵေႃႈထၢတ်ႇယဵၼ်ၼိမ်မႃးတီႈၶႃႈဢေႃႈ။
ၵမ်ႇၽႃႇလေႃးၵႃႉတင်းသဵင်ႈတင်းမူတ်းဢွၼ်ၵၼ်ၵူဝ်ႁႄတီႈၼိမိၵ်ႈလၢၵ်ႈၶၼႃႇ ဢၼ်ၸဝ်ႈႁဝ်းႁဵတ်းယဝ်ႉၵႂႃႇၼၼ်ႉတီႈၶႃႈဢေႃႈ။ လွင်ႈတၢင်းဢၼ်ၸဝ်ႈႁဝ်းပွင်ႁဵတ်း ပွင်သၢင်ႈယဝ်ႉၼၼ်ႉ၊ ႁဵတ်းႁႂ်ႈပဵၼ်တၢင်းဢၼ်ႁွင်ႉသႅၼ်ႇၸူမ်းသိူဝ်းၼႃႇၵႃႈၼိူဝ်မိူင်းလေႃးၵႃႉ ၸဵင်ႇၼိုင်ႈတေႃႇထိုင်ႁွတ်ႈမိူင်းလေႃးၵႃႉထႅင်ႈၸဵင်ႇၼိုင်ႈတီႈၶႃႈဢေႃႈ။
ၸဝ်ႈႁဝ်းၼႄပျႃးတၢင်းဢၼ်ၸဝ်ႈႁဝ်းလူႁၼ်လုမ်းလႃးလိၼ်မိူင်း၊ ၼႂ်းတၢင်းဢၼ်ႁႂ်ႈၽူၼ်တူၵ်းယမ်းသႂ်ႇမၼ်းလႄႈ၊ ႁႂ်ႈၶွၼ်ႇၼမ်ႉမၼ်းလိၼ်လီၼႃႇလူင်လၢင်တီႈၶႃႈဢေႃႈ။ ထႃႇဝရႃႉၽြႃး၊ တီႈၶႃႈၼမ်ႉႁွင်ႈၼမ်ႉၵႄးၸဝ်ႈႁဝ်းတင်းလၢႆတဵမ်ဝႆႉတင်းၼမ်ႉလႄႈ မႄးပွင်မႄးႁဵတ်းႁႂ်ႈလိၼ်ဢွၵ်ႇမၢၵ်ႇၶဝ်ႈႁူင်းၶဝ်ႈမႃးတီႈၶႃႈဢေႃႈ။ လွင်ႈတၢင်းဢၼ်ၸဝ်ႈႁဝ်းပွင်ႁဵတ်းပွင်မႄးၼၼ်ႉၸမ်ႉ။
ၸဝ်ႈႁဝ်းပၼ်ၼမ်ႉၽူၼ်တူၵ်းသႂ်ႇၵႃႈၼိူဝ်လွၵ်းၼႃးဢၼ်ထႆဝႆႉယဝ်ႉၼၼ်ႉ၊ ဢဝ်ႁွႆးထိူၼ်ႇႁွႆးထႆၸႄႈၼမ်ႉဝႆႉ၊ႁႂ်ႈၽၢင်ႈလိၼ်ပိူဝ်ႉသေလႄႈ၊ ၸဝ်ႈႁဝ်းပၼ်တၢင်းလီတီႈတူၼ်ႈဢၼ်ဢွၵ်ႇမႃးၸိူဝ်းၼၼ်ႉတီႈၶႃႈဢေႃႈ။
ၵျေးၸူးတၢင်းလီဢၼ်ၸဝ်ႈႁဝ်းမႄးပွင်မႄးႁဵတ်း ႁႂ်ႈလႆႈပၢတ်ႇဢဝ်သိမ်းဢဝ်ၼၼ်ႉယႂ်ႇၼႃႇလူင်လၢင်တီႈၶႃႈဢေႃႈ။ တီႈဢၼ်ၸဝ်ႈႁဝ်းၽၢႆႈၵႂႃႇတီႈလႂ်တၢင်းလႂ်ၵေႃႈပဵၼ်ဢၼ်လိူင်ႇၼမ်မၢၵ်ႈမီးတီႈၶႃႈဢေႃႈ။
ပၢင်ႇလဵင်ႉသူဝ်း၊ဝူဝ်းတင်းလၢႆၵေႃႈတဵမ်ဝႆႉတင်း ၽုင်သူဝ်းၽုင်ဝူဝ်းဢေႃႈ။ တၢပ်ႈလွႆတႄးလွႆတင်းလၢႆၵေႃႈမီး တၢင်းဢၼ်ၸူမ်းသိူဝ်းဢေႃႈ။
ပၢင်ႇယိူဝ်ႈတင်းလၢႆတဵမ်ဝႆႉတင်းၽုင်သူဝ်းလႄႈ၊တူင်ႈၼႃးတင်းလၢႆၵေႃႈ၊ မီးတၢင်းဢၼ်တူၼ်ႈၶဝ်ႈႁူမ်ႇသုမ်ႇဝႆႉ တီႈၶႃႈဢေႃႈ။ လွင်ႈတၢင်းၵူႈၸိူဝ်ႉၵူႈပိူင်ႁွင်ႉသႅၼ်ႇလႄႈ ဢွၼ်ၵၼ်ၸူမ်းသိူဝ်းႁဵတ်းၵႂၢမ်းဢၼ်ယွင်ႈယေႃးယူႇတီႈၶႃႈဢေႃႈ။
ၵူၼ်းတင်းသဵင်ႈတင်းလူင်ၶဝ်႟။ ဢွၼ်ၵၼ်ႁဵတ်းသဵင်ဢၼ်ၸူမ်းဢၼ်သိူဝ်းလႄႈယွင်ႈယေႃးၽြႃးပဵၼ်ၸဝ်ႈ။
ႁဵတ်းၵႂၢမ်းလွင်ႈမုၼ်ၽုင်းၼႃႇမႃႉၸိုဝ်ႈသဵင်မၼ်းၸဝ်ႈတႃႉ။ ဢွၼ်ၵၼ်ပၼ်မုၼ်သရေႇတၢင်းဢၼ်ယွင်ႈယေႃး တီႈမၼ်းၸဝ်ႈတႃႉ။
လဝ်ႈလၢတ်ႈတီႈၽြႃးပဵၼ်ၸဝ်ႈလႄႈဝႃႈ၊ “လွင်ႈတၢင်းဢၼ်ၸဝ်ႈႁဝ်းၶိုင်ပွင်ႁဵတ်းဝႆႉၸိူဝ်းၼၼ်ႉပဵၼ်ဢၼ်လီဢၢမ်းၼႃႇတီႈၶႃႈဢေႃႈ။ မုၼ်ၽုင်းတၼ်းၶူဝ်းၸဝ်ႈႁဝ်းယႂ်ႇၼႃႇလႄႈ ရၢၼ်ႇသူႇၸဝ်ႈႁဝ်းၸိူဝ်းၼၼ်ႉ ဢွၼ်ၵၼ်ၶုပ်ႉမူပ်ႇၵူဝ်ႁႄၵႃႈတီႈၽၢႆႇၼႃႈၸဝ်ႈႁဝ်းတီႈၶႃႈဢေႃႈ။
ၵူၼ်းလေႃးၵီႇၵူႈၵေႃႉၵူႈၵူၼ်းတၵ်းဢွၼ်ၵၼ်ဝႆႈၸဝ်ႈႁဝ်းလႄႈ ၶဝ်ဢွၼ်ၵၼ်ႁဵတ်းၵႂၢမ်းယွင်ႈယေႃးၸဝ်ႈႁဝ်း၊ ႁဵတ်းၵႂၢမ်းယွင်ႈယေႃးၼႃႇမႃႉၸိုဝ်ႈသဵင် ၸဝ်ႈႁဝ်းတီႈၶႃႈဢေႃႈ၊” ဝႃႈၼင်ႇၼႆတႃႉ။
ဢွၼ်ၵၼ်မႃးလူတူၺ်းလွင်ႈတၢင်းဢၼ်ၽြႃးပဵၼ်ၸဝ်ႈ၊ၶိုင်ပွင်ႁဵတ်းဝႆႉၸိူဝ်းၼၼ်ႉ၊ ဢိၵ်ႇတင်းတၢင်းႁဵတ်းတၢင်းသၢင်ႈ ဢၼ်လီဢၢမ်း၊ၵႃႈတီႈၼႂ်းၵၢင်ၵူၼ်း တင်းလၢႆၼၼ်ႉတႃႉ။
မၼ်းၸဝ်ႈႁႂ်ႈပၢင်ႇလၢႆႇပိၼ်ႇပဵၼ်ၵွင်းႁႅင်ႈၵႂႃႇသေယဝ်ႉ၊ ပူႇမွၼ်ႇႁဝ်းၸိူဝ်းၼၼ်ႉလႆႈပႆတိၼ်ၽႃႇလတ်း ၼမ်ႉႁွင်ႈၼၼ်ႉၵႂႃႇဢေႃႈ။ ႁဝ်းဢွၼ်ၵၼ်ၸူမ်းသိူဝ်းၵွပ်ႈပိူဝ်ႈလွင်ႈတၢင်းဢၼ်မၼ်းၸဝ်ႈႁဵတ်းဝႆႉၸိူဝ်းၼၼ်ႉဢေႃႈ။
ၵွပ်ႈပိူဝ်ႈတၼ်းၶူဝ်းမၼ်းၸဝ်ႈလႄႈမၼ်းၸဝ်ႈဢုပ်ႉပိူင်ႇယူႇတႃႇသေႇဢမ်ႇထၢတ်ႇ ဢိၵ်ႇတင်းမၢၵ်ႇတႃမၼ်းၸဝ်ႈလူတူၺ်းမဵဝ်းၵူၼ်းတင်းလၢႆယူႇဢေႃႈ။ ယႃႇပေႁႂ်ႈၽူႈလႂ်လုၵ်ႉၽိုၼ်ႉမၼ်းၸဝ်ႈ သေၵေႃႉသေၵူၼ်းသေၵမ်း။
မဵဝ်းၵူၼ်းတင်းလၢႆၶဝ်႟။ ဢွၼ်ၵၼ်ယွင်ႈယေႃးၽြႃးပဵၼ်ၸဝ်ႈႁဝ်းတႃႉ။ တၢင်းဢၼ်ယွင်ႈယေႃးၼၼ်ႉႁႂ်ႈပိူၼ်ႈလႆႈငိၼ်းတႃႉ။
မၼ်းၸဝ်ႈႁႂ်ႈဢသၢၵ်ႈႁဝ်းလႆႈလိပ်းယူႇလႄႈ ဢမ်ႇပၼ်ႁႂ်ႈတိၼ်ႁဝ်းလႆႈပြၢတ်ႈၵႂႃႇ။
ၽြႃးပဵၼ်ၸဝ်ႈတီႈၶႃႈ။ ၸဝ်ႈႁဝ်းၸၢမ်းတူၺ်း ၶႃႈၸဝ်ႈႁဝ်းၶဝ်တီႈၶႃႈယဝ်ႉ၊ ၸဝ်ႈႁဝ်းၸႅတ်ႈတူၺ်းၶႃႈၸဝ်ႈႁဝ်းၶဝ် မိူၼ်ၸိူဝ်ႉၼင်ႇဢၼ်၊ၸႅတ်ႈတူၺ်းၶႃႇတူၺ်း ငိုၼ်းၼၼ်ႉတီႈၶႃႈယဝ်ႉ။
ၸဝ်ႈႁဝ်းႁႂ်ႈၶႃႈၸဝ်ႈႁဝ်းၶဝ်တူၵ်းၶဵၼ်းမႅၼ်ႈ ၵႃႈၼႂ်းတူင်ႇႁႅဝ်ႉသေလႄႈ သမ်ႉဢဝ်ၶူဝ်းဢၼ်ၼၵ်းၼႃႇတၢင်ႇသႂ်ႇၵႃႈၼိူဝ် ၵုင်းလင်တီႈၶႃႈယဝ်ႉ။
ၸဝ်ႈႁဝ်းႁႂ်ႈပိူၼ်ႈၶီႇႁူဝ်မႃႇၶႃႈၸဝ်ႈႁဝ်းၶဝ်တီႈၶႃႈယဝ်ႉ၊ ၶႃႈၸဝ်ႈႁဝ်းၶဝ်လႆႈပႆၶၢမ်ႈၽႆး၊ၶၢမ်ႈၼမ်ႉ ၵႂႃႇသေၵေႃႈ ၸဝ်ႈႁဝ်းသမ်ႉယင်းဢဝ်သူင်ႇႁွတ်ႈၵႃႈတီႈဢၼ် လူင်ႈလီလွတ်ႈလီတီႈၶႃႈယဝ်ႉ။
ၶႃႈၸဝ်ႈတၵ်းပႃးဢဝ်တင်းၶိူင်ႈတၢင်းလူႇဢၼ်ၽဝ်ၽႆးတင်းလၢႆ၊ ၶဝ်ႈၵႃႈၼႂ်းႁိူၼ်းၸဝ်ႈႁဝ်းသေလႄႈ၊ တၵ်းသၢၵ်ႈလူႇၵႃႈၼင်ႇဢၼ်ၶႃႈၸဝ်ႈ ဝႆႉၵတိၼၼ်ႉတီႈၶႃႈဢေႃႈ။
ၶႃႈၸဝ်ႈတၵ်းၽေႇဝၢတ်ႈၵတိသဵတ်ႈၸႃႇဢၼ်ၶႃႈၸဝ်ႈလႆႈလၢတ်ႈဝႆႉ၊ ၼႂ်းမိူဝ်ႈဢၼ်ၶႃႈၸဝ်ႈလႆႈထူပ်းၽေးတုၵ်ႉၶႃႉယူႇၼၼ်ႉတီႈၶႃႈဢေႃႈ။
ၶႃႈၸဝ်ႈတၵ်းသၢၵ်ႈလူႇသူဝ်းပေႃႈပုၼ်ႈဢၼ်တၵ်းၽဝ်ၽႆးၵႃႈၼိူဝ်ၶဵင်ႇတၢင်းလူႇသေလႄႈ၊ တၵ်းႁဵတ်းတၢင်းလူႇဢၼ်ပဵၼ်သူဝ်း ပဵၼ်ပႄႉၸိူဝ်းၼၼ်ႉ ႁႂ်ႈဢၢႆၵႂၼ်းၼၼ်ႉၶိုၼ်ႈၵႂႃႇၵႃႈၼိူဝ် တွင်ႉၽႃႉတီႈၶႃႈဢေႃႈ။
ၵူၼ်းဢၼ်ၵူဝ်ယမ်ၽြႃးပဵၼ်ၸဝ်ႈတင်းသဵင်ႈ တင်းလူင်ၶဝ်႟။ ဢွၼ်ၵၼ်မႃးထွမ်ႇငိၼ်းတႃႉ။ ၵဝ်တၵ်းမွၵ်ႇလၢတ်ႈလွင်ႈတၢင်းဢၼ်မၼ်းၸဝ်ႈ ႁဵတ်းၸိူဝ်ႉၼင်ႇႁိုဝ်ပုၼ်ႈၵဝ်ၼၼ်ႉဢေႃႈ။
ၵဝ်ဢဝ်သဵင်ဢၼ်ယႂ်ႇၼႃႇႁွင်ႉၵၢဝ်ႇတီႈမၼ်းၸဝ်ႈဢေႃႈ။ ၵဝ်ဢဝ်တင်းတၢင်းဢၼ်ႁဵတ်းၵႂၢမ်းလႄႈယွင်ႈယေႃးမၼ်းၸဝ်ႈဢေႃႈ။
ပေႃးၵဝ်ၵျိူၵ်ႈႁၵ်ႉတုၸရိူၵ်ႈတင်းလၢႆၸိုင်၊ၸဝ်ႈၽြႃးတေဢမ်ႇထွမ်ႇဢဝ်ငိၼ်းဢဝ်။
ၵူၺ်းၵႃႈ၊ၽြႃးပဵၼ်ၸဝ်ႈထွမ်ႇငိၼ်း တႄႉတႄႉဝႃႈဝႃႈလႄႈထွမ်ႇဢဝ် ၵႂၢမ်းသူးတွင်းၵဝ်ၼၼ်ႉယဝ်ႉ။
ႁႂ်ႈၽြႃးပဵၼ်ၸဝ်ႈမီးမၢင်ႇၵလႃႇသေၵမ်းလူၺ်ႈ။ လွင်ႈမၼ်းၸမ်ႉ၊မၼ်းၸဝ်ႈဢမ်ႇပႄႇပႅတ်ႈ ၵႂၢမ်းသူးတွင်းၵဝ်လႄႈ၊ ဢမ်ႇၼုၵ်ႈသိမ်းဢဝ်မႅတ်ႈတႃႇၵရုၼႃႇမၼ်းၸဝ်ႈသေၵႃႈတီႈၵဝ်ဢေႃႈ။
ႁႂ်ႈၽြႃးပဵၼ်ၸဝ်ႈမီးၸႂ်ဢၼ်ဢဵတ်းလူႁဝ်းၶႃႈလႄႈပၼ်တၢင်းလီတီႈႁဝ်းၶႃႈသေၵမ်းလူၺ်ႈ။ ႁႂ်ႈမီးၸႂ်ၵရုၼႃႇလႄႈလူတူၺ်းႁဝ်းၶႃႈသေၵမ်းလူၺ်ႈ။
ၼင်ႇၼၼ်လႄႈ၊ႁႂ်ႈလိၼ်မိူင်းႁုဢလူဝ်ႇၸဝ်ႈႁဝ်းလႄႈ ႁႂ်ႈမဵဝ်းၵူၼ်းတင်းလၢႆလႆႈႁုၵျေးၸူးတၢင်းဢၼ်ၸဝ်ႈႁဝ်းၵႄႇၶျွတ်ႈဢဝ်ၼၼ်ႉသေၵမ်းလူၺ်ႈ။
ၽြႃးပဵၼ်ၸဝ်ႈတီႈၶႃႈ။ ႁႂ်ႈၵူၼ်းတင်းလၢႆယွင်ႈယေႃးၸဝ်ႈႁဝ်းသေၵမ်းလူၺ်ႈ။ ႁႂ်ႈၵူၼ်းၵႃႈမီးတင်းသဵင်ႈတင်းမူတ်းယွင်ႈယေႃးၸဝ်ႈႁဝ်းသေၵမ်းလူၺ်ႈ။
ႁႂ်ႈမဵဝ်းၵူၼ်းတင်းလၢႆၸူမ်းသိူဝ်းလႄႈႁဵတ်းၵႂၢမ်းတၢင်းဢၼ်သႂၢင်ႇဢၼ်သိူဝ်းသေၵမ်းလူၺ်ႈ။ လွင်ႈမၼ်းၸမ်ႉ၊ၸဝ်ႈႁဝ်းၸီႇယၢင်ႇတြႃး ၵူၼ်းတင်းလၢႆ၊ၸွမ်းၼင်ႇတြႃးတၢင်းဢၼ် သိုဝ်ႈတေႃႇလႄႈ ၼႄတၢင်းၵႃႈတီႈမဵဝ်းၵူၼ်းတင်းလၢႆၵႃႈၼိူဝ်လိၼ်မိူင်းတီႈၶႃႈဢေႃႈ။
ၽြႃးပဵၼ်ၸဝ်ႈတီႈၶႃႈ။ ႁႂ်ႈၵူၼ်းတင်းလၢႆ ယွင်ႈယေႃးၸဝ်ႈႁဝ်းသေၵမ်းလူၺ်ႈ။ ႁႂ်ႈၵူၼ်းၵႃႈမီးတင်းသဵင်ႈတင်းမူတ်းယွင်ႈယေႃး ၸဝ်ႈႁဝ်းသေၵမ်းလူၺ်ႈ။
လိၼ်မိူင်းႁႂ်ႈမၢၵ်ႇၶဝ်ႈႁူင်းၶဝ်ႈမၼ်းဢွၵ်ႇမႃး တီႈၶႃႈယဝ်ႉ။ ၽြႃးပဵၼ်ၸဝ်ႈဢၼ်ပဵၼ်ၽြႃးပဵၼ်ၸဝ်ႈႁဝ်းၼၼ်ႉပၼ်တၢင်းလီတီႈႁဝ်းယဝ်ႉ။
ႁႂ်ႈၽြႃးပဵၼ်ၸဝ်ႈသိုပ်ႇပၼ်တၢင်းလီတီႈႁဝ်း သေၵမ်းလူၺ်ႈတီႈၶႃႈ။ ႁႂ်ႈၵူၼ်းၵႃႈမီးတင်းသဵင်ႈတင်းလူင်ၵူႈတီႈၵူႈလႅၼ်ၵူဝ်ယမ်ၸဝ်ႈႁဝ်းသေၵမ်းလူၺ်ႈ။
ႁႂ်ႈၽြႃးပဵၼ်ၸဝ်ႈလုၵ်ႉလႄႈႁႂ်ႈရၢၼ်ႇသူႇ မၼ်းၸဝ်ႈတင်းလၢႆ ၽၢတ်ႇၽႄၵၼ်ၵႂႃႇၵူႈတီႈၵူႈလႅၼ်သေၵမ်းလူၺ်ႈ။ ႁႂ်ႈၶဝ်ၸိူဝ်းဢၼ်ၸင်းမၼ်းၸဝ်ႈၼၼ်ႉ လႆႈဢွၵ်ႇပၢႆႈၼႂ်းတၢင်းဢၼ်တူၵ်းသုမ်း ၼၼ်ႉသေၵမ်းလူၺ်ႈ။
မိူၼ်ၸိူဝ်ႉၼင်ႇဢၼ်ၵႂၼ်းၽႆးပိဝ်ၵႂႃႇၼၼ်ႉႁႂ်ႈမၼ်းၸဝ်ႈႁေႃႈၶဝ်ပႅတ်ႈသေၵမ်းလူၺ်ႈ။ မိူၼ်ၸိူဝ်ႉၼင်ႇဢၼ်ၶီႈၽိုင်ႈၸိူမ်ႈၵႂႃႇၵႃႈတီႈၽၢႆႇၼႃႈၽႆးၼၼ်ႉ ႁႂ်ႈၵူၼ်းဢၼ်ႁၢႆႉမိူၵ်ႈတင်းလၢႆလုလႅဝ်ပႅတ်ႈၵႂႃႇၵႃႈတီႈၽၢႆႇၼႃႈၽြႃးပဵၼ်ၸဝ်ႈသေၵမ်းလူၺ်ႈ။
ၵူၼ်းဢၼ်သိုဝ်ႈတေႃႇၸမ်ႉ၊ႁႂ်ႈမီးဢၶႂၢင်ႉ ဢၼ်ၸူမ်းသိူဝ်းယူႇ၊ ႁႂ်ႈလႆႈသႂၢင်ႇၸႂ်ၵႃႈတီႈၽၢႆႇၼႃႈ ၽြႃးပဵၼ်ၸဝ်ႈယူႇ၊ ႁႂ်ႈလႆႈပၢဝ်ႇသႅၼ်ႇသေလႄႈသႂၢင်ႇသိူဝ်း သေၵမ်းလူၺ်ႈ။
ဢွၼ်ၵၼ်ႁဵတ်းၵႂၢမ်းတီႈၽြႃးပဵၼ်ၸဝ်ႈလႄႈ ႁဵတ်းၵႂၢမ်းထေႃးပၼႃႇတီႈၼႃႇမႃႉၸိုဝ်ႈသဵင်၊မၼ်းၸဝ်ႈတႃႉ။ ၵိဝ်သဵင်ႁဵတ်းၵႂၢမ်းတီႈမၼ်းၸဝ်ႈဢၼ် ၶီႇမွၵ်ႇၵုမ်ႈၵႂႃႇၼၼ်ႉတႃႉ။ ၼႃႇမႃႉၸိုဝ်ႈသဵင်မၼ်းၸဝ်ႈၸမ်ႉ၊ပဵၼ် ထႃႇဝရႃႉၽြႃး၊ ဢေႃႈ။ ဢွၼ်ၵၼ်ၸူမ်းသိူဝ်းၵႃႈတီႈၽၢႆႇၼႃႈ မၼ်းၸဝ်ႈတႃႉ။
ၽြႃးပဵၼ်ၸဝ်ႈ၊ၸဝ်ႈဢၼ်ၵိင်းဝၢပ်ႈယူႇၵႃႈၼႂ်းၵျွင်းပိၵ်ႈမၢၼ်ႇဢၼ်မူတ်းၸၢင်ႇၼၼ်ႉ၊ ပႂ်ႉလူလုမ်းလႃးလုၵ်ႈၽၢၼ်ပေႃႈၽၢၼ်မႄႈတင်းလၢႆဢိၵ်ႇတင်း ၵႅတ်ႇၶႄႁႄႉၵင်ႈပၼ်မႄႈမၢႆႈတင်းလၢႆ တီႈၶႃႈဢေႃႈ။
မၼ်းၸဝ်ႈပၼ်ၵေႃႉဢၼ်ဢမ်ႇမီးၵေႃႉမီးသႄႈၼၼ်ႉႁႂ်ႈလႆႈပဵၼ်ႁိူၼ်းယေးလႄႈ ဢွၼ်ဢဝ်ၶဝ်ၸိူဝ်းဢၼ်တူၵ်းၵႅၼ်းတင်းလၢႆ လႆႈလွတ်ႈဢွၵ်ႇမႃးၵႃႈၼႂ်းတၢင်းဢၼ်လွတ်ႈလႅဝ်းဢၼ်ၸူမ်းသိူဝ်းၼၼ်ႉဢေႃႈ။ ၶဝ်ၸိူဝ်းဢၼ်လုၵ်ႉၽိုၼ်ႉၼၼ်ႉၸမ်ႉ၊လႆႈယူႇတီႈဢၼ်သဵတ်ႇဢၼ်ငႅဝ်ဢေႃႈ။
ၽြႃးပဵၼ်ၸဝ်ႈတီႈၶႃႈ။ မိူဝ်ႈဢၼ်ၸဝ်ႈႁဝ်းဢွၼ်ႁူဝ်ၵူၼ်းၸဝ်ႈႁဝ်းတင်းလၢႆသေလႄႈ ၶီႇၶိုၼ်ႈလတ်းၶဝ်ႈထိူၼ်ႇလႅင်ႉၼၼ်ႉ။
ဢိင်ႇသၼ်ႇလႄႈတွင်ႉၽႃႉလေႃႇၼမ်ႉၽူၼ်တူၵ်းယူႇသိုဝ်ႈၼႃႈတႂ်ႈတႃၽြႃးပဵၼ်ၸဝ်ႈ၊ ၵွပ်ႈပိူဝ်ႈတၢင်းဢၼ်ၽြႃးပဵၼ်ၸဝ်ႈဢၼ် ပေႃႇမႃးတီႈလွႆ သိၼႃႉ၊ ဢၼ်ဝႃႈၽြႃးပဵၼ်ၸဝ်ႈမဵဝ်း ဢိသရေး၊ ၼၼ်ႉ ၵျွမႃးၼၼ်ႉတီႈၶႃႈဢေႃႈ။
ၸဝ်ႈႁဝ်းႁႂ်ႈၽူၼ်တူၵ်းၼမ်ၼႃႇလႄႈ ၸဝ်ႈႁဝ်းၵမ်ႉထွၵ်ႈၸွႆႈထႅမ်လိၼ်မိူင်းဢၼ်ၸၢင်ၵႂႃႇၼၼ်ႉတီႈၶႃႈဢေႃႈ။
ၽုင်မူႇၵူၼ်းၸဝ်ႈႁဝ်းဢွၼ်ၵၼ်ႁဵတ်းႁိူၼ်းႁဵတ်းယေးၵႃႈတီႈၼၼ်ႈသေလႄႈ ၸွမ်းၼင်ႇၸႂ်ၸေႇတၼႃႇၸဝ်ႈႁဝ်းၼၼ်ႉ ၸဝ်ႈႁဝ်းႁဵတ်းၵျေးၸူးတီႈၵူၼ်းယၢၵ်ႈၵူၼ်းၽၢၼ်တီႈၶႃႈဢေႃႈ။
ၸဝ်ႈၽြႃးမီးဢမိင်ႉၸဝ်ႈလႄႈၽူႈယိင်းၼမ်ၼႃႇ မွၵ်ႇလၢတ်ႈၶၢဝ်ႇငၢဝ်းသိူဝ်းပျေႃႇၸိူဝ်းၼၼ်ႉလႄႈဝႃႈၸမ်ႉ၊
“ၶုၼ်ႁေႃၶမ်းဢိၵ်ႇတင်းတပ်ႉသိုၵ်းၶဝ်ဢွၵ်ႇပၢႆႈဢေႃႈ။ ၶဝ်ဢွၼ်ၵၼ်ဢွၵ်ႇပၢႆႈဢေႃႈ၊” ဝႃႈၼင်ႇၼႆဢေႃႈ။ ၽူႈယိင်းဢၼ်ၵိုတ်းသဝ်းယူႇၵႃႈတီႈႁိူၼ်းၼၼ်ႉ ဢွၼ်ၵၼ်ၽႄမႅင်ႇဢဝ်ဢုၵ်ႉၸႃႇဢၼ်ႁိမ်ဢဝ်လႆႈမႃးၼၼ်ႉဢေႃႈ။
ပိၵ်ႉသမ်ႉတူဝ်ၶဝ်လႆႈမီးယူႇၼႂ်းၶွၵ်ႈသူဝ်းသေၵေႃႈ၊ ၶဝ်လႆႈၶူဝ်းဢၼ်မီးႁၢင်ႈၼူၵ်ႉတူႈဢၼ်ဢဝ်ငိုၼ်းဢုမ်ႇဝႆႉၼၼ်ႉ ဢိၵ်ႇတင်းၶူၼ်ပိၵ်ႇဢၼ်ဢဝ်တင်းၶမ်းၸႅတ်ႈ ဢုမ်ႇဝႆႉၼၼ်ႉဢေႃႈ။
မိူဝ်ႈဢၼ် ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ ႁႂ်ႈၶုၼ်ႁေႃၶမ်းတင်းလၢႆၽၢတ်ႇၽႄၵၼ်ၵႂႃႇ ၵႃႈၼိူဝ်လွႆ သႃႇလမုၼ်ႇ၊ ၼၼ်ႉၸိုင်၊မၼ်းၸဝ်ႈႁႂ်ႈမူၺ်ႁႃႇတူၵ်းသႂ်ႇၵႃႈတီႈၼၼ်ႈဢေႃႈ။
လွႆ ပႃႇသၢၼ်ႇ၊ ဢၼ်မီးၸိၵ်းမီးသၼ် ၼမ်ၼႃႇၼၼ်ႉပဵၼ်လွႆဢၼ်သုင်မျၢတ်ႈ ၼႃႇလူင်လၢင်ဢေႃႈ။
ႁဵတ်းသင်လႄႈသူယူႇၵႃႈတီႈၸိၵ်းလွႆဢၼ်သုင်မျၢတ်ႈၼႃႇလူင်လၢင်ၼၼ်ႉသေလႄႈ လွမ်တူၺ်းလွႆဢၼ်ၽြႃးပဵၼ်ၸဝ်ႈမီးဢလူဝ်ႇ ၶႂ်ႈၵိင်းဝၢပ်ႈယူႇၼၼ်ႉၼင်ႇႁိုဝ်။ ထႃႇဝရႃႉၽြႃး၊ တၵ်းၶျႃးတီႈယူႇတီႈသဝ်းၵႃႈၼိူဝ်လွႆၼၼ်ႉတႃႇသေႇဢမ်ႇထၢတ်ႇဢေႃႈ။
မၼ်းၸဝ်ႈဢဝ်တင်းလေႃႉရထႃးၸဝ်ႈဢၢၼ်ႇႁူဝ်မိုၼ်ႇႁူဝ်သႅၼ်ဢမ်ႇၵႃးလႄႈ မၼ်းၸဝ်ႈလုၵ်ႉသေၵႃႈတီႈလွႆ သိၼႃႉ၊ မႃးၶဝ်ႈၵႃႈၼႂ်းထႃႇၼႃႉတီႈမူတ်းၸၢင်ႇဢေႃႈ။
မၼ်းၸဝ်ႈတိဢဝ်ၵူၼ်းၼမ်ၼႃႇလႄႈၶိုၼ်ႈၵႂႃႇ တီႈဢၼ်သုင်ပုၼ်ႉသေယဝ်ႉ၊ ၶၢမ်ႇဢဝ်သူးလၢပ်ႈၵႃႈတီႈၶဝ်ၸိူဝ်းဢၼ်လုၵ်ႉၽိုၼ်ႉမၼ်းၸဝ်ႈတင်းလၢႆၼၼ်ႉဢေႃႈ။ ထႃႇဝရႃႉၽြႃး၊ ပဵၼ်ၸဝ်ႈတၵ်းၶျႃးတီႈယူႇတီႈသဝ်းၵႃႈတီႈၼၼ်ႈဢေႃႈ။
ႁႂ်ႈၽြႃးပဵၼ်ၸဝ်ႈဢၼ်ပႃးဢဝ်ၶူဝ်းႁဝ်းဢၼ်ႁၢပ်ႇၼၵ်းၼႃႇၵႂႃႇၵူႈမိုဝ်ႉၵူႈဝၼ်းၼၼ်ႉ၊ မီးမၢင်ႇၵလႃႇသေၵမ်းလူၺ်ႈ။ မၼ်းၸဝ်ႈပဵၼ်ၽြႃးပဵၼ်ၸဝ်ႈဢၼ်ၵႄႇသႄႇၶျွတ်ႈဢဝ်ႁဝ်းဢေႃႈ။
ၽြႃးပဵၼ်ၸဝ်ႈႁဝ်းၼၼ်ႉပဵၼ်ၽြႃးဢၼ်ၵႄႇသႄႇၶျွတ်ႈဢဝ်ဢေႃႈ။ မၼ်းၸဝ်ႈပဵၼ် ထႃႇဝရႃႉၽြႃး၊ ပဵၼ်ၸဝ်ႈၽြႃးႁဝ်းဢၼ်ထုတ်ႇၼုၵ်ႈဢဝ်ႁဝ်းသေၵႃႈၼႂ်းတၢင်းတၢႆဢေႃႈ။
ၽြႃးပဵၼ်ၸဝ်ႈတၵ်းပေႃႉယႅၼ်ႉႁူဝ်ရၢၼ်ႇသူႇမၼ်းၸဝ်ႈတင်းလၢႆ ဢၼ်ဝႃႈၶဝ်ၸိူဝ်းဢၼ်သိုပ်ႇႁဵတ်းတုၸရိူၵ်ႈဢပျတ်ႈၼၼ်ႉဢမၢၼ်ႇၶၼ်ပဵၼ်ဢေႃႈ။
ၽြႃးပဵၼ်ၸဝ်ႈလၢတ်ႈလႄႈဝႃႈ၊ “ၵဝ်တၵ်းဢဝ်ရၢၼ်ႇသူႇမႂ်းတင်းလၢႆ ၶိုၼ်းဢွၵ်ႇသေၵႃႈၼႂ်းမိူင်း ပႃႇသၢၼ်ႇ၊ မႃးဢေႃႈ။ ၵဝ်တၵ်းဢဝ်ၶဝ်ၶိုၼ်းဢွၵ်ႇသေၵႃႈၼႂ်းၼမ်ႉသမ်ႇမုၵ်ႈတြႃႇဢၼ်လိုၵ်ႉဢၼ်လမ်ႇၼၼ်ႉမႃး။
ႁႂ်ႈမႂ်းလႆႈယဵပ်ႇတဝ်ၼႂ်းလိူတ်ႈၶဝ်လႄႈ၊ မႃမႂ်းတင်းလၢႆၵေႃႈလႆႈလေးၵိၼ်ဢိမ်ႇဢိမ်ႇ တဵမ်တဵမ်ဢေႃႈ၊” ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈတီႈၶႃႈ။ ၶဝ်တင်းသဵင်ႈတင်းလူင်လႆႈႁၼ်တၢင်းဢၼ်ၸဝ်ႈႁဝ်း၊ၽြႃးပဵၼ်ၸဝ်ႈ၊ ၶုၼ်ႁေႃၶမ်းၵဝ်ၶႃႈႁႄႇၶဝ်ႈၵႂႃႇၵႃႈၼႂ်းထႃႇၼႃႉဢၼ်မူတ်းၸၢင်ႇတီႈၶႃႈယဝ်ႉ။
ၶဝ်ၸိူဝ်းဢၼ်ပဵၼ်မေႃႁွင်ႉၵႂၢမ်းတင်းလၢႆၶီႇၵႂႃႇဢွၼ်တၢင်းလႄႈ ၶဝ်ၸိူဝ်းဢၼ်လဵတ်းတိင်ႇလဵတ်းတရေႃးတင်းလၢႆၸွမ်းလိုၼ်းလင်သုတ်းသေယဝ်ႉ၊ ၽူႈယိင်းဢၼ်ႁႆႇၵွင်ၶဵတ်ႇတင်းလၢႆပႆၸွမ်းၶိုင်ႈၵၢင်တီႈၶႃႈဢေႃႈ။
ၶဝ်ႁွင်ႉဝႃႈ၊ “ဢွၼ်ၵၼ်ယွင်ႈယေႃးၽြႃးပဵၼ်ၸဝ်ႈၵႃႈၼႂ်းၵႄႈၵူၼ်းမၼ်းၸဝ်ႈ၊ ဢၼ်ၸုၵၼ်တုမ်ၵၼ်ၼၼ်ႉတႃႉ။ သူၸိူဝ်းဢၼ်ပဵၼ်ၸိူဝ်ႉၶိူဝ်း ယႃႇၵုပ်ႈ၊ တင်းသဵင်ႈတင်းလူင်ၶဝ်႟။ ဢွၼ်ၵၼ်ယွင်ႈယေႃး ထႃႇဝရႃႉၽြႃး၊ တႃႉ။” ဝႃႈၼင်ႇၼႆဢေႃႈ။
တႄႇၸႃႉဢဝ်ၸိူဝ်ႉၶိူဝ်း ပိၼ်ႇယႃႇမိၼ်ႇ၊ ဢၼ်ပဵၼ်ၸိူဝ်ႉၶိူဝ်းဢၼ်လဵၵ်ႉသေပိူၼ်ႈၼၼ်ႉလႄႈ ၵူၼ်းဢၼ်ပဵၼ်ၵႄႇပဵၼ်ႁူဝ်ၸိူဝ်ႉၶိူဝ်း ယုတႃႉ၊ လႂ်ဢိၵ်ႇတင်းမုၵ်ႉၵူၼ်းၸိူဝ်းၵူၼ်းၶဝ်လႂ်၊ ဢိၵ်ႇတင်းၵူၼ်းၵႄႇၵူၼ်းႁူဝ်ၸိူဝ်ႉၶိူဝ်း ၸေႇပုလုၼ်ႇ၊ လႂ်၊တင်းၸိူဝ်ႉၶိူဝ်း ၼပ်ႉထလိ၊ လႂ် ၶပ်ႉၸွမ်းတၢမ်းၵၼ်မႃးဢေႃႈ။
ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈၼႄပျႃးတၼ်းၶူဝ်းၸဝ်ႈႁဝ်း၊ ဢၼ်ပဵၼ်ၵျေးၸူးတၢင်းဢၼ်ၸဝ်ႈႁဝ်းႁဵတ်းပုၼ်ႈၶႃႈၸဝ်ႈႁဝ်းၶဝ်ၼၼ်ႉသေၵမ်းတီႈၶႃႈ။
ၵွပ်ႈပိူဝ်ႈၵျွင်းပိၵ်ႈမၢၼ်ႇၸဝ်ႈႁဝ်းဢၼ်မီးယူႇၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉလႄႈ ၶုၼ်ႁေႃၶမ်းတင်းလၢႆဢွၼ်ၵၼ်ဢဝ်လၢၵ်ႈသွင်ႇပၼ်ႇၼႃႇမႃးၸူးၸဝ်ႈႁဝ်းတီႈၶႃႈဢေႃႈ။
ၶႅၼ်းတေႃႈသင်ႇသွၼ်သုင်းမႃႉၵူၼ်းမိူင်း ဢေးၵျိပ်ႉ၊ ဢၼ်ဝႃႈတူဝ်ထိူၼ်ႇႁၢႆႉ ဢၼ်မီးၵႃႈၼႂ်းပႃႇမႆႉဢေႃႈၼၼ်ႉ၊ဢိၵ်ႇတင်းမဵဝ်းၵူၼ်းတင်းလၢႆ ဢၼ်ဝႃႈၽုင်ဝူဝ်းငၢၼ်တင်းဝူဝ်းၼုမ်ႇၸိူဝ်းၼၼ်ႉ၊တေႃႇထိုင်ႁွတ်ႈၶဝ်တင်းသဵင်ႈတင်းလူင် ထၢၼ်ႈပေႃးၵူမ်ႈႁူဝ်ၵွမ်းႁူဝ်သေလႄႈဢဝ်ငိုၼ်းၶဝ်သၢၵ်ႈလူႇတီႈၸဝ်ႈႁဝ်းသေၵမ်းတီႈၶႃႈ။ ႁႂ်ႈၵူၼ်းၸိူဝ်းဢၼ်ၵျိူၵ်ႈၼႃႈသိုၵ်းၼၼ်ႉၽၢတ်ႇၽႄၵၼ်ၵႂႃႇသေၵမ်းတီႈၶႃႈ။
ႁႂ်ႈၵူၼ်းမိူင်း ဢေးၵျိပ်ႉ၊ ၶဝ်ပွႆႇသၢၼ်ႇတမၢၼ်ႇ ၶဝ် မႃးလႄႈ ႁႂ်ႈၵူၼ်းမိူင်း ဢေႇတီႇဢူဝ်းပီးယႃး၊ ႁိပ်ႈၼႅတ်ႈႁွမ်းမိုဝ်းမၼ်းသူးတွင်းတီႈၽြႃးပဵၼ်ၸဝ်ႈတႃႉ။
သိုင်ႇၸိုင်ႈဝၢၼ်ႈမိူင်းလေႃးၵီႇၶဝ်႟။ ႁဵတ်းၵႂၢမ်း တီႈၽြႃးပဵၼ်ၸဝ်ႈတႃႉ။ ဢွၼ်ၵၼ်ႁဵတ်းၵႂၢမ်းယွင်ႈယေႃးၸဝ်ႈၽြႃး။
ဢၼ်ဝႃႈၸဝ်ႈဢၼ်ၶီႇၽႃႉၵၢင်ႁၢဝ် ဢၼ်ပဵၼ်တွင်ႉၽႃႉဢၼ်မီးမႃးၸဵမ်မိူဝ်ႈၵွၼ်ႇမိူဝ်ႈမိုၼ်ႉၼၼ်ႉတႃႉ။ ထွမ်ႇငိၼ်းသဵင်ဢၼ်မၼ်းၸဝ်ႈႁွင်ႉသႅၼ်ႇသဵင်လင်ၶၢင်းယူႇႁိုင်ႁိုင်ၼၼ်ႉတႃႉ။
ၽုၺ်ႇမွၵ်ႇလၢတ်ႈၼႄလွင်ႈမုၼ်ၽုင်းၽြႃးပဵၼ်ၸဝ်ႈတႃႉ။ မုၼ်ၽုင်းမၼ်းၸဝ်ႈမီးၵႃႈၼိူဝ်မိူင်း ဢိသရေး၊ လႄႈ တၼ်းၶူဝ်းမၼ်းၸဝ်ႈတႄႇယူႇၵႃႈၼိူဝ် ၽႃႉၵၢင်ႁၢဝ်ဢေႃႈ။
ၽြႃးပဵၼ်ၸဝ်ႈပဵၼ်ၸဝ်ႈဢၼ်လီၵူဝ်လီႁႄၼႃႇလူင်လၢင်၊ ၸွမ်းၼင်ႇဢၼ်မၼ်းၸဝ်ႈဢွၵ်ႇသေထႃႇၼႃႉတီႈမူတ်းၸၢင်ႇၸဝ်ႈမႃးၼၼ်ႉတီႈၶႃႈဢေႃႈ။ ၽြႃးပဵၼ်ၸဝ်ႈမဵဝ်း ဢိသရေး၊ ၼၼ်ႉပၼ်ႁႅင်းတၼ်းၶူဝ်းတီႈၵူၼ်းမၼ်းၸဝ်ႈတင်းလၢႆဢေႃႈ။ ႁႂ်ႈၽြႃးပဵၼ်ၸဝ်ႈမီးမၢင်ႇၵလႃႇသေၵမ်းလူၺ်ႈ။
ၽြႃးပဵၼ်ၸဝ်ႈတီႈၶႃႈ။ ၵႄႇသႄႇၶျွတ်ႈဢဝ်ၶႃႈၸဝ်ႈသေၵမ်းတီႈၶႃႈ။ ၼမ်ႉထူမ်ႈထိုင်ၶေႃးၶႃႈၸဝ်ႈဝႆႉတီႈၶႃႈယဝ်ႉ။
ၶႃႈၸဝ်ႈၸူမ်ၶဝ်ႈဢုင်ဝႆႉဢၼ်လိုၵ်ႉၼႃႇ တီႈဢၼ်ဢမ်ႇမီးတီႈတၵ်းယဵပ်ႇတမ်းတိၼ်ၼၼ်ႉတီႈၶႃႈယဝ်ႉ။ ၶႃႈၸဝ်ႈလွင်ႈယူႇၵႃႈၼႂ်းၼမ်ႉဢၼ်လိုၵ်ႉၼႃႇ တီႈဢၼ်လႅင်းၼမ်ႉပိူပ်ႈၼမ်ႉထူမ်ႈၶႃႈၸဝ်ႈၼၼ်ႉတီႈၶႃႈယဝ်ႉ။
ၶႃႈၸဝ်ႈႁိူဝ်ႉၸႂ်ဢူၼ်ႈၼႃႇၼူၼ်းၼႃႇ ၵွပ်ႈပိူဝ်ႈလႆႈႁွင်ႉႁႃပုၼ်ႈတၢင်းဢၼ်ၸွႆႈဢၼ်ထႅမ်ၼၼ်ႉတီႈၶႃႈဢေႃႈ။ ၵူင်ၶေႃးၶႃႈၸဝ်ႈႁႅင်ႈၵႂႃႇတီႈၶႃႈယဝ်ႉ။ ႁူၺ်ႇတႃၶႃႈၸဝ်ႈမူဝ်းၵႂႃႇၵွပ်ႈပိူဝ်ႈ လႆႈမုင်ႈထႃႈမွင်းထႃႈၽြႃးပဵၼ်ၸဝ်ႈ ႁိုင်ၼႃႇၼၼ်ႉတီႈၶႃႈယဝ်ႉ။
ၶဝ်ၸိူဝ်းဢၼ်ယင်းဢမ်ႇမီးလွင်ႈမီးတၢင်းလႄႈၸင်းၶႃႈၸဝ်ႈၼၼ်ႉ ယင်းမီးၼမ်ၼႃႇသေၶူၼ်ႁူဝ်ၶႃႈၸဝ်ႈတီႈၶႃႈဢေႃႈ။ ရၢၼ်ႇသူႇၶႃႈၸဝ်ႈဢၼ်ဢမ်ႇမီးလွင်ႈဢၼ်ၸိုဝ်ႈဢၼ်ၸႂ်ႈလႄႈယႃႉၵဝ်းၶႃႈၸဝ်ႈၼၼ်ႉ ႁႅင်းယႂ်ႇၼႃႇလူင်လၢင်တီႈၶႃႈဢေႃႈ။ ၶဝ်ႁႂ်ႈၶႃႈၸဝ်ႈၶိုၼ်းတႅၼ်းဢုၵ်ႉၸႃႇဢၼ်ၶႃႈၸဝ်ႈယင်းဢမ်ႇလႆႈဢဝ်ၼၼ်ႉတီႈၶႃႈဢေႃႈ။
ၽြႃးပဵၼ်ၸဝ်ႈတီႈၶႃႈ။ ၸဝ်ႈႁဝ်းႁုတၢင်းဢၼ်ၶႃႈၸဝ်ႈမိူၵ်ႈၼၼ်ႉယူႇတီႈၶႃႈဢေႃႈ။ ဢပျတ်ႈၶႃႈၸဝ်ႈတင်းလၢႆၼၼ်ႉဢမ်ႇသိူင်ႇဢမ်ႇလပ်ႉဝႆႉၵႃႈတီႈၸဝ်ႈႁဝ်းတီႈၶႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ဢၼ်ပဵၼ်ၽြႃးဢၼ်ပိူင်ႇၽႃႉငမ်းလိၼ်တီႈၶႃႈ။ ယႃႇပေႁႂ်ႈၶဝ်ၸိူဝ်းဢၼ်ယုမ်ႇယမ်ဢိင်ပိုင်ႈၸဝ်ႈႁဝ်းၼၼ်ႉ၊ လႆႈဢူၵ်းလႆႈဢၢႆၵွပ်ႈပိူဝ်ႈၶႃႈၸဝ်ႈသေၵမ်းတီႈၶႃႈ။ ၽြႃးပဵၼ်ၸဝ်ႈမဵဝ်း ဢိသရေး၊ တီႈၶႃႈ။ ယႃႇပေႁႂ်ႈၶဝ်ၸိူဝ်းဢၼ်ၵူဝ်းၵႂၢႆႇၸဝ်ႈႁဝ်းၼၼ်ႉ လႆႈသုၵ်ႉၸႂ်ၵႂၢင်ၸႂ်ၵွပ်ႈပိူဝ်ႈၶႃႈၸဝ်ႈသေၵမ်းတီႈၶႃႈ။
ၶႃႈၸဝ်ႈလႆႈၶၢမ်ႇတၢင်းဢၼ်သႄႉဢၼ်သွမ်းၵွပ်ႈပိူဝ်ႈၸဝ်ႈႁဝ်းလႄႈ ၶၢမ်ႇတၢင်းဢၼ်သရေႇလုႁူမ်ႇသုမ်ႇၼႃႈၶႃႈၸဝ်ႈဝႆႉတီႈၶႃႈဢေႃႈ။
ၶႃႈၸဝ်ႈလႆႈပဵၼ်မိူၼ်ၼင်ႇၵူၼ်းၼႃႈမႂ်ႇၵႃႈၼႂ်းပီႈၼွင်ႉၶႃႈၸဝ်ႈတင်းလၢႆလႄႈ၊ သမ်ႉလႆႈပဵၼ်မိူၼ်ၼင်ႇၵူၼ်း တၢင်ႇသိုင်ႇတၢင်ႇမိူင်း ၵႃႈၼႂ်းၵူၼ်းႁိူၼ်းၵူၼ်းယေးၶႃႈၸဝ်ႈ ၵႂႃႇတီႈၶႃႈယဝ်ႉ။
တၢင်းဢၼ်ၶႃႈၸဝ်ႈၸႂ်ၸွႆးႁႅင်းယႂ်ႇလူၺ်ႈလွင်ႈၵျွင်းပိၵ်ႈမၢၼ်ႇၸဝ်ႈႁဝ်းၼႆႉ၊ မႆႈၼႂ်းၸႂ်ၶႃႈၸဝ်ႈယူႇမိူၼ်ၸိူဝ်ႉၼင်ႇၽႆးဢေႃႈ။ ၵႂၢမ်းသႄႉသွမ်းဢၼ်ပိူၼ်ႈသႄႉသွမ်းတီႈၸဝ်ႈႁဝ်းၼၼ်ႉ တူၵ်းႁွတ်ႈၵႃႈၼိူဝ်ၶႃႈၸဝ်ႈတီႈၶႃႈဢေႃႈ။
မိူဝ်ႈဢၼ်ၶႃႈၸဝ်ႈၶျႃးတႅမ်ႇတူဝ်ၸဝ်ႈၵဝ်ႇ ၼႂ်းတၢင်းဢၼ်ၵမ်သိၼ်၊ဢမ်ႇၵိၼ် တၢင်းၵိၼ်ၼၼ်ႉ၊ ၵူၼ်းတင်းလၢႆလႆႈသႄႉသွမ်းၶႃႈၸဝ်ႈလႄႈ။
မိူဝ်ႈဢၼ်ၶႃႈၸဝ်ႈၼုင်ႈမႆၶူဝ်းဢၼ်ၵျၢမ်းၼႂ်းတၢင်းဢၼ်ၶၢင်းၶီၶၢင်းၽၢၼ်ၼၼ်ႉ၊ ၶဝ်ႁဵတ်းတၢင်းဢၼ်ပျၢၵ်ႈၶူဝ်တီႈၶႃႈၸဝ်ႈတီႈၶႃႈဢေႃႈ။
ၶဝ်လၢတ်ႈလွင်ႈၶႃႈၸဝ်ႈၼႂ်းသဵၼ်ႈတႃသၢႆတၢင်းလႄႈ ၵူၼ်းမဝ်းလဝ်ႈတင်းလၢႆၸၢပ်ႈလိၵ်ႈႁဵတ်းၵႂၢမ်းဢၼ်ပျၢၵ်ႈၶူဝ်တီႈၶႃႈၸဝ်ႈတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈၸမ်ႉ၊သူးတွင်းတီႈၸဝ်ႈႁဝ်းယူႇတီႈၶႃႈဢေႃႈ။ ၽြႃးပဵၼ်ၸဝ်ႈတီႈၶႃႈ။ ၼႂ်းၶိင်ႇဢၼ်သၢင်ႇထုၵ်ႇၼၼ်ႉၶိုၼ်းဢိူဝ်ၶႃႈၸဝ်ႈသေၵမ်းတီႈၶႃႈ။ ၶႅၼ်းတေႃႈၸွမ်းလူၺ်ႈမႅတ်ႈတႃႇၵရုၼႃႇၸဝ်ႈႁဝ်းဢၼ်ယႂ်ႇၼႃႇၼၼ်ႉ ဢိၵ်ႇတင်းၸွမ်းလူၺ်ႈသဵတ်ႈၸႃႇတၢင်းဢၼ်ၸဝ်ႈႁဝ်းၵႄႇသႄႇဢဝ်ၼၼ်ႉလႄႈ ထွမ်ႇဢဝ်ၶႃႈၸဝ်ႈသေၵမ်းတီႈၶႃႈ။
ၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈဢွၵ်ႇသေ ၵႃႈတီႈတၢင်းဢၼ်တူၵ်းၸူမ်ၵႃႈၼႂ်းဢုင်ဝႆႉသေၵမ်းတီႈၶႃႈ။ ၶႅၼ်းတေႃႈႁႂ်ႈၶႃႈၸဝ်ႈလႆႈလွတ်ႈသေရၢၼ်ႇသူႇၶႃႈၸဝ်ႈ၊တင်းလၢႆ ဢိၵ်ႇတင်းလႆႈလွတ်ႈသေၵႃႈၼႂ်းၼမ်ႉဢၼ်လိုၵ်ႉၼႃႇၼၼ်ႉသေၵမ်းတီႈၶႃႈ။
ယႃႇပေႁႂ်ႈၼမ်ႉထူမ်ႈၵႃႈၼိူဝ်ၶႃႈၸဝ်ႈသေၵမ်း။ ယႃႇပေႁႂ်ႈၶႃႈၸဝ်ႈတူၵ်းတၢႆၵႃႈၼႂ်းၼမ်ႉဢၼ်လိုၵ်ႉၼၼ်ႉသေၵမ်း။ ယႃႇပေႁႂ်ႈၶႃႈၸဝ်ႈၸူမ်ၶဝ်ႈၵႂႃႇၵႃႈၼႂ်းၶုမ်ပႃႇႁဵဝ်ႈသေၵမ်းတီႈၶႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈဢိူဝ်ၶႃႈၸဝ်ႈၸွမ်းလူၺ်ႈၸႂ်ၸေႇတၼႃႇ၊တၢင်းႁၵ်ႉမႅတ်ႈတႃႇ ဢိၵ်ႇတင်းၵရုၼႃႇၸဝ်ႈႁဝ်းၼၼ်ႉသေလႄႈဝၢႆႇၼႃႈၸူးၶႃႈၸဝ်ႈသေၵမ်းတီႈၶႃႈ။
ၶႅၼ်းတေႃႈယႃႇပေလပ်ႉၼႃႈၸဝ်ႈႁဝ်းဝႆႉသေၵႃႈတီႈၶႃႈၸဝ်ႈသေၵမ်းတီႈၶႃႈ။ ၶႃႈၸဝ်ႈထူပ်းၽေးယူႇတီႈၶႃႈယဝ်ႉ။ ၶႅၼ်းတေႃႈဢိူဝ်ၶႃႈၸဝ်ႈယၢမ်းမိူဝ်ႈလဵဝ်ၼႆႉ၊ ၵမ်းလဵဝ်သေၵမ်းတီႈၶႃႈ။
ၶႅၼ်းတေႃႈမႃးၵႄႇသႄႇၶျွတ်ႈဢဝ်ၶႃႈၸဝ်ႈသေၵမ်းတီႈၶႃႈ။ ထုတ်ႇၼုၵ်ႈဢဝ်ၶႃႈၸဝ်ႈဢွၵ်ႇသေၵႃႈၼႂ်းမိုဝ်းရၢၼ်ႇသူႇတင်းလၢႆသေၵမ်းတီႈၶႃႈ။
ၸဝ်ႈႁဝ်းႁုတၢင်းဢၼ်ၶႃႈၸဝ်ႈလႆႈၶၢမ်ႇတၢင်းဢၼ်သႄႉသွမ်းထၼ်ႇႁိုဝ်၊ လႆႈဢူၵ်းဢၢႆထၼ်ႇႁိုဝ်၊လႆႈသရေႇလုထၼ်ႇႁိုဝ်ၼၼ်ႉယူႇတီႈၶႃႈဢေႃႈ။ ၸဝ်ႈႁဝ်းႁၼ်ရၢၼ်ႇသူႇၶႃႈၸဝ်ႈတင်းလၢႆၸိူဝ်းၼၼ်ႉယူႇတီႈၶႃႈဢေႃႈ။
တၢင်းဢၼ်သႄႉဢၼ်သွမ်းၸိူဝ်းၼၼ်ႉႁႂ်ႈႁူဝ်ၸႂ်ၶႃႈၸဝ်ႈတႅၵ်ႇလႅဝ်ၵႂႃႇလႄႈ ၶႃႈၸဝ်ႈမီးတၢင်းဢၼ်မႆႈၸႂ်ႁွၼ်ႉၸႂ်ၼႃႇလူင်လၢင်တီႈၶႃႈဢေႃႈ။ ၶႃႈၸဝ်ႈမုင်ႈထႃႈမွင်းထႃႈတၢင်းဢၼ်ပိူၼ်ႈ တၵ်းဢဵတ်းလူၼၼ်ႉသေၵေႃႈ၊ဢမ်ႇမီး ၽူႈလႂ်လႃးလႃး။ ၶႃႈၸဝ်ႈသေႃႉႁႃၵေႃႉဢၼ်တၵ်းႁႂ်ႈၸႂ် သၢၵ်ႈသႃႇၼၼ်ႉသေၵေႃႈဢမ်ႇထူပ်း ဢမ်ႇႁၼ်သေၵေႃႉတီႈၶႃႈ။
မိူဝ်ႈဢၼ်ၶႃႈၸဝ်ႈတွင်ႉမႆႈၼၼ်ႉၶဝ်ဢဝ်ငူၼ်ႉပၼ်ၶႃႈၸဝ်ႈၵိၼ်လႄႈ မိူဝ်ႈဢၼ်ၶႃႈၸဝ်ႈယၢၵ်ႇၼမ်ႉၼၼ်ႉသမ်ႉဢဝ်ၼမ်ႉမူၵ်ႈသူမ်ႈတိုၵ်းပၼ်ဢေႃႈ။
ႁႂ်ႈၽိူၼ်တီႈၵိၼ်ၶဝ်ၼၼ်ႉပဵၼ်ဢၼ်ယႃႉဢၼ်ယုၵ်ႉၶဝ်လႄႈ ႁႂ်ႈပွႆးၵိၼ်ပွႆးၶူပ်းၶဝ်ၼၼ်ႉပဵၼ်ပုၼ်ႈဢၼ်တၵ်းတူၵ်းသုမ်းသေၵမ်းလူၺ်ႈ။
ႁႂ်ႈမၢၵ်ႇတႃၶဝ်လပ်းသိင်ႇၵႂႃႇထၢၼ်ႈပေႃးဢမ်ႇႁၼ်လႆႈလႄႈ ႁႂ်ႈဢႅဝ်ၶဝ်ႁႅင်းဢူၼ်ႈယူႇသေၵမ်းလူၺ်ႈ။
ဢဝ်တင်းတၢင်းဢၼ်ၸဝ်ႈႁဝ်းၸီႇယၢင်ႇပၼ်တၢမ်ႇဢပျတ်ႈၼၼ်ႉထွၵ်ႇသႂ်ႇလႄႈ ဢဝ်ၸႂ်ၶၼ်ၸႂ်ဝႆးၸဝ်ႈႁဝ်းၼၼ်ႉလမ်းႁႂ်ႈၶိုတ်းၶဝ်သေၵမ်းလူၺ်ႈ။
ႁႂ်ႈသုမ်ႉထဵင်ၶဝ်ပဵၼ်တီႈဢၼ်သဵတ်ႇၵူၼ်းငႅဝ်ၵူၼ်းလႄႈ ယႃႇပေႁႂ်ႈမီးၵေႃႉဢၼ်ယူႇၵႃႈၼႂ်းထဵင် ၶဝ်ၸိူဝ်းၼၼ်ႉသေၵမ်းလူၺ်ႈ။
ၶဝ်ၼိၵ်ႈၸၢၵ်ႈငႅၼ်းသႄးတီႈၶဝ်ၸိူဝ်းဢၼ်ၸဝ်ႈႁဝ်းပၼ်တၢမ်ႇဝႆႉၼၼ်ႉလႄႈ ၶဝ်လၢတ်ႈလွင်ႈတၢင်းဢၼ်ၶူပ်းဢၼ်ၶိုၼ်ႈတီႈၶဝ်ၸိူဝ်းဢၼ်ၸဝ်ႈႁဝ်းႁႂ်ႈၸဵပ်းႁႂ်ႈသႅပ်ႇၼၼ်ႉတီႈၶႃႈဢေႃႈ။
ၶႅၼ်းတေႃႈတႅမ်ႈမၢႆဢပျတ်ႈၶဝ်ၵႃႈမီးတင်းသဵင်ႈတင်းလူင်ၼၼ်ႉဝႆႉလႄႈ၊ ယႃႇပေႁႂ်ႈၶဝ်လႆႈၶဝ်ႈပႃးၶၢမ်ႇဢဝ်ၵျေးၸူး တၢင်းဢၼ်ၸဝ်ႈႁဝ်းၵႄႇၶျွတ်ႈဢဝ်ၼၼ်ႉ သေၵမ်းတီႈၶႃႈ။
ႁႂ်ႈၸိုဝ်ႈသဵင်ၶဝ်လႆႈၶၢမ်ႇတၢင်းဢၼ်မွတ်ႇပႅတ်ႈသေ ၵႃႈၼႂ်းၸရၢင်းဢၢင်းၶဝ်ၸိူဝ်းဢၼ်ဢသၢၵ်ႈလိပ်းယူႇသေလႄႈ၊ ယႃႇပေႁႂ်ႈၶဝ်လႆႈၶဝ်ႈပႃးၵႃႈၼႂ်းၸရၢင်းဢၢင်းၵူၼ်းၸဝ်ႈႁဝ်းၼၼ်ႉသေၵမ်းတီႈၶႃႈ။
ၶႃႈၸဝ်ႈၸမ်ႉ၊မီးတၢင်းဢၼ်ၶူပ်းၶိုၼ်ႈလႄႈၸႂ်ယၢၵ်ႈၽၢၼ်ယူႇတီႈၶႃႈဢေႃႈ။ ၽြႃးပဵၼ်ၸဝ်ႈတီႈၶႃႈ။ ယူၵ်ႉၶႃႈၸဝ်ႈၶိုၼ်ႈလႄႈၵႄႇသႄႇၶျွတ်ႈဢဝ်သေၵမ်းတီႈၶႃႈ။
ၵဝ်တၵ်းႁဵတ်းၵႂၢမ်းယွင်ႈယေႃးၼႃႇမႃႉၸိုဝ်ႈသဵင်ၽြႃးပဵၼ်ၸဝ်ႈလႄႈ တၵ်းၽုၺ်ႇမွၵ်ႇလၢတ်ႈၼႄလွင်ႈတၢင်းဢၼ်မၼ်းၸဝ်ႈယႂ်ႇမျၢတ်ႈၼၼ်ႉ ၼႂ်းတၢင်းဢၼ်ယွင်ႈယေႃးၵျေးၸူးမၼ်းၸဝ်ႈၼၼ်ႉဢေႃႈ။
တၢင်းဢၼ်ႁဵတ်းၸိူဝ်ႉၼင်ႇၼၼ်ၼၼ်ႉ ပဵၼ်ဢၼ်ယဵင်ႈၶႅၼ်း ထုၵ်ႇၸႂ်ၵျိူၵ်ႈၸႂ် ထႃႇဝရႃႉၽြႃး၊ ၼႃႇသေတၢင်းဢၼ်သၢၵ်ႈလူႇဝူဝ်းပေႃႈတီႈမၼ်းၸဝ်ႈလႄႈ၊ ယဵင်ႈၶႅၼ်းၼႃႇသေတၢင်းဢၼ်ဢဝ်ဝူဝ်းငၢၼ်ႁဵတ်းတၢင်းလူႇသၢၵ်ႈၵၢပ်ႈၼၼ်ႉတီႈၶႃႈဢေႃႈ။
မိူဝ်ႈဢၼ်ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်တဵၵ်းငႅၼ်းၼၼ်ႉ လႆႈႁၼ်လွင်ႈတၢင်းဢၼ်ပဵၼ်ၼၼ်ႉၸိုင်၊ၶဝ်တၵ်းၸူမ်းသိူဝ်းလႄႈ၊ ၶဝ်ၸိူဝ်းဢၼ်ၵူဝ်းၵႂၢႆႇၽြႃးပဵၼ်ၸဝ်ႈၼၼ်ႉၵေႃႈႁွမ်ႁႅင်းၸႂ်ယူႇဢေႃႈ။
ထႃႇဝရႃႉၽြႃး၊ ထွမ်ႇဢဝ်ၵႂၢမ်းၶဝ်ၸိူဝ်းဢၼ်ၸုတ်ႈဢၼ်လုတ်ႈၼၼ်ႉလႄႈ၊ မၼ်းၸဝ်ႈဢမ်ႇလူင်ဢမ်ႇလိုမ်းၵူၼ်းမၼ်းၸဝ်ႈၸိူဝ်းဢၼ်လႆႈယူႇၼႂ်းထွင်ႇၼၼ်ႉတီႈၶႃႈ။
ၽႃႉၵၢင်ႁၢဝ်၊လိၼ်မိူင်း၊ၼမ်ႉသမ်ႇမုၵ်ႈတြႃႇ ဢိၵ်ႇတင်းသတ်ႉတဝႃႇဢၼ်ဢသၢၵ်ႈလိပ်းၵႃႈမီးတင်းသဵင်ႈတင်းလူင်ၶဝ်႟။ ဢွၼ်ၵၼ်ယွင်ႈယေႃးၽြႃးပဵၼ်ၸဝ်ႈတႃႉ။
မၼ်းၸဝ်ႈတၵ်းၵႄႇသႄႇၶျွတ်ႈဢဝ်ဝဵင်း ယေႇရုသလႅမ်ႇ၊ လႄႈ တၵ်းၶိုၼ်းတႄႇၶိုၼ်းႁဵတ်းဝဵင်း ယုတႃႉ၊ တင်းလၢႆဢေႃႈ။ ၵူၼ်းမၼ်းၸဝ်ႈၸိူဝ်းၼၼ်ႉတၵ်းတေလႆႈယူႇၵႃႈတီႈၼၼ်ႈလႄႈဢုပ်ႉပိူင်ႇဢေႃႈ။
လုၵ်ႈလၢၼ်မဵဝ်းၶႃႈမၼ်းၸဝ်ႈၸိူဝ်းၼၼ်ႉတၵ်းတေလႆႈၶၢမ်ႇဢဝ်ဢမူၺ်ႇၼၼ်ႉလႄႈ ၶဝ်ၸိူဝ်းဢၼ်ႁၵ်ႉမၼ်းၸဝ်ႈသမ်ႉတၵ်းတေလႆႈယူႇလႆႈသဝ်းၵႃႈၼႂ်းမၼ်းဢေႃႈ။
ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈမီးၸႂ်ဢၼ်ၶႂ်ႈ ၵႄႇသႄႇၶျွတ်ႈဢဝ်ၶႃႈၸဝ်ႈသေၵမ်းတီႈၶႃႈ။ ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈ ႁိပ်ႈၼႅတ်ႈႁႂ်ႈလႆႈၸွႆႈထႅမ်မႃႉၸႃႉၶႃႈၸဝ်ႈ သေၵမ်းတီႈၶႃႈ။
ႁႂ်ႈၶဝ်ၸိူဝ်းဢၼ်ၵျၢမ်ႇႁႃႁႂ်ႈလႆႈဢဝ်ၶႃႈၸဝ်ႈတၢႆၼၼ်ႉလႆႈတူၵ်းသုမ်းလႄႈ သုၵ်ႉၸႂ်ၵႂၢင်ၸႂ်သေၵမ်းလူၺ်ႈ။ ႁႂ်ႈၶဝ်ၸိူဝ်းဢၼ်မီးၸႂ်ဢၼ်ၸူမ်းသိူဝ်း ၵွပ်ႈပိူဝ်ႈၶႃႈၸဝ်ႈထူပ်းၽေးၼၼ်ႉ၊ လႆႈဝၢတ်ႈပၢႆႈသေလႄႈသရေႇလုသေၵမ်းလူၺ်ႈ။
ႁႂ်ႈၶဝ်ၸိူဝ်းဢၼ်ၵႄႉယႄႉသႄႉသွမ်းၶႃႈၸဝ်ႈ လႄႈဝႃႈ၊ “ဢႁိ။ ဢႁိ၊” ဝႃႈၼင်ႇၼႆၼၼ်ႉ လႆႈတူၵ်းၸႂ်လႄႈလႆႈဢူၵ်းလႆႈဢၢႆ သေၵမ်းလူၺ်ႈ။
ႁႂ်ႈၶဝ်ၸိူဝ်းဢၼ်မႃးၸူးတီႈၸဝ်ႈႁဝ်းၵႃႈမီးတင်းသဵင်ႈတင်းလူင်ၼၼ်ႉ၊ လႆႈဢၶႂၢင်ႉဢၼ်ၸူမ်းသိူဝ်းသေၵမ်းလူၺ်ႈ။ ႁႂ်ႈၶဝ်ၸိူဝ်းဢၼ်ယွင်ႈယေႃးၵျေးၸူးတၢင်းဢၼ်၊ၸဝ်ႈႁဝ်းၵႄႇၶျွတ်ႈဢဝ်ၼၼ်ႉ တင်းသဵင်ႈတင်းလူင် လႆႈဢွၼ်ၵၼ်လၢတ်ႈဝႃႈ၊ “ၽြႃးပဵၼ်ၸဝ်ႈ ယႂ်ႇမျၢတ်ႈၼႃႇဢေႃႈ၊” ဝႃႈၼင်ႇၼႆယူႇတႃႇသေႇဢမ်ႇထၢတ်ႇ သေၵမ်းလူၺ်ႈ။
ၽြႃးပဵၼ်ၸဝ်ႈတီႈၶႃႈ။ ၶႃႈၸဝ်ႈယၢၵ်ႈၽၢၼ်လႄႈၸုတ်ႈလုတ်ႈတီႈၶႃႈယဝ်ႉ။ ၶႅၼ်းတေႃႈႁဵတ်းၼႅတ်ႈမႃးၸူးတီႈၶႃႈၸဝ်ႈ သေၵမ်းတီႈၶႃႈ။ ၸဝ်ႈႁဝ်းပဵၼ်ၸဝ်ႈဢၼ်ၸွႆႈထႅမ်မႃႉၸႃႉ ၶႃႈၸဝ်ႈ၊ၸဝ်ႈဢၼ်ၵႄႇၶျွတ်ႈဢဝ် ၶႃႈၸဝ်ႈတီႈၶႃႈဢေႃႈ။ ထႃႇဝရႃႉၽြႃး၊ တီႈၶႃႈ။ ယႃႇပေထိူင်း ပေၼၢၼ်းသေၵမ်းတီႈၶႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈမႃးဢိင်သွၼ်ႈပိုင်ႈၸဝ်ႈႁဝ်းတီႈၶႃႈဢေႃႈ။ ၶႅၼ်းတေႃႈယႃႇပေႁႂ်ႈၶႃႈၸဝ်ႈလႆႈတူၵ်းသုမ်းသေၵမ်းတီႈၶႃႈ။
ၶႅၼ်းတေႃႈၸွမ်းလူၺ်ႈတၢင်းဢၼ်သိုဝ်ႈတေႃႇၸဝ်ႈႁဝ်းၼၼ်ႉသေလႄႈ၊ ၵႄႇၼုၵ်ႈဢဝ်ၶႃႈၸဝ်ႈသေၵမ်းတီႈၶႃႈ။ ဝၢႆႇႁူၸဝ်ႈႁဝ်းၸူးၽၢႆႇၶႃႈၸဝ်ႈသေလႄႈၵႄႇသႄႇၶျွတ်ႈဢဝ်ၶႃႈၸဝ်ႈသေၵမ်းတီႈၶႃႈ။
ၸဝ်ႈႁဝ်းၶႅၼ်းတေႃႈပဵၼ်ႁူမ်ႈၽူၺ်းဢၼ်ၶႃႈၸဝ်ႈလႆႈသွၼ်ႈယူႇ၊ ဢိၵ်ႇတင်းတီႈဢၼ်မၼ်ႈၶိူင်ႇဢၼ်ႁႄႉဢၼ်ၵင်ႈၶႃႈၸဝ်ႈသေၵမ်းတီႈၶႃႈ။ ၸဝ်ႈႁဝ်းပဵၼ်တီႈဢိင်သွၼ်ႈပိုင်ႈၶႃႈၸဝ်ႈတီႈဢၼ်ၵႅတ်ႇၶႄၶႃႈၸဝ်ႈတီႈၶႃႈဢေႃႈ။
ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ ၶႅၼ်းတေႃႈၵႄႇၼုၵ်ႈဢဝ်ၶႃႈၸဝ်ႈလွတ်ႈသေၵႃႈၼႂ်းမိုဝ်းၵေႃႉဢၼ်ႁၢႆႉဢၼ်မိူၵ်ႈ ဢိၵ်ႇတင်းၵႃႈၼႂ်းတၼ်းၶူဝ်းၵေႃႉဢၼ်ႁၢဝ်ႉၵျၢမ်းလႄႈႁဵတ်းဢမ်ႇတြႃးၼၼ်ႉသေၵမ်းတီႈၶႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈမုင်ႈမွင်း ၸဝ်ႈႁဝ်းတီႈၶႃႈဢေႃႈ။ ၶႃႈၸဝ်ႈလႆႈယုမ်ႇမၢတ်ႈဢိင်ပိုင်ႈၸဝ်ႈႁဝ်းၸဵမ်မိူဝ်ႈလဵၵ်ႉတီႈၶႃႈယဝ်ႉ။
ၶႃႈၸဝ်ႈဢိင်ပိုင်ႈၸဝ်ႈႁဝ်းယူႇၸူဝ်ႈဢသၢၵ်ႈၶႃႈၸဝ်ႈလႄႈ၊ ၸဝ်ႈႁဝ်းၵေႃႈၵႅတ်ႇၶႄႁႄႉၵင်ႈပၼ်ၶႃႈၸဝ်ႈယူႇ ၸဵမ်မိူဝ်ႈဢၼ်ၸႃႉၵိူတ်ႇမႃးၼၼ်ႉ တီႈၶႃႈယဝ်ႉ။ ၶႃႈၸဝ်ႈတၵ်းယွင်ႈယေႃးၸဝ်ႈႁဝ်းယူႇ တႃႇသေႇဢမ်ႇထၢတ်ႇတီႈၶႃႈဢေႃႈ။
ၶႃႈၸဝ်ႈလႆႈပဵၼ်ပုင်ႇသၢၵ်ႈသေႇတီႈပိူၼ်ႈတၢင်ႇၵေႃႉၼမ်ၼႃႇတီႈၶႃႈယဝ်ႉ။ ၵူၺ်းၵႃႈ၊ၸဝ်ႈႁဝ်းပဵၼ်တီႈဢိင်သွၼ်ႈပိုင်ႈဢၼ်မၼ်ႈၶိူင်ႇပုၼ်ႈၶႃႈၸဝ်ႈယူႇတီႈၶႃႈဢေႃႈ။
ၶႃႈၸဝ်ႈယွင်ႈယေႃးၸဝ်ႈႁဝ်းယူႇတင်းဝၼ်းတင်းဝၼ်းလႄႈ ၽုၺ်ႇမွၵ်ႇလၢတ်ႈၼႄလွင်ႈမုၼ်ၽုင်းၸဝ်ႈႁဝ်းယူႇတီႈၶႃႈဢေႃႈ။
ယႃႇပေပႄႇပႅတ်ႈၼႂ်းတၢင်းဢၼ်ၶႃႈၸဝ်ႈ ထဝ်ႈၵႄႇယဝ်ႉၼၼ်ႉသေၵမ်းတီႈၶႃႈ။ ယႃႇပေၸုၼ်ႉပႅတ်ႈၼႂ်းတၢင်းဢၼ်ၶႃႈၸဝ်ႈႁႅင်းဢူၼ်ႈၵႂႃႇယဝ်ႉၼၼ်ႉသေၵမ်းတီႈၶႃႈ။
ရၢၼ်ႇသူႇၶႃႈၸဝ်ႈတင်းလၢႆၵျၢမ်ႇႁႃဢဝ် ၶႃႈၸဝ်ႈတၢႆလႄႈ ၶဝ်ဢွၼ်ၵၼ်ၵျၢမ်ႇပွင်လၢတ်ႈၸႃလွင်ႈတၢင်းဢၼ်ၶတ်းၵၼ်တင်းၶႃႈၸဝ်ႈတီႈၶႃႈဢေႃႈ။
ၶဝ်လၢတ်ႈလႄႈဝႃႈ၊ “ၽြႃးပဵၼ်ၸဝ်ႈ ၸုၼ်ႉပႅတ်ႈမၼ်းယဝ်ႉ။ ဢွၼ်ၵၼ်လမ်းၸွမ်းလႄႈၵႂႃႇတိဢဝ်မၼ်းတႃႉႁဝ်း။ မၼ်းဢမ်ႇမီးၵေႃႉဢၼ်တၵ်းၵႄႇၼုၵ်ႈ ဢဝ်မၼ်းလႃးလႃး၊” ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈယႃႇပေယူႇ ၵႆၵၼ်တင်းၶႃႈၸဝ်ႈသေၵမ်းတီႈၶႃႈ။ ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ ၶႅၼ်းတေႃႈႁိပ်ႈၼႅတ်ႈႁႂ်ႈလႆႈၸွႆႈထႅမ် မႃႉၸႃႉၶႃႈၸဝ်ႈသေၵမ်းတီႈၶႃႈ။
ႁႂ်ႈၶဝ်ၸိူဝ်းဢၼ်တိုၵ်းတေႃးၶႃႈၸဝ်ႈၼၼ်ႉလႆႈတူၵ်းသုမ်းလႄႈလုလႅဝ်ၵႂႃႇသေၵမ်းတီႈၶႃႈ။ ႁႂ်ႈၶဝ်ၸိူဝ်းဢၼ်ၵျၢမ်ႇႁႃႁႂ်ႈလႆႈႁဵတ်းဢပျတ်ႈသႂ်ႇၶႃႈၸဝ်ႈၼၼ်ႉ လႆႈဢူၵ်းလႆႈဢၢႆလႄႈသရေႇလုသေၵမ်းတီႈၶႃႈ။
ၶႃႈၸဝ်ႈတၵ်းမုင်ႈမွင်းၸဝ်ႈႁဝ်းယူႇသေႇသေႇသေလႄႈ၊ တၵ်းယဵင်ႈၶႅၼ်းယွင်ႈယေႃးၸဝ်ႈႁဝ်းၼႃႇသေမိူဝ်ႈဢွၼ်တၢင်းၼၼ်ႉတီႈၶႃႈဢေႃႈ။
ၶႃႈၸဝ်ႈတၵ်းမွၵ်ႇလၢတ်ႈလွင်ႈတၢင်း ဢၼ်လီဢၼ်ငၢမ်းၸဝ်ႈႁဝ်း၊ ဢိၵ်ႇတင်းလွင်ႈတၢင်းဢၼ်ၸဝ်ႈႁဝ်းၵႄႇၶျွတ်ႈဢဝ်ၼၼ်ႉတင်းဝၼ်းတင်းဝၼ်းတီႈၶႃႈဢေႃႈ။ လွင်ႈတၢင်းၸိူဝ်းၼႆႉၸိုင်၊ၼပ်ႉဢၢၼ်ႇလႄႈယင်းဢမ်ႇပႄႉသဵင်ႈလႆႈတီႈၶႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တီႈၶႃႈ။ ၵွပ်ႈပိူဝ်ႈဢၼ်ၸဝ်ႈႁဝ်းမီးႁႅင်းတၼ်းၶူဝ်းလႄႈ ၶႃႈၸဝ်ႈတၵ်းယွင်ႈယေႃးၸဝ်ႈႁဝ်းတီႈၶႃႈဢေႃႈ။ ၶႃႈၸဝ်ႈတၵ်းၽုၺ်ႇမွၵ်ႇလၢတ်ႈၼႄ လွင်ႈတၢင်းဢၼ်လီဢၼ်ငၢမ်းၸဝ်ႈႁဝ်းၵူၺ်း တီႈၶႃႈဢေႃႈ။
ၸဝ်ႈႁဝ်းသင်ႇသွၼ်ပၼ်ၶႃႈၸဝ်ႈ ၸဵမ်မိူဝ်ႈလဵၵ်ႉတီႈၶႃႈယဝ်ႉ။ ၶႃႈၸဝ်ႈယင်းမွၵ်ႇလၢတ်ႈၼႄလွင်ႈတၢင်း ႁဵတ်းဢၼ်လီဢၢမ်းၸဝ်ႈႁဝ်းယူႇ ႁၢၼ်ႉတေႃႇထိုင်ႁွတ်ႈမိူဝ်ႈလဵဝ်ၼႆႉတီႈၶႃႈယဝ်ႉ။
ၼႂ်းၸူဝ်ႈဢၼ်ၶႃႈၸဝ်ႈထဝ်ႈၵႄႇယဝ်ႉလႄႈႁူဝ်ႁွၵ်ႇယူႇၼၼ်ႉၼႆႉ၊ ၽြႃးပဵၼ်ၸဝ်ႈတီႈၶႃႈ၊ၶႅၼ်းတေႃႈယႃႇပေၸုၼ်ႉပႅတ်ႈၶႃႈၸဝ်ႈသေၵမ်းတီႈၶႃႈ။ ၶႅၼ်းတေႃႈမီးယူႇလူၺ်ႈၵၼ်တင်းၶႃႈၸဝ်ႈယၢမ်းမိူဝ်ႈဢၼ်ၶႃႈၸဝ်ႈၽုၺ်ႇမွၵ်ႇလၢတ်ႈၼႄ လွင်ႈတၼ်းၶူဝ်းဢိၵ်ႇတင်းမုၼ်ၽုင်း ဢႃႇၼုၽေႃႇၸဝ်ႈႁဝ်း တီႈၸိူဝ်ႉၶိူဝ်းဢၼ်ယင်းသိုပ်ႇလၢမ်းတၢမ်းမႃးယူႇ၊တင်းသဵင်ႈတင်းလူင်ၼၼ်ႉသေၵမ်းတီႈၶႃႈ။
ၽြႃးပဵၼ်ၸဝ်ႈတီႈၶႃႈ။ တၢင်းဢၼ် ၸဝ်ႈႁဝ်းသိုဝ်ႈတေႃႇၼၼ်ႉပဵၼ်ဢၼ် သုင်ၼႃႇလႄႈၶိုတ်းထိုင်တွင်ႉၽႃႉတီႈၶႃႈဢေႃႈ။ ၸဝ်ႈႁဝ်းႁဵတ်းလွင်ႈတၢင်းဢၼ် ယႂ်ႇၼႃႇလႄႈၽူႈလႂ်ဢမ်ႇမိူၼ်ၵၼ်တင်း ၸဝ်ႈႁဝ်းလႆႈလႃးလႃးတီႈၶႃႈ။
ၸဝ်ႈႁဝ်းႁႂ်ႈၶႃႈၸဝ်ႈလႆႈၶၢမ်ႇတုၵ်ႉၶႃႉဝူၺ်ႇတၼႃႇၼမ်ၼႃႇတီႈၶႃႈယဝ်ႉ။ ၵူၺ်းၵႃႈ၊ၸဝ်ႈႁဝ်းတၵ်းၶိုၼ်းပၼ်ဢဵၼ်ပၼ်ႁႅင်းၶႃႈၸဝ်ႈလႄႈ၊ ၸဝ်ႈႁဝ်းသမ်ႉတၵ်းႁႂ်ႈၶႃႈၸဝ်ႈလွတ်ႈသေၵႃႈတီႈၶုမ်ပႃႇႁဵဝ်ႈတီႈၶႃႈဢေႃႈ။
ၸဝ်ႈႁဝ်းတၵ်းႁႂ်ႈၶႃႈၸဝ်ႈၶိုၼ်ႈယႂ်ႇသေဢွၼ်တွၼ်းသေၵဝ်ႇလႄႈ တၵ်းႁႂ်ႈၶႃႈၸဝ်ႈသၢၵ်ႈသႃႇတီႈၶႃႈဢေႃႈ။
ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ ၶႃႈၸဝ်ႈတၵ်းလဵတ်းတိင်ႇလႄႈ ယွင်ႈယေႃးၸဝ်ႈႁဝ်း၊ဢိၵ်ႇတင်းသဵတ်ႈၸႃႇ ၸဝ်ႈႁဝ်းတီႈၶႃႈဢေႃႈ။ ၽြႃးဢၼ်မူတ်းၸၢင်ႇမဵဝ်း ဢိသရေး၊ တီႈၶႃႈ။ ၶႃႈၸဝ်ႈတၵ်းလဵတ်းတိင်ႇလႄႈႁဵတ်းၵႂၢမ်း ထမ်ႇမႃႉတီႈၸဝ်ႈႁဝ်းတီႈၶႃႈဢေႃႈ။
ၼႂ်းမိူဝ်ႈဢၼ်ၶႃႈၸဝ်ႈလဵတ်းတိင်ႇယူႇၼၼ်ႉ ၶႃႈၸဝ်ႈတၵ်းႁွင်ႉသႂၢင်ႇသိူဝ်းတီႈၸဝ်ႈႁဝ်းလႄႈ၊ တၢင်းဢၼ်ၶႃႈၸဝ်ႈတၵ်းပႃးၸႂ် ပႃးၶေႃးႁဵတ်းၵႂၢမ်း၊ ၵွပ်ႈပိူဝ်ႈဢၼ်ၸဝ်ႈႁဝ်းၵႄႇသႄႇၶျွတ်ႈဢဝ်ၶႃႈၸဝ်ႈယဝ်ႉၼၼ်ႉတီႈၶႃႈဢေႃႈ။
ၶႃႈၸဝ်ႈတၵ်းလၢတ်ႈၸႃလွင်ႈတၢင်းဢၼ်သိုဝ်ႈတေႃႇၸဝ်ႈႁဝ်းၼၼ်ႉတင်းဝၼ်းတင်းဝၼ်း၊ ၵွပ်ႈပိူဝ်ႈၶဝ်ၸိူဝ်းဢၼ်ၵျၢမ်ႇႁႃႁဵတ်းဢပျတ်ႈသႂ်ႇၶႃႈၸဝ်ႈၼၼ်ႉ၊ လႆႈတူၵ်းသုမ်းယဝ်ႉလႄႈသရေႇလႆႈလုယဝ်ႉ ၼၼ်ႉတီႈၶႃႈဢေႃႈ။
ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈသွၼ်ပၼ်ႁႂ်ႈၶုၼ်ႁေႃၶမ်းၸီႇယၢင်ႇတႅပ်းတတ်း၊ ၸွမ်းၼင်ႇတြႃးတၢင်းဢၼ်သိုဝ်ႈတေႃႇၸဝ်ႈႁဝ်းၼၼ်ႉသေၵမ်းတီႈၶႃႈ။ ဢဝ်ၸႂ်သၽေႃးၸဝ်ႈႁဝ်းဢၼ်သိုဝ်ႈတေႃႇၼၼ်ႉၽႄမႅင်ႇပၼ်တီႈမၼ်း။
ပုၼ်ႈလွင်ႈၼင်ႇႁိုဝ်မၼ်းတၵ်းၸီႇယၢင်ႇ တႅပ်းတတ်းၵႃႈၼိူဝ်ၵူၼ်းၸဝ်ႈႁဝ်း ၸိူဝ်းၼၼ်ႉၽဵင်ႇၽဵင်ႇလႄႈ ဢုပ်ႉပိူင်ႇၵႃႈၼိူဝ်ၶဝ်ၸိူဝ်းဢၼ်လႆႈၶၢမ်ႇ တၢင်းဢၼ်ပိူၼ်ႈတဵၵ်းငႅၼ်းၼၼ်ႉ သိုဝ်ႈသိုဝ်ႈတေႃႇတေႃႇသေၵမ်းတီႈၶႃႈ။
ႁႂ်ႈလိၼ်မိူင်းလႆႈသႂၢင်ႇသိူဝ်းလူၺ်ႈတၢင်းဢၼ်လႆႈလီလႆႈပဵၼ် ၵွပ်ႈပိူဝ်ႈၵူၼ်းမၼ်းလႆႈၸွမ်းတြႃးတၢင်းဢၼ် သိုဝ်ႈတေႃႇၼၼ်ႉသေၵမ်းလူၺ်ႈ။
ႁႂ်ႈၶုၼ်ႁေႃၶမ်းၸီႇယၢင်ႇတႅပ်းတတ်းၵႃႈၼိူဝ်ၵူၼ်းၽၢၼ်တင်းလၢႆၽဵင်ႇၽဵင်ႇသေၵမ်းလူၺ်ႈ။ ႁႂ်ႈၶုၼ်ၼၼ်ႉၸွႆႈထႅမ်ၵေႃႉဢၼ်ၸုတ်ႈဢၼ်လုတ်ႈလႄႈ ပႄႇၽဵဝ်ႈပႅတ်ႈၵူၼ်းဢၼ်ၸၢင်ႈတဵၵ်းငႅၼ်းပိူၼ်ႈၼၼ်ႉသေၵမ်းလူၺ်ႈ။
ႁႂ်ႈၵူၼ်းတင်းလၢႆဢွၼ်ၵၼ် ၵူဝ်းၵႂၢႆႇၸဝ်ႈႁဝ်းယူႇ၊ ၼႂ်းၶိင်ႇၶႃႇၸူဝ်ႈဢၼ်ၵၢင်ဝၼ်းလႅင်းႁိူဝ်ႈယူႇ၊ ဢိၵ်ႇတင်းၸူဝ်ႈဢၼ်လိူၼ်လႅင်းယူႇၼႆႉ၊ တေႃႇထိုင်ၶိင်ႇၵႃႇလႃႉဢၼ်တၵ်းမႃး ၵမ်းလိုၼ်းၼၼ်ႉသေၵမ်းလူၺ်ႈ။
ႁႂ်ႈၶုၼ်ႁေႃၶမ်းပဵၼ်ၸိူဝ်ႉၼင်ႇၽူၼ်ဢၼ်တူၵ်းသႂ်ႇၵႃႈၼိူဝ်တူင်ႈၼႃး၊ ဢိၵ်ႇတင်းမိူၼ်ၸိူဝ်ႉၼင်ႇၽူၼ်ၽွင်ဢၼ်ဢွႆသႂ်ႇၵႃႈၼိူဝ်လိၼ်မိူင်းၼၼ်ႉသေၵမ်းလူၺ်ႈ။
ႁႂ်ႈတြႃးတၢင်းဢၼ်သိုဝ်ႈတေႃႇလိူင်ႇၼမ်ၼႂ်းၸူဝ်ႈပၢၼ်ၶုၼ်ၼၼ်ႉလႄႈ ႁႂ်ႈတၢင်းဢၼ်သႃႇယႃႇလိူင်ႇၸႂ်ၼၼ်ႉ ပျေႉၸုမ်ႇယူႇၼႂ်းၶိင်ႇၶႃႇၸူဝ်ႈဢၼ်လိူၼ်လႅင်းယူႇၼၼ်ႉသေၵမ်းလူၺ်ႈ။
သိုင်ႇၸိုင်ႈဝၢၼ်ႈမိူင်းၶုၼ်ၼၼ်ႉတၵ်းၵႂၢင်ႈၼႃႇလူင်လၢင်၊ လုၵ်ႉၵႃႈတီႈပၢင်ႇလၢႆႇၼိုင်ႈတေႃႇထိုင်ႁွတ်ႈပၢင်ႇလၢႆႇၼိုင်ႈ၊ လုၵ်ႉတီႈၼမ်ႉ ဢုၽရတ်ႉ၊ တေႃႇထိုင်ႁွတ်ႈလႅၼ်လိၼ်သုတ်းလိၼ်မိူင်းတီႈၶႃႈဢေႃႈ။
ၵူၼ်းဢၼ်ယူႇၵႃႈၼႂ်းထိူၼ်ႇၼႂ်းၶိူဝ်းတင်းလၢႆတၵ်းဢွၼ်ၵၼ်ၵူမ်ႈၵွမ်းၸူးတီႈၶုၼ်ၼၼ်ႉလႄႈ၊ ရၢၼ်ႇသူႇမၼ်းၸဝ်ႈတင်းလၢႆတၵ်းဢွၼ်ၵၼ်ၶုပ်ႉမူပ်ႇၸပ်းလိၼ်တီႈၶႃႈဢေႃႈ။
ၶုၼ်ႁေႃၶမ်းမိူင်း သပဵၼ်ႇ၊ ၶဝ်ဢိၵ်ႇတင်း ၶုၼ်ႁေႃၶမ်းၵုၼ်ပၢင်ႇလၢႆႇၶဝ်၊ တၵ်းဢွၼ်ၵၼ်သႂၢင်းပၼ်ၶွၼ်ႇ တီႈမၼ်းၸဝ်ႈလႄႈ၊ ၶုၼ်ႁေႃၶမ်းမိူင်း ဢရေႇပျႃး၊ တင်းမိူင်း ဢေႇတီႇဢူဝ်းပီးယႃး၊ ၸိူဝ်းၼၼ်ႉ၊ တၵ်းဢွၼ်ၵၼ်သၢၵ်ႈလၢၵ်ႈသွင်ႇပၼ်ႇၼႃႇ တီႈၶႃႈဢေႃႈ။
ၶုၼ်ႁေႃၶမ်းၵႃႈမီးတင်းသဵင်ႈတင်းလူင်တၵ်းၵူမ်ႈၵွမ်းၸူးတီႈၽၢႆႇၼႃႈမၼ်းၸဝ်ႈလႄႈ မဵဝ်းၵူၼ်းၵူႈၸိူဝ်ႉၵူႈၶိူဝ်းတၵ်းဢွၼ်ၵၼ်ႁၢပ်ႇၼႃႈၵၢၼ်မၼ်းၸဝ်ႈတီႈၶႃႈဢေႃႈ။
မၼ်းၸဝ်ႈၵႄႇၼုၵ်ႈဢဝ်ၵူၼ်းၽၢၼ်ၸိူဝ်းဢၼ်ႁွင်ႉၵၢဝ်ႇတီႈမၼ်းၸဝ်ႈ၊ ဢၼ်ပဵၼ်ၸႃႉၸဵမ်ၶဝ်ၸိူဝ်းဢၼ်ၸုတ်ႈဢၼ်လုတ်ႈ၊ဢိၵ်ႇတင်း ၶဝ်ၸိူဝ်းဢၼ်ဢမ်ႇမီးတီႈဢၼ်ၸႂ်လီလူၺ်ႈၼၼ်ႉတီႈၶႃႈဢေႃႈ။
မၼ်းၸဝ်ႈမီးၸႂ်ဢၼ်ဢဵတ်းလူတီႈၶဝ်ၸိူဝ်းဢၼ်ၽၢၼ်ဢၼ်ၵႅၼ်းဢိၵ်ႇတင်း ၶဝ်ၸိူဝ်းဢၼ်ၸုတ်ႈဢၼ်လုတ်ႈၼၼ်ႉလႄႈ ၵႄႇသႄႇၶျွတ်ႈဢဝ်ဢသၢၵ်ႈၶဝ်ၸိူဝ်းဢၼ်ၸုတ်ႈဢၼ်လုတ်ႈၼၼ်ႉတီႈၶႃႈဢေႃႈ။
မၼ်းၸဝ်ႈၵႄႇၼုၵ်ႈဢဝ်ၶဝ်လွတ်ႈသေၵႃႈၼႂ်းမိုဝ်းၶဝ်ၸိူဝ်းဢၼ်တဵၵ်းငႅၼ်းပိူၼ်ႈ၊ ဢိၵ်ႇတင်းၵႃႈတီႈၶဝ်ၸိူဝ်းဢၼ်ႁၢဝ်ႉဢၼ်ၵျၢမ်းၼၼ်ႉလႄႈ ဢသၢၵ်ႈၶဝ်ထိူၵ်ႈၵႃႈထိူၵ်ႈၶၼ်သိုဝ်ႈၼႃႈတႂ်ႈတႃမၼ်းၸဝ်ႈတီႈၶႃႈဢေႃႈ။
ႁႂ်ႈၶုၼ်ႁေႃၶမ်းၼၼ်ႉဢသၢၵ်ႈယိုၼ်းယၢဝ်းသေၵမ်းလူၺ်ႈ။ ႁႂ်ႈမၼ်းၸဝ်ႈလႆႈႁပ်ႉဢဝ်ၶမ်းဢၼ်မိူင်း ဢရေးပီးယႃး၊ သၢၵ်ႈၼၼ်ႉလႄႈ ႁႂ်ႈၵႂၢမ်းထေႃးပၼႃႇတင်းလၢႆၼၼ်ႉ သူးတွင်းပုၼ်ႈမၼ်းၸဝ်ႈယူႇၵူႈၶိင်ႇၵူႈၶႃႇ၊ ႁႂ်ႈတၢင်းလီမၢင်ႇၵလႃႇၽြႃးပဵၼ်ၸဝ်ႈ တူၵ်းႁွတ်ႈတူၵ်းထိုင် ၵႃႈၼိူဝ်မၼ်းၸဝ်ႈယူႇတႃႇသေႇ ဢမ်ႇထၢတ်ႇသေၵမ်းလူၺ်ႈ။
ႁႂ်ႈၶဝ်ႈပိူၵ်ႇၶဝ်ႈသၢၼ်မီးလိူင်ႇၼမ်ၼႃႇ ၵႃႈၼႂ်းမိူင်းၸဝ်ႈလႄႈ ႁႂ်ႈမၢၵ်ႇၶဝ်ႈႁူင်းၶဝ်ႈတဵမ်ဝႆႉၵႃႈၼိူဝ် သၼ်လွႆတႄးလွႆတင်းလၢႆ၊ ၵွၼ်ႈလီပူင်းလီမိူၼ်ၸိူဝ်ႉၼင်ႇၵႃႈၼႂ်းမိူင်း လေႇပၼုၼ်ႇ၊ ၼၼ်ႉသေၵမ်းလူၺ်ႈ။ ႁႂ်ႈဝဵင်းၸဝ်ႈတင်းလၢႆၵိုၼ်းၼႃႇမိူၼ်ၸိူဝ်ႉၼင်ႇတူၼ်ႈယိူဝ်ႈတူၼ်ႈယႃႈ၊ ၵႃႈၼႂ်းတူင်ႈၼႃးၼၼ်ႉသေၵမ်းလူၺ်ႈ။
ႁႂ်ႈၼႃႇမႃႉၸိုဝ်ႈသဵင်မၼ်းၸဝ်ႈၼၼ်ႉ တႄႇယူႇသေႇသေႇလႄႈ ႁႂ်ႈသရေႇမၼ်းၸဝ်ႈႁူင်ႁၢင်းယူႇၼႂ်းၸူဝ်ႈၵၢင်ဝၼ်းမီးယူႇၼၼ်ႉသေၵမ်းလူၺ်ႈ။ ႁႂ်ႈမဵဝ်းၵူၼ်းၵူႈၸိူဝ်ႉၵူႈၶိူဝ်းယွင်ႈယေႃး မၼ်းၸဝ်ႈယူႇလႄႈ ႁႂ်ႈၶဝ်ဢွၼ်ၵၼ်ယွၼ်းတၢင်းလီမၢင်ႇၵလႃႇတီႈၽြႃးပဵၼ်ၸဝ်ႈယူႇ၊ ဢိၵ်ႇတင်းႁႂ်ႈၶဝ်ဢွၼ်ၵၼ်ယွင်ႈယေႃးလႄႈဝႃႈ၊ “မီးမၢင်ႇၵလႃႇတီႈၶႃႈဢေႃႈ၊” ဝႃႈၼင်ႇၼႆတီႈၶုၼ်ႁေႃၶမ်းၼၼ်ႉသေၵမ်းလူၺ်ႈ။
ႁႂ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ ၼၼ်ႉမီးမၢင်ႇၵလႃႇသေၵမ်းလူၺ်ႈ။ မၼ်းၸဝ်ႈသူႇလဵဝ်ပႃးလဵဝ်ၵူၺ်းၶိုင်ပွင်သၢင်ႈႁဵတ်း လွင်ႈတၢင်းဢၼ်လီဢၢမ်းၸိူဝ်းၼႆႉတီႈၶႃႈဢေႃႈ။
ႁႂ်ႈၼႃႇမႃႉၸိုဝ်ႈသဵင်မၼ်းၸဝ်ႈဢၼ်မုၼ်ယႂ်ႇၼၼ်ႉမီးမၢင်ႇၵလႃႇသေႇသေႇသေၵမ်းလူၺ်ႈ။ ႁႂ်ႈမုၼ်သရေႇမၼ်းၸဝ်ႈၼၼ်ႉၸွတ်ႇတဵမ်လိၼ်မိူင်းၵႂႃႇသေၵမ်းလူၺ်ႈ။ ဢႃမိၼ်ႈလႄႈဢႃမိၼ်ႈ။
ၼႆႉၸမ်ႉ၊ပဵၼ်ၵႂၢမ်းသူးတွင်းပထၼႃႇ တႃႇဝိတ်ႈ၊ လုၵ်ႈၸၢႆး ယေႇသႄး၊ ၼၼ်ႉသုတ်းတီႈၼႆႉ ယဝ်ႉဢေႃႈ။
ၽြႃးပဵၼ်ၸဝ်ႈၸႂ်လီၸႂ်ဝၢၼ်တေႃႇမဵဝ်း ဢိသရေး၊ ဢၼ်ဝႃႈၶဝ်ၸိူဝ်းဢၼ်ႁူဝ်ၸႂ်ၶၢဝ်ၸၢင်ႇၼၼ်ႉဢမၢၼ်ႇၶၼ်ပဵၼ်ဢေႃႈ။
ၶႃႈၸဝ်ႈၸမ်ႉ၊တၢင်းဢၼ်ယုမ်ႇမၢတ်ႈတမ်းၸႂ်ၼႂ်းမၼ်းၸဝ်ႈၼၼ်ႉၸမ်တၵ်းႁၢႆၵႂႃႇလႄႈ ၸႂ်ဢၼ်ယုမ်ႇမၢတ်ႈၼႂ်းမၼ်းၸဝ်ႈၼၼ်ႉၸမ်တၵ်းသဵင်ႈၵႂႃႇမူတ်းၵႂႃႇ။
ၵွပ်ႈပိူဝ်ႈၶႃႈၸဝ်ႈၶွႆၶဝ်ၸိူဝ်းဢၼ်မႃႇၼႃႉၸႂ်သုင်ၼၼ်ႉ၊ ၼႂ်းမိူဝ်ႈဢၼ်ၶႃႈၸဝ်ႈႁၼ်ၸေးၸိမ်ႇၶဝ်ၸိူဝ်းဢၼ်ဢမ်ႇတြႃးၼၼ်ႉတီႈၶႃႈဢေႃႈ။
ၶဝ်ဢမ်ႇမီးသေႃးၵႃႉတၢင်းမႆႈၸႂ်လႄႈၶဝ်ယင်းမီးဢဵၼ်မီးႁႅင်း၊ယူႇလီပီးမၼ်းယူႇဢေႃႈ။
ၶဝ်ဢမ်ႇလႆႈၶၢမ်ႇတုၵ်ႉၶႃႉမိူၼ်ပိူၼ်ႈလႄႈၶဝ်ဢမ်ႇမီးတၢင်းဢၼ်ၶၢၼ်ၸႂ်မိူၼ်ပိူၼ်ႈၼၼ်ႉ။
ပိူဝ်ႈၼႆလႄႈ၊ၶဝ်ဢဝ်မႃႇၼႃႉႁွႆႈဝႆႉမိူၼ်ၸိူဝ်ႉၼင်ႇသွႆႈၶေႃးၼၼ်ႉလႄႈ ဢဝ်ၸႂ်ႁၢဝ်ႉၸႂ်ၵျၢမ်းၼုင်ႈႁေႃႇဝႆႉမိူၼ်ၸိူဝ်ႉၼင်ႇၶူဝ်းလဵင်းဢေႃႈ။
မၢၵ်ႇတႃႁူဝ်ၸႂ်ၶဝ်တဵမ်ဝႆႉတင်းတၢင်းဢၼ်ဢမ်ႇလီဢမ်ႇငၢမ်းလႄႈ ႁူဝ်ၸႂ်ၶဝ်ၵျၢမ်ႇပွင်တၢင်းဢၼ်ႁၢႆႉမိူၵ်ႈထၢၼ်ႈပေႃးလူၼ်ႉၵႂႃႇလိူဝ်ၵႂႃႇဢေႃႈ။
ၶဝ်ၸၢင်ႈႁဵတ်းပျၢၵ်ႈႁဵတ်းၶူဝ်ပိူၼ်ႈလႄႈလၢတ်ႈၶိူဝ်းဢၼ်ဢမ်ႇတြႃးၵူၺ်းၵူၺ်းဢေႃႈ။ ၶဝ်ၸၢင်ႈမီးတၢင်းဢၼ်မႃႇၼႃႉၸႂ်သုင်လႄႈၵျၢမ်ႇပွင်ႁႂ်ႈလႆႈတဵၵ်းငႅၼ်းပိူၼ်ႈဢေႃႈ။
ၶဝ်ၸၢင်ႈလၢတ်ႈၵႂၢမ်းႁၢႆႉၵႂၢမ်းယုတ်ႈတီႈၽြႃးၵၢင်ႁၢဝ်လႄႈ ၶဝ်ၸၢင်ႈပၼ်ဢမိင်ႉဢၼ်ပူၼ်ႉဢၼ်လိူဝ်တီႈၵူၼ်းလေႃးၵီႇတင်းလၢႆဢေႃႈ။
ၵွပ်ႈပိူဝ်ႈၸိူဝ်ႉၼင်ႇၼႆလႄႈ၊ၵူၼ်းၽြႃးပဵၼ်ၸဝ်ႈၵေႃႈယင်းဝၢႆႇၸူးတီႈၶဝ်လႄႈ ဢွၼ်ၵၼ်ယုမ်ႇယမ်ၵႃႈဢၼ်ၶဝ် လၢတ်ႈၼၼ်ႉဢေႃႈ။
ၶဝ်ၼၼ်ႉလၢတ်ႈလႄႈဝႃႈ၊ “ၽြႃးပဵၼ်ၸဝ်ႈတေဢမ်ႇႁု။ ၽြႃးဢၼ်သုင်ၼႃႇသေပိူၼ်ႈၼၼ်ႉၵေႃႈတေဢမ်ႇထူပ်းဢမ်ႇႁၼ်၊” ဝႃႈၼင်ႇၼႆဢေႃႈ။
ၵူၼ်းဢၼ်ႁၢႆႉမိူၵ်ႈၸိုင်၊ပဵၼ်ၸိူဝ်ႉၼင်ႇၼႆယဝ်ႉ။ ၶဝ်မၢၵ်ႈမီးမႃးလႄႈယင်းမီးမႃးထႅင်ႈယူႇတိၵ်းတိၵ်းဢေႃႈ။
ပေႃးပဵၼ်ၸိူဝ်ႉၼင်ႇၼႆၸိုင်၊တၢင်းဢၼ်ၵဝ် ႁႂ်ႈႁူဝ်ၸႂ်ၶၢဝ်ၸၢင်ႇယူႇ၊ ဢိၵ်ႇတင်းတၢင်းဢၼ်ဢမ်ႇႁႂ်ႈႁဵတ်းမႅၼ်ႈဢပျတ်ႈၼၼ်ႉတၵ်းမီးဢၵျူဝ်းၵႃႈသင်။
ၽြႃးပဵၼ်ၸဝ်ႈတီႈၶႃႈ။ ၸဝ်ႈႁဝ်းႁႂ်ႈၶႃႈၸဝ်ႈၶၢမ်ႇဝူၺ်ႇတၼႃႇယူႇ၊တင်းဝၼ်းတင်းဝၼ်းလႄႈ၊ ၸဝ်ႈႁဝ်းယင်းပၼ်တၢမ်ႇၶႃႈၸဝ်ႈယူႇ ၵူႈၼႂ်တီႈၶႃႈဢေႃႈ။
သင်ၶႃႈၸဝ်ႈလႆႈလၢတ်ႈဝႃႈၸိူဝ်ႉၼင်ႇၼႆၸိုင်၊ ၶႃႈၸဝ်ႈတၵ်းပဵၼ်ၵေႃႉဢၼ် ဢမ်ႇၵမ်ဢမ်ႇၵျၢင်ႉ ၸိူဝ်ႉၼင်ႇၵူၼ်းၸဝ်ႈႁဝ်းၵေႃႉၼိုင်ႈ ထုၵ်ႇလီၵမ်ၵျၢင်ႉၼၼ်ႉတီႈၶႃႈယဝ်ႉ။
ၶႃႈၸဝ်ႈၶႆႈၸႂ်ဝူၼ်ႉၸႂ်ႁႂ်ႈလႆႈႁုလွင်ႈတၢင်းၼၼ်ႉယူႇသေၵေႃႈ၊ ပဵၼ်တၢင်းဢၼ်ယၢပ်ႇၽိုတ်ႇၼႃႇ တီႈၶႃႈၸဝ်ႈတီႈၶႃႈဢေႃႈ။
လိုၼ်းသေၶႃႈၸဝ်ႈၶဝ်ႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉယဝ်ႉၸင်ႇ၊ ၶႃႈၸဝ်ႈလႆႈႁုလွင်ႈတၢင်းဢၼ်တၵ်းပဵၼ်မႃး တီႈၵူၼ်းဢၼ်ႁၢႆႉမိူၵ်ႈၼၼ်ႉတီႈၶႃႈဢေႃႈ။
ၸဝ်ႈႁဝ်းဢဝ်ၶဝ်ဝႆႉၵႃႈတီႈဢၼ်မိုၼ်ႈၼၼ်ႉသေလႄႈ ႁႂ်ႈၶဝ်တူၵ်းႁွတ်ႈၵႃႈၼႂ်းတီႈဢၼ်လုဢၼ်လႅဝ် ၼၼ်ႉတီႈၶႃႈဢေႃႈ။
ၶဝ်လႆႈၶိုၵ်းၶၢၵ်းလုလႅဝ်ၵႂႃႇၵမ်းလဵဝ်လႄႈ လႆႈလူင်းၵႂႃႇၸူးတီႈသုတ်းတီႈၵွႆဢၼ်လီၵူဝ်လီႁႄၼႃႇၼၼ်ႉတီႈၶႃႈဢေႃႈ။
ၶဝ်လႆႈပဵၼ်ၸိူဝ်ႉၼင်ႇတၢင်းဢၼ်ၼွၼ်းၽၼ်ႁၼ်ဢၼ်ႁၢႆပႅတ်ႈၼႂ်းၶိင်ႇၵၢင်ၼႂ်ၼၼ်ႉလႄႈ ၸဝ်ႈၽြႃးတီႈၶႃႈ။ မိူဝ်ႈဢၼ်ၸဝ်ႈႁဝ်းလုၵ်ႉမႃးၼၼ်ႉ၊ၶဝ်ႁၢႆလၢႆၵႂႃႇဢေႃႈ။
ၼႂ်းမိူဝ်ႈဢၼ်ၶႃႈၸဝ်ႈၶႆႈၸႂ်ၸဵၼ်းၸႃးၼၼ်ႉ ပဵၼ်ဢၼ်ၶူမ်ၸႂ်ယူႇႁူဝ်ၸႂ်ၶႃႈၸဝ်ႈ ၸဵပ်းၸႂ်ယူႇၼၼ်ႉၸိုင်၊
ၶႃႈၸဝ်ႈပဵၼ်တၢင်းဢၼ်ၺၢၼ်ႇထိုင်ႉၼႃႇမိူၼ်ၸိူဝ်ႉၼင်ႇတရိၵ်ႈသၢၼ်ႇၼၼ်ႉယူႇလႄႈ ဢမ်ႇၸၢင်ႈႁုပွင်ႇလွင်ႈၸဝ်ႈႁဝ်းတီႈၶႃႈ။
ၼႂ်းဝႃႈၼၼ်သေၵေႃႈ၊ၶႃႈၸဝ်ႈယူႇၸမ်ႁိမ်း ၸဝ်ႈႁဝ်းယူႇတႃႇသေႇလႄႈ ၸဝ်ႈႁဝ်းယိပ်းၸုင်ဢဝ်မိုဝ်းၶႃႈၸဝ်ႈ တီႈၶႃႈဢေႃႈ။
ၸဝ်ႈႁဝ်းပၼ်ၺၢၼ်ႇဢၼ်လႅင်းတီႈၶႃႈၸဝ်ႈလႄႈ ဢွၼ်သူင်ႇၶႃႈၸဝ်ႈယူႇၼႂ်းတီႈသုတ်းတီႈၵွႆၼၼ်ႉ ၸဝ်ႈႁဝ်းတၵ်းႁပ်ႉၶၢမ်ႇဢဝ်ၶႃႈၸဝ်ႈဝႆႉ ၵႃႈၼႂ်းမုၼ်သရေႇတီႈၶႃႈဢေႃႈ။
လိူဝ်သေၸဝ်ႈႁဝ်းၶႃႈၼႆႉၵႃႈၼိူဝ် ၽုင်ႇၵၢင်ႁၢဝ်ပုၼ်ႉၼၼ်ႉၶႃႈၸဝ်ႈတၵ်းမီး ၽူႈလႂ်လူးၵွၼ်ႇတီႈၶႃႈ။ လိုၼ်းသေဢၼ်ၶႃႈၸဝ်ႈလႆႈႁပ်ႉဢဝ် ၸဝ်ႈႁဝ်းယဝ်ႉၼၼ်ႉ၊ ၵႃႈၼိူဝ်လိၼ်မိူင်းၼႆႉ၊ၶႃႈၸဝ်ႈတၵ်းမီးဢလူဝ်ႇ ၽူႈလႂ်လူးၵွၼ်ႇတီႈၶႃႈ။
တူဝ်ၸႂ်ၶႃႈၸဝ်ႈတၵ်းႁႅင်းဢူၼ်ႈၵႂႃႇၸွပ်ႈၵႂႃႇ သေၵေႃႈ၊ၸဝ်ႈႁဝ်းပဵၼ်ဢဵၼ်ႁႅင်း ၶႃႈၸဝ်ႈတီႈၶႃႈဢေႃႈ။ ပဵၼ်ၸဝ်ႈဢၼ်ၶႃႈၸဝ်ႈပဵၼ်တီႈဢၼ် ၶႃႈၸဝ်ႈသွၼ်ႈပိုင်ႈယူႇတႃႇသေႇတီႈၶႃႈဢေႃႈ။
ၶဝ်ၸိူဝ်းဢၼ်ၸုၼ်ႉပႅတ်ႈၸဝ်ႈႁဝ်းၼၼ်ႉတၵ်းလႆႈလုလႅဝ်ဢမၢၼ်ႇၶၼ်ပဵၼ်လႄႈ ၸဝ်ႈႁဝ်းတၵ်းယႃႉပႅတ်ႈၶဝ်ၸိူဝ်းဢၼ်ၽွၵ်ႈသဵတ်ႈၸႃႇတီႈၸဝ်ႈႁဝ်းၼၼ်ႉတီႈၶႃႈဢေႃႈ။
ၶႃႈၸဝ်ႈၸမ်ႉ၊လီဢၢမ်းဢေႃးၼႃႇလူင်လၢင်ၵွပ်ႈပိူဝ်ႈဢၼ်လႆႈယူႇၸမ်ႁိမ်းၸဝ်ႈႁဝ်းလႄႈ လႆႈထူပ်းႁၼ်တၢင်းဢၼ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ၵႅတ်ႇၶႄႁႄႉၵင်ႈ၊ သမ်ႉလႆႈၽုၺ်ႇမွၵ်ႇလၢတ်ႈၼႄ လွင်ႈတၢင်းဢၼ်မၼ်းၸဝ်ႈ ၶိုင်ပွင်ႁဵတ်းသၢင်ႈယဝ်ႉၼၼ်ႉဢေႃႈ။
ၽြႃးပဵၼ်ၸဝ်ႈတီႈၶႃႈ။ ႁဵတ်းသင်လႄႈၸဝ်ႈႁဝ်းၸုၼ်ႉပႅတ်ႈၶႃႈၸဝ်ႈႁဝ်းၶဝ်ဝႆႉ၊ၸိူဝ်ႉၼင်ႇၼႆတီႈၶႃႈ။ ၸွင်ႇၸဝ်ႈႁဝ်းတၵ်းဢွၵ်ႇတေႃးသႃႉတေႃႇ ၵူၼ်းၸဝ်ႈႁဝ်းၸိူဝ်းၼၼ်ႉယူႇသေႇသေႇ တီႈၶႃႈႁိုဝ်း။
ၶႅၼ်းတေႃႈၶုၵ်းၸႂ်လႆႈၵူၼ်းၸဝ်ႈႁဝ်းတင်းလၢႆဢၼ်ၸဝ်ႈႁဝ်းလိူၵ်ႈဢဝ်ဝႆႉ ႁႂ်ႈပဵၼ်ပုၼ်ႈၸဝ်ႈႁဝ်းၸဵမ်မိူဝ်ႈၵွၼ်ႇ ဢွၼ်ၼႆႉၼၼ်ႉ၊ ၸဝ်ႈႁဝ်းထုတ်ႇဢဝ်ဢွၵ်ႇသေၸိူဝ်ႉၸၢတ်ႈ ၶႃႈမႃးႁႂ်ႈလႆႈပဵၼ်ၵူၼ်းမဵဝ်းၸဝ်ႈႁဝ်းၼၼ်ႉ၊ ဢိၵ်ႇတင်းၶုၵ်းၸႂ်လႆႈလွႆ ၸိဢုၼ်ႇ၊ တီႈဢၼ်ၸဝ်ႈႁဝ်းၵိင်းဝၢပ်ႈမႃးၼၼ်ႉသေၵမ်းတီႈၶႃႈ။
ၶႅၼ်းတေႃႈယဵပ်ႇၶၢမ်ႈပႆၵႂႃႇၵႃႈၼိူဝ်တီႈဢၼ်လုလႅဝ်ယဝ်ႉၸိူဝ်းၼၼ်ႉသေၵမ်းတီႈၶႃႈ။ ရၢၼ်ႇသူႇၸဝ်ႈႁဝ်းတင်းလၢႆယႃႉၽဵဝ်ႈပႅတ်ႈ ၵူႈၸိူဝ်ႉၵူႈပိူင် ၵႃႈၼႂ်းၵျွင်းပိၵ်ႈမၢၼ်ႇၸဝ်ႈႁဝ်းၼၼ်ႉတီႈၶႃႈယဝ်ႉ။
ရၢၼ်ႇသူႇၸဝ်ႈႁဝ်းၸိူဝ်းၼၼ်ႉဢွၼ်ၵၼ်ႁွင်ႉသႅၼ်ႇပွႆးဢွင်ႇသိုၵ်း၊ ၵႃႈၼႂ်းၵျွင်းပိၵ်ႈမၢၼ်ႇၸဝ်ႈႁဝ်းၼၼ်ႉလႄႈ၊ ၶဝ်ႁဵတ်းဝႆႉတီႈမၢတ်ႈတီႈတွင်း၊ပုၼ်ႈလၢၵ်ႈၶၼႃႇဢၼ်ၶဝ်ပႄႉၼႅင်ႇၼၼ်ႉတီႈၶႃႈဢေႃႈ။
ၶဝ်ပဵၼ်ၸိူဝ်ႉၼင်ႇၵူၼ်းဢၼ်ဢဝ်တႃမၢတ်ႇပွမ်ႈတႅပ်းၽၼ်းပႃႇတူၼ်ႈမႆႉ၊ ဢၼ်ၼႃဢၼ်တၼ်ၼႃႇၼၼ်ႉ တီႈၶႃႈဢေႃႈ။
ၶဝ်ဢွၼ်ၵၼ်ဢဝ်တႃမႅတ်းလႂ်၊ၶွၼ်ႉလဵၵ်းလႂ်ပေႃႉထုပ်ႉၶိူင်ႈပိူင်ဢၼ်တွင်ႈႁဵတ်း၊ လၢႆးမွၵ်ႇလၢႆးမႂ်ၸိူဝ်းၼၼ်ႉလုလႅဝ်ပႅတ်ႈတင်းသဵင်ႈတင်းမူတ်းတီႈၶႃႈယဝ်ႉ။
ၶဝ်ဢဝ်ၽႆးတုတ်ႇပႅတ်ႈၵျွင်းပိၵ်ႈမၢၼ်ႇ ၸဝ်ႈႁဝ်းသေလႄႈ ၶဝ်ဢဝ်ထႃႇၼႃႉတီႈဢၼ်ပိူၼ်ႈဝႆႈၸဝ်ႈႁဝ်းၼၼ်ႉတူၵ်းတီႈတႅမ်ႇတီႈၶႃႈယဝ်ႉ။
ၶဝ်မီးဢလူဝ်ႇၶႂ်ႈၶိုတ်ႈၶႃႈၸဝ်ႈႁဝ်းၶဝ်ထၢၼ်ႈပေႃးပဵၼ်မုၼ်ႈပဵၼ်ၽွင်ၵႂႃႇဢေႃႈ။ ၶဝ်တုတ်ႇပႅတ်ႈထႃႇၼႃႉတီႈဢၼ်မူတ်းၸၢင်ႇ ၵူႈၸိူဝ်ႉၵူႈဢၼ်ၵႃႈၼႂ်းမိူင်းဢၼ်မၼ်းၸဝ်ႈ ဝႆႉၵတိၼၼ်ႉတီႈၶႃႈယဝ်ႉ။
လၢၵ်ႈၶၼႃႇတီႈမၢတ်ႈတီႈတွင်းၶႃႈၸဝ်ႈႁဝ်းၶဝ်ၵႃႈမီးႁၢႆလၢႆၵႂႃႇတင်းသဵင်ႈတင်းမူတ်းတီႈၶႃႈယဝ်ႉ။ ပရေႃးၽႅတ်ႈ ၵေႃႉၼိုင်ႈၵေႃႈဢမ်ႇၵိုတ်းဢမ်ႇၵျၢၼ်ႇဝႆႉတီႈၶႃႈယဝ်ႉ။ လွင်ႈတၢင်းၼႆႉတၵ်းပဵၼ်ႁိုင်ၵႃႈႁိုဝ်ၼၼ်ႉၽူႈလႂ်ၵေႃႈဢမ်ႇလႆႈႁုတီႈၶႃႈ။
ၽြႃးပဵၼ်ၸဝ်ႈတီႈၶႃႈ။ ရၢၼ်ႇသူႇၶႃႈၸဝ်ႈႁဝ်းၶဝ်ၸိူဝ်းၼၼ်ႉ တၵ်းဢွၼ်ၵၼ်ႁဵတ်းပျၢၵ်ႈႁဵတ်းၶူဝ်၊ၸဝ်ႈႁဝ်းယူႇႁိုင်ၵႃႈႁိုဝ်တီႈၶႃႈ။ ၶဝ်တၵ်းသႄႉသွမ်းၼႃႇမႃႉၸိုဝ်ႈသဵင်ၸဝ်ႈႁဝ်းယူႇသေႇသေႇတီႈၶႃႈႁိုဝ်း။
ၵွပ်ႈသင်လႄႈၸဝ်ႈႁဝ်းပႄႇပႅတ်ႈတၢင်းဢၼ်ၸွႆႈထႅမ်ၶႃႈၸဝ်ႈႁဝ်းၶဝ်ၼၼ်ႉတီႈၶႃႈ။ ၵွပ်ႈသင်လႄႈၸဝ်ႈႁဝ်းဢဝ်မိုဝ်းၸဝ်ႈႁဝ်းပႆႇလင်ဝႆႉတီႈၶႃႈ။
ၽြႃးပဵၼ်ၸဝ်ႈတီႈၶႃႈ။ ၸဝ်ႈႁဝ်းပဵၼ်ၶုၼ်ႁေႃၶမ်းၶႃႈၸဝ်ႈႁဝ်းၶဝ်မႃးၸဵမ်မိူဝ်ႈၵေႃႇၸႃႉႁူဝ်ပိုင်းၼၼ်ႉသေလႄႈ၊ ၸဝ်ႈႁဝ်းၵႄႇၶျွတ်ႈဢဝ်ၶႃႈၸဝ်ႈႁဝ်းၶဝ်ဢမ်ႇႁု လၢႆပွၵ်ႈတီႈၶႃႈယဝ်ႉ။
ၸဝ်ႈႁဝ်းဢဝ်တင်းႁႅင်းတၼ်းၶူဝ်းၸဝ်ႈႁဝ်း ၽႃႇၼမ်ႉပၢင်ႇလၢႆႇသေလႄႈ ၸဝ်ႈႁဝ်းႁၵ်းႁူဝ်တူဝ်သတ်းလူင်တင်းလၢႆဢၼ်မီးၵႃႈၼႂ်းၼမ်ႉၼၼ်ႉတီႈၶႃႈယဝ်ႉ။
ၸဝ်ႈႁဝ်းၶိုတ်ႈႁူဝ်ငိူၵ်ႈၼၼ်ႉသေယဝ်ႉ၊ ဢဝ်တူဝ်တၢႆမၼ်းဢွႆႇတူဝ်ထိူၼ်ႇတူဝ်ၶိူဝ်းတင်းလၢႆၵိၼ်ပႅတ်ႈတီႈၶႃႈယဝ်ႉ။
ၸဝ်ႈႁဝ်းႁႂ်ႈၼမ်ႉဢွၵ်ႇႁူးတင်းလၢႆပုၼ်းဢွၵ်ႇမႃးလႄႈလႆယူႇသေယဝ်ႉ၊ ႁဵတ်းႁႂ်ႈၼမ်ႉႁွင်ႈၼမ်ႉၸႅဝ်ႈတင်းလၢႆႁႅင်ႈၶၢတ်ႇၶေႃးၵႂႃႇတီႈၶႃႈယဝ်ႉ။
ၸဝ်ႈႁဝ်းၽၢၼ်ႇသၢင်းႁဵတ်းပဵၼ်ၵၢင်ဝၼ်းတင်းၵၢင်ၶိုၼ်းသေလႄႈ ႁႂ်ႈၵၢင်ဝၼ်းတင်းလိူၼ်တႄႇယူႇတီႈၽႂ် တီႈမၼ်းဢေႃႈ။
ၸဝ်ႈႁဝ်းၶၼ်ႈဝႆႉၶႅၼ်ႈဝႆႉလႅၼ်လိၼ်မိူင်းၵႃႈမီးတင်းသဵင်ႈတင်းလူင်လႄႈ ႁဵတ်းပဵၼ်ၶိင်ႇမႆႈၶိင်ႇၵတ်းဝႆႉတီႈၶႃႈယဝ်ႉ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈၶုၵ်းၸႂ်လႆႈတၢင်းဢၼ်ရၢၼ်ႇသူႇ ၸဝ်ႈႁဝ်းတင်းလၢႆႁဵတ်းပျၢၵ်ႈႁဵတ်းၶူဝ် ၸဝ်ႈႁဝ်းၼၼ်ႉသေၵမ်းတီႈၶႃႈ။ ၶဝ်ၼၼ်ႉပဵၼ်ၵူၼ်းဢၼ်ဢမ်ႇမီးၽြႃးတြႃးလႄႈ ႁဵတ်းဢမ်ႇပေႃးၼင်ႇႁိုဝ်တီႈၸဝ်ႈႁဝ်း ယူႇတီႈၶႃႈဢေႃႈ။
ယႃႇပေဢဝ်ဢသၢၵ်ႈၵူၼ်းၸဝ်ႈႁဝ်းဢၼ်ဢမ်ႇမီးတီႈဢႃးၵူဝ်းၸိူဝ်းၼၼ်ႉ ဢၢပ်ႈပၼ်ၵႃႈၼႂ်းမိုဝ်းရၢၼ်ႇသူႇဢၼ်ႁၢႆႉမိူၵ်ႈၼၼ်ႉသေၵမ်းတီႈၶႃႈ။ ယႃႇပေလူင်လိုမ်းၵူၼ်းၸဝ်ႈႁဝ်းၸိူဝ်းဢၼ်လႆႈၶၢမ်ႇတဵၵ်းငႅၼ်းယူႇၼၼ်ႉသေၵမ်းတီႈၶႃႈ။
ၶႅၼ်းတေႃႈၶုၵ်းၸႂ်လႆႈပတိၺိၺ်ႇတြႃး ဢၼ်ၸဝ်ႈႁဝ်းႁဵတ်းလူၺ်ႈၵၼ်တင်းၶႃႈၸဝ်ႈႁဝ်းၶဝ်ၼၼ်ႉသေၵမ်းတီႈၶႃႈ။ လွင်ႈမၼ်းၸမ်ႉ၊ၵႃႈၼိူဝ်လိၼ်မိူင်းၼႆႉ တၢင်းဢၼ်ႁၢဝ်ႉၵျၢမ်း မီးယူႇၵႃႈတီႈၸွၵ်ႉတီႈၸဵင်ႇဢၼ်လပ်းသိင်ႇၵူႈတီႈၵူႈလႅၼ်ၼၼ်ႉတီႈၶႃႈဢေႃႈ။
ယႃႇပေႁႂ်ႈၶဝ်ၸိူဝ်းဢၼ်လႆႈၶၢမ်ႇတၢင်းဢၼ် တဵၵ်းငႅၼ်းယူႇၸိူဝ်းၼၼ်ႉလႆႈဢူၵ်း လႆႈဢၢႆသေၵမ်းတီႈၶႃႈ။ ၶႅၼ်းတေႃႈႁႂ်ႈၶဝ်ၸိူဝ်းဢၼ်ယၢၵ်ႈၽၢၼ် ၸုတ်ႈလုတ်ႈၸိူဝ်းၼၼ်ႉ၊ လႆႈယွင်ႈယေႃးၸဝ်ႈႁဝ်းသေၵမ်းလူၺ်ႈ။
ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈလုၵ်ႉလႄႈၵႅတ်ႇၶႄဢမုၸဝ်ႈႁဝ်းၼၼ်ႉသေၵမ်းတီႈၶႃႈ။ ၶုၵ်းၸႂ်လႆႈလွင်ႈတၢင်းဢၼ်ၶဝ်ၸိူဝ်းဢၼ် ဢမ်ႇမီးၽြႃးတြႃးၸိူဝ်းၼၼ်ႉ၊ ႁဵတ်းပျၢၵ်ႈႁဵတ်းၶူဝ်ၸဝ်ႈႁဝ်းယူႇတင်းဝၼ်းတင်းဝၼ်းၼၼ်ႉသေၵမ်းတီႈၶႃႈ။
ၶႅၼ်းတေႃႈယႃႇပေလူင်လိုမ်းသဵင်ဢၼ် ရၢၼ်ႇသူႇၸဝ်ႈႁဝ်းတင်းလၢႆႁွင်ႉသႅၼ်ႇ ၼၼ်ႉသေၵမ်းၶႃႈ။ သဵင်ဢၼ်ၶဝ်သႄႉသွမ်းၸဝ်ႈႁဝ်းၼၼ်ႉ ဢူၼ်ဢဵၼ်မေႃးယူႇသေႇသေႇတီႈၶႃႈဢေႃႈ။
ၽြႃးပဵၼ်ၸဝ်ႈတီႈၶႃႈ။ ၶႃႈၸဝ်ႈႁဝ်းၶဝ်ဢွၼ်ၵၼ်ယွင်ႈယေႃးၵျေးၸူးၸဝ်ႈႁဝ်းတီႈၶႃႈဢေႃႈ။ ၶႃႈၸဝ်ႈႁဝ်းၶဝ်ယွင်ႈယေႃးၵျေးၸူးၸဝ်ႈႁဝ်းတီႈၶႃႈဢေႃႈ။ ၶႃႈၸဝ်ႈႁဝ်းၶဝ်မွၵ်ႇလၢတ်ႈၼႄလွင်ႈဢၼ်ၸဝ်ႈႁဝ်းယႂ်ႇမျၢတ်ႈၼႃႇၼၼ်ႉသေလႄႈ ဢွၼ်ၵၼ်ၶၢမ်ႇသၢၵ်ႈသေႇလွင်ႈတၢင်းဢၼ်လီဢၢမ်းၸဝ်ႈႁဝ်းၸိူဝ်းၼၼ်ႉတီႈၶႃႈဢေႃႈ။
ၽြႃးပဵၼ်ၸဝ်ႈမီးဢမိင်ႉလႄႈဝႃႈ၊ “ၵဝ်ၶၢၼ်းၶိင်ႇဢၼ်တၵ်းၸီႇယၢင်ႇတြႃးဝႆႉယဝ်ႉ။ ၵဝ်တၵ်းတႅပ်းတတ်းသိုဝ်ႈသိုဝ်ႈ တေႃႇတေႃႇဢေႃႈ။
ပိၵ်ႉသမ်ႉလိၼ်မိူင်းဢိၵ်ႇတင်းသတ်ႉတဝႃႇဢၼ်ဢသၢၵ်ႈလိပ်းယူႇၼႂ်းမၼ်း၊ ၵူႈၸိူဝ်ႉၵူႈပိူင်ၶွၼ်းၶဝ်ႇၸၢႆႉၵႂႃႇၸိူၼ်းၵႂႃႇသေၵေႃႈ၊ ၵဝ်တၵ်းတႄႇတင်ႈငဝ်ႈႁၢၵ်ႈမၼ်းမၼ်ႈမၼ်ႈၶိူင်ႇၶိူင်ႇဢေႃႈ။
ၵဝ်ဝႃႈတီႈၵူၼ်းဢၼ်မႃႇၼႃႉၸႂ်သုင်ၼၼ်ႉလႄႈဝႃႈ၊ယႃႇပေထၢင်ႇယႂ်ႇတီႈတူဝ်ၸဝ်ႈၵဝ်ႇ၊ သမ်ႉပူင်ဢမိင်ႉတီႈၵူၼ်းဢၼ်ဢမ်ႇတြႃးၼၼ်ႉလႄႈဝႃႈ၊ယႃႇပေႁဵတ်းပႄႉႁဵတ်းၼႅင်ႇပိူၼ်ႈ။
ယႃႇႁႂ်ႈမီးတၢင်းဢၼ်ၸႂ်ယႂ်ႇၶေႃးၶႅင်လႄႈလၢတ်ႈ၊ဝႃႈၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။
လွင်ႈမၼ်းၸမ်ႉ၊တၢင်းဢၼ်ၸီႇယၢင်ႇတြႃး လုၵ်ႉသေၵႃႈတီႈၽၢႆႇဝၼ်းတူၵ်း၊ၽၢႆႇဝၼ်းဢွၵ်ႇ၊ၽၢႆႇႁွင်ႇ၊ၽၢႆႇၸၢၼ်းၸိူဝ်းၼၼ်ႉမႃးဢမ်ႇၸႂ်ႈ။
ပဵၼ်ဢၼ်ၽြႃးပဵၼ်ၸဝ်ႈၸီႇယၢင်ႇဢေႃႈ။ မၼ်းၸဝ်ႈၸီႇယၢင်ႇပၼ်တၢမ်ႇ တီႈၵူၼ်းၵမ်ႈၽွင်ႈလႄႈ၊သမ်ႉပွႆႇၶႂၢင်းပၼ် တီႈၵမ်ႈၽွင်ႈဢေႃႈ။
ထႃႇဝရႃႉၽြႃး၊ ယိပ်းၵမ်ၵွၵ်းဝႆႉၵႃႈၼႂ်းမိုဝ်းမၼ်းၸဝ်ႈလႄႈၵွၵ်းၼၼ်ႉတဵမ်ဝႆႉ၊ တင်းၼမ်ႉမၢၵ်ႇၸပိတ်ႉဢၼ်ၶိုၼ်ႇၼႃႇဢၼ်ဝႃႈတေႃးသႃႉမၼ်းၸဝ်ႈၼၼ်ႉဢေႃႈ။ မၼ်းၸဝ်ႈဢဝ်ၼမ်ႉမၢၵ်ႇၸပိတ်ႉၼၼ်ႉထွၵ်ႇဢွၵ်ႇလႄႈ၊ ၶဝ်ၸိူဝ်းဢၼ်ႁၢႆႉဢၼ်မိူၵ်ႈတင်းသဵင်ႈတင်းလူင်ဢွၼ်ၵၼ်သူတ်ႉၵိၼ်ဢေႃႈ။ ၶဝ်ဢွၼ်ၵၼ်သူတ်ႉၵိၼ်တေႃႇပေႃးမူတ်း ပေႃးၵဵင်ႈဢေႃႈ။
ၵဝ်ၸမ်ႉ၊တၵ်းလၢတ်ႈၸႃ လွင်ႈၽြႃးပဵၼ်ၸဝ်ႈမဵဝ်း ယႃႇၵုပ်ႈ၊ ၼၼ်ႉယူႇၶိူဝ်းၶိူဝ်းလႄႈ ႁဵတ်းၵႂၢမ်းယွင်ႈယေႃးမၼ်းၸဝ်ႈဢေႃႈ။
မၼ်းၸဝ်ႈတၵ်းႁၵ်းပႅတ်ႈတၼ်းၶူဝ်းၶဝ်ၸိူဝ်းဢၼ်ႁၢႆႉဢၼ်မိူၵ်ႈၼၼ်ႉသေလႄႈ သမ်ႉႁႂ်ႈတၼ်းၶူဝ်းၶဝ်ၸိူဝ်းဢၼ်သိုဝ်ႈဢၼ်တေႃႇၼၼ်ႉယႂ်ႇၼမ်လိူဝ်တွၼ်းမႃးဢေႃႈ။
ၵူၼ်းမိူင်း ယုတႃႉ၊ ဢွၼ်ၵၼ်ႁုၸၵ်းၽြႃးပဵၼ်ၸဝ်ႈဢေႃႈ။ ၵူၼ်းမဵဝ်း ဢိသရေး၊ ၶဝ်သမ်ႉဢွၼ်ၵၼ်ရူဝ်ႇသေႇၼႃႇမႃႉၸိုဝ်ႈသဵင်မၼ်းၸဝ်ႈဢေႃႈ။
မၼ်းၸဝ်ႈၼၼ်ႉမီးႁိူၼ်းၸဝ်ႈၵႃႈၼႂ်းဝဵင်း ယေႇရုသလႅမ်ႇ၊ လႄႈ ၵိင်းဝၢပ်ႈယူႇၵႃႈၼိူဝ်လွႆ ၸိဢုၼ်ႇ၊ ပုၼ်ႉဢေႃႈ။
ၵႃႈတီႈၼၼ်ႈမၼ်းၸဝ်ႈႁၵ်းပႅတ်ႈပိုၼ်ၵၢင်ႇ ရၢၼ်ႇသူႇၸိူဝ်းၼၼ်ႉပႃးတင်းၶႅပ်းႁႄႉ လၢၵ်ႈၼၢၵ်ႈလႂ်၊ လၢပ်ႇလႅဝ်းလႂ်၊ဢိၵ်ႇတင်းၶိူင်ႈလၢၵ်ႈၼၢၵ်ႈၶဝ်ၵႃႈမီးတင်းသဵင်ႈတင်းလူင်ၼၼ်ႉဢေႃႈ။
ၽြႃးပဵၼ်ၸဝ်ႈတီႈၶႃႈ။ ၸဝ်ႈႁဝ်းမီးမုၼ်ၽုင်းယႂ်ႇၼႃႇလႄႈ၊ပဵၼ်ၸဝ်ႈဢၼ်သုင်မျၢတ်ႈၼႃႇ၊ ၸွမ်းၵႃႈၼင်ႇဢၼ်ၸဝ်ႈႁဝ်းပွၵ်ႈလူင်းလွႆ၊တီႈဢၼ်ၸဝ်ႈႁဝ်းပႄႉသိုၵ်း ၼၼ်ႉမႃးဢေႃႈ။
ၵူၼ်းသိုၵ်းၶဝ်ဢၼ်ႁတ်းႁၢၼ်ၸိူဝ်းၼၼ်ႉလႆႈၶၢမ်ႇတၢင်းဢၼ်ႁိမ်ဢဝ်လႄႈၼွၼ်းလပ်းၵႂႃႇ၊ ၼႂ်းတၢင်းၼွၼ်းဢၼ်ဝႃႈတၢင်းတၢႆၼၼ်ႉယဝ်ႉ။ တၢင်းဢၼ်ၶဝ်ႁႅင်းယႂ်ႇလႄႈၵတ်ႉၵႃႈၼၼ်ႉပဵၼ်ဢၼ်လၢႆလၢႆဢမ်ႇပွင်ႇလွင်ႈၵႃႈသင်ယဝ်ႉ။
ၽြႃးပဵၼ်ၸဝ်ႈမဵဝ်း ယႃႇၵုပ်ႈ၊ တီႈၶႃႈ။ မိူဝ်ႈဢၼ်ၸဝ်ႈႁဝ်းႁိုတ်းသႂ်ႇၶဝ်ၼၼ်ႉ၊ မႃႉဢိၵ်ႇတင်းၵူၼ်းၶီႇမႃႉၶဝ်ၸိူဝ်းၼၼ်ႉလူမ်ႉတၢႆၵႂႃႇတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းၸမ်ႉ၊ပဵၼ် ၸဝ်ႈဢၼ်လီၵူဝ်လီႁႄတီႈၶႃႈဢေႃႈ။ မိူဝ်ႈဢၼ်ၸဝ်ႈႁဝ်းၸႂ်မႆႈၶႂ်ႈၸႃႉၼၼ်ႉၽူႈလႂ် တၵ်းၸုၵ်းၶၢမ်ႇယူႇၽၢႆႇၼႃႈၸဝ်ႈႁဝ်း လႆႈတီႈၶႃႈ။
ၸဝ်ႈႁဝ်းပွႆႇသဵင်ဢၼ်တႅပ်းတတ်းတြႃးသေ ၵႃႈတီႈၵၢင်ႁၢဝ်ပုၼ်ႉမႃးလႄႈ၊ ၵူၼ်းလေႃးၵီႇတင်းလၢႆၵူဝ်ႁႄလႄႈ ယူႇတဵတ်ႇတဵတ်ႇယူႇ။
ၼႂ်းမိူဝ်ႈဢၼ်ၸဝ်ႈႁဝ်းလုၵ်ႉႁႂ်ႈလႆႈတႅပ်းတတ်းတြႃးလႄႈၵႄႇသႄႇၶျွတ်ႈဢဝ်ၵူၼ်းလေႃးၵီႇ၊ ဢၼ်လႆႈၶၢမ်ႇတၢင်းဢၼ်တဵၵ်းငႅၼ်းတင်းသဵင်ႈတင်းလူင်ၼၼ်ႉတီႈၶႃႈဢေႃႈ။
တေႃးသႃႉၵူၼ်းတင်းလၢႆတၵ်းပွင်ပဵၼ်တၢင်းဢၼ်ယွင်ႈယေႃးၸဝ်ႈႁဝ်းမႃးလႄႈ ၶဝ်ၸိူဝ်းဢၼ်လွတ်ႈဢသၢၵ်ႈၼႂ်းၼႃႈသိုၵ်းမႃးၼၼ်ႉ တၵ်းဢွၼ်ၵၼ်ၶဝ်ႈပွႆးဢၼ်ၵိၼ်ၶူပ်းလူၺ်ႈၵၼ်တင်းၸဝ်ႈႁဝ်းတီႈၶႃႈဢေႃႈ။
ၵႃႈဢၼ်သူႁဵတ်းၵတိသဵတ်ႈၸႃႇတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူၼၼ်ႉ၊ ၽေႇဝၢတ်ႈတီႈမၼ်းၸဝ်ႈတႃႉ။ ႁႂ်ႈမဵဝ်းၵူၼ်းၸိူဝ်းဢၼ်ယူႇၸမ်ႁိမ်းႁွမ်း မၼ်းၸဝ်ႈၼၼ်ႉ၊ ဢွၼ်ၵၼ်ဢဝ်ၶွင်ၽၢၵ်ႇလၢၵ်ႈသွင်ႇမႃးသၢၵ်ႈတီႈမၼ်းၸဝ်ႈတႃႉ။ လွင်ႈမၼ်းၸမ်ႉ၊ၽြႃးပဵၼ်ၸဝ်ႈႁဵတ်းႁႂ်ႈၵူၼ်းတင်းလၢႆၵူဝ်ယမ်မၼ်းၸဝ်ႈဢေႃႈ။
မၼ်းၸဝ်ႈႁႂ်ႈၸႂ်ဢၼ်ၽႅၼ်သုင်ၶုၼ်လူင်တင်းလၢႆဢူၼ်ႈဢွၼ်ႇလူင်းလႄႈ ႁႂ်ႈၶုၼ်ႁေႃၶမ်းတင်းလၢႆၵူဝ်ႁႄမၼ်းၸဝ်ႈဢေႃႈ။
ၵဝ်ႁွင်ႉၵၢဝ်ႇတီႈၽြႃးပဵၼ်ၸဝ်ႈတင်းသဵင် ဢၼ်ယႂ်ႇၼႃႇဢေႃႈ။ ၵဝ်ႁွင်ႉၵၢဝ်ႇတင်းသဵင်ဢၼ်ယႂ်ႇၼႃႇလႄႈ၊ မၼ်းၸဝ်ႈငိၼ်းသဵင်ၵဝ်ဢေႃႈ။
ၼႂ်းၶိင်ႇမိူဝ်ႈဢၼ်ၵဝ်ထူပ်းၽေးၼၼ်ႉၵဝ်သူးတွင်းတီႈၸဝ်ႈၽြႃးဢေႃႈ။ ၵဝ်ႁွမ်းမိုဝ်းသူးတွင်းတီႈမၼ်းၸဝ်ႈယူႇ တင်းၶိုၼ်းသေၵေႃႈ ႁူဝ်ၸႂ်ၵဝ်ဢမ်ႇမီးတၢင်းဢၼ်သၢၵ်ႈသႃႇလႃးလႃး။
မိူဝ်ႈဢၼ်ၵဝ်ၶႆႈၸႂ်ဝူၼ်ႉၸႂ်လူၺ်ႈလွင်ႈၽြႃးပဵၼ်ၸဝ်ႈၼၼ်ႉၵဝ်ထူၺ်ႈၸႂ်လူင်ဢေႃႈ။ မိူဝ်ႈဢၼ်ၵဝ်ဝႆႉၸႂ်ဢႃႇယူင်ႇၸပ်းတီႈမၼ်းၸဝ်ႈၼၼ်ႉၸႂ်ဝိၺိၺ်ႇၵဝ်ႁႅင်းလုၵႂႃႇဢေႃႈ။
မၼ်းၸဝ်ႈႁဵတ်းႁႂ်ႈၵဝ်ဢမ်ႇလပ်းလႆႈတင်းၶိုၼ်းလႄႈ ၵဝ်မီးတၢင်းဢၼ်ယၢပ်ႇၸႂ်ယုင်ႈၸႂ်ယူႇထၢၼ်ႈပေႃးဢမ်ႇမွၵ်ႇလၢတ်ႈလႆႈဢေႃႈ။
ၵဝ်ၶႆႈၸႂ်ဝူၼ်ႉတူၺ်းမိုဝ်ႉဝၼ်းမိူဝ်ႈၵွၼ်ႇဢွၼ်ၼႆႉၼၼ်ႉဢိၵ်ႇတင်း ၶူပ်ႇၼီႈပီမိူင်းမိူဝ်ႈမိုၼ်ႉၸိုၼ်ႉသိုၼ်းၼၼ်ႉဢေႃႈ။
ၶိင်ႇၵၢင်ၶိုၼ်းၵေႃႈၵဝ်ၶႆႈၸႂ်လိုၵ်ႉလိုၵ်ႉလမ်ႇလမ်ႇတင်းၶိုၼ်းယူႇ၊ ၵဝ်ဝႆႉၸႂ်ဢႃႇရူင်ႇၸပ်းတီႈမၼ်းၸဝ်ႈယူႇလႄႈ၊ၵဝ်တွင်ႈထၢမ်ၼႂ်းၸႂ်လႄႈဝႃႈ၊
“ၽြႃးပဵၼ်ၸဝ်ႈတၵ်းပႄႇပႅတ်ႈႁဝ်းယူႇသေႇသေႇႁိုဝ်း။ မၼ်းၸဝ်ႈတၵ်းဢမ်ႇၶိုၼ်းႁဵတ်းၵျေးၸူး လႃးလႃးယဝ်ႉႁိုဝ်း။
တၢင်းႁၵ်ႉမႅတ်ႈတႃႇမၼ်းၸဝ်ႈမူတ်းသဵင်ႈၵႂႃႇယဝ်ႉႁိုဝ်း။ ၵတိသဵတ်ႈၸႃႇမၼ်းၸဝ်ႈၵေႃႈတၵ်းလုယူႇ တႃႇသေႇဢမ်ႇထၢတ်ႇႁိုဝ်း။
ၽြႃးပဵၼ်ၸဝ်ႈလူင်လိုမ်းလွင်ႈတၢင်းဢၼ်တၵ်းတေလႆႈဢဵတ်းလူၼၼ်ႉယဝ်ႉႁိုဝ်း။ ၵျေးၸူးၵရုၼႃႇမၼ်းၸဝ်ႈၼၼ်ႉ ႁႂ်ႈပဵၼ်ပဵၼ်တေႃးသႃႉမေႃးႁႃႉၵႂႃႇယဝ်ႉႁိုဝ်း၊” ဝႃႈၼင်ႇၼႆယူႇဢေႃႈ။
မိူဝ်ႈၼၼ်ႉၵဝ်လၢတ်ႈလႄႈဝႃႈ၊ “လွင်ႈတၢင်းဢၼ်ၵဝ်မႆႈၸႂ်ၶီၸႂ်ၼၼ်ႉပဵၼ်ၵႃႈသင်ဝႃႈၼႆၸမ်ႉ၊ ပဵၼ်တၢင်းဢၼ်ၽြႃးပဵၼ်ၸဝ်ႈ ဢမ်ႇမီးၽုင်းတၼ်းၶူဝ်းလႃးလႃးယဝ်ႉၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈတၵ်းၶုၵ်းၸႂ်လႆႈတၢင်းႁဵတ်းၸဝ်ႈႁဝ်းဢၼ်ယႂ်ႇၼႃႇၼၼ်ႉသေလႄႈ၊ ၶႃႈၸဝ်ႈတၵ်းၶိုၼ်းၶႆႈၸႂ်လွင်ႈတၢင်းဢၼ်လီဢၢမ်း ၸိူဝ်းဢၼ်ၸဝ်ႈႁဝ်းယၢမ်ႈႁဵတ်းမိူဝ်ႈၵွၼ်ႇ ဢွၼ်ၼႆႉၼၼ်ႉတီႈၶႃႈဢေႃႈ။
ၶႃႈၸဝ်ႈတၵ်းၶႆႈၸႂ်လွင်ႈတၢင်းဢၼ်ၸဝ်ႈႁဝ်းပွင်ႁဵတ်းယဝ်ႉၵႃႈမီးတင်းသဵင်ႈတင်းလူင် ၼၼ်ႉသေလႄႈ၊ တၵ်းဝႆႉၸႂ်ဢႃႇယူင်ႇၸပ်းတီႈၼႃႈၵၢၼ် တၢင်းႁဵတ်းၸဝ်ႈႁဝ်း ဢၼ်ယႂ်ႇၼႃႇၸိူဝ်းၼၼ်ႉတင်းသဵင်ႈ တင်းလူင်တီႈၶႃႈဢေႃႈ။
ၽြႃးပဵၼ်ၸဝ်ႈတီႈၶႃႈ။ လွင်ႈတၢင်းဢၼ်ၸဝ်ႈႁဝ်းႁဵတ်းၵူႈၸိူဝ်ႉ ၵူႈပိူင်ၼၼ်ႉ၊ပဵၼ်ဢၼ်မူတ်းၸၢင်ႇ တီႈၶႃႈဢေႃႈ။ ၽြႃးဢၼ်ယႂ်ႇမျၢတ်ႈမိူၼ်ၸဝ်ႈႁဝ်းၼၼ်ႉ၊ ဢမ်ႇမီးသေသူႇသေပႃးတီႈၶႃႈ။
ၸဝ်ႈႁဝ်းပဵၼ်ၽြႃးဢၼ်ၸၢင်ႈႁဵတ်းဢၼ်လၢၵ်ႇဢၼ်လၢႆးၵူႈမဵဝ်းမဵဝ်းလႄႈၸဝ်ႈႁဝ်း ႁဵတ်းၼႄတၼ်းၶူဝ်းၸဝ်ႈႁဝ်းၵႃႈၼႂ်း မဵဝ်းၵူၼ်းတင်းလၢႆတီႈၶႃႈယဝ်ႉ။
ၸဝ်ႈႁဝ်းဢဝ်တင်းတၼ်းၶူဝ်းၸဝ်ႈႁဝ်းလႄႈၵႄႇသႄႇၶျွတ်ႈဢဝ်ၵူၼ်းၸဝ်ႈႁဝ်းတင်းလၢႆ ဢၼ်ပဵၼ်လုၵ်ႈလၢၼ်ၸိူဝ်ႉၶိူဝ်း ယႃႇၵုပ်ႈ၊ တင်း ယူဝ်းသႅပ်ႈ၊ ၼၼ်ႉဢေႃႈ။
ၽြႃးပဵၼ်ၸဝ်ႈတီႈၶႃႈ။ မိူဝ်ႈဢၼ်ၼမ်ႉတင်းလၢႆႁၼ်ၸဝ်ႈႁဝ်းၼၼ်ႉၶဝ်ၵူဝ်ႁႄတီႈၶႃႈဢေႃႈ။ တီႈဢၼ်လိုၵ်ႉဢၼ်လမ်ႇပၢင်ႇလၢႆႇတင်းလၢႆၵေႃႈတူင်ႉၼိုင်ၶွၼ်းၶဝ်းတီႈၶႃႈဢေႃႈ။
မွၵ်ႇၵုမ်ႈတင်းလၢႆထွၵ်ႇၼမ်ႉၽူၼ်တူၵ်းမႃးလႄႈ သဵင်ၽႃႉလင်ႁုၼ်ႈႁၢၼ်ႈဢူၼ်ဢဵၼ် မေႃးမႄးယူႇ ၵႃႈၼိူဝ်ၽႃႉၵၢင်ႁၢဝ်ယူႇ၊ၽႃႉၵေႃႈၽႅတ်းမႅပ်ႈထိုင်ၵႂႃႇၵူႈၽၢႆႇၵူႈၼႃႈယူႇဢေႃႈ။
သဵင်ၽႃႉၽႃႇၸဝ်ႈႁဝ်းၼၼ်ႉပႃးမႃးၼႂ်း လူမ်းၽိဝ်ႁုင်လႄႈ၊ ၽႃႉမႅပ်ႈၸိူဝ်းၼၼ်ႉႁႂ်ႈလေႃးၵႃႉလႅင်းမႃး တီႈၶႃႈဢေႃႈ။ လိၼ်မိူင်းၵေႃႈတူင်ႉၼိုင်သၼ်ႇဝႆၵႂႃႇဢေႃႈ။
ၸဝ်ႈႁဝ်းပႆၶဝ်ႈၵႂႃႇၵႃႈၼႂ်းလႅင်းၼမ်ႉပိူပ်ႈၼမ်ႉလႄႈ၊ ပႆၽႃႇလတ်းပၢင်ႇလၢႆႇဢၼ်လိုၵ်ႉၼၼ်ႉတီႈၶႃႈဢေႃႈ။ ၵူၺ်းၵႃႈ၊ႁွႆးတိၼ်ၸဝ်ႈႁဝ်းဢမ်ႇထၢင်ႇ ဢမ်ႇပေႃႇဝႆႉလႃးလႃး။
ၸဝ်ႈႁဝ်းပဵၼ်ၸိူဝ်ႉၼင်ႇၵေႃႉဢၼ်လဵင်ႉသူဝ်းလႄႈ၊ ၸႂ်ႉ မူဝ်းသေႇ၊ တင်း ဢႃႇရုၼ်ႇ၊ ဢွၼ်သူင်ႇ ၵူၼ်းၸဝ်ႈႁဝ်းတင်းလၢႆတီႈၶႃႈဢေႃႈ။
ၵူၼ်းၵဝ်တင်းလၢႆၶဝ်႟။ ဢွၼ်ၵၼ်ဢဝ်ႁူသူထွမ်ႇငိၼ်းတြႃးၵဝ်တႃႉ။ ဝႆႉၸႂ်ထွမ်ႇဢဝ်ၵႂၢမ်းဢၼ်ၵဝ်လၢတ်ႈၼႆႉတႃႉ။
ၵဝ်တၵ်းပိုတ်ႇပၢၵ်ႇလႄႈမွၵ်ႇလၢတ်ႈထုင်းၵႂၢမ်း ပိင်ႇၺႃႇတင်းလၢႆဢေႃႈ။ ၵဝ်တၵ်းၽုၺ်ႇမွၵ်ႇလၢတ်ႈၼႄလွင်ႈတၢင်း ဢၼ်လိုၵ်ႉဢၼ်လမ်ႇဢၼ်ပဵၼ် မိူဝ်ႈၵွၼ်ႇဢွၼ်ၼႆႉၼၼ်ႉ
ဢၼ်ဝႃႈလွင်ႈတၢင်းဢၼ်ႁဝ်းလႆႈႁုလႆႈငိၼ်း၊ လွင်ႈတၢင်းဢၼ်ပူႇမွၼ်ႇႁဝ်းမွၵ်ႇလၢတ်ႈလႄႈၶႆႈၼႄဝႆႉၸိူဝ်းၼၼ်ႉဢေႃႈ။
ႁဝ်းယင်းဢမ်ႇသိူင်ႇဝႆႉလပ်ႉဝႆႉသေၵႃႈတီႈလုၵ်ႈလၢၼ်ႁဝ်းလႄႈ၊ သမ်ႉတၵ်းမွၵ်ႇလၢတ်ႈၶႆႈၼႄတီႈလုၵ်ႈလၢၼ်ထႅင်ႈသိုပ်ႇၼိုင်ႈၼၼ်ႉ၊ လွင်ႈမုၼ်ၽုင်းတၼ်းၶူဝ်း ထႃႇဝရႃႉၽြႃး၊ ဢိၵ်ႇတင်းလွင်ႈတၢင်းႁဵတ်းဢၼ်ယႂ်ႇၼႃႇမၼ်းၸဝ်ႈ တင်းလွင်ႈတၢင်းဢၼ်လီဢၢမ်းတင်းသဵင်ႈ တင်းမူတ်းၼၼ်ႉဢေႃႈ။
မၼ်းၸဝ်ႈပၼ်တြႃးၸဝ်ႈတီႈၵူၼ်းမဵဝ်း ဢိသရေး၊ ၶဝ်ဝႆႉလႄႈ၊ဝႆႉပိင်းၺၢပ်ႈတြႃး၊ တီႈၸိူဝ်ႉၶိူဝ်း ယႃႇၵုပ်ႈ၊ ၼၼ်ႉဢေႃႈ။ မၼ်းၸဝ်ႈသင်ႇဝႆႉလၢတ်ႈဝႆႉတီႈပူႇမွၼ်ႇႁဝ်းၶဝ်ႁႂ်ႈသွၼ်ပၼ်တြႃးၸဝ်ႈတီႈလုၵ်ႈလၢၼ်ၶဝ်။
ပုၼ်ႈလွင်ႈၼင်ႇႁိုဝ်ၸိူဝ်ႉၶိူဝ်းလုၵ်ႈလၢၼ်ၶဝ်ထႅင်ႈသိုပ်ႇၼိုင်ႈၼၼ်ႉတၵ်းသွၼ်ဢဝ်လႄႈ ၶဝ်သမ်ႉတၵ်းမွၵ်ႇလၢတ်ႈၶႆႈၼႄလုၵ်ႈလၢၼ်ၶဝ်ထႅင်ႈသိုပ်ႇၼိုင်ႈၼၼ်ႉဢေႃႈ။
ႁဵတ်းၸိူဝ်ႉၼင်ႇၼၼ်လႄႈၶဝ်တၵ်းဢွၼ်ၵၼ်ယုမ်ႇမၢတ်ႈဢိင်ပိုင်ႈၼႂ်းၽြႃးပဵၼ်ၸဝ်ႈယူႇ၊ ယင်းဢမ်ႇလူင်ဢမ်ႇလိုမ်းလွင်ႈတၢင်းဢၼ်မၼ်းၸဝ်ႈႁဵတ်းၸိူဝ်းၼၼ်ႉယူႇသေလႄႈ၊ တၵ်းပႂ်ႉၵမ်ပႂ်ႉၵျၢင်ႉပိင်းၺၢပ်ႈတြႃးမၼ်းၸဝ်ႈတင်းလၢႆသေႇသေႇယူႇဢေႃႈ။
ၼင်ႇၼၼ်လႄႈၶဝ်တၵ်းဢမ်ႇလႆႈပဵၼ်ၸိူဝ်ႉၼင်ႇပူႇမွၼ်ႇၶဝ်၊ ဢၼ်ၶတ်းၶႅင်ႁႅင်းတႃႉမၼ်းၸဝ်ႈယူႇၸၢင်ႈတွပ်ႇၸၢင်ႈထဵင်မၼ်းၸဝ်ႈယူႇ၊ တၢင်းဢၼ်ၶဝ်ယုမ်ႇမၢတ်ႈဢိင်ပိုင်ႈၼႂ်း ၽြႃးပဵၼ်ၸဝ်ႈၼၼ်ႉၵေႃႈ ဢမ်ႇတႄႇ ဢမ်ႇမၼ်ႈယူႇလႄႈ၊ ပဵၼ်ၶဝ်ၸိူဝ်းဢၼ်ၽွၵ်ႈသဵတ်ႈၸႃႇတီႈမၼ်းၸဝ်ႈယူႇၼၼ်ႉဢေႃႈ။
ၵူၼ်းၸိူဝ်ႉၶိူဝ်း ဢေႇၽရိမ်ႇ၊ တင်းလၢႆယင်းယိပ်းၵမ်ၵၢင်ႇလႂ်၊ပိုၼ်လႂ်၊ယူႇသေလႄႈ လႆႈလႅၼ်ႈပၢႆႈၼႂ်းဝၼ်းဢၼ်တိုၵ်းသိုၵ်းၼၼ်ႉယဝ်ႉ။
ၶဝ်ဢမ်ႇပႂ်ႉပတိၺိၺ်ႇတြႃးၽြႃးပဵၼ်ၸဝ်ႈ၊ၶဝ်ဢမ်ႇၸွမ်းၼႂ်းသဵၼ်ႈတြႃးမၼ်းၸဝ်ႈ၊
ၶဝ်လူင်လိုမ်းလွင်ႈတၢင်းဢၼ်မၼ်းၸဝ်ႈ ႁဵတ်းၸိူဝ်းၼၼ်ႉဢိၵ်ႇတင်း တၢင်းဢၼ်မၼ်းၸဝ်ႈႁဵတ်းဢၼ်လၢၵ်ႇဢၼ်လၢႆးၸိူဝ်းဢၼ်ၶဝ်လႆႈႁၼ်ၼၼ်ႉယဝ်ႉ။
ယၢမ်းမိူဝ်ႈဢၼ်ပူႇမွၼ်ႇၶဝ်ပႂ်ႉတူၺ်းယူႇၼၼ်ႉ၊ ၽြႃးပဵၼ်ၸဝ်ႈႁဵတ်းၼႄတၢင်းဢၼ်လၢၵ်ႇလၢႆး ၵႃႈတီႈပၢင်ႇပဵင်း ၸေႃးၼႃႉ၊ ၵႃႈၼႂ်းမိူင်း ဢေးၵျိပ်ႉ၊ ၼၼ်ႉဢေႃႈ။
မၼ်းၸဝ်ႈတႅပ်းပၢင်ႇလၢႆႇၶၢတ်ႇသေလႄႈ ႁႂ်ႈၶဝ်ပႆလတ်းၵႂႃႇ၊ ယၢမ်းမိူဝ်ႈၼၼ်ႉမၼ်းၸဝ်ႈႁႂ်ႈၼမ်ႉၶွၼ်ႈၵၼ်ပဵၼ်ၸိူဝ်ႉၼင်ႇၽႃသင်ႉဝႆႉဢေႃႈ။
ၽြႃးပဵၼ်ၸဝ်ႈဢဝ်မွၵ်ႇၵုမ်ႈၼႄပျႃးသဵၼ်ႈတၢင်းတီႈၶဝ်ၼႂ်းၶိင်ႇၵၢင်ဝၼ်းလႄႈ ဢဝ်ဢၼ်လႅင်းၽႆးၼႄပျႃးသဵၼ်ႈတၢင်းတီႈၶဝ်ၼႂ်းၶိင်ႇၵၢင်ၶိုၼ်းဢေႃႈ။
မၼ်းၸဝ်ႈၽႃႇၽႃႁႂ်ႈႁိၼ်ပွင်ႇၵႂႃႇ ၵႃႈၼႂ်းထိူၼ်ႇလႅင်ႉလႄႈ တိုၵ်းပၼ်ၶဝ်ႁႂ်ႈလႆႈၵိၼ်ၼမ်ႉဢၼ်ဢွၵ်ႇမႃး ၵႃႈတီႈဢၼ်လိုၵ်ႉၼၼ်ႉဢေႃႈ။
မၼ်းၸဝ်ႈႁႂ်ႈၼမ်ႉလႆဢွၵ်ႇၽႃႁိၼ်မႃးလႄႈ၊ႁႂ်ႈၼမ်ႉၼမ်ၼႃႇလႆယူႇပဵၼ်ႁွင်ႈပဵၼ်ၵႄးဢေႃႈ။
ၶဝ်ၸိူဝ်းၼၼ်ႉၸမ်ႉ၊ယင်းႁဵတ်းၽိတ်းႁဵတ်းပိူင်ႈလႄႈ လုၵ်ႉၽိုၼ်ႉၽြႃးပဵၼ်ၸဝ်ႈ၊ဢၼ်သုင်ၼႃႇ သေပိူၼ်ႈၼၼ်ႉၶိူဝ်းၶိူဝ်းယႂ်းယႂ်း ၵႃႈၼႂ်းထိူၼ်ႇလႅင်ႉၼၼ်ႉဢေႃႈ။
ၶဝ်ၼၼ်ႉတင်ႈၸႂ်ၸၢမ်းတူၺ်းၽြႃးပဵၼ်ၸဝ်ႈလႄႈ ယွၼ်းဢဝ်တၢင်းၵိၼ်မဵဝ်းဢၼ်ၶဝ် ၶႂ်ႈၵိၼ်ၼၼ်ႉလူးၵွၼ်ႇဢေႃႈ။
ၶဝ်လၢတ်ႈၶတ်းၵၼ်တင်းၽြႃးပဵၼ်ၸဝ်ႈလႄႈဝႃႈ၊ “ၽြႃးပဵၼ်ၸဝ်ႈတေပၼ်တၢင်းၵိၼ်ၵႃႈၼႂ်းထိူၼ်ႇလႅင်ႉၼႆႉလႆႈႁိုဝ်း။
မၼ်းၸဝ်ႈပေႃႉယႅၼ်ႉၽႃႁိၼ်လႄႈႁႂ်ႈၼမ်ႉထၢၼ်ႈပေႃးလႆမႃးပဵၼ်ႁွင်ႈပဵၼ်ၵႄးယဝ်ႉ။ ၶဝ်ႈမုၼ်းၵေႃႈမၼ်းၸဝ်ႈတေပၼ်ႁဝ်းလႆႈႁိုဝ်း။ ၼိူဝ်ႉၵေႃႈၸွင်ႇမၼ်းၸဝ်ႈတေပၼ်ၵူၼ်း မၼ်းၸဝ်ႈလႆႈႁိုဝ်း၊” ဝႃႈၼင်ႇၼႆဢေႃႈ။
ၵွပ်ႈပိူဝ်ႈလွင်ႈတၢင်းၼႆႉလႄႈ၊ ထႃႇဝရႃႉၽြႃး၊ ၸႂ်မႆႈၶႂ်ႈၸႃႉတေႃႇၶဝ် မိူဝ်ႈဢၼ်မၼ်းၸဝ်ႈငိၼ်းၵႂၢမ်းၼၼ်ႉၸိုင်၊ မၼ်းၸဝ်ႈဢဝ်တင်းၽႆးတိုၵ်းတေႃး ၵူၼ်းမၼ်းၸဝ်ႈၸိူဝ်းၼၼ်ႉဢေႃႈ။ တေႃးသႃႉတၢင်းၸႂ်မႆႈၶႂ်ႈၸႃႉမၼ်းၸဝ်ႈၼၼ်ႉယဵင်ႈၶႅၼ်းတူဝ်းတွၼ်းမႃး၊
ၵွပ်ႈပိူဝ်ႈၶဝ်ဢမ်ႇယုမ်ႇမၢတ်ႈမၼ်းၸဝ်ႈလႄႈ ဢမ်ႇယုမ်ႇမၢတ်ႈလွင်ႈဢၼ်မၼ်းၸဝ်ႈ တၵ်းၵႄႇသႄႇၶျွတ်ႈဢဝ်ၶဝ်လႆႈၼၼ်ႉဢေႃႈ။
ၼႂ်းဝႃႈၼၼ်သေၵေႃႈ၊မၼ်းၸဝ်ႈပူင်ဢမိင်ႉ တီႈၽႃႉၵၢင်ႁၢဝ်လႄႈၽုၺ်ႇၽၵ်းတူ ၵၢင်ႁၢဝ်ဢေႃႈ။
မၼ်းၸဝ်ႈဢဝ်မဵတ်ႉၶဝ်ႈၵၢင်ႁၢဝ်ဢၼ်ဝႃႈၽူၼ်ၶဝ်ႈမုၼ်း မၼ်ႇၼႃႉ၊ ၼၼ်ႉတူၵ်းလူင်းမႃး၊ ပုၼ်ႈဢၼ်ၶဝ်တၵ်းၵိၼ်ဢေႃႈ။
ၶဝ်ၵေႃႈဢွၼ်ၵၼ်လႆႈၵိၼ်ၶဝ်ႈမုၼ်း တမၢၼ်ႇၵၢင်ႁၢဝ်ၼၼ်ႉလႄႈ မၼ်းၸဝ်ႈႁႂ်ႈၶဝ်လႆႈၵိၼ်ဢိမ်ႇဢိမ်ႇ တဵမ်တဵမ်ဢေႃႈ။
မၼ်းၸဝ်ႈသမ်ႉႁႂ်ႈလူမ်းတၢင်းဢွၵ်ႇထူဝ်းမႃးလႄႈ ဢဝ်တင်းႁႅင်းတၼ်းၶူဝ်းမၼ်းၸဝ်ႈပွႆႇ လူမ်းတၢင်းၸၢၼ်းၵႂႃႇဢေႃႈ။
ၼင်ၼၼ်လႄႈ၊ၵႃႈတီႈၵူၼ်းမၼ်းၸဝ်ႈၸိူဝ်းၼၼ်ႉ ပွႆႇၼူၵ်ႉၼမ်ၼႃႇလူင်လၢင်၊ပဵင်းထၼ်ႇမဵတ်ႉသၢႆးၵႃႈတီႈၽင်ႇၼမ်ႉသမ်ႇမုၵ်ႈတြႃႇလႄႈ။
ၼူၵ်ႉၸိူဝ်းၼၼ်ႉတူၵ်းႁွတ်ႈၵႃႈၼႂ်းၵၢင်ပၢင်တပ်ႉၶဝ်ႁွပ်ႈသုမ်ႉတီႈယူႇၶဝ်ၼၼ်ႉၵႂႃႇဢေႃႈ။
ၵူၼ်းတင်းလၢႆလႆႈၵိၼ်ဢိမ်ႇၵိၼ်တဵမ်ၼႃႇလူင်လၢင်၊ ၸွမ်းၵႃႈၼင်ႇဢၼ်ၸႂ်လေႃးၽႃႉၶဝ်မီးၼၼ်ႉဢေႃႈ။
ၵူၺ်းၵႃႈ၊ၸႂ်လေႃးၽႃႉၶဝ်ယင်းဢမ်ႇၸၢင်ႈတိူၵ်ႈလႄႈယူႇဢေႃႈ။ ယၢမ်းမိူဝ်ႈဢၼ်တၢင်းၵိၼ်ယင်းတိုၵ်ႉမီးယူႇ ၼႂ်းသူပ်းၶဝ်ၼၼ်ႉ။
ၽြႃးပဵၼ်ၸဝ်ႈဢွၵ်ႇတေႃးသႃႉတေႃႇၶဝ်လႄႈ၊ ဢဝ်ၵူၼ်းၶဝ်ၸိူဝ်းဢၼ်ႁႅင်းယႂ်ႇ ၼႃႇသေပိူၼ်ႈ၊ ဢိၵ်ႇတင်းၵူၼ်းၼုမ်ႇၵူၼ်းၵမ် မဵဝ်း ဢိသရေး၊ ၶဝ်တၢႆပႅတ်ႈဢေႃႈ။
ပိၵ်ႉသမ်ႉပဵၼ်ထၼ်ႇၼႆႉသေၵေႃႈ၊ ၵူၼ်းမၼ်းၸဝ်ႈတင်းလၢႆယင်းႁဵတ်းၽိတ်း ႁဵတ်းပိူင်ႈထႅင်ႈယူႇတိၵ်းတိၵ်းဢေႃႈ။ ပိၵ်ႉသမ်ႉလႆႈႁၼ်ဢၼ်လၢၵ်ႇဢၼ်လၢႆးမၼ်းၸဝ်ႈထၢၼ်ႇၼႆႉသေၵေႃႈ၊ ၶဝ်ယင်းဢမ်ႇယုမ်ႇယမ်ဢိင်ပိုင်ႈမၼ်းၸဝ်ႈ လူးၵွၼ်ႇဢေႃႈ။
ပိူဝ်ႈၼႆလႄႈ၊မၼ်းၸဝ်ႈႁႂ်ႈမိုဝ်ႉဝၼ်းၶဝ်ၸိူဝ်းၼၼ်ႉပူၼ်ႉၵႂႃႇလၢႆလၢႆလွၵ်ႇလွၵ်ႇလႄႈ ႁႂ်ႈၶူပ်ႇၼီႈပီမိူင်းၶဝ်ၸိူဝ်းၼၼ်ႉပူၼ်ႉၵႂႃႇယူႇ ၼႂ်းၽေးဢုပၢတ်ႈဢေႃႈ။
မိူဝ်ႈဢၼ်မၼ်းၸဝ်ႈဢဝ်ၶဝ် တၢႆပႅတ်ႈၵမ်ႈၽွင်ႈၸိုင်၊ ၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇၼၼ်ႉ ဢွၼ်ၵၼ်ႁႃမၼ်းၸဝ်ႈဢေႃႈ။ ၶဝ်ဢွၼ်ၵၼ်ပဵၼ်ၸႂ်ၶိုၼ်းမႃးလႄႈ ၵၢဝ်ႇႁႃဢေႁႃမၼ်းၸဝ်ႈဢေႃႈ။
ၶဝ်လႆႈသတိလွင်ႈဢၼ်ၽြႃးပဵၼ်ၸဝ်ႈပဵၼ်ၸဝ်ႈဢၼ်ႁႄႉၶႅၼ်ပၼ်ၶဝ်၊ဢိၵ်ႇတင်း လွင်ႈၽြႃးဢၼ်သုင်ၼႃႇသေပိူၼ်ႈၼၼ်ႉမႃးလႄႈၸွႆႈထႅမ်မႃႉၸႃႉၶဝ်ၼၼ်ႉဢေႃႈ။
ၼႂ်းဝႃႈၼၼ်သေၵေႃႈ၊ၵႂၢမ်းၶဝ်ၼၼ်ႉပဵၼ် ၵႂၢမ်းမုသႃႇၵူၺ်းလႄႈ၊ ၵႃႈဢၼ်ၶဝ်လၢတ်ႈဝႃႈၼၼ်ႉ၊ဢမ်ႇမီး သဵတ်ႈၸႃႇဢေႃႈ။
ၸႂ်သၽေႃးၶဝ်ၼၼ်ႉဢမ်ႇသိုဝ်ႈဢမ်ႇယူဝ်း တေႃႇၽြႃးပဵၼ်ၸဝ်ႈ။ ၶဝ်ယင်းဢမ်ႇပႂ်ႉသဵတ်ႈၸႃႇ၊ၵႃႈၼိူဝ် ပတိၺိၺ်ႇတြႃး ဢၼ်ၶဝ်ႁဵတ်းဝႆႉလူၺ်ႈၵၼ်တင်းမၼ်းၸဝ်ႈ လႄႈယူႇဢေႃႈ။
မၼ်းၸဝ်ႈၸမ်ႉ၊မီးၸႂ်ၵရုၼႃႇသေယဝ်ႉ၊ ယင်းပွႆႇလွတ်ႈဢပျတ်ႈၶဝ်လႄႈ ဢမ်ႇယႃႉၶဝ်ပႅတ်ႈဢေႃႈ။ မၼ်းၸဝ်ႈၶိုၼ်းယိူၼ်ႉၸႂ်တေႃးသႃႉမၼ်းၸဝ်ႈ ဢမ်ႇႁုလၢႆပွၵ်ႈလႄႈ ဢမ်ႇတိုၵ်းယူင်းတၢင်းၸႂ်မႆႈၶႂ်ႈၸႃႉမၼ်းၸဝ်ႈ။
မၼ်းၸဝ်ႈၶုၵ်းၸႂ်လႆႈလွင်ႈဢၼ်ၶဝ်ပဵၼ် မိူၼ်ၸိူဝ်ႉဢၼ်ၸၢင်ႈတူႇၸၢင်ႈၼဝ်ႈ ၵူၺ်းၼၼ်ႉ၊ဢိၵ်ႇတင်း ၵူၺ်းပဵၼ်မိူၼ်ၸိူဝ်ႉၼင်ႇလူမ်းဢၼ်ၸၢင်ႈ ပူၼ်ႉၵႂႃႇလႄႈဢမ်ႇၶိုၼ်းမႃးထႅင်ႈၼၼ်ႉဢေႃႈ။
ၶဝ်သၢၼ်ၶတ်းမၼ်းၸဝ်ႈလႄႈႁဵတ်းႁႂ်ႈ မၼ်းၸဝ်ႈလႆႈၸဵပ်းၸႂ် ၵႃႈတီႈထိူၼ်ႇလႅင်ႉ၊ဢၼ်သဵတ်ႇၵူၼ်းငႅဝ်ၵူၼ်းၼၼ်ႉဢမ်ႇႁုလၢႆပွၵ်ႈယဝ်ႉ။
ၶဝ်ၵမ်းၵမ်းၸၢမ်းတူၺ်းၽြႃးပဵၼ်ၸဝ်ႈလႄႈ ႁဵတ်းႁႂ်ႈၽြႃးဢၼ်မူတ်းၸၢင်ႇမဵဝ်း ဢိသရေး၊ ၼၼ်ႉၸဵပ်းၸႂ်ယဝ်ႉ။
ၶဝ်လူင်လိုမ်းတၼ်းၶူဝ်းမၼ်းၸဝ်ႈၼၼ်ႉပႅတ်ႈဢိၵ်ႇတင်းလွင်ႈဢၼ်ပဵၼ်မႃး ၼႂ်းဝၼ်းဢၼ်မၼ်းၸဝ်ႈၵႄႇၶျွတ်ႈဢဝ်ၶဝ်လွတ်ႈၼႂ်းမိုဝ်းရၢၼ်ႇသူႇၶဝ်။
ဢၼ်မၼ်းၸဝ်ႈႁဵတ်းလၢၵ်ႈၶၼႃႇဢၼ်လၢၵ်ႇဢၼ်လၢႆးၵႃႈတီႈပၢင်ႇပဵင်း ၸေႃးၼႃႉ၊ ၵႃႈၼႂ်းမိူင်း ဢေးၵျိပ်ႉ၊ ၼၼ်ႉဢေႃႈ။
မၼ်းၸဝ်ႈဢဝ်ၼမ်ႉႁွင်ႈၼမ်ႉၵႄးပဵၼ်ပဵၼ် လိူတ်ႈၵႂႃႇလႄႈ ၵူၼ်းမဵဝ်း ဢေးၵျိပ်ႉ၊ ၶဝ်ထၢၼ်ႈပေႃးဢမ်ႇမီးၼမ်ႉတႃႇတေၵိၼ်ဢေႃႈ။
မၼ်းၸဝ်ႈပွႆႇလိူၵ်ႇသႂ်ႇၵႃႈၼႂ်းၶဝ်ႁႂ်ႈၶူပ်းၶဝ်၊ ဢိၵ်ႇတင်းၶဵတ်ႇႁႂ်ႈယႃႉယုၵ်ႉ ၵႃႈၼႂ်းမိူင်းၶဝ်ဢေႃႈ။
မၼ်းၸဝ်ႈပွႆႇမႅင်းၸၵ်းတႅၼ်မႃးႁႂ်ႈလႆႈၵိၼ်ပႅတ်ႈမၢၵ်ႇၶဝ်ႈႁူင်းၼမ်ႉၶဝ်လႄႈ ယႃႉၽဵဝ်ႈပႅတ်ႈႁႆႈၼႃးၶဝ်ဢေႃႈ။
မၼ်းၸဝ်ႈဢဝ်မၢၵ်ႇႁဵပ်းယႃႉၶိူဝ်းမၢၵ်ႇၸပိတ်ႉ ၶဝ်လႄႈဢဝ်ၵွၼ်ႈမူၺ်ယႃႉမႆႉမွၼ်း ၶဝ်ပႅတ်ႈဢေႃႈ။
မၼ်းၸဝ်ႈဢဝ်မၢၵ်ႇႁဵပ်းယႃႉၽုင်သူဝ်းဝူဝ်းၶဝ်လႄႈ ဢဝ်ၽႃႉၽႃႇတူဝ်တရိၵ်ႈသၢၼ်ႇ ၶဝ်ပႅတ်ႈဢေႃႈ။
မၼ်းၸဝ်ႈဢဝ်တေႃးသႃႉတၢင်းဢၼ်ၸႂ်မႆႈၶႂ်ႈၸႃႉ၊တၢင်းဢၼ်ပၼ်တၢမ်ႇ တၢင်းဢၼ်ယႃႉယုၵ်ႉဢၼ်ဝႃႈတမၢၼ်ႇၶုၼ်တၢႆၼၼ်ႉပွႆႇသႂ်ႇၵႃႈၼိူဝ်ၶဝ်ဢေႃႈ။
မၼ်းၸဝ်ႈဢမ်ႇယိူၼ်ႉၸႂ်တေႃးသႃႉမၼ်းၸဝ်ႈ၊ဢမ်ႇပွႆႇႁႂ်ႈဢသၢၵ်ႈၶဝ်လႆႈလွတ်ႈ တၢင်းတၢႆလႄႈ၊ ဢဝ်ၶဝ်တၢႆပႅတ်ႈလူၺ်ႈၽေးဢုပၢတ်ႈ ၵႃႇလႃႉႁႃလႅင်မိူင်းဢေႃႈ။
မၼ်းၸဝ်ႈဢဝ်လုၵ်ႈၸၢႆးတူၼ်ႈၵူႈႁိူၼ်းၵူႈယေး ၵႃႈဢၼ်မီးၼႂ်းမိူင်း ဢေးၵျိပ်ႉ၊ တင်းသဵင်ႈ တင်းလူင်ၼၼ်ႉတၢႆပႅတ်ႈဢေႃႈ။
မိူဝ်ႈၼၼ်ႉမၼ်းၸဝ်ႈဢွၼ်ႁူဝ်ၵူၼ်းမၼ်းၸဝ်ႈတင်းလၢႆဢွၵ်ႇၵႂႃႇ၊ မိူၼ်ၸိူဝ်ႉၼင်ႇၵူၼ်းဢၼ်လဵင်ႉသူဝ်း ၼႄတၢင်းၶဝ်ၼႂ်းၶၢဝ်းတၢင်း ထိူၼ်ႇလႅင်ႉၼၼ်ႉဢေႃႈ။
မၼ်းၸဝ်ႈဢွၼ်ၶဝ်သူင်ႇၵႂႃႇလူင်ႉလီလွတ်ႈလီ ႁႂ်ႈၶဝ်ဢမ်ႇလႆႈၵူဝ်လႆႈႁႄဢေႃႈ။ ရၢၼ်ႇသူႇၶဝ်တင်းလၢႆၸမ်ႉ၊ၼမ်ႉပၢင်ႇလၢႆႇ ထူမ်ႈလႄႈတၢႆပႅတ်ႈဢေႃႈ။
မၼ်းၸဝ်ႈဢွၼ်သူင်ႇထိုင်လႅၼ်လိၼ်မိူင်းၸဝ်ႈဢၼ်မူတ်းၸၢင်ႇၼၼ်ႉ ဢိၵ်ႇတင်းၵႃႈတီႈမိူင်းလွႆတင်းလၢႆၸိူဝ်းဢၼ်မၼ်းၸဝ်ႈတိုၵ်းပႄႉဢဝ်ၼၼ်ႉဢေႃႈ။
မၼ်းၸဝ်ႈႁေႃႈၵူၼ်းၸိူဝ်းဢၼ်ယူႇသဝ်းၼႂ်းမိူင်းၼၼ်ႉဢွၵ်ႇပႅတ်ႈ၊ သိုဝ်ႈၼႃႈတႂ်ႈတႃၵူၼ်းမၼ်းၸဝ်ႈသေယဝ်ႉ၊ မၼ်းၸဝ်ႈၸၵ်းၽႄလိၼ်မိူင်းၼၼ်ႉမႅင်ႇပၼ်တီႈၵူၼ်းမဵဝ်းၸိူဝ်ႉၶိူဝ်း ဢိသရေး၊ ၶဝ်လႄႈ ဢဝ်ႁိူၼ်းယေးၶဝ်ၸိူဝ်းၼၼ်ႉ၊ပၼ်တီႈ ၵူၼ်းမၼ်းၸဝ်ႈဢေႃႈ။
ၼႂ်းဝႃႈၼၼ်သေၵေႃႈ၊ၶဝ်ယင်းၸၢမ်းတူၺ်းလႄႈ၊ သၢၼ်ၶတ်း ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ ၼၼ်ႉဢေႃႈ။ ၶဝ်ယင်းဢမ်ႇၵမ်ဢမ်ႇၸွမ်းပိင်းၺၢပ်ႈတြႃး၊မၼ်းၸဝ်ႈၸိူဝ်းၼၼ်ႉလႄႈယူႇဢေႃႈ။
ၶဝ်ဢွၼ်ၵၼ်ၽွၵ်ႈပျၢၼ်ႇၶိုၼ်းၵႂႃႇလႄႈ၊ ယႃႉသဵတ်ႈၸႃႇပႅတ်ႈမိူၼ်ၸိူဝ်ႉၼင်ႇ ပူႇမွၼ်ႇၶဝ်ၼၼ်ႉဢေႃႈ။ ၶဝ်ပိူင်ႈတၢင်းၵႂႃႇမိူၼ်ၸိူဝ်ႉၼင်ႇလႅမ်ႈပိုၼ် ဢၼ်ၸၢင်ႈလိမ်ႇၸၢင်ႈၵူတ်ႉၼၼ်ႉဢေႃႈ။
ၶဝ်ဢဝ်ထႃႇၼႃႉတီႈဝႆႈၽြႃးၶဝ်ၼၼ်ႉတိုၵ်းယူင်းႁႂ်ႈတေႃးသႃႉမၼ်းၸဝ်ႈဢွၵ်ႇလႄႈ ဢဝ်ႁုၼ်ႇႁၢင်ႈသၢင်းထုၶဝ်ၼၼ်ႉမႃးယႃႉယုၵ်ႉၸႂ်မၼ်းၸဝ်ႈဢေႃႈ။
ၽြႃးပဵၼ်ၸဝ်ႈႁုႁၼ်လွင်ႈတၢင်းၼၼ်ႉသေယဝ်ႉ၊တေႃးသႃႉမၼ်းၸဝ်ႈဢွၵ်ႇလႄႈ မၼ်းၸဝ်ႈပႄႇပႅတ်ႈၶဝ်လုမ်းလုမ်းသေဢေႃႈ။
မၼ်းၸဝ်ႈၸုၼ်ႉပႅတ်ႈသုမ်ႉထဵင်ၸဝ်ႈၵႃႈတီႈ ဝဵင်း သိလေႃႇ။ ဢၼ်ပဵၼ်ႁိူၼ်းမၼ်းၸဝ်ႈယူႇလူၺ်ႈၵၼ် တင်းႁဝ်းၼၼ်ႉဢေႃႈ။
မၼ်းၸဝ်ႈပၼ်ဢၶႂၢင်ႉႁႂ်ႈရၢၼ်ႇသူႇႁဝ်းလႆႈ သိမ်းဢဝ်တိူၵ်ႈပတိၺိၺ်ႇတြႃးၸဝ်ႈ ဢၼ်ပဵၼ်ၶိူင်ႈသၢၵ်ႈသေႇတၼ်းၶူဝ်းဢိၵ်ႇတင်းမုၼ်ၽုင်းမၼ်းၸဝ်ႈၼၼ်ႉယဝ်ႉ။
မၼ်းၸဝ်ႈၸႂ်မႆႈၶႂ်ႈၸႃႉတေႃႇၵူၼ်းမၼ်းၸဝ်ႈ တင်းလၢႆလႄႈ ပွႆႇႁႂ်ႈရၢၼ်ႇသူႇတင်းလၢႆဢဝ်ၶဝ်တၢႆပႅတ်ႈယဝ်ႉ။
ၽူႈမၢဝ်ႇၶဝ်လႆႈတၢႆပႅတ်ႈၵႃႈၼႂ်းၼႃႈသိုၵ်းလႄႈ၊ ၽူႈသၢဝ်ၶဝ်ဢမ်ႇမီးၵေႃႉဢၼ်တေ သွင်ႇမၢင်ႇၵလႃႇၵၼ်တင်းၶဝ်ယဝ်ႉ။
ယဵၸ်ႈပရေႃးႁဵၵ်ႈ ၶဝ်တင်းလၢႆလႆႈလုသုမ်းလူၺ်ႈၽေးလၢပ်ႇၽေးလႅဝ်းလႄႈ မႄႈမၢႆႈၶဝ်ဢမ်ႇမီးဢၶႂၢင်ႉဢၼ်လႆႈ ၶၢင်းၶီၶၢင်းၽၢၼ်။
မိူဝ်ႈၼၼ်ႉၸဝ်ႈၽြႃးတိုၼ်ႇမႃးမိူၼ်ၸိူဝ်ႉၼင်ႇဢၼ်ၵူၼ်းၼွၼ်းလပ်းတိုၼ်ႇမႃးၼၼ်ႉသေယဝ်ႉ၊ မၼ်းၸဝ်ႈႁဵတ်းၸိူဝ်ႉၼင်ႇၵူၼ်းႁတ်းၵူၼ်းႁၢၼ် ဢၼ်ႁွင်ႉသႅၼ်ႇယူႇ ၵွပ်ႈပိူဝ်ႈၼမ်ႉမၢၵ်ႇၸပိတ်ႉၼၼ်ႉဢေႃႈ။
မၼ်းၸဝ်ႈၸင်ႇႁေႃႈရၢၼ်ႇသူႇမၼ်းၸဝ်ႈ တင်းလၢႆၶိုၼ်းၵႂႃႇလႄႈ ႁႂ်ႈၶဝ်လႆႈဢူၵ်းဢၢႆယူႇသေႇသေႇ ၼႂ်းတၢင်းဢၼ်ၶဝ်တူၵ်းသုမ်းၼၼ်ႉဢေႃႈ။
မၼ်းၸဝ်ႈပႄႇပႅတ်ႈၸိူဝ်းၶိူဝ်း ယူဝ်းသႅပ်ႈ၊ လႄႈ ဢမ်ႇလိူၵ်ႈဢဝ်ၸိူဝ်ႉၶိူဝ်း ဢေႇၽရိမ်ႇ၊ ယဝ်ႉ။
ပုၼ်ႈတၢင်တူဝ်ၼၼ်ႉ၊မၼ်းၸဝ်ႈလိူၵ်ႈဢဝ်ၸိူဝ်ႉၶိူဝ်း ယုတႃႉ၊ ဢိၵ်ႇတင်းလွႆ ၸိဢုၼ်ႇ၊ ဢၼ်မၼ်းၸဝ်ႈႁၵ်ႉၼၼ်ႉဢေႃႈ။
ၵႃႈတီႈၼၼ်ႈမၼ်းၸဝ်ႈတႄႇႁဵတ်းၵျွင်းပိၵ်ႈမၢၼ်ႇၸဝ်ႈ၊ဢၼ်မိူၼ်ၸိူဝ်ႉၼင်ႇ ႁိူၼ်းဢၼ်မီးၵႃႈၼႂ်းမိူင်းၵၢင်ႁၢဝ်ၼၼ်ႉဢေႃႈ။ မၼ်းၸဝ်ႈတႄႇႁဵတ်းမၼ်ႈၶိူင်ႇၼႃႇ မိူၼ်ၸိူဝ်ႉၼင်ႇလိၼ်မိူင်း၊ ဢၼ်မၼ်းၸဝ်ႈႁႂ်ႈမၼ်းၶိူင်ႇယူႇ သေႇသေႇၼၼ်ႉဢေႃႈ။
မၼ်းၸဝ်ႈလိူၵ်ႈဢဝ် တႃႇဝိတ်ႈ၊ ဢၼ်ပဵၼ် ၶႃႈမၼ်းၸဝ်ႈၼၼ်ႉ၊ ဢွၵ်ႇသေၵႃႈတီႈပၢင်ႇလဵင်ႉသူဝ်းဝူဝ်း။
တီႈဢၼ်မၼ်းလဵင်ႉထိင်းၽုင်သူဝ်းၽုင်ဝူဝ်း မၼ်းၼၼ်ႉမႃးသေယဝ်ႉ၊ မၼ်းၸဝ်ႈယုၵ်ႉတၢင်ႇႁႂ်ႈမၼ်းပဵၼ်ၶုၼ်ႁေႃၶမ်း မဵဝ်း ဢိသရေး၊ ႁႂ်ႈပဵၼ်ၸိူဝ်ႉၼင်ႇၵေႃႉဢၼ်လဵင်ႉထိင်းၵူၼ်း ၽြႃးပဵၼ်ၸဝ်ႈတင်းလၢႆသေဢေႃႈ။
ၼင်ႇၼၼ်လႄႈ တႃႇဝိတ်ႈ၊ ၼၼ်ႉလဵင်ႉလူၶဝ် လူၺ်ႈတင်းသၽေႃးဢၼ် သိုဝ်ႈတေႃႇယူႇလႄႈ ဢဝ်တင်းမိုဝ်းဢၼ်လၵ်းဢၼ်လႅမ် ဢွၼ်သူင်ႇၼႄတၢင်းၶဝ်ဢေႃႈ။
ၽြႃးပဵၼ်ၸဝ်ႈတီႈၶႃႈ။ ၵူၼ်းတၢင်ႇၸိူဝ်ႉတၢင်ႇၶိူဝ်းၶဝ်ႈႁွတ်ႈၶဝ်ႈထိုင်ၼႂ်းမိူင်းၸဝ်ႈႁဝ်းမႃးယဝ်ႉ။ ၶဝ်ႁဵတ်းႁႂ်ႈၵျွင်းပိၵ်ႈမၢၼ်ႇၸဝ်ႈႁဝ်းဢၼ် မူတ်းၸၢင်ႇၼၼ်ႉၵူဝ်ႈၵိူၵ်ႇယဝ်ႉလႄႈ ၵိူၼ်ႇယႃႉဝဵင်း ယေႇရုသလႅမ်ႇ၊ ပႅတ်ႈတီႈၶႃႈယဝ်ႉ။
ၶဝ်ဢဝ်တူဝ်တၢႆၵူၼ်းၸဝ်ႈႁဝ်းၸိူဝ်းၼၼ်ႉပႅတ်ႈဢွႆႇပၼ်လၢင်းတႃႉတင်းလၢႆလႄႈ ဢဝ်ၼိူဝ်ႉၵူၼ်းမူတ်းၸၢင်ႇၸဝ်ႈႁဝ်းၸိူဝ်းၼၼ်ႉ ပႅတ်ႈဢွႆႇပၼ်တူဝ်ထိူၼ်ႇတင်းလၢႆ တီႈၶႃႈယဝ်ႉ။
ၶဝ်ဢဝ်လိူတ်ႈၵူၼ်းၸဝ်ႈႁဝ်းၸိူဝ်းၼၼ်ႉ ထွၵ်ႇပႅတ်ႈ ထၢၼ်ႈပေႃးပဵၼ်ႁွင်ႈပဵၼ်ၵႄးလႆၸွတ်ႇတူဝ်ႈဝဵင်း ယေႇရုသလႅမ်ႇ၊ ၵႂႃႇလႄႈ၊ ဢမ်ႇမီးၵေႃႉဢၼ်သၢင်းၵျူဝ်ႇပၼ်တီႈၶႃႈယဝ်ႉ။
ၵူၼ်းမဵဝ်းၸိူဝ်းဢၼ်ယူႇႁိမ်းႁွမ်းၶႃႈၸဝ်ႈႁဝ်းၶဝ်ၼၼ်ႉ ဢွၼ်ၵၼ်သႄႉသွမ်းလႄႈႁဵတ်းပျၢၵ်ႈႁဵတ်းၶူဝ်တီႈၶႃႈၸဝ်ႈႁဝ်းၶဝ်တီႈၶႃႈယဝ်ႉ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းတၵ်းၸႂ်မႆႈၶႂ်ႈၸႃႉတေႃႇၶႃႈၸဝ်ႈႁဝ်းၶဝ်သေႇသေႇတီႈၶႃႈႁိုဝ်း။ တၢင်းဢၼ်ၸႂ်မႆႈၶႂ်ႈၸႃႉၸဝ်ႈႁဝ်းၼၼ်ႉတၵ်းမႆႈမိူၼ်ၽႆးယူႇၶိူဝ်းၶိူဝ်းတီႈၶႃႈႁိုဝ်း။
ၶႅၼ်းတေႃႈဢဝ်တၢင်းဢၼ်ၸဝ်ႈႁဝ်းၸီႇယၢင်ႇပၼ်တၢမ်ႇဢပျတ်ႈၼၼ်ႉ ဝၢႆႇၸူးၵႃႈၼိူဝ်ၵူၼ်းမဵဝ်းၸိူဝ်းဢၼ် ဢမ်ႇၵူဝ်းၵႂၢႆႇၸဝ်ႈႁဝ်း၊ ၵူၼ်းၸိူဝ်းဢၼ်ဢမ်ႇႁဵတ်းသူးတွင်းပထၼႃႇတီႈၸဝ်ႈႁဝ်းၼၼ်ႉသေၵမ်းတီႈၶႃႈ။
လွင်ႈမၼ်းၸမ်ႉ၊ၶဝ်ဢဝ်ၵူၼ်းၸဝ်ႈႁဝ်းတင်းလၢႆတၢႆပႅတ်ႈလႄႈ ၶဝ်ယႃႉပႅတ်ႈသိုင်ႇၸိုင်ႈဝၢၼ်ႈမိူင်း ၸဝ်ႈႁဝ်းတီႈၶႃႈဢေႃႈ။
ၵွပ်ႈပိူဝ်ႈဢပျတ်ႈတုၸရိူၵ်ႈပူႇမွၼ်ႇၶႃႈၸဝ်ႈႁဝ်းၶဝ်ၼၼ်ႉလႄႈ၊ ၶႅၼ်းတေႃႈယႃႇပေပၼ်တၢမ်ႇတီႈၶႃႈၸဝ်ႈ ႁဝ်းၶဝ်သေၵမ်းတီႈၶႃႈ။ ၵွပ်ႈပိူဝ်ႈဢၼ်ၶႃႈၸဝ်ႈႁဝ်းၶဝ်ဢမ်ႇမီးတီႈ ဢိင်ပိုင်ႈဢႃးၵူဝ်းယဝ်ႉလႄႈ ၶႅၼ်းတေႃႈႁႂ်ႈၵရုၼႃႇၸဝ်ႈႁဝ်းၸဵဝ်းၸွႆႈထႅမ်မႃႉၸႃႉၶၼ်ၶၼ်ၽႂ်းၽႂ်းသေၵမ်းၶႃႈ။
ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈၸွႆႈထႅမ်လႄႈၵႄႇသႄႇၶျွတ်ႈဢဝ်ၶႃႈၸဝ်ႈႁဝ်းၶဝ်၊ ၵႄႇၼုၵ်ႈဢဝ်လႄႈပွႆႇလွတ်ႈဢပျတ်ႈ ၶႃႈၸဝ်ႈႁဝ်းၶဝ်ၵႃႈမီးၼၼ်ႉ ၸွမ်းလူၺ်ႈမုၼ်ၵုင်ႇသရေႇၸဝ်ႈႁဝ်းၼၼ်ႉ သေၵမ်းတီႈၶႃႈ။
ၵွပ်ႈသင်လႄႈၵူၼ်းမဵဝ်းတင်းလၢႆတွင်ႈထၢမ် ၶႃႈၸဝ်ႈႁဝ်းၶဝ်လႄႈဝႃႈ၊ “ၽြႃးသူမီးၵႃႈလႂ်၊” ဝႃႈၼင်ႇၼႆ ၸိူဝ်ႉၼင်ႇႁိုဝ်တီႈၶႃႈ။ ၶႅၼ်းတေႃႈႁႂ်ႈၶႃႈၸဝ်ႈႁဝ်းၶဝ်လႆႈႁၼ်တၢင်း ဢၼ်ၸဝ်ႈႁဝ်း၊ပၼ်တၢမ်ႇ ၵႃႈတီႈၵူၼ်းမဵဝ်းၸိူဝ်းဢၼ်ထွၵ်ႇလိူတ်ႈၵူၼ်းၸဝ်ႈႁဝ်းတင်းလၢႆၼၼ်ႉသေၵမ်းတီႈၶႃႈ။
ၸဝ်ႈႁဝ်းၶႅၼ်းတေႃႈထွမ်ႇဢဝ်သဵင် ၵူၼ်းတူၵ်းထွင်ႇတင်းလၢႆၶၢင်းၶီ ၶၢင်းၽၢၼ်ယူႇၼၼ်ႉသေလႄႈ၊ ၶႅၼ်းတေႃႈဢဝ်မုၼ်တၼ်းၶူဝ်းၸဝ်ႈႁဝ်း ပွႆႇၶဝ်ၸိူဝ်းဢၼ်လႆႈၶၢမ်ႇတၢမ်ႇတၢႆၼၼ်ႉ လႆႈလွတ်ႈသေၵမ်းတီႈၶႃႈ။
ၸဝ်ႈၽြႃးတီႈၶႃႈ။ ၶႅၼ်းတေႃႈတႅၼ်းသႂ်ႇတီႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉ၊ ႁႂ်ႈမၼ်းထူၼ်ႈထိုင်ၸဵတ်းပုၼ်ႈ ပုၼ်ႈတႃႇတၢင်းဢၼ်ၶဝ်သႄႉသွမ်းလူလၢႆ ၸဝ်ႈႁဝ်းၼၼ်ႉသေၵမ်းတီႈၶႃႈ။
ၼင်ႇၼၼ်လႄႈ၊ၶႃႈၸဝ်ႈႁဝ်းၶဝ်ဢၼ်ပဵၼ်ၵူၼ်းၸဝ်ႈႁဝ်းဢၼ်ဝႃႈၽုင်သူဝ်းဢၼ်ယၢမ်ႈၵိၼ် ၵႃႈတီႈပၢင်ႇလဵင်ႉၸဝ်ႈႁဝ်းၼၼ်ႉတၵ်း ဢွၼ်ၵၼ်ယွင်ႈယေႃးၵျေးၸူး ၸဝ်ႈႁဝ်းယူႇသေႇသေႇလႄႈ တၵ်းယွင်ႈယေႃးၸဝ်ႈႁဝ်းယူႇဝၼ်းလိုၼ်းမိူဝ်းၼႃႈတႃႇသေႇဢမ်ႇထၢတ်ႇဢေႃႈ။
ၸဝ်ႈဢၼ်လဵင်ႉထိင်းမဵဝ်း ဢိသရေး၊ တီႈၶႃႈ။ ၶႅၼ်းတေႃႈထွမ်ႇဢဝ်ၶႃႈၸဝ်ႈႁဝ်းၶဝ်သေၵမ်းတီႈၶႃႈ။ ၸဝ်ႈဢၼ်ဢွၼ်ႁူဝ်ၵူၼ်းမဵဝ်းၸဝ်ႈႁဝ်းမိူၼ်ၸိူဝ်ႉၼင်ႇၽုင်သူဝ်းၼၼ်ႉတီႈၶႃႈ။ ၶႅၼ်းတေႃႈႁေႈႁူၸူးၶႃႈၸဝ်ႈႁဝ်းၶဝ် သေၵမ်းတီႈၶႃႈ။ ၸဝ်ႈဢၼ်ၵိင်းဝၢပ်ႈယူႇၵႃႈၼိူဝ် ၶေႇရုၽဵမ်ႇ၊ ၼၼ်ႉတီႈၶႃႈ။ ၶႅၼ်းတေႃႈပွႆႇသၢႆဢရွင်ႇၸဝ်ႈႁဝ်း
ၵႃႈတီႈၽၢႆႇၼႃႈၸိူဝ်ႉၶိူဝ်း ဢေႇၽရိမ်ႇ၊ပိၼ်ႇယႃႇမိၼ်ႇ၊ ဢိၵ်ႇတင်း မၼႃႇသေႇ၊ ၸိူဝ်းၼၼ်ႉ သေၵမ်းတီႈၶႃႈ။ ၶႅၼ်းတေႃႈတိုၵ်းယူင်းႁႅင်းတၼ်းၶူဝ်း ၸဝ်ႈႁဝ်းသေလႄႈ မႃးၵႄႇသႄႇၶျွတ်ႈဢဝ်ၶႃႈၸဝ်ႈႁဝ်းၶဝ် သေၵမ်းတီႈၶႃႈ။
ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈၶိုၼ်းတႄႇၶိုၼ်းတင်ႈၶႃႈၸဝ်ႈႁဝ်းၶဝ် သေၵမ်းတီႈၶႃႈ။ ၼႄပျႃးၵရုၼႃႇၸဝ်ႈႁဝ်း တီႈၶႃႈၸဝ်ႈႁဝ်းၶဝ် သေၵမ်းတီႈၶႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ ၶႃႈၸဝ်ႈႁဝ်းၶဝ်တၵ်းႁွတ်ႈထိုင်တၢင်းဢၼ် ၵႄႇသႄႇၶျွတ်ႈဢဝ်တီႈၶႃႈဢေႃႈ။
ထႃႇဝရႃႉၽြႃး၊ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ တီႈၶႃႈ။ ၸဝ်ႈႁဝ်းတေၸႂ်မႆႈၶႂ်ႈၸႃႉတေႃႇတၢင်းသူးတွင်းၵူၼ်းၸဝ်ႈႁဝ်းၼၼ်ႉ ယူႇႁိုင်ထႅင်ႈၵႃႈႁိုဝ်လူးၵွၼ်ႇတီႈၶႃႈ။
ၸဝ်ႈႁဝ်းဢဝ်တၢင်းမႆႈတၢင်းၶီလဵင်ႉပၼ် ႁႂ်ႈၶဝ်လႆႈၵိၼ်လႄႈ ဢဝ်ၵွၵ်းၼမ်ႉတႃတိုၵ်းပၼ်ၶဝ်လႆႈသူတ်ႉၵိၼ်ၼမ်ၼႃႇတီႈၶႃႈယဝ်ႉ။
ၸဝ်ႈႁဝ်းႁႂ်ႈၵူၼ်းမဵဝ်းဢၼ်မီးႁိမ်းႁွမ်းၸိူဝ်းၼၼ်ႉတိုၵ်းတေႃးမိူင်းၶႃႈၸဝ်ႈႁဝ်းၶဝ်လႄႈ ရၢၼ်ႇသူႇၶႃႈၸဝ်ႈႁဝ်းၶဝ်ၸိူဝ်းၼၼ်ႉသႄႉသွမ်းလူလၢႆၶႃႈၸဝ်ႈႁဝ်းၶဝ်တီႈၶႃႈယဝ်ႉ။
ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ တီႈၶႃႈ။ ၶႅၼ်းတေႃႈၶိုၼ်းတႄႇၶိုၼ်းတင်ႈၶႃႈၸဝ်ႈႁဝ်းၶဝ်၊သေၵမ်းတီႈၶႃႈ။ ၼႄပျႃးၵရုၼႃႇၸဝ်ႈႁဝ်းတီႈၶႃႈၸဝ်ႈႁဝ်းၶဝ်သေၵမ်းတီႈၶႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ ၶႃႈၸဝ်ႈႁဝ်းၶဝ်တၵ်းႁွတ်ႈထိုင်တၢင်းဢၼ် ၵႄႇသႄႇၶျွတ်ႈဢဝ်တီႈၶႃႈဢေႃႈ။
ၸဝ်ႈႁဝ်းဢဝ်တူၼ်ႈၶိူဝ်းမၢၵ်ႇၸပိတ်ႉၵႃႈတီႈ မိူင်း ဢေးၵျိပ်ႉ၊ မႃးသေယဝ်ႉ၊ ႁေႃႈပႅတ်ႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်း တင်းလၢႆလႄႈ ဢဝ်တူၼ်ႈၶိူဝ်းၼၼ်ႉၽုၵ်ႇဝႆႉၵႃႈၼႂ်းမိူင်း ၶဝ်ၼၼ်ႉဢေႃႈ။
ၸဝ်ႈႁဝ်းတီႇပၼ်ၽဵဝ်ႈပၼ် တီႈဢၼ်မၼ်း တၵ်းယႂ်ႇမႃးၼၼ်ႉသေယဝ်ႉ၊ မၼ်းယင်ႇႁၢၵ်ႈလႄႈၸွတ်ႇတူဝ်ႈၵႂႃႇ တင်းမိူင်းတီႈၶႃႈယဝ်ႉ။
ႁူမ်ႈမၼ်းႁူမ်ႇလွႆတင်းလၢႆၵႂႃႇလႄႈ ၵိင်ႇမၼ်းၶႃႈမၼ်း ထၢၼ်ႈပေႃးႁူမ်ႇသုမ်ႇတူၼ်ႈ ဢႃႇရိတ်ႉ၊ ဢၼ်ယႂ်ႇဢၼ်သုင်ၼၼ်ႉတီႈၶႃႈယဝ်ႉ။
မၼ်းၽႄႇၵိင်ႇၽႄၶႃႈမၼ်းတေႃႇထိုင်ႁွတ်ႈ ပၢင်ႇလၢႆႇ မေႇတိထေးရီးယၼ်း။ ၸွတ်ႇတူဝ်ႈၵႂႃႇတေႃႇထိုင်ႁွတ်ႈၼမ်ႉ ဢုၽရတ်ႉ၊ ပုၼ်ႉတီႈၶႃႈယဝ်ႉ။
ၵွပ်ႈသင်လႄႈၸဝ်ႈႁဝ်းႁၵ်းယႃႉႁူဝ်ႉဝၢင်းမၼ်းပႅတ်ႈတီႈၶႃႈ။ မိူဝ်ႈလဵဝ်ၼႆႉၽူႈလႂ်ပႆၵၢႆၵႂႃႇၵေႃႈလၵ်ႉဢဝ် မၢၵ်ႇၸပိတ်ႉလႆႈငၢႆႈငၢႆႈတီႈၶႃႈယဝ်ႉ။
မူထိူၼ်ႇတင်းလၢႆထူၺ်ႉပႅတ်ႈႁၢၵ်ႈမၼ်းလႄႈ၊တူဝ်ထိူၼ်ႇတင်းလၢႆၵိၼ်ပႅတ်ႈမူတ်းတီႈၶႃႈယဝ်ႉ။
ၽြႃးပဵၼ်ၸဝ်ႈဢၼ်ယႂ်ႇမျၢတ်ႈတီႈၶႃႈ။ ၶႅၼ်းတေႃႈပွၵ်ႈၶိုၼ်းမႃးထႅင်ႈသေၵမ်းတီႈၶႃႈ။ ၶႅၼ်းတေႃႈယူႇၵႃႈၼိူဝ်ၽုင်ႇၵၢင်ႁၢဝ်သေယဝ်ႉ လူတူၺ်းၶႃႈၸဝ်ႈႁဝ်းၶဝ်လႄႈ လူင်းမႃးၵႄႇသႄႇၶျွတ်ႈဢဝ်ၵူၼ်းၸဝ်ႈႁဝ်း တင်းလၢႆသေၵမ်းတီႈၶႃႈ။
ၶႅၼ်းတေႃႈမႃးလႄႈၵႄႇသႄႇၶျွတ်ႈဢဝ်တူၼ်ႈၶိူဝ်းမၢၵ်ႇၸပိတ်ႉဢၼ်ၸဝ်ႈႁဝ်းၽုၵ်ႇဝႆႉ၊ တူၼ်ႈၶိူဝ်းမၢၵ်ႇၸပိတ်ႉဢၼ်ၼုမ်ႇလီ၊ ဢၼ်ၸဝ်ႈႁဝ်းႁႂ်ႈယႂ်ႇသုင်မႃးႁႅင်းယႂ်ႇၼႃႇၼၼ်ႉသေၵမ်းတီႈၶႃႈ။
ရၢၼ်ႇသူႇၶႃႈၸဝ်ႈႁဝ်းၶဝ်ၼၼ်ႉဢဝ်ၽႆးတုတ်ႇပႅတ်ႈလႄႈပွမ်ႈလူမ်ႉပႅတ်ႈတီႈၶႃႈယဝ်ႉ။ ၶႅၼ်းတေႃႈပႃးတင်းတေႃးသႃႉလူတူၺ်းၶဝ်သေလႄႈယႃႉၽဵဝ်ႈပႅတ်ႈၶဝ်သေၵမ်းတီႈၶႃႈ။
ႁႂ်ႈၸဝ်ႈႁဝ်းဢဝ်မိုဝ်းၸဝ်ႈႁဝ်းတၢင်ႇသႂ်ႇၵႃႈၼိူဝ်ၵေႃႉဢၼ်ၸၢပ်ႈသႅင်ႇၵၼ်တင်း မိုဝ်းၶွၼ်ၶႂႃၸဝ်ႈႁဝ်း၊လုၵ်ႈၵူၼ်းဢၼ်ၸဝ်ႈႁဝ်းႁႂ်ႈပျေႉၸုမ်ႇဝႆႉတင်းႁႅင်းပုၼ်ႈၸဝ်ႈႁဝ်း သေၵမ်းလူၺ်ႈတီႈၶႃႈ။
ၶႃႈၸဝ်ႈႁဝ်းၶဝ်တၵ်းတေဢမ်ႇၶိုၼ်းသုတ်ႉၶိုၼ်းႁူၼ်သေၵႃႈတီႈၸဝ်ႈႁဝ်းတီႈၶႃႈ။ ၶႅၼ်းတေႃႈႁႂ်ႈၶႃႈၸဝ်ႈႁဝ်းၶဝ်ဢသၢၵ်ႈလိပ်းယူႇ သေၵမ်းတီႈၶႃႈ။ ၶႃႈၸဝ်ႈႁဝ်းၶဝ်တၵ်းဢွၼ်ၵၼ်ယွင်ႈယေႃး ၸဝ်ႈႁဝ်းတီႈၶႃႈဢေႃႈ။
ထႃႇဝရႃႉၽြႃး၊ၽြႃးပဵၼ်ၸဝ်ႈ၊ၸဝ်ႈ ဢၼၼ်ႇတႃႉတၼ်းၶူဝ်း၊ တီႈၶႃႈ။ ၶႅၼ်းတေႃႈၶိုၼ်းတႄႇၶိုၼ်းတင်ႈ ၶႃႈၸဝ်ႈႁဝ်းၶဝ်၊သေၵမ်းတီႈၶႃႈ။ ၼႄပျႃးၵရုၼႃႇၸဝ်ႈႁဝ်းတီႈၶႃႈၸဝ်ႈႁဝ်းၶဝ် သေၵမ်းတီႈၶႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ ၶႃႈၸဝ်ႈႁဝ်းၶဝ်တၵ်းႁွတ်ႈထိုင်တၢင်းဢၼ် ၵႄႇသႄႇၶျွတ်ႈဢဝ်တီႈၶႃႈဢေႃႈ။
ဢွၼ်ၵၼ်ႁဵတ်းၵႂၢမ်းသဵင်ဢၼ်ယႂ်ႇၼႃႇတီႈၽြႃးပဵၼ်ၸဝ်ႈဢၼ်ပဵၼ်ဢဵၼ်ႁႅင်းႁဝ်းၼၼ်ႉတႃႉ။ ဢွၼ်ၵၼ်သႂၢင်ႇသိူဝ်းလႄႈႁွင်ႉသႅၼ်ႇႁွင်ႉၵိဝ်တီႈၽြႃးပဵၼ်ၸဝ်ႈမဵဝ်း ယႃႇၵုပ်ႈ၊ ၼၼ်ႉတႃႉ။
ဢွၼ်ၵၼ်တႄႇၸႃႉႁဵတ်းၵႂၢမ်းတႃႉ။ ဢွၼ်ၵၼ် ႁႆႇၵွင်ၶဵတ်ႇတင်းလၢႆတႃႉ။ ဢွၼ်ၵၼ်လဵတ်းတိင်ႇဢၼ်သဵင်လီ သဵင်ဝၢၼ်တႃႉ။
ဢွၼ်ၵၼ်ပဝ်ႇတိုင်ႈၼႄးၶရႃႇပုၼ်ႈဝၼ်းပွႆးလူင်ၼႂ်းဝၼ်းလိူၼ်မႂ်ႇတင်းဝၼ်းလိူၼ်မူၼ်းတႃႉ။
ဢၼ်ၼႆႉၸမ်ႉပဵၼ်ထုင်းၽိင်ႈတြႃး ပုၼ်ႈမဵဝ်း ဢိသရေး၊ ဢၼ်ၽြႃးပဵၼ်ၸဝ်ႈမဵဝ်း ယႃႇၵုပ်ႈ၊ ပူင်ဢမိင်ႉဝႆႉၼၼ်ႉဢေႃႈ။
မၼ်းၸဝ်ႈၸီႇယၢင်ႇလွင်ႈတၢင်းၼႆႉတီႈၵူၼ်းမဵဝ်း ဢိသရေး၊ တင်းလၢႆ၊ ၼႂ်းမိူဝ်ႈဢၼ်မၼ်းၸဝ်ႈတိုၵ်းတေႃးမိူင်း ဢေးၵျိပ်ႉ၊ ၼၼ်ႉဢေႃႈ။
ၵဝ်လႆႈငိၼ်းၵႂၢမ်းၵေႃႉဢၼ်ၵဝ်ဢမ်ႇႁုၸၵ်းၼၼ်ႉလၢတ်ႈဝႃႈၸမ်ႉ၊ “ၵဝ်ပူတ်းၶူဝ်းၼၵ်းၵႃႈတီႈမႃႇမႂ်းပၼ်ယဝ်ႉ။ တီႈမိုဝ်းၵေႃႈလွတ်ႈသေၵူၺ်တၢင်ႇ ၸိူဝ်းၼၼ်ႉဝႆႉယဝ်ႉ။
မိူဝ်ႈဢၼ်မႂ်းထူပ်းၽေးတုၵ်ႉၶႃႉၼၼ်ႉ၊ မႂ်းႁွင်ႉၵၢဝ်ႇတီႈၵဝ်လႄႈၵဝ်ၵႄႇသႄႇ တိုတ်ႉၸၼ်မႂ်းဢွၵ်ႇဢေႃႈ။ ၵဝ်ၶိုၼ်းဢိူဝ်မႂ်းၵႃႈၼႂ်းတီႈယူႇၽႃႉၽႃႇ ဢၼ်ပဵၼ်တီႈတဵတ်ႇတီႈသွၼ်ႈၵဝ်ၼၼ်ႉလႄႈ ၸၢမ်းတူၺ်းမႂ်းၵႃႈတီႈၼမ်ႉဢွၵ်ႇႁူး မေႇရၽႃႉ၊ ၼၼ်ႉဢေႃႈ။
ၵူၼ်းၵဝ်တင်းလၢႆၶဝ်႟။ ဢွၼ်ၵၼ်ထွမ်ႇဢဝ်ၵႂၢမ်းဢၼ်ၵဝ်ပၼ်သတိၼၼ်ႉတႃႉ။ မဵဝ်း ဢိသရေး၊ ႟။ ႁႂ်ႈမႂ်းထွမ်ႇငိၼ်းဢဝ် ၵႂၢမ်းၵဝ်သေၵမ်းလူၺ်ႈ။
မႂ်းတၵ်းဢမ်ႇလႆႈၵူဝ်းၵႂၢႆႇလႄႈဝႆႈၽြႃးတၢင်ႇသူႇတၢင်ႇပႃးလႃးလႃး။
ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈမႂ်း၊ ဢၼ်ထုတ်ႇၼုၵ်ႈဢဝ်မႂ်းဢွၵ်ႇသေၵႃႈၼႂ်းမိူင်း၊ ဢေးၵျိပ်ႉ၊ မႃးၼၼ်ႉယဝ်ႉ။ ၽုၺ်ႇသူပ်းမႂ်းၵႂၢင်ႈၵႂၢင်ႈတႃႉ။ ၵဝ်တၵ်းလဵင်ႉပၼ်ဢိမ်ႇဢိမ်ႇတဵမ်တဵမ်ဢေႃႈ။
ၵူၼ်းၵဝ်တင်းလၢႆၸမ်ႉ၊ဢမ်ႇထွမ်ႇဢမ်ႇဢဝ် ၵႂၢမ်းၵဝ်။ မဵဝ်း ဢိသရေး၊ ဢမ်ႇမီးၸႂ်ဢၼ်ထွမ်ႇဢဝ် ၵႂၢမ်းၵဝ်။
ပိူဝ်ႈၼႆလႄႈၵဝ်ပွႆႇပႅတ်ႈႁႂ်ႈၶဝ်ႁဵတ်းၸွမ်း ၸႂ်တိုဝ်ၸႂ်တၼ်ၶဝ်၊ ႁႂ်ႈၶဝ်ႁဵတ်းၸွမ်းဢလူဝ်ႇၵၢင်ၸႂ်ၶဝ် ၼၼ်ႉဢေႃႈ။
ႁႂ်ႈၵူၼ်းၵဝ်တင်းလၢႆထွမ်ႇငိၼ်းဢဝ်ၵႂၢမ်းၵဝ်လႄႈ ႁႂ်ႈၶဝ်ဢွၼ်ၵၼ်ၸွမ်းၵႃႈၼႂ်းသဵၼ်ႈတၢင်းၵဝ် သေၵမ်းလူၺ်ႈ။
ပေႃးႁဵတ်းၸိူဝ်ႉၼင်ႇၼၼ်ၸိုင်၊ၵဝ်တၵ်းႁိပ်ႈၼႅတ်ႈတိုၵ်းပႅတ်ႈရၢၼ်ႇသူႇၶဝ်တင်းလၢႆလႄႈ တၵ်းႁဵတ်းပႄႉႁဵတ်းၼႅင်ႇတီႈရၢၼ်ႇသူႇၶဝ် ၼၼ်ႉပႅတ်ႈဢေႃႈ။
ၶဝ်ၸိူဝ်းဢၼ်ၸင်းၵဝ်ၼၼ်ႉတၵ်းဢွၼ်ၵၼ်ပႃးတၢင်းဢၼ်ၵူဝ်ဢၼ်ႁႄလႄႈ ၶုပ်ႉဝႆႈၵႃႈတီႈၽၢႆႇၼႃႈၵဝ်ဢေႃႈ။ ၽေးတၢမ်ႇၶဝ်ၼၼ်ႉၵေႃႈတၵ်းတႄႇယူႇ တႃႇသေႇဢမ်ႇထၢတ်ႇဢေႃႈ။
ၵဝ်တၵ်းဢဝ်ၶဝ်ႈၵျုင်ႇဢၼ်လီသေပိူၼ်ႈၼၼ်ႉလဵင်ႉပၼ်မႂ်းလႄႈ တၵ်းဢဝ်ၼမ်ႉၽိုင်ႈထိူၼ်ႇပၼ်ႁႂ်ႈမႂ်း လႆႈၵိၼ်ဢိမ်ႇဢိမ်ႇတဵမ်တဵမ်ဢေႃႈ၊” ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈဢဝ်ဢွင်ႈဢဝ်တီႈမၼ်းၸဝ်ႈၵႃႈၼႂ်းပရိၵ်ႈသၢတ်ႈၽုင်ႇၵၢင်ႁၢဝ်လႄႈ မၼ်းၸဝ်ႈၸီႇယၢင်ႇတႅပ်းတတ်းၵႃႈၼႂ်း ၵႄႈၵၢင်ဢၼ်ၸုဢၼ်တုမ်ၽြႃးတင်းလၢႆ လႄႈဝႃႈၸမ်ႉ၊
“သူတၵ်းတေဢမ်ႇလႆႈၸီႇယၢင်ႇတႅပ်းတတ်း ဢၼ်ဢမ်ႇသိုဝ်ႈဢမ်ႇတြႃး၊ ဢဝ်ၼႆႉၵႂႃႇတေဢမ်ႇလႆႈၽွမ်ႉၽၢႆႇၵူၼ်းဢၼ်ဢမ်ႇတြႃးတင်းလၢႆၼၼ်ႉလႃးလႃး။
ၵႅတ်ႇၶႄႁႄႉၵင်ႈဢၶႂၢင်ႉဢယေးၵူၼ်းယၢၵ်ႈ ၵူၼ်းၽၢၼ်လႂ်၊ လုၵ်ႈဢွၼ်ၽၢၼ်ပေႃႈ ၽၢၼ်မႄႈလႂ်ၼၼ်ႉတႃႉ။ မီးတၢင်းဢၼ်တႅပ်းတတ်းၽဵင်ႇၽဵင်ႇၵႃႈတီႈၶဝ်ၸိူဝ်းဢၼ်ၸုတ်ႈဢၼ်လုတ်ႈ၊ တင်းၶဝ်ၸိူဝ်းဢၼ်ဢမ်ႇမီးတီႈဢိင်ပိုင်ႈ ဢႃးၵူဝ်းၸိူဝ်းၼၼ်ႉတႃႉ။
ၵႄႇၼုၵ်ႈဢဝ်ၶဝ်လွတ်ႈသေၵႃႈၼႂ်းမိုဝ်းၵူၼ်းၸိူဝ်းဢၼ်ဢမ်ႇတြႃးၼၼ်ႉတႃႉ။”
“သူၼႆႉပဵၼ်ၵူၼ်းငိူဝ်ႈဢေႃႈ။ သူပဵၼ်ၵူၼ်းတိုဝ်ဢေႃႈ။ သူပဵၼ်ဢၼ် ႁၢႆႉမိူၵ်ႈၵႂႃႇလုမ်းလုမ်းယဝ်ႉ။ တၢင်းဢၼ်ၸီႇယၢင်ႇၸွမ်းၼင်ႇတြႃးဢမ်ႇပေႃႇဢမ်ႇဢွၵ်ႇမႃးၵႃႈတီႈမိူင်းလေႃးၵႃႉၼႆႉယဝ်ႉ။
ၵဝ်လၢတ်ႈလႄႈဝႃႈ၊ ‘သူတင်းလၢႆပဵၼ်ၽြႃးဢေႃႈ။ သူၵႃႈမီးတင်းသဵင်ႈတင်းလူင်၊ ပဵၼ်လုၵ်ႈၽြႃးပဵၼ်ၸဝ်ႈဢၼ်သုင်ၼႃႇသေပိူၼ်ႈၼၼ်ႉဢေႃႈ၊’ ဝႃႈၼင်ႇၼႆယဝ်ႉ။
ၵူၺ်းၵႃႈ၊သူတၵ်းလႆႈတၢႆမိူၼ်မိူၼ်ၵၼ်တင်းၵူၼ်းတင်းလၢႆလႄႈဢသၢၵ်ႈသူၵေႃႈတၵ်းသုတ်းၵွႆ မိူၼ်မိူၼ်ၵၼ်တင်းၶုၼ်သေပႃးပႃးၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈမႃးဢုပ်ႉပိူင်ႇမိူင်းလေႃးၵႃႉၼႆႉသေၵမ်းတီႈၶႃႈ။ လွင်ႈမၼ်းၸမ်ႉ၊မဵဝ်းၵူၼ်းၵႃႈမီးတင်းသဵင်ႈတင်ႈလူင်ပဵၼ်ၶွင်ၸဝ်ႈႁဝ်းတီႈၶႃႈဢေႃႈ။
ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈယႃႇပေ ယူႇတဵတ်ႇတဵတ်ႇသေၵမ်းတီႈၶႃႈ။ ၶႅၼ်းတေႃႈယႃႇပေယူႇယဵၼ်သီႇသီႇလႄႈ၊ ယႃႇပေႁဵတ်းတၢင်းဢၼ်ဢမ်ႇတၵ်းသဵင် သေၵမ်းတီႈၶႃႈ။
တူၺ်းတီႈၶႃႈလူး။ ရၢၼ်ႇသူႇၸဝ်ႈႁဝ်းတင်းလၢႆ ဢွၼ်ၵၼ်ႁဵတ်းတၢင်းဢၼ်ဢူၼ်ဢဵၼ်မေႃးမႄးယူႇလႄႈ၊ ၶဝ်ၸိူဝ်းဢၼ်ၸင်းၸဝ်ႈႁဝ်းၼၼ်ႉဢွၼ်ၵၼ်လုၵ်ႉၽိုၼ်ႉၸဝ်ႈႁဝ်းယူႇတီႈၶႃႈဢေႃႈ။
ၶဝ်ဢွၼ်ၵၼ်လွမ်ၶိုင်ပွင်ႁဵတ်းၶတ်းၵၼ်တင်း ၵူၼ်းၸဝ်ႈႁဝ်းတင်းလၢႆယူႇ၊ ဢွၼ်ၵၼ်တိူင်ႇပၢင်ႇလၢတ်ႈၸႃၶတ်းၵၼ် တင်းၶဝ်ၸိူဝ်းဢၼ်ၸဝ်ႈႁဝ်းႁႄႉဝႆႉၶႅၼ်ဝႆႉ ၼၼ်ႉတီႈၶႃႈဢေႃႈ။
ၶဝ်လၢတ်ႈလႄႈဝႃႈ၊ “မႃးမႃး႟။ ဢွၼ်ၵၼ်ယႃႉပႅတ်ႈၵူၼ်းမဵဝ်းၶဝ်ၼႆႉတႃႉႁဝ်း။ ဢွၼ်ၵၼ်ႁဵတ်းႁႂ်ႈမဵဝ်း ဢိသရေး၊ ၶဝ်ႁၢႆလၢႆ တေႃႇထိုင်ႁွတ်ႈထၢၼ်ႈပေႃးပိူၼ်ႈဢမ်ႇၶုၵ်းၸႂ်လႆႈ ၶိုၼ်းသေပွၵ်ႈၼၼ်ႉတႃႉႁဝ်း၊” ဝႃႈၼင်ႇၼႆဢေႃႈ။
ၶဝ်ၸိူဝ်းၼၼ်ႉဢွၼ်ၵၼ်ၽွမ်ႉၸႂ်ၵၼ်သေလႄႈ၊ ႁဵတ်းပဵၼ်မုၵ်ႉပဵၼ်ၸိူဝ်းသေႁဵတ်းၶတ်းၵၼ်တင်းၸဝ်ႈႁဝ်းၼၼ်ႉဢေႃႈ။
ၶဝ်ၸိူဝ်းၼၼ်ႉၸမ်ႉ၊ပဵၼ်ၵူၼ်းမဵဝ်း ဢေႇတုမ်ႇ၊ လႂ်၊ၵူၼ်းမဵဝ်း ဢိသမေႇလႃႉ၊ လႂ်၊ ၵူၼ်းမဵဝ်း မေႃႇၽႃႉ၊ လႂ်၊ၵူၼ်းမဵဝ်း ႁႃႇၵရႃႉ၊ လႂ်၊
ၵူၼ်းမဵဝ်း ၵေႇပလႃႉ၊ လႂ်၊ၵူၼ်းမဵဝ်း ဢမ်ႇမုၼ်ႇ၊ လႂ်၊ၵူၼ်းမဵဝ်း ဢႃႇမလႅၵ်ႉ၊ လႂ်၊ ၵူၼ်းမဵဝ်း ၽိလိတ်ႉတိ၊ လႂ်၊ဢိၵ်ႇတင်းၵူၼ်းဝဵင်း တုရု၊ လႂ်ၸိူဝ်းၼၼ်ႉတီႈၶႃႈဢေႃႈ။
ၵူၼ်းမဵဝ်း ဢႃႇသီးရီးယႃး၊ တင်းလၢႆၵေႃႈၶဝ်ႈပႃးလူၺ်ႈၵၼ်တင်းၶဝ်လႄႈ ပဵၼ်ၶႅၼ်ပဵၼ်မိုဝ်းဢၼ်မီးဢဵၼ်မီးႁႅင်း တီႈၵူၼ်းမဵဝ်း လေႃးတႃႉ၊ ၸိူဝ်းၼၼ်ႉတီႈၶႃႈဢေႃႈ။
ၶႅၼ်းတေႃႈႁဵတ်းတီႈၶဝ်မိူၼ်ၸိူဝ်ႉၼင်ႇဢၼ်ၸဝ်ႈႁဝ်းႁဵတ်းတီႈမဵဝ်း မိတျၼ်ႇ၊ တင်းၶုၼ် သိသရႃႉ၊ ဢိၵ်ႇတင်းၶုၼ် ယႃႇၽိၼ်း၊ ၵႃႈတီႈႁိမ်းၼမ်ႉ ၵိသုၼ်ႇ၊ ၼၼ်ႉသေၵမ်းတီႈၶႃႈ။
ၸဝ်ႈႁဝ်းတိုၵ်းတေႃးၶဝ်ပႅတ်ႈၵႃႈတီႈ ဢိၼ်ႇတေႃးရႃႉ၊ လႄႈ တူဝ်တၢႆၶဝ်တူႇၼဝ်ႈၵႂႃႇၵႃႈၼိူဝ်လိၼ် တီႈၶႃႈဢေႃႈ။
ၸဝ်ႈႁဝ်းၶႅၼ်းတေႃႈႁဵတ်းတီႈၵူၼ်းဢၼ် ပဵၼ်ၵႄႇပဵၼ်ႁူဝ်ၶဝ် မိူၼ်ၸိူဝ်ႉၼင်ႇဢၼ်ၸဝ်ႈႁဝ်းႁဵတ်းတီႈ ၶုၼ် ဢေႃးရၽႃႉ၊ တင်း ၶုၼ် ၸေးၽႃႉ၊ ၼၼ်ႉလႄႈ၊ တိုၵ်းပႅတ်ႈမူးမၢတ်ႈၽွင်းမိူင်းၶဝ်မိူၼ်ၸိူဝ်ႉၼင်ႇဢၼ်ၸဝ်ႈႁဝ်းတိုၵ်းပႅတ်ႈ ၶုၼ် ၸေးၽႁႃႉ၊ တင်းၶုၼ် ၸႃႇလမုၼ်ႇၼႃႉ၊ ၼၼ်ႉသေၵမ်းတီႈၶႃႈ။
ၶဝ်ၼၼ်ႉလၢတ်ႈဝႃႈ၊ “ဢွၼ်ၵၼ်သိမ်းဢဝ် လိၼ်မိူင်းၽြႃးပဵၼ်ၸဝ်ႈတင်းလၢႆ၊ ပုၼ်ႈႁဝ်းတႃႉႁဝ်း၊” ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈဢဝ်ၶဝ်ၸၢတ်ႇပိုၼ်ပႅတ်ႈၸိူဝ်ႉၼင်ႇမုၼ်ႈလိၼ်၊ ဢိၵ်ႇတင်းၸိူဝ်ႉၼင်ႇၵႅပ်ႇဢၼ်ပိဝ်ၸွမ်း လူမ်းၵႂႃႇၼၼ်ႉသေၵမ်းတီႈၶႃႈ။
မိူၼ်ၸိူဝ်ႉၼင်ႇဢၼ်ၽႆးမႆႈထိူၼ်ႇ၊ဢိၵ်ႇတင်းမိူၼ်ၸိူဝ်ႉၼင်ႇပိဝ်ၽႆးဢၼ်တုတ်ႇၵႃႈၼိူဝ်လွႆလႄႈ
ဢဝ်တင်းၽူၼ်လူင်လူမ်းလူင်ၸဝ်ႈႁဝ်း လိုပ်ႈၸွမ်းလမ်းၸွမ်းၶဝ်၊ ဢဝ်တင်းလူမ်းၽိဝ်ႁုင်ၸဝ်ႈႁဝ်းလွၵ်ႇငိုတ်ႈ ၶဝ်ပႅတ်ႈသေၵမ်းတီႈၶႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈဢဝ်တၢင်းဢၼ်ဢူၵ်းဢၼ်ဢၢႆႁူမ်ႇသုမ်ႇၼႃႈၶဝ်လႄႈ ႁႂ်ႈၶဝ်ႁႃၼႃႇမႃႉၸိုဝ်ႈသဵင်ၸဝ်ႈႁဝ်း သေၵမ်းတီႈၶႃႈ။
ႁႂ်ႈၶဝ်လႆႈတူၵ်းသုမ်းလႄႈၵူဝ်ႁႄသၼ်ႇဝႆယူႇ သေႇသေႇသေၵမ်းလူၺ်ႈ။ ႁႂ်ႈၶဝ်သရေႇလုလုမ်းလုမ်းလႄႈတၢႆၵႂႃႇ သေၵမ်းလူၺ်ႈ။
ႁႂ်ႈၶဝ်ႁုလွင်ႈဢၼ်ၸဝ်ႈႁဝ်းသူႇလဵဝ်ပႃးလဵဝ်ၵူၺ်း၊ ပဵၼ်ၸဝ်ႈဢၼ်ဢုပ်ႉပိူင်ႇၵႃႈၼိူဝ်လိၼ်မိူင်း တင်းသဵင်ႈတင်းလူင်ၼၼ်ႉ ပဵၼ် ထႃႇဝရႃႉၽြႃး၊ သေၵမ်းလူၺ်ႈ။
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ တီႈၶႃႈ။ ၶႃႈၸဝ်ႈႁၵ်ႉၵျွင်းပိၵ်ႈမၢၼ်ႇ ၸဝ်ႈႁဝ်းတီႈၶႃႈဢေႃႈ။
ဝိၺိၺ်ႇၶႃႈၸဝ်ႈၶႂ်ႈယူႇၵႃႈတီႈၼၼ်ႈလႄႈ၊ ၶႃႈၸဝ်ႈၸႂ်ၸပ်းၸွႆးႁႂ်ႈလႆႈယူႇၵႃႈၼႂ်းၵျွင်းပိၵ်ႈမၢၼ်ႇ ထႃႇဝရႃႉၽြႃး၊ တီႈၶႃႈဢေႃႈ။ ႁူဝ်ၸႂ်တင်းၼိူဝ်ႉလိူတ်ႈၶႃႈၸဝ်ႈႁဵတ်းၵႂၢမ်းတၢင်းဢၼ်သႂၢင်ႇဢၼ်သိူဝ်း ၵႃႈတီႈၽြႃးပဵၼ်ၸဝ်ႈဢၼ်ဢသၢၵ်ႈလိပ်း ယူႇၼၼ်ႉတီႈၶႃႈဢေႃႈ။
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၶုၼ်ႁေႃၶမ်းၵဝ်ၶႃႈ၊ၽြႃးၵဝ်ၶႃႈတီႈၶႃႈ။ ၼူၵ်ႉၸွၵ်ႇတင်းလၢႆလႆႈႁဵတ်းႁင်းလႄႈ၊ ၼူၵ်ႉဢႅၼ်ႇၽႃႉၵေႃႈလႆႈမီးႁိူၼ်းပုၼ်ႈ တူဝ်ၸဝ်ႈၵဝ်ႇသေယဝ်ႉ၊ ၶဝ်လႆႈဢွၼ်ၵၼ်ဢဝ်လုၵ်ႈဢွၼ်ႇၶဝ် တွမ်ဝႆႉၵႃႈႁိမ်းၶဵင်ႇတၢင်းလူႇၸဝ်ႈႁဝ်း ၸိူဝ်းၼၼ်ႉတီႈၶႃႈဢေႃႈ။
ၶဝ်ၸိူဝ်းဢၼ်ယူႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈႁဝ်းၼၼ်ႉမီးမၢင်ႇၵလႃႇတီႈၶႃႈဢေႃႈ။ ၶဝ်လႆႈဢွၼ်ၵၼ်ႁဵတ်းၵႂၢမ်းယွင်ႈယေႃးၸဝ်ႈႁဝ်း ယူႇတႃႇသေႇတီႈၶႃႈဢေႃႈ။
ၶဝ်ၸိူဝ်းဢၼ်ဢဝ်ၸဝ်ႈႁဝ်းႁဵတ်းႁႅင်းယူႇလႄႈ ၵႃႈၼႂ်းၸႂ်မၼ်းပႆၸွမ်းတၢင်းလူင် ၵႂႃႇၸူးလွႆ ၸိဢုၼ်ႇ၊ ၼၼ်ႉမီးမၢင်ႇၵလႃႇတီႈၶႃဢေႃႈ။
ၶဝ်ၼၼ်ႉၼႂ်းမိူဝ်ႈဢၼ်ယင်းတိုၵ်ႉပႆၽႃႇလတ်းပၢင်ႇႁူၺ်ႈ ပႃႇၶႃႇ၊ ဢၼ်ႁႅင်ႈႁွင်ၵႂႃႇယူႇၼၼ်ႉ၊ ႁႂ်ႈၵႃႈတီႈၼၼ်ႈပဵၼ်တီႈဢၼ်ၼမ်ႉဢွၵ်ႇႁူးမႃးၼမ်ၼႃႇလႄႈ၊ ၽူၼ်ႁူဝ်ပီၵေႃႈဢဝ်မၢင်ႇၵလႃႇတင်းလၢႆ ထူမ်ႈႁူမ်ႇဝႆႉတီႈၶႃႈဢေႃႈ။
ၶဝ်ၼၼ်ႉယဵင်ႈၵႂႃႇယဵင်ႈႁႅင်းထႅင်ႈတိၵ်းတိၵ်းလႄႈ၊ၶဝ်တၵ်းတေလႆႈႁၼ်ၽြႃး ဢၼ်ပဵၼ်ၽြႃးၵႃႈၼိူဝ်ၽြႃးတင်းလၢႆ ၵႃႈတီႈလွႆ ၸိဢုၼ်ႇ၊ ပုၼ်ႉတီႈၶႃႈဢေႃႈ။
ထႃႇဝရႃႉၽြႃး၊ၽြႃးပဵၼ်ၸဝ်ႈ၊ၸဝ်ႈ ဢၼၼ်ႇတႃႉတၼ်းၶူဝ်း၊ တီႈၶႃႈ။ ၶႅၼ်းတေႃႈထွမ်ႇငိၼ်းဢဝ်ၵႂၢမ်းပထၼႃႇ ၶႃႈၸဝ်ႈသေၵမ်းတီႈၶႃႈ။ ၽြႃးပဵၼ်ၸဝ်ႈမဵဝ်း ယႃႇၵုပ်ႈ၊ တီႈၶႃႈ။ ၶႅၼ်းတေႃႈထွမ်ႇဢဝ်သေၵမ်းတီႈၶႃႈ။
ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈပၼ်တၢင်းလီတီႈၶုၼ်ႁေႃၶမ်းဢၼ် ၸဝ်ႈႁဝ်းလိူၵ်ႈဝႆႉယဝ်ႉၼၼ်ႉသေၵမ်းတီႈၶႃႈ။
တၢင်းဢၼ်ယူႇသဝ်းၼႂ်းၵျွင်းပိၵ်ႈမၢၼ်ႇ ၸဝ်ႈႁဝ်းဝၼ်းၼိုင်ႈၼၼ်ႉ ယဵင်ႈၶႅၼ်းလီၼႃႇသေတၢင်းဢၼ်ယူႇတၢင်ႇတီႈတၢင်ႇလႅၼ်ႁဵင်ဝၼ်းတီႈၶႃႈဢေႃႈ။ ၶႃႈၸဝ်ႈယဵင်ႈၶႅၼ်းထုၵ်ႇၸႂ်ၵျိူၵ်ႈၸႂ် တၢင်းဢၼ်ၸုၵ်းယူႇ ၵႃႈတီႈၽၵ်းတူႁိူၼ်းၽြႃးပဵၼ်ၸဝ်ႈ ၶႃႈၸဝ်ႈၼၼ်ႉ၊ ၼႃႇသေတၢင်းဢၼ်ယူႇၼႂ်းႁိူၼ်းၵေႃႉဢၼ် ႁၢႆႉမိူၵ်ႈၼၼ်ႉတီႈၶႃႈဢေႃႈ။
ၸဝ်ႈ ထႃႇဝရႃႉၽြႃး၊ ပဵၼ်ၸဝ်ႈဢၼ်ၵုမ်ႈၶႅၼ်မႃႉၸႃႉဢိၵ်ႇတင်းၶုၼ်ႁေႃၶမ်း၊ ဢၼ်မီးမုၼ်ၽုင်းၼၼ်ႉလႄႈပၼ်ၵျေးၸူး ဢိၵ်ႇတင်းမုၼ်သရေႇတီႈႁဝ်းၶႃႈ တီႈၶႃႈဢေႃႈ။ မၼ်းၸဝ်ႈဢမ်ႇပႄႇပႅတ်ႈလွင်ႈ တၢင်းဢၼ်လီဢၼ်ငၢမ်းသေၸိူဝ်ႉသေပိူင်သေ ၵႃႈတီႈၶဝ်ၸိူဝ်းဢၼ်ၵမ်ၵျၢင်ႉသိုဝ်ႈသိုဝ်ႈ တေႃႇတေႃႇၼၼ်ႉတီႈၶႃႈ။
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ တီႈၶႃႈ။ ၶဝ်ၸိူဝ်းဢၼ်ယုမ်ႇယမ်ဢိင်ပိုင်ႈ ၸဝ်ႈႁဝ်းၼၼ်ႉမီးမၢင်ႇၵလႃႇတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းႁၵ်ႉဢဵတ်းလူ မိူင်းၸဝ်ႈႁဝ်းလႄႈ ၸဝ်ႈႁဝ်းဢဝ်မဵဝ်း ဢိသရေး၊ လႆႈၶိုၼ်း ၶိုၼ်ႈယႂ်ႇမႂ်ႇသုင်မႃးတီႈၶႃႈယဝ်ႉ။
ၸဝ်ႈႁဝ်းပွႆႇလွတ်ႈဢပျတ်ႈၵူၼ်းၸဝ်ႈႁဝ်း တင်းလၢႆလႄႈ ပွႆႇၶႂၢင်းပၼ်ၵႃႈဢၼ်ၶဝ်ၽိတ်းပိူင်ႈတင်းသဵင်ႈတင်းလူင်ၼၼ်ႉတီႈၶႃႈယဝ်ႉ။
ၸဝ်ႈႁဝ်းႁႂ်ႈၸႂ်တေႃးသႃႉၸႂ်မႆႈၸဝ်ႈႁဝ်း ယဵၼ်ၵႂႃႇသဵင်ႈသဵင်ႈလႄႈ ၸဝ်ႈႁဝ်းယိူၼ်ႉၸႂ်တေႃးသႃႉၸႂ်မႆႈသႆႈလိူတ်ႇ ၼၼ်ႉတီႈၶႃႈယဝ်ႉ။
ၽြႃးပဵၼ်ၸဝ်ႈဢၼ်ပဵၼ်ၸဝ်ႈၵႄႇၶျွတ်ႈ ဢဝ်ႁဝ်းၶႃႈ။ ၶႅၼ်းတေႃႈၶိုၼ်းတႄႇၶိုၼ်းတင်ႈၶႃႈၸဝ်ႈ ႁဝ်းၶဝ်သေလႄႈ ၶႅၼ်းတေႃႈႁႂ်ႈတေႃးသႃႉဢၼ်ၸဝ်ႈႁဝ်းယၢမ်ႈဢွၵ်ႇတေႃႇၶႃႈၸဝ်ႈႁဝ်းၶဝ်ၼၼ်ႉ၊ ထၢတ်ႇယဵၼ်သေၵမ်းတီႈၶႃႈ။
ၸဝ်ႈႁဝ်းတၵ်းၸႂ်မႆႈၶႂ်ႈၸႃႉတေႃႇ ၶႃႈၸဝ်ႈႁဝ်းၶဝ်ယူႇသေႇသေႇ တီႈၶႃႈႁိုဝ်း။ တေႃးသႃႉၸဝ်ႈႁဝ်းတေဢမ်ႇယဵၼ် သေပွၵ်ႈယဝ်ႉတီႈၶႃႈႁိုဝ်း။
ၸဝ်ႈႁဝ်းတၵ်းသမ်ႉႁႂ်ႈၶႃႈၸဝ်ႈႁဝ်းၶဝ်ၶိုၼ်းမီးဢဵၼ်မီးႁႅင်းမႃးလႄႈ၊ ႁႂ်ႈၵူၼ်းၸဝ်ႈႁဝ်းတင်းလၢႆလႆႈၶိုၼ်း ၸူမ်းသိူဝ်းမူၼ်ႈပျေႃႇၼႂ်းၸဝ်ႈႁဝ်းယူႇ ဢမ်ႇၸႂ်ႈတီႈၶႃႈႁိုဝ်း။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈ ၼႄပျႃးမႅတ်ႈတႃႇၵရုၼႃႇၸဝ်ႈႁဝ်း ၵႃႈတီႈၶႃႈၸဝ်ႈႁဝ်းၶဝ်လႄႈ၊ ၶႅၼ်းတေႃႈပၼ်ၵျေးၸူးတၢင်းဢၼ်ၵႄႇၶျွတ်ႈဢဝ်တီႈၶႃႈၸဝ်ႈႁဝ်းၶဝ်သေၵမ်းတီႈၶႃႈ။
ႁႂ်ႈၵဝ်လႆႈထွမ်ႇငိၼ်းၵႂၢမ်း ထႃႇဝရႃႉၽြႃး၊ ၽြႃးပဵၼ်ၸဝ်ႈ တၵ်းမီးဢမိင်ႉၸိူဝ်ႉၼင်ႇႁိုဝ်ၼၼ်ႉ သေၵမ်းလူၺ်ႈ။ လွင်ႈမၼ်းၸမ်ႉ၊မၼ်းၸဝ်ႈတၵ်းမီးဢမိင်ႉတၢင်းဢၼ်ၼိမ်သိမ်ႇတီႈၵူၼ်းမၼ်းၸဝ်ႈ ဢၼ်ပဵၼ်တီႈၵူၼ်းဢၼ်မူတ်းၸၢင်ႇၸဝ်ႈ ၸိူဝ်းဢၼ်ဢဝ်ႁူဝ်ၸႂ်ၶဝ်ဝၢႆႇၸူးတီႈ မၼ်းၸဝ်ႈလႂ်ၸိူဝ်းၼၼ်ႉလူးၵွၼ်ႇဢေႃႈ။
ၵျေးၸူးတၢင်းဢၼ်မၼ်းၸဝ်ႈ ၵႄႇၶျွတ်ႈဢဝ်ၼၼ်ႉ ႁွတ်ႈထိုင်မႃးၵႃႈတီႈၶဝ်ၸိူဝ်းဢၼ် ရူဝ်ႇသေႇၵူဝ်ယမ်မၼ်းၸဝ်ႈၼၼ်ႉသေလႄႈ၊ ႁႂ်ႈမုၼ်ၽုင်းမၼ်းၸဝ်ႈၵိင်းဝၢပ်ႈယူႇၵႃႈၼႂ်းမိူင်းႁဝ်းၶႃႈဢမၢၼ်ႇၶၼ်ပဵၼ်ယဝ်ႉ။
မႅတ်ႈတႃႇၵရုၼႃႇဢိၵ်ႇတင်းသဵတ်ႈၸႃႇ တၵ်းႁူပ်ႉၶွႆႈၵၼ်ယဝ်ႉ။ တၢင်းသိုဝ်ႈတေႃႇဢိၵ်ႇတင်းတၢင်းၼိမ် တၵ်းၵွတ်ႇၵဵဝ်ႈၵၼ်ယဝ်ႉ။
ၵတိသဵတ်ႈၸႃႇၵူၼ်းတၵ်းလုၵ်ႉသေၵႃႈတီႈ လိၼ်မိူင်းၶိုၼ်ႈလႄႈ၊ တၢင်းဢၼ်သိုဝ်ႈတေႃႇၽြႃးပဵၼ်ၸဝ်ႈ တၵ်းလူင်းသေၵႃႈၼိူဝ်ၽႃႉၵၢင်ႁၢဝ်လႄႈ ၵူမ်ႈတူၺ်းယဝ်ႉ။
ထႃႇဝရႃႉၽြႃး၊ တၵ်းပၼ်ႁႂ်ႈႁဝ်း လႆႈလီလႆႈပဵၼ်လႄႈ လိၼ်ႁဝ်းတၵ်းႁႂ်ႈမၢၵ်ႇၶဝ်ႈႁူင်းၼမ်ႉ ဢွၵ်ႇမႃးယဝ်ႉ။
တၢင်းသိုဝ်ႈတေႃႇတၵ်းၵႂႃႇပႃႈၼႃႈ ထႃႇဝရႃႉၽြႃး၊ လႄႈ ႁဵတ်းႁႂ်ႈႁွႆးတိၼ်မၼ်းၸဝ်ႈပဵၼ်သဵၼ်ႈတၢင်း ဢၼ်လီပႆၵႂႃႇၸွမ်းၼၼ်ႉဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈ ႁေႈႁူၸဝ်ႈႁဝ်းၸူးလႄႈၶိုၼ်းဢိူဝ် ၶႃႈၸဝ်ႈသေၵမ်းတီႈၶႃႈ။ ၶႃႈၸဝ်ႈပဵၼ်ဢၼ်ယၢၵ်ႈၽၢၼ်လႄႈ ၸုတ်ႈလုတ်ႈတီႈၶႃႈဢေႃႈ။
ၸဝ်ႈႁဝ်းၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈႁႂ်ႈလွတ်ႈသေတၢင်းတၢႆ၊ ၵွပ်ႈပိူဝ်ႈၶႃႈၸဝ်ႈပႂ်ႉသဵတ်ႈၸႃႇတီႈၸဝ်ႈႁဝ်း ယူႇၼၼ်ႉသေလႄႈ၊ ၶႅၼ်းတေႃႈၵႄႇသႄႇၶျွတ်ႈဢဝ် ၵွပ်ႈပိူဝ်ႈၶႃႈၸဝ်ႈပဵၼ်ၶႃႈဢၼ်ယုမ်ႇမၢတ်ႈ ဢိင်ပိုင်ႈၸဝ်ႈႁဝ်းယူႇၼၼ်ႉသေၵမ်းတီႈၶႃႈ။
ၸဝ်ႈႁဝ်းပဵၼ်ၽြႃးပဵၼ်ၸဝ်ႈၶႃႈၸဝ်ႈလႄႈ၊ ၶႅၼ်းတေႃႈဢဵတ်းလူၸွႆႈထႅမ်ၶႃႈၸဝ်ႈ၊ ၵွပ်ႈပိူဝ်ႈၶႃႈၸဝ်ႈသူးတွင်းတီႈၸဝ်ႈႁဝ်း ယူႇတင်းဝၼ်းတင်းဝၼ်းၼၼ်ႉသေၵမ်းတီႈၶႃႈ။
ၸဝ်ႈၽြႃးတီႈၶႃႈ။ ၶႅၼ်းတေႃႈႁႂ်ႈၶႃႈၸဝ်ႈႁဝ်း လႆႈၸူမ်းသိူဝ်းယူႇ၊ ၵွပ်ႈပိူဝ်ႈၵႂၢမ်းသူးတွင်းၶႃႈၸဝ်ႈၶိုၼ်ႈၸူး ၸဝ်ႈႁဝ်းယူႇၼၼ်ႉသေၵမ်းတီႈၶႃႈ။
ၸဝ်ႈႁဝ်းမီးၸႂ်လီၸႂ်ဝၢၼ်တီႈၶႃႈၸဝ်ႈႁဝ်းၶဝ်လႄႈ ဢဝ်တင်းၵရုၼႃႇမႅတ်ႈတႃႇၸဝ်ႈႁဝ်းၼၼ်ႉ ပွႆႇလွတ်ႈဢပျတ်ႈၶဝ်ၸိူဝ်းဢၼ်သူးတွင်း တီႈၸဝ်ႈႁဝ်းယူႇတင်းသဵင်ႈတင်းလူင် ၼၼ်ႉတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈထွမ်ႇဢဝ်ၵႂၢမ်းသူးတွင်းၶႃႈၸဝ်ႈလႄႈ ထွမ်ႇငိၼ်းသဵင်ဢၼ်ၶႃႈၸဝ်ႈႁွင်ႉႁႃပုၼ်ႈတၢင်းဢၼ်ၸွႆႈဢၼ်ထႅမ်ၼၼ်ႉသေၵမ်းတီႈၶႃႈ။
ၶႃႈၸဝ်ႈႁွင်ႉၵၢဝ်ႇတီႈၸဝ်ႈႁဝ်းယၢမ်းမိူဝ်ႈဢၼ်ထူပ်းၽေးၼၼ်ႉ၊ ၵွပ်ႈပိူဝ်ႈၸပ်းႁဝ်းၶိုၼ်းဢိူဝ်ၶႃႈၸဝ်ႈၼၼ်ႉ တီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၵႃႈၼႂ်းၽြႃးတင်းလၢႆ၊ၽြႃးဢၼ်မိူၼ်ၸဝ်ႈႁဝ်းၼၼ်ႉ ဢမ်ႇမီးတီႈၶႃႈ။ တၢင်းႁဵတ်းဢၼ်မိူၼ်တၢင်းႁဵတ်းၸဝ်ႈႁဝ်းၼၼ်ႉၵေႃႈဢမ်ႇမီးတီႈၶႃႈ။
မဵဝ်းၵူၼ်းၵႃႈဢၼ်ၸဝ်ႈႁဝ်းၽၢၼ်ႇသၢင်း ႁဵတ်းပဵၼ်ဝႆႉၼၼ်ႉ တၵ်းဢွၼ်ၵၼ်မႃးၶုပ်ႉမူပ်ႇၵႃႈတီႈၽၢႆႇၼႃႈ ၸဝ်ႈႁဝ်းလႄႈ ၶဝ်တၵ်းဢွၼ်ၵၼ်ယွင်ႈယေႃးတၢင်းဢၼ်ယႂ်ႇမျၢတ်ႈၸဝ်ႈႁဝ်းၼၼ်ႉတီႈၶႃႈဢေႃႈ။
ၸဝ်ႈႁဝ်းပဵၼ်ဢၼ်ယႂ်ႇမျၢတ်ႈၼႃႇလႄႈႁဵတ်းလွင်ႈတၢင်းဢၼ်လီဢၢမ်းတင်းလၢႆတီႈၶႃႈဢေႃႈ။ ၸဝ်ႈႁဝ်းသူႇလဵဝ်ပႃးလဵဝ်ၵူၺ်းပဵၼ် ၽြႃးပဵၼ်ၸဝ်ႈတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈသွၼ်ပၼ်လွင်ႈတၢင်းဢၼ်ၸဝ်ႈႁဝ်းမီးဢလူဝ်ႇ၊ ႁႂ်ႈၶႃႈၸဝ်ႈႁဵတ်းဢၼ်လႂ်ၼၼ်ႉသေၵမ်းတီႈၶႃႈ။ ၶႃႈၸဝ်ႈတၵ်းပႃးတင်းသဵတ်ႈၸႃႇလႄႈၵမ်ၵျၢင်ႉၸွမ်းတီႈၶႃႈဢေႃႈ။ ၶႅၼ်းတေႃႈႁႂ်ႈႁူဝ်ၸႂ်ၶႃႈၸဝ်ႈၽွမ်ႉၵၼ်ႁႂ်ႈၶႃႈၸဝ်ႈရူဝ်ႇသေႇၵူဝ်ယမ်ၸဝ်ႈႁဝ်း သေၵမ်းတီႈၶႃႈ။
ၸဝ်ႈၽြႃးပဵၼ်ၸဝ်ႈၵဝ်ၶႃႈတီႈၶႃႈ။ ၶႃႈၸဝ်ႈတၵ်းပႃးၸႂ်ပႃးၶေႃးယွင်ႈယေႃးၸဝ်ႈႁဝ်းလႄႈ၊ ၶႃႈၸဝ်ႈတၵ်းယုၵ်ႉယွင်ႈၼႃႇမႃႉၸိုဝ်ႈသဵင် ၸဝ်ႈႁဝ်းသေႇသေႇတီႈၶႃႈဢေႃႈ။
မႅတ်ႈတႃႇၵရုၼႃႇၸဝ်ႈႁဝ်းယႂ်ႇၼႃႇၼိူဝ် ၶႃႈၸဝ်ႈတီႈၶႃႈဢေႃႈ။ ၸဝ်ႈႁဝ်းၵႄႇသႄႇၶျွတ်ႈဢဝ်ၶႃႈၸဝ်ႈဢွၵ်ႇသေ ၵႃႈၼႂ်းမိူင်းမရၼႃႉဢၼ်လိုၵ်ႉၼႃႇၼၼ်ႉ တီႈၶႃႈဢေႃႈ။
ၽြႃးပဵၼ်ၸဝ်ႈတီႈၶႃႈ။ ၶဝ်ၸိူဝ်းဢၼ် မႃႇၼႃႉၸႂ်သုင်ၼၼ်ႉ ဢွၼ်ၵၼ်ႁဵတ်းၶတ်းၵၼ်တင်းၶႃႈၸဝ်ႈလႄႈ၊ မုၵ်ႉၵူၼ်းၸိူဝ်းၵူၼ်းဢၼ်ၵျၢမ်းထၢမ်းၼႃႇၼၼ်ႉၵျၢမ်ႇႁႃဢဝ်ၶႃႈၸဝ်ႈတၢႆတီႈၶႃႈဢေႃႈ။ ၶဝ်ၸိူဝ်းၼၼ်ႉပဵၼ်ၵူၼ်းဢၼ်ဢမ်ႇဢဝ်ၸဝ်ႈႁဝ်းဝႆႉသိုဝ်ႈၼႃႈတႂ်ႈတႃၶဝ်ဢေႃႈ။
ၸဝ်ႈၽြႃးတီႈၶႃႈ။ ၸဝ်ႈႁဝ်းၸိုင်၊ပဵၼ် ၽြႃးပဵၼ်ၸဝ်ႈဢၼ်မီးၵရုၼႃႇဢိၵ်ႇတင်းမႅတ်ႈတႃႇသေလႄႈ၊ မီးၸႂ်ဢၼ်ယိူၼ်ႉၶၢမ်ႇတင်းၸႂ်ၵရုၼႃႇ ဢိၵ်ႇတင်းသဵတ်ႈၸႃႇတႃႇသေႇ ဢမ်ႇထၢတ်ႇတီႈၶႃႈဢေႃႈ။
ၶႅၼ်းတေႃႈဝၢႆႇၼႃႈတေႃႇၶႃႈၸဝ်ႈလႄႈ ဢဵတ်းလူၸွႆႈထႅမ်ၶႃႈၸဝ်ႈယူႇ၊ပၼ်ဢဵၼ်ပၼ်ႁႅင်းတီႈၶႃႈၸဝ်ႈလႄႈ၊ ၵႄႇသႄႇၶျွတ်ႈဢဝ်လုၵ်ႈၸၢႆးမႄႈယိင်းဢၼ်ပဵၼ်ၶႃႈၸဝ်ႈႁဝ်းၼၼ်ႉသေၵမ်းတီႈၶႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈ ႁဵတ်းၼႄသၢၵ်ႈသေႇတၢင်းဢၼ်ၸဝ်ႈႁဝ်းမီးၸႂ်လီၸႂ်ဝၢၼ်တီႈၶႃႈၸဝ်ႈ ႁႂ်ႈၶဝ်ၸိူဝ်းဢၼ်ၸင်းၶႃႈၸဝ်ႈၼၼ်ႉလႆႈ ႁၼ်လႄႈဢူၵ်းဢၢႆ ၼႂ်းမိူဝ်ႈဢၼ်ၶဝ်ႈလႆႈႁၼ်တၢင်းဢၼ်ၸဝ်ႈႁဝ်း ၸွႆႈထႅမ်ၶႃႈၸဝ်ႈလႄႈ ပၼ်ၵတ်းယဵၼ်ၶျၢမ်းသႃႇၼၼ်ႉသေၵမ်းတီႈၶႃႈ။
ထႃႇဝရႃႉၽြႃး၊ တႄႇႁဵတ်းဝဵင်းမၼ်းၸဝ်ႈၵႃႈၼိူဝ်လွႆဢၼ်မူတ်းၸၢင်ႇၼၼ်ႉဢေႃႈ။
မၼ်းၸဝ်ႈယဵင်ႈၶႅၼ်းႁၵ်ႉဝဵင်းလူင် ယေႇရုသလႅမ်ႇ၊ ၼႃႇသေတၢင်ႇတီႈတၢင်ႇလႅၼ်တင်းလၢႆ ၼႂ်းမိူင်း ဢိသရေး၊ ဢေႃႈ။
ဝဵင်းလူင်ၽြႃးပဵၼ်ၸဝ်ႈ႟။ မီးၵႂၢမ်းဢၼ်မီးမုၼ်သရေႇဢၼ်လၢတ်ႈၸၢပ်ႈ လူၺ်ႈလွင်ႈမႂ်းဝႆႉၼၼ်ႉယူႇဢေႃႈ။
“ၼႂ်းမိူဝ်ႈဢၼ်ၵဝ်ဢဝ်ၸရၢင်းမဵဝ်းၵူၼ်းဢၼ် ထွမ်ႇဢဝ်ၵဝ်ၼၼ်ႉၸိုင်၊ ၵဝ်တၵ်းဢဝ်မိူင်း ဢေးၵျိပ်ႉ၊ တင်းမိူင်း ပႃႇပုလုၼ်ႇ၊ သႂ်ႇပႃးဢေႃႈ။ ၵႃႈၼႂ်းၸရၢင်းၵူၼ်းဢၼ်ယူႇသဝ်းၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉၸမ်ႉ၊ ၵဝ်တၵ်းၼပ်ႉဢၢၼ်ႇပႃးၵူၼ်းမဵဝ်း ၽိလိတ်ႉတိ၊ ၵူၼ်းမိူင်း တုရု၊ ၵူၼ်းမိူင်း ဢေႇတီႇဢူဝ်းပီးယႃး၊ ၸိူဝ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵႂၢမ်းဢၼ်လၢတ်ႈၸၢပ်ႈလူၺ်ႈလွင်ႈ ဝဵင်း ၸိဢုၼ်ႇ၊ ၸမ်ႉ၊ “မဵဝ်းၵူၼ်းတင်းသဵင်ႈတင်းလူင်ပဵၼ် ၵူၼ်းဝဵင်းၼၼ်ႉလႄႈ၊ ၽြႃးဢၼ်သုင်ၼႃႇသေပိူၼ်ႈၼၼ်ႉ ႁဵတ်းႁႂ်ႈဝဵင်းၼၼ်ႉ၊မၼ်ႈၶိူင်ႇဝႆႉယဝ်ႉ၊” ဝႃႈၼင်ႇၼႆဢေႃႈ။
“ ထႃႇဝရႃႉၽြႃး၊ တၵ်းတႅမ်ႈၸရၢင်းၸိုဝ်ႈသဵင်ၵူၼ်းတင်းလၢႆသေလႄႈ ဢဝ်ၶဝ်တင်းသဵင်ႈတင်းလူင် ၶဝ်ႈပႃးပဵၼ်ၵူၼ်းဝဵင်း ယေႇရုသလႅမ်ႇ၊ ဢေႃႈ၊” ဝႃႈၼင်ႇၼႆဢေႃႈ။
ၶဝ်ဢွၼ်ၵၼ်ၵႃႈဝႅၼ်လႄႈႁဵတ်းၵႂၢမ်းဝႃႈ၊ “ဝဵင်း ၸိဢုၼ်ႇ၊ ပဵၼ်တီႈဢၼ်တၢင်းလီ မၢင်ႇၵလႃႇလႆဢွၵ်ႇမႃးၸူးႁဝ်းဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ ၶႃႈၸဝ်ႈႁွင်ႉၵၢဝ်ႇပုၼ်ႈတၢင်းဢၼ်ၸွႆႈထႅမ် ၶိင်ႇၵၢင်ဝၼ်းတီႈၶႃႈလႄႈ၊ သမ်ႉသႅၼ်ႇႁွင်ႉၵႃႈတီႈၽၢႆႇၼႃႈ ၸဝ်ႈႁဝ်းၶိင်ႇၵၢင်ၶိုၼ်းတီႈၶႃႈဢေႃႈ။
ႁႂ်ႈပထၼႃႇၶႃႈၸဝ်ႈႁွတ်ႈထိုင်ၵႃႈတီႈၽၢႆႇၼႃႈၸဝ်ႈႁဝ်းသေၵမ်းလူၺ်ႈတီႈၶႃႈ။ ၶႅၼ်းတေႃႈႁေႈႁူၸဝ်ႈႁဝ်းၸူးသဵင်ဢၼ်ၶႃႈၸဝ်ႈႁွင်ႉၵၢဝ်ႇၼၼ်ႉသေၵမ်းတီႈၶႃႈ။
လွင်ႈမၼ်းၸမ်ႉ၊ၶႃႈၸဝ်ႈတူၵ်းၸူမ်ၼႂ်း တုၵ်ႉၶႃႉယူႇလႄႈ ဢသၢၵ်ႈၶႃႈၸဝ်ႈတၵ်းႁွတ်ႈထိုင်ႁိမ်း မိူင်းမရၼႃႉတီႈၶႃႈဢေႃႈ။
ၶႃႈၸဝ်ႈလႆႈပဵၼ်ၵေႃႉဢၼ်တၵ်းတၢႆၵႂႃႇ မိူၼ်မိူၼ်ၵၼ်တင်းပိူၼ်ႈ တၢင်ႇၵေႃႉၼၼ်ႉလႄႈ ပဵၼ်ၵေႃႉဢၼ်ႁႅင်းသဵင်ႈၵႂႃႇၼၼ်ႉ တီႈၶႃႈဢေႃႈ။
ၶႃႈၸဝ်ႈလႆႈၶၢမ်ႇတၢင်းဢၼ်ၸုၼ်ႉပႅတ်ႈဝႆႉ ၼႂ်းၵႄႈတူဝ်တၢႆတင်းလၢႆ၊ မိူၼ်ၵေႃႉဢၼ်လႆႈၶၢမ်ႇတၢင်းတၢႆလႄႈ ၼွၼ်းယူႇၵႃႈတီႈၶုမ်ပႃႇႁဵဝ်ႈ၊ ဢၼ်ဝႃႈၵေႃႉဢၼ်ၸဝ်ႈႁဝ်းလူင်လိုမ်းပႅတ်ႈ လုမ်းလုမ်းလႄႈ ၵႆယၢၼ်ၵၼ်တင်းမိုဝ်းၸဝ်ႈႁဝ်းၼၼ်ႉ တီႈၶႃႈဢေႃႈ။
ၸဝ်ႈႁဝ်းဢဝ်ၶႃႈၸဝ်ႈထိမ်ႈပႅတ်ႈၵႃႈၼႂ်း ပိုၼ်ႉၶုမ်ဢၼ်လိုၵ်ႉၼႃႇ၊ ၵႃႈတီႈဢၼ်လပ်းသိင်ႇၵႃႈၼႂ်းၶုမ်ဢၼ် လိုၵ်ႉၼႃႇသေပိူၼ်ႈၼၼ်ႉတီႈၶႃႈယဝ်ႉ။
တၢင်းဢၼ်ၸဝ်ႈႁဝ်းၸီႇယၢင်ႇပၼ်တၢမ်ႇဢပျတ်ႈၼၼ်ႉတၢင်ႇတဵင်ၶႃႈၸဝ်ႈယူႇလႄႈ ၶႃႈၸဝ်ႈလႆႈၶၢမ်ႇတၢင်းဢၼ်တူၵ်းၸူမ်ယူႇ ၵႃႈတႂ်ႈလႅင်းၼမ်ႉၼၼ်ႉ။
ၸဝ်ႈႁဝ်းႁႂ်ႈၵေႃႉဢၼ်မိုတ်ႈၵိုဝ်းၵၼ်တင်းၶႃႈၸဝ်ႈၼၼ်ႉပႄႇပႅတ်ႈမၢင်ပႅတ်ႈၶႃႈၸဝ်ႈလႄႈ ၸဝ်ႈႁဝ်းႁႂ်ႈၶႃႈၸဝ်ႈပဵၼ်လွင်ႈဢၼ်လီႁင်ႈဢဵတ်ႇသဵတ်ႇတီႈၶဝ်ၼၼ်ႉတီႈၶႃႈယဝ်ႉ။ ၶႃႈၸဝ်ႈလႆႈၶၢမ်ႇတၢင်းဢၼ်ၶျုၵ်ႈဝႆႉယဝ်ႉလႄႈ၊ဢမ်ႇမီးတၢင်းဢၼ်လွတ်ႈလႆႈတီႈၶႃႈ။
ႁႅင်းတႃၶႃႈၸဝ်ႈဢူၼ်ႈၵႂႃႇၵွပ်ႈပိူဝ်ႈလႆႈၶၢမ်ႇ တုၵ်ႉၶႃႉတီႈၶႃႈဢေႃႈ။ ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈႁွင်ႉၵၢဝ်ႇတီႈၸဝ်ႈႁဝ်းယူႇၵူႈဝၼ်းလႄႈ ၶႃႈၸဝ်ႈႁွမ်းမိုဝ်းသူးတွင်းတီႈၸဝ်ႈႁဝ်းယူႇ တီႈၶႃႈဢေႃႈ။
ၸဝ်ႈႁဝ်းႁဵတ်းဢၼ်လၢၵ်ႇဢၼ်လၢႆးၼႄ ၵူၼ်းတၢႆတင်းလၢႆတီႈၶႃႈႁိုဝ်း။ ၸွင်ႇၶဝ်ၼၼ်ႉလုၵ်ႉမႃးလႄႈယွင်ႈယေႃး ၸဝ်ႈႁဝ်းတီႈၶႃႈႁိုဝ်း။
ၵႃႈတီႈပႃႇႁဵဝ်ႈၼၼ်ႉၸွင်ႇမီးတၢင်းဢၼ်လၢတ်ႈလွင်ႈမႅတ်ႈတႃႇၵရုၼႃႇၸဝ်ႈႁဝ်းတီႈၶႃႈႁိုဝ်း။ ၵႃႈတီႈဢၼ်ၸၢင်ႈလုၸၢင်ႈလႅဝ်ၼၼ်ႉၵေႃႈ ၸွင်ႇမီးတၢင်းဢၼ်လၢတ်ႈလွင်ႈသဵတ်ႈၸႃႇ ၸဝ်ႈႁဝ်းတီႈၶႃႈႁိုဝ်း။
ၵႃႈတီႈဢၼ်လပ်းသိင်ႇၼၼ်ႉၸွင်ႇတၵ်းႁၼ် တၢင်းဢၼ်ၸဝ်ႈႁဝ်းႁဵတ်းဢၼ်လၢၵ်ႇ ဢၼ်လၢႆးၼၼ်ႉလႆႈတီႈၶႃႈႁိုဝ်း။ ၵႃႈၼႂ်းမိူင်းဢၼ်ၽြႃးပဵၼ်ၸဝ်ႈပႄႇပႅတ်ႈယဝ်ႉၼၼ်ႉ ၸွင်ႇတၵ်းႁၼ်တၢင်းဢၼ်လီဢၼ်ငၢမ်း ၸဝ်ႈႁဝ်းလႆႈတီႈၶႃႈႁိုဝ်း။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈႁွင်ႉၵၢဝ်ႇတီႈၸဝ်ႈႁဝ်းပုၼ်ႈတၢင်းဢၼ်ၸွႆႈထႅမ်လႄႈ ၶႃႈၸဝ်ႈသူးတွင်းတီႈၸဝ်ႈႁဝ်းယူႇၵူႈၼႂ်ၵူႈၼႂ် တီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ႁဵတ်းသင်လႄႈၸဝ်ႈႁဝ်းပႄႇပႅတ်ႈၶႃႈၸဝ်ႈတီႈၶႃႈ။ ႁဵတ်းသင်လႄႈၸဝ်ႈႁဝ်းဝၢႆႇၼႃႈပႅတ်ႈ ၶႃႈၸဝ်ႈတီႈၶႃႈ။
ၶႃႈၸဝ်ႈထူပ်းၽေးတုၵ်ႉၶႃႉယူႇထၢၼ်ႈပေႃး ၸမ်တၵ်းတၢႆယူႇ ၸဵမ်မိူဝ်ႈယင်းၼုမ်ႇၼၼ်ႉတီႈၶႃႈဢေႃႈ။ ၶႃႈၸဝ်ႈလႆႈၶၢမ်ႇၽေးဢၼ်ၸဝ်ႈႁဝ်းပၼ်တၢမ်ႇၼၼ်ႉလႄႈယၢပ်ႇၸႂ်ယုင်ႈၸႂ်တီႈၶႃႈဢေႃႈ။
တၢင်းဢၼ်ၸဝ်ႈႁဝ်းၸီႇယၢင်ႇပၼ်တၢမ်ႇၼၼ်ႉထူမ်ႈႁူဝ်ၶႃႈၸဝ်ႈဝႆႉလႄႈ ၽေးဢၼ်ၸဝ်ႈႁဝ်းတိုၵ်းတေႃးႁႅင်းၼႃႇၸိူဝ်းၼၼ်ႉယႃႉၶႃႈၸဝ်ႈပႅတ်ႈတီႈၶႃႈဢေႃႈ။
ၽေးၸိူဝ်းၼၼ်ႉလွမ်ႉႁွပ်ႈၶႃႈၸဝ်ႈဝႆႉ တင်းဝၼ်းတင်းဝၼ်းလႄႈ ၶဝ်ၽွမ်ႉၵၼ်ၶျုၵ်ႈၶႃႈၸဝ်ႈဝႆႉၵူႈၽၢႆႇ ၵူႈပႃႈတီႈၶႃႈဢေႃႈ။
ၸဝ်ႈႁဝ်းႁႂ်ႈၵေႃႉသႄႈဢၼ်ၸမ်ၸႂ်ၶႃႈၸဝ်ႈၸိူဝ်းၼၼ်ႉပႄႇပႅတ်ႈမၢင်ပႅတ်ႈၶႃႈၸဝ်ႈတီႈၶႃႈလႄႈ၊ ၶႃႈၸဝ်ႈၵူၺ်းလႆႈမိုတ်ႈၵိုဝ်းၵၼ်တင်းတၢင်းဢၼ်လပ်းသိင်ႇတီႈၶႃႈယဝ်ႉ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈတၵ်း ႁဵတ်းၵႂၢမ်းလွင်ႈမႅတ်ႈတႃႇၵရုၼႃႇၸဝ်ႈႁဝ်း ယူႇသေႇသေႇ ၶႃႈၸဝ်ႈတၵ်းၽုၺ်ႇမွၵ်ႇလၢတ်ႈၼႄ လွင်ႈသဵတ်ႈၸႃႇၸဝ်ႈႁဝ်း၊ တီႈၸိူဝ်ႉၶိူဝ်းသိုပ်ႇသိုပ်ႇတၢမ်တၢမ် တီႈၶႃႈဢေႃႈ။
ၶႃႈၸဝ်ႈႁုလွင်ႈဢၼ်မႅတ်ႈတႃႇၵရုၼႃႇၸဝ်ႈႁဝ်းတႄႇယူႇသေႇသေႇလႄႈ သဵတ်ႈၸႃႇၸဝ်ႈႁဝ်းမၼ်ႈၶိူင်ႇယူႇမိူၼ်ၸိူဝ်ႉၼင်ႇတွင်ႉၽႃႉတီႈၶႃႈဢေႃႈ။
ၸဝ်ႈႁဝ်းမီးဢမိင်ႉဝႃႈ၊ “ၵဝ်ႁဵတ်းပတိၺိၺ်ႇတြႃး လူၺ်ႈၵၼ်တင်းၵေႃႉဢၼ်ၵဝ်လိူၵ်ႈဢဝ်ဝႆႉၼၼ်ႉလႄႈ ႁဵတ်းၵတိသဵတ်ႈၸႃႇဝႆႉတီႈ ၶႃႈၵဝ် တႃႇဝိတ်ႈ၊ လႄႈဝႃႈ၊
‘ၵဝ်တၵ်းႁဵတ်းႁႂ်ႈၸိူဝ်ႉၶိူဝ်းမႂ်းလႆႈပဵၼ်ၶုၼ်ႁေႃၶမ်းတႃႇသေႇဢမ်ႇထၢတ်ႇလႄႈ တၵ်းႁႂ်ႈၶိူဝ်းၶုၼ်မႂ်းမၼ်ႈယူႇသိုပ်ႇသိုပ်ႇ တၢမ်တၢမ်ဢေႃႈ၊’ ဝႃႈၼႆဝႆႉယဝ်ႉ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ တီႈၶႃႈ။ ၽႃႉၵၢင်ႁၢဝ်ႁဵတ်းၵႂၢမ်းယွင်ႈယေႃး လွင်ႈတၢင်းဢၼ်လီဢၢမ်း၊ ဢၼ်ၸဝ်ႈႁဝ်းႁဵတ်းလႄႈ ၵူၼ်းမူတ်းၸၢင်ႇတင်းလၢႆႁဵတ်းၵႂၢမ်းလွင်ႈ သဵတ်ႈၸႃႇၸဝ်ႈႁဝ်းၼၼ်ႉတီႈၶႃႈဢေႃႈ။
ၵႃႈၼႂ်းၽႃႉၵၢင်ႁၢဝ်ၼၼ်ႉၽူႈလႂ်တၵ်းၶေႉၵၼ်တႅၵ်ႈၵၼ်တင်း ထႃႇဝရႃႉၽြႃး၊ လႆႈ။ တမၢၼ်ႇၵၢင်ႁၢဝ်တင်းလၢႆၼၼ်ႉၽူႈလႂ်တၵ်းမိူၼ်ၵၼ်တင်း ထႃႇဝရႃႉၽြႃး၊ လႆႈ။
ၽြႃးပဵၼ်ၸဝ်ႈပဵၼ်တီႈဢၼ်လီၵူဝ်လီႁႄ ၼႃႇလူင်လၢင် ၵႃႈၼႂ်းပရိၵ်ႈသၢတ်ႈၵူၼ်းဢၼ်မူတ်းၸၢင်ႇ တင်းလၢႆလႄႈ၊ ပဵၼ်တီႈဢၼ်လီရူဝ်ႇသေႇၵူဝ်ယမ် ၼႃႇသေ ၶဝ်ၸိူဝ်းဢၼ်ယူႇႁွပ်ႈမၼ်းၸဝ်ႈ တင်းသဵင်ႈတင်းလူင်ၼၼ်ႉဢေႃႈ။
ထႃႇဝရႃႉၽြႃး၊ၽြႃးပဵၼ်ၸဝ်ႈ၊ၸဝ်ႈ ဢၼၼ်ႇတႃႉတၼ်းၶူဝ်း၊ တီႈၶႃႈ။ ၽူႈလႂ်တၵ်းႁႅင်းယႂ်ႇၼႃႇမိူၼ်ၸိူဝ်ႉၼင်ႇၸဝ်ႈႁဝ်းလႆႈတီႈၶႃႈ။ ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းမီးသဵတ်ႈၸႃႇၵႃႈၼႂ်းလွင်ႈတၢင်းၵူႈၸိူဝ်ႉၵူႈမဵဝ်းတီႈၶႃႈဢေႃႈ။
ၸဝ်ႈႁဝ်းဢုပ်ႉပိူင်ႇၵႃႈၼိူဝ်ပၢင်ႇလၢႆႇဢၼ်ႁႅင်းတၼ်းၶူဝ်းယႂ်ႇၼႃႇၼၼ်ႉလႄႈ ၸဝ်ႈႁဝ်းႁႂ်ႈလႅင်းၼမ်ႉပိူပ်ႈၼမ်ႉဢၼ်တေႃးသႃႉ ယႂ်ႇၼႃႇၼၼ်ႉထၢတ်ႇယဵၼ်ၵႂႃႇတီႈၶႃႈဢေႃႈ။
ၸဝ်ႈႁဝ်းႁၵ်းၶေႃးသတ်ႉတဝႃႇလူင် ရႃႇၶပ်ႉ၊ ၼၼ်ႉတၢႆလႄႈ ၸဝ်ႈႁဝ်းဢဝ်တင်းႁႅင်းတၼ်းၶူဝ်းၸဝ်ႈႁဝ်း တိုၵ်းပႄႉရၢၼ်ႇသူႇၸဝ်ႈႁဝ်း တင်းလၢႆပႅတ်ႈတီႈၶႃႈဢေႃႈ။
ၽႃႉၵၢင်ႁၢဝ်ပဵၼ်ဢုၵ်ႉၸႃႇၸဝ်ႈႁဝ်းဢေႃႈ။ လိၼ်မိူင်းၵေႃႈပဵၼ်ဢုၵ်ႉၸႃႇၸဝ်ႈႁဝ်းဢေႃႈ။ ၸဝ်ႈႁဝ်းၽၢၼ်ႇသၢင်းႁဵတ်းပဵၼ်ၸႃႉၸဵမ်လေႃးၵႃႉဢိၵ်ႇတင်းလေႃးၵထၢတ်ႈ တင်းသဵင်ႈတင်းလူင်ဢေႃႈ။
ၸဝ်ႈႁဝ်းၽၢၼ်ႇသၢင်းႁဵတ်းပဵၼ်ၼႃႈတၢင်းႁွင်ႇဢိၵ်ႇတင်းၼႃႈတၢင်းၸၢၼ်းဝႆႉတီႈၶႃႈယဝ်ႉ။ လွႆ တႃႇပေႃႇ၊ တင်းလွႆ ႁေႇရမုၼ်ႇ၊ ဢွၼ်ၵၼ်ႁဵတ်းၵႂၢမ်းဢၼ်သႂၢင်ႇဢၼ်သိူဝ်း တီႈၸဝ်ႈႁဝ်းတီႈၶႃႈဢေႃႈ။
တၼ်းၶူဝ်းၸဝ်ႈႁဝ်းယႂ်ႇၼႃႇလူင်လၢင် တီႈၶႃႈဢေႃႈ။ ဢဵၼ်ႁႅင်းၸဝ်ႈႁဝ်းၵေႃႈယႂ်ႇၼႃႇတီႈၶႃႈဢေႃႈ။
သိုင်ႇၸိုင်ႈဝၢၼ်ႈမိူင်းၸဝ်ႈႁဝ်းတႄႇယူႇၵႃႈၼိူဝ်တၢင်းဢၼ်သိုဝ်ႈတေႃႇဢိၵ်ႇတင်း တၢင်းဢၼ်ၸီႇယၢင်ႇၸွမ်းၼင်ႇတြႃး ၼၼ်ႉလႄႈ၊တၢင်းႁၵ်ႉမႅတ်ႈတႃႇ ဢိၵ်ႇတင်းသဵတ်ႈၸႃႇၵေႃႈ၊ ထၢင်ႇသႃးၼႂ်းတၢင်းဢၼ်ၸဝ်ႈႁဝ်း ႁဵတ်းသၢင်ႈၵူႈမဵဝ်းမဵဝ်းၼၼ်ႉတီႈၶႃႈဢေႃႈ။
ၵူၼ်းၸိူဝ်းဢၼ်ဢဝ်တင်းသဵင်ႁဵတ်းၵႂၢမ်း ယွင်ႈယေႃးၸဝ်ႈႁဝ်း၊ဢိၵ်ႇတင်း ၶဝ်ၸိူဝ်းဢၼ်ယူႇၵႃႈၼႂ်းဢၼ်လႅင်းၵရုၼႃႇၸဝ်ႈႁဝ်းၼၼ်ႉမီးမၢင်ႇၵလႃႇဢေႃႈ။
ၵွပ်ႈပိူဝ်ႈၸဝ်ႈႁဝ်းလႄႈၶဝ်လႆႈသႂၢင်ႇသိူဝ်းယူႇ တင်းဝၼ်းတင်းဝၼ်းလႄႈ ၶဝ်လႆႈယွင်ႈယေႃးတၢင်းဢၼ်ၸႂ်လီၸႂ်ဝၢၼ်ၸဝ်ႈႁဝ်းၼၼ်ႉတီႈၶႃႈဢေႃႈ။
ၸဝ်ႈႁဝ်းပၼ်ႁႂ်ႈၶႃႈၸဝ်ႈႁဝ်းၶဝ်ပႄႉၼႅင်ႇ ယႂ်ႇၼႃႇလူင်လၢင်လႄႈ ၵႃႈၼႂ်းတၢင်းႁၵ်ႉမႅတ်ႈတႃႇၸဝ်ႈႁဝ်းၼၼ်ႉ ၸဝ်ႈႁဝ်းႁႂ်ႈၶႃႈၸဝ်ႈႁဝ်းၶဝ်ၶၢမ်ႇပွႆးဢၼ် ဢွင်ႇသိုၵ်းတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းလိူၵ်ႈပၼ်ၸဝ်ႈဢၼ်တၵ်းႁႄႉၵင်ႈပၼ်ၶႃႈၸဝ်ႈ၊ႁဝ်းၶဝ်ၼၼ်ႉတီႈၶႃႈယဝ်ႉ။ ၽြႃးပဵၼ်ၸဝ်ႈမဵဝ်း ဢိသရေး၊ ၽြႃး ဢၼ်မူတ်းၸၢင်ႇတီႈၶႃႈ။ ၸဝ်ႈႁဝ်းပၼ်ၶုၼ်ႁေႃၶမ်းတီႈၶႃႈၸဝ်ႈႁဝ်း ၶဝ်တီႈၶႃႈယဝ်ႉ။
ၵႃႈၼႂ်းရူႇပႃႇရူင်ႇၸဝ်ႈႁဝ်းမိူဝ်ႈၵွၼ်ႇဢွၼ်ၼႆႉၼၼ်ႉၸဝ်ႈႁဝ်းမီးဢမိင်ႉတီႈၶႃႈၸဝ်ႈႁဝ်း၊ ၶႃႈဢၼ်မီးသဵတ်ႈၸႃႇၼၼ်ႉလႄႈဝႃႈၸမ်ႉ၊ “ၵဝ်ဢဝ်သရၽူႇတိုဝ်းပၼ် ၵႃႈၼိူဝ်ၵေႃႉဢၼ်ႁႅင်းယႂ်ႇၼၼ်ႉ၊ၵဝ်ဢဝ် ပလၢင်ႇဢၢပ်ႈပၼ်တီႈၵေႃႉဢၼ် ၵဝ်လိူၵ်ႈဢဝ်ၵႃႈၼႂ်းၵူၼ်း တင်းလၢႆဝႆႉယဝ်ႉ။
ၵဝ်ယုၵ်ႉတၢင်ႇၶႃႈၵဝ် တႃႇဝိတ်ႈ၊ ၵႃႈၼႂ်း ဢရႃႇၶုၼ်ႁေႃၶမ်းလႄႈ ဢဝ်တင်းၼမ်ႉမၼ်းဢၼ်မူတ်းၸၢင်ႇ သွၼ်းလေႃႇပၼ်မၼ်းယဝ်ႉ။
ဢဵၼ်ႁႅင်းၵဝ်တၵ်းမီးလူၺ်ႈၵၼ်တင်းမၼ်း တႃႇသေႇဢမ်ႇထၢတ်ႇလႄႈ တၼ်းၶူဝ်းၵဝ်တၵ်းႁႂ်ႈမၼ်းမီးဢဵၼ်ႁႅင်း ဢၼ်ယႂ်ႇၼႃႇဢေႃႈ။
ရၢၼ်ႇသူႇမၼ်းတင်းလၢႆတၵ်းတေဢမ်ႇလႆႈ ပႄႉၼႅင်ႇမၼ်းသေပွၵ်ႈလႄႈ ၵူၼ်းဢၼ်ႁၢႆႉမိူၵ်ႈတၵ်းတေဢမ်ႇလႆႈ တိုၵ်းပႄႉမၼ်းလႃးလႃး။
ၵဝ်တၵ်းပေႃႉထုပ်ႉရၢၼ်ႇသူႇမၼ်းတင်းလၢႆလႄႈ ယႃႉပႅတ်ႈၶဝ်ၸိူဝ်းဢၼ်ၸင်းမၼ်းၼၼ်ႉဢေႃႈ။
ၵဝ်တၵ်းႁၵ်ႉပႅင်းမၼ်းလႄႈပႂ်ႉသဵတ်ႈၸႃႇတေႃႇမၼ်းဢေႃႈ။ ၵဝ်တၵ်းႁႂ်ႈမၼ်းၶၢမ်ႇပွႆးဢွင်ႇသိုၵ်း တႃႇသေႇဢမ်ႇထၢတ်ႇဢေႃႈ။
ၵဝ်တၵ်းၶႂၢၵ်ႈသိုင်ႇၸိုင်ႈဝၢၼ်ႈမိူင်းမၼ်း ၸႃႉဢဝ်တီႈပၢင်ႇလၢႆႇ မေႇတိထေးရီးယၼ်း၊ တေႃႇထိုင်ႁွတ်ႈၼမ်ႉ ဢုၽရတ်ႉ၊ ပုၼ်ႉဢေႃႈ။
မၼ်းတၵ်းလၢတ်ႈတီႈၵဝ်လႄႈဝႃႈ၊ ‘ၸဝ်ႈႁဝ်းပဵၼ်ပေႃႈၵဝ်ၶႃႈ၊ၽြႃးၵဝ်ၶႃႈဢေႃႈ။ ၸဝ်ႈႁဝ်းပဵၼ်ၸဝ်ႈဢၼ်ႁႄႉၵင်ႈပၼ်ၵဝ်ၶႃႈ၊ ၸဝ်ႈဢၼ်ၵႄႇၶျွတ်ႈဢဝ်ၵဝ်ၶႃႈတီႈၶႃႈဢေႃႈ၊’ ဝႃႈၼင်ႇၼႆဢေႃႈ။
ၵဝ်တၵ်းယုၵ်ႉတၢင်ႇမၼ်းဝႆႉၼႂ်းဢရႃႇ လုၵ်ႈၸၢႆးတူၼ်ႈလႄႈ ႁႂ်ႈမၼ်းပဵၼ်ၶုၼ်ႁေႃၶမ်းၵႃႈၼိူဝ်ၶုၼ်ႁေႃၶမ်း လေႃးၵီႇတင်းလၢႆဢေႃႈ။
ၵဝ်တၵ်းႁႂ်ႈၵတိၵဝ်တႄႇၵႃႈၼိူဝ်မၼ်း တႃႇသေႇဢမ်ႇထၢတ်ႇလႄႈ ႁႂ်ႈပတိၺိၺ်ႇတြႃးၵဝ်မၼ်ႈၶိူင်ႇယူႇ တီႈမၼ်းဢေႃႈ။
ၵဝ်တၵ်းႁႂ်ႈၶိူဝ်းၶုၼ်မၼ်းမၼ်ႈယူႇသိုပ်ႇသိုပ်ႇတၢမ်တၢမ်မိူၼ်ၸိူဝ်ႉၼင်ႇတွင်ႉၽႃႉဢေႃႈ။ လုၵ်ႈလၢၼ်ၸိူဝ်ႉၶိူဝ်းမၼ်းၼၼ်ႉတၵ်းတေလႆႈ ပဵၼ်ၶုၼ်ႁေႃၶမ်းယူႇတႃႇသေႇဢေႃႈ။
ၵူၺ်းၵႃႈ၊ပေႃးလုၵ်ႈလၢၼ်ၸိူဝ်ႉၶိူဝ်းမၼ်း ၸုၼ်ႉပႅတ်ႈတြႃးၵဝ်လႄႈ ဢမ်ႇၵမ်ၵျၢင်ႉၸွမ်းၵႃႈၼင်ႇဢၼ်ၵဝ် ပိင်းၺၢပ်ႈဝႆႉၼၼ်ႉ။
ပေႃးၶဝ်ႁဵတ်းဢမ်ႇပေႃးၼင်ႇႁိုဝ်တီႈ ထုင်းၽိင်ႈတြႃးၵဝ်တင်းလၢႆလႄႈ ယင်းဢမ်ႇပႂ်ႉပိင်းၺၢပ်ႈၵဝ်လႄႈယူႇၸိုင်။
ၵဝ်တၵ်းဢဝ်ၶွၼ်ႉဝၢႆၵဝ်ပၼ်တၢမ်ႇတၢင်းဢၼ် ၶဝ်ၽိတ်းပိူင်ႈၼၼ်ႉလႄႈ ၵဝ်တၵ်းႁႂ်ႈၶဝ်ၶၢမ်ႇၽေးတုၸရိူၵ်ႈ ၶဝ်ၼၼ်ႉဢေႃႈ။
ၼႂ်းဝႃႈၼၼ်သေၵေႃႈ၊ ၵဝ်တၵ်းဢမ်ႇယႃႉဢဝ်ထွၼ်ဢဝ်ၵရုၼႃႇၵဝ် သေၵႃႈတီႈ တႃႇဝိတ်ႈ၊ ၼၼ်ႉလႃးလႃး။ ၵဝ်တၵ်းဢမ်ႇယႃႉသဵတ်ႈၸႃႇၵဝ်။
ၵဝ်တၵ်းဢမ်ႇႁႂ်ႈပတိၺိၺ်ႇတြႃးၵဝ်လႆႈလုၵႂႃႇလႄႈ၊တၵ်းဢမ်ႇထူၺ်ႈဢမ်ႇထွၼ်ဢဝ်၊ ၵႂၢမ်းၵတိၵဝ်သေၶေႃႈသေၵမ်းလႃးလႃး။
ၵဝ်ဝႆႉၵတိၼႂ်းၼႃႇမႃႉၸိုဝ်ႈသဵင်ၵဝ်ပွၵ်ႈလဵဝ်လႄႈႁႂ်ႈပဵၼ်ၵႂႃႇသေႇသေႇယဝ်ႉ။ တၵ်းဢမ်ႇႁႂ်ႈပဵၼ်ၵႂၢမ်းမုသႃႇတေႃႇ တႃႇဝိတ်ႈ၊ လႃးလႃး။
ၸိူဝ်ႉၶိူဝ်းမၼ်းတၵ်းလႆႈတႄႇယူႇတႃႇသေႇ ဢမ်ႇထၢတ်ႇလႄႈ၊ ၵဝ်တၵ်းပႂ်ႉလူပႂ်ႉတူၺ်းသိုင်ႇၸိုင်ႈဝၢၼ်ႈမိူင်းမၼ်း ၵႃႈၼင်ႇဢၼ်ၸူဝ်ႈတႃဝၼ်းမီးယူႇၼၼ်ႉဢေႃႈ။
မိူင်းမၼ်းတၵ်းတေလႆႈမၼ်ႈၶိူင်ႇယူႇမိူၼ်ၸိူဝ်ႉၼင်ႇလိူၼ်ဢၼ်ပဵၼ်သၢၵ်ႈသေႇ ၵႃႈၼႂ်းတွင်ႉၽႃႉယူႇတႃႇသေႇၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊တေႃႈလဵဝ်ၼႆႉၸဝ်ႈႁဝ်းတေႃးသႃႉဢွၵ်ႇ တေႃႇၵေႃႉဢၼ်ၸဝ်ႈႁဝ်းလိူၵ်ႈဝႆႉ ၼၼ်ႉသေယဝ်ႉ၊ ပွႆႇမၼ်းပႅတ်ႈလႄႈပႄႇပႅတ်ႈမၼ်းဝႆႉတီႈၶႃႈယဝ်ႉ။
ၸဝ်ႈႁဝ်းယႃႉပတိၺိၺ်ႇတြႃးဢၼ်ႁဵတ်းဝႆႉတင်းၶႃႈၸဝ်ႈႁဝ်းၼၼ်ႉသေလႄႈ ဢဝ်သရၽူႇမၼ်းထိမ်ႈသႂ်ႇၵႃႈၼႂ်းၵူမ်ႇ တီႈၶႃႈယဝ်ႉ။
ၸဝ်ႈႁဝ်းၵိူၼ်ႇယႃႉလမ်းဝဵင်းမၼ်းၵႃႈမီး ပႅတ်ႈယဝ်ႉလႄႈ ပွႆႇပႅတ်ႈႁႂ်ႈတိူၵ်ႈတီႈတိုၵ်းသိုၵ်းမၼ်းၸိူဝ်းၼၼ်ႉ လုလႅဝ်ဝႆႉတီႈၶႃႈယဝ်ႉ။
ၶဝ်ၸိူဝ်းဢၼ်ပႆၵၢႆၵႂႃႇၼၼ်ႉဢွၼ်ၵၼ်လၵ်ႉဢဝ်ၶူဝ်းၶွင်မၼ်းလႄႈ ၵူၼ်းႁိူၼ်းၸမ်ၵၼ်တင်းမၼ်းၸိူဝ်းၼၼ်ႉ ဢွၼ်ၵၼ်ႁဵတ်းပျၢၵ်ႈႁဵတ်းၶူဝ်မၼ်း တီႈၶႃႈဢေႃႈ။
ၸဝ်ႈႁဝ်းပၼ်ဢၶႂၢင်ႉႁႂ်ႈရၢၼ်ႇသူႇမၼ်းတင်းလၢႆလႆႈပႄႉလႆႈၼႅင်ႇမၼ်းယဝ်ႉလႄႈ ႁႂ်ႈၶဝ်တင်းသဵင်ႈတင်းလူင်လႆႈၸူမ်းသိူဝ်း တီႈၶႃႈဢေႃႈ။
ၸဝ်ႈႁဝ်းႁႂ်ႈၶူမ်းလၢပ်ႇၶူမ်းလႅဝ်းမၼ်းမဵဝ်ႈၵႂႃႇလႄႈ ဢမ်ႇပၼ်ႁႂ်ႈမၼ်းၸုၵ်းၶၢမ်ႇၵႃႈၼႂ်းပၢင်တိုၵ်းသိုၵ်းၼၼ်ႉလႆႈတီႈၶႃႈဢေႃႈ။
ၸဝ်ႈႁဝ်းႁႂ်ႈဢႃႇၼႃႇၸၢၵ်ႈမၼ်းလုလႅဝ် ပႅတ်ႈယဝ်ႉလႄႈ ပိၼ်ႈရႃႇၸႃႉပလၢင်ႇမၼ်းၶွမ်ႈတူၵ်း ၵႃႈတီႈလိၼ်တီႈၶႃႈယဝ်ႉ။
ၸဝ်ႈႁဝ်းႁႂ်ႈဢသၢၵ်ႈဢရွႆႇဢၼ်မၼ်းယင်းၼုမ်ႇယင်းၵမ်ၼၼ်ႉပွတ်းလႄႈ ဢဝ်တင်းတၢင်းဢၼ်ဢူၵ်းဢၼ်ဢၢႆ ႁူမ်ႇသုမ်ႇမၼ်းတီႈၶႃႈယဝ်ႉ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းတၵ်းတဵတ်ႇမႅပ်းယူႇသေႇသေႇတီႈၶႃႈႁိုဝ်း။ တၢင်းၸႂ်မႆႈၶႂ်ႈၸႃႉၸဝ်ႈႁဝ်းတၵ်းမႆႈယူႇ ၸိူဝ်ႉၼင်ႇၽႆးႁိုင်ၵႃႈႁိုဝ်တီႈၶႃႈ။
ၶႅၼ်းတေႃႈၶႆႈၸႂ်ထူပ်းလွင်ႈဢၼ်ဢသၢၵ်ႈ ၶႃႈၸဝ်ႈပွတ်းၵႃႈႁိုဝ်ၼၼ်ႉ၊ ဢိၵ်ႇတင်းလွင်ႈတၢင်းဢၼ်ၸဝ်ႈႁဝ်း ၽၢၼ်ႇသၢင်းႁဵတ်းပဵၼ် ႁႂ်ႈၶႃႈၸဝ်ႈႁဝ်းၶဝ်ပဵၼ်ဢၼ်လၢႆလၢႆဢမ်ႇပွင်ႇလွင်ႈၵႃႈသင်ၼၼ်ႉသေၵမ်းတီႈၶႃႈ။
ၽူႈလႂ်တၵ်းဢသၢၵ်ႈလိပ်းယူႇသေႇသေႇလႄႈ ဢမ်ႇတၢႆသေပွၵ်ႈၼၼ်ႉ၊ ၵူၼ်းၵေႃႉလႂ်တၵ်းႁႂ်ႈတူဝ်ၸဝ်ႈၵဝ်ႇလွတ်ႈသေ ၶုမ်ပႃႇႁဵဝ်ႈလႆႈတီႈၶႃႈ။
ၸဝ်ႈၽြႃးတီႈၶႃႈ။ သၢၵ်ႈသေႇဢၼ်ဝႃႈၸဝ်ႈႁဝ်းယၢမ်ႈႁၵ်ႉပႅင်းၼၼ်ႉမီးၵႃႈလႂ်တီႈၶႃႈ။ ၵတိသဵတ်ႈၸႃႇဢၼ်ၸဝ်ႈႁဝ်းဝႆႉတီႈ တႃႇဝိတ်ႈ၊ ၼၼ်ႉမီးၵႃႈတီႈလႂ်တီႈၶႃႈ။
ၶႅၼ်းတေႃႈယႃႇပေလူင်လိုမ်းတၢင်းဢၼ် ၶႃႈၸဝ်ႈႁဝ်းလႆႈၶၢမ်ႇတၢင်းဢၼ် ပိူၼ်ႈသႄႉသွမ်းၼၼ်ႉ၊ ဢိၵ်ႇတင်းတၢင်းဢၼ်ၶႃႈၸဝ်ႈလႆႈယိူၼ်ႉၶၢမ်ႇ တၢင်းဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်းသႄႉသွမ်းၵူႈသမ်ႇၵူႈပိူင်ယူႇၼၼ်ႉသေၵမ်းတီႈၶႃႈ။
ထႃႇဝရႃႉၽြႃး၊ တီႈၶႃႈ။ ရၢၼ်ႇသူႇၸဝ်ႈႁဝ်း ၸိူဝ်းၼၼ်ႉသႄႉသွမ်းၶုၼ်ႁေႃၶမ်း ဢၼ်ၸဝ်ႈႁဝ်းလိူၵ်ႈဝႆႉၼၼ်ႉယူႇတီႈၶႃႈဢေႃႈ။ ၶဝ်ၸၢင်ႈသႄႉသွမ်းၸွမ်းလင်မၼ်းတီႈဢၼ် မၼ်းၵႂႃႇမၼ်းပႆၼၼ်ႉတီႈၶႃႈဢေႃႈ။
ႁႂ်ႈ ထႃႇဝရႃႉၽြႃး၊ မီးမၢင်ႇၵလႃႇၵူႈၵၢပ်ႈၵမ်ႇၽႃႇသိုပ်ႇသိုပ်ႇတၢမ်တၢမ်သေၵမ်းလူၺ်ႈ။ ဢႃမိၼ်ႈ။ ဢႃမိၼ်ႈ။
ၸဝ်ႈၽြႃးတီႈၶႃႈ။ ၸဝ်ႈႁဝ်းပဵၼ်တီႈဢၼ် ၶႃႈၸဝ်ႈႁဝ်းၶဝ်သွၼ်ႈပိုင်ႈယူႇ၊ ၵူႈၸူဝ်ႈၵူႈပၢၼ်တႃႇသေႇဢမ်ႇထၢတ်ႇ တီႈၶႃႈဢေႃႈ။
ၸဵမ်မိူဝ်ႈဢွၼ်တၢင်းၸဝ်ႈႁဝ်းၽၢၼ်ႇသၢင်း ႁဵတ်းပဵၼ်လွႆတင်းလၢႆ၊ ၸဝ်ႈႁဝ်းယင်းဢမ်ႇပႆႇႁဵတ်းပဵၼ်လိၼ်မိူင်းတင်းလေႃးၵထၢတ်ႈၼၼ်ႉ ၸဝ်ႈႁဝ်းပဵၼ် ထႃႇဝရႃႉၽြႃး၊ လႄႈတၵ်းပဵၼ်ၽြႃးယူႇၵူႈၵမ်ႇၽႃႇသိုပ်ႇသိုပ်ႇတၢမ်တၢမ်ဢေႃႈ။
ၸဝ်ႈႁဝ်းႁဵတ်းႁႂ်ႈၵူၼ်းၶိုၼ်းပဵၼ်မုၼ်ႈလိၼ် လႄႈလၢတ်ႈဝႃႈ၊ “မဵဝ်းၵူၼ်းတင်းလၢႆၶဝ်႟။ ၶိုၼ်းပဵၼ် မုၼ်ႈလိၼ်တႃႉ၊” ဝႃႈၼင်ႇၼႆဢေႃႈ။
ႁဵင်ပီမိူင်းၸိုင်၊မိူၼ်ၵၼ်တင်းဝၼ်းၼိုင်ႈ ၵႃႈတီႈၸဝ်ႈႁဝ်းလႄႈ ပီမိူင်းၸိူဝ်းၼၼ်ႉပူၼ်ႉၵႂႃႇပဵၼ်ၸိူဝ်ႉၼင်ႇမိူဝ်ႈဝႃးဢိၵ်ႇတင်းၸိူဝ်ႉၼင်ႇၶိင်ႇဢၼ်ပႂ်ႉယူႇ ယၢမ်းၼိုင်ႈၵူၺ်းၼၼ်ႉတီႈၶႃႈဢေႃႈ။
ၸဝ်ႈႁဝ်းၽဵဝ်ႈၶႃႈၸဝ်ႈႁဝ်းၶဝ်ၵႂႃႇမိူၼ်ၸိူဝ်ႉၼင်ႇၼမ်ႉၼွင်းၼၼ်ႉလႄႈ ၶႃႈၸဝ်ႈႁဝ်းၶဝ်၊ဢမ်ႇၸၢင်ႈတႄႇယူႇ မိူၼ်တၢင်းဢၼ်ၼွၼ်းၽၼ်ႁၼ် ၼၼ်ႉတီႈၶႃႈဢေႃႈ။ ၶႃႈၸဝ်ႈႁဝ်းၶဝ်ပဵၼ်ၸိူဝ်ႉၼင်ႇတူၼ်ႈယိူဝ်ႈ တူၼ်ႈယႃႈၸူဝ်ႈၶၢဝ်းၵၢင်ၼႂ်သေယဝ်ႉ။
ၸၢင်ႈယႂ်ႇမႃးလႄႈပူင်ႇၽိူဝ်ပူင်ႇမွၵ်ႇမႃးၼၼ်ႉ တီႈၶႃႈဢေႃႈ။ ၶိင်ႇၵၢင်ၶမ်ႈၸမ်ႉႁဵဝ်ႇႁႅင်ႈၵႂႃႇလႄႈ တၢႆၵႂႃႇၼၼ်ႉတီႈၶႃႈဢေႃႈ။
ၶႃႈၸဝ်ႈႁဝ်းၶဝ်လႆႈလုလႅဝ်ၵႂႃႇၵွပ်ႈပိူဝ်ႈတၢင်းဢၼ်ၸႂ်မႆႈၶႂ်ႈၸႃႉၸဝ်ႈႁဝ်းလႄႈ၊ ၶႃႈၸဝ်ႈႁဝ်းၶဝ်လႆႈမီးႁူဝ်ၸႂ်ဢၼ်သၼ်ႇဝႆ ၵွပ်ႈပိူဝ်ႈတေႃးသႃႉတၢင်းဢၼ်ၸႂ်မႆႈၸႂ်လိူတ်ႇၸဝ်ႈႁဝ်းတီႈၶႃႈဢေႃႈ။
ၸဝ်ႈႁဝ်းဢဝ်တုၸရိူၵ်ႈၶႃႈၸဝ်ႈႁဝ်းၶဝ်ၸိူဝ်းၼၼ်ႉၽုၺ်ႇၵီႈဝႆႉၽၢႆႇၼႃႈၸဝ်ႈႁဝ်းလႄႈ ဢဝ်ဢပျတ်ႈၶႃႈၸဝ်ႈႁဝ်းၶဝ်ဢၼ်သိူင်ႇဝႆႉလပ်ႉဝႆႉၸိူဝ်းၼၼ်ႉ ၽုၺ်ႇၵီႈဝႆႉၵႃႈၼႂ်းဢၼ်လႅင်းၼႃႈၸဝ်ႈႁဝ်းၼၼ်ႉတီႈၶႃႈဢေႃႈ။
ဢသၢၵ်ႈတၢၼ်းၶႃႈၸဝ်ႈႁဝ်းၶဝ်ပွတ်းၵႂႃႇ ၵွပ်ႈပိူဝ်ႈတၢင်းဢၼ်ၸဝ်ႈႁဝ်းၸီႇယၢင်ႇပၼ်တၢမ်ႇဢပျတ်ႈလႄႈ၊ ၶူပ်ႇၼီႈပီမိူင်းၶႃႈၸဝ်ႈႁဝ်းၶဝ်ပူၼ်ႉၵႂႃႇ မိူၼ်ၸိူဝ်ႉၼင်ႇတၢင်းဢၼ်ထူၺ်ႈၸႂ်လူင် ၵမ်းၼိုင်ႈၼၼ်ႉတီႈၶႃႈဢေႃႈ။
ဢသၢၵ်ႈဢရွႆႇၶႃႈၸဝ်ႈႁဝ်းၶဝ်လႆႈၸဵတ်းသိပ်းပီတီႈၶႃႈဢေႃႈ။ ပေႃးႁႅင်းယႂ်ႇၸိုင်၊ၸၢင်ႈလႆႈပႅတ်ႇသိပ်းပီတီႈၶႃႈဢေႃႈ။ ၼႂ်းဝႃႈၼၼ်သေၵေႃႈ၊တၢင်းဢၼ်မၼ်း ယိုၼ်းယၢဝ်းယူႇၼၼ်ႉၵူၺ်း ပဵၼ်တၢင်းဢၼ်ယၢပ်ႇၽိုတ်ႇၼႃႇ၊ဢိၵ်ႇတင်းတၢင်းဢၼ်မႆႈၸႂ်ၶီၸႂ်တီႈၶႃႈဢေႃႈ။ ဢသၢၵ်ႈၼၼ်ႉၸဵဝ်းပူၼ်ႉၵႂႃႇၶၼ်ၶၼ် ၽႂ်းၽႂ်းလႄႈ၊ ၶႃႈၸဝ်ႈႁဝ်းၶဝ်လၢႆႈၸူဝ်ႈလၢႆႈၸၢတ်ႈၵႂႃႇ တီႈၶႃႈဢေႃႈ။
ၽူႈလႂ်ႁုဢႁုင်ႇတၢင်းဢၼ်ၸဝ်ႈႁဝ်းၸီႇယၢင်ႇ ဢိၵ်ႇတင်းတၢင်းဢၼ်ၸဝ်ႈႁဝ်းပၼ်တၢမ်ႇဢပျတ်ႈ၊ ၸွမ်းၵႃႈၼင်ႇဢၼ်ထုၵ်ႇလီၵူဝ်ႁႄ ၸဝ်ႈႁဝ်းၼၼ်ႉတီႈၶႃႈ။
ပိူဝ်ႈၼႆလႄႈ၊ၶႅၼ်းတေႃႈသင်ႇသွၼ်ပၼ်ၶႃႈၸဝ်ႈႁဝ်းၶဝ်ၸၢင်ႈၼပ်ႉဢၢၼ်ႇ မိုဝ်ႉဝၼ်းၶႃႈၸဝ်ႈႁဝ်းၶဝ်၊ႁႂ်ႈၶႃႈၸဝ်ႈႁဝ်းၶဝ် မီးပိင်ႇၺႃႇသေၵမ်းတီႈၶႃႈ။
တေႃးသႃႉၸဝ်ႈႁဝ်းတၵ်းမႆႈလိူတ်ႇယူႇႁိုင်ၵႃႈႁိုဝ်တီႈၶႃႈ။ ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈဢဵတ်းလူၶႃႈၸဝ်ႈႁဝ်းတင်းလၢႆ သေၵမ်းတီႈၶႃႈ။
ၶႅၼ်းတေႃႈဢဝ်တင်းမႅတ်ႈတႃႇၵရုၼႃႇၸဝ်ႈႁဝ်း ႁႂ်ႈၶႃႈၸဝ်ႈႁဝ်းၶဝ်လႆႈဢိမ်ႇၸႂ်ၼိမ်ၸႂ်ယူႇ ၵူႈၼႂ်ၵူႈၼႂ်သေၵမ်းတီႈၶႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ၶႃႈၸဝ်ႈ ႁဝ်းၶဝ်တၵ်းမီးဢၶႂၢင်ႉ၊ ဢၼ်လႆႈႁဵတ်းၵႂၢမ်းဢၼ်သႂၢင်ႇဢၼ်သိူဝ်းၸူဝ်ႈဢသၢၵ်ႈၶႃႈၸဝ်ႈႁဝ်းၶဝ်တီႈၶႃႈဢေႃႈ။
ၵမ်းၼႆႉၸိုင်၊ၶႅၼ်းတေႃႈပၼ်ႁႂ်ႈၶႃႈၸဝ်ႈႁဝ်းၶဝ်လႆႈၸူမ်းလႆႈသိူဝ်း ႁိုင်မိူၼ်ၸိူဝ်ႉၼင်ႇမိူဝ်ႈဝၼ်းဢၼ်ၸဝ်ႈႁဝ်းၼိၵ်ႈၸၢၵ်ႈငႅၼ်းသႄးၶႃႈၸဝ်ႈႁဝ်းၶဝ်၊ ဢိၵ်ႇတင်းႁိုင်မိူၼ်ၸိူဝ်ႉၼင်ႇၶူပ်ႇၼီႈပီမိူင်း ဢၼ်ၶႃႈၸဝ်ႈႁဝ်းၶဝ်လႆႈၶၢမ်ႇတုၵ်ႉၶႃႉ မႃးယဝ်ႉၼၼ်ႉသေၵမ်းတီႈၶႃႈ။
ႁႂ်ႈၶႃႈၸဝ်ႈႁဝ်းၶဝ်ဢၼ်ပဵၼ်ၶႃႈၸဝ်ႈႁဝ်းၸိူဝ်းၼႆႉ လႆႈႁၼ်ၵၢၼ်တၢင်းႁဵတ်းၸဝ်ႈႁဝ်းဢၼ်ယႂ်ႇၼႃႇတင်းလၢႆၼၼ်ႉလႄႈ ႁႂ်ႈလုၵ်ႈလၢင်းၸိူဝ်ႉၶိူဝ်းၶႃႈၸဝ်ႈႁဝ်းၶဝ် လႆႈႁၼ်မုၼ်ၽုင်းတၼ်းၶူဝ်းၸဝ်ႈႁဝ်း သေၵမ်းလူၺ်ႈတီႈၶႃႈ။
ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၶႃႈတီႈၶႃႈ။ ႁႂ်ႈတၢင်းလီမၢင်ႇၵလႃႇၸဝ်ႈႁဝ်းမီး လူၺ်ႈၵၼ်တင်းၶႃႈၸဝ်ႈႁဝ်းၶဝ်သေၵမ်းတီႈၶႃႈ။ ၸႂ်ႈတီႈၶႃႈယဝ်ႉ။ လွင်ႈတၢင်းဢၼ်ၶႃႈၸဝ်ႈ ႁဝ်းၶဝ်ႁဵတ်းယဝ်ႉတင်းသဵင်ႈတင်းလူင်ၼၼ်ႉ ႁႂ်ႈမၼ်ႈၶိူင်ႇယူႇသေၵမ်းတီႈၶႃႈ။
ၵေႃႉဢၼ်ယူႇၵႃႈတႂ်ႈႁူမ်ႈၽူၺ်းၽြႃးဢၼ် သုင်ၼႃႇသေပိူၼ်ႈ၊ ၵေႃႉဢၼ်သွၼ်ႈပိုင်ႈယူႇၵႃႈၼႂ်းငဝ်းႁူမ်ႈၸဝ်ႈဢၼၼ်ႇတႃႉတၼ်းၶူဝ်းၼၼ်ႉ။
တၵ်းလဝ်ႈလၢတ်ႈတီႈ ထႃႇဝရႃႉၽြႃး၊ လႄႈဝႃႈ၊ “ၸဝ်ႈႁဝ်းပဵၼ်ၸဝ်ႈဢၼ်ၵႅတ်ႇၶႄႁႄႉၵင်ႈၵဝ်ဢိၵ်ႇတင်း ပဵၼ်ၸဝ်ႈဢၼ်ႁႄႉၵင်ႈပၼ်ၵဝ်တီႈၶႃႈဢေႃႈ။ ၸဝ်ႈႁဝ်းပဵၼ်ၽြႃးပဵၼ်ၸဝ်ႈဢၼ်ၶႃႈၸဝ်ႈ ယုမ်ႇမၢတ်ႈဢိင်ပိုင်ႈတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈတၵ်းႁႂ်ႈမႂ်းၵၢင်းလွတ်ႈသေတင်း တူင်ႇႁႅဝ်ႉဢၼ်သိူင်ႇဝႆႉၸိူဝ်းၼၼ်ႉ၊ ဢိၵ်ႇတင်းႁႂ်ႈမႂ်းၵၢင်းလွတ်ႈသေၽေး ၵႃႇလႃႉႁႃႈလႅင်မိူင်းဢေႃႈ။
မၼ်းၸဝ်ႈတၵ်းဢဝ်ပိၵ်ႇမၼ်းၸဝ်ႈ ႁူမ်ႇသုမ်ႇဝႆႉလႄႈ၊ မႂ်းတၵ်းလႆႈယူႇလူင်ႉလီလွတ်ႈလီၵႃႈၼႂ်းတၢင်းဢၼ်မၼ်းၸဝ်ႈပႂ်ႉလူလုမ်းလႃးၼၼ်ႉဢေႃႈ။ သဵတ်ႈၸႃႇမၼ်းၸဝ်ႈတၵ်းၵႅတ်ႇၶႄလႄႈ ႁႄႉၵင်ႈမႂ်းဢေႃႈ။
မႂ်းတၵ်းတေဢမ်ႇလႆႈၵူဝ်လႆႈႁႄၽေးဢၼ် ၸၢင်ႈပဵၼ်မႃးၶိင်ႇၵၢင်ၶိုၼ်း ဢိၵ်ႇတင်းၽေးဢၼ်ၶိုၵ်းၶၢၵ်းတိုၵ်းတေႃးမႂ်းၶိင်ႇၵၢင်ဝၼ်း၊
ၽေးဢုပၢတ်ႈဢၼ်ၸၢင်ႈယႃႉၵႃႈၼႂ်းၶိင်ႇဢၼ်လပ်းသိင်ႇ၊ၽေးႁၢႆႉၽေးမိူၵ်ႈ၊ ဢၼ်ၸၢင်ႈဢဝ်ဢသၢၵ်ႈမႂ်းတၢႆၶိင်ႇၵၢင်ဝၼ်းတဵင်ႈၸိူဝ်းၼၼ်ႉလႃးလႃး။
ၵူၼ်းႁဵင်ၼိုင်ႈလႆႈလူမ်ႉတၢႆၵႃႈႁိမ်းမႂ်း၊ၵူၼ်းမိုၼ်ႇၼိုင်ႈလူမ်ႉတၢႆႁွပ်ႈမႂ်းယဝ်ႉသေၵေႃႈ၊ တၵ်းဢမ်ႇလႆႈတိူဝ်ႉလႆႈထုၵ်ႇမႂ်းလႃးလႃး။
မႂ်းတၵ်းတူၺ်းလႄႈႁၼ်တၢင်းဢၼ် ၵူၼ်းႁၢႆႉၵူၼ်းမိူၵ်ႈၶဝ် လႆႈၶၢမ်ႇတၢင်းဢၼ်ၸီႇယၢင်ႇပၼ်တၢမ်ႇ ၸိူဝ်ႉၼင်ႇႁိုဝ်ၼၼ်ႉဢေႃႈ။
ၵွပ်ႈပိူဝ်ႈမႂ်းဢဝ် ထႃႇဝရႃႉၽြႃး၊ ပဵၼ် တီႈဢၼ်ဢိင်သွၼ်ႈပိုင်ႈ၊ ၸဝ်ႈဢၼ်သုင်ၼႃႇသေပိူၼ်ႈၼၼ်ႉပဵၼ်တီႈယူႇတီႈသဝ်းမႂ်းၼၼ်ႉၸိုင်၊
တၢင်းဢၼ်ဢမ်ႇလီဢမ်ႇငၢမ်းဢမ်ႇလႆႈ တူၵ်းႁွတ်ႈၵႃႈၼိူဝ်မႂ်းလႄႈ၊ ၽေးဢုပၢတ်ႈဢမ်ႇလႆႈၸမ်မႃးၵႃႈတီႈ ႁိူၼ်းယေးမႂ်းလႃးလႃး။
ၽြႃးပဵၼ်ၸဝ်ႈတၵ်းၸႂ်ႉတမၢၼ်ႇၵၢင်ႁၢဝ်မၼ်းၸဝ်ႈတင်းလၢႆပႂ်ႉလူပႂ်ႉတူၺ်းမႂ်းလႄႈ ဢွၼ်သူင်ႇမႂ်းၵႃႈၼႂ်းတီႈဢၼ်မႂ်း ၵႂႃႇၼၼ်ႉဢေႃႈ။
ၶဝ်တၵ်းယဵတ်ႇမိုဝ်းၶဝ်ႁွပ်ႇဢုမ်ႈဢဝ်မႂ်းလႄႈ ၽႃႇတိၼ်တၵ်းမႂ်းဢမ်ႇလႆႈတိူဝ်ႉမၢၵ်ႇႁိၼ်။
မႂ်းတၵ်းယဵပ်ႇယမ်ႈသႂ်ႇၵႃႈၼိူဝ်သၢင်ႇသီႈတင်း ငူးႁၢႆႉလႄႈ ဢဝ်တိၼ်မႂ်းၶိုတ်ႈသႂ်ႇၵႃႈၼိူဝ်သၢင်ႇသီႈၼုမ်ႇ ဢိၵ်ႇတင်းၵႃႈၼိူဝ်ၼၵႃးဢေႃႈ။
ၽြႃးပဵၼ်ၸဝ်ႈလၢတ်ႈလႄႈဝႃႈ၊ “ၵဝ်တၵ်းၵႄႇသႄႇၶျွတ်ႈဢဝ် ၶဝ်ၸိူဝ်းဢၼ်ႁၵ်ႉၵဝ်ၼၼ်ႉလႄႈ တၵ်းႁႄႉၶႅၼ်ပၼ်ၶဝ်ၸိူဝ်းဢၼ်ႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ၼၼ်ႉဢေႃႈ။
မိူဝ်ႈဢၼ်ၶဝ်ႁွင်ႉၵၢဝ်ႇတီႈၵဝ်ၼၼ်ႉၵဝ်တၵ်း ၶိုၼ်းဢိူဝ်ၶဝ်ဢေႃႈ။ မိူဝ်ႈဢၼ်ၶဝ်ထူပ်းၽေးၼၼ်ႉၵဝ်တၵ်းမီးယူႇလူၺ်ႈၵၼ်တင်းၶဝ်ဢေႃႈ။ ၵဝ်တၵ်းၵႄႇသႄႇဢဝ်ၶဝ်လႄႈႁႂ်ႈၶဝ် မီးၼႃႈမီးတႃဢေႃႈ။
ၵဝ်တၵ်းပၼ်ၵျေးၸူးတၢင်းဢၼ်ဢသၢၵ်ႈ ယၢဝ်းယိုၼ်းၼၼ်ႉတီႈၶဝ်လႄႈ ၵဝ်တၵ်းၵႄႇသႄႇၶျွတ်ႈဢဝ်ၶဝ်ဢေႃႈ၊” ဝႃႈၼင်ႇၼႆဢေႃႈ။
တၢင်းဢၼ်ယွင်ႈယေႃးၵျေးၸူး ထႃႇဝရႃႉၽြႃး၊ ဢိၵ်ႇတင်းတၢင်းဢၼ်ႁဵတ်းၵႂၢမ်းယွင်ႈယေႃး၊ ၼႃႇမႃႉၸိုဝ်ႈသဵင်ၽြႃးဢၼ်သုင်ၼႃႇ သေပိူၼ်ႈၼၼ်ႉပဵၼ်ဢၼ်လီ ဢၼ်ငၢမ်းတီႈၶႃႈဢေႃႈ။
တၢင်းဢၼ်ၽုၺ်ႇမွၵ်ႇလၢတ်ႈၼႄလွင်ႈ မႅတ်ႈတႃႇၵရုၼႃႇၸဝ်ႈႁဝ်း ၵူႈၼႂ်ၵူႈၼႂ်၊ဢိၵ်ႇတင်းလွင်ႈသဵတ်ႈၸႃႇ ၸဝ်ႈႁဝ်းၵူႈၶမ်ႈၵူႈၶမ်ႈ။
ဢိၵ်ႇတင်းတၢင်းဢၼ်ဢဝ်တူႇရိယႃႇဢၼ်လဵတ်းတိင်ႇသိပ်းသွင်သၢႆတင်းပတ်ႉတလႃး၊ ဢိၵ်ႇတင်းတရေႃးဢၼ်သဵင်လီသဵင်ဝၢၼ် ယွင်ႈယေႃးၸဝ်ႈႁဝ်းၼၼ်ႉၵေႃႈ၊ ပဵၼ်ဢၼ်ထုၵ်ႇလီၼႃႇလူင်လၢင်တီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းႁႂ်ႈၶႃႈၸဝ်ႈၸူမ်းသိူဝ်းၵွပ်ႈပိူဝ်ႈ ၵၢၼ်ဢၼ်ၸဝ်ႈႁဝ်းႁဵတ်းၸိူဝ်းၼၼ်ႉလႄႈ၊ ၶႃႈၸဝ်ႈႁဵတ်းၵႂၢမ်းဢၼ်သႂၢင်ႇဢၼ်သိူဝ်း တီႈၸဝ်ႈႁဝ်းတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ လွင်ႈတင်းဢၼ် ၸဝ်ႈႁဝ်းႁဵတ်းဝႆႉၼၼ်ႉယႂ်ႇၼႃႇလႄႈ တၢင်းၵျၢမ်ႇတၢင်းပွင်ၸဝ်ႈႁဝ်းၵေႃႈလိုၵ်ႉ လမ်ႇၼႃႇလူင်လၢင်တီႈၶႃႈဢေႃႈ။
ပဵၼ်လွင်ႈတၢင်းဢၼ်ၵူၼ်းငိူဝ်ႈငႃႉ ဢမ်ႇၸၢင်ႈႁုလႄႈ၊ ပဵၼ်လွင်ႈတၢင်းဢၼ်ၵူၼ်းတိုဝ်ဢမ်ႇၸၢင်ႈပွင်ႇ ၸၢင်ႈလႅင်းတီႈၶႃႈဢေႃႈ။
ၵူၼ်းဢၼ်ႁၢႆႉမိူၵ်ႈၸၢင်ႈယႂ်ႇမႃးႁုၼ်ႈမႃး မိူၼ်ၸိူဝ်ႉၼင်ႇယိူဝ်ႈယႃႈလႄႈ ၵူၼ်းဢၼ်ဢမ်ႇတြႃးၸၢင်ႈ လႆႈလီလႆႈပဵၼ်ဢေႃႈ။ ၼႂ်းဝႃႈၼၼ်သေၵေႃႈၶဝ်တၵ်းလႆႈလုလႅဝ် ၵႂႃႇလုမ်းလုမ်းဢေႃႈ။
ၵွပ်ႈပိူဝ်ႈၸဝ်ႈႁဝ်း ထႃႇဝရႃႉၽြႃး၊ ဢုပ်ႉပိူင်ႇယူႇတႃႇသေႇဢမ်ႇထၢတ်ႇၼၼ်ႉ တီႈၶႃႈဢေႃႈ။
ၶႃႈၸဝ်ႈႁဝ်းၶဝ်ႁုလွင်ႈဢၼ်ရၢၼ်ႇသူႇၸဝ်ႈႁဝ်းတင်းလၢႆတၵ်းတၢႆလႄႈ ၵူၼ်းဢၼ်ႁၢႆႉဢၼ်မိူၵ်ႈၵူႈၵေႃႉၵူႈၵူၼ်းတၵ်း တူၵ်းသုမ်းၼၼ်ႉတီႈၶႃႈဢေႃႈ။
ၸဝ်ႈႁဝ်းႁႂ်ႈၶႃႈၸဝ်ႈႁႅင်းယႂ်ႇပဵင်းတၢၼ်ႇ ဝူဝ်းထိူၼ်ႇလႄႈ ၸဝ်ႈႁဝ်းပၼ်တၢင်းလီႁႂ်ႈၶႃႈၸဝ်ႈလႆႈ ၸူမ်းသိူဝ်းတီႈၶႃႈဢေႃႈ။
ၶႃႈၸဝ်ႈလႆႈႁၼ်ရၢၼ်ႇသူႇၶႃႈၸဝ်ႈတင်းလၢႆ တူၵ်းသုမ်းၵႂႃႇဢိၵ်ႇတင်း ၶႃႈၸဝ်ႈလႆႈငိၼ်းသဵင်ဢၼ်ၵူၼ်းႁၢႆႉၵူၼ်းမိူၵ်ႈၶဝ်ႁွင်ႉႁႆႈႁွင်ႉသႅၼ်ႇၼၼ်ႉတီႈၶႃႈဢေႃႈ။
ၵေႃႉဢၼ်သိုဝ်ႈတေႃႇၼၼ်ႉတၵ်းယႂ်ႇသုင် မိူၼ်ၸိူဝ်ႉၼင်ႇတူၼ်ႈထၢၼ်လႄႈ ၶဝ်တၵ်းယႂ်ႇမႃးမိူၼ်ၸိူဝ်ႉၼင်ႇတူၼ်ႈ ဢႃႇရိတ်ႉ၊ ဢၼ်ဢွၵ်ႇၵႃႈတီႈလွႆ လေႇပၼုၼ်ႇ၊ ၼၼ်ႉတီႈၶႃႈဢေႃႈ။
ၶဝ်ၼၼ်ႉပဵၼ်ၸိူဝ်ႉၼင်ႇတူၼ်ႈဢၼ်ၽုၵ်ႇသွမ်ႈၵႃႈၼႂ်းႁိူၼ်း ထႃႇဝရႃႉၽြႃး၊ ၼၼ်ႉလႄႈ ပဵၼ်တူၼ်ႈဢၼ်ယႂ်ႇသုင်ၵႃႈၼႂ်း ၵျွင်းပိၵ်ႈမၢၼ်ႇၸဝ်ႈႁဝ်းၼၼ်ႉသေယဝ်ႉ၊
ၼႂ်းမိူဝ်ႈဢၼ်ပဵၼ်တူၼ်ႈၵႄႇၼၼ်ႉၵေႃႈ ယင်းၸၢင်ႈမၢၵ်ႇမၢၵ်ႇမႃးယူႇလႄႈ ပဵၼ်ဢၼ်ၶဵဝ်လီၼုမ်ႇလီယူႇတႃႇသေႇ ဢမ်ႇထၢတ်ႇတီႈၶႃႈဢေႃႈ။
လွင်ႈတၢင်းၼႆႉၸိုင်၊ပဵၼ်ဢၼ်ၼႄပျႃးလွင်ႈဢၼ် ထႃႇဝရႃႉၽြႃး၊ ပဵၼ်ၸဝ်ႈဢၼ် သိုဝ်ႈတေႃႇလႄႈ ပဵၼ်ၸဝ်ႈဢၼ်ႁႄႉၶႅၼ်ၵဝ်ဢၼ်ဢမ်ႇၸၢင်ႈၽိတ်းၵႂႃႇပိူင်ႈၵႂႃႇၼၼ်ႉတီႈၶႃႈဢေႃႈ။
ထႃႇဝရႃႉၽြႃး၊ ပဵၼ်ၶုၼ်ႁေႃၶမ်းတီႈၶႃႈဢေႃႈ။ မၼ်းၸဝ်ႈၼုင်ႈမႆႁၢင်ႈၶိူင်ႈလူၺ်ႈမုၼ်ၽုင်းဢႃႇၼုၽေႃႇတင်းႁႅင်းတၼ်းၶူဝ်းဝႆႉတီႈၶႃႈဢေႃႈ။ ၸႂ်ႈတီႈၶႃႈယဝ်ႉ။ လေႃးၵႃႉတႄႇမၼ်ႈယူႇ တေႃႇထိုင်ႁွတ်ႈထၢၼ်ႈပေႃးဢမ်ႇသၼ်ႇဢမ်ႇဝႆဢမ်ႇတူင်ႉဢမ်ႇၼိုင်တီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ပလၢင်ႇၸဝ်ႈႁဝ်းတႄႇမၼ်ႈယူႇၸဵမ်မိူဝ်ႈၵွၼ်ႇမိူဝ်ႈမိုၼ်ႉၼၼ်ႉလႄႈ ၸဝ်ႈႁဝ်းမီးဝႆႉၸဵမ်မိူဝ်ႈၵွၼ်ႇဢွၼ်တၢင်းၶိင်ႇၵႃႇလႃႉတႄႇၸႃႉမီးမႃးၼၼ်ႉတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ဢၼ်လိုၵ်ႉဢၼ်လမ်ႇၼမ်ႉသမ်ႇမုၵ်ႈတြႃႇ ႁဵတ်းသဵင်ပွႆႇသဵင်၊ၶဝ်တီႈၶႃႈဢေႃႈ။ ၶဝ်ႁဵတ်းသဵင်ပွႆႇသဵင်လႄႈႁူၼ်ႈမေႃး ႁိုင်ႈႁိုင်ႈႁၢင်ႈႁၢင်ႈတီႈၶႃႈဢေႃႈ။
ထႃႇဝရႃႉၽြႃး၊ ဢုပ်ႉပိူင်ႇသုင်ၼႃႇလူင်လၢင် ၵႃႈၼိူဝ်ၽႃႉၵၢင်ႁၢဝ်လႄႈ ပဵၼ်ဢၼ်ယဵင်ႈၶႅၼ်းယႂ်ႇၼႃႇသေသဵင်ၼမ်ႉသမ်ႇမုၵ်ႈတြႃႇႁူၼ်ႈမေႃးၸိူဝ်းၼၼ်ႉ ဢိၵ်ႇတင်းပဵၼ်ဢၼ်ယဵင်ႈၶႅၼ်းတၼ်းၶူဝ်း ယႂ်ႇၼႃႇသေလႅင်းၼမ်ႉပိူပ်ႈၼမ်ႉပၢင်ႇလၢႆႇ တီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ထုင်းတြႃးၸဝ်ႈႁဝ်းၸိူဝ်းၼၼ်ႉတႄႇယူႇၼိၵ်ႈၸႃႉထႃႇဝရႃႉဢေႃႈ။ ၵျွင်းပိၵ်ႈမၢၼ်ႇ ၸဝ်ႈႁဝ်းမူတ်းၸၢင်ႇၵူႈၵၢပ်ႈၵမ်ႇၽႃႇသိုပ်ႇသိုပ်ႇ တၢမ်တၢမ်တႄႉတႄႉတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းပဵၼ်ၸဝ်ႈဢၼ်ပိူင်ႇၸီႇယၢင်ႇပၼ်တၢမ်ႇတီႈၶႃႈဢေႃႈ။ ၶႅၼ်းတေႃႈပွႆႇဢရွင်ႇၸဝ်ႈႁဝ်းသေၵမ်းတီႈၶႃႈ။
ၸဝ်ႈႁဝ်းတႅပ်းတတ်းတြႃးၵႃႈၼိူဝ်ၵူၼ်းလေႃးၵီႇတင်းလၢႆတီႈၶႃႈဢေႃႈ။ ၶႅၼ်းတေႃႈတွပ်ႇတႅၼ်းပၼ်ဢၵျူဝ်းဢပျတ်ႈ တီႈၶဝ်ၸိူဝ်းဢၼ်မႃႇၼႃႉၸႂ်သုင်ၼၼ်ႉ သေၵမ်းတီႈၶႃႈ။
ထႃႇဝရႃႉၽြႃး၊ တီႈၶႃႈ။ ၶဝ်ၸိူဝ်းဢၼ်ႁၢႆႉဢၼ်မိူၵ်ႈၼၼ်ႉတၵ်း ဢွၼ်ၵၼ်သႂၢင်ႇသိူဝ်းယူႇႁိုင်ၵႃႈႁိုဝ်တီႈၶႃႈ။ ၶဝ်တၵ်းသႂၢင်ႇသိူဝ်းၸႂ်ယူႇႁိုင်ၵႃႈႁိုဝ်တီႈၶႃႈ။
ၶဝ်ၸိူဝ်းဢၼ်ႁဵတ်းဢမုဢထမ်ႇမႃႉၼၼ်ႉ တၵ်းမႃႇၼႃႉၸႂ်သုင်ယူႇလႄႈ ဢုပ်ႇဢၢတ်ႇလူၺ်ႈၵၢၼ်ဢထမ်ႇမႃႉၶဝ်ၼၼ်ႉ ယူႇႁိုင်ၵႃႈႁိုဝ်တီႈၶႃႈ။
ထႃႇဝရႃႉၽြႃး၊ တီႈၶႃႈ။ ၶဝ်ၼၼ်ႉယႃႉႁၵ်း ၵူၼ်းၸဝ်ႈႁဝ်းတင်းလၢႆလႄႈ တဵၵ်းငႅၼ်းၵႃႈၼိူဝ်ၶဝ်ၸိူဝ်းဢၼ်ၸၢပ်ႈသႅင်ႇၵၼ်တင်းၸဝ်ႈႁဝ်းၼၼ်ႉတီႈၶႃႈဢေႃႈ။
ၶဝ်ဢဝ်မႄႈမၢႆႈတင်းလၢႆဢိၵ်ႇတင်းလုၵ်ႈဢွၼ်ႇဢၼ်ၽၢၼ်ပေႃႈၽၢၼ်မႄႈတၢႆပႅတ်ႈလႄႈ ၶဝ်ဢဝ်ၶႅၵ်ႇဢႃႇၵၼ်ႇတုဢၼ်သွၼ်ႈပိုင်ႈယူႇၵႃႈၼႂ်းမိူင်းႁဝ်းၶႃႈၼၼ်ႉတၢႆတီႈၶႃႈဢေႃႈ။
ၶဝ်ဝႃႈ၊ “ ထႃႇဝရႃႉၽြႃး၊ ဢမ်ႇႁၼ်ႁဝ်း။ ၽြႃးပဵၼ်ၸဝ်ႈမဵဝ်း ဢိသရေး၊ ၶဝ်ၼၼ်ႉ ဢမ်ႇဝႆႉဢမု၊” ဝႃႈၼင်ႇၼႆဢေႃႈ။
ၵေႃႉဢၼ်ငိူဝ်ႈငႃႉသေပိူၼ်ႈၵႃႈၼႂ်းၵူၼ်းတင်းလၢႆၼႆႉ႟။ ႁုႁၼ်တႃႉ။ ၵူၼ်းတိုဝ်႟။ မိူဝ်ႈလႂ်မႂ်းၸင်ႇတေမီးပိင်ႇၺႃႇ။
ၽြႃးပဵၼ်ၸဝ်ႈဢၼ်ႁဵတ်းပဵၼ်ႁူးႁူၼၼ်ႉ မၼ်းၸဝ်ႈတၵ်းဢမ်ႇငိၼ်းႁိုဝ်း။ မၼ်းၸဝ်ႈဢၼ်ႁဵတ်းပဵၼ်မၢၵ်ႇတႃၼၼ်ႉ တၵ်းဢမ်ႇႁၼ်ႁိုဝ်း။
မၼ်းၸဝ်ႈဢၼ်ဢုပ်ႉပိူင်ႇမဵဝ်းၵူၼ်းတင်းလၢႆၼၼ်ႉတၵ်းဢမ်ႇၸီႇယၢင်ႇပၼ်တၢမ်ႇႁိုဝ်း။ မၼ်းၸဝ်ႈဢၼ်ပဵၼ်သြႃႇဢၼ်သင်ႇသွၼ် ပၼ်ၵူၼ်းတင်းလၢႆၼၼ်ႉတၵ်းဢမ်ႇမီး ပိင်ႇၺႃႇႁိုဝ်း။
ထႃႇဝရႃႉၽြႃး၊ ႁုတၢင်းၵျၢမ်ႇတၢင်းပွင် တၢင်းဢၼ်ၵူၼ်းၶႆႈၸႂ်ပဵၼ်လၢႆလၢႆ ဢမ်ႇပွင်ႇလွင်ႈၵႃႈသင်ၼၼ်ႉယူႇဢေႃႈ။
ထႃႇဝရႃႉၽြႃး၊ တီႈၶႃႈ။ ၵေႃႉဢၼ်ၸဝ်ႈႁဝ်းသုင်းမႃႉလႄႈဢဝ်တြႃးၸဝ်ႈသွၼ်ပၼ်ၼၼ်ႉ မီးမၢင်ႇၵလႃႇတီႈၶႃႈဢေႃႈ။
ၸဝ်ႈႁဝ်းႁႂ်ႈမၼ်းလႆႈလိုဝ်ႈၼိမ်ၼိမ်လီလီလႄႈလွတ်ႈသေၵႃႈၼႂ်းမိုဝ်ႉဝၼ်းတုၵ်ႉၶႃႉ တေႃႇထိုင်ႁွတ်ႈမီးၶုမ်ဢၼ်ၶုတ်းဝႆႉ ႁႂ်ႈပဵၼ်တူင်ႇၶိုမ်းပုၼ်ႈၵူၼ်းဢၼ်ႁၢႆႉဢၼ်မိူၵ်ႈ ယဝ်ႉတူဝ်ႈလီငၢမ်းၼၼ်ႉတီႈၶႃႈဢေႃႈ။
ထႃႇဝရႃႉၽြႃး၊ ဢမ်ႇပႄႇပႅတ်ႈၵူၼ်းမၼ်းၸဝ်ႈတင်းလၢႆလႄႈ မၼ်းၸဝ်ႈဢမ်ႇၸုၼ်ႉပႅတ်ႈၶဝ်ၸိူဝ်းဢၼ်ၸၢပ်ႈသႅင်ႇၵၼ်တင်းမၼ်းၸဝ်ႈၼၼ်ႉတီႈၶႃႈ။
တၢင်းဢၼ်တႅပ်းတတ်းၽဵင်ႇပဵင်းလီၼၼ်ႉ တၵ်းၶိုၼ်းမီးမႃးၵႃႈၼႂ်းလုမ်းဢၼ် ၸီႇယၢင်ႇတြႃးလႄႈ၊ ၶဝ်ၸိူဝ်းဢၼ်သိုဝ်ႈဢၼ်ယူဝ်းၼၼ်ႉ တၵ်းၵမ်ႉထွၵ်ႈႁဵတ်းၸွမ်းမၼ်းဢေႃႈ။
ၽူႈလႂ်တၵ်းလုၵ်ႉယူႇၽၢႆႇၵဝ်လႄႈႁႄႉၶႅၼ် ၵူၼ်းႁၢႆႉတင်းလၢႆ။ ၽူႈလႂ်တၵ်းမီးယူႇၽၢႆႇၵဝ်လႄႈႁႄႉၶႅၼ် ၵူၼ်းဢၼ်ဢမ်ႇတြႃးတင်းလၢႆ။
သင် ထႃႇဝရႃႉၽြႃး၊ ဢမ်ႇၸွႆႈ ဢမ်ႇထႅမ်ၵဝ်ယူႇၸိုင်၊ ၵဝ်တၵ်းတေလႆႈၵႂႃႇယူႇၵႃႈတီႈမိူင်း မရၼႃႉၼၼ်ႉၶၼ်ၽႂ်းၼႃႇယဝ်ႉယဝ်ႉ။
မိူဝ်ႈဢၼ်ၵဝ်လၢတ်ႈဝႃႈ၊ “ၵဝ်လူမ်ႉၵႂႃႇယဝ်ႉ၊” ဝႃႈၼင်ႇၼႆၼၼ်ႉၸိုင်၊ ထႃႇဝရႃႉၽြႃး၊ တီႈၶႃႈမႅတ်ႈတႃႇၵရုၼႃႇၸဝ်ႈႁဝ်းၼၼ်ႉပူၵ်းၶႃႈၸဝ်ႈလုၵ်ႉတီႈၶႃႈဢေႃႈ။
ၼႂ်းမိူဝ်ႈဢၼ်ၶႃႈၸဝ်ႈၸႂ်ၼမ်ယူႇၼၼ်ႉ ၸဝ်ႈႁဝ်းႁႂ်ႈၶႃႈၸဝ်ႈသၢၵ်ႈသႃႇၸႂ်လႄႈ လႆႈၸူမ်းလႆႈသိူဝ်းတီႈၶႃႈဢေႃႈ။
ၸဝ်ႈႁဝ်းယင်းဢမ်ႇၸၢပ်ႈသႅင်ႇၵၼ်တင်းၶုၼ်ဢၼ်ႁၢႆႉဢၼ်မိူၵ်ႈတင်းလၢႆ ၸိူဝ်းဢၼ်ၸီႇယၢင်ႇၸွမ်းၼင်ႇတၢင်းဢၼ်ဢမ်ႇတြႃးၼၼ်ႉလႄႈ။
ၵျၢမ်ႇပွင်တၢင်းဢၼ်ၶတ်းၵၼ်တင်းၵူၼ်း ဢၼ်လီဢၼ်ငၢမ်းတင်းလၢႆ ဢိၵ်ႇတင်းၸီႇယၢင်ႇႁႂ်ႈဢဝ်ၶဝ်ၸိူဝ်းဢၼ်ဢမ်ႇမီးဢပျတ်ႈၼၼ်ႉတၢႆတီႈၶႃႈဢေႃႈ။
ထႃႇဝရႃႉၽြႃး၊ ၸမ်ႉ၊ၵႅတ်ႇၶႄႁႄႉၵင်ႈ ပၼ်ၵဝ်လႄႈ ၽြႃးပဵၼ်ၸဝ်ႈတီႈဢၼ်ၵဝ် ဢိင်သွၼ်ႈပိုင်ႈဢေႃႈ။
မၼ်းၸဝ်ႈတၵ်းပၼ်တၢမ်ႇတီႈၶဝ်ၸိူဝ်း ဢၼ်ႁၢႆႉဢၼ်မိူၵ်ႈၼၼ်ႉလႄႈ ယႃႉၶဝ်ပႅတ်ႈၵွပ်ႈပိူဝ်ႈတုၸရိူၵ်ႈၶဝ်ၼၼ်ႉဢေႃႈ။ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၼၼ်ႉတၵ်းယႃႉၶဝ်ပႅတ်ႈဢေႃႈ။
မႃးမႃး႟။ ဢွၼ်ၵၼ်ယွင်ႈယေႃး ထႃႇဝရႃႉၽြႃး၊ ၵၼ်တႃႉႁဝ်း။ ဢွၼ်ၵၼ်ႁဵတ်းၵႂၢမ်းဢၼ်သႂၢင်ႇဢၼ်သိူဝ်း တီႈၽြႃးပဵၼ်ၸဝ်ႈ၊ၸဝ်ႈဢၼ်ၵႅတ်ႇၶႄႁႄႉၵင်ႈ ပၼ်ႁဝ်းၼၼ်ႉတႃႉႁဝ်း။
ဢွၼ်ၵၼ်ပႃးတင်းတၢင်းဢၼ်ယွင်ႈယေႃးၵျေးၸူးမၼ်းၸဝ်ႈ ၶဝ်ႈၵႂႃႇၸူးၵႃႈတီႈ၊ ၽၢႆႇၼႃႈမၼ်းၸဝ်ႈသေလႄႈ၊ဢွၼ်ၵၼ်ဢဝ်သဵင်ဢၼ်ယႂ်ႇၼႃႇႁဵတ်းၵႂၢမ်းဢၼ်၊ ယွင်ႈယေႃးမၼ်းၸဝ်ႈၸူမ်းၸူမ်း သိူဝ်းသိူဝ်းတႃႉႁဝ်း။
လွင်ႈမၼ်းၸမ်ႉ၊ ထႃႇဝရႃႉၽြႃး၊ ပဵၼ်ၽြႃး ဢၼ်ယႂ်ႇမျၢတ်ႈၼႃႇ၊ ပဵၼ်ၶုၼ်ႁေႃၶမ်းဢၼ်ယႂ်ႇမျၢတ်ႈၼႃႇသေၽြႃးတင်းသဵင်ႈတင်းလူင်ဢေႃႈ။
မၼ်းၸဝ်ႈဢုပ်ႉပိူင်ႇၵမ်ႇၽႃႇလေႃးၵႃႉတင်းသဵင်ႈ တင်းလူင်တႄႇၸႃႉဢဝ်ႁူးထမ်ႈ ဢၼ်လိုၵ်ႉၼႃႇသေပိူၼ်ႈတေႃႇထိုင်ႁွတ်ႈ ပၢႆၸိၵ်းၸွမ်လွႆဢၼ်သုင်ၼႃႇ သေပိူၼ်ႈၼၼ်ႉဢေႃႈ။
မၼ်းၸဝ်ႈဢုပ်ႉပိူင်ႇၵႃႈၼိူဝ်ပၢင်ႇလၢႆႇဢၼ်မၼ်းၸဝ်ႈၽၢၼ်ႇသၢင်းႁဵတ်းပဵၼ်ဝႆႉ၊ ဢိၵ်ႇတင်းလိၼ်မိူင်းဢၼ်မၼ်းၸဝ်ႈႁဵတ်းဝႆႉၼၼ်ႉၵေႃႈပဵၼ်ၶွင်မၼ်းၸဝ်ႈဢေႃႈ။
မႃးမႃး႟။ ဢွၼ်ၵၼ်ၶုပ်ႉမူပ်ႇလႄႈ ဝႆႈမၼ်းၸဝ်ႈတႃႉႁဝ်း။ ဢွၼ်ၵၼ်ၶုပ်ႉမူပ်ႇၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢၼ်ၽၢၼ်ႇသၢင်း ႁဵတ်းပဵၼ်ႁဝ်းၼၼ်ႉတႃႉႁဝ်း။
မၼ်းၸဝ်ႈပဵၼ်ၽြႃးပဵၼ်ၸဝ်ႈႁဝ်းဢေႃႈ။ ႁဝ်းၵေႃႈပဵၼ်ၶဝ်ၸိူဝ်းဢၼ်မၼ်းၸဝ်ႈ ပႂ်ႉလူလုမ်းလႃးလႄႈ၊ ပဵၼ်ၽုင်သူဝ်းဢၼ်မၼ်းၸဝ်ႈၵမ်ႉထွၵ်ႈ ပၼ်ယူႇၼၼ်ႉဢေႃႈ။ ၼႂ်းဝၼ်းမိူဝ်ႈၼႆႉထွမ်ႇဢဝ်ၵႂၢမ်းဢၼ် မၼ်းၸဝ်ႈလၢတ်ႈလႄႈဝႃႈ၊
“ယႃႇပေႁႂ်ႈမီးၸႂ်ဢၼ်တိုဝ်မိူၼ်ၸိူဝ်ႉၼင်ႇ ပူႇပေႃႈသူ ၵႃႈတီႈ မေႇရိၽႃႉ၊ ၼႂ်းဝၼ်းဢၼ်ၶဝ်မီးၸႂ်ဢၼ်တိုဝ်ၼႂ်းထိူၼ်ႇလႅင်ႉၵႃႈတီႈ မတ်ႉသႃႉ၊ ၼၼ်ႉ။
ၵႃႈတီႈၼၼ်ႈၶဝ်ၸၢမ်းတူၺ်းၵဝ်လႄႈ၊ ပိၵ်ႉသမ်ႉၶဝ်ႁၼ်လွင်ႈတၢင်းဢၼ်ၵဝ်ႁဵတ်းပၼ်ၶဝ်ၼၼ်ႉသေၵေႃႈၶဝ်ယႃႉယုၵ်ႉၵဝ်ဢေႃႈ။
သီႇသိပ်းပီတဵမ်တဵမ် ၵဝ်လီႁင်ႈၵူၼ်း ၸိူဝ်းၼၼ်ႉလႄႈ ၵဝ်ဝႃႈ၊ ‘ၶဝ်ၼႆႉပဵၼ်ၵူၼ်းဢၼ်ဢမ်ႇမီး ၵတိသဵတ်ႈၸႃႇဢေႃႈ။ ၶဝ်ထဵင်ပႅတ်ႈပိင်းၺၢပ်ႈတြႃးၵဝ်တင်းလၢႆလူင်ပႄႇ၊’ ဝႃႈၼင်ႇၼႆဢေႃႈ။
ပိူဝ်ႈၼႆလႄႈၵဝ်ၸႂ်မႆႈၶႂ်ႈၸႃႉလႄႈတိူင်ႇဝႃႈ၊ ‘ၶဝ်တေဢမ်ႇလႆႈၶဝ်ႈၵႃႈၼႂ်းမိူင်းၵတ်းယဵၼ် ၶျၢမ်းသႃႇၵဝ်၊’ ဝႃႈၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။
ႁဵတ်းၵႂၢမ်းဢၼ်မႂ်ႇတီႈ ထႃႇဝရႃႉၽြႃး၊ တႃႉ။ ၵူၼ်းလေႃးၵီႇတင်းသဵင်ႈတင်းလူင်႟။ ႁဵတ်းၵႂၢမ်းတီႈ ထႃႇဝရႃႉၽြႃး၊ တႃႉ။
ႁဵတ်းၵႂၢမ်းတီႈ ထႃႇဝရႃႉၽြႃး၊ လႄႈယွင်ႈယေႃးမၼ်းၸဝ်ႈတႃႉ။ ဢဝ်တြႃးတၢင်းဢၼ်မၼ်းၸဝ်ႈၵႄႇၶျွတ်ႈဢဝ်ၼၼ်ႉမွၵ်ႇလၢတ်ႈၵူႈဝၼ်းၵူႈဝၼ်းတႃႉ။
ၽုၺ်ႇမွၵ်ႇလၢတ်ႈၼႄလွင်ႈမုၼ်ၽုင်းမၼ်းၸဝ်ႈတီႈမဵဝ်းၵူၼ်းတင်းလၢႆ ဢိၵ်ႇတင်းလွင်ႈတၢင်းဢၼ်လီဢၢမ်းမၼ်းၸဝ်ႈတီႈၵူၼ်းတင်းလၢႆတႃႉ။
ထႃႇဝရႃႉၽြႃး၊ ယႂ်ႇမျၢတ်ႈလႄႈ ပဵၼ်ၸဝ်ႈဢၼ်ထုၵ်ႇလီယွင်ႈယေႃးၼႃႇလူင်လၢင်၊ ပဵၼ်ၸဝ်ႈဢၼ်ထိူၵ်ႈၵူဝ်ယမ်ၼႃႇသေၽြႃးတင်းသဵင်ႈတင်းလူင်ဢေႃႈ။
ၽြႃးၵူၼ်းတၢင်ႇၸိူဝ်ႉတၢင်ႇၶိူဝ်းတင်းသဵင်ႈတင်းလူင်ၼၼ်ႉပဵၼ်ႁုၼ်ႇႁၢင်ႈသၢင်းထုၵူၺ်းလႄႈ ထႃႇဝရႃႉၽြႃး၊ ၸမ်ႉ၊ၽၢၼ်ႇသၢင်းႁဵတ်းပဵၼ်ၽႃႉၵၢင်ႁၢဝ်ဢေႃႈ။
မုၼ်ၽုင်းဢိၵ်ႇတင်းဢႃႇၼုၽေႃႇမီးလွမ်ႉႁွပ်ႈမၼ်းၸဝ်ႈဝႆႉလႄႈ ႁႅင်းတၼ်းၶူဝ်းဢိၵ်ႇတင်းၵုင်ႇသရေႇမီးတဵမ်ဝႆႉၵႃႈၼႂ်းၵျွင်းပိၵ်ႈမၢၼ်ႇၸဝ်ႈဢေႃႈ။
ၵူၼ်းလေႃးၵီႇတင်းသဵင်ႈတင်းလူင်ၶဝ်႟။ ယွင်ႈယေႃး ထႃႇဝရႃႉၽြႃး၊ တႃႉ။ ယွင်ႈယေႃးမုၼ်ၽုင်းဢိၵ်ႇတင်းတၼ်းၶူဝ်း မၼ်းၸဝ်ႈတႃႉ။
ယွင်ႈယေႃး ထႃႇဝရႃႉၽြႃး၊ ၸွမ်းလူၺ်ႈ ၼႃႇမႃႉၸိုဝ်ႈသဵင်မၼ်းၸဝ်ႈဢၼ် မုၼ်ၽုင်းယႂ်ႇၼႃႇၼၼ်ႉတႃႉ။ ပႃးတင်းၶိူင်ႈတၢင်းလူႇလႄႈၶဝ်ႈမႃးၵႃႈၼႂ်း ၵျွင်းပိၵ်ႈမၢၼ်ႇၸဝ်ႈတႃႉ။
ဢဝ်တင်းၶိူင်ႈပိူင်ဢၼ်မူတ်းၸၢင်ႇႁၢင်ႈၶိူင်ႈလႄႈဝႆႈသႃတီႈ ထႃႇဝရႃႉၽြႃး၊ တႃႉ။ ၵူၼ်းလိၼ်မိူင်းၶဝ်႟။ သၼ်ႇသၼ်ႇသၢႆသၢႆယူႇၽၢႆႇၼႃႈမၼ်းၸဝ်ႈတႃႉ။
လၢတ်ႈတီႈမဵဝ်းၵူၼ်းတင်းသဵင်ႈတင်းလူင်လႄႈဝႃႈ၊ “ ထႃႇဝရႃႉၽြႃး၊ ၼင်ႈႁၢင်ႈၼင်ႈႁေႃယူႇဢေႃႈ။” လေႃးၵထၢတ်ႈၼႆႉတႄႇယူႇမၼ်ႈမၼ်ႈၶိူင်ႇၶိူင်ႇထၢၼ်ႈပေႃးဢမ်ႇတူင်ႉဢမ်ႇၶွၼ်းလႆႈဢေႃႈ။ မၼ်းၸဝ်ႈတၵ်းၸီႇယၢင်ႇတြႃးသိုဝ်ႈသိုဝ်ႈ တေႃႇတေႃႇတီႈၵူၼ်းတင်းလၢႆဢေႃႈ။
ႁႂ်ႈလိၼ်မိူင်းတင်းၵၢင်ႁၢဝ်မီးတၢင်းဢၼ် ၸူမ်းသိူဝ်းသေၵမ်းလူၺ်ႈ။ ႁႂ်ႈပၢင်ႇလၢႆႇတင်းသတ်ႉတဝႃႇဢၼ်မီး ၼႂ်းမၼ်းၼၼ်ႉႁဵတ်းသဵင်ဢၼ်လင်မေႃးၼၼ်း ယူႇသေၵမ်းလူၺ်ႈ။
ပၢင်ႇတူင်ႈၼႃးတင်းၵႃႈဢၼ်မီးၼႂ်းမၼ်းၵေႃႈႁႂ်ႈသႂၢင်ႇသိူဝ်းသေၵမ်းလူၺ်ႈ။ မိူဝ်ႈၼၼ်ႉတူၼ်ႈမႆႉတူၼ်ႈတွၵ်ႇၵႃႈဢၼ်မီးၵႃႈၼႂ်းထိူၼ်ႇၼႂ်းၶိူဝ်းၸိူဝ်းၼၼ်ႉ၊ တၵ်းဢွၼ်ၵၼ်ႁဵတ်းၵႂၢမ်းဢၼ်သႂၢင်ႇသိူဝ်း။
ၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢေႃႈ။ လွင်ႈမၼ်းၸမ်ႉ၊မၼ်းၸဝ်ႈမႃးဢေႃႈ။ မၼ်းၸဝ်ႈမႃးႁႂ်ႈလႆႈၸီႇယၢင်ႇတြႃး တီႈလိၼ်မိူင်းၼႆႉဢေႃႈ။ မၼ်းၸဝ်ႈတၵ်းၸီႇယၢင်ႇတႅပ်းတတ်းတီႈ လေႃးၵႃႉၼႆႉၸွမ်းၼင်ႇတြႃးဢၼ် သိုဝ်ႈတေႃႇလႄႈတီႈၵူၼ်းတင်းလၢႆၸွမ်းၼင်ႇ သဵတ်ႈၸႃႇတြႃးဢေႃႈ။
ထႃႇဝရႃႉၽြႃး၊ ၼင်ႈႁၢင်ႈၼင်ႈႁေႃယူႇဢေႃႈ။ ႁႂ်ႈၵူၼ်းလိၼ်မိူင်းသႂၢင်ႇသိူဝ်းလႄႈႁႂ်ႈၵူၼ်း ၼႂ်းၵုၼ်တင်းလၢႆမူၼ်ႈပျေႃႇသေၵမ်းလူၺ်ႈ။
မွၵ်ႇၵုမ်ႈဢိၵ်ႇတင်းတၢင်းဢၼ်လပ်းသိင်ႇၽိတ်းၽိတ်းၼၼ်ႉလွမ်ႉႁွပ်ႈႁိမ်းမၼ်းၸဝ်ႈယူႇလႄႈ မၼ်းၸဝ်ႈဢုပ်ႉပိူင်ႇၽွင်းငမ်းယူႇၸွမ်းၼင်ႇ တြႃးသိုဝ်ႈသိုဝ်ႈတေႃႇတေႃႇဢေႃႈ။
ၽႆးၵႂႃႇပႃႈၼႃႈမၼ်းၸဝ်ႈလႄႈမႆႈပႅတ်ႈရၢၼ်ႇသူႇဢၼ်မီးႁိမ်းႁွမ်းမၼ်းၸဝ်ႈၼၼ်ႉဢေႃႈ။
ၽႃႉမႅပ်ႈမၼ်းၸဝ်ႈႁႂ်ႈလေႃးၵႃႉလႅင်းဢေႃႈ။ လိၼ်မိူင်းႁၼ်လႄႈသၼ်ႇဝႆဢေႃႈ။
လွႆတင်းလၢႆၸိူမ်ႈပဵၼ်ၼမ်ႉၵႂႃႇ မိူၼ်ၸိူဝ်ႉၼင်ႇ ၶီႈၽိုင်ႈၸိူမ်ႈၵႃႈတီႈၽၢႆႇၼႃႈ ထႃႇဝရႃႉၽြႃး၊ ၵႃႈတီႈၽၢႆႇၼႃႈၸဝ်ႈၽြႃးဢၼ်ဢုပ်ႉပိူင်ႇလိၼ်မိူင်းတင်းသဵင်ႈတင်းလူင်ၼၼ်ႉဢေႃႈ။
ၽႃႉၵၢင်ႁၢဝ်ၽုၺ်ႇမွၵ်ႇလၢတ်ႈလူၺ်ႈလွင်ႈတၢင်းဢၼ်သိုဝ်ႈတေႃႇမၼ်းၸဝ်ႈလႄႈ မဵဝ်းၵူၼ်းတင်းသဵင်ႈတင်းလူင်လႆႈႁၼ်မုၼ်ၽုင်းမၼ်းၸဝ်ႈဢေႃႈ။
ၶဝ်ၸိူဝ်းဢၼ်ဝႆႈႁုၼ်ႇႁၢင်ႈသၢင်းထုၼၼ်ႉလႆႈဢွၼ်ၵၼ်ဢူၵ်းဢၢႆၵူႈၵေႃႉၵူႈၵူၼ်းလႄႈ ၽြႃးၵႃႈမီးတင်းသဵင်ႈတင်းလူင်ဢွၼ်ၵၼ်ၶုပ်ႉမူပ်ႇၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢေႃႈ။
ထႃႇဝရႃႉၽြႃး၊ တီႈၶႃႈ။ ၵူၼ်းဝဵင်း ၸိဢုၼ်ႇ၊ ၶဝ်လႆႈငိၼ်းလႄႈၸူမ်းသိူဝ်းဢေႃႈ။ ၵူၼ်းဝဵင်း ယုတႃႉ၊ တင်းလၢႆၵေႃႈသႂၢင်ႇသိူဝ်းယူႇ၊ ၵွပ်ႈပိူဝ်ႈလွင်ႈတၢင်းဢၼ်၊ၸဝ်ႈႁဝ်းၸီႇယၢင်ႇတြႃးၼၼ်ႉဢေႃႈ။
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ တီႈၶႃႈ။ ၸဝ်ႈႁဝ်းဢုပ်ႉပိူင်ႇလိၼ်မိူင်းတင်းသဵင်ႈလႄႈ ၸဝ်ႈႁဝ်းသုင်မျၢတ်ႈၼႃႇသေၽြႃးၵႃႈမီး တင်းသဵင်ႈတင်းလူင်ၼၼ်ႉတီႈၶႃႈဢေႃႈ။
ထႃႇဝရႃႉၽြႃး၊ ႁၵ်ႉပႅင်းၶဝ်ၸိူဝ်းဢၼ်ၸင်းတၢင်းဢၼ်ႁၢႆႉဢၼ်မိူၵ်ႈၼၼ်ႉဢေႃႈ။ မၼ်းၸဝ်ႈၵႅတ်ႇၶႄႁႄႉၵင်ႈဢသၢၵ်ႈ ၵူၼ်းမၼ်းၸဝ်ႈတင်းလၢႆၼၼ်ႉလႄႈ ၵႄႇသႄႇဢဝ်ၶဝ်လွတ်ႈသေၵႃႈၼႂ်းတၼ်းၶူဝ်းၵူၼ်းဢၼ်ႁၢႆႉဢၼ်မိူၵ်ႈၼၼ်ႉဢေႃႈ။
ဢၼ်လႅင်းထွင်ႇႁိူဝ်ႈၵႃႈၼိူဝ်ၶဝ်ၸိူဝ်းဢၼ်သိုဝ်ႈတေႃႇတင်းလၢႆလႄႈ တၢင်းဢၼ်သႂၢင်ႇသိူဝ်းထွင်ႇၸူးၶဝ်ၸိူဝ်းဢၼ်ၸႂ်လီၸႂ်ဝၢၼ်ၼၼ်ႉဢေႃႈ။
သူၸိူဝ်းဢၼ်သိုဝ်ႈတေႃႇၶဝ်႟။ ဢွၼ်ၵၼ်မီးတၢင်းဢၼ်ၸူမ်းသိူဝ်း ၵွပ်ႈပိူဝ်ႈလွင်ႈတၢင်းဢၼ် ထႃႇဝရႃႉၽြႃး၊ ႁဵတ်းဝႆႉယဝ်ႉၸိူဝ်းၼၼ်ႉတႃႉ။ ဢွၼ်ၵၼ်ၶုၵ်းၸႂ်လႆႈတၢင်းဢၼ်ၽြႃးပဵၼ်ၸဝ်ႈဢၼ်မူတ်းၸၢင်ႇႁဵတ်းဝႆႉယဝ်ႉၼၼ်ႉလႄႈ ဢွၼ်ၵၼ်ယွင်ႈယေႃးၵျေးၸူးမၼ်းၸဝ်ႈတႃႉ။
ဢွၼ်ၵၼ်ႁဵတ်းၵႂၢမ်းဢၼ်မႂ်ႇတီႈ ထႃႇဝရႃႉၽြႃး၊ တႃႉ။ မၼ်းၸဝ်ႈႁဵတ်းလွင်ႈတၢင်းဢၼ်လီဢၢမ်း တင်းလၢႆယဝ်ႉယဝ်ႉ။ ၵွပ်ႈပိူဝ်ႈဢဵၼ်ႁႅင်းဢိၵ်ႇတင်းတၼ်းၶူဝ်းဢၼ် မူတ်းၸၢင်ႇမၼ်းၸဝ်ႈၼၼ်ႉလႄႈ မၼ်းၸဝ်ႈလႆႈပႄႉလႆႈၼႅင်ႇယဝ်ႉယဝ်ႉ။
ထႃႇဝရႃႉၽြႃး၊ မွၵ်ႇလၢတ်ႈပိုၼ်ၽၢဝ်ႇလွင်ႈတၢင်းဢၼ်မၼ်းၸဝ်ႈလႆႈပႄႉလႆႈၼႅင်ႇယဝ်ႉလႄႈ ဢဝ်တင်းတၼ်းၶူဝ်းဢၼ်မၼ်းၸဝ်ႈ ၵႄႇသႄႇၶျွတ်ႈဢဝ်ၼၼ်ႉ ႁႂ်ႈမဵဝ်းၵူၼ်းတင်းလၢႆလႆႈႁုယဝ်ႉယဝ်ႉ။
မၼ်းၸဝ်ႈပႂ်ႉၵတိ တီႈၵူၼ်းမဵဝ်း ဢိသရေး၊ တင်းလၢႆယဝ်ႉလႄႈ မီးသဵတ်ႈၸႃႇတင်းမႅတ်ႈတႃႇၵရုၼႃႇ တီႈၶဝ်ယဝ်ႉယဝ်ႉ။ ၵူၼ်းၵႃႈမီးၵူႈတီႈၵူႈလႅၼ်တင်းသဵင်ႈတင်းလူင် လႆႈႁၼ်တၢင်းဢၼ်ၽြႃးပဵၼ်ၸဝ်ႈႁဝ်း လႆႈပႄႉလႆႈၼႅင်ႇၼၼ်ႉယဝ်ႉယဝ်ႉ။
ၵူၼ်းလိၼ်မိူင်းတင်းသဵင်ႈတင်းမူတ်းၼႆႉ႟။ ဢွၼ်ၵၼ်ႁဵတ်းၵႂၢမ်းတၢင်းဢၼ်သႂၢင်ႇ ဢၼ်သိူဝ်းတီႈ ထႃႇဝရႃႉၽြႃး၊ တႃႉ။ ဢွၼ်ၵၼ်ၵိဝ်သဵင်လင်လင်လႄႈႁဵတ်းၵႂၢမ်း ဢၼ်သႂၢင်ႇဢၼ်သိူဝ်းယွင်ႈယေႃး တီႈမၼ်းၸဝ်ႈတႃႉ။
ႁဵတ်းၵႂၢမ်းယွင်ႈယေႃးတီႈ ထႃႇဝရႃႉၽြႃး၊ တႃႉ။ လဵတ်းတိင်ႇလႄႈႁဵတ်းသဵင်တူႇရိယႃႇတႃႉ။
ပဝ်ႇၼႄးၶရႃႇတင်းတိုင်ႈၶဝ်ၵႂၢႆးသေလႄႈ ႁဵတ်းသဵင်ဢၼ်သႂၢင်ႇဢၼ်သိူဝ်း၊ တီႈ ထႃႇဝရႃႉၽြႃး၊ ဢၼ်ဝႃႈ ၶုၼ်ႁေႃၶမ်းႁဝ်းၼၼ်ႉတႃႉ။
ႁႂ်ႈပၢင်ႇလၢႆႇတင်းသတ်ႉတဝႃႇဢၼ်မီးၼႂ်းမၼ်းႁဵတ်းသဵင်လင်လင်သေၵမ်းလူၺ်ႈ။ ႁႂ်ႈလိၼ်မိူင်းတင်းၶဝ်ၸိူဝ်းဢၼ်ယူႇၼႂ်းမၼ်းႁဵတ်းၵႂၢမ်းသေၵမ်းလူၺ်ႈ။
ႁႂ်ႈၼမ်ႉႁွင်ႈၼမ်ႉၵႄးတင်းလၢႆဢွၼ်ၵၼ် တူပ်းမိုဝ်းသေလႄႈ ႁႂ်ႈလွႆတင်းလၢႆၽွမ်ႉၵၼ်ႁဵတ်းၵႂၢမ်းဢၼ်သႂၢင်ႇဢၼ်သိူဝ်းၵႃႈတီႈၽၢႆႇၼႃႈ ထႃႇဝရႃႉၽြႃး။
ၵွပ်ႈပိူဝ်ႈမၼ်းၸဝ်ႈမႃးႁႂ်ႈလႆႈဢုပ်ႉပိူင်ႇလိၼ်မိူင်းၼၼ်ႉသေၵမ်းလူၺ်ႈ။ မၼ်းၸဝ်ႈတၵ်းၸီႇယၢင်ႇတႅပ်းတတ်း တီႈလေႃးၵႃႉၼႆႉ ၸွမ်းၼင်ႇတြႃးဢၼ်သိုဝ်ႈတေႃႇလႄႈ တီႈၵူၼ်းတင်းလၢႆၸွမ်းၼင်ႇသဵတ်ႈၸႃႇဢေႃႈ။
ထႃႇဝရႃႉၽြႃး၊ ၼင်ႈႁၢင်ႈၼင်ႈႁေႃယူႇဢေႃႈ။ ႁႂ်ႈၵူၼ်းတင်းလႆႈသၼ်ႇဝႆယူႇသေၵမ်းလူၺ်ႈ။ မၼ်းၸဝ်ႈၼင်ႈၵႃႈၼိူဝ်ပလၢင်ႇ ၶေႇရုၽဵမ်ႇ၊ ဢေႃႈ။ ႁႂ်ႈဢိင်ႇသၼ်ႇသေၵမ်းလူၺ်ႈ။
ထႃႇဝရႃႉၽြႃး၊ ယႂ်ႇမျၢတ်ႈၼႃႇၵႃႈၼိူဝ် လွႆ ၸိဢုၼ်ႇ၊ လႄႈ၊ မၼ်းၸဝ်ႈသုင်မျၢတ်ႈၼႃႇၵႃႈၼိူဝ်မဵဝ်းၵူၼ်းၵႃႈမီးတင်းသဵင်ႈတင်းလူင်ဢေႃႈ။
ႁႂ်ႈၶဝ်ယွင်ႈယေႃးၼႃႇမႃႉၸိုဝ်ႈသဵင်ၸဝ်ႈႁဝ်း ဢၼ်ယႂ်ႇမျၢတ်ႈၼႃႇလႄႈလီၵူဝ်လီႁႄၼၼ်ႉသေၵမ်းလူၺ်ႈ။ ၸဝ်ႈႁဝ်းပဵၼ်ဢၼ်မူတ်းၸၢင်ႇတီႈၶႃႈဢေႃႈ။
ၶုၼ်ႁေႃၶမ်းဢၼ်ယႂ်ႇမျၢတ်ႈၼႃႇသေပိူၼ်ႈတီႈၶႃႈ။ ၸဝ်ႈႁဝ်းထုၵ်ႇၸႂ်ၵျိူၵ်ႈၸႂ်တၢင်းဢၼ်ၸီႇယၢင်ႇ ၸွမ်းၼင်ႇတြႃးတီႈၶႃႈဢေႃႈ။ ၸဝ်ႈႁဝ်းႁႂ်ႈတၢင်းဢၼ်သိုဝ်ႈလီယူဝ်းလီတႄႇယူႇၼႂ်းၵူၼ်းမဵဝ်း ဢိသရေး၊ သေယဝ်ႉ၊ ၸဝ်ႈႁဝ်းၸီႇယၢင်ႇၸွမ်းၼင်ႇတြႃးလႄႈတႅပ်းတတ်းသိုဝ်ႈသိုဝ်ႈတေႃႇတေႃႇတီႈၶႃႈဢေႃႈ။
ဢွၼ်ၵၼ်ယွင်ႈယေႃး ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းတႃႉ။ ဢွၼ်ၵၼ်ဝႆႈသႃမၼ်းၸဝ်ႈၵႃႈတီႈၽၢႆႇၼႃႈ ပလၢင်ႇမၼ်းၸဝ်ႈတႃႉ။ ၸဝ်ႈႁဝ်းပဵၼ်ဢၼ်မူတ်းၸၢင်ႇတီႈၶႃႈဢေႃႈ။
မူဝ်းသေႇ၊ ဢိၵ်ႇတင်း ဢႃႇရုၼ်ႇ၊ ၶဝ်ႈပႃးၼႂ်းမဵဝ်းယဵၸ်ႈပရေႃးႁဵၵ်ႈ မၼ်းၸဝ်ႈလႄႈ သမူၺ်ႇလႃႉ၊ သမ်ႉပဵၼ်ၵေႃႉဢၼ်ႁဵတ်းပထၼႃႇတီႈၼႃႇမႃႉၸိုဝ်ႈသဵင်မၼ်းၸဝ်ႈဢေႃႈ။ ၶဝ်ၸိူဝ်းၼႆႉႁွင်ႉၵၢဝ်ႇတီႈ ထႃႇဝရႃႉၽြႃး၊ လႄႈ၊မၼ်းၸဝ်ႈၶိုၼ်းဢိူဝ်ဢေႃႈ။
မၼ်းၸဝ်ႈယူႇၵႃႈၼႂ်းမွၵ်ႇၵုမ်ႈသေလႄႈ လၢတ်ႈတေႃႇၶဝ်ဢေႃႈ။ ၶဝ်ၵေႃႈဢွၼ်ၵၼ်ပႂ်ႉၵမ်ပႂ်ႉၸွမ်းထုင်းၽိင်ႈတြႃး ဢိၵ်ႇတင်းပိင်းၺၢပ်ႈတြႃးဢၼ်မၼ်းၸဝ်ႈ ၸီႇယၢင်ႇဝႆႉၼၼ်ႉဢေႃႈ။
ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၶႃႈတီႈၶႃႈ။ ၸဝ်ႈႁဝ်းၶိုၼ်းဢိူဝ်ၶဝ်ၸိူဝ်းၼၼ်ႉ တီႈၶႃႈဢေႃႈ။ ပိၵ်ႉသမ်ႉၸဝ်ႈႁဝ်းပၼ်တၢမ်ႇဢပျတ်ႈၵွပ်ႈပိူဝ်ႈၶဝ်ၽိတ်းပိူင်ႈၼၼ်ႉသေၵေႃႈ ၸဝ်ႈႁဝ်းယင်းၼႄပျႃးလွင်ႈဢၼ်ၸဝ်ႈႁဝ်း ပဵၼ်ၽြႃးဢၼ်ပွႆႇလွတ်ႈဢပျတ်ႈၼၼ်ႉယူႇ တီႈၶႃႈဢေႃႈ။
ဢွၼ်ၵၼ်ယွင်ႈယေႃး ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းလႄႈ၊ ဢွၼ်ၵၼ်ဝႆႈသႃမၼ်းၸဝ်ႈၵႃႈတီႈလွႆ မူတ်းၸၢင်ႇၸဝ်ႈၼၼ်ႉတႃႉ။ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်း ပဵၼ်ဢၼ်မူတ်းၸၢင်ႇတီႈၶႃႈဢေႃႈ။
ၵူၼ်းလေႃးၵီႇၵႃႈမီးတင်းသဵင်ႈတင်းလူင်႟။ ႁဵတ်းၵႂၢမ်းတီႈ ထႃႇဝရႃႉၽြႃး၊ တႃႉ။
ဢွၼ်ၵၼ်မီးတၢင်းဢၼ်ၸူမ်းသိူဝ်းသေလႄႈ ပွင်ႁဵတ်းၵၢၼ် ထႃႇဝရႃႉၽြႃး၊ တႃႉ။ ႁဵတ်းၵႂၢမ်းဢၼ်သႂၢင်ႇဢၼ်သိူဝ်းသေလႄႈၶဝ်ႈၸူးၵႃႈတီႈၽၢႆႇၼႃႈမၼ်းၸဝ်ႈတႃႉ။
ယႃႇပေလူင်လိုမ်းလွင်ႈတၢင်းဢၼ် ထႃႇဝရႃႉၽြႃး၊ ပဵၼ်ၽြႃးပဵၼ်ၸဝ်ႈၼၼ်ႉ၊ မၼ်းၸဝ်ႈႁဵတ်းႁႂ်ႈႁဝ်းပဵၼ်မႃးလႄႈႁဝ်းလႆႈပဵၼ်ၵေႃႉဢၼ်ၸၢပ်ႈသႅင်ႇၵၼ်တင်းမၼ်းၸဝ်ႈ၊ ပဵၼ်ၵူၼ်းမၼ်းၸဝ်ႈ၊ပဵၼ်ၽုင်သူဝ်းဢၼ် မၼ်းၸဝ်ႈပိူင်ႇဢေႃႈ။
ဢွၼ်ၵၼ်ပႃးၸႂ်ဢၼ်ယွင်ႈယေႃးၵျေးၸူး မၼ်းၸဝ်ႈသေလႄႈ ၶဝ်ႈၵႃႈၼႂ်းၽၵ်းတူၵျွင်းပိၵ်ႈမၢၼ်ႇၸဝ်ႈတႃႉ။ ဢွၼ်ၵၼ်ယွင်ႈယေႃးၵျေးၸူးမၼ်းၸဝ်ႈလႄႈ ယုၵ်ႉယွင်ႈၼႃႇမႃႉၸိုဝ်ႈသဵင်မၼ်းၸဝ်ႈတႃႉ။
လွင်ႈမၼ်းၸမ်ႉ၊ ထႃႇဝရႃႉၽြႃး၊ ပဵၼ်ဢၼ် ၸႂ်လီၸႂ်ဝၢၼ်ၼႃႇဢေႃႈ။ မႅတ်ႈတႃႇမၼ်းၸဝ်ႈတႄႇယူႇၼိၵ်ႈၸႃႉ ထႃႇဝရႃႉလႄႈ သဵတ်ႈၸႃႇမၼ်းၸဝ်ႈၼၼ်ႉမီးယူႇၵူႈၸူဝ်ႈၵူႈပၢၼ်သိုပ်ႇသိုပ်ႇတၢမ်တၢမ်ဢေႃႈ။
ၵဝ်တၵ်းႁဵတ်းၵႂၢမ်းလူၺ်ႈလွင်ႈၵတိသဵတ်ႈၸႃႇ ဢိၵ်ႇတင်းလွင်ႈတၢင်းဢၼ်ၸီႇယၢင်ႇၸွမ်းၼင်ႇတြႃးၼၼ်ႉတီႈၶႃႈဢေႃႈ။ ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈတၵ်းႁဵတ်းၵႂၢမ်းတီႈၸဝ်ႈႁဝ်းတီႈၶႃႈဢေႃႈ။
ၶႃႈၸဝ်ႈတၵ်းဝႆႉသတိၵမ်ၵျၢင်ႉၸွမ်းၼင်ႇတြႃး ၼင်ႇႁိုဝ်တၵ်းၵၢင်းလွတ်ႈတင်းတၢင်းဢၼ်တၢင်ႇဢပျတ်ႈၼၼ်ႉတီႈၶႃႈဢေႃႈ။ ၸဝ်ႈႁဝ်းတၵ်းမႃးၸူးတီႈၶႃႈၸဝ်ႈမိူဝ်ႈလႂ်တီႈၶႃႈ။ ၶႃႈၸဝ်ႈတၵ်းၵမ်ၵျၢင်ႉတၢင်းဢၼ်ၶၢဝ်ၸၢင်ႇယူႇၵႃႈၼႂ်းႁိူၼ်းၶႃႈၸဝ်ႈတီႈၶႃႈဢေႃႈ။
ၶႃႈၸဝ်ႈတၵ်းဢမ်ႇႁႂ်ႈလႆႈႁဵတ်းဢၼ်ဢမ်ႇတြႃးမႅၼ်ႈတီႈၶႃႈ။ ၶႃႈၸဝ်ႈဢဵတ်ႇသဵတ်ႇတၢင်းၵမ်တၢင်းၵျၢင်ႉ ၶဝ်ၸိူဝ်းဢၼ်ဝၢႆႇၼႃႈပႅတ်ႈသေၵႃႈတီႈ ၽြႃးပဵၼ်ၸဝ်ႈၸိူဝ်းၼၼ်ႉလႄႈ ၶႃႈၸဝ်ႈဢမ်ႇႁႂ်ႈလႆႈၸၢပ်ႈသႅင်ႇလူၺ်ႈၵၼ် တင်းၶဝ်ၼၼ်ႉတီႈၶႃႈ။
ၶႃႈၸဝ်ႈတၵ်းဢမ်ႇႁႂ်ႈလႆႈမီးတၢင်းၸႂ် ဢၼ်ၵူတ်ႉဢၼ်ငေႃးလႄႈ၊ တၵ်းဢမ်ႇႁႂ်ႈလႆႈႁဵတ်းတၢင်းဢၼ်ဢမ်ႇတြႃး မႅၼ်ႈလႃးလႃးတီႈၶႃႈ။
ၶႃႈၸဝ်ႈတၵ်းပႄႇၽဵဝ်ႈၵေႃႉဢၼ်လွမ်ယႃႉသရေႇပိူၼ်ႈတၢင်ႇၵေႃႉၼၼ်ႉပႅတ်ႈဢေႃႈ။ ၶႃႈၸဝ်ႈတၵ်းဢမ်ႇယိူၼ်ႉဢမ်ႇၶၢမ်ႇ ၵေႃႉဢၼ်ၼႃႈပူၵ်းပႅၼ်လႄႈၸႂ်ၽႅၼ်သုင် ၼၼ်ႉလႃးလႃး။
ၶႃႈၸဝ်ႈတၵ်းတူၺ်းထိုင် ၶဝ်ၸိူဝ်းဢၼ်မီးသဵတ်ႈၸႃႇတီႈၽြႃးပဵၼ်ၸဝ်ႈၼၼ်ႉလႄႈ တၵ်းပၼ်ဢၶႂၢင်ႉႁႂ်ႈၶဝ်လႆႈယူႇလူၺ်ႈၵၼ်တင်းၶႃႈၸဝ်ႈတီႈၶႃႈဢေႃႈ။ ၶဝ်ၸိူဝ်းဢၼ်ၵမ်ၵျၢင်ႉထၢၼ်ႈပေႃးဢမ်ႇမီးတီႈတၵ်းတၢင်ႇဢပျတ်ႈၼၼ်ႉ ၶႃႈၸဝ်ႈတၵ်းပၼ်ဢၶႂၢင်ႉႁႂ်ႈၶဝ်လႆႈပွင်ႁဵတ်းၼႃႈၵၢၼ်ၶႃႈၸဝ်ႈတီႈၶႃႈဢေႃႈ။
ၵေႃႉဢၼ်ၸၢင်ႈပႅတ်ႉၸၢင်ႈလႅၼ်ၼၼ်ႉၸမ်ႉ၊တၵ်းဢမ်ႇလႆႈယူႇၵႃႈၼႂ်းႁေႃၶႃႈၸဝ်ႈ။ ၵေႃႉဢၼ်ၼႃႈသိုဝ်ႈၸႂ်ၵူတ်ႉၼၼ်ႉဢမ်ႇလႆႈယူႇသိုဝ်ႈၼႃႈတႂ်ႈတႃၶႃႈၸဝ်ႈတီႈၶႃႈ။
ၶႃႈၸဝ်ႈတၵ်းယႃႉၽဵဝ်ႈၵူၼ်းဝၢၼ်ႈၵူၼ်းမိူင်းဢၼ်ဢမ်ႇတြႃးၼၼ်ႉပႅတ်ႈၵူႈၼႂ်ၵူႈၼႂ်လႄႈ ၶႃႈၸဝ်ႈတၵ်းပႄႇၽဵဝ်ႈၵူၼ်းႁၢႆႉၵူၼ်းမိူၵ်ႈၼၼ်ႉပႅတ်ႈသေၵႃႈၼႂ်းဝဵင်း ထႃႇဝရႃႉၽြႃး၊ ဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈထွမ်ႇဢဝ်ပထၼႃႇၶႃႈၸဝ်ႈလႄႈ ႁႂ်ႈသဵင်ဢၼ်ၶႃႈၸဝ်ႈႁွင်ႉႁႃပုၼ်ႈတၢင်းဢၼ်ၸွႆႈတၢင်းထႅမ်ၼၼ်ႉ ႁွတ်ႈထိုင်တီႈၸဝ်ႈႁဝ်းသေၵမ်းတီႈၶႃႈ။
ယၢမ်းမိူဝ်ႈဢၼ်ၶႃႈၸဝ်ႈထူပ်းၽေးၼၼ်ႉ ၶႅၼ်းတေႃႈၸဝ်ႈႁဝ်းယႃႇပေဝၢႆႇၼႃႈပႅတ်ႈသေၵႃႈတီႈၶႃႈၸဝ်ႈသေၵမ်းတီႈၶႃႈ။ ၶႅၼ်းတေႃႈထွမ်ႇဢဝ်ၶႃႈၸဝ်ႈသေလႄႈ ၸဵဝ်းၶိုၼ်းဢိူဝ် ၼႂ်းမိူဝ်ႈဢၼ်ၶႃႈၸဝ်ႈႁွင်ႉၵၢဝ်ႇတီႈ ၸဝ်ႈႁဝ်းၼၼ်ႉသေၵမ်းတီႈၶႃႈ။
ဢသၢၵ်ႈၶႃႈၸဝ်ႈသဵင်ႈၵႂႃႇႁၢႆၵႂႃႇမိူၼ်ၸိူဝ်ႉၼင်ႇၵႂၼ်းၽႆးၼၼ်ႉလႄႈ တူဝ်ၶၼ်ႇထႃႇၶႃႈၸဝ်ႈမႆႈၶႅမ်ႈၵႂႃႇမိူၼ်ၸိူဝ်ႉၼင်ႇထၢၼ်ႇၽႆးၼၼ်ႉတီႈၶႃႈဢေႃႈ။
ၶႃႈၸဝ်ႈလႆႈၶၢမ်ႇတၢင်းဢၼ်တီႇပႅတ်ႈထၢင်ပႅတ်ႈမိူၼ်ၸိူဝ်ႉၼင်ႇယိူဝ်ႈယႃႈၼၼ်ႉလႄႈ ၶႃႈၸဝ်ႈဢမ်ႇမီးၸႂ်ဢၼ်ၶႂ်ႈၵိၼ်ၶႂ်ႈၶူပ်း လႃးလႃးတီႈၶႃႈယဝ်ႉ။
ၶႃႈၸဝ်ႈလႆႈၶၢင်းၶီၶၢင်းၽၢၼ်ယူႇလႄႈၶႃႈၸဝ်ႈၵူၺ်းမီးၼင်ႁေႃႇလုပ်ႇယူႇတီႈၶႃႈယဝ်ႉ။
ၶႃႈၸဝ်ႈပဵၼ်ၸိူဝ်ႉၼင်ႇလၢင်းတႃႉၵႃႈၼႂ်းထိူၼ်ႇလႅင်ႉၼၼ်ႉလႄႈ ပဵၼ်ၸိူဝ်ႉၼင်ႇၼူၵ်ႉၵဝ်ႉဢၼ်မီးၵႃႈတီႈဢၼ်ၵိူၼ်ႇပင်းလုလႅဝ်ၼၼ်ႉတီႈၶႃႈယဝ်ႉ။
ၶႃႈၸဝ်ႈၼွၼ်းဢိင်ယူႇယင်းဢမ်ႇလပ်းလႆႈလႄႈ၊ ပဵၼ်ၸိူဝ်ႉၼင်ႇၼူၵ်ႉဢၼ်ၸပ်းလင်ၶႃးယူႇတူဝ်လဵဝ်ၵူၺ်းမၼ်းၼၼ်ႉတီႈၶႃႈယဝ်ႉ။
ရၢၼ်ႇသူႇၶႃႈၸဝ်ႈတင်းလၢႆသႄႉသွမ်းၶႃႈၸဝ်ႈယူႇတင်းဝၼ်းတင်းဝၼ်းလႄႈ ၶဝ်ၸိူဝ်းဢၼ်ႁဵတ်းပျၢၵ်ႈႁဵတ်းၶူဝ်ၶႃႈၸဝ်ႈၼၼ်ႉ ၸၢင်ႈဢဝ်ၸိုဝ်ႈသဵင်ၶႃႈၸဝ်ႈႁဵတ်းတၢင်းဢၼ်တိူင်ႇဝႃႈတီႈၶႃႈဢေႃႈ။
ၶႃႈၸဝ်ႈလႆႈၵိၼ်တဝ်ႈမိူၼ်ၸိူဝ်ႉၼင်ႇ ၶဝ်ႈမုၼ်းလႄႈ မိူဝ်ႈဢၼ်ၵိၼ်ၼမ်ႉၼၼ်ႉလႆႈ ၵိၼ်လေႃးၼမ်ႉတႃယူႇ၊
ၵွပ်ႈပိူဝ်ႈဢၼ်မၼ်းၸဝ်ႈၸီႇယၢင်ႇလႄႈပၼ်တၢမ်ႇဢပျတ်ႈၼၼ်ႉတီႈၶႃႈဢေႃႈ။ ၸဝ်ႈႁဝ်းယိပ်းယူၵ်ႉၶႃႈၸဝ်ႈသေလႄႈဢဝ် ထိမ်ႈတူၵ်းပႅတ်ႈတီႈၶႃႈယဝ်ႉ။
ဢသၢၵ်ႈၶႃႈၸဝ်ႈပဵၼ်မိူၼ်ၸိူဝ်ႉၼင်ႇၵွင်ႉငဝ်း ၶိင်ႇႁူဝ်ၶမ်ႈၼၼ်ႉယူႇလႄႈ ၶႃႈၸဝ်ႈႁဵဝ်ႇၸွပ်ႈၵႂႃႇမိူၼ်ၸိူဝ်ႉၼင်ႇယိူဝ်ႈယႃႈ တီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းၸမ်ႉ၊ၼင်ႈႁၢင်ႈၼင်ႈႁေႃယူႇၼိၵ်ႈၸႃႉထႃႇဝရႃႉလႄႈ ၵူၼ်းတၵ်းၶုၵ်းၸႂ်လႆႈၸဝ်ႈႁဝ်းယူႇၵူႈသိုပ်ႇၵူႈၶိူဝ်းတီႈၶႃႈဢေႃႈ။
ၸဝ်ႈႁဝ်းတၵ်းလုၵ်ႉလႄႈဢဵတ်းလူဝဵင်း ၸိဢုၼ်ႇ၊ တီႈၶႃႈဢေႃႈ။ ၶိင်ႇဢၼ်ၸဝ်ႈႁဝ်းတၵ်းဢဵတ်းလူမၼ်းၼၼ်ႉ မႃးယူႇလႄႈ၊ မိူဝ်ႈလဵဝ်ၼႆႉပဵၼ်ၶိင်ႇၼၼ်ႉတီႈၶႃႈယဝ်ႉ။
ၶႃႈၸဝ်ႈႁဝ်းၸိူဝ်းၼၼ်ႉယင်းႁၵ်ႉဝဵင်းၼၼ်ႉယူႇ ပိၵ်ႉသမ်ႉမၼ်းလႆႈၶၢမ်ႇတၢင်းဢၼ်ယႃႉပႅတ်ႈယဝ်ႉၼၼ်ႉလႄႈ ၶဝ်ယင်းဢဵတ်းလူမၼ်းယူႇပိၵ်ႉသမ်ႉမၼ်း လႆႈလုလႅဝ်ယဝ်ႉၼၼ်ႉဢေႃႈ။
မဵဝ်းၵူၼ်းတင်းလၢႆတၵ်းဢွၼ်ၵၼ်ၵူဝ်ႁႄ ထႃႇဝရႃႉၽြႃး၊ လႄႈ ၶုၼ်ႁေႃၶမ်းလေႃးၵီႇတင်းသဵင်ႈတင်းလူင်တၵ်းဢွၼ်ၵၼ်ၵူဝ်ႁႄမုၼ်ၽုင်းမၼ်းၸဝ်ႈဢေႃႈ။
မိူဝ်ႈဢၼ် ထႃႇဝရႃႉၽြႃး၊ ၶိုၼ်းတႄႇၶိုၼ်းတင်ႈဝဵင်း ၸိဢုၼ်ႇ၊ ၼၼ်ႉၸိုင်၊ မၼ်းၸဝ်ႈတၵ်းႁႂ်ႈတၢင်းဢၼ်ယႂ်ႇမျၢတ်ႈမၼ်းၸဝ်ႈၼၼ်ႉထၢင်ႇသႃးမႃးဢေႃႈ။
မၼ်းၸဝ်ႈတၵ်းထွမ်ႇငိၼ်းဢဝ်ပထၼႃႇၶဝ်ၸိူဝ်းဢၼ်ၽၢၼ်ဢၼ်ၵႅၼ်းၼၼ်ႉလႄႈ တၵ်းထွမ်ႇဢဝ်ၵႂၢမ်းသူးတွင်းၶဝ်ဢေႃႈ။
လွင်ႈတၢင်းၸိူဝ်းၼၼ်ႉၸိုင်၊တႅမ်ႈမၢႆဝႆႉပုၼ်ႈၵူၼ်းဢၼ်သိုပ်ႇမႃးၼၼ်ႉတင်းလၢႆ၊ ပုၼ်ႈလွင်ႈၼင်ႇႁိုဝ်ၶဝ်ၸိူဝ်းဢၼ် တၵ်းၵိူတ်ႇလဵင်ႉမႃးၵမ်းလိုၼ်းၼၼ်ႉတၵ်းဢွၼ်ၵၼ်ယွင်ႈယေႃးမၼ်းၸဝ်ႈၼၼ်ႉတႃႉ။
ထႃႇဝရႃႉၽြႃး၊ ယူႇၵႃႈတီႈထႃႇၼႃႉတီႈမူတ်းၸၢင်ႇဢၼ်သုင်မျၢတ်ႈ ဢၼ်ဝႃႈၽုင်ႇၵၢင်ႁၢဝ်ၼၼ်ႉသေလႄႈ ၵူမ်ႈတူၺ်းလိၼ်မိူင်းဢေႃႈ။
မၼ်းၸဝ်ႈလႆႈငိၼ်းသဵင်ၶၢင်းၶီၶၢင်းၽၢၼ်ၵူၼ်းတူၵ်းထွင်ႇတင်းလၢႆ ဢိၵ်ႇတင်းလႆႈပွႆႇၶဝ်ၸိူဝ်းဢၼ်ၶၢမ်ႇ တၢင်းဢၼ်ၸီႇယၢင်ႇဝႆႉႁႂ်ႈဢဝ်တၢႆၼၼ်ႉ လွတ်ႈတီႈၶႃႈယဝ်ႉ။
မိူဝ်ႈလဵဝ်ၼႆႉတၵ်းၽုၺ်ႇမွၵ်ႇလၢတ်ႈလူၺ်ႈလွင်ႈၼႃႇမႃႉၸိုဝ်ႈသဵင်မၼ်းၸဝ်ႈ၊ ၵႃႈၼႂ်းဝဵင်း ၸိဢုၼ်ႇ၊ လႄႈ၊ တၵ်းဢွၼ်ၵၼ်ယွင်ႈယေႃးမၼ်းၸဝ်ႈၵႃႈၼႂ်း ဝဵင်း ယေႇရုသလႅမ်ႇ။
ၼႂ်းမိူဝ်ႈဢၼ်မဵဝ်းၵူၼ်းတင်းလၢႆဢိၵ်ႇတင်းသိုင်ႇၸိုင်ႈဝၢၼ်ႈမိူင်းတင်းလၢႆၸုၵၼ်တုမ်ၵၼ်၊ ႁႂ်ႈလႆႈဝႆႈသႃ ထႃႇဝရႃႉၽြႃး၊ ၼၼ်ႉဢေႃႈ။
ထႃႇဝရႃႉၽြႃး၊ ႁႂ်ႈဢဵၼ်ႁႅင်းၵဝ်သုတ်ႈယွမ်းၵႂႃႇၸဵမ်မိူဝ်ႈၵဝ်ယင်းလဵၵ်ႉၼၼ်ႉလႄႈ ႁႂ်ႈဢသၢၵ်ႈၵဝ်ပွတ်းၵႂႃႇဢေႃႈ။
ၽြႃးပဵၼ်ၸဝ်ႈတီႈၶႃႈ။ ၸူဝ်ႈဢၼ်ၶႃႈၸဝ်ႈဢမ်ႇပႆႇထဝ်ႈပႆႇၵႄႇၼႆႉ၊ ၶႅၼ်းတေႃႈယႃႇပေၼုၵ်ႈဢဝ်ၶႃႈၸဝ်ႈ ၵႂႃႇသေၵမ်းတီႈၶႃႈ။ ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းတႄႇယူႇမီးယူႇၼိၵ်ႈၸႃႉထႃႇဝရႃႉတီႈၶႃႈဢေႃႈ။
ၸဵမ်မိူဝ်ႈၵွၼ်ႇမိူဝ်ႈမိုၼ်ႉၼၼ်ႉ ၸဝ်ႈႁဝ်းၽၢၼ်ႇသၢင်းႁဵတ်းပဵၼ်လိၼ်မိူင်းလႄႈ မိုဝ်းၸဝ်ႈႁဝ်းႁဵတ်းပဵၼ်ၽႃႉၵၢင်ႁၢဝ် တီႈၶႃႈဢေႃႈ။
ပိၵ်ႉသမ်ႉဢၼ်ၸိူဝ်းၼၼ်ႉတၵ်းလုလႅဝ် ႁၢႆၵႂႃႇသေၵေႃႈ ၸဝ်ႈႁဝ်းယင်းတၵ်းတႄႇယူႇမီးယူႇ တီႈၶႃႈဢေႃႈ။ ပိၵ်ႉသမ်ႉလွင်ႈတၢင်းၸိူဝ်းၼၼ်ႉပဵၼ်ဢၼ်ၵဝ်ႇၵႂႃႇမွင်ၵႂႃႇၸိူဝ်ႉၼင်ႇၶူဝ်းလဵင်းလႄႈ ၸဝ်ႈႁဝ်းထွတ်ႇထႆႇၶဝ်ၸိူဝ်ႉၼင်ႇဢၼ် ထႆႇၶူဝ်းထႆႇလဵင်းၼၼ်ႉလႄႈ ၶဝ်ပဵၼ်ဢၼ်ပူၼ်ႉၵႂႃႇႁၢႆၵႂႃႇဢေႃႈ။
ၸဝ်ႈႁဝ်းၸမ်ႉ၊ဢမ်ႇၶၢႆႉဢမ်ႇပုတ်ႈတီႈၶႃႈ။ ၶူပ်ႇၼီႈပီမိူင်းၸဝ်ႈႁဝ်းၵေႃႈဢမ်ႇသုတ်း ဢမ်ႇသဵင်ႈလႆႈတီႈၶႃႈ။
လုၵ်ႈလၢၼ်ၶႃႈၸဝ်ႈႁဝ်းၶဝ်ၸိူဝ်းၼၼ်ႉတၵ်းတႄႇယူႇလူင်ႉလီလွတ်ႈလီလႄႈ၊ ၵႃႈတႂ်ႈတၢင်းဢၼ်ၸဝ်ႈႁဝ်းၵႅတ်ႇၶႄ ႁႄႉၵင်ႈၼၼ်ႉ၊ ၸူဝ်ႈလုၵ်ႈပၢၼ်လၢၼ်ၶဝ်ၵေႃႈ တၵ်းမၼ်ႈၶိူင်ႇယူႇတီႈၶႃႈဢေႃႈ။
ဝိၺိၺ်ႇၵဝ်႟။ ယွင်ႈယေႃး ထႃႇဝရႃႉၽြႃး၊ တႃႉ။ ၵႃႈဢၼ်မီးယူႇၵႃႈၼႂ်းၵဝ်႟။ ယွင်ႈယေႃးၼႃႇမႃႉၸိုဝ်ႈသဵင်ဢၼ်မူတ်းၸၢင်ႇမၼ်းၸဝ်ႈတႃႉ။
ဝိၺိၺ်ႇၵဝ်႟။ ယွင်ႈယေႃး ထႃႇဝရႃႉၽြႃး၊ တႃႉ။ ယႃႇပေလူင်လိုမ်းၵျေးၸူးမၼ်းၸဝ်ႈ ၵႃႈမီးၸိူဝ်းၼၼ်ႉ။
မၼ်းၸဝ်ႈပွႆႇလွတ်ႈဢပျတ်ႈၵဝ်ၵႃႈမီးၵူႈၸိူဝ်ႉၵူႈပိူင်လႄႈ ႁႂ်ႈတၢင်းၶႆႈတၢင်းပဵၼ်ၵႃႈမီးတင်းသဵင်ႈ တင်းလူင်ႁၢႆဢေႃႈ။
မၼ်းၸဝ်ႈထုတ်ႇၼုၵ်ႈဢဝ်ဢသၢၵ်ႈၵဝ် သေၵႃႈတီႈၶုမ်ပႃႇႁဵဝ်ႈလႄႈ ဢဝ်မႅတ်ႈတႃႇဢိၵ်ႇတင်းတၢင်းဢၼ်ႁၵ်ႉဢဵတ်းလူပၼ်မၢင်ႇၵလႃႇတီႈၵဝ်ဢေႃႈ။
မၼ်းၸဝ်ႈဢဝ်လွင်ႈတၢင်းဢၼ်လီဢၼ်ငၢမ်း ထႅမ်သႂ်ႇတီႈဢသၢၵ်ႈၵဝ် ထၢၼ်ႈပေႃးမီးတၢင်းဢၼ်ၼုမ်ႇလီပီးလီ ယူႇသေလႄႈႁႅင်းယႂ်ႇယူႇ မိူၼ်ၸိူဝ်ႉၼင်ႇၼူၵ်ႉၶၢင်ႇလေႃႉ ၼၼ်ႉဢေႃႈ။
ထႃႇဝရႃႉၽြႃး၊ ႁဵတ်းတၢင်းဢၼ်သိုဝ်ႈ ဢၼ်တေႃႇလႄႈၸီႇယၢင်ႇတႅပ်းတတ်း ၸွမ်းၼင်ႇတြႃး တီႈၶဝ်ၸိူဝ်းဢၼ်လႆႈၶၢမ်ႇတၢင်းဢၼ် ပိူၼ်ႈတဵၵ်းငႅၼ်းၼၼ်ႉဢေႃႈ။
မၼ်းၸဝ်ႈၼႄပျႃးတၢင်းၵျၢမ်ႇဢၼ်မၼ်းၸဝ်ႈၶိုင်ပွင်ဝႆႉၼၼ်ႉတီႈ မူဝ်းသေႇ၊ လႄႈ ႁႂ်ႈၵူၼ်းမဵဝ်း ဢိသရေး၊ ၶဝ်လႆႈႁၼ် ၼႃႈၵၢၼ်တၢင်းႁဵတ်းမၼ်းၸဝ်ႈဢၼ် ယႂ်ႇၼႃႇၼၼ်ႉဢေႃႈ။
ထႃႇဝရႃႉၽြႃး၊ မီးၸႂ်ဢၼ်ဢဵတ်းလူလႄႈႁၵ်ႉပႅင်း၊ ဢမ်ႇသူႈဢွၵ်ႇတေႃးသႃႉလႄႈမီးတၢင်းဢၼ် ပျေႉၸုမ်ႇဝႆႉတင်းမႅတ်ႈတႃႇၵရုၼႃႇဢေႃႈ။
မၼ်းၸဝ်ႈတၢင်ႇဢပျတ်ႈယူႇသေႇသေႇဢမ်ႇၸႂ်ႈ။ မၼ်းၸဝ်ႈဝႆႉတၢင်းၽိတ်းၼႂ်းၸႂ်ယူႇမၼ်ႈမၼ်ႈ ၶိူင်ႇၶိူင်ႇဢမ်ႇၸႂ်ႈ။
မၼ်းၸဝ်ႈဢမ်ႇပၼ်တၢမ်ႇဢပျတ်ႈတီႈႁဝ်း ၸွမ်းၵႃႈၼင်ႇတုၸရိူၵ်ႈႁဝ်းၼၼ်ႉ။
မိူၼ်ၸိူဝ်ႉၼင်ႇဢၼ်ၵၢင်ႁၢဝ်မီးတၢင်းဢၼ်သုင်ၵႃႈၼိူဝ်လိၼ်မိူင်းၼၼ်ႉ မႅတ်ႈတႃႇမၼ်းၸဝ်ႈယႂ်ႇမျၢတ်ႈၼႃႇတီႈၶဝ် ၸိူဝ်းဢၼ်ၵူဝ်ယမ်မၼ်းၸဝ်ႈၼၼ်ႉဢေႃႈ။
မိူၼ်ၸိူဝ်ႉၼင်ႇဢၼ်ၼႃႈဝၼ်းဢွၵ်ႇယၢၼ်ၵႆ ၵၼ်တင်းၼႃႈဝၼ်းတူၵ်းၼၼ်ႉ၊ မၼ်းၸဝ်ႈႁႂ်ႈဢပျတ်ႈႁဝ်းၵႆယၢၼ် ၵၼ်တင်းႁဝ်းဢေႃႈ။
မိူၼ်ၸိူဝ်ႉၼင်ႇဢၼ်ပေႃႈဢဵတ်းလူႁၵ်ႉပႅင်း လုၵ်ႈမၼ်းလၢင်းမၼ်းၼၼ်ႉ၊ ထႃႇဝရႃႉၽြႃး၊ ဢဵတ်းလူႁၵ်ႉပႅင်းၶဝ်ၸိူဝ်းဢၼ်ၵူဝ်ယမ်မၼ်းၸဝ်ႈၼၼ်ႉဢေႃႈ။
လွင်ႈမၼ်းၸမ်ႉ၊မၼ်းၸဝ်ႈႁုလွင်ႈဢၼ် တူဝ်ၶၼ်ႇထႃႇႁဝ်းၼႆႉ ဢဝ်ၵႃႈသင်ႁဵတ်းဝႆႉၼၼ်ႉလႄႈၶုၵ်းၸႂ်လႆႈလွင်ႈဢၼ်ႁဝ်းပဵၼ်မုၼ်ႈလိၼ်ၼၼ်ႉဢေႃႈ။
ႁဝ်းၼႆႉၸမ်ႉ၊ဢသၢၵ်ႈႁဝ်းပဵၼ်ၸိူဝ်ႉၼင်ႇ ယိူဝ်ႈယႃႈၼၼ်ႉလႄႈ ႁဝ်းၸၢင်ႈယႂ်ႇမႃးၼုမ်ႇလီၵီႈလီမိူၼ်ၸိူဝ်ႉၼင်ႇမွၵ်ႇထိူၼ်ႇၼၼ်ႉသေယဝ်ႉ။
လူမ်းထူဝ်းလူမ်းပတ်ႉပူၼ်ႉမၼ်းၵႂႃႇသေယဝ်ႉ ႁႂ်ႈမၼ်းႁၢႆၵႂႃႇလႄႈ ၵမ်းလိုၼ်းတီႈယူႇမၼ်းဢမ်ႇႁုၸၵ်းမၼ်း။
တီႈၶဝ်ၸိူဝ်းဢၼ်ၵူဝ်ယမ် ထႃႇဝရႃႉၽြႃး၊ ၼၼ်ႉၸမ်ႉ တၢင်းႁၵ်ႉမႅတ်ႈတႃႇမၼ်းၸဝ်ႈတႄႇယူႇၼိူဝ် ၶဝ်သေႇသေႇလႄႈ တၢင်းဢၼ်ၸႂ်ၼိမ်ၸႂ်ဝၢၼ်မၼ်းၸဝ်ႈမီးတီႈလုၵ်ႈလၢၼ်မၼ်းၸဝ်ႈသိုပ်ႇသိုပ်ႇတၢမ်တၢမ်။
ဢၼ်ပႂ်ႉပတိၺိၺ်ႇတြႃးမၼ်းၸဝ်ႈလႄႈ မီးသတိႁႂ်ႈလႆႈၵမ်ၵျၢင်ႉပိင်းၺၢပ်ႈမၼ်းၸဝ်ႈ ၸိူဝ်းၼၼ်ႉဢေႃႈ။
ထႃႇဝရႃႉၽြႃး၊ တႄႇပလၢင်ႇမၼ်းၸဝ်ႈ ၵႃႈၼိူဝ်ၽုင်ႇၵၢင်ႁၢဝ်လႄႈ ဢႃႇၼႃႇမၼ်းၸဝ်ႈဢုပ်ႇပိူင်ႇၸွတ်ႇတူဝ်ႈၵႂႃႇ ၵူႈတီႈၵူႈလႅၼ်ဢေႃႈ။
တမၢၼ်ႇၵၢင်ႁၢဝ်ဢၼ်ႁႅင်းတၼ်းၶူဝ်းယႂ်ႇၼႃႇဢၼ်ပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၸဝ်ႈလႄႈ ထွမ်ႇဢဝ်သဵင်ၼုၵ်ႈၵပၢတ်ႈမၼ်းၸဝ်ႈ ယူႇၼၼ်ႉၶဝ်႟။ ဢွၼ်ၵၼ်ယွင်ႈယေႃး ထႃႇဝရႃႉၽြႃး၊ တႃႉ။
ၽုင်းတၼ်းၶူဝ်းၽႃႉၵၢင်ႁၢဝ်ပႃးၸဵမ် ၶႃႈမၼ်းၸဝ်ႈတင်းၶဝ်ၸိူဝ်းဢၼ်၊ ႁဵတ်းၸွမ်းဢလူဝ်ႇၵၢင်ၸႂ်မၼ်းၸဝ်ႈၼၼ်ႉ တင်းသဵင်ႈတင်းလူင်ၶဝ်႟။ ဢွၼ်ၵၼ်ယွင်ႈယေႃး ထႃႇဝရႃႉၽြႃး၊ တႃႉ။
ဝူၺ်ႇၼေႇယႃႉသတ်ႉတဝႃႇဢၼ်မီးၵႃႈတႂ်ႈ တီႈဢၼ်မၼ်းၸဝ်ႈဢုပ်ႉပိူင်ႇၼၼ်ႉတင်းသဵင်ႈတင်းလူင်ၶဝ်႟။ ဢွၼ်ၵၼ်ယွင်ႈယေႃး ထႃႇဝရႃႉၽြႃး၊ တႃႉ။ ဝိၺိၺ်ႇၵဝ်႟။ ယွင်ႈယေႃး ထႃႇဝရႃႉၽြႃး၊ တႃႉ။
ဝိၺိၺ်ႇၵဝ်႟။ ယွင်ႈယေႃး ထႃႇဝရႃႉၽြႃး၊ တႃႉ။ ထႃႇဝရႃႉၽြႃး၊ ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ ၸဝ်ႈႁဝ်းပဵၼ်ဢၼ်ယႂ်ႇမျၢတ်ႈၼႃႇ လူင်လၢင်တီႈၶႃႈဢေႃႈ။ ၸဝ်ႈႁဝ်းဢဝ်တၼ်းၶူဝ်းဢႃႇၼုၽေႃႇ ႁၢင်ႈၶိူင်ႈဝႆႉတီႈၶႃႈဢေႃႈ။
ၸဝ်ႈႁဝ်းဢဝ်ဢၼ်လႅင်းႁူမ်ႇသုမ်ႇတူဝ်ၸဝ်ႈၵဝ်ႇ ဝႆႉတီႈၶႃႈဢေႃႈ။ ၸဝ်ႈႁဝ်းဢဝ်ၽႃႉၵၢင်ႁၢဝ်ၶဵင်ႈမုင်း မိူၼ်ၸိူဝ်ႉၼင်ႇသုမ်ႉထဵင်လႄႈ။
တႄႇႁဵတ်းႁိူၼ်းၸဝ်ႈႁဝ်းၵႃႈၼိူဝ်ၼမ်ႉ ၶူင်းၼိူဝ် ၼၼ်ႉတီႈၶႃႈဢေႃႈ။ ၸဝ်ႈႁဝ်းၶီႇမွၵ်ႇၵုမ်ႈ ပဵၼ်ၸိူဝ်ႉၼင်ႇ လေႃႉမႃႉလႄႈ ၵႂႃႇၵႂႃႇမႃးမႃးယူႇၵႃႈၼိူဝ်ပိၵ်ႇလူမ်းတီႈၶႃႈဢေႃႈ။
ၸဝ်ႈႁဝ်းၸႂ်ႉလူမ်းပဵၼ်ၸိူဝ်ႉၼင်ႇတမၢၼ်ႇ တူဝ်ၸဝ်ႈၵဝ်ႇလႄႈ ၸႂ်ႉသၢႆၽႃႉမႅပ်ႈပဵၼ်ၸိူဝ်ႉၼင်ႇၵူၼ်းၸႂ်ႉၵူၼ်းသွႆ တူဝ်ၸဝ်ႈၵဝ်ႇတီႈၶႃႈဢေႃႈ။
ၸဝ်ႈႁဝ်းတႄႇလိၼ်မိူင်းဝႆႉမၼ်ႈမၼ်ႈၶိူင်ႇၶိူင်ႇ ၵႃႈၼိူဝ်ငဝ်ႈႁၢၵ်ႈမၼ်း၊ ႁႂ်ႈမၼ်းဢမ်ႇၼိုင်ဢမ်ႇၶွၼ်းသေဢိတ်း တီႈၶႃႈဢေႃႈ။
ၸဝ်ႈႁဝ်းသမ်ႉဢဝ်ၼမ်ႉသမ်ႇမုၵ်ႈတြႃႇႁူမ်ႇမၼ်းဝႆႉ မိူၼ်ၸိူဝ်ႉၼင်ႇဢၼ်ဢဝ်ၶူဝ်းၼုင်ႈၶူဝ်းမႆႁူမ်ႇဝႆႉၼၼ်ႉလႄႈ ဢဝ်ၼမ်ႉၸိူဝ်းၼၼ်ႉယိုင်ႈယူႇၵႃႈၼိူဝ် လွႆတင်းလၢႆဢေႃႈ။
မိူဝ်ႈဢၼ်ၸဝ်ႈႁဝ်းသုင်းမႃႉၼမ်ႉၸိူဝ်းၼၼ်ႉၸိုင်၊ၶဝ်ဢွၼ်ၵၼ်ဢွၵ်ႇပၢႆႈတီႈၶႃႈဢေႃႈ။ မိူဝ်ႈဢၼ်ၶဝ်ငိၼ်းသဵင်ဢမိင်ႉဢၼ် ၸဝ်ႈႁဝ်းႁိုတ်းၼၼ်ႉၸိုင်၊ ၶဝ်ဢွၼ်ၵၼ်ႁိပ်ႈၼႅတ်ႈလႅၼ်ႈပၢႆႈၶၼ်ၶၼ် ၽႂ်းၽႂ်းတီႈၶႃႈဢေႃႈ။
ၶဝ်ၼၼ်ႉလႆၶိုၼ်ႈလွႆတင်းလၢႆဢိၵ်ႇတင်းလႆလူင်းၵႃႈၼႂ်းႁူၺ်ႈတင်းလၢႆယူႇသေလႄႈ၊ ၵႂႃႇၸူးတီႈဢၼ်ၸဝ်ႈႁဝ်းတႄႇႁဵတ်းဝႆႉ ပုၼ်ႈၶဝ်ၼၼ်ႉတီႈၶႃႈဢေႃႈ။
ၸဝ်ႈႁဝ်းသမ်ႉၶၼ်ႈၶႅၼ်ႈလႅၼ်လိၼ်ဢၼ်ၶဝ် ဢမ်ႇလႆပူၼ်ႉလႆႈၼၼ်ႉဝႆႉ ႁႂ်ႈၶဝ်ဢမ်ႇၶိုၼ်းမႃးထူမ်ႈယိုင်ႈလိၼ်မိူင်း ထႅင်ႈၼၼ်ႉတီႈၶႃႈဢေႃႈ။
ၸဝ်ႈႁဝ်းပွႆႇၼမ်ႉဢွၵ်ႇႁူးတင်းလၢႆၵႃႈၼႂ်း ႁူၺ်ႈၼႂ်းႁွင်ႈလႄႈ သမ်ႉႁႂ်ႈၼမ်ႉတင်းလၢႆလႆယူႇၵႃႈၼႂ်းၵၢင်လွႆ တင်းလၢႆတီႈၶႃႈဢေႃႈ။
ၶဝ်ပၼ်ၼမ်ႉၵိၼ်တီႈတူဝ်ထိူၼ်ႇတင်းလၢႆလႄႈ မႃႉလီႈထိူၼ်ႇၸိူဝ်းၼၼ်ႉၵေႃႈလႆႈၵိၼ်ၼမ်ႉ ၼၼ်ႉဢိမ်ႇလီတဵမ်လီတီႈၶႃႈဢေႃႈ။
ၵႃႈၼႂ်းၵိင်ႇမႆႉၶႃႈမႆႉႁိမ်းႁွမ်းၸိူဝ်းၼၼ်ႉၵေႃႈ ၼူၵ်ႉတင်းလၢႆႁဵတ်းႁင်းလႄႈႁွင်ႉမေႃး ႁွင်ႉၵႂၢမ်းယူႇတီႈၶႃႈဢေႃႈ။
ၸဝ်ႈႁဝ်းပွႆႇၽူၼ်လုၵ်ႉသေၵႃႈတီႈတွင်ႉၽႃႉ တူၵ်းသႂ်ႇၵႃႈၼိူဝ်လွႆတင်းလၢႆလႄႈ လိၼ်ၵေႃႈလႆႈတဵမ်ဝႆႉတင်းၵျေးၸူးတၢင်းလီ ၸဝ်ႈႁဝ်းယူႇတီႈၶႃႈဢေႃႈ။
ၸဝ်ႈႁဝ်းႁႂ်ႈယိူဝ်ႈယႃႈဢွၵ်ႇမႃးပုၼ်ႈၽုင်ဝူဝ်းၽုင်သူဝ်းဢိၵ်ႇတင်းတူၼ်ႈမႆႉတူၼ်ႈတွၵ်ႇတင်းလၢႆ ပုၼ်ႈၵူၼ်းတၵ်းသုင်းတင်းသွင်ႇလႄႈႁႂ်ႈၵူၼ်းလႆႈၽုၵ်ႇလႆႈသွမ်ႈၶဝ်ႈပိူၵ်ႇပုၼ်ႈတူဝ်ၸဝ်ႈၵဝ်ႇ။
ႁႂ်ႈလႆႈႁဵတ်းဢွၵ်ႇၼမ်ႉမၢၵ်ႇၸပိတ်ႉဢၼ်ႁႂ်ႈ ႁူဝ်ၸႂ်မၼ်းၸူမ်းသိူဝ်း၊ ၼမ်ႉမၼ်း သၢၼ်ႇလုၼ်ႇ၊ ဢၼ်ႁႂ်ႈ ၼႃႈမၼ်းမိုၼ်ႈလီၶျေႃးလီ၊ ဢိၵ်ႇတင်းၶဝ်ႈမုၼ်းဢၼ်ပၼ်ဢဵၼ်ပၼ်ႁႅင်း တီႈမၼ်းၼၼ်ႉတီႈၶႃႈဢေႃႈ။
တူၼ်ႈမႆႉ ဢႃႇရိတ်ႉ၊ ဢၼ်မီးၵႃႈတီႈ မိူင်း လေႇပၼုၼ်ႇ၊ တူၼ်ႈမႆႉဢၼ်တူဝ် ထႃႇဝရႃႉၽြႃး၊ ၽုၵ်ႇဝႆႉၸိူဝ်းၼၼ်ႉၵေႃႈ လႆႈၼမ်ႉၽူၼ်ၼမ်ၼႃႇတီႈၶႃႈဢေႃႈ။
ၼူၵ်ႉတင်းလၢႆဢွၼ်ၵၼ်ႁဵတ်းႁင်းယူႇ ၵႃႈတီႈၼၼ်ႈလႄႈ ၼူၵ်ႉယၢင်းတင်းလၢႆၵေႃႈႁဵတ်းႁင်းယူႇ ၵႃႈၼိူဝ်တူၼ်ႈပႅၵ်ႇဢေႃႈ။
လွႆဢၼ်သုင်ၸိူဝ်းၼၼ်ႉပဵၼ်ပုၼ်ႈတီႈဢၼ်ယိူင်းတင်းလၢႆတၵ်းယူႇလႄႈ ငၢပ်ႇႁိၼ်ငၢပ်ႇၽႃၸိူဝ်းၼၼ်ႉသမ်ႉပဵၼ် တီႈဢၼ်မူမႃတင်းလၢႆသွၼ်ႈယူႇဢေႃႈ။
ၸဝ်ႈႁဝ်းႁဵတ်းပဵၼ်လိူၼ်ပုၼ်ႈဢၼ်မၵ်းၶၢၼ်း ၶိင်ႇဢုတုယႃႇသီႇလႄႈ သမ်ႉႁဵတ်းပဵၼ်တႃဝၼ်းပုၼ်ႈဢၼ်တၵ်းႁု ၶိင်ႇမၼ်းၶႃႇမၼ်းၼၼ်ႉတီႈၶႃႈဢေႃႈ။
ၸဝ်ႈႁဝ်းႁဵတ်းပဵၼ်ၶိင်ႇၵၢင်ၶိုၼ်းလႄႈ၊ ၵႃႈၼႂ်းတၢင်းဢၼ်လပ်းသိင်ႇၼၼ်ႉတူဝ်ထိူၼ်ႇတင်းလၢႆဢွၼ်ၵၼ်ဢွၵ်ႇလႄႇၵႂႃႇဢေႃႈ။
သၢင်ႇသီႈၼုမ်ႇတင်းလၢႆဢွၼ်ၵၼ်ႁွင်ႉ ပုၼ်ႈဢၼ်တၵ်းလႆႈႁႃၵိၼ်တၢင်းၵိၼ်ဢၼ်ၽြႃးပဵၼ်ၸဝ်ႈပၼ်ၼၼ်ႉဢေႃႈ။
မိူဝ်ႈဢၼ်ၵၢင်ဝၼ်းဢွၵ်ႇမႃးၸိုင်၊ ၶဝ်ဢွၼ်ၵၼ်ၶိုၼ်းပွၵ်ႈၵႂႃႇၼွၼ်းယူႇၵႃႈၼႂ်းငိူပ်ႇၼႂ်းၶုမ်တီႈယူႇၶဝ်ၼၼ်ႉတီႈၶႃႈဢေႃႈ။
မိူဝ်ႈၼၼ်ႉၵူၼ်းၸင်ႇဢွၼ်ၵၼ်ဢွၵ်ႇၵႂႃႇ ႁဵတ်းၵၢၼ်ၶဝ်ယူႇတေႃႇထိုင်ႁွတ်ႈ ၶိင်ႇႁူဝ်ၶမ်ႈတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းပွင်ႁဵတ်းလွင်ႈတၢင်းၼမ်ၼႃႇလူင်လၢင်တီႈၶႃႈဢေႃႈ။ ၸွမ်းလူၺ်ႈပိင်ႇၺႃႇၸဝ်ႈႁဝ်းၼၼ်ႉ ၸဝ်ႈႁဝ်းပွင်ႁဵတ်းလွင်ႈတၢင်းၸိူဝ်းၼၼ်ႉ တင်းသဵင်ႈတင်းလူင်တီႈၶႃႈဢေႃႈ။ လိၼ်မိူင်းၼႆႉၵေႃႈတဵမ်ဝႆႉတင်းၶိူင်ႈပိူင် ဢၼ်ၸဝ်ႈႁဝ်းၽၢၼ်ႇသၢင်းႁဵတ်းဝႆႉၼၼ်ႉ တီႈၶႃႈဢေႃႈ။
ၵႃႈတီႈပုၼ်ႉၼၼ်ႉယင်းမီးၼမ်ႉသမ်ႇမုၵ်ႈတြႃႇဢၼ်ယႂ်ႇဢၼ်ၵႂၢင်ႈၼႃႇ ဢၼ်ပဵၼ်တီႈဢၼ်တူဝ်သတ်ႉတဝႃႇ ဢၼ်ဢသၢၵ်ႈလိပ်းတင်းလၢႆ ထၢၼ်ႈပေႃးဢမ်ႇၼပ်ႉဢမ်ႇဢၢၼ်ႇလႆႈ ၸဵမ်တူဝ်လဵၵ်ႉတူဝ်ယႂ်ႇတၵ်းယူႇၼၼ်ႉ လူးၵွၼ်ႇတီႈၶႃႈဢေႃႈ။
ႁိူဝ်းသၢင်းၽေႃးတင်းလၢႆၵႂႃႇၵႂႃႇမႃးမႃး ယူႇၵႃႈၼိူဝ်မၼ်းလႄႈ ၵႃႈၼႂ်းမၼ်းၸမ်ႉ၊ငိူၵ်ႈဢၼ်ၸဝ်ႈႁဝ်း ႁဵတ်းပဵၼ်ဝႆႉ၊ သတ်ႉတဝႃႇလူင်ၼႂ်းၼမ်ႉၼၼ်ႉၵေႃႈဝၢႆႈၵႂႃႇ ဝၢႆႈမႃးမူၼ်ႈပျေႃႇယူႇဢေႃႈ။
တူဝ်ၸိူဝ်ႉၼင်ႇၼၼ်တင်းသဵင်ႈတင်းလူင်ၼၼ်ႉၵူၺ်းမုင်ႈမွင်းတီႈၸဝ်ႈႁဝ်း ႁႂ်ႈၸဝ်ႈႁဝ်းဢွႆႇပၼ်တၢင်းၵိၼ်တၢင်းၶူပ်း မိူဝ်ႈဢၼ်ၶိင်ႇမၼ်းထုၵ်ႇၼၼ်ႉဢေႃႈ။
ၸဝ်ႈႁဝ်းဢွႆလႄႈၶဝ်လႆႈၵိၼ်ဢေႃႈ။ ၸဝ်ႈႁဝ်းမႅင်ႇပၼ်တၢင်းၵိၼ်တၢင်းၶူပ်းလႄႈ ၶဝ်လႆႈဢိမ်ႇတွင်ႉဢိမ်ႇသႆႈတီႈၶႃႈဢေႃႈ။
ၸဝ်ႈႁဝ်းဝၢႆႇပႅတ်ႈၶဝ်လႄႈၶဝ်လႆႈယၢပ်ႇၸႂ် ယုင်ႈၸႂ်တီႈၶႃႈဢေႃႈ။ ၸဝ်ႈႁဝ်းသိမ်းဢဝ်ဢသၢၵ်ႈၶဝ်လႄႈ ၶဝ်လႆႈတၢႆသေယဝ်ႉ၊ လႆႈၶိုၼ်းၸူးၵႃႈတီႈမုၼ်ႈလိၼ်ဢၼ်ပဵၼ် တီႈယူႇၵဝ်ႇၵဝ်ႇမၼ်းဢေႃႈ။
ၸဝ်ႈႁဝ်းပဝ်ႇသႂ်ႇၸီႇဝႃႉဢသၢၵ်ႈၼၼ်ႉသေယဝ်ႉ ၸဝ်ႈႁဝ်းၽၢၼ်ႇသၢင်းႁဵတ်းပဵၼ်ၶဝ်လႄႈ ၸဝ်ႈႁဝ်းပၼ်ဢသၢၵ်ႈဢၼ်မႂ်ႇမႂ်ႇတီႈ လိၼ်မိူင်းဢေႃႈ။
ႁႂ်ႈမုၼ်ၽုင်း ထႃႇဝရႃႉၽြႃး၊ တႄႇယူႇၼိၵ်ႈၸႃႉထႃႇဝရႃႉသေၵမ်းလူၺ်ႈ။ ႁႂ်ႈ ထႃႇဝရႃႉၽြႃး၊ ၸူမ်းသိူဝ်းလူၺ်ႈ လွင်ႈတၢင်းဢၼ်မၼ်းၸဝ်ႈႁဵတ်းဝႆႉယဝ်ႉ ၼၼ်ႉသေၵမ်းလူၺ်ႈ။
မၼ်းၸဝ်ႈတူၺ်းလိၼ်မိူင်းလႄႈလိၼ်မိူင်း သၼ်ႇဝႆဢေႃႈ။ မၼ်းၸဝ်ႈတိူဝ်ႉသႂ်ႇလွႆတင်းလၢႆလႄႈ လွႆၸိူဝ်းၼၼ်ႉဢွၵ်ႇၵႂၢၼ်းမႃးဢေႃႈ။
ၵဝ်တၵ်းႁဵတ်းၵႂၢမ်းတီႈ ထႃႇဝရႃႉၽြႃး၊ ၼႂ်းၸူဝ်ႈတႃႇဢသၢၵ်ႈၵဝ်ၼႆႉလႄႈ ၸူဝ်ႈဢၼ်ၵဝ်ယင်းဢသၢၵ်ႈလိပ်းယူႇၼႆႉ ၵဝ်တၵ်းႁဵတ်းၵႂၢမ်းယွင်ႈယေႃး ၽြႃးပဵၼ်ၸဝ်ႈၵဝ်ဢေႃႈ။
ႁႂ်ႈလွင်ႈတၢင်းဢၼ်ၵဝ်ၶႆႈၸႂ်ဝူၼ်ႉၸႂ်ၼၼ်ႉထုၵ်ႇၸႂ်ၵျိူၵ်ႈၸႂ်မၼ်းၸဝ်ႈသေၵမ်းလူၺ်ႈ။ ၵဝ်ၵေႃႈတၵ်းၸူမ်းသိူဝ်းယူႇၼႂ်း ထႃႇဝရႃႉၽြႃး၊ ဢေႃႈ။
ႁႂ်ႈၶဝ်ၸိူဝ်းဢၼ်ၽိတ်းပိူင်ႈၼၼ်ႉလႆႈၶၢမ်ႇ တၢင်းဢၼ်ပႄႇၽဵဝ်ႈပႅတ်ႈသေ ၵႃႈတီႈလိၼ်မိူင်းလႄႈယႃႇႁႂ်ႈၶဝ်ၸိူဝ်းဢၼ် ႁၢႆႉမိူၵ်ႈၼၼ်ႉမီးထႅင်ႈသေၵမ်းလူၺ်ႈ။ ဝိၺိၺ်ႇၵဝ်႟။ ယွင်ႈယေႃး ထႃႇဝရႃႉၽြႃး၊ တႃႉ။ ယွင်ႈယေႃး ထႃႇဝရႃႉၽြႃး၊ တႃႉ။
ဢွၼ်ၵၼ်ယွင်ႈယေႃးၵျေးၸူး ထႃႇဝရႃႉၽြႃး၊ တႃႉ။ ႁွင်ႉႁႃၼႃႇမႃႉၸိုဝ်ႈသဵင်မၼ်းယူႇလႄႈ ၽုၺ်ႇမွၵ်ႇလၢတ်ႈၼႄလွင်ႈတၢင်းဢၼ်မၼ်းၸဝ်ႈႁဵတ်းဝႆႉၼၼ်ႉတီႈမဵဝ်းၵူၼ်းတင်းလၢႆတႃႉ။
ႁဵတ်းၵႂၢမ်းယွင်ႈယေႃး ထႃႇဝရႃႉၽြႃး၊ တႃႉ။ ၽုၺ်ႇမွၵ်ႇလၢတ်ႈၼႄလွင်ႈတၢင်း ဢၼ်လီဢၢမ်းဢၼ်မၼ်းၸဝ်ႈ ႁဵတ်းဝႆႉၸိူဝ်းၼၼ်ႉတႃႉ။
ပိူဝ်ႈဢၼ်ႁဝ်းပဵၼ်ၵူၼ်းမၼ်းၸဝ်ႈၼၼ်ႉလႄႈမီးတၢင်းဢၼ်ၸူမ်းသိူဝ်းတႃႉ။ ႁႂ်ႈၶဝ်ၸိူဝ်းဢၼ်ၵူဝ်းၵႂၢႆႇမၼ်းၸဝ်ႈၼၼ်ႉမီးတၢင်းဢၼ်သႂၢင်ႇဢၼ်သိူဝ်းတႃႉ။
ဢွၼ်ၵၼ်သုတ်ႉၸပ်းသုတ်ႉၸူး ထႃႇဝရႃႉၽြႃး၊ ပုၼ်ႈတၢင်းဢၼ်ၸွႆႈဢၼ်ထႅမ်လႄႈ ဢွၼ်ၵၼ်ဝႆႈသႃမၼ်းၸဝ်ႈ ၶိူဝ်းၶိူဝ်းယႂ်းယႂ်းတႃႉ။
ၶုၵ်းၸႂ်လႆႈလွင်ႈတၢင်းဢၼ်လီဢၢမ်းဢၼ် မၼ်းၸဝ်ႈႁဵတ်းဝႆႉၸိူဝ်းၼၼ်ႉ ဢိၵ်ႇတင်းလွင်ႈတၢင်းဢၼ်လၢၵ်ႇဢၼ်လၢႆး ဢၼ်ၽြႃးပဵၼ်ၸဝ်ႈႁဵတ်းၼႄၸိူဝ်းၼၼ်ႉ တင်းတၢင်းဢၼ်မၼ်းၸဝ်ႈဢဝ်တင်းသူပ်း တူဝ်ၸဝ်ႈၵဝ်ႇၸီႇယၢင်ႇဝႆႉၸိူဝ်းၼၼ်ႉတႃႉ။
ၸိူဝ်ႉၶိူဝ်း ဢႃႇပြႃႇႁၢမ်ႇ၊ ၶႃႈမၼ်းၸဝ်ႈလုၵ်ႈလၢၼ် ယႃႇၵုပ်ႈ၊ ဢၼ်မၼ်းၸဝ်ႈလိူၵ်ႈဢဝ်ဝႆႉၶဝ်႟။
ထႃႇဝရႃႉၽြႃး၊ ပဵၼ်ၽြႃးပဵၼ်ၸဝ်ႈႁဝ်းလႄႈ၊လွင်ႈတၢင်းဢၼ်မၼ်းၸဝ်ႈ ပိင်းၺၢပ်ႈဝႆႉၸိူဝ်းၼၼ်ႉ ပဵၼ်ပုၼ်ႈၵူၼ်းလေႃးၵီႇၵႃႈမီး တင်းသဵင်ႈတင်းလူင်ဢေႃႈ။
မၼ်းၸဝ်ႈတၵ်းပႂ်ႉပတိၺိၺ်ႇတြႃးၸဝ်ႈၼၼ်ႉသေႇသေႇ၊ဢိၵ်ႇတင်း ပႂ်ႉၵတိၸဝ်ႈတင်းလၢႆတေႃႇထိုင်ႁွတ်ႈ မဵဝ်းၵူၼ်းႁဵင်သိုပ်ႇၼၼ်ႉဢေႃႈ။
မၼ်းၸဝ်ႈတၵ်းပႂ်ႉၵႂၢမ်းသဵတ်ႈၸႃႇၸဝ်ႈဢၼ်လၢတ်ႈဝႆႉတီႈ ဢႃႇပြႃႇႁၢမ်ႇ၊ လႄႈ ပႂ်ႉၵတိၸဝ်ႈဢၼ်ဝႆႉတီႈ ဢိၸၢၵ်ႈ၊ ၼၼ်ႉဢေႃႈ။
ထႃႇဝရႃႉၽြႃး၊ ဝႆႉပတိၺိၺ်ႇတြႃး လူၺ်ႈၵၼ်တင်း ယႃႇၵုပ်ႈ၊ ႁႂ်ႈတႄႇမၼ်ႈတႃႇသေႇဢမ်ႇထၢတ်ႇဢေႃႈ။
မၼ်းၸဝ်ႈလၢတ်ႈလႄႈဝႃႈ၊ “ၵဝ်တၵ်းဢဝ် မိူင်း ၶႃႇၼၼ်ႇ၊ ၼၼ်ႉ ပၼ်ႁႂ်ႈပဵၼ်ဢမူၺ်ႇဢၼ်သူထိူၵ်ႈၶၢမ်ႇဢဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵူၼ်းၽြႃးပဵၼ်ၸဝ်ႈတင်းလၢႆမီး ၵေႇၼႃႇလႄႈပဵၼ်ၶႅၵ်ႇဢႃႇၵၼ်ႇတု ၵႃႈၼႂ်းမိူင်း ၶႃႇၼၼ်ႇ၊ ဢေႃႈ။
ၶဝ်လုၵ်ႉသေၵႃႈတီႈမိူင်းၼိုင်ႈလႄႇၵႂႃႇလႄႇ မႃးၸူးၵႃႈတီႈမိူင်းၼိုင်ႈ သမ်ႉလုၵ်ႉသေၵႃႈတီႈသိုင်ႇၸိုင်ႈဝၢၼ်ႈမိူင်းၼိုင်ႈၵႂႃႇၸူးတၢင်ႇမိူင်းယူႇဢေႃႈ။
ၵူၺ်းၵႃႈ၊ၽြႃးပဵၼ်ၸဝ်ႈဢမ်ႇပၼ်ဢၶႂၢင်ႉႁႂ်ႈၽူႈလႂ်လႆႈတဵၵ်းငႅၼ်းပႄႉၵိၼ်ၶဝ်လႄႈ မၼ်းၸဝ်ႈယင်းသုင်းမႃႉၶုၼ်ႁေႃၶမ်း တင်းလၢႆလႄႈဝႃႈ။
“ယႃႇပေႁဵတ်းၶဵၼ်သႂ်ႇၶႃႈၵဝ်တင်းလၢႆဢၼ်ၵဝ်လိူၵ်ႈဢဝ်ဝႆႉၸိူဝ်းၼၼ်ႉ။ ယႃႇပေတိူဝ်ႉပေထုၵ်ႇတီႈပရေႃးၽႅတ်ႈ ၵဝ်ၸိူဝ်းၼၼ်ႉ၊” ဝႃႈၼင်ႇၼႆလူးၵွၼ်ႇဢေႃႈ။
ထႃႇဝရႃႉၽြႃး၊ ပွႆႇႁႂ်ႈမိူင်းၶဝ်ပဵၼ်တၢင်းဢၼ် ၶဝ်ႈၵႃႈမၢၵ်ႇပႅင်းလႄႈ ယုၵ်ႉသိမ်းဢဝ်ၶဝ်ႈၼမ်ႉတၢင်းၵိၼ်ၵႃႈမီးတင်းသဵင်ႈတင်းလူင်ပႅတ်ႈသေၵႃႈတီႈၶဝ်ဢေႃႈ။
ၵူၺ်းၵႃႈ၊မၼ်းၸဝ်ႈပွႆႇၸႂ်ႉၵူၼ်းၵေႃႉၼိုင်ႈ ၵႂႃႇဢွၼ်တၢင်းၶဝ် ဢၼ်ပဵၼ် ယူဝ်းသႅပ်ႈ၊ ဢၼ်လႆႈၶၢမ်ႇတၢင်းဢၼ်ၶၢႆပႅတ်ႈႁႂ်ႈၵႂႃႇပဵၼ်ၶႃႈၼၼ်ႉဢေႃႈ။
တိၼ်မၼ်းလႆႈၶမ်ယူႇၼႂ်းၸိူၵ်ႈလဵၵ်းလႄႈၶႂၢင်ၶေႃးလဵၵ်းၵေႃႈႁွႆႈၸပ်းၶေႃးမၼ်းဝႆႉ၊
တေႃႇထိုင်ႁွတ်ႈတၢင်းဢၼ်မၼ်း ႁေႃးထႃႈဝႆႉပဵၼ်မႃးၼၼ်ႉ ဢမိင်ႉ ထႃႇဝရႃႉၽြႃး၊ ၸၢမ်းတူၺ်း မၼ်းဢေႃႈ။
ၶုၼ်ႁေႃၶမ်းမိူင်း ဢေးၵျိပ်ႉ၊ ပွႆႇၶႂၢင်းပၼ်မၼ်းလႄႈ ၶုၼ်ဢၼ်ဢုပ်ႉပိူင်ႇၵူၼ်းတင်းလၢႆၵေႃႈ ပွႆႇႁႂ်ႈမၼ်းလွတ်ႈလႅဝ်းဢေႃႈ။
ၶုၼ်ႁေႃၶမ်းၼၼ်ႉဢဝ်မၼ်းယုၵ်ႉတၢင်ႇဝႆႉ ၼႂ်းဢရႃႇဢၼ်ဢုပ်ႉပိူင်ႇႁေႃၶမ်းမၼ်းၸဝ်ႈ၊ ႁႂ်ႈမၼ်းဢုပ်ႉပိူင်ႇၵႃႈၼိူဝ်မိူင်းမၼ်းၸဝ်ႈ တင်းမိူင်းလႄႈ
ပၼ်ဢႃႇၼႃႇဢၼ်ဢုပ်ႉပိူင်ႇၵႃႈၼိူဝ်မူးမၢတ်ႈၽွင်းမိူင်းတင်းလၢႆဢိၵ်ႇတင်းဢႃႇၼႃႇ၊ ဢၼ်သင်ႇသွၼ်ၼႄပျႃးပၼ်ပိင်ႇၺႃႇတီႈ ၽူႈပၼ်တၢင်းၵျၢမ်ႇၸိူဝ်းၼၼ်ႉဢေႃႈ။
မိူဝ်ႈၼၼ်ႉ ယႃႇၵုပ်ႈ၊ ၵႂႃႇၵႃႈတီႈမိူင်း ဢေးၵျိပ်ႉ၊ လႄႈယူႇသဝ်းၵႃႈၼႂ်းမိူင်းၼၼ်ႉဢေႃႈ။
ထႃႇဝရႃႉၽြႃး၊ ႁႂ်ႈၵူၼ်းမၼ်းၸဝ်ႈ ၸိူဝ်းၼၼ်ႉယႂ်ႇၽႄႈၼမ်ၵိုၼ်း မႃးလႄႈသမ်ႉႁႂ်ႈၶဝ်ႁႅင်းယႂ်ႇၼႃႇ သေရၢၼ်ႇသူႇၶဝ်ဢေႃႈ။
မၼ်းၸဝ်ႈႁႂ်ႈၵူၼ်းမဵဝ်း ဢေးၵျိပ်ႉ၊ ၶဝ်ၸင်း ၵူၼ်းမၼ်းၸဝ်ႈတင်းလၢႆလႄႈ ႁဵတ်းပရိယႄႇတီႈၶႃႈမၼ်းၸဝ်ႈ ၸိူဝ်းၼၼ်ႉဢေႃႈ။
မိူဝ်ႈၼၼ်ႉမၼ်းၸဝ်ႈၸင်ႇပွႆႇၸႂ်ႉၶႃႈမၼ်းၸဝ်ႈ မူဝ်းသေႇ၊ တင်း ဢႃႇရုၼ်ႇ၊ ဢၼ်မၼ်းၸဝ်ႈလိူၵ်ႈဢဝ်ၼၼ်ႉဢေႃႈ။
ၶဝ်သွင်ၵေႃႉၼၼ်ႉႁဵတ်းၼႄတၼ်းၶူဝ်းၽြႃးပဵၼ်ၸဝ်ႈဢၼ်ယႂ်ႇၼႃႇတင်းလၢႆ၊ဢိၵ်ႇတင်း ႁဵတ်းၼႄလၢၵ်ႈၶၼႃႇဢၼ်လၢၵ်ႇဢၼ်လၢႆးၼမ်ၼႃႇၵႃႈၼႂ်းမိူင်း ဢေးၵျိပ်ႉ၊ ဢေႃႈ။
မၼ်းၸဝ်ႈႁႂ်ႈတၢင်းဢၼ်လပ်းသိင်ႇ ႁူမ်ႇသုမ်ႇမိူင်းၶဝ်ဢေႃႈ။ ၵူၺ်းၵႃႈ၊ၵူၼ်းမဵဝ်း ဢေးၵျိပ်ႉ၊ ယင်းႁဵတ်းၶတ်းၵၼ်တင်းၼုၵ်ႈၵပၢတ်ႈၸဝ်ႈဢေႃႈ။
မၼ်းၸဝ်ႈႁႂ်ႈၼမ်ႉၶဝ်ပိၼ်ႇပဵၼ်လိူတ်ႈၵႂႃႇလႄႈ ႁႂ်ႈပႃတင်းလၢႆတၢႆဢေႃႈ။
ၼႃႈလိၼ်မိူင်းၶဝ်ၼၼ်ႉမီးတၢင်းဢၼ်သတ်ႉ တဵမ်ဝႆႉတင်းၶဵတ်ႇၼမ်ၼႃႇလႄႈ တေႃႈၵႃႈၵႃႈၼႂ်းႁွင်ႈၼွၼ်းၶုၼ်ႁေႃၶမ်းၶဝ်ၸိူဝ်းၼၼ်ႉယင်းမီးၶဵတ်ႇဢေႃႈ။
ၽြႃးပဵၼ်ၸဝ်ႈပူင်ဢမိင်ႉႁႂ်ႈလိူၵ်ႈတင်းႁိၼ်ႉၸွတ်ႇတူဝ်ႈၵႂႃႇၵႃႈၼႂ်းမိူင်းၶဝ်တင်းမိူင်းဢေႃႈ။
မၼ်းၸဝ်ႈပွႆႇမၢၵ်ႇႁဵပ်းတူၵ်းတၢင်ၼမ်ႉၽူၼ် ဢိၵ်ႇတင်းပဵဝ်ၽႆးတူၵ်းသႂ်ႇၵႃႈၼိူဝ် ၼႃႈလိၼ်ၶဝ်ဢေႃႈ။
မၼ်းၸဝ်ႈပႄႇၽဵဝ်ႈတူၼ်ႈၶိူဝ်းမၢၵ်ႇၸပိတ်ႉၶဝ်လႂ်၊ တင်းတူၼ်ႈမၢၵ်ႇလိူဝ်ႇၶဝ်လႂ်လႄႈ ႁႂ်ႈတူၼ်ႈမႆႉတူၼ်ႈတွၵ်ႇၶဝ်ႁၵ်းလူမ်ႉပႅတ်ႈ တင်းသဵင်ႈတင်းမူတ်းဢေႃႈ။
မၼ်းၸဝ်ႈပူင်ဢမိင်ႉႁႂ်ႈမႅင်းၸၵ်းတႅၼ်ဢွၵ်ႇမႃးၼမ်ၼႃႇပဵၼ်သႅၼ်ပဵၼ်လၢၼ်ႉဢေႃႈ။
မႅင်းၸိူဝ်းၼၼ်ႉၶူပ်းၵိၼ်ၽၵ်းယိူဝ်ႈၽၵ်းၶဵဝ် ၵႃႈဢၼ်မီးၵႃႈၼႂ်းမိူင်းၶဝ်ဢိၵ်ႇတင်း မၢၵ်ႇၶဝ်ႈႁူင်းၼမ်ႉၶဝ်ဢေႃႈ။
မၼ်းၸဝ်ႈဢဝ်လုၵ်ႈၸၢႆးတူၼ်ႈၶဝ်တင်းလၢႆ တၢႆပႅတ်ႈ ၵႃႈၼႂ်းႁိူၼ်းၵူၼ်းမဵဝ်း ဢေးၵျိပ်ႉ၊ တင်းသဵင်ႈတင်းလူင်ဢေႃႈ။
မိူဝ်ႈၼၼ်ႉမၼ်းၸဝ်ႈဢွၼ်ဢဝ်ၵူၼ်းမဵဝ်း ဢိသရေး၊ ၶဝ်ဢွၵ်ႇမႃး ပႃးဢဝ်ငိုၼ်းဢဝ်ၶမ်းမႃးလႄႈ ၶဝ်ၸိူဝ်းၼၼ်ႉယင်းယူႇလီပီးမၼ်းယူႇမီးဢဵၼ်မီးႁႅင်းယူႇၵူႈၵေႃႉၵူႈၵူၼ်းဢေႃႈ။
ၵူၼ်းမဵဝ်း ဢေးၵျိပ်ႉ၊ ၶဝ်ၵူဝ်ႁႄၶဝ်လႄႈ မီးတၢင်းဢၼ်ၸူမ်းသိူဝ်းမိူဝ်ႈဢၼ်ၶဝ် ဢွၵ်ႇၵႂႃႇၼၼ်ႉဢေႃႈ။
ၽြႃးပဵၼ်ၸဝ်ႈၵီႈမွၵ်ႇၵုမ်ႈမုင်းၵႃႈၼိူဝ်ၶဝ်လႄႈပၼ်ၽႆးႁႂ်ႈလႅင်းၶိင်ႇၵၢင်ၶိုၼ်းတီႈၶဝ်ဢေႃႈ။
ၶဝ်လဝ်ႈယွၼ်းလႄႈမၼ်းၸဝ်ႈပၼ် ၼူၵ်ႉၶုမ်ႈတင်းလၢႆ ဢိၵ်ႇတင်းၶဝ်ႈမုၼ်းၵၢင်ႁၢဝ်ႁႂ်ႈၶဝ် လႆႈဢိမ်ႇတွင်ႉၶဝ်ဢေႃႈ။
မၼ်းၸဝ်ႈၽုၺ်ႇမၢၵ်ႇႁိၼ်လႄႈ ၼမ်ႉၽုတ်းဢွၵ်ႇမႃး လႆၵႂႃႇၼႂ်းထိူၼ်ႇလႅင်ႉမိူၼ်ၸိူဝ်ႉၼင်ႇ ၼမ်ႉႁွင်ႈၼမ်ႉၵႄးဢေႃႈ။
လွင်ႈမၼ်းၸမ်ႉ၊မၼ်းၸဝ်ႈၶုၵ်းၸႂ်လႆႈၵတိ ဢၼ်မူတ်းၸၢင်ႇမၼ်းၸဝ်ႈ ဢၼ်ဝႆႉတီႈၶႃႈမၼ်းၸဝ်ႈ ဢႃႇပြႃႇႁၢမ်ႇ၊ ၼၼ်ႉဢေႃႈ။
ႁဵတ်းၼၼ်လႄႈ၊မၼ်းၸဝ်ႈဢွၼ်ဢဝ် ၵူၼ်းဢၼ်မၼ်းၸဝ်ႈလိူၵ်ႈဢဝ်ဝႆႉ ၸိူဝ်းၼၼ်ႉဢွၵ်ႇၵႂႃႇလႄႈ ၶဝ်ဢွၼ်ၵၼ်ႁဵတ်းၵႂၢမ်းႁွင်ႉသႅၼ်ႇဢၼ်သႂၢင်ႇ ဢၼ်သိူဝ်းဢေႃႈ။
မၼ်းၸဝ်ႈဢဝ်လိၼ်မိူင်းဢၼ်ၵူၼ်းတၢင်ႇၸိူဝ်ႉတၢင်ႇမဵဝ်းပိူင်ႇၼၼ်ႉသေလႄႈ ပၼ်တီႈၶဝ်ဢိၵ်ႇတင်းႁႂ်ႈၶဝ်သိမ်းဢဝ် ႁႆႈၼႃးပိူၼ်ႈၸိူဝ်းၼၼ်ႉဢေႃႈ။
ၵူၼ်းမၼ်းၸဝ်ႈၸိူဝ်းၼၼ်ႉၵေႃႈလႆႈပႂ်ႉၵမ်ပႂ်ႉၸွမ်း ထုင်းၽိင်ႈတြႃးမၼ်းၸဝ်ႈတင်းလၢႆလႄႈ ၵမ်ၵျၢင်ႉပိင်းၺၢပ်ႈတြႃးမၼ်းၸဝ်ႈဢေႃႈ။ ယွင်ႈယေႃး ထႃႇဝရႃႉၽြႃး၊ တီႈၶႃႈဢေႃႈ။
ယွင်ႈယေႃး ထႃႇဝရႃႉၽြႃး၊ တီႈၶႃႈဢေႃႈ။ ဢွၼ်ၵၼ်ယွင်ႈယေႃးမုၼ်ၵုင်ႇၵျေးၸူး ထႃႇဝရႃႉၽြႃး၊ ၵွပ်ႈပိူဝ်ႈဢၼ်မၼ်းၸဝ်ႈပဵၼ်ဢၼ်လီမျၢတ်ႈလႄႈ တၢင်းႁၵ်ႉမႅတ်ႈတႃႇမၼ်းၸဝ်ႈတႄႇယူႇ တႃႇသေႇဢမ်ႇထၢတ်ႇၼၼ်ႉတႃႉ။
ၽူႈလႂ်တၵ်းမွၵ်ႇလၢတ်ႈၶႆႈၼႄလွင်ႈ တၢင်းဢၼ်မၼ်းၸဝ်ႈႁဵတ်းဝႆႉဢၼ်ယႂ်ႇ ဢၼ်လူင်ၸိူဝ်းၼၼ်ႉလႆႈ။ ၽူႈလႂ်တၵ်းယွင်ႈယေႃးၵျေးၸူးမၼ်းၸဝ်ႈ တင်းသဵင်ႈတင်းမူတ်းလႆႈ။
ၶဝ်ၸိူဝ်းဢၼ်ၸွမ်းပိင်းၺၢပ်ႈတြႃး မၼ်းၸဝ်ႈလႄႈ ႁဵတ်းၸွမ်းတၢင်းဢၼ်သိုဝ်ႈဢၼ်တေႃႇယူႇတႃႇသေႇၼၼ်ႉမီးမၢင်ႇၵလႃႇဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈၶုၵ်းၸႂ်လႆႈၶႃႈၸဝ်ႈ ယၢမ်းမိူဝ်ႈဢၼ်ၸဝ်ႈႁဝ်းၸွႆႈထႅမ်မႃႉၸႃႉ ၵူၼ်းၸဝ်ႈႁဝ်းၼၼ်ႉသေလႄႈ၊ ၶႅၼ်းတေႃႈႁႂ်ႈၶႃႈၸဝ်ႈလႆႈၶဝ်ႈပႃးၸွမ်း ၼႂ်းမိူဝ်ႈဢၼ်ၸဝ်ႈႁဝ်းၵႄႇသႄႇၶျွတ်ႈ ဢဝ်ၼၼ်ႉသေၵမ်းတီႈၶႃႈ။
ၶႅၼ်းတေႃႈႁႂ်ႈၶႃႈၸဝ်ႈလႆႈႁၼ်တၢင်းဢၼ် လႆႈလီလႆႈပဵၼ်ၶဝ်ၸိူဝ်းဢၼ်ၸဝ်ႈႁဝ်း လိူၵ်ႈဢဝ်ဝႆႉၼၼ်ႉ၊ ဢိၵ်ႇတင်းႁႂ်ႈၶႃႈၸဝ်ႈလႆႈၸွၼ်ၸူမ်းသိူဝ်းလူၺ်ႈၵၼ်တင်းၵူၼ်းၸဝ်ႈႁဝ်းၸိူဝ်းၼၼ်ႉ၊ ဢိၵ်ႇတင်းႁႂ်ႈၶႃႈၸဝ်ႈလႆႈဢဝ်ၵုင်ႇဢဝ်မုၼ် လူၺ်ႈၵၼ်တင်းၶဝ်ၸိူဝ်းဢၼ်ၸၢပ်ႈသႅင်ႇၵၼ်တင်းၸဝ်ႈႁဝ်းၼၼ်ႉသေၵမ်းလူၺ်ႈ။
ၶႃႈၸဝ်ႈႁဝ်းၶဝ်ၽိတ်းပိူင်ႈမိူၼ်ၸိူဝ်ႉၼင်ႇပူႇမွၼ်ႇၶႃႈၸဝ်ႈႁဝ်းၶဝ်ၸိူဝ်းၼၼ်ႉတီႈၶႃႈယဝ်ႉ။ ၶႃႈၸဝ်ႈႁဝ်းၶဝ်ႁဵတ်းတုၸရိူၵ်ႈလႄႈႁဵတ်းယုတ်ႈ ႁဵတ်းႁၢႆႉတီႈၶႃႈယဝ်ႉ။
ပူႇမွၼ်ႇၶႃႈၸဝ်ႈႁဝ်းၶဝ်ၸိူဝ်းၼၼ်ႉဢမ်ႇႁုဢမ်ႇၸႅင်ႈ လွင်ႈတၢင်းဢၼ်လီဢၢမ်းဢၼ်ၸဝ်ႈႁဝ်းႁဵတ်းၵႃႈၼႂ်းမိူင်း ဢေးၵျိပ်ႉ၊ ၼၼ်ႉတီႈၶႃႈ။ ၶဝ်လူင်လိုမ်းပႅတ်ႈၵရုၼႃႇဢၼ်ၸဝ်ႈႁဝ်းၼႄပျႃးၶဝ်ဢမ်ႇႁုလၢႆပွၵ်ႈယဝ်ႉလႄႈ၊ ဢွၼ်ၵၼ်လုၵ်ႉၽိုၼ်ႉၽြႃးဢၼ်သုင် ၼႃႇသေပိူၼ်ႈၵႃႈတီႈႁိမ်း ပၢင်ႇလၢႆႇလႅင်ၼၼ်ႉတီႈၶႃႈဢေႃႈ။
ၵူၺ်းၵႃႈ၊မၼ်းၸဝ်ႈၵႄႇသႄႇၶျွတ်ႈဢဝ်ၶဝ် ၸွမ်းၵႃႈၼင်ႇဢၼ်ၵတိၸဝ်ႈမီးၼၼ်ႉ၊ ႁႂ်ႈမႁႃႇတၼ်းၶူဝ်းမၼ်းၸဝ်ႈလႆႈ ထၢင်ႇသႃးဢေႃႈ။
မၼ်းၸဝ်ႈပူင်ဢမိင်ႉတီႈပၢင်ႇလၢႆႇလႅင်လႄႈ ၼမ်ႉမၼ်းယူတ်းႁႅင်ႈၵႂႃႇဢေႃႈ။ မၼ်းၸဝ်ႈဢွၼ်ၶဝ်ပႆၽႃႇလတ်းၵႂႃႇၸွမ်း လိၼ်ႁႅင်ႈၼၼ်ႉၵႂႃႇဢေႃႈ။
မၼ်းၸဝ်ႈၵႄႇသႄႇၶျွတ်ႈဢဝ်ၶဝ်လွတ်ႈသေ ၵႃႈၼႂ်းမိုဝ်းၶဝ်ၸိူဝ်းဢၼ် ၸင်းၶဝ်ၼၼ်ႉလႄႈၵႄႇၼုၵ်ႈဢဝ်ၶဝ်ဢွၵ်ႇ သေၵႃႈၼႂ်းမိုဝ်းရၢၼ်ႇသူႇၶဝ်ဢေႃႈ။
ၼမ်ႉၼၼ်ႉထူမ်ႈရၢၼ်ႇသူႇၶဝ်တၢႆပႅတ်ႈ ထၢၼ်ႈပေႃးဢမ်ႇၵိုတ်းဢမ်ႇၵျၢၼ်ႇ သေၵေႃႉသေၵူၼ်းဢေႃႈ။
မိူဝ်ႈၼၼ်ႉၵူၼ်းမၼ်းၸဝ်ႈၸိူဝ်းၼၼ်ႉ ယုမ်ႇမၢတ်ႈၵတိမၼ်းၸဝ်ႈလႄႈ ဢွၼ်ၵၼ်ႁဵတ်းၵႂၢမ်းယွင်ႈယေႃး မၼ်းၸဝ်ႈဢေႃႈ။
ၼႂ်းဝႃႈၼၼ်သေၵေႃႈ၊ၶဝ်လူင်လိုမ်းလွင်ႈ တၢင်းဢၼ်မၼ်းၸဝ်ႈႁဵတ်းဝႆႉ ၸိူဝ်းၼၼ်ႉပႅတ်ႈ၊ၶၼ်ၶၼ်ၽႂ်းၽႂ်းလႄႈ၊ ဢမ်ႇပႂ်ႉထႃႈတၢင်းဢၼ်မၼ်းၸဝ်ႈ ပၼ်တၢင်းၵျၢမ်ႇၼၼ်ႉဢေႃႈ။
ၶဝ်မီးၸႂ်ဢၼ်ၸပ်းၸွႆးၼႃႇလူင်လၢင်ၵႃႈၼႂ်းထိူၼ်ႇလႅင်ႉၼၼ်ႉယူႇလႄႈ ၸၢမ်းတူၺ်းၽြႃးပဵၼ်ၸဝ်ႈဢေႃႈ။
မၼ်းၸဝ်ႈၵေႃႈပၼ်သုၵျေးၸူးၵႃႈၼင်ႇဢၼ်ၶဝ် ယွၼ်းဢဝ်ၼၼ်ႉဢေႃႈ။ ၵူၺ်းၵႃႈ၊မၼ်းၸဝ်ႈပၼ်ယေႃးၵႃႇတၢင်းပဵၼ်ဢၼ်လီၵူဝ်လီႁႄၼၼ်ႉတီႈၶဝ်ဢေႃႈ။
ၵႃႈၼႂ်းထိူၼ်ႇလႅင်ႉၼၼ်ႉၶဝ်မီးတၢင်းဢၼ်ဢမ်ႇၼႃႇလူဝ်ႇ မူဝ်းသေႇ၊ တင်း ဢႃႇရုၼ်ႇ၊ ဢၼ်ပဵၼ်ၶႃႈ ထႃႇဝရႃႉၽြႃး၊ ၼၼ်ႉဢေႃႈ။
မိူဝ်ႈၼၼ်ႉလိၼ်မိူင်းတႅၵ်ႇဢႃႈလႄႈဢိုၼ်ၵိၼ် တႃႇႀၼ်ႇ၊ ပႅတ်ႈဢိၵ်ႇတင်း ႁူမ်ႇသုမ်ႇ ဢၽိရမ်ႇ၊ တင်းၵူၼ်းႁိူၼ်း ၵူၼ်းယေးမၼ်းပႅတ်ႈဢေႃႈ။
ၽႆးတူၵ်းသႂ်ႇၵႃႈၼိူဝ်ၵူၼ်းၸွမ်းမၼ်းတင်းလၢႆလႄႈ၊ႁုပ်ႇမႆႈၶဝ်ၸိူဝ်းဢၼ်လိူင်းၼၼ်ႉဢေႃႈ။
ၶဝ်ႁဵတ်းဝူဝ်းၶမ်းၵႃႈတီႈလွႆ သိၼႃႉ၊ လႄႈ ဝႆႈႁုၼ်ႇႁၢင်ႈသၢင်းထုၼၼ်ႉဢေႃႈ။
ၶဝ်ဢဝ်မုၼ်ၽုင်းၽြႃးပဵၼ်ၸဝ်ႈလႅၵ်ႈၵၼ် တင်းႁုၼ်ႇႁၢင်ႈတူဝ်သတ်းဢၼ် ၵိၼ်ယိူဝ်ႈၼၼ်ႉဢေႃႈ။
ၶဝ်လူင်လိုမ်းပႅတ်ႈၽြႃးပဵၼ်ၸဝ်ႈဢၼ် ၵႄႇသႄႇၶျွတ်ႈဢဝ်ၶဝ် ဢၼ်ဢဝ်တင်းႁႅင်းတၼ်းၶူဝ်းႁဵတ်းပုၼ်ႈၶဝ် ၵႃႈၼႂ်းမိူင်း ဢေးၵျိပ်ႉ၊ ၼၼ်ႉဢေႃႈ။
တၢင်းဢၼ်လီဢၢမ်းတင်းလၢႆမၼ်းၸဝ်ႈ ႁဵတ်းၵႃႈတီႈၼၼ်ႈလႄႈ၊ တၢင်းဢၼ်လီၵူဝ်လီႁႄၵေႃႈ ႁဵတ်းၵႃႈတီႈ ပၢင်ႇလၢႆႇလႅင်ဢေႃႈ။
မိူဝ်ႈဢၼ်ၽြႃးပဵၼ်ၸဝ်ႈမီးၸႂ်ဢၼ်တၵ်းယႃႉၽဵဝ်ႈၵူၼ်းမၼ်းၸဝ်ႈတင်းလၢႆပႅတ်ႈၼၼ်ႉ၊ မူဝ်းသေႇ၊ ဢၼ်မၼ်းၸဝ်ႈလိူၵ်ႈဢဝ်ဝႆႉၼၼ်ႉၸုၵ်းၶၢမ်ႇၵႃႈတီႈၽၢႆႇၼႃႈမၼ်းၸဝ်ႈလႄႈ ႁၢမ်ႈတပ်ႉတၢင်းၸႂ်မႆႈၶႂ်ႈၸႃႉမၼ်းၸဝ်ႈဢၼ်ဝႃႈတၵ်းတေယႃႉၽဵဝ်ႈပႅတ်ႈၼၼ်ႉဢေႃႈ။
မိူဝ်ႈၼၼ်ႉၶဝ်ဢွၼ်ၵၼ်ပႄႇပႅတ်ႈမိူင်းဢၼ် သႃႇယႃႇလီငၢမ်းၼၼ်ႉ၊ ၵွပ်ႈပိူဝ်ႈၶဝ်ဢမ်ႇယုမ်ႇမၢတ်ႈၵတိ ၸဝ်ႈၼၼ်ႉဢေႃႈ။
ၶဝ်ဢွၼ်ၵၼ်ယူႇယူႇၵႃႈၼႂ်းသုမ်ႉၼႂ်းထဵင်ၶဝ်လႄႈ ပွင်ႉယူႇၶၢင်းယူႇယင်းဢမ်ႇထွမ်ႇဢဝ် ၼုၵ်ႈၵပၢတ်ႈ ထႃႇဝရႃႉၽြႃး၊ လႄႈယူႇဢေႃႈ။
မိူဝ်ႈၼၼ်ႉမၼ်းၸဝ်ႈပၼ်သတိတီႈၶဝ် လွင်ႈဢၼ်မၼ်းၸဝ်ႈတၵ်းဢဝ်ၶဝ် တၢႆပႅတ်ႈၵႃႈၼႂ်းထိူၼ်ႇလႅင်ႉၼၼ်ႉ။
ဢိၵ်ႇတင်းတၵ်းဢဝ်မဵဝ်းၸိူဝ်ႉၶိူဝ်းၶဝ်ၸၢတ်ႇပိုၼ်ပႅတ်ႈၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းလႄႈ ႁႂ်ႈၶဝ်တၢႆၵႃႈၼႂ်းပႃႇၽိူင်းမိူင်းပိူၼ်ႈဢေႃႈ။
မိူဝ်ႈၼၼ်ႉၵႃႈတီႈမိူင်း ပေႇၵုရႃႉ၊ ၼၼ်ႉ ၵူၼ်းၽြႃးပဵၼ်ၸဝ်ႈတင်းလၢႆ၊ ၶဝ်ႈပႃးၵႃႈၼႂ်းတၢင်းဢၼ်ဝႆႈသႃ ၽြႃး ပႃႇလႃႉ၊ သေလႄႈ ၶဝ်ဢွၼ်ၵၼ်ၵိၼ်တူဝ်တၢင်းလူႇ၊ဢၼ်သၢၵ်ႈလူႇတီႈၽြႃးဢၼ်ဢမ်ႇမီးဢသၢၵ်ႈၼၼ်ႉဢေႃႈ။
ၶဝ်ဢဝ်လွင်ႈတၢင်းဢၼ်ၶဝ်ႁဵတ်းၼၼ်ႉတိုၵ်းယူင်းတေႃးသႃႉ ထႃႇဝရႃႉၽြႃး၊ လႄႈ ၽေးၵႃႇလႃႉႁႃႈလႅင်မိူင်းလႆႈတူၵ်းႁွတ်ႈ ၵႃႈၼိူဝ်ၶဝ်ဢေႃႈ။
ၵူၺ်းၵႃႈ၊ ၽိၼႁတ်ႉ၊ လုၵ်ႉသေယဝ်ႉ ၸီႇယၢင်ႇပၼ်တၢမ်ႇတီႈၶဝ်ၸိူဝ်းဢၼ်ၽိတ်းပိူင်ႈၼၼ်ႉလႄႈ ၽေးတုၵ်ႉၶႃႉၼၼ်ႉထၢတ်ႇၵႂႃႇယဵၼ်ၵႂႃႇဢေႃႈ။
လွင်ႈတၢင်းၼၼ်ႉၸိုင်၊လႆႈမၢတ်ႈပဵၼ်ၸိူဝ်ႉၼင်ႇတၢင်းဢၼ်သိုဝ်ႈတေႃႇတီႈမၼ်းၼၼ်ႉယူႇ၊ တႄႇၸႃႉဢဝ်ဝၼ်းမိူဝ်ႈၼၼ်ႉၵႂႃႇ ၵူႈၸူဝ်ႈၵူႈပၢၼ်တေႃႇထိုင်ႁွတ်ႈ ဝၼ်းလိုၼ်းမိူဝ်းၼႃႈဢေႃႈ။
ၵႃႈတီႈပၢင်ႇၼမ်ႉဢွၵ်ႇႁူး မေႇရိၽႃႉ၊ ၼၼ်ႉ ၵူၼ်းတင်းလၢႆဢွၼ်ၵၼ်ႁဵတ်းႁႂ်ႈ ထႃႇဝရႃႉၽြႃး၊ ၸႂ်မႆႈၶႂ်ႈၸႃႉၼႃႇ ထၢၼ်ႈပေႃးႁႂ်ႈဢႃႉမၢင်ႇၵလႃႇပဵၼ်မႃးတီႈ၊ မူဝ်းသေႇ၊ ၵွပ်ႈပိူဝ်ႈတၢင်းႁဵတ်းၶဝ်ၼၼ်ႉဢေႃႈ။
ၵွပ်ႈပိူဝ်ႈၶဝ်ႁဵတ်းႁႂ်ႈမၼ်းၶူမ်ၸႂ်ၶူမ်ၶေႃးၼႃႇလႄႈ မၼ်းဢမ်ႇတၼ်းလႆႈၶႆႈၸႂ်လႄႈလႆႈလၢတ်ႈ ဢွၵ်ႇသူပ်းၵႂႃႇဢေႃႈ။
ၶဝ်ယင်းဢမ်ႇယႃႉၵူၼ်းတၢင်ႇၸိူဝ်ႉတၢင်ႇၶိူဝ်းပႅတ်ႈ ၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉဝႆႉႁႂ်ႈၶဝ်ႁဵတ်းၼၼ်ႉလႄႈ
ၶဝ်သမ်ႉယင်းလေႃးလႄးလူၺ်ႈၵၼ်တင်းၶဝ်ၼၼ်ႉယူႇသေလႄႈ ဢွၼ်ၵၼ်ယိူင်ႈၸွမ်းႁဵတ်းၸွမ်းထုင်းၽိင်ႈ ၽႃႇသႃႇၶဝ်ၼၼ်ႉဢေႃႈ။
ၵူၼ်းၽြႃးပဵၼ်ၸဝ်ႈတင်းလၢႆဢွၼ်ၵၼ်ဝႆႈသႃႁုၼ်ႇႁၢင်ႈသၢင်းထုၸိူဝ်းၼၼ်ႉလႄႈ ႁွတ်ႈထိုင်တၢင်းလုလႅဝ်ၵႂႃႇဢေႃႈ။
ၶဝ်ဢွၼ်ၵၼ်ဢဝ်လုၵ်ႈၸၢႆးလုၵ်ႈယိင်းၶဝ် ႁဵတ်းပဵၼ်ၶိူင်ႈတၢင်းလူႇ၊ တီႈႁုၼ်ႇႁၢင်ႈသၢင်းထုမိူင်း ၶႃႇၼၼ်ႇ၊ ဢေႃႈ။
ၶဝ်ဢဝ်လုၵ်ႈဢွၼ်ႇလၢင်းဢွၼ်ႇဢၼ်ဢမ်ႇမီး ဢပျတ်ႈၸိူဝ်းၼၼ်ႉတၢႆသေလႄႈ ႁႂ်ႈမိူင်းၼၼ်ႉၵူဝ်ႈၵိူၵ်ႇဝႆႉတင်းလိူတ်ႈဢေႃႈ။
ၼင်ႇၼၼ်လႄႈၶဝ်ႁႂ်ႈတူဝ်ၸဝ်ႈၵဝ်ႇၵူဝ်ႈၵိူၵ်ႇၵွပ်ႈပိူဝ်ႈတၢင်းၵမ်တၢင်းၵျၢင်ႉၶဝ်ၼၼ်ႉလႄႈ ယႃႉပႅတ်ႈသဵတ်ႈၸႃႇဢၼ်ဝႆႉၵႃႈတီႈ ၽြႃးပဵၼ်ၸဝ်ႈၼၼ်ႉဢေႃႈ။
ပိူဝ်ႈၼႆလႄႈ ထႃႇဝရႃႉၽြႃး၊ ၸႂ်မႆႈၶႂ်ႈၸႃႉ ၵူၼ်းမၼ်းၸဝ်ႈတင်းလၢႆလႄႈ မၼ်းၸဝ်ႈလီႁင်ႈဢဵတ်ႇသဵတ်ႇၶဝ်ၸိူဝ်းဢၼ်ပဵၼ်ဢမူၺ်ႇမၼ်းၸဝ်ႈၼၼ်ႉဢေႃႈ။
မၼ်းၸဝ်ႈဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆလႄႈ ရၢၼ်ႇသူႇၶဝ်ၸိူဝ်းၼၼ်ႉလႆႈဢုပ်ႉပိူင်ႇ ၵႃႈၼိူဝ်ၶဝ်ဢေႃႈ။
ရၢၼ်ႇသူႇၶဝ်ၸိူဝ်းၼၼ်ႉၵေႃႈ ၼိၵ်ႈၸၢၵ်ႈငႅၼ်းသႄးၶဝ်လႄႈ ၶဝ်လႆႈၵူမ်ႈၵွမ်းၼွမ်းၶၢမ်ႇၵႃႈတႂ်ႈ မိုဝ်းၶဝ်ၸိူဝ်းၼၼ်ႉဢေႃႈ။
မၼ်းၸဝ်ႈၵႄႇၼုၵ်ႈဢဝ်ၵူၼ်းမၼ်းၸဝ်ႈၼၼ်ႉဢမ်ႇႁုလၢႆပွၵ်ႈယဝ်ႉသေၵေႃႈ ၶဝ်လိူၵ်ႈဢဝ်လွင်ႈတၢင်းဢၼ်တၵ်းလုၵ်ႉၽိုၼ်ႉမၼ်းၸဝ်ႈၵူၺ်းလႄႈ ယဵင်ႈၶႅၼ်းတူၵ်းၸူမ်ၵႂႃႇၵႃႈၼႂ်းတုၸရိူၵ်ႈ ဢပျတ်ႈလိုၵ်ႉလိုၵ်ႉဢေႃႈ။
ၼႂ်းဝႃႈၼၼ်သေၵေႃႈ၊ ထႃႇဝရႃႉၽြႃး၊ ငိၼ်းသဵင်တၢင်းဢၼ်ၶဝ်ႁွင်ႉၵၢဝ်ႇတီႈ မၼ်းၸဝ်ႈၼၼ်ႉလႄႈ မၼ်းၸဝ်ႈလူတူၺ်းတုၵ်ႉၶႃႉတၢင်းၽၢၼ် ၶဝ်ၼၼ်ႉဢေႃႈ။
မၼ်းၸဝ်ႈၶုၵ်းၸႂ်လႆႈပတိၺိၺ်ႇတြႃးမၼ်းၸဝ်ႈၼၼ်ႉပုၼ်ႈၶဝ်လႄႈ ၸႂ်ပျေႇၵႂႃႇယဵၼ်ၵႂႃႇၵွပ်ႈပိူဝ်ႈမၼ်းၸဝ်ႈမီးၸႂ်မႅတ်ႈတႃႇၵရုၼႃႇၼၼ်ႉဢေႃႈ။
မၼ်းၸဝ်ႈၸင်ႇႁဵတ်းႁႂ်ႈၶဝ်ၸိူဝ်းဢၼ်တဵၵ်းငႅၼ်းၶဝ်ၼၼ်ႉမီးၸႂ်ဢၼ်ဢဵတ်းလူၶဝ်မႃးဢေႃႈ။
ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၶႃႈတီႈၶႃႈ။ ၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈႁဝ်းၶဝ် လႄႈၶိုၼ်းၸုသိမ်းဢဝ်ၶႃႈၸဝ်ႈႁဝ်းၶဝ်သေ ၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းၼၼ်ႉ ႁႂ်ႈၶႃႈၸဝ်ႈႁဝ်းၶဝ်လႆႈယွင်ႈယေႃးတၢင်ႇ ၵျေးၸူးၸဝ်ႈႁဝ်းယူႇလႄႈ သမ်ႉလႆႈယွင်ႈယေႃးၼႃႇမႃႉၸိုဝ်ႈသဵင်ဢၼ်မူတ်းၸၢင်ႇၸဝ်ႈႁဝ်းၼၼ်ႉသေၵမ်းလူၺ်ႈတီႈၶႃႈ။
ဢွၼ်ၵၼ်ယွင်ႈယေႃး ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ ၼၼ်ႉတႃႉႁဝ်း။ ႁႂ်ႈမီးတၢင်းဢၼ်ယွင်ႈယေႃးမၼ်းၸဝ်ႈယူႇ ၸႃႉၸဵမ်မိူဝ်ႈလဵဝ်ၼႆႉၵႂႃႇတႃႇသေႇ ဢမ်ႇထၢတ်ႇသေၵမ်းလူၺ်ႈ။ ႁႂ်ႈၵူၼ်းတင်းလၢႆဝႃႈ၊ “ဢႃမိၼ်ႈ” ဝႃႈၼင်ႇၼႆသေၵမ်းလူၺ်ႈ။ ယွင်ႈယေႃး ထႃႇဝရႃႉၽြႃး၊ တီႈၶႃႈဢေႃႈ။
“ဢွၼ်ၵၼ်ယွင်ႈယေႃးၵျေးၸူး ထႃႇဝရႃႉၽြႃး၊ ၵွပ်ႈပိူဝ်ႈဢၼ်မၼ်းၸဝ်ႈပဵၼ်ဢၼ် မျၢတ်ႈလီလႄႈ မႅတ်ႈတႃႇမၼ်းၸဝ်ႈတႄႇယူႇထႃႇဝရႃႉ ၼၼ်ႉတႃႉႁဝ်း။”
ဢဝ်ၵႂၢမ်းၶေႃႈၼႆႉသေလႄႈၵမ်းၵမ်းယွင်ႈယေႃး ထႃႇဝရႃႉၽြႃး၊ ယူႇတႃႉ။ ၶဝ်ၸိူဝ်းဢၼ်မၼ်းၸဝ်ႈၵႄႇသႄႇၶျွတ်ႈ ဢဝ်ဝႆႉတင်းလၢႆၶဝ်႟။ မၼ်းၸဝ်ႈၵႄႇၼုၵ်ႈဢဝ်သူလွတ်ႈသေၵႃႈၼႂ်း မိုဝ်းရၢၼ်ႇသူႇသူတင်းလၢႆလႄႈ။
ဢဝ်သူဢွၵ်ႇသေၵႃႈၼႂ်းပႃႇၽိူင်းမိူင်းပိူၼ်ႈ၊ ၵႃႈတီႈတၢင်းဢွၵ်ႇ၊တၢင်းတူၵ်း၊တၢင်းႁွင်ႇ၊ တၢင်းၸၢၼ်းမႃးယဝ်ႉ။
ၶဝ်ၵမ်ႈၽွင်ႈလႄႇၵႂႃႇလႄႇမႃးယူႇၵႃႈၼႂ်းထိူၼ်ႇလႅင်ႉဢၼ်ဢမ်ႇမီးႁွႆးတၢင်းလႄႈ ဢမ်ႇၸၢင်ႈထူပ်းၸၢင်ႈၺႃးသဵၼ်ႈတၢင်းဢၼ်ၵႂႃႇၸူးၵႃႈတီႈဝဵင်းပုၼ်ႈတၵ်းယူႇသဝ်းၼၼ်ႉ။
ၶဝ်တွင်ႉမႆႈသႆႈလိူတ်ႇယၢၵ်ႇၼမ်ႉယၢၵ်ႇၼၢႆးလႄႈၸႂ်လုႁႅင်းဢူၼ်ႈယူႇဢေႃႈ။
ၼႂ်းမိူဝ်ႈဢၼ်ထူပ်းၽေးတုၵ်ႉၶႃႉၸိူဝ်းၼၼ်ႉၶဝ်ႁွင်ႉၵၢဝ်ႇတီႈ ထႃႇဝရႃႉၽြႃး၊ လႄႈ မၼ်းၸဝ်ႈၵႄႇသႄႇၶျွတ်ႈဢဝ်ၶဝ်ဢွၵ်ႇသေၵႃႈၼႂ်းတၢင်းတုၵ်ႉၶႃႉတၢင်းၽၢၼ်ၶဝ်ဢေႃႈ။
မၼ်းၸဝ်ႈၸင်ႇဢွၼ်ၶဝ်သူင်ႇၸွမ်းသဵၼ်ႈတၢင်း ဢၼ်သိုဝ်ႈၵႂႃႇၸူးၵႃႈတီႈဝဵင်းဢၼ်ၶဝ်တၵ်းလႆႈယူႇလႆႈသဝ်းပုၼ်ႉဢေႃႈ။
ၶဝ်တၵ်းလႆႈယွင်ႈယေႃးၵျေးၸူး ထႃႇဝရႃႉၽြႃး၊ ၵွပ်ႈလူၺ်ႈမႅတ်ႈတႃႇၵရုၼႃႇမၼ်းၸဝ်ႈ ဢိၵ်ႇတင်းတၢင်းဢၼ်လီဢၢမ်းဢၼ်မၼ်းၸဝ်ႈႁဵတ်းပုၼ်ႈၶဝ်ၼၼ်ႉဢေႃႈ။
လွင်ႈမၼ်းၸမ်ႉ၊မၼ်းၸဝ်ႈႁႂ်ႈၵေႃႉဢၼ်ယၢၵ်ႇၼမ်ႉယၢၵ်ႇၼၢႆးလႆႈဢိမ်ႇၸႂ်ၼိမ်ၸႂ်လႄႈ ႁႂ်ႈၵေႃႉဢၼ်တွင်ႉမႆႈသႆႈလိူတ်ႇၼၼ်ႉတဵမ်ဝႆႉတင်းတၢင်းဢၼ်လီဢၼ်ငၢမ်းဢေႃႈ။
ၶဝ်ၵမ်ႈၽွင်ႈၼင်ႈယူႇၵႃႈတီႈဢၼ်လပ်းသိင်ႇၽိတ်းၽိတ်းၼၼ်ႉလႄႈ လႆႈၶၢမ်ႇတုၵ်ႉၶႃႉတၢင်းဢၼ်ၸိူၵ်ႈလဵၵ်း မတ်ႉၽုၵ်ႇလႄႈၶမ်ယူႇၵႃႈၼႂ်းထွင်ႇ
ၵွပ်ႈပိူဝ်ႈၶဝ်လုၵ်ႉၽိုၼ်ႉၶတ်းၶႅင်ႁႅင်းတႃႉဢမိင်ႉ ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ ဢိၵ်ႇတင်းပႄႇပႅတ်ႈတၢင်းဢၼ်မၼ်းၸဝ်ႈသင်ႇသွၼ်ၼႄတၢင်းၼၼ်ႉဢေႃႈ။
ၶဝ်လႆႈႁိူဝ်ႉဢူၼ်ႈၼူၼ်းၵႂႃႇၵွပ်ႈလူၺ်ႈၵၢၼ်တၢင်းႁဵတ်းဢၼ်ယၢပ်ႇၽိုတ်ႇၼႃႇၼၼ်ႉသေယဝ်ႉ၊ ၶဝ်လူမ်ႉလႄႈဢမ်ႇမီးၵေႃႉဢၼ်ထွၵ်ႈ ဢၼ်ၵမ်ႉလႃးလႃး။
ၼႂ်းမိူဝ်ႈဢၼ်ထူပ်းၽေးတုၵ်ႉၶႃႉၸိူဝ်းၼၼ်ႉၶဝ်ႁွင်ႉၵၢဝ်ႇတီႈ ထႃႇဝရႃႉၽြႃး၊ လႄႈ မၼ်းၸဝ်ႈၵႄႇသႄႇၶျွတ်ႈဢဝ်ၶဝ်ဢွၵ်ႇသေ ၵႃႈၼႂ်းတုၵ်ႉၶႃႉတၢင်းၽၢၼ်ၶဝ်ဢေႃႈ။
မၼ်းၸဝ်ႈဢဝ်ၶဝ်ဢွၵ်ႇသေၵႃႈတီႈဢၼ် လပ်းသိင်ႇၽိတ်းၽိတ်းၼၼ်ႉလႄႈ တႅပ်းပႅတ်ႈၸိူၵ်ႈလဵၵ်းၸိူဝ်းၼၼ်ႉ ပဵၼ်ပွတ်းပဵၼ်ပိတ်းၵႂႃႇဢေႃႈ။
ၶဝ်တၵ်းလႆႈယွင်ႈယေႃးၵျေးၸူး ထႃႇဝရႃႉၽြႃး၊ ၵွပ်ႈလူၺ်ႈမႅတ်ႈတႃႇၵရုၼႃႇမၼ်းၸဝ်ႈ၊ ဢိၵ်ႇတင်းတၢင်းဢၼ်လီဢၢမ်းဢၼ်မၼ်းၸဝ်ႈႁဵတ်းပုၼ်ႈၶဝ်ၼၼ်ႉဢေႃႈ။
လွင်ႈမၼ်းၸမ်ႉ၊မၼ်းၸဝ်ႈယႃႉႁၵ်းၽၵ်းတူတွင်းလိူင်တင်းလၢႆပႅတ်ႈ၊ ဢိၵ်ႇတင်းတႅပ်းၵိူၼ်ႇလဵၵ်းတင်းလၢႆပႅတ်ႈဢေႃႈ။
ၶဝ်ၵမ်ႈၽွင်ႈၸိူဝ်းဢၼ်မီးၸႂ်ဢၼ်မိူၵ်ႈၼၼ်ႉ လႆႈၶၢမ်ႇၽေးတုၵ်ႉၶႃႉ ၵွပ်ႈပိူဝ်ႈဢၼ်ၶဝ်ၽိတ်းတၢင်းပိူင်ႈတၢင်းလႄႈ ႁဵတ်းတုၸရိူၵ်ႈၼၼ်ႉဢေႃႈ။
ၶဝ်လီႁင်ႈဢဵတ်ႇသဵတ်ႇတၢင်းၵိၼ်တၢင်းၶူပ်း ၵူႈၸိူဝ်ႉၵူႈမဵဝ်းလႄႈ ၶဝ်ႁွတ်ႈထိုင်ၵႃႈတီႈဢၼ်ၸမ်တၵ်းတၢႆဢေႃႈ။
ၼႂ်းမိူဝ်ႈဢၼ်ထူပ်းၽေးတုၵ်ႉၶႃႉၸိူဝ်းၼၼ်ႉၶဝ်ႁွင်ႉၵၢဝ်ႇတီႈ ထႃႇဝရႃႉၽြႃး၊ လႄႈ မၼ်းၸဝ်ႈၵႄႇသႄႇၶျွတ်ႈဢဝ်ၶဝ်ဢွၵ်ႇသေၵႃႈၼႂ်းတုၵ်ႉၶႃႉတၢင်းၽၢၼ်ၶဝ်ဢေႃႈ။
မၼ်းၸဝ်ႈဢဝ်တင်းဢမိင်ႉပူင်ႁႂ်ႈတၢင်းၶႆႈ တၢင်းပဵၼ်ၶဝ်ၸိုၼ်ႈႁၢႆလႄႈ ၵႄႇသႄႇၶျွတ်ႈဢဝ်ၶဝ်ဢွၵ်ႇသေၵႃႈၼႂ်း ၶုမ်ပႃႇႁဵဝ်ႈၶဝ်ဢေႃႈ။
ၶဝ်တၵ်းလႆႈယွင်ႈယေႃးၵျေးၸူး ထႃႇဝရႃႉၽြႃး၊ ၵွပ်ႈလူၺ်ႈမႅတ်ႈတႃႇၵရုၼႃႇမၼ်းၸဝ်ႈ၊ ဢိၵ်ႇတင်းတၢင်းဢၼ်လီဢၢမ်းဢၼ်မၼ်းၸဝ်ႈႁဵတ်းပုၼ်ႈၶဝ်ၼၼ်ႉဢေႃႈ။
ၶဝ်တၵ်းလႆႈပႃးတင်းတူဝ်တၢင်းလူႇသေလႄႈ ယွင်ႈယေႃးၵျေးၸူးမၼ်းၸဝ်ႈ၊ ဢိၵ်ႇတင်းဢဝ်တင်းတၢင်းဢၼ်ႁဵတ်းၵႂၢမ်း ဢၼ်သႂၢင်ႇဢၼ်သိူဝ်း၊ ၽုၺ်ႇမွၵ်ႇလၢတ်ႈၼႄလွင်ႈတၢင်းဢၼ် မၼ်းၸဝ်ႈႁဵတ်းၸိူဝ်းၼၼ်ႉဢေႃႈ။
ၶဝ်ၵမ်ႈၽွင်ႈၶီႇႁိူဝ်းသၢင်းၽေႃးၵႂႃႇမႃးယူႇ ၵႃႈၼိူဝ်ၼမ်ႉသမ်ႇမုၵ်ႈတြႃႇလႄႈ ႁဵတ်းၵၢၼ်လဵင်ႉတွင်ႉၶဝ်ယူႇၵႃႈၼိူဝ် ၼမ်ႉပၢင်ႇလၢႆႇၼၼ်ႉဢေႃႈ။
ၶဝ်လႆႈႁၼ်လွင်ႈတၢင်းဢၼ် ထႃႇဝရႃႉၽြႃး၊ ႁဵတ်း၊ ဢိၵ်ႇတင်းလွင်ႈတၢင်းဢၼ်လီဢၢမ်းမၼ်းၸဝ်ႈတင်းလၢႆၵႃႈၼိူဝ်ၼမ်ႉပၢင်ႇလၢႆႇၼၼ်ႉဢေႃႈ။
မၼ်းၸဝ်ႈပူင်ဢမိင်ႉႁႂ်ႈလူမ်းဢၼ်ႁႅင်းၼႃႇ ပတ်ႉမႃးလႄႈႁႂ်ႈလႅင်းၼမ်ႉ ပိူပ်ႈၼမ်ႉလုၵ်ႉၶိုၼ်ႈဢေႃႈ။
ႁိူဝ်းသၢင်းၽေႃးၶဝ်ၼၼ်ႉလႆႈၶၢမ်ႇတၢင်းဢၼ်ယွင်ႈၶိုၼ်ႈၵႂႃႇၵႃႈၼိူဝ်ၽႃႉၵၢင်ႁၢဝ်ယူႇ၊ သမ်ႉလမ်ႇလူင်းၵႂႃႇၵႃႈတီႈတႂ်ႈ ဢၼ်လိုၵ်ႉဢၼ်လမ်ႇၼၼ်ႉဢေႃႈ။ ၸႂ်ၶဝ်လုၵႂႃႇၵွပ်ႈပိူဝ်ႈၽေးၼၼ်ႉဢေႃႈ။
ၶဝ်ဢိုင်ႈဢၢင်ႈၵႂႃႇဢိုင်ႈဢၢင်ႈၶိုၼ်းယူႇ ဝၢင်ႇဝီႈဝၢင်ႇဝိူဝ်ႈမိူၼ်ၸိူဝ်ႉၼင်ႇၵူၼ်းမဝ်းလဝ်ႈၼၼ်ႉယူႇသေလႄႈ တၢင်းၵတ်ႉတၢင်းၶၼ်ၶဝ်ၼၼ်ႉဢမ်ႇပွင်ႇလွင်ႈၵႃႈသင်ပဵၼ်ဢၼ်လၢႆလၢႆၵႂႃႇဢေႃႈ။
ၼႂ်းမိူဝ်ႈဢၼ်ထူပ်းၽေးတုၵ်ႉၶႃႉၸိူဝ်းၼၼ်ႉၶဝ်ႁွင်ႉၵၢဝ်ႇတီႈ ထႃႇဝရႃႉၽြႃး၊ လႄႈ မၼ်းၸဝ်ႈၵႄႇသႄႇၶျွတ်ႈဢဝ်ၶဝ်ဢွၵ်ႇသေၵႃႈၼႂ်းတၢင်းတုၵ်ႉၶႃႉတၢင်းၽၢၼ်ၶဝ်ဢေႃႈ။
မၼ်းၸဝ်ႈႁႂ်ႈၽူၼ်လူင်လူမ်းလူင်ပၢင်ႇၸိုၼ်ႈၵႂႃႇ ထၢၼ်ႈပေႃးလႅင်းၼမ်ႉပိူပ်ႈၼမ်ႉတင်းလၢႆ ယဵၼ်ၵႂႃႇၼိမ်ၵႂႃႇဢေႃႈ။
မိူဝ်ႈၼၼ်ႉၶဝ်ဢွၼ်ၵၼ်ၸူမ်းသိူဝ်းၵွပ်ႈပိူဝ်ႈဢၼ်ယဵၼ်ၵႂႃႇၼိမ်ၵႂႃႇယဝ်ႉၼၼ်ႉဢေႃႈ။ ၼင်ႇၼၼ်လႄႈမၼ်းၸဝ်ႈဢဝ်ၶဝ်သူင်ႇႁွတ်ႈၵႃႈတီႈတႃႈႁိူဝ်းသၢင်းၽေႃး၊ ဢၼ်ၶဝ်မီးဢလူဝ်ႇၼၼ်ႉႁႂ်ႈၵႂႃႇ လူင်ႉလီလွတ်ႈလီဢေႃႈ။
ၶဝ်တၵ်းလႆႈယွင်ႈယေႃးၵျေးၸူး ထႃႇဝရႃႉၽြႃး၊ ၵွပ်ႈလူၺ်ႈမႅတ်ႈတႃႇၵရုၼႃႇမၼ်းၸဝ်ႈ၊ ဢိၵ်ႇတင်းတၢင်းဢၼ်လီဢၢမ်းဢၼ် မၼ်းၸဝ်ႈႁဵတ်းပုၼ်ႈၶဝ်ၼၼ်ႉဢေႃႈ။
ၶဝ်တၵ်းလႆႈၽုၺ်ႇမွၵ်ႇလၢတ်ႈၼႄလွင်ႈတၢင်းဢၼ်ယႂ်ႇမျၢတ်ႈမၼ်းၸဝ်ႈၼၼ်ႉ၊ ၵႃႈၼႂ်းပၢင်ၵူၼ်းတင်းလၢႆ၊ဢိၵ်ႇတင်း တၵ်းလႆႈယွင်ႈယေႃးမၼ်းၸဝ်ႈ၊ ၵႃႈတီႈၽၢႆႇၼႃႈၵူၼ်းဢၼ်ပဵၼ်ၵႄႇပဵၼ်ႁူဝ် ၸိူဝ်းဢၼ်ၸုၵၼ်တုမ်ၵၼ်ၼၼ်ႉဢေႃႈ။
ထႃႇဝရႃႉၽြႃး၊ ႁဵတ်းႁႂ်ႈၼမ်ႉႁွင်ႈၼမ်ႉၵႄး တင်းလၢႆယူတ်းႁႅင်ႈၵႂႃႇလုမ်းလုမ်း ဢိၵ်ႇတင်းႁႂ်ႈၼမ်ႉဢွၵ်ႇႁူးတင်းလၢႆဢမ်ႇမီး ၼမ်ႉလႆဢွၵ်ႇမႃးယဝ်ႉ။
မၼ်းၸဝ်ႈႁႂ်ႈလိၼ်ဢၼ်ၶွၼ်ႇၼမ်ႉမၼ်း လိၼ်လီၼၼ်ႉပဵၼ်လိၼ်ၵိူဝ်ၵႂႃႇ ၵွပ်ႈပိူဝ်ႈဢပျတ်ႈၵူၼ်းၸိူဝ်းဢၼ်ယူႇသဝ်း ၵႃႈတီႈၼၼ်ႈၼၼ်ႉဢေႃႈ။
လၢႆးၼိုင်ႈသမ်ႉမၼ်းၸဝ်ႈႁဵတ်းႁႂ်ႈထိူၼ်ႇဢၼ်ႁႅင်ႈဢၼ်ႁွင်ပဵၼ်တီႈဢၼ်မီးၼမ်ႉမီးၼွင်မႃး၊ လိၼ်ဢၼ်ႁႅင်ႈဢၼ်ႁွင်သမ်ႉမီး ၼမ်ႉဢွၵ်ႇႁူးလႆယူႇဢေႃႈ။
မၼ်းၸဝ်ႈႁႂ်ႈၶဝ်ၸိူဝ်းဢၼ်ဢိုပ်းဢၼ်ယၢၵ်ႈၼၼ်ႉၶျႃးတီႈယူႇတီႈသဝ်းၵႃႈတီႈၼၼ်ႈ၊ ၶဝ်ဢွၼ်ၵၼ်တႄႇႁဵတ်းဝဵင်းယႂ်ႇဝဵင်းလူင် တႃႇတေယူႇတေသဝ်းဢေႃႈ။
ၶဝ်ဝၢၼ်ႇၸိူဝ်ႉဝၢၼ်ႇၽၼ်းၵႃႈတီႈႁႆႈယူႇ၊ၽုၵ်ႇသွမ်ႈသူၼ်မၢၵ်ႇၸပိတ်ႉသေလႄႈ လႆႈပၢတ်ႇဢဝ်သိမ်းဢဝ်မၢၵ်ႇလိၼ်ႁူင်းၼမ်ႉ ၼမ်ၼႃႇယူႇဢေႃႈ။
မၼ်းၸဝ်ႈပၼ်တၢင်းလီႁႂ်ႈၶဝ်ယႂ်ႇၽႄႈၼမ်ၵိုၼ်းမႃးၼႃႇလူင်လၢင်လႄႈ ႁႂ်ႈၽုင်သူဝ်းၽုင်ဝူဝ်းၶဝ်ယႂ်ႇၽႄႈ ၼမ်ၵိုၼ်းမႃးယူႇဢေႃႈ။
မိူဝ်ႈဢၼ်ၵူၼ်းၽြႃးပဵၼ်ၸဝ်ႈလႆႈၶၢမ်ႇ တၢင်းဢၼ်တူၵ်းသုမ်း ဢိၵ်ႇတင်းတၢင်းဢၼ်တဵၵ်းငႅၼ်းၵွပ်ႈပိူဝ်ႈတၢင်းဢၼ်ၼိၵ်ႈၸၢၵ်ႈငႅၼ်းသႄး၊ တၢင်းဢၼ်ထူပ်းၽေးတုၵ်ႉၶႃႉတၢင်းဢၼ် ၶၢၼ်ၸႂ်ၶၢၼ်ၶေႃးယူႇၼၼ်ႉၸိုင်။
မၼ်းၸဝ်ႈဢဝ်တၢင်းဢၼ်လီဢူၵ်း လီဢၢႆထွၵ်ႇသႂ်ႇ ၵႃႈၼိူဝ်လုၵ်ႈၶုၼ်လုၵ်ႈၵွၼ်းတင်းလၢႆ ႁႂ်ႈၶဝ်လႆႈလႄႇၵႂႃႇလႄႇမႃးယူႇ ၵႃႈတီႈဢၼ်ပဝ်ႇဢၼ်လၢပ်ႈတီႈဢၼ် ဢမ်ႇမီးႁွႆးတၢင်းၼၼ်ႉဢေႃႈ။
မၼ်းၸဝ်ႈသမ်ႉၵႄႇသႄႇဢဝ်ၶဝ်ၸိူဝ်းဢၼ်ၸုတ်ႈဢၼ်လုတ်ႈၼၼ်ႉ၊ ဢွၵ်ႇသေၵႃႈၼႂ်းတုၵ်ႉၶႃႉသေလႄႈ ႁႂ်ႈပဵၼ်ႁိူၼ်းပဵၼ်ယေးယႂ်ႇၽႄႈၼမ်ၵိုၼ်းမႃးမိူၼ်ၸိူဝ်ႉၼင်ႇၽုင်သူဝ်းၼၼ်ႉဢေႃႈ။
ၶဝ်ၸိူဝ်းဢၼ်သိုဝ်ႈဢၼ်ယူဝ်းၼၼ်ႉႁၼ်လႄႈၸူမ်းသိူဝ်းဢေႃႈ။ ၶဝ်ၸိူဝ်းဢၼ်ႁၢႆႉဢၼ်မိူၵ်ႈၸမ်ႉ၊လႆႈဢိုတ်းသူပ်းတူဝ်ၸဝ်ႈၵဝ်ႇယူႇဢေႃႈ။
ႁႂ်ႈၶဝ်ၸိူဝ်းဢၼ်မီးပိင်ႇၺႃႇၼၼ်ႉၶႆႈၸႂ်ဝူၼ်ႉၸႂ်လွင်ႈတၢင်းၸိူဝ်းၼႆႉသေၵမ်းလူၺ်ႈ။ ႁႂ်ႈၶဝ်ႁုၵျေးၸူးမႅတ်ႈတႃႇၵရုၼႃႇ ထႃႇဝရႃႉၽြႃး၊ သေၵမ်းလူၺ်ႈ။
ၽြႃးပဵၼ်ၸဝ်ႈတီႈၶႃႈ။ ႁူဝ်ၸႂ်ၶႃႈၸဝ်ႈ တႄႇမၼ်ႈယူႇတီႈၶႃႈဢေႃႈ။ ၶႃႈၸဝ်ႈတၵ်းႁဵတ်းၵႂၢမ်းလႄႈယွင်ႈယေႃး ၸဝ်ႈႁဝ်းတီႈၶႃႈဢေႃႈ။ ဝိၺိၺ်ႇၵဝ်႟။ တိုၼ်ႇမႃးတႃႉ။
တရေႃးဢိၵ်ႇတင်းတိင်ႇၵဝ်႟။ တိုၼ်ႇမႃးတႃႉ။ ၵဝ်ၵေႃႈတၵ်းတိုၼ်ႇမႃးၸဝ်ႉၸဝ်ႉ ၸဵဝ်းၸဵဝ်းဢေႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈ တၵ်းယွင်ႈယေႃးၵျေးၸူးၸဝ်ႈႁဝ်း ၵႃႈၼႂ်းမဵဝ်းၵူၼ်းတင်းလၢႆတီႈၶႃႈဢေႃႈ။ ၶႃႈၸဝ်ႈတၵ်းယွင်ႈယေႃးၸဝ်ႈႁဝ်း ၵႃႈၼႂ်းၵၢင်ၵူၼ်းတင်းလၢႆတီႈၶႃႈဢေႃႈ။
လွင်ႈမၼ်းၸမ်ႉ၊မႅတ်ႈတႃႇၵရုၼႃႇၸဝ်ႈႁဝ်း သုင်ၼႃႇသေၵၢင်ႁၢဝ်လႄႈ သဵတ်ႈၸႃႇမၼ်းၸဝ်ႈၼၼ်ႉၵေႃႈ ၶိုတ်းထိုင်တွင်ႉၽႃႉတီႈၶႃႈဢေႃႈ။
ၽြႃးပဵၼ်ၸဝ်ႈတီႈၶႃႈ။ ႁႂ်ႈၸဝ်ႈႁဝ်းမီးတၢင်းဢၼ်ယုၵ်ႉယွင်ႈယူႇၵႃႈၼိူဝ်ၽႃႉၵၢင်ႁၢဝ်လႄႈ ႁႂ်ႈမုၼ်ၽုင်းၸဝ်ႈႁဝ်းမီးၵႃႈၼိူဝ်လိၼ်မိူင်း သေၵမ်းလူၺ်ႈတီႈၶႃႈ။
ၶႅၼ်းတေႃႈဢဝ်တင်းႁႅင်းတၼ်းၶူဝ်းၸဝ်ႈႁဝ်းသေလႄႈၵႄႇသႄႇၶျွတ်ႈဢဝ်ၶႃႈၸဝ်ႈ၊ သမ်ႉဢိူဝ်ၶႃႈၸဝ်ႈပုၼ်ႈလွင်ႈၼင်ႇႁိုဝ် ၶဝ်ၸိူဝ်းဢၼ်ၸဝ်ႈႁဝ်းႁၵ်ႉပႅင်းၼၼ်ႉ၊ ႁႂ်ႈလႆႈၶၢမ်ႇတၢင်းဢၼ်ၵႄႇသႄႇ ၶျွတ်ႈဢဝ်ၼၼ်ႉသေၵမ်းတီႈၶႃႈ။
ၽြႃးပဵၼ်ၸဝ်ႈယူႇၵႃႈၼႂ်းတီႈဢၼ်မူတ်းၸၢင်ႇမၼ်းၸဝ်ႈလႄႈလၢတ်ႈဝႃႈ၊ “ၵဝ်တၵ်းႁဵတ်းပွႆးဢၼ်ဢွင်ႇသိုၵ်းဢၼ် ၸၵ်းၽႄဝဵင်း သေးၶိမ်ႇ၊ ဢေႃႈ။ ၵဝ်တၵ်းတႅပ်းမႅင်ႇပၢင်ႇႁူၺ်ႈ သုၵုတ်ႉ၊ ပၼ်တီႈၵူၼ်းၵဝ်တင်းလၢႆဢေႃႈ။
မိူင်း ၵိလိတ်ႉ၊ ပဵၼ်မိူင်းၵဝ်ဢေႃႈ။ မိူင်း မၼႃႇသေႇ၊ ၵေႃႈၵဝ်လႆႈပိူင်ႇဢေႃႈ။ မိူင်း ဢေႇၽရိမ်ႇ၊ ပဵၼ်မွၵ်ႇႁူဝ်လဵၵ်းၵဝ်လႄႈ မိူင်း ယုတႃႉ၊ သမ်ႉပဵၼ်ၵၼ်းႁွၵ်ႇရႃႇၸႃႉၵဝ်ဢေႃႈ။
မိူင်း မေႃႇၽႃႉ၊ ၸမ်ႉ၊ပဵၼ်ဢၢင်ႇ လၢင်ႉမိုဝ်းၵဝ်ဢေႃႈ။ ၵဝ်တၵ်းဢဝ်ၶႅပ်းတိၼ်ၵဝ်ထိမ်ႈသႂ်ႇ မိူင်း ဢေႇတုမ်ႇ၊ ႁႂ်ႈပဵၼ်သၢၵ်ႈသေႇတၢင်းဢၼ်ၵဝ်ပိူင်ႇ ၼၼ်ႉဢေႃႈ။ ၵဝ်တၵ်းႁွင်ႉသႅၼ်ႇသဵင်ဢၼ်ပႄႉၼႅင်ႇၵႃႈၼိူဝ် မိူင်း ၽိလိတ်ႉတိ၊ ဢေႃႈ။”
ၽြႃးပဵၼ်ၸဝ်ႈတီႈၶႃႈ။ ၽူႈလႂ်တၵ်းဢဝ်ၶႃႈၸဝ်ႈသူင်ႇၸူးၵႃႈၼႂ်းဝဵင်းဢၼ်ႁႅင်းယႂ်ႇၼၼ်ႉ၊ ၽူႈလႂ်တၵ်းဢဝ်ၶႃႈၸဝ်ႈသူင်ႇၵႂႃႇၵႃႈတီႈ မိူင်း ဢေႇတုမ်ႇ၊ တီႈၶႃႈ။
ၸဝ်ႈႁဝ်းပႄႇပႅတ်ႈၶႃႈၸဝ်ႈႁဝ်းၶဝ်ယဝ်ႉ ၸႂ်ႈတႄႉတီႈၶႃႈႁိုဝ်း။ ၸဝ်ႈႁဝ်းတၵ်းတေဢမ်ႇၶီႇသိုၵ်းၵႂႃႇလူၺ်ႈၵၼ်တင်းတပ်ႉသိုၵ်းၶႃႈၸဝ်ႈႁဝ်းၶဝ် တီႈၶႃႈႁိုဝ်း။
ၶႅၼ်းတေႃႈၸွႆႈထႅမ်ၶႃႈၸဝ်ႈႁဝ်းၶဝ်ႁဵတ်း ၶတ်းၵၼ်တင်းရၢၼ်ႇသူႇသေၵမ်းတီႈၶႃႈ။ တၢင်းဢၼ်ၵူၼ်းၸွႆႈထႅမ်ၼၼ်ႉဢမ်ႇ ပွင်ႇလွင်ႈၵႃႈသင်တီႈၶႃႈ။
ၵွပ်ႈပိူဝ်ႈၽြႃးပဵၼ်ၸဝ်ႈမီးယူႇၽၢႆႇႁဝ်းလႄႈ ႁဝ်းတၵ်းပႄႉၼႅင်ႇဢေႃႈ။ မၼ်းၸဝ်ႈတၵ်းတိုၵ်းတေႃးပႄႉၼႅင်ႇ ရၢၼ်ႇသူႇႁဝ်းတင်းလၢႆဢေႃႈ။
ၽြႃးပဵၼ်ၸဝ်ႈတီႈၶႃႈ။ ၶႃႈၸဝ်ႈယွင်ႈယေႃး ၸဝ်ႈႁဝ်းတီႈၶႃႈဢေႃႈ။ ၶႅၼ်းတေႃႈယႃႇပေယူႇတဵတ်ႇတဵတ်ႇဢမ်ႇ တၵ်းသဵင်ၼၼ်ႉသေၵမ်းတီႈၶႃႈ။
ၵူၼ်းႁၢႆႉၵူၼ်းမိူၵ်ႈဢိၵ်ႇတင်းၵူၼ်းပႅတ်ႉၵူၼ်းလႅၼ်တင်းလၢႆတိုၵ်းတေႃးၶႃႈၸဝ်ႈတီႈၶႃႈဢေႃႈ။ ၶဝ်ဢွၼ်ၵၼ်ဢဝ်ၵႂၢမ်းမုသႃႇလၢတ်ႈလွင်ႈ ၶႃႈၸဝ်ႈလႄႈယူႇဢေႃႈ။
ၶဝ်ဢဝ်ၵႂၢမ်းယုတ်ႈၵႂၢမ်းႁၢႆႉလၢတ်ႈဝႃႈတီႈ ၶႃႈၸဝ်ႈတီႈၶႃႈဢေႃႈ။ လွင်ႈတၢင်းယင်းဢမ်ႇမီးလႄႈတိုၵ်းတေႃး ၶႃႈၸဝ်ႈယူႇတီႈၶႃႈဢေႃႈ။
ၶဝ်ဢဝ်တၢင်းဢၼ်တၢင်ႇဢပျတ်ႈၼၼ်ႉ ၶိုၼ်းတႅၼ်းပုၼ်ႈမႅတ်ႈတႃႇဢၼ်ၶႃႈၸဝ်ႈႁၵ်ႉၶဝ်ၼၼ်ႉတီႈၶႃႈဢေႃႈ။ ၶႃႈၸဝ်ႈၸမ်ႉသူးတွင်းပုၼ်ႈၶဝ်ယူႇတီႈၶႃႈဢေႃႈ။
ၶဝ်ဢဝ်တၢင်းဢၼ်ႁၢႆႉဢၼ်မိူၵ်ႈၼၼ်ႉၶိုၼ်းတႅၼ်းပုၼ်ႈတၢင်းဢၼ်လီဢၼ်ငၢမ်း၊ ဢိၵ်ႇတင်းဢဝ်တၢင်းဢၼ်ငိၼ်းၸင်း ၶိုၼ်းတႅၼ်းပုၼ်ႈတၢင်းႁၵ်ႉမႅတ်ႈတႃႇ တီႈၶႃႈၸဝ်ႈဢေႃႈ။
ၶႅၼ်းတေႃႈဢဝ်ၵေႃႉဢၼ်ၸီႇယၢင်ႇဢၼ် ဢမ်ႇၸွမ်းၼင်ႇတြႃးၼၼ်ႉ ၸႅတ်ႈထၢမ်ၸႅတ်ႈသေးတီႈရၢၼ်ႇသူႇ ၶႃႈၸဝ်ႈသေလႄႈ ႁႂ်ႈရၢၼ်ႇသူႇမၼ်းၼၼ်ႉသေၵေႃႉၵေႃႉတၢင်ႇ ဢပျတ်ႈတီႈမၼ်းသေၵမ်းတီႈၶႃႈ။
မိူဝ်ႈဢၼ်မၼ်းၶၢမ်ႇဢဝ်တၢင်းဢၼ် ၸႅတ်ႈထၢမ်ၸႅတ်ႈသေးၼၼ်ႉႁႂ်ႈမၼ်းလႆႈသုမ်းသေၵမ်းလူၺ်ႈ။ ႁႂ်ႈပထၼႃႇဢၼ်မၼ်းႁဵတ်းၼၼ်ႉပဵၼ်တၢင်းဢၼ်ၽိတ်းပိူင်ႈသေၵမ်းလူၺ်ႈ။
ႁႂ်ႈဢသၢၵ်ႈမၼ်းပွတ်းသေၵမ်းလူၺ်ႈ။ ႁႂ်ႈပိူၼ်ႈတၢင်ႇၵေႃႉႁိမ်ဢဝ်ၵၢၼ်ငၢၼ်း မၼ်းသေၵမ်းလူၺ်ႈ။
ႁႂ်ႈလုၵ်ႈလၢင်းမၼ်းၸိူဝ်းၼၼ်ႉၽၢၼ်ပေႃႈ ၽၢၼ်မႄႈသေၵမ်းလူၺ်ႈ။ ႁႂ်ႈမေးမၼ်းပဵၼ်မႄႈမၢႆႈသေၵမ်းလူၺ်ႈ။
ႁႂ်ႈလုၵ်ႈလၢင်းမၼ်းၸိူဝ်းၼၼ်ႉပဵၼ်ၵူၼ်းယွၼ်းဢၼ်ဢမ်ႇမီးႁိူၼ်းမီးယေးလႄႈ၊ ႁႂ်ႈၶဝ်လႆႈၶၢမ်ႇတၢင်းဢၼ်ႁေႃႈဢွၵ်ႇပႅတ်ႈသေ ၵႃႈတီႈႁိူၼ်းယွၵ်းႁိူၼ်းယႅၵ်းဢၼ်ၶဝ် ယူႇၼၼ်ႉသေၵမ်းလူၺ်ႈ။
ႁႂ်ႈၸဝ်ႈၼီႈၸဝ်ႈၶွတ်ႇသိမ်းဢဝ်ၵႃႈဢၼ် မၼ်းမီးၼၼ်ႉလႄႈ ႁႂ်ႈၵူၼ်းတၢင်ႇဝၢၼ်ႈတၢင်ႇမိူင်းႁိမ်ဢဝ်ဢုၵ်ႉၸႃႇဢၼ်မၼ်းႁႃလႆႈမႃးၼၼ်ႉသေၵမ်းလူၺ်ႈ။
ယႃႇပေႁႂ်ႈမီးၵေႃႉဢၼ်ဢဵတ်းလူမၼ်း ၵေႃႉဢၼ်တၵ်းလူတူၺ်းလုမ်းလႃး လုၵ်ႈဢၼ်ၽၢၼ်ပေႃႈၽၢၼ်မႄႈဢၼ်မၼ်း ဝႆႉၵိုတ်းၼၼ်ႉသေၵမ်းလူၺ်ႈ။
ႁႂ်ႈၸိူဝ်ႉၶိူဝ်းမၼ်းၶၢတ်ႇၵႂႃႇလႄႈ၊ ႁႂ်ႈၸိုဝ်ႈသဵင်မၼ်းလပ်ႉႁၢႆပႅတ်ႈ လိုၼ်းလင်မၼ်းၵမ်းလဵဝ်သေၵမ်းလူၺ်ႈ။
ႁႂ်ႈ ထႃႇဝရႃႉၽြႃး၊ ၶႆႈၸႂ်ထူပ်းတုၸရိူၵ်ႈပူႇမွၼ်ႇမၼ်းၼၼ်ႉတႃႇသေႇလႄႈ ယႃႇပေႁႂ်ႈဢပျတ်ႈမႄႈမၼ်းမီးတၢင်းဢၼ် ပွႆႇၶႂၢင်းပၼ်သေၵမ်း။
ႁႂ်ႈ ထႃႇဝရႃႉၽြႃး၊ ၶႆႈၸႂ်ထူပ်းတုၸရိူၵ်ႈၶဝ် ယူႇတႃႇသေႇလႄႈ ႁႂ်ႈၶဝ်လႆႈၶၢမ်ႇတၢင်းဢၼ်ၵူၼ်းလေႃးၵီႇတင်းလၢႆလူင်လိုမ်းပႅတ်ႈလုမ်းလုမ်းသေၵမ်းလူၺ်ႈ။
ၵူၼ်းၵေႃႉၼၼ်ႉဢမ်ႇတွၼ်ႉမီးၸႂ်ဢၼ် ဢဵတ်းလူၸွႆႈထႅမ်လႄႈ မၼ်းၼိၵ်ႈၸၢၵ်ႈငႅၼ်းသႄးၵေႃႉဢၼ်ယၢၵ်ႈ ဢၼ်ၽၢၼ်၊ၵေႃႉဢၼ်ၸုတ်ႈဢၼ်လုတ်ႈ၊ ၵေႃႉဢၼ်ၸႂ်လုႁႅင်းဢူၼ်ႈၸိူဝ်းၼၼ်ႉ တေႃႇထိုင်ႁွတ်ႈထၢၼ်ႈပေႃးတၢႆယဝ်ႉ။
မၼ်းႁၵ်ႉပႅင်းထုၵ်ႇၸႂ်တၢင်းဢၼ် ၵိၼ်ႇဢၼ်ဝႃႈၼၼ်ႉလႄႈ ႁႂ်ႈတၢင်းဢၼ်ၵိၼ်ႇဝႃႈၼၼ်ႉႁွတ်ႈထိုင် ၵႃႈၼိူဝ်မၼ်းသေၵမ်းလူၺ်ႈ။ မၼ်းငိၼ်းၸင်းတၢင်းလီမၢင်ႇၵလႃႇလႄႈ ႁႂ်ႈတၢင်းလီမၢင်ႇၵလႃႇၼၼ်ႉၵႆယၢၼ်ၵၼ်တင်းမၼ်းသေၵမ်းလူၺ်ႈ။
မၼ်းဢဝ်တၢင်းဢၼ်ၵိၼ်ႇဢၼ်လႃႇႁဵတ်းပဵၼ်ၶူဝ်းၼုင်ႈၶူဝ်းမႆတူဝ်ၸဝ်ႈၵဝ်ႇလႄႈ ႁႂ်ႈတၢင်းဢၼ်ၵိၼ်ႇဢၼ်လႃႇၼၼ်ႉၸိုမ်းၶဝ်ႈ ၵႃႈၼႂ်းတူဝ်မၼ်းမိူၼ်ၸိူဝ်ႉၼင်ႇၼမ်ႉ၊ ဢိၵ်ႇတင်းၵႃႈၼႂ်းလုပ်ႇမၼ်းမိူၼ်ၸိူဝ်ႉၼင်ႇ ၼမ်ႉမၼ်းသေၵမ်းလူၺ်ႈ။
ႁႂ်ႈတၢင်းဢၼ်ၵိၼ်ႇဢၼ်လႃႇၼၼ်ႉ ပဵၼ်ၸိူဝ်ႉၼင်ႇၽႃႈဝႆမၼ်း၊ ဢိၵ်ႇတင်းၸိူဝ်ႉၼင်ႇသၢႆဢႅဝ်ဢၼ် ႁတ်ႉဢႅဝ်မၼ်းယူႇၼၼ်ႉတႃႇသေႇ ဢမ်ႇထၢတ်ႇသေၵမ်းလူၺ်ႈ။
ႁႂ်ႈတၢင်းဢၼ်ၵိၼ်ႇဢၼ်လႃႇၼၼ်ႉပဵၼ်ၵႃႈၶၼ်ဢၵျူဝ်းဢၼ်ရၢၼ်ႇသူႇၵဝ် ဢိၵ်ႇတင်းၶဝ်ၸိူဝ်းဢၼ်လၢတ်ႈၵႂၢမ်းဢၼ်ယုတ်ႈဢၼ်ႁၢႆႉတီႈၵဝ်ၸိူဝ်းၼၼ်ႉ၊ လႆႈၶၢမ်ႇဢဝ်တီႈ ထႃႇဝရႃႉၽြႃး၊ သေၵမ်းလူၺ်ႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ၵဝ်ၶႃႈတီႈၶႃႈ။ ၶႅၼ်းတေႃႈထွၵ်ႈလူၺ်ႈၵတိၸဝ်ႈႁဝ်းၸိူဝ်းၼၼ်ႉသေလႄႈၸွႆႈထႅမ်မႃႉၸႃႉၶႃႈၸဝ်ႈ ၵႄႇၼုၵ်ႈဢဝ်ၶႃႈၸဝ်ႈၵွပ်ႈပိူဝ်ႈဢၼ်ၵရုၼႃႇၸဝ်ႈႁဝ်းလီၼႃႇၼၼ်ႉသေၵမ်းတီႈၶႃႈ။
ၶႃႈၸဝ်ႈယၢၵ်ႈၽၢၼ်လႄႈၸုတ်ႈလုတ်ႈ တီႈၶႃႈဢေႃႈ။ ႁူဝ်ၸႂ်ၶႃႈၸဝ်ႈၵေႃႈၸဵပ်းၼႃႇတီႈၶႃႈဢေႃႈ။
ၶႃႈၸဝ်ႈသုတ်ႈယွမ်းၵႂႃႇမိူၼ်ၸိူဝ်ႉၼင်ႇႁူမ်ႈၵွင်ႉငဝ်းၶိင်ႇႁူဝ်ၶမ်ႈၼၼ်ႉတီႈၶႃႈဢေႃႈ။ ၶႃႈၸဝ်ႈလႆႈၶၢမ်ႇတၢင်းဢၼ်ပဝ်ႇသဵၼ်ပိဝ်ၵႂႃႇမိူၼ်ၸိူဝ်ႉၼင်ႇမႅင်းၽွင်ႉတီႈၶႃႈဢေႃႈ။
ႁူဝ်ၶဝ်ႇၶႃႈၸဝ်ႈဢူၼ်ႈၵႂႃႇထွပ်ႉထီႈထွပ်ႉထႅပ်ႉၵွပ်ႈပိူဝ်ႈဢမ်ႇမီးဢႁႃႇရႃႉတၢင်းၵိၼ်လႄႈ ၶႃႈၸဝ်ႈပဵၼ်ၵေႃႉဢၼ်ၼင်ႁေႃႇလုပ်ႇဝႆႉ ၵူၺ်းတီႈၶႃႈယဝ်ႉ။
မိူဝ်ႈဢၼ်ၵူၼ်းတင်းလၢႆႁၼ်ၶႃႈၸဝ်ႈၼၼ်ႉ ၶဝ်ၶူဝ်ၶႃႈၸဝ်ႈလႄႈ ဢွၼ်ၵၼ်ငွၵ်းႁူဝ်သႄႉသွမ်းၶႃႈၸဝ်ႈ တီႈၶႃႈဢေႃႈ။
ထႃႇဝရႃႉၽြႃး၊ ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ ၶႅၼ်းတေႃႈၸွႆႈထႅမ်ၶႃႈၸဝ်ႈသေၵမ်းတီႈၶႃႈ။ ၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈ ၸွမ်းၵႃႈၼင်ႇဢၼ်မႅတ်ႈတႃႇၵရုၼႃႇၸဝ်ႈႁဝ်း မီးၼၼ်ႉသေၵမ်းတီႈၶႃႈ။
ၶႅၼ်းတေႃႈႁႂ်ႈရၢၼ်ႇသူႇၶႃႈၸဝ်ႈတင်းလၢႆ ႁုလွင်ႈဢၼ်ၸဝ်ႈႁဝ်းပဵၼ် ၸဝ်ႈဢၼ်ၵႄႇသႄႇၶျွတ်ႈဢဝ်ၶႃႈၸဝ်ႈၼၼ်ႉ သေၵမ်းတီႈၶႃႈ။
ၶဝ်တၵ်းၵိၼ်ႇလႃႇၶႃႈၸဝ်ႈတီႈၶႃႈဢေႃႈ။ ၵူၺ်းၵႃႈ၊ၸဝ်ႈႁဝ်းပၼ်တၢင်းလီတီႈ ၶႃႈၸဝ်ႈတီႈၶႃႈဢေႃႈ။ ႁႂ်ႈၶဝ်ၸိူဝ်းဢၼ်ၼိၵ်ႈၸၢၵ်ႈငႅၼ်းသႄးၶႃႈၸဝ်ႈၼၼ်ႉ၊တူၵ်းသုမ်းသေၵမ်းလူၺ်ႈ။ ၶႃႈၸဝ်ႈႁဝ်းၸမ်ႉ၊ႁႂ်ႈလႆႈၸူမ်းသိူဝ်း သေၵမ်းတီႈၶႃႈ။
ႁႂ်ႈရၢၼ်ႇသူႇၶႃႈၸဝ်ႈတင်းလၢႆလႆႈဢဝ်တၢင်းဢၼ်သရေႇလုၼုင်ႈမႆလႄႈ ဢဝ်တၢင်းဢၼ်ဢူၵ်းဢၢႆႁူမ်ႇသုမ်ႇ တူဝ်ၸဝ်ႈၵဝ်ႇ မိူၼ်ၸိူဝ်ႉၼင်ႇၽႃႈႁူမ်ႇၽႃႈဝႆၼၼ်ႉ သေၵမ်းတီႈၶႃႈ။
ၶႃႈၸဝ်ႈတၵ်းႁဵတ်းသဵင်ဢၼ်ယႂ်ႇၼႃႇယွင်ႈယေႃးၵျေးၸူး ထႃႇဝရႃႉၽြႃး၊ တီႈၶႃႈဢေႃႈ။ ၶႃႈၸဝ်ႈတၵ်းယွင်ႈယေႃးမၼ်းၸဝ်ႈ ၵႃႈၼႂ်းၵၢင်ၵူၼ်းဢၼ်ၸုၵၼ်တုမ်ၵၼ် ၼၼ်ႉတီႈၶႃႈဢေႃႈ။
လွင်ႈမၼ်းၸမ်ႉ၊မၼ်းၸဝ်ႈၵႅတ်ႇၶႄႁႄႉၵင်ႈပၼ်ၵူၼ်းယၢၵ်ႈၵူၼ်းၽၢၼ်လႄႈ ၵႄႇသႄႇၶျွတ်ႈဢဝ်ႁႂ်ႈမၼ်းလွတ်ႈသေ တၢင်းဢၼ်ပိူၼ်ႈၸီႇယၢင်ႇႁႂ်ႈဢဝ် မၼ်းတၢႆၼၼ်ႉဢေႃႈ။
ထႃႇဝရႃႉၽြႃး၊ လၢတ်ႈတီႈၸဝ်ႈၵဝ်ၶႃႈ၊ ၶုၼ်ႁေႃၶမ်းၼၼ်ႉလႄႈဝႃႈ၊ “ၼင်ႈယူႇၽၢႆႇၶႂႃၵဝ်တေႃႇထိုင်ႁွတ်ႈၵဝ်ဢဝ် ရၢၼ်ႇသူႇမႂ်းတင်းလၢႆ ၶျႃးဝႆႉႁႂ်ႈပဵၼ်တီႈတၢင်ႇတိၼ်မႂ်းၼၼ်ႉတႃႉ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၶႂၢၵ်ႈပၼ်ဢႃႇၼႃႇတၼ်းၶူဝ်း မႂ်းၸဝ်ႈဢွၵ်ႇသေၵႃႈတီႈဝဵင်း ၸိဢုၼ်ႇ၊ သေလႄႈလၢတ်ႈဝႃႈ၊ “ဢုပ်ႉပိူင်ႇၵႃႈၼိူဝ် ရၢၼ်ႇသူႇမႂ်းတင်းလၢႆတႃႉ၊” ဝႃႈၼင်ႇၼႆဢေႃႈ။
ၼႂ်းဝၼ်းဢၼ်မႂ်းၸဝ်ႈတိုၵ်းတေႃးၵၼ်တင်း ရၢၼ်ႇသူႇမႂ်းၸဝ်ႈၼၼ်ႉ ၵူၼ်းမႂ်းၸဝ်ႈတင်းလၢႆတၵ်းဢွၼ်ၵၼ်မီးၸႂ်ၸေႇတၼႃႇၶဝ်ႈပႃးၸွႆႈထႅမ်မႂ်းၸဝ်ႈဢေႃႈ။ ၵူၼ်းၼုမ်ႇၵူၼ်းၵမ်မႂ်းၸဝ်ႈတင်းလၢႆတၵ်းဢွၼ်ၵၼ်မႃးၸူးမႂ်းၸဝ်ႈ ၵႃႈၼိူဝ်လွႆမူတ်းၸၢင်ႇၼၼ်ႉမိူၼ်ၸိူဝ်ႉၼင်ႇ ၼမ်ႉၼၢႆးၶိင်ႇႁူဝ်ၼႂ်ဢေႃႈ။
ထႃႇဝရႃႉၽြႃး၊ ႁဵတ်းၵတိသဵတ်ႈၸႃႇ တီႈမႂ်းၸဝ်ႈလႄႈလၢတ်ႈဝႃႈ၊ “မႂ်းပဵၼ်ယဵၸ်ႈပရေႃးႁဵၵ်ႈ ထႃႇဝရႃႉၸွမ်းၼင်ႇဢရႃႇ မေႇလၶိၸေႇတႅၵ်ႈ၊ ၼၼ်ႉဢေႃႈ။” ဝႃႈၼင်ႇၼႆလႄႈ၊မၼ်းၸဝ်ႈတၵ်းဢမ်ႇၶိုၼ်းယူၵ်ႉသိမ်းဢဝ်ၵတိၼၼ်ႉသေပွၵ်ႈ။
ၸဝ်ႈၽြႃးမီးယူႇၽၢႆႇၶႂႃမိုဝ်းမႂ်းလႄႈ မိူဝ်ႈဢၼ်မၼ်းၸဝ်ႈၸီႇယၢင်ႇၼၼ်ႉၸိုင်၊ မၼ်းၸဝ်ႈတိုၵ်းပႄႉၶုၼ်ႁေႃၶမ်း တင်းလၢႆပႅတ်ႈဢေႃႈ။
မၼ်းၸဝ်ႈတၵ်းၸီႇယၢင်ႇတြႃးၵႃႈၼိူဝ်မဵဝ်းၵူၼ်းတင်းလၢႆသေယဝ်ႉ ႁႂ်ႈတူဝ်တၢႆတဵမ်ၵႃႈၼႂ်းပၢင်သိုၵ်းပၢင်သိူဝ်လႄႈ မၼ်းၸဝ်ႈတၵ်းတိုၵ်းပႄႉၶုၼ်ႁေႃၶမ်းလေႃးၵီႇၵႃႈမီးတင်းသဵင်ႈတင်းလူင်ပႅတ်ႈဢေႃႈ။
မၼ်းၸဝ်ႈတၵ်းၵိၼ်ၼမ်ႉတီႈၼမ်ႉႁွင်ႈဢၼ်လႆၵႃႈႁိမ်းတၢင်းလႄႈလႆႈဢဵၼ်လႆႈႁႅင်းသေယဝ်ႉ၊ မၼ်းၸဝ်ႈတၵ်းယူၵ်ႉႁူဝ်ၶိုၼ်ႈယူႇၼႂ်းတၢင်း ဢၼ်ပႄႉဢၼ်ၼႅင်ႇဢေႃႈ။
ယွင်ႈယေႃး ထႃႇဝရႃႉၽြႃး၊ တီႈၶႃႈဢေႃႈ။ ၵဝ်တၵ်းပႃးတင်းႁူဝ်ၸႂ်သဵင်ႈသဵင်ႈယွင်ႈယေႃး ၵျေးၸူး ထႃႇဝရႃႉၽြႃး၊ ၵႃႈၼႂ်းၵၢင်ၵူၼ်းမၼ်းၸဝ်ႈဢၼ်ၸု ဢၼ်တုမ်ၸိူဝ်းၼၼ်ႉဢေႃႈ။
လွင်ႈတၢင်းဢၼ် ထႃႇဝရႃႉၽြႃး၊ ႁဵတ်းဝႆႉၸိူဝ်းၼၼ်ႉလီဢၢမ်းၼႃႇလူင်လၢင်လႄႈ ၶဝ်ၸိူဝ်းဢၼ်ထုၵ်ႇၸႂ်ၵျိူၵ်ႈၸႂ်လွင်ႈတၢင်းၸိူဝ်းၼၼ်ႉဢွၼ်ၵၼ်ၶႂ်ႈႁုၶႂ်ႈၸႅင်ႈတီႈၶႃႈဢေႃႈ။
လွင်ႈတၢင်းဢၼ်မၼ်းၸဝ်ႈႁဵတ်းဝႆႉၸိူဝ်းၼၼ်ႉ မီးမုၼ်သရေႇဢႃႇၼုၽေႃႇလႄႈ တြႃးတၢင်းဢၼ်သိုဝ်ႈတေႃႇမၼ်းၸဝ်ႈ ပဵၼ်ဢၼ်တႄႇယူႇသေႇသေႇဢေႃႈ။
ထႃႇဝရႃႉၽြႃး၊ ဢမ်ႇၶႂ်ႈႁႂ်ႈၵူၼ်းႁဝ်းလူင်လိုမ်း လွင်ႈတၢင်းႁဵတ်းမၼ်းၸဝ်ႈဢၼ်လီဢၢမ်းတင်းလၢႆၼၼ်ႉ။ မၼ်းၸဝ်ႈမီးၸႂ်ဢၼ်ၸၢင်ႈႁၵ်ႉဢဵတ်းလူလႄႈၸၢင်ႈႁဵတ်းၵျေးၸူးတီႈၶႃႈဢေႃႈ။
မၼ်းၸဝ်ႈၸတ်းၽႄမႅင်ႇပၼ် တၢင်းၵိၼ်တၢင်းၶူပ်း တီႈၶဝ်ၸိူဝ်းဢၼ်ရူဝ်ႇသေႇၵူဝ်ယမ် မၼ်းၸဝ်ႈၼၼ်ႉလႄႈ မၼ်းၸဝ်ႈၶႆႈၸႂ်ထူပ်းပတိၺိၺ်ႇတြႃးမၼ်းၸဝ်ႈယူႇသေႇသေႇဢေႃႈ။
မၼ်းၸဝ်ႈၼႄပျႃးတၼ်းၶူဝ်းမၼ်းၸဝ်ႈ ၵႃႈတီႈၵူၼ်းမၼ်းၸဝ်ႈတင်းလၢႆ ၼႂ်းတၢင်းဢၼ်ဢဝ်လိၼ်မိူင်းၵူၼ်းတၢင်ႇၸိူဝ်ႉတၢင်ႇမိူင်းပၼ်ႁႂ်ႈၶဝ်ပိူင်ႇၼၼ်ႉဢေႃႈ။
လွင်ႈတၢင်းဢၼ်မၼ်းၸဝ်ႈႁဵတ်းၵႃႈမီး တင်းသဵင်ႈတင်းလူင်ၼၼ်ႉၸၢပ်ႈသႅင်ႇ ၵၼ်တင်းသဵတ်ႈၸႃႇ ဢိၵ်ႇတင်းတၢင်းဢၼ်တြႃးသိုဝ်ႈလီၼၼ်ႉလႄႈ၊ ပိင်းၺၢပ်ႈမၼ်းၸဝ်ႈတင်းသဵင်ႈတင်းလူင်ၵေႃႈ ပဵၼ်ဢၼ်လီယုမ်ႇယမ်ဢိင်ပိုင်ႈလႄႈ။
တႄႇယူႇသေႇသေႇဢမ်ႇထၢတ်ႇသေယဝ်ႉပဵၼ်ဢၼ်ႁဵတ်းပၼ်ၸွမ်းၼင်ႇသဵတ်ႈၸႃႇ၊ ဢိၵ်ႇတင်းတၢင်းဢၼ်သိုဝ်ႈယူဝ်းဢေႃႈ။
မၼ်းၸဝ်ႈပွႆႇၵူၼ်းမၼ်းၸဝ်ႈတင်းလၢႆ ႁႂ်ႈလႆႈလွတ်ႈလႅဝ်းလႄႈ ႁဵတ်းပတိၺိၺ်ႇတြႃးလူၺ်ႈၵၼ်တင်းၶဝ် ဝႆႉသေႇသေႇဢေႃႈ။ မၼ်းၸဝ်ႈမူတ်းၸၢင်ႇလႄႈယႂ်ႇမျၢတ်ႈၼႃႇ တီႈၶႃႈဢေႃႈ။
တၢင်းဢၼ်ရူဝ်ႇသေႇၵူဝ်ယမ် ထႃႇဝရႃႉၽြႃး၊ ၼၼ်ႉပဵၼ်လွင်ႈတၢင်းဢၼ် လႆႈပိင်ႇၺႃႇဢေႃႈ။ ၵႃႈပဵၼ်ၵေႃႉဢၼ်ပႂ်ႉၸွမ်းပိင်းၺၢပ်ႈၸဝ်ႈ ၸိူဝ်းၼၼ်ႉမီးၺၢၼ်ႇဢၼ်လီဢေႃႈ။ ႁႂ်ႈမုၼ်ၽုင်းသရေႇမၼ်းၸဝ်ႈတႄႇယူႇ သေႇသေႇသေၵမ်းလူၺ်ႈ။
ယွင်ႈယေႃး ထႃႇဝရႃႉၽြႃး၊ တီႈၶႃႈဢေႃႈ။ ၵေႃႉဢၼ်ၵူဝ်ယမ် ထႃႇဝရႃႉၽြႃး၊ လႄႈ ၸၢင်ႈမူၼ်ႈပျေႃႇၵႃႈၼႂ်းပိင်းၺၢပ်ႈမၼ်းၸဝ်ႈၼႃႇလူင်လၢင်ၸိူဝ်းၼၼ်ႉမီးမၢင်ႇၵလႃႇဢေႃႈ။
လုၵ်ႈလၢင်းမၼ်းတၵ်းမီးႁႅင်းတၼ်းၶူဝ်းၵႃႈၼိူဝ်လိၼ်မိူင်းလႄႈ ၸိူဝ်ႉၶိူဝ်းမၼ်းတၵ်းမီးမၢင်ႇၵလႃႇဢေႃႈ။
ၸေးၸိမ်ႇဢုၵ်ႉၸႃႇမၢၵ်ႈမီးၼမ်ၼႃႇၵႃႈၼႂ်းႁိူၼ်းမၼ်းလႄႈ တၢင်းဢၼ်ၶိုၼ်ႈယႂ်ႇမႂ်ႇသုင်တၵ်းမီးတီႈမၼ်းသေႇသေႇဢေႃႈ။
ဢၼ်လႅင်းၸၢင်ႈတႆႈႁိူဝ်ႈၵႃႈၼႂ်းဢၼ်လပ်းသိင်ႇ ပုၼ်ႈၶဝ်ၸိူဝ်းဢၼ်သိုဝ်ႈလီယူဝ်းလီ၊ၶဝ်ၸိူဝ်းဢၼ်မီးၸႂ်ဢၼ်ၸၢင်ႈႁဵတ်းၵျေးၸူး တင်းၸႂ်ဢၼ်ၸၢင်ႈဢဵတ်းလူလႄႈၸၢင်ႈႁဵတ်းၸွမ်းၼင်ႇတြႃးသိုဝ်ႈသိုဝ်ႈၼၼ်ႉဢေႃႈ။
ၵေႃႉဢၼ်မီးၸႂ်ၸေႇတၼႃႇလႄႈ ၸၢင်ႈပၼ်ၵူႈပၼ်ယိမ်၊ ဢိၵ်ႇတင်းလႆႈႁဵတ်းၼႃႈၵၢၼ်မၼ်းသိုဝ်ႈသိုဝ်ႈယူဝ်းယူဝ်းၼၼ်ႉၸၢင်ႈလႆႈလီလႆႈပဵၼ်ဢေႃႈ။
ၵေႃႉဢၼ်ၵူဝ်ယမ် ထႃႇဝရႃႉၽြႃး၊ ၼၼ်ႉတၵ်းတေဢမ်ႇလႆႈတွၼ်ႉသုမ်းၸွမ်းလႄႈ ပိူၼ်ႈတၵ်းၶုၵ်းၸႂ်လႆႈမၼ်းယူႇ တႃႇသေႇဢမ်ႇထၢတ်ႇဢေႃႈ။
မၼ်းဢမ်ႇလႆႈၵူဝ်ႁႄၶၢဝ်ႇဢၼ်ဢမ်ႇလီ ဢမ်ႇငၢမ်းၼၼ်ႉလႄႈ၊ တၢင်းယုမ်ႇမၢတ်ႈမၼ်းႁႅင်းယႂ်ႇၼႃႇ ဢိၵ်ႇတင်းမၼ်းယုမ်ႇယမ်ဢိင်ပိုင်ႈ ထႃႇဝရႃႉၽြႃး၊ ဢေႃႈ။
မၼ်းဢမ်ႇမီးတၢင်းဢၼ်ယၢပ်ႇၸႂ်မႆႈၸႂ်၊ ဢမ်ႇမီးတၢင်းဢၼ်လီၵူဝ်လီႁႄ တေႃႇထိုင်ႁွတ်ႈမၼ်းထၢၼ်ႈပေႃး လႆႈႁၼ်ရၢၼ်ႇသူႇမၼ်းတင်းလၢႆ တူၵ်းသုမ်းၼၼ်ႉဢေႃႈ။
မၼ်းၽေးၸွၼ်းမႅင်ႇပၼ်လၢႆလၢႆတီႈ ၵေႃႉဢၼ်ၸုတ်ႈဢၼ်လုတ်ႈလႄႈ ၸႂ်ဢဵတ်းလူမၼ်းၼၼ်ႉဢမ်ႇတွၼ်ႉႁၢႆလၢႆ။ မၼ်းလႆႈပဵၼ်ၵေႃႉဢၼ်ၽုင်းတၼ်းၶူဝ်းယႂ်ႇမႃးလႄႈပိူၼ်ႈလႆႈရူဝ်ႇသေႇၵူဝ်ယမ်ၼၼ်ႉဢေႃႈ။
ၶဝ်ၸိူဝ်းဢၼ်ႁၢႆႉဢၼ်မိူၵ်ႈႁၼ်လႄႈ တေႃးသႃႉဢွၵ်ႇဢေႃႈ။ ၶဝ်ၵိုဝ်တႃငႃးၶဵဝ်ႈတင်းၸႂ်ဢၼ်ငိၼ်းၸင်းလႄႈ လပ်းႁၢႆၵႂႃႇဢေႃႈ။ ဢလူဝ်ႇၵၢင်ၸႂ်ၶဝ်ဢၼ်ဢမ်ႇတြႃးၼၼ်ႉၵေႃႈ လႆႈလုလႆႈလႅဝ်ၵႂႃႇဢေႃႈ။
ယွင်ႈယေႃး ထႃႇဝရႃႉၽြႃး၊ တီႈၶႃႈဢေႃႈ။ ၶႃႈ ထႃႇဝရႃႉၽြႃး၊ ၶဝ်႟။ ဢွၼ်ၵၼ်ယွင်ႈယေႃးတႃႉ။ ဢွၼ်ၵၼ်ယွင်ႈယေႃးၼႃႇမႃႉၸိုဝ်ႈသဵင် ထႃႇဝရႃႉၽြႃး၊ တႃႉ။
ၼႃႇမႃႉၸိုဝ်ႈသဵင် ထႃႇဝရႃႉၽြႃး၊ တၵ်း တေလႆႈမီးတၢင်းဢၼ်ယွင်ႈယေႃးယူႇ၊ ၸႃႉၸဵမ်တေႃႈလဵဝ်ၵႂႃႇမိူဝ်းၼႃႈတႃႇသေႇ ဢမ်ႇထၢတ်ႇဢေႃႈ။
ဢဝ်ၵႃႈတီႈၽၢႆႇဝၼ်းဢွၵ်ႇတေႃႇထိုင်ႁွတ်ႈ ၽၢႆႇဝၼ်းတူၵ်းၼၼ်ႉ၊ ႁႂ်ႈၸိုဝ်ႈသဵင် ထႃႇဝရႃႉၽြႃး၊ မီးတၢင်းဢၼ် ယွင်ႈယေႃးသေၵမ်းလူၺ်ႈ။
ထႃႇဝရႃႉၽြႃး၊ ဢုပ်ႉပိူင်ႇၵႃႈၼိူဝ်မဵဝ်းၵူၼ်း ၵႃႈမီးတင်းသဵင်ႈတင်းလူင်လႄႈ မုၼ်ၽုင်းမၼ်းၸဝ်ႈမီးတၢင်းဢၼ်ယုၵ်ႉယွင်ႈ ၵႃႈၼိူဝ်ၽႃႉၵၢင်ႁၢဝ်ဢေႃႈ။
ၽူႈလႂ်ဢမ်ႇမိူၼ်ၸိူဝ်ႉၼင်ႇ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းလႆႈလႃးလႃး။ မၼ်းၸဝ်ႈၵိင်းဝၢပ်ႈယူႇၵႃႈတီႈ ဢၼ်သုင်ၼႃႇလႄႈ။
မၼ်းၸဝ်ႈၵူမ်ႈလူင်းၸူးႁႂ်ႈလႆႈလူတူၺ်း ၵၢင်ႁၢဝ်တင်းလိၼ်မိူင်းဢေႃႈ။
မၼ်းၸဝ်ႈယူၵ်ႉဢဝ်ၵေႃႉဢၼ်ယၢၵ်ႈဢၼ်ၽၢၼ်လုၵ်ႉမႃးသေၵႃႈတီႈမုၼ်ႈလိၼ်လႄႈ ယွင်ႈဢဝ်ၵေႃႉဢၼ်ၸုတ်ႈဢၼ်လုတ်ႈ ဢွၵ်ႇမႃးသေၵႃႈတီႈၵွင်ၶီႈၽုၼ်ႇ၊
ႁႂ်ႈၶဝ်လႆႈပဵၼ်ၵေႃႉပဵၼ်သႄႈလူၺ်ႈၵၼ်တင်း လုၵ်ႈၸဝ်ႈလုၵ်ႈၶုၼ် ဢၼ်ဝႃႈၶုၼ်ဢၼ်ဢုပ်ႉပိူင်ႇၵႃႈၼိူဝ်ၵူၼ်း မၼ်းၸဝ်ႈၼၼ်ႉဢေႃႈ။
မၼ်းၸဝ်ႈႁႂ်ႈမႄႈယိင်းဢၼ်မၼ်လႆႈ မီးႁိူၼ်းမီးယေးလႄႈ သမ်ႉႁႂ်ႈမၼ်းၸူမ်းသိူဝ်းၵွပ်ႈပိူဝ်ႈဢၼ်မၼ်းလႆႈၵိူတ်ႇလဵင်ႉလုၵ်ႈလဵင်ႉလၢင်းၼၼ်ႉဢေႃႈ။ ယွင်ႈယေႃး ထႃႇဝရႃႉၽြႃး၊ တီႈၶႃႈဢေႃႈ။
မိူဝ်ႈဢၼ်ၵူၼ်းမဵဝ်း ဢိသရေး၊ တင်းလၢႆ ဢွၵ်ႇမိူင်း ဢေးၵျိပ်ႉ၊ မႃးလႄႈ ၸိူဝ်ႉၶိူဝ်း ယႃႇၵုပ်ႈ၊ ဢွၵ်ႇသေၵႃႈတီႈ မဵဝ်းၵူၼ်းဢၼ်လၢတ်ႈၵႂၢမ်းဢၼ် ဢမ်ႇမိူၼ်ၵၼ်ၼၼ်ႉၸိုင်၊
မဵဝ်း ယုတႃႉ၊ လႆႈပဵၼ်ၵူၼ်းဢၼ်မူတ်းၸၢင်ႇ ထႃႇဝရႃႉၽြႃး၊ မႃးလႄႈ မဵဝ်း ဢိသရေး၊ သမ်ႉလႆႈပဵၼ်ၵူၼ်းမဵဝ်းဢၼ် မၼ်းၸဝ်ႈဢုပ်ႉပိူင်ႇမႃးဢေႃႈ။
ပၢင်ႇလၢႆႇလႅင်ႁၼ်လႄႈဢွၵ်ႇပၢႆႈဢေႃႈ။ မႄႈၼမ်ႉ ယေႃးတၢၼ်ႇ၊ ဢၼ်လႆယူႇၼၼ်ႉၵေႃႈယိုတ်းၵႂႃႇၵိုတ်းၵႂႃႇဢေႃႈ။
လွႆလူင်တင်းလၢႆတူၵ်းၸႂ်လႄႈဢွၼ်ၵၼ်ၵျွၵ်းဝႅၼ်မိူၼ်ၸိူဝ်ႉၼင်ႇပႄႉလႄႈ လွႆဢွၼ်ႇတင်းလၢႆၵေႃႈဢွၼ်ၵၼ်ၵျွၵ်းဝႅၼ် မိူၼ်ၸိူဝ်ႉၼင်ႇသူဝ်းဢွၼ်ႇဢေႃႈ။
ပၢင်ႇလၢႆႇ႟။ ၵွပ်ႈသင်လႄႈမႂ်းဢွၵ်ႇပၢႆႈ။ မႄႈၼမ်ႉ ယေႃးတၢၼ်ႇ၊ ႟။ ၵွပ်ႈသင်လႄႈ ဢၼ်မႂ်းလႆယူႇၼၼ်ႉယိုတ်းၵႂႃႇၵိုတ်းၵႂႃႇ။
လွႆလူင်ၶဝ်႟။ ၵွပ်ႈသင်လႄႈသူၵျွၵ်းဝႅၼ် မိူၼ်ၸိူဝ်ႉၼင်ႇပႄႉ။ လွႆဢွၼ်ႇၶဝ်႟။ ၵွပ်ႈသင်လႄႈသူၵျွၵ်းဝႅၼ် မိူၼ်ၸိူဝ်ႉၼင်ႇသူဝ်းဢွၼ်ႇၼၼ်ႉ။
လိၼ်မိူင်း႟။ သၼ်ႇဝႆယူႇၵႃႈတီႈ ၽၢႆႇၼႃႈၽြႃးပဵၼ်ၸဝ်ႈမဵဝ်း ယႃႇၵုပ်ႈ၊ ဢၼ်ၵျွမႃးယူႇၼၼ်ႉတႃႉ။
မၼ်းၸဝ်ႈႁႂ်ႈႁိၼ်ၽႃပဵၼ်ၼမ်ႉၼွင်မႃးလႄႈ ႁႂ်ႈမၢၵ်ႇႁိၼ်ပၢႆႇၽႆးပဵၼ်ၼမ်ႉဢွၵ်ႇႁူး မႃးယဝ်ႉဢေႃႈ။
တီႈၶႃႈၸဝ်ႈႁဝ်းၶဝ်ဢမ်ႇၸႂ်ႈတီႈၶႃႈ။ ထႃႇဝရႃႉၽြႃး၊ တီႈၶႃႈ။ တီႈၶႃႈၸဝ်ႈႁဝ်းၶဝ်ဢမ်ႇၸႂ်ႈတီႈၶႃႈ။ ပဵၼ်တီႈၼႃႇမႃႉၸိုဝ်ႈသဵင်ၸဝ်ႈႁဝ်းၼၼ်ႉ ႁႂ်ႈမီးမုၼ်မီးၽုင်း ၵွပ်ႈပိူဝ်ႈမႅတ်ႈတႃႇၵရုၼႃႇၸဝ်ႈႁဝ်းဢိၵ်ႇတင်း သဵတ်ႈၸႃႇၸဝ်ႈႁဝ်းသေၵမ်းလူၺ်ႈ။
ၵွပ်ႈသင်လႄႈမဵဝ်းၵူၼ်းတင်းလၢႆလႆႈဢွၼ်ၵၼ်ထၢမ်ၶႃႈၸဝ်ႈႁဝ်းၶဝ်လႄႈဝႃႈ၊ “ၽြႃးသူမီးၵႃႈလႂ်၊” ဝႃႈၼင်ႇၼႆ ၼင်ႇႁိုဝ်တီႈၶႃႈ။
ၽြႃးပဵၼ်ၸဝ်ႈႁဝ်းမီးယူႇၵႃႈၼိူဝ် ၽုင်ႇၵၢင်ႁၢဝ်ဢေႃႈ။ မၼ်းၸဝ်ႈႁဵတ်းၸွမ်းၵႃႈၼင်ႇဢၼ်ဢလူဝ်ႇ ၵၢင်ၸႂ်မၼ်းၸဝ်ႈမီးၼၼ်ႉဢေႃႈ။
ၽြႃးၶဝ်တင်းလၢႆၸမ်ႉ၊ဢဝ်ငိုၼ်း ဢဝ်ၶမ်းႁဵတ်းဝႆႉလႄႈ ပဵၼ်ႁုၼ်ႇႁၢင်ႈသၢင်းထုဢၼ်ဢဝ် မိုဝ်းၵူၼ်းႁဵတ်းၼၼ်ႉဢေႃႈ။
ၶဝ်မီးသူပ်းဢေႃႈ။ ၵူၺ်းၵႃႈ၊ဢမ်ႇၸၢင်ႈ လၢတ်ႈထွႆႈလၢတ်ႈၵႂၢမ်း။ မီးတႃဢေႃႈ။ ၵူၺ်းၵႃႈ၊ဢမ်ႇၸၢင်ႈႁၼ်။
မီးႁူဢေႃႈ။ ၵူၺ်းၵႃႈ၊ဢမ်ႇၸၢင်ႈငိၼ်း။ မီးၶူႈလင်ၵေႃႈဢမ်ႇၸၢင်ႈၼူမ်။
မီးမိုဝ်းသေၵေႃႈဢမ်ႇၸၢင်ႈယိပ်း။ မီးတိၼ် သေၵေႃႈဢမ်ႇၸၢင်ႈၵႂႃႇၸၢင်ႈပႆ။ မီးၵူင်ၶေႃးသေၵေႃႈဢမ်ႇၸၢင်ႈႁဵတ်းသဵင်။
ၶဝ်ၸိူဝ်းဢၼ်ႁဵတ်းဢိၵ်ႇတင်းၶဝ်ၸိူဝ်းဢၼ်ဝႆႈႁုၼ်ႇႁၢင်ႈသၢင်းထုၼၼ်ႉ၊ ပဵၼ်မိူၼ်မိူၼ်ၵၼ်တင်းႁုၼ်ႇႁၢင်ႈသၢင်းထု ဢၼ်ၶဝ်ႁဵတ်းၼၼ်ႉဢေႃႈ။
မဵဝ်း ဢိသရေး၊ ႟။ ယုမ်ႇမၢတ်ႈဢိင်ပိုင်ႈ ၵႃႈၼႂ်း ထႃႇဝရႃႉၽြႃး၊ တႃႉ။ မၼ်းၸဝ်ႈပဵၼ်ၸဝ်ႈဢၼ်ၸွႆႈထႅမ်သူ၊ ၸဝ်ႈဢၼ်ၵႅတ်ႇၶႄႁႄႉၵင်ႈသူဢေႃႈ။
ယဵၸ်ႈပရေႃးႁဵၵ်ႈ ၽြႃးပဵၼ်ၸဝ်ႈၶဝ်႟။ ယုမ်ႇမၢတ်ႈဢိင်ပိုင်ႈၼႂ်း ထႃႇဝရႃႉၽြႃး၊ တႃႉ။ မၼ်းၸဝ်ႈပဵၼ်ၸဝ်ႈဢၼ်ၸွႆႈထႅမ်သူ၊ ၸဝ်ႈဢၼ်ၵႅတ်ႇၶႄႁႄႉၵင်ႈသူဢေႃႈ။
သူၸိူဝ်းဢၼ်ၵူဝ်ယမ်မၼ်းၸဝ်ႈၶဝ်႟။ ယုမ်ႇမၢတ်ႈဢိင်ပိုင်ႈၼႂ်း ထႃႇဝရႃႉၽြႃး၊ တႃႉ။ မၼ်းၸဝ်ႈပဵၼ်ၸဝ်ႈဢၼ်ၸွႆႈထႅမ်သူ၊ ၸဝ်ႈဢၼ်ၵႅတ်ႇၶႄႁႄႉၵင်ႈသူဢေႃႈ။
ထႃႇဝရႃႉၽြႃး၊ ၶႆႈၸႂ်ထူပ်းႁဝ်းလႄႈ တၵ်းပၼ်တၢင်းလီတီႈႁဝ်းဢေႃႈ။ မၼ်းၸဝ်ႈတၵ်းပၼ်တၢင်းလီတီႈၵူၼ်းမဵဝ်း ဢိသရေး၊ တင်းလၢႆလႄႈ တၵ်းပၼ်တၢင်းလီတီႈယဵၸ်ႈပရေႃးႁဵၵ်ႈ ၽြႃးပဵၼ်ၸဝ်ႈၸိူဝ်းၼၼ်ႉဢေႃႈ။
မၼ်းၸဝ်ႈတၵ်းပၼ်တၢင်းလီတီႈၶဝ် ၸိူဝ်းဢၼ်ၵူဝ်ယမ်မၼ်းၸဝ်ႈ၊ ၸဵမ်လဵၵ်ႉၸဵမ်ယႂ်ႇမိူၼ်မိူၼ်ၵၼ်ဢေႃႈ။
ႁႂ်ႈ ထႃႇဝရႃႉၽြႃး၊ ပၼ်ႁႂ်ႈသူဢိၵ်ႇတင်းလုၵ်ႈလၢင်းသူယႂ်ႇၽႄႈၼမ်ၵိုၼ်းမႃးသေၵမ်းလူၺ်ႈ။
ႁႂ်ႈသူပဵၼ်ၶဝ်ၸိူဝ်းဢၼ် ထႃႇဝရႃႉၽြႃး၊ ၸဝ်ႈဢၼ်ႁဵတ်းပဵၼ်ၵၢင်ႁၢဝ်တင်းလိၼ်မိူင်း ၼၼ်ႉ၊ပၼ်တၢင်းလီသေၵမ်းလူၺ်ႈ။
ၵၢင်ႁၢဝ်ပဵၼ်ၵၢင်ႁၢဝ် ထႃႇဝရႃႉၽြႃး၊ ၵူၺ်းလႄႈလိၼ်မိူင်းၸမ်ႉမၼ်းၸဝ်ႈ ပၼ်တီႈၵူၼ်းယဝ်ႉဢေႃႈ။
ၵူၼ်းတၢႆၵေႃႉဢၼ်လူင်းၵႂႃႇၵႃႈတီႈမိူင်းမရၼႃႉၼၼ်ႉ၊ဢမ်ႇယွင်ႈယေႃး ထႃႇဝရႃႉၽြႃး။
ႁဝ်းၸိူဝ်းဢၼ်ဢသၢၵ်ႈလိပ်းယူႇၼႆႉၵူၺ်း တၵ်းဢွၼ်ၵၼ်ယွင်ႈယေႃးၵျေးၸူးမၼ်းၸဝ်ႈ ၸႃႉၸဵမ်မိူဝ်ႈလဵဝ်ၼႆႉၵႂႃႇတေႃႇထိုင်ႁွတ်ႈမိူဝ်းၼႃႈ တႃႇသေႇဢမ်ႇထၢတ်ႇဢေႃႈ။ ယွင်ႈယေႃး ထႃႇဝရႃႉၽြႃး၊ တီႈၶႃႈဢေႃႈ။
ၵဝ်ႁၵ်ႉ ထႃႇဝရႃႉၽြႃး၊ ၵွပ်ႈပိူဝ်ႈဢၼ်မၼ်းၸဝ်ႈလႆႈထွမ်ႇငိၼ်းဢဝ်သဵင်ၵဝ်၊ ဢိၵ်ႇတင်းတၢင်းဢၼ်ၵဝ်လဝ်ႈယွၼ်း ၼၼ်ႉဢေႃႈ။
မၼ်းၸဝ်ႈထွမ်ႇဢဝ်မိူဝ်ႈဢၼ်ၵဝ်ႁွင်ႉၵၢဝ်ႇ တီႈမၼ်းၸဝ်ႈၵူႈပွၵ်ႈၼၼ်ႉဢေႃႈ။
ၽေးတၢင်းတၢႆလွမ်ႉႁွပ်ႈၵဝ်ဝႆႉဢေႃႈ။ မိူင်းမရၼႃႉၵေႃႈတိၺွပ်းၵဝ်ဝႆႉဢေႃႈ။ ၵဝ်လႆႈႁူပ်ႉထူပ်းၽေးဢၼ်လီၵူဝ်လီႁႄ၊ၽေးဢၼ်ယၢပ်ႇၸႂ်ယုင်ႈၸႂ်ၼၼ်ႉဢေႃႈ။
မိူဝ်ႈၼၼ်ႉၵဝ်ႁွင်ႉၵၢဝ်ႇတီႈ ထႃႇဝရႃႉၽြႃး၊ လႄႈဝႃႈ “ ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈ သေၵမ်းတီႈၶႃႈ။ ၶႃႈၸဝ်ႈၶေႃယွၼ်းတွင်းပၢၼ်ႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးၸႂ်ဢၼ်ၸၢင်ႈႁဵတ်းၵျေးၸူးတင်းၸႂ်ဢၼ်လီဢၼ်ဝၢၼ်လႄႈ ၽြႃးပဵၼ်ၸဝ်ႈႁဝ်းၼၼ်ႉမီးၸႂ် ၵရုၼႃႇတီႈၶႃႈဢေႃႈ။
ထႃႇဝရႃႉၽြႃး၊ ၵႅတ်ႇၶႄႁႄႉၵင်ႈၶဝ်ၸိူဝ်းဢၼ် ဢမ်ႇမီးတီႈဢႃးၵူဝ်းၼၼ်ႉလႄႈ မၼ်းၸဝ်ႈၵႄႇသႄႇၶျွတ်ႈဢဝ်ၵဝ်ၼႂ်းမိူဝ်ႈဢၼ် ၵဝ်ထူပ်းၽေးၼၼ်ႉဢေႃႈ။
ဝိၺိၺ်ႇၵဝ်႟။ မီးတၢင်းဢၼ်ယုမ်ႇယမ် တမ်းၸႂ်တႃႉ။ ထႃႇဝရႃႉၽြႃး၊ ႁဵတ်းၵျေးၸူးတီႈမႂ်းယဝ်ႉ။
ထႃႇဝရႃႉၽြႃး၊ ၵႄႇသႄႇထွတ်ႇထူၺ်ႈဢဝ်ၵဝ်ဢွၵ်ႇသေၵႃႈၼႂ်းတၢင်းတၢႆသေလႄႈ ႁႂ်ႈၼမ်ႉတႃၵဝ်ထၢတ်ႇၵိုတ်းၵႂႃႇ၊ဢိၵ်ႇတင်းပႂ်ႉထိင်းႁႂ်ႈၵဝ်ဢမ်ႇလႆႈတူၵ်းသုမ်းဢေႃႈ။
ပိူဝ်ႈၼႆလႄႈၵဝ်လႆႈၵႂႃႇမႃးၵႃႈတီႈၽၢႆႇၼႃႈ ထႃႇဝရႃႉၽြႃး၊ ၵႃႈၼႂ်းမိူင်းလေႃးၵႃႉၼႆႉဢေႃႈ။
ၵဝ်သိုပ်ႇယုမ်ႇမၢတ်ႈယူႇ၊ပိၵ်ႉသမ်ႉၼႂ်းမိူဝ်ႈဢၼ်ၵဝ်လၢတ်ႈဝႃႈ၊ “ၵဝ်လႆႈၶၢမ်ႇတုၵ်ႉၶႃႉတၢင်းၽၢၼ်လုမ်းလုမ်းဢေႃႈ။” ဝႃႈၼင်ႇၼႆၼၼ်ႉဢေႃႈ။
ပိၵ်ႉသမ်ႉၼႂ်းမိူဝ်ႈဢၼ်ၵဝ်ၵူဝ်ႁႄလႄႈလၢတ်ႈဝႃႈ၊ “ၽူႈလႂ်ၵေႃႈဢမ်ႇလီယုမ်ႇမၢတ်ႈဢိင်ပိုင်ႈ လႃးလႃး၊” ဝႃႈၼင်ႇၼႆၼၼ်ႉဢေႃႈ။
ၵဝ်တၵ်းဢဝ်ဢၼ်လႂ်တွပ်ႇတႅၼ်းၶိုၼ်း ၵျေးၸူးဢၼ် ထႃႇဝရႃႉၽြႃး၊ ႁဵတ်းတီႈ ၵဝ်ၵူႈၸိူဝ်ႉၵူႈပိူင်ၼၼ်ႉလႆႈ။
ၵဝ်တၵ်းယူၵ်ႉဢဝ်ၵွၵ်းၼမ်ႉမၢၵ်ႇၸပိတ်ႉ လူႇတၢၼ်းတီႈ ထႃႇဝရႃႉၽြႃး။ ပုၼ်ႈတၢင်းဢၼ်ယွင်ႈယေႃးၵျေးၸူး မၼ်းၸဝ်ႈၼၼ်ႉဢေႃႈ။
ၵႃႈၼင်ႇဢၼ်ၵဝ်ဝႆႉၵတိၼၼ်ႉၵဝ်တၵ်း လူႇပၼ်တီႈ ထႃႇဝရႃႉၽြႃး။ ၵႃႈတီႈၽၢႆႇၼႃႈၵူၼ်းမၼ်းၸဝ်ႈတင်းသဵင်ႈ တင်းလူင်ဢေႃႈ။
မိူဝ်ႈဢၼ်ၵူၼ်းမၼ်းၸဝ်ႈသေၵေႃႉၵေႃႉတၢႆၼၼ်ႉ ထႃႇဝရႃႉၽြႃး၊ တိူဝ်ႉၸႂ်ၼႃႇလူင်လၢင်ဢေႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈပဵၼ်ၶႃႈ ၸဝ်ႈႁဝ်းတီႈၶႃႈဢေႃႈ။ ၶႃႈၸဝ်ႈႁဵတ်းဝၢတ်ႈတၢင်းဢၼ်ၸႂ်ႉသွႆ တီႈၸဝ်ႈႁဝ်း ၸိူဝ်ႉၼင်ႇဢၼ်မႄႈၶႃႈၸဝ်ႈႁဵတ်းၼၼ်ႉ တီႈၶႃႈဢေႃႈ။ ၸဝ်ႈႁဝ်းၵႄႇသႄႇၶျွတ်ႈဢဝ်ၶႃႈၸဝ်ႈ လွတ်ႈသေၵႃႈတၢင်းတၢႆတီႈၶႃႈယဝ်ႉ။
ၶႃႈၸဝ်ႈဢဝ်တင်းၶိူင်ႈတၢင်းလူႇတၢင်းဢၼ် တၢင်ႇၵျေးၸူးၼၼ်ႉသေလႄႈ ၶႃႈၸဝ်ႈသၢၵ်ႈလူႇပထၼႃႇတီႈၸဝ်ႈႁဝ်း တီႈၶႃႈဢေႃႈ။
ၵႃႈၼင်ႇဢၼ်ၵဝ်ဝႆႉၵတိၼၼ်ႉ ၵဝ်တၵ်းလူႇပၼ်တီႈ ထႃႇဝရႃႉၽြႃး၊ ၵႃႈတီႈ ၽၢႆႇၼႃႈၵူၼ်းမၼ်းၸဝ်ႈတင်းသဵင်ႈတင်းလူင်၊
ၵႃႈၼႂ်းထႃႇၼႃႉတီႈဢၼ်မူတ်းၸၢင်ႇၵႃႈတီႈ ၼႂ်းၵျွင်းပိၵ်ႈမၢၼ်ႇၸဝ်ႈႁဝ်း၊ ဢၼ်မီးယူႇၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉတီႈၶႃႈဢေႃႈ။ ယွင်ႈယေႃး ထႃႇဝရႃႉၽြႃး၊ တီႈၶႃႈဢေႃႈ။
ၵူၼ်းမဵဝ်းတင်းသဵင်ႈတင်းလူင်ၶဝ်႟။ ဢွၼ်ၵၼ်ယွင်ႈယေႃး ထႃႇဝရႃႉၽြႃး၊ တႃႉ။ ၵူၼ်းၵႃႈမီးတင်းသဵင်ႈတင်းလူင်ၶဝ်႟။ ဢွၼ်ၵၼ်ယွင်ႈယေႃးမၼ်းၸဝ်ႈၼႃႇၼႃႇတႃႉ။
လွင်ႈမၼ်းၸမ်ႉ၊မႅတ်ႈတႃႇမၼ်းၸဝ်ႈၼၼ်ႉ ယႂ်ႇၼႃႇတီႈႁဝ်းလႄႈ သဵတ်ႈၸႃႇမၼ်းၸဝ်ႈၼၼ်ႉတႄႇယူႇ တႃႇသေႇဢမ်ႇထၢတ်ႇဢေႃႈ။ ယွင်ႈယေႃး ထႃႇဝရႃႉၽြႃး၊ တီႈၶႃႈဢေႃႈ။
ဢွၼ်ၵၼ်ယွင်ႈယေႃး ထႃႇဝရႃႉၽြႃး၊ ၵွပ်ႈပိူဝ်ႈမၼ်းၸဝ်ႈမီးၸႂ်လီၸႂ်ဝၢၼ် ဢိၵ်ႇတင်းမႅတ်ႈတႃႇမၼ်းၸဝ်ႈတႄႇယူႇ တႃႇသေႇဢမ်ႇထၢတ်ႇၼၼ်ႉတႃႉႁဝ်း။
ႁႂ်ႈၵူၼ်းမဵဝ်း ဢိသရေး၊ တင်းလၢႆလၢတ်ႈဝႃႈ၊ “မႅတ်ႈတႃႇမၼ်းၸဝ်ႈတႄႇယူႇတႃႇသေႇ ဢမ်ႇထၢတ်ႇဢေႃႈ၊” ဝႃႈၼင်ႇၼႆတႃႉ။
ႁႂ်ႈယဵၸ်ႈပရေႃးႁဵၵ်ႈ ၽြႃးပဵၼ်ၸဝ်ႈ တင်းလၢႆလၢတ်ႈဝႃႈ၊ “မႅတ်ႈတႃႇမၼ်းၸဝ်ႈတႄႇယူႇတႃႇသေႇ ဢမ်ႇထၢတ်ႇဢေႃႈ၊” ဝႃႈၼင်ႇၼႆတႃႉ။
ႁႂ်ႈၶဝ်ၸိူဝ်းဢၼ်ၵူဝ်ယမ်မၼ်းၸဝ်ႈတင်းသဵင်ႈ တင်းလူင်ၼၼ်ႉလၢတ်ႈဝႃႈ၊ “မႅတ်ႈတႃႇမၼ်းၸဝ်ႈတႄႇယူႇတႃႇသေႇ ဢမ်ႇထၢတ်ႇဢေႃႈ၊” ဝႃႈၼင်ႇၼႆတႃႉ။
ၵႃႈၼႂ်းတီႈဢၼ်ၵဝ်ၵိတ်ႇၸႂ်ၵႅၼ်းၸႂ်ၼၼ်ႉ၊ၵဝ် ႁွင်ႉၵၢဝ်ႇတီႈ ထႃႇဝရႃႉၽြႃး၊ လႄႈ မၼ်းၸဝ်ႈၶိုၼ်းဢိူဝ်ၵဝ်သေယဝ်ႉ၊ပွႆႇႁႂ်ႈ ၵဝ်လႆႈလွတ်ႈလႅဝ်းဢေႃႈ။
ထႃႇဝရႃႉၽြႃး၊ မီးယူႇလူၺ်ႈၵၼ်တင်းၵဝ်လႄႈ ၵဝ်ဢမ်ႇလႆႈၵူဝ်လႆႈႁႄ။ ၽူႈလႂ်တၵ်းႁဵတ်းၵႃႈသင်တီႈၵဝ်လႆႈ။
ထႃႇဝရႃႉၽြႃး၊ ပဵၼ်ၸဝ်ႈဢၼ် ၸွႆႈထႅမ်မႃႉၸႃႉၵဝ်လႄႈ ၵဝ်တၵ်းတေလႆႈႁၼ်ရၢၼ်ႇသူႇၵဝ်တင်းလၢႆ တူၵ်းသုမ်းၼၼ်ႉဢေႃႈ။
တၢင်းဢၼ်ယုမ်ႇမၢတ်ႈဢိင်ပိုင်ႈ ထႃႇဝရႃႉၽြႃး၊ ၼၼ်ႉ၊ ယဵင်ႈၶႅၼ်းလီၼႃႇသေတၢင်းဢၼ် ဢိင်ပိုင်ႈၵူၼ်းၼၼ်ႉဢေႃႈ။
တၢင်းဢၼ်ယုမ်ႇမၢတ်ႈဢိင်ပိုင်ႈ ထႃႇဝရႃႉၽြႃး၊ ၼၼ်ႉ၊ ယဵင်ႈၶႅၼ်းလီၼႃႇသေတၢင်းဢၼ်ဢိင်ပိုင်ႈ ၶုၼ်မိူင်းၼၼ်ႉဢေႃႈ။
ရၢၼ်ႇသူႇၵဝ်တင်းလၢႆလွမ်ႉႁွပ်ႈၵဝ်ဝႆႉဢေႃႈ။ ၵူၺ်းၵႃႈ၊ၵဝ်လႆႈယႃႉၽဵဝ်ႈပႅတ်ႈၶဝ်ၵွပ်ႈလူၺ်ႈ တၼ်းၶူဝ်း ထႃႇဝရႃႉၽြႃး၊ ဢေႃႈ။
ၶဝ်ဢွၼ်ၵၼ်လွမ်ႉႁွပ်ႈၵဝ်ယူႇၵူႈၽၢႆႇၵူႈပႃႈဢေႃႈ။ ၵူၺ်းၵႃႈ၊ၵဝ်လႆႈယႃႉၽဵဝ်ႈၶဝ်ပႅတ်ႈၵွပ်ႈလူၺ်ႈ တၼ်းၶူဝ်း ထႃႇဝရႃႉၽြႃး၊ ဢေႃႈ။
ၶဝ်ဢွၼ်ၵၼ်ဢုမ်ႇၵဝ်ဝႆႉမိူၼ်ၸိူဝ်ႉၼင်ႇ ၽုင်ၽိုင်ႈဢေႃႈ။ ၵူၺ်းၵႃႈ၊ၶဝ်လႆႈၶၢမ်ႇတၢင်းဢၼ်မႆႈၶႅမ်ႈ ပႅတ်ႈၵႂႃႇၶၼ်ၽႂ်းၼႃႇ မိူၼ်ၸိူဝ်ႉၼင်ႇဢၼ်ၽႆးမႆႈယုမ်းၼၢမ် ၼၼ်ႉယဝ်ႉဢေႃႈ။ ၵွပ်ႈလူၺ်ႈတၼ်းၶူဝ်းၽြႃးပဵၼ်ၸဝ်ႈလႄႈ ၵဝ်လႆႈယႃႉၽဵဝ်ႈၶဝ်ပႅတ်ႈဢေႃႈ။
ၵဝ်လႆႈၶၢမ်ႇတၢင်းဢၼ်တွၵ်ႈဢီးႁႂ်ႈလႆႈ တူၵ်းသုမ်းဢေႃႈ။ ၵူၺ်းၵႃႈ၊ ထႃႇဝရႃႉၽြႃး၊ ၸွႆႈထႅမ်ၵဝ်ဢေႃႈ။
ထႃႇဝရႃႉၽြႃး၊ ႁဵတ်းႁႂ်ႈၵဝ်မီးႁႅင်းတၼ်းၶူဝ်းလႄႈမၼ်းၸဝ်ႈၵႄႇသႄႇၶျွတ်ႈဢဝ်ယဝ်ႉ။
ထွမ်ႇတႃႉ။ သဵင်ႁွင်ႉသဵင်သႅၼ်ႇဢၼ်သႂၢင်ႇဢၼ်သိူဝ်းတၢင်းဢၼ်ဢွင်ႇသိုၵ်းၼၼ်ႉ၊ မီးၵႃႈၼႂ်းသုမ်ႉထဵင်ၵူၼ်းၽြႃးပဵၼ်ၸဝ်ႈ ၼၼ်ႉလႄႈဝႃႈၸမ်ႉ၊ “ႁႅင်းတၼ်းၶူဝ်း ထႃႇဝရႃႉၽြႃး၊ ႁဵတ်း လွင်ႈတၢင်းၸိူဝ်းၼႆႉဢေႃႈ။
ႁႅင်းတၼ်းၶူဝ်းမၼ်းၸဝ်ႈၼၼ်ႉပၼ်ႁႂ်ႈႁဝ်းလႆႈဢွင်ႇသိုၵ်းယဝ်ႉ။ ႁႅင်းတၼ်းၶူဝ်းမၼ်းၸဝ်ႈၼၼ်ႉႁဵတ်းလွင်ႈတင်း ဢၼ်ယႂ်ႇၼႃႇၼႆႉယဝ်ႉ၊” ဝႃႈၼင်ႇၼႆဢေႃႈ။
ၵဝ်တၵ်းဢမ်ႇတၢႆ။ ၵဝ်တၵ်းဢသၢၵ်ႈ လိပ်းယူႇလႄႈ၊ တၵ်းၽုၺ်ႇမွၵ်ႇလၢတ်ႈၼႄလွင်ႈတၢင်းဢၼ် ထႃႇဝရႃႉၽြႃး၊ ႁဵတ်းဝႆႉၼၼ်ႉလူးၵွၼ်ႇဢေႃႈ။
ပိၵ်ႉသမ်ႉ ထႃႇဝရႃႉၽြႃး၊ ပၼ်တၢမ်ႇၵဝ် ႁႅင်းၼႃႇလူင်လၢင်သေၵေႃႈ မၼ်းၸဝ်ႈဢမ်ႇႁႂ်ႈၵဝ်ႁွတ်ႈထိုင် ၵႃႈတီႈတၢင်းတၢႆ။
ၽုၺ်ႇၽၵ်းတူၵျွင်းပိၵ်ႈမၢၼ်ႇၸဝ်ႈ ၸိူဝ်းၼၼ်ႉပၼ်တီႈၵဝ်တႃႉ။ ၵဝ်တၵ်းၶဝ်ႈလႄႈယွင်ႈယေႃးၵျေးၸူး ထႃႇဝရႃႉၽြႃး၊ ဢေႃႈ။
ဢၼ်ၼႆႉပဵၼ်ၽၵ်းတူ ထႃႇဝရႃႉၽြႃး၊ လႄႈ ၶဝ်ၸိူဝ်းဢၼ်သိုဝ်ႈတေႃႇၵူၺ်း တၵ်းၶဝ်ႈလႆႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈယွင်ႈယေႃးၸဝ်ႈႁဝ်းၵွပ်ႈပိူဝ်ႈၸဝ်ႈႁဝ်းဢိူဝ်ၶႃႈၸဝ်ႈလႄႈ ၸဝ်ႈႁဝ်းပၼ်ႁႂ်ႈၶႃႈၸဝ်ႈလႆႈပႄႉလႆႈၼႅင်ႇၼၼ်ႉ တီႈၶႃႈဢေႃႈ။
မၢၵ်ႇႁိၼ်ဢၼ်ၵူၼ်းႁဵတ်းႁိူၼ်းတိူၵ်ႈပႄႇပႅတ်ႈဝႆႉၸိူဝ်ႉၼင်ႇဢၼ်ဢမ်ႇပွင်ႇလွင်ႈၵႃႈသင်ၼၼ်ႉ၊ လႆႈပဵၼ်ႁိၼ်ႁူဝ်ၸဵင်ႇတိူၵ်ႈဢေႃႈ။
လွင်ႈဢၼ်ၼႆႉၸိုင်၊ပဵၼ်တၢင်းဢၼ် ထႃႇဝရႃႉၽြႃး၊ ႁဵတ်းဝႆႉဢေႃႈ။ ပဵၼ်ဢၼ်လီဢၢမ်းၼႃႇလူင်လၢင် သိုဝ်ႈၼႃႈတႂ်ႈတႃႁဝ်းဢေႃႈ။
မိူဝ်ႈၼႆႉဝၼ်းၼႆႉၸမ်ႉ၊ပဵၼ်မိုဝ်ႉဝၼ်းဢၼ် ထႃႇဝရႃႉၽြႃး၊ ပႄႉၼႅင်ႇလႄႈဢွၼ်ၵၼ်ၸူမ်းသိူဝ်းတႃႉႁဝ်း။ ဢွၼ်ၵၼ်ႁဵတ်းပွႆးဢၼ်သႂၢင်ႇသိူဝ်းတႃႉႁဝ်း။
ၶႅၼ်းတေႃႈၵႄႇသႄႇၶျွတ်ႈဢဝ်သေၵမ်းတီႈၶႃႈ။ ထႃႇဝရႃႉၽြႃး၊ တီႈၶႃႈ။ ၵႄႇသႄႇၶျွတ်ႈဢဝ် သေၵမ်းတီႈၶႃႈ။ ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈ ပၼ်တၢင်းလီမၢင်ႇၵလႃႇသေၵမ်းတီႈၶႃႈ။
ႁႂ်ႈ ထႃႇဝရႃႉၽြႃး၊ ပၼ်တၢင်းလီမၢင်ႇၵလႃႇ တီႈၵေႃႉဢၼ်မႃးၼႂ်းၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ၼၼ်ႉသေၵမ်းတီႈၶႃႈ။ ၶႃႈၸဝ်ႈႁဝ်းၶဝ်ယူႇၵႃႈၼႂ်းၵျွင်းပိၵ်ႈမၢၼ်ႇ၊ ထႃႇဝရႃႉၽြႃး၊ ၼၼ်ႉသေလႄႈ ပၼ်တၢင်းလီတီႈသူတီႈၶႃႈဢေႃႈ။
ထႃႇဝရႃႉၽြႃး၊ ပဵၼ်ၽြႃးပဵၼ်ၸဝ်ႈလႄႈ၊ မၼ်းၸဝ်ႈပဵၼ်ၸဝ်ႈဢၼ်လီဢၼ်မျၢတ်ႈ တီႈႁဝ်းဢေႃႈ။ ဢွၼ်ၵၼ်ယိပ်းၵမ်ၵိင်ႇမႆႉၶႃႈမႆႉၵႃႈၼႂ်းမိုဝ်း တူဝ်ၸဝ်ႈၵဝ်ႇယူႇသေလႄႈ တႄႇတင်ႈပၢင်ပွႆးသေယဝ်ႉ ပႆႁွပ်ႈ ၶဵင်ႇတၢင်းလူႇၵၼ်တႃႉႁဝ်း။
ၸဝ်ႈႁဝ်းပဵၼ်ၽြႃးၶႃႈၸဝ်ႈလႄႈၶႃႈၸဝ်ႈယွင်ႈယေႃးၵျေးၸူးၸဝ်ႈႁဝ်းတီႈၶႃႈဢေႃႈ။ ၶႃႈၸဝ်ႈတၵ်းၽုၺ်ႇမွၵ်ႇလၢတ်ႈၼႄလွင်ႈဢၼ်ၸဝ်ႈႁဝ်းယႂ်ႇမျၢတ်ႈၼႃႇၼၼ်ႉတီႈၶႃႈဢေႃႈ။
ဢွၼ်ၵၼ်ယွင်ႈယေႃးၵျေးၸူး ထႃႇဝရႃႉၽြႃး၊ ၵွပ်ႈပိူဝ်ႈမၼ်းၸဝ်ႈမီးၸႂ်လီၸႂ်ဝၢၼ် ၼၼ်ႉတႃႉႁဝ်း။ မႅတ်ႈတႃႇမၼ်းၸဝ်ႈတႄႇယူႇ တႃႇသေႇဢမ်ႇထၢတ်ႇဢေႃႈ။
ၶဝ်ၸိူဝ်းဢၼ်တၢင်းၵမ်တၢင်းၵျၢင်ႉၶဝ်ယင်း ဢမ်ႇမီးတီႈတၵ်းတၢင်ႇဢပျတ်ႈလႄႈ ပႂ်ႉၵမ်ပႂ်ႉၸွမ်းထုင်းၽိင်ႈတြႃး ထႃႇဝရႃႉၽြႃး၊ ၼၼ်ႉမီးမၢင်ႇၵလႃႇဢေႃႈ။
ၶဝ်ၸိူဝ်းဢၼ်ၸပ်းၸွမ်းႁွမ်းပႆၼႂ်းပိင်းၺၢပ်ႈတြႃးမၼ်းၸဝ်ႈလႄႈ ပႃးတင်းႁူဝ်ၸႂ်သဵင်ႈသဵင်ႈထွမ်ႇဢဝ်မၼ်းၸဝ်ႈၼၼ်ႉမီးမၢင်ႇၵလႃႇဢေႃႈ။
ၶဝ်ၼၼ်ႉဢမ်ႇၸၢင်ႈႁဵတ်းတုၸရိူၵ်ႈ။ ၶဝ်ၸၢင်ႈဢွၼ်ၵၼ်ၵႂႃႇၸွမ်းပႆၸွမ်းၼႂ်း သဵၼ်ႈတၢင်းမၼ်းၸဝ်ႈဢေႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းပၼ်ပိင်းၺၢပ်ႈတြႃးၸဝ်ႈႁဝ်းတီႈၶႃႈၸဝ်ႈႁဝ်းၶဝ်သေယဝ်ႉ သင်ႇလၢတ်ႈဝႆႉႁႂ်ႈၶႃႈၸဝ်ႈႁဝ်းၶဝ်တၵ်းလႆႈၶတ်းၸႂ်ၵမ်ၵျၢင်ႉၼၼ်ႉတီႈၶႃႈဢေႃႈ။
ႁႂ်ႈၶႃႈၸဝ်ႈမီးသဵတ်ႈၸႃႇၼႂ်းတၢင်းဢၼ် ပႂ်ႉၵမ်ပႂ်ႉၸွမ်း၊ ထုင်းၽိင်ႈတြႃးၸဝ်ႈႁဝ်းၼၼ်ႉသေၵမ်းလူၺ်ႈ။
ပေႃးၶႃႈၸဝ်ႈဝႆႉၸႂ်ၸပ်းၸွမ်းပိင်းၺၢပ်ႈၸဝ်ႈႁဝ်းၵႃႈမီးတင်းသဵင်ႈတင်းလူင်ၸင်ႇ၊ ၶႃႈၸဝ်ႈတၵ်းၵၢင်းလွတ်ႈတင်းတၢင်းဢၼ် ဢူၵ်းဢၢႆတီႈၶႃႈဢေႃႈ။
ၸွမ်းၼင်ႇၶႃႈၸဝ်ႈသွၼ်ဢဝ်လွင်ႈတၢင်းဢၼ် ၸဝ်ႈႁဝ်းၸီႇယၢင်ႇသိုဝ်ႈသိုဝ်ႈတေႃႇတေႃႇၼၼ်ႉယဝ်ႉၼၼ်ႉၸိုင်၊ ၶႃႈၸဝ်ႈတၵ်းပႃးတင်းၸႂ်ဢၼ်ၶၢဝ်သႂ်လႄႈယွင်ႈယေႃးၸဝ်ႈႁဝ်းတီႈၶႃႈဢေႃႈ။
ၶႃႈၸဝ်ႈတၵ်းပႂ်ႉၸွမ်းထုင်းၽိင်ႈတြႃးၸဝ်ႈႁဝ်းၸိူဝ်းၼၼ်ႉတီႈၶႃႈဢေႃႈ။ ၶႅၼ်းတေႃႈယႃႇပေၸုၼ်ႉပႅတ်ႈၶႃႈၸဝ်ႈ လႃးလႃးသေၵမ်းတီႈၶႃႈ။
ၵူၼ်းၼုမ်ႇၵူၼ်းၵမ်တၵ်းႁႂ်ႈသဵၼ်ႈတၢင်းဢၼ် မၼ်းၵႂႃႇၼၼ်ႉမူတ်းၸၢင်ႇလႆႈၸိူဝ်ႉၼင်ႇႁိုဝ် ဝႃႈၼႆၸမ်ႉ။ တၵ်းလႆႈဝႆႉၸႂ်ပႂ်ႉၸွမ်းပိင်းၺၢပ်ႈၸဝ်ႈႁဝ်း တီႈၶႃႈဢေႃႈ။
ၶႃႈၸဝ်ႈပႃးၸႂ်ပႃးၶေႃးၵျူဝ်းၸႃးႁဵတ်းဝၢတ်ႈ တီႈၸဝ်ႈႁဝ်းဢေႃႈ။ ၶႅၼ်းတေႃႈယႃႇပေႁႂ်ႈၶႃႈၸဝ်ႈပိူင်ႈသေ သဵၼ်ႈတၢင်းပိင်းၺၢပ်ႈၸဝ်ႈႁဝ်း ၸိူဝ်းၼၼ်ႉၵႂႃႇသေၵမ်းတီႈၶႃႈ။
ၶႃႈၸဝ်ႈဢဝ်ထုင်းၽိင်ႈတြႃးၸဝ်ႈႁဝ်းသိမ်းဝႆႉ ၼႂ်းႁူဝ်ၸႂ်၊ၼင်ႇႁိုဝ်တၵ်းဢမ်ႇလႆႈၽိတ်းပိူင်ႈ ၸဝ်ႈႁဝ်းတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈယွင်ႈယေႃး ၸဝ်ႈႁဝ်းတီႈၶႃႈဢေႃႈ။ ၶႅၼ်းတေႃႈသွၼ်ပၼ်ထုင်းၽိင်ႈတြႃးၸဝ်ႈႁဝ်းၸိူဝ်းၼၼ်ႉတီႈၶႃႈၸဝ်ႈသေၵမ်းတီႈၶႃႈ။
ၶႃႈၸဝ်ႈတၵ်းႁေႃးလၢတ်ႈဢွၵ်ႇသဵင် ထုင်းၽိင်ႈတြႃးဢၼ်ၸဝ်ႈႁဝ်းပၼ်ဝႆႉတီႈ ၶႃႈၸဝ်ႈၵႃႈမီးတင်းသဵင်ႈတင်းလူင်ဢေႃႈ။
ၶႃႈၸဝ်ႈမူၼ်ႈပျေႃႇၼႂ်းတၢင်းဢၼ် ၸပ်းၸွမ်းႁွမ်းပႆ ၼႂ်းပိင်းၺၢပ်ႈၸဝ်ႈႁဝ်းၼႃႇသေတၢင်းဢၼ် မၢၵ်ႈမီးလီပဵၼ်ၼၼ်ႉတီႈၶႃႈဢေႃႈ။
ၶႃႈၸဝ်ႈသွၼ်ဢၢၼ်ႇဢဝ်တၢင်းဢၼ်ၸဝ်ႈႁဝ်းသင်ႇသွၼ်ၼႄတၢင်းၸိူဝ်းၼၼ်ႉလႄႈ ၶႆႈၸႂ်ဝူၼ်ႉၸႂ်လူၺ်ႈလွင်ႈဢေႃးဝႃႇတႃႉဢၼ်ၸဝ်ႈႁဝ်းသွၼ်ပၼ်ၸိူဝ်းၼၼ်ႉတီႈၶႃႈဢေႃႈ။
ၶႃႈၸဝ်ႈမူၼ်ႈပျေႃႇၼႂ်းထုင်းၽိင်ႈတြႃးၸဝ်ႈႁဝ်းၸိူဝ်းၼၼ်ႉလႄႈ ယင်းဢမ်ႇလူင်ဢမ်ႇလိုမ်းပိင်းၺၢပ်ႈၸဝ်ႈႁဝ်းၸိူဝ်းၼၼ်ႉတီႈၶႃႈ။
ၶႅၼ်းတေႃႈႁဵတ်းၵျေးၸူးတီႈၶႃႈၸဝ်ႈႁဝ်း၊ႁႂ်ႈၶႃႈၸဝ်ႈလႆႈဢသၢၵ်ႈလိပ်းယူႇလႄႈ ပႂ်ႉၵမ်ပႂ်ႉၸွမ်းဢေႃးဝႃႇတႃႉၸဝ်ႈႁဝ်းၸိူဝ်းၼၼ်ႉသေၵမ်းတီႈၶႃႈ။
ၶႅၼ်းတေႃႈၽုၺ်ႇမၢၵ်ႇတႃၶႃႈၸဝ်ႈႁႂ်ႈၶႃႈၸဝ်ႈႁၼ်သဵတ်ႈၸႃႇဢၼ်လီဢၼ်ငၢမ်းတင်းလၢႆ ၵႃႈၼႂ်းတြႃးၸဝ်ႈႁဝ်းၼၼ်ႉသေၵမ်းတီႈၶႃႈ။
ၶႃႈၸဝ်ႈပဵၼ်ၶႅၵ်ႇၵႃႈၼိူဝ်လိၼ်မိူင်းၼႆႉ တီႈၶႃႈဢေႃႈ။ ၶႅၼ်းတေႃႈယႃႇပေသိူင်ႇပိင်းၺၢပ်ႈ ၸဝ်ႈႁဝ်းၸိူဝ်းၼၼ်ႉဝႆႉသေၵႃႈတီႈ ၶႃႈၸဝ်ႈသေၵမ်းတီႈၶႃႈ။
ႁူဝ်ၸႂ်ၶႃႈၸဝ်ႈပႂ်ႉမွင်းထႃႈထၢၼ်ႈပေႃးၸႂ်ၶူမ်းၼႃႇ ၵွပ်ႈပိူဝ်ႈဢၼ်ၶႂ်ႈႁုၶႂ်ႈၸႅင်ႈလွင်ႈတၢင်းဢၼ် ၸဝ်ႈႁဝ်းၸီႇယၢင်ႇတြႃးၸိူဝ်းၼၼ်ႉ ယူႇၵူႈၶိင်ႇၵူႈၶႃႇတီႈၶႃႈဢေႃႈ။
ၸဝ်ႈႁဝ်းသင်ႇသွၼ်သုင်းမႃႉၶဝ်ၸိူဝ်းဢၼ် မႃႇၼႃႉယႂ်ႇ၊ ၶဝ်ၸိူဝ်းဢၼ်ပိူင်ႈသဵၼ်ႈတၢင်းပိင်းၺၢပ်ႈ ၸဝ်ႈႁဝ်းတင်းလၢႆၵႂႃႇၸိူဝ်းၼၼ်ႉ၊ လႆႈၶၢမ်ႇတၢင်းဢၼ်ၵိၼ်ႇဢၼ်ဝႃႈတီႈၶႃႈဢေႃႈ။
ၶႅၼ်းတေႃႈပွႆႇႁႂ်ႈၶႃႈၸဝ်ႈလွတ်ႈသေတင်း တၢင်းဢၼ်ၶဝ်သႄႉသွမ်း ဢိၵ်ႇတင်းတၢင်းဢၼ်ႁဵတ်းဢမ်ႇပေႃး ၼင်ႇႁိုဝ်ၸိူဝ်းၼၼ်ႉ ၵွပ်ႈပိူဝ်ႈဢၼ်ၶႃႈၸဝ်ႈပႂ်ႉၵမ်ထုင်းၽိင်ႈတြႃးၸဝ်ႈႁဝ်းၸိူဝ်းၼၼ်ႉယူႇၼၼ်ႉသေၵမ်းတီႈၶႃႈ။
ပိၵ်ႉသမ်ႉလုၵ်ႈၶုၼ်လုၵ်ႈၵႂၢၼ်ၸိူဝ်းၼၼ်ႉတိူင်ႇပၢင်ႇႁႂ်ႈလႆႈၵျၢမ်ႇႁဵတ်းၶတ်းၶႃႈၸဝ်ႈသေၵေႃႈ ၶႃႈၸဝ်ႈတၵ်းသွၼ်ဢဝ်ဢေႃးဝႃႇတႃႉ ၸဝ်ႈႁဝ်းၸိူဝ်းၼၼ်ႉယူႇတီႈၶႃႈဢေႃႈ။
တြႃးဢၼ်ၸဝ်ႈႁဝ်းသင်ႇသွၼ်ၼႄတၢင်းၼၼ်ႉပၼ်ႁႂ်ႈၶႃႈၸဝ်ႈသိူဝ်းပျေႃႇလႄႈ ပဵၼ်တၢင်းဢၼ်ပၼ်တၢင်းၵျၢမ်ႇတၢင်းပွင် တီႈၶႃႈၸဝ်ႈတီႈၶႃႈဢေႃႈ။
ၶႃႈၸဝ်ႈၵိင်ႈလူမ်ႉၵႃႈတီႈမုၼ်ႈလိၼ်ယူႇထၢၼ်ႈပေႃးၸမ်တၵ်းတၢႆတီႈၶႃႈဢေႃႈ။ ၶႅၼ်းတေႃႈႁႂ်ႈၶႃႈၸဝ်ႈလုၵ်ႉလႄႈ ၶိုၼ်းႁႅင်းယႂ်ႇမႃးၸွမ်းၵႃႈၼင်ႇဢၼ် ၸဝ်ႈႁဝ်းဝႆႉၵတိၼၼ်ႉသေၵမ်းတီႈၶႃႈ။
ၶႃႈၸဝ်ႈၽုၺ်ႇၼႄၵႃႈဢၼ်ၶႃႈၸဝ်ႈ လႆႈႁဵတ်းယဝ်ႉၸိူဝ်းၼၼ်ႉလႄႈၸဝ်ႈႁဝ်း ထွမ်ႇဢဝ်တီႈၶႃႈယဝ်ႉ။ ၶႅၼ်းတေႃႈသွၼ်ပၼ်ထုင်းၽိင်ႈတြႃးၸဝ်ႈႁဝ်းၸိူဝ်းၼၼ်ႉတီႈၶႃႈၸဝ်ႈသေၵမ်းၶႃႈ။
ၶႅၼ်းတေႃႈၸွႆႈထႅမ်ႁႂ်ႈၶႃႈၸဝ်ႈႁုၸႅင်ႈထုင်းၽိင်ႈတြႃးၸဝ်ႈႁဝ်းၸိူဝ်းၼၼ်ႉသေၵမ်းတီႈၶႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ၶႃႈၸဝ်ႈ တၵ်းၶႆႈၸႂ်ဝူၼ်ႉၸႂ်၊ လွင်ႈဢေႃးဝႃႇတႃႉၸဝ်ႈႁဝ်းဢၼ်လီဢၢမ်း ၸိူဝ်းၼၼ်ႉတီႈၶႃႈဢေႃႈ။
ႁူဝ်ၸႂ်ၶႃႈၸဝ်ႈၸိူမ်ႈၵႂႃႇၵွပ်ႈပိူဝ်ႈတၢင်းဢၼ်ၸႂ်လဵၵ်ႉၸႂ်ဢူၼ်ႈၼၼ်ႉတီႈၶႃႈယဝ်ႉ။ ၶႅၼ်းတေႃႈပၼ်ဢဵၼ်ပၼ်ႁႅင်းတီႈၶႃႈၸဝ်ႈ ၸွမ်းၵႃႈၼင်ႇဢၼ်ၸဝ်ႈႁဝ်းဝႆႉၵတိၼၼ်ႉ သေၵမ်းတီႈၶႃႈ။
ၶႅၼ်းတေႃႈပႂ်ႉယၢင်တိၼ်ၶႃႈၸဝ်ႈႁႂ်ႈမၼ်း ဢမ်ႇလႆႈပႆၸွမ်းသဵၼ်ႈတၢင်းဢၼ် ၽိတ်းပိူင်ႈၼၼ်ႉလႄႈ ဢဵတ်းလူသွၼ်ပၼ်တြႃးၸဝ်ႈႁဝ်းတီႈ ၶႃႈၸဝ်ႈသေၵမ်းတီႈၶႃႈ။
ၶႃႈၸဝ်ႈလိူၵ်ႈဢဝ်သဵၼ်ႈတၢင်းသဵတ်ႈၸႃႇတီႈၶႃႈယဝ်ႉ။ ၶႃႈၸဝ်ႈဝႆႉၸႂ်ထွမ်ႇတၢင်းဢၼ်ၸဝ်ႈႁဝ်းၸီႇယၢင်ႇဝႆႉၼၼ်ႉတီႈၶႃႈယဝ်ႉ။
ၶႃႈၸဝ်ႈၸပ်းၸွမ်းႁွမ်းပႆၼႂ်းတြႃးဢၼ်ၸဝ်ႈႁဝ်းသင်ႇသွၼ်ၼႄပၼ်ၼၼ်ႉတီႈၶႃႈယဝ်ႉ။ ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈယႃႇပေႁႂ်ႈၶႃႈၸဝ်ႈလႆႈထိုင်တီႈဢၼ်လႆႈဢူၵ်းလႆႈဢၢႆသေၵမ်းတီႈၶႃႈ။
ၶႃႈၸဝ်ႈတၵ်းဝႆႉၸႂ်ဝၢင်းၸႂ်ပႂ်ႉၵမ်ပႂ်ႉၸွမ်းပိင်းၺၢပ်ႈၸဝ်ႈႁဝ်းၸိူဝ်းၼၼ်ႉ၊ ၵွပ်ႈပိူဝ်ႈၸဝ်ႈႁဝ်းႁႂ်ႈၺၢၼ်ႇႁူဝ်ၸႂ်ၶႃႈၸဝ်ႈ ယႂ်ႇၵႂၢင်ႈမႃးၼၼ်ႉတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈသွၼ်ပၼ်သဵၼ်ႈတၢင်းထုင်းၽိင်ႈ တြႃးၸဝ်ႈႁဝ်းၼၼ်ႉတီႈၶႃႈၸဝ်ႈ သေၵမ်းတီႈၶႃႈ။ ၶႃႈၸဝ်ႈတၵ်းပႂ်ႉၸွမ်းၵႂႃႇတေႃႇထိုင်ႁွတ်ႈ တီႈသုတ်းတီႈၵွႆၼၼ်ႉတီႈၶႃႈဢေႃႈ။
ၶႅၼ်းတေႃႈပၼ်ႁႂ်ႈႁူဝ်ၸႂ်ၶႃႈၸဝ်ႈပွင်ႇလႅင်း ႁႂ်ႈၶႃႈၸဝ်ႈၸၢင်ႈပႂ်ႉၸွမ်းထုင်းၽိင်ႈတြႃး ၸဝ်ႈႁဝ်းသေၵမ်းတီႈၶႃႈ။ ၶႃႈၸဝ်ႈတၵ်းပႃးတင်းႁူဝ်ၸႂ်သဵင်ႈသဵင်ႈ သေလႄႈၵမ်ၵျၢင်ႉယူႇတီႈၶႃႈဢေႃႈ။
ၶႅၼ်းတေႃႈပႂ်ႉထိင်းႁႂ်ႈၶႃႈၸဝ်ႈပဵၼ်ၵေႃႉဢၼ်ထွမ်ႇဢဝ်ပိင်းၺၢပ်ႈတြႃးၸဝ်ႈႁဝ်းၸိူဝ်းၼၼ်ႉ၊ ၵွပ်ႈပိူဝ်ႈၶႃႈၸဝ်ႈထူပ်းႁၼ်တၢင်းဢၼ်မူၼ်ႈပျေႃႇၵႃႈၼႂ်းတြႃးၸိူဝ်းၼၼ်ႉသေၵမ်းတီႈၶႃႈ။
ၶႅၼ်းတေႃႈပၼ်ၸႂ်ဢၼ်ၸပ်းၸွႆးၼႂ်းတၢင်းဢၼ်ပႂ်ႉၵမ်ပႂ်ႉၸွမ်းတြႃးၸဝ်ႈႁဝ်းၸိူဝ်းၼၼ်ႉ၊ ၼႃႇသေၸႂ်လေႃးၽႃႉသေၵမ်းတီႈၶႃႈ။
ၶႅၼ်းတေႃႈယႃႇပေႁႂ်ႈၶႃႈၸဝ်ႈဝႆႉၸႂ်ၸူးတီႈ ဢၼတ်ႉတႃႉၼၼ်ႉလႄႈ ၶႅၼ်းတေႃႈဝႆႉၸႂ်ဢၼ်လီၸႂ်ဝၢၼ် တေႃႇၶႃႈၸဝ်ႈ ၸွမ်းၵႃႈၼင်ႇဢၼ်ၸဝ်ႈႁဝ်းဝႆႉၵတိၼၼ်ႉ သေၵမ်းတီႈၶႃႈ။
ၶႅၼ်းတေႃႈႁႂ်ႈၵတိၸဝ်ႈႁဝ်းဢၼ်ဝႃႈၵတိ ဢၼ်ၸဝ်ႈႁဝ်းႁဵတ်းဝႆႉ တီႈၶဝ်ၸိူဝ်းဢၼ်ၵူဝ်ယမ်ၸဝ်ႈႁဝ်းၼၼ်ႉတႄႇယူႇ တီႈၶႃႈၸဝ်ႈႁဝ်းသေၵမ်းတီႈၶႃႈ။
ၶႅၼ်းတေႃႈၵႄႇသႄႇၶျွတ်ႈဢဝ် ၶႃႈၸဝ်ႈလွတ်ႈသေ တၢင်းဢၼ်သႄႉသွမ်းဢၼ်ၶႃႈၸဝ်ႈ ၵူဝ်ႁႄၼၼ်ႉသေၵမ်းတီႈၶႃႈ။ လွင်ႈတၢင်းဢၼ်ၸဝ်ႈႁဝ်းၸီႇယၢင်ႇဝႆႉၸိူဝ်းၼၼ်ႉပဵၼ်ဢၼ်လီဢၢမ်းတီႈၶႃႈဢေႃႈ။
ၶႃႈၸဝ်ႈမီးၸႂ်ဢၼ်ၶႂ်ႈပႂ်ႉၵမ်ပိင်းၺၢပ်ႈၸဝ်ႈႁဝ်းၸိူဝ်းၼၼ်ႉတီႈၶႃႈဢေႃႈ။ ၶႅၼ်းတေႃႈပၼ်ဢသၢၵ်ႈဢၼ်မႂ်ႇတီႈၶႃႈၸဝ်ႈ ၵွပ်ႈလူၺ်ႈၸဝ်ႈႁဝ်းသိုဝ်ႈတေႃႇၼၼ်ႉ သေၵမ်းတီႈၶႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈ ၼႄပျႃးလွင်ႈဢၼ်ၸဝ်ႈႁဝ်းႁၵ်ႉၶႃႈၸဝ်ႈထၼ်ႇႁိုဝ်ၼၼ်ႉသေလႄႈ၊ ၵႄႇသႄႇၶျွတ်ႈဢဝ်ၶႃႈၸဝ်ႈၸွမ်းၵႃႈၼင်ႇဢၼ်ၸဝ်ႈႁဝ်းဝႆႉၵတိၼၼ်ႉသေၵမ်းတီႈၶႃႈ။
ၼင်ႇၼၼ်လႄႈ၊ၶႃႈၸဝ်ႈတၵ်းၸၢင်ႈၵႄႈလိတ်ႈၵႂၢမ်းဢၼ်သႄႉသွမ်းၼၼ်ႉ၊ ၵွပ်ႈပိူဝ်ႈဢၼ်ၶႃႈၸဝ်ႈယုမ်ႇမၢတ်ႈဢိင်ပိုင်ႈၼုၵ်ႈၵပၢတ်ႈၸဝ်ႈႁဝ်းၼၼ်ႉတီႈၶႃႈဢေႃႈ။
ၶႅၼ်းတေႃႈႁႂ်ႈၶႃႈၸဝ်ႈၸၢင်ႈမေႃလၢတ်ႈလွင်ႈသဵတ်ႈၸႃႇတြႃးၵူႈၶိင်ႇၵူႈၶႃႇ ၵွပ်ႈပိူဝ်ႈဢၼ်ၶႃႈၸဝ်ႈမုင်ႈထႃႈမွင်းထႃႈ၊ လွင်ႈတၢင်းဢၼ်ၸဝ်ႈႁဝ်းၸီႇယၢင်ႇဝႆႉၸိူဝ်းၼၼ်ႉ ယူႇၼၼ်ႉသေၵမ်းတီႈၶႃႈ။
ၶႃႈၸဝ်ႈတၵ်းပႂ်ႉၵမ်ၸွမ်းတြႃးၸဝ်ႈႁဝ်းယူႇ တႃႇသေႇဢမ်ႇထၢတ်ႇတီႈၶႃႈဢေႃႈ။
ၶႃႈၸဝ်ႈတၵ်းၵမ်ၵျၢင်ႉလွတ်ႈလွတ်ႈလႅဝ်းလႅဝ်း ၵွပ်ႈပိူဝ်ႈဢၼ်ၶႃႈၸဝ်ႈ ၵျူဝ်းၸႃးပႂ်ႉၵမ်ၸွမ်းဢေႃးဝႃႇတႃႉၸဝ်ႈႁဝ်းၸိူဝ်းၼၼ်ႉယူႇၼၼ်ႉတီႈၶႃႈဢေႃႈ။
ၶႃႈၸဝ်ႈတၵ်းဢဝ်ပိင်းၺၢပ်ႈၸဝ်ႈႁဝ်းၸိူဝ်းၼၼ်ႉ မွၵ်ႇလၢတ်ႈတီႈၶုၼ်ႁေႃၶမ်းတင်းလၢႆလႄႈ ၶႃႈၸဝ်ႈဢမ်ႇမီးတီႈဢၼ်တၵ်းဢူၵ်းဢၢႆ တီႈၶႃႈဢေႃႈ။
ၶႃႈၸဝ်ႈထူပ်းႁၼ်တၢင်းဢၼ်မူၼ်ႈပျေႃႇ ၵႃႈၼႂ်းပိင်းၺၢပ်ႈၸဝ်ႈႁဝ်း၊ ဢၼ်ၶႃႈၸဝ်ႈႁၵ်ႉၸိူဝ်းၼၼ်ႉတီႈၶႃႈဢေႃႈ။
ၶႃႈၸဝ်ႈရူဝ်ႇသေႇၵူဝ်ယမ်ပိင်းၺၢပ်ႈၸဝ်ႈႁဝ်းဢၼ်ၶႃႈၸဝ်ႈႁၵ်ႉၼၼ်ႉလႄႈ ၶႃႈၸဝ်ႈတၵ်းၶႆႈၸႂ်ဝူၼ်ႉၸႂ်ထုင်းၽိင်ႈတြႃးၸဝ်ႈႁဝ်းၸိူဝ်းၼၼ်ႉတီႈၶႃႈဢေႃႈ။
ၶႅၼ်းတေႃႈၶႆႈၸႂ်ထူပ်းၵတိၸဝ်ႈႁဝ်းဢၼ်ဝႆႉတီႈၶႃႈၸဝ်ႈႁဝ်းၼၼ်ႉသေၵမ်းတီႈၶႃႈ။ ၵတိၼၼ်ႉႁႂ်ႈၶႃႈၸဝ်ႈမုင်ႈထႃႈမွင်းထႃႈ ယူႇတီႈၶႃႈဢေႃႈ။
ပိၵ်ႉသမ်ႉၶႃႈၸဝ်ႈလႆႈၶၢမ်ႇဝူၺ်ႇတၼႃႇယူႇ သေၵေႃႈ၊ၶႃႈၸဝ်ႈလႆႈသၢၵ်ႈသႃႇမႃး၊ ၵွပ်ႈပိူဝ်ႈဢၼ်ၵတိၸဝ်ႈႁဝ်းႁႂ်ႈၶႃႈၸဝ်ႈ ဢသၢၵ်ႈလိပ်းယူႇၼၼ်ႉတီႈၶႃႈဢေႃႈ။
ပိၵ်ႉသမ်ႉၶဝ်ၸိူဝ်းဢၼ်မႃႇၼႃႉယႂ်ႇၼၼ်ႉသႄႉသွမ်းၶႃႈၸဝ်ႈၼႃႇလူင်လၢင်သေၵေႃႈ၊ ၶႃႈၸဝ်ႈဢမ်ႇဝႄႈပႅတ်ႈတြႃးၸဝ်ႈႁဝ်းတီႈၶႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈ ၶႆႈၸႂ်ထူပ်းလွင်ႈတၢင်းၸိူဝ်းဢၼ် ၸဝ်ႈႁဝ်းၸီႇယၢင်ႇဝႆႉမိူဝ်ႈဢွၼ်ၼႆႉၼၼ်ႉလႄႈ လွင်ႈတၢင်းၸိူဝ်းၼၼ်ႉႁႂ်ႈၶႃႈၸဝ်ႈ ၼိမ်ၸႂ်ၼိမ်ၶေႃးတီႈၶႃႈဢေႃႈ။
မိူဝ်ႈဢၼ်ၶႃႈၸဝ်ႈႁၼ်ၶဝ်ၸိူဝ်းဢၼ်ဢမ်ႇတြႃးပူၼ်ႉလိူဝ်တြႃးၸဝ်ႈႁဝ်းၸိူဝ်းၼၼ်ႉၸိုင်၊ ၶႃႈၸဝ်ႈတေႃးသႃႉဢွၵ်ႇတႄႉတႄႉ တီႈၶႃႈဢေႃႈ။
ၼႂ်းၸူဝ်ႈၶၢဝ်းဢၼ်ၶႃႈၸဝ်ႈဢသၢၵ်ႈလိပ်းယူႇၵႃႈၼႂ်းလေႃးၵႃႉၼႆႉၵမ်းဢွၼ်ႇၼိုင်ႈၼၼ်ႉ ၶႃႈၸဝ်ႈၸၢပ်ႈႁဵတ်းလိၵ်ႈႁဵတ်းၵႂၢမ်း ၼမ်ၼႃႇလွင်ႈပိင်းၺၢပ်ႈၸဝ်ႈႁဝ်း ၸိူဝ်းၼၼ်ႉတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶိင်ႇၵၢင်ၶိုၼ်း ၶႃႈၸဝ်ႈၶႆႈၸႂ်ထူပ်းၸဝ်ႈႁဝ်းလႄႈ ၶႆႈၸႂ်လွင်ႈတြႃးၸဝ်ႈႁဝ်းတီႈၶႃႈဢေႃႈ။
ၵွပ်ႈပိူဝ်ႈၶႃႈၸဝ်ႈပႂ်ႉၵမ်ပိင်းၺၢပ်ႈၸဝ်ႈႁဝ်းလႄႈ၊တၢင်းလီမၢင်ႇၵလႃႇၸိူဝ်ႉၼင်ႇၼႆၼၼ်ႉ ပဵၼ်မႃးတီႈၶႃႈၸဝ်ႈတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်း ပဵၼ်တၢင်းဢၼ်ၶႃႈၸဝ်ႈတူၵ်းဢၢင်ႈ ၶႂ်ႈလႆႈၵႃႈမီးတင်းသဵင်ႈတင်းလူင် တီႈၶႃႈဢေႃႈ။ ၶႃႈၸဝ်ႈဝႆႉၵတိတႃႇတေပႂ်ႉၵမ်တြႃးၸဝ်ႈႁဝ်း ၸိူဝ်းၼၼ်ႉတီႈၶႃႈဢေႃႈ။
ၶႃႈၸဝ်ႈပႃးၸႂ်ပႃးၶေႃးတွင်းပၢၼ်ႇတီႈၸဝ်ႈႁဝ်းႁႂ်ႈလႆႈၶၢမ်ႇၵျေးၸူးၸဝ်ႈႁဝ်းတီႈၶႃႈလႄႈ ၶႅၼ်းတေႃႈဢဵတ်းလူၶႃႈၸဝ်ႈႁဝ်း ၸွမ်းၵႃႈၼင်ႇဢၼ်ၸဝ်ႈႁဝ်းဝႆႉၵတိၼၼ်ႉ သေၵမ်းတီႈၶႃႈ။
မိူဝ်ႈဢၼ်ၶႃႈၸဝ်ႈၶႆႈၸႂ်တူၺ်းလွင်ႈသဵၼ်ႈတၢင်းၸဝ်ႈႁဝ်းၸိူဝ်းၼၼ်ႉၸိုင်၊ ၶႃႈၸဝ်ႈဝၢႆႇယၢင်တိၼ်ၶႃႈၸဝ်ႈငႅၵ်းၸူး တီႈတြႃးဢၼ်ၸဝ်ႈႁဝ်းသင်ႇသွၼ်ၼႄပၼ်ၼၼ်ႉတီႈၶႃႈဢေႃႈ။
ၶႃႈၸဝ်ႈယင်းဢမ်ႇၵွႆႈဢမ်ႇထိူင်း၊ႁိပ်ႈၼႅတ်ႈ ႁႂ်ႈလႆႈပႂ်ႉၵမ်ပိင်းၺၢပ်ႈၸဝ်ႈႁဝ်းၸိူဝ်းၼၼ်ႉ တီႈၶႃႈဢေႃႈ။
ပိၵ်ႉသမ်ႉၶဝ်ၸိူဝ်းဢၼ်ဢမ်ႇတြႃးႁၢင်ႈၶိုမ်းဝႆႉ ပုၼ်ႈၶႃႈၸဝ်ႈသေၵေႃႈ၊ ၶႃႈၸဝ်ႈဢမ်ႇလူင်လိုမ်းတြႃးၸဝ်ႈႁဝ်းတီႈၶႃႈ။
ၶိင်ႇတဵင်ႈၶိုၼ်းၶႃႈၸဝ်ႈတိုၼ်ႇမႃး ႁႂ်ႈလႆႈယွင်ႈယေႃးၸဝ်ႈႁဝ်း ၵွပ်ႈပိူဝ်ႈတၢင်းဢၼ်ၸဝ်ႈႁဝ်းၸီႇယၢင်ႇ ၸွမ်းၼင်ႇတြႃးၼၼ်ႉတီႈၶႃႈဢေႃႈ။
ၶႃႈၸဝ်ႈႁဵတ်းၵေႃႉႁဵတ်းသႄႈလူၺ်ႈၵၼ်တင်းၶဝ်ၸိူဝ်းဢၼ်ၵူဝ်ယမ်ၸဝ်ႈႁဝ်း၊ ဢိၵ်ႇတင်းၶဝ်ၸိူဝ်းဢၼ်ပႂ်ႉၵမ်တြႃးၸဝ်ႈႁဝ်း ၸိူဝ်းၼၼ်ႉတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ လိၼ်မိူင်းၼႆႉတဵမ်ဝႆႉတင်းမႅတ်ႈတႃႇၵရုၼႃႇၸဝ်ႈႁဝ်းတီႈၶႃႈဢေႃႈ။ ၶႅၼ်းတေႃႈသင်ႇသွၼ်ပၼ်ပိင်းၺၢပ်ႈတြႃး ၸဝ်ႈႁဝ်းၸိူဝ်းၼၼ်ႉတီႈၶႃႈၸဝ်ႈ သေၵမ်းတီႈၶႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်း ႁဵတ်းၵျေးၸူးတီႈၶႃႈၸဝ်ႈ ၸွမ်းၵႃႈၼင်ႇဢၼ်ၸဝ်ႈႁဝ်း ဝႆႉၵတိၼၼ်ႉတီႈၶႃႈဢေႃႈ။
ၶႅၼ်းတေႃႈပၼ်ၺၢၼ်ႇပိင်ႇၺႃႇတီႈၶႃႈၸဝ်ႈ၊ ၵွပ်ႈပိူဝ်ႈၶႃႈၸဝ်ႈယုမ်ႇမၢတ်ႈပိင်းၺၢပ်ႈ ၸဝ်ႈႁဝ်းၼၼ်ႉသေၵမ်းတီႈၶႃႈ။
ၸူဝ်ႈဢၼ်ၸဝ်ႈႁဝ်းဢမ်ႇပႆႇပၼ်တၢမ်ႇ တီႈၶႃႈၸဝ်ႈၼၼ်ႉၶႃႈၸဝ်ႈ ယၢမ်ႈပိူင်ႈတၢင်းၵႂႃႇတီႈၶႃႈယဝ်ႉ။ တေႃႈလဵဝ်ၼႆႉၸမ်ႉ၊ၶႃႈၸဝ်ႈ ပႂ်ႉၵမ်ၼုၵ်ႈၵပၢတ်ႈၸဝ်ႈႁဝ်းတီႈၶႃႈယဝ်ႉ။
ၸဝ်ႈႁဝ်းမီးၸႂ်ဢၼ်လီၸႂ်ဢၼ်ဝၢၼ်ဢိၵ်ႇတင်းၸႂ်ဢၼ်ဢဵတ်းလူတီႈၶႃႈဢေႃႈ။ ၶႅၼ်းတေႃႈသွၼ်ပၼ်ပိင်းၺၢပ်ႈၸဝ်ႈႁဝ်း ၸိူဝ်းၼၼ်ႉတီႈၶႃႈၸဝ်ႈသေၵမ်းတီႈၶႃႈ။
ၶဝ်ၸိူဝ်းဢၼ်မႃႇၼႃႉယႂ်ႇၼၼ်ႉလၢတ်ႈၵႂၢမ်း မုသႃႇလွင်ႈၶႃႈၸဝ်ႈသေၵေႃႈ၊ ၶႃႈၸဝ်ႈပႃးၸႂ်ပႃးၶေႃးပႂ်ႉၸွမ်းတြႃးဢၼ် ၸဝ်ႈႁဝ်းသင်ႇသွၼ်ပၼ်ၸိူဝ်းၼၼ်ႉ တီႈၶႃႈဢေႃႈ။
ၶဝ်ၸိူဝ်းၼၼ်ႉဢမ်ႇမီးတၢင်းႁုတီႈၶႃႈ။ ၶႃႈၸဝ်ႈၸမ်ႉထူပ်းႁၼ်တၢင်းသိူဝ်းပျေႃႇ ၵႃႈၼႂ်းတြႃးၸဝ်ႈႁဝ်းတီႈၶႃႈဢေႃႈ။
တၢင်းဢၼ်ၶႃႈၸဝ်ႈလႆႈၶၢမ်ႇတၢမ်ႇဢပျတ်ႈၼၼ်ႉလီၼႃႇပုၼ်ႈၶႃႈၸဝ်ႈ၊ ၵွပ်ႈပိူဝ်ႈဢၼ်ၼၼ်ႉႁဵတ်းႁႂ်ႈၶႃႈၸဝ်ႈ ၸၢင်ႈသွၼ်ဢဝ်ပိင်းၺၢပ်ႈၸဝ်ႈႁဝ်း ၸိူဝ်းၼၼ်ႉတီႈၶႃႈဢေႃႈ။
တြႃးဢၼ်ၸဝ်ႈႁဝ်းပၼ်တီႈၶႃႈၸဝ်ႈၼၼ်ႉ ယဵင်ႈၶႅၼ်းလီၼႃႇသေငိုၼ်းၶမ်းၵႃႈၼႂ်း လေႃးၵႃႉၼႆႉဢေႃႈ။
ၸဝ်ႈႁဝ်းၽၢၼ်ႇသၢင်းႁဵတ်းပဵၼ်ၶႃႈၸဝ်ႈလႄႈ ႁႂ်ႈၶႃႈၸဝ်ႈလႆႈယူႇလူင်ႉလီလွတ်ႈလီ တီႈၶႃႈဢေႃႈ။ ၶႅၼ်းတေႃႈပၼ်ၸႂ်ဢၼ်ၸၢင်ႈပွင်ႇၸၢင်ႈလႅင်း ႁႂ်ႈၶႃႈၸဝ်ႈသွၼ်ဢဝ်တြႃးၸဝ်ႈႁဝ်း ၸိူဝ်းၼၼ်ႉသေၵမ်းတီႈၶႃႈ။
ၶဝ်ၸိူဝ်းဢၼ်ၵူဝ်ယမ်ၸဝ်ႈႁဝ်းၼၼ်ႉတၵ်းႁၼ်ၶႃႈၸဝ်ႈလႄႈဢွၼ်ၵၼ်ၸူမ်းသိူဝ်း၊ ၵွပ်ႈပိူဝ်ႈၶႃႈၸဝ်ႈယုမ်ႇမၢတ်ႈဢိင်ပိုင်ႈၵတိ ၸဝ်ႈႁဝ်းၼၼ်ႉတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈ ႁုလွင်ႈတၢင်းဢၼ်ၸဝ်ႈႁဝ်းၸီႇယၢင်ႇ ၸိူဝ်းၼၼ်ႉပဵၼ်ဢၼ်သိုဝ်ႈတေႃႇ ဢိၵ်ႇတင်းလွင်ႈတၢင်းဢၼ်ၸဝ်ႈႁဝ်း ပၼ်တၢမ်ႇတီႈၶႃႈၸဝ်ႈၼၼ်ႉ မႅၼ်ႈၸွမ်းၼင်ႇသဵတ်ႈၸႃႇၸဝ်ႈႁဝ်းၼၼ်ႉ တီႈၶႃႈဢေႃႈ။
ၶႅၼ်းတေႃႈႁႂ်ႈမႅတ်ႈတႃႇၵရုၼႃႇၸဝ်ႈႁဝ်းပၼ်တၢင်းဢၼ်ၵတ်းယဵၼ်ၶျၢမ်းသႃႇ၊ တီႈၶႃႈၸဝ်ႈႁဝ်းၼၼ်ႉသေၵမ်းတီႈၶႃႈ။
ၶႅၼ်းတေႃႈႁဵတ်းၵျေးၸူးတီႈၶႃႈၸဝ်ႈႁႂ်ႈလႆႈ ဢသၢၵ်ႈလိပ်းယူႇသေၵမ်းတီႈၶႃႈ။ လွင်ႈမၼ်းၸမ်ႉ၊ၶႃႈၸဝ်ႈထူပ်းႁၼ် တၢင်းဢၼ်သိူဝ်းပျေႃႇၵႃႈၼႂ်းတြႃး ၸဝ်ႈႁဝ်းတီႈၶႃႈဢေႃႈ။
ႁႂ်ႈၶဝ်ၸိူဝ်းဢၼ်မႃႇၼႃႉယႂ်ႇၼၼ်ႉလႆႈ ဢူၵ်းဢၢႆသေၵမ်းလူၺ်ႈ။ လွင်ႈမၼ်းယင်းဢမ်ႇမီးလႄႈၶဝ်ယႃႉၵဝ်း ၶႃႈၸဝ်ႈတီႈၶႃႈဢေႃႈ။ ၶႃႈၸဝ်ႈၸမ်ႉ၊တၵ်းၶႆႈၸႂ်ဝူၼ်ႉၸႂ်လွင်ႈတြႃး ၸဝ်ႈႁဝ်းတီႈၶႃႈဢေႃႈ။
ႁႂ်ႈၶဝ်ၸိူဝ်းဢၼ်ၵူဝ်ယမ်ၸဝ်ႈႁဝ်းဢၼ်ဝႃႈၶဝ်ၸိူဝ်းဢၼ်၊ႁုပိင်းၺၢပ်ႈၸဝ်ႈႁဝ်းၸိူဝ်းၼၼ်ႉ ဢွၼ်ၵၼ်မႃးၸူးတီႈၶႃႈၸဝ်ႈသေၵမ်းလူၺ်ႈ။
ႁႂ်ႈၶႃႈၸဝ်ႈပႂ်ႉၵမ်ပႂ်ႉၸွမ်းပိင်းၺၢပ်ႈတြႃး ၸဝ်ႈႁဝ်းလုမ်းလုမ်းလႄႈ ႁႂ်ႈၶႃႈၸဝ်ႈၵၢင်းလွတ်ႈတင်းတၢင်းဢၼ် ဢူၵ်းဢၢႆသေၵမ်းတီႈၶႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈမုင်ႈထႃႈမွင်းထႃႈတၢင်းဢၼ်ၸဝ်ႈႁဝ်းၵႄႇၶျွတ်ႈဢဝ်ၼၼ်ႉ ထၢၼ်ႈပေႃးၸႂ်လုႁႅင်းဢူၼ်ႈၵႂႃႇတီႈၶႃႈဢေႃႈ။ ၼႂ်းဝႃႈၼၼ်သေၵေႃႈၶႃႈၸဝ်ႈ ယင်းယုမ်ႇမၢတ်ႈဢိင်ပိုင်ႈၼႂ်းၼုၵ်ႈၵပၢတ်ႈ ၸဝ်ႈႁဝ်းယူႇတီႈၶႃႈဢေႃႈ။
ၶႃႈၸဝ်ႈပႂ်ႉထႃႈၵတိၸဝ်ႈႁဝ်းယူႇထၢၼ်ႈပေႃးမၢၵ်ႇတႃၶႃႈၸဝ်ႈႁႅင်းဢူၼ်ႈၵႂႃႇ၊ တေႃႇထိုင်ၶိင်ႇဢၼ်ၶႃႈၸဝ်ႈလဝ်ႈထၢမ်ဝႃႈ၊ “ၸဝ်ႈႁဝ်းတၵ်းၸွႆႈထႅမ်ၶႃႈၸဝ်ႈမိူဝ်ႈလႂ်တီႈၶႃႈ၊” ဝႃႈၼင်ႇၼႆၼၼ်ႉတီႈၶႃႈဢေႃႈ။
ၶႃႈၸဝ်ႈဢမ်ႇမီးၵႃႈၶၼ်မိူၼ်ၸိူဝ်ႉၼင်ႇ ထူင်ၼင်ၼမ်ႉမၢၵ်ႇၸပိတ်ႉဢၼ်ၽင်ႉဝႆႉၼၼ်ႉ တီႈၶႃႈဢေႃႈ။ ၼႂ်းဝႃႈၼၼ်သေၵေႃႈၶႃႈၸဝ်ႈ ဢမ်ႇလူင်လိုမ်းပိင်းၺၢပ်ႈၸဝ်ႈႁဝ်းတီႈၶႃႈ။
ၶႃႈၸဝ်ႈတၵ်းလႆႈပႂ်ႉထႃႈႁိုင်ၵႃႈႁိုဝ်တီႈၶႃႈ။ ၸဝ်ႈႁဝ်းတၵ်းပၼ်တၢမ်ႇတီႈၶဝ်ၸိူဝ်းဢၼ် တဵၵ်းငႅၼ်းၶႃႈၸဝ်ႈၼၼ်ႉမိူဝ်ႈလႂ်တီႈၶႃႈ။
ၶဝ်ၸိူဝ်းဢၼ်မႃႇၼႃႉယႂ်ႇ၊ၸိူဝ်းဢၼ် ဢမ်ႇပႂ်ႉၸွမ်းတြႃးၸဝ်ႈႁဝ်းၼၼ်ႉ၊ ဢွၼ်ၵၼ်ၶုတ်းၶုမ်ၶုတ်းႁူးႁႂ်ႈလႆႈႁၢင်ႈဢဝ် ၶႃႈၸဝ်ႈတီႈၶႃႈယဝ်ႉ။
ပိင်းၺၢပ်ႈတြႃးၸဝ်ႈႁဝ်းၵႃႈမီးတင်းသဵင်ႈတင်းလူင်ၼၼ်ႉမီးသဵတ်ႈၸႃႇတီႈၶႃႈဢေႃႈ။ လွင်ႈမၼ်းယင်းဢမ်ႇမီးလႄႈၶဝ်ဢွၼ်ၵၼ် တဵၵ်းငႅၼ်းၶႃႈၸဝ်ႈတီႈၶႃႈဢေႃႈ။ ၶႅၼ်းတေႃႈၸွႆႈထႅမ်ၶႃႈၸဝ်ႈသေၵမ်းတီႈၶႃႈ။
ၶဝ်ၸမ်တၵ်းပႄႉၼႅင်ႇႁႂ်ႈလႆႈဢဝ်ၶႃႈၸဝ်ႈ တၢႆၼၼ်ႉတီႈၶႃႈယဝ်ႉ။ ၵူၺ်းၵႃႈ၊ၶႃႈၸဝ်ႈဢမ်ႇၸုၼ်ႉပႅတ်ႈပိင်းၺၢပ်ႈ ၸဝ်ႈႁဝ်းၸိူဝ်းၼၼ်ႉတီႈၶႃႈ။
ၶႅၼ်းတေႃႈမီးၸႂ်ဢၼ်လီဢၼ်ဝၢၼ်တီႈၶႃႈၸဝ်ႈ ၸွမ်းၵႃႈၼင်ႇဢၼ်မႅတ်ႈတႃႇၵရုၼႃႇ ၸဝ်ႈႁဝ်းမီးၼၼ်ႉ ႁႂ်ႈၶႃႈၸဝ်ႈပႂ်ႉၸွမ်းထုင်းၽိင်ႈတြႃး ၸဝ်ႈႁဝ်းၸိူဝ်းၼၼ်ႉသေၵမ်းတီႈၶႃႈ။
ထႃႇဝရႃႉၽြႃး၊ တီႈၶႃႈ။ ၼုၵ်ႈၵပၢတ်ႈၸဝ်ႈတႄႇယူႇၵႃႈၼိူဝ်ၽုင်ႇၵၢင်ႁၢဝ်တႃႇသေႇဢမ်ႇထၢတ်ႇတီႈၶႃႈဢေႃႈ။
သဵတ်ႈၸႃႇၸဝ်ႈႁဝ်းမၼ်ႈၶိူင်ႇယူႇ ၵူႈၸူဝ်ႈၵူႈပၢၼ်တီႈၶႃႈဢေႃႈ။ ၸဝ်ႈႁဝ်းတႄႇႁဵတ်းလိၼ်မိူင်းတူၵ်းတီႈ တူၵ်းတၢင်းလႄႈမၼ်းလႆႈမီးယူႇ သေႇသေႇတီႈၶႃႈဢေႃႈ။
လွင်ႈတၢင်းၵႃႈမီးတင်းသဵင်ႈတင်းလူင်မီးယူႇတေႃႇထိုင်ႁွတ်ႈဝၼ်းမိူဝ်ႈၼႆႉ၊ ၵွပ်ႈပိူဝ်ႈဢမိင်ႉၸဝ်ႈႁဝ်းဢိၵ်ႇတင်းၵွပ်ႈပိူဝ်ႈၶဝ် ၵႃႈမီးတင်းသဵင်ႈတင်းလူင်၊ ပဵၼ်ၶႃႈဢၼ်ၸႂ်ႉဢၼ်သွႆၸဝ်ႈႁဝ်းတီႈၶႃႈဢေႃႈ။
သင်ဝႃႈၶႃႈၸဝ်ႈဢမ်ႇမီးတၢင်းဢၼ်မူၼ်ႈပျေႃႇယူႇၼႂ်းတြႃးၸဝ်ႈႁဝ်းၸိုင်၊ ၶႃႈၸဝ်ႈတၵ်းတၢႆၼႂ်းမိူဝ်ႈဢၼ်ၶႃႈၸဝ်ႈလႆႈ ထူပ်းၽေးမိူဝ်ႈၼၼ်ႉယဝ်ႉတီႈၶႃႈယဝ်ႉ။
ၶႃႈၸဝ်ႈတၵ်းဢမ်ႇပႄႇပႅတ်ႈတြႃးဢၼ်ၸဝ်ႈႁဝ်းသင်ႇသွၼ်ၼႄတၢင်းၼၼ်ႉလႃးလႃးတီႈၶႃႈ။ လွင်ႈမၼ်းၸမ်ႉ၊တြႃးၸိူဝ်းၼၼ်ႉႁႂ်ႈဢသၢၵ်ႈ ၶႃႈၸဝ်ႈလိပ်းယူႇတီႈၶႃႈဢေႃႈ။
ၶႃႈၸဝ်ႈပဵၼ်ၵူၼ်းၸဝ်ႈႁဝ်းတီႈၶႃႈလႄႈ ၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈသေၵမ်းတီႈၶႃႈ။ ၶႃႈၸဝ်ႈၶတ်းၸႂ်ၵျူဝ်းၸႃးႁႂ်ႈလႆႈပႂ်ႉၸွမ်း ပိင်းၺၢပ်ႈၸဝ်ႈႁဝ်းၸိူဝ်းၼၼ်ႉတီႈၶႃႈဢေႃႈ။
ၵူၼ်းႁၢႆႉၵူၼ်းမိူၵ်ႈတင်းလၢႆဢွၼ်ၵၼ်ပႂ်ႉယူႇႁႂ်ႈလႆႈဢဝ်ၶႃႈၸဝ်ႈတၢႆတီႈၶႃႈဢေႃႈ။ ၶႃႈၸဝ်ႈၸမ်ႉ၊ၶႆႈၸႂ်ဝူၼ်ႉၸႂ်တြႃးၸဝ်ႈႁဝ်း ၸိူဝ်းၼၼ်ႉယူႇတီႈၶႃႈဢေႃႈ။
ၶႃႈၸဝ်ႈႁၼ်လွင်ႈတၢင်းၵူႈၸိူဝ်ႉၵူႈပိူင်မီးတီႈသုတ်းတီႈတိူၵ်ႈမၼ်းၼၼ်ႉတီႈၶႃႈဢေႃႈ။ ပိင်းၺၢပ်ႈတြႃးၸဝ်ႈႁဝ်းၸမ်ႉ၊ပဵၼ်ဢၼ် ၸေးၸုမ်ႇတီႈၶႃႈဢေႃႈ။
ၶႃႈၸဝ်ႈထုၵ်ႇၸႂ်ႁၵ်ႉပႅင်းတြႃးၸဝ်ႈႁဝ်း တႄႉတႄႉတီႈၶႃႈဢေႃႈ။ ၶႃႈၸဝ်ႈၶႆႈၸႂ်ဝူၼ်ႉၸႂ်လွင်ႈတြႃးၼၼ်ႉ ၵူႈဝၼ်းၵူႈဝၼ်းယူႇတီႈၶႃႈဢေႃႈ။
ပိင်းၺၢပ်ႈတြႃးၸဝ်ႈႁဝ်းမီးယူႇလူၺ်ႈၵၼ်တင်း ၶႃႈၸဝ်ႈၵူႈၶိင်ႇၵူႈၶႃႇလႄႈ ႁႂ်ႈၶႃႈၸဝ်ႈလၵ်းလႅမ်သေရၢၼ်ႇသူႇၶႃႈၸဝ်ႈ တင်းလၢႆတီႈၶႃႈဢေႃႈ။
ၵွပ်ႈပိူဝ်ႈၶႃႈၸဝ်ႈၶႆႈၸႂ်ဝူၼ်ႉၸႂ်တြႃး ၸဝ်ႈႁဝ်းၸိူဝ်းၼၼ်ႉလႄႈ ယဵင်ႈၶႅၼ်းႁုပွင်ႇလႅင်းလီၼႃႇသေသြႃႇၶႃႈၸဝ်ႈတင်းသဵင်ႈတင်းလူင်လူးၵွၼ်ႇတီႈၶႃႈဢေႃႈ။
ၵွပ်ႈပိူဝ်ႈၶႃႈၸဝ်ႈပႂ်ႉၸွမ်းပိင်းၺၢပ်ႈ ၸဝ်ႈႁဝ်းၸိူဝ်းၼၼ်ႉလႄႈ ၶႃႈၸဝ်ႈယဵင်ႈၶႅၼ်းပိင်ႇၺႃႇယႂ်ႇသေၵူၼ်းထဝ်ႈတင်းလၢႆလူးၵွၼ်ႇတီႈၶႃႈဢေႃႈ။
ၵွပ်ႈပိူဝ်ႈၶႃႈၸဝ်ႈၶႂ်ႈပႂ်ႉၸွမ်းၼုၵ်ႈၵပၢတ်ႈ ၸဝ်ႈႁဝ်းၼၼ်ႉလႄႈ ၶႃႈၸဝ်ႈဝႄႈပႅတ်ႈဢၵျၢင်ႉဢၼ်ဢမ်ႇလီ ဢမ်ႇငၢမ်းၵႃႈမီးၼၼ်ႉတီႈၶႃႈယဝ်ႉ။
ၵွပ်ႈပိူဝ်ႈတူဝ်ၸဝ်ႈႁဝ်းပဵၼ်သြႃႇ ၶႃႈၸဝ်ႈၼၼ်ႉလႄႈ ၶႃႈၸဝ်ႈဢမ်ႇပိုၼ်ႉဢမ်ႇပႅတ်ႈတြႃး ၸဝ်ႈႁဝ်းၸိူဝ်းၼၼ်ႉတီႈၶႃႈ။
ဢရႃႉသႃႇၼမ်ႉၸဵမ်းတြႃးၸဝ်ႈႁဝ်းၸိူဝ်းၼၼ်ႉဝၢၼ်ၼႃႇလူင်လၢင်လႄႈ ပဵၼ်ဢၼ်ယဵင်ႈၶႅၼ်းဝၢၼ်ၼႃႇသေၼမ်ႉၽိုင်ႈ လူးၵွၼ်ႇတီႈၶႃႈဢေႃႈ။
ၶႃႈၸဝ်ႈလႆႈဢမျတ်ႈပိင်ႇၺႃႇၵႃႈၼႂ်းတြႃး ၸဝ်ႈႁဝ်းၸိူဝ်းၼၼ်ႉလႄႈ ၶႃႈၸဝ်ႈငိၼ်းၸင်းဢၵျၢင်ႉဢၼ်ဢမ်ႇလီ ဢမ်ႇငၢမ်းၵႃႈမီးၼၼ်ႉတီႈၶႃႈဢေႃႈ။
ၼုၵ်ႈၵပၢတ်ႈၸဝ်ႈႁဝ်းပဵၼ်ၵွၵ်းၽႆးဢၼ်ၼႄသဵၼ်ႈတၢင်းတီႈၶႃႈၸဝ်ႈလႄႈ ပဵၼ်ဢၼ်လႅင်းပုၼ်ႈသဵၼ်ႈတၢင်းၶႃႈၸဝ်ႈ တီႈၶႃႈဢေႃႈ။
ၶႃႈၸဝ်ႈဝႆႉၵတိသဵတ်ႈၸႃႇပုၼ်ႈဢၼ် တၵ်းပႂ်ႉၸွမ်း တြႃးဢၼ်သိုဝ်ႈတေႃႇဢၼ်ၸဝ်ႈႁဝ်း သင်ႇသွၼ်ၼႄတၢင်းၼၼ်ႉ တႄႉတႄႉဝႃႈဝႃႈတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈလႆႈထူပ်းၽေးဢၼ်လီၵူဝ်လီႁႄ တႄႉတႄႉဝႃႈဝႃႈၼၼ်ႉတီႈၶႃႈဢေႃႈ။ ၶႅၼ်းတေႃႈႁႂ်ႈၶႃႈၸဝ်ႈလႆႈဢသၢၵ်ႈလိပ်းယူႇ ၸွမ်းၵႃႈၼင်ႇဢၼ်ၸဝ်ႈႁဝ်းဝႆႉၵတိၼၼ်ႉ သေၵမ်းတီႈၶႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈႁပ်ႉတုင်းဢဝ်ၵႂၢမ်းသူးတွင်း ဢၼ်ၶႃႈၸဝ်ႈယွင်ႈယေႃးၵျေးၸူး ၸဝ်ႈႁဝ်းၼၼ်ႉသေလႄႈ သင်ႇသွၼ်ပၼ်ပိင်းၺၢပ်ႈၸဝ်ႈႁဝ်းၸိူဝ်းၼၼ်ႉ တီႈၶႃႈၸဝ်ႈသေၵမ်းတီႈၶႃႈ။
ၶႃႈၸဝ်ႈတၼ်းဝႆႉတႃႇတေၸုၼ်ႉဢသၢၵ်ႈ ၶႃႈၸဝ်ႈတႃႇသေႇတီႈၶႃႈဢေႃႈ။ ၵူၺ်းၵႃႈ၊ၶႃႈၸဝ်ႈဢမ်ႇလူင်လိုမ်းတြႃး ၸဝ်ႈႁဝ်းတီႈၶႃႈ။
ၵူၼ်းႁၢႆႉၵူၼ်းမိူၵ်ႈတင်းလၢႆႁၢင်ႈၶိုမ်းဝႆႉပုၼ်ႈ ၶႃႈၸဝ်ႈတီႈၶႃႈယဝ်ႉ။ ၵူၺ်းၵႃႈ၊ၶႃႈၸဝ်ႈဢမ်ႇဝႄႈပိူင်ႈသေ ပိင်းၺၢပ်ႈၸဝ်ႈႁဝ်းတီႈၶႃႈ။
ပိင်းၺၢပ်ႈတြႃးၸဝ်ႈႁဝ်းပဵၼ်ဢမူၺ်ႇဢၼ်ၶႃႈၸဝ်ႈလႆႈၶၢမ်ႇဢဝ်တႃႇသေႇၼၼ်ႉလႄႈ ပဵၼ်တီႈဢၼ်ႁူဝ်ၸႂ်ၶႃႈၸဝ်ႈသိူဝ်းသႂၢင်ႇ တီႈၶႃႈဢေႃႈ။
ၶႃႈၸဝ်ႈတႅပ်းတတ်းၸႂ်ဝႆႉႁႂ်ႈလႆႈပႂ်ႉၸွမ်းတြႃး ၸဝ်ႈႁဝ်းၸိူဝ်းၼၼ်ႉ၊ တေႃႇထိုင်ႁွတ်ႈဝၼ်းတၢႆၼၼ်ႉတီႈၶႃႈဢေႃႈ။
ၶႃႈၸဝ်ႈငိၼ်းၸင်းၶဝ်ၸိူဝ်းဢၼ်မီး ၸႂ်သွင်ငၢမ်ႈၼၼ်ႉလႄႈ သမ်ႉထုၵ်ႇၸႂ်ႁၵ်ႉပႅင်းတြႃး ၸဝ်ႈႁဝ်းတီႈၶႃႈဢေႃႈ။
ၸဝ်ႈႁဝ်းပဵၼ်ၸဝ်ႈဢၼ်ႁႄႉဢၼ်ၶႄပၼ် ၶႃႈၸဝ်ႈဢိၵ်ႇတင်းၸဝ်ႈဢၼ်ၵႅတ်ႇၶႄ ႁႄႉၵင်ႈၶႃႈၸဝ်ႈလႄႈ ၶႃႈၸဝ်ႈမုင်ႈထႃႈမွင်းထႃႈၵတိၸဝ်ႈႁဝ်းဢေႃႈ။
ၵူၼ်းဢၼ်ႁဵတ်းတုၸရိူၵ်ႈၶဝ်႟။ ဢွၼ်ၵၼ် ဢွၵ်ႇၵႂႃႇသေၵႃႈတီႈၵဝ်တႃႉ။ ၵဝ်တၵ်းပႂ်ႉၸွမ်းပိင်းၺၢပ်ႈၽြႃးပဵၼ်ၸဝ်ႈၵဝ်ၸိူဝ်းၼၼ်ႉဢေႃႈ။
ၶႅၼ်းတေႃႈပၼ်ဢဵၼ်ပၼ်ႁႅင်းၶႃႈၸဝ်ႈၸွမ်းၵႃႈၼင်ႇဢၼ်ၸဝ်ႈႁဝ်းဝႆႉၵတိၼၼ်ႉ၊ ႁႂ်ႈၶႃႈၸဝ်ႈလႆႈဢသၢၵ်ႈလိပ်းယူႇ သေၵမ်းတီႈၶႃႈ။ ၶႅၼ်းတေႃႈယႃႇပေႁႂ်ႈၶႃႈၸဝ်ႈလႆႈ ၸႂ်လုႁႅင်းႁႅင်းဢူၼ်ႈ ၼႂ်းလွင်ႈတၢင်းဢၼ်ၶႃႈၸဝ်ႈမုင်ႈထႃႈမွင်းထႃႈ ယူႇၼၼ်ႉသေၵမ်းတီႈၶႃႈ။
ဢုမ်ႈႁွပ်ႇဢဝ်ၶႃႈၸဝ်ႈသေၵမ်းတီႈၶႃႈ။ ပေႃးႁဵတ်းၸိူဝ်ႉၼင်ၼၼ်ၸိုင်၊ၶႃႈၸဝ်ႈ တၵ်းတေလႆႈယူႇလူင်ႉလီလွတ်ႈလီလႄႈ တၵ်းဝႆႉၸႂ်တၢင်ဢၼ်ၸပ်းၸွႆးတီႈပိင်းၺၢပ်ႈ ၸဝ်ႈႁဝ်းယူႇတႃႇသေႇတီႈၶႃႈဢေႃႈ။
ၸဝ်ႈႁဝ်းပႄႇၶဝ်ၸိူဝ်းဢၼ်ပိူင်ႈထုင်းၽိင်ႈတြႃးၸဝ်ႈႁဝ်းၵႂႃႇၵႃႈမီးၼၼ်ႉပႅတ်ႈတီႈၶႃႈဢေႃႈ။ ၸႂ်ႈတီႈၶႃႈယဝ်ႉ။ ပရိယႄႇၶဝ်ၼၼ်ႉ ပဵၼ်ဢၼ်လၢႆလၢႆတီႈၶႃႈဢေႃႈ။
ၵူၼ်းလိၼ်မိူင်းၸိူဝ်းဢၼ်ႁၢႆႉဢၼ်မိူၵ်ႈ တင်းသဵင်ႈတင်းလူင်ၼၼ်ႉ ၸဝ်ႈႁဝ်းမၢတ်ႈပဵၼ်ၸိူဝ်ႉၼင်ႇၶီႈၽုၼ်ႇ တီႈၶႃႈဢေႃႈ။ ပိူဝ်ႈၼႆလႄႈၶႃႈၸဝ်ႈၵျိူၵ်ႈၸႂ်ထုၵ်ႇၸႂ် တြႃးဢၼ်ၸဝ်ႈႁဝ်းသင်ႇသွၼ်ၼႄတၢင်း ၸိူဝ်းၼၼ်ႉတီႈၶႃႈဢေႃႈ။
တုမ်ႇၶူၼ်ၼိူဝ်ႉၶႃႈၸဝ်ႈယူၵ်ႉၵွပ်ႈပိူဝ်ႈတၢင်းဢၼ်တူၵ်းၸႂ်တိုၼ်ႇၸႂ်ၸဝ်ႈႁဝ်းၼၼ်ႉလႄႈ ၶႃႈၸဝ်ႈၵူဝ်ႁႄလွင်ႈတၢင်းဢၼ်ၸဝ်ႈႁဝ်း ၸီႇယၢင်ႇဝႆႉၸိူဝ်းၼၼ်ႉတီႈၶႃႈဢေႃႈ။
ၶႃႈၸဝ်ႈႁဵတ်းတၢင်းဢၼ်သိုဝ်ႈဢၼ်တေႃႇဢိၵ်ႇတင်းတၢင်းဢၼ်လီဢၼ်ငၢမ်းတီႈၶႃႈဢေႃႈ။ ၶႅၼ်းတေႃႈယႃႇပေၸုၼ်ႉပႅတ်ႈၶႃႈၸဝ်ႈဝႆႉ ၵႃႈၼႂ်းမိုဝ်းရၢၼ်ႇသူႇၶႃႈၸဝ်ႈတင်းလၢႆ သေၵမ်းတီႈၶႃႈ။
ၶႅၼ်းတေႃႈဝႆႉၵတိဝႃႈၸဝ်ႈႁဝ်းတၵ်း ၸွႆႈထႅမ်ၶႃႈၸဝ်ႈႁဝ်းၼၼ်ႉသေလႄႈ ၶႅၼ်းတေႃႈယႃႇပေႁႂ်ႈၶဝ်ၸိူဝ်းဢၼ် မႃႇၼႃႉယႂ်ႇၼၼ်ႉလႆႈတဵၵ်းငႅၼ်းၶႃႈၸဝ်ႈ သေၵမ်းတီႈၶႃႈ။
ၶႃႈၸဝ်ႈပႂ်ႉထႃႈၵျေးၸူးတၢင်းဢၼ်ၸဝ်ႈႁဝ်းၵႄႇၶျွတ်ႈဢဝ်ဢိၵ်ႇတင်းၵတိၸဝ်ႈႁဝ်း ဢၼ်ၵႄႇသႄႇထုတ်ႇၼုၵ်ႈဢဝ်ၼၼ်ႉယူႇ ထၢၼ်ႈပေႃးမၢၵ်ႇတႃၶႃႈၸဝ်ႈႁႅင်းဢူၼ်ႈ ၵႂႃႇတီႈၶႃႈဢေႃႈ။
ၶႅၼ်းတေႃႈႁဵတ်းတီႈၶႃႈၸဝ်ႈၸွမ်းၼင်ႇဢၼ်မႅတ်ႈတႃႇၵရုၼႃႇၸဝ်ႈႁဝ်းမီးၼၼ်ႉလႄႈ သင်ႇသွၼ်ပၼ်ပိင်းၺၢပ်ႈၸဝ်ႈႁဝ်းၸိူဝ်းၼၼ်ႉတီႈၶႃႈၸဝ်ႈသေၵမ်းတီႈၶႃႈ။
ၶႃႈၸဝ်ႈပဵၼ်ၶႃႈဢၼ်ၸႂ်ႉဢၼ်သွႆၸဝ်ႈႁဝ်း တီႈၶႃႈဢေႃႈ။ ၶႅၼ်းတေႃႈပၼ်ၸႂ်ဢၼ်ၸၢင်ႈပွင်ႇၸၢင်ႈလႅင်း ပုၼ်ႈဢၼ်ၶႃႈၸဝ်ႈတၵ်းႁုဢေႃးဝႃႇတႃႉ ၸဝ်ႈႁဝ်းၸိူဝ်းၼၼ်ႉသေၵမ်းတီႈၶႃႈ။
ထႃႇဝရႃႉၽြႃး၊ တီႈၶႃႈ၊ၶိင်ႇဢၼ်ၸဝ်ႈႁဝ်းထုၵ်ႇလီၸီႇယၢင်ႇၼၼ်ႉႁွတ်ႈထိုင်တီႈၶႃႈယဝ်ႉ။ လွင်ႈမၼ်းၸမ်ႉၶဝ်ၼၼ်ႉပႄႇပႅတ်ႈတြႃး ၸဝ်ႈႁဝ်းယဝ်ႉတီႈၶႃႈဢေႃႈ။
ၶႃႈၸဝ်ႈထုၵ်ႇၸႂ်ႁၵ်ႉပႅင်းပိင်းၺၢပ်ႈၸဝ်ႈႁဝ်းၸိူဝ်းၼၼ်ႉၼႃႇသေၶမ်းဢမ်ႇၵႃး ယဵင်ႈၶႅၼ်းထုၵ်ႇၸႂ်ႁၵ်ႉပႅင်းလိူဝ်တွၼ်းၼႃႇသေ ၶမ်းလွတ်ႈငၢၼ်ႇတီႈၶႃႈဢေႃႈ။
ပိူဝ်ႈၼႆလႄႈၶႃႈၸဝ်ႈဢဝ်ပိင်းၺၢပ်ႈၸဝ်ႈႁဝ်းၸိူဝ်းၼၼ်ႉပႂ်ႉထိင်းယၢင်ႈတိၼ်ၶႃႈၸဝ်ႈလႄႈ ငိၼ်းၸင်းသဵၼ်ႈတၢင်းဢၼ်ၽိတ်းပိူင်ႈ ၵႃႈမီးၼၼ်ႉတီႈၶႃႈဢေႃႈ။
ဢေႃးဝႃႇတႃႉၸဝ်ႈႁဝ်းၸိူဝ်းၼၼ်ႉပဵၼ်ဢၼ် လီဢၢမ်းၼႃႇလႄႈ ၶႃႈၸဝ်ႈပႃးတၢင်းႁူဝ်ၸႂ်သဵင်ႈသဵင်ႈလႄႈ ပႂ်ႉၵမ်ပႂ်ႉၸွမ်းတီႈၶႃႈဢေႃႈ။
တၢင်းဢၼ်ၽုၺ်ႇမွၵ်ႇလၢတ်ႈၼႄၼုၵ်ႈၵပၢတ်ႈၸဝ်ႈႁဝ်းၼၼ်ႉပၼ်ဢၼ်လႅင်းလႄႈ ၸၢင်ႈႁႂ်ႈၶဝ်ၸိူဝ်းဢၼ်ငိူဝ်ႈငႃႉၼၼ်ႉ လၵ်းလႅမ်မႃးတီႈၶႃႈဢေႃႈ။
ၶႃႈၸဝ်ႈဢႃႈပၢၵ်ႇသေလႄႈထူၺ်ႈၸႂ် သဝ်ၸႂ်လူင်ယူႇ ၵွပ်ႈပိူဝ်ႈဢၼ်ၶႃႈၸဝ်ႈၸႂ်ၸပ်းၶႂ်ႈလႆႈပိင်းၺၢပ်ႈ ၸဝ်ႈႁဝ်းၸိူဝ်းၼၼ်ႉတီႈၶႃႈဢေႃႈ။
ၶႅၼ်းတေႃႈဝၢႆႇၸူးတီႈၶႃႈၸဝ်ႈလႄႈ ႁဵတ်းၵျေးၸူးတီႈၶႃႈၸဝ်ႈ ၸွမ်းၵႃႈၼင်ႇဢၼ်ၸဝ်ႈႁဝ်းၸၢင်ႈႁဵတ်း တီႈၶဝ်ၸိူဝ်းဢၼ်ႁၵ်ႉၸဝ်ႈႁဝ်းၼၼ်ႉ သေၵမ်းတီႈၶႃႈ။
ၶႅၼ်းတေႃႈၸွမ်းလူၺ်ႈၵတိၸဝ်ႈႁဝ်း ၼၼ်ႉသေလႄႈ ယႃႇပေႁႂ်ႈၶႃႈၸဝ်ႈတူၵ်းသုမ်းသေၵမ်းတီႈၶႃႈ။ ယႃႇပေႁႂ်ႈတုၸရိူၵ်ႈဢၼ်လႂ်လႆႈဢုပ်ႉပိူင်ႇ ၶႃႈၸဝ်ႈသေၵမ်းတီႈၶႃႈ။
ၶႅၼ်းတေႃႈၵႄႇသႄႇၶျွတ်ႈဢဝ် ၶႃႈၸဝ်ႈလွတ်ႈသေ ၵႃႈၼႂ်းမိုဝ်းၶဝ်ၸိူဝ်းဢၼ်တဵၵ်းငႅၼ်း ၶႃႈၸဝ်ႈၸိူဝ်းၼၼ်ႉ ႁႂ်ႈၶႃႈၸဝ်ႈလႆႈပႂ်ႉၸွမ်းပိင်းၺၢပ်ႈတြႃး ၸဝ်ႈႁဝ်းသေၵမ်းတီႈၶႃႈ။
ၶႅၼ်းတေႃႈပၼ်တၢင်းလီတီႈၶႃႈၸဝ်ႈႁႂ်ႈလႆႈယူႇသိုဝ်ႈၼႃႈတႂ်ႈတႃၸဝ်ႈႁဝ်းလႄႈ သင်ႇသွၼ်ပၼ်တြႃးၸဝ်ႈႁဝ်းၸိူဝ်းၼၼ်ႉ တီႈၶႃႈၸဝ်ႈသေၵမ်းတီႈၶႃႈ။
ၼမ်ႉတႃၶႃႈၸဝ်ႈလေႃႇလႆဢွၵ်ႇမႃးထၼ်ႇ ၼမ်ႉႁွင်ႈၼမ်ႉၵႄးယူႇ ၵွပ်ႈပိူဝ်ႈၵူၼ်းတင်းလၢႆဢမ်ႇပႂ်ႉဢမ်ႇၸွမ်းတြႃး ၸဝ်ႈႁဝ်းၼၼ်ႉတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်း သိုဝ်ႈတေႃႇတီႈၶႃႈဢေႃႈ။ ထုင်းၽိင်ႈတြႃးၸဝ်ႈႁဝ်းၸိူဝ်းၼၼ်ႉၵေႃႈ သိုဝ်ႈတေႃႇတီႈၶႃႈဢေႃႈ။
ထုင်းတြႃးဢၼ်ၸဝ်ႈႁဝ်းပၼ်ဝႆႉၸိူဝ်းၼၼ်ႉ ပဵၼ်ဢၼ်တတ်းၽဵင်ႇလႄႈသိုဝ်ႈတေႃႇ တီႈၶႃႈဢေႃႈ။
တေႃးသႃႉတၢင်းဢၼ်ၸႂ်မႆႈၶႂ်ႈၸႃႉၼၼ်ႉမႆႈယူႇမိူၼ်ၸိူဝ်ႉၼင်ႇၽႆးၵႃႈၼႂ်းႁူဝ်ၸႂ်ၶႃႈၸဝ်ႈ ၵွပ်ႈပိူဝ်ႈရၢၼ်ႇသူႇၶႃႈၸဝ်ႈၸိူဝ်းၼၼ်ႉ ဢမ်ႇဝႆႉဢယေးတီႈပိင်းၺၢပ်ႈၸဝ်ႈႁဝ်း ၼၼ်ႉတီႈၶႃႈဢေႃႈ။
ၵွပ်ႈပိူဝ်ႈၵတိၸဝ်ႈႁဝ်းတၵ်းပဵၼ်ၸွမ်း ဢမၢၼ်ႇၶၼ်ပဵၼ်လႄႈ ၶႃႈၸဝ်ႈထုၵ်ႇၸႂ်ႁၵ်ႉပႅင်းၼႃႇတီႈၶႃႈဢေႃႈ။
ၶႃႈၸဝ်ႈပဵၼ်ၵူၼ်းဢၼ်လဵၵ်ႉၼွႆႉလႄႈပိူၼ်ႈႁဵတ်းဢမ်ႇပေႃးၼင်ႇႁိုဝ်တီႈၶႃႈၸဝ်ႈဢေႃႈ။ ၵူၺ်းၵႃႈ၊ၶႃႈၸဝ်ႈဢမ်ႇလူင်လိုမ်းဢေႃးဝႃႇတႃႉၸဝ်ႈႁဝ်းၸိူဝ်းၼၼ်ႉတီႈၶႃႈ။
တၢင်းဢၼ်သိုဝ်ႈတေႃႇၸဝ်ႈႁဝ်းၼၼ်ႉပဵၼ်တၢင်းဢၼ်သိုဝ်ႈတေႃႇၼိၵ်ႈၸႃႉထႃႇဝရႃႉလႄႈ တြႃးၸဝ်ႈႁဝ်းၼၼ်ႉပဵၼ်သဵတ်ႈၸႃႇတြႃး တီႈၶႃႈဢေႃႈ။
ၶႃႈၸဝ်ႈတဵမ်ဝႆႉတင်းတုၵ်ႉၶႃႉဢိၵ်ႇတင်း တၢင်းဢၼ်မႆႈၸႂ်ႁွၼ်ႉၸႂ်တီႈၶႃႈဢေႃႈ။ ၼႂ်းဝႃႈၼၼ်သေၵေႃႈပိင်းၺၢပ်ႈတြႃးၸဝ်ႈႁဝ်းႁႂ်ႈၶႃႈၸဝ်ႈလႆႈမူၼ်ႈပျေႃႇတီႈၶႃႈဢေႃႈ။
တြႃးဢၼ်ၸဝ်ႈႁဝ်းသင်ႇသွၼ်ၼႄတၢင်းပၼ်ၼၼ်ႉသိုဝ်ႈတေႃႇယူႇတႃႇသေႇတီႈၶႃႈဢေႃႈ။ ၶႅၼ်းတေႃႈပၼ်ၸႂ်ဢၼ်ၸၢင်ႈပွင်ႇၸၢင်ႈလႅင်း တီႈၶႃႈၸဝ်ႈ ႁႂ်ႈၶႃႈၸဝ်ႈလႆႈဢသၢၵ်ႈလိပ်းယူႇသေၵမ်းတီႈၶႃႈ။
ၶႃႈၸဝ်ႈပႃးတၢင်းႁူဝ်ၸႂ်သဵင်ႈသဵင်ႈလႄႈႁွင်ႉၵၢဝ်ႇတီႈၸဝ်ႈႁဝ်းတီႈၶႃႈဢေႃႈ။ ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈၶိုၼ်းဢိူဝ် သေၵမ်းတီႈၶႃႈ။ ၶႃႈၸဝ်ႈတၵ်းပႂ်ႉၸွမ်းထုင်းၽိင်ႈတြႃးၸဝ်ႈႁဝ်းၸိူဝ်းၼၼ်ႉတီႈၶႃႈဢေႃႈ။
ၶႃႈၸဝ်ႈႁွင်ႉၵၢဝ်ႇတီႈၸဝ်ႈႁဝ်းတီႈၶႃႈဢေႃႈ။ ၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈ သေၵမ်းတီႈၶႃႈ။ ၶႃႈၸဝ်ႈတၵ်းပႂ်ႉၸွမ်းထုင်းၽိင်ႈတြႃး ၸဝ်ႈႁဝ်းၸိူဝ်းၼၼ်ႉတီႈၶႃႈဢေႃႈ။
ၸူဝ်ႈဢၼ်မိူင်းဢမ်ႇပႆႇလႅင်းၼၼ်ႉၶႃႈၸဝ်ႈႁွင်ႉႁႃၸဝ်ႈႁဝ်းပုၼ်ႈတၢင်းဢၼ်ၸွႆႈ ဢၼ်ထႅမ်လႄႈၶႃႈၸဝ်ႈမုင်ႈထႃႈမွင်းထႃႈ ၵတိၸဝ်ႈႁဝ်းတီႈၶႃႈဢေႃႈ။
ၶႃႈၸဝ်ႈၼွၼ်းဢမ်ႇလပ်းလႆႈတင်းၶိုၼ်းယူႇ ႁႂ်ႈလႆႈၶႆႈၸႂ်ဝူၼ်ႉၸႂ်၊ တြႃးဢၼ်ၸဝ်ႈႁဝ်းသင်ႇသွၼ်ၼႄတၢင်းၼၼ်ႉ ၸိူဝ်းၼၼ်ႉတီႈၶႃႈဢေႃႈ။
ၶႅၼ်းတေႃႈထွမ်ႇသဵင်ၶႃႈၸဝ်ႈ ၸွမ်းၵႃႈၼင်ႇဢၼ် မႅတ်ႈတႃႇၵရုၼႃႇၸဝ်ႈႁဝ်းမီးၼၼ်ႉ သေၵမ်းတီႈၶႃႈ။ ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈႁႂ်ႈ ၶႃႈၸဝ်ႈဢသၢၵ်ႈလိပ်းယူႇ၊ ၸွမ်းလူၺ်ႈၵျေးၸူးၵရုၼႃႇၸဝ်ႈႁဝ်းၼၼ်ႉ သေၵမ်းတီႈၶႃႈ။
ၶဝ်ၸိူဝ်းဢၼ်ႁၢဝ်ႉၵျၢမ်းၼိၵ်ႈၸၢၵ်ႈငႅၼ်းသႄးၶႃႈၸဝ်ႈၼၼ်ႉသုတ်ႉၸမ်မႃးတီႈၶႃႈယဝ်ႉ။ ၶဝ်ၵႆၵၼ်တင်းတြႃးၸဝ်ႈႁဝ်းတီႈၶႃႈဢေႃႈ။
ထႃႇဝရႃႉၽြႃး၊ ၸမ်ႉ၊မီးၸမ်ယူႇတီႈၶႃႈဢေႃႈ။ ပိင်းၺၢပ်ႈတြႃးၸဝ်ႈႁဝ်းၵူႈၸိူဝ်ႉၵူႈပိူင်ၵေႃႈ တႄႇမၼ်ႈယူႇတီႈၶႃႈဢေႃႈ။
ၸဵမ်မိူဝ်ႈၵွၼ်ႇဢွၼ်ၼႆႉၼၼ်ႉၶႃႈၸဝ်ႈသွၼ်ဢဝ် တြႃးဢၼ်ၸဝ်ႈႁဝ်းသင်ႇသွၼ်ၼႄတၢင်း ၸိူဝ်းၼၼ်ႉယဝ်ႉလႄႈ ၸဝ်ႈႁဝ်းႁႂ်ႈတြႃးၸိူဝ်းၼၼ်ႉတႄႇယူႇသေႇသေႇ တီႈၶႃႈဢေႃႈ။
ၶႅၼ်းတေႃႈလူတူၺ်းတုၵ်ႉၶႃႉတၢင်းၽၢၼ်ၶႃႈၸဝ်ႈလႄႈၵႄႇသႄႇၶျွတ်ႈဢဝ်ၶႃႈၸဝ်ႈ ၵွပ်ႈပိူဝ်ႈဢၼ်ၶႃႈၸဝ်ႈဢမ်ႇပိုၼ်ႉဢမ်ႇပႅတ်ႈ တြႃးၸဝ်ႈႁဝ်းၼၼ်ႉသေၵမ်းတီႈၶႃႈ။
ၶႅၼ်းတေႃႈၵႅတ်ႇၶႄႁႄႉၵင်ႈဢမု ၶႃႈၸဝ်ႈသေလႄႈပွႆႇႁႂ်ႈၶႃႈၸဝ်ႈလွတ်ႈလႅဝ်းသေၵမ်းတီႈၶႃႈ။ ၵႄႇၶျွတ်ႈဢဝ်ၶႃႈၸဝ်ႈၸွမ်းၵႃႈၼင်ႇဢၼ် ၸဝ်ႈႁဝ်းဝႆႉၵတိၼၼ်ႉသေၵမ်းတီႈၶႃႈ။
ၶဝ်ၸိူဝ်းဢၼ်ႁၢႆႉဢၼ်မိူၵ်ႈတေလႆႈၶၢမ်ႇဢဝ် ၵျေးၸူးတၢင်းဢၼ်ၵႄႇၶျွတ်ႈဢဝ်ၼၼ်ႉ ဢမ်ႇၸႂ်ႈတီႈၶႃႈ။ လွင်ႈမၼ်းၸမ်ႉၶဝ်ဢမ်ႇပႂ်ႉဢမ်ႇၸွမ်းတြႃး ၸဝ်ႈႁဝ်းၸိူဝ်းၼၼ်ႉတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၸႂ်ဢၼ်ၸဝ်ႈႁဝ်းၸၢင်ႈႁၵ်ႉဢဵတ်းလူၼၼ်ႉယႂ်ႇၼႃႇတီႈၶႃႈဢေႃႈ။ ၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈ ၸွမ်းလူၺ်ႈၵျေးၸူးၵရုၼႃႇၸဝ်ႈႁဝ်းၼၼ်ႉ သေၵမ်းတီႈၶႃႈ။
ၶဝ်ၸိူဝ်းဢၼ်ပဵၼ်ရၢၼ်ႇသူႇၶႃႈၸဝ်ႈဢိၵ်ႇတင်း ၶဝ်ၸိူဝ်းဢၼ်တဵၵ်းငႅၼ်းၶႃႈၸဝ်ႈၼၼ်ႉ မီးၼမ်ၼႃႇတီႈၶႃႈဢေႃႈ။ ၵူၺ်းၵႃႈ၊ၶႃႈၸဝ်ႈဢမ်ႇႁႂ်ႈသုတ်ႈယွမ်းၵႂႃႇ ၼႂ်းတၢင်းဢၼ်ပႂ်ႉၸွမ်းတြႃးၸဝ်ႈႁဝ်း ၸိူဝ်းၼၼ်ႉတီႈၶႃႈ။
ၶႃႈၸဝ်ႈလူတူၺ်းၶဝ်ၸိူဝ်းဢၼ်သဵတ်ႈၸႃႇလု ပႅတ်ႉၵိၼ်လႅၼ်ၵိၼ်ၼၼ်ႉလႄႈလီႁင်ႈဢဵတ်ႇသဵတ်ႇၶဝ်တီႈၶႃႈဢေႃႈ။ လွင်ႈမၼ်းၸမ်ႉ၊ၶဝ်ၼၼ်ႉဢမ်ႇပႂ်ႉဢမ်ႇၸွမ်း ပိင်းၺၢပ်ႈၸဝ်ႈႁဝ်းတီႈၶႃႈဢေႃႈ။
ၶႅၼ်းတေႃႈၶႆႈၸႂ်ဝူၼ်ႉၸႂ်လွင်ႈဢၼ်ၶႃႈၸဝ်ႈၵျိူၵ်ႈႁၵ်ႉထုၵ်ႇၸႂ် တြႃးဢၼ်ၸဝ်ႈႁဝ်းသင်ႇသွၼ်ပၼ်ၼၼ်ႉ ၵႃႈႁိုဝ်ၼၼ်ႉသေၵမ်းတီႈၶႃႈ။ ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈ ႁႂ်ႈၶႃႈၸဝ်ႈဢသၢၵ်ႈလိပ်းယူႇ ၸွမ်းလူၺ်ႈမႅတ်ႈတႃႇၵရုၼႃႇၸဝ်ႈႁဝ်းၼၼ်ႉ သေၵမ်းတီႈၶႃႈ။
လွၼ်ႉတြႃးၸဝ်ႈႁဝ်းၼၼ်ႉပဵၼ်ဢၼ်ၸိုဝ်ႈ ဢၼ်ၸႂ်ႈတီႈၶႃႈဢေႃႈ။ လွင်ႈတၢင်းဢၼ်ၸဝ်ႈႁဝ်းၸီႇယၢင်ႇ ၸွမ်းၼင်ႇတြႃးဢၼ်သိုဝ်ႈတေႃႇဝႆႉ တင်းသဵင်ႈတင်းလူင်ၼၼ်ႉ တႄႇယူႇတႃႇသေႇဢမ်ႇထၢတ်ႇတီႈၶႃႈဢေႃႈ။
လုၵ်ႈၶုၼ်လုၵ်ႈၵႂၢၼ်တင်းလၢႆယင်းဢမ်ႇမီး လွင်ႈမၼ်းတၢင်းမၼ်းလႄႈ ၼိၵ်ႈၸၢၵ်ႈငႅၼ်းသႄးၶႃႈၸဝ်ႈတီႈၶႃႈဢေႃႈ။ ၵူၺ်းၵႃႈ၊ၶႃႈၸဝ်ႈရူဝ်ႇသေႇတြႃး ၸဝ်ႈႁဝ်းၼၼ်ႉယူႇတီႈၶႃႈဢေႃႈ။
ၶႃႈၸဝ်ႈသိူဝ်းပျေႃႇၵွပ်ႈပိူဝ်ႈၵတိၸဝ်ႈႁဝ်းၼၼ်ႉ မိူၼ်ၸိူဝ်ႉၼင်ႇဢၼ်ထူပ်းၺႃးရတၼႃႇ ဢၼ်ထိူၵ်ႈၵႃႈထိူၵ်ႈၶၼ်ၼၼ်ႉတီႈၶႃႈဢေႃႈ။
ၶႃႈၸဝ်ႈၶၢၼ်ႉငိၼ်းလႄႈလီႁင်ႈဢဵတ်ႇသဵတ်ႇ ၵႂၢမ်းမုသႃႇတီႈၶႃႈဢေႃႈ။ တြႃးၸဝ်ႈႁဝ်းၸမ်ႉ၊ၶႃႈၸဝ်ႈၵျိူၵ်ႈႁၵ်ႉထုၵ်ႇၸႂ် တီႈၶႃႈဢေႃႈ။
ၶႃႈၸဝ်ႈယွင်ႈယေႃးၵျေးၸူးၸဝ်ႈႁဝ်း ယေႈဝၼ်းၸဵတ်းပွၵ်ႈ ၵွပ်ႈပိူဝ်ႈလွင်ႈတၢင်းဢၼ်ၸဝ်ႈႁဝ်း ၸီႇယၢင်ႇဝႆႉသိုဝ်ႈသိုဝ်ႈတေႃႇတေႃႇ ၸိူဝ်းၼၼ်ႉတီႈၶႃႈဢေႃႈ။
ၶဝ်ၸိူဝ်းဢၼ်ၵျိူၵ်ႈႁၵ်ႉထုၵ်ႇၸႂ်တြႃး ၸဝ်ႈႁဝ်းၼၼ်ႉ မီးတၢင်းဢၼ်ၼိမ်သိမ်ႇယႂ်ႇၼႃႇလႄႈလွင်ႈဢၼ်ၶဝ်တၵ်းၸႂ်လုဢမ်ႇမီးလႃးလႃးတီႈၶႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈမုင်ႈမွင်း ၵျေးၸူးတၢင်းဢၼ်ၸဝ်ႈႁဝ်း ၵႄႇၶျွတ်ႈဢဝ်ၼၼ်ႉလႄႈ ပႂ်ႉၸွမ်းၵႃႈဢၼ်ၸဝ်ႈႁဝ်းပိင်းၺၢပ်ႈဝႆႉၼၼ်ႉ တီႈၶႃႈဢေႃႈ။
ၶႃႈၸဝ်ႈပႂ်ႉၸွမ်းတြႃးဢၼ်ၸဝ်ႈႁဝ်းသင်ႇသွၼ် ၼႄတၢင်းၸိူဝ်းၼၼ်ႉယူႇလႄႈ ၶႃႈၸဝ်ႈပႃးၸႂ်ပႃးၶေႃးထုၵ်ႇၸႂ်ၵျိူၵ်ႈၸႂ်တြႃး ၸိူဝ်းၼၼ်ႉတႄႉတႄႉတီႈၶႃႈဢေႃႈ။
ၶႃႈၸဝ်ႈပႂ်ႉၸွမ်းပိင်းၺၢပ်ႈတြႃး ၸဝ်ႈႁဝ်းဢိၵ်ႇတင်း တြႃးဢၼ်ၸဝ်ႈႁဝ်းသင်ႇသွၼ်ၼႄတၢင်း ၸိူဝ်းၼၼ်ႉတီႈၶႃႈဢေႃႈ။ ၸဝ်ႈႁဝ်းႁၼ်ၵႃႈဢၼ်ၶႃႈၸဝ်ႈၵမ်ၵျၢင်ႉၵူႈၸိူဝ်ႉ ၵူႈပိူင်ၼၼ်ႉတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ႁႂ်ႈသဵင်ဢၼ် ၶႃႈၸဝ်ႈႁွင်ႉၵၢဝ်ႇတီႈၸဝ်ႈႁဝ်းၼၼ်ႉ ႁွတ်ႈထိုင်ႁူၸဝ်ႈႁဝ်းသေၵမ်းတီႈၶႃႈ။ ၶႅၼ်းတေႃႈပၼ်ၸႂ်ဢၼ်ၸၢင်ႈပွင်ႇ ၸၢင်ႈလႅင်းတီႈၶႃႈၸဝ်ႈ၊ ၸွမ်းၵႃႈၼင်ႇဢၼ်ၸဝ်ႈႁဝ်းဝႆႉၵတိၼၼ်ႉ သေၵမ်းတီႈၶႃႈ။
ႁႂ်ႈၵႂၢမ်းသူးတွင်းၶႃႈၸဝ်ႈႁွတ်ႈထိုင်ႁူၸဝ်ႈႁဝ်း သေၵမ်းတီႈၶႃႈ။ ၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈ ၸွမ်းၵႃႈၼင်ႇဢၼ်ၸဝ်ႈႁဝ်း ဝႆႉၵတိၼၼ်ႉသေၵမ်းတီႈၶႃႈ။
ၶႃႈၸဝ်ႈတၵ်းယွင်ႈယေႃးၸဝ်ႈႁဝ်းယူႇ တႃႇသေႇဢမ်ႇထၢတ်ႇၵွပ်ႈပိူဝ်ႈဢၼ် ၸဝ်ႈႁဝ်းသွၼ်ပၼ်တြႃးၸဝ်ႈႁဝ်းၸိူဝ်းၼၼ်ႉ တီႈၶႃႈၸဝ်ႈၼၼ်ႉတီႈၶႃႈဢေႃႈ။
ၶႃႈၸဝ်ႈတၵ်းႁဵတ်းၵႂၢမ်းလွင်ႈတြႃးၸဝ်ႈႁဝ်း၊ ၵွပ်ႈပိူဝ်ႈဢၼ်ပိင်းၺၢပ်ႈၸဝ်ႈႁဝ်း သိုဝ်ႈတေႃႇၼၼ်ႉတီႈၶႃႈဢေႃႈ။
ၸဝ်ႈႁဝ်းတီႈၶႃႈၶႅၼ်းတေႃႈတၼ်းဝႆႉတႃႇတေ ၸွႆႈထႅမ်ၶႃႈၸဝ်ႈသေႇသေႇ ၵွပ်ႈပိူဝ်ႈဢၼ်ၶႃႈၸဝ်ႈၸပ်းၸွမ်းႁွမ်းပႆၼႂ်းပိင်းၺၢပ်ႈၸဝ်ႈႁဝ်းၼၼ်ႉသေၵမ်းတီႈၶႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈတူၵ်းဢၢင်ႈၶႂ်ႈလႆႈၵျေးၸူးတၢင်းဢၼ်ၸဝ်ႈႁဝ်း၊ၵႄႇၶျွတ်ႈဢဝ်ၼၼ်ႉတီႈၶႃႈဢေႃႈ။ ၶႃႈၸဝ်ႈထူပ်းႁၼ်တၢင်းသိူဝ်းပျေႃႇၼႂ်းတြႃး ၸဝ်ႈႁဝ်းၼၼ်ႉတီႈၶႃႈဢေႃႈ။
ႁႂ်ႈၶႃႈၸဝ်ႈလႆႈဢသၢၵ်ႈလိပ်းယူႇပုၼ်ႈဢၼ်တၵ်းယွင်ႈယေႃးၸဝ်ႈႁဝ်းသေၵမ်းတီႈၶႃႈ။ ႁႂ်ႈတြႃးဢၼ်ၸဝ်ႈႁဝ်းသင်ႇသွၼ်ၼႄတၢင်းၼၼ်ႉ ၸွႆႈထႅမ်ၶႃႈၸဝ်ႈသေၵမ်းတီႈၶႃႈ။
ၶႃႈၸဝ်ႈလႄႇၵႂႃႇလႄႇမႃးမိူၼ်ၸိူဝ်ႉၼင်ႇသူဝ်း ဢၼ်ႁၢႆၵႂႃႇၼၼ်ႉတီႈၶႃႈယဝ်ႉ။ ၶႅၼ်းတေႃႈသွၵ်ႈႁႃၶႃႈၸဝ်ႈႁဝ်း၊ၵွပ်ႈပိူဝ်ႈဢၼ် ၶႃႈၸဝ်ႈဢမ်ႇပိုၼ်ႉဢမ်ႇပႅတ်ႈတြႃးၸဝ်ႈႁဝ်း ၸိူဝ်းၼၼ်ႉသေၵမ်းတီႈၶႃႈ။
ၼႂ်းမိူဝ်ႈဢၼ်ၵဝ်လႆႈထူပ်းၽေးတုၵ်ႉၶႃႉၼၼ်ႉ ၵဝ်ႁွင်ႉၵၢဝ်ႇတီႈ ထႃႇဝရႃႉၽြႃး၊ လႄႈ မၼ်းၸဝ်ႈၶိုၼ်းဢိူဝ်ၵဝ်ဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈ ၵႄႇသႄႇၶျွတ်ႈဢဝ်ၶႃႈၸဝ်ႈသေ ၵႃႈတီႈၶဝ်ၸိူဝ်းဢၼ်ၸၢင်ႈပႅတ်ႉလႅၼ် ဢိၵ်ႇတင်းၶဝ်ၸိူဝ်းဢၼ်ဢမ်ႇမီးသဵတ်ႈၸႃႇ ၼၼ်ႉသေၵမ်းတီႈၶႃႈ။
ၶဝ်ၸိူဝ်းဢၼ်ၸၢင်ႈပႅတ်ႉၸၢင်ႈလႅၼ်ၶဝ်႟။ ၽြႃးပဵၼ်ၸဝ်ႈတၵ်းႁဵတ်းၸိူဝ်ႉၼင်ႇႁိုဝ်တီႈသူ၊ မၼ်းၸဝ်ႈတၵ်းပၼ်တၢမ်ႇၸိူဝ်ႉၼင်ႇႁိုဝ်တီႈသူ။
မၼ်းၸဝ်ႈတၵ်းဢဝ်ပိုၼ်ဢၼ်လႅမ်ၼႃႇၼၼ်ႉ ယိုဝ်းသႂ်ႇလႄႈ ဢဝ်ထၢၼ်ႇၽႆးလႅင်ဢၼ်မႆႈၼႃႇၼၼ်ႉ ၸီႈဢေႃႈ။
တၢင်းဢၼ်ယူႇၵႃႈၼႂ်းၵႄႈသူၼႆႉပဵၼ် ဢၼ်ႁၢႆႉဢၼ်ၸႃႉမိူၼ်ၵၼ်တင်း တၢင်းဢၼ်ယူႇၸွမ်းမိူင်း မႄႇသႅၵ်ႉ၊ ဢိၵ်ႇတင်းၵႃႈၼႂ်းသုမ်ႉထဵင်မိူင်း ၵေႇတႃႇ၊ ဢေႃႈ။
ၵဝ်လႆႈယူႇလူၺ်ႈၵၼ်တင်းၶဝ်ၸိူဝ်းဢၼ်ၸင်းတၢင်းၼိမ်ၼၼ်ႉႁိုင်ၼႃႇလူင်လၢင်ယဝ်ႉ။
မိူဝ်ႈဢၼ်ၵဝ်လၢတ်ႈလွင်ႈတၢင်းၼိမ်ၼၼ်ႉၶဝ်ၼၼ်ႉမီးၸႂ်ဢၼ်ၶႂ်ႈတိုၵ်းသိုၵ်းဢေႃႈ။
ၵဝ်မုင်ႈတူၺ်းၵႃႈတီႈသၼ်လွႆဢေႃႈ။ တၢင်းဢၼ်ၸွႆႈထႅမ်မႃႉၸႃႉၵဝ်ၼၼ်ႉ တေဢွၵ်ႇၵႃႈတီႈလႂ်မႃး။
တၢင်းဢၼ်ၸွႆႈထႅမ်မႃႉၸႃႉၵဝ်ၼၼ်ႉ၊ လႆႈဢွၵ်ႇၵႃႈတီႈ ထႃႇဝရႃႉၽြႃး။ ဢၼ်ၽၢၼ်ႇသၢင်းႁဵတ်းပဵၼ်ၽႃႉၵၢင်ႁၢဝ် တင်းလိၼ်မိူင်းၼၼ်ႉမႃးဢေႃႈ။
မၼ်းၸဝ်ႈဢမ်ႇပၼ်ဢၶႂၢင်ႉႁႂ်ႈတိၼ်မႂ်း လႆႈပရၢတ်ႈၵႂႃႇၼၼ်ႉ။ ၸဝ်ႈဢၼ်ၵႅတ်ႇၶႄႁႄႉၵင်ႈမႂ်းၼၼ်ႉ ဢမ်ႇငဝ်ဢမ်ႇၼွၼ်းလပ်းယူႇ။
ၸဝ်ႈဢၼ်ၵႅတ်ႇၶႄႁႄႉၵင်ႈမဵဝ်း ဢိသရေး၊ ၼၼ်ႉဢမ်ႇမီးတၢင်းဢၼ်ငဝ်သူၼ်းလႄႈ ၼွၼ်းလပ်းယူႇ။
ထႃႇဝရႃႉၽြႃး၊ ၼၼ်ႉပဵၼ်ၸဝ်ႈဢၼ် ပႂ်ႉတူၺ်းမႂ်းယူႇဢေႃႈ။ မၼ်းၸဝ်ႈမီးယူႇတီႈႁိမ်းမႂ်းလႄႈႁႂ်ႈလႆႈ ၵႅတ်ႇၶႄႁႄႉၵင်ႈမႂ်းယူႇဢေႃႈ။
ၵၢင်ဝၼ်းဢမ်ႇလႆႈတိူဝ်ႉလႆႈထုၵ်ႇမႂ်း ၼႂ်းၶိင်ႇၵၢင်ဝၼ်းလႄႈ လိူၼ်ဢမ်ႇလႆႈတိူဝ်ႉလႆႈထုၵ်ႇမႂ်းၶိင်ႇၵၢင်ၶိုၼ်း။
ထႃႇဝရႃႉၽြႃး၊ တၵ်းႁႄႉၵင်ႈၽေးဢၼ်ႇတရေႇ ၵူႈၸိူဝ်ႉၵူႈပိူင်လႄႈ ပႂ်ႉမႂ်းႁႂ်ႈလႆႈယူႇလူင်ႉလီလွတ်ႈလီဢေႃႈ။
မၼ်းၸဝ်ႈတၵ်းၵႅတ်ႇၶႄႁႄႉၵင်ႈတၢင်းဢၼ် မႂ်းဢွၵ်ႇဢိၵ်ႇတင်းတၢင်းဢၼ်မႂ်း ၶဝ်ႈၸိူဝ်းၼၼ်ႉယူႇဢေႃႈ။ ဢဝ်ၸႃႉၸဵမ်တေႃႈလဵဝ်ၼႆႉၵႂႃႇတႃႇသေႇ ဢမ်ႇထၢတ်ႇဢေႃႈ။
မိူဝ်ႈဢၼ်ၶဝ်လၢတ်ႈတီႈၵဝ်လႄႈဝႃႈ၊ “ႁဝ်းဢွၼ်ၵၼ် ၵႂႃႇတီႈႁိူၼ်း ထႃႇဝရႃႉၽြႃး၊ တႃႉႁဝ်း၊” ဝႃႈၼင်ႇၼႆၼၼ်ႉၵဝ်ၸူမ်းသိူဝ်းၼႃႇဢေႃႈ။
ၵမ်းၼႆႉႁဝ်းမီးယူႇၵႃႈတီႈၼႆႈ၊ၸုၵ်းယူႇၵႃႈၼႂ်း၊ၽၵ်းတူဝဵင်း ယေႇရုသလႅမ်ႇ၊ ၼႆႉယဝ်ႉယဝ်ႉ။
ဝဵင်း ယေႇရုသလႅမ်ႇ၊ တႄႇယူႇၸိူဝ်ႉၼင်ႇဝဵင်းလူင်ဢၼ်သတ်ႉလီတဵမ်လီၼႃႇလႄႈ၊
ပဵၼ်တီႈဢၼ်ၸိူဝ်ႉၶိူဝ်းၵူၼ်းတင်းလၢႆတၵ်းဢွၼ်ၵၼ်မႃး၊ၸိူဝ်ႉၶိူဝ်းမဵဝ်း ဢိသရေး၊ ၶဝ် တၵ်းဢွၼ်ၵၼ်ယွင်ႈယေႃးၵျေးၸူး ထႃႇဝရႃႉၽြႃး။ မႅၼ်ႈၸွမ်းၵႃႈၼင်ႇဢၼ်မၼ်းၸဝ်ႈ မီးဢမိင်ႉဝႆႉၼၼ်ႉဢေႃႈ။
ၵႃႈတီႈၼၼ်ႈၸိုင်၊ၶုၼ်ႁေႃၶမ်းမဵဝ်း ဢိသရေး၊ ၼင်ႈႁၢင်ႈၼင်ႈႁေႃလႄႈ ၸီႇယၢင်ႇတြႃးတီႈၵူၼ်းတင်းလၢႆဢေႃႈ။
ဢွၼ်ၵၼ်သူးတွင်းပုၼ်ႈဝဵင်း ယေႇရုသလႅမ်ႇ၊ ႁႂ်ႈလႆႈတၢင်းၼိမ်လႄႈဝႃႈ၊ “ႁႂ်ႈၶဝ်ၸိူဝ်းဢၼ်ႁၵ်ႉမႂ်းၼၼ်ႉယႂ်ႇၽႄႇ ၼမ်ၵိုၼ်းသေၵမ်းလူၺ်ႈ။
ႁႂ်ႈတၢင်းၼိမ်မီးၵႃႈၼႂ်းလမ်းဝဵင်းမႂ်း ဢိၵ်ႇတင်းတၢင်းဢၼ်လူင်ႉလီလွတ်ႈလီ မီးၵႃႈၼႂ်းႁေႃၶမ်းမႂ်းသေၵမ်းလူၺ်ႈ၊” ဝႃႈၼင်ႇၼႆတႃႉ။
ပုၼ်ႈဢၵျူဝ်းပီႈၼွင်ႉၸိူဝ်ႉၶိူဝ်းၵဝ်ဢိၵ်ႇတင်း ၵေႃႉသႄႈၵဝ်တင်းလၢႆၼၼ်ႉ၊ ၵဝ်လၢတ်ႈတီႈဝဵင်း ယေႇရုသလႅမ်ႇ၊ လႄႈဝႃႈ၊ “ႁႂ်ႈတၢင်းၼိမ်မီးလူၺ်ႈၵၼ်တင်းမႂ်း သေၵမ်းလူၺ်ႈ၊” ဝႃႈၼင်ႇၼႆဢေႃႈ။
ပုၼ်ႈဢၵျူဝ်းႁိူၼ်း ထႃႇဝရႃႉၽြႃး၊ ႁဝ်းၶႃႈၼၼ်ႉၵေႃႈ ၵဝ်သူးတွင်းပုၼ်ႈဢၼ်မႂ်းတၵ်းယႂ်ႇၼမ် တူဝ်းတွၼ်းမႃးဢေႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈႁႅၼ်တူၺ်း ၸဝ်ႈႁဝ်းတူၺ်းၵႃႈၼိူဝ်ၵၢင်ႁၢဝ်၊ တီႈဢၼ်ၸဝ်ႈႁဝ်းၵိင်းဝၢပ်ႈၼၼ်ႉ တီႈၶႃႈဢေႃႈ။
ၸိူဝ်ႉၼင်ႇဢၼ်ၶႃႈဢိင်ပိုင်ႈတီႈၸဝ်ႈမၼ်း၊ ဢိၵ်ႇတင်းၸိူဝ်ႉၼင်ႇဢၼ်ၶႃႈမႄႈယိင်းဢိင်ပိုင်ႈ တီႈၸဝ်ႈၼၢင်းမၼ်းၼၼ်ႉ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၶႃႈ တီႈၶႃႈ၊ၶႃႈၸဝ်ႈႁဝ်းၶဝ်ႁႅၼ်တူၺ်းတီႈ ၸဝ်ႈႁဝ်းယူႇၶိူဝ်းၶိူဝ်းယႂ်းယႂ်း တေႃႇထိုင်ႁွတ်ႈၸဝ်ႈႁဝ်းႁဵတ်းၵျေးၸူးတၢင်းဢၼ်ဢဵတ်းလူ တီႈၶႃႈၸဝ်ႈႁဝ်းၶဝ်ၼၼ်ႉတီႈၶႃႈဢေႃႈ။
ၶႅၼ်းတေႃႈႁဵတ်းၵျေးၸူးတၢင်းဢၼ်ဢဵတ်းလူ တီႈၶႃႈၸဝ်ႈႁဝ်းၶဝ်သေၵမ်းတီႈၶႃႈ။ ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈႁဵတ်းၵျေးၸူးတၢင်းဢၼ် ဢဵတ်းလူတီႈၶႃႈၸဝ်ႈႁဝ်းၶဝ်၊ ၵွပ်ႈပိူဝ်ႈဢၼ်ၶႃႈၸဝ်ႈႁဝ်းၶဝ်လႆႈၶၢမ်ႇ တၢင်းဢၼ်ပိူၼ်ႈမၢတ်ႈၺၢမ်ႉၼႃႇ လူင်လၢင်ၼၼ်ႉသေၵမ်းတီႈၶႃႈ။
ၶႃႈၸဝ်ႈႁဝ်းၶဝ်လႆႈၶၢမ်ႇတၢင်းဢၼ်ၵူၼ်းမၢၵ်ႈၵူၼ်းမီးသႄႉသွမ်းဢိၵ်ႇတင်း ၶဝ်ၸိူဝ်းဢၼ်မႃႇၼႃႉယႂ်ႇလႄႈတဵၵ်းငႅၼ်းၼၼ်ႉ မၢတ်ႈၺၢမ်ႉယူႇႁိုင်ၼႃႇတီႈၶႃႈယဝ်ႉ။
ပေႃး ထႃႇဝရႃႉၽြႃး၊ ဢမ်ႇမီးယူႇၽၢႆႇႁဝ်းၸိုင်၊ ဢူဝ်းၵူၼ်းမဵဝ်း ဢိသရေး၊ တေလႆႈဝႃႈၸိူဝ်ႉၼင်ႇႁိုဝ်ဝႃႈၼႆၸမ်ႉ၊
“ပေႃး ထႃႇဝရႃႉၽြႃး၊ ဢမ်ႇမီးယူႇၽၢႆႇႁဝ်း မိူဝ်ႈဢၼ်ရၢၼ်ႇသူႇႁဝ်းတင်းလၢႆမႃးတိုၵ်းတေႃးႁဝ်းၼၼ်ႉၸိုင်။
ၶဝ်တၵ်းဢိုၼ်ၵိၼ်ႁဝ်းတင်းလိပ်းၵႂႃႇၼႂ်းတၢင်းဢၼ်ၸႂ်မႆႈၶႂ်ႈၸႃႉၶဝ်ဢွၵ်ႇၼႃႇၼၼ်ႉယဝ်ႉ။
ၼမ်ႉတၵ်းထူမ်ႈႁဝ်းမႃးလႄႈတၵ်းဢဝ်ႁဝ်း လွင်ႈၵႂႃႇဢေႃႈ။ ၼမ်ႉတၵ်းထူမ်ႈႁူမ်ႇ ႁဝ်းပႅတ်ႈဢေႃႈ။
ၼမ်ႉဢၼ်ပဵၼ်ၵုၵ်ႉပဵၼ်ႁွၼ်ၼၼ်ႉတၵ်းဢဝ်ႁဝ်းတူၵ်းၸူမ်တၢႆဢေႃႈ၊” ဝႃႈၼင်ႇၼႆဢေႃႈ။
ဢွၼ်ၵၼ်ယွင်ႈယေႃးၵျေးၸူး ထႃႇဝရႃႉၽြႃး၊ တႃႉႁဝ်း။ မၼ်းၸဝ်ႈဢမ်ႇပၼ်ဢၶႂၢင်ႉဢၼ်ရၢၼ်ႇသူႇ ႁဝ်းတင်းလၢႆလႆႈယႃႉႁဝ်းပႅတ်ႈ။
မၼ်းၸဝ်ႈပွႆႇႁႂ်ႈႁဝ်းလွတ်ႈမိူၼ်ၸိူဝ်ႉၼင်ႇၼူၵ်ႉလႆႈလွတ်ႈဢွၵ်ႇတူင်ႇၶိုမ်းလႃႈထိူၼ်ႇၼၼ်ႉယဝ်ႉ။ တူင်ႇၶိုမ်းၶၢတ်ႇလႄႈႁဝ်းလႆႈလွတ်ႈယဝ်ႉ။
တၢင်းဢၼ်ၸွႆႈထႅမ်မႃႉၸႃႉႁဝ်းၼၼ်ႉ ပေႃႇဢွၵ်ႇၵႃႈတီႈ ထႃႇဝရႃႉၽြႃး၊ ဢၼ်ႁဵတ်း ပဵၼ်ၵၢင်ႁၢဝ်တင်းလိၼ်မိူင်းၼၼ်ႉမႃးဢေႃႈ။
ၶဝ်ၸိူဝ်းဢၼ်ယုမ်ႇမၢတ်ႈဢိင်ပိုင်ႈ ထႃႇဝရႃႉၽြႃး၊ ၼၼ်ႉပဵၼ်ၸိူဝ်ႉၼင်ႇလွႆ ၸိဢုၼ်ႇ။ ဢၼ်ဢမ်ႇသၼ်ႇဢမ်ႇၶွၼ်းလႆႈလႄႈတႄႇယူႇ သေႇသေႇၼၼ်ႉဢေႃႈ။
ၸိူဝ်ႉၼင်ႇဢၼ်သၼ်လွႆတႄးလွႆလွမ်ႉႁွပ်ႈဝဵင်း ယေႇရုသလႅမ်ႇ၊ ယူႇၼၼ်ႉ၊ ထႃႇဝရႃႉၽြႃး၊ လွမ်ႉႁွပ်ႈၵူၼ်းမၼ်းၸဝ်ႈ တင်းလၢႆယူႇ ၸႃႉၸဵမ်တေႃႈလဵဝ်ၼႆႉၵႂႃႇတႃႇသေႇ ဢမ်ႇထၢတ်ႇဢေႃႈ။
ၶဝ်ၸိူဝ်းဢၼ်ႁၢႆႉဢၼ်မိူၵ်ႈၼၼ်ႉတၵ်းဢုပ်ႉပိူင်ႇ ၵႃႈၼိူဝ်ၶဝ်ၸိူဝ်းဢၼ်သိုဝ်ႈတေႃႇၼၼ်ႉ ယူႇသေႇသေႇဢမ်ႇၸႂ်ႈ။ ပေႃးၶဝ်လႆႈဢုပ်ႉပိူင်ႇယူႇၸိုင်၊ ၶဝ်ၸိူဝ်းဢၼ်သိုဝ်ႈတေႃႇၼၼ်ႉၸၢင်ႈႁဵတ်း ဢၼ်ႁၢႆႉဢၼ်မိူၵ်ႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈ မီးၸႂ်ဢၼ်လီဢၼ်ဝၢၼ်တီႈၶဝ်ၸိူဝ်းဢၼ်လီဢၼ်ငၢမ်း၊ ဢိၵ်ႇတင်းၶဝ်ၸိူဝ်းဢၼ်ပႂ်ႉၸွမ်းပိင်းၺၢပ်ႈ ၸဝ်ႈႁဝ်းၸိူဝ်းၼၼ်ႉသေၵမ်းတီႈၶႃႈ။
ၼႂ်းမိူဝ်ႈဢၼ်ၸဝ်ႈႁဝ်းၸီႇယၢင်ႇပၼ်တၢမ်ႇ ၶဝ်ၸိူဝ်းဢၼ်ႁၢႆႉဢၼ်မိူၵ်ႈၼၼ်ႉၸိုင်၊ ၶႅၼ်းတေႃႈၸီႇယၢင်ႇပၼ်တၢမ်ႇပႃး ၶဝ်ၸိူဝ်းဢၼ်ပႄႇပႅတ်ႈသဵၼ်ႈတၢင်း ၸဝ်ႈႁဝ်းၸိူဝ်းၼၼ်ႉသေၵမ်းတီႈၶႃႈ။ ႁႂ်ႈတၢင်းဢၼ်တဵတ်ႇလီၼိမ်လီမီးတီႈ ၵူၼ်းမဵဝ်း ဢိသရေး၊ သေၵမ်းလူၺ်ႈ။
မိူဝ်ႈဢၼ် ထႃႇဝရႃႉၽြႃး၊ ဢဝ်ႁဝ်းၶိုၼ်းမႃး တီႈဝဵင်း ယေႇရုသလႅမ်ႇ၊ ၼၼ်ႉၸိုင်၊ မၼ်းပဵၼ်မိူၼ်ၸိူဝ်ႉၼင်ႇဢၼ်ၼွၼ်းၽၼ် ၼၼ်ႉယူႇဢေႃႈ။
မိူဝ်ႈၼၼ်ႉႁဝ်းလႆႈဢွၼ်ၵၼ်ၶူဝ်၊လႆႈဢွၼ်ၵၼ်ႁဵတ်းၵႂၢမ်းဢၼ်သႂၢင်ႇဢၼ်သိူဝ်းဢေႃႈ။ ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၵေႃႈဢွၼ်ၵၼ် လၢတ်ႈလွင်ႈႁဝ်းလႄႈဝႃႈ၊ “ ထႃႇဝရႃႉၽြႃး၊ ႁဵတ်းလွင်ႈတၢင်းဢၼ်ယႂ်ႇၼႃႇပုၼ်ႈၶဝ်ယဝ်ႉ၊” ဝႃႈၼင်ႇၼႆဢေႃႈ။
ၸႂ်ႈတႄႉ၊ ထႃႇဝရႃႉၽြႃး၊ ႁဵတ်းလွင်ႈတၢင်းဢၼ်ယႂ်ႇၼႃႇပုၼ်ႈႁဝ်းယဝ်ႉ။ ႁဝ်းၵေႃႈမီးတၢင်းဢၼ်ၸူမ်းသိူဝ်းဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈဢဝ်ၶႃႈၸဝ်ႈႁဝ်းၶဝ်ၶိုၼ်းမႃးၸူးမိူင်းၶႃႈၸဝ်ႈႁဝ်းၶဝ်၊ မိူၼ်ၸိူဝ်ႉၼင်ႇၼမ်ႉၽူၼ်ၶိုၼ်းတူၵ်းသႂ်ႇ ၼႂ်းႁွင်ႈၼႂ်းၵႄးဢၼ်ႁႅင်ႈယူႇၼၼ်ႉ သေၵမ်းတီႈၶႃႈ။
ႁႂ်ႈၶဝ်ၸိူဝ်းဢၼ်ၼမ်ႉတႃတူၵ်းယူႇလႄႈ ဝၢၼ်ႇၸိူဝ်ႉၽၼ်းၼၼ်ႉ လႆႈႁဵတ်းၵႂၢမ်းဢၼ်သႂၢင်ႇဢၼ်သိူဝ်းသေယဝ်ႉ ပၢတ်ႇၶဝ်ႈသေၵမ်းလူၺ်ႈ။
ၶဝ်ၸိူဝ်းဢၼ်ၼမ်ႉတႃတူၵ်းယူႇသေလႄႈ ပႃးဢဝ်ၸိူဝ်ႉၽၼ်းဢွၵ်ႇၵႂႃႇၼၼ်ႉ၊ တၵ်းမီးတၢင်းဢၼ်ႁဵတ်းၵႂၢမ်းဢၼ်သႂၢင်ႇ ဢၼ်သိူဝ်းသေလႄႈ ပႃးဢဝ်လိုၼ်ႈၶဝ်ႈၶိုၼ်းမႃးဢမၢၼ်ႇ ၶၼ်ပဵၼ်ဢေႃႈ။
ပေႃး ထႃႇဝရႃႉၽြႃး၊ ဢမ်ႇတႄႇႁဵတ်းႁိူၼ်းၸိုင်၊ၶဝ်ၸိူဝ်းဢၼ်တႄႇႁဵတ်းၼၼ်ႉ၊ ပွင်ႁဵတ်းယူႇလၢႆလၢႆလွၵ်ႇလွၵ်ႇဢမ်ႇပွင်ႇလွင်ႈ ၵႃႈသင်ဢေႃႈ။ ပေႃး ထႃႇဝရႃႉၽြႃး၊ ဢမ်ႇပႂ်ႉဝဵင်းၸိုင်၊ ၶဝ်ၸိူဝ်းဢၼ်ပႂ်ႉတႃပႂ်ႉၵၢင်ၼၼ်ႉပႂ်ႉယူႇလၢႆလၢႆ လွၵ်ႇလွၵ်ႇဢမ်ႇပွင်ႇလွင်ႈၵႃႈသင်ဢေႃႈ။
ပိၵ်ႉသမ်ႉလုၵ်ႉၸဝ်ႉၸဝ်ႉၸဵဝ်းၸဵဝ်း၊သမ်ႉယင်း ဢမ်ႇလပ်းဢမ်ႇၼွၼ်းလႄႈ ယူႇတေႃႇထိုင်ႁွတ်ႈထၢၼ်ႈပေႃးလိုၵ်ႉလႄႈၵိၼ်ယၢၵ်ႈၵိၼ်ၽၢၼ်သေၵေႃႈဢမ်ႇမီးဢၵျူဝ်း။ လွင်ႈမၼ်းၸမ်ႉ၊မၼ်းၸဝ်ႈပၼ်ဢၶႂၢင်ႉဢၼ် လႆႈၼွၼ်းလပ်းၼွၼ်းလီ တီႈၶဝ်ၸိူဝ်းဢၼ်မၼ်းၸဝ်ႈႁၵ်ႉၼၼ်ႉဢေႃႈ။
လုၵ်ႈလၢင်းဢၼ်ၵိူတ်ႇလဵင်ႉမႃးၼၼ်ႉပဵၼ် သုလၢပ်ႈဢၼ် ထႃႇဝရႃႉၽြႃး၊ ပၼ်လႄႈ ၶဝ်ၼၼ်ႉပဵၼ်ရတၼႃႇတၢင်းလီ မၢင်ႇၵလႃႇဢေႃႈ။
လုၵ်ႈၸၢႆးဢၼ်ၵိူတ်ႇလဵင်ႉမႃးၵႃႈတီႈၵူၼ်းဢၼ်ယင်းၼုမ်ႇယင်းၵမ်ၼၼ်ႉၸိူဝ်းၼၼ်ႉ၊ ပဵၼ်ၸိူဝ်ႉၼင်ႇပိုၼ်ၵၢင်ႇဢၼ်မီးၼႂ်းမိုဝ်း ၵူၼ်းဢၼ်ႁတ်းႁၢၼ်ၼၼ်ႉဢေႃႈ။
ၵေႃႉဢၼ်မူၵ်ႇမႆႉမၼ်းတဵမ်ဝႆႉတင်း ပိုၼ်ၵၢင်ႇၼမ်ၼႃႇၸိူဝ်ႉၼင်ႇၼၼ်ၼၼ်ႉ မီးမၢင်ႇၵလႃႇဢေႃႈ။ မၼ်းတၵ်းဢမ်ႇမီးတၢင်းဢၼ်တူၵ်းသုမ်းၼႂ်းမိူဝ်ႈဢၼ်မၼ်းထူပ်းၺႃးရၢၼ်ႇသူႇမၼ်း၊ ၵႃႈတီႈလုမ်းဢၼ်ၸီႇယၢင်ႇတြႃးၼၼ်ႉဢေႃႈ။
ၶဝ်ၸိူဝ်းဢၼ်ၵူဝ်ယမ် ထႃႇဝရႃႉၽြႃး၊ လႄႈ ၵမ်ၵျၢင်ႉၸွမ်းပိင်းၺၢပ်ႈမၼ်းၸဝ်ႈၸိူဝ်းၼၼ်ႉမီး မၢင်ႇၵလႃႇဢေႃႈ။
မႂ်းတၵ်းလႆႈၵိၼ်တၢင်းၵိၼ်ဢၼ်မိုဝ်းမႂ်းႁဵတ်းလႄႈ လႆႈမႃးၼၼ်ႉဢေႃႈ။ မႂ်းတၵ်းလႆႈမီးမၢင်ႇၵလႃႇလႄႈ လႆႈလီလႆႈပဵၼ်ဢေႃႈ။
မေးမႂ်းတၵ်းပဵၼ်ၸိူဝ်ႉၼင်ႇတူၼ်ႈၶိူဝ်းမၢၵ်ႇၸပိတ်ႉ ဢၼ်မၢၵ်ႇမၢၵ်ႇၼမ်ၼႃႇ ၵႃႈတီႈၼႂ်းႁိူၼ်းမႂ်းလႄႈလုၵ်ႈလၢင်းမႂ်းတင်းလၢႆ တၵ်းပဵၼ်ၸိူဝ်ႉၼင်ႇယွတ်ႈတူၼ်ႈမႆႉ သၢၼ်ႇလုၼ်ႇ၊ ဢၼ်လွမ်ႉႁွပ်ႈတီႈၵိၼ်မႂ်းၼၼ်ႉဢေႃႈ။
ၵူၼ်းၵေႃႉဢၼ်ၵူဝ်ယမ် ထႃႇဝရႃႉၽြႃး၊ ၼၼ်ႉ တၵ်းတေမီးမၢင်ႇၵလႃႇ ၸိူဝ်ႉၼင်ႇၼၼ်ဢေႃႈ။
ႁႂ်ႈ ထႃႇဝရႃႉၽြႃး၊ ယူႇၵႃႈၼိူဝ်လွႆ ၸိဢုၼ်ႇ၊ ပၼ်တၢင်းလီတီႈမႂ်းသေၵမ်းလူၺ်ႈ။ ႁႂ်ႈမႂ်းလႆႈႁၼ်တၢင်းလီဢၼ်ဝဵင်း ယေႇရုသလႅမ်ႇ၊ လႆႈၶၢမ်ႇဢဝ်ၼၼ်ႉၸူဝ်ႈဢသၢၵ်ႈမႂ်း သေၵမ်းလူၺ်ႈ။
ႁႂ်ႈမႂ်းလႆႈႁၼ်လုၵ်ႈလၢၼ်မႂ်းလဵၼ်မႂ်းတင်းလၢႆ သေၵမ်းလူၺ်ႈ။ ႁႂ်ႈတၢင်းၼိမ်မီးတီႈၵူၼ်းမဵဝ်း ဢိသရေး၊ သေၵမ်းလူၺ်ႈ။
ႁႂ်ႈၵူၼ်းမဵဝ်း ဢိသရေး၊ ဢွၼ်ၵၼ်လၢတ်ႈလႄႈဝႃႈ၊ “ၶဝ်ၼိၵ်ႈၸၢၵ်ႈငႅၼ်းသႄးၵဝ် ၸႃႉၸဵမ်မိူဝ်ႈဢၼ်ၵဝ်ယင်းလဵၵ်ႉယင်းဢွၼ်ႇၼၼ်ႉ၊ဢမ်ႇႁုလၢႆၽဝ်ႇလၢႆပွၵ်ႈယဝ်ႉယဝ်ႉ။
ၶဝ်ၼိၵ်ႈၸၢၵ်ႈငႅၼ်းသႄးၵဝ်ၸႃႉၸဵမ်မိူဝ်ႈဢၼ်ၵဝ်ယင်းလဵၵ်ႉယင်းဢွၼ်ႇၼၼ်ႉသေၵေႃႈ။ ၶဝ်ဢမ်ႇပႄႉဢမ်ႇၼႅင်ႇၵဝ်လႆႈ။
ၶဝ်ၸိူဝ်းၼၼ်ႉထႆသႂ်ႇၵႃႈၼိူဝ်လင်ၵဝ်ႁႂ်ႈပဵၼ် ႁွႆးထႆဢၼ်ယၢဝ်းၼႃႇဢေႃႈ။
ၵူၺ်းၵႃႈ၊ ထႃႇဝရႃႉၽြႃး၊ ဢၼ်ဝႃႈ၊ ၸဝ်ႈဢၼ်သိုဝ်ႈတေႃႇၼၼ်ႉ ပွႆႇႁႂ်ႈၵဝ်လွတ်ႈသေတၢင်းဢၼ်ပဵၼ်ၶႃႈ ၼၼ်ႉဢေႃႈ၊” ဝႃႈၼင်ႇၼႆတႃႉ။
ႁႂ်ႈၶဝ်ၸိူဝ်းဢၼ်ၸင်းဝဵင်း ၸိဢုၼ်ႇ၊ ၼၼ်ႉ လႆႈတူၵ်းသုမ်းၵူႈၵေႃႉၵူႈၵူၼ်းလႄႈ လႆႈဢွၵ်ႇပၢႆႈၵႂႃႇသေၵမ်းလူၺ်ႈတီႈၶႃႈ။
ႁႂ်ႈၶဝ်ပဵၼ်ၸိူဝ်ႉၼင်ႇယိူဝ်ႈယႃႈဢၼ်ဢွၵ်ႇ ၵႃႈၼိူဝ်မုင်းႁိူၼ်းလႄႈ ၸၢင်ႈႁဵဝ်ႇႁႅင်ႈၵႂႃႇၸဵမ်မိူဝ်ႈဢၼ်ၽူႈလႂ် ဢမ်ႇပႆႇထူၺ်ႈမၼ်းပႅတ်ႈၼၼ်ႉ၊
ၽူႈလႂ်ဢမ်ႇၸၢင်ႈပၢတ်ႇဢဝ်မၼ်း၊ၽူႈလႂ် ဢမ်ႇၸၢင်ႈသိမ်းဢဝ်မၼ်းလႆႈ ပဵၼ်ၵမ်ပဵၼ်ႁွပ်ႇၼၼ်ႉသေၵမ်းလူၺ်ႈ။
ၶဝ်ၸိူဝ်းဢၼ်ပႆၵၢႆပူၼ်ႉႁိမ်းမၼ်းၵႂႃႇၼၼ်ႉၽူႈလႂ်ၵေႃႈဢမ်ႇလၢတ်ႈဝႃႈ “ႁႂ်ႈ ထႃႇဝရႃႉၽြႃး၊ ပၼ်တၢင်းလီတီႈသူသေၵမ်းလူၺ်ႈ။ ႁဝ်းဢိင်ၼႃႇမႃႉၸိုဝ်ႈသဵင် ထႃႇဝရႃႉၽြႃး၊ လႄႈ ပၼ်တၢင်းလီတီႈသူဢေႃႈ၊” ဢမ်ႇမီးၽူႈလႂ် ဝႃႈၸိူဝ်ႉၼင်ႇၼႆ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈ မီးတင်းၸႂ်ဢၼ်ၼၵ်းၼႃ၊ဢၼ်တူၵ်းၸူမ်ၼႂ်းတၢင်းဢၼ်လိုၵ်ႉလမ်ႇၼႃႇသေလႄႈ၊ ႁွင်ႉၵၢဝ်ႇတီႈၸဝ်ႈႁဝ်းတီႈၶႃႈဢေႃႈ။
ၸဝ်ႈၽြႃးတီႈၶႃႈ။ ၶႅၼ်းတေႃႈငိၼ်းသဵင် ၶႃႈၸဝ်ႈလႄႈ ထွမ်ႇဢဝ်သဵင်ဢၼ်ၶႃႈၸဝ်ႈႁဵတ်းသူးတွင်း ပထၼႃႇၼၼ်ႉသေၵမ်းတီႈၶႃႈ။
ပေႃးၸဝ်ႈႁဝ်းမၢတ်ႈမၢႆတုၸရိူၵ်ႈဢပျတ်ႈဝႆႉၸိုင်၊ ၽူႈလႂ်တၵ်းၵၢင်းလွတ်ႈတင်းတၢင်းဢၼ် ၸီႇယၢင်ႇပၼ်တၢမ်ႇၼၼ်ႉလႆႈတီႈၶႃႈ။
ၵူၺ်းၵႃႈ၊ၸဝ်ႈႁဝ်းမီးသၽေႃးဢၼ်ပွႆႇလွတ်ႈ ဢပျတ်ႈၶႃႈၸဝ်ႈႁဝ်းၶဝ်လႄႈ ၶႃႈၸဝ်ႈႁဝ်းၶဝ်လႆႈဢၶႂၢင်ႉဢၼ်ရူဝ်ႇသေႇ ၵူဝ်ယမ်ၸဝ်ႈႁဝ်းယူႇတီႈၶႃႈဢေႃႈ။
ၵဝ်ဝႆႉၸႂ်ဝႆႉၶေႃးပႂ်ႉထႃႈတၢင်းဢၼ် ထႃႇဝရႃႉၽြႃး၊ တၵ်းၸွႆႈထႅမ်ၼၼ်ႉလႄႈ၊ ယုမ်ႇမၢတ်ႈဢိင်ပိုင်ႈၼုၵ်ႈၵပၢတ်ႈ မၼ်းၸဝ်ႈယူႇဢေႃႈ။
ၵဝ်မုင်ႈမွင်းပႂ်ႉထႃႈၸဝ်ႈၽြႃးၼႃႇသေၵူၼ်းပႂ်ႉၵၢင် မုင်ႈမွင်းၶိင်ႇၵၢင်ၼႂ်ၼၼ်ႉဢေႃႈ။ ၸႂ်ႈတႄႉ။ မုင်ႈမွင်းၼႃႇသေၵူၼ်းပႂ်ႉၵၢင် မုင်ႈမွင်းၶိင်ႇၵၢင်ၼႂ်ၼၼ်ႉဢေႃႈ။
ၵူၼ်းမဵဝ်း ဢိသရေး၊ ႟။ ယုမ်ႇမၢတ်ႈ ဢိင်ပိုင်ႈ ထႃႇဝရႃႉၽြႃး၊ တႃႉ။ လွင်ႈမၼ်းၸမ်ႉ၊မႅတ်ႈတႃႇၵရုၼႃႇၸဝ်ႈ မီးယူႇလႄႈ၊ မၼ်းၸဝ်ႈမီးၸႂ်ဢၼ်ၶႂ်ႈၵႄႇသႄႇၶျွတ်ႈဢဝ် ယူႇသေႇသေႇၼၼ်ႉဢေႃႈ။
မၼ်းၸဝ်ႈတၵ်းၵႄႇသႄႇၶျွတ်ႈဢဝ် ၵူၼ်းမၼ်းၸဝ်ႈ မဵဝ်း ဢိသရေး၊ လွတ်ႈဢွၵ်ႇသေၵႃႈၼႂ်း တုၸရိူၵ်ႈဢပျတ်ႈၶဝ်ဢေႃႈ။
ထႃႇဝရႃႉၽြႃး၊ တီႈၶႃႈ။ ႁူဝ်ၸႂ်ၶႃႈၸဝ်ႈ ဢမ်ႇၽႅၼ်သုင်လႄႈ မၢၵ်ႇတႃၶႃႈၸဝ်ႈဢမ်ႇႁႅၼ်သုင်တီႈၶႃႈ။ ၶႃႈၸဝ်ႈဢမ်ႇလႆႈၵႂႃႇၵဝ်းၸွမ်းၼႂ်း လွင်ႈတၢင်းဢၼ်ယႂ်ႇသုင်ၼႃႇ ဢိၵ်ႇတင်းလွင်ႈတၢင်းဢၼ်ဢမ်ႇတၢၼ်ႇၵၼ် တင်းတူဝ်ၸဝ်ႈၵဝ်ႇၼၼ်ႉတီႈၶႃႈ။
ၶႃႈၸဝ်ႈၽေႇၸႂ်တူဝ်ၸဝ်ႈၵဝ်ႇႁႂ်ႈဢိမ်ႇလႄႈ ၼိမ်ဝႆႉတီႈၶႃႈဢေႃႈ။ ၸိူဝ်ႉၼင်ႇဢၼ်လုၵ်ႈဢွၼ်ႇလႅင်တဵတ်ႇၼိမ်ယူႇ ၵႃႈၼႂ်းဝၢင်ႈႁူဝ်ဢူၵ်းမႄႈမၼ်းၼၼ်ႉ၊ ႁူဝ်ၸႂ်ၶႃႈၸဝ်ႈၵေႃႈတဵတ်ႇၼိမ်ယူႇတီႈၶႃႈဢေႃႈ။
ၵူၼ်းမဵဝ်း ဢိသရေး၊ ႟။ ယုမ်ႇမၢတ်ႈ ဢိင်ပိုင်ႈ ထႃႇဝရႃႉၽြႃး၊ ယူႇ ၸႃႉၸဵမ်မိူဝ်ႈလဵဝ်ၵႂႃႇတႃႇသေႇဢမ်ႇထၢတ်ႇတႃႉ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈယႃႇပေ လူင်လိုမ်း တႃႇဝိတ်ႈ၊ ဢိၵ်ႇတင်း တုၵ်ႉၶႃႉတၢင်းၽၢၼ်ဢၼ်မၼ်းလႆႈယိူၼ်ႉၶၢမ်ႇ မႃးၸိူဝ်းၼၼ်ႉသေၵမ်းတီႈၶႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈၶုၵ်းၸႂ်လႆႈ ၵတိသဵတ်ႈၸႃႇဢၼ်မၼ်းတိူင်ႇဝႃႈ တီႈၸဝ်ႈႁဝ်း၊ ဢၼ်ပဵၼ်ၸဝ်ႈတၼ်းၶူဝ်းဢၼ်ၵူၼ်းမဵဝ်း ယႃႇၵုပ်ႈ၊ ၵူဝ်းၵႂၢႆႇၼၼ်ႉလႄႈဝႃႈ၊
“ၶႃႈၸဝ်ႈတၵ်းဢမ်ႇၶိုၼ်းမိူဝ်းၸူးၵႃႈတီႈႁိူၼ်း၊တၵ်းဢမ်ႇၶိုၼ်ႈၵႃႈၼိူဝ်ၵူႇသေလႄႈ
တၵ်းဢမ်ႇလိုဝ်ႈဢမ်ႇၼွၼ်း၊
တေႃႇထိုင်ႁွတ်ႈၶိင်ႇဢၼ်ၶႃႈၸဝ်ႈႁဵတ်းပၼ် တီႈယူႇတီႈသဝ်း ထႃႇဝရႃႉၽြႃး၊ ဢၼ်ဝႃႈႁိူၼ်းၸဝ်ႈ တၼ်းၶူဝ်းဢၼ်ၵူၼ်းမဵဝ်း ယႃႇၵုပ်ႈ၊ ၵူဝ်းၵႂၢႆႇၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၵႃႈၼႂ်းဝဵင်း ပႅတ်ႉလႁႅမ်ႇ၊ ၼၼ်ႉႁဝ်းလႆႈငိၼ်းလွင်ႈတိူၵ်ႈပတိၺိၺ်ႇတြႃးလႄႈ ႁဝ်းလႆႈထူပ်းႁၼ်မၼ်းၵႃႈၼႂ်းတူင်ႈပၢင်ႇဝဵင်း ယႃႇရိမ်ႇ၊ ၼၼ်ႉယဝ်ႉ။
ႁဝ်းဢွၼ်ၵၼ်လၢတ်ႈလႄႈဝႃႈ၊ “ဢွၼ်ၵၼ်ၵႂႃႇၸူးၵႃႈတီႈႁိူၼ်း ထႃႇဝရႃႉၽြႃး၊ တႃႉႁဝ်း။ ဢွၼ်ၵၼ်ၶုပ်ႉမူပ်ႇဝႆႈၵႃႈတီႈၽၢႆႇၼႃႈပလၢင်ႇ မၼ်းၸဝ်ႈတႃႉႁဝ်း၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈၸဝ်ႈႁဝ်းဢိၵ်ႇတင်းတိူၵ်ႈပတိၺိၺ်ႇတြႃးၸဝ်ႈ ဢၼ်ၸၢပ်ႈသႅင်ႇမုၼ်တၼ်းၶူဝ်းၸဝ်ႈႁဝ်းၼၼ်ႉ ၵျွမႃးၵႃႈၼႂ်းၵျွင်းပိၵ်ႈမၢၼ်ႇၸဝ်ႈသေလႄႈ ၵိင်းဝၢပ်ႈယူႇတႃႇသေႇဢမ်ႇထၢတ်ႇ သေၵမ်းတီႈၶႃႈ။
ႁႂ်ႈယဵၸ်ႈပရေႃးႁဵၵ်ႈ ၸဝ်ႈႁဝ်းၸိူဝ်းၼၼ်ႉ ႁဵတ်းတၢင်းဢၼ်သိုဝ်ႈတေႃႇယူႇ သေႇသေႇသေလႄႈ ႁႂ်ႈၵူၼ်းၸဝ်ႈႁဝ်းၸိူဝ်းၼၼ်ႉႁွင်ႉသႅၼ်ႇ သႂၢင်ႇသႂၢင်ႇသိူဝ်းသိူဝ်းသေၵမ်းလူၺ်ႈ။
ၸဝ်ႈႁဝ်းႁဵတ်းၵတိသဵတ်ႈၸႃႇဝႆႉၵၼ်တင်း တႃႇဝိတ်ႈ၊ ဢၼ်ပဵၼ်ၶႃႈၸဝ်ႈႁဝ်းၼၼ်ႉ၊ တီႈၶႃႈယဝ်ႉ။ ၶႅၼ်းတေႃႈယႃႇပေပႄႇပႅတ်ႈၶုၼ်ႁေႃၶမ်းဢၼ်ၸဝ်ႈႁဝ်းလိူၵ်ႈတၢင်ႇဝႆႉၼၼ်ႉသေၵမ်း၊ ထႃႇဝရႃႉၽြႃး၊ တီႈၶႃႈ။
ၸဝ်ႈႁဝ်းႁဵတ်းၵတိဝႆႉတီႈ တႃႇဝိတ်ႈ၊ ဢၼ်ဝႃႈၵတိဢၼ်ဢမ်ႇၶိုၼ်းယႃႉလႆႈၼၼ်ႉလႄႈဝႃႈၸမ်ႉ၊ “ၵႃႈၼႂ်းလုၵ်ႈၸၢႆးမႂ်းတင်းလၢႆၼၼ်ႉ ၵဝ်တၵ်းႁႂ်ႈၵေႃႉၼိုင်ႈပဵၼ်ၶုၼ်ႁေႃၶမ်းလႄႈ မၼ်းတၵ်းဢုပ်ႉပိူင်ႇဝၢႆးလင်မႂ်းဢေႃႈ။
ပေႃးလုၵ်ႈၸၢႆးမႂ်းၸိူဝ်းၼၼ်ႉပႂ်ႉသဵတ်ႈၸႃႇ ၵႃႈၼိူဝ်ပတိၺိၺ်ႇတြႃးၵဝ် ဢိၵ်ႇတင်းၵႃႈတီႈပိင်းၺၢပ်ႈၵႃႈဢၼ် ၵဝ်ပၼ်ဝႆႉတင်းလၢႆၸိုင်၊ လုၵ်ႈၸၢႆးၶဝ်ၸိူဝ်းၼၼ်ႉၵေႃႈတၵ်းတေလႆႈ သိုပ်ႇၶၢမ်ႇဢဝ်ဢရႃႇမႂ်း ဢၼ်ပဵၼ်ၶုၼ်ႁေႃၶမ်းၼၼ်ႉၵႂႃႇသိုပ်ႇသိုပ်ႇ တၢမ်တၢမ်ဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ လိူၵ်ႈဢဝ်ဝဵင်း ၸိဢုၼ်ႇ၊ လႄႈ၊ မီးဢလူဝ်ႇပုၼ်ႈဢၼ်မၼ်းၸဝ်ႈတၵ်းၵိင်းဝၢပ်ႈ တီႈၼၼ်ႈသေႇသေႇလႄႈဝႃႈ၊
“ဝဵင်းၼႆႉၸမ်ႉ၊ပဵၼ်ဝဵင်းဢၼ်ၵဝ်တၵ်း ၵိင်းဝၢပ်ႈယူႇသေႇသေႇ၊ တီႈဢၼ်ၵဝ်မီးဢလူဝ်ႇဢုပ်ႉပိူင်ႇၼၼ်ႉဢေႃႈ။
ၵဝ်တၵ်းသွၼ်းလေႃႇပၼ်မၢင်ႇၵလႃႇဢႁႃႇရႃႉတၢင်းၵိၼ်တီႈဝဵင်း ၸိဢုၼ်ႇ၊ လႄႈ လဵင်ႉလူၶဝ်ၸိူဝ်းဢၼ်ဢိုပ်းယၢၵ်ႈဢၼ်မီးၵႃႈၼႂ်း မၼ်းၼၼ်ႉဢိမ်ႇဢိမ်ႇတဵမ်တဵမ်ဢေႃႈ။
ၵဝ်တၵ်းပၼ်တၢင်းလီတီႈယဵၸ်ႈပရေႃးႁဵၵ်ႈ မၼ်းတင်းလၢႆ ၵႃႈတီႈတၢင်းဢၼ်ၶဝ်ပွင်ႁဵတ်းၼၼ်ႉလႄႈ ၵူၼ်းမူတ်းၸၢင်ႇမၼ်းၸိူဝ်းၼၼ်ႉ တၵ်းႁဵတ်းၵႂၢမ်းသႂၢင်ႇသႂၢင်ႇသိူဝ်းသိူဝ်းဢေႃႈ။
ၵႃႈတီႈၼၼ်ႈၸိုင်၊ၵဝ်တၵ်းႁႂ်ႈၸိူဝ်ႉၶိူဝ်း တႃႇဝိတ်ႈ၊ ၸိူဝ်းၼၼ်ႉၵေႃႉၼိုင်ႈ ပဵၼ်ၶုၼ်ႁေႃၶမ်းဢေႃႈ။ ၵႃႈတီႈၼၼ်ႈၵဝ်တၵ်းၸတ်းမႅင်ႇဢႃႇၼႃႇ ဢၼ်ဢုပ်ႉပိူင်ႇၵႃႈတီႈၶုၼ်ႁေႃၶမ်းဢၼ်ၵဝ် လိူၵ်ႈတၢင်ႇဝႆႉၼၼ်ႉဢေႃႈ။
ၵဝ်တၵ်းဢဝ်တၢင်းဢၼ်လီဢူၵ်းလီဢၢႆႁူမ်ႇသုမ်ႇၵႃႈၼိူဝ်ရၢၼ်ႇသူႇမၼ်းတင်းလၢႆဢေႃႈ။ သိုင်ႇၸိုင်ႈဝၢၼ်ႈမိူင်းမၼ်းၸမ်ႉ၊ တၵ်းတေလႆႈလီလႆႈပဵၼ်လႄႈႁၢင်ႈၶိူင်ႈဝႆႉတင်း မုၼ်သရေႇဢေႃႈ၊” ဝႃႈၼင်ႇၼႆဢေႃႈ။
တၢင်းဢၼ်ၵူၼ်းၽြႃးပဵၼ်ၸဝ်ႈတင်းလၢႆ ယူႇၸွမ်းၵၼ်လႄႈ ထုၵ်ႇမေႃပေႃးၵႂၢမ်းၵၼ်ၼၼ်ႉ လီၼႃႇလူင်လၢင်ဢေႃႈ။ ႁၢင်ႈလီႁၢင်ႈငၢမ်းၼႃႇလူင်လၢင်ဢေႃႈ။
ပဵၼ်ၸိူဝ်ႉၼင်ႇဢၼ်ၼမ်ႉမၼ်းၼၢမ်ႇသႃႇဢၼ်ထွၵ်ႇသႂ်ႇၵႃႈၼိူဝ်ႁူဝ် ဢႃႇရုၼ်ႇ၊ လႄႈ လႆၸွမ်းၼူတ်ႇၵၢင်းမၼ်းတူၵ်းႁွတ်ႈၵႃႈတီႈ တႂ်ႈၶေႃးသိူဝ်ႈမၼ်းၼၼ်ႉဢေႃႈ။
ပဵၼ်ၸိူဝ်ႉၼင်ႇၼမ်ႉၼၢႆးလွႆ ႁေႇရမုၼ်ႇ၊ ဢၼ်တူၵ်းႁွတ်ႈၵႃႈၼိူဝ်လွႆ ၸိဢုၼ်ႇ၊ ၼၼ်ႉဢေႃႈ။ ၵႃႈတီႈၼၼ်ႈၸိုင်၊ပဵၼ်တီႈဢၼ် ထႃႇဝရႃႉၽြႃး၊ ပူင်ဝႆႉမၢင်ႇၵလႃႇတၢင်းလီ၊ဢၼ်ဝႃႈ ဢၶႂၢင်ႉဢၼ်ဢသၢၵ်ႈလိပ်းယူႇ သေႇသေႇၼၼ်ႉဢေႃႈ။
ဢွၼ်ၵၼ်မႃးလႄႈယွင်ႈယေႃး ထႃႇဝရႃႉၽြႃး၊ တႃႉ။ သူၸိူဝ်းဢၼ်ပဵၼ်ၶႃႈမၼ်းၸဝ်ႈ ၸိူဝ်းဢၼ်ႁဵတ်းၼႃႈၵၢၼ်ၵႃႈၼႂ်းၵျွင်းပိၵ်ႈမၢၼ်ႇၸဝ်ႈၶိင်ႇၵၢင်ၶိုၼ်းတင်းသဵင်ႈတင်းလူင်႟။
ဢွၼ်ၵၼ်ႁွမ်းမိုဝ်းသူသေယဝ်ႉ ႁဵတ်းပထၼႃႇတၢင်းဢၼ်သူးတွင်း ၵႃႈၼႂ်းၵျွင်းပိၵ်ႈမၢၼ်ႇၸဝ်ႈလႄႈ ယွင်ႈယေႃး ထႃႇဝရႃႉၽြႃး၊ တႃႉ။
ႁႂ်ႈ ထႃႇဝရႃႉၽြႃး၊ ဢၼ်ႁဵတ်းပဵၼ်ၵၢင်ႁၢဝ်တင်းလိၼ်မိူင်းၼၼ်ႉ ယူႇၵႃႈၼႂ်းဝဵင်း ၸိဢုၼ်ႇ၊ လႄႈပၼ် မၢင်ႇၵလႃႇတၢင်းလီတီႈသူသေၵမ်းလူၺ်ႈ။
ယွင်ႈယေႃး ထႃႇဝရႃႉၽြႃး၊ တီႈၶႃႈဢေႃႈ။ ဢွၼ်ၵၼ်ယွင်ႈယေႃးၼႃႇမႃႉ ၸိုဝ်ႈသဵင် ထႃႇဝရႃႉၽြႃး၊ တႃႉ။ ၶႃႈ ထႃႇဝရႃႉၽြႃး၊ ၶဝ်႟။ ယွင်ႈယေႃးတႃႉ။
သူၸိူဝ်းဢၼ်ၸုၵ်းၶႃးၸႃးယူႇၵႃႈၼႂ်းႁိူၼ်း ထႃႇဝရႃႉၽြႃး၊ ၵႃႈၼႂ်းၵျွင်းပိၵ်ႈမၢၼ်ႇၽြႃးပဵၼ်ၸဝ်ႈၶဝ်႟။
ဢွၼ်ၵၼ်ယွင်ႈယေႃး ထႃႇဝရႃႉၽြႃး၊ ပိူဝ်ႈဢၼ်မၼ်းၸဝ်ႈမျၢတ်ႈလီၼႃႇၼၼ်ႉတႃႉ။ ဢွၼ်ၵၼ်ႁဵတ်းၵႂၢမ်းထေႃးပၼႃႇတီႈ ၼႃႇမႃႉၸိုဝ်ႈသဵင်မၼ်းၸဝ်ႈ၊ ပိူဝ်ႈဢၼ်မၼ်းၸဝ်ႈမီးၸႂ်ဢၼ်ၸၢင်ႈႁၵ်ႉ ဢဵတ်းလူၼၼ်ႉတႃႉ။
လွင်ႈမၼ်းၸမ်ႉ၊မၼ်းၸဝ်ႈလိူၵ်ႈဢဝ်ၵူၼ်းမဵဝ်း ယႃႇၵုပ်ႈ၊ ပုၼ်ႈမၼ်းၸဝ်ႈ၊ ၵူၼ်းမဵဝ်း ဢိသရေး၊ ပုၼ်ႈတႃႇ မၼ်းၸဝ်ႈဢေႃႈ။
ၵဝ်ႁုလွင်ႈဢၼ် ထႃႇဝရႃႉၽြႃး၊ မျၢတ်ႈလီၼႃႇ၊ ဢိၵ်ႇတင်းလွင်ႈဢၼ်ၸဝ်ႈၽြႃးႁဝ်း ယႂ်ႇမျၢတ်ႈၼႃႇသေၽြႃးတင်းသဵင်ႈ တင်းလူင်ၼၼ်ႉယူႇဢေႃႈ။
ၵႃႈၼင်ႇဢၼ် ထႃႇဝရႃႉၽြႃး၊ မီးဢလူဝ်ႇၼၼ်ႉမၼ်းၸဝ်ႈႁဵတ်းၵႃႈတီႈၵၢင်ႁၢဝ်၊လိၼ်မိူင်း ၼမ်ႉသမ်ႇမုၵ်ႈတြႃႇဢိၵ်ႇတင်းၵႃႈတႂ်ႈဢၼ်လိုၵ်ႉ ဢၼ်လမ်ႇၵူႈတီႈၵူႈလႅၼ်ဢေႃႈ။
မၼ်းၸဝ်ႈႁဵတ်းႁႂ်ႈမွၵ်ႇၵုမ်ႈၽႃႉၽူၼ်လုၵ်ႉတီႈလႅၼ်လိၼ်သုတ်းၶိုၼ်းမႃးဢေႃႈ။ မၼ်းၸဝ်ႈႁႂ်ႈၽႃႉမႅပ်ႈဢွၵ်ႇၵႃႈတီႈၽူၼ်လူင်လူမ်းလူင်မႃးလႄႈ မၼ်းၸဝ်ႈဢဝ်လူမ်းဢွၵ်ႇသေၵႃႈၼႂ်း တိူၵ်ႈၽၢၼ်ႇတႃႇမၼ်းၸဝ်ႈမႃးဢေႃႈ။
ၵႃႈၼႂ်းမိူင်း ဢေးၵျိပ်ႉ၊ ၼၼ်ႉမၼ်းၸဝ်ႈပၼ် ၽေးတၢမ်ႇတၢင်းတၢႆၵႃႈတီႈ လုၵ်ႈတူၼ်ႈၵူၼ်း၊ၵႃႈတီႈလုၵ်ႈတူၼ်ႈတူဝ်သတ်း မိူၼ်မိူၼ်ၵၼ်ယဝ်ႉဢေႃႈ။
ၵႃႈတီႈၼၼ်ႈမၼ်းၸဝ်ႈႁဵတ်းၼႄ ၼိမိၵ်ႈလၢၵ်ႈၶၼႃႇ၊ ဢိၵ်ႇတင်းတၢင်းဢၼ်လၢၵ်ႈ ဢၼ်လၢႆးၼမ်ၼႃႇ ႁႂ်ႈလႆႈပၼ်ၽေးတၢမ်ႇတီႈၶုၼ်ႁေႃၶမ်းဢိၵ်ႇတင်းမူးမၢတ်ႈၽွင်းမိူင်းမၼ်းတင်းလၢႆဢေႃႈ။
မၼ်းၸဝ်ႈယႃႉၽဵဝ်ႈပႅတ်ႈမဵဝ်းၵူၼ်းၼမ်ၼႃႇလႄႈ ဢဝ်တၢႆပႅတ်ႈ၊ ၶုၼ်ႁေႃၶမ်းဢၼ်တၼ်းၶူဝ်းယႂ်ႇတင်းလၢႆ ဢၼ်ပဵၼ်၊
ၶုၼ် သိႁုၼ်ႇ၊ ၶုၼ်ႁေႃၶမ်းဝဵင်း ဢႃႇမေႃးရိ၊ ဢေႃႇၶႃႉ၊ ၶုၼ်ႁေႃၶမ်းမိူင်း ပႃႇသၢၼ်ႇ၊ ဢိၵ်ႇတင်းၵႃႈဢၼ်ပဵၼ်ၶုၼ်ႁေႃၶမ်းမိူင်း ၶႃႇၼၼ်ႇ၊ တင်းသဵင်ႈတင်းလူင်ယဝ်ႉဢေႃႈ။
မၼ်းၸဝ်ႈဢဝ်မိူင်းၶဝ်ၸိူဝ်းၼၼ်ႉပၼ်တီႈ ၵူၼ်းမၼ်းၸဝ်ႈတင်းလၢႆလႄႈ ဢဝ်မိူင်းၸိူဝ်းၼၼ်ႉဢၢပ်ႈပၼ်တီႈ ၵူၼ်းမဵဝ်း ဢိသရေး၊ ဢေႃႈ။
ထႃႇဝရႃႉၽြႃး၊ တီႈၶႃႈ။ ၼႃႇမႃႉၸိုဝ်ႈသဵင်ၸဝ်ႈႁဝ်းတႄႇယူႇတႃႇသေႇဢမ်ႇထၢတ်ႇလႄႈ ၵူၼ်းသိုပ်ႇသိုပ်ႇတၢမ်တၢမ်တၵ်းဢွၼ်ၵၼ် ၶုၵ်းၸႂ်လႆႈၸဝ်ႈႁဝ်းယူႇတီႈၶႃႈဢေႃႈ။
ထႃႇဝရႃႉၽြႃး၊ တၵ်းၵႅတ်ႇၶႄႁႄႉၵင်ႈပၼ် ၵူၼ်းမၼ်းၸဝ်ႈတင်းလၢႆလႄႈ တၵ်းမီးၸႂ်ဢၼ်ဢဵတ်းလူၶႃႈမၼ်းၸဝ်ႈ တင်းလၢႆဢေႃႈ။
ၽြႃးတင်းလၢႆဢၼ်မဵဝ်းၵူၼ်းတင်းလၢႆဝႆႈၼၼ်ႉပဵၼ်ငိုၼ်းပဵၼ်ၶမ်းဢေႃႈ။ ပဵၼ်ၶိူင်ႈပိူင်ဢၼ်ဢဝ်မိုဝ်းၵူၼ်းႁဵတ်းဢေႃႈ။
ၶဝ်မီးသူပ်းဢေႃႈ။ ၵူၺ်းၵႃႈ၊ဢမ်ႇၸၢင်ႈ လၢတ်ႈထွႆႈလၢတ်ႈၵႂၢမ်း။ ၶဝ်မီးမၢၵ်ႇတႃဢေႃႈ။ ၵူၺ်းၵႃႈ၊ ဢမ်ႇၸၢင်ႈတူၺ်းႁၼ်လႆႈ။
ၶဝ်မီးႁူဢေႃႈ။ ၵူၺ်းၵႃႈ၊ဢမ်ႇၸၢင်ႈထွမ်ႇ ၸၢင်ႈငိၼ်းလႆႈ၊ ၶဝ်ယင်းဢမ်ႇမီးဢသၢၵ်ႈဢၼ်ၸၢင်ႈ ထူၺ်ႈၸႂ်ၶဝ်ႈထူၺ်ႈၸႂ်ဢွၵ်ႇဢေႃႈ။
ႁႂ်ႈၶဝ်ၸိူဝ်းဢၼ်ႁဵတ်းဢိၵ်ႇတင်းၶဝ်ၸိူဝ်းဢၼ် ဝႆႈႁုၼ်ႇႁၢင်ႈသၢင်းထုၼၼ်ႉၵေႃႈ၊ ပဵၼ်မိူၼ်ၵၼ်တင်းႁုၼ်ႇႁၢင်ႈသၢင်းထုဢၼ် ၶဝ်ႁဵတ်းၼၼ်ႉသေၵမ်းလူၺ်ႈ။
ၵူၼ်းမဵဝ်း ဢိသရေး၊ ၶဝ်႟။ ယွင်ႈယေႃး ထႃႇဝရႃႉၽြႃး၊ တႃႉ။ ၸိူဝ်ႉၶိူဝ်းမဵဝ်း ဢႃႇရုၼ်ႇ၊ ၶဝ်႟။ ယွင်ႈယေႃး ထႃႇဝရႃႉၽြႃး၊ တႃႉ။
ၸိူဝ်ႉၶိူဝ်းမဵဝ်း လေႇဝိ၊ ၶဝ်႟။ ယွင်ႈယေႃး ထႃႇဝရႃႉၽြႃး၊ တႃႉ။ သူၸိူဝ်းဢၼ်ဝႆႈသႃမၼ်းၸဝ်ႈတင်းသဵင်ႈတင်းလူင် ၶဝ်႟။ ယွင်ႈယေႃး ထႃႇဝရႃႉၽြႃး၊ တႃႉ။
ဢွၼ်ၵၼ်ယွင်ႈယေႃး ထႃႇဝရႃႉၽြႃး၊ ၵႃႈၼိူဝ်လွႆ ၸိဢုၼ်ႇ၊ ၵႃႈၼႂ်းဝဵင်း ယေႇရုသလႅမ်ႇ၊ ၵႃႈၼႂ်းႁိူၼ်းမၼ်းၸဝ်ႈၼၼ်ႉတႃႉ။ ယွင်ႈယေႃး ထႃႇဝရႃႉၽြႃး၊ တီႈၶႃႈဢေႃႈ။
ဢွၼ်ၵၼ်ယွင်ႈယေႃးတၢင်ႇၵျေးၸူးတီႈ ထႃႇဝရႃႉၽြႃး၊ ပိူဝ်ႈဢၼ်မၼ်းၸဝ်ႈ မျၢတ်ႈလီၼၼ်ႉတႃႉ။ တၢင်းႁၵ်ႉမႅတ်ႈတႃႇမၼ်းၸဝ်ႈၼၼ်ႉ တႄႇယူႇတႃႇသေႇဢမ်ႇထၢတ်ႇဢေႃႈ။
ဢွၼ်ၵၼ်ယွင်ႈယေႃးၵျေးၸူးတၢင်းဢၼ် မၼ်းၸဝ်ႈ ယႂ်ႇမျၢတ်ႈၼႃႇသေၽြႃးတင်းသဵင်ႈ တင်းလူင်ၼၼ်ႉတႃႉ။ တၢင်းႁၵ်ႉမႅတ်ႈတႃႇမၼ်းၸဝ်ႈၼၼ်ႉတႄႇယူႇတႃႇသေႇဢမ်ႇထၢတ်ႇဢေႃႈ။
ဢွၼ်ၵၼ်ယွင်ႈယေႃးၵျေးၸူးတၢင်းဢၼ် မၼ်းၸဝ်ႈ သုင်မျၢတ်ႈၼႃႇသေၸဝ်ႈတင်းသဵင်ႈ တင်းလူင်ၼၼ်ႉတႃႉ။ တၢင်းႁၵ်ႉမႅတ်ႈတႃႇမၼ်းၸဝ်ႈၼၼ်ႉတႄႇယူႇတႃႇသေႇဢမ်ႇထၢတ်ႇဢေႃႈ။
မၼ်းၸဝ်ႈသူႇလဵဝ်ပႃးလဵဝ်ၵူၺ်းႁဵတ်းၼႄလၢၵ်ႈၶၼႃႇဢၼ်ယႂ်ႇၼႃႇတင်းလၢႆဢေႃႈ။ တၢင်းႁၵ်ႉမႅတ်ႈတႃႇမၼ်းၸဝ်ႈၼၼ်ႉတႄႇယူႇ တႃႇသေႇဢမ်ႇထၢတ်ႇဢေႃႈ။
မၼ်းၸဝ်ႈဢဝ်တင်းပိင်ႇၺႃႇတၢင်းၵတ်ႉတၢင်းၶၼ်သေလႄႈႁဵတ်းပဵၼ်ၵၢင်ႁၢဝ်ဢေႃႈ။ တၢင်းႁၵ်ႉမႅတ်ႈတႃႇမၼ်းၸဝ်ႈၼၼ်ႉတႄႇယူႇ တႃႇသေႇဢမ်ႇထၢတ်ႇဢေႃႈ။
မၼ်းၸဝ်ႈတႄႇႁဵတ်းလိၼ်မိူင်းၵႃႈၼိူဝ် ၼမ်ႉတင်းလၢႆဢေႃႈ။ တၢင်းႁၵ်ႉမႅတ်ႈတႃႇမၼ်းၸဝ်ႈၼၼ်ႉတႄႇယူႇ တႃႇသေႇဢမ်ႇထၢတ်ႇဢေႃႈ။
မၼ်းၸဝ်ႈႁဵတ်းပဵၼ်ၵၢင်ဝၼ်းဢိၵ်ႇတင်း လိူၼ်ဢေႃႈ။ တၢင်းႁၵ်ႉမႅတ်ႈတႃႇမၼ်းၸဝ်ႈၼၼ်ႉတႄႇယူႇ တႃႇသေႇဢမ်ႇထၢတ်ႇဢေႃႈ။
တႃဝၼ်းၼၼ်ႉႁႂ်ႈလႆႈဢုပ်ႉပိူင်ႇၵၢင်ဝၼ်းဢေႃႈ။ တၢင်းႁၵ်ႉမႅတ်ႈတႃႇမၼ်းၸဝ်ႈၼၼ်ႉတႄႇယူႇ တႃႇသေႇဢမ်ႇထၢတ်ႇဢေႃႈ။
လိူၼ်ဢိၵ်ႇတင်းလၢဝ်တင်းလၢႆႁႂ်ႈလႆႈ ဢုပ်ႉပိူင်ႇၵၢင်ၶိုၼ်းဢေႃႈ။ တၢင်းႁၵ်ႉမႅတ်ႈတႃႇမၼ်းၸဝ်ႈၼၼ်ႉတႄႇယူႇ တႃႇသေႇဢမ်ႇထၢတ်ႇဢေႃႈ။
မၼ်းၸဝ်ႈဢဝ်လုၵ်ႈၸၢႆးတူၼ်ႈတၢႆပႅတ်ႈ ၵႃႈၼႂ်းမိူင်း ဢေးၵျိပ်ႉ၊ ဢေႃႈ။ တၢင်းႁၵ်ႉမႅတ်ႈတႃႇမၼ်းၸဝ်ႈၼၼ်ႉတႄႇယူႇ တႃႇသေႇဢမ်ႇထၢတ်ႇဢေႃႈ။
မၼ်းၸဝ်ႈဢွၼ်ဢဝ်ၵူၼ်းမဵဝ်း ဢိသရေး၊ တင်းလၢႆဢွၵ်ႇၵႃႈၼႂ်းမိူင်း ဢေးၵျိပ်ႉ၊ မႃးဢေႃႈ။ တၢင်းႁၵ်ႉမႅတ်ႈတႃႇမၼ်းၸဝ်ႈၼၼ်ႉတႄႇယူႇ တႃႇသေႇဢမ်ႇထၢတ်ႇဢေႃႈ။
ဢဝ်တင်းမိုဝ်းဢၼ်မီးႁႅင်း၊ၶႅၼ်မိုဝ်းဢၼ်မီး တၼ်းၶူဝ်းမၼ်းၸဝ်ႈၼၼ်ႉသေလႄႈ ႁဵတ်းၸိူဝ်ႉၼင်ႇၼၼ်ဢေႃႈ။ တၢင်းႁၵ်ႉမႅတ်ႈတႃႇမၼ်းၸဝ်ႈၼၼ်ႉတႄႇယူႇ တႃႇသေႇဢမ်ႇထၢတ်ႇဢေႃႈ။
မၼ်းၸဝ်ႈၽႃႇပၢင်ႇလၢႆႇလႅင်ၶၢတ်ႇပဵၼ်သွင်ၽၢၵ်ႇသွင်ပွတ်းၵႂႃႇဢေႃႈ။ တၢင်းႁၵ်ႉမႅတ်ႈတႃႇမၼ်းၸဝ်ႈၼၼ်ႉတႄႇယူႇ တႃႇသေႇဢမ်ႇထၢတ်ႇဢေႃႈ။
မၼ်းၸဝ်ႈဢွၼ်ဢဝ်ၵူၼ်းမၼ်းၸဝ်ႈတင်းလၢႆသူင်ႇႁႂ်ႈပူၼ်ႉၵႃႈတီႈၼၼ်ႈၵႂႃႇဢေႃႈ။ တၢင်းႁၵ်ႉမႅတ်ႈတႃႇမၼ်းၸဝ်ႈၼၼ်ႉတႄႇယူႇ တႃႇသေႇဢမ်ႇထၢတ်ႇဢေႃႈ။
မၼ်းၸဝ်ႈသမ်ႉဢဝ်ၶုၼ်ႁေႃၶမ်း ဢေးၵျိပ်ႉ၊ တင်း တပ်ႉသိုၵ်းမၼ်းတူၵ်းၸူမ်လႄႈတၢႆဢေႃႈ။ တၢင်းႁၵ်ႉမႅတ်ႈတႃႇမၼ်းၸဝ်ႈၼၼ်ႉတႄႇယူႇ တႃႇသေႇဢမ်ႇထၢတ်ႇဢေႃႈ။
မၼ်းၸဝ်ႈဢွၼ်ဢဝ်ၵူၼ်းမၼ်းၸဝ်ႈတင်းလၢႆ သူင်ႇၶၢမ်ႈထိူၼ်ႇလႅင်ႉၵႂႃႇဢေႃႈ။ တၢင်းႁၵ်ႉမႅတ်ႈတႃႇမၼ်းၸဝ်ႈၼၼ်ႉတႄႇယူႇ တႃႇသေႇဢမ်ႇထၢတ်ႇဢေႃႈ။
မၼ်းၸဝ်ႈဢဝ်ၶုၼ်ႁေႃၶမ်းဢၼ်တၼ်းၶူဝ်းယႂ်ႇ တင်းလၢႆၼၼ်ႉတၢႆပႅတ်ႈဢေႃႈ။ တၢင်းႁၵ်ႉမႅတ်ႈတႃႇမၼ်းၸဝ်ႈၼၼ်ႉတႄႇယူႇ တႃႇသေႇဢမ်ႇထၢတ်ႇဢေႃႈ။
မၼ်းၸဝ်ႈဢဝ်ၶုၼ်ႁေႃၶမ်းဢၼ်ၸိုဝ်ႈသဵင်ယႂ်ႇ တင်းလၢႆတၢႆပႅတ်ႈဢေႃႈ။ တၢင်းႁၵ်ႉမႅတ်ႈတႃႇမၼ်းၸဝ်ႈၼၼ်ႉတႄႇယူႇ တႃႇသေႇဢမ်ႇထၢတ်ႇဢေႃႈ။
ဢဝ်ၶုၼ် သိႁုၼ်ႇ၊ ၶုၼ်ႁေႃၶမ်း ဢႃႇမေႃးရိ၊ တၢႆပႅတ်ႈဢေႃႈ။ တၢင်းႁၵ်ႉမႅတ်ႈတႃႇမၼ်းၸဝ်ႈၼၼ်ႉတႄႇယူႇ တႃႇသေႇဢမ်ႇထၢတ်ႇဢေႃႈ။
ဢဝ်ၶုၼ် ဢေႃႇၶႃႉ၊ ၶုၼ်ႁေႃၶမ်း ပႃႇသၢၼ်ႇ၊ တၢႆပႅတ်ႈဢေႃႈ။ တၢင်းႁၵ်ႉမႅတ်ႈတႃႇမၼ်းၸဝ်ႈၼၼ်ႉတႄႇယူႇ တႃႇသေႇဢမ်ႇထၢတ်ႇဢေႃႈ။
မၼ်းၸဝ်ႈဢဝ်မိူင်းၶဝ်ၸိူဝ်းၼၼ်ႉပၼ်တီႈ ၵူၼ်းမၼ်းၸဝ်ႈတင်းလၢႆဢေႃႈ။ တၢင်းႁၵ်ႉမႅတ်ႈတႃႇမၼ်းၸဝ်ႈၼၼ်ႉတႄႇယူႇ တႃႇသေႇဢမ်ႇထၢတ်ႇဢေႃႈ။
ပၼ်ႁႂ်ႈပဵၼ်ဢမူၺ်ႇတီႈၵူၼ်းမဵဝ်း ဢိသရေး၊ ဢၼ်ပဵၼ်ၶႃႈမၼ်းၸဝ်ႈၼၼ်ႉဢေႃႈ။ တၢင်းႁၵ်ႉမႅတ်ႈတႃႇမၼ်းၸဝ်ႈၼၼ်ႉတႄႇယူႇ တႃႇသေႇဢမ်ႇထၢတ်ႇဢေႃႈ။
မၼ်းၸဝ်ႈဢမ်ႇလူင်လိုမ်းပႅတ်ႈႁဝ်းယၢမ်းမိူဝ်ႈ ဢၼ်ႁဝ်းတူၵ်းသုမ်းၼၼ်ႉ။ တၢင်းႁၵ်ႉမႅတ်ႈတႃႇမၼ်းၸဝ်ႈၼၼ်ႉတႄႇယူႇ တႃႇသေႇဢမ်ႇထၢတ်ႇဢေႃႈ။
မၼ်းၸဝ်ႈပွႆႇႁႂ်ႈႁဝ်းလွတ်ႈသေၵႃႈၼႂ်း မိုဝ်းရၢၼ်ႇသူႇႁဝ်းၸိူဝ်းၼၼ်ႉဢေႃႈ။ တၢင်းႁၵ်ႉမႅတ်ႈတႃႇမၼ်းၸဝ်ႈၼၼ်ႉတႄႇယူႇ တႃႇသေႇဢမ်ႇထၢတ်ႇဢေႃႈ။
မၼ်းၸဝ်ႈလဵင်ႉပၼ်ဢွႆႇပၼ်တၢင်းၵိၼ်တၢင်းၶူပ်းတီႈသတ်ႉတဝႃႇတင်းသဵင်ႈတင်းလူင်ဢေႃႈ။ တၢင်းႁၵ်ႉမႅတ်ႈတႃႇမၼ်းၸဝ်ႈၼၼ်ႉတႄႇယူႇ တႃႇသေႇဢမ်ႇထၢတ်ႇဢေႃႈ။
ဢွၼ်ၵၼ်ယွင်ႈယေႃးၵျေးၸူးၽြႃးပဵၼ်ၸဝ်ႈ ၵၢင်ႁၢဝ်ၼၼ်ႉတႃႉႁဝ်း။ တၢင်းႁၵ်ႉမႅတ်ႈတႃႇမၼ်းၸဝ်ႈၼၼ်ႉတႄႇယူႇ တႃႇသေႇဢမ်ႇထၢတ်ႇဢေႃႈ။
ႁဝ်းၼင်ႈၵႃႈတီႈႁိမ်းၼမ်ႉႁွင်ႈၼမ်ႉၵႄး ပႃႇပုလုၼ်ႇ၊ ၸိူဝ်းၼၼ်ႉလႄႈ ႁဝ်းၶုၵ်းၸႂ်လႆႈၶႂ်ႈၸႂ်ထိုင်ဝဵင်း ၸိဢုၼ်ႇ၊ ယူႇတႃႇသေႇလႄႈႁွင်ႉႁႆႈဢေႃႈ။
ႁဝ်းဢွၼ်ၵၼ်ဢဝ်တိင်ႇႁဝ်းၸိူဝ်းၼၼ်ႉ ႁွႆႈဝႆႉၵႃႈတီႈ တူၼ်ႈမႆႉၶႆႉ၊ ၸိူဝ်းဢၼ် မီးႁိမ်းႁွမ်းၼၼ်ႉဢေႃႈ။
ၶဝ်ၸိူဝ်းဢၼ်တိဢဝ်ၶျုၵ်ႈႁဝ်းဝႆႉၼၼ်ႉ ယွၼ်းႁႂ်ႈႁဝ်းႁဵတ်းၵႂၢမ်း၊ႁႂ်ႈႁဝ်းႁဵတ်း တၢင်းဢၼ်သႂၢင်ႇဢၼ်သိူဝ်းပုၼ်ႈၶဝ်လႄႈဝႃႈ၊ “ႁဵတ်းၵႂၢမ်းလွင်ႈဝဵင်း ၸိဢုၼ်ႇ၊ ၼၼ်ႉ ပၼ်ႁဝ်းတႃႉ၊” ဝႃႈၼင်ႇၼႆဢေႃႈ။
ႁဝ်းတၵ်းႁဵတ်းၸိူဝ်ႉၼင်ႇႁိုဝ်ႁဵတ်းၵႂၢမ်းတီႈ ထႃႇဝရႃႉၽြႃး၊ ၵႃႈၼႂ်းပႃႇၽိူင်းမိူင်းပိူၼ်ႈၼႆႉ လႆႈၸိူဝ်ႉၼင်ႇႁိုဝ်။
ဢူဝ်းဝဵင်း ယေႇရုသလႅမ်ႇ၊ ႟။ ပေႃးၵဝ်လူင်လိုမ်းမႂ်းၸိုင်၊ ႁႂ်ႈၵဝ်ဢမ်ႇမေႃလဵတ်းတိင်ႇလႆႈထႅင်ႈသေပွၵ်ႈ သေၵမ်းလူၺ်ႈ။
ပေႃးၵဝ်ဢမ်ႇၶုၵ်းၸႂ်လႆႈမႂ်း၊ပေႃးၵဝ်ဢမ်ႇမၢတ်ႈမႂ်းပဵၼ်တီႈၵဝ်သိူဝ်းပျေႃႇသေပိူၼ်ႈၼၼ်ႉၸိုင်၊ ႁႂ်ႈၵဝ်ဢမ်ႇမေႃႁဵတ်းၵႂၢမ်းလႆႈထႅင်ႈသေပွၵ်ႈ သေၵမ်းလူၺ်ႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈၶုၵ်းၸႂ်လႆႈလွင်ႈတၢင်းဢၼ်ၵူၼ်းမဵဝ်း ဢေႇတုမ်ႇ၊ ၶဝ် ႁဵတ်းၼႂ်းဝၼ်းဢၼ်ၶဝ်တိဢဝ်ၶျုၵ်ႈဝႆႉဝဵင်း ယေႇရုသလႅမ်ႇ၊ ၼၼ်ႉသေၵမ်းတီႈၶႃႈ။ ၶႅၼ်းတေႃႈၶုၵ်းၸႂ်လႆႈတၢင်းဢၼ်ၶဝ်လၢတ်ႈ ၶိူဝ်းၶိူဝ်းယႂ်းယႂ်းယူႇလႄႈဝႃႈ၊ “ၽဵဝ်ႈမၼ်း ပႅတ်ႈတႃႉ။ ၽဵဝ်ႈမၼ်းပႅတ်ႈထၢၼ်ႈပေႃး ႁႂ်ႈမၼ်းႁွတ်ႈထိုင်ငဝ်ႈႁၢၵ်ႈမၼ်းၵႂႃႇတႃႉ၊” ဝႃႈၼင်ႇၼႆၼၼ်ႉသေၵမ်းတီႈၶႃႈ။
ဝဵင်း ပႃႇပုလုၼ်ႇ၊ ႟။ မႂ်းတၵ်း လူမ်ႉပင်းလုလႅဝ်ဢေႃႈ။ ၵေႃႉဢၼ်တွပ်ႇတႅၼ်းပၼ်ဢပျတ်ႈတီႈမႂ်း ၸွမ်းၵႃႈၼင်ႇဢၼ်မႂ်း ႁဵတ်းတီႈႁဝ်းၼၼ်ႉမီးမၢင်ႇၵလႃႇဢေႃႈ။
ၵေႃႉဢၼ်ယိပ်းၵမ်ဢဝ်လုၵ်ႈဢွၼ်ႇလၢင်းဢွၼ်ႇမႂ်းသေလႄႈ သွင်ႉသႂ်ႇၵႃႈၼိူဝ်မၢၵ်ႇႁိၼ်ၼၼ်ႉ မီးမၢင်ႇၵလႃႇဢေႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈ ပႃးၸႂ်ပႃးၶေႃးယွင်ႈယေႃးတၢင်ႇၵျေးၸူးၸဝ်ႈႁဝ်းယူႇတီႈၶႃႈဢေႃႈ။ ၶႃႈၸဝ်ႈႁဵတ်းၵႂၢမ်းယွင်ႈယေႃးၸဝ်ႈႁဝ်းၵႃႈတီႈ ၽၢႆႇၼႃႈၽြႃးတင်းလၢႆတီႈၶႃႈဢေႃႈ။
ၶႃႈၸဝ်ႈဝၢႆႇၼႃႈၸူးၵျွင်းပိၵ်ႈမၢၼ်ႇ ဢၼ်မူတ်းၸၢင်ႇၸဝ်ႈသေလႄႈ ၶုပ်ႉမူပ်ႇယွင်ႈယေႃးၼႃႇမႃႉၸိုဝ်ႈသဵင်ၸဝ်ႈႁဝ်း ၵွပ်ႈပိူဝ်ႈမႅတ်ႈတႃႇၵရုၼႃႇ ဢိၵ်ႇတင်းသဵတ်ႈၸႃႇၸဝ်ႈႁဝ်းဢိၵ်ႇတင်း ၵွပ်ႈပိူဝ်ႈဢၼ်ၸဝ်ႈႁဝ်းယုၵ်ႉယွင်ႈ ၼႃႇမႃႉၸိုဝ်ႈသဵင်ၸဝ်ႈႁဝ်း၊ တင်းၼုၵ်ႈၵပၢတ်ႈၸဝ်ႈႁဝ်းၸိူဝ်းၼၼ်ႉ သုင်ၼႃႇသေၵႃႈမီးၵူႈၸိူဝ်ႉၵူႈပိူင်ၼၼ်ႉ တီႈၶႃႈဢေႃႈ။
ၼႂ်းမိူဝ်ႈဢၼ်ၶႃႈၸဝ်ႈႁွင်ႉၵၢဝ်ႇတီႈၸဝ်ႈႁဝ်းၼၼ်ႉၸဝ်ႈႁဝ်းၶိုၼ်းဢိူဝ်ၶႃႈၸဝ်ႈလႄႈ ဢဝ်တင်းႁႅင်းတၼ်းၶူဝ်းၸဝ်ႈႁဝ်းႁႂ်ႈဝိၺိၺ်ႇ ၶႃႈၸဝ်ႈႁႅင်းယႂ်ႇမႃးတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶုၼ်ႁေႃၶမ်း လေႃးၵီႇတင်းသဵင်ႈတင်းလူင်တၵ်းဢွၼ်ၵၼ် ယွင်ႈယေႃးၸဝ်ႈႁဝ်း ၵွပ်ႈပိူဝ်ႈဢၼ်ၶဝ်လႆႈငိၼ်းၵႂၢမ်းၵတိၸဝ်ႈႁဝ်း ၸိူဝ်းၼၼ်ႉတီႈၶႃႈဢေႃႈ။
ၶဝ်တၵ်းဢွၼ်ၵၼ်ႁဵတ်းၵႂၢမ်းယွင်ႈယေႃးလွင်ႈတၢင်းဢၼ်ၸဝ်ႈႁဝ်းႁဵတ်းဝႆႉတင်းလၢႆ၊ ဢိၵ်ႇတင်းလွင်ႈဢၼ်မုၼ်ၽုင်းၸဝ်ႈႁဝ်း ယႂ်ႇၼႃႇၼၼ်ႉတီႈၶႃႈဢေႃႈ။
တေႃႈၵႃႈ ထႃႇဝရႃႉၽြႃး၊ ပဵၼ်ၸဝ်ႈဢၼ် သုင်မျၢတ်ႈၼႃႇသေၵေႃႈ မၼ်းၸဝ်ႈလူတူၺ်းၶဝ်ၸိူဝ်းဢၼ်ႁူဝ်ၸႂ် ၶျႃးတႅမ်ႇၼၼ်ႉယူႇဢေႃႈ။ ၶဝ်ၸိူဝ်းဢၼ်ၸႂ်သုင်ၼၼ်ႉၸမ်ႉဢမ်ႇပၢႆႈသိူင်ႇ ပၢႆႈမႅပ်းသေၵႃႈတီႈမၼ်းၸဝ်ႈလႆႈဢေႃႈ။
ၼႂ်းမိူဝ်ႈဢၼ်ၶႃႈၸဝ်ႈၶမ်ယူႇၵႃႈၼႂ်းၽေး တုၵ်ႉၶႃႉတၢင်းၽၢၼ်ၼၼ်ႉ ၸဝ်ႈႁဝ်းပႂ်ႉထိင်းႁႂ်ႈၶႃႈၸဝ်ႈလႆႈလူင်ႈလီ လွတ်ႈလီတီႈၶႃႈဢေႃႈ။ ၸဝ်ႈႁဝ်းၶတ်းၶႅင်ႇႁႅင်းတႃႉရၢၼ်ႇသူႇၶႃႈၸဝ်ႈ ၸိူဝ်းဢၼ်မီးတေႃးသႃႉၸႂ်မႆႈၶႂ်ႈၸႃႉ ယူႇၼၼ်ႉသေလႄႈ ဢဝ်တင်းႁႅင်းတၼ်းၶူဝ်းၸဝ်ႈႁဝ်းၵႄႇသႄႇ ၶျွတ်ႈဢဝ်ၶႃႈၸဝ်ႈတီႈၶႃႈဢေႃႈ။
ၸဝ်ႈႁဝ်းတၵ်းႁဵတ်းၸွမ်းၵႃႈၼင်ႇဢၼ်ဝႆႉၵတိ ၼၼ်ႉႁႂ်ႈယဝ်ႉတူဝ်ႈၵူႈၸိူဝ်ႉၵူႈပိူင် တီႈၶႃႈဢေႃႈ။ ထႃႇဝရႃႉၽြႃး၊ တီႈၶႃႈ။ တၢင်းႁၵ်ႉမႅတ်ႈတႃႇၸဝ်ႈႁဝ်းတႄႇယူႇ တႃႇသေႇဢမ်ႇထၢတ်ႇတီႈၶႃႈဢေႃႈ။ ၶႅၼ်းတေႃႈဢဝ်လွင်ႈတၢင်းဢၼ်ၸဝ်ႈႁဝ်း တႄႇၸႃႉပွင်ႁဵတ်းဝႆႉၸိူဝ်းၼၼ်ႉ ႁဵတ်းႁႂ်ႈယဝ်ႉတူဝ်ႈလီငၢမ်းသေၵမ်းတီႈၶႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းၸႅတ်ႈတူၺ်းၶႃႈၸဝ်ႈလႄႈႁုတီႈၶႃႈဢေႃႈ။
ၸဝ်ႈႁဝ်းႁုလွင်ႈတၢင်းဢၼ်ၶႃႈၸဝ်ႈႁဵတ်း ၵူႈၸိူဝ်ႉၵူႈပိူင်ၼၼ်ႉတီႈၶႃႈဢေႃႈ။ ၸဝ်ႈႁဝ်းယူႇတီႈဢၼ်ၵႆလႄႈႁုၸႅင်ႈတၢင်းဢၼ်ၶႃႈၸဝ်ႈၵျၢမ်ႇပွင်ၼၼ်ႉတီႈၶႃႈဢေႃႈ။
ၸဝ်ႈႁဝ်းႁၼ်တၢင်းဢၼ်ၶႃႈၸဝ်ႈပွင်ႁဵတ်းယူႇ ဢိၵ်ႇတင်းတၢင်းဢၼ်ၶႃႈၸဝ်ႈလိုဝ်ႈႁိူဝ်ႉယူႇၼၼ်ႉတီႈၶႃႈဢေႃႈ။ ၸဝ်ႈႁဝ်းႁုၵၢၼ်ငၢၼ်းၶႃႈၸဝ်ႈတင်းသဵင်ႈ တင်းမူတ်းတီႈၶႃႈဢေႃႈ။
ၸဵမ်မိူဝ်ႈဢၼ်ၶႃႈၸဝ်ႈဢမ်ႇပႆႇလၢတ်ႈ ဢွၵ်ႇသူပ်းၼၼ်ႉ ၸဝ်ႈႁဝ်းႁုလွင်ႈတၢင်းဢၼ်ၶႃႈၸဝ်ႈတၵ်းလၢတ်ႈၼၼ်ႉယဝ်ႉတီႈၶႃႈဢေႃႈ။
ၸဝ်ႈႁဝ်းလွမ်ႉၼႃႈလွမ်ႉလင်ၶႃႈၸဝ်ႈဝႆႉသေလႄႈ ၸဝ်ႈႁဝ်းဢဝ်တင်းႁႅင်းတၼ်းၶူဝ်းၸဝ်ႈႁဝ်း ၵႅတ်ႇၶႄႁႄႉၵင်ႈၶႃႈၸဝ်ႈတီႈၶႃႈဢေႃႈ။
ၺၢၼ်ႇၸဝ်ႈႁဝ်းပဵၼ်ဢၼ်လိုၵ်ႉလမ်ႇၼႃႇပုၼ်ႈၶႃႈၸဝ်ႈလႄႈ ပဵၼ်ဢၼ်သုင်မျၢတ်ႈၼႃႇလႄႈၶႃႈၸဝ်ႈ ထၢၼ်ႈပေႃးဢမ်ႇၶိုတ်းထိုင်လႆႈတီႈၶႃႈဢေႃႈ။
ၶႃႈၸဝ်ႈတၵ်းၵႂႃႇၵႃႈတီႈလႂ် ႁႂ်ႈၵၢင်းလွတ်ႈတင်း ၸဝ်ႈႁဝ်းလႆႈတီႈၶႃႈ။ တၵ်းဢွၵ်ႇပၢႆႈၸူးၵႃႈတီႈလႂ်ႁႂ်ႈၵၢင်းလွတ်ႈတင်း ၼႃႈၸဝ်ႈႁဝ်းလႆႈတီႈၶႃႈ။
ပေႃးၶႃႈၸဝ်ႈၶိုၼ်ႈၵႂႃႇၵႃႈၼိူဝ်ၽႃႉၵၢင်ႁၢဝ်ၸိုင်၊ ၸဝ်ႈႁဝ်းမီးယူႇၵႃႈတီႈၼၼ်ႈဢေႃႈ။ ပေႃးၶႃႈၸဝ်ႈသိူဝ်ႇၽႃႈတီႈၼွၼ်းၵႃႈၼႂ်း မိူင်းမရၼႃႉၸိုင်၊ ၸဝ်ႈႁဝ်းမီးယူႇၵႃႈတီႈၼၼ်ႈတီႈၶႃႈဢေႃႈ။
ပေႃးၶႃႈၸဝ်ႈမိၼ်ပၢႆႈၵႂႃႇၽၢႆႇပုၼ်ႉ တၢင်းဝၼ်းဢွၵ်ႇ၊ ဢမ်ႇၼၼ်ၵေႃႈၵႂႃႇယူႇၵႃႈတီႈဢၼ်ၵႆၼႃႇ ၽၢႆႇပုၼ်ႉတၢင်းဝၼ်းတူၵ်းသေၵေႃႈ။
ၸဝ်ႈႁဝ်းယူႇၵႃႈတီႈၼၼ်ႈလႄႈဢွၼ်သူင်ႇ ၶႃႈၸဝ်ႈယူႇတီႈၶႃႈဢေႃႈ။ ၸဝ်ႈႁဝ်းတၵ်းယူႇၵႃႈတီႈၼၼ်ႈလႄႈၸွႆႈထႅမ် မႃႉၸႃႉၶႃႈၸဝ်ႈယူႇတီႈၶႃႈဢေႃႈ။
ပေႃးၶႃႈၸဝ်ႈသမ်ႉလၢတ်ႈဝႃႈ၊ “ႁႂ်ႈလပ်းသိင်ႇၽိတ်းၽိတ်းၼၼ်ႉႁူမ်ႇသုမ်ႇၵဝ်ဝႆႉတႃႉ။ သမ်ႉႁႂ်ႈဢၼ်လႅင်းႁိမ်းၵဝ်ၼႆႉပဵၼ်ဢၼ်လပ်းသိင်ႇၵႂႃႇတႃႉ၊” ဝႃႈၼင်ႇၼႆတီႈၶႃႈၸိုင်။
တၢင်းဢၼ်လပ်းသိင်ႇၼၼ်ႉဢမ်ႇပဵၼ် ဢၼ်လပ်းသိင်ႇတီႈၸဝ်ႈႁဝ်းလႆႈ လႃးလႃးတီႈၶႃႈဢေႃႈ။ ၵၢင်ၶိုၼ်းလႅင်းယူႇ မိူၼ်ၸိူဝ်ႉၼင်ႇၵၢင်ဝၼ်းတီႈၶႃႈဢေႃႈ။ တီႈၸဝ်ႈႁဝ်းၼၼ်ႉဢၼ်လပ်းသိင်ႇဢိၵ်ႇတင်း ဢၼ်လႅင်းမိူၼ်ၵၼ်ၵူၺ်းတီႈၶႃႈဢေႃႈ။
ၸဝ်ႈႁဝ်းႁဵတ်းပဵၼ်ဢၢင်ႇၵႃႇၶႃႈၸဝ်ႈ ၵူႈၸိူဝ်ႉၵူႈဢၼ်သေယဝ်ႉ၊ ႁႂ်ႈတိတ်းၸပ်းၵၼ်ဝႆႉၵႃႈၼႂ်းတွင်ႉမႄႈၶႃႈၸဝ်ႈ တီႈၶႃႈယဝ်ႉ။
ၶႃႈၸဝ်ႈယွင်ႈယေႃးၸဝ်ႈႁဝ်းၵွပ်ႈပိူဝ်ႈဢၼ်ၸဝ်ႈႁဝ်းပဵၼ်တီႈဢၼ်လီၵူဝ်လီႁႄတီႈၶႃႈဢေႃႈ။ ၵႃႈဢၼ်ၸဝ်ႈႁဝ်းႁဵတ်းဝႆႉၼၼ်ႉပဵၼ်ဢၼ် လၢၵ်ႇလၢႆးလီဢၢမ်းၼႃႇတီႈၶႃႈဢေႃႈ။ လွင်ႈတၢင်းၸိူဝ်းၼႆႉၸိုင်၊ၶႃႈၸဝ်ႈႁုတီႈၸႂ် တီႈၶေႃးၶႃႈၸဝ်ႈတီႈၶႃႈဢေႃႈ။
မိူဝ်ႈဢၼ်တူဝ်ၶၢပ်ႈၶႃႈၸဝ်ႈ လႆႈၶၢမ်ႇ တၢင်းဢၼ်ႁဵတ်းပဵၼ်ယူႇလႄႈ ႁႂ်ႈၸပ်းၵၼ်ငီႇငႅၼ်ႇၵၼ်ယူႇၵႃႈၼႂ်း တွင်ႉမႄႈၶႃႈၸဝ်ႈသေယဝ်ႉ မိူဝ်ႈဢၼ်ၶႃႈၸဝ်ႈယႂ်ႇမႃးယူႇတဵတ်ႇတဵတ်ႇ ၼၼ်ႉၸိုင်၊ ၸဝ်ႈႁဝ်းႁုလွင်ႈဢၼ်ၶႃႈၸဝ်ႈမီးယူႇ ၵႃႈတီႈၼၼ်ႈၼၼ်ႉယူႇသေလႄႈ။
ၸဝ်ႈႁဝ်းႁၼ်ၶႃႈၸဝ်ႈယူႇၸူဝ်ႈဢၼ် ၶႃႈၸဝ်ႈယင်းဢမ်ႇပႆႇၵိူတ်ႇလဵင်ႉမႃးၼၼ်ႉတီႈၶႃႈဢေႃႈ။ မိုဝ်ႉဝၼ်းတင်းလၢႆဢၼ်မၵ်းၶၢၼ်းဝႆႉ တီႈၶႃႈၸဝ်ႈၼၼ်ႉၸိူဝ်းၼၼ်ႉ၊ ၸဵမ်မိူဝ်ႈဢၼ်လွင်ႈတၢင်းၸိူဝ်းၼၼ်ႉယင်းဢမ်ႇပႆႇ ပဵၼ်မႃးမီးမႃးသေၸိူဝ်ႉသေပိူင်ၼၼ်ႉ၊ သမ်ႉပေႃးမီးတၢင်းဢၼ်မၢတ်ႈမၢႆတႅမ်ႈဝႆႉ ၵႃႈၼႂ်းပပ်ႉၸရၢင်းၸဝ်ႈႁဝ်းဝႆႉတင်းသဵင်ႈ တင်းမူတ်းယဝ်ႉတီႈၶႃႈဢေႃႈ။
ၽြႃးပဵၼ်ၸဝ်ႈတီႈၶႃႈ။ တၢင်းၵျၢမ်ႇတၢင်းပွင် ၸဝ်ႈႁဝ်းၼၼ်ႉပဵၼ်ဢၼ်ပွင်ႇလႅင်းယၢပ်ႇၼႃႇလူင်လၢင် ပုၼ်ႈၶႃႈၸဝ်ႈလႄႈပဵၼ်ဢၼ်မီး ၼမ်ၼႃႇတီႈၶႃႈဢေႃႈ။
ပေႃးၶႃႈၸဝ်ႈၼပ်ႉဢၢၼ်ႇတူၺ်းၸိုင်၊တေမီးၼမ်ၼႃႇသေမဵတ်ႉႁိၼ်မဵတ်ႉသၢႆးတီႈၶႃႈဢေႃႈ။ မိူဝ်ႈဢၼ်ၶႃႈၸဝ်ႈတိုၼ်ႇမႃးၼၼ်ႉၸိုင်၊ ၶႃႈၸဝ်ႈယင်းမီးယူႇၵႃႈတီႈၸဝ်ႈႁဝ်းဢေႃႈ။
ၽြႃးပဵၼ်ၸဝ်ႈတီႈၶႃႈ။ ၸဝ်ႈႁဝ်း ၶႅၼ်းတေႃႈဢဝ်ၶဝ်ၸိူဝ်းဢၼ်ႁၢႆႉ ဢၼ်မိူၵ်ႈၼၼ်ႉ၊တၢႆပႅတ်ႈသေၵမ်းတီႈၶႃႈ။ ၸဝ်ႈႁဝ်းၶႅၼ်းတေႃႈဢဝ်ၵူၼ်းၸိူဝ်းဢၼ် ႁၢဝ်ႉဢၼ်ၵျၢမ်းၼၼ်ႉ၊ ဢွၵ်ႇသေၵႃႈတီႈၶႃႈၸဝ်ႈသေၵမ်းတီႈၶႃႈ။
ၶဝ်ၼၼ်ႉလၢတ်ႈၵႂၢမ်းဢၼ်ယုတ်ႈဢၼ်ႁၢႆႉ တီႈၸဝ်ႈႁဝ်းလႄႈ ၶဝ်သမ်ႇမုၵ်ႈသႄႉသွမ်းၼႃႇမႃႉၸိုဝ်ႈသဵင် ၸဝ်ႈႁဝ်းတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈ ငိၼ်းၸင်းၶဝ်ၸိူဝ်းဢၼ်ၸင်း ၸဝ်ႈႁဝ်းၼၼ်ႉတႄႉတႄႉတီႈၶႃႈဢေႃႈ။ ၶႃႈၸဝ်ႈလီႁင်ႈဢဵတ်ႇသဵတ်ႇၶဝ်ၸိူဝ်း ဢၼ်လုၵ်ႉၽိုၼ်ႉၶတ်းၵၼ်တင်းၸဝ်ႈႁဝ်း ၼၼ်ႉတီႈၶႃႈဢေႃႈ။
ၶႃႈၸဝ်ႈပႃးၸႂ်ပႃးၶေႃးငိၼ်းၸင်းၶဝ်ၼၼ်ႉ တႄႉတႄႉဝႃႈဝႃႈလႄႈ ၶႃႈၸဝ်ႈမၢတ်ႈၶဝ်ပဵၼ်ရၢၼ်ႇသူႇ ၶႃႈၸဝ်ႈတီႈၶႃႈဢေႃႈ။
ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈၸႅတ်ႈသေး တူၺ်းၶႃႈၸဝ်ႈသေလႄႈ ႁုၸႅင်ႈတပ်းပွတ်ႇႁူဝ်ၸႂ်ၶႃႈၸဝ်ႈ သေၵမ်းတီႈၶႃႈ။ ၸၢမ်းတူၺ်းၶႃႈၸဝ်ႈႁႂ်ႈႁုတၢင်းၵျၢမ်ႇတၢင်းပွင် ၶႃႈၸဝ်ႈသေၵမ်းတီႈၶႃႈ။
ၸၢင်ႈၶႄးတၵ်းမီးတၢင်းဢၼ်ၶႃႈၸဝ်ႈလႆႈ ၽိတ်းပိူင်ႈႁိုဝ်ဢမ်ႇႁုလႄႈ ၶႅၼ်းတေႃႈလူတူၺ်းႁူဝ်ၸႂ်ၶႃႈၸဝ်ႈ သေၵမ်းတီႈၶႃႈ။ ၶႅၼ်းတေႃႈဢွၼ်သူင်ႇၶႃႈၸဝ်ႈၵႂႃႇၸွမ်း သဵၼ်ႈတၢင်းထႃႇဝရႃႉသေၵမ်းတီႈၶႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈၵႄႇသႄႇထုတ်ႇၼုၵ်ႈဢဝ်ၶႃႈၸဝ်ႈသေ၊ ၵႃႈၼႂ်းမိုဝ်းၵူၼ်းႁၢႆႉၵူၼ်းမိူၵ်ႈသေလႄႈ ၶႅၼ်းတေႃႈႁႂ်ႈၶႃႈၸဝ်ႈၵၢင်းလွတ်ႈသေၵႃႈတီႈၵူၼ်းဢၼ်ႁၢဝ်ႉၵျၢမ်းတင်းလၢႆသေၵမ်းတီႈၶႃႈ။
ၶဝ်ၼၼ်ႉၵျၢမ်ႇပွင်ဢၼ်ဢမ်ႇလီဢမ်ႇငၢမ်း ယူႇတႃႇသေႇလႄႈ ၶဝ်သူၼ်းယူင်းႁႂ်ႈၽိတ်းၵၼ်ယူႇ တႃႇသေႇဢေႃႈ။
လိၼ်ႉၶဝ်ပဵၼ်ၸိူဝ်ႉၼင်ႇငူးဢၼ်ၵွင်ႉမၼ်း ႁၢႆႉၼႃႇၼၼ်ႉလႄႈ ၵႂၢမ်းၶဝ်သမ်ႉပဵၼ်ၸိူဝ်ႉၼင်ႇငူးႁဝ်ႇၵၢၵ်ႇဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈ ႁႄႉၵင်ႈပၼ်ၶႃႈၸဝ်ႈသေၵႃႈတီႈၶဝ်ၸိူဝ်းဢၼ်ႁၢႆႉဢၼ်မိူၵ်ႈၼၼ်ႉသေလႄႈ ၶႅၼ်းတေႃႈႁႂ်ႈၶႃႈၸဝ်ႈၵၢင်းလွတ်ႈသေၵႃႈတီႈ၊ ၵူၼ်းဢၼ်ႁၢဝ်ႉၵျၢမ်းတင်းလၢႆ ၸိူဝ်းဢၼ်ၵျၢမ်ႇႁဵတ်းႁႂ်ႈၶႃႈၸဝ်ႈလႆႈ တူၵ်းသုမ်းၼၼ်ႉသေၵမ်းတီႈၶႃႈ။
ၵူၼ်းၸိူဝ်းဢၼ်မႃႇၼႃႉၸႂ်သုင်ၼၼ်ႉႁၢင်ႈ တူင်ႇၶိုမ်းဝႆႉပုၼ်ႈၶႃႈၸဝ်ႈတီႈၶႃႈဢေႃႈ။ ၶဝ်ဢဝ်ၶႄၶဵင်ႈၵင်ႈဝႆႉလႄႈ၊သမ်ႉဢဝ်ၵၢင်ႇ ႁၢင်ႈၶိုမ်းဝႆႉၸွမ်းတႃၸွမ်းတၢင်း ပုၼ်ႈဢၼ်တၵ်းတိဢဝ်ၶႃႈၸဝ်ႈတီႈၶႃႈဢေႃႈ။
ၶႃႈၸဝ်ႈလၢတ်ႈတီႈ ထႃႇဝရႃႉၽြႃး၊ လႄႈဝႃႈ “ၸဝ်ႈႁဝ်းပဵၼ်ၽြႃးပဵၼ်ၸဝ်ႈ ၵဝ်ၶႃႈတီႈၶႃႈဢေႃႈ။ ၶႅၼ်းတေႃႈႁေႈႁူထွမ်ႇဢဝ်ၵႂၢမ်းဢၼ်ၶႃႈၸဝ်ႈ လဝ်ႈယွၼ်းၼၼ်ႉသေၵမ်းတီႈၶႃႈ။”
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ၵဝ်ၶႃႈဢဵၼ်ႁႅင်းဢၼ်ၵႄႇသႄႇထုတ်ႇၼုၵ်ႈ ဢဝ်ၶႃႈၸဝ်ႈတီႈၶႃႈ။ ၸဝ်ႈႁဝ်းၵႅတ်ႇၶႄႁႄႉၵင်ႈပၼ်ၶႃႈၸဝ်ႈၵႃႈၼႂ်း ပၢင်တိုၵ်းသိုၵ်းၼၼ်ႉတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈ ယႃႇပေပၼ်ဢၶႂၢင်ႉ ႁႂ်ႈဢလူဝ်ႇၶဝ်ၸိူဝ်းဢၼ်ႁၢႆႉဢၼ်မိူၵ်ႈၼၼ်ႉ လႆႈပျေႉၸုမ်ႇသေၵမ်းတီႈၶႃႈ။ ယႃႇပေႁႂ်ႈတၢင်းဢၼ်ၶဝ်ၶိုင်ပွင်ၼၼ်ႉ ဢွင်ႇမႅင်ႇလႆႈသေၵမ်းတီႈၶႃႈ။
ၶႅၼ်းတေႃႈယႃႇပေႁႂ်ႈရၢၼ်ႇသူႇၶႃႈၸဝ်ႈၸိူဝ်းၼၼ်ႉလႆႈႁဵတ်းပွႆးဢွင်ႇသိုၵ်းသေၵမ်းတီႈၶႃႈ။ ၶႅၼ်းတေႃႈႁႂ်ႈတၢင်းဢၼ်ဢမ်ႇလီဢမ်ႇငၢမ်း ဢၼ်ဢွၵ်ႇသူပ်းၶဝ်ၼၼ်ႉ ၶိုၼ်းတိူဝ်ႉထုၵ်ႇၶဝ်သေၵမ်းတီႈၶႃႈ။
ႁႂ်ႈထၢၼ်ႇၽႆးလႅင်တူၵ်းသႂ်ႇၶဝ်သေၵမ်းလူၺ်ႈ။ ႁႂ်ႈၶဝ်လႆႈတူၵ်းၶဝ်ႈႁူးၶုမ်ဢၼ်ဢမ်ႇၶိုၼ်းဢွၵ်ႇ မႃးလႆႈသေပွၵ်ႈၼၼ်ႉသေၵမ်းလူၺ်ႈ။
ႁႂ်ႈၶဝ်ၸိူဝ်းဢၼ်သမ်ႇမုၵ်ႈသႄႉသွမ်းပိူၼ်ႈၼၼ်ႉ ဢမ်ႇလႆႈဢွင်ႇမႅင်ႇသေပွၵ်ႈလႄႈ ၽေးဢုပၢတ်ႈတူၵ်းႁွတ်ႈတူၵ်းထိုင်ၵႃႈတီႈ ၵူၼ်းဢၼ်ႁၢဝ်ႉၵျၢမ်းတင်းလၢႆထၢၼ်ႈပေႃး ယႃႉၶဝ်ပႅတ်ႈသေၵမ်းလူၺ်ႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈ ႁုလွင်ႈဢၼ်ၸဝ်ႈႁဝ်းၵႅတ်ႇၶႄဢမု ၵေႃႉဢၼ်ယၢၵ်ႈဢၼ်ၽၢၼ်သေလႄႈ ၸီႇယၢင်ႇတြႃးဢၼ်သိုဝ်ႈလီၽၢႆႇၵေႃႉဢၼ် ၸုတ်ႈဢၼ်လုတ်ႈၼၼ်ႉယူႇတီႈၶႃႈဢေႃႈ။
ၶဝ်ၸိူဝ်းဢၼ်သိုဝ်ႈတေႃႇၼၼ်ႉတၵ်းဢွၼ်ၵၼ် ယွင်ႈယေႃးၸဝ်ႈႁဝ်းတႄႉတႄႉလႄႈ ၶဝ်တၵ်းဢွၼ်ၵၼ်ယူႇၵႃႈတီႈၸဝ်ႈႁဝ်း တီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈႁွင်ႉၵၢဝ်ႇ တီႈၸဝ်ႈႁဝ်းတီႈၶႃႈဢေႃႈ။ ၶႅၼ်းတေႃႈၸဵဝ်းၸွႆႈထႅမ်ၶႃႈၸဝ်ႈ သေၵမ်းတီႈၶႃႈ။ ၶႅၼ်းတေႃႈထွမ်ႇသဵင်ၶႃႈၸဝ်ႈမိူဝ်ႈဢၼ်ၶႃႈၸဝ်ႈႁွင်ႉၵၢဝ်ႇတီႈၸဝ်ႈႁဝ်းၼၼ်ႉသေၵမ်းတီႈၶႃႈ။
ၶႅၼ်းတေႃႈႁပ်ႉတုင်းဢဝ်ၵႂၢမ်းသူးတွင်းၶႃႈၸဝ်ႈမိူၼ်ၸိူဝ်ႉၼင်ႇဢၢႆၼၢမ်ႇသႃႇဢၼ်ၽဝ်ၽႆး ဢိၵ်ႇတင်းတၢင်းဢၼ်ၶႃႈၸဝ်ႈႁွမ်းမိုဝ်းဝႆႈသႃ ၸဝ်ႈႁဝ်းမိူၼ်ၸိူဝ်ႉၼင်ႇၶိူင်ႈတၢင်းလူႇ၊ ၶိင်ႇႁူဝ်ၶမ်ႈၼၼ်ႉသေၵမ်းတီႈၶႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈပႂ်ႉထိင်း သူပ်းၶႃႈၸဝ်ႈသေၵမ်းၶႃႈ။ ၶႅၼ်းတေႃႈပႂ်ႉထိင်းသီႇသူပ်းၽၵ်းတူ ၶႃႈၸဝ်ႈသေၵမ်းတီႈၶႃႈ။
ၶႅၼ်းတေႃႈယႃႇပေႁႂ်ႈၶႃႈၸဝ်ႈမီးဢလူဝ်ႇ ၶႂ်ႈႁဵတ်းၽိတ်းႁဵတ်းပိူင်ႈသေလႄႈ ယႃႇပေႁႂ်ႈၶႃႈၸဝ်ႈၶဝ်ႈပႃးၼႂ်းတၢင်းႁဵတ်း ဢၼ်ဢမ်ႇတြႃးၵူၼ်းႁၢႆႉၵူၼ်းမိူၵ်ႈၸိူဝ်းၼၼ်ႉ သေၵမ်းတီႈၶႃႈ။ ၶႅၼ်းတေႃႈယႃႇပေႁႂ်ႈၶႃႈၸဝ်ႈ လႆႈၵိၼ်တၢင်းၵိၼ်ဢၼ်ဝၢၼ်ဢၼ်မၼ်းၶဝ်ၼၼ်ႉ သေၵမ်းတီႈၶႃႈ။
ႁႂ်ႈၵေႃႉဢၼ်ၸႂ်လီၸႂ်ဝၢၼ်ၼၼ်ႉပၼ်တၢမ်ႇ ၶႃႈၸဝ်ႈလႄႈပႃးၸႂ်ၵရုၼႃႇသင်ႇသွၼ်ၶႃႈၸဝ်ႈသေၵမ်းလူၺ်ႈ။ ၵူၺ်းၵႃႈ၊ၶႃႈၸဝ်ႈတၵ်းဢမ်ႇႁပ်ႉတုင်းဢဝ် တၢင်းဢၼ်ၵူၼ်းႁၢႆႉၵူၼ်းမိူၵ်ႈၶဝ် ယုၵ်ႉယွင်ႈၼၼ်ႉလႃးလႃး။ လွင်ႈမၼ်းၸမ်ႉ၊ၶႃႈၸဝ်ႈတိုၼ်းသူးတွင်းယူႇ၊ ႁဵတ်းၶတ်းၵၼ်တင်းတၢင်းႁဵတ်းဢၼ် ဢမ်ႇတြႃးၶဝ်ၼၼ်ႉတီႈၶႃႈဢေႃႈ။
မိူဝ်ႈဢၼ်ၶုၼ်ၶဝ်လႆႈၶၢမ်ႇတၢင်းဢၼ်ဢီးတူၵ်းႁိၼ်ၽႃၵႂႃႇယဝ်ႉၼၼ်ႉၸိုင်၊ ၵူၼ်းတင်းသဵင်တင်းလူင်တၵ်းဢွၼ်ၵၼ်မၢတ်ႈဢဝ်ၵႂၢမ်းၶႃႈၸဝ်ႈတင်းလၢႆ ပဵၼ်ဢၼ်မၢၼ်ႇမႅၼ်ႈၸိုဝ်ႈၸႂ်ႈၼၼ်ႉတီႈၶႃႈဢေႃႈ။
မိူၼ်ၸိူဝ်ႉၼင်ႇမႆႉလႆႈၽႃႇၸၵ်းပဵၼ်သိၵ်ႈဝႆႉၼၼ်ႉ၊ လုပ်ႇၶဝ်မီးတၢင်းဢၼ်မၢၵ်ႇမိူဝ်ဝႆႉယူႇၵႃႈတီႈ၊ ႁိမ်းၶွပ်ႇၶုမ်ပႃႇႁဵဝ်ႈတီႈၶႃႈဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ၵဝ်ၶႃႈတီႈၶႃႈ။ ၶႃႈၸဝ်ႈယုမ်ႇမၢတ်ႈဢိင်ပိုင်ႈၸဝ်ႈႁဝ်းယူႇတီႈၶႃႈဢေႃႈ။ ၶႃႈၸဝ်ႈသွၵ်ႈႁႃတၢင်းဢၼ်ၵႅတ်ႇၶႄႁႄႉၵင်ႈၵႃႈတီႈၸဝ်ႈႁဝ်းယူႇတီႈၶႃႈဢေႃႈ။ ၶႅၼ်းတေႃႈႁႂ်ႈၶႃႈၸဝ်ႈလွတ်ႈသေၵႃႈတၢင်းတၢႆၼၼ်ႉသေၵမ်းတီႈၶႃႈ။
ၶႅၼ်းတေႃႈႁႂ်ႈၶႃႈၸဝ်ႈၵၢင်းလွတ်ႈသေ ၵႃႈတီႈတူင်ႇၶိုမ်းၸိူဝ်းဢၼ်ၶဝ်ၵၢင် ၶႃႈၸဝ်ႈဝႆႉ၊ဢိၵ်ႇတင်းတူင်ႇၶိုမ်းၶဝ်ၸိူဝ်းဢၼ် ႁဵတ်းတုၸရိူၵ်ႈၼၼ်ႉသေၵမ်းတီႈၶႃႈ။
ယၢမ်းမိူဝ်ႈဢၼ်ၶႃႈၸဝ်ႈလႆႈလွတ်ႈဢွၵ်ႇၵႂႃႇယဝ်ႉၼၼ်ႉၸိုင်၊ႁႂ်ႈၶဝ် ၸိူဝ်းဢၼ်ႁၢႆႉဢၼ်မိူၵ်ႈၼၼ်ႉ၊တူၵ်းၶမ် ၵႃႈၼႂ်းတူင်ႇၶိုမ်းၶဝ်ၼၼ်ႉသေၵမ်းလူၺ်ႈ။
ၵဝ်ႁွင်ႉၵၢဝ်ႇတီႈ ထႃႇဝရႃႉၽြႃး၊ ပုၼ်ႈ တၢင်းဢၼ်ၸွႆႈဢၼ်ထႅမ်ဢေႃႈ။ ၵဝ်ႁဵတ်းပထၼႃႇတၢင်းဢၼ်သူးတွင်း လဝ်ႈယွၼ်းတီႈမၼ်းၸဝ်ႈယူႇဢေႃႈ။
ၵဝ်ပႃးဢဝ်ၵႂၢမ်းဢၼ်ၶၢင်းၶီၶၢင်းၽၢၼ်ၵႃႈမီး တင်းမူတ်းမႃးၸူးမၼ်းၸဝ်ႈဢေႃႈ။ ၵဝ်လဝ်ႈလၢတ်ႈလွင်ႈတုၵ်ႉၶႃႉတင်းၽၢၼ်ၵႃႈမီးတင်းမူတ်းတီႈမၼ်းၸဝ်ႈဢေႃႈ။
မိူဝ်ႈဢၼ်ၸႂ်ဝိၺိၺ်ႇၵဝ်ႁိူဝ်ႉၼူၼ်းယူႇၼၼ်ႉမၼ်းၸဝ်ႈႁုလွင်ႈတၢင်းဢၼ်ၵဝ်ထုၵ်ႇလီႁဵတ်း၊ ၸိူဝ်ႉၼင်ႇႁိုဝ်ၼၼ်ႉဢေႃႈ။ ရၢၼ်ႇသူႇၵဝ်တင်းလၢႆဢဝ်တူင်ႇၶိုမ်းသိူင်ႇလပ်ႉဝႆႉၵႃႈၼႂ်း၊ သဵၼ်ႈတၢင်းဢၼ်ၵဝ်ၵႂႃႇၼၼ်ႉဢေႃႈ။
မိူဝ်ႈဢၼ်ၵဝ်တူၺ်းၽၢႆႇသၢႆႉၽၢႆႇၶႂႃၼၼ်ႉၸိုင်၊ ၵဝ်ဢမ်ႇႁၼ်ၵေႃႉဢၼ်ၵေႃႉဢၼ်တၵ်းၸွႆႈတၵ်းထႅမ်ၵဝ်ၼၼ်ႉသေၵေႃႉသေၵူၼ်း။ ဢမ်ႇမီးၵေႃႉဢၼ်တၵ်းႁႄႉတၵ်းၵင်ႈၵဝ် သေၵေႃႉသေၵူၼ်း။ ဢမ်ႇမီးၵေႃႉဢၼ်တၵ်းလူတူၺ်းလုမ်းလႃးၵဝ် သေၵေႃႉသေၵူၼ်းတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈ ႁွင်ႉၵၢဝ်ႇတီႈၸဝ်ႈႁဝ်းပုၼ်ႈတၢင်းၸွႆႈ တၢင်းထႅမ်ယူႇတီႈၶႃႈဢေႃႈ။ ၸဝ်ႈႁဝ်း ထႃႇဝရႃႉၽြႃး၊ ပဵၼ် ၸဝ်ႈဢၼ်ၵႅတ်ႇၶႄႁႄႉၵင်ႈၶႃႈၸဝ်ႈလႄႈ ပဵၼ်ၸဝ်ႈဢၼ်ၶႃႈၸဝ်ႈတူၵ်းဢၢင်ႈၶႂ်ႈလႆႈၼႂ်းၸူဝ်ႈဢသၢၵ်ႈၶႃႈၸဝ်ႈတီႈၶႃႈဢေႃႈ။
ၶႅၼ်းတေႃႈထွမ်ႇသဵင်ဢၼ်ၶႃႈၸဝ်ႈႁွင်ႉၵၢဝ်ႇတီႈၸဝ်ႈႁဝ်းပုၼ်ႈတၢင်းၸွႆႈတၢင်းထႅမ်ၼၼ်ႉ၊ ၵွပ်ႈပိူဝ်ႈၶႃႈၸဝ်ႈတူၵ်းၸူမ်ၵႃႈၼႂ်းတၢင်းဢၼ် ၸႂ်လုၼၼ်ႉသေၵမ်းတီႈၶႃႈ။ ၶႅၼ်းတေႃႈၵႄႇသႄႇၶျွတ်ႈဢဝ် ၶႃႈၸဝ်ႈလွတ်ႈသေ ၵႃႈၼႂ်းမိုဝ်းရၢၼ်ႇသူႇၶႃႈၸဝ်ႈၸိူဝ်းၼၼ်ႉ သေၵမ်းတီႈၶႃႈ။ ၶဝ်ၼၼ်ႉႁႅင်းယႂ်ႇၼႃႇသေၶႃႈၸဝ်ႈတီႈၶႃႈဢေႃႈ။
ၶႅၼ်းတေႃႈပွႆႇႁႂ်ႈၶႃႈၸဝ်ႈလွတ်ႈဢွၵ်ႇသေတၢင်းဢၼ်ၸႂ်လုႁႅင်းဢူၼ်ႈၼႆႉသေၵမ်းတီႈၶႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ ၶႃႈၸဝ်ႈတၵ်းယွင်ႈယေႃးၸဝ်ႈႁဝ်းၵႃႈၼႂ်းၵၢင်ပရိၵ်ႈသၢတ်ႈၵူၼ်းၸဝ်ႈႁဝ်းတင်းလၢႆ ၵွပ်ႈပိူဝ်ႈၸဝ်ႈႁဝ်းႁဵတ်းၵျေးၸူးတီႈ ၶႃႈၸဝ်ႈၼၼ်ႉတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈထွမ်ႇငိၼ်းၵႂၢမ်းသူးတွင်းၶႃႈၸဝ်ႈသေၵမ်းတီႈၶႃႈ။ ၶႅၼ်းတေႃႈထွၵ်ႈလူၺ်ႈတၢင်းဢၼ်သိုဝ်ႈတေႃႇ ၸဝ်ႈႁဝ်းၼၼ်ႉသေလႄႈ ထွမ်ႇဢဝ်တၢင်းဢၼ်ၶႃႈၸဝ်ႈလဝ်ႈယွၼ်း၊ ဢိၵ်ႇတင်းထွၵ်ႈလူၺ်ႈသဵတ်ႈၸႃႇ ၸဝ်ႈႁဝ်းသေလႄႈ ၶိုၼ်းဢိူဝ်ၶႃႈၸဝ်ႈသေၵမ်းတီႈၶႃႈ။
ၶႅၼ်းတေႃႈယႃႇပေၸီႇယၢင်ႇတြႃးၼိူဝ် ၶႃႈၸဝ်ႈသေၵမ်းတီႈၶႃႈ။ လွင်ႈမၼ်းၸမ်ႉ၊ဢမ်ႇမီးၵေႃႉဢၼ် ၵၢင်းလွတ်ႈတင်းဢပျတ်ႈ ၵႃႈတီႈၽၢႆႇၼႃႈၸဝ်ႈႁဝ်းသေၵေႃႉ သေၵူၼ်းတီႈၶႃႈ။
ရၢၼ်ႇသူႇၶႃႈၸဝ်ႈလိုပ်ႈၸွမ်းလမ်းၸွမ်း ၶႃႈၸဝ်ႈသေလႄႈ တိုၵ်းပႄႉၶႃႈၸဝ်ႈပႅတ်ႈလုမ်းလုမ်းတီႈၶႃႈယဝ်ႉ။ မၼ်းဢဝ်ၶႃႈၸဝ်ႈၶင်ၵႃႈၼႂ်းထွင်ႇဢၼ် လပ်းသိင်ႇဝႆႉလႄႈ ၶႃႈၸဝ်ႈပဵၼ်မိူၼ်ၸိူဝ်ႉၼင်ႇၶဝ်ၸိူဝ်းဢၼ်တၢႆယူႇႁိုင်ၼႃႇယဝ်ႉၼၼ်ႉတီႈၶႃႈဢေႃႈ။
ပိူဝ်ႈၼႆလႄႈၸႂ်ဝိၺိၺ်ႇၶႃႈၸဝ်ႈႁိူဝ်ႉၼူၼ်း ဢူၼ်ႈဢွၼ်ႇမွႆႈၼႃႇၵႃႈၼႂ်းၶႃႈၸဝ်ႈလႄႈ ၶႃႈၸဝ်ႈၸႂ်လုၼႃႇတီႈၶႃႈဢေႃႈ။
ၶႃႈၸဝ်ႈၶႆႈၸႂ်ထူပ်းမိုဝ်ႉဝၼ်းဢၼ်ပူၼ်ႉမႃးယဝ်ႉမိူဝ်ႈၵွၼ်ႇဢွၼ်ၼႆႉၼၼ်ႉတီႈၶႃႈဢေႃႈ။ ၶႃႈၸဝ်ႈၶႆႈၸႂ်လူၺ်ႈလွင်ႈတၢင်းဢၼ်ၸဝ်ႈႁဝ်း ႁဵတ်းဝႆႉယဝ်ႉၵူႈၸိူဝ်ႉၵူႈပိူင်ၼၼ်ႉလႄႈ ၶႂ်ႈၸႂ်ဝူၼ်ႉၸႂ်လူၺ်ႈလွင်ႈၵၢၼ်တၢင်းႁဵတ်း ၸဝ်ႈႁဝ်းၵူႈၸိူဝ်ႉၵူႈပိူင်တီႈၶႃႈဢေႃႈ။
ၶႃႈၸဝ်ႈႁွမ်းမိုဝ်းသေလႄႈသူးတွင်းတီႈ ၸဝ်ႈႁဝ်းတီႈၶႃႈဢေႃႈ။ ဝိၺိၺ်ႇၶႃႈၸဝ်ႈတွင်ႉမႆႈၸဝ်ႈႁဝ်းၸိူဝ်ႉၼင်ႇ လိၼ်တႅၵ်ႇၶၢပ်ႇၼၼ်ႉတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈၶိုၼ်းဢိူဝ် ၶႃႈၸဝ်ႈဝႆးဝႆးသေၵမ်းတီႈၶႃႈ။ ၶႃႈၸဝ်ႈၸႂ်လုတီႈၶႃႈဢေႃႈ။ ၸဝ်ႈႁဝ်းၶႅၼ်းတေႃႈယႃႇပေဝၢႆႇၼႃႈပႅတ်ႈၶႃႈၸဝ်ႈ၊ ႁႂ်ႈၶႃႈၸဝ်ႈပဵၼ်ၸိူဝ်ႉၼင်ႇၶဝ်ၸိူဝ်းဢၼ်လူင်းၵႂႃႇၵႃႈၼႂ်းၶုမ်တၢင်းတၢႆၼၼ်ႉသေၵမ်းတီႈၶႃႈ။
ၶႅၼ်းတေႃႈႁႂ်ႈၶႃႈၸဝ်ႈလႆႈငိၼ်းၵႂၢမ်းမႅတ်ႈတႃႇ ၵရုၼႃႇၸဝ်ႈႁဝ်း ၶိင်ႇၵၢင်ၼႂ်ၸဝ်ႉၸဝ်ႉသေၵမ်းတီႈၶႃႈ။ ၶႃႈၸဝ်ႈယုမ်ႇမၢတ်ႈဢိင်ပိုင်ႈၸဝ်ႈႁဝ်းတီႈၶႃႈဢေႃႈ။ ၶႃႈၸဝ်ႈႁဵတ်းပထၼႃႇတၢင်းဢၼ်သူးတွင်း တီႈၸဝ်ႈႁဝ်းတီႈၶႃႈဢေႃႈ။ ၶႅၼ်းတေႃႈၼႄပၼ်သဵၼ်ႈတၢင်းဢၼ် ၶႃႈၸဝ်ႈဢၼ်ထုၵ်ႇလီၵႂႃႇၸွမ်းၼၼ်ႉ သေၵမ်းတီႈၶႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈသုတ်ႉၸပ်း သုတ်ႉၸူးၵႃႈတီႈၸဝ်ႈႁဝ်း၊ပုၼ်ႈဢၼ်တၵ်းဢိင် တၵ်းပိုင်ႈတီႈၶႃႈဢေႃႈ။ ၶႅၼ်းတေႃႈၵႄႇၼုၵ်ႈဢဝ် ၶႃႈၸဝ်ႈသေၵႃႈၼႂ်းမိုဝ်း ရၢၼ်ႇသူႇၶႃႈၸဝ်ႈတင်းလၢႆသေၵမ်းတီႈၶႃႈ။
ၸဝ်ႈႁဝ်းပဵၼ်ၽြႃးပဵၼ်ၸဝ်ႈၵဝ်ၶႃႈတီႈၶႃႈဢေႃႈ။ ၶႅၼ်းတေႃႈသင်ႇသွၼ်ပၼ်ႁႂ်ႈၶႃႈၸဝ်ႈႁဵတ်း ၸွမ်းဢလူဝ်ႇၸဝ်ႈႁဝ်းသေၵမ်းတီႈၶႃႈ။ ၶႅၼ်းတေႃႈၸႂ်လီၸႂ်ဝၢၼ်တေႃႇၶႃႈၸဝ်ႈလႄႈ ဢွၼ်ဢဝ်ၶႃႈၸဝ်ႈသူင်ႇၸွမ်းသဵၼ်ႈတၢင်း ဢၼ်လူင်ႈလီလွတ်ႈလီၼၼ်ႉသေၵမ်းတီႈၶႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈ ၵႄႇသႄႇဢဝ်ၶႃႈၸဝ်ႈ ၸွမ်းၵႃႈၼင်ႇဢၼ်ၸဝ်ႈႁဝ်းဝႆႉၵတိၼၼ်ႉ သေၵမ်းတီႈၶႃႈ။ ၸွမ်းလူၺ်ႈတၢင်းဢၼ်ၸႂ်လီၸႂ်ဝၢၼ် ၸဝ်ႈႁဝ်းၼၼ်ႉသေလႄႈ ၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈ လွတ်ႈသေၵႃႈၼႂ်းတုၵ်ႉၶႃႉတၢင်းၽၢၼ် သေၵမ်းတီႈၶႃႈ။
ၶႅၼ်းတေႃႈၸွမ်းလူၺ်ႈမႅတ်ႈတႃႇၵရုၼႃႇ ၸဝ်ႈႁဝ်းသေလႄႈပႄႇၽဵဝ်ႈရၢၼ်ႇသူႇ ၶႃႈၸဝ်ႈတင်းလၢႆ ဢိၵ်ႇတင်းယႃႉပႅတ်ႈၶဝ်ၸိူဝ်းဢၼ်တဵၵ်းငႅၼ်း ၶႃႈၸဝ်ႈၸိူဝ်းၼၼ်ႉသေၵမ်းတီႈၶႃႈ။ ၶႃႈၸဝ်ႈပဵၼ်ၶႃႈၸဝ်ႈႁဝ်းတီႈၶႃႈဢေႃႈ။
ႁႂ်ႈ ထႃႇဝရႃႉၽြႃး၊ ဢၼ်ပဵၼ်ၸိူဝ်ႉၼင်ႇ မၢၵ်ႇႁိၼ်မၢၵ်ႇၽႃၵဝ်ၼၼ်ႉ၊ မီးမၢင်ႇၵလႃႇသေၵမ်းလူၺ်ႈ။ မၼ်းၸဝ်ႈသင်ႇသွၼ်ပၼ်ႁႂ်ႈမိုဝ်းၵဝ် မေႃတိုၵ်းသိုၵ်းလႄႈ ၼိဝ်ႉမိုဝ်းၵဝ်မေႃႁႅၼ်းၼႃႈသိုၵ်းတီႈၶႃႈဢေႃႈ။
မၼ်းၸဝ်ႈပဵၼ်ၸဝ်ႈဢၼ်ၵႅတ်ႇၶႄႁႄႉၵင်ႈၵဝ်၊ ၸဝ်ႈဢၼ်ႁႄႉၶႄပၼ်ၵဝ်၊ ပဵၼ်ၸဝ်ႈဢၼ်ၵဝ်သွၼ်ႈႁူမ်ႈၽူၺ်း၊ဢိၵ်ႇတင်း ၸဝ်ႈဢၼ်ၵႄႇသႄႇၶျွတ်ႈၵဝ်လႄႈ ၵႃႈၼႂ်းမၼ်းၸဝ်ႈၼၼ်ႉၵဝ်ယုမ်ႇမၢတ်ႈဢိင်ပိုင်ႈ ႁႂ်ႈလႆႈယူႇလူင်ႈလီလွတ်ႈလီဢေႃႈ။ မၼ်းၸဝ်ႈဢဝ်မဵဝ်းၵူၼ်းတင်းလၢႆၶျႃးဝႆႉ ႁႂ်ႈပဵၼ်ၵူၼ်းမိူင်းၵႃႈတႂ်ႈၵဝ်ဢေႃႈ။
ထႃႇဝရႃႉၽြႃး၊ တီႈၶႃႈ။ ၵူၼ်းသတ်ႉတဝႃႇၸိုင်၊ပဵၼ်ၵေႃႉၸိူဝ်ႉၼင်ႇႁိုဝ်လႄႈ ၸဝ်ႈႁဝ်းမၢတ်ႈမၼ်းဝႆႉတီႈၶႃႈ။ ၵူၼ်းဢၼ်ၸၢင်ႈၽင်ႉဢုတူႇၼဝ်ႈၸိုင်၊ ပဵၼ်ၵေႃႉၸိူဝ်ႉၼင်ႇႁိုဝ်လႄႈၸဝ်ႈႁဝ်းၶႆႈၸႂ် လူၺ်ႈမၼ်းတီႈၶႃႈ။
မၼ်းၼၼ်ႉပဵၼ်ၸိူဝ်ႉၼင်ႇဢၢႆၼင်ႇၵႂၼ်း တီႈၶႃႈဢေႃႈ။ မိုဝ်ႉဝၼ်းမၼ်းတင်းလၢႆၵေႃႈပဵၼ်ၸိူဝ်ႉၼင်ႇၵွင်ႉငဝ်းဢၼ်ၸၢင်ႈပူၼ်ႉၵႂႃႇၼၼ်ႉတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈသိၵ်ႇၽႃႉၵၢင်ႁၢဝ်ၸဝ်ႈႁဝ်း သေလႄႈလူင်းမႃးသေၵမ်းတီႈၶႃႈ။ ၶႅၼ်းတေႃႈတိူဝ်ႉသႂ်ႇလွႆတင်းလၢႆႁႂ်ႈ ၵႂၼ်းၽႆးလႆႈဢွၵ်ႇမႃးသေၵမ်းတီႈၶႃႈ။
ၶႅၼ်းတေႃႈႁႂ်ႈတၢင်းဢၼ်ၽႃႉမႅပ်ႈၸဝ်ႈႁဝ်း မၢပ်ႈသႂ်ႇႁႂ်ႈရၢၼ်ႇသူႇၸဝ်ႈႁဝ်းတင်းလၢႆ ၽူင်ႉၽၢင်းမၢၵ်ႇမိူဝ်ၵႂႃႇသေၵမ်းတီႈၶႃႈ။ ၶႅၼ်းတေႃႈပိုတ်းပိုၼ်ၵၢင်ၸဝ်ႈႁဝ်းႁႂ်ႈၶဝ် ဢွၵ်ႇပၢႆႈသေၵမ်းတီႈၶႃႈ။
ၶႅၼ်းတေႃႈယူႇၵႃႈၼိူဝ်လႄႈယိုၼ်းမိုဝ်းၸဝ်ႈႁဝ်းတိုတ်ႉၸၼ်ၵႄႇၼုၵ်ႈဢဝ်ၶႃႈၸဝ်ႈဢွၵ်ႇသေ၊ ၵႃႈၼႂ်းၼမ်ႉဢၼ်လိုၵ်ႉ၊ဢိၵ်ႇတင်းၵႃႈၼႂ်းမိုဝ်း ၵူၼ်းတၢင်ႇၸိူဝ်ႉတၢင်ႇၶိူဝ်းသေၵမ်းတီႈၶႃႈ။
ၶဝ်ၼၼ်ႉဢမ်ႇၸၢင်ႈလၢတ်ႈၵႂၢမ်းဢၼ် မၢၼ်ႇမႅၼ်ႈၸိုဝ်ႈၸႂ်ႈလႄႈ ယင်းၸၢင်ႈၵိၼ်ႇဝႃႈသေယဝ်ႉလၢတ်ႈၵႂၢမ်း မုသႃႇလူးၵွၼ်ႇတီႈၶႃႈဢေႃႈ။
ၽြႃးပဵၼ်ၸဝ်ႈတီႈၶႃႈ။ ၶႃႈၸဝ်ႈတၵ်းႁဵတ်းၵႂၢမ်းဢၼ်မႂ်ႇတီႈၸဝ်ႈႁဝ်းတီႈၶႃႈဢေႃႈ။ ၶႃႈၸဝ်ႈတၵ်းလဵတ်းတိင်ႇသိပ်းသၢႆလႄႈ ႁဵတ်းၵႂၢမ်းတီႈၶႃႈဢေႃႈ။
ၸဝ်ႈႁဝ်းပၼ်ဢၶႂၢင်ႉဢၼ်လႆႈပႄႉလႆႈၼႅင်ႇတီႈ ၶုၼ်ႁေႃၶမ်းတင်းလၢႆလႄႈ ၵႄႇၼုၵ်ႈဢဝ် တႃႇဝိတ်ႈ၊ ဢၼ်ပဵၼ် ၶႃႈၸဝ်ႈႁဝ်းၼၼ်ႉတီႈၶႃႈဢေႃႈ။
ၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈဢွၵ်ႇသေ ၵႃႈၼႂ်းမိုဝ်းရၢၼ်ႇသူႇၶႃႈၸဝ်ႈ၊ ဢၼ်ႁၢဝ်ႉၵျၢမ်းၼႃႇၸိူဝ်းၼၼ်ႉဢိၵ်ႇတင်း ၵႃႈၼႂ်းမိုဝ်းၵူၼ်းတၢင်ႇၸိူဝ်ႉတၢင်ႇၶိူဝ်း သေၵမ်းတီႈၶႃႈ။ ၶဝ်ၼၼ်ႉဢမ်ႇၸၢင်ႈလၢတ်ႈၵႂၢမ်း ဢၼ်ၸိုဝ်ႈၸႂ်ႈလႄႈ ယင်းၸၢင်ႈၵိၼ်ႇဝႃႈသေယဝ်ႉလၢတ်ႈၵႂၢမ်း မုသႃႇလူးၵွၼ်ႇတီႈၶႃႈဢေႃႈ။
ႁႂ်ႈလုၵ်ႈၸၢႆးၶႃႈၸဝ်ႈႁဝ်းၶဝ်တင်းလၢႆ ပဵၼ်ၸိူဝ်ႉၼင်ႇတူၼ်ႈၵႃႈဢၼ်ယႂ်ႇမႃးယူႇ၊ ၼႂ်းမိူဝ်ႈဢၼ်ဢသၢၵ်ႈၶဝ်ယင်းၼုမ်ႇ ယင်းၵမ်ၼၼ်ႉသေၵမ်းလူၺ်ႈ။ ႁႂ်ႈလုၵ်ႈသၢဝ်ၶႃႈၸဝ်ႈႁဝ်းၶဝ်တင်းလၢႆ ပဵၼ်ၸိူဝ်ႉၼင်ႇသဝ်ႁိၼ်ၸဵင်ႇတိူၵ်ႈ ဢၼ်တွင်ႈႁဵတ်းၶွၵ်းႁဵတ်းဝႆႉပုၼ်ႈဢၼ်တၵ်း ႁဵတ်းႁေႃၸဝ်ႈၼၼ်ႉသေၵမ်းလူၺ်ႈ။
ႁႂ်ႈယွင်ယေးၶႃႈၸဝ်ႈႁဝ်းၶဝ်တဵမ်ဝႆႉတင်းမၢၵ်ႇၶဝ်ႈ ႁူင်းၼမ်ႉၵူႈၸိူဝ်ႉၵူႈပိူင်သေၵမ်းလူၺ်ႈ။ ႁႂ်ႈသူဝ်းၶႃႈၸဝ်ႈႁဝ်းၶဝ် ၵိူတ်ႇလဵင်ႉမႃး ၵႃႈတီႈၼွၵ်ႈတီႈပၢင်ႇပဵၼ်ႁဵင်ပဵၼ်မိုၼ်ႇ သေၵမ်းလူၺ်ႈ။
ႁႂ်ႈဝူဝ်းၵႂၢႆးၶႃႈၸဝ်ႈႁဝ်းၶဝ်တင်းလၢႆဢၼ်ပႃးတွင်ႉ ယင်းဢမ်ႇႁႂ်ႈလႆႈတၢႆ၊ဢမ်ႇႁူင်ႈဢမ်ႇႁၢႆလႄႈ ၽႄႈမႃးၼမ်ၵိုၼ်းမႃးၼႃႇသေၵမ်းလူၺ်ႈ။ ႁႂ်ႈသဵင်ဢၼ်ႁွင်ႉသႅၼ်ႇပွင်ႉၶၢင်း ဢမ်ႇလႆႈမီးၵႃႈတီႈၵၢင်တႃၵၢင်တၢင်းၶႃႈၸဝ်ႈႁဝ်းၶဝ်ၸိူဝ်းၼၼ်ႉသေၵမ်းလူၺ်ႈ။
မဵဝ်းၵူၼ်းဢၼ်လႆႈယူႇၸိူဝ်ႉၼင်ႇၼၼ်ၼၼ်ႉမီးမၢင်ႇၵလႃႇတီႈၶႃႈဢေႃႈ။ မဵဝ်းၵူၼ်း ဢၼ် ထႃႇဝရႃႉၽြႃး၊ ပဵၼ်ၽြႃးပဵၼ်ၸဝ်ႈ ၶဝ်ၼၼ်ႉမီးမၢင်ႇၵလႃႇတီႈၶႃႈဢေႃႈ။
ၽြႃးပဵၼ်ၸဝ်ႈၵဝ်ၶႃႈ။ ၶုၼ်ႁေႃၶမ်း ၵဝ်ၶႃႈတီႈၶႃႈ။ ၶႃႈၸဝ်ႈတၵ်းၽုၺ်ႇမွၵ်ႇလၢတ်ႈၼႄလွင်ႈတၢင်း ဢၼ်ၸဝ်ႈႁဝ်းယႂ်ႇမျၢတ်ႈၼႃႇလႄႈ၊ ၶႃႈၸဝ်ႈတၵ်းယွင်ႈယေႃးၵျေးၸူးၸဝ်ႈႁဝ်း သေႇသေႇၵူႈၸူဝ်ႈၵူႈပၢၼ်တီႈၶႃႈဢေႃႈ။
ၶႃႈၸဝ်ႈတၵ်းယွင်ႈယေႃးၵျေးၸူးၸဝ်ႈႁဝ်း ၵူႈဝၼ်းၵူႈဝၼ်းလႄႈ ၶႃႈၸဝ်ႈတၵ်းယွင်ႈယေႃးၸဝ်ႈႁဝ်းသေႇသေႇ ၵူႈၸူဝ်ႈၵူႈပၢၼ်တီႈၶႃႈဢေႃႈ။
ထႃႇဝရႃႉၽြႃး၊ ယႂ်ႇမျၢတ်ႈၼႃႇလႄႈပဵၼ်ဢၼ် လီယွင်ႈယေႃးၼႃႇလူင်လၢင်တီႈၶႃႈဢေႃႈ။ တၢင်းဢၼ်ယႂ်ႇမျၢတ်ႈမၼ်းၸဝ်ႈၼၼ်ႉ ပူၼ်ႉပႅၼ်တၢင်းဢၼ်ႁဝ်းၸၢင်ႈပွင်ႇၸၢင်ႈလႅင်း ၼၼ်ႉတီႈၶႃႈဢေႃႈ။
ၵူၼ်းမဵဝ်းသိုပ်ႇၼိုင်ႈတၵ်းယွင်ႈယေႃးလွင်ႈတၢင်း ဢၼ်ၸဝ်ႈႁဝ်းႁဵတ်းဝႆႉၸိူဝ်းၼၼ်ႉ၊ တေႃႇထိုင်ၵူၼ်းမဵဝ်းသိုပ်ႇၼိုင်ႈထႅင်ႈလႄႈၶဝ် တၵ်းဢွၼ်ၵၼ်ၽုၺ်ႇမွၵ်ႇလၢတ်ႈၼႄ လွင်ႈတၼ်းၶူဝ်းတၢင်းႁဵတ်းၸဝ်ႈႁဝ်း တင်းလၢႆတီႈၶႃႈဢေႃႈ။
ၶဝ်တၵ်းလၢတ်ႈလွင်ႈမုၼ်တၼ်းၶူဝ်း ဢႃႇၼုၽေႃႇၸဝ်ႈႁဝ်းလႄႈ ၶႃႈၸဝ်ႈသမ်ႉတၵ်းၶႆႈၸႂ်ဝူၼ်ႉၸႂ်လွင်ႈတၢင်းႁဵတ်း ဢၼ်လီဢၢမ်းၸဝ်ႈႁဝ်းတီႈၶႃႈဢေႃႈ။
ၵူၼ်းတင်းလၢႆတၵ်းလၢတ်ႈလူၺ်ႈလွင်ႈတၢင်း ဢၼ်ၸဝ်ႈႁဝ်းႁဵတ်းတၢင်းႁဵတ်း ဢၼ်ယႂ်ႇၼႃႇၼၼ်ႉလႄႈ ၶႃႈၸဝ်ႈသမ်ႉတၵ်းၽုၺ်ႇမွၵ်ႇလၢတ်ႈၼႄ လွင်ႈတၢင်းဢၼ်ၸဝ်ႈႁဝ်းယႂ်ႇမျၢတ်ႈ ၼၼ်ႉတီႈၶႃႈဢေႃႈ။
ၶဝ်တၵ်းမွၵ်ႇလၢတ်ႈလွင်ႈတၢင်းဢၼ်ၸဝ်ႈႁဝ်းမီးၸႂ်လီၸႂ်ဝၢၼ်ၼၼ်ႉတင်းမူတ်းသေလႄႈ ႁဵတ်းၵႂၢမ်းလွင်ႈၵျေးၸူးၵရုၼႃႇ ၸဝ်ႈႁဝ်းတီႈၶႃႈဢေႃႈ။
ထႃႇဝရႃႉၽြႃး၊ မီးၸႂ်ႁၵ်ႉၸႂ်ပႅင်းဢိၵ်ႇတင်း ၸႂ်ဢၼ်ဢဵတ်းလူ၊ မီးၸႂ်ဢၼ်ယိူၼ်ႉၶၢမ်ႇ၊ၸႂ်ယိုၼ်းၸႂ်ယၢဝ်းဢိၵ်ႇတင်း ၸႂ်မႅတ်ႈတႃႇၵရုၼႃႇတီႈၶႃႈဢေႃႈ။
မၼ်းၸဝ်ႈမီးၸႂ်ဢၼ်လီဢၼ်ဝၢၼ်တေႃႇ ၵူႈၵေႃႉၵူႈၵူၼ်းလႄႈ မီးၸႂ်ဢၼ်ဢဵတ်းလူႁၵ်ႉပႅင်းၵႃႈဢၼ်မၼ်းၸဝ်ႈ ႁဵတ်းပဵၼ်ဝႆႉၸိူဝ်းၼၼ်ႉတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ဝူၺ်ႇၼေႇယႃႉသတ်ႉတဝႃႇၵႃႈမီးတင်းသဵင်ႈတင်းလူင်၊ တၵ်းဢွၼ်ၵၼ်ယွင်ႈယေႃးၸဝ်ႈႁဝ်းလႄႈ၊ ၵူၼ်းၸဝ်ႈႁဝ်းၵႃႈမီးၸိူဝ်းၼၼ်ႉတၵ်း ယွင်ႈယေႃးၵျေးၸူးၸဝ်ႈႁဝ်းတီႈၶႃႈဢေႃႈ။
ၶဝ်တၵ်းဢွၼ်ၵၼ်ဢွၵ်ႇသူပ်းၶဝ်ဝႃႈလွင်ႈ မုၼ်ၽုင်းမိူင်းၸဝ်ႈႁဝ်းလႄႈ မွၵ်ႇလၢတ်ႈလွင်ႈတၼ်းၶူဝ်းၸဝ်ႈႁဝ်း။
ပုၼ်ႈလွင်ႈၼင်ႇႁိုဝ်ၵူၼ်းၵူႈၵေႃႉတၵ်းႁု လွင်ႈတၢင်းဢၼ်ၸဝ်ႈႁဝ်း၊ ပႃးတၼ်းၶူဝ်းသေလႄႈႁဵတ်းၸိူဝ်းၼၼ်ႉ ဢိၵ်ႇတင်းမုၼ်သရေႇမိူင်းၸဝ်ႈႁဝ်း ၼၼ်ႉတီႈၶႃႈဢေႃႈ။
မိူင်းၸဝ်ႈႁဝ်းပဵၼ်မိူင်းၼိၵ်ႈၸႃႉထႃႇဝရႃႉလႄႈ ဢႃႇၼႃႇၸဝ်ႈႁဝ်းတႄႇယူႇသေႇသေႇ ၵူႈၸူဝ်ႈၵူႈပၢၼ်တီႈၶႃႈဢေႃႈ။ ထႃႇဝရႃႉၽြႃး၊ ပႂ်ႉသဵတ်ႈၸႃႇၵႃႈၼိူဝ် ၵႂၢမ်းၵတိမၼ်းၸဝ်ႈၸိူဝ်းၼၼ်ႉလႄႈ၊ ၵႃႈဢၼ်မၼ်းၸဝ်ႈႁဵတ်းဝႆႉၸိူဝ်းၼၼ်ႉ မီးၵုင်ႇမီးမုၼ်တီႈၶႃႈဢေႃႈ။
မၼ်းၸဝ်ႈပူၵ်းၶဝ်ၸိူဝ်းဢၼ်လူမ်ႉၵႃႈမီးလုၵ်ႉလႄႈ ဢုမ်ႈဢဝ်ၶဝ်ၸိူဝ်းဢၼ်ၵူမ်ႈၵွမ်းၼွမ်းၶၢမ်ႇ ၵႃႈမီးၼၼ်ႉၶိုၼ်ႈဢေႃႈ။
ၵႃႈဢၼ်ဢသၢၵ်ႈလိပ်းယူႇတင်းသဵင်ႈတင်းလူင်ဢွၼ်ၵၼ်မုင်ႈမွင်းႁႅၼ်တူၺ်းၸဝ်ႈႁဝ်းတီႈၶႃႈလႄႈ ၸဝ်ႈႁဝ်းပၼ်တၢင်းၵိၼ်တၢင်းၶူပ်းၼႂ်းမိူဝ်ႈ ဢၼ်ၶဝ်လူဝ်ႇၼၼ်ႉတီႈၶႃႈဢေႃႈ။
ၸဝ်ႈႁဝ်းပၼ်ဢၼ်ပေႃးၵုမ်ႇလဵင်ႉၸႂ်ၼၼ်ႉ ထၢၼ်ႈပေႃးမီးတၢင်းဢၼ်ဢိမ်ႇတဵမ် တင်းသဵင်ႈတင်းလူင်ၵူႈၵေႃႉၵူႈၵူၼ်းတီႈၶႃႈဢေႃႈ။
ထႃႇဝရႃႉၽြႃး၊ ပဵၼ်ၸဝ်ႈဢၼ်သိုဝ်ႈတေႃႇ ၼႂ်းၼႃႈၵၢၼ်တၢင်းႁဵတ်းမၼ်းၸဝ်ႈၵႃႈမီး ၸိူဝ်းၼၼ်ႉလႄႈမီးၸႂ်မႅတ်ႈတႃႇၵရုၼႃႇ ၼႂ်းတၢင်းဢၼ်မၼ်းၸဝ်ႈႁဵတ်းၵူႈၸိူဝ်ႉ ၵူႈပိူင်ၸိူဝ်းၼၼ်ႉဢေႃႈ။
မၼ်းၸဝ်ႈမီးၸမ်ၶဝ်ၸိူဝ်းဢၼ်ႁွင်ႉၵၢဝ်ႇတီႈ မၼ်းၸဝ်ႈဢၼ်ဝႃႈ ၶဝ်ၸိူဝ်းဢၼ်ပႃးၸႂ်ပႃးၶေႃးႁွင်ႉၵၢဝ်ႇ တီႈမၼ်းၸဝ်ႈၼၼ်ႉဢေႃႈ။
မၼ်းၸဝ်ႈႁႂ်ႈဢလူဝ်ႇၶဝ်ၸိူဝ်းဢၼ်ၵူဝ်ယမ် မၼ်းၸဝ်ႈၼၼ်ႉပျေႉၸုမ်ႇဢေႃႈ။ မၼ်းၸဝ်ႈငိၼ်းသဵင်ဢၼ်ၶဝ်ႁွင်ႉၵၢဝ်ႇၼၼ်ႉလႄႈ ၵႄႇသႄႇၶျွတ်ႈဢဝ်ၶဝ်ဢေႃႈ။
မၼ်းၸဝ်ႈၵႅတ်ႇၶႄႁႄႉၵင်ႈၶဝ်ၸိူဝ်းဢၼ်ႁၵ်ႉပႅင်း မၼ်းၸဝ်ႈၼၼ်ႉၵူႈၵေႃႉၵူႈၵူၼ်းဢေႃႈ။ ၶဝ်ၸိူဝ်းဢၼ်ႁၢႆႉဢၼ်မိူၵ်ႈၸမ်ႉ၊မၼ်းၸဝ်ႈ ယႃႉပႅတ်ႈဢေႃႈ။
ၵဝ်တၵ်းယွင်ႈယေႃး ထႃႇဝရႃႉၽြႃး၊ သေႇသေႇဢေႃႈ။ ႁႂ်ႈၵူၼ်းၵႃႈမီးတင်းသဵင်ႈတင်းလူင် ယွင်ႈယေႃးၼႃႇမႃႉၸိုဝ်ႈသဵင်မၼ်းၸဝ်ႈ တႃႇသေႇဢမ်ႇထၢတ်ႇသေၵမ်းလူၺ်ႈ။
ယွင်ႈယေႃး ထႃႇဝရႃႉၽြႃး၊ တီႈၶႃႈဢေႃႈ။ ဝိၺိၺ်ႇၵဝ်။ ယွင်ႈယေႃး ထႃႇဝရႃႉၽြႃး၊ တီႈၶႃႈဢေႃႈ။
ၵဝ်တၵ်းယွင်ႈယေႃးမၼ်းၸဝ်ႈၸူဝ်ႈဢၼ် ဢသၢၵ်ႈၵဝ်ယင်းလိပ်းယူႇၼႆႉလႄႈ ၵဝ်တၵ်းႁဵတ်းၵႂၢမ်းတီႈၽြႃးပဵၼ်ၸဝ်ႈၵဝ် ၸူဝ်ႈဢသၢၵ်ႈၵဝ်ဢေႃႈ။
ယႃႇပေဢိင်ပိုင်ႈၶုၼ်တင်းလၢႆ။ ၵူၼ်းၼင်ႇၵၼ် ဢမ်ႇၸၢင်ႈၵႄႇသႄႇဢဝ်မႂ်းလႃးလႃး။
ၶဝ်ၼၼ်ႉၸၢင်ႈတၢႆလႄႈၶိုၼ်းၸူးၵႃႈတီႈ မုၼ်ႈလိၼ်ဢေႃႈ။ ၼႂ်းဝၼ်းၼၼ်ႉၵမ်းလဵဝ်တၢင်းဢၼ်ၶဝ် ၵျၢမ်ႇပွင်ဝႆႉၼၼ်ႉလုလႅဝ်ဢေႃႈ။
ၵေႃႉဢၼ်ၽြႃးပဵၼ်ၸဝ်ႈၵူၼ်းမဵဝ်း ယႃႇၵုပ်ႈ၊ ၸွႆႈထႅမ်ယူႇ၊ ၵေႃႉဢၼ်မုင်ႈထႃႈမွင်းထႃႈ ထႃႇဝရႃႉၽြႃး၊ ၽြႃးပဵၼ်ၸဝ်ႈမၼ်းယူႇၼၼ်ႉ မီးမၢင်ႇၵလႃႇဢေႃႈ။
မၼ်းၸဝ်ႈၼၼ်ႉႁဵတ်းပဵၼ်ၵၢင်ႁၢဝ်၊လိၼ်မိူင်း၊ ၼမ်ႉသမ်ႇမုၵ်ႈတြႃႇ ဢိၵ်ႇတင်းၵႃႈဢၼ်မီးၼႂ်းမၼ်းၸိူဝ်းၼၼ်ႉလႄႈ ပႂ်ႉသဵတ်ႈၸႃႇယူႇသေႇသေႇဢေႃႈ။
မၼ်းၸဝ်ႈၸီႇယၢင်ႇၸွမ်းၼင်ႇတြႃးယူႇ ၽွမ်ႉၽၢႆႇၶဝ်ၸိူဝ်းဢၼ်လႆႈၶၢမ်ႇတၢင်းဢၼ်တဵၵ်းငႅၼ်းၼၼ်ႉလႄႈ ပၼ်တၢင်းၵိၼ်တၢင်းၶူပ်းတီႈၶဝ်ၸိူဝ်းဢၼ် ဢိုပ်းယၢၵ်ႈတွင်ႉမႆႈၼၼ်ႉဢေႃႈ။ ထႃႇဝရႃႉၽြႃး၊ ပွႆႇၵူၼ်းထွင်ႇ တင်းလၢႆလွတ်ႈလႄႈ၊
ပၼ်ဢၼ်လႅင်းတႃတီႈၶဝ်ၸိူဝ်းဢၼ် တႃမွတ်ႇၼၼ်ႉဢေႃႈ။ မၼ်းၸဝ်ႈပူၵ်းၶဝ်ၸိူဝ်းဢၼ်လူမ်ႉၼၼ်ႉလုၵ်ႉလႄႈ မၼ်းၸဝ်ႈႁၵ်ႉၶဝ်ၸိူဝ်းဢၼ်သိုဝ်ႈတေႃႇ ၼၼ်ႉဢေႃႈ။
မၼ်းၸဝ်ႈၵႅတ်ႇၶႄႁႄႉၵင်ႈၶႅၵ်ႇဢၼ်သွၼ်ႈပိုင်ႈယူႇ ၵႃႈၼႂ်းမိူင်းႁဝ်းလႄႈ မၼ်းၸဝ်ႈၸွႆႈၵမ်ႉၸွႆႈထွၵ်ႈမႄႈမၢႆႈတင်းလုၵ်ႈ ဢၼ်ၽၢၼ်ပေႃႈၽၢၼ်မႄႈတင်းလၢႆဢေႃႈ။ တၢင်းၵျၢမ်ႇတၢင်းပွင်ၶဝ်ၸိူဝ်းဢၼ်ႁၢႆႉဢၼ်မိူၵ်ႈ ၼၼ်ႉၸမ်ႉ၊မၼ်းၸဝ်ႈႁႂ်ႈလုလႅဝ်ဢေႃႈ။
ထႃႇဝရႃႉၽြႃး၊ ပဵၼ်ၶုၼ်ႁေႃၶမ်းယူႇ တႃႇသေႇဢမ်ႇထၢတ်ႇဢေႃႈ။ ဝဵင်း ၸိဢုၼ်ႇ၊ ႟။ ၽြႃးပဵၼ်ၸဝ်ႈမႂ်း တၵ်းၼင်ႈႁၢင်ႈၼင်ႈႁေႃၵူႈၶိင်ႇၵူႈၶႃႇဢေႃႈ။ ယွင်ႈယေႃး ထႃႇဝရႃႉၽြႃး၊ တီႈၶႃႈဢေႃႈ။
ယွင်ႈယေႃး ထႃႇဝရႃႉၽြႃး၊ တီႈၶႃႈဢေႃႈ။ တၢင်းဢၼ်ႁဵတ်းၵႂၢမ်းယွင်ႈယေႃး ၽြႃးပဵၼ်ၸဝ်ႈၼၼ်ႉပဵၼ်ဢၼ် ထုၵ်ႇဢၼ်လီၼႃႇ၊ပဵၼ်ဢၼ်သႃႇယႃႇ လီငၢမ်းၼႃႇလႄႈတၢင်းဢၼ်ယွင်ႈယေႃးၼၼ်ႉ ပဵၼ်ဢၼ်ထိူၵ်ႈတၢၼ်ႇၼႃႇဢေႃႈ။
ထႃႇဝရႃႉၽြႃး၊ မႄးတႄႇမႄးႁဵတ်းဝဵင်း ယေႇရုသလႅမ်ႇ၊ လႄႈ သမ်ႉၶိုၼ်းဢဝ်ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်တိဢဝ်ၶျုၵ်ႈဝႆႉၼၼ်ႉမႃးဢေႃႈ။
မၼ်းၸဝ်ႈႁႂ်ႈၶဝ်ၸိူဝ်းဢၼ်ႁူဝ်ၸႂ်တႅၵ်ႇလႅဝ်ၼၼ်ႉ သၢၵ်ႈသႃႇၶႅၼ်းၸႂ်မႃးလႄႈပူၵ်ႉႁေႃႇပၼ် ႁွႆးၸဵပ်းၶဝ်ဢေႃႈ။
မၼ်းၸဝ်ႈၼပ်ႉဢၢၼ်ႇလၢဝ်တင်းလၢႆလႄႈ ႁွင်ႉႁဵၵ်ႈၸိုဝ်ႈႁင်းၽႂ်ႁင်းမၼ်းဢေႃႈ။
ၸဝ်ႈၽြႃးႁဝ်းယႂ်ႇမျၢတ်ႈၼႃႇဢေႃႈ။ ၺၢၼ်ႇပိင်ႇၺႃႇမၼ်းၸဝ်ႈၼၼ်ႉ ဢမ်ႇတုဢမ်ႇတႅၵ်ႈလႆႈ။
မၼ်းၸဝ်ႈယူၵ်ႉယွင်ႈၶဝ်ၸိူဝ်းဢၼ်တူၵ်းတႅမ်ႇ ယၢၵ်ႈၽၢၼ်ၼၼ်ႉလႄႈ ၶဝ်ၸိူဝ်းဢၼ်ႁၢႆႉဢၼ်မိူၵ်ႈၸမ်ႉ၊မၼ်းၸဝ်ႈ ဢီးလူမ်ႉတူၵ်းတီႈလိၼ်ဢေႃႈ။
ဢွၼ်ၵၼ်ႁဵတ်းၵႂၢမ်းထမ်ႇမႃႉဢၼ်ယွင်ႈယေႃး တီႈ ထႃႇဝရႃႉၽြႃး၊ တႃႉႁဝ်း။ ဢွၼ်ၵၼ်ႁႆႇတူႇရိယႃႇလဵတ်းတိင်ႇတီႈ ထႃႇဝရႃႉၽြႃး၊ ပဵၼ်ၸဝ်ႈႁဝ်းတႃႉႁဝ်း။
မၼ်းၸဝ်ႈၵီႈၽႄႇမွၵ်ႇၵုမ်ႈႁူမ်ႇတွင်ႉၽႃႉဝႆႉလႄႈ ႁႂ်ႈၽူၼ်တူၵ်းသႂ်ႇလိၼ်မိူင်းယူႇ၊ႁႂ်ႈယိူဝ်ႈယႃႈ ႁုၼ်ႈမႃးၵႃႈတီႈၼိူဝ်လွႆၼိူဝ်ၵွင်းဢေႃႈ။
မၼ်းၸဝ်ႈလဵင်ႉပၼ်တၢင်းၵိၼ်တၢင်းၶူပ်းတီႈ တူဝ်သတ်းတင်းလၢႆလႄႈ ဢွႆႇပၼ်ၼူၵ်ႉၵႃလမ်ဢွၼ်ႇဢၼ်ၸၢင်ႈႁွင်ႉ ၸိူဝ်းၼၼ်ႉဢေႃႈ။
မၼ်းၸဝ်ႈထုၵ်ႇၸႂ်ၵျိူၵ်ႈၸႂ်ႁႅင်းမႃႉဢမ်ႇၸႂ်ႈ။ မၼ်းၸဝ်ႈၸႂ်လီလူၺ်ႈႁႅင်းၵူၼ်းသိုၵ်း ဢၼ်ႁတ်းႁၢၼ်ၼၼ်ႉဢမ်ႇၸႂ်ႈ။
မၼ်းၸဝ်ႈထုၵ်ႇၸႂ်ၵျိူၵ်ႈၸႂ်ၶဝ်ၸိူဝ်းဢၼ် ရူဝ်ႇသေႇၵူဝ်ယမ်မၼ်းၸဝ်ႈ၊ ဢိၵ်ႇတင်းၶဝ်ၸိူဝ်းဢၼ်ဢိင်ပိုင်ႈမႅတ်ႈတႃႇ ၵရုၼႃႇမၼ်းၸဝ်ႈၼၼ်ႉဢေႃႈ။
ဝဵင်း ယေႇရုသလႅမ်ႇ၊ ႟။ ယွင်ႈယေႃး ထႃႇဝရႃႉၽြႃး၊ တႃႉ။ ဝဵင်း ၸိဢုၼ်ႇ၊ ႟။ ယွင်ႈယေႃး ၽြႃးပဵၼ်ၸဝ်ႈမႂ်းတႃႉ။
လွင်ႈမၼ်းၸမ်ႉ၊မၼ်းၸဝ်ႈႁႂ်ႈၵိူၼ်ႇၽၵ်းတူမႂ်း ၵႅၼ်ႇၶႅင်လႄႈပၼ်တၢင်းလီတီႈၵူၼ်းမႂ်း တင်းလၢႆဢေႃႈ။
မၼ်းၸဝ်ႈႁႂ်ႈၶွပ်ႇၼမ်ႉလႅၼ်လိၼ်မႂ်းမီးတၢင်းဢၼ် လူင်ႈလီလွတ်ႈလီလႄႈ ဢဝ်ၶဝ်ႈၵျုင်ႇမဵဝ်းဢၼ်လီလီၼၼ်ႉလဵင်ႉပၼ်မႂ်း ဢိမ်ႇဢိမ်ႇတဵမ်တဵမ်ဢေႃႈ။
မၼ်းၸဝ်ႈပူင်ဢမိင်ႉတီႈလိၼ်မိူင်းလႄႈ ၵႃႈၼင်ႇဢၼ်မၼ်းၸဝ်ႈလၢတ်ႈဝႃႈၼၼ်ႉ မၼ်းၸဝ်ႈႁဵတ်းႁႂ်ႈမၼ်းယဝ်ႉတူဝ်ႈ ၶၼ်ၽႂ်းၼႃႇဢေႃႈ။
မၼ်းၸဝ်ႈၵီႈၽႄႇမူၺ်ႁႃႇဝႆႉမိူၼ်ၸိူဝ်ႉၼင်ႇ ၽႃႈႁူမ်ႇၽႃႈဝႆလႄႈ ဢဝ်ၼမ်ႉၼၢႆးၽွင်ၸၢတ်ႇပိုၼ်ဝႆႉ မိူၼ်ၸိူဝ်ႉၼင်ႇတဝ်ႈဢေႃႈ။
မၼ်းၸဝ်ႈပွႆႇမၢၵ်ႇႁဵပ်းမႃးမိူၼ်ၸိူဝ်ႉၼင်ႇ ပဵၼ်မၢၵ်ႇႁိၼ်ယွႆႈလႄႈ ၽူႈလႂ်ဢမ်ႇၶၢမ်ႇတၢင်းၵတ်းဢၼ်မၼ်းၸဝ်ႈ ပွႆႇသႂ်ႇဝႆႉၼၼ်ႉလႆႈသေၵေႃႉသေၵူၼ်း။
မိူဝ်ႈၼၼ်ႉမၼ်းၸဝ်ႈပူင်ဢမိင်ႉလႄႈၼမ်ႉၶႅင် ၸိူမ်ႈပႅတ်ႈၵႂႃႇဢေႃႈ။ မၼ်းၸဝ်ႈပွႆႇလူမ်းမႃးလႄႈၼမ်ႉၵေႃႈ လႆႈလႆၵႂႃႇပႅတ်ႈဢေႃႈ။
မၼ်းၸဝ်ႈပၼ်ၶၢဝ်ႇငၢဝ်းတြႃးတီႈၵူၼ်း မၼ်းၸဝ်ႈတင်းလၢႆဢိၵ်ႇတင်း တြႃးဢၼ်သင်ႇသွၼ်ၼႄတၢင်း၊ဢိၵ်ႇတင်း ထုင်းၽိင်ႈတြႃးမၼ်းၸဝ်ႈတီႈၵူၼ်းမဵဝ်း ဢိသရေး၊ ဢေႃႈ။
မၼ်းၸဝ်ႈဢမ်ႇပၼ်တြႃးၸိူဝ်းၼၼ်ႉတီႈမဵဝ်းၵူၼ်း တၢင်ႇၸိူဝ်ႉတၢင်ႇၶိူဝ်းလႄႈ ပိူၼ်ႈဢမ်ႇလႆႈႁုထုင်းၽိင်ႈတြႃး မၼ်းၸဝ်ႈၸိူဝ်းၼၼ်ႉ၊ ယွင်ႈယေႃး ထႃႇဝရႃႉၽြႃး၊ တီႈၶႃႈဢေႃႈ။
ယွင်ႈယေႃး ထႃႇဝရႃႉၽြႃး၊ တီႈၶႃႈဢေႃႈ။ ၶဝ်ၸိူဝ်းဢၼ်မီးၵႃႈၼိူဝ်ၵၢင်ႁၢဝ်ၶဝ်႟။ ဢွၼ်ၵၼ်ယွင်ႈယေႃး ထႃႇဝရႃႉၽြႃး၊ တႃႉ။ ၶဝ်ၸိူဝ်းဢၼ်မီးတီႈပၢႆၸိၵ်းၸွမ်ပုၼ်ႉၶဝ်႟။ ဢွၼ်ၵၼ်ယွင်ႈယေႃးမၼ်းၸဝ်ႈတႃႉ။
တမၢၼ်ႇၵၢင်ႁၢဝ်မၼ်းၸဝ်ႈတင်းသဵင်ႈ႟။ ဢွၼ်ၵၼ်ယွင်ႈယေႃးမၼ်းၸဝ်ႈတႃႉ။ တပ်ႉသိုၵ်းၵၢင်ႁၢဝ်တင်းသဵင်ႈ႟။ ဢွၼ်ၵၼ် ယွင်ႈယေႃးမၼ်းၸဝ်ႈတႃႉ။
ၵၢင်ဝၼ်းတင်းလိူၼ်႟။ ဢွၼ်ၵၼ် ယွင်ႈယေႃးမၼ်းၸဝ်ႈတႃႉ။ လၢဝ်လႅင်းတင်းလၢႆ႟။ ဢွၼ်ၵၼ် ယွင်ႈယေႃးမၼ်းၸဝ်ႈတႃႉ။
ၵၢင်ႁၢဝ်ဢၼ်သုင်၊ဢိၵ်ႇတင်းၼမ်ႉၵႃႈၼိူဝ် ၵၢင်ႁၢဝ်တင်းလၢႆ႟။ ဢွၼ်ၵၼ်ယွင်ႈယေႃးမၼ်းၸဝ်ႈတႃႉ။
ႁႂ်ႈၶဝ်ၵႃႈမီးၸိူဝ်းၼၼ်ႉယွင်ႈယေႃးၼႃႇမႃႉ ၸိုဝ်ႈသဵင် ထႃႇဝရႃႉၽြႃး၊ တႃႉ။ လွင်ႈမၼ်းၸမ်ႉ၊မၼ်းၸဝ်ႈပူင်ဢမိင်ႉလႄႈ ၶဝ်ၸိူဝ်းၼၼ်ႉလႆႈၶၢမ်ႇတၢင်းဢၼ် ၽၢၼ်ႇသၢင်းႁဵတ်းပဵၼ်ဢေႃႈ။
မၼ်းၸဝ်ႈဢဝ်တင်းဢမိင်ႉသေယဝ်ႉႁႂ်ႈၶဝ်ယူႇဝႆႉ တီႈၽႂ်တီႈမၼ်းမၼ်ႈၶိူင်ႇဝႆႉသေႇသေႇ သေလႄႈ ၶဝ်ဢမ်ႇထွမ်ႇဢမ်ႇဢဝ်လႄႈ ဢမ်ႇယူႇလႆႈလႃးလႃးဢေႃႈ။
ဢွၼ်ၵၼ်ယွင်ႈယေႃး ထႃႇဝရႃႉၽြႃး၊ ၵႃႈတီႈလိၼ်မိူင်းၼႆႉတႃႉ။ ၸႃႉၸဵမ်ပႃလူင်တင်းလၢႆ၊တီႈလိုၵ်ႉတီႈလမ်ႇ ၼမ်ႉသမ်ႇမုၵ်ႈတြႃႇၵႃႈမီး၊
ၽႃႉမႅပ်ႈတင်းမၢၵ်ႇႁဵပ်းမူၺ်ႁႃႇတင်းမွၵ်ႇၵုမ်ႈ၊ လူမ်းၽိဝ်ႁုင်ဢၼ်ထွမ်ႇဢဝ်ဢမိင်ႉမၼ်းၸဝ်ႈ ၼၼ်ႉ၊ဢွၼ်ၵၼ်ယွင်ႈယေႃးမၼ်းၸဝ်ႈတႃႉ။
ၸႃႉၸဵမ်လွႆလူင်လွႆဢွၼ်ႇ၊တူၼ်ႈမၢၵ်ႇ တင်းထိူၼ်ႇမႆႉ၊
တူဝ်သတ်းၵႃႈမီးဢၼ်ပဵၼ်တူဝ်ထိူၼ်ႇတင်း တူဝ်ငႄႈ၊တူဝ်ဢၼ်ၸၢင်ႈၵၢၼ်း၊ဢိၵ်ႇတင်း ၼူၵ်ႉတင်းလၢႆ႟။ ဢွၼ်ၵၼ်ယွင်ႈယေႃးမၼ်းၸဝ်ႈတႃႉ။
ၶုၼ်ႁေႃၶမ်းတင်းလၢႆ၊ဢိၵ်ႇတင်းၶႃႈဝၢၼ်ႈ ၵူၼ်းမိူင်းၶဝ်ၵႃႈမီး၊ လုၵ်ႈၶုၼ်လုၵ်ႈၵွၼ်း၊ဢိၵ်ႇတင်းမူးမၢတ်ႈ ၽွင်းမိူင်းတင်းလၢႆ။
ၽူႈသၢဝ်ၽူႈမၢဝ်ႇ၊ဢိၵ်ႇတင်းၵူၼ်းထဝ်ႈ လုၵ်ႈဢွၼ်ႇတင်းလၢႆၶဝ်႟။ ဢွၼ်ၵၼ်ယွင်ႈယေႃးမၼ်းၸဝ်ႈတႃႉ။
ႁႂ်ႈၶဝ်ၵႃႈမီးၸိူဝ်းၼၼ်ႉယွင်ႈယေႃးၼႃႇမႃႉ ၸိုဝ်ႈသဵင် ထႃႇဝရႃႉၽြႃး၊ တႃႉ။ လွင်ႈမၼ်းၸမ်ႉ၊ၸိုဝ်ႈသဵင်မၼ်းၸဝ်ႈ ပႃးလဵဝ်ၵူၺ်းမျၢတ်ႈၼႃႇသေပိူၼ်ႈလႄႈ မုၼ်ၽုင်းမၼ်းၸဝ်ႈမီးယူႇၵႃႈၼိူဝ်လိၼ်မိူင်း တင်းၵႃႈၼိူဝ်ၵၢင်ႁၢဝ်ဢေႃႈ။
မၼ်းၸဝ်ႈႁႂ်ႈမဵဝ်းၵူၼ်းမၼ်းၸဝ်ႈႁႅင်းယႂ်ႇ၊ ႁႂ်ႈၵူၼ်းမၼ်းၸဝ်ႈမဵဝ်း ဢိသရေး၊ ဢၼ် မၼ်းၸဝ်ႈႁၵ်ႉၼၼ်ႉယွင်ႈယေႃးမၼ်းၸဝ်ႈဢေႃႈ။ ယွင်ႈယေႃး ထႃႇဝရႃႉၽြႃး၊ တီႈၶႃႈဢေႃႈ။
ယွင်ႈယေႃး ထႃႇဝရႃႉၽြႃး၊ တီႈၶႃႈဢေႃႈ။ ဢွၼ်ၵၼ်ႁဵတ်းၵႂၢမ်းဢၼ်မႂ်ႇတီႈ ထႃႇဝရႃႉၽြႃး၊ တႃႉ။ ယွင်ႈယေႃးမၼ်းၸဝ်ႈၵႃႈၼႂ်းပရိၵ်ႈသၢတ်ႈ ၶဝ်ၸိူဝ်းဢၼ်ပႂ်ႉသဵတ်ႈၸႃႇတီႈ မၼ်းၸဝ်ႈၼၼ်ႉတႃႉ။
ႁႂ်ႈၵူၼ်းမဵဝ်း ဢိသရေး၊ ဢွၼ်ၵၼ်ၸူမ်းသိူဝ်း ယူႇၼႂ်းၸဝ်ႈဢၼ်ၽၢၼ်ႇသၢင်းႁဵတ်းပဵၼ် ၶဝ်ၼၼ်ႉသေၵမ်းလူၺ်ႈ။ ႁႂ်ႈၵူၼ်းမဵဝ်း ၸိဢုၼ်ႇ၊ တင်းလၢႆဢွၼ်ၵၼ်သႂၢင်ႇသိူဝ်းယူႇၼႂ်းၶုၼ်ႁေႃၶမ်းၶဝ်သေၵမ်းလူၺ်ႈ။
ႁႂ်ႈၶဝ်ဢွၼ်ၵၼ်ၵႃႈဝႅၼ်သေလႄႈယွင်ႈယေႃးၼႃႇမႃႉၸိုဝ်ႈသဵင်မၼ်းၸဝ်ႈသေၵမ်းလူၺ်ႈ။ ႁႂ်ႈၶဝ်ဢွၼ်ၵၼ်ႁႆႇၵွင်ၶဵတ်ႇလဵတ်းတိင်ႇလႄႈ ႁဵတ်းၵႂၢမ်းတီႈမၼ်းၸဝ်ႈသေၵမ်းလူၺ်ႈ။
ထႃႇဝရႃႉၽြႃး၊ ထုၵ်ႇၸႂ်ၵျိူၵ်ႈၸႂ်ၵူၼ်း မၼ်းၸဝ်ႈတင်းလၢႆလႄႈ ႁႂ်ႈၶဝ်ၸိူဝ်းဢၼ်ၶျႃးတႅမ်ႇၼၼ်ႉမီးမုၼ်သရေႇ လူၺ်ႈတၢင်းဢၼ်ပႄႉၼႅင်ႇဢေႃႈ။
ႁႂ်ႈၵူၼ်းမၼ်းၸဝ်ႈၸိူဝ်းၼၼ်ႉသႂၢင်ႇသိူဝ်း လူၺ်ႈၵုင်ႇလူၺ်ႈမုၼ်ၶဝ်လႄႈ ႁဵတ်းၵႂၢမ်းသႂၢင်ႇသႂၢင်ႇသိူဝ်းသိူဝ်းယူႇ တင်းၶိုၼ်းတင်းၶိုၼ်းသေၵမ်းလူၺ်ႈ။
ႁႂ်ႈတၢင်းဢၼ်ယွင်ႈယေႃးၽြႃးပဵၼ်ၸဝ်ႈ ၸပ်းသူပ်းၸပ်းပၢၵ်ႇၶဝ်ဝႆႉသေၵမ်းလူၺ်ႈ။ ႁႂ်ႈလၢပ်ႇသၢၼ်ႇလႅၵ်ႈဢၼ်ၶူမ်းမၼ်းၽၢႆၼႃႇ ၼၼ်ႉမီးယူႇၼႂ်းမိုဝ်းၶဝ်၊
ႁႂ်ႈတိုၵ်းပႄႉမဵဝ်းၵူၼ်းတင်းလၢႆလႄႈႁႂ်ႈလႆႈ ပၼ်တၢမ်ႇဢပျတ်ႈတီႈပိူၼ်ႈတၢင်ႇၵေႃႉ၊
ႁႂ်ႈဢဝ်ၸိူၵ်ႈလဵၵ်းမတ်ႉၶုၼ်ႁေႃၶမ်းတင်းလၢႆဝႆႉ၊ ႁႂ်ႈဢဝ်ဝႅၼ်လဵၵ်းသႂ်ႇတီႈမိုဝ်းမူးမၢတ်ႈ ၽွင်းမိူင်းၶဝ်။
ႁႂ်ႈလႆႈပၼ်တၢမ်ႇဢပျတ်ႈတီႈမဵဝ်းၵူၼ်းတင်းလၢႆ ၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးပျႃႇတိၵ်ႈဝႆႉၼၼ်ႉသေၵမ်းလူၺ်ႈ။ ဢၼ်ၼႆႉၸမ်ႉ၊ပဵၼ်တၢင်းဢၼ်ၵူၼ်း ၽြႃးပဵၼ်ၸဝ်ႈလႆႈပႄႉလႆႈၼႅင်ႇဢေႃႈ။ ယွင်ႈယေႃး ထႃႇဝရႃႉၽြႃး၊ တီႈၶႃႈဢေႃႈ။
ယွင်ႈယေႃး ထႃႇဝရႃႉၽြႃး၊ တီႈၶႃႈဢေႃႈ။ ဢွၼ်ၵၼ်ယွင်ႈယေႃးၽြႃးပဵၼ်ၸဝ်ႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈတႃႉ။ ဢွၼ်ၵၼ်ယွင်ႈယေႃးႁႅင်းတၼ်းၶူဝ်းမၼ်းၸဝ်ႈၵႃႈၼႂ်းၽုင်ႇၵၢင်ႁၢဝ်ၼၼ်ႉတႃႉႁဝ်း။
ဢွၼ်ၵၼ်ယွင်ႈယေႃးလွင်ႈတၢင်းဢၼ်မၼ်းၸဝ်ႈဢဝ်တင်းတၼ်းၶူဝ်းႁဵတ်းဝႆႉၼၼ်ႉတႃႉ။ ဢွၼ်ၵၼ်ယွင်ႈယေႃးၸွမ်းၵႃႈၼင်ႇဢၼ်မၼ်းၸဝ်ႈယႂ်ႇမျၢတ်ႈၼႃႇလူင်လၢင်ၼၼ်ႉတႃႉ။
ဢွၼ်ၵၼ်ပဝ်ႇတိုင်ႈၼႄးၶရႃႇသေလႄႈ ယွင်ႈယေႃးမၼ်းၸဝ်ႈတႃႉ။ ဢွၼ်ၵၼ်လဵတ်းတိင်ႇသီတရေႃးသေလႄႈ ယွင်ႈယေႃးမၼ်းၸဝ်ႈတႃႉ။
ဢွၼ်ၵၼ်ႁႆႇၵွင်ၶဵတ်ႇၵႃႈဝႅၼ်ယူႇသေလႄႈ ယွင်ႈယေႃးမၼ်းၸဝ်ႈတႃႉ။ ဢွၼ်ၵၼ်လဵတ်းတိင်ႇပဝ်ႇပီႇယူႇသေလႄႈ ယွင်ႈယေႃးမၼ်းၸဝ်ႈတႃႉ။
ဢွၼ်ၵၼ်ႁႆႇသႅင်ႇဢၼ်သဵင်ႁႅင်းယႂ်ႇၼႃႇၼၼ်ႉ သေလႄႈယွင်ႈယေႃးမၼ်းၸဝ်ႈတႃႉ။ ဢွၼ်ၵၼ်ႁႆႇသႅင်ႇဢၼ်မီးသဵင်မူၼ်ႈပျေႃႇၼၼ်ႉ သေလႄႈယွင်ႈယေႃးမၼ်းၸဝ်ႈတႃႉ။
ၶဝ်ၸိူဝ်းဢၼ်ထူၺ်ႈၸႂ်ၶဝ်ႈထူၺ်ႈၸႂ်ဢွၵ်ႇတင်းသဵင်ႈတင်းလူင်ၶဝ်႟။ ဢွၼ်ၵၼ်ယွင်ႈယေႃး ထႃႇဝရႃႉၽြႃး၊ တႃႉ။ ယွင်ႈယေႃး ထႃႇဝရႃႉၽြႃး၊ တီႈၶႃႈဢေႃႈ။ ၵျၢမ်းလိၵ်ႈႁဵတ်းၵႂၢမ်းသႃႇလၢမ်ႇယဝ်ႉယဝ်ႉဢေႃႈ။
ထုင်းၵႂၢမ်းပိင်ႇၺႃႇတင်းလၢႆဢၼ် သေႃးလမုၼ်ႇ၊ ၵေႃႉပဵၼ်လုၵ်ႈၸၢႆး တႃႇဝိတ်ႈ၊ ၶုၼ်ႁေႃၶမ်းၵူၼ်းမဵဝ်း ဢိသရေး၊ ၸီႇယၢင်ႇဝႃႈဝႆႉၶႃႈဢေႃႈ။
ၵႂၢမ်းၸိူဝ်းၼႆႉပဵၼ်ထုင်းၵႂၢမ်းပိင်ႇၺႃႇဢၼ်တၵ်းၸွႆႈထႅမ်ႁႂ်ႈမႂ်းႁုပိင်ႇၺႃႇတြႃးဢိၵ်ႇတင်းတၢင်းဢၼ်ပၼ်တၢင်းၵျၢမ်ႇဢၼ်လီဢၼ်ငၢမ်းလႄႈႁုၸႅင်ႈၵႂၢမ်းဢၼ်လိုၵ်ႉဢၼ်လမ်ႇၸိူဝ်းၼၼ်ႉဢေႃႈ။-
ၵႂၢမ်းၸိူဝ်းၼႆႉတၵ်းသွၼ်ပၼ်ႁႂ်ႈမႂ်းမေႃယူႇမေႃသဝ်း၊မေႃၵမ်ၵျၢင်ႉသိုဝ်ႈသိုဝ်ႈတေႃႇတေႃႇ၊မေႃႁဵတ်းၸွမ်းၼင်ႇတြႃးဢိၵ်ႇတင်းမီးၸႂ်ၽဵင်ႇပဵင်းဢေႃႈ။-
ၵႂၢမ်းၸိူဝ်းၼႆႉၸၢင်ႈႁႂ်ႈၵေႃႉဢၼ်ငိူဝ်ႈငႃႉၼၼ်ႉလၵ်းလႅမ်မႃး၊သမ်ႉသွၼ်ပၼ်ႁႂ်ႈၵူၼ်းၼုမ်ႇၵူၼ်းၵမ်တင်းလၢႆ မီးၺၢၼ်ႇဢၼ်လႅတ်းမႃးဢေႃႈ။-
ထုင်းၵႂၢမ်းပိင်ႇၺႃႇၸိူဝ်းၼႆႉယင်းၸၢင်ႈထၢပ်ႈပၼ်ပိင်ႇၺႃႇတီႈၵေႃႉဢၼ်ၺၢၼ်ႇလီၼၼ်ႉထႅင်ႈလႄႈ၊ၼႄတၢင်းပၼ်ၵေႃႉဢၼ်မီးပိင်ႇၺႃႇၼၼ်ႉ၊-
ပုၼ်ႈလွင်ႈၼင်ႇႁိုဝ်ၶဝ်တၵ်းႁုၸႅင်ႈဢၼၢၵ်ႈဢထိၵ်ႈပႄႇထုင်းၵႂၢမ်းပိင်ႇၺႃႇသိူင်ႇလပ်ႉဝႆႉဢိၵ်ႇတင်းၵႂၢမ်းတႃႉဢၼ်ၵူၼ်းဢၼ်မီးပိင်ႇၺႃႇၶဝ်ထၢမ်ၼၼ်ႉဢေႃႈ။
ၼင်ႇႁိုဝ်တၵ်းမေႃပိင်ႇၺႃႇၸိုင်၊ဢွၼ်တၢင်းသုတ်းပိူၼ်ႈမႂ်းတၵ်းလႆႈရူဝ်ႇသေႇၵူဝ်ယမ် ထႃႇဝရႃႉၽြႃး၊ ဢေႃႈ။ ၵူၼ်းမိူၵ်ႈၸိုင်၊ဢမ်ႇဝႆႉဢမုပိင်ႇၺႃႇလႄႈဢမ်ႇၶႂ်ႈသွၼ်ဢဝ်လႃးလႃး။
လုၵ်ႈၸၢႆးၵဝ်႟။ ထွမ်ႇဢဝ်တြႃးဢၼ်ပေႃႈမႂ်းသင်ႇသွၼ်ၼႄတၢင်းပၼ်ၼၼ်ႉလႄႈယႃႇပေပႄႇပႅတ်ႈတြႃးဢၼ်မႄႈမႂ်းသင်ႇသွၼ်သုင်းမႃႉၼၼ်ႉ။-
တြႃးၸိူဝ်းၼၼ်ႉတၵ်းႁဵတ်းႁႂ်ႈမႂ်းမီးၼႃႈမီးတႃမိူၼ်ၸိူဝ်ႉၼင်ႇၶဵၼ်းႁူဝ်ဢၼ်ႁၢင်ႈလီၵႃႈတီႈႁူဝ်မႂ်း၊ဢမ်ႇၼၼ်ၵေႃႈမိူၼ်သွႆႈၶေႃးဢၼ်ႁဵတ်းႁႂ်ႈမႂ်းယဵင်ႈၶႅၼ်းႁၢင်ႈလီၼၼ်ႉဢေႃႈ။
လုၵ်ႈၸၢႆးၵဝ်႟။ မိူဝ်ႈဢၼ်ၵူၼ်းဢၼ်ဢမ်ႇတြႃးၸူဝ်းဢဝ်မႂ်းၼၼ်ႉၸိုင်၊ယႃႇပေႁႂ်ႈလွင်ႈၵႂႃႇၸွမ်းၵႂႃႇ။-
ပေႃးၶဝ်လၢတ်ႈလႄႈဝႃႈ၊ “မႃးတႃႉ႟။ ႁဝ်းဢွၼ်ၵၼ်လွမ်ဢဝ်ၵူၼ်းသေၵေႃႉၵေႃႉတၢႆတႃႉႁဝ်း။ ႁဝ်းဢွၼ်ၵၼ်ၵႂႃႇၽုတ်းသႂ်ႇတိုၵ်းတေႃးၶဝ်ၸိူဝ်းဢၼ်ၵၢင်းလွတ်ႈတင်းဢပျတ်ႈၼၼ်ႉပုၼ်ႈတၢင်းပျေႃႇႁဝ်းတႃႉ။-
မိူဝ်ႈဢၼ်ႁဝ်းထူပ်းႁၼ်ၶဝ်ၼၼ်ႉၶဝ်ၸၢင်ႈၶႄးဢသၢၵ်ႈတၵ်းလိပ်းလႄႈယူႇလီပီးမၼ်းဢေႃႈ။ ၵူၺ်းၵႃႈ၊ဝၢႆးသေဢၼ်ႁဝ်းတိုၵ်းတေႃးၶဝ်ယဝ်ႉၼၼ်ႉၶဝ်တၵ်းတၢႆယဝ်ႉဢေႃႈ။-
ႁဝ်းတၵ်းထူပ်းႁၼ်ၽၢၼ်ႇတႃႇဢုၵ်ႉၸႃႇၵူႈၸိူဝ်ႉၵူႈပိူင်လႄႈတၵ်းႁႂ်ႈဢုၵ်ႉၸႃႇဢၼ်ႁဝ်းႁိမ်ႁူင်ႇဢဝ်လႆႈမႃးၼၼ်ႉသႂ်ႇတဵမ်ႁိူၼ်းႁဝ်းဢေႃႈ။-
မႃးၶဝ်ႈပႃးၸွမ်းႁဝ်းတႃႉ။ ၵႃႈဢၼ်ႁဝ်းၸူၼ်ဢဝ်လႆႈမႃးၼၼ်ႉႁဝ်းတၵ်းၽႄမႅင်ႇၵၼ်ဢဝ်ဢေႃႈ၊” ဝႃႈၼင်ႇၼႆသေၵေႃႈ။
လုၵ်ႈၸၢႆးၵဝ်႟။ ယႃႇပေၵႂႃႇၸွမ်းၶဝ်ၼၼ်ႉ၊ယူႇၽၢတ်ႇၵၼ်တင်းၶဝ်တႃႉ။-
လွင်ႈမၼ်းၸမ်ႉ၊ၶဝ်ဢမ်ႇယိူၼ်ႉထႃႈႁဵတ်းတၢင်းဢၼ်ႁုၵ်းဢၼ်ႁၢႆႉၼၼ်ႉလႆႈ။ ၶဝ်တၼ်းဝႆႉႁႂ်ႈလႆႈဢဝ်ၵူၼ်းတၢႆဢေႃႈ။-
တၢင်းဢၼ်ႁၢင်ႈႁႅၼ်းၶႄလႄႈတိဢဝ်ၼူၵ်ႉတူဝ်ဢၼ်ပႂ်ႉတူၺ်းမႂ်းယူႇၼၼ်ႉတေဢမ်ႇမီးဢၵျူဝ်း။-
ၵူၺ်းၵႃႈ၊ၵူၼ်းၸိူဝ်ႉၼင်ႇၼၼ်ၼၼ်ႉၸၢင်ႈမေႃႁၢင်ႈၶိုမ်းပုၼ်ႈတူဝ်ၸဝ်ႈၵဝ်ႇလႄႈ၊တူဝ်ၶဝ်သမ်ႉတူၵ်းၶမ်ၶိုမ်းၶဝ်တၢႆပႅတ်ႈဢေႃႈ။-
ဢမုတၢင်းဢၼ်ၸူၼ်ဢဝ်ၼၼ်ႉၸၢင်ႈသိမ်းဢဝ်ဢသၢၵ်ႈၵူၼ်းၸူၼ်ၼၼ်ႉဢေႃႈ။ ဢၼ်ၼႆႉၸမ်ႉ၊ၸၢင်ႈပဵၼ်ဢၵျူဝ်းဢပျတ်ႈတီႈၶဝ်ၸိူဝ်းဢၼ်ႁဵတ်းဢမ်ႇတြႃးၼၼ်ႉယဝ်ႉဢေႃႈ။
ထွမ်ႇတႃႉ။ ပိင်ႇၺႃႇႁွင်ႉသႅၼ်ႇယူႇၵႃႈတီႈၵၢင်တႃၵၢင်တၢင်းဢိၵ်ႇတင်းၵႃႈတီႈၵၢင်ၵၢတ်ႇဢေႃႈ။-
ႁွင်ႉၵိဝ်သဵင်ယႂ်ႇၼႃႇၵႃႈတီႈႁူးၽၵ်းတူဝဵင်းလႂ်ဢိၵ်ႇတင်းၵႃႈတီႈဢၼ်ၵူၼ်းၸုၵူၼ်းတုမ်ၵၼ်လႂ်ၼၼ်ႉလႄႈဝႃႈၸမ်ႉ။
“ၵူၼ်းငိူဝ်ႈ႟။ မႂ်းတၵ်းငိူဝ်ႈငႃႉယူႇႁိုင်ၵႃႈႁိုဝ်။ မႂ်းတၵ်းမူၼ်ႈပျေႃႇၼႂ်းတၢင်းဢၼ်သႄႉသွမ်းပိင်ႇၺႃႇၼၼ်ႉယူႇႁိုင်ၵႃႈႁိုဝ်။ မႂ်းတၵ်းဢမ်ႇတွၼ်ႉသွၼ်ဢဝ်သေပွၵ်ႈယဝ်ႉႁိုဝ်း။-
ထွမ်ႇဢဝ်ၵႂၢမ်းဢၼ်ၵဝ်သင်ႇသွၼ်ၼၼ်ႉတႃႉ။ ၵဝ်တၵ်းပၼ်တၢင်းၵျၢမ်ႇဢၼ်လီဢၼ်ငၢမ်းတီႈမႂ်းလႄႈႁႂ်ႈမႂ်းႁုဢၼၢၵ်ႈဢထိၵ်ႈပႄႇၵႂၢမ်းၵဝ်ဢေႃႈ။-
ၵဝ်ႁွင်ႉမႂ်းယဝ်ႉ။ ၵဝ်ႁွင်ႉပၢင်းဢဝ်ႁႂ်ႈမႂ်းမႃးယဝ်ႉ။ ၵူၺ်းၵႃႈ၊မႂ်းဢမ်ႇထွမ်ႇဢဝ်။ မႂ်းဢမ်ႇဝႆႉဢယေးတီႈၵဝ်။-
မႂ်းပႄႇပႅတ်ႈထဵင်ပႅတ်ႈတၢင်ၵျၢမ်ႇၵဝ်ၵႃႈမီးလႄႈဢမ်ႇၶၢမ်ႇဢမ်ႇဢဝ်တၢင်းဢၼ်ၵဝ်မႄးပၼ်မႂ်းၼၼ်ႉ။-
ပိူဝ်ႈၼႆလႄႈမိူဝ်ႈဢၼ်မႂ်းထူပ်းၽေးတုၵ်ႉၶႃႉၼၼ်ႉၸိုင်၊ၵဝ်တၵ်းၶူဝ်မႂ်းဢေႃႈ။ မိူဝ်ႈဢၼ်မႂ်းႁွတ်ႈထိုင်တၢင်းဢၼ်လီၵူဝ်လီႁႄၼၼ်ႉၸိုင်၊ၵဝ်တၵ်းႁဵတ်းပျၢၵ်ႈမႂ်းဢေႃႈ။-
ယၢမ်းမိူဝ်ႈဢၼ်တၢင်းဢၼ်တူၵ်းၸႂ်တိုၼ်ႇၸႂ်ပဵၼ်မႃးတီႈမႂ်းမိူၼ်ၸိူဝ်ႉၼင်ႇလူမ်းၽိဝ်ႁုင်၊ဢိၵ်ႇတင်းၽေးဢုပၢတ်ႈတူၵ်းႁွတ်ႈမႃးမိူၼ်ၸိူဝ်ႉၼင်ႇလူမ်းလိဝ်လႄႈမႂ်းပဵၼ်ဢၼ်ၸဵပ်းၸႂ်၊ယၢပ်ႇၸႂ်ၶၢၼ်ၸႂ်ယူႇၼၼ်ႉၸိုင်၊-
မႂ်းတၵ်းႁွင်ႉၵၢဝ်ႇတီႈၵဝ်သေၵေႃႈ ၵဝ်တၵ်းဢမ်ႇဢိူဝ်။ မႂ်းတၵ်းသွၵ်ႈႁႃၵဝ်ၵူႈတီႈၵူႈလႅၼ်သေၵေႃႈ တၵ်းဢမ်ႇထူပ်းဢမ်ႇႁၼ်ၵဝ်။-
လွင်ႈမၼ်းၸမ်ႉ၊မႂ်းငိၼ်းၸင်းဢတၢတ်ႈပိင်ႇၺႃႇလႄႈဢမ်ႇမီးဢလူဝ်ႇၶႂ်ႈၵူဝ်ယမ် ထႃႇဝရႃႉၽြႃး ။-
မႂ်းဢမ်ႇတွၼ်ႉမီးၸႂ်ဢၼ်ၶႂ်ႈလႆႈတၢင်းၵျၢမ်ႇၵဝ်လႄႈမႂ်းဢမ်ႇဝႆႉဢယေးတီႈတၢင်းဢၼ်ၵဝ်မႄးပၼ်မႂ်းၼၼ်ႉ။-
ၵွပ်ႈပိူဝ်ႈၸိူဝ်ႉၼင်ႇၼႆလႄႈမႂ်းတၵ်းလႆႈၶၢမ်ႇၵႃႈဢၼ်ထိူၵ်ႈၶၢမ်ႇၼၼ်ႉဢိၵ်ႇတင်းၵႃႈဢၼ်မႂ်းႁဵတ်းၼၼ်ႉတၵ်းႁႂ်ႈမႂ်းယၢပ်ႇၸႂ်ၶၢၼ်ၸႂ်ဢေႃႈ။-
ၵူၼ်းငိူဝ်ႈတၵ်းၸၢင်ႈတၢႆၵွပ်ႈပိူဝ်ႈဢၼ်မၼ်းထဵင်ပႅတ်ႈပိင်ႇၺႃႇၼၼ်ႉလႄႈၵူၼ်းမိူၵ်ႈသမ်ႉတၵ်းၸၢင်ႈလုလႅဝ်လူၺ်ႈတၢင်းဢၼ်မၼ်းယူႇမဝ်ယူႇမၢင်ၼၼ်ႉဢေႃႈ။-
ၵေႃႉဢၼ်ထွမ်ႇဢဝ်ၵႂၢမ်းၵဝ်ၼၼ်ႉၸမ်ႉ၊တၵ်းတေလႆႈယူႇလူင်ႉလီလွတ်ႈလီလႄႈမၼ်းတၵ်းတေလႆႈတဵတ်ႇလီၼိမ်လီ၊ဢမ်ႇမီးတၢင်းဢၼ်ၵူဝ်ၽေးၵႃႈသင်ဢေႃႈ။”
လုၵ်ႈၸၢႆးၵဝ်႟။ သွၼ်ဢဝ်ၵႃႈဢၼ်ၵဝ်သင်ႇသွၼ်သုင်းမႃႉမႂ်းၼၼ်ႉတႃႉ။ ယႃႇပေလူင်လိုမ်းတၢင်းဢၼ်ၵဝ်သင်ႇလၢတ်ႈႁႂ်ႈမႂ်းႁဵတ်းၼၼ်ႉ။-
ထွမ်ႇဢဝ်ၵႃႈဢၼ်ပဵၼ်ၵႂၢမ်းပိင်ႇၺႃႇၼၼ်ႉလႄႈ ၵျူဝ်းၸႃးႁႂ်ႈႁုၸႅင်ႈဢၼၢၵ်ႈဢထိၵ်ႈပႄႇမၼ်းတႃႉ။-
ၸႂ်ႈတႄႉ၊လဝ်ႈယွၼ်းဢဝ်ဢတၢတ်ႈပိင်ႇၺႃႇလႄႈၶေႃယွၼ်းဢဝ်ၺၢၼ်ႇဢၼ်လိုၵ်ႉဢၼ်လမ်ႇၼၼ်ႉတႃႉ။-
သွၵ်ႈႁႃဢဝ်မၼ်းမိူၼ်ၸိူဝ်ႉၼင်ႇဢၼ်မႂ်းႁႃဢဝ်ငိုၼ်းၼၼ်ႉ၊ဢမ်ႇၼၼ်ၵေႃႈသပ်းႁႃထၢမ်ႁႃဢဝ်မိူၼ်ၸိူဝ်ႉၼင်ႇဢၼ်မႂ်းႁႃၽၼ်ႇတႃႇဢၼ်သိူင်ႇဝႆႉသိမ်းဝႆႉၼၼ်ႉတႃႉ။-
ပေႃးမႂ်းႁဵတ်းၸိူဝ်ႉၼင်ႇၼၼ်ၸိုင်၊မႂ်းတၵ်းႁုၸႅင်ႈသၽေႃးဢၼ်ၵူဝ်ယမ် ထႃႇဝရႃႉၽြႃး၊ လႄႈ၊မႂ်းတၵ်းမီးၸႂ်ဢၼ်မေႃသွၼ်ဢဝ်လွင်ႈၽြႃးပဵၼ်ၸဝ်ႈဢေႃႈ။-
လွင်ႈမၼ်းၸမ်ႉ၊ ထႃႇဝရႃႉၽြႃး၊ ၸၢင်ႈပၼ်ပိင်ႇၺႃႇဢေႃႈ။ ၺၢၼ်ႇဢိၵ်ႇတင်းၸႂ်ဢၼ်ၸၢင်ႈပွင်ႇၸၢင်ႈလႅင်းၼၼ်ႉပဵၼ်မႃးၵႃႈတီႈမၼ်းၸဝ်ႈဢေႃႈ။-
မၼ်းၸဝ်ႈပၼ်တၢင်းဢၼ်ၸွႆႈထႅမ်ထွၵ်ႈၵမ်ႉ ဢိၵ်ႇတင်းတၢင်းဢၼ်ၵႅတ်ႇၶႄႁႄႉၵင်ႈတီႈၶဝ်ၸိူဝ်းဢၼ်သိုဝ်ႈလီယူဝ်းလီၼၼ်ႉဢေႃႈ။-
မၼ်းၸဝ်ႈၵႅတ်ႇၶႄပၼ်ၶဝ်ၸိူဝ်းဢၼ်မီးၸႂ်ၽဵင်ႇပဵင်းတီႈပိူၼ်ႈတၢင်ႇၵေႃႉၼၼ်ႉဢိၵ်ႇတင်းႁႄႉပၼ်ၵင်ႈပၼ်ၶဝ်ၸိူဝ်းဢၼ်ႁၵ်ႉပႅင်းမၼ်းၸဝ်ႈၼၼ်ႉဢေႃႈ။
ပေႃးမႂ်းထွမ်ႇဢဝ်ၵႂၢမ်းၵဝ်ၸိုင်၊မႂ်းတၵ်းႁုသၽေႃးတၢင်းဢၼ်ၵမ်ၵျၢင်ႉသိုဝ်ႈသိုဝ်ႈတေႃႇတေႃႇ၊တၢင်းဢၼ်ၸီႇယၢင်ႇၸွမ်းၼင်ႇတြႃးဢိၵ်ႇတင်းတၢင်းဢၼ်ၸႂ်ၽဵင်ႇပဵင်းၼၼ်ႉဢေႃႈ။ မႂ်းတၵ်းႁုၵႃႈဢၼ်မႂ်းထုၵ်ႇလီႁဵတ်းၼၼ်ႉဢေႃႈ။-
မႂ်းတၵ်းပဵၼ်ၵေႃႉဢၼ်မီးပိင်ႇၺႃႇမႃးလႄႈ၊တၢင်းဢၼ်မႂ်းမေႃႁုမေႃၸႅင်ႈၼၼ်ႉတၵ်းႁႂ်ႈမႂ်းလႆႈၸူမ်းသိူဝ်းမူၼ်ႈပျေႃႇဢေႃႈ။-
ၺၢၼ်ႇဢၼ်လိုၵ်ႉဢၼ်လမ်ႇမႂ်းဢိၵ်ႇတင်းတၢင်းဢၼ်မႂ်းၸၢင်ႈပွင်ႇၸၢင်ႈလႅင်းၼၼ်ႉတၵ်းၵႅတ်ႇၶႄႁႄႉၵင်ႈမႂ်းလႄႈ၊-
တၵ်းႁႄႉၶႅၼ်ပၼ်မႂ်းသေၵႃႈတီႈတၢင်းဢၼ်ႁဵတ်းၽိတ်းႁဵတ်းပိူင်ႈၼၼ်ႉဢေႃႈ။ ၺၢၼ်ႇပိင်ႇၺႃႇၸိူဝ်းၼၼ်ႉတၵ်းႁႂ်ႈမႂ်းလွတ်ႈသေၵႃႈတီႈၵူၼ်းၸိူဝ်းဢၼ်လၢတ်ႈၵႂၢမ်းဢၼ်ၵူတ်ႉဢၼ်ငေႃးသေလႄႈတိုၵ်းသူၼ်းၽေးဢၼ်ႇတရေႇၼၼ်ႉဢေႃႈ။-
ၶဝ်ၸိူဝ်းဢၼ်ဝႄႈပိူင်ႈသေဢၼ်သိုဝ်ႈဢၼ်ယူဝ်းၼၼ်ႉၸၢင်ႈယူႇၵႃႈၼႂ်းဢပျတ်ႈဢၼ်လပ်းသိင်ႇဢေႃႈ။-
ၶဝ်ၼၼ်ႉၸူမ်းပျေႃႇယူႇၼႂ်းတုၸရိူၵ်ႈလႄႈၸၢင်ႈသႂၢင်ႇသိူဝ်းယူႇၼႂ်းတၢင်းဢၼ်ႁုၵ်းဢၼ်ႁၢႆႉ၊-
ဢမ်ႇမီးၵတိသဵတ်ႈၸႃႇလႄႈပဵၼ်ၶဝ်ၸိူဝ်းဢၼ်ဢမ်ႇလီယုမ်ႇၼၼ်ႉဢေႃႈ။
မႂ်းတၵ်းၸၢင်ႈဝႄႈပႅတ်ႈသေမႄႈယိင်းလေႃလႄဢၼ်ဢဝ်သူပ်းလီၵႂၢမ်းဝၢၼ်ၶျေႃးဝွၼ်း၊-
ဢၼ်ဢမ်ႇပႂ်ႉသဵတ်ႈၸႃႇတီႈၽူဝ်တူဝ်ၸဝ်ႈၵဝ်ႇလႄႈလူင်လိုမ်းပႅတ်ႈၵႂၢမ်းသဵတ်ႈၸႃႇဢၼ်တိူင်ႇဝႃႈဝႆႉၼၼ်ႉဢေႃႈ။-
ပေႃးမႂ်းၵႂႃႇၸူးၵႃႈတီႈႁိူၼ်းမၼ်းၸိုင်၊မႂ်းပဵၼ်ဢၼ်ပႆၸွမ်းသဵၼ်ႈတၢင်းဢၼ်ၵႂႃႇၸူးတၢင်းတၢႆၼၼ်ႉယဝ်ႉ။ တၢင်းဢၼ်ၵႂႃႇၵႃႈတီႈၼၼ်ႈၼၼ်ႉပဵၼ်တၢင်းဢၼ်ၶဝ်ႈၸူးၵႃႈတီႈမိူင်းမရၼႃႉယဝ်ႉ။-
ၵေႃႉဢၼ်ၵႂႃႇလႄႇၵႂႃႇၸႂ်းမႄႈယိင်းၼၼ်ႉၼၼ်ႉဢမ်ႇတွၼ်ႉၶိုၼ်းပွၵ်ႈၶိုၼ်းမႃးသေၵေႃႉသေၵူၼ်းမၼ်းဢမ်ႇတွၼ်ႉၶိုၼ်းပွၵ်ႈၸူးတီႈသဵၼ်ႈတၢင်းဢသၢၵ်ႈ။-
ပိူဝ်ႈၼႆလႄႈမႂ်းတၵ်းလႆႈၵႂႃႇမႃးယူႇၵႃႈၼႂ်းသဵၼ်ႈတၢင်းၶဝ်ၸိူဝ်းဢၼ်လီဢၼ်ငၢမ်းၼၼ်ႉလႄႈၵမ်ၵျၢင်ႉဢၼ်သိုဝ်ႈဢၼ်တေႃႇယူႇတိၵ်းတိၵ်းဢေႃႈ။-
ၶဝ်ၸိူဝ်းဢၼ်သိုဝ်ႈလီယူဝ်းလီၼၼ်ႉတၵ်းယူႇၵႃႈၼႂ်းမိူင်းဢၼ်မၼ်းၸဝ်ႈပၼ်လႄႈတူၵ်းတီႈယူႇတီႈသဝ်းၵႃႈၼႂ်းမိူင်းၼၼ်ႉဢေႃႈ။-
ၶဝ်ၸိူဝ်းဢၼ်ဢမ်ႇတြႃးၼၼ်ႉၸမ်ႉ၊ၽြႃးပဵၼ်ၸဝ်ႈတၵ်းၸၵ်ႉဢဝ်ဢွၵ်ႇသေၵႃႈတီႈမိူင်းၼၼ်ႉလႄႈထူၺ်ႈဢွၵ်ႇပႅတ်ႈ ၶဝ်ၸိူဝ်းဢၼ်ႁဵတ်းပႅတ်ႉႁဵတ်းလႅၼ်ၼၼ်ႉမိူၼ်ၸိူဝ်ႉၼင်ႇတူၼ်ႈဢၼ်ထူၺ်ႈဢွၵ်ႇသေၵႃႈတီႈလိၼ်ပႅတ်ႈၼၼ်ႉဢေႃႈ။
လုၵ်ႈၸၢႆးၵဝ်႟။ ယႃႇပေလူင်လိုမ်းပႅတ်ႈတြႃးဢၼ်ၵဝ်သွၼ်ပၼ်ၼၼ်ႉ။ ၶုၵ်းၸႂ်လႆႈၵႃႈဢၼ်ၵဝ်သင်ႇလၢတ်ႈႁႂ်ႈမႂ်းႁဵတ်းၼၼ်ႉယူႇသေႇသေႇတႃႉ။-
တြႃးၸိူဝ်းၼၼ်ႉတၵ်းႁႂ်ႈမႂ်းဢသၢၵ်ႈယၢဝ်းယိုၼ်းလႄႈမႂ်းတၵ်းတေလႆႈမၢၵ်ႈမီးလီပဵၼ်ဢေႃႈ။-
ယႃႇပေပွႆႇပႅတ်ႈတၢင်းဢၼ်ပႂ်ႉၵတိဢိၵ်ႇတင်းသဵတ်ႈၸႃႇၼၼ်ႉလႃးလႃး။ ဢဝ်တြႃးၸိူဝ်းၼၼ်ႉႁွႆႈပႃးဝႆႉၵႃႈတီႈၶေႃးမႂ်းတႃႉ။ တႅမ်ႈသႂ်ႇဝႆႉၵႃႈၼႂ်းၸရၢင်းဢၢင်းႁူဝ်ၸႂ်မႂ်းတႃႉ။-
ပေႃးမႂ်းႁဵတ်းၸိူဝ်ႉၼင်ႇၼၼ်ၸိုင်၊မႂ်းတၵ်းလႆႈၼႃႈလႆႈတႃသိုဝ်ႈၼႃႈတႂ်ႈတႃၽြႃးပဵၼ်ၸဝ်ႈတင်းၵူၼ်းတင်းလၢႆဢေႃႈ။
ပႃးၸႂ်ပႃးၶေႃးယုမ်ႇယမ်ဢိင်ပိုင်ႈ ထႃႇဝရႃႉၽြႃး၊ တႃႉ။ ယႃႇပေၸႂ်လီလူၺ်ႈၺၢၼ်ႇတူဝ်ၸဝ်ႈၵဝ်ႇ။-
ၼႂ်းၵႃႈဢၼ်မႂ်းႁဵတ်းၵူႈသမ်ႇၵူႈပိူင်ၼၼ်ႉႁဵတ်းသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ တႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊မၼ်းၸဝ်ႈတၵ်းၼႄပၼ်လၢႆးမၢၼ်ႇတီႈမႂ်းဢေႃႈ။-
ယႃႇပေထၢင်ႇတူဝ်ၸဝ်ႈၵဝ်ႇမီးပိင်ႇၺႃႇၼႃႇသေတူဝ်ၸဝ်ႈၵဝ်ႇမီးယူႇၼၼ်ႉ။ ၵူၺ်းထွမ်ႇဢဝ် ထႃႇဝရႃႉၽြႃး၊ လႄႈဝႄႈပႅတ်ႈတုၸရိူၵ်ႈတႃႉ။-
ပေႃးႁဵတ်းၸိူဝ်ႉၼင်ႇၼၼ်ၸိုင်၊မၼ်းတၵ်းပဵၼ်ယႃႈယႃဢၼ်လီလႄႈယႃပၼ်ႁွႆးၸဵပ်းမႂ်းဢိၵ်ႇတင်းႁႂ်ႈတၢင်းဢၼ်ၶိုၼ်ႈဢၼ်ၶူပ်းမႂ်းၸိုၼ်ႈၶႅၼ်းဢေႃႈ။-
ရူဝ်ႇသေႇၵူဝ်ယမ် ထႃႇဝရႃႉၽြႃး၊ ၼႂ်းတၢင်းဢၼ်သၢၵ်ႈလူႇဢုၵ်ႉၸႃႇဢိၵ်ႇတင်းမၢၵ်ႇႁူင်းဢၼ်လီသေပိူၼ်ႈ ၼႂ်းၵႃႈဢၼ်မၢၵ်ႇမႃးတီႈမႂ်းၼၼ်ႉတႃႉ။-
ပေႃးႁဵတ်းၸိူဝ်ႉၼင်ႇၼၼ်ၸိုင်၊ယွင်မႂ်းယေးမႂ်းတၵ်းသတ်ႉတဵမ်ဝႆႉတင်းမၢၵ်ႇတင်းႁူင်းလႄႈ၊ဢုမ်မႂ်းၸိူဝ်းၼၼ်ႉၵေႃႈတၵ်းလူၼ်ႉတဵမ်ဝႆႉတင်းၼမ်ႉမၢၵ်ႇၸပိတ်ႉဢေႃႈ။
လုၵ်ႈၸၢႆးၵဝ်႟။ မိူဝ်ႈဢၼ် ထႃႇဝရႃႉၽြႃး၊ သင်ႇသွၼ်မႂ်းမိူၼ်ၸိူဝ်ႉၼင်ႇပေႃႈသင်ႇသွၼ်လုၵ်ႈဢၼ်မၼ်းႁၵ်ႉၼၼ်ႉယဝ်ႉ၊ႁပ်ႉတုင်းဢဝ်လီလီတႃႉ။-
ထႃႇဝရႃႉၽြႃး၊ မႄးပၼ်ၶဝ်ၸိူဝ်းဢၼ်မၼ်းၸဝ်ႈႁၵ်ႉၼၼ်ႉမိူၼ်ၸိူဝ်ႉၼင်ႇဢၼ် ပေႃႈမႄႈပၼ်လုၵ်ႈလၢင်းဢၼ်မၼ်းဢဝ်ၵုင်ႇဢဝ်မုၼ်ၼၼ်ႉဢေႃႈ။-
ၵေႃႉဢၼ်မီးပိင်ႇၺႃႇမႃး၊လႆႈၺၢၼ်ႇမႃးၼၼ်ႉမီးမၢင်ႇၵလႃႇဢေႃႈ။-
လွင်ႈမၼ်းၸမ်ႉ၊တၢင်းဢၼ်လႆႈဢမျတ်ႈဢတူဝ်းၼႂ်းပိင်ႇၺႃႇၼၼ်ႉယဵင်ႈၶႅၼ်းလီတွၼ်းၼႃႇသေတၢင်းဢၼ်လႆႈဢမျတ်ႈဢတူဝ်းၼႂ်းငိုၼ်းၼၼ်ႉဢေႃႈ။ ယဵင်ႈၶႅၼ်းလီၼႃႇသေဢမျတ်ႈၼႂ်းၶမ်းလူးၵွၼ်ႇဢေႃႈ။-
ပိင်ႇၺႃႇယဵင်ႈၶႅၼ်းထိူၵ်ႈၵႃႈၼႃႇသေသႅင်လႅင်ဢေႃႈ။ ၶိူင်ႈပိူင်ၵႃႈဢၼ်မႂ်းတူၵ်းဢၢင်ႈၶႂ်ႈလႆႈၼၼ်ႉဢမ်ႇၸၢင်ႈတႅၵ်ႈၼိူင်းၵၼ်တင်းမၼ်းလႆႈ။-
ပိင်ႇၺႃႇၸိူဝ်းၼၼ်ႉၸၢင်ႈပၼ်ဢၵျူဝ်းႁႂ်ႈမႂ်းဢသၢၵ်ႈယိုၼ်းယၢဝ်းဢမ်ႇၵႃး၊ၸၢင်ႈႁႂ်ႈမႂ်းမၢၵ်ႈမီးလီပဵၼ်ဢိၵ်ႇတင်းၸၢင်ႈႁႂ်ႈမႂ်းမီးမုၼ်သရေႇဢေႃႈ။-
မၼ်းၸၢင်ႈႁႂ်ႈဢသၢၵ်ႈတၢၼ်းမႂ်းသႃႇယႃႇလီငၢမ်းလႄႈမၼ်းတၵ်းဢွၼ်သူင်ႇမႂ်းလူင်ႉလွတ်ႈလီဢေႃႈ။-
ၶဝ်ၸိူဝ်းဢၼ်မီးပိင်ႇၺႃႇမႃးၼၼ်ႉမီးမၢင်ႇၵလႃႇဢေႃႈ။ လွင်ႈမၼ်းၸမ်ႉ၊ပိင်ႇၺႃႇၼၼ်ႉၸၢင်ႈပၼ်ဢသၢၵ်ႈတီႈၶဝ်ၸိူဝ်းၼၼ်ႉဢေႃႈ။
ထႃႇဝရႃႉၽြႃး၊ ဢဝ်တင်းပိင်ႇၺႃႇၽၢၼ်ႇသၢင်းႁဵတ်းပဵၼ်လိၼ်မိူင်းလႄႈ ဢဝ်တင်းၺၢၼ်ႇတႄႇဝႆႉၽႃႉၵၢင်ႁၢဝ်ဢေႃႈ။
ဢဝ်တင်းတၢင်းဢၼ်မၼ်းၸဝ်ႈၸၢင်ႈႁုၸႅင်ႈၼၼ်ႉလႄႈ ႁႂ်ႈၼမ်ႉႁွင်ႈၼမ်ႉၵႄးတင်းလၢႆလႆယူႇဢိၵ်ႇတင်းႁႂ်ႈမွၵ်ႇၵုမ်ႈ၊ ယွတ်ႇဢွၵ်ႇၼမ်ႉၽူၼ်တူၵ်းသႂ်ႇၼိူဝ်လိၼ်ဢေႃႈ။
လုၵ်ႈၸၢႆးၵဝ်႟။ ယိပ်းၵမ်ဢဝ်ပိင်ႇၺႃႇတင်းၺၢၼ်ႇဢၼ်လိုၵ်ႉဢၼ်လမ်ႇဝႆႉတႃႉ။ ယႃႇပေပွႆႇၶဝ်ပႅတ်ႈလႃးလႃး။-
ၶဝ်တၵ်းႁႂ်ႈဢသၢၵ်ႈတၢၼ်းမႂ်းႁႂ်ႈပဵၼ်ဢသၢၵ်ႈတၢၼ်းဢၼ်သႃႇယႃႇဢိၵ်ႇတင်းဢသၢၵ်ႈတၢၼ်းဢၼ်မီးမၢင်ႇၵလႃႇဢေႃႈ။-
မႂ်းတၵ်းလႆႈပႆၵႂႃႇၼႂ်းသဵၼ်ႈတႃသၢႆတၢင်းမႂ်းလူင်ႉလွတ်ႈလီ၊တိၼ်မႂ်းယင်းဢမ်ႇလႆႈၶီႈလိုတ်းၶီႈလႅင်ႉလႃးလႃး။-
မိူဝ်ႈဢၼ်မႂ်းၼွၼ်းၼၼ်ႉမႂ်းတၵ်းဢမ်ႇလႆႈၵူဝ်လႆႈႁႄၵႃႈသင်။ ၸႂ်ႈတႄႉတႄႉယဝ်ႉ။ မႂ်းတၵ်းတေလႆႈၼွၼ်းလပ်းၼွၼ်းလီတင်းၶိုၼ်းဢေႃႈ။-
မႂ်းတေဢမ်ႇလႆႈမႆႈၸႂ်လူၺ်ႈၽေးဢၼ်ႇတရေႇဢၼ်ၶိုၵ်းၶၢၵ်းပဵၼ်မႃးၸိူဝ်ႉၼင်ႇဢၼ်ပဵၼ်မႃးတီႈၵူၼ်းႁၢႆႉၵူၼ်းမိူၵ်ႈမိူၼ်ၼင်ႇလူမ်းလႅင်ႉၼၼ်ႉဢေႃႈ။-
ထႃႇဝရႃႉၽြႃး၊ တၵ်းပႂ်ႉထိင်းႁႂ်ႈမႂ်းလူင်ႉလွတ်ႈလီဢေႃႈ။ မၼ်းၸဝ်ႈတေဢမ်ႇႁႂ်ႈမႂ်းလႆႈထုၵ်ႇၶမ်မႅၼ်ႈဢေႃႈ။
ၵႃႈၼင်ႇဢၼ်မႂ်းပွင်ပဵၼ်လႆႈၼၼ်ႉႁဵတ်းၵျေးၸူးပၼ်တီႈၵေႃႉဢၼ်ၸုတ်ႈဢၼ်လုတ်ႈၼၼ်ႉတႃႉ။-
ပေႃးမႂ်းမီးတႃႇတေၸွႆႈထႅမ်ပၼ်တေႃႈလဵဝ်လႆႈယူႇၼၼ်ႉၸိုင်၊ယႃႇပေလၢတ်ႈဝႃႈႁႂ်ႈၵူၼ်းဢၼ်ၸၢပ်ႈသႅင်ႇၵၼ်တင်းမႂ်းၼၼ်ႉပႂ်ႉထႃႈတေႃႇထိုင်ႁွတ်ႈမိူဝ်ႈၽုၵ်ႈၼၼ်ႉ။-
ယႃႇပေၵျၢမ်ႇပွင်မဵဝ်းဢၼ်ၸၢင်ႈတိူဝ်ႉၶိူၵ်ႈၵူၼ်းဢၼ်ၸၢပ်ႈသႅင်ႇၵၼ်တင်းမႂ်းၼၼ်ႉ။ မၼ်းမီးၸႂ်ဢၼ်ယုမ်ႇယမ်မႂ်းလႄႈယူႇၸမ်ႁိမ်းမႂ်းယူႇဢေႃႈ။-
ပေႃးၵူၼ်းသေၵေႃႉၵေႃႉ ယင်းဢမ်ႇၽိတ်းဢမ်ႇၽႅၵ်ႇၵၼ်တင်းမႂ်း၊လွင်ႈတၢင်းၵႃႈသင်ယင်းဢမ်ႇမီးၸိုင်၊ယႃႇပေၽိတ်းၵၼ်ထဵင်ၵၼ်တင်းမၼ်း။-
ယႃႇပေၶွႆၵေႃႉဢၼ်ၸၢင်ႈႁဵတ်းဢထမ်ႇမႃႉၼၼ်ႉ။ ယႃႇပေမီးၸႂ်ဢၼ်ၶႂ်ႈႁဵတ်းမိူၼ်မၼ်းလႃးလႃး။-
လွင်ႈမၼ်းၸမ်ႉ၊ ထႃႇဝရႃႉၽြႃး၊ ငိၼ်းၸင်းၶဝ်ၸိူဝ်းဢၼ်ၸႂ်ၵူတ်ႉၸႂ်ငေႃးၼၼ်ႉလႄႈ၊ၶဝ်ၸိူဝ်းဢၼ်သိုဝ်ႈလီယူဝ်းလီၼၼ်ႉၸမ်ႉမၼ်းၸဝ်ႈဢဝ်ႁဵတ်းၵူၼ်းယုမ်ႇၸႂ်မၼ်းၸဝ်ႈဢေႃႈ။-
ထႃႇဝရႃႉၽြႃး၊ ၵိၼ်ႇဝႃႈတီႈႁိူၼ်းၵေႃႉဢၼ်ဢမ်ႇတြႃးၼၼ်ႉလႄႈ၊သမ်ႉပၼ်တၢင်းလီတီႈႁိူၼ်းၵေႃႉဢၼ်တြႃးသိုဝ်ႈတေႃႇၼၼ်ႉဢေႃႈ။-
မၼ်းၸဝ်ႈသႄႉသွမ်းၵေႃႉဢၼ်ၸၢင်ႈသႄႉသွမ်းပိူၼ်ႈၼၼ်ႉလႄႈ၊သမ်ႉႁဵတ်းၵျေးၸူးတီႈၵေႃႉဢၼ်ႁူဝ်ၸႂ်ၶျႃးတႅမ်ႇၼၼ်ႉဢေႃႈ။-
ၵေႃႉဢၼ်မီးပိင်ႇၺႃႇသတိၼၼ်ႉလႆႈၶၢမ်ႇဢဝ်မုၼ်သရေႇလႄႈ၊ၵူၼ်းမိူၵ်ႈၸမ်ႉလႆႈဢူၵ်းဢၢႆၵူၺ်းဢေႃႈ။
လုၵ်ႈၸၢႆးၵဝ်တင်းလၢႆၶဝ်႟။ ဢွၼ်ၵၼ်ထွမ်ႇငိၼ်းတၢင်းဢၼ်ပေႃႈသင်ႇသွၼ်ၼႄတၢင်းပၼ်ၼၼ်ႉတႃႉ။ ဝႆႉၸႂ်ထွမ်ႇဢဝ်ႁႂ်ႈသူလႆႈမီးၺၢၼ်ႇတႃႉ။-
ၵဝ်ပၼ်ဢေႃးဝႃႇတႃႉဢၼ်လီဢၼ်ငၢမ်းယဝ်ႉယဝ်ႉ။ ပိူဝ်ႈၼႆလႄႈမၢတ်ႈတွင်းဢဝ်လီလီတႃႉ။-
မိူဝ်ႈဢၼ်ၵဝ်ယင်းတိုၵ်ႉပဵၼ်လုၵ်ႈဢွၼ်ႇၸၢႆး၊လုၵ်ႈၸၢႆးလဵဝ်တီႈပေႃႈမႄႈၵဝ်ၼၼ်ႉၸိုင်၊-
ပေႃႈၵဝ်သင်ႇသွၼ်သုင်းမႃႉၵဝ်ဢေႃႈ။ မၼ်းလၢတ်ႈတီႈၵဝ်လႄႈဝႃႈ၊ “ၶုၵ်းၸႂ်လႆႈၵႂၢမ်းဢၼ်ၵဝ်သင်ႇလၢတ်ႈဝႆႉၼၼ်ႉလႄႈယႃႇပေလူင်လိုမ်းပႅတ်ႈလႃးလႃး။ ၵမ်ၵျၢင်ႉၸွမ်းပိင်းၺၢပ်ႈတြႃးၵဝ်တင်းလၢႆသေလႄႈဢသၢၵ်ႈလိပ်းယူႇတႃႉ။-
ၸုသိမ်းဢဝ်ပိင်ႇၺႃႇတင်းၺၢၼ်ႇဢၼ်လိုၵ်ႉဢၼ်လမ်ႇဝႆႉတႃႉ။ ယႃႇပေလူင်ပေလိုမ်း။ ယႃႇပေႁဵတ်းတၢင်းဢၼ်ဢမ်ႇဝႆႉဢယေးတီႈၵႂၢမ်းဢၼ်ၵဝ်သင်ႇလၢတ်ႈဝႆႉၼၼ်ႉ။-
ယႃႇပေၸုၼ်ႉပေပႅတ်ႈပိင်ႇၺႃႇ။ မၼ်းတၵ်းၵႅတ်ႇၶႄႁႄႉၵင်ႈမႂ်းဢေႃႈ။ ႁၵ်ႉပႅင်းမၼ်းတႃႉ။ မၼ်းတၵ်းပႂ်ႉထိင်းႁႂ်ႈမႂ်းလူင်ႉလွတ်ႈလီဢေႃႈ။-
တၢင်းဢၼ်သိမ်းပႅင်းဢဝ်ပိင်ႇၺႃႇၼၼ်ႉမျၢတ်ႈလီၼႃႇသေတၢင်းဢၼ်မႂ်းမေႃႁဵတ်းမေႃပွင်ၵူႈၸိူဝ်ႉၵူႈပိူင်ၼၼ်ႉဢေႃႈ။ ၵႃႈဢၼ်မႂ်းၸၢင်ႈၸုၸၢင်ႈႁွမ်ၼၼ်ႉၸုႁွမ်ဢဝ်ပိင်ႇၺႃႇတႃႉ။-
ႁၵ်ႉပႅင်းပိင်ႇၺႃႇတႃႉ။ မၼ်းတၵ်းယုၵ်ႉယွင်ႈမႂ်းဢေႃႈ။ ၵွတ်ႇဢုမ်ႈမၼ်းတႃႉ။ မၼ်းတၵ်းပၼ်မုၼ်သရေႇတီႈမႂ်းဢေႃႈ။-
မၼ်းတၵ်းပဵၼ်သရၽူႇဢၼ်မီးမုၼ်သရေႇတီႈမႂ်းဢေႃႈ။”
လုၵ်ႈၸၢႆးၵဝ်႟။ ထွမ်ႇၵႂၢမ်းၵဝ်တႃႉ။ ဝႆႉၸႂ်ထွမ်ႇဢဝ်ၵႃႈဢၼ်ၵဝ်သင်ႇလၢတ်ႈမႂ်းၼၼ်ႉတႃႉ။ ၶူပ်ႇၼီႈဢသၢၵ်ႈမႂ်းတၵ်းယၢဝ်းယိုၼ်းဢေႃႈ။-
ၵဝ်သင်ႇသွၼ်ပၼ်ပိင်ႇၺႃႇတင်းသဵၼ်ႈတၢင်းဢသၢၵ်ႈဢၼ်မၢၼ်ႇမႅၼ်ႈၼၼ်ႉတီႈမႂ်းယဝ်ႉယဝ်ႉ။-
ပေႃးမႂ်းတႆႇၸွမ်းပႆၸွမ်းၸိုင်၊ယၢင်ႈတိၼ်မႂ်းတေဢမ်ႇလႆႈႁွတ်ႈထိုင်တီႈဢၼ်ၶတ်းဢၼ်ၶႂၢင်လႄႈမိူဝ်ႈဢၼ်မႂ်းၶုၼ်ႇလႅၼ်ႈၼၼ်ႉမႂ်းတၵ်းဢမ်ႇၶီႈလိုတ်းလႄႈလူမ်ႉ။-
ၵႃႈဢၼ်မႂ်းလႆႈသွၼ်ဢဝ်ၼၼ်ႉမၢတ်ႈတွင်းဝႆႉတႃႇသေႇတႃႉ။ ပိင်ႇၺႃႇၼၼ်ႉပဵၼ်ဢသၢၵ်ႈမႂ်းဢေႃႈ။ ပႂ်ႉထိင်းလီလီဝႆႉတႃႉ။-
ယႃႇပေၵႂႃႇၸွမ်းၵႃႈတီႈၶဝ်ၸိူဝ်းဢၼ်ဢမ်ႇတြႃးၵႂႃႇၼၼ်ႉ။ ယႃႇပေႁဵတ်းၸွမ်းတၢင်းႁဵတ်းၵူၼ်းႁၢႆႉၵူၼ်းမိူၵ်ႈၼၼ်ႉ။-
ယႃႇပေႁဵတ်းၸိူဝ်ႉၼင်ႇၼၼ်လႃးလႃး။ ဝႄႈပႅတ်ႈတုၸရိူၵ်ႈတႃႉ။ ထဵင်ပႅတ်ႈမၼ်းလႄႈႁဵတ်းၸွမ်းလၢႆးမႂ်းၵူၺ်းတႃႉ။-
ၵူၼ်းႁၢႆႉၵူၼ်းမိူၵ်ႈၼၼ်ႉပေႃးဢမ်ႇလႆႈႁဵတ်းမိူၵ်ႈတီႈပိူၼ်ႈၸိုင်၊ဢမ်ႇၸၢင်ႈၼွၼ်း။ ပေႃးၶဝ်ဢမ်ႇလႆႈႁဵတ်းၶဵၼ်သႂ်ႇပိူၼ်ႈၸိုင်၊ၶဝ်ၼွၼ်းဢမ်ႇလပ်းလႆႈ။-
တၢင်းဢၼ်ႁၢႆႉဢၼ်မိူၵ်ႈဢိၵ်ႇတင်းတၢင်းဢၼ်ႁၢဝ်ႉဢၼ်ၵျၢမ်းၼၼ်ႉပဵၼ်တၢင်းၵိၼ်တၢင်းၶူပ်း၊တၢင်းဢၼ်ၶဝ်သူတ်ႉဢိုၵ်ႉၵိၼ်ၼၼ်ႉဢေႃႈ။
သဵၼ်ႈတၢင်းၶဝ်ၸိူဝ်းဢၼ်သိုဝ်ႈတေႃႇပႆၵႂႃႇၼၼ်ႉပဵၼ်ၸိူဝ်ႉၼင်ႇဢႃႇရူင်ႇဢၼ်ၶိုၼ်ႈမႃးတိၵ်းတိၵ်းတေႃႇထိုင်ႁွတ်ႈတႃဝၼ်းထၢၼ်ႈပေႃးဢွၵ်ႇဢေႃႈ။-
သဵၼ်ႈတၢင်းၶဝ်ၸိူဝ်းဢၼ်ႁၢႆႉဢၼ်မိူၵ်ႈၸမ်ႉ၊ပဵၼ်ဢၼ်လပ်းသိင်ႇၽိတ်းၽိတ်းၸိူဝ်ႉၼင်ႇၶိင်ႇၵၢင်ၶိုၼ်းဢေႃႈ။ ၶဝ်လူမ်ႉၵႂႃႇၵေႃႈယင်းဢမ်ႇႁုလွင်ႈဢၼ်ၶဝ်ၶီႈလိုတ်းမႅၼ်ႈၵႃႈသင်ၼၼ်ႉၼၼ်ႉဢေႃႈ။
လုၵ်ႈၸၢႆးၵဝ်႟။ ဝႆႉၸႂ်ထွမ်ႇဢဝ်ၵႂၢမ်းဢၼ်ၵဝ်သင်ႇလၢတ်ႈၼၼ်ႉတႃႉ။ ထွမ်ႇဢဝ်ၵႂၢမ်းၵဝ်ၸိူဝ်းၼၼ်ႉတႃႉ။-
ယႃႇပေပွႆႇပႅတ်ႈႁႂ်ႈၶဝ်ယၢၼ်ၵၼ်တင်းမႂ်း။ မၢတ်ႈတွင်းဢဝ်ၵႃႈၼႂ်းႁူဝ်ၸႂ်မႂ်းဝႆႉတႃႉ။-
ၶဝ်ၸၢင်ႈပၼ်ဢသၢၵ်ႈဢိၵ်ႇတင်းတၢင်းဢၼ်ယူႇလီၵိၼ်ဝၢၼ်တီႈၵေႃႉဢၼ် ၸၢင်ႈပွင်ႇၸၢင်ႈလႅင်းပိင်ႇၺႃႇၼၼ်ႉဢေႃႈ။-
ဝႆႉသတိတီႈတၢင်းဢၼ်မႂ်းၶႆႈၸႂ်ၸဵၼ်းၸႃးၼၼ်ႉတႃႉ။ လွင်ႈမၼ်းၸမ်ႉ၊ဢသၢၵ်ႈတၢၼ်းမႂ်းၸၢင်ႈပဵၼ်ၸွမ်းၵႃႈၼင်ႇဢၼ်မႂ်းၶႆႈၸႂ်ၸဵၼ်းၸႃးၼၼ်ႉဢေႃႈ။-
ယႃႇပေလၢတ်ႈၵႂၢမ်းဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉ။ ဝႄႈပႅတ်ႈၵႂၢမ်းဢၼ်ၸၢင်ႈႁႂ်ႈၽိတ်းပိူင်ႈၵႂႃႇၼၼ်ႉတႃႉ။-
ႁႂ်ႈမၢၵ်ႇတႃမႂ်းတူၺ်းသိုဝ်ႈၼႃႈမႂ်းလႄႈႁႂ်ႈတၢင်းဢၼ်မႂ်းယႅၵ်ႉယဵင်းၼၼ်ႉသိုဝ်ႈလီတႃႉ။-
ၶိုင်ပွင်လီလီငၢမ်းငၢမ်းလႄႈႁဵတ်းတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ၵႃႈဢၼ်မႂ်းႁဵတ်းၼၼ်ႉတၵ်းပဵၼ်ဢၼ်မၢၼ်ႇမႅၼ်ႈဢေႃႈ။-
ဝႄႈပႅတ်ႈတုၸရိူၵ်ႈလႄႈယႃႇပေႁႂ်ႈယၢင်ႈတိၼ်မႂ်းပိူင်ႈသေသဵၼ်ႈတၢင်းဢၼ်သိုဝ်ႈၼၼ်ႉ။
လုၵ်ႈၸၢႆးၵဝ်႟။ ဝႆႉၸႂ်ထွမ်ႇဢဝ်ၵႂၢမ်းပိင်ႇၺႃႇၵဝ်တင်းၺၢၼ်ႇဢၼ်လိုၵ်ႉဢၼ်လမ်ႇၵဝ်တႃႉ။-
ပေႃးႁဵတ်းၸိူဝ်ႉၼင်ႇၼၼ်ၸိုင်၊မႂ်းတၵ်းမီးသမ်ႇမႃႇသတိလႄႈၼမ်ႉၵႂၢမ်းမႂ်းတၵ်းပဵၼ်ၵႂၢမ်းပိင်ႇၺႃႇဢေႃႈ။-
လွင်ႈမၼ်းၸမ်ႉ၊သီႇသူပ်းမႄႈယိင်းဢၼ်ဢၵျၢင်ႉလုၼၼ်ႉၸၢင်ႈဝၢၼ်တၢၼ်ႇၼမ်ႉၽိုင်ႈလႄႈ ၵႂၢမ်းဢၼ်မၼ်းလၢတ်ႈၼၼ်ႉၸၢင်ႈမိုၼ်ႈသေၼမ်ႉမၼ်းဢေႃႈ။-
ၵူၺ်းၵႃႈ၊မိူဝ်ႈဢၼ်ယဝ်ႉတူဝ်ႈယဝ်ႉၼၼ်ႉၸၢင်ႈဝႆႉၵိုတ်းပၼ်တၢင်းဢၼ်ၶူမ်ၸႂ်ဢိၵ်ႇတင်းတၢင်းဢၼ်ၸဵပ်းၸႂ်ၵူၺ်းဢေႃႈ။-
မၼ်းၸၢင်ႈဢွၼ်မႂ်းလူင်းၸူးမိူင်းမရၼႃႉလႄႈသဵၼ်ႈတၢင်းဢၼ်မႂ်းၵႂႃႇၼၼ်ႉပဵၼ်သဵၼ်ႈတၢင်းတၢင်းတၢႆဢေႃႈ။-
မၼ်းဢမ်ႇယူႇဢမ်ႇသဝ်းၵႃႈၼိူဝ်သဵၼ်ႈတၢင်းဢသၢၵ်ႈ။ ၵူၺ်းလႄႇၵႂႃႇလႄႇမႃးယူႇလႄႈယင်းဢမ်ႇႁုဢမ်ႇႁၼ်လွင်ႈတၢင်းဢၼ်ပဵၼ်ယဝ်ႉၵႂႃႇၸိူဝ်းၼၼ်ႉ။
ပိူဝ်ႈၼႆလႄႈလုၵ်ႈၸၢႆးၵဝ်တင်းလၢႆၶဝ်႟။ ထွမ်ႇဢဝ်ၵႂၢမ်းၵဝ်တႃႉ။ ယႃႇပေလူင်လိုမ်းၵႂၢမ်းဢၼ်ၵဝ်သင်ႇလၢတ်ႈၸိူဝ်းၼၼ်ႉ။-
ယူႇယၢၼ်ၵၼ်တင်းမႄႈယိင်းၸိူဝ်ႉၼင်ႇၼၼ်ၼၼ်ႉၵႆၵႆတႃႉ။ ယႃႇပေၵႂႃႇၵႂ်ႈၵႂႃႇၵၢႆၵႃႈတီႈၽၵ်းတူႁိူၼ်းမၼ်းၼၼ်ႉ။-
ပေႃးမႂ်းႁဵတ်းၸိုင်၊ပိူၼ်ႈတၢင်ႇၵေႃႉတေလႆႈမုၼ်သရေႇမဵဝ်းဢၼ်မႂ်းလႆႈဝႆႉပွၵ်ႈၼိုင်ႈၼၼ်ႉလႄႈ၊မႂ်းၸၢင်ႈလႆႈတၢႆၸဝ်ႉတၢႆၸဵဝ်းၼႂ်းမိုဝ်းၶဝ်ၸိူဝ်းဢၼ်ႁၢဝ်ႉဢၼ်ၵျၢမ်းၼၼ်ႉဢေႃႈ။-
ၸႂ်ႈတႄႉတႄႉယဝ်ႉ။ ၵူၼ်းၼႃႈမႂ်ႇတင်းလၢႆတေလႆႈသိမ်းဢဝ်ၸေးၸိမ်ႇမႂ်းၵႃႈမီးလႄႈဢၼ်မႂ်းႁဵတ်းလႆႈဝႆႉၸိူဝ်းၼၼ်ႉတေလႆႈပဵၼ်ဢုၵ်ႉၸႃႇပိူၼ်ႈတၢင်ႇၵေႃႉၵႂႃႇဢေႃႈ။-
မိူဝ်ႈဢၼ်ၼိူဝ်ႉမႂ်းတင်းဢဵၼ်ႁႅင်းမႂ်းၽင်ႉဢုၸမ်တၵ်းတၢႆၵႂႃႇၼၼ်ႉၸိုင်၊မႂ်းတၵ်းပွင်ႉၶၢင်းပွင်ႉမိုၼ်ႇဢေႃႈ။-
မႂ်းတၵ်းလၢတ်ႈလႄႈဝႃႈ “ႁဵတ်းသင်လႄႈၵဝ်ၼႆႉဢမ်ႇလႆႈသွၼ်ဢဝ်ၸိူဝ်ႉၼင်ႇႁိုဝ်။ ႁဵတ်းသင်လႄႈၵဝ်ၼႆႉဢမ်ႇၶၢမ်ႇဢဝ်တၢင်းဢၼ်ပိူၼ်ႈမႄးပၼ်ၼၼ်ႉၸိူဝ်ႉၼင်ႇႁိုဝ်။-
ၵဝ်ယင်းဢမ်ႇထွမ်ႇဢဝ်ၵႂၢမ်းသြႃႇၵဝ်တင်းလၢႆ၊ယင်းဢမ်ႇဝႆႉဢယေးၵႂၢမ်းၶဝ်ၸိူဝ်းၼၼ်ႉလူင်ပႄႇ။-
ၼင်ႇၼၼ်လႄႈၵဝ်လႆႈထူပ်းႁၼ်တူဝ်ၵဝ်လႆႈဢူၵ်းဢၢႆၽၢႆႇၼႃႈၵူၼ်းတင်းလၢႆယဝ်ႉ၊” ဝႃႈၼင်ႇၼႆဢေႃႈ။
ပႂ်ႉသဵတ်ႈၸႃႇၵႃႈတီႈမေးတူဝ်ၸဝ်ႈၵဝ်ႇလႄႈႁၵ်ႉႁွမ်ၸူမ်းပႅင်းမၼ်းၵေႃႉလဵဝ်ၵူၺ်းတႃႉ။-
လုၵ်ႈလၢင်းဢၼ်မႂ်းလႆႈ ၵႃႈတီႈမႄႈယိင်းတၢင်ႇၵေႃႉတၢင်ႇၵူၼ်းၼၼ်ႉတၵ်းဢမ်ႇပၼ်ဢၵျူဝ်းတီႈမႂ်း။-
လုၵ်ႈလၢင်းမႂ်းတင်းလၢႆၵူၺ်းတၵ်းယႂ်ႇမႃးႁႂ်ႈလႆႈၸွႆႈထႅမ်မႂ်းဢေႃႈ။ လုၵ်ႈလၢင်းပိူၼ်ႈၼၼ်ႉတၵ်းဢမ်ႇပဵၼ်ၸိူဝ်ႉၼင်ႇၼၼ်။-
ပိူဝ်ႈၼႆလႄႈမူၼ်ႈပျေႃႇလူၺ်ႈၵၼ်တင်းမေးတူဝ်ၸဝ်ႈၵဝ်ၵူၺ်းလႄႈ၊ႁႂ်ႈမီးတၢင်းဢၼ်သႂၢင်ႇဢၼ်သိူဝ်းလူၺ်ႈၵၼ်တင်းၽူဝ်မၢဝ်ႇမေးသၢဝ်မႂ်း၊-
ဢၼ်ႁၢင်ႈလီလႄႈယဵၼ်ႇလီၸိူဝ်ႉၼင်ႇၵႂၢင်မႄႈၼၼ်ႉၵူၺ်းတႃႉ။ ႁႂ်ႈၼူမ်းမၼ်းၸိူဝ်းၼၼ်ႉပျေႇၸႂ်ဢလူဝ်ႇသၢၼ်ႇတႃႉမႂ်းယူႇၵူႈၶိင်ႇၵူႈမိူဝ်ႈလႄႈ၊မဝ်းမိင်းလိုမ်းတူဝ်ယူႇလူၺ်ႈၵၼ်တင်းၸႂ်ဢၼ်ႁၵ်ႉဢၼ်ပႅင်းမၼ်းယူႇၼၼ်ႉတႃႉ။-
လုၵ်ႈၸၢႆးၵဝ်႟။ ႁဵတ်းသင်လႄႈမႂ်းလႄႇၵႂႃႇႁၵ်ႉမႄႈယိင်းတၢင်ႇၵေႃႉၼၼ်ႉလႄႈလႄႇၵႂႃႇမဝ်းမိင်းလိုမ်းတူဝ်ယူႇၼႂ်းဝၢင်ႈဢူၵ်းမေးပိူၼ်ႈၼၼ်ႉၸိူဝ်ႉၼင်ႇႁိုဝ်။-
ထႃႇဝရႃႉၽြႃး၊ ႁုႁၼ်ၵႃႈဢၼ်မႂ်းႁဵတ်းၼၼ်ႉယူႇဢေႃႈ။ မႂ်းၵႂႃႇၵႃႈတီႈလႂ်တၢင်းလႂ်ၵေႃႈမၼ်းၸဝ်ႈပႂ်ႉတူၺ်းယူႇဢေႃႈ။-
ဢပျတ်ႈတုၸရိူၵ်ႈၵူၼ်းႁၢႆႉၵူၼ်းမိူၵ်ႈၼၼ်ႉပဵၼ်တူင်ႇႁႅဝ်ႉတူင်ႇၶိုမ်းဢေႃႈ။ မၼ်းတေလႆႈၶၢမ်ႇတၢင်းဢၼ်တိဢဝ်ၼႂ်းဢပျတ်ႈမၼ်းၼၼ်ႉဢေႃႈ။-
မၼ်းလႆႈတၢႆၵႂႃႇၵွပ်ႈပိူဝ်ႈမၼ်းဢမ်ႇၸၢင်ႈပႂ်ႉၸၢင်ႈထိင်းတူဝ်ၸဝ်ႈၵဝ်ႇဢေႃႈ။ တၢင်းမိူၵ်ႈမၼ်းဢၼ်ႁၢဝ်ႉၵျၢမ်းၼႃႇၼၼ်ႉတၵ်းဢွၼ်သူင်ႇမၼ်းၵႂႃႇၸူးၵႃႈတီႈၶုမ်ပႃႇႁဵဝ်ႈဢေႃႈ။
လုၵ်ႈၸၢႆးၵဝ်႟။ ၸွင်ႇမႂ်းလႆႈၶၢမ်ႇတႃႇဝုၼ်ႇၼီႈပိူၼ်ႈမႅၼ်ႈႁိုဝ်း။-
ၸွင်ႇမႂ်းႁွတ်ႈထိုင်ဢမုၵွပ်ႈပိူဝ်ႈၵႂၢမ်းတူဝ်ၸဝ်ႈၵဝ်ႇလႄႈလႆႈထုၵ်ႇၶမ်မႅၼ်ႈၼႂ်းၵႂၢမ်းၵတိတူဝ်ၸဝ်ႈၵဝ်ႇမႅၼ်ႈႁိုဝ်း။-
ပိူဝ်ႈဢၼ်ပဵၼ်ၸိူဝ်ႉၼင်ႇၼၼ်လႄႈ၊လုၵ်ႈၸၢႆးၵဝ်႟။ မႂ်းလႆႈတူၵ်းႁွတ်ႈၵႃႈၼႂ်းဢူင်ႈမိုဝ်းၵေႃႉၼၼ်ႉယဝ်ႉ။ လၢႆးဢၼ်မႂ်းတၵ်းလွတ်ႈလႆႈၼၼ်ႉၸမ်ႉ၊ၸဵဝ်းၵႂႃႇတီႈမၼ်းလႄႈ တွင်းပၢၼ်ႇႁႂ်ႈမၼ်းၶႂၢင်းပၼ်မႂ်းတႃႉ။-
ယႃႇပေႁႂ်ႈတူဝ်ၸဝ်ႈၵဝ်ႇငိူဝ်ႈငဝ်ၼွၼ်းယူႇ။ ယႃႇပေၵိုတ်းလိုဝ်ႈသေဢိတ်း။-
ၶတ်းၸႂ်သေႁႂ်ႈလွတ်ႈဢွၵ်ႇတူင်ႇႁႅဝ်ႉတူင်ႇၶိုမ်းမိူၼ်ၸိူဝ်ႉၼင်ႇၼူၵ်ႉလႂ်ၵႂၢင်လႂ်မႃးႁႂ်ႈလွတ်ႈသေၵႃႈၼႂ်းမိုဝ်းၵူၼ်းလႃႈထိူၼ်ႇၼၼ်ႉတႃႉ။
ၵူၼ်းၶၢၼ်ႉၵူၼ်းဢိူၼ်႟။ ၵႂႃႇၸူးၵႃႈတီႈမူတ်ႉလႄႈသွၼ်ဢဝ်လၢႆးဢၼ်ၶဝ်ႁဵတ်းၶဝ်သၢင်ႈၼၼ်ႉတႃႉ။-
ၶဝ်ၼၼ်ႉဢမ်ႇမီးသြႃႇ၊ဢမ်ႇမီးၵႄႇမီးႁူဝ်၊ဢမ်ႇမီးၸဝ်ႈမီးၶုၼ်။-
ၵူၺ်းၵႃႈ၊ၶဝ်ၸၢင်ႈႁႃဢဝ်တေႃႉဢဝ်တၢင်းၵိၼ်တၢင်းၶူပ်းၶဝ်ဝႆႉ မိူဝ်ႈၶိင်ႇမႆႈလႄႈၸၢင်ႈၸုၸၢင်ႈသိမ်းဢဝ်တၢင်းၵိၼ်တၢင်းယႅမ်ႉၶဝ်ဝႆႉ ၼႂ်းၶိင်ႇဢၼ်ပၢတ်ႇၶဝ်ႈၼၼ်ႉဢေႃႈ။-
ၵူၼ်းၶၢၼ်ႉၵူၼ်းဢိူၼ်႟။ မႂ်းတၵ်းၼွၼ်းလိုၼ်ႈယူႇႁိုင်ၵႃႈႁိုဝ်။ မိူဝ်ႈလႂ်မႂ်းၸင်ႇတေလုၵ်ႉ။-
ပေႃးမႂ်းဝႃႈ၊ “ၵဝ်တေၼွၼ်းသႅပ်ႉၼိုင်ႈလူးၵွၼ်ႇ။ ၵဝ်တေၵွတ်ႇၵႆႇလိုဝ်ႈၵမ်းဢွၼ်ႇၼိုင်ႈလူးၵွၼ်ႇ၊” ဝႃႈၼင်ႇၼႆၸိုင်၊-
ၸူဝ်ႈဢၼ်မႂ်းၼွၼ်းယူႇၼၼ်ႉတၢင်းဢၼ်ယၢၵ်ႈဢၼ်ၽၢၼ်တၵ်းမႃးယႃႉၵဝ်းမႂ်း မိူၼ်ၸိူဝ်ႉၼင်ႇၵူၼ်းၸူၼ်ဢၼ်ယိပ်းလၢၵ်ႈၼၢၵ်ႈမႃးတိုၵ်းတေႃးမႂ်းၼၼ်ႉဢေႃႈ။
ၵေႃႉဢၼ်ဢမ်ႇပွင်ႇလွင်ႈပွင်ႇတႃ၊ၵေႃႉဢၼ်ႁၢႆႉမိူၵ်ႈၼၼ်ႉၸၢင်ႈလႄႇၵႂႃႇလၢတ်ႈၸႃၵႂၢမ်းဢၼ်ၵူတ်ႉဢၼ်ငေႃးၼၼ်ႉဢေႃႈ။-
ၶဝ်ၸၢင်ႈၽႅပ်ႉတႃယုပ်းတႃၼႄယူႇ၊ဢဝ်ၼိဝ်ႉမိုဝ်းၸိၼႄယူႇဢေႃႈ။-
ၶဝ်ၸၢင်ႈမီးၸႂ်ဢၼ်ၵူတ်ႉဢၼ်ငေႃးလႄႈၵျၢမ်ႇပွင်ဢၼ်ဢမ်ႇလီဢမ်ႇငၢမ်းယူႇၵူႈၶိင်ႇၵူႈၶႃႇ၊ႁဵတ်းႁႂ်ႈပိူၼ်ႈၽိတ်းၵၼ်ယူႇဢေႃႈ။-
ၵွပ်ႈပိူဝ်ႈၼႆလႄႈၽေးဢၼ်ႇတရေႇတၵ်းၵိုင်ႉၵၢင်ႉႁွတ်ႈထိုင်ၶဝ်လႄႈတၵ်းတေလႆႈၶၢမ်ႇတၢင်းဢၼ်ႁၵ်းႁိၵ်းလုလႅဝ်ထၢၼ်ႈပေႃးဢမ်ႇယႃႁၢႆလႆႈၼၼ်ႉၵမ်းလဵဝ်ဢေႃႈ။
တၢင်းဢၼ် ထႃႇဝရႃႉၽြႃး၊ ငိၼ်းၸင်းၶၢၼ်ႉႁၼ်လႄႈဢမ်ႇယိူၼ်ႉၶၢမ်ႇလႆႈၸဵတ်းမဵဝ်းၸမ်ႉ၊
ပဵၼ်မၢၵ်ႇတႃဢၼ်ပူၵ်းပႅၼ်ၽႅၼ်သုင်မဵဝ်းၼိုင်ႈ၊ လိၼ်ႉဢၼ်ၸၢင်ႈလၢတ်ႈၵႂၢမ်းမုသႃႇမဵဝ်းၼိုင်ႈ၊ မိုဝ်းဢၼ်ၸၢင်ႈဢဝ်တၢႆၵေႃႉဢၼ်ဢမ်ႇမီးဢပျတ်ႈၼၼ်ႉမဵဝ်းၼိုင်ႈ၊
ႁူဝ်ၸႂ်ဢၼ်ၸၢင်ႈၵျၢမ်ႇပွင်တၢင်းၵျၢမ်ႇဢၼ် ဢမ်ႇလီဢမ်ႇငၢမ်းမဵဝ်းၼိုင်ႈ၊ တိၼ်ဢၼ်ၸၢင်ႈၶုၼ်ႇလႅၼ်ႈၵႂႃႇႁဵတ်း ဢပျတ်ႈၼၼ်ႉမဵဝ်းၼိုင်ႈ၊
သၢၵ်ႈသေႇၵေႃႉဢၼ်လၢတ်ႈဢွၵ်ႇဢမ်ႇမၢၼ်ႇဢမ်ႇမႅၼ်ႈၼၼ်ႉမဵဝ်းၼိုင်ႈ၊ဢိၵ်ႇတင်း ၵေႃႉဢၼ်ၸၢင်ႈႁဵတ်းႁႂ်ႈပီႈၼွင်ႉၽိတ်းၵၼ်ၼၼ်ႉမဵဝ်းၼိုင်ႈဢေႃႈ။
လုၵ်ႈၸၢႆးၵဝ်႟။ ႁဵတ်းၸွမ်းၵႃႈဢၼ်ပေႃႈမႂ်းသင်ႇလၢတ်ႈၼၼ်ႉတႃႉ။ ယႃႇပေလူင်လိုမ်းၵႃႈဢၼ်မႄႈမႂ်းသင်ႇသွၼ်ပၼ်ၼၼ်ႉ။-
ဢဝ်ၵႂၢမ်းၶဝ်ၸိူဝ်းၼၼ်ႉသႂ်ႇဝႆႉၵႃႈၼႂ်းႁူဝ်ၸႂ်မႂ်းလႄႈတွင်းဝႆႉတႃႇသေႇတႃႉ။-
ၵႂၢမ်းသုင်းမႃႉၸိူဝ်းၼၼ်ႉတၵ်းဢွၼ်သူင်ႇမႂ်းမိူဝ်ႈဢၼ်မႂ်းၵႂႃႇမႂ်းပႆဢေႃႈ။ ၶဝ်တၵ်းၵႅတ်ႇၶႄႁႄႉၵင်ႈမႂ်းၶိင်ႇၵၢင်ၶိုၼ်းဢေႃႈ။ တၵ်းပၼ်တၢင်းၵျၢမ်ႇတၢင်းပွင်တီႈမႂ်းၶိင်ႇၵၢင်ဝၼ်းဢေႃႈ။-
တြႃးဢၼ်ၶဝ်သင်ႇသွၼ်ၼႄတၢင်းပၼ်ၼၼ်ႉပဵၼ်ဢၼ်လႅင်းဢၼ်ႁိူဝ်ႈယူႇဢေႃႈ။ တၢင်းဢၼ်ၶဝ်မႄးပၼ်ၼၼ်ႉၸၢင်ႈသင်ႇသွၼ်ပၼ်လွင်ႈဢၼ်မႂ်းတၵ်းလႆႈၵမ်ၵျၢင်ႉၸိူဝ်ႉၼင်ႇႁိုဝ်ၼၼ်ႉဢေႃႈ။-
ပဵၼ်ပုၼ်ႈဢၼ်တၵ်းပႂ်ႉမႂ်းယူႇႁႂ်ႈမႂ်းၵၢင်းလွတ်ႈတင်းမႄႈယိင်းဢၼ်ႁၢႆႉဢိၵ်ႇတင်းၵႂၢမ်းၶျေႃးၵႂၢမ်းဝွၼ်းဢၼ်မေးပိူၼ်ႈၸူဝ်းဢဝ်မႂ်းၼၼ်ႉဢေႃႈ။-
ယႃႇပေႁႂ်ႈမီးၸႂ်ဢၼ်ၸပ်းၸွႆးတၢင်းႁၢင်ႈလီမၼ်းၼၼ်ႉ။ ယႃႇပေႁႂ်ႈလႆႈတူၵ်းၶမ်မႅၼ်ႈၵွပ်ႈလူၺ်ႈမၢၵ်ႇတႃဢၼ်လေႃလႄမၼ်းၼၼ်ႉ။-
လွင်ႈမၼ်းၸမ်ႉ၊မႄႈမွၵ်ႇယႃႈၸိုင်၊ဢဝ်ၶဝ်ႈမုၼ်းၽၢၵ်ႇလဵဝ်ၵူၺ်းပၼ်ၵႃႈၶၼ်မၼ်းလႄႈၶၢတ်ႈဢဝ်လႆႈယူႇဢေႃႈ။ တၢင်းဢၼ်ၵူတ်ႉမေးပိူၼ်ႈၸမ်ႉ၊ၸၢင်ႈႁႂ်ႈဢသၢၵ်ႈၵူၼ်းၸၢႆးၼၼ်ႉသုမ်းၸွမ်းဢေႃႈ။
ၵူၼ်းၸိုင်၊ႁွပ်ႇဢုမ်ႈဢဝ်ၽႆးၵႃႈၼႂ်းႁူဝ်ဢူၵ်းမၼ်းလႄႈဢမ်ႇႁႂ်ႈမႆႈၶူဝ်းၼုင်ႈမၼ်းၼၼ်ႉတေပဵၼ်လႆႈႁိုဝ်း။-
ယဵပ်ႇပႆၵႂႃႇၵႃႈၼိူဝ်ထၢၼ်ႇၽႆးလႅင်လႄႈဢမ်ႇႁႂ်ႈမႆႈတိၼ်မၼ်းၼၼ်ႉၵေႃႈတေပဵၼ်လႆႈႁိုဝ်း။-
ၵေႃႉဢၼ်ၵူတ်ႉမေးပိူၼ်ႈၼၼ်ႉၵေႃႈပဵၼ်ၸိူဝ်ႉၼင်ႇၼၼ်ယဝ်ႉ။ ၵေႃႉဢၼ်ၽိတ်းပိူင်ႈၸိူဝ်ႉၼင်ႇၼၼ်ၼၼ်ႉဢမ်ႇၵၢင်းလွတ်ႈတင်းဢပျတ်ႈလႆႈ။-
ၵူၼ်းဢမ်ႇပေႃးဝႆႉဢယေးတီႈၽူႈလၵ်ႉဢၼ်တွင်ႉမႆႈလႄႈလၵ်ႉၵိၼ်ႁႂ်ႈဢိမ်ႇတွင်ႉမၼ်းၼၼ်ႉ။-
ၼႂ်းဝႃႈၼၼ်သေၵေႃႈပေႃးထူပ်းမႅၼ်ႈၸိုင်၊မၼ်းတၵ်းလႆႈၶိုၼ်းတႅၼ်းပၼ်ၸဵတ်းပုၼ်ႈဢေႃႈ။ မၼ်းတၵ်းလႆႈဢဝ်ဢုၵ်ႉၸႃႇဢၼ်မၼ်းမီးၼၼ်ႉၵူႈၸိူဝ်ႉၵူႈပိူင်ယေႃႇသေပၼ်ဢေႃႈ။-
ၵေႃႉဢၼ်ၵူတ်ႉမေးပိူၼ်ႈၼၼ်ႉၸမ်ႉ၊ဢမ်ႇမီးၺၢၼ်ႇ။ မၼ်းၼၼ်ႉ ၵူၺ်းယႃႉၽဵဝ်ႈဢသၢၵ်ႈတူဝ်ၸဝ်ႈၵဝ်ႇပႅတ်ႈဢေႃႈ။-
မၼ်းတၵ်းတေလႆႈၶၢမ်ႇတၢင်းဢၼ်တိူဝ်ႉဢၼ်မၢတ်ႇလႄႈသရေႇလုဢေႃႈ။ တေလႆႈဢူၵ်းလႆႈဢၢႆယူႇတႃႇသေႇတႃႇပၢၼ်ဢေႃႈ။-
ၵူၼ်းၸၢႆးၵေႃႉဢၼ်ပဵၼ်ၽူဝ်ၸိုင်၊တၢင်းဢၼ်တေႃးသႃႉဢွၵ်ႇဢၼ်ယဵင်ႈၶႅၼ်းယႂ်ႇၼႃႇသေတၢင်းဢၼ်ၶႅၼ်မေးမၼ်းၼၼ်ႉဢမ်ႇမီးယဝ်ႉ။ တၢင်းဢၼ်မၼ်းၶိုၼ်းတွပ်ႇသူၺ်ႈၼၼ်ႉဢမ်ႇမီးတီႈတိူၵ်ႉလႆႈ။-
မၼ်းဢမ်ႇႁပ်ႉဢမ်ႇၶၢမ်ႇဢဝ်ငိုၼ်းဢၼ်ယေႃႇဢၼ်သေပုၼ်ႈဢပျတ်ႈၼၼ်ႉ။ လၢၵ်ႈသွင်ႇၼမ်ၼႃႇၵႃႈႁိုဝ်သေၵေႃႈဢမ်ႇၸၢင်ႈပျေႇၸႂ်မၼ်းလႆႈ။
လုၵ်ႈၸၢႆးၵဝ်႟။ မၢတ်ႈတွင်းဢဝ်ၵႂၢမ်းဢၼ်ၵဝ်သင်ႇလၢတ်ႈၼၼ်ႉလႄႈယႃႇပေလူင်လိုမ်းၵႃႈဢၼ်ၵဝ်ဝႃႈႁႂ်ႈမႂ်းႁဵတ်းၼၼ်ႉ။-
ၵမ်ၵျၢင်ႉၸွမ်းၵႃႈၼင်ႇဢၼ် ၵဝ်သင်ႇလၢတ်ႈၼၼ်ႉလႄႈဢသၢၵ်ႈလိပ်းယူႇတႃႉ။ ပႂ်ႉၵႂၢမ်းသုင်းမႃႉၵဝ်မိူၼ်ၸိူဝ်ႉၼင်ႇဢၼ် မႂ်းၶႄမၢၵ်ႇတႃမႂ်းၼၼ်ႉတႃႉ။-
မတ်ႉၸပ်းတီႈၼိဝ်ႉမိုဝ်းမႂ်းတင်းလၢႆလႄႈတႅမ်ႈမၢႆသႂ်ႇဝႆႉၵႃႈတီႈၸရၢင်းဢၢင်းႁူဝ်ၸႂ်မႂ်းတႃႉ။-
မၢတ်ႈပိင်ႇၺႃႇပဵၼ်ၸိူဝ်ႉၼင်ႇၼွင်ႉယိင်းမႂ်းလႄႈမၢတ်ႈၺၢၼ်ႇဢၼ်လိုၵ်ႉဢၼ်လမ်ႇပဵၼ်ၸိူဝ်ႉၼင်ႇၵေႃႉသႄႈဢၼ်ၸမ်ၸႂ်မႂ်းၼၼ်ႉတႃႉ။-
ၺၢၼ်ႇပိင်ႇၺႃႇၸိူဝ်းၼၼ်ႉတၵ်းၸတ်းဢဝ်မႂ်းၵၢင်းလွတ်ႈသေၵၼ်တင်းမေးပိူၼ်ႈတင်းၽူႈယိင်းလေႃလႄဢၼ်ၸၢင်ႈဢဝ်သူပ်းၶျေႃးဝွၼ်းၼၼ်ႉဢေႃႈ။
မီးၽဝ်ႇၼိုင်ႈ၊ၵဝ်ယူႇၵႃႈၼႂ်းႁိူၼ်းလူတူၺ်းဢွၵ်ႇတီႈႁူးလၢင်းတဵၼ်လႄႈ၊-
ၵဝ်လႆႈႁၼ်ၵူၼ်းၼုမ်ႇၵူၼ်းၵမ်ဢၼ်ဢမ်ႇပႆႇမီးတၢင်းႁုတၢင်းႁၼ်ၵႃႈသင်ၼၼ်ႉၼမ်ၼႃႇဢေႃႈ။ ၼႂ်းၶဝ်ၼၼ်ႉၵဝ်ထူပ်းႁၼ်ၽူႈမၢဝ်ႇဢၼ်ငိူဝ်ႈငႃႉၼၼ်ႉၵေႃႉၼိုင်ႈဢေႃႈ။-
မၼ်းပႆၵၢႆၵႂႃႇႁိမ်းၸဵင်ႇတၢင်းဢၼ်မီးႁိူၼ်းမႄႈယိင်းၵေႃႉၼိုင်ႈၼၼ်ႉဢေႃႈ။-
မၼ်းပႆၵၢႆၵႂႃႇႁိမ်းႁိူၼ်းမႄႈယိင်းၼၼ်ႉမိူဝ်ႈၶိင်ႇၵၢင်ၶမ်ႈၼၼ်ႉဢေႃႈ။-
မႄႈယိင်းၼၼ်ႉၼုင်ႈၶူဝ်းမႄႈမွၵ်ႇယႃႈ၊ပႃးတင်းတၢင်းၵျၢမ်ႇလႄႈႁပ်ႉႁူဝ်တၢင်းမၼ်းဢေႃႈ။-
မႄႈယိင်းၼၼ်ႉႁတ်းႁၢၼ်ၼႃႇဢမ်ႇၵူဝ်ဢမ်ႇဢၢႆလႄႇၸွမ်းတႃၸွမ်းတၢင်း၊-
ၸၢင်ႈပႂ်ႉယူႇၵႃႈတီႈၸဵင်ႇတၢင်းလႂ်၊မၢင်ၽဝ်ႇၵႃႈၼႂ်းသဵၼ်ႈတၢင်းသၢႆတႃလႂ်၊မၢင်ၽဝ်ႇၵႃႈၼႂ်းၵၢင်ၵၢတ်ႇလႂ်ဢေႃႈ။-
မႄႈယိင်းၼၼ်ႉတိၵွတ်ႇဢဝ်ၵူၼ်းၼုမ်ႇၼၼ်ႉ၊ၸုပ်ႇၼူမ်မၼ်း၊ယႅၵ်ႉတူၺ်းတီႈတႃမၼ်းၸေးၸေးလႄႈလၢတ်ႈဝႃႈ၊-
“မိူဝ်ႈၼႆႉ ႁဝ်းႁဵတ်းတၢင်းလူႇလႄႈမီးၼိူဝ်ႉဢၼ်သၢၵ်ႈလူႇၼၼ်ႉဝႆႉယဝ်ႉ။-
ပိူဝ်ႈၼႆလႄႈႁဝ်းဢွၵ်ႇမႃးႁပ်ႉႁူဝ်တၢင်းသူယဝ်ႉ။ ႁဝ်းၶတ်းၸႂ်ႁႃသူလႄႈထူပ်းယဝ်ႉ။-
ၵဝ်ၶႃႈဢဝ်ၽႃႈပၢၼ်ႇၶျေႃးဢၼ်မီးသီဢရွင်ႇဢၼ်ႁၢင်ႈလီမိူင်း ဢေးၵျိပ်ႉ၊ ၼၼ်ႉသိူဝ်ႇဝႆႉၵႃႈတီႈၵူႇၵဝ်ၶႃႈယဝ်ႉယဝ်ႉ။-
ႁဝ်းသမ်ႉဢဝ်တင်းမုရၼ်ႇ၊ၼၢမ်ႇဢၵျေႃႇတင်းၵႅင်းႁွမ်ၽႅတ်းသႂ်ႇၽႃႈၵွပ်းႁဝ်းဝႆႉယဝ်ႉယဝ်ႉ။-
မႃးသေၵမ်း။ ၽႄႇၸႂ်ၵႃႇမႃႉယႃႇၵႃႉ ႁႃးတင်းၶိုၼ်းတႃႉႁဝ်း။ ၵွတ်ႇၵၼ်ၵဵဝ်ႈၵၼ်မူၼ်ႈမူၼ်ႈပျေႃႇပျေႃႇတႃႉႁဝ်း။-
ၽူဝ်ႁဝ်းဢမ်ႇယူႇႁိူၼ်းၵူၺ်း။ မၼ်းပႃးဢဝ်ထူင်ငိုၼ်းဢွၵ်ႇတႃပႆတၢင်းၵႂႃႇၶၢဝ်းတၢင်းၵႆပုၼ်ႉယဝ်ႉ။-
လိူၼ်မူၼ်းမႃးၸင်ႇမၼ်းတေၶိုၼ်းမႃးတီႈႁိူၼ်းဢေႃႈ၊” ဝႃႈၼင်ႇၼႆဢေႃႈ။-
မႄႈယိင်းၼၼ်ႉဢဝ်တင်းၵႂၢမ်းဢၼ်ဝၢၼ်ႁူဝၢၼ်ၸႂ်ၶျေႃးဝွၼ်းၸူဝ်းဢဝ်မၼ်းဢေႃႈ။-
မၼ်းၵေႃႈၸွမ်းမႄႈယိင်းၼၼ်ႉၵႂႃႇမိူၼ်ၸိူဝ်ႉၼင်ႇဢၼ်ဝူဝ်းဢၼ်ၸွမ်းၵႂႃႇၵႃႈတီႈဢၼ်ႁႅမ်ဝူဝ်းၼၼ်ႉ၊မိူၼ်ၸိူဝ်ႉၼင်ႇတိုင်ဢၼ်ၵျွၵ်းဝႅၼ်ၶဝ်ႈၵႃႈၼႂ်းတူင်ႇၶိုမ်း၊-
တီႈဢၼ်ပိုၼ်ၵၢင်ႇၸူၵ်ႉသဵပ်ႇသႂ်ႇမၢၵ်ႇႁူဝ်ၸႂ်မၼ်းၼၼ်ႉဢေႃႈ။ မၼ်းပဵၼ်ၸိူဝ်ႉၼင်ႇဢၼ်တူဝ်ၼူၵ်ႉၸဵဝ်းၶဝ်ႈဝႆးဝႆးၵႃႈၼႂ်းၶႄၵႂႃႇလႄႈ၊မၼ်းဢမ်ႇႁုလွင်ႈဢၼ်မၼ်းႁွတ်ႈၽေးၼၼ်ႉ။
ပိူဝ်ႈၼႆလႄႈလုၵ်ႈၸၢႆးၵဝ်႟။ ထွမ်ႇဢဝ်ၵႂၢမ်းၵဝ်လႄႈဝႆႉၸႂ်မၢတ်ႈတွင်းဢဝ်ၵႃႈဢၼ်ၵဝ်သင်ႇလၢတ်ႈၼၼ်ႉတႃႉ။-
ယႃႇပေပၼ်ဢၶႂၢင်ႉႁႂ်ႈမႄႈယိင်းၸိူဝ်ႉၼင်ႇၼၼ်လႆႈပႄႉဢဝ်ႁူဝ်ၸႂ်မႂ်း။ ယႃႇပေၵႂႃႇလႄႇၵႂႃႇဢႅဝ်ႇၵႃႈတီႈမၼ်း။-
လွင်ႈမၼ်းၸမ်ႉ၊မၼ်းႁႂ်ႈၵူၼ်းၸၢႆးၼမ်ၼႃႇလုၵႂႃႇထၢၼ်ႈပေႃးဢမ်ႇၼပ်ႉဢမ်ႇဢၢၼ်ႇလႆႈယဝ်ႉ။-
ပေႃးမႂ်းၵႂႃႇၸူးၵႃႈတီႈႁိူၼ်းမၼ်းၸိုင်၊ပဵၼ်တၢင်းဢၼ်မႂ်းၵႂႃႇၸူးမိူင်းမရၼႃႉယဝ်ႉ။ ဢၼ်ၼၼ်ႉပဵၼ်တၢင်းလတ်းၵႂႃႇၸူးတၢင်းတၢႆဢေႃႈ။
ထွမ်ႇတႃႉ။ ပိင်ႇၺႃႇႁွင်ႉသႅၼ်ႇယူႇဢေႃႈ။ ၺၢၼ်ႇၵိဝ်သဵင်မၼ်းယူႇဢေႃႈ။
မၼ်းၸုၵ်းယူႇၵႃႈၼိူဝ်ၸိၵ်းလွႆတင်းလၢႆဢိၵ်ႇတင်း ၵႃႈတီႈတၢင်းၸုတၢင်းႁွမ်းဢေႃႈ။
မၼ်းႁွင်ႉၵၢဝ်ႇယူႇၵႃႈတီႈၼႃႈၽၵ်းတူဝဵင်းၵႃႈတီႈ၊ ႁူးၽၵ်းတူတင်းလၢႆလႄႈဝႃႈၸမ်ႉ၊
“ၵူၼ်းတင်းလၢႆၶဝ်႟။ ၵဝ်ႁွင်ႉတီႈသူလႄႈၵိဝ်သဵင်ၵဝ်ၸူးတီႈၵူၼ်းလေႃးၵီႇၵူႈၵေႃႉၵူႈၵူၼ်းဢေႃႈ။
သူပဵၼ်ၵူၼ်းဢၼ်ပိင်ႇၺႃႇဢမ်ႇၵႄႇဢမ်ႇထူၼ်ႈၼၼ်ႉႁိုဝ်း။ သွၼ်ဢဝ်ႁႂ်ႈပဵၼ်၊ ၵေႃႉဢၼ်ၵႄႇထူၼ်ႈတႃႉ။ သူပဵၼ်ၵူၼ်းငိူဝ်ႈငႃႉႁိုဝ်း၊သွၼ်ဢဝ်ၺၢၼ်ႇ၊ ဢၼ်ၸၢင်ႈၶႆႈၸႂ်လႄႈႁုလႆႈၼၼ်ႉတႃႉ။
ဢွၼ်ၵၼ်ထွမ်ႇဢဝ်ၵႂၢမ်းၵဝ်ဢၼ်မျၢတ်ႈလီ ၼၼ်ႉတႃႉ။ ၵႂၢမ်းၵႃႈဢၼ်ၵဝ်သင်ႇလၢတ်ႈၼၼ်ႉပဵၼ်ၵႂၢမ်းဢၼ်သိုဝ်ႈလီယူဝ်းလီဢေႃႈ။
ၵႂၢမ်းၵႃႈဢၼ်ၵဝ်သင်ႇလၢတ်ႈၼၼ်ႉပဵၼ်သမ်ႇမႃႇတြႃးလႄႈ၊ၵႂၢမ်းမုသႃႇတင်းလၢႆပဵၼ်၊ ၵႂၢမ်းဢၼ်ၵဝ်လီႁင်ႈဢဵတ်ႇသဵတ်ႇဢေႃႈ။
ၵႂၢမ်းၵႃႈဢၼ်ၵဝ်သင်ႇလၢတ်ႈၼၼ်ႉ မၢၼ်ႇမႅၼ်ႈၸိုဝ်ႈၸႂ်ႈလႄႈ ဢမ်ႇမီးသၽေႃးဢၼ်ၵူတ်ႉဢိၵ်ႇတင်းသၽေႃးဢၼ်ပိၼ်ႇၸႂ်ၶိုၼ်းၼၼ်ႉလႃးလႃး။
ၵူႈၸိူဝ်ႉၵူႈပိူင်ပဵၼ်ဢၼ်ပၢင်ႇလီလႅင်းလီ တီႈၵေႃႉဢၼ်မီးၺၢၼ်ႇ၊ ဢၼ်လိုၵ်ႉဢၼ်လမ်ႇလႄႈ၊ပဵၼ်ဢၼ် ပိုတ်ႇပၢင်ႇထၢင်ႇသႃးတီႈ၊ ၵေႃႉဢၼ်လႆႈပိင်ႇၺႃႇၼၼ်ႉဢေႃႈ။
လိူၵ်ႈဢဝ်တြႃးဢၼ်ၵဝ်သင်ႇသွၼ် ၼႄတၢင်းၼၼ်ႉဢွၼ်တၢင်းငိုၼ်းလႄႈ၊ လိူၵ်ႈဢဝ်ၺၢၼ်ႇဢွၼ်တၢင်းၶမ်းတႃႉ။
ၵဝ်ပဵၼ်ပိင်ႇၺႃႇဢေႃႈ။ ၵဝ်ပဵၼ်ဢၼ် ယဵင်ႈၶႅၼ်းမျၢတ်ႈၼႃႇ၊ သေသႅင်လႅင်လႄႈ၊ၶိူင်ႈပိူင်ဢၼ်သူ တူၵ်းဢၢင်ႈၶႂ်ႈလႆႈမဵဝ်းလႂ်ၵေႃႈ၊ ဢမ်ႇမီးတီႈဢၼ်တႅၵ်ႈၼိူင်းၵၼ်တင်းၵဝ်လႆႈ။
ၵဝ်ပဵၼ်ပိင်ႇၺႃႇလႄႈ၊ၵဝ်မီးၺၢၼ်ႇ ဢၼ်လိုၵ်ႉဢၼ်လမ်ႇဢေႃႈ။ ၵဝ်မီးတၢင်းႁုၸႅင်ႈဢၼ်ၸၵ်းၽႄ လၵ်းလၵ်းလႅမ်လႅမ်ဢေႃႈ။
တၢင်းဢၼ်ရူဝ်ႇသေႇၵူဝ်ယမ် ထႃႇဝရႃႉၽြႃး၊ ၸမ်ႉ၊ ပဵၼ်တၢင်းဢၼ်ငိၼ်းၸင်းတုၸရိူၵ်ႈ၊ ငိၼ်းၸင်းမႃႇၼႃႉၸႂ်သုင်၊ တၢင်းဢၼ်သႄႉသွမ်းဢမ်ႇၼပ်ႉဢမ်ႇၶၢၼ်းပိူၼ်ႈ၊တၢင်းဢၼ်ႁဵတ်းဢမ်ႇလီ၊ တင်းတၢင်းဢၼ်လၢတ်ႈၵႂၢမ်းဢၼ် ဢမ်ႇၸိုဝ်ႈဢမ်ႇၸႂ်ႈၸိူဝ်းၼၼ်ႉဢေႃႈ။
ၵဝ်မီးသၽေႃးဢၼ်ပၼ်တၢင်းၵျၢမ်ႇတၢင်းပွင် ဢိၵ်ႇတင်းပိင်ႇၺႃႇဢၼ်လၵ်းဢၼ်လႅမ်ဢေႃႈ။ ၵဝ်မီးၺၢၼ်ႇဢၼ်လိုၵ်ႉဢၼ်လမ်ႇ ဢိၵ်ႇတင်းႁႅင်းဢၼ်ယႂ်ႇၼႃႇဢေႃႈ။
ၵဝ်ၸွႆႈထႅမ်ၶုၼ်ႁေႃၶမ်းတင်းလၢႆ ႁႂ်ႈမေႃဢုပ်ႉမေႃပိူင်ႇလႄႈ ၸွႆႈထႅမ်မူးမၢတ်ႈၽွင်းမိူင်းတင်းလၢႆ ႁႂ်ႈမေႃၶိုင်မေႃပွင်တြႃးဢေႃႈ။
ၵွပ်ႈလူၺ်ႈတၢင်းဢၼ်ၵဝ်ၸွႆႈထႅမ်ၼၼ်ႉလႄႈ မူးမၢတ်ႈၽွင်းမိူင်းလႂ်၊ ၶုၼ်ႁေႃၶမ်းလႂ်တင်းၵူၼ်းလူင်ဢၼ် ၸီႇယၢင်ႇတြႃးလႂ်၊ ၵႃႈမီးတင်းသဵင်ႈတင်းလူင်ဢုပ်ႉပိူင်ႇ တႅပ်းတတ်းဢေႃႈ။
ၵဝ်ႁၵ်ႉၶဝ်ၸိူဝ်းဢၼ်ႁၵ်ႉၵဝ်ၼၼ်ႉလႄႈ ၶဝ်ၸိူဝ်းဢၼ်ၵႆႉၶတ်းႁႃ၊ ဢဝ်ၵဝ်ၼၼ်ႉၸၢင်ႈထူပ်းၵဝ်ဢေႃႈ။
ၵဝ်မီးၸေးၸိမ်ႇဢိၵ်ႇတင်း မုၼ်သရေႇဢေႃႈ။ တၢင်းဢၼ်ၶိုၼ်ႈယႂ်ႇ၊ မႂ်ႇသုင်တင်းတၢင်းဢၼ်ဢွင်ႇမႅင်ႇၵေႃႈ မီးဢေႃႈ။
ၵႃႈဢၼ်မႂ်းလႆႈတီႈၵဝ်ၼၼ်ႉယဵင်ႈၶႅၼ်း မျၢတ်ႈၼႃႇသေ၊ ၶမ်းလွတ်ႈငၢၼ်ႇဢမ်ႇၵႃး၊ယဵင်ႈၶႅၼ်းမျၢတ်ႈ ၼႃႇသေငိုၼ်းၸႅတ်ႈဢေႃႈ။
ၵဝ်ပႆၵႃႈၼိူဝ်သဵၼ်ႈတၢင်းဢၼ်သိုဝ်ႈတေႃႇ၊ ၸွမ်းၵႂႃႇၵႃႈၼႂ်း၊ ၵၢင်တၢင်းဢၼ်တြႃးသိုဝ်ႈသေယဝ်ႉ။
ပၼ်ၸေးၸိမ်ႇဢုၵ်ႉၸႃႇတီႈၶဝ်ၸိူဝ်းဢၼ် ႁၵ်ႉၵဝ်လႄႈ ပၼ်ႁႂ်ႈႁိူၼ်းၶဝ်လူၼ်ႉတဵမ်ဝႆႉတင်းၽၼ်ႇတႃႇ ဢုၵ်ႉၸႃႇဢေႃႈ။
ထႃႇဝရႃႉၽြႃး၊ ၽၢၼ်ႇသၢင်းႁဵတ်းပဵၼ်ၵဝ် ဢွၼ်တၢင်းသုတ်းပိူၼ်ႈ၊ ဢွၼ်တၢင်းသေပိူၼ်ႈၼႂ်းတၢင်းႁဵတ်းတၢင်းသၢင်ႈဢၼ်မၼ်းၸဝ်ႈပွင်ႁဵတ်းၸဵမ်မိူဝ်ႈႁိုင်ၼႃႇယဝ်ႉၼၼ်ႉဢေႃႈ။
ၵဝ်လႆႈၶၢမ်ႇတၢင်းဢၼ်ႁဵတ်းပဵၼ်ၸဵမ်မိူဝ်ႈႁူဝ်ပိုင်း၊ဢွၼ်တၢင်းသေပိူၼ်ႈ၊ ၸဵမ်မိူဝ်ႈၵမ်ႇၽႃႇဢမ်ႇပႆႇတႄႇပႆႇပဵၼ် ၼၼ်ႉယဝ်ႉ။
ၵဝ်လႆႈၵိူတ်ႇလဵင်ႉမႃးဢွၼ်တၢင်းသေ ၼမ်ႉသမ်ႇမုၵ်ႈတြႃႇ၊ ၸဵမ်မိူဝ်ႈဢၼ်ဢမ်ႇပႆႇမီးၼမ်ႉဢွၵ်ႇႁူး ၼၼ်ႉယဝ်ႉ။
ၵဝ်လႆႈၵိူတ်ႇလဵင်ႉမႃးဢွၼ်တၢင်းသေလွႆ တင်းလၢႆ၊ၸဵမ်မိူဝ်ႈဢၼ်ၵွင်းတင်းလၢႆ ဢမ်ႇပႆႇတႄႇပႆႇပဵၼ်ၼၼ်ႉ။
ၸဵမ်မိူဝ်ႈဢၼ်ၽြႃးပဵၼ်ၸဝ်ႈဢမ်ႇပႆႇၽၢၼ်ႇသၢင်းႁဵတ်းပဵၼ်လိၼ်မိူင်း၊ ဢိၵ်ႇတင်းတီႈပၢင်ႇတီႈပဵင်းတင်းလၢႆ၊ယင်းဢွၼ်တၢင်းသေၽုၼ်ႇလိၼ်ဝၵ်ႉၼိုင်ႈ၊ ဢွၼ်တၢင်းသုတ်းၼၼ်ႉလူးၵွၼ်ႇဢေႃႈ။
ၵဝ်ပေႃးမီးဝႆႉၵႃႈတီႈၼၼ်ႈၼႂ်းမိူဝ်ႈဢၼ် မၼ်းၸဝ်ႈတႄႇႁဵတ်းၽႃႉၵၢင်ႁၢဝ်၊ ၼႂ်းမိူဝ်ႈဢၼ်မၼ်းၸဝ်ႈၵီႈၽႄႇၼႃႈၽႃႉ ဢၼ်ပဵၼ်ဝူင်းပဵၼ်တူင်ႇဝႆႉ၊ ၵႃႈၼိူဝ်ၼႃႈၼမ်ႉသမ်ႇမုၵ်ႈတြႃႇၼၼ်ႉ။
ၼႂ်းမိူဝ်ႈဢၼ်မၼ်းၸဝ်ႈဢဝ်မွၵ်ႇၵုမ်ႈၶႅၼ်ဝႆႉ ၵႃႈၼိူဝ်တွင်ႉၽႃႉ၊ ၼႂ်းမိူဝ်ႈဢၼ်မၼ်းၸဝ်ႈၽုၺ်ႇၼမ်ႉဢွၵ်ႇႁူး ၵႃႈတီႈဢၼ်လိုၵ်ႉဢၼ်လမ်ႇ။
ဢိၵ်ႇတင်းၼႂ်းမိူဝ်ႈဢၼ်မၼ်းၸဝ်ႈပူင်ဢမိင်ႉ တီႈၼမ်ႉပၢင်ႇလၢႆႇ၊ တၵ်းဢမ်ႇလႆႈထူမ်ႈပူၼ်ႉပႅၼ်ႁိမ်းၽင်ႇတီႈ ဢၼ်မၼ်းၸဝ်ႈၶၼ်ႈၶႅၼ်ႈဝႆႉၼၼ်ႉ၊ ၸိူဝ်းၼၼ်ႉယဝ်ႉယဝ်ႉ။ ၵဝ်ပေႃးမီးဝႆႉၵႃႈတီႈၼၼ်ႈၼႂ်းမိူဝ်ႈဢၼ်မၼ်းၸဝ်ႈ၊ တႄႇႁဵတ်းငဝ်ႈႁၢၵ်ႈလိၼ်မိူင်းၼၼ်ႉယဝ်ႉယဝ်ႉ။
ၵဝ်မီးယူႇၵႃႈတီႈႁိမ်းမၼ်းၸဝ်ႈမိူၼ်ၸိူဝ်ႉၼင်ႇ ‘သြႃႇဢၼ်ၸၢင်ႈၶိုင်ပွင်’ ၼၼ်ႉလႄႈ၊ပဵၼ်တီႈဢၼ်မၼ်းၸဝ်ႈမူၼ်ႈပျေႃႇယူႇၵူႈဝၼ်းၵူႈဝၼ်းၼၼ်ႉဢေႃႈ။ ၵဝ်သႂၢင်ႇသိူဝ်းၵႃႈတီႈၽၢႆႇၼႃႈမၼ်းၸဝ်ႈ တႃႇသေႇယူႇ။
သႂၢင်ႇသိူဝ်းယူႇၵႃႈၼႂ်းမိူင်းလေႃးၵႃႉမၼ်းၸဝ်ႈဢၼ်ပဵၼ်တီႈယူႇ၊ တီႈသဝ်းၵူၼ်းၼၼ်ႉသေလႄႈ၊ႁဵတ်းၵေႃႉ ႁဵတ်းသႄႈမူၼ်ႈပျေႃႇလူၺ်ႈၵၼ်၊ တင်းၵူၼ်းမဵဝ်းတင်းလၢႆယူႇဢေႃႈ။
ၵမ်းၼႆႉ၊လုၵ်ႈၸၢႆးၵဝ်ၶဝ်႟။ ဢွၼ်ၵၼ် ထွမ်ႇဢဝ်ၵႂၢမ်းၵဝ်တႃႉ။ ၵမ်ၵျၢင်ႉၸွမ်းၵႃႈၼင်ႇဢၼ်ၵဝ်သင်ႇလၢတ်ႈၼၼ်ႉတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊သူတၵ်း မီးမၢင်ႇၵလႃႇဢေႃႈ။
ဢွၼ်ၵၼ်ထွမ်ႇဢဝ်တၢင်းဢၼ်သူလႆႈ သွၼ်ဢဝ်ယဝ်ႉၼၼ်ႉတႃႉ။ မီးပိင်ႇၺႃႇတႃႉ။ ယႃႇပေၸုၼ်ႉပေပႅတ်ႈမၼ်း။
ၵေႃႉဢၼ်ထွမ်ႇဢဝ်ၵႂၢမ်းၵဝ်ယူႇ၊ၵေႃႉဢၼ်ၸုၵ်း၊ ၵႃႈတီႈၽၵ်းတူၵဝ်ယူႇၵူႈဝၼ်းလႄႈပႂ်ႉထႃႈယူႇ ၵႃႈတီႈၼႃႈၽၵ်းတူႁိူၼ်း၊ ၵဝ်ၼၼ်ႉမီးမၢင်ႇၵလႃႇဢေႃႈ။
ၵေႃႉဢၼ်ထူပ်းၵဝ်ၼၼ်ႉထူပ်းဢသၢၵ်ႈလႄႈ တၵ်းတေလႆႈ၊ ၶၢမ်ႇဢဝ်ၵျေးၸူးတီႈ ထႃႇဝရႃႉၽြႃး၊ ဢေႃႈ။
ၵေႃႉဢၼ်ဢမ်ႇထူပ်းၵဝ်ၸမ်ႉ၊ၸၢင်ႈတိူဝ်ႉၶိူၵ်ႈ တီႈတူဝ်ၸဝ်ႈၵဝ်ႇလႄႈ၊ ၵေႃႉဢၼ်ၸင်းၵဝ်ၵူႈၵေႃႉၵူႈၵူၼ်းၼၼ်ႉ ႁၵ်ႉပႅင်းတၢင်းတၢႆဢေႃႈ။”
ပိင်ႇၺႃႇတႄႇႁဵတ်းႁိူၼ်းလႄႈပူၵ်းသဝ်ၸဵတ်းလႅမ်ႈပုၼ်ႈႁိူၼ်းၼၼ်ႉယဝ်ႉယဝ်ႉ။-
မၼ်းႁႅမ်တူဝ်သတ်းမၼ်းပုၼ်ႈပွႆးၵိၼ်ပွႆးၶူပ်းသေယဝ်ႉ၊မႄးၽေႃႇၼမ်ႉမၢၵ်ႇၸပိတ်ႉမၼ်းလႄႈႁႅၼ်းၽိူၼ်တီႈၵိၼ်ဝႆႉယဝ်ႉယဝ်ႉ။-
မၼ်းပွႆႇၸႂ်ႉၶႃႈမႄႈယိင်းမၼ်းတင်းလၢႆႁႂ်ႈၵႂႃႇႁွင်ႉသေႃႇၵႃႈတီႈဢၼ်သုင်ၼႃႇသေပိူၼ်ႈတင်းလၢႆၵႃႈၼႂ်းၶူးၼႂ်းဝဵင်းလႄႈဝႃႈၸမ်ႉ၊-
“ၵေႃႉဢၼ်ငိူဝ်ႈငႃႉၶဝ်႟။ ၶဝ်ႈမႃးၵႃႈတီႈၼႆႈသေၵမ်း၊” ဝႃႈၼင်ႇၼႆလႄႈ၊မၼ်းသမ်ႉလၢတ်ႈတီႈၵူၼ်းမိူၵ်ႈတင်းလၢႆလႄႈဝႃႈ၊-
“မႃးသေၵမ်း။ ၵိၼ်တၢင်းၵိၼ်ၵဝ်လႄႈသူတ်ႉၵိၼ်ၼမ်ႉမၢၵ်ႇၸပိတ်ႉဢၼ်ၵဝ်မႄးၽေႃႇဝႆႉၼႆႉသေၵမ်း။-
ဝႄႈပႅတ်ႈတၢင်းဢၼ်ငိူဝ်ႈငႃႉသေလႄႈဢသၢၵ်ႈလိပ်းယူႇသေၵမ်း။ ၵႂႃႇမႃးယူႇၼႂ်းသဵၼ်ႈတၢင်းပိင်ႇၺႃႇသေၵမ်း၊” ဝႃႈၼင်ႇၼႆဢေႃႈ။
ပေႃးမႂ်းသင်ႇသွၼ်မႄးပၼ်ၵူၼ်းဢၼ်ၸႂ်ၽႅၼ်သုင်ၼၼ်ႉၸိုင်၊မႂ်းၵူၺ်းတေလႆႈၶၢမ်ႇၵႂၢမ်းလႃႇဢေႃႈ။ ပေႃးမႂ်းၽုၺ်ႇဢွၵ်ႇၼႄပျႃးဢပျတ်ႈတီႈၵေႃႉဢၼ်ႁၢႆႉမိူၵ်ႈၸိုင်၊မႂ်းၵူၺ်းတေလႆႈၶၢမ်ႇၸဵပ်းလၢႆလၢႆဢေႃႈ။-
ယႃႇပေသင်ႇသွၼ်မႄးပၼ်ၵူၼ်းဢၼ်ၸႂ်ၽႅၼ်သုင်ၼၼ်ႉ။ မၼ်းတၵ်းၸင်းမႂ်းဢေႃႈ။ သင်ႇသွၼ်မႄးပၼ်ၵူၼ်းဢၼ်မီးပိင်ႇၺႃႇၼၼ်ႉတႃႉ။ မၼ်းတၵ်းႁၵ်ႉမႂ်းဢေႃႈ။-
ၵႃႈဢၼ်မႂ်းလၢတ်ႈၼႄလွင်ႈသေမဵဝ်းမဵဝ်းတီႈၵူၼ်းဢၼ်မီးပိင်ႇၺႃႇၸိုင်၊ပဵၼ်တၢင်းဢၼ်ထႅင်ႈပိင်ႇၺႃႇမၼ်းဢေႃႈ။ ၵႃႈဢၼ်မႂ်းလၢတ်ႈၼႄတီႈၵေႃႉဢၼ်သိုဝ်ႈတေႃႇၼၼ်ႉပဵၼ်တၢင်းဢၼ်ထႅင်ႈၺၢၼ်ႇမၼ်းဢေႃႈ။
ၼင်ႇႁိုဝ်တၵ်းမီးပိင်ႇၺႃႇၸိုင်၊မႂ်းတၵ်းလႆႈထွမ်ႇဢဝ် ထႃႇဝရႃႉၽြႃး၊ ဢွၼ်တၢင်းသုတ်းဢေႃႈ။ ပေႃးမႂ်းႁုၸၵ်းၽြႃးဢၼ်မူတ်းၸၢင်ႇၸိုင်၊မႂ်းတၵ်းမီးၺၢၼ်ႇဢေႃႈ။-
ပိင်ႇၺႃႇတၵ်းထႅင်ႈပၼ်ၶူပ်ႇၼီႈပီမိူင်းတီႈဢသၢၵ်ႈမႂ်းဢေႃႈ။-
ပေႃးမႂ်းမီးပိင်ႇၺႃႇၸိုင်၊တူဝ်မႂ်းတၵ်းမီးဢၵျူဝ်းဢေႃႈ။ ပေႃးမႂ်းပႄႇပႅတ်ႈၸမ်ႉ၊တူဝ်မႂ်းတၵ်းလႆႈၶၢမ်ႇဢပျတ်ႈဢေႃႈ။
တၢင်းဢၼ်မိူၵ်ႈလိူင်းၼၼ်ႉပဵၼ်ၸိူဝ်ႉၼင်ႇမႄႈယိင်းဢၼ်လၢတ်ႈမေႃးလင်ၼႃႇလႄႈငိူဝ်ႈငႃႉဢမ်ႇႁုၵႃႈသင်လႃးလႃးၼၼ်ႉဢေႃႈ။-
မၼ်းၼင်ႈယူႇၵႃႈတီႈၽၵ်းတူႁိူၼ်းမၼ်း၊ဢမ်ႇၼၼ်ၵေႃႈၵႃႈတီႈတီႈၼင်ႈၼႂ်းတီႈဢၼ်သုင်ၵႃႈၼႂ်းၶူးၼႂ်းဝဵင်းသေလႄႈ၊-
ႁွင်ႉဢဝ်ၶဝ်ၸိူဝ်းဢၼ်ၵႂႃႇတႃပႆတၢင်းၸွမ်းလူၺ်ႈၼႃႈၵၢၼ်တၢင်းႁဵတ်းတူဝ်ၸဝ်ႈၵဝ်ႇယူႇၼၼ်ႉလႄႈဝႃႈ၊-
“ၶဝ်ႈမႃးၵႃႈတီႈၼႆႈသေၵမ်း။ ၵေႃႉဢၼ်ငိူဝ်ႈငႃႉၶဝ်႟။” ဝႃႈၼင်ႇၼႆလႄႈ၊သမ်ႉလၢတ်ႈတီႈၵူၼ်းမိူၵ်ႈၸိူဝ်းၼၼ်ႉလႄႈဝႃႈ၊-
“ၼမ်ႉဢၼ်လၵ်ႉၵိၼ်ၼၼ်ႉဝၢၼ်ဢေႃႈ။ ၶဝ်ႈမုၼ်းဢၼ်လၵ်ႉၵိၼ်ၼၼ်ႉယဵင်ႈၶႅၼ်းဝၢၼ်ဢေႃႈ၊” ဝႃႈၼင်ႇၼႆဢေႃႈ။-
ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်မၼ်းပႅတ်ႉလႅၼ်ၼၼ်ႉဢမ်ႇႁုလွင်ႈဢၼ်ၶဝ်ၸိူဝ်းဢၼ်ၵႂႃႇၵႃႈတီႈႁိူၼ်းမၼ်းၸၢင်ႈတၢႆၼၼ်ႉ၊ဢိၵ်ႇတင်းလွင်ႈဢၼ်ၶဝ်ၸိူဝ်းဢၼ်ၶဝ်ႈၸူးယဝ်ႉၼၼ်ႉတူၵ်းႁွတ်ႈၼႂ်းမိူင်းမရၼႃႉယဝ်ႉၼၼ်ႉ။
ထုင်းၵႂၢမ်းၸိူဝ်းၼႆႉၸမ်ႉပဵၼ်ထုင်းၵႂၢမ်းပိင်ႇၺႃႇ သေႃးလမုၼ်ႇ၊ ဢေႃႈ။ လုၵ်ႈၸၢႆးဢၼ်မီးပိင်ႇၺႃႇၼၼ်ႉၸၢင်ႈပဵၼ်တီႈဢၼ်ပေႃႈမၼ်းၸူမ်းသိူဝ်းလႄႈလုၵ်ႈၸၢႆးဢၼ်မိူၵ်ႈၸမ်ႉၸၢင်ႈပဵၼ်တီႈဢၼ်မႄႈမၼ်းမႆႈၸႂ်ၶီၸႂ်ဢေႃႈ။
ၸေးၸိမ်ႇဢုၵ်ႉၸႃႇဢၼ်ႁဵတ်းဢမ်ႇတြႃးလႄႈလႆႈမႃးၼၼ်ႉဢမ်ႇပၼ်ဢၵျူဝ်း။ ပႃႇရမီႇတၢင်းဢၼ်သိုဝ်ႈတေႃႇၸမ်ႉၸၢင်ႈၵႄႇသႄႇထုတ်ႇၼုၵ်ႈဢဝ်ဢသၢၵ်ႈဢေႃႈ။
ထႃႇဝရႃႉၽြႃး၊ ဢမ်ႇပၼ်ဢၶႂၢင်ႉႁႂ်ႈၵေႃႉဢၼ်သိုဝ်ႈတေႃႇၼၼ်ႉလႆႈဢိုပ်းလႆႈယၢၵ်ႈ၊မဵဝ်းဢၼ်ၵူၼ်းမိူၵ်ႈဢၢင်ႈၶႂ်ႈလႆႈၼၼ်ႉမၼ်းၸဝ်ႈယႃႉၽဵဝ်ႈပႅတ်ႈဢေႃႈ။
ၵေႃႉဢၼ်ၶၢၼ်ႉဢၼ်ဢိူၼ်ၼၼ်ႉၸၢင်ႈႁွတ်ႈထိုင်တၢင်းဢၼ်ယၢၵ်ႈဢၼ်ၽၢၼ်လႄႈ၊ၵေႃႉဢၼ်ၵႆႉၶတ်းႁဵတ်းသၢင်ႈၼၼ်ႉၸမ်ႉ ၸၢင်ႈႁွတ်ႈထိုင်ပဵၼ်ၵူၼ်းမၢၵ်ႈၵူၼ်းမီးဢေႃႈ။
ၵေႃႉဢၼ်လၵ်းလႅမ်ၼၼ်ႉၸၢင်ႈၵဵပ်းႁွမ်ၵဵပ်းသိမ်းဢဝ်မၢၵ်ႇဢဝ်ႁူင်းၶိင်ႇမိူဝ်ႈဢၼ်သၢင်ႇထုၵ်ႇလႄႈ၊ၵေႃႉဢၼ်ၸၢင်ႈၼွၼ်းၶိင်ႇမိူဝ်ႈဢၼ်ပၢတ်ႇၶဝ်ႈၼၼ်ႉၸမ်ႉၸၢင်ႈလႆႈဢူၵ်းလႆႈဢၢႆဢေႃႈ။
ၵူၼ်းလီၵူၼ်းငၢမ်းၸၢင်ႈလႆႈႁပ်ႉဢဝ်မၢင်ႇၵလႃႇလႄႈ၊သူပ်းၵႂၢမ်းၵူၼ်းမိူၵ်ႈၸမ်ႉၸၢင်ႈမူမ်ႇဝႆႉသၽေႃးဢၼ်ႁၢဝ်ႉၵျၢမ်းဢေႃႈ။
တၢင်းဢၼ်ၶုၵ်းၸႂ်လႆႈၵေႃႉဢၼ်တြႃးၼၼ်ႉၸၢင်ႈပၼ်တၢင်းလီလႄႈၸိုဝ်ႈသဵင်ၵူၼ်းမိူၵ်ႈၸမ်ႉၸၢင်ႈတူႇၼဝ်ႈလုလႅဝ်ၵႂႃႇဢေႃႈ။
ၵေႃႉဢၼ်လၵ်းလႅမ်ၼၼ်ႉၸၢင်ႈႁပ်ႉၶၢမ်ႇဢဝ်ၵႂၢမ်းဢၼ်ပၼ်တၢင်းၵျၢမ်ႇလႄႈ၊ၵေႃႉဢၼ်မိူၵ်ႈလႄႈသူပ်းၼမ်ၵႂၢမ်းၼမ်ၼၼ်ႉၸမ်ႉၸၢင်ႈႁွတ်ႈထိုင်တၢင်းဢၼ်လုဢၼ်သုမ်းဢေႃႈ။
ၵေႃႉဢၼ်သိုဝ်ႈလီယူဝ်းလီၼၼ်ႉလႆႈယူႇလူင်ႉလီလွတ်ႈလီလႄႈ၊ၵေႃႉဢၼ်ၸႂ်ၵူတ်ႉၸႂ်ငွၵ်းၸမ်ႉ၊တၵ်းလႆႈၶၢမ်ႇတၢင်းဢၼ်တိမႅၼ်ႈဢေႃႈ။
ၵေႃႉဢၼ်ပွႆႇပႅတ်ႈသမ်ႇမႃႇတြႃးၼၼ်ႉၸၢင်ႈႁဵတ်းႁႂ်ႈပဵၼ်ၽေးတုၵ်ႉၶႃႉလႄႈ၊ၵေႃႉဢၼ်ၽုၺ်ႇဢွၵ်ႇၼႄပျႃးဢပျတ်ႈႁတ်းႁတ်းႁၢၼ်ႁၢၼ်ၼၼ်ႉၸၢင်ႈႁဵတ်းႁႂ်ႈတၢင်းၽိတ်းၵၼ်ထၢတ်ႇယဵၼ်ဢေႃႈ။
ၶေႃႈၵႂၢမ်းၵူၼ်းလီၵူၼ်းငၢမ်းၼၼ်ႉပဵၼ်ၼမ်ႉဢွၵ်ႇႁူးဢသၢၵ်ႈလႄႈ၊ၶေႃႈၵႂၢမ်းၵူၼ်းမိူၵ်ႈၸမ်ႉ၊ၸၢင်ႈမူပ်ႇဝႆႉသၽေႃးဢၼ်ႁၢဝ်ႉၵျၢမ်းဢေႃႈ။
ၸႂ်ဢၼ်ငိၼ်းၸင်းၼၼ်ႉၸၢင်ႈတိုၵ်းယူင်းၽေးတုၵ်ႉၶႃႉလႄႈ၊ၸႂ်ဢၼ်ငိၼ်းႁၵ်ႉၼၼ်ႉၸၢင်ႈပွႆႇၶႂၢင်းဢပျတ်ႈၵႃႈမီးဢေႃႈ။
ၵေႃႉဢၼ်ၺၢၼ်ႇလီၼၼ်ႉၸၢင်ႈလၢတ်ႈလၵ်းလၵ်းလႅမ်လႅမ်လႄႈ၊ၵူၼ်းငိူဝ်ႈၸမ်ႉလူဝ်ႇၺႃးတၢမ်ႇဢေႃႈ။
ၵေႃႉဢၼ်မီးပိင်ႇၺႃႇၼၼ်ႉၸၢင်ႈၸုႁွမ်သိမ်းဝႆႉပိင်ႇၺႃႇဢၼ်ၶဝ်လႆႈႁုလႆႈငိၼ်းၼၼ်ႉလႄႈ၊သူပ်းၶဝ်ၸိူဝ်းဢၼ်မိူၵ်ႈၸမ်ႉၸမ်ၵၼ်တင်းတၢင်းဢၼ်လုဢၼ်သုမ်းဢေႃႈ။
ၸေးၸိမ်ႇဢုၵ်ႉၸႃႇၸၢင်ႈၵႅတ်ႇၶႄႁႄႉၵင်ႈၵူၼ်းမၢၵ်ႈၵူၼ်းမီးလႄႈ၊တၢင်းဢၼ်ၵွတ်းဢၼ်ဢိုပ်းၸမ်ႉၸၢင်ႈယႃႉၵဝ်းၵူၼ်းယၢၵ်ႈၵူၼ်းၽၢၼ်ဢေႃႈ။
ဢၵျူဝ်းတၢင်းဢၼ်ႁဵတ်းသၢင်ႈလီလီငၢမ်းငၢမ်းၼၼ်ႉၸိုင်၊ၸၢင်ႈပဵၼ်ဢသၢၵ်ႈလႄႈ၊ဢၵျူဝ်းတၢင်းဢၼ်ၽိတ်းဢၼ်ပိူင်ႈၸမ်ႉၸၢင်ႈပဵၼ်ဢပျတ်ႈဢေႃႈ။
ၵေႃႉဢၼ်ထွမ်ႇဢဝ်တၢင်းဢၼ်ပိူၼ်ႈတၢင်ႇၵေႃႉသင်ႇသွၼ်မႄးပၼ်ၼၼ်ႉၸၢင်ႈလႆႈဢသၢၵ်ႈလႄႈ၊ၵေႃႉဢၼ်ဢမ်ႇႁပ်ႉၶၢမ်ႇတၢင်းၽိတ်းတူဝ်ၸဝ်ႈၵဝ်ႇၼၼ်ႉၸမ်ႉ၊ၸၢင်ႈထူပ်းၽေးဢၼ်ႇတရေႇဢေႃႈ။
ၵေႃႉဢၼ်မူမ်ႇၸႂ်ဢၼ်ငိၼ်းၸင်းၼၼ်ႉပဵၼ်ၵူၼ်းပႅတ်ႉၵူၼ်းလႅၼ်လႄႈ၊ၵေႃႉဢၼ်ၶႃႉၸိုဝ်ႈၶၢႆသဵင်ပိူၼ်ႈၼၼ်ႉပဵၼ်ၵူၼ်းမိူၵ်ႈဢေႃႈ။
တၢင်းဢၼ်သူပ်းၼမ်ၵႂၢမ်းၼမ်ၼၼ်ႉၸၢင်ႈႁႂ်ႈႁွတ်ႈထိုင်တၢင်းဢၼ်မီးဢပျတ်ႈလႄႈ၊ၵေႃႉဢၼ်ၶျုၵ်ႈသူပ်းၶျုၵ်ႈသဵင်ၼၼ်ႉမီးပိင်ႇၺႃႇဢေႃႈ။
ၶေႃႈၵႂၢမ်းၵူၼ်းလီၵူၼ်းငၢမ်းတင်းလၢႆၼၼ်ႉပဵၼ်ၸိူဝ်ႉၼင်ႇငိုၼ်းၸႅတ်ႈငိုၼ်းလီလႄႈ၊ၶေႃႈၵႂၢမ်းဢၼ်ၵူၼ်းမိူၵ်ႈပၼ်တၢင်းၵျၢမ်ႇၼၼ်ႉဢမ်ႇထိူၵ်ႈၵႃႈထိူၵ်ႈၶၼ်။
ၶေႃႈၵႂၢမ်းၵူၼ်းလီၵူၼ်းငၢမ်းတင်းလၢႆၼၼ်ႉၸၢင်ႈပဵၼ်ဢၵျူဝ်းပုၼ်ႈၵူၼ်းၼမ်ၼႃႇလႄႈ၊ၵူၼ်းဢၼ်မိူၵ်ႈလိူင်းၼၼ်ႉၸမ်ႉ၊ၸၢင်ႈလႆႈတၢႆၵွပ်ႈပိူဝ်ႈဢမ်ႇမီးၺၢၼ်ႇဢေႃႈ။
တၢင်းလီမၢင်ႇၵလႃႇ ထႃႇဝရႃႉၽြႃး၊ ၼၼ်ႉၸၢင်ႈႁဵတ်းႁႂ်ႈမၢၵ်ႈမီးလီပဵၼ်လႄႈ၊တၢင်းဢၼ်ဝိရိယႃႉၵႆႉၶတ်းၼၼ်ႉဢမ်ႇၸၢင်ႈထႅမ်ပၼ်ၵႃႈသင်ဢေႃႈ။-
ၵူၼ်းမိူၵ်ႈၸၢင်ႈမူၼ်ႈပျေႃႇၼႂ်းတၢင်းဢၼ်ႁဵတ်းဢပျတ်ႈလႄႈၵူၼ်းဢၼ်လၵ်းလႅမ်ၸမ်ႉၸၢင်ႈမူၼ်ႈပျေႃႇၼႂ်းပိင်ႇၺႃႇဢေႃႈ။
ၵူၼ်းဢၼ်သိုဝ်ႈတေႃႇၸၢင်ႈလႆႈၵႃႈဢၼ်မၼ်းတူၵ်းဢၢင်ႈၶႂ်ႈလႆႈၼၼ်ႉလႄႈ၊ၵူၼ်းမိူၵ်ႈၸမ်ႉၸၢင်ႈလႆႈမဵဝ်းဢၼ်ၶဝ်လီၵူဝ်လီႁႄၼႃႇလူင်လၢင်ၼၼ်ႉဢေႃႈ။
မိူဝ်ႈဢၼ်လူမ်းၽိဝ်ႁုင်ပတ်ႉထူဝ်းမႃးၼၼ်ႉၵူၼ်းမိူၵ်ႈတင်းလၢႆၸၢင်ႈပိဝ်ၵႂႃႇၽူင်ႉၵႂႃႇလႄႈ၊ၵူၼ်းၸိူဝ်းဢၼ်သိုဝ်ႈလီယူဝ်းလီၸမ်ႉတၵ်းလႆႈယူႇလူင်ႉလွတ်ႈလီဢေႃႈ။
ယႃႇပေၸႂ်ႉၵူၼ်းၶၢၼ်ႉၵူၼ်းဢိူၼ်ႁဵတ်းၵၢၼ်ပုၼ်ႈမႂ်းသေဢိတ်း။ မၼ်းၸၢင်ႈပဵၼ်ၸိူဝ်ႉၼင်ႇၼမ်ႉသူမ်ႈႁဵတ်းႁႂ်ႈၶဵဝ်ႈမႂ်းၸဵပ်း၊ဢမ်ႇၼၼ်ၵေႃႈပဵၼ်ၸိူဝ်ႉၼင်ႇၵႂၼ်းၽႆးၶဝ်ႈတႃမႂ်းဢေႃႈ။
ထွမ်ႇဢဝ် ထႃႇဝရႃႉၽြႃး၊ တႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ဢသၢၵ်ႈမႂ်းတၵ်းယၢဝ်းယိုၼ်းဢေႃႈ။ ၵူၼ်းမိူၵ်ႈၸမ်ႉဢသၢၵ်ႈပွတ်းဢေႃႈ။
တၢင်းဢၼ်ၵူၼ်းလီၵူၼ်းငၢမ်းမုင်ႈထႃႈမွင်းထႃႈၼၼ်ႉပဵၼ်တၢင်းဢၼ်လီၸူမ်းလီသိူဝ်းလႄႈ၊ၵူၼ်းမိူၵ်ႈၸမ်ႉၸၢင်ႈမုင်ႈထႃႈမွင်းထႃႈမဵဝ်းဢၼ်ဢမ်ႇပွင်ႇလွင်ႈၵႃႈသင်ၼၼ်ႉဢေႃႈ။
ထႃႇဝရႃႉၽြႃး၊ ၵႅတ်ႇၶႄႁႄႉၵင်ႈၶဝ်ၸိူဝ်းဢၼ်သိုဝ်ႈလီယူဝ်းလီၼၼ်ႉလႄႈ၊ယႃႉၽဵဝ်ႈပႅတ်ႈၶဝ်ၸိူဝ်းဢၼ်ႁဵတ်းဢပျတ်ႈၼၼ်ႉဢေႃႈ။
ၵူၼ်းဢၼ်သိုဝ်ႈတေႃႇတင်းလၢႆလႆႈတူၵ်းတီႈတူၵ်းတၢင်းၼႂ်းတီႈယူႇၶဝ်သေလႄႈ၊ၶဝ်ၸိူဝ်းဢၼ်ဢမ်ႇတြႃးၸမ်ႉဢမ်ႇလႆႈယူႇလႆႈသဝ်းၵႃႈၼႂ်းမိူင်းဢၼ်မၼ်းၸဝ်ႈပၼ်။
ၵူၼ်းဢၼ်သိုဝ်ႈတေႃႇတင်းလၢႆၸၢင်ႈလၢတ်ႈၵႂၢမ်းပိင်ႇၺႃႇလႄႈ၊လိၼ်ႉဢၼ်လၢတ်ႈၵႂၢမ်းဢၼ်ယုတ်ႈဢၼ်ႁၢႆႉၸမ်ႉတၵ်းလႆႈၶၢမ်ႇတႅပ်းပႅတ်ႈဢေႃႈ။
ၵူၼ်းဢၼ်သိုဝ်ႈတေႃႇတင်းလၢႆၸၢင်ႈႁုၸၢင်ႈမိုတ်ႈၵႂၢမ်းဢၼ်လီဢၼ်ထုၵ်ႇၸႂ်ၵျိူၵ်ႈၸႂ်ၼၼ်ႉလႄႈ၊ၶဝ်ၸိူဝ်းဢၼ်ဢမ်ႇတြႃးၼၼ်ႉၸမ်ႉၸၢင်ႈလၢတ်ႈၵႂၢမ်းဢၼ်တိူဝ်ႉၶိူၵ်ႈပိူၼ်ႈၼၼ်ႉဢေႃႈ။
ထႃႇဝရႃႉၽြႃး၊ ငိၼ်းၸင်းၶဝ်ၸိူဝ်းဢၼ်သုင်းတိုဝ်းယွႆးဢၼ်ဢမ်ႇမၢၼ်ႇဢမ်ႇမႅၼ်ႈၼၼ်ႉလႄႈ၊မၼ်းၸဝ်ႈထုၵ်ႇၸႂ်ၵျိူၵ်ႈၸႂ်မၢၵ်ႇလုၵ်ႈၶၼ်ဢၼ်မၢၼ်ႇဢၼ်မႅၼ်ႈၼၼ်ႉဢေႃႈ။
ၶဝ်ၸိူဝ်းဢၼ်မႃႇၼႃႉၸႂ်သုင်ၼၼ်ႉတၵ်းၸဵဝ်းလႆႈဢူၵ်းလႆႈဢၢႆလႄႈ၊ၶဝ်ၸိူဝ်းဢၼ်ၸႂ်ၶျႃးတႅမ်ႇၸမ်ႉမီးပိင်ႇၺႃႇဢေႃႈ။
ပေႃးမႂ်းပဵၼ်ၵူၼ်းလီၵူၼ်းငၢမ်းၸိုင်၊သၽေႃးဢၼ်သိုဝ်ႈလီယူဝ်းလီၼၼ်ႉတၵ်းဢွၼ်သူင်ႇမႂ်းဢေႃႈ။ ၶဝ်ၸိူဝ်းဢၼ်ဢမ်ႇလီတမ်းၸႂ်လႆႈၼၼ်ႉသၽေႃးဢၼ်ၵူတ်ႉဢၼ်ငေႃးတၵ်းယႃႉၽဵဝ်ႈပႅတ်ႈၶဝ်ဢေႃႈ။
ၸေးၸိမ်ႇဢုၵ်ႉၸႃႇဢမ်ႇၸၢင်ႈပၼ်ဢၵျူဝ်းတီႈမႂ်း၊ၼႂ်းဝၼ်းဢၼ်မႂ်းထူပ်းၽေးတၢင်းတၢႆၼၼ်ႉ။ သၽေႃးဢၼ်သိုဝ်ႈလီယူဝ်းလီၵူၺ်းၸၢင်ႈၵႄႇၶျွတ်ႈဢဝ်ဢသၢၵ်ႈမႂ်းဢေႃႈ။
သၽေႃးဢၼ်သိုဝ်ႈလီယူဝ်းလီၼၼ်ႉႁဵတ်းႁႂ်ႈၸူဝ်ႈဢသၢၵ်ႈတၢၼ်းၵူၼ်းလီၵူၼ်းငၢမ်းသၢၵ်ႈသႃႇလႄႈ၊ၵူၼ်းမိူၵ်ႈၸမ်ႉၸၢင်ႈႁဵတ်းႁႂ်ႈတူဝ်ၸဝ်ႈၵဝ်ႇတူၵ်းသုမ်းဢေႃႈ။
တြႃးတၢင်းဢၼ်သိုဝ်ႈတေႃႇၼၼ်ႉၸၢင်ႈၵႄႇၼုၵ်ႈဢဝ်ၵေႃႉဢၼ်သိုဝ်ႈလီယူဝ်းလီလႄႈ၊ၶဝ်ၸိူဝ်းဢၼ်ဢမ်ႇလီတမ်းၸႂ်လႆႈၼၼ်ႉၸမ်ႉၸၢင်ႈတူၵ်းၶမ်မႅၼ်ႈၵႃႈၼႂ်းၸႂ်လေႃးၽႃႉတူဝ်ၸဝ်ႈၵဝ်ႇဢေႃႈ။
မိူဝ်ႈဢၼ်ၵူၼ်းမိူၵ်ႈတၢႆၵႂႃႇၼၼ်ႉတၢင်းဢၼ်မုင်ႈထႃႈမွင်းထႃႈမၼ်းၼၼ်ႉၵေႃႈတၢႆၸွမ်းမၼ်းၵႂႃႇဢေႃႈ။ တၢင်းဢၼ်ယုမ်ႇယမ်တမ်းၸႂ်ၼႂ်းၸေးၸိမ်ႇဢုၵ်ႉၸႃႇၼၼ်ႉဢမ်ႇၸၢင်ႈပွင်ပဵၼ်ဢၵျူဝ်းၵႃႈသင်မႃး။
ၵေႃႉဢၼ်သိုဝ်ႈတေႃႇၼၼ်ႉတၵ်းလွတ်ႈဢွၵ်ႇသေၵႃႈၼႂ်းတုၵ်ႉၶႃႉလႄႈ၊ၽေးတုၵ်ႉၶႃႉၼၼ်ႉၸၢင်ႈတူၵ်းႁွတ်ႈတူၵ်းထိုင်တီႈၵေႃႉဢၼ်ဢမ်ႇတြႃးၵူၺ်းဢေႃႈ။
တၢင်းဢၼ်ၵူၼ်းဢၼ်ဢမ်ႇမီးၽြႃးတြႃးလၢတ်ႈၵႂၢမ်းဢၼ်ထွႆႈၼၼ်ႉၸၢင်ႈႁႂ်ႈမႂ်းလုလႅဝ်ၵႂႃႇလႄႈ၊ၵႂၢမ်းပိင်ႇၺႃႇဢၼ်ၵူၼ်းသိုဝ်ႈတေႃႇလၢတ်ႈၼၼ်ႉၸမ်ႉၸၢင်ႈၵႄႇသႄႇၶျွတ်ႈဢဝ်မႂ်းဢေႃႈ။
မိူဝ်ႈဢၼ်ၵူၼ်းသိုဝ်ႈတေႃႇလႆႈလီလႆႈပဵၼ်ၼၼ်ႉၸိုင်၊ၸၢင်ႈဢွၼ်ၵၼ်ၸူမ်းသိူဝ်းတင်းဝဵင်းလႄႈ၊မိူဝ်ႈဢၼ်ၵေႃႉဢၼ်ဢမ်ႇတြႃးတၢႆၼၼ်ႉၸမ်ႉမီးတၢင်းဢၼ်ႁုၼ်ႈဢၼ်ႁိူဝ်ႈဢေႃႈ။
ၵွပ်ႈလူၺ်ႈၵူၼ်းသိုဝ်ႈတေႃႇပၼ်တၢင်းလီၼၼ်ႉလႄႈဝဵင်းၼၼ်ႉလႆႈၶိုၼ်ႈယႂ်ႇမႂ်ႇသုင်ဢေႃႈ။ ၵွပ်ႈလူၺ်ႈသူပ်းလူၺ်ႈၵႂၢမ်းၵေႃႉဢၼ်ဢမ်ႇတြႃးၼၼ်ႉလႄႈဝဵင်းၼၼ်ႉလႆႈတူၵ်းသုမ်းဢေႃႈ။
တၢင်းဢၼ်လၢတ်ႈၵႂၢမ်းဢၼ်ဝူၺ်ႇဢၼ်ႁင်ႈတီႈပိူၼ်ႈတၢင်ႇၵေႃႉၼၼ်ႉပဵၼ်ဢၼ်ယုတ်ႈဢၼ်ႁၢႆႉဢေႃႈ။ ပေႃးမႂ်းပဵၼ်ၵေႃႉဢၼ်လၵ်းလႅမ်ၸိုင်၊မႂ်းၸၢင်ႈယူႇတဵတ်ႇတဵတ်ႇဢေႃႈ။
ၵေႃႉဢၼ်ၸၢင်ႈလႄႇၵႂႃႇၶႃႉၸိုဝ်ႈၶၢႆသဵင်ပိူၼ်ႈၼၼ်ႉဢမ်ႇလီယုမ်ႇလႆႈပုၼ်ႈၵၢၼ်ဢၼ်သိူင်ႇဢၼ်လပ်ႉၼၼ်ႉ။ ၵေႃႉဢၼ်ပႂ်ႉသဵတ်ႈၸႃႇၼၼ်ႉၸမ်ႉၸၢင်ႈသိူင်ႇဝႆႉဢမ်ဝႆႉဢေႃႈ။
ပေႃးယင်းဢမ်ႇမီးၺၢၼ်ႇဢၼ်ၸၢင်ႈပၼ်တၢင်းၵျၢမ်ႇၸိုင်၊ၵူၼ်းဝၢၼ်ႈၵူၼ်းမိူင်းၸၢင်ႈလႆႈလုသုမ်းဢေႃႈ။ ပေႃးမီးၵေႃႉဢၼ်ပၼ်တၢင်းၵျၢမ်ႇၼမ်ၼႃႇၸင်ႇတေလႆႈယူႇလူင်ႉလွတ်ႈလီဢေႃႈ။
ပေႃးမႂ်းဝႆႉၵတိတႃႇတေယေႃႇပၼ်ၼီႈၵူၼ်းၼႃႈမႂ်ႇၸိုင်၊မႂ်းတေလႆႈသေလၢႆၸဵပ်းၸႂ်ဢေႃႈ။ ပေႃးမႂ်းၸင်းတၢင်းဢၼ်ဢႃႇမႃႉၶၢမ်ႇပိူၼ်ႈၸိုင်၊မႂ်းတေၵၢင်းလွတ်ႈတၢင်းဢၼ်မႆႈၸႂ်ဢေႃႈ။
မႄႈယိင်းဢၼ်မီးၸႂ်ၵရုၼႃႇၼၼ်ႉၸၢင်ႈလႆႈမုၼ်သရေႇဢေႃႈ။ မႄႈယိင်းဢၼ်ဢမ်ႇမီးသိၼ်ထမ်းၼၼ်ႉၸမ်ႉ၊ၸၢင်ႈလႆႈဢူၵ်းလႆႈဢၢႆဢေႃႈ။ ၵူၼ်းၸၢႆးဢၼ်ၶၢၼ်ႉဢၼ်ဢိူၼ်ၼၼ်ႉဢမ်ႇၸၢင်ႈလႆႈငိုၼ်းလႆႈတွင်းလႃးလႃး။ ၵူၼ်းၸၢႆးဢၼ်ႁႅင်းယႂ်ႇၼႃႇၸိူဝ်းၼၼ်ႉၸမ်ႉၸၢင်ႈလႆႈမၢၵ်ႈမီးလီပဵၼ်ဢေႃႈ။
ပေႃးမႂ်းမီးၸႂ်ၸေႇတၼႃႇၸိုင်၊မႂ်းႁဵတ်းႁႂ်ႈတူဝ်ၸဝ်ႈၵဝ်ႇမီးၼႃႈမီးတႃလႄႈ၊ပေႃးမႂ်းမီးၸႂ်ဢၼ်ႁၢဝ်ႉၵျၢမ်းၸိုင်၊ၸၢင်ႈယႃႉတူဝ်ၸဝ်ႈၵဝ်ႇဢေႃႈ။
ၵူၼ်းႁၢႆႉမိူၵ်ႈၸိုင်၊ဢမ်ႇၸၢင်ႈလႆႈဢၵျူဝ်းၵႃႈသင်တႄႉတႄႉဢေႃႈ။ ပေႃးႁဵတ်းသိုဝ်ႈသိုဝ်ႈယူဝ်းယူဝ်းၵူၺ်းၸင်ႇတေလႆႈၶၢမ်ႇဢဝ်ဢၵျူဝ်းဢမၢၼ်ႇၶၼ်ပဵၼ်ဢေႃႈ။
ၽူႈလႂ်သေဢမ်ႇဝႃႈပေႃးမၼ်းတႅပ်းတတ်းၸႂ်ႁႂ်ႈလႆႈႁဵတ်းသိုဝ်ႈသိုဝ်ႈတေႃႇတေႃႇၸိုင်၊တၵ်းတေဢသၢၵ်ႈလိပ်းလႄႈ၊ပေႃးမၼ်းဝႆႉၸႂ်တိုၼ်းဝႃႈတေႁဵတ်းတုၸရိူၵ်ႈၸမ်ႉၸၢင်ႈလႆႈတၢႆၵူၺ်းဢေႃႈ။
ထႃႇဝရႃႉၽြႃး၊ ငိၼ်းၸင်းဢဵတ်ႇသဵတ်ႇသၽေႃးဢၼ်ၵူတ်ႉငေႃးၼၼ်ႉလႄႈ၊ထုၵ်ႇၸႂ်ၵျိူၵ်ႈၸႂ်သၽေႃးဢၼ်သိုဝ်ႈတေႃႇဢေႃႈ။
မႂ်းတၵ်းတေလႆႈႁၼ်ထၢင်ႇသႃးလွင်ႈဢၼ်ၶဝ်ၸိူဝ်းဢၼ်ဢမ်ႇတြႃးတေလႆႈၶၢမ်ႇတၢမ်ႇဢပျတ်ႈလႄႈၶဝ်ၸိူဝ်းဢၼ်သိုဝ်ႈတေႃႇသမ်ႉတေလႆႈလွတ်ႈၼၼ်ႉဢေႃႈ။
ၽူႈယိင်းႁၢင်ႈလီဢၼ်ဢမ်ႇမီးသတိဝိရိယႃႉၼၼ်ႉမိူၼ်ၸိူဝ်ႉၼင်ႇၶိူင်ႈၶမ်းဢၼ်ႁွႆႈတီႈပၢႆၶူႈလင်မူၼၼ်ႉဢေႃႈ။
ၵႃႈဢၼ်ၵူၼ်းလီၵူၼ်းငၢမ်းတူၵ်းဢၢင်ႈၶႂ်ႈလႆႈၼၼ်ႉပဵၼ်ဢၵျူဝ်းတၢင်းလီယူႇတႃႇသေႇလႄႈ၊မိူဝ်ႈဢၼ်ၵူၼ်းမိူၵ်ႈလႆႈၵႃႈဢၼ်မၼ်းတူၵ်းဢၢင်ႈၶႂ်ႈလႆႈၼၼ်ႉပိူၼ်ႈဢွၼ်ၵၼ်ၸႂ်မႆႈၶႂ်ႈၸႃႉ ဢေႃႈ။
ၵူၼ်းၵမ်ႈၽွင်ႈၽေးၸွၼ်းယိုၼ်ႈမႅင်ႇယူႇသေၵေႃႈဢုၵ်ႉၸႃႇၸၢင်ႈယႂ်ႇၽႄႈၼမ်မႃးယူႇတိၵ်းတိၵ်းလႄႈ၊ၵမ်ႈၽွင်ႈဢမ်ႇမီးၸႂ်ၸေႇတၼႃႇလူႇတၢၼ်းယူႇသေၵေႃႈၸၢင်ႈယၢၵ်ႈၵႂႃႇၽၢၼ်ၵႂႃႇယူႇတိၵ်းတိၵ်းဢေႃႈ။
ၵေႃႉဢၼ်မီးၸႂ်ၸေႇတၼႃႇၼၼ်ႉတၵ်းလိူင်ႇၸႂ်လႄႈ၊ၵေႃႉဢၼ်ၸွႆႈထႅမ်ပိူၼ်ႈၼၼ်ႉတၵ်းတေလႆႈၶၢမ်ႇဢဝ်တၢင်းဢၼ်ၸွႆႈဢၼ်ထႅမ်ဢေႃႈ။
ၵေႃႉဢၼ်သိမ်းဝႆႉၶဝ်ႈပိူၵ်ႇပႂ်ႉထႃႈတၢင်းဢၼ်ၵႃႈၶၼ်ၶိုၼ်ႈၼၼ်ႉၵူၼ်းတင်းလၢႆသႄႉသွမ်းလႄႈ၊ၵေႃႉဢၼ်ဢဝ်ဢွၵ်ႇၶၢႆပၼ်ၼၼ်ႉၸမ်ႉပိူၼ်ႈဢွၼ်ၵၼ်ယွင်ႈယေႃးၵျေးၸူးဢေႃႈ။
ၵေႃႉဢၼ်ၵႆႉၶတ်းႁႃဢဝ်လွင်ႈဢၼ်လီဢၼ်ငၢမ်းၼၼ်ႉၸၢင်ႈလႆႈၶၢမ်ႇၵျေးၸူးလႄႈ၊ၵေႃႉဢၼ်ႁႃႁႂ်ႈဢၵျူဝ်းပိူၼ်ႈလႆႈလုၼၼ်ႉၸမ်ႉၸၢင်ႈႁွတ်ႈတုၵ်ႉၶႃႉဢေႃႈ။
ၵေႃႉဢၼ်ဢိင်ပိုင်ႈၸေးၸိမ်ႇတူဝ်ၸဝ်ႈၵဝ်ႇၼၼ်ႉၸၢင်ႈတူၵ်းသုမ်းမိူၼ်ၸိူဝ်ႉၼင်ႇမႂ်မႆႉႁူင်ႈၶိင်ႇမႆႈၼၼ်ႉလႄႈ၊ၵေႃႉဢၼ်သိုဝ်ႈတေႃႇၸမ်ႉၸၢင်ႈၶိုၼ်ႈယႂ်ႇမႂ်ႇသုင်မိူၼ်ၸိူဝ်ႉၼင်ႇမႂ်မႆႉၶဵဝ်ႁူဝ်ၽူၼ်ၼၼ်ႉဢေႃႈ။
ၵေႃႉဢၼ်ယႃႉယုၵ်ႉၼႃႈႁိူၼ်းတူဝ်ၸဝ်ႈၵဝ်ႇၼၼ်ႉတီႈသုတ်းမၼ်းၸၢင်ႈႁၢမ်းလၢႆဢေႃႈ။ ၵေႃႉဢၼ်မိူၵ်ႈၼၼ်ႉလႆႈၶၢမ်ႇႁဵတ်းၶႃႈတီႈၵေႃႉဢၼ်လၵ်းလႅမ်ၼၼ်ႉတႃႇသေႇဢေႃႈ။
တၢင်းဢၼ်သိုဝ်ႈတေႃႇၼၼ်ႉပၼ်ဢသၢၵ်ႈလႄႈ၊တၢင်းဢၼ်ၽိတ်းပိူင်ႈၼၼ်ႉၸမ်ႉ၊ယႃႉဢသၢၵ်ႈႁႂ်ႈလုလႅဝ်ဢေႃႈ။
ၶဝ်ၸိူဝ်းဢၼ်ပဵၼ်ၵူၼ်းလီၵူၼ်းငၢမ်းယင်းလႆႈၶၢမ်ႇဢဝ်ဢၵျူဝ်းၵႃႈတီႈလိၼ်မိူင်းၼႆႉလႄႈ၊ၶဝ်ၸိူဝ်းဢၼ်မိူၵ်ႈ၊ဢိၵ်ႇတင်းၶဝ်ၸိူဝ်းဢၼ်မီးဢပျတ်ႈၼၼ်ႉတေလႆႈၶၢမ်ႇတၢမ်ႇဢပျတ်ႈဢမၢၼ်ႇၶၼ်ပဵၼ်ဢေႃႈ။
ၵေႃႉဢၼ်ၵျိူၵ်ႈႁၵ်ႉၺၢၼ်ႇဢၼ်ႁုဢၼ်ၸႅင်ႈၼၼ်ႉမီးၸႂ်ဢၼ်ၶႂ်ႈႁႂ်ႈပိူၼ်ႈတၢင်ႇၵေႃႉသင်ႇသွၼ်သုင်းမႃႉမၼ်းလႄႈ၊ၵေႃႉဢၼ်မိူၵ်ႈၸမ်ႉငိၼ်းၸင်းတၢင်းဢၼ်ပိူၼ်ႈမႄးပၼ်မၼ်းၼၼ်ႉဢေႃႈ။
ထႃႇဝရႃႉၽြႃး၊ ၵျိူၵ်ႈၸႂ်ထုၵ်ႇၸႂ်ၵေႃႉဢၼ်လီဢၼ်ငၢမ်းၼၼ်ႉလႄႈ၊ၸီႇယၢင်ႇပၼ်တၢမ်ႇတီႈၵေႃႉဢၼ်ၵျၢမ်ႇႁဵတ်းမိူၵ်ႈၼၼ်ႉဢေႃႈ။
တၢင်းဢၼ်ႁဵတ်းႁၢႆႉႁဵတ်းမိူၵ်ႈၼၼ်ႉဢမ်ႇၸၢင်ႈပၼ်ၵတ်းယဵၼ်ၶျၢမ်းသႃႇလႄႈ၊ၵူၼ်းသိုဝ်ႈတေႃႇတင်းလၢႆၸမ်ႉတၵ်းတေမၼ်ႈၵိုမ်းလီဢေႃႈ။
မေးဢၼ်လီဢၼ်ငၢမ်းၼၼ်ႉပဵၼ်တီႈဢၼ်ၽူဝ်မၼ်းလႆႈဢုပ်ႇယွင်ႈၸူမ်းသိူဝ်းလႄႈ၊မေးဢၼ်ၸၢင်ႈႁဵတ်းႁႂ်ႈၽူဝ်မၼ်းလႆႈဢူၵ်းဢၢႆၼၼ်ႉပဵၼ်ၸိူဝ်ႉၼင်ႇဢၼ်တၢင်းဢၼ်ၽင်ႉဢုၵႃႈတီႈလုပ်ႇၽူဝ်မၼ်းဢေႃႈ။
ၶဝ်ၸိူဝ်းဢၼ်သိုဝ်ႈဢၼ်ယူဝ်းၼၼ်ႉၸၢင်ႈၶိုင်ပွင်ႁႂ်ႈၽဵင်ႇပဵင်းၵၼ်လႄႈ၊ၶဝ်ၸိူဝ်းဢၼ်မိူၵ်ႈၸမ်ႉၵူၺ်းၶႂ်ႈပႅတ်ႉလႅၼ်မႂ်းယူႇဢေႃႈ။
ၶေႃႈၵႂၢမ်းဢၼ်ၵူၼ်းမိူၵ်ႈလၢတ်ႈၼၼ်ႉပဵၼ်ၵႂၢမ်းဢၼ်ၶႃႈၸႂ်ပိူၼ်ႈလႄႈ၊ၶေႃႈၵႂၢမ်းဢၼ်ၵူၼ်းသိုဝ်ႈတေႃႇလၢတ်ႈၼၼ်ႉၸမ်ႉၸၢင်ႈၵႄႇၼုၵ်ႈဢဝ်ပိူၼ်ႈဢေႃႈ။
ၵူၼ်းမိူၵ်ႈတင်းလၢႆလူမ်ႉပင်းလႄႈၸိူဝ်ႉၶိူဝ်းႁၢႆဢေႃႈ။ ႁိူၼ်းယေးၶဝ်ၸိူဝ်းဢၼ်သိုဝ်ႈတေႃႇၸမ်ႉတၵ်းတႄႇယူႇသေႇသေႇဢေႃႈ။
ပေႃးမႂ်းမီးၸႂ်လၵ်းၸႂ်လႅမ်ၸိုင်၊တၵ်းတေလႆႈၶၢမ်ႇတၢင်းဢၼ်ပိူၼ်ႈယုၵ်ႉယွင်ႈဢေႃႈ။ ပေႃးမႂ်းမီးၸႂ်ငိူဝ်ႈငႃႉၸမ်ႉပိူၼ်ႈတၵ်းထၢင်ႇလဵၵ်ႉၵႃႈၼိူဝ်မႂ်းဢေႃႈ။
တၢင်းဢၼ်ပဵၼ်ၵူၼ်းယူဝ်းယူဝ်းႁဵတ်းၵိၼ်ၵၢၼ်လဵင်ႉတွင်ႉၼၼ်ႉယဵင်ႈၶႅၼ်းလီၼႃႇသေတၢင်းဢၼ်ပဵၼ်ၵူၼ်းဢုပ်ႇဝၢဝ်းဢၼ်ဢိုပ်းၶဝ်ႈယူႇၼၼ်ႉဢေႃႈ။
ၵူၼ်းလီၵူၼ်းငၢမ်းၸိုင်၊ၸၢင်ႈလုမ်းလႃးတူဝ်သတ်းတူဝ်ၸဝ်ႈၵဝ်ႇလႄႈ၊ၵူၼ်းမိူၵ်ႈၸမ်ႉၸၢင်ႈႁဵတ်းႁၢဝ်ႉၵျၢမ်းၼႃႇတီႈတူဝ်သတ်းၶဝ်ဢေႃႈ။
ၵူၼ်းၵႆႉဢၼ်ႁဵတ်းႁႆႈႁဵတ်းၼႃးၼၼ်ႉၸၢင်ႈမီးတၢင်းၵိၼ်တၢင်းၶူပ်းလိူင်ႇၼမ်ၼႃႇလႄႈ၊ၵေႃႉဢၼ်သဵင်ႈပႅတ်ႈၶိင်ႇလၢႆလၢႆလူၺ်ႈလွင်ႈတၢင်းဢၼ်ဢမ်ႇပွင်ႇလွင်ႈၵႃႈသင်ၼၼ်ႉပဵၼ်ၵူၼ်းမိူၵ်ႈဢေႃႈ။
ၵူၼ်းမိူၵ်ႈၵႃႈမီးတင်းသဵင်ႈတင်းလူင်မီးၸႂ်ဢၼ်ၶႂ်ႈၵျၢမ်ႇႁဵတ်းတုၸရိူၵ်ႈလႄႈ၊ၵူၼ်းသိုဝ်ႈတေႃႇတင်းလၢႆၸမ်ႉၸၢင်ႈလႆႈၸုၵ်းၶၢမ်ႇမၼ်ႈၶိူင်ႇဢေႃႈ။
ၵူၼ်းမိူၵ်ႈၸိုင်၊ၸၢင်ႈတူၵ်းၶႅၼ်မႅၼ်ႈၼႂ်းတူင်ႇၶိုမ်းၵႂၢမ်းတူဝ်ၸဝ်ႈၵဝ်ႇလႄႈ၊ၵေႃႉဢၼ်သိုဝ်ႈလီယူဝ်းလီၸမ်ႉၸၢင်ႈႁႂ်ႈတူဝ်ၸဝ်ႈၵဝ်ႇလွတ်ႈတုၵ်ႉၶႃႉဢေႃႈ။
ဢၵျူဝ်းဢၼ်လီဢၼ်ငၢမ်းၸိုင်၊တႄႇၼိူဝ်ၵႃႈဢၼ်မႂ်းလၢတ်ႈဢိၵ်ႇတင်းၵႃႈဢၼ်မႂ်းႁဵတ်းၼၼ်ႉလႄႈ၊မႂ်းတၵ်းလႆႈၵိၼ်ၸွမ်းၵႃႈဢၼ်ဢဝ်မိုဝ်းႁဵတ်းၼၼ်ႉဢေႃႈ။
ၵူၼ်းမိူၵ်ႈၸိုင်၊ၸၢင်ႈထၢင်ႇၵႃႈဢၼ်မၼ်းႁဵတ်းၼၼ်ႉသိုဝ်ႈတေႃႇယူႇတႃႇသေႇလႄႈ၊ၵေႃႉဢၼ်မီးပိင်ႇၺႃႇၸမ်ႉၸၢင်ႈထွမ်ႇဢဝ်ၵႂၢမ်းဢၼ်ပိူၼ်ႈတၢင်ႇၵေႃႉသင်ႇသွၼ်သုင်းမႃႉၼၼ်ႉဢေႃႈ။
မိူဝ်ႈဢၼ်ၵူၼ်းမိူၵ်ႈဢွၵ်ႇတေႃးသႃႉၼၼ်ႉၸၢင်ႈႁႂ်ႈပိူၼ်ႈႁုၵမ်းလဵဝ်လႄႈ၊ၵေႃႉဢၼ်မီးပိင်ႇၺႃႇၸမ်ႉၸၢင်ႈႁူမ်ႇငမ်းဝႆႉလွင်ႈတၢင်းဢၼ်လီဢူၵ်းလီဢၢႆဢေႃႈ။
မိူဝ်ႈဢၼ်မႂ်းလၢတ်ႈၵႂၢမ်းဢၼ်ၸိုဝ်ႈဢၼ်ၸႂ်ႈၼၼ်ႉပဵၼ်ဢၼ်ၼႄပျႃးတြႃးဢၼ်သိုဝ်ႈတေႃႇလႄႈ၊မိူဝ်ႈဢၼ်မႂ်းၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉၸၢင်ႈၼႄပျႃးတြႃးမုသႃႇဢေႃႈ။
ၵႂၢမ်းဢၼ်ယင်းဢမ်ႇၶႆႈၸႂ်လႄႈလၢတ်ႈဢွၵ်ႇၵႂႃႇၼၼ်ႉၸၢင်ႈသဵပ်ႇၸႂ်တႅင်းၸႂ်လိုၵ်ႉၼႃႇထၢၼ်ႈပေႃးမိူၼ်ၸိူဝ်ႉၼင်ႇလၢပ်ႇတႅင်းသႂ်ႇလႄႈ၊ၶေႃႈၵႂၢမ်းဢၼ်ပႃးပိင်ႇၺႃႇၸမ်ႉၸၢင်ႈယႃပၼ်ႁႂ်ႈႁၢႆဢေႃႈ။
ၵႂၢမ်းသဵတ်ႈၸႃႇၸိုင်၊တႄႇယူႇတႃႇသေႇဢမ်ႇထၢတ်ႇလႄႈ၊ၵႂၢမ်းမုသႃႇၸမ်ႉတႄႇယူႇၵႅပ်ႉၼိုင်ႈၵမ်းၼိုင်ႈၵူၺ်းဢေႃႈ။
သၽေႃးဢၼ်ၸၢင်ႈပႅတ်ႉၸၢင်ႈလႅၼ်ၼၼ်ႉမီးယူႇၼႂ်းၸႂ်ၶဝ်ၸိူဝ်းဢၼ်ၵျၢမ်ႇႁဵတ်းတုၸရိူၵ်ႈၼၼ်ႉလႄႈ၊ၶဝ်ၸိူဝ်းဢၼ်ၵျၢမ်ႇႁဵတ်းလွင်ႈတၢင်းဢၼ်လီဢၼ်ငၢမ်းၼၼ်ႉၸမ်ႉ၊ၸၢင်ႈလႆႈၸူမ်းသိူဝ်းဢေႃႈ။
ဢႃႉမၢင်ႇၵလႃႇဢမ်ႇတွၼ်ႉႁွတ်ႈထိုင်ၵႃႈတီႈၵူၼ်းသိုဝ်ႈတေႃႇလႄႈ၊ၵူၼ်းမိူၵ်ႈၸမ်ႉ၊လိူဝ်သေတုၵ်ႉၶႃႉတၢင်းၽၢၼ်လႄႈမၼ်းဢမ်ႇလႆႈၵႃႈသင်လႃးလႃး။
ထႃႇဝရႃႉၽြႃး၊ ငိၼ်းၸင်းမုသႃႇလႄႈထုၵ်ႇၸႂ်ၵျိူၵ်ႈၸႂ်ၶဝ်ၸိူဝ်းဢၼ်ပႂ်ႉသဵတ်ႈၸႃႇတြႃးၼၼ်ႉဢေႃႈ။
ၵေႃႉဢၼ်မီးပိင်ႇၺႃႇၸိုင်၊ၸၢင်ႈယူႇတဵတ်ႇတဵတ်ႇလူၺ်ႈလွင်ႈတၢင်းဢၼ်တူဝ်ၸဝ်ႈၵဝ်ႇႁုၼၼ်ႉလႄႈ၊ၵူၼ်းမိူၵ်ႈၸမ်ႉၸၢင်ႈၵျေႃႇၺႃႇလွင်ႈတၢင်းဢၼ်တူဝ်ၸဝ်ႈၵဝ်ႇဢမ်ႇႁုၵႃႈသင်ၼၼ်ႉဢေႃႈ။
တၢင်းဢၼ်မီးဝိရိယႃႉၵႆႉၶၵ်းၼၼ်ႉၸၢင်ႈပၼ်ႁႅင်းတၼ်းၶူဝ်းတီႈမႂ်းလႄႈ၊တၢင်းဢၼ်ၶၢၼ်ႉဢၼ်ဢိူၼ်ၼၼ်ႉၸမ်ႉ၊ၸၢင်ႈႁႂ်ႈပဵၼ်ၶႃႈပိူၼ်ႈဢေႃႈ။
တၢင်းဢၼ်မႂ်းၸႂ်လဵၵ်ႉၸႂ်ဢူၼ်ႈၼၼ်ႉၸၢင်ႈႁိမ်ဢဝ်တၢင်းဢၼ်ၸူမ်းဢၼ်သိူဝ်းပႅတ်ႈလႄႈ၊ၵႂၢမ်းဢၼ်လီဢၼ်ဝၢၼ်ၸမ်ႉၸၢင်ႈႁႂ်ႈမီးတၢင်းဢၼ်ၸႂ်ယႂ်ႇဢေႃႈ။
ၵူၼ်းသိုဝ်ႈတေႃႇၸၢင်ႈဢွၼ်သူင်ႇၼႄတၢင်းၵေႃႉသႄႈမၼ်းလႄႈ၊သဵၼ်ႈတၢင်းၵူၼ်းမိူၵ်ႈၸမ်ႉ၊ၸၢင်ႈႁႂ်ႈပိူၼ်ႈၽိတ်းတၢင်းၵႂင်တၢင်းဢေႃႈ။
ပေႃးမႂ်းၶၢၼ်ႉဢိူၼ်ၸိုင်၊မႂ်းတေဢမ်ႇတွၼ်ႉလႆႈၵႃႈဢၼ်မႂ်းတူၵ်းဢၢင်ႈၶႂ်ႈလႆႈၼၼ်ႉလႃးလႃး။ ပေႃးမႂ်းၵႆႉၶတ်းၸိုင်၊မႂ်းတေလႆႈလီလႆႈပဵၼ်ဢေႃႈ။
တၢင်းဢၼ်သိုဝ်ႈတေႃႇၼၼ်ႉပဵၼ်သဵၼ်ႈတၢင်းဢၼ်ၵႂႃႇၸူးဢသၢၵ်ႈလႄႈ၊တၢင်းဢၼ်ယုတ်ႈဢၼ်ႁၢႆႉၸမ်ႉပဵၼ်သဵၼ်ႈတၢင်းဢၼ်ၵႂႃႇၸူးတၢင်းတၢႆဢေႃႈ။
လုၵ်ႈၸၢႆးဢၼ်မီးပိင်ႇၺႃႇၼၼ်ႉၸၢင်ႈထွမ်ႇဢဝ်တၢင်းဢၼ်ပေႃႈမၼ်းသင်ႇသွၼ်သုင်းမႃႉၼၼ်ႉလႄႈ၊လုၵ်ႈဢၼ်ၸႂ်ၽႅၼ်သုင်ၼၼ်ႉၸမ်ႉဢမ်ႇထွမ်ႇဢဝ်တၢင်းဢၼ်တၢင်ႇဢပျတ်ႈမၼ်းၼၼ်ႉ။
ၵူၼ်းလီၵူၼ်းငၢမ်းၸၢင်ႈလႆႈၶၢမ်ႇဢဝ်ဢၵျူဝ်းၵႃႈဢၼ်မၼ်းလၢတ်ႈဝႃႈၼၼ်ႉလႄႈ၊ၵေႃႉဢၼ်ၸၢင်ႈပႅတ်ႉၸၢင်ႈလႅၼ်ၸမ်ႉလႆႈၶၢမ်ႇဢပျတ်ႈတၢင်းဢၼ်သႄႉသွမ်းဢေႃႈ။
ဝႆႉသတိတီႈၵႃႈဢၼ်မႂ်းလၢတ်ႈမႂ်းၸႃၼၼ်ႉလႄႈႁႄႉၶႅၼ်ဢသၢၵ်ႈတၢၼ်းတူဝ်ၸဝ်ႈၵဝ်ႇယူႇတႃႉ။ ၵေႃႉဢၼ်ဢမ်ႇမီးသတိလႄႈလၢတ်ႈပဝ်ႇပဝ်ႇလၢႆလၢႆၼၼ်ႉယႃႉတူဝ်ၸဝ်ႈၵဝ်ႇလုဢေႃႈ။
ႁူဝ်ၸႂ်ၵေႃႉဢၼ်ၶၢၼ်ႉဢၼ်ဢိူၼ်ၼၼ်ႉပိၵ်ႉသမ်ႉမီးၸႂ်လေႃးၽႃႉသေၵေႃႈမၼ်းဢမ်ႇၸၢင်ႈလႆႈၵႃႈသင်။ ၵေႃႉဢၼ်မီးဝိရိယႃႉၵႆႉၶၵ်းၼၼ်ႉၸမ်ႉၸၢင်ႈလႆႈၵႃႈဢၼ်မၼ်းမီးဢလူဝ်ႇၶႂ်ႈလႆႈၼၼ်ႉဢေႃႈ။
ၵူၼ်းသိုဝ်ႈၵူၼ်းယူဝ်းငိၼ်းၸင်းၵႂၢမ်းမုသႃႇလႄႈ၊ၶေႃႈၵႂၢမ်းၵူၼ်းမိူၵ်ႈၸမ်ႉပဵၼ်တၢင်းဢၼ်လီဢူၵ်းလီဢၢႆပဵၼ်ဢၼ်လီႁင်ႈဢဵတ်ႇသဵတ်ႇဢေႃႈ။
တြႃးသိုဝ်ႈတေႃႇၸၢင်ႈၵႅတ်ႇၶႄႁႄႉၵင်ႈၵေႃႉဢၼ်သိုဝ်ႈဢၼ်ယူဝ်းၼၼ်ႉလႄႈ၊တၢင်းဢၼ်ယုတ်ႈဢၼ်ႁၢႆႉၸမ်ႉပဵၼ်တၢင်းဢၼ်ႁႂ်ႈၵေႃႉဢၼ်မီးဢပျတ်ႈၼၼ်ႉလူမ်ႉဢေႃႈ။
ၵူၼ်းၵမ်ႈၽွင်ႈႁဵတ်းႁၢင်ႈပဵၼ်ၵူၼ်းမၢၵ်ႈၵူၼ်းမီးသေၵေႃႈၶဝ်ဢမ်ႇမီးၵႃႈသင်ဢေႃႈ။ ၵမ်ႈၽွင်ႈသမ်ႉႁဵတ်းႁၢင်ႈပဵၼ်ၵူၼ်းယၢၵ်ႈၵူၼ်းၽၢၼ်သေၵေႃႈၶဝ်မီးၸေးၸိမ်ႇဢုၵ်ႉၸႃႇဢေႃႈ။
ၵူၼ်းမၢၵ်ႈၵူၼ်းမီးၸၢႆႇငိုၼ်းမၼ်းႁႂ်ႈလႆႈၵႄႇသႄႇဢသၢၵ်ႈတူဝ်ၸဝ်ႈၵဝ်ႇသေလႄႈ၊ၵူၼ်းယၢၵ်ႈၵူၼ်းၽၢၼ်ၸမ်ႉဢမ်ႇမီးတီႈဢၼ်တၵ်းထုတ်ႇဢဝ်တူဝ်ၸဝ်ႈၵဝ်ႇ။
ၵူၼ်းသိုဝ်ႈတေႃႇပဵၼ်ၸိူဝ်ႉၼင်ႇဢၼ်လႅင်းထွင်ႇႁိူဝ်ႈယူႇၼၼ်ႉလႄႈ၊ၵူၼ်းမိူၵ်ႈၸမ်ႉပဵၼ်ၸိူဝ်ႉၼင်ႇၵွၵ်းၽႆးဢၼ်မွတ်ႇၵႂႃႇၼၼ်ႉဢေႃႈ။
သၽေႃးဢၼ်မႃႇၼႃႉၸႂ်သုင်ၼၼ်ႉၸၢင်ႈႁဵတ်းႁႂ်ႈၽိတ်းၵၼ်လႄႈ၊တၢင်းဢၼ်ထွမ်ႇဢဝ်တုင်းဢဝ်ၵႂၢမ်းဢၼ်ပၼ်သတိၼၼ်ႉပဵၼ်ပိင်ႇၺႃႇဢေႃႈ။
ၸေးၸိမ်ႇဢုၵ်ႉၸႃႇဢၼ်လႆႈငၢႆႈငၢႆႈၼၼ်ႉၸၢင်ႈၸဵဝ်းမူတ်းလႄႈ၊တၢင်းဢၼ်ၵႆႉၶၵ်းၵဵပ်းႁွမ်တွမ်ဝႆႉၼၼ်ႉၸၢင်ႈလိူင်ႇၼမ်တူဝ်းတွၼ်းမႃးဢေႃႈ။
မိူဝ်ႈဢၼ်တၢင်းဢၼ်မုင်ႈမွင်းမၼ်းဢမ်ႇပဵၼ်မႃးၼၼ်ႉၸၢင်ႈႁႂ်ႈၸႂ်လုၸွမ်းလႄႈ၊မိူဝ်ႈဢၼ်မၼ်းပဵၼ်မႃးၸွမ်းဢလူဝ်ႇၼၼ်ႉၸမ်ႉၸၢင်ႈႁႂ်ႈၸူမ်းၸႂ်ဢေႃႈ။
ပေႃးမႂ်းပႄႇပႅတ်ႈၵႂၢမ်းဢၼ်ပၼ်သတိၸိုင်၊ၸၢင်ႈႁႂ်ႈတုၵ်ႉၶႃႉပဵၼ်မႃးလႄႈ၊ပေႃးမႂ်းထွမ်ႇဢဝ်တုင်းဢဝ်ၸိုင်၊မႂ်းတၵ်းလႆႈၵတ်းယဵၼ်ၶျၢမ်းသႃႇဢေႃႈ။
ၵႂၢမ်းဢၼ်ၵူၼ်းမီးပိင်ႇၺႃႇသင်ႇသွၼ်သုင်းမႃႉၼၼ်ႉပဵၼ်ၼမ်ႉဢွၵ်ႇႁူးဢသၢၵ်ႈလႄႈ၊ၵႂၢမ်းၸိူဝ်းၼၼ်ႉၸၢင်ႈၸွႆႈထႅမ်ႁႂ်ႈမႂ်းလွတ်ႈဢွၵ်ႇသေၵႃႈၼႂ်းၽေးတၢင်းတၢႆဢေႃႈ။
ၺၢၼ်ႇဢၼ်လီၼၼ်ႉၸၢင်ႈႁႂ်ႈလႆႈၼႃႈလႆႈတႃလႄႈ၊ၵေႃႉဢၼ်ဢမ်ႇလီတမ်းၸႂ်လႆႈၼၼ်ႉၸၢင်ႈၵႂႃႇၸွမ်းသဵၼ်ႈတၢင်းဢၼ်လုလႅဝ်ဢေႃႈ။
ၵေႃႉဢၼ်လၵ်းလႅမ်ၼၼ်ႉၸၢင်ႈၶႆႈၸႂ်ဢွၼ်တၢင်းလႄႈႁဵတ်းဢေႃႈ။ ၵေႃႉဢၼ်ၺၢၼ်ႇထိုင်ႉၸမ်ႉ၊ၸၢင်ႈပၢဝ်ႇသေႃႇတၢင်းဢၼ်မၼ်းဢမ်ႇႁုၵႃႈသင်ၼၼ်ႉဢေႃႈ။
ၵူၼ်းၸႂ်ႉၵူၼ်းသွႆဢၼ်ဢမ်ႇယုမ်ႇလႆႈၼၼ်ႉၸၢင်ႈတဵၵ်းၵူၼ်းတင်းလၢႆၸူမ်ၼႂ်းတုၵ်ႉၶႃႉလႄႈ၊သၢၼ်ႇတမၢၼ်ႇဢၼ်မီးသဵတ်ႈၸႃႇၸမ်ႉၸၢင်ႈပႃးဢဝ်တၢင်းယဵၼ်တၢင်းၼိမ်မႃးဢေႃႈ။
ၵေႃႉဢၼ်ဢမ်ႇထွမ်ႇတုင်းဢဝ်တၢင်းဢၼ်ပိူၼ်ႈသင်ႇသွၼ်သုင်းမႃႉၼၼ်ႉၸၢင်ႈထိုင်ပဵၼ်ၵူၼ်းယၢၵ်ႈၵူၼ်းၽၢၼ်ဢိၵ်ႇတင်းတၢင်းဢၼ်လီဢူၵ်းလီဢၢႆလႄႈ၊ၵေႃႉဢၼ်ထွမ်ႇဢဝ်ၸမ်ႉၸၢင်ႈလႆႈမုၼ်သရေႇဢေႃႈ။
တၢင်းဢၼ်ဢလူဝ်ႇၵၢင်ၸႂ်ပျေႉၸုမ်ႇၼၼ်ႉပဵၼ်ဢၼ်ဝၢၼ်ဢၼ်မၼ်းတီႈၸႂ်တီႈၶေႃးလႄႈ၊တၢင်းဢၼ်ဝႄႈပႅတ်ႈတုၸရိူၵ်ႈၼၼ်ႉၸမ်ႉပဵၼ်ဢၼ်လီႁင်ႈဢဵတ်ႇသဵတ်ႇတီႈၵူၼ်းႁၢႆႉၵူၼ်းမိူၵ်ႈဢေႃႈ။
ၵေႃႉဢၼ်ၵႂႃႇမႃးလူၺ်ႈၵၼ်တင်းၶဝ်ၸိူဝ်းဢၼ်မီးပိင်ႇၺႃႇၼၼ်ႉၸၢင်ႈလႆႈပိင်ႇၺႃႇလႄႈ၊ၵေႃႉဢၼ်ႁဵတ်းၵေႃႉႁဵတ်းသႄႈလူၺ်ႈၵၼ်တင်းၵူၼ်းမိူၵ်ႈၼၼ်ႉၸမ်ႉၸၢင်ႈလႆႈထူပ်းၽေးဢေႃႈ။
ၽေးၸၢင်ႈလိုပ်ႈၸွမ်းလမ်းၸွမ်းၶဝ်ၸိူဝ်းဢၼ်မီးဢပျတ်ႈၼၼ်ႉလႄႈ၊ၶဝ်ၸိူဝ်းဢၼ်သိုဝ်ႈတေႃႇၼၼ်ႉၸမ်ႉတၵ်းလႆႈၶၢမ်ႇဢၵျူဝ်းဢၼ်လီဢေႃႈ။
ၵူၼ်းလီၵူၼ်းငၢမ်းၸၢင်ႈၸုၸၢင်ႈႁွမ်ဢမူၺ်ႇပုၼ်ႈလုၵ်ႈမၼ်းလၢၼ်မၼ်းတင်းလၢႆလႄႈ၊ၸေးၸိမ်ႇဢုၵ်ႉၸႃႇၶဝ်ၸိူဝ်းဢၼ်မီးဢပျတ်ႈၼၼ်ႉၸမ်ႉၸၢင်ႈၵႂႃႇၸူးတီႈၵူၼ်းသိုဝ်ႈတေႃႇၶဝ်ဢေႃႈ။
ၼႃးႁၢမ်းတင်းလၢႆၸၢင်ႈဢွၵ်ႇၶဝ်ႈၼမ်ႉတၢင်းၵိၼ်လိူင်ၼမ်ၼႃႇ ပုၼ်ႈၵူၼ်းယၢၵ်ႈၵူၼ်းၽၢၼ်ဢေႃႈ။ ၵူၺ်းၵႃႈ၊ၵွပ်ႈလူၺ်ႈၵူၼ်းဢၼ်ဢမ်ႇတြႃးတင်းလၢႆလႄႈလႆႈပဵၼ်ၼႃးႁၢမ်းဢေႃႈ။
ပေႃးမႂ်းဢမ်ႇပၼ်တၢမ်ႇတီႈလုၵ်ႈမႂ်းၸိုင်၊မႂ်းဢမ်ႇႁၵ်ႉလုၵ်ႈမႂ်းဢေႃႈ။ ပေႃးမႂ်းႁၵ်ႉလုၵ်ႈမႂ်းၸိုင်၊မႂ်းၸၢင်ႈသင်ႇသွၼ်သုင်းမႃႉလုၵ်ႈမႂ်းၵျၢပ်ႈၵျၢပ်ႈဢေႃႈ။
ၵူၼ်းသိုဝ်ႈတေႃႇၸၢင်ႈလႆႈၵိၼ်ဢိမ်ႇၵိၼ်တဵမ်လႄႈ၊ၵူၼ်းမိူၵ်ႈၸမ်ႉၸၢင်ႈတွင်ႉမႆႈသႆႈလိူတ်ႇယူႇတႃႇသေႇဢေႃႈ။
မႄႈႁိူၼ်းဢၼ်မီးပိင်ႇၺႃႇၼၼ်ႉၸၢင်ႈတႄႇၸၢင်ႈႁဵတ်းႁိူၼ်းမၼ်းလႄႈ၊မႄႈယိင်းဢၼ်မိူၵ်ႈၸမ်ႉ ၸၢင်ႈဢဝ်တင်းမိုဝ်းၵိူၼ်ႇယႃႉပႅတ်ႈဢေႃႈ။
သၽေႃးဢၼ်သိုဝ်ႈလီယူဝ်းလီၼၼ်ႉပဵၼ်တၢင်းဢၼ်ရူဝ်ႇသေႇၵူဝ်ယမ် ထႃႇဝရႃႉၽြႃး၊ လႄႈ၊သၽေႃးဢၼ်ၵူတ်ႉဢၼ်ငေႃးၸမ်ႉပဵၼ်တၢင်းဢၼ်ႁဵတ်းဢမ်ႇပေႃးၼင်ႇႁိုဝ်တီႈမၼ်းၸဝ်ႈဢေႃႈ။
ၶေႃႈၵႂၢမ်းဢၼ်ၵူၼ်းမိူၵ်ႈလၢတ်ႈဢွၵ်ႇၼၼ်ႉပဵၼ်ၶွၼ်ႉဝၢႆတီႈပႄလင်မၼ်းလႄႈ၊ၶေႃႈၵႂၢမ်းဢၼ်ၵူၼ်းမီးပိင်ႇၺႃႇလၢတ်ႈဢွၵ်ႇၸမ်ႉၸၢင်ႈၵႅတ်ႇၶႄပၼ်မၼ်းဢေႃႈ။
ပေႃးဢမ်ႇၸႂ်ႈႁႅင်းဝူဝ်းပေႃႈထႆၸိုင်၊ယွင်မႂ်းယေးမႂ်းတၵ်းပဝ်ႇဢေႃႈ။ ၵွပ်ႈလူၺ်ႈႁႅင်းၶဝ်ၵူၺ်းၸင်ႇၸၢင်ႈတဵမ်ဝႆႉတင်းၶဝ်ႈပိူၵ်ႇဢေႃႈ။
ၵူၼ်းၶၢမ်ႇသၢၵ်ႈသေႇဢၼ်ယုမ်ႇလႆႈၼၼ်ႉၸၢင်ႈလၢတ်ႈၵႂၢမ်းသဵတ်ႈၸႃႇတႃႇသေႇလႄႈ၊ၵေႃႉဢၼ်ဢမ်ႇယုမ်ႇလႆႈၼၼ်ႉၸမ်ႉၸၢင်ႈလၢတ်ႈၵႂၢမ်းမုသႃႇၵူၺ်းၵူၺ်းဢေႃႈ။
ၵေႃႉဢၼ်ႁူဝ်ၸႂ်ၽႅၼ်သုင်ၼၼ်ႉႁႃပိင်ႇၺႃႇသေၵေႃႈ၊ဢမ်ႇၸၢင်ႈထူပ်းၸၢင်ႈလႆႈ။ ၵေႃႉဢၼ်မီးၺၢၼ်ႇၸမ်ႉ၊လႆႈတၢင်းဢၼ်ႁုၸႅင်ႈငၢႆႈဢေႃႈ။
ယူႇၽၢတ်ႇၵၼ်တင်းၵူၼ်းမိူၵ်ႈတႃႉ။ လွင်ႈမၼ်းၸမ်ႉ၊မႂ်းဢမ်ႇၸၢင်ႈသွၼ်ဢဝ်ၵႃႈသင်တီႈမၼ်းလႃးလႃး။
ၵေႃႉဢၼ်လၵ်းလႅမ်ၼၼ်ႉၵွပ်ႈပိူဝ်ႈသင်လႄႈမၼ်းမီးပိင်ႇၺႃႇဝႃႈၼႆၸမ်ႉ၊ပဵၼ်ၵွပ်ႈပိူဝ်ႈမၼ်းႁုတၢင်းႁဵတ်းမၼ်းဢေႃႈ။ ၵူၼ်းမိူၵ်ႈၼၼ်ႉၵွပ်ႈပိူဝ်ႈသင်လႄႈမၼ်းမိူၵ်ႈဝႃႈၼႆၸမ်ႉ၊ပဵၼ်ၵွပ်ႈပိူဝ်ႈမၼ်းထၢင်ႇဝႃႈမၼ်းႁုဢေႃႈ။
ၵူၼ်းမိူၵ်ႈတင်းလၢႆဢမ်ႇဝႆႉဢယေးတၢင်းဢၼ်ႁဵတ်းတုၸရိူၵ်ႈလႄႈ၊ၵူၼ်းလီၵူၼ်းငၢမ်းၸမ်ႉတူၵ်းဢၢင်ႈၶႂ်ႈလႆႈတၢင်းဢၼ်ပိူၼ်ႈပွႆႇၶႂၢင်းပၼ်ဢပျတ်ႈဢေႃႈ။
တၢင်းဢၼ်ၸူမ်းသိူဝ်းသေဢမ်ႇဝႃႈ၊တၢင်းဢၼ်ၶူမ်ၸႂ်သေဢမ်ႇဝႃႈပဵၼ်ပုၼ်ႈတူဝ်ၸဝ်ႈၵဝ်ႇလႄႈ၊ပိူၼ်ႈတၢင်ႇၵေႃႉဢမ်ႇၸၢင်ႈၽႄဢဝ်မႅင်ႇဢဝ်တီႈမႂ်းလႃးလႃး။
မိူဝ်ႈဢၼ်ႁိူၼ်းၵူၼ်းမိူၵ်ႈလူမ်ႉပင်းၵႂႃႇယဝ်ႉၼၼ်ႉႁိူၼ်းၵူၼ်းလီၵူၼ်းငၢမ်းၸမ်ႉ၊ယင်းတင်ႈတႄႇဝႆႉယူႇဢေႃႈ။
သဵၼ်ႈတၢင်းဢၼ်မႂ်းထၢင်ႇပဵၼ်ဢၼ်မၢၼ်ႇမႅၼ်ႈၸိုဝ်ႈၸႂ်ႈၼၼ်ႉၸၢင်ႈဢွၼ်သူင်ႇၸူးတၢင်းတၢႆဢေႃႈ။
တေႃႈၵႃႈၵူၼ်းဢၼ်ယုမ်ႉၶူဝ်ၼၼ်ႉယင်းၸဵပ်းၸႂ်ယူႇလႄႈ၊မိူဝ်ႈဢၼ်တၢင်းဢၼ်သႂၢင်ႇဢၼ်သိူဝ်းသုတ်းသဵင်ႈၵႂႃႇၼၼ်ႉမီးတၢင်းဢၼ်မႆႈၸႂ်ၶီၸႂ်ယူႇၵူၺ်းဢေႃႈ။
ၵေႃႉဢၼ်ႁူဝ်ၸႂ်ၽွၵ်ႈပျၢၼ်ႇၼၼ်ႉၸၢင်ႈဢိမ်ႇတဵမ်ဝႆႉတင်းဢလူဝ်ႇၵၢင်ၸႂ်မၼ်းလႄႈ၊ၵူၼ်းလီၵူၼ်းငၢမ်းၸမ်ႉ၊ၸၢင်ႈလႆႈဢၵျူဝ်းပုၼ်ႈတၢင်းႁဵတ်းၶဝ်ၼၼ်ႉဢေႃႈ။
ၵူၼ်းငိူဝ်ႈငႃႉၸၢင်ႈယုမ်ႇၵႂၢမ်း ၵႃႈဢၼ်ပိူၼ်ႈလၢတ်ႈၼၼ်ႉလႄႈ၊ၵေႃႉဢၼ်ၺၢၼ်ႇလႅတ်းၼၼ်ႉၸမ်ႉ၊ၸၢင်ႈပႂ်ႉထိင်းယၢင်ႈတိၼ်မၼ်းဢေႃႈ။
ၵေႃႉဢၼ်မီးပိင်ႇၺႃႇၼၼ်ႉၸၢင်ႈဝႆႉသတိလႄႈဝႄႈပႅတ်ႈတုၸရိူၵ်ႈဢေႃႈ။ ၵူၼ်းမိူၵ်ႈၸမ်ႉဢမ်ႇၸၢင်ႈဝႆႉသတိလႄႈၵူၺ်းႁဵတ်းၶၼ်ၶၼ်ၽႂ်းၽႂ်းဢေႃႈ။
ၵေႃႉဢၼ်ၸႂ်ပွတ်းၸႂ်လွတ်းၼၼ်ႉၸၢင်ႈႁဵတ်းတၢင်းဢၼ်မိူၵ်ႈလႄႈ၊ၵေႃႉဢၼ်မီးပိင်ႇၺႃႇၼၼ်ႉမီးၸႂ်ဢၼ်တဵတ်ႇၼိမ်လီဢေႃႈ။
ၵူၼ်းငိူဝ်ႈငႃႉၼၼ်ႉၸၢင်ႈလႆႈၵႃႈဢၼ်ဢလူဝ်ႇၵၢင်ၸႂ်မၼ်းၶႂ်ႈႁဵတ်းမိူၵ်ႈၼၼ်ႉလႄႈ၊ၵေႃႉဢၼ်လၵ်းလႅမ်ၼၼ်ႉၸမ်ႉ၊ၸၢင်ႈလႆႈဢၵျူဝ်းတၢင်းဢၼ်ႁုၸႅင်ႈဢေႃႈ။
ၵေႃႉဢၼ်ဢမ်ႇတြႃးတၵ်းလႆႈၵူမ်ႈႁူဝ်ၵွမ်းႁူဝ်ၸူးတီႈၶဝ်ၸိူဝ်းဢၼ်လီဢၼ်ငၢမ်းၼၼ်ႉလႄႈ၊လႆႈပႃးၸႂ်ဢၼ်ၶျႃးတႅမ်ႇၶေႃယွၼ်းတၢင်းဢၼ်ၶဝ်တၵ်းပၼ်ၼႃႈလီၼၼ်ႉဢေႃႈ။
ၵူၼ်းယၢၵ်ႈၵူၼ်းၽၢၼ်ၸိုင်၊ၽူႈလႂ်ၵေႃႈဢမ်ႇၵျိူၵ်ႈ။ တေႃႈၵႃႈၵူၼ်းႁိူၼ်းၸမ်ၵၼ်တင်းမၼ်းၵေႃႈဢမ်ႇလူဝ်ႇဢမ်ႇၵျိူၵ်ႈမၼ်း။ ၵူၼ်းမၢၵ်ႈၵူၼ်းမီးၸမ်ႉမီးၵေႃႉမီးသႄႈၼမ်ၼႃႇလူင်လၢင်ဢေႃႈ။
ဢဵတ်းလူၵူၼ်းယၢၵ်ႈၵူၼ်းၽၢၼ်တႃႉ။ မႂ်းတၵ်းမီးမၢင်ႇၵလႃႇဢေႃႈ။ တၢင်းဢၼ်ႁဵတ်းဢမ်ႇပေႃးၼင်ႇႁိုဝ်တီႈပိူၼ်ႈတၢင်ႇၵေႃႉၼၼ်ႉပဵၼ်ဢပျတ်ႈဢေႃႈ။
ပေႃးမႂ်းႁဵတ်းလီၸိုင်၊ပိူၼ်ႈတၵ်းဢွၼ်ၵၼ်ယုမ်ႇယမ်ဢိင်ပိုင်ႈမႂ်းလႄႈရူဝ်ႇသေႇမႂ်းဢေႃႈ။ ၵူၺ်းၵႃႈ၊ပေႃးမႂ်းႁဵတ်းမိူၵ်ႈၸမ်ႉ၊မႂ်းႁဵတ်းဢၼ်ၽိတ်းဢၼ်ပိူင်ႈယဝ်ႉ။
ၵႆႉႁဵတ်းၵၢၼ်တႃႉ။ မႂ်းတၵ်းမီးဢၵျူဝ်းဢေႃႈ။ ပေႃးမႂ်းၵူၺ်းၼင်ႈဢုပ်ႇပိူၼ်ႈယူႇၸိုင်၊မႂ်းတၵ်းတေယၢၵ်ႈတေၽၢၼ်ၵႂႃႇဢေႃႈ။
ၵူၼ်းဢၼ်မီးပိင်ႇၺႃႇၼၼ်ႉၸၢင်ႈလႆႈၶၢမ်ႇဢဝ်ဢၵျူဝ်းတၢင်းဢၼ်မၢၵ်ႈမီးလီပဵၼ်လႄႈ၊တၢင်းမိူၵ်ႈၶဝ်ၸိူဝ်းဢၼ်မိူၵ်ႈၼၼ်ႉပဵၼ်ဢၼ်မိူၵ်ႈလွၼ်ႉလွၼ်ႉၵူၺ်းဢေႃႈ။
ၵေႃႉဢၼ်ၶၢမ်ႇသၢၵ်ႈသေႇၼၼ်ႉပေႃးမၼ်းလၢတ်ႈဢၼ်မၢၼ်ႇမႅၼ်ႈၸိုဝ်ႈၸႂ်ႈၸိုင်၊ပဵၼ်တၢင်းဢၼ်ၵႄႇသႄႇဢဝ်ဢသၢၵ်ႈပိူၼ်ႈလွတ်ႈလႄႈ၊ပေႃးမၼ်းလၢတ်ႈမုသႃႇၸိုင်၊ပဵၼ်တၢင်းဢၼ်ၶၢႆပိူၼ်ႈပႅတ်ႈဢေႃႈ။
ၵေႃႉဢၼ်ရူဝ်ႇသေႇၵူဝ်ယမ် ထႃႇဝရႃႉၽြႃး၊ ၼၼ်ႉၸၢင်ႈလႆႈဢၶႂၢင်ႉဢၼ်ယုမ်ႇယမ်တမ်းၸႂ်ဢိၵ်ႇတင်းဢၶႂၢင်ႉဢၼ်လႆႈလူင်ႉလွတ်ႈလီပုၼ်ႈမၼ်းဢိၵ်ႇတင်းပုၼ်ႈၵူၼ်းႁိူၼ်းၵူၼ်းယေးမၼ်းဢေႃႈ။
တၢင်းဢၼ်ရူဝ်ႇသေႇၵူဝ်ယမ် ထႃႇဝရႃႉၽြႃး၊ ၼၼ်ႉပဵၼ်ၼမ်ႉဢွၵ်ႇႁူးဢသၢၵ်ႈပုၼ်ႈဢၼ်တၵ်းဝႄႈပၢႆႈတူင်ႇႁႅဝ်ႉတူင်ႇၶိုမ်းတၢင်းတၢႆၼၼ်ႉဢေႃႈ။
တၢင်းဢၼ်ၶုၼ်ႁေႃၶမ်းမုၼ်ယႂ်ႇၵႃႈႁိုဝ်ၼၼ်ႉၸိုင်၊တႄႇၼိူဝ်ၵူၼ်းဝၢၼ်ႈၵူၼ်းမိူင်းမၼ်းၼမ်ၵိုၼ်းၵႃႈႁိုဝ်ၼၼ်ႉဢေႃႈ။ ပေႃးဢမ်ႇမီးၵူၼ်းဝၢၼ်ႈၵူၼ်းမိူင်းၸိုင်၊မၼ်းဢမ်ႇမီးဢၵျူဝ်းၵႃႈသင်ဢေႃႈ။
ပေႃးမႂ်းယူႇတဵတ်ႇၼိမ်လီၸိုင်၊မႂ်းပဵၼ်ၵေႃႉဢၼ်မီးပိင်ႇၺႃႇဢေႃႈ။ ပေႃးမႂ်းမီးၸႂ်ပွတ်းၸႂ်လွတ်းၸမ်ႉ၊မႂ်းၼႄပျႃးလွင်ႈဢၼ်မႂ်းပဵၼ်ၵူၼ်းမိူၵ်ႈဢေႃႈ။
တၢင်းဢၼ်ႁူဝ်ၸႂ်ၼိမ်သိမ်ႇၼၼ်ႉၸၢင်ႈႁဵတ်းႁႂ်ႈတူဝ်ၵႃႇယႃႉယူႇလီၵိၼ်ဝၢၼ်လႄႈ၊ႁူဝ်ၸႂ်ဢၼ်သီႈၵေႉႁေႈတႃပိူၼ်ႈၸမ်ႉ၊ပဵၼ်ၸိူဝ်ႉၼင်ႇတၢင်းဢၼ်ၽင်ႉဢုၵႃႈတီႈလုပ်ႇဢေႃႈ။
ပေႃးမႂ်းတဵၵ်းငႅၼ်းၵူၼ်းယၢၵ်ႈၵူၼ်းၽၢၼ်ၸိုင်၊မႂ်းသႄႉသွမ်းၽြႃးဢၼ်ၽၢၼ်ႇသၢင်းႁဵတ်းပဵၼ်ၶဝ်ၼၼ်ႉယဝ်ႉ။ တၢင်းဢၼ်ၸၢင်ႈဢဵတ်းလူၵူၼ်းယၢၵ်ႈၵူၼ်းၽၢၼ်ၸမ်ႉ၊ပဵၼ်တၢင်းဢၼ်ရူဝ်ႇသေႇၵူဝ်ယမ်မၼ်းၸဝ်ႈဢေႃႈ။
ၵူၼ်းမိူၵ်ႈလႆႈၶၢမ်ႈတၢင်းဢၼ်ဢီးလူမ်ႉၵွပ်ႈလူၺ်ႈတၢင်းႁဵတ်းဢၼ်ယုတ်ႈဢၼ်ႁၢႆႉမၼ်းၼၼ်ႉလႄႈ၊ၵူၼ်းလီၵူၼ်းငၢမ်းၸမ်ႉ၊တၢင်းႁဵတ်းဢၼ်ၶၢဝ်ၸၢင်ႇဢၼ်ၶဝ်ႁဵတ်းၼၼ်ႉၵႅတ်ႇၶႄပၼ်ၶဝ်ဢေႃႈ။
ပိင်ႇၺႃႇၵိင်းဝၢပ်ႈယူႇၵႃႈၼႂ်းႁူဝ်ၸႂ်ၵေႃႉဢၼ်လၵ်းလႅမ်ၼၼ်ႉဢေႃႈ၊ၵူၼ်းမိူၵ်ႈၸမ်ႉ၊ဢမ်ႇႁုလွင်ႈပိင်ႇၺႃႇလႃးလႃး။
တြႃးတၢင်းဢၼ်သိုဝ်ႈတေႃႇၼၼ်ႉၸၢင်ႈႁႂ်ႈၵူၼ်းဝၢၼ်ႈၵူၼ်းမိူင်းၶိုၼ်ႈယႂ်ႇမႂ်ႇသုင်လႄႈ၊ဢပျတ်ႈတုၸရိူၵ်ႈၸမ်ႉ၊ၸၢင်ႈႁႂ်ႈၵူၼ်းဝၢၼ်ႈၵူၼ်းမိူင်းလႆႈဢူၵ်းလႆႈဢၢႆဢေႃႈ။
ၶုၼ်ႁေႃၶမ်းတင်းလၢႆၵျိူၵ်ႈၸႂ်ထုၵ်ႇၸႂ်မူးမၢတ်ႈၽွင်းမိူင်းဢၼ်ၵတ်ႉၸိူဝ်းၼၼ်ႉလႄႈ၊ၶဝ်ၸၢင်ႈပၼ်တၢမ်ႇတီႈၵေႃႉဢၼ်ဢမ်ႇၵတ်ႉဢမ်ႇၶၼ်ၼၼ်ႉဢေႃႈ။
ၵႂၢမ်းတွပ်ႇဢၼ်လီဢၼ်ဝၢၼ်ၼၼ်ႉၸၢင်ႈၽေႇတေႃးသႃႉလႄႈ၊ၵႂၢမ်းဢၼ်ၶူမ်ဢၼ်ၶၼ်းၸမ်ႉ၊ၸၢင်ႈယူင်းတေႃးသႃႉဢေႃႈ။
မိူဝ်ႈဢၼ်ၵူၼ်းမီးပိင်ႇၺႃႇလၢတ်ႈၵႂၢမ်းၼၼ်ႉမၼ်းၸၢင်ႈၽႄမႅင်ႇပၼ်ၺၢၼ်ႇလႄႈ၊ၵူၼ်းမိူၵ်ႈၸမ်ႉ၊ၸၢင်ႈလၢတ်ႈဢွၵ်ႇၵႂၢမ်းဢၼ်ဢမ်ႇမီးတီႈယိပ်းတီႈၵမ်ၵူၺ်းဢေႃႈ။
ထႃႇဝရႃႉၽြႃး၊ ႁၼ်ၵႃႈဢၼ်ပဵၼ်ယူႇၵူႈတီႈၵူႈလႅၼ်ၼၼ်ႉလႄႈမၼ်းၸဝ်ႈပႂ်ႉတူၺ်းလွင်ႈတၢင်းဢၼ်ႁဝ်းႁဵတ်းလီႁိုဝ်း၊ႁဵတ်းမိူၵ်ႈႁိုဝ်းၼၼ်ႉယူႇဢေႃႈ။
ၶေႃႈၵႂၢမ်းဢၼ်ပႃးၵရုၼႃႇၼၼ်ႉၸၢင်ႈပၼ်ႁႂ်ႈဢသၢၵ်ႈလိပ်းလႄႈ၊ၵႂၢမ်းဢၼ်ႁၢဝ်ႉဢၼ်ၵျၢမ်းၸမ်ႉ၊ၸၢင်ႈယႃႉၵဝ်းၸႂ်ဝိၺိၺ်ႇမႂ်းဢေႃႈ။
တၢင်းဢၼ်ႁဵတ်းဢမ်ႇပေႃးၼင်ႇႁိုဝ်တီႈတၢင်းဢၼ်ပေႃႈမႂ်းသင်ႇသွၼ်ပၼ်ၼၼ်ႉပဵၼ်သၽေႃးဢၼ်မိူၵ်ႈလႄႈ၊တၢင်းဢၼ်ထွမ်ႇဢဝ်တုင်းတၢင်းဢၼ်မၼ်းသင်ႇသွၼ်သုင်းမႃႉၼၼ်ႉပဵၼ်သၽေႃးပိင်ႇၺႃႇဢေႃႈ။
ၵူၼ်းသိုဝ်ႈတေႃႇတင်းလၢႆ ၸၢင်ႈၸုႁွမ်သိမ်းဝႆႉၽၼ်ႇတႃႇဢုၵ်ႉၸႃႇၶဝ်လႄႈ၊ၵူၼ်းႁၢႆႉမိူၵ်ႈတင်းလၢႆၸမ်ႉၸၢင်ႈသုမ်းပႅတ်ႈၶူဝ်းၶွင်ၶဝ်ၼႂ်းၶိင်ႇဢၼ်ယၢပ်ႇၽိုတ်ႇႁွတ်ႈမႃးၼၼ်ႉဢေႃႈ။
ၺၢၼ်ႇဢၼ်ႁုဢၼ်ၸႅင်ႈၼၼ်ႉပဵၼ်ဢၼ်ၵူၼ်းမိူၵ်ႈၽႄမႅင်ႇပၼ်ဢမ်ႇၸႂ်ႈ၊ပဵၼ်ဢၼ်ၵူၼ်းမီးပိင်ႇၺႃႇၽႄမႅင်ႇပၼ်ဢေႃႈ။
ထႃႇဝရႃႉၽြႃး၊ ၵျိူၵ်ႈႁၵ်ႉထုၵ်ႇၸႂ်မိူဝ်ႈဢၼ်ၵူၼ်းလီၵူၼ်းငၢမ်းသူးတွင်းၼၼ်ႉလႄႈ၊ငိၼ်းၸင်းၶိူင်ႈတၢင်းလူႇဢၼ်ၵူၼ်းႁၢႆႉမိူၵ်ႈပႃးမႃးၵႃႈတီႈမၼ်းၸဝ်ႈၼၼ်ႉဢေႃႈ။
ထႃႇဝရႃႉၽြႃး၊ ငိၼ်းၸင်းသဵၼ်ႈတၢင်းၵေႃႉဢၼ်ႁၢႆႉမိူၵ်ႈၼၼ်ႉလႄႈ၊ႁၵ်ႉပႅင်းၶဝ်ၸိူဝ်းဢၼ်ႁဵတ်းသိုဝ်ႈသိုဝ်ႈတေႃႇတေႃႇၼၼ်ႉဢေႃႈ။
ပေႃးမႂ်းႁဵတ်းၽိတ်းႁဵတ်းပိူင်ႈၸိုင်၊မႂ်းတၵ်းလႆႈၶၢမ်ႇတၢမ်ႇဢၼ်ၼၵ်းၼႃႇဢေႃႈ။ ပေႃးမႂ်းဢမ်ႇၶၢမ်ႇဢဝ်တၢင်းဢၼ်သင်ႇသွၼ်သုင်းမႃႉၸိုင်၊မႂ်းတၵ်းတၢႆဢေႃႈ။
မိူင်းမရၼႃႉဢၼ်ဝႃႈမိူင်းတၢင်းလုတၢင်းလႅဝ်ၼၼ်ႉယင်းၽုၺ်ႇပိုတ်ႇထၢင်ႇသႃးဝႆႉၵႃႈတီႈၽၢႆႇၼႃႈ ထႃႇဝရႃႉၽြႃး၊ ယူႇဢေႃႈ။ ႁူဝ်ၸႂ်ၵူၼ်းတင်းလၢႆယဵင်ႈၶႅၼ်းထၢင်ႇသႃးယူႇၵႃႈတီႈၽၢႆႇၼႃႈမၼ်းၸဝ်ႈဢမၢၼ်ႇၶၼ်ပဵၼ်ဢေႃႈ။
ၶဝ်ၸိူဝ်းဢၼ်ၸႂ်ၽႅၼ်သုင်ၼၼ်ႉဢမ်ႇၶႂ်ႈၶၢမ်ႇဢဝ်တၢင်းဢၼ်သင်ႇသွၼ်မႄးပၼ်ၼၼ်ႉလႄႈ၊ၶဝ်ဢမ်ႇတွၼ်ႉတွင်ႈထၢမ်ဢဝ်တၢင်းၵျၢမ်ႇတီႈၵူၼ်းမီးပိင်ႇၺႃႇၼၼ်ႉ။
မိူဝ်ႈဢၼ်ၵူၼ်းမီးၸႂ်ဢၼ်ၸူမ်းဢၼ်သိူဝ်းၸိုင်၊ၶဝ်ယုမ်ႉဝႆႉလႄႈ၊မိူဝ်ႈဢၼ်ၶဝ်မီးတၢင်းဢၼ်ၶီဢၼ်ၼႅင်ၸိုင်၊ၶဝ်မီးၼႃႈငိူဝ်ႈၼႃႈငဝ်ဝႆႉဢေႃႈ။
ၵေႃႉဢၼ်ၺၢၼ်ႇလီၼၼ်ႉၶႂ်ႈသွၼ်ဢဝ်ယူႇလႄႈ၊ၵူၼ်းမိူၵ်ႈၸမ်ႉပျေႇၸႂ်လူၺ်ႈတၢင်းဢၼ်မၼ်းဢမ်ႇႁုၵႃႈသင်ၼၼ်ႉယူႇဢေႃႈ။
ဢသၢၵ်ႈတၢၼ်းၵူၼ်းယၢၵ်ႈၵူၼ်းၽၢၼ်ၸိုင်၊လႆႈႁဵတ်းယၢပ်ႇႁဵတ်းယဵၼ်းယူႇလႄႈ၊ၵူၼ်းမူၼ်ႈၵူၼ်းပျေႃႇတင်းလၢႆၸမ်ႉပဵၼ်ပွႆးပဵၼ်လၢမ်းယူႇတႃႇသေႇဢေႃႈ။
တၢင်းဢၼ်ပဵၼ်ၵူၼ်းၽၢၼ်လႄႈၵူဝ်ယမ် ထႃႇဝရႃႉၽြႃး၊ ယူႇၼၼ်ႉယဵင်ႈၶႅၼ်းလီၼႃႇသေၵူၼ်းမၢၵ်ႇၵူၼ်းမီးဢၼ်မီးၸႂ်တုၵ်ႉၶႃႉယူႇၼၼ်ႉဢေႃႈ။
တၢင်းဢၼ်ၵိၼ်ၽၵ်းၶဵဝ်လူၺ်ႈၵၼ်တင်းတႆးၵေႃႉတႆးသႄႈဢၼ်ႁၵ်ႉၵၼ်ႁွမ်ၵၼ်ၼၼ်ႉယဵင်ႈၶႅၼ်းလီၼႃႇသေတၢင်းဢၼ်ၵိၼ်ၼိူဝ်ႉၵိၼ်ပႃၵႃႈတီႈဢၼ်မီးတၢင်းဢၼ်ငိၼ်းၸင်းၵၼ်ၼၼ်ႉဢေႃႈ။
ၵေႃႉဢၼ်ၸႂ်မႆႈသႆႈလိူတ်ႇၼၼ်ႉၸၢင်ႈႁႂ်ႈၽိတ်းၵၼ်မေႃးၵၼ်လႄႈ၊ၵေႃႉဢၼ်ၸႂ်ၼိမ်သိမ်ႇၼၼ်ႉၸမ်ႉ၊ၸၢင်ႈႁႂ်ႈတၢင်းၽိတ်းၵၼ်ထၢတ်ႇယဵၼ်ဢေႃႈ။
ပေႃးမႂ်းၶၢၼ်ႉဢိူၼ်ၸိုင်၊မႂ်းတၵ်းထူပ်းၺႃးတၢင်းယၢပ်ႇတၢင်းၽိုတ်ႇၵူႈတီႈၵူႈလႅၼ်လႄႈ၊ပေႃးမႂ်းသိုဝ်ႈလီယူဝ်းလီၸိုင်၊မႂ်းတၵ်းလွတ်ႈၽေးဢေႃႈ။
လုၵ်ႈၸၢႆးဢၼ်မီးပိင်ႇၺႃႇၼၼ်ႉၸၢင်ႈႁႂ်ႈပေႃႈမၼ်းလႆႈၸူမ်းသိူဝ်းလႄႈ၊လုၵ်ႈၸၢႆးဢၼ်မိူၵ်ႈၸမ်ႉ၊ၸၢင်ႈႁဵတ်းဢမ်ႇပေႃးၼင်ႇႁိုဝ်တီႈမႄႈမၼ်းဢေႃႈ။
ၵူၼ်းငိူဝ်ႈၸိုင်၊ၸၢင်ႈမူၼ်ႈပျေႃႇလူၺ်ႈတၢင်းဢၼ်မၼ်းမိူၵ်ႈၼၼ်ႉလႄႈ၊ၵေႃႉဢၼ်မီးပိင်ႇၺႃႇၸမ်ႉ၊ၸၢင်ႈႁဵတ်းသိုဝ်ႈသိုဝ်ႈတေႃႇတေႃႇဢေႃႈ။
ပေႃးဢမ်ႇမီးတၢင်းဢၼ်တိူင်ႇပၢင်ႇၵၼ်ၸိုင်၊တၢင်းဢၼ်ၶိုင်ပွင်ဝႆႉၼၼ်ႉၸၢင်ႈလုၵႂႃႇဢေႃႈ။ ပေႃးမီးၵေႃႉဢၼ်ပၼ်တၢင်းၵျၢမ်ႇတၢင်းပွင်ၼၼ်ႉၼမ်ၼႃႇၸင်ႇတၵ်းတေဢွင်ႇမႅင်ႇဢေႃႈ။
ပေႃးထူပ်းၶေႃႈၵႂၢမ်းဢၼ်ထုၵ်ႇဢၼ်ဢၢပ်ႈၵၼ်တင်းၼႃႈၵၢၼ်ဢၼ်သင်ႇထုၵ်ႇၼၼ်ႉၸိုင်၊ပဵၼ်တၢင်းဢၼ်လီၸူမ်းသိူဝ်းၼႃႇလူင်လၢင်ဢေႃႈ။
ၵူၼ်းမီးပိင်ႇၺႃႇၸၢင်ႈပႆၸွမ်းၵႂႃႇၼႂ်းသဵၼ်ႈတၢင်းဢၼ်ဢွၼ်သူင်ႇၸူးမိူင်းမရၼႃႉၽၢႆႇတၢင်းတႂ်ႈဢမ်ႇၸႂ်ႈ။ ၶဝ်ၸၢင်ႈပႆၸွမ်းၵႂႃႇၼႂ်းသဵၼ်ႈတၢင်းဢၼ်ဢွၼ်သူင်ႇၸူးမိူင်းဢသၢၵ်ႈၽၢႆႇတၢင်းၼိူဝ်ဢေႃႈ။
ထႃႇဝရႃႉၽြႃး၊ ထူၺ်ႈထွၼ်ႁိူၼ်းၵေႃႉဢၼ်ၸႂ်ၽႅၼ်သုင်ၼၼ်ႉပႅတ်ႈလႄႈ၊ဢုၵ်ႉၸႃႇၸေးၸိမ်ႇမႄႈမၢႆႈတင်းလၢႆၸမ်ႉမၼ်းၸဝ်ႈႁႄႉၶႅၼ်ပၼ်ဢေႃႈ။
ထႃႇဝရႃႉၽြႃး၊ ငိၼ်းၸင်းတၢင်းၵျၢမ်ႇတၢင်းပွင်ဢၼ်ဢမ်ႇတြႃးလႄႈ၊မၼ်းၸဝ်ႈၵျိူၵ်ႈႁၵ်ႉထုၵ်ႇၸႂ်ၵႂၢမ်းဢၼ်မူတ်းသႂ်ၼၼ်ႉဢေႃႈ။
ပေႃးမႂ်းႁႃငိုၼ်းၶမ်းဢၼ်ဢမ်ႇတြႃးၸိုင်၊ၸၢင်ႈႁႂ်ႈၵူၼ်းႁိူၼ်းၵူၼ်းယေးမႂ်းထူပ်းၽေးဢေႃႈ။ ပေႃးမႂ်းဢမ်ႇၵိၼ်လၢပ်ႈၵိၼ်သူးၸိုင်၊ဢသၢၵ်ႈတၵ်းတေၵတ်းယဵၼ်ၶျၢမ်းသႃႇဢေႃႈ။
ၵူၼ်းလီၵူၼ်းငၢမ်းၶႆႈၸႂ်ၸဵၼ်းၸႃးတူၺ်းသေယဝ်ႉၸင်ႇၶိုၼ်းလၢတ်ႈၶိုၼ်းတွပ်ႇၶေႃႈၵႂၢမ်းမၼ်းဢေႃႈ။ ၵူၼ်းမိူၵ်ႈၸမ်ႉၶိုၼ်းတွပ်ႇၶေႃႈၵႂၢမ်းၽႂ်းၼႃႇလႄႈၸၢင်ႈထူပ်းၽေးဢေႃႈ။
မိူဝ်ႈဢၼ်ၵူၼ်းလီၵူၼ်းငၢမ်းသူးတွင်းၸိုင်၊ ထႃႇဝရႃႉၽြႃး၊ ထွမ်ႇဢဝ်လႄႈ၊မၼ်းၸဝ်ႈဢမ်ႇဝႆႉဢယေးတီႈၵူၼ်းမိူၵ်ႈၸိူဝ်းၼၼ်ႉဢေႃႈ။
ၼႃႈဢၼ်ယုမ်ႉယူႇၼၼ်ႉၸၢင်ႈႁႂ်ႈမႂ်းၸူမ်းသိူဝ်းလႄႈ၊ၶၢဝ်ႇငၢဝ်းဢၼ်လီၼၼ်ႉၸၢင်ႈႁႂ်ႈမႂ်းလီၸႂ်ဢေႃႈ။
ပေႃးမႂ်းမေႃထွမ်ႇဢဝ်ၵႂၢမ်းဢၼ်သင်ႇသွၼ်မႄးပၼ်ၸိုင်၊မႂ်းပဵၼ်ၵူၼ်းမီးပိင်ႇၺႃႇဢေႃႈ။
ပေႃးမႂ်းဢမ်ႇၶၢမ်ႇသွၼ်ဢဝ်ၸိုင်၊မႂ်းယႃႉတူဝ်ၸဝ်ႈၵဝ်ႇလုလႄႈ၊ပေႃးမႂ်းၸၢင်ႈထွမ်ႇဢဝ်တုင်းဢဝ်တၢင်းဢၼ်သင်ႇသွၼ်မႄးပၼ်ၸိုင်၊ပိင်ႇၺႃႇမႂ်းတၵ်းယဵင်ႈၶႅၼ်းတူဝ်းမႃးဢေႃႈ။
တၢင်းဢၼ်ရူဝ်ႇသေႇၵူဝ်ယမ် ထႃႇဝရႃႉၽြႃး၊ ၼၼ်ႉႁႂ်ႈဢတၢတ်ႈပိင်ႇၺႃႇပေႃႇပဵၼ်မႃးဢေႃႈ။ မႂ်းတၵ်းလႆႈမီးၸႂ်ဢၼ်ဢူၼ်ႈဢွၼ်ႇၶျႃးတႅမ်ႇဢွၼ်တၢင်းလႄႈၸင်ႇတေလႆႈၶၢမ်ႇဢဝ်တၢင်းဢၼ်ပိူၼ်ႈတၢင်ႇၵေႃႉရူဝ်ႇသေႇဢေႃႈ။
တၢင်းဢၼ်ႁူဝ်ၸႂ်ၵျၢမ်ႇပွင်ၼၼ်ႉၸၢပ်ႈသႅင်ႇၵၼ်တင်းၵူၼ်းဢေႃႈ။ ၵူၺ်းၵႃႈ၊ၶေႃႈၵႂၢမ်းဢၼ်ၶိုၼ်းမွၵ်ႇၶိုၼ်းလၢတ်ႈၼၼ်ႉၸမ်ႉလုၵ်ႉတီႈ ထႃႇဝရႃႉၽြႃး၊ မႃးဢေႃႈ။
မႂ်းၸၢင်ႈထၢင်ႇဝႃႈၵႃႈဢၼ်မႂ်းႁဵတ်းၼၼ်ႉပဵၼ်ဢၼ်သိုဝ်ႈဢၼ်တြႃးဢေႃႈ။ ၵူၺ်းၵႃႈ၊ ထႃႇဝရႃႉၽြႃး၊ ၸင်ႈႁိဝ်ႈတူၺ်းၸႂ်သၽေႃးမႂ်းၼၼ်ႉယူႇဢေႃႈ။
ဢဝ်ၼႃႈၵၢၼ်တၢင်းႁဵတ်းမႂ်းဢၢပ်ႈပၼ်တီႈ ထႃႇဝရႃႉၽြႃး၊ တႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊တၢင်းၵျၢမ်ႇတၢင်းပွင်မႂ်း တၵ်းဢွင်ႇမႅင်ႇဢေႃႈ။
ၵႃႈဢၼ် ထႃႇဝရႃႉၽြႃး၊ ပွင်ႁဵတ်းၵူႈသမ်ႇၵူႈပိူင်ၼၼ်ႉမၼ်းမီးတီႈဢၼ်ဢဵၼ်းဢၢၼ်းတၵ်းႁႂ်ႈပဵၼ်ၼၼ်ႉဢေႃႈ။ တေႃႈၵႃႈၵူၼ်းမိူၵ်ႈယင်းမီးဝႆႉပုၼ်ႈတၵ်းတေလႆႈၶၢမ်ႇၽေးတၢမ်ႇၼၼ်ႉယဝ်ႉဢေႃႈ။
ထႃႇဝရႃႉၽြႃး၊ ငိၼ်းၸင်းၶဝ်ၸိူဝ်းဢၼ်ၸႂ်ၽႅၼ်သုင်ၵူႈၵေႃႉၵူႈၵူၼ်းၼၼ်ႉလႄႈမၼ်းၸဝ်ႈတၵ်းဢမ်ႇႁႂ်ႈၶဝ်ၵၢင်းလွတ်ႈတင်းတၢင်းဢၼ်ပၼ်တၢမ်ႇဢပျတ်ႈၼၼ်ႉလႃးလႃး။
မီးတၢင်းဢၼ်ရူဝ်ႇသေႇလေႇမၢတ်ႈတင်းတၢင်းဢၼ်ပႂ်ႉသဵတ်ႈၸႃႇတႃႉ။ ၽြႃးပဵၼ်ၸဝ်ႈတၵ်းပွႆႇလွတ်ႈဢပျတ်ႈမႂ်းဢေႃႈ။ ထွမ်ႇဢဝ် ထႃႇဝရႃႉၽြႃး၊ တႃႉ။ ၽေးဢၼ်ႁၢႆႉဢၼ်မိူၵ်ႈတၵ်းဢမ်ႇတူၵ်းထိုင်တီႈမႂ်းဢေႃႈ။
ပေႃးမႂ်းပဵၼ်ၵေႃႉဢၼ်ထုၵ်ႇၸႂ်ၵျိူၵ်ႈၸႂ် ထႃႇဝရႃႉၽြႃး၊ ၸိုင်၊မၼ်းၸဝ်ႈတၵ်းႁႂ်ႈရၢၼ်ႇသူႇမႂ်းပဵၼ်ၵေႃႉသႄႈမႃးဢေႃႈ။
တၢင်းဢၼ်မီးဢုၵ်ႉၸႃႇဢိတ်းဢွၼ်ႇၼိုင်ႈဢၼ်ႁဵတ်းသိုဝ်ႈသိုဝ်ႈယူဝ်းယူဝ်းလႄႈလႆႈမႃးၼၼ်ႉယဵင်ႈၶႅၼ်းလီၼႃႇသေဢုၵ်ႉၸႃႇဢၼ်မီးၼမ်ၼႃႇဢၼ်လႆႈလူၺ်ႈလွင်ႈဢၼ်ဢမ်ႇတြႃးၼၼ်ႉဢေႃႈ။
မႂ်းမီးဢၶႂၢင်ႉဢၼ်ၶိုင်ပွင်ၼႃႈၵၢၼ်မႂ်းဢေႃႈ။ ၵူၺ်းၵႃႈ၊ၽြႃးပဵၼ်ၸဝ်ႈတၵ်းၼႄပၼ်လၢႆးဢၼ်မႂ်းတၵ်းလႆႈႁဵတ်းၸိူဝ်ႉၼင်ႇႁိုဝ်ၼၼ်ႉဢေႃႈ။
ပျႃႇတိၵ်ႈၸဝ်ႈမီးယူႇၵႃႈၼႂ်းသူပ်းၶုၼ်ႁေႃၶမ်းလႄႈ၊သူပ်းမၼ်းဢမ်ႇလႆႈၽိတ်းပိူင်ႈၼႂ်းတၢင်းဢၼ်ၸီႇယၢင်ႇတြႃးၼၼ်ႉ။
ထႃႇဝရႃႉၽြႃး၊ မီးဢလူဝ်ႇၶႂ်ႈႁႂ်ႈမၢၵ်ႇလုၵ်ႈၶၼ်တင်းယွႆးပဵၼ်ဢၼ်မၢၼ်ႇဢၼ်ၸပ်းလီလီလႄႈ၊တၢင်းဢၼ်ၸင်ႈဢၼ်တူင်ၵူႈၸိူဝ်ႉၵူႈဢၼ်ႁႂ်ႈမၢၼ်ႇမႅၼ်ႈၸိုဝ်ႈၸႂ်ႈဝႆႉဢေႃႈ။
ၶုၼ်ႁေႃၶမ်းတင်းလၢႆလီႁင်ႈဢဵတ်ႇသဵတ်ႇတုၸရိူၵ်ႈ၊ၵွပ်ႈပိူဝ်ႈတၢင်းဢၼ်ၸီႇယၢင်ႇၸွမ်းၼင်ႇတြႃးၼၼ်ႉပဵၼ်လွင်ႈတၢင်းဢၼ်ႁႂ်ႈယႃႇၸႃႉပလၢင်ႇၶဝ်တႄႇမၼ်ႈဢေႃႈ။
ၶုၼ်ႁေႃၶမ်းမီးဢလူဝ်ႇၶႂ်ႈငိၼ်းၵႂၢမ်းသဵတ်ႈၸႃႇလႄႈထုၵ်ႇၸႂ်ၵေႃႉဢၼ်လၢတ်ႈၵႂၢမ်းၼၼ်ႉၼၼ်ႉဢေႃႈ။
တၢင်းဢၼ်ၶုၼ်ႁေႃၶမ်းဢွၵ်ႇတေႃးသႃႉၼၼ်ႉပဵၼ်တမၢၼ်ႇတၢင်းတၢႆလႄႈၵူၼ်းမီးပိင်ႇၺႃႇၸၢင်ႈၽေႇၸၢင်ႈၵႄႈပၼ်ဢေႃႈ။
ၵွပ်ႈပိူဝ်ႈတၢင်းဢၼ်ၼႃႈၶုၼ်ႁေႃၶမ်းသႂၢင်ႇသိူဝ်းၼၼ်ႉဢသၢၵ်ႈၵတ်းယဵၼ်ၶျၢမ်းသႃႇလႄႈၵျေးၸူးမၼ်းပဵၼ်ၸိူဝ်ႉၼင်ႇမွၵ်ႇၵုမ်ႈဢၼ်ပၼ်ၽူၼ်ႁူဝ်ပီၼၼ်ႉဢေႃႈ။
တၢင်းဢၼ်လႆႈပိင်ႇၺႃႇတင်းၺၢၼ်ႇပဵၼ်ဢၼ်လီၼႃႇ၊ပဵၼ်ဢၼ်ယဵင်ႈၶႅၼ်းလီၼႃႇသေတၢင်းဢၼ်လႆႈငိုၼ်းလႆႈၶမ်းၼၼ်ႉလူးၵွၼ်ႇဢေႃႈ။
ၶဝ်ၸိူဝ်းဢၼ်လီဢၼ်ငၢမ်းၼၼ်ႉပႆၸွမ်းသဵၼ်ႈတၢင်းဢၼ်ဝႄႈပႅတ်ႈတုၸရိူၵ်ႈဢေႃႈ။ ပိူဝ်ႈၼႆလႄႈပႂ်ႉတူၺ်းသဵၼ်ႈတၢင်းဢၼ်မႂ်းၵႂႃႇတီႈလႂ်ၼၼ်ႉတႃႉ။ မၼ်းတၵ်းၵႄႇသႄႇဢသၢၵ်ႈမႂ်းဢေႃႈ။
မႃႇၼႃႉၸႂ်သုင်ၸၢင်ႈၸုင်ဢဝ်မႂ်းၵႂႃႇသူင်ႇတီႈဢၼ်လုဢၼ်လႅဝ်လႄႈ၊သၽေႃးဢၼ်ပူၵ်းပႅၼ်ၽႅၼ်သုင်ၸၢင်ႈသူင်ႇတီႈဢၼ်တူၵ်းတႅမ်ႇဢေႃႈ။
တၢင်းဢၼ်မီးၸႂ်ၶျႃးတႅမ်ႇလႄႈပဵၼ်ၵူၼ်းၽၢၼ်ယူႇၼၼ်ႉယဵင်ႈၶႅၼ်းလီၼႃႇသေၵေႃႉဢၼ်ႁူဝ်ၸႂ်ပူၵ်းပႅၼ်ၽႅၼ်သုင်လႄႈၽႄမႅင်ႇဢဝ်ဢုၵ်ႉၸႃႇဢၼ်ႁိမ်လႆႈမႃးၼၼ်ႉဢေႃႈ။
ဝႆႉသတိတီႈၵႃႈဢၼ်မႂ်းလႆႈသွၼ်ဢဝ်ၸိူဝ်းၼၼ်ႉတႃႉ။ မႂ်းတၵ်းတေလႆႈဢွင်ႇမႅင်ႇဢေႃႈ။ ယုမ်ႇယမ်ဢိင်ပိုင်ႈ ထႃႇဝရႃႉၽြႃး၊ တႃႉ။ မႂ်းတၵ်းမီးမၢင်ႇၵလႃႇဢေႃႈ။
ၶဝ်ၸိူဝ်းဢၼ်မီးပိင်ႇၺႃႇလႄႈၸႂ်သၽေႃးၵႄႇထူၼ်ႈၼၼ်ႉပိူၼ်ႈႁွင်ႉႁဵၵ်ႈၶဝ်ဝႃႈၵူၼ်းႁုၵူၼ်းၸႅင်ႈဢေႃႈ။ ၶေႃႈၵႂၢမ်းဢၼ်လီဢၼ်ဝၢၼ်ၼၼ်ႉၵေႃႈ ၸၢင်ႈႁႂ်ႈပိင်ႇၺႃႇၺၢၼ်ႇယႂ်ႇၽႄႈတူဝ်းတွၼ်းမႃးဢေႃႈ။
ပိင်ႇၺႃႇပဵၼ်ၼမ်ႉဢွၵ်ႇႁူးဢသၢၵ်ႈတီႈၵူၼ်းမီးပိင်ႇၺႃႇလႄႈ၊တၢင်းဢၼ်သွၼ်ပၼ်ပိင်ႇၺႃႇတီႈၵူၼ်းမိူၵ်ႈၼၼ်ႉပဵၼ်ဢၼ်သုမ်းဢၶိင်ႇပႅတ်ႈလၢႆလၢႆၵူၺ်းဢေႃႈ။
ၵေႃႉဢၼ်မီးၺၢၼ်ႇၼၼ်ႉၸၢင်ႈၶႆႈၸႂ်ၸဵၼ်းၸႃးဢွၼ်တၢင်းယဝ်ႉၸင်ႇ လၢတ်ႈၵႂၢမ်းလႄႈ၊ၼမ်ႉသူပ်းၼမ်ႉၵႂၢမ်းမၼ်းယဵင်ႈၶႅၼ်းထႅင်ႈပၼ်ပိင်ႇၺႃႇတိၵ်းတိၵ်းယူႇဢေႃႈ။
ၵႂၢမ်းဢၼ်သႃႇယႃႇလီငၢမ်းၼၼ်ႉပဵၼ်ၸိူဝ်ႉၼင်ႇႁူဝ်ၼမ်ႉႁူင်းၽိုင်ႈလႄႈ၊ဝၢၼ်တီႈၸႂ်တီႈၶေႃးႁႂ်ႈပဵၼ်ဢဵၼ်ပဵၼ်ႁႅင်းတီႈတူဝ်ၶၼ်ႇထႃႇဢေႃႈ။
သဵၼ်ႈတၢင်းဢၼ်မႂ်းထၢင်ႇပဵၼ်တၢင်းဢၼ်ၸိုဝ်ႈဢၼ်ၸႂ်ႈၼၼ်ႉၸၢင်ႈဢွၼ်သူင်ႇတီႈတၢင်းတၢႆဢေႃႈ။
ၵူၼ်းႁဵတ်းၵၢၼ်ဢၼ်တွင်ႉမႆႈၼၼ်ႉမၼ်းယဵင်ႈၶႅၼ်းလႆႈၵႆႉႁဵတ်းၵၢၼ်ၼႃႇၵွပ်ႈပိူဝ်ႈသူပ်းမၼ်းယွၼ်းၼၼ်ႉဢေႃႈ။
ၵူၼ်းမိူၵ်ႈၸိုင်၊ၵျၢမ်ႇပွင်ႁႂ်ႈလႆႈႁဵတ်းၶဵၼ်သႂ်ႇပိူၼ်ႈတၢင်ႇၵေႃႉယူႇလႄႈ၊တေႃႈၵႃႈၶေႃႈၵႂၢမ်းမၼ်းယင်းပဵၼ်ၸိူဝ်ႉၼင်ႇၽႆးဢၼ်မႆႈယူႇၼၼ်ႉဢေႃႈ။
ၵူၼ်းႁၢႆႉမိူၵ်ႈတင်းလၢႆၸၢင်ႈၶႃႉၸိုဝ်ႈၶၢႆသဵင်ပိူၼ်ႈလႄႈ၊ၵႂၢမ်းသွပ်ႉသႅပ်ႉၵေႃႈၸၢင်ႈသႄႇသူၼ်းႁႂ်ႈၵေႃႉသႄႈၵၼ်ဢၼ်ႁၵ်ႉၵၼ်ၼၼ်ႉၽၢတ်ႇၽႄၵၼ်ဢေႃႈ။
ၵေႃႉဢၼ်ႁၢဝ်ႉၵျၢမ်းၼၼ်ႉၸၢင်ႈပႅတ်ႉလႅၼ်ၵိၼ်ၵေႃႉသႄႈတူဝ်ၸဝ်ႈၵဝ်ႇလႄႈၸူဝ်းဢဝ်ၵႂႃႇၵႃႈၼႂ်းသဵၼ်ႈတၢင်းဢၼ်ဢမ်ႇလီၼၼ်ႉဢေႃႈ။
ဝႆႉသတိၵူၼ်းၸိူဝ်းဢၼ်ၵၢပ်ႈၶဵဝ်ႈၵၢပ်ႈၵၢင်း၊ၽႅပ်ႉတႃလိဝ်တႃတီႈမႂ်းၼၼ်ႉတႃႉ။ ၶဝ်ၸၢင်ႈၵျၢမ်ႇပွင်လွင်ႈဢၼ်ဢမ်ႇလီတီႈမႂ်းဢေႃႈ။
ၶူၼ်ႁူဝ်ႁွၵ်ႇပဵၼ်သရၽူႇဢၼ်မီးမုၼ်သရေႇလႄႈပဵၼ်ဢၼ်လႆႈဢၵျူဝ်းၵွပ်ႈပိူဝ်ႈဢၵျၢင်ႉတၢင်းဢၼ်သိုဝ်ႈတေႃႇၼၼ်ႉဢေႃႈ။
ၵေႃႉဢၼ်ၸႂ်ယႂ်ႇၸႂ်ယၢဝ်းၼၼ်ႉယဵင်ႈၶႅၼ်းလီတွၼ်းၼႃႇသေၵေႃႉဢၼ်ႁႅင်းယႂ်ႇၼၼ်ႉလႄႈ၊တၢင်းဢၼ်ပႄႉၸႂ်ဢုပ်ႉထိင်းတူဝ်ၸဝ်ႈၵဝ်ႇလႆႈၼၼ်ႉယဵင်ႈၶႅၼ်းလီတွၼ်းၼႃႇသေတၢင်းဢၼ်ပႄႉၼႅင်ႇဢုပ်ႉပိူင်ႇတင်းဝဵင်းၼၼ်ႉဢေႃႈ။
ၵူၼ်းၸၢင်ႈဢဝ်လိၵ်ႈတူၵ်းၸႃႇၵွၵ်ႈႁႂ်ႈလႆႈႁုဢလူဝ်ႇၽြႃးပဵၼ်ၸဝ်ႈဢေႃႈ။ ၵူၺ်းၵႃႈ၊တူဝ်ၽြႃးပဵၼ်ၸဝ်ႈတႅပ်းတတ်းပၼ်လွင်ႈတၢင်းတင်းသဵင်ႈတင်းမူတ်းဢေႃႈ။
တၢင်းဢၼ်ၵိၼ်ၶဝ်ႈယဵၼ်ႁႅင်ႈတႃႇၵမ်းၼိုင်ႈလူၺ်ႈၸႂ်ဢၼ်ၼိမ်လီၼၼ်ႉယဵင်ႈၶႅၼ်းလီၼႃႇသေတၢင်းဢၼ်ၵိၼ်ၶဝ်ႈလီၽၵ်းဝၢၼ်ၵႃႈၼႂ်းႁိူၼ်းဢၼ်မီးတၢင်းၽိတ်းၵၼ်ၼၼ်ႉဢေႃႈ။
ၶႃႈဢၼ်မီးပိင်ႇၺႃႇၼၼ်ႉၸၢင်ႈလႆႈဢုပ်ႉၵႃႈၼိူဝ်လုၵ်ႈၸၢႆးၸဝ်ႈမၼ်းဢၼ်ဢမ်ႇပွင်ႇလွင်ႈပွင်ႇတႃၼၼ်ႉလႄႈယင်းၸၢင်ႈလႆႈၶၢမ်ႇဢမူၺ်ႇၸိူဝ်ႉၼင်ႇပီႈဢၢႆႈၼွင်ႉၸၢႆးၵေႃႉၼိုင်ႈၼၼ်ႉဢေႃႈ။
ငိုၼ်းၶမ်းၸိုင်၊ဢဝ်တင်းမိုင်ႈတင်းၽႆးလႄႈၸႅတ်ႈၶႃႇတူၺ်းဢေႃႈ။ ႁူဝ်ၸႂ်ၸမ်ႉ ထႃႇဝရႃႉၽြႃး၊ ၸႅတ်ႈသေးဢေႃႈ။
ၵူၼ်းႁၢႆႉမိူၵ်ႈၸၢင်ႈထွမ်ႇဢဝ်ဢၵျၢမ်ႇၺၢၼ်ႇဢၼ်ႁၢႆႉဢၼ်ယုတ်ႈလႄႈ၊ၵူၼ်းပႅတ်ႉၵူၼ်းလႅၼ်ၵေႃႈၸၢင်ႈထွမ်ႇဢဝ်ဢၵျၢမ်ႇၺၢၼ်ႇဢၼ်ၵူတ်ႉဢၼ်ငေႃးဢေႃႈ။
ပေႃးမႂ်းၶူဝ်တေႃႇၵူၼ်းယၢၵ်ႈၵူၼ်းၽၢၼ်ၸိုင်၊ပဵၼ်တၢင်းဢၼ်မႂ်းသႄႉသွမ်းၽြႃးဢၼ်ၽၢၼ်ႇသၢင်းႁဵတ်းပဵၼ်မၼ်းၼၼ်ႉဢေႃႈ။ ပေႃးမႂ်းၸူမ်းသိူဝ်းၵွပ်ႈပိူဝ်ႈပိူၼ်ႈႁွတ်ႈတုၵ်ႉၶႃႉၼၼ်ႉၸိုင်၊မႂ်းတၵ်းတေလႆႈၶၢမ်ႇတၢမ်ႇဢပျတ်ႈဢေႃႈ။
ၵူၼ်းထဝ်ႈၸၢင်ႈဢဝ်ၵုင်ႇဢဝ်မုၼ်ၵွပ်ႈလူၺ်ႈလၢၼ်လဵၼ်မၼ်းတင်းလၢႆမိူၼ်ၸိူဝ်ႉၼင်ႇလုၵ်ႈဢွၼ်ႇၸၢႆးတင်းလၢႆဢဝ်ၵုင်ႇဢဝ်မုၼ်ၵွပ်ႈလူၺ်ႈပေႃႈၶဝ်ၼၼ်ႉဢေႃႈ။
ၶုၼ်ၸိူဝ်းဢၼ်ပိူၼ်ႈရူဝ်ႇသေႇလေႇမၢတ်ႈၼၼ်ႉဢမ်ႇလၢတ်ႈၵႂၢမ်းမုသႃႇ။ ၵႂၢမ်းဢၼ်မျၢတ်ႈဢၼ်လီၼၼ်ႉဢမ်ႇၵိုင်ႇၵၼ်တင်းၵူၼ်းမိူၵ်ႈဢေႃႈ။
ၵူၼ်းၵေႃႉဢၼ်ပၼ်သူးပၼ်လၢပ်ႈၼၼ်ႉၸၢင်ႈထၢင်ႇဝႃႈသူးလၢပ်ႈပဵၼ်သႅင်လီသႅင်မျၢတ်ႈလႄႈ၊ၶဝ်ယုမ်ႇဝႃႈသႅင်ၼၼ်ႉႁဵတ်းပဵၼ်လႆႈၵူႈမဵဝ်းဢေႃႈ။
ပေႃးမႂ်းၶႂ်ႈႁႂ်ႈပိူၼ်ႈႁၵ်ႉမႂ်းၸိုင်၊ပွႆႇၶႂၢင်းပၼ်တၢင်းၽိတ်းၶဝ်ဢၼ်ႁဵတ်းမႅၼ်ႈတီႈမႂ်းၼၼ်ႉတႃႉ။ တၢင်းဢၼ်ၶူၼ်ႉဢွၵ်ႇတၢင်းၽိတ်းၼၼ်ႉႁဵတ်းႁႂ်ႈၵေႃႉသႄႈၵၼ်ၽၢတ်ႇၽႄၵၼ်ဢေႃႈ။
ၵေႃႉဢၼ်မီးၺၢၼ်ႇၼၼ်ႉၸၢင်ႈသွၼ်တူဝ်ၸဝ်ႈၵဝ်ႇလူၺ်ႈၵႂၢမ်းဢၼ်ပိူၼ်ႈတၢင်ႇဢပျတ်ႈၶေႃႈလဵဝ်ၵူၺ်းၼၼ်ႉၼႃႇသေၵေႃႉဢၼ်မိူၵ်ႈသွၼ်ဢဝ်လူၺ်ႈတၢင်းဢၼ်ၶွၼ်ႉပေႃႉပၢၵ်ႇၵမ်းလူးၵွၼ်ႇဢေႃႈ။
ၵူၼ်းႁၢႆႉမိူၵ်ႈၸိုင်၊ၸၢင်ႈႁႃႁဵတ်းလွင်ႈတၢင်းဢၼ်လုၵ်ႉၽိုၼ်ႉၵၼ်ၵူၺ်းဢေႃႈ။ ပိူဝ်ႈၼႆလႄႈၸၢင်ႈလႆႈပွႆႇၸႂ်ႉတမၢၼ်ႇဢၼ်ႁၢဝ်ႉၵျၢမ်းၼႃႇၼၼ်ႉၸူးတီႈမၼ်းဢေႃႈ။
တၢင်းဢၼ်ထူပ်းမီမႄႈဢၼ်ပိူၼ်ႈႁိမ်ဢဝ်လုၵ်ႈဢွၼ်ႇမၼ်းယဝ်ႉၼၼ်ႉယဵင်ႈၶႅၼ်းလီၼႃႇသေတၢင်းဢၼ်ထူပ်းၵၼ်တင်းၵူၼ်းမိူၵ်ႈဢၼ်ယင်းတိုၵ်ႉၸႂ်လမ်သႆႈၵမ်ႇယူႇၼၼ်ႉလူးၵွၼ်ႇဢေႃႈ။
ၵေႃႉဢၼ်ဢမ်ႇႁုၵျေးၸူးလႄႈယင်းဢဝ်တၢင်းဢၼ်ဢမ်ႇလီဢမ်ႇငၢမ်း တွပ်ႇတႅၼ်းပၼ်ၼၼ်ႉ၊တၢင်းဢၼ်ဢမ်ႇလီဢမ်ႇငၢမ်းၸိူဝ်းၼၼ်ႉဢမ်ႇတွၼ်ႉဢွၵ်ႇသေၵႃႈတီႈႁိူၼ်းမၼ်းၵႂႃႇ။
တၢင်းဢၼ်ၸႃႉတွပ်ႇထဵင်ၵၼ်ၼၼ်ႉပဵၼ်ၸိူဝ်ႉၼင်ႇၽၢႆၼမ်ႉၸႃႉၸိုမ်းၸႃႉပွင်ႇၼၼ်ႉလႄႈ၊ၸူဝ်ႈဢၼ်ဢမ်ႇပႆႇတၼ်းၽိတ်းၵၼ်ၼၼ်ႉဝႄႈပႅတ်ႈတၢင်းဢၼ်တွပ်ႇထဵင်ၵၼ်ၼၼ်ႉတႃႉ။
တၢင်းဢၼ်ၸီႇယၢင်ႇဢပျတ်ႈတီႈၵူၼ်းသိုဝ်ႈတေႃႇ၊ဢမ်ႇၼၼ်ၵေႃႈတၢင်းဢၼ်ပွႆႇၵေႃႉဢၼ်ဢမ်ႇတြႃးလွတ်ႈၼၼ်ႉ၊တင်းသွင်ပိူင်ၼႆႉပဵၼ်ဢၼ် ထႃႇဝရႃႉၽြႃး၊ လီႁင်ႈဢဵတ်ႇသဵတ်ႇဢေႃႈ။
ၵူၼ်းမိူၵ်ႈဢၼ်ၸၢႆႇငိုၼ်းပုၼ်ႈဢၼ် တၵ်းသွၼ်ဢဝ်ဢတၢတ်ႈပိင်ႇၺႃႇၼၼ်ႉဢမ်ႇမီးဢၵျူဝ်းၵွပ်ႈပိူဝ်ႈမၼ်းဢမ်ႇမီးၺၢၼ်ႇဢၼ်ၸၢင်ႈႁုၸႅင်ႈၼၼ်ႉဢေႃႈ။
ၵေႃႉသႄႈၸၢင်ႈႁၵ်ႉယူႇၵူႈၶိင်ႇၵူႈၶႃႇဢေႃႈ။ ပီႈၼွင်ႉၵၼ်ၸမ်ႉပေႃးဢမ်ႇၸွႆႈဢမ်ႇထႅမ်ၵၼ်မိူဝ်ႈတုၵ်ႉၶႃႉၸိုင်၊တၵ်းမီးဢၵျူဝ်းၵႃႈသင်။
ၵေႃႉဢၼ်ဢမ်ႇမီးၺၢၼ်ႇၼၼ်ႉၵူၺ်းၸၢင်ႈၶၢမ်ႇဢဝ်ၵတိတႃႇတေဢဝ်တႃႇဝုၼ်ႇၼီႈပိူၼ်ႈတၢင်ႇၵေႃႉၼၼ်ႉဢေႃႈ။
ၵေႃႉဢၼ်ၵျိူၵ်ႈတုၸရိူၵ်ႈၼၼ်ႉၵျိူၵ်ႈတုၵ်ႉၶႃႉဢေႃႈ။ ပေႃးမႂ်းၽုၺ်ႇၶူဝ်းၶွင်ငိုၼ်းၶမ်းမႂ်းၼႄပၼ်ပိူၼ်ႈၸိုင်၊ပဵၼ်တၢင်းဢၼ်ႁွင်ႉဢဝ်ၽေးၶဝ်ႈၸူးမႂ်းယဝ်ႉ။
ၵေႃႉဢၼ်ၸႂ်ၵူတ်ႉၸႂ်ငေႃးၼၼ်ႉဢမ်ႇၸၢင်ႈလႆႈလီလႆႈပဵၼ်။ ၵေႃႉဢၼ်မီးသူပ်းလၢတ်ႈတႂ်ႈလၢတ်ႈၼိူဝ်ၼၼ်ႉၸၢင်ႈထူပ်းၽေးဢေႃႈ။
လုၵ်ႈၸၢႆးဢၼ်မိူၵ်ႈၼၼ်ႉပဵၼ်တၢင်းဢၼ်မႆႈၸႂ်ၶီၸႂ်တီႈပေႃႈမၼ်းလႄႈ၊ပေႃႈဢၼ်မီးလုၵ်ႈၸၢႆးဢၼ်ဢမ်ႇႁုၶေႃႈႁုတႃၼၼ်ႉမၼ်းဢမ်ႇမီးတၢင်းဢၼ်မူၼ်ႈဢၼ်ပျေႃႇလႃးလႃး။
ၸႂ်ဢၼ်ၸူမ်းသိူဝ်းၼၼ်ႉၸၢင်ႈႁႂ်ႈယူႇလီၵိၼ်ဝၢၼ်လႄႈ၊ၸႂ်ဢၼ်တႅၵ်ႇလႅဝ်ၼၼ်ႉၸမ်ႉၸၢင်ႈႁႂ်ႈတၢႆလွႆးလွႆးဢေႃႈ။
ၶုၼ်ဢၼ်ၸီႇယၢင်ႇတြႃးဢၼ်ဢမ်ႇတြႃးၼၼ်ႉၸၢင်ႈႁပ်ႉဢဝ်သူးလၢပ်ႈဢၼ်လွမ်ပၼ်ၼၼ်ႉႁႂ်ႈလႆႈယႃႉတြႃးဢၼ်သိုဝ်ႈတေႃႇပႅတ်ႈဢေႃႈ။
ၵေႃႉဢၼ်မီးၺၢၼ်ႇလီၼၼ်ႉၸၢင်ႈဢဵၼ်းဢၢၼ်းၵၢၼ်တၢင်းႁဵတ်းဢၼ်မီးပိင်ႇၺႃႇၼၼ်ႉလႄႈ၊ၵူၼ်းမိူၵ်ႈၸမ်ႉၸၢင်ႈၸႃႉႁဵတ်းၵူႈလွင်ႈၵူႈတၢင်းဢေႃႈ။
လုၵ်ႈၸၢႆးဢၼ်မိူၵ်ႈၼၼ်ႉပဵၼ်တၢင်းဢၼ်မႆႈၸႂ်ၶီၸႂ်တီႈပေႃႈမၼ်းလႄႈ၊သမ်ႉပဵၼ်တၢင်းဢၼ်ၶီၸႂ်ၶူမ်ၸႂ်တီႈမႄႈမၼ်းဢေႃႈ။
တၢင်းဢၼ်မၢပ်ႇၵိၼ်မႂ်ၵိၼ်ၵူၼ်းသိုဝ်ႈတေႃႇၼၼ်ႉဢမ်ႇထုၵ်ႇဢမ်ႇလီလႄႈ၊တၢင်းဢၼ်ၶွၼ်ႉပေႃႉယႅၼ်ႉၵေႃႉဢၼ်မီးသိၵ်ႈၶႃႇၼၼ်ႉၽိတ်းတႄႉတႄႉဢေႃႈ။
ၵေႃႉဢၼ်ၸၢင်ႈၶျုၵ်ႈၵႂၢမ်းတူဝ်ၸဝ်ႈၵဝ်ႇၼၼ်ႉဢမ်ႇသူႈလၢတ်ႈပိၼ်ႉလၢတ်ႈပႅတ်ႈလႄႈ၊ၵေႃႉဢၼ်ယူႇတဵတ်ႇတဵတ်ႇ ဢမ်ႇတၵ်းသဵင်ၼၼ်ႉမီးၺၢၼ်ႇဢၼ်လိုၵ်ႉဢၼ်လမ်ႇဢေႃႈ။
တေႃႈၵႃႈၵေႃႉဢၼ်မိူၵ်ႈၼၼ်ႉပေႃးယူႇတဵတ်ႇတဵတ်ႇႁပ်းသူပ်းႁပ်းပၢၵ်ႇယူႇၸိုင်၊ပိူၼ်ႈၸၢင်ႈမၢတ်ႈမၼ်းပဵၼ်ၵေႃႉဢၼ် မီးပိင်ႇၺႃႇၵေႃႉဢၼ်ၺၢၼ်ႇလီလူးၵွၼ်ႇဢေႃႈ။
ၵူၼ်းယူႇၶေႃၶေႃဢၼ်ဢမ်ႇယူႇၸွမ်းပိူၼ်ႈၼၼ်ႉၸၢင်ႈႁႃဢဝ်ၵႃႈၼင်ႇဢၼ်ဢလူဝ်ႇၵၢင်ၸႂ်မၼ်းမီးၼၼ်ႉၵူၺ်းလႄႈ၊ၶဝ်ဢမ်ႇၸၢင်ႈၽွမ်ႉၸႂ်လူၺ်ႈလွင်ႈဢၼ်ပိူၼ်ႈႁုဝႃႈပဵၼ်ဢၼ်သိုဝ်ႈဢၼ်တေႃႇၼၼ်ႉၵူႈၸိူဝ်ႉၵူႈဢၼ်ဢေႃႈ။
ၵူၼ်းမိူၵ်ႈၸိုင်၊ၼွၵ်ႈသေတၢင်းဢၼ်လႆႈၼႄပျႃးၸႂ်သၽေႃးမၼ်းၼၼ်ႉဢမ်ႇၸၢင်ႈမူၼ်ႈပျေႃႇၼႂ်းၺၢၼ်ႇလႃးလႃး။
တုၸရိူၵ်ႈတင်းတၢင်းဢၼ်ဢူၵ်းဢၼ်ဢၢႆၽၢၵ်ႈႁွမ်းၵၼ်ၵႂႃႇလႄႈမိူဝ်ႈဢၼ်သရေႇမႂ်းလုၼၼ်ႉတၢင်းဢၼ်သႄႉဢၼ်သွမ်းၸိမ်းၶဝ်ႈမႃးၵမ်းလဵဝ်ဢေႃႈ။
ၵႂၢမ်းဢၼ်ဢွၵ်ႇသူပ်းၵူၼ်းမႃးၼၼ်ႉၸၢင်ႈပဵၼ်ၸိူဝ်ႉၼင်ႇၼမ်ႉဢွၵ်ႇႁူးပိင်ႇၺႃႇလႄႈပဵၼ်ဢၼ်လိုၵ်ႉတၢၼ်ႇၼမ်ႉသမ်ႇမုၵ်ႈတြႃႇ၊သႂ်လီတၢၼ်ႇၼမ်ႉႁွင်ႈၼမ်ႉၵႄးဢၼ်လႆၸႅဝ်ႈၼၼ်ႉဢေႃႈ။
တၢင်းဢၼ်ထွၵ်ႈလူၺ်ႈၼႃႈၵူၼ်းဢၼ်ဢမ်ႇတြႃးၼၼ်ႉပဵၼ်ဢၼ်ဢမ်ႇလီလႄႈ၊တၢင်းဢၼ်ႁႂ်ႈၵေႃႉဢၼ်ၸွမ်းတြႃးၼၼ်ႉသုမ်းၸွမ်းၼႂ်းဢမုဢၼ်ထူပ်းတြႃးၼၼ်ႉၵေႃႈပဵၼ်ဢၼ်ဢမ်ႇလီ။
တၢင်းဢၼ်ၵူၼ်းမိူၵ်ႈၸႃႉတွပ်ႇထဵင်ပိူၼ်ႈၼၼ်ႉပဵၼ်တၢင်းဢၼ်မၼ်းယွၼ်းဢဝ်တၢမ်ႇၶွၼ်ႉဢေႃႈ။
သူပ်းသဵင်ၵေႃႉဢၼ်မိူၵ်ႈၼၼ်ႉပဵၼ်လွင်ႈတၢင်းဢၼ်လုလႅဝ်တီႈမၼ်းလႄႈ၊မၼ်းၸၢင်ႈတူၵ်းၶမ်မႅၼ်ႈၼႂ်းတူင်ႇၶိုမ်းၵႂၢမ်းမၼ်းၶိုၼ်းဢေႃႈ။
ၵႂၢမ်းဢၼ်ၶႃႉၸိုဝ်ႈၶၢႆသဵင်ပိူၼ်ႈၼၼ်ႉမီးဢရႃႉသႃႇဢၼ်ဝၢၼ်ဢၼ်မၼ်းလႄႈ၊ပဵၼ်ဢၼ်လီၶႂ်ႈဢိုၼ်ၵိၼ်တႄႉတႄႉဢေႃႈ။
ၵေႃႉဢၼ်ၶၢၼ်ႉဢၼ်ဢိူၼ်ၼၼ်ႉဢမ်ႇပွင်ႇလွင်ႈၵႃႈသင်မိူၼ်ၵၼ်တင်းၵေႃႉဢၼ်ႁႂ်ႈဢုၵ်ႉၸႃႇမၼ်းသုမ်းၸွမ်းပႅတ်ႈလၢႆလၢႆလွၵ်ႇလွၵ်ႇၼၼ်ႉဢေႃႈ။
ထႃႇဝရႃႉၽြႃး၊ ပဵၼ်ၸိူဝ်ႉၼင်ႇတိူၵ်ႈတီႈတိုၵ်းသိုၵ်းဢၼ်မၼ်ႈၶိူင်ႇၼၼ်ႉလႄႈ၊ပဵၼ်တီႈဢၼ်ၵူၼ်းသိုဝ်ႈတေႃႇၶဝ်ႈၵႂႃႇသွၼ်ႈယူႇလူင်ႉလီလွတ်ႈလီဢေႃႈ။
ၵူၼ်းမၢၵ်ႈၵူၼ်းမီးၸၢင်ႈထၢင်ႇဝႃႈ၊ဢုၵ်ႉၸႃႇၸေးၸိမ်ႇၶဝ်ၸၢင်ႈႁႄႉၶႅၼ်ၶဝ်လႆႈမိူၼ်ၸိူဝ်ႉၼင်ႇလမ်းဝဵင်းဢၼ်သုင်လီလွမ်ႉႁွပ်ႈဝဵင်းဝႆႉမၼ်ႈမၼ်ႈၶိူင်ႇၶိူင်ႇၼၼ်ႉဢေႃႈ။
ၽူႈလႂ်သေဢမ်ႇဝႃႈ၊ပေႃးမၼ်းဢမ်ႇမီးႁူဝ်ၸႂ်ဢၼ်ၶျႃးတႅမ်ႇၸိုင်၊ပိူၼ်ႈဢမ်ႇရူဝ်ႇသေႇလေႇမၢတ်ႈမၼ်း။ ၶဝ်ၸိူဝ်းဢၼ်ႁူဝ်ၸႂ်ပူၵ်းပႅၼ်ၽႅၼ်သုင်ၼၼ်ႉၸၢင်ႈၵႂႃႇၸွမ်းတၢင်းဢၼ်လုဢၼ်လႅဝ်ဢေႃႈ။
ၸူဝ်ႈဢၼ်ဢမ်ႇပႆႇၶိုၼ်းတွပ်ႇၶိုၼ်းလၢတ်ႈၼၼ်ႉၸိုင်၊ထွမ်ႇဢဝ်လီလီတႃႉ။ ပေႃးမႂ်းဢမ်ႇႁဵတ်းၸိူဝ်ႉၼင်ႇၼၼ်ၸိုင်၊မႂ်းပဵၼ်ၵူၼ်းမိူၵ်ႈၵေႃႉဢၼ်လီဢူၵ်းလီဢၢႆဢေႃႈ။
ၸႂ်ဝိၺိၺ်ႇၵူၼ်းၸၢင်ႈၶၢမ်ႇဝူၺ်ႇတၼႃႇမၼ်းလႆႈလႄႈ၊ၸႂ်ဢၼ်တႅၵ်ႇလႅဝ်ၼၼ်ႉၸမ်ႉ၊ဢမ်ႇၶၢမ်ႇလႆႈလႃးလႃး။
ၵေႃႉဢၼ်ၺၢၼ်ႇလီၼၼ်ႉၸႂ်ႁႅင်းယႂ်ႇတႃႇတေသွၼ်ဢဝ်လႄႈတၼ်းဝႆႉတႃႇသေႇဢေႃႈ။
ၸွင်ႇမႂ်းမီးဢလူဝ်ႇၶႂ်ႈထူပ်းၵူၼ်းယႂ်ႇၵူၼ်းလူင်ႁိုဝ်း။ ပႃးဢဝ်လၢၵ်ႈသွင်ႇလႄႈၵႂႃႇၸူးမၼ်းတႃႉ။ တေပဵၼ်ဢၼ်ငၢႆႈတႄႉတႄႉဢေႃႈ။
ၵေႃႉဢၼ်လုၵ်ႉလၢတ်ႈၵႃႈၼႂ်းလုမ်းဢွၼ်တၢင်းပိူၼ်ႈၼၼ်ႉထၢင်ႇႁၢင်ႈပဵၼ်လွင်ႈတၢင်းဢၼ်သိုဝ်ႈတေႃႇယူႇတေႃႇထိုင်ႁွတ်ႈၵေႃႉဢၼ်ယူႇၽၢႆႇၶတ်းၵၼ်တင်းမၼ်းၼၼ်ႉမႃးၸႅတ်ႈသေးထၢမ်တူၺ်းမၼ်းၼၼ်ႉဢေႃႈ။
ပေႃးၶဝ်ၸိူဝ်းဢၼ်ႁႅင်းယႂ်ႇၼင်ႇၵၼ်ၶတ်းၵၼ်ၶဵင်ႇၵၼ်ၵႃႈၼႂ်းလုမ်းၸိုင်၊တၢင်းဢၼ်ဢဝ်လိၵ်ႈတူၵ်းၸႃႇၵွၵ်ႈၵၼ်ၼၼ်ႉၸၢင်ႈႁႂ်ႈတၢင်းယၢပ်ႇၼၼ်ႉထၢတ်ႇယဵၼ်ဢေႃႈ။
ၸွႆႈၵမ်ႉၸွႆႈထႅမ်ပီႈၼွင်ႉမႂ်းတႃႉ။ မၼ်းတၵ်းႁႄႉၶႅၼ်ပၼ်မႂ်းမိူၼ်ၸိူဝ်ႉၼင်ႇလမ်းဝဵင်းဢၼ်မၼ်ႈၶိူင်ႇၼၼ်ႉဢေႃႈ။ ၵူၺ်းၵႃႈ၊ပေႃးမႂ်းၽိတ်းၵၼ်တင်းမၼ်းၸိုင်၊မၼ်းတၵ်းဢိုတ်းပႅတ်ႈၽၵ်းတူႁိူၼ်းမၼ်းတီႈမႂ်းဢေႃႈ။
မႂ်းၸၢင်ႈလႆႈၶၢမ်ႇဢဝ်ၸွမ်းလူၺ်ႈဢၵျူဝ်းဢၼ်မႂ်းလၢတ်ႈၵူႈၶေႃႈၵူႈၵမ်းၼၼ်ႉ ဢေႃႈ။
ၵႃႈဢၼ်မႂ်းလၢတ်ႈၼၼ်ႉၸၢင်ႈႁႂ်ႈဢသၢၵ်ႈမႂ်းၵတ်းယဵၼ်ၶျၢမ်းသႃႇယူႇ၊ဢမ်ႇၼၼ်ၵေႃႈၸၢင်ႈႁႂ်ႈဢသၢၵ်ႈမႂ်းလုလႅဝ်ၵႂႃႇဢေႃႈ။ ပိူဝ်ႈၼႆလႄႈမႂ်းတၵ်းလႆႈႁပ်ႉတုင်းဢဝ်ဢၵျူဝ်းၶေႃႈၵႂၢမ်းမႂ်းၸိူဝ်းၼၼ်ႉဢေႃႈ။
ၵေႃႉဢၼ်လႆႈမေးၼၼ်ႉလႆႈတၢင်းဢၼ်လီလႄႈလႆႈၸၢမ်ႇၸႃးၵျေးၸူး ထႃႇဝရႃႉၽြႃး၊ ဢေႃႈ။
ၵူၼ်းယၢၵ်ႈၵူၼ်းၽၢၼ်ၸၢင်ႈတွင်းပၢၼ်ႇလႄႈ၊ၵူၼ်းမၢၵ်ႈၵူၼ်းမီးၸမ်ႉ၊ၸၢင်ႈၶိုၼ်းလၢတ်ႈႁၢဝ်ႉၵျၢမ်းၼႃႇဢေႃႈ။
ၵေႃႉသႄႈမၢင်ၵေႃႉၵူၺ်းႁဵတ်းႁၢင်ႈႁဵတ်းပဵၼ်ၵေႃႉပဵၼ်သႄႈယူႇလႄႈ၊ၵေႃႉသႄႈမၢင်ၵေႃႉၸမ်ႉ၊ယင်းမီးသဵတ်ႈၸႃႇသေပီႈၼွင်ႉဢွၵ်ႇၵၼ်ဢေႃႈ။
တၢင်းဢၼ်ပဵၼ်ၵူၼ်းၽၢၼ်မီးၸႂ်သိုဝ်ႈၸႂ်ယူဝ်းၼၼ်ႉယဵင်ႈၶႅၼ်းလီၼႃႇသေတၢင်းဢၼ်ပဵၼ်ၵူၼ်းမိူၵ်ႈဢၼ်ပႅတ်ႉၵိၼ်လႅၼ်ၵိၼ်ၼၼ်ႉဢေႃႈ။
တၢင်းဢၼ်ပႃးၸႂ်ပႃးၶေႃးယင်းဢမ်ႇမီးပိင်ႇၺႃႇၼၼ်ႉပဵၼ်ဢၼ်ဢမ်ႇလီဢေႃႈ။ တၢင်းဢၼ်ႁဵတ်းၶၼ်ႁဵတ်းၽႂ်းၼၼ်ႉၵေႃႈၸၢင်ႈထူပ်းၽေးဢေႃႈ။
တၢင်းဢၼ်မိူၵ်ႈၵူၼ်းၼၼ်ႉၸၢင်ႈႁႂ်ႈတူဝ်ၶဝ်လုၵႂႃႇသေၵေႃႈႁူဝ်ၸႂ်ၶဝ်တၢင်ႇဢပျတ်ႈ ထႃႇဝရႃႉၽြႃး၊ ဢေႃႈ။
ၵူၼ်းမၢၵ်ႈၵူၼ်းမီးၶဝ်ၸၢင်ႈလႆႈၵေႃႉသႄႈဢၼ်မႂ်ႇတိၵ်းတိၵ်းလႄႈ၊ၵူၼ်းယၢၵ်ႈၵူၼ်းၽၢၼ်ၸမ်ႉ ၵေႃႉသႄႈၵဝ်ႇၵဝ်ႇမၼ်းယင်းၸၢင်ႈဢွၵ်ႇပၢႆႈပႅတ်ႈမၼ်းဢေႃႈ။
ပေႃးမႂ်းလၢတ်ႈၵႂၢမ်းမုသႃႇၵႃႈၼႂ်းလုမ်းၸိုင်၊မႂ်းဢမ်ႇမီးတီႈဢၼ်တၵ်းလွတ်ႈ။ မႂ်းတၵ်းလႆႈၶၢမ်ႇတၢမ်ႇၵူၺ်းဢေႃႈ။
ၵူၼ်းဢၼ်ၶႂ်ႈလႆႈၼႃႈၵႃႈတီႈၵူၼ်းယႂ်ႇၵူၼ်းလူင်ၼၼ်ႉမီးၼမ်ၼႃႇလႄႈ၊ၵူႈၵေႃႉၵူႈၵူၼ်းၸၢင်ႈႁဵတ်းၵေႃႉႁဵတ်းသႄႈလူၺ်ႈၵၼ်တင်းၵေႃႉဢၼ်ၸၢင်ႈႁႂ်ႈၸၢင်ႈပၼ်ၼၼ်ႉဢေႃႈ။
ၵူၼ်းယၢၵ်ႈၵူၼ်းၽၢၼ်ၸိုင်၊တေႃႈၵႃႈပီႈၼွင်ႉမၼ်းယင်းဢွၼ်ၵၼ်ၸင်းမၼ်းလႄႈ၊ၵေႃႉမၼ်းသႄႈမၼ်းယဵင်ႈၶႅၼ်းဢွၼ်ၵၼ်ဝႄႈပၢႆႈပႅတ်ႈမၼ်းၵႆၼႃႇဢေႃႈ။ ပိၵ်ႉသမ်ႉမၼ်းၸွမ်းႁွင်ႉၸွမ်းႁႃသေၵေႃႈၶဝ်ယင်းပၢႆႈတဵတ်ႇပၢႆႈမႅပ်းယူႇဢေႃႈ။
ၵေႃႉဢၼ်လႆႈပိင်ႇၺႃႇၼၼ်ႉႁၵ်ႉတူဝ်ၸဝ်ႈၵဝ်ႇလႄႈ၊ၵေႃႉဢၼ်ၸပ်းၸွႆးလူၺ်ႈၺၢၼ်ႇၼၼ်ႉၵေႃႈတၵ်းတေၶိုၼ်ႈယႂ်ႇမႂ်ႇသုင်ဢေႃႈ။
ၽူႈလႂ်သေဢမ်ႇဝႃႈၵေႃႉဢၼ်လၢတ်ႈမုသႃႇၵႃႈၼႂ်းလုမ်းၼၼ်ႉဢမ်ႇၵၢင်းလွတ်ႈတင်းတၢင်းဢၼ်ၸီႇယၢင်ႇပၼ်တၢမ်ႇလႆႈ။ မၼ်းတိုၼ်းတၵ်းလႆႈၶၢမ်ႇတၢမ်ႇဢပျတ်ႈဢေႃႈ။
ၵူၼ်းမိူၵ်ႈဢမ်ႇထုၵ်ႇဢမ်ႇဢၢပ်ႈၵၼ်တင်းၸေးၸိမ်ႇတၢင်းဢၼ်မူၼ်ႈပျေႃႇၼႂ်းလေႃးၵႃႉၼႆႉၼၼ်ႉ။ လိူဝ်သေၼၼ်ႉဢမ်ႇၵႃးၶႃႈဢမ်ႇထုၵ်ႇလီဢုပ်ႉပိူင်ႇၵႃႈၼိူဝ်လုၵ်ႈၶုၼ်လုၵ်ႈၵွၼ်း။
ပေႃးမႂ်းမီးသမ်ႇမႃႇသတိၸိုင်၊မႂ်းတၵ်းၶျုၵ်ႈၵၼ်ႈတေႃးသႃႉမႂ်းလႆႈဢေႃႈ။ တၢင်းဢၼ်မႂ်းယိူၼ်ႉၶၢမ်ႇတၢင်းဢၼ်ပိူၼ်ႈၽိတ်းပိူင်ႈမႂ်းၼၼ်ႉသမ်ႉပဵၼ်မုၼ်သရေႇမႂ်းဢေႃႈ။
တၢင်းဢၼ်ၶုၼ်ႁေႃၶမ်းၸႂ်မႆႈၶႂ်ႈၸႃႉၼၼ်ႉပဵၼ်ၸိူဝ်ႉၼင်ႇတၢင်းဢၼ်သၢင်ႇသီႈႁွင်ႉၼၼ်ႉလႄႈ၊ၵျေးၸူးမၼ်းၸမ်ႉပဵၼ်ၸိူဝ်ႉၼင်ႇၼမ်ႉၼၢႆးတူၵ်းသႂ်ႇတူၼ်ႈယိူဝ်ႈတူၼ်ႈယႃႈၼၼ်ႉဢေႃႈ။
လုၵ်ႈၸၢႆးမိူၵ်ႈၸၢင်ႈႁႂ်ႈပေႃႈမၼ်းလုလႅဝ်လႄႈ၊မေးဢၼ်ပွင်ႉမိုၼ်ႇပွင်ႉဝႃႈယူႇၼၼ်ႉသမ်ႉမိူၼ်မဵတ်ႉၽူၼ်ဢၼ်ယွတ်ႇတူၵ်းယူႇၸိၵ်ႉၸိၵ်ႉၼၼ်ႉဢေႃႈ။
ႁိူၼ်းဢိၵ်ႇတင်းၸေးၸိမ်ႇဢုၵ်ႉၸႃႇပဵၼ်ဢမူၺ်ႇဢၼ်လႆႈၶၢမ်ႇဢဝ်တီႈပေႃႈမႄႈလႄႈ၊မေးဢၼ်မီးသမ်ႇမႃႇသတိၸမ်ႉပဵၼ်ဢၼ် ထႃႇဝရႃႉၽြႃး၊ ဢဵတ်းလူပၼ်ဢေႃႈ။
ပေႃးမႂ်းၶႂ်ႈမီးၸႂ်ဢၼ်ၶၢၼ်ႉဢၼ်ဢိူၼ်ၸိုင်၊ၶၢၼ်ႉတႃႉ။ ပေႃးၶႂ်ႈၼွၼ်းၵေႃႈၼွၼ်းတႃႉ။ ၵူၺ်းၵႃႈ၊မႂ်းတၵ်းတေလႆႈၶၢမ်ႇတၢင်းဢၼ်ဢိုပ်းၵိၼ်ဢိုပ်းယၢၵ်ႈဢေႃႈ။
ပႂ်ႉပိင်းၺၢပ်ႈတြႃးၸဝ်ႈတႃႉ။ မႂ်းတၵ်းဢသၢၵ်ႈယၢဝ်းယိုၼ်းဢေႃႈ။ ပေႃးမႂ်းဢမ်ႇဝႆႉဢယေးၸိုင်၊မႂ်းတၵ်းတေလႆႈတၢႆဢေႃႈ။
မိူဝ်ႈဢၼ်မႂ်းပၼ်တီႈၵူၼ်းယၢၵ်ႈၵူၼ်းၽၢၼ်ၼၼ်ႉမၼ်းပဵၼ်ၸိူဝ်ႉၼင်ႇဢၼ်မႂ်းပၼ်ၵူႈပၼ်ယိမ်ဝႆႉတီႈ ထႃႇဝရႃႉၽြႃး၊ လႄႈ၊ ထႃႇဝရႃႉၽြႃး၊ တၵ်းၶိုၼ်းတႅၼ်းပၼ်ဢၵျူဝ်းမႂ်းဢေႃႈ။
ယၢမ်းမိူဝ်ႈဢၼ်လုၵ်ႈလၢင်းမႂ်းယင်းဢသၢၵ်ႈဢွၼ်ႇထိူၵ်ႈသွၼ်ဢဝ်လႆႈယူႇၼၼ်ႉသင်ႇသွၼ်သုင်းမႃႉၶဝ်တႃႉ။ ၵူၺ်းၵႃႈ၊ယႃႇပေပေႃႉယႅၼ်ႉႁႂ်ႈၸဵပ်းသႅပ်ႇၼႃႇထၢၼ်ႈပေႃးမိူၼ်ၼင်ႇဢဝ်ၶဝ်တၢႆၼၼ်ႉ။
ပေႃးသေၵေႃႉသေၵူၼ်းမီးတေႃးသႃႉတၢင်းၸႂ်မႆႈယႂ်ႇၼႃႇၸိုင်၊မၼ်းတေလႆႈၶၢမ်ႇတၢမ်ႇဢပျတ်ႈလႄႈ၊ပေႃးမႂ်းၵႄႇသႄႇၼုၵ်ႈဢဝ်မၼ်းလွတ်ႈၽေးၸိုင်၊မႂ်းလူဝ်ႇလႆႈၵႄႇသႄႇၼုၵ်ႈဢဝ်ထႅင်ႈယူႇၶိူဝ်းၶိူဝ်းယႂ်းယႂ်းဢေႃႈ။
ပေႃးမႂ်းဝႆႉၸႂ်ထွမ်ႇဢဝ်ၵႂၢမ်းပၼ်တၢင်းၵျၢမ်ႇလႄႈၵမ်ၵျၢင်ႉႁဵတ်းၸွမ်းၸိုင်၊ဝၼ်းၼိုင်ႈမႂ်းတၵ်းပဵၼ်ၵေႃႉဢၼ်မီးပိင်ႇၺႃႇမႃးဢေႃႈ။
ၵူၼ်းၸိုင်၊မီးဢၶႂၢင်ႉဢၼ်ၶိုင်ပွင်ၼႃႈၵၢၼ်ၵူႈၸိူဝ်ႉၵူႈပိူင်ၼမ်ၼႃႇဢေႃႈ။ ၵူၺ်းၵႃႈ၊တၵ်းတေလႆႈပဵၼ်ၸွမ်းဢလူဝ်ႇ ထႃႇဝရႃႉၽြႃး၊ ဢေႃႈ။
တၢင်းဢၼ်မီးၸႂ်လေႃးၽႃႉၼၼ်ႉပဵၼ်တၢင်းဢၼ်လီဢူၵ်းလီဢၢႆလႄႈ၊ၵူၼ်းယၢၵ်ႈၵူၼ်းၽၢၼ်ယဵင်ႈၶႅၼ်းလီၼႃႇသေၵေႃႉဢၼ်လၢတ်ႈမုသႃႇဢေႃႈ။
တၢင်းဢၼ်ရူဝ်ႇသေႇၵူဝ်ယမ် ထႃႇဝရႃႉၽြႃး၊ ၼၼ်ႉႁဵတ်းႁႂ်ႈဢသၢၵ်ႈမႂ်းယၢဝ်းယိုၼ်းႁႂ်ႈဢလူဝ်ႇသၢၼ်ႇတႃႉမႂ်းပျေႉၸုမ်ႇလႄႈဢမ်ႇလႆႈထူပ်းၽေးဢုပၢတ်ႈဢေႃႈ။
ၵူၼ်းၵမ်ႈၽွင်ႈၶၢၼ်ႉၼႃႇလူင်လၢင်ထၢၼ်ႈပေႃးဢမ်ႇၶႂ်ႈဢဝ်ၶဝ်ႈသႂ်ႇသူပ်းလႄႈၵိၼ်ဢေႃႈ။
ၵေႃႉဢၼ်ႁူဝ်ၸႂ်ပူၵ်းပႅၼ်ၽႅၼ်သုင်ၼၼ်ႉတိုၼ်းတေလႆႈၶၢမ်ႇတၢမ်ႇဢပျတ်ႈ၊ပုၼ်ႈလွင်ႈၼင်ႇႁိုဝ်ၵေႃႉဢၼ်ငိူဝ်ႈငႃႉတၵ်းတေလႆႈသတိၼၼ်ႉလႄႈ၊ၵေႃႉဢၼ်မီးပိင်ႇၺႃႇၼၼ်ႉမၼ်းၸၢင်ႈမေႃသွၼ်ဢဝ်မိူဝ်ႈဢၼ်ပိူၼ်ႈသင်ႇသွၼ်မႄးပၼ်မၼ်းၼၼ်ႉဢေႃႈ။
ၵေႃႉဢၼ်ႁဵတ်းယၢပ်ႇႁဵတ်းယဵၼ်းသႂ်ႇတီႈပေႃႈမၼ်းလႄႈ၊လိုပ်ႈမႄႈမၼ်းဢွၵ်ႇႁိူၼ်းၼၼ်ႉပဵၼ်လုၵ်ႈၸၢႆးဢၼ်ႁဵတ်းႁႂ်ႈလီဢူၵ်းလီဢၢႆလႄႈႁႂ်ႈပဵၼ်ဢၼ်ၼႃႈမႆႈဢေႃႈ။
လုၵ်ႈၸၢႆးၵဝ်႟။ ပေႃးမႂ်းၵိုတ်းပႅတ်ႈတၢင်းဢၼ်သွၼ်ဢဝ်ၸိုင်၊ပဵၼ်တၢင်းဢၼ်ဝႄႈပႅတ်ႈသေ ၵႂၢမ်းပိင်ႇၺႃႇဢၼ်မႂ်းႁုၸႅင်ႈယဝ်ႉၸိူဝ်းၼၼ်ႉဢေႃႈ။
ၵူၼ်းမဝ်မၢင်ဢၼ်ၶၢမ်ႇသၢၵ်ႈသေႇၼၼ်ႉၸၢင်ႈႁဵတ်းပျၢၵ်ႈႁဵတ်းၶူဝ်တီႈတြႃးဢၼ်သိုဝ်ႈတေႃႇလႄႈ၊ၵူၼ်းမိူၵ်ႈတင်းလၢႆၸၢင်ႈမၵ်ႉဢရႃႉသႃႇတုၸရိူၵ်ႈဢေႃႈ။
ၵူၼ်းမိူၵ်ႈဢၼ်ႁူဝ်ၸႂ်ၽႅၼ်သုင်ၼၼ်ႉတၵ်းလႆႈၶၢမ်ႇတၢမ်ႇၶွၼ်ႉဢမၢၼ်ႇၶၼ်ပဵၼ်ဢေႃႈ။
တၢင်းဢၼ်ၵိၼ်ၼမ်ႉလဝ်ႈၼၼ်ႉၸၢင်ႈႁႂ်ႈဢူၼ်ဢဵၼ်မေႃးမႄးလႄႈၸၢင်ႈႁႂ်ႈပႅတ်ႉလႅၼ်ၼၼ်ႉပဵၼ်ဢၼ်ႁၢႆႉမိူၵ်ႈဢေႃႈ။ တၢင်းဢၼ်ၵိၼ်မဝ်းၼႃႇဝၢင်ႇဝီႈဝၢင်ႇဝိူဝ်ႈၵႂႃႇၼၼ်ႉပဵၼ်ဢၼ်ဢမ်ႇမီးပိင်ႇၺႃႇဢေႃႈ။
ၵူဝ်ႁႄၶုၼ်ႁေႃၶမ်းဢၼ်တေႃးသႃႉၸႂ်မႆႈယႂ်ႇၼႃႇၼၼ်ႉမိူၼ်ၸိူဝ်ႉၼင်ႇဢၼ်မႂ်းၵူဝ်သၢင်ႇသီႈဢၼ်ႁွင်ႉယူႇၼၼ်ႉတႃႉ။ တၢင်းဢၼ်ယူင်းတေႃးသႃႉမၼ်းၸဝ်ႈၼၼ်ႉပဵၼ်တၢင်းဢၼ်ဢဝ်တူဝ်ၸဝ်ႈၵဝ်ႇတၢႆဢေႃႈ။
ၵူၼ်းမိူၵ်ႈၵေႃႉလႂ်သေဢမ်ႇဝႃႈၸၢင်ႈတႄႇၸႃႉတၢင်းဢၼ်ၽိတ်းၵၼ်မေႃးၵၼ်လႄႈ၊တၢင်းဢၼ်ယူႇၵႆၵၼ်တင်းတၢင်းဢၼ်ၽိတ်းၵၼ်ၼၼ်ႉၸမ်ႉ၊ႁႂ်ႈမီးမုၼ်သရေႇဢေႃႈ။
ၵူၼ်းႁဵတ်းၼႃးဢၼ်ၶၢၼ်ႉထႆမိူဝ်ႈၶၢဝ်းၼႃးၼၼ်ႉဢမ်ႇၸၢင်ႈလႆႈပၢတ်ႇဢဝ်ၵႃႈသင်လႃးလႃးဢေႃႈ။
တၢင်းၵျၢမ်ႇတၢင်းပွင်ၵူၼ်းၸိုင်၊ပဵၼ်ၸိူဝ်ႉၼင်ႇၼမ်ႉဢၼ်မီးၼႂ်းၼမ်ႉမေႃႇဢၼ်လိုၵ်ႉၼႃႇၼၼ်ႉလႄႈ၊ၵေႃႉဢၼ်မီးၺၢၼ်ႇဢၼ်လိုၵ်ႉဢၼ်လမ်ႇၼၼ်ႉၸၢင်ႈတဵၵ်းၵိၼ်ဢေႃႈ။
ၵူၼ်းၵူႈၵေႃႉၵူႈၵူၼ်းၸၢင်ႈလၢတ်ႈဝႃႈလွင်ႈဢၼ်မၼ်းမီးၵတိသဵတ်ႈၸႃႇၵႃႈႁိုဝ်ၼၼ်ႉသေၵေႃႈ ပေႃးႁႃတူၺ်းလီလီၸိုင်၊ဢမ်ႇၸၢင်ႈထူပ်းၸၢင်ႈႁၼ်သေၵေႃႉသေၵူၼ်းဢေႃႈ။
ပေႃႈဢၼ်သိုဝ်ႈလီယူဝ်းလီလႄႈၸၢင်ႈႁဵတ်းသိုဝ်ႈသိုဝ်ႈတေႃႇတေႃႇၼၼ်ႉပဵၼ်တီႈဢၼ်လုၵ်ႈလၢၼ်မၼ်းလဵၼ်မၼ်းၸိူဝ်းၼၼ်ႉမီးမၢင်ႇၵလႃႇဢေႃႈ။
ၶုၼ်ႁေႃၶမ်းၼင်ႈယူႇၵႃႈၼိူဝ်ပလၢင်ႇတြႃးလႄႈၸၢင်ႈဢဝ်တင်းတႃတူၺ်းလႄႈႁုလွင်ႈတၢင်းဢၼ်ဢမ်ႇတြႃးတင်းလၢႆဢေႃႈ။
ၽူႈလႂ်တၵ်းလၢတ်ႈဝႃႈ၊ “ၵဝ်ႁႂ်ႈႁူဝ်ၸႂ်ၵဝ်မူတ်းသႂ်ယဝ်ႉ။ ၵဝ်ၵၢင်းလွတ်ႈတင်းဢပျတ်ႈယဝ်ႉ၊” ဝႃႈၼင်ႇၼႆလႆႈ။
ထႃႇဝရႃႉၽြႃး၊ ငိၼ်းၸင်းၵူၼ်းၸိူဝ်းဢၼ်သုင်းတိုဝ်းမၢၵ်ႇလုၵ်ႈၶၼ်ဢၼ်ဢမ်ႇမၢၼ်ႇတင်းၵွၵ်းတၢင်ၵွၵ်းၶႂၢႆးဢၼ်ဢမ်ႇတၢၼ်ႇဢမ်ႇပဵင်းၼၼ်ႉဢေႃႈ။
တေႃႈၵႃႈလုၵ်ႈဢွၼ်ႇယင်းႁႂ်ႈသၽေႃးတူဝ်ၸဝ်ႈၵဝ်ႇထၢင်ႇသႃးၼႂ်းတၢင်းဢၼ်မၼ်းႁဵတ်းၼၼ်ႉလႄႈ၊လွင်ႈတၢင်းဢၼ်မၼ်းႁဵတ်းၼၼ်ႉသိုဝ်ႈႁိုဝ်ဢမ်ႇသိုဝ်ႈႁိုဝ်၊လီႁိုဝ်ဢမ်ႇလီႁိုဝ်ၼၼ်ႉမႂ်းႁုလႆႈယူႇဢေႃႈ။
ထႃႇဝရႃႉၽြႃး၊ ပၼ်မၢၵ်ႇတႃဢၼ်ၸၢင်ႈႁၼ်ႁူဢၼ်ၸၢင်ႈထွမ်ႇၼၼ်ႉတီႈႁဝ်းဝႆႉယဝ်ႉ။
ၵူဝ်မႂ်းယၢၵ်ႈၵႂႃႇၽၢၼ်ၵႂႃႇလႄႈယႃႇပေၼွၼ်းယူႇၵူႈၶိင်ႇၵူႈယၢမ်း။ ၵႆႉၶၵ်းယူႇတႃႉ။ မႂ်းၸၢင်ႈလႆႈၵိၼ်တၢင်းၵိၼ်တၢင်းၶူပ်းလိူင်ႇၼမ်ၼႃႇဢေႃႈ။
ၵေႃႉဢၼ်သိုဝ်ႉၼၼ်ႉၸၢင်ႈလၢတ်ႈဝႃႈ၊ “ၵႃႈယႂ်ႇၼႃႇ။ ဢမ်ႇလီၵူၺ်း၊” ဝႃႈၼင်ႇၼႆသေယဝ်ႉ၊ၵူၺ်းၵႃႈ၊မၼ်းသိုဝ်ႉၵႂႃႇလႄႈ၊ၸၢင်ႈဢုပ်ႇဢၢတ်ႇလွင်ႈတၢင်းဢၼ်မၼ်းသဵတ်ႈဢဝ်လႆႈမႃးၼၼ်ႉဢေႃႈ။
ပေႃးမႂ်းႁုတူဝ်တၢင်းဢၼ်မႂ်းလၢတ်ႈလွင်ႈၵႃႈသင်ယူႇၼၼ်ႉၸိုင်၊မႂ်းမီးသေၸိူဝ်ႉသေပိူင်ဢၼ်ယဵင်ႈၶႅၼ်းထိူၵ်ႈၵႃႈယႂ်ႇၼႃႇသေၶမ်းသေသႅင်ၼၼ်ႉဢေႃႈ။
ပေႃးသေၵေႃႉသေၵူၼ်းငိူဝ်ႈငႃႉထၢၼ်ႈပေႃးဢႃႇမႃႉၶၢမ်ႇပိူၼ်ႈဢၼ်မၼ်းဢမ်ႇႁုၸၵ်း၊ဢၼ်ပဵၼ်ၵူၼ်းတၢင်ႇဝၢၼ်ႈတၢင်ႇမိူင်းၼၼ်ႉၸိုင်၊သိမ်းဢဝ်ၶူဝ်းၶွင်မၼ်းသေၸိူဝ်ႉသေပိူင်ဝႆႉႁႂ်ႈပဵၼ်ၶူဝ်းဢၼ်ပွင်ႇဝႆႉတၢင်ဝႆႉၼၼ်ႉတႃႉ။
တၢင်းၵိၼ်တၢင်းၶူပ်းဢၼ်ပႅတ်ႉလႅၼ်လႄႈလႆႈမႃးၼၼ်ႉပဵၼ်ဢၼ်ဝၢၼ်ဢၼ်မၼ်းဢေႃႈ။ ၵူၺ်းၵႃႈ၊ဢမ်ႇႁိုင်ဢမ်ႇၼၢၼ်းတၢင်းၵိၼ်ၼၼ်ႉတၵ်းပဵၼ်ၸိူဝ်ႉၼင်ႇမဵတ်ႉသၢႆးတဵမ်ပၢၵ်ႇယူႇၼၼ်ႉဢေႃႈ။
တိူင်ႇပၢင်ႇၵၼ်လီလီတႃႉ။ မႂ်းတၵ်းတေဢွင်ႇမႅင်ႇဢေႃႈ။ ယင်းဢမ်ႇၶိုင်ပွင်လႄႈဢမ်ႇလႆႈၶိုၼ်ႈတိုၵ်းသိုၵ်း။
ၵေႃႉဢၼ်ၶႃႉၸိုဝ်ႈၶၢႆသဵင်ပိူၼ်ႈၼၼ်ႉဢမ်ႇၸၢင်ႈႁူမ်ႇဝႆႉလွင်ႈတၢင်းဢၼ်လပ်ႉဢၼ်သိူင်ႇဝႆႉၼၼ်ႉလႆႈ။ ပိူဝ်ႈၼႆလႄႈယႃႇပေႁဵတ်းၵေႃႉႁဵတ်းသႄႈလူၺ်ႈၵၼ်တင်းၶဝ်ၸိူဝ်းဢၼ်သူပ်းၼမ်ၵႂၢမ်းၼမ်ၼၼ်ႉ။
ပေႃးမႂ်းလႃႇလင်ပေႃႈမႄႈမႂ်းၸိုင်၊ဢသၢၵ်ႈတၢၼ်းမႂ်းတၵ်းပဵၼ်ၸိူဝ်ႉၼင်ႇၵွၵ်းၽႆးဢၼ်မွတ်ႇၵႂႃႇၵႃႈၼႂ်းလပ်းသိင်ႇၽိတ်းၽိတ်းၼၼ်ႉဢေႃႈ။
ၸေးၸိမ်ႇဢုၵ်ႉၸႃႇဢၼ်လႆႈငၢႆႈၼႃႇၼၼ်ႉၸၢင်ႈပၼ်ဢၵျူဝ်းလဵၵ်ႉၵေႇဢေႇမၢင်ၼႃႇဢေႃႈ။
ယႃႇပေလၢတ်ႈဝႃႈ၊ “ၵဝ်တၵ်းၶိုၼ်းတွပ်ႇတႅၼ်းတၢင်းၽိတ်းဢေႃႈ၊” ဝႃႈၼင်ႇၼႆၼၼ်ႉ။ ပႂ်ႉထႃႈ ထႃႇဝရႃႉၽြႃး၊ ယူႇတႃႉ။ မၼ်းၸဝ်ႈတၵ်းၸွႆႈထႅမ်မႂ်းယူႇဢေႃႈ။
ထႃႇဝရႃႉၽြႃး၊ ငိၼ်းၸင်းယွႆးဢၼ်ဢမ်ႇမၢၼ်ႇဢိၵ်ႇတင်းမၢၵ်ႇလုၵ်ႈၶၼ်ဢၼ်ဢမ်ႇတဵမ်ၼၼ်ႉဢေႃႈ။
ထႃႇဝရႃႉၽြႃး၊ ၸီႇယၢင်ႇသဵၼ်ႈတၢင်းႁဝ်းဝႆႉယဝ်ႉ။ ပိူဝ်ႈၼႆလႄႈႁဝ်းတၵ်းႁုတၢင်းၵႂႃႇႁဝ်းလႆႈၸိူဝ်ႉၼင်ႇႁိုဝ်။
ၸူဝ်ႈဢၼ်မႂ်းဢမ်ႇပႆႇဝႆႉၵတိတႃႇတေသၢၵ်ႈလူႇတီႈၽြႃးပဵၼ်ၸဝ်ႈၼၼ်ႉၸိုင်၊ၶႆႈၸႂ်ၸဵၼ်းၸႃးလီလီဢွၼ်တၢင်းတႃႉ။ ၵူဝ်မႂ်းသေလၢႆၵမ်းလိုၼ်းဢေႃႈ။
ၶုၼ်ႁေႃၶမ်းဢၼ်မီးပိင်ႇၺႃႇၼၼ်ႉၸၢင်ႈထူပ်းႁၼ်ၵေႃႉလႂ်ၽိတ်းပိူင်ႈၼၼ်ႉလႄႈ၊ၸၢင်ႈပၼ်တၢမ်ႇၼၵ်းၼႃႇဢၼ်ၵၢင်းလွတ်ႈတင်းၸႂ်ဢၼ်ဢဵတ်းလူဢေႃႈ။
ထႃႇဝရႃႉၽြႃး၊ ပၼ်ၸႂ်ဝိၺိၺ်ႇဢိၵ်ႇတင်းၸႂ်ဢၼ်ႁုတူဝ်ၸဝ်ႈၵဝ်ႇၼၼ်ႉတီႈႁဝ်းဝႆႉယဝ်ႉ။ ပိူဝ်ႈၼႆလႄႈႁဝ်းဢမ်ႇၸၢင်ႈတဵတ်ႇၸၢင်ႈမႅပ်းတူဝ်ၸဝ်ႈၵဝ်ႇ။
ၶုၼ်ႁေႃၶမ်းၸၢင်ႈမၼ်ႈၶိူင်ႇယူႇၼႂ်းႁႅင်းတၼ်းၶူဝ်းမၼ်းၼႂ်းၸူဝ်ႈဢၼ်မၼ်းယင်းဢုပ်ႉပိူင်ႇသိုဝ်ႈသိုဝ်ႈယူဝ်းယူဝ်းယူႇ၊ၸီႇယၢင်ႇၸွမ်းၼင်ႇတြႃးယူႇလႄႈတႅပ်းတတ်းၽဵင်ႇၽဵင်ႇယူႇၼၼ်ႉဢေႃႈ။
မုၼ်သရေႇၵူၼ်းၼုမ်ႇၵူၼ်းၵမ်ၸမ်ႉ၊ပဵၼ်ဢဵၼ်ႁႅင်းၶဝ်လႄႈ၊တၢင်းဢၼ်လီရူဝ်ႇသေႇၵူၼ်းထဝ်ႈၸမ်ႉ၊ပဵၼ်ႁူဝ်ႁွၵ်ႇႁူဝ်ၶၢဝ်ၶဝ်ဢေႃႈ။
မၢင်ၽဝ်ႇမၢင်ပွၵ်ႈလႆႈထူပ်းၺႃးတၢင်းဢၼ်ၸဵပ်းၸႂ်ၼႃႇလူင်လၢင်ၼၼ်ႉ၊ႁဵတ်းႁႂ်ႈႁဝ်းလႆႈပိၼ်ႇသဵၼ်ႈတၢင်းႁဝ်းၼၼ်ႉဢေႃႈ။
ထႃႇဝရႃႉၽြႃး၊ ဢုပ်ႉပိူင်ႇၸႂ်သၽေႃးၶုၼ်ႁေႃၶမ်းငၢႆႈၼႃႇမိူၼ်ၸိူဝ်ႉၼင်ႇဢၼ်မၼ်းၸဝ်ႈႁႂ်ႈၼမ်ႉႁွင်ႈၼမ်ႉၵႄးလႆငွၵ်းလႆငႅၵ်း ၸွမ်းၼင်ႇဢလူဝ်ႇမၼ်းၸဝ်ႈမီးၼၼ်ႉဢေႃႈ။
မႂ်းမီးဢၶႂၢင်ႉဢၼ်ထၢင်ႇဝႃႈ ၵႃႈဢၼ်မႂ်းႁဵတ်းၼၼ်ႉမၢၼ်ႇမႅၼ်ႈၸိုဝ်ႈၸႂ်ႈယူႇဢေႃႈ။ ၵူၺ်းၵႃႈ၊ၶႆႈၸႂ်ထူပ်းလွင်ႈဢၼ် ထႃႇဝရႃႉၽြႃး၊ ၸီႇယၢင်ႇႁူဝ်ၸႂ်မႂ်းယူႇၼၼ်ႉတႃႉ။
တၢင်းဢၼ်ၵမ်ၵျၢင်ႉသိုဝ်ႈသိုဝ်ႈတေႃႇတေႃႇဢိၵ်ႇတင်းတၢင်းဢၼ်တႅပ်းတတ်းၽဵင်ႇၽဵင်ႇၼၼ်ႉပဵၼ်တီႈဢၼ် ထႃႇဝရႃႉၽြႃး၊ ယဵင်ႈၶႅၼ်းထုၵ်ႇၸႂ်ၵျိူၵ်ႈၸႂ်ၼႃႇသေတၢင်းဢၼ်ပႃးဢဝ်ၶိူင်ႈတၢင်းလူႇတင်းလၢႆမႃးၼၼ်ႉဢေႃႈ။
ၼႃႈဢၼ်ပူၵ်းပႅၼ်ဢိၵ်ႇတင်းႁူဝ်ၸႂ်ဢၼ်မႃႇၼႃႉယႂ်ႇဢၼ်ဝႃႈဢၼ်လႅင်းၶဝ်ၸိူဝ်းဢၼ်မိူၵ်ႈၼၼ်ႉပဵၼ်ဢပျတ်ႈဢေႃႈ။
ၶိုင်ပွင်လီလီငၢမ်းငၢမ်းတႃႉ။ မႂ်းတေလိူင်ႇၼမ်မၢၵ်ႈမီးၼႃႇဢေႃႈ။ ပေႃးမႂ်းႁဵတ်းၶၼ်ႁဵတ်းၽႂ်းၼႃႇၽႅဝ်ၸိုင်၊မႂ်းၸၢင်ႈဢမ်ႇလႆႈၵုမ်ႇၵိၼ်ၵုမ်ႇယႅမ်ႉဢေႃႈ။
ၸေးၸိမ်ႇဢုၵ်ႉၸႃႇဢၼ်ပႅတ်ႉလႅၼ်လႄႈလႆႈၼၼ်ႉၸၢင်ႈၸဵဝ်းႁၢႆလၢႆၵႂႃႇလႄႈ ၸၢင်ႈဢွၼ်သူင်ႇမႂ်းၸူးတီႈတူင်ႇၶိုမ်းတၢင်းတၢႆဢေႃႈ။
တၢင်းဢၼ်ႁၢဝ်ႉဢၼ်ၵျၢမ်းၵူၼ်းမိူၵ်ႈၼၼ်ႉၸၢင်ႈပတ်းၶဝ်ပႅတ်ႈၵႆၵႆ ၵွပ်ႈပိူဝ်ႈၶဝ်ထဵင်ပႅတ်ႈတၢင်းဢၼ်ႁဵတ်းသိုဝ်ႈသိုဝ်ႈတေႃႇတေႃႇၼၼ်ႉဢေႃႈ။
ၵေႃႉဢၼ်ႁဵတ်းတုၸရိူၵ်ႈၼၼ်ႉ ၸၢင်ႈပႆၵႂႃႇၸွမ်းၵႂႃႇၵႃႈၼႂ်းသဵၼ်ႈတၢင်းဢၼ်ၵူတ်ႉဢၼ်ငေႃးလႄႈ၊ၵေႃႉဢၼ်ဢမ်ႇမီးဢပျတ်ႈၸမ်ႉ၊ၸၢင်ႈႁဵတ်းသိုဝ်ႈသိုဝ်ႈတေႃႇတေႃႇဢေႃႈ။
တၢင်းဢၼ်ယူႇတီႈၸွၵ်ႉတီႈၸဵင်ႇ ၵႃႈၼိူဝ်ၵုင်းႁိူၼ်းၼၼ်ႉ ယဵင်ႈၶႅၼ်းလီၼႃႇသေ တၢင်းဢၼ်ယူႇၵႃႈၼႂ်းႁိူၼ်းလူၺ်ႈၵၼ်တင်းမေးဢၼ်ပွင်ႉမိုၼ်ႇပွင်ႉဝႃႈယူႇ ၶိူဝ်းၶိူဝ်းယႂ်းယႂ်းၼၼ်ႉဢေႃႈ။
ႁူဝ်ၸႂ်ၵေႃႉဢၼ်ႁၢႆႉမိူၵ်ႈၼၼ်ႉၸပ်းၸွႆးလွင်ႈတၢင်းဢၼ်ဢမ်ႇလီဢမ်ႇငၢမ်းလႄႈ၊ၶဝ်ဢမ်ႇမီးၸႂ်ဢၼ်ဢဵတ်းလူတီႈၽူႈလႂ်သေၵေႃႉသေၵူၼ်း။
ပေႃးၵေႃႉဢၼ်ၸၢင်ႈႁဵတ်းပျၢၵ်ႈႁဵတ်းၶူဝ်ၼၼ်ႉလႆႈၶၢမ်ႇတၢမ်ႇဢပျတ်ႈၸိုင်၊ၵေႃႉဢၼ်ငိူဝ်ႈငႃႉၼၼ်ႉၸၢင်ႈလႆႈသတိလႄႈ၊ၵေႃႉဢၼ်မီးပိင်ႇၺႃႇၼၼ်ႉၸၢင်ႈသွၼ်ဢဝ်ပိင်ႇၺႃႇ ၵႃႈတီႈဢၼ်ပိူၼ်ႈတၢင်ႇၵေႃႉသင်ႇသွၼ်သုင်းမႃႉမၼ်းၼၼ်ႉဢေႃႈ။
ၵေႃႉဢၼ်သိုဝ်ႈတေႃႇၼၼ်ႉ ၸၢင်ႈၶႆႈၸႂ်ဝူၼ်ႉၸႂ်တူၺ်းလူၺ်ႈႁိူၼ်းၵေႃႉဢၼ်မိူၵ်ႈၼၼ်ႉလႄႈ၊ၵေႃႉဢၼ်မိူၵ်ႈၸမ်ႉ၊ၽြႃးပဵၼ်ၸဝ်ႈတၵ်းဢဝ်လူမ်ႉပၵ်းၶိတ်းတူၵ်းသႂ်ႇၵႃႈတီႈဢၼ်လုလႅဝ်ဢေႃႈ။
ပေႃးမႂ်းဢိုတ်းႁူယူႇ ဢမ်ႇၶႂ်ႈငိၼ်းသဵင်ၵူၼ်းယၢၵ်ႈၵူၼ်းၽၢၼ်ၶဝ် ႁွင်ႉသႅၼ်ႇၼၼ်ႉၸိုင်၊သဵင်ဢၼ်တူဝ်မႂ်းႁွင်ႉသႅၼ်ႇၼၼ်ႉ တေဢမ်ႇမီးၵေႃႉဢၼ်လႆႈငိၼ်းသေၵေႃႉသေၵူၼ်း။
ပေႃးသေၵေႃႉသေၵူၼ်းၸႂ်မႆႈၶႂ်ႈၸႃႉမႂ်းၸိုင်၊လၢၵ်ႈသွင်ႇဢၼ်လွမ်ပၼ်တဵတ်ႇတဵတ်ႇၼၼ်ႉၸၢင်ႈၽေႇၸႂ်မၼ်းၼိမ်မႃးဢေႃႈ။
တၢင်းဢၼ်ၸီႇယၢင်ႇၸွမ်းၼင်ႇတြႃးၼၼ်ႉပဵၼ်တီႈဢၼ်ၵူၼ်းသိုဝ်ႈတေႃႇၸူမ်းသိူဝ်းလႄႈ၊သမ်ႉပဵၼ်တီႈၵေႃႉဢၼ်ဢမ်ႇတြႃးၼၼ်ႉၸႂ်လုဢေႃႈ။
ၵေႃႉဢၼ်ဝႄႈဢွၵ်ႇသေ ၵႃႈတီႈသဵၼ်ႈတၢင်းပိင်ႇၺႃႇၼၼ်ႉ ၸၢင်ႈၵႂႃႇလိုဝ်ႈၵႃႈၼႂ်းတီႈဢၼ်ၵူၼ်းတၢႆတင်းလၢႆၸုတုမ်ၼၼ်ႉဢေႃႈ။
ၵေႃႉဢၼ်မူၼ်ႈပျေႃႇၼႂ်းၸေးၸိမ်ႇၵႃႇမၵုင်ႇယူႇ၊ၵိၼ်လဝ်ႈမဝ်းၵမ်ယူႇလႄႈ ၵိၼ်ၶဝ်ႈလီၽၵ်းဝၢၼ်ယူႇၼၼ်ႉ ဢမ်ႇလႆႈမၢၵ်ႈလႆႈမီး။
ၵူၼ်းႁၢႆႉမိူၵ်ႈတင်းလၢႆ ၸၢင်ႈလႆႈၶၢမ်ႇဢဝ်ၽေးတုၵ်ႉၶႃႉဢၼ်ၶဝ်ၶတ်းၸႂ်ႁဵတ်းတီႈၵူၼ်းသိုဝ်ႈတေႃႇၸိူဝ်းၼၼ်ႉ ၶိုၼ်းထုၵ်ႇမႅၼ်ႈတီႈၶဝ်ဢေႃႈ။
တၢင်းဢၼ်ယူႇၼႂ်းပၢင်ႇႁၢတ်ႇသၢႆးၼၼ်ႉယဵင်ႈၶႅၼ်းလီၼႃႇသေ တၢင်းဢၼ်ယူႇလူၺ်ႈၵၼ်တင်း မေးဢၼ်ပွင်ႉမိုၼ်ႇပွင်ႉဝႃႈလႄႈႁႃတၢင်းၽိတ်းသႂ်ႇယူႇၼၼ်ႉဢေႃႈ။
ၶူဝ်းလဵင်းဢၼ်ထိူၵ်ႈၵႃႈထိူၵ်ႈၶၼ် ၸၢင်ႈမီးၵႃႈၼႂ်းႁိူၼ်းၵူၼ်းမီးပိင်ႇၺႃႇလႄႈ၊တီႈၵေႃႉဢၼ်မိူၵ်ႈၸမ်ႉ ၸၢင်ႈႁႂ်ႈမူတ်းႁႂ်ႈသဵင်ႈဢေႃႈ။
ႁႂ်ႈမီးၸႂ်ဢဵတ်းလူတင်းသၽေႃးဢၼ်သိုဝ်ႈလီယူဝ်းလီတႃႉ။ ဢသၢၵ်ႈမႂ်းတၵ်းယၢဝ်းယိုၼ်းလႄႈပိူၼ်ႈတၢင်ႇၵေႃႉ တၵ်းရူဝ်ႇသေႇလေႇမၢတ်ႈမႂ်းလႄႈ ယူႇထုၵ်ႇထုၵ်ႇၵၼ်တင်းမႂ်းဢေႃႈ။
ၶုၼ်သိုၵ်းဢၼ်မီးပိင်ႇၺႃႇၼၼ်ႉ ၸၢင်ႈသိမ်းဢဝ်ဝဵင်းဢၼ် ၵူၼ်းႁႅင်းယႂ်ႇၶဝ်ၵႅတ်ႇၶႄဝႆႉၼၼ်ႉလႄႈ၊ၸၢင်ႈယႃႉပႅတ်ႈလမ်းဝဵင်း ဢၼ်ၶဝ်ဢႃးၵူဝ်းၼၼ်ႉဢေႃႈ။
ပေႃးမႂ်းမီးဢလူဝ်ႇ ၶႂ်ႈယူႇၵႆယၢၼ်ၵၼ်တင်းၽေးတုၵ်ႉၶႃႉၸိုင်၊ဝႆႉသတိတီႈၵႃႈဢၼ်မႂ်းလၢတ်ႈၼၼ်ႉတႃႉ။
ၵေႃႉဢၼ်မႃႇၼႃႉယႂ်ႇလႄႈပူၵ်းပႅၼ်ၽႅၼ်သုင်ယူႇၼၼ်ႉ လႆႈႁွင်ႉၸိုဝ်ႈဝႃႈ၊ “ၵူၼ်းမဝ်မၢင်ဢၼ်ႁဵတ်းပျၢၵ်ႈ” သေလႄႈမၼ်းၸၢင်ႈႁဵတ်းတၢင်းဢၼ်သႄႉသွမ်းလူလၢႆၼၼ်ႉဢေႃႈ။
ၵူၼ်းၶၢၼ်ႉၵူၼ်းဢိူၼ် ဢၼ်ဢမ်ႇၶႂ်ႈႁဵတ်းၵၢၼ်ႁဵတ်းငၢၼ်းၼၼ်ႉ ၸၢင်ႈဢဝ်တူဝ်ၸဝ်ႈၵဝ်ႇတၢႆလႄႈ၊
တၢင်းႁဵတ်းမၼ်းၵႃႈမီးၸိုင်၊ၵူၺ်းၶႆႈၸႂ်လွင်ႈတၢင်းဢၼ်မၼ်းမီးဢလူဝ်ႇၶႂ်ႈလႆႈၼၼ်ႉဢေႃႈ။ ၵူၼ်းသိုဝ်ႈတေႃႇၸမ်ႉ၊ယင်းဢမ်ႇသေလၢႆလႄႈၸၢင်ႈယိုၼ်ႈမႅင်ႇဢေႃႈ။
ထႃႇဝရႃႉၽြႃး၊ လီႁင်ႈဢဵတ်ႇသဵတ်ႇၶိူင်ႈတၢင်းလူႇဢၼ်ၵူၼ်းႁၢႆႉမိူၵ်ႈသၢၵ်ႈလူႇၼၼ်ႉဢေႃႈ။ လိူဝ်တွၼ်းၼႃႇသေပိူၼ်ႈ ပေႃးၶဝ်မီးတင်းၸႂ်ဢၼ်ဢမ်ႇတြႃးသေလႄႈ သၢၵ်ႈလူႇၸိုင်၊ယဵင်ႈၶႅၼ်းၼႃႇဢေႃႈ။
တၢင်းဢၼ်ၶၢမ်ႇသၢၵ်ႈသေႇ ဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉ ပဵၼ်ဢၼ်ဢမ်ႇယုမ်ႇလႆႈလႄႈ၊ၶေႃႈၵႂၢမ်းၵေႃႉဢၼ်ၶႆႈၸႂ်ၸဵၼ်းၸႃးလူၺ်ႈလွင်ႈတၢင်းမၼ်းလီလီလႄႈ လၢတ်ႈၼၼ်ႉၸမ်ႉ၊ႁပ်ႉၶၢမ်ႇဢဝ်လႆႈဢေႃႈ။
ၵူၼ်းသိုဝ်ႈတေႃႇၸိုင်၊ပဵၼ်ၵေႃႉဢၼ်ယုမ်ႇတူဝ်ၸဝ်ႈၵဝ်ႇလႆႈလႄႈ၊ၵူၼ်းႁၢႆႉမိူၵ်ႈၸမ်ႉ၊လူဝ်ႇလႆႈႁဵတ်းႁၢင်ႈပဵၼ်ၵူၼ်းလီယူႇဢေႃႈ။
ပိင်ႇၺႃႇၺၢၼ်ႇတင်းတၢင်းၵျၢမ်ႇတၢင်းပွင်ဢၼ်လိုၵ်ႉဢၼ်လမ်ႇၸိူဝ်းၼၼ်ႉ ပေႃး ထႃႇဝရႃႉၽြႃး၊ ႁဵတ်းၶတ်းၵၼ်တင်းၶဝ်ၸိုင်၊ၶဝ်ဢမ်ႇမီးဢၵျူဝ်းဢေႃႈ။
မႂ်းၸၢင်ႈမႄးႁႅၼ်းမႃႉတင်းလၢႆဝႆႉပုၼ်ႈဝၼ်းဢၼ်တိုၵ်းသိုၵ်း လႆႈယူႇသေၵေႃႈ၊တၢင်းဢၼ်တၵ်းဢွင်ႇသိုၵ်းၸမ်ႉ၊ပဵၼ်တၢင်းဢၼ် ထႃႇဝရႃႉၽြႃး၊ ပၼ်ဢၶႂၢင်ႉဢေႃႈ။
သရေႇဢၼ်လီဢၼ်ငၢမ်းၼၼ်ႉယဵင်ႈၶႅၼ်းမျၢတ်ႈလီၼႃႇသေတၢင်းဢၼ်မၢၵ်ႈမီးလီပဵၼ်လႄႈ၊ၵျေးၸူးတၢင်းဢၼ်ၸွႆႈထႅမ်ၵၼ်ၼၼ်ႉယဵင်ႈၶႅၼ်းမျၢတ်ႈလီၼႃႇသေငိုၼ်းၶမ်းဢေႃႈ။
ၵူၼ်းမီးတင်းၵူၼ်းၽၢၼ်မီးတီႈမိူၼ်ၵၼ်မဵဝ်းၼိုင်ႈၸမ်ႉ ထႃႇဝရႃႉၽြႃး၊ ၽၢၼ်ႇသၢင်းႁဵတ်းပဵၼ်ၶဝ်တင်းသဵင်ႈတင်းမူတ်းဢေႃႈ။
ၵူၼ်းလၵ်းၵူၼ်းလႅမ်ၸၢင်ႈႁၼ်ၽေးသေလႄႈၸၢင်ႈဝႄႈပႅတ်ႈဢေႃႈ။ ၵူၼ်းမိူၵ်ႈၸမ်ႉ၊ၸၢင်ႈၵႂႃႇယူႇတိၵ်းတိၵ်းသေလႄႈထူပ်းၽေးၼၼ်ႉဢေႃႈ။
ထွမ်ႇဢဝ် ထႃႇဝရႃႉၽြႃး၊ လႄႈမီးႁူဝ်ၸႂ်ဢၼ်ၶျႃးတႅမ်ႇတႃႉ။ မႂ်းတေလႆႈဢၶႂၢင်ႉဢၼ်လႆႈလီလႆႈပဵၼ်၊လႆႈမီးသရေႇလႄႈလႆႈတၢင်းဢၼ်ဢသၢၵ်ႈယၢဝ်းယိုၼ်းဢေႃႈ။
ပေႃးမႂ်းႁၵ်ႉဢသၢၵ်ႈတၢၼ်းမႂ်းၸိုင်၊ဝႄႈပႅတ်ႈသေၵႃႈတီႈတူင်ႇႁႅဝ်ႉတူင်ႇၶိုမ်းဢၼ်ၸၢင်ႈတိဢဝ်ၵူၼ်းမိူၵ်ႈၵူႈၶၢဝ်းတၢင်းၼၼ်ႉၵႂႃႇၵႆၵႆတႃႉ။
သင်ႇသွၼ်သုင်းမႃႉပၼ်တီႈလုၵ်ႈဢွၼ်ႇၸွမ်းလူၺ်ႈဢၼ်မၼ်းထုၵ်ႇလီၵမ်ၵျၢင်ႉၼၼ်ႉတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊မၼ်းတၵ်းၶႆႈၸႂ်ထူပ်းယူႇၸူဝ်ႈဢသၢၵ်ႈမၼ်းဢေႃႈ။
ၵူၼ်းယၢၵ်ႈၵူၼ်းၽၢၼ်ၸၢင်ႈလႆႈပဵၼ်ၶႃႈတီႈၵူၼ်းမၢၵ်ႈၵူၼ်းမီးဢေႃႈ။ ပေႃးၵူႈငိုၼ်းၸိုင်၊မႂ်းၸၢင်ႈလႆႈပဵၼ်ၶႃႈတီႈၵေႃႉဢၼ်ၵူႈပၼ်ယိမ်ပၼ်ၼၼ်ႉဢေႃႈ။
ပေႃးမႂ်းဝၢၼ်ႇၸိူဝ်ႉၽၼ်းတုၸရိူၵ်ႈၸိုင်၊မႂ်းတၵ်းလႆႈပၢတ်ႇၶဝ်ႈတုၵ်ႉၶႃႉဢေႃႈ။ တၢင်းဢၼ်မႂ်းတဵၵ်းငႅၼ်းၵႅၼ်ႉၶေႃးပိူၼ်ႈၼၼ်ႉၵေႃႈတၵ်းသုတ်းသဵင်ႈဢေႃႈ။
ပႃးတင်းၸႂ်ၸေႇတၼႃႇလႄႈဢဝ်တၢင်းၵိၼ်တၢင်းၶူပ်းမႂ်းၽႄမႅင်ႇလဵင်ႉလူၵူၼ်းယၢၵ်ႈၵူၼ်းၽၢၼ်တႃႉ။ မႂ်းတၵ်းမီးမၢင်ႇၵလႃႇဢေႃႈ။
ႁေႃႈပႅတ်ႈၵူၼ်းဢၼ်ပူၵ်းပႅၼ်ၽႅၼ်သုင်ၼၼ်ႉတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊တၢင်းဢၼ်ထဵင်ၵၼ်၊တၢင်းဢၼ်ၽိတ်းၵၼ်တင်းတၢင်းဢၼ်လႃႇလင်ၵၼ်တေထၢတ်ႇယဵၼ်ဢေႃႈ။
ပေႃးမႂ်းၵျိူၵ်ႈႁၵ်ႉထုၵ်ႇၸႂ်ႁူဝ်ၸႂ်ဢၼ်ၶၢဝ်ၸၢင်ႇဢိၵ်ႇတင်းတၢင်းဢၼ်လၢတ်ႈၵႂၢမ်းဢူၼ်ႈၵႂၢမ်းဢွၼ်ႇၸိုင်၊မႂ်းၸၢင်ႈလႆႈပဵၼ်ၵေႃႉသႄႈၵၼ်တင်းၶုၼ်ႁေႃၶမ်းဢေႃႈ။
မၢၵ်ႇတႃ ထႃႇဝရႃႉၽြႃး၊ ပႂ်ႉထိင်းပိင်ႇၺႃႇတၢင်းဢၼ်ႁုဢၼ်ၸႅင်ႈၼၼ်ႉယူႇလႄႈ၊ၶေႃႈၵႂၢမ်းၵေႃႉဢၼ်ၸၢင်ႈပႅတ်ႉၸၢင်ႈလႅၼ်ၼၼ်ႉၸမ်ႉ၊မၼ်းၸဝ်ႈဢဝ်လူမ်ႉပၵ်းၶိတ်းတူၵ်းပႅတ်ႈဢေႃႈ။
ၵူၼ်းၶၢၼ်ႉၵူၼ်းဢိူၼ်ၸၢင်ႈလၢတ်ႈလႄႈဝႃႈ၊ “သၢင်ႇသီႈမီးၵႃႈၼွၵ်ႈပုၼ်ႉဢေႃႈ။ ပေႃးၵဝ်ဢွၵ်ႇၵႂႃႇ မၼ်းတၵ်းၶူပ်းၵိၼ်ၵဝ်ဢေႃႈ၊” ဝႃႈၼႆလႄႈယူႇၵႃႈၼႂ်းႁိူၼ်းယူႇၵူၺ်းဢေႃႈ။
တၢင်းၽိတ်းပိူင်ႈၵႃႇမေႇသုၸိုင်၊ပဵၼ်တူင်ႇႁႅဝ်ႉတူင်ႇၶိုမ်းလႄႈ၊မၼ်းၸၢင်ႈတိၺွပ်းဢဝ်ၶဝ်ၸိူဝ်းဢၼ် ထႃႇဝရႃႉၽြႃး၊ လီႁင်ႈဢဵတ်ႇသဵတ်ႇၼၼ်ႉဢေႃႈ။
လုၵ်ႈဢွၼ်ႇတင်းလၢႆမီးသၽေႃးဢၼ်ႁဵတ်းမိူၵ်ႈသေၵေႃႈ၊ၶွၼ်ႉဝၢႆၸၢင်ႈသင်ႇသွၼ်သုင်းမႃႉပၼ်လၢႆးဢၼ်ၶဝ်တၵ်းၵမ်ၵျၢင်ႉၸိူဝ်ႉၼင်ႇႁိုဝ်ၼၼ်ႉဢေႃႈ။
ပေႃးမႂ်းပၼ်လၢၵ်ႈသွင်ႇတီႈၵူၼ်းမၢၵ်ႈၵူၼ်းမီး၊ဢမ်ႇၼၼ်ၵေႃႈတဵၵ်းငႅၼ်းၵူၼ်းယၢၵ်ႈၵူၼ်းၽၢၼ်ႁႂ်ႈတူဝ်ၸဝ်ႈၵဝ်ႇမၢၵ်ႈမီးၸိုင်၊မႂ်းတၵ်းပဵၼ်ၵူၼ်းယၢၵ်ႈၵူၼ်းၽၢၼ်ဢေႃႈ။
ထုင်းၵႂၢမ်းဢၼ်ၵူၼ်းမီးပိင်ႇၺႃႇၶဝ်လၢတ်ႈၼၼ်ႉၵဝ်တၵ်းမွၵ်ႇလၢတ်ႈၼႄပၼ်ဢေႃႈ။ ထွမ်ႇဢဝ်လႄႈသွၼ်ဢဝ်ၵႂၢမ်းဢေႃးဝႃႇတႃႉၸိူဝ်းၼၼ်ႉတႃႉ။-
ပေႃးမႂ်းၶႆႈၸႂ်ထူပ်းၵႂၢမ်းၸိူဝ်းၼၼ်ႉလႄႈႁေႃးဢၢၼ်ႇယူႇၸိုင်၊မႂ်းတၵ်းမီးတၢင်းဢၼ်လီဢၼ်ငၢမ်းယူႇတႃႇသေႇဢေႃႈ။-
လွင်ႈၼင်ႇႁိုဝ် မႂ်းတၵ်းယုမ်ႇမၢတ်ႈဢိင်ပိုင်ႈ ထႃႇဝရႃႉၽြႃး၊ ယူႇၸိုင်၊ၵဝ်ဢဝ်ထုင်းၵႂၢမ်းပိင်ႇၺႃႇၼႆႉသင်ႇသွၼ်ပၼ်မႂ်းမိူဝ်ႈၼႆႉယဝ်ႉ။-
ၵဝ်တႅမ်ႈထုင်းၵႂၢမ်းသၢမ်သိပ်းၶေႃႈဢၼ်ၶဝ်ႈပႃးလွင်ႈတၢင်းဢၼ်ပၼ်သတိဢိၵ်ႇတင်းပိင်ႇၺႃႇဢၼ်ႁုဢၼ်ၸႅင်ႈၼၼ်ႉတီႈမႂ်း၊-
ႁႂ်ႈမႂ်းလႆႈႁုလွင်ႈတၢင်းဢၼ်လႂ်သိုဝ်ႈတေႃႇ၊လွင်ႈတၢင်းဢၼ်လႂ်ၸိုဝ်ႈၸႂ်ႈၼၼ်ႉဢိၵ်ႇတင်းႁႂ်ႈမႂ်းမေႃၶိုၼ်းလၢတ်ႈၵႂၢမ်းဢၼ်ၸိုဝ်ႈဢၼ်ၸႂ်ႈတီႈၶဝ်ၸိူဝ်းဢၼ်ပွႆႇၸႂ်ႉမႂ်းၼၼ်ႉဢေႃႈ။
ယႃႇပေႁိမ်ႁူင်ႇဢဝ်ဢုၵ်ႉၸႃႇၵူၼ်းယၢၵ်ႈၵူၼ်းၽၢၼ်ၵွပ်ႈပိူဝ်ႈဢၼ်မၼ်းယၢၵ်ႈၽၢၼ်ယူႇၼၼ်ႉ။ ယႃႇပေတဵၵ်းငႅၼ်းၵေႃႉဢၼ်မီးတုၵ်ႉၶႃႉၼၼ်ႉၵႃႈတီႈၼႂ်းလုမ်း။-
လွင်ႈမၼ်းၸမ်ႉ ထႃႇဝရႃႉၽြႃး၊ တၵ်းၽွမ်ႉၽၢႆႇၶဝ်ပုၼ်ႈဢမုၶဝ်ၼၼ်ႉဢိၵ်ႇတင်းတၵ်းႁိမ်ႁူင်ႇဢဝ်ဢသၢၵ်ႈၵေႃႉဢၼ်ႁိမ်ႁူင်ႇဢဝ်ဢုၵ်ႉၸႃႇပိူၼ်ႈၼၼ်ႉဢေႃႈ။
ယႃႇပေႁဵတ်းၵေႃႉႁဵတ်းသႄႈလူၺ်ႈၵၼ်တင်းၶဝ်ၸိူဝ်းဢၼ်ၸႂ်ပွတ်းၸႂ်လွတ်းတင်းၸိူဝ်းဢၼ်ၸႂ်လမ်သႆႈၵမ်ႇၼၼ်ႉ။-
ၵူဝ်မႂ်းသွၼ်ဢဝ်ဢၵျၢင်ႉၶဝ်လႄႈဢမ်ႇၸၢင်ႈၶိုၼ်းပိၼ်ႇၸႂ်မႂ်းဢေႃႈ။
ယႃႇပေပၼ်ၵတိဢၼ်ၶၢမ်ႇတႃႇဝုၼ်ႇပုၼ်ႈၼီႈပိူၼ်ႈတၢင်ႇၵေႃႉၼၼ်ႉ။-
ပေႃးမႂ်းဢမ်ႇမီးဢၼ်တၵ်းပၼ်ၸိုင်၊ၶဝ်တၵ်းသိမ်းဢဝ်ၸႃႉၸဵမ်ၵူႇၼွၼ်းမႂ်းလူးၵွၼ်ႇဢေႃႈ။
ယႃႇပေၶၢႆႉသဝ်လၵ်းဢၼ်မၵ်းမၼ်ႈလႅၼ်လိၼ်ဢၼ်ပူႇမွၼ်ႇမႂ်းပၵ်းဝႆႉၼၼ်ႉလႃးလႃး။
မႂ်းႁၼ်ၵေႃႉဢၼ်ၵတ်ႉဢၼ်ၶႅၼ်ႇလူၺ်ႈတၢင်းႁဵတ်းတၢင်းသၢင်ႈမၼ်းၼၼ်ႉႁိုဝ်း။ ၵေႃႉၼၼ်ႉၸၢင်ႈလႆႈၸုၵ်းယူႇၵႃႈတီႈၽၢႆႇၼႃႈၶုၼ်ႁေႃၶမ်းလႄႈ၊မၼ်းဢမ်ႇလႆႈၸုၵ်းယူႇၵႃႈတီႈၽၢႆႇၼႃႈၵူၼ်းယူဝ်းယူဝ်းတင်းလၢႆ။
မိူဝ်ႈဢၼ်မႂ်းၼင်ႈလႄႈၵိၼ်လူၺ်ႈၵၼ်တင်းၵူၼ်းယႂ်ႇၵူၼ်းလူင်ၸိုင်၊ၶႆႈၸႂ်ဝူၼ်ႉၸႂ်လူၺ်ႈၵေႃႉဢၼ်မီးယူႇၽၢႆႇၼႃႈမႂ်းလီလီငၢမ်းငၢမ်းတႃႉ။-
ပေႃးမႂ်းပဵၼ်ၵေႃႉဢၼ်ၵိၼ်လူင်ၸိုင်၊ၶျုၵ်ႈၵၼ်ႈတူဝ်ၸဝ်ႈၵဝ်ႇတႃႉ။-
ယႃႇပေမီးၸႂ်လေႃးၽႃႉၶႂ်ႈၵိၼ်တၢင်းၵိၼ်ဢၼ်ဝၢၼ်ဢၼ်မၼ်းၶုၼ်ၼၼ်ႉ။ မၼ်းၸၢင်ႈဢဝ်တင်းပရိယႄႇလႄႈၸူဝ်းဢဝ်မႂ်းဢေႃႈ။
ယႃႇပေႁႂ်ႈတူဝ်ၸဝ်ႈၵဝ်ႇႁဵတ်းယၢပ်ႇႁဵတ်းယဵၼ်းၼႃႇလူင်လၢင်ႁႂ်ႈလႆႈမၢၵ်ႈမီးလီပဵၼ်။ ပႃးတင်းပိင်ႇၺႃႇသတိလႄႈၶျုၵ်ႈတူဝ်ၸဝ်ႈၵဝ်ႇတႃႉ။-
ငိုၼ်းမႂ်းၸၢင်ႈမူတ်းၵႂႃႇၸူဝ်ႈၽႃႉမႅပ်ႈၵမ်းၼိုင်ႈလႄႈ၊တၵ်းပဵၼ်ၸိူဝ်ႉၼင်ႇဢၼ်မီးပိၵ်ႇလႄႈမိၼ်ပၢႆႈၵႂႃႇၸိူဝ်ႉၼင်ႇၼူၵ်ႉၶၢင်ႇလေႃႉၼၼ်ႉဢေႃႈ။
ယႃႇပေၵိၼ်ၵႃႈတီႈၽိူၼ်ၶဝ်ႈၵေႃႉဢၼ်ထီႇဢၼ်ၼဵဝ်ၼၼ်ႉ။ ယႃႇပေၶႂ်ႈၵိၼ်တၢင်းၵိၼ်တၢင်းၶူပ်းဢၼ်ဝၢၼ်ဢၼ်ၵေႃႉၼၼ်ႉလဵင်ႉလူမႂ်းၼၼ်ႉ။-
မၼ်းၸၢင်ႈလၢတ်ႈလႄႈဝႃႈ၊ “ၵိၼ်တႃႉ။ သႂ်ႇထႅင်ႈသေၵမ်း” ဝႃႈၼႆသေၵေႃႈၸႂ်ၸေႇတၼႃႇမၼ်းဢမ်ႇမီး။ ၵႃႈၼင်ႇဢၼ်ၸႂ်မၼ်းထၢင်ႇၼၼ်ႉမၼ်းတိုၼ်းပဵၼ်ၸိူဝ်ႉၼင်ႇၼၼ်ဢေႃႈ။-
ၵႃႈဢၼ်မႂ်းၵိၼ်ယဝ်ႉၼၼ်ႉမႂ်းသမ်ႉတၵ်းႁၢၵ်ႈဢွၵ်ႇပႅတ်ႈလႄႈ၊ၵႂၢမ်းလီၵႂၢမ်းဝၢၼ်မႂ်းတင်းသဵင်ႈတင်းလူင်တၵ်းပႅတ်ႈလၢႆလၢႆဢေႃႈ။
ယႃႇပေလၢတ်ႈၵႂၢမ်းဢၼ်မီးပိင်ႇၺႃႇသတိၼၼ်ႉတေႃႇၵူၼ်းမိူၵ်ႈ။ လွင်ႈမၼ်းၸမ်ႉမၼ်းၸၢင်ႈႁဵတ်းဢမ်ႇပေႃးၼင်ႇႁိုဝ်တီႈၵႂၢမ်းမႂ်းၼၼ်ႉဢေႃႈ။
ယႃႇပေၶၢႆႉသဝ်လၵ်းဢၼ်မၵ်းမၼ်ႈလႅၼ်လိၼ်ဢၼ်ပၵ်းဝႆႉၵဝ်ႇၵဝ်ႇၼၼ်ႉ။ ယႃႇပေသိမ်းတူင်ႈႁႆႈတူင်ႈၼႃးၶဝ်ၸိူဝ်းဢၼ်ၽၢၼ်ပေႃႈၽၢၼ်မႄႈၼၼ်ႉ။-
လွင်ႈမၼ်းၸမ်ႉ ထႃႇဝရႃႉၽြႃး၊ ဢဝ်ၽုင်းတၼ်းၶူဝ်းဢၼ်ယႂ်ႇၼႃႇႁႄႉၶႅၼ်ၶဝ်လႄႈ၊မၼ်းၸဝ်ႈတၵ်းၽွမ်ႉၽၢႆႇၶဝ်ပုၼ်ႈဢမုၶဝ်လႄႈၶတ်းမႂ်းဢေႃႈ။
ဝႆႉၸႂ်မႂ်းၸပ်းၸွႆးတီႈသြႃႇမႂ်းလႄႈသွၼ်ဢဝ်ၵႃႈၼင်ႇဢၼ်မႂ်းတၢတ်ႈၼိူင်ႇလႆႈၼၼ်ႉတႃႉ။
ယင်းဢမ်ႇသင်ႇသွၼ်သုင်းမႃႉလုၵ်ႈဢွၼ်ႇလႄႈယႃႇပေယူႇ။ ပိၵ်ႉသမ်ႉဢဝ်ၶွၼ်ႉဝၢႆပေႃႉယႅၼ်ႉမၼ်းသေၵေႃႈ မၼ်းဢမ်ႇတၢႆ။-
ပေႃးမႂ်းဢဝ်ၶွၼ်ႉဝၢႆပေႃႉယႅၼ်ႉမၼ်းၸိုင်၊မႂ်းၵႄႇသႄႇၶျွတ်ႈဢဝ်မၼ်းလွတ်ႈသေၵႃႈၼႂ်းမိူင်းမရၼႃႉဢေႃႈ။
လုၵ်ႈၸၢႆးၵဝ်႟။ ပေႃးႁူဝ်ၸႂ်မႂ်းမီးပိင်ႇၺႃႇၸိုင်၊ႁူဝ်ၸႂ်ၵဝ်ၼႆႉၵေႃႈတၵ်းမီးတၢင်းဢၼ်ၸူမ်းသိူဝ်းဢေႃႈ။-
ၵဝ်တၵ်းဢဝ်ၵုင်ႇဢဝ်မုၼ်မိူဝ်ႈဢၼ်ၵဝ်လႆႈငိၼ်းမႂ်းလၢတ်ႈၵႂၢမ်းပိင်ႇၺႃႇၼၼ်ႉဢေႃႈ။
ယႃႇပေၶွႆၶဝ်ၸိူဝ်းဢၼ်မီးဢပျတ်ႈၼၼ်ႉ။ ႁႂ်ႈမီးၸႂ်ဢၼ်ရူဝ်ႇသေႇၵူဝ်ယမ် ထႃႇဝရႃႉၽြႃး၊ ယူႇၸူဝ်ႈဢသၢၵ်ႈမႂ်းတႃႉ။-
ပေႃးမႂ်းႁဵတ်းၸိူဝ်ႉၼင်ႇၼၼ်ၸိုင်၊ဝၼ်းလိုၼ်းမိူဝ်းၼႃႈမႂ်းတၵ်းၼႃႈသႂ်ၸႂ်ၵီႈဢေႃႈ။
လုၵ်ႈၸၢႆးၵဝ်႟။ ထွမ်ႇဢဝ်ၵႂၢမ်းၵဝ်လႄႈမီးပိင်ႇၺႃႇယူႇတႃႉ။ ႁႂ်ႈႁူဝ်ၸႂ်မႂ်းၸွမ်းၵႃႈၼႂ်းသဵၼ်ႈတၢင်းၼၼ်ႉယူႇတႃႉ။-
ယႃႇပေႁဵတ်းၵေႃႉႁဵတ်းသႄႈလူၺ်ႈၵၼ်တင်းၶဝ်ၸိူဝ်းဢၼ်မဝ်းလဝ်ႈမဝ်းၵမ်ဢိၵ်ႇတင်းၸိူဝ်းဢၼ်ၵိၼ်ပူၼ်ႉၵိၼ်လိူဝ်ၼၼ်ႉ။-
ၶဝ်ၸိူဝ်းဢၼ်မဝ်းလဝ်ႈမဝ်းၵမ်တင်းၸိူဝ်းဢၼ်ၵိၼ်ပူၼ်ႉၵိၼ်လိူဝ်ၼၼ်ႉၸၢင်ႈလႆႈယၢၵ်ႈၽၢၼ်ဢေႃႈ။ ပေႃးမႂ်းၵူၺ်းၼွၼ်းပူၼ်ႉၼွၼ်းလိူဝ်ယူႇၸိုင်၊မႂ်းၸၢင်ႈလႆႈႁူမ်ႇၽႃႈယွၵ်းၽႃႈယႅၵ်းဢေႃႈ။
ထွမ်ႇဢဝ်ၵႂၢမ်းပေႃႈမႂ်းဢၼ်ၵိူတ်ႇလဵင်ႉမႂ်းမႃးၼၼ်ႉတႃႉ။ မိူဝ်ႈဢၼ်မႄႈမႂ်းထဝ်ႈမႃးၼၼ်ႉၼႄပျႃးလွင်ႈဢၼ်မႂ်းဢုပ်ႇယွင်ႈမႄႈမႂ်းၼၼ်ႉတႃႉ။
သမ်ႇမႃႇတြႃး၊ပိင်ႇၺႃႇ၊တၢင်းဢၼ်သွၼ်ဢဝ်တင်းတၢင်းဢၼ်ၺၢၼ်ႇလီၸိူဝ်းၼၼ်ႉပဵၼ်ဢၼ်ထိူၵ်ႈၵႃႈထိူၵ်ႈၶၼ်ၼႃႇလူင်လၢင်လႄႈယႃႇပေၶၢႆပႅတ်ႈ။
ၵေႃႉဢၼ်ပဵၼ်ပေႃႈၵေႃႉဢၼ်သိုဝ်ႈတေႃႇၼၼ်ႉတၵ်းသိူဝ်ႈပျေႃႇၼႃႇလူင်လၢင်လႄႈ၊မၼ်းလႆႈဢၶႂၢင်ႉဢၼ်ဢဝ်ၵုင်ႇဢဝ်မုၼ်လုၵ်ႈၸၢႆးမၼ်းဢၼ်မီးပိင်ႇၺႃႇၼၼ်ႉဢေႃႈ။
ႁႂ်ႈပေႃႈမႄႈမႂ်းလႆႈဢဝ်ၵုင်ႇဢဝ်မုၼ်မႂ်းတႃႉ။ ႁႂ်ႈမႄႈမႂ်းလႆႈသႂၢင်ႇသိူဝ်ႈၵွပ်ႈပိူဝ်ႈမႂ်းတႃႉ။
လုၵ်ႈၸၢႆးၵဝ်႟။ ဢဝ်ႁူဝ်ၸႂ်မႂ်းဢၢပ်ႈပၼ်တီႈၵဝ်တႃႉ။ ႁႂ်ႈတၢင်းၵမ်တၢင်းၵျၢင်ႉၵဝ်ၼၼ်ႉပဵၼ်တီႈဢၼ်မႂ်းလီယိူင်ႈႁဵတ်းၼၼ်ႉသေၵမ်း။-
မႄႈမွၵ်ႇယႃႈတင်းမႄႈယိင်းလေႃၸိူဝ်းၼၼ်ႉပဵၼ်ၸိူဝ်ႉၼင်ႇၵၢင်ႇႁၢင်ႈဢၼ်ၸၢင်ႈႁဵတ်းႁႂ်ႈတၢႆၼၼ်ႉဢေႃႈ။-
ၶဝ်ၸၢင်ႈလွမ်ပႂ်ႉမႂ်းယူႇ မိူၼ်ၸိူဝ်ႉၼင်ႇၵူၼ်းၸူၼ်လႄႈၸၢင်ႈႁဵတ်းႁႂ်ႈၵူၼ်းၸၢႆးၼမ်ၼႃႇၽွၵ်ႈသဵတ်ႈၸႃႇဢေႃႈ။
ၽူႈလႂ်မီးတၢင်းဢၼ်ယၢပ်ႇၸႂ်။ ၽူႈလႂ်မီးတုၵ်ႉၶႃႉ။ ၽူႈလႂ်မီးတၢင်းဢၼ်ပွင်ႉၶၢင်းပွင်ႉဝႃႈ။ ၽူႈလႂ်ယင်းဢမ်ႇမီးလွင်ႈမၼ်းလႄႈမီးတၢင်းဢၼ်တိူဝ်ႉမၢတ်ႇ။ ၽူႈလႂ်မီးတၢင်းဢၼ်မၢၵ်ႇတႃလႅင်ဝႃႈၼႆၸမ်ႉ၊-
ပဵၼ်ၶဝ်ၸိူဝ်းဢၼ်ၵိၼ်လဝ်ႈၼမ်ႉမၢၵ်ႇၸပိတ်ႉႁိုင်ၼႃႇတင်းၸိူဝ်းဢၼ်ႁႃၵိၼ်လဝ်ႈဢၼ်ၸႄႈယႃႈယႃဝႆႉၼၼ်ႉဢေႃႈ။-
ယႃႇပေပၼ်ဢၶႂၢင်ႉႁႂ်ႈၼမ်ႉလဝ်ႈမၢၵ်ႇၸပိတ်ႉၸူဝ်းဢဝ်မႂ်း၊ပိၵ်ႉသမ်ႉပဵၼ်သီလႅင်လႄႈငဝ်းမၼ်းႁိူဝ်ႈယူႇၵႃႈၼႂ်းၵွၵ်းဢၼ်ဢိုၼ်ၶဝ်ႈၵႂႃႇဝၢၼ်လီၸဵမ်းလီၼၼ်ႉ။-
ထိုင်မိူဝ်ႈၽုၵ်ႈၵၢင်ၼႂ်ၼၼ်ႉမႂ်းတၵ်းၶူပ်းၶိုၼ်ႈယူႇမိူၼ်ၸိူဝ်ႉၼင်ႇဢၼ်ငူးႁၢႆႉတွတ်ႇသႂ်ႇဝႆႉၼၼ်ႉဢေႃႈ။-
မႂ်းတၵ်းပဵၼ်တႃလဵၼ်းတႃလၢႆးလႄႈႁူဝ်ၸႂ်မႂ်းတၵ်းပိၼ်ႈယူႇၽၢၼ်ႈယူႇဢေႃႈ။-
မႂ်းတၵ်းပဵၼ်ၸိူဝ်ႉၼင်ႇၵေႃႉဢၼ်ၼွၼ်းလိုၼ်ႈယူႇၵႃႈၼႂ်းၵၢင်ပၢင်ႇလၢႆႇလႄႈ၊ပဵၼ်ၸိူဝ်ႉၼင်ႇဢၼ်ၼွၼ်းယူႇၵႃႈၼိူဝ်ႁူဝ်သဝ်လၢင်းယၢၼ်းႁိူဝ်းသၢင်းၽေႃးၼၼ်ႉဢေႃႈ။-
မႂ်းတၵ်းလၢတ်ႈလႄႈဝႃႈ၊ “ၶဝ်ထုပ်ႉႁႅမ်ၵဝ်ယဝ်ႉ။ ၵူၺ်းၵႃႈ၊ၵဝ်ဢမ်ႇၸဵပ်း။ ၶဝ်ပေႃႉယႅၼ်ႉၵဝ်ယဝ်ႉ။ ၵူၺ်းၵႃႈ၊ဢမ်ႇႁုတူဝ်။ ၵဝ်တိုၼ်ႇမႃးမိူဝ်ႈလႂ်။ ၵဝ်သမ်ႉတၵ်းႁႃၵိၼ်ထႅင်ႈလူးၵွၼ်ႇဢေႃႈ၊” ဝႃႈၼင်ႇၼႆဢေႃႈ။
ယႃႇပေၶွႆၶဝ်ၸိူဝ်းဢၼ်ႁဵတ်းတုၸရိူၵ်ႈၼၼ်ႉ။ ယႃႇပေမီးၸႂ်ၶႂ်ႈႁဵတ်းၵေႃႉႁဵတ်းသႄႈလူၺ်ႈၵၼ်တင်းၶဝ်။-
ႁူဝ်ၸႂ်ၶဝ်ၵျၢမ်ႇပွင်ႁႂ်ႈလႆႈယႃႉပိူၼ်ႈပႅတ်ႈယူႇလႄႈ၊သူပ်းၶဝ်ၵေႃႈၸၢင်ႈလၢတ်ႈၵႂၢမ်းဢၼ်ႁဵတ်းၽေးသႂ်ႇပိူၼ်ႈၼၼ်ႉယူႇဢေႃႈ။
လႆႈပႃးတင်းပိင်ႇၺႃႇသေလႄႈတႄႇႁဵတ်းႁိူၼ်းဢိၵ်ႇတင်းလႆႈပႃးတင်းၺၢၼ်ႇတၢင်းၵတ်ႉသေလႄႈႁႂ်ႈမၼ်းလႆႈမၼ်ႈလႆႈၶိူင်ႇဢေႃႈ။-
လႆႈပႃးတင်းၺၢၼ်ႇတၢင်းဢၼ်ႁုဢၼ်ၸႅင်ႈသေလႄႈႁႂ်ႈလုၵ်းႁိူၼ်းတင်းလၢႆလႆႈတဵမ်ဝႆႉတင်းဢုၵ်ႉၸႃႇဢၼ်ထိူၵ်ႈၵႃႈထိူၵ်ႈၶၼ်၊ဢၼ်လီထုၵ်ႇၸႂ်ၵူႈၸိူဝ်ႉၵူႈပိူင်ၼၼ်ႉဢေႃႈ။
ၵေႃႉဢၼ်မီးပိင်ႇၺႃႇၼၼ်ႉမျၢတ်ႈၼႃႇသေၵေႃႉဢၼ်မီးဢဵၼ်ႁႅင်းဢေႃႈ။ ၸႂ်ႈတႄႉဢေႃႈ။ ၵေႃႉဢၼ်မီးၺၢၼ်ႇၼၼ်ႉယဵင်ႈၶႅၼ်းမီးတၼ်းၶူဝ်းသေၵေႃႉဢၼ်မီးႁႅင်းၼၼ်ႉဢေႃႈ။-
ၸူဝ်ႈဢၼ်မႂ်းဢမ်ႇပႆႇၵႂႃႇတိုၵ်းသိုၵ်းၼၼ်ႉမႂ်းတၵ်းလႆႈၶိုင်ပွင်လီလီဢွၼ်တၢင်းလႄႈ၊တၢင်းဢၼ်ပိူၼ်ႈပၼ်တၢင်းၵျၢမ်ႇတၢင်းပွင်ၼၼ်ႉယဵင်ႈလႆႈၼမ်ယဵင်ႈၶႅၼ်းလီပုၼ်ႈဢၼ်မႂ်းတၵ်းပႄႉၼႅင်ႇၼၼ်ႉဢေႃႈ။
ထုင်းၵႂၢမ်းပိင်ႇၺႃႇတင်းလၢႆပဵၼ်ဢၼ်သုင်ၼႃႇပုၼ်ႈၵူၼ်းမိူၵ်ႈထၢၼ်ႈပေႃးဢမ်ႇၶိုတ်းထိုင်လႆႈလႄႈ၊မိူဝ်ႈဢၼ်လူဝ်ႇလၢတ်ႈလွင်ႈၼႃႈၵၢၼ်ပိူင်ယႂ်ႇပိူင်လူင်ၼၼ်ႉမၼ်းဢမ်ႇၸၢင်ႈဢႃႈပၢၵ်ႇလႃးလႃး။
ၵေႃႉဢၼ်ၵျၢမ်ႇပွင်လွင်ႈဢၼ်ဢမ်ႇလီၼၼ်ႉၸိုင်၊ပိူၼ်ႈဝႃႈၵေႃႉၼၼ်ႉၸၢင်ႈႁဵတ်းၽေးဢေႃႈ။-
တၢင်းၵျၢမ်ႇတၢင်းပွင်ၵူၼ်းမိူၵ်ႈၼၼ်ႉပႃးဢပျတ်ႈလႄႈ၊ၵေႃႉဢၼ်ၸၢင်ႈႁဵတ်းပျၢၵ်ႈႁဵတ်းၶူဝ်တီႈပိူၼ်ႈၼၼ်ႉပဵၼ်ဢၼ်လီႁင်ႈဢဵတ်ႇသဵတ်ႇဢေႃႈ။
ပေႃးမႂ်းၸႂ်လုၼႂ်းၶိင်ႇမိူဝ်ႈဢၼ်ဢမုႁွတ်ႈထိုင်ၼၼ်ႉၸိုင်၊ႁႅင်းမႂ်းၵေႇဢေႃႈ။
ႁိပ်ႈၼႅတ်ႈႁႂ်ႈလႆႈၵႄႇၼုၵ်ႈဢဝ်ၵေႃႉဢၼ်လႆႈၶၢမ်ႇတၢင်းဢၼ်ၸီႇယၢင်ႇဢဝ်တၢႆလူၺ်ႈတြႃးဢၼ်တႅပ်းတတ်းဢမ်ႇသိုဝ်ႈတေႃႇၼၼ်ႉတႃႉ။-
ပိၵ်ႉသမ်ႉမႂ်းဝႃႈ၊ “ၵဝ်ဢမ်ႇႁု၊” ဝႃႈၼႆသေၵေႃႈ ထႃႇဝရႃႉၽြႃး၊ ႁုယူႇလႄႈ၊မၼ်းၸဝ်ႈတၵ်းၸီႇယၢင်ႇသၽေႃးၵၢင်ၸႂ်မႂ်းဢေႃႈ။ မၼ်းၸဝ်ႈပႂ်ႉတူၺ်းမႂ်းလႄႈႁုႁၼ်မႂ်းဢေႃႈ။ မၼ်းၸဝ်ႈတွပ်ႇတႅၼ်းပၼ်ဢၵျူဝ်းဢပျတ်ႈတီႈၵူၼ်းႁင်းၽႂ်ႁင်းမၼ်း ၸွမ်းၼင်ႇတၢင်းၵမ်တၢင်းၵျၢင်ႉမၼ်းမီးၼၼ်ႉဢေႃႈ။
လုၵ်ႈၸၢႆး႟။ ၵိၼ်ၼမ်ႉၽိုင်ႈတႃႉမၼ်းပဵၼ်ဢၼ်လီဢေႃႈ။ ၸိူဝ်ႉၼင်ႇဢၼ်ႁူဝ်ၼမ်ႉႁူင်းၽိုင်ႈဝၢၼ်လီၸဵမ်းလီတီႈလိၼ်ႉမႂ်းၼၼ်ႉၸိုင်၊-
မႂ်းတၵ်းတေႁုဝႃႈပိင်ႇၺႃႇပဵၼ်ဢၼ်လီၼႃႇပုၼ်ႈၸႂ်ဝိၺိၺ်ႇမႂ်းၼၼ်ႉဢေႃႈ။ ႁႃဢဝ်ႁႂ်ႈလႆႈပိင်ႇၺႃႇတႃႉ။ ဝၼ်းလိုၼ်းမိူဝ်းၼႃႈမႂ်းတၵ်းၼႃႈသႂ်ၸႂ်ၵီႈဢေႃႈ။
ယႃႇပေႁဵတ်းမိူၼ်ၸိူဝ်ႉၼင်ႇၵူၼ်းမိူၵ်ႈၵေႃႉဢၼ်ၵျၢမ်ႇပွင်ႁႂ်ႈလႆႈၸူၼ်ဢဝ်ၵူၼ်းဢၼ်သိုဝ်ႈတေႃႇၼၼ်ႉ။ ယႃႇပေယႃႉၽဵဝ်ႈတီႈယူႇတီႈသဝ်းမၼ်းၼၼ်ႉ။-
ၵေႃႉဢၼ်သိုဝ်ႈတေႃႇၼၼ်ႉပိၵ်ႉသမ်ႉမၼ်းလူမ်ႉၸဵတ်းပွၵ်ႈသေၵေႃႈမၼ်းၶိုၼ်းလုၵ်ႉလႆႈၵူႈပွၵ်ႈလႄႈ၊ၵေႃႉဢၼ်ဢမ်ႇတြႃးၸမ်ႉ ၸၢင်ႈလႆႈလူမ်ႉတူၵ်းၵႃႈၼႂ်းၽေးဢၼ်ႇတရေႇလူင်ဢေႃႈ။
မိူဝ်ႈဢၼ်ရၢၼ်ႇသူႇမႂ်းလူမ်ႉၸိုင်၊ယႃႇပေၸူမ်း။ မိူဝ်ႈဢၼ်မၼ်းၶီႈလိုတ်းၼၼ်ႉၵေႃႈယႃႇပေမီးၸႂ်ဢၼ်သႂၢင်ႇသိူဝ်း။-
ၵူဝ် ထႃႇဝရႃႉၽြႃး၊ ႁုႁၼ်လႄႈဢမ်ႇထုၵ်ႇၸႂ်ၵျိူၵ်ႈၸႂ်ၵူၺ်းဢမ်ႇၵႃး၊ၵူဝ်မၼ်းၸဝ်ႈတၵ်းဢမ်ႇၸီႇယၢင်ႇပၼ်တၢမ်ႇတီႈမၼ်းဢေႃႈ။
ယႃႇပေမႆႈၸႂ်လူၺ်ႈၶဝ်ၸိူဝ်းဢၼ်ဢမ်ႇတြႃးၼၼ်ႉ။ ယႃႇပေၶွႆၶဝ်။-
လွင်ႈမၼ်းၸမ်ႉၵေႃႉဢၼ်ဢမ်ႇတြႃးၼၼ်ႉဢမ်ႇမီးဢၵျူဝ်းမိုဝ်ႉဝၼ်းလိုၼ်း။ ၶဝ်ဢမ်ႇမီးတီႈဢၼ်တၵ်းမုင်ႈထႃႈမွင်းထႃႈ။
လုၵ်ႈၸၢႆးၵဝ်႟။ ၵူဝ်ႁႄ ထႃႇဝရႃႉၽြႃး၊ လႄႈရူဝ်ႇသေႇလေႇမၢတ်ႈ ၶုၼ်ႁေႃၶမ်းတႃႉ။ ယႃႇပေလေႃးလႄးႁဵတ်းၵေႃႉႁဵတ်းသႄႈလူၺ်ႈၵၼ်တင်းၶဝ်ၸိူဝ်းဢၼ်ပဵၼ်ၵူၼ်းလုၵ်ႉၽိုၼ်ႉၼၼ်ႉ။ ၶဝ်ၸၢင်ႈလႆႈလုလႅဝ်ၵႂႃႇၵမ်းလဵဝ်ဢေႃႈ။-
ၽူႈလႂ်တၵ်းႁုတၢင်းဢၼ်ၽြႃးပဵၼ်ၸဝ်ႈတင်းၶုၼ်ႁေႃၶမ်းၸၢင်ႈႁဵတ်းႁႂ်ႈလုလႅဝ်ၼၼ်ႉလႆႈ။
ၵူၼ်းမီးပိင်ႇၺႃႇတင်းလၢႆယင်းလၢတ်ႈဝႆႉၸိူဝ်းၼႆႉထႅင်ႈလႄႈဝႃႈၸမ်ႉ၊တၢင်းဢၼ်ၶုၼ်ဢၼ်ၸီႇယၢင်ႇတြႃးထွၵ်ႈလူၺ်ႈၼႃႈၵူၼ်းၼၼ်ႉဢမ်ႇထုၵ်ႇဢမ်ႇလီ။-
ပေႃးမၼ်းၸီႇယၢင်ႇတီႈၵေႃႉဢၼ်ဢမ်ႇတြႃးၼၼ်ႉလႄႈဝႃႈ၊ “မႂ်းဢမ်ႇမီးဢပျတ်ႈ၊” ဝႃႈၼင်ႇၼႆၸိုင်၊ၵူၼ်းတင်းလၢႆတၵ်းသႄႉသွမ်းမၼ်းလႄႈဢွၼ်ၵၼ်လီႁင်ႈဢဵတ်ႇသဵတ်ႇမၼ်းဢေႃႈ။-
ၶုၼ်လုမ်းၸိူဝ်းဢၼ်သုင်းမႃႉတၢင်ႇဢပျတ်ႈတီႈၵေႃႉဢၼ်ဢမ်ႇတြႃးၼၼ်ႉၸမ်ႉတၵ်းမီးတၢင်းဢၼ်ၸႂ်သႃႇယႃႇလႄႈမၢင်ႇၵလႃႇတၢင်းလီတၵ်းတူၵ်းႁွတ်ႈၵႃႈၼိူဝ်ၶဝ်ဢေႃႈ။
တၢင်းဢၼ်ၶိုၼ်းလၢတ်ႈဢၼ်မၢၼ်ႇဢၼ်မႅၼ်ႈၼၼ်ႉပဵၼ်လၢၵ်ႈၶၼႃႇတၢင်းဢၼ်မိုတ်ႈၵိုဝ်းၵၼ်ဢေႃႈ။
မႄးႁႅၼ်းၵၢၼ်ငၢၼ်းမႂ်းၵႃႈတီႈၼွၵ်ႈဝႆႉယဝ်ႉသေလႄႈပွင်ႁဵတ်းႁႆႈမႂ်းၼႃးမႂ်းတၼ်းဝႆႉလီလီဢွၼ်တၢင်းတႃႉ။ လိုၼ်းၼၼ်ႉၸင်ႇႁဵတ်းႁိူၼ်းမႂ်းတႃႉ။
လွင်ႈမၼ်းယင်းဢမ်ႇမီးလႄႈယႃႇပေၶၢမ်ႇသၢၵ်ႈသေႇယူႇၽၢႆႇၼိုင်ႈတင်းပိူၼ်ႈသေၵေႃႉသေၵူၼ်း။ ယႃႇပေလၢတ်ႈဝႃႈဢၼ်ဢမ်ႇၸိုဝ်ႈဢမ်ႇၸႂ်ႈလွင်ႈမၼ်းၼၼ်ႉ။-
ယႃႇပေလၢတ်ႈလႄႈဝႃႈ၊ “ၵဝ်တၵ်းႁဵတ်းတီႈမၼ်းၸွမ်းၵႃႈၼင်ႇဢၼ်မၼ်းႁဵတ်းတီႈၵဝ်ၼၼ်ႉဢေႃႈ၊ၵဝ်တၵ်းတွပ်ႇတႅၼ်းဢပျတ်ႈတီႈမၼ်းၸွမ်းၵႃႈၼင်ႇဢၼ်မၼ်းၵမ်ၵျၢင်ႉၼၼ်ႉဢေႃႈ” ဝႃႈၼင်ႇၼႆၼၼ်ႉ။
ၽဝ်ႇၼိုင်ႈၵဝ်ၵၢႆၵႂႃႇၵႃႈႁိမ်းတူင်ႈၼႃးဢိၵ်ႇတင်းသူၼ်မၢၵ်ႇၸပိတ်ႉၵူၼ်းၶၢၼ်ႉၵူၼ်းဢိူၼ်ဢၼ်ဢမ်ႇမီးၺၢၼ်ႇၼၼ်ႉဢေႃႈ။-
ၵဝ်လႆႈႁၼ်ယုမ်းၼၢမ်ႁူမ်ႇငမ်းယူႇ၊တူၼ်ႈယိူဝ်ႈတူၼ်ႈယႃႈသတ်ႉတဵမ်ယူႇ၊ဢိၵ်ႇတင်းသၢင်ႉမၢၵ်ႇႁိၼ်မၼ်းၵၢၼ်ႉဝႆႉပင်းဝႆႉယူႇဢေႃႈ။-
ၵဝ်လူတူၺ်းလႄႈၶႆႈၸႂ်ဝူၼ်ႉၸႂ်လွင်ႈတၢင်းၼၼ်ႉသေယဝ်ႉသွၼ်ဢဝ်ဢၵျူဝ်းဢပျတ်ႈမၼ်းယဝ်ႉၸင်ႇလႆႈႁုဝႃႈ၊-
ၼွၼ်းၵမ်းဢွၼ်ႇၼိုင်ႈလူးၵွၼ်ႇ၊လပ်းသႅပ်ႉၼိုင်ႈလူးၵွၼ်ႇ၊ဢဝ်မိုဝ်းၵွတ်ႇၵႆႇလႄႈလိုဝ်ႈၵမ်းဢွၼ်ႇၼိုင်ႈလူးၵွၼ်ႇဝႃႈၼင်ႇၼႆၼၼ်ႉ၊-
ယၢမ်းမိူဝ်ႈဢၼ်မႂ်းလပ်းၵႂႃႇယဝ်ႉၼၼ်ႉတၢင်းဢၼ်ၽၢၼ်ဢၼ်ၵွတ်းႁွတ်ႈထိုင်မႃးတိုၵ်းတေႃးမႂ်းမိူၼ်ၸိူဝ်ႉၼင်ႇၵူၼ်းၸူၼ်ဢၼ်ယိပ်းပႃးလၢၵ်ႈၼၢၵ်ႈမႃးၸူၼ်ဢဝ်မႂ်းၼၼ်ႉဢေႃႈ။
ဢၼ်ၸိူဝ်းၼႆႉသမ်ႉပဵၼ်ထုင်းၵႂၢမ်းပိင်ႇၺႃႇဢၼ်ၶုၼ် သေႃးလမုၼ်ႇ၊ ႁေႃးလၢတ်ႈလႄႈၵူၼ်းၼႂ်းလုမ်းၶုၼ်ႁေႃၶမ်း ႁေႇၸၵိ၊ မိူင်း ယုတႃႉ၊ ၶဝ်တႅမ်ႈၸွမ်းမီးဝႆႉဢေႃႈ။
ႁဝ်းရူဝ်ႇသေႇၵူဝ်ယမ်ၽြႃးပဵၼ်ၸဝ်ႈၵွပ်ႈလူၺ်ႈတၢင်းဢၼ်မၼ်းၸဝ်ႈသိူင်ႇမႅပ်းဢမုဝႆႉၼၼ်ႉလႄႈ၊ႁဝ်းရူဝ်ႇသေႇၵူဝ်ယမ်ၶုၼ်ႁေႃၶမ်းတင်းလၢႆၵွပ်ႈလူၺ်ႈတၢင်းဢၼ်ၶဝ်ၽုၺ်ႇလၢတ်ႈၼႄၼၼ်ႉဢေႃႈ။
ႁဝ်းဢမ်ႇတွၼ်ႉႁုတၢင်းဢၼ်ၶုၼ်ႁေႃၶမ်းၵျၢမ်ႇပွင်ၸိူဝ်ႉၼင်ႇႁိုဝ်ၼၼ်ႉသေပွၵ်ႈ။ လွင်ႈမၼ်းၸမ်ႉ၊တၢင်းၵျၢမ်ႇတၢင်းပွင်မၼ်းၸဝ်ႈၼၼ်ႉသုင်ၼႃႇသေၽႃႉၵၢင်ႁၢဝ်၊လိုၵ်ႉၼႃႇသေၼမ်ႉသမ်ႇမုၵ်ႈတြႃႇလႄႈႁဝ်းဢမ်ႇၶိုတ်းထိုင်လႆႈ။
ပေႃးၶႃႇပႅတ်ႈၶီႈၶျေႃႇဢွၵ်ႇသေၵႃႈၼႂ်းငိုၼ်းၸိုင်၊ၸၢင်ႈလႆႈငိုၼ်းဢၼ်လီပုၼ်ႈတႃႇတၵ်းႁဵတ်းၵွၵ်းဢေႃႈ။-
ပႄႇၽဵဝ်ႈၵူၼ်းပၼ်တၢင်းၵျၢမ်ႇဢၼ်ဢမ်ႇတြႃးၼၼ်ႉပႅတ်ႈသေၵႃႈတီႈၶုၼ်ႁေႃၶမ်းတႃႉ။ ရႃႇၸႃႉပလၢင်ႇမၼ်းၸဝ်ႈတၵ်းတႄႇယူႇၼႂ်းတြႃးဢေႃႈ။
ယႃႇပေယွင်ႈယေႃးတူဝ်ၸဝ်ႈၵဝ်ႇၽၢႆႇၼႃႈၶုၼ်ႁေႃၶမ်း။ ယႃႇပေၸုၵ်းၵႃႈတီႈ၊တီႈယူႇၵူၼ်းယႂ်ႇၵူၼ်းလူင်။-
လွင်ႈမၼ်းၸမ်ႉတၢင်းဢၼ်ပိူၼ်ႈလၢတ်ႈဝႃႈ၊ “ၶိုၼ်ႈမႃးတၢင်းႁွင်ႈၼိူဝ်ၼႆႉသေၵမ်း၊” ဝႃႈၼင်ႇၼႆၼၼ်ႉယဵင်ႈၶႅၼ်းလီၼႃႇသေတၢင်းဢၼ်ပိူၼ်ႈၸႂ်ႉမႂ်းၶၢႆႉပၼ်တီႈပုၼ်ႈၵူၼ်းယႂ်ႇၵူၼ်းလူင်ၼၼ်ႉဢေႃႈ။
ယႃႇပေႁိပ်ႈၼႅတ်ႈဢဝ်လွင်ႈတၢင်းဢၼ်မႂ်းလႆႈႁၼ်ၼၼ်ႉၵႂႃႇတၢင်ႇထိုင်ၵႃႈတီႈလုမ်း။ ပေႃးၵေႃႉဢၼ်ၶၢမ်ႇသၢၵ်ႈသေႇတၢင်ႇၵေႃႉမႃးၽုၺ်ႇၼႄတၢင်းၽိတ်းမႂ်းၸိုင်၊မႂ်းတၵ်းႁဵတ်းၸိူဝ်ႉၼင်ႇႁိုဝ်။
ပေႃးမႂ်းမီးတၢင်းဢၼ်ၶတ်းၵၼ်တင်းၵူၼ်းႁိူၼ်းၸမ်ၵၼ်တင်းမႂ်းသေၸိူဝ်ႉသေပိူင်ၸိုင်၊ၵႄႈလိတ်ႈၵၼ်ၼႂ်းၵႄႈဝူင်ႈၵၢင်သူသွင်ၵေႃႉၵူၺ်းတႃႉ။ ယႃႇပေဢဝ်လွင်ႈတၢင်းဢၼ်သိူင်ႇမႅပ်းဝႆႉၼၼ်ႉ ၽုၺ်ႇမွၵ်ႇၼႄပိူၼ်ႈ။-
ၵူဝ်ပိူၼ်ႈႁုသၽေႃးမႂ်းလႄႈမႂ်းတၵ်းလႆႈဢူၵ်းဢၢႆယူႇတႃႇသေႇဢေႃႈ။
ၶေႃႈၵႂၢမ်းဢၼ်လၢတ်ႈမိူဝ်ႈဢၼ်ၶိင်ႇမၼ်းထုၵ်ႇၼၼ်ႉမိူၼ်ၸိူဝ်ႉၼင်ႇဢၼ်ဢဝ်မဵတ်ႉၶမ်းၶပ်ႉၸီႇႁၢင်ႈၶိူင်ႈသႂ်ႇလၢႆးၵႃႈၼိူဝ်ငိုၼ်းဢေႃႈ။
ၵႂၢမ်းပိင်ႇၺႃႇဢၼ်ပၼ်သတိတီႈၵေႃႉဢၼ်မီးၸႂ်ၶႂ်ႈထွမ်ႇဢဝ်ၼၼ်ႉပဵၼ်ၸိူဝ်ႉၼင်ႇပေႇႁူၶမ်း၊ဢမ်ႇၼၼ်ၵေႃႈၸိူဝ်ႉၼင်ႇၶိူင်ႈၶမ်းၸႅတ်ႈၸႅတ်ႈၼၼ်ႉဢေႃႈ။
တမၢၼ်ႇဢၼ်ယုမ်ႇလႆႈၼၼ်ႉၸၢင်ႈႁႂ်ႈၵေႃႉဢၼ်ပွႆႇၸႂ်ႉမၼ်းၼၼ်ႉလႆႈၵတ်းၸႂ်ယဵၼ်ၸႂ်မိူၼ်ၸိူဝ်ႉၼင်ႇၼမ်ႉၵတ်းမိူဝ်ႈဢၼ်ပၢတ်ႇၶဝ်ႈၼႂ်းၶိင်ႇလႅတ်ႇမႆႈၼၼ်ႉဢေႃႈ။
ၵေႃႉဢၼ်ဝႆႉၵတိဝႃႈ၊ “တေပၼ်ဢေႃႈ၊” ဝႃႈၼႆသေယဝ်ႉယင်းဢမ်ႇပၼ်ၼၼ်ႉပဵၼ်ၸိူဝ်ႉၼင်ႇလူမ်းတင်းမွၵ်ႇၵုမ်ႈဢၼ်ဢမ်ႇပႃးၼမ်ႉၽူၼ်ၼၼ်ႉဢေႃႈ။
တၢင်းဢၼ်ယိူၼ်ႉၶၢမ်ႇၼၼ်ႉၸၢင်ႈတိုၵ်းယူင်းၸူဝ်းဢဝ်ၶုၼ်လႆႈလႄႈ၊လိၼ်ႉဢၼ်ဢူၼ်ႈဢၼ်ဢွၼ်ႇၼၼ်ႉၸၢင်ႈႁၵ်းပႅတ်ႈလုပ်ႇလႆႈဢေႃႈ။
ပေႃးမႂ်းထူပ်းၼမ်ႉၽိုင်ႈၸိုင်၊ၵိၼ်ႁႂ်ႈပေႃးဢိမ်ႇၵူၺ်းတႃႉ။ ပေႃးၵိၼ်ပူၼ်ႉၵိၼ်လိူဝ်ၸိုင်၊တၵ်းမိူဝ်ႇလႄႈႁၢၵ်ႈဢေႃႈ။-
ယႃႇပေၵႆႉၵႂႃႇလႄႇလဵၼ်ႈတီႈႁိူၼ်းၵူၼ်းႁိူၼ်းၸမ်ၵၼ်တင်းမႂ်းၼၼ်ႉၼႃႇၽႅဝ်။ ၵူဝ်မၼ်းမိူဝ်ႇၸၢၼ်ႈလႄႈၸင်းမႂ်းဢေႃႈ။
တၢင်းဢၼ်ၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉပဵၼ်ၸိူဝ်ႉၼင်ႇၶွၼ်ႉလဵၵ်း၊လၢပ်ႇလႅဝ်းတင်းပိုၼ်ဢၼ်ပၢႆလႅမ်ၼၼ်ႉဢေႃႈ။
တၢင်းဢၼ်ဢိင်ပိုင်ႈၵူၼ်းဢၼ်ဢမ်ႇယုမ်ႇလႆႈၼႂ်းမိူဝ်ႈဢၼ်ထူပ်းၽေးၼၼ်ႉပဵၼ်ၸိူဝ်ႉၼင်ႇၶဵဝ်ႈမၢင်ႈ၊ဢမ်ႇၼၼ်ၵေႃႈပဵၼ်ၸိူဝ်ႉၼင်ႇတိၼ်ဢၼ်ပြၢတ်ႈၼၼ်ႉဢေႃႈ။
တၢင်းဢၼ်ႁဵတ်းၵႂၢမ်းပၼ်တီႈၵေႃႉဢၼ်မႆႈၸႂ်ၶီၸႂ်ၼၼ်ႉမိူၼ်ၸိူဝ်ႉၼင်ႇဢၼ် ထွတ်ႇလွၼ်ႈသိူဝ်ႈၼႂ်းၶိင်ႇၵတ်း၊ဢမ်ႇၼၼ်ၵေႃႈမိူၼ်ၸိူဝ်ႉၼင်ႇဢၼ်ဢဝ်ၵိူဝ်တႃးၸဵပ်းဢေႃႈ။
ပေႃးရၢၼ်ႇသူႇမႂ်းတွင်ႉမႆႈၶႂ်ႈၵိၼ်ၸိုင်၊လဵင်ႉပၼ်တႃႉ။ ပေႃးမၼ်းယၢၵ်ႇၼမ်ႉၸိုင်၊ပၼ်ၼမ်ႉၵိၼ်တီႈမၼ်းတႃႉ။-
ပေႃးႁဵတ်းၸိူဝ်ႉၼင်ႇၼၼ်ၸိုင်၊မႂ်းတၵ်းႁႂ်ႈမၼ်းမႆႈၸႂ်လူၺ်ႈတၢင်းဢၼ်ဢူၵ်းဢၼ်ဢၢႆလႄႈ ထႃႇဝရႃႉၽြႃး၊ သမ်ႉတၵ်းၶျႃးသူးတီႈမႂ်းဢေႃႈ။
ၸိူဝ်ႉၼင်ႇဢၼ်လူမ်းတၢင်းႁွင်ႇပႃးဢဝ်ၼမ်ႉၽူၼ်မႃးၼၼ်ႉသူပ်းၵႂၢမ်းဢၼ်ၶႃႉၸိုဝ်ႈၶၢႆသဵင်ၼၼ်ႉၸၢင်ႈပႃးဢဝ်တေႃးသႃႉမႃးဢေႃႈ။
တၢင်းဢၼ်ယူႇၵႃႈတီႈၸွၵ်ႉၵႃႈၼိူဝ်လင်ၶႃးႁိူၼ်းၼၼ်ႉယဵင်ႈၶႅၼ်းလီၼႃႇသေတၢင်းဢၼ်ယူႇၵႃႈၼႂ်းႁိူၼ်းလူၺ်ႈၵၼ်တင်းမေးဢၼ်ပွင်ႉမိုၼ်ႇပွင်ႉဝႃႈယူႇၼၼ်ႉဢေႃႈ။
တၢင်းဢၼ်လႆႈငိၼ်းသဵင်ၶၢဝ်ႇဢၼ်လီဢၼ်ငၢမ်းဢၼ်လုၵ်ႉသေၵႃႈတီႈမိူင်းၵႆႁွတ်ႈမႃးၼၼ်ႉပဵၼ်ၸိူဝ်ႉၼင်ႇဢၼ်လႆႈၵိၼ်ၼမ်ႉၵတ်းမိူဝ်ႈယၢမ်းဢၼ်ယၢၵ်ႇၼမ်ႉၼၼ်ႉဢေႃႈ။
တၢင်းဢၼ်ၵူၼ်းသိုဝ်ႈတေႃႇတူၵ်းသုမ်းၵႃႈတႂ်ႈၵေႃႉဢၼ်ႁၢႆႉမိူၵ်ႈၼၼ်ႉၸိုင်၊ပဵၼ်မိူၼ်ၸိူဝ်ႉၼင်ႇၼမ်ႉဢွၵ်ႇႁူးဢၼ်ၶုၼ်ႇဢူၼ်၊ဢမ်ႇၼၼ်ၵေႃႈမိူၼ်ၸိူဝ်ႉၼင်ႇၼမ်ႉမေႃႇဢၼ်မဵၼ်တူႇၼၼ်ႉဢေႃႈ။
တၢင်းဢၼ်ၵိၼ်ၼမ်ႉၽိုင်ႈၼမ်ပူၼ်ႉလိူဝ်ၵႂႃႇၼၼ်ႉဢမ်ႇထုၵ်ႇဢမ်ႇလီ။ မိူၼ်ၸိူဝ်ႉၼင်ႇၼၼ်ၵူၼ်းဢၼ်ႁႂ်ႈပိူၼ်ႈယွင်ႈယေႃးမၼ်းဢႃးလႃးၼၼ်ႉၵေႃႈဢမ်ႇထုၵ်ႇဢမ်ႇလီ။
ပေႃးယင်းဢမ်ႇၶျုၵ်ႈဢမ်ႇၵၼ်ႈတေႃးသႃႉမႂ်းဝႆႉလႆႈၸိုင်၊မႂ်းတၵ်းပဵၼ်မိူၼ်ၸိူဝ်ႉၼင်ႇဝဵင်းဢၼ်လမ်းဝဵင်းမၼ်းပင်းလုလႄႈပဵၼ်ဢၼ်ပိုတ်ႇပၢင်ႇပလႁူဝ်ႇပလႁႃႇယူႇၼၼ်ႉဢေႃႈ။
ၸိူဝ်ႉၼင်ႇမူၺ်ႁႃႇၼႂ်းၶိင်ႇမႆႈ၊ဢမ်ႇၼၼ်ၵေႃႈၽူၼ်တူၵ်းၼႂ်းၶိင်ႇဢၼ်ပၢတ်ႇၶဝ်ႈၼၼ်ႉၵူၼ်းမိူၵ်ႈဢမ်ႇထုၵ်ႇၶၢမ်ႇဢဝ်မုၼ်သရေႇ။
လွင်ႈမၼ်းယင်းဢမ်ႇမီးလႄႈၵႂၢမ်းဢၼ်တိူင်ႇဢၼ်တၢၼ်ႇၼၼ်ႉဢမ်ႇတိူဝ်ႉမႂ်းလႆႈ။ မၼ်းပဵၼ်ၸိူဝ်ႉၼင်ႇဢၼ်ၼူၵ်ႉတင်းလၢႆမိၼ်သၢတ်ႈၵႂႃႇယင်းဢမ်ႇမီးတီႈၸပ်းတီႈလိုဝ်ႈၼၼ်ႉဢေႃႈ။
ၶွၼ်ႉႁေႃႈထုၵ်ႇလီပုၼ်ႈမႃႉ၊သၢႆၵၵ်ႉထုၵ်ႇလီပုၼ်ႈလီႈ၊ၶွၼ်ႉဝၢႆထုၵ်ႇလီပုၼ်ႈပႄလင်ၵူၼ်းမိူၵ်ႈဢေႃႈ။
ယႃႇပေၶိုၼ်းၵႄႈလိတ်ႈၵႂၢမ်းၵူၼ်းမိူၵ်ႈၸွမ်းသၽေႃးဢၼ်မၼ်းမိူၵ်ႈၼၼ်ႉ။ ၵူဝ်မႂ်းတၵ်းမိူၼ်ၵၼ်တင်းမၼ်းဢေႃႈ။
ၵႄႈလိတ်ႈၵႂၢမ်းၵူၼ်းမိူၵ်ႈၸွမ်းသၽေႃးဢၼ်မၼ်းမိူၵ်ႈၼၼ်ႉတႃႉ။ ၵူဝ်မၼ်းထၢင်ႇမၼ်းမီးပိင်ႇၺႃႇဢေႃႈ။
ပေႃးမႂ်းဢဝ်ၵႂၢမ်းၽၢၵ်ႇႁႂ်ႈၵူၼ်းမိူၵ်ႈၵႂႃႇလၢတ်ႈၸိုင်၊ပဵၼ်တၢင်းဢၼ်မႂ်းတႅပ်းတိၼ်တူဝ်ၸဝ်ႈၵဝ်ႇလႄႈႁႃၽေးသႂ်ႇတူဝ်ၵူၺ်းဢေႃႈ။
ၸိူဝ်ႉၼင်ႇဢၼ်ၵူၼ်းတိၼ်ၵႅင်ႉယူၵ်ႉတိၼ်မၼ်းဢၼ်ယင်းဢမ်ႇၸုၵ်းလႆႈၼၼ်ႉထုင်းၵႂၢမ်းပိင်ႇၺႃႇၵေႃႈဢမ်ႇမီးဢသုင်းပုၼ်ႈၵူၼ်းမိူၵ်ႈ။
တၢင်းဢၼ်ယွင်ႈယေႃးၵူၼ်းမိူၵ်ႈၼၼ်ႉဢမ်ႇမီးဢၵျူဝ်းမိူၼ်ၸိူဝ်ႉၼင်ႇဢဝ်မၢၵ်ႇႁိၼ်မတ်ႉၸပ်းဝႆႉတီႈယူင်ႉၵၢင်ႇၵူင်ၼၼ်ႉဢေႃႈ။-
ထုင်းၵႂၢမ်းပိင်ႇၺႃႇဢၼ်ၵူၼ်းမိူၵ်ႈလၢတ်ႈဢွၵ်ႇသူပ်းမၼ်းၼၼ်ႉပဵၼ်ၸိူဝ်ႉၼင်ႇၼၢမ်ၸူၵ်ႉမိုဝ်းၵူၼ်းမဝ်းလဝ်ႈၼၼ်ႉဢေႃႈ။
တၢင်းဢၼ်ၸၢင်ႈဢဝ်ငႃဢဝ်ၵူၼ်းမိူၵ်ႈဢၼ်လႄႇလၢဝ်း၊ဢမ်ႇၼၼ်ၵေႃႈၸၢင်ႈငႃဢဝ်ၵူၼ်းမဝ်းလဝ်ႈၼၼ်ႉပဵၼ်မိူၼ်ၸိူဝ်ႉၼင်ႇၸဝ်ႈၵၢင်ႇၵူင်ပိုတ်းတိူဝ်ႉမၢတ်ႇသႂ်ႇၵူၼ်းတင်းသဵင်ႈတင်းလူင်ၼၼ်ႉဢေႃႈ။
ၵူၼ်းမိူၵ်ႈဢၼ်ၸၢင်ႈၶိုၼ်းႁဵတ်းမိူၵ်ႈထႅင်ႈပွၵ်ႈတီႈသွင်ၼၼ်ႉပဵၼ်မိူၼ်မႃဢၼ်ၶိုၼ်းၵိၼ်ႁၢၵ်ႈမၼ်းၼၼ်ႉဢေႃႈ။
ၵေႃႉဢၼ်မိူၵ်ႈၼႃႇသေပိူၼ်ႈၼၼ်ႉယင်းလီၼႃႇသေၵေႃႉဢၼ်ၺၢၼ်ႇထိုင်ႉထၢင်ႇတူဝ်မၼ်းမီးပိင်ႇၺႃႇၼၼ်ႉလူးၵွၼ်ႇဢေႃႈ။
ၵွပ်ႈပိူဝ်ႈသင်လႄႈၵူၼ်းၶၢၼ်ႉဢမ်ႇဢွၵ်ႇႁိူၼ်းဢွၵ်ႇယေးလႄႈယူႇယူႇၸိူဝ်ႉၼင်ႇႁိုဝ်။ မၼ်းၵူဝ်ၵႃႈသင်၊မၼ်းၵူဝ်သၢင်ႇသီႈႁိုဝ်း။
ၸိူဝ်ႉၼင်ႇဢၼ်ၼႃႈၽၵ်းတူပၼ်ႇၵႂႃႇပၼ်ႇၶိုၼ်းယူႇၵႃႈတီႈတူင်သႂ်ႇတိၼ်မၼ်းၼၼ်ႉၵူၼ်းၶၢၼ်ႉၵေႃႈၸၢင်ႈပၼ်ႇယူႇၵႃႈၼိူဝ်ၵူႇမၼ်းဢေႃႈ။
ၵူၼ်းၵမ်ႈၽွင်ႈၶၢၼ်ႉၼႃႇလူင်လၢင်တေႃႇထိုင်ႁွတ်ႈထၢၼ်ႈပေႃးၶၢၼ်ႉဢဝ်တၢင်းၵိၼ်သႂ်ႇသူပ်းမၼ်းဢေႃႈ။
ၵူၼ်းၶၢၼ်ႉၵူၼ်းဢိူၼ်ၸၢင်ႈထၢင်ႇမၼ်းမီးပိင်ႇၺႃႇလိူဝ်တွၼ်းၼႃႇသေၵူၼ်းၸဵတ်းၵေႃႉဢၼ်ၸၢင်ႈၽုၺ်ႇလၢတ်ႈၼႄလွင်ႈမၼ်းတၢင်းမၼ်းလႆႈလီလီၼၼ်ႉဢေႃႈ။
ယင်းဢမ်ႇၸၢပ်ႈသႅင်ႇသင်ၵၼ်တင်းမႂ်းလႄႈၶဝ်ႈပႃးၸွမ်းၼႂ်းတၢင်းဢၼ်ပိူၼ်ႈၽိတ်းၵၼ်ၼၼ်ႉပဵၼ်ၸိူဝ်ႉၼင်ႇဢၼ်ၵမ်ႁိဝ်ႈမႂ်ႁူမႃဢၼ်လႄႇၵႂႃႇၸွမ်းတၢင်းၼၼ်ႉဢေႃႈ။
ၵေႃႉဢၼ်ပႅတ်ႉလႅၼ်ပိူၼ်ႈတၢင်ႇၵေႃႉသေယဝ်ႉ၊သမ်ႉဝႃႈ “ၵဝ်ယွၵ်ႇယဝ်ႈလဵၼ်ႈၵူၺ်း၊” ဝႃႈၼင်ႇၼႆၼၼ်ႉ၊-
ပဵၼ်ၸိူဝ်ႉၼင်ႇၵူၼ်းယွင်ႇဢၼ်ဢဝ်လိမ်ႈၽႆးလႂ်၊ပိုၼ်ၵၢင်ႇလႂ်ဢၼ်ၸၢင်ႈႁႂ်ႈတၢႆလႆႈၼၼ်ႉယိုဝ်းသႂ်ႇပိူၼ်ႈၼၼ်ႉဢေႃႈ။
ၸိူဝ်ႉၼင်ႇဢၼ်ပေႃးဢမ်ႇမီးၽိုၼ်းၸိုင်၊ၽႆးၸၢင်ႈမွတ်ႇၼၼ်ႉ၊ပေႃးဢမ်ႇမီးၵႂၢမ်းဢၼ်သႄႇယူင်းၸိုင်၊တၢင်းဢၼ်ၽိတ်းၵၼ်ထၢတ်ႇယဵၼ်ဢေႃႈ။
ၸိူဝ်ႉၼင်ႇဢၼ်ထၢၼ်ႇမီႈပွင်ႁဵတ်းထၢၼ်ႇၽႆးလႅင်ဢိၵ်ႇတင်းၽိုၼ်းပွင်ႁဵတ်းမုၵ်ႉၽႆးၼၼ်ႉ၊ၵေႃႉဢၼ်ၸၢင်ႈႁဵတ်းၶဵၼ်သႂ်ႇပိူၼ်ႈၼၼ်ႉပွင်ႁဵတ်းတၢင်းဢၼ်ၽိတ်းၵၼ်ဢေႃႈ။
ၵႂၢမ်းဢၼ်ၶႃႉၸိုဝ်ႈၶၢႆသဵင်ပိူၼ်ႈၼၼ်ႉမီးဢရႃႉသႃႇဢၼ်ဝၢၼ်လီၸဵမ်းလီလႄႈ၊ၸၢင်ႈၶဝ်ႈၵႂႃႇၵႃႈၼႂ်းတွင်ႉၼႂ်းပုမ်ဢေႃႈ။
ၶေႃႈၵႂၢမ်းပရိယႄႇဢၼ်ဢမ်ဝႆႉႁူမ်ႇဝႆႉႁူဝ်ၸႂ်ဢၼ်မႂ်းၵျၢမ်ႇပွင်ၼၼ်ႉပဵၼ်ၸိူဝ်ႉၼင်ႇမေႃႈလိၼ်ဢၼ်ဢဝ်ၶျေႃႇငိုၼ်းဢုမ်ႇဝႆႉၼၼ်ႉဢေႃႈ။
ၵေႃႉဢၼ်မီးသၽေႃးဢၼ်ငိၼ်းၸင်းပိူၼ်ႈၼၼ်ႉၸၢင်ႈဢမ်သူပ်းဢမ်ၵႂၢမ်းမၼ်းဝႆႉလႄႈ၊ၸၢင်ႈႁွမ်ဝႆႉတၢင်းဢၼ်ပႅတ်ႉလႅၼ်ၵႃႈၼႂ်းမၼ်းဢေႃႈ။-
ၵႂၢမ်းမၼ်းၼၼ်ႉပိၵ်ႉသမ်ႉဝၢၼ်သေၵေႃႈ၊ယႃႇပေယုမ်ႇ။ ၵႃးၼႂ်းႁူဝ်ၸႂ်မၼ်းၼၼ်ႉမီးလွင်ႈတၢင်းဢၼ်လီႁင်ႈဢဵတ်ႇသဵတ်ႇလူၼ်ႉတဵမ်ဝႆႉဢေႃႈ။-
မၼ်းၸၢင်ႈႁဵတ်းႁၢင်ႈသိူင်ႇဝႆႉတၢင်းဢၼ်မၼ်းၸင်းပိူၼ်ႈၼၼ်ႉသေၵေႃႈ၊ပိူၼ်ႈတၵ်းဢွၼ်ၵၼ်လႆႈႁၼ်ဢပျတ်ႈတုၸရိူၵ်ႈဢၼ်မၼ်းႁဵတ်းၼၼ်ႉၵူႈၵေႃႉၵူႈၵူၼ်းဢေႃႈ။
ၵေႃႉဢၼ်ၶုတ်းၶုမ်ႁၢင်ႈပိူၼ်ႈၼၼ်ႉတူဝ်မၼ်းၸၢင်ႈတူၵ်းၶမ်လႄႈ၊ၵေႃႉဢၼ်ၵိင်ႈမၢၵ်ႇႁိၼ်တဵင်သႂ်ႇပိူၼ်ႈၼၼ်ႉၵေႃႈမၢၵ်ႇႁိၼ်တၵ်းၶိုၼ်းၵိင်ႈတဵင်သႂ်ႇမၼ်းဢေႃႈ။
လိၼ်ႉဢၼ်ၸၢင်ႈလၢတ်ႈမုသႃႇၼၼ်ႉၸၢင်ႈငိၼ်းၸင်းၶဝ်ၸိူဝ်းဢၼ် မၼ်းၼိၵ်ႈၸၢၵ်ႈငႅၼ်းသႄးၼၼ်ႉလႄႈ၊သူပ်းဢၼ်ၸၢင်ႈၶျေႃးဝွၼ်းၼၼ်ႉၵေႃႈၸၢင်ႈယႃႉၽဵဝ်ႈပႅတ်ႈဢေႃႈ။
ယႃႇပေဢိင်ပိုင်ႈဝၼ်းမိူဝ်ႈၽုၵ်ႈလႄႈဢုပ်ႇဢၢတ်ႇ။ မႂ်းဢမ်ႇႁုလွင်ႈဢၼ်ၼႂ်းဝၼ်းလဵဝ်ၵူၺ်းတၵ်းပဵၼ်ၸိူဝ်ႉၼင်ႇႁိုဝ်ၼၼ်ႉလႆႈ။
ႁႂ်ႈပိူၼ်ႈယွင်ႈယေႃးမႂ်းတႃႉ။ တေႃႈၵႃႈၵူၼ်းၼႃႈမႂ်ႇၵေႃႈ ႁႂ်ႈမၼ်းယွင်ႈယေႃးမႂ်းတႃႉ။ ယႃႇပေယွင်ႈယေႃးတူဝ်ၸဝ်ႈၵဝ်ႇလႃးလႃး။
မၢၵ်ႇႁိၼ်ပဵၼ်ဢၼ်ၼၵ်းဢေႃႈ။ သၢႆးၵေႃႈၼၵ်းၼႃႇဢေႃႈ။ ၵူၺ်းၵႃႈ၊ၽေးတုၵ်ႉၶႃႉဢၼ်ၵူၼ်းမိူၵ်ႈႁဵတ်းသႂ်ႇၼၼ်ႉယဵင်ႈၶႅၼ်းၼၵ်းၼႃႇသေၸိူဝ်းၼၼ်ႉဢေႃႈ။
တေႃးသႃႉတင်းတၢင်းဢၼ်ၸႂ်မႆႈၶႂ်ႈၸႃႉပဵၼ်ဢၼ်ႁၢဝ်ႉၵျၢမ်းၼႃႇဢေႃႈ။ ၵူၺ်းၵႃႈ၊ၸႂ်ဢၼ်သီႈၵေႉႁေႈတႃၼၼ်ႉယဵင်ႈၶႅၼ်းၵျၢမ်းလိူင်းၼႃႇသေၸိူဝ်းၼၼ်ႉဢေႃႈ။
တၢင်းဢၼ်သုင်းမႃႉတၢင်ႇဢပျတ်ႈထၢင်ႇထၢင်ႇသႃးသႃးၼၼ်ႉယဵင်ႈၶႅၼ်းလီၼႃႇသေတၢင်းဢၼ်လၵ်ႉလွမ်ႁၵ်ႉပႅင်းတဵတ်ႇတဵတ်ႇၼၼ်ႉဢေႃႈ။
ၵေႃႉသႄႈၸိုင်၊ပိၵ်ႉသမ်ႉမၼ်းႁႂ်ႈမႂ်းၸဵပ်းၸႂ်တိူဝ်ႉၸႂ်သေၵေႃႈပဵၼ်ဢၼ်ႁဵတ်းႁႂ်ႈလီဢေႃႈ။ ၵူၺ်းၵႃႈ၊မိူဝ်ႈဢၼ်ရၢၼ်ႇသူႇၵွတ်ႇမႃႇၵွတ်ႇၶေႃးမႂ်းၼၼ်ႉၸိုင်၊ဝႆႉသတိတႃႉ။
ၵေႃႉဢၼ်လႆႈၵိၼ်ဢိမ်ႇယဝ်ႉၼၼ်ႉၸၢင်ႈမိူဝ်ႇၸၢၼ်ႈၼမ်ႉၽိုင်ႈဢေႃႈ။ ၵေႃႉဢၼ်တွင်ႉမႆႈသႆႈလိူတ်ႇၸမ်ႉၸၢင်ႈထၢင်ႇတၢင်းၵိၼ်ဢၼ်ၶူမ်ၼၼ်ႉဝၢၼ်ဢေႃႈ။
ၵေႃႉဢၼ်ၼီပၢႆႈဢွၵ်ႇႁိူၼ်းၵႂႃႇၼၼ်ႉပဵၼ်မိူၼ်ၸိူဝ်ႉၼင်ႇၼူၵ်ႉဢၼ်ၸုၼ်ႉပႅတ်ႈႁင်းမၼ်းသေလႄႈလႄႇၵႂႃႇၼၼ်ႉဢေႃႈ။
ၼမ်ႉမၼ်းႁွမ်ဢိၵ်ႇတင်းၼၢမ်ႇသႃႇႁႂ်ႈႁူဝ်ၸႂ်မႂ်းၸူမ်းသိူဝ်းဢေႃႈ။ ၵူၺ်းၵႃႈ၊ၽေးတုၵ်ႉၶႃႉၸၢင်ႈႁႂ်ႈႁူဝ်ၸႂ်မႂ်းလုၵႂႃႇဢူၼ်ႈၵႂႃႇဢေႃႈ။
ယႃႇပေၸုၼ်ႉပႅတ်ႈၵေႃႉသႄႈမႂ်းဢိၵ်ႇတင်းၵေႃႉသႄႈပေႃႈမႂ်း။ ၼႂ်းၶိင်ႇမိူဝ်ႈဢၼ်ထူပ်းၽေးတုၵ်ႉၶႃႉၼၼ်ႉယႃႇပေယွၼ်းတၢင်းၸွႆႈတၢင်းထႅမ်တီႈပီႈၼွင်ႉမႂ်း။ ၵူၼ်းႁိူၼ်းၸမ်ၵၼ်ဢၼ်မီးႁိမ်းမႂ်းၼၼ်ႉယဵင်ႈၶႅၼ်းၸွႆႈထႅမ်ပၼ်လႆႈသေပီႈၼွင်ႉမႂ်းဢၼ်မီးၵႆၵၼ်တင်းမႂ်းၼၼ်ႉဢေႃႈ။
လုၵ်ႈၸၢႆးၵဝ်႟။ မီးပိင်ႇၺႃႇတႃႉ။ ပေႃးမီးၸိုင်၊ၸႂ်ၵဝ်တၵ်းၸူမ်းသိူဝ်းယူႇပုၼ်ႈလွင်ႈၼင်ႇႁိုဝ် ၵဝ်တၵ်းၵႄႈလိတ်ႈၵႂၢမ်းၵေႃႉဢၼ်သႄႉသွမ်းတၢင်ႇဢပျတ်ႈတီႈၵဝ်ၼၼ်ႉသေၵမ်းလူၺ်ႈ။
ၵေႃႉဢၼ်မီးသမ်ႇမႃႇသတိၼၼ်ႉၸၢင်ႈႁၼ်ၽေးလႄႈဝႄႈပႅတ်ႈဢေႃႈ။ ၵေႃႉဢၼ်ဢမ်ႇမီးၺၢၼ်ႇၼၼ်ႉၸမ်ႉ၊ဢမ်ႇၶႆႈၸႂ်ဝူၼ်ႉၸႂ်ၵႃႈသင်လႄႈၶဝ်ႈၵႃႈၼႂ်းၽေးၵႂႃႇၼၼ်ႉ၊ဝၢႆးလိုၼ်းၸၢင်ႈလႆႈသၢင်ႇဝူၺ်ႇၵႃႉဢေႃႈ။
ပေႃးသေၵေႃႉသေၵူၼ်းငိူဝ်ႈငႃႉထၢၼ်ႈပေႃးဢႃႇမႃႉၶၢမ်ႇဢၼ်မၼ်းဢမ်ႇႁုၸၵ်း၊ၵူၼ်းတၢင်ႇဝၢၼ်ႇတၢင်ႇမိူင်းၼၼ်ႉၸိုင်၊သိမ်းဢဝ်ၶူဝ်းၶွင်မၼ်းသေၸိူဝ်ႉသေပိူင်ဝႆႉႁႂ်ႈပဵၼ်ၶူဝ်းဢၼ်ပွင်ႇဝႆႉတၢင်ဝႆႉၼၼ်ႉတႃႉ။
တၢင်းဢၼ်မႂ်းလုၵ်ႉၸဝ်ႉၸဝ်ႉလႄႈၵႂႃႇပူၵ်းၵေႃႉသႄႈမႂ်းတိုၼ်ႇသေယဝ်ႉ၊ဢဝ်တင်းသဵင်ဢၼ်ယႂ်ႇၼႃႇပၼ်တၢင်းလီတီႈမၼ်းၼၼ်ႉၸၢင်ႈမၢတ်ႈပဵၼ်ၵႂၢမ်းဢၼ်ၵိၼ်ႇလႃႇဢေႃႈ။
တၢင်းဢၼ်ၵေႃႉဢၼ်ပဵၼ်မေးပွင်ႉမိုၼ်ႇပွင်ႉဝႃႈယူႇၶိူဝ်းၶိူဝ်းယႂ်းယႂ်းၼၼ်ႉပဵၼ်ၸိူဝ်ႉၼင်ႇၼမ်ႉၽူၼ်ဢၼ်ယွတ်ႇႁူဝ်ႈတူၵ်းယူႇၸိၵ်ႉၸိၵ်ႉၼၼ်ႉဢေႃႈ။-
မႂ်းဢမ်ႇၸၢင်ႈႁဵတ်းၸိူဝ်ႉၼင်ႇႁိုဝ်ႁႂ်ႈမၼ်းယူႇတဵတ်ႇတဵတ်ႇလႆႈ၊မၼ်းပဵၼ်ၸိူဝ်ႉၼင်ႇဢၼ်ႁႄႉၶင်ႉလူမ်းဢမ်ႇလႆႈၼၼ်ႉဢိၵ်ႇတင်းတၢင်းဢၼ်ဢဝ်မိုဝ်းယိပ်းၼမ်ႉမၼ်းဢမ်ႇလႆႈၼၼ်ႉဢေႃႈ။
ၸိူဝ်ႉၼင်ႇဢၼ်ဢဝ်လဵၵ်းလပ်ႉလဵၵ်းႁႂ်ႈၽၢႆလီလႅမ်လီၼၼ်ႉၵူၼ်းၸၢင်ႈသွၼ်ပၼ်တီႈၵေႃႉသႄႈမၼ်းႁႂ်ႈလၵ်းလီလႅမ်လီဢေႃႈ။
ၵေႃႉဢၼ်လုမ်းလႃးသူၼ်မၢၵ်ႇလိူဝ်ႇၼၼ်ႉတၵ်းလႆႈၵိၼ်မၢၵ်ႇတူၼ်ႈၼၼ်ႉလႄႈ၊ၶႃႈဢၼ်ပွင်ႁဵတ်းၼႃႈၵၢၼ်ၸဝ်ႈမၼ်းၼၼ်ႉၸၢင်ႈလႆႈၼႃႈလႆႈတႃဢေႃႈ။
ၸိူဝ်ႉၼင်ႇဢၼ်ငဝ်းၼႃႈမႂ်းပေႃႇၵႃႈတီႈၼမ်ႉၼၼ်ႉၸႂ်သၽေႃးၵူၼ်းၼၼ်ႉၵေႃႈပေႃႇၵႃႈတီႈၵူၼ်းၼင်ႇၵဝ်ႇဢေႃႈ။
ၸိူဝ်ႉၼင်ႇဢၼ်မိူင်းမရၼႃႉဢၼ်ဝႃႈမိူင်းဢၼ်လုလႅဝ်ဢမ်ႇဢိမ်ႇၸႂ်ၼၼ်ႉမၢၵ်ႇတႃၵူၼ်းၵေႃႈဢမ်ႇၸၢင်ႈဢိမ်ႇၸႂ်။
မိုင်ႈပဵၼ်ပုၼ်ႈဢၼ်ၸႅတ်ႈငိုၼ်းၶႃႇငိုၼ်းလႄႈမုၵ်ႉၽႆးပဵၼ်ပုၼ်ႈဢၼ်ၸႅတ်ႈၶမ်းၶႃႇၶမ်းဢေႃႈ။ ၵူၼ်းၸမ်ႉ၊ၶၢမ်ႇတၢင်းဢၼ်ၸႅတ်ႈတူၺ်းၸၢမ်းတူၺ်းၼႂ်းတၢင်းဢၼ်ပိူၼ်ႈယွင်ႈယေႃးမၼ်းၼၼ်ႉဢေႃႈ။
ပိၵ်ႉသမ်ႉဢဝ်ၵူၼ်းမိူၵ်ႈသႂ်ႇၼႂ်းၶူၵ်ႉလႄႈတမ်လူၺ်ႈၵၼ်တင်းၶဝ်ႈပိူၵ်ႇသေၵေႃႈသၽေႃးတၢင်းဢၼ်မိူၵ်ႈမၼ်းၼၼ်ႉဢမ်ႇၸၢင်ႈဢွၵ်ႇသေၵႃႈတီႈမၼ်း။
ၵႆႉၶတ်းၸႂ်လဵင်ႉလူလုမ်းလႃးၽုင်သူဝ်းၽုင်ဝူဝ်းမႂ်းလီလီတႃႉ။-
လွင်ႈမၼ်းၸမ်ႉ၊ဢုၵ်ႉၸႃႇဢမ်ႇၸၢင်ႈတႄႇယူႇတႃႇသေႇ။ တေႃႈၵႃႈမဵဝ်းၸိူဝ်ႉၶိူဝ်းၵူၼ်းၵေႃႈဢမ်ႇၸၢင်ႈတႄႇယူႇၵူႈၸူဝ်ႈၵူႈပၢၼ်သိုပ်ႇသိုပ်ႇတၢမ်တၢမ်။-
မိူဝ်ႈဢၼ်ယိူဝ်ႈၵႄႇယႃႈၵႄႇႁၢႆလၢႆၵႂႃႇယဝ်ႉၼၼ်ႉယိူဝ်ႈၼုမ်ႇယႃႈၼုမ်ႇၶိုၼ်းႁုၼ်ႈမႃးဢေႃႈ။ ၽိူင်းၵႃႈတီႈႁႆႈတင်းလၢႆၵေႃႈႁွတ်ႈထိုင်ဝႆႉၵႃႈၼိူဝ်ၵၢင်ႉယဝ်ႉဢေႃႈ။-
သူဝ်းဢွၼ်ႇတင်းလၢႆပၼ်ၶူၼ်သူဝ်းပုၼ်ႈၶူဝ်းၼုင်ႈတၢင်းမႆမႂ်းလႄႈ၊ပႄႉတင်းလၢႆသမ်ႉဢဝ်ၶၢႆလႆႈငိုၼ်းသေယဝ်ႉ၊လႆႈသိုဝ်ႉဢဝ်ၵႂၢၵ်ႈလိၼ်ဢေႃႈ။-
ပႄႉဢၼ်ၵိုတ်းၵျၢၼ်ႇဝႆႉၸိူဝ်းၼၼ်ႉၸၢင်ႈပၼ်ၼမ်ႉၼူမ်းဢၼ်မႂ်းတင်းၵူၼ်းႁိူၼ်းၵူၼ်းယေးမႂ်းလႆႈၵိၼ်ၵူၺ်းဢမ်ႇၵႃး၊တၵ်းႁႂ်ႈၶႃႈမႄႈယိင်းၸိူဝ်းၼၼ်ႉၵေႃႈလႆႈၵိၼ်ဢိမ်ႇဢိမ်ႇဢေႃႈ။
ၵူၼ်းဢၼ်ဢမ်ႇတြႃးၼၼ်ႉပိၵ်ႉသမ်ႉၽူႈလႂ်ဢမ်ႇလိုပ်ႈၸွမ်းလမ်းၸွမ်းသေၵေႃႈ၊မၼ်းၸၢင်ႈလႅၼ်ႈပၢႆႈလႄႈ၊ၵူၼ်းသိုဝ်ႈတေႃႇၸမ်ႉ၊ၸၢင်ႈႁတ်းႁၢၼ်ၸိူဝ်ႉၼင်ႇသၢင်ႇသီႈဢေႃႈ။
ၵွပ်ႈပိူဝ်ႈၵူၼ်းဝၢၼ်ႈၵူၼ်းမိူင်းမီးဢပျတ်ႈၼၼ်ႉၶုၼ်ၸၢင်ႈလႆႈလၢႆႈပႅတ်ႈၵေႃႉၼိုင်ႈယဝ်ႉၵေႃႉၼိုင်ႈဢေႃႈ။ ၵူၺ်းၵႃႈ၊ၵွပ်ႈပိူဝ်ႈၶုၼ်ဢၼ်မီးပိင်ႇၺႃႇၼၼ်ႉၸၢင်ႈဢုပ်ႉပိူင်ႇႁႂ်ႈဝၢၼ်ႈမိူင်းႁႅင်းယႂ်ႇလႄႈတႄႇမၼ်ႈဢေႃႈ။
ၵေႃႉဢၼ်ၸုတ်ႈဢၼ်လုတ်ႈၼၼ်ႉဢဝ်ဢႃႇၼႃႇတဵၵ်းငႅၼ်းၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉပဵၼ်မိူၼ်ၸိူဝ်ႉၼင်ႇၼမ်ႉၽူၼ်ဢၼ်ယႃႉမၢၵ်ႇၶဝ်ႈႁူင်းၶဝ်ႈပႅတ်ႈမူတ်းမူတ်းၼၼ်ႉဢေႃႈ။
ၶဝ်ၸိူဝ်းဢၼ်ၸုၼ်ႉပႅတ်ႈတြႃးၼၼ်ႉပဵၼ်ၵူၼ်းဢၼ်ၽွမ်ႉၽၢႆႇၶဝ်ၸိူဝ်းဢၼ်ဢမ်ႇတြႃးလႄႈ၊ၶဝ်ၸိူဝ်းဢၼ်ပႂ်ႉၸွမ်းတြႃးၸမ်ႉၸၢင်ႈႁဵတ်းၶတ်းၵၼ်တင်းၶဝ်ၼၼ်ႉဢေႃႈ။
ၵူၼ်းႁၢႆႉမိူၵ်ႈၸိုင်၊ဢမ်ႇႁုတၢင်းဢၼ်ၸီႇယၢင်ႇၸွမ်းၼင်ႇတြႃးၼၼ်ႉလႄႈ၊ၶဝ်ၸိူဝ်းဢၼ်ၵူဝ်းၵႂၢႆႇ ထႃႇဝရႃႉၽြႃး၊ ၸမ်ႉၸၢင်ႈႁုတြႃးၼၼ်ႉလီလီငၢမ်းငၢမ်းဢေႃႈ။
တၢင်းဢၼ်ပဵၼ်ၵူၼ်းၽၢၼ်ဢၼ်သိုဝ်ႈလီယူဝ်းလီယဵင်ႈၶႅၼ်းမျၢတ်ႈလီၼႃႇသေတၢင်းဢၼ်ပဵၼ်ၵူၼ်းမီးဢၼ်ၸႂ်ၵူတ်ႉၸႂ်ငေႃးၼၼ်ႉဢေႃႈ။
ၵေႃႉဢၼ်ပႂ်ႉၸွမ်းတြႃးယူႇၼၼ်ႉပဵၼ်လုၵ်ႈၸၢႆးဢၼ်မီးပိင်ႇၺႃႇလႄႈ၊ၵေႃႉဢၼ်ႁဵတ်းၵေႃႉႁဵတ်းသႄႈလူၺ်ႈၵၼ်တင်းၶဝ်ၸိူဝ်းဢၼ်ဢမ်ႇပွင်ႇၶေႃႈပွင်ႇတႃၼၼ်ႉၸၢင်ႈႁႂ်ႈပေႃႈမၼ်းဢူၵ်းဢၢႆဢေႃႈ။
ပေႃးမႂ်းႁဵတ်းတၢင်းၵႃႉဢၼ်ပွႆႇႁၢင်ငိုၼ်းလႄႈ၊ၵိၼ်ၶီႈငိုၼ်းႁႂ်ႈပဵၼ်တိုၼ်းပဵၼ်ႁွၼ်းၸိုင်၊ဢုၵ်ႉၸႃႇၶူဝ်းၶွင်မႂ်းၸိူဝ်းၼၼ်ႉၸၢင်ႈႁွတ်ႈၽႅဝ်ၶဝ်ႈမိုဝ်းၵေႃႉဢၼ်ၸၢင်ႈဢဵတ်းလူၵူၼ်းၽၢၼ်ၼၼ်ႉၵႂႃႇဢေႃႈ။
ပေႃးမႂ်းဢမ်ႇၵမ်ဢမ်ႇၵျၢင်ႉၸွမ်းၼင်ႇတြႃးၸဝ်ႈၸိုင်၊ၽြႃးပဵၼ်ၸဝ်ႈတၵ်းငိၼ်းၸင်းၶၢၼ်ႉထွမ်ႇၵႂၢမ်းသူးတွင်းမႂ်းၼၼ်ႉဢေႃႈ။
ပေႃးမႂ်းၸူဝ်းဢဝ်ႁႂ်ႈၵေႃႉဢၼ်သိုဝ်ႈလီယူဝ်းလီႁဵတ်းတုၸရိူၵ်ႈမႅၼ်ႈၸိုင်၊မႂ်းတၵ်းတူၵ်းၶမ်မႅၼ်ႈၼႂ်းတူင်ႇႁႅဝ်ႉတူဝ်ၸဝ်ႈၵဝ်ႇဢေႃႈ။ ၵေႃႉဢၼ်ၵၢင်းလွတ်ႈတင်းတၢင်းဢၼ်တၢင်ႇဢပျတ်ႈၼၼ်ႉၸမ်ႉ၊တၵ်းတေလႆႈၶၢမ်ႇဢမူၺ်ႇလွင်ႈတင်းဢၼ်လီဢေႃႈ။
ၵူၼ်းမၢၵ်ႈၵူၼ်းမီးၸၢင်ႈထၢင်ႇဝႃႈတူဝ်ၸဝ်ႈၵဝ်ႇမီးပိင်ႇၺႃႇဢေႃႈ။ ၵူၺ်းၵႃႈ၊ၵူၼ်းယၢၵ်ႈၵူၼ်းၽၢၼ်ဢၼ်ၺၢၼ်ႇလီၼၼ်ႉယဵင်ႈၶႅၼ်းႁုၶႅၼ်းၸႅင်ႈလီဢေႃႈ။
မိူဝ်ႈဢၼ်ၵူၼ်းလီၵူၼ်းငၢမ်းမီးတၼ်းၶူဝ်းမႃးၼၼ်ႉၸိုင်၊ၵူၼ်းတင်းလၢႆသႂၢင်ႇၸႂ်သိူဝ်းၸႂ်ဢေႃႈ။ မိူဝ်ႈဢၼ်ၵူၼ်းႁၢႆႉမိူၵ်ႈလႆႈပဵၼ်ၶုၼ်ၼၼ်ႉပိူၼ်ႈဢွၼ်ၵၼ်ပၢႆႈတဵတ်ႇပၢႆႈမႅပ်းဢေႃႈ။
ပေႃးမႂ်းသိူင်ႇဝႆႉဢမ်ဝႆႉဢပျတ်ႈၸိုင်၊မႂ်းတၵ်းဢမ်ႇလႆႈလီလႆႈပဵၼ်လႃးလႃး။ ၽုၺ်ႇဢွၵ်ႇၼႄပျႃးဢပျတ်ႈမႂ်းလႄႈပႄႇပႅတ်ႈတႃႉ။ ၽြႃးပဵၼ်ၸဝ်ႈတၵ်းပၼ်ၵျေးၸူးၵရုၼႃႇတီႈမႂ်းဢေႃႈ။
ရူဝ်ႇသေႇၵူဝ်ယမ် ထႃႇဝရႃႉၽြႃး၊ ယူႇတႃႇသေႇတႃႉ။ မႂ်းတၵ်းမီးမၢင်ႇၵလႃႇဢေႃႈ။ ပေႃးမႂ်းမီးၸႂ်တိုဝ်တၼ်ၸိုင်၊မႂ်းတၵ်းႁွတ်ႈထိုင်တၢင်းလုတၢင်းလႅဝ်ဢေႃႈ။
ၶုၼ်ႁၢႆႉမိူၵ်ႈဢၼ်ဢုပ်ႉပိူင်ႇၵႃႈၼိူဝ်ၵူၼ်းယၢၵ်ႈၵူၼ်းၽၢၼ်ၼၼ်ႉပဵၼ်မိူၼ်ၸိူဝ်ႉၼင်ႇသၢင်ႇသီႈဢၼ်ႁွင်ႉယူႇဢိၵ်ႇတင်းမီဢၼ်လႄႇၵႂႃႇလႄႇမႃးယူႇၼၼ်ႉဢေႃႈ။
ၶုၼ်ဢၼ်ဢမ်ႇမီးၺၢၼ်ႇၼၼ်ႉပဵၼ်ၵေႃႉဢၼ်ၸၢင်ႈၼိၵ်ႈၸၢၵ်ႈငႅၼ်းသႄးၼႃႇလူင်လၢင်လႄႈ၊ၶုၼ်ဢၼ်ၸင်းတၢင်းဢၼ်လေႃးၽႃႉယႂ်ႇၼၼ်ႉၸမ်ႉဢသၢၵ်ႈတၵ်းယၢဝ်းယိုၼ်းဢေႃႈ။
ၵေႃႉဢၼ်မီးဢပျတ်ႈၵွပ်ႈလူၺ်ႈဢဝ်ဢသၢၵ်ႈၵူၼ်းတၢႆၼၼ်ႉပဵၼ်ၵေႃႉဢၼ်ၶုတ်းၶုမ်ပႃႇႁဵဝ်ႈတူဝ်ၸဝ်ႈၵဝ်ႇယူႇၶၼ်ၶၼ်ၽႂ်းၽႂ်းၼၼ်ႉဢေႃႈ။ ၽူႈလႂ်ယႃႇပေႁၢမ်ႈပေၶႅၼ်မၼ်း။
ပေႃးမႂ်းမီးၸႂ်ဢၼ်သိုဝ်ႈလီယူဝ်းလီၸိုင်၊မႂ်းတၵ်းတေလႆႈၵတ်းယဵၼ်ၶျၢမ်းသႃႇလႄႈ၊ပေႃးမႂ်းမီးၸႂ်ဢၼ်ၵူတ်ႉဢၼ်ငေႃးၸမ်ႉ၊မႂ်းၸၢင်ႈလႆႈၵိုင်ႉၵၢင်ႉတူၵ်းသုမ်းဢေႃႈ။
ၸဝ်ႈႁႆႈၸဝ်ႈၼႃးဢၼ်ၵႆႉၶၵ်းၼၼ်ႉတၢင်းၵိၼ်တၢင်းၶူပ်းတၵ်းမီးလိူင်ႇၼမ်လႄႈ၊ၵေႃႉဢၼ်ယူႇလၢႆယူႇလွၵ်ႇၼၼ်ႉၸမ်ႉ၊တၵ်းယၢၵ်ႈၽၢၼ်ယူႇသေႇသေႇဢေႃႈ။
ၵေႃႉဢၼ်ပႂ်ႉသဵတ်ႈၸႃႇၼၼ်ႉတၵ်းတဵမ်ဝႆႉတင်းတၢင်းလီမၢင်ႇၵလႃႇလႄႈ၊ၵေႃႉဢၼ်ႁိပ်ႈၼႅတ်ႈႁဵတ်းႁႂ်ႈမၼ်းမၢၵ်ႈမီးၼၼ်ႉၸမ်ႉ၊ဢမ်ႇလႆႈၵၢင်းလွတ်ႈတင်းတၢမ်ႇဢပျတ်ႈ။
တၢင်းဢၼ်ထွၵ်ႈလူၺ်ႈၼႃႈၵူၼ်းၼၼ်ႉဢမ်ႇထုၵ်ႇဢမ်ႇလီ။ ၵူၺ်းၵႃႈ၊ၵူၼ်းၸၢင်ႈႁဵတ်းတုၸရိူၵ်ႈ ႁႂ်ႈလႆႈၵိၼ်သူးၵိၼ်လၢပ်ႈဢိတ်းဢွၼ်ႇၼိုင်ႈဢေႃႈ။
ၵေႃႉဢၼ်ထီႇဢၼ်ၼဵဝ်လႄႈမီးၸႂ်ဢၼ်ႁိပ်ႈၼႅတ်ႈႁဵတ်းႁႂ်ႈမၼ်းမၢၵ်ႈမီးၼၼ်ႉဢမ်ႇၸၢင်ႈႁုလွင်ႈဢၼ်ၵမ်းလိုၼ်းတၵ်းႁွတ်ႈထိုင်တၢင်းဢၼ်ယၢၵ်ႈဢၼ်ၽၢၼ်ၵႃႈႁိုဝ်ၼၼ်ႉဢေႃႈ။
ၵေႃႉဢၼ်သုင်းမႃႉတၢင်ႇဢပျတ်ႈတီႈသေၵေႃႉၵေႃႉၼၼ်ႉၵမ်းလိုၼ်းယဵင်ႈၶႅၼ်းတၵ်းတေလႆႈၶၢမ်ႇဢဝ်ဢၵျူဝ်းၼမ်ၼႃႇသေၵေႃႉဢၼ်ဢဝ်တင်းသူပ်းၶျေႃးၵိၼ်ဝွၼ်းၵိၼ်ၼၼ်ႉဢေႃႈ။
ၵေႃႉဢၼ်ထၢင်ႇဝႃႈ၊တၢင်းဢၼ်လၵ်ႉဢဝ်တီႈပေႃႈမႄႈမၼ်းၼၼ်ႉဢမ်ႇမီးဢပျတ်ႈဝႃႈၼႆၼၼ်ႉမၼ်းပဵၼ်ၽူႈလၵ်ႉၵေႃႉၼိုင်ႈမိူၼ်မိူၼ်ၵၼ်တင်းၽူႈလၵ်ႉတင်းလၢႆဢေႃႈ။
ၵေႃႉဢၼ်ၶႆႈၸႂ်ပုၼ်ႈတူဝ်ၸဝ်ႈၵဝ်ႇၵူၺ်းၼၼ်ႉၸၢင်ႈႁဵတ်းႁႂ်ႈပဵၼ်ၶဵၼ်ၵူၺ်းလႄႈ၊ၵေႃႉဢၼ်ယုမ်ႇယမ်ဢိင်ပိုင်ႈ ထႃႇဝရႃႉၽြႃး၊ ၸမ်ႉ၊ၸၢင်ႈလႆႈပျေႉၸုမ်ႇလိူင်ႇၸႂ်ဢေႃႈ။
တၢင်းဢၼ်ၸွမ်းဢလူဝ်ႇၵၢင်ၸႂ်တူဝ်ၸဝ်ႈၵဝ်ႇၼၼ်ႉပဵၼ်သၽေႃးဢၼ်မိူၵ်ႈလႄႈ၊တၢင်းဢၼ်ၸပ်းၸွမ်းၼႂ်းတၢင်းဢၼ်ၵူၼ်းမီးပိင်ႇၺႃႇသင်ႇသွၼ်ဝႆႉၸိူဝ်းၼၼ်ႉၸိုင်၊ၸၢင်ႈလႆႈလူင်ႉလီလွတ်ႈလီဢေႃႈ။
ၽေးၸွၼ်းယိုၼ်ႈမႅင်ႇတီႈၵူၼ်းယၢၵ်ႈၵူၼ်းၽၢၼ်တႃႉ။ မႂ်းတၵ်းဢမ်ႇလူဝ်ႇထႅင်ႈသေၸိူဝ်ႉသေပိူင်ဢေႃႈ။ ပေႃးမႂ်းဝၢႆႇၼႃႈဝႄႈပိူင်ႈသေဢၼ်ၼၼ်ႉၸမ်ႉပိူၼ်ႈတၵ်းဢွၼ်ၵၼ်ၵိၼ်ႇဝႃႈၼမ်ၼႃႇဢေႃႈ။
မိူဝ်ႈဢၼ်ၵူၼ်းႁၢႆႉမိူၵ်ႈမီးၽုင်းတၼ်းၶူဝ်းမႃးၼၼ်ႉၵူၼ်းတင်းလၢႆဢွၼ်ၵၼ်ပၢႆႈတဵတ်ႇပၢႆႈမႅပ်းယူႇဢေႃႈ။ မိူဝ်ႈဢၼ်ၽုင်းတၼ်းၶူဝ်းမၼ်းတူၵ်းၼၼ်ႉၸမ်ႉ၊ၵူၼ်းသိုဝ်ႈတေႃႇတၵ်းၶိုၼ်းပုတ်ႈဢုပ်ႉပိူင်ႇဢေႃႈ။
ပေႃးမႂ်းလႆႈၶၢမ်ႇတၢင်းဢၼ်သင်ႇသွၼ်သုင်းမႃႉယူႇၶိူဝ်းၶိူဝ်းယႂ်းယႂ်းလႄႈသမ်ႉယင်းမီးၸႂ်တိုဝ်တၼ်ယူႇၸိုင်၊ဝၼ်းၼိုင်ႈမႂ်းတၵ်းတေလႆႈၶၢမ်ႇတၢင်းဢၼ်ႁၵ်းလုႁၵ်းလႅဝ်ထၢၼ်ႈပေႃးဢမ်ႇၶိုၼ်းယႃႁၢႆလႆႈဢေႃႈ။
မိူဝ်ႈဢၼ်ၵူၼ်းသိုဝ်ႈတေႃႇမီးဢၶႂၢင်ႉဢႃႇၼႃႇၼၼ်ႉၵူၼ်းတင်းလၢႆၸူမ်းသိူဝ်းလႄႈ၊မိူဝ်ႈဢၼ်ၵူၼ်းႁၢႆႉမိူၵ်ႈဢုပ်ႉပိူင်ႇၼၼ်ႉၸမ်ႉ၊ၵူၼ်းတင်းလၢႆမႆႈၸႂ်ၶီၸႂ်ဢေႃႈ။
ပေႃးမႂ်းၵျိူၵ်ႈႁၵ်ႉထုၵ်ႇၸႂ်ပိင်ႇၺႃႇၸိုင်၊ၸၢင်ႈႁႂ်ႈပေႃႈမႂ်းၸူမ်းသိူဝ်းလႄႈ၊ၵေႃႉဢၼ်ၸၢႆႇငိုၼ်းတီႈမႄႈမွၵ်ႇယႃႈၼၼ်ႉပဵၼ်ၵူၼ်းငိူဝ်ႈဢေႃႈ။
မိူဝ်ႈဢၼ်ၶုၼ်ႁေႃၶမ်းၸီႇယၢင်ႇၸွမ်းၼင်ႇတြႃးၼၼ်ႉဝၢၼ်ႈမိူင်းမၼ်းႁႅင်းယႂ်ႇလႄႈ၊မိူဝ်ႈဢၼ်မၼ်းၸႂ်ၸပ်းၶႂ်ႈလႆႈငိုၼ်းယူႇၵူၺ်းၼၼ်ႉၸိုင်၊မိူင်းမၼ်းတၵ်းလုၵႂႃႇဢေႃႈ။
ပေႃးမႂ်းဢဝ်တင်းသူပ်းၶျေႃးၵိၼ်ယွင်ႈၵိၼ်ၵေႃႉသႄႈမႂ်းၸိုင်၊ပဵၼ်တၢင်းဢၼ်မႂ်းဢဝ်ၶႄၵီႈၽႄႇဝႆႉပုၼ်ႈယၢင်ႈတိၼ်မႂ်းဢေႃႈ။
ၵူၼ်းႁၢႆႉမိူၵ်ႈတင်းလၢႆၸၢင်ႈလႆႈတူၵ်းၶမ်မႅၼ်ႈၵႃႈၼႂ်းတူင်ႇၶိုမ်းတူဝ်ၸဝ်ႈၵဝ်ႇလႄႈ၊ၵူၼ်းသိုဝ်ႈတေႃႇၸမ်ႉ၊လႆႈၸူမ်းသိူဝ်းလႄႈလွတ်ႈလႅဝ်းဢေႃႈ။
ၵူၼ်းလီၵူၼ်းငၢမ်းၸၢင်ႈႁုဢၶႂၢင်ႉဢႃႇၼႃႇၵူၼ်းၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉသေလႄႈ၊ၵူၼ်းဢၼ်ဢမ်ႇတြႃးၸမ်ႉ၊ဢမ်ႇၸၢင်ႈႁုၸၢင်ႈၸႅင်ႈလွင်ႈတၢင်းၸိူဝ်ႉၼင်ႇၼၼ်ၼၼ်ႉ။
ၶဝ်ၸိူဝ်းဢၼ်ႁဵတ်းဢမ်ႇပေႃးၼင်ႇႁိုဝ်တီႈပိူၼ်ႈတၢင်ႇၵေႃႉၼၼ်ႉၸၢင်ႈႁႂ်ႈတၢင်းၶီဢၼ်မႆႈႁွၼ်ႉတူၵ်းႁွတ်ႈၵႃႈၼိူဝ်ၵူၼ်းတင်းဝဵင်းဢေႃႈ။ ၶဝ်ၸိူဝ်းဢၼ်မီးပိင်ႇၺႃႇၸမ်ႉ၊ၸၢင်ႈႁႂ်ႈလွင်ႈတၢင်းၵူႈၸိူဝ်ႉၵူႈဢၼ်ၼိမ်သိမ်ႇဢေႃႈ။
ပေႃးၵေႃႉဢၼ်မီးပိင်ႇၺႃႇပဵၼ်ဢမုၵၼ်တင်းၵူၼ်းမိူၵ်ႈၸိုင်၊ၵူၼ်းမိူၵ်ႈၼၼ်ႉမီးတၢင်းဢၼ်ဢွၵ်ႇတေႃးသႃႉယူႇသေဢမ်ႇဝႃႈ၊ယုမ်ႉၶူဝ်ယူႇသေဢမ်ႇဝႃႈ၊မၼ်းဢမ်ႇမီးတီႈဢၼ်တၵ်းထၢတ်ႇတၵ်းယဵၼ်။
ၶဝ်ၸိူဝ်းဢၼ်ၶႂ်ႈဢဝ်ပိူၼ်ႈတၢႆၼၼ်ႉၸၢင်ႈငိၼ်းၸင်းၵေႃႉဢၼ်သိုဝ်ႈလီယူဝ်းလီဢေႃႈ။ ၵေႃႉဢၼ်သိုဝ်ႈတေႃႇၸမ်ႉ၊ၸၢင်ႈႁႃၸွႆႈႁႃထႅမ်ဢသၢၵ်ႈပိူၼ်ႈဢေႃႈ။
ၵူၼ်းတိုဝ်ၸိုင်၊ၸၢင်ႈၼႄပျႃးတေႃးသႃႉမၼ်းလႅင်းလႅင်းလႄႈ၊ၵူၼ်းမီးပိင်ႇၺႃႇၸမ်ႉၸၢင်ႈၶျုၵ်ႈၵၼ်ႈႁႂ်ႈမၼ်းထၢတ်ႇယဵၼ်ဢေႃႈ။
ပေႃးၶုၼ်ထွမ်ႇဢဝ်ၵႂၢမ်းမုသႃႇၸိုင်၊မူးမၢတ်ႈၽွင်းမိူင်းမၼ်းတင်းလၢႆတၵ်းပဵၼ်ၵူၼ်းပႅတ်ႉၵူၼ်းလႅၼ်ဢေႃႈ။
ၵူၼ်းယၢၵ်ႈၵူၼ်းၽၢၼ်တင်းၵေႃႉဢၼ်တဵၵ်းငႅၼ်းမၼ်းၼၼ်ႉမီးတၢင်းဢၼ်မိူၼ်မိူၼ်ၵၼ်မဵဝ်းၼိုင်ႈၸမ်ႉ၊ပဵၼ်တၢင်းဢၼ် ထႃႇဝရႃႉၽြႃး၊ ဢဵတ်းလူပၼ်ဢၼ်လႅင်းတီႈမၢၵ်ႇတႃၶဝ်ၼၼ်ႉဢေႃႈ။
ပေႃးၶုၼ်ႁေႃၶမ်းၸီႇယၢင်ႇတြႃးတီႈၵူၼ်းၽၢၼ်ၽဵင်ႇၽဵင်ႇၸိုင်၊မၼ်းတၵ်းလႆႈဢုပ်ႉပိူင်ႇၸူဝ်ႈၶၢဝ်းႁိုင်ၼႃႇဢေႃႈ။
တၢင်းဢၼ်ဢဝ်ၶွၼ်ႉဝၢႆဢိၵ်ႇတင်းတၢင်းဢၼ်ဢဝ်သူပ်းသင်ႇသွၼ်သုင်းမႃႉလုၵ်ႈဢွၼ်ႇၼၼ်ႉၸၢင်ႈႁႂ်ႈပိင်ႇၺႃႇယႂ်ႇၽႄႈၼမ်ၵိုၼ်းမႃးလႄႈ၊လုၵ်ႈဢွၼ်ႇဢၼ်ယူႇၵမ်ၸႂ်မၼ်းၼၼ်ႉၸမ်ႉ၊ၸၢင်ႈႁႂ်ႈမႄႈမၼ်းလႆႈဢူၵ်းလႆႈဢၢႆဢေႃႈ။
မိူဝ်ႈဢၼ်ၵူၼ်းႁၢႆႉမိူၵ်ႈတင်းလၢႆမီးၽုင်းတၼ်းၶူဝ်းၼၼ်ႉဢပျတ်ႈတၢင်းဢၼ်ၽိတ်းပိူင်ႈပူၼ်ႉလိူဝ်ၸၢင်ႈယႂ်ႇၽႄႈၼမ်ၵိုၼ်းမႃးလႄႈ၊ၵူၺ်းၵႃႈ၊ၵူၼ်းသိုဝ်ႈတေႃႇတင်းလၢႆၸၢင်ႈလႆႈတူၺ်းႁၼ်တၢင်းဢၼ်ၶဝ်လူမ်ႉတူၵ်းၼၼ်ႉဢေႃႈ။
သင်ႇသွၼ်သုင်းမႃႉလုၵ်ႈၸၢႆးမႂ်းတႃႉ။ မႂ်းတေလႆႈဢဝ်ၵုင်ႇဢဝ်မုၼ်ၵွပ်ႈလူၺ်ႈမၼ်းဢေႃႈ။ မၼ်းတၵ်းဢမ်ႇႁဵတ်းလွင်ႈတၢင်းဢၼ်ႁႂ်ႈမႂ်းလႆႈဢူၵ်းလႆႈဢၢႆလႃးလႃး။
ပေႃးပျႃႇတိၵ်ႈၸဝ်ႈဢမ်ႇမီးၸိုင်၊ၵူၼ်းတင်းလၢႆႁဵတ်းၵမ်ၸႂ်ၶဝ်ယူႇလႄႈ၊ၵေႃႉဢၼ်ၵမ်ၵျၢင်ႉၸွမ်းတြႃးၸဝ်ႈၸမ်ႉ၊မီးမၢင်ႇၵလႃႇဢေႃႈ။
ဢဝ်တင်းၵႂၢမ်းၵူၺ်းသင်ႇသွၼ်သုင်းမႃႉၶႃႈမႂ်းဢမ်ႇလႆႈ။ မၼ်းၼၼ်ႉပိၵ်ႉသမ်ႉႁုၸႅင်ႈသေၵေႃႈ မၼ်းဢမ်ႇၸၢင်ႈဝႆႉၸႂ်ထွမ်ႇဢဝ်။
ၵူၼ်းတိုဝ်ၵူၼ်းမိူၵ်ႈၼၼ်ႉယင်းမီးတီႈလီမုင်ႈမွင်းၼႃႇသေၵေႃႉဢၼ်ဢမ်ႇမီးသမ်ႇမႃႇသတိလႄႈသူပ်းၽႂ်းၵႂၢမ်းၽႂ်းၼၼ်ႉလူးၵွၼ်ႇဢေႃႈ။
ပေႃးမႂ်းပၼ်ဢၶႂၢင်ႉႁႂ်ႈၶႃႈယူႇၵမ်ၸႂ်မၼ်းၸဵမ်မိူဝ်ႈဢၼ်ယင်းလဵၵ်ႉၼၼ်ႉၸိုင်၊ဝၼ်းၼိုင်ႈမၼ်းတၵ်းသိမ်းဢဝ်ဢုၵ်ႉၸႃႇမႂ်းၵႃႈမီးၵူႈၸိူဝ်ႉၵူႈပိူင်ဢေႃႈ။
ၵေႃႉဢၼ်တေႃးသႃႉဢွၵ်ႇၶၼ်ၽႂ်းၼႃႇၼၼ်ႉၸၢင်ႈႁႂ်ႈပဵၼ်တၢင်းဢၼ်ၽိတ်းၵၼ်ၼမ်ၼႃႇဢိၵ်ႇတင်းႁႂ်ႈပဵၼ်ၽေးၼမ်ၼႃႇဢေႃႈ။
တၢင်းဢၼ်မႃႇၼႃႉၸႂ်သုင်ၼၼ်ႉၸၢင်ႈႁႂ်ႈတူဝ်ၸဝ်ႈၵဝ်ႇတူၵ်းတီႈတႅမ်ႇလႄႈ၊ပေႃးမႂ်းမီးႁူဝ်ၸႂ်ဢၼ်ၶျႃးတႅမ်ႇၸိုင်၊ပိူၼ်ႈတၵ်းရူဝ်ႇသေႇလေႇမၢတ်ႈမႂ်းဢေႃႈ။
ၵေႃႉဢၼ်ၽႄမႅင်ႇဢဝ်ဢုၵ်ႉၸႃႇတီႈၽူႈလၵ်ႉၼၼ်ႉၸၢင်ႈပဵၼ်ရၢၼ်ႇသူႇဢၼ်လီၵူဝ်သေပိူၼ်ႈတီႈတူဝ်ၸဝ်ႈၵဝ်ႇၼၼ်ႉဢေႃႈ။ ပေႃးမၼ်းလၢတ်ႈၼႄဢၼ်ၸိုဝ်ႈဢၼ်ၸႂ်ႈၵႃႈၼႂ်းလုမ်းၸိုင်၊မၼ်းတၵ်းတေလႆႈၶၢမ်ႇတၢမ်ႇဢပျတ်ႈဢေႃႈ။ ပေႃးမၼ်းဢမ်ႇလႆႈလၢတ်ႈၸိုင်၊ၽြႃးပဵၼ်ၸဝ်ႈတၵ်းၵိၼ်ႇဝႃႈတီႈမၼ်းဢေႃႈ။
တၢင်းဢၼ်ၶႆႈၸႂ်ဝူၼ်ႉၸႂ်လူၺ်ႈလွင်ႈဢၼ်ပိူၼ်ႈထၢင်ႇထိူမ်ၼိူဝ်မႂ်းၸိူဝ်ႉၼင်ႇႁိုဝ်ယူႇၼၼ်ႉပဵၼ်ၽေးဢၼ်လီၵူဝ်ၼႃႇဢေႃႈ။ ၵူၺ်းၵႃႈ၊ပေႃးမႂ်းယုမ်ႇယမ်ဢိင်ပိုင်ႈ ထႃႇဝရႃႉၽြႃး၊ ၸိုင်၊မႂ်းတၵ်းၵၢင်းလွတ်ႈတင်းၽေးဢေႃႈ။
ၵူၼ်းၼမ်ၼႃႇမီးဢလူဝ်ႇၶႂ်ႈႁႂ်ႈၶုၼ်မီးၸႂ်လီၸႂ်ဝၢၼ်ဢေႃႈ။ ၵူၺ်းၵႃႈ၊ ထႃႇဝရႃႉၽြႃး၊ ၵူၺ်းၸီႇယၢင်ႇၸွမ်းၼင်ႇတြႃးတီႈၵူၼ်းတင်းလၢႆဢေႃႈ။
ၵူၼ်းသိုဝ်ႈတေႃႇငိၼ်းၸၢၼ်ႈၵေႃႉဢၼ်ဢမ်ႇတြႃးလႄႈ၊ၵေႃႉဢၼ်ဢမ်ႇတြႃးၵေႃႈငိၼ်းၸၢၼ်ႈၵူၼ်းသိုဝ်ႈတေႃႇဢေႃႈ။
ဢၼ်ၸိူဝ်းၼႆႉၸမ်ႉ၊ပဵၼ်ထုင်းၵႂၢမ်း ဢႃႇၵုရႃႉ၊ လုၵ်ႈၸၢႆး ယႃႇၵေႇ၊ ၼၼ်ႉဢေႃႈ။ “ၽြႃးပဵၼ်ၸဝ်ႈဢမ်ႇမီးယူႇလူၺ်ႈၵၼ် တင်းၵဝ်ယဝ်ႉ။ ၽြႃးပဵၼ်ၸဝ်ႈဢမ်ႇမီးယူႇလူၺ်ႈၵၼ်တင်းၵဝ်ယဝ်ႉလႄႈၵဝ်ဢမ်ႇမီးတီႈဢိင်တီႈပိုင်ႈယဝ်ႉ။ ”
ၵဝ်ပဵၼ်ၸိူဝ်ႉၼင်ႇသတ်းၼႃႇသေၵူၼ်း သေၵေႃႉၵေႃႉလႄႈ ၵဝ်ဢမ်ႇမီးၺၢၼ်ႇတၢင်းႁုမိူၼ်ၵူၼ်းယဝ်ႉ။
ၵဝ်ဢမ်ႇတွၼ်ႉသွၼ်ဢဝ်ပိင်ႇၺႃႇတြႃး။ ၵဝ်ဢမ်ႇႁုၸႅင်ႈလွင်ႈၸဝ်ႈဢၼ်မူတ်းၸၢင်ႇ။
ၽူႈလႂ်ယၢမ်ႈမီးပိင်ႇၺႃႇဢၼ်ႁုၸႅင်ႈလွင်ႈ ၽုင်ႇၵၢင်ႁၢဝ်ယဝ်ႉ။ ၽူႈလႂ်ယၢမ်ႈယိပ်းၵမ်ဢဝ်လူမ်းဝႆႉ ၵႃႈၼႂ်းမိုဝ်းမၼ်း။ ၽူႈလႂ်ယၢမ်ႈဢဝ်ၼမ်ႉပူၵ်ႉႁေႃႇသႂ်ႇဝႆႉ ၵႃႈၼႂ်းၽႃႈၽႅၼ်ႇမၼ်း။ ၽူႈလႂ်ယၢမ်ႈမၵ်းမၢႆၶွပ်ႇလႅၼ်လိၼ်မိူင်းမၼ်းဝႆႉ။ ပေႃးမႂ်းႁုၸၵ်းမၼ်းၸိုင်၊ၸိုဝ်ႈမၼ်းႁွင်ႉႁဵၵ်ႈဝႃႈ၊ ၸိုဝ်ႈဢီႈသင်။ လုၵ်ႈၸၢႆးမၼ်းၼၼ်ႉ သမ်ႉၸိုဝ်ႈဢီႈသင်။
“ၽြႃးပဵၼ်ၸဝ်ႈပႂ်ႉၵႂၢမ်းၵတိၵႃႈတီႈဢၼ်မၼ်းၸဝ်ႈလၢတ်ႈဝႆႉၵူႈၶေႃႈၵူႈၵမ်းၼၼ်ႉ ဢေႃႈ။ မၼ်းၸဝ်ႈပဵၼ်ၸိူဝ်ႉၼင်ႇၶိူင်ႈႁႄႉလၢၵ်ႈၼၢၵ်ႈတီႈၶဝ်ၸိူဝ်းဢၼ်ႁႃဢဝ်တၢင်းဢၼ်မၼ်းၸဝ်ႈၵႅတ်ႇၶႄႁႄႉၵင်ႈၼၼ်ႉဢေႃႈ။-
ယႃႇပေထၢပ်ႈသႂ်ႇထႅင်ႈတီႈၵႂၢမ်းမၼ်းၸဝ်ႈ။ ၵူဝ်မၼ်းၸဝ်ႈတၵ်းတၢင်ႇဢပျတ်ႈတီႈမႂ်းလႄႈမႂ်းတၵ်းပဵၼ်ၵေႃႉဢၼ်လၢတ်ႈမုသႃႇဢေႃႈ။”
ၽြႃးပဵၼ်ၸဝ်ႈတီႈၶႃႈ။ ၶႃႈၸဝ်ႈလဝ်ႈယွၼ်းသွင်ပိူင်တီႈၸဝ်ႈႁဝ်းဢေႃႈ။ ၶႅၼ်းတေႃႈႁႂ်ႈၶႃႈၸဝ်ႈလႆႈၸူဝ်ႈဢၼ်ၶႃႈၸဝ်ႈဢမ်ႇပႆႇတၢႆၼႆႉသေၵမ်းတီႈၶႃႈ။-
ၶႅၼ်းတေႃႈဢဝ်မုသႃႇဢၼ်လၢတ်ႈပႅတ်ႉလၢတ်ႈလႅၼ်ၼၼ်ႉဝႆႉၵႆၵၼ်တင်းၶႃႈၸဝ်ႈ၊ဢိၵ်ႇတင်းၶႅၼ်းတေႃႈယႃႇပေႁႂ်ႈၶႃႈၸဝ်ႈမၢၵ်ႈမီးၼႃႇ၊ဢမ်ႇၼၼ်ယၢၵ်ႈၽၢၼ်ၼႃႇလူင်လၢင်သေၵမ်းတီႈၶႃႈ။ ၶႅၼ်းတေႃႈပၼ်တၢင်းၵိၼ်ဢၼ်ပေႃးၵုမ်ႇလဵင်ႉဢသၢၵ်ႈၵူၺ်းၼၼ်ႉသေၵမ်းတီႈၶႃႈ။-
ပေႃးၶႃႈၸဝ်ႈမီးၼမ်လိူဝ်ၵႂႃႇၸိုင်၊ၵူဝ်ၶႃႈၸဝ်ႈထဵင်ပႅတ်ႈၸဝ်ႈႁဝ်းလႄႈလၢတ်ႈဝႃႈ၊ “ၽြႃးပဵၼ်ၸဝ်ႈၼၼ်ႉပဵၼ်ၽူႈလႂ်၊” ဝႃႈၼင်ႇၼႆတီႈၶႃႈဢေႃႈ။ ပေႃးၶႃႈၸဝ်ႈၽၢၼ်ၼႃႇၵေႃႈၵူဝ်ၶႃႈၸဝ်ႈၸၢင်ႈလၵ်ႉလႄႈႁႂ်ႈၼႃႇမႃႉၸိုဝ်ႈသဵင်ၽြႃးပဵၼ်ၸဝ်ႈမီးတီႈဢၼ်တၢင်ႇဢပျတ်ႈဢေႃႈ။
ယႃႇပေၶႃႉၸိုဝ်ႈၶၢႆသဵင်ၵေႃႉဢၼ်ပဵၼ်ၶႃႈၼၼ်ႉတီႈၸဝ်ႈမၼ်း။ ၵူဝ်မၼ်းၵိၼ်ႇလႃႇမႂ်းလႄႈဢပျတ်ႈတၵ်းႁွတ်ႈထိုင်တီႈမႂ်းဢေႃႈ။
မီးၵူၼ်းမဵဝ်းဢၼ်ၸၢင်ႈၵိၼ်ႇလႃႇပေႃႈၶဝ်လႄႈဢမ်ႇပၼ်တၢင်းလီတီႈမႄႈၶဝ်ၼၼ်ႉဢေႃႈ။
မီးၵူၼ်းမဵဝ်းဢၼ်ထၢင်ႇတူဝ်ၸဝ်ႈၵဝ်ႇမူတ်းသႂ်တီႈၸႂ်တီႈၶေႃးၶဝ်၊ၼႂ်းမိူဝ်ႈဢၼ်ၶဝ်ယင်းဢမ်ႇသုၵ်ႈလၢင်ႉပႅတ်ႈတၢင်းဢၼ်ၵူဝ်ႈဢၼ်ၵိူၵ်ႇတူဝ်ၸဝ်ႈၵဝ်ႇၼၼ်ႉဢေႃႈ။
မီးၵူၼ်းမဵဝ်းဢၼ်ထၢင်ႇတူဝ်ၸဝ်ႈၵဝ်ႇပဵၼ်ၵူၼ်းလီၵူၼ်းငၢမ်းလႄႈထၢင်ႇၶဝ်လီသေပိူၼ်ႈဢေႃႈ။
မီးၵူၼ်းမဵဝ်းဢၼ်မီးၶဵဝ်ႈဢၼ်မိူၼ်ၸိူဝ်ႉၼင်ႇလၢပ်ႇလႅဝ်းတင်းၶဵဝ်ႈဢၼ်မိူၼ်မိတ်ႈပုၼ်ႈဢၼ်တၵ်းၶူပ်းၵူၼ်းၽၢၼ်ပႅတ်ႈသေၵႃႈၼိူဝ်လိၼ်မိူင်းဢိၵ်ႇတင်းၵူၼ်းဢၼ်ၸုတ်ႈလုတ်ႈပႅတ်ႈသေၵႃႈၼႂ်းၵူၼ်းတင်းလၢႆဢေႃႈ။
တူဝ်ပိင်မီးလုၵ်ႈတူဝ်မႄႈသွင်တူဝ်လႄႈၸိုဝ်ႈသဵင်ၶဝ်ႁွင်ႉႁဵၵ်ႈဝႃႈ၊ “ပၼ်ၵဝ်တႃႉ” ဝႃႈၼႆတင်းသွင်တူဝ်ဢေႃႈ။ လွင်ႈတၢင်းဢၼ်ဢလူဝ်ႇၵၢင်ၸႂ်ဢမ်ႇပျေႇလႄႈဢမ်ႇၸၢင်ႈဝႃႈ၊ “ပေႃးယဝ်ႉ” ၼၼ်ႉမီးသီႇမဵဝ်းဢေႃႈ။
ၸိူဝ်းၼၼ်ႉၸမ်ႉ၊ပဵၼ်ပႃႇႁဵဝ်ႈမဵဝ်းၼိုင်ႈ၊ မႄႈယိင်းဢၼ်ပဵၼ်မၼ်လႄႈဢမ်ႇမီးလုၵ်ႈၼၼ်ႉမဵဝ်းၼိုင်ႈ၊ လိၼ်ဢၼ်ဢမ်ႇဢိမ်ႇၼမ်ႉလႆႈၼၼ်ႉမဵဝ်းၼိုင်ႈ၊ ၽႆးဢၼ်မႆႈထၢၼ်ႈပေႃးဢမ်ႇမွတ်ႇပႅတ်ႈလႆႈၼၼ်ႉမဵဝ်းၼိုင်ႈဢေႃႈ။
ၵေႃႉဢၼ်ယဝ်ႈဢၼ်ယွၵ်ႇပေႃႈမၼ်းလႄႈႁဵတ်းဢမ်ႇပေႃးၼင်ႇႁိုဝ်တီႈမႄႈမၼ်းဢၼ်ထဝ်ႈၵႄႇယဝ်ႉၼၼ်ႉ ၸိုင်၊ထိူၵ်ႈၶၢမ်ႇတၢင်းဢၼ်လၢင်းတႃႉတင်းလၢႆၵိၼ်ပႅတ်ႈ၊ဢမ်ႇၼၼ်ၵေႃႈၵႃလမ်ထိူၼ်ႇတင်းလၢႆၶွၵ်းၵိၼ်မၢၵ်ႇတႃမၼ်းပႅတ်ႈဢေႃႈ။
လွင်ႈတၢင်းဢၼ်ၺၢၼ်ႇၵဝ်ဢမ်ႇၶိုတ်းထိုင်လႆႈလႄႈသၢမ်မဵဝ်းဢမ်ႇၵႃး၊ဢမ်ႇႁုဢမ်ႇၸႅင်ႈလႆႈမီးသီႇမဵဝ်းဢေႃႈ။
ၸိူဝ်းၼၼ်ႉပဵၼ်ႁွႆးတၢင်းၼူၵ်ႉၶၢင်ႇလေႃႉ ဢၼ်မိၼ်ၵႂႃႇၼႂ်းလူမ်းမဵဝ်းၼိုင်ႈ၊ ႁွႆးတၢင်းငူးဢၼ်လိူၼ်ႈၵႂႃႇၼိူဝ်မၢၵ်ႇႁိၼ် မဵဝ်းၼိုင်ႈ၊ႁွႆးတၢင်းႁိူဝ်းသၢင်းၽေႃးဢၼ် ၶၢမ်ႈၵႂႃႇၼႂ်းၵၢင်ပၢင်ႇလၢႆႇမဵဝ်းၼိုင်ႈ၊ ႁွႆးတၢင်းၽူႈမၢဝ်ႇၽူႈသၢဝ်ႁၵ်ႉပႅင်း ၵၼ်ၼၼ်ႉမဵဝ်းၼိုင်ႈဢေႃႈ။
ႁွႆးတၢင်းမႄႈယိင်းဢၼ်မီးၽူဝ်ယူႇလႄႈလဵၼ်ႈၸုၼၼ်ႉၵေႃႈပဵၼ်ၸိူဝ်ႉၼင်ႇၼႆဢေႃႈ။ မၼ်းၽိတ်းပိူင်ႈၵႃႇမေႇသုသေယဝ်ႉ၊ဢၢပ်ႇၼမ်ႉပႅတ်ႈယဝ်ႉၸင်ႇလၢတ်ႈဝႃႈ၊ “ၵဝ်ဢမ်ႇႁဵတ်းၽိတ်းၵႃႈသင်ၵူၺ်း” ဝႃႈၼင်ႇၼႆဢေႃႈ။
လွင်ႈတၢင်းဢၼ်ၶွၼ်းၶဝ်းလိၼ်မိူင်းသၢမ်မဵဝ်းဢမ်ႇၵႃးလိၼ်မိူင်းထၢၼ်ႈပေႃးဢမ်ႇၶၢမ်ႇလႆႈမီးသီႇမဵဝ်းဢေႃႈ။
ၸိူဝ်းၼၼ်ႉပဵၼ်ၶႃႈဢၼ်လႆႈပဵၼ်ၶုၼ်မႃးၼၼ်ႉ မဵဝ်းၼိုင်ႈ၊ ၵူၼ်းမိူၵ်ႈဢၼ်လႆႈၵိၼ်ဢိမ်ႇၵိၼ်တဵမ်ၼၼ်ႉ မဵဝ်းၼိုင်ႈ။
မႄႈယိင်းဢၼ်လီၸင်းဢၼ်ဢဝ်ၽူဝ်ၼၼ်ႉ မဵဝ်းၼိုင်ႈ၊ ၶႃႈမႄႈယိင်းဢၼ်ပုတ်ႈဢဝ်ဢရႃႇၸဝ်ႈၼၢင်း မၼ်းၼၼ်ႉမဵဝ်းၼိုင်ႈဢေႃႈ။
တူဝ်သတ်းဢၼ်ပိၵ်ႉသမ်ႉတူဝ်လဵၵ်ႉၵႃႈၼိူဝ်လိၼ်မိူင်းၼႆႉသေၵေႃႈ မီးပိင်ႇၺႃႇယႂ်ႇၼႃႇလူင်လၢင်ၼၼ်ႉမီးသီႇမဵဝ်းဢေႃႈ။
ၸိူဝ်းၼၼ်ႉၸမ်ႉ၊ပဵၼ်မူတ်ႉမဵဝ်းၼိုင်ႈဢၼ် ဢမ်ႇမီးဢဵၼ်မီးႁႅင်းသေၵေႃႈ၊ ၸၢင်ႈပွင်ႁႅၼ်းပွင်မႄးတၢင်းၵိၼ်ၶဝ်ဝႆႉ၊ၼႂ်းမိူဝ်ႈ ဢၼ်ပဵၼ်ၶိင်ႇႁႅင်ႈၼၼ်ႉဢေႃႈ။
မူမႃမဵဝ်းၼိုင်ႈၼၼ်ႉဢမ်ႇမီးဢဵၼ်မီးႁႅင်းသေၵေႃႈ ၶဝ်ၸၢင်ႈႁဵတ်း၊ တီႈယူႇတီႈသဝ်းၶဝ်ၵႃႈၼႂ်းငၢပ်ႇႁိၼ် ငၢပ်ႇၽႃဢေႃႈ။
ၸၵ်းၶႆႇၼႃးမဵဝ်းၼိုင်ႈၼၼ်ႉၵေႃႈ ဢမ်ႇမီးၸဝ်ႈ မီးၶုၼ်သေၵေႃႈ၊ ၸၢင်ႈၵႂႃႇၶပ်ႉၶပ်ႉတၢမ်းတၢမ်းၵၼ်ဢေႃႈ။
ဢိၵ်ႇတင်းၸိူင်ႉႁိူၼ်းမဵဝ်းၼိုင်ႈဢၼ်ဢဝ်တင်းမိုဝ်းမႂ်း ယိပ်းၵမ်ဝႆႉလႆႈသေၵေႃႈ၊ ယင်းၸၢင်ႈၵႂႃႇယူႇၼႂ်းႁေႃၶမ်းတင်းလၢႆဢေႃႈ။
လွင်ႈတၢင်းဢၼ်ၵႂႃႇလီလီငၢမ်းငၢမ်းလႄႈတၢင်းပႆတၢင်းယၢင်ႈၶဝ်ႁၢင်ႈလီႁၢင်ႈငၢမ်းၼႃႇမီးသီႇမဵဝ်းဢေႃႈ။
ၸိူဝ်းၼၼ်ႉပဵၼ်သၢင်ႇသီႈဢၼ်ဢဵၼ်ႁႅင်း ယႂ်ႇၼႃႇသေတူဝ်သတ်း၊ တင်းသဵင်ႈတင်းလူင်လႄႈဢမ်ႇဝၢတ်ႈပၢႆႈ ၽူႈလႂ်ၼၼ်ႉမဵဝ်းၼိုင်ႈ။
ပႄႉပေႃႈမဵဝ်းၼိုင်ႈ၊မႃႉႁၢင်ႈၶိူင်ႈမဵဝ်းၼိုင်ႈတင်း ၶုၼ်ႁေႃၶမ်းဢၼ်ပႆၵႂႃႇ၊ ယၢင်ႈၵႂႃႇၵႃႈတီႈၽၢႆႇၼႃႈၵူၼ်းမၼ်းၸိူဝ်းၼၼ်ႉမဵဝ်းၼိုင်ႈဢေႃႈ။
ပေႃးမႂ်းမီးၸႂ်မိူၵ်ႈလႄႈယုၵ်ႉယွင်ႈတူဝ်ၸဝ်ႈၵဝ်ႇယူႇ၊ၵျၢမ်ႇပွင်ဢၼ်ဢမ်ႇလီဢမ်ႇငၢမ်းမႅၼ်ႈၸိုင်၊ၵိုတ်းသဝ်းသေတၢင်းဢၼ်ၶႆႈၸႂ်ၸဵၼ်းၸႃးလီလီတႃႉ။-
လွင်ႈမၼ်းၸမ်ႉ၊တၢင်းဢၼ်ၶူၼ်းၼမ်ႉၼူမ်းၼၼ်ႉၸၢင်ႈႁႂ်ႈထေႃးပၢတ်ႈဢွၵ်ႇလႄႈ၊တၢင်းဢၼ်လိမ်ႇတိုတ်ႉၶူႈလင်ၼၼ်ႉၸၢင်ႈႁႂ်ႈလိူတ်ႈဢွၵ်ႇဢေႃႈ။ မိူၼ်ၼင်ႇၼၼ်တၢင်းတိုၵ်းယူင်းတေႃးသႃႉၼၼ်ႉၸၢင်ႈႁႂ်ႈတၢင်းဢၼ်ၽိတ်းၵၼ်ဢွၵ်ႇဢေႃႈ။
ၵႂၢမ်းၶုၼ်ႁေႃၶမ်း လေႇမူၺ်ႇလႃႉ၊ ဢၼ်ဝႃႈ၊ပျႃႇတိၵ်ႈဢၼ်မႄႈမၼ်းၸဝ်ႈသင်ႇသွၼ်ပၼ်တီႈမၼ်းၸဝ်ႈၸမ်ႉ။
“လုၵ်ႈၸၢႆးၵဝ်ဢၼ်ဝႃႈ၊လုၵ်ႈဢွၵ်ႇဢၼ်ၵဝ်ႁၵ်ႉၼႃႇၼႆႉ႟။ ဢၼ်ပဵၼ်ၵေႃႉဢၼ်ၵဝ်တိူင်ႇယွၼ်းလႄႈလႆႈမႃးၼႆႉ႟၊ၵဝ်တၵ်းလႆႈလၢတ်ႈတီႈမႂ်းၸိူဝ်ႉၼင်ႇႁိုဝ်ဝႃႈၼႆၸမ်ႉ၊-
ယႃႇပေႁႂ်ႈသုမ်းႁႅင်းမႂ်းလူၺ်ႈၵႃႇမႃႉလႄႈ၊ယႃႇပေၸၢႆႇငိုၼ်းမႂ်းပုၼ်ႈၽူႈယိင်းတင်းလၢႆ။ ၶဝ်ၼၼ်ႉၸၢင်ႈယႃႉၶုၼ်ႁေႃၶမ်းတင်းလၢႆပႅတ်ႈဢေႃႈ။-
ထွမ်ႇတႃႉ၊ လေႇမူၺ်ႇလႃႉ၊ ႟။ ၶုၼ်ႁေႃၶမ်းတင်းလၢႆဢမ်ႇထုၵ်ႇလီၵိၼ်လဝ်ႈၼမ်ႉမၢၵ်ႇၸပိတ်ႉတင်းၼမ်ႉလဝ်ႈဢၼ်ၶိုၼ်ႇၼႃႇၼၼ်ႉ။-
ၵူဝ်ၶဝ်တၵ်းၵိၼ်သေယဝ်ႉ၊လူင်လိုမ်းတြႃးၸဝ်ႈလႄႈတႅပ်းတတ်းဢမုၶဝ်ၸိူဝ်းဢၼ်ယၢၵ်ႈဢၼ်ၽၢၼ်တင်းလၢႆဢမ်ႇမႅၼ်ႈၸွမ်းၼင်ႇတြႃးဢေႃႈ။-
ၼမ်ႉလဝ်ႈၸိုင်၊ပဵၼ်ပုၼ်ႈၵူၼ်းၸိူဝ်းဢၼ်ၸမ်တၵ်းတၢႆဢိၵ်ႇတင်းၵေႃႉဢၼ်ၶီၸႂ်ၶူမ်ၸႂ်ၸိူဝ်းၼၼ်ႉၵူၺ်းဢေႃႈ။-
ႁႂ်ႈမၼ်းၵိၼ်လႄႈဢမ်ႇၶုၵ်းၸႂ်လႆႈတုၵ်ႉၶႃႉမၼ်း၊ႁႂ်ႈမၼ်းလူင်လိုမ်းတၢင်းယၢၵ်ႈတၢင်းၽၢၼ်မၼ်းတႃႉ။
“ယူႇၽၢႆႇၵေႃႉဢၼ်ဢမ်ႇၸၢင်ႈပိုတ်ႇၸၢင်ႈလၢတ်ႈပုၼ်ႈတူဝ်ၸဝ်ႈၵဝ်ႇၼၼ်ႉသေလႄႈၸွႆႈလၢတ်ႈပုၼ်ႈမၼ်းတႃႉ။ ပႂ်ႉဢမုၶဝ်ၸိူဝ်းဢၼ်ၽၢၼ်ပေႃႈၽၢၼ်မႄႈတင်းလၢႆၼၼ်ႉယူႇတႃႉ။-
ၸွႆႈလၢတ်ႈပုၼ်ႈၶဝ်လႄႈၸီႇယၢင်ႇတြႃးသိုဝ်ႈသိုဝ်ႈတေႃႇတေႃႇတႃႉ။ ပႂ်ႉဢမုၶဝ်ၸိူဝ်းဢၼ်ယၢၵ်ႈဢၼ်ၽၢၼ်ဢိၵ်ႇတင်းၸိူဝ်းဢၼ်ၸုတ်ႈဢၼ်လုတ်ႈၼၼ်ႉယူႇတႃႉ။”
တၢင်းဢၼ်ႁႃမေးဢၼ်မီးသီႇလႃႉသိၼ်ထမ်းၼၼ်ႉထူပ်းၺႃးယၢပ်ႇၼႃႇဢေႃႈ။ မေးၸိူဝ်ႉၼင်ႇၼၼ်ၼၼ်ႉၸိုင်၊ယဵင်ႈၶႅၼ်းထိူၵ်ႈၵႃႈထိူၵ်ႈၶၼ်ၼႃႇသေသႅင်လႅင်ပတ်ႈတမျႃးၼၼ်ႉၼႃႇလူင်လၢင်ဢေႃႈ။
ႁူဝ်ၸႂ်ၽူဝ်မၼ်းတၵ်းယုမ်ႇယမ်တမ်းၸႂ်မၼ်းလႄႈတၵ်းဢမ်ႇလႆႈယၢၵ်ႈၽၢၼ်ဢေႃႈ။
မၼ်းယင်းဢမ်ႇယႃႉဢၵျူဝ်းၽူဝ်မၼ်းလႄႈၸၢင်ႈပွင်ႁဵတ်းဢၼ်လီပၼ်ၸူဝ်ႈဢသၢၵ်ႈမၼ်းဢေႃႈ။
မၼ်းၸၢင်ႈႁႃဢဝ်ၶူၼ်သူဝ်းတင်းမႆပၢၼ်ႇမႆၵုၺ်လႂ်လႄႈပႃးၸႂ်ပႃးၶေႃးဢဝ်မိုဝ်းမၼ်းပၼ်ႇတေႃးဢေႃႈ။
မၼ်းၸၢင်ႈဢဝ်တၢင်းၵိၼ်တၢင်းၶူပ်းလုၵ်ႉသေၵႃႈတီႈဢၼ်ၵႆသေလႄႈမႃးၵႃႈတီႈႁိူၼ်း၊မိူၼ်ၸိူဝ်ႉၼင်ႇႁိူဝ်းသၢင်းၽေႃးၸဝ်ႈၵုၼ်ႇၸဝ်ႈသိၼ်ၼၼ်ႉဢေႃႈ။
မၼ်းၸၢင်ႈလုၵ်ႉၸဵမ်မိူဝ်ႈမိူင်းဢမ်ႇပႆႇလႅင်းၼၼ်ႉသေလႄႈမႄးႁႅၼ်းတၢင်းၵိၼ်တၢင်းၶူပ်းပုၼ်ႈၵူၼ်းႁိူၼ်းၵူၼ်းယေးမၼ်းတင်းလၢႆဢိၵ်ႇတင်းသင်ႇလၢတ်ႈမႄႈယိင်းဢၼ်ပဵၼ်ၶႃႈမႄႈယိင်းတင်းလၢႆၵေႃႉလႂ်တၵ်းႁဵတ်းဢၼ်လႂ်ၼၼ်ႉဢေႃႈ။
မၼ်းၸၢင်ႈၶႆႈၸႂ်လီလီငၢမ်းငၢမ်းလႄႈသိုဝ်ႉဢဝ်တူင်ႈႁႆႈတူင်ႈၼႃးသေယဝ်ႉ၊ဢဝ်ငိုၼ်းဢၼ်မၼ်းႁဵတ်းလႆႈမႃးၼၼ်ႉၽုၵ်ႇသွမ်ႈတူၼ်ႈၶိူဝ်းမၢၵ်ႇၸပိတ်ႉဢေႃႈ။
မၼ်းၸၢင်ႈမီးဝိရိယႃႉလႄႈဢဝ်မႃႇဢဝ်ႁႅင်းၵျူဝ်းၸႃးႁဵတ်းၵၢၼ်ဢေႃႈ။
မၼ်းႁုၵႃႈၶၼ်ဢုၵ်ႉၸႃႇဢၼ်မၼ်းႁဵတ်းလႆႈမႃးၼၼ်ႉလႄႈႁဵတ်းသၢင်ႈတေႃႇထိုင်ႁွတ်ႈၶိင်ႇၵၢင်ၶိုၼ်းဢေႃႈ။
တူဝ်မၼ်းပၼ်ႇမႆၵုၺ်သေလႄႈတေႃးႁဵတ်းၶူဝ်းၼုင်ႈတူဝ်ၸဝ်ႈၵဝ်ႇဢေႃႈ။
မၼ်းၸၢင်ႈမီးၸႂ်ၸေႇတၼႃႇၵႃႈတီႈၵူၼ်းယၢၵ်ႈၵူၼ်းၽၢၼ်ၸိူဝ်းဢၼ်ၸုတ်ႈဢၼ်လုတ်ႈၼၼ်ႉဢေႃႈ။
ပိၵ်ႉသမ်ႉမူၺ်တူၵ်းသေၵေႃႈမၼ်းဢမ်ႇမႆႈၸႂ်၊ၵွပ်ႈပိူဝ်ႈၵူၼ်းႁိူၼ်းၵူၼ်းယေးမၼ်းတင်းလၢႆလႆႈၼုင်ႈၶူဝ်းဢုၼ်ႇဝႆႉယဝ်ႉဢေႃႈ။
မၼ်းၸၢင်ႈတေႃးၽႃႈၸွင်ႇၽႃႈသိူဝ်ႇတင်းလၢႆလႄႈၼုင်ႈမႆၶူဝ်းၽႃႈပၢၼ်ႇတင်းၶူဝ်းဢၼ်လႅင်ၵမ်ႇဢေႃႈ။
ၽူဝ်မၼ်းလႆႈၼႃႈလႆႈတႃယႂ်ႇၼႃႇၵႃႈၼႂ်းဝဵင်းမိူဝ်ႈဢၼ်မၼ်းၼင်ႈလူၺ်ႈၵၼ်တင်းၵူၼ်းလူင်ၼႂ်းမိူင်းၸိူဝ်းၼၼ်ႉဢေႃႈ။
မၼ်းၸၢင်ႈယဵပ်ႉၶူဝ်းလႂ်၊ႁဵတ်းသၢႆဢႅဝ်လႂ်လႄႈၶၢႆပၼ်ၸဝ်ႈၵုၼ်ႇၸဝ်ႈသိၼ်ၶဝ်ဢေႃႈ။
မၼ်းမီးဢဵၼ်မီးႁႅင်း၊လႆႈၶၢမ်ႇဢဝ်တၢင်းဢၼ်ပိူၼ်ႈရူဝ်ႇသေႇလႄႈ၊မၼ်းဢမ်ႇမႆႈၸႂ်ထႃႈၶိင်ႇၵႃႇလႃႉဢၼ်တၵ်းပဵၼ်မႃးၵမ်းလိုၼ်းၼၼ်ႉဢေႃႈ။
မၼ်းၸၢင်ႈလၢတ်ႈၸၢင်ႈဝႃႈၵႂၢမ်းမႅတ်ႈတႃႇတင်းၵႂၢမ်းပိင်ႇၺႃႇဢေႃႈ။
မၼ်းၸၢင်ႈလူၸၢင်ႈတူၺ်းၵႃႈဢၼ်ၵူၼ်းႁိူၼ်းၵူၼ်းယေးမၼ်းပွင်ႁဵတ်းၼၼ်ႉလႄႈမၼ်းဢမ်ႇၵိၼ်တၢင်းၵိၼ်ဢၼ်ၸၢင်ႈႁႂ်ႈၶၢၼ်ႉဢိူၼ်ၼၼ်ႉ။
လုၵ်ႈလၢင်းမၼ်းတင်းလၢႆဢွၼ်ၵၼ်ႁုမၢတ်ႈဢၵျူဝ်းၵျေးၸူးမၼ်းလီလီငၢမ်းငၢမ်းလႄႈၽူဝ်မၼ်းၵေႃႈယွင်ႈယေႃးမၼ်းလႄႈဝႃႈ။
“ၽူႈယိင်းပိူၼ်ႈၼမ်ၼႃႇပဵၼ်မေးဢၼ်လီဢၼ်ငၢမ်းဢေႃႈ။ ၵူၺ်းၵႃႈ၊မႂ်းၼႆႉလိူဝ်တွၼ်းသေၶဝ်တင်းသဵင်ႈတင်းလူင်ဢေႃႈ၊” ဝႃႈၼင်ႇၼႆဢေႃႈ။
တၢင်းဢၼ်ႁၢင်ႈယဵၼ်ႇလီႁၵ်ႉၼၼ်ႉပဵၼ်တၢင်းဢၼ်ပႅတ်ႉဢၼ်လႅၼ်လႄႈ၊တၢင်းဢၼ်ႁၢင်ႈလီႁၢင်ႈငၢမ်းၼၼ်ႉၵေႃႈပဵၼ်ဢၼ်လၢႆလၢႆဢမ်ႇပွင်ႇလွင်ႈၵႃႈသင်ဢေႃႈ။ မႄႈယိင်းဢၼ်ရူဝ်ႇသေႇၵူဝ်ယမ် ထႃႇဝရႃႉၽြႃး၊ ၸမ်ႉ၊လႆႈၶၢမ်ႇတၢင်းဢၼ်ယွင်ႈယေႃးဢေႃႈ။
ပၼ်ဢၵျူဝ်းၸွမ်းၵႃႈၼင်ႇဢၼ်မၼ်းၵမ်ၵျၢင်ႉၼၼ်ႉတီႈမၼ်းတႃႉ။ မၼ်းထိူၵ်ႈၶၢမ်ႇဢဝ်တၢင်းဢၼ်ပိူၼ်ႈရူဝ်ႇသေႇလေႇမၢတ်ႈၵူႈၵေႃႉၵူႈၵူၼ်းဢေႃႈ။ ၵျၢမ်းသုၵ်ႉတၢမ်ႇယဝ်ႉယဝ်ႉဢေႃႈ။
ဢၼ်ၸိူဝ်းၼႆႉၸမ်ႉ၊ပဵၼ်ၵႂၢမ်းထမ်ႇမႃႉတေႇသၼႃႇသြႃႇလူင်မေႃပိင်ႇၺႃႇဢၼ်ပဵၼ်ၶုၼ်ႁေႃၶမ်းၵႃႈၼႂ်းဝဵင်း ယေႇရုသလႅမ်ႇ၊ လႄႈပဵၼ်လုၵ်ႈၸၢႆး တႃႇဝိတ်ႈ၊ ၼၼ်ႉဢေႃႈ။
သြႃႇလူင်မေႃပိင်ႇၺႃႇႁေႃးလၢတ်ႈထမ်ႇမႃႉတေႇသၼႃႇလႄႈဝႃႈၸမ်ႉ၊ “ဢၼတ်ႉတႃႉလွၼ်ႉလွၼ်ႉ။ ပဵၼ်ဢၼတ်ႉတႃႉလွၼ်ႉလွၼ်ႉ။ လွင်ႈတၢင်းၵူႈၸိူဝ်ႉၵူႈပိူင်ပဵၼ်ဢၼတ်ႉတႃႉလွၼ်ႉလွၼ်ႉဢေႃႈ။-
ၵႃႈဢၼ်ၵူၼ်းၵႆႉၶတ်းၸႂ်ႁဵတ်းသၢင်ႈၵႃႈတႂ်ႈၵၢင်ဝၼ်းၸိူဝ်းၼၼ်ႉၶဝ်လႆႈၶၢမ်ႇဢဝ်ဢၵျူဝ်းၵႃႈသင်။-”
ၵူၼ်းသိုပ်ႇၼိုင်ႈယဝ်ႉသိုပ်ႇၼိုင်ႈပူၼ်ႉၵႂႃႇယဝ်ႉလႄႈသိုပ်ႇၼိုင်ႈလႄႈသိုပ်ႇၼိုင်ႈသမ်ႉပေႃႇပဵၼ်မႃးသေယဝ်ႉ၊လိၼ်မိူင်းၸမ်ႉ၊တႄႇယူႇတႃႇသေႇဢေႃႈ။-
ၵၢင်ဝၼ်းၵေႃႈဢွၵ်ႇယူႇတူၵ်းယူႇလႄႈသမ်ႉၶိုၼ်းႁိပ်ႈၼႅတ်ႈၵႂႃႇၸူးတီႈဢၼ်မၼ်းယၢမ်ႈဢွၵ်ႇမႃးၼၼ်ႉဢေႃႈ။-
လူမ်းၵေႃႈပတ်ႉထူဝ်းၵႂႃႇၽၢႆႇတၢင်းၸၢၼ်းလႄႈသမ်ႉပၼ်ႇၵႂႃႇၽၢႆႇတၢင်းႁွင်ႇယူႇသေယဝ်ႉ၊ပၼ်ႇၵႂႃႇပၼ်ႇၶိုၼ်းယူႇၵႃႈၼႂ်းဝူင်းလူမ်းဢၼ်ပတ်ႉထူဝ်းၼၼ်ႉဢေႃႈ။-
ၼမ်ႉႁွင်ႈၼမ်ႉၵႄးတင်းလၢႆဢွၼ်ၵၼ်လႆၶဝ်ႈၵႃႈၼႂ်းၼမ်ႉပၢင်ႇလၢႆႇဢေႃႈ။ ၵူၺ်းၵႃႈ၊ပၢင်ႇလၢႆႇဢမ်ႇၸၢင်ႈတဵမ်၊ၼမ်ႉၶိုၼ်းပွၵ်ႈၵႂႃႇတီႈႁူဝ်ၼမ်ႉႁွင်ႈၼမ်ႉၵႄးလႄႈသမ်ႉလႆယူႇၶိူဝ်းၶိူဝ်းဢေႃႈ။-
လွင်ႈတၢင်းၵႃႈမီးတင်းသဵင်ႈတင်းလူင်ပဵၼ်တၢင်းဢၼ်ယၢပ်ႇၸႂ်ၶၢၼ်ၸႂ်ၼႃႇလူင်လၢင်ထၢၼ်ႈပေႃးၵူၼ်းလၢတ်ႈဢမ်ႇသဵင်ႈလႆႈ၊မၢၵ်ႇတႃႁၼ်ထၢၼ်ႈပေႃးဢမ်ႇၸၢင်ႈဢိမ်ႇၸၢင်ႈတိူၵ်ႈ၊ႁူငိၼ်းထၢၼ်ႈပေႃးဢမ်ႇၸၢင်ႈတဵမ်လႆႈဢေႃႈ။-
လွင်ႈတၢင်းဢၼ်ယၢမ်ႈပဵၼ်ၵႂႃႇယဝ်ႉၼၼ်ႉသမ်ႉတၵ်းပဵၼ်မႃးထႅင်ႈလႄႈလွင်ႈတၢင်းဢၼ်ယၢမ်ႈႁဵတ်းယဝ်ႉၼၼ်ႉသမ်ႉတၵ်းႁဵတ်းထႅင်ႈဢေႃႈ။ ဢမ်ႇမီးလွင်ႈတၢင်းဢၼ်မႂ်ႇၵႃႈၼႂ်းမိူင်းလေႃးၵႃႉၼႆႉလႃးလႃး။-
ၸွင်ႇမီးမဵဝ်းၼိုင်ႈမဵဝ်းလႂ်ဢၼ်ပိူၼ်ႈတၵ်းၸၢင်ႈလၢတ်ႈဝႃႈ၊ “တူၺ်းလူး။ ဢၼ်ၼႆႉပဵၼ်ဢၼ်မႂ်ႇဢေႃႈ” ဝႃႈၼင်ႇၼႆၼၼ်ႉႁိုဝ်း။ ဢမ်ႇမီးလႃးလႃး။ လွင်ႈတၢင်းၼၼ်ႉယၢမ်ႈပဵၼ်ၵႂႃႇမိူဝ်ႈၵွၼ်ႇႁိုင်ၼႃႇၸဵမ်မိူဝ်ႈဢွၼ်တၢင်းႁဝ်းဢမ်ႇပႆႇၵိူတ်ႇလဵင်ႉမႃးၼၼ်ႉယဝ်ႉ။-
ၽူႈလႂ်သေၵေႃႉသေၵူၼ်းဢမ်ႇမၢတ်ႈဢမ်ႇတွင်းလွင်ႈတၢင်းဢၼ်ပဵၼ်ၵႂႃႇမိူဝ်ႈၵွၼ်ႇဢွၼ်ၼႆႉၼၼ်ႉလႃးလႃး။ ၶဝ်ၸိူဝ်းဢၼ်ၵိူတ်ႇမႃးၵမ်းလိုၼ်းတေဢမ်ႇမီးၽူႈလႂ်မၢတ်ႈတွင်းလႆႈလႃးလႃး။
ၵဝ်သြႃႇလူင်မေႃပိင်ႇၺႃႇၼႆႉလႆႈပဵၼ်ၶုၼ်ႁေႃၶမ်းမဵဝ်း ဢိသရေး၊ လႄႈယူႇၵႃႈၼႂ်းဝဵင်း ယေႇရုသလႅမ်ႇ၊ မႃးဢေႃႈ။-
မိူဝ်ႈၼၼ်ႉ၊ၵဝ်တႅပ်းတတ်းၸႂ်တႃႇတေဢဝ်တင်းပိင်ႇၺႃႇလႄႈသွၵ်ႈႁႃလႄႈသွၼ်ဢဝ်လွင်ႈတၢင်းၵႃႈမီးတင်းသဵင်ႈတင်းလူင်ဢၼ်ႁဵတ်းၵႃႈၼႂ်းမိူင်းလေႃးၵႃႉၼႆႉဢေႃႈ။ လွင်ႈတၢင်းဢၼ်ၽြႃးပဵၼ်ၸဝ်ႈပၼ်ႁႂ်ႈၵူၼ်းထၢမ်းႁဵတ်းၼၼ်ႉပဵၼ်ဢၼ်ယၢပ်ႇၽိုတ်ႇလွၼ်ႉလွၼ်ႉဢေႃႈ။-
ၵဝ်ႁၼ်လွင်ႈတၢင်းဢၼ်ႁဵတ်းသၢင်ႈၵႃႈၼႂ်းမိူင်းလေႃးၵႃႉၼႆႉတင်းသဵင်ႈတင်းလူင်ပဵၼ်ဢၼတ်ႉတႃႉလွၼ်ႉလွၼ်ႉဢေႃႈ။ ပဵၼ်မိူၼ်ၸိူဝ်ႉၼင်ႇတၢင်းဢၼ်ၵိၼ်လူမ်းၵိၼ်လႅင်ႉၼၼ်ႉၵူၺ်းဢေႃႈ။-
လွင်ႈတၢင်းဢၼ်ၵူတ်ႉၼၼ်ႉၸိုင်၊ဢမ်ႇႁႂ်ႈသိုဝ်ႈလႆႈ။ လွင်ႈတၢင်းဢၼ်လုတ်ႈႁၢမ်းၵေႃႈ ဢမ်ႇၼပ်ႉဢၢၼ်ႇလႆႈ။
ၵဝ်လၢတ်ႈၵႃႈၼႂ်းႁူဝ်ၸႂ်ၵဝ်လႄႈဝႃႈ၊ “ၵဝ်ၼႆႉမီးပိင်ႇၺႃႇဢၼ်ယဵင်ႈၶႅၼ်းလိူဝ်တွၼ်းၼႃႇသေၶုၼ်ၸိူဝ်းဢၼ်ယၢမ်ႈဢုပ်ႉပိူင်ႇၵႃႈၼႂ်းဝဵင်း ယေႇရုသလႅမ်ႇ၊ မႃးမိူဝ်ႈဢွၼ်တၢင်းၵဝ်ၼၼ်ႉဢေႃႈ။ ႁူဝ်ၸႂ်ၵဝ်လႆႈၶႆႈၸႂ်ဝူၼ်ႉၸႂ်လူၺ်ႈပိင်ႇၺႃႇတၢင်းႁုတၢင်းမေႃၼႃႇလူင်လၢင်ဢေႃႈ၊” ဝႃႈၼင်ႇၼႆဢေႃႈ။-
ၵဝ်တင်ႈၸႂ်တင်ႈၶေႃးႁႂ်ႈလႆႈၸၵ်းၽႄလႄႈႁုပိင်ႇၺႃႇတြႃး၊ဢိၵ်ႇတင်းတၢင်းဢၼ်ၸႂ်ယွင်ႇၸႂ်မႃႈ၊တၢင်းဢၼ်ၸႂ်မိူၵ်ႈၸႂ်တိုဝ်ၸိူဝ်းၼၼ်ႉဢေႃႈ။ ၵဝ်ႁုႁၼ်လွင်ႈဢၼ်လွင်ႈတၢင်းၼၼ်ႉပဵၼ်မိူၼ်ၸိူဝ်ႉၼင်ႇဢၼ်ၵိၼ်လူမ်းၵိၼ်လႅင်ႉၵူၺ်းၼၼ်ႉဢေႃႈ။-
လွင်ႈမၼ်းၸမ်ႉ၊ၵေႃႉဢၼ်ယဵင်ႈၶႅၼ်းမီးပိင်ႇၺႃႇၼၼ်ႉ၊ယဵင်ႈၶႅၼ်းယၢပ်ႇၸႂ်ၽိုတ်ႇၸႂ်ဢေႃႈ။ ၵေႃႉဢၼ်ယဵင်ႈၶႅၼ်းမီးၺၢၼ်ႇၼၼ်ႉ၊ယဵင်ႈၶႅၼ်းမႆႈၸႂ်ၶီၸႂ်ဢေႃႈ။
ၵဝ်တႅပ်းတတ်းၸႂ်ၵဝ်ႁႂ်ႈလႆႈဢဝ်တူဝ်ၸဝ်ႈၵဝ်ႇမူၼ်ႈပျေႃႇပုၼ်ႈလွင်ႈၼင်ႇႁိုဝ်တၵ်းလႆႈႁၼ်ၸႂ်သႂၢင်ႇၸႂ်သိူဝ်းပဵၼ်ၸိူဝ်ႉၼင်ႇႁိုဝ်ၼၼ်ႉဢေႃႈ။ ၵူၺ်းၵႃႈ၊ၵဝ်ႁၼ်လွင်ႈတၢင်းၼၼ်ႉၵေႃႈပဵၼ်ဢၼတ်ႉတႃႉၼင်ႇၵဝ်ႇဢေႃႈ။-
ၵဝ်ႁုႁၼ်လွင်ႈတၢင်းဢၼ်ယုမ်ႉၶူဝ်ၼၼ်ႉပဵၼ်တၢင်းဢၼ်ယွင်ႇလႄႈ တၢင်းဢၼ်သႂၢင်ႇဢၼ်သိူဝ်းၼၼ်ႉဢမ်ႇပၼ်ဢၵျူဝ်းၵႃႈသင်ဢေႃႈ။-
လွင်ႈတၢင်းဢၼ်ႁူဝ်ၸႂ်ၵဝ်တိုၵ်းသူၼ်းႁႂ်ႈလႆႈပိင်ႇၺႃႇၼၼ်ႉ၊ၵဝ်ဢၢင်ႈတေႁႂ်ႈၸႂ်သႂၢင်ႇသိူဝ်းလူၺ်ႈၼမ်ႉမၢၵ်ႇၸပိတ်ႉလႄႈႁႂ်ႈၸူဝ်ႈဢသၢၵ်ႈၵဝ်မူၼ်ႈပျေႃႇဢေႃႈ။ ၵဝ်ထၢင်ႇလွင်ႈတၢင်းၼႆႉၸၢင်ႈၶႄးပဵၼ်လွင်ႈတၢင်းဢၼ်ၵူၼ်းထုၵ်ႇလီႁဵတ်းၼႂ်းၸူဝ်ႈဢသၢၵ်ႈၶဝ်ဢၼ်ပွတ်းၼႃႇၼႂ်းလေႃးၵႃႉၼႆႉဢေႃႈ။
ၵဝ်ပွင်ႁဵတ်းလွင်ႈတၢင်းယႂ်ႇၼႃႇတင်းလၢႆဢေႃႈ။ ၵဝ်တႄႇႁဵတ်းႁိူၼ်းလႂ်၊ၽုၵ်ႇသွမ်ႈသူၼ်တူၼ်ႈၶိူဝ်းမၢၵ်ႇၸပိတ်ႉလႂ်၊ပုၼ်ႈတူဝ်ၸဝ်ႈၵဝ်ႇဢေႃႈ။-
တူဝ်ၵဝ်ႁဵတ်းသူၼ်လႂ်၊ဢူးယဵၼ်ႇလႂ်လႄႈၽုၵ်ႇသွမ်ႈတူၼ်ႈမၢၵ်ႇၵူႈၸိူဝ်ႉၵူႈမဵဝ်းဢေႃႈ။-
ၵဝ်ၶုတ်းၼမ်ႉၼွင်တင်းလၢႆပုၼ်ႈဢၼ်တၵ်းႁူတ်းပႃးထိူၼ်ႇဢၼ်မီးတူၼ်ႈမႆႉလၢႆမဵဝ်းၼၼ်ႉဢေႃႈ။-
ၵဝ်သိုဝ်ႉဢဝ်ၶႃႈၵူၼ်းၸၢႆး၊ၶႃႈၵူၼ်းယိင်းၼမ်ၼႃႇလႄႈလႆႈလုၵ်ႈၶႃႈဢၼ်ၵိူတ်ႇလဵင်ႉမႃးၵႃႈၼႂ်းႁိူၼ်းၵဝ်ၼၼ်ႉဢေႃႈ။ ၵဝ်လႆႈမၢၵ်ႈမီးၽုင်သူဝ်းၽုင်ဝူဝ်းၼမ်ၼႃႇသေၶဝ်ၸိူဝ်းဢၼ်ယၢမ်ႈယူႇၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉဢေႃႈ။-
ၵဝ်သမ်ႉၽႃႇၵဵပ်းဢဝ်ၶွၼ်ႇငိုၼ်းၶမ်းၽၼ်ႇတႃႇၸဝ်ႈၼၼ်ႉသေၵႃႈတီႈမိူင်းဢၼ်ၵဝ်ဢုပ်ႉပိူင်ႇတင်းလၢႆၼၼ်ႉမႃးၵွင်ဝႆႉ၊ဢိၵ်ႇတင်းၽူႈယိင်းၵူၼ်းၸၢႆးတင်းလၢႆႁဵတ်းပွႆးၸၢတ်ႈသႅင်ႇပုၼ်ႈၵဝ်လႄႈၵဝ်လႆႈၽူႈယိင်းၼမ်ၼႃႇၸွမ်းၼင်ႇၵူၼ်းၸၢႆးထုၵ်ႇၸႂ်ၵျိူၵ်ႈၸႂ်ၼၼ်ႉဢေႃႈ။
ၼင်ႇၼၼ်လႄႈၵဝ်ႁွတ်ႈထိုင်တၢင်းဢၼ်ယႂ်ႇသုင်လႄႈၽႄၵႂၢင်ႈတူဝ်းတွၼ်းမႃးလိူဝ်တွၼ်းၼႃႇသေၶဝ်ၸိူဝ်းဢၼ်ယၢမ်ႈယူႇၵႂႃႇၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉလႄႈပိင်ႇၺႃႇၵဝ်ၵေႃႈ ဢမ်ႇတွၼ်ႉႁၢႆၵႂႃႇသေၵႃႈတီႈၵဝ်လႃးလႃး။-
ၵႃႈဢၼ်ၵဝ်ၶႂ်ႈလႆႈၼၼ်ႉၵဝ်လႆႈၵူႈၸိူဝ်ႉၵူႈပိူင်ဢေႃႈ။ ၵဝ်ဢမ်ႇပႄႇဢမ်ႇထဵင်ပႅတ်ႈၵႃႈဢၼ်ႁူဝ်ၸႂ်ၵဝ်ၸူမ်းသိူဝ်းၼၼ်ႉသေၸိူဝ်ႉသေပိူင်။ ၵဝ်ဢုပ်ႇဝၢဝ်းလူၺ်ႈၵႃႈဢၼ်ၵဝ်ၶတ်းၸႂ်ၵျူဝ်းၸႃးႁဵတ်းၵႃႈမီးတင်းသဵင်ႈတင်းလူင်ၼၼ်ႉလႄႈလွင်ႈတၢင်းၸိူဝ်းၼၼ်ႉတင်းသဵင်ႈပဵၼ်ဢၵျူဝ်းတီႈၵဝ်ဢေႃႈ။-
ၼင်ႇၼၼ်လႄႈၵဝ်ၶႆႈၸႂ်ဝူၼ်ႉတူၺ်းလွင်ႈတၢင်းဢၼ်ၵဝ်ဢဝ်မိုဝ်းပွင်ႁဵတ်း၊ၵႃႈဢၼ်ၵဝ်လႆႈၶတ်းၸႂ်ၵျူဝ်းၸႃးဢဝ်ႁႅင်းဢွၵ်ႇႁဵတ်းသၢင်ႈထၼ်ႇႁိုဝ်မႃးယဝ်ႉၼၼ်ႉသေလႄႈၵဝ်လႆႈႁုႁၼ်ၵူႈၸိူဝ်ႉၵူႈပိူင်ၼၼ်ႉပဵၼ်ဢၼတ်ႉတႃႉလွၼ်ႉလွၼ်ႉလႄႈ၊ပဵၼ်မိူၼ်ၸိူဝ်ႉၼင်ႇဢၼ်ၵိၼ်လူမ်းၵိၼ်လႅင်ႉၵူၺ်းလႄႈဢမ်ႇပွင်ႇလွင်ႈၵႃႈသင်လႃးလႃး။-
တီႈသုတ်းမၼ်းၸမ်ႉ၊ၶုၼ်ႁေႃၶမ်းၸၢင်ႈႁဵတ်းၸွမ်းၵႃႈၼင်ႇဢၼ်ၶုၼ်ႁေႃၶမ်းဢွၼ်တၢင်းၸိူဝ်းၼၼ်ႉယၢမ်ႈႁဵတ်းမႃးယဝ်ႉၼၼ်ႉၵူၺ်းဢေႃႈ။ ၵွပ်ႈပိူဝ်ႈၸိူဝ်ႉၼင်ႇၼႆလႄႈၵဝ်သမ်ႉၶႆႈၸႂ်ဝူၼ်ႉတူၺ်းလူၺ်ႈလွင်ႈပိင်ႇၺႃႇ၊ဢိၵ်ႇတင်းတၢင်းဢၼ်ယွင်ႇမႃႈ၊ဢိၵ်ႇတင်းတၢင်းဢၼ်ငိူဝ်ႈငႃႉပဵၼ်ၸိူဝ်ႉၼင်ႇႁိုဝ်ၼၼ်ႉဢေႃႈ။-
မိူဝ်ႈၼၼ်ႉ၊ၵဝ်ႁုဝႃႈ၊ “ပိင်ႇၺႃႇမျၢတ်ႈလီလိူဝ်တွၼ်းၼႃႇသေတၢင်းဢၼ်ႁၢႆႉမိူၵ်ႈမိူၼ်ၸိူဝ်ႉၼင်ႇဢၼ်လႅင်းမျၢတ်ႈလီလိူဝ်တွၼ်းၼႃႇသေဢၼ်လပ်းသိင်ႇၼၼ်ႉဢေႃႈ။
ၵူၼ်းဢၼ်မီးပိင်ႇၺႃႇၶဝ်ၼၼ်ႉမီးမၢၵ်ႇတႃၵႃႈၼႂ်းၵွၵ်းႁူဝ်ၶဝ်လႄႈ၊ၵူၼ်းမိူၵ်ႈၸမ်ႉ၊ၸၢင်ႈၵႂႃႇမႃးၵႃႈၼႂ်းလပ်းသိင်ႇဢေႃႈ၊” ဝႃႈၼႆၼၼ်ႉဢေႃႈ။ ၼႂ်းဝႃႈၼၼ်သေၵေႃႈ၊ၵဝ်ႁုႁၼ်လွင်ႈဢၼ်ဢမုၸိူဝ်ႉလဵဝ်ပိူင်လဵဝ်ၵူၺ်းႁွတ်ႈထိုင်ၵႃႈၼိူဝ်ၶဝ်တင်းလၢႆဢေႃႈ။-
ၵဝ်လၢတ်ႈၵႃႈၼႂ်းႁူဝ်ၸႂ်ၵဝ်လႄႈဝႃႈ၊ “ဢမုဢၼ်တေလႆႈတူၵ်းႁွတ်ႈၵႃႈၼိူဝ်ၶဝ်ၸိူဝ်းဢၼ်ငိူဝ်ႈငႃႉၼၼ်ႉတၵ်းတူၵ်းႁွတ်ႈထိုင်တီႈၵဝ်မိူၼ်မိူၼ်ၵၼ်ၵူၺ်းလႄႈ၊ၵဝ်ၼႆႉပဵၼ်ၵူၼ်းမီးပိင်ႇၺႃႇသေၵေႃႈ တၵ်းမီးဢၵျူဝ်းၵႃႈသင်” ဝႃႈၼင်ႇၼႆဢေႃႈ။ ၵဝ်လႆႈႁုဝႃႈ၊ “ဢမ်ႇမီးဢၵျူဝ်းၵႃႈသင်။ ပဵၼ်ဢၼတ်ႉတႃႉလွၼ်ႉလွၼ်ႉၵူၺ်းဢေႃႈ၊” ဝႃႈၼင်ႇၼႆဢေႃႈ။-
ၽူႈလႂ်ၵေႃႈဢမ်ႇတွင်းၵူၼ်းဢၼ်မီးပိင်ႇၺႃႇ။ ၽူႈလႂ်သေၵေႃႉသေၵူၼ်းၵေႃႈဢမ်ႇတွင်းၵူၼ်းႁၢႆႉမိူၵ်ႈ။ မိူဝ်ႈၶိင်ႇၵႃႇလႃႉၵမ်းလိုၼ်းၼၼ်ႉ ပိူၼ်ႈတၵ်းလူင်လိုမ်းပႅတ်ႈႁဝ်းၵႃႈမီးတင်းသဵင်ႈတင်းလူင်ဢေႃႈ။ ႁဝ်းၵႃႈဢၼ်ပဵၼ်ၵူၼ်းမီးပိင်ႇၺႃႇ၊ဢိၵ်ႇတင်းၵူၼ်းႁၢႆႉမိူၵ်ႈတၵ်းဢွၼ်ၵၼ်တၢႆၵႂႃႇမိူၼ်မိူၼ်ၵၼ်ဢေႃႈ။-
ပိူဝ်ႈၼႆလႄႈၵဝ်မိူဝ်ႇၸၢၼ်ႈတၢင်းဢၼ်ဢသၢၵ်ႈလိပ်းၵွပ်ႈပိူဝ်ႈလွင်ႈတၢင်းၵႃႈဢၼ်မီးၵႃႈၼႂ်းတၢင်းဢၼ်ဢသၢၵ်ႈလိပ်းယူႇၼၼ်ႉဢမ်ႇပွင်ႇဢၵျူဝ်းပုၼ်ႈၵဝ်လႃးလႃးလႄႈႁႂ်ႈၵဝ်ႁွတ်ႈတုၵ်ႉၶႃႉၵူၺ်းဢေႃႈ။ ၵႃႈမီးတင်းသဵင်ႈတင်းလူင်ပဵၼ်ဢၼတ်ႉတႃႉလွၼ်ႉလွၼ်ႉလႄႈၵဝ်ၵေႃႈလႆႈၵိၼ်လူမ်းၵိၼ်လႅင်ႉၵူၺ်းဢေႃႈ။
ၼွၵ်ႈသေၼႆႉ၊ၵဝ်သမ်ႉမိူဝ်ႇၸၢၼ်ႈလူၺ်ႈလွင်ႈတၢင်းဢၼ်ၵဝ်ၵႆႉၶတ်းၸႂ် ႁဵတ်းယၢပ်ႇႁဵတ်းၽိုတ်ႇဝႆႉၸိူဝ်းၼၼ်ႉ၊ၵွပ်ႈပိူဝ်ႈၵဝ်ႁုလွင်ႈဢၼ်ၵဝ်တၵ်းလႆႈဝႆႉၵိုတ်းဝႆႉၵျၢၼ်ႇပုၼ်ႈၵေႃႉဢၼ်တၵ်းပဵၼ်မႃးလိုၼ်းလင်ၵဝ်ၼၼ်ႉဢေႃႈ။-
ၵေႃႉၼၼ်ႉတေပဵၼ်ၵူၼ်းမီးပိင်ႇၺႃႇႁိုဝ်၊တေပဵၼ်ၵူၼ်းငိူဝ်ႈငႃႉႁိုဝ်ၽူႈလႂ်တေႁုလႆႈ။ ဝႃႈၸိူဝ်ႉႁိုဝ်သေၵေႃႈၵေႃႉၼၼ်ႉတၵ်းဢုပ်ႉပိူင်ႇၵႃႈဢၼ်ၵဝ်ၶတ်းၸႂ်ၵျူဝ်းၸႃးႁဵတ်းဝႆႉၼၼ်ႉလႂ်၊ၵႃႈဢၼ်ၵဝ်ႁဵတ်းလူၺ်ႈပိင်ႇၺႃႇၵဝ်ဝႆႉၵႃႈၼႂ်းမိူင်းလေႃးၵႃႉၼႆႉၼၼ်ႉလႂ်၊လွင်ႈတၢင်းၼၼ်ႉၵေႃႈပဵၼ်ဢၼတ်ႉတႃႉလွၼ်ႉလွၼ်ႉၵူၺ်းဢေႃႈ။-
ၵွပ်ႈပိူဝ်ႈၼႆလႄႈၵဝ်ၶိုၼ်းထူပ်းႁၼ်ဝႃႈ၊ဢမ်ႇမီးတၢင်းဢၼ်မုင်ႈထႃႈမွင်းထႃႈလႄႈၵူၺ်းလႆႈၸႂ်လုလူၺ်ႈလွင်ႈၵႃႈဢၼ်ၵဝ်ၵႆႉၶတ်းၸႂ်ႁဵတ်းယၢပ်ႇႁဵတ်းၽိုတ်ႇဝႆႉၸိူဝ်းၼၼ်ႉဢေႃႈ။-
လွင်ႈမၼ်းၸမ်ႉ၊ပိၵ်ႉသမ်ႉပဵၼ်ၵေႃႉဢၼ်ဢဝ်တင်းပိင်ႇၺႃႇၺၢၼ်ႇ၊ဢိၵ်ႇတင်းတၢင်းဢၼ်ၵတ်ႉဢၼ်ၶၼ်သေလႄႈၵႆႉၶတ်းၸႂ်ႁဵတ်းဝႆႉၸိူဝ်းၼၼ်ႉသေၵေႃႈ၊ၵႃႈမီးတင်းသဵင်ႈတင်းလူင်ၼၼ်ႉတၵ်းလႆႈဝႆႉၵိုတ်းဝႆႉၵျၢၼ်ႇပုၼ်ႈၵေႃႉဢၼ်ယင်းဢမ်ႇလႆႈႁဵတ်းၵႃႈသင်လႄႈႁႂ်ႈလႆႈမႃးၸၢမ်ႇၸႃးဢေႃႈ။ လွင်ႈတၢင်းၼႆႉၵေႃႈပဵၼ်ဢၼတ်ႉတႃႉ၊ပဵၼ်လွင်ႈတၢင်းဢၼ်ဢမ်ႇတြႃးဢေႃႈ။-
ႁဝ်းႁဵတ်းသၢင်ႈယူႇ၊ယၢပ်ႇၸႂ်ယုင်ႈၸႂ်ယူႇၸူဝ်ႈဢသၢၵ်ႈလႄႈႁဝ်းမီးဢၵျူဝ်းၵႃႈသင်၊-
ၵႃႈၼင်ႇဢၼ်ဢသၢၵ်ႈမႂ်းယၢဝ်းယိုၼ်းယူႇၼၼ်ႉၵႃႈဢၼ်မႂ်းႁဵတ်းမႂ်းသၢင်ႈတင်းသဵင်ႈတင်းလူင်ၼၼ်ႉဢမ်ႇပၼ်ဢၵျူဝ်းၵူၺ်းဢမ်ႇၵႃး၊ယင်းပဵၼ်လွင်ႈတၢင်းဢၼ်ယၢပ်ႇၸႂ်ယုင်ႈၸႂ်ႁဵတ်းႁႂ်ႈပဵၼ်ႁူဝ်ၶႆႈႁူဝ်မဝ်းၵူၺ်းဢေႃႈ။ လိူဝ်သေၼၼ်ႉၶိင်ႇၵၢင်ၶိုၼ်းၵေႃႈႁူဝ်ၸႂ်မႂ်းဢမ်ႇလႆႈတႄႇလႆႈၼိမ်။ လွင်ႈတၢင်းၼၼ်ႉၵေႃႈပဵၼ်ဢၼတ်ႉတႃႉဢေႃႈ။
တၢင်းဢၼ်ၵိၼ်ဢၼ်ၶူပ်း၊တၢင်းဢၼ်ႁူဝ်ၸႂ်မူၼ်ႈပျေႃႇၵႃႈၼႂ်းလွင်ႈတၢင်းဢၼ်မၼ်းၵႆႉၶတ်းၸႂ်ႁဵတ်းယၢပ်ႇႁဵတ်းၽိုတ်ႇၼၼ်ႉပဵၼ်တၢင်းဢၼ်ထုၵ်ႇလီႁဵတ်းသေပိူၼ်ႈပုၼ်ႈၵူၼ်းႁဝ်းဢေႃႈ။ လွင်ႈတၢင်းၼၼ်ႉၵေႃႈၵဝ်ႁုဝႃႈပဵၼ်ဢၶႂၢင်ႉဢၼ်ၽြႃးပဵၼ်ၸဝ်ႈပၼ်ဢေႃႈ။-
ပေႃးမၼ်းၸဝ်ႈဢမ်ႇပၼ်ဢၶႂၢင်ႉၸိုင်၊ၽူႈလႂ်တၵ်းၵိၼ်လႆႈ။ ၽူႈလႂ်တၵ်းၸၢမ်ႇၸႃးလႆႈ။-
ၽြႃးပဵၼ်ၸဝ်ႈပၼ်ပိင်ႇၺႃႇၺၢၼ်ႇ၊ဢိၵ်ႇတင်းဢၶႂၢင်ႉဢၼ်ၸူမ်းသိူဝ်းတီႈၵေႃႉဢၼ်မၼ်းၸဝ်ႈထုၵ်ႇၸႂ်ၵျိူၵ်ႈၸႂ်ၼၼ်ႉဢေႃႈ။ တီႈၵေႃႉဢၼ်မီးဢပျတ်ႈၼၼ်ႉၸမ်ႉ၊မၼ်းၸဝ်ႈၸႂ်ႉႁႂ်ႈၶဝ်ႁဵတ်းၵၢၼ်ငၢၼ်းဢၼ်ယၢပ်ႇၸႂ်ၽိုတ်ႇၸႂ်ၼႃႇလူင်လၢင်ႁႂ်ႈလႆႈၵဵပ်းႁွမ်ၸုသိမ်းဝႆႉပုၼ်ႈဢၼ်တၵ်းပၼ်တီႈၵေႃႉဢၼ်ထုၵ်ႇၸႂ်ၵျိူၵ်ႈၸႂ်ၽြႃးပဵၼ်ၸဝ်ႈၼၼ်ႉဢေႃႈ။ လွင်ႈတၢင်းၼႆႉၵေႃႈပဵၼ်ဢၼတ်ႉတႃႉမိူၼ်ၸိူဝ်ႉၼင်ႇဢၼ်ၵိၼ်လူမ်းၵိၼ်လႅင်ႉၵူၺ်းၼၼ်ႉဢေႃႈ။
ၵႃႈၼင်ႇဢၼ်ပဵၼ်မႃးၵႃႈၼႂ်းလေႃးၵႃႉၼႆႉတင်းသဵင်ႈတင်းလူင်၊ပဵၼ်မႃးၸွမ်းၼင်ႇၶိင်ႇၵႃႇလႃႉဢၼ်ၽြႃးပဵၼ်ၸဝ်ႈမၵ်းၶၢၼ်းဝႆႉၼၼ်ႉဢေႃႈ။
မၼ်းၸဝ်ႈမၵ်းၶၢၼ်းၶိင်ႇၵႃႇလႃႉဢၼ်ၵိူတ်ႇလဵင်ႉ၊ ဢိၵ်ႇတင်းၶိင်ႇၵႃႇလႃႉတၢင်းတၢႆ၊ ၶိင်ႇၵႃႇလႃႉဢၼ်ၽုၵ်ႇသွမ်ႈ၊ဢိၵ်ႇတင်း ၶိင်ႇၵႃႇလႃႉဢၼ်ထူၺ်ႈဢွၵ်ႇ။
ၶိင်ႇၵႃႇလႃႉဢၼ်ဢဝ်တၢႆ၊ဢိၵ်ႇတင်းၶိင်ႇၵႃႇလႃႉဢၼ်ယူတ်းယႃႁႂ်ႈႁၢႆ၊ ၶိင်ႇၵႃႇလႃႉဢၼ်ၵိူၼ်ႇယႃႉ၊ဢိၵ်ႇတင်း ၶိင်ႇၵႃႇလႃႉဢၼ်တႄႇႁဵတ်းၼၼ်ႉဢေႃႈ။
မၼ်းၸဝ်ႈမၵ်းၶၢၼ်းၶိင်ႇၵႃႇလႃႉဢၼ်ႁွင်ႉႁႆႈ၊ဢိၵ်ႇတင်း ၶိင်ႇၵႃႇလႃႉဢၼ်ယုမ်ႉၶူဝ်၊ ၶိင်ႇၵႃႇလႃႉဢၼ်ၶၢင်းၶီၶၢင်းၽၢၼ်၊ဢိၵ်ႇတင်း ၶိင်ႇၵႃႇလႃႉဢၼ်ၵႃႈဢၼ်ဝႅၼ်။
ၶိင်ႇၵႃႇလႃႉဢၼ်ဢဝ်မၢၵ်ႇႁိၼ်ၽၢဝ်ႇပိုၼ်၊ ဢိၵ်ႇတင်းၶိင်ႇၵႃႇလႃႉဢၼ်ဢဝ်မၢၵ်ႇႁိၼ်ၵွင်ဝႆႉသိမ်းဝႆႉ၊ ၶိင်ႇၵႃႇလႃႉဢၼ်ၵွတ်ႇၵဵဝ်ႈၵၼ်၊ဢိၵ်ႇတင်းၶိင်ႇၵႃႇလႃႉဢၼ်ဢမ်ႇၵွတ်ႇၵဵဝ်ႈၵၼ်ၼၼ်ႉဢေႃႈ။
မၼ်းၸဝ်ႈမၵ်းၶၢၼ်းၶိင်ႇၵႃႇလႃႉဢၼ်သွၵ်ႈႁႃ၊ဢိၵ်ႇတင်းၶိင်ႇၵႃႇလႃႉဢၼ်ႁူင်ႈႁၢႆပႅတ်ႈ ၶိင်ႇၵႃႇလႃႉဢၼ်သိမ်းပႅင်းဝႆႉ၊ဢိၵ်ႇတင်း ၶိင်ႇၵႃႇလႃႉဢၼ်ဢဝ်ထိမ်ႈပႅတ်ႈၼၼ်ႉ။
ၶိင်ႇၵႃႇလႃႉဢၼ်ၸၵ်ႉသိၵ်ႇၶူဝ်းၼုင်ႈ၊ဢိၵ်ႇတင်းၶိင်ႇၵႃႇလႃႉဢၼ်ယဵပ်ႉဢၼ်ၽုင်၊ ၶိင်ႇၵႃႇလႃႉဢၼ်ဢမ်ႇလၢတ်ႈၵႂၢမ်း၊ဢိၵ်ႇတင်း ၶိင်ႇၵႃႇလႃႉဢၼ်လၢတ်ႈၵႂၢမ်းၼၼ်ႉဢေႃႈ။
မၼ်းၸဝ်ႈမၵ်းၶၢၼ်းၶိင်ႇၵႃႇလႃႉဢၼ်ႁၵ်ႉပႅင်း၊ဢိၵ်ႇတင်းၶိင်ႇၵႃႇလႃႉဢၼ်ၸင်း၊ ၶိင်ႇၵႃႇလႃႉဢၼ်တိုၵ်းသိုၵ်းတိုၵ်းသိူဝ်၊ဢိၵ်ႇတင်းၶိင်ႇၵႃႇလႃႉဢၼ်ႁႂ်ႈသိုၵ်းထၢတ်ႇယဵၼ်ဢေႃႈ။
ၽူႈဢၼ်သၢင်ႈႁဵတ်းၼၼ်ႉမီးဢၵျူဝ်းၵႃႈသင်ၼႂ်းတၢင်းဢၼ်မၼ်းၵႆႉၶတ်းၸႂ်သၢင်ႈႁဵတ်းၼၼ်ႉ။-
ၵဝ်ႁုၵၢၼ်ငၢၼ်းဢၼ်ယၢပ်ႇၸႂ်ၽိုတ်ႇၸႂ်ၼႃႇဢၼ်ၽြႃးပဵၼ်ၸဝ်ႈတၢင်ႇသႂ်ႇၵႃႈၼိူဝ်ၵူၼ်းႁဝ်းၼၼ်ႉဢေႃႈ။-
မၼ်းၸဝ်ႈမၵ်းၶၢၼ်းၶိင်ႇၵႃႇလႃႉဢၼ်သၢင်ႇထုၵ်ႇၼၼ်ႉပုၼ်ႈၵူႈၸိူဝ်ႉၵူႈပိူင်ဢေႃႈ။ ၽြႃးပဵၼ်ၸဝ်ႈသႂၢင်းသႂ်ႇပၼ်ၸႂ်သၽေႃးဢၼ်ၶႂ်ႈႁုလွင်ႈၶိင်ႇၵႃႇလႃႉဢၼႃႇၵၢတ်ႈၼၼ်ႉဢေႃႈ။ ၵူၺ်းၵႃႈ၊လွင်ႈဢၼ်မၼ်းၸဝ်ႈႁဵတ်းငဝ်ႈတေႃႇပၢႆတင်းသဵင်ႈတင်းမူတ်းၼၼ်ႉဢမ်ႇပၼ်ၵူၼ်းႁုဢေႃႈ။-
ပိူဝ်ႈၼႆလႄႈၵဝ်ႁုႁၼ်လွင်ႈဢၼ်ႁဝ်းထုၵ်ႇလီႁဵတ်းၼၼ်ႉ၊ပဵၼ်တၢင်းဢၼ်ယူႇပျေႃႇပျေႃႇလႄႈၵတ်းယဵၼ်ၶျၢမ်းသႃႇၼႂ်းၸူဝ်ႈဢၼ်ႁဝ်းဢသၢၵ်ႈယင်းတိုၵ်ႉလိပ်းယူႇၼၼ်ႉယဵင်ႈၶႅၼ်းမီးဢၵျူဝ်းယႂ်ႇၼႃႇၼၼ်ႉဢေႃႈ။-
ႁဝ်းၵူႈၵေႃႉၵူႈၵူၼ်းဢွၼ်ၵၼ်ၵိၼ်ယူႇၶူပ်းယူႇ၊မူၼ်ႈပျေႃႇလူၺ်ႈၵႃႈဢၼ်ႁဝ်းၵႆႉၶတ်းၸႂ်ႁဵတ်းဢွၵ်ႇမႃးၼၼ်ႉ လွင်ႈတၢင်းၼႆႉပဵၼ်သုၵျေးၸူးတၢင်းဢၼ်ၽြႃးပဵၼ်ၸဝ်ႈပၼ်ဢေႃႈ။
ၵဝ်ႁုလွင်ႈတၢင်းၵႃႈဢၼ်ၽြႃးပဵၼ်ၸဝ်ႈႁဵတ်းၼၼ်ႉပဵၼ်ၼိၵ်ႈၸႃႉထႃႇဝရႃႉဢေႃႈ။ ဢမ်ႇထၢပ်ႈသႂ်ႇထႅင်ႈလႆႈသေၸိူဝ်ႉသေပိူင်လႄႈဢမ်ႇဢဝ်ဢွၵ်ႇပႅတ်ႈလႆႈ။ ၽြႃးပဵၼ်ၸဝ်ႈႁဵတ်းလွင်ႈတၢင်းၼႆႉဢၼ်လဵဝ်ဝႆႉႁႂ်ႈၵူၼ်းႁဝ်းလႆႈၵူဝ်ႁႄၽၢႆႇၼႃႈမၼ်းၸဝ်ႈဢေႃႈ။-
လွင်ႈတၢင်းဢၼ်ပဵၼ်ယူႇမိူဝ်ႈလဵဝ်ၼႆႉမိူၼ်ၵၼ်တင်းလွင်ႈဢၼ်ယၢမ်ႈပဵၼ်ၵႂႃႇၼၼ်ႉဢေႃႈ။ လွင်ႈတၢင်းဢၼ်တၵ်းပဵၼ်မႃးၸိူဝ်းၼၼ်ႉၵေႃႈမိူၼ်ၵၼ်တင်းလွင်ႈတၢင်းဢၼ်ပဵၼ်ယူႇမိူဝ်ႈလဵဝ်ၼႆႉဢေႃႈ။ လွင်ႈတၢင်းဢၼ်ပူၼ်ႉၵႂႃႇယဝ်ႉၸိူဝ်းၼၼ်ႉၵေႃႈ မၼ်းၸဝ်ႈသမ်ႉႁႂ်ႈပဵၼ်ထႅင်ႈဢေႃႈ။
ၼွၵ်ႈသေၼၼ်ႉ၊ၵဝ်သမ်ႉလႆႈႁုလွင်ႈဢၼ်ၵႃႈၼႂ်းလေႃးၵႃႉၼႆႉလွင်ႈဢၼ်ဢမ်ႇတြႃးၼၼ်ႉမီးၵႃႈၼႂ်းတီႈဢၼ်ၸီႇယၢင်ႇတြႃးလႄႈ၊လွင်ႈဢၼ်တုၸရိူၵ်ႈၼၼ်ႉမီးၵႃႈၼႂ်းတၢင်းဢၼ်သိုဝ်ႈတေႃႇဢေႃႈ။-
ၵဝ်လၢတ်ႈၼႂ်းၸႂ်လႄႈဝႃႈ၊ “ၽြႃးပဵၼ်ၸဝ်ႈတၵ်းၸီႇယၢင်ႇတြႃးၵႃႈၼိူဝ်ၵူၼ်းသိူဝ်ႈတေႃႇတင်းၵူၼ်းႁၢႆႉမိူၵ်ႈမိူၼ်မိူၼ်ၵၼ်၊ၵွပ်ႈပိူဝ်ႈလွင်ႈတၢင်းၵႃႈမီးၵူႈၸိူဝ်ႉၵူႈပိူင် ဢိၵ်ႇတင်းၵႃႈဢၼ်ပွင်ႁဵတ်းယူႇတင်းသဵင်ႈတင်းလူင်တၵ်းဢွၼ်ၵၼ်ပဵၼ်မႃးၸွမ်းၶိင်ႇၵႃႇလႃႉၵႃႈၼင်ႇဢၼ်မၼ်းၸဝ်ႈၶၢၼ်းဝႆႉပုၼ်ႈၽႂ်ပုၼ်ႈမၼ်းၼၼ်ႉဢေႃႈ။-”
ၵႂၢမ်းတီႈတိူၵ်ႈၸိုင်၊ၵဝ်ဝႃႈၽြႃးပဵၼ်ၸဝ်ႈၸႅတ်ႈတူၺ်းၸၢမ်းတူၺ်းႁဝ်း၊ႁႂ်ႈႁဝ်းလႆႈႁုလွင်ႈဢၼ်ႁဝ်းၼႆႉပဵၼ်ဢၼ်မိူၼ်ၵၼ်တင်းတူဝ်သတ်းၼၼ်ႉဢေႃႈ။-
လွင်ႈတၢင်းဢၼ်ႁွတ်ႈထိုင်တီႈၵူၼ်းၼၼ်ႉတီႈတူဝ်သတ်းၵေႃႈႁွတ်ႈထိုင်ယူႇမိူၼ်မိူၼ်ၵၼ်တင်းသွင်မဵဝ်းလႄႈ၊ၸိူဝ်ႉၼင်ႇဢၼ်မဵဝ်းၼိုင်ႈတၢႆၼၼ်ႉထႅင်ႈမဵဝ်းၼိုင်ႈၵေႃႈၸၢင်ႈတၢႆဢေႃႈ။ တင်းသွင်မဵဝ်းၼၼ်ႉပဵၼ်သတ်ႉတဝႃႇဢၼ်ဢသၢၵ်ႈလိပ်းဢေႃႈ။ ၵူၼ်းဢမ်ႇမီးလွင်ႈဢၼ်မျၢတ်ႈလီၼႃႇသေတူဝ်သတ်း၊ၵွပ်ႈပိူဝ်ႈဢၼ်ဢသၢၵ်ႈၼၼ်ႉ ပဵၼ်ဢၼတ်ႉတႃႉၵူၺ်းဢေႃႈ။-
ၶဝ်ၵႃႈမီးတင်းသဵင်ႈတင်းလူင်ၸၢင်ႈႁွတ်ႈထိုင်ၵႃႈတီႈတီႈလဵဝ်ၵူၺ်းဢေႃႈ။ ၶဝ်ပဵၼ်မႃးၵႃႈတီႈမုၼ်ႈလိၼ်လႄႈၸၢင်ႈၶိုၼ်းၵႂႃႇၵႃႈတီႈမုၼ်ႈလိၼ်ဢေႃႈ။-
ၵေႃႉလႂ်ၵူၼ်းလႂ်ၸၢင်ႈႁုသေႇၶျႃႇလွင်ႈဢၼ်ဝိၺိၺ်ႇၵူၼ်းၸၢင်ႈၶိုၼ်ႈၵႂႃႇၵႃႈတီႈၼိူဝ်၊ဢိၵ်ႇတင်းဝိၺိၺ်ႇတူဝ်သတ်းလူင်းၸူးတီႈလိၼ်ၼၼ်ႉလႆႈ။-
ပိူဝ်ႈၼႆလႄႈၵဝ်ႁုႁၼ်လွင်ႈဢၼ်ႁဝ်းထုၵ်ႇလီႁဵတ်းၼၼ်ႉၸမ်ႉ၊ပဵၼ်လွင်ႈတၢင်းဢၼ်ယူႇပျေႃႇပျေႃႇလူၺ်ႈၵႃႈဢၼ်ႁဝ်းၵႆႉၶတ်းၸႂ်ႁဵတ်းဢွၵ်ႇမႃးၼၼ်ႉဢေႃႈ။ ႁဝ်းဢမ်ႇၸၢင်ႈတၢတ်ႈၼိူင်ႇလႆႈသေၸိူဝ်ႉသေပိူင်။ ဢမ်ႇမီးလွင်ႈမီးတၢင်းပုၼ်ႈတႃႇႁဝ်းတေႁုလွင်ႈတၢင်းဢၼ်တၵ်းပဵၼ်မႃးၸိူဝ်ႉႁိုဝ်ဝၢႆးသေဢၼ်ႁဝ်းတၢႆၵႂႃႇယဝ်ႉၼၼ်ႉဢေႃႈ။
ၵဝ်သမ်ႉတူၺ်းထႅင်ႈလႄႈႁၼ်လွင်ႈတၢင်းဢၼ်ဢမ်ႇတြႃးၵႃႈမီးတင်းသဵင်ႈတင်းလူင်ၵႃႈၼႂ်းမိူင်းလေႃးၵႃႉၼႆႉဢေႃႈ။ ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်တဵၵ်းငႅၼ်းၼၼ်ႉႁွင်ႉႁႆႈလႄႈဢမ်ႇမီးၵေႃႉဢၼ်ၸွႆႈဢၼ်ထႅမ်ၶဝ်။ ၽူႈလႂ်ဢမ်ႇၸၢင်ႈၸွႆႈထႅမ်ၶဝ် ၵွပ်ႈပိူဝ်ႈၵူၼ်းၸိူဝ်းဢၼ်တဵၵ်းငႅၼ်းၶဝ်ၼၼ်ႉ မီးဢႃႇၼႃႇတၼ်းၶူဝ်းဢေႃႈ။-
ၵဝ်ၶႆႈၸႂ်ႁုထိုင်ဝႃႈ၊ၶဝ်ၸိူဝ်းဢၼ်တၢႆပူၼ်ႉၵႂႃႇယဝ်ႉၼၼ်ႉ၊ယဵင်ႈၶႅၼ်းလီၼႃႇသေၶဝ်ၸိူဝ်းဢၼ်ဢသၢၵ်ႈယင်းလိပ်းယူႇၼၼ်ႉဢေႃႈ။-
လွင်ႈတၢင်းဢၼ်ယဵင်ႈၶႅၼ်းလီၼႃႇသေသွင်ၸိူဝ်ႉသွင်ပိူင်ၼႆႉၼၼ်ႉ၊ပဵၼ်ၶဝ်ၸိူဝ်းဢၼ်ဢမ်ႇပႆႇတွၼ်ႉၵိူတ်ႇလဵင်ႉမႃးသေပွၵ်ႈလႄႈဢမ်ႇပႆႇတွၼ်ႉထူပ်းႁၼ်တၢင်းဢၼ်ဢမ်ႇတြႃးဢၼ်မီးယူႇၵႃႈၼႂ်းမိူင်းလေႃးၵႃႉၼႆႉၼၼ်ႉဢေႃႈ။
ၵဝ်သမ်ႉယင်းသွၼ်ဢဝ်လွင်ႈဢၼ်၊ၵွပ်ႈသင်လႄႈၵူၼ်းႁဝ်းၵႆႉၶတ်းၸႂ်ဢွၵ်ႇႁႅင်းႁဵတ်းႁႂ်ႈပေႃးၶိုၼ်ႈယႂ်ႇမႂ်ႇသုင်ၼၼ်ႉလႄႈလႆႈႁုဝႃႈလွင်ႈတၢင်းၼၼ်ႉပဵၼ်ၵွပ်ႈပိူဝ်ႈၶဝ်ၶွႆပိူၼ်ႈတၢင်ႇၵေႃႉဢေႃႈ။ လွင်ႈတၢင်းၼႆႉၵေႃႈပဵၼ်ဢၼတ်ႉတႃႉလႄႈ၊ပဵၼ်မိူၼ်ၸိူဝ်ႉၼင်ႇဢၼ်ၵိၼ်လူမ်းၵိၼ်လႅင်ႉၵူၺ်းဢေႃႈ။-
ပိူၼ်ႈလၢတ်ႈၵၼ်ဝႃႈ၊ၵေႃႉဢၼ်ဢဝ်မိုဝ်းၵွတ်ႇၵႆႇဝႆႉလႄႈ ပွႆႇႁႂ်ႈတူဝ်ၸဝ်ႈၵဝ်ႇဢိုပ်းတၢႆၼၼ်ႉပဵၼ်ၵူၼ်းဢၼ်ႁၢႆႉမိူၵ်ႈဢေႃႈ။-
တၢင်းဢၼ်မီးဢုၵ်ႉၸႃႇဢိတ်းဢီႈလူၺ်ႈၸႂ်ဢၼ်ၼိမ်လီၼၼ်ႉယဵင်ႈၶႅၼ်းလီၼႃႇသေတၢင်းဢၼ်ဢဝ်တင်းမိုဝ်းသွင်ၶွၼ်ၶတ်းၸႂ်ၵျူဝ်းၸႃးႁဵတ်းယၢပ်ႇႁဵတ်းၽိုတ်ႇယူႇၵူႈၶိင်ႇၵူႈၶႃႇလႄႈၵိၼ်လူမ်းၵိၼ်လႅင်ႉယူႇၼၼ်ႉဢေႃႈ။
ၵဝ်ႁုထိုင်ထႅင်ႈလွင်ႈၼိုင်ႈဢၼ်ပဵၼ်ဢၼတ်ႉတႃႉၼႂ်းၸူဝ်ႈတႃႇဢသၢၵ်ႈၵူၼ်းႁဝ်းၼႆႉၼၼ်ႉ။-
မီးၵူၼ်းၵေႃႉၼိုင်ႈဢၼ်ယူႇၵူၺ်းၶေႃမၼ်းၵေႃႉလဵဝ်ၵူၺ်းၼၼ်ႉ မၼ်းဢမ်ႇမီးလုၵ်ႈမီးလၢင်းဢမ်ႇမီးပီႈမီးၼွင်ႉယူႇၸွမ်းမၼ်း။ ၼႂ်းဝႃႈၼၼ်သေၵေႃႈမၼ်းၵႆႉၶတ်းၸႂ်ႁဵတ်းယၢပ်ႇႁဵတ်းၽိုတ်ႇယူႇတႃႇသေႇသေၵေႃႈဢမ်ႇပျေႇၸႂ်လူၺ်ႈၸေးၸိမ်ႇဢုၵ်ႉၸႃႇဢၼ်မၼ်းမီးၼၼ်ႉလႃးလႃး။ မၼ်းၸၢင်ႈထၢမ်လႄႈဝႃႈ၊ “ၵဝ်ၼႆႉၵႆႉၶတ်းၸႂ်ႁဵတ်းယၢပ်ႇႁဵတ်းၽိုတ်ႇလႄႈဝႄႈပႅတ်ႈတၢင်းမူၼ်ႈပျေႃႇၵဝ်ပုၼ်ႈၽူႈလႂ်၊” ဝႃႈၼင်ႇၼႆဢေႃႈ။ လွင်ႈတၢင်းၼႆႉပဵၼ်ဢၼတ်ႉတႃႉလႄႈပဵၼ်လွင်ႈတၢင်းဢၼ်ႁႂ်ႈယၢပ်ႇၸႂ်ၶၢၼ်ၸႂ်ၼႃႇလူင်လၢင်ဢေႃႈ။
ၵူၼ်းသွင်ၵေႃႉယဵင်ႈၶႅၼ်းလီၼႃႇသေၵေႃႉလဵဝ်ၵွပ်ႈပိူဝ်ႈဢၼ်ၶဝ်ၽွမ်ႉၵၼ်ႁဵတ်းၼၼ်ႉလႄႈယဵင်ႈၶႅၼ်းမီးဢၵျူဝ်းဢေႃႈ။-
ပေႃးၵေႃႉၼိုင်ႈလူမ်ႉၸိုင်၊ၵေႃႉၼိုင်ႈတၵ်းပူၵ်းဢေႃႈ။ ၵူၺ်းၵႃႈ၊ပေႃးၵေႃႉဢၼ်ယူႇၵေႃႉလဵဝ်ၵူၺ်းၼၼ်ႉလူမ်ႉၸိုင်၊ယဵင်ႈၶႅၼ်းတၵ်းယၢပ်ႇၼႃႇ၊ၵွပ်ႈပိူဝ်ႈဢၼ်မၼ်းဢမ်ႇမီးၵေႃႉဢၼ်တၵ်းပူၵ်းပၼ်ၼၼ်ႉဢေႃႈ။-
ပေႃးၵူၼ်းသွင်ၵေႃႉၼွၼ်းလူၺ်ႈၵၼ်ၸိုင်၊ၸၢင်ႈဢုၼ်ႇလီဢေႃႈ။ ၵူၼ်းၵေႃႉလဵဝ်ၵူၺ်းၸမ်ႉ၊တၵ်းဢုၼ်ႇလႆႈၸိူဝ်ႉၼင်ႇႁိုဝ်။-
ပေႃးၵူၼ်းၵေႃႉၼိုင်ႈပႄႉၼႅင်ႇၵူၼ်းၵေႃႉၼိုင်ႈၸိုင်၊ၵူၼ်းသွင်ၵေႃႉႁၢမ်ႈတၢပ်ႈႁႄႉၶႅၼ်ၵေႃႉဢၼ်ပႄႉၼႅင်ႇၼၼ်ႉလႆႈယူႇဢေႃႈ။ ၸိူၵ်ႈႁွမ်းၵၼ်သၢမ်ၵဵဝ်ၵေႃႈဢမ်ႇၸၢင်ႈၶၢတ်ႇလႆႈငၢႆႈငၢႆႈ။
ၵူၼ်းယၢၵ်ႈၵူၼ်းၽၢၼ်ဢၼ်ဢသၢၵ်ႈယင်းၼုမ်ႇယင်းၵမ်လႄႈမီးပိင်ႇၺႃႇၼၼ်ႉယဵင်ႈၶႅၼ်းလီၼႃႇသေၶုၼ်ႁေႃၶမ်းဢၼ်ဢသၢၵ်ႈယႂ်ႇလႄႈႁၢႆႉမိူၵ်ႈ၊ဢၼ်ဢမ်ႇၶၢမ်ႇဢဝ်တၢင်းဢၼ်ပိူၼ်ႈပၼ်တၢင်းၵျၢမ်ႇတၢင်းပွင်ၼၼ်ႉဢေႃႈ။-
ၵူၼ်းယၢၵ်ႈၵူၼ်းၽၢၼ်ဢၼ်ၵိူတ်ႇလဵင်ႉမႃးၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈၼၼ်ႉပိၵ်ႉသမ်ႉပဵၼ်ၵေႃႉဢၼ်လွတ်ႈဢွၵ်ႇၵႃႈၼႂ်းထွင်ႇမႃးသေၵေႃႈမၼ်းယင်းၸၢင်ႈပဵၼ်ၶုၼ်ႁေႃၶမ်းယူႇဢေႃႈ။-
ၵဝ်ၶႆႈၸႂ်ဝူၼ်ႉၸႂ်တူၺ်းလွင်ႈၵူၼ်းလေႃးၵီႇၵႃႈမီးတင်းသဵင်ႈတင်းလူင်လႄႈ၊ၵဝ်လႆႈႁုလွင်ႈဢၼ်ၵႃႈၼႂ်းၶဝ်ၸိူဝ်းၼၼ်ႉတီႈၼိုင်ႈမီးၵူၼ်းၼုမ်ႇၵူၼ်းၵမ်ၵေႃႉၼိုင်ႈဢၼ်တၵ်းပုတ်ႈဢဝ်ဢရႃႇတၢင်တူဝ်ၶုၼ်ႁေႃၶမ်းၼၼ်ႉဢေႃႈ။-
ၼပ်ႉဢၢၼ်ႇၵူၼ်းမိူင်းဢၼ်ၶုၼ်ႁေႃၶမ်းဢုပ်ႉပိူင်ႇၼၼ်ႉလႄႈဢမ်ႇသဵင်ႈလႆႈ။ ၵူၺ်းၵႃႈ၊မိူဝ်ႈဢၼ်မၼ်းသဵင်ႈႁၢႆပူၼ်ႉၵႂႃႇယဝ်ႉၼၼ်ႉ၊ဢမ်ႇမီးၽူႈလႂ်ဢၼ်တၵ်းၸူမ်းသိူဝ်းလူၺ်ႈတၢင်းႁဵတ်းဢၼ်မၼ်းႁဵတ်းပူၼ်ႉၵႂႃႇယဝ်ႉၼၼ်ႉသေၵေႃႉသေၵူၼ်း၊လွင်ႈတၢင်းၼၼ်ႉၵေႃႈပဵၼ်ဢၼတ်ႉတႃႉမိူၼ်ၸိူဝ်ႉၼင်ႇၵိၼ်လူမ်းၵိၼ်လႅင်ႉၵူၺ်းဢေႃႈ။
ဝႆႉသတိမိူဝ်ႈဢၼ်မႂ်းၶဝ်ႈၵႂႃႇၵႃႈတီႈၵျွင်းပိၵ်ႈမၢၼ်ႇၸဝ်ႈၼၼ်ႉတႃႉ။ တၢင်းဢၼ်ၵႂႃႇႁႂ်ႈလႆႈသွၼ်ဢဝ်ၼၼ်ႉ၊ယဵင်ႈၶႅၼ်းလီၼႃႇသေတၢင်းဢၼ်ၵူၼ်းႁၢႆႉမိူၵ်ႈၶဝ်သၢၵ်ႈလူႇၶိူင်ႈတၢင်းလူႇၼၼ်ႉဢေႃႈ။ လွင်ႈမၼ်းၸမ်ႉ၊ၶဝ်ဢမ်ႇႁုလွင်ႈဢၼ်ၶဝ်ႁဵတ်းဢပျတ်ႈၼၼ်ႉ။-
ၸူဝ်ႈဢၼ်မႂ်းဢမ်ႇပႆႇလၢတ်ႈၵႂၢမ်းၼၼ်ႉၶႆႈၸႂ်ဝူၼ်ႉၸႂ်တႃႉ။ ယႃႇပေႁိပ်ႈၼႅတ်ႈဝႆႉၵတိတီႈၽြႃးပဵၼ်ၸဝ်ႈဢၼ်မီးၵႃႈၼိူဝ်ၽုင်ႇၵၢင်ႁၢဝ်ၼၼ်ႉ။ မႂ်းၸိုင်၊မီးၵႃႈၼိူဝ်လိၼ်မိူင်းဢေႃႈ။ ပိူဝ်ႈၼႆလႄႈမႂ်းယႃႇပေလၢတ်ႈၵႂၢမ်းၼမ်။-
တၢင်းဢၼ်မႂ်းမႆႈၸႂ်ၶီၸႂ်ၼၼ်ႉ၊ၸၢင်ႈႁႂ်ႈမႂ်းၼွၼ်းၽၼ်ႁၼ်ဢၼ်ဢမ်ႇလီဢမ်ႇငၢမ်းလႄႈတၢင်းဢၼ်မႂ်းသူပ်းၼမ်ၼၼ်ႉၸၢင်ႈႁဵတ်းႁႂ်ႈမႂ်းလၢတ်ႈၽိတ်းလၢတ်ႈပိူင်ႈဢေႃႈ။-
ပိူဝ်ႈၼႆလႄႈမိူဝ်ႈဢၼ်မႂ်းႁဵတ်းၵတိသဵတ်ႈၸႃႇတီႈၽြႃးပဵၼ်ၸဝ်ႈၼၼ်ႉႁဵတ်းၸွမ်းၶၼ်ၶၼ်ၽႂ်းၽႂ်းတႃႉ။ လွင်ႈမၼ်းၸမ်ႉ၊မၼ်းၸဝ်ႈဢမ်ႇၵျိူၵ်ႈၶဝ်ၸိူဝ်းဢၼ်ႁၢႆႉမိူၵ်ႈၼၼ်ႉ။ ႁဵတ်းၸွမ်းၵႃႈၼင်ႇဢၼ်မႂ်းဝႆႉၵတိသဵတ်ႈၸႃႇၼၼ်ႉတႃႉ။-
တၢင်းဢၼ်ယင်းဢမ်ႇႁဵတ်းၵတိသဵတ်ႈၸႃႇလႃးလႃးၼၼ်ႉယဵင်ႈၶႅၼ်းလီၼႃႇသေတၢင်းဢၼ်ႁဵတ်းၵတိသဵတ်ႈၸႃႇသေယဝ်ႉ၊သမ်ႉဢမ်ႇႁဵတ်းၸွမ်းၼၼ်ႉဢေႃႈ။-
ယႃႇပေႁႂ်ႈသူပ်းမႂ်းႁဵတ်းႁႂ်ႈတၢမ်ႇဢပျတ်ႈႁွတ်ႈထိုင်တီႈတူဝ်ၶၼ်ႇထႃႇမႂ်း။ ယႃႇပေႁႂ်ႈမီးလွင်ႈဢၼ်တၵ်းလႆႈလၢတ်ႈၵႃႈတီႈတမၢၼ်ႇၸဝ်ႈလႄႈဝႃႈ၊ “ၵဝ်ၶႃႈၽိတ်းပိူင်ႈယဝ်ႉ၊” ဝႃႈၼင်ႇၼႆၼၼ်ႉ။ ၵွပ်ႈသင်လႄႈႁႂ်ႈၽြႃးပဵၼ်ၸဝ်ႈလႆႈမႆႈၸႂ်ၶႂ်ႈၸႃႉတီႈၵႂၢမ်းမႂ်းၸိူဝ်းၼၼ်ႉလႄႈႁႂ်ႈမၼ်းၸဝ်ႈလႆႈယႃႉၽဵဝ်ႈလွင်ႈတၢင်းဢၼ်မိုဝ်းမႂ်းႁဵတ်းသၢင်ႈဝႆႉၼၼ်ႉၸိူဝ်ႉၼင်ႇႁိုဝ်။-
တၢင်းဢၼ်ၼွၼ်းၽၼ်ႁၼ်ၼမ်ၼႃႇဢိၵ်ႇတင်းတၢင်းဢၼ်လၢတ်ႈၵႂၢမ်းၼမ်ၼႃႇၼၼ်ႉၸၢင်ႈပႃးလွင်ႈတၢင်းဢၼ်ပဵၼ်လၢႆလၢႆဢမ်ႇပွင်ႇလွင်ႈၵႃႈသင်ဢေႃႈ။ မႂ်းၸမ်ႉ၊ၵူဝ်ႁႄၽြႃးပဵၼ်ၸဝ်ႈယူႇတႃႉ။
မိူဝ်ႈဢၼ်မႂ်းႁၼ်ၶုၼ်ဢုပ်ႉမိူင်းတဵၵ်းငႅၼ်းၵူၼ်းယၢၵ်ႈၵူၼ်းၽၢၼ်လႄႈဝႄႈပႅတ်ႈတၢင်းဢၼ်ၸီႇယၢင်ႇၸွမ်းၼင်ႇတြႃး၊ဢိၵ်ႇတင်းတၢင်းဢၼ်သိုဝ်ႈဢၼ်တေႃႇၸိုင်၊ယႃႇပေဢၢမ်း။ ၶုၼ်ဢၼ်ပွင်ၵၢၼ်ၼၼ်ႉယင်းလႆႈၶၢမ်ႇတၢင်းဢၼ်ၵေႃႉဢၼ်ယႂ်ႇသေမၼ်းၼၼ်ႉပႂ်ႉတူၺ်းမၼ်းဝႆႉယူႇဢမ်ႇၵႃး၊ယင်းမီးၵေႃႉဢၼ်ယဵင်ႈၶႅၼ်းယႂ်ႇၼႃႇသေၶဝ်ၼၼ်ႉပႂ်ႉတူၺ်းၶဝ်ဝႆႉယူႇၼၼ်ႉဢေႃႈ။
ၵူၼ်းတင်းသဵင်ႈတင်းလူင်လႆႈၶိုၼ်ႈယႂ်ႇတူဝ်းတွၼ်းမႃးၵွပ်ႈလူၺ်ႈၵျေးၸူးၼႃႈလိၼ်လႄႈၶုၼ်ႁေႃၶမ်းၵေႃႈလႆႈၶၢမ်ႇဢဝ်ၵျေးၸူးႁႆႈၵျေးၸူးၼႃးဢေႃႈ။
ၵူၼ်းဢၼ်ၸႂ်ၸပ်းၸႂ်ၸွႆးငိုၼ်းၼၼ်ႉၸႂ်သၢၼ်ႇတႃႉမၼ်းဢမ်ႇပျေႇတီႈငိုၼ်းလႆႈ။ ၵေႃႉဢၼ်မုင်ႈမွင်းႁႂ်ႈမၢၵ်ႈမီးလီပဵၼ်ၼၼ်ႉပိၵ်ႉသမ်ႉၸေးၸိမ်ႇၼမ်ၵိုၼ်းမႃးသေၵေႃႈဢမ်ႇပျေႇၸႂ်လႆႈ။ လွင်ႈတၢင်းၼၼ်ႉၵေႃႈပဵၼ်ဢၼတ်ႉတႃႉၵူၺ်းဢေႃႈ။-
ပေႃးယဵင်ႈၶႅၼ်းမၢၵ်ႈမီးလီပဵၼ်မႃးၸိုင်၊ၵူၼ်းၵိၼ်ၸွမ်းၵေႃႈယဵင်ႈၶႅၼ်းၼမ်ၵိုၼ်းမႃးဢေႃႈ။ ၵေႃႉဢၼ်ပိူင်ႇဢုၵ်ႉၸႃႇၼၼ်ႉတေလႆႈဢၵျူဝ်းၵျေးၸူးၵႃႈသင်၊ၼွၵ်ႈသေမၢၵ်ႇတႃမၼ်းလႆႈလူလႆႈတူၺ်းလၢႆလၢႆၼၼ်ႉၵူၺ်းဢေႃႈ။-
ၵူၼ်းဢၼ်ႁဵတ်းၵၢၼ်ႁဵတ်းငၢၼ်းၼၼ်ႉပေႃးၵုမ်ႇၵိၼ်သေဢမ်ႇဝႃႈ၊ဢမ်ႇၵုမ်ႇၵိၼ်သေဢမ်ႇဝႃႈ၊ၸၢင်ႈၼွၼ်းလပ်းလီလပ်းဝၢၼ်ဢေႃႈ။ ၵူၼ်းဢၼ်ၸၢင်ႈမၢၵ်ႈမီးၼၼ်ႉၸမ်ႉ၊ၸၢင်ႈမႆႈၸႂ်ႁွၼ်ႉၸႂ်လႄႈၸၢင်ႈႁႂ်ႈတၢင်းၼွၼ်းမၼ်းလုဢေႃႈ။
ဢၼ်ၵဝ်လႆႈႁၼ်တၢင်းဢၼ်ႁၢႆႉယုတ်ႈၼႃႇလူင်လၢင်ၵႃႈတႂ်ႈၵၢင်ဝၼ်းလူင်ၼႆႉၸမ်ႉ၊ၵူၼ်းၸိုင်၊ၸၢင်ႈသိမ်းပႅင်းၸေးၸိမ်ႇဢုၵ်ႉၸႃႇဝႆႉထၢၼ်ႈပေႃးပဵၼ်ၽေးသႂ်ႇတူဝ်ႈၸဝ်ႈၵဝ်ႇဢေႃႈ။-
ၸေးၸိမ်ႇဢုၵ်ႉၸႃႇၸိူဝ်းၼၼ်ႉၸၢင်ႈႁူင်ႈႁၢႆၵႂႃႇၵွပ်ႈပိူဝ်ႈလွင်ႈတၢင်းဢၼ်ဢမ်ႇလီဢမ်ႇငၢမ်းလႄႈ၊သဵင်ႈၵႂႃႇမူတ်းၵႂႃႇထၢၼ်ႈပေႃးဢမ်ႇၵိုတ်းဢမ်ႇၵျၢၼ်ႇတႃႇတေသိုပ်ႇပၼ်တီႈလုၵ်ႈလၢၼ်မၼ်းဢေႃႈ။-
ၸိူဝ်ႉၼင်ႇဢၼ်မၼ်းယင်းဢမ်ႇပႃးၵႃႈသင်သေလႄႈၵိူတ်ႇလဵင်ႉသေၵႃႈတီႈတွင်ႉမႄႈမၼ်းမႃးၼၼ်ႉ၊မၼ်းတၵ်းလႆႈၶိုၼ်းၵႂႃႇမိူၼ်ၸိူဝ်ႉၼင်ႇဢၼ်မၼ်းမႃးၼၼ်ႉဢေႃႈ။ ပိၵ်ႉသမ်ႉမၼ်းၵႆႉၶတ်းၸႂ်ဢဝ်ႁႅင်းဢွၵ်ႇႁဵတ်းယၢပ်ႇႁဵတ်းၽိုတ်ႇလႄႈလႆႈမႃးဢုၵ်ႉၸႃႇၼၼ်ႉမၼ်းဢမ်ႇလႆႈယိပ်းၵမ်ဢဝ်ၵႂႃႇသေၸိူဝ်ႉသေပိူင်။-
ၸႂ်ႈတႄႉဢေႃႈ။ မၼ်းတၵ်းၵႂႃႇမိူၼ်ၸိူဝ်ႉၼင်ႇမၼ်းမႃးၼၼ်ႉဢေႃႈ။ မၼ်းပွင်ႁဵတ်းယၢပ်ႇၽိုတ်ႇယူႇ၊ၶတ်းၸႂ်ၵျူဝ်းၸႃးဢဝ်ႁႅင်းဢွၵ်ႇႁဵတ်းႁႂ်ႈလႆႈလူမ်းလႆႈလႅင်ႉၵူၺ်းၼၼ်ႉမီးဢၵျူဝ်းၵျေးၸူးၵႃႈသင်။-
မၼ်းတၵ်းလႆႈဢသၢၵ်ႈလိပ်းယူႇၵႃႈၼႂ်းဢၼ်လပ်းသိင်ႇလႄႈၶီၸႂ်ၶူမ်ၸႂ်ယူႇ၊ၼႂ်းတၢင်းဢၼ်ယၢပ်ႇၸႂ်ယုင်ႈၸႂ်၊တၢင်းဢၼ်ၸႂ်မႆႈၶႂ်ႈၸႃႉ၊တၢင်းဢၼ်ၶႆႈဢၼ်ၼၢဝ်ၵူၺ်းဢေႃႈ။
ၵႃႈဢၼ်ၵဝ်ႁုႁၼ်ဢဝ်လွင်ႈတၢင်းဢၼ်ၵူၼ်းထုၵ်ႇလီႁဵတ်းဢၼ်လီသေပိူၼ်ႈၼၼ်ႉၸမ်ႉ၊ပဵၼ်တၢင်းဢၼ်ၵိၼ်ၶူပ်း၊တၢင်းဢၼ်မူၼ်ႈပျေႃႇလူၺ်ႈၵႃႈဢၼ်မၼ်းႁဵတ်းလႆႈမႃးၼႂ်းၸူဝ်ႈဢသၢၵ်ႈပွတ်းပွတ်းဢွၼ်ႇဢၼ်ၽြႃးပဵၼ်ၸဝ်ႈပၼ်ဝႆႉတီႈမၼ်းၼၼ်ႉဢေႃႈ။ လွင်ႈတၢင်းၼၼ်ႉပဵၼ်ဢၵျူဝ်းပုၼ်ႈမၼ်းဢေႃႈ။-
ၵႃႈပဵၼ်ၸေးၸိမ်ႇဢုၵ်ႉၸႃႇဢၼ်ၽြႃးပဵၼ်ၸဝ်ႈဢဵတ်းလူပၼ်တီႈၵူႈၵေႃႉမီးဢၶႂၢင်ႉလႆႈၵိၼ်လႄႈမူၼ်ႈပျေႃႇၸေးၸိမ်ႇၵႃႈဢၼ်မၼ်းၶတ်းၸႂ်ဢဝ်ႁႅင်းဢွၵ်ႇႁဵတ်းလႆႈမႃးၼၼ်ႉပဵၼ်သုၵျေးၸူးဢၼ်ၽြႃးပဵၼ်ၸဝ်ႈပၼ်ဢေႃႈ။-
ၸွမ်းလူၺ်ႈၽြႃးပဵၼ်ၸဝ်ႈပၼ်ဢၶႂၢင်ႉဢၼ်ႁူဝ်ၸႂ်မၼ်းလႆႈၸူမ်းသိူဝ်းမူၼ်ႈပျေႃႇၼၼ်ႉလႄႈ၊မၼ်းဢမ်ႇလႆႈမႆႈၸႂ်လူၺ်ႈၸူဝ်ႈတႃႇဢသၢၵ်ႈမၼ်းပွတ်းၵႃႈႁိုဝ်ၼၼ်ႉယဝ်ႉ။
ၵဝ်လႆႈႁုလႆႈႁၼ်လွင်ႈတၢင်းဢၼ်ၵႃႈၼႂ်းမိူင်းလေႃးၵႃႉၼႆႉဢၼ်ႁၢႆႉဢၼ်ယုတ်ႈပဵၼ်ဢၼ်ၼၵ်းၼႃႇၵႃႈၼိူဝ်ၵူၼ်းၸမ်ႉ။-
တၢင်းဢၼ်ၽြႃးပဵၼ်ၸဝ်ႈတၵ်းပၼ်ၸေးၸိမ်ႇဢုၵ်ႉၸႃႇ၊ဢိၵ်ႇတင်းတၢင်းဢၼ်ပိူၼ်ႈရူဝ်ႇသေႇၼပ်ႉယမ်ၼၼ်ႉတီႈသေၵေႃႉသေၵူၼ်းလႄႈမၼ်းၼၼ်ႉပျေႉၸုမ်ႇဝႆႉတင်းၵႃႈဢၼ်ဢလူဝ်ႇသၢၼ်ႇတႃႉမၼ်းမီးၼၼ်ႉသေၵေႃႈ၊မၼ်းဢမ်ႇလႆႈဢၶႂၢင်ႉဢၼ်ၸၢမ်ႇၸႃး။ ပိူၼ်ႈတၢင်ႇၵေႃႉဢၼ်ဢမ်ႇၸၢပ်ႈသႅင်ႇၵၼ်တင်းမၼ်းၼၼ်ႉၸၢင်ႈၶဝ်ႈမႃးလႄႈၸၢမ်ႇၸႃးဢေႃႈ။ လွင်ႈတၢင်းၼၼ်ႉပဵၼ်ဢၼတ်ႉတႃႉ၊ပဵၼ်လွင်ႈတၢင်းဢၼ်တုၵ်ႉၶႃႉၶၢၼ်ၸႂ်ယႂ်ႇၼႃႇဢေႃႈ။-
ပိၵ်ႉသမ်ႉသေၵေႃႉသေၵူၼ်းလႆႈလုၵ်ႈလႆႈလၢင်းပဵၼ်ပၢၵ်ႇလႄႈဢသၢၵ်ႈမၼ်းယၢဝ်းယိုၼ်းၼႃႇထၢၼ်ႈပေႃးၶူပ်ႇပီမိုဝ်ႉဝၼ်းမၼ်းၼမ်ၼႃႇသေၵေႃႈ၊ပေႃးမၼ်းဢမ်ႇလႆႈၶၢမ်ႇၸေးၸိမ်ႇဢၼ်မၼ်းထိူၵ်ႈမူၼ်ႈပျေႃႇလႄႈဢမ်ႇလႆႈၶၢမ်ႇတၢင်းဢၼ်သၢင်းၵျူဝ်ႇလူၺ်ႈဢၼ်မီးၵုင်ႇသရေႇၸိုင်၊ၵဝ်ဝႃႈၸမ်ႉ၊လုၵ်ႈဢွၼ်ႇဢၼ်တၢႆၸဵမ်မိူဝ်ႈၼႂ်းတွင်ႉၼၼ်ႉယင်းလီသေၵေႃႉၼၼ်ႉလူးၵွၼ်ႇဢေႃႈ။-
လုၵ်ႈဢွၼ်ႇၼၼ်ႉၵိူတ်ႇလဵင်ႉမႃးသေၵေႃႈ ဢမ်ႇမီးဢထိၵ်ႈပႄႇၵႃႈသင်၊ပိူဝ်ႈဝႃႈမၼ်းႁၢႆလၢႆၵႂႃႇၵႃႈၼႂ်းဢၼ်လပ်းသိင်ႇတီႈဢၼ်ပိူၼ်ႈၸၢင်ႈလိုမ်းပႅတ်ႈၼၼ်ႉဢေႃႈ။-
ပိၵ်ႉသမ်ႉမၼ်းဢမ်ႇလႆႈႁၼ်ဢၼ်လႅင်းၵၢင်ဝၼ်း၊ဢမ်ႇလႆႈႁုလွင်ႈတၢင်းၵႃႈသင်သေၸိူဝ်ႉသေပိူင်သေၵေႃႈ၊မၼ်းယဵင်ႈၶႅၼ်းလႆႈၵတ်းယဵၼ်ၶျၢမ်းသႃႇလိူဝ်တွၼ်းၼႃႇသေၵေႃႉၼၼ်ႉဢေႃႈ။-
ၵေႃႉၼၼ်ႉၸမ်ႉ၊ပိၵ်ႉသမ်ႉဢသၢၵ်ႈလိပ်းယူႇသေသွင်ႁဵင်ပီသေၵေႃႈဢမ်ႇလႆႈဢၶႂၢင်ႉဢၼ်ၸၢမ်ႇၸႃးၸေးၸိမ်ႇဢၼ်မၼ်းထိူၵ်ႈမူၼ်ႈပျေႃႇဢေႃႈ။ တီႈသုတ်းမၼ်းၸမ်ႉ၊ၶဝ်တင်းသွင်ၵေႃႉလႆႈၵႂႃႇၸူးတီႈလဵဝ်ၵၼ်ၵူၺ်းဢေႃႈ။
ၵႃႈဢၼ်ၵူၼ်းၵႆႉၶတ်းၸႂ်ပွင်ႁဵတ်းၼၼ်ႉပဵၼ်ပုၼ်ႈတွင်ႉမၼ်းသေၵေႃႈတၢင်းဢၼ်ၸႂ်မၼ်းၶႂ်ႈၵိၼ်ၼၼ်ႉဢမ်ႇပျေႇၸႂ်လႆႈ။-
ၵူၼ်းဢၼ်မီးပိင်ႇၺႃႇၼၼ်ႉတေလီၼႃႇသေၵေႃႉဢၼ်ငိူဝ်ႈငႃႉၼၼ်ႉၵႃႈႁိုဝ်။ တၢင်းဢၼ်ၵူၼ်းယၢၵ်ႈၵူၼ်းၽၢၼ်မေႃယူႇမေႃသဝ်းၽၢႆႇၼႃႈၵူၼ်းဢၼ်ဢသၢၵ်ႈလိပ်းယူႇသေၵေႃႈတေလႆႈလွင်ႈလီၵႃႈသင်။-
တၢင်းဢၼ်ဢိမ်ႇၸႂ်ၼိမ်ၸႂ်လူၺ်ႈၵႃႈဢၼ်တူဝ်ၸဝ်ႈၵဝ်ႇမီးၼၼ်ႉယဵင်ႈၶႅၼ်းလီသေတၢင်းဢၼ်လေႃးၽႃႉပူၼ်ႉလိူဝ်ၼၼ်ႉလူးၵွၼ်ႇဢေႃႈ။ လွင်ႈတၢင်းၼႆႉၵေႃႈပဵၼ်ဢၼတ်ႉတႃႉလႄႈ၊ပဵၼ်မိူၼ်ၸိူဝ်ႉၼင်ႇၵိၼ်လူမ်းၵိၼ်လႅင်ႉၼၼ်ႉၵူၺ်းဢေႃႈ။
မဵဝ်းဢၼ်မီးယူႇမိူဝ်ႈလဵဝ်ၼႆႉလႆႈပၼ်ၸိုဝ်ႈပၼ်သဵင်မႃးႁိုင်ၼႃႇလူင်လၢင်ယဝ်ႉ။ လွင်ႈၵူၼ်းပဵၼ်ၸိူဝ်ႉႁိုဝ်ၼၼ်ႉၵေႃႈပေႃးလႆႈႁုယဝ်ႉယဝ်ႉ။ ၵူၼ်းၸိုင်၊ဢမ်ႇၶေႉၶဵင်ႇၵၼ်တင်းၵေႃႉဢၼ်ႁႅင်းယႂ်ႇသေမၼ်းၼၼ်ႉလႆႈ။-
တၢင်းဢၼ်မႂ်းယဵင်ႈၶႅၼ်းတွပ်ႇထဵင်ၶိူဝ်းၶိူဝ်းၼၼ်ႉယဵင်ႈၶႅၼ်းပဵၼ်တၢင်းဢၼ်ဢမ်ႇပွင်ႇလွင်ႈၵႃႈသင်တိၵ်းတိၵ်းလႄႈတေမီးဢၵျူဝ်းပုၼ်ႈၵူၼ်းလႆႈၸိူဝ်ႉၼင်ႇႁိုဝ်။-
လွင်ႈမၼ်းၸမ်ႉ၊ၽူႈလႂ်ႁုဝႃႈ၊ဢၼ်လႂ်ပဵၼ်လွင်ႈလီပုၼ်ႈၵူၼ်းၼႂ်းၸူဝ်ႈပၢၼ်ဢၼ်ဝႃႈ၊မိုဝ်ႉဝၼ်းဢသၢၵ်ႈဢၼ်ပဵၼ်ဢၼတ်ႉတႃႉမၼ်းဢၼ်ပွတ်းၼႃႇ၊ဢၼ်ၸၢင်ႈပူၼ်ႉၵႂႃႇၸိူဝ်ႉၼင်ႇႁူမ်ႈၵွင်ႉငဝ်းၼၼ်ႉလႆႈ။ ဝၢႆးသေမၼ်းတၢႆၵႂႃႇယဝ်ႉၼၼ်ႉၽူႈလႂ်တၵ်းႁုလႆႈလွင်ႈတၢင်းဢၼ်တၵ်းပဵၼ်မႃးၵႃႈၼႂ်းမိူင်းလေႃးၵႃႉၼၼ်ႉလႆႈ။
ၵုင်ႇသရေႇဢၼ်လီၼၼ်ႉယဵင်ႈၶႅၼ်းလီၼႃႇသေၼမ်ႉမၼ်းၼၢမ်ႇသႃႇဢေႃႈ။ မိုဝ်ႉဝၼ်းဢၼ်လႆႈတၢႆၼၼ်ႉၵေႃႈယဵင်ႈၶႅၼ်းလီၼႃႇသေမိုဝ်ႉဝၼ်းဢၼ်ၵိူတ်ႇလဵင်ႉၼၼ်ႉဢေႃႈ။
တၢင်းဢၼ်ၵႂႃႇၵႃႈတီႈႁိူၼ်းမႃႇသႃႇၼၼ်ႉယဵင်ႈၶႅၼ်းလီၼႃႇသေတၢင်းဢၼ်ၵႂႃႇၵႃႈတီႈႁိူၼ်းဢၼ်ႁဵတ်းပွႆးၼၼ်ႉဢေႃႈ။ လွင်ႈမၼ်းၸမ်ႉ၊ၶဝ်ၸိူဝ်းဢၼ်ဢသၢၵ်ႈယင်းလိပ်းယူႇၼၼ်ႉလႆႈၶႆႈၸႂ်ဝူၼ်ႉၸႂ်လွင်ႈတၢင်းဢၼ်တၢင်းတၢႆပႂ်ႉထႃႈၵူၼ်းႁဝ်းၵႃႈမီးတင်းသဵင်ႈတင်းလူင်ယူႇၼၼ်ႉဢေႃႈ။
တၢင်းဢၼ်မႆႈၸႂ်ၶီၸႂ်ယဵင်ႈၶႅၼ်းလီၼႃႇသေတၢင်းဢၼ်ယုမ်ႉၶူဝ်ဢေႃႈ။ လွင်ႈမၼ်းၸမ်ႉ၊ၵွပ်ႈပိူဝ်ႈၼႃႈႁဵဝ်ႇၼႃႈၸွပ်ႈၼၼ်ႉ၊ၸၢင်ႈတၵ်းႁႂ်ႈႁူဝ်ၸႂ်မႂ်းယဵင်ႈၶႅၼ်းလီမႃးဢေႃႈ။
ႁူဝ်ၸႂ်ၶဝ်ၸိူဝ်းဢၼ်မီးပိင်ႇၺႃႇၼၼ်ႉၸၢင်ႈၵႂႃႇမီးၵႃႈတီႈႁိူၼ်းဢၼ်မီးတၢင်းမႆႈၸႂ်ၶီၸႂ်လႄႈႁူဝ်ၸႂ်ၶဝ်ၸိူဝ်းဢၼ်ႁၢႆႉမိူၵ်ႈၸမ်ႉ၊ၸၢင်ႈၵႂႃႇမီးၵႃႈတီႈႁိူၼ်းဢၼ်ႁဵတ်းတၢင်းမူၼ်ႈတၢင်းပျေႃႇၼၼ်ႉဢေႃႈ။-
တၢင်းဢၼ်ထွမ်ႇငိၼ်းၵႂၢမ်းၵူၼ်းဢၼ်မီးပိင်ႇၺႃႇၶဝ်သင်ႇသွၼ်သုင်းမႃႉမႂ်းၼၼ်ႉယဵင်ႈၶႅၼ်းလီၼႃႇသေထွမ်ႇငိၼ်းၵႂၢမ်းၵူၼ်းဢၼ်ဢမ်ႇမီးပိင်ႇၺႃႇယွင်ႈယေႃးမႂ်းၼၼ်ႉဢေႃႈ။
တၢင်းဢၼ်ၵူၼ်းမိူၵ်ႈယုမ်ႉၶူဝ်ႁုၼ်ႉၼၼ်ႉမိူၼ်ၸိူဝ်ႉၼင်ႇသဵင်ဢၼ်ၽႆးမႆႈတူၼ်ႈၼၢမ်ဢၼ်မီးတႂ်ႈၵူၼ်ႈမေႃႈၼၼ်ႉဢေႃႈ။ လွင်ႈတၢင်းၼၼ်ႉၵေႃႈပဵၼ်ဢၼတ်ႉတႃႉဢေႃႈ။
တၢင်းဢၼ်ၼိၵ်ႈၸၢၵ်ႈငႅၼ်းသႄးၼၼ်ႉၸၢင်ႈႁဵတ်းႁႂ်ႈၵေႃႉဢၼ်မီးပိင်ႇၺႃႇၼၼ်ႉငိူဝ်ႈငႃႉၵႂႃႇလႄႈတၢင်းဢၼ်မႂ်းႁပ်ႉသူးလၢပ်ႈၵေႃႈၸၢင်ႈႁဵတ်းႁႂ်ႈဢၵျၢင်ႉၸႃႇရိၵ်ႉတႃႉတူဝ်ၸဝ်ႈၵဝ်ႇလုလႅဝ်ဢေႃႈ။
တီႈသုတ်းတီႈၵွႆၼၼ်ႉယဵင်ႈၶႅၼ်းလီၼႃႇသေတၢင်းဢၼ်တႄႇတင်ႈႁဵတ်းၼၼ်ႉဢေႃႈ။ ၸႂ်ဢၼ်ယိူၼ်ႉၶၢမ်ႇၼၼ်ႉယဵင်ႈၶႅၼ်းလီၼႃႇသေၸႂ်မႃႇၼႃႉၽႅၼ်သုင်ၼၼ်ႉဢေႃႈ။
ယႃႇပေႁႂ်ႈတေႃးသႃႉဢွၵ်ႇၶၼ်ၽႂ်းၼႃႇၽႅဝ်။ တေႃးသႃႉၸိုင်၊မီးယူႇၼႂ်းၸႂ်ၵူၼ်းႁၢႆႉဢေႃႈ။
ယႃႇပေထၢမ်လႄႈဝႃႈ၊ “ႁဵတ်းသင်လႄႈလွင်ႈတၢင်းဢၼ်ပဵၼ်မိူဝ်ႈၵွၼ်ႇဢွၼ်ၼႆႉၼၼ်ႉယဵင်ႈၶႅၼ်းလီၼႃႇသေဢၼ်ပဵၼ်မိူဝ်ႈလဵဝ်ၼႆႉၸိူဝ်ႉၼင်ႇႁိုဝ်၊” ဝႃႈၼင်ႇၼႆ။ မၼ်းပဵၼ်ၵႂၢမ်းထၢမ်ဢၼ်ၸွမ်းၼင်ႇပိင်ႇၺႃႇဢမ်ႇၸႂ်ႈ။
ၶဝ်ၸိူဝ်းဢၼ်ဢသၢၵ်ႈလိပ်းၵူႈၵေႃႉၵူႈၵူၼ်းၼၼ်ႉထုၵ်ႇလီမီးပိင်ႇၺႃႇဢေႃႈ။ လွင်ႈမၼ်းၸမ်ႉ၊ပိင်ႇၺႃႇၼၼ်ႉလီမိူၼ်ၸိူဝ်ႉၼင်ႇဢမူၺ်ႇဢုၵ်ႉၸႃႇဢေႃႈ။
ပိင်ႇၺႃႇၸၢင်ႈႁႄႉၸၢင်ႈၵင်ႈမိူၼ်ၸိူဝ်ႉၼင်ႇငိုၼ်းၶမ်ႈၸၢင်ႈႁႄႉၸၢင်ႈၵင်ႈၼၼ်ႉဢေႃႈ။ ဢၵျူဝ်းတၢင်းဢၼ်ႁုဢၼ်မေႃၼၼ်ႉၸမ်ႉ၊ပိင်ႇၺႃႇၸၢင်ႈပႂ်ႉဢသၢၵ်ႈမႂ်းႁႂ်ႈလူင်ႉလီလွတ်ႈလီဢေႃႈ။
ၶႆႈၸႂ်ဝူၼ်ႉၸႂ်လူၺ်ႈလွင်ႈတၢင်းဢၼ်ၽြႃးပဵၼ်ၸဝ်ႈႁဵတ်းၼၼ်ႉတႃႉ။ လွင်ႈတၢင်းဢၼ်မၼ်းၸဝ်ႈႁႂ်ႈၵူတ်ႉငေႃးၼၼ်ႉၽူႈလႂ်ႁဵတ်းႁႂ်ႈသိုဝ်ႈလႆႈ။-
ၼႂ်းမိူဝ်ႈဝၼ်းဢၼ်လႆႈလီလႆႈပဵၼ်ၼၼ်ႉၸူမ်းသိူဝ်းတႃႉ။ မိုဝ်ႉဝၼ်းဢၼ်တုၵ်ႉၶႃႉတၢင်းၽၢၼ်ႁွတ်ႈမႃးၼၼ်ႉၶႆႈၸႂ်ဝူၼ်ႉတူၺ်းဝႃႈ၊ၽြႃးပဵၼ်ၸဝ်ႈႁႂ်ႈတၢင်းဢၼ်လႆႈလီလႆႈပဵၼ်၊ဢိၵ်ႇတင်းတၢင်းဢၼ်တုၵ်ႉၶႃႉၶၢၼ်ၸႂ်ၼၼ်ႉပဵၼ်လႄႉပဵၼ်ၵမ်းပုၼ်ႈလွင်ႈၼင်ႇႁိုဝ်ၵူၼ်းတၵ်းဢမ်ႇလႆႈသွၵ်ႈႁႃ၊ႁႂ်ႈလႆႈႁုလွင်ႈတၢင်းဢၼ်ၵမ်းလိုၼ်းတၵ်းပဵၼ်မႃးၸိူဝ်ႉၼင်ႇႁိုဝ်ၼၼ်ႉဢေႃႈ။
ၼႂ်းၸူဝ်ႈဢသၢၵ်ႈၵဝ်ဢၼ်ပဵၼ်ဢၼတ်ႉတႃႉၼႆႉၼၼ်ႉၵဝ်လႆႈႁၼ်သွင်ၸိူဝ်ႉသွင်ပိူင်ဢၼ်ဝႃႈ၊မီးၵူၼ်းသိုဝ်ႈတေႃႇဢၼ်သုမ်းၸွမ်းၼႂ်းတၢင်းဢၼ်မၼ်းသိုဝ်ႈတေႃႇၼၼ်ႉ၊ဢိၵ်ႇတင်းၵူၼ်းႁၢႆႉၵူၼ်းယုတ်ႈဢၼ်ဢသၢၵ်ႈယၢဝ်းယိုၼ်းယူႇၼႂ်းတၢင်းဢၼ်မၼ်းႁၢႆႉမိူၵ်ႈၼၼ်ႉၵေႃႈမီးဢေႃႈ။-
ပိူဝ်ႈၼႆလႄႈယႃႇပေသိုဝ်ႈတေႃႇသိုဝ်ႈယူဝ်းပူၼ်ႉၼႃႇလူင်လၢင်၊ယႃႇပေမီးပိင်ႇၺႃႇပူၼ်ႉၼႃႇလူင်လၢင်၊ႁဵတ်းသင်လႄႈမႂ်းၶႂ်ႈယႃႉဢၵျူဝ်းတူဝ်ၸဝ်ႈၵဝ်ႇၸိူဝ်ႉၼင်ႇႁိုဝ်။-
ၼင်ႇၼၼ်လႄႈယႃႇပေႁၢႆႉယုတ်ႈပူၼ်ႉလိူဝ်ၼႃႇလူင်လၢင်၊ယႃႇပေႁဵတ်းမိူၵ်ႈပူၼ်ႉၼႃႇလူင်လၢင်။ ႁဵတ်းသင်လႄႈမႂ်းၶႂ်ႈတၢႆၸူဝ်ႈဢၼ်ယင်းဢမ်ႇပႆႇထုၵ်ႇလီလႆႈတၢႆၼၼ်ႉၸိူဝ်ႉၼင်ႇႁိုဝ်။-
ဝႄႈပႅတ်ႈလွင်ႈတၢင်းဢၼ်ပူၼ်ႉဢၼ်လိူဝ်တင်းသွင်မဵဝ်းၼႆႉတႃႉ။ ပေႃးမႂ်းရူဝ်ႇသေႇၵူဝ်ယမ်ၽြႃးပဵၼ်ၸဝ်ႈၸိုင်၊မႂ်းတၵ်းဢွင်ႇမႅင်ႇၵူႈၸိူဝ်ႉၵူႈပိူင်ဢေႃႈ။
ပိင်ႇၺႃႇၼၼ်ႉႁဵတ်းႁႂ်ႈၵူၼ်းဢၼ်မီးပိင်ႇၺႃႇၵေႃႉၼိုင်ႈမီးတၼ်းၶူဝ်းဢၼ်ယဵင်ႈၶႅၼ်းယႂ်ႇၼႃႇသေၶုၼ်ဢၼ်ဢုပ်ႉပိူင်ႇသိပ်းပႃးဢၼ်ယူႇၼႂ်းဝဵင်းၼိုင်ႈၼၼ်ႉဢေႃႈ။
ၵူၼ်းလေႃးၵီႇၵေႃႉဢၼ်သိုဝ်ႈတေႃႇသေႇသေႇ၊ဢမ်ႇတွၼ်ႉၵမ်ၵျၢင်ႉတၢင်းၵမ်တၢင်းၵျၢင်ႉဢၼ်ဢမ်ႇလီဢမ်ႇငၢမ်းၼၼ်ႉဢမ်ႇမီးသေၵေႃႉသေၵူၼ်း။
ယႃႇပေဝႆႉဢယေးတီႈၵႂၢမ်းၵႃႈဢၼ်ပိူၼ်ႈလၢတ်ႈၼၼ်ႉ။ မႂ်းၸၢင်ႈၶႄးတၵ်းငိၼ်းၵႂၢမ်းဢၼ်ၶႃႈမႂ်းၶႃႉၸိုဝ်ႈၶၢႆသဵင်မႂ်းလႄႈ၊-
မႂ်းၵေႃႈႁုတူဝ်ၸဝ်ႈၵဝ်ႇလွင်ႈဢၼ်မႂ်းယၢမ်ႈၶႃႉၸိုဝ်ႈၶၢႆသဵင်ပိူၼ်ႈဢမ်ႇႁုလၢႆပွၵ်ႈယဝ်ႉၼၼ်ႉယူႇဢေႃႈ။
ၵဝ်ဢဝ်တင်းပိင်ႇၺႃႇၵဝ်လႄႈၸၢမ်းတူၺ်းလွင်ႈတၢင်းၵူႈၸိူဝ်ႉၵူႈပိူင်ယဝ်ႉ။ ၵဝ်ဝႃႈ၊ၵဝ်တၵ်းပျေႉၸုမ်ႇဝႆႉတင်းပိင်ႇၺႃႇဝႃႈၼႆသေၵေႃႈပိင်ႇၺႃႇၼၼ်ႉယင်းယၢၼ်ၵႆၵၼ်တင်းၵဝ်ယူႇဢေႃႈ။-
ၽူႈလႂ်ထူပ်းႁၼ်ဢသၢၵ်ႈတၢၼ်းၵူၼ်းၼၼ်ႉၶႂ်ႈပွင်ႇဝႃႈၸိူဝ်ႉၼင်ႇႁိုဝ်။ လွင်ႈမၼ်းၸမ်ႉ၊မၼ်းပဵၼ်လွင်ႈတၢင်းဢၼ်လိုၵ်ႉလမ်ႇၼႃႇလူင်လၢင်လႄႈပဵၼ်ဢၼ်ယၢပ်ႇၼႃႇပုၼ်ႈဢၼ်တၵ်းႁုပွင်ႇလႅင်းလႆႈၼၼ်ႉဢေႃႈ။-
ၵူၺ်းၵႃႈ၊ၵဝ်ဢဝ်တူဝ်ၸဝ်ႈၵဝ်ႇဢၢပ်ႈဝႆႉၵႃႈတီႈဢတၢတ်ႈပိင်ႇၺႃႇလႄႈသွၵ်ႈႁႃသွၼ်ဢဝ်ဢေႃႈ။ ၵဝ်တႅပ်းတတ်းၸႂ်ႁႂ်ႈလႆႈႁႃပိင်ႇၺႃႇ၊ဢိၵ်ႇတင်းႁႂ်ႈလႆႈသွၼ်ဢဝ်လွင်ႈတၢင်းဢၼ်ႁၢႆႉဢၼ်ယုတ်ႈပဵၼ်ဢၼ်မိူၵ်ႈ၊ဢိၵ်ႇတင်းလွင်ႈတၢင်းဢၼ်မိူၵ်ႈပဵၼ်ဢၼ်ယွင်ႇဢၼ်မႃႈၼၼ်ႉဢေႃႈ။
ၵဝ်ထူပ်းႁၼ်လွင်ႈတၢင်းဢၼ်ယဵင်ႈၶႅၼ်းၶူမ်ၸႂ်ၼႃႇသေတၢင်းတၢႆဢၼ်ဝႃႈမႄႈယိင်းၼၼ်ႉဢေႃႈ။ တၢင်းႁၵ်ႉမႄႈယိင်းၼၼ်ႉပဵၼ်ၸိူဝ်ႉၼင်ႇတူင်ႇႁႅဝ်ႉတူင်ႇၶိုမ်းတီႈမႂ်းလႄႈမိုဝ်းဢၼ်ၵွတ်ႇမႂ်းၼၼ်ႉပဵၼ်ၸိူဝ်ႉၼင်ႇၸိူၵ်ႈဢၼ်မတ်ႉၽုၵ်ႇၼၼ်ႉဢေႃႈ။ ၵေႃႉဢၼ်ၵူဝ်ႁႄၽြႃးပဵၼ်ၸဝ်ႈၼၼ်ႉၸၢင်ႈလွတ်ႈဢွၵ်ႇသေတီႈမၼ်းလႄႈၵေႃႉဢၼ်ႁဵတ်းဢပျတ်ႈၼၼ်ႉလႆႈၶၢမ်ႇတၢင်းဢၼ်မၼ်းတိဢဝ်ဢေႃႈ။-
ၵဝ်သြႃႇလူင်မေႃပိင်ႇၺႃႇဝႃႈၸမ်ႉ၊ယၢမ်းမိူဝ်ႈဢၼ်ၵဝ်သွၵ်ႈႁႃတိၵ်းတိၵ်းယူႇၼၼ်ႉၵဝ်ထူပ်းႁၼ်လွင်ႈတၢင်းမၼ်းဢၼ်ၼိုင်ႈယဝ်ႉဢၼ်ၼိုင်ႈဢေႃႈ။-
ၵဝ်သမ်ႉသွၵ်ႈႁႃထႅင်ႈသေၵေႃႈဢမ်ႇထူပ်းႁၼ်ထႅင်ႈယဝ်ႉ။ ၵႃႈၼႂ်းၵူၼ်းၸၢႆးႁဵင်ၼိုင်ႈၼၼ်ႉၵဝ်ထူပ်းႁၼ်ၵေႃႉဢၼ်ထိူၵ်ႈရူဝ်ႇသေႇၵူဝ်ယမ်ၼၼ်ႉၵေႃႉၼိုင်ႈလႄႈၵႃႈၼႂ်းမႄႈယိင်းၸမ်ႉ၊ဢမ်ႇထူပ်းသေၵေႃႉသေၵူၼ်းလႃးလႃး။-
လွင်ႈတၢင်းဢၼ်ၵဝ်ထူပ်းႁၼ်ဢၼ်ၼိုင်ႈၸမ်ႉ၊ၽြႃးပဵၼ်ၸဝ်ႈႁဵတ်းပဵၼ်ၵူၼ်းႁႂ်ႈသိုဝ်ႈတေႃႇသေၵေႃႈ၊ၶဝ်ႁဵတ်းႁႂ်ႈတူဝ်ၸဝ်ႈၵဝ်ႇယုင်ႈယၢင်ႈၵႂင်ၸႂ်ဢေႃႈ။
ၵူၼ်းဢၼ်မီးပိင်ႇၺႃႇၵူၺ်းၸၢင်ႈႁုၸႅင်ႈဢၼၢၵ်ႈဢထိၵ်ႈပႄႇဢၼ်လိုၵ်ႉလမ်ႇၼၼ်ႉဢေႃႈ။ လွင်ႈမၼ်းၸမ်ႉ၊ပိင်ႇၺႃႇၸၢင်ႈႁႂ်ႈၼႃႈမၼ်းၵီႈလီသႂ်လီလႄႈႁႂ်ႈၼႃႈတူႇၼႃႈသူမ်ႈမၼ်းႁၢႆၵႂႃႇဢေႃႈ။
ၵဝ်ပၼ်တၢင်းၵျၢမ်ႇတၢင်းပွင်လႄႈဝႃႈ၊ထွၵ်ႈလူၺ်ႈသဵတ်ႈၸႃႇဢၼ်ႁဵတ်းတီႈၽြႃးပဵၼ်ၸဝ်ႈၼၼ်ႉသေလႄႈပႂ်ႉၸွမ်းဢမိင်ႉၶုၼ်ႁေႃၶမ်းယူႇတႃႉ။-
ႁိပ်ႈၼႅတ်ႈဢွၵ်ႇၵႂႃႇသေၵႃႈတီႈၽၢႆႇၼႃႈၶုၼ်ႁေႃၶမ်းၵႂႃႇယၢမ်းမိူဝ်ႈဢၼ်လွင်ႈတၢင်းဢၼ်ဢမ်ႇလီဢမ်ႇငၢမ်းပေႃႇပဵၼ်မႃးၼၼ်ႉ၊ၶုၼ်ႁေႃၶမ်းတၵ်းၸီႇယၢင်ႇၸွမ်းၵႃႈၼင်ႇဢၼ်ဢလူဝ်ႇမၼ်းမီးၼၼ်ႉဢေႃႈ။-
ပိူဝ်ႈဢၼ်ဢမိင်ႉၶုၼ်ႁေႃၶမ်းၼၼ်ႉပႃးတၼ်းၶူဝ်းလႄႈၽူႈလႂ်ႁတ်းလဝ်ႈထၢမ်တီႈမၼ်းၸဝ်ႈလႄႈဝႃႈ၊ “ၸဝ်ႈႁဝ်းႁဵတ်းၸိူဝ်ႉၼင်ႇႁိုဝ်၊” ဝႃႈၼင်ႇၼႆ။-
ၵေႃႉဢၼ်ပႂ်ႉၸွမ်းဢမိင်ႉၸဝ်ႈၼၼ်ႉတၵ်းၵၢင်းလွတ်ႈတင်းၽေးလႄႈၵႃႈၼႂ်းၸႂ်ၵေႃႉဢၼ်မီးပိင်ႇၺႃႇၼၼ်ႉၸၢင်ႈႁုၶိင်ႇၶႃႇမၼ်း၊ဢိၵ်ႇတင်းၼႄးလၢႆးဢၼ်တၵ်းႁဵတ်းၸိူဝ်ႉၼင်ႇႁိုဝ်ၼၼ်ႉဢေႃႈ။-
ပုၼ်ႈလွင်ႈတၢင်းၵူႈၸိူဝ်ႉၵူႈပိူင်ၸိုင်၊မီးၶိင်ႇၶႃႇမၼ်း၊ဢိၵ်ႇတင်းၼႄးလၢႆးမၼ်းႁင်းၽႂ်ႁင်းမၼ်း၊ပိၵ်ႉသမ်ႉၵူၼ်းလႆႈၶၢမ်ႇတုၵ်ႉၶႃႉတၢင်းၽၢၼ်ၼမ်ၼႃႇသေၵေႃႈ။-
လွင်ႈဢၼ်တၵ်းပဵၼ်မႃးၸိူဝ်ႉၼင်ႇႁိုဝ်မိူဝ်ႈၵမ်းလိုၼ်းၼၼ်ႉၸိုင်၊ႁဝ်းဢမ်ႇႁုသေၵေႃႉသေၵူၼ်း။ ၽူႈလႂ်တၵ်းလၢတ်ႈလွင်ႈဢၼ်တၵ်းပဵၼ်မႃးၸိူဝ်ႉၼင်ႇႁိုဝ်ၼၼ်ႉလႆႈ။-
ဢမ်ႇမီးၽူႈလႂ်သေၵေႃႉသေၵူၼ်းၶျုၵ်ႈလူမ်းဝႆႉလႄႈဢုပ်ႉပိူင်ႇလႆႈ။ ဢမ်ႇမီးၽူႈလႂ်သေၵေႃႉသေၵူၼ်းမီးဢႃႇၼႃႇၵႃႈၼိူဝ်ဝၼ်းတၢႆမၼ်းလႆႈ။ ဢမ်ႇမီးၽူႈလႂ်သေၵေႃႉသေၵူၼ်းတေလႆႈလွတ်ႈသေတၢင်းဢၼ်လႆႈတိုၵ်းသိုၵ်း။ တုၸရိူၵ်ႈၵေႃႈဢမ်ႇၸၢင်ႈၵႄႇၼုၵ်ႈဢဝ်ၵေႃႉဢၼ်ႁဵတ်းတုၸရိူၵ်ႈယူႇၶိူဝ်းၶိူဝ်းၼၼ်ႉ။
ၵဝ်ႁုႁၼ်လွင်ႈတၢင်းၵူႈၸိူဝ်ႉၵူႈပိူင်၊မိူဝ်ႈဢၼ်ၵဝ်ၶႆႈၸႂ်ဝူၼ်ႉၸႂ်လူၺ်ႈၵႃႈဢၼ်ႁဵတ်းၵႃႈၼႂ်းလေႃးၵႃႉၼႆႉဢၼ်ဝႃႈၵူၼ်းၵမ်ႈၽွင်ႈမီးၽုင်းတၼ်းၶူဝ်းလႄႈၵူၼ်းတၢင်ႇၵေႃႉတၢင်ႇၵူၼ်းလႆႈၶၢမ်ႇတုၵ်ႉၶႃႉၵႃႈတႂ်ႈမိုဝ်းၶဝ်ယူႇၼၼ်ႉဢေႃႈ။-
ၵဝ်လႆႈႁၼ်ၵူၼ်းႁၢႆႉၵူၼ်းယုတ်ႈတင်းလၢႆလႆႈၶၢမ်ႇတၢင်းဢၼ်သၢင်းၵျူဝ်ႇလႄႈၽင်ၵႃႈၼႂ်းၶုမ်ပႃႇႁဵဝ်ႈၶဝ်ဝႆႉယဝ်ႉ။ ၵူၺ်းၵႃႈ၊မိူဝ်ႈဢၼ်ပွၵ်ႈသေၵႃႈတီႈပႃႇႁဵဝ်ႈမႃးၼၼ်ႉၵူၼ်းတင်းလၢႆဢွၼ်ၵၼ်ယုၵ်ႉယွင်ႈၶဝ်ၵႃႈၼႂ်းဝဵင်းဢၼ်ၶဝ်ႁဵတ်းဢၼ်ႁၢႆႉဢၼ်ယုတ်ႈၼၼ်ႉဢေႃႈ။ လွင်ႈတၢင်းၼႆႉၵေႃႈပဵၼ်ဢၼတ်ႉတႃႉဢေႃႈ။
ၵွပ်ႈသင်လႄႈၵူၼ်းဢွၼ်ၵၼ်ႁဵတ်းႁၢႆႉႁဵတ်းယုတ်ႈၼႃႇလူင်လၢင်ဝႃႈၼႆၸမ်ႉ၊ပဵၼ်ၵွပ်ႈပိူဝ်ႈဢမ်ႇၸီႇယၢင်ႇဢမုဢၼ်ႁၢႆႉဢၼ်ယုတ်ႈၼၼ်ႉၶၼ်ၶၼ်ၽႂ်းၽႂ်းလႄႈပၼ်တၢမ်ႇၵမ်းလဵဝ်ၼၼ်ႉဢေႃႈ။-
ပိၵ်ႉသမ်ႉၵေႃႉဢၼ်ပူၼ်ႉလိူဝ်ၼၼ်ႉႁဵတ်းဢမုတၢင်းဢၼ်ႁၢႆႉဢၼ်မိူၵ်ႈတေႃႇထိုင်ႁွတ်ႈပၢၵ်ႇပွၵ်ႈလႄႈၸူဝ်ႈဢသၢၵ်ႈမၼ်းယၢဝ်းယိုၼ်းသေၵေႃႈ၊ၵဝ်ႁုလွင်ႈဢၼ်ၶဝ်ၸိူဝ်းဢၼ်ၵူဝ်ႁႄၽြႃးပဵၼ်ၸဝ်ႈၼၼ်ႉတၵ်းလႆႈၶၢမ်ႇဢၵျူဝ်းဢၼ်လီဢမၢၼ်ႇၶၼ်ပဵၼ်ၵွပ်ႈပိူဝ်ႈဢၼ်ၵူဝ်ႁႄၵႃႈတီႈၽၢႆႇၼႃႈမၼ်းၸဝ်ႈၼၼ်ႉဢေႃႈ။-
ၵေႃႉဢၼ်ႁၢႆႉဢၼ်မိူၵ်ႈၼၼ်ႉဢမ်ႇလႆႈၶၢမ်ႇဢဝ်ဢၵျူဝ်းဢၼ်လီ၊ဢသၢၵ်ႈမၼ်းၵေႃႈဢမ်ႇလႆႈယိုၼ်းလႆႈယၢဝ်းလႄႈတၵ်းမိူၼ်ၸိူဝ်ႉၼင်ႇႁူမ်ႈၵွင်ႉငဝ်းၼၼ်ႉၵွပ်ႈပိူဝ်ႈဢၼ်မၼ်းဢမ်ႇၵူဝ်ဢမ်ႇႁႄၵႃႈတီႈၽၢႆႇၼႃႈၽြႃးပဵၼ်ၸဝ်ႈၼၼ်ႉဢေႃႈ။-
လွင်ႈတၢင်းဢၼတ်ႉတႃႉမဵဝ်းၼိုင်ႈဢၼ်ၸၢင်ႈပဵၼ်ၵႃႈၼိူဝ်လိၼ်မိူင်းၼႆႉၸမ်ႉ၊ၶဝ်ၸိူဝ်းဢၼ်သိုဝ်ႈတေႃႇၵမ်ႈၽွင်ႈလႆႈဢွၼ်ၵၼ်ၶၢမ်ႇမိူၼ်ၸိူဝ်ႉၼင်ႇဢၼ်ၵေႃႉဢၼ်ႁၢႆႉဢၼ်မိူၵ်ႈၼၼ်ႉထိူၵ်ႈၶၢမ်ႇ၊ၵွပ်ႈပိူဝ်ႈတၢင်းဢၼ်မၼ်းႁဵတ်းၼၼ်ႉဢေႃႈ။ မိူၼ်ၸိူဝ်ႉၼင်ႇၼၼ်ၶဝ်ၸိူဝ်းဢၼ်ႁၢႆႉဢၼ်မိူၵ်ႈၼၼ်ႉၵမ်ႈၽွင်ႈလႆႈဢွၼ်ၵၼ်ၶၢမ်ႇဢဝ်မိူၼ်ၸိူဝ်ႉၼင်ႇဢၼ်ၵေႃႉဢၼ်သိုဝ်ႈတေႃႇၼၼ်ႉထိူၵ်ႈၶၢမ်ႇၵွပ်ႈပိူဝ်ႈတၢင်းဢၼ်မၼ်းႁဵတ်းၼၼ်ႉဢေႃႈ။ ၵဝ်လႆႈဝႃႈ၊ “လွင်ႈတၢင်းၼၼ်ႉၵေႃႈပဵၼ်ဢၼတ်ႉတႃႉဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈၵဝ်သၽေႃးလႆႈလွင်ႈတၢင်းဢၼ်ၵူၼ်းထုၵ်ႇလီမူၼ်ႈပျေႃႇၵွပ်ႈပိူဝ်ႈတၢင်းဢၼ်ၸူမ်းသိူဝ်းၼႂ်းၸူဝ်ႈဢသၢၵ်ႈၵူၼ်းၼၼ်ႉပဵၼ်တၢင်းဢၼ်ၵိၼ်မူၼ်ႈၵိၼ်ပျေႃႇဢေႃႈ။ လွင်ႈမၼ်းၸမ်ႉ၊ၵူၼ်းလႆႈၶၢမ်ႇဢဝ်ဢၵျူဝ်းဢၼ်ႁဵတ်းၸိူဝ်ႉၼင်ႇၼႆၼႂ်းတၢင်းဢၼ်ၶတ်းၸႂ်ၵျူဝ်းၸႃးဢဝ်ႁႅင်းဢွၵ်ႇၼႂ်းၸူဝ်ႈဢသၢၵ်ႈဢၼ်ၽြႃးပဵၼ်ၸဝ်ႈဢဵတ်းလူပၼ်ၵႃႈၼႂ်းလေႃးၵႃႉၼႆႉၼၼ်ႉဢေႃႈ။
မိူဝ်ႈလႂ်သေဢမ်ႇဝႃႈ၊မိူဝ်ႈဢၼ်ၵဝ်ၶတ်းၸႂ်ၵျူဝ်းၸႃးႁႂ်ႈပဵၼ်ၵူၼ်းမီးပိင်ႇၺႃႇလႄႈသွၼ်ဢၢၼ်ႇဢဝ်လွင်ႈတၢင်းဢၼ်ပဵၼ်ယူႇၼႂ်းလေႃးၵႃႉၼႆႉၼၼ်ႉၸိုင်၊ၵဝ်ႁုႁၼ်လွင်ႈဢၼ်ပိၵ်ႉသမ်ႉၵူၼ်းယင်းဢမ်ႇလပ်းဢမ်ႇၼွၼ်းယူႇတင်းဝၼ်းတင်းၶိုၼ်းယူႇသေၵေႃႈ။-
တၵ်းဢမ်ႇႁုၵၢၼ်တၢင်းႁဵတ်းဢၼ်ၽြႃးပဵၼ်ၸဝ်ႈသၢင်ႈႁဵတ်းၼၼ်ႉလႆႈၸေးၸေးၸွတ်ႇၸွတ်ႇ၊ၵူၼ်းၶတ်းၸႂ်ၵျူဝ်းၸႃးႁႃတူၺ်းထၢၼ်ႇႁိုဝ်သေၵေႃႈဢမ်ႇႁုတင်းသဵင်ႈတင်းမူတ်းလႆႈလိူဝ်သေၼၼ်ႉဢမ်ႇၵႃး၊ပိၵ်ႉသမ်ႉၵူၼ်းဢၼ်မီးပိင်ႇၺႃႇၶဝ်ထၢင်ႇတၵ်းႁုလႆႈသေၵေႃႈၶဝ်ဢမ်ႇႁုလႆႈ။
ၵဝ်ၶႆႈၸႂ်ဝူၼ်ႉတူၺ်းၼႃႇလူင်လၢင်လူၺ်ႈလွင်ႈတၢင်းၸိူဝ်းၼႆႉႁိုင်ၼႃႇယဝ်ႉလႄႈလႆႈႁုႁၼ်လွင်ႈတၢင်းဢၼ်ၵူၼ်းသိုဝ်ႈတေႃႇတင်းၵူၼ်းဢၼ်မီးပိင်ႇၺႃႇၶဝ်ႁဵတ်းၼၼ်ႉမီးၼႂ်းမိုဝ်းၽြႃးပဵၼ်ၸဝ်ႈဢေႃႈ။ ၶဝ်ဢမ်ႇႁုလွင်ႈဢၼ်ပိူၼ်ႈတၵ်းႁၵ်ႉပႅင်းႁိုဝ်၊ပိူၼ်ႈတၵ်းၸင်းႁိုဝ်ၼၼ်ႉလႆႈ။ ၽူႈလႂ်ဢမ်ႇႁုလွင်ႈတၢင်းဢၼ်မီးၵႃႈတီႈဝၼ်းတႃမိူဝ်းၼႃႈၶဝ်ၼၼ်ႉလႆႈသေၸိူဝ်ႉသေပိူင်။-
ယင်းဢမ်ႇမီးလွင်ႈတၢင်းဢၼ်ပႅၵ်ႇဢၼ်ပိူင်ႈလႄႈ၊လွင်ႈတၢင်းၵႃႈမီးႁွတ်ႈထိုင်ၵႃႈၼိူဝ်ၵူၼ်းတင်းသဵင်ႈတင်းလူင်မိူၼ်မိူၼ်ၵၼ်ဢေႃႈ။ ၸၢင်ႈပဵၼ်တီႈၵူၼ်းဢၼ်သိုဝ်ႈတြႃးလႄႈၵူၼ်းဢၼ်ဢမ်ႇသိုဝ်ႈတြႃး၊ၵူၼ်းလီလႄႈၵူၼ်းၸႃႉ၊ၵူၼ်းသိုဝ်ႈတေႃႇလႄႈၵူၼ်းဢၼ်ဢမ်ႇသိုဝ်ႈတေႃႇ၊ဢိၵ်ႇတင်းၶဝ်ၸိူဝ်းဢၼ်သၢၵ်ႈလူႇၶိူင်ႈတၢင်းလူႇလႄႈၸိူဝ်းဢၼ်ဢမ်ႇသၢၵ်ႈဢမ်ႇလူႇၼၼ်ႉဢေႃႈ။ ၵူၼ်းလီၼၼ်ႉၵေႃႈဢမ်ႇမျၢတ်ႈလီသေၵူၼ်းဢၼ်မီးဢပျတ်ႈ။ ၵေႃႉဢၼ်တိူင်ႇၵၢဝ်ႇသဵတ်ႈၸႃႇၵေႃႈဢမ်ႇမျၢတ်ႈလီသေၵေႃႉဢၼ်ဢမ်ႇႁတ်းတိူင်ႇၵၢဝ်ႇသဵတ်ႈၸႃႇၼၼ်ႉ။-
လွင်ႈတၢင်းဢၼ်လီငိၼ်းၽၢၼ်ထိုင်ၸႂ်လူၺ်ႈၵႃႈဢၼ်ပဵၼ်ယူႇၵႃႈၼႂ်းလေႃးၵႃႉၼႆႉၼၼ်ႉၸမ်ႉ၊လွင်ႈတၢင်းမဵဝ်းလဵဝ်ပိူင်လဵဝ်ပဵၼ်တီႈၵူၼ်းတင်းသဵင်ႈတင်းလူင်မိူၼ်မိူၼ်ၵၼ်ၼၼ်ႉဢေႃႈ။ ၼႂ်းၸူဝ်ႈၵူၼ်းယင်းဢသၢၵ်ႈလိပ်းယူႇၼႆႉၼၼ်ႉႁူဝ်ၸႂ်ၶဝ်တဵမ်ဝႆႉတင်းတုၸရိူၵ်ႈ၊ဢိၵ်ႇတင်းၸႂ်ဢၼ်ယွင်ႇဢၼ်မႃႈသေလႄႈလိုၼ်းၼၼ်ႉၸင်ႇဢွၼ်ၵၼ်တၢႆၵႂႃႇဢေႃႈ။-
ၵူၺ်းၵႃႈ၊ၵူၼ်းၸိူဝ်းဢၼ်ၶဝ်ႈပႃးၵႃႈၼႂ်းၶဝ်ၸိူဝ်းဢၼ်ဢသၢၵ်ႈယင်းလိပ်းယူႇၼၼ်ႉမီးတၢင်းဢၼ်မုင်ႈမွင်းဢေႃႈ။ မႃဢၼ်ဢသၢၵ်ႈယင်းလိပ်းယူႇၼၼ်ႉယဵင်ႈၶႅၼ်းမျၢတ်ႈလီသေသၢင်ႇသီႈဢၼ်တၢႆယဝ်ႉၼၼ်ႉဢေႃႈ။-
ၶဝ်ၸိူဝ်းဢၼ်ဢသၢၵ်ႈလိပ်းယူႇၼၼ်ႉႁုလွင်ႈဢၼ်ၶဝ်တၵ်းတေလႆႈတၢႆၼၼ်ႉလႄႈ၊ၶဝ်ၸိူဝ်းဢၼ်တၢႆယဝ်ႉၸမ်ႉ၊ဢမ်ႇႁုလွင်ႈၵႃႈသင်လႃးလႃးယဝ်ႉ။ ၶဝ်ဢမ်ႇၸၢင်ႈၶၢမ်ႇဢဝ်ဢၵျူဝ်းဢၼ်လႂ်လႆႈ၊ပိူၼ်ႈဢွၼ်ၵၼ်လူင်လိုမ်းၶဝ်ပႅတ်ႈဢေႃႈ။-
ပုၼ်ႈၶဝ်ၼၼ်ႉတၢင်းႁၵ်ႉ၊တၢင်းၸင်း၊တၢင်းဢၼ်သီႈၵေႉႁေႈတႃၵႃႈမီးၼၼ်ႉတေႃႈလဵဝ်ၼႆႉလပ်ႉႁၢႆၵႂႃႇမူတ်းယဝ်ႉလႄႈၶဝ်တၵ်းဢမ်ႇၶိုၼ်းၶဝ်ႈပႃးၼႂ်းလွင်ႈတၢင်းဢၼ်ပဵၼ်ယူႇၼႂ်းလေႃးၵႃႉၼႆႉၼၼ်ႉထႅင်ႈသေပွၵ်ႈယဝ်ႉ။
ၵွပ်ႈပိူဝ်ႈၸိူဝ်ႉၼင်ႇၼႆလႄႈၵိၼ်တၢင်းၵိၼ်တၢင်းၶူပ်းမႂ်းလႄႈမူၼ်ႈပျေႃႇၸူမ်းသိူဝ်းၵႂႃႇတိၵ်းတိၵ်းတႃႉ။ သူတ်ႉၵိၼ်ၼမ်ႉမၢၵ်ႇၸပိတ်ႉမႂ်းလႄႈသိူဝ်းသႂၢင်ႇတႃႉ။ လွင်ႈတၢင်းၸိူဝ်းၼႆႉပဵၼ်ဢၼ်ထုၵ်ႇဢၼ်လီၵႃႈတီႈၽြႃးပဵၼ်ၸဝ်ႈဢေႃႈ။-
ႁႂ်ႈၶူဝ်းၼုင်ႈတၢင်းမႆမႂ်းၽိူၵ်ႇၶၢဝ်ယူႇသေႇသေႇသေၵမ်း။ ၵွၵ်းႁူဝ်မႂ်းၵေႃႈယႃႇပေႁႂ်ႈၼမ်ႉမၼ်းလႆႈယူတ်းလႆႈႁႅင်ႈသေၵမ်း။-
မူၼ်ႈပျေႃႇလူၺ်ႈမေးဢၼ်မႂ်းႁၵ်ႉၼၼ်ႉၼႂ်းၸူဝ်ႈဢသၢၵ်ႈဢၼတ်ႉတႃႉဢၼ်ၽြႃးပဵၼ်ၸဝ်ႈဢဵတ်းလူပၼ်တီႈမႂ်းၼႂ်းလေႃးၵႃႉၼႆႉၼၼ်ႉတဵမ်တဵမ်တႃႉ။ မူၼ်ႈပျေႃႇလူၺ်ႈမိုဝ်ႉဝၼ်းဢၼတ်ႉတႃႉမႂ်းၵွပ်ႈပိူဝ်ႈဢၼ်လွင်ႈတၢင်းၼႆႉပဵၼ်ပုၼ်ႈပဵၼ်တႃႇဢၼ်မႂ်းလႆႈၶၢမ်ႇဢဝ်ၵႃႈၼႂ်းၸူဝ်ႈဢၼ်မႂ်းၶတ်းၸႂ်ၵျူဝ်းၸႃးဢဝ်ႁႅင်းဢွၵ်ႇႁဵတ်းလႆႈမႃးၵႃႈၼႂ်းလေႃးၵႃႉၼႆႉၼၼ်ႉဢေႃႈ။-
ၵႃႈဢၼ်မႂ်းထုၵ်ႇလီႁဵတ်းၼၼ်ႉၶတ်းၸႂ်ၵျူဝ်းၸႃးဢဝ်ႁႅင်းဢွၵ်ႇလႄႈပွင်ႁဵတ်းတႃႉ။ လွင်ႈမၼ်းၸမ်ႉ၊ၵႃႈတီႈမိူင်းမရၼႃႉမိူင်းဢၼ်မႂ်းတၵ်းၵႂႃႇယူႇၼၼ်ႉဢမ်ႇမီးတၢင်းဢၼ်ပွင်ဢၼ်ႁဵတ်း၊ဢမ်ႇမီးတၢင်းၵျၢမ်ႇတၢင်းပွင်၊ဢမ်ႇမီးၺၢၼ်ႇ၊ဢမ်ႇမီးပိင်ႇၺႃႇလူင်ပႄႇ။
ၵဝ်သမ်ႉလႆႈႁုလွင်ႈတၢင်းဢၼ်ၼိုင်ႈထႅင်ႈၵႃႈၼႂ်းလေႃးၵႃႉၼႆႉၸမ်ႉ၊ၵေႃႉဢၼ်ၶုၼ်ႇလႅၼ်ႈဝႆးၼႃႇၼၼ်ႉပႄႉၼႂ်းပွႆးလႅၼ်ႈၶေႉၵၼ်လႆႈၵူႈပွၵ်ႈဢမ်ႇၸႂ်ႈ။ ၵေႃႉဢၼ်ႁတ်းႁၢၼ်ၼၼ်ႉပႄႉၼႂ်းၼႃႈသိုၵ်းလႆႈၵူႈပွၵ်ႈဢမ်ႇၸႂ်ႈ။ ၵေႃႉဢၼ်မီးပိင်ႇၺႃႇၼၼ်ႉလႆႈၵိၼ်ဢိမ်ႇၵိၼ်တဵမ်တႃႇသေႇဢမ်ႇၸႂ်ႈ။ ၵေႃႉဢၼ်ၺၢၼ်ႇလီၼၼ်ႉမီးၸေးၸိမ်ႇတႃႇသေႇဢမ်ႇၸႂ်ႈ။ ၵေႃႉဢၼ်လၵ်းလႅမ်ၼၼ်ႉလႆႈၼႃႈလႆႈတႃယူႇတႃႇသေႇဢမ်ႇၸႂ်ႈ။ ၶိင်ႇမၼ်းၶႃႇမၼ်းတင်းဢၶႂၢင်ႉတၢင်းဢၼ်သၢင်ႇထုၵ်ႇၼၼ်ႉထိုင်မႃးတီႈၶဝ်ၵူႈၵေႃႉဢေႃႈ။-
လိူဝ်သေၼၼ်ႉၵူၼ်းၸိုင်၊ဢမ်ႇၸၢင်ႈႁုၶိင်ႇႁုမိူဝ်ႈတူဝ်ၸဝ်ႈၵဝ်ႇ။ မိူၼ်ၸိူဝ်ႉၼင်ႇၼူၵ်ႉၵိုင်ႉၵၢင်ႉၸၢင်ႈၶမ်တူင်ႇႁႅဝ်ႉ၊ပႃၸၢင်ႈၶမ်ၵႃႈၼႂ်းၶႄၼၼ်ႉ၊ၵူၼ်းႁဝ်းၼႆႉၸၢင်ႈလႆႈၶမ်ၵႃႈၼႂ်းတူင်ႇႁႅဝ်ႉၼႂ်းၶိင်ႇၶႃႇဢၼ်ၽေးႁွတ်ႈမႃး၊ယၢမ်းမိူဝ်ႈဢၼ်ႁဝ်းဢမ်ႇထၢင်ႇဢမ်ႇထိူမ်ၼၼ်ႉဢေႃႈ။
ၵဝ်ထူပ်းႁၼ်လွင်ႈပိင်ႇၺႃႇပဵၼ်တၢင်းဢၼ်လီယွင်ႈယေႃးၵႃႈၼႂ်းလေႃးၵႃႉၼႆႉၸမ်ႉ၊-
မီးဝဵင်းဢွၼ်ႇဝဵင်းၼိုင်ႈဢၼ်မီးၵူၼ်းယူႇၵေႇၼႃႇၼၼ်ႉဢေႃႈ။ ၶုၼ်ႁေႃၶမ်းလူင်ပႃးၼိုင်ႈမႃးတိုၵ်းတေႃးဝဵင်းၼၼ်ႉဢေႃႈ။ မၼ်းလွမ်ႉဝဵင်းၼၼ်ႉဝႆႉသေယဝ်ႉ၊ၶိုင်ပွင်ႁႂ်ႈလႆႈၵိူၼ်ႇယႃႉလမ်းဝဵင်းၸိူဝ်းၼၼ်ႉဢေႃႈ။-
ၵႃႈၼႂ်းဝဵင်းၼၼ်ႉမီးၵူၼ်းၽၢၼ်ဢၼ်လၵ်းလႅမ်ၼႃႇၵေႃႉၼိုင်ႈလႄႈမၼ်းဢဝ်တင်းပိင်ႇၺႃႇမၼ်းၵႄႇသႄႇဢဝ်ဝဵင်းၼၼ်ႉသေဢေႃႈ။ ၵူၺ်းၵႃႈ၊ၽူႈလႂ်သေၵေႃႉသေၵူၼ်းဢမ်ႇၶုၵ်းၸႂ်လႆႈၶႆႈၸႂ်ထူပ်းၵူၼ်းၽၢၼ်ၵေႃႉၼၼ်ႉ။-
ၵဝ်ယၢမ်ႈလၢတ်ႈဝႃႈ၊ “ပိင်ႇၺႃႇယဵင်ႈၶႅၼ်းမျၢတ်ႈလီၼႃႇသေႁႅင်းတၼ်းၶူဝ်းဢေႃႈ၊” ဝႃႈၼႆသေၵေႃႈၵူၼ်းသမ်ႉၸၢင်ႈဢွၼ်ၵၼ်လူလၢႆတီႈပိင်ႇၺႃႇၵေႃႉဢၼ်ယၢၵ်ႈဢၼ်ၽၢၼ်ၼၼ်ႉလႄႈဢမ်ႇၶႂ်ႈဢွၼ်ၵၼ်ထွမ်ႇဢဝ်ၵႂၢမ်းမၼ်း။-
တၢင်းဢၼ်ဢွၼ်ၵၼ်ထွမ်ႇဢဝ်ၵႂၢမ်းၵူၼ်းဢၼ်မီးပိင်ႇၺႃႇဢၼ်လၢတ်ႈၼိမ်ၼိမ်ယဵၼ်ယဵၼ်ၼၼ်ႉယဵင်ႈၶႅၼ်းလီၼႃႇသေသဵင်ၸဝ်ႈၶုၼ်ဢၼ်ပၢဝ်ႇသေႃႇၵႃႈၼႂ်းၵႄႈၵၢင်ၶဝ်ၸိူဝ်းဢၼ်ငိူဝ်ႈငႃႉၼၼ်ႉဢေႃႈ။-
ပိင်ႇၺႃႇယဵင်ႈၶႅၼ်းလီၼႃႇသေၶိူင်ႈလၢၵ်ႈၼၢၵ်ႈသိုၵ်းဢေႃႈ။ ၵူၺ်းၵႃႈ၊ၵေႃႉဢၼ်ႁဵတ်းတုၸရိူၵ်ႈၼၼ်ႉၸၢင်ႈယႃႉၽဵဝ်ႈပႅတ်ႈလွင်ႈတၢင်းဢၼ်လီဢၼ်ငၢမ်းၼမ်ၼႃႇဢေႃႈ။
မႅင်းမုၼ်းဢၼ်တၢႆၼၼ်ႉႁႂ်ႈၼမ်ႉမၼ်းၼၢမ်ႇသႃႇတင်းတဝ်ႈတူႇၵႂႃႇမဵၼ်ၵႂႃႇဢေႃႈ။ တၢင်းဢၼ်ႁၢႆႉမိူၵ်ႈဢိတ်းဢွၼ်ႇၼိုင်ႈၼၼ်ႉၵေႃႈၸၢင်ႈႁႂ်ႈမုၼ်သရေႇပိင်ႇၺႃႇဢၼ်ထိူၵ်ႈၵႃႈထိူၵ်ႈၶၼ်ၼၼ်ႉလုၵႂႃႇဢေႃႈ။
ႁူဝ်ၸႂ်ၵေႃႉဢၼ်မီးပိင်ႇၺႃႇၼၼ်ႉမီးၵႃႈတီႈမိုဝ်းၶွၼ်ၶႂႃမၼ်းဢေႃႈ။ ႁူဝ်ၸႂ်ၵေႃႉဢၼ်ငိူဝ်ႈငႃႉၼၼ်ႉၸမ်ႉ၊မီးတီႈမိုဝ်းၶွၼ်သၢႆႉမၼ်းဢေႃႈ။-
မၼ်းၸၢင်ႈႁႂ်ႈတၢင်းဢၼ်ငိူဝ်ႈငႃႉၼၼ်ႉထၢင်ႇသႃးၵႃႈတီႈၵူၼ်းၼႃႈမႂ်ႇဢၼ်မၼ်းႁူပ်ႉထူပ်းၸွမ်းတႃႈၸွမ်းတၢင်းဢၼ်မၼ်းပႆၵႂႃႇၼၼ်ႉလႄႈ၊မၼ်းၸၢင်ႈၽုၺ်ႇဢွၵ်ႇမွၵ်ႇၼႄလွင်ႈဢၼ်တူဝ်ၸဝ်ႈၵဝ်ႇငိူဝ်ႈငႃႉၼၼ်ႉတီႈၵူႈၵေႃႉၵူႈၵူၼ်းဢေႃႈ။
ပေႃးၸဝ်ႈၶုၼ်မႂ်းၸႂ်မႆႈၶႂ်ႈၸႃႉမႂ်းယူႇၸိုင်၊ယႃႇပေယွၼ်းဢွၵ်ႇၵၢၼ်မႂ်းၼၼ်ႉ။ တၢင်းဢၼ်ယိူၼ်ႉၶၢမ်ႇၼၼ်ႉၸၢင်ႈၽေႇဢပျတ်ႈဢၼ်ယႂ်ႇၼႃႇၼၼ်ႉလႆႈဢေႃႈ။
လွင်ႈတၢင်းဢၼ်ႁၢႆႉဢၼ်ယုတ်ႈဢၼ်ၵဝ်လႆႈႁၼ်ၼႂ်းလေႃးၵႃႉၼႆႉၸိုင်၊တၢင်းဢၼ်ၽိတ်းပိူင်ႈဢၼ်ပဵၼ်မႃးၵႃႈတီႈၶုၼ်ၼၼ်ႉၸမ်ႉ၊-
ၵူၼ်းငိူဝ်ႈငႃႉတင်းလၢႆလႆႈၶၢမ်ႇတၢင်းဢၼ်ၶၢၼ်းဝႆႉၼႂ်းဢရႃႇၶုၼ်ဢၼ်မီးဢႃႇၼႃႇလႄႈၵူၼ်းမၢၵ်ႈၵူၼ်းမီးတင်းလၢႆလႆႈၼင်ႈၵႃႈတီႈဢၼ်တႅမ်ႇဢေႃႈ။-
ၵဝ်လႆႈႁၼ်ၶႃႈတင်းလၢႆၶီႇမႃႉလႄႈမူးမၢတ်ႈၽွင်းမိူင်းတင်းလၢႆလႆႈပႆတိၼ်ၵႂႃႇမိူၼ်ၸိူဝ်ႉၼင်ႇၶဝ်ပဵၼ်ၶႃႈၼၼ်ႉဢေႃႈ။
ပေႃးမႂ်းၶုတ်းၶုမ်ၶုတ်းလုၵ်းၸိုင်၊မႂ်းတၵ်းတူၵ်းၶဝ်ႈၼႂ်းၶုမ်ၼႂ်းလုၵ်းၼၼ်ႉလႄႈပေႃးမႂ်းယႃႉႁူဝ်ႉဝၢင်းပွင်ႇၸိုင်၊ငူးတၵ်းတွတ်ႇမႂ်းဢေႃႈ။-
ပေႃးမႂ်းႁဵတ်းၵၢၼ်ဢၼ်ၶုတ်းမၢၵ်ႇႁိၼ်ၸိုင်၊မၢၵ်ႇႁိၼ်တၵ်းႁဵတ်းႁႂ်ႈမႂ်းၸဵပ်းသႅပ်ႇဢေႃႈ။ ပေႃးမႂ်းၽႃႇၽိုၼ်းၵေႃႈတၵ်းလႆႈၶၢမ်ႇတၢင်းဢၼ်တိူဝ်ႉဢၼ်မၢတ်ႇဢေႃႈ။-
ပေႃးတႃမၢတ်ႇမႂ်းပုၵ်းလႄႈယင်းဢမ်ႇလပ်ႉၸိုင်၊မႂ်းတၵ်းလႆႈယဵင်ႈၶႅၼ်းဢဝ်ႁႅင်းဢွၵ်ႇၼမ်ဢေႃႈ။ တၢင်းဢၼ်မီးပိင်ႇၺႃႇလႄႈၶိုင်ပွင်ႁႅၼ်းထႃႈဝႆႉၼၼ်ႉယဵင်ႈၶႅၼ်းလီဢေႃႈ။-
ငူးၼၼ်ႉပေႃးဢမ်ႇပႆႇလႆႈႁဵတ်းႁႂ်ႈမၼ်းငႄႈလႄႈပေႃးမၼ်းသမ်ႉတွတ်ႇမႅၼ်ႈဢွၼ်တၢင်းၸိုင်၊ပုၼ်ႈမေႃငူးတေမီးဢၵျူဝ်းၵႃႈသင်။-
ၵႂၢမ်းဢၼ်ၵူၼ်းမီးပိင်ႇၺႃႇလၢတ်ႈၼၼ်ႉယုၵ်ႉမုၼ်သရေႇမၼ်းလႄႈ၊ၵူၼ်းငိူဝ်ႈငႃႉၸမ်ႉ၊လႆႈလုလႅဝ်လူၺ်ႈၵႂၢမ်းတူဝ်ၸဝ်ႈၵဝ်ႇဢေႃႈ။-
ငဝ်ႈၵႂၢမ်းဢၼ်မၼ်းလၢတ်ႈၼၼ်ႉပဵၼ်ၵႂၢမ်းဢၼ်ငိူဝ်ႈငႃႉလႄႈပၢႆၵႂၢမ်းမၼ်းသမ်ႉပဵၼ်ၵႂၢမ်းဢၼ်ယွင်ႇဢၼ်မႃႈလႄႈၸၢင်ႈႁဵတ်းဢပျတ်ႈဢေႃႈ။-
ၵူၼ်းငိူဝ်ႈငႃႉၼၼ်ႉၸၢင်ႈသူပ်းၼမ်ၵႂၢမ်းၼမ်ဢေႃႈ။ ၽူႈလႂ်ဢမ်ႇႁုလွင်ႈတၢင်းဢၼ်တၵ်းပဵၼ်မႃးၸိူဝ်ႉႁိုဝ်ၼၼ်ႉလႆႈ။ ဝၢႆးသေႁဝ်းတၢႆၵႂႃႇယဝ်ႉၼၼ်ႉ ၽူႈလႂ်ဢမ်ႇၸၢင်ႈလၢတ်ႈၼႄႁဝ်းလွင်ႈတၢင်းဢၼ်တၵ်းပဵၼ်မႃးၸိူဝ်ႉႁိုဝ်ၼၼ်ႉလႆႈ။
ၵူၼ်းငိူဝ်ႈငႃႉၸိုင်၊ၶတ်းၸႂ်ၵျူဝ်းၸႃးဢဝ်ႁႅင်းဢွၵ်ႇႁဵတ်းလူၺ်ႈတင်းၸႂ်မႆႈၸႂ်ႁွၼ်ႉလႄႈဢမ်ႇႁုသဵၼ်ႈတၢင်းဢၼ်ၵႂႃႇၸူးတီႈဝဵင်းၼၼ်ႉဢေႃႈ။
မိူင်းဢၼ်ၶုၼ်ႁေႃၶမ်းမၼ်းပဵၼ်ၶႃႈၵူၼ်းၸႂ်ႉ လႄႈမူးမၢတ်ႈၽွင်းမိူင်းမၼ်းတင်းလၢႆၸၢင်ႈႁဵတ်းပွႆးၵိၼ်ပွႆးၶူပ်းတင်းၶမ်ႈတင်းၶိုၼ်းၼၼ်ႉမီးဢႃႉမၢင်ႇၵလႃႇဢေႃႈ။-
မိူင်းဢၼ်ၶုၼ်ႁေႃၶမ်းမၼ်းပဵၼ်လုၵ်ႈၶုၼ်လုၵ်ႈၵွၼ်းလႄႈမူးမၢတ်ႈၽွင်းမိူင်းမၼ်းတင်းလၢႆၸၢင်ႈၵိၼ်ၸၢင်ႈၶူပ်းမိူဝ်ႈဢၼ်ၶိင်ႇမၼ်းထုၵ်ႇမႅၼ်ႈႁႂ်ႈလႆႈထႅင်ႈဢဵၼ်ထႅင်ႈႁႅင်းလႄႈဢမ်ႇႁႂ်ႈမဝ်းပူၼ်ႉမဝ်းလိူဝ်ၼၼ်ႉၸမ်ႉ၊မီးမၢင်ႇၵလႃႇဢေႃႈ။
ပေႃးၵူၼ်းၶၢၼ်ႉဢိူၼ်ၼႃႇၽႅဝ်လႄႈဢမ်ႇမႄးပွင်မႄးႁဵတ်းၸွမ်ႁိူၼ်းမၼ်းၸိုင်၊ႁိူၼ်းၼၼ်ႉၽူၼ်ၸၢင်ႈႁူဝ်ႈလႄႈၸၢင်ႈၽင်ႉဢုလႄႈလူမ်ႉပင်းၵႂႃႇဢေႃႈ။
ပွႆးၵိၼ်လဵင်ႉၵၼ်ၼၼ်ႉၸၢင်ႈႁႂ်ႈလႆႈမူၼ်ႈပျေႃႇဢေႃႈ။ ၼမ်ႉမၢၵ်ႇၸပိတ်ႉၵေႃႈၸၢင်ႈႁႂ်ႈလႆႈသႂၢင်ႇသိူဝ်းဢေႃႈ။ ၵူၺ်းၵႃႈ၊ပေႃးဢမ်ႇမီးငိုၼ်းၸိုင်၊ဢမ်ႇၸၢင်ႈလႆႈၵိၼ်သေၸိူဝ်ႉသေမဵဝ်း။
ယႃႇပေလၵ်ႉလွမ်တဵတ်ႇတဵတ်ႇလႄႈၶႃႉၸိုဝ်ႈၶၢႆသဵင်ၶုၼ်ႁေႃၶမ်းမႂ်း၊ဢိၵ်ႇတင်းယႃႇပေၶႃႉၸိုဝ်ႈၶၢႆသဵင်ၵူၼ်းမၢၵ်ႈၵူၼ်းမီးၵႃႈၼႂ်းလုၵ်းတီႈၼွၼ်းမႂ်း။ ၼူၵ်ႉၸၢင်ႈပႃးဢဝ်ၵႂၢမ်းဢၼ်မႂ်းလၢတ်ႈၼၼ်ႉၵႂႃႇသူင်ႇပၼ်တီႈၶဝ်ဢေႃႈ။
ဢဝ်တၢင်းၵိၼ်တၢင်းၶူပ်းမႂ်းထိမ်ႈတူၵ်းသႂ်ႇၵႃႈၼိူဝ်ၼႃႈၼမ်ႉတႃႉ။ ၶိင်ႇၵႃႇလႃႉႁိုင်ၼႃႇယဝ်ႉၸင်ႇမႂ်းတၵ်းလႆႈၶိုၼ်းထူပ်းၶိုၼ်းႁၼ်ဢေႃႈ။-
ဢဝ်ၽႄမႅင်ႇပၼ်တီႈၵူၼ်းၸဵတ်းၵေႃႉဢမ်ႇၵႃး၊တီႈၵူၼ်းပႅတ်ႇၵေႃႉၼၼ်ႉၵေႃႈၽႄမႅင်ႇပၼ်တႃႉ။ ၵွပ်ႈပိူဝ်ႈဢၼ်မႂ်းဢမ်ႇႁုလွင်ႈဢၼ်ၽေးႁၢႆႉဢၼ်လႂ်တၵ်းႁွတ်ႈထိုင်ၵႃႈၼိူဝ်လိၼ်မိူင်းၼၼ်ႉ။
တူၼ်ႈမႆႉၸိုင်၊မၼ်းလူမ်ႉၵႂႃႇၽၢႆႇလႂ်တၢင်းလႂ်သေဢမ်ႇဝႃႈ၊ၽၢႆႇဢၼ်မၼ်းလူမ်ႉၼၼ်ႉမၼ်းၵေႃႈမီးယူႇၸိူဝ်ႉၼင်ႇၼၼ်ဢေႃႈ။ မိူဝ်ႈဢၼ်မွၵ်ႇၵုမ်ႈၵၢမ်ႈမိုတ်ႈမႃးၼၼ်ႉၸၢင်ႈႁႂ်ႈၽူၼ်တူၵ်းဢေႃႈ။-
ပေႃးမႂ်းပႂ်ႉထႃႈၽူၼ်လူမ်းယူႇၸိုင်၊မႂ်းတေဢမ်ႇလႆႈၽုၵ်ႇလႆႈသွမ်ႈသေၸိူဝ်ႉသေပိူင်လႄႈဢမ်ႇလႆႈပၢတ်ႇဢဝ်သိမ်းဢဝ်သေၸိူဝ်ႉသေမဵဝ်း။-
ၸိူဝ်ႉၼင်ႇဢၼ်မႂ်းဢမ်ႇႁုသၢႆလူမ်းလႆႈ၊ဢမ်ႇၸၢင်ႈႁုတူဝ်ၶၼ်ႇထႃႇႁဵတ်းၸိူဝ်ႉၼင်ႇႁိုဝ်ပဵၼ်မႃးၵႃႈၼႂ်းတွင်ႉမႄႈမႂ်းလႆႈၼၼ်ႉ၊မႂ်းဢမ်ႇၸၢင်ႈႁုၽြႃးပဵၼ်ၸဝ်ႈႁဵတ်းၸိူဝ်ႉႁိုဝ်ၽၢၼ်ႇသၢင်းႁဵတ်းပဵၼ်ၵူႈၸိူဝ်ႉၵူႈပိူင်ၼၼ်ႉလႆႈ။-
ဝၢၼ်ႇၸိူဝ်ႉဝၢၼ်ႇၽၼ်းၶိင်ႇၵၢင်ၼႂ်တႃႉ။ ၶိင်ႇႁူဝ်ၶမ်ႈၵေႃႈဝၢၼ်ႇပိုၼ်တႃႉ။ လွင်ႈမၼ်းၸမ်ႉ၊မႂ်းဢမ်ႇႁုလွင်ႈဢၼ်ၵႃႈဢၼ်မႂ်းဝၢၼ်ႇၼၼ်ႉတၵ်းငွၵ်ႈလီႁိုဝ်၊ဢမ်ႇၼၼ်ၵေႃႈဢၼ်လႂ်တၵ်းငွၵ်ႈလီသေဢၼ်လႂ်ၼၼ်ႉလႆႈ။
တၢင်းဢၼ်လႆႈမူၼ်ႈပျေႃႇလႄႈၸူမ်းသိူဝ်းလူၺ်ႈသၢႆလႅတ်ႇၵၢင်ဝၼ်းၼၼ်ႉပဵၼ်ဢၼ်လီဢေႃႈ။-
ၸူမ်းသိူဝ်းလႄႈတၢင်ႇၵျေးၸူးတီႈတၢင်းဢၼ်မႂ်းဢသၢၵ်ႈလိပ်းယူႇၵူႈပီၵူႈပီၼၼ်ႉတႃႉ။ ၵူၺ်းၵႃႈ၊ဢႃႇယုဢသၢၵ်ႈမႂ်းယိုၼ်းယၢဝ်းၵႃႈႁိုဝ်သေၵေႃႈမီးတၢင်းဢၼ်ၶုၵ်းၸႂ်လႆႈၶႆႈၸႂ်ထူပ်းလွင်ႈဢၼ်ဢမ်ႇပေႃးႁိုင်ပေႃးၼၢၼ်းမႂ်းတၵ်းလႆႈတၢႆၵႂႃႇယူႇၼၼ်ႉတႃႉ။ ၵႃႈဢၼ်တၵ်းပဵၼ်မႃးၼၼ်ႉပဵၼ်ဢၼတ်ႉတႃႉလွၼ်ႉလွၼ်ႉဢေႃႈ။
ၵူၼ်းၼုမ်ႇၶဝ်႟။ မူၼ်ႈပျေႃႇလူၺ်ႈတၢင်းဢၼ်ဢသၢၵ်ႈယင်းၼုမ်ႇယင်းၵမ်ၼၼ်ႉတႃႉ။ ၵႃႈၼင်ႇဢၼ်ဢလူဝ်ႇၵၢင်ၸႂ်ၶႂ်ႈႁဵတ်းၼၼ်ႉ ႁဵတ်းၸွမ်းတႃႉ။ ၵူၺ်းၵႃႈ၊ၶုၵ်းၸႂ်လႆႈၶႆႈၸႂ်ထူပ်းလွင်ႈဢၼ်ၽြႃးပဵၼ်ၸဝ်ႈတၵ်းၸီႇယၢင်ႇၸွမ်းၵႃႈၼင်ႇဢၼ်မႂ်းႁဵတ်းၼၼ်ႉဢေႃႈ။
ယႃႇပေႁႂ်ႈႁူဝ်ၸႂ်မႂ်းလႆႈမႆႈၸႂ်လူၺ်ႈလွင်ႈတၢင်းသေၸိူဝ်ႉသေပိူင် ဢမ်ႇၼၼ်ယႃႇပေႁႂ်ႈလႆႈမီးတၢင်းဢၼ်ၸဵပ်းၸႂ်။ လွင်ႈမၼ်းၸမ်ႉ၊ဢသၢၵ်ႈမႂ်းတၵ်းၼုမ်ႇၼႅၼ်ႈယူႇႁိုင်ၼႃႇလူင်လၢင်ဢမ်ႇၸႂ်ႈ။
ပိူဝ်ႈၼႆလႄႈၶုၵ်းၸႂ်လႆႈၶႆႈၸႂ်ထူပ်းၸဝ်ႈဢၼ်ၽၢၼ်ႇသၢင်းႁဵတ်းပဵၼ်မႂ်းၼၼ်ႉၼႂ်းမိူဝ်ႈဢၼ်ဢသၢၵ်ႈမႂ်းယင်းၼုမ်ႇယင်းၵမ်၊ၸူဝ်ႈဢၼ်မိုဝ်ႉဝၼ်းဢၼ်တုၵ်ႉၶႃႉဢမ်ႇပႆႇႁွတ်ႈထိုင်၊ဢိၵ်ႇတင်းၶူပ်ႇပီယင်းဢမ်ႇပႆႇၸမ်မႃးမိူဝ်ႈဢၼ်တၵ်းလၢတ်ႈဝႃႈ၊ “ၵဝ်ယူႇဢမ်ႇပျေႃႇၵူၺ်း” ဝႃႈၼႆဢိၵ်ႇတင်း။-
ၸူဝ်ႈဢၼ်ၵၢင်ဝၼ်းတင်းဢၼ်လႅင်း၊ဢိၵ်ႇတင်းလိူၼ်တင်းလၢဝ်ဢမ်ႇပႆႇလပ်ႉႁၢႆၵႂႃႇ၊ၶိင်ႇဢၼ်ၽူၼ်တူၵ်းသေယဝ်ႉ၊မွၵ်ႇၵုမ်ႈဢမ်ႇပႆႇၶိုၼ်းၵၢမ်ႈမိုတ်ႈမႃးၼၼ်ႉတႃႉ။-
မိူဝ်ႈယၢမ်းၼၼ်ႉၶႅၼ်မိုဝ်းမႂ်းဢၼ်ႁႄႉၶႅၼ်မႂ်းယူႇၸိူဝ်းၼၼ်ႉတၵ်းသၼ်ႇသၼ်ႇသၢႆသၢႆလႄႈတိၼ်မႂ်းဢၼ်မိူဝ်ႈလဵဝ်ႁႅင်းယႂ်ႇယူႇၼႆႉ တၵ်းႁႅင်းဢူၼ်ႈၵႂႃႇဢေႃႈ။ ၶဵဝ်ႈမႂ်းတၵ်းမီးၵေႇၼႃႇလႄႈဢမ်ႇၸၢင်ႈၵဵဝ်ႉတၢင်းၵိၼ်တၢင်းၶူပ်းမႂ်း၊မၢၵ်ႇတႃမႂ်းမူဝ်းလႄႈဢမ်ႇၸၢင်ႈႁၼ်ၸႅင်ႈလႆႈယဝ်ႉဢေႃႈ။-
ႁူမႂ်းတၵ်းၼူၵ်ႇလႄႈဢမ်ႇၸၢင်ႈငိၼ်းသဵင်ၵႃႈတီႈၵၢင်တႃႈၵၢင်တၢင်းလႂ်။ မႂ်းတၵ်းဢမ်ႇငိၼ်းသဵင်မၢၵ်ႇႁိၼ်လူၺ်ဢၼ်ၶိုတ်ႈယူႇလႂ်၊သဵင်တူႇရိယႃႇဢၼ်ႁႆႇယူႇလဵတ်းယူႇလႂ်၊ၵူၺ်းၵႃႈ၊သဵင်ၼူၵ်ႉသဵင်ၼူလႂ်တၵ်းပူၵ်းမႂ်းတိုၼ်ႇဢေႃႈ။-
မႂ်းတၵ်းၵူဝ်ႁႄတီႈယူႇဢၼ်သုင်လႂ်လႄႈၵူဝ်ထူပ်းၽေးၼႂ်းတၢင်းဢၼ်ပႆၵႂႃႇပႆမႃးၼၼ်ႉဢေႃႈ။ ၶူၼ်ႁူဝ်မႂ်းတၵ်းႁွၵ်ႇတၵ်းၶၢဝ်လႄႈတၵ်းၽိုၼ်ႉတူဝ်ၽိုၼ်ႉၶိင်းတူဝ်ၸဝ်ႈၵဝ်ႇယၢပ်ႇၼႃႇသေယဝ်ႉ၊ဢလူဝ်ႇသၢၼ်ႇတႃႉတၢင်းဢၼ်ၶႂ်ႈႁဵတ်းၶႂ်ႈသၢင်ႈၼၼ်ႉတၵ်းသုတ်ႈတၵ်းယွမ်းၵႂႃႇဢေႃႈ။ လွင်ႈမၼ်းၸမ်ႉ၊ႁဝ်းယင်းတိုၵ်ႉၵႂႃႇၸူးတီႈယူႇထႃႇဝရႃႉႁဝ်းယူႇလႄႈၶဝ်ၸိူဝ်းဢၼ်ၶၢင်းၶီၶၢင်းၽၢၼ်ၼၼ်ႉဢွၼ်ၵၼ်လႄႇၵႂႃႇၸွမ်းသဵၼ်ႈတၢင်းယူႇဢေႃႈ။-
ၸူဝ်ႈဢၼ်မႆငိုၼ်းဢမ်ႇပႆႇၶၢတ်ႇ၊ၵွၵ်းၶမ်းဢမ်ႇပႆႇတႅၵ်ႇ၊ပုင်းၼမ်ႉဢမ်ႇပႆႇႁူဝ်ႈပႆႇပွင်ႇၵႃႈတီႈၼမ်ႉဢွၵ်ႇႁူး၊ၵူင်းပၼ်ႇၼမ်ႉဢမ်ႇပႆႇႁၵ်းၵႃႈတီႈႁိမ်းၼမ်ႉမေႃႇၼၼ်ႉလႄႈ၊-
ၸူဝ်ႈဢၼ်မုၼ်ႈလိၼ်ဢမ်ႇပႆႇၶိုၼ်းၵႂႃႇၸူးတီႈယူႇၵဝ်ႇၵဝ်ႇမၼ်း၊ဝိၺိၺ်ႇဢမ်ႇပႆႇၶိုၼ်းၵႂႃႇၸူးတီႈၽြႃးပဵၼ်ၸဝ်ႈ၊ၸဝ်ႈဢၼ်ပၼ်မႃးၼၼ်ႉၸိုင်၊ၶုၵ်းၸႂ်လႆႈၶႆႈၸႂ်ထူပ်းမၼ်းၸဝ်ႈတႃႉ။
သြႃႇလူင်မေႃပိင်ႇၺႃႇႁေႃးလၢတ်ႈထမ်ႇမႃႉတေႇသၼႃႇလႄႈဝႃႈ၊ “ဢၼတ်ႉတႃႉလွၼ်ႉလွၼ်ႉ၊ပဵၼ်ဢၼတ်ႉတႃႉလွၼ်ႉလွၼ်ႉဢေႃႈ။ လွင်ႈတၢင်းၵူႈၸိူဝ်ႉၵူႈပိူင်ပဵၼ်ဢၼတ်ႉတႃႉဢေႃႈ၊” ဝႃႈၼင်ႇၼႆဢေႃႈ။
ၵွပ်ႈပိူဝ်ႈဢၼ်သြႃႇလူင်မေႃပိင်ႇၺႃႇၼႆႉပဵၼ်ၵေႃႉဢၼ်မီးပိင်ႇၺႃႇလႄႈမၼ်းမီးဢလေႉဢၼ်သင်ႇသွၼ်ပၼ်တၢင်းႁုတၢင်းမေႃတီႈပရိၵ်ႈသၢတ်ႈတင်းလၢႆဢေႃႈ။ မၼ်းသပ်းႁႃဢဝ်သမ်ႇမႃႇတြႃးလႄႈ တႅမ်ႈမၢႆဝႆႉၵႂၢမ်းသုၵ်ႉတၢမ်ႇၼမ်ၼႃႇဢေႃႈ။-
သြႃႇလူင်မေႃပိင်ႇၺႃႇၼႆႉႁႃဢဝ်ၵႂၢမ်းဢၼ်လီထွမ်ႇလီငိၼ်းလႄႈတႅမ်ႈၵႂၢမ်းသမ်ႇမႃႇဝႆႉသိုဝ်ႈသိုဝ်ႈတေႃႇတေႃႇဢေႃႈ။-
ၵႂၢမ်းၵူၼ်းမီးပိင်ႇၺႃႇၼၼ်ႉမိူၼ်ၵၼ်တင်းၶွၼ်ႉလႅမ်ဢၼ်ၵူၼ်းလဵင်ႉသူဝ်းၶဝ်ႁေႃႈၽုင်သူဝ်းၼၼ်ႉလႄႈၵႂၢမ်းသုၵ်ႉတၢမ်ႇဢၼ်သိမ်းဝႆႉႁွမ်းဝႆႉၸိူဝ်းၼၼ်ႉမၼ်ႈၶိူင်ႇၵိုမ်းၼႃႇမိူၼ်ၵၼ်တင်းလဵၵ်းလႅမ်ဢၼ်တွၵ်ႇၸပ်းသႂ်ႇဝႆႉၼၼ်ႉဢေႃႈ။ ပဵၼ်ၵႂၢမ်းၽြႃးပဵၼ်ၸဝ်ႈဢၼ်ဝႃႈ၊ၸဝ်ႈလဵင်ႉသူဝ်းလူင်ၼၼ်ႉပၼ်ဝႆႉတီႈႁဝ်းဢေႃႈ။
လုၵ်ႈၸၢႆးၵဝ်႟။ လွင်ႈတၢင်းဢၼ်လီပႂ်ႉၵမ်ပႂ်ႉၸွမ်းၼၼ်ႉယင်းမီးထႅင်ႈယူႇလူးၵွၼ်ႇဢေႃႈ။ တၢင်းဢၼ်တၵ်းဢွၼ်ၵၼ်ႁဵတ်းလိၵ်ႈႁဵတ်းလၢႆးၼၼ်ႉမီးၼမ်ၼႃႇလႄႈဢမ်ႇသဵင်ႈဢမ်ႇမူတ်းလႆႈ၊တၢင်းဢၼ်ၶတ်းၸႂ်သေလႄႈသွၼ်ဢဝ်ၼမ်ၼႃႇၼၼ်ႉၵေႃႈပဵၼ်တၢင်းဢၼ်ႁႂ်ႈတူဝ်ၵႃႇယႃႉႁိူဝ်ႉၼူၼ်းဢေႃႈ။
ၵႂၢမ်းဢၼ်ပဵၼ်ႁူဝ်ႁုပ်ႈမၼ်းၸမ်ႉ၊ၵူဝ်ႁႄၽြႃးပဵၼ်ၸဝ်ႈလႄႈပႂ်ႉၵမ်ပႂ်ႉၸွမ်းပိင်းၺၢပ်ႈမၼ်းၸဝ်ႈတင်းလၢႆတႃႉ။ လွင်ႈတၢင်းၼႆႉပဵၼ်ႁူဝ်ႁုပ်ႈလွင်ႈတၢင်းဢၼ်ၸၢပ်ႈသႅင်ႇၵၼ်တင်းၵူၼ်းဢေႃႈ။-
လွင်ႈမၼ်းၸမ်ႉ၊ၽြႃးပဵၼ်ၸဝ်ႈတၵ်းၸီႇယၢင်ႇၵႃႈဢၼ်ႁဝ်းႁဵတ်းၵူႈၸိူဝ်ႉၵူႈပိူင်ၸႃႉၸဵမ်မဵဝ်းဢၼ်သိူင်ႇဝႆႉဢမ်ဝႆႉလႂ်၊ဢိၵ်ႇတင်းမဵဝ်းလီမဵဝ်းၸႃႉၵူႈၸိူဝ်ႉၵူႈပိူင်ၼၼ်ႉဢေႃႈ။ ၵျၢမ်းတေႇသၼႃႇယဝ်ႉယဝ်ႉဢေႃႈ။
တၢင်းဢၼ်ႁဵတ်းၵႂၢမ်း သေႃးလမုၼ်ႇ၊ ဢၼ်လီထွမ်ႇလီငိၼ်းသေပိူၼ်ႈၼၼ်ႉ။
ႁႂ်ႈသီႇသူပ်းၸဝ်ႈၸုပ်ႇၼူမ်ၶႃႈၼၢင်း သေၵမ်းလူၺ်ႈ၊ မႅတ်ႈတႃႇၸဝ်ႈၼၼ်ႉယဵင်ႈၶႅၼ်းလီၼႃႇသေ ၼမ်ႉမၢၵ်ႇၸပိတ်ႉဢေႃႈ။
ၼမ်ႉမၼ်းၸဝ်ႈဢၼ်ၸဝ်ႈတႃးၼၼ်ႉ၊ ပဵၼ်ဢၼ်ႁွမ်ဢၼ်ႁူၺ်းၼႃႇလႄႈ ၼႃႇမႃႉၸိုဝ်ႈသဵင်ၸဝ်ႈၵေႃႈ၊ပဵၼ် ၸိူဝ်ႉၼင်ႇၼမ်ႉမၼ်းၼၢမ်ႇသႃႇဢၼ်သွၼ်းလေႃႇဢေႃႈ။ ပိူဝ်ႈၼႆလႄႈသၢဝ်ၵၼ်ႇၺႃႇတင်းလၢႆ ဢွၼ်ၵၼ်ႁၵ်ႉပႅင်းၸဝ်ႈဢေႃႈ။
ၸူဝ်းဢဝ်ၶႃႈၼၢင်းသေၵမ်း။ ၶႃႈၼၢင်း တၵ်းလႅၼ်ႈၸွမ်းၸဝ်ႈဢေႃႈ။ ၸဝ်ႈႁဝ်းပဵၼ်ၸဝ်ႈၶုၼ်လူင်ၶႃႈၼၢင်းလႄႈ ဢဝ်ၶႃႈၼၢင်းၶဝ်ႈၸူးၼႂ်းႁွင်ႈႁိူၼ်းၸဝ်ႈ သေၵမ်း၊ ႁဝ်းတၵ်းဢွၼ်ၵၼ်မူၼ်ႈပျေႃႇလူၺ်ႈၵၼ်ယူႇလႄႈ ၵိၼ်သူတ်ႉၼမ်ၼမ်ႁႂ်ႈတူဝ်ႁဝ်းတူၵ်းၸူမ်ယူႇ ၼႂ်းတၢင်းႁၵ်ႉတၢင်းပႅင်းၵၼ်သေၵမ်း၊ တၢင်းဢၼ်မႄႈယိင်းတင်းလၢႆဢွၼ်ၵၼ်ႁၵ်ႉပႅင်း ၸဝ်ႈၼၼ်ႉဢမ်ႇပဵၼ်တီႈလီဢၢမ်းၶႃႈ။
မႄႈယိင်းဝဵင်း ယေႇရုသလႅမ်ႇ၊ တင်းလၢႆတီႈၶႃႈ၊ ပိၵ်ႉသမ်ႉၶႃႈၼၢင်းမီးၽိဝ်ၼိူဝ်ႉဢၼ်လမ်သေၵေႃႈ၊ပဵၼ်ဢၼ်လီႁၵ်ႉလီပႅင်းတီႈၶႃႈဢေႃႈ။ လမ်မိူၼ်သုမ်ႉထဵင်ႁၢတ်ႇသၢႆး ၵေႇတႃႇ၊ ၸိူဝ်းၼၼ်ႉသေၵေႃႈ၊ ယင်းႁၢင်ႈလီႁၢင်ႈငၢမ်းမိူၼ်ၽႃႈၵင်ႈၵႃႈၼႂ်း ႁေႃၶမ်း သေႃးလမုၼ်ႇ၊ ဢေႃႈ။
ယႃႇပေဢွၼ်ၵၼ်ထၢင်ႇလဵၵ်ႉၶႃႈၼၢင်း၊ ၵွပ်ႈပိူဝ်ႈလႆႈၶၢမ်ႇတၢင်းဢၼ်တၢၵ်ႇလႅတ်ႇလႄႈ ၽိဝ်ၼိူဝ်ႉၽိဝ်ၼင်လမ်ၵႂႃႇၼၼ်ႉသေၵမ်း၊ ပီႈဢၢႆႈၼွင်ႉၸၢႆးၶႃႈၼၢင်းတင်းလၢႆ ဢွၼ်ၵၼ်ၸႂ်မႆႈၶႂ်ႈၸႃႉတီႈၶႃႈၼၢင်းလႄႈ ႁႂ်ႈၶႃႈၼၢင်းၵႂႃႇႁဵတ်းၵၢၼ် ၵႃႈၼႂ်းသူၼ်မၢၵ်ႇၸပိတ်ႉဢေႃႈ။ တႃႇတေလုမ်းလႃးသူၼ်မၢၵ်ႇတူဝ်ၸဝ်ႈၵဝ်ႇၸိုင်၊ယင်းဢမ်ႇမီးဢၶိင်ႇလႃးလႃး။
ၸဝ်ႈဢၼ်ၶႃႈၼၢင်းႁၵ်ႉပႅင်းၼႆႉ႟။ မွၵ်ႇလၢတ်ႈတီႈၶႃႈၼၢင်းလွင်ႈဢၼ် ၸဝ်ႈလဵင်ႉထိင်းသူဝ်းၸဝ်ႈယူႇၵႃႈတီႈလႂ်၊ ၼႂ်းၶိင်ႇၵၢင်ဝၼ်းတဵင်ႈၼၼ်ႉ သမ်ႉဢဝ် ၽုင်သူဝ်းၸဝ်ႈႁဝ်းသွၼ်ႈႁူမ်ႈယူႇၵႃႈတီႈလႂ်၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၶႃႈၼၢင်းတၵ်းလႆႈ ပဵၼ်မိူၼ်ၸိူဝ်ႉၼင်ႇမႄႈယိင်းဢၼ်ဢဝ် ၽႃႈႁူမ်ႇၼႃႈသေလႄႈ၊ ယူႇၵႃႈတီႈႁိမ်းၽုင်သူဝ်းၵေႃႉသႄႈ ၸဝ်ႈႁဝ်းတင်းလၢႆၼၼ်ႉတီႈၶႃႈ။
ဢူဝ်းၼၢင်းဢၼ်ႁၢင်ႈလီၼႃႇသေပိူၼ်ႈၼႂ်း မႄႈယိင်းတင်းလၢႆၼႆႉ႟။ ပေႃးမႂ်းၼၢင်းယင်းဢမ်ႇႁုတီႈဢၼ်ၵဝ်ယူႇၸိုင်၊ ၸွမ်းႁွႆးတိၼ်ၽုင်သူဝ်း၊ၽုင်ပႄႉၵႂႃႇလႄႈ လဵင်ႉလူၽုင်သူဝ်း၊ၽုင်ပႄႉဢွၼ်ႇမႂ်းၼၢင်း တင်းလၢႆယူႇ၊ ၵႃႈႁိမ်းသုမ်ႉထဵင်ၵူၼ်းလဵင်ႉသူဝ်းလဵင်ႉပႄႉ ၸိူဝ်းၼၼ်ႉတႃႉ။
ၼၢင်းဢၼ်ၵဝ်ႁၵ်ႉၼႃႇသေပိူၼ်ႈၼႆႉ႟။ ၵဝ်တၵ်း ဢဝ်မႂ်းၼၢင်းႁဵတ်းပုင်ႇတႅၵ်ႈၵၼ်တင်း၊ မႃႉဢၼ်ႁၢင်ႈႁႅၼ်းဝႆႉတီႈလေႃႉရထႃး ၶုၼ်ႁေႃၶမ်း ၽႃႇရေႃး၊ ၼၼ်ႉဢေႃႈ။
ၶူၼ်ႁူဝ်မႂ်းၼၢင်းပဵၼ်ဢၼ်ႁၢင်ႈလီႁၢင်ႈငၢမ်းၼႃႇၵႃႈတီႈၵႅမ်ႈမႂ်းၼၢင်းလႄႈ ယွႆႉၸွမ်းၵၢၼ်ႈၶေႃးမႂ်းၼၢင်းမိူၼ်သႅင်ပူးလႄး ပဵၼ်ၶိူဝ်းပဵၼ်ၶိူဝ်းၼၼ်ႉဢေႃႈ။
ႁဝ်းသမ်ႉတၵ်းႁဵတ်းသၢႆသွႆႈၶမ်းဢၼ်သႂ်ႇမွၵ်ႇငိုၼ်း၊ ႁၢင်ႈၶိူင်ႈပၼ်မႂ်းၼၢင်းဢေႃႈ။
ၼႂ်းမိူဝ်ႈဢၼ်ၸဝ်ႈၶုၼ်လူင်တိုၵ်ႉၼွၼ်းဢိင်ယူႇၵႃႈၼိူဝ်ၵူႇၸဝ်ႈၼၼ်ႉ၊ ဢၢႆၼမ်ႉႁွမ်ၵဝ်ႁွမ်ႁူၺ်းယူႇၵႃႈၼႂ်း လူမ်းဢေႃႈ။
ၸဝ်ႈဢၼ်ၵဝ်ႁၵ်ႉပႅင်းၼႃႇၼၼ်ႉမီးဢၢႆႁွမ် ၼၢမ်ႇသႃႇမုရၼ်ႇ၊ ယၢမ်းမိူဝ်ႈဢၼ်ၸဝ်ႈဢိင်ယူႇၼႂ်းဝၢင်ႈႁူဝ်ဢူၵ်း ၶႃႈၼၢင်းဢေႃႈ။
ၸဝ်ႈဢၼ်ၵဝ်ႁၵ်ႉပႅင်းၼႃႇၼၼ်ႉပဵၼ်ၸိူဝ်ႉၼင်ႇမွၵ်ႇႁဵဝ်းငိုၼ်း၊ ဢၼ်တုမ်ႇမၼ်းၵီႈယူႇၵႃႈၼႂ်းသူၼ် မၢၵ်ႇၸပိတ်ႉ ဢႅၼ်ႇၵေးတိ၊ ၼၼ်ႉဢေႃႈ။
ၼၢင်းဢၼ်ၵဝ်ႁၵ်ႉၼႃႇၼႆႉ႟။ မႂ်းၼၢင်း ႁၢင်ႈလီၽၢင်လီၼႃႇဢေႃႈ။ မၢၵ်ႇတႃမႂ်းၼၢင်းသႂ်လီလူၺ်ႈတၢင်းႁၵ်ႉ မႅတ်ႈတႃႇဢေႃႈ။
ၸဝ်ႈဢၼ်ၶႃႈၼၢင်းႁၵ်ႉၼႃႇၼႆႉ႟။ ႁၢင်ႈၽၢင်ၸဝ်ႈႁဝ်းႁၢင်ႈလီလႄႈပဵၼ်ဢၼ်လီႁၵ်ႉလီပႅင်းၼႃႇတီႈၶႃႈဢေႃႈ။ ယိူဝ်ႈၶဵဝ်ၸိဝ်းငိဝ်းၸိူဝ်းၼၼ်ႉတၵ်းပဵၼ် ၵူႇၼွၼ်းႁဝ်းဢေႃႈ။
ၶိုဝ်ႇႁိူၼ်းႁဝ်းၸိူဝ်းၼၼ်ႉဢဝ်တင်းမႆႉဢႃႇရိတ်ႉ ႁဵတ်းဝႆႉလႄႈ ၵွၼ်ႁိူၼ်းတင်းလၢႆပဵၼ်မႆႉပႅၵ်ႇ လွၼ်ႉလွၼ်ႉဢေႃႈ။
ၶႃႈၼၢင်းၸိုင်၊ပဵၼ်မွၵ်ႇယႃႈထိူၼ်ႇဢၼ်မီး ၵႃႈတီႈထူင်ႉ သႃႇရုၼ်ႇ၊ ပဵၼ်မွၵ်ႇႁဵဝ်းငိုၼ်းဢၼ်ဢွၵ်ႇတီႈႁူၺ်ႈတီႈႁွင်ႈ တီႈၶႃႈဢေႃႈ။
မိူၼ်ၸိူဝ်ႉၼင်ႇဢၼ်မွၵ်ႇႁဵဝ်းငိုၼ်းဢွၵ်ႇၵႃႈၼႂ်းပႃႇယုမ်းၼၢမ်ၼၼ်ႉ၊ မႂ်းၼၢင်းဢၼ်ၵဝ်ႁၵ်ႉၼႃႇၼႆႉၵေႃႈ ပဵၼ်ဢၼ်ႁၢင်ႈလီၼႃႇၵႃႈၼႂ်းၵႄႈ မႄႈယိင်းတင်းလၢႆဢေႃႈ။
မိူၼ်ၸိူဝ်ႉၼင်ႇတူၼ်ႈမၢၵ်ႇဝၢၼ်ဢၼ်မီး ၵႃႈၼႂ်းပႃႇမႆႉၸိင်ၼၼ်ႉ၊ ၸဝ်ႈဢၼ်ၶႃႈႁၵ်ႉၼႃႇၼႆႉၵေႃႈ၊ပဵၼ်ၵႃႈၼႂ်း မုၵ်ႉၼႂ်းၸိူဝ်းၵူၼ်းၸၢႆးတင်းလၢႆဢေႃႈ။ တၢင်းဢၼ်ၼင်ႈၵႃႈတႂ်ႈႁူမ်ႈတူၼ်ႈမႆႉၼၼ်ႉ လီမူၼ်ႈလီပျေႃႇၼႃႇပုၼ်ႈၶႃႈလႄႈ မၢၵ်ႇမၼ်းၵေႃႈပဵၼ်ဢၼ်ဝၢၼ်ၼႃႇ ၸဵမ်းၼႃႇတီႈၶႃႈဢေႃႈ။
ၸဝ်ႈၼၼ်ႉပႃးၶႃႈၶဝ်ႈၵႃႈၼႂ်းပွႆးလဵင်ႉ ပွႆးလူၸဝ်ႈၼၼ်ႉလႄႈ ဢဝ်တုင်းမုင်းႁူမ်ႇၵႃႈၼိူဝ်ၶႃႈၼၼ်ႉပဵၼ် တၢင်းႁၵ်ႉမႅတ်ႈတႃႇဢေႃႈ။
ဢဝ်တင်းၶႅပ်းမၢၵ်ႇၸပိတ်ႉလႄႈၸွႆႈႁႅင်း ထႅမ်ႁႅင်းၶႃႈသေယဝ်ႉ၊ ဢဝ်တင်းမၢၵ်ႇဝၢၼ်လဵင်ႉလူၶႃႈလႄႈ၊ ႁႂ်ႈၸိုၼ်ႈမႃးၶႅၼ်းမႃးသေၵမ်း၊ ၵွပ်ႈပိူဝ်ႈဢၼ်ၶႃႈႁႅင်းၸွပ်ႈၵႂႃႇလူၺ်ႈ တၢင်းႁၵ်ႉမႅတ်ႈတႃႇၼၼ်ႉဢေႃႈ။
မိုဝ်းၶွၼ်သၢႆႉၸဝ်ႈႁွင်းဢဝ်ၵွၵ်းႁူဝ်ၶႃႈလႄႈ မိုဝ်းၶွၼ်ၶႂႃသမ်ႉၵွတ်ႇၵဵဝ်ႈၶႃႈယူႇဢေႃႈ။
ၼၢင်းယိင်းဝဵင်း ယေႇရုသလႅမ်ႇ၊ ၶဝ်႟။ ၶႃႈဢဝ်တိုင်ဢိၵ်ႇတင်းၸၢတ်ႇၶၢႆးလႂ်ဢၼ်ယူႇ ၵႃႈၼႂ်းထိူၼ်ႇၼႂ်းၶိူဝ်းၼၼ်ႉ၊ တိူင်ႇၵၢဝ်ႇၵတိဝႃႈ၊ႁႂ်ႈသူဢမ်ႇယႃႉဢမ်ႇၵဝ်း တၢင်းႁၵ်ႉႁဝ်းၼၼ်ႉဢေႃႈ။
ၶႃႈလႆႈငိၼ်းသဵင်ၸဝ်ႈဢၼ်ၶႃႈႁၵ်ႉပႅင်း ၼႃႇၼၼ်ႉဢေႃႈ။ မၼ်းၵျွၵ်းဝႅၼ်ၶၢမ်ႈလွႆလူင်တင်းလၢႆ၊ၵျွၵ်းၶၢမ်ႈ လွႆဢွၼ်ႇတင်းလၢႆလႄႈမႃးၸူးတီႈၶႃႈဢေႃႈ။
ၸဝ်ႈဢၼ်ၶႃႈႁၵ်ႉပႅင်းၼႃႇၼၼ်ႉမိူၼ်တိုင်မိူၼ်ၸၢတ်ႇၶၢႆးဢေႃႈ။ မၼ်းၸၢင်ႈၸုၵ်းယူႇၽၢႆႇၼွၵ်ႈၽႃလႄႈ လွမ်တူၺ်းၶဝ်ႈမႃးၵႃႈၼႂ်းႁူးလၢင်းတဵၼ်ယူႇ၊ ၼႄပျႃးတူဝ်မၼ်းၸဝ်ႈသိုဝ်ႈသိုဝ်ႈတီႈၵႄႈမႂ် ႁူးလၢင်းတဵၼ်ဢေႃႈ။
ၸဝ်ႈဢၼ်ၶႃႈႁၵ်ႉပႅင်းၼႃႇၼၼ်ႉ လၢတ်ႈတီႈၶႃႈလႄႈဝႃႈ၊ ၼၢင်းဢၼ်ၵဝ်ႁၵ်ႉၼႃႇၼႆႉ႟။ မႃးတႃႉ။ ၼၢင်းဢၼ်ၵဝ်ႁၵ်ႉပႅင်း႟။ ၸွမ်းလူၺ်ႈ ၵၼ်တင်းၵဝ်မႃးတႃႉ။
ပူၼ်ႉၶိင်ႇၵတ်းယဝ်ႉလႄႈၽႃႉၽူၼ်ၵေႃႈ ယိုတ်းထၢတ်ႇၵႂႃႇယဝ်ႉ။
မွၵ်ႇတင်းလၢႆဢွၼ်ၵၼ်ၵီႈၵႃႈတီႈဝၢၼ်ႈၼွၵ်ႈၼႃးပၢင်ႇယဝ်ႉ၊ ႁွတ်ႈထိုင်ၶိင်ႇဢၼ်ႁွင်ႉမေႃႁွင်ႉၵႂၢမ်းလႄႈ လႆႈငိၼ်းသဵင်ၼူၵ်ႉတူႈၵႃႈၼႂ်းႁႆႈၼႂ်းၼႃးယဝ်ႉ။
မၢၵ်ႇလိူဝ်ႇဢၼ်လိပ်းဢၼ်ၶဵဝ်တင်းလၢႆၵေႃႈ သုၵ်းယဝ်ႉ၊ ဢၢႆႁွမ်မွၵ်ႇတူၼ်ႈၶိူဝ်းမၢၵ်ႇၸပိတ်ႉၵေႃႈ၊ ၸွတ်ႇတူဝ်ႈၵႂႃႇၵႃႈၼႂ်းလူမ်းယဝ်ႉ၊ ပိူဝ်ႈၼႆလႄႈၼၢင်းဢၼ်ၵဝ်ႁၵ်ႉၼႃႇၼႆႉ႟၊ မႃးတႃႉ၊ ၼၢင်းဢၼ်ၵဝ်ႁၵ်ႉပႅင်း႟။ ၸွမ်းလူၺ်ႈ ၵၼ်တင်းၵဝ်မႃးတႃႉ။
မႂ်းၼၢင်းဢၼ်ပဵၼ်ၸိူဝ်ႉၼင်ႇၼူၵ်ႉတူႈဢၼ်တဵတ်ႇသွၼ်ႈယူႇၵႃႈၼႂ်းငိူပ်ႇႁိၼ်ၽႃႁိၼ်ၼႆႉ႟။ ႁႂ်ႈၵဝ်လႆႈႁၼ်ၼႃႈမႂ်းၼၢင်းသေၵမ်း၊ႁႂ်ႈၵဝ်လႆႈ ငိၼ်းသဵင်ဝၢၼ်သဵင်လီမႂ်းၼၢင်းသေၵမ်း။
တိဢဝ်မႃလိၼ်တင်းလၢႆ၊ဢိၵ်ႇတင်း မႃလိၼ်ဢွၼ်ႇတင်းလၢႆ၊ ၸူဝ်ႈဢၼ်ၶဝ်ဢမ်ႇပႆႇတၼ်းယႃႉတူၼ်ႈၶိူဝ်း မၢၵ်ႇၸပိတ်ႉႁဝ်း၊ ၸိူဝ်းဢၼ်မီးတၢင်းဢၼ်မွၵ်ႇမွၵ်ႇယူႇ ၼၼ်ႉတႃႉႁဝ်း။
ၸဝ်ႈဢၼ်ၶႃႈႁၵ်ႉပႅင်းၼႃႇၼၼ်ႉပဵၼ်တီႈဢၼ်ၶႃႈပိူင်ႇဢေႃႈ။ ၶႃႈၵေႃႈပဵၼ်တီႈဢၼ်မၼ်းၸဝ်ႈပိူင်ႇဢေႃႈ။ မၼ်းၸဝ်ႈလဵင်ႉၽုင်သူဝ်းမၼ်းၸဝ်ႈၵႃႈၼႂ်း ၵႄႈမွၵ်ႇႁဵဝ်းငိုၼ်းဢေႃႈ။
ၸူဝ်ႈဢၼ်မိူင်းဢမ်ႇပႆႇလႅင်းလႄႈငဝ်းလပ်းသိင်ႇ ဢမ်ႇပႆႇပူၼ်ႉၵႂႃႇၼၼ်ႉ၊ၸဝ်ႈဢၼ်ၶႃႈၼၢင်း ႁၵ်ႉပႅင်းၼႃႇတီႈၶႃႈ႟။ ပွၵ်ႈၶိုၼ်းမႃးႁဵတ်း ၸိူဝ်ႉၼင်ႇတိုင်ၼင်ႇၸၢတ်ႇၶၢႆး၊ ၵႃႈၼိူဝ်လွႆ ပေႇႀႃႇ၊ ၼၼ်ႉထႅင်ႈသေၵမ်းတီႈၶႃႈ။
ၶႃႈၼွၼ်းလပ်းယူႇၵႃႈၼိူဝ်ၵူႇမိူဝ်ႈ ၶိင်ႇၵၢင်ၶိုၼ်းလႄႈ ၼွၼ်းၽၼ်ႁၼ်ၸဝ်ႈဢၼ်ၸႂ်ဝိၺိၺ်ႇၶႃႈ ႁၵ်ႉပႅင်းၼၼ်ႉဢေႃႈ။ ၶႃႈသွၵ်ႈႁႃမၼ်းသေၵေႃႈဢမ်ႇထူပ်း။
ၶႃႈဝႃႈ၊ “ၶႃႈတၵ်းလုၵ်ႉလႄႈၵႂႃႇၵႃႈၼႂ်းဝဵင်း၊ ၸွမ်းသဵၼ်ႈတႃသၢႆတၢင်းတင်းလၢႆလႄႈ သွၵ်ႈႁႃၸဝ်ႈဢၼ်ၸႂ်ဝိၺိၺ်ႇၶႃႈႁၵ်ႉပႅင်းၼၼ်ႉဢေႃႈ၊” ဝႃႈၼႆသေလႄႈ၊ႁႃသေၵေႃႈဢမ်ႇထူပ်း။
ၵူၼ်းပႂ်ႉၵၢင်ပႂ်ႉယၢမ်းဢၼ်လႄႇၵႂႃႇမႃး ၵႃႈၼႂ်းဝဵင်းၸိူဝ်းၼၼ်ႉ၊ ထူပ်းႁၼ်ၶႃႈလႄႈၶႃႈထၢမ်တီႈၶဝ်လႄႈဝႃႈ၊ “ၸွင်ႇသူႁၼ်ၸဝ်ႈဢၼ်ၸႂ်ဝိၺိၺ်ႇၶႃႈႁၵ်ႉပႅင်းၼၼ်ႉႁိုဝ်း၊” ဝႃႈၼင်ႇၼႆသေယဝ်ႉ။
ပူၼ်ႉသေၵႃႈတီႈၶဝ်ၵႂႃႇဢိတ်းၼိုင်ႈလႄႈ ၶႃႈထူပ်းၸဝ်ႈဢၼ်ၸႂ်ဝိၺိၺ်ႇၶႃႈႁၵ်ႉပႅင်းၼၼ်ႉဢေႃႈ။ ၶႃႈယိပ်းၵမ်ဢဝ်မၼ်းၸဝ်ႈမၼ်ႈမၼ်ႈၶိူင်ႇၶိူင်ႇသေလႄႈ ဢမ်ႇပွႆႇဢမ်ႇၽႃႈမၼ်းၸဝ်ႈလႃးလႃး၊ တေႃႇထိုင်ႁွတ်ႈထၢၼ်ႈပေႃးဢဝ်မၼ်းၸဝ်ႈ မႃးၵႃႈတီႈႁိူၼ်းမႄႈၶႃႈ၊ ၸူးၵႃႈၼႂ်းႁွင်ႈၼွၼ်းဢၼ်ၶႃႈၵိူတ်ႇလဵင်ႉ မႃးၼၼ်ႉဢေႃႈ။
ၼၢင်းယိင်းဝဵင်း ယေႇရုသလႅမ်ႇ၊ ၶဝ်႟။ ၶႃႈယွၼ်းႁႂ်ႈသူတိူင်ႇၵၢဝ်ႇၵတိတေႃႇၼႃႈတိုင်၊ဢိၵ်ႇတင်းၸၢတ်ႇၶၢႆးဢၼ်ယူႇၵႃႈၼႂ်းထိူၼ်ႇၼႂ်းၶိူဝ်းၼၼ်ႉလႄႈဝႃႈ၊ သူတၵ်းဢမ်ႇမႃးယႃႉမႃးၵဝ်းႁႂ်ႈ တၢင်းႁၵ်ႉႁဝ်းတိုၼ်ႇ၊ႁႂ်ႈမၼ်းတိုၼ်ႇမႃး ၵူၺ်းမၼ်းၼၼ်ႉဢေႃႈ။
ၵေႃႉဢၼ်လုၵ်ႉသေၵႃႈၼႂ်းထိူၼ်ႇ ၼႂ်းၶိူဝ်းမႃးလႄႈ မီးႁၢင်ႈမီးၽၢင်မိူၼ်ၸိူဝ်ႉၼင်ႇသဝ်ၵႂၼ်းၽႆး၊ မီးဢၢႆဢၼ်ႁွမ်ႁူၺ်းလူၺ်ႈမုရၼ်ႇ၊လေႃႇပၢၼ်ႇ၊ တင်းမဵဝ်းၼၢမ်ႇသႃႇဢၼ်ၸဝ်ႈၵုၼ်ႇၸဝ်ႈသိၼ်ၶဝ်ၸၢင်ႈၶၢႆၼၼ်ႉၸမ်ႉ၊ပဵၼ်ၽူႈလႂ်။
တူၺ်းလူး။ မၼ်းၸဝ်ႈပဵၼ်ၶုၼ်လူင် သေႃးလမုၼ်ႇ၊ ၼင်ႈၼႂ်းပွင်ၼႂ်းဝေႃးလႄႈမႃးယူႇယဝ်ႉ၊ ၵူၼ်းသိုၵ်းႁူၵ်းသိပ်းဢၼ်ၵတ်ႉဢၼ်ၶႅၼ်ႇသေပိူၼ်ႈၼႂ်းမဵဝ်း ဢိသရေး၊ တင်းလၢႆ၊ ဢွၼ်ၵၼ်လွမ်ႉႁွပ်ႈပႂ်ႉဢသၢၵ်ႈၸဝ်ႈယူႇဢေႃႈ။
ၶဝ်တင်းသဵင်ႈတင်းလူင်ၼၼ်ႉ၊ပဵၼ်ၵူၼ်းမေႃ ၵူၼ်းၸၢင်ႈလၢႆးလၢပ်ႇလၢႆးလႅဝ်း၊ ပဵၼ်ၵူၼ်းသိုၵ်းဢၼ်မေႃတိုၵ်းသိုၵ်း ၵူၺ်းၵူၺ်းဢေႃႈ။ ၶဝ်ဢွၼ်ၵၼ်ယိပ်းၵမ်ၶိူင်ႈလၢပ်ႇၶိူင်ႈလႅဝ်းဝႆႉၵူႈၵေႃႉၵူႈၵူၼ်းလႄႈ ပႂ်ႉယၢမ်းယူႇၼႂ်းၶိင်ႇၵၢင်ၶိုၼ်းဢေႃႈ။
ၶုၼ်လူင် သေႃးလမုၼ်ႇ၊ ၼင်ႈၼႂ်းပွင် ၼႂ်းဝေႃးဢၼ်၊ ဢဝ်မႆႉၸိင် လေႇပၼုၼ်ႇ၊ ႁဵတ်းၼၼ်ႉဢေႃႈ။
သဝ်မၼ်းတင်းလၢႆဢုမ်ႇဝႆႉတင်းငိုၼ်း၊ တိၼ်မၼ်းပွတ်းတႂ်ႈဢဝ်ၶမ်းဢုမ်ႇဝႆႉလႄႈ ၵွပ်းၼင်ႈၸဝ်ႈဢဝ်ၵင်ႈပလၢင်ႇၽႃႈလႅင်ၵမ်ႇဢၼ်မႄႈယိင်းဝဵင်း ယေႇရုသလႅမ်ႇ၊ ၶဝ်တေႃးလူၺ်ႈ တၢင်းႁၵ်ႉၶဝ်ၼၼ်ႉသိူဝ်ႇဝႆႉဢေႃႈ။
မႄႈယိင်းဝဵင်း ၸိဢုၼ်ႇ၊ ၶဝ်႟။ မႃးလႄႈတူၺ်း ၶုၼ်လူင် သေႃးလမုၼ်ႇ၊ လူး၊ မၼ်းၸဝ်ႈတိုဝ်းသရၽူႇဢၼ်မႄႈၸဝ်ႈ သုပ်းပၼ်၊ ၼႂ်းမိုဝ်ႉဝၼ်းဢၼ်သွင်ႇမၢင်ႇၵလႃႇ၊ဝၼ်းဢၼ် ႁူဝ်ၸႂ်ၸဝ်ႈသႂၢင်ႇသိူဝ်းၼၼ်ႉဢေႃႈ။
မႂ်းၼၢင်းၼႆႉႁၢင်ႈလီၼႃႇဢေႃႈ။ ၼၢင်းဢၼ်ၵဝ်ႁၵ်ႉၼႃႇ႟။ မႂ်းၼၢင်းႁၢင်ႈလီၼႃႇဢေႃႈ။ မၢၵ်ႇတႃမႂ်းၼၢင်းသႂ်လႅင်းလူၺ်ႈမႅတ်ႈတႃႇယူႇ ၵႃႈၼႂ်းၽႃႈႁူမ်ႇၼႃႈၼၼ်ႉလႄႈ ၶူၼ်ႁူဝ်မႂ်းၼၢင်းပိဝ်ယူႇၵႃႈဝႅၼ်ယူႇ မိူၼ်ၸိူဝ်ႉၼင်ႇၽုင်ပႄႉဢၼ်၊ ၵျွၵ်းဝႅၼ်လူင်းပဵမ်ႉလွႆ ၵိလိတ်ႉ၊ မႃး ယူႇၼၼ်ႉဢေႃႈ။
ၶဵဝ်ႈမႂ်းၼၢင်းၸိူဝ်းၼၼ်ႉၶၢဝ်သႂ်မိူၼ်ၸိူဝ်ႉၼင်ႇၽုင်သူဝ်းဢၼ်၊ ၵႅတ်းႁႆးၶူၼ်ယဝ်ႉလႄႈဢၢပ်ႇၼမ်ႉဝႆႉၼၼ်ႉ၊ ယင်းဢမ်ႇႁူင်ႈဢမ်ႇယွမ်းသေသိၵ်ႈလႄႈ ၶပ်ႉၸႅၼ်ႇၽဵင်ႇပဵင်းၵၼ်ဝႆႉဢေႃႈ။
သီႇသူပ်းမႂ်းၼၢင်းပဵၼ်ၸိူဝ်ႉၼင်ႇသၢႆၶႅပ်းၽႄး ဢၼ်လႅင်ၸွင်းႁွင်းလႄႈ သဵင်ၵႂၢမ်းမႂ်းၼၢင်းပဵၼ်ဢၼ်ဝၢၼ်ႁူ ဝၢၼ်ၸႂ်ဢေႃႈ။ ၵႅမ်ႈမႂ်းၼၢင်းၶွင်ႇၸွင်းႁွင်းမိူၼ်ၶႅပ်းမၢၵ်ႇၸင်ႈ ယူႇၼႂ်းၽႃႈႁူမ်ႇၼႃႈဢေႃႈ။
ၵၢၼ်ႈၶေႃးမႂ်းၼၢင်းၵေႃႈ မိူၼ်ၸိူဝ်ႉၼင်ႇ တိူၵ်ႈသဝ်လၢင်း၊ ၶုၼ် တႃႇဝိတ်ႈ၊ ဢၼ်လွမ်ႈလီလိူမ်ႈလီၼၼ်ႉ၊ ဢဝ်တင်းသွႆႈၶေႃးဢၼ်မိူၼ်ၶႅပ်းႁႄႉလၢၵ်ႈၼၢၵ်ႈႁဵင်ၼိုင်ႈႁွႆႈဝႆႉႁွပ်ႈႁွပ်ႈၼၼ်ႉဢေႃႈ။
တဝ်ႈၼူမ်းမႂ်းၼၢင်းသွင်လုၵ်ႈၼၼ်ႉမိူၼ် တိုင်ဢွၼ်ႇၽႃၽႄ၊ ဢၼ်ၵိၼ်ယူႇၵႃႈၼႂ်းပႃႇမွၵ်ႇႁဵဝ်းငိုၼ်း ၼၼ်ႉဢေႃႈ။
ၵဝ်တၵ်းယူႇၵႃႈၼိူဝ်လွႆမုရၼ်ႇ၊ဢိၵ်ႇတင်းၵွင်းလေႃႇပၢၼ်ႇ၊ၸူဝ်ႈဢၼ်မိူင်းဢမ်ႇပႆႇလႅင်းလႄႈ ငဝ်းလပ်းသိင်ႇဢမ်ႇပႆႇပူၼ်ႉၵႂႃႇၼၼ်ႉဢေႃႈ။
ၼၢင်းဢၼ်ၵဝ်ႁၵ်ႉၼႃႇၼႆႉ႟။ မႂ်းၼၢင်းၼႆႉႁၢင်ႈလီၽၢင်လီတင်းတူဝ်တင်းၶိင်းဢေႃႈ။ ဢမ်ႇမီးတီႈၸိတီႈၼႄးသေၸိူဝ်ႉသေပိူင်။
လုၵ်ႉသေၵႃႈတီႈလွႆ လေႇပၼုၼ်ႇ၊ ၼၼ်ႉၸွမ်းလူၺ်ႈၵၼ်တင်းၵဝ်မႃးတႃႉ၊ မေးဢၼ်ၵဝ်မၢႆဝႆႉၼႆႉ႟။ လုၵ်ႉသေၵႃႈတီႈလွႆ လေႇပၼုၼ်ႇ၊ ၸွမ်းၵဝ်မႃးတႃႉ၊ လုၵ်ႉသေၵႃႈတီႈပၢႆၸိၵ်းလွႆ ဢႃႇမၼႃႉ၊ ပၢႆၸိၵ်းလွႆ ၸိၼိရႃႉ၊ တင်းလွႆ ႁေႇရမုၼ်ႇ၊ တီႈဢၼ်သၢင်ႇသီႈတင်းသိူဝ်ၸုမ်ႈ တင်းလၢႆယူႇၼၼ်ႉလူင်းမႃးတႃႉ။
ၼၢင်းဢၼ်ၵဝ်ႁၵ်ႉၼႃႇ၊မေးဢၼ်ၵဝ်မၢႆဝႆႉၼႆႉ႟။ တၢင်းဢၼ်မၢၵ်ႇတႃမႂ်းၼၢင်းယႅၵ်ႉတူၺ်းၵဝ်၊ဢိၵ်ႇတင်း သွႆႈၶေႃးဢၼ်မႂ်းၼၢင်းႁွႆႈၼၼ်ႉႁိမ်ႁူင်ႇဢဝ် ႁူဝ်ၸႂ်ၵဝ်ၵႂႃႇယဝ်ႉ။
ၼၢင်းဢၼ်ၵဝ်ႁၵ်ႉၼႃႇ၊မေးဢၼ်ၵဝ်မၢႆဝႆႉၼႆႉ႟။ တၢင်းႁၵ်ႉမႂ်းၼၢင်းၼၼ်ႉၶိုတ်းၸႂ် ၶိုတ်းၶေႃးၵဝ်လႄႈ မႅတ်ႈတႃႇမႂ်းၼၢင်းၼၼ်ႉယဵင်ႈၶႅၼ်း လီၼႃႇသေၼမ်ႉမၢၵ်ႇၸပိတ်ႉ၊ ဢၢႆၼမ်ႉမၼ်းႁွမ်မႂ်းၼၢင်းယင်းလီၼႃႇသေ မဵဝ်းၼၢမ်ႇသႃႇတင်းလူင်ဢေႃႈ။
မေးဢၼ်ၵဝ်မၢႆဝႆႉၼႆႉ႟။ သီႇသူပ်းမႂ်းၼၢင်းမီး ၼမ်ႉၸဵမ်းဢၼ်မိူၼ်ႁူဝ်ၼမ်ႉႁူင်းၽိုင်ႈလႄႈ လိၼ်ႉမႂ်းၼၢင်းၼၼ်ႉပဵၼ်ၼမ်ႉၼူမ်းတင်း ၼမ်ႉၽိုင်ႈပုၼ်ႈၵဝ်ဢေႃႈ။ ၶူဝ်းၼုင်ႈမႂ်းၼၢင်းၵေႃႈမီးဢၢႆႁွမ် မႆႉ လေႇပၼုၼ်ႇ၊ ဝႆႉဢေႃႈ။
ၼၢင်းဢၼ်ၵဝ်ႁၵ်ႉၼႃႇ၊မေးဢၼ်ၵဝ်မၢႆဝႆႉၼႆႉ၊ပဵၼ်သူၼ်ဢူးယဵၼ်ႇဢၼ်လွမ်ႉႁူဝ်ႉဝႆႉ၊ ၼမ်ႉၼွင်ဢၼ်ၵႅတ်ႇဝႅတ်ႉဝႆႉ၊ၼမ်ႉဢွၵ်ႇႁူး ဢၼ်ၵူၼ်းတၢင်ႇၵေႃႉဢမ်ႇၸႂ်ႉလႆႈ။
မီးတူၼ်ႈတင်းလၢႆဢၼ်ပူင်ႇၽိူဝ်ၼုမ်ႇလႄႈ ပဵၼ်သူၼ်မၢၵ်ႇဢၼ်ပႃးတူၼ်ႈမၢၵ်ႇၸင်ႈ ဢၼ်မၢၵ်ႇမၢၵ်ႇဢၼ်ဝၢၼ်၊ပႃႇ ႁိၼ်ႇၼႃႇ၊ ဢၼ်ဢွၵ်ႇလေႃးတူၼ်ႈ ၼႃႇတု၊ လႂ်။
တူၼ်ႈဢွႆႈလႂ်၊တူၼ်ႈၵဵင်းႁွမ်လႂ်တူၼ်ႈလေႃႇပၢၼ်ႇ၊တူၼ်ႈမုရၼ်ႇလႂ်၊ တူၼ်ႈဢၵျေႃႇတင်းတူၼ်ႈၼၢမ်ႇသႃႇလႂ် ၵူႈမဵဝ်းဢေႃႈ။
မႂ်းၼၢင်းပဵၼ်ၼမ်ႉဢွၵ်ႇႁူးၵႃႈၼႂ်းသူၼ်ဢူးယဵၼ်ႇ ပဵၼ်ၼမ်ႉႁွင်ႈၼမ်ႉၵႄး ဢၼ်လႆလူင်းလွႆ လေႇပၼုၼ်ႇ၊ ၼၼ်ႉဢေႃႈ။
လူမ်းတၢင်းႁွင်ႇ႟။ တိုၼ်ႇသေၵမ်း၊လူမ်းတၢင်းၸၢၼ်း႟။ ပတ်ႉမႃးၵႃႈၼိူဝ် သူၼ်ဢူးယဵၼ်ႇၵဝ်သေၵမ်း၊ ႁႂ်ႈဢၢႆႁွမ်ဢၢႆႁူၺ်းၸွတ်ႇတူဝ်ႈၵႂႃႇသေၵမ်း၊ ႁႂ်ႈၸဝ်ႈဢၼ်ၵဝ်ႁၵ်ႉပႅင်းၼၼ်ႉၶဝ်ႈၵႃႈၼႂ်း သူၼ်ဢူးယဵၼ်ႇမၼ်းၸဝ်ႈလႄႈ၊ ၵိၼ်မၢၵ်ႇမၼ်းဢၼ်ဝၢၼ်ဢၼ်ၸဵမ်းၼၼ်ႉ သေၵမ်းလူၺ်ႈ။
ၼၢင်းဢၼ်ၵဝ်ႁၵ်ႉၼႃႇ၊မေးဢၼ်ၵဝ်မၢႆဝႆႉၼႆႉ႟။ ၵဝ်ၶဝ်ႈၵႃႈၼႂ်းသူၼ်ဢူးယဵၼ်ႇၵဝ်ယဝ်ႉ၊ ၵဝ်သိမ်းဢဝ်မဵဝ်းၼၢမ်ႇသႃႇၵဝ်တင်းမဵဝ်း မုရၼ်ႇၵဝ်ယဝ်ႉလႄႈၵဝ်ၵိၼ်ၼမ်ႉၽိုင်ႈၵဝ် တင်းႁူဝ်ၼမ်ႉႁူင်းၽိုင်ႈၵဝ်ယဝ်ႉ၊ ၵဝ်သမ်ႉၵိၼ်ၼမ်ႉမၢၵ်ႇၸပိတ်ႉၵဝ် တင်းၼမ်ႉၼူမ်းၵဝ်ယဝ်ႉယဝ်ႉ။ ၵေႃႉသႄႈၵဝ်တင်းလၢႆၶဝ်႟။ ဢွၼ်ၵၼ် ၵိၼ်သေၵမ်း၊ ၵိၼ်ၵိၼ်သူတ်ႉသူတ်ႉတေႃႇထိုင်ႁွတ်ႈ ထၢၼ်ႈပေႃးမဝ်းလူၺ်ႈတၢင်းႁၵ်ႉတႃႉ။
ပိၵ်ႉသမ်ႉၶႃႈၼၢင်းၼွၼ်းလပ်းသေၵေႃႈ ႁူဝ်ၸႂ်ၸိုင်၊တိုၼ်ႇယူႇဢေႃႈ။ ၶႃႈၼၢင်းၼွၼ်းၽၼ်ႁၼ်ၸဝ်ႈဢၼ်ၶႃႈၼၢင်း ႁၵ်ႉၼၼ်ႉတွႆႇၽၵ်းတူယူႇဢေႃႈ။ ၼၢင်းဢၼ်ၵဝ်ႁၵ်ႉပႅင်းၼႆႉ႟။ ၼၢင်းဢၼ် ၵဝ်ၸႂ်ၸပ်း႟။ ၼူၵ်ႉတူႈၵဝ်႟။ ႁႂ်ႈၵဝ်လႆႈၶဝ်ႈၸူးတီႈ မႂ်းၼၢင်းတႃႉ၊ ၵွၵ်းႁူဝ်ၵဝ်ယမ်းၼမ်ႉၼၢႆးလႄႈၶူၼ်ႁူဝ်ၵဝ် ယမ်းၼမ်ႉမူၺ်ယူႇယဝ်ႉ။
ၶႃႈၼၢင်းထွတ်ႇသိူဝ်ႈထွတ်ႇၶူဝ်းယဝ်ႉတီႈၶႃႈယဝ်ႉ၊ ၵွပ်ႈသင်လႄႈၶႃႈၼၢင်းသမ်ႉၶိုၼ်းၼုင်ႈၶူဝ်း ထႅင်ႈၸိူဝ်ႉၼင်ႇႁိုဝ်တီႈၶႃႈ၊ၶႃႈၼၢင်း သုၵ်ႈတိၼ်ယဝ်ႉတီႈၶႃႈယဝ်ႉ၊ ၵွပ်ႈသင်လႄႈၶႃႈၼၢင်းသမ်ႉတၵ်းႁႂ်ႈၵူဝ်ႈၵိူၵ်ႇၶိုၼ်း ၸိူဝ်ႉၼင်ႇႁိုဝ်တီႈၶႃႈ။
ၸဝ်ႈဢၼ်ၶႃႈႁၵ်ႉပႅင်းၼႃႇၼၼ်ႉဢဝ်မိုဝ်းၸဝ်ႈ ၸူၵ်းၶဝ်ႈၵႃႈၼႂ်းႁူးၽၵ်းတူဢၼ် ဢႃႈယူႇၼၼ်ႉလႄႈ၊ ၶႃႈမီးၸႂ်ဢၼ်ႁၵ်ႉပႅင်းၸဝ်ႈၶႃႈ ၼႃႇလူင်လၢင်ဢေႃႈ။
ၶႃႈလုၵ်ႉလႄႈၵႂႃႇၽုၺ်ႇၽၵ်းတူပၼ်ပုၼ်ႈၸဝ်ႈဢၼ်ၶႃႈႁၵ်ႉပႅင်းၼၼ်ႉလႄႈ ၶႅၼ်မိုဝ်းၶႃႈတႃးဝႆႉတင်းၼမ်ႉမၼ်း မုရၼ်ႇ၊ဢိၵ်ႇတင်း ၼိဝ်ႉမိုဝ်းၶႃႈႁႂ်ႈၼမ်ႉမၼ်းမုရၼ်ႇယွတ်ႇသႂ်ႇ ၵႃႈတီႈၵၢၼ်းၵိူၼ်ႇၽၵ်းတူယၢမ်းမိူဝ်ႈဢၼ် ၶႃႈယိပ်းၵမ်ၼၼ်ႉဢေႃႈ။
ႁူဝ်ၸႂ်ၶႃႈဢူၼ်ႈၵႂႃႇမိူဝ်ႈဢၼ်ၸဝ်ႈဢၼ်ၶႃႈ ႁၵ်ႉပႅင်းၼၼ်ႉလၢတ်ႈတေႃႇၶႃႈ၊ ၶႃႈၽုၺ်ႇၽၵ်းတူပၼ်မၼ်းၸဝ်ႈသေၵေႃႈ၊ မၼ်းၸဝ်ႈသမ်ႉဝၢႆႇၶိုၼ်းလႄႈႁၢႆၵႂႃႇယဝ်ႉ၊ ၶႃႈသွၵ်ႈႁႃမၼ်းၸဝ်ႈသေၵေႃႈဢမ်ႇထူပ်း၊ ၶႃႈႁွင်ႉသေၵေႃႈ၊မၼ်းၸဝ်ႈဢမ်ႇဢိူဝ်။
ၵူၼ်းပႂ်ႉၵၢင်ပႂ်ႉယၢမ်းၸိူဝ်းဢၼ်လႄႇၵႃႈၼႂ်း ဝဵင်းၼၼ်ႉထူပ်းၶႃႈသေယဝ်ႉ၊ ဢွၼ်ၵၼ်ပေႃႉယႅၼ်ႉၶႃႈႁႂ်ႈၶႃႈမၢတ်ႇၸဵပ်း ၼမ်ၼႃႇလူင်လၢင်လႄႈ ၵူၼ်းပႂ်ႉယၢမ်းၵႃႈတီႈလမ်းဝဵင်းၸိူဝ်းၼၼ်ႉ၊သမ်ႉဢွၼ်ၵၼ်ႁိမ်ဢဝ်သိူဝ်ႈယၢဝ်းၶႃႈပႅတ်ႈဢေႃႈ။
မႄႈယိင်းဝဵင်း ယေႇရုသလႅမ်ႇ၊ ၶဝ်႟။ ဢွၼ်ၵၼ် တိူင်ႇဝႃႈၵတိတီႈၵဝ်ၶႃႈ၊ ပေႃးသူထူပ်းႁၼ်ၸဝ်ႈဢၼ်ၶႃႈႁၵ်ႉပႅင်း ၼႃႇၼၼ်ႉၸိုင်၊ တၵ်းဢွၼ်ၵၼ်မွၵ်ႇလၢတ်ႈတီႈမၼ်းၸဝ်ႈ၊ လွင်ႈဢၼ်ၶႃႈမီးတၢင်းဢၼ်ၸႂ်ၸဵပ်းၸႂ်ၶိုၼ်ႈ၊ လူၺ်ႈတၢင်းႁၵ်ႉမႅတ်ႈတႃႇၼၼ်ႉ တီႈမၼ်းၸဝ်ႈဢေႃႈ။
မႄႈယိင်းဢၼ်ႁၢင်ႈလီလိူဝ်တွၼ်းၼႃႇသေ မႄႈယိင်းတင်းလၢႆၼႆႉ႟။ ၸဝ်ႈဢၼ်မႂ်းႁၵ်ႉပႅင်းၼႃႇၼၼ်ႉယဵင်ႈၶႅၼ်း လီၼႃႇသေပိူၼ်ႈတၢင်ႇၵေႃႉၵႃႈႁိုဝ်၊ တေႃႇထိုင်ႁွတ်ႈႁဝ်းထၢၼ်ႈပေႃးတေလႆႈ တိူင်ႇဝႃႈၵတိတီႈမႂ်းၼၼ်ႉ။
ၸဝ်ႈဢၼ်ၶႃႈႁၵ်ႉပႅင်းၼႃႇၼၼ်ႉမီးႁၢင်ႈၽၢင်ႁၢင်ႈလီလႄႈတဵမ်ဝႆႉတင်းဢဵၼ်ႁႅင်းဢေႃႈ။ မၼ်းၸဝ်ႈပဵၼ်ၸိၵ်းပဵၼ်ၸွမ်မီးၸိုဝ်ႈသဵင် ၵႃႈၼႂ်းၵူၼ်းမိုၼ်ႇၼိုင်ႈဢေႃႈ။
ၵွၵ်းႁူဝ်ၸဝ်ႈပဵၼ်မိူၼ်ၶမ်းလွတ်ႈငၢၼ်ႇ၊ ၶူၼ်ႁူဝ်ၸဝ်ႈၼႃတၼ်လႄႈလမ်မိူၼ် ၵႃလမ်ဢေႃႈ။
မၢၵ်ႇတႃၸဝ်ႈႁၢင်ႈလီမိူၼ်ၼူၵ်ႉတူႈဢၼ် မီးႁိမ်းၼမ်ႉႁွင်ႈၼမ်ႉၵႄး၊ မိူၼ်ၼူၵ်ႉတူႈဢၼ်ဢၢပ်ႇၼမ်ႉၼူမ်းလႄႈမူပ်ႇယူႇႁိမ်းၼမ်ႉႁွင်ႈဢၼ်လႆယူႇၼၼ်ႉဢေႃႈ။
ၵႅမ်ႈၸဝ်ႈပဵၼ်ဢၼ်လီႁၵ်ႉလီပႅင်းမိူၼ် သူၼ်ဢူးယဵၼ်ႇ၊ ပႃႇၼၢမ်ႇသႃႇ၊ပႃႇမွၵ်ႇဢၼ်ႁွမ် ဢၼ်ႁူၺ်းၼၼ်ႉလႄႈ သီႇသူပ်းၸဝ်ႈပဵၼ်မိူၼ်မွၵ်ႇႁဵဝ်းငိုၼ်း၊ ဢၼ်ယွတ်ႇယမ်းလူၺ်ႈၼမ်ႉမၼ်းမုရၼ်ႇ ၸႅတ်ႈၸႅတ်ႈၼၼ်ႉဢေႃႈ။
ၶႅၼ်မိုဝ်းၸဝ်ႈပဵၼ်မိူၼ်မႆႉၵၢၼ်းၶမ်းဢၼ်ဢဝ်သႅင် ရတၼႃႇၶပ်ႉၸႅၼ်ႇသႂ်ႇဝႆႉလႄႈ တူဝ်ၶိင်းၸဝ်ႈပဵၼ်မိူၼ်ငႃးၸၢင်ႉဢၼ်ဢဝ်သႅင် ၼီႇလႃႇၶပ်ႉၸႅၼ်ႇဝႆႉၼၼ်ႉဢေႃႈ။
ၶႃၸဝ်ႈပဵၼ်မိူၼ်သဝ်ႁိၼ်ၶၢဝ်ဢၼ်တင်ႈသႂ်ႇ ၵႃႈၼိူဝ်တိၼ်သဝ်ဢၼ်ဢဝ်ၶမ်းႁဵတ်းဝႆႉၼၼ်ႉဢေႃႈ။ ႁၢင်ႈၽၢင်တူဝ်ၶိင်းၸဝ်ႈပဵၼ်မိူၼ်လွႆ လေႇပၼုၼ်ႇ၊ လႄႈ မီးမုၼ်သရေႇၼႃႇၸိူဝ်ႉၼင်ႇမႆႉဢႃႇရိတ်ႉ ၸိူဝ်းၼၼ်ႉဢေႃႈ။
သူပ်းၸဝ်ႈလၢတ်ႈၵႂၢမ်းဢၼ်ဝၢၼ်ၼႃႇ လူင်လၢင်လႄႈ ႁၢင်ႈၽၢင်တူဝ်ၶိင်းၸဝ်ႈၵႃႈမီးတင်းသဵင်ႈပဵၼ်ဢၼ်လီႁၵ်ႉလီပႅင်းၼႃႇဢေႃႈ။ ၵေႃႉဢၼ်ၶႃႈလၢတ်ႈလွင်ႈမၼ်းယူႇၼႆႉၸမ်ႉ၊ ပဵၼ်ၵေႃႉႁၵ်ႉၵေႃႉပႅင်းၶႃႈ၊ပဵၼ် ၵေႃႉသႄႈၶႃႈယဝ်ႉ၊ မႄႈယိင်းဝဵင်း ယေႇရုသလႅမ်ႇ၊ ၶဝ်႟။
မႄႈယိင်းဢၼ်ႁၢင်ႈလီသေပိူၼ်ႈၵႃႈၼႂ်း မႄႈယိင်းတင်းလၢႆၼႆႉ႟။ ၸဝ်ႈဢၼ်မႂ်းႁၵ်ႉပႅင်းၼႃႇၼၼ်ႉၵႂႃႇၵႃႈတီႈလႂ်၊ ၸဝ်ႈဢၼ်မႂ်းႁၵ်ႉပႅင်းၼႃႇၼၼ်ႉမၼ်း ဢွၵ်ႇၸွမ်းသဵၼ်ႈတၢင်းဢၼ်လႂ်ၵႂႃႇၼၼ်ႉ၊ မွၵ်ႇလၢတ်ႈတီႈႁဝ်း၊ႁႂ်ႈႁဝ်းလႆႈၸွႆႈမႂ်းႁႃ မၼ်းၸဝ်ႈတႃႉ။
ၸဝ်ႈဢၼ်ၶႃႈႁၵ်ႉပႅင်းၼႃႇၼၼ်ႉၵႂႃႇၸူးတီႈ သူၼ်ဢူးယဵၼ်ႇမၼ်းၸဝ်ႈ၊တီႈဢၼ်ပဵၼ်ပႃႇၼၢမ်ႇသႃႇၼၼ်ႉယဝ်ႉ၊ မၼ်းၸဝ်ႈၵႂႃႇႁႂ်ႈလႆႈလဵင်ႉလူၽုင်သူဝ်း မၼ်းၸဝ်ႈ၊ဢိၵ်ႇတင်းႁႂ်ႈလႆႈဝိတ်းဢဝ် မွၵ်ႇႁဵဝ်းငိုၼ်းဢေႃႈ။
ၸဝ်ႈဢၼ်ၶႃႈႁၵ်ႉပႅင်းၼၼ်ႉပဵၼ်ၵေႃႉဢၼ် ၶႃႈပိူင်ႇလႄႈၶႃႈၵေႃႈသမ်ႉပဵၼ်ၵေႃႉဢၼ်မၼ်းၸဝ်ႈပိူင်ႇဢေႃႈ။ မၼ်းၸဝ်ႈလဵင်ႉလူၽုင်သူဝ်းၸဝ်ႈယူႇၵႃႈၼႂ်း ပႃႇမွၵ်ႇႁဵဝ်းငိုၼ်းဢေႃႈ။
ၼၢင်းဢၼ်ၵဝ်ႁၵ်ႉ႟။ မႂ်းၼၢင်းႁၢင်ႈလီၽၢင်လီမိူၼ်ဝဵင်း ယေႇရုသလႅမ်ႇ၊ လႄႈ လီႁၵ်ႉလီပႅင်းမိူၼ်ဝဵင်း တိရၸႃႉ၊ ဢေႃႈ။ လီၵူဝ်လီႁႄမိူၼ်တပ်ႉသိုၵ်းဢၼ် ပူၵ်းလၢမ်ႇဝႆႉၼၼ်ႉဢေႃႈ။
ဢဝ်မၢၵ်ႇတႃမႂ်းၼၢင်းငိူင်ႉဝႄႈသေၵႃႈတီႈ ၵဝ်သေၵမ်း၊ မၢၵ်ႇတႃၸိူဝ်းၼၼ်ႉပႄႉၼႅင်ႇႁူမ်ႇသုမ်ႇ ၵဝ်ဝႆႉဢေႃႈ။ ၶူၼ်ႁူဝ်မႂ်းၼၢင်းပိဝ်ယူႇၵႃႈယူႇမိူၼ် ၸိူဝ်ႉၼင်ႇၽုင်ပႄႉဢၼ်၊ ၵျွၵ်းဝႅၼ်လူင်းပဵမ်ႉလွႆ ၵိလတ်ႉ၊ မႃးယူႇၼၼ်ႉဢေႃႈ။
ၶဵဝ်ႈမႂ်းၼၢင်းၸိူဝ်းၼၼ်ႉၶၢဝ်သႂ်မိူၼ်ၸိူဝ်ႉၼင်ႇ ၽုင်သူဝ်းဢၼ်ၵဵတ်းႁႆးၶူၼ်ယဝ်ႉလႄႈ လုၵ်ႉတီႈဢၢပ်ႇၼမ်ႉမႃးၼၼ်ႉ၊ယင်းဢမ်ႇႁူင်ႈ ဢမ်ႇယွမ်းသေသိၵ်ႈလႄႈၶပ်ႉၸႅၼ်ႇ ၽဵင်ႇပဵင်းၵၼ်ဝႆႉဢေႃႈ။
ၵႅမ်ႈမႂ်းၼၢင်းဢၼ်မီးတၢင်းၼႂ်းၽႃႈႁူမ်ႇၼႃႈၼၼ်ႉ ၶွင်ႇၸွင်းႁွင်းမိူၼ်မၢၵ်ႇၸင်ႈဢေႃႈ။
တီႈၶုၼ်ႁေႃၶမ်းၼၼ်ႉၸၢင်ႈမီးၼၢင်းႁေႃၶမ်းႁူၵ်းသိပ်း၊ၼၢင်းဢွၼ်ႇပႅတ်ႇသိပ်း၊ သၢဝ်ၸိူင်ႉၼၢင်းၵေႃႈ၊ဢမ်ႇႁုဝႃႈမီးၼမ် ၵႃႈႁိုဝ်ယဝ်ႉ။
ၵဝ်ႁၵ်ႉၵဝ်ပႅင်းၵေႃႉလဵဝ်ၵူၺ်းဢၼ်ဝႃႈ၊ၵေႃႉဢၼ်လီႁၵ်ႉလီပႅင်းမိူၼ်ၼူၵ်ႉတူႈၼၼ်ႉဢေႃႈ။ ပဵၼ်လုၵ်ႈယိင်းၵေႃႉလဵဝ်ၵူၺ်းတီႈမႄႈမၼ်းလႄႈ ပဵၼ်လုၵ်ႈယိင်းဢၼ်မႄႈမၼ်းၵျိူၵ်ႈႁၵ်ႉ ထုၵ်ႇၸႂ်ၼၼ်ႉဢေႃႈ။ မႄႈယိင်းၵႃႈမီးတင်းသဵင်ႈတင်းလူင် ယႅၵ်ႉတူၺ်းမၼ်းလႄႈဢွၼ်ၵၼ်ယုၵ်ႉယွင်ႈ ဢၢမ်းဢေႃးမၼ်းဢေႃႈ။ ၼၢင်းႁေႃၶမ်းတင်းၸိူင်ႉၼၢင်းလႂ်၊ဢွၼ်ၵၼ် ႁဵတ်းၵႂၢမ်းယွင်ႈယေႃးမၼ်းဢေႃႈ။
ၼၢင်းယိင်းဢၼ်လီယႅၵ်ႉလီတူၺ်းမိူၼ်ၶိင်ႇ ၵၢင်ၼႂ်ၼၼ်ႉၸမ်ႉ၊ပဵၼ်ၽူႈလႂ်၊ မၼ်းၼၢင်းၼၼ်ႉႁၢင်ႈလီၽၢင်လီလႄႈသႂၢင်ႇၵီႈႁိူဝ်ႈႁိူင်းမိူၼ်ၸိူဝ်ႉၼင်ႇသၢႆလႅတ်ႇၵၢင်ဝၼ်း၊ဢမ်ႇၼၼ်ဢၼ်လႅင်းလိူၼ်ၼၼ်ႉဢေႃႈ။
ၵဝ်လူင်းၵႂႃႇၸူးတီႈသူၼ်ဢူးယဵၼ်ႇ မၢၵ်ႇမႆႉမၢၵ်ႇတွၵ်ႇ၊ ႁႂ်ႈလႆႈလူတူၺ်းတူၼ်ႈမႆႉတူၼ်ႈမၢၵ်ႇဢၼ်ၶဵဝ် တင်းလၢႆ၊ဢိၵ်ႇတင်း ႁႂ်ႈလႆႈလူတူၺ်းတူၼ်ႈမၢၵ်ႇၸပိတ်ႉပူင်ႇၽိူဝ် ဢိၵ်ႇတင်းတူၼ်ႈမၢၵ်ႇၸင်ႈမွၵ်ႇ မွၵ်ႇယဝ်ႉႁိုဝ်ၼၼ်ႉဢေႃႈ။
မႂ်းၼၢင်းႁဵတ်းႁႂ်ႈၵဝ်မဝ်းလူၺ်ႈတၢင်းႁၵ်ႉ မႅတ်ႈတႃႇထၢၼ်ႈပေႃးႁူဝ်ၸႂ်ၵဝ်သၼ်ႇသၼ်ႇ သၢႆသၢႆၵႂႃႇ၊ မိူၼ်ၸိူဝ်ႉၼင်ႇၵေႃႉဢၼ်ႁေႃႈလေႃႉမႃႉ ၶဝ်ႈၵႃႈၼႂ်းပၢင်သိုၵ်းၼၼ်ႉဢေႃႈ။
မႄႈယိင်းမဵဝ်း သုလမိတ်ႉ၊ ႟။ ၶိုၼ်းမႃးတႃႉ။ ၶိုၼ်းမႃးသေၵမ်း။ ႁႂ်ႈႁဝ်းလႆႈၸူမ်းတူၺ်း မႂ်းၼၼ်ႉၸိုင်၊ပွၵ်ႈၶိုၼ်းမႃးသေၵမ်း။ ၵွပ်ႈသင်လႄႈသူဢွၼ်ၵၼ်ၶႂ်ႈတူၺ်းႁၼ်ၶႃႈ၊ ယၢမ်းမိူဝ်ႈဢၼ်ၶႃႈၵႃႈဝႅၼ်ၵႃႈၼႂ်း ၵႄႈဝူင်ႈၵၢင်၊ထႅဝ်ၵူၼ်းဢၼ်တူၺ်းယူႇ ၸိူဝ်းၼၼ်ႉၸိူဝ်ႉၼင်ႇႁိုဝ်။
လုၵ်ႈယိင်းၶုၼ်႟။ တိၼ်မႂ်းၼၢင်းဢၼ် တိုဝ်းၶႅပ်းယူႇၼၼ်ႉ၊ပဵၼ်ဢၼ်ႁၢင်ႈလီႁၢင်ႈငၢမ်း ၼႃႇလူင်လၢင်လႄႈ ပွတ်းဢႅဝ်မႂ်းၼၢင်းၵေႃႈ၊ပဵၼ်ၸိူဝ်ႉၼင်ႇ လၢႆးမိုဝ်းၵေႃႉဢၼ်ၸၢင်ႈမေႃမႄးႁဵတ်း ဝႆႉၼၼ်ႉဢေႃႈ။
တွင်ႉၼွႆႉမႂ်းၼၢင်းၼၼ်ႉ၊ပဵၼ်ၵွၵ်းၽလႃးဢၼ် တဵမ်ဝႆႉတင်းၼမ်ႉမၢၵ်ႇၸပိတ်ႉဢၼ် လေႃးၼမ်ႉယႃႁွမ်ၼၼ်ႉလႄႈ တွင်ႉမႂ်းၼၢင်းပဵၼ်ၵွင်ၶဝ်ႈပိူၵ်ႇဢၼ်ဢဝ်တင်းမွၵ်ႇႁဵဝ်းငိုၼ်းႁၢင်ႈၶိူင်ႈဝႆႉၼၼ်ႉဢေႃႈ။
တဝ်ႈၼူမ်းမႂ်းၼၢင်းသွင်လုၵ်ႈၼၼ်ႉ၊မိူၼ်တိုင် ၽႃၽႄဢွၼ်ႇဢေႃႈ။
ၶေႃးမႂ်းၼၢင်းပဵၼ်မိူၼ်သဝ်လၢင်းငႃးၸၢင်ႉလႄႈမၢၵ်ႇတႃမႂ်းၼၢင်းၼၼ်ႉ၊ပဵၼ်ၸိူဝ်ႉၼင်ႇ ၼမ်ႉၼွင်ဝဵင်း ႁေႇသၽုၼ်ႇ၊ ၵႃႈႁိမ်းၽၵ်းတူဝဵင်း ပႃႇသရပ်ႉပိမ်း၊ ဝဵင်းလူင်ဢၼ်ၵူၼ်းၵိုၼ်းၼႃႇၼၼ်ႉဢေႃႈ။ ၶူႈလင်မႂ်းၼၢင်းပဵၼ်မိူၼ်ထဵင်လၢင်း လေႇပၼုၼ်ႇ၊ ဢၼ်ဝၢႆႇၼႃႈတေႃႇ ဝဵင်း တမ်ႇမတ်ႉသၵတ်ႉ၊ ၼၼ်ႉဢေႃႈ။
ၵွၵ်းႁူဝ်မႂ်းၼၢင်းပဵၼ်မိူၼ်လွႆ ၵရမေႇလႃႉ၊ လႄႈ ၶူၼ်ႁူဝ်မႂ်းၼၢင်းဢၼ်ၽိူဝ်ဝႆႉ၊ႁိူဝ်ႈမၢပ်ႈမိူၼ်ၽႄးပိၵ်ႈၶျေႃးလႄႈ တၢင်းဢၼ်ၶူၼ်ႁူဝ်ႁၢင်ႈလီႁၢင်ႈငၢမ်းၼၼ်ႉ၊ တိၵမ်ဢဝ်ၶုၼ်ႁေႃၶမ်းလႆႈဢေႃႈ။
ၼၢင်းဢၼ်ၵဝ်ႁၵ်ႉၼႃႇၼႆႉ႟။ မႂ်းၼၢင်းပဵၼ်ဢၼ် ႁၢင်ႈလီႁၢင်ႈငၢမ်းၼႃႇလႄႈ ပဵၼ်တၢင်းဢၼ်ၵဝ်မူၼ်ႈပျေႃႇလူၺ်ႈတၢင်းႁၵ်ႉ တၢင်းပႅင်းမႂ်းၼၢင်းဢေႃႈ။
မႂ်းၼၢင်းသုင်ၸၢမ်းလၢမ်း၊ငၢမ်းမိူၼ် တူၼ်ႈထၢၼ်လႄႈ တဝ်ႈၼူမ်းမႂ်းၼၢင်းမိူၼ်ပူၵ်ႉမၢၵ်ႇထၢၼ်ဢေႃႈ။
ၵဝ်ဝႃႈ၊ “ၵဝ်တၵ်းၶိုၼ်ႈတူၼ်ႈထၢၼ်ၼၼ်ႉလႄႈ ဝိတ်းဢဝ်မၢၵ်ႇၼၼ်ဢေႃႈ၊” ဝႃႈၼႆဢေႃႈ။ ဢူဝ်း။ ႁႂ်ႈတဝ်ႈၼူမ်းမႂ်းၼၢင်းပဵၼ်ၸိူဝ်ႉၼင်ႇ ပူၵ်ႉမၢၵ်ႇၸပိတ်ႉဝႆႉလႄႈ ဢၢႆထူၺ်ႈၸႂ်မႂ်းၼၢင်းပဵၼ်ၸိူဝ်ႉၼင်ႇ ဢၢႆႁွမ်မၢၵ်ႇဝၢၼ်။
ဢိၵ်ႇတင်းတၢင်းဢၼ်မႂ်းၼၢင်းၸုပ်ႇၼူမ် ပဵၼ်မိူၼ်ၼမ်ႉမၢၵ်ႇၸပိတ်ႉ၊ ဢၼ်လီၼႃႇသေပိူၼ်ႈၼၼ်ႉသေၵမ်း။ ပေႃးပဵၼ်ၼၼ်ၸိုင်၊ႁႂ်ႈၼမ်ႉမၢၵ်ႇၸပိတ်ႉၼၼ်ႉ လႆၸူးသိုဝ်ႈသိုဝ်ႈတီႈၸဝ်ႈဢၼ် ၶႃႈႁၵ်ႉပႅင်းၼၼ်ႉ၊ လႆၶဝ်ႈၵႃႈၼႂ်းသီႇသူပ်းၸဝ်ႈတင်းၶဵဝ်ႈ မၼ်းၸဝ်ႈၸိူဝ်းၼၼ်ႉၵႂႃႇသေၵမ်း။
ၶႃႈပဵၼ်ၵေႃႉဢၼ်ၸဝ်ႈဢၼ်ၶႃႈႁၵ်ႉပႅင်း ၼႃႇၼၼ်ႉပိူင်ႇလႄႈ မၼ်းၸဝ်ႈၸၢင်ႈထုၵ်ႇၸႂ်ၵျိူၵ်ႈၸႂ်ဢေႃႈ။
မႃးသေၵမ်း။ ၸဝ်ႈဢၼ်ၶႃႈၼၢင်း ႁၵ်ႉပႅင်းၼႃႇတီႈၶႃႈ႟။ ဢွၼ်ၵၼ်ဢွၵ်ႇၵႂႃႇၵႃႈတီႈတူင်ႈႁႆႈ တူင်ႈၼႃးလႄႈ ၵႂႃႇလိုဝ်ႈၵႂႃႇသွၼ်ႈၵႃႈၼႂ်းဝၢၼ်ႈၸိူဝ်းၼၼ်ႉ တီႈၶႃႈတႃႉႁဝ်း။
ဢွၼ်ၵၼ်လုၵ်ႉၸဝ်ႉၸဝ်ႉလႄႈၵႂႃႇၵႃႈတီႈ သူၼ်မၢၵ်ႇၸပိတ်ႉ၊ ႁႂ်ႈလႆႈလူတူၺ်းတူၼ်ႈၶိူဝ်းမၢၵ်ႇၸပိတ်ႉ ဢၼ်မၼ်းဢွၵ်ႇတုမ်ႇမႃးယဝ်ႉႁိုဝ်၊ မွၵ်ႇမၼ်းၵီႈမႃးယဝ်ႉႁိုဝ်ၼၼ်ႉ၊ ဢိၵ်ႇတင်းႁႂ်ႈလႆႈလူတူၺ်းတူၼ်ႈမၢၵ်ႇၸင်ႈမွၵ်ႇမၼ်းမွၵ်ႇမႃးယဝ်ႉႁိုဝ်ၼၼ်ႉတီႈၶႃႈတႃႉႁဝ်း၊ ၵႃႈတီႈၼၼ်ႈ၊ၶႃႈၼၢင်းတၵ်းဢဝ်မႅတ်ႈတႃႇၶႃႈၼၢင်းဢၢပ်ႈပၼ်တီႈၸဝ်ႈႁဝ်းတီႈၶႃႈဢေႃႈ။
ၸဝ်ႈႁဝ်းလႆႈၼူမ်ဢၢႆႁွမ်တူၼ်ႈယႃႈဢၶျူဝ်ႇ ဢိၵ်ႇတင်းမၢၵ်ႇဢၼ်ဝၢၼ်ၵူႈမဵဝ်း မီးၵႃႈတီႈႁိမ်းၽၵ်းတူ၊ ၸႃႉဢၼ်ပႃးမၢၵ်ႇၵဝ်ႇတင်းမၢၵ်ႇမႂ်ႇဢၼ် ၶႃႈၼၢင်းလႆႈသိမ်းဝႆႉပုၼ်ႈၸဝ်ႈႁဝ်း တီႈၶႃႈယဝ်ႉ။ ၸဝ်ႈဢၼ်ၶႃႈႁၵ်ႉၼႃႇ႟။
ဢူဝ်း။ ၶႂ်ႈႁႂ်ႈၸဝ်ႈႁဝ်းပဵၼ်ၸိူဝ်ႉၼင်ႇပီႈၸၢႆးဢွၵ်ႇၶႃႈၼၢင်း၊ ပီႈၸၢႆးဢၼ်ၵိၼ်ၼူမ်းမႄႈၶႃႈၼၢင်းတီႈၶႃႈဢေႃႈ။ ပေႃးပဵၼ်ၸိူဝ်ႉၼင်ႇၼၼ်ၸိုင်၊မိူဝ်ႈဢၼ် ၶႃႈၼၢင်းႁူပ်ႉထူပ်းၸဝ်ႈႁဝ်း၊ ၵႃႈတီႈၵၢင်တႃႈၵၢင်တၢင်းၼၼ်ႉ၊ၶႃႈၼၢင်းတၵ်း ၸုပ်ႇၼူမ်ၸဝ်ႈႁဝ်းသေၵေႃႈ၊ ဢမ်ႇမီးတၢင်းဢၼ်ပိူၼ်ႈတၵ်းသႄႉသွမ်းတီႈၶႃႈ။
ၶႃႈၼၢင်းတၵ်းၸုင်ဢဝ်မိုဝ်းၸဝ်ႈႁဝ်း၊ၶဝ်ႈၸူး ၵႃႈၼႂ်းႁွင်ႈၼွၼ်းမႄႈၶႃႈၼၢင်းလႄႈ တီႈၼၼ်ႈၸဝ်ႈႁဝ်းတၵ်းသွၼ်၊လွင်ႈတၢင်းႁၵ်ႉ ပၼ်တီႈၶႃႈၼၢင်းတီႈၶႃႈဢေႃႈ။ ၶႃႈၼၢင်းသမ်ႉတၵ်းဢဝ်ၼမ်ႉမၢၵ်ႇၸပိတ်ႉ ဢၼ်လေႃးယႃႈႁွမ်ဢိၵ်ႇတင်း ၼမ်ႉမၢၵ်ႇၸင်ႈၶႃႈၼၢင်းၼၼ်ႉ၊ႁႂ်ႈၸဝ်ႈႁဝ်း သူတ်ႉၵိၼ်တီႈၶႃႈဢေႃႈ။
မိုဝ်းၶွၼ်သၢႆႉၸဝ်ႈၼၼ်ႉ၊ႁွင်းဢဝ် ၵွၵ်းႁူဝ်ၶႃႈယူႇလႄႈ မိုဝ်းၶွၼ်ၶႂႃၸဝ်ႈသမ်ႉၵွတ်ႇၶႃႈၼၢင်း ယူႇဢေႃႈ။
မႄႈယိင်းဝဵင်း ယေႇရုသလႅမ်ႇ၊ ၶဝ်႟။ တိူင်ႇဝႃႈၵတိတီႈၵဝ်ၶႃႈ၊ ၼင်ႇႁိုဝ်သူတၵ်းဢမ်ႇယႃႉဢမ်ႇၵဝ်း တၢင်းႁၵ်ႉတၢင်းပႅင်းႁဝ်းႁႂ်ႈတိုၼ်ႇ၊ႁႂ်ႈတိုၼ်ႇ မႃးၵူၺ်းမၼ်းၼၼ်ႉဢေႃႈ။
မႄႈယိင်းၵေႃႉဢၼ်ဢိင်ၸပ်းၸဝ်ႈဢၼ် မၼ်းႁၵ်ႉၼၼ်ႉလႄႈ လုၵ်ႉသေၵႃႈတီႈၼႂ်းထိူၼ်ႇၼႂ်းၶိူဝ်း မႃးယူႇၼၼ်ႉပဵၼ်ၽူႈလႂ်၊ ၶႃႈၼၢင်းလႆႈယႃႉလႆႈပူၵ်းၸဝ်ႈႁဝ်းၵႃႈတီႈတႂ်ႈတူၼ်ႈမၢၵ်ႇဝၢၼ်၊ ၵႃႈတီႈဢၼ်မႄႈၸဝ်ႈႁဝ်းလႆႈၶၢမ်ႇၸဵပ်း ၵွပ်ႈပိူဝ်ႈၸဝ်ႈႁဝ်းလႄႈ လႆႈၵိူတ်ႇလဵင်ႉၸဝ်ႈႁဝ်းမႃးတီႈၼၼ်ႈ တီႈၶႃႈယဝ်ႉ။
ဢိုတ်းႁပ်းႁူဝ်ၸႂ်တၢင်းႁၵ်ႉတၢင်းပႅင်းၸဝ်ႈႁဝ်း၊ ၵႃႈတီႈၵူႈၵေႃႉၵူႈၵူၼ်း၊ၼွၵ်ႈသေၶႃႈၼၢင်းသေၵမ်း၊ ၼွၵ်ႈသေၶႃႈၼၢင်းလႄႈယႃႇပေဢဝ်ၽူႈလႂ် ၵွတ်ႇဝႆႉၵႃႈၼႂ်းၶႅၼ်မိုဝ်းၸဝ်ႈႁဝ်းသေၵမ်း၊ လွင်ႈမၼ်းၸမ်ႉ၊လွင်ႈတၢင်းႁၵ်ႉတၢင်းပႅင်းၼၼ်ႉ၊ တၼ်းၶူဝ်းယႂ်ႇၼႃႇပဵင်းတၢၼ်ႇတၢင်းတၢႆတီႈၶႃႈလႄႈ သၽေႃးဢၼ်ဢမ်ႇယုမ်ႇၽူဝ်၊ယုမ်ႇမေးၼၼ်ႉ ႁၢဝ်ႉၵျၢမ်းၼႃႇလူင်လၢင်ပဵင်းတၢၼ်ႇမိူင်း မရၼႃႉတီႈၶႃႈဢေႃႈ။ မၼ်းၸၢင်ႈတႅၵ်ႇပဵၼ်မုၵ်ႉၽႆးမႃးလႄႈ မႆႈၶႅမ်ႈထၢၼ်ႈပေႃးလီၵူဝ်လီႁႄၼႃႇသေ ဢၢႆႁႅင်းၽႆးတီႈၶႃႈဢေႃႈ။
ၼမ်ႉဢၼ်ၼမ်ထၢၼ်ႇႁိုဝ်သေၵေႃႈ၊ဢမ်ႇၸၢင်ႈ ဢဝ်မႅတ်ႈတႃႇမွတ်ႇလႆႈ၊ ၼမ်ႉႁွင်ႈၼမ်ႉၵႄးတင်းလၢႆၵေႃႈ၊ ဢမ်ႇထူမ်ႈႁူမ်ႇမၼ်းလႆႈ၊ ပေႃးသေၵေႃႉၵေႃႉဢၢင်ႈဢၢၼ်းဢဝ် ဢုၵ်ႉၸႃႇၶူဝ်းလဵင်းမၼ်းၵႃႈမီး၊ လႅၵ်ႈဢဝ်မႅတ်ႈတႃႇၸိုင်၊မၼ်းတေလႆႈၶၢမ်ႇ တၢင်းဢၼ်ပိူၼ်ႈသႄႉသွမ်းဢေႃႈ။
ႁဝ်းမီးၼွင်ႉသၢဝ်ဢွၼ်ႇၵေႃႉၼိုင်ႈဢေႃႈ။ တဝ်ႈၼူမ်းမၼ်းယင်းဢမ်ႇပႆႇမီးပႆႇယႂ်ႇ၊ ၼႂ်းမိူဝ်ႈဢၼ်ၽူႈမၢဝ်ႇမႃးယွၼ်း ၼွင်ႉသၢဝ်ႁဝ်းၼၼ်ႉ၊ ႁဝ်းတၵ်းတေလႆႈႁဵတ်းၸိူဝ်ႉၼင်ႇႁိုဝ်ပုၼ်ႈမၼ်း။
ပေႃးၼွင်ႉသၢဝ်ႁဝ်းမၼ်းပဵၼ်လမ်းဝဵင်းၸိုင်၊ႁဝ်းတၵ်းႁဵတ်းႁေႃငိုၼ်းဝႆႉၵႃႈၼိူဝ်မၼ်းလႄႈ ပေႃးမၼ်းပဵၼ်ၽၵ်းတူၸိုင်၊ႁဝ်းတၵ်းဢဝ် မႆႉဢႃႇရိတ်ႉၶတ်းမႂ်ၽၵ်းတူဝႆႉဢေႃႈ။
ၶႃႈပဵၼ်လမ်းဝဵင်းလႄႈတဝ်ႈၼူမ်းၶႃႈၼၼ်ႉ၊ ပဵၼ်ၸိူဝ်ႉၼင်ႇထဵင်လၢင်းၵႃႈၼိူဝ်လမ်းဝဵင်းၼၼ်ႉဢေႃႈ။ ပိူဝ်ႈၼႆလႄႈသိုဝ်ႈၼႃႈတႂ်ႈတႃမၼ်းၸဝ်ႈၼၼ်ႉ၊ ၶႃႈလႆႈပဵၼ်မိူၼ်ၵေႃႉဢၼ်ပႃးဢဝ် တၢင်းၼိမ်မႃးဢေႃႈ။
ၶုၼ် သေႃးလမုၼ်ႇ၊ မီးသူၼ်မၢၵ်ႇၸပိတ်ႉ သူၼ်ၼိုင်ႈၵႃႈတီႈမိူင်း ပႃႇလႁႃႇမုၼ်ႇ၊ ဢေႃႈ။ မၼ်းၸဝ်ႈၶၢတ်ႈပၼ်ဝႆႉတီႈ၊ၵူၼ်းၵိၼ်ၸၢင်ႈ ၵိၼ်ငႃတင်းလၢႆလႄႈ ၶဝ်လႆႈသၢၵ်ႈငိုၼ်းယေႈၵေႃႉယေႈႁဵင်၊ပုၼ်ႈဢၼ်ၶဝ်လႆႈၵိၼ်မၢၵ်ႇမၼ်းဢေႃႈ။
သူၼ်ဢူးယဵၼ်ႇၵဝ်ၸိုင်၊ပဵၼ်သူၼ်ဢၼ်ၵဝ်ပိူင်ႇလႄႈပဵၼ်ပုၼ်ႈတူဝ်ၸဝ်ႈၵဝ်ႇဢေႃႈ။ ဢူဝ်း။ ၶုၼ် သေႃးလမုၼ်ႇ၊ တီႈၶႃႈ။ ၸဝ်ႈႁဝ်းၸိုင်၊ႁပ်ႉဢဝ်ငိုၼ်းၸဝ်ႈ ႁဵင်ၼိုင်ႈၼၼ်ႉသေၵမ်း၊ ၶဝ်ၸိူဝ်းဢၼ်ၶၢတ်ႈႁဵတ်းသူၼ်ၼၼ်ႉ လႆႈသွင်ပၢၵ်ႇတီႈၶႃႈယဝ်ႉ။
မႂ်းၼၢင်းဢၼ်ၵဝ်ႁၵ်ႉၼႃႇၼႆႉ႟။ မႂ်းၼၢင်းဢၼ် ၼင်ႈၵႃႈၼႂ်းသူၼ်ဢူးယဵၼ်ႇၵဝ်ယူႇ၊ လူၺ်ႈၵၼ်တင်းၵေႃႉသႄႈၸိူင်ႉၼၢင်းတင်းလၢႆ၊ ဢၼ်ပႂ်ႉထွမ်ႇသဵင်မႂ်းၼၢင်းၼၼ်ႉ၊ႁႂ်ႈၵဝ် လႆႈငိၼ်းသဵင်မႂ်းၼၢင်းသေၵမ်း။
မႃးၸူးတီႈၶႃႈၼၢင်းသေၵမ်း၊ၸဝ်ႈဢၼ်ၶႃႈၼၢင်းႁၵ်ႉပႅင်းၼႃႇတီႈၶႃႈ႟။ ၶႅၼ်းတေႃႈပဵၼ်ၸိူဝ်ႉၼင်ႇတိုင်ဢွၼ်ႇ၊ဢိၵ်ႇတင်း ၸၢတ်ႇၶၢႆးဢွၼ်ႇ၊ၵႃႈၼိူဝ်လွႆဢၼ် တူၼ်ႈၼၢမ်ႇသႃႇဢွၵ်ႇၼၼ်ႉသေၵမ်းတီႈၶႃႈ။ လိၵ်ႈႁဵတ်းၵႂၢမ်းသေႃးလမုၼ်ႇယဝ်ႉယဝ်ႉဢေႃႈ။
ၽိုၼ်လိၵ်ႈၼႆႉၶဝ်ႈပႃးၵႂၢမ်းပျႃႇတိၵ်ႈလွင်ႈမိူင်း ယုတႃႉ၊ တင်းလွင်ႈဝဵင်း ယေႇရုသလႅမ်ႇ၊ ဢၼ်ၽြႃးပဵၼ်ၸဝ်ႈလၢတ်ႈၼႄတီႈ ဢိသႃႇယႃႉ၊ လုၵ်ႈၸၢႆး ဢႃႇမူတ်ႉ၊ ၼႂ်းၸူဝ်ႈပၢၼ်ၶုၼ် ဢူဝ်းၸိယႃႉ၊ ၶုၼ် ယူဝ်းထမ်ႇ၊ ၶုၼ် ဢႃႇၶတ်ႉ၊ တင်းၶုၼ် ႁေႇၸၵိ၊ ၸိူဝ်းဢၼ်ပဵၼ်ၶုၼ်ႁေႃၶမ်းမိူင်း ယုတႃႉ၊ ၼၼ်ႉဢေႃႈ။
ထႃႇဝရႃႉၽြႃး၊ မီးဢမိင်ႉလႄႈဝႃႈၸမ်ႉ၊ “ၵၢင်ႁၢဝ်တင်းလိၼ်မိူင်း႟။ ထွမ်ႇငိၼ်းတႃႉ။ ၵဝ်လဵင်ႉလုၵ်ႈလၢင်းယဝ်ႉ၊ၵူၺ်းၵႃႈ၊လုၵ်ႈလၢင်းၸိူဝ်းၼၼ်ႉလုၵ်ႉၽိုၼ်ႉၵဝ်ယဝ်ႉ။-
ဝူဝ်းယင်းႁုၸၵ်းၸဝ်ႈမၼ်းဢေႃႈ။ မႃႉလီႈၵေႃႈႁုၸၵ်းၸဝ်ႈဢၼ်ဢွႆႇယႃႈပၼ်မၼ်းၼၼ်ႉဢေႃႈ။ ၵူၼ်းမဵဝ်းၵဝ် ဢိသရေး၊ ၸမ်ႉ၊ဢမ်ႇႁုၸၵ်းၵဝ်လႄႈဢမ်ႇႁုထွမ်ႇၵႃႈသင်လႃးလႃးယဝ်ႉ၊” ဝႃႈၼင်ႇၼႆဢေႃႈ။
သူၸိူဝ်းဢၼ်တဵမ်ဝႆႉတင်းတုၸရိူၵ်ႈလႄႈပဵၼ်ၵူၼ်းလုၵူၼ်းလႅဝ်၊ၵူၼ်းဢၼ်ႁဵတ်းႁၢႆႉႁဵတ်းမိူၵ်ႈၼႆႉ၊သူမီးဢႃႉမၢင်ႇၵလႃႇဢေႃႈ။ ဢပျတ်ႈတုၸရိူၵ်ႈဢၼ်သူႁဵတ်းၸိူဝ်းၼၼ်ႉတိုတ်ႉၸၼ်ဢဝ်သူတူၵ်းယဝ်ႉ။ သူၸုၼ်ႉပႅတ်ႈ ထႃႇဝရႃႉၽြႃး၊ ၽြႃးဢၼ်မူတ်းၸၢင်ႇဢၼ်ပဵၼ်ၽြႃးၵူၼ်းမဵဝ်း ဢိသရေး၊ ၼၼ်ႉသေလႄႈ၊ဝၢႆႇလင်တေႃႇမၼ်းၸဝ်ႈယဝ်ႉ။-
ႁဵတ်းၸိူဝ်ႉၼင်ႇႁိုဝ်လႄႈသူယင်းတိုၵ်ႉလုၵ်ႉၽိုၼ်ႉမၼ်းၸဝ်ႈၶိူဝ်းၶိူဝ်းယႂ်းယႂ်းယူႇ။ သူၶႂ်ႈၶၢမ်ႇၽေးတၢမ်ႇဢပျတ်ႈၼၼ်ႉထႅင်ႈလူးၵွၼ်ႇႁိုဝ်း။ မဵဝ်း ဢိသရေး၊ ႟။ ၵွၵ်းႁူဝ်မႂ်းတဵမ်ဝႆႉတင်းႁွႆးၸဵပ်းႁွႆးသႅပ်ႇယဝ်ႉလႄႈႁူဝ်ၸႂ်မႂ်းၵေႃႈဢူၼ်ႈၵႂႃႇၸွပ်ႈၵႂႃႇယဝ်ႉ။-
ဢဝ်တီႈၸိၵ်းႁူဝ်တေႃႇပၢႆတိၼ်ဢမ်ႇမီးတၢင်းဢၼ်လီၵႃႈတီႈတူဝ်ၶိင်းမႂ်းသေတီႈ၊ပဵၼ်ႁွႆးၸမ်ႉလႄႈၵႂ်ႈပဵၼ်တုမ်ႇၸဵပ်းဢၼ်မူမ်ႇၼွင်တင်းႁွႆးၸဵပ်းဢၼ်ၵီႈယူႇၼၼ်ႉၵူၺ်းၵူၺ်းဢေႃႈ။ တၢင်းၸဵပ်းၸိူဝ်းၼၼ်ႉဢမ်ႇပႆႇလႆႈမိပ်ႇ၊ဢမ်ႇပႆႇလႆႈဢဝ်ၼမ်ႉမၼ်းတႃးႁႂ်ႈဢူၼ်ႈမႃးၶႅၼ်းမႃးလႄႈဢမ်ႇပႆႇလႆႈဢဝ်ၽႃႈပူၵ်ႉႁေႃႇဝႆႉလႃးလႃး။
မိူင်းသူလႆႈၶၢမ်ႇတၢင်းဢၼ်ယႃႉလုယႃႉလႅဝ်ပႅတ်ႈသေယဝ်ႉ၊ဝဵင်းသူတင်းလၢႆၵေႃႈၽႆးလႆႈမႆႈပႅတ်ႈယဝ်ႉ။ မိူဝ်ႈဢၼ်သူမုင်ႈတူၺ်းၼၼ်ႉလႆႈႁၼ်ၵူၼ်းတၢင်ႇသိုင်ႇတၢင်ႇမိူင်းသိမ်းဢဝ်လိၼ်သူမိူင်းသူယဝ်ႉလႄႈယႃႉပႅတ်ႈၵႃႈမီးတင်းသဵင်ႈတင်းလူင်လုလႅဝ်ပႅတ်ႈၼၼ်ႉယဝ်ႉ။-
ၵူၺ်းမီးဝဵင်း ယေႇရုသလႅမ်ႇ၊ ဢၼ်ရၢၼ်ႇသူႇမၼ်းလွမ်ႉႁွပ်ႈဝႆႉၼၼ်ႉၵိုတ်းၵျၢၼ်ႇယူႇမိူၼ်ၸိူဝ်ႉၼင်ႇသုမ်ႉသူၼ်မၢၵ်ႇၸပိတ်ႉ၊ဢမ်ႇၼၼ်မိူၼ်ၸိူဝ်ႉၼင်ႇထဵင်ၵႃႈၼႂ်းသူၼ်တႅင်ၼၼ်ႉယဝ်ႉ။-
ပေႃးဝႃႈ၊ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ယင်းဢမ်ႇဝႆႉၵိုတ်းဝႆႉၵျၢၼ်ႇၵမ်ႈၽွင်ႈၸိုင်၊ဝဵင်း ယေႇရုသလႅမ်ႇ၊ တၵ်းပဵၼ်မိူၼ်ၸိူဝ်ႉၼင်ႇဝဵင်း သေႃးတုမ်ႇ၊ ဝဵင်း ၵေႃးမေႃးရႃႉ၊ ဢေႃႈ။
ဝဵင်း ယေႇရုသလႅမ်ႇ၊ ႟။ ၶုၼ်လူင်မႂ်းတင်းလၢႆ၊ဢိၵ်ႇတင်းၵူၼ်းမႂ်းတင်းလၢႆပဵၼ်မိူၼ်ၸိူဝ်ႉၼင်ႇဝဵင်း သေႃးတုမ်ႇ၊ ဝဵင်း ၵေႃးမေႃးရႃႉ၊ ယဝ်ႉ။ ႁႄႈႁူလႄႈထွမ်ႇငိၼ်းဢၼ်တၵ်းမီးဢမိင်ႉတီႈမႂ်းၼၼ်ႉတႃႉ။ ဝႆႉၸႂ်ဝႆႈၶေႃးထွမ်ႇဢဝ်ၵႂၢမ်းဢၼ်ၽြႃးပဵၼ်ၸဝ်ႈသင်ႇသွၼ်သုင်းမႃႉတီႈသူၼၼ်ႉတႃႉ။-
ထႃႇဝရႃႉၽြႃး၊ မီးဢမိင်ႉၸမ်ႉ၊ “သူထၢင်ႇၵဝ်မီးဢလူဝ်ႇၶႂ်ႈလႆႈတူဝ်တၢင်းလူႇဢၼ်သူလူႇတၢၼ်းတီႈၵဝ်ၼၼ်ႉႁိုဝ်း။ ၵဝ်ဢိမ်ႇမိူဝ်ႇတူဝ်တၢင်းလူႇဢၼ်သူဢဝ်တုတ်ႇၽႆးဢိၵ်ႇတင်းၵွၼ်ႈၶႆၵွၼ်ႈမၼ်းတူဝ်သတ်းဢၼ်ပီးလီမၼ်းလီၼၼ်ႉဢေႃႈ။ ၵဝ်ဢမ်ႇထုၵ်ႇၸႂ်လိူတ်ႈဝူဝ်း၊လိူတ်ႈသူဝ်းတင်းလိူတ်ႈပႄႉတင်းလၢႆယဝ်ႉ။-
ၽူႈလႂ်ယွၼ်းႁႂ်ႈသူပႃးဢဝ်ၶိူင်ႈပိူင်ၸိူဝ်းၼႆႉမႃးတီႈၵဝ်မိူဝ်ႈဢၼ်သူမႃးဝႆႈၵဝ်ၼၼ်ႉ။ ၽူႈလႂ်ယွၼ်းႁႂ်ႈသူပႃးဢဝ်ၶိူင်ႈပိူင်ၸိူဝ်းၼႆႉမႃးယဵပ်ႇယမ်ႈၵႃႈၼႂ်းၵျွင်းပိၵ်ႈမၢၼ်ႇၵဝ်။-
တၢင်းဢၼ်သူပႃးဢဝ်ၶိူင်ႈတၢင်းလူႇၸိူဝ်းၼႆႉမႃးၸိုင်၊ပဵၼ်ဢၼ်လၢႆလၢႆဢမ်ႇပွင်ႇလွင်ႈၵႃႈသင်ဢေႃႈ။ ၵဝ်မိူဝ်ႇၸၢၼ်ႈဢၢႆၼၢမ်ႇသႃႇဢၼ်သူၽဝ်ၽႆးၼႆႉယဝ်ႉ။ ၵဝ်ဢဵတ်ႇသဵတ်ႇပွႆးလိူၼ်မႂ်ႇသူ၊ဝၼ်းၵမ်သိၼ်သူ၊ဢိၵ်ႇတင်းဝၼ်းဢၼ်သူၸုတုမ်ၵၼ်ၼႂ်းပွႆးထမ်ႇမႃႉလႂ်ၼၼ်ႉယဝ်ႉ။ လွင်ႈမၼ်းၸမ်ႉ၊ဝၼ်းၸိူဝ်းၼၼ်ႉသိၼ်လုၵႂႃႇၵွပ်ႈပိူဝ်ႈဢပျတ်ႈသူၼၼ်ႉယဝ်ႉ။
“ပွႆးဝၼ်းလိူၼ်မႂ်ႇသူလႂ်၊ပွႆးဝၼ်းဢၼ်မူတ်းၸၢင်ႇလႂ်ၸိူဝ်းၼၼ်ႉၵေႃႈၵဝ်ငိၼ်းၸင်းၶၢၼ်ႉႁၼ်ယဝ်ႉ။ ဝၼ်းၸိူဝ်းၼႆႉႁဵတ်းႁႂ်ႈၵဝ်ယၢပ်ႇၸႂ်ၽိုတ်ႇၸႂ်လႄႈဢမ်ႇယိူၼ်ႉၶၢမ်ႇလူၺ်ႈလွင်ႈၸိူဝ်းၼၼ်ႉလႆႈယဝ်ႉ။
“ယၢမ်းမိူဝ်ႈဢၼ်သူႁွမ်းမိုဝ်းလႄႈသူးတွင်းၼၼ်ႉၵဝ်တၵ်းဢမ်ႇတူၺ်းႁၼ်သူ။ သူႁဵတ်းသူးတွင်းပထၼႃႇၵႃႈႁိုဝ်သေၵေႃႈၵဝ်တၵ်းဢမ်ႇထွမ်ႇငိၼ်းဢဝ်။ လွင်ႈမၼ်းၸမ်ႉ၊မိုဝ်းသူၼၼ်ႉတဵမ်ဝႆႉတင်းလိူတ်ႈဢေႃႈ။-
သုၵ်ႈပွတ်ႈတူဝ်ၸဝ်ႈၵဝ်ႇႁႂ်ႈမူတ်းသႂ်တႃႉ။ ပႄႇပႅတ်ႈတုၸရိူၵ်ႈၵႃႈဢၼ်ၵဝ်ႁၼ်သူႁဵတ်းယူႇၸိူဝ်းၼၼ်ႉတႃႉ။ တႅပ်းပႅတ်ႈတၢင်းၵမ်တၢင်းၵျၢင်ႉဢၼ်ဢမ်ႇလီဢမ်ႇငၢမ်းၼၼ်ႉသေတႃႉ။-
သွၼ်ဢဝ်ႁႂ်ႈလႆႈၵမ်ၵျၢင်ႉဢၼ်လီဢၼ်ငၢမ်းတႃႉ။ ၵျၢမ်ႇႁႃႁႂ်ႈလႆႈႁဵတ်းသိုဝ်ႈသိုဝ်ႈယူဝ်းယူဝ်းတႃႉ။ ၸွႆႈထႅမ်ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၼိၵ်ႈၸၢၵ်ႈၼၼ်ႉတႃႉ။ ပၼ်ဢၶႂၢင်ႉဢယေးတၢင်းဢၼ်လွတ်ႈလႅဝ်းတီႈလုၵ်ႈၽၢၼ်ပေႃႈၽၢၼ်မႄႈၸိူဝ်းၼၼ်ႉလႄႈၵႅတ်ႇၶႄႁႄႉၵင်ႈမႄႈမၢႆႈတင်းလၢႆတႃႉ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉလႄႈဝႃႈ၊ “မႃးတႃႉ။ ဢွၼ်ၵၼ်တိူင်ႇပၢင်ႇၵၼ်တႃႉႁဝ်း။ ပိၵ်ႈသမ်ႉဢပျတ်ႈသူလႅင်ၸၢင်းႁၢင်းယူႇသေၵေႃႈၵဝ်တၵ်းႁႂ်ႈၽိူၵ်ႇၶၢဝ်သေမူၺ်ႁႃႇဢေႃႈ။ ပိၵ်ႈသမ်ႉဢပျတ်ႈသူၵူဝ်ႈၵိူၵ်ႇလႄႈလႅင်ၵမ်ႇသေၵေႃႈတၵ်းႁႂ်ႈၽိူၵ်ႇၶၢဝ်မိူၼ်ၸိူဝ်ႉၼင်ႇၶူၼ်သူဝ်းဢေႃႈ။-
ပေႃးသူပႃးၸႂ်ပႃးၶေႃးထွမ်ႇဢဝ်ၸိုင်၊သူတၵ်းလႆႈၵိၼ်မၢၵ်ႇၶဝ်ႈႁူင်းၼမ်ႉဢၼ်လီသေပိူၼ်ႈဢၼ်ဢွၵ်ႇမႃးၵႃႈတီႈလိၼ်ၼၼ်ႉဢေႃႈ။-
ၵူၺ်းၵႃႈ၊ပေႃးသူတွပ်ႇထဵင်လႄႈလုၵ်ႉၽိုၼ်ႉၵဝ်ၸိုင်၊သူတၵ်းလႆႈတၢႆဢေႃႈ။ ၵဝ်၊ ထႃႇဝရႃႉၽြႃး၊ မီးဢမိင်ႉဝႆႉယဝ်ႉ၊” ဝႃႈၼင်ႇၼႆဢေႃႈ။
ဝဵင်းဢၼ်မိူဝ်ႈၵွၼ်ႇမီးသဵတ်ႈၸႃႇၼၼ်ႉလဵၼ်ႈၽူဝ်ၼွႆႉယူႇယဝ်ႉဢေႃႈ။ မိူဝ်ႈဢွၼ်ၼႆႉၼၼ်ႉတဵမ်ဝႆႉတင်းၵူၼ်းဢၼ်သိုဝ်ႈတေႃႇၵူၺ်းၵူၺ်းသေၵေႃႈ၊မိူဝ်ႈလဵဝ်ၼႆႉတဵမ်ဝႆႉတင်းၵူၼ်းဢၼ်ဢဝ်ဢသၢၵ်ႈပိူၼ်ႈတၢႆၼၼ်ႉၵူၺ်းၵူၺ်းယဝ်ႉဢေႃႈ။-
ဝဵင်း ယေႇရုသလႅမ်ႇ၊ ႟။ မိူဝ်ႈဢွၼ်ၼႆႉၼၼ်ႉမႂ်းပဵၼ်မိူၼ်ၸိူဝ်ႉၼင်ႇငိုၼ်းသေၵေႃႈ၊တေႃႈလဵဝ်ၼႆႉၸမ်ႉ၊မႂ်းပဵၼ်ၶီႈဝၢၵ်ႇၵႂႃႇယဝ်ႉ။ ၼမ်ႉမၢၵ်ႇၸပိတ်ႉမႂ်းဢၼ်လီၼၼ်ႉၵေႃႈပဵၼ်ၼမ်ႉလိပ်းလၢႆလၢႆၵႂႃႇယဝ်ႉဢေႃႈ။-
ၶုၼ်ၸိူဝ်းၼၼ်ႉၵေႃႈပဵၼ်ၵူၼ်းဢၼ်လုၵ်ႉၽိုၼ်ႉမိူင်းလႄႈႁဵတ်းၵေႃႉလူၺ်ႈၵၼ်တင်းၽူႈလၵ်ႉၵူၼ်းၸူၼ်သေယဝ်ႉ၊ၶဝ်ႁပ်ႉဢဝ်လၢၵ်ႈသွင်ႇပိူၼ်ႈလႄႈၵိၼ်သူးၵိၼ်လၢပ်ႈပိူၼ်ႈယဝ်ႉ။ ၶဝ်ဢမ်ႇၵႅတ်ႇဢမ်ႇၶႄဢၼ်လုၵ်ႈၽၢၼ်ပေႃႈၽၢၼ်မႄႈၵႃႈၼႂ်းလုမ်းလႄႈဢမ်ႇထွမ်ႇဢဝ်ဢမုဢၼ်မႄႈမၢႆႈတင်းလၢႆတၢင်ႇလဝ်ႈၼၼ်ႉယဝ်ႉဢေႃႈ။
ပိူဝ်ႈၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ဢၼ်ပဵၼ်ၽြႃးၵူၼ်းမဵဝ်း ဢိသရေး၊ မီးဢမိင်ႉလႄႈလၢတ်ႈဝႃႈၸမ်ႉ၊ “ၵဝ်တၵ်းပႄႇပႅတ်ႈၶဝ်ၸိူဝ်းဢၼ်ပဵၼ်ရၢၼ်ႇသူႇၵဝ်တင်းလၢႆလႄႈၵဝ်တၵ်းတွပ်ႇတၵ်းတႅၼ်းပၼ်တီႈရၢၼ်ႇသူႇၵဝ်တင်းလၢႆဢေႃႈ။-
ၵဝ်သမ်ႉၶိုၼ်းတၵ်းယူႇၽၢႆႇသူလႄႈႁဵတ်းႁႂ်ႈသူၵၢင်းလွတ်ႈတင်းၶီႈဝၢၵ်ႇမူတ်းမူတ်းသဵင်ႈသဵင်ႈ၊ဢိၵ်ႇတင်းဢဝ်မဵဝ်းဢၼ်ဢမ်ႇမူတ်းသႂ်ဢၼ်မီးၵႃႈၼႂ်းသူၼၼ်ႉဢွၵ်ႇပႅတ်ႈဢေႃႈ။-
ၵဝ်တၵ်းသမ်ႉၶိုၼ်းၶၢၼ်းၶုၼ်လူင်ဢိၵ်ႇတင်းၶုၼ်ဢၼ်ၸီႇယၢင်ႇတြႃးတင်းလၢႆဝႆႉမိူၼ်ၸိူဝ်ႉၼင်ႇမိူဝ်ႈႁူဝ်ပိုင်းၼၼ်ႉထႅင်ႈလူးၵွၼ်ႇဢေႃႈ။ လိုၼ်းၼၼ်ႉဝဵင်း ယေႇရုသလႅမ်ႇ၊ တၵ်းသမ်ႉၶိုၼ်းလႆႈႁွင်ႉၸိုဝ်ႈၼၼ်ႉဝႃႈ၊ပဵၼ်ဝဵင်းဢၼ်သိုဝ်ႈတေႃႇ၊ဝဵင်းဢၼ်ပႂ်ႉသဵတ်ႈၸႃႇဢေႃႈ။
“ၵွပ်ႈပိူဝ်ႈဢၼ် ထႃႇဝရႃႉၽြႃး၊ ပဵၼ်ၸဝ်ႈဢၼ်သိုဝ်ႈတေႃႇလႄႈမၼ်းၸဝ်ႈတၵ်းၵႄႇသႄႇၼုၵ်ႈဢဝ်ဝဵင်း ယေႇရုသလႅမ်ႇ၊ ဢိၵ်ႇပႃးတင်းၵူၼ်းၼႂ်းဝဵင်းဢၼ်ၶုၵ်းၸႂ်လႆႈမႆႈၸႂ်ဢပျတ်ႈလႄႈၶၢႆႉပုတ်ႈၸႂ်ၸိူဝ်းၼၼ်ႉၵူႈၵေႃႉၵူႈၵူၼ်းဢေႃႈ။-
ၵူၺ်းၵႃႈ၊မၼ်းၸဝ်ႈတၵ်းပေႃႉထုပ်ႉႁၵ်းႁိၵ်းပႅတ်ႈၶဝ်ၸိူဝ်းဢၼ်ႁဵတ်းတုၸရိူၵ်ႈလႄႈလုၵ်ႉၽိုၼ်ႉမၼ်းၸဝ်ႈၼၼ်ႉၵူႈၵေႃႉၵူႈၵူၼ်းဢေႃႈ။ မၼ်းၸဝ်ႈတၵ်းႁႂ်ႈၶဝ်ၸိူဝ်းဢၼ်ၸုၼ်ႉပႅတ်ႈမၼ်းၸဝ်ႈၵူႈၵေႃႉၵူႈၵူၼ်းၼၼ်ႉႁွတ်ႈထိုင်တၢင်းဢၼ်လုလႅဝ်ဢေႃႈ။
“သူတၵ်းဢွၼ်ၵၼ်မီးႁူဝ်ၸႂ်ဢၼ်ဢမ်ႇသႃႇၵွပ်ႈပိူဝ်ႈဢၼ်သူယၢမ်ႈဝႆႈတူၼ်ႈမႆႉၼိမ်လႂ်၊ဢိၵ်ႇတင်းတၢင်းဢၼ်သူယၢမ်ႈႁဵတ်းလူင်ႈၸဝ်ႈမိူင်း ၼၼ်ႉဢေႃႈ။-
သူတၵ်းႁဵဝ်ႇၵႂႃႇၸွပ်ႈၵႂႃႇမိူၼ်ၸိူဝ်ႉၼင်ႇတူၼ်ႈမႆႉၼိမ်ဢၼ်တၢႆၵႂႃႇယဝ်ႉ၊ဢိၵ်ႇတင်းလူင်ႈၸဝ်ႈမိူင်းဢၼ်ဢမ်ႇမီးၼမ်ႉလႃးလႃးၼၼ်ႉဢေႃႈ။-
မၼ်းတၵ်းပဵၼ်မိူၼ်ၸိူဝ်ႉၼင်ႇၽိူင်းဢၼ်မႆႈၵႂႃႇၵွပ်ႈပိူဝ်ႈၶႆႇၽႆးဢၼ်ၼိုင်ႈၼၼ်ႉဢေႃႈ။ ၵူၼ်းဢၼ်မီးႁႅင်းယႂ်ႇၸိူဝ်းၼၼ်ႉတၢင်းႁၢႆႉတၢင်းမိူၵ်ႈၶဝ်ၼၼ်ႉတၵ်းမႃးယႃႉၽဵဝ်ႈပႅတ်ႈၶဝ်လႄႈတၢင်းဢၼ်လုဢၼ်လႅဝ်ၼၼ်ႉၽူႈလႂ်သေၵေႃႉသေၵူၼ်းဢမ်ႇႁႄႉဢမ်ႇၶႅၼ်လႆႈလႃးလႃး။”
ၵႂၢမ်းပျႃႇတိၵ်ႈဢၼ်ၽြႃးပဵၼ်ၸဝ်ႈပၼ်မႃးတီႈ ဢိသႃႇယႃႉ၊ လုၵ်ႈၸၢႆး ဢႃႇမူတ်ႉ၊ လွင်ႈမိူင်း ယုတႃႉ၊ ဢိၵ်ႇတင်းဝဵင်း ယေႇရုသလႅမ်ႇ၊ လႄႈဝႃႈၸမ်ႉ၊
ၼႂ်းဝၼ်းလိုၼ်းမိူဝ်းၼႃႈၼၼ်ႉ၊လွႆဢၼ်ၵျွင်းပိၵ်ႈမၢၼ်ႇၸဝ်ႈတႄႇတင်ႈယူႇၼၼ်ႉ၊ တၵ်းပဵၼ်ၸိၵ်းၸွမ်လွႆဢၼ်သုင်ၼႃႇသေလွႆတင်းလၢႆလႄႈ မုင်းႁူမ်ႇယူႇၵႃႈၼိူဝ်လွႆၵႃႈမီးတင်းသဵင်ႈတင်းလူင်ဢေႃႈ။ ၵူၼ်းမဵဝ်းၼမ်ၼႃႇတၵ်းဢွၼ်ၵၼ်မႃးၵႃႈတီႈလွႆၼၼ်ႉသေယဝ်ႉ။
ၵူၼ်းၶဝ်ၸိူဝ်းၼၼ်ႉတၵ်းဢွၼ်ၵၼ်လၢတ်ႈဝႃႈ၊ “မႃးမႃး႟။ ႁဝ်းဢွၼ်ၵၼ်ၶိုၼ်ႈၵႂႃႇၵႃႈၼိူဝ်လွႆၸဝ်ႈၽြႃး၊ ၵႃႈတီႈၵျွင်းပိၵ်ႈမၢၼ်ႇၽြႃးၵူၼ်းမဵဝ်း ဢိသရေး၊ ၶဝ်တႃႉႁဝ်း၊ မၼ်းၸဝ်ႈတၵ်းသင်ႇသွၼ်ပၼ်ၵႃႈဢၼ်မၼ်းၸဝ်ႈၶႂ်ႈႁႂ်ႈႁဝ်းၵမ်ၵျၢင်ႉလႄႈ ႁဝ်းတၵ်းၵႂႃႇမႃးၵႃႈၼႂ်းသဵၼ်ႈတၢင်းမၼ်းၸဝ်ႈဢေႃႈ၊” ဝႃႈၼင်ႇၼႆဢေႃႈ။ လွင်ႈမၼ်းၸမ်ႉ၊ ထႃႇဝရႃႉၽြႃး၊ လုၵ်ႉသေၵႃႈတီႈဝဵင်း ယေႇရုသလႅမ်ႇ၊ မႃးလႄႈ ၼုၵ်ႈၵပၢတ်ႈ ထႃႇဝရႃႉၽြႃး၊ ပေႃႇဢွၵ်ႇမႃးၵႃႈတီႈလွႆ ၸိဢုၼ်ႇ၊ ဢေႃႈ။
မၼ်းၸဝ်ႈတၵ်းႁႂ်ႈသိုၵ်းထၢတ်ႇယဵၼ်ၵႃႈၼႂ်းၵူၼ်းမဵဝ်းယႂ်ႇမဵဝ်းလူင်တင်းလၢႆလႄႈ ဢဝ်လၢပ်ႇၶဝ်လႅဝ်းၶဝ်ပေႃႉႁဵတ်းပဵၼ်သိၵ်ႈထိူၼ်ႇသိၵ်ႈၽိူဝ် ဢိၵ်ႇတင်းဢဝ်ႁွၵ်ႇၶဝ်ပေႃႉႁဵတ်းပဵၼ်ၶဵဝ်းဢေႃႈ။ မိူင်းၼိုင်ႈတၵ်းဢမ်ႇတိုၵ်းတေႃးမိူင်းၼိုင်ႈ၊ တၢင်းဢၼ်ႁႅၼ်းၼႃႈသိုၵ်းႁႂ်ႈလႆႈတိုၵ်းတေႃးၼၼ်ႉဢမ်ႇမီးထႅင်ႈသေပွၵ်ႈယဝ်ႉ။
လုၵ်ႈလၢၼ်မဵဝ်း ယႃႇၵုပ်ႈ၊ ၶဝ်႟။ မႃးတႃႉ။ ဢွၼ်ၵၼ်ပႆၵႂႃႇပႆမႃးၼႂ်းဢၼ်လႅင်းဢၼ် ထႃႇဝရႃႉၽြႃး၊ ပၼ်ႁဝ်းၼၼ်ႉတႃႉႁဝ်း။
ဢူဝ်း၊ၽြႃးပဵၼ်ၸဝ်ႈတီႈၶႃႈ။ ၸဝ်ႈႁဝ်းၸုၼ်ႉပႅတ်ႈၵူၼ်းမဵဝ်းၸဝ်ႈႁဝ်းၸိူဝ်ႉၶိူဝ်း ယႃႇၵုပ်ႈ၊ ၼၼ်ႉတီႈၶႃႈယဝ်ႉလူင်ပႄႇ။ ၵႃႈၼႂ်းမိူင်းၼႆႉတဵမ်ဝႆႉတင်းဢတၢတ်ႈမေႃၽီဢၼ်လုၵ်ႉသေၵႃႈတီႈမိူင်းၽၢႆႇတၢင်းဝၼ်းဢွၵ်ႇ၊ဢိၵ်ႇတင်းမိူင်း ၽိလိတ်ႉတိ၊ ဢဝ်မႃးၼၼ်ႉဢေႃႈ။ ၵူၼ်းတင်းလၢႆဢွၼ်ၵၼ်ၵမ်ၵျၢင်ႉၸွမ်းထုင်းတြႃးၵူၼ်းမိူင်းၼွၵ်ႈၶဝ်ယဝ်ႉ။-
မိူင်းၶဝ်ၼၼ်ႉတဵမ်ဝႆႉတင်းငိုၼ်းၶမ်းလႄႈဢုၵ်ႉၸႃႇၼမ်ၼႃႇဢမ်ႇႁုၼမ်ၵႃႈႁိုဝ်ၼၼ်ႉဢေႃႈ။ မိူင်းၶဝ်ပျေႉၸုမ်ႇတဵမ်ဝႆႉတင်းမႃႉတင်းလၢႆလႄႈလေႃႉမႃႉသိုၵ်းၼမ်ၼႃႇဢမ်ႇႁုၼမ်ၵႃႈႁိုဝ်ၼၼ်ႉဢေႃႈ။-
မိူင်းၶဝ်တဵမ်ဝႆႉတင်းႁုၼ်ႇႁၢင်ႈသၢင်းထုတင်းလၢႆလႄႈၶဝ်ဝႆႈၶိူင်ႈပိူင်ဢၼ်ဢဝ်တင်းမိုဝ်းၶဝ်ႁဵတ်းၼၼ်ႉဢေႃႈ။
ၶဝ်တင်းလၢႆတၵ်းလႆႈၶၢမ်ႇတၢင်းဢၼ်ၶျႃးတူၵ်းတီႈတႅမ်ႇလႄႈတၵ်းလႆႈႁွတ်ႈထိုင်တၢင်းဢၼ်လီဢူၵ်းလီဢၢႆဢေႃႈ။ ၸဝ်ႈႁဝ်းယႃႇပေပွႆႇလွတ်ႈဢပျတ်ႈၶဝ်ၼၼ်ႉသေၵမ်းတီႈၶႃႈ။
ၶဝ်တၵ်းဢွၼ်ၵၼ်ပၢႆႈတဵတ်ႇၵႃႈၼႂ်းႁူးထမ်ႈႁိၼ်ၽႃလႄႈမႅပ်းယူႇၵႃႈၼႂ်းလုၵ်းၼႂ်းႁူးႁႂ်ႈလႆႈပၢႆႈလွတ်ႈသေၵႃႈတီႈႁႅင်းတေႃးသႃႉ ထႃႇဝရႃႉၽြႃး၊ ဢိၵ်ႇတင်းႁႂ်ႈလႆႈပၢႆႈတဵတ်ႇပၢႆႈမႅပ်းသေၵႃႈတီႈႁႅင်းတၼ်းၶူဝ်းဢႃႇၼုၽေႃႇမၼ်းၸဝ်ႈဢေႃႈ။-
ၼႂ်းဝၼ်းၼိုင်ႈၸဝ်ႉၸဝ်ႉ၊တၢင်းဢၼ်ၵူၼ်းဢုပ်ႇဝၢဝ်းတၵ်းသုတ်းဝၢႆးၵႂႃႇလႄႈတၢင်းဢၼ်ၵူၼ်းႁူဝ်ၸႂ်ၽႅၼ်သုင်တၵ်းလုၵႂႃႇလႅဝ်ၵႂႃႇၼၼ်ႉတၵ်းပဵၼ်မႃးဢေႃႈ။ ၵမ်းၼၼ်ႉ ထႃႇဝရႃႉၽြႃး၊ သူႇလဵဝ်ပႃးလဵဝ်ၵူၺ်းတၵ်းႁွတ်ႈထိုင်တၢင်းဢၼ်ယုၵ်ႉယွင်ႈဢေႃႈ။-
ၼႂ်းမိုဝ်ႉဝၼ်းၼၼ်ႉ ထႃႇဝရႃႉၽြႃး၊ ၸဝ်ႈဢၼၼ်ႇတႃႉတၼ်းၶူဝ်းတၵ်းႁႂ်ႈၶဝ်ၸိူဝ်းဢၼ်တၼ်းၶူဝ်းယႂ်ႇလႄႈဢုပ်ႇဝၢဝ်းလူၺ်ႈတၢင်းဢၼ်တူဝ်ၸဝ်ႈၵဝ်ႇယႂ်ႇသုင်ၼႃႇၼၼ်ႉတၵ်းႁွတ်ႈထိုင်တၢင်းဢၼ်ၶျႃးတူၵ်းတီႈတႅမ်ႇဢေႃႈ။-
မၼ်းၸဝ်ႈတၵ်းပွမ်ႈတူၼ်ႈမႆႉဢႃႇရိတ်ႉတီႈလွႆ လေႇပၼုၼ်ႇ၊ လႂ်၊မႆႉၼိမ်တီႈမိူင်း ပႃႇသၢၼ်ႇ၊ လႂ်ပႅတ်ႈဢေႃႈ။-
မၼ်းၸဝ်ႈတၵ်းၵိူၼ်ႇယႃႉလွႆလူင်ဢၼ်သုင်ၼႃႇ၊ဢိၵ်ႇတင်းၵွင်းလွႆဢွၼ်ႇလႂ်၊-
သဝ်လၢင်းဢၼ်ယႂ်ႇဢၼ်သုင်လႂ်၊ဢိၵ်ႇတင်းတိူၵ်ႈပုၼ်ႈတႃႇတိုၵ်းသိုၵ်းလႂ်ၸိူဝ်းၼၼ်ႉတၵ်းႁဵတ်းႁႂ်ႈမၼ်းပဵင်းဢေႃႈ။-
မၼ်းၸဝ်ႈတၵ်းဢဝ်ႁိူဝ်းသၢင်းၽေႃးဢၼ်ယႂ်ႇၼႃႇသေပိူၼ်ႈ၊ဢၼ်ႁၢင်ႈလီသေပိူၼ်ႈၸိူဝ်းၼၼ်ႉၸူမ်ၼမ်ႉပႅတ်ႈဢေႃႈ။-
မိူဝ်ႈၼၼ်ႉတၢင်းဢၼ်ၵူၼ်းဢုပ်ႇဝၢဝ်းတၵ်းသုတ်းဝၢႆးလႄႈတၢင်းဢၼ်ၵူၼ်းႁူဝ်ၸႂ်ၽႅၼ်သုင်ၼၼ်ႉတၵ်းလုၵႂႃႇလႅဝ်ၵႂႃႇဢေႃႈ။ ထႃႇဝရႃႉၽြႃး၊ သူႇလဵဝ်ပႃးလဵဝ်ၵူၺ်းတၵ်းႁွတ်ႈထိုင်တၢင်းဢၼ်ယုၵ်ႉယွင်ႈဢေႃႈ။-
ႁုၼ်ႇႁၢင်ႈသၢင်းထုတင်းလၢႆတၵ်းလႆႈလပ်ႉႁၢႆၵႂႃႇမူတ်းမူတ်းသဵင်ႈသဵင်ႈဢေႃႈ။
ၵူၼ်းတင်းလၢႆဢွၼ်ၵၼ်ပၢႆႈတဵတ်ႇၵႃႈၼႂ်းႁူးထမ်ႈႁိၼ်ၽႃလႄႈမႅပ်းၵႃႈၼႂ်းလုၵ်းၼႂ်းႁူး၊ႁႂ်ႈလႆႈပၢႆႈလွတ်ႈသေၵႃႈတီႈႁႅင်းတေႃးသႃႉ ထႃႇဝရႃႉၽြႃး၊ ဢိၵ်ႇတင်းႁႂ်ႈလႆႈပၢႆႈတဵတ်ႇပၢႆႈမႅပ်းသေၵႃႈတီႈႁႅင်းတၼ်းၶူဝ်းဢႃႇၼုၽေႃႇမၼ်းၸဝ်ႈ၊ၼႂ်းမိူဝ်ႈဢၼ်မၼ်းၸဝ်ႈၵျွလူင်းမႃးသၼ်ႇၶွၼ်းလိၼ်မိူင်းၼၼ်ႉဢေႃႈ။-
ၼႂ်းမိူဝ်ႈဢၼ်ဝၼ်းၼၼ်ႉႁွတ်ႈမႃးၸိုင်၊ၵူၼ်းတင်းလၢႆတၵ်းဢဝ်ႁုၼ်ႇႁၢင်ႈသၢင်းထုငိုၼ်း၊ႁုၼ်ႇႁၢင်ႈသၢင်းထုၶမ်းဢၼ်ၶဝ်ႁဵတ်းၸိူဝ်းၼၼ်ႉထိမ်ႈပႅတ်ႈပၼ်တီႈတွၼ်ႇလႂ်၊ဢိၵ်ႇတင်းၵႃႈတီႈဝိင်ႇလႂ်ဢေႃႈ။-
မိူဝ်ႈဢၼ် ထႃႇဝရႃႉၽြႃး၊ ၵျွလူင်းမႃးသၼ်ႇၶွၼ်းလိၼ်မိူင်းၼၼ်ႉၵူၼ်းတင်းလၢႆတၵ်းဢွၼ်ၵၼ်ပၢႆႈတဵတ်ႇပၢႆႈမႅပ်းၵႃႈၼႂ်းလုၵ်းၼႂ်းႁူး၊ဢိၵ်ႇတင်းၵႃႈၼႂ်းႁူးထမ်ႈမၢၵ်ႇႁိၼ်တင်းလၢႆႁႂ်ႈလႆႈပၢႆႈလွတ်ႈသေၵႃႈတီႈႁႅင်းတေႃးသႃႉမၼ်းၸဝ်ႈ၊ဢိၵ်ႇတင်းႁႂ်ႈလႆႈပၢႆႈတဵတ်ႇပၢႆႈမႅပ်းသေၵႃႈတီႈႁႅင်းတၼ်းၶူဝ်းဢႃႇၼုၽေႃႇမၼ်းၸဝ်ႈဢေႃႈ။
ၵူၺ်းၵႃႈ၊ယႃႇပေယုမ်ႇယမ်တမ်းၸႂ်ၵႃႈတီႈၵူၼ်းသတ်ႉတဝႃႇဢၼ်ၸၢင်ႈတူႇၸၢင်ႈၼဝ်ႈၼႆႉၶဝ်ပဵၼ်ဢၼ်ဢမ်ႇပွင်ႇလွင်ႈၵႃႈသင်ဢေႃႈ။
တေႃႈလဵဝ်ၼႆႉ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၸမ်တၵ်းပႄႇၽဵဝ်ႈပႅတ်ႈၵူႈၸိူဝ်ႉၵူႈပိူင်၊ဢိၵ်ႇတင်းၵူၼ်းၵူႈၵေႃႉၵူႈၵူၼ်းဢၼ်ၵူၼ်းတင်းလၢႆဢိင်ပိုင်ႈဢႃးၵူဝ်းလႄႈမီးယူႇၵႃႈၼႂ်းဝဵင်း ယေႇရုသလႅမ်ႇ၊ တင်းမိူင်း ယုတႃႉ၊ ၼၼ်ႉယဝ်ႉ။ မၼ်းၸဝ်ႈၸမ်တၵ်းပႄႇၽဵဝ်ႈပႅတ်ႈၶဝ်ႈၼမ်ႉတၢင်းၵိၼ်ၶဝ်၊-
ၵူၼ်းႁတ်းႁၢၼ်ၶဝ်၊ၵူၼ်းသိုၵ်းၵူၼ်းသိူဝ်ၶဝ်၊ၶုၼ်ဢၼ်ၸီႇယၢင်ႇတြႃးၶဝ်၊ပရေႃးၽႅတ်ႈ ၶဝ်၊သြႃႇပေႇတၢင်ႇတင်းၵူၼ်းထဝ်ႈၵူၼ်းၵႄႇၶဝ်၊-
ၶုၼ်ဢၼ်ဢုပ်ႉတပ်ႉသိုၵ်းၶဝ်၊ၶုၼ်ဝၢၼ်ႈၶုၼ်မိူင်းၶဝ်၊ၵူၼ်းႁဵတ်းၵၢၼ်ၽၢႆႇပၢႆးမိူင်းၶဝ်၊ဢိၵ်ႇတင်းၵူၼ်းဢၼ်ၸၢင်ႈႁဵတ်းဢၼ်လၢၵ်ႇဢၼ်လၢႆးၶဝ်၊ဢိၵ်ႇတင်းၵူၼ်းဢၼ်ၸၢင်ႈပဝ်ႇၵႃႇထႃႇၶဝ်တင်းလၢႆၼၼ်ႉ၊မၼ်းၸဝ်ႈတၵ်းပႄႇပႅတ်ႈယဝ်ႉ။-
မၼ်းၸဝ်ႈတၵ်းၶၢၼ်းႁႂ်ႈလုၵ်ႈဢွၼ်ႇၸၢႆးဢၼ်ယင်းၼုမ်ႇယင်းၵမ်ၼၼ်ႉဢုပ်ႉပိူင်ႇၵူၼ်းတင်းလၢႆဢေႃႈ။-
ၵူၼ်းၵူႈၵေႃႉၵူႈၵူၼ်းတၵ်းဢွၼ်ၵၼ်ၼိၵ်ႈၸၢၵ်ႈငႅၼ်းသႄးၵၼ်လႄႈၵူၼ်းဢၼ်ယင်းၼုမ်ႇယင်းၵမ်တၵ်းဢမ်ႇၼပ်ႉဢမ်ႇၶၢၼ်းၵူၼ်းထဝ်ႈၵူၼ်းၵႄႇၶဝ်။ ၵူၼ်းယုတ်ႈၵူၼ်းၺၢမ်ႉတင်းလၢႆတၵ်းဢမ်ႇၼပ်ႉဢမ်ႇယမ်ၵူၼ်းဢၼ်မီးဢႃႇၼႃႇၸိူဝ်းၼၼ်ႉယဝ်ႉ။
ၶိင်ႇၵႃႇလႃႉတၵ်းထိုင်မႃးဝၼ်းၼိုင်ႈမိူဝ်ႈဢၼ်ၵူၼ်းၶိူဝ်းႁိူၼ်းႁိူၼ်းၼိုင်ႈတၵ်းလိူၵ်ႈဢဝ်ၵူၼ်းၼႂ်းၶိူဝ်းႁိူၼ်းၶဝ်ၵေႃႉၼိုင်ႈသေယဝ်ႉ၊တၵ်းလၢတ်ႈတီႈမၼ်းလႄႈဝႃႈ၊ “မႂ်းယင်းမီးၶူဝ်းၼုင်ႈၶူဝ်းမႆယူႇဢေႃႈ။ ႁဵတ်းၶုၼ်ၵႃႈၼိူဝ်ႁဝ်း၊ၵႃႈၼႂ်းယၢမ်းမိူဝ်ႈဢၼ်ႁဝ်းတင်းလၢႆႁွတ်ႈတုၵ်ႉၶႃႉယူႇၼႆႉသေၵမ်းတႃႉ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊မၼ်းတၵ်းၶိုၼ်းလၢတ်ႈလႄႈဝႃႈ၊ “ဢမ်ႇၸႂ်ႈၵူၺ်း။ ၵဝ်ဢမ်ႇၸၢင်ႈၸွႆႈထႅမ်သူ။ ၵဝ်ၼႆႉယင်းဢမ်ႇမီးၶဝ်ႈၼမ်ႉတၢင်းၵိၼ်၊ဢမ်ႇမီးၶူဝ်းၼုင်ႈၶူဝ်းမႆလူင်လၢင်။ ယႃႇပေႁႂ်ႈၵဝ်ႁဵတ်းၶုၼ်ၵႃႈၼိူဝ်သူသေၵမ်း၊” ဝႃႈၼင်ႇၼႆဢေႃႈ။
ၸႂ်ႈယဝ်ႉ။ ဝဵင်း ယေႇရုသလႅမ်ႇ၊ လႆႈထူပ်းၽေးတၢမ်ႇဢပျတ်ႈယဝ်ႉဢေႃႈ။ မိူင်း ယုတႃႉ၊ သမ်ႉလူမ်ႉပင်းယဝ်ႉဢေႃႈ။ လွင်ႈမၼ်းၸမ်ႉ၊ၵႃႈဢၼ်ၶဝ်လၢတ်ႈ၊ၵႃႈဢၼ်ၶဝ်ႁဵတ်းၼၼ်ႉၶတ်းၵၼ်တင်း ထႃႇဝရႃႉၽြႃး၊ ဢေႃႈ။ ၶဝ်ဢွၼ်ၵၼ်သႄႉသွမ်းၽြႃးပဵၼ်ၸဝ်ႈဢၼ်မုၼ်ၽုင်းယႂ်ႇၼႃႇၼၼ်ႉဢေႃႈ။-
တၢင်းဢၼ်ၶဝ်လိူၵ်ႈၼႃႈလဵၵ်ႉၼႃႈယႂ်ႇၼၼ်ႉပဵၼ်သၢၵ်ႈသေႇတၢင်းဢၼ်တၢင်ႇဢပျတ်ႈတီႈတူဝ်ၶဝ်ယူႇယဝ်ႉ။ ၶဝ်ဢွၼ်ၵၼ်ႁဵတ်းတုၸရိူၵ်ႈထၢင်ႇထၢင်ႇသႃးသႃးမိူၼ်ၵူၼ်းဝဵင်း သေႃးတုမ်ႇ၊ ၶဝ်ဢေႃႈ။ ၶဝ်လႆႈထူပ်းၽေးတၢမ်ႇဢပျတ်ႈယဝ်ႉလႄႈႁဵတ်းႁႂ်ႈတၢင်းဢၼ်ဢမ်ႇလီဢမ်ႇငၢမ်းၶိုၼ်းႁွတ်ႈၶိုၼ်းထိုင်ၵႃႈၼိူဝ်ၶဝ်ဢေႃႈ။
ၵူၼ်းသိုဝ်ႈတေႃႇမီးမၢင်ႇၵလႃႇဢေႃႈ။ လွင်ႈမၼ်းၸမ်ႉ၊ၶဝ်တၵ်းလႆႈၸၢမ်ႇၸႃးဢၵျူဝ်းတၢင်းၵမ်တၢင်းၵျၢင်ႉၶဝ်ဢေႃႈ။-
ၵူၼ်းဢၼ်ဢမ်ႇတြႃးၸမ်ႉ၊မီးဢႃႉမၢင်ႇၵလႃႇဢေႃႈ။ ၵႃႈဢၼ်ၶဝ်ႁဵတ်းတီႈပိူၼ်ႈတၢင်ႇၵေႃႉၼၼ်ႉတေႃႈလဵဝ်ၼႆႉတၵ်းပဵၼ်ၵႃႈတီႈၶဝ်ဢေႃႈ။
ၵူၼ်းၵဝ်တင်းလၢႆၸမ်ႉ၊လုၵ်ႈဢွၼ်ႇဢွၼ်ၵၼ်ၼိၵ်ႈၸၢၵ်ႈငႅၼ်းသႄးသေလႄႈမႄႈယိင်းသမ်ႉဢွၼ်ၵၼ်ဢုပ်ႉပိူင်ႇၵႃႈၼိူဝ်ဢေႃႈ။ ၵူၼ်းၵဝ်တင်းလၢႆၶဝ်႟။ ၶုၼ်သူၸိူဝ်းၼၼ်ႉႁဵတ်းႁႂ်ႈသူၽိတ်းတၢင်းပိူင်ႈတၢင်းယဝ်ႉလႄႈသူဢမ်ႇႁုလွင်ႈဢၼ်တၵ်းဝၢႆႇၸူးသဵၼ်ႈတၢင်းဢၼ်လႂ်ၼၼ်ႉယဝ်ႉ။
ထႃႇဝရႃႉၽြႃး၊ လုၵ်ႉၶိုၼ်ႈႁႂ်ႈလႆႈတွပ်ႇလၢတ်ႈဢမုမၼ်းၸဝ်ႈလႄႈ၊ၸုၵ်းယူႇႁႂ်ႈလႆႈၸီႇယၢင်ႇတြႃးတီႈၵူၼ်းမၼ်းၸဝ်ႈတင်းလၢႆဢေႃႈ။-
ထႃႇဝရႃႉၽြႃး၊ ၽုၺ်ႇဢမုတြႃးသႂ်ႇတီႈၵူၼ်းၵႄႇၵူၼ်းႁူဝ်တင်းလၢႆၼႂ်းၵူၼ်းမၼ်းၸဝ်ႈတင်းလၢႆလႄႈဝႃႈၸမ်ႉ၊ “သူႁိမ်ၵိၼ်သူၼ်ဢူးယဵၼ်ႇၵဝ်ယဝ်ႉ။ ၵႃႈၼႂ်းႁိူၼ်းသူၵေႃႈတဵမ်ဝႆႉတင်းဢုၵ်ႉၸႃႇဢၼ်သူမႂ်ဢဝ်သိမ်းဢဝ်တီႈၵူၼ်းယၢၵ်ႈၵူၼ်းၽၢၼ်ၸိူဝ်းၼၼ်ႉဢေႃႈ။-
သူဢမ်ႇမီးဢၶႂၢင်ႉဢၼ်တၵ်းၼိၵ်ႈၸၢၵ်ႈငႅၼ်းသႄးၵူၼ်းၵဝ်တင်းလၢႆလႄႈပႄႉၼႅင်ႇၵူၼ်းယၢၵ်ႈၵူၼ်းၽၢၼ်တင်းလၢႆ။ ၵဝ်၊ၸဝ်ႈပူဝ်ႇပႃႇၵၢင်ႁၢဝ်၊ ၸဝ်ႈထႃႇဝရႃႉၽြႃး၊ မီးဢမိင်ႉၸိူဝ်ႉၼင်ႇၼႆဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “တူၺ်းလူး။ ၽူႈယိင်းဝဵင်း ယေႇရုသလႅမ်ႇ၊ ၸိူဝ်းၼၼ်ႉႁူဝ်ၸႂ်ၽႅၼ်သုင်ၼႃႇလူင်လၢင်လူင်ပႄႇ။ ၶဝ်ၼၼ်ႉထၢၼ်ႈပေႃးယိုၼ်းၶေႃးႁႅၼ်ၶေႃးလႄႈယၢင်ႈတၢင်းဢေႃႈ။ ၶဝ်ၸၢင်ႈလႆတႃၵႂႃႇၵႂႃႇၶိုၼ်းၶိုၼ်းယူႇ၊ၸၢင်ႈယၢင်ႈတိၼ်ထီႇထီႇလႄႈၶွၼ်းၶဝ်းႁႂ်ႈဝႅၼ်တိၼ်ၶဝ်သဵင်မေႃးလင်ယူႇဢေႃႈ။-
ၵူၺ်းၵႃႈ၊ၵဝ်တၵ်းၸီႇယၢင်ႇပၼ်တၢမ်ႇၶဝ်လႄႈတၵ်းထႃႁူဝ်ၶဝ်ႁႂ်ႈပဵၼ်ႁူဝ်လွမ်ပႅတ်ႈဢေႃႈ၊” ဝႃႈၼင်ႇၼႆဢေႃႈ။
ဝၼ်းၼိုင်ႈၸဝ်ႉၸဝ်ႉ၊ၸဝ်ႈၽြႃးတၵ်းပႄႇၽဵဝ်ႈပႅတ်ႈၶိူင်ႈၶူဝ်းၵႃႈဢၼ်ၽူႈယိင်းဝဵင်း ယေႇရုသလႅမ်ႇ၊ ၶဝ်ဢုပ်ႇဝၢဝ်းၼၼ်ႉ၊ဢမ်ႇဝႃႈၶိူင်ႈငိုၼ်းၶိူင်ႈၶမ်းဢၼ်ၶဝ်ႁၢင်ႈၶိူင်ႈတီႈတိၼ်ၶဝ်လႂ်၊တီႈႁူဝ်ၶဝ်လႂ်၊ဢိၵ်ႇတင်းတီႈၶေႃးၶဝ်လႂ်ၸိူဝ်းၼၼ်ႉ၊-
ဢိၵ်ႇတင်းၵႃႈတီႈၶေႃႈမိုဝ်းၶဝ်ၸိူဝ်းၼၼ်ႉဢေႃႈ။ မၼ်းၸဝ်ႈတၵ်းပႄႇၽဵဝ်ႈပႅတ်ႈၽႃႈႁူမ်ႇႁူဝ်ၶဝ်၊-
ဢိၵ်ႇတင်းမွၵ်ႇႁူဝ်ၸႃႇၸိူဝ်းၼၼ်ႉ၊ဢိၵ်ႇတင်းသၢႆလၢၵ်ႈၽွႆးဢၼ်ၶဝ်မတ်ႉၵႃႈတီႈၶႅၼ်မိုဝ်းၶဝ်တင်းၵႃႈတီႈဢႅဝ်ၶဝ်ၸိူဝ်းၼၼ်ႉ၊-
ဢိၵ်ႇတင်းမွင်းၵူၺ်းဢၼ်ၶဝ်သုပ်းၵႃႈတီႈၼိဝ်ႉမိုဝ်းၶဝ်၊ၵႃႈတီႈၶူႈလင်ၶဝ်ၸိူဝ်းၼၼ်ႉ၊-
သိူဝ်ႈၸႃႇၶမ်းၶဝ်၊ၽႃႈလူပ်းၶဝ်၊သိူဝ်ႈယၢဝ်းၶဝ်၊ထူင်ငိုၼ်းၶဝ်၊-
သိူဝ်ႈတၢင်းၼႂ်းၶဝ်၊ၽႃႈၸဵတ်ႉၽႃႈပၢၼ်ႇၶဝ်၊ၽႃႈဝႆၶဝ်၊ဢိၵ်ႇတင်းၽႃႈၶဵၼ်းႁူဝ်ၶဝ်ၸိူဝ်းၼၼ်ႉဢေႃႈ။
တၢင်းဢၼ်မဵၼ်ႁိူဝ်ႇမဵၼ်ၶႆးၼၼ်ႉမႃးတႅၼ်းဢၼ်ႁွမ်ဢၼ်ႁူၺ်းတူဝ်ၶဝ်၊သၢႆၸိူၵ်ႈၼၼ်ႉမႃးတႅၼ်ႈပုၼ်ႈသၢႆဢႅဝ်ၶဝ်၊တၢင်းဢၼ်ႁူဝ်လွမ်ၼၼ်ႉမႃးတႅၼ်းတီႈဢၼ်ၽၼ်ႉဢၼ်ၽိူဝ်ၶူၼ်ႁူဝ်ၶဝ်၊ၽႃႈၶူဝ်းၼင်ပေႃမႃးတႅၼ်းၽႃႈဢၼ်ၶျေႃးဢၼ်လီၶဝ်၊တၢင်းဢူၵ်းတၢင်းဢၢႆမႃးတႅၼ်းတၢင်းႁၢင်ႈလီႁၢင်ႈငၢမ်းၶဝ်ဢေႃႈ။
ၵူၼ်းၸၢႆးၵႃႈၼႂ်းဝဵင်းၸိူဝ်းၼၼ်ႉတၵ်းတၢႆလူၺ်ႈလၢပ်ႇလူၺ်ႈလႅဝ်းလႄႈၵူၼ်းသိုၵ်းဢၼ်ႁႅင်းယႂ်ႇၼႃႇၸိူဝ်းၼၼ်ႉၵေႃႈတၵ်းလႆႈတူၵ်းသုမ်းၵႃႈၼႂ်းၼႃႈသိုၵ်းဢေႃႈ။-
ၽၵ်းတူဝဵင်းတင်းလၢႆတၵ်းၶၢင်းၶီၶၢင်းၽၢၼ်လႄႈႁွင်ႉႁႆႈယူႇ၊ဝဵင်းလူင်ၼၼ်ႉၵေႃႈတၵ်းသဵတ်ႇၵူၼ်းငႅဝ်ၵူၼ်းလႄႈမိူၼ်ၸိူဝ်ႉၼင်ႇၽူႈယိင်းဢၼ်ပိူၼ်ႈပေႃႉယႅၼ်ႉၼၼ်ႉသေယဝ်ႉ၊ပွႆႇမၼ်းယူႇတူဝ်ပူၺ်လႄႈၼင်ႈယူႇၵႃႈၼိူဝ်လိၼ်ၼၼ်ႉဢေႃႈ။
ၼႂ်းမိုဝ်ႉဝၼ်းၶိင်ႇၵႃႇလႃႉၼၼ်ႉမႄႈယိင်းၸဵတ်းၵေႃႉတၵ်းဢွၼ်ၵၼ်တိုတ်ႉၸၼ်ဢဝ်ၵူၼ်းၸၢႆးၵေႃႉၼိုင်ႈသေလႄႈလၢတ်ႈဝႃႈ၊ “ႁဝ်းၶႃႈပေႃးၵုမ်ႇတႃႇတေႁဵတ်းလဵင်ႉတွင်ႉတူဝ်ၸဝ်ႈၵဝ်ႇ၊တႃႇတေႁႃၼုင်ႈႁႃမႆပုၼ်ႈတူဝ်ႈၸဝ်ႈၵဝ်ႇယူႇဢေႃႈ။ ၵူၺ်းၵႃႈ၊ၶႅၼ်းတေႃႈပၼ်ဢၶႂၢင်ႉႁႂ်ႈႁဝ်းၶႃႈ၊ႁွင်ႉပီႈႁဝ်းဝႃႈ၊ၽူဝ်ႁဝ်းၶႃႈဝႃႈၼႆသေၵမ်း။ ၼင်ႇၼၼ်လႄႈႁဝ်းၶႃႈတေလႆႈၵၢင်းလွတ်ႈတၢင်းဢၢႆဢၼ်ဝႃႈသၢဝ်ထဝ်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၼႂ်းမိုဝ်ႉဝၼ်းၶိင်ႇၵႃႇလႃႉၼၼ်ႉ ထႃႇဝရႃႉၽြႃး၊ တၵ်းႁဵတ်းႁႂ်ႈတူၼ်ႈယိူဝ်ႈတူၼ်ႈယႃႈတင်းတူၼ်ႈမႆႉပႃႇၵူႈတူၼ်ႈတၵ်းယႂ်ႇလႄႈႁၢင်ႈလီႁၢင်ႈငၢမ်းမႃးၵႃႈၼႂ်းမိူင်းၸဝ်ႈဢေႃႈ။ ၵူၼ်းမဵဝ်း ဢိသရေး၊ ၵႃႈမီးတင်းသဵင်ႈတင်းမူတ်းတၵ်းဢွၼ်ၵၼ်ထုၵ်ႇၸႂ်ၵျိူၵ်ႈၸႂ်လႄႈဢဝ်ၵုင်ႇဢဝ်မုၼ်လူၺ်ႈမၢၵ်ႇၶဝ်ႈႁူင်းၼမ်ႉဢၼ်ဢွၵ်ႇၵႃႈၼႂ်းမိူင်းၸဝ်ႈၼၼ်ႉဢေႃႈ။-
ၶဝ်ၸိူဝ်းဢၼ်ဢသၢၵ်ႈလိပ်းယူႇၵႃႈၼႂ်းဝဵင်း ယေႇရုသလႅမ်ႇ၊ ဢၼ်ဝႃႈၶဝ်ၸိူဝ်းဢၼ်ၽြႃးပဵၼ်ၸဝ်ႈလိူၵ်ႈဝႆႉႁႂ်ႈလႆႈဢသၢၵ်ႈၵတ်းယဵၼ်ၶျၢမ်းသႃႇယူႇၼၼ်ႉတၵ်းတေလႆႈၶၢမ်ႇတၢင်းဢၼ်ႁွင်ႉႁဵၵ်ႈဝႃႈၵူၼ်းမူတ်းၸၢင်ႇဢေႃႈ။-
ၸဝ်ႈၽြႃးတၵ်းဢဝ်တၼ်းၶူဝ်းမၼ်းၸဝ်ႈၸီႇယၢင်ႇတြႃးဢိၵ်ႇတင်းႁႂ်ႈၵူၼ်းမဵဝ်းၸဝ်ႈမူတ်းၸၢင်ႇ၊ဢိၵ်ႇတင်းသုၵ်ႈသၢႆႇပႅတ်ႈဢပျတ်ႈတုၸရိူၵ်ႈၵူၼ်းဝဵင်း ယေႇရုသလႅမ်ႇ၊ တင်းလိူတ်ႈဢၼ်ထွၵ်ႇဝႆႉၵႃႈတီႈၼၼ်ႈၸိူဝ်းၼၼ်ႉဢေႃႈ။-
မိူဝ်ႈၼၼ်ႉ၊ ထႃႇဝရႃႉၽြႃး၊ တၵ်းဢဝ်မွၵ်ႇၵုမ်ႈမုင်းႁူမ်ႇၵႃႈၼိူဝ်လွႆ ၸိဢုၼ်ႇ၊ ဢိၵ်ႇတင်းၶဝ်ၸိူဝ်းဢၼ်ၸုဢၼ်တုမ်ၵၼ်ၵႃႈတီႈၼၼ်ႈမိူဝ်ႈၶိင်ႇၵၢင်ဝၼ်းလႄႈသမ်ႉတၵ်းဢဝ်ပိဝ်ၽႆးဢၼ်လႅင်းႁူမ်ႇသုမ်ႇၶိင်ႇၵၢင်ၶိုၼ်းဢေႃႈ။ မုၼ်ၽုင်းၽြႃးပဵၼ်ၸဝ်ႈၸမ်ႉ၊တၵ်းႁူမ်ႇသုမ်ႇလႄႈၵႅတ်ႇၶႄႁႄႉၵင်ႈဝဵင်းလူင်ၼၼ်ႉတင်းဝဵင်းဢေႃႈ။-
မုၼ်ၽုင်းမၼ်းၸဝ်ႈတၵ်းမုင်းႁူမ်ႇၵႃႈၼိူဝ်ဝဵင်းလူင်ၼၼ်ႉမိူၼ်ၸိူဝ်ႉၼင်ႇသုမ်ႉထဵင်ပုၼ်ႈဢၼ်ႁႄႉၵင်ႈလႅတ်ႇမႆႈၶိင်ႇၵၢင်ဝၼ်း၊ဢိၵ်ႇတင်းပုၼ်ႈဢၼ်သွၼ်ႈပိုင်ႈတီႈဢၼ်လွတ်ႈၽူၼ်လူင်လူမ်းလူင်ၼၼ်ႉဢေႃႈ။
ထွမ်ႇငိၼ်းလိၵ်ႈႁဵတ်းၵႂၢမ်းယၢမ်းမိူဝ်ႈဢၼ်ၵဝ်ႁဵတ်းၵႂၢမ်း၊ လွင်ႈၵေႃႉသႄႈၵဝ်တင်းသူၼ်ဢူးယဵၼ်ႇမၢၵ်ႇၸပိတ်ႉမၼ်းၼၼ်ႉသေၵမ်း၊ ၵေႃႉသႄႈၵဝ်မီးသူၼ်ဢူးယဵၼ်ႇမၢၵ်ႇၸပိတ်ႉဢၼ်ၽုၵ်ႇဝႆႉ ၵႃႈၼိူဝ်လိၼ်ဢၼ်မီးၽုၼ်ႇၼမ်ႉမၼ်းလိၼ်လီၼၼ်ႉဢေႃႈ။
မၼ်းၶုတ်းယူင်းလိၼ်လႄႈၵဵပ်းမၢၵ်ႇႁိၼ်ႁႄႈမၼ်းတင်းလၢႆပႅတ်ႈသေယဝ်ႉ၊ မၼ်းၽုၵ်ႇတူၼ်ႈမၢၵ်ႇၸပိတ်ႉဢၼ်လီၼႃႇသေပိူၼ်ႈဝႆႉဢေႃႈ။ မၼ်းသမ်ႉပူၵ်းတင်ႈထဵင်လၢင်းပုၼ်ႈဢၼ်တၵ်းပႂ်ႉသူၼ်လႄႈ သမ်ႉႁဵတ်းတီႈဢၼ်တၵ်းၼူတ်ႈမၢၵ်ႈၸပိတ်ႉၼၼ်ႉဝႆႉဢေႃႈ။ မၼ်းပႂ်ႉထႃႈၶိင်ႇဢၼ်မၢၵ်ႇၸပိတ်ႉတၵ်းသုၵ်းၼၼ်ႉယဝ်ႉ၊ ၵူၺ်းၵႃႈ၊မၢၵ်ႇၸပိတ်ႉဢၼ်မၢၵ်ႇမႃးၼၼ်ႉသူမ်ႈၼႃႇဢေႃႈ။
ပိူဝ်ႈၼႆလႄႈၵေႃႉသႄႈၵဝ်ၼၼ်ႉလၢတ်ႈလႄႈဝႃႈ၊ “သူၸိူဝ်းဢၼ်ယူႇၵႃႈၼႂ်းဝဵင်း ယေႇရုသလႅမ်ႇ၊ မိူင်း ယုတႃႉ၊ ၶဝ်ၼႆႉ႟။ ၸီႇယၢင်ႇဢမုဝူင်ႈၵၢင်သူၼ်ဢူးယဵၼ်ႇမၢၵ်ႇၸပိတ်ႉ၊ဢိၵ်ႇတင်းၵဝ်သေၵမ်း။-
မဵဝ်းဢၼ်ၵဝ်လူဝ်ႇႁဵတ်းထႅင်ႈပုၼ်ႈသူၼ်ဢူးယဵၼ်ႇၵဝ်ၼၼ်ႉၸွင်ႇမီးသေၸိူဝ်ႉသေပိူင်ႈဢၼ်ၵဝ်ယင်းဢမ်ႇလႆႈႁဵတ်းမႅၼ်ႈၼၼ်ႉႁိုဝ်း။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈသူၼ်ဢူးယဵၼ်ႇၼၼ်ႉဢွၵ်ႇမႃးမၢၵ်ႇၸပိတ်ႉဢၼ်သူမ်ႈၼၼ်ႉၵူၺ်းသေယဝ်ႉ၊ၵွပ်ႈၸိူဝ်ႉၼင်ႇႁိုဝ်ယင်းဢမ်ႇမၢၵ်ႇမႃးမၢၵ်ႇၸပိတ်ႉမဵဝ်းဢၼ်ၵဝ်မုင်ႈထႃႈမွင်းထႃႈၼၼ်ႉ။
“လွင်ႈတၢင်းဢၼ်ၵဝ်တၵ်းႁဵတ်းၵႃႈတီႈသူၼ်ဢူးယဵၼ်ႇမၢၵ်ႇၸပိတ်ႉၵဝ်ၼၼ်ႉၸမ်ႉ၊ၵဝ်တၵ်းၽဵဝ်ႈႁူဝ်ႉဝၢင်းမၼ်းပႅတ်ႈႁွပ်ႈႁွပ်ႈ၊ၵိူၼ်ႇယႃႉလမ်းဢုတ်ႇဢၼ်ၵႅတ်ႇၶႄႁႄႉၵင်ႈမၼ်းၼၼ်ႉပႅတ်ႈႁႂ်ႈတူဝ်ထိူၼ်ႇတင်းလၢႆၶဝ်ႈမႃးၵိၼ်လႄႈယဵပ်ႇသႂ်ႇမၼ်းဢေႃႈ။-
ၵဝ်တၵ်းပွႆႇပႅတ်ႈႁႂ်ႈမၼ်းပဵၼ်သူၼ်ႁၢမ်းဢၼ်တဵမ်ဝႆႉတင်းတူၼ်ႈယိူဝ်ႈယႃႈသေယဝ်ႉ၊ၽူႈလႂ်တၵ်းဢမ်ႇၶုတ်းဢမ်ႇယူင်းမၼ်းဢေႃႈ။ တူၼ်ႈၼၢမ်ၵူႈၸိူဝ်ႉၵူႈမဵဝ်းတၵ်းဢွၵ်ႇမႃးၵႃႈၼႂ်းမၼ်းဢေႃႈ။ ၵဝ်တၵ်းႁၢမ်ႈတီႈၽႃႉၽူၼ်ဢမ်ႇႁႂ်ႈၽူၼ်တူၵ်းၵႃႈၼိူဝ်မၼ်းဢေႃႈ၊” ဝႃႈၼင်ႇၼႆဢေႃႈ။
ၵူၼ်းမဵဝ်း ဢိသရေး၊ တင်းလၢႆပဵၼ်သူၼ်ဢူးယဵၼ်ႇ၊ မၢၵ်ႇၸပိတ်ႉ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ လႄႈ ၵူၼ်းမဵဝ်း ယုတႃႉ၊ တင်းလၢႆၸမ်ႉ၊ ပဵၼ်တူၼ်ႈမၢၵ်ႇၸပိတ်ႉဢၼ်မၼ်းၸဝ်ႈၽုၵ်ႇသွမ်ႈဝႆႉၼၼ်ႉဢေႃႈ။ မၼ်းၸဝ်ႈမုင်ႈထႃႈမွင်းထႃႈႁႂ်ႈၶဝ်ၵမ်ၵျၢင်ႉသၢင်ႈႁဵတ်းလွင်ႈတၢင်းဢၼ် သိုဝ်ႈလီယူဝ်းလီ၊ၵူၺ်းၵႃႈ၊ၶဝ်ထွၵ်ႇလိူတ်ႈပိူၼ်ႈဢေႃႈ။ မၼ်းၸဝ်ႈမုင်ႈမွင်းႁႂ်ႈၶဝ်ႁဵတ်းၸွမ်းတြႃး။ ၵူၺ်းၵႃႈ၊မီးသဵင်ႁွင်ႉႁႆႈၵေႃႉဢၼ်ၶဝ်ၼိၵ်ႈၸၢၵ်ႈၼၼ်ႉဢေႃႈ။
သူၸိူဝ်းၼႆႉမီးဢႃႉမၢင်ႇၵလႃႇဢေႃႈ။ လွင်ႈမၼ်းၸမ်ႉ၊သူသိုဝ်ႉဢဝ်ႁိူၼ်းလႂ်၊တူင်ႈႁႆႈတူင်ႈၼႃးလႂ်သပ်းသႂ်ႇတီႈဢၼ်သူမီးဝႆႉယဝ်ႉၸိူဝ်းၼၼ်ႉထႅင်ႈဢေႃႈ။ ဝၼ်းၼိုင်ႈၸဝ်ႉၸဝ်ႉတီႈလိၼ်ပုၼ်ႈဢၼ်ပိူၼ်ႈတၵ်းယူႇတၵ်းသဝ်းၼၼ်ႉတၵ်းဢမ်ႇမီးလႄႈမႂ်းၵေႃႉလဵဝ်ၵူၺ်းတၵ်းယူႇၵႃႈၼႂ်းမိူင်းၸဝ်ႈၼႆႉဢေႃႈ။-
ၵဝ်လႆႈငိၼ်း ၸဝ်ႈထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉလႄႈဝႃႈ၊ “ႁိူၼ်းဢၼ်ယႂ်ႇဢၼ်လူင်ဢၼ်ႁၢင်ႈလီႁၢင်ႈငၢမ်းၸိူဝ်းၼႆႉတင်းသဵင်ႈတင်းမူတ်းတၵ်းလုလႅဝ်လႄႈပဵၼ်ႁိူၼ်းႁၢမ်းၵႂႃႇဢေႃႈ။-
လွင်ႈမၼ်းၸမ်ႉ၊သူၼ်ဢူးယဵၼ်ႇမၢၵ်ႇၸပိတ်ႉဢၼ်မီးႁႃႈဢေႇၵႃႉ ၼၼ်ႉတၵ်းဢိတ်ႇဢွၵ်ႇၼမ်ႉမၢၵ်ႇၸပိတ်ႉလႆႈႁႃႈၵႃႇလၢၼ်ႇ ၵူၺ်းသေလႄႈ၊ၸိူဝ်ႉၽၼ်းၶဝ်ႈပိူၵ်ႇၵေႃႈဝၢၼ်ႇႁႃႈတၢင်ၼၼ်ႉတၵ်းတေလႆႈတၢင်ၼိုင်ႈၵူၺ်းဢေႃႈ။”
သူၸိူဝ်းၼႆႉမီးဢႃႉမၢင်ႇၵလႃႇဢေႃႈ။ လွင်ႈမၼ်းၸမ်ႉ၊သူဢွၼ်ၵၼ်လုၵ်ႉၸဝ်ႉၸဝ်ႉသေယဝ်ႉၵိၼ်လဝ်ႈ၊ၶိင်ႇႁူဝ်ၶမ်ႈၵေႃႈသူၵိၼ်လဝ်ႈႁိုင်ၼႃႇထၢၼ်ႈပေႃးမဝ်းဢေႃႈ။-
ၵႃႈၼႂ်းပွႆးဢၼ်သူၵိၼ်လဵင်ႉၼၼ်ႉသူၸၢင်ႈဢဝ်တိင်ႇလႂ်၊ၵွင်ၶဵတ်ႇလႂ်၊ပီႇလႂ်၊ဢိၵ်ႇတင်းၼမ်ႉမၢၵ်ႇၸပိတ်ႉလႂ်ၶဝ်ႈပႃးဢေႃႈ။ ၵူၺ်းၵႃႈ၊သူဢမ်ႇႁုဢမ်ႇႁၼ်လွင်ႈတၢင်းဢၼ် ၸဝ်ႈထႃႇဝရႃႉၽြႃး၊ ႁဵတ်းၵႃႈသင်တီႈသူယူႇၼၼ်ႉ။-
ၵွပ်ႈပိူဝ်ႈၸိူဝ်ႉၼင်ႇၼႆလႄႈသူတၵ်းလႆႈၶၢမ်ႇတၢင်းဢၼ်တိသိမ်းဢဝ်ၵႂႃႇသေလႄႈလႆႈတူၵ်းၵႅၼ်းၼၼ်ႉယူႇဢေႃႈ။ မူးမၢတ်ႈၽွင်းမိူင်းသူတင်းလၢႆတၵ်းဢိုပ်းတၢႆလႄႈၶႃႈဝၢၼ်ႈၵူၼ်းမိူင်းတင်းလၢႆတၵ်းတၢႆလူၺ်ႈတၢင်းဢၼ်ဢိုပ်းၼမ်ႉဢေႃႈ။-
မိူင်း မရၼႃႉ၊ တၵ်းတွင်ႉမႆႈၶႂ်ႈၵိၼ်ၶဝ်လႄႈၽုၺ်ႇပိုတ်ႇပၢၵ်ႇမၼ်းၵႂၢင်ႈၼႃႇသေယဝ်ႉ၊တၵ်းဢိုၼ်ၵိၼ်ၵူၼ်းၸိူဝ်းဢၼ်မီးမုၼ်သရေႇၵႃႈၼႂ်းဝဵင်း ယေႇရုသလႅမ်ႇ၊ ႁူမ်ႈလူၺ်ႈၵၼ်တင်းၶႃႈဝၢၼ်ႈၵူၼ်းမိူင်းၸိူဝ်းဢၼ်ဢူၼ်မေႃးယူႇၼၼ်ႉဢေႃႈ။
ၵူၼ်းၵူႈၵေႃႉၵူႈၵူၼ်းတၵ်းတေလႆႈၶၢမ်ႇတၢင်းဢၼ်ၶျႃးတူၵ်းလႄႈၶဝ်ၸိူဝ်းဢၼ်ႁူဝ်ၸႂ်ၽႅၼ်သုင်ၼၼ်ႉၵေႃႈတၵ်းတေလႆႈၶၢမ်ႇတၢင်းဢၼ်ၶျႃးတူၵ်းတီႈတႅမ်ႇဢေႃႈ။-
ၵူၺ်းၵႃႈ၊ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ တၵ်းၼႄပျႃးလွင်ႈတၢင်းဢၼ်မၼ်းၸဝ်ႈယႂ်ႇမျၢတ်ႈထၢၼ်ႇႁိုဝ်လူၺ်ႈလွင်ႈတၢင်းဢၼ်မၼ်းၸဝ်ႈၸီႇယၢင်ႇသိုဝ်ႈသိုဝ်ႈတေႃႇတေႃႇ၊ဢိၵ်ႇတင်းမၼ်းၸဝ်ႈသမ်ႉတၵ်းၽုၺ်ႇၼႄလွင်ႈတၢင်းဢၼ်မၼ်းၸဝ်ႈမူတ်းၸၢင်ႇထၢၼ်ႇႁိုဝ်ၼၼ်ႉလူၺ်ႈလွင်ႈတၢင်းဢၼ်ၸီႇယၢင်ႇတြႃးတီႈၵူၼ်းမၼ်းၸဝ်ႈၼၼ်ႉဢေႃႈ။-
သူဝ်းဢွၼ်ႇတင်းလၢႆတၵ်းမီးတၢင်းဢၼ်လႆႈၵိၼ်ယိူဝ်ႈၵိၼ်ယႃႈၵႃႈၼႂ်းဝဵင်းဢၼ်လုလႅဝ်တင်းလၢႆၼၼ်ႉလႄႈပႄႉဢွၼ်ႇတင်းလၢႆသမ်ႉတေလႆႈႁႃၵိၼ်ၵႃႈတီႈပၢင်ႇယိူဝ်ႈဢၼ်ၶဵဝ်လီၼုမ်ႇလီၼၼ်ႉဢေႃႈ။
သူၸိူဝ်းၼႆႉမီးဢႃႉမၢင်ႇၵလႃႇဢေႃႈ။ လွင်ႈမၼ်းၸမ်ႉ၊သူဢမ်ႇတိုတ်ႉၸၼ်ဢဝ်တူဝ်သူလွတ်ႈဢွၵ်ႇသေၵႃႈၼႂ်းတုၸရိူၵ်ႈလႆႈၼၼ်ႉဢေႃႈ။-
သူလၢတ်ႈလႄႈဝႃႈ၊ “ႁႂ်ႈ ထႃႇဝရႃႉၽြႃး၊ ၶတ်းၸႂ်ၵျူဝ်းၸႃးၶၼ်ၶၼ်ၽႂ်းၽႂ်းလႄႈႁိပ်ႈၼႅတ်ႈႁဵတ်းၵၢၼ်ဢမုဢၼ်မၼ်းၸဝ်ႈဢၢင်ႈတၵ်းႁဵတ်းၼၼ်ႉႁႂ်ႈႁဝ်းလႆႈႁၼ်သေၵမ်းလူၺ်ႈ။ ႁႂ်ႈၽြႃးပဵၼ်ၸဝ်ႈဢၼ်မူတ်းၸၢင်ႇဢၼ်ပဵၼ်ၽြႃးၵူၼ်းမဵဝ်း ဢိသရေး၊ ၼၼ်ႉႁဵတ်းၸွမ်းၵႃႈၼင်ႇဢၼ်မၼ်းၸဝ်ႈၶိုင်ပွင်ၵျၢမ်ႇႁဵတ်းၼၼ်ႉႁႂ်ႈႁဝ်းလႆႈႁုလႆႈၸႅင်ႈသေၵမ်းလူၺ်ႈ၊” ဝႃႈၼင်ႇၼႆဢေႃႈ။
သူၸိူဝ်းၼႆႉမီးဢႃႉမၢင်ႇၵလႃႇဢေႃႈ။ လွင်ႈမၼ်းၸမ်ႉ၊သူၸၢင်ႈႁွင်ႉဝႃႈ၊ဢၼ်ဢမ်ႇလီၼၼ်ႉပဵၼ်ဢၼ်လီ၊ဢၼ်လီၼၼ်ႉပဵၼ်ဢၼ်ဢမ်ႇလီဝႃႈၼင်ႇၼႆဢေႃႈ။ သူၸၢင်ႈပိၼ်ႇဢၼ်လပ်းသိင်ႇႁႂ်ႈပဵၼ်ဢၼ်လႅင်းလႄႈႁႂ်ႈဢၼ်လႅင်းပဵၼ်လပ်းသိင်ႇဢေႃႈ။ သူၸၢင်ႈႁဵတ်းႁႂ်ႈဢၼ်ၶူမ်ပဵၼ်ဢၼ်ဝၢၼ်လႄႈႁႂ်ႈဢၼ်ဝၢၼ်ပဵၼ်ဢၼ်ၶူမ်ဢေႃႈ။
သူၸိူဝ်းၼႆႉမီးဢႃႉမၢင်ႇၵလႃႇဢေႃႈ။ လွင်ႈမၼ်းၸမ်ႉ၊သူထၢင်ႇသူမီးပိင်ႇၺႃႇလႄႈမၢတ်ႈတူဝ်ၸဝ်ႈၵဝ်ႇတဵမ်ဝႆႉတင်းဢၼ်လၵ်းလႅမ်ဢေႃႈ။
သူၸိူဝ်းၼႆႉမီးဢႃႉမၢင်ႇၵလႃႇဢေႃႈ။ လွင်ႈမၼ်းၸမ်ႉ၊သူပဵၼ်ၵေႃႉဢၼ်ၵတ်ႉၶႅၼ်ႇၼႃႇၼႂ်းတၢင်းဢၼ်ၵိၼ်ၼမ်ႉမၢၵ်ႇၸပိတ်ႉဢေႃႈ။ သူၸၢင်ႈမီးၸႂ်ဢၼ်ႁတ်းႁၢၼ်၊ဢမ်ႇၸၢင်ႈၵူဝ်ၸၢင်ႈႁႄမိူဝ်ႈဢၼ်သူၵိၼ်ၼမ်ႉမၢၵ်ႇၸပိတ်ႉဢၼ်လေႃးယႃႈယႃၼၼ်ႉဢေႃႈ။-
ၵူၺ်းၵႃႈ၊ပုၼ်ႈလွင်ႈတြႃးဢၼ်သိုဝ်ႈၼၼ်ႉၸမ်ႉ၊သူယင်းဢမ်ႇတၢင်ႇဢပျတ်ႈတီႈၵေႃႉဢၼ်ဢမ်ႇတြႃးၼၼ်ႉ၊သူပွႆႇလွတ်ႈပိူဝ်ႈဢၼ်သူၵိၼ်သူးၵိၼ်လၢပ်ႈလႄႈဝႄႈပႅတ်ႈတြႃးဢၼ်သိုဝ်ႈတေႃႇပုၼ်ႈတၵ်းၸီႇယၢင်ႇတီႈၵေႃႉဢၼ်ဢမ်ႇလႆႈႁဵတ်းမႅၼ်ႈဢပျတ်ႈၼၼ်ႉဢေႃႈ။-
ပိူဝ်ႈၼႆလႄႈၸိူဝ်ႉၼင်ႇဢၼ်ၽိူင်းတင်းယိူဝ်ႈႁႅင်ႈႁူတ်းႁူႇၵႂႃႇလႄႈမႆႈၶႅမ်ႈၵႃႈၼႂ်းၽႆးၼၼ်ႉ၊ႁၢၵ်ႈသူတၵ်းၽင်ႉဢုၵႂႃႇ၊ဢိၵ်ႇတင်းမွၵ်ႇသူတၵ်းႁဵဝ်ႇႁႅင်ႈၵႂႃႇသေယဝ်ႉ၊ပိဝ်ၽူင်ႉၽၢင်းၵႂႃႇၵွပ်ႈပိူဝ်ႈသူၸုၼ်ႉပႅတ်ႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈဢၼ်မူတ်းၸၢင်ႇလႄႈပဵၼ်ၽြႃးၵူၼ်းမဵဝ်း ဢိသရေး၊ ဢၼ်သင်ႇသွၼ်ပၼ်ႁဝ်းၼၼ်ႉဢေႃႈ။-
ထႃႇဝရႃႉၽြႃး၊ ၸႂ်မႆႈၶႂ်ႈၸႃႉၵူၼ်းမၼ်းၸဝ်ႈၸိူဝ်းၼၼ်ႉလႄႈယဵတ်ႇမိုဝ်းမၼ်းၸဝ်ႈႁႂ်ႈလႆႈပၼ်တၢမ်ႇတီႈၶဝ်ဢေႃႈ။ လွႆတင်းလၢႆတၵ်းသၼ်ႇၶွၼ်းလႄႈတူဝ်တၢႆၶဝ်ၼၼ်ႉတၵ်းပဵၼ်ၸိူဝ်ႉၼင်ႇၶီႈၼင်ႇဢႃႇၸွမ်းတႃႈၸွမ်းတၢင်းၼၼ်ႉဢေႃႈ။ ၼႂ်းဝႃႈၼၼ်သေၵေႃႈ၊တၢင်းၸႂ်မႆႈၶႂ်ႈၸႃႉ ထႃႇဝရႃႉၽြႃး၊ ၼၼ်ႉတၵ်းဢမ်ႇထၢတ်ႇဢမ်ႇယဵၼ်ႇလႄႈမိုဝ်းမၼ်းၸဝ်ႈယင်းတၵ်းယဵတ်ႇဢွၵ်ႇပုၼ်ႈတႃႇတၵ်းပၼ်တၢမ်ႇၼၼ်ႉဢေႃႈ။
မၼ်းၸဝ်ႈတၵ်းပူၵ်းတင်ႈသဝ်တုင်းဢၼ်ပဵၼ်ၶိူင်ႈမၢႆလၢၵ်ႈၶၼႃႇ၊ပုၼ်ႈတၵ်းႁွင်ႉဢဝ်ၵူၼ်းမဵဝ်းဢၼ်ယူႇၵႆၼၼ်ႉဢေႃႈ။ မၼ်းၸဝ်ႈၽိဝ်ပၢၵ်ႇၼႄလၢၵ်ႈၶၼႃႇႁႂ်ႈၶဝ်လုၵ်ႉသေၵႃႈတီႈလႅၼ်သုတ်းလိၼ်မိူင်းမႃးဢေႃႈ။ ၶဝ်ၵေႃႈတၵ်းဢွၼ်ၵၼ်မႃးၶၼ်ၶၼ်ၽႂ်းၽႂ်းဢေႃႈ။-
ၶဝ်ၸိူဝ်းၼၼ်ႉဢမ်ႇႁိူဝ်ႉဢမ်ႇၼူၼ်း၊ဢမ်ႇတိူဝ်ႉမႅၼ်ႈလႄႈလူမ်ႉသေၵေႃႉသေၵူၼ်း။ ၵေႃႉဢၼ်ငဝ်သူၼ်းလႄႈၼွၼ်းလပ်းဢမ်ႇမီး။ ၵေႃႉဢၼ်သၢႆဢႅဝ်လုတ်း၊သၢႆၶႅပ်းတိၼ်ၶၢတ်ႇဢမ်ႇမီး။-
ပိုၼ်ၵၢင်ႇၶဝ်ၵေႃႈပၢႆလႅမ်ဢေႃႈ။ ၵၢင်ႇၶဝ်ၵေႃႈဝူတ်ႈဝႆႉယဝ်ႉဢေႃႈ။ ၸၢင်းမႃႉၶဝ်ၶႅင်မိူၼ်ၸိူဝ်ႉၼင်ႇႁိၼ်ပၢႆႇၽႆးလႄႈ၊မၢၵ်ႇလေႃႉလေႃႉမႃႉသိုၵ်းၶဝ်ၵေႃႈၵိင်ႈပၼ်ႇမိူၼ်လူမ်းၽိဝ်ႁုင်ဢေႃႈ။-
သဵင်ႁွင်ႉသဵင်သႅၼ်ႇၵူၼ်းသိုၵ်းၶဝ်ပဵၼ်မိူၼ်ၸိူဝ်ႉၼင်ႇသဵင်သၢင်ႇသီႈႁွင်ႉယၢမ်းမိူဝ်ႈဢၼ်မၼ်းဢဝ်တူဝ်သတ်းတၢႆသေယဝ်ႉ၊ဢဝ်ၵႂႃႇတီႈဢၼ်ၽူႈလႂ်ဢမ်ႇႁိမ်ႁူင်ႇဢဝ်မၼ်းလႆႈၼၼ်ႉဢေႃႈ။
ၼႂ်းမိုဝ်ႉဝၼ်းၶိင်ႇၵႃႇလႃႉၼၼ်ႉၶဝ်တၵ်းဢွၼ်ၵၼ်မေႃးႁိုင်းႁိုင်းႁၢင်းႁၢင်းၵႃႈၼိူဝ်မဵဝ်း ဢိသရေး၊ မိူၼ်ၸိူဝ်ႉၼင်ႇဢၼ်သဵင်ၼမ်ႉသမ်ႇမုၵ်ႈတြႃႇၼၼ်ႉဢေႃႈ။ လူတူၺ်းမိူင်းၼႆႉလူး။ မီးလပ်းသိင်ႇၽိတ်းၽိတ်း၊ဢိၵ်ႇတင်းတုၵ်ႉၶႃႉတၢင်းၽၢၼ်ၵူၺ်းၵူၺ်းဢေႃႈ။ ဢၼ်လပ်းသိင်ႇဢူမ်ဢိုၼ်ဢၼ်လႅင်းပႅတ်ႈယဝ်ႉဢေႃႈ။
ၼႂ်းပီဢၼ်ၶုၼ်ႁေႃၶမ်း ဢူဝ်းၸိယႃႉ၊ ၼွၼ်းၽႄးၼၼ်ႉၵဝ်လႆႈႁၼ်ၸဝ်ႈၽြႃးဢေႃႈ။ မၼ်းၸဝ်ႈၼၼ်ႉၼင်ႈယူႇၵႃႈၼိူဝ်ပလၢင်ႇၸဝ်ႈတီႈပဵၼ်ဢၼ်သုင်မျၢတ်ႈလႄႈလီယုၵ်ႉယွင်ႈၼႃႇလူင်လၢင်သေယဝ်ႉ၊ၶူဝ်းၼုင်ႈတၢင်းမႆမၼ်းၸဝ်ႈတဵမ်ဝႆႉၵႃႈၼႂ်းၵျွင်းပိၵ်ႈမၢၼ်ႇဢေႃႈ။-
တမၢၼ်ႇၵၢင်ႁၢဝ် သရပ်ႉ၊ ဢွၼ်ၵၼ်ၸုၵ်းလွမ်ႉႁွပ်ႈမၼ်းၸဝ်ႈယူႇဢေႃႈ။ ၶဝ်ၼၼ်ႉယေႈတူဝ်မီးပိၵ်ႇႁူၵ်းဢၼ်လႄႈဢဝ်ပိၵ်ႇသွင်ဢၼ်ႁူမ်ႇၼႃႈၶဝ်ယူႇ၊သွင်ဢၼ်ႁူမ်ႇတိၼ်ၶဝ်ယူႇ၊ဢိၵ်ႇတင်းဢဝ်ပိၵ်ႇသွင်ဢၼ်မိၼ်ယူႇဢေႃႈ။-
ၶဝ်ၼၼ်ႉပႃးၼိုင်ႈလႄႈပႃးၼိုင်ႈႁွင်ႉတေႃႇၵၼ်လႄႈဝႃႈ၊ “မူတ်းၸၢင်ႇ၊မူတ်းၸၢင်ႇ၊မူတ်းၸၢင်ႇဢေႃႈ။ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ဢၼ်မူတ်းၸၢင်ႇဢေႃႈ။ မုၼ်ၽုင်းမၼ်းၸဝ်ႈတဵမ်ဝႆႉၵႃႈၼိူဝ်ၽႅၼ်ႇလိၼ်မိူင်းဢေႃႈ၊” ဝႃႈၼင်ႇၼႆဢေႃႈ။
သဵင်ဢၼ်ၶဝ်ႁွင်ႉသႅၼ်ႇၼၼ်ႉႁႂ်ႈငဝ်ႈႁၢၵ်ႈၵျွင်းပိၵ်ႈမၢၼ်ႇၸဝ်ႈသၼ်ႇၶွၼ်းဢေႃႈ။ ၵျွင်းပိၵ်ႈမၢၼ်ႇၸဝ်ႈၵေႃႈတဵမ်ဝႆႉတင်းၵႂၼ်းၽႆးဢေႃႈ။
ၵဝ်လၢတ်ႈလႄႈဝႃႈ၊ “ၵဝ်ဢမ်ႇမီးတီႈလီမုင်ႈမွင်းယဝ်ႉ။ ၵဝ်မီးဢႃႉမၢင်ႇၵလႃႇၵွပ်ႈပိူဝ်ႈၵဝ်မီးသူပ်းဢၼ်ၵူဝ်ႈၵိူၵ်ႇၼၼ်ႉယူႇသေလႄႈယူႇသဝ်းၵႃႈၼႂ်းၵူၼ်းမဵဝ်းဢၼ်မီးသူပ်းဢၼ်ၵူဝ်ႈၵိူၵ်ႇၼၼ်ႉဢေႃႈ။ ၼႂ်းဝႃႈၼၼ်သေၵေႃႈ၊ၵဝ်လႆႈႁၼ်ၶုၼ်ႁေႃၶမ်းဢၼ်ပဵၼ်၊ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ယဝ်ႉလူင်ပႄႇ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉတမၢၼ်ႇၵၢင်ႁၢဝ် သရပ်ႉ၊ ပႃးၼိုင်ႈမိၼ်လူင်းမႃးၸူးတီႈၵဝ်ဢေႃႈ။ ၵႃႈၼႂ်းမိုဝ်းမၼ်းပႃးဢဝ်ထၢၼ်ႇၽႆးလႅင်ဢၼ်ဢဝ်တင်းၵိမ်းၽႆးၵိပ်ႈဢဝ်သေၵႃႈတီႈၶဵင်ႇတၢင်းလူႇၸဝ်ႈမႃးၼၼ်ႉဢေႃႈ။-
မၼ်းဢဝ်ထၢၼ်ႇၽႆးလႅင်ၼၼ်ႉတမ်သႂ်ႇသူပ်းၵဝ်လႄႈလၢတ်ႈဝႃႈ၊ “ဢၼ်ၼႆႉတိူဝ်ႉထုၵ်ႇတီႈသီသူပ်းမႂ်းယဝ်ႉလႄႈတုၸရိူၵ်ႈမႂ်းလႆႈၶၢမ်ႇတၢင်းဢၼ်ဢဝ်ၽဵဝ်ႈပႅတ်ႈယဝ်ႉ။ ဢပျတ်ႈမႂ်းၵေႃႈ လႆႈၶၢမ်ႇတၢင်းဢၼ်ပွႆႇလွတ်ႈယဝ်ႉ၊” ဝႃႈၼင်ႇၼႆဢေႃႈ။
ၵမ်းၼၼ်ႉ ၵဝ်ငိၼ်းသဵင် ထႃႇဝရႃႉၽြႃး၊ လၢတ်ႈလႄႈဝႃႈ၊ “ၵဝ်တၵ်းလႆႈပွႆႇၸႂ်ႉၽူႈလႂ်၊ၽူႈလႂ်တၵ်းၵႂႃႇပုၼ်ႈႁဝ်း၊” ဝႃႈၼင်ႇၼႆသေယဝ်ႉ၊ၵဝ်လဝ်ႈလၢတ်ႈလႄႈဝႃႈ၊ “ၶႃႈၸဝ်ႈမီးယူႇတီႈၶႃႈဢေႃႈ။ ပွႆႇၸႂ်ႉၶႃႈၸဝ်ႈၵႂႃႇသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈသမ်ႉမီးဢမိင်ႉထႅင်ႈလႄႈဝႃႈ၊ “ၵႂႃႇလႄႈမွၵ်ႇလၢတ်ႈတီႈၵူၼ်းၸိူဝ်းၼႆႉလႄႈဝႃႈ၊ ‘သူငိၼ်းယူႇသေၵေႃႈ၊တၵ်းဢမ်ႇပွင်ႇၸႂ် လႅင်းၸႂ်။ သူတူၺ်းယူႇသေၵေႃႈ၊တၵ်းဢမ်ႇမၢတ်ႈဢမ်ႇတွင်းၵူၺ်း၊’ ဝႃႈၼႆတႃႉ။-
ႁဵတ်းႁႂ်ႈႁူဝ်ၸႂ်ၶဝ်ၼူၵ်ႇတၼ်ၼႃႇတႃႉ။ ဢိုတ်းမၢၵ်ႇတႃၶဝ်ဝႆႉတႃႉ။ ဢိုတ်းႁူၶဝ်ဝႆႉတႃႉ။ ၵူဝ်ဝႃႈၶဝ်တၵ်းႁၼ်လူၺ်ႈတႃၶဝ်၊ၶဝ်တၵ်းငိၼ်းလူၺ်ႈႁူၶဝ်၊ၶဝ်တၵ်းႁုႁၼ်လူၺ်ႈႁူဝ်ၸႂ်ၶဝ်သေယဝ်ႉ၊ၶဝ်တၵ်းပိၼ်ႇၸႂ်သေလႄႈၶၢႆႉပုတ်ႈမႃးပုၼ်ႈတၵ်းႁႂ်ႈၵဝ်လႆႈႁဵတ်းႁႂ်ႈတၢင်းၶႆႈတၢင်းပဵၼ်ၶဝ်ႁၢႆၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵဝ်ၶိုၼ်းလဝ်ႈလၢတ်ႈလႄႈဝႃႈ၊ “ ထႃႇဝရႃႉၽြႃး၊ တီႈၶႃႈ။ တၵ်းပဵၼ်ၸိူဝ်ႉၼင်ႇၼႆယူႇႁိုင်ၵႃႈႁိုဝ်တီႈၶႃႈ၊” ဝႃႈၼင်ႇၼႆဢေႃႈ။ မၼ်းၸဝ်ႈၶိုၼ်းမီးဢမိင်ႉလႄႈဝႃႈ၊ “တေႃႇထိုင်ႁွတ်ႈဝဵင်းလူင်တင်းလၢႆလုလႅဝ်လႄႈႁၢမ်းယူႇ။ ႁိူၼ်းတင်းလၢႆထၢၼ်ႈပေႃးဢမ်ႇမီးၵူၼ်းယူႇသဝ်းလႄႈမိူင်းတင်းမိူင်းပဵၼ်ဢၼ်သဵတ်ႇယဵၼ်ဝႆႉၵူၺ်းၵူၺ်းၼၼ်ႉဢေႃႈ။-
ၵဝ်တၵ်းၵဝ်ၵူၼ်းတင်းလၢႆၵႂႃႇၵႃႈတီႈဢၼ်ၵႆလႄႈႁဵတ်းႁႂ်ႈမိူင်းတင်းမိူင်းသဵတ်ႇၵူၼ်းယဵၼ်ၵူၼ်းဢေႃႈ။-
ပိၵ်ႉသမ်ႉၵူၼ်းယေႈသိပ်းၵိုတ်းၵျၢၼ်ႇဝႆႉၵေႃႉလဵဝ်ၵူၺ်းသေၵေႃႈ၊ၵေႃႉၼၼ်ႉယင်းတၵ်းလႆႈၶၢမ်ႇတၢင်းဢၼ်ယႃႉၽဵဝ်ႈပႅတ်ႈလူးၵွၼ်ႇလႄႈ၊မၼ်းတၵ်းပဵၼ်မိူၼ်တေႃမႆႉၼိမ်ဢၼ်လႆႈၶၢမ်ႇတၢင်းဢၼ်ပွမ်ႈလူမ်ႉယဝ်ႉၼၼ်ႉဢေႃႈ။” (တေႃမႆႉၼၼ်ႉ၊တၵ်းတၢင်တူဝ်ၸိူဝ်ႉၶိူဝ်းၵူၼ်းၽြႃးပဵၼ်ၸဝ်ႈဢၼ်တၵ်းမႃးမႂ်ႇမႂ်ႇၸိူဝ်းၼၼ်ႉဢေႃႈ။)
ၼႂ်းၸူဝ်ႈပၢၼ်ၶုၼ်ႁေႃၶမ်း ဢႃႇၶတ်ႉ၊ လုၵ်ႈၸၢႆး ယူဝ်းထမ်ႇ၊ လၢၼ် ဢူဝ်းၸိယႃႉ၊ ပဵၼ်ၶုၼ်ႁေႃၶမ်းမိူင်း ယုတႃႉ၊ ယူႇၼၼ်ႉ၊ ရေႇၸိၼ်း၊ ၶုၼ်ႁေႃၶမ်းမိူင်း သီးရီးယႃး၊ ဢိၵ်ႇတင်းၶုၼ်ႁေႃၶမ်း ပေႇၵႃႇ၊ လုၵ်ႈၸၢႆးၶုၼ် ရေႇမလိ၊ ၶုၼ်ႁေႃၶမ်းမိူင်း ဢိသရေး၊ မႃးတိုၵ်းတေႃးဝဵင်း ယေႇရုသလႅမ်ႇ၊ ဢေႃႈ။ ၼႂ်းဝႃႈၼၼ်သေၵေႃႈၶဝ်ဢမ်ႇပႄႉၼႅင်ႇလႆႈ။
မိူဝ်ႈဢၼ်ၶုၼ်ႁေႃၶမ်းမိူင်း ယုတႃႉ၊ လႆႈငိၼ်းၶၢဝ်ႇဝႃႈ၊တပ်ႉသိုၵ်းမဵဝ်း သီးရီးယႃး၊ ၶဝ် မႃးယူႇၵႃႈၼႂ်းမိူင်း ဢိသရေး၊ ဝႃႈၼႆၼၼ်ႉၸိုင်၊မၼ်းဢိၵ်ႇတင်းၵူၼ်းမၼ်းတင်းသဵင်ႈတင်းလူင်မီးတၢင်းဢၼ်သၼ်ႇဝႆယူႇ မိူၼ်ၸိူဝ်ႉၼင်ႇဢၼ်ပႃႇမႆႉတင်းလၢႆသၼ်ႇဝႆၵွပ်ႈပိူဝ်ႈလူမ်းၼၼ်ႉဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ မီးဢမိင်ႉတီႈ ဢိသႃႇယႃႉ၊ လႄႈဝႃႈ၊ “ႁွင်ႉပႃးဢဝ်တင်းလုၵ်ႈၸၢႆးမႂ်း သႃႇၽႃႇသုပ်ႉ၊ သေလႄႈၵႂႃႇႁူပ်ႉထူပ်းၶုၼ်ႁေႃၶမ်း ဢႃႇၶတ်ႉ၊ တႃႉ။ သူတၵ်းႁူပ်ႉထူပ်းမၼ်းၵႃႈတီႈသဵၼ်ႈတၢင်းတီႈဢၼ်ၵူၼ်းသၵ်ႉၶူဝ်းၵႃႈတီႈပၢၵ်ႇႁူးလိၼ်ဢၼ်ဢဝ်ၼမ်ႉၵႃႈတီႈၼမ်ႉၼွင်ႁၢၼ်ႉၼိူဝ်မႃးၼၼ်ႉဢေႃႈ။-
သင်ႇလၢတ်ႈတီႈမၼ်းႁႂ်ႈမၼ်းဝႆႉသတိလႄႈယူႇၼိမ်ၼိမ်လီလီယူႇသေယဝ်ႉ၊ယႃႇႁႂ်ႈမၼ်းတူၵ်းၸႂ်ၵူဝ်ႁႄလႄႈၸႂ်လုႁႅင်းဢူၼ်ႈယူႇ။ လွင်ႈမၼ်းၸမ်ႉ၊တၢင်းဢၼ်ၸႂ်မႆႈၶႂ်ႈၸႃႉၶုၼ်ႁေႃၶမ်း ရေႇၸိၼ်း၊ ဢိၵ်ႇတင်းတၢင်းၸႂ်မႆႈၶႂ်ႈၸႃႉၵူၼ်းမဵဝ်း သီးရီးယႃး၊ ဢိၵ်ႇတင်းတၢင်းၸႂ်မႆႈၶႂ်ႈၸႃႉၶုၼ်ႁေႃၶမ်း ပေႇၵႃႇ၊ ၼၼ်ႉယင်းဢမ်ႇမီးၽေးဢၼ်ယႂ်ႇတၢၼ်ႇၵႂၼ်းၽႆးဢၼ်ဢွၵ်ႇသေၵႃႈတီႈၽိုၼ်းသွင်လုၼ်ႈမႃးၼၼ်ႉ။-
ၵူၼ်းမိူင်း သီးရီးယႃး၊ ဢိၵ်ႇတင်းၵူၼ်းမိူင်း ဢိသရေး၊ တင်းၶုၼ်ႁေႃၶမ်းၶဝ်မီးတၢင်းၵျၢမ်ႇတၢင်းပွင်ဝႆႉၸမ်ႉ။-
ၶဝ်ဢၢင်ႈတၵ်းတိုၵ်းသိမ်းဢဝ်မိူင်း ယုတႃႉ၊ လႄႈလွၵ်ႇငိုတ်ႈၵူၼ်းတင်းလၢႆႁူမ်ႈပွင်းလူၺ်ႈၵၼ်တင်းၶဝ်သေယဝ်ႉ၊ၶၢၼ်းလုၵ်ႈၸၢႆး တပေးလႃႉ၊ ၼႂ်းဢရႃႇၶုၼ်ႁေႃၶမ်းဢေႃႈ။
“ၵူၺ်းၵႃႈ၊ၵဝ် ထႃႇဝရႃႉၽြႃး၊ မီးဢမိင်ႉလႄႈဝႃႈၸမ်ႉ၊လွင်ႈတၢင်းၼႆႉတၵ်းဢမ်ႇပဵၼ်မႃးသေပွၵ်ႈ။-
ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈဝႃႈၸမ်ႉ၊မိူင်း သီးရီးယႃး၊ ဢမ်ႇမီးဢဵၼ်ႁႅင်းယႂ်ႇသေဝဵင်း တမ်ႇမတ်ႉသၵတ်ႉ၊ လႄႈဝဵင်းလူင်မၼ်း၊ဢိၵ်ႇတင်းဝဵင်း တမ်ႇမတ်ႉသၵတ်ႉ၊ ဢမ်ႇမီးဢဵၼ်ႁႅင်းယႂ်ႇသေၶုၼ်ႁေႃၶမ်း ရေႇၸိၼ်း၊ ဢေႃႈ။ ၵူၼ်းမဵဝ်း ဢိသရေး၊ ၸမ်ႉ၊ၼႂ်းၸူဝ်ႈႁူၵ်းသိပ်းႁႃႈပီၼႆႉတၵ်းၽူင်ႉၽၢင်းၵႂႃႇၼႃႇလူင်လၢင်သေယဝ်ႉ၊ဢမ်ႇၶိုၼ်းပဵၼ်ဝၢၼ်ႈပဵၼ်မိူင်း။-
မိူင်း ဢိသရေး၊ ဢမ်ႇမီးဢဵၼ်ႁႅင်းယႂ်ႇသေဝဵင်း မႃႇရိ၊ ဢၼ်ပဵၼ်ဝဵင်းလူင်မၼ်းလႄႈဝဵင်း သမႃႇရိ၊ ၵေႃႈဢမ်ႇမီးဢဵၼ်ႁႅင်းယႂ်ႇသေၶုၼ်ႁေႃၶမ်း ပေႇၵႃႇ၊ ဢေႃႈ။ “ပေႃးသူဢမ်ႇယုမ်ႇၸိုင်၊သူတေဢမ်ႇလႆႈတႄႇလႆႈတင်ႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉလၢတ်ႈထႅင်ႈပွၵ်ႈၼိုင်ႈတီႈၶုၼ်ႁေႃၶမ်း ဢႃႇၶတ်ႉ၊ လႄႈဝႃႈၸမ်ႉ၊-
“တွင်းပၢၼ်ႇယွၼ်းဢဝ်ၼိမိၵ်ႈလၢၵ်ႈၶၼႃႇတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈမႂ်းတႃႉ။ ပဵၼ်ၵႃႈတီႈဢၼ်လိုၵ်ႉဢၼ်လမ်ႇမိူင်း မရၼႃႉ၊ သေဢမ်ႇဝႃႈ၊ပဵၼ်ၵႃႈတီႈဢၼ်သုင်မိူင်းၵၢင်ႁၢဝ်သေဢမ်ႇဝႃႈ၊တွင်းပၢၼ်ႇယွၼ်းဢဝ်တႃႉ၊” ဝႃႈၼင်ႇၼႆဢေႃႈ။
ဢႃႇၶတ်ႉ၊ ၶိုၼ်းလဝ်ႈလၢတ်ႈလႄႈဝႃႈ၊ “ၶႃႈၸဝ်ႈတၵ်းဢမ်ႇယွၼ်းဢဝ်ၼိမိၵ်ႈလၢၵ်ႈၶၼႃႇၵႃႈသင်တီႈၶႃႈ။ ၶႃႈၸဝ်ႈဢမ်ႇၶႂ်ႈၸၢမ်းတူၺ်း ထႃႇဝရႃႉၽြႃး၊ တီႈၶႃႈ၊” ဝႃႈၼင်ႇၼႆဢေႃႈ။
ဢိသႃႇယႃႉ၊ ႁေႃးလၢတ်ႈလႄႈဝႃႈ၊ “ၸိူဝ်ႉၶိူဝ်းၶုၼ်ႁေႃၶမ်း တႃႇဝိတ်ႈ၊ ၶဝ်႟။ ထွမ်ႇတႃႉ။ သူၼႆႉတၵ်းႁႂ်ႈၵူၼ်းမိူဝ်ႇၸၢၼ်ႈၵူၺ်းဢမ်ႇၵႃး၊သူယင်းတၵ်းႁႂ်ႈၽြႃးပဵၼ်ၸဝ်ႈမိူဝ်ႇၸၢၼ်ႈႁိုဝ်း၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ ထႃႇဝရႃႉၽြႃး၊ ၼၼ်ႉတူဝ်မၼ်းၸဝ်ႈတၵ်းပၼ်လၢၵ်ႈၶၼႃႇတီႈသူဢေႃႈ။ ၵၼ်ႇၺႃႇလုၵ်ႈယိင်းသၢဝ် ဢၼ်ပႃးပတိၵ်ႈသၼ်ႇထေႇၼၼ်ႉ၊တၵ်းၵိူတ်ႇလဵင်ႉမႃးလုၵ်ႈၸၢႆးသေယဝ်ႉ၊တၵ်းလႆႈႁွင်ႉႁဵၵ်ႈၸိုဝ်ႈဝႃႈ၊ ဢေႇမႃႇၼူၺ်ႇလႃႉ၊ ဢေႃႈ။-
မၼ်းၼၼ်ႉတၵ်းလႆႈၵိၼ်ၼမ်ႉၼူမ်းၵၢမ်ႈတင်းၼမ်ႉၽိုင်ႈတေႃႇထိုင်ႁွတ်ႈမၼ်းႁုပုၼ်ႈတၵ်းၽႄမႅင်ႇလွင်ႈဢၼ်လီဢၼ်ၸႃႉၼၼ်ႉဢေႃႈ။-
ၸူဝ်ႈဢၼ်မၼ်းဢမ်ႇပႆႇႁုလွင်ႈလီလွင်ႈၸႃႉၼၼ်ႉၸိုင်၊မိူင်းၸိူဝ်းဢၼ်ၶုၼ်ႁေႃၶမ်းသွင်ပႃးဢုပ်ႉပိူင်ႇလႄႈလွၵ်ႈငိုတ်ႈသူၼၼ်ႉတၵ်းပဵၼ်မိူင်းဢၼ်ပိူၼ်ႈၸုၼ်ႉပႅတ်ႈဢေႃႈ။
ထႃႇဝရႃႉၽြႃး၊ တၵ်းဢဝ်ၽေးဢုပၢတ်ႈဢၼ်ယဵင်ႈၶႅၼ်းယႂ်ႇၼႃႇသေၽေးဢုပၢတ်ႈဢၼ်တူၵ်းႁွတ်ႈၵႃႈၼိူဝ်ၵူၼ်းမဵဝ်း ဢိသရေး၊ ၸႃႉၸဵမ်မိုဝ်ႉဝၼ်းဢၼ်ၶဝ်ၽၢတ်ႇယၢၼ်ၵၼ်တင်းၵူၼ်းမဵဝ်း ယုတႃႉ၊ ၶဝ်မႃးဢၼ်ဝႃႈ၊ၽေးၶုၼ်ႁေႃၶမ်းမဵဝ်း ဢႃႇသီးရီးယႃး၊ တၵ်းတူၵ်းသႂ်ႇၵႃႈၼိူဝ်ၵူၼ်းမဵဝ်းသူ၊ၵႃႈၼိူဝ်ၵူၼ်းၸဝ်ႈၵူၼ်းႁေႃတင်းမူတ်းဢေႃႈ။
“ၼႂ်းၶိင်ႇၵႃႇလႃႉၼၼ်ႉ ထႃႇဝရႃႉၽြႃး၊ တၵ်းၽိဝ်ပၢၵ်ႇႁဵတ်းလၢၵ်ႈၶၼႃႇပုၼ်ႈၵူၼ်းမဵဝ်း ဢေးၵျိပ်ႉ၊ တင်းလၢႆႁႂ်ႈၶဝ်မႃးမိူၼ်ၸိူဝ်ႉၼင်ႇမႅင်းမုၼ်းဢၼ်ယူႇၸွမ်းတီႈႁူဝ်ၼမ်ႉမႄႈၼမ်ႉ ၼၢႆးလ်၊ ဢိၵ်ႇတင်းၵူၼ်းမဵဝ်း ဢႃႇသီးရီးယႃး၊ ၶဝ်မႃးမိူၼ်ၸိူဝ်ႉၼင်ႇၽုင်ၽိုင်ႈၼၼ်ႉဢေႃႈ။-
ၶဝ်ၼၼ်ႉတၵ်းဢွၼ်ၵၼ်မႃးၸပ်းၵႃႈၼႂ်းၶူင်ႈႁူၺ်ႈဢၼ်သဵတ်ႇၵူၼ်းငႅဝ်ၵူၼ်း၊ၵႃႈၼႂ်းၶုမ်ၼႂ်းႁူးမၢၵ်ႇႁိၼ်မၢၵ်ႇၽႃ၊ၵႃႈၼိူဝ်တူၼ်ႈယုမ်းတူၼ်ႈၼၢမ်၊ဢိၵ်ႇတင်းပၢင်ႇယိူဝ်ႈယႃႈဢၼ်ၶဵဝ်လီၼုမ်ႇလီၼၼ်ႉဢေႃႈ။
“ၼႂ်းၶိင်ႇၵႃႇလႃႉၼၼ်ႉ၊ ထႃႇဝရႃႉၽြႃး၊ တၵ်းၸၢင်ႈဢဝ်ၵူၼ်းထႃႁူဝ်သေၵႃႈတီႈၽၢႆႇပုၼ်ႉၼမ်ႉ ဢုၽရတ်ႉ၊ ၸိူဝ်းဢၼ်ဝႃႈ၊ၶုၼ်ႁေႃၶမ်းမိူင်း ဢႃႇသီးရီးယႃး၊ ႁႂ်ႈမၼ်းထႃၼူတ်ႇၵၢင်းသူ၊ၶူၼ်ႁူဝ်သူဢိၵ်ႇတင်းၶူၼ်တူဝ်သူပႅတ်ႈဢေႃႈ။
“ၼႂ်းၶိင်ႇၵႃႇလႃႉၼၼ်ႉ၊ပေႃးၸဝ်ႈႁႆႈၸဝ်ႈၼႃးၵေႃႉၼိုင်ႈတၵ်းလဵင်ႉလႆႈဝူဝ်းမႄႈတူဝ်ၼိုင်ႈ၊ဢိၵ်ႇတင်းပႄႉမႄႈသွင်တူဝ်ၵူၺ်းသေၵေႃႈ၊-
တူဝ်သတ်းမႄႈၸိူဝ်းၼၼ်ႉတၵ်းပၼ်ၼမ်ႉၼူမ်းၼမ်ၼႃႇႁႂ်ႈၵေႃႉၼၼ်ႉလႆႈပေႃးၵုမ်ႇၵႃႈဢၼ်မၼ်းလူဝ်ႇၵူႈၸိူဝ်ႉၵူႈပိူင်ၼၼ်ႉလႄႈၵူၼ်းဢၼ်ၵိုတ်းဢၼ်ၵျၢၼ်ႇၵႃႈၼႂ်းမိူင်းၼၼ်ႉၵေႃႈတၵ်းတေလႆႈၵိၼ်ၼမ်ႉၼူမ်းတင်းၼမ်ႉၽိုင်ႈဢေႃႈ။
“ၼႂ်းၶိင်ႇၵႃႇလႃႉၼၼ်ႉ၊သူၼ်ဢူးယဵၼ်ႇဢၼ်မီးတူၼ်ႈၶိူဝ်းႁဵင်ၼိုင်ႈဢၼ်ထိူၵ်ႈၵႃႈထိူၵ်ႈၶၼ်ငိုၼ်းၼိုင်ႈႁဵင်ၵျၢပ်ႈၼၼ်ႉ၊တၵ်းပဵၼ်မဵဝ်းတူၼ်ႈၼၢမ်ၵႂႃႇဢေႃႈ။-
ၵူၼ်းတင်းလၢႆတၵ်းဢွၼ်ၵၼ်ပႃးၵၢင်ႇပႃးပိုၼ်လႄႈၵႂႃႇလႄႇႁႃယိုဝ်းတူဝ်ထိူၼ်ႇၵႃႈတီႈၼၼ်ႈ ၵွပ်ႈပိူဝ်ႈဢၼ်ၼႃႈလိၼ်တင်းသဵင်ႈတင်းမူတ်းလႆႈပဵၼ်မဵဝ်းတူၼ်ႈၼၢမ်ၵႂႃႇၼၼ်ႉဢေႃႈ။-
တီႈတၢပ်ႈလွႆၸိူဝ်းဢၼ်ယၢမ်ႈႁဵတ်းႁႆႈၶဝ်ႈၼၼ်ႉၵွပ်ႈပိူဝ်ႈပဵၼ်မဵဝ်းတူၼ်ႈၼၢမ်ၵႂႃႇယဝ်ႉလႄႈၽူႈလႂ်ဢမ်ႇႁတ်းၵႂႃႇၸမ်။ လႆႈပဵၼ်တီႈပွႆႇဝူဝ်းၵႂၢႆးၵိၼ်ယိူဝ်ႈ၊ဢိၵ်ႇတင်းသူဝ်းလႂ်၊ပႄႉလႂ်ယဵပ်ႇၶၢမ်ႈၵူၺ်းဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉတီႈၵဝ်လႄႈဝႃႈ၊ “မႂ်းဢဝ်တင်းၶႅပ်းၽႅၼ်ႇလူင်ပုၼ်ႈတၵ်းတႅမ်ႈမၢႆၼၼ်ႉလႄႈဢဝ်တူဝ်လိၵ်ႈဢၼ်ၵူၼ်းၵူႈၵေႃႉၸၢင်ႈၽတ်းဢၢၼ်ႇလႆႈဢၼ်ဝႃႈ၊ ‘မႁေႇရႃႉ၊သႃႇသလႃႉ၊ႁႃႇသပတ်ႉ’ ၼၼ်ႉတႅမ်ႈဝႆႉတႃႉ။-
ႁွင်ႉဢဝ်ၵူၼ်းဢၼ်ယုမ်ႇလႆႈသွင်ၵေႃႉဢၼ်ပဵၼ်ယဵၸ်ႈပရေႃးႁဵၵ်ႈ ဢုရိယႃး၊ တင်း ၸႃႇၶရိ၊ လုၵ်ႈၸၢႆး ပေႇပရၶိ၊ ၸိူဝ်းၼၼ်ႉႁႂ်ႈပဵၼ်သၢၵ်ႈသေႇတႃႉ၊” ဝႃႈၼင်ႇၼႆဢေႃႈ။
လိုၼ်းၼၼ်ႉဢမ်ႇႁိုင်ဢမ်ႇၼၢၼ်းမေးၵဝ်ဢၼ်ပဵၼ်ပရေႃးၽႅတ်ႈ မႄႈယိင်းၼၼ်ႉပႃးပတိၵ်ႈသၼ်ႇထေႇဢေႃႈ။ မိူဝ်ႈဢၼ်လုၵ်ႈၸၢႆးႁဝ်းၵိူတ်ႇလႅင်ႉမႃးၼၼ်ႉ ထႃႇဝရႃႉၽြႃး၊ မီးဢမိင်ႉတီႈၵဝ်လႄႈဝႃႈ၊ “ႁွင်ႉႁဵၵ်ႈၸိုဝ်ႈလုၵ်ႈၸၢႆးၼၼ်ႉဝႃႈ၊ မႁေႇရႃႉသႃႇသလႃႉႁႃႇသပတ်ႉ၊ တႃႉ။-
လွင်ႈမၼ်းၸမ်ႉ၊ၸူဝ်ႈဢၼ်လုၵ်ႈဢွၼ်ႇဢမ်ႇပႆႇၸၢင်ႈႁွင်ႉဝႃႈပေႃႈ႟၊မႄႈ႟၊ဝႃႈၼႆၼၼ်ႉၸိုင်၊ၵႃႈဢၼ်ပဵၼ်ဢုၵ်ႉၸႃႇၸေးၸိမ်ႇဝဵင်း တမ်ႇမတ်ႉသၵတ်ႉ၊ ဢိၵ်ႇတင်းဢုၵ်ႉၸႃႇဢၼ်သိမ်းဢဝ်သေဝဵင်း သမႃႇရိ၊ မႃးၸိူဝ်းၼၼ်ႉတၵ်းလႆႈၶၢမ်ႇတၢင်းဢၼ်ၶုၼ်ႁေႃၶမ်းမိူင်း ဢႃႇသီးရီးယႃး၊ သိမ်းဢဝ်ဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉတီႈၵဝ်ထႅင်ႈလူးၵွၼ်ႇဢေႃႈ။-
မၼ်းၸဝ်ႈမီးဢမိင်ႉလႄႈဝႃႈၸမ်ႉ၊ “ၵွပ်ႈပိူဝ်ႈၵူၼ်းတင်းလၢႆမၢင်ပႅတ်ႈၼမ်ႉၵႄးဢွၼ်ႇ သိလွင်ႇ၊ ဢၼ်လႆယူႇၼိမ်ၼိမ်လီလီၼၼ်ႉသေယဝ်ႉ၊ၸူမ်းသိူဝ်းလူၺ်ႈၶုၼ်လူင် ရေႇၸိၼ်း၊ ဢိၵ်ႇတင်းၶုၼ်လူင် ပေႇၵႃႇ၊ ၼၼ်ႉလႄႈ၊-
ၵဝ်၊ ထႃႇဝရႃႉၽြႃး၊ တၵ်းဢဝ်ၸဝ်ႈမုၼ်ယႂ်ႇၶုၼ်ႁေႃၶမ်းမိူင်း ဢႃႇသီးရီးယႃး၊ ပႃးဢဝ်ႁႅင်းသိုၵ်းမၼ်းတင်းမူတ်းမႃးတိုၵ်းတေႃးမိူင်း ယုတႃႉ၊ ဢေႃႈ။ ၶဝ်ၼၼ်ႉတၵ်းပႄႉၼႅင်ႇလုၵ်ႉမႃးမိူၼ်ၸိူဝ်ႉၼင်ႇမႄႈၼမ်ႉလူင် ဢုၽရတ်ႉ၊ ဢၼ်ၼွင်းလႄႈလူၼ်ႉၽင်ႇမၼ်းၵႂႃႇတင်းမူတ်းၼၼ်ႉဢေႃႈ။-
ၼမ်ႉၼၼ်ႉတၵ်းၼွင်းမိူင်း ယုတႃႉ၊ ႁႂ်ႈၸွတ်ႇတူဝ်ႈၵႂႃႇတင်းမိူင်းထူမ်ႈပဵင်းၶေႃးလႄႈႁူမ်ႇထူမ်ႈၶိူင်ႈပိူင်ၵႃႈမီးတင်းသဵင်ႈတင်းမူတ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။ ဢေႇမႃႇၼူၺ်ႇလႃႉ၊ တီႈၶႃႈ႟။ တၢင်းဢၼ်မၼ်းၸဝ်ႈၵီႈပိၵ်ႇၸဝ်ႈၼၼ်ႉပဵၼ်တၢင်းဢၼ်ၵႅတ်ႇၶႄႁႄႉၵင်ႈမိူင်းၸဝ်ႈတီႈၶႃႈဢေႃႈ။
ၵူၼ်းမဵဝ်းတင်းလၢႆၶဝ်႟။ ဢွၼ်ၵၼ်မီးႁူဝ်ၸႂ်ဢၼ်ၵူဝ်ႁႄလႄႈၸုတုမ်ၵၼ်တႃႉ။ သူၸိူဝ်းဢၼ်ယူႇဝၢၼ်ႈၵႆမိူင်းယၢၼ်ၶဝ်႟။ ထွမ်ႇငိၼ်းတႃႉ။ ႁၢင်ႈႁႅၼ်းဝႆႉပုၼ်ႈတၵ်းတိုၵ်းသိုၵ်းတႃႉ။ ၵူၺ်းၵႃႈ၊မီးၸႂ်ၵူဝ်ၸႂ်ႁႄတႃႉ။ ႁၢင်ႈႁႅၼ်းဝႆႉတႃႉ။ မီးတၢင်းဢၼ်ၵူဝ်ႁႄတႃႉ။-
တိူင်ႇပၢင်ႇၶိုင်ႁႅၼ်းဝႆႉတႃႉ။ ၵူၺ်းၵႃႈ၊တၢင်းၵျၢမ်ႇတၢင်းပွင်သူတၵ်းလုဢေႃႈ။ လၢတ်ႈၶေႃႈလၢတ်ႈၵႂၢမ်းၵႃႈၼင်ႇဢၼ်သူမီးဢလူဝ်ႇဢၼ်ၶႂ်ႈလၢတ်ႈၼၼ်ႉတႃႉ။ ၵူၺ်းၵႃႈ၊တၵ်းပဵၼ်ဢၼ်ဢမ်ႇပွင်ႇလွင်ႈၵႃႈသင်လႃးလႃး၊ၵွပ်ႈပိူဝ်ႈၽြႃးပဵၼ်ၸဝ်ႈမီးလူၺ်ႈၵၼ်တင်းႁဝ်းဢေႃႈ။
ထႃႇဝရႃႉၽြႃး၊ ဢဝ်တင်းတၼ်းၶူဝ်းဢၼ်ယႂ်ႇၼႃႇပၼ်သတိတီႈၵဝ် ပုၼ်ႈလွင်ႈၼင်ႇႁိုဝ်ၵဝ်တၵ်းဢမ်ႇယၢင်ႈၸွမ်းသဵၼ်ႈတၢင်းဢၼ်ၵူၼ်းတင်းလၢႆပႆၸွမ်းၼၼ်ႉဢေႃႈ။ မၼ်းၸဝ်ႈမီးဢမိင်ႉလႄႈဝႃႈ၊-
“မႂ်းယႃႇပေၶဝ်ႈပႃးၸွမ်းလွၵ်းလၢႆးဢၼ်ၵူၼ်းတင်းလၢႆၶိုင်ပွင်ဝႆႉၸိူဝ်းၼၼ်ႉ။ ယႃႇပႄၵူဝ်ပႄႁႄၶိူင်ႈပိူင်ဢၼ်ၶဝ်ၸၢင်ႈလီၵူဝ်လီႁႄၼၼ်ႉ။-
မၢတ်ႈတွင်းလွင်ႈတၢင်းဢၼ်ၵဝ်၊ ထႃႇဝရႃႉၽြႃး၊ ၸဝ်ႈဢၼၼ်ႇတႃႉတၼ်းၶူဝ်း၊ပဵၼ်ၸဝ်ႈဢၼ်မူတ်းၸၢင်ႇသေယဝ်ႉ၊ပဵၼ်ၸဝ်ႈဢၼ်မႂ်းထုၵ်ႇလီၵူဝ်လီႁႄၼၼ်ႉတႃႉ။-
ၵွပ်ႈပိူဝ်ႈတၢင်းမူတ်းၸၢင်ႇၵဝ်ဢၼ်ထိူၵ်ႈရူဝ်ႇသေႇၵူဝ်ယမ်ၼႆႉလႄႈ၊ၵဝ်ပဵၼ်မိူၼ်မၢၵ်ႇႁိၼ်ဢၼ်ၵူၼ်းတင်းလၢႆၶီႈလိုတ်းလႄႈလူမ်ႉ၊ဢိၵ်ႇတင်းမိူၼ်တူင်ႇႁႅဝ်ႉတူင်ႇၶိုမ်းဢၼ်တိၺွပ်းဢဝ်ၵူၼ်းမိူင်း ယုတႃႉ၊ တင်းၵူၼ်းမိူင်း ဢိသရေး၊ ဢိၵ်ႇတင်းၵူၼ်းဝဵင်း ယေႇရုသလႅမ်ႇ၊ တင်းလၢႆၼၼ်ႉဢေႃႈ။-
ၵူၼ်းၼမ်ၼႃႇတၵ်းဢွၼ်ၵၼ်တိူဝ်ႉမႅၼ်ႈလႄႈလႆၶၢမ်ႇတၢင်းဢၼ်ႁၵ်းႁိၵ်းလုလႅဝ်၊ဢိၵ်ႇတင်းလႆႈၶၢမ်ႇတၢင်းဢၼ်တိဢဝ်ဢေႃႈ။”
သူၸိူဝ်းဢၼ်ပဵၼ်တပႄးၵဝ်တင်းလၢႆၶဝ်႟။ ပႂ်ႉထိင်းႁႄႉၵင်ႈတြႃးဢၼ်ၽြႃးပဵၼ်ၸဝ်ႈပၼ်တီႈၵဝ်ဝႆႉၸိူဝ်းၼၼ်ႉလီလီတႃႉ။-
ၵဝ်တၵ်းပႂ်ႉထႃႈ ထႃႇဝရႃႉၽြႃး၊ ဢၼ်သိူင်ႇလပ်ႉၼႃႈမၼ်းၸဝ်ႈပႅတ်ႈသေၵႃႈတီႈၸိူဝ်ႉၶိူဝ်းၵူၼ်းႁိူၼ်း ယႃႇၵုပ်ႈ၊ ၼၼ်ႉလႄႈၵဝ်တၵ်းမုင်ႈမွင်းမၼ်းၸဝ်ႈဢေႃႈ။
တူၺ်းလူး။ ၵဝ်ယူႇလူၺ်ႈၵၼ်တင်းလုၵ်ႈဢွၼ်ႇၸိူဝ်းဢၼ် ထႃႇဝရႃႉၽြႃး၊ ပၼ်ဝႆႉၵႃႈတီႈၵဝ်ၼၼ်ႉဢေႃႈ။ ထႃႇဝရႃႉၽြႃး၊ ၸဝ်ႈဢၼၼ်ႇတႃႉတၼ်းၶူဝ်း၊ဢၼ်ပလၢင်ႇၸဝ်ႈမီးယူႇၵႃႈၼိူဝ်လွႆ ၸိဢုၼ်ႇ၊ လႄႈပွႆႇၸႂ်ႉႁဝ်းၵႂႃႇပဵၼ်ၼိမိၵ်ႈလၢၵ်ႈၶၼႃႇ ဢိၵ်ႇတင်းမဵဝ်းဢၼ်လီဢၢမ်းတီႈၵူၼ်းမဵဝ်း ဢိသရေး၊ တင်းလၢႆဢေႃႈ။
ၵူၺ်းၵႃႈ၊ၵူၼ်းတင်းလၢႆတၵ်းလၢတ်ႈတီႈသူႁႂ်ႈသူၵႂႃႇတွင်ႈထၢမ်တီႈၵူၼ်းဢၼ်ၽီၶဝ်ႈလႂ်၊ၵူၼ်းဢၼ်ၽိူဝ်ႉၶဝ်ႈလႂ်၊ၸိူဝ်းဢၼ်ၸၢင်ႈသွပ်ႉသႅပ်ႉလႄႈႁေႃးမၢၼ်ႇတၢၼ်ႇၵႃႇထႃႇၸိူဝ်းၼၼ်ႉဢေႃႈ။ ၶဝ်တၵ်းလၢတ်ႈလႄႈဝႃႈ၊ “ၼႂ်းလွင်ႈတၢင်းမဵဝ်းၼႆႉၵူၼ်းထုၵ်ႇလီထၢမ်ႁႃဢိင်ႁႃတြႃးဝိၺိၺ်ႇလႂ်၊ဢိၵ်ႇတင်းထုၵ်ႇလီတွင်ႈထၢမ်တီႈၽီၵူၼ်းတၢႆပုၼ်ႈတႃႇၵူၼ်းဢၼ်ဢသၢၵ်ႈလိပ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
သူတၵ်းလႆႈၶိုၼ်းတွပ်ႇလၢတ်ႈတီႈၶဝ်လႄႈဝႃႈ၊ “ထွမ်ႇဢဝ်တြႃးၸဝ်ႈဢၼ် ထႃႇဝရႃႉၽြႃး၊ သင်ႇသွၼ်သုင်းမႃႉသူၼၼ်ႉတႃႉ။ ယႃႇပေထွမ်ႇဢဝ်ၵႂၢမ်းၽိူဝ်ႉၽီၸိူဝ်းဢၼ်ႁေႃးလၢတ်ႈၵႂၢမ်းပဝ်ႇၵႂၢမ်းလၢႆတီႈသူၼၼ်ႉ၊” ဝႃႈၼင်ႇၼႆဢေႃႈ။
ၵူၼ်းၸိူဝ်းၼၼ်ႉတၵ်းဢွၼ်ၵၼ်လႄႇၵႂႃႇလႄႇမႃးယူႇ၊ၸႂ်လဵၵ်ႉႁႅင်းဢူၼ်ႈယူႇ၊တွင်ႉမႆႈသႆႈလိူတ်ႇယူႇဢေႃႈ။ မိူဝ်ႈဢၼ်ၶဝ်တွင်ႉမႆႈသႆႈလိူတ်ႇလႄႈ ၸႂ်မႆႈၶႂ်ႈၸႃႉယူႇၼၼ်ႉၸိုင်၊ၶဝ်တၵ်းလႃႇလင်ၶုၼ်ႁေႃၶမ်းၶဝ်တင်းၽြႃးပဵၼ်ၸဝ်ႈၶဝ်ဢေႃႈ။ ၶဝ်တၵ်းႁႅၼ်တူၺ်းၵႃႈတီႈတွင်ႉၽႃႉယူႇ၊-
ၵူမ်ႈတူၺ်းလိၼ်မိူင်းယူႇသေၵေႃႈ ၶဝ်တၵ်းဢမ်ႇႁၼ်ၵႃႈသင်သေၸိူဝ်ႉသေမဵဝ်းလႄႈတၵ်းႁၼ်ၽေးတုၵ်ႉၶႃႉဢၼ်လပ်းသိင်ႇၽိတ်းၽိတ်း၊တၢင်းလပ်းသိင်ႇဝူၺ်ႇတၼႃႇဢၼ်လီၵူဝ်လီႁႄၵႃႈၼႂ်းတီႈဢၼ်ၶဝ်လႆႈၶၢမ်ႇတၢင်းဢၼ်ႁေႃႈၶဝ်ႈၵႂႃႇၸူးၼၼ်ႉဢေႃႈ။
ၶဝ်တၵ်းဢမ်ႇမီးသဵၼ်ႈတၢင်းဢၼ်ၸၢင်ႈပၢႆႈလွတ်ႈဢွၵ်ႇသေၵႃႈတီႈၶိင်ႇၵႃႇလႃႉၽေးတုၵ်ႉၶႃႉၼၼ်ႉလႆႈလႃးလႃးဢေႃႈ။ မိူဝ်ႈဢွၼ်တၢင်းၼၼ်ႉမၼ်းၸဝ်ႈၶျႃးဢိူင်ႇ ၸေႇပုလုၼ်ႇ၊ တင်းဢိူင်ႇ ၼပ်ႉထလိ၊ တူၵ်းတီႈတႅမ်ႇဢေႃႈ။ ၵူၺ်းၵႃႈ၊မိူဝ်ႈၵမ်းလိုၼ်းမၼ်းၸဝ်ႈတၵ်းဢဝ်မုၼ်သရေႇမႃးၵႃႈတီႈဢိူင်ႇၸိူဝ်းၼႆႉ၊ၸႃႉၸဵမ်ၵႃႈတီႈၽၢႆႇဝၼ်းဢွၵ်ႇပၢင်ႇလၢႆႇ မေႇတိထေးရီးယၼ်း၊ မႃးထိုင်တီႈမိူင်းဢၼ်မီးၽၢႆႇပုၼ်ႉၼမ်ႉ ယေႃးတၢၼ်ႇ၊ ဢိၵ်ႇတင်းမိူင်း ၵႃႇလိလႄး၊ တီႈဢၼ်ၵူၼ်းတၢင်ႇသိုင်ႇတၢင်ႇမိူင်းယူႇသဝ်းၼၼ်ႉဢေႃႈ။
ၵူၼ်းၸိူဝ်းဢၼ်ၵႂႃႇမႃးၼႂ်းလပ်းသိင်ႇတင်းလၢႆ၊ လႆႈႁၼ်ဢၼ်လႅင်းယႂ်ႇၼႃႇလူင်လၢင်လႄႈ တေႃႈလဵဝ်ၼႆႉဢၼ်လႅင်းထွင်ႇႁိူဝ်ႈ ၵႃႈၼိူဝ်ၶဝ်ၸိူဝ်းဢၼ်မီးယူႇၼႂ်းမိူင်းႁူမ်ႈတၢင်းတၢႆၼၼ်ႉယဝ်ႉ။
ထႃႇဝရႃႉၽြႃး၊ ႁႂ်ႈၶဝ်ၼမ်ၵိုၼ်းၼႃႇလႄႈႁႂ်ႈၶဝ်ၸူမ်းသိူဝ်းၼႃႇလူင်လၢင်ဢေႃႈ။ ၶဝ်ၼၼ်ႉလႆႈၸူမ်းသိူဝ်းၵႃႈတီႈၽၢႆႇၼႃႈၸဝ်ႈႁဝ်းမိူၼ်ၸိူဝ်ႉၼင်ႇဢၼ်၊ ပိူၼ်ႈၸူမ်းသိူဝ်းၼႂ်းၶိင်ႇဢၼ်ပၢတ်ႇသိမ်းဢဝ်ၶဝ်ႈပိူၵ်ႇ၊ဢမ်ႇၼၼ်ၵေႃႈမိူၼ်ၸိူဝ်ႉၼင်ႇဢၼ်၊ ပိူၼ်ႈၸူမ်းသိူဝ်းၼႂ်းမိူဝ်ႈဢၼ်ၶဝ် ၽႄမႅင်ႇဢုၵ်ႉၸႃႇပၼ်ၵၼ်ဢၼ်ၶဝ်ႁိမ်ႁူင်ႇဢဝ်လႆႈမႃးၼၼ်ႉဢေႃႈ။
လွင်ႈမၼ်းၸမ်ႉ၊ၸဝ်ႈႁဝ်းႁၵ်းႁိၵ်းၵၢၼ်းႁၢပ်ႇၶဝ် တင်းၶွၼ်ႉဝၢႆဢၼ်ပေႃႉတီႈမႃႇတီႈလင်ၶဝ်ၼၼ်ႉပႅတ်ႈဢေႃႈ။ ၸဝ်ႈႁဝ်းပႄႉၼႅင်ႇၵူၼ်းမဵဝ်းဢၼ်တဵၵ်းငႅၼ်းလႄႈႁဵတ်းမိူၵ်ႈႁဵတ်းလိူင်းတေႃႇ ၵူၼ်းၸဝ်ႈႁဝ်းတင်းလၢႆၼၼ်ႉ၊မိူၼ်ၸိူဝ်ႉၼင်ႇဢၼ်ၸဝ်ႈႁဝ်းႁဵတ်းပႄႉႁဵတ်းၼႅင်ႇ တပ်ႉသိုၵ်းၵူၼ်း မိတျၼ်ႇ၊ ၶဝ်မိူဝ်ႈပူၼ်ႉမႃးႁိုင်ၼႃႇယဝ်ႉၼၼ်ႉဢေႃႈ။
သွၵ်းတိၼ်ၵူၼ်းသိုၵ်းဢၼ်မႃးတိုၵ်းသိုၵ်းၸိူဝ်းၼၼ်ႉ၊ဢိၵ်ႇတင်း ၶူဝ်းၼုင်ႈၶူဝ်းမႆၶဝ်ဢၼ်ၵူဝ်ႈလိူတ်ႈၵႃႈမီး ၸိူဝ်းၼၼ်ႉတၵ်းလႆႈဢဝ်ၽႆးတုတ်ႇပႅတ်ႈဢေႃႈ။
လွင်ႈမၼ်းၸမ်ႉ၊လုၵ်ႈၸၢႆးဢွၼ်ႇၵိူတ်ႇလဵင်ႉမႃးပုၼ်ႈႁဝ်းယဝ်ႉဢေႃႈ။ လုၵ်ႈၸၢႆးဢွၼ်ႇၼၼ်ႉလႆႈၶၢမ်ႇတၢင်းဢၼ်ပၼ်တီႈႁဝ်းယဝ်ႉဢေႃႈ။ မၼ်းၸဝ်ႈၼၼ်ႉတၵ်းပဵၼ်ၸဝ်ႈၶုၼ်လူင်ဢၼ်ဢုပ်ႉပိူင်ႇႁဝ်းလႄႈ ၼႃႇမႃႉၸိုဝ်ႈသဵင်တၵ်းလႆႈႁွင်ႉႁဵၵ်ႈၸိုဝ်ႈဝႃႈ၊ ၸဝ်ႈတီႈဢၼ်တိူင်ႇပၢင်ႇဢၼ်လီဢၢမ်းဢေႃႈ။ ပဵၼ်ၽြႃးပဵၼ်ၸဝ်ႈဢၼ်တၼ်းၶူဝ်းယႂ်ႇ၊ ပေႃႈၸဝ်ႈထႃႇဝရႃႉ၊ပဵၼ်ၸဝ်ႈတၢင်းၼိမ်ဢေႃႈ။
ဢႃႇၼႃႇၸၢၵ်ႈၽုင်းတၼ်းၶူဝ်းၸဝ်ႈၼၼ်ႉတၵ်းယႂ်ႇၶိုၼ်ႈယူႇၶိူဝ်းၶိူဝ်းယႂ်းယႂ်းလႄႈ သိုင်ႇၸိုင်ႈဝၢၼ်ႈမိူင်းၸဝ်ႈတၵ်းမီးတၢင်းၼိမ်တႃႇသေႇဢမ်ႇထၢတ်ႇဢေႃႈ။ မၼ်းၸဝ်ႈၼၼ်ႉတၵ်းဢုပ်ႇပိူင်ႇမိူၼ် ၸဝ်ႈဢၼ်သိုပ်ႇႁၢင်ႈသိုပ်ႇႁေႃၶုၼ်ႁေႃၶမ်း တႃႇဝိတ်ႈ၊ လႄႈ မုၼ်ၽုင်းတၼ်းၶူဝ်းၸဝ်ႈတၵ်းတႄႇယူႇၵႃႈၼိူဝ်တၢင်းဢၼ်ၸီႇယၢင်ႇၸွမ်းၼင်ႇတြႃး၊ ဢိၵ်ႇတင်းတၢင်းဢၼ်သိုဝ်ႈတေႃႇၼၼ်ႉ၊ဢဝ်ၸႃႉၸဵမ်မိူဝ်ႈလဵဝ်ၼႆႉၵႂႃႇမိူဝ်းၼႃႈ ၵူႈၸူဝ်ႈၵူႈပၢၼ်သိုပ်ႇသိုပ်ႇတၢမ်တၢမ်ဢမ်ႇထၢတ်ႇဢေႃႈ။ ထႃႇဝရႃႉၽြႃး၊ ၸဝ်ႈဢၼၼ်ႇတႃႉ တၼ်းၶူဝ်းၼၼ်ႉတႅပ်းတတ်းၸႂ်လႄႈႁဵတ်းႁႂ်ႈလွင်ႈတၢင်းၸိူဝ်းၼႆႉယဝ်ႉတူဝ်ႈဢေႃႈ။
ထႃႇဝရႃႉၽြႃး၊ မွၵ်ႇလၢတ်ႈၵႂၢမ်းဢၼ်ၸီႇယၢင်ႇတြႃးၵႃႈၼိူဝ်သိုင်ႇၸိုင်ႈဝၢၼ်ႈမိူင်း ဢိသရေး၊ ၵႃႈၼိူဝ်ၸိူဝ်ႉၶိူဝ်း ယႃႇၵုပ်ႈ၊ ဢေႃႈ။-
ၵူၼ်းမဵဝ်း ဢိသရေး၊ တင်းသဵင်ႈတင်းလူင်ၸိူဝ်းဢၼ်ယူႇၵႃႈၼႂ်းဝဵင်း သမႃႇရိ၊ တၵ်းႁုလွင်ႈဢၼ်မၼ်းၸဝ်ႈႁဵတ်းလွင်ႈတၢင်းၼႆႉၼၼ်ႉဢေႃႈ။ တေႃႈလဵဝ်ၼႆႉၶဝ်မီးၸႂ်မႃႇၼႃႉၽႅၼ်သုင်ႁူဝ်ၸႂ်ပူၵ်းပႅၼ်လႄႈဢွၼ်ၵၼ်လၢတ်ႈဝႃႈ၊-
“ပိၵ်ႉသမ်ႉလမ်းဢုတ်ႇလူင်လူမ်ႉပင်းသေၵေႃႈ ႁဝ်းတၵ်းဢဝ်မၢၵ်ႇႁိၼ်ဢၼ်ထၢၵ်ႇႁဵတ်းသပ်းႁဵတ်းၼၼ်ႉ ၶိုၼ်းတႄႇတင်ႈဢေႃႈ။ ပိၵ်ႉသမ်ႉတူၼ်ႈမၢၵ်ႇလိူဝ်ႇတင်းလၢႆလႆႈၶၢမ်ႇတၢင်းဢၼ်ပွမ်ႈလူမ်ႉပႅတ်ႈသေၵေႃႈ ႁဝ်းတၵ်းဢဝ်တူၼ်ႈမႆႉဢႃႇရိတ်ႉတင်းလၢႆၽုၵ်ႇတႅၼ်းသႂ်ႇဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ တၵ်းတိုၵ်းယူင်းရၢၼ်ႇသူႇၶဝ်ႁႂ်ႈတိုၵ်းတေႃးၶဝ်ဢေႃႈ။-
ၵူၼ်း သီးရီးယႃး၊ ဢၼ်ယူႇၽၢႆႇတၢင်းဢွၵ်ႇ၊ဢိၵ်ႇတင်းၵူၼ်း ၽိလိတ်ႉတိ၊ ဢၼ်ယူႇၽၢႆႇတၢင်းတူၵ်းၼၼ်ႉတၵ်းဢွၼ်ၵၼ်ဢႃႈပၢၵ်ႇၶဝ်သေလႄႈဢိုၼ်ၵိၼ်ၵူၼ်းမဵဝ်း ဢိသရေး၊ ၶဝ်ဢေႃႈ။ ၼႂ်းဝႃႈၼၼ်သေၵေႃႈတၢင်းၸႂ်မႆႈၶႂ်ႈၸႃႉမၼ်းၸဝ်ႈဢမ်ႇထၢတ်ႇဢမ်ႇယဵၼ်။ မိုဝ်းမၼ်းၸဝ်ႈယင်းယဵတ်ႇဢွၵ်ႇပုၼ်ႈတႃႇတေပၼ်တၢမ်ႇၼၼ်ႉဢေႃႈ။
ၵူၼ်း ဢိသရေး၊ တင်းလၢႆယင်းဢမ်ႇၶုၵ်းၸႂ်လႆႈမႆႈၸႂ်ဢပျတ်ႈၶဝ်။ ပိၵ်ႉသမ်ႉ ထႃႇဝရႃႉၽြႃး၊ ၸဝ်ႈဢၼၼ်ႇတႃႉတၼ်းၶူဝ်းၼၼ်ႉပၼ်တၢမ်ႇတီႈၶဝ်သေၵေႃႈၶဝ်ဢမ်ႇဝၢႆႇဢမ်ႇၶိုၼ်းၸူးတီႈမၼ်းၸဝ်ႈ။-
ပိူဝ်ႈၼႆလႄႈ ထႃႇဝရႃႉၽြႃး၊ တၵ်းပၼ်တၢမ်ႇတီႈၵူၼ်းဢွၼ်ႁူဝ်ၵူၼ်းမဵဝ်း ဢိသရေး၊ ဢိၵ်ႇတင်းၵူၼ်းၶဝ်တင်းလၢႆ၊တႅပ်းႁူဝ်တႅပ်းႁၢင်ၶဝ်ပႅတ်ႈၼႂ်းဝၼ်းလဵဝ်ၵူၺ်းၼၼ်ႉဢေႃႈ။-
ႁူဝ်ၶဝ်ၼၼ်ႉၸမ်ႉ၊ပဵၼ်ၵူၼ်းထဝ်ႈၵူၼ်းၵႄႇၶဝ်တင်းလၢႆလႄႈႁၢင်ၼၼ်ႉၸမ်ႉ၊ပဵၼ်ပရေႃးၽႅတ်ႈ ၶဝ်ၸိူဝ်းဢၼ်ႁေႃးလၢတ်ႈမုသႃႇၼၼ်ႉဢေႃႈ။-
ၵူၼ်းၸိူဝ်းဢၼ်ဢွၼ်ႁူဝ်ၼႄတၢင်းၶဝ်ၼၼ်ႉ ဢွၼ်သူင်ႇႁႂ်ႈၶဝ်ၽိတ်းတၢင်းလႄႈ ႁဵတ်းႁႂ်ႈၶဝ်ၸိူဝ်းဢၼ်ၸွမ်းၼၼ်ႉၵႂၢင်တၢင်းဢေႃႈ။-
ၵွပ်ႈပိူဝ်ႈလွင်ႈတၢင်းၼႆႉလႄႈ ထႃႇဝရႃႉၽြႃး၊ တၵ်းဢမ်ႇပွႆႇႁႂ်ႈၵူၼ်းၼုမ်ႇၶဝ်လွတ်ႈၵၢင်းသေၵေႃႉသေၵူၼ်း၊တၵ်းဢမ်ႇၼႄၸႂ်ဢၼ်ၸၢင်ႈဢဵတ်းလူတီႈမႄႈမၢႆႈလႂ်၊ဢိၵ်ႇတင်းလုၵ်ႈဢွၼ်ႇၽၢၼ်ပေႃႈၽၢၼ်မႄႈလႂ်၊ၵွပ်ႈပိူဝ်ႈၵူၼ်းတင်းသဵင်ႈတင်းလူင်ဢမ်ႇမီးၽြႃးတြႃးလႄႈႁၢႆႉမိူၵ်ႈယူႇ၊ဢိၵ်ႇတင်းၵႃႈဢၼ်ၶဝ်လၢတ်ႈၼၼ်ႉပဵၼ်ၵႂၢမ်းဢၼ်ဢမ်ႇတြႃးလွၼ်ႉလွၼ်ႉၼၼ်ႉဢေႃႈ။ ၼႂ်းဝႃႈၼၼ်သေၵေႃႈတၢင်းၸႂ်မႆႈၶႂ်ႈၸႃႉ ထႃႇဝရႃႉၽြႃး၊ ယင်းဢမ်ႇထၢတ်ႇဢမ်ႇယဵၼ်၊မိုဝ်းမၼ်းၸဝ်ႈယင်းယဵတ်ႇဢွၵ်ႇပုၼ်ႈတႃႇတေပၼ်တၢမ်ႇၼၼ်ႉဢေႃႈ။
တၢင်းဢၼ်ႁၢႆႉဢၼ်မိူၵ်ႈၵူၼ်းတင်းလၢႆၼၼ်ႉပဵၼ်ၸိူဝ်ႉၼင်ႇၽႆးဢၼ်မႆႈယုမ်းၼၢမ်၊ဢိၵ်ႇတင်းယုမ်းယိူဝ်ႈယႃႈၼၼ်ႉဢေႃႈ။ မၼ်းမႆႈလုၵ်ႉၶိုၼ်ႈမိူၼ်ၸိူဝ်ႉၼင်ႇၽႆးမႆႈထိူၼ်ႇဢၼ်ႁႂ်ႈပိဝ်ၽႆးၵႂၼ်းၽႆးလုၵ်ႉၶိုၼ်ႈၼႃတၼ်ၼႃႇၼၼ်ႉဢေႃႈ။-
ၵွပ်ႈပိူဝ်ႈ ထႃႇဝရႃႉၽြႃး၊ ၸဝ်ႈဢၼၼ်ႇတႃႉတၼ်းၶူဝ်းၼၼ်ႉၸႂ်မႆႈၶႂ်ႈၸႃႉၼႃႇလႄႈတၢင်းဢၼ်မၼ်းၸဝ်ႈပၼ်တၢမ်ႇၼၼ်ႉ မႆႈလုၵ်ႉၶိုၼ်ႈမိူၼ်ၸိူဝ်ႉၼင်ႇၽႆးမႆႈလိၼ်မိူင်းလႄႈယႃႉၽဵဝ်ႈပႅတ်ႈၵူၼ်းတင်းလၢႆၼၼ်ႉဢေႃႈ။ ၽႂ်ၽႂ်မၼ်းမၼ်းတၵ်းလႆႈၶၢမ်ႇပုၼ်ႈတူဝ်ၽႂ်တူဝ်မၼ်းဢေႃႈ။-
ၵႃႈၼႂ်းမိူင်းၼၼ်ႉၵူႈတီႈၵူႈလႅၼ် ၵူၼ်းတင်းလၢႆတၵ်းၸၵ်ႉဢဝ်လႄႈၵိၼ်ၵႃႈဢၼ်ၶဝ်ဝၵ်ႉဢဝ်လႆႈဢိတ်းဢီႈၼိုင်ႈၼၼ်ႉတၵ်းဢမ်ႇဢိမ်ႇတွင်ႉဢိမ်ႇသႆႈၶဝ်လႆႈ။ ၶဝ်ယင်းလႆႈၵိၼ်ၼိူဝ်ႉလုၵ်ႈလၢင်းတူဝ်ၸဝ်ႈၵဝ်ႇလူးၵွၼ်ႇဢေႃႈ။-
ၵူၼ်း မၼႃႇသေႇ၊ တိုၵ်းတေႃးၵၼ်တင်းၵူၼ်း ဢေႇၽရိမ်ႇ၊ ဢေႃႈ။ ၶဝ်တင်းသွင်မဵဝ်းၸၢင်ႈၽွမ်ႉၵၼ်တိုၵ်းတေႃးၵူၼ်းမဵဝ်း ယုတႃႉ၊ ဢေႃႈ။ ၼႂ်းဝႃႈၼၼ်သေၵေႃႈတၢင်းၸႂ်မႆႈၶႂ်ႈၸႃႉ ထႃႇဝရႃႉၽြႃး၊ ယင်းဢမ်ႇထၢတ်ႇဢမ်ႇယဵၼ်ႇ၊မိုဝ်းမၼ်းၸဝ်ႈယင်းယဵတ်ႇဢွၵ်ႇပုၼ်ႈတႃႇတၵ်းပၼ်တၢမ်ႇၼၼ်ႉဢေႃႈ။
သူမီးဢႃႉမၢင်ႇၵလႃႇဢေႃႈ။ လွင်ႈမၼ်းၸမ်ႉ၊သူတႅမ်ႈမၢႆမီႈဢုပတေႇဢၼ်ဢမ်ႇတြႃးမဵဝ်းဢၼ်တဵၵ်းငႅၼ်းၵူၼ်းၵဝ်တင်းလၢႆၼၼ်ႉဢေႃႈ။-
သူၸၢင်ႈႁႄႉပႅတ်ႈဢိုတ်းပႅတ်ႈဢၶႂၢင်ႉဢရႃႇၵူၼ်းဢၼ်ၸုတ်ႈဢၼ်လုတ်ႈတင်းလၢႆလႄႈ ႁႂ်ႈၶဝ်ဢမ်ႇလႆႈၶၢမ်ႇဢဝ်ဢၶႂၢင်ႉဢၼ်ၸီႇယၢင်ႇၽဵင်ႇၽဵင်ႇၼၼ်ႉ၊သူလႆႈႁိမ်ႁူင်ႇဢဝ်ဢုၵ်ႉၸႃႇမႄႈမၢႆႈတင်းလုၵ်ႈဢွၼ်ႇဢၼ်ၽၢၼ်ပေႃႈၽၢၼ်မႄႈၼၼ်ႉလူင်ပႄႇ။-
သူတၵ်းႁဵတ်းၸိူဝ်ႉၼင်ႇႁိုဝ်ၼႂ်းမိုဝ်ႉဝၼ်းဢၼ်ၽြႃးပဵၼ်ၸဝ်ႈပၼ်တၢမ်ႇ၊မိူဝ်ႈဢၼ်တၢင်းဢၼ်ယႃႉပႅတ်ႈဢၼ်လုၵ်ႉသေၵႃႈတီႈၵႆႁွတ်ႈမႃးၼၼ်ႉ။ သူတၵ်းလႅၼ်ႈၵႂႃႇၵႃႈတီႈလႂ်ႁႂ်ႈလႆႈတၢင်းၸွႆႈတၢင်းထႅမ်၊သူတၵ်းဢဝ်ဢုၵ်ႉၸႃႇၶူဝ်းၶွင်သူသိူင်ႇမႅပ်းဝႆႉၵႃႈတီႈလႂ်။-
သူတၵ်းလႆႈၶၢမ်ႇတၢင်းဢၼ်ၶႃႈၽၼ်းတၢႆၵႃႈၼႂ်းၼႃႈသိုၵ်း၊ဢမ်ႇၼၼ်တၵ်းလႆႈၶၢမ်ႇတၢင်းဢၼ်တိုတ်ႉလၢၵ်ႈၶဝ်ႈၵႃႈၼႂ်းထွင်ႇဢေႃႈ။ ၼႂ်းဝႃႈၼၼ်သေၵေႃႈတၢင်းၸႂ်မႆႈၶႂ်ႈၸႃႉ ထႃႇဝရႃႉၽြႃး၊ ယင်းဢမ်ႇထၢတ်ႇဢမ်ႇယဵၼ်၊မိုဝ်းမၼ်းၸဝ်ႈယင်းယဵတ်ႇဢွၵ်ႇပုၼ်ႈတႃႇတၵ်းပၼ်တၢမ်ႇၼၼ်ႉဢေႃႈ။
ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ၵူၼ်းမိူင်း ဢႃႇသီးရီးယႃး၊ ၶဝ်႟။ ၵဝ်ဢဝ်ၵူၼ်းမိူင်း ဢႃႇသီးရီးယႃး၊ ၼၼ်ႉပဵၼ်ၸိူဝ်ႉၼင်ႇၶွၼ်ႉတဝ်ႉပုၼ်ႈဢၼ်တၵ်းပေႃႉထုပ်ႉၶဝ်ၸိူဝ်းဢၼ်ၵဝ်ၸႂ်မႆႈၶႂ်ႈၸႃႉတေႃႇၶဝ်ၼၼ်ႉဢေႃႈ။-
ၵဝ်ပွႆႇၸႂ်ႉၵူၼ်းမိူင်း ဢႃႇသီးရီးယႃး၊ တိုၵ်းတေႃးၵူၼ်းမဵဝ်းဢၼ်ဢမ်ႇမီးၽြႃးဢမ်ႇမီးတြႃး၊ၸိူဝ်းဢၼ်ႁဵတ်းႁႂ်ႈၵဝ်ၸႂ်မႆႈၶႂ်ႈၸႃႉၼၼ်ႉဢေႃႈ။ ၵဝ်ပွႆႇၸႂ်ႉၶဝ်ၵႂႃႇႁႂ်ႈႁိမ်ႁူင်ႇၸူၼ်ဢဝ်ဢုၵ်ႉၸႃႇၶဝ်ၸိူဝ်းၼၼ်ႉလႄႈယဵပ်ႇယမ်ႈၵူၼ်းတင်းလၢႆမိူၼ်ၸိူဝ်ႉၼင်ႇယဵပ်ႇယမ်ႈမုၼ်ႈလိၼ်ၵႃႈၼိူဝ်ၶူၼ်တၢင်းၼၼ်ႉဢေႃႈ။
“ၵူၺ်းၵႃႈ၊ၶုၼ်ႁေႃၶမ်းမဵဝ်း ဢႃႇသီးရီးယႃး၊ ၼၼ်ႉသမ်ႉမီးတၢင်းၵျၢမ်ႇတၢင်းပွင်တၢင်ႇၸိူဝ်ႉတၢင်ႇမဵဝ်းၵႃႈၼႂ်းၸႂ်မၼ်းဝႆႉဢေႃႈ။ မၼ်းတႅပ်းတတ်းၸႂ်ႁႂ်ႈလႆႈယႃႉၽဵဝ်ႈပႅတ်ႈၵူၼ်းၼမ်ၼႃႇၼၼ်ႉဢေႃႈ။-
မၼ်းယင်းဢုပ်ႇဝၢဝ်းလႄႈဝႃႈ၊ ‘မူးမၢတ်ႈၽွင်းမိူင်းၵဝ်ၸိူဝ်းၼႆႉပဵၼ်ၶုၼ်ႁေႃၶမ်းၵူႈၵေႃႉဢေႃႈ။-
ၵဝ်တိုၵ်းပႄႉဢဝ်ဝဵင်း ၵႃႇလၼေႃး၊ ဝဵင်း ၶႃႇသေႇမိတ်ႉ၊ ဝဵင်း ႁႃႇမတ်ႉ၊ ဢိၵ်ႇတင်းဝဵင်း ဢႃႇပတ်ႉ၊ ယဝ်ႉ။ ဝဵင်း သမႃႇရိ၊ ဢိၵ်ႇတင်းဝဵင်း တမ်ႇမတ်ႉသၵတ်ႉ၊ ၵေႃႈၵဝ်တိုၵ်းပႄႉယဝ်ႉ။-
ၵဝ်ယဵတ်ႇယိုၼ်းမိုဝ်းၵဝ်လႄႈပၼ်တၢမ်ႇတီႈသိုင်ႇၸိုင်ႈဝၢၼ်ႈမိူင်းၸိူဝ်းဢၼ်ဝႆႈႁုၼ်ႇႁၢင်ႈသၢင်းထု၊ႁုၼ်ႇႁၢင်ႈသၢင်းထုၸိူဝ်းဢၼ်ယဵင်ႈၶႅၼ်းမီးၼမ်သေၸိူဝ်းဢၼ်မီးၼႂ်းဝဵင်း ယေႇရုသလႅမ်ႇ၊ ဢိၵ်ႇတင်းဝဵင်း သမႃႇရိ၊ ၼၼ်ႉယဝ်ႉ။-
ၵဝ်ယႃႉၽဵဝ်ႈပႅတ်ႈဝဵင်း သမႃႇရိ၊ ဢိၵ်ႇတင်းႁုၼ်ႇႁၢင်ႈသၢင်းထုမၼ်းၵႃႈမီးၸိူဝ်းၼၼ်ႉယဝ်ႉလႄႈ၊သမ်ႉတၵ်းတေယႃႉၽဵဝ်ႈပႅတ်ႈဝဵင်း ယေႇရုသလႅမ်ႇ၊ ဢိၵ်ႇတင်းႁုၼ်ႇႁၢင်ႈသၢင်းထုၸိူဝ်းဢၼ်ၶဝ်ဝႆႈၼၼ်ႉဢေႃႈ၊’” ဝႃႈၼင်ႇၼႆဢေႃႈ။
ၵူၺ်းၵႃႈ၊ ထႃႇဝရႃႉၽြႃး၊ မီးဢမိင်ႉၸမ်ႉ၊ “မိူဝ်ႈဢၼ်ၵဝ်ထၢမ်းႁဵတ်းၵႃႈဢၼ်ၵဝ်ထုၵ်ႇလီႁဵတ်း၊ၵႃႈၼိူဝ်လွႆ ၸိဢုၼ်ႇ၊ တင်းၵႃႈၼႂ်းဝဵင်း ယေႇရုသလႅမ်ႇ၊ ယဝ်ႉတူဝ်ႈလီငၢမ်းယဝ်ႉၼၼ်ႉၸိုင်၊ၵဝ်တၵ်းပၼ်တၢမ်ႇတီႈၶုၼ်ႁေႃၶမ်းမိူင်း ဢႃႇသီးရီးယႃး၊ ၵွပ်ႈပိူဝ်ႈဢၼ်မၼ်းလၢတ်ႈၵႂၢမ်းဢုပ်ႇဝၢဝ်းလႄႈႁူဝ်ၸႂ်မၼ်းၽႅၼ်သုင်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းမိူင်း ဢႃႇသီးရီးယႃး၊ ယင်းလၢတ်ႈၵႂၢမ်းဢုပ်ႇဝၢဝ်းလႄႈဝႃႈ၊ “ၵဝ်ႁဵတ်းၸိူဝ်ႉၼင်ႇၼႆလႆႈၵွပ်ႈပိူဝ်ႈတၢင်းၵတ်ႉတၢင်းၶၼ်တူဝ်ၸဝ်ႈၵဝ်ႇဢေႃႈ။ ၵဝ်ၼႆႉမီးႁႅင်းတၼ်းၶူဝ်း၊မီးၺၢၼ်ႇလႄႈလၵ်းလႅမ်ဢေႃႈ။ ၵဝ်ပတ်းၽဵဝ်ႈပႅတ်ႈလႅၼ်လိၼ်ဢၼ်ၶၼ်ႈၶႅၼ်ႈတီႈယူႇမဵဝ်းၵူၼ်းတင်းလၢႆပႅတ်ႈယဝ်ႉလႄႈႁိမ်ဢဝ်ၽၼ်ႇတႃႇဢုၵ်ႉၸႃႇၸိူဝ်းဢၼ်ၶဝ်သိမ်းဝႆႉၼႂ်းယွင်ၼႂ်းယေးၶဝ်ၼၼ်ႉယဝ်ႉ။ ၵဝ်ၼႆႉပဵၼ်ၸိူဝ်ႉၼင်ႇဝူဝ်းငၢၼ်ဢၼ်ယဵပ်ႇယမ်ႈၵူၼ်းၸိူဝ်းဢၼ်ယူႇသဝ်းၵႃႈတီႈၼၼ်ႈဢေႃႈ။-
မဵဝ်းၵူၼ်းလေႃးၵီႇတင်းလၢႆပဵၼ်ၸိူဝ်ႉၼင်ႇႁၢင်ႈၼူၵ်ႉလႄႈၵဝ်ၵဵပ်းၸုၵဵပ်းသိမ်းဢဝ်ဢုၵ်ႉၸႃႇၶူဝ်းၶွင်ၶဝ်ငၢႆႈၼႃႇမိူၼ်ၸိူဝ်ႉၼင်ႇဢၼ်ၵဵပ်းၸုၵဵပ်းသိမ်းဢဝ်ၶႆႇၼူၵ်ႉတင်းလၢႆၼၼ်ႉယဝ်ႉ။ ၽူႈလႂ်ဢမ်ႇၵီႈပိၵ်ႇမႃးလွၵ်ႇငိုတ်ႈၵဝ်။ ၽူႈလႂ်ၵေႃႈဢမ်ႇဢႃႈသူပ်းႁွင်ႉသႅၼ်ႇတေႃႇၵဝ်လႃးလႃး၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ ထႃႇဝရႃႉၽြႃး၊ မီးဢမိင်ႉၸမ်ႉ၊ “တႃမၢတ်ႇတၵ်းၸၢင်ႈလၢတ်ႈဝႃႈ၊မၼ်းယဵင်ႈၶႅၼ်းယႂ်ႇမျၢတ်ႈသေၵေႃႉဢၼ်ဢဝ်မၼ်းၸႂ်ႉသွႆၼၼ်ႉလႆႈႁိုဝ်း။ လဵၵ်းလိူဝ်ႈတၵ်းယဵင်ႈၶႅၼ်းပဵၼ်ဢၼ်လီဢၼ်ၶိုၵ်ႉသေၵေႃႉဢၼ်ယိပ်းၵမ်ႁႂ်ႈမၼ်းလိူဝ်ႈၼၼ်ႉႁိုဝ်ႈ။ ၶွၼ်ႉတဝ်ႉဢမ်ႇၸၢင်ႈယိပ်းၵမ်ဢဝ်ၵူၼ်း။ ၵူၼ်းၸၢင်ႈယိပ်းၵမ်ဢဝ်ၶွၼ်ႉတဝ်ႉၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၸဝ်ႈဢၼၼ်ႇတႃႉတၼ်းၶူဝ်းၼၼ်ႉတၵ်းဢဝ်တၢင်းၶႆႈတၢင်းပဵၼ်ပွႆႇသႂ်ႇၵႃႈတီႈၶဝ်ၸိူဝ်းဢၼ်ပီးလီမၼ်းလီတေႃႈလဵဝ်ၼႆႉသေယဝ်ႉ၊ၵႃႈၼႂ်းတူဝ်ၶိင်းၶဝ်တၵ်းပဵၼ်ၽႆးဢၼ်မႆႈၶႅမ်ႈမူတ်းၵႂႃႇလွႆးလွႆးဢေႃႈ။-
ၽြႃးပဵၼ်ၸဝ်ႈဢၼ်ပဵၼ်ဢၼ်လႅင်းၵူၼ်းမဵဝ်း ဢိသရေး၊ ၼၼ်ႉတၵ်းပဵၼ်ၸိူဝ်ႉၼင်ႇၽႆးဢေႃႈ။ ၽြႃးပဵၼ်ၸဝ်ႈဢၼ်မူတ်းၸၢင်ႇလႄႈပဵၼ်ၽြႃးၵူၼ်းမဵဝ်း ဢိသရေး၊ ၶဝ်ၼၼ်ႉတၵ်းပဵၼ်ၸိူဝ်ႉၼင်ႇပိဝ်ၽႆးဢၼ်တၵ်းမႆႈၶႅမ်ႈပႅတ်ႈၶိူင်ႈပိူင်ၵႃႈမီးတင်းသဵင်ႈတင်းလူင်ပႃးတင်းယုမ်းၼၢမ်လႂ်၊ယုမ်းယိူဝ်ႈယႃႈလႂ်ၼႂ်းဝၼ်းလဵဝ်ၼၼ်ႉဢေႃႈ။-
ပႃႇမႆႉၸိင်တင်းလၢႆ၊ဢိၵ်ႇတင်းႁႆႈၼႃးတင်းလၢႆ တၵ်းလႆႈႁွတ်ႈထိုင်တၢင်းဢၼ်လုလႅဝ်မိူၼ်ၸိူဝ်ႉၼင်ႇတၢင်းၶႆႈတၢင်းပဵၼ်တူၵ်းႁွတ်ႈၵႃႈၼိူဝ်ၵူၼ်းလႄႈႁဵတ်းႁႂ်ႈလုလႅဝ်ၼၼ်ႉဢေႃႈ။-
ပႃႇမႆႉၸိင်ဢၼ်ၵိုတ်းၵျၢၼ်ႇၼၼ်ႉတၵ်းမီးၵေႇၼႃႇတေႃႇထိုင်ႁွတ်ႈလုၵ်ႈဢွၼ်ႇလႂ်ၼပ်ႉဢၢၼ်ႇလႆႈဢေႃႈ။
ၶိင်ႇၵႃႇလႃႉဢၼ်ၵူၼ်းမဵဝ်း ဢိသရေး၊ ၸိူဝ်းဢၼ်ဢသၢၵ်ႈလိပ်းၵိုတ်းၵျၢၼ်ႇယူႇတၵ်းဢမ်ႇဢိင်ဢမ်ႇပိုင်ႈၵူၼ်းမဵဝ်းဢၼ်ၼိၵ်ႈၸၢၵ်ႈငႅၼ်းသႄးၶဝ်ၼၼ်ႉတၵ်းႁွတ်ႈမႃးဢေႃႈ။ ၶဝ်ၸိူဝ်းၼၼ်ႉတၵ်းဢိင်ပိုင်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈဢၼ်မူတ်းၸၢင်ႇလႄႈပဵၼ်ၽြႃးၵူၼ်းမဵဝ်း ဢိသရေး၊ ၼၼ်ႉဢမၢၼ်ႇၶၼ်ပဵၼ်ဢေႃႈ။-
ၵူၼ်းမဵဝ်း ဢိသရေး၊ ဢိတ်းဢီႈၼိုင်ႈတၵ်းၶိုၼ်းပွၵ်ႈမႃးတီႈၽြႃးပဵၼ်ၸဝ်ႈဢၼ်တၼ်းၶူဝ်းယႂ်ႇၼႃႇၼၼ်ႉဢေႃႈ။-
ပိၵ်ႉသမ်ႉယၢမ်းမိူဝ်ႈလဵဝ်ၼႆႉၵူၼ်းမဵဝ်း ဢိသရေး၊ ၶဝ်ၵိုၼ်းထၼ်ႇမဵတ်ႉႁိၼ်မဵတ်ႉသၢႆးၼမ်ႉသမ်ႇမုၵ်ႈတြႃႇသေၵေႃႈတၵ်းမီးၵူၼ်းဢိတ်းဢီႈၼိုင်ႈၵူၺ်းၶိုၼ်းပွၵ်ႈမႃးဢေႃႈ။ တၢင်းဢၼ်လုလႅဝ်ၼၼ်ႉမီးဝႆႉပုၼ်ႈၵူၼ်းတင်းလၢႆ ၸွမ်းလူၺ်ႈၶဝ်ထိူၵ်ႈၶၢမ်ႇဢဝ်ထူၼ်ႈထူၼ်ႈတဵမ်တဵမ်ၼၼ်ႉယဝ်ႉ။-
ၼင်ႇၼၼ်လႄႈၸဝ်ႈပူဝ်ႇပႃႇၵၢင်ႁၢဝ်၊ ၸဝ်ႈထႃႇဝရႃႉၽြႃး၊ တၵ်းယႃႉၽဵဝ်ႈပႅတ်ႈတင်းမူတ်းတင်းဝၢၼ်ႈတင်းမိူင်းၸွမ်းၼင်ႇဢၼ်မၼ်းၸဝ်ႈမီးဢမိင်ႉဝႃႈတၵ်းႁဵတ်းၸိူဝ်ႉၼင်ႇၼၼ်ၼၼ်ႉဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ ၸဝ်ႈထႃႇဝရႃႉၽြႃး၊ မီးဢမိင်ႉတီႈၵူၼ်းမၼ်းၸဝ်ႈၸိူဝ်းဢၼ်ယူႇၵႃႈၼႂ်းဝဵင်း ၸိဢုၼ်ႇ၊ ၼၼ်ႉလႄႈဝႃႈၸမ်ႉ၊ “ပိၵ်ႉသမ်ႉၵူၼ်းမဵဝ်း ဢႃႇသီးရီးယႃး၊ ၶဝ်တဵၵ်းငႅၼ်းသူမိူၼ်ၸိူဝ်ႉၼင်ႇၵူၼ်းမဵဝ်း ဢေးၵျိပ်ႉ၊ ၶဝ်ယၢမ်ႈႁဵတ်းတီႈသူၼၼ်ႉသေၵေႃႈယႃႇပေၵူဝ်ပေႁႄၶဝ်။-
ဢမ်ႇႁိုင်ဢမ်ႇၼၢၼ်းၵဝ်တၵ်းပၼ်တၢမ်ႇတီႈသူႁႂ်ႈယဝ်ႉတူဝ်ႈလီငၢမ်းယဝ်ႉ။ လိုၼ်းၼၼ်ႉၵဝ်တၵ်းယႃႉၶဝ်ပႅတ်ႈဢေႃႈ။-
ၵဝ်၊ ထႃႇဝရႃႉၽြႃး၊ ၸဝ်ႈဢၼၼ်ႇတႃႉတၼ်းၶူဝ်းတၵ်းဢဝ်ၶွၼ်ႉဝၢႆပေႃႉယႅၼ်ႉၶဝ်မိူၼ်ၸိူဝ်ႉၼင်ႇဢၼ်ပေႃႉယႅၼ်ႉၵူၼ်းမိူင်း မိတျၼ်ႇ၊ ၵႃႈတီႈႁိမ်းမၢၵ်ႇႁိၼ်မၢၵ်ႇၽႃ ဢေႃးရၽႃႉ၊ ၼၼ်ႉသေယဝ်ႉ၊ၵဝ်တၵ်းပၼ်တၢမ်ႇတီႈၵူၼ်းမိူင်း ဢႃႇသီးရီးယႃး၊ မိူၼ်ၸိူဝ်ႉၼင်ႇဢၼ်ၵဝ်ပၼ်တၢမ်ႇတီႈၵူၼ်းမိူင်း ဢေးၵျိပ်ႉ၊ ၼၼ်ႉဢေႃႈ။-
ၼႂ်းမိုဝ်ႉဝၼ်းၶိင်ႇၵႃႇလႃႉၼၼ်ႉၵဝ်တၵ်းပွႆႇႁႂ်ႈသူလွတ်ႈသေၵႃႈတီႈဢႃႇၼႃႇၵူၼ်းမိူင်း ဢႃႇသီးရီးယႃး၊ လႄႈၵၢၼ်းႁၢပ်ႇၶဝ်ၼၼ်ႉတၵ်းဢမ်ႇပဵၼ်ၵၢၼ်းႁၢပ်ႇဢၼ်ၼၵ်းၵႃႈတီႈႁူဝ်မႃႇသူထႅင်ႈလႃးလႃး၊” ဝႃႈၼင်ႇၼႆဢေႃႈ။
တပ်ႉသိုၵ်းရၢၼ်ႇသူႇမၼ်းတိုၵ်းသိမ်းဝဵင်း ဢႃႇဢိ၊ ယဝ်ႉ။ ၶဝ်ၶၢမ်ႈပူၼ်ႉဝဵင်း မိၵရုၼ်ႇ၊ မႃးယဝ်ႉ။ ၶဝ်ဢဝ်ၶူဝ်းလဵင်းၶဝ်ၶျႃးဝႆႉၵႃႈတီႈဝဵင်း မိၵ်ႉမတ်ႉ၊ ယဝ်ႉ။-
ၶဝ်ၸွမ်းတၢင်းၵႄးလွႆပူၼ်ႉမႃးယဝ်ႉလႄႈၶျႃးပၢင်တပ်ႉၶဝ်ဝႆႉၵႃႈတီႈဝဵင်း ၵေးပႃႉ၊ ၶိုၼ်းၼိုင်ႈယဝ်ႉ။ ၵူၼ်းဝဵင်း ရႃႇမႃႉ၊ ၸိူဝ်းၼၼ်ႉမီးတၢင်းဢၼ်သၼ်ႇသၢႆၵူဝ်ႁႄယူႇဢေႃႈ။ ၵူၼ်းဝဵင်း ၵိပိယႃႉ၊ ဝဵင်းဢၼ်ၶုၼ်ႁေႃၶမ်း သေႃးလု၊ ယူႇၼၼ်ႉဢွၵ်ႇပၢႆႈဢွၵ်ႇၼီယဝ်ႉ။-
ၵူၼ်းဝဵင်း ၵႃႇလိမ်း၊ ႟။ ႁွင်ႉသႅၼ်ႇတႃႉ။ ၵူၼ်းဝဵင်း လေႇသႃႉ၊ ႟။ ထွမ်ႇတႃႉ။ ၵူၼ်းဝဵင်း ဢႃႇၼသုတ်ႉ၊ ႟။ ၶိုၼ်းတွပ်ႇလၢတ်ႈတႃႉ။-
ၵူၼ်းဝဵင်း မႃႇတမေႇၼႃႉ၊ ဢိၵ်ႇတင်းၵူၼ်းဝဵင်း ၵေႇပိမ်း၊ ဢွၼ်ၵၼ်ပၢႆႈႁႂ်ႈလွတ်ႈတၢင်းတၢႆယဝ်ႉ။-
ၼႂ်းဝၼ်းမိူဝ်ႈၼႆႉရၢၼ်ႇသူႇတင်းလၢႆမီးယူႇၵႃႈၼႂ်းဝဵင်း ၼေႃႇပႃႉ၊ သေလႄႈဢွၼ်ၵၼ်ဢဝ်တႃမိုဝ်းၶဝ်ငႃၸူးယဵင်းၸူးတီႈလွႆ ၸိဢုၼ်ႇ၊ ဢိၵ်ႇတင်းဝဵင်း ယေႇရုသလႅမ်ႇ၊ ယူႇဢေႃႈ။
ထႃႇဝရႃႉၽြႃး၊ ၸဝ်ႈဢၼၼ်ႇတႃႉတၼ်းၶူဝ်းၼၼ်ႉတၵ်းႁႂ်ႈရၢၼ်ႇသူႇၸိူဝ်းၼၼ်ႉလေႃႇလူင်းတူၵ်းမႃးမိူၼ်ၸိူဝ်ႉၼင်ႇတႅပ်းၽၼ်းၵိင်ႇမႆႉၶႃႈမႆႉဢၼ်ယႂ်ႇၼႃႇၼၼ်ႉဢေႃႈ။ ၵေႃႉဢၼ်မူင်ႈငသေပိူၼ်ႈ၊ၵေႃႉဢၼ်သုင်မျၢတ်ႈသေပိူၼ်ႈၵႃႈၼႂ်းၶဝ်ၼၼ်ႉတၵ်းလႆႈၶၢမ်ႇတၢင်းဢၼ်တႅပ်းလူင်းလႄႈၶျႃးတူၵ်းတီႈတႅမ်ႇဢေႃႈ။-
ထႃႇဝရႃႉၽြႃး၊ တၵ်းဢဝ်တႃမၢတ်ႇပွမ်ႈတူၼ်ႈမႆႉလူင်ၵႃႈၼႂ်းထိူၼ်ႇဢၼ်လီလႄႈတူၼ်ႈမႆႉလွႆ လေႇပၼုၼ်ႇ၊ ၼၼ်ႉ၊တၵ်းလူမ်ႉတူၵ်းပႅတ်ႈဢေႃႈ။
ၸိူဝ်ႉၸဝ်ႈၶိူဝ်းၶုၼ် တႃႇဝိတ်ႈ၊ ၼၼ်ႉမိူၼ်ၸိူဝ်ႉၼင်ႇတူၼ်ႈမႆႉဢၼ်လႆႈၶၢမ်ႇတၢင်းဢၼ်ပွမ်ႈလူမ်ႉၼၼ်ႉလႄႈၶိုၼ်းတႅၵ်ႇၵိင်ႇတႅၵ်ႇယွတ်ႈမႃးၵႃႈတီႈတေႃမၼ်းဢၼ်ဝႃႈၶုၼ်ႁေႃၶမ်းမႂ်ႇတၵ်းပေႃႇမႃးၵႃႈၼႂ်းၸိူဝ်ႉၶိူဝ်း တႃႇဝိတ်ႈ၊ ၼၼ်ႉဢေႃႈ။
ဝိၺိၺ်ႇ ထႃႇဝရႃႉၽြႃး၊ တၵ်းပၼ်ၺၢၼ်ႇပိင်ႇၺႃႇတၢင်းႁုတၢင်းၸႅင်ႈၵႃႈတီႈမၼ်း၊ တၢင်းၵတ်ႉတၢင်းၶၼ်ဢၼ်ဢုပ်ႉပိူင်ႇၵႃႈၼိူဝ်ၵူၼ်းမၼ်းတင်းလၢႆဢေႃႈ။ မၼ်းတၵ်းႁုၸၵ်းဢလူဝ်ႇ ထႃႇဝရႃႉၽြႃး၊ လႄႈၸၢင်ႈမေႃရူဝ်ႇသေႇၵူဝ်ယမ်မၼ်းၸဝ်ႈ။
ၸၢင်ႈမေႃမူၼ်ႈပျေႃႇယူႇၼႂ်းတၢင်းဢၼ်ထွမ်ႇဢဝ်ၵႂၢမ်းၸဝ်ႈဢေႃႈ။ မၼ်းတၵ်းဢမ်ႇၸီႇယၢင်ႇတြႃးၸွမ်းၵႃႈၼင်ႇဢၼ်မၢၵ်ႇတႃမၼ်းႁၼ်၊ ယင်းဢမ်ႇတႅပ်းတတ်းၸွမ်းၵႃႈၼင်ႇဢၼ်ႁူမၼ်းငိၼ်းၼၼ်ႉ။
မၼ်းတၵ်းၸီႇယၢင်ႇတြႃးၵႃႈတီႈၵူၼ်းယၢၵ်ႈၵူၼ်းၽၢၼ်ၽဵင်ႇၽဵင်ႇလႄႈ ႁႄႉၵင်ႈဢၶႂၢင်ႉဢယေးပၼ်ၶဝ်ၸိူဝ်းဢၼ်ဢမ်ႇမီးဢဵၼ်ႁႅင်းၼၼ်ႉဢေႃႈ။ ၵႂၢမ်းဢမိင်ႉဢၼ်ဢွၵ်ႇသူပ်းမၼ်းၼၼ်ႉ ၸၢင်ႈပၼ်တၢမ်ႇတီႈၵူၼ်းတင်းလၢႆလႄႈၵူၼ်းႁၢႆႉၵူၼ်းမိူၵ်ႈတၵ်းတၢႆဢေႃႈ။
မၼ်းတၵ်းဢုပ်ႉပိူင်ႇၶႃႈဝၢၼ်ႈၵူၼ်းမိူင်းမၼ်းတင်းလၢႆ၊ လူၺ်ႈတြႃးတၢင်းဢၼ်သိုဝ်ႈတေႃႇ၊ဢိၵ်ႇတင်းတြႃးသဵတ်ႈၸႃႇဢေႃႈ။
မႃၼႆးတင်းလၢႆ၊ဢိၵ်ႇတင်းသူဝ်းတင်းလၢႆတၵ်းယူႇၸွမ်းၵၼ်ၼိမ်ၼိမ်လီလီလႄႈ သိူဝ်ၸုမ်ႈတင်းပႄႉဢွၼ်ႇတင်းလၢႆတၵ်းၼွၼ်းလူၺ်ႈၵၼ်ၼိမ်ၼိမ်လီလီဢေႃႈ။ ဝူဝ်းဢွၼ်ႇတင်းလၢႆ၊ဢိၵ်ႇတင်းသၢင်ႇသီႈဢွၼ်ႇတင်းလၢႆတၵ်းႁႃၵိၼ်ၸွမ်းၵၼ်လႄႈ လုၵ်ႈဢွၼ်ႇတင်းလၢႆတၵ်းလဵင်ႉထိင်းၶဝ်ဢေႃႈ။
ဝူဝ်းမႄႈတင်းလၢႆတင်းမီတင်းလၢႆတၵ်းၵိၼ် တီႈလဵဝ်ၵၼ်လႄႈလုၵ်ႈၶဝ်တၵ်းၼွၼ်းလူၺ်ႈၵၼ်ၼိမ်ၼိမ်လီလီဢေႃႈ။ သၢင်ႇသီႈတင်းလၢႆတၵ်းၵိၼ်ယိူဝ်ႈယႃႈမိူၼ်ၸိူဝ်ႉၼင်ႇဝူဝ်းဢေႃႈ။
လုၵ်ႈဢွၼ်ႇဢၼ်ၵိၼ်ၼူမ်းတၵ်းလဵၼ်ႈယူႇၵႃႈတီႈႁိမ်းႁူးငူးႁဝ်ႇလႄႈ လုၵ်ႈဢွၼ်ႇဢၼ်ၽၢတ်ႇၼူမ်း တၵ်းဢဝ်မိုဝ်းမၼ်းသႄႇၶဝ်ႈၵႃႈၼႂ်းႁူးငူးႁၢႆႉၵေႃႈတၵ်းဢမ်ႇပဵၼ်ၽေး။
ၵႃႈၼိူဝ်လွႆ ၸိဢုၼ်ႇ၊ လွႆမူတ်းၸၢင်ႇၽြႃးပဵၼ်ၸဝ်ႈၼၼ်ႉ တၵ်းဢမ်ႇမီးၽေးဢၼ်ႇတရေႇဢမ်ႇမီးတၢင်းဢၼ်ႁၢႆႉဢၼ်မိူၵ်ႈလႃးလႃး။ ၵႃႈတီႈၽႅၼ်ႇလိၼ်မိူင်းၼႆႉတၵ်းပျေႉၸုမ်ႇဝႆႉတင်းတၢင်းဢၼ်ႁုၸၵ်းလွင်ႈ ထႃႇဝရႃႉၽြႃး၊ မိူၼ်ၸိူဝ်ႉၼင်ႇဢၼ်ပၢင်ႇလၢႆႇတဵမ်ဝႆႉတင်းၼမ်ႉၼၼ်ႉဢေႃႈ။
ၼႂ်းမိူဝ်ႈၶိင်ႇၵႃႇလႃႉၼၼ်ႉၶုၼ်ႁေႃၶမ်းမႂ်ႇတၵ်းပေႃႇမႃးၵႃႈၼႂ်းၸိူဝ်ႉၸဝ်ႈၶိူဝ်းၶုၼ် တႃႇဝိတ်ႈ၊ လႄႈပဵၼ်လၢၵ်ႈၶၼႃႇတီႈမၢတ်ႈတီႈတွင်းပုၼ်ႈမဵဝ်းၵူၼ်းတင်းလၢႆဢေႃႈ။ ၶဝ်တၵ်းဢွၼ်ၵၼ်ၸုတုမ်ၵၼ်တီႈဝဵင်းလူင်မၼ်းၸဝ်ႈလႄႈယုၵ်ႉယွင်ႈမုၼ်သရေႇမၼ်းဢေႃႈ။-
ၼႂ်းမိုဝ်ႉဝၼ်းၶိင်ႇၵႃႇလႃႉၼၼ်ႉ ထႃႇဝရႃႉၽြႃး၊ သမ်ႉတၵ်းၸႂ်ႉမုၼ်ၽုင်းတၼ်းၶူဝ်းမၼ်းၸဝ်ႈသေလႄႈၶိုၼ်းႁွင်ႉၸုႁွင်ႉသိမ်းဢဝ်ၵူၼ်းမၼ်းၸဝ်ႈၸိူဝ်းဢၼ်ယင်းၵိုတ်းၵျၢၼ်ႇယူႇၵႃႈၼႂ်းမိူင်း ဢႃႇသီးရီးယႃး၊ မိူင်း ဢေးၵျိပ်ႉ၊ မိူင်း ပႃႇသရု၊ မိူင်း ဢေႇတီႇဢူဝ်းပီးယႃး၊ မိူင်း ဢေႇလမ်ႇ၊ မိူင်း ပႃႇပုလုၼ်ႇ၊ ဢိၵ်ႇတင်းမိူင်း ႁႃႇမတ်ႉ၊ ဢိၵ်ႇတင်းမိူင်းဢၼ်မီးၸွမ်းသၢပ်ႇပၢင်ႇလၢႆႇ၊ဢိၵ်ႇတင်းၵူၼ်းဢၼ်မီးၼႂ်းၵုၼ်ပၢင်ႇလၢႆႇၸိူဝ်းၼၼ်ႉမႃးဢေႃႈ။-
ထႃႇဝရႃႉၽြႃး၊ တၵ်းပူၵ်းသဝ်တုင်းႁႂ်ႈပဵၼ်လၢၵ်ႈၶၼႃႇတၢင်းဢၼ်ၼႄပျႃးတီႈၵူၼ်းတင်းလၢႆ လွင်ႈဢၼ်မၼ်းၸဝ်ႈၶိုၼ်းၸုၶိုၼ်းသိမ်းဢဝ်ၵူၼ်းမၼ်းၸဝ်ႈဢၼ်ပဵၼ်၊ၵူၼ်းမဵဝ်း ဢိသရေး၊ တင်းၵူၼ်းမဵဝ်း ယုတႃႉ၊ ၸိူဝ်းဢၼ်ၽၢတ်ႇၽႄၵၼ်ယူႇလႄႈဢဝ်သေၵႃႈတီႈသီႇၸဵင်ႇပႅတ်ႇၼႃႈလိၼ်မိူင်းမႃးထႅင်ႈၼၼ်ႉဢေႃႈ။-
ၵူၼ်းမိူင်း ဢိသရေး၊ တၵ်းဢမ်ႇသီႈၵေႉႁေႈတႃၵူၼ်းမဵဝ်း ယုတႃႉ၊ ယဝ်ႉလႄႈၵူၼ်းမဵဝ်း ယုတႃႉ၊ တၵ်းဢမ်ႇပဵၼ်ရၢၼ်ႇသူႇတီႈၵူၼ်းမဵဝ်း ဢိသရေး၊ ယဝ်ႉ။-
ၶဝ်တၵ်းၽွမ်ႉၵၼ်ဢွၵ်ႇၵႂႃႇတိုၵ်းၵူၼ်း ၽိလိတ်ႉတိ၊ ၽၢႆႇတၢင်းတူၵ်းလႄႈတၵ်းၽွမ်ႉၵၼ်ႁိမ်ႁူင်ႇဢဝ်ၵူၼ်းၸိူဝ်းဢၼ်ယူႇၽၢႆႇတၢင်းဝၼ်းဢွၵ်ႇဢေႃႈ။ ၶဝ်တၵ်းဢွၼ်ၵၼ်ပႄႉၼႅင်ႇၵူၼ်းမဵဝ်း ဢေႇတုမ်ႇ၊ တင်းမဵဝ်း မေႃႇၽႃႉ၊ လႄႈၵူၼ်းမဵဝ်း ဢမ်ႇမုၼ်ႇ၊ တၵ်းၶၢမ်ႇႁဵတ်းၶႃႈဝၢၼ်ႈၵူၼ်းမိူင်းၶဝ်ဢေႃႈ။-
ထႃႇဝရႃႉၽြႃး၊ တၵ်းႁႂ်ႈၼမ်ႉၵႃႈၼႂ်း ငွၵ်းလူင်သူးဢႅတ်ႈ၊ ႁႅင်ႈၵႂႃႇလႄႈမၼ်းၸဝ်ႈတၵ်းႁႂ်ႈလူမ်းမႆႈႁုပ်ႇမႄႈၼမ်ႉလူင် ဢုၽရတ်ႉ၊ ႁႂ်ႈၽႄပဵၼ်ၼမ်ႉႁွင်ႈၼမ်ႉၵႄးၸဵတ်းႁွင်ႈ၊ပုၼ်ႈလွင်ႈၼင်ႇႁိုဝ်ၽူႈလႂ်ၵေႃႈၶၢမ်ႈမႃးလႆႈၼၼ်ႉဢေႃႈ။-
တၵ်းမီးသဵၼ်ႈတၢင်းလူင်ပုၼ်ႈၵူၼ်းမၼ်းၸဝ်ႈၵူၼ်းမဵဝ်း ဢိသရေး၊ ၶဝ်ဢၼ်ယင်းဢသၢၵ်ႈလိပ်းၵိုတ်းၵျၢၼ်ႇယူႇၼၼ်ႉပႆဢွၵ်ႇမိူင်း ဢႃႇသီးရီးယႃး၊ မႃးမိူၼ်ၸိူဝ်ႉၼင်ႇမိုဝ်ႉဝၼ်းပူႇၶဝ်မွၼ်ႇၶဝ်ဢွၵ်ႇမိူင်း ဢေးၵျိပ်ႉ၊ မႃးၼၼ်ႉဢေႃႈ။
ၼႂ်းမိုဝ်ႉဝၼ်းၶိင်ႇၵႃႇလႃႉၼၼ်ႉၵူၼ်းတင်းလၢႆတၵ်းႁဵတ်းၵႂၢမ်းလႄႈဝႃႈၸမ်ႉ၊ “ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈႁဝ်းယွင်ႈယေႃးၸဝ်ႈႁဝ်းတီႈၶႃႈဢေႃႈ။ ပိၵ်ႉသမ်ႉၸဝ်ႈႁဝ်းၸႂ်မႆႈၶႂ်ႈၸႃႉတေႃႇၶႃႈၸဝ်ႈႁဝ်းသေၵေႃႈ၊ တေႃႈလဵဝ်ၼႆႉထၢတ်ႇယဵၼ်ယဝ်ႉလႄႈႁႂ်ႈၶႃႈၸဝ်ႈပျေႇၸႂ်ၼိမ်ၸႂ်ဢေႃႈ။
ၽြႃးပဵၼ်ၸဝ်ႈ၊ပဵၼ်ၸဝ်ႈဢၼ်ၵႄႇၶျွတ်ႈဢဝ်ၶႃႈၸဝ်ႈလႄႈ ၶႃႈၸဝ်ႈယုမ်ႇယမ်ဢိင်ပိုင်ႈၸဝ်ႈႁဝ်းလႄႈဢမ်ႇလႆႈၵူဝ်လႆႈႁႄ၊ ထႃႇဝရႃႉၽြႃး၊ ပၼ်ႁႅင်းတၼ်းၶူဝ်းတီႈၶႃႈၸဝ်ႈလႄႈ မၼ်းၸဝ်ႈပဵၼ်ၸဝ်ႈဢၼ်ၵႄႇၶျွတ်ႈဢဝ်ၶႃႈၸဝ်ႈဢေႃႈ။
ၸိူဝ်ႉၼင်ႇဢၼ်ၼမ်ႉသႂ်ၼမ်ႉလီႁဵတ်းႁႂ်ႈၵေႃႉဢၼ်ယၢၵ်ႇၼမ်ႉလႆႈၸူမ်းသိူဝ်းၼၼ်ႉ၊ ၵူၼ်းၽြႃးပဵၼ်ၸဝ်ႈလႆႈၸူမ်းသိူဝ်း ၵွပ်ႈပိူဝ်ႈဢၼ်မၼ်းၸဝ်ႈၵႄႇၶျွတ်ႈဢဝ်ၶဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၼႂ်းဝၼ်းၼၼ်ႉတၵ်းဢွၼ်ၵၼ်ႁဵတ်းၵႂၢမ်းလႄႈဝႃႈၸမ်ႉ၊ “ဢွၼ်ၵၼ်ယွင်ႈယေႃးၵျေးၸူး ထႃႇဝရႃႉၽြႃး၊ တႃႉ။ ႁွင်ႉပၢဝ်ႇႁွင်ႉလၢတ်ႈတီႈမၼ်းၸဝ်ႈႁႂ်ႈလႆႈတၢင်းဢၼ်ၸွႆႈဢၼ်ထႅမ်တႃႉ။ မွၵ်ႇလၢတ်ႈတီႈမဵဝ်းၵူၼ်းၵႃႈမီးလွင်ႈဢၼ်မၼ်းၸဝ်ႈႁဵတ်းမႃးၼၼ်ႉတႃႉ။ ဢွၼ်ၵၼ်ႁေႃးလၢတ်ႈလွင်ႈၼႃႇမႃႉၸိုဝ်ႈသဵင်မၼ်းၸဝ်ႈဢၼ်ယႂ်ႇၼႃႇၼၼ်ႉတႃႉ။
ႁဵတ်းၵႂၢမ်းတီႈမၼ်းၸဝ်ႈၵွပ်ႈပိူဝ်ႈမၼ်းၸဝ်ႈႁဵတ်းဢၼ်ယႂ်ႇဢၼ်မျၢတ်ႈၼၼ်ႉတႃႉ။ ႁႂ်ႈၵူၼ်းလေႃးၵီႇတင်းလၢႆလႆႈငိၼ်းၶၢဝ်ႇၼၼ်ႉတႃႉ။
ႁႂ်ႈၵူၼ်းဢၼ်မီးၼႂ်းဝဵင်း ၸိဢုၼ်ႇ၊ ႁွင်ႉသႅၼ်ႇႁဵတ်းၵႂၢမ်းၵူႈၵေႃႉတႃႉ။ ၽြႃးၵူၼ်းမဵဝ်း ဢိသရေး၊ ဢၼ်မူတ်းၸၢင်ႇၼၼ်ႉယႂ်ႇမျၢတ်ႈၼႃႇလႄႈ မၼ်းၸဝ်ႈၵိင်းဝၢပ်ႈယူႇၼႂ်းၵႄႈၵၢင်ၵူၼ်းမၼ်းၸဝ်ႈဢေႃႈ၊” ဝႃႈၼင်ႇၼႆဢေႃႈ။
ဢၼ်ၼႆႉပဵၼ်ပျႃႇတိၵ်ႈဢၼ်ဝႃႈလူၺ်ႈလွင်ႈမိူင်း ပႃႇပုလုၼ်ႇ၊ ဢၼ် ဢိသႃႇယႃႉ၊ ၵေႃႉပဵၼ်လုၵ်ႈၸၢႆး ဢႃႇမူတ်ႉ၊ ၼၼ်ႉလႆႈႁပ်ႉဢဝ်သေၵႃႈတီႈၽြႃးပဵၼ်ၸဝ်ႈၸမ်ႉ။
“ၵႃႈၼိူဝ်ပၢႆၸိၵ်းလွႆဢၼ်ၵဵင်ႈလီပၢင်ႇလီၼၼ်ႉပူၵ်းသဝ်တုင်းဢၼ်တိုၵ်းသိုၵ်းၼၼ်ႉဝႆႉဢေႃႈ။ ႁွင်ႉပၢဝ်ႇႁွင်ႉသေႃႇၵူၼ်းသိုၵ်းတင်းလၢႆ၊ယူၵ်ႉမိုဝ်းလႄႈၼႄလၢၵ်ႈၶၼႃႇဢၼ်ႁႂ်ႈၶဝ်ၶဝ်ႈၵႃႈၼႂ်းၽၵ်းတူတီႈယူႇၶုၼ်တင်းလၢႆၼၼ်ႉတႃႉ။-
ထႃႇဝရႃႉၽြႃး၊ လႆႈသင်ႇလၢတ်ႈဝႆႉတီႈၵူၼ်းသိုၵ်းမၼ်းၸဝ်ႈၸိူဝ်းဢၼ်ၸႂ်ယႂ်ႇလႄႈယုမ်ႇတူဝ်ၸဝ်ႈၵဝ်ႇၼၼ်ႉႁႂ်ႈတိုၵ်းသိုၵ်းဢၼ်မူတ်းၸၢင်ႇသေယဝ်ႉ၊ပၼ်တၢမ်ႇတီႈၵေႃႉဢၼ်မၼ်းၸဝ်ႈၸႂ်မႆႈၶႂ်ႈၸႃႉၼၼ်ႉဢေႃႈ။
“ဢွၼ်ၵၼ်ထွမ်ႇသဵင်ဢၼ်ဢူၼ်မေႃးယူႇၵႃႈၼိူဝ်လွႆတင်းလၢႆၼၼ်ႉလူး။ သဵင်ၵူၼ်းဢၼ်ၼမ်ဢၼ်ၵိုၼ်းဢၼ်ပဵၼ်မုၵ်ႉပဵၼ်ၸိူဝ်းယူႇ၊သဵင်မဵဝ်းၵူၼ်းတင်းလၢႆ၊တင်းသဵင်ၵူၼ်းဝၢၼ်ႈၵူၼ်းမိူင်းၼမ်ၼႃႇၸုတုမ်ၵၼ်ယူႇၼၼ်ႉတႃႉ။ ထႃႇဝရႃႉၽြႃး၊ ႁၢင်ႈပွင်တပ်ႉသိုၵ်းမၼ်းၸဝ်ႈႁႂ်ႈလႆႈတိုၵ်းသိုၵ်းဢေႃႈ။-
ၶဝ်ၸိူဝ်းၼႆႉလုၵ်ႉသေၵႃႈတီႈမိူင်းဢၼ်ၵႆၼႃႇ၊တီႈသုတ်းလႅၼ်လိၼ်လေႃးၵႃႉၼၼ်ႉလႄႈႁွတ်ႈမႃးဢေႃႈ။ ထႃႇဝရႃႉၽြႃး၊ ၵေႃႈဢဝ်တင်းတေႃးသႃႉတၢင်းၸႂ်မႆႈၶႂ်ႈၸႃႉမၼ်းၸဝ်ႈလႄႈမႃးႁႂ်ႈလႆႈယႃႉၽဵဝ်ႈပႅတ်ႈတင်းမိူင်းဢေႃႈ။
“ဢွၼ်ၵၼ်မီးတၢင်းဢၼ်ၸဵပ်းၸႂ်လႄႈၶၢင်းယူႇတႃႉ။ မိုဝ်ႉဝၼ်းၶိင်ႇၵႃႇလႃႉ ထႃႇဝရႃႉၽြႃး၊ ဝၼ်းဢၼ်ၸဝ်ႈဢၼၼ်ႇတႃႉတၼ်းၶူဝ်းၸီႇယၢင်ႇ ႁႂ်ႈလုလႅဝ်ၼၼ်ႉၸမ်တၵ်းႁွတ်ႈမႃးယဝ်ႉ။-
မိုဝ်းၵူႈၵေႃႉၵူႈၵူၼ်းတၵ်းဢူၼ်ႈဢွၼ်ႇလႄႈတၢင်းဢၼ်ၶဝ်မီးၸႂ်ဢၼ်ႁတ်းႁၢၼ်ၼၼ်ႉတၵ်းႁၢႆလၢႆဢေႃႈ။-
ဝူၺ်ႇတၼႃႇဢၼ်ၸဵပ်းဢၼ်ၶိုၼ်ႈၼၼ်ႉတၵ်းႁူမ်ႇသုမ်ႇၶဝ်လႄႈဢွၼ်ၵၼ်ၵူဝ်ႁႄထၢၼ်ႈပေႃးမိူၼ်ၸိူဝ်ႉၼင်ႇဝူၺ်ႇတၼႃႇဢၼ်မႄႈယိင်းတၵ်းၵိူတ်ႇလဵင်ႉလုၵ်ႈၼၼ်ႉဢေႃႈ။ ၼႃႈၶဝ်တၵ်းငိူဝ်ႈငဝ်ယူႇလႄႈၵေႃႉၼိုင်ႈလႄႈၵေႃႉၼိုင်ႈလူတူၺ်းၵၼ်ယူႇ၊ဢိၵ်ႇတင်းၶဝ်တၵ်းၼႃႈလႅင်လူၺ်ႈတၢင်းဢၼ်ဢၢႆပိူၼ်ႈဢေႃႈ။-
ၼႂ်းမိုဝ်ႉဝၼ်းဢၼ် ထႃႇဝရႃႉၽြႃး၊ ဢွၵ်ႇတေႃးသႃႉတၢင်းဢၼ်ၸႂ်မႆႈၶႂ်ႈၸႃႉ ႁၢဝ်ႈၵျၢမ်းၼႃႇလူင်လၢင်ႁွတ်ႈမႃးၼၼ်ႉၸိုင်၊မၼ်းၸဝ်ႈတၵ်းႁႂ်ႈမိူင်းလေႃးၵႃႉပဵၼ်ထိူၼ်ႇႁႅင်ႈလႄႈႁႂ်ႈၵူၼ်းဢၼ်မီးဢပျတ်ႈတၢႆပႅတ်ႈၵူႈၵေႃႉၵူႈၵူၼ်းဢေႃႈ။-
လၢဝ်ၼၵ်ႈၶၢတ်ႈၵႃႈၼိူဝ်ၵၢင်ႁၢဝ်တၵ်းဢမ်ႇႁိူဝ်ႈလႅင်းသေလုၵ်ႈလႄႈတႃဝၼ်းတၵ်းမိုတ်ႈလမ်ၵႂႃႇ၊လိူၼ်ၵေႃႈတၵ်းဢမ်ႇႁိူဝ်ႈဢမ်ႇလႅင်းယဝ်ႉဢေႃႈ။”
ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ၵဝ်တၵ်းႁႂ်ႈၽေးဢုပၢတ်ႈတူၵ်းႁွတ်ႈၵႃႈၼိူဝ်လိၼ်မိူင်းလႄႈပၼ်တၢမ်ႇတီႈၶဝ်ၸိူဝ်းဢၼ်ဢမ်ႇတြႃးၼၼ်ႉပုၼ်ႈတုၸရိူၵ်ႈၶဝ်ဢေႃႈ။ ၵဝ်တၵ်းဢဝ်ၶျႃးတူၵ်းပႅတ်ႈၵေႃႉဢၼ်ႁူဝ်ၸႂ်ပူၵ်းပႅၼ်ၼၼ်ႉၵူႈၵေႃႉၵူႈၵူၼ်းသေယဝ်ႉ၊ပၼ်တၢမ်ႇတီႈၶဝ်ၸိူဝ်းဢၼ်သႄႉသွမ်း၊ဢိၵ်ႇတင်းၶဝ်ၸိူဝ်းဢၼ်ႁၢဝ်ႈၵျၢမ်းၼၼ်ႉဢေႃႈ။-
ၶဝ်ၸိူဝ်းဢၼ်ဢသၢၵ်ႈလိပ်းၵိုတ်းၵျၢၼ်ႇယူႇၼၼ်ႉတၵ်းထိူၵ်ႈၵႃႈၶၼ်ယႂ်ႇၼႃႇသေၶမ်းဢေႃႈ။-
ၵဝ်တၵ်းႁဵတ်းႁႂ်ႈၽႃႉၵၢင်ႁၢဝ်သၼ်ႇၶွၼ်းလႄႈလိၼ်မိူင်းၵေႃႈတၵ်းသၼ်ႇၶွၼ်းၶၢႆႉတီႈယူႇမၼ်းၵႂႃႇၵႃႈၼႂ်းမိုဝ်ႉဝၼ်းဢၼ်ၵဝ်၊ ထႃႇဝရႃႉၽြႃး၊ ၸဝ်ႈဢၼၼ်ႇတႃႉတၼ်းၶူဝ်းၼႄပျႃးတေႃးသႃႉတၢင်းၸႂ်မႆႈၶႂ်ႈၸႃႉၵဝ်ၼၼ်ႉဢေႃႈ။
“ၵူၼ်းမိူင်းၼွၵ်ႈၸိူဝ်းဢၼ်ယူႇၼႂ်းမိူင်း ပႃႇပုလုၼ်ႇ၊ တၵ်းဢွၼ်ၵၼ်လႅၼ်ပၢႆႈၸူးမိူင်းတူဝ်ၸဝ်ႈၵဝ်ႇမိူၼ်ၸိူဝ်ႉၼင်ႇၵႂၢင်မႄႈဢၼ်ဢွၵ်ႇပၢႆႈၵူၼ်းလႃႈထိူၼ်ႇ လႄႈၽၢတ်ႇၽႄၽူင်ႉၽၢင်းၵႂႃႇ၊ဢိၵ်ႇတင်းမိူၼ်ၸိူဝ်ႉၼင်ႇသူဝ်းတင်းလၢႆဢၼ်ဢမ်ႇမီးၵေႃႉလဵင်ႉၵေႃႉထိင်းၼၼ်ႉဢေႃႈ။-
ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်တိဢဝ်မႅၼ်ႈၼၼ်ႉတၵ်းလႆႈၶၢမ်ႇတၢင်းဢၼ်တႅင်းတၢႆပႅတ်ႈဢေႃႈ။-
လုၵ်ႈဢွၼ်ႇလၢင်းဢွၼ်ႇၶဝ်တၵ်းလႆႈၶၢမ်ႇတၢင်းဢၼ်ပေႃႉၽတ်ႉတၢႆၵႃႈတီႈသိုဝ်ႈၼႃႈတႂ်ႈတႃၶဝ်၊ႁိူၼ်းၶဝ်တၵ်းလႆႈၶၢမ်ႇတၢင်းဢၼ်ႁိမ်ႁူင်ႇဢဝ်လႄႈမေးၶဝ်တၵ်းလႆႈၶၢမ်ႇတၢင်းဢၼ်ပိူၼ်ႈႁဵတ်းဢထမ်ႇမႃႉဢေႃႈ။”
ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ၵဝ်တၵ်းတိုၵ်းယူင်းၵူၼ်း မေႇတိ၊ တိုၵ်းတေႃးၵူၼ်းမိူင်း ပႃႇပုလုၼ်ႇ၊ ဢေႃႈ။ ၵူၼ်းၸိူဝ်းၼၼ်ႉဢမ်ႇၸၢင်ႈဝႆႉဢမုငိုၼ်း၊ဢမ်ႇမီးဢလူဝ်ႇၶႂ်ႈလႆႈၶမ်း။-
ၵဝ်တၵ်းဢဝ်ၵၢင်ႇၶဝ်ပိုၼ်ၶဝ်ယိုဝ်းၵူၼ်းၼုမ်ႇၵူၼ်းၵမ်တင်းလၢႆတၢႆဢေႃႈ။ ၶဝ်တၵ်းဢမ်ႇမီးၸႂ်ၵရုၼႃႇတီႈလုၵ်ႈဢွၼ်ႇလႅင်တင်းလၢႆလႄႈတၵ်းဢမ်ႇဢဵတ်းလူလုၵ်ႈဢွၼ်ႇတင်းလၢႆလႃးလႃး။-
မိူင်း ပႃႇပုလုၼ်ႇ၊ ၸိုင်၊ပဵၼ်သိုင်ႇၸိုင်ႈဝၢၼ်ႈမိူင်းဢၼ်ႁၢင်ႈလီႁၢင်ႈငၢမ်းသေပိူၼ်ႈ၊ပဵၼ်မိူင်းဢၼ်ၵူၼ်းမၼ်းတင်းလၢႆဢဝ်ၵုင်ႇဢဝ်မုၼ်ဢေႃႈ။ ၵူၺ်းၵႃႈ၊ၵဝ်၊ ထႃႇဝရႃႉၽြႃး၊ တၵ်းယႃႉၽဵဝ်ႈမိူင်း ပႃႇပုလုၼ်ႇ၊ ပႅတ်ႈမိူၼ်ၸိူဝ်ႉၼင်ႇဢၼ်ၵဝ်ယႃႉၽဵဝ်ႈဝဵင်း သေႃးတုမ်ႇ၊ တင်းဝဵင်း ၵေႃးမေႃးရႃႉ၊ ပႅတ်ႈၼၼ်ႉဢေႃႈ။-
ၵႃႈတီႈၼၼ်ႈၽူႈလႂ်တၵ်းဢမ်ႇယူႇလႃးလႃး။ ၵူၼ်း ဢႃႇရပ်ႉ၊ ဢၼ်လႄႇၵႂႃႇလႄႇမႃးၸိူဝ်းၼၼ်ႉတၵ်းဢမ်ႇပူၵ်းတင်ႈသုမ်ႉထဵင်ၶဝ်လႄႈယူႇလႃးလႃး။ ၵူၼ်းလဵင်ႉသူဝ်းထိင်းသူဝ်းၵေႃႈတၵ်းဢမ်ႇလဵင်ႉၽုင်သူဝ်းၶဝ်လႃးလႃး။-
မၼ်းတၵ်းပဵၼ်တီႈဢၼ်တူဝ်ထိူၼ်ႇႁၢႆႉတင်းလၢႆယူႇလႄႈၼူၵ်ႉၵဝ်ႉလႂ်တၵ်းႁဵတ်းႁၢင်းဢေႃႈ။ ၼူၵ်ႉၵလႃႇဢုၵ်ႈလႂ်တၵ်းယူႇၵႃႈတီႈၼၼ်ႈလႄႈပႄႉထိူၼ်ႇလႂ်တၵ်းတဵၼ်ႈဝႅၼ်ၸွမ်းတီႈဢၼ်လုဢၼ်လႅဝ်ၼၼ်ႉဢေႃႈ။-
မႃထိူၼ်ႇလႂ်၊ဢိၵ်ႇတင်းမႃၼႆးလႂ်တၵ်းႁဝ်ႇႁွၼ်ၵႃႈတီႈသဝ်လၢင်းၶဝ်တင်းႁေႃၶမ်းၶဝ်ၸိူဝ်းၼၼ်ႉဢေႃႈ။ ၶိင်ႇၵႃႇလႃႉမိူင်း ပႃႇပုလုၼ်ႇ၊ ၸမ်တၵ်းႁွတ်ႈမႃးယဝ်ႉ။ ၸူဝ်ႈတႃႇဢသၢၵ်ႈမၼ်းၸမ်တၵ်းသုတ်းသဵင်ႈယဝ်ႉဢေႃႈ။”
ထႃႇဝရႃႉၽြႃး၊ သမ်ႉတၵ်းမီးၸႂ်ၵရုၼႃႇတီႈၵူၼ်းမၼ်းၸဝ်ႈၵူၼ်းမဵဝ်း ဢိသရေး၊ လႄႈလိူၵ်ႈၵဵပ်းဢဝ်ၶဝ်ႁႂ်ႈပဵၼ်ၵူၼ်းမၼ်းၸဝ်ႈဢေႃႈ။ မၼ်းၸဝ်ႈသမ်ႉတၵ်းႁႂ်ႈၶဝ်ယူႇသဝ်းၵႃႈၼႂ်းမိူင်းဢၼ်ၶဝ်ယူႇၵဝ်ႇၵဝ်ႇသေယဝ်ႉ၊ၵူၼ်းတၢင်ႇၸိူဝ်ႉတၢင်ႇမဵဝ်းတၵ်းဢွၼ်ၵၼ်မႃးယူႇလူၺ်ႈၵၼ်တင်းၶဝ်ဢေႃႈ။-
မဵဝ်းၵူၼ်းၼမ်ၼႃႇတၵ်းဢွၼ်ၵၼ်ၸွႆႈထႅမ်ဢွၼ်သူင်ႇႁႂ်ႈၶဝ်ၶိုၼ်းႁွတ်ႈထိုင်ၵႃႈတီႈဢၼ်ၶဝ်ယူႇၵဝ်ႇၵဝ်ႇၼၼ်ႉလႄႈမိူဝ်ႈၼၼ်ႉမဵဝ်းၵူၼ်းတင်းလၢႆတၵ်းလႆႈၶၢမ်ႇႁဵတ်းၶႃႈၵူၼ်းမဵဝ်း ဢိသရေး၊ ဢေႃႈ။ ၵူၼ်းမိူဝ်ႈၵွၼ်ႇဢၼ်တိဢဝ်ၵူၼ်းမဵဝ်း ဢိသရေး၊ ၶဝ်ၼၼ်ႉမိူဝ်ႈလဵဝ်တၵ်းလႆႈၶၢမ်ႇတၢင်းဢၼ်ၵူၼ်းမဵဝ်း ဢိသရေး၊ တိဢဝ်ၶဝ်ဢေႃႈ။ ၵူၼ်းမဵဝ်း ဢိသရေး၊ တၵ်းမီးဢၶႂၢင်ႉဢႃႇၼႃႇဢၼ်ဢုပ်ႉပိူင်ႇၵႃႈၼိူဝ်ၵူၼ်းၸိူဝ်းဢၼ်ယၢမ်ႈတဵၵ်းငႅၼ်းၶဝ်မႃးၼၼ်ႉဢေႃႈ။
ၼႂ်းဝၼ်းမိူဝ်ႈၼၼ်ႉ၊ ထႃႇဝရႃႉၽြႃး၊ တၵ်းပၼ်ႁႂ်ႈၵူၼ်းမဵဝ်း ဢိသရေး၊ လႆႈၶျၢမ်းသႃႇသေၼႂ်းတၢင်းဢၼ်လႆႈၶၢမ်ႇဝူၺ်ႇတၼႃႇဢၼ်ၸဵပ်းသႅပ်ႇၼႃႇၼၼ်ႉႁႂ်ႈထၢတ်ႇယဵၼ်၊ဢိၵ်ႇတင်းတၢင်းဢၼ်လႆႈၶၢမ်ႇတၢင်းဢၼ်ပိူၼ်ႈႁဵတ်းပႄႉႁဵတ်းၼႅင်ႇၸႂ်ႉၵိၼ်ၶဝ်ၼၼ်ႉဢေႃႈ။-
မိူဝ်ႈဢၼ်မၼ်းၸဝ်ႈႁဵတ်းၸိူဝ်ႉၼင်ႇၼၼ်ၼၼ်ႉၶဝ်တၵ်းမီးဢၶႂၢင်ႉဢၼ်သႄႉသွမ်းယွၵ်ႇယဝ်ႈၶုၼ်ႁေႃၶမ်းမိူင်း ပႃႇပုလုၼ်ႇ၊ လႄႈဝႃႈ၊ “ၶုၼ်ႁေႃၶမ်းဢၼ်ႁၢဝ်ႈၵျၢမ်းၼၼ်ႉတူၵ်းသုမ်းယဝ်ႉ။ မၼ်းဢမ်ႇတဵၵ်းငႅၼ်းပိူၼ်ႈလႆႈထႅင်ႈသေပွၵ်ႈယဝ်ႉ။-
ထႃႇဝရႃႉၽြႃး၊ ႁႂ်ႈႁႅင်းတၼ်းၶူဝ်းၶုၼ်ဢၼ်ႁၢႆႉဢၼ်မိူၵ်ႈၼၼ်ႉသုတ်းသဵင်ႈယဝ်ႉ။-
ၶုၼ်ၸိူဝ်းၼၼ်ႉၸၢင်ႈမီးတေႃးသႃႉမေႃးႁႃႉလႄႈတဵၵ်းငႅၼ်းၵူၼ်းတင်းလၢႆဢေႃႈ။ တၢင်းဢၼ်ၸၢင်ႈၼိၵ်ႈၸၢၵ်ႈငႅၼ်းသႄးၼၼ်ႉဢမ်ႇၸၢင်ႈထၢတ်ႇယဵၼ်ၵႃႈၼိူဝ်မဵဝ်းၵူၼ်းၸိူဝ်းဢၼ်ၶဝ်တိုၵ်းတေႃးပႄႉၼႅင်ႇၼၼ်ႉလႃးလႃး။-
ၵမ်းၼႆႉလိၼ်မိူင်းတင်းသဵင်ႈတင်းမူတ်းမီးတၢင်းဢၼ်ၼိမ်လီယဵၼ်လီလႄႈဢွၼ်ၵၼ်ႁဵတ်းၵႂၢမ်းသႂၢင်ႇသႂၢင်ႇသိူဝ်းသိူဝ်းယဝ်ႉ။-
တူၼ်ႈပႅၵ်ႇဢိၵ်ႇတင်းတူၼ်ႈဢႃႇရိတ်ႉ လေႇပၼုၼ်ႇ၊ တင်းလၢႆဢွၼ်ၵၼ်ၸူမ်းသိူဝ်းၵွပ်ႈပိူဝ်ႈၶုၼ်ႁေႃၶမ်းလႆႈတူၵ်းသုမ်းယဝ်ႉလႄႈဢမ်ႇမီးၽူႈလႂ်သေၵေႃႉသေၵူၼ်းတၵ်းပွမ်ႈၽၼ်းတူၼ်ႈၸိူဝ်းၼၼ်ႉလူမ်ႉလႄႈဢမ်ႇမီးၵေႃႉယႃႉၵေႃႉၵဝ်းယဝ်ႉၼၼ်ႉဢေႃႈ။
“မိူင်း မရၼႃႉ၊ ၸိုင်၊မႄးႁႅၼ်းတၼ်းဝႆႉတႃႇတေႁပ်ႉတွၼ်ႈၶုၼ်ႁေႃၶမ်းမိူင်း ပႃႇပုလုၼ်ႇ၊ ယူႇယဝ်ႉ။ ၵူၼ်းမိူင်း မရၼႃႉ၊ ဢၼ်မီးတၼ်းၶူဝ်းၵႃႈၼိူဝ်လိၼ်မိူင်းယူႇၸိူဝ်းၼၼ်ႉတူင်ႉတိုၼ်ႇယူႇၵူႈတီႈၵူႈလႅၼ်ယဝ်ႉ။ ၵူၼ်းမိူင်း မရၼႃႉ၊ ဢၼ်ယၢမ်ႈပဵၼ်ၶုၼ်ႁေႃၶမ်းတင်းလၢႆ၊လုၵ်ႉသေၵႃႈတီႈပလၢင်ႇၶဝ်ယဝ်ႉ။-
ၶဝ်ဢွၼ်ၵၼ်ႁွင်ႉပၢင်းမၼ်းလႄႈဝႃႈ၊ ‘တေႃႈလဵဝ်ၼႆႉမႂ်းႁႅင်းလဵၵ်ႉႁႅင်းၵေႇမိူၼ်ၸိူဝ်ႉၼင်ႇႁဝ်းယဝ်ႉ။ မႂ်းပဵၼ်ၵူၼ်းႁဝ်းၵေႃႉၼိုင်ႈယဝ်ႉ။-
မႂ်းယၢမ်ႈယူႇလူၺ်ႈမုၼ်သရေႇသဵင်တူႇရိယႃႇမႃးသေၵေႃႈတေႃႈလဵဝ်ၼႆႉမႂ်းႁွတ်ႈထိုင်တီႈမိူင်း မရၼႃႉ၊ ယဝ်ႉ။ တူဝ်မူင်ႈတူဝ်မႅင်းတင်းလၢႆပဵၼ်ၵူႈၼွၼ်းမႂ်းလႄႈၼွၼ်တင်းလၢႆပဵၼ်ၽႃႈႁူမ်ႇမႂ်းယူႇယဝ်ႉ၊’ ဝႃႈၼင်ႇၼႆဢေႃႈ။
“ဢူဝ်း။ လၢဝ်လႅင်းၵၢင်ၼႂ်႟။ မႂ်းၼႆႉတူၵ်းသေၵႃႈတီႈၵၢင်ႁၢဝ်ယဝ်ႉ။ မိူဝ်ႈဢွၼ်ၼႆႉၼၼ်ႉမႂ်းပႄႉၼႅင်ႇမဵဝ်းၵူၼ်းတင်းလၢႆဢေႃႈ။ တေႃႈလဵဝ်ၼႆႉၸမ်ႉ၊မႂ်းလႆႈၶၢမ်ႇတၢင်းဢၼ်တိုတ်ႉၸၼ်တူၵ်းလူင်းထိုင်ၵႃႈတီႈလိၼ်ယဝ်ႉ။-
မႂ်းဢၢင်ႈဢၢၼ်းတၵ်းၶိုၼ်ႈၵႃႈၼိူဝ်ၽႃႉၵၢင်ႁၢဝ်လႄႈဢၢင်ႈတၵ်းတႄႇတင်ႈပလၢင်ႇမႂ်းၵႃႈၼိူဝ်လၢဝ်ဢၼ်သုင်ၼႃႇၼၼ်ႉဢေႃႈ။ မႂ်းၵျၢမ်ႇပွင်ႁႂ်ႈလႆႈၼင်ႈယူႇမိူၼ်ၸိူဝ်ႉၼင်ႇၶုၼ်ႁေႃၶမ်းဢၼ်ၼင်ႈၵႃႈၼိူဝ်လွႆၽၢႆႇတၢင်းၸၢၼ်းတီႈဢၼ်ၽြႃးတင်းလၢႆၸုတုမ်ၵၼ်ၼၼ်ႉဢေႃႈ။-
မႂ်းယင်းဝႃႈမႂ်းတၵ်းၶိုၼ်ႈၵႃႈၼိူဝ်ပၢႆၸိၵ်းၸွမ်မွၵ်ႇၵုမ်ႈသေလႄႈႁဵတ်းၸိူဝ်ႉၼင်ႇပဵၼ်ၸဝ်ႈဢၼၼ်ႇတႃႉတၼ်းၶူဝ်းၼၼ်ႉဢေႃႈ။-
ၵူၺ်းၵႃႈ၊မႂ်းလႆႈၶၢမ်ႇတၢင်းဢၼ်တိုတ်ႉၸၼ်တူၵ်းလူင်းထိုင်မိူင်း မရၼႃႉ၊ တီႈဢၼ်လိုၵ်ႉဢၼ်လမ်ႇသေပိူၼ်ႈၼၼ်ႉယဝ်ႉ။
“ၶဝ်ၸိူဝ်းဢၼ်တၢႆယဝ်ႉၼၼ်ႉတၵ်းဢႃႈပၢၵ်ႇဢႃႈၵၢင်းသေတူၺ်းမႂ်းလႄႈလၢတ်ႈဝႃႈ၊ ‘ၵေႃႉၼႆႉ ပဵၼ်ၵေႃႉဢၼ်ၶွၼ်းၶဝ်းလိၼ်မိူင်းလႄႈႁႂ်ႈသိုင်ႇၸိုင်ႈဝၢၼ်ႈမိူင်းတင်းလၢႆသၼ်ႇသၼ်ႇသၢႆသၢႆၵႂႃႇၼၼ်ႉဢမ်ႇၸႂ်ႈႁိုဝ်း။-
မၼ်းပဵၼ်ၵေႃႉဢၼ်ယႃႉၽဵဝ်ႈဝဵင်းလူင်တင်းလၢႆလႄႈႁႂ်ႈလိၼ်မိူင်းတင်းလၢႆပဵၼ်ထိူၼ်ႇပဵၼ်ၶိူဝ်းၵႂႃႇၼၼ်ႉဢမ်ႇၸႂ်ႈႁိုဝ်း။ မၼ်းပဵၼ်ၵေႃႉဢၼ်ဢမ်ႇၸၢင်ႈပွႆႇၵူၼ်းထွင်ႇမၼ်းတင်းလၢႆလွတ်ႈလႄႈဢမ်ႇႁႂ်ႈၶဝ်လႆႈပွၵ်ႈၶိုၼ်းႁိူၼ်းၼၼ်ႉဢမ်ႇၸႂ်ႈႁိုဝ်း၊’ ဝႃႈၼႆဢေႃႈ။
“ၶုၼ်ႁေႃၶမ်းၵူႈသိုင်ႇၵူႈမိူင်းတင်းသဵင်ႈတင်းလူင်ၼၼ်ႉပႃးတင်းမုၼ်သရေႇလႄႈၼွၼ်းၽႄးၵႃႈၼႂ်းၶုမ်ပႃႇႁဵဝ်ႈၶဝ်ႁင်းၽႂ်ႁင်းမၼ်းဢေႃႈ။-
မႂ်းၸမ်ႉ၊ဢမ်ႇမီးၶုမ်ပႃႇႁဵဝ်ႈ။ တူဝ်တၢႆမႂ်းလႆႈၶၢမ်ႇတၢင်းဢၼ်တိုတ်ႉလၢၵ်ႈဢွၵ်ႇတၢင်းၼွၵ်ႈလႄႈပႅတ်ႈၼဝ်ႈၵႂႃႇဢေႃႈ။ တူဝ်တၢႆၵူၼ်းသိုၵ်းၸိူဝ်းဢၼ်တၢႆၼႂ်းၼႃႈသိုၵ်းၼၼ်ႉႁူမ်ႇသုမ်ႇတူဝ်တၢႆမႂ်းဝႆႉသေယဝ်ႉ၊လၢၵ်ႈၵႂႃႇပႅတ်ႈၵႃႈၼႂ်းႁူးမၢၵ်ႇႁိၼ်မၢၵ်ႇၽႃပဵၼ်မိူၼ်ၸိူဝ်ႉၼင်ႇတူဝ်တၢႆဢၼ်ပိူၼ်ႈယဵပ်ႇပိူၼ်ႈၶၢမ်ႈၼၼ်ႉဢေႃႈ။-
ၵွပ်ႈပိူဝ်ႈမႂ်းယႃႉၽဵဝ်ႈမိူင်းတူဝ်ၸဝ်ႈၵဝ်ႇလႄႈၶႃႈၽၼ်းတၢႆၵူၼ်းတူဝ်ၸဝ်ႈၵဝ်ႇၼၼ်ႉမႂ်းဢမ်ႇလႆႈၶၢမ်ႇတၢင်းဢၼ်သၢင်းၵျူဝ်ႇမိူၼ်ၸိူဝ်ႉၼင်ႇၶုၼ်ႁေႃၶမ်းတၢင်ႇသူႇတၢင်ႇပႃးၸိူဝ်းၼၼ်ႉ။ ၵူၼ်းႁိူၼ်းမႂ်းဢၼ်ႁၢႆႉဢၼ်မိူၵ်ႈၸိူဝ်းၼၼ်ႉဢမ်ႇလႆႈဢသၢၵ်ႈလိပ်းလႄႈၵိုတ်းၵျၢၼ်ႇသေၵေႃႉသေၵူၼ်း။-
ႁႂ်ႈတၢင်းဢၼ်ဢဝ်တၢႆၼၼ်ႉပဵၼ်မႃးတႃႉ။ လုၵ်ႈၸၢႆးၶုၼ်ႁေႃၶမ်းပႃးၼႆႉတင်းလၢႆတၵ်းလႆႈတၢႆၵွပ်ႈပိူဝ်ႈဢပျတ်ႈပူႇၶဝ်မွၼ်ႇၶဝ်ဢေႃႈ။ ၼႂ်းၶဝ်ၼၼ်ႉတၵ်းဢမ်ႇမီးဢၶႂၢင်ႉဢၼ်ဢုပ်ႉပိူင်ႇလိၼ်မိူင်းထႅင်ႈသေပွၵ်ႈ။ တၵ်းဢမ်ႇႁႂ်ႈၶဝ်လႆႈတႄႇဝဵင်းၼမ်ၼႃႇၵႃႈၼိူဝ်လိၼ်မိူင်းၼၼ်ႉလႃးလႃး။”
ထႃႇဝရႃႉၽြႃး၊ ၸဝ်ႈဢၼၼ်ႇတႃႉတၼ်းၶူဝ်းမီးဢမိင်ႉလႄႈဝႃႈ၊ “ၵဝ်တၵ်းတိုၵ်းတေႃးမိူင်း ပႃႇပုလုၼ်ႇ၊ ႁႂ်ႈမၼ်းလုလႅဝ်ဢေႃႈ။ ၵဝ်တၵ်းဢမ်ႇဝႆႉသေၸိူဝ်ႉသေမဵဝ်းၵိုတ်းၵျၢၼ်ႇဝႆႉ။ တၵ်းဢမ်ႇဝႆႉၵိုတ်းလုၵ်ႈဢွၼ်ႇတင်းလၢႆ၊တၵ်းဢမ်ႇႁႂ်ႈၵေႃႉဢၼ်ဢသၢၵ်ႈလိပ်းၼၼ်ႉၵိုတ်းၵျၢၼ်ႇဝႆႉသေၵေႃႉသေၵူၼ်းဝႃႈၼႆၵဝ်၊ ထႃႇဝရႃႉၽြႃး၊ မီးဢမိင်ႉဢေႃႈ။-
ၵဝ်သမ်ႉတၵ်းႁဵတ်းႁႂ်ႈမိူင်း ပႃႇပုလုၼ်ႇ၊ ပဵၼ်ၵူမ်ႇပဵၼ်ၶၢႆးလႄႈပဵၼ်တီႈဢၼ်ၼူၵ်ႉၵဝ်ႉလႂ်ယူႇၼၼ်ႉဢေႃႈ။ ၵဝ်တၵ်းဢဝ်တင်းယူးပတ်းၽဵဝ်ႈပႅတ်ႈၵႃႈမီးတင်းသဵင်ႈတင်းလူင်ဢေႃႈ၊ဝႃႈၼႆၵဝ်၊ ထႃႇဝရႃႉၽြႃး၊ ၸဝ်ႈဢၼၼ်ႇတႃႉတၼ်းၶူဝ်း၊မီးဢမိင်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၸဝ်ႈဢၼၼ်ႇတႃႉတၼ်းၶူဝ်းတိူင်ႇၵၢဝ်ႇၵတိလႄႈမီးဢမိင်ႉၸမ်ႉ၊ “ၸွမ်းၵႃႈၼင်ႇဢၼ်ၵဝ်ၵျၢမ်ႇပွင်ၼၼ်ႉတၵ်းလႆႈပဵၼ်ဢေႃႈ။ ၸွမ်းၵႃႈၼင်ႇဢၼ်ၵဝ်တႅပ်းတတ်းၸႂ်ဝႃႈတေႁဵတ်းၼၼ်ႉတၵ်းလႆႈပဵၼ်ဢေႃႈ။-
ဢၼ်ၵဝ်ၵျၢမ်ႇပွင်ၸမ်ႉ၊ၵဝ်တၵ်းယႃႉၶုၼ် ဢႃႇသီးရီးယႃး၊ ပႅတ်ႈၵႃႈၼႂ်းမိူင်း ဢိသရေး၊ လႄႈတၵ်းယဵပ်ႇယမ်ႈမၼ်းၵႃႈၼိူဝ်လွႆၵဝ်တင်းလၢႆဢေႃႈ။ ၵဝ်တၵ်းပွႆႇႁႂ်ႈၵူၼ်းၵဝ်တင်းလၢႆလွတ်ႈသေၵႃႈတီႈၵၢၼ်းႁၢပ်ႇမဵဝ်း ဢႃႇသီးရီးယႃး၊ ဢိၵ်ႇတင်းတၵ်းပူတ်းပၼ်ၶူဝ်းႁၢပ်ႇလွတ်ႈသေၵႃႈတီႈႁူဝ်မႃႇၶဝ်ဢေႃႈ။-
တၢင်းၵျၢမ်ႇတၢင်းပွင်ၵဝ်ၼႆႉပဵၼ်ပုၼ်ႈလိၼ်မိူင်းတင်းသဵင်ႈတင်းမူတ်းလႄႈမိုဝ်းဢၼ်ယဵတ်ႇယိုၼ်းၼၼ်ႉပဵၼ်ပုၼ်ႈတႃႇႁႂ်ႈလႆႈပၼ်တၢမ်ႇတီႈမဵဝ်းၵူၼ်းတင်းလၢႆဢေႃႈ၊” ဝႃႈၼင်ႇၼႆဢေႃႈ။-
ထႃႇဝရႃႉၽြႃး၊ ၸဝ်ႈဢၼၼ်ႇတႃႉတၼ်းၶူဝ်းတႅပ်းတတ်းၸႂ်ဝႆႉႁႂ်ႈလႆႈႁဵတ်းၸိူဝ်ႉၼင်ႇၼႆလႄႈ၊မၼ်းၸဝ်ႈယဵတ်ႇယိုၼ်းၶႅၼ်မိုဝ်းမၼ်းၸဝ်ႈႁႂ်ႈလႆႈပၼ်တၢမ်ႇဢေႃႈ။ ၽူႈလႂ်ဢမ်ႇႁၢမ်ႈတၢပ်ႈႁႄႉၶႅၼ်လႆႈ။
ပျႃႇတိၵ်ႈၸဝ်ႈဢၼ်လႆႈႁပ်ႉၼႂ်းပီဢၼ်ၶုၼ် ဢႃႇၶတ်ႉ၊ သဵင်ႈၵၢမ်ႇၵႂႃႇၼၼ်ႉၸမ်ႉ၊-
ၵူၼ်းမိူင်း ၽိလိတ်ႉတိ၊ ၶဝ်႟။ ၶွၼ်ႉဝၢႆဢၼ်ပေႃႉယႅၼ်ႉမႂ်းၼၼ်ႉႁၵ်းယဝ်ႉ။ ၵူၺ်းၵႃႈ၊မႂ်းဢမ်ႇမီးလွင်ႈတၢင်းဢၼ်လီၸူမ်းသိူဝ်း။ မိူဝ်ႈဢၼ်ငူးတူဝ်ၼိုင်ႈတၢႆယဝ်ႉသေၵေႃႈငူးဢၼ်ယဵင်ႈၶႅၼ်းႁၢႆႉၼၼ်ႉၸၢင်ႈမႃးတႅၼ်းဢေႃႈ။ ၶႆႇငူးၼၼ်ႉၸၢင်ႈတႅၵ်ႇဢွၵ်ႇငူးႁၢႆႉမိၼ်မႃးဢေႃႈ။-
ထႃႇဝရႃႉၽြႃး၊ တၵ်းတေႁဵတ်းၵေႃႉဢၼ်လဵင်ႉထိင်းသူဝ်းတီႈၵူၼ်းမၼ်းၸဝ်ႈၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉသေယဝ်ႉ၊တၵ်းႁႂ်ႈၶဝ်လႆႈယူႇလူင်ႉလီလွတ်ႈလီဢေႃႈ။ ၵူၺ်းၵႃႈ၊မၼ်းၸဝ်ႈတၵ်းပွႆႇၸႂ်ႉၽေးတၢင်းဢၼ်ဢိုပ်းဢၼ်ယၢၵ်ႈတူၵ်းႁွတ်ႈၵႃႈၼိူဝ်မဵဝ်း ၽိလိတ်ႉတိ၊ သူလႄႈတၵ်းဢမ်ႇပွႆႇႁႂ်ႈသူလွတ်ႈဢသၢၵ်ႈသေၵေႃႉသေၵူၼ်း။
ၵူၼ်းမိူင်း ၽိလိတ်ႉတိ၊ ၵႃႈမီးၶဝ်႟။ ပွင်ႉၶၢင်းလႄႈႁွင်ႉႁႆႈပုၼ်ႈတၢင်းၸွႆႈတၢင်းထႅမ်တႃႉ။ သူၵႃႈမီးတင်းသဵင်ႈတင်းမူတ်း႟။ မီးၸႂ်ဢၼ်ၵူဝ်ႁႄသၼ်ႇဝႆတႃႉ။ မုၵ်ႉၵႂၼ်းၽႆးလူင်လုၵ်ႉသေၽၢႆႇတၢင်းႁွင်ႇႁွတ်ႈမႃးယူႇယဝ်ႉ။ ၵႃႈၼႂ်းတပ်ႉသိုၵ်းၼၼ်ႉၽူႈလႂ်ၵေႃႈဢမ်ႇမီးၸႂ်ၶီႈယၢၼ်ႈၵူဝ်ႁႄသေၵေႃႉသေၵူၼ်း။
တၵ်းလႆႈၶိုၼ်းလၢတ်ႈတီႈသၢၼ်ႇတမၢၼ်ႇဢၼ်လုၵ်ႉသေၵႃႈတီႈမိူင်း ၽိလိတ်ႉတိ၊ မႃးၸူးတီႈႁဝ်းၼၼ်ႉၸိူဝ်ႉၼင်ႇႁိုဝ်ဝႃႈၼႆၸမ်ႉ၊ႁဝ်းတၵ်းလႆႈလၢတ်ႈဝႃႈ၊ ထႃႇဝရႃႉၽြႃး၊ လႆႈတႄႇႁဵတ်းဝဵင်း ၸိဢုၼ်ႇ၊ လႄႈၵူၼ်းယၢၵ်ႈၵူၼ်းၽၢၼ်မၼ်းၸဝ်ႈတင်းလၢႆ၊လႆႈသွၼ်ႈပိုင်ႈလႄႈလွတ်ႈၽေးၼႂ်းဝဵင်းၼၼ်ႉဢေႃႈ။
ၼႆႉၸမ်ႉ၊ပဵၼ်ပျႃႇတိၵ်ႈၸဝ်ႈပုၼ်ႈမိူင်း မေႃႇၽႃႉ၊ ဢေႃႈ။ ၼႂ်းၶိုၼ်းလဵဝ်ၵူၺ်းဝဵင်း ဢႃႇရႃႉ၊ တင်းဝဵင်း ၵိရႃႉ၊ ဢၼ်မီးၵႃႈၼႂ်းမိူင်း မေႃႇၽႃႉ၊ ၼၼ်ႉလုလႅဝ်လႄႈတဵတ်ႇယဵၼ်ၵႂႃႇဢေႃႈ။-
ၵူၼ်းဝဵင်း တိၽုၼ်ႇ၊ တင်းလၢႆၶိုၼ်ႈၵႂႃႇၵႃႈၼိူဝ်လွႆႁႂ်ႈလႆႈႁွင်ႉႁႆႈၵႃႈတီႈထႃႇၼႃႉတီႈသုင်ဢေႃႈ။ ၵူၼ်းမိူင်း မေႃႇၽႃႉ၊ တင်းလၢႆႁွင်ႉႁႆႈလႄႈမႆႈၸႂ်လူၺ်ႈဝဵင်း ၼေႇပေႃႇ၊ တင်းဝဵင်း မေႇတေႇၽႃႉ၊ ဢေႃႈ။ ၶဝ်ဢွၼ်ၵၼ်ထႃၶူၼ်ႁူဝ်ၶဝ်၊ၼူတ်ႇၵၢင်းၶဝ်ပႅတ်ႈဢေႃႈ။-
ၵူၼ်းၸိူဝ်းဢၼ်မီးၵႃႈၼိူဝ်ၶူၼ်တၢင်းၼၼ်ႉဢွၼ်ၵၼ်ၼုင်ႈမႆၼင်ပေႃဢေႃႈ။ ၵူၼ်းဢၼ်ယူႇၵႃႈၼႂ်းၵၢင်ပၢင်ႇဝဵင်းလႄႈၵႃႈၼိူဝ်ၸွမ်ႁိူၼ်းၸိူဝ်းၼၼ်ႉၵေႃႈ၊ႁွင်ႉႁႆႈပွင်ႉၶၢင်းဢေႃႈ။-
ၵူၼ်းဝဵင်း ႁေႇသၽုၼ်ႇ၊ တင်းဝဵင်း ဢေးလႃႇလေး၊ ၸိူဝ်းၼၼ်ႉဢွၼ်ၵၼ်ႁွင်ႉႁႆႈလႄႈသဵင်ႁႆႈၼၼ်ႉလႆႈငိၼ်းၵႂႃႇတေႃႇထိုင်ႁွတ်ႈဝဵင်း ယႃႇႁတ်ႉ၊ ဢေႃႈ။ ၵူၼ်းသိုၵ်း မေႃႇၽႃႉ၊ တင်းလၢႆၼၼ်ႉႁႅင်းၸႂ်ၶဝ်ဢူၼ်ႈဢွၼ်ႇၵႂႃႇလႄႈသၼ်ႇသၼ်ႇသၢႆသၢႆယူႇဢေႃႈ။-
ႁူဝ်ၸႂ်ၵဝ်ႁွင်ႉႁႆႈပုၼ်ႈၵူၼ်းမိူင်း မေႃႇၽႃႉ၊ ဢေႃႈ။ လွင်ႈမၼ်းၸမ်ႉ၊ၵူၼ်းတင်းလၢႆဢွၵ်ႇပၢႆႈၵႂႃႇတေႃႇထိုင်ႁွတ်ႈဝဵင်း ၸေႃႇရႃႉ၊ ဢိၵ်ႇတင်းဝဵင်း ဢေႇၵလတ်ႉသေႇလသိယႃႉ၊ ဢေႃႈ။ ၵမ်ႈၽွင်ႈၶိုၼ်ႈၸွမ်းသဵၼ်ႈတၢင်းၵႂႃႇၸူးတီႈဝဵင်း လုႁိတ်ႉ၊ လႄႈ ၶဝ်ႁွင်ႉႁႆႈၸွမ်းတၢင်းၵႂႃႇဢေႃႈ။ ၵမ်ႈၽွင်ႈပၢႆႈလွတ်ႈၵႂႃႇၵႃႈတီႈဝဵင်း ႁေႃးရၼိမ်ႇ၊ လႄႈပွင်ႉၶီပွင်ႉၶၢင်းလူၺ်ႈသဵင်ဢၼ်ယႂ်ႇၼႃႇဢေႃႈ။-
ၼမ်ႉၵႄးဢွၼ်ႇ ၼိမ်းရိမ်း၊ ယူတ်းႁႅင်ႈယဝ်ႉလႄႈ၊ယိူဝ်ႈယႃႈႁဵဝ်ႇၵႂႃႇႁႅင်ႈၵႂႃႇယဝ်ႉ။ တူၼ်ႈဢၼ်ၶဵဝ်လီၼုမ်ႇလီဢမ်ႇမီးသေတူၼ်ႈယဝ်ႉ။-
ၵူၼ်းတင်းလၢႆဢွၼ်ၵၼ်ၶၢမ်ႈႁူၺ်ႈမႆႉၶႆႉၵႂႃႇႁႂ်ႈလႆႈပၢႆႈလွတ်ႈလူၺ်ႈၵၼ်တင်းဢုၵ်ႉၸႃႇဢၼ်ၶဝ်ၵဵပ်းႁွမ်ၵဵပ်းတွမ်ဝႆႉၼၼ်ႉဢေႃႈ။-
သဵင်ဢၼ်ႁွင်ႉႁႆႈၶဝ်ၼၼ်ႉလႆႈငိၼ်းၸွတ်ႇတူဝ်ႈၵႂႃႇၸွမ်းလႅၼ်လိၼ်မိူင်း မေႃႇၽႃႉ၊ ဢိၵ်ႇတင်းလႆႈငိၼ်းၵႃႈၼႂ်းဝဵင်း ဢေႇၵလိမ်း၊ တင်းဝဵင်း ပေႇရႃႉဢေႇလိမ်း၊ ဢေႃႈ။-
မႄႈၼမ်ႉၼႂ်းဝဵင်း တိၽုၼ်ႇ၊ ၸိူဝ်းၼၼ်ႉတဵမ်ဝႆႉတင်းလိူတ်ႈလႄႈၵဝ်တၵ်းႁႂ်ႈၽေးတူၵ်းႁွတ်ႈၵႃႈၼိူဝ်ဝဵင်း တိမုၼ်ႇ၊ ထႅင်ႈၼၼ်ႉၸမ်ႉ၊ဢၼ်ပဵၼ်သၢင်ႇသီႈပုၼ်ႈၵူၼ်းမိူင်း မေႃႇၽႃႉ၊ ဢိၵ်ႇတင်းပုၼ်ႈၵူၼ်းမိူင်းဢၼ်ၵိုတ်းဢၼ်ၵျၢၼ်ႇယူႇၸိူဝ်းဢၼ်ဢွၵ်ႇပၢႆႈႁႂ်ႈလႆႈလွတ်ႈၽေးရၢၼ်ႇသူႇၼၼ်ႉဢေႃႈ။
ၵူၼ်းမိူင်း မေႃႇၽႃႉ၊ ဢဝ်သူဝ်းဢွၼ်ႇတူဝ်ၼိုင်ႈသေၵႃႈတီႈဝဵင်း သေးလႃႉ၊ ဢၼ်မီးၵႃႈၼႂ်းထိူၼ်ႇလႅင်ႉၼၼ်ႉသေလႄႈပၼ်တီႈၶုၼ်ဢၼ်ဢုပ်ႉပိူင်ႇဝဵင်း ယေႇရုသလႅမ်ႇ၊ ၼၼ်ႉဢေႃႈ။-
ၶဝ်ဢွၼ်ၵၼ်ပႂ်ႉထႃႈယူႇၵႃႈတီႈတႃႈၶၢမ်ႈၼမ်ႉ ဢႃႇၼုၼ်ႇ၊ ယင်းဢမ်ႇမီးတၢင်းၵျၢမ်ႇတၢင်းပွင်ၵႃႈသင်၊လႄႇၵႂႃႇလႄႇမႃးယူႇမိူၼ်ၸိူဝ်ႉၼင်ႇၼူၵ်ႉဢၼ်လႆႈၶၢမ်ႇတၢင်းဢၼ်ႁေႃႈဢွၵ်ႇသေၵႃႈတီႈႁင်းၶဝ်ၼၼ်ႉဢေႃႈ။
ၶဝ်လၢတ်ႈတီႈၵူၼ်းမိူင်း ယုတႃႉ၊ လႄႈဝႃႈ၊ “ႁဝ်းၶႃႈတၵ်းတေလႆႈႁဵတ်းၸိူဝ်ႉၼင်ႇႁိုဝ်ၼၼ်ႉၶႅၼ်းတေႃႈမွၵ်ႇလၢတ်ႈပၼ်သေၵမ်း။ ၶႅၼ်းတေႃႈၵႅတ်ႇၶႄႁဝ်းၶႃႈမိူၼ်ၸိူဝ်ႉၼင်ႇတူၼ်ႈမႆႉဢၼ်ဢဝ်ႁူမ်ႈငဝ်းမၼ်းႁူမ်ႇသုမ်ႇၵႃႈၼိူဝ်ႁဝ်းၶႃႈႁႂ်ႈလႆႈယဵၼ်လီၵႃႈၼႂ်းလႅတ်ႇၵၢင်ဝၼ်းတဵင်ႈၼၼ်ႉသေၵမ်း။ ႁႂ်ႈႁဝ်းၶႃႈလႆႈလိုဝ်ႈၵႃႈတႂ်ႈႁူမ်ႈၼၼ်ႉသေၵမ်း။ ႁဝ်းၶႃႈပဵၼ်ၶဝ်ၸိူဝ်းဢၼ်ပၢႆႈတဵတ်ႇပၢႆႈသွၼ်ႈၼႃႈသိုၵ်းၼႃႈသိူဝ်လႄႈ၊ဢဝ်ႁဝ်းၶႃႈသိူင်ႇလပ်ႉဝႆႉတီႈဢၼ်ၽူႈလႂ်ဢမ်ႇႁၼ်ႁဝ်းၶႃႈလႆႈၼၼ်ႉသေၵမ်း။-
ႁႂ်ႈႁဝ်းၶႃႈလႆႈယူႇသဝ်းၵႃႈၼႂ်းမိူင်းၸဝ်ႈသေၵမ်း။ ၵႅတ်ႇၶႄႁဝ်းၶႃႈႁႂ်ႈလွတ်ႈသေၵႃႈတီႈၶဝ်ၸိူဝ်းဢၼ်ၶႂ်ႈယႃႉပႅတ်ႈႁဝ်းၶႃႈၼၼ်ႉသေၵမ်း၊” ဝႃႈၼင်ႇၼႆဢေႃႈ။ (တၢင်းဢၼ်ၼိၵ်ႈၸၢၵ်ႈငႅၼ်းသႄး၊တၢင်းဢၼ်ယႃႉဢၼ်ၵဝ်းတၵ်းထၢတ်ႇယဵၼ်ယဝ်ႉ။ ၶဝ်ၸိူဝ်းဢၼ်ယႃႉႁႂ်ႈမိူင်းလုလႅဝ်ၼၼ်ႉတၵ်းဢမ်ႇမီးယဝ်ႉ။-
မိူဝ်ႈၼၼ်ႉၼႂ်းၸိူဝ်ႉၶိူဝ်း တႃႇဝိတ်ႈ၊ ၼၼ်ႉၵေႃႉၼိုင်ႈတၵ်းပဵၼ်ၶုၼ်ႁေႃၶမ်းသေယဝ်ႉ၊ၸဝ်ႈၼၼ်ႉတၵ်းပႃးတင်းသဵတ်ႈၸႃႇၵရုၼႃႇလႄႈဢုပ်ႉပိူင်ႇၵူၼ်းတင်းလၢႆဢေႃႈ။ ၸဝ်ႈၼၼ်ႉတၵ်းႁဵတ်းၶၼ်ႁဵတ်းၽႂ်းၼႂ်းတၢင်းဢၼ်သိုဝ်ႈတေႃႇလႄႈတၵ်းၸီႇယၢင်ႇတြႃးၽဵင်ႇၽဵင်ႇဢေႃႈ။)
ၵူၼ်းမိူင်း ယုတႃႉ၊ တင်းလၢႆၵေႃႈဝႃႈ၊ “ႁဝ်းလႆႈငိၼ်းလွင်ႈမိူင်း မေႃႇၽႃႉ၊ မီးမႃႇၼႃႉၽႅၼ်သုင်ၼႃႇၼၼ်ႉယဝ်ႉ။ ႁဝ်းႁုလွင်ႈတၢင်းဢၼ်ၶဝ်မႃႇၼႃႉၽႅၼ်သုင်၊ၶဝ်ထၢင်ႇယႂ်ႇတူဝ်ၸဝ်ႈၵဝ်ႇၼၼ်ႉယူႇယဝ်ႉ။ ၵူၺ်းၵႃႈ၊တၢင်းဢၼ်ၶဝ်မူင်ႈမႅၼ်ဢုပ်ႇဝၢဝ်းၼၼ်ႉပဵၼ်ဢၼ်ပဝ်ႇလၢႆလၢႆၵူၺ်းဢေႃႈ၊” ဝႃႈၼင်ႇၼႆဢေႃႈ။
ၵူၼ်းမိူင်း မေႃႇၽႃႉ၊ တၵ်းႁွင်ႉႁႆႈၵွပ်ႈပိူဝ်ႈလႆႈၶၢမ်ႇတုၵ်ႉၶႃႉတၢင်းၶၢၼ်ၸႂ်ၼၼ်ႉဢေႃႈ။ ၶဝ်တၵ်းဢွၼ်ၵၼ်ႁွင်ႉႁႆႈယၢမ်းမိူဝ်ႈဢၼ်ၶဝ်ၶုၵ်းၸႂ်လႆႈၶဝ်ႈလီၽၵ်းဝၢၼ်ဢၼ်ၶဝ်ယၢမ်ႈလႆႈၵိၼ်မႃးၵႃႈၼႂ်းဝဵင်း ၵိရႃႉႁရိတ်ႉ၊ ၼၼ်ႉလႄႈၶဝ်တၵ်းတေလႆႈၶၢမ်ႇတၢင်းဢၼ်တုၵ်ႉၶႃႉၼမ်ၼႃႇဢေႃႈ။-
ပၢင်ႇတူင်ႈၼႃး ႁေႇသၽုၼ်ႇ၊ ဢိၵ်ႇတင်းယွတ်ႈၶိူဝ်းမၢၵ်ႇၸပိတ်ႉဝဵင်း ၸိပမႃႇ၊ ဢၼ်ဢွၵ်ႇပဵၼ်ၼမ်ႉမၢၵ်ႇၸပိတ်ႉမဵဝ်းၶုၼ်တင်းလၢႆယၢမ်ႈၵိၼ်လႄႈမဝ်းၼၼ်ႉယူတ်းႁႅင်ႈၵႂႃႇယဝ်ႉ။ မိူဝ်ႈဢွၼ်ၼႆႉၼၼ်ႉၵိင်ႇတူၼ်ႈမၼ်းၽႄႈယၢဝ်းၵႂႃႇထိုင်ဝဵင်း ယႃႇၸႃႇ၊ လႄႈၽၢႆႇတၢင်းဝၼ်းဢွၵ်ႇၼၼ်ႉၶိုတ်းထိုင်ၼႂ်းထိူၼ်ႇလႅင်ႉသေယဝ်ႉ၊ၽၢႆႇတၢင်းဝၼ်းတူၵ်းသမ်ႉယိုၼ်းထိုင် ပၢင်ႇလၢႆႇတၢႆ၊ ဢေႃႈ။-
မိူဝ်ႈလဵဝ်ၼႆႉၵဝ်ႁွင်ႉႁႆႈပုၼ်ႈတူၼ်ႈၶိူဝ်းမၢၵ်ႇၸပိတ်ႉဝဵင်း ၸိပမႃႇ၊ ၸိူဝ်ႉၼင်ႇဢၼ်ၵဝ်ႁွင်ႉႁႆႈပုၼ်ႈဝဵင်း ယႃႇၸႃႇ၊ ဢေႃႈ။ ၼမ်ႉတႃၵဝ်တူၵ်းပုၼ်ႈဝဵင်း ႁေႇသၽုၼ်ႇ၊ တင်းဝဵင်း ဢေးလႃႇလေး၊ ၵွပ်ႈပိူဝ်ႈၵူၼ်းဢၼ်မီးၵႃႈတီႈၼၼ်ႈဢမ်ႇလႆႈပၢတ်ႇဢဝ်သိမ်းဢဝ်ပုၼ်ႈတၵ်းႁႂ်ႈၶဝ်လႆႈၸူမ်းသိူဝ်းၼၼ်ႉဢေႃႈ။-
မိူဝ်ႈလဵဝ်ၼႆႉဢမ်ႇမီးၵေႃႉဢၼ်သႂၢင်ႇဢၼ်သိူဝ်းၵႃႈၼႂ်းတူင်ႈၼႃးဢၼ်ၽုၼ်ႇၼမ်ႉမၼ်းလိၼ်လီၼၼ်ႉသေၵေႃႉသေၵူၼ်း။ ဢမ်ႇမီးၵေႃႉဢၼ်ယဵပ်ႇၼူတ်ႈမၢၵ်ႇၸပိတ်ႉႁႂ်ႈလႆႈႁဵတ်းၼမ်ႉမၢၵ်ႇၸပိတ်ႉယဝ်ႉလႄႈတၢင်းဢၼ်ႁွင်ႉပၢဝ်ႇႁွင်ႉသႅၼ်ႇၸူမ်းၸူမ်းသိူဝ်းသိူဝ်းၼၼ်ႉထၢတ်ႇယဵၼ်ယဝ်ႉ။-
ပိူဝ်ႈၼႆလႄႈၵဝ်မႆႈၸႂ်ၶီၸႂ်ပုၼ်ႈမိူင်း မေႃႇၽႃႉ၊ လႄႈပွင်ႉၶီပွင်ႉၶၢင်းပုၼ်ႈဝဵင်း ၵိရႃႉႁရိတ်ႉ၊ ဢေႃႈ။-
ၵူၼ်းမိူင်း မေႃႇၽႃႉ၊ တင်းလၢႆမီးတၢင်းဢၼ်ႁိူဝ်ႉၸႂ်ႁိူဝ်ႉၶေႃးသေၶဝ်ႈတီႈၵျွင်းဝၢတ်ႈၶဝ်ဢၼ်မီးၵႃႈၼိူဝ်လွႆသုင်မျၢတ်ႈလႄႈဢွၼ်ၵၼ်သူးတွင်းလဝ်ႈယွၼ်းဢေႃႈ။ ၵူၺ်းၵႃႈ၊တၵ်းဢမ်ႇမီးဢၵျူဝ်းၵျေးၸူးၵႃႈသင်။
ၼႆႉၸမ်ႉ၊ပဵၼ်ပျႃႇတိၵ်ႈဢၼ် ထႃႇဝရႃႉၽြႃး၊ မီးဢမိင်ႉဝႆႉ လူၺ်ႈလွင်ႈမိူင်း မေႃႇၽႃႉ၊ မိူဝ်ႈဢွၼ်ၼႆႉၼၼ်ႉဢေႃႈ။-
တေႃႈလဵဝ်ၼႆႉၸမ်ႉ၊ ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ဢုၵ်ႉၸႃႇၸေးၸိမ်ႇမိူင်း မေႃႇၽႃႉ၊ တၵ်းသဵင်ႈႁၢႆၵႂႃႇၼႂ်းသၢမ်ပီတဵမ်တဵမ်ယဝ်ႉၼၼ်ႉဢေႃႈ။ ၼႂ်းၵူၼ်းၶဝ်ဢၼ်ၼမ်ၼႃႇၼၼ်ႉတၵ်းၵိုတ်းၵျၢၼ်ႇယူႇဢိတ်းဢီႈၼိုင်ႈၵူၺ်းယဝ်ႉလႄႈ၊ၶဝ်တၵ်းႁႅင်းဢူၼ်ႈၼႃႇဢေႃႈ။”
ထႃႇဝရႃႉၽြႃး၊ မီးဢမိင်ႉၸမ်ႉ၊ “ဝဵင်း တမ်ႇမတ်ႉသၵတ်ႉ၊ တၵ်းဢမ်ႇလႆႈတႄႇလႆႈပဵၼ်ဝဵင်းထႅင်ႈသေပွၵ်ႈ။ မၼ်းတၵ်းလႆႈပဵၼ်ၵွင်ပဵၼ်ပုမ်ႇဢၼ်လုဢၼ်လႅဝ်ဝႆႉဢေႃႈ။-
ဝဵင်းလူင်တင်းလၢႆဢၼ်မီးၵႃႈၼႂ်းမိူင်း သီးရီးယႃး၊ ၼၼ်ႉတၵ်းလႆႈပဵၼ်ဝဵင်းဢၼ်ႁၢမ်းယူႇတႃႇသေႇဢေႃႈ။ ဝဵင်းၸိူဝ်းၼၼ်ႉတၵ်းပဵၼ်ပၢင်ႇယိူဝ်ႈပုၼ်ႈသူဝ်းဝူဝ်းတင်းလၢႆလႄႈဢမ်ႇမီးၵေႃႉဢၼ်တၵ်းႁေႃႈသတ်းၸိူဝ်းၼၼ်ႉပႅတ်ႈသေၵေႃႉသေၵူၼ်း။-
မိူင်း ဢိသရေး၊ တၵ်းဢမ်ႇမီးလွင်ႈဢၼ်ၵႅတ်ႇဢၼ်ၶႄလႃးလႃးလႄႈဝဵင်း တမ်ႇမတ်ႉသၵတ်ႉ၊ တၵ်းသုမ်းပႅတ်ႈတၢင်းဢၼ်လွတ်ႈလႅဝ်းၵွၼ်းၶေႃဢေႃႈ။ ၵူၼ်းမဵဝ်း သီးရီးယႃး၊ ၸိူဝ်းဢၼ်ဢသၢၵ်ႈလိပ်းၵိုတ်းၵျၢၼ်ႇယူႇၼၼ်ႉမုၼ်ၽုင်းတၵ်းသုတ်းယွမ်းၵႂႃႇမိူၼ်ၸိူဝ်ႉၼင်ႇၵူၼ်းမဵဝ်း ဢိသရေး၊ ၶဝ်ၼၼ်ႉဢေႃႈ၊ဝႃႈၼႆၵဝ်၊ ထႃႇဝရႃႉၽြႃး၊ ၸဝ်ႈဢၼၼ်ႇတႃႉတၼ်းၶူဝ်းမီးဢမိင်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၼႂ်းမိူဝ်ႈၶိင်ႇၵႃႇလႃႉၼၼ်ႉမုၼ်ၽုင်း ဢိသရေး၊ တၵ်းလႆႈသုတ်းယွမ်းၵႂႃႇလႄႈတၢင်းဢၼ်မၼ်းမၢၵ်ႈမီးလီပဵၼ်ၼၼ်ႉတၵ်းပဵၼ်တၢင်းဢၼ်ယၢၵ်ႈဢၼ်ၽၢၼ်ၵႂႃႇဢေႃႈ။-
မိူင်း ဢိသရေး၊ တၵ်းပဵၼ်မိူၼ်ၸိူဝ်ႉၼင်ႇႁႆႈၶဝ်ႈဢၼ်ပၢတ်ႇဢဝ်သိမ်းဢဝ်ယဝ်ႉလႄႈ၊ပဵၼ်ၸိူဝ်ႉၼင်ႇႁႆႈဢၼ်သဵတ်ႇၵူၼ်းငႅဝ်ၵူၼ်းၵႃႈၼႂ်းပၢင်ႇႁူၺ်ႈ ရေႇၽိမ်း၊ ယၢမ်းမိူဝ်ႈဢၼ်ပၢတ်ႇဢဝ်သိမ်းဢဝ်ယဝ်ႉလႄႈႁၢမ်းဝႆႉၼၼ်ႉဢေႃႈ။-
ၵူၼ်းဢၼ်ဢသၢၵ်ႈလိပ်းၵိုတ်းၵျၢၼ်ႇဝႆႉၼၼ်ႉတၵ်းမီးဢိတ်းဢီႈၵူၺ်းသေယဝ်ႉ၊ၵူၼ်းမဵဝ်း ဢိသရေး၊ တၵ်းပဵၼ်ၸိူဝ်ႉၼင်ႇတူၼ်ႈမၢၵ်ႇသၢၼ်ႇလုၼ်ႇဢၼ်သၼ်ႇၶွၼ်းဢဝ်မၢၵ်ႇမၼ်းမူတ်ႉယဝ်ႉလႄႈၵိုတ်းၵျၢၼ်ႇယူႇသွင်သၢမ်လုၵ်ႈၵႃႈတီႈပၢႆတူၼ်ႈမႆႉ၊ဢမ်ႇၼၼ်ၵႃႈတီႈၵိင်ႇၶႃႈဢၼ်မၢၵ်ႇပူင်းလီဢၼ်ၵိုတ်းၵျၢၼ်ႇယူႇသီႇႁႃႈလုၵ်ႈၼၼ်ႉဢေႃႈ၊ဝႃႈၼႆၵဝ်၊ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ၼၼ်ႉမီးဢမိင်ႉဝႆႉဢေႃႈ၊” ဝႃႈၼင်ႇၼႆဢေႃႈ။
ၼႂ်းမိုဝ်ႉဝၼ်းၶိင်ႇၵႃႇလႃႉၼၼ်ႉ၊ၵူၼ်းတင်းလၢႆတၵ်းဝႆႉၸႂ်တီႈၸဝ်ႈဢၼ်ၽၢၼ်ႇသၢင်းႁဵတ်းပဵၼ်ဢၼ်ဝႃႈ၊ၽြႃးဢၼ်မူတ်းၸၢင်ႇမဵဝ်း ဢိသရေး၊ ၼၼ်ႉဢေႃႈ။-
ၶဝ်တၵ်းဢမ်ႇဢိင်ပိုင်ႈၶဵင်ႇတၢင်းလူႇၸိူဝ်းဢၼ်ဢဝ်မိုဝ်းၶဝ်ႁဵတ်းၼၼ်ႉထႅင်ႈလႄႈတၵ်းဢမ်ႇယုမ်ႇမၢတ်ႈဢိင်ပိုင်ႈၶိူင်ႈပိူင်ဢၼ်ဢဝ်မိုဝ်းၶဝ်ၶွၵ်းႁဵတ်းသဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ ဢိၵ်ႇတင်းၶဵင်ႇတၢင်းလူႇဢၼ်ၽဝ်ၼၢမ်ႇသႃႇၸိူဝ်းၼၼ်ႉထႅင်ႈယဝ်ႉ။
ၼႂ်းမိုဝ်ႉဝၼ်းၶိင်ႇၵႃႇလႃႉၼၼ်ႉ၊ဝဵင်းလူင်ဢၼ်မၼ်ႈၶိူင်ႇၸိူဝ်းၼၼ်ႉတၵ်းပဵၼ်တီႈဢၼ်ၸုၼ်ႉပႅတ်ႈဝႆႉႁႂ်ႈမၼ်းလုလႅဝ်ယူႇမိူၼ်ၸိူဝ်ႉၼင်ႇဝဵင်းလူင်ၵူၼ်းမိူင်း ႁိဝိ၊ တင်းၵူၼ်းမဵဝ်း ဢႃႇမေႃးရိ၊ ဢၼ်ၸုၼ်ႉပႅတ်ႈဝႆႉၼႂ်းမိူဝ်ႈဢၼ်ၶဝ်ဢွၵ်ႇပၢႆႈၵူၼ်းမဵဝ်း ဢိသရေး၊ ၼၼ်ႉဢေႃႈ။
မဵဝ်း ဢိသရေး၊ ႟။ မႂ်းလူင်လိုမ်းၽြႃးပဵၼ်ၸဝ်ႈဢၼ်မိူၼ်ၸိူဝ်ႉၼင်ႇမၢၵ်ႇႁိၼ်ဢၼ်ၵႄႇၼုၵ်ႈဢဝ်မႂ်းလႄႈၵႅတ်ႇၶႄႁႄႉၵင်ႈမႂ်းၼၼ်ႉယဝ်ႉ၊မႂ်းယင်းၽုၵ်ႇဝႆႉလူင်ႈၸဝ်ႈမိူင်း ပုၼ်ႈဢၼ်တၵ်းဝႆႈၽြႃးၵူၼ်းတၢင်ႇသိုင်ႇတၢင်ႇမိူင်းၼၼ်ႉဢေႃႈ။-
ၵူၺ်းၵႃႈ၊ပိၵ်ႉသမ်ႉလွမ်ႉႁူဝ်ႉလွမ်ႉႁိူၵ်ႈဝႆႉလႄႈပူင်ႇၽိူဝ်ပူင်ႇမွၵ်ႇမႃးၶိင်ႇၵၢင်ၼႂ်မိူဝ်ႈဢၼ်မႂ်းၽုၵ်ႇသွမ်ႈၼၼ်ႉၵမ်းလဵဝ်သေၵေႃႈ၊တၵ်းဢမ်ႇလႆႈဝိတ်းဢဝ်သိမ်းဢဝ်မၢၵ်ႇမၼ်း။ ၵူၺ်းတၵ်းပဵၼ်ၽေးတုၵ်ႉၶႃႉဢၼ်ယၢပ်ႇၸႂ်ၽိုတ်ႇၸႂ်ၼႃႇၼၼ်ႉတီႈမႂ်းဢေႃႈ။
ၵူၼ်းမဵဝ်းဢၼ်ႁႅင်းတၼ်းၶူဝ်းယႂ်ႇၸိူဝ်းၼၼ်ႉႁဵတ်းသဵင်ဢၼ်ႁုၼ်ႈမေႃးမိူၼ်ၸိူဝ်ႉၼင်ႇသဵင်မေႃးလင်ၼမ်ႉသမ်ႇမုၵ်ႈတြႃႇ၊မိူၼ်ၸိူဝ်ႉၼင်ႇလႅင်းၼမ်ႉပိူပ်ႈၼမ်ႉဢၼ်ႁႅင်းယႂ်ႇၼႃႇၽွမ်ႉၵၼ်ႁိပ်ႈၼႅတ်ႈၽၢင်ႈၽိင်ႈသႂ်ႇၵၼ်ၼၼ်ႉဢေႃႈ။-
ပိၵ်ႉသမ်ႉၵူၼ်းမဵဝ်းတင်းလၢႆၽွမ်ႉၵၼ်ႁိပ်ႈၼႅတ်ႈၽၢင်ႈၽိင်ႈမိူၼ်ၸိူဝ်ႉၼင်ႇဢၼ်လႅင်းၼမ်ႉပိူပ်ႈၼမ်ႉဢၼ်ၼမ်ၼႃႇၽွမ်ႉၵၼ်ႁိပ်ႈၼႅတ်ႈၽၢင်ႈၽိင်ႈၼၼ်ႉသေၵေႃႈ၊ၽြႃးပဵၼ်ၸဝ်ႈသုင်းမႃႉတၢင်ႇဢပျတ်ႈၶဝ်ႁႅင်းႁႅင်းလႄႈၶဝ်ဢွၼ်ၵၼ်ဢွၵ်ႇပၢႆႈၵႂႃႇဢေႃႈ။ ၶဝ်တၵ်းလႆႈၶၢမ်ႇတၢင်းဢၼ်လိုပ်ႈလမ်းမိူၼ်ၸိူဝ်ႉၼင်ႇမုၼ်ႈလိၼ်ဢၼ်ပိဝ်ယူႇၵႃႈၼိူဝ်လွႆ၊ဢိၵ်ႇတင်းမိူၼ်ၸိူဝ်ႉၼင်ႇမုၼ်ႈယိူဝ်ႈယႃႈဢၼ်ပႃးၵႂႃႇၵႃႈၼႂ်းလူမ်းၽိဝ်ႁုင်ၼၼ်ႉဢေႃႈ။-
ၶဝ်ႁဵတ်းႁႂ်ႈၽေးႁွတ်ႈၽႅဝ်ၶိင်ႇႁူဝ်ၶမ်ႈလႄႈၶဝ်တၵ်းႁၢႆၵႂႃႇမိူဝ်ႈၶိင်ႇႁူဝ်ၼႂ်ဢမ်ႇပႆႇထိုင်မႃးၼၼ်ႉဢေႃႈ။ ဢၼ်ၼႆႉၸမ်ႉ၊ပဵၼ်ပုၼ်ႈပဵၼ်တႃႇၶဝ်ၸိူဝ်းဢၼ်ႁိမ်ႁူင်ႇသိမ်းဢဝ်လိၼ်မိူင်းႁဝ်းၼၼ်ႉဢေႃႈ။
ၼႄႈ။ ၼႄႈ။ ၽၢႆႇပုၼ်ႉမႄႈၼမ်ႉ ဢေႇတီႇဢူဝ်းပီးယႃး၊ ၼၼ်ႉ မီးမိူင်းဢၼ်လႆႈငိၼ်းသဵင်ပိၵ်ႇဢၼ်ၸၢင်ႈလင်မေႃးၼၼ်ႉဢေႃႈ။-
သၢၼ်ႇတမၢၼ်ႇတင်းလၢႆလုၵ်ႉသေၵႃႈတီႈမိူင်းၼၼ်ႉၶီႇႁိူဝ်းမႆႉဢေႃႈလူင်းၸွမ်းမႄႈၼမ်ႉ ၼၢႆးလ်၊ မႃးဢေႃႈ။ သၢၼ်ႇတမၢၼ်ႇဢၼ်ၶၼ်ၽႂ်းၶဝ်႟။ ဢွၼ်ၵၼ်ၶိုၼ်းပွၵ်ႈမိူဝ်းတႃႉ။ ဢဝ်ၶေႃႈၵႂၢမ်းဢၼ်သင်ႇလၢတ်ႈၼၼ်ႉၶိုၼ်းပွၵ်ႈၵႂႃႇၵႃႈတီႈမိူင်းသူဢၼ်ၼမ်ႉႁွင်ႈတင်းလၢႆၶၼ်ႈၶႅၼ်ႈဝႆႉ၊မိူင်းဢၼ်မီးႁႅင်းတၼ်းၶူဝ်းယႂ်ႇၼၼ်ႉပၼ်ၶိုၼ်းတီႈၵူၼ်းသူဢၼ်တူဝ်ၶိင်းသုင်ယႂ်ႇသေယဝ်ႉ၊ၵႅၼ်ၶႅင်ႁၢဝ်ႉၵျၢမ်းလႄႈပဵၼ်တီႈဢၼ်လီၵူဝ်လီႁႄပုၼ်ႈၵူၼ်းလေႃးၵီႇတင်းလၢႆၼၼ်ႉတႃႉ။
ၵူၼ်းဢၼ်ယူႇသဝ်းၵႃႈၼိူဝ်လိၼ်မိူင်းၵူႈၵေႃႉၵူႈၵူၼ်းၶဝ်႟။ ဢွၼ်ၵၼ်ထွမ်ႇတႃႉ။ ဢွၼ်ၵၼ်လူတူၺ်းမိူဝ်ႈဢၼ်ပူၵ်းလၢမ်ႇၵႃႈၼိူဝ်လွႆတင်းလၢႆၼၼ်ႉတႃႉ။ ထွမ်ႇဢဝ်သဵင်ဢၼ်ပဝ်ႇၼႄးၶရႃႇၼၼ်ႉတႃႉ။-
ထႃႇဝရႃႉၽြႃး၊ မီးဢမိင်ႉတီႈၵဝ်လႄႈဝႃႈၸမ်ႉ၊ “ၵဝ်တၵ်းယူႇၵႃႈတီႈၽႃႉၵၢင်ႁၢဝ်လႄႈၵူမ်ႈတူၺ်းတဵတ်ႇတဵတ်ႇၼိမ်ၼိမ်မိူၼ်ၸိူဝ်ႉၼင်ႇၼမ်ႉၼၢႆးဢၼ်ဢွႆယူႇၼႂ်းၶမ်ႈၶိုၼ်းဢၼ်မႆႈႁွၼ်ႉၶိင်ႇၶၢဝ်းပၢတ်ႇၶဝ်ႈ၊မိူၼ်ၸိူဝ်ႉၼင်ႇဢၼ်လႅတ်ႇမႆႈႁွၼ်ႉၼိမ်ယူႇၸူဝ်ႈၶိင်ႇၵၢင်ဝၼ်းၼၼ်ႉဢေႃႈ။-
ၸူဝ်ႈဢၼ်ဢမ်ႇပႆႇသိမ်းဢဝ်ပုၵ်ႉမၢၵ်ႇၸပိတ်ႉ၊မိူဝ်ႈဢၼ်တုမ်ႇမၼ်းလူၼ်ႇႁူင်ႈလႄႈမၢၵ်ႇၸပိတ်ႉႁၢမ်ႇမႃးယူႇၼၼ်ႉရၢၼ်ႇသူႇတင်းလၢႆတၵ်းယႃႉၽဵဝ်ႈမဵဝ်း ဢေႇတီႇဢူဝ်းပီးယႃး၊ ပႅတ်ႈငၢႆႈၼႃႇမိူၼ်ၸိူဝ်ႉၼင်ႇဢဝ်မိတ်ႈတႅပ်းၵိင်ႇၶႃႈၶိူဝ်းမၢၵ်ႇၸပိတ်ႉပႅတ်ႈၼၼ်ႉဢေႃႈ။-
တူဝ်တၢႆၵူၼ်းသိုၵ်းၸိူဝ်းၼၼ်ႉတၵ်းပႅတ်ႈဝႆႉတီႈပၢင်ႇတီႈပိဝ်ပုၼ်ႈၼူၵ်ႉတင်းလၢႆတင်းတူဝ်ထိူၼ်ႇႁၢႆႉတင်းလၢႆဢေႃႈ။ ၼူၵ်ႉတင်းလၢႆတၵ်းၵိၼ်ၶဝ်မိူဝ်ႈၶၢဝ်းၶိင်ႇမႆႈလႄႈတူဝ်ထိူၼ်ႇႁၢႆႉတင်းလၢႆတၵ်းၵိၼ်ၶဝ်မိူဝ်ႈၶၢဝ်းၶိင်ႇၵတ်းဢေႃႈ၊” ဝႃႈၼင်ႇၼႆဢေႃႈ။
ၼႂ်းၶိင်ႇၵႃႇလႃႉၼၼ်ႉ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ တၵ်းႁပ်ႉဢဝ်လၢၵ်ႈသွင်ႇတီႈမိူင်းဢၼ်ၼမ်ႉႁွင်ႈတင်းလၢႆၶၼ်ႈၶႅၼ်ႈဝႆႉ၊မိူင်းဢၼ်မီးႁႅင်းတၼ်းၶူဝ်းယႂ်ႇ၊ၵူၼ်းဢၼ်တူဝ်ၶိင်းသုင်ယႂ်ႇ၊ၵႅၼ်ၶႅင်ႁၢဝ်ႈၵျၢမ်းလႄႈပဵၼ်တီႈဢၼ်လီၵူဝ်လီႁႄပုၼ်ႈၵူၼ်းလေႃးၵီႇတင်းလၢႆၼၼ်ႉဢေႃႈ။ ၶဝ်တၵ်းဢွၼ်ၵၼ်မႃးၵႃႈတီႈလွႆ ၸိဢုၼ်ႇ၊ တီႈဢၼ်ဝႆႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၼၼ်ႉဢေႃႈ။
ၼႆႉၸမ်ႉ၊ပဵၼ်ပျႃႇတိၵ်ႈၸဝ်ႈလၢတ်ႈလွင်ႈမိူင်း ဢေးၵျိပ်ႉ၊ ဢေႃႈ။ ထႃႇဝရႃႉၽြႃး၊ ၶီႇမွၵ်ႇၵုမ်ႈဢၼ်ၶၼ်ၽႂ်းၼႃႇၼၼ်ႉသေလႄႈမႃးၸူးတီႈမိူင်း ဢေးၵျိပ်ႉ၊ ယူႇဢေႃႈ။ ႁုၼ်ႇႁၢင်ႈသၢင်းထုၵူၼ်းမိူင်း ဢေးၵျိပ်ႉ၊ ၶဝ်မီးတၢင်းဢၼ်သၼ်ႇၶွၼ်းဝႆၵႃႈတီႈၽၢႆႇၼႃႈမၼ်းၸဝ်ႈလႄႈႁူဝ်ၸႂ်ၵူၼ်းဢၼ်ႁတ်းႁၢၼ်မိူင်း ဢေးၵျိပ်ႉ၊ တင်းလၢႆၼၼ်ႉၸိူမ်ႈယၢႆႈၵႂႃႇဢေႃႈ။-
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵဝ်တၵ်းတိုၵ်းယူင်းႁႂ်ႈၶဝ်ၼင်ႇၵၼ်ၵၼ်တိုၵ်းတေႃးၵၼ်ၵႃႈၼႂ်းမိူင်း ဢေးၵျိပ်ႉ၊ ပီႈၼွင်ႉၵၼ်ၼင်ႇၵၼ်ၵၼ်၊ၵူၼ်းၸမ်ၵၼ်ၼင်ႇၵၼ်ၵၼ်တၵ်းတိုၵ်းတေႃးၵၼ်ဢေႃႈ။ ဝဵင်းလူင်ၸိူဝ်းဢၼ်ၶေႉၶဵင်ႇၵၼ်ၼၼ်ႉတၵ်းတိုၵ်းတေႃးၵၼ်ဢေႃႈ။-
ၵဝ်တၵ်းယႃႉယူၵ်ႉတၢင်းၵျၢမ်ႇတၢင်းပွင်ၵူၼ်းမဵဝ်း ဢေးၵျိပ်ႉ၊ ၶဝ်ၼၼ်ႉသေလႄႈယႃႉပႅတ်ႈဢၵျူဝ်းတၢင်းၵမ်တၢင်းၵျၢင်ႉၶဝ်ဢေႃႈ။ ၶဝ်တၵ်းဢွၼ်ၵၼ်တွင်ႈထၢမ်ႁုၼ်ႇႁၢင်ႈသၢင်းထုတင်းလၢႆပုၼ်ႈတၢင်းၸွႆႈတၢင်းထႅမ်ၶဝ်၊တၵ်းၵႂႃႇၸူးတီႈမႄႈမေႃမႄႈမူတ်ႉလႂ်၊တီႈၽီၵူၼ်းတၢႆလႂ်၊တီႈၽိူဝ်ႉလႂ်ႁႂ်ႈလႆႈဢၵျၢမ်ႇၺၢၼ်ႇဢေႃႈ။-
ၵဝ်တၵ်းဢဝ်ၵူၼ်းမဵဝ်း ဢေးၵျိပ်ႉ၊ ၶဝ်ဢၢပ်ႈပၼ်ၵႃႈၼႂ်းမိုဝ်းၸဝ်ႈဢၼ်ၵျၢမ်းထၢမ်းၼႃႇၼၼ်ႉလႄႈၶုၼ်ႁေႃၶမ်းဢၼ်ႁၢဝ်ႈၵျၢမ်းၼႃႇပႃးၼိုင်ႈတၵ်းဢုပ်ႉပိူင်ႇၶဝ်ဢေႃႈ၊ဝႃႈၼင်ႇၼႆ ၵဝ်၊ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၼမ်ႉၵႃႈၼႂ်းမႄႈၼမ်ႉ ၼၢႆးလ်၊ တၵ်းယူတ်းယွမ်းၵႂႃႇလႄႈၼမ်ႉႁွင်ႈၼမ်ႉၵႄႈၵေႃႈတၵ်းယူတ်းႁႅင်ႈၵႂႃႇဢေႃႈ။-
ၼမ်ႉႁွင်ႈၼမ်ႉၵႄးဢၼ်တႅၵ်ႇၽႄၵႂႃႇၸိူဝ်းၼၼ်ႉတၵ်းမဵၼ်တူႇၵႂႃႇမိူဝ်ႈဢၼ်ၼမ်ႉႁႅင်ႈၵႂႃႇလွႆးလွႆးၼၼ်ႉဢေႃႈ။ မႆႉဢေႃႈတင်းမႆႉၶႅမ်လႂ်ၵေႃႈတၵ်းႁဵဝ်ႇႁႅင်ႈၵႂႃႇလႄႈ၊-
ပၢင်ႇတူင်ႈၼႃးဢၼ်ႁဵတ်းၸွမ်းၽင်ႇမႄႈၼမ်ႉ ၼၢႆးလ်၊ ၸိူဝ်းၼၼ်ႉတၵ်းႁႅင်ႈၵႂႃႇႁွင်ၵႂႃႇလႄႈလုလႅဝ်ႁၢႆလၢႆၵႂႃႇဢေႃႈ။-
ၵူၼ်းၸိူဝ်းဢၼ်ႁႃပႃၵႃႈၼႂ်းမႄႈၼမ်ႉ ၼၢႆးလ်၊ သေလႄႈလဵင်ႉတွင်ႉၶဝ်ၼၼ်ႉတၵ်းဢွၼ်ၵၼ်ႁႆႈႁွင်ႉပွင်ႉၶၢင်းၵူႈၵေႃႉၵူႈၵူၼ်းဢေႃႈ။ မဵတ်းၶဝ်လႄႈၶႄၶဝ်တၵ်းပဵၼ်ဢၼ်လၢႆလၢႆဢမ်ႇပွင်ႇလွင်ႈၵႃႈသင်ဢေႃႈ။-
ၶဝ်ၸိူဝ်းဢၼ်ႁဵတ်းၵၢၼ်ဢၼ်ပၼ်ႇဢၼ်တေႃးပိၵ်ႈၶျေႃးၼၼ်ႉၵေႃႈတၵ်းဢွၼ်ၵၼ်ယုင်ႈၸႂ်ၵႂင်ၸႂ်ဢေႃႈ။-
ၵူၼ်းတေႃးႁုၵ်ႇတင်းလၢႆတင်းၵူၼ်းၵိၼ်ၸၢင်ႈၵိၼ်ငႃတင်းလၢႆ၊တၵ်းမီးၸႂ်ဢၼ်ႁဵဝ်ႇဢၼ်ၸွပ်ႈၵႂႃႇဢေႃႈ။
မူးမၢတ်ႈၽွင်းမိူင်းဝဵင်း ၸေႃးၼႃႉ၊ တင်းလၢႆ၊ပဵၼ်ၵူၼ်းယွင်ႇၵူၼ်းမႃႈၵႂႃႇယဝ်ႉ။ ၵူၼ်းဢၼ်မီးပိင်ႇၺႃႇၼမ်မဵဝ်း ဢေးၵျိပ်ႉ၊ ၶဝ်ပၼ်တၢင်းၵျၢမ်ႇတၢင်းပွင်ဢၼ်မိူၵ်ႈဢၼ်လပ်းသိင်ႇဢေႃႈ။ ၶဝ်ၼၼ်ႉယင်းႁတ်းလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “ႁဝ်းၶႃႈပဵၼ်ၸိူဝ်ႉၶိူဝ်းဢၼ်မီးပိင်ႇၺႃႇတင်းၶုၼ်ႁေႃၶမ်းမိူဝ်ႈဢွၼ်ၼႆႉၼၼ်ႉဢေႃႈ၊” ဝႃႈၼင်ႇၼႆဢေႃႈ။-
ၶုၼ်ႁေႃၶမ်းမိူင်း ဢေးၵျိပ်ႉ၊ ႟။ ၵူၼ်းဢၼ်မီးပိင်ႇၺႃႇဢၼ်လၵ်းဢၼ်လႅမ်တီႈမႂ်းၼၼ်ႉမီးတီႈလႂ်မူတ်း။ ၸၢင်ႈၶႄးၶဝ်တၵ်းၽုၺ်ႇဢွၵ်ႇၼႄပျႃးလွင်ႈဢၼ် ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၵျၢမ်ႇပွင်လူၺ်ႈလွင်ႈမိူင်း ဢေးၵျိပ်ႉ၊ ၼၼ်ႉဢေႃႈ။-
မူးမၢတ်ႈၽွင်းမိူင်းဝဵင်း ၸေႃးၼႃႉ၊ တင်းဝဵင်း မႅမ်းၽိ၊ ၸိူဝ်းၼၼ်ႉပဵၼ်ၵူၼ်းယွင်ႇၵူၼ်းမႃႈၵႂႃႇယဝ်ႉ။ ၶဝ်ဢၢင်ႈတၵ်းဢွၼ်ႁူဝ်ၵူၼ်းဝၢၼ်ႈၵူၼ်းမိူင်းသေၵေႃႈၶဝ်ဢွၼ်ၵၼ်ၽိတ်းတၢင်းၵႂႃႇယဝ်ႉဢေႃႈ။-
လွင်ႈမၼ်းၸမ်ႉ၊ ထႃႇဝရႃႉၽြႃး၊ ႁဵတ်းႁႂ်ႈၶဝ်ပၼ်တၢင်းၵျၢမ်ႇဢၼ်ၵႂင်ၸႂ်ယုင်ႈၸႂ်ၵႂႃႇၼၼ်ႉဢေႃႈ။ ၵွပ်ႈပိူဝ်ႈၼႆလႄႈၵူၼ်းမိူင်း ဢေးၵျိပ်ႉ၊ တင်းလၢႆသၢင်ႈႁဵတ်းဢၼ်ၽိတ်းဢၼ်ပိူင်ႈ မိူၼ်ၸိူဝ်ႉၼင်ႇဢၼ်ၵူၼ်းမဝ်းလဝ်ႈပရၢတ်ႈလူမ်ႉၵႃႈၼိူဝ်ႁၢၵ်ႈတူဝ်ၸဝ်ႈၵဝ်ႇၼၼ်ႉဢေႃႈ။-
ၵူၼ်းမိူင်း ဢေးၵျိပ်ႉ၊ ၸႃႉဢဝ်ၵူၼ်းမီးလႄႈၵူၼ်းၽၢၼ်၊ၵူၼ်းဢၼ်မီးၵုင်ႇသရေႇလႄႈၵူၼ်းယူဝ်းယူဝ်းၸိူဝ်းၼၼ်ႉဢမ်ႇၸွႆႈဢမ်ႇထႅမ်လႆႈသေၵေႃႉသေၵူၼ်း။
ၼႂ်းမိုဝ်ႉဝၼ်းၼၼ်ႉၵူၼ်းမဵဝ်း ဢေးၵျိပ်ႉ၊ တင်းလၢႆတၵ်းမိူၼ်ၽူႈယိင်းလႄႈမီးၸႂ်ဢၼ်ၸၢင်ႈၵူဝ်ၸၢင်ႈႁႄဢေႃႈ။ ၶဝ်တၵ်းၵူဝ်ႁႄသၼ်ႇဝႆယၢမ်းမိူဝ်ႈဢၼ် ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ယဵတ်ႇၶႅၼ်မိုဝ်းၸဝ်ႈလႄႈပၼ်တၢမ်ႇတီႈၶဝ်ၼၼ်ႉဢေႃႈ။-
ၵူၼ်းမဵဝ်း ဢေးၵျိပ်ႉ၊ တင်းလၢႆတၵ်းဢွၼ်ၵၼ်ၵူဝ်ႁႄၵူၼ်းမဵဝ်း ယုတႃႉ၊ ၶဝ်ယူႇသေႇသေႇမိူဝ်ႈဢၼ်ပိူၼ်ႈမွၵ်ႇလၢတ်ႈပၼ်သတိတီႈၶဝ်လူၺ်ႈလွင်ႈဢၼ် ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မႄးႁႅၼ်းဝႆႉပုၼ်ႈၶဝ်ၸိူဝ်ႉၼင်ႇႁိုဝ်ၼၼ်ႉဢေႃႈ။
ၼႂ်းမိုဝ်ႉဝၼ်းၶိင်ႇၵႃႇလႃႉၼၼ်ႉၵႃႈၼႂ်းဝဵင်းလူင် ဢေးၵျိပ်ႉ၊ ၼၼ်ႉတၵ်းလႆႈလၢတ်ႈၵႂၢမ်းၽႃႇသႃႇ ႁေႇပြႄး၊ ၵူၺ်းၵူၺ်းႁႃႈဝဵင်းဢေႃႈ။ ၵူၼ်းၸိူဝ်းၼၼ်ႉသမ်ႉတၵ်းဢွၼ်ၵၼ်ၶၢမ်ႇၵတိသဵတ်ႈၸႃႇၵႃႈၼႂ်းၼႃႇမႃႉၸိုဝ်ႈသဵင် ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ဢေႃႈ။ ၼႂ်းဝဵင်းလူင်ၸိူဝ်းၼၼ်ႉဝဵင်းၼိုင်ႈတၵ်းလႆႈႁွင်ႉၸိုဝ်ႈဝႃႈ၊ “ ဝဵင်းတႃဝၼ်း၊ ” ဢေႃႈ။
ၼႂ်းမိုဝ်ႉဝၼ်းၶိင်ႇၵႃႇလႃႉၼၼ်ႉတၵ်းမီးၶဵင်ႇတၢင်းလူႇပုၼ်ႈ ထႃႇဝရႃႉၽြႃး၊ ၵႃႈၼႂ်းမိူင်း ဢေးၵျိပ်ႉ၊ ဢိၵ်ႇတင်းသဝ်ႁိၼ်ဢၼ်သၢၵ်ႈၵၢပ်ႈဝႆႉတီႈမၼ်းၸဝ်ႈၵႃႈတီႈလႅၼ်လိၼ်မိူင်း ဢေးၵျိပ်ႉ၊ ဢေႃႈ။-
ဢၼ်ၸိူဝ်းၼၼ်ႉတၵ်းပဵၼ်လၢၵ်ႈၶၼႃႇသၢၵ်ႈသေႇလွင်ႈဢၼ် ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၵိင်းဝၢပ်ႈယူႇၵႃႈၼႂ်းမိူင်း ဢေးၵျိပ်ႉ၊ ဢေႃႈ။ ၼႂ်းမိူဝ်ႈဢၼ်ၵူၼ်းၵႃႈတီႈၼၼ်ႈလႆႈၶၢမ်ႇတၢင်းဢၼ်တဵၵ်းငႅၼ်းလႄႈႁွင်ႉႁႃ ထႃႇဝရႃႉၽြႃး၊ ပုၼ်ႈတၢင်းၸွႆႈတၢင်းထႅမ်ၸိုင်၊မၼ်းၸဝ်ႈတၵ်းပွႆႇၸႂ်ႉၵေႃႉဢၼ်ၵႄႇသႄႇၶျွတ်ႈဢဝ်ႁႂ်ႈၵႄႇၼုၵ်ႈဢဝ်ၶဝ်ဢေႃႈ။-
ထႃႇဝရႃႉၽြႃး၊ တၵ်းၼႄပျႃးတူဝ်ၸဝ်ႈၵဝ်ႇၵႃႈတီႈၵူၼ်းမဵဝ်း ဢေးၵျိပ်ႉ၊ တင်းလၢႆလႄႈၶဝ်ၸိူဝ်းၼၼ်ႉတၵ်းႁုၸၵ်းမၼ်းၸဝ်ႈလႄႈဢွၼ်ၵၼ်ဝႆႈသႃမၼ်းၸဝ်ႈဢေႃႈ။ ၼႂ်းမိုဝ်ႉဝၼ်းၼၼ်ႉၶဝ်တၵ်းပႃးဢဝ်ၶိူင်ႈတၢင်းလူႇ၊ဢိၵ်ႇတင်းတူဝ်တင်းလူႇဢၼ်တၵ်းလႆႈဢဝ်တုတ်ႇၽႆးၼၼ်ႉဢဝ်သၢၵ်ႈၵၢပ်ႈၵႃႈတီႈမၼ်းၸဝ်ႈဢေႃႈ။ ၶဝ်တၵ်းဢွၼ်ၵၼ်ဝႆႉၵတိသဵတ်ႈၸႃႇတီႈ ထႃႇဝရႃႉၽြႃး၊ လႄႈႁဵတ်းၸွမ်းၵႃႈၼင်ႇဢၼ်ၶဝ်ဝႆႉၵတိသဵတ်ႈၸႃႇၼၼ်ႉဢေႃႈ။-
ထႃႇဝရႃႉၽြႃး၊ တၵ်းပၼ်တၢမ်ႇတီႈၵူၼ်းမဵဝ်း ဢေးၵျိပ်ႉ၊ တင်းလၢႆလႄႈမၼ်းၸဝ်ႈသမ်ႉတၵ်းႁႂ်ႈႁွႆးတၢမ်ႇၶဝ်ၶႅၼ်းမႃးၶိုၼ်းဢေႃႈ။ ၼႂ်းမိုဝ်ႉဝၼ်းၼၼ်ႉၶဝ်တၵ်းၶၢႆႉပုတ်ႈမႃးတီႈ ထႃႇဝရႃႉၽြႃး၊ လႄႈမၼ်းၸဝ်ႈတၵ်းထွမ်ႇဢဝ်ၵႂၢမ်းသူးတွင်းၶဝ်လႄႈႁႂ်ႈႁွႆးတၢမ်ႇၶဝ်ၶႅၼ်းမႃးဢေႃႈ။
ၼႂ်းမိုဝ်ႉဝၼ်းၶိင်ႇၵႃႇလႃႉၼၼ်ႉတၵ်းမီးသဵၼ်ႈတၢင်းလူင်ဢၼ်သိုပ်ႇဝူင်ႈၵၢင်မိူင်း ဢေးၵျိပ်ႉ၊ တင်းမိူင်း ဢႃႇသီးရီးယႃး၊ ဢေႃႈ။ ၵူၼ်းမိူင်းသွင်မိူင်းၼၼ်ႉတၵ်းဢွၼ်ၵၼ်ၵႂႃႇၵႂႃႇမႃးမႃးၶဝ်ႈၸူးၵၼ်ယူႇလႄႈၵူၼ်းမိူင်းတင်းသွင်မိူင်းတၵ်းဢွၼ်ၵၼ်ႁဵတ်းဝၢတ်ႈၵူဝ်းၵႂၢႆႇႁူမ်ႈလူၺ်ႈၵၼ်ဢေႃႈ။-
ၼႂ်းမိုဝ်ႉဝၼ်းၶိင်ႇၵႃႇလႃႉၼၼ်ႉၵူၼ်းမဵဝ်း ဢိသရေး၊ တၵ်းႁူမ်ႈပွင်းလူၺ်ႈၵၼ်တင်းၵူၼ်းမိူင်း ဢေးၵျိပ်ႉ၊ တင်းမိူင်း ဢႃႇသီးရီးယႃး၊ သေယဝ်ႉ၊ၶဝ်သၢမ်မိူင်းၼၼ်ႉတၵ်းပဵၼ်တီႈဢၼ်ႁဵတ်းတၢင်းလီမၢင်ႇၵလႃႇၵႃႈၼႂ်းၶိုင်ႈၵၢင်လိၼ်မိူင်းဢေႃႈ။-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ တၵ်းပၼ်တၢင်းလီတီႈၶဝ်သေလႄႈမီးဢမိင်ႉၸမ်ႉ၊ “ႁႂ်ႈၵူၼ်းၵဝ်မဵဝ်း ဢေးၵျိပ်ႉ၊ မဵဝ်း ဢႃႇသီးရီးယႃး၊ ဢၼ်ၵဝ်ၽၢၼ်ႇသၢင်းႁဵတ်းပဵၼ်၊မဵဝ်း ဢိသရေး၊ ဢၼ်ၵဝ်လိူၵ်ႈဢဝ်ဝႆႉၸိူဝ်းၼၼ်ႉမီးမၢင်ႇၵလႃႇသေၵမ်းလူၺ်ႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်း သႃႇၵုၼ်ႇ၊ မိူင်း ဢႃႇသီးရီးယႃး၊ ၼၼ်ႉမီးဢမိင်ႉတီႈၸဝ်ႈၵွၼ်းတပ်ႉသိုၵ်းလူင်မဵဝ်း ဢႃႇသီးရီးယႃး၊ ၶဝ်ႁႂ်ႈၵႂႃႇတိုၵ်းတေႃးဝဵင်းလူင် ဢႃႇၸုတ်ႉ၊ မိူင်း ၽိလိတ်ႉတိ၊ ဢေႃႈ။-
ၸူဝ်ႈဢွၼ်တၢင်းၼၼ်ႉသၢမ်ပီ ထႃႇဝရႃႉၽြႃး၊ ၸႂ်ႉ ဢိသႃႇယႃႉ၊ လုၵ်ႈၸၢႆး ဢႃႇမူတ်ႉ၊ ႁႂ်ႈမၼ်းထွတ်ႇသွၵ်းတိၼ်၊ဢိၵ်ႇတင်းထွတ်ႇၶူဝ်းၼင်ပေႃဢၼ်မၼ်းၼုင်ႈမႆယူႇၼၼ်ႉပႅတ်ႈဢေႃႈ။ မၼ်းႁဵတ်းၸွမ်းၵႃႈၼင်ႇဢၼ်ဝႃႈၼၼ်ႉလႄႈယူႇတူဝ်ပူၺ်ယူႇ၊ယင်းဢမ်ႇတိုဝ်းသွၵ်းတိၼ်လႄႈၵႂႃႇမႃးယူႇဢေႃႈ။-
ၼႂ်းမိူဝ်ႈဢၼ်ဝဵင်း ဢႃႇၸုတ်ႉ၊ လႆႈၶၢမ်ႇတၢင်းဢၼ်တိုၵ်းပႄႉသိမ်းဢဝ်ယဝ်ႉၼၼ်ႉ၊ ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ၶႃႈၵဝ်၊ ဢိသႃႇယႃႉ၊ ယူႇတူဝ်ပူၺ်ယူႇ၊ယင်းဢမ်ႇတိုဝ်းသွၵ်းတိၼ်လႄႈၵႂႃႇမႃးယူႇသၢမ်ပီတဵမ်တဵမ်ၼၼ်ႉႁႂ်ႈလႆႈၼႄပျႃးၼိမိၵ်ႈလၢၵ်ႈၶၼႃႇတၵ်းပဵၼ်မႃးၵႃႈတီႈမိူင်း ဢေးၵျိပ်ႉ၊ တင်းမိူင်း ဢေႇတီႇဢူဝ်းပီးယႃး၊ ၼၼ်ႉဢေႃႈ။-
ၶုၼ်ႁေႃၶမ်းမိူင်း ဢႃႇသီးရီးယႃး၊ တၵ်းသိမ်းဢဝ်ၵူၼ်းမိူင်းသွင်မိူင်းၼၼ်ႉႁႂ်ႈၵႂႃႇတူဝ်ပူၺ်လႄႈၶၢမ်ႇပဵၼ်ၶႃႈဢေႃႈ။ ၵူၼ်းၸဵမ်ၼုမ်ႇၸဵမ်ထဝ်ႈတၵ်းဢမ်ႇလႆႈတိုဝ်းသွၵ်းတိၼ်၊တၵ်းလႆႈယူႇတူဝ်ပူၺ်ယူႇ၊ယင်းဢမ်ႇမီးၵႃႈသင်ဢၼ်တၵ်းႁူမ်ႇၵူမ်ႇၵူၼ်ႈၶဝ်ႁႂ်ႈလႆႈယႃႉသရေႇၵူၼ်းမိူင်း ဢေးၵျိပ်ႉ၊ ဢေႃႈ။-
ၶဝ်ၸိူဝ်းဢၼ်ဝႆႉၸႂ်ဝၢင်းၸႂ်ၵႃႈၼိူဝ်မိူင်း ဢေႇတီႇဢူဝ်းပီးယႃး၊ လႄႈဢုပ်ႇဝၢဝ်းလူၺ်ႈမိူင်း ဢေးၵျိပ်ႉ၊ ၼၼ်ႉ၊တၵ်းဢွၼ်ၵၼ်ၵူဝ်ႁႄလႄႈဢူၵ်းဢၢႆသေယဝ်ႉ၊တီႈဢၼ်ၶဝ်လီမုင်ႈမွင်းၼၼ်ႉတၵ်းထၢတ်ႇယဵၼ်ၵႂႃႇဢေႃႈ။-
ၼႂ်းမိုဝ်ႉဝၼ်းၶိင်ႇၵႃႇလႃႉၼၼ်ႉၶဝ်ၸိူဝ်းဢၼ်ယူႇၸွမ်းၽင်ႇပၢင်ႇလၢႆႇမိူင်း ၽိလိတ်ႉတိ၊ ၼၼ်ႉတၵ်းလၢတ်ႈလႄႈဝႃႈ၊ ‘တူၺ်းလူး။ တီႈဢၼ်ႁဝ်းမုင်ႈမွင်းယူႇ၊တီႈဢၼ်ႁဝ်းပႆၸူးလႄႈသွၼ်ႈပိုင်ႈႁႂ်ႈလႆႈလွတ်ႈသေၵႃႈၼႂ်းမိုဝ်းၶုၼ်ႁေႃၶမ်းမိူင်း ဢႃႇသီးရီးယႃး၊ ၼၼ်ႉပဵၼ်ၸိူဝ်ႉၼင်ႇၼႆဝႆႉယဝ်ႉလူင်ပႄႇ။ ႁဝ်းၼႆႉတၵ်းလႆႈႁဵတ်းၸိူဝ်ႉၼင်ႇႁိုဝ်လွတ်ႈလႆႈ၊’ ဝႃႈၼႆဢေႃႈ၊” ဝႃႈၼင်ႇၼႆဢေႃႈ။
ဢၼ်ၼႆႉၸမ်ႉ၊ပဵၼ်ပျႃႇတိၵ်ႈလၢတ်ႈလွင်ႈမိူင်း ပႃႇပုလုၼ်ႇ၊ ဢေႃႈ။ ၸိူဝ်ႉၼင်ႇဢၼ်လူမ်းၽိဝ်ႁုင်ထူဝ်းၶၢမ်ႈထိူၼ်ႇလႅင်ႉမႃးၼၼ်ႉ၊တၢင်းဢၼ်ယႃႉၽဵဝ်ႈတၵ်းလုၵ်ႉၵႃႈတီႈမိူင်းဢၼ်လီၵူဝ်လီႁႄၼႃႇၼၼ်ႉမႃးဢေႃႈ။-
ရူႇပႃႇရူင်ႇဢၼ်ယၢပ်ႇၼႃႇၽိုတ်ႇၼႃႇပေႃႇမႃးတီႈၵဝ်ဢေႃႈ။ ပဵၼ်ရူႇပႃႇရူင်ႇလွင်ႈၵေႃႉဢၼ်ၸၢင်ႈပႅတ်ႉလႅၼ်၊ဢၼ်ၸၢင်ႈႁိမ်ႁူင်ႇဢဝ်ဢေႃႈ။ မိူင်း ဢေႇလမ်ႇ၊ ႟။ တိုၵ်းတေႃးတႃႉ။ မိူင်း မေႇတိ၊ ႟။ လွမ်ႉႁွပ်ႈဝဵင်းလူင်တင်းလၢႆဝႆႉတႃႉ။ ၽြႃးပဵၼ်ၸဝ်ႈတၵ်းႁႂ်ႈတုၵ်ႉၶႃႉဢၼ်ပဵၼ်မႃးၵွပ်ႈပိူဝ်ႈၵူၼ်းမိူင်း ပႃႇပုလုၼ်ႇ၊ ၼၼ်ႉထၢတ်ႇယဵၼ်ယဝ်ႉ။
ၵႃႈဢၼ်ၵဝ်လႆႈႁၼ်၊ၵႃႈဢၼ်ၵဝ်လႆႈငိၼ်းမႃးၼႂ်းရူႇပႃႇရူင်ႇၼၼ်ႉၸိုင်၊ႁဵတ်းႁႂ်ႈၵဝ်ၵူဝ်ႁႄလႄႈၸဵပ်းၼႃႇထၢၼ်ႈပေႃးပဵၼ်ၸိူဝ်ႉၼင်ႇဝူၺ်ႇတၼႃႇမႄႈယိင်းဢၼ်ၵိူတ်ႇလဵင်ႉလုၵ်ႈလႆႈၶၢမ်ႇၼၼ်ႉဢေႃႈ။-
ၵွၵ်းႁူဝ်ၵဝ်ထၢၼ်ႈပေႃးပၼ်ႇပေႃးမဝ်းလႄႈလီၵူဝ်လီႁႄထၢၼ်ႈပေႃးသၼ်ႇသၼ်ႇသၢႆသၢႆဢေႃႈ။ ၵဝ်မုင်ႈမွင်းႁႂ်ႈႁွတ်ႈထိုင်ၶိင်ႇႁူဝ်ၶမ်ႈသေၵေႃႈဢမ်ႇမီးဢၵျူဝ်းၵျေးၸူး။ ၵူၺ်းမီးတၢင်းဢၼ်တူၵ်းၸႂ်ဢေႃႈ။
ၵႃႈၼႂ်းရူႇပႃႇရူင်ႇၼၼ်ႉပွႆးၵိၼ်ပွႆးၶူပ်းမႄးႁႅၼ်းတၼ်းဝႆႉယဝ်ႉ။ ၽႃႈသိူဝ်ႇတင်းလၢႆၵေႃႈပူသိူဝ်ႇဝႆႉပုၼ်ႈၶႅၵ်ႇတင်းလၢႆတၵ်းၼင်ႈၼၼ်ႉယဝ်ႉ။ ၶဝ်ဢွၼ်ၵၼ်ၵိၼ်ယူႇသူတ်ႉယူႇယဝ်ႉ။ မိူဝ်ႈၼၼ်ႉၵမ်းလဵဝ်မီးဢမိင်ႉႁွတ်ႈမႃးလႄႈဝႃႈ၊ “ၶုၼ်တင်းလၢႆ႟။ ဢွၼ်ၵၼ်မႄးႁႅၼ်းၶိူင်ႈႁႄႉလၢၵ်ႈၼၢၵ်ႈသူတႃႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ မီးဢမိင်ႉတီႈၵဝ်လႄႈဝႃႈ၊ “မႂ်းၵႂႃႇလႄႈၶၢၼ်းဝႆႉၵူၼ်းပႂ်ႉယၢမ်းၵေႃႉၼိုင်ႈသေယဝ်ႉ၊ႁႂ်ႈမၼ်းမွၵ်ႇလၢတ်ႈၵႃႈဢၼ်မၼ်းႁၼ်ၼၼ်ႉတႃႉ။-
ပေႃးမၼ်းလႆႈႁၼ်ၵူၼ်းတင်းလၢႆၶီႇမႃႉၵူႈၵၼ်မႃးသွင်ၵေႃႉ၊သွင်ၵေႃႉ၊ဢိၵ်ႇတင်းၵူၼ်းၶီႇမႃႉလီႈတင်းၵူၼ်းၶီႇၵလႃႇဢုၵ်ႈမႃးယူႇၼၼ်ႉၸိုင်၊ႁႂ်ႈမၼ်းႁဵတ်းသတိလူတူၺ်းထွမ်ႇငိၼ်းၸေးၸေးၸွတ်ႇၸွတ်ႇတႃႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၵူၼ်းပႂ်ႉယၢမ်းႁွင်ႉပၢဝ်ႇႁွင်ႉသေႃႇလႄႈဝႃႈ၊ “ၸဝ်ႈတီႈၶႃႈ။ ၵဝ်ၶႃႈၸုၵ်းပႂ်ႉယၢမ်းယူႇၵႃႈတီႈဢၼ်ၵဝ်ၶႃႈပႂ်ႉယူႇၼႆႉတင်းၶိုၼ်းတင်းဝၼ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၵမ်းလဵဝ်ၶဝ်ၼၼ်ႉႁွတ်ႈမႃးဢေႃႈ။ ၵူၼ်းၶီႇမႃႉၶဝ်ၶီႇမႃႉၵူႈၵၼ်မႃးသွင်ၵေႃႉ၊သွင်ၵေႃႉဢေႃႈ။ ၵူၼ်းပႂ်ႉယၢမ်းၼၼ်ႉပၢဝ်ႇသေႃႇသဵင်ၶၢဝ်ႇလႄႈဝႃႈ၊ “ဝဵင်း ပႃႇပုလုၼ်ႇ၊ လူမ်းပင်းယဝ်ႉ၊ၵႃႈဢၼ်ပဵၼ်ႁုၼ်ႇႁၢင်ႈသၢင်းထုဢၼ်ၶဝ်ဝႆႈသႃၼၼ်ႉလႆႈၶၢမ်ႇတၢင်းဢၼ်ႁၵ်းႁိၵ်းတူၵ်းလႅဝ်ၸွတ်ႇတူဝ်ႈၵႂႃႇၵႃႈၼိူဝ်လိၼ်မိူင်းယဝ်ႉ၊” ဝႃႈၼင်ႇၼႆဢေႃႈ။
ၵူၼ်းၵဝ်မဵဝ်း ဢိသရေး၊ ၶဝ်႟။ ၵဝ်လႆႈၽတ်းသူမိူၼ်ၸိူဝ်ႉၼင်ႇၵဝ်ၽတ်းၶဝ်ႈၵျုင်ႇၼၼ်ႉယဝ်ႉလႄႈ၊တေႃႈလဵဝ်ၼႆႉၵဝ်ဢဝ်ၵႃႈဢၼ်ၵဝ်လႆႈငိၼ်းၵႃႈတီႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ဢၼ်ပဵၼ်ၽြႃးမဵဝ်း ဢိသရေး၊ မီးဢမိင်ႉသင်ႇလၢတ်ႈၵႂႃႇတီႈသူဢေႃႈ။
ဢၼ်ၼႆႉၸမ်ႉ၊ပဵၼ်ပျႃႇတိၵ်ႈလၢတ်ႈလွင်ႈမိူင်း ဢေႇတုမ်ႇ၊ ဢေႃႈ။ ၵူၼ်းၵေႃႉၼိုင်ႈယူႇၵႃႈတီႈမိူင်း ဢေႇတုမ်ႇ၊ ႁွင်ႉပၢဝ်ႇတီႈၵဝ်လႄႈဝႃႈ၊ “ၵူၼ်းပႂ်ႉယၢမ်း႟။ ၶိင်ႇၵၢင်ၶိုၼ်းၼႆႉတၵ်းပူၼ်ႉၵႂႃႇမိူဝ်ႈလႂ်။ ၶိင်ႇၵၢင်ၶိုၼ်းတၵ်းသဵင်ႈသုတ်းမိူဝ်ႈလႂ်၊မွၵ်ႇလၢတ်ႈၵဝ်တႃႉ၊” ဝႃႈၼင်ႇၼႆဢေႃႈ။
ၵဝ်ၶိုၼ်းလၢတ်ႈလႄႈဝႃႈ၊ “ၶိင်ႇၵၢင်ၼႂ်မႃးယူႇယဝ်ႉ။ ၵူၺ်းၵႃႈ၊ၶိင်ႇၵၢင်ၶိုၼ်းသမ်ႉတၵ်းၶိုၼ်းမႃးထႅင်ႈဢေႃႈ။ ပေႃးမႂ်းၶႂ်ႈထၢမ်ထႅင်ႈၸိုင်၊ၶိုၼ်းမႃးထၢမ်ထႅင်ႈတႃႉ၊” ဝႃႈၼင်ႇၼႆဢေႃႈ။
ဢၼ်ၼႆႉၸမ်ႉ၊ပဵၼ်ပျႃႇတိၵ်ႈပုၼ်ႈမိူင်း ဢရေးပီးယႃး၊ ဢေႃႈ။ မုၵ်ႉၵူၼ်းၸိူဝ်းၵူၼ်းမိူင်း တေႇတၼ်ႇ၊ ဢၼ်ဢွၵ်ႇတႃႈပႆတၢင်းလႄႈၶျႃးပၢင်ၵႃႈၼႂ်းမိူင်း ဢရေးပီးယႃး၊ ဢၼ်ပဝ်ႇဢၼ်လၢပ်ႈၼၼ်ႉၶဝ်႟။-
ပၼ်ၼမ်ႉၵိၼ်တီႈၶဝ်ၸိူဝ်းဢၼ်ယၢၵ်ႇၼမ်ႉလႄႈမႃးၸူးတီႈသူၼၼ်ႉတႃႉ။ ၶဝ်ၸိူဝ်းဢၼ်ယူႇသဝ်းၼႂ်းမိူင်း တေႇမႃႉ၊ ၶဝ်႟။ ပၼ်ၶဝ်ႈၼမ်ႉတၢင်းၵိၼ်တီႈၶဝ်ၸိူဝ်းဢၼ်ပၢႆႈသိုၵ်းပၢႆႈသိူဝ်ၼၼ်ႉတႃႉ။-
ၵူၼ်းတင်းလၢႆဢွၼ်ၵၼ်ဢွၵ်ႇပၢႆႈႁႂ်ႈလွတ်ႈသေၵႃႈတီႈၽေးလၢပ်ႇဢၼ်ထွတ်ႇဝႆႉ၊ၽေးပိုၼ်ၵၢင်ႇဢၼ်ဝူတ်ႈဝႆႉ၊ဢိၵ်ႇတင်းၽေးတင်းသဵင်ႈတင်းမူတ်းဢၼ်ပဵၼ်မႃးၼႂ်းသိုၵ်းၼႂ်းသိူဝ်ၼၼ်ႉဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ မီးဢမိင်ႉတီႈၵဝ်လႄႈဝႃႈ၊ “မိူဝ်ႈဢၼ်ၸေးပီၼိုင်ႈလီလီယဝ်ႉၼၼ်ႉမုၼ်သရေႇၵူၼ်းၸိူဝ်ႉၶိူဝ်း ၵေႇတႃႇ၊ တၵ်းလပ်ႉႁၢႆၵႂႃႇဢေႃႈ။-
ၵူၼ်းယိပ်းၵၢင်ႇၼႂ်းၵူၼ်းမဵဝ်း ၵေႇတႃႇ၊ ၼၼ်ႉႁတ်းႁၢၼ်ၼႃႇလူင်လၢင်သေၵေႃႈ၊ၶဝ်တၵ်းၵိုတ်းၵျၢၼ်ႇယူႇဢိတ်းဢီႈၼိုင်ႈၵူၺ်းယဝ်ႉဢေႃႈ၊” ဝႃႈၼႆၵဝ်၊ ထႃႇဝရႃႉၽြႃး၊ မဵဝ်း ဢိသရေး၊ မီးဢမိင်ႉဢေႃႈ။
ဢၼ်ၼႆႉၸမ်ႉ၊ပဵၼ်ပျႃႇတိၵ်ႈလၢတ်ႈလွင်ႈ ပၢင်ႇႁူၺ်ႈရူႇပႃႇရူင်ႇ၊ ဢေႃႈ။ ပဵၼ်ၸိူဝ်ႉၼင်ႇႁိုဝ်ယူႇဝႃႈၼႆၸမ်ႉ၊ၵွပ်ႈသင်လႄႈၵူၼ်းဝဵင်းတင်းလၢႆဢွၼ်ၵၼ်ႁဵတ်းပွႆးယူႇၵႃႈၼိူဝ်ၸွမ်ႁိူၼ်းၼၼ်ႉ။-
ၵူၼ်းဝဵင်းတင်းဝဵင်းသူပ်းၼမ်သဵင်ၼမ်လႄႈႁဵတ်းဢူၼ်ဢဵၼ်မေႃးမႄးယူႇ၊သႂၢင်ႇသိူဝ်းယူႇ။ ၵူၼ်းမႂ်းဢၼ်တၢႆၼႂ်းၼႃႈသိုၵ်းၼၼ်ႉတၢႆလူၺ်ႈတၢင်းဢၼ်တိုၵ်းၵၼ်တေႃးၵၼ်ဢမ်ႇၸႂ်ႈ။-
ၶုၼ်မႂ်းတင်းသဵင်ႈတင်းလူင်ၼၼ်ႉဢွၵ်ႇပၢႆႈလႄႈလႆႈၶၢမ်ႇတၢင်းဢၼ်တိၺွပ်းလႆႈၸူဝ်ႈဢၼ်ဢမ်ႇပႆႇယိုဝ်းပိုၼ်ၵၢင်ႇသေလႅမ်ႈၼၼ်ႉဢေႃႈ။-
တေႃႈလဵဝ်ၼႆႉဝႆႉပႅတ်ႈႁႂ်ႈၵဝ်မီးယူႇၵေႃႉလဵဝ်လႄႈႁႂ်ႈၵဝ်လႆႈမီးတၢင်းဢၼ်ၶူမ်ၸႂ်ၶူမ်ၶေႃးၼႃႇလႄႈႁွင်ႉႁႆႈပုၼ်ႈၵူၼ်းၵဝ်ၸိူဝ်းဢၼ်တၢႆၼၼ်ႉတႃႉ။ ယႃႇပေၶတ်းၸႂ်ၵျူဝ်းၸႃးႁႂ်ႈၵဝ်ပျေႇၸႂ်ၼၼ်ႉသေၵမ်း။-
မိုဝ်ႉဝၼ်းၼၼ်ႉပဵၼ်ၶိင်ႇဢၼ်ၶၢမ်ႇတုၵ်ႉၶႃႉတၢင်းၽၢၼ်၊ၶိင်ႇဢၼ်သုမ်းသိုၵ်းသုမ်းသိူဝ်၊ၶိင်ႇဢၼ်ၵႂၢင်ၸႂ်ယုင်ႈၸႂ်ၵႃႈၼႂ်း ပၢင်ႇႁူၺ်ႈရူႇပႃႇရူင်ႇ၊ ၼၼ်ႉဢေႃႈ။ ၸဝ်ႈပူဝ်ႇပႃႇၵၢင်ႁၢဝ်၊ၸဝ်ႈထႃႇဝရႃႉၽြႃး၊ ၼၼ်ႉပွႆႇႁႂ်ႈပဵၼ်ၵႃႈၼိူဝ်ႁဝ်းဢေႃႈ။ လမ်းဝဵင်းႁဝ်းၵေႃႈလႆႈၶၢမ်ႇတၢင်းဢၼ်ၵိူၼ်ႇယႃႉလူမ်ႉပင်းယဝ်ႉလႄႈၵႃႈတီႈၼိူဝ်လွႆတင်းလၢႆၼၼ်ႉမီးသဵင်ဢၼ်ႁွင်ႉသႅၼ်ႇယူႇပုၼ်ႈတၢင်းဢၼ်ၸွႆႈထႅမ်ဢေႃႈ။
ၵူၼ်းသိုၵ်းဝဵင်း ဢေႇလမ်ႇ၊ ၼၼ်ႉပႃးဢဝ်ၵၢင်ႇဢဝ်ပိုၼ်လႄႈလေႃႉမႃႉသိုၵ်းလႂ်၊ၵူၼ်းသိုၵ်းၶီႇမႃႉလႂ်မႃးယူႇဢေႃႈ။ ၵူၼ်းသိုၵ်းမဵဝ်း ၵိရႃႉ၊ ၼၼ်ႉ၊ပႃးဢဝ်ၶိူင်ႈႁႄႉလၢၵ်ႈၼၢၵ်ႈလႄႈမႃးဢေႃႈ။-
ပၢင်ႇႁူၺ်ႈမိူင်း ယုတႃႉ၊ ဢၼ်ၽုၼ်ႇၼမ်ႉမၼ်းလိၼ်လီၼႃႇၼၼ်ႉတဵမ်ဝႆႉတင်းလေႃႉမႃႉသိုၵ်းတင်းလၢႆလႄႈ၊ၵူၼ်းသိုၵ်းတင်းလၢႆၶီႇမႃႉလႄႈၸုၵ်းယူႇၵႃႈတီႈၽၢႆႇၼႃႈၽၵ်းတူဝဵင်းဢေႃႈ။-
ဢၼ်ၵႅတ်ႇၶႄႁႄႉၵင်ႈၵူၼ်းမဵဝ်း ယုတႃႉ၊ ယူႇတင်းသဵင်ႈတင်းလူင်ၼၼ်ႉမၼ်းၸဝ်ႈဢဝ်ၵႂႃႇယဝ်ႉဢေႃႈ။ မိူဝ်ႈဢၼ်လွင်ႈတၢင်းၼၼ်ႉပဵၼ်မႃးၸိုင်၊သူလူတူၺ်းၶိူင်ႈလၢၵ်ႈၼၢၵ်ႈဢၼ်မီးၵႃႈၼႂ်းႁေႃၼႂ်းထိူၼ်ႇတီႈဢၼ်သိမ်းလၢၵ်ႈၼၢၵ်ႈၼၼ်ႉသေလႄႈ။
လႆႈႁၼ်တီႈဢၼ်လမ်းဝဵင်း ယေႇရုသလႅမ်ႇ၊ ဢၼ်ထုၵ်ႇလီမႄးၵုမ်းမႄးႁဵတ်းၼၼ်ႉလၢႆတီႈလၢႆလႅၼ်ဢေႃႈ။ ၼင်ႇၼၼ်ႉလႄႈသူၸုဢဝ်သိမ်းဢဝ်ၼမ်ႉတင်းလၢႆဝႆႉၵႃႈၼႂ်းၼမ်ႉၼွင်တီႈဢၼ်တႅမ်ႇၼၼ်ႉဢေႃႈ။-
မိူဝ်ႈၼၼ်ႉသူၼပ်ႉဢၢၼ်ႇတူၺ်းႁိူၼ်းဝဵင်း ယေႇရုသလႅမ်ႇ၊ တင်းလၢႆလႄႈၵိူၼ်ႇယႃႉႁိူၼ်းၵမ်ႈၽွင်ႈပႅတ်ႈႁႂ်ႈလႆႈမႄးၵုမ်းမႄးႁဵတ်းလမ်းဝဵင်းဢေႃႈ။-
ၵႃႈၼႂ်းၶိုင်ႈၵၢင်ၽႃလမ်းဝဵင်းသွင်ၽၢႆႇၼၼ်ႉသူၵေႃႈႁဵတ်းထၢင်ၼမ်ႉပုၼ်ႈဢၼ်တၵ်းၸုဢဝ်သိမ်းဢဝ်ၼမ်ႉဢၼ်ဢွၵ်ႇသေၵႃႈတီႈၼႂ်းၼမ်ႉၼွင်ၵဝ်ႇၵဝ်ႇၼၼ်ႉဢေႃႈ။ ၼႂ်းဝႃႈၼၼ်သေၵေႃႈသူဢမ်ႇၸၢင်ႈတူၺ်းၸၢင်ႈမၢတ်ႈ ၸဝ်ႈဢၼ်သၢင်ႈႁဵတ်းဝဵင်းၼၼ်ႉ။ သူဢမ်ႇၼပ်ႉဢမ်ႇသင်ႇၸဝ်ႈဢၼ်ၶိုင်ပွင်ႁဵတ်းဝႆႉမိူဝ်ႈဢွၼ်တၢင်းၼႆႉၼၼ်ႉ။
ၼႂ်းမိုဝ်ႉဝၼ်းၶိင်ႇၵႃႇလႃႉၼၼ်ႉ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ၼၼ်ႉႁွင်ႉဢဝ်သူပုၼ်ႈတၢင်းဢၼ်ႁွင်ႉႁႆႈ၊တၢင်းဢၼ်ၶၢင်းၶီၶၢင်းၽၢၼ်၊တၢင်းဢၼ်ထႃၶူၼ်ႁူဝ်၊တၢင်းဢၼ်ၼုင်ႈမႆၶူဝ်းၼင်ပေႃၼၼ်ႉဝႆႉဢေႃႈ။-
ၼႂ်းဝႃႈၼၼ်သေၵေႃႈသူယင်းႁဵတ်းတၢင်းဢၼ်မူၼ်ႈပျေႃႇသႂၢင်ႇသိူဝ်း၊တၢင်းဢၼ်ၶၢမ်ႇပွႆး၊တၢင်းဢၼ်ၶႃႈဝူဝ်း၊ၶႃႈသူဝ်းလႄႈၵိၼ်ၼိူဝ်ႉ၊ဢိၵ်ႇတင်းၵိၼ်ၼမ်ႉမၢၵ်ႇၸပိတ်ႉဢေႃႈ။ သူယင်းလၢတ်ႈဝႃႈ၊ “ဢွၼ်ၵၼ်ၵိၼ်ၶူပ်းတႃႉႁဝ်း။ သူတ်ႉဢိုၵ်ႉတႃႉႁဝ်း။ ဝၼ်းမိူဝ်ႈၽုၵ်ႈတၵ်းလႆႈတၢႆယဝ်ႉ၊” ဝႃႈၼင်ႇၼႆလူင်ပႄႇ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ၼၼ်ႉမီးဢမိင်ႉတီႈၵဝ်ၸမ်ႉ၊ “ဢပျတ်ႈၼႆႉတၵ်းဢမ်ႇလႆႈပွႆႇလွတ်ႈ၊တေႃႇထိုင်ႁွတ်ႈထၢၼ်ႈပေႃးတၢႆသဵင်ႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ၼၼ်ႉၸႂ်ႉၵဝ်ၵႂႃႇၸူးတီႈ သေႇပၼႃႉ၊ ၵေႃႉဢၼ်ဢုပ်ႉၵႃႈၼိူဝ်ႁေႃၶမ်းၼၼ်ႉ၊ႁႂ်ႈၵဝ်လၢတ်ႈတီႈမၼ်းလႄႈဝႃႈ၊-
“မႂ်းထၢင်ႇဝႃႈမႂ်းပဵၼ်ၽူႈလႂ်။ မႂ်းမီးဢၶႂၢင်ႉဢႃႇၼႃႇၵႃႈသင်တႃႇတေတွင်ႈႁဵတ်းၶွၵ်းႁဵတ်းၶုမ်သၢင်းၶႅင်းပႃႇႁဵဝ်ႈမႂ်းၵႃႈတီႈဢၼ်သုင်ၼႂ်းမၢၵ်ႇႁိၼ်မၢၵ်ႇၽႃၼႆႉ။-
မႂ်းတၵ်းၸၢင်ႈၶႄးပဵၼ်ၽူႈယႂ်ႇၵူၼ်းလူင်ယူႇ။ ၵူၺ်းၵႃႈ ထႃႇဝရႃႉၽြႃး၊ တၵ်းၵဵပ်းဢဝ်မႂ်းလႄႈထိမ်ႈဢွၵ်ႇပႅတ်ႈဢေႃႈ။-
မၼ်းၸဝ်ႈတၵ်းၵဵပ်းဢဝ်မႂ်းမိူၼ်ၸိူဝ်ႉၼင်မၢၵ်ႇၵူင်လႄႈဢဝ်ပိုတ်းၵႂႃႇၵႃႈၼႂ်းမိူင်းဢၼ်ယႂ်ႇဢၼ်ၵႂၢင်ႈဢေႃႈ။ မႂ်းတၵ်းတၢႆၵႃႈၼႂ်းမိူင်းၼၼ်ႉႁိမ်းလေႃႉမႃႉသိုၵ်းဢၼ်မႂ်းဢုပ်ႇဝၢဝ်းလူၺ်ႈၼၼ်ႉဢေႃႈ။ မိူဝ်ႈၼၼ်ႉမႂ်းတၵ်းပဵၼ်တီႈဢၼ်လီဢူၵ်းလီဢၢႆတီႈၵူၼ်းႁေႃၵူၼ်းႁိူၼ်းၸဝ်ႈမႂ်းဢေႃႈ။-
ထႃႇဝရႃႉၽြႃး၊ တၵ်းၼုၵ်ႈဢဝ်ဢရႃႇမႂ်းလႄႈၶျႃးမႂ်းတူၵ်းပႅတ်ႈသေၵႃႈတီႈဢရႃႇဢၼ်သုင်မႂ်းၼၼ်ႉဢေႃႈ။”
ထႃႇဝရႃႉၽြႃး၊ မီးဢမိင်ႉတီႈ သေႇပၼႃႉ၊ လႄႈဝႃႈ၊ “ၼႂ်းမိုဝ်ႉဝၼ်းၶိင်ႇၵႃႇလႃႉၼၼ်ႉၵဝ်တၵ်းႁွင်ႉဢဝ်ၶႃႈၵဝ် ဢေးလျႃႇၵိမ်း၊ လုၵ်ႈၸၢႆး ႁိလၶိ၊ မႃးလႄႈ၊-
ႁႂ်ႈမၼ်းၼုင်ႈမႆသိူဝ်ႈယၢဝ်းမႂ်း၊ဢဝ်သၢႆဢႅဝ်မႂ်းႁတ်ႉသေလႄႈဢဝ်ဢၶႂၢင်ႉဢႃႇၼႃႇမႂ်းဢၼ်လႆႈဢုပ်ႉပိူင်ႇၼၼ်ႉဢၢပ်ႈပၼ်ၵႃႈၼႂ်းမိုဝ်းမၼ်းဢေႃႈ။ မၼ်းတၵ်းပဵၼ်ပေႃႈၶဝ်ၸိူဝ်းဢၼ်ယူႇၵႃႈၼႂ်းမိူင်း ယေႇရုသလႅမ်ႇ၊ ဢိၵ်ႇတင်းၵူၼ်းဝဵင်း ယုတႃႉ၊ တင်းလၢႆဢေႃႈ။-
ၵဝ်တၵ်းဢၢပ်ႈဢၶႂၢင်ႉဢႃႇၼႃႇတီႈမၼ်းတဵမ်တဵမ်ႁႂ်ႈမၼ်းဢုပ်ႉပိူင်ႇၵႃႈတႂ်ႈၶုၼ်ႁေႃၶမ်းဢၼ်ပဵၼ်ၸိူဝ်ႉၶိူဝ်း တႃႇဝိတ်ႈ၊ ၼၼ်ႉဢေႃႈ။ မၼ်းတၵ်းႁပ်ႉဢဝ်သေႃးႁေႃၶမ်းသေယဝ်ႉ၊ၵႃႈဢၼ်မၼ်းၽုၺ်ႇပိုတ်ႇၼၼ်ႉၽူႈလႂ်ဢမ်ႇဢိုတ်းလႆႈ။ ၵႃႈဢၼ်မၼ်းဢိုတ်းႁပ်းၼၼ်ႉၽူႈလႂ်ဢမ်ႇၽုၺ်ႇလႆႈဢေႃႈ။-
ၵဝ်တၵ်းႁႂ်ႈမၼ်းမၼ်ႈၶိူင်ႇၵႃႈတီႈဢၶႂၢင်ႉဢႃႇၼႃႇၼၼ်ႉ၊မိူၼ်ၸိူဝ်ႉၼင်ႇဢၼ်လဵၵ်းမၢႆႇၼႃးဢၼ်တွၵ်ႇဝႆႉမၼ်ႈမၼ်ႈၼၼ်ႉလႄႈမၼ်းတၵ်းပဵၼ်တႄႇၸႃႉငဝ်ႈႁၢၵ်ႈမုၼ်သရေႇၵူၼ်းၶိူဝ်းႁိူၼ်းမၼ်းတၢင်းၶိူဝ်းဢေႃႈ။
“ၼႂ်းဝႃႈၼၼ်သေၵေႃႈဢၼ်ပဵၼ်ပီႈၼွင်ႉၸိူဝ်ႉၶိူဝ်းမၼ်းဢိၵ်ႇတင်းၵႃႈဢၼ်ၶဝ်ၸိူဝ်းဢၼ်ဢိင်သွၼ်ႈပိုင်ႈမၼ်းတင်းသဵင်ႈတင်းလူင်ၼၼ်ႉတၵ်းပဵၼ်တၢင်းဢၼ်ၼၵ်းၼႃႇဢေႃႈ။ တေပဵၼ်မိူၼ်ၸိူဝ်ႉၼင်ႇဢဝ်ၵွၵ်း၊ဝၢၼ်ႇ၊မေႃႈလႂ်ႁွႆႈဝႆႉတီႈလဵၵ်းမၢႆႇၼႃးၼၼ်ႉဢေႃႈ။-
မိုဝ်ႉဝၼ်းၶိင်ႇၵႃႇလႃႉၼၼ်ႉ၊လဵၵ်းမၢႆႇၼႃးဢၼ်တွၵ်ႇဝႆႉမၼ်ႈၶိူင်ႇၼႃႇၼၼ်ႉ၊တၵ်းလူမ်လႄႈလုတ်းတူၵ်းဢေႃႈ။ ၵမ်းၼၼ်ႉ လွင်ႈတၢင်းဢၼ်ႁွႆႈဝႆႉၵႃႈမီးတင်းသဵင်ႈတင်းမူတ်းၼၼ်ႉ၊တၵ်းႁွတ်ႈထိုင်တီႈသုတ်းတီႈၵွႆဢေႃႈ၊” ဝႃႈၼင်ႇၼႆ ထႃႇဝရႃႉၽြႃး၊ မီးဢမိင်ႉဢေႃႈ။
ဢၼ်ၼႆႉၸမ်ႉ၊ပဵၼ်ပျႃႇတိၵ်ႈၸဝ်ႈလၢတ်ႈလွင်ႈဝဵင်း တုရု၊ ဢေႃႈ။ ႁိူဝ်းသၢင်းၽေႃး သပဵၼ်ႇ၊ ဢၼ်ၵႂႃႇမႃးၵႃႈၼႂ်းၼမ်ႉသမ်ႇမုၵ်ႈတြႃႇ႟။ ဢွၼ်ၵၼ်ႁွင်ႉႁႆႈပွင်ႉၶၢင်းတႃႉ။ ႁိူၼ်းယေးသူၵႃႈတီႈတႃႈၼမ်ႉ တုရု၊ ၸိူဝ်းၼၼ်ႉလုလႅဝ်ပႅတ်ႈမူတ်းမူတ်းယဝ်ႉ။ တိူၵ်ႈႁိူၼ်းတင်းလၢႆ၊ဢိၵ်ႇတင်းတႃႈႁိူဝ်းမၼ်းလုလႅဝ်ၵႂႃႇမူတ်းမူတ်းယဝ်ႉ။ မိူဝ်ႈဢၼ်ႁိူဝ်းသၢင်းၽေႃးသူၸိူဝ်းၼၼ်ႉပွၵ်ႈၶိုၼ်းသေၵႃႈတီႈၵုၼ် သၢႆးပရၢတ်ႈ၊ မႃးၼၼ်ႉသူလႆႈငိၼ်းၶၢဝ်ႇမၼ်းယဝ်ႉဢေႃႈ။-
ၵူၼ်းၵႃႉၵူၼ်းၶၢႆဝဵင်း ၸိတုမ်ႇ၊ ၶဝ်႟။ ႁႆႈႁွင်ႉပွင်ႉၶၢင်းတႃႉ။ သူပွႆႇၸႂ်ႉၵူၼ်းတင်းလၢႆ၊-
ၶၢမ်ႈပၢင်ႇလၢႆႇၵႂႃႇႁႂ်ႈလႆႈသိုဝ်ႉလႆႈၶၢႆၶဝ်ႈပိူၵ်ႇဢၼ်ၽုၵ်ႇသွမ်ႈၵႃႈတီႈမိူင်း ဢေးၵျိပ်ႉ၊ ႁႂ်ႈလႆႈၵႃႉၶၢႆၵၼ်ၵူႈသိုင်ႇၵူႈမိူင်းဢေႃႈ။
ၵူၼ်းမဵဝ်း ၸိတုမ်ႇ၊ ၶဝ်႟။ မီးတၢင်းဢၼ်ဢူၵ်းဢၢႆတႃႉ။ ပၢင်ႇလၢႆႇဢိၵ်ႇတင်းၼမ်ႉသမ်ႇမုၵ်ႈတြႃႇဢၼ်လိုၵ်ႉဢၼ်လမ်ႇထဵင်ပႅတ်ႈသူလႄႈဝႃႈ၊ “ၵဝ်ဢမ်ႇၵိူတ်ႇဢမ်ႇလဵင်ႉလုၵ်ႈလၢင်းသေပွၵ်ႈ။ ဢမ်ႇတွၼ်ႉလႆႈလဵင်ႉလႆႈလူၽူႈမၢဝ်ႇၽူႈသၢဝ်တင်းလၢႆ၊” ဝႃႈၼင်ႇၼႆဢေႃႈ။
ၵူၼ်းမဵဝ်း ဢေးၵျိပ်ႉ၊ တင်းလၢႆတၵ်းတူၵ်းၸႂ်လႄႈမႆႈၸႂ်လူၺ်ႈလွင်ႈၶၢဝ်ႇဢၼ်ဝဵင်း တုရု၊ လႆႈႁွတ်ႈထိုင်တၢင်းဢၼ်လုလႅဝ်ၵႂႃႇယဝ်ႉၼၼ်ႉဢေႃႈ။
ၶဝ်ၸိူဝ်းဢၼ်ယူႇၵႃႈတီႈႁိမ်းၽင်ႇပၢင်ႇလၢႆႇၽၢႆႇၼႆႉၶဝ်႟။ ဢွၼ်ၵၼ်ႁွင်ႉႁႆႈပွင်ႉၶင်းတႃႉ။ ဢွၼ်ၵၼ်ဢွၵ်ႇပၢႆႈၵႂႃႇၸူးတီႈမိူင်း သပဵၼ်ႇ၊ တႃႉ။-
ဝဵင်း တုရု၊ ၼႆႉၸွင်ႇပဵၼ်ဝဵင်းဢၼ်တႄႇပဵၼ်မိူဝ်ႈၵွၼ်ႇဢွၼ်ၼႆႉၼၼ်ႉလႄႈၸူမ်းသိူဝ်းသႂၢင်ႇၸႂ်လႆႈႁိုဝ်း။ ၸွင်ႇပဵၼ်ဝဵင်းဢၼ်လႆႈပွႆႇၸႂ်ႉၵူၼ်းၶၢမ်ႈပၢင်ႇလၢႆႇၵႂႃႇတႄႇတင်ႈၼၼ်ႉႁိူဝ်း။-
ၽူႈလႂ်ၵျၢမ်ႇပွင်လႄႈႁဵတ်းႁႂ်ႈဝဵင်း တုရု၊ ဢၼ်ၸၢင်ႈပၼ်ရႃႇၸႃႉသရၽူႇဢၼ်ၸဝ်ႈၵုၼ်ႇၸဝ်ႈၶူဝ်းမၼ်းတင်းလၢႆမီးမုၼ်သရေႇယႂ်ႇၼႃႇသေပိူၼ်ႈၵႃႈၼိူဝ်လိၼ်မိူင်းၼၼ်ႉ။-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၵျၢမ်ႇပွင်ႁဵတ်းသၢင်ႈဢေႃႈ။ မၼ်းၸဝ်ႈၵျၢမ်ႇပွင်ၸိူဝ်ႉၼင်ႇၼႆႁႂ်ႈလႆႈယႃႉသရေႇမႃႇၼႃႉမုၼ်ၽုင်းၵႃႈမီး၊ဢိၵ်ႇတင်းႁႂ်ႈလႆႈၶျႃးမူးမၢတ်ႈလိၼ်မိူင်းတင်းလၢႆတူၵ်းတီႈတႅမ်ႇဢေႃႈ။
ၶႃႈဝၢၼ်ႈၵူၼ်းမိူင်း သပဵၼ်ႇ၊ ၶဝ်႟။ ၵႂႃႇလႄႈႁဵတ်းႁႆႈႁဵတ်းၼႃးၵႃႈတီႈလိၼ်မိူင်းတႃႉ။ ဢမ်ႇမီးၽူႈလႂ်ဢၼ်ၵႅတ်ႇၶႄႁႄႉၵင်ႈသူသေၵေႃႉသေၵူၼ်းယဝ်ႉ။-
မၼ်းၸဝ်ႈယဵတ်ႇမိုဝ်းမၼ်းၸဝ်ႈၵႃႈၼိူဝ်ပၢင်ႇလၢႆႇလႄႈသၼ်ႇၶွၼ်းသိုင်ႇၸိုင်ႈဝၢၼ်းမိူင်းတင်းလၢႆဢေႃႈ။ ထႃႇဝရႃႉၽြႃး၊ မီးဢမိင်ႉလူၺ်ႈလွင်ႈမိူင်း ၶႃႇၼၼ်ႇ၊ ႁႂ်ႈလႆႈယႃႉၽဵဝ်ႈတီႈဢၼ်မၼ်ႈဢၼ်ၶိူင်ႇမၼ်းပႅတ်ႈဢေႃႈ။-
ဝဵင်း ၸိတုမ်ႇ၊ ႟။ တၢင်းဢၼ်ၸူမ်းသိူဝ်းသႂၢင်ႇၸႂ်မႂ်းၼၼ်ႉထၢတ်ႇယဵၼ်ယဝ်ႉလႄႈၵူၼ်းမႂ်းတင်းလၢႆလႆႈၶၢမ်ႇတၢင်းဢၼ်တဵၵ်းငႅၼ်းယဝ်ႉ။ ပိၵ်ႉသမ်ႉၶဝ်ပၢႆႈလွတ်ႈႁွတ်ႈၵႂႃႇတီႈၵုၼ် သၢႆးပရၢတ်ႈ၊ သေၵေႃႈ၊ၶဝ်တၵ်းဢမ်ႇပႆႇလူင်ႉလီလွတ်ႈလီ။
ၶဝ်ၸိူဝ်းဢၼ်ပွႆႇတူဝ်ထိူၼ်ႇႁၢႆႉႁူမ်ႇသုမ်ႇဝဵင်း တုရု၊ ၵႂႃႇၼၼ်ႉပဵၼ်ၵူၼ်းမဵဝ်း ဢႃႇသီးရီးယႃး၊ ဢမ်ႇၸႂ်ႈ။ ပဵၼ်ၵူၼ်းမဵဝ်း ပႃႇပုလုၼ်ႇ၊ ၶဝ်ဢေႃႈ။ ၶဝ်ၸိူဝ်းဢၼ်ပူၵ်းတင်ႈႁဵတ်းထဵင်လၢင်းမၼ်းတင်းလၢႆလႄႈၵိူၼ်ႇလူမ်ႉဝဵင်း တုရု၊ ဢၼ်မၼ်ႈၶိူင်ႇၼၼ်ႉသေယဝ်ႉ၊ဝႆႉပႅတ်ႈဝဵင်းလူင်ၼၼ်ႉလုလႅဝ်ယူႇၸိူဝ်ႉၼင်ႇၼၼ်ၼၼ်ႉပဵၼ်ၵူၼ်းမဵဝ်း ပႃႇပုလုၼ်ႇ၊ ၶဝ်ဢေႃႈ။
ၵူၼ်းဢၼ်ၸွမ်းႁိူဝ်းသၢင်းၽေႃး သပဵၼ်ႇ၊ ဢၼ်ဢွၵ်ႇၵႂႃႇၵႃႈၼႂ်းၼမ်ႉသမ်ႇမုၵ်ႈတြႃႇၶဝ်႟။ ဢွၼ်ၵၼ်ႁွင်ႉႁႆႈပွင်ႉၶၢင်းတႃႉ။ လွင်ႈမၼ်းၸမ်ႉ၊ဝဵင်းလူင်ဢၼ်သူဢိင်ပိုင်ႈၼၼ်ႉလုလႅဝ်ယဝ်ႉ။
ၼႂ်းမိုဝ်ႉဝၼ်းၶိင်ႇၵႃႇလႃႉၼၼ်ႉ၊ၼႂ်းၸူဝ်ႈပၢၼ်ၶုၼ်ႁေႃၶမ်းသိုပ်ႇၼိုင်ႈၼၼ်ႉဝဵင်း တုရု၊ တၵ်းလႆႈၶၢမ်ႇတၢင်းဢၼ်လိုမ်းပႅတ်ႈဝႆႉၸဵတ်းသိပ်းပီဢေႃႈ။ ပူၼ်ႉၸဵတ်းသိပ်းပီသေယဝ်ႉ၊ဝဵင်း တုရု၊ တၵ်းပဵၼ်ၸွမ်းလိၵ်ႈႁဵတ်းၵႂၢမ်းဢၼ်မႄႈမွၵ်ႇယႃႈၶဝ်ႁွင်ႉၵႂၢမ်းလႄႈဝႃႈ၊-
“မႄႈမွၵ်ႇယႃႈဢၼ်ပိူၼ်ႈလိုမ်းပႅတ်ႈ႟။ ပႃးဢဝ်တိင်ႇသေယဝ်ႉ၊လႄႇလဵပ်ႈၵႂႃႇၵႃႈၼႂ်းဝဵင်းတႃႉ။ ဢဝ်လိၵ်ႈႁဵတ်းၵႂၢမ်းၼမ်ၼႃႇႁွင်ႉၵႂၢမ်းတင်းသဵင်လီသဵင်ဝၢၼ်ႁႂ်ႈၵူၼ်းၸၢႆးတင်းလၢႆၶိုၼ်းၶုၵ်းၸႂ်လႆႈမႂ်းတႃႉ” ဝႃႈၼင်ႇၼႆၼၼ်ႉဢေႃႈ။
မိူဝ်ႈဢၼ်ပူၼ်ႉၸဵတ်းသိပ်းပီယဝ်ႉၼၼ်ႉ ထႃႇဝရႃႉၽြႃး၊ တၵ်းမႃးလႄႇမႃးၸႂ်းဝဵင်း တုရု၊ လႄႈတၵ်းႁႂ်ႈမၼ်းၵႂႃႇၸူးတီႈဢၼ်ၵႃႉဢၼ်ၶၢႆမၼ်းၵဝ်ႇၵဝ်ႇသေယဝ်ႉ၊မၼ်းတၵ်းၶိုၼ်းႁပ်ႉဢဝ်ၵႃႈၸၢင်ႈၵႃႈတီႈသိုင်ႇတိူင်းမိူင်းၵႃႈၼိူဝ်လိၼ်မိူင်းၼႆႉဢေႃႈ။-
မၼ်းတၵ်းဢဝ်ငိုၼ်းမၼ်းၵႃႉၶၢႆလႄႈလႆႈမႃးၼၼ်ႉ၊သၢၵ်ႈၵၢပ်ႈတီႈ ထႃႇဝရႃႉၽြႃး၊ ဢေႃႈ။ မၼ်းတၵ်းဢမ်ႇၸုဢဝ်သိမ်းဢဝ်ဝႆႉလႄႈ၊ပိူၼ်ႈတၢင်ႇၵေႃႉၸိူဝ်းဢၼ်ႁဵတ်းဝၢတ်ႈၵူဝ်းၵႂၢႆႇတီႈ ထႃႇဝရႃႉၽြႃး၊ ၼၼ်ႉတၵ်းဢဝ်ငိုၼ်းမၼ်းၸိူဝ်းၼၼ်ႉသိုဝ်ႉတၢင်းၵိၼ်တၢင်းၶူပ်း၊ဢိၵ်ႇတင်းၶူဝ်းၼုင်ႈတၢင်းမႆဢၼ်ၶဝ်လူဝ်ႇၼၼ်ႉဢေႃႈ။
ထႃႇဝရႃႉၽြႃး၊ တၵ်းယႃႉၽဵဝ်ႈပႄႇပႅတ်ႈလိၼ်မိူင်းႁႂ်ႈပဝ်ႇလၢပ်ႈႁၢမ်းဝႆႉဢေႃႈ။ ဢဝ်ၼႃႈလိၼ်မိူင်းႁၢမ်းၵႂႃႇပိၼ်ႈၶွမ်ႈၵႂႃႇသေယဝ်ႉ၊ဢဝ်ၵူၼ်းတင်းလၢႆၸၢတ်ႇပိုၼ်ပႅတ်ႈဢေႃႈ။-
ၵႃႈဢၼ်ပဵၼ်ၵူၼ်း၊ၸႃႉဢဝ်ၸဵမ်ယဵၸ်ႈပရေႃးႁဵၵ်ႈ တေႃႇၵူၼ်းမိူင်း၊ဢိၵ်ႇတင်းၶႃႈၵူၼ်းသိုဝ်ႉဢိၵ်ႇတင်းၵူၼ်းၶၢႆ၊ၸဝ်ႈၼၢင်းဢိၵ်ႇတင်းၶႃႈၸဝ်ႈၼၢင်း၊ၸဝ်ႈၼီႈဢိၵ်ႇတင်းၵေႃႉဢၼ်ထုၵ်ႇၼီႈ၊ၵူၼ်းမီးဢိၵ်ႇတင်းၵူၼ်းၽၢၼ်တၵ်းလႆႈၶၢမ်ႇဢဝ်မိူၼ်မိူၼ်ၵၼ်ဢေႃႈ။-
လိၼ်မိူင်းတၵ်းပဝ်ႇလၢပ်ႈလႄႈလုလႅဝ်ၵႂႃႇမူတ်းမူတ်းသဵင်ႈသဵင်ႈဢေႃႈ။ လွင်ႈမၼ်းၸမ်ႉ၊ ထႃႇဝရႃႉၽြႃး၊ မီးဢမိင်ႉဝႆႉဢေႃႈ။
လိၼ်မိူင်းပဵၼ်ဢၼ်ႁႅင်ႈၵႂႃႇႁွင်ၵႂႃႇဢေႃႈ။ လေႃးၵႃႉၼႆႉမီးတၢင်းဢၼ်ႁႅင်းဢူၼ်ႈႁႅင်းၸွပ်ႈၵႂႃႇလႄႈလိၼ်မိူင်းတင်းၵၢင်ႁၢဝ်ႁဵဝ်ႇၸွပ်ႈၵႂႃႇၸွမ်းၵၼ်ဢေႃႈ။-
ၵူၼ်းဝၢၼ်ႈၵူၼ်းမိူင်းႁဵတ်းႁႂ်ႈလိၼ်မိူင်းၵူဝ်ႈၵိူၵ်ႇၵွပ်ႈပိူဝ်ႈၶဝ်ပူၼ်ႉလိူဝ်ၵျၢမ်းဢုပတေႇၽြႃးပဵၼ်ၸဝ်ႈ၊ဢိၵ်ႇတင်းယႃႉပႅတ်ႈပတိၺိၺ်ႇထႃႇဝရႃႉၸဝ်ႈၼၼ်ႉဢေႃႈ။-
ၵွပ်ႈပိူဝ်ႈၼႆလႄႈၽြႃးပဵၼ်ၸဝ်ႈၵိၼ်ႇဝႃႈလိၼ်မိူင်းၸဝ်ႈပႅတ်ႈယဝ်ႉ။ ၼင်ႇၼၼ်လႄႈၵူၼ်းဝၢၼ်ႈၵူၼ်းမိူင်းတင်းလၢႆလႆႈၶၢမ်ႇဢဝ်ၵႃႈဢၼ်ၶဝ်ႁဵတ်းဢပျတ်ႈၼၼ်ႉယဝ်ႉ။ ၵူၼ်းဝၢၼ်ႈၵူၼ်းမိူင်းတင်းလၢႆၵေႃႈ ယွမ်းၵႂႃႇႁၢႆၵႂႃႇလႄႈၵိုတ်းၵျၢၼ်ႇယူႇၵေႇၼႃႇယဝ်ႉ။-
ၼမ်ႉမၢၵ်ႇၸပိတ်ႉၵေႃႈႁဵင်းၵႂႃႇယဝ်ႉ။ တူၼ်ႈၶိူဝ်းမၢၵ်ႇၸပိတ်ႉၵေႃႈႁႅင်းဢူၼ်ႈႁႅင်းၵေႇၵႂႃႇယဝ်ႉ။ ၶဝ်ၵႃႈဢၼ်ယၢမ်ႈၸူမ်းသိူဝ်းၼၼ်ႉလႆႈမႆႈၸႂ်ၶီၸႂ်ယဝ်ႉ။-
သဵင်တူႇရိယႃႇၶဝ်ဢၼ်လီပျေႃႇလီမူၼ်ႈ၊ဢိၵ်ႇတင်းသဵင်ၵွင်ၶဵတ်ႇၶဝ်ႁၢႆၵႂႃႇယဝ်ႉ။-
သဵင်ႁဵတ်းၵႂၢမ်းဢၼ်ၸူမ်းသိူဝ်းလူၺ်ႈၼမ်ႉမၢၵ်ႇၸပိတ်ႉၼၼ်ႉဢမ်ႇမီးယဝ်ႉ။ ၼမ်ႉလဝ်ႈတၵ်းၶူမ်တီႈၶဝ်ၸိူဝ်းဢၼ်ၵိၼ်မၼ်းၼၼ်ႉဢေႃႈ။-
ဝဵင်းဢၼ်ပဝ်ႇလၢပ်ႈၼၼ်ႉလူမ်ႉပင်းၵႂႃႇယဝ်ႉ။ ၵူၼ်းတင်းလၢႆယူႇၵႃႈၼႂ်းႁိူၼ်းၶဝ်လႄႈဢိုတ်းႁပ်းၶတ်းဝႆႉႁႂ်ႈလႆႈယူႇလူင်ႉလီလွတ်ႈလီဢေႃႈ။-
မီးသဵင်ဢၼ်ႁွင်ႉႁႆႈႁွင်ႉသႅၼ်ႇၵႃႈတီႈသဵၼ်ႈတႃသၢႆတၢင်းၵွပ်ႈပိူဝ်ႈဢၼ်ဢမ်ႇမီးၼမ်ႉမၢၵ်ႇၸပိတ်ႉၼၼ်ႉယဝ်ႉ။ တၢင်းဢၼ်ၸူမ်းဢၼ်သိူဝ်းႁၢႆၵႂႃႇမူတ်းမူတ်းသဵင်ႈသဵင်ႈလႄႈသဵင်ဢၼ်သႃႇယႃႇလီငၢမ်းၼၼ်ႉယဵၼ်ၵႂႃႇတင်းမိူင်းယဝ်ႉ။-
ဝဵင်းလူင်လုဝႆႉလႅဝ်ဝႆႉလႄႈၽၵ်းတူဝဵင်းတင်းလၢႆတႅၵ်ႇပႅတ်ႈလုပႅတ်ႈယဝ်ႉ။-
လွင်ႈတၢင်းၼၼ်ႉတၵ်းပဵၼ်မႃးၵႃႈတီႈမဵဝ်းၵူၼ်းၵူႈၸိူဝ်ႉၵူႈၶိူဝ်းၵႃႈၼိူဝ်ၼႃႈလိၼ်မိူင်းၼႆႉဢေႃႈ။ မၼ်းတၵ်းပဵၼ်ၸိူဝ်ႉၼင်ႇဢၼ်ၶဝ်တွႆႇဢဝ်သႄႇဢဝ်မၢၵ်ႇသၢၼ်ႇလုၼ်ႇယဝ်ႉတူဝ်ႈၵႂႃႇၵူႈတူၼ်ႈ၊ဢိၵ်ႇတင်းၸိူဝ်ႉၼင်ႇဢၼ်ဝိတ်းဢဝ်မၢၵ်ႇၸပိတ်ႉဢၼ်လိုၼ်းလင်သုတ်းပိူၼ်ႈၵႃႈတီႈတူၼ်ႈၶိူဝ်းမၢၵ်ႇၸပိတ်ႉၼၼ်ႉဢေႃႈ။
ၶဝ်ၸိူဝ်းဢၼ်ၵိုတ်းၵျၢၼ်ႇယူႇၼၼ်ႉဢွၼ်ၵၼ်ႁဵတ်းၵႂၢမ်းၸူမ်းၸူမ်းသိူဝ်းသိူဝ်းဢေႃႈ။ ၶဝ်ၸိူဝ်းဢၼ်ယူႇၽၢႆႇဝၼ်းတူၵ်းၼၼ်ႉဢွၼ်ၵၼ်ပၢဝ်ႇသေႃႇလွင်ႈဢၼ် ထႃႇဝရႃႉၽြႃး၊ ယႂ်ႇမျၢတ်ႈၼႃႇၼၼ်ႉဢေႃႈ။
ၶဝ်ၸိူဝ်းဢၼ်ယူႇၽၢႆႇတၢင်းဝၼ်းဢွၵ်ႇၼၼ်ႉဢွၼ်ၵၼ်ယွင်ႈယေႃးမၼ်းၸဝ်ႈဢေႃႈ။ ၶဝ်ၸိူဝ်းဢၼ်ယူႇၸွမ်းသၢပ်ႇပၢင်ႇလၢႆႇၵေႃႈတၵ်းဢွၼ်ၵၼ်ယွင်ႈယေႃး ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ ဢေႃႈ။-
ႁဝ်းတၵ်းလႆႈငိၼ်းသဵင်ႁဵတ်းၵႂၢမ်းယွင်ႈယေႃးယူႇဢၼ်လုၵ်ႉသေၵႃႈတီႈလႅၼ်လိၼ်မိူင်းဢၼ်ၵႆၼႃႇႁွတ်ႈမႃးၼၼ်ႉလႄႈဝႃႈ၊ႁႂ်ႈၵေႃႉဢၼ်သိုဝ်ႈတေႃႇၼၼ်ႉမီးမုၼ်ၽုင်းယႂ်ႇၼႃႇသေၵမ်း။ ၼႂ်းဝႃႈၼၼ်သေၵေႃႈပုၼ်ႈၵဝ်ၼႆႉဢမ်ႇမီးတီႈလီမုင်ႈမွင်းယဝ်ႉ။ လွင်ႈမၼ်းၸမ်ႉ၊ၵဝ်ၼႆႉသုတ်ႈယွမ်းၵႂႃႇလွႆးလွႆးယူႇယဝ်ႉ။ ၵူၼ်းဢၼ်ၸၢင်ႈပႅတ်ႉၸၢင်ႈလႅၼ်တင်းလၢႆၵေႃႈ၊ပႅတ်ႉလႅၼ်ၶိူဝ်းၶိူဝ်းယႂ်းယႂ်းသေယဝ်ႉ၊တၢင်းဢၼ်ယႃႉသဵတ်ႈၸႃႇၼၼ်ႉပဵၼ်ဢၼ်ယဵင်ႈၶႅၼ်းႁၢႆႉမႃးႁၢႆႉမႃးတိၵ်းတိၵ်းဢေႃႈ။-
ဢွၼ်ၵၼ်ထွမ်ႇဢဝ်ၵႂၢမ်းၵဝ်ၵူႈၵေႃႉၵူႈၵူၼ်းတႃႉ။ တၢင်းဢၼ်လီၵူဝ်လီႁႄ၊ၶုမ်လိၼ်ႁူးလိၼ်၊တူင်ႇႁႅဝ်ႉတူင်ႇၶိုမ်း၊ႁွတ်ႈထိုင်ၵႃႈတီႈသူယဝ်ႉ။-
ၵူၼ်းၸိူဝ်းဢၼ်ၶတ်းၸႂ်ဢွၵ်ႇပၢႆႈသေၵႃႈတီႈဢၼ်လီၵူဝ်လီႁႄၼၼ်ႉတၵ်းဢွၼ်ၵၼ်တူၵ်းၼႂ်းၶုမ်လိၼ်ႁူးလိၼ်ၵူႈၵေႃႉဢေႃႈ။ ၵေႃႉဢၼ်ဢွၵ်ႇပၢႆႈလွတ်ႈသေၵႃႈတီႈႁူးၶုမ်ၼၼ်ႉ၊တၵ်းလႆႈၶမ်ၵႃႈၼႂ်းတူင်ႇႁႅဝ်ႉတူင်ႇၶိုမ်းဢေႃႈ။ သၢႆၼမ်ႉၽူၼ်ဢၼ်ႁႅင်းၼႃႇတၵ်းလုၵ်ႉသေၵႃႈၼိူဝ်ၽႃႉၵၢင်ႁၢဝ်ထွၵ်ႇလူင်းမႃးလႄႈငဝ်ႈႁၢၵ်ႈလိၼ်မိူင်းတၵ်းသၼ်ႇၶွၼ်းဝႆၵႂႃႇဢေႃႈ။-
လိၼ်မိူင်းတၵ်းတႅၵ်ႇဢႃႈလႄႈတႅၵ်ႇယၢႆႈၵႂႃႇပဵၼ်ၽွင်သေယဝ်ႉ၊ၶွၼ်းၶဝ်ႇသၼ်ႇဝႆၼႃႇဢေႃႈ။-
လိၼ်မိူင်းၼၼ်ႉတၵ်းၵိင်ႈၵိင်ႈၵိူၵ်ႇၵိူၵ်ႇယူႇမိူၼ်ၵူၼ်းမဝ်းလဝ်ႈမဝ်းၵမ်သေလႄႈတူင်ႉဝႆၼိုင်ယူႇၸိူဝ်ႉၼင်ႇဢူႇၼၼ်ႉဢေႃႈ။ လိၼ်မိူင်းၼႆႉၼမ်ႉၼၵ်းတဵင်ႈတၢင်ႇၵႃႈၼိူဝ်မၼ်းၵွပ်ႈပိူဝ်ႈဢပျတ်ႈမၼ်းဢေႃႈ။ မၼ်းတၵ်းလူမ်ႉတူၵ်းလႄႈၵမ်းလိုၼ်းဢမ်ႇၶိုၼ်းလုၵ်ႉလႆႈ။
ၼႂ်းမိုဝ်ႉဝၼ်းၶိင်ႇၵႃႇလႃႉၼၼ်ႉ ထႃႇဝရႃႉၽြႃး၊ တၵ်းပၼ်တၢမ်ႇတီႈၶုၼ်ၵၢင်ႁၢဝ်ၸိူဝ်းဢၼ်မီးၵႃႈၼိူဝ်ၽုင်ႇၵၢင်ႁၢဝ်၊ဢိၵ်ႇတင်းတီႈၶုၼ်ႁေႃၶမ်းလိၼ်မိူင်းၸိူဝ်းဢၼ်မီးၵႃႈၼိူဝ်လိၼ်မိူင်းၼၼ်ႉဢေႃႈ။-
ၽြႃးပဵၼ်ၸဝ်ႈတၵ်းၸုဢဝ်တုမ်ဢဝ်ၶုၼ်ႁေႃၶမ်းတင်းလၢႆၸိူဝ်ႉၼင်ႇၵူၼ်းထွင်ႇဢၼ်မီးၼႂ်းၶုမ်လိၼ်ႁူးလိၼ်ၼၼ်ႉဢေႃႈ။ မၼ်းၸဝ်ႈတၵ်းၶျုၵ်ႈၶင်ၶဝ်ဝႆႉၵႃႈၼႂ်းၶွၵ်ႈတေႃႇထိုင်ႁွတ်ႈဝၼ်းဢၼ်ၸႅတ်ႈထၢမ်ပၼ်တၢမ်ႇႁွတ်ႈမႃးၼၼ်ႉဢေႃႈ။-
လိုၼ်တၵ်းလပ်းသိင်ႇၵႂႃႇလႄႈ၊ၵၢင်ဝၼ်းတၵ်းဢမ်ႇပၼ်ဢၼ်ႁိူဝ်ႈဢၼ်လႅင်း၊ၵွပ်ႈပိူဝ်ႈ ထႃႇဝရႃႉၽြႃး၊ ၸဝ်ႈဢၼၼ်ႇတႃႉတၼ်းၶူဝ်းတၵ်းပဵၼ်ၶုၼ်ႁေႃၶမ်းဢေႃႈ။ မၼ်းၸဝ်ႈတၵ်းၼင်ႈႁၢင်ႈၼင်ႈႁေႃၵႃႈၼႂ်းဝဵင်း ယေႇရုသလႅမ်ႇ၊ ၵႃႈၼိူဝ်လွႆ ၸိဢုၼ်ႇ၊ သေယဝ်ႉ၊မူးမၢတ်ႈၽွင်းမိူင်းတင်းလၢႆတၵ်းဢွၼ်ၵၼ်ႁၼ်မုၼ်ၽုင်းမၼ်းၸဝ်ႈဢေႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းပဵၼ်ၽြႃးပဵၼ်ၸဝ်ႈၶႃႈၸဝ်ႈတီႈၶႃႈဢေႃႈ။ ၶႃႈၸဝ်ႈတၵ်းယုၵ်ႉယွင်ႈၸဝ်ႈႁဝ်းလႄႈ ယွင်ႈယေႃးၼႃႇမႃႉၸိုဝ်ႈသဵင်ၸဝ်ႈႁဝ်းတီႈၶႃႈဢေႃႈ။ ၸဝ်ႈႁဝ်းႁဵတ်းလွင်ႈတၢင်းဢၼ်လီဢၢမ်းတီႈၶႃႈယဝ်ႉလႄႈၸဝ်ႈႁဝ်းပႃးသဵတ်ႈၸႃႇ ပွင်ႁဵတ်းၸွမ်းတၢင်းၵျၢမ်ႇၸဝ်ႈႁဝ်းဢၼ်မီးၸဵမ်မိူဝ်ႈၵွၼ်ႇဢွၼ်ၼႆႉၼၼ်ႉတီႈၶႃႈဢေႃႈ။
ၸဝ်ႈႁဝ်းပိၼ်ႈၶွမ်ႈဝဵင်းလူင်တင်းလၢႆႁႂ်ႈပဵၼ် ၵွင်ၽုၼ်ႇၵွင်လိၼ်၊ႁႂ်ႈဝဵင်းဢၼ်မၼ်ႈၶိူင်ႇပဵၼ်တီႈဢၼ်ၵိူၼ်ႇပင်းလုလႅဝ်၊ ႁႂ်ႈႁေႃၶမ်းဢၼ်ရၢၼ်ႇသူႇၶႃႈၸဝ်ႈတႄႇတင်ႈၼၼ်ႉလပ်ႉႁၢႆၵႂႃႇတႃႇသေႇတီႈၶႃႈယဝ်ႉ။
ၵူၼ်းမိူင်းဢၼ်မီးႁႅင်းတၼ်းၶူဝ်းယႂ်ႇၼၼ်ႉတၵ်းဢွၼ်ၵၼ်ယွင်ႈယေႃးၸဝ်ႈႁဝ်းလႄႈ မဵဝ်းၵူၼ်းႁၢႆႉဢၼ်ယူႇၼႂ်းဝဵင်းလူင်ၸိူဝ်းၼၼ်ႉတၵ်းဢွၼ်ၵၼ်ၵူဝ်ႁႄၸဝ်ႈႁဝ်းဢေႃႈ။
ၵူၼ်းယၢၵ်ႈၵူၼ်းၽၢၼ်ဢၼ်ၸုတ်ႈဢၼ်လုတ်ႈ တင်းလၢႆဢွၼ်ၵၼ်ပၢႆႈၵႂႃႇသွၼ်ႈပိုင်ႈတီႈ ၸဝ်ႈႁဝ်းလႄႈၶဝ်လႆႈလူင်ႉလီလွတ်ႈလီၼႂ်းၶိင်ႇဢၼ်ထူပ်းၽေးတုၵ်ႉၶႃႉၼၼ်ႉဢေႃႈ။ ၸဝ်ႈႁဝ်းပၼ်ဢၼ်ၵင်ႈဢၼ်မုင်းဢၼ်ႁႄႉၵင်ႈၽူၼ်လူင်လူမ်းလူင်လႄႈ ပၼ်ႁူမ်ႈပၼ်ငဝ်းဢၼ်ႁႄႉၵင်ႈလႅတ်ႇဢၼ်မႆႈႁွၼ်ႉၼႃႇၼၼ်ႉဢေႃႈ။ ၵူၼ်းႁၢႆႉၵူၼ်းလိူင်းတင်းလၢႆတိုၵ်းတေႃးမႃးမိူၼ်ၸိူဝ်ႉၼင်ႇၽူၼ်မၢၵ်ႇႁဵပ်းၶိင်ႇၵတ်းၼၼ်ႉ၊
မိူၼ်ၸိူဝ်ႉၼင်ႇၽႃႉလႅင်ႉၵႃႈတီႈလိၼ်ဢၼ်ႁႅင်ႈႁွင်ဢေႃႈ။ ၵူၺ်းၵႃႈ၊ၸဝ်ႈႁဝ်း ထႃႇဝရႃႉၽြႃး၊ ႁႂ်ႈသဵင်ၵူၼ်းဝၢၼ်ႈၵူၼ်းမိူင်းတဵတ်ႇၵႂႃႇ ယဵၼ်ၵႂႃႇလႄႈႁႂ်ႈသဵင်ဢၼ်ၵူၼ်းႁၢႆႉၵူၼ်းမိူၵ်ႈႁွင်ႉပၢဝ်ႇၼၼ်ႉ တဵတ်ႇၵႂႃႇယဵၼ်ၵႂႃႇ၊မိူၼ်ၸိူဝ်ႉၼင်ႇလႅတ်ႇမႆႈႁၢႆၵႂႃႇၼႂ်းဝၼ်းဢၼ်မွၵ်ႇၵုမ်ႈၽႃႉၽူၼ်မီးၼၼ်ႉဢေႃႈ။
ၵႃႈတီႈၼိူဝ်လွႆ ၸိဢုၼ်ႇ၊ ၼၼ်ႉ ထႃႇဝရႃႉၽြႃး၊ ၸဝ်ႈဢၼၼ်ႇတႃႉတၼ်းၶူဝ်းတၵ်းႁႅၼ်းတႄႇႁႅၼ်းတမ်းပွႆးၵိၼ်လဵင်ႉဢၼ်ဢဝ်တင်းတၢင်းၵိၼ်တၢင်းၶူပ်းဢၼ်ၵွၼ်ႈလီမၢၵ်ႈလီသေပိူၼ်ႈ၊ဢိၵ်ႇတင်းၼမ်ႉမၢၵ်ႇၸပိတ်ႉဢၼ်လီဢၼ်ဝၢၼ်သေပိူၼ်ႈၼၼ်ႉ၊လဵင်ႉလူမဵဝ်းၵူၼ်းၵႃႈမီးတင်းသဵင်ႈတင်းမူတ်းၵႃႈၼိူဝ်လိၼ်မိူင်းၼႆႉဢေႃႈ။-
ၵႃႈၼိူဝ်လွႆၼၼ်ႉမၼ်းၸဝ်ႈတၵ်းပႄႇၽဵဝ်ႈပႅတ်ႈမွၵ်ႇၵုမ်ႈဢၼ်ပဵၼ်တၢင်းၶီၸႂ်ဢၼ်ႁူမ်ႇၵႃႈၼိူဝ်မဵဝ်းၵူၼ်းတင်းလၢႆၼၼ်ႉၵမ်းလဵဝ်ဢေႃႈ။-
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တၵ်းယႃႉၽဵဝ်ႈၶုၼ်တၢႆၼၼ်ႉပႅတ်ႈတႃႇသေႇဢမ်ႇထၢတ်ႇဢေႃႈ။ မၼ်းၸဝ်ႈတၵ်းၸဵတ်ႉၼမ်ႉတႃႇပႅတ်ႈသေၵႃႈတီႈမၢၵ်ႇတႃၵူႈၵေႃႉၵူႈၵူၼ်းသေလႄႈတၢင်းဢၼ်ၵူၼ်းမၼ်းၸဝ်ႈတင်းလၢႆလႆႈၶၢမ်ႇတၢင်းဢၼ်သႄႉသွမ်းၼၼ်ႉၵေႃႈမၼ်းၸဝ်ႈတၵ်းပႄႇပႅတ်ႈသေၵႃႈၼိူဝ်လိၼ်မိူင်းၵူႈတီႈၵူႈလႅၼ်ဢေႃႈ၊ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ၼႂ်းမိုဝ်ႉဝၼ်းၶိင်ႇၵႃႇလႃႉၼၼ်ႉၶဝ်ၵူႈၵေႃႉၵူႈၵူၼ်းတၵ်းဢွၼ်ၵၼ်လၢတ်ႈလႄႈဝႃႈ၊ “မၼ်းၸဝ်ႈပဵၼ်ၽြႃးပဵၼ်ၸဝ်ႈႁဝ်းဢေႃႈ။ ႁဝ်းဢွၼ်ၵၼ်ဢိင်ပိုင်ႈမၼ်းၸဝ်ႈလႄႈမၼ်းၸဝ်ႈၵႄႇၼုၵ်ႈဢဝ်ႁဝ်းဢေႃႈ။ မၼ်းၸဝ်ႈပဵၼ် ထႃႇဝရႃႉၽြႃး၊ ဢေႃႈ။ ႁဝ်းဢွၼ်ၵၼ်ဢိင်ပိုင်ႈမၼ်းၸဝ်ႈလႄႈၸူမ်းသိူဝ်းၵွပ်ႈပိူဝ်ႈမၼ်းၸဝ်ႈၵႄႇၶျွတ်ႈဢဝ်ႁဝ်းဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ တၵ်းႁႄႉၵင်ႈလွႆ ၸိဢုၼ်ႇ၊ လႄႈၵူၼ်းမိူင်း မေႃႇၽႃႉ၊ ၸမ်ႉ၊တၵ်းလႆႈၶၢမ်ႇတၢင်းဢၼ်ယဵပ်ႇသႂ်ႇၵႃႈၼႂ်းတီႈယူႇၶဝ်မိူၼ်ၸိူဝ်ႉၼင်ႇဢၼ်ၽိူင်းလႆႈၶၢမ်ႇတၢင်းဢၼ်ယဵပ်ႇသႂ်ႇၵႃႈၼႂ်းၵူမ်ႇၶီႈဝူဝ်းၼၼ်ႉဢေႃႈ။-
ၶဝ်တၵ်းယဵတ်ႇၶႅၼ်မိုဝ်းၶဝ်မိူၼ်ၸိူဝ်ႉၼင်ႇဢၼ်ၶဝ်ၶတ်းၸႂ်ၵျူဝ်းၸႃးလုၺ်းၼမ်ႉသေၵေႃႈ၊ၽြႃးပဵၼ်ၸဝ်ႈတၵ်းၶျႃးတူၵ်းပႅတ်ႈတၢင်းၶတ်းၸႂ်ၶဝ်၊ဢိၵ်ႇတင်းတၢင်းၵတ်ႉတၢင်းၶၼ်ၶဝ်ဢေႃႈ။-
မၼ်းၸဝ်ႈတၵ်းၵိူၼ်ႇယႃႉထဵင်လၢင်းပၢႆလမ်းဝဵင်းပႅတ်ႈလႄႈယဵပ်ႇယမ်ႈႁႂ်ႈတူၵ်းပဵၼ်မုၼ်ႈလိၼ်ၵႂႃႇဢေႃႈ။
ၼႂ်းမိုဝ်ႉဝၼ်းၶိင်ႇၵႃႇလႃႉၼၼ်ႉၵူၼ်းတင်းလၢႆတၵ်းဢွၼ်ၵၼ်ႁဵတ်းၵႂၢမ်းၵႃႈၼႂ်းမိူင်း ယုတႃႉ၊ လႄႈဝႃႈၸမ်ႉ၊ ဝဵင်းႁဝ်းၼႆႉႁႅင်းယႂ်ႇမၼ်ႈၶိူင်ႇဢေႃႈ။ ၽြႃးပဵၼ်ၸဝ်ႈၵႅတ်ႇၶႄႁႄႉၵင်ႈလမ်းဝဵင်းတင်းလၢႆဢေႃႈ။
ဢွၼ်ၵၼ်ၽုၺ်ႇပိုတ်ႇၽၵ်းတူဝဵင်းလႄႈ ႁႂ်ႈမဵဝ်းၵူၼ်းဢၼ်ပႂ်ႉသဵတ်ႈၸႃႇဢိၵ်ႇတင်းမဵဝ်းၵူၼ်းဢၼ်သိုဝ်ႈတေႃႇၼၼ်ႉၶဝ်ႈတႃႉ။
ၸဝ်ႈႁဝ်း ထႃႇဝရႃႉၽြႃး၊ ပၼ်တၢင်းဢၼ်ၼိမ်လီ၊ တီႈၶဝ်ၸိူဝ်းဢၼ်မီးၸႂ်မၼ်ႈၶိူင်ႇလႄႈဢိင်ပိုင်ႈၸဝ်ႈႁဝ်းၼၼ်ႉတီႈၶႃႈဢေႃႈ။
ဢွၼ်ၵၼ်ဢိင်ပိုင်ႈ ထႃႇဝရႃႉၽြႃး၊ ယူႇတႃႇသေႇဢမ်ႇထၢတ်ႇတႃႉ။ မၼ်းၸဝ်ႈတၵ်းၵႅတ်ႇၶႄႁႄႉၵင်ႈႁဝ်းတႃႇသေႇဢေႃႈ။
မၼ်းၸဝ်ႈဢဝ်ၶဝ်ၸိူဝ်းဢၼ်ႁူဝ်ၸႂ်ၽႅၼ်သုင်ၼၼ်ႉၶျႃးတူၵ်းတီႈတႅမ်ႇလႄႈ မၼ်းၸဝ်ႈၵိူၼ်ႇယႃႉဝဵင်းဢၼ်ႁႅင်းယႂ်ႇမၼ်ႈၶိူင်ႈၼၼ်ႉလႄႈ ယႃႉပႅတ်ႈလမ်းဝဵင်းဢၼ်ၶဝ်ယူႇၼၼ်ႉ၊ယဵပ်ႇယမ်ႈႁႂ်ႈပဵၼ်မုၼ်ႈလိၼ်ၵႂႃႇဢေႃႈ။
ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်တဵၵ်းငႅၼ်းၼၼ်ႉ၊ မိူဝ်ႈလဵဝ်ၼႆႉဢွၼ်ၵၼ်၊ယဵပ်ႇယမ်ႈတႆႇၶၢမ်ႈၵႃႈၼိူဝ်မိူင်းၼၼ်ႉၵႂႃႇဢေႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းႁဵတ်းသဵၼ်ႈတၢင်းၵူၼ်းသိုဝ်ႈတေႃႇတင်းလၢႆ၊ ႁႂ်ႈၵဵင်ႈလီလိူမ်ႈလီလႄႈႁႂ်ႈတၢင်းၵႂႃႇတၢင်းမႃးၶဝ်ၼၼ်ႉပဵင်းလီဢေႃႈ။
ၶႃႈၸဝ်ႈႁဝ်းၶဝ်ၸွမ်းသဵၼ်ႈတၢင်းဢလူဝ်ႇ ၸဝ်ႈႁဝ်းလႄႈဢဝ်တၢင်းမုင်ႈမွင်းဝႆႉၵႃႈတီႈၸဝ်ႈႁဝ်းတီႈၶႃႈဢေႃႈ။ ၸဝ်ႈႁဝ်းပဵၼ်တီႈဢၼ်ၶႃႈၸဝ်ႈႁဝ်းၶဝ်တူၵ်းဢၢင်ႈၶႂ်ႈလႆႈၼၼ်ႉတီႈၶႃႈဢေႃႈ။
ၶိင်ႇၵၢင်ၶိုၼ်းၶႃႈၸဝ်ႈဢဝ်တင်းႁူဝ်ၸႂ်တိူင်ႇႁႃ ၵၢဝ်ႇႁႃၸဝ်ႈႁဝ်း၊ယၢမ်းမိူဝ်ႈဢၼ်ၸဝ်ႈႁဝ်း ၸီႇယၢင်ႇၸႅတ်ႈသေးလိၼ်မိူင်းဢိၵ်ႇတင်းၵူၼ်းလေႃးၵီႇတင်းလၢႆသေယဝ်ႉ၊ ၶဝ်တၵ်းသွၼ်ဢဝ်တြႃးတၢင်းဢၼ်သိုဝ်ႈတေႃႇၼၼ်ႉတီႈၶႃႈဢေႃႈ။
ၵေႃႉဢၼ်ဢမ်ႇတြႃးၼၼ်ႉပိၵ်ႉသမ်ႉလႆႈၶၢမ်ႇဢဝ်ၵျေးၸူးၸဝ်ႈသေၵေႃႈ၊ ၶဝ်ဢမ်ႇၸၢင်ႈသွၼ်ဢဝ်တြႃးတၢင်းဢၼ်သိုဝ်ႈတေႃႇၼၼ်ႉ၊ ၶဝ်ၵမ်ၵျၢင်ႉဢၼ်မိူၵ်ႈလိူင်းယူႇၵႃႈၼႂ်းမိူင်းဢၼ်မီးသိၼ်မီးထမ်းၼၼ်ႉလႄႈ ၶဝ်ယင်းဢမ်ႇမၢတ်ႈဢမ်ႇတွင်းတၢင်းဢၼ်ၸဝ်ႈႁဝ်းယႂ်ႇမျၢတ်ႈၼၼ်ႉလူင်ပႄႇ။
ရၢၼ်ႇသူႇၸဝ်ႈႁဝ်းၸိူဝ်းၼၼ်ႉယင်းဢမ်ႇႁု ဢမ်ႇႁၼ်တၢင်းဢၼ်ၸဝ်ႈႁဝ်းတၵ်းပၼ်တၢမ်ႇတီႈၶဝ်ၼၼ်ႉလူင်ပႄႇ၊ ထႃႇဝရႃႉၽြႃး၊ တီႈၶႃႈ။ ႁႂ်ႈၶဝ်လႆႈဢူၵ်းလႆႈဢၢႆလႄႈလႆႈၶၢမ်ႇၽေးတုၵ်ႉၶႃႉသေၵမ်းတီႈၶႃႈ။ ႁႂ်ႈၶဝ်လႆႈၶၢမ်ႇၽေးတုၵ်ႉၶႃႉဢၼ်ၸဝ်ႈႁဝ်းမႄးႁႅၼ်းတၢမ်ႇဢပျတ်ႈပုၼ်ႈၶဝ်ၼၼ်ႉသေၵမ်း။ ႁႂ်ႈၶဝ်လႆႈႁုႁၼ်တၢင်းဢၼ်ၸဝ်ႈႁဝ်းႁၵ်ႉၵူၼ်းၸဝ်ႈႁဝ်းၼၼ်ႉသေၵမ်းတီႈၶႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းတၵ်းႁႂ်ႈၶႃႈၸဝ်ႈႁဝ်းၶဝ်ၶိုၼ်ႈယႂ်ႇမႂ်ႇသုင်လႄႈ ၵႃႈဢၼ်ၶႃႈၸဝ်ႈႁဝ်းလႆႈလီလႆႈပဵၼ်မႃးၼၼ်ႉပဵၼ်တၢင်းဢၼ်ၸဝ်ႈႁဝ်းပၼ်တီႈၶႃႈဢေႃႈ။
ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၶႃႈတီႈၶႃႈ။ ၶႃႈၸဝ်ႈႁဝ်းၶဝ်လႆႈၶၢမ်ႇတၢင်းဢၼ်ပိူၼ်ႈဢုပ်ႉပိူင်ႇတီႈၶႃႈဢေႃႈ။ ၼႂ်းဝႃႈၼၼ်သေၵေႃႈ၊ၸဝ်ႈႁဝ်းၶႃႈ သူႇလဵဝ်ပႃးလဵဝ်ၵူၺ်းပဵၼ် ထႃႇဝရႃႉၽြႃး၊ ၶႃႈၸဝ်ႈႁဝ်းၶဝ်ဢေႃႈ။
တေႃႈလဵဝ်ၼႆႉၶဝ်ၸိူဝ်းၼၼ်ႉတၢႆမူတ်းယဝ်ႉ တီႈၶႃႈယဝ်ႉ။ ၵမ်းလိုၼ်းဢသၢၵ်ႈဢမ်ႇလႆႈၶိုၼ်းလိပ်းတီႈၶႃႈ၊ ၽီၶဝ်တၵ်းဢမ်ႇလုၵ်ႉၵွပ်ႈပိူဝ်ႈၸဝ်ႈႁဝ်း ပၼ်တၢမ်ႇတီႈၶဝ်လႄႈယႃႉပႅတ်ႈၶဝ်ၼၼ်ႉဢေႃႈ။ ၽူႈလႂ်ဢမ်ႇၶိုၼ်းၶုၵ်းၸႂ်လႆႈၶႂ်ႈၸႂ်ထူပ်းၶဝ်ထႅင်ႈသေပွၵ်ႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းႁဵတ်း ႁႂ်ႈၵူၼ်းမဵဝ်းၶႃႈၸဝ်ႈႁဝ်းၶဝ်ၶိုၼ်ႈယႂ်ႇမႂ်ႇသုင်မႃးတီႈၶႃႈလႄႈ မႄႇၶႂၢၵ်ႈသိုင်ႇၸိုင်ႈဝၢၼ်ႈမိူင်းၸဝ်ႈၵူႈၽၢႆႇၵူႈပႃႈ သေယဝ်ႉ၊ႁႂ်ႈမုၼ်ၽုင်းၸဝ်ႈႁဝ်းယႂ်ႇၼႃႇတီႈၶႃႈယဝ်ႉ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းပၼ်တၢမ်ႇတီႈၵူၼ်းၸဝ်ႈႁဝ်းယဝ်ႉ၊ ၵူၺ်းၵႃႈ၊ၶဝ်ပႃးတင်းႁူဝ်ၸႂ်ဢၼ်ၸဵပ်းသႅပ်ႇၼႃႇလႄႈသူးတွင်းတီႈၸဝ်ႈႁဝ်းတီႈၶႃႈဢေႃႈ။
ၸဝ်ႈႁဝ်း ထႃႇဝရႃႉၽြႃး၊ ႁဵတ်းႁႂ်ႈၶႃႈၸဝ်ႈႁဝ်းၶဝ်ႁွင်ႉႁႆႈၸိူဝ်ႉၼင်ႇဢၼ်မႄႈယိင်းႁွင်ႉႁႆႈ၊ ယၢမ်းမိူဝ်ႈဢၼ်ၶၢမ်ႇဝူၺ်ႇတၼႃႇဢၼ်ၵိူတ်ႇလဵင်ႉလုၵ်ႈၼၼ်ႉဢေႃႈ။
ၶႃႈၸဝ်ႈႁဝ်းၶဝ်မီးတၢင်းဢၼ်ၸဵပ်းၶိုၼ်ႈလႄႈၶၢမ်ႇဝူၺ်ႇတၼႃႇယူႇတီႈၶႃႈ။ ၵူၺ်းၵႃႈ၊ၶႃႈၸဝ်ႈႁဝ်းၶဝ်ဢမ်ႇၵိူတ်ႇလဵင်ႉၵႃႈသင်ဢွၵ်ႇမႃးတီႈၶႃႈ၊ ၶႃႈၸဝ်ႈႁဝ်းၶဝ်ယင်းဢမ်ႇပႄႉၼႅင်ႇၵႃႈသင်လႆႈ ပုၼ်ႈမိူင်းႁဝ်းလႄႈဢမ်ႇတႄႇဢမ်ႇတင်ႈၵႃႈသင်လႆႈတီႈၶႃႈ။
ၵူၼ်းၶႃႈၸဝ်ႈႁဝ်းၶဝ်ဢၼ်တၢႆတင်းလၢႆၼၼ်ႉဢသၢၵ်ႈတၵ်းၶိုၼ်းလိပ်းတီႈၶႃႈဢေႃႈ။ တူဝ်တၢႆၶဝ်ၵေႃႈတၵ်းလုၵ်ႉၶိုၼ်းတီႈၶႃႈဢေႃႈ။ ၶဝ်ၸိူဝ်းဢၼ်ၼွၼ်းလပ်းၵႃႈၼႂ်းၶုမ်ပႃႇႁဵဝ်ႈၼၼ်ႉ တၵ်းတိုၼ်ႇမႃးလႄႈႁဵတ်းၵႂၢမ်းဢၼ်သႂၢင်ႇဢၼ်သိူဝ်းဢေႃႈ။ ၸိူဝ်ႉၼင်ႇဢၼ်ၼမ်ႉၼၢႆးႁဵတ်းႁႂ်ႈတူၼ်ႈယိူဝ်ႈၶဵဝ်ယူႇ ၵႃႈၼိူဝ်လိၼ်ၼၼ်ႉ၊ လိၼ်မိူင်းၼႆႉၵေႃႈတၵ်းဢဝ်ၶဝ်ၸိူဝ်း ဢၼ်တၢႆၵႂႃႇႁိုင်ၼႃႇယဝ်ႉၼၼ်ႉလုၵ်ႉၶိုၼ်းလိပ်းမႃးဢေႃႈ။
ၵူၼ်းမဵဝ်းၵဝ်႟။ ၶဝ်ႈၵႃႈၼႂ်းႁိူၼ်းသူသေလႄႈဢိုတ်းႁပ်းၽၵ်းတူႁိူၼ်းဝႆႉတႃႉ။ တဵတ်ႇမႅပ်းယူႇၵမ်းဢွၼ်ႇၼိုင်ႈတေႃႇထိုင်ႁွတ်ႈတၢင်းၸႂ်မႆႈၶႂ်ႈၸႃႉၸဝ်ႈပူၼ်ႉၵႂႃႇၼၼ်ႉတႃႉ။-
လွင်ႈမၼ်းၸမ်ႉ၊ ထႃႇဝရႃႉၽြႃး၊ ဢွၵ်ႇသေၵႃႈတီႈထႃႇၼႃႉမၼ်းၸဝ်ႈမႃးႁႂ်ႈလႆႈပၼ်တၢမ်ႇဢပျတ်ႈတီႈၵူၼ်းလေႃးၵႃႉတင်းလၢႆ ၵွပ်ႈပိူဝ်ႈတုၸရိူၵ်ႈၶဝ်ဢေႃႈ။ မိူဝ်ႈၼၼ်ႉလိၼ်မိူင်းတၵ်းၽုၺ်ႇဢွၵ်ႇၼႄပျႃးတၢင်းဢၼ်တဵတ်ႇတဵတ်ႇလွမ်ဢဝ်ၵၼ်တၢႆၼၼ်ႉသေလႄႈလိၼ်မိူင်းတၵ်းဢမ်ႇသိူင်ႇဝႆႉလပ်ႉဝႆႉၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ဢဝ်တၢႆၼၼ်ႉဢေႃႈ။
ၼႂ်းမိုဝ်ႉဝၼ်းၶိင်ႇၵႃႇလႃႉၼၼ်ႉ ထႃႇဝရႃႉၽြႃး၊ တၵ်းပႃးတင်းတၼ်းၶူဝ်းယႂ်ႇလႄႈဢဝ်လၢပ်ႇၸဝ်ႈလႅဝ်းၸဝ်ႈဢၼ်ၸၢင်ႈဢဝ်တၢႆၼၼ်ႉပၼ်တၢမ်ႇတီႈငိူၵ်ႈ လဝိသၼ်ႇ၊ ဢၼ်ၶူတ်းလိမ်ႇၶူတ်းငေႃးယူႇ၊ဢိၵ်ႇတင်းၼၵႃးလူင်ဢၼ်မီးၵႃႈၼႂ်းပၢင်ႇလၢႆႇၼၼ်ႉဢေႃႈ။
ၼႂ်းမိုဝ်ႉဝၼ်းၶိင်ႇၵႃႇလႃႉၼၼ်ႉ ထႃႇဝရႃႉၽြႃး၊ တၵ်းလၢတ်ႈလူၺ်ႈလွင်ႈသူၼ်ဢူးယဵၼ်ႇမၢၵ်ႇၸပိတ်ႉၸဝ်ႈဢၼ်သႃႇယႃႇလီငၢမ်းၼၼ်ႉလႄႈဝႃႈၸမ်ႉ၊-
“ၵဝ် ထႃႇဝရႃႉၽြႃး၊ ပႂ်ႉလူလုမ်းလႃးမၼ်း၊ႁူတ်းၼမ်ႉမၼ်းၶိူဝ်းၶိူဝ်းယႂ်းယႂ်းဢေႃႈ။ ၵဝ်ပႂ်ႉမၼ်းဝႆႉဝၼ်းဝၼ်းၶိုၼ်းၶိုၼ်းပုၼ်ႈလွင်ႈၼင်ႇႁိုဝ်ၽူႈလႂ်သေၵေႃႉသေၵူၼ်းတၵ်းဢမ်ႇမႃးယႃႉမၼ်းလႆႈဢေႃႈ။-
ၵဝ်ဢမ်ႇၶႂ်ႈၸႃႉတေႃႇသူၼ်ၼၼ်ႉယဝ်ႉ။ ပေႃးမီးတူၼ်ႈၼၢမ်တူၼ်ႈၶိူဝ်းဢွၵ်ႇမႃးၵႃႈၼႂ်းမၼ်းၸိုင်၊ၵဝ်တၵ်းတိုၵ်းတေႃးလႄႈဢဝ်ၽႆးတုတ်ႇပႅတ်ႈသဵင်ႈသဵင်ႈဢေႃႈ။-
ဢမ်ႇၼၼ်ၵေႃႈ၊ပေႃးၶဝ်ၸိူဝ်းဢၼ်ပဵၼ်ရၢၼ်ႇသူႇတီႈၵူၼ်းၵဝ်ၼၼ်ႉဢၢင်ႈဢၢၼ်းၶႂ်ႈႁႂ်ႈၵဝ်ၵႅတ်ႇၶႄႁႄႉၵင်ႈပၼ်ၸိုင်၊ႁႂ်ႈၶဝ်ႁဵတ်းမိၵ်ႈသႁႃႇယႃႉတၢင်းဢၼ်ထုၵ်ႇၵၼ်တင်းၵဝ်တႃႉ။ ၸႂ်ႈယဝ်ႉ။ ႁႂ်ႈၶဝ်ႁဵတ်းမိၵ်ႈသႁႃႇယႃႉတၢင်းဢၼ်ထုၵ်ႇၵၼ်တင်းၵဝ်တႃႉ၊” ဝႃႈၼင်ႇၼႆဢေႃႈ။
ၼႂ်းမိုဝ်ႉဝၼ်းၶိင်ႇၵႃႇလႃႉၵမ်းလိုၼ်းၼၼ်ႉၵူၼ်းမဵဝ်း ဢိသရေး၊ ဢၼ်ဝႃႈၸိူဝ်ႉၶိူဝ်း ယႃႇၵုပ်ႈ၊ တၵ်းယင်ႇႁၢၵ်ႈသေယဝ်ႉ၊တၵ်းၶဵဝ်လီပူင်ႇလီလႄႈဢွၵ်ႇယွတ်ႈဢွၵ်ႇတုမ်ႇဢေႃႈ။ မၢၵ်ႇဢၼ်ၶဝ်ၽုၵ်ႇၶဝ်သွမ်ႈၼၼ်ႉတၵ်းတဵမ်ဝႆႉၵႃႈၼိူဝ်လိၼ်မိူင်းဢေႃႈ။
ထႃႇဝရႃႉၽြႃး၊ ဢမ်ႇတွၼ်ႉပၼ်တၢမ်ႇတီႈၵူၼ်းမဵဝ်း ဢိသရေး၊ ၵျၢမ်းထၢမ်းၼႃႇမိူၼ်ၸိူဝ်ႉၼင်ႇဢၼ်ယၢမ်ႈပၼ်တီႈရၢၼ်ႇသူႇၶဝ်။ ဢမ်ႇတွၼ်ႉဢဝ်တၢႆႁႂ်ႈၶဝ်ထၢၼ်ႈပေႃးယွမ်းၵႂႃႇၼမ်ၼႃႇလူင်လၢင်။-
ထႃႇဝရႃႉၽြႃး၊ သင်ႇသွၼ်သုင်းမႃႉၶဝ်ႁႂ်ႈၶဝ်လႆႈၶၢမ်ႇတူၵ်းၵႅၼ်းၵူၺ်းဢေႃႈ။ မၼ်းၸဝ်ႈဢဝ်လူမ်းဢၼ်ႁႅင်းၼႃႇထူဝ်းၶဝ်ၵႂႃႇၼႂ်းဝၼ်းဢၼ်လူမ်းတၢင်းဢွၵ်ႇမႃးၼၼ်ႉဢေႃႈ။-
ၼႂ်းဝႃႈၼၼ်သေၵေႃႈဢပျတ်ႈၵူၼ်းမဵဝ်း ဢိသရေး၊ ၶဝ်ၸိူဝ်းၼၼ်ႉတၵ်းလႆႈၶၢမ်ႇတၢင်းဢၼ်ပွႆႇလွတ်ႈပၼ်ယၢမ်းမိူဝ်ႈဢၼ်ၶဝ်ႁဵတ်းႁႂ်ႈမၢၵ်ႇႁိၼ်ၶဵင်ႇတၢင်းလူႇၶဝ်ၼၼ်ႉပဵၼ်မိူၼ်ၸိူဝ်ႉၼင်ႇမၢၵ်ႇႁိၼ်ဢၼ်ႁၵ်းပႅတ်ႈၵႂႃႇမိူၼ်ၸိူဝ်ႉၼင်ႇမၢၵ်ႇႁိၼ်ထုၼ်ၼၼ်ႉဢေႃႈ။ ၶဵင်ႇတၢင်းလူႇၶဝ်ဢၼ်ၽဝ်ၼၢမ်ႇသႃႇလႂ်၊တင်းႁုၼ်ႇႁၢင်ႈၼၢင်းၽီ ဢႃႇသရႃႉ၊ လႂ်ဢမ်ႇမီးသေဢိတ်းယဝ်ႉၼၼ်ႉၵူၺ်းဢေႃႈ။
ဝဵင်းဢၼ်မၼ်ႈၶိူင်ႇတင်းလၢႆပဵၼ်ဢၼ်သဵတ်ႇဢၼ်ငႅဝ်၊ပဵၼ်တီႈယူႇဢၼ်ပႅတ်ႈႁၢမ်းဝႆႉမိူၼ်ၸိူဝ်ႉၼင်ႇထိူၼ်ႇၼင်ႇၶိူဝ်းၼၼ်ႉဢေႃႈ။ မၼ်းပဵၼ်တီႈဢၼ်ပွႆႇသူဝ်းပွႆႇဝူဝ်းႁႂ်ႈၶဝ်ၶူပ်းၵိၼ်ၼွၼ်းၵိၼ်ယူႇၼၼ်ႉဢေႃႈ။-
တူၼ်ႈမႆႉတင်းလၢႆႁၵ်းလႄႈၵိင်ႇမၼ်းၶႃႈမၼ်းႁဵဝ်ႇၵႂႃႇသေယဝ်ႉ၊ၽူႈယိင်းတင်းလၢႆဢွၼ်ၵၼ်ၵႂႃႇၵဵပ်းဢဝ်ႁဵတ်းၽိုၼ်းဢေႃႈ။ လွင်ႈမၼ်းၸမ်ႉ၊ၵူၼ်းတင်းလၢႆပဵၼ်မဵဝ်းၵူၼ်းဢၼ်ဢမ်ႇမီးၺၢၼ်ႇဢေႃႈ။ ပိူဝ်ႈၼႆလႄႈၽြႃးပဵၼ်ၸဝ်ႈဢၼ်ၽၢၼ်ႇသၢင်းႁဵတ်းပဵၼ်ၶဝ်ၼၼ်ႉတၵ်းဢမ်ႇဢဵတ်းလူၶဝ်၊တၵ်းဢမ်ႇၼႄပျႃးၵျေးၸူးၵရုၼႃႇတီႈၶဝ်လႄႈယူႇဢေႃႈ။
ၼႂ်းမိုဝ်ႉဝၼ်းၶိင်ႇၵႃႇလႃႉၼၼ်ႉ ထႃႇဝရႃႉၽြႃး၊ တၵ်းၵဵပ်းတွမ်ၵဵပ်းႁွမ်ၵူၼ်းမၼ်းၸဝ်ႈတႄႇၸႃႉဢဝ်ၸႃႉၸဵမ်မႄႈၼမ်ႉ ဢုၽရတ်ႉ၊ တေႃႇထိုင်ႁွတ်ႈလႅၼ်လိၼ်မိူင်း ဢေးၵျိပ်ႉ၊ ၼၼ်ႉၵေႃႉၼိုင်ႈယဝ်ႉၵေႃႉၼိုင်ႈမိူၼ်ၸိူဝ်ႉၼင်ႇဢၼ်ၽႄဢဝ်သၢၼ်ၶဝ်ႈၵျုင်ႇၽၢတ်ႇဢွၵ်ႇသေၵႃႈတီႈၵႅပ်ႇၵႃႈတီႈႁမ်းမၼ်းၼၼ်ႉဢေႃႈ။
ၼႂ်းမိုဝ်ႉဝၼ်းၶိင်ႇၵႃႇလႃႉၼၼ်ႉတၵ်းမီးတၢင်းဢၼ်ပဝ်ႇၼႄးၶရႃႇသဵင်ယႂ်ႇၼႃႇႁႂ်ႈလႆႈႁွင်ႉဢဝ်ၵူၼ်းမဵဝ်း ဢိသရေး၊ ၸိူဝ်းဢၼ်တူၵ်းၵႅၼ်းယူႇၵႃႈၼႂ်းမိူင်း ဢႃႇသီးရီးယႃး၊ ဢိၵ်ႇတင်းမိူင်း ဢေးၵျိပ်ႉ၊ ၼၼ်ႉၶိုၼ်းမႃးဢေႃႈ။ ၶဝ်တၵ်းဢွၼ်ၵၼ်မႃးလႄႈၶုပ်ႉမူပ်ႇၵူဝ်းၵႂၢႆႇ ထႃႇဝရႃႉၽြႃး၊ ၼႂ်းဝဵင်း ယေႇရုသလႅမ်ႇ၊ ၵႃႈၼိူဝ်လွႆဢၼ်မူတ်းၸၢင်ႇၼၼ်ႉဢေႃႈ။
သိုင်ႇၸိုင်ႈဝၢၼ်ႈမိူင်း ဢိသရေး၊ မီးဢႃႉမၢင်ႇၵလႃႇဢေႃႈ။ လွင်ႈမၼ်းၸမ်ႉ၊မုၼ်သရေႇမၼ်းႁဵဝ်ႇႁႅင်ႈလူၼ်ႇတူၵ်းၵႂႃႇမိူၼ်ၸိူဝ်ႉၼင်ႇမွၵ်ႇယႃႈပၢၼ်းၵုမ်းဢၼ်မီးၵႃႈၼိူဝ်ႁူဝ်ၶုၼ်ၶဝ်ဢၼ်မဝ်းလဝ်ႈမဝ်းၵမ်ၼၼ်ႉဢေႃႈ။ ႁူဝ်ၶဝ်ဢၼ်ဢုပ်ႇဝၢဝ်းၽႅၼ်သုင်ၼၼ်ႉသႂ်ႇၼမ်ႉမၼ်းႁွမ်ႁၢင်ႈၶိူင်ႈဝႆႉႁၢင်ႈလီႁၢင်ႈငၢမ်းဢေႃႈ။ ၵူၺ်းၵႃႈ၊ၶဝ်ၼၼ်ႉမဝ်းလဝ်ႈၼႃႇလႄႈၼွၼ်းယူႇၵူၺ်းဢေႃႈ။-
ထႃႇဝရႃႉၽြႃး၊ မီးၵေႃႉဢၼ်ႁႅင်းယႂ်ႇဢိၵ်ႇတင်းတၼ်းၶူဝ်းယႂ်ႇလႄႈတၼ်းဝႆႉတႃႇတေတိုၵ်းတေႃးၶဝ်ဢေႃႈ။ ၵေႃႉၼၼ်ႉတၵ်းႁွတ်ႈမႃးမိူၼ်ၸိူဝ်ႉၼင်ႇၽူၼ်မၢၵ်ႇႁဵပ်း၊မိူၼ်ၸိူဝ်ႉၼင်ႇၽူၼ်လူင်လူမ်းလူင်ဢၼ်ပတ်ႉထူဝ်းမႃး၊မိူၼ်ၸိူဝ်ႉၼင်ႇၼမ်ႉၸႅဝ်ႈႁႅင်းယႂ်ႇၼႃႇ၊ဢၼ်လုပ်ႇထူမ်ႈႁႅင်းယႂ်ႇၼႃႇလႄႈထူမ်ႈႁူမ်ႇလိၼ်မိူင်းၼၼ်ႉဢေႃႈ။-
တၢင်းဢၼ်ဢုပ်ႇဝၢဝ်းၽႅၼ်သုင်ၶုၼ်ၶဝ်ဢၼ်ၵိၼ်လဝ်ႈမဝ်းၵမ်ၼၼ်ႉလႆႈၶၢမ်ႇတၢင်းဢၼ်တိၼ်ယဵပ်ႇၶၢမ်ႈဢေႃႈ။-
မုၼ်ၽုင်းၶုၼ်ၶဝ်ဢၼ်ဢုပ်ႇဝၢဝ်းၽႅၼ်သုင်ၼၼ်ႉတၵ်းႁဵဝ်ႇႁႅင်ႈလူၼ်ႇတူၵ်းလႄႈႁၢႆၵႂႃႇမိူၼ်ၸိူဝ်ႉၼင်ႇမၢၵ်ႇလိူဝ်ႇဢၼ်မၢၵ်ႇမႃးဢွၼ်တၢင်းၼႂ်းၶိင်ႇႁႅင်ႈဢမ်ႇပႆႇတဵမ်ထူၼ်ႈဢၼ်ပိူၼ်ႈဝိတ်းၵိၼ်မိူဝ်ႈဢၼ်မၼ်းႁၢမ်ႇမႃးၵမ်းလဵဝ်ၼၼ်ႉဢေႃႈ။
ၼႂ်းမိုဝ်ႉဝၼ်းၶိင်ႇၵႃႇလႃႉၼၼ်ႉ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ တၵ်းပဵၼ်သရၽူႇဢၼ်မီးမုၼ်ၽုင်းပုၼ်ႈၵူၼ်းမၼ်းၸဝ်ႈၸိူဝ်းဢၼ်ဢသၢၵ်ႈလိပ်းၵိုတ်းၵျၢၼ်ႇယူႇၼၼ်ႉဢေႃႈ။-
မၼ်းၸဝ်ႈတၵ်းပၼ်ၺၢၼ်ႇဢၼ်ၸၢင်ႈၸီႇယၢင်ႇၸွမ်းၼင်ႇတြႃးတီႈၶုၼ်ဢၼ်ၸီႇယၢင်ႇတြႃးတင်းလၢႆလႄႈသမ်ႉပၼ်ဢဵၼ်ႁႅင်းတီႈၶဝ်ၸိူဝ်းဢၼ်ၵႅတ်ႇၶႄႁႄႉၵင်ႈၽၵ်းတူဝဵင်းၶဝ်လႄႈတိုၵ်းရၢၼ်ႇသူႇတင်းလၢႆၼၼ်ႉဢေႃႈ။
ပရေႃးၽႅတ်ႈ တင်းလၢႆ၊ဢိၵ်ႇတင်းယဵၸ်ႈပရေႃးႁဵၵ်ႈ တင်းလၢႆယင်းဢွၼ်ၵၼ်ၵိၼ်လဝ်ႈမဝ်းၵမ်လႄႈဝၢင်ႇဝီႈဝၢင်ႇဝိူဝ်ႈယူႇဢေႃႈ။ ၶဝ်ၵိၼ်ၼမ်ႉလဝ်ႈမၢၵ်ႇၸပိတ်ႉ၊ဢိၵ်ႇတင်းၼမ်ႉလဝ်ႈဢၼ်ၶိုၼ်ႇႁႅင်းၼၼ်ႉလႄႈလူမ်ႉတူၵ်းပိူင်ႈတႃႈပိူင်ႈတၢင်းၵႂႃႇဢေႃႈ။ ပရေႃးၽႅတ်ႈတင်းလၢႆၵိၼ်လဝ်ႈမဝ်းပူၼ်ႉမဝ်းလိူဝ်လႄႈဢမ်ႇၸၢင်ႈႁုၸႅင်ႈရူႇပႃႇရူင်ႇဢၼ်ၽြႃးပဵၼ်ၸဝ်ႈၼႄပျႃးၼၼ်ႉလႆႈ။ ယဵၸ်ႈပရေႃးႁဵၵ်ႈတင်းလၢႆၵေႃႈ၊ၵိၼ်လဝ်ႈမဝ်းပူၼ်ႉမဝ်းလိူဝ်လႄႈဢမ်ႇၸၢင်ႈၸီႇယၢင်ႇဢမုဢၼ်ပိူၼ်ႈမႃးတၢင်ႇဝႆႉတိူင်ႇဝႆႉၼၼ်ႉဢေႃႈ။-
ၽိူၼ်တီႈဢၼ်ၶဝ်ၼင်ႈၵိၼ်ၼၼ်ႉပဵၼ်ႁၢၵ်ႈတင်းသဵင်ႈလႄႈဢမ်ႇမီးတီႈဢၼ်ၵဵင်ႈသႂ်သေဢိတ်းဢေႃႈ။
ၶဝ်ဢွၼ်ၵၼ်လၢတ်ႈၵႂၢမ်းဢၼ်တၢင်ႇဢပျတ်ႈတီႈၵဝ်လႄႈဝႃႈ၊ “ၵေႃႉၼၼ်ႉမၼ်းထၢင်ႇဝႃႈ၊မၼ်းသင်ႇသွၼ်ၵႃႈသင်ပၼ်တီႈႁဝ်း။ မၼ်းႁႂ်ႈၽူႈလႂ်ႁုၸႅင်ႈၵႂၢမ်းပိင်ႇၺႃႇမၼ်းၼၼ်ႉ။ ပဵၼ်လုၵ်ႈဢွၼ်လႅင်ဢၼ်ၸႃႉၽၢတ်ႇၼူမ်းမႄႈမၼ်းၼၼ်ႉႁိုဝ်း။-
မၼ်းယင်းဢဝ်တူဝ်လိၵ်ႈဢႅၵ်ႉၶရႃႇတူဝ်ၼိုင်ႈယဝ်ႉတူဝ်ၼိုင်ႈ၊လိၵ်ႈထႅဝ်ၼိုင်ႈယဝ်ႉထႅဝ်ၼိုင်ႈ၊ပုၵ်ႈၼိုင်ႈယဝ်ႉပုၵ်ႈၼိုင်ႈသေလႄႈသွၼ်ပၼ်ႁဝ်းယဝ်ႉ၊” ဝႃႈၼင်ႇၼႆဢေႃႈ။
ပေႃးသူယင်းဢမ်ႇထွမ်ႇဢဝ်ၵႂၢမ်းၵဝ်ၸိုင်၊ၽြႃးပဵၼ်ၸဝ်ႈတၵ်းၸႂ်ႉၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်လၢတ်ႈၵႂၢမ်းၽႃႇသႃႇဢၼ်ပႅၵ်ႇပိူင်ႈၼၼ်ႉမႃးသွၼ်ပၼ်သူဢေႃႈ။-
မၼ်းၸဝ်ႈဢဵတ်းလူပၼ်ႁႂ်ႈသူလႆႈလိုဝ်ႈလႄႈႁွမ်ႁႅင်းၵူႈၵေႃႉၵူႈၵူၼ်းဢေႃႈ။ ၵူၺ်းၵႃႈ၊သူယင်းထဵင်ပႅတ်ႈလႄႈဢမ်ႇထွမ်ႇဢဝ်လူင်ပႄႇ။-
ပိူဝ်ႈၼႆလႄႈ ထႃႇဝရႃႉၽြႃး၊ တၵ်းဢဝ်တူဝ်လိၵ်ႈဢႅၵ်ႉၶရႃႇတူဝ်ၼိုင်ႈယဝ်ႉတူဝ်ၼိုင်ႈ၊လိၵ်ႈထႅဝ်ၼိုင်ႈယဝ်ႉထႅဝ်ၼိုင်ႈ၊လိၵ်ႈၵၼ်ႈၼိုင်ႈယဝ်ႉၵၼ်ႈၼိုင်ႈသေလႄႈသင်ႇသွၼ်သုင်းမႃႉသူ၊ႁႂ်ႈသူလႆႈႁွတ်ႈထိုင်တၢင်းဢၼ်ၶီႈလိုတ်းၼႂ်းယၢင်ႈတိၼ်သူၵူႈယၢင်ႈဢေႃႈ။ သူတၵ်းလႆႈၶၢမ်ႇတၢင်းဢၼ်လုလႅဝ်၊တၢင်းဢၼ်ၶမ်ၼႂ်းတူင်ႇႁႅဝ်ႉတူင်ႇၶိုမ်းလႄႈၶၢမ်ႇတၢင်းဢၼ်တိလႆႈၼၼ်ႉဢေႃႈ။
ပိူဝ်ႈၼႆလႄႈၵူၼ်းဢၼ်ၸၢင်ႈလႃႇၸၢင်ႈလင်လႄႈပဵၼ်ၵႄႇပဵၼ်ႁူဝ်ၵႃႈၼႂ်းၵူၼ်းဝဵင်း ယေႇရုသလႅမ်ႇ၊ ၶဝ်႟။ ဢွၼ်ၵၼ်ထွမ်ႇဢဝ်ၼုၵ်ႈၵပၢတ်ႈ ထႃႇဝရႃႉၽြႃး၊ တႃႉ။-
သူဢုပ်ႇဝၢဝ်းလႄႈလၢတ်ႈဝႃႈ၊ “ႁဝ်းႁဵတ်းမိၵ်ႈသႁႃႇယႃႉတၢင်းဢၼ်ထုၵ်ႇမေႃၵၼ်တၢင်းၶုၼ်တၢႆယဝ်ႉ။ ႁဵတ်းမိုတ်ႈႁဵတ်းၵိုဝ်းၵၼ်တင်းမိူင်းမရၼႃႉယဝ်ႉ။ မိူဝ်ႈဢၼ်ၽေးတၢင်းဢၼ်ယႃႉယူၵ်ႉႁွတ်ႈမႃးၼၼ်ႉႁဝ်းတၵ်းလွတ်ႈသေၽေးၼၼ်ႉၵွပ်ႈပိူဝ်ႈဢၼ်ႁဝ်းသွၼ်ႈပိုင်ႈတီႈမုသႃႇလႄႈတဵတ်ႇမႅပ်းယူႇၵႃႈတႂ်ႈတၢင်းဢၼ်ပႅတ်ႉလႅၼ်ၼၼ်ႉဢေႃႈ” ဝႃႈၼင်ႇၼႆယဝ်ႉ။-
ဢၼ်ၼႆႉၸမ်ႉ၊ပဵၼ်ပျႃႇတိၵ်ႈဢၼ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ၵဝ်တႄႇတင်ႈငဝ်ႈႁၢၵ်ႈဢၼ်မၼ်ႈၶိူင်ႇႁႅင်းယႂ်ႇၼႃႇၼၼ်ႉတႄႇႁဵတ်းဝဵင်း ၸိဢုၼ်ႇ၊ ယဝ်ႉ။ ၵႃႈၼႂ်းငဝ်ႈႁၢၵ်ႈၼၼ်ႉၵဝ်သႂ်ႇမၢၵ်ႇႁိၼ်ၸဵင်ႇတိူၵ်ႈလႄႈမီးတူဝ်လိၵ်ႈဢႅၵ်ႉၶရႃႇဢၼ်တႅမ်ႈဝႆႉဝႃႈ၊ ‘တၢင်းယုမ်ႇမၢတ်ႈပဵၼ်ဢၼ်တႄႇမၼ်ႈလႄႈၸႂ်ယႂ်ႇၸႂ်ယၢဝ်းဢေႃႈ’ ဝႃႈၼင်ႇၼႆၼၼ်ႉဢေႃႈ။-
တၢင်းဢၼ်တႅပ်းတတ်းၸွမ်းတြႃးတၵ်းပဵၼ်ငဝ်ႈႁၢၵ်ႈမႆမီႈၼၼ်ႉလႄႈတၢင်းသိုဝ်ႈတေႃႇသမ်ႉပဵၼ်လုၵ်ႈယွၼ်ႇမၼ်းဢေႃႈ၊” ဝႃႈၼင်ႇၼႆဢေႃႈ။ ၽူၼ်မၢၵ်ႇႁဵပ်းတၵ်းယႃႉၽဵဝ်ႈမုသႃႇဢၼ်သူသွၼ်ႈပိုင်ႈၼၼ်ႉပႅတ်ႈလႄႈၼမ်ႉတၵ်းထူမ်ႈႁူမ်ႇတီႈဢၼ်တဵတ်ႇမႅပ်းၼၼ်ႉပႅတ်ႈဢေႃႈ။-
မိၵ်ႈသႁႃႇယႃႉဢၼ်သူႁဵတ်းလူၺ်ႈၵၼ်တင်းၶုၼ်တၢင်းတၢႆၼၼ်ႉတၵ်းလုလႄႈ၊တၢင်းဢၼ်သူႁဵတ်းမိုတ်ႈႁဵတ်းၵိုဝ်းၵၼ်တင်းမိူင်းမရၼႃႉၼၼ်ႉတၵ်းလႆႈၶၢမ်ႇတၢင်းဢၼ်ယႃႉပႅတ်ႈဢေႃႈ။ မိူဝ်ႈဢၼ်ၽေးတၢင်းဢၼ်ယႃႉယူၵ်ႉႁွတ်ႈမႃးၼၼ်ႉသူတၵ်းလႆႈၶၢမ်ႇတၢင်းဢၼ်သုမ်းဢေႃႈ။-
ၽေးၼၼ်ႉတၵ်းပေႃႉထုပ်ႉသူယူႇၶိူဝ်းၶိူဝ်းယႂ်းယႂ်းယူႇၵူႈၼႂ်ၵူႈၼႂ်လႄႈသူတၵ်းလႆႈၶၢမ်ႇဢဝ်ၽေးၼၼ်ႉၵူႈဝၼ်းၵူႈၶိုၼ်းဢေႃႈ။ ၶၢဝ်ႇငၢဝ်းပျႃႇတိၵ်ႈဢၼ်မႂ်ႇၽြႃးပဵၼ်ၸဝ်ႈဢၼ်ႁွတ်ႈမႃးတီႈသူၶိူဝ်းၶိူဝ်းပဵၼ်တၢင်းဢၼ်တူၵ်းၸႂ်မႂ်ႇမႂ်ႇၵူၺ်းၵူၺ်းဢေႃႈ။-
သူတၵ်းပဵၼ်ၸိူဝ်ႉၼင်ႇထုင်းၵႂၢမ်းဢၼ်ဝႃႈ၊ၵူႇတီႈၼွၼ်းပွတ်းၼႃႇထၢၼ်ႈပေႃးဢမ်ႇပေႃးယဵတ်ႇတူဝ်ယဵတ်ႇၶိင်း၊ၽႃႈဝႆၵႅပ်ႈထၢၼ်ႈပေႃးဢမ်ႇပေႃးမႆပေႃးဝဵၼ်းဢေႃႈ၊ဝႃႈၼႆၼၼ်ႉယဝ်ႉ။-
ထႃႇဝရႃႉၽြႃး၊ တၵ်းတိုၵ်းတေႃးၸိူဝ်ႉၼင်ႇဢၼ်မၼ်းၸဝ်ႈႁဵတ်းတီႈလွႆ ပေႇရၸိမ်း၊ ဢိၵ်ႇတင်းၵႃႈၼႂ်းထူင်ႉ ၵိပွင်ႇ၊ ႁႂ်ႈမၼ်းၸဝ်ႈလႆႈႁဵတ်းဢၼ်လၢၵ်ႇဢၼ်လၢႆးဢၼ်မၼ်းၸဝ်ႈဢၢင်ႈတၵ်းႁဵတ်း၊ဢိၵ်ႇတင်းႁႂ်ႈလႆႈႁဵတ်းဢမုမၼ်းၸဝ်ႈ၊ဢၼ်ယၢမ်ႈႁဵတ်းယူႇသေႇသေႇၼၼ်ႉႁႂ်ႈယဝ်ႉတူဝ်ႈလီငၢမ်းဢေႃႈ။
ယႃႇပေႁႂ်ႈပဵၼ်တၢင်းဢၼ်ၶူဝ်လဵၼ်ႈတီႈၵႂၢမ်းဢၼ်ၵဝ်ပၼ်သတိတီႈသူၼၼ်ႉ။ ပေႃးဢမ်ႇၼၼ်တၵ်းယဵင်ႈၶႅၼ်းယၢပ်ႇၼႃႇပုၼ်ႈဢၼ်တၵ်းပၢႆႈလွတ်ႈၼၼ်ႉဢေႃႈ။ ၵဝ်လႆႈငိၼ်းလွင်ႈတၢင်းဢၼ် ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ တႅပ်းတတ်းဝႆႉႁႂ်ႈလႆႈယႃႉမိူင်းတင်းမိူင်းပႅတ်ႈၼၼ်ႉယဝ်ႉ။
သူဢွၼ်ၵၼ်ထွမ်ႇဢဝ်ၵႂၢမ်းဢၼ်ၵဝ်တၵ်းလၢတ်ႈၼၼ်ႉတႃႉ။ ဢွၼ်ၵၼ်ႁႄႈႁူသူထွမ်ႇငိၼ်းဢဝ်ဢၼ်ၵဝ်တၵ်းမွၵ်ႇလၢတ်ႈတီႈသူၼၼ်ႉတႃႉ။-
ၵေႃႉဢၼ်ႁဵတ်းၼႃးၼၼ်ႉမၼ်းဢမ်ႇထႆၼႃးမၼ်းယူႇၵူႈဝၼ်းႁႂ်ႈလႆႈဝၢၼ်ႇၸိူဝ်ႉဝၢၼ်ႇၽၼ်း။ မၼ်းယူင်းလိၼ်လႄႈတွႆႇၵွၼ်ႈလိၼ်ယၢႆႈယူႇၶိူဝ်းၶိူဝ်းယႂ်းယႂ်းႁိုဝ်း။-
ဝၢႆးသေဢၼ်မၼ်းထႆယဝ်ႉၽိူဝ်ယဝ်ႉလီလီၼၼ်ႉၸိုင်၊ဝၢၼ်ႇပိုၼ်ၸိူဝ်ႉၽၼ်းၸမုတ်ႈလႄႈၸီႇယႃႇဢေႃႈ။ သမ်ႉဢဝ်ၸိူဝ်ႉၶဝ်ႈၵျုင်ႇဝၢၼ်ႇသႂ်ႇပဵၼ်ထႅဝ်ပဵၼ်ထႅဝ်၊ဢိၵ်ႇတင်းၶဝ်ႈမုယေႃးၵေႃႈဝၢၼ်ႇဝႆႉမိူၼ်မိူၼ်ၵၼ်ဢေႃႈ။ ၵႃႈတီႈလဵပ်ႈႁွပ်ႈၸွမ်းလႅၼ်ၼႃးမၼ်းၼၼ်ႉမၼ်းယင်းဝၢၼ်ႇၶဝ်ႈပိူၵ်ႇတၢင်ႇၸိူဝ်ႉတၢင်ႇမဵဝ်းဢေႃႈ။-
မၼ်းႁုၵၢၼ်ၼႃးမၼ်းလီလီၵွပ်ႈပိူဝ်ႈၽြႃးပဵၼ်ၸဝ်ႈသွၼ်ပၼ်မၼ်းဢေႃႈ။-
မၼ်းဢမ်ႇဢဝ်မႆႉၸိင်ဢၼ်ၼၵ်းၼၼ်ႉၼူတ်ႈမဵတ်ႉၸမုတ်ႈ၊မဵတ်ႉၸီႇယႃႇၸိူဝ်းၼၼ်ႉ။ မၼ်းၸၢင်ႈဢဝ်ၶွၼ်ႉၵွမ်ႈပေႃႉၽတ်ႉႁႂ်ႈမဵတ်ႉၸိူဝ်ႉၼၼ်ႉႁူင်ႈတူၵ်းဢေႃႈ။-
မဵတ်ႉၶဝ်ႈၵျုင်ႇတင်းၶဝ်ႈမုယေႃးၸိုင်၊မၼ်းၼူတ်ႈယူႇတိၵ်းတိၵ်းဢမ်ႇၸႂ်ႈလႄႈ၊မၼ်းႁုလွင်ႈဢၼ်ႁေႃႈလေႃႉၵိင်ႈၵႂႃႇလႄႈၼူတ်ႈၶဝ်ႈၵျုင်ႇ၊ယင်းဢမ်ႇႁႂ်ႈမဵတ်ႉၶဝ်ႈၵျုင်ႇၼၼ်ႉလုလႅဝ်ဢေႃႈ။-
ပိင်ႇၺႃႇၸိူဝ်းၼႆႉၵႃႈမီးတင်းသဵင်ႈတင်းလူင်လုၵ်ႉသေၵႃႈတီႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မႃးဢေႃႈ။ တၢင်းၵျၢမ်ႇတၢင်းပွင်ဢၼ်ၽြႃးပဵၼ်ၸဝ်ႈပၼ်ၼၼ်ႉပႃးပိင်ႇၺႃႇလႄႈၸၢင်ႈႁဵတ်းႁႂ်ႈၶိုၼ်ႈယႂ်ႇမႂ်ႇသုင်ဢေႃႈ။
ၶဵင်ႇတၢင်းလူႇၽြႃးပဵၼ်ၸဝ်ႈ၊ဝဵင်း ယေႇရုသလႅမ်ႇ၊ ႟။ မႂ်းမီးဢႃႉမၢင်ႇၵလႃႇဢေႃႈ။ ဝဵင်းဢၼ်ၶုၼ် တႃႇဝိတ်ႈ၊ လိုဝ်ႈသဝ်း႟။ မႂ်းမီးဢႃႉမၢင်ႇၵလႃႇဢေႃႈ။ ပီၼိုင်ႈယဝ်ႉပီၼိုင်ႈႁႂ်ႈပွႆးၵိၼ်လဵင်ႉႁဵတ်းၸွမ်းပဵၼ်လႄႉပဵၼ်ၵမ်းယူႇတႃႉ။-
မိူဝ်ႈၼၼ်ႉၽြႃးပဵၼ်ၸဝ်ႈတၵ်းဢဝ်တၢင်းဢၼ်လုဢၼ်လႅဝ်တူၵ်းႁွတ်ႈၵႃႈၼိူဝ်ဝဵင်းဢၼ်ႁွင်ႉႁဵၵ်ႈဝႃႈ၊ၶဵင်ႇတၢင်းလူႇၼၼ်ႉလႄႈတၵ်းမီးဢၼ်ႁွင်ႉႁႆႈလူၺ်ႈသဵင်ဢၼ်ၶၢင်းၶီၶၢင်းၽၢၼ်ယူႇ၊ဢိၵ်ႇတင်းဝဵင်းတင်းဝဵင်းတၵ်းပဵၼ်ၸိူဝ်ႉၼင်ႇၶဵင်ႇတၢင်းလူႇဢၼ်လိူတ်ႈထူမ်ႈႁူမ်ႇဝႆႉၼၼ်ႉဢေႃႈ။-
ၽြႃးပဵၼ်ၸဝ်ႈတၵ်းတိုၵ်းတေႃးဝဵင်းၼၼ်ႉ၊တၵ်းဢဝ်ၵူၼ်းသိုၵ်းလွမ်ႉႁွပ်ႈဝႆႉ၊ဢိၵ်ႇတင်းတၵ်းဢဝ်တႅၼ်လိၼ်လွမ်ႉႁွပ်ႈမၼ်းဝႆႉလီလီဢေႃႈ။-
ဝဵင်း ယေႇရုသလႅမ်ႇ၊ တၵ်းပဵၼ်ၸိူဝ်ႉၼင်ႇဢၼ်ၽီၽဵတ်ႇၶတ်းၸႂ်လၢတ်ႈၵႂၢမ်းၵႃႈတႂ်ႈၼင်လိၼ်လႄႈႁဵတ်းသဵင်လဵၵ်ႉသဵင်ဢွၼ်ႇဢွၵ်ႇသေၵႃႈတီႈမုၼ်ႈလိၼ်မႃးၼၼ်ႉဢေႃႈ။
ဝဵင်း ယေႇရုသလႅမ်ႇ၊ ႟။ ၵူၼ်းတၢင်ႇသိုင်ႇတၢင်ႇမိူင်းဢၼ်တိုၵ်းတေႃးမႂ်းၸိူဝ်းၼၼ်ႉတၵ်းလႆႈၶၢမ်ႇတၢင်းဢၼ်လူမ်းပတ်ႉထူဝ်းၵႂႃႇမိူၼ်ၸိူဝ်ႉၼင်ႇမုၼ်ႈလိၼ်လႄႈ၊တပ်ႉသိုၵ်းၶဝ်ဢၼ်လီၵူဝ်လီႁႄၸိူဝ်းၼၼ်ႉတၵ်းပိဝ်သဵၼ်ၵႂႃႇမိူၼ်ၸိူဝ်ႉၼင်ႇၽိူင်းလႄႈလွင်ႈတၢင်းၼၼ်ႉတၵ်းၵိုင်ႉၵၢင်ႉပဵၼ်မႃးၵမ်းလဵဝ်ၼၼ်ႉဢေႃႈ။-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ တၵ်းပႃးဢဝ်တင်းၽႃႉလင်၊ဢိၵ်ႇတင်းဢိင်ႇသၼ်ႇ၊တၢင်းဢၼ်သဵင်လင်သဵင်မေႃးသေလႄႈၵႄႇသႄႇၼုၵ်ႈဢဝ်မႂ်းဢေႃႈ။ မၼ်းၸဝ်ႈတၵ်းပွႆႇၸႂ်ႉလူမ်းၽိဝ်ႁုင်၊ၽူၼ်လူင်လူမ်းလူင်၊ဢိၵ်ႇတင်းၽႆးဢၼ်မႆႈၵိၼ်ပႅတ်ႈၼၼ်ႉမႃးလႄႈ၊-
ၵႃႈဢၼ်ပဵၼ်တပ်ႉရၢၼ်ႇသူႇၵူၼ်းတၢင်ႇၸိူဝ်ႉတၢင်ႇၶိူဝ်းၸိူဝ်းဢၼ်တိုၵ်းတေႃးဝဵင်းၶဵင်ႇတၢင်းလူႇၽြႃးပဵၼ်ၸဝ်ႈ၊ၵႃႈဢၼ်ပဵၼ်ၶိူင်ႈလၢၵ်ႈၼၢၵ်ႈ၊ဢိၵ်ႇတင်းၶိူင်ႈၸႂ်ႉၼႂ်းသိုၵ်းၵႃႈမီးၵူႈၸိူဝ်ႉၵူႈပိူင်တၵ်းႁၢႆၵႂႃႇမိူၼ်ၸိူဝ်ႉၼင်ႇဢၼ်ၼွၼ်းၽၼ်ႁၼ်၊ဢမ်ႇၼၼ်ၵေႃႈမိူၼ်ၸိူဝ်ႉၼင်ႇရူႇပႃႇရူင်ႇၶိင်ႇၵၢင်ၶိုၼ်းၼၼ်ႉဢေႃႈ။-
မၼ်းတၵ်းမိူၼ်ၸိူဝ်ႉၼင်ႇၵေႃႉဢၼ်တွင်ႉမႆႈသႆႈလိူတ်ႈၼွၼ်းၽၼ်ႁၼ်ဝႃႈ၊မၼ်းလႆႈၵိၼ်လႄႈမိူဝ်ႈဢၼ်တိုၼ်ႇမႃးၼၼ်ႉယင်းတိုၵ်ႉတွင်ႉမႆႈယူႇၼၼ်ႉ၊ဢမ်ႇၼၼ်ၵေႃႈ၊ပဵၼ်ၸိူဝ်ႉၼင်ႇၵေႃႉဢၼ်ယၢၵ်ႇၼမ်ႉၶေႃးႁႅင်ႈၼၼ်ႉၼွၼ်းၽၼ်ဝႃႈ၊မၼ်းလႆႈၵိၼ်ၼမ်ႉလႄႈ၊မိူဝ်ႈဢၼ်တိုၼ်ႇမႃးၼၼ်ႉယင်းတိုၵ်ႉတွင်ႉမႆႈယၢၵ်ႇၼမ်ႉယူႇၼၼ်ႉဢေႃႈ။
ဢွၼ်ၵၼ်ယူႇမိူၵ်ႈယူႇလိူင်းယူႇတႃႉ။ ႁႂ်ႈတူဝ်ၸဝ်ႈၵဝ်ႇတႃမွတ်ႇယူႇတႃႉ။ ယင်းဢမ်ႇသူတ်ႉၼမ်ႉမၢၵ်ႇၸပိတ်ႉလႄႈမဝ်းယူႇတႃႉ။ ယင်းဢမ်ႇၵိၼ်လဝ်ႈဢၼ်ၶိုၼ်ႇလႄႈဝၢင်ႇဝီႈဝၢင်ႇဝိူဝ်ႈယူႇတႃႉ။-
လွင်ႈမၼ်းၸမ်ႉ၊ ထႃႇဝရႃႉၽြႃး၊ ႁဵတ်းႁႂ်ႈမႂ်းငဝ်သူၼ်းယူႇလႄႈႁႂ်ႈမႂ်းၼွၼ်းလပ်းၼွၼ်းဝၢၼ်ၵႂႃႇယဝ်ႉ၊ပရေႃးၽႅတ်ႈ တင်းလၢႆပဵၼ်မၢၵ်ႇတႃၵူၼ်းတင်းလၢႆဢေႃႈ။ ၵူၺ်းၵႃႈ၊ၽြႃးပဵၼ်ၸဝ်ႈႁူမ်ႇသုမ်ႇၵင်ႈလပ်ႉမၢၵ်ႇတႃၶဝ်ဝႆႉယဝ်ႉ။-
ဢၼၢၵ်ႈဢထိၵ်ႈပႄႇၵႂၢမ်းပျႃႇတိၵ်ႈၵူႈၶေႃႈၵူႈၵမ်းၼၼ်ႉ သိူင်ႇဝႆႉလပ်ႉဝႆႉတီႈသူ မိူၼ်ၸိူဝ်ႉၼင်ႇၵဵၼ်လိၵ်ႈဢၼ်တွၵ်ႇတၼ်းသိၵ်ႈဝႆႉၼၼ်ႉဢေႃႈ။ ပေႃးသူဢဝ်ၵဵၼ်လိၵ်ႈၼၼ်ႉၵႂႃႇၸူးတီႈၵေႃႉဢၼ်မေႃလိၵ်ႈမေႃလၢႆးၼၼ်ႉလႄႈႁႂ်ႈမၼ်းၽတ်းဢၢၼ်ႇၼႄသူၸိုင်၊မၼ်းတၵ်းၶိုၼ်းလၢတ်ႈလႄႈဝႃႈ၊ “ၵဝ်ဢမ်ႇၽတ်းဢၢၼ်ႇလႆႈ၊မၼ်းတွၵ်ႇတၼ်းသိၵ်ႈဝႆႉလူင်ပႄႇ၊” ဝႃႈၼႆဢေႃႈ။-
ပေႃးမႂ်းသမ်ႉဢဝ်ၵႂႃႇၸူးတီႈၵေႃႉဢၼ်ဢမ်ႇမေႃလိၵ်ႈမေႃလၢႆးၼၼ်ႉလႄႈႁႂ်ႈမၼ်းၽတ်းဢၢၼ်ႇၼႄသူၸိုင်၊မၼ်းတၵ်းဝႃႈ၊ “ၵဝ်ဢမ်ႇမေႃလိၵ်ႈ” တၵ်းဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ၵူၼ်းမဵဝ်းၼႆႉဢွၼ်ၵၼ်လၢတ်ႈဝႃႈ၊ၶဝ်တၵ်းႁဵတ်းဝၢတ်ႈၵူဝ်းၵႂၢႆႇၵဝ်ဝႃႈၼႆသေၵေႃႈ၊ၵႂၢမ်းၶဝ်ၼၼ်ႉဢမ်ႇပွင်ႇလွင်ႈၵႃႈသင်လႃးလႃး။ ႁူဝ်ၸႂ်ၶဝ်ၵႆၵၼ်တင်းၵဝ်ဢေႃႈ။ ၽႃႇသႃႇတြႃးၶဝ်ၼၼ်ႉပဵၼ်ၼႄးဢုပတေႇထုင်းၽိင်ႈၵူၼ်းဢၼ်ၸီႇယၢင်ႇသွၼ်ပၼ်ၶဝ်ၼၼ်ႉဢေႃႈ။-
ပိူဝ်ႈၼႆလႄႈၵဝ်တၵ်းႁႂ်ႈၶဝ်တူၵ်းၸႂ်လႂ်တိုၼ်ႇလူၺ်ႈလွင်ႈဢၼ်ၶဝ်ယင်းဢမ်ႇထၢင်ႇဢမ်ႇထိူမ်လႄႈပေႃႉထုပ်ႉၶဝ်ၵမ်းၼိုင်ႈယဝ်ႉၵမ်းၼိုင်ႈၼၼ်ႉဢေႃႈ။ ၶဝ်ၸိူဝ်းဢၼ်မီးပိင်ႇၺႃႇၼၼ်ႉတၵ်းယွင်ႇတၵ်းမႃႈလႄႈၺၢၼ်ႇၶဝ်ၵႃႈမီးၵေႃႈတၵ်းဢမ်ႇပွင်ႇလွင်ႈၵႃႈသင်ဢေႃႈ၊” ဝႃႈၼင်ႇၼႆဢေႃႈ။
ၶဝ်ၸိူဝ်းဢၼ်သိူင်ႇမႅပ်းတၢင်းၵျၢမ်ႇတၢင်းပွင်သေၵႃႈတီႈ ထႃႇဝရႃႉၽြႃး၊ ၼၼ်ႉမီးဢႃႉမၢင်ႇၵလႃႇဢေႃႈ။ လွင်ႈမၼ်းၸမ်ႉ၊ၶဝ်ၵျၢမ်ႇပွင်ႁဵတ်းသၢင်ႈယူႇလိုၵ်ႉလိုၵ်ႉလမ်ႇလမ်ႇသေလႄႈထၢင်ႇဝႃႈ၊ၽူႈလႂ်ဢမ်ႇႁုဢမ်ႇႁၼ်လွင်ႈတၢင်းၶဝ်ႁဵတ်းၼၼ်ႉဝႃႈၼႆဢေႃႈ။-
ၶဝ်ဢွၼ်ၵၼ်ႁဵတ်းႁႂ်ႈၵူႈၸိူဝ်ႉၵူႈပိူင်ပိၼ်ႈၽူၼ်ၵႂႃႇယဝ်ႉ။ ၵေႃႉဢၼ်ႁဵတ်းမေႃႈ၊ဢိၵ်ႇတင်းလိၼ်ၼဵဝ်ၼၼ်ႉဢၼ်လႂ်ယဵင်ႈၶႅၼ်းပဵၼ်ဢၼ်လမ်ႇလွင်ႈ။ မဵဝ်းဢၼ်ၵူၼ်းႁဵတ်းပဵၼ်ယဝ်ႉၼၼ်ႉတၵ်းလၢတ်ႈတီႈၵူၼ်းၵေႃႉၼၼ်ႉလႄႈဝႃႈ၊ “မႂ်းဢမ်ႇႁဵတ်းပဵၼ်ၵဝ်မႃး” ဝႃႈၼႆႁိုဝ်း၊ဢမ်ႇၼၼ်တၵ်းလၢတ်ႈတီႈၵေႃႉႁဵတ်းၼၼ်ႉလႄႈဝႃႈ၊ “မႂ်းၼႆႉဢမ်ႇမီးပိင်ႇၺႃႇတၢင်းဢၼ်ၸၢင်ႈဢၼ်မေႃၵူၺ်း” ဝႃႈၼင်ႇၼႆႁိုဝ်း။
မၼ်းတၵ်းပဵၼ်ၸွမ်းၵႂၢမ်းလၢင်ႇၵႃႇၸၢပ်ႈဢၼ်ဝႃႈ၊ “ဝၼ်းလိုၼ်းမိုဝ်းၼႃႈလွႆ လေႇပၼုၼ်ႇ၊ တၵ်းပဵၼ်တူင်ႈႁႆႈတူင်ႈၼႃးမၢၵ်ႇၼမ်ႉႁူင်းၼမ်ႉၵႂႃႇလႄႈ၊ပၢင်ႇတူင်ႈႁႆႈတူင်ႈၼႃးမၢၵ်ႇၼမ်ႉႁူင်းၼမ်ႉၼၼ်ႉတၵ်းပဵၼ်ပႃႇမႆႉပႃႇတွၵ်ႇၵႂႃႇဢေႃႈ၊” ဝႃႈၼင်ႇၼႆၼၼ်ႉဢေႃႈ။
ၼႂ်းမိုဝ်ႉဝၼ်းၶိင်ႇၵႃႇလႃႉၼၼ်ႉၵူၼ်းႁူၼူၵ်ႇတၵ်းတေလႆႈငိၼ်းၵႂၢမ်းၵျၢမ်းလိၵ်ႈဢၼ်ၽတ်းဢၢၼ်ႇလူၺ်ႈသဵင်ဢၼ်ယႂ်ႇၼၼ်ႉ၊ဢိၵ်ႇတင်းၵူၼ်းတႃမွတ်ႇဢၼ်ယူႇၼႂ်းလပ်းသိင်ႇၼၼ်ႉမၢၵ်ႇတႃၶဝ်တၵ်းၽုၺ်ႇပိုတ်ႇလႄႈႁၼ်ဢေႃႈ။-
ၵူၼ်းၽၢၼ်တင်းလၢႆ၊ဢိၵ်ႇတင်းၶဝ်ၸိူဝ်းဢၼ်ႁူဝ်ၸႂ်ၶျႃးတႅမ်ႇၼၼ်ႉတၵ်းၶိုၼ်းလႆႈထူပ်းတၢင်းဢၼ်မူၼ်ႈပျေႃႇၼႂ်း ထႃႇဝရႃႉၽြႃး၊ ၽြႃးဢၼ်မူတ်းၸၢင်ႇလႄႈပဵၼ်ၽြႃးၵူၼ်းမဵဝ်း ဢိသရေး၊ ဢၼ်ဢဵတ်းလူပၼ်ၼၼ်ႉဢေႃႈ။-
မၼ်းတၵ်းပဵၼ်တီႈသုတ်းတီႈၵွႆတီႈၶဝ်ၸိူဝ်းဢၼ်တဵၵ်းငႅၼ်းပိူၼ်ႈလႄႈႁဵတ်းတၢင်းဢၼ်လူလၢႆတီႈၽြႃးပဵၼ်ၸဝ်ႈၼၼ်ႉဢေႃႈ။ ၵေႃႉဢၼ်ႁဵတ်းဢပျတ်ႈၸိူဝ်းၼၼ်ႉတၵ်းလႆႈၶၢမ်ႇတၢင်းဢၼ်ယႃႉၽဵဝ်ႈပႅတ်ႈဢေႃႈ။-
ၽြႃးပဵၼ်ၸဝ်ႈတၵ်းယႃႉပႅတ်ႈၶဝ်ၸိူဝ်းဢၼ်ၶႃႉၸိုဝ်ႈၶၢႆသဵင်ပိူၼ်ႈ၊ၶဝ်ၸိူဝ်းဢၼ်ႁႄႉၵင်ႈပၼ်တီႈၵေႃႉဢၼ်လႆႈၶၢမ်ႇတၢင်းဢၼ်ၸီႇယၢင်ႇတြႃးဢၼ်ထူပ်းဢမု၊ဢိၵ်ႇတင်းတီႈၶဝ်ၸိူဝ်းဢၼ်ၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈႁႂ်ႈၵူၼ်းဢၼ်သိုဝ်ႈတေႃႇလႆႈလုလႆႈသုမ်းၼၼ်ႉဢေႃႈ။
ၵွပ်ႈပိူဝ်ႈၼႆလႄႈ ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ ၽြႃးဢၼ်ၵႄႇသႄႇၼုၵ်ႈဢဝ် ဢႃႇပြႃႇႁၢမ်ႇ၊ လွတ်ႈသေတုၵ်ႉၶႃႉသေလႄႈမီးဢမိင်ႉဝႃႈ၊ “ၵူၼ်းၵဝ်႟။ ၵမ်းလိုၼ်းသူတၵ်းဢမ်ႇလႆႈမီးတၢင်းဢၼ်ဢူၵ်းဢၼ်ဢၢႆ၊တၢင်းဢၼ်ၼႃႈလုၼႃႈႁဵဝ်ႇၵေႃႈဢမ်ႇလႆႈမီး။-
ၼႂ်းမိူဝ်ႈဢၼ်သူလႆႈႁၼ်လုၵ်ႈလၢင်းဢၼ်ၵဝ်တၵ်းပၼ်တီႈသူၼၼ်ႉသူတၵ်းႁုလွင်ႈဢၼ်ၵဝ်ပဵၼ်ၽြႃးဢၼ်မူတ်းၸၢင်ႇဢၼ်ပဵၼ်ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ၼၼ်ႉဢေႃႈ။ သူတၵ်းဢွၼ်ၵၼ်ရူဝ်ႇသေႇၵူဝ်ယမ်ၵဝ်ဢေႃႈ။-
ၵူၼ်းငိူဝ်ႈငႃႉတင်းလၢႆတၵ်းၸၢင်ႈသွၼ်ဢဝ်ႁႂ်ႈႁုလႄႈၶဝ်ၸိူဝ်းဢၼ်ပွင်ႉမိုၼ်ႇပွင်ႉမေႃးၼၼ်ႉတၵ်းဢွၼ်ၵၼ်မီးတၢင်းသိူဝ်းၸူမ်းလႄႈၶၢမ်ႇဢဝ်တင်းဢၼ်သင်ႇသွၼ်သုင်းမႃႉဢေႃႈ၊” ဝႃႈၼင်ႇၼႆဢေႃႈ။-
ထႃႇဝရႃႉၽြႃး၊ မီးဢမိင်ႉလႄႈဝႃႈၸမ်ႉ၊ “ၶုၼ်ၸိူဝ်းဢၼ်ဢုပ်ႉမိူင်း ယုတႃႉ၊ ၼၼ်ႉမီးဢႃႉမၢင်ႇၵလႃႇဢေႃႈ။ လွင်ႈမၼ်းၸမ်ႉ၊ၶဝ်လုၵ်ႉၽိုၼ်ႉၵဝ်ဢေႃႈ။ ၶဝ်ႁဵတ်းၸွမ်းတၢင်းၵျၢမ်ႇတၢင်းပွင်ၶဝ်ဢၼ်ဢမ်ႇၸႂ်ႈဢလူဝ်ႇၵဝ်ၼၼ်ႉလႄႈ၊လူင်းလၢႆးမိုဝ်းလိၵ်ႈမၼ်ႈၵႅၼ်ႇဢၼ်ၶတ်းၵၼ်တင်းၸႂ်သၽေႃးၵဝ်ႁႂ်ႈလႆႈဢဝ်ဢပျတ်ႈထၢပ်ႈသႂ်ႇထႅင်ႈယူႇတိၵ်းတိၵ်းဢေႃႈ။-
ၶဝ်ယင်းဢမ်ႇလဝ်ႈယွၼ်းဢဝ်တၢင်းၵျၢမ်ႇတီႈၵဝ်လႄႈၵႂႃႇၸူးတီႈမိူင်း ဢေးၵျိပ်ႉ၊ ၶႂ်ႈႁႂ်ႈမိူင်း ဢေးၵျိပ်ႉ၊ ၵႅတ်ႇၶႄႁႄႉၵင်ႈၶဝ်သေယဝ်ႉ၊လႆႈဢိင်ပိုင်ႈၶုၼ်ႁေႃၶမ်းမိူင်း ဢေးၵျိပ်ႉ၊ ဢေႃႈ။-
ၵူၺ်းၵႃႈ၊ၶုၼ်ႁေႃၶမ်းၼၼ်ႉ တၵ်းဢမ်ႇမီးႁႅင်းတၼ်းၶူဝ်းတႃႇတေၸွႆႈတေထႅမ်ၶဝ်၊တၢင်းဢၼ်မိူင်း ဢေးၵျိပ်ႉ၊ ၵႅတ်ႇၶႄႁႄႉၵင်ႈၶဝ်ၼၼ်ႉတၵ်းသုတ်းသဵင်ႈလူၺ်ႈတၢင်းဢၼ်ၼႃႈလုၼၼ်ႉဢေႃႈ။-
ပိၵ်ႉသမ်ႉသၢၼ်ႇတမၢၼ်ႇၶဝ်ႁွတ်ႈထိုင်ၵႂႃႇတီႈမိူင်း ဢေးၵျိပ်ႉ၊ ဝဵင်း ၸေႃးၼႃႉ၊ တင်းဝဵင်း ႁႃၼိတ်ႉ၊ ယဝ်ႉသေၵေႃႈ၊-
ၵူၼ်းမဵဝ်း ယုတႃႉ၊ ၶဝ်တၵ်းဢွၼ်ၵၼ်သေလၢႆၵွပ်ႈပိူဝ်ႈၶဝ်ယၢမ်ႈလႆႈဢိင်ပိုင်ႈၵူၼ်းမဵဝ်းဢၼ်ဢမ်ႇပွင်ႇလွင်ႈၵႃႈသင်၊ၵူၼ်းမဵဝ်းဢၼ်ဢမ်ႇႁဵတ်းၵျေးၸူးလႆႈၼႂ်းမိူဝ်ႈဢၼ်လူဝ်ႇတၢင်းၸွႆႈတၢင်းထႅမ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ပျႃႇတိၵ်ႈၸဝ်ႈၸၢပ်ႈလူၺ်ႈတရိၵ်ႈသၢၼ်ႇမိူင်းပွတ်းၸၢၼ်းၼၼ်ႉၸမ်ႉ၊ “သၢၼ်ႇတမၢၼ်ႇတင်းလၢႆလႆႈပႆတၢင်းၽႃႇလတ်းၶဝ်ႈမိူင်းဢၼ်မီးၽေးဢၼ်ႇတရေႇ၊တီႈဢၼ်မီးသင်ႇသီႈတင်းတီႈဢၼ်မီးငူးႁဝ်ႇ၊ဢိၵ်ႇတင်းၼၵႃးမိၼ်တင်းလၢႆၼၼ်ႉဢေႃႈ။ ၶဝ်ဢဝ်ဢုၵ်ႉၸႃႇဢၼ်ၵႃႈဢၼ်ပႅင်းတၢင်ႇၵႃႈၼိူဝ်လင်မႃႉလီႈတင်းၵႃႈၼိူဝ်လင်ၵလႃႇဢုၵ်ႈၶဝ်ၵႂႃႇႁႂ်ႈလႆႈပၼ်လၢၵ်ႈသွင်ႇၵႃႈတီႈၵူၼ်းမဵဝ်းဢၼ်ဢမ်ႇၸၢင်ႈပၼ်တၢင်းၸွႆႈတၢင်းထႅမ်တီႈၶဝ်ၼၼ်ႉဢေႃႈ။-
မိူင်း ဢေးၵျိပ်ႉ၊ ၼၼ်ႉဢမ်ႇပၼ်ဢၵျူဝ်းၵျေးၸူးတၢင်းဢၼ်ၸွႆႈဢၼ်ထႅမ်လႆႈလႄႈၵဝ်ႁွင်ႉႁဵၵ်ႈၸိုဝ်ႈမၼ်း ‘ ရႃႇၶပ်ႉ၊ ဢၼ်ဢမ်ႇႁဵတ်းၵႃႈသင်’ ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈသင်ႇလၢတ်ႈတီႈၵဝ်ႁႂ်ႈတႅမ်ႈမၢႆဝႆႉလူၺ်ႈလွင်ႈဢၼ်ၵူၼ်းတင်းလၢႆဢွၼ်ၵၼ်ပဵၼ်ၸိူဝ်ႉၼင်ႇႁိုဝ်ၼၼ်ႉဝႆႉၵႃႈၼႂ်းၽိုၼ်လိၵ်ႈႁႂ်ႈမၼ်းပဵၼ်တီႈမၢတ်ႈတီႈမၢႆဢၼ်တႄႇမၼ်ႈယူႇသိုပ်ႇသိုပ်ႇတၢမ်တၢမ်လွင်ႈဢၼ်ၶဝ်ႁၢႆႉမိူၵ်ႈထၢၼ်ႇႁိုဝ်ၼၼ်ႉဢေႃႈ။-
ၶဝ်ၼၼ်ႉဢွၼ်ၵၼ်လုၵ်ႉၽိုၼ်ႉၽြႃးပဵၼ်ၸဝ်ႈယူႇသေႇသေႇ၊လၢတ်ႈမုသႃႇယူႇသေႇသေႇ၊ဢမ်ႇၶႂ်ႈထွမ်ႇဢဝ်တြႃး ထႃႇဝရႃႉၽြႃး၊ သေပွၵ်ႈဢေႃႈ။-
ၶဝ်မွၵ်ႇလၢတ်ႈတီႈပရေႃးၽႅတ်ႈ တင်းလၢႆလႄႈဝႃႈ၊ “ယႃႇပေမွၵ်ႇလၢတ်ႈၵႂၢမ်းဢၼ်ၸိုဝ်ႈဢၼ်ၸႂ်ႈတီႈႁဝ်း။ မွၵ်ႇလၢတ်ႈၵႂၢမ်းဢၼ်ႁဝ်းၶႂ်ႈထွမ်ႇၶႂ်ႈငိၼ်းၼၼ်ႉတႃႉ။ ဢဝ်ၵႂၢမ်းဢၼ်ပႅတ်ႉလႅၼ်ႁေႃးလၢတ်ႈတီႈႁဝ်းတႃႉ။-
ငႅၵ်းဢွၵ်ႇသေၵႃႈၼႂ်းသဵၼ်ႈတၢင်းႁဝ်းသေၵမ်း။ ႁဝ်းဢမ်ႇၶႂ်ႈထွမ်ႇၶႂ်ႈငိၼ်းလွင်ႈၽြႃးပဵၼ်ၸဝ်ႈဢၼ်မူတ်းၸၢင်ႇလႄႈပဵၼ်ၽြႃးၵူၼ်းမဵဝ်း ဢိသရေး၊ ၶဝ်ၼၼ်ႉလႃးလႃး၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈၽြႃးပဵၼ်ၸဝ်ႈဢၼ်မူတ်းၸၢင်ႇလႄႈပဵၼ်ၽြႃးၵူၼ်းမဵဝ်း ဢိသရေး၊ ၶဝ်မီးဢမိင်ႉၸမ်ႉ၊ “သူပႄႇပႅတ်ႈၼုၵ်ႈၵပၢတ်ႈၸဝ်ႈသေလႄႈၸပ်းၸွမ်းတၢင်းဢၼ်ၼိၵ်ႈၸၢၵ်ႈငႅၼ်းသႄးတၢင်းဢၼ်ၸႂ်ၵူတ်ႉၸႂ်ငေႃးၸိူဝ်းၼၼ်ႉဢေႃႈ။-
ပိူဝ်ႈၼႆလႄႈသူမီးဢပျတ်ႈဢေႃႈ။ သူပဵၼ်ၸိူဝ်ႉၼင်ႇလမ်းဝဵင်းဢၼ်သုင်ဢၼ်မီးႁွႆးၸတ်ႉႁွႆးတႅၵ်ႇငဝ်ႈတေႃႇပၢႆၼၼ်ႉလႄႈသူတၵ်းပင်းတူၵ်းၵမ်းလဵဝ်ဢေႃႈ။-
သူတၵ်းတႅၵ်ႇမိူၼ်မေႃလိၼ်ၼၼ်ႉသေယဝ်ႉ၊တၵ်းတႅၵ်ႇယၢႆႈႁႅင်းၼႃႇထၢၼ်ႈပေႃးဢမ်ႇပဵၼ်ၽၢၵ်ႇဢၼ်တၵ်းၸေႃႉဢဝ်ထၢၼ်ႇၽႆးလႅင်ၼၼ်ႉ၊ဢမ်ႇၼၼ်ၵေႃႈဢမ်ႇၸၢင်ႈတၵ်းဢဝ်ၼမ်ႉၵႃႈၼႂ်းဢႅင်ႇၼမ်ႉလႆႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ဢၼ်ပဵၼ်ၽြႃးပဵၼ်ၸဝ်ႈဢၼ်မူတ်းၸၢင်ႇလႄႈပဵၼ်ၽြႃးၵူၼ်းမဵဝ်း ဢိသရေး၊ ၶဝ်မီးဢမိင်ႉတီႈၵူၼ်းတင်းလၢႆၼၼ်ႉၸမ်ႉ၊ “ၶိုၼ်းပွၵ်ႈမႃးလႄႈဢိင်ပိုင်ႈၵဝ်တႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊သူတၵ်းမီးဢဵၼ်မီးႁႅင်းလႄႈလႆႈယူႇလူင်ႉလီလွတ်ႈလီဢေႃႈ၊” ဝႃႈၼင်ႇၼႆဢေႃႈ။ ၵူၺ်းၵႃႈ၊သူထဵင်ပႅတ်ႈလႄႈဢမ်ႇႁဵတ်းၸွမ်းၸိူဝ်ႉၼင်ႇၼၼ်။-
သူယင်းၵျၢမ်ႇဢၢင်ႈတၵ်းၶီႇမႃႉဢွၵ်ႇၵႂႃႇၶၼ်ၶၼ်ၽႂ်းၽႂ်းႁႂ်ႈလႆႈလွတ်ႈသေၵႃႈၼႂ်းမိုဝ်းရၢၼ်ႇသူႇၼၼ်ႉဢေႃႈ။ တၢင်းဢၼ်သူၵျၢမ်ႇဢၢင်ႈၼၼ်ႉထုၵ်ႇယဝ်ႉ။ တၢင်းဢၼ်တေဢွၵ်ႇပၢႆႈႁႂ်ႈလွတ်ႈၼၼ်ႉပဵၼ်တၢင်းဢၼ်ထုၵ်ႇလီႁဵတ်းဢေႃႈ။ သူထၢင်ႇမႃႉသူၶၼ်ၽႂ်းဝႃႈၼႆဢေႃႈ။ ၵူၺ်းၵႃႈ၊ၶဝ်ၸိူဝ်းဢၼ်လိုပ်ႈလမ်းၸွမ်းသူၼၼ်ႉယဵင်ႈၶႅၼ်းၶၼ်ၽႂ်းၼႃႇဢေႃႈ။-
ၵူၼ်းသူႁဵင်ၼိုင်ႈတၵ်းလႆႈဢွၵ်ႇပၢႆႈမိူဝ်ႈဢၼ်သူႁၼ်ၵူၼ်းသိုၵ်းရၢၼ်ႇသူႇၵေႃႉလဵဝ်ၼၼ်ႉလႄႈ၊ၵူၼ်းသိုၵ်းပိူၼ်ႈႁႃႈၵေႃႉၵူၺ်းၵေႃႈတၵ်းလွၵ်ႇငိုတ်ႈႁႂ်ႈသူလႅၼ်ႈပၢႆႈဢေႃႈ။ မိူဝ်ႈဢၼ်သူဢွၵ်ႇပၢႆႈၼၼ်ႉၼွၵ်ႈသေတုင်းဢၼ်ပူၵ်းဝႆႉၵႃႈၼိူဝ်ၸိၵ်းလွႆၼၼ်ႉတၵ်းဢမ်ႇၵိုတ်းဢမ်ႇၵျၢၼ်ႇသေၸိူဝ်ႉသေမဵဝ်း။-
ၼႂ်းဝႃႈၼၼ်သေၵေႃႈ ထႃႇဝရႃႉၽြႃး၊ ယင်းမုင်ႈမွင်းယူႇႁႂ်ႈလႆႈႁဵတ်းၵျေးၸူးတီႈသူလႄႈတၼ်းဝႆႉပုၼ်ႈဢၼ်တၵ်းႁဵတ်းၵျေးၸူးတၢင်းဢၼ်ဢဵတ်းလူတီႈသူၵွပ်ႈပိူဝ်ႈမၼ်းၸဝ်ႈႁဵတ်းဢၼ်ၸိုဝ်ႈဢၼ်ၸႂ်ႈသေႇသေႇၼၼ်ႉဢေႃႈ။ ၶဝ်ၸိူဝ်းဢၼ်ဢိင်ပိုင်ႈ ထႃႇဝရႃႉၽြႃး၊ ၼၼ်ႉမီးမၢင်ႇၵလႃႇဢေႃႈ။
သူၸိူဝ်းဢၼ်ယူႇၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉၵမ်းလိုၼ်းတၵ်းဢမ်ႇလႆႈႁႆႈလႆႈႁွင်ႉ။ ထႃႇဝရႃႉၽြႃး၊ မီးၸႂ်ဢၼ်ၸၢင်ႈႁၵ်ႉဢဵတ်းလူလႄႈမၼ်းၸဝ်ႈတၵ်းထွမ်ႇဢဝ်မိူဝ်ႈဢၼ်သူၵၢဝ်ႇႁႃမၼ်းၸဝ်ႈၼၼ်ႉဢေႃႈ။-
ထႃႇဝရႃႉၽြႃး၊ တၵ်းႁႂ်ႈသူၵႂႃႇမႃးၼႂ်းဢသၢၵ်ႈတၢၼ်းဢၼ်ယၢပ်ႇၽိုတ်ႇဢေႃႈ။ ၵူၺ်းၵႃႈ၊တူဝ်မၼ်းၸဝ်ႈတၵ်းမီးယူႇၵႃႈတီႈၼၼ်ႈႁႂ်ႈလႆႈသင်ႇသွၼ်ပၼ်သူဢေႃႈ။ ပိူဝ်ႈၼႆလႄႈသူတၵ်းဢမ်ႇလူဝ်ႇသွၵ်ႈႁႃမၼ်းၸဝ်ႈယဝ်ႉ။-
ပေႃးသူၽိတ်းပိူင်ႈသဵၼ်ႈတၢင်းၵႂႃႇၸွမ်းၽၢႆႇၶႂႃ၊ၸွမ်းၽၢႆႇသၢႆႉၸိုင်၊သူတၵ်းငိၼ်းသဵင်ၵႂၢမ်းဢၼ်လၢတ်ႈလႄႈဝႃႈ၊ “သဵၼ်ႈတၢင်းမီးၵႃႈတီႈၼႆႈဢေႃႈ။ ယၢင်ႈၸွမ်းသဵၼ်ႈတၢင်းၼႆႉတႃႉ” ဝႃႈၼင်ႇၼႆဢေႃႈ။-
သူတၵ်းဢဝ်ႁုၼ်ႇႁၢင်ႈသၢင်းထုသူဢၼ်တဵၵ်းၶႅပ်းငိုၼ်းဝႆႉ၊ဢိၵ်ႇတင်းႁုၼ်ႇႁၢင်ႈသၢင်းထုသူဢၼ်ဢုမ်ႇၶမ်းဝႆႉၸိူဝ်းၼၼ်ႉမၢတ်ႈပဵၼ်ၶိူင်ႈပိူင်ဢၼ်ၵူဝ်ႈၵိူၵ်ႇသေယဝ်ႉ၊ထိမ်ႈပႅတ်ႈလႄႈႁွင်ႉပၢဝ်ႇဝႃႈ၊ “ဢွၵ်ႇၵႂႃႇႁႂ်ႈပူၼ်ႉတႃႉ” ဝႃႈၼင်ႇၼႆဢေႃႈ။-
မိူဝ်ႈလႂ်သေဢမ်ႇဝႃႈ၊ပေႃးမႂ်းဝၢၼ်ႇၸိူဝ်ႉဝၢၼ်ႇၽၼ်းၸိုင်၊ ထႃႇဝရႃႉၽြႃး၊ တၵ်းႁႂ်ႈၽူၼ်တူၵ်းပုၼ်ႈဢၼ်တၵ်းယႂ်ႇမႃးလႄႈမၢၵ်ႇမၢၵ်ႇဢၼ်ပူင်းလီ၊ဢိၵ်ႇတင်းၽုင်သူဝ်းၽုင်ဝူဝ်းသူတၵ်းမီးယိူဝ်ႈဢၼ်ၶဵဝ်လီၼုမ်ႇလီၼမ်ၼႃႇၼၼ်ႉဢေႃႈ။-
ဝူဝ်းဢိၵ်ႇတင်းမႃႉလီႈဢၼ်ထႆႁႆႈထႆၼႃးၸိူဝ်းၼၼ်ႉၵေႃႈတၵ်းလႆႈၵိၼ်ၶဝ်ႈပိူၵ်ႇဢၼ်ပႃးၵိူဝ်၊ဢၼ်ဢဝ်တင်းလူင်ႈၽတ်းဢဝ်ၶိုင်ဢဝ်ဢၼ်လီမၼ်းၼၼ်ႉဢေႃႈ။-
ၼႂ်းမိုဝ်ႉဝၼ်းၶိင်ႇၵႃႇလႃႉဢၼ်တိူၵ်ႈတီႈတိုၵ်းသိုၵ်းရၢၼ်ႇသူႇတင်းလၢႆလႆႈၶၢမ်ႇတၢင်းဢၼ်သိမ်းဢဝ်လႄႈၵူၼ်းၶဝ်လႆႈတၢႆၼမ်ၼႃႇၼၼ်ႉၼႂ်းဝၼ်းၼၼ်ႉၼမ်ႉၵႃႈၼႂ်းၼမ်ႉႁွင်ႈၼမ်ႉၵႄးတၵ်းလႆဢွၵ်ႇသေၵႃႈတီႈၵူႈႁူၺ်ႈၵူႈလွႆမႃးဢေႃႈ။-
လိူၼ်တၵ်းႁိူဝ်ႈလႅင်းမိူၼ်ၵၢင်ဝၼ်းလႄႈ၊ၵၢင်ဝၼ်းသမ်ႉတၵ်းယဵင်ႈၶႅၼ်းလႅင်းထႅင်ႈၸဵတ်းပုၼ်ႈဢၼ်ပဵင်းထၼ်ႇဢၼ်လႅင်းၸဵတ်းဝၼ်းလႅင်းၼႂ်းဝၼ်းလဵဝ်ၼၼ်ႉဢေႃႈ။ လွင်ႈတၢင်းၼႆႉတၵ်းပဵၼ်မႃးၼႂ်းမိူဝ်ႈဢၼ် ထႃႇဝရႃႉၽြႃး၊ ပူၵ်ႉႁေႃႇႁွႆးၸဵပ်းလႄႈယူတ်းယႃပၼ်ႁွႆးတၢမ်ႇၵူၼ်းမၼ်းၸဝ်ႈတင်းလၢႆၼၼ်ႉဢေႃႈ။
မုၼ်ၽုင်းဢိၵ်ႇတင်းၵုင်ႇသရေႇ ထႃႇဝရႃႉၽြႃး၊ ၼၼ်ႉယူႇတီႈၵႆသေၵေႃႈႁၼ်လႆႈဢေႃႈ။ ၽႆးဢိၵ်ႇတင်းၵႂၢၼ်းၽႆးၼၼ်ႉၼႄပျႃးလွင်ႈတေႃးသႃႉမၼ်းၸဝ်ႈဢေႃႈ။ ဢမိင်ႉဢၼ်မၼ်းၸဝ်ႈလၢတ်ႈဢွၵ်ႇသူပ်းၼၼ်ႉပဵၼ်ၸိူဝ်ႉၼင်ႇၽႆးဢေႃႈ။-
မၼ်းၸဝ်ႈပွႆႇၸႂ်ႉလူမ်းၵႂႃႇဢွၼ်တၢင်းမၼ်းၸဝ်ႈမိူၼ်ၸိူဝ်ႉၼင်ႇၼမ်ႉထူမ်ႈလႄႈၼွင်းဢဝ်ၵႂႃႇၵူႈၸိူဝ်ႉၵူႈပိူင်ၼၼ်ႉဢေႃႈ။ ၼမ်ႉၼၼ်ႉပတ်းၽဵဝ်ႈဢဝ်မဵဝ်းၵူၼ်းတင်းလၢႆႁႂ်ႈလႆႈႁွတ်ႈထိုင်တၢင်းလုတၢင်းလႅဝ်၊ဢိၵ်ႇတင်းႁႂ်ႈတၢင်းၵျၢမ်ႇတၢင်းပွင်ဢၼ်ႁၢႆႉမိူၵ်ႈတၵ်းလႆႈသုတ်းႁၢႆဝၢႆးၵႂႃႇဢေႃႈ။-
ၵူၺ်းၵႃႈ၊သူၸိူဝ်းဢၼ်ပဵၼ်ၵူၼ်းၽြႃးပဵၼ်ၸဝ်ႈတင်းလၢႆတၵ်းဢွၼ်ၵၼ်ၸူမ်းသိူဝ်းလႄႈႁဵတ်းၵႂၢမ်းမိူၼ်ၸိူဝ်ႉၼင်ႇသူႁဵတ်းၼႂ်းၶိုၼ်းဢၼ်ၶၢမ်ႇပွႆးၵိၼ်လဵင်ႉဢၼ်မူတ်းၸၢင်ႇၼၼ်ႉဢေႃႈ။ သူတၵ်းဢွၼ်ၵၼ်ၸူမ်းသိူဝ်းမိူၼ်ၸိူဝ်ႉၼင်ဢၼ်ၵေႃႉဢၼ်ပဝ်ႇပီႇသေလႄႈၵႂႃႇၸူးတီႈၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ၽြႃးပဵၼ်ၸဝ်ႈဢၼ်ၵႅတ်ႇၶႄႁႄႉၵင်ႈၵူၼ်းမဵဝ်း ဢိသရေး၊ ၼၼ်ႉဢေႃႈ။
ထႃႇဝရႃႉၽြႃး၊ တၵ်းႁႂ်ႈငိၼ်းသဵင်မၼ်းၸဝ်ႈဢၼ်မုၼ်ယႂ်ႇၼၼ်ႉလႄႈတၵ်းႁႂ်ႈလႆႈၶၢမ်ႇဢဝ်ႁႅင်းတေႃးသႃႉမၼ်းၸဝ်ႈၼၼ်ႉဢေႃႈ။ တၵ်းမီးပိဝ်ၽႆးမႆႈ၊ဢိၵ်ႇတင်းၽူၼ်လူင်လူမ်းလူင်ဢၼ်ပႃးမၢၵ်ႇႁဵပ်းၸိူဝ်းၼၼ်ႉဢေႃႈ။-
ပိူဝ်ႈၼႆလႄႈၵူၼ်းမဵဝ်း ဢႃႇသီးရီးယႃး၊ ၶဝ်တၵ်းတူၵ်းၸႂ်လႂ်တိုၼ်ႇမိူဝ်ႈဢၼ်ၶဝ်ငိၼ်းသဵင်မၼ်းၸဝ်ႈဢၼ်မုၼ်ယႂ်ႇၼၼ်ႉလႄႈလႆႈၶၢမ်ႇဢဝ်တၢင်းဢၼ်မၼ်းၸဝ်ႈပၼ်တၢမ်ႇၼၼ်ႉဢေႃႈ။-
မိူဝ်ႈဢၼ် ထႃႇဝရႃႉၽြႃး၊ ပေႃႉထုပ်ႉသႂ်ႇၵူႈပွၵ်ႈၵူႈၵမ်းၼၼ်ႉ ၵူၼ်းမၼ်းၸဝ်ႈတင်းလၢႆတၵ်းဢွၼ်ၵၼ်ႁႆႇတူႇရိယႃႇၵွင်ၶဵတ်ႇတင်းတိင်ႇလႂ်ၵူႈပွၵ်ႈၵူႈၵမ်းဢေႃႈ။ တူဝ်ၽြႃးပဵၼ်ၸဝ်ႈတၵ်းတိုၵ်းတေႃးၵူၼ်းမဵဝ်း ဢႃႇသီးရီးယႃး၊ ၶဝ်ဢေႃႈ။-
တီႈမုၵ်ႉၽႆးဢၼ်တၵ်းတုတ်ႇၽဝ်ၸဝ်ႈမုၼ်ယႂ်ႇၶုၼ်ႁေႃၶမ်းမိူင်း ဢႃႇသီးရီးယႃး၊ ၼၼ်ႉမႄးႁႅၼ်းဝႆႉၸဵမ်မိူဝ်ႈဢွၼ်တၢင်းၼႆႉႁိုင်ၼႃႇယဝ်ႉဢေႃႈ။ တီႈမုၵ်ႉၽႆးၼၼ်ႉပဵၼ်ၵွင်မႆႉၸိင်ဢၼ်ၵွင်ဝႆႉသုင်ၼႃႇ၊ၵႂၢင်ႈၼႃႇဢေႃႈ။ တၢင်းဢၼ် ထႃႇဝရႃႉၽြႃး၊ ထူၺ်ႈၸႂ်ဢွၵ်ႇၼၼ်ႉပဵၼ်မိူၼ်ၸိူဝ်ႉၼင်ႇၵၢၼ်ႉဢၼ်လႆထူမ်ႈလႄႈလုၵ်ႉမႆႈပဵၼ်ၽႆးၼၼ်ႉဢေႃႈ။
ၶဝ်ၸိူဝ်းဢၼ်လူင်းၵႂႃႇၵႃႈတီႈမိူင်း ဢေးၵျိပ်ႉ၊ ႁႂ်ႈလႆႈယွၼ်းတၢင်းၸွႆႈတၢင်းထႅမ်ၼၼ်ႉမီးဢႃႉမၢင်ႇၵလႃႇဢေႃႈ။ လွင်ႈမၼ်းၸမ်ႉ၊ၶဝ်ၸႂ်လီလူၺ်ႈတပ်ႉသိုၵ်းမဵဝ်း ဢေးၵျိပ်ႉ၊ ဢၼ်မီးႁႅင်းယႂ်ႇၼႃႇဢၼ်ဝႃႈ၊တပ်ႉမႃႉ၊တပ်ႉလေႃႉမႃႉသိုၵ်း၊ဢိၵ်ႇတင်းၵူၼ်းသိုၵ်းၸိူဝ်းၼၼ်ႉဢေႃႈ။ ၶဝ်ယင်းဢမ်ႇမုင်ႈမွင်း ထႃႇဝရႃႉၽြႃး၊ ၽြႃးပဵၼ်ၸဝ်ႈဢၼ်မူတ်းၸၢင်ႇလႄႈပဵၼ်ၽြႃးၵူၼ်းမဵဝ်း ဢိသရေး၊ ၼၼ်ႉလႄႈယင်းဢမ်ႇယွၼ်းတၢင်းၸွႆႈတၢင်းထႅမ်လႄႈယူႇဢေႃႈ။-
မၼ်းၸဝ်ႈမီးၺၢၼ်ႇႁုလွင်ႈတၢင်းဢၼ်မၼ်းၸဝ်ႈႁဵတ်းယူႇၼၼ်ႉဢေႃႈ။ မၼ်းၸဝ်ႈႁဵတ်းႁႂ်ႈၶဝ်လုလႅဝ်ဢေႃႈ။ မၼ်းၸဝ်ႈယင်းဢမ်ႇၼုၵ်ႈဢမ်ႇထွၼ်ၵႂၢမ်းဢၼ်မၼ်းၸဝ်ႈလွၵ်ႇငိုတ်ႈလႄႈပၼ်တၢမ်ႇတီႈၵူၼ်းဢၼ်ဢမ်ႇတြႃးတင်းလၢႆ၊ဢိၵ်ႇတင်းတီႈၶဝ်ၸိူဝ်းဢၼ်ၸွႆႈထႅမ်ၶဝ်ၼၼ်ႉဢေႃႈ။-
ၵူၼ်းမဵဝ်း ဢေးၵျိပ်ႉ၊ ၸိူဝ်းၼၼ်ႉဢမ်ႇၸႂ်ႈၽြႃး။ ပဵၼ်ၵူၼ်းလၢႆလၢႆၵူၺ်းဢေႃႈ။ မႃႉၶဝ်ၸိူဝ်းၼၼ်ႉၵေႃႈဢမ်ႇၸႂ်ႈဝိၺိၺ်ႇ။ ပဵၼ်ၼိူဝ်ႉလၢႆလၢႆၵူၺ်းဢေႃႈ။ ယၢမ်းမိူဝ်ႈဢၼ် ထႃႇဝရႃႉၽြႃး၊ ယဵတ်ႇမိုဝ်းမၼ်းၸဝ်ႈၼၼ်ႉၸိုင်၊မဵဝ်းၵူၼ်းဢၼ်ႁႅင်းယႂ်ႇႁႅင်းၶႅင်ၼၼ်ႉတၵ်းလုလႄႈ၊မဵဝ်းၵူၼ်းဢၼ်ၶဝ်ၸွႆႈထႅမ်ဢၼ်ႁႅင်းလဵၵ်ႉႁႅင်းဢူၼ်ႈၼၼ်ႉတၵ်းသုမ်းၸွမ်းဢေႃႈ။ ၶဝ်တင်းသွင်မဵဝ်းတၵ်းလုလႅဝ်ဢေႃႈ။
ထႃႇဝရႃႉၽြႃး၊ မီးဢမိင်ႉတီႈၵဝ်လႄႈဝႃႈ၊ “ပိၵ်ႉသမ်ႉမူႇၽုင်မုၵ်ႉၸိူဝ်းၵူၼ်းလဵင်ႉသူဝ်းတင်းလၢႆဢွၼ်ၵၼ်ႁွင်ႉသႅၼ်ႇထၢၼ်ႇႁိုဝ်သေၵေႃႈ၊ၶဝ်ဢမ်ႇၸၢင်ႈလိုပ်ႈႁေႃႈႁႂ်ႈသၢင်ႇသီႈဢၼ်ႁွင်ႉၶၢင်းၼၼ်ႉဢွၵ်ႇပၢႆႈသေၵႃႈၼိူဝ်တူဝ်တၢႆဢၼ်မၼ်းႁိမ်ဢဝ်လႆႈၼၼ်ႉ။ မိူၼ်ၸိူဝ်ႉၼင်ႇၼၼ်ၽူႈလႂ်ဢမ်ႇႁႄႉၶႅၼ်လိုပ်ႈႁေႃႈၵဝ် ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၼၼ်ႉသေၵႃႈတီႈတၢင်းဢၼ်ပႂ်ႉထိင်းလွႆ ၸိဢုၼ်ႇ၊ ၼၼ်ႉလႆႈ။-
ၸိူဝ်ႉၼင်ႇဢၼ်ၼူၵ်ႉမိၼ်သၢတ်ႈၵႂႃႇသၢတ်ႈမႃးၵႃႈႁိမ်းႁင်းမၼ်းႁႂ်ႈလႆႈၵႅတ်ႇၶႄလုၵ်ႈဢွၼ်ႇမၼ်းၼၼ်ႉ၊ၵဝ် ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၵေႃႈတၵ်းၵႅတ်ႇၶႄဝဵင်း ယေႇရုသလႅမ်ႇ၊ လႄႈႁႄႉၵင်ႈမၼ်းဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵူၼ်းမဵဝ်း ဢိသရေး၊ ၶဝ်႟။ သူဢွၼ်ၵၼ်ႁဵတ်းတုၸရိူၵ်ႈဢပျတ်ႈလႄႈလုၵ်ႉၽိုၼ်ႉၵဝ်ယဝ်ႉ။ ၵူၺ်းၵႃႈ၊တေႃႈလဵဝ်ၼႆႉၶိုၼ်းမႃးၸူးတီႈၵဝ်တႃႉ။-
ၼႂ်းမိုဝ်ႉဝၼ်းၶိင်ႇၵႃႇလႃႉၼၼ်ႉသူၵႃႈမီးတင်းသဵင်ႈတင်းလူင်တၵ်းဢွၼ်ၵၼ်ၸုၼ်ႉပႅတ်ႈႁုၼ်ႇႁၢင်ႈသၢင်းထုဢၼ်သူဢဝ်ငိုၼ်းၶမ်းႁဵတ်းဝႆႉလႄႈၽိတ်းပိူင်ႈၸိူဝ်းၼၼ်ႉဢေႃႈ။-
မိူင်း ဢႃႇသီးရီးယႃး၊ တၵ်းလႆႈၶၢမ်ႇတၢင်းဢၼ်ယႃႉလုယႃႉလႅဝ်ၵႃႈၼႂ်းၼႃႈသိုၵ်းဢၼ်ဢမ်ႇၸႂ်ႈၵွပ်ႈပိူဝ်ႈႁႅင်းတၼ်းၶူဝ်းၵူၼ်းၼၼ်ႉဢေႃႈ။ ၵူၼ်းမဵဝ်း ဢႃႇသီးရီးယႃး၊ ၶဝ်တၵ်းလႅၼ်ႈပၢႆႈဢွၵ်ႇၼႃႈသိုၵ်းလႄႈၵူၼ်းၼုမ်ႇၵူၼ်းၵမ်ၶဝ်တၵ်းလႆႈၶၢမ်ႇပဵၼ်ၶႃႈဢေႃႈ။-
ၶုၼ်ႁေႃၶမ်းၶဝ်တၵ်းလႅၼ်ႈပၢႆႈလူၺ်ႈၸႂ်ဢၼ်ၵူဝ်ဢၼ်ႁႄလႄႈ၊မူးမၢတ်ႈၽွင်းမိူင်းၶဝ်တၵ်းတူၵ်းၸႂ်လႂ်တိုၼ်ႇလႄႈထိမ်ႈပႅတ်ႈလၢမ်ႇသိုၵ်းၶဝ်ဝႆႉဢေႃႈ၊” ဝႃႈၼင်ႇၼႆလႄႈ၊ ထႃႇဝရႃႉၽြႃး၊ ဢၼ်ၵူၼ်းဝဵင်း ယေႇရုသလႅမ်ႇ၊ ၶဝ်ၵူဝ်းၵႂၢႆႇလႄႈပဵၼ်ၽြႃးပဵၼ်ၸဝ်ႈဢၼ်မီးၽႆးလႄႈၽဝ်ၶိူင်ႇတၢင်းလူႇၼၼ်ႉမီးဢမိင်ႉၸိူဝ်ႉၼင်ႇၼႆဢေႃႈ။
တူၺ်းလူး။ ၶုၼ်ႁေႃၶမ်းပႃးၼိုင်ႈတၵ်းဢုပ်ႉပိူင်ႇလူၺ်ႈတၢင်းသိုဝ်ႈတေႃႇလႄႈမူးမၢတ်ႈၽွင်းမိူင်းတင်းလၢႆတၵ်းဢုပ်ႉပိူင်ႇၸွမ်းၼင်ႇတြႃးဢေႃႈ။-
ၶုၼ်ၼၼ်ႉတၵ်းပဵၼ်ၸိူဝ်ႉၼင်ႇႁူမ်ႈၽူၺ်းဢၼ်လႆႈသွၼ်ႈပိုင်ႈမိူဝ်ႈဢၼ်လူမ်းလူင်ထူဝ်းပတ်ႉမႃး၊ဢိၵ်ႇတင်းတၵ်းပဵၼ်ၸိူဝ်ႉၼင်ႇတီႈဢၼ်တဵတ်ႇမႅပ်းၽူၼ်လူင်လူမ်းလူင်ဢေႃႈ။ ၶဝ်တၵ်းပဵၼ်ၸိူဝ်ႉၼင်ႇၼမ်ႉႁွင်ႈၼမ်ႉၵႄးဢၼ်လႆၵႃႈၼႂ်းပၢင်ႇႁၢတ်ႇသၢႆးလူင်လႄႈပဵၼ်မိူၼ်ငဝ်းႁူမ်ႈမၢၵ်ႇႁိၼ်လူင်ဢၼ်ပူၵ်းတင်ႈၵႃႈၼႂ်းၵၢင်ပၢင်ႇၼၼ်ႉဢေႃႈ။-
မၢၵ်ႇတႃၶဝ်ၸိူဝ်းဢၼ်ႁၼ်ၼၼ်ႉတၵ်းဢမ်ႇလႆႈၽိူမ်လႆႈမူဝ်းလႄႈႁူၶဝ်ၸိူဝ်းဢၼ်ငိၼ်းၼၼ်ႉတၵ်းထွမ်ႇဢဝ်ဢေႃႈ။-
ၶဝ်တၵ်းဢမ်ႇမီးတၢင်းဢၼ်ၸႂ်ပွတ်းၸႂ်လွတ်းလႄႈၶဝ်တၵ်းႁဵတ်းၸွမ်းၵႃႈဢၼ်ၶဝ်ႁုၸႅင်ႈၼၼ်ႉ၊ဢိၵ်ႇတင်းၶဝ်တၵ်းလၢတ်ႈၸွမ်းၵႃႈၼင်ႇဢၼ်ၶဝ်ၶုၵ်းၸႂ်လႆႈၶႆႈၸႂ်ထူပ်းၼၼ်ႉဢေႃႈ။-
ၵမ်းလိုၼ်းၵေႃႉဢၼ်ႁၢႆႉယုတ်ႈၼၼ်ႉတၵ်းဢမ်ႇလႆႈၶၢမ်ႇတၢင်းဢၼ်ႁွင်ႉႁဵၵ်ႈဝႃႈ၊ၵေႃႉဢၼ်မျၢတ်ႈလီ။ ၵေႃႉဢၼ်ၸၢင်ႈပႅတ်ႉလႅၼ်ၵေႃႈဢမ်ႇလႆႈၶၢမ်ႇတၢင်းဢၼ်ႁွင်ႉႁဵၵ်ႈဝႃႈ၊ၵေႃႉဢၼ်သိုဝ်ႈယူဝ်း။-
လွင်ႈမၼ်းၸမ်ႉ၊ၵေႃႉဢၼ်ႁၢႆႉယုတ်ႈၼၼ်ႉတၵ်းလၢတ်ႈၵႂၢမ်းဢၼ်ႁၢႆႉယုတ်ႈၵူၺ်းလႄႈႁူဝ်ၸႂ်မၼ်းၸၢင်ႈၵျၢမ်ႇပွင်ဢၼ်ဢမ်ႇလီဢမ်ႇငၢမ်းဢေႃႈ။ ၵႃႈဢၼ်မၼ်းႁဵတ်းလႄႈမၼ်းလၢတ်ႈၸိူဝ်းၼၼ်ႉပဵၼ်တၢင်းဢၼ်သႄႉသွမ်း ထႃႇဝရႃႉၽြႃး၊ လႄႈမၼ်းဢမ်ႇလဵင်ႉလူၵေႃႉဢၼ်ဢိုပ်းယၢၵ်ႈတွင်ႉမႆႈ၊ဢမ်ႇပၼ်ၼမ်ႉၵိၼ်တီႈၵေႃႉဢၼ်ယၢၵ်ႇၼမ်ႉၼၼ်ႉ။-
တၢင်းႁဵတ်းၵေႃႉဢၼ်ၸၢင်ႈပႅတ်ႉလႅၼ်ၼၼ်ႉပဵၼ်ဢၼ်ႁၢႆႉၼႃႇလႄႈပိၵ်ႉသမ်ႉၵေႃႉဢၼ်ၸုတ်ႈဢၼ်လုတ်ႈၼၼ်ႉလၢတ်ႈမၢၼ်ႇမၢၼ်ႇမႅၼ်ႈမႅၼ်ႈသေၵေႃႈမၼ်းၸၢင်ႈၵျၢမ်ႇပွင်တၢင်းၵျၢမ်ႇတၢင်းပွင်ဢၼ်ဢမ်ႇလီဢမ်ႇငၢမ်းႁႂ်ႈလႆႈဢဝ်မုသႃႇယႃႉၽဵဝ်ႈၵေႃႉဢၼ်ၽၢၼ်ဢၼ်ၵႅၼ်းၼၼ်ႉပႅတ်ႈဢေႃႈ။-
ၵေႃႉဢၼ်မီးၸေႇတၼႃႇလီၼၼ်ႉၸမ်ႉ၊ၸၢင်ႈၵျၢမ်ႇပွင်တၢင်းၵျၢမ်ႇတၢင်းပွင်ဢၼ်ၸၢပ်ႈသႅင်ႇၵၼ်တင်းၸေႇတၼႃႇလီၼၼ်ႉလႄႈတၵ်းတႄႇယူႇၼႂ်းတၢင်းဢၼ်ၸၢပ်ႈသႅင်ႇၵၼ်တင်းၸေႇတၼႃႇလီၼၼ်ႉဢေႃႈ။
ၽူႈယိင်းၸိူဝ်းဢၼ်ယူႇပျေႃႇယူႇမူၼ်ႈလႄႈဢမ်ႇမီးတၢင်းမႆႈတၢင်းၶီၶဝ်႟။ ထွမ်ႇၵႂၢမ်းဢၼ်ၵဝ်လၢတ်ႈၼႆႉတႃႉ။-
သူတၵ်းဢွၼ်ၵၼ်လႆႈပျေႇၸႂ်ပျေႇၶေႃးသေၵေႃႈ၊ပီၼႃႈၼႂ်းၶိင်ႇတေႃႈလဵဝ်ၼႆႉသူတၵ်းယၢပ်ႇၸႂ်ယုင်ႈၸႂ်ဢေႃႈ။ လွင်ႈမၼ်းၸမ်ႉ၊သူတၵ်းဢမ်ႇမီးမၢၵ်ႇၸပိတ်ႉဢၼ်တၵ်းဝိတ်းဢဝ်ၼၼ်ႉဢေႃႈ။-
သူလႆႈယူႇမူၼ်ႈယူႇပျေႃႇလႄႈဢမ်ႇမီးတၢင်းမႆႈတၢင်းၶီလႄႈပူၼ်ႉမႃးယဝ်ႉ။ ၵူၺ်းၵႃႈ၊တေႃႈလဵဝ်ၼႆႉသူတၵ်းမီးတၢင်းဢၼ်သၼ်ႇသၢႆလႄႈလီၵူဝ်လီႁႄဢေႃႈ။ ထွတ်ႇၶူဝ်းၼုင်ႈတၢင်းမႆသူပႅတ်ႈသေလႄႈဢဝ်ၶူဝ်းၼင်ပေႃႁတ်ႉဢႅဝ်သူတႃႉ။-
တူပ်းဢူၵ်းထုပ်ႉဢူၵ်းပုၼ်ႈႁႆႈၼႃးဢၼ်သႃႇယႃႇ၊ဢိၵ်ႇတင်းတူၼ်ႈၶိူဝ်းမၢၵ်ႇၸပိတ်ႉဢၼ်မၢၵ်ႇပူင်းလီလႄႈလႆႈၶၢမ်ႇတၢင်းဢၼ်ယႃႉၽဵဝ်ႈပႅတ်ႈၼၼ်ႉတႃႉ။-
တူၼ်ႈၼၢမ်တူၼ်ႈၶိူဝ်းႁုၼ်ႈဢွၵ်ႇမႃးၵႃႈၼႂ်းလိၼ်ဢၼ်ၵူၼ်းၵဝ်ယူႇၼၼ်ႉယဝ်ႉ။ ပိူဝ်ႈၼႆလႄႈႁွင်ႉႁႆႈပုၼ်ႈၵူၼ်းႁိူၼ်းၸိူဝ်းဢၼ်ယူႇမူၼ်ႈယူႇပျေႃႇ၊ဢိၵ်ႇတင်းၵူၼ်းဝဵင်းၸိူဝ်းဢၼ်မီးၸႂ်ၶျၢမ်းသႃႇၼၼ်ႉတႃႉ။-
လွင်ႈမၼ်းၸမ်ႉ၊ႁေႃၶမ်းတၵ်းလႆႈၶၢမ်ႇတၢင်းဢၼ်ၸုၼ်ႉပႅတ်ႈလႄႈဝဵင်းယႂ်ႇဝဵင်းလူင်တၵ်းႁၢမ်းဢေႃႈ။ ႁိူၼ်းယေးဢိၵ်ႇတင်းတိူၵ်ႈတီႈတိုၵ်းသိုၵ်းတင်းလၢႆတၵ်းလုလႅဝ်ယူႇတႃႇသေႇလႄႈ၊မႃႉလီႈထိူၼ်ႇတင်းလၢႆတၵ်းဢွၼ်ၵၼ်လႄႇၵႂႃႇလႄႇမႃးယူႇၵႃႈတီႈၼၼ်ႈလႄႈတၵ်းပဵၼ်ပၢင်ႇယိူဝ်ႈပုၼ်ႈၽုင်သူဝ်းတင်းလၢႆတၵ်းၵိၼ်ဢေႃႈ။
ၼႂ်းဝႃႈၼၼ်သေၵေႃႈ၊ၽြႃးပဵၼ်ၸဝ်ႈတၵ်းသွၼ်းလေႃႇဝိၺိၺ်ႇၸဝ်ႈၵႃႈၼိူဝ်ႁဝ်းထႅင်ႈပွၵ်ႈၼိုင်ႈလူးၵွၼ်ႇဢေႃႈ။ လိၼ်ဢၼ်ၽုၼ်ႇဢမ်ႇလီၼႆႉတၵ်းမီးၽုၼ်ႇလီလိၼ်လီမႃးလႄႈတူင်ႈႁႆႈတူင်ႈၼႃးတင်းလၢႆတၵ်းမီးမၢၵ်ႇၶဝ်ႈႁူင်းၼမ်ႉၼမ်ၼႃႇဢေႃႈ။-
ၵႃႈၼႂ်းမိူင်းၸဝ်ႈၼႆႉတၵ်းၸီႇယၢင်ႇတြႃးၸွမ်းတြႃးတၢင်းဢၼ်သိုဝ်ႈတေႃႇ၊ဢိၵ်ႇတင်းတြႃးတၢင်းဢၼ်တတ်းၽဵင်ႇလွၼ်ႉလွၼ်ႉၼၼ်ႉဢေႃႈ။-
လွင်ႈမၼ်းၸမ်ႉ၊ၵူၼ်းၵူႈၵေႃႉၵူႈၵူၼ်းပွင်ႁဵတ်းသိုဝ်ႈသိုဝ်ႈတေႃႇတေႃႇလႄႈတၵ်းမီးတၢင်းဢၼ်ၼိမ်သိမ်ႇလီလႄႈလွတ်ႈၽေးလွတ်ႈရၢၼ်ႇတႃႇသေႇဢမ်ႇထၢတ်ႇဢေႃႈ။-
ၵူၼ်းၽြႃးပဵၼ်ၸဝ်ႈတင်းလၢႆတၵ်းလွတ်ႈသေတၢင်းဢၼ်မႆႈၸႂ်ၶီၸႂ်လႄႈႁိူၼ်းယေးၶဝ်တၵ်းၼိမ်သိမ်ႇလႄႈလွတ်ႈၽေးလွတ်ႈရၢၼ်ႇဢေႃႈ။-
(ၵူၺ်းၵႃႈ၊ၽူၼ်မၢၵ်ႇႁဵပ်းတၵ်းတူၵ်းသႂ်ႇၵႃႈၼႂ်းပႃႇမႆႉပႃႇၸိင်လႄႈဝဵင်းလူင်တၵ်းလႆႈၶၢမ်ႇတၢင်းဢၼ်ၵိူၼ်ႇယႃႉပႅတ်ႈဢေႃႈ။-)
ၶဝ်ၸိူဝ်းဢၼ်မီးၼမ်ႉပုၼ်ႈတၵ်းသႂ်ႇသူၼ်ၽၵ်းသူၼ်ယိူဝ်ႈလႄႈမီးပၢင်ႇယိူဝ်ႈဢၼ်ၶဵဝ်လီပုၼ်ႈၽုင်မႃႉလီႈ၊ပုၼ်ႈၽုင်ဝူဝ်း၊ပုၼ်ႈၽုင်သူဝ်းတၵ်းၵိၼ်ၼၼ်ႉမီးမၢင်ႇၵလႃႇဢေႃႈ။
ရၢၼ်ႇသူႇႁဝ်းၸိူဝ်းၼၼ်ႉမီးဢႃႉမၢင်ႇၵလႃႇဢေႃႈ။ လွင်ႈမၼ်းၸမ်ႉ၊ပိၵ်ႉသမ်ႉၽူႈလႂ်ဢမ်ႇႁိမ်ဢမ်ႇႁူင်ႇဢဝ်ၶဝ်၊ဢမ်ႇပႅတ်ႉဢမ်ႇလႅၼ်ၶဝ်သေၵေႃႉသေၵူၼ်းသေၵေႃႈ၊ၶဝ်ႁိမ်ဢဝ်ႁူင်ႇဢဝ်တီႈပိူၼ်ႈလႄႈပႅတ်ႉလႅၼ်ပိူၼ်ႈဢေႃႈ။ ၵူၺ်းၵႃႈ၊မိုဝ်ႉဝၼ်းၶိင်ႇၵႃႇလႃႉဢၼ်ၶဝ်တၵ်းႁိမ်ဢဝ်ႁူင်ႇဢဝ်၊ပႅတ်ႉၵိၼ်လႅၼ်ၵိၼ်ၼၼ်ႉတၵ်းသုတ်းသဵင်ႈဢေႃႈ။ မိူဝ်ႈၼၼ်ႉတူဝ်ၶဝ်သမ်ႉတၵ်းတေလႆႈၶၢမ်ႇတၢင်းဢၼ်ႁိမ်ႁူင်ႇ၊တၢင်းဢၼ်ပိူၼ်ႈပႅတ်ႉၵိၼ်လႅၼ်ၵိၼ်ဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈဢဵတ်းလူၶႃႈၸဝ်ႈႁဝ်းၶဝ်သေၵမ်းတီႈၶႃႈ။ ၶႃႈၸဝ်ႈႁဝ်းၶဝ်မုင်ႈမွင်းၸဝ်ႈႁဝ်းယူႇတီႈၶႃႈဢေႃႈ။ ၶႅၼ်းတေႃႈၵႅတ်ႇၶႄႁႄႉၵင်ႈၶႃႈၸဝ်ႈႁဝ်းၶဝ်ယူႇၵူႈဝၼ်းၵူႈဝၼ်းလႄႈၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈႁဝ်းၶဝ်ၼႂ်းမိူဝ်ႈၽေးႁွတ်ႈမႃးၼၼ်ႉသေၵမ်းတီႈၶႃႈ။-
ၼႂ်းမိူဝ်ႈဢၼ်ၸဝ်ႈႁဝ်းတိုၵ်းတေႃးပုၼ်ႈၶႃႈၸဝ်ႈႁဝ်းၶဝ်ၼၼ်ႉမဵဝ်းၵူၼ်းတင်းလၢႆဢွၼ်ၵၼ်ၽူင်ႉပၢႆႈယၢႆႈၼီၵႂႃႇၵွပ်ႈပိူဝ်ႈသဵင်တိုၵ်းသိုၵ်းဢၼ်ဢူၼ်ဢဵၼ်မေႃးမႄးၼၼ်ႉဢေႃႈ။-
ဢုၵ်ႉၸႃႇၶူဝ်းၶွင်ၶဝ်တင်းလၢႆၼၼ်ႉလႆႈၶၢမ်ႇတၢင်းဢၼ်ၸၵ်ႉဢဝ်လၢၵ်ႈဢဝ်၊ဢိၵ်ႇတင်းၶၢမ်ႇတၢင်းဢၼ်ႁိမ်ႁူင်ႇဢဝ်ဢေႃႈ။
ထႃႇဝရႃႉၽြႃး၊ မီးတၢင်းဢၼ်ယုၵ်ႉယွင်ႈယူႇဢေႃႈ။ လွင်ႈမၼ်းၸမ်ႉ၊မၼ်းၸဝ်ႈဢုပ်ႉပိူင်ႇၵႃႈၼိူဝ်ၵႃႈမီးၵူႈၸိူဝ်ႉၵူႈပိူင်ဢေႃႈ။ မၼ်းၸဝ်ႈတၵ်းႁႂ်ႈဝဵင်း ယေႇရုသလႅမ်ႇ၊ တဵမ်ဝႆႉတင်းတၢင်းဢၼ်တႅပ်းတတ်းၸွမ်းၼင်ႇတြႃး၊ဢိၵ်ႇတင်းတၢင်းဢၼ်ၸီႇယၢင်ႇသိုဝ်ႈသိုဝ်ႈတေႃႇတေႃႇလႄႈ၊-
ႁႂ်ႈမဵဝ်းၵူၼ်းတင်းလၢႆတႄႇၼိမ်မၼ်ႈၶိူင်ႇဢေႃႈ။ မၼ်းၸဝ်ႈၵႅတ်ႇၶႄႁႄႉၵင်ႈၵူၼ်းမၼ်းၸဝ်ႈတင်းလၢႆတႃႇသေႇလႄႈဢဵတ်းလူပၼ်ၺၢၼ်ႇပိင်ႇၺႃႇတီႈၶဝ်ဢေႃႈ။ တၢင်းဢၼ်ရူဝ်ႇသေႇၵူဝ်ယမ် ထႃႇဝရႃႉၽြႃး၊ ၼၼ်ႉပဵၼ်ၽၼ်ႇတႃႇၶဝ်ဢၼ်ထိူၵ်ႈၵႃႈသေပိူၼ်ႈၼၼ်ႉဢေႃႈ။
ၵူၼ်းႁတ်းၵူၼ်းႁၢၼ်တင်းလၢႆဢွၼ်ၵၼ်ႁွင်ႉႁႃတၢင်းၸွႆႈတၢင်းထႅမ်ဢေႃႈ။ သၢၼ်ႇတမၢၼ်ႇၸိူဝ်းဢၼ်ပႃးဢဝ်ၵႂၢမ်းမိၵ်ႈသႁႃႇယႃႉမႃးၼၼ်ႉႁွင်ႉႁႆႈလူၺ်ႈတင်းသဵင်ႈဢၼ်ႁႅင်းၼႃႇလူင်လၢင်ဢေႃႈ။-
သဵၼ်ႈတၢင်းလူင်တင်းလၢႆပဵၼ်ဢၼ်သဵတ်ႇၵူၼ်းငႅဝ်ၵူၼ်းလႄႈဢမ်ႇမီးၵေႃႉဢၼ်ၵႂႃႇမႃး။ လိၵ်ႈမၼ်ႈၵႅၼ်ႇၼၼ်ႉလုလႅဝ်လႄႈၵႂၢမ်းၵတိသဵတ်ႈၸႃႇၵေႃႈဢမ်ႇမီးသေလႄႈၽူႈလႂ်ၵေႃႈဢမ်ႇၼပ်ႉဢမ်ႇယမ်မၼ်းယဝ်ႉ။-
မိူင်းၸဝ်ႈတမ်ႇၼွႆႉမွင်ၸႂ်လႄႈႁႅင်းဢူၼ်ႈယူႇဢေႃႈ။ ထိူၼ်ႇ လေႇပၼုၼ်ႇ၊ ႁဵဝ်ႇၵႂႃႇႁႅင်ႈၵႂႃႇယဝ်ႉလႄႈတီႈၽုၼ်ႇၼမ်ႉမၼ်းလိၼ်လီၼႂ်းထူင်ႉႁူၺ်ႈ သႃႇရုၼ်ႇ၊ ၼၼ်ႉပဵၼ်ၸိူဝ်ႉၼင်ႇပၢင်ႇႁၢတ်ႇသၢႆးယဝ်ႉ။ ၵႃႈၼိူဝ်လွႆ ပႃႇသၢၼ်ႇ၊ ဢိၵ်ႇတင်းလွႆ ၵရမေႇလႃႉ၊ ၼၼ်ႉမႂ်မႆႉတင်းလၢႆလူၼ်ႇတူၵ်းႁူင်ႈတူၵ်းယူႇဢေႃႈ။
ထႃႇဝရႃႉၽြႃး၊ မီးဢမိင်ႉတီႈမဵဝ်းၵူၼ်းတင်းလၢႆလႄႈဝႃႈၸမ်ႉ၊ “ၵဝ်တၵ်းသၢင်ႈႁဵတ်းမိူဝ်ႈလဵဝ်ၼႆႉယဝ်ႉ။ ၵဝ်တၵ်းၼႄပျႃးတၼ်းၶူဝ်းၵဝ်ယႂ်ႇၼႃႇထၢၼ်ႇႁိုဝ်ၼၼ်ႉယဝ်ႉ။-
သူဢွၼ်ၵၼ်ၵျၢမ်ႇဢၢင်ႈတၢင်းၵျၢမ်ႇတၢင်းပွင်ဢၼ်ဢမ်ႇပွင်ႇလွင်ႈၵႃႈသင်ၼၼ်ႉလႄႈၵႃႈဢၼ်သူသၢင်ႈႁဵတ်းၼၼ်ႉပဵၼ်ဢၼ်လၢႆလၢႆလွၵ်ႇလွၵ်ႇၵူၺ်းၵူၺ်းဢေႃႈ။ တၢင်းထူၺ်ႈၸႂ်သူၼၼ်ႉပဵၼ်ၽႆးဢၼ်မႆႈသူပႅတ်ႈဢေႃႈ။-
မဵဝ်းၵူၼ်းတင်းလၢႆတၵ်းပဵၼ်ၸိူဝ်ႉၼင်ႇဢၼ်ၽဝ်မၢၵ်ႇႁိၼ်ထုၼ်ၼၼ်ႉလႄႈပဵၼ်ၸိူဝ်ႉၼင်ႇဢၼ်ဢဝ်တူၼ်ႈၼၢမ်တုတ်ႇၽႆးပဵၼ်တဝ်ႈၵႂႃႇၼၼ်ႉဢေႃႈ။-
ႁႂ်ႈၶဝ်ၸိူဝ်းဢၼ်မီးတီႈၵႆတီႈၸမ်လႆႈငိၼ်းလွင်ႈတၢင်းဢၼ်ၵဝ်ႁဵတ်းဢိၵ်ႇတင်းလႆႈႁုၸႅင်ႈတၼ်းၶူဝ်းၵဝ်တႃႉ။”
ၵူၼ်းဝဵင်း ၸိဢုၼ်ႇ၊ ဢၼ်မီးဢပျတ်ႈၸိူဝ်းၼၼ်ႉဢွၼ်ၵၼ်မီးတၢင်းဢၼ်ၵူဝ်ႁႄလႄႈတၢင်းဢၼ်တူၵ်းၸႂ်သၼ်ႇဝႆယူႇဢေႃႈ။ ၶဝ်လၢတ်ႈလႄႈဝႃႈ၊ “တၢင်းဢၼ် ထႃႇဝရႃႉၽြႃး၊ ၸီႇယၢင်ႇတြႃးၼၼ်ႉပဵၼ်မိူၼ်ၽႆးဢၼ်မႆႈယူႇတႃႇသေႇၼၼ်ႉဢေႃႈ။ ၵွပ်ႈပိူဝ်ႈၼႆလႄႈႁဝ်းတၵ်းလွတ်ႈတၢင်းတၢႆသေၵႃႈၼႂ်းၽႆးမဵဝ်းၼႆႉလႆႈႁိုဝ်း၊” ဝႃႈၼင်ႇၼႆဢေႃႈ။-
ပေႃးသူလၢတ်ႈသိုဝ်ႈသိုဝ်ႈရူဝ်းရူဝ်းလႄႈၵမ်ၵျၢင်ႉၸွမ်းၼင်ႇတြႃးယူႇၸိုင်၊သူတၵ်းလွတ်ႈတၢင်းတၢႆလႆႈယူႇဢေႃႈ။ ယႃႇပေဢဝ်တင်းဢႃႇၼႃႇသူလႄႈမႂ်ၵိၼ်ၵူၼ်းၽၢၼ်၊ယႃႇပေၵိၼ်သူးၵိၼ်လၢပ်ႈ။ ယႃႇပေၶဝ်ႈပႃးလူၺ်ႈၵၼ်တင်းၶဝ်ၸိူဝ်းဢၼ်ၵျၢမ်ႇပွင်ႁႂ်ႈလႆႈၶႃႈပိူၼ်ႈတၢႆ၊ဢမ်ႇၼၼ်ၵေႃႈႁႂ်ႈလႆႈႁဵတ်းဢၼ်ႁၢႆႉဢၼ်မိူၵ်ႈၼၼ်ႉ။-
ပေႃးသူႁဵတ်းၸိူဝ်ႉၼင်ႇၼၼ်ၸိုင်၊သူတၵ်းမီးဢၶႂၢင်ႉဢၼ်ယူႇၼိမ်ၼိမ်လီလီဢေႃႈ။ သူတၵ်းမီးတၢင်းဢၼ်လူင်ႉလီလွတ်ႈလီမိူၼ်ၸိူဝ်ႉၼင်ႇဢၼ်လႆႈယူႇၵႃႈၼႂ်းတိူၵ်ႈတီႈတိုၵ်းသိုၵ်းဢၼ်မၼ်ႈၶိူင်ႇၼၼ်ႉဢေႃႈ။ သူတၵ်းမီးတၢင်းၵိၼ်တၢင်းၶူပ်းဢိၵ်ႇတင်းၼမ်ႉၵိၼ်ဢေႃႈ။
သူတၵ်းဢွၼ်ၵၼ်ႁၼ်ၶုၼ်ႁေႃၶမ်းဢၼ်မီးမုၼ်သရေႇဢၼ်ႁၢင်ႈလီႁၢင်ႈငၢမ်းဢၼ်ဢုပ်ႉပိူင်ႇမိူင်းဢၼ်ယႂ်ႇၵႂၢင်ႈၼႃႇၼၼ်ႉထႅင်ႈပွၵ်ႈၼိုင်ႈလူးၵွၼ်ႇဢေႃႈ။-
တၢင်းဢၼ်သူၵူဝ်ႁႄၵူၼ်းၵဵပ်းၶွၼ်ႇဢၼ်ပဵၼ်ၵူၼ်းမိူင်းၼွၵ်ႈ၊ဢိၵ်ႇတၢင်ႇၵူၼ်းသိုပ်ႇၶၢဝ်ႇၶဝ်ၼၼ်ႉတၵ်းပဵၼ်တီႈဢၼ်ၶုၵ်းၸႂ်လႆႈၶႆႈၸႂ်ထူပ်းၼၼ်ႉၵူၺ်းဢေႃႈ။-
သူတၵ်းဢမ်ႇလႆႈတူၺ်းလႆႈႁၼ်ၵူၼ်းမဵဝ်းဢၼ်ႁၢဝ်ႈၵျၢမ်းၼႃႇ၊ၵူၼ်းမဵဝ်းလၢတ်ႈၽႃႇသႃႇၵႂၢမ်းဢၼ်သူဢမ်ႇႁုထွမ်ႇၸိူဝ်းၼၼ်ႉထႅင်ႈလႃးလႃး။-
တူၺ်းဝဵင်း ၸိဢုၼ်ႇ၊ ဝဵင်းဢၼ်ႁဝ်းႁဵတ်းပွႆးၽြႃးၽႃႇသႃႇတြႃးၼၼ်ႉလူး။ တူၺ်းဝဵင်း ယေႇရုသလႅမ်ႇ၊ ၼၼ်ႉလူး။ မၼ်းပဵၼ်ဝဵင်းဢၼ်ၼိမ်လီသဵတ်ႇလီလႄႈပဵၼ်ဝဵင်းဢၼ်လီယူႇလီသဝ်းဢၼ်ဝႃႈ၊သုမ်ႉထဵင်ဢၼ်ဢမ်ႇလႆႈၶၢႆႉၵႂႃႇၶၢႆႉမႃး၊လၵ်းမၼ်းဢမ်ႇလႆႈထူၺ်ႈလႆႈထွၼ်လႄႈၸိူၵ်ႈမၼ်းဢမ်ႇလႆႈၶၢတ်ႇၵႂႃႇလႃးလႃးၼၼ်ႉဢေႃႈ။-
ၵႃႈၼႂ်းဝဵင်းၼၼ်ႉ ထႃႇဝရႃႉၽြႃး၊ တၵ်းႁႅင်းယႂ်ႇၼႃႇပုၼ်ႈႁဝ်းလႄႈပဵၼ်တီႈဢၼ်ၼမ်ႉႁွင်ႈၼမ်ႉၵႄးဢၼ်ၵႂၢင်ႈလီလႃးလီတင်းလၢႆမီးယူႇၵႃႈတီႈႁဝ်းဢေႃႈ။ ၵႃႈတီႈၼၼ်ႉႁိူဝ်းဢၼ်တိုၵ်းသိုၵ်းဢၼ်ဢဝ်လၢမ်ႈၽၢႆးသေလႄႈၽၢႆးဢဝ်၊ႁိူဝ်းသၢင်းၽေႃးဢၼ်ႁႅင်းယႂ်ႇၼႃႇဢမ်ႇလႆႈလတ်းလႆႈၵႂႃႇသေလမ်း။-
လွင်ႈမၼ်းၸမ်ႉ၊ ထႃႇဝရႃႉၽြႃး၊ ပဵၼ်ၵူၼ်းလူင်ဢၼ်ၸီႇယၢင်ႇတြႃးႁဝ်းလႄႈ ထႃႇဝရႃႉၽြႃး၊ ပဵၼ်ၸဝ်ႈပိင်းၺၢပ်ႈတြႃးႁဝ်းဢေႃႈ။ ထႃႇဝရႃႉၽြႃး၊ ပဵၼ်ၶုၼ်ႁေႃၶမ်းႁဝ်းလႄႈမၼ်းၸဝ်ႈတၵ်းၵႄႇသႄႇၶျွတ်ႈဢဝ်ႁဝ်းဢေႃႈ။-
ၸိူၵ်ႈသဝ်လၢင်းယၢၼ်းႁိူဝ်းၼၼ်ႉလုတ်ႈၵႂႃႇယဝ်ႉ။ ၶဝ်ဢမ်ႇမတ်ႉဝႆႉသဝ်လၢင်းယၢၼ်းမၼ်ႈမၼ်ႈၶိူင်ႇၶိူင်ႇလႆႈ။ မႂ်လၢင်းယၢၼ်းၵေႃႈၶဝ်ဢမ်ႇၵီႈဢမ်ႇပိုတ်ႇလႆႈ။ မိူဝ်ႈၼၼ်ႉလႆႈႁိမ်ႁူင်ႇဢဝ်ဢုၵ်ႉၸႃႇၶူဝ်းၶွင်တပ်ႉရၢၼ်ႇသူႇတင်းလၢႆလႄႈၵူၼ်းတိၼ်ၵႅင်ႉၵူၺ်းၵေႃႈယင်းႁိမ်ဢဝ်လႆႈယူႇယဝ်ႉ။-
ၶဝ်ၸိူဝ်းဢၼ်ယူႇသဝ်းၵႃႈၼႂ်းမိူင်းၸဝ်ႈၼၼ်ႉၵမ်းလိုၼ်းတၵ်းဢမ်ႇမီးတၢင်းဢၼ်ပွင်ႉဢၼ်ၶၢင်းလူၺ်ႈတၢင်းၶႆႈတၢင်းပဵၼ်ၶဝ်။ တီႈၶဝ်ၸိူဝ်းၼၼ်ႉ ထႃႇဝရႃႉၽြႃး၊ ပွႆႇလွတ်ႈဢပျတ်ႈမူတ်းမူတ်းသဵင်ႈသဵင်ႈယဝ်ႉဢေႃႈ။
ၵူၼ်းမဵဝ်းတင်းသဵင်ႈတင်းလူင်ၶဝ်႟။ ဢွၼ်ၵၼ်မႃးတႃႉ။ ဢွၼ်ၵၼ်မႃးၸုၵၼ်တုမ်ၵၼ်လႄႈထွမ်ႇငိၼ်းတႃႉ။ ႁႂ်ႈၵူၼ်းလေႃးၵီႇၸိူဝ်းဢၼ်ယူႇသဝ်းၵႃႈၼႂ်းလေႃးၵႃႉၼႆႉဢွၼ်ၵၼ်မႃးၵႃႈတီႈၼႆႈလႄႈထွမ်ႇငိၼ်းတႃႉ။-
ထႃႇဝရႃႉၽြႃး၊ ၸႂ်မႆႈၶႂ်ႈၸႃႉၵူၼ်းမဵဝ်းၵႃႈမီး၊ဢိၵ်ႇတင်းတပ်ႉသိုၵ်းၶဝ်ၼၼ်ႉဢေႃႈ။ မၼ်းၸဝ်ႈၸီႇယၢင်ႇႁႂ်ႈလႆႈယႃႉၽဵဝ်ႈၶဝ်ပႅတ်ႈယဝ်ႉ။-
တူဝ်တၢႆၶဝ်ၼၼ်ႉတၵ်းဢမ်ႇလႆႈၽင်၊တၵ်းလႆႈပႅတ်ႈၼဝ်ႈဝႆႉလႄႈမဵၼ်တူႇဝႆႉဢေႃႈ။ လွႆတင်းလၢႆၵေႃႈတၵ်းပဵၼ်လိူတ်ႈလႄႈလႆလူင်းၵႂႃႇဢေႃႈ။-
ၵၢင်ဝၼ်း၊လိူၼ်၊လၢဝ်တင်းလၢႆတၵ်းယွၵ်းယွႆႈပဵၼ်မုၼ်ႈပဵၼ်ၽွင်ၵႂႃႇဢေႃႈ။ ၽႃႉၵၢင်ႁၢဝ်တၵ်းႁၢႆလၢႆၵႂႃႇမိူၼ်ၸိူဝ်ႉၼင်ႇၵဵၼ်လိၵ်ႈဢၼ်ႁမ်းၵႂႃႇၼၼ်ႉလႄႈ၊လၢဝ်တင်းလၢႆတၵ်းလူၼ်ႇတူၵ်းႁူင်ႈတူၵ်းမိူၼ်ၸိူဝ်ႉၼင်ႇမႂ်မႆႉလူၼ်ႇတူၵ်းသေၵႃႈတီႈတူၼ်ႈၶိူဝ်းမၢၵ်ႇၸပိတ်ႉဢမ်ႇၼၼ်တူၼ်ႈမၢၵ်ႇလိူဝ်ႇၼၼ်ႉဢေႃႈ။
ထႃႇဝရႃႉၽြႃး၊ ထွတ်ႇလၢပ်ႇမၼ်းၸဝ်ႈၵႃႈၼႂ်းမိူင်းၵၢင်ႁၢဝ်ဝႆႉလႄႈတေႃႈလဵဝ်ၼႆႉၶႃႈၽၼ်းဢဝ်တၢႆၵူၼ်းဝဵင်း ဢေႇတုမ်ႇ၊ ၸိူဝ်းဢၼ်မၼ်းၸဝ်ႈၸီႇယၢင်ႇဝႆႉႁႂ်ႈလႆႈယႃႉၽဵဝ်ႈပႅတ်ႈၼၼ်ႉယဝ်ႉဢေႃႈ။-
လၢပ်ႇ ထႃႇဝရႃႉၽြႃး၊ ၼၼ်ႉဢိမ်ႇတဵမ်ဝႆႉတင်းလိူတ်ႈ၊ဢိၵ်ႇတင်းၵွၼ်ႈၶႆၵွၼ်ႈမၼ်း၊မၢၵ်ႇလၼ်းသူဝ်းဢွၼ်ႇပႄႉဢွၼ်ႇဢၼ်သၢၵ်ႈလူႇၼၼ်ႉဢေႃႈ။ ထႃႇဝရႃႉၽြႃး၊ တၵ်းသၢၵ်ႈလူႇၶိူင်ႈတၢင်းလူႇၼႆႉၵႃႈၼႂ်းဝဵင်း ပေႃႇၸရႃႉ၊ ဢိၵ်ႇတင်းႁဵတ်းပွႆးတၢင်းဢၼ်ဢဝ်တၢႆဢၼ်ယႂ်ႇၼႃႇၵႃႈတီႈမိူင်း ဢေႇတုမ်ႇ၊ ဢေႃႈ။-
ၵူၼ်းတင်းလၢႆတၵ်းလူမ်ႉတူၵ်းမိူၼ်ၸိူဝ်ႉၼင်ႇၸူင်၊ဢိၵ်ႇတင်းဝူဝ်းငၢၼ်လႄႈလိၼ်မိူင်းတၵ်းဢိူၵ်ႇလိူတ်ႈလႄႈလႅင်ၵႂႃႇမူတ်း၊ဢိၵ်ႇတင်းတၵ်းႁူမ်ႇသုမ်ႇဝႆႉတင်းၵွၼ်ႈၶႆၵွၼ်ႈမၼ်းဢေႃႈ။-
ဢၼ်ၼႆႉၸမ်ႉ၊ပဵၼ်ၶိင်ႇၵႃႇလႃႉမိူဝ်ႈဢၼ် ထႃႇဝရႃႉၽြႃး၊ တၵ်းၵႄႇၼုၵ်ႈဢဝ်ဝဵင်း ၸိဢုၼ်ႇ၊ လႄႈတွပ်ႇတႅၼ်းရၢၼ်ႇသူႇမၼ်းၸဝ်ႈတင်းလၢႆၼၼ်ႉဢေႃႈ။
ၼမ်ႉႁွင်ႈၼမ်ႉၵႄးမိူင်း ဢေႇတုမ်ႇ၊ တၵ်းပဵၼ်ယၢင်ပႅၵ်ႇၵႂႃႇ၊ၽုၼ်ႇလိၼ်မၼ်းတၵ်းပဵၼ်ၵၢၼ်ႉၵႂႃႇ၊မိူင်းတင်းမိူင်းတၵ်းပဵၼ်ယၢင်ဢၼ်မႆႈၽႆးၼၼ်ႉၵႂႃႇဢေႃႈ။-
ၶိုၼ်းၶိုၼ်းဝၼ်းဝၼ်းၽႆးတၵ်းမႆႈယူႇလႄႈၵႂၢၼ်းၽႆးတၵ်းၶိုၼ်ႈယူႇသေႇသေႇဢေႃႈ။ မိူင်းၼၼ်ႉတၵ်းသဵတ်ႇတၵ်းယဵၼ်ၵႂႃႇၵူႈၸူဝ်ႈၵူႈပၢၼ်သိုပ်ႇသိုပ်ႇတၢမ်တၢမ်လႄႈၽူႈလႂ်သေၵေႃႉသေၵူၼ်းတၵ်းဢမ်ႇပႆလတ်းၵႂႃႇတႆႇၵႂႃႇၵႃႈၼႂ်းမၼ်းသေပွၵ်ႈသေပၢၼ်ဢေႃႈ။-
ၼူၵ်ႉဝူၼ်ႇပူဝ်ႇ၊မဵၼ်ႈ၊တီးတုတ်ႈ၊ၵႃလမ်လူင်၊တင်းလၢႆတၵ်းတဵမ်မိူင်းဝႆႉလႄႈ၊ ထႃႇဝရႃႉၽြႃး၊ တၵ်းႁႂ်ႈမၼ်းသဵတ်ႇငႅဝ်ၵႂႃႇထႅင်ႈမိူၼ်ၸိူဝ်ႉၼင်ႇဢၼ်သဵတ်ႇငႅဝ်မိူဝ်ႈဢွၼ်တၢင်းၽၢၼ်ႇသၢင်းႁဵတ်းပဵၼ်ၼၼ်ႉဢေႃႈ။-
မိူဝ်ႈၼၼ်ႉတၵ်းဢမ်ႇမီးၶုၼ်ႁေႃၶမ်းဢၼ်ဢုပ်ႉပိူင်ႇမၼ်း၊မူးမၢတ်ႈၽွင်းမိူင်းမၼ်းတင်းလၢႆၵေႃႈ တၵ်းဢမ်ႇမီးသေၵေႃႉသေၵူၼ်း။-
တူၼ်ႈၼၢမ်တင်းလၢႆတၵ်းဢွၵ်ႇမႃးၵႃႈတီႈႁေႃတီႈဝၢင်းမၼ်းလႄႈတူၼ်ႈၶိူဝ်းတင်းလၢႆတၵ်းၶိုၼ်ႈလမ်းဝဵင်းမၼ်းသေယဝ်ႉ၊တၵ်းပဵၼ်တီႈယူႇတီးတုတ်ႈတင်းမႃၼႆးတင်းလၢႆဢေႃႈ။-
တူဝ်ထိူၼ်ႇႁၢႆႉတင်းလၢႆတၵ်းလႄႇၵႂႃႇလႄႇမႃးၵႃႈတီႈၼၼ်ႈယူႇ၊မႃလိၼ်တင်းလၢႆတၵ်းႁဝ်ႇႁွၼ်ယူႇ၊တူဝ်ဢၼ်ၶူၼ်ပူင်းၶူၼ်ယၢဝ်းတင်းလၢႆတၵ်းမႃးလႄႈသွၵ်ႈႁႃတီႈယူႇတီႈသဝ်းၶဝ်ယူႇဢေႃႈ။-
တီးတုတ်ႈတင်းလၢႆတၵ်းႁဵတ်းႁင်းၶဝ်လႄႈဢွၵ်ႇၶႆႇသေယဝ်ႉ၊ငွမ်းႁႂ်ႈလုၵ်ႈမၼ်းတႅၵ်ႇဢွၵ်ႇမႃးလႄႈလုမ်းလႃးၵႃႈတီႈၼၼ်ႈဢေႃႈ။ လၢင်းတႃႉတင်းလၢႆတၵ်းဢွၼ်ၵၼ်မႃးၸုၵၼ်တုမ်ၵၼ်ၵႃႈတီႈၼၼ်ႈတူဝ်ၼိုင်ႈယဝ်ႉတူဝ်ၼိုင်ႈဢေႃႈ။
သူဢွၼ်ၵၼ်သွၵ်ႈႁႃၵႃႈၼႂ်းၵျၢမ်းလိၵ်ႈ ထႃႇဝရႃႉၽြႃး၊ ဢၼ်တႅမ်ႈလွင်ႈဝူၺ်ႇၼေႇယႃႉသတ်ႉတဝႃႇတင်းလၢႆၼၼ်ႉလႄႈၽတ်းဢၢၼ်ႇတႃႉ။ တူဝ်ၸိူဝ်းၼၼ်ႉတၵ်းဢမ်ႇလႆႈယွမ်းလႆႈႁၢႆၵႂႃႇသေတူဝ်လႄႈ၊တူဝ်ဢၼ်ဢမ်ႇမီးၵူပ်ႉမီးၵူႈၼၼ်ႉဢမ်ႇလႆႈမီးသေတူဝ်။ ထႃႇဝရႃႉၽြႃး၊ မီးဢမိင်ႉဝႆႉႁႂ်ႈလႆႈပဵၼ်ၸိူဝ်ႉၼင်ႇၼႆယဝ်ႉ။ တူဝ်မၼ်းၸဝ်ႈႁႂ်ႈၶဝ်ၸုၵၼ်တုမ်ၵၼ်ဢေႃႈ။-
ထႃႇဝရႃႉၽြႃး၊ တၵ်းၸၵ်ႉၽႄလိၼ်မိူင်းပုၼ်ႈၶဝ်လႄႈမႅင်ႇပၼ်တီႈၶဝ်မဵဝ်းလႂ်မဵဝ်းၼၼ်ႉႁႂ်ႈပဵၼ်ဢမူၺ်ႇၶဝ်ဢေႃႈ။ ၶဝ်တၵ်းဢွၼ်ၵၼ်ယူႇၵႃႈၼႂ်းမိူင်းၶဝ်တႃႇသေႇဢမ်ႇထၢတ်ႇလႄႈတၵ်းပဵၼ်တီႈလိၼ်ဢၼ်ၶဝ်ပိူင်ႇၵူႈၸူဝ်ႈၵူႈပၢၼ်သိုပ်ႇသိုပ်ႇတၢမ်တၢမ်ဢေႃႈ။
ထိူၼ်ႇတီႈဢၼ်သဵတ်ႇၵူၼ်းငႅဝ်ၵူၼ်းၼၼ်ႉတၵ်းမီးတၢင်းဢၼ်ၸူမ်းသိူဝ်းလႄႈ၊ မွၵ်ႇယႃႈတင်းလၢႆတၵ်းမွၵ်ႇမႃးၵႃႈၼႂ်းထိူၼ်ႇၼႂ်းၶိူဝ်းဢၼ်ႁႅင်ႈႁွင်ဢေႃႈ။
ထိူၼ်ႇလႅင်ႉၼၼ်ႉတၵ်းႁဵတ်းၵႂၢမ်းလႄႈပၢဝ်ႇသႅၼ်ႇၵွပ်ႈပိူဝ်ႈဢၼ်မူၼ်ႈပျေႃႇၼၼ်ႉဢေႃႈ။ တၵ်းမီးတၢင်းဢၼ်ႁၢင်ႈလီႁၢင်ႈငၢမ်းမိူၼ်လွႆ လေႇပၼုၼ်ႇ၊ တင်းလၢႆလႄႈ မီးၽုၼ်ႇၼမ်ႉမၼ်းလိၼ်လီၵႃႈတီႈပၢင်ႇပဵင်း ၵရမေႇလႃႉ၊ ဢိၵ်ႇတင်းၵႃႈတီႈ သႃႇရုၼ်ႇ၊ ဢေႃႈ။ ၵူၼ်းတင်းလၢႆတၵ်းႁၼ်မုၼ်ၽုင်း ထႃႇဝရႃႉၽြႃး၊ ဢိၵ်ႇတင်းသရေႇဢၼ်ႁၢင်ႈလီႁၢင်ႈငၢမ်းၽြႃးပဵၼ်ၸဝ်ႈႁဝ်းဢေႃႈ။
သူဢွၼ်ၵၼ်ပၼ်ဢဵၼ်ပၼ်ႁႅင်းတီႈမိုဝ်းၸိူဝ်းဢၼ်ႁႅင်းဢူၼ်ႈဢိၵ်ႇတင်း တီႈႁူဝ်ၶဝ်ႇၸိူဝ်းဢၼ်သၼ်ႇၶွၼ်းၵွပ်ႈပိူဝ်ႈဢမ်ႇမီးႁႅင်းၼၼ်ႉတႃႉ။
ဢွၼ်ၵၼ်လၢတ်ႈတီႈၶဝ်ၸိူဝ်းဢၼ်ႁူဝ်ၸႂ်ၸၢင်ႈၵူဝ်ၸၢင်ႈႁႄၼၼ်ႉလႄႈဝႃႈ၊ “ဢဝ်ႁႅင်းတႃႉ။ ယႃႇပေမီးတၢင်းဢၼ်ၵူဝ်ဢၼ်ႁႄ။ ၽြႃးပဵၼ်ၸဝ်ႈမႃးႁႂ်ႈလႆႈၵႄႇၼုၵ်ႈဢဝ်သူလႄႈ မႃးႁႂ်ႈလႆႈပၼ်တၢမ်ႇတီႈရၢၼ်ႇသူႇသူဢေႃႈ၊” ဝႃႈၼင်ႇၼႆတႃႉ။
မိူဝ်ႈၼၼ်ႉမၢၵ်ႇတႃၵူၼ်းတႃမွတ်ႇတင်းလၢႆ၊တၵ်းမီးတၢင်းဢၼ်ပိုတ်ႇလႅင်းလႄႈ၊ ႁူၵူၼ်းဢၼ်ႁူၼူၵ်ႇတင်းလၢႆ၊တၵ်းမီးတၢင်းဢၼ်ၽုၺ်ႇပိုတ်ႇငိၼ်းလီဢေႃႈ။
ၵူၼ်းတိၼ်ၵႅင်ႉတင်းလၢႆ၊တၵ်းဢွၼ်ၵၼ်ၵျွၵ်းဝႅၼ်လႄႈၵႃႈဢေႃႈ။ ၵူၼ်းဢႃႉတင်းလၢႆတၵ်းပၢဝ်ႇသႅၼ်ႇလူၺ်ႈတၢင်းဢၼ်ၸူမ်းသိူဝ်းဢေႃႈ။ ၼမ်ႉႁွင်ႈၼမ်ႉၵႄးတင်းလၢႆ၊တၵ်းလႆၽႃႇလတ်းထိူၼ်ႇလႅင်ႉၵႂႃႇဢေႃႈ။
ႁၢတ်ႇသၢႆးဢၼ်သၢႆဢရွင်ႇလႅတ်ႇမၢပ်ႈယူႇၼၼ်ႉ တၵ်းပဵၼ်ၼွင်လႄႈလိၼ်ႁႅင်ႈတၵ်းပျေႉၸုမ်ႇဝႆႉတင်းၼမ်ႉဢွၵ်ႇႁူးတင်းလၢႆဢေႃႈ။ တီႈဢၼ်မႃၼႆးယၢမ်ႈယူႇသဝ်းၼၼ်ႉယႃႈသႆး၊ဢိၵ်ႇတင်းမႆႉဢေႃႈတၵ်းဢွၵ်ႇမႃးဢေႃႈ။
ၵႃႈတီႈၼၼ်ႈတၵ်းမီးသဵၼ်ႈတၢင်းလူင် ဢၼ်ႁွင်ႉႁဵၵ်ႈၸိုဝ်ႈဝႃႈ၊ “သဵၼ်ႈတၢင်းဢၼ်မူတ်းၸၢင်ႇ” ဢေႃႈ။ ၵေႃႉဢၼ်မီးဢပျတ်ႈဢမ်ႇလႆႈၵႂႃႇလႆႈပႆၸွမ်းတၢင်းၼၼ်ႉ၊ ပိၵ်ႉသမ်ႉပဵၼ်ၵူၼ်းငိူဝ်ႈငႃႉသေၵေႃႈဢမ်ႇလႆႈၽိတ်းတၢင်းပိူင်ႈတၢင်းၵႂႃႇ။
ၵႃႈတီႈၼၼ်ႈဢမ်ႇလႆႈမီးသၢင်ႇသီႈ သေတူဝ်သေလႂ်၊ဢမ်ႇလႆႈမီးတူဝ်ႁၢႆႉတူဝ်ၵျၢမ်းဢၼ်ၶၢမ်ႈၵႂႃႇၶၢမ်ႈမႃး၊ ၶဝ်ၸိူဝ်းဢၼ် ထႃႇဝရႃႉၽြႃး၊ ၵႄႇၼုၵ်ႈ ဢဝ်ယဝ်ႉၼၼ်ႉ၊တၵ်းၵႂႃႇၸွမ်းသဵၼ်ႈတၢင်းၼၼ်ႉလႄႈပွၵ်ႈၶိုၼ်းႁိူၼ်းဢေႃႈ။
ၶဝ်ၸိူဝ်းၼၼ်ႉတၵ်းႁွတ်ႈထိုင်ဝဵင်း ယေႇရုသလႅမ်ႇ၊ ၵႂႃႇၸူမ်းၸူမ်းသိူဝ်းသိူဝ်းလႄႈ ဢွၼ်ၵၼ်ႁဵတ်းၵႂၢမ်းလႄႈႁွင်ႉသႅၼ်ႇလူၺ်ႈၸႂ်ဢၼ်သႂၢင်ႇသိူဝ်းဢေႃႈ။ ၶဝ်တၵ်းမီးတၢင်းဢၼ်မူၼ်ႈပျေႃႇထႃႇဝရႃႉလႄႈတၵ်းၵၢင်းလွတ်ႈတၢင်းဢၼ်မႆႈၸႂ်ၶီၸႂ်၊ ဢိၵ်ႇတင်းတၢင်းဢၼ်ၶၢင်းၶီၶၢင်းၽၢၼ်တႃႇသေႇဢမ်ႇထၢတ်ႇဢေႃႈ။
ၼႂ်းပီဢၼ်ၶုၼ်ႁေႃၶမ်း ႁေႇၸၵိ၊ ၸၢမ်ႇႁၢင်ႈၸၢမ်ႇႁေႃၵႃႈၼႂ်းမိူင်း ယုတႃႉ၊ သိပ်းသီႇပီၼၼ်ႉ၊ၶုၼ်ႁေႃၶမ်း သၼႃႇၶရိပ်ႉ၊ ၸဝ်ႈမုၼ်ယႂ်ႇၶုၼ်ႁေႃၶမ်းမိူင်း ဢႃႇသီးရီးယႃး၊ မႃးတိုၵ်းတေႃးသိမ်းဢဝ်ဝဵင်းဢၼ်မၼ်ႈၶိူင်ႇတင်းလၢႆၵႃႈၼႂ်းမိူင်း ယုတႃႉ၊ ဢေႃႈ။-
မိူဝ်ႈၼၼ်ႉၶုၼ်ႁေႃၶမ်းမိူင်း ဢႃႇသီးရီးယႃး၊ ၼၼ်ႉပွႆႇၸႂ်ႉၶုၼ်လူင်ဢၼ်ပွင်ၵၢၼ်ၼႂ်းႁေႃမၼ်းလူၺ်ႈၵၼ်တင်းတပ်ႉသိုၵ်းဢၼ်ယႂ်ႇၼႃႇသေၵႃႈတီႈဝဵင်း လႃႇၶိသႃႉ၊ မႃးၸူးတီႈၶုၼ်ႁေႃၶမ်း ႁေႇၸၵိ၊ ႁႂ်ႈမၼ်းဝၢင်းမိုဝ်းၶၢမ်ႇသုမ်းသိုၵ်းဢေႃႈ။ ၶုၼ်လူင်ဢၼ်ပွင်ၵၢၼ်ၼၼ်ႉလႆႈသိမ်းဢဝ်သဵၼ်ႈတၢင်းဢၼ်ၵႂႃႇၸူးတီႈတႃႈၼမ်ႉၵူၼ်းသၵ်ႉၶူဝ်းဢၼ်ၼမ်ႉလႆမႃးသေၵႃႈတီႈၼမ်ႉၼွင်ဢၼ်မီးၵႃႈၼိူဝ်ၼၼ်ႉဢေႃႈ။-
မိူဝ်ႈၼၼ်ႉ၊ ဢေးလျႃႇၵိမ်း၊ လုၵ်ႈၸၢႆး ႁိလၶိ၊ ၽူႈၵွၼ်းႁေႃၶမ်းၸဝ်ႈ၊ဢိၵ်ႇတင်းၸရေးလူင် သေႇပၼႃႉ၊ ဢိၵ်ႇတင်းဢတႂၢင်းဝုၼ်ႇ ယေႃႇဢႃႇ၊ လုၵ်ႈၸၢႆး ဢႃႇသပ်ႉ၊ ၶဝ်သၢမ်ၵေႃႉၼၼ်ႉဢွၵ်ႇၵႂႃႇႁူပ်ႉထူပ်းၵၼ်တင်းမၼ်းဢေႃႈ။-
ဝုၼ်ႇ ရႃႇပသႃႇၶႃႉ၊ ၵူၼ်းမဵဝ်း ဢႃႇသီးရီးယႃး၊ ၼၼ်ႉလၢတ်ႈတီႈၶဝ်လႄႈဝႃႈ၊ “သူၶိုၼ်းမွၵ်ႇလၢတ်ႈတီႈ ႁေႇၸၵိ၊ လႄႈဝႃႈ၊ ‘ၸဝ်ႈမုၼ်ယႂ်ႇၶုၼ်ႁေႃၶမ်း ဢႃႇသီးရီးယႃး၊ မီးဢမိင်ႉလႄႈဝႃႈၸမ်ႉ၊တီႈဢိင်တီႈပိုင်ႈမႂ်းၸမ်ႉ၊ပဵၼ်ဢၼ်လႂ်။-
မႂ်းဝႃႈ၊ “ၵဝ်ၼႆႉမီးၺၢၼ်ႇဢၼ်ၵတ်ႉဢၼ်ၶၼ်တင်းႁႅင်းသိုၵ်းဢၼ်ယႂ်ႇၼႃႇဢေႃႈ၊” ဝႃႈၼႆယဝ်ႉ။ ၵူၺ်းၵႃႈ၊ၵႂၢမ်းၼၼ်ႉပဵၼ်ၵႂၢမ်းပဝ်ႇၵႂၢမ်းလၢႆၵူၺ်းဢေႃႈ။ မႂ်းဢိင်ပိုင်ႈၽူႈလႂ်လႄႈႁတ်းလုၵ်ႉၽိုၼ်ႉၵဝ်။-
တူၺ်းလူး။ မႂ်းဢိင်ပိုင်ႈမိူင်း ဢေးၵျိပ်ႉ၊ ဢၼ်မိူၼ်ၸိူဝ်ႉၼင်ႇဢဝ်မႆႉဢေႃႈႁဵတ်းၶွၼ်ႉတဝ်ႉၼၼ်ႉလူင်ပႄႇ။ မႆႉဢေႃႈၼၼ်ႉၸၢင်ႈတမ်တႅင်းႁႂ်ႈမိုဝ်းၵေႃႉဢၼ်ဢိင်ပိုင်ႈၼၼ်ႉပွင်ႇပိဝ်ၵႂႃႇဢေႃႈ။ ၶုၼ်ႁေႃၶမ်းမိူင်း ဢေးၵျိပ်ႉ၊ ၼၼ်ႉၸၢင်ႈႁဵတ်းၸိူဝ်ႉၼင်ႇၼၼ်တီႈၵေႃႉဢၼ်ဢိင်ပိုင်ႈမၼ်းၼၼ်ႉဢေႃႈ။
“‘ပေႃးမႂ်းသမ်ႉလၢတ်ႈတီႈၵဝ်လႄႈဝႃႈ၊ “ႁဝ်းဢိင်ပိုင်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းဢေႃႈ၊” ဝႃႈၼႆၸိုင်၊မၼ်းၸဝ်ႈၼၼ်ႉပဵၼ်ၽြႃးဢၼ် ႁေႇၸၵိ၊ ပႄႇၽဵဝ်ႈထႃႇၼႃႉတီႈသုင်မၼ်းၸဝ်ႈ၊ဢိၵ်ႇတင်းၶဵင်ႇတၢင်းလူႇမၼ်းၸဝ်ႈတင်းလၢႆပႅတ်ႈၼႂ်းမိူဝ်ႈဢၼ်မၼ်းၸဝ်ႈသင်ႇလၢတ်ႈတီႈၵူၼ်းမဵဝ်း ယုတႃႉ၊ တင်းၵူၼ်းဝဵင်း ယေႇရုသလႅမ်ႇ၊ လႄႈဝႃႈ၊ “သူတၵ်းလႆႈဝႆႈသႃၵႃႈတီႈၽၢႆႇၼႃႈၶဵင်ႇတၢင်းလူႇၼႆႉၵူၺ်းဢေႃႈ၊” ဝႃႈၼင်ႇၼႆၼၼ်ႉဢမ်ႇၸႂ်ႈႁိုဝ်း။-
တေႃႈလဵဝ်ၼႆႉမႂ်းမႃးလႄႈသဵတ်ႈၵႃႈသဵတ်ႈၶၼ်မၼ်းတေႃႇၵၼ်တင်းၸဝ်ႈၵဝ်ၶုၼ်ႁေႃၶမ်း ဢႃႇသီးရီးယႃး၊ လႄႈဝႃႈ၊ပေႃးမႂ်းမီးၵူၼ်းသိုၵ်းဢၼ်ၶီႇမႃႉႁႂ်ႈပေႃးၵုမ်ႇလႆႈၸိုင်၊ၵဝ်တၵ်းပၼ်မႃႉသွင်ႁဵင်တီႈမႂ်းဢေႃႈ။-
မႂ်းယင်းဢမ်ႇၶေႉၶဵင်ႇၶုၼ်သိုၵ်းၵူၼ်းမဵဝ်း ဢႃႇသီးရီးယႃး၊ ဢၼ်တႅမ်ႇယေႃႈသေပိူၼ်ႈၼၼ်ႉလႆႈလႄႈမႂ်းသမ်ႉၵႂႃႇမုင်ႈမွင်းမဵဝ်း ဢေးၵျိပ်ႉ၊ ၶဝ်တၵ်းပွႆႇၸႂ်ႉတပ်ႉလေႃႉမႃႉသိုၵ်းလႂ်၊တပ်ႉမႃႉလႂ်မႃးၸွႆႈထႅမ်မႂ်းၼၼ်ႉလူင်ပႄႇ။-
လိူဝ်သေၼၼ်ႉဢမ်ႇၵႃး၊တၢင်းဢၼ်ၵဝ်မႃးတိုၵ်းတေႃးမိူင်းမႂ်းလႄႈယႃႉၽဵဝ်ႈပႅတ်ႈၼၼ်ႉမႂ်းထၢင်ႇဝႃႈ၊ ထႃႇဝရႃႉၽြႃး၊ ဢမ်ႇၸွႆႈထႅမ်ၵဝ်လႆႈႁိုဝ်း။ တူဝ် ထႃႇဝရႃႉၽြႃး၊ ၸႂ်ႉႁႂ်ႈၵဝ်ၶီႇၶိုၼ်ႈတိုၵ်းတေႃးမိူင်းၼႆႉလႄႈႁႂ်ႈယႃႉၽဵဝ်ႈပႅတ်ႈဢေႃႈ၊’ ဝႃႈၼႆယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ဢေးလျႃႇၵိမ်း၊သေႇပၼႃႉ၊ယေႃႇဢႃႇ၊ ၸိူဝ်းၼၼ်ႉလၢတ်ႈတီႈၶုၼ်လူင်ဢၼ်ပွင်ၵၢၼ်ၼၼ်ႉလႄႈဝႃႈ၊ “လၢတ်ႈၵႂၢမ်းၽႃႇသႃႇ ဢႃႇရမိၵ်ႉ၊ တီႈႁဝ်းသေၵမ်း။ ႁဝ်းႁုၵႂၢမ်းၼၼ်ႉယူႇၶႃႈဢေႃႈ။ ယႃႇပေလၢတ်ႈၵႂၢမ်းၽႃႇသႃႇ ႁေႇပြႄး၊ သေၵမ်း။ ၵူၼ်းတင်းသဵင်ႈတင်းလူင်ၼင်ႈယူႇၵႃႈၼိူဝ်လမ်းဝဵင်းလႄႈထွမ်ႇဢဝ်ယူႇၶႃႈဢေႃႈ၊” ဝႃႈၼင်ႇၼႆဢေႃႈ။
မၼ်းၼၼ်ႉၶိုၼ်းလၢတ်ႈလႄႈဝႃႈ၊ “သူထၢင်ႇၸဝ်ႈမုၼ်ယႂ်ႇၶုၼ်ႁေႃၶမ်းပွႆႇၸႂ်ႉၵဝ်မႃးႁႂ်ႈလႆႈလၢတ်ႈတေႃႇၶုၼ်ႁေႃၶမ်းတင်းသူၼႆႉၵူၺ်းႁိုဝ်း။ ဢမ်ႇၸႂ်ႈၵူၺ်း။ ၵဝ်တၵ်းလႆႈလၢတ်ႈတေႃႇၵူၼ်းၸိူဝ်းဢၼ်မီးယူႇၵႃႈၼိူဝ်လမ်းဝဵင်းဢၼ်တၵ်းတေလႆႈၵိၼ်ၽၢႆႈလူင်ၶဝ်လႄႈၵိၼ်ၽၢႆႈဢွၼ်ႇၶဝ်လူၺ်ႈၵၼ်တင်းသူၸိူဝ်းၼႆႉၼၼ်ႉဢေႃႈ၊” ဝႃႈၼင်ႇၼႆသေယဝ်ႉ။
မၼ်းလုၵ်ႉၸုၵ်းလႄႈဢဝ်တင်းၵႂၢမ်း ႁေႇပြႄး၊ လၢတ်ႈတင်းသဵင်ဢၼ်ယႂ်ႇၼႃႇလႄႈဝႃႈ၊ “ဢွၼ်ၵၼ်ထွမ်ႇဢဝ်ဢမိင်ႉၸဝ်ႈမုၼ်ယႂ်ႇၶုၼ်ႁေႃၶမ်းမိူင်း ဢႃႇသီးရီးယႃး၊ တႃႉ။-
မၼ်းၸဝ်ႈသင်ႇလၢတ်ႈတီႈသူလႄႈဝႃႈၸမ်ႉ၊ယႃႇပေႁႂ်ႈ ႁေႇၸၵိ၊ လႆႈပႅတ်ႉလႅၼ်သူ။ ႁေႇၸၵိ၊ ဢမ်ႇၵႄႇသႄႇဢဝ်သူလႆႈၵူၺ်း။-
ယႃႇပေႁႂ်ႈ ႁေႇၸၵိ၊ ၸူဝ်းဢဝ်သူၵႂႃႇဢိင်ပိုင်ႈ ထႃႇဝရႃႉၽြႃး၊ ယႃႇပေထၢင်ႇ ထႃႇဝရႃႉၽြႃး၊ တၵ်းၵႄႇသႄႇဢဝ်သူ။ ယႃႇပေထၢင်ႇမၼ်းၸဝ်ႈတၵ်းႁႄႉၵင်ႈတပ်ႉသိုၵ်းၵူၼ်းမဵဝ်း ဢႃႇသီးရီးယႃး၊ ႁဝ်းၼႆႉႁႂ်ႈႁဝ်းဢမ်ႇလႆႈသိမ်းဢဝ်ဝဵင်းသူလႆႈၼၼ်ႉ။-
ယႃႇပေထွမ်ႇၵႂၢမ်း ႁေႇၸၵိ၊ ၼၼ်ႉ။ ၸဝ်ႈမုၼ်ယႂ်ႇၶုၼ်ႁေႃၶမ်းမိူင်း ဢႃႇသီးရီးယႃး၊ ဢၼ်ပူင်ဢမိင်ႉႁႂ်ႈသူဢွၵ်ႇဝဵင်းမႃးလႄႈၶၢမ်ႇသုမ်းၼၼ်ႉသူတၵ်းမီးဢၶႂၢင်ႉဢၼ်တၵ်းလႆႈၵိၼ်မၢၵ်ႇၸပိတ်ႉတီႈတူၼ်ႈၶိူဝ်းမၢၵ်ႇၸပိတ်ႉသူ၊ဢိၵ်ႇတင်းတၵ်းလႆႈၵိၼ်မၢၵ်ႇလိူဝ်ႇတီႈတူၼ်ႈမၢၵ်ႇလိူဝ်ႇသူလႄႈတၵ်းလႆႈတဵၵ်းၵိၼ်ၼမ်ႉတီႈၼမ်ႉမေႃႇသူႁင်းၽႂ်ႁင်းမၼ်း၊-
တေႃႇထိုင်ႁွတ်ႈၶုၼ်ႁေႃၶမ်းဢဝ်သူၵႂႃႇတူၵ်းတီႈတူၵ်းတၢင်းၼႂ်းမိူင်းဢၼ်မိူၼ်ၵၼ်တင်းမိူင်းသူဢၼ်ဝႃႈ၊မိူင်းဢၼ်မီးတူၼ်ႈမၢၵ်ႇၸပိတ်ႉပုၼ်ႈဢၼ်သူတၵ်းဢိတ်ႇဢဝ်ၼမ်ႉမၢၵ်ႇၸပိတ်ႉဢိၵ်ႇတင်းမိူင်းဢၼ်မီးၶဝ်ႈပိူၵ်ႇၶဝ်ႈသၢၼ်ပုၼ်ႈသူတၵ်းႁဵတ်းၵိၼ်ၶဝ်ႈမုၼ်းၼၼ်ႉဢေႃႈ။-
ယႃႇပေႁႂ်ႈ ႁေႇၸၵိ၊ တိုၵ်းယူင်းၸူဝ်းဢဝ်သူႁႂ်ႈသူယုမ်ႇဝႃႈ၊ ထႃႇဝရႃႉၽြႃး၊ တၵ်းၵႄႇသႄႇၼုၵ်ႈဢဝ်သူၼၼ်ႉသေၵမ်း။ ၸွင်ႇမီးၽြႃးတၢင်ႇဝၢၼ်ႈတၢင်ႇမိူင်းယၢမ်ႈၵႄႇသႄႇၼုၵ်ႈဢဝ်မိူင်းတူဝ်ၸဝ်ႈၵဝ်ႇဢွၵ်ႇသေၵႃႈၼႂ်းမိုဝ်းၶုၼ်ႁေႃၶမ်း ဢႃႇသီးရီးယႃး၊ ယဝ်ႉႁိုဝ်း။-
ၽြႃးမိူင်း ႁႃႇမတ်ႉ၊ ဢိၵ်ႇတင်းၽြႃးမိူင်း ဢႃႇပတ်ႉ၊ ၸိူဝ်းၼၼ်ႉမီးၵႃႈလႂ်။ ၽြႃးမိူင်း သေႇၽရႃႉဝိမ်း၊ ၸိူဝ်းၼၼ်ႉမီးၵႃႈလႂ်။ ၽြႃးၸိူဝ်းၼၼ်ႉသေပႃးပႃးၵႄႇသႄႇၼုၵ်ႈဢဝ်မိူင်း သမႃႇရိ၊ လွတ်ႈသေၵႃႈၼႂ်းမိုဝ်းၵဝ်ယဝ်ႉႁိုဝ်း။-
ၼႂ်းၽြႃးၵူႈသိုင်ႇၵူႈမိူင်းၸိူဝ်းၼၼ်ႉၽြႃးသူႇလႂ်ပႃးလႂ်ယၢမ်ႈတွၼ်ႉၵႄႇသႄႇဢဝ်မိူင်းတူဝ်ၸဝ်ႈၵဝ်ႇဢွၵ်ႇသေၵႃႈၼႂ်းမိုဝ်းၸဝ်ႈမုၼ်ယႂ်ႇၶုၼ်ႁေႃၶမ်းႁဝ်းယဝ်ႉ။ ႁဵတ်းၸိူဝ်ႉၼင်ႇႁိုဝ်လႄႈသူထၢင်ႇ ထႃႇဝရႃႉၽြႃး၊ တၵ်းၵႄႇသႄႇၼုၵ်ႈဢဝ်ဝဵင်း ယေႇရုသလႅမ်ႇ၊ လႆႈၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ၵူၼ်းၸိူဝ်းၼၼ်ႉဢမ်ႇတၵ်းသဵင်လႄႈယူႇၸွမ်းၼင်ႇဢၼ်ၶုၼ်ႁေႃၶမ်း ႁေႇၸၵိ၊ သင်ႇလၢတ်ႈၶဝ်ဝႆႉဝႃႈ၊ “သူယႃႇပေလၢတ်ႈၵႃႈသင်၊” ဝႃႈၼင်ႇၼႆၼၼ်ႉဢေႃႈ။-
မိူဝ်ႈၼၼ်ႉ၊ ဢေးလျႃႇၵိမ်း၊ လုၵ်ႈၸၢႆး ႁိလၶိ၊ ၵေႃႉဢၼ်ၵွၼ်းႁေႃၶမ်းၸဝ်ႈဢိၵ်ႇတင်းၸရေးလူင် သေႇပၼႃႉ၊ ၵေႃႉပဵၼ်ဢတႂၢင်းဝုၼ်ႇ ယေႃႇဢႃႇ၊ လုၵ်ႈၸၢႆး ဢႃႇသပ်ႉ၊ ၸိူဝ်းၼၼ်ႉၸၵ်ႉသိၵ်ႇၶူဝ်းၼုင်ႈတူဝ်ၸဝ်ႈၵဝ်ႇသေလႄႈၶဝ်ႈၸူးတီႈ ႁေႇၸၵိ၊ လႄႈဢဝ်ၵႂၢမ်းၶုၼ်လူင်ဢၼ်ပွင်ၵၼ်ၼၼ်ႉလဝ်ႈလၢတ်ႈဢေႃႈ။
မိူဝ်ႈဢၼ်ၶုၼ်ႁေႃၶမ်း ႁေႇၸၵိ၊ လႆႈငိၼ်းၵႂၢမ်းၼၼ်ႉၸိုင်၊မီးတၢင်းဢၼ်မႆႈၸႂ်ၼႃႇဢေႃႈ။ မၼ်းၸၵ်ႉသိၵ်ႇၶူဝ်းၼုင်ႈမၼ်းလႄႈၼုင်ႈမႆၶူဝ်းၼုင်ႈၼင်ပေႃသေယဝ်ႉ၊ၶဝ်ႈၵႂႃႇၵႃႈၼႂ်းၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ဢေႃႈ။-
မၼ်းပွႆႇၸႂ်ႉ ဢေးလျႃႇၵိမ်း၊ ဝုၼ်ႇလူင်ဢၼ်ဢုပ်ႉထိင်းၵႃႈၼႂ်းဝၢင်းႁေႃၶမ်း၊ဢိၵ်ႇတင်းၸရေးလူင် သေႇပၼႃႉ၊ ဢိၵ်ႇတင်းယဵၸ်ႈပရေႃးႁဵၵ်ႈ ဢၼ်ဢသၢၵ်ႈယႂ်ႇတင်းလၢႆၵႂႃႇၸူးတီႈပရေႃးၽႅတ်ႈ ဢိသႃႇယႃႉ၊ လုၵ်ႈၸၢႆး ဢႃႇမူတ်ႉ၊ ၼၼ်ႉဢေႃႈ။ ၶဝ်ၸိူဝ်းၼၼ်ႉၵေႃႈၼုင်ႈမႆၶူဝ်းၼုင်ႈၼင်ပေႃၼင်ႇၵဝ်ႇဢေႃႈ။-
ၶေႃႈၵႂၢမ်းဢၼ်မၼ်းသင်ႇလၢတ်ႈၵႂႃႇတီႈ ဢိသႃႇယႃႉ၊ ၼၼ်ႉၸမ်ႉ၊ “ဝၼ်းမိူဝ်ႈၼႆႉပဵၼ်ဝၼ်းတုၵ်ႉၶႃႉ၊ဝၼ်းဢၼ်လႆႈၶၢမ်ႇတၢမ်ႇ၊ဝၼ်းဢၼ်မႆႈၸႂ်ၶီၸႂ်ဢေႃႈ။ ႁဝ်းလႆႈပဵၼ်မိူၼ်ၸိူဝ်ႉၼင်ႇမႄႈယိင်းဢၼ်ၸမ်တၵ်းၵိူတ်ႇလဵင်ႉလုၵ်ႈလႄႈသမ်ႉဢမ်ႇမီးႁႅင်းဢၼ်ႁႂ်ႈၵိူတ်ႇလဵင်ႉလုၵ်ႈလႆႈဢေႃႈ။-
ၶုၼ်ႁေႃၶမ်းၵူၼ်းမဵဝ်း ဢႃႇသီးရီးယႃး၊ ပွႆႇၸႂ်ႉၶုၼ်ဢၼ်ပွင်ၵၢၼ်ၸဝ်ႈမႃးသႄႉသွမ်းၽြႃးပဵၼ်ၸဝ်ႈဢၼ်ဢသၢၵ်ႈလိပ်းၼၼ်ႉတီႈၶႃႈယဝ်ႉ။ ႁႂ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈမႂ်းၼၼ်ႉငိၼ်းၵႂၢမ်းဢၼ်သႄႉသွမ်းၼၼ်ႉသေလႄႈပၼ်တၢမ်ႇတီႈၵေႃႉဢၼ်လၢတ်ႈၼၼ်ႉသေၵမ်းလူၺ်ႈ။ ပိူဝ်ႈၼႆလႄႈမႂ်းသူးတွင်းတီႈၽြႃးပဵၼ်ၸဝ်ႈပုၼ်ႈၵူၼ်းႁဝ်းၸိူဝ်းဢၼ်ယင်းဢသၢၵ်ႈလိပ်းလႄႈၵိုတ်းၵျၢၼ်ႇယူႇၼႆႉသေၵမ်း၊” ဝႃႈၼင်ႇၼႆဢေႃႈ။
မိူဝ်ႈဢၼ် ဢိသႃႇယႃႉ၊ ငိၼ်းၵႂၢမ်းၶုၼ်ႁေႃၶမ်း ႁေႇၸၵိ၊ ယဝ်ႉၼၼ်ႉၸိုင်၊-
မၼ်းၶိုၼ်းသင်ႇလၢတ်ႈၵႂႃႇလႄႈဝႃႈ၊ “ထႃႇဝရႃႉၽြႃး၊ သင်ႇလၢတ်ႈတီႈမႂ်းလႄႈဝႃႈၸမ်ႉ၊ ‘ယႃႇပေၵူဝ်ပေႁႄၵွပ်ႈပိူဝ်ႈၵူၼ်းမဵဝ်း ဢႃႇသီးရီးယႃး၊ ၶဝ်သႄႉသွမ်းၵဝ်ၼၼ်ႉ။-
ၵဝ်တၵ်းႁဵတ်းႁႂ်ႈၶုၼ်ႁေႃၶမ်းၼၼ်ႉလႆႈငိၼ်းၶၢဝ်ႇငၢဝ်းဢၼ်တၵ်းယူင်းႁူဝ်ၸႂ်မၼ်းၶိုၼ်းပွၵ်ႈမိူဝ်းၵႂႃႇၵႃႈတီႈမိူင်းတူဝ်ၸဝ်ႈၵဝ်ႇသေယဝ်ႉ၊ၵႃႈတီႈၼၼ်ႈၸိုင်၊ၵဝ်တၵ်းႁဵတ်းႁႂ်ႈမၼ်းလႆႈတၢႆဢေႃႈ၊’ ဝႃႈၼႆယဝ်ႉ၊” ဝႃႈၼင်ႇၼႆဢေႃႈ။
ဝုၼ်ႇလူင် ရႃႇပသႃႇၶႃႉ၊ ၼၼ်ႉငိၼ်းလွင်ႈဢၼ်ၶုၼ်ႁေႃၶမ်းမိူင်း ဢႃႇသီးရီးယႃး၊ ဢွၵ်ႇသေၵႃႈတီႈဝဵင်း လႃႇၶိသႃႉ၊ လႄႈတိုၵ်းတေႃးၵၼ်တင်းၵူၼ်းဝဵင်း လိပၼႃႉ၊ ယူႇၼၼ်ႉဢေႃႈ။ ပိူဝ်ႈၼႆလႄႈမၼ်းၶိုၼ်းၵႂႃႇႁႂ်ႈလႆႈတွင်ႈထၢမ်ၵၼ်တင်းၶုၼ်ႁေႃၶမ်းၶဝ်ၼၼ်ႉဢေႃႈ။-
မိူဝ်ႈၼၼ်ႉၶၢဝ်ႇႁွတ်ႈမႃးၵႃႈတီႈၵူၼ်းဝဵင်း ဢႃႇသီးရီးယႃး၊ လူၺ်ႈလွင်ႈဢၼ်ၶုၼ်ႁေႃၶမ်း တိရိၵ်ႉၵႃႉ၊ မိူင်း ဢေႇတီႇဢူဝ်းပီးယႃး၊ ၶီႇသိုၵ်းမႃးၸူးတီႈၶဝ်ယူႇၼၼ်ႉဢေႃႈ။ မိူဝ်ႈဢၼ်ၸဝ်ႈမုၼ်ယႂ်ႇၶုၼ်ႁေႃၶမ်းငိၼ်းလွင်ႈတၢင်းၼၼ်ႉၸိုင်၊မၼ်းသူင်ႇလိၵ်ႈၵႂႃႇတီႈၶုၼ်ႁေႃၶမ်း ႁေႇၸၵိ၊-
လႄႈဝႃႈ၊ “ၽြႃးဢၼ်မႂ်းဢိင်ပိုင်ႈၼၼ်ႉသင်ႇလၢတ်ႈတီႈမႂ်းဝႆႉလႄႈဝႃႈ၊မႂ်းတၵ်းဢမ်ႇလႆႈတူၵ်းသုမ်းၵႃႈၼႂ်းမိုဝ်းၵဝ်ၼၼ်ႉယဝ်ႉ။ ၵူၺ်းၵႃႈ၊ယႃႇပေႁႂ်ႈၵႂၢမ်းၼၼ်ႉလႆႈပႅတ်ႉလႅၼ်မႂ်း။-
မႂ်းယၢမ်ႈငိၼ်းလွင်ႈဢၼ်ၶုၼ်ႁေႃၶမ်းၵူၼ်းမဵဝ်း ဢႃႇသီးရီးယႃး၊ ၼၼ်ႉၵႃႈၼင်ႇဢၼ်မၼ်းတႅပ်းတတ်းဝႃႈ၊ ‘တၵ်းယႃႉပႅတ်ႈ’ ဝႃႈၼႆၼၼ်ႉ၊မၼ်းၵေႃႈယႃႉၽဵဝ်ႈပႅတ်ႈမိူင်းလႂ်မိူင်းၼၼ်ႉယူႇယဝ်ႉ။ မႂ်းထၢင်ႇမႂ်းတၵ်းလွတ်ႈလႆႈႁိုဝ်း။-
ပူႇမွၼ်ႇၵဝ်တင်းလၢႆယႃႉၽဵဝ်ႈပႅတ်ႈၵူၼ်းဝဵင်း ၵေႃးၸၼ်ႇ၊ ၵူၼ်းဝဵင်း ၶႃႇရၼ်ႇ၊ ဢိၵ်ႇတင်းၵူၼ်းဝဵင်း ရေႇၸပ်ႉ၊ ၸိူဝ်းၼၼ်ႉလႄႈဢဝ်တၢႆပႅတ်ႈၵူၼ်းဝဵင်း ပႅတ်ႉဢေႇတိၼ်ႇ၊ ဢၼ်ယူႇၼႂ်းမိူင်း တေႇလၸႃႇ၊ ၸိူဝ်းၼၼ်ႉယဝ်ႉ။ ၽြႃးၶဝ်သူႇလႂ်ပႃးလႂ်ၵေႃႈဢမ်ႇၵႄႇသႄႇဢဝ်ၶဝ်လႆႈလႃးလႃး။-
ၶုၼ်ႁေႃၶမ်းဝဵင်း ႁႃႇမတ်ႉ၊ ၶုၼ်ႁေႃၶမ်းဝဵင်း ဢႃႇပတ်ႉ၊ ၶုၼ်ႁေႃၶမ်းဝဵင်း သေႇၽရႃႉဝိမ်း၊ ၶုၼ်ႁေႃၶမ်းဝဵင်း ႁေႇၼႃႉ၊ ၶုၼ်ႁေႃၶမ်းဝဵင်း ဢိဝႃႇ၊ ၸိူဝ်းၼၼ်ႉမီးၵႃႈလႂ်ယဝ်ႉ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်း ႁေႇၸၵိ၊ ဢဝ်လိၵ်ႈသေၵႃႈတီႈသၼ်ႇတမၢၼ်ႇတင်းလၢႆၼၼ်ႉၽတ်းဢၢၼ်ႇဢေႃႈ။ မိူဝ်ႈၼၼ်ႉမၼ်းၶဝ်ႈၵႂႃႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈသေလႄႈဢဝ်လိၵ်ႈၼၼ်ႉၽုၺ်ႇပိုတ်ႇၵႃႈတီႈၽၢႆႇၼႃႈ ထႃႇဝရႃႉၽြႃး၊ သေယဝ်ႉ။-
ႁဵတ်းပထၼႃႇသူးတွင်းတီႈ ထႃႇဝရႃႉၽြႃး၊ လႄႈဝႃႈ၊-
“ၸဝ်ႈဢၼၼ်ႇတႃႉတၼ်းၶူဝ်း ၸဝ်ႈထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ တီႈၶႃႈ။ ၸဝ်ႈႁဝ်းၼင်ႈယူႇၵႃႈၼိူဝ်ရႃႇၸႃႉပလၢင်ႇဢၼ်တင်ႈၵႃႈၼိူဝ် ၶေႇရုၽိမ်ႇ၊ ၼၼ်ႉသေလႄႈၸဝ်ႈႁဝ်းသူႇလဵဝ်ပႃးလဵဝ်ၵူၺ်းပဵၼ်ၽြႃးပဵၼ်ၸဝ်ႈဢၼ်ဢုပ်ႉပိူင်ႇၵႃႈၼိူဝ်သိုင်ႇၸိုင်ႈဝၢၼ်ႈမိူင်းလေႃးၵႃႉၼႆႉတီႈၶႃႈဢေႃႈ။ ၸဝ်ႈႁဝ်းၽၢၼ်ႇသၢင်းႁဵတ်းပဵၼ်ၽႃႉၵၢင်ႁၢဝ်တင်းလိၼ်မိူင်းတီႈၶႃႈဢေႃႈ။-
ထႃႇဝရႃႉၽြႃး၊ တီႈၶႃႈ။ တေႃႈလဵဝ်ၼႆႉၶႅၼ်းတေႃႈၵူမ်ႈတူၺ်းၶႃႈၸဝ်ႈႁဝ်းၶဝ်သေၵမ်းတီႈၶႃႈ။ ၶႅၼ်းတေႃႈႁႄႈႁူထွမ်ႇလွင်ႈတၢင်းၵႃႈဢၼ် သၼႃႇၶရိပ်ႉ၊ လၢတ်ႈၵႂၢမ်းဢၼ်သႄႉသွမ်းၸဝ်ႈႁဝ်းၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼႆႉၼၼ်ႉသေၵမ်းတီႈၶႃႈ။-
ထႃႇဝရႃႉၽြႃး၊ တီႈၶႃႈ၊ၶႃႈၸဝ်ႈႁဝ်းၶဝ်တင်းသဵင်ႈတင်းမူတ်းႁုလွင်ႈဢၼ်ၶုၼ်ႁေႃၶမ်းမိူင်း ဢႃႇသီးရီးယႃး၊ ၵႃႈမီးၸိူဝ်းၼၼ်ႉယႃႉၽဵဝ်ႈၵူႈသိုင်ႇၵူႈမိူင်း၊ဢိၵ်ႇတင်းၼမ်ႉလိၼ်ႁိၼ်ၽႃမိူင်းပိူၼ်ႈပႅတ်ႈၼမ်ၼႃႇယဝ်ႉၼၼ်ႉတီႈၶႃႈဢေႃႈ။-
ၶဝ်ဢဝ်ၽြႃးပိူၼ်ႈတင်းလၢႆၽဝ်ၽႆးပႅတ်ႈတီႈၶႃႈယဝ်ႉ။ ၵွပ်ႈပိူဝ်ႈဢၼ်ၸိူဝ်းၼၼ်ႉဢမ်ႇၸႂ်ႈၽြႃးၵူၺ်း၊ပဵၼ်မႆႉပဵၼ်မၢၵ်ႇႁိၼ်ဢၼ်ၵူၼ်းဢဝ်မိုဝ်းႁဵတ်းၵူၺ်းလႄႈၶဝ်ယႃႉၽဵဝ်ႈပႅတ်ႈလႆႈတီႈၶႃႈဢေႃႈ။-
တေႃႈလဵဝ်ၼႆႉ ထႃႇဝရႃႉၽြႃး၊ ၽြႃးပဵၼ်ၸဝ်ႈၶႃႈၸဝ်ႈႁဝ်းၶဝ်တီႈၶႃႈ။ ၵႄႇသႄႇဢဝ်ၶႃႈၸဝ်ႈႁဝ်းၶဝ်လွတ်ႈသေၵႃႈၼႂ်းမိုဝ်းၵူၼ်းမဵဝ်း ဢႃႇသီးရီးယႃး၊ ၶဝ်သေၵမ်းတီႈၶႃႈ။ ၼင်ႇၼၼ်လႄႈၵူၼ်းမဵဝ်းလေႃးၵီႇၵႃႈမီးတင်းသဵင်ႈတင်းမူတ်းတၵ်းႁုလွင်ႈဢၼ်ၸဝ်ႈႁဝ်းသူႇလဵဝ်ပႃးလဵဝ်ၵူၺ်းပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ဢိသႃႇယႃႉ၊ သင်ႇလၢတ်ႈၶေႃႈၵႂၢမ်းၵႂႃႇတီႈၶုၼ်ႁေႃၶမ်း ႁေႇၸၵိ၊ လႄႈဝႃႈ၊ “ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉလႄႈဝႃႈၸမ်ႉ၊ၵွပ်ႈပိူဝ်ႈဢၼ်မႂ်းသူးတွင်းတီႈၵဝ်လူၺ်ႈလွင်ႈ သၼႃႇၶရိပ်ႉ၊ ၶုၼ်ႁေႃၶမ်းမိူင်း ဢႃႇသီးရီးယႃး၊ ၼၼ်ႉလႄႈၵဝ်ထွမ်ႇဢဝ်ၵႂၢမ်းမႂ်းယဝ်ႉ။-
ထႃႇဝရႃႉၽြႃး၊ မီးဢမိင်ႉလူၺ်ႈလွင်ႈမၼ်းလႄႈဝႃႈၸမ်ႉ၊ ‘ၵၼ်ႇၺႃႇလုၵ်ႈယိင်းသၢဝ်ဝဵင်း ၸိဢုၼ်ႇ၊ ၼၼ်ႉႁဵတ်းဢမ်ႇပေႃးၼင်ႇႁိုဝ်လႄႈႁဵတ်းပျၢၵ်ႈၶူဝ်မႂ်းယူႇဢေႃႈ။ လုၵ်ႈယိင်းသၢဝ်ဝဵင်း ယေႇရုသလႅမ်ႇ၊ သၼ်ႇႁူဝ်ၸွမ်းတၢင်းလင်မႂ်းမိူဝ်ႈဢၼ်မႂ်းဢွၵ်ႇပၢႆႈယူႇဢေႃႈ။-
မႂ်းသႄႉသွမ်းလႄႈလႃႇလင်ၽူႈလႂ်။ မႂ်းသႅၼ်ႇႁွင်ႉတေႃႇၽူႈလႂ်။ မႂ်းၵိုဝ်တႃဢၼ်ၽႅၼ်သုင်တေႃႇၽူႈလႂ်။ မႂ်းႁဵတ်းတီႈၽြႃးဢၼ်မူတ်းၸၢင်ႇၵူၼ်းမဵဝ်း ဢိသရေး၊ ၼၼ်ႉလူင်ပႄႇ။-
မႂ်းယင်းပွႆႇၸႂ်ႉတမၢၼ်ႇမႂ်းၸိူဝ်းၼၼ်ႉမႃးသႄႉသွမ်း ထႃႇဝရႃႉၽြႃး၊ လႄႈဝႃႈ၊ၵဝ်ပႃးဢဝ်လေႃႉမႃႉသိုၵ်းၵဝ်တင်းလၢႆလႄႈၶီႇၶိုၼ်ႈထိုင်ပၢႆၸိၵ်းလွႆၼမ်ၼႃႇ၊ထိုင်တီႈၸိၵ်းတီႈၸွမ်လွႆ လေႇပၼုၼ်ႇ၊ ပုၼ်ႉယဝ်ႉ။ ၵဝ်ပွမ်ႈတူၼ်ႈမႆႉဢႃႇရိတ်ႉမၼ်းဢၼ်သုင်ၼႃႇသေပိူၼ်ႈဢိၵ်ႇတင်းတူၼ်ႈမႆႉပႅၵ်ႇမၼ်းဢၼ်လဝ်းလီၼႃႇၸိူဝ်းၼၼ်ႉလူမ်ႉယဝ်ႉ။ ၵဝ်ၶဝ်ႈႁွတ်ႈထိုင်ၵႃႈၼႂ်းထိူၼ်ႇမၼ်းတီႈဢၼ်လိုၵ်ႉၼႃႇသေပိူၼ်ႈၼၼ်ႉယဝ်ႉ။-
ၵဝ်လႆႈၶုတ်းၼမ်ႉမေႃႇၵႃႈၼႂ်းမိူင်းပိူၼ်ႈလႄႈလႆႈၵိၼ်ၼမ်ႉဢၼ်လီၼႂ်းမိူင်းပိူၼ်ႈၼၼ်ႉယဝ်ႉ။ ၽႃႇတိၼ်ၵဝ်ႁဵတ်းႁႂ်ႈၼမ်ႉၵႃႈၼႂ်းၼမ်ႉႁွင်ႈၼမ်ႉၵႄးမိူင်း ဢေးၵျိပ်ႉ၊ ၼၼ်ႉႁႅင်ႈႁွင်ၵႂႃႇယဝ်ႉ၊’ ဝႃႈၼႆလူင်ပႄႇ။
“မႂ်းဢမ်ႇတွၼ်ႉလႆႈငိၼ်းလွင်ႈဢၼ်ၵဝ်ႁၢင်ႈႁႅၼ်းၶိုင်ပွင်လွင်ႈတၢင်းၸိူဝ်းၼႆႉ၊ၸဵမ်မိူဝ်ႈၵွၼ်ႇမိူဝ်ႈမိုၼ်ႉၼၼ်ႉႁိုဝ်း။ တေႃႈလဵဝ်ၼႆႉၸီႇယၢင်ႇႁဵတ်းႁႂ်ႈမၼ်းပဵၼ်ၸွမ်းမႃးယဝ်ႉလႄႈမႂ်းလႆႈပဵၼ်ၵေႃႉဢၼ်ယႃႉၽဵဝ်ႈပႅတ်ႈဝဵင်းဢၼ်မၼ်ႈၶိူင်ႇတင်းလၢႆႁႂ်ႈပဵၼ်ၵွင်မၢၵ်ႇႁိၼ်ၵႂႃႇယဝ်ႉ။-
ၵူၼ်းဝဵင်းၸိူဝ်းၼၼ်ႉႁႅင်းလဵၵ်ႉႁႅင်းၵေႇၵႂႃႇလႄႈၶဝ်လႆႈၵူဝ်ႁႄတူၵ်းၸႂ်လႂ်တိုၼ်ႇၵႂႃႇယဝ်ႉ။ ၶဝ်လႆႈပဵၼ်ၸိူဝ်ႉၼင်ႇတူၼ်ႈယိူဝ်ႈယႃႈၵႃႈၼႂ်းပၢင်ႇၼႂ်းပိုၼ်ၸိူဝ်ႉၼင်ႇတူၼ်ႈဝင်ဢၼ်ၶဵဝ်၊ၸိူဝ်ႉၼင်ႇတူၼ်ႈယိူဝ်ႈဢၼ်ဢွၵ်ႇၵႃႈၼိူဝ်ၵုင်းႁိူၼ်း၊လႆႈႁဵဝ်ႇႁႅင်ႈတၢႆၵႂႃႇၵွပ်ႈပိူဝ်ႈလူမ်းႁွၼ်ႉၽၢႆႇတၢင်းဝၼ်းဢွၵ်ႇထူဝ်းပတ်ႉသႂ်ႇၼၼ်ႉယဝ်ႉ။
“ၵူၺ်းၵႃႈ၊ၵဝ်ႁုလွင်ႈမႂ်းၵူႈၸိူဝ်ႉၵူႈပိူင်လွင်ႈဢၼ်မႂ်းၵႂႃႇမႂ်းႁဵတ်းၼၼ်ႉဢေႃႈ။ မႂ်းၶႂ်ႈၸႃႉၵဝ်ထၢၼ်ႇႁိုဝ်ၵေႃႈၵဝ်ႁုယူႇဢေႃႈ။-
ၵွပ်ႈပိူဝ်ႈမႂ်းၶႂ်ႈၸႃႉၵဝ်၊မႂ်းမီးၸႂ်ၽႅၼ်သုင်တီႈၵဝ်ၼၼ်ႉလႄႈတေႃႈလဵဝ်ၼႆႉၵဝ်တၵ်းဢဝ်သၢႆလင်သူၼ်သႂ်ႇတီႈၶူႈလင်မႂ်း၊ဢဝ်ၵၵ်ႉသႂ်ႇသူပ်းမႂ်းသေယဝ်ႉ၊ၸုင်ဢဝ်မႂ်းၶိုၼ်းမိူဝ်းၵႂႃႇၸွမ်းသဵၼ်ႈတၢင်းဢၼ်မႂ်းမႃးၼၼ်ႉဢေႃႈ၊ဝႃႈၼႆယဝ်ႉ၊” ဝႃႈၼင်ႇၼႆဢေႃႈ။
ဢိသႃႇယႃႉ၊ သမ်ႉလၢတ်ႈတီႈၶုၼ်ႁေႃၶမ်း ႁေႇၸၵိ၊ လႄႈဝႃႈ၊ “ဢူဝ်း၊ ႁေႇၸၵိ၊ ႟။ ပုၼ်ႈဢၼ်တၵ်းပဵၼ်ၼိမိၵ်ႈလၢၵ်ႈၶၼႃႇတီႈမႂ်းၸမ်ႉ၊ၼႂ်းပီၼႆႉတင်းပီၼႃႈၸိုင်၊သူတၵ်းတေလႆႈၵိၼ်မၢၵ်ႇၵိၼ်ႁူင်းဢၼ်မၢၵ်ႇမႃးၵူၺ်းမၼ်းၼၼ်ႉၵူၺ်းဢေႃႈ။ ၼႂ်းပီလိုၼ်းၼၼ်ႉၸင်ႇသူတၵ်းတေလႆႈဝၢၼ်ႇၸိူဝ်ႉဝၢၼ်ႇၽၼ်းလႄႈပၢတ်ႇဢဝ်၊တေလႆႈၽုၵ်ႇသွမ်ႈတူၼ်ႈၶိူဝ်းမၢၵ်ႇၸပိတ်ႉလႄႈၵိၼ်မၢၵ်ႇမၼ်းဢေႃႈ။-
ၵူၼ်းမဵဝ်း ယုတႃႉ၊ ဢၼ်လွတ်ႈတၢင်းတၢႆလႄႈၵိုတ်းၵျၢၼ်ႇယူႇၸိူဝ်းၼၼ်ႉတၵ်းတေယင်ႇႁၢၵ်ႈလိုၵ်ႉလိုၵ်ႉလႄႈတေမီးမၢၵ်ႇမၼ်းမႃးဢေႃႈ။
ၵူၼ်းဢၼ်ဢသၢၵ်ႈလိပ်းၵိုတ်းၵျၢၼ်ႇဝႆႉၸိူဝ်းၼၼ်ႉ၊တၵ်းမီးယူႇၵႃႈၼႂ်းဝဵင်း ယေႇရုသလႅမ်ႇ၊ ဢိၵ်ႇတင်းၵႃႈၼိူဝ်လွႆ ၸိဢုၼ်ႇ၊ ၵွပ်ႈပိူဝ်ႈဢၼ် ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၶိုင်ပွင်ႁႂ်ႈပဵၼ်မႃးၸိူဝ်ႉၼင်ႇၼၼ်ဢေႃႈ၊” ဝႃႈၼင်ႇၼႆယဝ်ႉ။
“ၵွပ်ႈပိူဝ်ႈဢၼ်ပဵၼ်ၸိူဝ်ႉၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉလူၺ်ႈလွင်ႈၶုၼ်ႁေႃၶမ်းၵူၼ်းမဵဝ်း ဢႃႇသီးရီးယႃး၊ လႄႈဝႃႈၸမ်ႉ၊ ‘မၼ်းဢမ်ႇလႆႈၶဝ်ႈၵႃႈၼႂ်းဝဵင်းၼႆႉ၊ဢမ်ႇလႆႈယိုဝ်းပိုၼ်သႂ်ႇသေလႅမ်ႈ၊ၵူၼ်းသိုၵ်းဢၼ်ယိပ်းၵမ်ၶႅပ်းႁႄႉလၢၵ်ႈၼၢၵ်ႈဢမ်ႇလႆႈၸမ်ဝဵင်းၼၼ်ႉ၊ဢမ်ႇလႆႈၵေႃႇလႆႈၵွင်တႅၼ်လိၼ်လွမ်ႉဝဵင်းၼၼ်ႉလႃးလႃး။-
မၼ်းတၵ်းလႆႈၶိုၼ်းမိူဝ်းၸွမ်းသဵၼ်ႈတၢင်းဢၼ်မၼ်းမႃးၼၼ်ႉလႄႈ၊ဢမ်ႇလႆႈၶဝ်ႈၵႃႈၼႂ်းဝဵင်းၼႆႉ၊ဝႃႈၼႆ၊’ ထႃႇဝရႃႉၽြႃး၊ မီးဢမိင်ႉဢေႃႈ။-
ၵဝ်တၵ်းထွၵ်ႈလူၺ်ႈၵတိဢၼ်ၵဝ်ဝႆႉတီႈၶႃႈၵဝ် တႃႇဝိတ်ႈ၊ ၼၼ်ႉလႄႈတၵ်းပႂ်ႉထိင်းၵုင်ႇသရေႇၵဝ်သေယဝ်ႉ၊တၵ်းၵႅတ်ႇၶႄႁႄႉၵင်ႈဝဵင်းၼႆႉဢေႃႈ၊” ဝႃႈၼင်ႇၼႆဢေႃႈ။
ၼႂ်းၶိုၼ်းၼၼ်ႉတမၢၼ်ႇၵၢင်ႁၢဝ် ထႃႇဝရႃႉၽြႃး၊ ၵႂႃႇတီႈတပ်ႉသိုၵ်းၵူၼ်းမဵဝ်း ဢႃႇသီးရီးယႃး၊ ၶဝ်သေလႄႈဢဝ်တၢႆပႅတ်ႈၵူၼ်းသိုၵ်းသႅၼ်ပႅတ်ႇမိုၼ်ႇႁႃႈႁဵင်ၵေႃႉဢေႃႈ။ ၶိင်ႇၵၢင်ၼႂ်ၸဝ်ႉၸဝ်ႉမိူဝ်ႈဢၼ်ထိုင်ၶိင်ႇၵူၼ်းလုၵ်ႉၼၼ်ႉၸိုင်၊ၶဝ်ၼၼ်ႉပဵၼ်တူဝ်တၢႆတင်းသဵင်ႈတင်းမူတ်းၵႂႃႇဢေႃႈ။
ၼင်ႇၼၼ်လႄႈၶုၼ်ႁေႃၶမ်း သၼႃႇၶရိပ်ႉ၊ ၵူၼ်းမဵဝ်း ဢႃႇသီးရီးယႃး၊ ၼၼ်ႉယုၵ်ႉသိမ်းဢဝ်တပ်ႉသိုၵ်းမၼ်းလႄႈၶိုၼ်းမိူဝ်းၵႂႃႇၵႃႈတီႈဝဵင်း ၼိၼေႇဝူၺ်ႇ၊ သေဢေႃႈ။-
ဝၼ်းၼိုင်ႈ၊ၼႂ်းမိူဝ်ႈဢၼ်မၼ်းယင်းတိုၵ်ႉဝႆႈၽြႃးမၼ်း ၼိၸရွၵ်ႉ၊ ၵႃႈၼႂ်းၵျွင်းဝၢတ်ႈယူႇၼၼ်ႉၸိုင်၊လုၵ်ႈၸၢႆးမၼ်းသွင်ၵေႃႉဢၼ်ပဵၼ် ဢႃႇတရမ်ႇမလႅၵ်ႉ၊ ဢိၵ်ႇတင်း သရေႇၸႃႇ၊ ဢဝ်မၼ်းတၢႆလူၺ်ႈလၢပ်ႇလူၺ်ႈလႅဝ်းသေယဝ်ႉ၊ဢွၵ်ႇပၢႆႈၵႂႃႇၵႃႈတီႈမိူင်း ဢႃႇရရတ်ႉ၊ ဢေႃႈ။ လုၵ်ႈၸၢႆးမၼ်းတၢင်ႇၵေႃႉဢၼ်ပဵၼ် ဢေႇသရႃႇႁတ်ႉတုၼ်ႇ၊ ၼၼ်ႉသိုပ်ႇၼင်ႈႁၢင်ႈၼင်ႈႁေႃဢေႃႈ။
ၼႂ်းၶိင်ႇမိုဝ်ႉဝၼ်းၸိူဝ်းၼၼ်ႉၶုၼ်ႁေႃၶမ်း ႁေႇၸၵိ၊ ပဵၼ်တၢင်းၶႆႈတၢင်းပဵၼ်ယူႇထၢၼ်ႈပေႃးၸမ်တၵ်းတၢႆဢေႃႈ။ ပရေႃးၽႅတ်ႈ ဢိသႃႇယႃႉ၊ လုၵ်ႈၸၢႆး ဢႃႇမူတ်ႉ၊ ၼၼ်ႉမႃးသူႇမႃးၸႂ်းမၼ်းလႄႈလၢတ်ႈဝႃႈ၊ “ ထႃႇဝရႃႉၽြႃး၊ မီးဢမိင်ႉတီႈမႂ်းလႄႈဝႃႈၸမ်ႉ၊မႄးႁႅၼ်းဝႆႉၸေးၸေးၸုမ်ႇၸုမ်ႇတႃႉ။ မႂ်းတၵ်းတၢႆဢေႃႈ။ မႄးႁႅၼ်းဝႆႉပုၼ်ႈဢၼ်တၵ်းတၢႆတႃႉ၊” ဝႃႈၼင်ႇၼႆဢေႃႈ။
ၵဝ်တၵ်းၵႄႇၼုၵ်ႈဢဝ်မႂ်း၊ဢိၵ်ႇတင်းဝဵင်း ယေႇရုသလႅမ်ႇ၊ လွတ်ႈသေၵႃႈၼႂ်းမိုဝ်းၸဝ်ႈမုၼ်ယႂ်ႇၶုၼ်ႁေႃၶမ်းမိူင်း ဢႃႇသီးရီးယႃး၊ ဢေႃႈ၊ၵဝ်တၵ်းၵႅတ်ႇၶႄႁႄႉၵင်ႈဝဵင်းၼႆႉဢေႃႈ၊” ဝႃႈၼင်ႇၼႆဢေႃႈ။
ဢိသႃႇယႃႉ၊ ၵေႃႈလၢတ်ႈလႄႈဝႃႈ၊ “လၢၵ်ႈၶၼႃႇသၢၵ်ႈသေႇဢၼ် ထႃႇဝရႃႉၽြႃး၊ တၵ်းပၼ်တီႈမႂ်းလူၺ်ႈလွင်ႈဢၼ်မၼ်းၸဝ်ႈတၵ်းႁဵတ်းၸွမ်းၵတိၸဝ်ႈၼၼ်ႉၸမ်ႉ၊-
ၵႃႈၼိူဝ်သိၵ်ႈၶူဝ်လႆဢၼ်ၶုၼ်ႁေႃၶမ်း ဢႃႇၶတ်ႉ၊ ႁဵတ်းဝႆႉၼၼ်ႉ၊ ထႃႇဝရႃႉၽြႃး၊ တၵ်းႁႂ်ႈငဝ်းလႅတ်ႇသုတ်ႉၶိုၼ်းၵႂႃႇတၢင်းလင်သိပ်းသိၵ်ႈဢေႃႈ၊” ဝႃႈၼင်ႇၼႆလႄႈငဝ်းလႅတ်ႇသုတ်ႉၶိုၼ်းၵႂႃႇတၢင်းလင်သိပ်းသိၵ်ႈဢေႃႈ။
လိုၼ်းသေဢၼ် ႁေႇၸၵိ၊ ၸိုၼ်ႈႁၢႆၶႅၼ်းမႃးသေၵႃႈတီႈတၢင်းၶႆႈတၢင်းပဵၼ်မၼ်းယဝ်ႉၼၼ်ႉမၼ်းတႅမ်ႈလိၵ်ႈႁဵတ်းၵႂၢမ်းယွင်ႈယေႃးၽြႃးပဵၼ်ၸဝ်ႈလႄႈဝႃႈၸမ်ႉ၊
ၵဝ်ဝႃႈ၊မိူဝ်ႈဢသၢၵ်ႈတၢၼ်းၵဝ်မႃးထိုင်ၵၢင်တၢင်းၼၼ်ႉ၊ ၵဝ်တၵ်းလႆႈၶဝ်ႈၵႃႈၼႂ်းႁူးၽၵ်းတူမိူင်းမရၼႃႉယဝ်ႉ၊ ၵဝ်ထၢင်ႇၵဝ်တၵ်းဢမ်ႇလႆႈဢသၢၵ်ႈလိပ်းယူႇယဝ်ႉ။
ၵဝ်ထၢင်ႇၼႂ်းမိူင်းလေႃးၵႃႉဢၼ်ၵူၼ်းဢသၢၵ်ႈလိပ်းယူႇၼႆႉ၊ ၵဝ်တၵ်းဢမ်ႇမီးဢၶႂၢင်ႉဢၼ်လႆႈႁၼ် ထႃႇဝရႃႉၽြႃး၊ ထႅင်ႈ၊ တၵ်းဢမ်ႇလႆႈႁၼ်ၵူၼ်းဢၼ်ဢသၢၵ်ႈလိပ်းယူႇၼႆႉသေၵေႃႉသေၵူၼ်းယဝ်ႉ။
ဢသၢၵ်ႈၵဝ်ၼႆႉလႆႈၶၢမ်ႇတၢင်းဢၼ်တႅပ်းၶၢတ်ႇယဝ်ႉလႄႈသုတ်းသဵင်ႈၵႂႃႇ မိူၼ်ၸိူဝ်ႉၼင်ႇသုမ်ႉထဵင်ဢၼ်ယႃႉတူၵ်း၊ မိူၼ်ၽႃႈဢၼ်တႅပ်းဢွၵ်ႇပႅတ်ႈသေၵႃႈတီႈႁုၵ်ႇတေႃးၽႃႈၼၼ်ႉယဝ်ႉဢေႃႈ။ ၵဝ်ထၢင်ႇ ထႃႇဝရႃႉၽြႃး၊ ဢဝ်ဢသၢၵ်ႈၵဝ်သုတ်းသဵင်ႈပႅတ်ႈယဝ်ႉဢေႃႈ။
ၵဝ်ႁွင်ႉႁႆႈလူၺ်ႈတၢင်းဢၼ်ၸဵပ်းၼႃႇတင်းၶိုၼ်း၊ မိူၼ်ၸိူဝ်ႉၼင်ႇဢၼ်သၢင်ႇသီႈႁၵ်းႁိၵ်းလုပ်ႇၵဝ်ပႅတ်ႈၼၼ်ႉဢေႃႈ။ ၵဝ်ထၢင်ႇ ထႃႇဝရႃႉၽြႃး၊ ဢဝ်ဢသၢၵ်ႈၵဝ်သုတ်းသဵင်ႈပႅတ်ႈယဝ်ႉဢေႃႈ။
ၵဝ်ပွင်ႉၶၢင်းပွင်ႉမိုၼ်ႇယူႇမိူၼ်ၸိူဝ်ႉၼင်ႇ ၼူၵ်ႉဢႅၼ်ႇၽႃႉ၊ဢိၵ်ႇတင်းၵွၼ်ႇလႄႈႁွင်ႉယူႇမိူၼ်ၸိူဝ်ႉၼင်ႇၼူၵ်ႉတူႈဢေႃႈ။ မၢၵ်ႇတႃၵဝ်ႁႅင်းဢူၼ်ႈၵႂႃႇၵွပ်ႈပိူဝ်ႈဢၼ်ႁႅၼ်တူၺ်းၽႃႉၵၢင်ႁၢဝ်ဢေႃႈ။ ထႃႇဝရႃႉၽြႃး၊ တီႈၶႃႈၶႅၼ်းတေႃႈၵႄႇၼုၵ်ႈဢဝ်ၶႃႈၸဝ်ႈဢွၵ်ႇသေ ၵႃႈၼႂ်းၽေးတုၵ်ႉၶႃႉၸိူဝ်းၼႆႉသေၵမ်းတီႈၶႃႈ။
ၵဝ်တၵ်းလၢတ်ႈၸိူဝ်ႉၼင်ႇႁိုဝ်လႆႈ။ ထႃႇဝရႃႉၽြႃး၊ ၶိုင်ပွင်လွင်ႈတၢင်းၼႆႉဢေႃႈ။ ၵဝ်ၶီၸႂ်ၶူမ်ၸႂ်ၼႃႇလႄႈၼွၼ်းဢမ်ႇလပ်းလႆႈယဝ်ႉ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈတၵ်းဢသၢၵ်ႈလိပ်းပုၼ်ႈၸဝ်ႈႁဝ်းယူႇ၊ ဢသၢၵ်ႈၼၼ်ႉပဵၼ်ပုၼ်ႈၸဝ်ႈႁဝ်းသူႇလဵဝ်ပႃးလဵဝ်ၵူၺ်းတီႈၶႃႈဢေႃႈ။ ၶႅၼ်းတေႃႈယူတ်းယႃပၼ်ၶႃႈၸဝ်ႈႁႂ်ႈၶႅၼ်းလႄႈ၊ႁႂ်ႈၶႃႈၸဝ်ႈဢသၢၵ်ႈလႆႈလိပ်းသေၵမ်းတီႈၶႃႈ။
တၢင်းဢၼ်ၶႃႈၸဝ်ႈၶီၸႂ်ၶူမ်ၸႂ်ၼၼ်ႉတၵ်းပဵၼ်တၢင်းၼိမ်မႃးတီႈၶႃႈဢေႃႈ။ ၸဝ်ႈႁဝ်းၵႄႇသႄႇဢဝ်ဢသၢၵ်ႈၶႃႈၸဝ်ႈသေၵႃႈတီႈၽေးဢၼ်ႇတရေႇသေယဝ်ႉ၊ ပွႆႇလွတ်ႈဢပျတ်ႈၶႃႈၸဝ်ႈပၼ်တင်းမူတ်းတင်းသဵင်ႈဢေႃႈ။
ၵူၼ်းၼႂ်းမိူင်းမရၼႃႉၸိူဝ်းၼၼ်ႉဢမ်ႇၸၢင်ႈယွင်ႈယေႃးၸဝ်ႈႁဝ်းလႆႈလႄႈ ၵူၼ်းတၢႆတင်းလၢႆဢမ်ႇၸၢင်ႈဢိင်ပိုင်ႈၵႃႈၼႂ်းသဵတ်ႈၸႃႇတြႃးၸဝ်ႈႁဝ်းလႆႈတီႈၶႃႈ။
ၶဝ်ၸိူဝ်းဢၼ်ဢသၢၵ်ႈလိပ်းၵူၺ်းယွင်ႈယေႃးၸဝ်ႈႁဝ်းလႆႈ၊ မိူၼ်ၸိူဝ်ႉၼင်ႇဢၼ်ၶႃႈၸဝ်ႈယွင်ႈယေႃးၸဝ်ႈႁဝ်းမိူဝ်ႈလဵဝ်ၼႆႉၼၼ်ႉဢေႃႈ။ ၵေႃႉဢၼ်ပဵၼ်ပေႃႈတင်းလၢႆဢွၼ်ၵၼ် မွၵ်ႇလၢတ်ႈလုၵ်ႈလၢင်းၶဝ်လူၺ်ႈလွင်ႈဢၼ်ၸဝ်ႈႁဝ်းမီးသဵတ်ႈၸႃႇၼၼ်ႉဢေႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းယူတ်းယႃပၼ်ႁႂ်ႈၶႃႈၸဝ်ႈႁၢႆတီႈၶႃႈယဝ်ႉ၊ ၶႃႈၸဝ်ႈႁဝ်းၶဝ်တၵ်းဢွၼ်ၵၼ်လဵတ်းတိင်ႇလႄႈႁဵတ်းၵႂၢမ်းယွင်ႈယေႃးၸဝ်ႈႁဝ်း၊ ႁဵတ်းၵႂၢမ်းယွင်ႈယေႃးၸဝ်ႈႁဝ်းၵႃႈၼႂ်း ၵျွင်းပိၵ်ႈမၢၼ်ႇၸဝ်ႈႁဝ်းယူႇၸူဝ်ႈဢသၢၵ်ႈၶႃႈၸဝ်ႈႁဝ်းၶဝ်တီႈၶႃႈဢေႃႈ။
ဢိသႃႇယႃႉ၊ ယၢမ်ႈလႆႈမွၵ်ႇလၢတ်ႈတီႈၶုၼ်ႁေႃၶမ်းႁႂ်ႈမၼ်းဢဝ်မၢၵ်ႇလိူဝ်ႇဢၼ်ပဵၼ်ၵွၼ်ႈပဵၼ်မမ်ႈၼၼ်ႉၼူတ်ႈလႄႈၵွပ်ႈသႂ်ႇၵႃႈတီႈတုမ်ႇၸဵပ်းၼၼ်ႉႁႂ်ႈမၼ်းတၵ်းၶႅၼ်းမႃးၼၼ်ႉဢေႃႈ။-
ၶုၼ်ႁေႃၶမ်း ႁေႇၸၵိ၊ ၵေႃႈယၢမ်ႈလႆႈထၢမ်လႄႈဝႃႈ၊ “တၵ်းမီးလၢၵ်ႈၶၼႃႇၸိူဝ်ႉၼင်ႇႁိုဝ်ၵဝ်ၶႃႈတၵ်းလႆႈၶိုၼ်ႈၵႂႃႇၵႃႈတီႈၵျွင်းပိၵ်ႈမၢၼ်ႇလႆႈၼၼ်ႉ၊” ဝႃႈၼင်ႇၼႆဢေႃႈ။
ၼႂ်းမိုဝ်ႉဝၼ်းၶိင်ႇၵႃႇလႃႉၼၼ်ႉၶုၼ်ႁေႃၶမ်း မေႇရေႃးတၵ်ႉပႃႇလတၼ်ႇ၊ လုၵ်ႈၸၢႆး ပႃႇလတၼ်ႇ၊ မိူင်း ပႃႇပုလုၼ်ႇ၊ ၼၼ်ႉလႆႈငိၼ်းလွင်ႈဢၼ်ၶုၼ်ႁေႃၶမ်း ႁေႇၸၵိ၊ ပဵၼ်ၸဵပ်းလႄႈၶႅၼ်းမႃးၼၼ်ႉမၼ်းတႅမ်ႈလိၵ်ႈမႅတ်ႈတႃႇၽိုၼ်ၼိုင်ႈသေလႄႈသူင်ႇပႃးၵႂႃႇၸွမ်းလၢၵ်ႈသွင်ႇထိုင်တီႈမၼ်းဢေႃႈ။-
ႁေႇၸၵိ၊ ႁပ်ႉတွၼ်ႈသၢၼ်ႇတမၢၼ်ႇၸိူဝ်းၼၼ်ႉၸူမ်းၸူမ်းသိူဝ်းသိူဝ်းလႄႈၼႄပျႃးၽၼ်ႇတႃႇဢုၵ်ႉၸႃႇၸဝ်ႈဢၼ်ဝႃႈ၊ငိုၼ်းၶမ်း၊မဵဝ်းၼၢမ်ႇသႃႇ၊ၼမ်ႉမၼ်းၼၢမ်ႇသႃႇဢၼ်လီဢၼ်ငၢမ်း၊ဢိၵ်ႇတင်းၶိူင်ႈလၢၵ်ႈၼၢၵ်ႈၸဝ်ႈၵူႈၸိူဝ်ႉၵူႈပိူင်ဢေႃႈ။ ၸႃႉၸဵမ်ၽၼ်ႇတႃႇႁေႃၶမ်း၊ဢိၵ်ႇတင်းသိုင်ႇၸိုင်ႈဝၢၼ်ႈမိူင်းၸဝ်ႈၵူႈတီႈၵူႈလႅၼ်မဵဝ်းဢၼ်ဢမ်ႇၼႄပျႃးတီႈၶဝ်ၼၼ်ႉဢမ်ႇမီးသေၸိူဝ်ႉသေပိူင်။
မိူဝ်ႈၼၼ်ႉပရေႃးၽႅတ်ႈ ဢိသႃႇယႃႉ၊ မႃးၵႃႈတီႈၶုၼ်ႁေႃၶမ်း ႁေႇၸၵိ၊ လႄႈထၢမ်ဝႃႈ၊ “ၶဝ်ၸိူဝ်းၼႆႉလုၵ်ႉၵႃႈတီႈလႂ်မႃးလႄႈလၢတ်ႈၵႃႈသင်တီႈၸဝ်ႈႁဝ်းယဝ်ႉ၊” ဝႃႈၼင်ႇၼႆဢေႃႈ။ ႁေႇၸၵိ၊ ၶိုၼ်းလၢတ်ႈလႄႈဝႃႈ၊ “ၶဝ်လုၵ်ႉသေၵႃႈတီႈဢၼ်ၵႆၼႃႇဢၼ်ဝႃႈမိူင်း ပႃႇပုလုၼ်ႇ၊ မႃးဢေႃႈ၊” ဝႃႈၼင်ႇၼႆဢေႃႈ။
မၼ်းသမ်ႉထၢမ်လႄႈဝႃႈ၊ “ၵႃႈၼႂ်းႁေႃၶမ်းၸဝ်ႈႁဝ်းၼႆႉၶဝ်ႁၼ်ၵႃႈသင်ယဝ်ႉ၊” ဝႃႈၼင်ႇၼႆလႄႈ၊ ႁေႇၸၵိ၊ ၶိုၼ်းလၢတ်ႈလႄႈဝႃႈ၊ “ၶဝ်လႆႈႁၼ်ၵူႈၸိူဝ်ႉၵူႈမဵဝ်းယဝ်ႉ။ ၵႃႈၼႂ်းၽၼ်ႇတႃႇၸဝ်ႈၼႆႉမဵဝ်းဢၼ်ၵဝ်ဢမ်ႇၼႄပျႃးတီႈၶဝ်ၼၼ်ႉဢမ်ႇမီးသေၸိူဝ်ႉသေပိူင်၊” ဝႃႈၼင်ႇၼႆဢေႃႈ။
ဢိသႃႇယႃႉ၊ ၵေႃႈလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “ထွမ်ႇငိၼ်းၼုၵ်ႈၵပၢတ်ႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်းတႃႉ၊-
ၶိင်ႇၵႃႇလႃႉမိုဝ်ႉဝၼ်းဢၼ်ဢုၵ်ႉၸႃႇၵႃႈဢၼ်မီးၵႃႈၼႂ်းႁေႃၶမ်း၊ဢိၵ်ႇတင်းဢုၵ်ႉၸႃႇၵႃႈဢၼ်ပူႇၸဝ်ႈမွၼ်ႇၸဝ်ႈၸုႁွမ်သိမ်းဝႆႉတေႃႇထိုင်ႁွတ်ႈဝၼ်းမိူဝ်ႈၼႆႉတင်းသဵင်ႈတင်းလူင်ၼၼ်ႉ၊တၵ်းလႆႈၶၢမ်ႇတၢင်းဢၼ်သိမ်းဢဝ်ၵႂႃႇၵႃႈတီႈမိူင်း ပႃႇပုလုၼ်ႇ၊ ပုၼ်ႉၼၼ်ႉတၵ်းႁွတ်ႈထိုင်မႃးဢေႃႈ။ ဢမ်ႇလႆႈၵိုတ်းလႆႈၵျၢၼ်ႇဝႆႉသေၸိူဝ်ႉသေပိူင်၊ဝႃႈၼင်ႇၼႆ ထႃႇဝရႃႉၽြႃး၊ မီးဢမိင်ႉဢေႃႈ။-
ၶဝ်တၵ်းဢဝ်လုၵ်ႈၸဝ်ႈလၢၼ်ၸဝ်ႈၵမ်ႈၽွင်ႈဢၼ်သိုပ်ႇဢွၵ်ႇၽႄႈဢွၵ်ႇသေၵႃႈတီႈၸဝ်ႈၼၼ်ႉလႄႈဢဝ်ၶဝ်ၵႂႃႇပဵၼ်ၵူၼ်းတွၼ်ဢၼ်ထၢမ်းႁဵတ်းၵၢၼ်ၵႃႈၼႂ်းႁေႃၸဝ်ႈဝဵင်း ပႃႇပုလုၼ်ႇ၊ ဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်း ႁေႇၸၵိ၊ ၶိုၼ်းလၢတ်ႈလႄႈဝႃႈ၊ “ၼုၵ်ႈၵပၢတ်ႈ ထႃႇဝရႃႉၽြႃး၊ ဢၼ်မႂ်းလႆႈပျၢၼ်ႇလႆႈလၢတ်ႈၼႆႉလီယဝ်ႉ၊” ဝႃႈၼင်ႇၼႆဢေႃႈ။ လွင်ႈမၼ်းၸမ်ႉ၊မၼ်းထၢင်ႇၼႂ်းၸႂ်လႄႈဝႃႈ၊ “ၼႂ်းၸူဝ်ႈပၢၼ်ၵဝ်ၼႆႉတၵ်းမီးတၢင်းဢၼ်ၼိမ်ဢၼ်လီဢိၵ်ႇတင်းတၢင်းဢၼ်လူင်ႉလီလွတ်ႈလီဢမၢၼ်ႇၶၼ်ပဵၼ်ဢေႃႈ၊” ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈမီးဢမိင်ႉၸမ်ႉ၊သူဢွၼ်ၵၼ်ႁႂ်ႈၵူၼ်းၵဝ်တင်းလၢႆ၊ ပျေႇၸႂ်ၼိမ်ၸႂ်တႃႉ။ ႁႂ်ႈပျေႇၸႂ်ၼိမ်ၸႂ်တႃႉ။
ဢွၼ်ၵၼ်ပၼ်ဢဵၼ်ပၼ်ႁႅင်းတီႈၵူၼ်းဝဵင်း ယေႇရုသလႅမ်ႇ၊ တႃႉ။ မွၵ်ႇလၢတ်ႈလွင်ႈဢၼ်ၶဝ်လႆႈၶၢမ်ႇၽေးတၢမ်ႇႁိုင်ၼႃႇယဝ်ႉလႄႈ၊ ဢပျတ်ႈၶဝ်ၵႃႈမီးၵေႃႈပွႆႇလွတ်ႈပၼ်ယဝ်ႉ၊ လွင်ႈမၼ်းၸမ်ႉ၊ၵဝ်ပၼ်တၢမ်ႇပျေႉပျေႉၸုမ်ႇၸုမ်ႇပုၼ်ႈဢပျတ်ႈၶဝ်ယဝ်ႉ၊ဝႃႈၼင်ႇၼႆဢေႃႈ။
သဵင်ၵေႃႉဢၼ်ႁွင်ႉသႅၼ်ႇၵႃႈၼႂ်းထိူၼ်ႇလႄႈဝႃႈၸမ်ႉ၊ “မႄးႁႅၼ်းသဵၼ်ႈတၢင်းၵႃႈၼႂ်းထိူၼ်ႇၼႂ်းၶိူဝ်းပုၼ်ႈ ထႃႇဝရႃႉၽြႃး၊ တႃႉ။ ပတ်းၽဵဝ်ႈသဵၼ်ႈတၢင်းၼႂ်းထိူၼ်ႇလႅင်ႉပုၼ်ႈၽြႃးပဵၼ်ၸဝ်ႈတႃႉ။
ထူမ်တီႈဢၼ်ပဵၼ်ႁူၺ်ႈပဵၼ်ႁွင်ႈၵူႈတီႈလႄႈ ၵိူၼ်ႇပႅတ်ႈတီႈဢၼ်ပဵၼ်ၵွင်းၼၼ်ႉႁႂ်ႈပဵင်းတႃႉ။ လွႆလူင်လွႆဢွၼ်ႇတင်းလၢႆတၵ်းပဵၼ် ပၢင်ႇပဵင်းမႃးလႄႈတီႈဢၼ်ၶူင်ႉဝႆႉယၢၼ်းဝႆႉတင်းလၢႆၵေႃႈထူမ်ႁႂ်ႈပဵင်းဝႆႉတႃႉ။
ႁဵတ်းၼင်ႇၼၼ်မုၼ်ၽုင်း ထႃႇဝရႃႉၽြႃး၊ တၵ်းထၢင်ႇသႃးလႄႈ ၵႃႈဢၼ်ပဵၼ်ၵူၼ်းဝူၺ်ႇၼေႇယႃႉတင်းလၢႆႁၼ်မုၼ်ၽုင်းတၼ်းၶူဝ်းၼၼ်ႉဢေႃႈ။ တူဝ် ထႃႇဝရႃႉၽြႃး၊ ဝႆႉၵတိၸိူဝ်ႉၼင်ႇၼႆဝႆႉဢေႃႈ၊” ဝႃႈၼင်ႇၼႆဢေႃႈ။
သဵင်ၵေႃႉဢၼ်ႁွင်ႉသႅၼ်ႇၵႃႈၼႂ်းထိူၼ်ႇၼႂ်းၶိူဝ်းလႄႈဝႃႈၸမ်ႉ၊ “ဢွၼ်ၵၼ်ပိုၼ်ၽၢဝ်ႇၶၢဝ်ႇငၢဝ်းတႃႉ၊” ဝႃႈၼင်ႇၼႆဢေႃႈ။ ၵဝ်ၵေႃႈထၢမ်လႄႈဝႃႈ၊ “တၵ်းလႆႈပိုၼ်ၽၢဝ်ႇ ၶၢဝ်ႇငၢဝ်းဢၼ်လႂ်တီႈၶႃႈ၊” ဝႃႈၼင်ႇၼႆဢေႃႈ။ “ဢွၼ်ၵၼ်ပိုၼ်ၽၢဝ်ႇၶၢဝ်ႇငၢဝ်းလွင်ႈဢၼ်ဝႃႈ ၵူၼ်းတင်းလၢႆပဵၼ်ၸိူဝ်ႉၼင်ႇယိူဝ်ႈယႃႈၼၼ်ႉတႃႉ။ မုၼ်ၽုင်းၵူၼ်းၵေႃႈမိူၼ်ၸိူဝ်ႉၼင်ႇယိူဝ်ႈယႃႈၵႃႈၼႂ်းတူင်ႈၼႃးဢေႃႈ။
ယိူဝ်ႈယႃႈတင်းလၢႆႁဵဝ်ႇႁႅင်ႈၵႂႃႇလႄႈမွၵ်ႇတင်းလၢႆၸၢင်ႈႁူင်ႈၵႂႃႇ၊ ၼႂ်းမိူဝ်ႈဢၼ် ထႃႇဝရႃႉၽြႃး၊ ၸႂ်ႉႁႂ်ႈလူမ်းထူဝ်းပတ်ႉသႂ်ႇၶဝ်ၼၼ်ႉဢေႃႈ။ ၵူၼ်းတင်းလၢႆပဵၼ်ၸိူဝ်ႉၼင်ႇတူၼ်ႈယိူဝ်ႈတူၼ်ႈယႃႈဢမၢၼ်ႇၶၼ်ပဵၼ်ဢေႃႈ။
ၸႂ်ႈတႄႉ။ ယိူဝ်ႈယႃႈတင်းလၢႆႁဵဝ်ႇႁႅင်ႈၵႂႃႇလႄႈမွၵ်ႇတင်းလၢႆၸၢင်ႈႁူင်ႈၵႂႃႇဢေႃႈ။ ၼုၵ်ႈၵပၢတ်ႈတြႃး ထႃႇဝရႃႉၽြႃး၊ ၸမ်ႉ၊ တႄႇယူႇၵူႈၶိင်ႇၵူႈၶႃႇတႃႇသေႇဢမ်ႇထၢတ်ႇဢေႃႈ၊” ဝႃႈၼင်ႇၼႆဢေႃႈ။
ဝဵင်း ယေႇရုသလႅမ်ႇ၊ ႟။ ၶိုၼ်ႈၵႂႃႇၵႃႈၼိူဝ်လွႆ ဢၼ်သုင်သေလႄႈမွၵ်ႇလၢတ်ႈၶၢဝ်ႇငၢဝ်းသိူဝ်းပျေႃႇတႃႉ။ ဝဵင်း ၸိဢုၼ်ႇ၊ ႟။ ဢဝ်ႁႅင်းလႄႈပၢဝ်ႇသဵင်ၵဵဝ်ႈသဵင်သေလႄႈ ပၢဝ်ႇသေႃႇၶၢဝ်ႇငၢဝ်းသိူဝ်းပျေႃႇတႃႉ။ ယင်းဢမ်ႇၵူဝ်ဢမ်ႇႁႄလႄႈႁွင်ႉပၢဝ်ႇႁွင်ႉသေႃႇတႃႉ။ မွၵ်ႇလၢတ်ႈတီႈဝၢၼ်ႈတီႈဝဵင်း ယုတႃႉ၊ တင်းလၢႆလႄႈဝႃႈ၊ “ၽြႃးပဵၼ်ၸဝ်ႈသူမီးၵႃႈတီႈၼႆႈဢေႃႈ၊” ဝႃႈၼင်ႇၼႆတႃႉ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ပႃးတင်းတၼ်းၶူဝ်းဢၼ်ယႂ်ႇၼႃႇမႃးႁႂ်ႈလႆႈ ဢုပ်ႉပိူင်ႇလႄႈၵႃႈၶၼ်ဢၼ်မၼ်းၸဝ်ႈ ထိူၵ်ႈၶၢမ်ႇဢဝ်ၼၼ်ႉယူႇလူၺ်ႈၵၼ်တင်းမၼ်းၸဝ်ႈဢေႃႈ။
မၼ်းၸဝ်ႈတၵ်းလဵင်ႉၽုင်သူဝ်းမၼ်းၸဝ်ႈမိူၼ် ၸိူဝ်ႉၼင်ႇၵူၼ်းလဵင်ႉသူဝ်းၼၼ်ႉသေယဝ်ႉ၊ မၼ်းၸဝ်ႈတၵ်းၸုသိမ်းဢဝ်သူဝ်းဢွၼ်ႇ တင်းလၢႆသေလႄႈႁွပ်ႇဢဝ်ဢုမ်ႈဢဝ်ဝႆႉၵႃႈၼႂ်းၶႅၼ်မိုဝ်းမၼ်းၸဝ်ႈဢေႃႈ။ သူဝ်းမႄႈဢၼ်လုၵ်ႈယင်းၵိၼ်ၼူမ်းၶဝ်ယူႇ ၸိူဝ်းၼၼ်ႉၵေႃႈမၼ်းၸဝ်ႈတၵ်းဢွၼ်သူင်ႇၵႂႃႇၼိမ်ၼိမ်လီလီဢေႃႈ။
ၵေႃႉဢၼ်ဢဝ်ဢူင်ႈမိုဝ်းတူင်တူၺ်းၼမ်ႉသမ်ႇမုၵ်ႈတြႃႇ၊ ဢၼ်ဢဝ်မိုဝ်းၶိုပ်ႈတူၺ်းတႅၵ်ႈတူၺ်း ၽႃႉၵၢင်ႁၢဝ်၊ဢၼ်ဢဝ်ၵွၵ်းၶႂၢႆးတူင်တူၺ်းမုၼ်ႈလိၼ်၊ ဢၼ်ဢဝ်ယႃႇၸူႇၸၢင်ႈႁိဝ်ႈတူၺ်းလွႆလူင် လွႆဢွၼ်ႇတင်းလၢႆလႆႈၼၼ်ႉမီးသေၵေႃႉသေၵူၼ်းႁိုဝ်း။
ၵေႃႉဢၼ်ၸႂ်ႉ ထႃႇဝရႃႉၽြႃး၊ ႁႂ်ႈႁဵတ်းဢၼ်ၼၼ်ႉႁဵတ်းဢၼ်ၼႆႉ၊ ၵေႃႉဢၼ်သင်ႇသွၼ်မၼ်းၸဝ်ႈ၊ ဢိၵ်ႇတင်းပၼ်တၢင်းၵျၢမ်ႇတၢင်းပွင်တီႈမၼ်းၸဝ်ႈၼၼ်ႉမီးသေၵေႃႉသေၵူၼ်းႁိုဝ်း။
မၼ်းၸဝ်ႈတိူင်ႇပၢင်ႇလူၺ်ႈၵၼ်တင်းၽူႈလႂ် ပုၼ်ႈလွင်ႈၼင်ႇႁိုဝ်မၼ်းၸဝ်ႈတၵ်းႁုတၵ်းၸၢင်ႈၼၼ်ႉသေလႄႈ သွၼ်ဢဝ်လွင်ႈတၢင်းဢၼ်တၵ်းလႆႈႁဵတ်း လႆႈသၢင်ႈဢၼ်လႂ်ၼၼ်ႉ။
ပုၼ်ႈ ထႃႇဝရႃႉၽြႃး၊ ၸိုင်၊ၵူၼ်းၵူႈၸိူဝ်ႉၵူႈမဵဝ်း ပဵၼ်ဢၼ်လၢႆလၢႆ၊မိူၼ်ၸိူဝ်ႉၼင်ႇယွတ်ႇ ၼမ်ႉဢွၼ်ႇယွတ်ႇၼိုင်ႈၵူၺ်းလႄႈ၊ ၵုၼ်တင်းလၢႆဢၼ်မီးတီႈၵႆၼၼ်ႉၵေႃႈမဝ်သေမုၼ်ႈလိၼ်လူးၵွၼ်ႇဢေႃႈ။
ၵႃႈဢၼ်ပဵၼ်တူဝ်သတ်းၵႃႈၼႂ်းထိူၼ်ႇ လေႇပၼုၼ်ႇ၊ ၸိူဝ်းၼၼ်ႉ ယင်းဢမ်ႇပေႃးဢမ်ႇၵုမ်ႇပုၼ်ႈတူဝ်တၢင်းလူႇ၊တီႈ ထႃႇဝရႃႉၽြႃး၊ လႄႈ တူၼ်ႈမႆႉတင်းလၢႆယင်းပဵၼ်ဢၼ်လဵၵ်ႉဢၼ်ၵေႇပုၼ်ႈတႃႇတၵ်းၸပ်းၽႆးသႂ်ႇၽႆး။
ၵႃႈတီႈၽၢႆႇၼႃႈမၼ်းၸဝ်ႈၼၼ်ႉ မဵဝ်းၵူၼ်းတင်းလၢႆပဵၼ်ၸိူဝ်ႉၼင်ႇဢၼ်ဢမ်ႇၸႂ်ႈၵႃႈသင်လႄႈမၼ်းၸဝ်ႈမၢတ်ႈပဵၼ် ဢၼ်ဢမ်ႇမီးၵႃႈမီးၶၼ်၊ယဵင်ႈၶႅၼ်းလဵၵ်ႉၼႃႇသေဢၼ်ဢမ်ႇမီးၵႃႈသင်ၼၼ်ႉဢေႃႈ။
ပိူဝ်ႈၼႆလႄႈတၵ်းဢဝ်ၽြႃးပဵၼ်ၸဝ်ႈတႅၵ်ႈတိူင်းၵၼ်တင်းၽူႈလႂ်လႆႈ။ တၵ်းဢဝ်ပုင်ႇႁၢင်ႈဢၼ်လႂ်တႅၵ်ႈတိူင်းၵၼ်တင်းမၼ်းၸဝ်ႈလႆႈ။
မၼ်းၸဝ်ႈဢမ်ႇပဵၼ်ၸိူဝ်ႉၼင်ႇႁုၼ်ႇႁၢင်ႈသၢင်းထုဢၼ်ဢဝ်မိုဝ်းၵူၼ်းႁဵတ်း၊ ဢၼ်ၸၢင်ႈၶမ်းၸၢင်ႈငိုၼ်းၶဝ်ဢဝ်တင်းၶမ်းဢုမ်ႇႁေႃႇလႄႈဢဝ်မႆငိုၼ်းလႂ်သႂ်ႇၼၼ်ႉ။
ၵေႃႉဢၼ်လူႇတၢၼ်းငိုၼ်းၶမ်းဢမ်ႇလႆႈ ၼၼ်ႉၵေႃႈ၊မၼ်းၸၢင်ႈလိူၵ်ႈဢဝ်တုမ်မႆႉ မဵဝ်းဢၼ်ဢမ်ႇၸၢင်ႈၽင်ႉၸၢင်ႈဢုၼၼ်ႉလႄႈ ၸၢင်ႈႁႃဢဝ်ၸၢင်ႈမႆႉဢၼ်ၵတ်ႉဢၼ်ၶႅၼ်ႇ သေယဝ်ႉ၊ႁဵတ်းႁုၼ်ႇႁၢင်ႈသၢင်းထု ဢၼ်တမ်းဝႆႉ၊ဢမ်ႇႁႂ်ႈမၼ်းလူမ်ႉလႆႈၼၼ်ႉဢေႃႈ။
သူဢမ်ႇႁုႁိုဝ်း။ သူဢမ်ႇငိၼ်းႁိုဝ်း။ ဢမ်ႇလႆႈမွၵ်ႇလၢတ်ႈသူဝႆႉၸဵမ်မိူဝ်ႈၵေႃႇၸႃႉႁူဝ်ပိုင်းၼၼ်ႉႁိုဝ်း။ သူဢမ်ႇႁုဢမ်ႇၸႅင်ႈဝႆႉၸဵမ်မိူဝ်ႈတႄႇတင်ႈငဝ်ႈလိၼ်မိူင်းၼၼ်ႉႁိုဝ်း။
ပဵၼ်ၸဝ်ႈဢၼ်ၼင်ႈယူႇၵႃႈၼိူဝ်ၸၢၵ်ႈလိၼ် မိူင်းလႄႈမၢတ်ႈၵူၼ်းလိၼ်မိူင်းတင်းလၢႆပဵၼ်ၸိူဝ်ႉၼင်ႇၸၵ်းတႅၼ်ၵူၺ်းလႄႈ မၼ်းၸဝ်ႈၽုၺ်ႇၵီႈၽႃႉၵၢင်ႁၢဝ်မိူၼ်ၸိူဝ်ႉၼင်ႇ ၽႃႈၵင်ႈဢၼ်ၽိုၼ်ယႂ်ႇမိူၼ်ၸိူဝ်ႉၼင်ႇ သုမ်ႉထဵင်ပုၼ်ႈဢၼ်တၵ်းယူႇၼၼ်ႉ။
ပဵၼ်ၸဝ်ႈဢၼ်ႁဵတ်းႁႂ်ႈၶုၼ်တင်းလၢႆပဵၼ်ဢၼ်ဢမ်ႇပွင်ႇလွင်ႈၵႃႈသင်လႄႈ ႁႂ်ႈၶုၼ်ဢၼ်ၸီႇယၢင်ႇတြႃးတင်းလၢႆပဵၼ်ဢၼတ်ႉတႃႉၼၼ်ႉဢေႃႈ။
ၶဝ်ပဵၼ်မိူၼ်ၸိူဝ်ႉၼင်ႇတူၼ်ႈမႆႉဢွၼ်ႇဢၼ်ႁၢၵ်ႈမၼ်းတိုၵ်းႁႃယင်ႇၶဝ်ႈၵႃႈၼႂ်းလိၼ်၊ မိူဝ်ႈဢၼ်မၼ်းၸဝ်ႈဢဝ်လူမ်းပဝ်ႇသႂ်ႇၶဝ်ၼၼ်ႉ ႁဵဝ်ႇႁႅင်ႈၵႂႃႇလႄႈလူမ်းၽိဝ်ႁုင်ထူဝ်းပတ်ႉဢဝ် ပိဝ်ၵႂႃႇမိူၼ်ၸိူဝ်ႉၼင်ႇၵႅပ်ႇၼၼ်ႉဢေႃႈ။
ၽြႃးပဵၼ်ၸဝ်ႈဢၼ်မူတ်းၸၢင်ႇၼၼ်ႉတၵ်းတႅၵ်ႈၼိူင်းၵၼ်တင်းၽူႈလႂ်လႆႈ၊ ၵေႃႉဢၼ်မိူၼ်ၵၼ်တင်းမၼ်းၸဝ်ႈလႆႈၼၼ်ႉမီးသေၵေႃႉသေၵူၼ်းႁိုဝ်း။
ဢွၼ်ၵၼ်ႁႅၼ်တူၺ်းၽႃႉၵၢင်ႁၢဝ်လူး။ ၽူႈလႂ်ၽၢၼ်ႇသၢင်းႁဵတ်းပဵၼ်လၢဝ်ၸိူဝ်းဢၼ်မႂ်း ႁၼ်ၼၼ်ႉ၊ၸဝ်ႈဢၼ်ဢွၼ်ဢဝ်ၶဝ်ပေႃႇဢွၵ်ႇမႃး ပဵၼ်မူႇပဵၼ်ၽုင်ၼၼ်ႉ၊ၶဝ်မီးၼမ်ထၢၼ်ႇႁိုဝ်ၵေႃႈ မၼ်းၸဝ်ႈႁုလႄႈႁွင်ႉႁဵၵ်ႈၸိုဝ်ႈၶဝ်လုၵ်ႈလႂ် လုၵ်ႈၼၼ်ႉတင်းသဵင်ႈတင်းလူင်ဢေႃႈ။ လွင်ႈမၼ်းၸမ်ႉ၊ၽုင်းတၼ်းၶူဝ်းမၼ်းၸဝ်ႈ ယႂ်ႇၼႃႇလႄႈၶဝ်ၸိူဝ်းၼၼ်ႉဢမ်ႇလႆႈႁူင်ႈလႆႈႁၢႆသေလုၵ်ႈဢေႃႈ။
ဢိသရေး၊ ႟။ ႁဵတ်းသင်လႄႈမႂ်းတၢင်ႇဢပျတ်ႈ ပွင်ႉၶၢင်းလႄႈဝႃႈ၊ “ ထႃႇဝရႃႉၽြႃး၊ ဢမ်ႇႁုတုၵ်ႉၶႃႉတၢင်းၽၢၼ်ၵဝ်၊ ဢမ်ႇဝႆႉဢမုတီႈၽေးရၢၼ်ႇဢၼ်ဢမ်ႇတြႃးတင်းလၢႆၼၼ်ႉ၊” ဝႃႈၼင်ႇၼႆႁိုဝ်း။
မႂ်းဢမ်ႇတွၼ်ႉႁုႁိုဝ်း။ မႂ်းဢမ်ႇတွၼ်ႉငိၼ်းႁိုဝ်း။ ထႃႇဝရႃႉၽြႃး၊ ပဵၼ်ၽြႃးပဵၼ်ၸဝ်ႈဢၼ်တႄႇယူႇတႃႇသေႇဢမ်ႇထၢတ်ႇဢေႃႈ။ မၼ်းၸဝ်ႈၽၢၼ်ႇသၢင်းႁဵတ်းပဵၼ်လေႃးၵႃႉဢေႃႈ။ မၼ်းၸဝ်ႈဢမ်ႇတွၼ်ႉႁိူဝ်ႉၼူၼ်းလႄႈမႆႈၸႂ်ၶီၸႂ်၊ ၽူႈလႂ်ဢမ်ႇႁုတၢင်းၵျၢမ်ႇတၢင်းပွင်မၼ်းၸဝ်ႈလႆႈလႃးလႃး။
မၼ်းၸဝ်ႈပၼ်ႁႅင်းတီႈၵေႃႉဢၼ်ႁိူဝ်ႉၼူၼ်းလႄႈႁႅင်းဢူၼ်ႈၼၼ်ႉဢေႃႈ။
ပိၵ်ႉသမ်ႉၵူၼ်းၼုမ်ႇၵူၼ်းၵမ်ယင်းၸၢင်ႈႁိူဝ်ႉၼူၼ်း ႁႅင်းဢူၼ်ႈၵႂႃႇ၊ၵူၼ်းဢွၼ်ႇတင်းလၢႆၼၼ်ႉၵေႃႈၸၢင်ႈႁိူဝ်ႉဢူၼ်ႈလႄႈလူမ်ႉဢေႃႈ။
ၶဝ်ၸိူဝ်းဢၼ်မုင်ႈမွင်း ထႃႇဝရႃႉၽြႃး၊ ယူႇၼၼ်ႉၸမ်ႉ၊တၵ်းလႆႈၶၢမ်ႇတၢင်းဢၼ် မႄးၵုမ်းမႄးႁဵတ်းဢဵၼ်ႁႅင်းဢၼ်မႂ်ႇလႄႈတၵ်း ဢဝ်ပိၵ်ႇမိၼ်ၶိုၼ်ႈမိူၼ်ၸိူဝ်ႉၼင်ႇ ၼူၵ်ႉၶၢင်ႇလေႃႉဢေႃႈ။ ၶဝ်တၵ်းၶုၼ်ႇလႅၼ်ႈသေၵေႃႈဢမ်ႇလႆႈမီးတၢင်းဢၼ်ယၢပ်ႇၸႂ်ၶၼ်ၸႂ်၊ ၶဝ်တၵ်းၵႂႃႇတၢင်းပႆတၢင်းသေၵေႃႈဢမ်ႇလႆႈမီးတၢင်းဢၼ်ႁိူဝ်ႉဢၼ်ၼူၼ်း။
ၽြႃးပဵၼ်ၸဝ်ႈမီးဢမိင်ႉလႄႈဝႃႈၸမ်ႉ၊ “မိူင်းဢၼ်ယူႇတီႈၵႆၶဝ်႟။ ယူႇတဵတ်ႇတဵတ်ႇလႄႈထွမ်ႇငိၼ်းၵႂၢမ်းၵဝ်တႃႉ။ ႁႅၼ်းဢမုသူဝႆႉႁႂ်ႈလႆႈၸွႆးတၢင်ႇၵႃႈတီႈလုမ်းတႃႉ။ သူတၵ်းမီးဢၶႂၢင်ႉဢၼ်လၢတ်ႈၵႂၢမ်းဢေႃႈ။ ဢွၼ်ၵၼ်မႃးလႄႈတႅပ်းတတ်းလွင်ႈၵေႃႉလႂ်ၽိတ်းၵေႃႉလႂ်ထုၵ်ႇၼၼ်ႉတႃႉႁဝ်း။
ၽူႈလႂ်ပႃးဢဝ်ၶုၼ်ဢၼ်ဢွင်ႇသိုၵ်းတီႈမိူင်းၽၢႆႇတၢင်းဝၼ်းဢွၵ်ႇၼၼ်ႉမႃးလႄႈ ႁႂ်ႈမၼ်းပႄႉၼႅင်ႇၵႃႈတီႈဢၼ်မၼ်းၵႂႃႇၵူႈတီႈၵူႈလႅၼ်ၼၼ်ႉ။ ၽူႈလႂ်ဢၢပ်ႈပၼ်ႁႂ်ႈမၼ်းပႄႉၼႅင်ႇၶုၼ်ႁေႃၶမ်းတင်းလၢႆ၊ဢိၵ်ႇတင်းၵူၼ်းမဵဝ်းတင်းလၢႆ၊ လၢပ်ႇမၼ်းၼၼ်ႉၶႃႈၽၼ်းၶဝ်တူၵ်းသုမ်းမိူၼ်ၸိူဝ်ႉၼင်ႇဢၼ်ႁႂ်ႈၶဝ်ပဵၼ်မုၼ်ႈလိၼ်ဢေႃႈ။ ပိုၼ်ၵၢင်ႇမၼ်းႁဵတ်းႁႂ်ႈၶဝ်တႅၵ်ႇယၢႆႈၵႂႃႇ မိူၼ်ၸိူဝ်ႉၼင်ႇၽိူင်းဢၼ်ပိဝ်ၵႂႃႇၵႃႈၼႂ်းလူမ်းၼၼ်ႉဢေႃႈ။
မၼ်းလိုပ်ႈၸွမ်းလမ်းၸွမ်းၶဝ်ပူၼ်ႉၵႂႃႇလွတ်ႈၽေး လွတ်ႈရၢၼ်ႇလႄႈၶၼ်ၽႂ်းၼႃႇထၢၼ်ႈပေႃးတိၼ်မၼ်းဢမ်ႇတိူဝ်ႉလိၼ်ဢေႃႈ။
ၽူႈလႂ်ႁဵတ်းႁႂ်ႈလွင်ႈတၢင်းၼႆႉပဵၼ်မႃး၊ၽူႈလႂ်ၶပ်ႉမၢႆပိုၼ်းၼႆႉဝႆႉဝႃႈၼႆၸမ်ႉ၊ ၵဝ် ထႃႇဝရႃႉၽြႃး၊ မီးၵႃႈတီႈၼၼ်ႈၸဵမ်မိူဝ်ႈၵေႃႇၸႃႉႁူဝ်ပိုင်းလႄႈ ၵဝ် ထႃႇဝရႃႉၽြႃး၊ တၵ်းမီးၵႃႈတီႈၼၼ်ႈၼႂ်းမိူဝ်ႈဢၼ်သုတ်းဢၼ်ၵွႆၼၼ်ႉဢေႃႈ။
ၶဝ်ၸိူဝ်းဢၼ်ယူႇတီႈမိူင်းၵႆမိူင်းယၢၼ်ဢွၼ်ၵၼ်ႁၼ်တၢင်းႁဵတ်းၵဝ်လႄႈ မီးတၢင်းဢၼ်ၵူဝ်ဢၼ်ႁႄလႄႈပဵၼ်ဢၼ်သၼ်ႇသၼ်ႇသၢႆသၢႆယူႇဢေႃႈ။ ပိူဝ်ႈၼႆလႄႈၶဝ်ၸုတုမ်ၵၼ်လႄႈသုတ်ႉၸပ်းသုတ်ႉၸူးဢေႃႈ။
ၵူၼ်းၸၢင်ႈမေႃတိၼ်မေႃမိုဝ်းတင်းလၢႆ ၸွႆႈထႅမ်ၵၼ်ၵေႃႉၼိုင်ႈလႄႈၵေႃႉၼိုင်ႈ ပၼ်ဢဵၼ်ပၼ်ႁႅင်းတီႈၵၼ်ဢေႃႈ။
ၵူၼ်းၸၢင်ႈမႆႉတင်းလၢႆလၢတ်ႈတီႈၸၢင်ႈၶမ်း လႄႈဝႃႈ၊ ‘ႁဵတ်းယဝ်ႉတူဝ်ႈယဝ်ႉ၊’ ဝႃႈၼႆဢေႃႈ။ ၵေႃႉဢၼ်ၶတ်းထူႁုၼ်ႇႁၢင်ႈသၢင်းထုႁႂ်ႈဢွၵ်ႇငဝ်း ၼၼ်ႉပၼ်ဢဵၼ်ပၼ်ႁႅင်းတီႈၵေႃႉဢၼ် တွၵ်ႇလဵၵ်းမၢႆႇၼႃးသႂ်ႇၼၼ်ႉဢေႃႈ။ ၶဝ်လၢတ်ႈတီႈၵၼ်လႄႈဝႃႈ၊ ‘ယိူဝ်ႇၸိူၵ်ႈ မၼ်းၼၼ်ႉမႅၼ်ႈလီယဝ်ႉယဝ်ႉ၊’ ဝႃႈၼႆလႄႈ ၶဝ်တွၵ်ႇလဵၵ်းမၢႆႇၼႃးသႂ်ႇႁႂ်ႈႁုၼ်ႇႁၢင်ႈသၢင်းထုၼၼ်ႉမၼ်ႈၶိူင်ႇဢေႃႈ။
မဵဝ်း ဢိသရေး၊ ဢၼ်ပဵၼ်ၶႃႈၵဝ်႟။ သူၸမ်ႉ၊ပဵၼ်ၵူၼ်းမဵဝ်းဢၼ်ၵဝ်လိူၵ်ႈဢဝ်ဝႆႉ၊ ဢၼ်ဝႃႈၸိူဝ်ႉၶိူဝ်း ဢႃႇပြႃႇႁၢမ်ႇ၊ ဢၼ်ပဵၼ်ၵေႃႉသႄႈၵဝ်ၼၼ်ႉဢေႃႈ။
ၵဝ်တိုတ်ႉၸၼ်ဢဝ်သူသေၵႃႈတီႈဢၼ်သုတ်းလႅၼ်လိၼ်မိူင်းလႄႈ ႁွင်ႉဢဝ်သူသေၵႃႈတီႈႁိမ်းၸဵင်ႇႁိမ်း လႅၼ်ဢၼ်ၵႆၼႃႇလူင်လၢင်ၼၼ်ႉမႃးလႄႈ လၢတ်ႈတီႈသူလႄႈဝႃႈ၊ ‘သူပဵၼ်ၶႃႈၵဝ်ဢေႃႈ၊’ ဝႃႈၼႆလႄႈၵဝ်ဢမ်ႇပႄႇဢမ်ႇပႅတ်ႈသူၵူၺ်း၊ၵဝ်လိူၵ်ႈဢဝ်သူဢေႃႈ။
ယႃႇပေၵူဝ်ပေႁႄ။ ၵဝ်မီးယူႇလူၺ်ႈၵၼ်တင်းသူဢေႃႈ။ ၵဝ်ပဵၼ်ၽြႃးပဵၼ်ၸဝ်ႈသူလႄႈတၵ်းႁႂ်ႈသူမၼ်ႈၶိူင်ႇဢေႃႈ။ ၵဝ်တၵ်းပႂ်ႉၸွႆႈပႂ်ႉထႅမ်သူ၊တၵ်းၵႅတ်ႇၶႄႁႄႉၵင်ႈသူလႄႈၵႄႇသႄႇဢဝ်သူလွတ်ႈဢေႃႈ။
ၶဝ်ၸိူဝ်းဢၼ်ဢွၵ်ႇတေႃးသႃႉတေႃႇသူၼၼ်ႉ တၵ်းမီးတၢင်းဢၼ်ဢူၵ်းဢၢႆ၊တၢင်းဢၼ်ၼႃႈလုဢေႃႈ။ ၶဝ်ၸိူဝ်းဢၼ်တိုၵ်းတေႃးသူၼၼ်ႉတၵ်းလႆႈၶၢမ်ႇတၢင်းတၢႆသေယဝ်ႉ၊
သူတေသွၵ်ႈႁႃၶဝ်ၸိူဝ်းဢၼ်တိုၵ်းတေႃးၼၼ်ႉသေၵေႃႈ၊ဢမ်ႇထူပ်းဢမ်ႇႁၼ်။ ၶဝ်ၸိူဝ်းဢၼ်တိုၵ်းတေႃးသူၼၼ်ႉပဵၼ်ဢၼတ်ႉတႃႉဢမ်ႇပွင်ႇလွင်ႈၵႃႈသင်ဢေႃႈ။
ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။ ၵဝ်ပၼ်ဢဵၼ်ပၼ်ႁႅင်းတီႈသူလႄႈလၢတ်ႈဝႃႈ၊ ယႃႇပေၵူဝ်ပေႁႄ။ ၵဝ်တၵ်းၸွႆႈထႅမ်သူဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “မဵဝ်း ယႃႇၵုပ်ႈ၊ ဢၼ်ပဵၼ်တိူၵ်ႇလိူၼ်႟။ ၵူၼ်းမဵဝ်း ဢိသရေး၊ တင်းလၢႆ႟။ ယႃႇပေၵူဝ်ပေႁႄ၊ၵဝ်တၵ်းၸွႆႈထႅမ်သူဢေႃႈ။ ၵဝ်ၽြႃးပဵၼ်ၸဝ်ႈဢၼ်မူတ်းၸၢင်ႇလႄႈ ပဵၼ်ၽြႃးၵူၼ်းမဵဝ်း ဢိသရေး၊ ၼႆႉၵႄႇသႄႇၶျွတ်ႈဢဝ်ႁႂ်ႈသူလွတ်ႈဢေႃႈ။
ၵဝ်တၵ်းႁႂ်ႈသူပဵၼ်ၸၢၵ်ႈၼူတ်ႈၶဝ်ႈပိူၵ်ႇဢၼ်မႂ်ႇမႂ်ႇဢၼ်မီးသိၵ်ႈၶဵဝ်ႈဢၼ်ၽၢႆၽၢႆၼၼ်ႉဢေႃႈ။ သူတၵ်းၼူတ်ႈလွႆလူင်တင်းလၢႆႁႂ်ႈလႅဝ် ယွၵ်းယွႆႈၵႂႃႇလႄႈၼူတ်ႈလွႆဢွၼ်ႇတင်းလၢႆပဵၼ်ၸိူဝ်ႉၼင်ႇမုၼ်ႈလိၼ်ၵႂႃႇဢေႃႈ။
သူတၵ်းလၢင်ၽႄႇၶဝ်ၵႃႈၼႂ်းလူမ်းလႄႈ လူမ်းတၵ်းထူဝ်းပတ်ႉဢဝ်ၶဝ်ပိဝ်ၵႂႃႇၸၢတ်ႇပိုၼ်ၵႂႃႇဢေႃႈ။ မိူဝ်ႈၼၼ်ႉသူတၵ်းဢွၼ်ၵၼ်မူၼ်ႈပျေႃႇၵွပ်ႈပိူဝ်ႈဢၼ်ၵဝ်ပဵၼ်ၽြႃးပဵၼ်ၸဝ်ႈသူၼၼ်ႉဢေႃႈ။ သူတၵ်းယုၵ်ႉယွင်ႈယွင်ႈယေႃးၵဝ်ဢၼ်ဝႃႈ၊ ၽြႃးပဵၼ်ၸဝ်ႈဢၼ်မူတ်းၸၢင်ႇလႄႈပဵၼ်ၽြႃးၵူၼ်းမဵဝ်း ဢိသရေး၊ ၼၼ်ႉဢေႃႈ။
ယၢမ်းမိူဝ်ႈဢၼ်ၵူၼ်းၵဝ်တင်းလၢႆၸုတ်ႈလုတ်ႈၼမ်ႉၵိၼ်၊ ၵူင်ၶေႃးၶဝ်ႁႅင်ႈလႄႈယၢၵ်ႇၼမ်ႉၼၼ်ႉ၊ၵဝ် ထႃႇဝရႃႉၽြႃး၊ တၵ်းထွမ်ႇဢဝ်ၵႂၢမ်းၶဝ်လႄႈ ၵဝ်ၽြႃးပဵၼ်ၸဝ်ႈဢၼ်ပဵၼ်ၽြႃးၵူၼ်းမဵဝ်း ဢိသရေး၊ ၼႆႉတၵ်းဢမ်ႇၸုၼ်ႉပႅတ်ႈၶဝ်။
ၵဝ်တၵ်းႁႂ်ႈၼမ်ႉႁွင်ႈၼမ်ႉၵႄးတင်းလၢႆလႆၵႃႈၼႂ်းဝူင်ႈၵၢင်လွႆဢိုၼ်ႈတင်းလၢႆ၊ တၵ်းႁႂ်ႈၼမ်ႉဢွၵ်ႇႁူးလႆၵႃႈၼႂ်းၶူင်ႈႁူၺ်ႈတင်းလၢႆဢေႃႈ။ ၵဝ်တၵ်းႁႂ်ႈထိူၼ်ႇႁႅင်ႈပဵၼ်ၼမ်ႉၼွင်လႄႈ တၵ်းႁႂ်ႈလိၼ်ႁႅင်ႈလိၼ်ႁွင်ပဵၼ်ၼမ်ႉဢွၵ်ႇႁူးတင်းလၢႆဢေႃႈ။
ၵဝ်တၵ်းႁႂ်ႈတူၼ်ႈမႆႉဢႃႇရိတ်ႉ၊တူၼ်ႈမႆႉဢၵႃႇသႃႉ၊ တူၼ်ႈမွၵ်ႇမုရတု၊တူၼ်ႈမႆႉသၢၼ်ႇလုၼ်ႇတင်းလၢႆဢွၵ်ႇၵႃႈၼႂ်းထိူၼ်ႇႁႅင်ႈထိူၼ်ႇလူင်၊ ၵႃႈတီႈပၢင်ႇတီႈပဵင်းတၵ်းဢွၵ်ႇတူၼ်ႈမႆႉပႅၵ်ႇ၊ တူၼ်ႈမႆႉတတေႇရႃႉတင်းတူၼ်ႈမႆႉတႃႇသုရႃႉတင်းလၢႆဢေႃႈ။
ၵူၼ်းတင်းလၢႆတၵ်းႁၼ်လွင်ႈတၢင်းၼႆႉသေလႄႈ ႁုၸႅင်ႈလွင်ႈဢၼ်ၵဝ် ထႃႇဝရႃႉၽြႃး၊ ႁဵတ်းပဵၼ်လွင်ႈတၢင်းၼႆႉၼၼ်ႉဢေႃႈ။ ၶဝ်တၵ်းၶႆႈၸႂ်ဝူၼ်ႉၸႂ်လႄႈႁုၸႅင်ႈလွင်ႈဢၼ် ၽြႃးပဵၼ်ၸဝ်ႈဢၼ်မူတ်းၸၢင်ႇ ဢၼ်ပဵၼ်ၽြႃးၵူၼ်းမဵဝ်း ဢိသရေး၊ ၼႆႉ၊ ႁဵတ်းႁႂ်ႈပဵၼ်မႃးၸိူဝ်ႉၼင်ႇၼႆၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၶုၼ်ႁေႃၶမ်းၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊ “သူဢၼ်ပဵၼ်ၽြႃးတင်းလၢႆတီႈမဵဝ်းၵူၼ်းၶဝ်ၼၼ်ႉ႟။ ဢဝ်ဢမုသူၼၼ်ႉၸွႆးတၢင်ႇသႂ်ႇတႃႉ။ ဢဝ်သၢၵ်ႈသေႇသူဢၼ်မၼ်ႈၶိူင်ႇၼၼ်ႉမႃးတွပ်ႇထဵင်တႃႉ။
မႃးလႄႈႁေႃးလၢတ်ႈလွင်ႈတၢင်းဢၼ်တၵ်းပဵၼ်ၸိူဝ်ႉႁိုဝ်မႃးၼၼ်ႉတႃႉ။ ၵွပ်ႈၸိူဝ်ႉၼင်ႇၼႆလႄႈႁဝ်းတၵ်းႁုထႃႈမိူဝ်ႈဢၼ်မၼ်းပဵၼ်မႃးၼၼ်ႉဢေႃႈ။ ဢဝ်လွင်ႈတၢင်းဢၼ်ပဵၼ်မႃးယဝ်ႉ၊ၸိူဝ်းၼၼ်ႉၽုၺ်ႇဢွၵ်ႇလၢတ်ႈၼႄတီႈလုမ်းလႄႈ၊ ၽုၺ်ႇဢွၵ်ႇၼႄပျႃးႁႂ်ႈႁဝ်းလႆႈၶႆႈၸႂ်ဝူၼ်ႉၸႂ်သေၵမ်းတႃႉ။
ဢဝ်လွင်ႈတၢင်းဢၼ်တၵ်းလႆႈပဵၼ်မႃးၸိူဝ်းၼၼ်ႉ ၽုၺ်ႇဢွၵ်ႇၼႄပျႃးႁႂ်ႈႁဝ်းလႆႈႁုလွင်ႈဢၼ်သူပဵၼ်ၽြႃးၼၼ်ႉတႃႉ။ ဢွၼ်ၵၼ်ႁဵတ်းဢမုဢၼ်လီ၊ဢမ်ႇၼၼ်ဢမုဢၼ်ဢမ်ႇလီသေၸိူဝ်ႉသေပိူင်ဢၼ်ႁဵတ်း ႁႂ်ႈႁဝ်းလႆႈၵူဝ်ႁႄလႄႈတူၵ်းၸႂ်လႂ်တိုၼ်ႇတႃႉ။
သူၼႆႉပဵၼ်ဢၼ်လၢႆလၢႆလွၵ်ႇလွၵ်ႇလႄႈတၢင်းႁဵတ်းသူၵေႃႈဢမ်ႇပွင်လွင်ႈၵႃႈသင်လႃးလႃး၊ ၵေႃႉဢၼ်ဝႆႈသူၼၼ်ႉၵေႃႈပဵၼ်ဢၼ်လီႁင်ႈဢဵတ်ႇသဵတ်ႇဢေႃႈ။
ၵဝ်လိူၵ်ႈဢဝ်ၵူၼ်းၵေႃႉၼိုင်ႈတီႈမိူင်းၽၢႆႇတၢင်းဝၼ်းဢွၵ်ႇ မႃးလႄႈ ၵဝ်တၵ်းဢဝ်မၼ်းမႃးတိုၵ်းတေႃးၽၢႆႇတၢင်းႁွင်ႈပုၼ်ႉဢေႃႈ။ မၼ်းၼၼ်ႉယဵပ်ႇၶၢမ်ႈၸဝ်ႈၶုၼ်တင်းလၢႆမိူၼ်ၸိူဝ်ႉၼင်ႇၵူမ်ႇၼင်ႇဢုင်၊ ၸိူဝ်ႉၼင်ႇဢၼ်ၸဝ်ႈမေႃႈယဵပ်ႇတဝ်လိၼ်ၼဵဝ်ၼၼ်ႉဢေႃႈ။
ၼႂ်းသူၼႆႉၽူႈလႂ်ႁေႃးလၢတ်ႈလွင်ႈတၢင်းဢၼ်တၵ်းပဵၼ်မႃးၼၼ်ႉ၊ ႁႂ်ႈႁဝ်းပေႃးလႆႈဝႃႈ၊ ‘ၸႂ်ႈတႄႉတႄႉဢေႃႈ၊’ ဝႃႈၼႆၼၼ်ႉ။ ၽူႈလႂ်ဢမ်ႇလၢတ်ႈလွင်ႈတၢင်းၼႆႉသေၵေႃႉသေၵူၼ်း၊ ဢမ်ႇမီးၵေႃႉဢၼ်လႆႈငိၼ်းၵႂၢမ်းသူသေၵေႃႉသေၵူၼ်း။
ၵဝ် ထႃႇဝရႃႉၽြႃး၊ ပဵၼ်ၸဝ်ႈဢၼ်လၢတ်ႈ ၶၢဝ်ႇငၢဝ်းၼၼ်ႉတီႈဝဵင်း ၸိဢုၼ်ႇ၊ ဝႆႉဢွၼ်တၢင်းသုတ်းပိူၼ်ႈလႄႈ ပွႆႇၸႂ်ႉသၢၼ်ႇတမၢၼ်ႇၵႂႃႇတီႈဝဵင်း ယေႇရုသလႅမ်ႇ၊ ႁႂ်ႈလၢတ်ႈဝႃႈ၊ ‘ၵူၼ်းသူတင်းလၢႆမႃးယူႇယဝ်ႉ။ ၶဝ်ဢွၼ်ၵၼ်ၶိုၼ်းပွၵ်ႈမိူဝ်းတီႈႁိူၼ်းၶဝ်ယူႇဢေႃႈ၊’ ဝႃႈၼႆဢေႃႈ။
မိူဝ်ႈဢၼ်ၵဝ်လူတူၺ်းၵႃႈၼႂ်းၽြႃး တင်းလၢႆၼၼ်ႉ၊ၶဝ်ၼၼ်ႉဢမ်ႇၸၢင်ႈလၢတ်ႈၵႃႈသင်သေၵေႃႉသေၵူၼ်း၊ ၵဝ်တွင်ႈထၢမ်ၶဝ်လႄႈၶဝ်ဢမ်ႇၶိုၼ်းတွပ်ႇၶိုၼ်းလၢတ်ႈလႆႈသေၵေႃႉသေၵူၼ်း။
ၽြႃးၸိူဝ်းၼႆႉတင်းသဵင်ႈတင်းလူင်ပဵၼ်ဢၼတ်ႉတႃႉဢေႃႈ။ လွင်ႈတၢင်းဢၼ်ၶဝ်ႁဵတ်းၼၼ်ႉဢမ်ႇၸႂ်ႈၵႃႈသင်လႃးလႃး၊ ႁုၼ်ႇႁၢင်ႈသၢင်းထုတင်းလၢႆၵေႃႈ ပဵၼ်ဢၼ်လၢႆလၢႆဢမ်ႇမီးတၼ်းၶူဝ်းလႃးလႃး၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “လူတူၺ်း၊ၶႃႈၵူၼ်းၸႂ်ႉၵဝ် ဢၼ်ၵဝ်ထႅင်ႈဢဵၼ်ထႅင်ႈႁႅင်း၊ၵေႃႉဢၼ်ၵဝ်လိူၵ်ႈဢဝ်လႄႈထုၵ်ႇၸႂ်ၵျိူၵ်ႈၸႂ်ၼၼ်ႉတႃႉ။ ၵဝ်လႆႈႁႂ်ႈဝိၺိၺ်ႇၵဝ်တႄႇယူႇၵႃႈၼိူဝ် မၼ်းယဝ်ႉ။ မၼ်းတၵ်းပၼ်တြႃးဢၼ်ၽဵင်ႇပဵင်းၵၼ်ၵႃႈတီႈမဵဝ်းၵူၼ်းတင်းလၢႆဢေႃႈ။
မၼ်းတၵ်းဢမ်ႇၵိဝ်သဵင်လႄႈတွပ်ႇထဵင်ၶိုၼ်း။ တၵ်းဢမ်ႇလၢတ်ႈၵႂၢမ်းဢၼ်သဵင်ယႂ်ႇၸွမ်းတႃႈၸွမ်းတၢင်း။
မႆႉဢေႃႈဢၼ်ၶၢမ်ႇတၢင်းယဵပ်ႇတူပ်ႉယဝ်ႉၼၼ်ႉမၼ်းတၵ်းဢမ်ႇႁၵ်းသမ်ႉထႅင်ႈ။ သႆႈၵွၵ်းၽႆးဢၼ်ၽႆးၸမ်တၵ်းမွတ်ႇၼၼ်ႉမၼ်းတၵ်းဢမ်ႇမွတ်ႇပႅတ်ႈ။ မၼ်းတၵ်းပၼ်တြႃးဢၼ်ၽဵင်ႇပဵင်း ထႃႇဝရႃႉၼၼ်ႉတီႈၵူၼ်းတင်းလၢႆဢေႃႈ။
ႁႅင်းမၼ်းတၵ်းဢမ်ႇဢူၼ်ႈ၊ၸႂ်မၼ်းတၵ်း ဢမ်ႇလုလႄႈမၼ်းတၵ်းႁႂ်ႈတြႃးၸဝ်ႈတႄႇယူႇၵႃႈၼိူဝ်လိၼ်မိူင်းဢေႃႈ။ ၵူၼ်းမိူင်းၵႆတင်းလၢႆတၵ်းဢွၼ်ၵၼ်မုင်ႈမွင်းတြႃးမၼ်းယူႇဢေႃႈ၊” ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈၽၢၼ်ႇသၢင်းႁဵတ်းပဵၼ်ၽႃႉၵၢင်ႁၢဝ်လႄႈဢဝ်ၶဵင်ႈဝႆႉ၊ ဢဝ်လိၼ်မိူင်းၽႄႇၶႂၢၵ်ႈဢွၵ်ႇလူၺ်ႈၵၼ်တင်းၵႃႈဢၼ်မီးၵႃႈၼႂ်းမၼ်းလႄႈ ပၼ်ဢသၢၵ်ႈ၊ဢိၵ်ႇတင်းဝိၺိၺ်ႇၵႃႈတီႈၵူၼ်းမၼ်းတင်းလၢႆဢေႃႈ။ ၼင်ႇၼၼ်ႉလႄႈ ထႃႇဝရႃႉၽြႃး၊ ၽြႃးပဵၼ်ၸဝ်ႈမီးဢမိင်ႉတီႈၶႃႈ မၼ်းၸဝ်ႈလႄႈဝႃႈ၊
“ၵဝ် ထႃႇဝရႃႉၽြႃး၊ ႁွင်ႉမႂ်းဝႆႉလႄႈပၼ်ႁႅင်းတၼ်းၶူဝ်းတီႈမႂ်း၊ ပုၼ်ႈတႃႇႁႂ်ႈတြႃးသိုဝ်ႈတေႃႇမီးၵႃႈၼိူဝ်လိၼ်မိူင်းယူႇၼၼ်ႉဢေႃႈ။ ၵဝ်တၵ်းႁႂ်ႈမႂ်းပဵၼ်ၸိူဝ်ႉၼင်ႇပတိၺိၺ်ႇတီႈ ၵူၼ်းတင်းလၢႆပုၼ်ႈတၢင်းဢၼ်ႁိူဝ်ႈလႅင်းတီႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ၊
ႁႂ်ႈမႂ်းလႆႈၽုၺ်ႇမၢၵ်ႇတႃဢၼ်မွတ်ႇတင်းလၢႆ၊ ဢိၵ်ႇတင်းႁႂ်ႈလႆႈပွႆႇၶဝ်ၸိူဝ်းဢၼ်ၼင်ႈယူႇ ၵႃႈၼႂ်းတီႈဢၼ်လပ်းသိင်ႇ၊ၵႃႈၼႂ်းထွင်ႇၼၼ်ႉလွတ်ႈဢွၵ်ႇမႃးဢေႃႈ။
ၵဝ်ပဵၼ် ထႃႇဝရႃႉၽြႃး၊ ဢေႃႈ။ ဢၼ်ၼႆႉၸမ်ႉ၊ပဵၼ်ၼႃႇမႃႉၸိုဝ်ႈသဵင်ၵဝ်ဢေႃႈ။ မုၼ်သရေႇၵဝ်ၼၼ်ႉၵဝ်ဢမ်ႇပၼ်တီႈၽြႃးတၢင်ႇသူႇတၢင်ႇပႃး။ ၵုင်ႇသရေႇမုၼ်ၽုင်းၵဝ်ၵေႃႈဢမ်ႇပၼ်တီႈႁုၼ်ႇႁၢင်ႈသၢင်းထုတင်းလၢႆ။
လွင်ႈတၢင်းဢၼ်ၵဝ်ႁေႃးလၢတ်ႈထႃႈဝႆႉၼၼ်ႉၸိုင်၊တေႃႈလဵဝ်ၼႆႉပဵၼ်မႃးယဝ်ႉ။ တေႃႈလဵဝ်ၼႆႉၵေႃႈၵဝ်တၵ်းမွၵ်ႇလၢတ်ႈလွင်ႈတၢင်းဢၼ်မႂ်ႇမႂ်ႇတီႈမႂ်း၊ ဢွၼ်တၢင်းလွင်ႈၸိူဝ်းၼၼ်ႉတၵ်းပေႃႇပဵၼ်မႃးၼၼ်ႉဢေႃႈ၊” ဝႃႈၼင်ႇၼႆဢေႃႈ။
ဢွၼ်ၵၼ်ႁဵတ်းၵႂၢမ်းဢၼ်မႂ်ႇတီႈ ထႃႇဝရႃႉၽြႃး၊ တႃႉ။ လိၼ်မိူင်းတင်းသဵင်ႈတင်းလူင်႟။ ႁဵတ်းၵႂၢမ်းယွင်ႈယေႃးမၼ်းၸဝ်ႈတႃႉ။ ၸႃႉၸဵမ်ၶဝ်ၸိူဝ်းဢၼ်ၶၢမ်ႈပၢင်ႇလၢႆႇ၊ဢိၵ်ႇတင်းၵႃႈဢၼ်မီးၵႃႈၼႂ်းမၼ်းၼၼ်ႉတင်းလၢႆၶဝ်႟။ ဢွၼ်ၵၼ်ယွင်ႈယေႃးမၼ်းၸဝ်ႈတႃႉ။ ၶဝ်ၸိူဝ်းဢၼ်ယူႇၵႃႈတီႈမိူင်းၵႆမိူင်းယၢၼ်ၶဝ်႟။ ဢွၼ်ၵၼ်ႁဵတ်းၵႂၢမ်းတႃႉ။
ထိူၼ်ႇဢိၵ်ႇတင်းဝၢၼ်ႈဝဵင်းမၼ်းတင်းလၢႆၶဝ်႟။ ယွင်ႈယေႃးၽြႃးပဵၼ်ၸဝ်ႈတႃႉ။ ႁႂ်ႈၵူၼ်းဝဵင်း ၵေႇတႃႇ၊ တင်းလၢႆယွင်ႈယေႃးမၼ်းၸဝ်ႈတႃႉ။ ႁႂ်ႈၶဝ်ၸိူဝ်းဢၼ်ယူႇၼႂ်းဝဵင်း သေႇလႃႇ၊ တင်းလၢႆ ဢွၼ်ၵၼ်ၵိဝ်သဵင်ဢၼ်ၸူမ်းသိူဝ်းမူၼ်ႈပျေႃႇလႄႈ၊ ပၢဝ်ႇသေႃႇၵႃႈၼိူဝ်ပၢႆလွႆၸိၵ်းလွႆတင်းလၢႆတႃႉ။
ႁႂ်ႈၶဝ်ၸိူဝ်းဢၼ်ယူႇၵႃႈတီႈမိူင်းၵႆမိူင်းယၢၼ် ဢွၼ်ၵၼ်ယုၵ်ႉယွင်ႈမုၼ်သရေႇ ထႃႇဝရႃႉၽြႃး၊ တႃႉ။
ထႃႇဝရႃႉၽြႃး၊ ဢွၵ်ႇၵႂႃႇႁႂ်ႈလႆႈတိုၵ်းတေႃးမိူၼ်ၸိူဝ်ႉၼင်ႇၵူၼ်းသိုၵ်းႁၢၼ်ဢေႃႈ။ မၼ်းၸဝ်ႈတၼ်းဝႆႉယဝ်ႉလႄႈၸႂ်ႁႅင်းယႂ်ႇပုၼ်ႈၼႃႈသိုၵ်းဢေႃႈ။ မၼ်းၸဝ်ႈႁွင်ႉပၢဝ်ႇပၼ်ဢမိင်ႉသိုၵ်းလႄႈပၢဝ်ႇသေႃႇတီႈၼႃႈသိုၵ်းသေယဝ်ႉ၊ မၼ်းၸဝ်ႈၼႄပျႃးႁႅင်းတၼ်းၶူဝ်းၸဝ်ႈဢၼ်ၶတ်းၵၼ်တင်းရၢၼ်ႇသူႇတင်းလၢႆဢေႃႈ။
ၽြႃးပဵၼ်ၸဝ်ႈမီးဢမိင်ႉၸမ်ႉ၊ “ၵဝ်ယင်းဢမ်ႇတၵ်ႉသဵင်လႄႈယူႇႁိုင်ၼႃႇယဝ်ႉ၊ ၵဝ်ယိူၼ်ႉၸႂ်ၵၼ်ႈၸႂ်ဢမ်ႇႁႂ်ႈလႆႈၶိုၼ်းတွပ်ႇၵႂၢမ်းသူးတွင်းၵူၼ်းၵဝ်တင်းလၢႆယဝ်ႉ။ မိူဝ်ႈလဵဝ်ၼႆႉၸမ်ႉ၊ၶိင်ႇဢၼ်ၵဝ်တၵ်းႁဵတ်းသၢင်ႈၼၼ်ႉႁွတ်ႈမႃးယဝ်ႉလႄႈ၊ ၵဝ်တၵ်းႁွင်ႉသႅၼ်ႇမိူၼ်ၸိူဝ်ႉၼင်ႇမႄႈယိင်းဢၼ် ၶၢမ်ႇဝူၺ်ႇတၼႃႇတၢင်းဢၼ်တၵ်းၵိူတ်ႇလဵင်ႉလုၵ်ႈၼၼ်ႉဢေႃႈ။
ၵဝ်တၵ်းႁႂ်ႈလွႆလူင်လွႆဢွၼ်ႇတင်းလၢႆပဝ်ႇလၢပ်ႈႁၢမ်းၵႂႃႇလႄႈ ႁႂ်ႈယိူဝ်ႈယႃႈ၊ဢိၵ်ႇတင်းတူၼ်ႈမႆႉတင်းလၢႆႁဵဝ်ႇႁႅင်ႈၵႂႃႇဢေႃႈ။ ၵဝ်တၵ်းႁႂ်ႈၼမ်ႉႁွင်ႈၼမ်ႉၵႄးတင်းလၢႆပဵၼ်ၵုင်းၵႂႃႇလႄႈ၊ႁႂ်ႈၼမ်ႉၼွင်တင်းလၢႆႁႅင်ႈႁွင်ၵႂႃႇဢေႃႈ။
ၵဝ်တၵ်းဢွၼ်ၵူၼ်းတႃမွတ်ႇတင်းလၢႆ သူင်ႇၸွမ်းသဵၼ်ႈတၢင်းဢၼ်ၶဝ်ဢမ်ႇတွၼ်ႉလႆႈပႆၼၼ်ႉဢေႃႈ။ ၵဝ်တၵ်းႁႂ်ႈလပ်းသိင်ႇပဵၼ်ဢၼ်လႅင်းလႄႈ ႁႂ်ႈဢၼ်ၶူင်ႉဢၼ်ယၢၼ်းတင်းလၢႆပဵင်းၵႃႈတီႈၽၢႆႇၼႃႈၶဝ်ဢေႃႈ။ လွင်ႈတၢင်းၸိူဝ်းၼႆႉပဵၼ်ၵတိၵဝ်လႄႈယင်းဢမ်ႇလုတ်ႈဢမ်ႇႁၢမ်းၵဝ်တၵ်းႁႂ်ႈပဵၼ်မႃးဢေႃႈ။
ၶဝ်ၸိူဝ်းဢၼ်ဢိင်ပိုင်ႈႁုၼ်ႇႁၢင်ႈသၢင်းထုတင်းလၢႆ၊ၸိူဝ်းဢၼ်ႁွင်ႉၵၢဝ်ႇတီႈ ႁုၼ်ႇႁၢင်ႈသၢင်းထုဝႃႈ၊ ‘ၽြႃးႁဝ်း’ ဝႃႈၼႆၼၼ်ႉ တၵ်းလႆႈၶၢမ်ႇတၢင်းဢၼ်ၶျႃးတူၵ်းတီႈတႅမ်ႇလႄႈ ႁွတ်ႈထိုင်တၢင်းဢၼ်ဢူၵ်းဢၢႆၼႃႇလူင်လၢင်ဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵူၼ်းႁူၼူၵ်ႇၶဝ်႟။ ဢွၼ်ၵၼ်ထွမ်ႇငိၼ်းတႃႉ။ ၵူၼ်းတႃမွတ်ႇၶဝ်႟။ ဢွၼ်ၵၼ်လူတူၺ်းႁႂ်ႈႁၼ်တႃႉ။
လိူဝ်သေၶႃႈၵဝ်ၼၼ်ႉၽူႈလႂ်တႃမွတ်ႇ။ ၽူႈလႂ်ႁူၼူၵ်ႇမိူၼ်သၢၼ်ႇတမၢၼ်ႇဢၼ်ၵဝ်ပွႆႇၸႂ်ႉၵႂႃႇၼၼ်ႉ။ ၽူႈလႂ်တႃမွတ်ႇမိူၼ်ၵေႃႉဢၼ်သၢၵ်ႈၵၢပ်ႈတူဝ်ၵႃႈတီႈၵဝ်ၼၼ်ႉ။ ၽူႈလႂ်တႃမွတ်ႇမိူၼ်ၶႃႈၵူၼ်းၸႂ်ႉ ထႃႇဝရႃႉၽြႃး၊ ၼၼ်ႉ။
ဢိသရေး၊ ႟။ မႂ်းလႆႈႁၼ်လွင်ႈတၢင်းၼမ်ၼႃႇသေၵေႃႈ၊မႂ်းဢမ်ႇၸၢင်ႈဢဝ်သႂၢင်းသႂ်ႇၸႂ်။ မႂ်းမီးႁူဢၼ်တၵ်းထွမ်ႇတၵ်းငိၼ်းသေၵေႃႈ၊ မႂ်းဢမ်ႇၸၢင်ႈငိၼ်းတႄႉတႄႉဝႃႈဝႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ပဵၼ်ၽြႃးပဵၼ်ၸဝ်ႈဢၼ်မီးႁူဝ်ၸႂ်ပုၼ်ႈတၵ်းၵႄႇသႄႇဢဝ်ၼၼ်ႉႁႅင်းၼႃႇလႄႈ၊ မၼ်းၸဝ်ႈယုၵ်ႉယွင်ႈတြႃးၸဝ်ႈၸိူဝ်းဢၼ်မၼ်းၸဝ်ႈသွၼ်ပၼ်၊ ဢိၵ်ႇတင်းမၼ်းၸဝ်ႈမီးဢလူဝ်ႇၶႂ်ႈႁႂ်ႈ ၵူၼ်းမၼ်းၸဝ်ႈတင်းလၢႆရူဝ်ႇသေႇၼပ်ႉယမ်တြႃးၸဝ်ႈၸိူဝ်းၼၼ်ႉဢေႃႈ။
ၵူၺ်းၵႃႈ၊ၵူၼ်းမၼ်းၸဝ်ႈတင်းလၢႆ၊လႆႈၶၢမ်ႇတၢင်းဢၼ်ႁိမ်ႁူင်ႇယႃႉပႅတ်ႈလႄႈ၊ လႆႈၶၢမ်ႇတၢင်းဢၼ်ၶင်ဝႆႉၵႃႈၼႂ်းၶုမ်ၼႂ်းလုၵ်းသေယဝ်ႉ၊ လႆႈၶၢမ်ႇတၢင်းဢၼ်တဵတ်ႇမႅပ်ႉယူႇၵႃႈၼႂ်းၶွၵ်ႈဢေႃႈ။ ၶဝ်လႆႈၶၢမ်ႇတၢင်းဢၼ်ၸူၼ်ဢဝ်ႁိမ်ႁူင်ႇ ဢဝ်သေၵေႃႈဢမ်ႇမီးၵေႃႉဢၼ်မႃးၵႄႇၼုၵ်ႈဢဝ်ၶဝ်သေၵေႃႉသေၵူၼ်း။
ၼႂ်းသူၽူႈလႂ်တၵ်းထွမ်ႇဢဝ်ၵႂၢမ်းၼႆႉ။ ၼႂ်းဝၼ်းလိုၼ်းမိူဝ်းၼႃႈၽူႈလႂ်တၵ်းငိၼ်းလႄႈမၢတ်ႈတွင်းဝႆႉ။
ၸဝ်ႈလႂ်ဢဝ် ဢိသရေး၊ ဢၢပ်ႈပၼ်တီႈၶဝ်ၸိူဝ်းဢၼ်ၸၢင်ႈႁိမ်ႁူင်ႇၼၼ်ႉ။ ထႃႇဝရႃႉၽြႃး၊ ၸဝ်ႈဢၼ်ႁဝ်းလႆႈၽိတ်းပိူင်ႈၼႆႉဢဝ်ႁဝ်းဢၢပ်ႈဢေႃႈ။ ႁဝ်းဢမ်ႇၵမ်ၵျၢင်ႉၸွမ်းတြႃးဢၼ်ႁဝ်းထုၵ်ႇလီ ၵမ်ၵျၢင်ႉလႄႈဢမ်ႇထွမ်ႇဢမ်ႇဢဝ်တြႃးၸဝ်ႈဢၼ်ပၼ်တီႈႁဝ်းၼၼ်ႉလူင်ပႄႇ။
ပိူဝ်ႈၼႆလႄႈမၼ်းၸဝ်ႈႁႂ်ႈႁဝ်းလႆႈၶၢမ်ႇႁႅင်းတေႃးသႃႉမၼ်းၸဝ်ႈလႄႈ၊ လႆႈၶၢမ်ႇၽေးသိုၵ်းၽေးသိူဝ်ဢၼ်ႁၢဝ်ႉၵျၢမ်းၼႃႇၼၼ်ႉဢေႃႈ။ တေႃးသႃႉမၼ်းၸဝ်ႈၼၼ်ႉမႆႈတၢၼ်ႇၵၼ်တင်းၽႆးဢၼ်မႆႈၵႃႈၼိူဝ် ဢိသရေး၊ ဢေႃႈ။ ၵူၺ်းၵႃႈ၊ႁဝ်းယင်းဢမ်ႇႁုလွင်ႈတၢင်းဢၼ်ပဵၼ်မႃးၼၼ်ႉလႄႈႁဝ်းယင်း ဢမ်ႇၸၢင်ႈၵဵပ်းဢဝ်သႂ်ႇၸႂ်ဝႆႉလႃးလႃး။
ဢိသရေး၊ ႟။ ထႃႇဝရႃႉၽြႃး၊ ဢၼ်ၽၢၼ်ႇသၢင်းႁဵတ်းပဵၼ်မႂ်းၼၼ်ႉမီးဢမိင်ႉၸမ်ႉ၊ “ယႃႇပေၵူဝ်ပေႁႄ။ ၵဝ်တၵ်းၵႄႇသႄႇၶျွတ်ႈဢဝ်မႂ်းဢေႃႈ။ ၵဝ်ႁွင်ႉၸိုဝ်ႈႁွင်ႉသဵင်မႂ်းယဝ်ႉလႄႈမႂ်းပဵၼ်ၵူၼ်းၵဝ်ယဝ်ႉဢေႃႈ။
မိူဝ်ႈဢၼ်မႂ်းယၢင်ႈၵႂႃႇပႆၵႂႃႇၼႂ်းၼမ်ႉဢၼ်လိုၵ်ႉၼႂ်းၼမ်ႉႁွင်ႈၼမ်ႉၵႄးၼၼ်ႉ၊ ၵဝ်တၵ်းမီးယူႇလူၺ်ႈၵၼ်တင်းမႂ်းလႄႈၽေးဢၼ်ႇတရေႇတၵ်းဢမ်ႇႁူမ်ႇသုမ်ႇမႂ်း၊ မိူဝ်ႈဢၼ်မႂ်းယဵပ်ႇၵႂႃႇပႆၵႂႃႇၵႃႈၼႂ်းၽႆးၼၼ်ႉၽႆးတၵ်းဢမ်ႇမႆႈမႂ်း၊ တၢင်းဢၼ်ၸုင်ႇၸၢမ်းယႃႉယူၵ်ႉဢၼ် ယၢပ်ႇၽိုတ်ႇၼႃႇၼၼ်ႉႁွတ်ႈထိုင်သေၵေႃႈ၊တၵ်းဢမ်ႇပဵၼ်ၽေးၵႃႈသင်တီႈမႂ်း။
ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈမႂ်း၊ၽြႃးဢၼ်မူတ်းၸၢင်ႇလႄႈ ပဵၼ်ၽြႃးၵူၼ်းမဵဝ်း ဢိသရေး၊ ၸဝ်ႈဢၼ်ၵႄႇသႄႇၶျွတ်ႈဢဝ်မႂ်းဢေႃႈ။ ၵဝ်ဢဝ်မိူင်း ဢေးၵျိပ်ႉ၊ ဢၢပ်ႈပၼ်ပုၼ်ႈဢၼ်တၵ်းပွႆႇႁႂ်ႈမႂ်းလွတ်ႈဢေႃႈ။ ၵဝ်ဢဝ်မိူင်း ဢေႇတီႇဢူဝ်းပီးယႃး၊ တင်းမိူင်း သေးၽႃႉ၊ ပၼ်ပုၼ်ႈတၵ်းပဵၼ်တၢင်းဢၼ်တၢင်တူဝ်မႂ်းဢေႃႈ။
ၵွပ်ႈပိူဝ်ႈဢၼ်မႂ်းထိူၵ်ႈၵႃႈထိူၵ်ႈၶၼ်ၼႃႇ သိုဝ်ႈၼႃႈတႂ်ႈတႃၵဝ်လႄႈမီးမုၼ်သရေႇၼၼ်ႉၵဝ်ႁၵ်ႉမႂ်းဢေႃႈ။ ပိူဝ်ႈၼႆလႄႈၵဝ်တၵ်းဢဝ်ၵူၼ်းတင်းလၢႆ လႅၵ်ႈဢဝ်တူဝ်မႂ်းလႄႈဢဝ်မဵဝ်းၵူၼ်းတင်းလၢႆပုၼ်ႈတႃႇလႅၵ်ႈဢဝ်ဢသၢၵ်ႈမႂ်းဢေႃႈ။
ယႃႇပေၵူဝ်ပေႁႄ။ ၵဝ်မီးယူႇလူၺ်ႈၵၼ်တင်းမႂ်းဢေႃႈ။ ၵဝ်တၵ်းဢဝ်ၵူၼ်းမႂ်းၸိူဝ်းဢၼ်ယူႇၵႃႈတီႈဢၼ်ၵႆဢၼ်ယူႇၽၢႆႇတၢင်းဝၼ်းဢွၵ်ႇ၊ ဢိၵ်ႇတင်းၵႃႈတီႈဢၼ်ၵႆသေပိူၼ်ႈ ဢၼ်ယူႇၽၢႆႇတၢင်းဝၼ်းတူၵ်းၸိူဝ်းၼၼ်ႉၶိုၼ်းပွၵ်ႈမိူဝ်းႁိူၼ်းဢေႃႈ။
ၵဝ်တၵ်းမွၵ်ႇလၢတ်ႈႁႂ်ႈမိူင်းၽၢႆႇတၢင်းႁွင်ႇပွႆႇၶဝ်ပွၵ်ႈမိူဝ်း၊ ဢိၵ်ႇတင်းမိူင်းၽၢႆႇတၢင်းၸၢၼ်းတၵ်းဢမ်ႇႁႂ်ႈလႆႈႁၢမ်ႈတၢပ်ႈၶဝ်ၼၼ်ႉဢေႃႈ။ ဢဝ်ၵူၼ်းၵဝ်တင်းလၢႆဢၼ်မီးၵႃႈတီႈဝၢၼ်ႈၵႆမိူင်းယၢၼ်၊ ဢိၵ်ႇတင်းၵႃႈတီႈၸွၵ်ႉတီႈၸဵင်ႇလေႃးၵႃႉၵူႈတီႈၵူႈလႅၼ်ပွၵ်ႈၶိုၼ်းမႃးတႃႉ။
ၶဝ်ပဵၼ်ၵူၼ်းၵဝ်ဢေႃႈ။ ၵဝ်ၽၢၼ်ႇသၢင်း ႁဵတ်းပဵၼ်ၶဝ်ဝႆႉႁႂ်ႈပဵၼ်ပုၼ်ႈမုၼ်သရေႇၵဝ်ဢေႃႈ၊” ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈမီးဢမိင်ႉၸမ်ႉ၊ “ႁွင်ႉဢဝ်ၵူၼ်းၵဝ်တင်းလၢႆမႃးၵႃႈတီႈလုမ်းတႃႉ။ ၶဝ်မီးမၢၵ်ႇတႃသေၵေႃႈ၊တႃမွတ်ႇယူႇ၊မီးႁူသေၵေႃႈႁူၼူၵ်ႇယူႇဢေႃႈ။
ႁွင်ႉဢဝ်မဵဝ်းၵူၼ်းတင်းလၢႆမႃးႁႂ်ႈလႆႈၸႅတ်ႈထၢမ်ၸႅတ်ႈသေးတႃႉ။ ၼႂ်းၶဝ်တင်းလၢႆၼၼ်ႉၵေႃႉလႂ်ၸၢင်ႈႁေႃးလၢတ်ႈလွင်ႈဝၼ်းမိူဝ်းၼႃႈၼၼ်ႉလႆႈ၊ ၼႂ်းၶဝ်ၼၼ်ႉၵေႃႉလႂ်ၸၢင်ႈႁေႃးလၢတ်ႈလွင်ႈတၢင်းဢၼ်ပဵၼ်ယူႇမိူဝ်ႈလဵဝ်ၼႆႉလႆႈ၊ ႁႂ်ႈၶဝ်ၸိူဝ်းၼၼ်ႉၼႄပျႃးသၢၵ်ႈသေႇၶဝ်လႄႈ ၽုၺ်ႇဢွၵ်ႇမွၵ်ႇၼႄလွင်ႈဢၼ်ၶဝ်မၢၼ်ႇမႅၼ်ႈၸိုဝ်ႈၸႂ်ႈ၊ဢိၵ်ႇတင်းႁႂ်ႈလႆႈငိၼ်းလႄႈ လၢတ်ႈဝႃႈ၊ၵႂၢမ်းၶဝ်ပဵၼ်ၵႂၢမ်းဢၼ်မၢၼ်ႇမႅၼ်ႈၸိုဝ်ႈၸႂ်ႈၼၼ်ႉတႃႉ။
ၵူၼ်းမဵဝ်း ဢိသရေး၊ ၶဝ်႟။ သူပဵၼ်သၢၵ်ႈသေႇၽၢႆႇၵဝ်ဢေႃႈ။ ၵဝ်လိူၵ်ႈဢဝ်သူႁႂ်ႈပဵၼ်ၶႃႈၵူၼ်းၸႂ်ႉၵူၼ်းသွႆၵဝ်ယဝ်ႉ၊ ပုၼ်ႈလွင်ႈၼင်ႇႁိုဝ်သူတၵ်းႁုၸၵ်းၵဝ်လႄႈ ယုမ်ႇမၢတ်ႈၵဝ်၊ဢိၵ်ႇတင်းႁုၸႅင်ႈလွင်ႈဢၼ်ၵဝ်ပဵၼ်ၽြႃးပဵၼ်ၸဝ်ႈၼၼ်ႉဢေႃႈ။ ၼွၵ်ႈသေၵဝ်ၼႆႉဢမ်ႇမီးၽြႃးတၢင်ႇသူႇတၢင်ႇပႃး၊ ဢွၼ်တၢင်းၵဝ်ၼၼ်ႉၵေႃႈဢမ်ႇတွၼ်ႉမီး၊ ဝၢႆးသေၵဝ်ၵေႃႈတၵ်းတေဢမ်ႇမီးသေၸဝ်ႈသေပႃး။
ၵဝ်ပဵၼ် ထႃႇဝရႃႉၽြႃး၊ သူႇလဵဝ်ပႃးလဵဝ်ၵူၺ်းလႄႈ လိူဝ်သေၵဝ်ၼႆႉဢမ်ႇမီးၸဝ်ႈဢၼ်ၵႄႇသႄႇၶျွတ်ႈႁႂ်ႈလွတ်ႈလႆႈ။
ၵဝ်လႆႈႁေႃးထႃႈလၢတ်ႈထႃႈဝႆႉလွင်ႈတၢင်း ဢၼ်တၵ်းပဵၼ်မႃးယဝ်ႉယဝ်ႉ၊ၵဝ်မႃးႁႂ်ႈလႆႈၸွႆႈၵမ်ႉၸွႆႈထႅမ်သူဢေႃႈ။ ၽြႃးတၢင်ႇသိုင်ႇတၢင်ႇမိူင်းၼၼ်ႉ ဢမ်ႇတွၼ်ႉႁဵတ်းတွၼ်ႉသၢင်ႈၸိူဝ်ႉၼင်ႇၼႆသူပဵၼ်သၢၵ်ႈသေႇၵဝ်ဢေႃႈ။
ၵဝ်ပဵၼ်ၽြႃးပဵၼ်ၸဝ်ႈယူႇၸႃႉၸဵမ်ၸူဝ်ႈဢၼ် မိုဝ်ႉဝၼ်းၶိင်ႇၵႃႇလႃႉဢမ်ႇပႆႇပဵၼ်ပႆႇမီးၼၼ်ႉ လႄႈတၵ်းပဵၼ်ယူႇတႃႇသေႇဢမ်ႇထၢတ်ႇသိုပ်ႇသိုပ်ႇတၢမ်တၢမ်ဢေႃႈ။ ၽူႈလႂ်ဢမ်ႇပၢႆႈလွတ်ႈဢွၵ်ႇသေၵႃႈၼႂ်းတၼ်းၶူဝ်းၵဝ်လႆႈ။ ၵဝ်ႁဵတ်းလႄႈၽူႈလႂ်ဢမ်ႇႁႄႉၶႅၼ်လႆႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၽြႃးဢၼ်မူတ်းၸၢင်ႇလႄႈပဵၼ်ၽြႃးၵူၼ်းမဵဝ်း ဢိသရေး၊ ဢၼ်ၵႄႇသႄႇၶျွတ်ႈဢဝ်သူၼၼ်ႉမီးဢမိင်ႉၸမ်ႉ၊ “ႁႂ်ႈလႆႈၵႄႇသႄႇၶျွတ်ႈဢဝ်သူၸိုင်၊ ၵဝ်တၵ်းပွႆႇၸႂ်ႉတပ်ႉသိုၵ်းၵႂႃႇၵႃႈတီႈမိူင်း ပႃႇပုလုၼ်ႇ၊ သေယဝ်ႉ၊ တၵ်းႁၵ်းပႅတ်ႈၽၵ်းတူဝဵင်းတင်းလၢႆလႄႈသဵင်ဢၼ် ၵူၼ်းမိူင်းမၼ်းႁွင်ႉမူၼ်ႈႁွင်ႉပျေႃႇၼၼ်ႉတၵ်းပဵၼ်သဵင်ဢၼ်ႁွင်ႉႁႆႈဢေႃႈ။
ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈဢၼ်မူတ်းၸၢင်ႇသူ၊ ၸဝ်ႈဢၼ်ၽၢၼ်ႇသၢင်းႁဵတ်းပဵၼ်မဵဝ်း ဢိသရေး၊ လႄႈ ပဵၼ်ၶုၼ်ႁေႃၶမ်းသူဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၵွၼ်ႇဢွၼ်ၼၼ်ႉ ထႃႇဝရႃႉၽြႃး၊ ႁဵတ်းပဵၼ်သဵၼ်ႈတၢင်းၼႂ်းပၢင်ႇလၢႆႇ၊ သဵၼ်ႈတၢင်းဢၼ်ၼႂ်းၼမ်ႉဢၼ်ၽႃႇလတ်းၼမ်ႉဢၼ်ၸႅဝ်ႈၼႃႇႁႅင်းၼႃႇၼၼ်ႉဢေႃႈ။
မၼ်းၸဝ်ႈဢွၼ်ဢဝ်တပ်ႉသိုၵ်းလူင်၊တပ်ႉလေႃႉမႃႉသိုၵ်းတင်းလၢႆ၊ တင်းႁႅင်းမႃႉတင်းလၢႆၵႂႃႇႁႂ်ႈၶဝ်ႁွတ်ႈထိုင်တၢင်းဢၼ်လုဢၼ်လႅဝ်ဢေႃႈ။ ၶဝ်ၼၼ်ႉလူမ်ႉတူၵ်းၽွမ်ႉၵၼ်ၵမ်းလဵဝ်ထၢၼ်ႈပေႃးဢမ်ႇလုၵ်ႉလႆႈလႄႈ မိူၼ်ၸိူဝ်ႉၼင်ႇဢဝ်မွတ်ႇပႅတ်ႈၽႆးသေၵႃႈတီႈတဵၼ်းၼၼ်ႉဢေႃႈ။
ၵူၺ်းၵႃႈ၊ ထႃႇဝရႃႉၽြႃး၊ မီးဢမိင်ႉၸမ်ႉ၊ “ယႃႇပေမီးၸႂ်မၢတ်ႈတွင်းဝႆႉလွင်ႈတၢင်းဢၼ်ပဵၼ်မႃးယဝ်ႉၸိူဝ်းၼၼ်ႉ၊ ယႃႇပေၸႂ်ၸပ်းၸႂ်ၸွႆးလွင်ႈတၢင်းဢၼ်မိူဝ်ႈၵွၼ်ႇဢွၼ်ၼႆႉၸိူဝ်းၼၼ်ႉ။
ပႂ်ႉဢဝ်ဢၼ်မႂ်ႇမႂ်ႇဢၼ်ၵဝ်တၵ်းႁဵတ်းပၼ်ၼၼ်ႉတႃႉ။ လွင်ႈတၢင်းၼၼ်ႉပေႃးပဵၼ်ဝႆႉယဝ်ႉလႄႈသူၵေႃႈႁုႁၼ်ယူႇယဝ်ႉ၊ ၵဝ်တၵ်းႁဵတ်းသဵၼ်ႈတၢင်းၵႃႈၼႂ်းထိူၼ်ႇယႂ်ႇ ထိူၼ်ႇလူင်ၵႂႃႇလႄႈ၊တၵ်းပၼ်ၼမ်ႉႁွင်ႈၼမ်ႉၵႄးတီႈမႂ်းၵႃႈတီႈၼၼ်ႈဢေႃႈ။
ၸႃႉၸဵမ်မႃၼႆး၊ဢိၵ်ႇတင်းၼူၵ်ႉၵလႃႇဢုၵ်ႈတင်းလၢႆလႄႈတူဝ်ထိူၼ်ႇႁၢႆႉတင်းလၢႆ၊ တၵ်းဢွၼ်ၵၼ်ယွင်ႈယေႃးၵုင်ႇၵျေးၸူးၵဝ်ဢေႃႈ။ လွင်ႈမၼ်းၸမ်ႉ၊ၵဝ်လႆႈဢဝ်ၼမ်ႉၼမ်ၼႃႇဝႆႉၵႃႈၼႂ်း ထိူၼ်ႇၼႂ်းၶိူဝ်းလႄႈလႆႈပၼ်ၼမ်ႉတီႈၵူၼ်းၵဝ်၊ဢၼ်ၵဝ်လိူၵ်ႈဢဝ်ဝႆႉၸိူဝ်းၼၼ်ႉဢေႃႈ။
ၶဝ်ၸိူဝ်းၼၼ်ႉပဵၼ်ၵူၼ်းဢၼ်ၵဝ်ႁဵတ်းဝႆႉပုၼ်ႈၵဝ် ႁႂ်ႈၶဝ်လႆႈယွင်ႈယေႃးၵဝ်ဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ ဢိသရေး၊ ႟။ မႂ်းမိူဝ်ႇၸၢၼ်ႈၵဝ်ယဝ်ႉလူင်ပႄႇ။ မႂ်းဢမ်ႇဝႆႈသႃၵူဝ်းၵႂၢႆႇၵဝ်ယဝ်ႉလူင်ပႄႇ။
မႂ်းဢမ်ႇဢဝ်သူဝ်းဢွၼ်ႇဢၼ်ပဵၼ်တူဝ်တၢင်းလူႇဢၼ်တၵ်းတုတ်ႇၽႆးၼၼ်ႉမႃးတီႈၵဝ်၊ မႂ်းဢမ်ႇဢဝ်တင်းၶိူင်ႈတၢင်းလူႇသေလႄႈယုၵ်ႉယွင်ႈၵဝ်၊ ၵဝ်ဢမ်ႇဢဝ်တင်းဢမိင်ႉယွၼ်းဢဝ်ၶိူင်ႈတၢင်းလူႇ တီႈမႂ်းႁႂ်ႈပဵၼ်ၵၢၼ်ငၢၼ်းဢၼ်ၼၵ်းဢၼ်ၼႃ တီႈမႂ်း၊ဢမ်ႇယွၼ်းဢဝ်လေႃႇပၢၼ်ႇႁႂ်ႈမႂ်းယၢပ်ႇၸႂ်ၶၢၼ်ၸႂ်။
မႂ်းဢမ်ႇဢဝ်ငိုၼ်းသိုဝ်ႉဢဝ်ဢွႆႈႁွမ်ၼၼ်ႉ မႃးပုၼ်ႈၵဝ်၊မႂ်းဢမ်ႇဢဝ်ၵွၼ်ႈၶႆၵွၼ်ႈမၼ်းတူဝ်တၢင်းလူႇမႂ်းႁႂ်ႈၵဝ်ပျေႇၸႂ်၊ မႂ်းယင်းဢဝ်ဢပျတ်ႈတုၸရိူၵ်ႈမႂ်းႁႂ်ႈပဵၼ် ၵၢၼ်ငၢၼ်းဢၼ်ၼၵ်းဢၼ်ၼႃပုၼ်ႈၵဝ်ယဝ်ႉလူင်ပႄႇ၊ မႂ်းယင်းဢဝ်တၢင်းဢၼ်မႂ်းႁဵတ်းႁၢႆႉႁဵတ်းမိူၵ်ႈ ၸိူဝ်းၼၼ်ႉႁႂ်ႈၵဝ်ယၢပ်ႇၸႂ်ၶၢၼ်ၸႂ်ယဝ်ႉလူင်ပႄႇ။
ၼႂ်းဝႃႈၼၼ်သေၵေႃႈ၊ၵဝ်ၼႆႉပဵၼ်ၽြႃးပဵၼ်ၸဝ်ႈ ဢၼ်ဢဝ်ဢပျတ်ႈမႂ်းမွတ်ႇပႅတ်ႈ ပုၼ်ႈဢၵျူဝ်းၵဝ်လႄႈတၵ်းဢမ်ႇမၢတ်ႈမၢႆဢပျတ်ႈတုၸရိူၵ်ႈမႂ်းၸိူဝ်းၼၼ်ႉ။
ဢွၼ်ၵၼ်ၵႂႃႇၵႃႈတီႈလုမ်းတႃႉႁဝ်း။ ပႃးဢဝ်ဢမုမႂ်းၼၼ်ႉၵႂႃႇတႃႉ။ လၢတ်ႈဢမုမႂ်းႁႂ်ႈလႆႈၽေႇသၢင်းလွင်ႈဢၼ်မႂ်းပဵၼ်ၵေႃႉဢၼ်ၸိုဝ်ႈၸႂ်ႈၼၼ်ႉတႃႉ။
ပူႇမွၼ်ႇမႂ်းဢၼ်ဢွၼ်တၢင်းသေပိူၼ်ႈၼၼ်ႉ ႁဵတ်းတုၸရိူၵ်ႈယဝ်ႉ၊သြႃႇမႂ်းၸိူဝ်းၼၼ်ႉဢွၼ်ၵၼ်ၽိတ်းပိူင်ႈၵဝ်ယဝ်ႉ။
ၶုၼ်မႂ်းၸိူဝ်းၼၼ်ႉႁဵတ်းႁႂ်ႈထႃႇၼႃႉတီႈမူတ်းၸၢင်ႇၵဝ်ၵူဝ်ႈၵိူၵ်ႇယဝ်ႉ၊ ပိူဝ်ႈၼႆလႄႈၵဝ်ဢဝ်မဵဝ်း ဢိသရေး၊ ႁွတ်ႈထိုင်တၢင်းဢၼ်လုဢၼ်လႅဝ်လႄႈ ဢဝ်ၵူၼ်းၵဝ်တင်းလၢႆႁႂ်ႈပဵၼ်တီႈဢၼ်သႄႉဢၼ်သွမ်းဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “မိူဝ်ႈလဵဝ်ၼႆႉ ဢိသရေး၊ ဢၼ်ပဵၼ်ၶႃႈၵဝ်႟။ ထွမ်ႇငိၼ်းတႃႉ။ မႂ်းပဵၼ်ၵူၼ်းဢၼ်ၵဝ်လိူၵ်ႈဢဝ်ဝႆႉလႄႈပဵၼ်ၸိူဝ်ႉၶိူဝ်း ယႃႇၵုပ်ႈ၊ ဢေႃႈ။
ၵဝ်ပဵၼ် ထႃႇဝရႃႉၽြႃး၊ ဢၼ်ၽၢၼ်ႇသၢင်းႁဵတ်းပဵၼ်သူလႄႈ၊ ၸႃႉၸဵမ်မိူဝ်ႈဢၼ်မႂ်းၵိူတ်ႇလဵင်ႉမႃးၼၼ်ႉၵဝ်ၸွႆႈထႅမ်မႃႉၸႃႉမႂ်းဢေႃႈ။ ယႃႇၵုပ်ႈ၊ ဢၼ်ပဵၼ်ၶႃႈၵဝ်၊ ယေႇသုရုၼ်ႇ၊ ဢၼ်ၵဝ်လိူၵ်ႈဢဝ်ဝႆႉ႟။ ယႃႇပေၵူဝ်ပေႁႄ။
ၵဝ်တၵ်းပၼ်ၼမ်ႉၵႃႈတီႈလိၼ်ဢၼ်ဢိုပ်းယၢၵ်ႇၼမ်ႉၼၼ်ႉလႄႈ ႁႂ်ႈၼမ်ႉႁွင်ႈၼမ်ႉၵႄးတင်းလၢႆလႆၵႃႈၼိူဝ်လိၼ်ႁႅင်ႈလိၼ်ႁွင်ဢေႃႈ။ ၵဝ်တၵ်းသွၼ်းလေႃႇဝိၺိၺ်ႇၸဝ်ႈၵႃႈၼိူဝ် လုၵ်ႈလၢင်းမႂ်းတင်းလၢႆလႄႈတၵ်းပၼ်တၢင်းလီမၢင်ႇၵလႃႇၵႃႈၼိူဝ်ၸိူဝ်ႉၶိူဝ်းမႂ်းဢေႃႈ။
ၶဝ်ၼၼ်ႉတၵ်းၸဵဝ်းယႂ်ႇမႃးမိူၼ်ၸိူဝ်ႉၼင်ႇယိူဝ်ႈယႃႈဢၼ်လႆႈၼမ်ႉလီလီၼၼ်ႉလႄႈ တၵ်းမိူၼ်ၸိူဝ်ႉၼင်ႇမႆႉၶႆႉၵႃႈတီႈၽင်ႇၼမ်ႉႁွင်ႈၼမ်ႉၵႄးဢၼ်လႆၸႅဝ်ႈလီၼႃႇၼၼ်ႉဢေႃႈ။
ၵေႃႉၼိုင်ႈယဝ်ႉၵေႃႉၼိုင်ႈတၵ်းဢွၼ်ၵၼ်လၢတ်ႈ လႄႈဝႃႈ၊ ‘ၵဝ်ပဵၼ်ၵူၼ်း ထႃႇဝရႃႉၽြႃး၊ ဢေႃႈ’ ဝႃႈၼႆဢေႃႈ။ ၶဝ်သမ်ႉတၵ်းဢွၼ်ၵၼ်ၶဝ်ႈပႃးၸပ်းၸွမ်းၵူၼ်းမဵဝ်း ဢိသရေး၊ ဢေႃႈ။ ၶဝ်တၵ်းဢဝ်ၼႃႇမႃႉၸိုဝ်ႈသဵင် ထႃႇဝရႃႉၽြႃး၊ သမ်းသႂ်ႇၵႃႈတီႈၶႅၼ်မိုဝ်းၶဝ်ႁႂ်ႈပဵၼ်တီႈမၢတ်ႈတီႈတွင်းမၼ်းသေယဝ်ႉ၊ တၵ်းႁွင်ႉတူဝ်ၸဝ်ႈၵဝ်ႇဝႃႈ၊ ‘ၵဝ်ပဵၼ်ၵူၼ်းၽြႃးပဵၼ်ၸဝ်ႈ၊’ ဝႃႈၼႆဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၶုၼ်ႁေႃၶမ်းမဵဝ်း ဢိသရေး၊ ၸဝ်ႈဢၼ်ၵႅတ်ႇၶႄႁႄႉၵင်ႈပၼ်မဵဝ်း ဢိသရေး၊ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၼၼ်ႉမီးဢမိင်ႉၸမ်ႉ၊ “ၵဝ်ၼႆႉပဵၼ်ၵေႃႉဢွၼ်တၢင်းသုတ်း၊ဢိၵ်ႇတင်းၵေႃႉလိုၼ်းလင်သုတ်းလႄႈ ပဵၼ်သူႇလဵဝ်ၽြႃးဢေႃႈ။ ၼွၵ်ႈသေၵဝ်ၼႆႉဢမ်ႇမီးၽြႃးတၢင်ႇသူႇတၢင်ႇပႃး။
မီးၽူႈလႂ်သေၵေႃႉသေၵူၼ်းသၢင်ႈႁဵတ်းလွင်ႈတၢင်းဢၼ်ၵဝ်ႁဵတ်းၼႆႉလႆႈႁိုဝ်း။ မီးၽူႈလႂ်တၵ်းၸၢင်ႈႁေႃးထႃႈဝႆႉလွင်ႈတၢင်း ၵႃႈဢၼ်တၵ်းပဵၼ်မႃးၵူႈၸိူဝ်ႉၵူႈပိူင် ၵႃႈဢၼ်ပဵၼ်မႃးၸႃႉၸဵမ်မိူဝ်ႈၵေႃႇၸႃႉႁူဝ်ပိုင်း တေႃႇထိုင်ႁွတ်ႈ တီႈသုတ်းၶိင်ႇၵႃႇလႃႉၼၼ်ႉလႆႈႁိုဝ်း။
ၵူၼ်းၵဝ်႟။ ယႃႇပေၵူဝ်ပေႁႄ။ မႂ်းႁုလွင်ႈတၢင်းဢၼ်ပဵၼ်မႃး ၸႃႉၸဵမ်မိူဝ်ႈၵွၼ်ႇဢွၼ်ၼၼ်ႉတေႃႇထိုင်ႁွတ်ႈၶိင်ႇဝၼ်းမိူဝ်ႈလဵဝ်ၼႆႉၼၼ်ႉ၊ ၵဝ်ႁေႃးလၢတ်ႈၼႄပျႃးလွင်ႈဢၼ်တၵ်းပဵၼ် မႃးၵႃႈတီႈတင်းသဵင်ႈတင်းလူင်ၼၼ်ႉယဝ်ႉလႄႈသူပဵၼ်သၢၵ်ႈသေႇၵဝ်ဢေႃႈ။ ၼွၵ်ႈသေၵဝ်ၼႆႉယင်းမီးၽြႃးတၢင်ႇသူႇတၢင်ႇပႃးလူးၵွၼ်ႇႁိုဝ်း။ ၼွၵ်ႈသေၵဝ်ၼႆႉယင်းမီးၽြႃးဢၼ်ႁႅင်း တၼ်းၶူဝ်းယႂ်ႇလႄႈၵဝ်ဢမ်ႇတွၼ်ႉလႆႈငိၼ်းၼၼ်ႉလူးၵွၼ်ႇႁိုဝ်း၊” ဝႃႈၼင်ႇၼႆဢေႃႈ။
ၶဝ်ၸိူဝ်းဢၼ်ႁဵတ်းႁုၼ်ႇႁၢင်ႈသၢင်းထုလႄႈလဵင်ႉတွင်ႉၼၼ်ႉပဵၼ်ဢၼ်လၢႆလၢႆလွၵ်ႇလွၵ်ႇလႄႈ၊ၽြႃးၸိူဝ်းဢၼ်ၶဝ်ယုၵ်ႉတၢင်ႇၵႃႈၶၼ်မၼ်းသုင်ၼၼ်ႉဢမ်ႇပွင်ႇလွင်ႈၵႃႈသင်ဢေႃႈ။ ၶဝ်ၸိူဝ်းဢၼ်ဝႆႈႁုၼ်ႇႁၢင်ႈသၢင်းထုၸိူဝ်းၼၼ်ႉပဵၼ်ၵူၼ်းတႃမွတ်ႇလႄႈဢမ်ႇၸၢင်ႈႁုၸၢင်ႈႁၼ်။ ၶဝ်တၵ်းလႆႈဢူၵ်းလႆႈဢၢႆဢေႃႈ။-
တၢင်းဢၼ်ဢဝ်ၶိူင်ႈလဵၵ်းၶိူင်ႈတွင်းလေႃႇႁဵတ်းႁုၼ်ႇႁၢင်ႈသၢင်းထုလႄႈဝႆႈၼၼ်ႉဢမ်ႇမီးဢၵျူဝ်း။-
ၵေႃႉဢၼ်ဝႆႈၼၼ်ႉတၵ်းလႆႈၶၢမ်ႇတၢင်းဢၼ်ၶျႃးတူၵ်းတီႈတႅမ်ႇဢေႃႈ။ ၶဝ်ၸိူဝ်းဢၼ်သၢင်ႈႁဵတ်းႁုၼ်ႇႁၢင်ႈသၢင်းထုသေလႄႈလဵင်ႉတွင်ႉၼၼ်ႉပဵၼ်ၵူၼ်းၵူၺ်းဢေႃႈ။ ႁႂ်ႈၶဝ်ၸုၵၼ်တုမ်ၵၼ်မႃးလႄႈၶၢမ်ႇတၢင်းဢၼ်ၸႅတ်ႈထၢမ်ၸႅတ်ႈသေးတႃႉ။ ၶဝ်တၵ်းတူၵ်းၸႂ်လႄႈဢူၵ်းဢၢႆၽွမ်ႉၵၼ်ၵမ်းလဵဝ်ဢေႃႈ။
ၸၢင်ႈလဵၵ်းဢဝ်တုမ်လဵၵ်းၽဝ်ၵႃႈၼႂ်းထၢၼ်ႇၽႆးသေယဝ်ႉ၊ၶႅၼ်မိုဝ်းမၼ်းဢၼ်ႁႅင်းယႂ်ႇၼႃႇၼၼ်ႉဢဝ်ၶွၼ်ႉပေႃႉလဵၵ်းပေႃႉထုပ်ႉတုမ်လဵၵ်းၼၼ်ႉႁႂ်ႈပဵၼ်ႁၢင်ႈပဵၼ်ၽၢင်မႃးဢေႃႈ။ မိူဝ်ႈဢၼ်မၼ်းယင်းႁဵတ်းယူႇၼၼ်ႉမၼ်းတွင်ႉမႆႈၶဝ်ႈ၊တွင်ႉမႆႈၼမ်ႉလႄႈႁိူဝ်ႉၼူၼ်းၼႃႇဢေႃႈ။
ၸၢင်ႈမႆႉၵေႃႈဢဝ်မႆမီႈၽႅတ်းယူႇ၊ဢဝ်တင်းမိုၵ်ႉတႅမ်ႈႁဵတ်းပဵၼ်ႁၢင်ႈၽၢင်လႄႈဢဝ်ၶိူင်ႈယိပ်းၶိူင်ႈၸႂ်ႉဢၼ်ဝႃႈလဵၵ်းၸီး၊သိဝ်ႇ၊ၸိူဝ်းၼၼ်ႉၶွၵ်းႁဵတ်းပုင်ႇႁၢင်ႈၵူၼ်းၸၢႆး၊ပုင်ႇၵူၼ်းဢၼ်ႁၢင်ႈလီႁၢင်ႈငၢမ်း၊ဢၼ်တၵ်းဝႆႉၵႃႈၼႂ်းႁိူၼ်းဢေႃႈ။-
မၼ်းၸၢင်ႈၽၼ်းတူၼ်ႈမႆႉ ဢႃႇရိတ်ႉ၊ တင်းလၢႆလႄႈလိူၵ်ႈဢဝ်တူၼ်ႈမႆႉၼိမ်၊ဢမ်ႇၼၼ်မႆႉၵႃႈၼႂ်းထိူၼ်ႇၼႂ်းၶိူဝ်းမႃးဢေႃႈ။ ဢမ်ႇၼၼ်ၵေႃႈမၼ်းၸၢင်ႈၽုၵ်ႇမႆႉပႅၵ်ႇလႄႈပႂ်ႉလုမ်းလႃးလႄႈၼမ်ႉၽူၼ်ၵေႃႈတူၵ်းသႂ်ႇႁႂ်ႈမၼ်းယႂ်ႇမႃးဢေႃႈ။-
ၵေႃႉၼၼ်ႉၸၢင်ႈဢဝ်မႆႉၼၼ်ႉပွတ်ႈၼိုင်ႈႁဵတ်းၽိုၼ်း၊ဢိၵ်ႇတင်းဢဝ်ပွတ်းၼိုင်ႈႁဵတ်းႁုၼ်ႇႁၢင်ႈသၢင်းထုဢေႃႈ။ ထႅင်ႈပွတ်းၼိုင်ႈမၼ်းၸၢင်ႈသႂ်ႇၽႆးပုၼ်ႈမၼ်းတၵ်းဢွမ်ႇ၊တၵ်းၼိုင်ႈၶဝ်ႈမုၼ်းဢေႃႈ။ ထႅင်ႈပွတ်းၼိုင်ႈၸမ်ႉ၊မၼ်းဢဝ်ႁဵတ်းၽြႃးပုၼ်ႈမၼ်းတၵ်းဝႆႈဢေႃႈ။-
သမ်ႉထႅင်ႈတၢင်ႇပွတ်းၸိုင်၊မၼ်းဢဝ်ႁဵတ်းၽိုၼ်းပုၼ်ႈမၼ်းတၵ်းဢုပ်ႉၼိူဝ်ႉၵိၼ်လႄႈႁႂ်ႈဢိမ်ႇတဵမ်ဢေႃႈ။ မၼ်းဢွမ်ႇၽႆးယဝ်ႉလႄႈၸၢင်ႈလၢတ်ႈဝႃႈ၊ “ဢူဝ်း။ ၵဝ်ဢုၼ်ႇတႄႉတႄႉ။ ၽႆးၵဝ်ၼႆႉလီတႄႉတႄႉယဝ်ႉ၊” ဝႃႈၼင်ႇၼႆဢေႃႈ။-
သမ်ႉထႅင်ႈတၢင်ႇပွတ်းၸမ်ႉ၊မၼ်းႁဵတ်းပဵၼ်ႁုၼ်ႇႁၢင်ႈသၢင်းထုသေယဝ်ႉ၊ၶုပ်ႉမူပ်ႇလႄႈဝႆႈဢေႃႈ။ မၼ်းၸၢင်ႈသူးတွင်းတီႈႁုၼ်ႇႁၢင်ႈၼၼ်ႉလႄႈဝႃႈ၊ “ၸဝ်ႈႁဝ်းပဵၼ်ၽြႃးၵဝ်ၶႃႈတီႈၶႃႈဢေႃႈ။ ၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ၵူၼ်းၸိူဝ်ႉၼင်ႇၼၼ်ၼၼ်ႉဢမ်ႇမီးၺၢၼ်ႇဢမ်ႇမီးပိင်ႇၺႃႇဢၼ်တၵ်းႁုလွင်ႈဢၼ်ၶဝ်ႁဵတ်းၵႃႈသင်ယူႇၼၼ်ႉ။ ၶဝ်ဢိုတ်းႁူဢိုတ်းတႃၶဝ်၊ဢိၵ်ႇတင်းႁူဝ်ၸႂ်ၶဝ်ဝႆႉႁႂ်ႈၶဝ်ထၢၼ်ႈပေႃးဢမ်ႇႁုဢမ်ႇၸႅင်ႈသမ်ႇမႃႇတြႃးလႆႈဢေႃႈ။-
ဢမ်ႇမီးၵူၼ်းဢၼ်ၶုၵ်းၸႂ်လႆႈၶႆႈၸႂ်ထူပ်းၵႃႈၼႂ်းႁူဝ်ၸႂ်မၼ်းသေၵေႃႉသေၵူၼ်းလႄႈ မီးၺၢၼ်ႇဢၼ်ၸၢင်ႈႁုၸႅင်ႈႁုပွင်ႇသေလႄႈလၢတ်ႈဝႃႈ၊ “မႆႉၼႆႉၵဝ်ဢဝ်ပွတ်းၼိုင်ႈႁဵတ်းၽိုၼ်းသႂ်ႇၽႆးယဝ်ႉလႄႈ၊ဢဝ်ၶဝ်ႈမုၼ်းပိင်ႈၵႃႈၼိူဝ်ထၢၼ်ႇၽႆးၼၼ်ႉယဝ်ႉ၊ၵဝ်လႆႈဢဝ်ၼိူဝ်ႉပိင်ႈၵိၼ်ႁႂ်ႈပေႃးဢိမ်ႇယဝ်ႉ။ မႆႉပွတ်းဢၼ်ၵိုတ်းၵျၢၼ်ႇဝႆႉၼၼ်ႉၸမ်ႉ၊ၵဝ်ထုၵ်ႇလီဢဝ်ႁဵတ်းႁႂ်ႈပဵၼ်တၢင်းဢၼ်လီႁင်ႈလီၸင်းႁိုဝ်း၊ဢမ်ႇၼၼ်ၵေႃႈထုၵ်ႇလီၶုပ်ႉမူပ်ႇဝႆႈတုမ်မႆႉၼၼ်ႉႁိုဝ်း၊” ဝႃႈၼင်ႇၼႆၼၼ်ႉဢေႃႈ။
မၼ်းပဵၼ်ၸိူဝ်ႉၼင်ႇဢၼ်ၵိၼ်တဝ်ႈၵူၺ်းဢေႃႈ။ ၸႂ်ဢၼ်တိုဝ်တၼ်မၼ်းၼၼ်ႉဢွၼ်ဢဝ်မၼ်းႁွတ်ႈထိုင်တၢင်းဢၼ်ဢမ်ႇၸၢင်ႈၸွႆႈထႅမ်ဝိၺိၺ်ႇမၼ်းလႆႈၼၼ်ႉဢေႃႈ။ မၼ်းဢမ်ႇၶၢမ်ႇဢဝ်မၢတ်ႈဢဝ်ၵႃႈၼႂ်းၸႂ်မၼ်းလႄႈဝႃႈ၊ “ႁုၼ်ႇႁၢင်ႈဢၼ်ၵဝ်ယိပ်းယူႇၼႂ်းမိုဝ်းၶွၼ်ၶႂႃၵဝ်ၼႆႉဢမ်ႇၸႂ်ႈၽြႃးၵူၺ်း၊” ဝႃႈၼင်ႇၼႆၼၼ်ႉဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “မဵဝ်း ဢိသရေး၊ ႟။ မၢတ်ႈတွင်းဝႆႉတႃႉ။ မႂ်းပဵၼ်ၶႃႈၵဝ်ဝႃႈၼႆတွင်းဝႆႉတႃႉ။ ၵဝ်ၽၢၼ်ႇသၢင်းႁဵတ်းပဵၼ်မႂ်း၊ ႁႂ်ႈမႂ်းပဵၼ်ၶႃႈၵဝ်လႄႈ၊ၵဝ်တၵ်းဢမ်ႇလိုမ်းမႂ်းပႅတ်ႈလႃးလႃး။
ၵဝ်ထူမွတ်ႇတုၸရိူၵ်ႈဢပျတ်ႈမႂ်းၸိူဝ်ႉၼၼ်ႉပႅတ်ႈ မိူၼ်ၸိူဝ်ႉၼင်ႇမွၵ်ႇၵုမ်ႈယဝ်ႉ။ ၶိုၼ်းမႃးၸူးတီႈၵဝ်တႃႉ။ ၵဝ်တၵ်းၵႄႇသႄႇၶျွတ်ႈဢဝ်မႂ်းယဝ်ႉ၊” ဝႃႈၼင်ႇၼႆဢေႃႈ။
ၽႃႉၵၢင်ႁၢဝ်႟။ ဢွၼ်ၵၼ်ႁွင်ႉသႅၼ်ႇတႃႉ။ ၵႃႈတီႈတႂ်ႈလိၼ်မိူင်းၶဝ်႟။ ဢွၼ်ၵၼ်ႁွင်ႉသႅၼ်ႇတႃႉ။ လွႆလူင်တင်းလၢႆ၊ ဢိၵ်ႇတင်းထိူၼ်ႇတူၼ်ႈမႆႉတင်းလၢႆၶဝ်႟။ ဢွၼ်ၵၼ်ႁွင်ႉသႅၼ်ႇၸူမ်းၸူမ်းသိူဝ်းသိူဝ်းတႃႉ။ ထႃႇဝရႃႉၽြႃး၊ ၼႄပျႃးတၢင်းဢၼ်မၼ်းၸဝ်ႈယႂ်ႇမျၢတ်ႈၼၼ်ႉ ၵွပ်ႈလူၺ်ႈတၢင်းဢၼ်ၵႄႇသႄႇၶျွတ်ႈဢဝ်ၵူၼ်းမၼ်းၸဝ်ႈမဵဝ်း ဢိသရေး၊ ၼၼ်ႉယဝ်ႉ။
“ၵဝ်ပဵၼ် ထႃႇဝရႃႉၽြႃး၊ ၸဝ်ႈဢၼ်ၵႄႇသႄႇၶျွတ်ႈဢဝ်မႂ်းဢေႃႈ။ ၵဝ်ပဵၼ် ထႃႇဝရႃႉၽြႃး၊ ၸဝ်ႈဢၼ်ၽၢၼ်ႇသၢင်းႁဵတ်းပဵၼ်မႂ်းဢေႃႈ။ ၵဝ်ပဵၼ် ထႃႇဝရႃႉၽြႃး၊ ၸဝ်ႈဢၼ်ၽၢၼ်ႇသၢင်းႁဵတ်းပဵၼ်လွင်ႈတၢင်းၵူႈၸိူဝ်ႉၵူႈပိူင်ဝႆႉဢေႃႈ။ ၵဝ်သူႇလဵဝ်ပႃးလဵဝ်ၵူၺ်းၶဵင်ႈမုင်းၽႃႉၵၢင်ႁၢဝ်ဝႆႉဢေႃႈ။ မိူဝ်ႈဢၼ်ၵဝ်ႁဵတ်းပဵၼ်လိၼ်မိူင်းၼၼ်ႉ ဢမ်ႇမီးၽူႈလႂ်ၸွႆႈထႅမ်ၵဝ်သေၵေႃႉသေၵူၼ်း။
ၵဝ်ႁဵတ်းႁႂ်ႈပုၵ်ႉပႃႉၼိမိၵ်ႈမိၵ်ႉသႃႇသြႃႇၸိူဝ်းၼၼ်ႉႁၢႆပႅတ်ႈလႄႈ၊ ႁႂ်ႈၸဝ်ႈပေႇတၢင်ႇတင်းလၢႆၸိူဝ်းၼၼ်ႉယွင်ႇမႃႈၵႂႃႇ၊ ႁႂ်ႈၵႂၢမ်းဢၼ်ၵူၼ်းမီးပိင်ႇၺႃႇတင်းလၢႆယုင်ႈၵႂႃႇလႄႈပိင်ႇၺႃႇၶဝ်ပဵၼ်ဢၼ်ႁၢႆႉမိူၵ်ႈၵႂႃႇဢေႃႈ။
ၼႂ်းဝႃႈၼၼ်သေၵေႃႈ၊ၼႂ်းမိူဝ်ႈဢၼ်ၶႃႈၵဝ် ႁေႃးလၢတ်ႈထႃႈဝႆႉ၊မိူဝ်ႈဢၼ်ၵဝ်ပွႆႇၸႂ်ႉသၢၼ်ႇတမၢၼ်ႇၵႂႃႇမွၵ်ႇလၢတ်ႈၼႄ တၢင်းဢဵၼ်းဢၢၼ်းၵဝ်ၼၼ်ႉၸိုင်၊ၵဝ်ႁဵတ်းႁႂ်ႈတၢင်း ဢဵၼ်းဢၢၼ်းၸိူဝ်းၼၼ်ႉတင်းၵႂၢမ်းဢၼ်ႁေႃးထႃႈဝႆႉၸိူဝ်းၼၼ်ႉပဵၼ်ၸွမ်းမႃးတႄႉဢေႃႈ။ ၵဝ်လၢတ်ႈလူၺ်ႈလွင်ႈဝဵင်း ယေႇရုသလႅမ်ႇ၊ လႄႈဝႃႈ၊ ‘ၵူၼ်းတင်းလၢႆတၵ်းဢွၼ်ၵၼ်ၶိုၼ်းၵႂႃႇယူႇ ၵႃႈတီႈၼၼ်ႈထႅင်ႈဢေႃႈ၊’ ဝႃႈၼႆဢိၵ်ႇတင်းလၢတ်ႈလူၺ်ႈလွင်ႈမိူင်း ယုတႃႉ၊ လႄႈဝႃႈ၊ ‘ၶဝ်တၵ်းမႄးၵုမ်းမႄးႁဵတ်းဝဵင်းလူင်ၸိူဝ်းၼႆႉဢေႃႈ။ ၵဝ်တၵ်းမႄးတၵ်းၵုမ်းတီႈဢၼ်ၵိူၼ်ႇဢၼ်လုၸိူဝ်းၼၼ်ႉဢေႃႈ၊’ ဝႃႈၼင်ႇၼႆဢေႃႈ။
ၵဝ်ဢဝ်တင်းၵႂၢမ်းဢမိင်ႉလႄႈလၢတ်ႈႁႂ်ႈၼမ်ႉပၢင်ႇလၢႆႇႁႅင်ႈႁွင်ၵႂႃႇဢေႃႈ။
ၵဝ်လၢတ်ႈတီႈၶုၼ် သႆးရတ်ႉ၊ လႄႈဝႃႈ၊ ‘မႂ်းပဵၼ်ၵေႃႉဢၼ်တၵ်းဢုပ်ႉပိူင်ႇၵူၼ်းၵဝ်ဢေႃႈ။ မႂ်းတၵ်းႁဵတ်းၸွမ်းၵႃႈဢၼ်ၵဝ်မီးဢလူဝ်ႇၶႂ်ႈႁဵတ်းၼၼ်ႉဢေႃႈ။ မႂ်းတၵ်းပၼ်ဢမိင်ႉႁႂ်ႈၶဝ်မႄးၵုမ်းမႄးပူၵ်းဝဵင်း ယေႇရုသလႅမ်ႇ၊ ဢိၵ်ႇတင်းႁႂ်ႈၶဝ်ၶျႃးငဝ်ႈႁၢၵ်ႈ တိူၵ်ႈၵျွင်းပိၵ်ႈမၢၼ်ႇၸဝ်ႈဢေႃႈ၊’ ဝႃႈၼႆဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ လိူၵ်ႈဢဝ်ၶုၼ် သႆးရတ်ႉ၊ ႁႂ်ႈပဵၼ်ၶုၼ်ႁေႃၶမ်းဢေႃႈ။ မၼ်းၸဝ်ႈၶၢၼ်းႁႂ်ႈၶုၼ် သႆးရတ်ႉ၊ ပႄႉၼႅင်ႇသိုၵ်းၵူၼ်းမဵဝ်းတင်းလၢႆလႄႈ ပွႆႇၸႂ်ႉႁႂ်ႈမၼ်းလႆႈထူမွတ်ႇႁႅင်းတၼ်းၶူဝ်းၶုၼ်ႁေႃၶမ်းတင်းလၢႆဢေႃႈ။ ထႃႇဝရႃႉၽြႃး၊ တၵ်းၽုၺ်ႇပၼ်ၽၵ်းတူဝဵင်းလူင်တင်းလၢႆပုၼ်ႈမၼ်းဢေႃႈ။ ထႃႇဝရႃႉၽြႃး၊ မီးဢမိင်ႉတီႈၶုၼ် သႆးရတ်ႉ၊ လႄႈဝႃႈ၊
“တူဝ်ၵဝ်တၵ်းမႄးႁႅၼ်းပၼ်သဵၼ်ႈတၢင်းမႂ်း၊ တၵ်းၵိူၼ်ႇလွႆလူင်လွႆဢွၼ်ႇတင်းလၢႆႁႂ်ႈပဵင်းၵၼ်ဢေႃႈ။ ၵဝ်တၵ်းႁၵ်းပႅတ်ႈၽၵ်းတူတွင်းလိူင်တင်းလၢႆ၊ပေႃႉထုပ်ႉၵိူၼ်ႇလဵၵ်းၶဝ်တင်းလၢႆပႅတ်ႈဢေႃႈ။
ၵဝ်တၵ်းဢဝ်ဢုၵ်ႉၸႃႇဢၼ်သိူင်ႇမႅပ်းဝႆႉၵႃႈတီႈဢၼ်လပ်းသိင်ႇၼၼ်ႉပၼ်တီႈမႂ်းဢေႃႈ။ ၼင်ႇၼၼ်လႄႈမႂ်းတၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢိၵ်ႇတင်းလွင်ႈဢၼ် ၵဝ်ၽြႃးပဵၼ်ၸဝ်ႈဢၼ်ပဵၼ်ၽြႃးၵူၼ်းမဵဝ်း ဢိသရေး၊ ၼႆႉႁွင်ႉၸိုဝ်ႈႁွင်ႉသဵင်မႂ်းယူႇဢေႃႈ။
ၵဝ်ၶၢၼ်းႁႂ်ႈမႂ်းလႆႈၸွႆႈထႅမ်ၶႃႈၵဝ်မဵဝ်း ဢိသရေး၊ ၵူၼ်းမဵဝ်းဢၼ်ၵဝ်လိူၵ်ႈဢဝ်ဝႆႉၼၼ်ႉဢေႃႈ။ ပိၵ်ႉသမ်ႉမႂ်းဢမ်ႇႁုၸၵ်းၵဝ်သေၵေႃႈၵဝ်ယုၵ်ႉယွင်ႈၵုင်ႇသရေႇမႂ်းယူႇဢေႃႈ။
ၵဝ်သူႇလဵဝ်ပႃးလဵဝ်ၵူၺ်းပဵၼ် ထႃႇဝရႃႉၽြႃး၊ ဢေႃႈ။ ၼွၵ်ႈသေၵဝ်ၼႆႉၽြႃးတၢင်ႇသူႇတၢင်ႇပႃးဢမ်ႇမီး။ ပိၵ်ႉသမ်ႉမႂ်းဢမ်ႇႁုၸၵ်းၵဝ်သေၵေႃႈၵဝ်ပၼ်ဢဵၼ်ပၼ်ႁႅင်းၵႃႈဢၼ်မႂ်းလူဝ်ႇၼၼ်ႉဢေႃႈ။
ၵဝ်ႁဵတ်းၸိူဝ်ႉၼင်ႇၼႆပုၼ်ႈၶဝ်ၸိူဝ်းဢၼ်ယူႇၸႃႉၸဵမ်ၽၢႆႇၼိုင်ႈလႅၼ်လိၼ်မိူင်းသုတ်းၵႂႃႇ တေႃႇထိုင်ႁွတ်ႈတၢင်ႇၽၢႆႇလိၼ်မိူင်းၼၼ်ႉ လႆႈႁုလွင်ႈဢၼ်ၼွၵ်ႈသေၵဝ်ၼႆႉဢမ်ႇမီးၽြႃးတၢင်ႇသူႇတၢင်ႇပႃးလႄႈ ၵဝ်သူႇလဵဝ်ပႃးလဵဝ်ၵူၺ်းပဵၼ် ထႃႇဝရႃႉၽြႃး၊ ၼၼ်ႉဢေႃႈ။
ၵဝ်ႁဵတ်းပဵၼ်ဢၼ်လႅင်း၊ဢိၵ်ႇတင်းဢၼ်လပ်းသိင်ႇတင်းသွင်ပိူင်ဢေႃႈ။ ၵဝ်ႁႂ်ႈတၢင်းဢၼ်ၼိမ်ဢၼ်လီပဵၼ်မႃးလႄႈဢႃႉမၢင်ႇၵလႃႇၵေႃႈၵဝ်ႁဵတ်းပဵၼ်ဢေႃႈ။ ၵဝ် ထႃႇဝရႃႉၽြႃး၊ ၼႆႉႁဵတ်းပဵၼ်လွင်ႈတၢင်းၵႃႈမီးတင်းသဵင်ႈတင်းလူင်ၸိူဝ်းၼႆႉဢေႃႈ။
ၵဝ်တၵ်းႁႂ်ႈတၢင်းဢၼ်ပႄႉၼႅင်ႇၼၼ်ႉ လုၵ်ႉသေၵႃႈၼိူဝ်တွင်ႉၽႃႉတူၵ်းလူင်းမႃးမိူၼ်ၸိူဝ်ႉၼင်ႇၽူၼ်လႄႈ လိၼ်မိူင်းတၵ်းၽုၺ်ႇပိုတ်ႇလႄႈႁပ်ႉတုင်းဢဝ်ၽႃႉၽူၼ်ၼၼ်ႉသေယဝ်ႉ၊ တၵ်းမၢၵ်ႇမၢၵ်ႇတၢင်းဢၼ်လွတ်ႈလႅဝ်း၊ ဢိၵ်ႇတင်းတြႃးတၢင်းဢၼ်သိုဝ်ႈတေႃႇဢေႃႈ။ ၵဝ်၊ ထႃႇဝရႃႉၽြႃး၊ တၵ်းႁဵတ်းႁႂ်ႈလွင်ႈတၢင်းၼႆႉပဵၼ်မႃးဢေႃႈ၊” ဝႃႈၼင်ႇၼႆဢေႃႈ။
ၵေႃႉဢၼ်ၶတ်းၵၼ်တင်းၸဝ်ႈဢၼ်ႁဵတ်းပဵၼ်မၼ်းၼၼ်ႉမီးဢႃႉမၢင်ႇၵလႃႇဢေႃႈ။ မၼ်းပဵၼ်ၽၢၵ်ႇမေႃႈၵႃႈၼႂ်းမေႃႈလိၼ်တင်းလၢႆလူင်ပႄႇ။ လိၼ်ၼဵဝ်ၼၼ်ႉတၵ်းထၢမ်တီႈၵေႃႉဢၼ်ႁဵတ်းမေႃႈၼၼ်ႉလႄႈ “မႂ်းႁဵတ်းၵႃႈသင်ယူႇ၊” ဝႃႈၼင်ႇၼႆႁိုဝ်း။ လိၼ်ၼဵဝ်ၼၼ်ႉတၵ်းတၢင်ႇဢပျတ်ႈတီႈၵေႃႉဢၼ် ႁဵတ်းၼၼ်ႉလႄႈဝႃႈ၊ “ၵေႃႉဢၼ်ႁဵတ်းၵဝ်ၼၼ်ႉလၢႆးမိုဝ်းမႂ်းဢမ်ႇလီ၊” ဝႃႈၼႆႁိုဝ်း။
ၽူႈလႂ်တၵ်းႁတ်းလၢတ်ႈတီႈပေႃႈမႄႈမၼ်း လႄႈဝႃႈ၊ “သူၵိူတ်ႇလဵင်ႉၵဝ်ဝႆႉၸိူဝ်ႉၼင်ႇၼႆၼင်ႇႁိုဝ်၊” ဝႃႈၼႆႁိုဝ်း။
ထႃႇဝရႃႉၽြႃး၊ ၽြႃးပဵၼ်ၸဝ်ႈ ဢၼ်မူတ်းၸၢင်ႇလႄႈပဵၼ်ၽြႃးၵူၼ်းမဵဝ်း ဢိသရေး၊ ၸဝ်ႈဢၼ်ၽၢၼ်ႇသၢင်းႁဵတ်းပဵၼ်ၼၼ်ႉ မီးဢမိင်ႉလႄႈဝႃႈ၊ “သူဢမ်ႇမီးဢၶႂၢင်ႉတႃႇတေထၢမ်ၵဝ်လူၺ်ႈလွင်ႈလုၵ်ႈလၢင်းၵဝ်၊ဢမ်ႇၼၼ်သူဢမ်ႇမီးဢၶႂၢင်ႉ ဢၼ်လၢတ်ႈတီႈၵဝ်ဝႃႈ၊မႂ်းထုၵ်ႇလီႁဵတ်းဢၼ်ၼႆႉ၊ထုၵ်ႇလီႁဵတ်းဢၼ်ၼၼ်ႉ။
ၵဝ်ပဵၼ်ၸဝ်ႈဢၼ်ႁဵတ်းပဵၼ်လိၼ်မိူင်းလႄႈ ၽၢၼ်ႇသၢင်းႁဵတ်းပဵၼ်ၵူၼ်းတင်းလၢႆႁႂ်ႈယူႇသဝ်းၵႃႈတီႈၼၼ်ႈဢေႃႈ။ ၵဝ်ဢဝ်တင်းမုၼ်ၽုင်းတၼ်းၶူဝ်းၵဝ်လႄႈၶဵင်ႈမုင်းၽႃႉၵၢင်ႁၢဝ်ဝႆႉသေယဝ်ႉ၊ ဢုပ်ႉပိူင်ႇၵၢင်ဝၼ်း၊လိူၼ်၊လၢဝ်တင်းလၢႆဝႆႉဢေႃႈ။
တူဝ်ၵဝ်တိုၵ်းယူင်းၶုၼ် သႆးရတ်ႉ၊ ႁႂ်ႈမၼ်းလုၵ်ႉႁဵတ်း ပုၼ်ႈဢၼ်တၵ်းႁႂ်ႈတၢင်းဢၢင်ႈဢၢၼ်းၵဝ် ပျေႉၸုမ်ႇပဵၼ်ၸွမ်းလႄႈ၊ႁႂ်ႈမၼ်းၸီႇယၢင်ႇသၢင်ႈပွင်သိုဝ်ႈသိုဝ်ႈတေႃႇတေႃႇဢေႃႈ။ ၵဝ်တၵ်းႁႂ်ႈသဵၼ်ႈတၢင်းဢၼ်မၼ်းပႆမၼ်းယၢင်ႈၸိူဝ်းၼၼ်ႉသိုဝ်ႈလီဢေႃႈ။ မၼ်းတၵ်းမႄးၵုမ်းမႄးႁဵတ်းဝဵင်းၵဝ်၊ဢၼ်ပဵၼ်ဝဵင်း ယေႇရုသလႅမ်ႇ၊ သေလႄႈ တၵ်းပွႆႇၵူၼ်းၵဝ်ၸိူဝ်းဢၼ်တူၵ်းၵႅၼ်းၼၼ်ႉလွတ်ႈဢေႃႈ။ ၽူႈလႂ်ဢမ်ႇၸၢင်ႈႁႂ်ႈမၼ်းႁဵတ်း၊ၽူႈလႂ် ဢမ်ႇပၼ်သူးပၼ်လၢပ်ႈႁႂ်ႈမၼ်းႁဵတ်းလွင်ႈၸိူဝ်းၼႆႉ၊” ဝႃႈၼင်ႇၼႆ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ။
ထႃႇဝရႃႉၽြႃး၊ မီးဢမိင်ႉတီႈၵူၼ်းမဵဝ်း ဢိသရေး၊ လႄႈဝႃႈ၊ “တၢင်းဢၼ်ၵႃႉၶၢႆမၢၵ်ႈမီးမိူင်း ဢေးၵျိပ်ႉ၊ တင်းမိူင်း ဢေႇတီႇဢူဝ်းပီးယႃး၊ တၵ်းမႃးပဵၼ်တၢင်းမၢၵ်ႈမီးမႂ်းလႄႈၵူၼ်းဢၼ်ယႂ်ႇဢၼ်သုင်မိူင်း သေႇၽႃႉ၊ တၵ်းလႆႈပဵၼ်ၶႃႈမႂ်းသေယဝ်ႉ၊ ၶဝ်တၵ်းလႆႈၶၢမ်ႇတၢင်းဢၼ်ဢဝ်ၸိူၵ်ႈလဵၵ်း မတ်ႉလႄႈၸွမ်းပႃႈလင်မႂ်းယူႇဢေႃႈ။ ၶဝ်တၵ်းဢွၼ်ၵၼ်ၶုပ်ႉမူပ်ႇၵႃႈတီႈၽၢႆႇၼႃႈမႂ်းလႄႈတွင်းပၢၼ်ႇတီႈမႂ်းလႄႈဝႃႈ၊ ‘ၽြႃးပဵၼ်ၸဝ်ႈမီးယူႇလူၺ်ႈၵၼ်တင်းၸဝ်ႈႁဝ်းဢေႃႈ။ ၼွၵ်ႈသေၽြႃးပဵၼ်ၸဝ်ႈၼၼ်ႉဢမ်ႇမီးၽြႃးတၢင်ႇသူႇတၢင်ႇပႃးၶႃႈယဝ်ႉ၊’ ဝႃႈၼႆဢေႃႈ။
ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ၸဝ်ႈဢၼ်ၵႄႇသႄႇၶျွတ်ႈဢဝ်ၵူၼ်းမၼ်းၸဝ်ႈ တင်းလၢႆၼၼ်ႉ၊ပဵၼ်ၽြႃးပဵၼ်ၸဝ်ႈဢၼ်သိူင်ႇဢၼ်လပ်ႉတူဝ်ၸဝ်ႈၵဝ်ႇဝႆႉတီႈၶႃႈဢေႃႈ။
ၶဝ်ၵႃႈဢၼ်ႁဵတ်းႁုၼ်ႇႁၢင်ႈသၢင်းထုၸိူဝ်းၼၼ်ႉတၵ်းဢွၼ်ၵၼ်ဢူၵ်းဢၢႆသေလႄႈ ၵႂၢင်ၸႂ်ယုင်ႈၸႂ်လႄႈႁွတ်ႈထိုင်တၢင်းဢၼ်ၸႂ်မၢၵ်ႇၸႂ်မိူဝ်ၼၼ်ႉ ၽွမ်ႉမိူဝ်ႈလဵဝ်ၵမ်းလဵဝ်ၵၼ်ဢေႃႈ။
ဢိသရေး၊ ၸမ်ႉ၊လႆႈႁွတ်ႈထိုင်တၢင်းဢၼ် ထႃႇဝရႃႉၽြႃး၊ ၵႄႇသႄႇၶျွတ်ႈဢဝ် ဝႆႉယဝ်ႉလႄႈမၼ်းလႆႈပႄႉလႆႈၼႅင်ႇၵူႈၶိင်ႇၵူႈၶႃႇတႃႇသေႇဢမ်ႇထၢတ်ႇလႄႈ ၵူၼ်းမၼ်းတၵ်းဢမ်ႇလႆႈဢူၵ်းလႆႈဢၢႆ၊ ဢမ်ႇၵႂၢင်ၸႂ်ယုင်ႈၸႂ်ယူႇၵူႈၵမ်ႇၽႃႇသိုပ်ႇသိုပ်ႇတၢမ်တၢမ်ဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၽၢၼ်ႇသၢင်းႁဵတ်းပဵၼ်ၵၢင်ႁၢဝ်၊ ၽြႃးပဵၼ်ၸဝ်ႈဢၼ်ပၼ်ႇလိၼ်မိူင်းလႄႈႁႂ်ႈတႄႇယူႇမၼ်ႈမၼ်ႈၶိူင်ႇၶိူင်ႇ၊ မၼ်းၸဝ်ႈၽၢၼ်ႇသၢင်းႁဵတ်းႁႂ်ႈလိၼ်မိူင်းပၢဝ်ႇဝႆႉလၢပ်ႇဝႆႉဢမ်ႇၸႂ်ႈ၊ မၼ်းၸဝ်ႈပၼ်ႈဝႆႉႁဵတ်းဝႆႉပုၼ်ႈသတ်ႉတဝႃႇတၵ်းယူႇတၵ်းသဝ်းၼၼ်ႉ၊ မီးဢမိင်ႉဝႆႉၸမ်ႉ၊ “ၵဝ်ပဵၼ် ထႃႇဝရႃႉၽြႃး၊ ဢေႃႈ။ ၼွၵ်ႈသေၵဝ်ၼႆႉဢမ်ႇမီးၽြႃးတၢင်ႇသူႇတၢင်ႇပႃး။
ၵဝ်ဢမ်ႇႁေႃးလၢတ်ႈၵႃႈတီႈ ဢၼ်သိူင်ႇဢၼ်လပ်ႉ၊ၵဝ်ဢမ်ႇဢဝ်တၢင်းဢၢင်ႈဢၢၼ်းၵဝ်တဵတ်ႇမႅပ်ႉဝႆႉလပ်ႉဝႆႉ။ ၵဝ်ဢမ်ႇလႆႈဝႃႈ၊ႁႂ်ႈၵူၼ်းမဵဝ်း ဢိသရေး၊ သွၵ်ႈႁႃၵဝ်ၼႂ်းတၢင်းဢၼ်ဢမ်ႇမီးဢၵျူဝ်း။ ၵဝ်ပဵၼ် ထႃႇဝရႃႉၽြႃး၊ ဢၼ်လၢတ်ႈၵႂၢမ်း ဢၼ်ၸိုဝ်ႈဢၼ်ၸႂ်ႈလႄႈႁႂ်ႈတြႃးတၢင်းဢၼ်သိုဝ်ႈတေႃႇပေႃႇဢွၵ်ႇထၢင်ႇသႃးဢေႃႈ။”
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵူၼ်းမဵဝ်းၵူႈၸိူဝ်ႉၵူႈၶိူဝ်းၶဝ်႟။ ဢွၼ်ၵၼ်ၸုတုမ်ၵၼ်မႃးတႃႉ။ သူၸိူဝ်းဢၼ်လွတ်ႈသေၽေးၵူႈသိုင်ႇၵူႈမိူင်းၶဝ်႟။ ဢွၼ်ၵၼ်မႃးပုၼ်ႈဢမုသူတႃႉ။ ၶဝ်ၸိူဝ်းဢၼ်ႁဵတ်းဝၢတ်ႈတီႈ ႁုၼ်ႇႁၢင်ႈသၢင်းထုဢၼ်ဢဝ်မႆႉႁဵတ်းလႄႈ သူးတွင်းတိူင်ႇထိုင်တီႈၽြႃးဢၼ် ဢမ်ႇၵႄႇသႄႇၶျွတ်ႈဢဝ်လႆႈၼၼ်ႉပဵၼ်ၶဝ်ၸိူဝ်းဢၼ်ဢမ်ႇမီးပိင်ႇၺႃႇ။
ဢွၼ်ၵၼ်မႃးမွၵ်ႇလၢတ်ႈလႄႈၽုၺ်ႇဢွၵ်ႇဢမုသူတီႈလုမ်းသေယဝ်ႉ၊ႁႂ်ႈၶဝ်တိူင်ႇပၢင်ႇၵၼ်တႃႉ။ ၽူႈလႂ်ႁေႃးလၢတ်ႈလွင်ႈမိူဝ်ႈမိုၼ်ႉ ၸိုၼ်ႉသိုၼ်းၼၼ်ႉ။ ၵဝ်၊ ထႃႇဝရႃႉၽြႃး၊ ၽြႃးပဵၼ်ၸဝ်ႈဢၼ် ၵႄႇသႄႇၶျွတ်ႈဢဝ်ၵူၼ်းၵဝ်ၼၼ်ႉဢမ်ႇၸႂ်ႈႁိုဝ်း။ ၼွၵ်ႈသေၵဝ်ၼႆႉ၊ဢမ်ႇမီးၽြႃးတၢင်ႇသူႇတၢင်ႇပႃး။
ၵူၼ်းလေႃးၵႃႉၶဝ်႟။ ဝၢႆႇမႃးၸူးတီႈၵဝ် မိူဝ်ႈလဵဝ်ၼႆႉလႄႈၶၢမ်ႇဢဝ်တၢင်းဢၼ်ၵႄႇသႄႇၶျွတ်ႈဢဝ်ၼၼ်ႉတႃႉ။ ၵဝ်ပဵၼ်ၽြႃးပဵၼ်ၸဝ်ႈဢၼ်မီးယူႇ သူႇလဵဝ်ပႃးလဵဝ်ၼၼ်ႉဢေႃႈ။
ၵႂၢမ်းၵတိၵဝ်ၼၼ်ႉယင်းတၵ်းဢမ်ႇလႅၵ်ႈဢမ်ႇလၢႆႈလႄႈပဵၼ်ဢၼ်မၢၼ်ႇမႅၼ်ႈၸိုဝ်ႈၸႂ်ႈဢေႃႈ။ ၵဝ်ဢဝ်တူဝ်ၵဝ်တိူင်ႇဝႃႈ၊ၵူႈၵေႃႉၵူႈၵူၼ်းတၵ်းဢွၼ်ၵၼ်သုတ်ႉၸပ်းသုတ်ႉၸူးတီႈၵဝ်လႄႈ ၶုပ်ႉၶဝ်ႇဝႆႈၽၢႆႇၼႃႈၵဝ်၊ဢိၵ်ႇတင်းၵူႈၵေႃႉၵူႈၵူၼ်းတၵ်းရူဝ်ႇသေႇၵူဝ်ယမ်ၵဝ်ဢေႃႈ။
ၵူႈၵေႃႉၵူႈၵူၼ်းတၵ်းဢွၼ်ၵၼ်လဝ်ႈလၢတ်ႈတီႈၵဝ်လႄႈဝႃႈ၊ ‘ၵႃႈၼႂ်း ထႃႇဝရႃႉၽြႃး၊ ၵူၺ်း လႆႈထူပ်းႁၼ်တၢင်းဢၼ်ပႄႉဢၼ်ၼႅင်ႇ ဢိၵ်ႇတင်းႁႅင်းတၼ်းၶူဝ်းဢေႃႈ။’ ရၢၼ်ႇသူႇၵဝ်ၵူႈၵေႃႉၵူႈၵူၼ်းၸမ်ႉ၊တၵ်းဢွၼ်ၵၼ်ႁွတ်ႈထိုင်တၢင်းဢၼ်ဢူၵ်းဢၼ်ဢၢႆဢေႃႈ။
ၵဝ်၊ ထႃႇဝရႃႉၽြႃး၊ တၵ်းၵႄႇသႄႇၼုၵ်ႈဢဝ်ၸိူဝ်ႉၶိူဝ်း ယႃႇၵုပ်ႈ၊ တင်းသဵင်ႈတင်းလူင်လႄႈ ၶဝ်တၵ်းဢွၼ်ၵၼ်ယုၵ်ႉယွင်ႈယွင်ႈယေႃးၵဝ်ဢေႃႈ။”
“ၼႆႉၸမ်ႉ၊ပဵၼ်လွင်ႈတီႈသုတ်းတီႈၵွႆၽြႃးမိူင်း ပႃႇပုလုၼ်ႇ၊ ၸိူဝ်းၼၼ်ႉဢေႃႈ။ ၽြႃး ပေႇလႃႉ၊ တင်းၽြႃး ၼေႇပေႃႇ၊ ၸိုင်၊ မိူဝ်ႈဢွၼ်ၼႆႉၼၼ်ႉပဵၼ်ၽြႃးဢၼ်ပိူၼ်ႈဝႆႈဢေႃႈ။ ၵူၺ်းၵႃႈ၊တေႃႈလဵဝ်ၼႆႉပိူၼ်ႈဢဝ်ၶဝ်တၢင်ႇသႂ်ႇၵႃႈၼိူဝ်မႃႉလီႈတင်းလၢႆ ႁႂ်ႈလႆႈပဵၼ်ၶူဝ်းဢၼ်ၼၵ်းဢၼ်ၼႃၵႃႈၼိူဝ်လင်သတ်းဢၼ်ႁိူဝ်ႉၼုၼ်းတင်းလၢႆဢေႃႈ။
ႁုၼ်ႇႁၢင်ႈသၢင်းထုတင်းလၢႆဢမ်ႇၸၢင်ႈၵႄႇသႄႇ ဢဝ်တူဝ်ၸဝ်ႈၵဝ်ႇလႆႈ၊ပိူၼ်ႈတိသိမ်းဢဝ်ၶဝ်ၵႂႃႇယဝ်ႉ။ ၼႆႉၸမ်ႉ၊ပဵၼ်လွင်ႈတီႈသုတ်းတီႈၵွႆၽြႃးမိူင်း ပႃႇပုလုၼ်ႇ၊ ၸိူဝ်းၼၼ်ႉဢေႃႈ။
ၸိူဝ်ႉၶိူဝ်း ယႃႇၵုပ်ႈ၊ ၶဝ်႟။ ထွမ်ႇဢဝ်ၵႂၢမ်းၵဝ်တႃႉ။ သူၸိူဝ်းဢၼ်ပဵၼ်ၵူၼ်းၵဝ်လႄႈၵိုတ်းၵျၢၼ်ႇယူႇၸိူဝ်းၼႆႉ၊ ၵဝ်လႆႈလုမ်းလႃးသူမႃးၸဵမ်မိူဝ်ႈၶိင်ႇၵႃႇလႃႉဢၼ်သူၵိူတ်ႇလဵင်ႉမႃးၼၼ်ႉဢေႃႈ။
ၵဝ်ပဵၼ်ၽြႃးပဵၼ်ၸဝ်ႈသူလႄႈတၵ်းလုမ်းလႃးသူ တေႃႇထိုင်ႁွတ်ႈသူထဝ်ႈၵႄႇလႄႈႁူဝ်ႁွၵ်ႇၼၼ်ႉဢေႃႈ။ ၵဝ်ၽၢၼ်ႇသၢင်းႁဵတ်းပဵၼ်သူလႄႈ တၵ်းလုမ်းလႃးသူဢေႃႈ။ ၵဝ်တၵ်းၸွႆႈထႅမ်သူလႄႈတၵ်းၵႄႇၼုၵ်ႈဢဝ်သူဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ ‘သူတၵ်းဢဝ်ၵဝ်တႅၵ်ႈတိူင်းၵၼ်တင်းၽူႈလႂ်၊ မီးၵေႃႉဢၼ်မိူၼ်ၵၼ်တင်းၵဝ်သေၵေႃႉသေၵူၼ်းႁိုဝ်း၊’ ဝႃႈၼင်ႇၼႆဢေႃႈ။
ၵူၼ်းတင်းလၢႆၽုၺ်ႇထူင်ၶဝ်လႄႈဢွၼ်ၵၼ်ထွၵ်ႇၶမ်းဢွၵ်ႇဢေႃႈ။ ၶဝ်ဢွၼ်ၵၼ်ၸင်ႈႁိဝ်ႈငိုၼ်းၵႃႈၼိူဝ် ယွႆးယႃႇၸူႇသေယဝ်ႉ၊ဢွၼ်ၵၼ် ၸၢင်ႈဢဝ်ငႃဢဝ်ၸၢင်ႈၶမ်းလႂ်မႃးႁဵတ်းၽြႃးဢေႃႈ။ ႁဵတ်းၼင်ႇၼၼ်လႄႈၶဝ်ဢွၼ်ၵၼ်ၶုပ်ႉမူပ်ႇဝႆႈႁုၼ်ႇႁၢင်ႈသၢင်းထုၼၼ်ႉဢေႃႈ။
ၶဝ်ဢဝ်ဢၼ်ၼၼ်ႉမႅၵ်ႇတၢင်ႇမႃႇလႄႈဢဝ်ၵႂႃႇဝႆႉၵႃႈတီႈတီႈယူႇမၼ်းဢေႃႈ။ မၼ်းၵေႃႈၸၢင်ႈၸုၵ်းယူႇဢေႃႈ။ မၼ်းဢမ်ႇၶၢႆႉသေၵႃႈတီႈ၊တီႈယူႇမၼ်းၼၼ်ႉလႆႈ။ ပိၵ်ႉသမ်ႉသေၵေႃႉသေၵူၼ်းၵၢဝ်ႇႁႃမၼ်းသေၵေႃႈမၼ်းဢမ်ႇဢိူဝ်လႆႈ။ မၼ်းဢမ်ႇ ၵႄႇသႄႇၼုၵ်ႈဢဝ်ၵေႃႉၼၼ်ႉဢွၵ်ႇသေၵႃႈၼႂ်းတုၵ်ႉၶႃႉတၢင်းၽၢၼ်လႆႈ။
သူၸိူဝ်းဢၼ်မီးဢပျတ်ႈၶဝ်႟။ ၶုၵ်းၸႂ်လႆႈ ၶႆႈၸႂ်ထူပ်းလွင်ႈတၢင်းၼႆႉတႃႉ။ ၶႆႈၸႂ်ဝူၼ်ႉၸႂ်လူၺ်ႈလွင်ႈတၢင်းဢၼ်ႁဵတ်းၼႆႉတႃႉ။
ဢွၼ်ၵၼ်ၶုၵ်းၸႂ်လႆႈၶႆႈၸႂ်ထူပ်း လွင်ႈတၢင်းဢၼ်ယၢမ်ႈပဵၼ်မႃးမိူဝ်ႈၵွၼ်ႇဢွၼ်ၼႆႉၸိူဝ်းၼၼ်ႉတႃႉ။ ႁုၸႅင်ႈလွင်ႈဢၼ်ၵဝ်သူႇလဵဝ်ပႃးလဵဝ်ၵူၺ်း ပဵၼ်ၽြႃးပဵၼ်ၸဝ်ႈ၊ဢိၵ်ႇတင်းလွင်ႈဢၼ် ၼွၵ်ႈသေၵဝ်ၼႆႉဢမ်ႇမီးၽြႃးတၢင်ႇသူႇတၢင်ႇပႃး။
ၸဵမ်မိူဝ်ႈၵေႃႇၸႃႉႁူဝ်ပိုင်းၼၼ်ႉ ၵဝ်ႁေႃးလၢတ်ႈဝႆႉထႃႈလွင်ႈတၢင်းဢၼ်တၵ်းပေႃႇဢွၵ်ႇပဵၼ်မႃးၼၼ်ႉ၊ ဢိၵ်ႇတင်းၸႃႉၸဵမ်မိူဝ်ႈမိုၼ်ႉၸိုၼ်ႉသိုၼ်းၼၼ်ႉ ၵဝ်မွၵ်ႇလၢတ်ႈဝႆႉလွင်ႈတၢင်းဢၼ်တၵ်းပဵၼ်မႃးၸိူဝ်းၼၼ်ႉဢေႃႈ။ ၵႂၢမ်းဢၼ်ၵဝ်ႁေႃးလၢတ်ႈဝႆႉထႃႈၼၼ်ႉၸမ်ႉ၊တၢင်းၵျၢမ်ႇတၢင်းပွင်ၵဝ်တၵ်းဢမ်ႇႁူင်ႈဢမ်ႇႁၢႆ၊ ၵဝ်တၵ်းႁႂ်ႈၵႃႈဢၼ်ၵဝ်မီးဢလူဝ်ႇၼၼ်ႉပျေႉၸုမ်ႇဝႆႉဢေႃႈ၊ဝႃႈၼႆဢေႃႈ။
ပိူဝ်ႈၼႆလႄႈၵဝ်ႁွင်ႉဢဝ်ၵူၼ်းၵေႃႉၼိုင်ႈဢွၵ်ႇသေၵႃႈတီႈၽၢႆႇတၢင်းဝၼ်းဢွၵ်ႇမႃးဢေႃႈ။ မၼ်းၼၼ်ႉတၵ်းၵိုင်ႉၵၢင်ႉလေႃႇလူင်းမႃးမိူၼ်ၸိူဝ်ႉၼင်ႇႁုင်ႉလႄႈ ၸွႆႈၵမ်ႉၸွႆႈထႅမ်ၼႂ်းၵႃႈဢၼ်ၵဝ်ဢၢင်ႈဢၢၼ်းတၵ်းႁဵတ်းၼၼ်ႉဢေႃႈ။ ၵဝ်မီးဢမိင်ႉယဝ်ႉ။ တၵ်းလႆႈပျေႉၸုမ်ႇဢေႃႈ။
သူၸိူဝ်းဢၼ်ၸႂ်ၵႅၼ်ႇၶႅင်ၶဝ်႟။ ဢွၼ်ၵၼ်ထွမ်ႇငိၼ်းၵႂၢမ်းၵဝ်တႃႉ။ ၽူႈလႂ်ထၢင်ႇဝႃႈတၢင်းဢၼ်ပႄႉဢၼ်ၼႅင်ႇၵႆၼႃႇဝႃႈၼင်ႇၼႆ။
ၵဝ်တၵ်းဢဝ်မိုဝ်ႉဝၼ်းဢၼ်ပႄႉဢၼ်ၼႅင်ႇၼၼ်ႉမႃးၸူးတီႈဢၼ်ၸမ်ဢေႃႈ။ မၼ်းဢမ်ႇမီးၵႃႈတီႈဢၼ်ၵႆၼၼ်ႉယဝ်ႉ။ ၵျေးၸူးတၢင်းဢၼ်ၵဝ်ၵႄႇသႄႇၶျွတ်ႈဢဝ်ၼၼ်ႉၵေႃႈဢမ်ႇလႆႈထိူင်းလႆႈၼၢၼ်း၊ ၵဝ်တၵ်းၵႄႇသႄႇၶျွတ်ႈဢဝ်ဝဵင်း ယေႇရုသလႅမ်ႇ၊ လႄႈႁဵတ်းပဵၼ် မုၼ်ၵုင်ႇသရေႇတီႈၵူၼ်းမဵဝ်း ဢိသရေး၊ ၵႃႈတီႈၼၼ်ႈဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “လုၵ်ႈယိင်းသၢဝ် ပႃႇပုလုၼ်ႇ၊ ႟။ လူင်းသေရႃႇၸႃႉပလၢင်ႇမႃးလႄႈၼင်ႈယူႇၵႃႈၼိူဝ်မုၼ်ႈလိၼ်တႃႉ။ မိူဝ်ႈၵွၼ်ႇဢွၼ်ၼႆႉမႂ်းယၢမ်ႈပဵၼ်မိူၼ် သၢဝ်ၵၼ်ႇၺႃႇဝဵင်းလူင်ဢၼ်ဢမ်ႇတွၼ်ႉသုမ်းပိူၼ်ႈၼၼ်ႉသေၵေႃႈ၊ မိူဝ်ႈလဵဝ်ၼႆႉမႂ်းဢမ်ႇမီးတၢင်းဢၼ် ၼုမ်ႇလီၵီႈလီ၊ဢမ်ႇဢူၼ်ႈလီ ဢွၼ်ႇလီယဝ်ႉလႄႈမႂ်းပဵၼ်ၶႃႈပိူၼ်ႈယူႇဢေႃႈ။
ဢဝ်မၢၵ်ႇႁိၼ်လူၺ်လႄႈလူၺ်ၶဝ်ႈပိူၵ်ႇတႃႉ။ ၽုၺ်ႇပိုတ်ႇၽႃႈဢၼ်ႁူမ်ႇၼႃႈမႂ်းၼၼ်ႉပႅတ်ႈလႄႈထွတ်ႇသိူဝ်ႈယၢဝ်းမႂ်းပႅတ်ႈတႃႉ။ ဝူတ်ႈသိၼ်ႈမႂ်းလႄႈၶၢမ်ႈၼမ်ႉႁွင်ႈ တႃႉ။
ၵူၼ်းတင်းလၢႆတၵ်းႁၼ်မႂ်းယူႇတူဝ်ပူၺ်လႄႈ၊ၶဝ် တၵ်းႁၼ်မႂ်းၶၢမ်ႇတၢင်းဢၼ်တူၵ်းတႅမ်ႇလႄႈၶၢမ်ႇတၢင်းဢၼ်ဢူၵ်းဢၼ်ဢၢႆဢေႃႈ။ ၵဝ်တၵ်းၶိုၼ်းႁဵတ်းတၢင်းဢၼ်တွပ်ႇတႅၼ်းလႄႈ ၽူႈလႂ်တၵ်းဢမ်ႇႁၢမ်ႈဢမ်ႇၶႅၼ်ၵဝ်လႆႈ။” ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈဢၼ်မူတ်းၸၢင်ႇလႄႈပဵၼ်ၽြႃးၵူၼ်းမဵဝ်း ဢိသရေး၊ ဢၼ်ပွႆႇႁႂ်ႈႁဝ်း လွတ်ႈၼၼ်ႉ၊မီးၼႃႇမႃႉၸိုဝ်ႈသဵင်ဝႃႈ၊ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ဢေႃႈ။
ထႃႇဝရႃႉၽြႃး၊ မီးဢမိင်ႉတီႈလုၵ်ႈယိင်းသၢဝ် ပႃႇပုလုၼ်ႇ၊ လႄႈဝႃႈ၊ “ၼင်ႈယူႇတဵတ်ႇတဵတ်ႇၵႃႈတီႈဢၼ်လပ်းသိင်ႇတႃႉ။ ၵမ်းလိုၼ်းၽူႈလႂ်တၵ်းဢမ်ႇႁွင်ႉမႂ်းဝႃႈ၊ ၼၢင်းႁေႃၶမ်းၵူၼ်းမဵဝ်းတင်းလၢႆသေၵေႃႉသေၵူၼ်း။
ၵဝ်ၸႂ်မႆႈၶႂ်ႈၸႃႉတီႈၵူၼ်းၵဝ်တင်းလၢႆလႄႈၵဝ်ဢမ်ႇမၢတ်ႈၶဝ်ပဵၼ်ၸိူဝ်ႉၼင်ႇၵူၼ်းၵဝ်ယဝ်ႉ။ ၵဝ်ဢဝ်ၶဝ်ဢၢပ်ႈပၼ်ၵႃႈၼႂ်းၽုင်းတၼ်းၶူဝ်းမႂ်းလႄႈ၊မႂ်းၵေႃႈယင်းဢမ်ႇပႃးၸႂ် ၵရုၼႃႇလႄႈဢဝ်ၵၢၼ်းဢၼ်ၼၵ်းၼႃႇ တၢင်ႇသႂ်ႇၵႃႈၼိူဝ်ၶဝ်ၸိူဝ်းဢၼ်ဢသၢၵ်ႈထဝ်ႈၵႄႇၼၼ်ႉယဝ်ႉ။
မႂ်းထၢင်ႇမႂ်းတၵ်းပဵၼ်ၼၢင်းႁေႃၶမ်းယူႇတႃႇသေႇ ဝႃႈၼႆလႄႈမႂ်းဢမ်ႇၶႆႈၸႂ်ဝူၼ်ႉၸႂ်လူၺ်ႈလွင်ႈၸိူဝ်းၼႆႉ၊ ယင်းဢမ်ႇႁုပွင်ႇၸႂ် လွင်ႈတၢင်းၼႆႉၸၢင်ႈသုတ်းၵႂႃႇသဵင်ႈၵႂႃႇၼၼ်ႉလူင်ပႄႇ။
ၵေႃႉဢၼ်ၸၢင်ႈမူၼ်ႈပျေႃႇလူၺ်ႈၵႃႇမၵုင်ႇၶဝ်႟။ ထွမ်ႇငိၼ်းတႃႉ။ မႂ်းထၢင်ႇမႂ်းလႆႈယူႇလူင်ႉလီလွတ်ႈလီၼႃႇလူင်လၢင်လႄႈ၊မႂ်းလၢတ်ႈဝႃႈ၊ မီးမႂ်းၵေႃႉလဵဝ်ၵူၺ်း၊ဢမ်ႇမီးၽူႈလႂ်သေၵေႃႉသေၵူၼ်းထႅင်ႈယဝ်ႉ၊ မႂ်းထၢင်ႇမႂ်းတၵ်းဢမ်ႇတွၼ်ႉပဵၼ်မႄႈမၢႆႈလႄႈ တၵ်းဢမ်ႇၶၢမ်ႇဝူၺ်ႇတၼႃႇတၢင်းဢၼ်လုၵ်ႈလၢင်းတၢႆဝႃႈၼႆယဝ်ႉ။
ၼႂ်းဝၼ်းလဵဝ်ၵၼ်၊ၶိင်ႇလဵဝ်ၵူၺ်းၽေးသွင်ပိူင်ၼႆႉ ဢၼ်ဝႃႈ၊တၢင်းဢၼ်လုၵ်ႈတၢႆ၊ဢိၵ်ႇတင်းတၢင်းဢၼ်ၽူဝ်တၢႆၼၼ်ႉတၵ်း ပဵၼ်မႃးဢေႃႈ။ ပိၵ်ႉသမ်ႉမႂ်းပိုင်ႈဢတၢတ်ႈၽီမေႃႇဝိၵ်ႉၸႃႇဢၼ်မႂ်းႁဵတ်းမႃးၼၼ်ႉသေၵေႃႈ၊ မႂ်းတၵ်းသုမ်းၽူဝ်မႂ်း၊ဢိၵ်ႇတင်းလုၵ်ႈလၢင်းမႂ်းဢေႃႈ။
မႂ်းသွၼ်ႈပိုင်ႈတၢင်းဢၼ်ႁၢႆႉဢၼ်ႁုၵ်းဢၼ်မႂ်းႁဵတ်းၼၼ်ႉယဝ်ႉ။ မႂ်းထၢင်ႇၽူႈလႂ်ဢမ်ႇႁၼ်မႂ်းလႆႈသေၵေႃႉသေၵူၼ်းဝႃႈၼႆယဝ်ႉ။ ပိင်ႇၺႃႇဢိၵ်ႇတင်းတၢင်းႁုတၢင်းၸႅင်ႈမႂ်းၼၼ်ႉ ဢွၼ်သူင်ႇႁႂ်ႈမႂ်းၽိတ်းပိူင်ႈတၢင်းၵႂႃႇလႄႈမႂ်းယင်းလၢတ်ႈတီႈတူဝ်မႂ်းလႄႈဝႃႈ၊ ‘မီးၵဝ်ၵေႃႉလဵဝ်ၵူၺ်း၊ဢမ်ႇမီးၽူႈလႂ်သေၵေႃႉသေၵူၼ်းထႅင်ႈယဝ်ႉ။’ ဝႃႈၼႆယူႇလူင်ပႄႇ။
ၽေးဢုပၢတ်ႈတၵ်းႁွတ်ႈထိုင်မႃးၵႃႈၼိူဝ်မႂ်းဢေႃႈ။ ဢတၢတ်ႈၽီမေႃႇဝိၵ်ႉၸႃႇမႂ်းၼၼ်ႉဢၼ်လႂ်ၵေႃႈဢမ်ႇၸၢင်ႈႁၢမ်ႈၸၢင်ႈၶႅၼ်မၼ်းလႆႈ။ တၢင်းလုတၢင်းလႅဝ်ဢၼ်မႂ်းဢမ်ႇတွၼ်ႉ ၼွၼ်းၽၼ်ႁၼ်သေပွၵ်ႈၼၼ်ႉတၵ်းၵိုင်ႉၵၢင်ႉႁွတ်ႈမႃးတီႈမႂ်းဢေႃႈ။
ဢိင်ဢတၢတ်ႈၽီမေႃႇဝိၵ်ႉၸႃႇမႂ်းဢၼ်မႂ်းယၢမ်ႈႁဵတ်းတီႈပိူၼ်ႈၼမ်ၼႃႇ၊ ဢၼ်မႂ်းၵႆႉႁဵတ်းမႃး၊ၸႃႉၸဵမ်မိူဝ်ႈဢၼ် ဢသၢၵ်ႈဢရွႆႇမႂ်းယင်းၼုမ်ႇယင်းလဵၵ်ႉၼၼ်ႉၸိူဝ်းၼၼ်ႉသေလႄႈတႄႇယူႇတႃႉ။ ပေႃးလီလႆႈဢၵျူဝ်းၸိုင်၊ၸၢင်ႈၶႄး တၵ်းလႆႈဢေႃႈ။ ပေႃးလီပႄႉၼႅင်ႇၸိုင်၊ၸၢင်ႈၶႄးတၵ်းပႄႉၼႅင်ႇဢေႃႈ။
မႂ်းယၢပ်ႇၸႂ်ၶၢၼ်ၸႂ်ၼႃႇလူင်လၢင်ၵွပ်ႈပိူဝ်ႈတၢင်းဢၼ်မႂ်းတိူင်ႇပၢင်ႇၵၼ်ၼမ်ၼႃႇၼၼ်ႉယဝ်ႉ။ ႁႂ်ႈၶဝ်ၸိူဝ်းဢၼ်လူတူၺ်းၽႃႉၵၢင်ႁၢဝ်လႂ်၊ ၶဝ်ၸိူဝ်းဢၼ်သွၼ်ဢဝ်လွင်ႈလၢဝ် ၼၢၵ်ႈၶၢတ်ႈလႂ်၊ၶဝ်ၸိူဝ်းဢၼ်တူၺ်းႁၢင်ႈၽၢင်လိူၼ်လႄႈ ႁေႃးလၢတ်ႈလွင်ႈတၢင်းဢၼ်တၵ်းပဵၼ်မႃးၸိူဝ်းၼၼ်ႉလႄႈ ၵႄႇသႄႇၶျွတ်ႈဢဝ်မႂ်းမိူဝ်ႈလဵဝ်ၼႆႉသေၵမ်းလူၺ်ႈ။
ၶဝ်ၸိူဝ်းၼၼ်ႉတၵ်းပဵၼ်ၸိူဝ်ႉၼင်ႇမုၼ်ႈယိူဝ်ႈမုၼ်ႈၽွႆလႄႈၽႆးတၵ်းမႆႈၶဝ်ပႅတ်ႈဢေႃႈ။ ၶဝ်ဢမ်ႇၵႄႇသႄႇၼုၵ်ႈဢဝ်တူဝ်ၶဝ်လႆႈ၊ပိဝ်ၽႆးၼၼ်ႉမႆႈႁွၼ်ႉပုၼ်ႈၶဝ်ဢေႃႈ။ တၵ်းဢမ်ႇပဵၼ်ထၢၼ်ႇၽႆးပုၼ်ႈဢၼ်ၶဝ်တၵ်းဢွမ်ႇႁႂ်ႈတူဝ်ၶဝ်ဢုၼ်ႇလႃးလႃး။
ၶဝ်ၸိူဝ်းဢၼ်ပဵၼ်သြႃႇၼၢၵ်ႈၶၢတ်ႈဢၼ်မႂ်း တိူင်ႇပၢင်ႇမႃးၸူဝ်ႈဢသၢၵ်ႈမႂ်းၼၼ်ႉႁဵတ်းလွင်ႈဢၼ်လီလႆႈထၢၼ်ႇၼႆႉၵူၺ်းယဝ်ႉ၊ ၶဝ်ၸိူဝ်းၼၼ်ႉတၵ်းၸုၼ်ႉပႅတ်ႈမႂ်းဝႆႉသေယဝ်ႉ၊ဝႄႈဢွၵ်ႇၸွမ်းသဵၼ်ႈတၢင်းၶဝ်ၵႂႃႇလႄႈ ပုၼ်ႈတႃႇတေၵႄႇသႄႇဢဝ်မႂ်းၼၼ်ႉ ဢမ်ႇၵိုတ်းၵျၢၼ်ႇဝႆႉသေၵေႃႉသေၵူၼ်းယဝ်ႉ၊” ဝႃႈၼင်ႇၼႆဢေႃႈ။
သူၸိူဝ်းဢၼ်သိုပ်ႇလူင်းမႃးၵႃႈတီႈၸိူဝ်ႉၶိူဝ်း ယႃႇၵုပ်ႈ၊ လႄႈ ပဵၼ်ၵူၼ်းမဵဝ်း ဢိသရေး၊ ဢၼ်လႆဢွၵ်ႇမႃးၵႃႈတီႈၼမ်ႉဢွၵ်ႇႁူး ယုတႃႉ၊ ၶဝ်႟။ ထွမ်ႇငိၼ်းလွင်ႈတၢင်းၼႆႉတႃႉ။ သူဢဝ်ၼႃႇမႃႉၸိုဝ်ႈသဵင် ထႃႇဝရႃႉၽြႃး၊ သေလႄႈ ၵိၼ်ႇဝႃႈလွင်ႈဢၼ်သူတၵ်းဝႆႈၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ သေၵေႃႈ၊ ၵႂၢမ်းသူၼၼ်ႉဢမ်ႇၸိုဝ်ႈဢမ်ႇၸႂ်ႈ၊ဢမ်ႇမီးသဵတ်ႈၸႃႇသေၶေႃႈသေၵမ်း။
ၼႂ်းဝႃႈၼၼ်သေၵေႃႈသူယင်းဢုပ်ႇဝၢဝ်းတူဝ်သူလႄႈလၢတ်ႈဝႃႈ၊ “ႁဝ်းၼႆႉပဵၼ်ၵူၼ်းဝၢၼ်ႈၵူၼ်းဝဵင်းဢၼ်မူတ်းၸၢင်ႇၸဝ်ႈလႄႈ ႁဝ်းၼႆႉဢိင်ပိုင်ႈၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ဢၼ်မီးၼႃႇမႃႉၸိုဝ်ႈသဵင်ဝႃႈ၊ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၼၼ်ႉဢေႃႈ၊” ဝႃႈၼင်ႇၼႆလူင်ပႄႇ။
ထႃႇဝရႃႉၽြႃး၊ မီးဢမိင်ႉတီႈၵူၼ်းမဵဝ်း ဢိသရေး၊ ၸမ်ႉ၊ “မိူဝ်ႈၵွၼ်ႇဢွၼ်ၼႆႉၼၼ်ႉ ၵဝ်ႁေႃးလၢတ်ႈဝႆႉထႃႈလွင်ႈတၢင်းဢၼ်တၵ်းပဵၼ်ၸိူဝ်ႉၼင်ႇႁိုဝ်မႃးၼၼ်ႉယဝ်ႉလႄႈ ၵဝ်ၵိုင်ႉၵၢင်ႉႁဵတ်းလွင်ႈတၢင်းၸိူဝ်းၼၼ်ႉႁႂ်ႈပဵၼ်မႃးယဝ်ႉဢေႃႈ။
ၵွပ်ႈပိူဝ်ႈၵဝ်ႁုလွင်ႈဢၼ်မႂ်းမီးၸႂ်သၽေႃးဢၼ်တိုဝ်တၼ်၊ၶေႃးၶႅင်မိူၼ်တႅင်ႈလဵၵ်းလႄႈ ၼႃႈၽၢၵ်ႇၵေႃႈပဵၼ်မိူၼ်တွင်းလိူင်ဢေႃႈ။
ၵဝ်ဢဝ်လွင်ႈတၢင်းၸိူဝ်းၼႆႉႁေႃးလၢတ်ႈထႃႈဝႆႉတီႈသူၸႃႉၸဵမ်မိူဝ်ႈၵွၼ်ႇဢွၼ်ၼၼ်ႉယဝ်ႉ၊ ၽုၺ်ႇဢွၵ်ႇၼႄပျႃးဝႆႉၸႃႉၸဵမ်မိူဝ်ႈလွင်ႈတၢင်းၸိူဝ်းၼႆႉယင်းဢမ်ႇပႆႇပဵၼ်မႃးၼၼ်ႉယဝ်ႉ။ ပုၼ်ႈလွင်ႈၼင်ႇႁိုဝ်တၵ်းႁႄႉၶႅၼ်သူဢမ်ႇႁႂ်ႈသူမီးတီႈတၵ်းလၢတ်ႈဝႃႈ၊ ‘ႁုၼ်ႇႁၢင်ႈသၢင်းထုၵဝ်ႁဵတ်းလွင်ႈတၢင်းၸိူဝ်းၼၼ်ႉယဝ်ႉ။ ႁုၼ်ႇႁၢင်ႈသၢင်းထုဢၼ်ၵဝ်တွင်ႈႁဵတ်းၶၵ်းႁဵတ်း၊ဢၼ်ၵဝ်သွၼ်းႁဵတ်းလေႃႇႁဵတ်းၸိူဝ်းၼၼ်ႉ ႁဵတ်းႁႂ်ႈလွင်ႈတၢင်းၸိူဝ်းၼႆႉပဵၼ်မႃးဢေႃႈ၊’ ဝႃႈၼင်ႇၼႆဢေႃႈ။
လွင်ႈတၢင်းၵႃႈဢၼ်ၵဝ်မွၵ်ႇလၢတ်ႈထႃႈဝႆႉ တင်းသဵင်ႈတင်းလူင်ၼၼ်ႉမိူဝ်ႈလဵဝ်ၼႆႉပျေႉၸုမ်ႇပဵၼ်ၸွမ်းမႃးယဝ်ႉ။ သူတၵ်းလႆႈၶၢမ်ႇဢဝ်လွင်ႈတၢင်းဢၼ်ၵဝ်ႁေႃးလၢတ်ႈဝႆႉထႃႈၸိူဝ်းၼၼ်ႉ ပဵၼ်ဢၼ်မၢၼ်ႇမႅၼ်ႈၸိုဝ်ႈၸႂ်ႈၼၼ်ႉဢေႃႈ။ ၵမ်းၼႆႉၸမ်ႉ၊ၵဝ်သမ်ႉတၵ်းမွၵ်ႇလၢတ်ႈၼႄသူလွင်ႈတၢင်းဢၼ်တၵ်းပဵၼ်မႃးမႂ်ႇမႂ်ႇ၊ မဵဝ်းဢၼ်ဢမ်ႇပႆႇတွၼ်ႉၽုၺ်ႇဢွၵ်ႇၼႄပျႃးသေပွၵ်ႈၼၼ်ႉဢေႃႈ။
ၵဝ်ႁဵတ်းႁႂ်ႈလွင်ႈတၢင်းၸိူဝ်းၼႆႉပဵၼ်မႃးမိူဝ်ႈလဵဝ်ၼႆႉၵူၺ်းဢေႃႈ။ မိူဝ်ႈၵွၼ်ႇဢွၼ်ၼႆႉၼၼ်ႉလွင်ႈတၢင်းၸိူဝ်ႉၼင်ႇၼႆဢမ်ႇပႆႇတွၼ်ႉပဵၼ်မႃးသေပွၵ်ႈ။ တေႃႇထိုင်ႁွတ်ႈမိူဝ်ႈလဵဝ်ၼႆႉလႄႈမႂ်းဢမ်ႇပႆႇယၢမ်ႈငိၼ်း။ ပိူဝ်ႈၼႆလႄႈမႂ်းဢမ်ႇမီးဢၶႂၢင်ႉဢၼ်လႆႈလၢတ်ႈလႄႈဝႃႈ၊ ‘ၵဝ်ႁုထႃႈဝႆႉယဝ်ႉ’ ဝႃႈၼႆၼၼ်ႉ၊
ၵဝ်ႁုလွင်ႈဢၼ်မႂ်းၼႆႉပဵၼ်ၵေႃႉဢၼ်ဢမ်ႇယုမ်ႇလႆႈၼၼ်ႉလႄႈ၊ ၵဝ်ႁုႁၼ်လွင်ႈဢၼ်မႂ်းၼႆႉပဵၼ်ၵေႃႉဢၼ် လုၵ်ႉၽိုၼ်ႉယူႇတႃႇသေႇၼၼ်ႉဢေႃႈ။ ၵွပ်ႈပိူဝ်ႈၸိူဝ်ႉၼင်ႇၼႆလႄႈမႂ်းဢမ်ႇတွၼ်ႉငိၼ်းလွင်ႈတၢင်းၸိူဝ်းၼႆႉလႆႈ။ ၶေႃႈၵႂၢမ်းဢၼ်လၢတ်ႈလွင်ႈတၢင်းၼႆႉၵေႃႈဢမ်ႇတွၼ်ႉၶဝ်ႈႁူမႂ်းလႆႈ။
ပုၼ်ႈလွင်ႈၼင်ႇႁိုဝ်ပိူၼ်ႈတၵ်းယွင်ႈယေႃးၼႃႇမႃႉၸိုဝ်ႈသဵင်ၵဝ်ၸိုင်၊ ၵဝ်လႆႈၶျုၵ်ႈၵၼ်ႈတေႃးသႃႉၵဝ်၊ယိူၼ်ႉၶၢမ်ႇတၢင်းၽိတ်းမႂ်းလႄႈဢမ်ႇယႃႉၽဵဝ်ႈမႂ်းပႅတ်ႈ။
ၵဝ်ၸႅတ်ႈၶႃႇတူၺ်းမႂ်းၵႃႈၼႂ်းၽႆးတုၵ်ႉၶႃႉယဝ်ႉ၊ ၵဝ်ၸႅတ်ႈတူၺ်းမိူၼ်ၸိူဝ်ႉၼင်ႇၸႅတ်ႈငိုၼ်းၵႃႈၼႂ်းမိုင်ႈယဝ်ႉလႄႈ ဢမ်ႇပဵၼ်မိူၼ်ငိုၼ်းလႄႈဢမ်ႇမီးၵႃႈၶၼ်လႃးလႃးၼၼ်ႉဢေႃႈ။
လွင်ႈဢၼ်ၵဝ်ႁဵတ်းၼႆႉၵဝ်ႁဵတ်းပုၼ်ႈတူဝ်ၸဝ်ႈၵဝ်ႇဢေႃႈ။ ၵဝ်တၵ်းဢမ်ႇႁႂ်ႈၼႃႇမႃႉၸိုဝ်ႈသဵင်ၵဝ်လႆႈတူၵ်းတႅမ်ႇ၊ ၵဝ်တၵ်းဢမ်ႇဢဝ်မုၼ်ၵုင်ႇသရေႇၵဝ်၊ဢၼ်ၵဝ်ႁႂ်ႈပဵၼ်ပုၼ်ႈတူဝ်ၸဝ်ႈၵဝ်ႇ သူႇလဵဝ်ပႃးလဵဝ်ၵူၺ်းၼၼ်ႉပၼ်တီႈပိူၼ်ႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “မဵဝ်း ဢိသရေး၊ ၵူၼ်းဢၼ်ၵဝ်ႁွင်ႉဢဝ်ၼၼ်ႉ႟။ ထွမ်ႇငိၼ်းၵႂၢမ်းၵဝ်တႃႉ။ ၵဝ်ပဵၼ်ၽြႃးပဵၼ်ၸဝ်ႈ၊ၸဝ်ႈဢၼ်ဢွၼ်တၢင်းသုတ်း၊ၸဝ်ႈဢၼ်လိုၼ်းလင်သုတ်းလႄႈ ပဵၼ်ၽြႃးပဵၼ်ၸဝ်ႈသူႇလဵဝ် ပႃးလဵဝ်ၵူၺ်းၼၼ်ႉဢေႃႈ။
မိုဝ်းၵဝ်ႁဵတ်းပဵၼ်ငဝ်ႈႁၢၵ်ႈလိၼ်မိူင်းလႄႈၶဵင်ႈမုင်းၽႃႉၵၢင်ႁၢဝ်ဢေႃႈ။ မိူဝ်ႈဢၼ်ၵဝ်ႁွင်ႉဢဝ်ၶဝ်ၼၼ်ႉ လိၼ်မိူင်းတင်းတွင်ႉၽႃႉၼၼ်ႉၵေႃႈပေႃႇပဵၼ်မႃးၽွမ်ႉမိူဝ်ႈလဵဝ်ၵၼ်ဢေႃႈ။
သူၵႃႈမီးတင်းသဵင်ႈတင်းလူင်ၶဝ်႟။ ၸုတုမ်ၵၼ်လႄႈထွမ်ႇငိၼ်းတႃႉ။ ၼႂ်းၽြႃးၸိူဝ်းၼၼ်ႉၽူႈလႂ်ႁေႃးလၢတ်ႈထႃႈဝႆႉလူၺ်ႈလွင်ႈဢၼ်ဝႃႈ၊ ‘ၵေႃႉဢၼ်ၵဝ်လိူၵ်ႈဢဝ်ၼၼ်ႉတၵ်းတိုၵ်းတေႃးမိူင်း ပႃႇပုလုၼ်ႇ၊ ဢေႃႈ’ ဝႃႈၼႆၼၼ်ႉ၊ ၵေႃႉၼၼ်ႉတၵ်းႁဵတ်းတီႈပိူၼ်ႈၵႃႈၼင်ႇဢၼ်ၵဝ်မီးဢလူဝ်ႇႁႂ်ႈမၼ်းႁဵတ်းၼၼ်ႉဢေႃႈ။
ၵဝ်ပဵၼ်ၸဝ်ႈဢၼ်လၢတ်ႈလွင်ႈတၢင်းၼႆႉလႄႈပဵၼ်ၸဝ်ႈဢၼ်ႁွင်ႉဢဝ်ၵေႃႉၼၼ်ႉယဝ်ႉ။ ၵဝ်ဢဝ်မၼ်းမႃးယဝ်ႉ။ ၵဝ်ပၼ်ႁႂ်ႈမၼ်းပႄႉၼႅင်ႇဢေႃႈ။
မိူဝ်ႈလဵဝ်ၼႆႉ၊သုတ်ႉၸပ်းသုတ်ႉၸူးတီႈၵဝ်လႄႈထွမ်ႇဢဝ်ၵႂၢမ်းဢၼ်ၵဝ်လၢတ်ႈၼၼ်ႉတႃႉ။ ၸႃႉၸဵမ်မိူဝ်ႈၵေႃႇၸႃႉႁူဝ်ပိုင်းၼၼ်ႉ ၵဝ်ၽုၺ်ႇမွၵ်ႇလၢတ်ႈၼႄၸႅင်ႈၸႅင်ႈလႅင်းလႅင်းဢေႃႈ။ ၵဝ်ႁႂ်ႈၵႂၢမ်းဢၼ်ၵဝ်လၢတ်ႈယဝ်ႉၼၼ်ႉ ပျေႉၸုမ်ႇပဵၼ်ၸွမ်းဢမၢၼ်ႇၶၼ်ပဵၼ်ဢေႃႈ၊” ဝႃႈၼင်ႇၼႆဢေႃႈ။ (တေႃႈလဵဝ်ၼႆႉ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ဢၢပ်ႈပၼ်ၽုင်းတၼ်းၶူဝ်းတီႈၵဝ်လႄႈပွႆႇၸႂ်ႉၵဝ်ယဝ်ႉ။)
ၽြႃးပဵၼ်ၸဝ်ႈဢၼ်မူတ်းၸၢင်ႇလႄႈပဵၼ်ၽြႃးၵူၼ်းမဵဝ်း ဢိသရေး၊ ထႃႇဝရႃႉၽြႃး၊ ဢၼ်ၵႄႇသႄႇဢဝ်မႂ်းၼၼ်ႉမီးဢမိင်ႉၸမ်ႉ၊ “ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈ၊မႂ်း ဢၼ်သင်ႇသွၼ်ပၼ်လွင်ႈတၢင်းဢၼ်ပွင် ဢၵျူဝ်းမႂ်းလႄႈဢဝ်သူင်ႇၵႂႃႇၵႃႈၼႂ်းသဵၼ်ႈတၢင်းဢၼ်မႂ်းထုၵ်ႇလီၵႂႃႇၼၼ်ႉဢေႃႈ။
သင်မႂ်းလႆႈပႂ်ႉၵမ်ပႂ်ႉၸွမ်းပိင်းၺၢပ်ႈၵဝ်တင်းလၢႆၸိုင်၊တၢင်းလီမၢင်ႇၵလႃႇတၵ်းလႆပုၼ်ႈမႂ်း၊ မိူၼ်ၸိူဝ်ႉၼင်ႇၼမ်ႉႁွင်ႈၼမ်ႉၵႄးဢၼ်ဢမ်ႇႁႅင်ႈလႆႈၼၼ်ႉဢေႃႈ။ ပႃႇရမီႇတၢင်းဢၼ်သိုဝ်ႈတေႃႇမႂ်းၼၼ်ႉ တၵ်းမိူၼ်ၸိူဝ်ႉၼင်ႇလႅင်းၼမ်ႉပိူပ်ႈၼမ်ႉ၊ၼမ်ႉသမ်ႇမုၵ်ႈတြႃႇၼၼ်ႉဢေႃႈ။
မဵဝ်းၸိူဝ်ႉၶိူဝ်းမႂ်းတၵ်းၼမ်ၵိုၼ်းမိူၼ်ၸိူဝ်ႉၼင်ႇမဵတ်ႉႁိၼ်မဵတ်ႉသၢႆးလႄႈ ၵဝ်တၵ်းဢမ်ႇႁႂ်ႈၶဝ်လုၵႂႃႇသုမ်းၵႂႃႇ သေပွၵ်ႈသေလႂ်ဢမၢၼ်ႇၶၼ်ပဵၼ်ဢေႃႈ၊” ဝႃႈၼင်ႇၼႆဢေႃႈ။
သူဢွၼ်ၵၼ်ဢွၵ်ႇသေၵႃႈတီႈမိူင်း ပႃႇပုလုၼ်ႇ၊ ၵႂႃႇတႃႉ။ ဢွၵ်ႇၵႂႃႇလွတ်ႈလွတ်ႈလႅဝ်းလႅဝ်းတႃႉ။ ဢွၼ်ၵၼ်ပႃးတၢင်းဢၼ်ၸူမ်းသိူဝ်းလႄႈၵိဝ်သဵင်မွၵ်ႇလၢတ်ႈၶၢဝ်ႇငၢဝ်းဢၼ်မႂ်ႇၼႆႉ တေႃႇထိုင်ႁွတ်ႈတီႈႁိမ်းလႅၼ်လိၼ်သုတ်းပုၼ်ႉလႄႈဝႃႈ၊ “ ထႃႇဝရႃႉၽြႃး၊ ထုတ်ႇဢဝ်ၶႃႈမၼ်းၸဝ်ႈ ၵူၼ်းမဵဝ်း ဢိသရေး၊ ယဝ်ႉ၊” ဝႃႈၼင်ႇၼႆတႃႉ။
ၼႂ်းမိူဝ်ႈဢၼ် ထႃႇဝရႃႉၽြႃး၊ ဢွၼ်သူင်ႇ ၵူၼ်းမၼ်းၸဝ်ႈၵႂႃႇၸွမ်းသဵၼ်ႈတၢင်းထိူၼ်ႇလႅင်ႉဢၼ်မႆႈႁွၼ်ႉၼႃႇၼၼ်ႉ၊ ၵူၼ်းမၼ်းၸဝ်ႈဢမ်ႇဢိုပ်းၼမ်ႉယၢၵ်ႇၼမ်ႉ။ မၼ်းၸဝ်ႈႁဵတ်းႁႂ်ႈၼမ်ႉဢွၵ်ႇသေၵႃႈတီႈႁိၼ်ၽႃမႃးပုၼ်ႈၶဝ်ဢေႃႈ။ မၼ်းၸဝ်ႈၽႃႇႁိၼ်ၽႃလႄႈၼမ်ႉၵေႃႈပုင်ႈဢွၵ်ႇမႃးဢေႃႈ။
“ပုၼ်ႈၶဝ်ၸိူဝ်းဢၼ်မီးဢပျတ်ႈၼၼ်ႉ ဢမ်ႇမီးတၢင်းဢၼ်ၵတ်းယဵၼ်ၶျၢမ်းသႃႇလႃးလႃး၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ၶဝ်ၸိူဝ်းဢၼ်ယူႇတီႈဢၼ်ၵႆ၊ၸွမ်းသၢပ်ႇပၢင်ႇလၢႆႇၶဝ်႟။ ဢွၼ်ၵၼ်ထွမ်ႇငိၼ်းၵႂၢမ်းၵဝ်တႃႉ။ ထႃႇဝရႃႉၽြႃး၊ ႁွင်ႉဢဝ်ၵဝ်ၸဵမ်မိူဝ်ႈဢၼ်ၵဝ် ယင်းဢမ်ႇပႆႇၵိူတ်ႇၼၼ်ႉသေယဝ်ႉ၊ၶၢၼ်းၵဝ်ဝႆႉၼႂ်းဢရႃႇၵူၼ်းၸႂ်ႉၵူၼ်းသွႆမၼ်းၸဝ်ႈဢေႃႈ။
မၼ်းၸဝ်ႈႁဵတ်းႁႂ်ႈၵႂၢမ်းၵဝ်ၽၢႆမိူၼ်လၢပ်ႇဢၼ်ၽၢႆၼႃႇၼၼ်ႉဢေႃႈ။ မၼ်းၸဝ်ႈဢဝ်ၶႅၼ်မိုဝ်းမၼ်းၸဝ်ႈၵႅတ်ႇၶႄႁႄႉၵင်ႈၵဝ်ဢေႃႈ။ မၼ်းၸဝ်ႈႁႂ်ႈၵဝ်ပဵၼ်ပၢႆပိုၼ်ၵၢင်ႇဢၼ်သဵမ်ႈလႅမ်လီလႄႈတၼ်းဝႆႉတႃႇတေပိုတ်းယိုဝ်းဢေႃႈ။
မၼ်းၸဝ်ႈမီးဢမိင်ႉတီႈၵဝ်လႄႈဝႃႈ၊ “ ဢိသရေး၊ ႟။ မႂ်းပဵၼ်ၶႃႈၵဝ်ဢေႃႈ။ ၵွပ်ႈပိူဝ်ႈမႂ်းလႄႈၵူၼ်းတင်းလၢႆတၵ်းယွင်ႈယေႃးၵဝ်ဢေႃႈ၊” ဝႃႈၼင်ႇၼႆဢေႃႈ။
ၵဝ်ၶိုၼ်းလဝ်ႈလၢတ်ႈလႄႈဝႃႈ၊ “ၵဝ်လႆႈသၢင်ႈႁဵတ်းယဝ်ႉ။ ၵူၺ်းၵႃႈဢမ်ႇမီးဢၵျူဝ်း။ ၵဝ်ဢဝ်ႁႅင်းဢွၵ်ႇယဝ်ႉ။ မၼ်းပဵၼ်ဢၼ်လၢႆလၢႆလွၵ်ႇလွၵ်ႇဢမ်ႇပွင်ႇလွင်ႈၵႃႈသင်ယဝ်ႉ၊” ၼႂ်းဝႃႈၼၼ်သေၵေႃႈ၊ၵဝ်ယုမ်ႇယမ်ဢိင်ပိုင်ႈ ထႃႇဝရႃႉၽြႃး၊ ပုၼ်ႈဢၼ်တၵ်း ၸွႆႈၵမ်ႉဢမုၵဝ်ၼႆႉလႄႈမၼ်းၸဝ်ႈ တၵ်းတွပ်ႇတႅၼ်းၵႃႈၶၼ်ပုၼ်ႈၵၢၼ်ငၢၼ်းဢၼ်ၵဝ်ႁဵတ်းၼၼ်ႉဢေႃႈ။
ၸႃႉၸဵမ်မိူဝ်ႈဢၼ်ၵဝ်ယင်းဢမ်ႇပႆႇၵိူတ်ႇၼၼ်ႉ ထႃႇဝရႃႉၽြႃး၊ ၶၢၼ်းႁႂ်ႈၵဝ် ဢဝ်ၵူၼ်းမဵဝ်းမၼ်းၸဝ်ႈၶိုၼ်းမႃးၸူးတီႈမၼ်းၸဝ်ႈ၊ႁႂ်ႈၵဝ်ႁွင်ႉၸုႁွင်ႉတုမ် ၵူၼ်းမဵဝ်း ဢိသရေး၊ ဢၼ်ၽၢတ်ႇၽႄၵၼ်မၢၵ်ႇမိူဝ်ဝႆႉၸိူဝ်းၼၼ်ႉဢေႃႈ။ ထႃႇဝရႃႉၽြႃး၊ ပၼ်မုၼ်ၵုင်ႇသရေႇ တီႈၵဝ်လႄႈပဵၼ်တီႈဢၼ်ၵဝ်လႆႈဢဵၼ်လႆႈႁႅင်းဢေႃႈ။
ထႃႇဝရႃႉၽြႃး၊ မီးဢမိင်ႉတီႈၵဝ်လႄႈဝႃႈ၊ “ၶႃႈၵဝ်႟။ ၵဝ်မီးၼႃႈၵၢၼ်ဢၼ်ယဵင်ႈၶႅၼ်းယႂ်ႇပုၼ်ႈမႂ်းဢေႃႈ။ မႂ်းမီးပုၼ်ႈၽွၼ်းဢၼ်တၵ်းပႃးဢဝ်ၵူၼ်းမဵဝ်း ဢိသရေး၊ ဢၼ်ၵိုတ်းဢၼ်ၵျၢၼ်ႇယူႇၸိူဝ်းၼႆႉ ၶိုၼ်းမႃးပဵၼ်ဢၼ်ယူႇလီၵူၺ်းဢမ်ႇၵႃး၊မႂ်းမီးပုၼ်ႈၽွၼ်းႁႂ်ႈပၼ်ဢၼ်လႅင်းတီႈ မဵဝ်းၵူၼ်းတင်းလၢႆ၊ၼင်ႇႁိုဝ်ၵူၼ်းလေႃးၵီႇ တင်းလၢႆတၵ်းလႆႈလွတ်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈဢၼ်မူတ်းၸၢင်ႇလႄႈပဵၼ်ၽြႃးၵူၼ်းမဵဝ်း ဢိသရေး၊ မီးဢမိင်ႉ တီႈၵေႃႉဢၼ်လႆႈၶၢမ်ႇတၢင်းဢၼ်ပိူၼ်ႈႁဵတ်းဢမ်ႇပေႃးၼင်ႇႁိုဝ်လႄႈ လႆႈၶၢမ်ႇတၢင်းဢၼ်ၵူၼ်းၵူႈမိူင်းလီႁင်ႈ ဢဵတ်ႇသဵတ်ႇ၊ဢိၵ်ႇတင်းပဵၼ်ၶႃႈၵူၼ်းၸႂ်ႉၵူၼ်းသွႆၶုၼ်တင်းလၢႆၼၼ်ႉလႄႈဝႃႈၸမ်ႉ၊ “ၶုၼ်ႁေႃၶမ်းတင်းလၢႆတၵ်းႁၼ်တၢင်းဢၼ်မႂ်း လႆႈၶၢမ်ႇဢဝ်တၢင်းဢၼ်ပွႆႇလွတ်ႈလႄႈတၵ်းလုၵ်ႉသေလႄႈပၼ်တၢင်းဢၼ်ရူဝ်ႇသေႇ တီႈမႂ်း။ ဢိၵ်ႇတင်းလုၵ်ႈၸဝ်ႈလုၵ်ႈၵွၼ်းတင်းလၢႆတၵ်းႁၼ်လွင်ႈတၢင်းၼၼ်ႉသေယဝ်ႉ၊ ၶဝ်တၵ်းဢွၼ်ၵၼ်ၶုပ်ႉမူပ်ႇလူင်းလႄႈႁဵတ်းတၢင်း ဢၼ်ရူဝ်ႇသေႇၵူဝ်ယမ်တီႈမႂ်းဢေႃႈ၊” ဝႃႈၼင်ႇၼႆဢေႃႈ။ လွင်ႈတၢင်းၼႆႉလႆႈပဵၼ်မႃးၵွပ်ႈပိူဝ်ႈ ထႃႇဝရႃႉၽြႃး၊ လိူၵ်ႈဢဝ်ၶႃႈမၼ်းၸဝ်ႈဢိၵ်ႇတင်းၵွပ်ႈပိူဝ်ႈၽြႃးပဵၼ်ၸဝ်ႈဢၼ်မူတ်းၸၢင်ႇလႄႈ ပဵၼ်ၽြႃးၵူၼ်းမဵဝ်း ဢိသရေး၊ ၶဝ်ပႂ်ႉသဵတ်ႈၸႃႇၼၼ်ႉဢေႃႈ။
ထႃႇဝရႃႉၽြႃး၊ မီးဢမိင်ႉတီႈၵူၼ်းမၼ်းၸဝ်ႈတင်းလၢႆလႄႈဝႃႈ၊ “ၼႂ်းမိုဝ်ႉဝၼ်းၶိင်ႇၵႃႇလႃႉဢၼ်ထုတ်ႇဢဝ်သူ ႁွတ်ႈထိုင်မႃးၼၼ်ႉၵဝ်တၵ်းၼႄပျႃးတၢင်းဢၼ်ၵဝ်ထုၵ်ႇၸႂ်ၵျိူၵ်ႈၸႂ်သူလႄႈ ၶိုၼ်းတွပ်ႇတၢင်းဢၼ်သူၵၢဝ်ႇတိူင်ႇပုၼ်ႈတၢင်းၸွႆႈတၢင်းထႅမ်ၼၼ်ႉဢေႃႈ။ ၵဝ်တၵ်းပႂ်ႉလူပႂ်ႉတူၺ်းသူ၊ၵႅတ်ႇၶႄႁႄႉၵင်ႈပၼ်သူသေလႄႈႁဵတ်းပတိၺိၺ်ႇတြႃးလူၺ်ႈၵၼ် တင်းသူပုၼ်ႈၵူၼ်းလေႃးၵီႇတင်းလၢႆဢေႃႈ။ ၵဝ်တၵ်းႁႂ်ႈသူၶိုၼ်းတႄႇတင်ႈယူႇသဝ်းၵႃႈၼႂ်းမိူင်းသူထႅင်ႈဢၼ်မိူဝ်ႈလဵဝ်ႁၢမ်းယူႇၼၼ်ႉဢေႃႈ။
ၵဝ်တၵ်းလၢတ်ႈတီႈၵူၼ်းထွင်ႇတင်းလၢႆလႄႈဝႃႈ၊ ‘ၵႂႃႇလွတ်ႈလွတ်ႈလႅဝ်းလႅဝ်းတႃႉ၊’ တီႈၶဝ်ၸိူဝ်းဢၼ်ယူႇၼႂ်းဢၼ်လပ်းသိင်ႇၼၼ်ႉၵေႃႈလၢတ်ႈလႄႈဝႃႈ၊ ‘ဢွၵ်ႇမႃးၵႃႈၼႂ်းဢၼ်လႅင်းတႃႉ၊’ ၶဝ်ၼၼ်ႉတၵ်းပဵၼ်မိူၼ်ၸိူဝ်ႉၼင်ႇ ၽုင်သူဝ်းဢၼ်လႆႈလႄႇၵိၼ်ယူႇၵႃႈၼိူဝ်လွႆတင်းလၢႆလႄႈ၊
တၵ်းဢမ်ႇလႆႈမီးတၢင်းဢၼ်ဢိုပ်းၶဝ်ႈဢိုပ်းၼမ်ႉလႃးလႃး၊ သၢႆလႅတ်ႇဢိၵ်ႇတင်းတၢင်းမႆႈႁွၼ်ႉႁၢတ်ႇသၢႆးၼၼ်ႉတၵ်းဢမ်ႇပၼ်ၽေးၵႃႈတီႈၶဝ်၊ ၵွပ်ႈပိူဝ်ႈၵေႃႉဢၼ်ႁၵ်ႉၶဝ်ၼၼ်ႉဢွၼ်ၶဝ်သူင်ႇၵႂႃႇၵႃႈတီႈၼမ်ႉဢွၵ်ႇႁူးတင်းလၢႆၼၼ်ႉဢေႃႈ။
ၵဝ်တၵ်းႁဵတ်းသဵၼ်ႈတၢင်းလူင်ၶၢမ်ႈလွႆလူင်တင်းလၢႆလႄႈ မႄးႁႅၼ်းပၼ်သဵၼ်ႈတၢင်းပုၼ်ႈၵူၼ်းၵဝ်တင်းလၢႆတၵ်းၵႂႃႇၸွမ်းပႆၸွမ်းဢေႃႈ။
ၵူၼ်းၵဝ်ၸိူဝ်းၼၼ်ႉတၵ်းလုၵ်ႉသေၵႃႈတီႈဢၼ်ၵႆပုၼ်ႉမႃးဢေႃႈ။ ၶဝ်ၼၼ်ႉတၵ်းလုၵ်ႉသေၵႃႈတီႈၽၢႆႇတၢင်းႁွင်ႇ၊ၽၢႆႇတၢင်းဝၼ်းတူၵ်း၊ ဢိၵ်ႇတင်းၽၢႆႇတၢင်းၸၢၼ်းမိူင်း ဢႃႇသဝၼ်ႇ၊ ပုၼ်ႉဢေႃႈ။” ဝႃႈၼင်ႇၼႆဢေႃႈ။
ၽႃႉၵၢင်ႁၢဝ်႟။ ႁဵတ်းၵႂၢမ်းတႃႉ။ လိၼ်မိူင်း႟။ ႁွင်ႉသႅၼ်ႇလူၺ်ႈတင်းၸႂ်ဢၼ်ၸူမ်းသိူဝ်းတႃႉ။ လွႆလူင်တင်းလၢႆ႟။ ဢွၼ်ၵၼ်ႁဵတ်းၵႂၢမ်းဢၼ်သႂၢင်ႇသိူဝ်းတႃႉ။ လွင်ႈမၼ်းၸမ်ႉ၊ ထႃႇဝရႃႉၽြႃး၊ ႁႂ်ႈၵူၼ်းမၼ်းၸဝ်ႈတင်းလၢႆသၢၵ်ႈသႃႇလႄႈ တၵ်းဢဵတ်းလူၵူၼ်းမၼ်းၸဝ်ႈဢၼ်လႆႈၶၢမ်ႇတုၵ်ႉၶႃႉတၢင်းၽၢၼ်ၸိူဝ်းၼၼ်ႉဢေႃႈ။
ၵူၺ်းၵႃႈ၊ၵူၼ်းဝဵင်း ယေႇရုသလႅမ်ႇ၊ တင်းလၢႆလၢတ်ႈလႄႈဝႃႈ၊ “ ထႃႇဝရႃႉၽြႃး၊ ၸုၼ်ႉပႅတ်ႈႁဝ်းယဝ်ႉ။ မၼ်းၸဝ်ႈလူင်လိုမ်းႁဝ်းယဝ်ႉ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ထႃႇဝရႃႉၽြႃး၊ ၶိုၼ်းလၢတ်ႈလႄႈဝႃႈ၊ မႄႈယိင်းတၵ်းလူင်လိုမ်းလုၵ်ႈဢွၼ်ႇဢၼ် ၵိၼ်ၼူမ်းမၼ်းယူႇသေလႄႈတၵ်းဢမ်ႇႁၵ်ႉလုၵ်ႈဢွၼ်ႇဢၼ်မၼ်းၵိူတ်ႇလဵင်ႉ မႃးၼၼ်ႉႁိုဝ်း။ ပိၵ်ႉသမ်ႉမႄႈယိင်းလူင်လိုမ်းလုၵ်ႈလၢင်းမၼ်းလႆႈယူႇသေၵေႃႈၵဝ်တၵ်းဢမ်ႇလူင်လိုမ်းသူ။
ၵဝ်ဢဝ်ၸိုဝ်ႈသဵင်မႂ်းသမ်းသႂ်ႇဝႆႉၵႃႈၼႂ်းၽႃႇမိုဝ်းၵဝ်ယဝ်ႉယဝ်ႉ။ လမ်းဝဵင်းမႂ်းၼၼ်ႉမီးယူႇတီႈၽၢႆႇၼႃႈၵဝ်တႃႇသေႇဢေႃႈ။
ၶဝ်ၸိူဝ်းဢၼ်တၵ်းမႄးၵုမ်းမႄးႁဵတ်းမႂ်းၼၼ်ႉ၊ဢွၼ်ၵၼ်မႃးၶၼ်ၶၼ်ၽႂ်းၽႂ်းယူႇဢေႃႈ။ ၶဝ်ၸိူဝ်းဢၼ်ယႃႉမႂ်းပႅတ်ႈၼၼ်ႉ၊ တၵ်းဢွၵ်ႇသေၵႃႈတီႈမႂ်းၵႂႃႇဢေႃႈ။
ဝၢႆႇတူၺ်းၵူႈၽၢႆႇၵူႈပႃႈႁႂ်ႈလႆႈႁၼ်လွင်ႈတၢင်းဢၼ်ပဵၼ်မႃးၼၼ်ႉတႃႉ။ ၵူၼ်းမႂ်းတင်းလၢႆၸုၵၼ်တုမ်ၵၼ်လႄႈဢွၼ်ၵၼ်ပွၵ်ႈမႃးၸူးတီႈမႂ်းယူႇဢေႃႈ။ ၸိူဝ်ႉၼင်ႇဢၼ်ၵဝ်ပဵၼ်ၽြႃးပဵၼ်ၸဝ်ႈဢၼ်ဢသၢၵ်ႈလိပ်းဢမၢၼ်ႇၶၼ်ပဵၼ်ၼၼ်ႉ၊ မႂ်းတၵ်းမီးတၢင်းဢၼ်ဢုပ်ႇဝၢဝ်းသိူဝ်းပျေႃႇၵွပ်ႈလူၺ်ႈၵူၼ်းမႂ်းတင်းလၢႆလႄႈ ဢုပ်ႇဝၢဝ်းသိူဝ်းပျေႃႇၸိူဝ်ႉၼင်ႇလုၵ်ႈပႂ်ႉမႂ်ႇဢၼ်သႂ်ႇၶူဝ်းသႅင်ၶူဝ်းၶမ်းၼၼ်ႉဢေႃႈ။
မိူင်းမႂ်းဢၼ်လုလႅဝ်လႄႈႁၢမ်းၵႂႃႇယဝ်ႉၼၼ်ႉ မိူဝ်ႈလဵဝ်ၼႆႉတၵ်းပဵၼ်ဢၼ်လဵၵ်ႉဢၼ်ၼွႆႉၵႂႃႇ ပုၼ်ႈၶဝ်ၸိူဝ်းဢၼ်တၵ်းမႃးယူႇမႃးသဝ်းၼၼ်ႉဢေႃႈ။ ၶဝ်ၸိူဝ်းဢၼ်ႁဵတ်းႁႂ်ႈဝဵင်းလုလႅဝ်ၵႂႃႇၼၼ်ႉ တၵ်းဢွၼ်ၵၼ်ၶၢႆႉၵႂႃႇၵႃႈတီႈဢၼ်ၵႆမႂ်းၼၼ်ႉဢေႃႈ။
ၶဝ်ၸိူဝ်းဢၼ်ၵိူတ်ႇလဵင်ႉၵႃႈတီႈဢၼ် တူၵ်းၵႅၼ်းၼၼ်ႉဝၼ်းၼိုင်ႈတၵ်းဢွၼ်ၵၼ်လၢတ်ႈတီႈမႂ်းလႄႈဝႃႈ၊ “မိူင်းၼႆႉလဵၵ်ႉၼႃႇၵႅပ်ႈၼႃႇပုၼ်ႈႁဝ်းၶႃႈဢေႃႈ။ ႁဝ်းၶႃႈလူဝ်ႇတီႈလိၼ်ဢၼ်ယဵင်ႈၶႅၼ်း ၵႂၢင်ႈၼၼ်ႉပုၼ်ႈတႃႇတၵ်းယူႇသဝ်းဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉမႂ်းတၵ်းထၢင်ႇၼႂ်းၸႂ်လႄႈဝႃႈ၊ “ၽူႈလႂ်ၵိူတ်ႇလဵင်ႉလုၵ်ႈလၢင်းၸိူဝ်းၼႆႉမႃးပုၼ်ႈၵဝ်။ ၵဝ်ပဵၼ်ၵေႃႉဢၼ်ၽၢၼ်လုၵ်ႈၽၢၼ်လၢင်းလႄႈလႆႈယူႇတူဝ်လဵဝ်ၶိင်းလဵဝ်၊ ၵေႃႉဢၼ်လႆႈၶၢမ်ႇတၢင်းဢၼ်တူၵ်းၵႅၼ်း၊တၢင်းဢၼ်ႁေႃႈဢွၵ်ႇယဝ်ႉယဝ်ႉ။ ၽူႈလႂ်ဢဝ်လုၵ်ႈလၢင်းၸိူဝ်းၼႆႉမႃး။ ၵဝ်ၼႆႉယူႇၵေႃႉလဵဝ်ၵူၺ်းလႄႈ လုၵ်ႈလၢင်းၸိူဝ်းၼႆႉသမ်ႉလုၵ်ႉသေၵႃႈတီႈလႂ်မႃး၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉတီႈၵူၼ်းမၼ်းၸဝ်ႈတင်းလၢႆလႄႈဝႃႈၸမ်ႉ၊ “ၵဝ်တၵ်းၵႂၵ်းမိုဝ်းႁွင်ႉဢဝ်မိူင်းတင်းလၢႆသေလႄႈ၊ၵဝ်တၵ်းၼႄ လၢၵ်ႈၶၼႃႇတီႈၵူၼ်းတင်းလၢႆဢေႃႈ။ ၶဝ်ၼၼ်ႉတၵ်းဢုမ်ႈႁွပ်ႇဢဝ်လုၵ်ႈၸၢႆးမႂ်းလႄႈ ဢဝ်လုၵ်ႈသၢဝ်မႂ်းမႅၵ်ႇတၢင်ႇမႃႇသေယဝ်ႉ၊မႃးၸူးတီႈမႂ်းဢေႃႈ။
ၶုၼ်ႁေႃၶမ်းတင်းလၢႆတၵ်းပဵၼ်ပေႃႈလဵင်ႉမႂ်း၊ ၼၢင်းႁေႃၶမ်းတင်းလၢႆတၵ်းပဵၼ်မႄႈၵဵပ်းမႂ်းဢေႃႈ။ ၶဝ်ၼၼ်ႉတၵ်းဢွၼ်ၵၼ်ၵူမ်ႈႁူဝ်ၸူးတီႈမႂ်းလႄႈႁဵတ်းဢၼ်ယုၵ်ႉဢၼ်ယွင်ႈတီႈမႂ်းဢေႃႈ။ ၶဝ်တၵ်းၶျႃးတႅမ်ႇတူဝ်ၶဝ်လႄႈၼႄပျႃးတၢင်းဢၼ်ၶဝ်ႁဵတ်းရူဝ်ႇသေႇၵူဝ်ယမ်တီႈမႂ်းဢေႃႈ။ မိူဝ်ႈၼၼ်ႉမႂ်းတၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢိၵ်ႇတင်း လွင်ႈဢၼ်ၶဝ်ၸိူဝ်းဢၼ်မုင်ႈမွင်းၵဝ်ၼၼ်ႉ ဢမ်ႇလႆႈမီးတၢင်းဢၼ်ဢူၵ်းဢၼ်ဢၢႆၼၼ်ႉဢေႃႈ၊” ဝႃႈၼင်ႇၼႆဢေႃႈ။
မႂ်းတၵ်းၶိုၼ်းဢဝ်ဢုၵ်ႉၸႃႇဢၼ်ၵူၼ်းသိုၵ်းႁိမ်ဢဝ်ႁူင်ႇဢဝ်ၵႂႃႇၼၼ်ႉလႆႈႁိုဝ်း။ မႂ်းတၵ်းၵႄႇၼုၵ်ႈဢဝ်ၶဝ်ၸိူဝ်းဢၼ် ၵူၼ်းဢၼ်ဢမ်ႇတြႃးၶဝ်သိမ်းဢဝ်ၵႂႃႇသႂ်ႇထွင်ႇယူႇၼၼ်ႉၶိုၼ်းဢွၵ်ႇမႃးလႆႈႁိုဝ်း။
ထႃႇဝရႃႉၽြႃး၊ ၶိုၼ်းမီးဢမိင်ႉဝႃႈ၊ “ဢၼ်ၼႆႉၸမ်ႉ၊တိုၼ်းတၵ်းပဵၼ်မႃးၼၼ်ႉဢေႃႈ။ ၵူၼ်းတူၵ်းထွင်ႇဢၼ်လုၵ်ႈသိုၵ်းဢဝ်ၶင်ဝႆႉၸိူဝ်းၼၼ်ႉတၵ်းလႆႈၶၢမ်ႇတၢင်းဢၼ်လွတ်ႈဢေႃႈ။ ဢုၵ်ႉၸႃႇဢၼ်ၵူၼ်းႁႅင်းယႂ်ႇႁိမ်ဢဝ်ဝႆႉၸိူဝ်းၼၼ်ႉတၵ်းလႆႈၶၢမ်ႇတၢင်းဢၼ်ဢဝ်ဢွၵ်ႇဢေႃႈ။ ၵဝ်တၵ်းတိုၵ်းတေႃးၵေႃႉဢၼ်တိုၵ်းတေႃး မႂ်းၼၼ်ႉလႄႈတၵ်းၵႄႇၼုၵ်ႈဢဝ်လုၵ်ႈလၢင်းမႂ်းတင်းလၢႆဢေႃႈ။
ၵဝ်တၵ်းႁႂ်ႈၶဝ်ၸိူဝ်းဢၼ်တဵၵ်းငႅၼ်းမႂ်းၼၼ်ႉၵေႃႉၼိုင်ႈလႄႈၵေႃႉၼိုင်ႈဢဝ်ၵၼ်တၢႆလႄႈ ႁႂ်ႈၶဝ်မဝ်းလူၺ်ႈတၢင်းဢၼ်ၶႃႈၵၼ်တၢႆ၊ ဢိၵ်ႇတင်းတၢင်းဢၼ်ႁႃတွပ်ႇတႅၼ်းၶိုၼ်းၵၼ်ၼၼ်ႉဢေႃႈ။ မိူဝ်ႈၼၼ်ႉၵူၼ်းတင်းသဵင်ႈတင်းလူင်တၵ်းဢွၼ်ၵၼ်ႁုလွင်ႈဢၼ် ၵဝ်ပဵၼ် ထႃႇဝရႃႉၽြႃး၊ ၸဝ်ႈဢၼ်ၵႄႇသႄႇၼုၵ်ႈဢဝ်မႂ်းလႄႈပွႆႇႁႂ်ႈမႂ်းလွတ်ႈၼၼ်ႉဢေႃႈ။ ၶဝ်တၵ်းႁုလွင်ႈဢၼ်ၵဝ်ပဵၼ်ၽြႃးပဵၼ်ၸဝ်ႈ ဢၼ်မီးတၼ်းၶူဝ်းယႂ်ႇဢၼ်ပဵၼ်ၽြႃးၵူၼ်းမဵဝ်း ဢိသရေး၊ ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “သူထၢင်ႇဝႃႈ၊ၵဝ်ပွႆႇပႅတ်ႈၵူၼ်းၵဝ်တင်းလၢႆၵႂႃႇ၊ မိူၼ်ၸိူဝ်ႉၼင်ႇဢၼ်ၵူၼ်းၸၢႆးပႅတ်ႈမေးမၼ်းၼၼ်ႉႁိုဝ်း။ ပေႃးပဵၼ်ၸိူဝ်ႉၼင်ႇၼၼ်ၸိုင်၊လိၵ်ႈဢၼ်ပုတ်းဢၼ်ၶၢတ်ႇၸိူဝ်းၼၼ်ႉမီးၵႃႈတီႈလႂ်။ သူထၢင်ႇဝႃႈ၊ၵဝ်ၶၢႆပႅတ်ႈၵူၼ်းၵဝ်တင်းလၢႆ မိူၼ်ၸိူဝ်ႉၼင်ႇၵေႃႉဢၼ်ဢဝ်လုၵ်ႈလၢင်းမၼ်းၶၢႆပႅတ်ႈႁႂ်ႈပဵၼ်ၶႃႈၼၼ်ႉႁိုဝ်း။ ဢမ်ႇၸႂ်ႈၸိူဝ်ႉၼင်ႇၼၼ်၊သူလႆႈၶၢမ်ႇတူၵ်းၵႅၼ်းၵွပ်ႈပိူဝ်ႈ တုၸရိူၵ်ႈဢပျတ်ႈသူၼၼ်ႉဢေႃႈ။ သူလႆႈၶၢမ်ႇတၢင်းဢၼ်ပွႆႇပႅတ်ႈၵႂႃႇၵွပ်ႈပိူဝ်ႈဢမုတၢင်းၽိတ်းသူၼၼ်ႉဢေႃႈ။
ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ၊မိူဝ်ႈဢၼ်ၵဝ် မႃးၸူးတီႈၵူၼ်းၵဝ်တင်းလၢႆႁႂ်ႈလႆႈၵႄႇသႄႇၼုၵ်ႈဢဝ်ၶဝ်ၼၼ်ႉ၊ ၶဝ်ယင်းဢမ်ႇၶိုၼ်းတွပ်ႇ၊မိူဝ်ႈဢၼ်ၵဝ်ႁွင်ႉဢဝ်ၶဝ်ၼၼ်ႉႁဵတ်းသင်လႄႈၶဝ်ဢမ်ႇၶိုၼ်းဢိူဝ်၊ မိုဝ်းၵဝ်ၼႆႉပွတ်းထၢၼ်ႈပေႃးဢမ်ႇထုတ်ႇ ဢဝ်လႆႈႁိုဝ်း၊ၵဝ်ဢမ်ႇမီးႁႅင်းလႄႈဢမ်ႇၸွႆႈထုတ်ႇဢဝ်လႆႈႁိုဝ်း။ တူၺ်းလူး။ ၵဝ်ပူင်ဢမိင်ႉႁႂ်ႈၼမ်ႉပၢင်ႇလၢႆႇယူတ်းႁႅင်ႈၵႂႃႇဢေႃႈ။ ၵဝ်ႁႂ်ႈၼမ်ႉႁွင်ႈၼမ်ႉၵႄးတင်းလၢႆပဵၼ်လိၼ်ပဝ်ႇလိၼ်လၢပ်ႈလႄႈ ပႃတင်းလၢႆတၢႆလႄႈမဵၼ်တူႇၵႂႃႇၵွပ်ႈပိူဝ်ႈဢၼ်ဢမ်ႇမီးၼမ်ႉၼၼ်ႉဢေႃႈ။
ၵဝ်ဢဝ်တၢင်းလပ်းသိင်ႇမိုတ်ႈမုင်းႁူမ်ႇ ၽႃႉၵၢင်ႁၢဝ်သေလႄႈဢဝ်ၼင်ပေႃႁူမ်ႇပၼ်ဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ သွၼ်ပၼ်ၵဝ်မေႃလၢတ်ႈ၊ ႁႂ်ႈၵဝ်ၸၢင်ႈသင်ႇသွၼ်ပၼ်ဢဵၼ်ပၼ်ႁႅင်းတီႈၶဝ်ၸိူဝ်းဢၼ်ႁႅင်းလဵၵ်ႉႁႅင်းၼွႆႉဢေႃႈ။ မၼ်းၸဝ်ႈတိုၵ်းယူင်းႁႂ်ႈၵဝ်ၶတ်းၸႂ်ၵျူဝ်းၸႃး ထွမ်ႇဢဝ်ၵႃႈဢၼ်မၼ်းၸဝ်ႈတၵ်းသွၼ်ပၼ်ၵဝ်ၼၼ်ႉၵူႈၼႂ်ၵူႈၼႂ်ဢေႃႈ။
ထႃႇဝရႃႉၽြႃး၊ ပၼ်တၢင်းႁုတၢင်းႁၼ် တီႈၵဝ်လႄႈၵဝ်ၵေႃႈဢမ်ႇတွပ်ႇဢမ်ႇထဵင်၊ဢမ်ႇပွၵ်ႈၶိုၼ်းတၢင်းလင်။
ၵဝ်ပိုတ်ႇပႄလင်ၵဝ်ပၼ်တီႈၵေႃႉဢၼ် ပေႃႉယႅၼ်ႉၵဝ်လႄႈၵဝ်ဢမ်ႇႁၢမ်ႈဢမ်ႇၶႅၼ်ၵေႃႉဢၼ်သႄႉသွမ်းၵဝ်၊ ၵေႃႉဢၼ်တိုတ်ႉၸၼ်ၼူတ်ႇၵဝ်၊ဢိၵ်ႇတင်းၵေႃႉဢၼ်ထူမ်ႇၼမ်ႉလၢႆးသႂ်ႇၼႃႈၵဝ်ၼၼ်ႉ။
ၵူၺ်းၵႃႈ၊တၢင်းဢၼ်ၶဝ်သႄႉသွမ်းၵဝ်ၼၼ်ႉဢမ်ႇပဵၼ်ၽေးတီႈၵဝ်ၵႃႈသင်လႃးလႃး။ လွင်ႈမၼ်းၸမ်ႉ၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ၸွႆႈထႅမ်ၵဝ်ဢေႃႈ။ ၵဝ်ဝႆႉၸႂ်မၼ်ႈမၼ်ႈႁႂ်ႈယိူၼ်ႉၶၢမ်ႇၶဝ်လႆႈဢေႃႈ။ လွင်ႈမၼ်းၸမ်ႉ၊ၵဝ်ႁုလွင်ႈဢၼ်ၵဝ်တၵ်းဢမ်ႇလႆႈဢူၵ်းလႆႈဢၢႆၼၼ်ႉဢေႃႈ။
ၵွပ်ႈပိူဝ်ႈဢၼ်ၽြႃးပဵၼ်ၸဝ်ႈမီးယူႇၵႃႈတီႈဢၼ်ၸမ်ၵၼ်တင်းၵဝ်လႄႈ မၼ်းၸဝ်ႈတၵ်းၶၢမ်ႇသၢၵ်ႈသေႇလွင်ႈဢၼ်ၵဝ်ဢမ်ႇမီးဢပျတ်ႈၼၼ်ႉဢေႃႈ။ မီးၵေႃႉဢၼ်တၵ်းႁဵတ်းဢမုသႂ်ႇတီႈၵဝ်သေၵေႃႉသေၵူၼ်းႁိုဝ်း။ ဢွၼ်ၵၼ်ၵႂႃႇၵႃႈတီႈလုမ်းၵၼ်တႃႉႁဝ်း။ ႁႂ်ႈမၼ်းပႃးဢဝ်လိၵ်ႈဢၼ်ၸွႆးတြႃးသႂ်ႇၼၼ်ႉမႃးတႃႉ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ပႂ်ႉၸွႆႈပႂ်ႉထႅမ်ၵဝ်ယူႇဢေႃႈ။ မီးၽူႈလႂ်ၶၢမ်ႇသၢၵ်ႈသေႇဝႃႈ၊ၵဝ်ႁဵတ်းၽိတ်းႁဵတ်းပိူင်ႈၼၼ်ႉႁိုဝ်း။ ၶဝ်ၸိူဝ်းဢၼ်တၢင်ႇဢပျတ်ႈသႂ်ႇၵဝ်ၼၼ်ႉ ဢွၼ်ၵၼ်လပ်ႉႁၢႆၵႂႃႇမိူၼ်ၸိူဝ်ႉၼင်ႇၶူဝ်းၼုင်ႈဢၼ်မူင်ႈၵိၼ်လႄႈၽင်ႉဢုၵႂႃႇၼၼ်ႉဢေႃႈ။
သူၸိူဝ်းဢၼ်ရူဝ်ႇသေႇၵူဝ်ယမ် ထႃႇဝရႃႉၽြႃး၊ လႄႈပႂ်ႉၵမ်ပႂ်ႉၸွမ်း ၵႂၢမ်းၶႃႈမၼ်းၸဝ်ႈၼၼ်ႉၶဝ်႟။ သဵၼ်ႈတၢင်းဢၼ်သူၵႂႃႇသူပႆၼၼ်ႉတၵ်းၸၢင်ႈလပ်းသိင်ႇၵႂႃႇဢေႃႈ။ ၵူၺ်းၵႃႈ၊ယုမ်ႇမၢတ်ႈ ထႃႇဝရႃႉၽြႃး၊ လႄႈဢိင်ပိုင်ႈၽြႃးပဵၼ်ၸဝ်ႈသူယူႇတႃႉ။
သူၸိူဝ်းဢၼ်ၵျၢမ်ႇပွင်ႁႂ်ႈလႆႈယႃႉၵဝ်းပိူၼ်ႈၼၼ်ႉတၵ်းလႆႈၶၢမ်ႇတၢင်းဢၼ်ယႃႉၵဝ်း လူၺ်ႈတၢင်းၵျၢမ်ႇတၢင်းပွင်ဢၼ်သူဢၢင်ႈတေႁဵတ်းတီႈပိူၼ်ႈၼၼ်ႉဢေႃႈ။ တူဝ် ထႃႇဝရႃႉၽြႃး၊ တၵ်းၸီႇယၢင်ႇၶိုင်ပွင်ႁႂ်ႈပဵၼ်ၸိူဝ်ႉၼင်ႇၼႆမႃးလႄႈ သူတၵ်းလႆႈၼွၼ်းၸူမ်ယူႇၼႂ်းတၢင်းဢၼ်မႆႈၸႂ်ယၢပ်ႇၸႂ်ၼၼ်ႉဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၶဝ်ၸိူဝ်းဢၼ် ၸွမ်းတြႃးဢၼ်သိုဝ်ႈတေႃႇလႄႈႁႃဢဝ် ထႃႇဝရႃႉၽြႃး၊ ၶဝ်႟။ ဢွၼ်ၵၼ်ထွမ်ႇဢဝ်ၵႂၢမ်းၵဝ်တႃႉ။ ဢွၼ်ၵၼ်ၶႆႈၸႂ်ဝူၼ်ႉၸႂ်တူၺ်းႁိၼ်ၽႃတီႈဢၼ်သူဢွၵ်ႇမႃး၊ ဢိၵ်ႇတင်းမေႃႇမၢၵ်ႇႁိၼ်တီႈဢၼ်ၶုတ်းဢဝ်သူဢွၵ်ႇမႃးၼၼ်ႉတႃႉ။
ၶႆႈၸႂ်ဝူၼ်ႉၸႂ်လူၺ်ႈလွင်ႈပူႇမွၼ်ႇသူ ဢႃႇပြႃႇႁၢမ်ႇ၊ ဢိၵ်ႇတင်း ၸႃႇရႃႇ၊ ဢၼ်သူသိုပ်ႇလူင်းမႃးတီႈၶဝ်ၼၼ်ႉတႃႉ။ မိူဝ်ႈဢၼ်ၵဝ်ႁွင်ႉဢဝ် ဢႃႇပြႃႇႁၢမ်ႇ၊ ၼၼ်ႉ မၼ်းဢမ်ႇမီးလုၵ်ႈမီးလၢင်း၊ၵူၺ်းၵႃႈ၊ၵဝ်ပၼ်တၢင်းလီတီႈမၼ်း၊ ဢိၵ်ႇတင်းတီႈလုၵ်ႈလၢင်းမၼ်းသေယဝ်ႉ၊ႁဵတ်းႁႂ်ႈၸိူဝ်ႉၶိူဝ်းမၼ်းၼမ်ၵိုၼ်းဢေႃႈ။
ၵဝ်တၵ်းၼႄပျႃးၸေႇတၼႃႇမႅတ်ႈတႃႇၵႃႈတီႈဝဵင်း ယေႇရုသလႅမ်ႇ၊ ဢၼ်လုလႅဝ်ယူႇၼၼ်ႉ၊ဢိၵ်ႇတင်းၶဝ်ၸိူဝ်းဢၼ်ယူႇသဝ်းၵႃႈၼႂ်းမၼ်းၼၼ်ႉဢေႃႈ။ ပိၵ်ႉသမ်ႉမိူင်းမၼ်းပဵၼ်ပၢင်ႇႁၢတ်ႇသၢႆးသေၵေႃႈၵဝ်တၵ်းႁဵတ်းႁႂ်ႈမၼ်းပဵၼ်သူၼ်ဢူးယဵၼ်ႇ၊ ဢၼ်မိူၼ်ၵၼ်တင်းသူၼ်ဢူးယဵၼ်ႇ ဢေႇတိၼ်ႇ၊ ၼၼ်ႉဢေႃႈ။ တၵ်းဢွၼ်ၵၼ်ထူပ်းႁၼ်တၢင်းဢၼ်ၸူမ်းသိူဝ်းတၢင်းဢၼ်သႂၢင်ႇၸႂ်၊တၢင်းဢၼ် ယွင်ႈယေႃးၵျေးၸူးၸဝ်ႈ၊တၢင်းဢၼ်ႁဵတ်းၵႂၢမ်းၵႃႈၼႂ်းဝဵင်းၼၼ်ႉဢေႃႈ။
ၵူၼ်းၵဝ်တင်းလၢႆၶဝ်႟။ ဢွၼ်ၵၼ်ထွမ်ႇဢဝ် ၵႂၢမ်းၵဝ်တႃႉ။ ထွမ်ႇဢဝ်ငိၼ်းဢဝ်ၵႃႈဢၼ်ၵဝ်တၵ်းလၢတ်ႈၼၼ်ႉတႃႉ။ ၵဝ်သင်ႇသွၼ်သုင်းမႃႉၵႃႈတီႈမဵဝ်းၵူၼ်း တင်းလၢႆယူႇလႄႈၼႄးဢုပတေႇၵဝ်ၵေႃႈပၼ်ဢၼ်လႅင်းတီႈၶဝ်ဢေႃႈ။
ၵဝ်တၵ်းမႃးၶၼ်ၶၼ်ၽႂ်းၽႂ်းလႄႈၵႄႇသႄႇၼုၵ်ႈဢဝ်ၶဝ်ဢေႃႈ။ လွင်ႈမၼ်းၸမ်ႉ၊ၶိင်ႇၵႃႇလႃႉဢၼ်ၵဝ်ပႄႉၼႅင်ႇဢွင်ႇသိုၵ်းၼၼ်ႉၸမ်မႃးယဝ်ႉ။ တူဝ်ၵဝ်တၵ်းဢုပ်ႉပိူင်ႇၵႃႈၼိူဝ်မဵဝ်းၵူၼ်းတင်းလၢႆဢေႃႈ။ ၵူၼ်းမိူင်းၵႆမိူင်းယၢၼ်တင်းလႆႈဢွၼ်ၵၼ်ပႂ်ႉထႃႈတၢင်းဢၼ်ၵဝ်တၵ်းမႃးၼၼ်ႉလႄႈ မုင်ႈထႃႈမွင်းထႃႈတၢင်းဢၼ်ၵဝ်တၵ်းမႃးၵႄႇၶျွတ်ႈဢဝ်ၶဝ်ဢေႃႈ။
ႁႅၼ်တူၺ်းတီႈၽႃႉၵၢင်ႁၢဝ်တႃႉ။ ၵူမ်ႈတူၺ်းၵႃႈတီႈလိၼ်မိူင်းတႃႉ။ ၽႃႉၵၢင်ႁၢဝ်တၵ်းလပ်ႉႁၢႆၵႂႃႇမိူၼ်ၸိူဝ်ႉၼင်ႇ ဢၢႆၵႂၼ်းလႄႈလိၼ်မိူင်းၵဝ်ႇမွင်ၵႂႃႇမိူၼ်ၸိူဝ်ႉၼင်ႇၶူဝ်းဢၼ်ၵဝ်ႇဢၼ်မွင်ၼၼ်ႉသေယဝ်ႉ၊ ၵူၼ်းလေႃးၵီႇတင်းလၢႆတၵ်းတၢႆ မိူၼ်ၸိူဝ်ႉၼင်ႇမႅင်းမုၼ်းဢေႃႈ။ တြႃးၵဝ်ဢၼ်ပဵၼ်တြႃးတၢင်းဢၼ်ၵႄႇသႄႇၶျွတ်ႈဢဝ်ၸမ်ႉ၊ပဵၼ်ၼိၵ်ႈၸႃႉထႃႇဝရႃႉလႄႈ တြႃးၵဝ်ဢၼ်ပဵၼ်တြႃးဢၼ်ႁႂ်ႈလွတ်ႈၵေႃႈ ဢမ်ႇမီးတၢင်းဢၼ်ႁၢႆလၢႆၵႂႃႇလႆႈ၊ဝႃႈၼင်ႇၼႆဢေႃႈ။
သူၸိူဝ်းဢၼ်ႁုတြႃးတၢင်းဢၼ်သိုဝ်ႈတေႃႇ၊ ၵူၼ်းဢၼ်ဢဝ်တြႃးၵဝ်သႂၢင်းသႂ်ႇဝႆႉၵႃႈၼႂ်းႁူဝ်ၸႂ်ၶဝ်႟။ ဢွၼ်ၵၼ်ထွမ်ႇဢဝ်ၵႂၢမ်းၵဝ်တႃႉ။ ယႃႇပေၵူဝ်ပေႁႄၼႂ်းမိူဝ်ႈဢၼ်ၵူၼ်းတင်းလၢႆတၢင်ႇဢပျတ်ႈသႄႉသွမ်းသူၼၼ်ႉ။
လွင်ႈမၼ်းၸမ်ႉ၊ၶဝ်တၵ်းလပ်ႉႁၢႆၵႂႃႇ မိူၼ်ၸိူဝ်ႉၼင်ႇၶူဝ်းၼုင်ႈဢၼ်မူင်ႈမႅင်းၶူပ်းၵိၼ်ပႅတ်ႈၼၼ်ႉဢေႃႈ။ တြႃးၵဝ်တၢင်းဢၼ်ႁႂ်ႈလွတ်ႈၼၼ်ႉၸမ်ႉ၊ ပဵၼ်ၼိၵ်ႈၸႃႉထႃႇဝရႃႉလႄႈတြႃးၵဝ် ဢၼ်ပဵၼ်တၢင်းဢၼ်ၵႄႇသႄႇၶျွတ်ႈဢဝ်ၵေႃႈ တၵ်းတႄႇယူႇၵူႈၸူဝ်ႈၵူႈပၢၼ်သိုပ်ႇသိုပ်ႇတၢမ်တၢမ်ဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ တီႈၶႃႈ႟။ တိုၼ်ႇမႃးသေၵမ်းတီႈၶႃႈ။ တိုၼ်ႇမႃးလႄႈၸွႆႈထႅမ်ၶႃႈၸဝ်ႈႁဝ်းၶဝ်သေၵမ်းတီႈၶႃႈ။ ဢဝ်တင်းၽုင်းတၼ်းၶူဝ်းၸဝ်ႈႁဝ်းလႄႈၵႄႇသႄႇၶႃႈၸဝ်ႈႁဝ်းၶဝ်သေၵမ်းတီႈၶႃႈ။ ၸဝ်ႈႁဝ်းပဵၼ်ၸဝ်ႈဢၼ်တႅပ်းၽၼ်း ၼၵႃးပၢင်ႇလၢႆႇလူင်ဢၼ်ဝႃႈ၊ ရႃႇႁပ်ႉ၊ ပဵၼ်ပွတ်းပဵၼ်တွၼ်ႈယဝ်ႉတီႈၶႃႈဢေႃႈ။
ၸဝ်ႈႁဝ်းပဵၼ်ၸဝ်ႈဢၼ်ႁဵတ်းႁႂ်ႈၼမ်ႉပၢင်ႇလၢႆႇ ႁႅင်ႈႁွင်ၵႂႃႇလႄႈႁႂ်ႈသဵၼ်ႈတၢင်းပွင်ႇၵႂႃႇၵႃႈတီႈၼမ်ႉပုၼ်ႈ ၶဝ်ၸိူဝ်းဢၼ်ထိူၵ်ႈၶၢမ်ႇဢဝ်တၢင်းဢၼ်ၵႄႇၶျွတ်ႈၼၼ်ႉတၵ်းၶၢမ်ႈၵႂႃႇဢေႃႈ။
ၶဝ်ၸိူဝ်းဢၼ်ၸဝ်ႈႁဝ်းထုတ်ႇၼုၵ်ႈဢဝ်ၼၼ်ႉ တၵ်းႁွတ်ႈမႃးၵႃႈတီႈဝဵင်း ယေႇရုသလႅမ်ႇ၊ ၸူမ်းၸူမ်းသိူဝ်းသိူဝ်းလႄႈ ႁဵတ်းၵႂၢမ်းယူႇႁွင်ႉပၢဝ်ႇႁွင်ႉသႅၼ်ႇယူႇမူၼ်ႈမူၼ်ႈပျေႃႇပျေႃႇဢေႃႈ။ ၶဝ်တၵ်းမီးတၢင်းၸူမ်းတၢင်းသိူဝ်းထႃႇဝရႃႉလႄႈ တၵ်းလွတ်ႈၵၢင်းတင်းတၢင်းဢၼ်မႆႈၸႂ်ၶီၸႂ်တၢင်းဢၼ်ၶင်းၶီၶင်းၽၢၼ်ဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵဝ်ၼႆႉယဝ်ႉ၊ပဵၼ်ၸဝ်ႈဢၼ်ႁဵတ်းႁႂ်ႈႁူဝ်ၸႂ်သူသၢၵ်ႈသႃႇဢေႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈသူၵူဝ်ႁႄၵူၼ်းဢၼ်ၸၢင်ႈတၢႆၼၼ်ႉ၊ ၵူဝ်ႁႄလုၵ်ႈၵူၼ်းဢၼ်ပဵၼ်မိူၼ်ၸိူဝ်ႉၼင်ႇတူၼ်ႈယိူဝ်ႈတူၼ်ႈယႃႈၼၼ်ႉၼင်ႇႁိုဝ်။
သူလူင်လိုမ်းပႅတ်ႈ ထႃႇဝရႃႉၽြႃး၊ ဢၼ်ႁဵတ်းပဵၼ်သူ၊ၸဝ်ႈဢၼ်ၶဵင်ႈမုင်းၽႃႉၵၢင်ႁၢဝ်လႄႈ တႄႇႁဵတ်းငဝ်ႈႁၢၵ်ႈလိၼ်မိူင်းၼၼ်ႉယဝ်ႉႁိုဝ်း။ သူမီးတၢင်းဢၼ်တူၵ်းၸႂ်လႂ်တိုၼ်ႇယူႇ တင်းဝၼ်းတင်းဝၼ်းၵွပ်ႈပိူဝ်ႈတၢင်းဢၼ်ႁၢဝ်ႉဢၼ်ၵျၢမ်းၵေႃႉဢၼ်ၼိၵ်ႈၸၢၵ်ႈငႅၼ်းသႄးသူ၊ ၵေႃႉဢၼ်တၼ်းဝႆႉတႃႇတေယႃႉၽဵဝ်ႈပႅတ်ႈသူၼၼ်ႉႁိုဝ်း။ တၢင်းဢၼ်ၶဝ်ႁၢဝ်ႈၵျၢမ်းၼၼ်ႉဢမ်ႇတိူဝ်ႉဢမ်ႇထုၵ်ႇသူလႆႈ။
ၶဝ်ၸိူဝ်းဢၼ်ၶမ်ထွင်ႇယူႇၼၼ်ႉတၵ်းလႆႈ ၸဵဝ်းလွတ်ႈဢွၵ်ႇလႄႈဢွၼ်ၵၼ်မီးဢသၢၵ်ႈဢၼ်ယိုၼ်းဢၼ်ယၢဝ်းလႄႈမီးၶဝ်ႈၼမ်ႉ တၢင်းၵိၼ်ဢၼ်ပေႃးၵုမ်ႇလဵင်ႉတွင်ႉၶဝ်ဢေႃႈ။
ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူ၊ ၸဝ်ႈဢၼ်ၶူၼ်းၼမ်ႉပၢင်ႇလၢႆႇလႄႈ ႁႂ်ႈလႅင်းၼမ်ႉပိူပ်ႈၼမ်ႉမၼ်းဢူၼ်ဢဵၼ်မေႃးမႄးဢေႃႈ။ ၸိုဝ်ႈသဵင်ၵဝ်ႁွင်ႉႁဵၵ်ႈဝႃႈ၊ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ဢေႃႈ။
ၵဝ်ၶဵင်ႈမုင်းၽႃႉၵၢင်ႁၢဝ်လႄႈတႄႇႁဵတ်းငဝ်ႈႁၢၵ်ႈလိၼ်မိူင်းတင်းလၢႆယဝ်ႉလႄႈ မီးဢမိင်ႉတီႈဝဵင်း ယေႇရုသလႅမ်ႇ၊ ၸမ်ႉ၊ ‘သူပဵၼ်ၵူၼ်းၵဝ်ဢေႃႈ။ ၵဝ်လႆႈသင်ႇသွၼ်သူလႄႈဢဝ်တင်းမိုဝ်းၵဝ် ၵႅတ်ႇၶႄႁႄႉၵင်ႈသူယဝ်ႉ၊’ ” ဝႃႈၼင်ႇၼႆဢေႃႈ။
ဝဵင်း ယေႇရုသလႅမ်ႇ၊ ႟။ တိုၼ်ႇတႃႉ။ တိုၼ်ႇလႄႈလုၵ်ႉတႃႉ။ မႂ်းသူတ်ႉၵိၼ်ၵႃႈတီႈၵွၵ်းဝၢၼ်ႇ ထႃႇဝရႃႉၽြႃး၊ ဢၼ်ၸီႇယၢင်ႇပၼ်တၢမ်ႇဢၼ်ပႃးတေႃးသႃႉလႄႈတိုၵ်းပၼ်မႂ်းၼၼ်ႉယဝ်ႉဢေႃႈ။ မႂ်းသူတ်ႉၵိၼ်ယႅမ်ႉၵိၼ်တင်းယိူဝ်ႇမၼ်းသေယဝ်ႉ၊ႁဵတ်းႁႂ်ႈမႂ်းဝၢင်ႇဝီႈဝၢင်ႇဝိူဝ်ႈၵႂႃႇယဝ်ႉ။
ၼႂ်းလုၵ်ႈလၢင်းၵႃႈဢၼ်မႂ်းၵိူတ်ႇလဵင်ႉမႃးၸိူဝ်ႉၼၼ်ႉ၊ဢမ်ႇမီးၵေႃႉဢၼ် တၵ်းၼႄတၢင်းပၼ်တီႈမႂ်း၊ဢမ်ႇမီးၵေႃႉဢၼ်ၸုင်ဢဝ်မိုဝ်းမႂ်းသေၵေႃႉသေၵူၼ်း။
ၽႄးသွင်ပႃးတၵ်းပဵၼ်မႃးၵႃႈတီႈမႂ်းၼၼ်ႉၽူႈလႂ်တၵ်းဢဵတ်းလူမႂ်း၊ၽေးတၢင်းဢၼ် ယႃႉလုယႃႉလႅဝ်လႄႈႁႂ်ႈမိူင်းလုမိူင်းႁၢမ်း၊ ဢိၵ်ႇတင်းၽေးတၢင်းဢၼ်လၢႆဢိုပ်းလႆႈယၢၵ်ႈလႄႈၽေးလၢပ်ႇၽေးလႅဝ်း၊ ဢမ်ႇမီးၵေႃႉဢၼ်ဢဵတ်းလူမႂ်းသေၵေႃႉသေၵူၼ်း။
ၵႃႈတီႈႁိမ်းၸဵင်ႇတၢင်းသူပ်းတၢင်းၵူႈတီႈၵူႈလႅၼ်ၼၼ်ႉၵူၼ်းမႂ်းတင်းလၢႆ ဢွၼ်ၵၼ်ႁႅင်းဢူၼ်ႈႁႅင်းဢွၼ်ႇလႄႈလူမ်ႉၼွၼ်းလိုမ်းတူဝ်ယူႇ မိူၼ်ၸိူဝ်ႉၼင်ႇတိုင်ဢၼ်ၶမ်မႅၼ်ႈတူင်ႇႁႅဝ်ႉၵူၼ်းလႃႈထိူၼ်ႇၼၼ်ႉဢေႃႈ။ ၶဝ်ၼၼ်ႉဢိမ်ႇတႅမ်ဝႆႉတင်းတေႃးသႃႉ ထႃႇဝရႃႉၽြႃး၊ ဢိၵ်ႇတင်းတၢင်းဢၼ်ၽြႃးပဵၼ်ၸဝ်ႈသင်ႇသွၼ်သုင်းမႃႉၼၼ်ႉဢေႃႈ။
ပိူဝ်ႈၼႆလႄႈ၊မႂ်းဢၼ်လႆႈၶၢမ်ႇၽေးတုၵ်ႉၶႃႉ ဝဵင်း ယေႇရုသလႅမ်ႇ၊ ဢၼ်ဝၢင်ႇဝီႈဝၢင်ႇဝိူဝ်ႈၸိူဝ်ႉၼင်ႇၵူၼ်းမဝ်းလဝ်ႈၶဝ်႟။
ထႃႇဝရႃႉၽြႃး၊ ၽြႃးပဵၼ်ၸဝ်ႈမႂ်းဢၼ်ၵႅတ်ႇၶႄႁႄႉၵင်ႈမႂ်းၼၼ်ႉမီးဢမိင်ႉၸမ်ႉ၊ “ၵဝ်ၼုၵ်ႈဢဝ်ပႅတ်ႈၵွၵ်းဢၼ်ၵဝ်ပႃးတင်းတေႃးသႃႉလႄႈပၼ်တီႈမႂ်းၼၼ်ႉယဝ်ႉ။ ပိူဝ်ႈၼႆလႄႈၵမ်းလိုၼ်းမႂ်းတၵ်းဢမ်ႇၵိၼ် ၼမ်ႉမၢၵ်ႇၸပိတ်ႉဢၼ်ႁဵတ်းႁႂ်ႈမႂ်းဝၢင်ႇဝီႈဝၢင်ႇဝိူဝ်ႈၼၼ်ႉထႅင်ႈယဝ်ႉ။
ၵဝ်ဢဝ်ၵွၵ်းၼၼ်ႉပၼ်တီႈၶဝ်ၸိူဝ်းဢၼ်တဵၵ်းငႅၼ်းၼိၵ်ႈၸၢၵ်ႈမႂ်း၊ ဢၼ်ဢဝ်မႂ်းလူမ်ႉၼွၼ်းၵႃႈၼႂ်းၵၢင်တႃႈၵၢင်တၢင်းလႄႈယဵပ်ႇယမ်ႈမႂ်း၊ ထၢၼ်ႈပေႃးမိူၼ်ၸိူဝ်ႉၼင်ႇဢၼ်ယဵပ်ႇယမ်ႈမုၼ်ႈလိၼ်ၼၼ်ႉယဝ်ႉဢေႃႈ။” ဝႃႈၼင်ႇၼႆဢေႃႈ။
ဝဵင်း ယေႇရုသလႅမ်ႇ၊ ႟။ တိုၼ်ႇမႃးတႃႉ။ တိုၼ်ႇမႃးလႄႈႁႂ်ႈပျေႉၸုမ်ႇတဵမ်ဝႆႉတင်းဢဵၼ်ႁႅင်းတႃႉ။ ဝဵင်းမူတ်းၸၢင်ႇၽြႃးပဵၼ်ၸဝ်ႈ႟။ ၼုင်ႈမႆ ၶူဝ်းၼုင်ႈမႂ်းဢၼ်ႁၢင်ႈလီၼၼ်ႉတႃႉ။ ၵမ်းလိုၼ်းၵေႃႉဢၼ်ဢမ်ႇယုမ်ႇမၢတ်ႈ ၽြႃးပဵၼ်ၸဝ်ႈၸိူဝ်းၼၼ်ႉတၵ်းဢမ်ႇလႆႈ ၶဝ်ႈၵႃႈၼႂ်းၽၵ်းတူဝဵင်းမႂ်းထႅင်ႈ။
ဝဵင်း ယေႇရုသလႅမ်ႇ၊ ႟။ ၽႅတ်းသၢႆႇပႅတ်ႈသေလႄႈ လုၵ်ႉၶိုၼ်ႈမႃးၼင်ႈၵႃႈၼိူဝ်ပလၢင်ႇမႂ်းတႃႉ။ ၵူၼ်းဝဵင်း ၸိဢုၼ်ႇ၊ ဢၼ်ၶၢမ်ႇတူၵ်းၵႅၼ်းၼႆႉ႟။ ၵႄႈပႅတ်ႈၸိူၵ်ႈလဵၵ်းဢၼ်မတ်ႉသူ ယူႇၼၼ်ႉတႃႉ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉတီႈၵူၼ်းမၼ်းၸဝ်ႈတင်းလၢႆလႄႈဝႃႈၸမ်ႉ၊ “မိူဝ်ႈဢၼ်သူလႆႈပဵၼ်ၶႃႈၼၼ်ႉၽူႈလႂ်ဢမ်ႇၸၢႆႇပၼ်ငိုၼ်းပုၼ်ႈသူ။ မိူၼ်ၸိူဝ်ႉၼင်ႇၼၼ် တၢင်းဢၼ်ပွႆႇႁႂ်ႈသူလွတ်ႈၼၼ်ႉၵေႃႈဢမ်ႇလူဝ်ႇမီးၵႃႈမၼ်းၶၼ်မၼ်း။-
မိူဝ်ႈဢွၼ်တၢင်းၼၼ်ႉသူဢွၼ်ၵၼ်လူင်းၵႂႃႇႁႂ်ႈလႆႈသွၼ်ႈပိုင်ႈယူႇၵႃႈၼႂ်းမိူင်း ဢေးၵျိပ်ႉ၊ ၸွမ်းၼင်ႇဢလူဝ်ႇၵၢင်ၸႂ်သူယဝ်ႉ။ လိုၼ်းၼၼ်ႉၵူၼ်းမိူင်း ဢႃႇသီးရီးယႃး၊ ၶဝ်ယင်းဢမ်ႇပၼ်ၵႃႈပၼ်ၶၼ်လႄႈတဵၵ်းငႅၼ်းၸႂ်ႉၵိၼ်သူဢေႃႈ။-
မိူၼ်ၼင်ႇၼၼ်မိူဝ်ႈလဵဝ်ၼႆႉၵေႃႈသူသမ်ႉၵႂႃႇပဵၼ်ၵူၼ်းတူၵ်းၵႅၼ်း၊ဢမ်ႇပၼ်ၵႃႈပၼ်ၶၼ်လႄႈယူႇၵႃႈၼႂ်းမိူင်း ပႃႇပုလုၼ်ႇ၊ ဢေႃႈ။ ၶုၼ်ၸိူဝ်းဢၼ်ဢုပ်ႉပိူင်ႇၵႃႈၼိူဝ်ၶဝ်ၼၼ်ႉဢူၼ်ဢဵၼ်မေႃးမႄးၵၼ်လႄႈၼႃႇမႃႉၸိုဝ်ႈသဵင်ၵဝ်လႆႈၶၢမ်ႇတၢင်းဢၼ်သႄႉသွမ်း၊ယူႇတင်းဝၼ်းတင်းဝၼ်းဢေႃႈ။-
ပိူဝ်ႈၼႆလႄႈၵူၼ်းၵဝ်တင်းလၢႆတၵ်းႁုၸၵ်းၼႃႇမႃႉၸိုဝ်ႈသဵင်ၵဝ်ဢၼ်ဝႃႈ၊ၽြႃးပဵၼ်ၸဝ်ႈၼၼ်ႉသေလႄႈႁုလွင်ႈဢၼ်ၵဝ်ပဵၼ်ၸဝ်ႈဢၼ်ဝႆႉၵတိၼၼ်ႉၼႂ်းမိုဝ်ႉဝၼ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ပဵၼ်ဢၼ်လီဢၢမ်းၼႃႇတၢင်းဢၼ်လႆႈႁၼ် ၵေႃႉဢၼ်ႁေႃးလၢတ်ႈၶၢဝ်ႇငၢဝ်း တြႃးသိူဝ်းပျေႃႇၶၢမ်ႈႁူၺ်ႈၶၢမ်ႈလွႆတင်းလၢႆ၊ မႃးလူၺ်ႈတြႃးသတၢင်းဢၼ်လီဢၼ်ငၢမ်း၊ ၶၢဝ်ႇငၢဝ်းတြႃးတၢင်းၼိမ်ၼၼ်ႉဢေႃႈ။ မၼ်းၼၼ်ႉပၢဝ်ႇသေႃႇတြႃးတၢင်းဢၼ် ၵႄႇသႄႇၶျွတ်ႈဢဝ်ၼၼ်ႉယူႇလႄႈ လၢတ်ႈတီႈဝဵင်း ၸိဢုၼ်ႇ၊ လႄႈဝႃႈ၊ “ၽြႃးပဵၼ်ၸဝ်ႈမႂ်းဢုပ်ႉပိူင်ႇၸၢမ်ႇၸႃး ယူႇဢေႃႈ၊” ဝႃႈၼင်ႇၼႆဢေႃႈ။
ၶဝ်ၸိူဝ်းဢၼ်ပႂ်ႉထိင်းဝဵင်းၼၼ်ႉဢွၼ်ၵၼ် ၵိဝ်သဵင်လႄႈႁွင်ႉသႅၼ်ႇယူႇၸူမ်းၸူမ်း သိူဝ်းသိူဝ်းဢေႃႈ။ လွင်ႈမၼ်းၸမ်ႉ၊ၶဝ်ၼၼ်ႉမၢၵ်ႇတႃၶဝ် လႆႈႁၼ် ထႃႇဝရႃႉၽြႃး၊ ၶိုၼ်းၶဝ်ႈၵႃႈၼႂ်း ဝဵင်း ၸိဢုၼ်ႇ၊ မႃးယူႇၼၼ်ႉဢေႃႈ။
တီႈဢၼ်ၵိူၼ်ႇပင်းလုလႅဝ်ၵႃႈၼႂ်းဝဵင်း ယေႇရုသလႅမ်ႇ၊ ၶဝ်႟။ ဢွၼ်ၵၼ် ၽွမ်ႉၵၼ်ႁဵတ်းၵႂၢမ်းလႄႈပၢဝ်ႇသေႃႇတႃႉ။ ထႃႇဝရႃႉၽြႃး၊ ၵႄႇၼုၵ်ႈဢဝ်ဝဵင်း ယေႇရုသလႅမ်ႇ၊ လႄႈႁႂ်ႈၸႂ်ၵူၼ်းမၼ်းၸဝ်ႈ တင်းလၢႆၵတ်းယဵၼ်ၶျၢမ်းသႃႇယဝ်ႉ။
ထႃႇဝရႃႉၽြႃး၊ ဝူတ်ႈၶႅၼ်ဝူတ်ႈမိုဝ်းဢၼ် မူတ်းၸၢင်ႇၸဝ်ႈလႄႈၵႄႇသႄႇၶျွတ်ႈဢဝ် ၵူၼ်းမၼ်းၸဝ်ႈတင်းလၢႆယဝ်ႉ။ ၵူၼ်းလေႃးၵႃႉတင်းလၢႆတၵ်းႁၼ်ၵျေးၸူး တၢင်းဢၼ်ၽြႃးပဵၼ်ၸဝ်ႈၵႄႇၶျွတ်ႈ ဢဝ်ႁဝ်းဢေႃႈ။
သူၸိူဝ်းဢၼ်ယိပ်းၵမ်ဢဝ်ၶိူင်ႈပိူင်ၵျွင်း ပိၵ်ႈမၢၼ်ႇၸဝ်ႈတင်းလၢႆၵႂႃႇၶဝ်႟။ ဢွၵ်ႇၵႂႃႇတႃႉ။ ဢွၵ်ႇသေၵႃႈၼႂ်းမိူင်း ပႃႇပုလုၼ်ႇ၊ ၵႂႃႇတႃႉ။ ယႃႇပေဢဝ် မိုဝ်းတိူဝ်ႉလွင်ႈတၢင်းဢၼ်ဢမ်ႇမူတ်းသႂ်ၼၼ်ႉ။ ႁႂ်ႈတူဝ်သူမူတ်းၸၢင်ႇယူႇလႄႈဢွၵ်ႇၵႂႃႇတႃႉ။
ပွၵ်ႈၼႆႉၸိုင်၊သူဢမ်ႇလူဝ်ႇဢွၵ်ႇၵႂႃႇၶၼ်ၶၼ် ၽႂ်းၽႂ်း။ သူဢမ်ႇလူဝ်ႇၶတ်းၸႂ်ၵျူဝ်းၸႃး ႁႂ်ႈလႆႈဢွၵ်ႇပၢႆႈသေလႄႈၵႂႃႇ။ ထႃႇဝရႃႉၽြႃး၊ ၽြႃးပဵၼ်ၸဝ်ႈ၊သူတၵ်း ႁႄႉၵင်ႈပၼ်သူယူႇၵူႈၽၢႆႇၵူႈပႃႈဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၶႃႈၵဝ်ၼၼ်ႉ ႁဵတ်းၵၢၼ်လူၺ်ႈတၢင်းဢၼ်မီး ၺၢၼ်ႇပိင်ႇၺႃႇသေယဝ်ႉ၊ တၵ်းဢွင်ႇမႅင်ႇပႄႉၼႅင်ႇလႄႈတၵ်းလႆႈ ၶၢမ်ႇဢဝ်တၢင်းဢၼ်ယုၵ်ႉယွင်ႈႁွတ်ႈထိုင် တီႈသုင်ၼႃႇဢေႃႈ။
မိူဝ်ႈဢၼ်ၵူၼ်းၼမ်ၼႃႇႁၼ်မၼ်းၼၼ်ႉၸိုင်၊ ၶဝ်မီးတၢင်းဢၼ်ဢၢမ်းဢေႃးလႄႈ တူၵ်းၸႂ်လႂ်တိုၼ်ႇ၊ ၵွပ်ႈပိူဝ်ႈဢၼ်ၼႃႈတႃ၊ဢိၵ်ႇတင်းႁၢင်ႈၽၢင် မၼ်းလုၵႂႃႇထၢၼ်ႈပေႃးဢမ်ႇမိူၼ် ၵူၼ်းၼၼ်ႉဢေႃႈ။
မိူဝ်ႈလဵဝ်ၼႆႉၸမ်ႉ၊မဵဝ်းၵူၼ်းၼမ်ၼႃႇတၵ်း ဢွၼ်ၵၼ်ယွင်ႈယေႃးဢၢမ်းဢေႃး မၼ်းလႄႈၶုၼ်ႁေႃၶမ်းတင်းလၢႆတၵ်း ဢိုတ်းသူပ်းဢိုတ်းပၢၵ်ႇလူၺ်ႈၸႂ်ဢၼ် လီဢၢမ်းၼႃႇၼၼ်ႉဢေႃႈ။ ၶဝ်ၼၼ်ႉတၵ်းႁၼ်လႄႈႁုလွင်ႈတၢင်းဢၼ်ၶဝ် ဢမ်ႇတွၼ်ႉႁုတွၼ်ႉငိၼ်းၸိူဝ်းၼၼ်ႉဢေႃႈ။” ဝႃႈၼင်ႇၼႆဢေႃႈ။
ၵူၼ်းတင်းလၢႆၶိုၼ်းလဝ်ႈလၢတ်ႈလႄႈဝႃႈ၊ “ၵႂၢမ်းသတၢင်းသဵင်ၶၢဝ်ႇဢၼ်ႁဝ်း ႁေႃးလၢတ်ႈၼႆႉၸိုင်၊ၽူႈလႂ်ယုမ်ႇ။ မိုဝ်း ထႃႇဝရႃႉၽြႃး၊ ဢၼ်သၢင်ႈႁဵတ်း လွင်ႈတၢင်းၼႆႉၼၼ်ႉၽူႈလႂ်ႁၼ်။
ဢၼ်ၼႆႉၸမ်ႉ၊ပဵၼ်ၸွမ်းဢလူဝ်ႇ ထႃႇဝရႃႉၽြႃး၊ ၼႂ်းလွင်ႈတၢင်းဢၼ်ၶႃႈၵူၼ်းၸႂ်ႉၵူၼ်းသွႆမၼ်းၸဝ်ႈၼၼ်ႉ၊ လႆႈယႂ်ႇသုင်မႃးမိူၼ်ၸိူဝ်ႉၼင်ႇတူၼ်ႈမႆႉဢၼ် ယင်ႇႁၢၵ်ႈၵႃႈၼႂ်းလိၼ်ၼၼ်ႉဢေႃႈ။ မၼ်းဢမ်ႇမီးႁၢင်ႈၽၢင်ဢၼ်ႁၢင်ႈလီႁၢင်ႈငၢမ်း လႄႈလီလွမ်လီတူၺ်းၼၼ်ႉ။ ဢမ်ႇမီး လၢၵ်ႈၶၼႃႇၼႃႈတႃတိုတ်ႉၸၼ်ၸူဝ်းဢဝ် ႁဝ်းၵႂႃႇၸူးတီႈမၼ်းၼၼ်ႉလႃးလႃး။
ႁဝ်းဢမ်ႇမီးၸႂ်ဢၼ်ၼပ်ႉယမ်မၼ်းသေလႄႈ ထဵင်ပႅတ်ႈမၼ်းဢေႃႈ။ မၼ်းလႆႈၶၢမ်ႇတၢင်းဢၼ်ယၢပ်ႇၸႂ်ၽိုတ်ႇၸႂ် လႄႈၸဵပ်းသႅပ်ႇ၊ပဵၼ်ၵေႃႉဢၼ်ၽူႈလႂ် ဢမ်ႇၶႂ်ႈတူၺ်းႁၼ်မၼ်း၊ ဢမ်ႇၶႂ်ႈမိုတ်ႈၵိုဝ်းၵၼ်တင်းမၼ်းမိူၼ်ၸိူဝ်ႉၼင်ႇ ဢၼ်မၼ်းပဵၼ်ၵေႃႉဢၼ်ဢမ်ႇပွင်ႇလွင်ႈ ၵႃႈသင်လႃးလႃးၼၼ်ႉဢေႃႈ။
ၵူၺ်းၵႃႈ၊မၼ်းၼၼ်ႉႁၢပ်ႇပႃးဢဝ်ဝူၺ်ႇတၼႃႇဢိၵ်ႇတင်းတၢင်းၸဵပ်းတၢင်းသႅပ်ႇႁဝ်း၊ဢၼ်ႁဝ်းထုၵ်ႇလီႁၢပ်ႇဢဝ်ၼၼ်ႉလႄႈၵႂႃႇဢေႃႈ။ ပဵၼ်ၼၼ်သေၵေႃႈႁဝ်းမၢတ်ႈဝႃႈ၊ဝူၺ်ႇတၼႃႇဢၼ်မၼ်းလႆႈၶၢမ်ႇၼၼ်ႉပဵၼ်ၽေးတၢမ်ႇ ဢၼ်ၽြႃးပဵၼ်ၸဝ်ႈၸီႇယၢင်ႇဢေႃႈ။
ၵူၺ်းၵႃႈ၊ၵွပ်ႈပိူဝ်ႈဢပျတ်ႈႁဝ်းၼၼ်ႉလႄႈ မၼ်းလႆႈၶၢမ်ႇတၢင်းဢၼ်တႅင်းသႂ်ႇ မၢတ်ႇၸဵပ်းၼႃႇလူင်လၢင်၊ ဢိၵ်ႇတင်းလႆႈၶၢမ်ႇတၢင်းဢၼ်ၶိုတ်ႈလႅဝ်ၵႂႃႇ ၵွပ်ႈပိူဝ်ႈတၢင်းဢၼ်ႁဝ်းလႆႈၵမ်ၵျၢင်ႉ ဢၼ်ဢမ်ႇတြႃးၼၼ်ႉဢေႃႈ။ ႁဝ်းလႆႈႁွတ်ႈထိုင်တၢင်းဢၼ်ၵတ်းယဵၼ်ၶျၢမ်းသႃႇၵွပ်ႈပိူဝ်ႈဝူၺ်ႇတၼႃႇၽေးတၢမ်ႇ ဢၼ်မၼ်းလႆႈၶၢမ်ႇၼၼ်ႉသေလႄႈ ႁဵတ်းႁႂ်ႈႁဝ်းႁၢႆလီလီလူၺ်ႈတၢင်းဢၼ်ပိူၼ်ႈ ဢဝ်တႃမိုဝ်းပေႃႉထုပ်ႉမၼ်းၼၼ်ႉဢေႃႈ။
ႁဝ်းၵႃႈမီးတင်းသဵင်ႈတင်းလူင်ပဵၼ်မိူၼ် ၸိူဝ်ႉၼင်ႇသူဝ်းဢၼ်ႁၢႆၵႂႃႇ၊ ၵွပ်ႈပိူဝ်ႈႁဝ်းဝႄႈပိူင်ႈလႄႈငႅၵ်းၸွမ်း သဵၼ်ႈတၢင်းတူဝ်ၸဝ်ႈၵဝ်ႇၵႂႃႇႁင်းၽႂ် ႁင်းမၼ်းၼၼ်ႉဢေႃႈ။ ၵူၺ်းၵႃႈ၊ ထႃႇဝရႃႉၽြႃး၊ ဢဝ်ၽေးတၢမ်ႇ ၵႃႈဢၼ်ႁဝ်းထိူၵ်ႈၶၢမ်ႇၼၼ်ႉတၢင်ႇသႂ်ႇ ၵႃႈၼိူဝ်မၼ်းဢေႃႈ။
မၼ်းၼၼ်ႉလႆႈၶၢမ်ႇတၢင်းဢၼ်ၼိၵ်ႈၸၢၵ်ႈ ငႅၼ်းသႄးႁႅင်းၼႃႇသေၵေႃႈ၊ မီးၸႂ်ဢၼ်ဢူၼ်ႈဢွၼ်ႇၶျႃးတႅမ်ႇ ယိူၼ်ႉၶၢမ်ႇယူႇ ဢမ်ႇလၢတ်ႈၵႂၢမ်းဢွၵ်ႇသူပ်း သေၶေႃႈသေၵမ်းလႄႈယူႇဢေႃႈ။ ၸိူဝ်ႉၼင်ႇသူဝ်းဢွၼ်ႇဢၼ်လႆႈၶၢမ်ႇ တၢင်းဢၼ်ဢဝ်ၵႂႃႇႁႅမ်တၢႆၼၼ်ႉ၊ ဢိၵ်ႇတင်းၸိူဝ်ႉၼင်ႇသူဝ်းဢၼ်ဢဝ်ၵႂႃႇ ႁႂ်ႈလႆႈၵႅတ်းႁႆးၶူၼ်ၼၼ်ႉ၊မၼ်းယင်းဢမ်ႇႁွင်ႉ ဢမ်ႇသႅၼ်ႇသေၵမ်းလႄႈယူႇဢေႃႈ။
မၼ်းၼၼ်ႉလႆႈၶၢမ်ႇတၢင်းဢၼ်တိဢဝ်လႄႈ ၸီႇယၢင်ႇႁႂ်ႈလႆႈဢဝ်တၢႆသေၵေႃႈ ဢမ်ႇမီးၵေႃႉဢၼ်ဝႆႉဢမုလွင်ႈမၼ်းၼၼ်ႉ။ မၼ်းၼၼ်ႉလႆႈၶၢမ်ႇဢဝ်တၢႆၵွပ်ႈပိူဝ်ႈ ဢပျတ်ႈၵူၼ်းႁဝ်းတင်းလၢႆၼၼ်ႉဢေႃႈ။
ပိၵ်ႉသမ်ႉမၼ်းၼၼ်ႉဢမ်ႇႁဵတ်းတၢင်းၽိတ်းလႄႈ ဢမ်ႇလၢတ်ႈမုသႃႇသေၵေႃႈ၊ မိူဝ်ႈဢၼ်မၼ်းတၢႆၼၼ်ႉ၊ၶဝ်ဢဝ်ၽင်ဝႆႉလူၺ်ႈၵၼ်တင်းၵူၼ်းၸိူဝ်းဢၼ်ႁၢႆႉဢၼ်မိူၵ်ႈ၊ ဢိၵ်ႇတင်းၶဝ်ၸိူဝ်းဢၼ်မၢၵ်ႈမီးငိုၼ်းတွင်း တင်းလၢႆဢေႃႈ။ ၵူၺ်းၵႃႈ၊မၼ်းဢမ်ႇတွၼ်ႉႁဵတ်းၽိတ်းဢမု သေၸိူဝ်ႉသေပိူင်၊ဢမ်ႇၼၼ်မၼ်းဢမ်ႇတွၼ်ႉ လၢတ်ႈၵႂၢမ်းမုသႃႇသေၶေႃႈသေၵမ်း၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “တၢင်းဢၼ် မၼ်းၶၢမ်ႇဝူၺ်ႇတၼႃႇၼၼ်ႉပဵၼ် ဢလူဝ်ႇၵဝ်ဢေႃႈ။ တၢင်းတၢႆမၼ်းၼၼ်ႉပဵၼ်ၶိူင်ႈတၢင်းလူႇဢၼ်ၽေႇဢပျတ်ႈဢေႃႈ။ ၼင်ႇၼၼ်လႄႈမၼ်းတၵ်းႁၼ်မဵဝ်းၸိူဝ်ႉၶိူဝ်း မၼ်းလႄႈဢသၢၵ်ႈမၼ်းၵေႃႈတၵ်း ယၢဝ်းယိုၼ်းဢေႃႈ။ တၢင်းဢၼ်ၵဝ်ဢဵၼ်းဢၢၼ်းၵေႃႈတၵ်း ႁွတ်ႈထိုင်တၢင်းဢၼ်ပျေႉၸုမ်ႇၵွပ်ႈလူၺ်ႈ မၼ်းၼၼ်ႉဢေႃႈ။
လိုၼ်းသေမၼ်းလႆႈၶၢမ်ႇဝူၺ်ႇတၼႃႇယဝ်ႉၼၼ်ႉၸိုင်၊မၼ်းတၵ်းၶိုၼ်းလႆႈၸူမ်းသိူဝ်းဢေႃႈ။ ၸႂ်ဝိၺိၺ်ႇမၼ်းတၵ်းႁုဝႃႈ၊ ဝူၺ်ႇတၼႃႇမၼ်းၼၼ်ႉဢမ်ႇပဵၼ်ဢၼ်လၢႆလၢႆလွၵ်ႇလွၵ်ႇဢေႃႈ။ ၶႃႈၵဝ်ၵေႃႉဢၼ်သိုဝ်ႈတေႃႇဢၼ်ၵဝ် ထုၵ်ႇၸႂ်ၵျိူၵ်ႈၸႂ်ၼၼ်ႉ၊တၵ်းပႃးဢဝ် ဢပျတ်ႈတၢမ်ႇၵူၼ်းၼမ်ၼႃႇၵႂႃႇသေယဝ်ႉ၊ ႁပ်ႉဢဝ်ဢပျတ်ႈၶဝ်ၵႂႃႇယဝ်ႉ။
ၵွပ်ႈပိူဝ်ႈၸိူဝ်ႉၼင်ႇၼႆလႄႈၵဝ်တၵ်းယုၵ်ႉယွင်ႈမၼ်း၊ႁႂ်ႈမၼ်းယႂ်ႇမျၢတ်ႈလႄႈမီးၽုင်း တၼ်းၶူဝ်းၵႃႈၼႂ်းၵႄႈၵၢင်ၵူၼ်းတင်းလၢႆဢေႃႈ။ မၼ်းၼၼ်ႉပႃးၸႂ်ၸေႇတၼႃႇလႄႈ သၢၵ်ႈလူႇဢသၢၵ်ႈမၼ်းပုၼ်ႈၵူၼ်းဢၼ် ႁဵတ်းတုၸရိူၵ်ႈၼၼ်ႉဢေႃႈ။ မၼ်းၼၼ်ႉၶၢမ်ႇဢဝ်ဢပျတ်ႈၵူၼ်းၼမ်ၼႃႇ သေယဝ်ႉ၊သူးတွင်းပုၼ်ႈလွင်ႈၼင်ႇႁိုဝ် ဢပျတ်ႈၶဝ်တၵ်းလႆႈၶၢမ်ႇတၢင်းဢၼ် ပွႆႇလွတ်ႈဢေႃႈ။” ဝႃႈၼင်ႇၼႆဢေႃႈ။
ဝဵင်း ယေႇရုသလႅမ်ႇ၊ ႟။ မႂ်းမိူၼ်မႄႈမၼ် ဢၼ်ဢမ်ႇၸၢင်ႈၵိူတ်ႇလဵင်ႉလုၵ်ႈၼၼ်ႉယဝ်ႉ။ ၵူၺ်းၵႃႈ၊မိူဝ်ႈလဵဝ်ၼႆႉမႂ်းလႆႈႁဵတ်းၵႂၢမ်းလႄႈ ႁွင်ႉသႅၼ်ႇလူၺ်ႈၸႂ်ဢၼ်သႂၢင်ႇသိူဝ်းယဝ်ႉ။ မိူဝ်ႈလဵဝ်ၼႆႉမႂ်းတၵ်းၵိူတ်ႇလဵင်ႉလုၵ်ႈလၢင်းၼမ်ၵိုၼ်းၼႃႇသေမႄႈယိင်းဢၼ်ၽူဝ်မၼ်း ဢမ်ႇတွၼ်ႉၸုၼ်ႉပႅတ်ႈမၼ်းၼၼ်ႉလူးၵွၼ်ႇဢေႃႈ။
ၶႂၢၵ်ႈႁႂ်ႈသုမ်ႉထဵင်မႂ်းႁႂ်ႈယဵင်ႈၶႅၼ်းၵႂၢင်ႈတႃႉ။ ၶဵင်ႈမုင်းၽႃႈၵင်ႈတီႈယူႇမႂ်းႁႂ်ႈၵႂၢင်ႈထႅင်ႈလူးၵွၼ်ႇတႃႉ။ ယိုတ်ႈႁႂ်ႈၸိူၵ်ႈမႂ်းၸိူဝ်းၼၼ်ႉယၢဝ်းဢွၵ်ႇ ထႅင်ႈတႃႉ။ ႁႂ်ႈသဝ်မၼ်းၸိူဝ်းၼၼ်ႉ မၼ်ႈလီၶိူင်ႇလီတႃႉ။
လွင်ႈမၼ်းၸမ်ႉ၊မႂ်းတၵ်းၶႂၢၵ်ႈဢွၵ်ႇလႅၼ်လိၼ်မႂ်း ၵူႈပႃႈၵူႈၽၢႆႇဢေႃႈ။ ၵူၼ်းမႂ်းတင်းလၢႆတၵ်းလႆႈသိမ်းၶိုၼ်းလိၼ်ဢၼ် ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၶဝ် ဢုပ်ႉပိူင်ႇယူႇတေႃႈလဵဝ်ၼႆႉၼၼ်ႉဢေႃႈ။ ဝဵင်းလူင်ၸိူဝ်းဢၼ်သႅတ်ႇၵူၼ်း ယဵၼ်ၵူၼ်းယူႇၼၼ်ႉၵေႃႈတၵ်းတဵမ်ဝႆႉတင်း ၵူၼ်းၼမ်ၼႃႇဢေႃႈ။
ယႃႇပေမႆႈၸႂ်။ မႂ်းတၵ်းဢမ်ႇလႆႈၶိုၼ်းႁွတ်ႈထိုင် တၢင်းဢၼ်ဢူၵ်းဢၼ်ဢၢႆ။ ယႃႇပေၵႂၢင်ၸႂ်ယုင်ႈၸႂ်။ မႂ်းတၵ်းဢမ်ႇလႆႈၶၢမ်ႇတၢင်းဢၼ်တူၵ်းတီႈတႅမ်ႇ။ မႂ်းတၵ်းလူင်လိုမ်းပႅတ်ႈတၢင်းဢၼ်ဢူၵ်း ဢၼ်ဢၢႆၼႂ်းတၢင်းဢၼ်မႂ်းဢမ်ႇပႂ်ႉသဵတ်ႈၸႃႇ၊ ၼႂ်းမိူဝ်ႈဢၼ်ဢသၢၵ်ႈမႂ်းယင်းတိုၵ်ႉၼုမ်ႇ ယူႇၼၼ်ႉ၊မႂ်းတၵ်းဢမ်ႇလႆႈမီးၸႂ်ဢၼ်တမ်ႇ ဢၼ်ၼွႆႉၵွပ်ႈပိူဝ်ႈဢၼ်မႂ်းပဵၼ်မႄႈမူၵ်း မႄႈမၢႆႈလႄႈယူႇၵူၺ်းၶေႃမႂ်းၼၼ်ႉ။
လွင်ႈမၼ်းၸမ်ႉ၊ၸဝ်ႈဢၼ်ၽၢၼ်ႇသၢင်းႁဵတ်းပဵၼ် မႂ်းၼၼ်ႉတၵ်းပဵၼ်ၸိူဝ်ႉၼင်ႇၽူဝ်မႂ်းလႄႈ၊ ၼႃႇမႃႉၸိုဝ်ႈသဵင်မၼ်းၸဝ်ႈၸမ်ႉ၊ ပဵၼ် ထႃႇဝရႃႉၽြႃး၊ ၸဝ်ႈဢၼၼ်ႇတႃႉတၼ်းၶူဝ်း၊ ဢေႃႈ။ ၽြႃးပဵၼ်ၸဝ်ႈဢၼ်မူတ်းၸၢင်ႇဢၼ်ပဵၼ် ၽြႃးၵူၼ်းမဵဝ်း ဢိသရေး၊ ၼၼ်ႉ ပဵၼ်ၸဝ်ႈဢၼ်ထုတ်ႇဢဝ်မႂ်းလႄႈ၊ မၼ်းၸဝ်ႈပဵၼ်ၽြႃးဢၼ်လႆႈဢုပ်ႉပိူင်ႇ လေႃးၵႃႉတင်းသဵင်ႈတင်းလူင်ဢေႃႈ။
ဢိသရေး၊ ႟။ မႂ်းၼႆႉပဵၼ်ၸိူဝ်ႉၼင်ႇမေး ၼႂ်းမိူဝ်ႈဢၼ်ယင်းလဵၵ်ႉယင်းၼုမ်ႇဢၼ် ၽူဝ်မၼ်းပႅတ်ႈၼၼ်ႉသေလႄႈ မီးၸႂ်ဢၼ်လဵၵ်ႉဢၼ်ၼွႆႉယူႇၼၼ်ႉဢေႃႈ။ ၵူၺ်းၵႃႈ၊ ထႃႇဝရႃႉၽြႃး၊ ႁွင်ႉဢဝ်မႂ်း ၶိုၼ်းၸူးတီႈမၼ်းၸဝ်ႈလႄႈမီးဢမိင်ႉၸမ်ႉ၊
“ၵဝ်ၸုၼ်ႉပႅတ်ႈမႂ်းၵမ်းဢွၼ်ႇၼိုင်ႈၵူၺ်းလႄႈ တၵ်းသမ်ႉဢဝ်တင်းၵရုၼႃႇဢၼ်ယႂ်ႇၼမ်ၼႃႇ ၶိုၼ်းသိမ်းဢဝ်မႂ်းဢေႃႈ။
တေႃးသႃႉတၢင်းၸႂ်မႆႈၶႂ်ႈၸႃႉဢွၵ်ႇႁႅင်းယႂ်ႇ ၼႃႇလူင်လၢင်လႄႈၵဝ်ဝၢႆႇၼႃႈပႅတ်ႈမႂ်း ၵမ်းဢွၼ်ႇၼိုင်ႈၵူၺ်းလႄႈ တၵ်းဢဝ်တင်းမႅတ်ႈတႃႇထႃႇဝရႃႉဢဵတ်းလူ ၸွႆႈထႅမ်မႂ်းလူးၵွၼ်ႇဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ ဢၼ်ထုတ်ႇၼုၵ်ႈဢဝ်မႂ်းၼၼ်ႉ မီးဢမိင်ႉဢေႃႈ။
“ၼႂ်းၸူဝ်ႈပၢၼ် ၼူဝ်းဢႃႇ၊ ၼၼ်ႉၵဝ်ႁဵတ်း တၢင်းဢၼ်တိူင်ႇၵၢဝ်ႇၵတိလႄႈဝႃႈ၊ ၵမ်းလိုၼ်းၼမ်ႉတၵ်းဢမ်ႇလႆႈထူမ်ႈလိၼ်မိူင်း ဝႃႈၼင်ႇၼႆၼၼ်ႉ၊ၵမ်းၼႆႉၵဝ်သမ်ႉႁဵတ်း တၢင်းဢၼ်တိူင်ႇၵၢဝ်ႇၵတိလႄႈဝႃႈ၊ ၵဝ်တၵ်းဢမ်ႇဢွၵ်ႇတေႃးသႃႉတၢင်းဢၼ် ၶႂ်ႈၸႃႉတီႈမႂ်းထႅင်ႈ။ ၵဝ်တၵ်းဢမ်ႇသင်ႇသွၼ်သုင်းမႃႉ၊ဢမ်ႇပၼ်တၢမ်ႇဢပျတ်ႈတီႈမႂ်းထႅင်ႈဝႃႈၼင်ႇၼႆယဝ်ႉ။
ပိၵ်ႉသမ်ႉလွႆလူင်လွႆဢွၼ်ႇတင်းလၢႆသုတ်ႉၶၢႆႉ သၼ်ႇၶွၼ်းသေၵေႃႈ၊တၢင်းႁၵ်ႉမႅတ်ႈတႃႇ ၵဝ်ၼၼ်ႉတၵ်းဢမ်ႇသုတ်းဢမ်ႇဝၢႆး။ ပတိၺိၺ်ႇတၢင်းၼိမ်ၵဝ်ၼၼ်ႉၵေႃႈ ၵဝ်တၵ်းပႂ်ႉယူႇတႃႇသေႇဢမ်ႇထၢတ်ႇဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ ဢၼ်မီးၸႂ်ၵရုၼႃႇဢဵတ်းလူၼၼ်ႉမီးဢမိင်ႉဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ဢူဝ်း ဝဵင်း ယေႇရုသလႅမ်ႇ၊ ႟။ မႂ်းလႆႈၶၢမ်ႇတုၵ်ႉၶႃႉဝူၺ်ႇတၼႃႇယူႇ၊ ဢမ်ႇမီးၵေႃႉဢၼ်ၸွႆႈဢၼ်ထႅမ်၊ ဢမ်ႇမီးၵေႃႉဢၼ်ပၼ်ဢဵၼ်ပၼ်ႁႅင်းၼႆႉ။ ၵဝ်တၵ်းဢဝ်သႅင်ၼီႇလႃႇဢၼ်ထိူၵ်ႈဢၼ်ၵႃႈ ၼၼ်ႉတႄႇႁဵတ်းပိုၼ်ႉငဝ်ႈႁၢၵ်ႈမႂ်း တင်းလၢႆဢေႃႈ။
ၵဝ်တၵ်းဢဝ်သႅင်ပတ်ႈတမျႃးတင်းလၢႆ တႄႇတင်ႈသဝ်လၢင်းၸီးမႂ်း၊ တၵ်းဢဝ်သႅင်ရတၼႃႇဢၼ်ႁိူဝ်ႈမၢပ်ႈ ႁဵတ်းမႂ်ၽၵ်းတူမႂ်းလႄႈတၵ်းဢဝ်သႅင် မျၢတ်ႈႁဵတ်းလမ်းဝဵင်းမႂ်းဢေႃႈ။
တူဝ်ၵဝ်တၵ်းသွၼ်ပၼ်ၵူၼ်းမႂ်းတင်းလၢႆသေယဝ်ႉ၊ ပၼ်တၢင်းဢၼ်ၶိုၼ်ႈယႂ်ႇမႂ်ႇသုင်လူၺ်ႈ တၢင်းၼိမ်ဢၼ်ၵတ်းယဵၼ်ၶျၢမ်းသႃႇဢေႃႈ။
တြႃးတၢင်းဢၼ်တတ်းၽဵင်ႇဢိၵ်ႇတင်း တြႃးတၢင်းဢၼ်သိုဝ်ႈတေႃႇတၵ်း ႁႂ်ႈမႂ်းမီးဢဵၼ်ႁႅင်းလႄႈ၊ မႂ်းတၵ်းၵၢင်းလွတ်ႈတင်းတၢင်းဢၼ် တဵၵ်းငႅၼ်းၼိၵ်ႈၸၢၵ်ႈ၊ဢိၵ်ႇတင်း တၢင်းဢၼ်လႆႈၵူဝ်လႆႈႁႄၼၼ်ႉဢေႃႈ။
ပေႃးသေၵေႃႉသေၵူၼ်းယင်းဢမ်ႇလႆႈဢၶႂၢင်ႉ ၵဝ်လႄႈတိုၵ်းတေႃးမႂ်းၸိုင်၊ ၵေႃႉဢၼ်တိုၵ်းတေႃးမႂ်းၼၼ်ႉတၵ်းလႆႈ တူၵ်းသုမ်းဢေႃႈ။
ၵဝ်ၽၢၼ်ႇသၢင်းႁဵတ်းပဵၼ်ၸၢင်ႈလဵၵ်းဢၼ် ထူဝ်းသဝ်ႇၽႆးလႄႈပေႃႉႁဵတ်းလၢၵ်ႈၼၢၵ်ႈတင်းလၢႆၼၼ်ႉ၊ ဢိၵ်ႇတင်းႁဵတ်းပဵၼ်ၵူၼ်းသိုၵ်းဢၼ်ယိပ်းၵမ် လၢၵ်ႈၼၢၵ်ႈတင်းလၢႆပုၼ်ႈတၵ်းလႆႈ ဢဝ်ရၢၼ်ႇသူႇတၢႆၼၼ်ႉဢေႃႈ။
ၵူၺ်းၵႃႈ၊လၢၵ်ႈၼၢၵ်ႈဢၼ်ၸၢင်ႈႁဵတ်းၽေး သႂ်ႇမႂ်းၼၼ်ႉဢမ်ႇမီးသေဢၼ်။ မႂ်းတၵ်းမီးၵႂၢမ်းတွပ်ႇၵႂၢမ်းထဵင်တီႈၶဝ်ၸိူဝ်းဢၼ် ႁဵတ်းဢမုသႂ်ႇမႂ်းၼၼ်ႉဢေႃႈ။ ၵဝ်တၵ်းၵႅတ်ႇၶႄႁႄႉၶႅၼ်ၶႃႈၵူၼ်းၸႂ်ႉၵူၼ်းသွႆၵဝ် တင်းလၢႆသေလႄႈႁႂ်ႈၶဝ်ပႄႉၼႅင်ႇဢေႃႈ၊” ဝႃႈၼင်ႇၼႆဢေႃႈ။ ထႃႇဝရႃႉၽြႃး၊ မီးဢမိင်ႉဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၶဝ်ၸိူဝ်းဢၼ် ယၢၵ်ႇၼမ်ႉၵူၼ်းၵူႈၵေႃႉၵူႈၵူၼ်းၶဝ်႟။ ဢွၼ်ၵၼ်မႃးတႃႉ။ ၵႃႈတီႈၼႆႈမီးၼမ်ႉဢေႃႈ။ ၵေႃႉဢၼ် ဢမ်ႇမီးငိုၼ်းၶဝ်႟။ ဢွၼ်ၵၼ်မႃး သိုဝ်ႉဢဝ်လႄႈၵိၼ်တႃႉ။ ဢွၼ်ၵၼ်မႃးသိုဝ်ႉၼမ်ႉမၢၵ်ႇၸပိတ်ႉ၊ ဢိၵ်ႇတင်းၼမ်ႉၼူမ်းတႃႉ။ သူတၵ်း ဢမ်ႇလႆႈပၼ်ၵႃႈပၼ်ၶၼ်မၼ်း။
ႁဵတ်းသင်လႄႈသူၸၢႆႇငိုၼ်းပုၼ်ႈမဵဝ်းဢၼ် ဢမ်ႇၸႂ်ႈတၢင်းၵိၼ်ၼၼ်ႉၸိူဝ်ႉၼင်ႇႁိုဝ်။ ႁဵတ်းသင်လႄႈသူဢဝ်ငိုၼ်းၵႃႈႁႅင်းဝၼ်း သူၼၼ်ႉၸၢႆႇသေၵေႃႈသူယင်းတိုၵ်ႉ တွင်ႉမႆႈၶႂ်ႈၵိၼ်ယူႇတိၵ်းတိၵ်း ၸိူဝ်ႉၼင်ႇၼၼ်ၼၼ်ႉႁိုဝ်း။ ထွမ်ႇငိၼ်းဢဝ်ၵႂၢမ်းၵဝ်လႄႈႁဵတ်းၸွမ်းၵႃႈဢၼ် ၵဝ်သင်ႇလၢတ်ႈၼၼ်ႉတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊သူတၵ်းတေ လႆႈမူၼ်ႈပျေႃႇၼႂ်းတၢင်းဢၼ် ၵိၼ်ၶူပ်းဢၼ်လီဢၼ်ဝၢၼ်သေပိူၼ်ႈ ၼႂ်းတၢင်းၵိၼ်တၢင်းၶူပ်းတင်းသဵင်ႈ တင်းလူင်ၼၼ်ႉဢေႃႈ။
ၵူၼ်းၵဝ်ၶဝ်႟။ ထွမ်ႇဢဝ်ၵႂၢမ်းၵဝ်လႄႈ မႃးတီႈၵဝ်တႃႉ။ ပေႃးသူဢွၼ်ၵၼ်မႃးတီႈၵဝ်ၸိုင်၊ဝိၺိၺ်ႇသူ ၼၼ်ႉဢသၢၵ်ႈတၵ်းလိပ်းဢေႃႈ။ ၵဝ်တၵ်းႁဵတ်းပတိၺိၺ်ႇထႃႇဝရႃႉလူၺ်ႈၵၼ်တင်းသူလႄႈ၊ ပၼ်တၢင်းလီမၢင်ႇၵလႃႇဢၼ်ၵဝ်ဝႆႉၵတိ လူၺ်ႈၵၼ်တင်း တႃႇဝိတ်ႈ၊ ၼၼ်ႉဢေႃႈ။
ၵဝ်ၶၢၼ်းမၼ်းဝႆႉႁႂ်ႈပဵၼ်ၵူၼ်းငဝ်ႈၵူၼ်းႁူဝ်၊ ဢိၵ်ႇတင်း ၵေႃႉဢၼ်ဢုပ်ႉပိူင်ႇၸီႇယၢင်ႇၵႃႈၼိူဝ် မဵဝ်းၵူၼ်းတင်းလၢႆဢေႃႈ။ ၵဝ်ႁႂ်ႈမၼ်းၼၼ်ႉပဵၼ်သၢၵ်ႈသေႇလွင်ႈ ၽုင်းတၼ်းၶူဝ်းၵဝ်ဢေႃႈ။
တူၺ်းလူး။ မႂ်းတၵ်းႁွင်ႉဢဝ်ၵူၼ်းမဵဝ်း တၢင်ႇၸိူဝ်ႉတၢင်ႇၶိူဝ်း၊ ဢၼ်မိူဝ်ႈၵွၼ်ႇဢွၼ်ၼႆႉၶဝ်ဢမ်ႇယၢမ်ႈႁုၸၵ်းသူၼၼ်ႉလႄႈၶဝ်တၵ်းဢွၼ်ၵၼ်လႅၼ်ႈမႃး ၸူးတီႈသူလႄႈၽွမ်ႉၽၢႆႇသူဢေႃႈ။ ၵဝ် ထႃႇဝရႃႉၽြႃး၊ ၽြႃးပဵၼ်ၸဝ်ႈ ၵူၼ်းမဵဝ်း ဢိသရေး၊ ၽြႃးဢၼ်မူတ်းၸၢင်ႇ၊ တၵ်းႁဵတ်းႁႂ်ႈလွင်ႈတၢင်းၵႃႈမီးၸိူဝ်းၼႆႉ ပဵၼ်မႃးဢေႃႈ။ ၵဝ်တၵ်းႁႂ်ႈသူလႆႈႁပ်ႉဢဝ် မုၼ်သရေႇဢေႃႈ၊” ဝႃႈၼင်ႇၼႆဢေႃႈ။
ဢွၼ်ၵၼ်ဝၢႆႇႁူဝ်ၶိုၼ်းၸူးတီႈ ထႃႇဝရႃႉၽြႃး၊ လႄႈ သူးတွင်းတီႈမၼ်းၸဝ်ႈတႃႉ။ တေႃႈလဵဝ် ၼႆႉမၼ်းၸဝ်ႈမီးၸမ်ဢေႃႈ။
ႁႂ်ႈၵေႃႉဢၼ်ႁၢႆႉမိူၵ်ႈၼၼ်ႉၸုၼ်ႉပႅတ်ႈသဵၼ်ႈတၢင်းမၼ်း၊ ႁႂ်ႈၵေႃႉဢၼ်ဢမ်ႇတြႃးၼၼ်ႉၸုၼ်ႉပႅတ်ႈ တၢင်းၵျၢမ်ႇတၢင်းပွင်မၼ်းတင်းလၢႆသေလႄႈ ၶၢႆႉပုတ်ႈမႃးယူႇၽၢႆႇ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းတႃႉ။ မၼ်းၸဝ်ႈမီးၸႂ်ၵရုၼႃႇလႄႈမီးတၢင်း ဢၼ်ၶၼ်ၽႂ်းၼႂ်းတၢင်းဢၼ်ပွႆႇလွတ်ႈ ဢပျတ်ႈၼၼ်ႉဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “တၢင်းၵျၢမ်ႇ တၢင်းပွင်ၵဝ်တင်းလၢႆဢမ်ႇမိူၼ်ၵၼ်တင်း တၢင်းၵျၢမ်ႇတၢင်းပွင်သူ။ သဵၼ်ႈတၢင်းၵဝ်တင်းလၢႆၵေႃႈဢမ်ႇမိူၼ် ၵၼ်တင်းသဵၼ်ႈတၢင်းသူၵႂႃႇၸိူဝ်းၼၼ်ႉ။
ၸိူဝ်ႉၼင်ႇဢၼ်ၽႃႉၵၢင်ႁၢဝ်ယဵင်ႈၶႅၼ်းသုင် ၼႃႇသေလိၼ်မိူင်းၼၼ်ႉ၊ သဵၼ်ႈတၢင်းၵဝ်ၸိူဝ်းၼၼ်ႉၵေႃႈ ယဵင်ႈၶႅၼ်း သုင်ၼႃႇသေသဵၼ်ႈတၢင်းသူၸိူဝ်းၼၼ်ႉလႄႈ တၢင်းၵျၢမ်ႇတၢင်းပွင်ၵဝ်တင်းလၢႆၵေႃႈ ယဵင်ႈၶႅၼ်းသုင်ၼႃႇသေ တၢင်းၵျၢမ်ႇတၢင်းပွင်သူၸိူဝ်းၼၼ်ႉဢေႃႈ။
ၵႂၢမ်းၼုၵ်ႈၵပၢတ်ႈၵဝ်ပဵၼ်ၸိူဝ်ႉၼင်ႇၼမ်ႉမူၺ်၊ ဢိၵ်ႇတင်းၼမ်ႉၽူၼ်၊ ဢၼ်တူၵ်းမႃးႁႂ်ႈလိၼ်ယမ်းဝႆႉၼၼ်ႉသေယဝ်ႉ။ ႁႂ်ႈဢွၵ်ႇတူၼ်ႈယူႇ၊ႁႂ်ႈမၢၵ်ႇမၢၵ်ႇယူႇ၊ ပၼ်ၸိူဝ်ႉပၼ်ၽၼ်းပုၼ်ႈဢၼ်တၵ်းဝၢၼ်ႇ တၵ်းပိုၼ်၊ဢိၵ်ႇတင်းပၼ်ၶဝ်ႈၼမ်ႉ တၢင်းၵိၼ်ပုၼ်ႈဢၼ်တၵ်းၵိၼ်ဢေႃႈ။
ၵႂၢမ်းၼုၵ်ႈၵပၢတ်ႈဢၼ်ၵဝ်ႁေႃးလၢတ်ႈၼၼ်ႉ ၵေႃႈပဵၼ်ၸိူဝ်ႉၼင်ႇၼၼ်ယဝ်ႉ။ ၵႃႈဢၼ်ၵဝ်ဢဵၼ်းဢၢၼ်းၵျၢမ်ႇပွင်ဝႆႉၼၼ်ႉ ၵႂၢမ်းၵဝ်ၼႆႉတၵ်းဢမ်ႇလုတ်ႈဢမ်ႇႁၢမ်းသေၶေႃႈသေၵမ်း။ ၼုၵ်ႈၵပၢတ်ႈၵဝ်တၵ်းႁဵတ်းႁႂ်ႈပဵၼ်ၸွမ်းၵႃႈဢၼ်ၵဝ်ပွႆႇၸႂ်ႉၵႂႃႇႁႂ်ႈလႆႈထၢမ်းႁဵတ်းၼၼ်ႉဢေႃႈ။
သူတၵ်းပႃးတင်းၸႂ်ဢၼ်ၸူမ်းသိူဝ်းဢွၵ်ႇမိူင်း ပႃႇပုလုၼ်ႇ၊ ၵႂႃႇလႄႈ ပႃးတင်းတၢင်းၼိမ်ၶျၢမ်းသႃႇလႄႈလႆႈၶၢမ်ႇတၢင်းဢၼ်ဢွၼ်ဢွၵ်ႇဝဵင်းၵႂႃႇဢေႃႈ။ လွႆလူင်၊လွႆဢွၼ်ႇတင်းလၢႆတၵ်းဢွၼ်ၵၼ် ႁဵတ်းၵႂၢမ်းပၢဝ်ႇသေႃႇလႄႈတူၼ်ႈမႆႉ တင်းလၢႆတၵ်းဢွၼ်ၵၼ်တူပ်းမိုဝ်းဢေႃႈ။
တူၼ်ႈမႆႉပႅၵ်ႇတၵ်းဢွၵ်ႇမႃးတႅၼ်းတူၼ်ႈၶိူဝ်းၼၢမ်လႄႈတူၼ်ႈမုရတုတၵ်းဢွၵ်ႇမႃးတႅၼ်း တူၼ်ႈၼၢမ်လိၼ်ဢေႃႈ။ လွင်ႈတၢင်းၼႆႉတၵ်းပဵၼ်လၢၵ်ႈၶၼႃႇ တီႈမၢတ်ႈတီႈတွင်းယူႇတႃႇသေႇ၊ဢိၵ်ႇတင်း တီႈဢၼ်ၶုၵ်းၸႂ်လႆႈၶႂ်ႈၸႂ်ထူပ်း၊ လွင်ႈဢၼ်ၵဝ် ထႃႇဝရႃႉၽြႃး၊ ၸီႇယၢင်ႇႁဵတ်းသၢင်ႈဝႆႉၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉတီႈၵူၼ်းမၼ်းၸဝ်ႈတင်းလၢႆလႄႈဝႃႈၸမ်ႉ၊ “ဢွၼ်ၵၼ်ပႂ်ႉတြႃးတင်းဢၼ်တႅပ်းတတ်းၽဵင်ႇၽဵင်ႇဢိၵ်ႇတင်းတြႃးတၢင်းဢၼ်သိုဝ်ႈတေႃႇၼၼ်ႉယူႇတႃႉ။ လွင်ႈမၼ်းၸမ်ႉ၊ၵဝ်တၵ်းၸဵဝ်းမႃးၵႄႇသႄႇၼုၵ်ႈဢဝ်သူဢေႃႈ။-
ၵဝ်တၵ်းပၼ်တၢင်းလီတီႈၶဝ်ၸိူဝ်းဢၼ်ပႂ်ႉဝၼ်းၵမ်သိၼ်ၼၼ်ႉသေလႄႈဢမ်ႇႁႂ်ႈလႆႈၽိတ်းလႆႈပိူင်ႈဝၼ်းၸိူဝ်းၼၼ်ႉဢေႃႈ။ ၵဝ်တၵ်းပၼ်တၢင်းလီတီႈၶဝ်ၸိူဝ်းဢၼ်ဢမ်ႇႁဵတ်းတုၸရိူၵ်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ၶဝ်ႈပႃးၼႂ်းၵူၼ်းၽြႃးပဵၼ်ၸဝ်ႈၸိူဝ်းၼၼ်ႉတၵ်းဢမ်ႇလႆႈလၢတ်ႈလႄႈဝႃႈ၊ “ ထႃႇဝရႃႉၽြႃး၊ ဢမ်ႇပၼ်ဢၶႂၢင်ႉႁႂ်ႈၵဝ်ႁဵတ်းဝၢတ်ႈၵူဝ်းၵႂၢႆႇလူၺ်ႈၵၼ်တင်းၵူၼ်းမၼ်းၸဝ်ႈ၊” ဝႃႈၼင်ႇၼႆၼၼ်ႉ။ ယႃႇႁႂ်ႈၵူၼ်းတွၼ်ၼၼ်ႉလၢတ်ႈလႄႈဝႃႈ၊ “ၵွပ်ႈပိူဝ်ႈဢၼ်ၵဝ်ဢမ်ႇၵိူတ်ႇလုၵ်ႈၵိူတ်ႇလၢင်းလႆႈယဝ်ႉၼၼ်ႉလႄႈၵဝ်ဢမ်ႇၶဝ်ႈပႃးၼႂ်းၵူၼ်းၽြႃးပဵၼ်ၸဝ်ႈလႆႈယဝ်ႉ၊” ဝႃႈၼင်ႇၼႆၼၼ်ႉ။-
ထႃႇဝရႃႉၽြႃး၊ မီးဢမိင်ႉတီႈၵူၼ်းၸိူဝ်ႉၼင်ႇၼၼ်လႄႈဝႃႈ၊ “ပေႃးမႂ်းရူဝ်ႇသေႇၵူဝ်ယမ်ၵဝ်လူၺ်ႈတၢင်းဢၼ်ပႂ်ႉဝၼ်းၵမ်သိၼ်၊ပေႃးမႂ်းၵမ်ၵျၢင်ႉၸွမ်းၵႃႈၼင်ႇဢၼ်ထုၵ်ႇၸႂ်မႅၼ်ႈၸႂ်ၵဝ်လႄႈပႂ်ႉသဵတ်ႈၸႃႇၸွမ်းပတိၺိၺ်ႇၵဝ်ၸိုင်၊-
ၵဝ်တၵ်းဢဝ်တီႈယူႇတီႈသဝ်း၊ဢိၵ်ႇတင်းၼႃႇမႃႉၸိုဝ်ႈသဵင်ဢၼ်မျၢတ်ႈၼႃႇသေလုၵ်ႈၸၢႆးလုၵ်ႈယိင်းတင်းလၢႆၼၼ်ႉပၼ်တီႈၶဝ်ၼၼ်ႉၵႃႈၼႂ်းႁိူၼ်းၵဝ်ဢေႃႈ။ ၵဝ်တၵ်းဢဝ်ၼႃႇမႃႉၸိုဝ်ႈသဵင်ထႃႇဝရႃႉဢၼ်ဢမ်ႇႁၢႆလႆႈၼၼ်ႉပၼ်တီႈၶဝ်ဢေႃႈ။”
ထႃႇဝရႃႉၽြႃး၊ မီးဢမိင်ႉတီႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်း၊ၸိူဝ်းဢၼ်ၶဝ်ႈပႃးၼႂ်းၵူၼ်းၽြႃးပဵၼ်ၸဝ်ႈ၊ၸိူဝ်းဢၼ်ႁၵ်ႉမၼ်းၸဝ်ႈလႄႈႁဵတ်းဝၢတ်ႈတီႈမၼ်းၸဝ်ႈ၊ၸိူဝ်းဢၼ်ပႂ်ႉဝၼ်းၵမ်သိၼ်လႄႈ ပႂ်ႉပတိၺိၺ်ႇမၼ်းၸဝ်ႈၼၼ်ႉလႄႈဝႃႈ၊-
“ၵဝ်တၵ်းဢဝ်သူၵႂႃႇၵႃႈတီႈဝဵင်း ၸိဢုၼ်ႇ၊ လွႆၵဝ်ဢၼ်မူတ်းၸၢင်ႇၼၼ်ႉသေယဝ်ႉ၊ပၼ်ႁႂ်ႈသူလႆႈၸူမ်းသိူဝ်းမူၼ်ႈပျေႃႇၵႃႈၼႂ်းႁိူၼ်းၵဝ်ဢၼ်ပဵၼ်တီႈသူးတွင်းလႄႈႁပ်ႉတုင်းဢဝ်ၶိူင်ႈတၢင်းလူႇၸိူဝ်းဢၼ်သူသၢၵ်ႈလူႇၵႃႈၼိူဝ်ၶဵင်ႇတၢင်းလူႇၵဝ်ၼၼ်ႉဢေႃႈ။ ၵျွင်းပိၵ်ႈမၢၼ်ႇၵဝ်ၼၼ်ႉတၵ်းလႆႈႁွင်ႉၸိုဝ်ႈဝႃႈ၊ႁိူၼ်းတီႈဢၼ်မဵဝ်းၵူၼ်းၵူႈၸိူဝ်ႉၵူႈၶိူဝ်းသူးတွင်းဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ၸဝ်ႈဢၼ်ဢဝ်ၵူၼ်းမၼ်းၸဝ်ႈမဵဝ်း ဢိသရေး၊ တင်းလၢႆဢွၵ်ႇသေၵႃႈတီႈဢၼ်ၶဝ်လႆႈၶၢမ်ႇတၢင်းဢၼ်တူၵ်းၵႅၼ်းသေပွၵ်ႈၶိုၼ်းမႃးႁိူၼ်းၼၼ်ႉ၊သမ်ႉယင်းဝႆႉၵတိဝႃႈ၊မၼ်းၸဝ်ႈတၵ်းပႃးဢဝ်ၵူၼ်းတၢင်ႇၸိူဝ်ႉတၢင်ႇၶိူဝ်းမႃးၶဝ်ႈပႃးၼႂ်းၶဝ်ၼၼ်ႉဢေႃႈ။
ထႃႇဝရႃႉၽြႃး၊ မွၵ်ႇလၢတ်ႈႁႂ်ႈၵူၼ်းတၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉမႃးမိူၼ်ၸိူဝ်ႉၼင်ႇတူဝ်ထိူၼ်ႇႁၢႆႉသေလႄႈဢၢင်ႈတၵ်းၶူပ်းၵိၼ်ၵူၼ်းမၼ်းၸဝ်ႈတင်းလၢႆၼၼ်ႉဢေႃႈ။-
မၼ်းၸဝ်ႈလၢတ်ႈဝႃႈ၊ “ၶုၼ်ၸိူဝ်းဢၼ်ဢၢင်ႈတၵ်းပၼ်သတိတီႈၵူၼ်းၵဝ်ၼၼ်ႉတႃၶဝ်မွတ်ႇဢေႃႈ။ ၶဝ်ဢမ်ႇႁုၵႃႈသင်။ ၶဝ်မိူၼ်မႃပႂ်ႉႁိူၼ်းဢၼ်ဢမ်ႇၸၢင်ႈႁဝ်ႇၼၼ်ႉလႄႈပဵၼ်မႃဢၼ်လႄႇၼွၼ်းတီႈၼၼ်ႈတီႈၼႆႈလႄႈၼွၼ်းၽၼ်ႁၼ်ယူႇၼၼ်ႉဢေႃႈ။ ၶဝ်ပဵၼ်မႃဢၼ်တႃၼွၼ်းယႂ်ႇၼႃႇဢေႃႈ။-
ၶဝ်ယင်းပဵၼ်ၸိူဝ်ႉၼင်ႇမႃဢၼ်တွင်ႉမႆႈၼႃႇလူင်လၢင်လႄႈၵိၼ်ဢမ်ႇဢိမ်ႇဢမ်ႇတဵမ်လႆႈ။ ၶုၼ်ၸိူဝ်းၼၼ်ႉဢမ်ႇမီးတၢင်းႁုတၢင်းႁၼ်ၵႃႈသင်။ ၶဝ်ၸၢင်ႈႁဵတ်းၸွမ်းဢလူဝ်ႇၵၢင်ၸႂ်တူဝ်ၸဝ်ႈၵဝ်ႇလႄႈႁႃဢၵျူဝ်းပုၼ်ႈတူဝ်ၸဝ်ႈၵဝ်ႇႁင်းၽႂ်ႁင်းမၼ်းဢေႃႈ။-
ၶဝ်ပဵၼ်ၵူၼ်းမဝ်းလဝ်ႈလႄႈလၢတ်ႈဝႃႈ၊ ‘ဢွၼ်ၵၼ်ဢဝ်ၼမ်ႉမၢၵ်ႇၸပိတ်ႉမႃးလႄႈၵိၼ်ႁႂ်ႈမဝ်းႁႂ်ႈဢိမ်ႇဢိမ်ႇတဵမ်တဵမ်တႃႉႁဝ်း။ ၼႂ်းဝၼ်းမိူဝ်ႈၽုၵ်ႈႁဝ်းတၵ်းယဵင်ႈၶႅၼ်းပျေႉၸုမ်ႇလိူင်ႇၸႂ်သေဝၼ်းမိူဝ်ႈၼႆႉလူးၵွၼ်ႇဢေႃႈ၊’ ” ဝႃႈၼင်ႇၼႆဢေႃႈ။
မိူဝ်ႈၵေႃႉဢၼ်သိုဝ်ႈတေႃႇတၢႆၼၼ်ႉဢမ်ႇမီးၵေႃႉဢၼ်ၶႆႈၸႂ်ဝူၼ်ႉၸႂ်လႄႈဝႆႉဢမုလွင်ႈမၼ်း။ ၵူၺ်းၵႃႈ၊ဢမ်ႇမီးၽေးရၢၼ်ႇဢၼ်လႂ်ၸၢင်ႈတၵ်းတိူဝ်ႉၶဝ်လႆႈမိူဝ်ႈဢၼ်ၶဝ်တၢႆၵႂႃႇၼၼ်ႉ။-
ၶဝ်ၸိူဝ်းဢၼ်မီးတၢင်းသိုဝ်ႈတေႃႇၼႂ်းမိူဝ်ႈဢၼ်ၶဝ်ယင်းဢသၢၵ်ႈလိပ်းၼၼ်ႉ၊ၶဝ်တေလႆႈလိုဝ်ႈသဝ်းၵႃႈၼႂ်းတၢင်းၼိမ်မိူဝ်ႈဢၼ်ၶဝ်တၢႆၵႂႃႇၼၼ်ႉဢေႃႈ။
သူၸိူဝ်းဢၼ်မီးဢပျတ်ႈၶဝ်႟။ မႃးၵႃႈတီႈၼႆႈတႃႉ။ မႃးၶၢမ်ႇဢဝ်တၢင်းဢၼ်ၸီႇယၢင်ႇတြႃးတႃႉ။ သူၼႆႉဢမ်ႇလီတွၼ်းသေမႄႈၽိူဝ်ႉလႂ်၊မႄႈယိင်းဢၼ်လဵၼ်ႈၽူဝ်ၼွႆႉလႂ်၊မႄႈမွၵ်ႇယႃႈလႂ်ၸိူဝ်းၼၼ်ႉၵူၺ်း။-
သူဢွၼ်ၵၼ်ယွၵ်ႇယဝ်ႈၽူႈလႂ်။ သူဢွၼ်ၵၼ်ဢႃႈပၢၵ်ႇလႄႈမႅပ်ႈလိၼ်ႉပၼ်ၽူႈလႂ်။ သူပဵၼ်ၵူၼ်းမဵဝ်းဢၼ်ပႅတ်ႉလႅၼ်၊မဵဝ်းဢၼ်သဵတ်ႈၸႃႇလုဢမ်ႇၸႂ်ႈႁိုဝ်း။-
သူဝႆႈႁုၼ်ႇႁၢင်ႈသၢင်းထုဢၼ်ပဵၼ်ၽြႃးတီႈလိၼ်ဢၼ်မီးၽုၼ်ႇလီၼၼ်ႉသေယဝ်ႉ၊ႁဵတ်းၵႃႇမၵုင်ႇၼွၼ်းလူၺ်ႈၵၼ်ၵႃႈတႂ်ႈတူၼ်ႈမႆႉၶဵဝ်ၼၼ်ႉဢေႃႈ။ သူသၢၵ်ႈလူႇလုၵ်ႈလၢင်းသူႁႂ်ႈပဵၼ်ၶိူင်ႈတၢင်းလူႇၵႃႈတႂ်ႈငိုပ်းမၢၵ်ႇႁိၼ်မၢၵ်ႇၽႃၵႃႈၼႂ်းၶူင်ႈႁူၺ်ႈတင်းလၢႆဢေႃႈ။-
သူဢဝ်မၢၵ်ႇႁိၼ်လိူမ်ႈၶျေႃးတင်းလၢႆသေၵႃႈတီႈၼၼ်ႈလႄႈဝႆႈၶဝ်မိူၼ်ၸိူဝ်ႉၼင်ႇပဵၼ်ၽြႃးသူဢေႃႈ။ သူထွၵ်ႇႁိုဝ်ႈၼမ်ႉမၢၵ်ႇၸပိတ်ႉႁႂ်ႈပဵၼ်ၶိူင်ႈတၢင်းလူႇတီႈၶဝ်လႄႈဢဝ်ၶိူင်ႈတၢင်းလူႇဢေႃးၸႃႇတၢင်းၵိၼ်သၢၵ်ႈလူႇတီႈၶဝ်ဢေႃႈ။ သူထၢင်ႇၵဝ်ၵျိူၵ်ႈၸႂ်ထုၵ်ႇၸႂ်လွင်ႈတၢင်းၸိူဝ်းၼႆႉႁိုဝ်း။-
သူၸၢင်ႈဢွၼ်ၵၼ်ၶိုၼ်ႈၵႂႃႇၵႃႈတီႈလွႆဢၼ်သုင်လႄႈသၢၵ်ႈလူႇၶိူင်ႈတၢင်းလူႇသေယဝ်ႉ၊ၽူႈယိင်းၽူႈၸၢႆးၼွၼ်းလူၺ်ႈၵၼ်ၵႃႈတီႈၼၼ်ႈဢေႃႈ။-
သူသၢင်ႈႁဵတ်းႁုၼ်ႇႁၢင်ႈသၢင်းထုဢၼ်လီႁင်ႈဢဵတ်ႇသဵတ်ႇၵႃႈတီႈၽၵ်းတူၼႃႈႁိူၼ်းသူသေလႄႈၸုၼ်ႉပႅတ်ႈၵဝ်ဢေႃႈ။ သူထွတ်ႇၶူဝ်းၼုင်ႈသူသေလႄႈၶိုၼ်ႈၵူႈတီႈၼွၼ်းသူဢၼ်ၵႂၢင်ႈၼၼ်ႉလူၺ်ႈၵၼ်တင်းၵေႃႉႁၵ်ႉသူဢၼ်သူပၼ်ၵႃႈပၼ်ၶၼ်ပုၼ်ႈဢၼ်တၵ်းၼွၼ်းလူၺ်ႈၵၼ်ၼၼ်ႉသေယဝ်ႉ၊သူပျေႇၸႂ်လူၺ်ႈတၢင်းပျေႃႇၵႃႇမႃႉၵုင်ႇသူဢေႃႈ။-
သူသႂ်ႇၼမ်ႉမၼ်းႁွမ်တင်းဢၢႆၼမ်ႉသႃႇသေယဝ်ႉ၊ၵႂႃႇႁႂ်ႈလႆႈဝႆႈၽြႃး မူးလွၵ်ႉ၊ ဢေႃႈ။ ႁႂ်ႈလႆႈသွၵ်ႈႁႃၽြႃးဢၼ်တၵ်းဝႆႈၼၼ်ႉၸိုင်၊သူပွႆႇၸႂ်ႉသၢၼ်ႇတမၢၼ်ႇတင်းလၢႆၵႂႃႇၸူးတီႈၸမ်တီႈၵႆတေႃႇထိုင်ႁွတ်ႈမိူင်းမရၼႃႉလူးၵွၼ်ႇဢေႃႈ။-
သူႁိူဝ်ႉၸႂ်ဢူၼ်ႈၸႂ်လူၺ်ႈလွင်ႈတၢင်းဢၼ်သွၵ်ႈႁႃၽြႃးတၢင်ႇသူႇတၢင်ႇပႃးသေၵေႃႈသူၸႂ်ဢမ်ႇလု။ သူယင်းထၢင်ႇႁုၼ်ႇႁၢင်ႈသၢင်းထုဢၼ်လီႁင်ႈဢဵတ်ႇသဵတ်ႇၼၼ်ႉပၼ်ဢဵၼ်ပၼ်ႁႅင်းသူလႄႈသူဢမ်ႇမီးတၢင်းဢၼ်ႁႅင်းဢူၼ်ႈႁႅင်းဢွၼ်ႇဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၽြႃးၸိူဝ်းလႂ်ႁဵတ်းႁႂ်ႈသူၵူဝ်ႁႄတေႃႇထိုင်ႁွတ်ႈပႅတ်ႉလႅၼ်ၵဝ်လႄႈလူင်လိုမ်းပႅတ်ႈၵဝ်လုမ်းလုမ်းၼၼ်ႉ။ သူႁဵတ်းဢမ်ႇရူဝ်ႇသေႇဢမ်ႇၼပ်ႉယမ်ၵဝ် ၵွပ်ႈပိူဝ်ႈၵဝ်ယူႇတဵတ်ႇတဵတ်ႇႁိုင်ၼႃႇလူင်လၢင်ၼၼ်ႉႁိုဝ်း။-
သူထၢင်ႇတၢင်းဢၼ်သူႁဵတ်းၼၼ်ႉပဵၼ်ဢၼ်သိုဝ်ႈတေႃႇႁိုဝ်း။ ၵဝ်တၵ်းၽုၺ်ႇၼႄလွင်ႈတၢင်းဢၼ်သူႁဵတ်း၊ဢိၵ်ႇတင်းလွင်ႈႁုၼ်ႇႁၢင်ႈသၢင်းထုသူၸိူဝ်းၼၼ်ႉဢမ်ႇပၼ်ဢၵျူဝ်းသူလႆႈၼၼ်ႉဢေႃႈ။-
မိူဝ်ႈဢၼ်သူၵၢဝ်ႇႁႃဢေႁႃႁုၼ်ႇႁၢင်ႈသၢင်းထုၼၼ်ႉ ႁႂ်ႈႁုၼ်ႇႁၢင်ႈသၢင်းထုသူၸိူဝ်းၼၼ်ႉၵႄႇသႄႇဢဝ်သူသေၵမ်း။ လူမ်းဢၼ်ၵိုင်ႉၵၢင်ႉပတ်ႉထူဝ်းမႃးၼၼ်ႉတၵ်းဢဝ်မၼ်းပိဝ်ၵႂႃႇဢေႃႈ။ ၵူၺ်းၵႃႈ၊ၶဝ်ၸိူဝ်းဢၼ်ယုမ်ႇမၢတ်ႈဢိင်ပိုင်ႈၵဝ်ၼၼ်ႉၸမ်ႉ၊တၵ်းတေလႆႈယူႇၼႂ်းမိူင်းၵဝ်လႄႈႁဵတ်းဝၢတ်ႈၵူဝ်းၵႂၢႆႇၵဝ်ၵႃႈၼႂ်းၵျွင်းပိၵ်ႈမၢၼ်ႇၵဝ်ဢေႃႈ။”
ထႃႇဝရႃႉၽြႃး၊ မီးဢမိင်ႉၸမ်ႉ၊ “ႁႂ်ႈၵူၼ်းၵဝ်တင်းလၢႆၶိုၼ်းပွၵ်ႈမႃးၵႃႈတီႈၵဝ်တႃႉ။ ပႄႇၽဵဝ်ႈပႅတ်ႈဢၼ်ယုင်ႈဢၼ်ယၢင်ႈဢၼ်ႁႄႉဢၼ်ၶႅၼ်ၵႃႈၼႂ်းသဵၼ်ႈတၢင်းၶဝ်ၼၼ်ႉတႃႉ။ ၵေႃႇတႅၼ်လိၼ်လႄႈႁဵတ်းတၢင်းႁႂ်ႈၽွမ်ႉဝႆႉတႃႉ။
“ၵဝ်ပဵၼ်ၽြႃးပဵၼ်ၸဝ်ႈဢၼ်သုင်ဢၼ်မျၢတ်ႈ၊ၽြႃးပဵၼ်ၸဝ်ႈဢၼ်မူတ်းၸၢင်ႇလႄႈဢသၢၵ်ႈလိပ်းယူႇတႃႇသေႇဢမ်ႇထၢတ်ႇဢေႃႈ။ ၵဝ်ယူႇသဝ်းၵႃႈတီႈဢၼ်သုင်ဢၼ်မျၢတ်ႈ၊ထႃႇၼႃႉဢၼ်မူတ်းၸၢင်ႇယူႇလူၺ်ႈၵၼ်တင်းၵူၼ်းၵဝ်ၸိူဝ်းဢၼ်မီးၸႂ်ဢၼ်ၶုၵ်းၸႂ်လႆႈမႆႈၸႂ်ဢပျတ်ႈလႄႈၶျႃးတႅမ်ႇၼၼ်ႉ၊ပုၼ်ႈလွင်ႈၼင်ႇႁိုဝ်ၵဝ်တၵ်းၸၢင်ႈမႄးၵုမ်းမႄးႁဵတ်းႁႂ်ႈၶဝ်မီးၸႂ်ဢၼ်ယုမ်ႇယမ်တမ်းၸႂ်၊ႁႂ်ႈမီးၸႂ်ဢၼ်မုင်ႈထႃႈမွင်းထႃႈဢေႃႈ။-
ၵဝ်ဢမ်ႇၵိၼ်ႇဢမ်ႇလႃႇၶဝ်ယူႇသေႇသေႇ။ ၵဝ်ဢမ်ႇဢွၵ်ႇတေႃးသႃႉတီႈၶဝ်ယူႇသေႇသေႇ။ ပေႃးဢမ်ႇႁဵတ်းၸိူဝ်ႉၼင်ႇၼၼ်၊ၵူၼ်းၸိူဝ်းဢၼ်ၵဝ်ပၼ်ႁႂ်ႈဢသၢၵ်ႈလိပ်းၼၼ်ႉတၵ်းတၢႆဢေႃႈ။-
ၵဝ်လႆႈဢွၵ်ႇတေႃးသႃႉတေႃႇၶဝ်ၵွပ်ႈပိူဝ်ႈတုၸရိူၵ်ႈၶဝ်၊ဢိၵ်ႇတင်းၵွပ်ႈပိူဝ်ႈၸႂ်လေႃးၽႃႉၶဝ်ဢေႃႈ။ ၵွပ်ႈပိူဝ်ႈၼႆလႄႈၵဝ်ၸီႇယၢင်ႇပၼ်တၢမ်ႇၶဝ်လႄႈပႄႇပႅတ်ႈၶဝ်ဢေႃႈ။ ၵူၺ်းၵႃႈ၊ၶဝ်ယင်းႁူဝ်ၶႅင်ယူႇလႄႈသိုပ်ႇၵႂႃႇၸွမ်းသဵၼ်ႈတၢင်းၶဝ်ၼၼ်ႉယူႇတိၵ်းတိၵ်းဢေႃႈ။
“ၵဝ်ႁၼ်တၢင်းဢၼ်ၶဝ်ၵမ်ၵျၢင်ႉသၢင်ႈႁဵတ်းၼၼ်ႉယဝ်ႉ၊ၵူၺ်းၵႃႈ၊ၵဝ်တၵ်းယူတ်းယႃၶဝ်၊ဢွၼ်ႁူဝ်ၶဝ်လႄႈပၼ်တၢင်းဢၼ်ၵတ်းယဵၼ်ၶျၢမ်းသႃႇတီႈၶဝ်ၸိူဝ်းဢၼ်ၸႂ်ႁဵဝ်ႇၸႂ်ၸွပ်ႈၼၼ်ႉဢေႃႈ။-
ၵဝ်ဢဵတ်းလူပၼ်တၢင်းၼိမ်တီႈၵူၼ်းတင်းသဵင်ႈတင်းလူင်ၸႃႉၸဵမ်ၵေႃႉဢၼ်ယူႇၵႆလႄႈၵေႃႉဢၼ်ယူႇၸမ်ဢေႃႈ။ ၵဝ်တၵ်းယူတ်းယႃပၼ်ၵူၼ်းၵဝ်တင်းလၢႆဢေႃႈ။-
ၶဝ်ၸိူဝ်းဢၼ်ဢမ်ႇတြႃးၸမ်ႉ၊မိူၼ်ၵၼ်တင်းၼမ်ႉပၢင်ႇလၢႆႇဢၼ်ဢမ်ႇထၢတ်ႇဢမ်ႇယဵၼ်လႄႈလႅင်းၼမ်ႉပိူပ်ႈၼမ်ႉပႃးဢဝ်မုၼ်ႈဢဝ်ၵူမ်ႇမႃးၼၼ်ႉဢေႃႈ။-
တီႈၵူၼ်းဢၼ်မီးဢပျတ်ႈတင်းလၢႆၼၼ်ႉဢမ်ႇမီးတၢင်းၼိမ်လႃးလႃး၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ႁွင်ႉပၢဝ်ႇႁွင်ႉသေႃႇၵႃႈၼင်ႇဢၼ်သူမီးသဵင်ဢၼ်ႁွင်ႉပၢဝ်ႇလႆႈၼၼ်ႉတႃႉ။ မွၵ်ႇလၢတ်ႈၵူၼ်းၵဝ်မဵဝ်း ဢိသရေး၊ လွင်ႈဢၼ်ၶဝ်မီးဢပျတ်ႈၼၼ်ႉတႃႉ။-
ၶဝ်ဢွၼ်ၵၼ်ၵၢဝ်ႇႁႃၵဝ်ယူႇၵူႈမိူဝ်ႈၵူႇဝၼ်းလႄႈဢွၼ်ၵၼ်မွၵ်ႇဝႃႈ၊ၶဝ်ၸႂ်ႁႅင်းယႂ်ႇၼႂ်းသဵၼ်ႈတၢင်းၵဝ်၊ဢိၵ်ႇတင်းၼႂ်းတၢင်းဢၼ်ၵမ်ၵျၢင်ႉၸွမ်းတြႃးၵဝ်ဢေႃႈ။ ၶဝ်ယွၼ်းဢဝ်တြႃးတၢင်းဢၼ်ၸီႇယၢင်ႇသိုဝ်ႈသိုဝ်ႈတေႃႇတေႃႇတီႈၵဝ်ပုၼ်ႈဢၼ်ၶဝ်တၵ်းမူၼ်ႈပျေႃႇယူႇၵႃႈၼႂ်းတၢင်းဢၼ်ႁဵတ်းဝၢတ်ႈတီႈၵဝ်ဢေႃႈ၊” ဝႃႈၼင်ႇၼႆဢေႃႈ။
ၵူၼ်းတင်းလၢႆလဝ်ႈထၢမ်လႄႈဝႃႈ၊ “ႁဵတ်းသင်လႄႈၶႃႈၸဝ်ႈႁဝ်းၶဝ်ႁဵတ်းတၢင်းဢၼ်ၵမ်တၢင်းၵိၼ်သေၵေႃႈ၊ၸဝ်ႈႁဝ်းယင်းဢမ်ႇတူၺ်းဢမ်ႇႁၼ်။ ႁဵတ်းသင်လႄႈၶႃႈၸဝ်ႈႁဝ်းၶဝ်ၵမ်ၵျၢင်ႉၵႅၼ်ႇၶႅင်ၼႃႇလူင်လၢင်သေၵေႃႈ၊ၸဝ်ႈႁဝ်းယင်းဢမ်ႇႁုဢမ်ႇမၢတ်ႈ၊” ဝႃႈၼင်ႇၼႆဢေႃႈ။ ထႃႇဝရႃႉၽြႃး၊ မီးဢမိင်ႉတီႈၶဝ်လႄႈဝႃႈၸမ်ႉ၊ “ၼႂ်းဝၼ်းဢၼ်သူၵမ်သိၼ်ဢမ်ႇၵိၼ်တၢင်းၵိၼ်ၼၼ်ႉ၊သူႁဵတ်းၸွမ်းၸႂ်တူဝ်ၸဝ်ႈၵဝ်ႇသူလႄႈတဵၵ်းငႅၼ်းႁႂ်ႈၶႃႈသူတင်းလၢႆႁဵတ်းယၢပ်ႇႁဵတ်းၽိုတ်ႇဢေႃႈ။-
ၼႂ်းတၢင်းဢၼ်သူၵမ်သိၼ်ဢမ်ႇၵိၼ်တၢင်းၵိၼ်ယူႇၼၼ်ႉသူထဵင်ၵၼ်ၽိတ်းၵၼ်ယူႇ၊ဢဝ်တႃမိုဝ်းဢၼ်ႁၢႆႉမိူၵ်ႈၼၼ်ႉပေႃႉထုပ်ႉၵၼ်ဢေႃႈ။ တၢင်းဢၼ်ၵမ်သိၼ်ဢမ်ႇၵိၼ်တၢင်းၵိၼ်ဢၼ်သူႁဵတ်းဝၼ်းမိူဝ်ႈၼႆႉၼၼ်ႉ၊ဢမ်ႇၸၢင်ႈႁဵတ်းႁႂ်ႈၵဝ်ထွမ်ႇၵႂၢမ်းသူးတွင်းသူ။-
တၢင်းဢၼ်ၵမ်သိၼ်ဢမ်ႇၵိၼ်တၢင်းၵိၼ်ဢၼ်ၵဝ်ထုၵ်ႇၸႂ်ၼၼ်ႉပဵၼ်ၸိူဝ်ႉၼင်ႇၼၼ်ႁိုဝ်း။ ပဵၼ်ဝၼ်းဢၼ်ၵူၼ်းၵမ်ၵျၢင်ႉႁႂ်ႈတူဝ်ၶျႃးတႅမ်ႇဝၼ်းၼိုင်ႈႁိုဝ်း။ ပဵၼ်တၢင်းဢၼ်ဝၢင်းႁူဝ်ၵူမ်ႈႁူဝ်မိူၼ်ၸိူဝ်ႉၼင်ႇတူၼ်ႈၶႅမ်၊တၢင်းဢၼ်ဢဝ်ၼင်ပေႃတင်းတဝ်ႈသိူဝ်ႇပုၼ်ႈတီႈၼွၼ်းၼၼ်ႉႁိုဝ်း။ သူႁွင်ႉဝႃႈ၊တၢင်းဢၼ်ႁဵတ်းၸိူဝ်ႉၼင်ႇၼႆၼၼ်ႉပဵၼ်တၢင်းဢၼ်ၵမ်သိၼ်ဢမ်ႇၵိၼ်တၢင်းၵိၼ်ယဝ်ႉႁိုဝ်း။ သူထၢင်ႇၵဝ်တၵ်းထုၵ်ႇၸႂ်ၵျိူၵ်ႈၸႂ်လွင်ႈတၢင်းဢၼ်ႁဵတ်းၸိူဝ်ႉၼင်ႇၼႆႁိုဝ်း။
“တၢင်းဢၼ်ၵမ်သိၼ်ဢမ်ႇၵိၼ်တၢင်းၵိၼ်ဢၼ်ၵဝ်ထုၵ်ႇၸႂ်ၵျိူၵ်ႈၸႂ်ၸမ်ႉ၊ပဵၼ်တၢင်းဢၼ်ၵႄႈဢွၵ်ႇၸိူၵ်ႈလဵၵ်းဢၼ်မတ်ႉၽုၵ်ႇတဵၵ်းငႅၼ်း၊ဢိၵ်ႇတင်းပူတ်းဢွၵ်ႇၵၢၼ်းၶေႃးဢၼ်ဢမ်ႇတြႃး၊တၢင်းဢၼ်ပွႆႇႁႂ်ႈၶဝ်ၸိူဝ်းဢၼ်လႆႈၶၢမ်ႇတၢင်းဢၼ်တဵၵ်းငႅၼ်းၼၼ်ႉလွတ်ႈဢေႃႈ။-
ပဵၼ်တၢင်းဢၼ်ၽႄမႅင်ႇတၢင်းၵိၼ်တီႈၵေႃႉဢၼ်တွင်ႉမႆႈသႆႈလိူတ်ႇ၊တၢင်းဢၼ်ၽုၺ်ႇၽၵ်းတူႁိူၼ်းပုၼ်ႈၶဝ်ၸိူဝ်းဢၼ်ဢမ်ႇမီးႁိူၼ်း၊တၢင်းဢၼ်ဢဝ်ၶူဝ်းၼုင်ႈပၼ်တီႈၵေႃႉဢၼ်ဢမ်ႇမီးၶူဝ်းၼုင်ႈလႃးလႃးၼၼ်ႉ၊ဢိၵ်ႇတင်းတၢင်းဢၼ်ဢမ်ႇထဵင်ပႅတ်ႈပုၼ်ႈတၵ်းၸွႆႈထႅမ်တီႈပီႈၼွင်ႉၸိူဝ်ႉၶိူဝ်းတူဝ်ၸဝ်ႈၵဝ်ႇၼၼ်ႉဢေႃႈ။
“ပေႃးႁဵတ်းၸိူဝ်ႉၼင်ႇၼၼ်ၸိုင်၊ၵျေးၸူးၵဝ်တၵ်းထွင်ႇလႅင်းၵႃႈၼိူဝ်သူမိူၼ်ၸိူဝ်ႉၼင်ႇဢၼ်လႅင်းၵၢင်ၼႂ်ၼၼ်ႉလႄႈႁွႆးၸဵပ်းႁွႆးတၢမ်ႇသူတၵ်းၸဵဝ်းႁၢႆၸဵဝ်းၶႅၼ်းဢေႃႈ။ ၵဝ်တၵ်းမီးယူႇလူၺ်ႈၵၼ်တင်းသူတႃႇသေႇႁႂ်ႈလႆႈၵႄႇသႄႇဢဝ်သူလႄႈမုၼ်ၽုင်းၵဝ်တၵ်းႁႄႉၶႅၼ်သူယူႇၵူႈပႃႈၵူႈၽၢႆႇဢေႃႈ။-
မိူဝ်ႈဢၼ်သူႁဵတ်းပထၼႃႇသူးတွင်းၼၼ်ႉ၊ၵဝ်တၵ်းထွမ်ႇဢဝ်ဢေႃႈ။ မိူဝ်ႈဢၼ်သူႁွင်ႉၵဝ်ၼၼ်ႉၵဝ်တၵ်းဢိူဝ်ဢေႃႈ။ “ပေႃးသူၵိုတ်းသဝ်းသေတၢင်းဢၼ်တဵၵ်းငႅၼ်းၵႅၼ်ႉၶေႃးပိူၼ်ႈ၊တၢင်းဢၼ်လၢတ်ႈၵႂၢမ်းဢၼ်သႄႉဢၼ်သွမ်းပိူၼ်ႈၼၼ်ႉဢွၵ်ႇသေၵႃႈၼႂ်းသူသေလႄႈ၊-
မီးတင်းၸႂ်ၸေႇတၼႃႇဢၼ်ၽႄပၼ်တၢင်းၵိၼ်တၢင်းၶူပ်းတီႈၶဝ်ၸိူဝ်းဢၼ်တွင်ႉမႆႈသႆႈလိူတ်ႇ၊ပၼ်ႁႂ်ႈၶဝ်ၸိူဝ်းဢၼ်ၸုတ်ႈဢၼ်လုတ်ႈၼၼ်ႉပျေႉၸုမ်ႇဢိမ်ႇတဵမ်ၼၼ်ႉၸိုင်၊ဢၼ်လပ်းသိင်ႇဢၼ်လဵပ်ႈႁွပ်ႈႁိမ်းသူယူႇၼၼ်ႉတၵ်းလႆႈပဵၼ်ဢၼ်လႅင်းၵၢင်ဝၼ်းမႃးဢေႃႈ။-
ပေႃးပဵၼ်ၸိူဝ်ႉၼင်ႇၼၼ်ၸိုင်၊ၵဝ်တၵ်းၼႄပျႃးသဵၼ်ႈတၢင်းတီႈသူတႃႇသေႇလႄႈႁႂ်ႈသူဢိမ်ႇတဵမ်လူၺ်ႈလွင်ႈဢၼ်လီဢၼ်ငၢမ်းဢေႃႈ။ ၵဝ်တၵ်းႁႂ်ႈသူမီးဢဵၼ်မီးႁႅင်းလႄႈယူႇလီၵိၼ်ဝၢၼ်ဢေႃႈ။ သူတၵ်းဢွၼ်ၵၼ်ပဵၼ်ၸိူဝ်ႉၼင်ႇသူၼ်ဢူးယဵၼ်ႇဢၼ်မီးၼမ်ႉလိူင်ႇလီ၊ဢိၵ်ႇတင်းၸိူဝ်ႉၼင်ႇၼမ်ႉဢွၵ်ႇႁူးဢၼ်ဢမ်ႇတွၼ်ႉႁႅင်ႈၼၼ်ႉဢေႃႈ။-
ၵူၼ်းသူတင်းလၢႆတၵ်းဢွၼ်ၵၼ်မႄးၵုမ်းမႄးႁဵတ်းၸိူဝ်းဢၼ်လုလႅဝ်ယဝ်ႉႁိုင်ၼႃႇၸိူဝ်းၼၼ်ႉလႄႈၶိုၼ်းမႄးတႄႇတင်ႈငဝ်ႈႁၢၵ်ႈၵႃႈၼိူဝ်ငဝ်ႈႁၢၵ်ႈဢၼ်ၵဝ်ႇၼၼ်ႉဢေႃႈ။ ပိူၼ်ႈတၵ်းႁုဝႃႈ၊သူပဵၼ်ၶဝ်ၸိူဝ်းဢၼ်မႄးၵုမ်းမႄးတင်ႈလမ်းဝဵင်းတင်းလၢႆ၊မႄးပူၵ်းမႄးတင်ႈႁိူၼ်းဢၼ်လုဢၼ်လႅဝ်တင်းလၢႆဢေႃႈ။”
ထႃႇဝရႃႉၽြႃး၊ မီးဢမိင်ႉၸမ်ႉ၊ “ပေႃးသူပႂ်ႉၵမ်ပႂ်ႉၸွမ်းဝၼ်းၵမ်သိၼ်လႄႈမၢတ်ႈပဵၼ်ဝၼ်းဢၼ်မူတ်းၸၢင်ႇ၊ဢမ်ႇႁႂ်ႈတူဝ်ၸဝ်ႈၵဝ်ႇလႆႈမူၼ်ႈပျေႃႇၸွမ်းဢလူဝ်ႇၵၢင်ၸႂ်တူဝ်ၸဝ်ႈၵဝ်ႇၼႂ်းဝၼ်းၼၼ်ႉသေလႄႈ၊ပေႃးသူဝႆႉဢမုဝၼ်းမူတ်းၸၢင်ႇၵဝ်လႄႈရူဝ်ႇသေႇၵူဝ်ယမ်သေယဝ်ႉ၊ဢမ်ႇၸွမ်းသဵၼ်ႈတၢင်းတူဝ်ၸဝ်ႈၵဝ်ႇ၊ဢမ်ႇႁဵတ်းၵၢၼ်ႁဵတ်းငၢၼ်းပုၼ်ႈဢၵျူဝ်းတူဝ်ၸဝ်ႈၵဝ်ႇ၊ဢမ်ႇလၢတ်ႈဢမ်ႇၸႃၵႂၢမ်းဢၼ်ဢမ်ႇပွင်ႇလွင်ႈၵႃႈသင်ၼႂ်းဝၼ်းၼၼ်ႉၸိုင်၊-
သူတၵ်းဢွၼ်ၵၼ်လႆႈမူၼ်ႈပျေႃႇၼႂ်းတၢင်းဢၼ်ႁဵတ်းဝၢတ်ႈတီႈၵဝ်ဢေႃႈ။ ၵဝ်တၵ်းႁႂ်ႈသူပဵၼ်တီႈဢၼ်ပိူၼ်ႈရူဝ်ႇသေႇၵူဝ်ယမ်ၵႃႈၼႂ်းလေႃးၵႃႉၼႆႉလႄႈသူတၵ်းဢွၼ်ၵၼ်လႆႈမူၼ်ႈပျေႃႇၵႃႈၼႂ်းမိူင်းဢၼ်ၵဝ်ဢၢပ်ႈပၼ်တီႈပူႇမွၼ်ႇသူ ယႃႇၵုပ်ႈ၊ ၼၼ်ႉဢေႃႈ၊ၵဝ် ထႃႇဝရႃႉၽြႃး၊ မီးဢမိင်ႉဢေႃႈ၊” ဝႃႈၼင်ႇၼႆဢေႃႈ။
ယႃႇပေထၢင်ႇဝႃႈ၊မိုဝ်း ထႃႇဝရႃႉၽြႃး၊ ပွတ်းၼႃႇထၢၼ်ႈပေႃးဢမ်ႇၵႄႇသႄႇၶျွတ်ႈဢဝ်လႆႈ။ ႁူမၼ်းၸဝ်ႈၼူၵ်ႇၼႃႇထၢၼ်ႈပေႃးဢမ်ႇၸၢင်ႈငိၼ်းသဵင်သူလႆႈဝႃႈၼႆၼၼ်ႉ။-
မၼ်းပဵၼ်ၵွပ်ႈပိူဝ်ႈဢပျတ်ႈသူတင်းလၢႆလႄႈႁႂ်ႈမၼ်းၸဝ်ႈဢမ်ႇငိၼ်းသဵင်သူလႆႈဢေႃႈ။ တုၸရိူၵ်ႈသူတင်းလၢႆႁႂ်ႈသူၽၢတ်ႇယၢၼ်ၵၼ်တင်းၽြႃးပဵၼ်ၸဝ်ႈၼႂ်းမိူဝ်ႈဢၼ်သူၵၢဝ်ႇႁႃမၼ်းၸဝ်ႈၼၼ်ႉဢေႃႈ။-
သူမီးဢပျတ်ႈၵွပ်ႈပိူဝ်ႈတၢင်းဢၼ်သူလၢတ်ႈၵႂၢမ်းမုသႃႇ၊တၢင်းဢၼ်သူဢဝ်ၵူၼ်းတၢႆၸိူဝ်းၼၼ်ႉဢေႃႈ။
ၽူႈလႂ်ဢမ်ႇႁဵတ်းဢမုၸွမ်းၼင်ႇတြႃးသေၵေႃႉသေၵူၼ်း။ သူဢိင်ပိုင်ႈတၢင်းပႅတ်ႉလႅၼ်လႄႈလၢတ်ႈမုသႃႇႁႂ်ႈပႄႉဢမုသူဢေႃႈ။ သူၸၢင်ႈၶိုင်ပွင်တၢင်းၵျၢမ်ႇတၢင်းပွင်ဢၼ်တိူဝ်ႉၶိူၵ်ႈသႂ်ႇပိူၼ်ႈၼၼ်ႉဢေႃႈ။-
တၢင်းၵျၢမ်ႇတၢင်းပွင်သူဢၼ်ႁၢႆႉဢၼ်မိူၵ်ႈၼၼ်ႉ၊မီးၵွင်ႉဢၼ်ၸၢင်ႈႁႂ်ႈတၢႆမိူၼ်ၸိူဝ်ႉၼင်ႇၶႆႇငူးဢၼ်ၵွင်ႉႁၢႆႉႁႅင်းၼႃႇၼၼ်ႉဢေႃႈ။ တၢင်းဢၼ်ၽႃႇၶႆႇၶဝ်တႅၵ်ႇၼၼ်ႉၸၢင်ႈဢွၵ်ႇငူးႁၢႆႉမႃးဢေႃႈ။-
ၵူင်ႇၵၢဝ်ၵေႃႈၸၢင်ႈၶၢတ်ႈယႂ်းမၼ်းဢေႃႈ။ ၵူၺ်းၵႃႈ၊ယႂ်းၵူင်ႇၵၢဝ်ၼၼ်ႉဢမ်ႇတေႃးႁဵတ်းၶူဝ်းၼုင်ႈၶူဝ်းမႆဢမ်ႇႁူမ်ႇတူဝ်ၶဝ်လႆႈ။ လွင်ႈတၢင်းဢၼ်သူႁဵတ်းၸိူဝ်းၼၼ်ႉပဵၼ်လွင်ႈတၢင်းဢၼ်ႁၢႆႉမိူၵ်ႈလႄႈပဵၼ်လွင်ႈတၢင်းဢၼ်ႁၢဝ်ႈၵျၢမ်းၼႃႇဢေႃႈ။-
သူၸၢင်ႈၵျၢမ်ႇပွင်မဵဝ်းဢၼ်ႁၢႆႉဢၼ်မိူၵ်ႈတႃႇသေႇလႄႈ၊ႁဵတ်းၸွမ်းတၢင်းၵျၢမ်ႇသူၼၼ်ႉၶၼ်ဝႆးၼႃႇ။ တႃႇတေဢဝ်ၵူၼ်းဢၼ်ဢမ်ႇမီးဢပျတ်ႈတၢႆၼၼ်ႉၵေႃႈ သူဢမ်ႇၵၼ်ႈဢမ်ႇယိူၼ်ႉလႆႈလႃးလႃး။ တီႈဢၼ်သူၵႂႃႇၼၼ်ႉသူၸၢင်ႈႁဵတ်းႁႂ်ႈလုႁႂ်ႈလႅဝ်ဢေႃႈ။-
တီႈဢၼ်သူလႄႇၵႂႃႇလႄႇမႃးၼၼ်ႉၽူႈလႂ်ဢမ်ႇလႆႈၵတ်းလႆႈယဵၼ်။ ၵႃႈဢၼ်သူႁဵတ်းၸိူဝ်းၼၼ်ႉဢမ်ႇပႃးတြႃး။ သူၸွမ်းသဵၼ်ႈတၢင်းဢၼ်ၵူတ်ႉလႄႈၵေႃႉဢၼ်ၸွမ်းၵႂႃႇၼၼ်ႉဢမ်ႇလႆႈၵတ်းလႆႈယဵၼ်ၶျၢမ်းသႃႇလႃးလႃး။
ၵူၼ်းတင်းလၢႆလဝ်ႈလၢတ်ႈလႄႈဝႃႈ၊ “တေႃႈလဵဝ်ၼႆႉႁဝ်းႁုလွင်ႈဢၼ်ဝႃႈ၊ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၽြႃးပဵၼ်ၸဝ်ႈဢမ်ႇၵႄႇသႄႇၼုၵ်ႈဢဝ်ႁဝ်းဢွၵ်ႇသေၵႃႈၼႂ်းတၢင်းဢၼ်တဵၵ်းဢၼ်ငႅၼ်းၼၼ်ႉယဝ်ႉ။ ႁဝ်းမုင်ႈမွင်းဢၼ်လႅင်းယူႇသေၵေႃႈယင်းပဵၼ်ဢၼ်လပ်းသိင်ႇယူႇဢေႃႈ။-
ပိူဝ်ႈၼႆလႄႈႁဝ်းလႆႈၵုမ်းၵီႈၵုမ်းၵမ်းၵႂႃႇမိူၼ်ၸိူဝ်ႉၼင်ႇၵူၼ်းတႃမွတ်ႇဢေႃႈ။ ႁဝ်းၶီႈလိုတ်းလႄႈလူမ်ႉၶိင်ႇၵၢင်ဝၼ်းတဵင်ႈယူႇထၢၼ်ႈပေႃးမိူၼ်ၸိူဝ်ႉၼင်ႇလူမ်ႉၼႂ်းၶိင်ႇၵၢင်ၶိုၼ်း၊မိူၼ်ၸိူဝ်ႉၼင်ႇႁဝ်းမီးယူႇၵႃႈၼႂ်းဢၼ်လပ်းသိင်ႇမိူင်းမရၼႃႉဢေႃႈ။-
ႁဝ်းၶၢင်းယူႇမိူၼ်ၸိူဝ်ႉၼင်ႇမီလႄႈပွင်ႉမေႃးယူႇမိူၼ်ၸိူဝ်ႉၼင်ႇၼူၵ်ႉတူႈဢေႃႈ။ ႁဝ်းသွၵ်ႈႁႃတြႃးဢၼ်သိုဝ်ႈတေႃႇၵေႃႈဢမ်ႇထူပ်း။ ပႂ်ႉထႃႈတြႃးတၢင်းဢၼ်ၵႄႇၶျွတ်ႈသေၵေႃႈ၊ၵႆၵၼ်တင်းႁဝ်းၼႃႇလူင်လၢင်ဢေႃႈ။
“ ထႃႇဝရႃႉၽြႃး၊ တီႈၶႃႈ။ ဢပျတ်ႈၶႃႈၸဝ်ႈႁဝ်းၶဝ်ၼမ်ၼႃႇလူင်လၢင်တီႈၽၢႆႇၼႃႈၸဝ်ႈႁဝ်းတီႈၶႃႈဢေႃႈ။ ဢပျတ်ႈၶႃႈၸဝ်ႈႁဝ်းၶဝ်ၸိူဝ်းၼၼ်ႉႁဵတ်းဢမုသႂ်ႇၶႃႈၸဝ်ႈႁဝ်းၶဝ်ယူႇဢေႃႈ။ ၶႃႈၸဝ်ႈႁဝ်းၶဝ်ႁုလွင်ႈတုၸရိူၵ်ႈႁဝ်းၸိူဝ်းၼၼ်ႉယူႇတီႈၶႃႈဢေႃႈ။-
ၶႃႈၸဝ်ႈႁဝ်းၶဝ်လုၵ်ႉၽိုၼ်ႉၸဝ်ႈႁဝ်း၊ၸုၼ်ႉပႅတ်ႈၸဝ်ႈႁဝ်း၊ထဵင်ပႅတ်ႈတြႃးၸဝ်ႈႁဝ်းလႄႈၼိၵ်ႈၸၢၵ်ႈငႅၼ်းသႄးပိူၼ်ႈတီႈၶႃႈဢေႃႈ။ တၢင်းၵျၢမ်ႇတၢင်းပွင်ၶႃႈၸဝ်ႈႁဝ်းၶဝ်ၽိတ်းပိူင်ႈတီႈၶႃႈဢေႃႈ။ ၵႂၢမ်းၶႃႈၸဝ်ႈႁဝ်းၶဝ်ပဵၼ်ၵႂၢမ်းမုသႃႇတီႈၶႃႈဢေႃႈ။-
တၢင်းဢၼ်ၸီႇယၢင်ႇၸွမ်းၼင်ႇတြႃးၼၼ်ႉၵိုတ်းသဝ်းၵႂႃႇလႄႈ တြႃးတၢင်းဢၼ်သိုဝ်ႈတေႃႇၼၼ်ႉမီးၵႃႈတီႈဢၼ်ၵႆဢေႃႈ။ သဵတ်ႈၸႃႇလူမ်ႉယူႇၵႃႈၼႂ်းပၢင်ႇဢၼ်ၵူၼ်းၸုတုမ်ၵၼ်ၼၼ်ႉလႄႈသၽေႃးဢၼ်သိုဝ်ႈတြႃးၼၼ်ႉဢမ်ႇၶဝ်ႈမႃးလႆႈ။-
သဵတ်ႈၸႃႇဢမ်ႇမီးလႃးလႃးလႄႈၵေႃႉဢၼ်ဝႄႈပႅတ်ႈတုၸရိူၵ်ႈၼၼ်ႉလႆႈၶၢမ်ႇတၢင်းဢၼ်ႁိမ်ႁူင်ႇဢဝ်ဢေႃႈ၊” ဝႃႈၼင်ႇၼႆဢေႃႈ။ ထႃႇဝရႃႉၽြႃး၊ ႁၼ်လွင်ႈတၢင်းၼၼ်ႉလႄႈဢမ်ႇၵျိူၵ်ႈၸႂ်ၵွပ်ႈပိူဝ်ႈဢၼ်ဢမ်ႇမီးတၢင်းဢၼ်ၸီႇယၢင်ႇၸွမ်းၼင်ႇတြႃးၼၼ်ႉဢေႃႈ။-
မၼ်းၸဝ်ႈႁၼ်လွင်ႈတၢင်းဢၼ်ဢမ်ႇမီးၵူၼ်းဢၼ်ၸွႆႈထႅမ်ၶဝ်ၸိူဝ်းဢၼ်လႆႈၶၢမ်ႇတဵၵ်းငႅၼ်းသေၵေႃႉသေၵူၼ်းလႄႈမၼ်းၸဝ်ႈဢၢမ်းၼႃႇလူင်လၢင်ဢေႃႈ။ ပိူဝ်ႈၼႆလႄႈမၼ်းၸဝ်ႈဢဝ်တင်းၽုင်းတၼ်းၶူဝ်းတူဝ်ၸဝ်ႈၵဝ်ႇၵႄႇၼုၵ်ႈဢဝ်ၶဝ်လႄႈမၼ်းၸဝ်ႈလႆႈပႄႉလႆႈၼႅင်ႇဢေႃႈ။-
မၼ်းၸဝ်ႈဢဝ်တၢင်းဢၼ်ၸီႇယၢင်ႇၸွမ်းၼင်ႇတြႃးမိူၼ်ၼင်ႇဢဝ်ၶိူင်ႈႁႄႉႁူဝ်ဢူၵ်းၼုင်ႈမႆလႄႈဢဝ်တြႃးတၢင်းဢၼ်ၵႄႇသႄႇၶျွတ်ႈဢၼ်ပဵၼ်မိူၼ်မွၵ်ႇႁူဝ်လဵၵ်းၼၼ်ႉတိုဝ်းဢေႃႈ။ မၼ်းၸဝ်ႈဢဝ်ၶူဝ်းၼုင်ႈဢၼ်ပဵၼ်မိူၼ်တၢင်းဢၼ်ပၼ်တၢမ်ႇဢပျတ်ႈၼၼ်ႉၼုင်ႈမႆလႄႈဢဝ်သိူဝ်ႈယၢဝ်းဢၼ်ပဵၼ်မိူၼ်တၢင်းဢၼ်ၸႂ်ႁႅင်းယႂ်ႇၼႃႇၼၼ်ႉၼုင်ႈမႆႁၢင်ႈၶိူင်ႈဢေႃႈ။-
မၼ်းၸဝ်ႈတၵ်းပၼ်တၢမ်ႇဢပျတ်ႈတီႈရၢၼ်ႇသူႇမၼ်းၸဝ်ႈတင်းလၢႆၸွမ်းၵႃႈၼင်ႇဢၼ်ၶဝ်ႁဵတ်းၼၼ်ႉဢမ်ႇဝႃႈၶဝ်ယူႇၵႃႈတီႈဢၼ်ၵႆၼၼ်ႉဢေႃႈ။-
ၵူၼ်းဢၼ်မီးၵႃႈတီႈမိူင်းၽၢႆႇတၢင်းဝၼ်းဢွၵ်ႇ၊ၵႃႈတီႈမိူင်းၽၢႆႇတၢင်းဝၼ်းတူၵ်းဢွၼ်ၵၼ်ၵူဝ်ႁႄမၼ်းၸဝ်ႈ၊ဢိၵ်ႇတင်းမုၼ်ၽုင်းမၼ်းၸဝ်ႈၵူႈၵေႃႉၵူႈၵူၼ်းဢေႃႈ။ လွင်ႈမၼ်းၸမ်ႉ၊မၼ်းၸဝ်ႈတၵ်းၵျွမႃးမိူၼ်ၸိူဝ်ႉၼင်ႇၼမ်ႉဢၼ်ၸႅဝ်ႈၼႃႇလူင်လၢင်၊ဢိၵ်ႇတင်းမိူၼ်ၸိူဝ်ႉၼင်ႇလူမ်းၽိဝ်ႁူင်ၼၼ်ႉဢေႃႈ။
ထႃႇဝရႃႉၽြႃး၊ မီးဢမိင်ႉတီႈၵူၼ်းမၼ်းၸဝ်ႈလႄႈဝႃႈၸမ်ႉ၊ “ၵဝ်တၵ်းမႃးၵႃႈတီႈဝဵင်း ယေႇရုသလႅမ်ႇ၊ ႁႂ်ႈလႆႈၵႅတ်ႇၶႄသူ၊ဢိၵ်ႇတင်းႁႂ်ႈလႆႈၵႄႇသႄႇၶျွတ်ႈဢဝ်သူၸိူဝ်းဢၼ်ဝႄႈပိူင်ႈသေၵႃႈတီႈလွင်ႈတၢင်းဢၼ်ဢမ်ႇတြႃးၵူႈၵေႃႉၵူႈၵူၼ်းၼၼ်ႉဢေႃႈ။-
ပတိၺိၺ်ႇတြႃးဢၼ်ၵဝ်ႁဵတ်းလူၺ်ႈၵၼ်တင်းသူၸမ်ႉ၊ဝိၺိၺ်ႇၵဝ်တၵ်းၵိင်းဝၢပ်ႈယူႇၵႃႈၼိူဝ်သူ၊ဢိၵ်ႇတင်းၵႂၢမ်းဢၼ်ၵဝ်သႂ်ႇဝႆႉၵႃႈၼႂ်းသူပ်းသူၼၼ်ႉတၵ်းဢမ်ႇလႆႈဢွၵ်ႇလႆႈႁၢႆသေၵႃႈၼႂ်းသူပ်းသူ။ ၵႃႈၼႂ်းသူပ်းလုၵ်ႈသူ၊ၵႃႈၼႂ်းသူပ်းလၢၼ်သူ၊တႄႇၸႃႉဢဝ်မိူဝ်ႈလဵဝ်ၼႆႉၵႂႃႇတႃႇသေႇဢမ်ႇထၢတ်ႇဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ဝဵင်း ယေႇရုသလႅမ်ႇ၊ ႟။ လုၵ်ႉတႃႉ။ ႁိူဝ်ႈလႅင်း ၸိူဝ်ႉၼင်ႇၵၢင်ဝၼ်းတႃႉ။ မုၼ်ၽုင်း ထႃႇဝရႃႉၽြႃး၊ ထွင်ႇႁိူဝ်ႈလႅင်းယူႇ ၵႃႈၼိူဝ်မႂ်းဢေႃႈ။
ဢၼ်လပ်းသိင်ႇတၵ်းမုင်းႁူမ်ႇသုမ်ႇၵႃႈၼိူဝ် မိူင်းၵူၼ်းတၢင်ႇၸိူဝ်ႉတၢင်ႇၶိူဝ်းၼႃတၼ်ၼႃႇလႄႈ ၵႃႈၼိူဝ်မိူင်းသူၸမ်ႉ၊ဢၼ်လႅင်း ထႃႇဝရႃႉၽြႃး၊ တၵ်းထွင်ႇႁိူဝ်ႈလႅင်းယူႇဢေႃႈ။ ဢရွင်ႇမုၼ်ၽုင်းမၼ်းၸဝ်ႈၼၼ်ႉတၵ်းမီး ယူႇလူၺ်ႈၵၼ်တင်းမႂ်းဢေႃႈ။
ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆတၵ်းဢွၼ်ၵၼ်မႃးၸူးၵႃႈတီႈဢၼ်လႅင်းမႂ်းလႄႈ ၶုၼ်ႁေႃၶမ်းတင်းလၢႆတၵ်းဢွၼ်ၵၼ် မႃးၸူးၵႃႈတီႈဢၼ်လႅင်းႁူဝ်ၼႂ်၊ၼႂ်းဝၼ်း မႂ်ႇမႂ်းၼၼ်ႉဢေႃႈ။
မႂ်းဝၢႆႇတူၺ်းလဵပ်ႈႁွပ်ႈႁိမ်းႁွမ်းမႂ်းလွင်ႈတင်း ဢၼ်ပဵၼ်ယူႇၼၼ်ႉတႃႉ။ ၵူၼ်းမႂ်းတင်းလၢႆဢွၼ်ၵၼ်ၸုတုမ်ၵၼ်ယူႇ ႁႂ်ႈလႆႈပွၵ်ႈၶိုၼ်းႁိူၼ်းဢေႃႈ။ လုၵ်ႈၸၢႆးမႂ်းတင်းလၢႆတၵ်းပွၵ်ႈၶိုၼ်းမႃးသေ ၵႃႈတီႈဢၼ်ၵႆၼၼ်ႉဢေႃႈ။ လုၵ်ႈယိင်းသၢဝ်မႂ်းတင်းလၢႆၵေႃႈတၵ်းလႆႈ ၶၢမ်ႇတၢင်းဢၼ်ဢုမ်ႈႁွပ်ႇမႃးၸူးတီႈမႂ်း မိူၼ်လုၵ်ႈဢွၼ်ႇဢေႃႈ။
မႂ်းတၵ်းႁၼ်လွင်ႈတၢင်းဢၼ်ပဵၼ်မႃးၼႆႉလႄႈ မီးတၢင်းဢၼ်သႂၢင်ႇသိူဝ်းဢေႃႈ။ ႁူဝ်ၸႂ်မႂ်းတၵ်းသၼ်ႇတၵ်းသၢႆၵွပ်ႈလူၺ်ႈ တၢင်းဢၼ်ၸူမ်းသိူဝ်းၼၼ်ႉဢေႃႈ။ ဢုၵ်ႉၸႃႇတၢင်းဢၼ်ၵူၼ်းတၢင်ႇၸိူဝ်ႉ တၢင်ႇၶိူဝ်းမၢၵ်ႈမီးလိူင်ႇၸႂ်ၼၼ်ႉတၵ်းဢဝ် မႃးၸူးတီႈမႂ်းလႄႈ ၸေးၸိမ်ႇၶျၢမ်းသႃႇဢၼ်မီးၽၢႆႇပုၼ်ႉ ၼမ်ႉသမ်ႇမုၵ်ႈတြႃႇၸိူဝ်းၼၼ်ႉတၵ်းမႃး ၸူးတီႈမႂ်းဢေႃႈ။
ၽုင်ၵလႃႇဢုၵ်ႈဢၼ်ယႂ်ႇၼႃႇ၊တၵ်းလုၵ်ႉသေ ၵႃႈတီႈမိူင်း မိတျၼ်ႇ၊ ဢိၵ်ႇတင်း မိူင်း ဢေးၽႃႇ၊ ၸိူဝ်းၼၼ်ႉမႃးဢေႃႈ။ ၵူၼ်းမိူင်း သေးပႃႉ၊ ပႃးဢဝ်တင်းၶမ်းဢိၵ်ႇတင်းလေႃႇပၢၼ်ႇမႃးဢေႃႈ။ ၵူၼ်းတင်းလၢႆတၵ်းဢွၼ်ၵၼ်မွၵ်ႇလၢတ်ႈ ၶၢဝ်ႇငၢဝ်းဢၼ်လီလွင်ႈဢၼ် ထႃႇဝရႃႉၽြႃး၊ သၢင်ႈႁဵတ်းၼၼ်ႉဢေႃႈ။
ၽုင်သူဝ်းမိူင်း ၵေႇတႃႇ၊ ဢိၵ်ႇတင်းမိူင်း ၼပႃႇယုတ်ႉ၊ ၸိူဝ်းၼၼ်ႉ၊ တၵ်းလႆႈၶၢမ်ႇတၢင်းဢၼ်ဢဝ်မႃႈ တီႈမႂ်းပုၼ်ႈဢၼ်တၵ်းသၢၵ်ႈလူႇ ၵႃႈၼိူဝ်ၶဵင်ႇတၢင်းလူႇ ႁႂ်ႈလႆႈထုၵ်ႇၸႂ်ၵျိူၵ်ႈၸႂ် ထႃႇဝရႃႉၽြႃး၊ ဢေႃႈ။ ထႃႇဝရႃႉၽြႃး၊ ၵေႃႈတၵ်းႁႂ်ႈ မုၼ်ၽုင်းၵျွင်းပိၵ်ႈမၢၼ်ႇၸဝ်ႈၼၼ်ႉယဵင်ႈၶႅၼ်း ႁိူဝ်ႈႁိူင်းထၢင်ႇသႃးမႃးဢေႃႈ။
ၶဝ်ၸိူဝ်းဢၼ်မိၼ်မႃးမိူၼ်ၸိူဝ်ႉၼင်ႇၽႃႉၽူၼ်၊မိူၼ်ၸိူဝ်ႉၼင်ႇၼူၵ်ႉတူႈမိၼ်ၶဝ်ႈႁၢင်း ယူႇၼၼ်ႉပဵၼ်ၽူႈလႂ်။
ၶဝ်ၸိူဝ်းၼၼ်ႉ၊ပဵၼ်ႁိူဝ်းသၢင်းၽေႃးဢၼ် လုၵ်ႉသေၵႃႈတီႈမိူင်းၵႆပႃးဢဝ်ၵူၼ်း ၽြႃးပဵၼ်ၸဝ်ႈတင်းလၢႆမႃးဢေႃႈ။ ၶဝ်ပႃးဢဝ်ငိုၼ်းၶမ်းမႃးႁႂ်ႈလႆႈယွင်ႈယေႃး ၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ၽြႃးဢၼ်မူတ်းၸၢင်ႇဢၼ်ပဵၼ်ၽြႃးၵူၼ်းမဵဝ်း ဢိသရေး၊ ၵွပ်ႈပိူဝ်ႈမၼ်းၸဝ်ႈႁႂ်ႈမုၼ်ၽုင်း ၵူၼ်းမၼ်းၸဝ်ႈထၢင်ႇသႃးမႃးၼၼ်ႉဢေႃႈ။
ထႃႇဝရႃႉၽြႃး၊ မီးဢမိင်ႉတီႈဝဵင်း ယေႇရုသလႅမ်ႇ၊ လႄႈဝႃႈၸမ်ႉ၊ “ၵူၼ်းတၢင်ႇၸိူဝ်ႉတၢင်ႇၶိူဝ်းတၵ်းမႄးၵုမ်း မႄးႁဵတ်းလမ်းဝဵင်းမႂ်းလႄႈၶုၼ်ႁေႃၶမ်းၶဝ် ၸိူဝ်းၼၼ်ႉတၵ်းလုမ်းလႃးမႂ်းဢေႃႈ။ လွင်ႈမၼ်းၸမ်ႉ၊ပိၵ်ႉသမ်ႉၵဝ်လႆႈဢွၵ်ႇ တေႃးသႃႉတေႃႇမႂ်းလႄႈ ပၼ်တၢမ်ႇတီႈမႂ်းသေၵေႃႈ၊ၵဝ်မီး ၸေႇတၼႃႇလႄႈဢဵတ်းလူမႂ်းယူႇဢေႃႈ။
ၽၵ်းတူမႂ်းယင်းတၵ်းၽုၺ်ႇဝႆႉဝၼ်းဝၼ်း ၶိုၼ်းၶိုၼ်းပုၼ်ႈလွင်ႈၼင်ႇႁိုဝ်ၶုၼ်ႁေႃၶမ်း မဵဝ်းၵူၼ်းတင်းလၢႆ၊ တၵ်းဢွၼ်ၵၼ်ဢဝ်ဢုၵ်ႉၸႃႇၸေးၸိမ်ႇ ၶဝ်မႃးသူင်ႇပၼ်တီႈမႂ်းၼၼ်ႉဢေႃႈ။
ၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ဢမ်ႇပွင်ႁဵတ်း ဢမုမႂ်းၸိူဝ်းၼၼ်ႉၸမ်ႉ၊ တၵ်းလႆႈၶၢမ်ႇတၢင်းဢၼ်ယႃႉလု ယႃႉလႅဝ်ပႅတ်ႈဢေႃႈ။
ဝဵင်း ယေႇရုသလႅမ်ႇ၊ ႟။ တူၼ်ႈပႅၵ်ႇလႂ်၊တူၼ်ႈ တတေႇရႃႉလႂ်၊တူၼ်ႈတႃႇသုရႃႉလႂ်၊ ဢၼ်ပဵၼ်မႆႉလီသေပိူၼ်ႈၵႃႈၼႂ်းထိူၼ်ႇ လေႇပၼုၼ်ႇ၊ ၼၼ်ႉ၊ပိူၼ်ႈတၵ်းဢဝ်မႃးလႄႈ မႄးၵုမ်းမႄးႁဵတ်းမႂ်းလႄႈႁႂ်ႈၵျွင်းပိၵ်ႈမၢၼ်ႇၵဝ် တၵ်းႁၢင်ႈလီမႃး၊တၵ်းႁႂ်ႈဝဵင်းၵဝ်မီးသရေႇ ဢၼ်ယႂ်ႇၼႃႇၼၼ်ႉဢေႃႈ။
လုၵ်ႈၸၢႆးၶဝ်ၸိူဝ်းဢၼ်ၼိၵ်ႈၸၢၵ်ႈငႅၼ်းသႄး မႂ်းၼၼ်ႉတၵ်းဢွၼ်ၵၼ်မႃးလႄႈ ၵူမ်ႈႁူဝ်ၵွမ်းႁူဝ်တီႈမႂ်းႁဵတ်းတၢင်းဢၼ် ရူဝ်ႇသေႇၵူဝ်ယမ်မႂ်းဢေႃႈ။ ၶဝ်ၸိူဝ်းဢၼ်ယၢမ်ႈႁဵတ်းတၢင်းဢၼ်လူလၢႆ တီႈမႂ်းၼၼ်ႉ၊တၵ်းဢွၼ်ၵၼ်မႃးလႄႈ ဝႆႈၵႃႈတီႈတိၼ်မႂ်းဢေႃႈ။ ၶဝ်တၵ်းႁွင်ႉႁဵၵ်ႈမႂ်းဝႃႈ၊ ‘ဝဵင်းလူင် ထႃႇဝရႃႉၽြႃး၊ ဝဵင်း ၸိဢုၼ်ႇ၊ ဝဵင်းၽြႃးပဵၼ်ၸဝ်ႈ ဢၼ်မူတ်းၸၢင်ႇဢၼ်ပဵၼ်ၽြႃးၵူၼ်းမဵဝ်း ဢိသရေး၊ ဢေႃႈ။’
မႂ်းတၵ်းဢမ်ႇလႆႈၶၢမ်ႇတၢင်းဢၼ်ၸုၼ်ႉပႅတ်ႈ၊ ဢိၵ်ႇတင်းတၢင်းဢၼ်ငိၼ်းၸင်းၶၢၼ်ႉႁၼ်၊ ဢမ်ႇႁႂ်ႈမႂ်းပဵၼ်ဝဵင်းဢၼ်ပိူၼ်ႈမိူဝ်ႇလႄႈ သဵတ်ႇၵူၼ်းယဵၼ်ၵူၼ်းၼၼ်ႉ။ ၵဝ်တၵ်းႁႂ်ႈမႂ်းယႂ်ႇမျၢတ်ႈႁၢင်ႈလီၼႃႇလႄႈ၊ ပဵၼ်တီႈဢၼ်ၸူမ်းသိူဝ်းမူၼ်ႈပျေႃႇ တႃႇသေႇၼၼ်ႉဢေႃႈ။
ၵူၼ်းတၢင်ႇၸိူဝ်ႉတၢင်ႇၶိူဝ်း၊ဢိၵ်ႇတင်း ၶုၼ်ႁေႃၶမ်းတင်းလၢႆ၊ တၵ်းဢွၼ်ၵၼ်လုမ်းလႃးမႂ်းမိူၼ်ၸိူဝ်ႉၼင်ႇ မႄႈလုမ်းလႃးလုၵ်ႈမၼ်းၼၼ်ႉဢေႃႈ။ မႂ်းတၵ်းႁုလွင်ႈဢၼ်ၵဝ် ထႃႇဝရႃႉၽြႃး၊ ၵႄႇသႄႇ ၶျွတ်ႈဢဝ်မႂ်း၊လွင်ႈဢၼ် ထႃႇဝရႃႉၽြႃး၊ ၽြႃးၵူၼ်းမဵဝ်း ဢိသရေး၊ ဢၼ်မီးတၼ်းၶူဝ်း ယႂ်ႇၼၼ်ႉပွႆႇႁႂ်ႈမႂ်းလွတ်ႈဢေႃႈ။
ၵဝ်တၵ်းဢဝ်ၶမ်းမႃးတႅၼ်းပုၼ်ႈတွင်းလိူင်၊ ငိုၼ်းမႃးတႅၼ်းပုၼ်ႈလဵၵ်း၊တွင်းလိူင်တႅၼ်းပုၼ်ႈမႆႉ၊ လဵၵ်းတႅၼ်းပုၼ်ႈမၢၵ်ႇႁိၼ်ဢေႃႈ။ ၶုၼ်ဢၼ်ဢုပ်ႉပိူင်ႇမႂ်းၸိူဝ်းၼၼ်ႉတၵ်းဢမ်ႇၼိၵ်ႈၸၢၵ်ႈငႅၼ်းသႄးမႂ်း။ ၵဝ်တၵ်းႁႂ်ႈၶဝ်ဢုပ်ႉပိူင်ႇမႂ်းလူၺ်ႈသၽေႃး ဢၼ်ၼိမ်လီလႄႈၸီႇယၢင်ႇတြႃးဢၼ် သိုဝ်ႈတေႃႇဢေႃႈ။
ၵမ်းလိုၼ်းသဵင်ဢၼ်ႁိုတ်းႁၢတ်ႇႁၢဝ်ႈၵျၢမ်းၼႃႇၼၼ်ႉဢမ်ႇလႆႈငိၼ်းထႅင်ႈယဝ်ႉ၊ တၢင်းဢၼ်ယႃႉၽဵဝ်ႈပႅတ်ႈၵႃႈၼႂ်းမိူင်းမႂ်းၼၼ်ႉ တၵ်းဢမ်ႇမီးၵႃႈၼႂ်းၼမ်ႉမႂ်းလိၼ်မႂ်း။ ၵဝ်တၵ်းၵႅတ်ႇၶႄႁႄႉၵင်ႈမႂ်းၸိူဝ်ႉၼင်ႇ လမ်းဝဵင်းလႄႈမႂ်းတၵ်းယွင်ႈယေႃးၵဝ် ၵွပ်ႈပိူဝ်ႈဢၼ်ၵဝ်ၵႄႇသႄႇၶျွတ်ႈ ဢဝ်မႂ်းၼၼ်ႉဢေႃႈ။
ၵမ်းလိုၼ်းတႃဝၼ်းဢမ်ႇပဵၼ်ဢၼ်လႅင်းတီႈမႂ်း ယၢမ်းမိူဝ်ႈၶိင်ႇၵၢင်ဝၼ်း၊လိုၼ်ဢမ်ႇပဵၼ် ဢၼ်လႅင်းတီႈမႂ်းၼႂ်းမိူဝ်ႈၶိင်ႇၵၢင်ၶိုၼ်း၊ လွင်ႈမၼ်းၸမ်ႉ၊ၵဝ် ထႃႇဝရႃႉၽြႃး၊ တၵ်းပဵၼ်ဢၼ်လႅင်းထႃႇဝရႃႉ တီႈမႂ်းလႄႈ၊ဢၼ်လႅင်းမုၼ်သရေႇ ၵဝ်ၼၼ်ႉတၵ်းႁိူဝ်ႈလႅင်း ၵႃႈၼိူဝ်မႂ်းဢေႃႈ။
မိုဝ်ႉဝၼ်းဢၼ်မႂ်းၶီၸႂ်ၶူမ်ၸႂ်ၼၼ်ႉတၵ်း သုတ်းသဵင်ႈၵႂႃႇဢေႃႈ။ ၵဝ် ထႃႇဝရႃႉၽြႃး၊ တၵ်းပဵၼ်ဢၼ်လႅင်း ထႃႇဝရႃႉတီႈမႂ်းလႄႈ ယဵင်ႈၶႅၼ်းတၵ်းမၼ်ႈၶိူင်ႇၼႃႇသေတႃဝၼ်း ဢိၵ်ႇတင်းလိူၼ်ဢေႃႈ။
ၵူၼ်းမႂ်းတင်းသဵင်ႈတင်းလူင်တၵ်းဢွၼ်ၵၼ်ၵမ်ၵျၢင်ႉသိုဝ်ႈသိုဝ်ႈတေႃႇတေႃႇသေယဝ်ႉ၊ တၵ်းမီးဢၶႂၢင်ႉဢၼ်ပိူင်ႇဢဝ်ဝၢၼ်ႈမိူင်း တႃႇသေႇဢမ်ႇထၢတ်ႇဢေႃႈ။ ၵဝ်ၽုၵ်ႇသွမ်ႈၶဝ်ဝႆႉလႄႈႁဵတ်းပဵၼ်ၶဝ်ဝႆႉႁႂ်ႈလႆႈ ၽုၺ်ႇၼႄတၢင်းဢၼ်ယႂ်ႇမျၢတ်ႈၵဝ်တီႈ ၵူၼ်းတင်းသဵင်ႈတင်းလူင်ၼၼ်ႉဢေႃႈ။
ၵူၼ်းမဵဝ်းဢၼ်လဵၵ်ႉၼွႆႉ၊ဢၼ်တႅမ်ႇယေႃႈ သေပိူၼ်ႈၵႃႈၼႂ်းၶိူဝ်းႁိူၼ်းမႂ်းၼၼ်ႉ ယင်းတၵ်းပဵၼ်ၵူၼ်းမဵဝ်းဢၼ်မုၼ်ၽုင်း ယႂ်ႇၼႃႇၼၼ်ႉဢေႃႈ။ ၼႂ်းမိူဝ်ႈဢၼ်ၶိင်ႇမၼ်းၶႃႇမၼ်းႁွတ်ႈမႃးၼၼ်ႉ၊ၵဝ်တၵ်းႁဵတ်းႁႂ်ႈလွင်ႈၸိူဝ်းၼႆႉပဵၼ်မႃး ၶၼ်ၶၼ်ၽႂ်းၽႂ်းဢေႃႈ။ ၵဝ်ပဵၼ် ထႃႇဝရႃႉၽြႃး ဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ႁႂ်ႈၵဝ်ပျေႉၸုမ်ႇဝႆႉတင်းဝိၺိၺ်ႇမၼ်းၸဝ်ႈဢေႃႈ။ မၼ်းၸဝ်ႈလိူၵ်ႈဢဝ်ၵဝ်လႄႈပွႆႇၸႂ်ႉၵႂႃႇ ႁႂ်ႈလႆႈႁေႃးလၢတ်ႈၶၢဝ်ႇသိူဝ်းပျေႃႇတီႈ ၵူၼ်းယၢၵ်ႈၵူၼ်းၽၢၼ်တင်းလၢႆ၊ ႁႂ်ႈလႆႈယူတ်းယႃႁူဝ်ၸႂ်ဢၼ်တႅၵ်ႇလႅဝ်လႄႈ လႆႈမွၵ်ႇလၢတ်ႈလွင်ႈတၢင်းဢၼ်ပွႆႇလွတ်ႈ၊ တီႈၶဝ်ၸိူဝ်းဢၼ်တူၵ်းၵႅၼ်းလႄႈလႆႈလၢတ်ႈ လွင်ႈတၢင်းဢၼ်ပွႆႇၵူၼ်းတူၵ်းထွင်ႇတင်းလၢႆ လွတ်ႈၼၼ်ႉဢေႃႈ။
မၼ်းၸဝ်ႈပွႆႇၸႂ်ႉၵဝ်ႁႂ်ႈလႆႈမွၵ်ႇလၢတ်ႈလွင်ႈဢၼ် ၶိင်ႇၵႃႇလႃႉဢၼ် ထႃႇဝရႃႉၽြႃး၊ တၵ်းၵႄႇသႄႇၶျွတ်ႈဢဝ်ၵူၼ်းမၼ်းၸဝ်ႈ၊ ႁႂ်ႈလႆႈပႄႉၼႅင်ႇရၢၼ်ႇသူႇၶဝ်ၸိူဝ်းၼၼ်ႉႁွတ်ႈထိုင်မႃးယဝ်ႉဢေႃႈ။ မၼ်းၸဝ်ႈပွႆႇၸႂ်ႉၵဝ်ႁႂ်ႈလႆႈပၼ်တၢင်းသၢၵ်ႈသႃႇ တီႈၶဝ်ၸိူဝ်းဢၼ်ၶၢင်းၶီၶၢင်းၽၢၼ်ၼၼ်ႉ။
ႁႂ်ႈဢဝ်ဢၼ်သိူဝ်းၸူမ်းမူၼ်ႈပျေႃႇမႃးတႅၼ်းတၢင်းၶီၸႂ်ၶူမ်ၸႂ်ၼၼ်ႉပၼ်တီႈၶဝ်ၸိူဝ်းဢၼ်၊ ၶၢင်းၶီၶၢင်းၽၢၼ်ယူႇၵႃႈၼႂ်းဝဵင်း ၸိဢုၼ်ႇ၊ လႄႈ ႁႂ်ႈၶဝ်ႁဵတ်းၵႂၢမ်းယွင်ႈယေႃးတႅၼ်း တၢင်းဢၼ်ယၢပ်ႇၸႂ်ၶၢၼ်ၸႂ်ၼၼ်ႉဢေႃႈ။ ၶဝ်တၵ်းပဵၼ်မိူၼ်ၸိူဝ်ႉၼင်ႇတူၼ်ႈမႆႉၸိူဝ်းဢၼ် ထႃႇဝရႃႉၽြႃး၊ ၽုၵ်ႇသွမ်ႈဝႆႉၼၼ်ႉဢေႃႈ။ ၶဝ်တၵ်းၵမ်ၵျၢင်ႉတၢင်းၵမ်တၢင်းၵျၢင်ႉၵႃႈဢၼ် သိုဝ်ႈတေႃႇၼၼ်ႉလႄႈ၊မုၼ်သရေႇမၼ်းၸဝ်ႈ တၵ်းမီးတၢင်းဢၼ်ယုၵ်ႉယွင်ႈယွင်ႈယေႃးဢေႃႈ။
ၶဝ်တၵ်းဢွၼ်ၵၼ်မႄးၵုမ်းမႄးႁဵတ်းဝဵင်းလူင် ၸိူဝ်းဢၼ်လုလႅဝ်ဝႆႉႁိုင်ၼႃႇၼၼ်ႉဢေႃႈ။ ၶဝ်တၵ်းဢွၼ်ၵၼ်မႄးႁဵတ်းမႄးသၢင်ႈဝဵင်း ဢၼ်လုဢၼ်လႅဝ်ဢၼ်ပွႆႇႁၢမ်းဝႆႉၸဵမ်မိူဝ်ႈ ၸူဝ်ႈပူႇပၢၼ်မွၼ်ႇၶဝ်မႃးၼၼ်ႉဢေႃႈ။
ၵူၼ်းၵဝ်႟။ ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ၊ တၵ်းဢွၼ်ၵၼ်ႁဵတ်းဝၢတ်ႈ လုမ်းလႃးသူဢေႃႈ။ ၶဝ်တၵ်းလဵင်ႉလူလုမ်းလႃးၽုင်သူဝ်းသူလႄႈ ႁဵတ်းသူၼ်ႁဵတ်းႁႆႈပၼ်သူလႄႈပႂ်ႉလူပႂ်ႉတူၺ်း သူၼ်မၢၵ်ႇၸပိတ်ႉသူဢေႃႈ။
သူသမ်ႉတၵ်းလႆႈၶၢမ်ႇတၢင်းဢၼ်ႁွင်ႉဝႃႈ၊ ယဵၸ်ႈပရေႃးႁဵၵ်ႈ ထႃႇဝရႃႉၽြႃး၊ ၵူၼ်းဢၼ်ႁၢပ်ႇၼႃႈၵၢၼ်ၽြႃးပဵၼ်ၸဝ်ႈဢေႃႈ။ သူတၵ်းမူၼ်ႈပျေႃႇလူၺ်ႈဢုၵ်ႉၸႃႇၵူၼ်း တၢင်ႇၸိူဝ်ႉတၢင်ႇၶိူဝ်းလႄႈၸူမ်းသိူဝ်းလူၺ်ႈ တၢင်းမၢၵ်ႈမီးသူတင်းလၢႆၼၼ်ႉဢေႃႈ။
တၢင်းဢၼ်သူဢူၵ်းဢၢႆလႄႈၼႃႈလုၼၼ်ႉ တၵ်းသုတ်းတၵ်းဝၢႆးယဝ်ႉလႄႈ သူတၵ်းယူႇၵႃႈၼႂ်းမိူင်းဢၼ်ပဵၼ်ဢမူၺ်ႇ သူၼၼ်ႉဢေႃႈ။ ဢုၵ်ႉၸႃႇၸေးၸိမ်ႇသူတၵ်းမၢၵ်ႈမီးမႃးသွင်ပုၼ်ႈ လႄႈတၢင်းဢၼ်ၸူမ်းသိူဝ်းမူၼ်ႈပျေႃႇသူၼၼ်ႉတၵ်းတႄႇမၼ်ႈယူႇသေႇသေႇဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵဝ်ၵျိူၵ်ႈႁၵ်ႉထုၵ်ႇၸႂ်တြႃးတၢင်းဢၼ်သိုဝ်ႈတေႃႇလႄႈ ငိၼ်းၸင်းငိၼ်းမိူဝ်ႇတၢင်းဢၼ်တဵၵ်းငႅၼ်းၵႅၼ်ႉၶေႃး၊တၢင်းဢၼ်ႁဵတ်းဢပျတ်ႈၼၼ်ႉဢေႃႈ။ ၵဝ်တၵ်းပႂ်ႉသဵတ်ႈၸႃႇသေပၼ်ဢၵျူဝ်းတီႈ ၵူၼ်းၵဝ်တင်းလၢႆလႄႈႁဵတ်းပတိၺိၺ်ႇ ထႃႇဝရႃႉလူၺ်ႈၵၼ်တင်းၶဝ်ဢေႃႈ။
မဵဝ်းၸိူဝ်ႉၶိူဝ်းၶဝ်တၵ်းႁူင်ႁၢင်းၵႃႈၼႂ်းၵူၼ်း တၢင်ႇၸိူဝ်ႉတၢင်ႇၶိူဝ်းတင်းလၢႆ၊ ၸူဝ်ႈလုၵ်ႈပၢၼ်လၢၼ်ၶဝ်တၵ်းႁူင်ႁၢင်း ၵႃႈၼႂ်းမဵဝ်းၵူၼ်းတင်းလၢႆလႄႈ ၵေႃႉဢၼ်ႁၼ်ၶဝ်ၼၼ်ႉတၵ်းႁုႁၼ်လွင်ႈဢၼ် ၶဝ်ပဵၼ်ၵူၼ်းၸိူဝ်းဢၼ်ၵဝ်ပၼ်မၢင်ႇၵလႃႇ ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ဝဵင်း ယေႇရုသလႅမ်ႇ၊ မီးတၢင်းဢၼ်ၸူမ်းသိူဝ်းမူၼ်ႈပျေႃႇၵွပ်ႈပိူဝ်ႈလွင်ႈတၢင်းဢၼ် ထႃႇဝရႃႉၽြႃး၊ ႁဵတ်းသၢင်ႈယဝ်ႉၼၼ်ႉဢေႃႈ။ ဝဵင်းၼၼ်ႉပဵၼ်ၸိူဝ်ႉၼင်ႇလုၵ်ႈပႂ်ႉမႂ်ႇ ဢၼ်ၼုင်ႈမႆႁၢင်ႈၶိူင်ႈၼႂ်းဝၼ်းဢၼ် သွင်ႇမၢင်ႇၵလႃႇၼၼ်ႉဢေႃႈ။ ၽြႃးပဵၼ်ၸဝ်ႈဢဝ်ၶူဝ်းၼုင်ႈတၢင်းမႆဢၼ်ပဵၼ် တၢင်းၵႄႇသႄႇၶျွတ်ႈဢဝ်၊ဢိၵ်ႇတင်း ၶူဝ်းၼုင်ႈဢၼ်ပဵၼ်တၢင်းဢၼ်သိုဝ်ႈတေႃႇၼၼ်ႉ ႁၢင်ႈၶိူင်ႈပၼ်ဝဵင်းၼၼ်ႉဢေႃႈ။
ၸိူဝ်ႉၼင်ႇဢၼ်လိၼ်မိူင်းႁႂ်ႈတူၼ်ႈငွၵ်ႈဢွၵ်ႇမႃး၊ ဢိၵ်ႇတင်းၸိူဝ်ႉၼင်ႇဢၼ်ႁႆႈၼႃးႁႂ်ႈၸိူဝ်ႉၽၼ်း ဢၼ်ဝၢၼ်ႇၵႃႈၼႂ်းမၼ်းၼၼ်ႉဢွၵ်ႇငူင်းမႃးၼၼ်ႉ၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တၵ်းႁႂ်ႈတၢင်းဢၼ်သိုဝ်ႈတေႃႇ၊ဢိၵ်ႇတင်း တၢင်းဢၼ်ယွင်ႈယေႃးၼၼ်ႉ၊ ငွၵ်ႈဢွၵ်ႇမႃးၵႃႈတီႈၽၢႆႇၼႃႈၵူၼ်းၵူႈၸိူဝ်ႉ ၵူႈၶိူဝ်းၵႃႈမီးတင်းသဵင်ႈတင်းလူင်ဢေႃႈ။
ၵဝ်တၵ်းလၢတ်ႈၵႂၢမ်းဢၼ်ပၼ်ဢဵၼ်ပၼ်ႁႅင်းတီႈ ဝဵင်း ယေႇရုသလႅမ်ႇ၊ ဢေႃႈ။ ၵဝ်တၵ်းဢမ်ႇယူႇတဵတ်ႇယဵၼ်သဵတ်ႇယဵၼ် တေႃႇထိုင်ႁွတ်ႈမၼ်းလႆႈၶၢမ်ႇတၢင်းဢၼ် ၵႄႇသႄႇၶျွတ်ႈဢဝ်ၼၼ်ႉ။ တၢင်းဢၼ်သိုဝ်ႈတေႃႇမၼ်းတၵ်းထၢင်ႇသႃးမႃးမိူၼ်ၸိူဝ်ႉၼင်ႇသၢႆဢရွင်ႇၽႆးၵၢၼ်ႈၶႄႈ ၶိင်ႇၵၢင်ၶိုၼ်းၼၼ်ႉဢေႃႈ။
ဝဵင်း ယေႇရုသလႅမ်ႇ၊ ႟။ မဵဝ်းၵူၼ်းတင်းလၢႆတၵ်းဢွၼ်ၵၼ်ႁၼ်တၢင်းသိုဝ်ႈတေႃႇမႂ်းဢေႃႈ။ ၶုၼ်ႁေႃၶမ်းၵႃႈမီးတၵ်းႁၼ်ၵုင်ႇသရေႇ မႂ်းဢေႃႈ။ မႂ်းတၵ်းလႆႈၸိုဝ်ႈမႂ်ႇဢၼ် ထႃႇဝရႃႉၽြႃး၊ ႁွင်ႉႁဵၵ်ႈၼၼ်ႉဢေႃႈ။
မႂ်းတၵ်းပဵၼ်သရၽူႇပၢၼ်းၵုမ်းဢၼ်ႁၢင်ႈလီ ႁၢင်ႈငၢမ်းပုၼ်ႈ ထႃႇဝရႃႉၽြႃး၊ ဢေႃႈ။
ၵမ်းလိုၼ်းမႂ်းတၵ်းဢမ်ႇလႆႈၶၢမ်ႇတၢင်းဢၼ်ႁွင်ႉႁဵၵ်ႈဝႃႈ၊ “ၵေႃႉဢၼ်လႆႈၶၢမ်ႇၸုၼ်ႉပႅတ်ႈ၊” ဢိၵ်ႇတင်းမိူင်းမႂ်းတၵ်းဢမ်ႇလႆႈၶၢမ်ႇတၢင်းဢၼ် ႁွင်ႉႁဵၵ်ႈဝႃႈ၊ “မိူင်းပဝ်ႇမိူင်းႁၢမ်း” ဝႃႈၼႆၼၼ်ႉ၊ ၸိုဝ်ႈသဵင်မႂ်ႇမႂ်းၼၼ်ႉႁွင်ႉဝႃႈ၊ “ၽြႃးပဵၼ်ၸဝ်ႈၵျိူၵ်ႈႁၵ်ႉထုၵ်ႇၸႂ်၊” ဢိၵ်ႇတင်း မိူင်းမႂ်းၼၼ်ႉႁွင်ႉဝႃႈ၊ “သွင်ႇမၢင်ႇၵလႃႇ ၸူမ်းၸူမ်းသိူဝ်းသိူဝ်း၊” ဝႃႈၼင်ႇၼႆဢေႃႈ။ လွင်ႈမၼ်းၸမ်ႉ၊ ထႃႇဝရႃႉၽြႃး၊ ၵျိူၵ်ႈႁၵ်ႉထုၵ်ႇၸႂ်မႂ်းလႄႈတၵ်းပဵၼ်မိူၼ်ၸိူဝ်ႉၼင်ႇၽူဝ်ၵႃႈတီႈလိၼ်မိူင်းမႂ်းဢေႃႈ။
ၸိူဝ်ႉၼင်ႇဢၼ်ၽူႈမၢဝ်ႇသွင်ႇမၢင်ႇၵလႃႇ ဢဝ်ၵၼ်တင်းၽူႈသၢဝ်ၵၼ်ႇၺႃႇၼၼ်ႉ၊ ၸဝ်ႈဢၼ်ၽၢၼ်ႇသၢင်းမႂ်းၼၼ်ႉတၵ်း သွင်ႇမၢင်ႇၵလႃႇလူၺ်ႈၵၼ်တင်းမႂ်းဢေႃႈ။ ၸိူဝ်ႉၼင်ႇဢၼ်လုၵ်ႈၶူၺ်မႂ်ႇၸူမ်းသိူဝ်းၵွပ်ႈလူၺ်ႈ လုၵ်ႈပႂ်ႉမႂ်ႇၼၼ်ႉ၊ၽြႃးပဵၼ်ၸဝ်ႈတၵ်း ၸူမ်းသိူဝ်းၵွပ်ႈလူၺ်ႈမႂ်းဢေႃႈ။
ဝဵင်း ယေႇရုသလႅမ်ႇ၊ ႟။ ၵႃႈၼိူဝ်လမ်းဝဵင်းမႂ်းၼၼ်ႉ ၵဝ်ပွႆႇၵူၼ်းပႂ်ႉမၼ်းဝႆႉယဝ်ႉ။ ၶဝ်ၼၼ်ႉဝၼ်းဝၼ်းၶိုၼ်းၶိုၼ်းၵေႃႈတၵ်း ဢမ်ႇလႆႈယူႇတဵတ်ႇယူႇယဵၼ်။ ႁႂ်ႈ ထႃႇဝရႃႉၽြႃး၊ ၶုၵ်းၸႂ်လႆႈၶႆႈၸႂ်ထူပ်းလွင်ႈ ၵတိမၼ်းၸဝ်ႈ၊ဢမ်ႇႁႂ်ႈမၼ်းၸဝ်ႈလႆႈ လူင်လိုမ်းမႂ်းၼၼ်ႉဢေႃႈ။
ၶဝ်ၼၼ်ႉတၵ်းဢမ်ႇႁႂ်ႈမၼ်းၸဝ်ႈလႆႈလိုဝ်ႈ လႆႈသဝ်းတေႃႇထိုင်ႁွတ်ႈမၼ်းၸဝ်ႈ မႄးပူၵ်းမႄးတင်ႈဝဵင်း ယေႇရုသလႅမ်ႇ၊ ယဝ်ႉတူဝ်ႈလီငၢမ်းသေလႄႈ ႁဵတ်းႁႂ်ႈဝဵင်းၼၼ်ႉပဵၼ်ဝဵင်းဢၼ်ၵူၼ်းလေႃးၵႃႉ တင်းလၢႆလႆႈယွင်ႈယေႃးၼၼ်ႉဢေႃႈ။
ထႃႇဝရႃႉၽြႃး၊ တိူင်ႇဝႃႈၵတိသဵတ်ႈၸႃႇ ဢၼ်လိုၵ်ႉဢၼ်လမ်ႇဝႆႉလႄႈ တၵ်းဢဝ်တင်းမုၼ်ၽုင်းတၼ်းၶူဝ်းမၼ်းၸဝ်ႈ ႁဵတ်းႁႂ်ႈပျေႉၸုမ်ႇၸမ်ႉ၊ “ၵမ်းလိုၼ်းၵဝ်တၵ်းဢမ်ႇဢဝ်ၶဝ်ႈပိူၵ်ႇမႂ်းလဵင်ႉပၼ် တီႈရၢၼ်ႇသူႇမႂ်းတင်းလၢႆ၊ ၵူၼ်းတၢင်ႇၸိူဝ်ႉတၢင်ႇမဵဝ်းတၵ်းဢမ်ႇလႆႈ သူတ်ႉၵိၼ်ၼမ်ႉမၢၵ်ႇၸပိတ်ႉမႂ်းထႅင်ႈ။
သူၸိူဝ်းဢၼ်ဝၢၼ်ႇၸိူဝ်ႉဝၢၼ်ႇၽၼ်းလႄႈပၢတ်ႇဢဝ်ႁူင်းၶဝ်ႈၼၼ်ႉတၵ်းတေၵိၼ်ၶဝ်ႈမုၼ်း လႄႈယွင်ႈယေႃး ထႃႇဝရႃႉၽြႃး၊ ဢေႃႈ။ သူၸိူဝ်းဢၼ်ႁဵတ်းသူၼ်မၢၵ်ႇၸပိတ်ႉလႄႈ ဝိတ်းသိမ်းဢဝ်မၢၵ်ႇၸပိတ်ႉၼၼ်ႉတၵ်းၵိၼ် ၼမ်ႉမၢၵ်ႇၸပိတ်ႉၵႃႈၼႂ်းပၢင်ႇဝၢင်းၵျွင်း ပိၵ်ႈမၢၼ်ႇၸဝ်ႈဢေႃႈ၊” ဝႃႈၼင်ႇၼႆဢေႃႈ။
ၵူၼ်းဝဵင်း ယေႇရုသလႅမ်ႇ၊ ၶဝ်႟။ ဢွၼ်ၵၼ်ဢွၵ်ႇ ဝဵင်းသူၵႂႃႇလႄႈႁဵတ်းၶူၼ်တၢင်းပုၼ်ႈၵူၼ်းသူ ဢၼ်ပွၵ်ႈၶိုၼ်းမႃးၸိူဝ်းၼၼ်ႉတႃႉ။ ဢွၼ်ၵၼ်ႁဵတ်းသဵၼ်ႈတၢင်းလူင်တႃႉ။ ၽဵဝ်ႈမၢၵ်ႇႁိၼ်တင်းလၢႆပႅတ်ႈတႃႉ။ ပူၵ်းသဝ်တုင်းဝႆႉပဵၼ်လၢၵ်ႈၶၼႃႇႁႂ်ႈမဵဝ်းၵူၼ်းတင်းလၢႆလႆႈႁုလွင်ႈတၢင်းဢၼ် ထႃႇဝရႃႉၽြႃး၊ မွၵ်ႇလၢတ်ႈတီႈၵူၼ်းလိၼ်မိူင်းၵႃႈမီးလႄႈဝႃႈ၊
ထႃႇဝရႃႉၽြႃး၊ ပၢဝ်ႇသေႃႇႁႂ်ႈလႆႈငိၼ်း တေႃႇထိုင်ႁွတ်ႈတီႈသုတ်းလိၼ်မိူင်းၸမ်ႉ၊ “မွၵ်ႇလၢတ်ႈပၼ်တီႈၵူၼ်းဝဵင်း ယေႇရုသလႅမ်ႇ၊ တင်းလၢႆဝႃႈ၊တူၺ်းလူး။ ၸဝ်ႈဢၼ် ၵႄႇၶျွတ်ႈဢဝ်မႂ်းၼၼ်ႉမႃးယဝ်ႉ။ တူၺ်းလူး။ သူးလၢပ်ႈမီးယူႇလူၺ်ႈတင်း မၼ်းၸဝ်ႈလႄႈၵႃႈၶၼ်ဢၼ်တၵ်းတွပ်ႇတႅၼ်း ၼၼ်ႉၵေႃႈမီးယူႇၵႃႈတီႈၽၢႆႇၼႃႈ မၼ်းၸဝ်ႈဢေႃႈ၊” ဝႃႈၼင်ႇၼႆဢေႃႈ။
သူတၵ်းလႆႈၶၢမ်ႇတၢင်းဢၼ်ႁွင်ႉႁဵၵ်ႈဝႃႈ၊ “ၵူၼ်းမူတ်းၸၢင်ႇၽြႃးပဵၼ်ၸဝ်ႈ၊” “ၵူၼ်းၸိူဝ်းဢၼ် ထႃႇဝရႃႉၽြႃး၊ ၵႄႇသႄႇ ၶျွတ်ႈဢဝ်၊” ဝႃႈၼင်ႇၼႆလႄႈ ဝဵင်း ယေႇရုသလႅမ်ႇ၊ ၸမ်ႉ၊ပိူၼ်ႈတၵ်းႁွင်ႉဝႃႈ၊ “ဝဵင်းဢၼ်ၽြႃးပဵၼ်ၸဝ်ႈႁၵ်ႉပႅင်း၊” “ဝဵင်းဢၼ်ၽြႃးပဵၼ်ၸဝ်ႈဢမ်ႇၸုၼ်ႉပႅတ်ႈ၊” ဝႃႈၼင်ႇၼႆဢေႃႈ။
“ၵေႃႉဢၼ်လုၵ်ႉသေၵႃႈတီႈဝဵင်း ပေႃႇၸရႃႉ၊ တင်းဝဵင်း ဢေႇတုမ်ႇ၊ မႃးယူႇၼၼ်ႉပဵၼ်ၽူႈလႂ်။ ၵေႃႉဢၼ်ၼုင်ႈၶူဝ်းလႅင်သေလႄႈႁၢင်ႈၶိူင်ႈယူႇ၊ၵေႃႉဢၼ်ငွၵ်ႈႁူဝ်ၶွၼ်းႁူဝ်လူၺ်ႈႁႅင်းတၼ်းၶူဝ်းလႄႈၶီႇၶိုၼ်ႈယူႇၼၼ်ႉပဵၼ်ၽူႈလႂ်။ “ၸဝ်ႈၼၼ်ႉပဵၼ် ထႃႇဝရႃႉၽြႃး၊ ဢၼ်ပႃးၽုင်းတၼ်းၶူဝ်းႁႂ်ႈလႆႈၵႄႇသႄႇၶျွတ်ႈဢဝ်ၼၼ်ႉၵျွမႃးႁႂ်ႈလႆႈမွၵ်ႇလၢတ်ႈတြႃးတၢင်းဢၼ်သိုဝ်ႈတေႃႇမၼ်းၸဝ်ႈၼၼ်ႉဢေႃႈ။
“ၵွပ်ႈပိူဝ်ႈသင်လႄႈမၼ်းၸဝ်ႈၼုင်ႈၶူဝ်းဢၼ်လႅင်ဢၼ်မိူၼ်ၶူဝ်းၼုင်ႈၵေႃႉဢၼ်ယဵပ်ႇၼူတ်ႈမၢၵ်ႇၸပိတ်ႉဢၼ်ယူႇၵႃႈၼႂ်းထၢင်ႇၼူတ်ႈမၢၵ်ႇၸပိတ်ႉၼၼ်ႉၸိူဝ်ႉၼင်ႇႁိုဝ်တီႈၶႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၶိုၼ်းမီးဢမိင်ႉၸမ်ႉ၊ “ၵဝ်ယဵပ်ႇၼူတ်ႈမဵဝ်းၵူၼ်းတင်းလၢႆမိူၼ်ၸိူဝ်ႉၼင်ႇယဵပ်ႇၼူတ်ႈမၢၵ်ႇၸပိတ်ႉၼၼ်ႉယဝ်ႉ။ ၵူၺ်းၵႃႈ၊ၵေႃႉဢၼ်ၸွႆႈဢၼ်ထႅမ်ၵဝ်ဢမ်ႇမီးသေၵေႃႉသေၵူၼ်း။ ၵဝ်ပႃးတင်းတေႃးသႃႉသေယဝ်ႉ၊ယဵပ်ႇၼူတ်ႈၶဝ်လႄႈလိူတ်ႈၶဝ်ၼၼ်ႉၽူင်ႉသႂ်ႇၶူဝ်းၼုင်ႈၵဝ်ဢေႃႈ။-
ၵဝ်လႆႈတႅပ်းတတ်းလွင်ႈၶိင်ႇၵႃႇလႃႉဢၼ်တၵ်းၵႄႇသႄႇၶျွတ်ႈဢဝ်ၵူၼ်းၵဝ်ၼၼ်ႉႁွတ်ႈထိုင်မႃးယဝ်ႉ။ ဢၼ်ၼႆႉပဵၼ်ၶိင်ႇၵႃႇလႃႉဢၼ်တၵ်းပၼ်တၢမ်ႇတီႈရၢၼ်ႇသူႇၶဝ်ယဝ်ႉၼၼ်ႉဢေႃႈ။-
မိူဝ်ႈဢၼ်ၵဝ်တူၺ်းလႄႈႁၼ်လွင်ႈဢၼ်ဢမ်ႇမီးၵေႃႉဢၼ်ၸွႆႈထႅမ်မႃႉၸႃႉၵဝ်ၼၼ်ႉ၊ၵဝ်မိုင်ႈငဝ်ၶႆႈၸႂ်ဝူၼ်ႉၸႂ်တူၺ်းလွင်ႈမၼ်းတၢင်းမၼ်းဢေႃႈ။ ၵဝ်လႆႈႁုလွင်ႈဢၼ်တေႃးသႃႉၵဝ်ႁဵတ်းႁႂ်ႈၵဝ်ႁႅင်းယႂ်ႇလႄႈၶႅၼ်မိုဝ်းၵဝ်ၼၼ်ႉဢဝ်တၢင်းဢၼ်ပႄႉၼႅင်ႇမႃးပၼ်ၵဝ်ၼၼ်ႉဢေႃႈ။-
တၢင်းၸႂ်မႆႈၶႂ်ႈၸႃႉၵဝ်ဢွၵ်ႇလႄႈၵဝ်ယဵပ်ႇၼူတ်ႈမဵဝ်းၵူၼ်းတင်းလၢႆႁႂ်ႈႁၵ်းလႅဝ်ပႅတ်ႈဢေႃႈ။ ၵဝ်ဢဝ်လိူတ်ႈၶဝ်ထွၵ်ႇတူၵ်းၵႃႈၼိူဝ်လိၼ်ဢေႃႈ၊” ဝႃႈၼင်ႇၼႆဢေႃႈ။
ၵဝ်တၵ်းမွၵ်ႇလၢတ်ႈလွင်ႈတၢင်းႁၵ်ႉမႅတ်ႈတႃႇ ထႃႇဝရႃႉၽြႃး၊ ဢၼ်ဢမ်ႇသုတ်း ဢမ်ႇသဵင်ႈလႆႈၼၼ်ႉသေလႄႈ ယွင်ႈယေႃးတၢင်းဢၼ်မၼ်းၸဝ်ႈႁဵတ်း ပုၼ်ႈႁဝ်းၸိူဝ်းၼၼ်ႉဢေႃႈ။ ၵွပ်ႈပိူဝ်ႈတၢင်းႁၵ်ႉမႅတ်ႈတႃႇ၊ဢိၵ်ႇတင်းၵရုၼႃႇ မၼ်းၸဝ်ႈၼၼ်ႉမၼ်းၸဝ်ႈပၼ်တၢင်းလီတီႈ ၵူၼ်း ဢိသရေး၊ လိူင်ႇၼမ်ၼႃႇဢေႃႈ။
ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ၶဝ်ၼၼ်ႉပဵၼ်ၵူၼ်းၵဝ်လႄႈၶဝ်ဢမ်ႇယႃႉသဵတ်ႈၸႃႇၵတိတေႃႇၵဝ်၊” ဝႃႈၼင်ႇၼႆသေယဝ်ႉ၊မၼ်းၸဝ်ႈၵႄႇသႄႇၶျွတ်ႈဢဝ်ၶဝ်ဢေႃႈ။-
မၼ်းၸဝ်ႈလႆႈၶၢမ်ႇတုၵ်ႉၶႃႉတၢင်းၽၢၼ်ၵွပ်ႈပိူဝ်ႈတုၵ်ႉၶႃႉတၢင်းၽၢၼ်ၶဝ်ၼၼ်ႉလႄႈတမၢၼ်ႇၵၢင်ႁၢဝ်ဢၼ်မီးၵႃႈတီႈၽၢႆႇၼႃႈမၼ်းၸဝ်ႈၼၼ်ႉ၊ၵႄႇသႄႇၶျွတ်ႈဢဝ်ၶဝ်ဢေႃႈ။ ၸွမ်းၵႃႈၼင်ႇဢၼ်ၵရုၼႃႇမႅတ်ႈတႃႇမၼ်းၸဝ်ႈမီးၼၼ်ႉ၊မၼ်းၸဝ်ႈထုတ်ႇၼုၵ်ႈဢဝ်ၶဝ်ဢေႃႈ။ မၼ်းၸဝ်ႈယူၵ်ႉၶဝ်ၶိုၼ်ႈသေလႄႈဢုမ်ႈႁွပ်ႇဢဝ်ၶဝ်ၵႂႃႇၼႂ်းၶိင်ႇမိူဝ်ႈၵွၼ်ႇၼၼ်ႉဢေႃႈ။-
ၶဝ်ယင်းလုၵ်ႉၽိုၼ်ႉမၼ်းၸဝ်ႈသေယဝ်ႉ၊ႁႂ်ႈဝိၺိၺ်ႇမူတ်းၸၢင်ႇၸဝ်ႈၸဵပ်းၸႂ်ဢေႃႈ။ ၵွပ်ႈပိူဝ်ႈလွင်ႈတၢင်းၼႆႉလႄႈမၼ်းၸဝ်ႈၸင်ႇလႆႈပဵၼ်ရၢၼ်ႇသူႇၶဝ်သေယဝ်ႉ၊တိုၵ်းတေႃးၵၼ်တင်းၶဝ်ဢေႃႈ။
မိူဝ်ႈၼၼ်ႉ၊ၶဝ်ဢွၼ်ၵၼ်ၶုၵ်းၸႂ်လႆႈၶႆႈၸႂ်ထူပ်းၶိင်ႇမိူဝ်ႈၵွၼ်ႇမိူဝ်ႈမိုၼ်ႉ၊ၶိင်ႇၵႃႇလႃႉ မူဝ်းသေႇ၊ ဢၼ်ပဵၼ်ၶႃႈ ထႃႇဝရႃႉၽြႃး၊ ၼၼ်ႉလႄႈထၢမ်ဝႃႈ၊ “ ထႃႇဝရႃႉၽြႃး၊ ဢၼ်ၵႄႇသႄႇၼုၵ်ႈဢဝ်ၶုၼ်ၵူၼ်းမဵဝ်းမၼ်းၸဝ်ႈသေၵႃႈတီႈပၢင်ႇလၢႆႇမႃးၼၼ်ႉမီးၵႃႈလႂ်။ ထႃႇဝရႃႉၽြႃး၊ ဢၼ်ဢဝ်ဝိၺိၺ်ႇမူတ်းၸၢင်ႇမၼ်းၸဝ်ႈသႂၢင်းသႂ်ႇပၼ် မူဝ်းသေႇ၊ ၼၼ်ႉမီးၵႃႈလႂ်။-
ၸိူဝ်ႉၼင်ႇဢၼ်ၽုင်ဝူဝ်းၽုင်သူဝ်းလူင်းၸူးတီႈပၢင်ႇၵိၼ်ယိူဝ်ႈၼၼ်ႉ၊ဝိၺိၺ်ႇ ထႃႇဝရႃႉၽြႃး၊ ႁႂ်ႈၵူၼ်းမၼ်းၸဝ်ႈတင်းလၢႆလႆႈလိုဝ်ႈလႆႈသဝ်းဢေႃႈ။ မၼ်းၸဝ်ႈဢွၼ်ၵူၼ်းမၼ်းၸဝ်ႈတင်းလၢႆသူင်ႇၵႂႃႇႁႂ်ႈမုၼ်ၽုင်းၼႃႇမႃႉၸိုဝ်ႈသဵင်မၼ်းၸဝ်ႈထၢင်ႇသႃးတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈယူႇၵႃႈၼိူဝ်ၽုင်ႇၵၢင်ႁၢဝ်၊တီႈယူႇၸဝ်ႈႁဝ်းဢၼ်မူတ်းၸၢင်ႇလႄႈမီးမုၼ်ၽုင်းယႂ်ႇၼၼ်ႉ၊လူတူၺ်းၶႃႈၸဝ်ႈႁဝ်းၶဝ်သေၵမ်းတီႈၶႃႈ။ တၢင်းဢၼ်ၸဝ်ႈႁဝ်းၸႂ်ၸပ်းၶႃႈၸဝ်ႈႁဝ်းၶဝ်ၼၼ်ႉမီးၵႃႈတီႈလႂ်။ မုၼ်ၽုင်းတၼ်းၶူဝ်းၸဝ်ႈႁဝ်းမီးၵႃႈတီႈလႂ်။ တၢင်းဢၼ်ၸဝ်ႈႁဝ်းၸၢင်ႈႁၵ်ႉဢဵတ်းလူၼၼ်ႉမီးၵႃႈတီႈလႂ်။ ၶႅၼ်းတေႃႈယႃႇပေပႄႇပႅတ်ႈၶႃႈၸဝ်ႈႁဝ်းၶဝ်သေၵမ်းတီႈၶႃႈ။-
ၸဝ်ႈႁဝ်းပဵၼ်ပေႃႈတီႈၶႃႈၸဝ်ႈႁဝ်းၶဝ်တီႈၶႃႈဢေႃႈ။ ပူႇမွၼ်ႇၶႃႈၸဝ်ႈႁဝ်းၶဝ် ဢႃႇပြႃႇႁၢမ်ႇ၊ ဢမ်ႇႁုၸၵ်းႁဝ်းၶႃႈ၊ ယႃႇၵုပ်ႈ၊ ၵေႃႈယင်းဢမ်ႇႁပ်ႉတုင်းဢဝ်ၶႃႈၸဝ်ႈႁဝ်းၶဝ်တီႈၶႃႈဢေႃႈ။ ၸဝ်ႈႁဝ်းၶႃႈ ထႃႇဝရႃႉၽြႃး၊ ၸမ်ႉ၊ပဵၼ်ပေႃႈၶႃႈၸဝ်ႈႁဝ်းၶဝ်လႄႈ၊ပဵၼ်ၸဝ်ႈဢၼ်ၵႄႇၼုၵ်ႈဢဝ်ၶႃႈၸဝ်ႈႁဝ်းၶဝ်တႃႇသေႇတီႈၶႃႈဢေႃႈ။-
ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းပွႆႇပႅတ်ႈႁႂ်ႈၶႃႈၸဝ်ႈႁဝ်းၶဝ်ပိူင်ႈသေၵႃႈတီႈသဵၼ်ႈတၢင်းၸဝ်ႈႁဝ်းၵႂႃႇသေယဝ်ႉ၊ႁႂ်ႈႁူဝ်ၸႂ်ၶႃႈၸဝ်ႈႁဝ်းၶဝ်ၵႅၼ်ႇၶႅင်လႄႈဝၢႆႇပႅတ်ႈၸဝ်ႈႁဝ်းၵႂႃႇၸိူဝ်ႉၼင်ႇႁိုဝ်တီႈၶႃႈ။ ၶႅၼ်းတေႃႈၶိုၼ်းမႃးပုၼ်ႈၶႃႈၸဝ်ႈႁဝ်းၶဝ်တင်းလၢႆ၊ပုၼ်ႈၶႃႈၸဝ်ႈႁဝ်းၶဝ်ၸိူဝ်းဢၼ်ပဵၼ်ၵူၼ်းၸဝ်ႈႁဝ်းၼႆႉသေၵမ်းတီႈၶႃႈ။
ၶႃႈၸဝ်ႈႁဝ်းၶဝ်ဢၼ်ပဵၼ်ၵူၼ်းမူတ်းၸၢင်ႇၸဝ်ႈႁဝ်းၸိူဝ်းၼႆႉ၊လႆႈၶၢမ်ႇတၢင်းဢၼ်ရၢၼ်ႇသူႇၶႃႈၸဝ်ႈႁဝ်းၶဝ်တင်းလၢႆလိုပ်ႈဢွၵ်ႇၸူဝ်ႈၼိုင်ႈၶၢဝ်းၼိုင်ႈလႄႈၶဝ်ယဵပ်ႇယမ်ႈထႃႇၼႃႉတီႈဢၼ်မူတ်းၸၢင်ႇၸဝ်ႈႁဝ်းတီႈၶႃႈဢေႃႈ။-
ၸဝ်ႈႁဝ်းႁဵတ်းတေႃႇၶႃႈၸဝ်ႈႁဝ်းၶဝ်မိူၼ်ၸိူဝ်ႉၼင်ႇဢၼ်ၸဝ်ႈႁဝ်းဢမ်ႇတွၼ်ႉဢုပ်ႉပိူင်ႇ၊ဢိၵ်ႇတင်းမိူၼ်ၸိူဝ်ႉၼင်ႇဢၼ်ၶႃႈၸဝ်ႈႁဝ်းၶဝ်ဢမ်ႇတွၼ်ႉပဵၼ်ၵူၼ်းၸဝ်ႈႁဝ်းၼၼ်ႉတီႈၶႃႈဢေႃႈ။
ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းဢမ်ႇသိၵ်ႇၽႃႉၵၢင်ႁၢဝ်သေယဝ်ႉ၊ၵျွလူင်းမႃးတီႈၶႃႈ။ လွႆတင်းလၢႆတၵ်းႁၼ်ၸဝ်ႈႁဝ်းလႄႈၵူဝ်ႁႄသၼ်ႇဝႆၶွၼ်းဝႆတီႈၶႃႈဢေႃႈ။-
ၶဝ်ၼၼ်ႉတၵ်းဢွၼ်ၵၼ်သၼ်ႇဝႆၶွၼ်းဝႆမိူၼ်ၸိူဝ်ႉၼင်ႇၼမ်ႉဢၼ်မႆႈလိူတ်ႇယူႇၵႃႈၼိူဝ်ၽႆးၼၼ်ႉဢေႃႈ။ ၶႅၼ်းတေႃႈၵျွလူင်းမႃးလႄႈၽုၺ်ႇဢွၵ်ႇၼႄပျႃးတၼ်းၶူဝ်းၸဝ်ႈႁဝ်းၵႃႈတီႈရၢၼ်ႇသူႇၸဝ်ႈႁဝ်းၸိူဝ်းၼၼ်ႉသေယဝ်ႉ၊ႁႂ်ႈမဵဝ်းၵူၼ်းတင်းလၢႆသၼ်ႇသၼ်ႇသၢႆသၢႆၵႃႈတီႈၽၢႆႇၼႃႈၸဝ်ႈႁဝ်းသေၵမ်းတီႈၶႃႈ။-
မီးၽဝ်ႇၼိုင်ႈမိူဝ်ႈဢၼ်ၸဝ်ႈႁဝ်းႁဵတ်းလွင်ႈတၢင်းဢၼ်လီၵူဝ်လီႁႄလိူဝ်တွၼ်းၼႃႇသေၶႃႈၸဝ်ႈႁဝ်းၶဝ်ထၢင်ႇၼၼ်ႉ၊မိူဝ်ႈဢၼ်ၸဝ်ႈႁဝ်းလူင်းမႃးၼၼ်ႉလွႆတင်းလၢႆသၼ်ႇဝႆၶွၼ်းၵႃႈတီႈၽၢႆႇၼႃႈၸဝ်ႈႁဝ်းတီႈၶႃႈဢေႃႈ။-
ၸႃႉၸဵမ်မိူဝ်ႈၵေႃႇၸႃႉႁူဝ်ပိုင်းၵမ်ႇၽႃႇၼၼ်ႉ၊ၽူႈလႂ်သေၵေႃႉသေၵူၼ်းဢမ်ႇတွၼ်ႉႁၼ်ဢမ်ႇတွၼ်ႉငိၼ်း၊လွင်ႈၽြႃးဢၼ်မိူၼ်ၵၼ်တင်းၸဝ်ႈႁဝ်းဢၼ်ႁဵတ်းပၼ်ဢၼ်လီဢၼ်ငၢမ်းတီႈၶဝ်ၸိူဝ်းဢၼ်မုင်ႈမွင်းၸဝ်ႈႁဝ်းၼၼ်ႉတီႈၶႃႈဢေႃႈ။-
ၸဝ်ႈႁဝ်းထူပ်းႁၼ်ၵေႃႉဢၼ်မီးၸႂ်ဢၼ်ၸူမ်းသိူဝ်းသေလႄႈၵမ်ၵျၢင်ႉသိုဝ်ႈသိုဝ်ႈတေႃႇတေႃႇ၊ဢိၵ်ႇတင်းၶဝ်ၸိူဝ်းဢၼ်ၶုၵ်းၸႂ်လႆႈၶႆႈၸႂ်ထူပ်းၸဝ်ႈႁဝ်းၼႂ်းတၢင်းဢၼ်ၸဝ်ႈႁဝ်းႁဵတ်းသၢင်ႈၸိူဝ်းၼၼ်ႉတီႈၶႃႈဢေႃႈ။ တူၺ်းတီႈၶႃႈလူး။ တေႃးသႃႉတၢင်းၸႂ်မႆႈၶႂ်ႈၸႃႉၸဝ်ႈႁဝ်းဢွၵ်ႇလႄႈၶႃႈၸဝ်ႈႁဝ်းၶဝ်ႁဵတ်းတုၸရိူၵ်ႈဢပျတ်ႈတီႈၶႃႈယဝ်ႉ၊ၶႃႈၸဝ်ႈႁဝ်းၶဝ်ႁဵတ်းၸိူဝ်းၼၼ်ႉယူႇသေႇသေႇလႄႈၶႃႈၸဝ်ႈႁဝ်းၶဝ်တၵ်းႁွတ်ႈထိုင်တၢင်းဢၼ်ၵႄႇၶျွတ်ႈဢဝ်တီႈၶႃႈႁိုဝ်း။-
ၶႃႈၸဝ်ႈႁဝ်းၶဝ်ၵႃႈမီးၸိူဝ်းၼႆႉႁဵတ်းဢပျတ်ႈမႅၼ်ႈတေႃႇထိုင်ႁွတ်ႈတၢင်းဢၼ်မူတ်းသႂ်သိုဝ်ႈတေႃႇၶႃႈၸဝ်ႈႁဝ်းၶဝ်ၼၼ်ႉထၢၼ်ႈပေႃးၵူဝ်ႈၵိူၵ်ႇၵႂႃႇတႄႉတႄႉဝႃႈဝႃႈယဝ်ႉဢေႃႈ။ ၵွပ်ႈပိူဝ်ႈဢပျတ်ႈၶႃႈၸဝ်ႈႁဝ်းၶဝ်ၼၼ်ႉလႄႈၶႃႈၸဝ်ႈႁဝ်းၶဝ်ၵႃႈမီးၸိူဝ်းၼႆႉပဵၼ်ၸိူဝ်ႉၼင်ႇမႂ်မႆႉဢၼ်ႁဵဝ်ႇၸွပ်ႈယူႇလႄႈပိဝ်ၵႂႃႇၼႂ်းလူမ်းၼၼ်ႉယဝ်ႉ။-
ၵေႃႉဢၼ်ႁဵတ်းပထၼႃႇသူးတွင်းတီႈၸဝ်ႈႁဝ်းဢမ်ႇမီးသေၵေႃႉသေၵူၼ်း၊ၵေႃႉဢၼ်သုတ်ႉၸပ်းသုတ်ႉၸူးတီႈၸဝ်ႈႁဝ်းလႄႈၵၢဝ်ႇႁႃၸဝ်ႈႁဝ်းၼၼ်ႉၵေႃႈ ဢမ်ႇမီးသေၵေႃႉသေၵူၼ်း။ လွင်ႈမၼ်းၸမ်ႉ၊ၸဝ်ႈႁဝ်းဝၢႆႇၼႃပႅတ်ႈၶႃႈၸဝ်ႈႁဝ်းၶဝ်လႄႈႁႂ်ႈၶႃႈၸဝ်ႈႁဝ်းၶဝ်သုမ်းၸွမ်းၵွပ်ႈပိူဝ်ႈတုၸရိူၵ်ႈဢပျတ်ႈၶႃႈၸဝ်ႈႁဝ်းၶဝ်တီႈၶႃႈဢေႃႈ။
ၼႂ်းဝႃႈၼၼ်သေၵေႃႈ၊ ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းပဵၼ်ပေႃႈၶႃႈၸဝ်ႈႁဝ်းၶဝ်တီႈၶႃႈဢေႃႈ။ ၶႃႈၸဝ်ႈႁဝ်းၶဝ်ပဵၼ်မိူၼ်လိၼ်ၼဵဝ်လႄႈၸဝ်ႈႁဝ်းပဵၼ်မိူၼ်ၸဝ်ႈပၼ်ႈမေႃႈတီႈၶႃႈဢေႃႈ။ ၶႃႈၸဝ်ႈႁဝ်းၶဝ်ၵႃႈမီးၸိူဝ်းၼႆႉပဵၼ်လွင်ႈတၢင်းဢၼ်ၸဝ်ႈႁဝ်းဢဝ်မိုဝ်းၸဝ်ႈႁဝ်းႁဵတ်းဝႆႉတီႈၶႃႈဢေႃႈ။-
ၵွပ်ႈပိူဝ်ႈၸိူဝ်ႉၼင်ႇၼႆလႄႈၶႅၼ်းတေႃႈယႃႇပေၸႂ်မႆႈၶႂ်ႈၸႃႉႁႅင်းယႂ်ႇၼႃႇလူင်လၢင်သေၵမ်းတီႈၶႃႈ။ ယႃႇပေမၢတ်ႈတွင်းဢပျတ်ႈဢၼ်ၶႃႈၸဝ်ႈႁဝ်းၶဝ်ၽိတ်းပိူင်ႈမႅၼ်ႈၸိူဝ်းၼၼ်ႉတႃႇသေႇသေၵမ်းတီႈၶႃႈ။ ၶႃႈၸဝ်ႈႁဝ်းၶဝ်ၵႃႈမီးၼႆႉပဵၼ်ၵူၼ်းၸဝ်ႈႁဝ်းတီႈၶႃႈလႄႈၶႅၼ်းတေႃႈလူတူၺ်းသေၵမ်းတီႈၶႃႈ။-
ဝဵင်းဢၼ်မူတ်းၸၢင်ႇၸဝ်ႈႁဝ်းၸိူဝ်းၼၼ်ႉပဵၼ်ထိူၼ်ႇပဵၼ်ၶိူဝ်းၵႂႃႇတီႈၶႃႈယဝ်ႉ။ ဝဵင်း ယေႇရုသလႅမ်ႇ၊ ၵေႃႈ၊ပဵၼ်ဝဵင်းဢၼ်လုဢၼ်ႁၢမ်းၵႂႃႇတီႈၶႃႈယဝ်ႉ။-
ၵျွင်းပိၵ်ႈမၢၼ်ႇၸဝ်ႈဢၼ်မူတ်းၸၢင်ႇႁၢင်ႈလီႁၢင်ႈငၢမ်းၶႃႈၸဝ်ႈႁဝ်းၶဝ်၊တီႈဢၼ်ပူႇမွၼ်ႇၶႃႈၸဝ်ႈႁဝ်းၶဝ်ယွင်ႈယေႃးၸဝ်ႈႁဝ်းၼၼ်ႉၽႆးမႆႈၵႂႃႇယဝ်ႉတီႈၶႃႈယဝ်ႉ။ ထႃႇၼႃႉတီႈဢၼ်ၶႃႈၸဝ်ႈႁဝ်းၶဝ်ၵျိူၵ်ႈႁၵ်ႉထုၵ်ႇၸႂ်ၵႃႈမီးၼၼ်ႉ၊လုလႅဝ်ပႅတ်ႈမူတ်းတီႈၶႃႈယဝ်ႉ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းဢမ်ႇတူင်ႉဢမ်ႇတိုၼ်ႇၵွပ်ႈလွင်ႈတၢင်းၼႆႉတီႈၶႃႈႁိုဝ်း။ ၸဝ်ႈႁဝ်းတၵ်းဢမ်ႇၶိုင်ပွင်ၵၢၼ်ၵႃႈသင်လႄႈပွႆႇႁႂ်ႈၶႃႈၸဝ်ႈႁဝ်းၶဝ်ၶၢမ်ႇတုၵ်ႉၶႃႉတၢင်းၽၢၼ်ယူႇတီႈၶႃႈႁိုဝ်း၊ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵဝ်တၼ်းဝႆႉတႃႇတေၶိုၼ်းဢိူဝ်ၵႂၢမ်းသူးတွင်းၵူၼ်းၵဝ်တင်းလၢႆဢေႃႈ။ ၵူၺ်းၵႃႈ၊ၶဝ်ဢမ်ႇသူးတွင်း။ ၵဝ်တၼ်းဝႆႉတႃႇၶဝ်တၵ်းထူပ်းႁၼ်ၵဝ်ဢေႃႈ။ ၵူၺ်းၵႃႈ၊ၶဝ်ဢမ်ႇမႃးႁႃၵဝ်။ ပိၵ်ႉသမ်ႉၵဝ်တၼ်းဝႆႉတႃႇတေၶိုၼ်းဢိူဝ်လႄႈဝႃႈ၊ ‘ၵဝ်မီးၵႃႈတီႈၼႆႈဢေႃႈ။ ၵဝ်တၵ်းၸွႆႈထႅမ်သူဢေႃႈ၊’ ဝႃႈၼႆယဝ်ႉ၊ၵူၺ်းၵႃႈ၊မဵဝ်းၵူၼ်းၶဝ်ၵေႃႈ ဢမ်ႇႁဵတ်းပထၼႃႇတၢင်းဢၼ်သူးတွင်းတီႈၵဝ်။-
ၵဝ်တၼ်းဝႆႉတႃႇတေႁပ်ႉတွၼ်ႈဢဝ်ၵူၼ်းၵဝ်ၸိူဝ်းဢၼ်ႁူဝ်ၶႅင်ၼႃႇလႄႈႁဵတ်းၽိတ်းႁဵတ်းပိူင်ႈၼၼ်ႉသေယဝ်ႉ၊ၸွမ်းဢလူဝ်ႇၵၢင်ၸႂ်တူဝ်ၸဝ်ႈၵဝ်ႇၼၼ်ႉယူႇတႃႇသေႇဢေႃႈ။-
ၶဝ်ၼၼ်ႉယင်းဢမ်ႇဢူၵ်းဢမ်ႇဢၢႆလႄႈႁဵတ်းႁႂ်ႈၵဝ်ဢွၵ်ႇတေႃးသႃႉယူႇဢေႃႈ။ ၸၢင်ႈႁဵတ်းတၢင်းလူႇၵႃႈတီႈလူင်ႈၸဝ်ႈမိူင်း လႄႈၽဝ်လေႃႇပၢၼ်ႇၵႃႈတီႈၶဵင်ႇတၢင်းလူႇၽြႃးတၢင်ႇမဵဝ်းဢေႃႈ။-
မိူဝ်ႈၶိင်ႇၵၢင်ၶိုၼ်းၼၼ်ႉၶဝ်ၸၢင်ႈၵႂႃႇၵႃႈတီႈပႃႇႁဵဝ်ႈလႂ်၊ၵႃႈတီႈႁူးထမ်ႈလႂ်လႄႈတွင်ႈထၢမ်ၽီၵူၼ်းတၢႆတင်းလၢႆဢေႃႈ။ ၸၢင်ႈၵိၼ်ၼိူဝ်ႉမူ၊ဢိၵ်ႇတင်းၼမ်ႉတူမ်ႈၼိူဝ်ႉဢၼ်လီႁင်ႈဢဵတ်ႇသဵတ်ႇဢၼ်ၶဝ်သၢၵ်ႈလူႇတီႈၽီယဝ်ႉၼၼ်ႉဢေႃႈ။-
ၼင်ႇၼၼ်လႄႈၶဝ်ၸၢင်ႈလၢတ်ႈတီႈပိူၼ်ႈတၢင်ႇၵေႃႉလႄႈဝႃႈ၊ ‘ၶၢႆႉၵႂႃႇယူႇတီႈဢၼ်ၵႆၵၼ်တင်းႁဝ်းတႃႉ။ ႁဝ်းၼႆႉမူတ်းၸၢင်ႇၼႃႇလူင်လၢင်လႄႈဢမ်ႇထုၵ်ႇလီတိူဝ်ႉထုၵ်ႇသူၵူၺ်း’ ဝႃႈၼႆလူးၵွၼ်ႇဢေႃႈ။ ၵဝ်ဢမ်ႇၸၢင်ႈႁုသၽေႃးၵူၼ်းၸိူဝ်ႉၼင်ႇၼၼ်ၼၼ်ႉ။ တေႃးသႃႉၵဝ်လုၵ်ႉယူႇၽၢႆႇၼိုင်ႈတင်းၶဝ်မိူၼ်ၸိူဝ်ႉၼင်ႇၽႆးဢၼ်ဢမ်ႇတွၼ်ႉမွတ်ႇၼၼ်ႉဢေႃႈ။
“ၵဝ်လႆႈတႅပ်းတတ်းဢပျတ်ႈတၢမ်ႇဝႆႉယဝ်ႉလႄႈတြႃးဢၼ်ၸီႇယၢင်ႇဝႆႉၼၼ်ႉၵေႃႈ တႅမ်ႈမၢတ်ႈမၢႆဝႆႉယဝ်ႉဢေႃႈ။ ၵဝ်တၵ်းဢမ်ႇလူင်လိုမ်းတၢင်းၽိတ်းၶဝ်ၼၼ်ႉလႄႈတၵ်းတွပ်ႇတႅၼ်းပၼ်ဢၵျူဝ်းဢပျတ်ႈၶဝ်ဢေႃႈ။-
တၵ်းတွပ်ႇတႅၼ်းပၼ်တီႈတုၸရိူၵ်ႈဢပျတ်ႈၶဝ်၊ဢိၵ်ႇတင်းတီႈတုၸရိူၵ်ႈဢပျတ်ႈပူႇမွၼ်ႇၶဝ်ၸိူဝ်းၼၼ်ႉဢေႃႈ။ ၶဝ်ၸိူဝ်းၼၼ်ႉၽဝ်လေႃႇပၢၼ်ႇၵႃႈၼိူဝ်လွႆတင်းလၢႆသေလႄႈသႄႉသွမ်းၵဝ်ဢေႃႈ။ ပိူဝ်ႈၼႆလႄႈၵဝ်တၵ်းတွပ်ႇတႅၼ်းပၼ်ၸွမ်းၵႃႈၼင်ႇဢၼ်ၶဝ်ထိူၵ်ႈၶၢမ်ႇဢဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ။ “ၽူႈလႂ်ဢမ်ႇယႃႉပႅတ်ႈပုၵ်ႉမၢၵ်ႇၸပိတ်ႉဢၼ်လီဢၼ်ငၢမ်းၼၼ်ႉၵူၺ်းဢမ်ႇၵႃး၊ယင်းၸၢင်ႈဢိတ်ႇဢွၵ်ႇၼမ်ႉမၢၵ်ႇၸပိတ်ႉယူႇဢေႃႈ။ မိူၼ်ၸိူဝ်ႉၼင်ႇၼၼ်ၵဝ်ၵေႃႈတၵ်းဢမ်ႇယႃႉပႅတ်ႈၵူၼ်းၵဝ်မူတ်းမူတ်းသဵင်ႈသဵင်ႈလႄႈ၊တၵ်းၵႄႇသႄႇၶျွတ်ႈဢဝ်ၶဝ်ၸိူဝ်းဢၼ်ႁဵတ်းဝၢတ်ႈတီႈၵဝ်ၼၼ်ႉဢေႃႈ။-
ၵဝ်တၵ်းပၼ်မၢင်ႇၵလႃႇၵႃႈတီႈၵူၼ်းမဵဝ်း ဢိသရေး၊ ၸိူဝ်းဢၼ်ပဵၼ်ၸိူဝ်ႉၶိူဝ်း ယႃႇၵုပ်ႈ၊ သေလႄႈတၵ်းႁႂ်ႈၸိူဝ်ႉၶိူဝ်းၶဝ်လႆႈၶၢမ်ႇဢဝ်လွႆၵဝ်တင်းလၢႆႁႂ်ႈပဵၼ်ဢမူၺ်ႇၶဝ်သေယဝ်ႉ၊ၵူၼ်းၸိူဝ်းဢၼ်ၵဝ်လိူၵ်ႈဢဝ်ဝႆႉလႄႈႁဵတ်းဝၢတ်ႈတီႈၵဝ်ၸိူဝ်းၼၼ်ႉတၵ်းယူႇတၵ်းသဝ်းၵႃႈတီႈၼၼ်ႈဢေႃႈ။-
ၶဝ်ၼၼ်ႉတၵ်းဢွၼ်ၵၼ်ဝႆႈသႃၵူဝ်းၵႂၢႆႇၵဝ်လႄႈတၵ်းဢွၼ်ၵၼ်ပႃးဢဝ်ၽုင်သူဝ်းၽုင်ဝူဝ်းၶဝ်ၵႂႃႇၸူးတီႈပၢင်ႇယိူဝ်ႈယႃႈၵႃႈၼႂ်းပၢင်ႇ သႃႇရုၼ်ႇ၊ ၽၢႆႇတၢင်းဝၼ်းတူၵ်း၊ဢိၵ်ႇတင်းၵႃႈၼႂ်းပၢင်ႇႁူၺ်ႈ ဢႃႇၶေႃႇ၊ ၽၢႆႇတၢင်းဝၼ်းဢွၵ်ႇဢေႃႈ။
“သူၸမ်ႉ၊တၵ်းပႅၵ်ႇပိူင်ႈၵွပ်ႈပိူဝ်ႈသူၸုၼ်ႉပႅတ်ႈၵဝ်၊လူင်လိုမ်းလွႆ ၸိဢုၼ်ႇ၊ ဢၼ်ဝႃႈ လွႆမူတ်းၸၢင်ႇၸဝ်ႈသေယဝ်ႉ၊ၵႂႃႇဝႆႈ ၽြႃးၵတ်ႉ၊ (ဢၼ်ပွင်ႇဝႃႈ၊လမ်းဝၼ်း) ဢိၵ်ႇတင်း ၽြႃးမေၼိ၊ (ဢၼ်ပွင်ႇဝႃႈ၊ၵၢမ်ႇ) ၼၼ်ႉဢေႃႈ။-
ပိူဝ်ႈၼႆလႄႈၵဝ်တၵ်းပွႆႇပႅတ်ႈႁႂ်ႈသူၵႃႈမီးတင်းသဵင်ႈတင်းလူင်တၢႆလူၺ်ႈၽေးရၢၼ်ႇဢၼ်ႁၢဝ်ႈၵျၢမ်းၼႃႇၼၼ်ႉဢေႃႈ။ လွင်ႈမၼ်းၸမ်ႉ၊ယၢမ်းမိူဝ်ႈဢၼ်ၵဝ်ႁွင်ႉသူၼၼ်ႉသူဢမ်ႇဢိူဝ်။ ယၢမ်းမိူဝ်ႈဢၼ်ၵဝ်လၢတ်ႈၼၼ်ႉသူဢမ်ႇထွမ်ႇဢမ်ႇဢဝ်။ သူလိူၵ်ႈဢဝ်လွင်ႈတၢင်းဢၼ်ၵဝ်ဢမ်ႇထုၵ်ႇၸႂ်ၵျိူၵ်ႈၸႂ်ၼၼ်ႉလႄႈၵမ်ၵျၢင်ႉတၢင်းၵမ်တၢင်းၵျၢင်ႉဢၼ်ဢမ်ႇလီၼၼ်ႉသိုဝ်ႈၼႃႈတႂ်ႈတႃၵဝ်ဢေႃႈ။-
ၵွပ်ႈပိူဝ်ႈၸိူဝ်ႉၼင်ႇၼႆလႄႈၵဝ်မွၵ်ႇလၢတ်ႈတီႈသူၸမ်ႉ၊ၶဝ်ၸိူဝ်းဢၼ်ဝႆႈသႃၵူဝ်းၵႂၢႆႇၵဝ်လႄႈထွမ်ႇဢဝ်ၵႂၢမ်းၵဝ်ၼၼ်ႉတၵ်းဢွၼ်ၵၼ်လႆႈၵိၼ်လႆႈၶူပ်းလႄႈ၊သူၸမ်ႉ၊တၵ်းလႆႈတွင်ႉမႆႈသႆႈလိူတ်ႇယူႇဢေႃႈ။ ၶဝ်ၸိူဝ်းၼၼ်ႉတၵ်းဢွၼ်ၵၼ်လႆႈမူၼ်ႈပျေႃႇလႄႈ၊သူၸမ်ႉ၊တၵ်းဢွၼ်ၵၼ်မီးၸႂ်ဢၼ်ဢူၵ်းဢၼ်ဢၢႆယူႇဢေႃႈ။-
ၶဝ်ၸိူဝ်းၼၼ်ႉတၵ်းဢွၼ်ၵၼ်လႆႈႁဵတ်းၵႂၢမ်းဢၼ်သႂၢင်ႇဢၼ်သိူဝ်းလႄႈ၊သူၸမ်ႉ၊တၵ်းဢွၼ်ၵၼ်ႁွင်ႉႁႆႈလူၺ်ႈႁူဝ်ၸႂ်ဢၼ်တႅၵ်ႇလႅဝ်ယူႇဢေႃႈ။-
ၵူၼ်းဢၼ်ၵဝ်လိူၵ်ႈဢဝ်ဝႆႉၸိူဝ်းၼၼ်ႉတၵ်းဢဝ်ၸိုဝ်ႈဢဝ်သဵင်သူႁဵတ်းပဵၼ်တီႈဢၼ်တၵ်းၵိၼ်ႇလႃႇဢေႃႈ။ ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တၵ်းၶႃႈၽၼ်းဢဝ်သူတၢႆပႅတ်ႈလႄႈ၊တီႈၶဝ်ၸိူဝ်းဢၼ်ထွမ်ႇဢဝ်ၵႂၢမ်းၵဝ်ၼၼ်ႉၸမ်ႉ၊ၵဝ်တၵ်းပၼ်ၸိုဝ်ႈသဵင်ဢၼ်မႂ်ႇဢေႃႈ။-
ပေႃးသေၵေႃႉသေၵူၼ်းၵႃႈၼိူဝ်လိၼ်မိူင်းၼႆႉၶႂ်ႈယွၼ်းဢဝ်မၢင်ႇၵလႃႇၸိုင်၊တၵ်းလႆႈယွၼ်းဢဝ်မၢင်ႇၵလႃႇၼၼ်ႉၵႃႈတီႈၽြႃးပဵၼ်ၸဝ်ႈဢၼ်မီးသဵတ်ႈၸႃႇၼၼ်ႉဢေႃႈ။ ပေႃးသေၵေႃႉသေၵူၼ်းၶႂ်ႈတိူင်ႇဝႃႈၵတိၸိုင်၊တၵ်းတိူင်ႇဝႃႈၵတိၵႃႈၼႂ်းၼႃႇမႃႉၸိုဝ်ႈသဵင်ၽြႃးပဵၼ်ၸဝ်ႈဢၼ်မီးသဵတ်ႈၸႃႇၼၼ်ႉဢေႃႈ။ လွင်ႈမၼ်းၸမ်ႉ၊တုၵ်ႉၶႃႉတၢင်းၽၢၼ်ဢွၼ်တၢင်းၸိူဝ်းၼၼ်ႉတၵ်းလပ်ႉႁၢႆၵႂႃႇလႄႈလႆႈၶၢမ်ႇတၢင်းဢၼ်လူင်လိုမ်းပႅတ်ႈဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵဝ်ဢၢင်ႈဢၢၼ်းတၵ်းၽၢၼ်ႇသၢင်းႁဵတ်းပဵၼ်လိၼ်မိူင်းဢၼ်မႂ်ႇ၊ဢိၵ်ႇတင်းၵၢင်ႁၢဝ်ဢၼ်မႂ်ႇယူႇဢေႃႈ။ လွင်ႈတၢင်းဢၼ်ပဵၼ်ပူၼ်ႉမႃးၸိူဝ်းၼၼ်ႉ၊တၵ်းဢမ်ႇလႆႈၶၢမ်ႇတၢင်းဢၼ်ၶုၵ်းၸႂ်လႆႈၶႆႈၸႂ်ထူပ်းထႅင်ႈ။-
ဢွၼ်ၵၼ်ၸူမ်းပျေႃႇလႄႈသႂၢင်ႇသိူဝ်းၵႃႈၼႂ်းလွင်ႈတၢင်းဢၼ်ၵဝ်ၽၢၼ်ႇသၢင်းႁဵတ်းပဵၼ်ၼၼ်ႉယူႇတႃႇသေႇတႃႉ။ ဝဵင်း ယေႇရုသလႅမ်ႇ၊ မႂ်ႇဢၼ်ၵဝ်တၵ်းၽၢၼ်ႇသၢင်းႁဵတ်းပဵၼ်ၼၼ်ႉ၊တၵ်းပျေႉၸုမ်ႇဝႆႉတင်းတၢင်းဢၼ်သႂၢင်ႇသိူဝ်းလႄႈ၊ၵူၼ်းဝဵင်းမၼ်းတင်းလၢႆတၵ်းမီးၸႂ်ဢၼ်ၸူမ်းသိူဝ်းဢေႃႈ။-
တူဝ်ၵဝ်တၵ်းမီးတၢင်းဢၼ်သႂၢင်ႇသိူဝ်းၵွပ်ႈလူၺ်ႈဝဵင်း ယေႇရုသလႅမ်ႇ၊ ဢိၵ်ႇလူၺ်ႈၵူၼ်းဝဵင်းမၼ်းတင်းလၢႆၼၼ်ႉဢေႃႈ။ ၵႃႈတီႈၼၼ်ႈတၵ်းဢမ်ႇမီးသဵင်ဢၼ်ႁႆႈဢၼ်ႁွင်ႉ၊ဢမ်ႇမီးသဵင်ဢၼ်ႁွင်ႉႁႃတၢင်းဢၼ်မႃႉၸႃႉၸွႆႈထႅမ်ၼၼ်ႉ။-
လုၵ်ႈဢွၼ်ႇတင်းလၢႆတၵ်းဢမ်ႇတၢႆၼႂ်းမိုဝ်ႉဝၼ်းဢၼ်ပဵၼ်လုၵ်ႈဢွၼ်ႇလႅင်ၼၼ်ႉလႄႈၵူၼ်းၵႃႈမီးတၵ်းဢွၼ်ၵၼ်ဢသၢၵ်ႈလိပ်းၼႂ်းၸူဝ်ႈၶၢဝ်းဢၼ်ယၢဝ်းၼႃႇဢေႃႈ။ ၶဝ်ၸိူဝ်းဢၼ်ဢသၢၵ်ႈလိပ်းထူၼ်ႈထိုင်ပၢၵ်ႇပီၼၼ်ႉလႆႈၶၢမ်ႇတၢင်းဢၼ်မၢတ်ႈဝႃႈ၊ၶဝ်ယင်းပဵၼ်ၵူၼ်းၼုမ်ႇၵူၼ်းၵမ်ယူႇဢေႃႈ။ ၵေႃႉဢၼ်ဢသၢၵ်ႈမၼ်းယင်းဢမ်ႇပႆႇထူၼ်ႈပၢၵ်ႇပီလႄႈတၢႆၵႂႃႇၼၼ်ႉၸမ်ႉ၊ပဵၼ်လၢၵ်ႈၶၼႃႇတၢင်းဢၼ်ၵဝ်ၵိၼ်ႇဝႃႈၼၼ်ႉဢေႃႈ။-
ၵၢၼ်ငၢၼ်းဢၼ်ၶဝ်ႁဵတ်းၶဝ်သၢင်ႈၼၼ်ႉတၵ်းၶိုၼ်ႈယႂ်ႇမႂ်ႇသုင်လႄႈၸိူဝ်ႉၶိူဝ်းၶဝ်ၼၼ်ႉတၵ်းဢမ်ႇလႆႈမႆႈၸႂ်ယၢပ်ႇၸႂ်လႃးလႃး။ ၵဝ်တၵ်းပၼ်တၢင်းလီမၢင်ႇၵလႃႇတီႈၶဝ်၊ဢိၵ်ႇတင်းၸိူဝ်ႉၶိူဝ်းၶဝ်တႃႇသေႇဢမ်ႇထၢတ်ႇသိုပ်ႇသိုပ်ႇတၢမ်တၢမ်ဢေႃႈ။-
ၸဵမ်မိူဝ်ႈဢၼ်ၶဝ်သူးတွင်းယင်းဢမ်ႇပႆႇသုတ်းၼၼ်ႉၵဝ်တၵ်းဢိူဝ်ဢေႃႈ။-
မႃၼႆးဢိၵ်ႇတင်းသူဝ်းဢွၼ်ႇတၵ်းဢွၼ်ၵၼ်ၵိၼ်ယူႇႁူမ်ႈလူၺ်ႈၵၼ်လႄႈသၢင်ႇသီႈတင်းလၢႆတၵ်းဢွၼ်ၵၼ်ၵိၼ်ၽိူင်းမိူၼ်ၸိူဝ်ႉၼင်ႇဝူဝ်းဢေႃႈ။ ငူးတင်းလၢႆၵေႃႈတၵ်းဢမ်ႇပဵၼ်ၽေးဢုပၢတ်ႈၵႃႈသင်ဢေႃႈ။ ၵႃႈၼိူဝ်လွႆ ၸိဢုၼ်ႇ၊ လွႆၵဝ်ဢၼ်မူတ်းၸၢင်ႇၼၼ်ႉတၵ်းဢမ်ႇမီးၽေးရၢၼ်ႇဢၢၼ်ႇတရေႇ၊တၵ်းဢမ်ႇမီးလွင်ႈတၢင်းဢၼ်ႁၢႆႉဢၼ်မိူၵ်ႈလႃးလႃး၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၽႃႉၵၢင်ႁၢဝ်ပဵၼ်ပလၢင်ႇၵဝ်လႄႈ၊လိၼ်မိူင်းပဵၼ်ၶူင်ႇတီႈတမ်းတိၼ်ၵဝ်ဢေႃႈ။ သူတၵ်းတႄႇႁဵတ်းႁိူၼ်းၸိူဝ်ႉၼင်ႇႁိုဝ်ပုၼ်ႈၵဝ်တၵ်းယူႇသဝ်းၼၼ်ႉ။-
တူဝ်ၵဝ်ၽၢၼ်ႇသၢင်းႁဵတ်းပဵၼ်ၵမ်ႇၽႃႇၸၵျႃႇဝလႃႇဢေႃႈ။ ၵဝ်ၵျိူၵ်ႈၸႂ်ထုၵ်ႇၸႂ်ၶဝ်ၸိူဝ်းဢၼ်မီးႁူဝ်ၸႂ်ဢၼ်ၶျႃးတႅမ်ႇသေပိၼ်ႇၸႂ်ၶၢႆႉပုတ်ႈလႄႈၵူဝ်ႁႄၵဝ်သေယဝ်ႉ၊ထွမ်ႇဢဝ်ၵႂၢမ်းၵဝ်ၼၼ်ႉဢေႃႈ။
“ၽူႈလႂ်သေဢမ်ႇဝႃႈ၊ပေႃးဢဝ်ဝူဝ်းတၢႆၸိုင်၊ပဵၼ်မိူၼ်ၵေႃႉဢၼ်ဢဝ်ၵူၼ်းတၢႆဢေႃႈ။ ၽူႈလႂ်သေဢမ်ႇဝႃႈ၊ပေႃးဢဝ်သူဝ်းဢွၼ်ႇသေလႄႈသၢၵ်ႈလူႇၼၼ်ႉပဵၼ်မိူၼ်ၵေႃႉဢၼ်ႁၵ်းၶေႃးမႃၼၼ်ႉဢေႃႈ။ ၽူႈလႂ်သေဢမ်ႇဝႃႈ၊ပေႃးဢဝ်မၢၵ်ႇၶဝ်ႈႁူင်းၶဝ်ႈႁႂ်ႈပဵၼ်ၶိူင်ႈတၢင်းလူႇၸိုင်၊ပဵၼ်မိူၼ်ၵေႃႉဢၼ်သၢၵ်ႈလူႇလိူတ်ႈမူဢေႃႈ။ ၽူႈလႂ်သေဢမ်ႇဝႃႈ၊ပေႃးဢဝ်လေႃႇပၢၼ်ႇတုတ်ႇၽႆးၸိုင်၊ပဵၼ်မိူၼ်ၵေႃႉဢၼ်ပၼ်တၢင်းလီတီႈႁုၼ်ႇႁၢင်ႈသၢင်းထုၼၼ်ႉဢေႃႈ။ ၶဝ်ၸိူဝ်းၼႆႉလိူၵ်ႈဢဝ်သဵၼ်တၢင်းတူဝ်ၸဝ်ႈၵဝ်ႇတင်းလၢႆလႄႈႁူဝ်ၸႂ်ၶဝ်ၼၼ်ႉမူၼ်ႈပျေႃႇယူႇၵႃႈၼႂ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇတူဝ်ၸဝ်ႈၵဝ်ႇၼၼ်ႉဢေႃႈ။-
ၵွပ်ႈပိူဝ်ႈလွင်ႈတၢင်းၼၼ်ႉလႄႈၵဝ်ၵေႃႈတၵ်းဢဝ်တုၵ်ႉၶႃႉတၢင်းၽၢၼ်ဢၼ်ပဵၼ်တၢင်းဢၼ်ၶဝ်ၵူဝ်ႁႄၼၼ်ႉတူၵ်းႁွတ်ႈၵႃႈၼိူဝ်ၶဝ်ဢေႃႈ။ လွင်ႈမၼ်းၸမ်ႉ၊ယၢမ်းမိူဝ်ႈဢၼ်ၵဝ်ႁွင်ႉၼၼ်ႉ၊ၽူႈလႂ်ဢမ်ႇဢိူဝ်သေၵေႃႉသေၵူၼ်း။ ယၢမ်းမိူဝ်ႈဢၼ်ၵဝ်လၢတ်ႈၼၼ်ႉၶဝ်ဢမ်ႇထွမ်ႇဢမ်ႇဢဝ်။ ၶဝ်တိုၼ်းလိူၵ်ႈဢဝ်တၢင်းဢၼ်ဢမ်ႇထွမ်ႇဢမ်ႇဢဝ်ၵဝ်သေယဝ်ႉ၊ၵမ်ၵျၢင်ႉတၢင်းၵမ်တၢင်းၵျၢင်ႉဢၼ်ဢမ်ႇလီဢမ်ႇငၢမ်းဢေႃႈ၊” ဝႃႈၼင်ႇၼႆဢေႃႈ။
သူၸိူဝ်းဢၼ်သၼ်ႇဝႆၵွပ်ႈပိူဝ်ႈၵႂၢမ်းၼုၵ်ႈၵပၢတ်ႈ ထႃႇဝရႃႉၽြႃး၊ ၶဝ်႟။ ထွမ်ႇဢဝ်တၢင်းဢၼ် ထႃႇဝရႃႉၽြႃး၊ သင်ႇလၢတ်ႈလႄႈဝႃႈ၊ “ၵွပ်ႈပိူဝ်ႈသူဢွၼ်ၵၼ်ပႂ်ႉသဵတ်ႈၸႃႇတေႃႇၵဝ်ၼၼ်ႉလႄႈၵႃႈၼႂ်းၵူၼ်းမဵဝ်းသူၼင်ႇၵၼ်ၵၼ်ၵမ်ႈၽွင်ႈၸင်းသူသေယဝ်ႉ၊ဢမ်ႇဝႆႉဢယေးသူဢေႃႈ။ ၶဝ်သႄႉသွမ်းသူလႄႈဝႃႈ၊ ‘ႁႂ်ႈ ထႃႇဝရႃႉၽြႃး၊ မုၼ်ၽုင်းထၢင်ႇသႃးပေႃႇမႃးႁႂ်ႈႁဝ်းလႆႈႁၼ်တၢင်းဢၼ်ၸူမ်းဢၼ်သိူဝ်းသူၼၼ်ႉသေၵမ်း၊’ ဝႃႈၼႆသေၵေႃႈၶဝ်တၵ်းလႆႈဢူၵ်းလႆႈဢၢႆဢေႃႈ။-
ထွမ်ႇတႃႉ။ သဵင်ဢၼ်ဢူၼ်ဢဵၼ်မေႃးမႄးၵႃႈၼႂ်းဝဵင်း၊သဵင်ဢၼ်ဢွၵ်ႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉပဵၼ်သဵင်ဢၼ် ထႃႇဝရႃႉၽြႃး၊ ပၼ်တၢမ်ႇဢပျတ်ႈတီႈရၢၼ်ႇသူႇမၼ်းၸဝ်ႈတင်းလၢႆၼၼ်ႉဢေႃႈ။
“ဝဵင်းၵဝ်ဢၼ်မူတ်းၸၢင်ႇၼၼ်ႉ၊ပဵၼ်ၸိူဝ်ႉၼင်ႇမႄႈယိင်းဢၼ်ၵိုင်ႉၵၢင်ႉၵိူတ်ႇလဵင်ႉလုၵ်ႈယဝ်ႉလႄႈယင်းဢမ်ႇပႆႇလႆႈၶၢမ်ႇဝူၺ်ႇတၼႃႇတၢင်းဢၼ်ၵိူတ်ႇလဵင်ႉလုၵ်ႈၼၼ်ႉဢေႃႈ။-
ၽူႈလႂ်ယၢမ်ႈငိၼ်းယၢမ်ႈႁၼ်လွင်ႈတၢင်းၸိူဝ်ႉၼင်ႇၼၼ်၊သိုင်ႇၸိုင်ႈဝၢၼ်ႈမိူင်းဢၼ်လႂ်ၸၢင်ႈၵိူတ်ႇလဵင်ႉမႃးၼႂ်းဝၼ်းလဵဝ်ၼၼ်ႉ။ ၸိဢုၼ်ႇ၊ ၸမ်ႉ၊ဢမ်ႇလႆႈၶၢမ်ႇဝူၺ်ႇတၼႃႇဢၼ်ႁိုင်ၼႃႇ၊ၸူဝ်ႈဢၼ်သိုင်ႇၸိုင်ႈဝၢၼ်ႈမိူင်းၵိူတ်ႇလဵင်ႉမႃးၽွမ်ႉမိူဝ်ႈလဵဝ်ၵၼ်ၵမ်းလဵဝ်ၼၼ်ႉဢေႃႈ။-
ယႃႇပေထၢင်ႇဝႃႈ၊ၵဝ်တၵ်းႁႂ်ႈၵူၼ်းၵဝ်တင်းလၢႆႁွတ်ႈထိုင်ၶိင်ႇၶႃႇဢၼ်ၵိူတ်ႇလဵင်ႉယဝ်ႉသေၵေႃႈ၊ယင်းဢမ်ႇႁႂ်ႈလႆႈၵိူတ်ႇလဵင်ႉမႃးတႄႉတႄႉၼၼ်ႉဢေႃႈ၊” ဝႃႈၼင်ႇၼင်ႇလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
သူၸိူဝ်းဢၼ်ႁၵ်ႉဝဵင်း ယေႇရုသလႅမ်ႇ၊ တင်းသဵင်ႈတင်းလူင်ၶဝ်႟။ ဢွၼ်ၵၼ်သႂၢင်ႇသိူဝ်းလူၺ်ႈၵၼ်တင်းဝဵင်း ၼၼ်ႉလႄႈၸူမ်းသိူဝ်းပုၼ်ႈမၼ်းတႃႉ။ သူၸိူဝ်းဢၼ်မီးၸႂ်ဢၼ်ၶၢင်းၶီၶင်းၽၢၼ် ပုၼ်ႈမၼ်းၵႃႈမီးၶဝ်႟။ ဢွၼ်ၵၼ်သႂၢင်ႇသိူဝ်းလူၺ်ႈၵၼ်တင်းမၼ်း မိူဝ်ႈလဵဝ်ၼႆႉတႃႉ။
ပေႃးသူႁဵတ်းၸိူဝ်ႉၼင်ႇၼၼ်ၸိုင်၊သူတၵ်းတေလႆႈသႂၢင်ႇလႆႈသိူဝ်းလူၺ်ႈ တၢင်းဢၼ်မၼ်းမၢၵ်ႈမီးလီပဵၼ်ၼၼ်ႉ၊ မိူၼ်ၸိူဝ်ႉၼင်ႇဢၼ်လုၵ်ႈဢွၼ်ႇလႆႈၵိၼ်ၼမ်ႉၼူမ်း ၵႃႈတီႈတဝ်ႈၼူမ်းမႄႈမၼ်းၼၼ်ႉဢေႃႈ။
ထႃႇဝရႃႉၽြႃး၊ မီးဢမိင်ႉဝႆႉၸမ်ႉ၊ “ၵဝ်တၵ်းပၼ်တၢင်းဢၼ်မၢၵ်ႈမီးလီပဵၼ်တႃႇသေႇဢမ်ႇထၢတ်ႇတီႈသူ။ ႁႂ်ႈမုၼ်ၸေးၸိမ်ႇတၢင်းဢၼ်ၵတ်းယဵၼ်ၶျၢမ်းသႃႇမဵဝ်းၵူၼ်းတင်းလၢႆ၊ႁွတ်ႈမႃးၸူးတီႈသူမိူၼ်ၸိူဝ်ႉၼင်ႇၼမ်ႉႁွင်ႈၼမ်ႉၵႄး၊ဢၼ်လႆယူႇသေႇသေႇဢမ်ႇယူတ်းဢမ်ႇႁႅင်ႈလႆႈၼၼ်ႉဢေႃႈ။ သူတၵ်းပဵၼ်မိူၼ်ၸိူဝ်ႉၼင်ႇလုၵ်ႈဢွၼ်ႇဢၼ်လႆႈၶၢမ်ႇတၢင်းဢၼ်လုမ်းလႃးၵႃႈၼႂ်းမိုဝ်းမႄးမၼ်းလႄႈၶၢမ်ႇတၢင်းဢၼ်ဢုမ်ႈႁွပ်ႇယူႇၵႃႈၼႂ်းဢူၵ်းၼႂ်းတၵ်း၊တၢင်းဢၼ်ယွၵ်ႇလဵၼ်ႈၵႃႈၼိူဝ်တၵ်းလူၺ်ႈတၢင်းႁၵ်ႉမႅတ်ႈတႃႇၼၼ်ႉဢေႃႈ။-
ၵဝ်တၵ်းႁႂ်ႈသူၼိမ်ၸႂ်ၵႃႈၼႂ်းဝဵင်း ယေႇရုသလႅမ်ႇ၊ မိူၼ်ၸိူဝ်ႉၼင်ႇလုၵ်ႈဢွၼ်ႇဢၼ်မႄႈမၼ်းႁႂ်ႈၼိမ်ၸႂ်ၼၼ်ႉဢေႃႈ။-
ၼင်ႇၼၼ်လႄႈသူတၵ်းထူပ်းႁၼ်လႄႈႁူဝ်ၸႂ်သူတၵ်းသႂၢင်ႇသိူဝ်းသေယဝ်ႉ၊ႁႂ်ႈသူမီးဢဵၼ်မီးႁႅင်းတင်းတၢင်းဢၼ်ယူႇလီၵိၼ်ဝၢၼ်ဢေႃႈ။ မိူဝ်ႈၼၼ်ႉသူတၵ်းႁုလွင်ႈတၢင်းဢၼ်ၵဝ်၊ ထႃႇဝရႃႉၽြႃး၊ ၸွႆႈထႅမ်မႃႉၸႃႉၶဝ်ၸိူဝ်းဢၼ်ထွမ်ႇဢဝ်ၵႂၢမ်းၵဝ်၊ဢိၵ်ႇတင်းတၢင်းဢၼ်ၵဝ်ၼႄပျႃးတေႃးသႃႉၵဝ်တေႃႇၶဝ်ၸိူဝ်းဢၼ်ပဵၼ်ရၢၼ်ႇသူႇၵဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ တၵ်းၵျွမႃးလူၺ်ႈၽႆးလႄႈမၼ်းၸဝ်ႈတၵ်းၶီႇၵႃႈၼိူဝ်ပိၵ်ႇလူမ်းၽိဝ်ႁုင်မႃးႁႂ်ႈလႆႈပၼ်တၢမ်ႇဢပျတ်ႈတီႈၶဝ်ၸိူဝ်းဢၼ်မၼ်းၸဝ်ႈၸႂ်မႆႈၶႂ်ႈၸႃႉၼၼ်ႉဢေႃႈ။-
ထႃႇဝရႃႉၽြႃး၊ တၵ်းဢဝ်ၽႆးတင်းလၢပ်ႇပၼ်တၢမ်ႇဢပျတ်ႈတီႈၵူၼ်းသတ်ႉတဝႃႇၵႃႈမီးဢၼ်မၼ်းၸဝ်ႈထူပ်းႁၼ်တုၸရိူၵ်ႈတၢင်းၽိတ်းၶဝ်ၼၼ်ႉလႄႈတၵ်းၶႃႈၽၼ်းၶဝ်ပႅတ်ႈၼမ်ၼႃႇဢေႃႈ။
ထႃႇဝရႃႉၽြႃး၊ မီးဢမိင်ႉဝႆႉၸမ်ႉ၊ “ၶိင်ႇၶႃႇၵႃႇလႃႉဢၼ်သုတ်းဢၼ်ဝၢႆးၼၼ်ႉ၊ႁွတ်ႈမႃးပုၼ်ႈၶဝ်ၸိူဝ်းဢၼ်ႁႂ်ႈတူဝ်ၸဝ်ႈၵဝ်ႇမူတ်းသႂ်ပုၼ်ႈၽြႃးၵူၼ်းတၢင်ႇၸိူဝ်ႉတၢင်ႇၶိူဝ်း၊ၶဝ်ၸိူဝ်းဢၼ်ၽွမ်ႉၵၼ်ၶိုၼ်ႈပဵၼ်ထႅဝ်ၵႂႃႇၸူးတီႈလူင်ႈၸဝ်ႈမိူင်း၊ ဢိၵ်ႇတင်းၶဝ်ၸိူဝ်းဢၼ်ၵိၼ်ၼိူဝ်ႉမူ၊ဢိၵ်ႇတင်းၼိူဝ်ႉၼူ၊ဢိၵ်ႇတင်းတၢင်းၵိၼ်တၢင်းၶူပ်းဢၼ်လီႁင်ႈဢဵတ်ႇသဵတ်ႇလၢႆၸိူဝ်ႉလၢႆမဵဝ်းၸိူဝ်းၼၼ်ႉဢေႃႈ။-
လွင်ႈမၼ်းၸမ်ႉ၊ၵဝ်ႁုတၢင်းၵျၢမ်ႇတၢင်းပွင်ၶဝ်၊ဢိၵ်ႇတင်းတၢင်းၵမ်တၢင်းၵျၢင်ႉၶဝ်ယူႇဢေႃႈ။ ၵဝ်မႃးႁႂ်ႈလႆႈဢဝ်ၵူၼ်းၵူႈၸိူဝ်ႉၵူႈမဵဝ်းတင်းသဵင်ႈတင်းလူင်ၸုတုမ်ၵၼ်လႄႈ၊မိူဝ်ႈဢၼ်ၶဝ်မႃးၸွမ်းၵၼ်ယူႇၼၼ်ႉၸိုင်၊ၶဝ်တၵ်းႁၼ်တၢင်းဢၼ်မုၼ်ၽုင်းၵဝ်ႁဵတ်းၼၼ်ႉသေယဝ်ႉ၊-
တၵ်းဢွၼ်ၵၼ်ႁုလွင်ႈဢၼ်ၵဝ်ပဵၼ်ၸဝ်ႈဢၼ်ပၼ်တၢမ်ႇဢပျတ်ႈတီႈၶဝ်ၼၼ်ႉဢေႃႈ။ “ၵူၺ်းၵႃႈ၊ၵဝ်တၵ်းၸတ်းဢဝ်ၶဝ်ၵမ်ႈၽွင်ႈလႄႈပွႆႇၸႂ်ႉၶဝ်ၵႂႃႇၸူးတီႈၵူၼ်းမဵဝ်းတင်းလၢႆ၊ဢိၵ်ႇတင်းတီႈမိူင်းဢၼ်ၵႆၼႃႇ၊ဢၼ်ဢမ်ႇလႆႈငိၼ်းသဵင်ၶၢဝ်ႇၵဝ်၊ဢၼ်ဢမ်ႇႁၼ်မုၼ်ၽုင်းဢၼ်ယႂ်ႇမျၢတ်ႈၼႃႇဢၼ်ဝႃႈ၊မိူင်း သပဵၼ်ႇ၊ မိူင်း လိပ်ႉပီးယႃး၊ တင်းမိူင်း လိတ်ႉတီးယႃး၊ ဢၼ်ပဵၼ်ၸဝ်ႈပိုၼ်ၸဝ်ႈၵၢင်ႇလႂ်၊ဢိၵ်ႇတင်းမိူင်း တုပလႃႉ၊ မိူင်း ၵရိၵ်ႉ၊ လႂ်ၸိူဝ်းၼၼ်ႉဢေႃႈ။ ၶဝ်ၼၼ်ႉတၵ်းဢွၼ်ၵၼ်ႁေႃးလၢတ်ႈမုၼ်ၽုင်းၵဝ်ၵႃႈၼႂ်းၵႄႈၵူၼ်းတၢင်ႇၸိူဝ်ႉတၢင်ႇမဵဝ်းၸိူဝ်းၼၼ်ႉဢေႃႈ။-
ၶဝ်ၼၼ်ႉ၊တၵ်းဢဝ်ၵူၼ်းမိူင်းသူတင်းသဵင်ႈတင်းလူင်ပွၵ်ႈမႃးသေၵႃႈတီႈၵူၼ်းတၢင်ႇၸိူဝ်ႉတၢင်ႇမဵဝ်းၸိူဝ်းၼၼ်ႉ၊မိူၼ်ၸိူဝ်ႉၼင်ႇဢၼ်ဢဝ်ၶိူင်ႈတၢင်းလူႇမႃးၸူးတီႈၵဝ်ၼၼ်ႉဢေႃႈ။ ၶဝ်ၼၼ်ႉ၊တၵ်းဢဝ်ပီႈၼွင်ႉသူၸိူဝ်းၼၼ်ႉ၊တၢင်ႇမႃႉလႂ်၊မႃႉလီႈလႂ်၊ၵလႃႇဢုၵ်ႈလႂ်၊ဢိၵ်ႇတင်းလေႃႉမႃႉသိုၵ်းလႂ်၊လေႃႉမႃႉတၢင်ႇၵူၼ်းလႂ်သေယဝ်ႉ၊မႃးၸူးၵႃႈတီႈလွႆမူတ်းၸၢင်ႇၵႃႈၼႂ်းဝဵင်း ယေႇရုသလႅမ်ႇ၊ မိူၼ်ၸိူဝ်ႉၼင်ႇၵူၼ်းမဵဝ်း ဢိသရေး၊ တင်းလၢႆ၊ဢဝ်ၶိူင်ႈတၢင်းလူႇမၢၵ်ႇၶဝ်ႈႁူင်းၶဝ်ႈတင်းလၢႆသႂ်ႇၵႃႈၼႂ်းၵွၵ်းမူတ်းၸၢင်ႇလႂ်သေယဝ်ႉ၊ဢဝ်မႃးၸူးၵႃႈတီႈၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။-
ၵဝ်တၵ်းဢဝ်ၵႃႈၼႂ်းၶဝ်ၼၼ်ႉၵမ်ႈၽွင်ႈၶၢၼ်းဝႆႉၼႂ်းဢရႃႇယဵၸ်ႈပရေႃးႁဵၵ်ႈ လႂ် တင်းဢရႃႇၵူၼ်း လေႇဝိ၊ လႂ်ဢေႃႈ။
“ၸိူဝ်ႉၼင်ႇဢၼ်ၽႃႉၵၢင်ႁၢဝ်မႂ်ႇ၊ဢိၵ်ႇတင်းလိၼ်မိူင်းမႂ်ႇတႄႇမၼ်ႈဝႆႉၵႃႈၼႂ်းၽုင်းတၼ်းၶူဝ်းၵဝ်ၼၼ်ႉ၊မဵဝ်းၸိူဝ်ႉၶိူဝ်းသူဢိၵ်ႇတင်းၼႃႇမႃႉၸိုဝ်ႈသဵင်သူတၵ်းတႄႇမၼ်ႈယူႇဢေႃႈ။-
ၼႂ်းဝၼ်းပွႆးလိူၼ်မႂ်ႇၵူႈပွၵ်ႈ၊ဢိၵ်ႇတင်းဝၼ်းၵမ်သိၼ်ၵူႈသိၼ်ၼၼ်ႉ၊ၵူၼ်းသတ်ႉတဝႃႇတင်းသဵင်ႈတင်းလူင်တၵ်းဢွၼ်ၵၼ်မႃးဝႆႈသႃၵူဝ်းၵႂၢႆႇၵဝ်ၵႃႈတီႈဝဵင်း ယေႇရုသလႅမ်ႇ၊ ၼႆႉဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။-
“မိူဝ်ႈဢၼ်ၶဝ်ဢွၵ်ႇၵႂႃႇၼၼ်ႉၶဝ်တၵ်းႁၼ်တူဝ်တၢႆၵူၼ်းၸိူဝ်းဢၼ်လုၵ်ႉၽိုၼ်ႉၵဝ်ၼၼ်ႉဢေႃႈ။ ၼွၼ်ဢၼ်သႆႉၵိၼ်ၶဝ်ၼၼ်ႉတၵ်းဢမ်ႇတၢႆလႆႈ၊ၽႆးဢၼ်မႆႈၶဝ်ၼၼ်ႉၵေႃႈတၵ်းဢမ်ႇမွတ်ႇလႆႈ။ တၢင်းဢၼ်လႆႈႁၼ်လွင်ႈၶဝ်ၼၼ်ႉ၊ပဵၼ်တၢင်းဢၼ်လီႁင်ႈဢဵတ်ႇသဵတ်ႇတီႈၵူၼ်းသတ်ႉတဝႃႇတင်းသဵင်ႈတင်းလူင်ဢေႃႈ၊” ဝႃႈၼင်ႇၼႆဢေႃႈ။ ၵျၢမ်းပရေႃးၽႅတ်ႈဢိသႃႇယႃႉယဝ်ႉယဝ်ႉဢေႃႈ။
ၵႂၢမ်းပရေႃးၽႅတ်ႈ ယေႇရမိ၊ လုၵ်ႈၸၢႆး ႁိလၶိ၊ ဢၼ်ၶဝ်ႈပႃးၵႃႈၼႂ်းယဵၸ်ႈပရေႃးႁဵၵ်ႈ တင်းလၢႆဢၼ်ယူႇၵႃႈၼႂ်းဝဵင်း ဢႃႇၼသုတ်ႉ၊ မိူင်း ပိၼ်ႇယႃႇမိၼ်ႇ၊-
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈ ယေႇရမိ၊ မိူဝ်ႈၶိင်ႇဢၼ်ၶုၼ် ယူဝ်းသိယႃႉ၊ ၵေႃႉပဵၼ်လုၵ်ႈၸၢႆး ဢႃႇမုၼ်ႇ၊ ၶုၼ်ႁေႃၶမ်းမိူင်း ယုတႃႉ၊ ၸၢမ်ႇႁၢင်ႈၸၢမ်ႇႁေႃလႆႈသိပ်းသၢမ်ပီၼၼ်ႉ၊-
ဢိၵ်ႇတင်းၼႂ်းၸူဝ်ႈပၢၼ် ယေႃးယၵိမ်း၊ ၵေႃႉပဵၼ်လုၵ်ႈၸၢႆး ယူဝ်းသိယႃႉ၊ ၶုၼ်ႁေႃၶမ်းမိူင်း ယုတႃႉ၊ တေႃႇထိုင်ႁွတ်ႈပီဢၼ်ၶုၼ် ၸေႇတၵိ၊ ၵေႃႉပဵၼ်လုၵ်ႈၸၢႆး ယူဝ်းသိယႃႉ၊ ၶုၼ်ႁေႃၶမ်းမိူင်း ယုတႃႉ၊ ၸၢမ်ႇႁၢင်ႈၸၢမ်ႇႁေႃလႆႈသိပ်းဢဵတ်းပီလႄႈၵူၼ်းဝဵင်း ယေႇရုသလႅမ်ႇ၊ တင်းလၢႆလႆႈၶၢမ်ႇတၢင်းဢၼ်တိဢဝ်သိမ်းဢဝ်ၵႂႃႇၼႂ်းလိူၼ်တီႈႁႃႈၼၼ်ႉဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈမီးဢမိင်ႉဝႃႈၸမ်ႉ၊-
“ၵဝ်ႁုၸၵ်းမႂ်းၸဵမ်မိူဝ်ႈဢၼ်ၸူဝ်ႈဢၼ်ၵဝ်ဢမ်ႇပႆႇႁဵတ်းပဵၼ်မႂ်းမႃးၵႃႈၼႂ်းတွင်ႉမႄႈမႂ်းၼၼ်ႉယဝ်ႉ။ ၵဝ်လိူၵ်ႈဢဝ်မႂ်းၸဵမ်မိူဝ်ႈၸူဝ်ႈဢၼ်မႂ်းဢမ်ႇပႆႇၵိူတ်ႇလဵင်ႉၼၼ်ႉလႄႈၶၢၼ်းမႂ်းဝႆႉႁႂ်ႈပဵၼ်ပရေႃးၽႅတ်ႈ ပုၼ်ႈၵူၼ်းၵူႈၸိူဝ်ႉၵူႈမဵဝ်းယဝ်ႉ၊” ဝႃႈၼင်ႇၼႆဢေႃႈ။
ၵဝ်ၵေႃႈလဝ်ႈလၢတ်ႈလႄႈဝႃႈ၊ “ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တီႈၶႃႈ၊ၶႃႈၸဝ်ႈဢမ်ႇႁုပုၼ်ႈတေလႆႈလၢတ်ႈၵႂၢမ်းၸိူဝ်ႉၼင်ႇႁိုဝ်ၼၼ်ႉတီႈၶႃႈ။ ပဵၼ်ၵူၼ်းၼုမ်ႇဢွၼ်ႇၵူၺ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “မႂ်းယႃႇပေလၢတ်ႈလႄႈဝႃႈ၊ ‘ၶႃႈၸဝ်ႈပဵၼ်ၵူၼ်းၼုမ်ႇဢွၼ်ႇၵူၺ်း၊ဝႃႈၼင်ႇၼႆၼၼ်ႉ၊’ မႂ်းတၵ်းတေလႆႈၵႂႃႇၸူးၵႃႈတီႈၵူၼ်းတင်းလၢႆတီႈၵေႃႉဢၼ်ၵဝ်ပွႆႇၸႂ်ႉမႂ်းၵႂႃႇၸူးၼၼ်ႉလႄႈမႂ်းတၵ်းလႆႈလၢတ်ႈၵႂၢမ်းၵႃႈဢၼ်ၵဝ်သင်ႇလၢတ်ႈတီႈမႂ်းၼၼ်ႉဢေႃႈ။-
ယႃႇပေၵူဝ်ပေႁႄၶဝ်။ ၵဝ်မီးယူႇလူၺ်ႈၵၼ်တင်းမႂ်းႁႂ်ႈလႆႈၵႄႇသႄႇၼုၵ်ႈဢဝ်မႂ်းဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ ယဵတ်ႇမိုဝ်းမၼ်းၸဝ်ႈလႄႈတိူဝ်ႉသႂ်ႇသူပ်းၵဝ်သေယဝ်ႉ၊မီးဢမိင်ႉလႄႈဝႃႈ၊ “တေႃႈလဵဝ်ၼႆႉၵဝ်ဢဝ်ၵႂၢမ်းၵဝ်သႂၢင်းသႂ်ႇဝႆႉၵႃႈၼႂ်းသူပ်းမႂ်းယဝ်ႉ။-
တူၺ်းလူး။ ၵဝ်ၶၢၼ်းမႂ်းဝႆႉၵႃႈၼိူဝ်ၵူၼ်းၵူႈၸိူဝ်ႉၵူႈမဵဝ်း၊ဢိၵ်ႇတင်းၵႃႈၼိူဝ်သိုင်ႇၸိုင်ႈဝၢၼ်ႈမိူင်းတင်းလၢႆ၊ႁႂ်ႈမႂ်းလႆႈထူၺ်ႈထွၼ်၊ၵိူၼ်ႇတူၵ်း၊ယႃႉပႅတ်ႈ၊ပိၼ်ႈၶွမ်ႈ၊ဢိၵ်ႇတင်းႁႂ်ႈလႆႈတႄႇႁဵတ်း၊ဝၢၼ်ႇၸိူဝ်ႉဝၢၼ်ႇၽၼ်းလႄႈၽုၵ်ႇသွမ်ႈဢေႃႈ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈ၊ “ ယေႇရမိ၊ ႟။ မႂ်းႁၼ်ၵႃႈသင်၊” ဝႃႈၼင်ႇၼႆလႄႈ၊ ၵဝ်သမ်ႉလဝ်ႈလၢတ်ႈလႄႈဝႃႈ၊ “ၶႃႈၸဝ်ႈႁၼ်ၵိင်ႇမႆႉပႃႇတမ်ႇတီႈၶႃႈဢေႃႈ၊” မိူဝ်ႈဢၼ်ဝႃႈၼင်ႇၼႆၸိုင်။
ထႃႇဝရႃႉၽြႃး၊ မီးဢမိင်ႉတီႈၵဝ်လႄႈဝႃႈ၊ “မႂ်းလႆႈႁၼ်တႄႉတႄႉဝႃႈဝႃႈယဝ်ႉ။ လွင်ႈမၼ်းၸမ်ႉ၊ၵဝ်ပႂ်ႉတူၺ်း ၵႃႈၼိူဝ်ၵႂၢမ်းၵဝ်ႁႂ်ႈပျေႉၸုမ်ႇပဵၼ်မႃးဢေႃႈ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်ပွၵ်ႈထူၼ်ႈသွင်လႄႈထၢမ်ဝႃႈ၊ “မႂ်းႁၼ်ၵႃႈသင်၊” ဝႃႈၼင်ႇၼႆဢေႃႈ။ ၵဝ်ၵေႃႈလဝ်ႈလၢတ်ႈလႄႈဝႃႈ၊ “ၶႃႈၸဝ်ႈႁၼ်မေႃႈဢၼ်ၼမ်ႉၽူတ်ႉယူႇလႄႈဝၢႆႇၼႃႈၵႂႃႇၸူးၽၢႆႇတၢင်းႁွင်ႇယူႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉတီႈၵဝ်လႄႈဝႃႈ၊ “ၽေးဢုပၢတ်ႈတၵ်းဢွၵ်ႇသေၵႃႈတီႈၽၢႆႇတၢင်းႁွင်ႇၼၼ်ႉမႃးၸူးၵႃႈၼိူဝ်ၵူၼ်းမိူင်းၼႆႉဢေႃႈ။-
လွင်ႈမၼ်းၸမ်ႉ၊ၵဝ်တၵ်းႁွင်ႉဢဝ်ၵူၼ်းဝၢၼ်ႈၵူၼ်းမိူင်းၵူႈၸိူဝ်ႉၵူႈမဵဝ်းဢၼ်လုၵ်ႉသေၵႃႈတီႈၽၢႆႇတၢင်းႁွင်ႇၼၼ်ႉမႃးသေယဝ်ႉ၊တၵ်းဢွၼ်ၵၼ်တႄႇႁဵတ်းရႃႇၸႃႉပလၢင်ႇၶဝ်ၵႃႈတီႈႁူးၽၵ်းတူဝဵင်း ယေႇရုသလႅမ်ႇ၊ တင်းလၢႆ၊ဢိၵ်ႇတင်းၵႃႈတီႈလဵပ်ႈႁွပ်ႈႁိမ်းလမ်းဝဵင်းၵူႈတီႈၵူႈလႅၼ်၊ၵႃႈတီႈဝၢၼ်ႈဝဵင်းၼႂ်းမိူင်း ယုတႃႉ၊ ၵူႈဝၢၼ်ႈၵူႈဝဵင်းဢေႃႈ။-
ၵဝ်တၵ်းၸႅတ်ႈထၢမ်ၶဝ်လႄႈၸီႇယၢင်ႇၸွမ်းၼင်ႇတြႃးလူၺ်ႈလွင်ႈဢပျတ်ႈၶဝ်ၵႃႈမီးဢၼ်ဝႃႈ၊ဢပျတ်ႈဢၼ်ၶဝ်ၸုၼ်ႉပႅတ်ႈၵဝ်၊ဢိၵ်ႇတင်းဢပျတ်ႈဢၼ်ၶဝ်သၢၵ်ႈလူႇတီႈၽြႃးတၢင်ႇသူႇတၢင်ႇပႃး၊ဢိၵ်ႇတင်းဢပျတ်ႈဢၼ်ၶဝ်ၵူဝ်းၵႂၢႆႇတီႈမဵဝ်းဢၼ်ဢဝ်တင်းမိုဝ်းၶဝ်ႁဵတ်းပဵၼ်ၸိူဝ်းၼၼ်ႉဢေႃႈ။-
ပိူဝ်ႈၼႆၸင်ႇမႂ်းႁတ်ႉသၢႆဢႅဝ်မႂ်းသေလႄႈလုၵ်ႉတႃႉ။ ဢဝ်ၵႃႈၼင်ႇဢၼ်ၵဝ်သင်ႇလၢတ်ႈဝႆႉၼႆႉႁေႃးလၢတ်ႈပၼ်တီႈၶဝ်တႃႉ။ ယႃႇပေၵူဝ်ပေႁႄၶဝ်၊ပေႃးဢမ်ႇၼၼ်တေပဵၼ်တၢင်းဢၼ်ၵဝ်ႁႂ်ႈမႂ်းဢူၵ်းဢၢႆၵႃႈတီႈၽၢႆႇၼႃႈၶဝ်ဢေႃႈ။-
တူၺ်းလူး။ ၼႂ်းဝၼ်းမိူဝ်ႈၼႆႉၵဝ်ႁႂ်ႈမႂ်းပဵၼ်ဝဵင်းဢၼ်မၼ်ႈၶိူင်ႇ၊ႁႂ်ႈမႂ်းပဵၼ်သဝ်လဵၵ်း၊ႁႂ်ႈမႂ်းပဵၼ်ၽႃတွင်းလိူင်လႄႈယူႇၽၢႆႇၼိုင်ႈတင်းမိူင်းတင်းမူတ်းဢၼ်ဝႃႈ၊ၽၢႆႇၼိုင်ႈတင်းၶုၼ်ႁေႃၶမ်း ယုတႃႉ၊ တင်းလၢႆ၊ၽၢႆႇၼိုင်ႈတင်းလုၵ်ႈၸၢႆးၶုၼ်တင်းလၢႆ၊ၽၢႆႇၼိုင်ႈတင်းယဵၸ်ႈပရေႃးႁဵၵ်ႈ တင်းလၢႆ၊ၽၢႆႇၼိုင်ႈတင်းၵူၼ်းဝၢၼ်ႈၵူၼ်းမိူင်းတင်းလၢႆဢေႃႈ။-
ၶဝ်ၼၼ်ႉတၵ်းဢွၼ်ၵၼ်တိုၵ်းတေႃးမႂ်းလႄႈဢမ်ႇလႆႈပႄႉလႆႈၼႅင်ႇမႂ်း။ ၵဝ်တၵ်းမီးယူႇလူၺ်ႈၵၼ်တင်းမႂ်းႁႂ်ႈလႆႈၵႄႇသႄႇၼုၵ်ႈဢဝ်မႂ်းဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈမီးဢမိင်ႉၸမ်ႉ၊-
“မႂ်းၵႂႃႇလႄႈႁွင်ႉပၢဝ်ႇႁွင်ႉသေႃႇတီႈႁူၵူၼ်းဝဵင်း ယေႇရုသလႅမ်ႇ၊ တင်းလၢႆလႄႈဝႃႈ၊ “ ထႃႇဝရႃႉၽြႃး၊ မီးဢမိင်ႉၸမ်ႉ၊ၵဝ်ၶုၵ်းၸႂ်လႆႈၶႆႈၸႂ်ထူပ်းတၢင်းဢၼ်သူပႂ်ႉသဵတ်ႈၸႃႇ၊ ၼႂ်းမိူဝ်ႈဢၼ်ဢသၢၵ်ႈဢရွႆႇသူယင်းၼုမ်ႇ၊တၢင်းႁၵ်ႉမႅတ်ႈတႃႇသူဢၼ်မိူၼ်ၸိူဝ်ႉၼင်ႇလုၵ်ႈယိင်းဢၼ်တႄႇၸႃႉသွင်ႇမၢင်ႇၵလႃႇ၊ ဢိၵ်ႇတင်းတၢင်းဢၼ်သူၸွမ်းလင်ၵဝ်ၵႃႈၼႂ်းထိူၼ်ႇတီႈဢၼ်ဢမ်ႇဝၢၼ်ႇၸိူဝ်ႉ ဝၢၼ်ႇၽၼ်းၼၼ်ႉဢေႃႈ။
မိူဝ်ႈၼၼ်ႉမဵဝ်းၵူၼ်း ဢိသရေး၊ ပဵၼ်ဢၼ် မူတ်းၸၢင်ႇပုၼ်ႈ ထႃႇဝရႃႉၽြႃး၊ လႄႈ ပဵၼ်မၢၵ်ႇဢၼ်မၢၵ်ႇဢွၼ်တၢင်းပိူၼ်ႈၼႂ်းၵႃႈဢၼ်လႆႈပၢတ်ႇဢဝ်သိမ်းဢဝ်ၼၼ်ႉယဝ်ႉ၊ ၶဝ်ၸိူဝ်းဢၼ်ၵိၼ်မၼ်းၼၼ်ႉမီးဢပျတ်ႈလႄႈ ၽေးဢုပၢတ်ႈႁွတ်ႈထိုင်ၵႃႈၼိူဝ် ၶဝ်ၼၼ်ႉဢေႃႈ၊” ဝႃႈၼင်ႇၼႆ၊ ထႃႇဝရႃႉၽြႃး၊ မီးဢမိင်ႉဢေႃႈ။
မဵဝ်း ယႃႇၵုပ်ႈ၊ ႟။ ၸိူဝ်ႉၶိူဝ်းမဵဝ်း ဢိသရေး၊ တင်းသဵင်ႈတင်းလူင်ၶဝ်႟။ ဢွၼ်ၵၼ်ထွမ်ႇငိၼ်းၼုၵ်ႈၵပၢတ်ႈ ထႃႇဝရႃႉၽြႃး၊ တႃႉ။-
ထႃႇဝရႃႉၽြႃး၊ မီးဢမိင်ႉၸမ်ႉ၊ “ပူႇမွၼ်ႇသူၼၼ်ႉဢွၼ်ၵၼ်ထူပ်းႁၼ်တၢင်းၽိတ်းဢၼ်လႂ်တီႈၵဝ်ၼၼ်ႉ၊ ႁဵတ်းႁႂ်ႈၶဝ်လႆႈဢွၵ်ႇသေၵႃႈတီႈၵဝ်ၵႂႃႇၵႆၵႆလႄႈ ၸွမ်းသဵၼ်ႈတၢင်းဢၼ်ဢမ်ႇပွင်ႇလွင်ႈ ၵႃႈသင်ယူႇသေယဝ်ႉ၊ ပဵၼ်ၶဝ်ၸိူဝ်းဢၼ်ဢမ်ႇပွင်ႇလွင်ႈၵႃႈသင်ၼၼ်ႉ ၸိူဝ်ႉၼင်ႇႁိုဝ်။
ၶဝ်ၼၼ်ႉယင်းဢမ်ႇထၢမ်လႄႈဝႃႈ၊ ‘ ထႃႇဝရႃႉၽြႃး၊ ဢၼ်ၼုၵ်ႈဢဝ်ႁဝ်း ဢွၵ်ႇသေၵႃႈၼႂ်းမိူင်း ဢေးၵျိပ်ႉ၊ ဢၼ်ဢွၼ်ႁူဝ်ႁဝ်းၵႃႈၼႂ်းထိူၼ်ႇလူင်၊ၵႃႈၼႂ်းထိူၼ်ႇလႅင်ႉလႄႈပဵၼ်ၶုမ်ပဵၼ်လုၵ်းလိၼ်၊ ၵႃႈၼႂ်းမိူင်းဢၼ်ႁႅင်ႈႁွင်ဝႆႉလႄႈလပ်းသိင်ႇ ၼႃတၼ်ၼႃႇ၊မိူင်းဢၼ်ဢမ်ႇမီးၵူၼ်း ယူႇသဝ်းလႄႈဢမ်ႇမီးၵေႃႉၵႂႃႇတႃႈပႆတၢင်းၼၼ်ႉ မီးၵႃႈလႂ်၊’ ဝႃႈၼင်ႇၼႆၼၼ်ႉ။
ၵဝ်ဢဝ်သူသႂၢင်းၶဝ်ႈၵႃႈၼႂ်းမိူင်းဢၼ်ပျေႉၸုမ်ႇဝႆႉ ၵူႈၸိူဝ်ႉၵူႈပိူင်၊ ႁႂ်ႈသူၵိၼ်မၢၵ်ႇမၼ်းႁူင်းမၼ်းဢိၵ်ႇတင်း မဵဝ်းဢၼ်လီဢၼ်ငၢမ်းၼၼ်ႉဢေႃႈ။ ၵူၺ်းၵႃႈ၊မိူဝ်ႈဢၼ်သူၶဝ်ႈၸၢမ်ႇၸႃးၼၼ်ႉၸိုင်၊သူႁႂ်ႈမိူင်းၵဝ်ၵူဝ်ႈၵိူၵ်ႇလႄႈႁႂ်ႈဢမူၺ်ႇၵဝ်ပဵၼ် တီႈဢၼ်လီႁင်ႈဢဵတ်ႇသဵတ်ႇယဝ်ႉလူင်ပႄႇ။
ယဵၸ်ႈပရေႃးႁဵၵ်ႈ တင်းလၢႆ ယင်းဢမ်ႇလႆႈ ဢွၼ်ၵၼ်ထၢမ်လႄႈဝႃႈ၊ ‘ ထႃႇဝရႃႉၽြႃး၊ မီးၵႃႈလႂ်၊’ ဝႃႈၼင်ႇၼႆဢေႃႈ။ ၶဝ်ၸိူဝ်းဢၼ်ၸၢင်ႈမေႃတြႃးၸဝ်ႈၼၼ်ႉဢမ်ႇႁုၸၵ်းၵဝ်။ ၶဝ်ၸိူဝ်းဢၼ်ဢုပ်ႉပိူင်ႇၼၼ်ႉဢွၼ်ၵၼ် ၽိတ်းပိူင်ႈၵဝ်ဢေႃႈ။ ပရေႃးၽႅတ်ႈ တင်းလၢႆဢွၼ်ၵၼ်ဢိင်ပိုင်ႈ ၽြႃးပႃႇလႃႉ၊ ယူႇသေလႄႈ ႁေႃးလၢတ်ႈႁဵတ်းၸွမ်းလွင်ႈတၢင်းဢၼ် ဢမ်ႇမီးဢၵျူဝ်းၸိူဝ်းၼၼ်ႉဢေႃႈ။
ပိူဝ်ႈၼႆလႄႈၵဝ်တၵ်းႁဵတ်းဢမုၵၼ်တင်းသူလႄႈ လုၵ်ႈသူလၢၼ်သူၵေႃႈၵဝ်တၵ်းႁဵတ်းဢမုၵၼ် တင်းၶဝ်ဢေႃႈ၊ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ဢွၼ်ၵၼ်ၶၢမ်ႈၵႂႃႇၸူးတီႈၵုၼ် သၢႆးပရၢတ်ႈ၊ ၸိူဝ်းၼၼ်ႉလႄႈလူတူၺ်းတႃႉ။ ဢွၼ်ၵၼ်ပွႆႇၸႂ်ႉၵႂႃႇၵႃႈတီႈမိူင်း ၵေႇတႃႇ၊ လႄႈ ၶႆႈၸႂ်ဝူၼ်ႉၸႂ်လီလီငၢမ်းငၢမ်းသေလႄႈ တူၺ်းလွင်ႈဢၼ်ၸွင်ႇယၢမ်ႈပဵၼ်မႃး ၸိူဝ်ႉၼင်ႇၼႆႁိုဝ်းၼၼ်ႉတႃႉ။
ၵူၼ်းတၢင်ႇၸိူဝ်ႉတၢင်ႇမဵဝ်းၸိူဝ်းၼၼ်ႉ ၸွင်ႇယၢမ်ႈၶၢႆႉပုတ်ႈလႅၵ်ႈလၢႆႈသေ ၽြႃးၶဝ်ဢၼ်ဢမ်ႇၸႂ်ႈၽြႃးၼၼ်ႉယဝ်ႉႁိုဝ်း။ ၵူၼ်းၵဝ်တင်းလၢႆၸမ်ႉ၊ၶဝ်ဢဝ်မုၼ်သရေႇၶဝ် ၶၢႆႉပုတ်ႈလႅၵ်ႈလၢႆႈဢဝ်၊ မဵဝ်းဢၼ်ဢမ်ႇပၼ်ဢၵျူဝ်းတၢင်းလီ လႆႈၼၼ်ႉယဝ်ႉလူင်ပႄႇ။
ထႃႇဝရႃႉၽြႃး၊ မီးဢမိင်ႉၸမ်ႉ၊ၽႃႉၵၢင်ႁၢဝ်ၶဝ်႟။ ဢွၼ်ၵၼ်မိင်းမဝ်းလူၺ်ႈလွင်ႈတၢင်းၼႆႉတႃႉ။ ဢွၼ်ၵၼ်တုမ်ႇၶူၼ်ၼိူဝ်ႉလုၵ်ႉတႃႉ၊ဢွၼ်ၵၼ်တူၵ်းၸႂ်၊ၵႂင်ၸႂ်ယုင်ႈၸႂ်တႃႉ။
ၵူၼ်းၵဝ်တင်းလၢႆဢွၼ်ၵၼ်ႁဵတ်းတုၸရိူၵ်ႈ သွင်မဵဝ်းဢၼ်ဝႃႈ၊ တၢင်းဢၼ်ၶဝ်ၸုၼ်ႉပႅတ်ႈၵဝ်ဢၼ်ပဵၼ် ၼမ်ႉဢွၵ်ႇႁူးဢၼ်ပၼ်ဢသၢၵ်ႈၼႆႉ၊ ဢိၵ်ႇတင်းတၢင်းဢၼ်ၶဝ်ၶုတ်းၼမ်ႉၼွင် ဢၼ်ဝႃႈ၊ၼမ်ႉၼွင်ဢၼ်လုဢၼ်ပင်း ဢၼ်ၼမ်ႉဢမ်ႇၶင်ဢမ်ႇယူႇၼၼ်ႉယဝ်ႉ။
ဢိသရေး၊ ၼႆႉပဵၼ်ၶႃႈႁိုဝ်း၊ပဵၼ်လုၵ်ႈၸၢႆးဢၼ်ၵိူတ်ႇလဵင်ႉမႃးတီႈၶႃႈၵူၼ်းၸႂ်ႉႁိုဝ်း။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၵူၼ်းမဵဝ်း ဢိသရေး၊ လႆႈၶၢမ်ႇတၢင်းဢၼ် ႁိမ်ဢဝ်ႁူင်ႇဢဝ်ၸိူဝ်ႉၼင်ႇႁိုဝ်။
သၢင်ႇသီႈၼုမ်ႇတင်းလၢႆဢွၼ်ၵၼ်ႁဝ်ႇၸူးၵူၼ်းမဵဝ်း ဢိသရေး၊ လႄႈႁွင်ႉၸူးၶၢင်းၸူးလူၺ်ႈ သဵင်ဢၼ်ႁႅင်းယႂ်ႇၼႃႇဢေႃႈ။ သၢင်ႇသီႈၼၼ်ႉဢွၼ်ၵၼ်ႁႂ်ႈဝၢၼ်ႈမိူင်း သဵတ်ႇယဵၼ်ၵႂႃႇယဝ်ႉ။ ဝဵင်းၵူၼ်းမဵဝ်း ဢိသရေး၊ တင်းလၢႆလုလႅဝ်လႄႈ ဢမ်ႇမီးၵူၼ်းယူႇသေၵေႃႉသေၵူၼ်း။
ၵူၼ်းဝဵင်း မႅမ်းၽိ၊ ဢိၵ်ႇတင်းၵူၼ်းဝဵင်း တႃႇပၼိတ်ႉ၊ ၸိူဝ်းၼၼ်ႉ၊ ဢွၼ်ၵၼ်ႁဵတ်းႁႂ်ႈၸိၵ်းႁူဝ်မႂ်းတႅၵ်ႇပႅတ်ႈယဝ်ႉ။
မႂ်းလႆႈၶၢမ်ႇဢဝ်လွင်ႈတၢင်းၼႆႉၵွပ်ႈပိူဝ်ႈဢၼ်မႂ်း ၸုၼ်ႉပႅတ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈမႂ်း၊ ဢၼ်ဢဝ်မႂ်းသူင်ႇၸွမ်းတႃႈၸွမ်းတၢင်း ၼၼ်ႉဢမ်ႇၸႂ်ႈႁိုဝ်း။
မိူဝ်ႈလဵဝ်ၼႆႉၸမ်ႉ၊မႂ်းတၵ်းလႆႈဢၵျူဝ်းၵႃႈသင်ၼႂ်း တၢင်းဢၼ်မႂ်းၵႂႃႇတီႈမိူင်း ဢေးၵျိပ်ႉ၊ ႁႂ်ႈလႆႈ ၵိၼ်ၼမ်ႉ၊တီႈမႄႈၼမ်ႉ ၼၢႆးလ်၊ ၼၼ်ႉ၊ မႂ်းတၵ်းလႆႈဢၵျူဝ်းၵႃႈသင်ၼႂ်းတၢင်းဢၼ် မႂ်းၵႂႃႇတီႈမိူင်း ဢႃႇသီးရီးယႃး၊ ႁႂ်ႈလႆႈ ၵိၼ်ၼမ်ႉတီႈမႄႈၼမ်ႉ ဢုၽရတ်ႉ၊ ၼၼ်ႉ။
တုၸရိူၵ်ႈမႂ်းတၵ်းၸီႇယၢင်ႇပၼ်တၢမ်ႇမႂ်းလႄႈတၢင်းဢၼ်မႂ်းၽွၵ်ႈပျၢၼ်ႇၶိုၼ်းၼၼ်ႉ တၵ်းပၼ်ဢပျတ်ႈတီႈမႂ်းဢေႃႈ။ ပိူဝ်ႈၼႆလႄႈႁုႁၼ်လွင်ႈဢၼ်ဢမုဢၼ် ၸုၼ်ႉပႅတ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈမႂ်း၊ ဢိၵ်ႇတင်းဢမုဢၼ်ဢမ်ႇၵူဝ်ဢမ်ႇႁႄၵဝ်လႄႈယူႇၼၼ်ႉ၊ ပဵၼ်ဢမုဢၼ်ဢမ်ႇလီ၊ဢမုဢၼ်ၶူမ်ၼၼ်ႉတႃႉ၊” ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ ထႃႇဝရႃႉၽြႃး၊ မီးဢမိင်ႉဢေႃႈ။
မိူဝ်ႈၵွၼ်ႇဢွၼ်ၼႆႉၼၼ်ႉမႂ်းႁၵ်းၵၢၼ်းဢၼ်မႂ်း လႆႈႁၢပ်ႇၼၼ်ႉပႅတ်ႈလႄႈၵႄႈလိတ်ႈ တၢင်းဢၼ်မတ်ႉဢၼ်ၽုၵ်ႇမႂ်းဝႆႉၼၼ်ႉ ပႅတ်ႈသေယဝ်ႉ၊လၢတ်ႈလႄႈဝႃႈ၊ “ၵဝ်ၶႃႈတိုၼ်းတေဢမ်ႇႁဵတ်းဝၢတ်ႈယဝ်ႉ၊” ဝႃႈၼင်ႇၼႆယဝ်ႉ။ ၶျႃးဝၢင်းတူဝ်ၸဝ်ႈၵဝ်ႇသေလႄႈ၊ ပဵၼ်မႄႈမွၵ်ႇယႃႈယူႇၵႃႈတီႈလွႆဢၼ် သုင်လႂ်၊ဢိၵ်ႇတင်းၵႃႈတႂ်ႈတူၼ်ႈမႆႉ ဢၼ်ၶဵဝ်လႂ်ၼၼ်ႉဢေႃႈ။
ပိၵ်ႉသမ်ႉၵဝ်ၽုၵ်ႇသွမ်ႈမႂ်းဢၼ်ပဵၼ်မဵဝ်း တူၼ်ႈၶိူဝ်းမၢၵ်ႇၸပိတ်ႉဢၼ်ၸႅတ်ႈဢၼ် လီၼႃႇသေပိူၼ်ႈသေၵေႃႈ၊ မႂ်းၽွၵ်ႈပျၢၼ်ႇၶိုၼ်းၸိူဝ်ႉၼင်ႇႁိုဝ်လႄႈပဵၼ် တူၼ်ႈၶိူဝ်းမၢၵ်ႇၸပိတ်ႉဢၼ်ယုတ်ႈဢၼ်ၺၢမ်ႉ မဵဝ်းဢၼ်ဢမ်ႇၸႅတ်ႈၼၼ်ႉတီႈၵဝ်လူင်ပႄႇ။
ပိၵ်ႉသမ်ႉမႂ်းဢဝ်ၼမ်ႉလၢင်ႉသုၵ်ႈသီဢၢပ်ႇလႄႈ ၸႂ်ႉသပ်ႉပျႃႇၼမ်ၼႃႇသေၵေႃႈ၊ ဢပျတ်ႈမႂ်းထၢင်ႇသႃးယူႇၵႃႈတီႈ ၽၢႆႇၼႃႈၵဝ်ဢေႃႈ၊ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
မႂ်းတၵ်းလၢတ်ႈလႆႈၸိူဝ်ႉၼင်ႇႁိုဝ်လႄႈဝႃႈ၊ၵဝ် “ဢမ်ႇမီးတၢင်းဢၼ်ၵူဝ်ႈၵိူၵ်ႇ။ ဢမ်ႇၸွမ်းလင် ၽြႃးပႃႇလႃႉတင်းလၢႆ” ဝႃႈၼင်ႇၼႆၼၼ်ႉ။ လူတူၺ်းသဵၼ်ႈတၢင်းဢၼ်မႂ်းၸွမ်းၵႃႈၼႂ်း ၶူင်ႈႁူၺ်ႈၼၼ်ႉလႄႈႁပ်ႉတုင်းဢဝ်လွင်ႈတၢင်း ဢၼ်မႂ်းႁဵတ်းၼၼ်ႉတႃႉ။ မႂ်းပဵၼ်ၵလႃႇဢုၵ်ႈမႄႈဢၼ်ၸၢင်ႈၶုၼ်ႇလႅၼ်ႈ ၶၼ်ၶၼ်ၽႂ်းၽႂ်းလႄႈလႄႇလၢဝ်းၵႂႃႇမႃး ယူႇၼၼ်ႉလူင်ပႄႇ။
ပဵၼ်မႃႉလီႈမႄႈဢၼ်ႁႄဢၼ်ၸၢင်ႈယူႇၵႃႈၼႂ်း ထိူၼ်ႇၼႂ်းၶိူဝ်းလႄႈပႃးတင်းၸႂ်ၵိလေႇသႃႇ ရႃႇၵႃႉသုတ်ႇၼူမ်လူမ်းယူႇၼၼ်ႉလူင်ပႄႇ။ ယၢမ်းမိူဝ်ႈဢၼ်မၼ်းႁွတ်ႈထိုင်ၶိင်ႇမၼ်း ၶႃႇမၼ်းဝၢင်ၵၼ်ၼၼ်ႉ၊ၽူႈလႂ်ဢမ်ႇၸၢင်ႈ ႁၢမ်ႈတၢပ်ႈႁႄႉၶႅၼ်မၼ်းလႆႈ။ ၶဝ်ၵႃႈဢၼ်ႁႃမၼ်းၼၼ်ႉတၵ်းဢမ်ႇႁႂ်ႈ တူဝ်ၸဝ်ႈၵဝ်ႇလႆႈယၢပ်ႇၸႂ်ၽိုတ်ႇၸႂ်။ မိူဝ်ႈဢၼ်ႁွတ်ႈထိုင်ၶိင်ႇၶႃႇမၼ်းယဝ်ႉၼၼ်ႉ၊ ၶဝ်တၵ်းထူပ်းႁၼ်မၼ်းဢေႃႈ။
ယႃႇပေႁႂ်ႈတိၼ်မႂ်းၵၢင်းလွတ်ႈသေသွၵ်းတိၼ်၊ ယႃႇပေႁႂ်ႈၵူင်ၶေႃးမႂ်းလႆႈယၢၵ်ႇၼမ်ႉ။ ၵူၺ်းၵႃႈ၊မႂ်းလၢတ်ႈလႄႈဝႃႈ၊ “တၢင်းဢၼ် မုင်ႈထႃႈမွင်းထႃႈ။ ဢမ်ႇမီးလႃးလႃး။ ၵဝ်လႆႈႁၵ်ႉၽြႃးတၢင်ႇသူႇတၢင်ႇပႃးယဝ်ႉလႄႈ တၵ်းၸွမ်းလင်ၶဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၸိူဝ်ႉၼင်ႇဢၼ်ၽူႈလၵ်ႉဢၼ်တိလႆႈဢၼ်လႆႈဢူၵ်းဢၢႆၼၼ်ႉ၊ၵူၼ်းမဵဝ်း ဢိသရေး၊ တင်းလၢႆ၊ဢိၵ်ႇလူၺ်ႈၵၼ်တင်းၶုၼ်ႁေႃၶမ်းၶဝ်၊ၶုၼ်ၶဝ်၊ယဵၸ်ႈပရေႃးႁဵၵ်ႈ ၶဝ်၊ပရေႃးၽႅတ်ႈ ၶဝ်ၸိူဝ်းၼၼ်ႉတၵ်းမီးတၢင်းဢၼ်ဢူၵ်းဢၢႆဢေႃႈ။-
ၶဝ်ဢွၼ်ၵၼ်လဝ်ႈလၢတ်ႈတီႈတုမ်မႆႉလႄႈဝႃႈ၊ “ၸဝ်ႈႁဝ်းပဵၼ်ပေႃႈၵဝ်ၶႃႈတီႈၶႃႈဢေႃႈ၊” ဝႃႈၼင်ႇၼႆလႄႈလဝ်ႈလၢတ်ႈတီႈမၢၵ်ႇႁိၼ်ၵွၼ်ႈႁိၼ်လႄႈဝႃႈ၊ “ၸဝ်ႈႁဝ်းၵိူတ်ႇလဵင်ႉၶႃႈၸဝ်ႈမႃးတီႈၶႃႈယဝ်ႉ၊” ဝႃႈၼင်ႇၼႆဢေႃႈ။ ၶဝ်ဢွၼ်ၵၼ်ၵွင်လင်တေႃႇၵဝ်ဢမၢၼ်ႇၶၼ်ပဵၼ်လႄႈဢမ်ႇဝၢႆႇၼႃႈဝၢႆႇတႃၸူးၵႃႈတီႈၵဝ်။ ၵူၺ်းၵႃႈ၊မိူဝ်ႈဢၼ်တၢင်းယၢပ်ႇၸႂ်ႁွတ်ႈထိုင်မႃးတီႈၶဝ်ၼၼ်ႉ၊ၶဝ်ၸၢင်ႈဢွၼ်ၵၼ်လဝ်ႈလၢတ်ႈလႄႈဝႃႈ၊ “ၶႅၼ်းတေႃႈလုၵ်ႉလႄႈၵႄႇၶျွတ်ႈဢဝ်ၶႃႈၸဝ်ႈႁဝ်းၶဝ်သေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ၽြႃးဢၼ်မႂ်းႁဵတ်းပုၼ်ႈမႂ်းၸိူဝ်းၼၼ်ႉမီးၵႃႈလႂ်။ ပေႃးၽြႃးၸိူဝ်းၼၼ်ႉတၢတ်ႈၼိူင်ႇႁႂ်ႈလႆႈၵႄႇသႄႇၶျွတ်ႈဢဝ်မႂ်းၼႂ်းမိူဝ်ႈဢၼ်တၢင်းယၢပ်ႇၸႂ်ႁွတ်ႈထိုင်တီႈမႂ်းၼၼ်ႉၸိုင်၊ႁႂ်ႈၽြႃးၸိူဝ်းၼၼ်ႉဢွၼ်ၵၼ်လုၵ်ႉသေၵမ်း။ ဢူဝ်း၊မိူင်း ယုတႃႉ၊ ႟။ ၸွမ်းလူၺ်ႈတၢင်းဢၼ်မႂ်းမီးဝဵင်းၼမ်ၼႃႇၼၼ်ႉမႂ်းမီးၽြႃးမႂ်းၼမ်ၼႃႇလူင်ပႄႇ။-
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵွပ်ႈသင်သူပွင်ႉၶၢင်းလႄႈၶတ်းၶဵင်ႇႁႅင်းတႃႉလူၺ်ႈၵၼ်တင်းၵဝ်။ သူၵႃႈမီးဢွၼ်ၵၼ်ႁဵတ်းၶတ်းၵၼ်တင်းၵဝ်လႄႈလုၵ်ႉၽိုၼ်ႉၵဝ်ယဝ်ႉ။-
တၢင်းဢၼ်ၵဝ်ပၼ်တၢမ်ႇတီႈလုၵ်ႈသူလၢင်းသူၼၼ်ႉပဵၼ်ဢၼ်လၢႆလၢႆလွၵ်ႇလွၵ်ႇယဝ်ႉ။ ၶဝ်ၼၼ်ႉဢမ်ႇၶၢမ်ႇတၢင်းဢၼ်သင်ႇသွၼ်သုင်းမႃႉ၊လၢပ်ႇသူလႅဝ်းသူၼၼ်ႉၸၢင်ႈယႃႉၽဵဝ်ႈပရေႃးၽႅတ်ႈ သူတင်းလၢႆပႅတ်ႈမိူၼ်ၸိူဝ်ႉၼင်ႇသၢင်ႇသီႈဢၼ်ၸၢင်ႈႁိမ်ဢဝ်ယႃႉပႅတ်ႈၼၼ်ႉဢေႃႈ။
သူၸိူဝ်းဢၼ်မီးယူႇတေႃႈလဵဝ်ၼႆႉၶဝ်႟။ ဢွၼ်ၵၼ်ၶႆႈၸႂ်ဝူၼ်ႉၸႂ်လူၺ်ႈလွင်ႈၼုၵ်ႈၵပၢတ်ႈ ထႃႇဝရႃႉၽြႃး၊ တႃႉ။ ၵဝ်ယၢမ်ႈပဵၼ်ၸိူဝ်ႉၼင်ႇထိူၼ်ႇၼင်ႇၶိူဝ်း၊ဢမ်ႇၼၼ်ၵေႃႈယၢမ်ႈပဵၼ်မိူင်းဢၼ်လပ်းသိင်ႇၼႃတၼ်ၼႃႇၼၼ်ႉတီႈမဵဝ်းၵူၼ်း ဢိသရေး၊ ႁိုဝ်း။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၵူၼ်းၵဝ်တင်းလၢႆဢွၼ်ၵၼ်လၢတ်ႈလႄႈဝႃႈ၊ ‘ႁဝ်းလွတ်ႈလႅဝ်းၵွၼ်းၶေႃယဝ်ႉ၊ႁဝ်းတၵ်းဢမ်ႇလူဝ်ႇသုတ်ႉၸပ်းသုတ်ႉၸူးတီႈၸဝ်ႈႁဝ်းၵူၺ်း၊’ ဝႃႈၼင်ႇၼႆလႆႈၸိူဝ်ႉၼင်ႇႁိုဝ်။-
ၸွင်ႇၽူႈယိင်းသၢဝ်လူင်လိုမ်းၶိူင်ႈဢၼ်ႁၢင်ႈၶိူင်ႈသႂ်ႇတီႈတူဝ်မၼ်းၼၼ်ႉလႆႈလႄႈလုၵ်ႈယိင်းဢၼ်သွင်ႇမၢင်ႇၵလႃႇၼၼ်ႉလူင်လိုမ်းၶူဝ်းၼုင်ႈမၼ်းလႆႈႁိုဝ်း။ ၼႂ်းဝႃႈၼၼ်သေၵေႃႈ၊ၵူၼ်းၵဝ်တင်းလၢႆဢွၼ်ၵၼ်လူင်လိုမ်းပႅတ်ႈၵဝ်မိုဝ်ႉဝၼ်းႁိုင်ၼႃႇထၢၼ်ႈပေႃးဢမ်ႇၼပ်ႉဢမ်ႇဢၢၼ်ႇလႆႈယဝ်ႉ။-
ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းပွင်ႁဵတ်းပွင်မႄးသဵၼ်ႈတၢင်းမႂ်းႁႂ်ႈလႆႈႁႃဢဝ်ၸုၵေႃႉႁၵ်ႉၸိူဝ်ႉၼင်ႇႁိုဝ်။ မႂ်းဢဝ်လၢႆးႁဵတ်းမႂ်းၸိူဝ်းၼၼ်ႉသင်ႇသွၼ်ပၼ်တီႈမႄႈယိင်းဢၼ်ႁၢႆႉဢၼ်ယုတ်ႈၸိူဝ်းၼၼ်ႉယဝ်ႉလူင်ပႄႇ။-
ၼွၵ်ႈသေၼၼ်ႉလိူတ်ႈၶဝ်ၸိူဝ်းဢၼ်ယၢၵ်ႈဢၼ်ၽၢၼ်ဢၼ်ဢမ်ႇမီးဢပျတ်ႈၼၼ်ႉလႆႈႁၼ်ၸပ်းဝႆႉမီးယူႇၵႃႈတီႈၶူဝ်းၼုင်ႈမႂ်းဢေႃႈ။ “ဢမ်ႇၸႂ်ႈလိူတ်ႈၶဝ်ၸိူဝ်းဢၼ်ၶဝ်ႈမႃးလၵ်ႉၶူဝ်းၼႂ်းႁိူၼ်းယေးမႂ်း၊ပိၵ်ႉသမ်ႉပဵၼ်ၸိူဝ်ႉၼင်ႇၼႆ။-
မႂ်းလၢတ်ႈလႄႈဝႃႈ၊ ‘ၵဝ်ဢမ်ႇမီးဢပျတ်ႈ၊တၢင်းၸႂ်မႆႈၶႂ်ႈၸႃႉမၼ်းၸဝ်ႈၼၼ်ႉတၵ်းဝႄႈပိူင်ႈသေၵႃႈတီႈၵဝ်ၵႂႃႇဢေႃႈ၊’ ဝႃႈၼင်ႇၼႆလူင်ပႄႇ။ ၵူၺ်းၵႃႈ၊ၵဝ်တၵ်းၸႅတ်ႈထၢမ်ၸီႇယၢင်ႇမႂ်းၵွပ်ႈပိူဝ်ႈဢၼ်မႂ်းလၢတ်ႈလႄႈဝႃႈ၊ ‘ၵဝ်ဢမ်ႇမီးဢပျတ်ႈ၊’ ဝႃႈၼင်ႇၼႆၼၼ်ႉဢေႃႈ။-
ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းလႄႇသွတ်ႉသႅတ်ႉၵႂႃႇမႃးထၢၼ်ႇၼႆႉႁႂ်ႈလႆႈၶၢႆႉတီႈၵႂႃႇၸိူဝ်ႉၼင်ႇႁိုဝ်။ မိူင်း ဢေးၵျိပ်ႉ၊ တၵ်းႁဵတ်းႁႂ်ႈမႂ်းဢူၵ်းဢၢႆမိူၼ်ၸိူဝ်ႉၼင်ႇဢၼ်မိူင်း ဢႃႇသီးရီးယႃး၊ ႁဵတ်းႁႂ်ႈမႂ်းဢူၵ်းဢၢႆယဝ်ႉၼၼ်ႉဢေႃႈ။-
မႂ်းတၵ်းလႆႈဢဝ်မိုဝ်းမႂ်းတၢင်ႇသႂ်ႇၵႃႈၼိူဝ်ႁူဝ်မႂ်းယူႇသေလႄႈဢွၵ်ႇသေၵႃႈတီႈမိူင်းၼၼ်ႉဢမၢၼ်ႇၶၼ်ပဵၼ်ဢေႃႈ။ လွင်ႈမၼ်းၸမ်ႉ၊ ထႃႇဝရႃႉၽြႃး၊ ပႄႇၶဝ်ၸိူဝ်းဢၼ်မႂ်းသွၼ်ႈပိုင်ႈၸိူဝ်းၼၼ်ႉပႅတ်ႈလႄႈမႂ်းတၵ်းဢမ်ႇလႆႈဢၵျူဝ်းၵႃႈတီႈၶဝ်ၸိူဝ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
“ပေႃးၽူႈၸၢႆးပႅတ်ႈမေးမၼ်းလႄႈမေးမၼ်းၼၼ်ႉဢွၵ်ႇၵႂႃႇသေၵႃႈတီႈမၼ်းသေယဝ်ႉ၊ၵႂႃႇပဵၼ်မေးၵူၼ်းတၢင်ႇၵေႃႉယဝ်ႉၸိုင်၊ၽူႈၸၢႆးၼၼ်ႉထုၵ်ႇလီၶိုၼ်းဢဝ်မၼ်းၼၼ်ႉႁိုဝ်း၊မိူင်းၼၼ်ႉတၵ်းပဵၼ်ဢၼ်ၵူဝ်ႈၵိူၵ်ႇဢၼ်ယႂ်ႇၼႃႇဢမ်ႇၸႂ်ႈႁိုဝ်း။ ၵူၺ်းၵႃႈ၊မႂ်းၼႆႉႁဵတ်းမႄႈမွၵ်ႇယႃႈလႄႈၸပ်းၸွမ်းၸုၵေႃႉႁၵ်ႉၼမ်ၼႃႇယဝ်ႉသေၵေႃႈ၊မႂ်းတၵ်းၶိုၼ်းမႃးၸူးတီႈၵဝ်ႁိုဝ်း၊ဝႃႈၼင်ႇၼႆလႄႈ ထႃႇဝရႃႉၽြႃး၊ လၢတ်ႈဝႃႈၸိူဝ်ႉၼင်ႇၼႆဢေႃႈ။-
ဢဝ်တႃမႂ်းႁႅၼ်တူၺ်းၵႃႈတီႈဢၼ်သုင်တင်းလၢႆလႄႈႁႃဢဝ်တီႈဢၼ်မႂ်းဢမ်ႇတွၼ်ႉၼွၼ်းလူၺ်ႈၵၼ်တင်းၽူဝ်ဢွၼ်ႇမႂ်းၼၼ်ႉသေတီႈတီႈတႃႉ။ မႂ်းၼင်ႈယူႇၵႃႈတီႈႁိမ်းတၢင်းလႄႈပႂ်ႉထႃႈၵေႃႉႁၵ်ႉၼၼ်ႉမိူၼ်ၸိူဝ်ႉၼင်ႇၵူၼ်း ဢႃႇရပ်ႉ၊ ပႂ်ႉထႃႈပုၼ်ႈတၵ်းတိဢဝ်ၵူၼ်းၵႃႈၼႂ်းထိူၼ်ႇလႅင်ႉၼၼ်ႉဢေႃႈ။ မႂ်းဢဝ်တၢင်းဢၼ်ႁဵတ်းမႄႈမွၵ်ႇယႃႈ၊ဢိၵ်ႇတင်းတၢင်းဢၼ်ႁၢႆႉယုတ်ႈမႂ်းၸိူဝ်းၼၼ်ႉႁဵတ်းႁႂ်ႈမိူင်းၵူဝ်ႈၵိူၵ်ႇယဝ်ႉဢေႃႈ။-
ပိူဝ်ႈၼႆလႄႈပိၵ်ႉသမ်ႉၽႃႉလႅင်ႉလႄႈၽူၼ်ႁူဝ်ပီဢမ်ႇတူၵ်း၊ၽူၼ်ႁၢင်ပီၵေႃႈဢမ်ႇမႃး၊မႂ်းယင်းမီးၼႃႈၽၢၵ်ႈၵေႃႉဢၼ်ပဵၼ်မႄႈမွၵ်ႇယႃႈယူႇလႄႈသမ်ႉပေႃးဢမ်ႇမီးၸႂ်ဢူၵ်းၸႂ်ဢၢႆလူင်ပႄႇ။
“မိူဝ်ႈလဵဝ်ၼႆႉမႂ်းႁွင်ႉသႅၼ်ႇတီႈၵဝ်လႄႈဝႃႈ၊ ‘ပေႃႈၵဝ်ၶႃႈ႟။ ၸဝ်ႈႁဝ်းပဵၼ်ၵေႃႉသႄႈၶႃႈၸဵမ်မိူဝ်ႈဢသၢၵ်ႈၶႃႈယင်းလဵၵ်ႉယင်းၼုမ်ႇတီႈၶႃႈယဝ်ႉ၊ဝႃႈၼင်ႇၼႆႁိုဝ်း။-
တၵ်းၸႂ်မႆႈၶႂ်ႈၸႃႉယူႇတႃႇသေႇႁိုဝ်း။ ၸဝ်ႈႁဝ်းတၵ်းမၢတ်ႈတွင်းၵဝ်ဝႆႉတေႃႇထိုင်ႁွတ်ႈတီႈသုတ်းတီႈၵွႆႁိုဝ်း၊’ ဢၼ်ၼႆႉပဵၼ်ၶေႃႈၵႂၢမ်းဢၼ်မႂ်းလၢတ်ႈယဝ်ႉ။ ၵူၺ်းၵႃႈ၊မႂ်းႁဵတ်းလွင်ႈတၢင်းဢၼ်ႁၢႆႉဢၼ်ယုတ်ႈတင်းလၢႆၵႃႈၼင်ႇဢၼ်မႂ်းတၢတ်ႈၼိူင်ႇလႆႈၼၼ်ႉယဝ်ႉလူင်ပႄႇ၊” ဝႃႈၼင်ႇၼႆဢေႃႈ။
ၼႂ်းၸူဝ်ႈပၢၼ်ၶုၼ်လူင် ယူဝ်းသိယႃႉ၊ ၼၼ်ႉ၊ ထႃႇဝရႃႉၽြႃး၊ မီးဢမိင်ႉတီႈၵဝ်ၸမ်ႉ၊ “မႂ်းႁၼ်လွင်ႈတၢင်းဢၼ် ဢိသရေး၊ ဢၼ်သဵတ်ႈၸႃႇလုၼၼ်ႉႁဵတ်းယဝ်ႉႁိုဝ်း။ မၼ်းၶိုၼ်ႈၵႃႈၼိူဝ်လွႆဢၼ်သုင်ၵႃႈမီးသေလႄႈၵႂႃႇပဵၼ်မႄႈမွၵ်ႇယႃႈယူႇၵႃႈတႂ်ႈတူၼ်ႈမႆႉဢၼ်လိပ်းဢၼ်ၶဵဝ်လႂ်ၸိူဝ်းၼၼ်ႉယဝ်ႉ။-
ၵဝ်ထၢင်ႇလႄႈဝႃႈ၊ ‘ဝၢႆးသေမၼ်းႁဵတ်းလွင်ႈတၢင်းၵူႈၸိူဝ်ႉၵူႈပိူင်ၸိူဝ်းၼၼ်ႉယဝ်ႉတူဝ်ႈၼၼ်ႉမၼ်းတၵ်းၶိုၼ်းမႃးတီႈၵဝ်ဢေႃႈ၊’ ၵူၺ်းၵႃႈ၊မၼ်းဢမ်ႇၶိုၼ်းဢမ်ႇမႃး၊လွင်ႈတၢင်းၼၼ်ႉၸိုင်၊ၼွင်ႉယိင်းမၼ်း ယုတႃႉ၊ ၵေႃႉမီးတၢင်းၽိတ်းၼၼ်ႉၵေႃႈႁၼ်ယူႇဢေႃႈ။-
မဵဝ်း ဢိသရေး၊ ဢၼ်သဵတ်ႈၸႃႇလုၼၼ်ႉၽိတ်းပိူင်ႈမေႇထုင်ႇဢၼ်ဢမ်ႇတြႃးလႄႈၵဝ်ပႅတ်ႈၵၼ်တင်းမၼ်းသေယဝ်ႉ၊ဢၢပ်ႈပၼ်လိၵ်ႈဢၼ်ပုတ်းဢၼ်ၶၢတ်ႇယဝ်ႉသေၵေႃႈ၊ၼွင်ႉယိင်းမၼ်းဢၼ်လႆႈၽိတ်းပိူင်ႈၼၼ်ႉယင်းဢမ်ႇၵူဝ်ဢမ်ႇႁႄလႄႈၵႂႃႇႁဵတ်းမႄႈမွၵ်ႇယႃႈယူႇဢေႃႈ။-
တၢင်းဢၼ်မၼ်းၸွမ်းၽြႃးတၢင်ႇသူႇတၢင်ႇပႃးၵႂႃႇၼၼ်ႉပဵၼ်ဢၼ်ငၢႆႈၼႃႇလႄႈမိူင်းလႆႈမီးတၢင်းဢၼ်ၵူဝ်ႈၵိူၵ်ႇသေယဝ်ႉ၊မၼ်းႁဵတ်းမေႇထုင်ႇဢၼ်ဢမ်ႇတြႃးလူၺ်ႈတၢင်းဢၼ်ဝႆႈမၢၵ်ႇႁိၼ်ၵွၼ်ႈႁိၼ်၊ဢိၵ်ႇတင်းတုမ်မႆႉပွတ်းမႆႉတင်းလၢႆဢေႃႈ။-
ပိၵ်ႉသမ်ႉမီးဢပျတ်ႈထၢၼ်ႇၼၼ်ႉသေၵေႃႈ၊ၼွင်ႉယိင်းမၼ်း ယုတႃႉ၊ ဢၼ်ၽိတ်းပိူင်ႈၼၼ်ႉဢမ်ႇပႃးဢဝ်တင်းႁူဝ်ၸႂ်သဵင်ႈသဵင်ႈၶိုၼ်းမႃးၸူးၵႃႈတီႈၵဝ်။ ႁဵတ်းၼင်ႇႁၢင်ႈတေၶိုၼ်းမႃးၵူၺ်းဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ထႃႇဝရႃႉၽြႃး၊ မီးဢမိင်ႉတီႈၵဝ်ၸမ်ႉ၊ “ ဢိသရေး၊ ဢၼ်သဵတ်ႈၸႃႇလုၼၼ်ႉၼႄပျႃးတူဝ်ၸဝ်ႈၵဝ်ႇလွင်ႈဢၼ်မၼ်းမီးဢပျတ်ႈတၢင်းၽိတ်းလဵၵ်ႉၵေႇသေ ယုတႃႉ၊ ဢၼ်ၽိတ်းပိူင်ႈၼၼ်ႉဢေႃႈ။-
ၵႂၢမ်းဢၼ်မႂ်းတၵ်းလႆႈၵႂႃႇလႄႈႁွင်ႉပၢဝ်ႇႁွင်ႉသေႃႇၵႃႈတီႈၽၢႆႇတၢင်းႁွင်ႇၸမ်ႉ၊ ‘ ဢိသရေး၊ ဢၼ်သဵတ်ႈၸႃႇလု႟။ ၶိုၼ်းမႃးသေၵမ်း၊ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။ ၵဝ်တၵ်းဢမ်ႇႁဵတ်းတၢင်းဢၼ်ၸႂ်လမ်သႆႈၵမ်ႇသေလႄႈတူၺ်းၼႃႈမႂ်း။ ၵဝ်တၵ်းမီးတၢင်းဢၼ်ၸႂ်လမ်သႆႈၵမ်ႇတႃႇသေႇဢမ်ႇၸႂ်ႈ၊ၵွပ်ႈပိူဝ်ႈၵဝ်မီးၸႂ်ၵရုၼႃႇတၢင်းဢၼ်ဢဵတ်းလူဢေႃႈ၊’ ဝႃႈၼင်ႇၼႆ ထႃႇဝရႃႉၽြႃး၊ မီးဢမိင်ႉဢေႃႈ။-
ၵူၺ်းႁပ်ႉၶၢမ်ႇတုင်းဢဝ်ဢပျတ်ႈတၢင်းၽိတ်းမႂ်းဢၼ်မႂ်းၶတ်းၶဵင်ႇလုၵ်ႉၽိုၼ်ႉ ထႃႇဝရႃႉၽြႃး၊ ၽြႃးပဵၼ်ၸဝ်ႈမႂ်းလႄႈၽိတ်းပိူင်ႈႁူမ်ႈလူၺ်ႈၵၼ်တင်းၶႅၵ်ႇတင်းလၢႆဢၼ်မႂ်းထူပ်းၵႃႈတီႈတႂ်ႈတူၼ်ႈမႆႉဢၼ်လိပ်းဢၼ်ၶဵဝ်ၵႃႈမီးလႄႈဢမ်ႇထွမ်ႇဢမ်ႇဢဝ်ၵႂၢမ်းၵဝ်ၼၼ်ႉၵူၺ်းတႃႉ၊” ဝႃႈၼင်ႇၼႆ ထႃႇဝရႃႉၽြႃး၊ မီးဢမိင်ႉဢေႃႈ။
“လုၵ်ႈလၢင်းဢၼ်သဵတ်ႈၸႃႇလုၶဝ်႟။ ဢွၼ်ၵၼ်ၶိုၼ်းမႃးတႃႉ၊ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။ ၵဝ်ပဵၼ်ၸဝ်ႈဢၼ်ဢုပ်ႉပိူင်ႇသူလႄႈတၵ်းလိူၵ်ႈၵဵပ်းဢဝ်ၵႃႈၼႂ်းသူယေႈဝဵင်းယေႈၵေႃႉ၊ၵႃႈၼႂ်းမဵဝ်းၶိူဝ်းႁိူၼ်းသူယေႈမဵဝ်းသွင်ၵေႃႉသေလႄႈဢဝ်သူင်ႇၵႂႃႇၵႃႈတီႈဝဵင်း ၸိဢုၼ်ႇ၊ ဢေႃႈ။-
ၵဝ်တၵ်းဢဝ်ၶဝ်ၸိူဝ်းဢၼ်ပဵၼ်ၵူၼ်းပႂ်ႉထိင်းဢၼ်ထုၵ်ႇၸႂ်ၵဝ်ၼၼ်ႉဝႆႉၵႃႈၼိူဝ်သူလႄႈၶဝ်ၼၼ်ႉတၵ်းပျေႉၸုမ်ႇဝႆႉတင်းၺၢၼ်ႇပိင်ႇၺႃႇ၊ဢိၵ်ႇတင်းတၢင်းဢၼ်ႁုပွင်ႇသေလႄႈဢွၼ်ၵၼ်လဵင်ႉလူသူဢေႃႈ။-
ၼႂ်းၶိင်ႇမိူဝ်ႈၼၼ်ႉမိူဝ်ႈဢၼ်သူယႂ်ႇၽႄႈၼမ်ၵိုၼ်းမႃးၵႃႈၼႂ်းမိူင်းၸဝ်ႈၼၼ်ႉၸိုင်၊ၵမ်းလိုၼ်းၶဝ်တၵ်းဢမ်ႇလႆႈႁွင်ႉလႆႈဝႃႈ၊ ‘တိူၵ်ႈပတိၺိၺ်ႇ ထႃႇဝရႃႉၽြႃး၊ ’ ဝႃႈၼင်ႇၼႆၼၼ်ႉ။ ဢမ်ႇလႆႈၸႂ်ၸပ်းၸႂ်ၸွႆးမၼ်း၊ဢမ်ႇလႆႈၶုၵ်းၸႂ်လႆႈၶႆႈၸႂ်ထူပ်းမၼ်း။ ဢမ်ႇလႆႈလူတူၺ်းလုမ်းလႃးမၼ်း။ ၵမ်းလိုၼ်းဢမ်ႇလႆႈႁဵတ်းထႅင်ႈ၊ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။-
မိူဝ်ႈၼၼ်ႉဝဵင်း ယေႇရုသလႅမ်ႇ၊ တၵ်းလႆႈႁွင်ႉႁဵၵ်ႈလႄႈဝႃႈ၊ ‘ပလၢင်ႇ ထႃႇဝရႃႉၽြႃး၊ ’ ဝႃႈၼင်ႇၼႆလႄႈၵူၼ်းၵူႈၸိူဝ်ႉၵူႈမဵဝ်းတၵ်းၸုၵၼ်တုမ်ၵၼ်ၵႃႈတီႈၼၼ်ႈၵႃႈတီႈၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ၵႃႈၼႂ်းဝဵင်း ယေႇရုသလႅမ်ႇ၊ ဢေႃႈ။ ၵမ်းလိုၼ်းၶဝ်ဢမ်ႇလႆႈဢွၼ်ၵၼ်ၸွမ်းသၽေႃးတၢင်းဢၼ်ႁၢႆႉဢၼ်ယုတ်ႈလူၺ်ႈတင်းႁူဝ်ၸႂ်ဢၼ်ၵႅၼ်ႇဢၼ်ၶႅင်ၼၼ်ႉ။-
ၼႂ်းၶိင်ႇၵႃႇလႃႉမိုဝ်ႉဝၼ်းၼၼ်ႉမဵဝ်း ယုတႃႉ၊ တၵ်းႁူမ်ႈပွင်းလူၺ်ႈၵၼ်တင်းမဵဝ်း ဢိသရေး၊ ယူႇသေလႄႈလုၵ်ႉသေၵႃႈတီႈၽၢႆႇတၢင်းႁွင်ႇမႃးပဵၼ်မုၵ်ႉလဵဝ်ၸုမ်းလဵဝ်ၵူၺ်းသေယဝ်ႉ၊ႁွတ်ႈထိုင်ၵႃႈတီႈမိူင်းဢၼ်ၵဝ်လႆႈပၼ်ပုၼ်ႈပူႇမွၼ်ႇသူလႆႈၶၢမ်ႇဢမူၺ်ႇၼၼ်ႉဢေႃႈ။
ၵဝ်ၶႆႈၸႂ်လႄႈဝႃႈ၊ၵဝ်တၵ်းလႆႈဢဝ်မႂ်းဝႆႉၵႃႈၼႂ်းၵႄႈၵၢင်လုၵ်ႈလၢင်းၵဝ်တင်းလၢႆလႄႈ ဢဝ်မိူင်းဢၼ်သႃႇယႃႇ၊မိူင်းဢၼ်ပဵၼ် ဢမူၺ်ႇဢၼ်ႁၢင်ႈလီလိူဝ်သေမိူင်းတင်းလၢႆၼၼ်ႉပၼ်တီႈမႂ်း။ ၵဝ်သမ်ႉၶႆႈၸႂ်လႄႈဝႃႈ၊မႂ်းတၵ်းတေႁွင်ႉႁဵၵ်ႈၵဝ်၊ ပေႃႈၵဝ်ၶႃႈ၊ဝႃႈၼႆလႄႈဢမ်ႇဝႄႈပိူင်ႈ တၢင်းဢၼ်တၵ်းတေၸွမ်းၵဝ်ၵႂႃႇၼၼ်ႉ၊ ဝႃႈၼင်ႇၼႆဢေႃႈ။
ၵူၺ်းၵႃႈ၊ဢူဝ်း မဵဝ်း ဢိသရေး၊ ႟။ ၸိူဝ်ႉၼင်ႇ မေးဢၼ်ဢမ်ႇမီးသဵတ်ႈၸႃႇလႄႈ ပႅတ်ႈၽူဝ်မၼ်းၼၼ်ႉသူၵေႃႈယႃႉ သဵတ်ႈၸႃႇတီႈၵဝ်ယဝ်ႉ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
လႆႈငိၼ်းသဵင်ၵႃႈၼိူဝ်တီႈဢၼ်သုင်တင်းလၢႆ တီႈဢၼ်လုၵ်ႈလၢင်းၵူၼ်းမဵဝ်း ဢိသရေး၊ တင်းလၢႆၶၢင်းၶီၶၢင်းၽၢၼ်ႁွင်ႉႁႆႈၼၼ်ႉယဝ်ႉ။ လွင်ႈမၼ်းၸမ်ႉ၊ၶဝ်ဢွၼ်ၵၼ်ၽိတ်းတၢင်း ပိူင်ႈတၢင်းလႄႈလူင်လိုမ်း ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်ပႅတ်ႈယဝ်ႉ။
လုၵ်ႈလၢင်းဢၼ်သဵတ်ႈၸႃႇလုၶဝ်႟။ ဢွၼ်ၵၼ်ၶိုၼ်းမႃးသေၵမ်း။ ၵဝ်တၵ်း ႁဵတ်းႁႂ်ႈတၢင်းဢၼ်သူသဵတ်ႈၸႃႇလုၼၼ်ႉ ပဵၼ်တၢင်းဢၼ်မီးသဵတ်ႈၸႃႇမႃးဢေႃႈ။ ၶဝ်ၵေႃႈလၢတ်ႈလႄႈဝႃႈ၊ “ၶႃႈၸဝ်ႈႁဝ်းၶဝ်မႃးၸူးတီႈၸဝ်ႈႁဝ်းတီႈၶႃႈဢေႃႈ။ ၵွပ်ႈပိူဝ်ႈၸဝ်ႈႁဝ်းပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၶႃႈတီႈၶႃႈဢေႃႈ။-
တၢင်းဢၼ်ႁဝ်းဝႆႈသႃၵႃႈၼိူဝ်ၵုင်းလွႆတင်းလၢႆ၊ဢိၵ်ႇတင်းသၼ်လွႆၼမ်ၼႃႇၸိူဝ်းၼၼ်ႉပဵၼ်ဢၼ်လၢႆလၢႆဢမ်ႇပွင်ႇလွင်ႈၵႃႈသင်ဢမၢၼ်ႇၶၼ်ပဵၼ်လႄႈ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၶႃႈၼၼ်ႉပဵၼ်ၸဝ်ႈဢၼ်ၵႄႇသႄႇၶျွတ်ႈဢဝ်မဵဝ်း ဢိသရေး၊ ဢေႃႈ။-
လွင်ႈတၢင်းဢၼ်လီဢူၵ်းလီဢၢႆၼၼ်ႉ၊ၵိၼ်ဢုၵ်ႉၸႃႇၸေးၸိမ်ႇဢၼ်ပူႇမွၼ်ႇႁဝ်းပိူင်ႇဢၼ်ပဵၼ်၊ၽုင်သူဝ်း၊ၽုင်ဝူဝ်း၊လုၵ်ႈၸၢႆးလုၵ်ႈယိင်းတင်းလၢႆ၊ၸႃႉၸဵမ်မိူဝ်ႈဢသၢၵ်ႈႁဝ်းယင်းလဵၵ်ႉယင်းၼုမ်ႇၼၼ်ႉလႄႈသဵင်ႈမူတ်းယဝ်ႉ။-
ႁဝ်းဢွၼ်ၵၼ်ၵိင်ႈၼွၼ်းၵႃႈၼႂ်းတၢင်းဢၼ်ဢူၵ်းဢၼ်ဢၢႆလႄႈႁႂ်ႈတၢင်းဢၼ်သရေႇႁဝ်းလုၼၼ်ႉႁူမ်ႇသုမ်ႇႁဝ်းသေၵမ်း၊လွင်ႈမၼ်းၸမ်ႉ၊ႁဝ်းဢိၵ်ႇတင်းပူႇမွၼ်ႇႁဝ်းဢွၼ်ၵၼ်ၽိတ်းပိူင်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၸႃႉၸဵမ်မိူဝ်ႈဢၼ်ဢသၢၵ်ႈယင်းလဵၵ်ႉယင်းၼုမ်ႇၼၼ်ႉတေႃႇထိုင်ႁွတ်ႈမိူဝ်ႈလဵဝ်ၼႆႉလႄႈဢမ်ႇထွမ်ႇဢမ်ႇဢဝ်ၵႂၢမ်း ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်း၊” ဝႃႈၼင်ႇၼႆဢေႃႈ။
“မဵဝ်း ဢိသရေး၊ ႟။ ပေႃးမႂ်းမီးၸႂ်ဢၼ်ၶႂ်ႈၶိုၼ်းမႃးတီႈၵဝ်ၸိုင်၊ၶိုၼ်းမႃးသေၵမ်း။ ပေႃးမႂ်းမီးၸႂ်ဢၼ်ၶႂ်ႈပႄႇပႅတ်ႈလွင်ႈတၢင်းဢၼ်လီႁင်ႈဢဵတ်ႇသဵတ်ႇမႂ်းၸိူဝ်းၼၼ်ႉသေၵႃႈတီႈသိုဝ်ႈၼႃႈတႂ်ႈတႃၵဝ်လႄႈဢမ်ႇတူင်ႉဢမ်ႇၶွၼ်း။-
ပေႃးမႂ်းဢဝ်တၢင်းဢၼ်ပႂ်ႉသဵတ်ႈၸႃႇ၊တၢင်းဢၼ်ၸီႇယၢင်ႇၸွမ်းၼင်ႇတြႃး၊တၢင်းဢၼ်သိုဝ်ႈတေႃႇသေလႄႈဢဝ်တၢင်းဢၼ် ထႃႇဝရႃႉၽြႃး၊ ဢသၢၵ်ႈလိပ်းယူႇၼၼ်ႉပဵၼ်ၵႂၢမ်းဢၼ်တိူင်ႇၵၢဝ်ႇၸိုင်၊ၵူၼ်းၵူႈၸိူဝ်ႉၵူႈမဵဝ်းၵေႃႈတၵ်းဢွၼ်ၵၼ်လႆႈၶၢမ်ႇတၢင်းလီၵွပ်ႈမၼ်းၸဝ်ႈလႄႈၵႃႈၼႂ်းမၼ်းၸဝ်ႈၼၼ်ႉၶဝ်တေဢုပ်ႇဝၢဝ်းဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ထႃႇဝရႃႉၽြႃး၊ မီးဢမိင်ႉတီႈၵူၼ်းမိူင်း ယုတႃႉ၊ ဢိၵ်ႇတင်းတီႈၵူၼ်းဝဵင်း ယေႇရုသလႅမ်ႇ၊ တင်းလၢႆလႄႈဝႃႈၸမ်ႉ၊ “ဢွၼ်ၵၼ်ထႆၼႃးသူတႃႉ။ ယႃႇပေဝၢၼ်ႇၸိူဝ်ႉဝၢၼ်ႇၽၼ်းၵႃႈၼႂ်းတူၼ်ႈၼၢမ်တင်းလၢႆ။-
ၵူၼ်းမိူင်း ယုတႃႉ၊ ဢိၵ်ႇတင်းၵူၼ်းဝဵင်း ယေႇရုသလႅမ်ႇ၊ ၶဝ်႟။ ဢွၼ်ၵၼ်ၶၢမ်ႇဢဝ်မၢင်ႇၵလႃႇတၢင်းဢၼ်ပၢတ်ႇပၢႆၼင်ပုၼ်ႈ ထႃႇဝရႃႉၽြႃး၊ လႄႈပၢတ်ႇပၢႆၼင်ႁူဝ်ၸႂ်သူပႅတ်ႈတႃႉ။ ပေႃးဢမ်ႇၼၼ်၊တၢင်းၸႂ်မႆႈၶႂ်ႈၸႃႉၵဝ်တၵ်းဢွၵ်ႇၸိူဝ်ႉၼင်ႇၽႆးလႄႈမႆႈတေႃႇထိုင်ႁွတ်ႈထၢၼ်ႈပေႃးၽူႈလႂ်ဢမ်ႇမွတ်ႇလႆႈၵွပ်ႈပိူဝ်ႈဢၼ်တၢင်းၵမ်တၢင်းၵျၢင်ႉသူပဵၼ်ဢၼ်ဢမ်ႇလီဢမ်ႇငၢမ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ဢွၼ်ၵၼ်ၽုၺ်ႇဢွၵ်ႇမွၵ်ႇလၢတ်ႈၵႃႈၼႂ်း မိူင်း ယုတႃႉ၊ လႄႈႁွင်ႉပၢဝ်ႇႁွင်ႉသေႃႇ ၵႃႈၼႂ်းဝဵင်း ယေႇရုသလႅမ်ႇ၊ တႃႉ။ ဢွၼ်ၵၼ်မွၵ်ႇလၢတ်ႈလႄႈဝႃႈ၊ပဝ်ႇၼႄးၶရႃႇ ၸွတ်ႇတူဝ်ႈၵႂႃႇၵႃႈၼႂ်းဝၢၼ်ႈၼႂ်းမိူင်းတႃႉ။ ဢွၼ်ၵၼ်ၵိဝ်သဵင်လႄႈလၢတ်ႈဝႃႈ၊ ၸုၵၼ်တုမ်ၵၼ်လႄႈၶဝ်ႈၵႃႈၼႂ်းဝဵင်းဢၼ် မၼ်ႈၶိူင်ႇတင်းလၢႆတႃႉ။
ဢွၼ်ၵၼ်ပူၵ်းတုင်းတၢင်းဢၼ်ၵႂႃႇတီႈ လွႆ ၸိဢုၼ်ႇ၊ တႃႉ။ ဢွၼ်ၵၼ်ပၢႆႈ ႁႂ်ႈလွတ်ႈၽေးတႃႉ။ ယႃႇပေႁဵတ်းထိူင်းႁဵတ်းၼၢၼ်းယူႇ၊လွင်ႈ မၼ်းၸမ်ႉ၊ၵဝ်တၵ်းဢဝ်ၽေးဢုပၢတ်ႈ၊ ဢိၵ်ႇတင်းတၢင်းဢၼ်လုဢၼ်လႅဝ်ဢၼ် ယႂ်ႇၼႃႇလူင်လၢင်ၼၼ်ႉလုၵ်ႉသေၵႃႈတီႈ ၼႃႈတၢင်းႁွင်ႇမႃးဢေႃႈ။
သၢင်ႇသီႈဢွၵ်ႇသေၵႃႈၼႂ်းယုမ်းတီႈယူႇမၼ်း မႃးယဝ်ႉ။ ၵေႃႉဢၼ်ယႃႉၵူၼ်းၵူႈၸိူဝ်ႉၵူႈမဵဝ်း ႁႂ်ႈလႆႈလုလႅဝ်ပႅတ်ႈၼၼ်ႉ၊ ယင်းတိုၵ်ႉမႃးၸွမ်းတၢင်းယူႇဢေႃႈ။ မၼ်းဢွၵ်ႇသေၵႃႈၼႂ်းတီႈယူႇမၼ်းမႃးႁႂ်ႈလႆႈႁဵတ်းႁႂ်ႈမိူင်းမႂ်းပဵၼ်တီႈဢၼ်သဵတ်ႇၵူၼ်းယဵၼ်ၵူၼ်းလႄႈ ႁႂ်ႈဝဵင်းမႂ်းတၵ်းလႆႈလုလႅဝ်တေႃႇထိုင်ႁွတ်ႈ ထၢၼ်ႈပေႃးဢမ်ႇမီးၵူၼ်းလႃးလႃးဢေႃႈ။
ၵွပ်ႈပိူဝ်ႈလွင်ႈၼႆႉလႄႈဢွၼ်ၵၼ်ဢဝ်ၶူဝ်းၼင်ပေႃ ၼုင်ႈယူႇသေလႄႈၶၢင်းၶီၶၢင်းၽၢၼ်ႁွင်ႉႁႆႈႁွင်ႉသႅၼ်ႇတႃႉ။ လွင်ႈမၼ်းၸမ်ႉ၊တၢင်းၸႂ်မႆႈၶႂ်ႈၸႃႉ ထႃႇဝရႃႉၽြႃး၊ ဢၼ်ႁၢဝ်ႈၵျၢမ်းၼႃႇၼၼ်ႉဢမ်ႇလႆႈ ဝၢႆႇၶိုၼ်းသေၵႃႈတီႈႁဝ်း။
“မိုဝ်ႉဝၼ်းၼၼ်ႉၶုၼ်ႁေႃၶမ်းဢိၵ်ႇတင်းမူးမၢတ်ႈၽွင်းမိူင်းတင်းလၢႆတၵ်းဢွၼ်ၵၼ်ၸႂ်လုလႄႈယဵၸ်ႈပရေႃးႁဵၵ်ႈ တင်းလၢႆတၵ်းမီးတၢင်းဢၼ်မဝ်းမိင်းၵႂၢင်ၸႂ်ယုင်ႈၸႂ်ယူႇသေလႄႈပရေႃးၽႅတ်ႈ တင်းလၢႆတၵ်းမီးတၢင်းဢၼ်တူၵ်းၸႂ်ဢၢမ်းၼႃႇယူႇဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
မိူဝ်ႈၼၼ်ႉၵဝ်လၢတ်ႈလႄႈဝႃႈ၊ “ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တီႈၶႃႈ၊ၸဝ်ႈႁဝ်းပႅတ်ႉလႅၼ်ၵူၼ်းၸိူဝ်းၼႆႉ၊ဢိၵ်ႇတင်းၵူၼ်းဝဵင်း ယေႇရုသလႅမ်ႇ၊ တင်းလၢႆၼႃႇလူင်လၢင်ၼႂ်းလွင်ႈဢၼ်ၸဝ်ႈႁဝ်းမီးဢမိင်ႉလႄႈဝႃႈ၊သူတၵ်းဢွၼ်ၵၼ်မီးတၢင်းဢၼ်ၼိမ်လီယူႇဢေႃႈ၊ဝႃႈၼင်ႇၼႆသေၵေႃႈ လၢပ်ႇၼၼ်ႉမီးယူႇၵႃႈၼိူဝ်ၶေႃးၶဝ်ဝႆႉယဝ်ႉၶႃႈဢေႃႈ၊” ဝႃႈၼင်ႇၼႆဢေႃႈ။
ၶိင်ႇမိူဝ်ႈၼၼ်ႉတၵ်းလႆႈလၢတ်ႈတီႈၵူၼ်းၸိူဝ်းၼႆႉ၊ဢိၵ်ႇတင်းတီႈၵူၼ်းဝဵင်း ယေႇရုသလႅမ်ႇ၊ တင်းလၢႆလႄႈဝႃႈၸမ်ႉ၊လူမ်းဢၼ်မႆႈဢၼ်ႁွၼ်ႉၼၼ်ႉတၵ်းလုၵ်ႉသေၵႃႈတီႈဢၼ်သုင်တင်းလၢႆၵႃႈၼႂ်းထိူၼ်ႇၼၼ်ႉမႃးၸူးၵႃႈတီႈၵူၼ်းမဵဝ်းၵဝ်ဢၼ်ယၢၵ်ႈၽၢၼ်တုၵ်ႉၶႃႉလႄႈလူမ်းပုၼ်ႈတၵ်းထူဝ်းတၵ်းထွင်းႁႂ်ႈမူတ်းလီသႂ်လီဢမ်ႇၸႂ်ႈ။-
လူမ်းဢၼ်ႁႅင်းယႂ်ႇၼႃႇသေၼၼ်ႉတၵ်းထူဝ်းမႃးႁႂ်ႈဢလူဝ်ႇၵဝ်ထၢၼ်ႈပေႃးလႆႈပျေႉၸုမ်ႇဢေႃႈ။ တေႃႈလဵဝ်ၼႆႉတူဝ်ၵဝ်တၵ်းၸႅတ်ႈထၢမ်ၸီႇယၢင်ႇၸွမ်းၼင်ႇတြႃးတီႈၶဝ်ဢေႃႈ။
တူၺ်းလူး၊ၶုၼ်ၼၼ်ႉတၵ်းမႃးမိူၼ်ၸိူဝ်ႉၼင်ႇၽႃႉၽူၼ်၊လေႃႉရထႃးမၼ်းၸိူဝ်းၼၼ်ႉတၵ်းပဵၼ်ၸိူဝ်ႉၼင်ႇလူမ်းၽိဝ်ႁုင်ဢေႃႈ။ မႃႉမၼ်းၸိူဝ်းၼၼ်ႉၶၼ်ၽႂ်းလိူဝ်တွၼ်းၼႃႇသေၼူၵ်ႉၶၢင်ႇလေႃႉဢေႃႈ။ ႁဝ်းမီးဢႃႉမၢင်ႇၵလႃႇလႄႈႁဝ်းႁွတ်ႈထိုင်တၢင်းလုတၢင်းလႅဝ်ယဝ်ႉ။
ဢူဝ်း၊ဝဵင်း ယေႇရုသလႅမ်ႇ၊ ႟။ သုၵ်ႈပွတ်ႈႁူဝ်ၸႂ်မႂ်းႁႂ်ႈမူတ်းၸၢင်ႇလႄႈၵၢင်းလွတ်ႈတင်းတုၸရိူၵ်ႈဢပျတ်ႈတႃႉ။ ပေႃးႁဵတ်းၸိူဝ်ႉၼင်ႇၼၼ်ၸင်ႇ၊မႂ်းတၵ်းႁွတ်ႈထိုင်တၢင်းဢၼ်ၵႄႇသႄႇၶျွတ်ႈဢဝ်ဢေႃႈ။ တၢင်းၵျၢမ်ႇတၢင်းပွင်မႂ်းဢၼ်ႁၢႆႉမိူၵ်ႈၸိူဝ်းၼၼ်ႉတၵ်းတႄႇယူႇၵႃႈၼႂ်းမႂ်းႁိုင်ၵႃႈႁိုဝ်။
သဵင်ဢၼ်မွၵ်ႇလၢတ်ႈလုၵ်ႉသေၵႃႈတီႈမိူင်း တၢၼ်ႇ၊ မႃးလႄႈသဵင်ႁွင်ႉပၢဝ်ႇႁွင်ႉလၢတ်ႈလွင်ႈတၢင်းဢၼ်တုၵ်ႉၶႃႉဢွၵ်ႇမႃးသေၵႃႈၼိူဝ်ႁၢၼ်ႉလွႆ ဢေႇၽရိမ်ႇ၊ ဢေႃႈ။-
ဢွၼ်ၵၼ်မွၵ်ႇလၢတ်ႈသတၢင်းသဵင်ၶၢဝ်ႇတီႈၵူၼ်းၵူႈၸိူဝ်ႉၵူႈမဵဝ်းတႃႉ။ ဢွၼ်ၵၼ်ႁွင်ႉသေႃႇႁွင်ႉပၢဝ်ႇႁႂ်ႈၶတ်းၵၼ်တင်းဝဵင်း ယေႇရုသလႅမ်ႇ၊ တႃႉ။ ရၢၼ်ႇသူႇတင်းလၢႆတၵ်းဢွၼ်ၵၼ်လုၵ်ႉသေၵႃႈတီႈမိူင်းဢၼ်ၵႆမႃးလႄႈႁွင်ႉသႅၼ်ႇလႄႈၶတ်းၵၼ်တင်းဝဵင်း ယုတႃႉ၊ တင်းလၢႆဢေႃႈ။-
ၶဝ်ဢွၼ်ၵၼ်လွမ်ႉလဵပ်ႈႁွပ်ႈဝႆႉမိူၼ်ၸိူဝ်ႉၼင်ႇၶဝ်ၸိူဝ်းဢၼ်ပႂ်ႉႁႆႈပႂ်ႉၼႃးၼၼ်ႉဢေႃႈ။ လွင်ႈမၼ်းၸမ်ႉ၊မိူင်းၼၼ်ႉလုၵ်ႉၽိုၼ်ႉၶတ်းၶႅင်ႇၵၼ်တင်းၵဝ်ယဝ်ႉ၊ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
သဵၼ်ႈတၢင်းဢၼ်မႂ်းၸွမ်း၊ဢိၵ်ႇတင်းတၢင်းၵမ်တၢင်းၵျၢင်ႉဢၼ်မႂ်းၵမ်ၵျၢင်ႉၸိူဝ်းၼၼ်ႉႁႂ်ႈလွင်ႈတၢင်းၸိူဝ်းၼႆႉတူၵ်းႁွတ်ႈၵႃႈၼိူဝ်မႂ်းယဝ်ႉ။ ဢၼ်ၸိူဝ်းၼႆႉပဵၼ်ဢၵျူဝ်းတၢင်းဢၼ်ႁၢႆႉဢၼ်ယုတ်ႈမႂ်းလႄႈပဵၼ်ဢၼ်ၶူမ်ဢၼ်ၽဵတ်းႁႂ်ႈၸႂ်မႂ်းလႆႈၶိုၼ်ႈလႆႈမူၺ်ႈဢေႃႈ။
တၢင်းတုၵ်ႉၶႃႉႁူဝ်ၸႂ်ၵဝ်႟။ တၢင်းတုၵ်ႉၶႃႉႁူဝ်ၸႂ်ၵဝ်႟။ ပဵမ်ႉႁူဝ်ၸႂ်ၵဝ်ၼႆႉၸဵပ်းၼႃႇလႄႈ ႁူဝ်ၸႂ်ၵဝ်တွတ်ႇယူႇႁႅင်းယႂ်ႇႁႅင်းလူင်ဢေႃႈ။ ၵဝ်ဢမ်ႇယူႇတဵတ်ႇတဵတ်ႇလႆႈ။ လွင်ႈမၼ်းၸမ်ႉ၊ဝိၺိၺ်ႇၵဝ်႟။ ၵဝ်လႆႈငိၼ်း သဵင်ပဝ်ႇၼႄးၶရႃႇ၊ဢိၵ်ႇတင်းသဵင် တိုၵ်းသိုၵ်းဢေႃႈ။
ဢႃႉမၢင်ႇၵလႃႇၽေးဢုပၢတ်ႈဢၼ်ၼိုင်ႈယဝ်ႉဢၼ်ၼိုင်ႈတၵ်းမႃးၸွမ်းၵၼ်ဢေႃႈ။ လုလႅဝ်ၵႂႃႇတင်းဝၢၼ်ႈတင်းဝဵင်းယဝ်ႉ။ သုမ်ႉထဵင်ၵဝ်ၸိူဝ်းၼၼ်ႉၵိုင်ႉၵၢင်ႉလုလႅဝ်ၵႂႃႇ ၵမ်းလဵဝ်ယဝ်ႉ။ ၽႃႈၵင်ႈၵဝ်ၸိူဝ်းၼၼ်ႉလုလႅဝ်ၵႂႃႇၼႂ်းၸူဝ်ႈ ၵမ်းဢွၼ်ႇၼိုင်ႈၵူၺ်းဢေႃႈ။
ၵဝ်တၵ်းလႆႈတူၺ်းႁၼ်တုင်းလႄႈငိၼ်းသဵင် ၼႄးၶရႃႇယူႇၶိင်ႇၵႃႇလႃႉႁိုင်ၵႃႈႁိုဝ်။
ထႃႇဝရႃႉၽြႃး၊ လၢတ်ႈဝႃႈ၊ “ၵူၼ်းၵဝ် တင်းလၢႆၼၼ်ႉပဵၼ်ၶဝ်ၸိူဝ်းဢၼ် ငိူဝ်ႈငႃႉလႄႈဢမ်ႇႁုၸၵ်းၵဝ်။ ၶဝ်ပဵၼ်လုၵ်ႈဢွၼ်ႇဢၼ်ႁၢႆႉမိူၵ်ႈလႄႈ ဢမ်ႇမီးၺၢၼ်ႇတၢင်းႁု။ ၶဝ်ဢွၼ်ၵၼ်လၵ်းလႅမ်ၼႂ်းလွင်ႈတၢင်းဢၼ် ႁဵတ်းဢမ်ႇလီဢမ်ႇငၢမ်းၵူၺ်းဢေႃႈ။ ၶဝ်ဢမ်ႇႁုလွင်ႈတၢင်းဢၼ်တေလႆႈႁဵတ်း ဢၼ်လီဢၼ်ငၢမ်း၊” ဝႃႈၼင်ႇၼႆဢေႃႈ။
ၵဝ်လူတူၺ်းလိၼ်မိူင်းလႄႈမၼ်းဢမ်ႇမီးႁၢင်ႈၽၢင်၊ပဵၼ်တင်းဢၼ်ပဝ်ႇလၢပ်ႈဝႆႉဢေႃႈ။ ၽႃႉၵၢင်ႁၢဝ်ၵေႃႈၵဝ်လူတူၺ်းလႄႈ မၼ်းဢမ်ႇမီးဢၼ်လႅင်း။
လွႆတင်းလၢႆၵေႃႈၵဝ်လူတူၺ်းလႄႈၶဝ် သၼ်ႇဝႆယူႇဢေႃႈ။ ၵုင်းလွႆၵႃႈမီးၵေႃႈတူင်ႉၼိုင်ယူႇဢေႃႈ။
ၵဝ်လူတူၺ်းလႄႈဢမ်ႇမီးၵူၼ်းလႃးလႃး။ ၼူၵ်ႉၼိူဝ်ၽႃႉၵၢင်ႁၢဝ်ၵႃႈမီးဢွၼ်ၵၼ် မိၼ်ဢွၵ်ႇပၢႆႈၵႂႃႇယဝ်ႉ။
ၵဝ်လူတူၺ်းလႄႈပၢင်ႇပဵင်းဢၼ်ပျေႉၸုမ်ႇဝႆႉတင်းမၢၵ်ႇတင်းႁူင်းၼၼ်ႉပဵၼ်ထိူၼ်ႇလႅင်ႉၵႂႃႇယဝ်ႉ။ ဝဵင်းမၼ်းၵႃႈမီးပဵၼ်ဢၼ်ၵိူၼ်ႇပင်းလုလႅဝ် ၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢိၵ်ႇတင်း ၵႃႈတီႈၽၢႆႇၼႃႈတၢင်းၸႂ်မႆႈၶႂ်ႈၸႃႉမၼ်းၸဝ်ႈဢၼ်ႁႅင်းယႂ်ႇၼႃႇၼၼ်ႉဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “မိူင်းတင်းမိူင်း တၵ်းပဵၼ်တၢင်းဢၼ်လုလႅဝ်ၵႂႃႇဢေႃႈ။ ၵူၺ်းၵႃႈ၊ၵဝ်တၵ်းဢမ်ႇႁဵတ်းႁႂ်ႈလုလႅဝ် ႁၢႆလၢႆပႅတ်ႈမူတ်းမူတ်းသဵင်ႈသဵင်ႈ။
ပိူဝ်ႈၼႆလႄႈလိၼ်မိူင်းတၵ်းၶၢင်းၶီၶၢင်းၽၢၼ်လႄႈၽႃႉၵၢင်ႁၢဝ်တၵ်းလမ်မိုတ်ႈၵႂႃႇဢေႃႈ။ ၵဝ်လၢတ်ႈယဝ်ႉယဝ်ႉ။ ၵဝ်မီးတၢင်းၵျၢမ်ႇ တၢင်းပွင်ယဝ်ႉယဝ်ႉ။ ၵဝ်ဢမ်ႇမီးတၢင်းဢၼ်ပိၼ်ႇၸႂ်လႄႈ တၵ်းတေဢမ်ႇသုတ်ႉၶိုၼ်းႁူၼ်ၶိုၼ်း၊” ဝႃႈၼင်ႇၼႆဢေႃႈ။
ၵွပ်ႈပိူဝ်ႈသဵင်ဢၼ်ၵူၼ်းသိုၵ်းၶီႇမႃႉ၊ဢိၵ်ႇတင်းၵူၼ်းသိုၵ်းဢၼ်ယိပ်းၵၢင်ႇၼၼ်ႉ၊ ႁွင်ႉသႅၼ်ႇဢူၼ်ဢဵၼ်မေႃးမႄးလႄႈ ၵူၼ်းဝဵင်းတင်းသဵင်ႈတင်းလူင်တၵ်း ဢွၼ်ၵၼ်ဢွၵ်ႇပၢႆႈဢေႃႈ။ ၶဝ်ၼၼ်ႉတၵ်းၶဝ်ႈၵႂႃႇၸူးၵႃႈတီႈယုမ်း တီႈထိူၼ်ႇသေလႄႈ ၶိုၼ်ႈၵႃႈၼိူဝ် မၢၵ်ႇႁိၼ်မၢၵ်ႇၽႃဢေႃႈ။ ဝဵင်းၵႃႈမီးလႆႈၶၢမ်ႇတၢင်းဢၼ်ၸုၼ်ႉပႅတ်ႈ ယဝ်ႉလႄႈဢမ်ႇမီးၵေႃႉဢၼ်ယူႇဢၼ်သဝ်း ၵႃႈၼႂ်းမၼ်းသေၵေႃႉသေၵူၼ်း။
ၵေႃႉဢၼ်လႆႈၶၢမ်ႇတၢင်းဢၼ်ၸုၼ်ႉပႅတ်ႈၼႆႉ႟။ တၢင်းဢၼ်မႂ်းၼုင်ႈၶူဝ်းလႅင်ၵမ်ႇ၊တၢင်းဢၼ် မႂ်းဢဝ်ၶိူင်ႈၶမ်းသေလႄႈႁၢင်ႈၶိူင်ႈ တၢင်းဢၼ်မႂ်းႁဵတ်းႁၢင်ႈၵႃႈတီႈမၢၵ်ႇတႃမႂ်းၼၼ်ႉမီးဢၵျူဝ်းၵႃႈသင်။ လွင်ႈတၢင်းဢၼ်ႁၢင်ႈလီႁၢင်ႈငၢမ်းမႂ်းၸိူဝ်းၼၼ်ႉ ပဵၼ်ဢၼ်လၢႆလၢႆလွၵ်ႇလွၵ်ႇဢမ်ႇပွင်ႇလွင်ႈၵႃႈသင်ဢေႃႈ။ ၸုႁၵ်ႉမႂ်းၸိူဝ်းၼၼ်ႉဢွၼ်ၵၼ်ၸုၼ်ႉပႅတ်ႈမႂ်းလႄႈၵျၢမ်ႇႁႃႁႂ်ႈလႆႈဢဝ်ဢသၢၵ်ႈမႂ်းတၢႆဢေႃႈ။
ၵဝ်လႆႈငိၼ်းသဵင်ဢၼ်မိူၼ်ၸိူဝ်ႉၼင်ႇသဵင် မႄႈယိင်းဢၼ်ၵိူတ်ႇလဵင်ႉလုၵ်ႈၼၼ်ႉ၊ သဵင်ဝူၺ်ႇတၼႃႇဢၼ်မိူၼ်ၸိူဝ်ႉၼင်ႇသဵင်မႄႈယိင်း ဢၼ်ၵိူတ်ႇလဵင်ႉလုၵ်ႈႁူဝ်သၢဝ်ဢၼ်ဝႃႈ၊ သဵင်ႁွင်ႉလုၵ်ႈယိင်း ၸိဢုၼ်ႇ၊ ၼၼ်ႉ ထၢၼ်ႈပေႃးၸႂ်တေၶၢတ်ႇ၊ဢႃႈမိုဝ်းမၼ်း သေလႄႈလၢတ်ႈဝႃႈ၊ “ၵဝ်မီးဢႃႉမၢင်ႇၵလႃႇဢေႃႈ။ ၸႂ်ၵဝ်ႁိူဝ်ႉၼူၼ်း ႁႅင်းဢူၼ်ႈၼႃႇၵႃႈတီႈၽၢႆႇၼႃႈၵူၼ်း ဢၼ်ဢဝ်ပိူၼ်ႈတၢႆၸိူဝ်းၼၼ်ႉယူႇဢေႃႈ၊” ဝႃႈၼင်ႇၼႆဢေႃႈ။
ဢွၼ်ၵၼ်ၶုၼ်ႇလႅၼ်ႈၵႂႃႇလႅၼ်ႈမႃးၵႃႈၼႂ်းသဵၼ်ႈတၢင်းဝဵင်း ယေႇရုသလႅမ်ႇ၊ တင်းလၢႆလႄႈ လူတူၺ်းလႄႈႁႃဢဝ်ၵႃႈတီႈဢၼ်ပၢင်ႇဝၢင်း ၼႂ်းဝဵင်းၸိူဝ်းၼၼ်ႉႁႂ်ႈလႆႈထူပ်းႁၼ် ၵူၼ်းဝဵင်းဢၼ်ၵမ်ၵျၢင်ႉၸွမ်းၼင်ႇတြႃး၊ ဢၼ်ပႂ်ႉသဵတ်ႈၸႃႇသေၵေႃႉသေၵူၼ်းၼၼ်ႉ ၸွင်ႇမီးႁိုဝ်း။ ပေႃးမီးၸိုင်၊ၵဝ်တၵ်းပွႆႇလွတ်ႈ ဢပျတ်ႈဝဵင်း ယေႇရုသလႅမ်ႇ၊ ဢေႃႈ။
ပိၵ်ႉသမ်ႉၶဝ်တိူင်ႇၵၢဝ်ႇဝႆႉၵတိလႄႈလၢတ်ႈဝႃႈ၊ “ၸူဝ်ႈဢၼ် ထႃႇဝရႃႉၽြႃး၊ ယင်း ဢသၢၵ်ႈလိပ်းယူႇၼၼ်ႉ၊” ၶဝ်ၵေႃႈယင်းဢွၼ်ၵၼ်တိူင်ႇၵၢဝ်ႇဝႆႉၵတိ ဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉဢေႃႈ။
ထႃႇဝရႃႉၽြႃး၊ တီႈၶႃႈ။ မၢၵ်ႇတႃၸဝ်ႈႁဝ်း ၶႂ်ႈလွမ်ၶႂ်ႈတူၺ်းသဵတ်ႈၸႃႇတြႃးယူႇ ဢမ်ႇၸႂ်ႈတီႈၶႃႈႁိုဝ်း။ ပိၵ်ႉသမ်ႉၸဝ်ႈႁဝ်း ပၼ်တၢမ်ႇတီႈၶဝ်သေၵေႃႈ၊ ၶဝ်ဢမ်ႇမီးတၢင်းဢၼ်ၸႂ်ႁဵဝ်ႇၸႂ်ၸွပ်ႈတီႈၶႃႈ။ ပိၵ်ႉသမ်ႉၸဝ်ႈႁဝ်းယႃႉၶဝ်ပႅတ်ႈသေၵေႃႈ ၶဝ်ဢွၼ်ၵၼ်ထဵင်ပႅတ်ႈတၢင်းဢၼ်သင်ႇသွၼ်သုင်းမႃႉတီႈၶႃႈယဝ်ႉ။ ၶဝ်ဢွၼ်ၵၼ်ဝႆႉၼႃႈဢၼ်ၵႅၼ်ႇၶႅင်ၼႃႇသေ မၢၵ်ႇႁိၼ်တီႈၶႃႈယဝ်ႉ။ ၶဝ်ဢွၼ်ၵၼ် တွပ်ႇထဵင်တၢင်းဢၼ်ၶဝ်တၵ်းလႆႈ ၶိုၼ်းမႃးၼၼ်ႉတီႈၶႃႈယဝ်ႉ။
ပိူဝ်ႈၼႆလႄႈၵဝ်လၢတ်ႈလႄႈဝႃႈ၊ “ၶဝ်ၼႆႉ ပဵၼ်ၵူၼ်းယၢၵ်ႈၵူၼ်းၽၢၼ်ၵူၺ်းလႄႈ ဢမ်ႇမီးၺၢၼ်ႇတၢင်းႁု။ ၵွပ်ႈပိူဝ်ႈဢၼ်ၶဝ်ဢမ်ႇႁုသဵၼ်ႈတၢင်း ထႃႇဝရႃႉၽြႃး၊ ဢိၵ်ႇတင်းပိင်းၺၢပ်ႈ တြႃး၊ၽြႃးပဵၼ်ၸဝ်ႈၼၼ်ႉဢေႃႈ။
ၵဝ်တၵ်းၵႂႃႇၸူးၵႃႈတီႈၵူၼ်းယႂ်ႇၵူၼ်းလူင် တင်းလၢႆလႄႈလၢတ်ႈၶဝ်၊ၵွပ်ႈပိူဝ်ႈၶဝ်ႁု သဵၼ်ႈတၢင်း ထႃႇဝရႃႉၽြႃး၊ ဢိၵ်ႇတင်းပိင်းၺၢပ်ႈတြႃးၽြႃးပဵၼ်ၸဝ်ႈ ၼၼ်ႉဢေႃႈ၊” ဝႃႈၼင်ႇၼႆဢေႃႈ။ ၵူၺ်းၵႃႈ၊ၶဝ်ၼၼ်ႉမိူၼ်မိူၼ်ၵၼ်လႄႈ ႁၵ်းၵၢၼ်းမၼ်းၸဝ်ႈပႅတ်ႈသေယဝ်ႉ၊ တႅပ်းတၢင်းဢၼ်မၼ်းၸဝ်ႈမတ်ႉၽုၵ်ႇဝႆႉ ၸိူဝ်းၼၼ်ႉၶၢတ်ႇပႅတ်ႈယဝ်ႉ။
ပိူဝ်ႈၼႆလႄႈသၢင်ႇသီႈဢၼ်လုၵ်ႉသေၵႃႈၼႂ်းထိူၼ်ႇမႃးၼၼ်ႉတၵ်းဢဝ်ၶဝ်တၢႆဢေႃႈ။ မႃထိူၼ်ႇဢၼ်လုၵ်ႉသေၵႃႈၼႂ်းထိူၼ်ႇလႅင်ႉ မႃးၼၼ်ႉတၵ်းယႃႉႁႂ်ႈၶဝ်လုလႅဝ်ဢေႃႈ။ သိူဝ်ၸုမ်ႈတၵ်းပႂ်ႉဝဵင်းၶဝ်တင်းလၢႆယူႇလႄႈ ၶဝ်ၵႃႈဢၼ်ဢွၵ်ႇဝဵင်းၵႂႃႇၸိူဝ်းၼၼ်ႉ တၵ်းလႆႈၶၢမ်ႇတၢင်းဢၼ်ၶူပ်းၶၢတ်ႇပဵၼ်ပွတ်း ပဵၼ်တွၼ်ႈၵႂႃႇဢေႃႈ။ လွင်ႈမၼ်းၸမ်ႉ၊ဢပျတ်ႈဢၼ်ၶဝ်ၽိတ်းပိူင်ႈ ၸိူဝ်းၼၼ်ႉၼမ်ၼႃႇလႄႈတၢင်းဢၼ် ၶဝ်ၽွၵ်ႈပျၢၼ်ႇၶိုၼ်းၸိူဝ်းၼၼ်ႉယႂ်ႇၼႃႇဢေႃႈ။
“ၵဝ်တၵ်းပွႆႇဝၢင်းၶႂၢင်းလွတ်ႈမႂ်းလႆႈၸိူဝ်ႉၼင်ႇႁိုဝ်။ လုၵ်ႈမႂ်းလၢင်းမႂ်းဢွၼ်ၵၼ်ၸုၼ်ႉပႅတ်ႈၵဝ်လႄႈ ဢဝ်ၶဝ်ၸိူဝ်းဢၼ်ဢမ်ႇၸႂ်ႈၽြႃးၼၼ်ႉ တိူင်ႇဝႃႈၵိၼ်ႇဝႃႈယဝ်ႉ။ မိူဝ်ႈဢၼ်ၵဝ် လဵင်ႉၶဝ်ဢိမ်ႇဢိမ်ႇတဵမ်တဵမ်ၼၼ်ႉ၊ ၶဝ်ၽိတ်းပိူင်ႈလူၺ်ႈတၢင်းဢၼ်ႁဵတ်းမေႇထုင်ႇ ဢၼ်ဢမ်ႇတြႃးလႄႈပဵၼ်မုၵ်ႉပဵၼ်ၸိူဝ်း ယူႇၵႃႈၼႂ်းႁိူၼ်းမႄႈမွၵ်ႇယႃႈယဝ်ႉ။
ၶဝ်ပဵၼ်ၸိူဝ်ႉၼင်ႇမႃႉဢၼ်ၵိၼ်ဢိမ်ႇၵိၼ်တဵမ်ၼၼ်ႉလႄႈဢွၼ်ၵၼ်ႁွင်ႉႁႄႇၸွမ်းမေးၵူၼ်း ႁိူၼ်းၸမ်ၵၼ်ၼၼ်ႉႁင်းၽႂ်ႁင်းမၼ်းဢေႃႈ။
ၵဝ်ဢမ်ႇထုၵ်ႇလီပၼ်တၢမ်ႇတီႈၶဝ်ၵွပ်ႈ လွင်ႈတၢင်းၸိူဝ်းၼႆႉၼၼ်ႉႁိုဝ်း။ ၵဝ်ဢမ်ႇထုၵ်ႇလီတွပ်ႇတႅၼ်းပၼ်တၢမ်ႇတီႈ ၵူၼ်းမဵဝ်းၸိူဝ်ႉၼင်ႇၼႆၼၼ်ႉႁိုဝ်း၊ ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ဢွၼ်ၵၼ်ၵႂႃႇယႃႉပႅတ်ႈသူၼ်မၢၵ်ႇၸပိတ်ႉ ၶဝ်တႃႉ။ ၵူၺ်းၵႃႈ၊ယႃႇပေႁဵတ်းႁႂ်ႈ လုလႅဝ်မူတ်းမူတ်းသဵင်ႈသဵင်ႈ။ ဢွၼ်ၵၼ်ပႄႇၽဵဝ်ႈၵိင်ႇမၼ်းၶႃႈမၼ်းတင်းလၢႆပႅတ်ႈတႃႉ။ ၵွပ်ႈၶဝ်ၸိူဝ်းၼၼ်ႉဢမ်ႇၸၢပ်ႈသႅင်ႇၵၼ်တင်း ထႃႇဝရႃႉၽြႃး၊ လႄႈ
မဵဝ်း ဢိသရေး၊ ဢိၵ်ႇတင်းမဵဝ်း ယုတႃႉ၊ ဢွၼ်ၵၼ်သဵတ်ႈၸႃႇလုတေႃႇၵဝ် လုမ်းလုမ်းၼၼ်ႉယဝ်ႉ၊” ဝႃႈၼင်ႇၼႆ ထႃႇဝရႃႉၽြႃး၊ မီးဢမိင်ႉဢေႃႈ။
ၶဝ်ဢွၼ်ၵၼ်လၢတ်ႈဢမ်ႇၸိုဝ်ႈဢမ်ႇၸႂ်ႈလွင်ႈ ထႃႇဝရႃႉၽြႃး၊ လႄႈဝႃႈ၊ “မၼ်းၸဝ်ႈတေဢမ်ႇႁဵတ်းၵႃႈသင်။ ၽေးဢုပၢတ်ႈမဵဝ်းလႂ်ၵေႃႈဢမ်ႇလႆႈႁွတ်ႈထိုင်ၵႃႈၼိူဝ်ႁဝ်း။ ႁဝ်းတေဢမ်ႇလႆႈထူပ်းၽေးလၢပ်ႇၽေးလႅဝ်း၊ဢိၵ်ႇတင်းၽေးတၢင်းဢၼ်ဢိုပ်းဢၼ်ယၢၵ်ႈ။-
ပရေႃးၽႅတ်ႈ ၸိူဝ်းၼၼ်ႉဢမ်ႇပွင်ႇလွင်ႈၵႃႈသင်၊ပဵၼ်လူမ်းၵူၺ်းလႄႈၼုၵ်ႈၵပၢတ်ႈၸဝ်ႈၵေႃႈဢမ်ႇမီးၵႃႈၼႂ်းၶဝ်။ ႁႂ်ႈဢၼ်ၶဝ်လၢတ်ႈၼၼ်ႉပဵၼ်ၵႃႈတီႈၶဝ်သေၵမ်း၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ ထႃႇဝရႃႉၽြႃး၊ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ “ၵွပ်ႈပိူဝ်ႈၶဝ်လၢတ်ႈၵႂၢမ်းဢၼ်ၼႆႉလႄႈ၊ၵဝ်တၵ်းႁႂ်ႈၵႂၢမ်းၵဝ်ပဵၼ်ၽႆးၵႃႈၼႂ်းသူပ်းမႂ်း၊ႁႂ်ႈၵူၼ်းမဵဝ်းၼႆႉပဵၼ်ၽိုၼ်းလႄႈၽႆးၼၼ်ႉတၵ်းလႆႈမႆႈၶဝ်ဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “မဵဝ်း ဢိသရေး၊ ႟။ ၵဝ်တၵ်းဢဝ်ၵူၼ်းမဵဝ်းၼိုင်ႈသေၵႃႈတီႈဢၼ်ၵႆမႃးပုၼ်ႈဢၼ်တၵ်းတိုၵ်းတေႃးမႂ်းဢေႃႈ။ တၵ်းပဵၼ်ၵူၼ်းမဵဝ်းဢၼ်ႁႅင်းယႂ်ႇ၊ၵူၼ်းမဵဝ်းဢၼ်မီးမႃးမိူဝ်ႈၵွၼ်ႇဢွၼ်ၼႆႉ၊မဵဝ်းဢၼ်မႂ်းဢမ်ႇႁုၵႂၢမ်းၶဝ်၊ဢမ်ႇႁုလွင်ႈဢၼ်ၶဝ်လၢတ်ႈၶဝ်ဝႃႈၼၼ်ႉဢေႃႈ။-
မူၵ်ႇပိုၼ်ၵၢင်ႇၶဝ်ၼၼ်ႉပဵၼ်ၶုမ်ပႃႇႁဵဝ်ႈဢၼ်ၽုၺ်ႇဝႆႉလႄႈၶဝ်ၵႃႈမီးၼၼ်ႉဢွၼ်ၵၼ်ပဵၼ်ၵူၼ်းသိုၵ်းဢၼ်ႁႅင်းယႂ်ႇၼႃႇဢေႃႈ။-
ၶဝ်ၼၼ်ႉတၵ်းဢွၼ်ၵၼ်ၵိၼ်မၢၵ်ႇၶဝ်ႈႁူင်းၶဝ်ႈမႂ်း၊ဢိၵ်ႇတင်းတၢင်းၵိၼ်တၢင်းၶူပ်းမႂ်းဢေႃႈ။ ၶဝ်တၵ်းၵိၼ်လုၵ်ႈၸၢႆးလုၵ်ႈယိင်းမႂ်းတင်းလၢႆဢေႃႈ။ တၵ်းဢွၼ်ၵၼ်ၵိၼ်ၽုင်သူဝ်းၽုင်ဝူဝ်းမႂ်းဢေႃႈ။ တၵ်းဢွၼ်ၵၼ်ၵိၼ်တူၼ်ႈၶိူဝ်းမၢၵ်ႇၸပိတ်ႉမႂ်း၊ဢိၵ်ႇတင်းတူၼ်ႈမၢၵ်ႇလိူဝ်ႇသၢင်းၽေႃးမႂ်းၸိူဝ်းၼၼ်ႉဢေႃႈ။ ၶဝ်တၵ်းဢွၼ်ၵၼ်ဢဝ်တင်းလၢပ်ႇလႅဝ်းလႄႈယႃႉၽဵဝ်ႈပႅတ်ႈဝဵင်းဢၼ်မၼ်ႈၶိူင်ႇဢၼ်မႂ်းသွၼ်ႈယူႇၸိူဝ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ လၢတ်ႈလႄႈဝႃႈ၊ “ၵူၺ်းၵႃႈ၊ၼႂ်းၶိင်ႇမိုဝ်ႉဝၼ်းၼၼ်ႉ၊ၵဝ်တၵ်းဢမ်ႇႁဵတ်းႁႂ်ႈသူလႆႈလုလႅဝ်ပႅတ်ႈမူတ်းမူတ်းသဵင်ႈသဵင်ႈ၊” ဝႃႈၼင်ႇၼႆဢေႃႈ။-
မိူဝ်ႈဢၼ်ၵူၼ်းမဵဝ်းမႂ်းၸိူဝ်းၼၼ်ႉထၢမ်လႄႈဝႃႈ၊ “ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်း၊ႁဵတ်းလွင်ႈတၢင်းၸိူဝ်းၼႆႉတီႈႁဝ်း၊” ဝႃႈၼင်ႇၼႆၸိုင်၊မႂ်းတၵ်းလႆႈသင်ႇလၢတ်ႈတီႈၶဝ်လႄႈဝႃႈ၊ “မိူၼ်ၸိူဝ်ႉၼင်ႇသူၸုၼ်ႉပႅတ်ႈၵဝ်လႄႈႁဵတ်းဝၢတ်ႈတီႈၽြႃးတၢင်ႇသိုင်ႇတၢင်ႇမိူင်းတင်းလၢႆၵႃႈၼႂ်းမိူင်းသူၼၼ်ႉသူတၵ်းလႆႈပွင်ႁဵတ်းၵၢၼ်ၵူၼ်းတၢင်ႇသိုင်ႇတၢင်ႇမိူင်း၊ၵႃႈၼႂ်းမိူင်းဢၼ်ဢမ်ႇၸႂ်ႈမိူင်းသူၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊သူတၵ်းလႆႈၽုၺ်ႇဢွၵ်ႇမွၵ်ႇလၢတ်ႈတီႈမဵဝ်းၸိူဝ်ႉၶိူဝ်း ယႃႇၵုပ်ႈ၊ လႄႈႁွင်ႉပၢဝ်ႇႁွင်ႉသေႃႇတီႈမိူင်း ယုတႃႉ၊ ၸမ်ႉ။-
ဢွၼ်ၵၼ်ထွမ်ႇငိၼ်းတႃႉ။ ၵူၼ်းမိူၵ်ႈလႄႈၵူၼ်းဢၼ်ဢမ်ႇမီးၺၢၼ်ႇ၊မီးမၢၵ်ႇတႃယူႇလႄႈဢမ်ႇႁၼ်၊မီးႁူယူႇလႄႈဢမ်ႇငိၼ်းၶဝ်႟။-
ထႃႇဝရႃႉၽြႃး၊ မီးဢမိင်ႉၸမ်ႉ၊ “သူဢမ်ႇဢွၼ်ၵၼ်ၵူဝ်ႁႄၵဝ်ႁိုဝ်း။ သူဢမ်ႇဢွၼ်ၵၼ်သၼ်ႇဝႆၵႃႈတီႈၽၢႆႇၼႃႈၵဝ်ႁိုဝ်း။ ၵဝ်ဢဝ်သၢႆးႁဵတ်းဢၼ်ၶၼ်ႈဢၼ်ၶႅၼ်ႈဝႆႉတီႈၼမ်ႉပၢင်ႇလၢႆႇတႃႇသေႇဢမ်ႇႁႂ်ႈပူၼ်ႉၵႂႃႇလႆႈၼၼ်ႉယဝ်ႉ။ ပိၵ်ႉသမ်ႉလႅင်းၼမ်ႉပိူပ်ႈၼမ်ႉတင်းလၢႆဢွၼ်ၵၼ်လုၵ်ႉသေၵေႃႈဢမ်ႇပႄႉဢမ်ႇၼႅင်ႇလႆႈ။ ဢွၼ်ၵၼ်ႁွင်ႉၶၢင်းသေၵေႃႈဢမ်ႇပူၼ်ႉဢမ်ႇၶၢမ်ႈမၼ်းလႆႈ။-
ၵူၺ်းၵႃႈ၊ၵူၼ်းမဵဝ်းၼႆႉႁူဝ်ၶႅင်လႄႈမီးႁူဝ်ၸႂ်ဢၼ်လုၵ်ႉၽိုၼ်ႉသေယဝ်ႉ၊ၶဝ်ဢွၼ်ၵၼ်ဢွၵ်ႇပၢႆႈပိူင်ႈတၢင်းၵႂႃႇသေၵႃႈတီႈၵဝ်ဢေႃႈ။-
ၶဝ်ဢမ်ႇလၢတ်ႈၵႃႈၼႂ်းႁူဝ်ၸႂ်ၶဝ်လႄႈဝႃႈ၊ ‘ႁဝ်းဢွၼ်ၵၼ်ၵူဝ်ႁႄ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းဢၼ်ႁႂ်ႈၽူၼ်ႁူဝ်ပီ၊ဢိၵ်ႇတင်းၽူၼ်ႁၢင်ပီတူၵ်းၼႂ်းမိူဝ်ႈဢၼ်ၶိင်ႇမၼ်းထုၵ်ႇၼၼ်ႉလႄႈပၼ်ၶိင်ႇဢၼ်သိမ်းဢဝ်မၢၵ်ႇဢဝ်ႁူင်းဢၼ်မၼ်းၸဝ်ႈၶၢၼ်းဝႆႉၼၼ်ႉတႃႉႁဝ်း၊’ ဝႃႈၼင်ႇၼႆၼၼ်ႉ။-
တုၸရိူၵ်ႈဢပျတ်ႈသူၼၼ်ႉႁႂ်ႈၵျေးၸူးၸိူဝ်းၼႆႉဝႄႈပိူင်ႈလႄႈဢပျတ်ႈသူၼၼ်ႉႁၢမ်ႈတၢပ်ႈႁႄႉၶႅၼ်တၢင်းဢၼ်လီဝႆႉယဝ်ႉ။
“ၵဝ်လႆႈထူပ်းႁၼ်ၶဝ်ၸိူဝ်းဢၼ်ႁၢႆႉမိူၵ်ႈၵႃႈၼႂ်းၵူၼ်းၵဝ်ဢေႃႈ။ ၶဝ်ႁိမ်ဢဝ်ႁူင်ႇဢဝ်ၶူဝ်းလဵင်းပိူၼ်ႈတၢင်ႇၵေႃႉဢေႃႈ။ ၶဝ်ဢွၼ်ၵၼ်ၵၢင်ႁႅဝ်ႉၵၢင်ၶိုမ်းသေလႄႈတိၺွပ်းဢဝ်ၵူၼ်းဢေႃႈ။-
ၸိူဝ်ႉၼင်ႇႁိူၼ်းၶင်ၼူၵ်ႉတဵမ်ဝႆႉတင်းၼူၵ်ႉၼၼ်ႉ ႁိူၼ်းၶဝ်ၵေႃႈတဵမ်ဝႆႉတင်းပရိယႄႇတင်းတၢင်းဢၼ်ပႅတ်ႉလႅၼ်ဢေႃႈ။ ၼင်ႇၼၼ်လႄႈၶဝ်ဢွၼ်ၵၼ်မီးႁႅင်းယႂ်ႇၽႄႈၼမ်ၵိုၼ်းမႃးလႄႈႁွတ်ႈထိုင်တၢင်းဢၼ်မၢၵ်ႈမီးဢေႃႈ။-
ၶဝ်မီးတၢင်းဢၼ်ပီးလီမၼ်းလီလႄႈၼႃႈၸိုၼ်ႈလီသႂ်လီဢေႃႈ။ ၶဝ်ႁဵတ်းတၢင်းႁၢႆႉဢမ်ႇယဝ်ႉဢမ်ႇတူဝ်ႈသေပွၵ်ႈ။ ဢမုလုၵ်ႈဢွၼ်ႇဢၼ်ဢမ်ႇမီးပေႃႈမီးမႄႈၼၼ်ႉၶဝ်ဢမ်ႇဢွၼ်ၵၼ်ၸီႇယၢင်ႇၸွမ်းၼင်ႇတြႃး။ ၶဝ်ဢမ်ႇၵႅတ်ႇၶႄႁႄႉၵင်ႈဢၶႂၢင်ႉဢယေးပုၼ်ႈၶဝ်ၸိူဝ်းဢၼ်ၸုတ်ႈဢၼ်လုတ်ႈၼၼ်ႉ။
“ၵွပ်ႈပိူဝ်ႈလွင်ႈတၢင်းၸိူဝ်းၼႆႉလႄႈၵဝ်ယင်းဢမ်ႇထုၵ်ႇလီၸီႇယၢင်ႇပၼ်တၢမ်ႇၶဝ်ႁိုဝ်း။ ၵဝ်ယင်းဢမ်ႇထုၵ်ႇလီတႅၼ်းပၼ်တၢမ်ႇတီႈၵူၼ်းမဵဝ်းၼႆႉၼၼ်ႉႁိုဝ်း။ ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။-
လွင်ႈတၢင်းဢၼ်လီၵူဝ်လႄႈလီႁင်ႈဢဵတ်ႇသဵတ်ႇၼၼ်ႉပဵၼ်မႃးၵႃႈၼႂ်းမိူင်းၸဝ်ႈဢေႃႈ။-
ပရေႃးၽႅတ်ႈ တင်းလၢႆဢွၼ်ၵၼ်ႁေႃးလၢတ်ႈဢမ်ႇၸိုဝ်ႈဢမ်ႇၸႂ်ႈလႄႈယဵၸ်ႈပရေႃးႁဵၵ်ႈ တင်းလၢႆဢွၼ်ၵၼ်ဢုပ်ႉပိူင်ႇၸွမ်းၼင်ႇပရေႃးၽႅတ်ႈတင်းလၢႆဢွၼ်ႁူဝ်ၼႄတၢင်းၼၼ်ႉဢေႃႈ။ ၵူၼ်းၵဝ်တင်းလၢႆဢွၼ်ၵၼ်ထုၵ်ႇၸႂ်ၵျိူၵ်ႈၸႂ်လွင်ႈတၢင်းၸိူဝ်ႉၼင်ႇၼၼ်ၼၼ်ႉဢေႃႈ။ ၵူၺ်းၵႃႈ၊မိူဝ်ႈထိုင်ၶိင်ႇဢၼ်သုတ်းသဵင်ႈႁွတ်ႈၽႅဝ်မႃးၼၼ်ႉၸိုင်၊သူတၵ်းဢွၼ်ၵၼ်ႁဵတ်းၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
လုၵ်ႈလၢင်းမဵဝ်း ပိၼ်ႇယႃႇမိၼ်ႇ၊ ၶဝ်႟။ ဢွၼ်ၵၼ်ဢွၵ်ႇပၢႆႈသေၵႃႈၼႂ်းဝဵင်း ယေႇရုသလႅမ်ႇ၊ ႁႂ်ႈလွတ်ႈတႃႉ။ ဢွၼ်ၵၼ်ပဝ်ႇၼႄးၶရႃႇၵႃႈၼႂ်းဝၢၼ်ႈ တေႇၵေႃႇ၊ လႄႈယုၵ်ႉၼႄလၢၵ်ႈၶၼႃႇတၢင်းဢၼ်မၢတ်ႈတွင်းလႆႈၵႃႈတီႈဝၢၼ်ႈ ပေႇႁၵ်ႉၶရိမ်ႇ၊ တႃႉ။ လွင်ႈမၼ်းၸမ်ႉ၊ၽေးဢုပၢတ်ႈဢၼ်ဝႃႈတၢင်းဢၼ်လုလႅဝ်ဢၼ်ယႂ်ႇၼႃႇၼၼ်ႉပေႃႇဢွၵ်ႇသေၵႃႈတီႈၽၢႆႇတၢင်းႁွင်ႇမႃးဢေႃႈ။-
ၵဝ်တၵ်းယႃႉၵေႃႉဢၼ်ႁၢင်ႈလီလႄႈဢူၼ်ႈလီဢွၼ်ႇလီဢၼ်ဝႃႈ၊ဝဵင်း ၸိဢုၼ်ႇ၊ ဢၼ်ပဵၼ်လုၵ်ႈယိင်းၵဝ်ၼၼ်ႉပႅတ်ႈဢေႃႈ။-
ၶဝ်ၸိူဝ်းဢၼ်လဵင်ႉသူဝ်းထိင်းသူဝ်းၼၼ်ႉတၵ်းပႃးဢဝ်ၽုင်သူဝ်းၶဝ်မႃးၸူးတီႈမၼ်းလႄႈႁဵတ်းၶတ်းၵၼ်တင်းမၼ်းဢေႃႈ။ တၵ်းႁဵတ်းသုမ်ႉထဵင်ၶဝ်လဵပ်ႈႁွပ်ႈမၼ်းလႄႈႁႂ်ႈသူဝ်းလႆႈႁႃၵိၼ်ၵႃႈတီႈဢၼ်ၶဝ်ယူႇၸိူဝ်းၼၼ်ႉဢေႃႈ။-
“ဢွၼ်ၵၼ်မႄးႁႅၼ်းႁႂ်ႈလႆႈတိုၵ်းတေႃး ၸိဢုၼ်ႇ၊ တႃႉ။ လုၵ်ႉလႄႈဢွၼ်ၵၼ်တိုၵ်းတေႃးမၼ်းၶိင်ႇၵၢင်ဝၼ်းတဵင်ႈတႃႉႁဝ်း၊” ၵူၺ်းၵႃႈ၊ၶဝ်တၵ်းလၢတ်ႈလႄႈဝႃႈ၊ “ပဵၼ်ဢၼ်ယၢပ်ႇၼႃႇလူင်လၢင်တီႈႁဝ်းဢေႃႈ။ ၵၢင်ဝၼ်းၸၢႆႉယဝ်ႉ။ ႁူမ်ႈၵွင်ႉငဝ်းၶိင်ႇႁူဝ်ၶမ်ႈပဵၼ်ဢၼ်ယၢဝ်းၼႃႇဢေႃႈ။-
လုၵ်ႉလႄႈဢွၼ်ၵၼ်တိုၵ်းတေႃးမၼ်းၶိင်ႇၵၢင်ၶိုၼ်းသေယဝ်ႉ၊ယႃႉႁေႃၶမ်းမၼ်းတင်းလၢႆပႅတ်ႈတႃႉႁဝ်း၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ “ဢွၼ်ၵၼ်ပွမ်ႈတူၼ်ႈမႆႉလူင်တင်းလၢႆတႃႉ။ ၵေႃႇတႅၼ်လိၼ်လႄႈႁဵတ်းၶတ်းၵၼ်တင်းဝဵင်း ယေႇရုသလႅမ်ႇ၊ တႃႉ။ ဝဵင်းၼႆႉပဵၼ်ဝဵင်းဢၼ်တၵ်းလႆႈပၼ်တၢမ်ႇဢပျတ်ႈလႄႈၵႃႈၼႂ်းမၼ်းၼၼ်ႉဢမ်ႇမီးၵႃႈသင်၊ၼွၵ်ႈသေတၢင်းဢၼ်ၼိၵ်ႈၸၢၵ်ႈငႅၼ်းသႄးၵူၺ်းၵူၺ်းဢေႃႈ။-
မိူၼ်ၸိူဝ်ႉၼင်ႇဢၼ်ၼမ်ႉမေႃႇႁႂ်ႈၼမ်ႉၼႂ်းမၼ်းၵတ်းယဵၼ်ၼၼ်ႉ၊ဝဵင်းၼၼ်ႉၸၢင်ႈသိမ်းပႅင်းတုၸရိူၵ်ႈတၢင်းႁၢႆႉမိူၵ်ႈၵႃႈၼႂ်းမၼ်းဢေႃႈ။ လႆႈငိၼ်းသဵင်တၢင်းဢၼ်ႁိမ်ဢဝ်ႁူင်ႇဢဝ်၊ဢိၵ်ႇတင်းတၢင်းဢၼ်ယႃႉပႅတ်ႈၽဵဝ်ႈပႅတ်ႈၵႃႈၼႂ်းမၼ်းလႄႈတၢင်းၶႆႈတၢင်းပဵၼ်၊ဢိၵ်ႇတင်းႁွႆးၸဵပ်းႁွႆးသႅပ်ႇမၼ်းၵႃႈတီႈၽၢႆႇၼႃႈၵဝ်ယူႇသေႇသေႇဢေႃႈ။-
ဝဵင်း ယေႇရုသလႅမ်ႇ၊ ႟။ မီးသတိတႃႉ။ ပေႃးဢမ်ႇၼၼ်၊ၵဝ်တၵ်းလီႁင်ႈဢဵတ်ႇသဵတ်ႇမႂ်းဢေႃႈ။ ၵဝ်တၵ်းပႄႇပႅတ်ႈမႂ်းလႄႈႁႂ်ႈပဵၼ်မိူင်းဢၼ်ဢမ်ႇမီးၵူၼ်းယူႇလႃးလႃးဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ “မိူၼ်ၸိူဝ်ႉၼင်ႇၵူၼ်းၵဵပ်းသိမ်းမၢၵ်ႇၸပိတ်ႉၵႃႈတီႈၶိူဝ်းမၼ်းၼၼ်ႉ၊ၶဝ်တၵ်းဢွၼ်ၵၼ်ၸွမ်းၵဵပ်းဢဝ်ဢၼ်ၵိုတ်းဢၼ်ၵျၢၼ်ႇတီႈမဵဝ်း ဢိသရေး၊ မူတ်းမူတ်းသဵင်ႈသဵင်ႈဢေႃႈ။ ဢဝ်မိုဝ်းမႂ်းယိုၼ်းဢွၵ်ႇၵႃႈၼိူဝ်ၵိင်ႇၶႃႈမၼ်းလႄႈႁဵတ်းမိူၼ်ၸိူဝ်ႉၼင်ႇၵေႃႉဢၼ်ဝိတ်းမၢၵ်ႇၸပိတ်ႉၼၼ်ႉတႃႉ၊” ဝႃႈၼင်ႇၼႆဢေႃႈ။
ၵဝ်တၵ်းလႆႈလၢတ်ႈလႄႈပၼ်သတိတီႈၽူႈလႂ် ႁႂ်ႈၶဝ်ပေႃးလႆႈငိၼ်း။ တူၺ်းလူး။ ၶဝ်ဢိုတ်းႁူၶဝ်ဝႆႉလႄႈဢမ်ႇၸၢင်ႈထွမ်ႇငိၼ်း။ ၼုၵ်ႈၵပၢတ်ႈ ထႃႇဝရႃႉၽြႃး၊ ၼၼ်ႉပဵၼ်တီႈဢၼ်ၶဝ်သႄႉသွမ်းလႄႈၶဝ်ဢမ်ႇပျေႇၸႂ်မူၼ်ႈၸႂ်လူၺ်ႈၼုၵ်ႈၵပၢတ်ႈၸဝ်ႈၼၼ်ႉ။-
ပိူဝ်ႈၼႆလႄႈတၢင်းၸႂ်မႆႈၶႂ်ႈၸႃႉ ထႃႇဝရႃႉၽြႃး၊ ၼၼ်ႉတဵမ်မီးယူႇၵႃႈၼႂ်းၵဝ်လႄႈဢမ်ႇယိူၼ်ႉယူႇၵၼ်ႈယူႇလႆႈ။ “ၵဝ်တၵ်းဢဝ်တၢင်းဢၼ်ၸႂ်မႆႈၶႂ်ႈၸႃႉၵဝ်ၼၼ်ႉသွၼ်းလေႃႇသႂ်ႇၵႃႈၼိူဝ်လုၵ်ႈဢွၼ်ႇဢၼ်မီးၵႃႈၼိူဝ်သဵၼ်ႈတၢင်းတင်းလၢႆ၊ဢိၵ်ႇတင်းၵူၼ်းၼုမ်ႇၵူၼ်းၵမ်ဢၼ်ၸုၵၼ်တုမ်ၵၼ်ယူႇၸိူဝ်းၼၼ်ႉလႄႈတၵ်းသိမ်းဢဝ်ၽူဝ်မေးဢၼ်ပဵၼ်ၵူပ်ႉပဵၼ်ၵူႈ၊ဢိၵ်ႇတင်းၵူၼ်းဢၼ်ဢသၢၵ်ႈယႂ်ႇတင်းၵူၼ်းဢၼ်ထဝ်ႈၵႄႇၸိူဝ်းၼၼ်ႉၵႂႃႇဢေႃႈ။-
ႁိူၼ်းၶဝ်ဢိၵ်ႇတင်းႁႆႈၼႃးၶဝ်တင်းမေးၶဝ်ၸိူဝ်းၼၼ်ႉတၵ်းႁွတ်ႈထိုင်ၵႃႈၼႂ်းမိုဝ်းပိူၼ်ႈဢေႃႈ။ လွင်ႈမၼ်းၸမ်ႉ၊ၵဝ်တၵ်းယိုၼ်းမိုဝ်းၵဝ်လႄႈၶတ်းတႃႉၵၼ်တင်းၵူၼ်းဝၢၼ်ႈၵူၼ်းမိူင်းတင်းလၢႆဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။-
“ၸႃႉၸဵမ်ၶဝ်ၸိူဝ်းဢၼ်လဵၵ်ႉသေပိူၼ်ႈတေႃႇထိုင်ႁွတ်ႈၶဝ်ၸိူဝ်းဢၼ်ယႂ်ႇသေပိူၼ်ႈတင်းသဵင်ႈတင်းလူင်ဢွၼ်ၵၼ်ႁႃတၢင်းဢၼ်မၢၵ်ႇမီးလူၺ်ႈတၢင်းဢၼ်ဢမ်ႇတြႃးဢေႃႈ။ ၸႃႉၸဵမ်ပရေႃးၽႅတ်ႈ တင်းလၢႆတေႃႇထိုင်ႁွတ်ႈယဵၸ်ႈပရေႃးႁဵၵ်ႈ တင်းသဵင်ႈတင်းလူင်ဢွၼ်ၵၼ်ႁဵတ်းဢၼ်ပႅတ်ႉလႅၼ်ဢေႃႈ။-
ၶဝ်ယူတ်းယႃပၼ်ၵူၼ်းမဵဝ်းၵဝ်ဢၼ်ၸဵပ်းသႅပ်ႇၼၼ်ႉမဝ်မဝ်မၢင်မၢင်လႄႈလၢတ်ႈလႄႈဝႃႈ၊ ‘ၵတ်းယဵၼ်ၶျၢမ်းသႃႇ၊ၵတ်းယဵၼ်ၶျၢမ်းသႃႇ၊’ ဝႃႈၼင်ႇၼႆၼႂ်းမိူဝ်ႈဢၼ်ဢမ်ႇမီးတၢင်းဢၼ်ၵတ်းယဵၼ်ၶျၢမ်းသႃႇၼၼ်ႉဢေႃႈ။-
ၶဝ်ဢွၼ်ၵၼ်ႁဵတ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇၼႃႇလႄႈပဵၼ်တၢင်းဢၼ်လီဢူၵ်းလီဢၢႆၼႃႇဢေႃႈ။ ၵူၺ်းၵႃႈ၊ၶဝ်ဢမ်ႇဢူၵ်းဢမ်ႇဢၢႆလႃးလႃး။ ၶဝ်ဢမ်ႇႁုလွင်ႈဢၼ်တေလႆႈၼႃႈလု။ ပိူဝ်ႈၼႆလႄႈၵေႃႉၼိုင်ႈယဝ်ႉၵေႃႉၼိုင်ႈတၵ်းဢွၼ်ၵၼ်လူမ်ႉလႄႈယၢမ်းမိူဝ်ႈဢၼ်ၵဝ်ပၼ်တၢမ်ႇဢပျတ်ႈၶဝ်ၼၼ်ႉၸိုင်၊ၶဝ်တၵ်းဢွၼ်ၵၼ်ႁွတ်ႈထိုင်တၢင်းဢၼ်ၶျႃးတူၵ်းတီႈတႅမ်ႇဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ဢွၼ်ၵၼ်ၸုၵ်းယူႇၵႃႈၼႂ်းသဵၼ်ႈတၢင်းၽႄၼၼ်ႉသေလႄႈလူတူၺ်းတႃႉ။ ဢွၼ်ၵၼ်ႁႃဢဝ်သဵၼ်ႈတၢင်းဢၼ်ၵဝ်ႇဢၼ်မွင်မိူဝ်ႈၵွၼ်ႇဢွၼ်ၼႆႉၸိူဝ်းၼၼ်ႉသေလႄႈတွင်ႈထၢမ်လႄႈဝႃႈ၊သဵၼ်ႈတၢင်းဢၼ်လီၼၼ်ႉမီးၵႃႈလႂ်၊ဝႃႈၼင်ႇၼႆလႄႈၸွမ်းၼႂ်းသဵၼ်ႈတၢင်းၼၼ်ႉတႃႉ။ ပေႃးႁဵတ်းၸိူဝ်ႉၼင်ႇၼႆၸိုင်၊ႁူဝ်ၸႂ်သူတၵ်းမီးတၢင်းဢၼ်သၢၵ်ႈသႃႇဢေႃႈ၊” ဝႃႈၼင်ႇၼႆဢေႃႈ။ ၵူၺ်းၵႃႈ၊ၶဝ်ဢွၼ်ၵၼ်ၶိုၼ်းလၢတ်ႈလႄႈဝႃႈ၊ “ႁဝ်းဢမ်ႇၸွမ်းဢမ်ႇၵႂႃႇ၊” ဝႃႈၼင်ႇၼႆဢေႃႈ။-
ၵဝ်ၶၢၼ်းၵူၼ်းဢၼ်ပႂ်ႉယၢမ်းတင်းလၢႆဝႆႉၵႃႈၼိူဝ်သူလႄႈလၢတ်ႈလႄႈဝႃႈ၊ “ဢွၼ်ၵၼ်မီးသတိထွမ်ႇငိၼ်းသဵင်ၼႄးၶရႃႇတႃႉ၊” ဝႃႈၼင်ႇၼႆဢေႃႈ။ ၵူၺ်းၵႃႈ၊ၶဝ်ဢွၼ်ၵၼ်ၶိုၼ်းလၢတ်ႈဝႃႈ၊ “ႁဝ်းတေဢမ်ႇထွမ်ႇဢဝ်၊” ဝႃႈၼင်ႇၼႆဢေႃႈ။
“ပိူဝ်ႈၼႆလႄႈၵူၼ်းၵူႈၸိူဝ်ႉၵူႈၶိူဝ်းၶဝ်႟။ ဢွၼ်ၵၼ်ထွမ်ႇငိၼ်းတႃႉ။ ၵူၼ်းပရိၵ်ႈသၢတ်ႈဢၼ်ၸုၵၼ်တုမ်ၵၼ်ၶဝ်႟။ ႁုၸႅင်ႈလွင်ႈတၢင်းဢၼ်တၵ်းပဵၼ်ၵႃႈသင်မႃးတီႈၶဝ်ၼၼ်ႉတႃႉ။-
လိၼ်မိူင်း႟။ ထွမ်ႇငိၼ်းတႃႉ။ ၵဝ်တၵ်းႁႂ်ႈၽေးဢုပၢတ်ႈဢၼ်ဝႃႈ၊ဢၵျူဝ်းဢပျတ်ႈတၢင်းဢၼ်ၶဝ်ၵျၢမ်ႇပွင်ၼၼ်ႉတူၵ်းႁွတ်ႈၵႃႈၼိူဝ်ၵူၼ်းမဵဝ်းၼႆႉဢေႃႈ။ လွင်ႈမၼ်းၸမ်ႉ၊ၶဝ်ဢမ်ႇမီးသတိလႄႈထွမ်ႇဢဝ်ၵႂၢမ်းၵဝ်။ ၶဝ်ထဵင်ပႅတ်ႈပႄႇပႅတ်ႈတြႃးၵဝ်ဢေႃႈ။-
ၵွပ်ႈပိူဝ်ႈလွင်ႈၸိူဝ်ႉၼင်ႇႁိုဝ်လႄႈဢဝ်လေႃႇပၢၼ်ႇၵႃႈတီႈမိူင်း သေးပႃႉ၊ ဢိၵ်ႇတင်းဢွႆႈဢၼ်ဝၢၼ်ဢၼ်ၸဵမ်းသေၵႃႈတီႈမိူင်းဢၼ်ၵႆၼႃႇၼၼ်ႉမႃးတီႈၵဝ်ၸိူဝ်ႉၼင်ႇႁိုဝ်။ တၢင်းလူႇဢၼ်တုတ်ႇၽႆးသူၸိူဝ်းၼၼ်ႉၵဝ်ဢမ်ႇႁပ်ႉဢမ်ႇၶၢမ်ႇဢဝ်လႄႈ၊တၢင်းလူႇၵူႈၸိူဝ်ႉၵူႈပိူင်ဢၼ်သူသၢၵ်ႈလူႇၼၼ်ႉဢမ်ႇထုၵ်ႇၸႂ်ၵျိူၵ်ႈၸႂ်ၵဝ်။-
ပိူဝ်ႈၼႆလႄႈ ထႃႇဝရႃႉၽြႃး၊ မီးဢမိင်ႉၸမ်ႉ၊တူၺ်းလူး။ ၵဝ်တၵ်းဢဝ်မဵဝ်းဢၼ်တိူဝ်ႉမႅၼ်ႈလႄႈလူမ်ႉၼၼ်ႉဝႆႉၵႃႈတီႈၽၢႆႇၼႃႈၵူၼ်းမဵဝ်းၼႆႉဢေႃႈ။ ပေႃႈမႄႈဢိၵ်ႇတင်းလုၵ်ႈလၢင်းတင်းလၢႆတၵ်းဢွၼ်ၵၼ်တိူဝ်ႉမႅၼ်ႈလႄႈလူမ်ႉဢေႃႈ။ ၵူၼ်းႁိူၼ်းၸမ်ၵၼ်၊ဢိၵ်ႇတင်းၵေႃႉသႄႈတင်းလၢႆတၵ်းဢွၼ်ၵၼ်လုလႅဝ်လူၺ်ႈၵၼ်ဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “တူၺ်းလူး။ မဵဝ်းၵူၼ်းမဵဝ်းၼိုင်ႈတၵ်းပေႃႇဢွၵ်ႇမႃးၵႃႈတီႈၽၢႆႇတၢင်းႁွင်ႇမႃးလႄႈမဵဝ်းၵူၼ်းဢၼ်မိူင်းၶဝ်ႁႅင်းယႂ်ႇၼႃႇသေလႄႈလႆႈၶၢမ်ႇတၢင်းဢၼ်တိုၵ်းယူင်းၸူဝ်းဢဝ်သေၵႃႈတီႈလႅၼ်သုတ်းလိၼ်မိူင်းပုၼ်ႉၼၼ်ႉမႃးဢေႃႈ။-
ၶဝ်ၼၼ်ႉဢွၼ်ၵၼ်ယိပ်းၵမ်ၵၢင်ႇ၊ဢိၵ်ႇတင်းႁွၵ်ႇယူႇဢေႃႈ။ ၶဝ်ပဵၼ်မဵဝ်းဢၼ်ႁၢဝ်ႈၵျၢမ်းၼႃႇလႄႈဢမ်ႇမီးၵရုၼႃႇတၢင်းဢၼ်ဢဵတ်းလူ။ သဵင်ၵႂၢမ်းၶဝ်ၼၼ်ႉမိူၼ်ၸိူဝ်ႉၼင်ႇသဵင်ၼမ်ႉပၢင်ႇလၢႆႇဢၼ်မေႃးယူႇႁိုင်းႁိုင်းၼၼ်ႉဢေႃႈ။ ၸိဢုၼ်ႇ၊ ဢၼ်ပဵၼ်လုၵ်ႈယိင်း႟။ ၶဝ်ဢွၼ်ၵၼ်ၶီႇမႃႉလႄႈႁၢင်ႈၶိူင်ႈမိူၼ်ၸိူဝ်ႉၼင်ႇၵူၼ်းသိုၵ်းဢၼ်တၵ်းတိုၵ်းသိုၵ်းယူႇသေလႄႈၶတ်းတႃႉၵၼ်တင်းမႂ်းယူႇဢေႃႈ၊” ဝႃႈၼင်ႇၼႆဢေႃႈ။
ႁဝ်းငိၼ်းသတၢင်းသဵင်ၶၢဝ်ႇၼၼ်ႉလႄႈ၊ႁႅင်းမိုဝ်းႁဝ်းဢူၼ်ႈၵႂႃႇဢေႃႈ။ တုၵ်ႉၶႃႉဝူၺ်ႇတၼႃႇဢၼ်ႁႅင်းယႂ်ႇၼႃႇလႆႈတိၵမ်ဢဝ်ႁဝ်းၸဵပ်းၼႃႇ၊မိူၼ်ၸိူဝ်ႉၼင်ႇဢၼ်မႄႈယိင်းဢၼ်ၵိူတ်ႇလဵင်ႉလုၵ်ႈၼၼ်ႉယဝ်ႉ။-
ယႃႇပေဢွၼ်ၵၼ်ၵႂႃႇၵႃႈၼႂ်းတူင်ႈႁႆႈတူင်ႈၼႃး။ ယႃႇပေပႆၵႃႈၼိူဝ်သဵၼ်ႈတၢင်း။ လွင်ႈမၼ်းၸမ်ႉ၊ရၢၼ်ႇသူႇၼၼ်ႉမီးလၢပ်ႇမီးလႅဝ်းလႄႈတၢင်းဢၼ်လီၵူဝ်လီႁႄၼၼ်ႉမီးၵူႈၽၢႆႇၵူႈပႃႈဢေႃႈ။
ၵူၼ်းမဵဝ်းၵဝ်႟။ ဢဝ်ၶူဝ်းၼင်ပေႃၼုင်ႈမႆသေလႄႈၵိင်ႈၵိူၵ်ႇယူႇၵႃႈၼႂ်းတဝ်ႈတႃႉ။ ႁွင်ႉႁႆႈမိူၼ်ၸိူဝ်ႉၼင်ႇဢၼ်ႁွင်ႉႁႆႈၵွပ်ႈလူၺ်ႈဢၼ်ပဵၼ်လုၵ်ႈၸၢႆးလဵဝ်တၢႆၼၼ်ႉလႄႈႁဵတ်းတၢင်းဢၼ်ၶၢင်းၶီၶၢင်းၽၢၼ်ဢၼ်ၶူမ်ၶေႃးၼႃႇလူင်လၢင်ၼၼ်ႉတႃႉ။ ၵေႃႉဢၼ်ႁိမ်ဢဝ်ယႃႉပႅတ်ႈၼၼ်ႉတၵ်းၵိုင်ႉၵၢင်ႉႁွတ်ႈထိုင်မႃးတီႈႁဝ်းၵမ်းလဵဝ်ဢေႃႈ။-
ၵဝ်ႁႂ်ႈမႂ်းပဵၼ်ၵေႃႉဢၼ်ၸဵတ်ႈထၢမ်ၸႅတ်ႈတူၺ်းၵူၼ်းၵဝ်တင်းလၢႆ၊ႁႂ်ႈမႂ်းလႆႈႁုလႄႈၸႅတ်ႈထၢမ်သဵၼ်ႈတၢင်းဢၼ်ၶဝ်ၸွမ်းၼၼ်ႉဢေႃႈ။-
ၶဝ်တင်းသဵင်ႈတင်းလူင်ပဵၼ်ၵေႃႉဢၼ်ၽွၵ်ႈသဵတ်ႈၸႃႇလုၵ်ႉၽိုၼ်ႉၼႃႇလူင်လၢင်၊ၵေႃႉဢၼ်ၸၢင်ႈလႄႇၵႂႃႇသေလႄႈၶႃႉၸိုဝ်ႈၶၢႆသဵင်ဢေႃႈ။ ၸႂ်ၶဝ်ၵႅၼ်ႇၶႅင်မိူၼ်တွင်းလိူင်၊ဢိၵ်ႇတင်းလဵၵ်းလွၼ်ႉလွၼ်ႉလႄႈၶဝ်တင်းသဵင်ႈတင်းလူင်ပဵၼ်ၵေႃႉဢၼ်ဢၼ်ႁၢႆႉဢၼ်ယုတ်ႈလွၼ်ႉလွၼ်ႉဢေႃႈ။-
သဝ်ႇတင်းလၢႆထူဝ်းပတ်ႉႁႅင်းယႂ်ႇၼႃႇလႄႈၸိုၼ်းၵေႃႈလႆႈၶၢမ်ႇတၢင်းဢၼ်ၽႆးမႆႈပႅတ်ႈမူတ်းမူတ်းသဵင်ႈသဵင်ႈယဝ်ႉ။ တၢင်းဢၼ်ၸႅတ်ႈဢၼ်သေးၼၼ်ႉဢမ်ႇမီးဢၵျူဝ်း။ ၶဝ်ၸိူဝ်းဢၼ်ႁုၵ်းဢၼ်ႁၢႆႉၼၼ်ႉဢမ်ႇလႆႈၶၢမ်ႇတၢင်းဢၼ်ထူၺ်ႈဢွၵ်ႇပႅတ်ႈ။-
ပိူၼ်ႈတၵ်းႁွင်ႉႁဵၵ်ႈၶဝ်လႄႈဝႃႈ၊ “ငိုၼ်းဢၼ်လႆႈၶၢမ်ႇတၢင်းဢၼ်ပႄႇပႅတ်ႈ၊” ဝႃႈၼင်ႇၼႆၵွပ်ႈပိူဝ်ႈဢၼ် ထႃႇဝရႃႉၽြႃး၊ ပႄႇပႅတ်ႈၶဝ်ၼၼ်ႉဢေႃႈ။
ၼုၵ်ႈၵပၢတ်ႈၸဝ်ႈဢွၵ်ႇသေၵႃႈတီႈ ထႃႇဝရႃႉၽြႃး၊ ႁွတ်ႈမႃးတီႈ ယေႇရမိ၊ လႄႈဝႃႈ၊-
“ၵႂၢမ်းဢၼ်မႂ်းတၵ်းလႆႈၸုၵ်းယူႇၵႃႈတီႈႁူးၽၵ်းတူႁိူၼ်း ထႃႇဝရႃႉၽြႃး၊ လႄႈႁွင်ႉပၢဝ်ႇႁွင်ႉသေႃႇၸမ်ႉ၊ၵူၼ်းမဵဝ်း ယုတႃႉ၊ ၵႃႈဢၼ်ၶဝ်ႈၵႃႈၼႂ်းၽၵ်းတူၸိူဝ်းၼႆႉလႄႈႁႂ်ႈလႆႈၵူဝ်းၵႂၢႆႇ ထႃႇဝရႃႉၽြႃး၊ ၶဝ်႟။-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊ဢွၼ်ၵၼ်မႄးသဵၼ်ႈတၢင်းသူ၊ဢိၵ်ႇတင်းတၢင်းၵမ်တၢင်းၵျၢင်ႉသူၸိူဝ်းၼၼ်ႉတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ၵဝ်တၵ်းႁႂ်ႈသူယူႇၵႃႈတီႈၼႆႈဢေႃႈ။-
ယႃႇပေဢွၼ်ၵၼ်ဢိင်ပိုင်ႈၵႂၢမ်းမုသႃႇဢၼ်ဝႃႈ၊ ‘ဢၼ်ၼႆႉၸမ်ႉ၊ပဵၼ်ၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ပဵၼ်ၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ပဵၼ်ၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ယဝ်ႉ၊’ ဝႃႈၼင်ႇၼႆၼၼ်ႉ။
“ပေႃးသူမႄးသဵၼ်ႈတၢင်းသူ၊ဢိၵ်ႇတင်းတၢင်းၵမ်တၢင်းၵျၢင်ႉသူၸိူဝ်းၼၼ်ႉၸေးၸေးၸုမ်ႇၸုမ်ႇယဝ်ႉလႄႈၸီႇယၢင်ႇၸွမ်းၼင်ႇတြႃးတေႃႇၵၼ်လီလီငၢမ်းငၢမ်းယဝ်ႉလႄႈ၊-
ယင်းဢမ်ႇၼိၵ်ႈၸၢၵ်ႈငႅၼ်းသႄးၶႅၵ်ႇဢႃႇၵၼ်ႇတု၊လုၵ်ႈဢွၼ်ႇဢၼ်ဢမ်ႇမီးပေႃႈမီးမႄႈ၊မႄႈမူၵ်းမႄႈမၢႆႈ၊ဢမ်ႇဢဝ်လိူတ်ႈၵေႃႉဢၼ်ဢမ်ႇမီးဢပျတ်ႈၼၼ်ႉထွၵ်ႇပႅတ်ႈၵႃႈတီႈၼႆႈ၊ဢမ်ႇၸပ်းၸွမ်းၽြႃးတၢင်ႇသူႇတၢင်ႇပႃးလႄႈယႃႉဢၵျူဝ်းတူဝ်ၸဝ်ႈၵဝ်ႇယဝ်ႉၸိုင်၊-
ၵဝ်တၵ်းႁႂ်ႈသူယူႇၵႃႈတီႈၼႆႈၵႃႈၼႂ်းမိူင်းဢၼ်ၵဝ်ပၼ်တီႈပူႇမွၼ်ႇသူၸဵမ်မိူဝ်ႈၵွၼ်ႇဢွၼ်ၼႆႉႁႂ်ႈပဵၼ်မိူင်းၶဝ်ယူႇသေႇသေႇၼၼ်ႉဢေႃႈ။
“တူၺ်းလူး။ သူဢွၼ်ၵၼ်ယုမ်ႇယမ်ဢိင်ပိုင်ႈၵႂၢမ်းမုသႃႇဢၼ်ဢမ်ႇမီးဢၵျူဝ်းၼၼ်ႉဢေႃႈ။-
သူၼႆႉတၵ်းလၵ်ႉဢဝ်လွမ်ဢဝ်ယူႇ၊တၵ်းဢဝ်ဢသၢၵ်ႈၵူၼ်းတၢႆယူႇ၊တၵ်းၽိတ်းပိူင်ႈမေးပိူၼ်ႈယူႇ၊တၵ်းတိူင်ႇဝႃႈၵၢဝ်ႇဝႃႈတၢင်းဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉယူႇ၊တၵ်းသၢၵ်ႈလူႇတီႈ ၽြႃးပႃႇလႃႉ၊ ယူႇ၊တၵ်းၸွမ်းလင်ၽြႃးတၢင်ႇသူႇတၢင်ႇပႃးဢၼ်သူဢမ်ႇယၢမ်ႈႁုၸိူဝ်းၼၼ်ႉယူႇသေယဝ်ႉ၊-
လႄႈယင်းတၵ်းၶဝ်ႈလႄႈၸုၵ်းၵႃႈတီႈၽၢႆႇၼႃႈၵဝ်ၵႃႈၼႂ်းႁိူၼ်းဢၼ်ႁွင်ႉႁဵၵ်ႈလူၺ်ႈၼႃႇမႃႉၸိုဝ်ႈသဵင်ၵဝ်ၼၼ်ႉသေလႄႈလဝ်ႈလၢတ်ႈလႄႈဝႃႈ၊ ‘ႁဝ်းလႆႈၶၢမ်ႇၵျေးၸူးတၢင်းဢၼ်ၵႄႇသႄႇၼုၵ်ႈဢဝ်ယဝ်ႉ၊’ ဝႃႈၼင်ႇၼႆႁႂ်ႈလႆႈႁဵတ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇၵူႇၸိူဝ်ႉၵူႈပိူင်ၸိူဝ်းၼႆႉယူႇႁိုဝ်း။-
ႁိူၼ်းၸဝ်ႈဢၼ်လႆႈၶၢမ်ႇတၢင်းဢၼ်ႁွင်ႉႁဵၵ်ႈလူၺ်ႈၼႃႇမႃႉၸိုဝ်ႈသဵင်ၵဝ်ၼၼ်ႉပဵၼ်ၸိူဝ်ႉၼင်ႇထမ်ႈၸူၼ်တီႈသိုဝ်ႈၼႃႈတႂ်ႈတႃသူႁိုဝ်း။ တူၺ်းလူး။ တူဝ်ၵဝ်ၼႆႉယဝ်ႉလႆႈႁၼ်လွင်ႈတၢင်းၼႆႉဢေႃႈ၊ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။-
ဢွၼ်ၵၼ်ၵႂႃႇၵႃႈတီႈထႃႇၼႃႉတီႈဢၼ်ၵဝ်မီးၵႃႈတီႈဝဵင်း သိလေႃႇ၊ တီႈဢၼ်ၵဝ်ႁႂ်ႈၼႃႇမႃႉၸိုဝ်ႈသဵင်ၵဝ်တႄႇယူႇမိူဝ်ႈဢွၼ်တၢင်းၼၼ်ႉလႄႈလူတူၺ်းလွင်ႈတၢင်းဢၼ်ၵဝ်လႆႈႁဵတ်းၸိူဝ်ႉၼင်ႇႁိုဝ်ၵႃႈတီႈၼၼ်ႈ၊ၵွပ်ႈပိူဝ်ႈတၢင်းႁၢႆႉမိူၵ်ႈၵူၼ်းၵဝ်မဵဝ်း ဢိသရေး၊ ၼၼ်ႉတႃႉ။-
မိူဝ်ႈလဵဝ်ၼႆႉ ထႃႇဝရႃႉၽြႃး၊ မီးဢမိင်ႉၸမ်ႉ၊ၵွပ်ႈပိူဝ်ႈဢၼ်သူႁဵတ်းလွင်ႈတၢင်းၵူႈၸိူဝ်ႉၵူႈပိူင်ၸိူဝ်းၼႆႉ၊ဢိၵ်ႇတင်းၵွပ်ႈပိူဝ်ႈဢၼ်ၵဝ်လၢတ်ႈပၼ်ယူႇၶိူဝ်းၶိူဝ်းယႂ်းယႂ်းသေၵေႃႈသူဢမ်ႇထွမ်ႇဢမ်ႇဢဝ်။ ၵွပ်ႈပိူဝ်ႈၵဝ်ႁွင်ႉသူသေၵေႃႈသူဢမ်ႇဢိူဝ်ၼၼ်ႉလႄႈ၊-
ၵႃႈတီႈႁိူၼ်းၸဝ်ႈဢၼ်လႆႈၶၢမ်ႇတၢင်းဢၼ်ႁွင်ႉႁဵၵ်ႈလူၺ်ႈၼႃႇမႃႉၸိုဝ်ႈသဵင်ၵဝ်ဢၼ်သူဢိင်ပိုင်ႈဢၼ်ဝႃႈ၊ထႃႇၼႃႉတီႈဢၼ်ၵဝ်ပၼ်တီႈသူ၊တီႈပူႇမွၼ်ႇသူၼၼ်ႉၶဝ်တၵ်းႁဵတ်းမိူၼ်ၸိူဝ်ႉၼင်ႇဢၼ်ၵဝ်ႁဵတ်းတီႈဝဵင်း သိလေႃႇ၊ ၼၼ်ႉဢေႃႈ။-
ၵဝ်တၵ်းလိုပ်ႈသူဢွၵ်ႇပႅတ်ႈသေၵႃႈတီႈသိုဝ်ႈၼႃႈတႂ်ႈတႃၵဝ်ၼႆႉမိူၼ်ၸိူဝ်ႉၼင်ႇၵဝ်လိုပ်ႈပႅတ်ႈပီႈၼွင်ႉသူၵူၼ်းမဵဝ်း ဢေႇၽရိမ်ႇ၊ တင်းသဵင်ႈတင်းလူင်ၼၼ်ႉဢေႃႈ။”
“ပိူဝ်ႈၼႆလႄႈမႂ်းၵေႃႈယႃႇပေႁဵတ်းပထၼႃႇသူးတွင်းပုၼ်ႈၵူၼ်းမဵဝ်းၼႆႉ။ ယႃႇပေႁဵတ်းတၢင်းဢၼ်ႁွင်ႉသႅၼ်ႇ၊တၢင်းဢၼ်သူးတွင်းပုၼ်ႈၶဝ်။ ယႃႇပေတိုၵ်းယူင်းၸူဝ်းဢဝ်ၵဝ်။ ၵဝ်တၵ်းဢမ်ႇထွမ်ႇဢဝ်ၵႂၢမ်းမႂ်းၵူၺ်း။-
မႂ်းဢမ်ႇႁၼ်လွင်ႈတၢင်းဢၼ်ၶဝ်ႁဵတ်းၵႃႈၼႂ်းဝဵင်း ယုတႃႉ၊ တင်းလၢႆ ဢိၵ်ႇတင်းၵႃႈၼႂ်းသဵၼ်ႈတၢင်းဝဵင်း ယေႇရုသလႅမ်ႇ၊ ၸိူဝ်းၼၼ်ႉႁိုဝ်း။-
လုၵ်ႈလၢင်းၶဝ်ဢွၼ်ၵၼ်ဢဝ်ၽိုၼ်း၊ၽူႈပဵၼ်ပေႃႈၵေႃႈဢွၼ်ၵၼ်သႂ်ႇၽႆး၊မႄႈယိင်းတင်းလၢႆၵေႃႈဢွၼ်ၵၼ်ၼူတ်ႈၶဝ်ႈၵျုင်ႇႁႂ်ႈလႆႈႁဵတ်းၶဝ်ႈမုၼ်းၶႅပ်းပုၼ်ႈၼၢင်းႁေႃၶမ်းၵၢင်ႁၢဝ်လႄႈဢဝ်ၶိူင်ႈတၢင်းလူႇဢၼ်ပဵၼ်ၼမ်ႉမၢၵ်ႇၸပိတ်ႉသွၼ်းလေႃႇတီႈၽြႃးတၢင်ႇသူႇတၢင်ႇပႃးႁႂ်ႈလႆႈယႃႉယူၵ်ႉတၢင်းၸႂ်မႆႈၶႂ်ႈၸႃႉၵဝ်ဢေႃႈ။-
ၶဝ်ဢွၼ်ၵၼ်ယႃႉယူၵ်ႉၵဝ်ႁိုဝ်း။ ၶဝ်ဢွၼ်ၵၼ်ယႃႉယူၵ်ႉတူဝ်ၶဝ်ႁႂ်ႈၼႃႈၶဝ်လုၵူၺ်းဢမ်ႇၸႂ်ႈႁိုဝ်း၊ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။-
ပိူဝ်ႈၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ၽႆးတေႃးသႃႉတၢင်းၸႂ်မႆႈၶႂ်ႈၸႃႉၵဝ်ထွၵ်ႇသႂ်ႇၵႃႈၼိူဝ်ထႃႇၼႃႉတီႈၼႆႈ၊ၵႃႈၼိူဝ်ၵူၼ်း၊ၵႃႈၼိူဝ်သတ်းတရိၵ်ႈသၢၼ်ႇ၊ၵႃႈၼိူဝ်တူၼ်ႈမႆႉဢၼ်မီးၵႃႈၼွၵ်ႈၵႃႈပၢင်ႇ၊ၵႃႈၼိူဝ်မၢၵ်ႇလိၼ်ႁူင်းလိၼ်တင်းလၢႆလႄႈၽႆးၼၼ်ႉတၵ်းမႆႈယူႇ၊ဢမ်ႇမီးတၢင်းဢၼ်မွတ်ႇလႃးလႃးဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ၽြႃးပဵၼ်ၸဝ်ႈမဵဝ်း ဢိသရေး၊ မီးဢမိင်ႉၸမ်ႉ၊ “ဢွၼ်ၵၼ်ဢဝ်ၶိူင်ႈတၢင်းလူႇဢၼ်တုတ်ႇၽႆးသူတင်းလၢႆဝႆႉလူၺ်ႈၵၼ်တင်းၶိူင်ႈတၢင်းလူႇတၢင်ႇၸိူဝ်ႉတၢင်ႇဢၼ်သူၼၼ်ႉသေလႄႈၵိၼ်ၼိူဝ်ႉတႃႉ။-
လွင်ႈမၼ်းၸမ်ႉ၊ၼႂ်းမိုဝ်ႉဝၼ်းဢၼ်ၵဝ်ၼုၵ်ႈဢဝ်ပူႇမွၼ်ႇသူဢွၵ်ႇသေၵႃႈၼႂ်းမိူင်း ဢေးၵျိပ်ႉ၊ မႃးၼၼ်ႉ၊ၵဝ်ဢမ်ႇသင်ႇလၢတ်ႈ၊ဢမ်ႇမီးဢမိင်ႉဝႆႉလူၺ်ႈလွင်ႈၶိူင်ႈတၢင်းလူႇဢၼ်တုတ်ႇၽႆး၊ဢိၵ်ႇတင်းၶိူင်ႈတၢင်းလူႇတၢင်ႇၸိူဝ်ႉတၢင်ႇပိူင်ၸိူဝ်းၼၼ်ႉတီႈၶဝ်ၼၼ်ႉ။-
လွင်ႈတၢင်းဢၼ်ၵဝ်သင်ႇလၢတ်ႈဝႆႉၸမ်ႉ၊ ‘ဢွၼ်ၵၼ်ထွမ်ႇဢဝ်ၵႂၢမ်းၵဝ်တႃႉ။ ၵဝ်တၵ်းပဵၼ်ၽြႃးပဵၼ်ၸဝ်ႈသူလႄႈသူၵေႃႈတၵ်းပဵၼ်ၵူၼ်းၵဝ်ဢေႃႈ။ ဢွၼ်ၵၼ်ၸွမ်းသဵၼ်ႈတၢင်းၵႃႈဢၼ်ၵဝ်ၸီႇယၢင်ႇဝႆႉတီႈသူႁႂ်ႈပဵၼ်ဢၼ်လီဢၼ်ငၢမ်းတီႈသူတႃႉ၊’ ဝႃႈၼင်ႇၼႆဢေႃႈ။-
ၵူၺ်းၵႃႈ၊ၶဝ်ယင်းဢမ်ႇထွမ်ႇဢမ်ႇဢဝ်။ ဢမ်ႇဝၢႆႇႁူၸူးလႄႈထွမ်ႇငိၼ်း။ ၵူၺ်းၵႂႃႇမႃးယူႇၵႃႈၼႂ်းတၢင်းၵျၢမ်ႇတၢင်းပွင်၊ဢိၵ်ႇတင်းတၢင်းဢၼ်ႁူဝ်ၸႂ်ႁၢႆႉယုတ်ႈၵႅၼ်ႇၶႅင်ၶဝ်ၼၼ်ႉလႄႈယင်းဢမ်ႇၵႂႃႇသိုဝ်ႈၽၢႆႇတၢင်းၼႃႈလႄႈဢွၼ်ၵၼ်ဝၢႆႇၶိုၼ်းတၢင်းလင်ဢေႃႈ။-
ၸႃႉၸဵမ်မိုဝ်ႉဝၼ်းဢၼ်ပူႇမွၼ်ႇသူဢွၵ်ႇသေၵႃႈၼႂ်းမိူင်း ဢေးၵျိပ်ႉ၊ မႃးၼၼ်ႉတေႃႇထိုင်ႁွတ်ႈဝၼ်းမိူဝ်ႈၼႆႉ၊ၵဝ်ပွႆႇၸႂ်ႉၶႃႈၵဝ်ပရေႃးၽႅတ်ႈ တင်းလၢႆမႃးၸူးၵႃႈတီႈၶဝ်ယူႇဝၼ်းၼိုင်ႈယဝ်ႉဝၼ်းၼိုင်ႈၶိူဝ်းၶိူဝ်းယႂ်းယႂ်းဢေႃႈ။-
ၵူၺ်းၵႃႈ၊ၶဝ်ယင်းဢမ်ႇထွမ်ႇဢဝ်ၵႂၢမ်းၵဝ်။ ယင်းဢမ်ႇဝၢႆႇႁူႁႄႈႁူၸူးၵဝ်လႄႈၶေႃးၶဝ်ၵႅၼ်ႇၶႅင်သေယဝ်ႉ၊ဢွၼ်ၵၼ်ႁဵတ်းႁၢႆႉႁဵတ်းႁုၵ်းလိူဝ်တွၼ်းၼႃႇသေပူႇမွၼ်ႇၶဝ်ၸိူဝ်းၼၼ်ႉဢေႃႈ။
“ပိၵ်ႉသမ်ႉမႂ်းဢဝ်ၵႂၢမ်းတင်းသဵင်ႈတင်းလူင်ၸိူဝ်းၼႆႉလၢတ်ႈတီႈၶဝ်သေၵေႃႈ၊ၶဝ်ဢမ်ႇထွမ်ႇဢမ်ႇငိၼ်း၊ပိၵ်ႉသမ်ႉမႂ်းႁွင်ႉသေၵေႃႈၶဝ်ဢမ်ႇဢိူဝ်။-
မႂ်းတၵ်းလႆႈလၢတ်ႈတီႈၶဝ်လႄႈဝႃႈ၊ၵူၼ်းမဵဝ်းၼႆႉပဵၼ်မဵဝ်းဢၼ်ဢမ်ႇထွမ်ႇဢဝ်ၵႂၢမ်း ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်။ ၵူၼ်းမဵဝ်းဢၼ်ဢမ်ႇၶၢမ်ႇဢဝ်တၢင်းဢၼ်သင်ႇသွၼ်သုင်းမႃႉ၊ၵူၼ်းမဵဝ်းဢၼ်သဵတ်ႈၸႃႇလု၊ၵူၼ်းမဵဝ်းဢၼ်ဢမ်ႇမီးၵႂၢမ်းဢၼ်ၸိုဝ်ႈဢၼ်ၸႂ်ႈဢွၵ်ႇတီႈသူပ်းၶဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃၶူၼ်ႁူဝ်မႂ်းသေလႄႈဢဝ်ၵႂႃႇထိမ်ႈပႅတ်ႈ ၵႆၵႆတႃႉ။ ၶၢင်းၶီၶၢင်းၽၢၼ်ယူႇၵႃႈၼိူဝ်တီႈဢၼ်သုင် တင်းလၢႆတႃႉ။ လွင်ႈမၼ်းၸမ်ႉ၊ ထႃႇဝရႃႉၽြႃး၊ ထဵင်ပဵတ်ႈၸုၼ်ႉပႅတ်ႈၵူၼ်းမဵဝ်းဢၼ်၊ ႁဵတ်းႁႂ်ႈမၼ်းၸဝ်ႈၸႂ်လုၶႂ်ႈၸႃႉၼၼ်ႉယဝ်ႉ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵူၼ်းမဵဝ်း ယုတႃႉ၊ တင်းလၢႆဢွၼ်ၵၼ်ႁဵတ်းလွင်ႈတၢင်းဢၼ်ႁၢႆႉယုတ်ႈသိုဝ်ႈၼႃႈတႂ်ႈတႃၵဝ်ယဝ်ႉ။ ၶဝ်ဢွၼ်ၵၼ်ဢဝ်လွင်ႈတၢင်းဢၼ်လီႁင်ႈဢဵတ်ႇသဵတ်ႇၶဝ်သႂၢင်းသႂ်ႇဝႆႉၵႃႈၼႂ်းႁိူၼ်းၸဝ်ႈဢၼ်လႆႈၶၢမ်ႇတၢင်းဢၼ်ႁွင်ႉႁဵၵ်ႈလူၺ်ႈၼႃႇမႃႉၸိုဝ်ႈသဵင်ၵဝ်ၼၼ်ႉႁႂ်ႈၵူဝ်ႈၵိူၵ်ႇယဝ်ႉ။-
ၶဝ်ဢွၼ်ၵၼ်တႄႇႁဵတ်းထႃႇၼႃႉတီႈသုင် တေႃးၽႅတ်ႉ၊ ဢၼ်မီးၵႃႈၼႂ်းၶူင်ႈႁူၺ်ႈလုၵ်ႈၸၢႆး ႁိၼ်ႇၼုမ်ႇ၊ ၼၼ်ႉႁႂ်ႈလႆႈဢဝ်လုၵ်ႈၸၢႆးလုၵ်ႈယိင်းၶဝ်တုတ်ႇၽႆး၊ဢၼ်ပဵၼ်လွင်ႈတၢင်းဢၼ်ၵဝ်ဢမ်ႇသင်ႇလၢတ်ႈဝႆႉ၊ဢၼ်ႁူဝ်ၸႂ်ၵဝ်ဢမ်ႇလႆႈၵျၢမ်ႇပွင်ဝႆႉလႃးလႃးၼၼ်ႉယဝ်ႉ။-
ပိူဝ်ႈၼႆလႄႈ ထႃႇဝရႃႉၽြႃး၊ မီးဢမိင်ႉၸမ်ႉ၊ၶိင်ႇၵႃႇလႃႉမိုဝ်ႉဝၼ်းဢၼ်ဢမ်ႇလႆႈႁွင်ႉႁဵၵ်ႈၶူင်ႈႁူၺ်ႈ တေႃးၽႅတ်ႉ၊ ဢမ်ႇၼၼ်ၶူင်ႈႁူၺ်ႈလုၵ်ႈၸၢႆး ႁိၼ်ႇၼုမ်ႇ၊ ၵူၺ်းၵႃႈ၊တၵ်းလႆႈႁွင်ႉႁဵၵ်ႈမၼ်းလႄႈဝႃႈ၊ ၶူင်ႈႁူၺ်ႈဢၼ်ဢဝ်တၢႆ၊ ဝႃႈၼင်ႇၼႆၼၼ်ႉၼၼ်ႉတၵ်းႁွတ်ႈထိုင်ဢေႃႈ။ ၶဝ်တၵ်းဢွၼ်ၵၼ်ဢဝ်ၵူၼ်းတၢႆသၢင်းၵျူဝ်ႇၵႃႈတီႈ တေႃးၽႅတ်ႉ၊ ၼၼ်ႉတေႃႇထိုင်ႁွတ်ႈထၢၼ်ႈပေႃးဢမ်ႇမီးလိၼ်တီႈဢၼ်ပဝ်ႇဢၼ်လၢပ်ႈဢေႃႈ။-
တူဝ်တၢႆၵူၼ်းမဵဝ်းၼႆႉၸိူဝ်းၼၼ်ႉတၵ်းပဵၼ်တၢင်းၵိၼ်တၢင်းၶူပ်းပုၼ်ႈၼူၵ်ႉၵၢင်ႁၢဝ်တင်းလၢႆ၊ဢိၵ်ႇတင်းတူဝ်ထိူၼ်ႇႁၢႆႉတင်းလၢႆဢေႃႈ။ ၽူႈလႂ်သေၵေႃႉသေၵူၼ်းဢမ်ႇလႆႈလိုပ်ႈၶဝ်ပႅတ်ႈ။-
မိူဝ်ႈၼၼ်ႉၵဝ်တၵ်းႁႂ်ႈသဵင်ဢၼ်ၸူမ်းသိူဝ်း၊သဵင်ဢၼ်သႂၢင်ႇၸႂ်၊သဵင်ဢၼ်သွင်ႇမၢင်ႇၵလႃႇၵူၼ်းၸၢႆး၊သဵင်ဢၼ်သွင်ႇမၢင်ႇၵလႃႇၵူၼ်းယိင်းၶဝ်ၸိူဝ်းၼၼ်ႉထၢတ်ႇယဵၼ်ၵႂႃႇၵႃႈၼႂ်းဝဵင်း ယုတႃႉ၊ တင်းလၢႆ၊ဢိၵ်ႇတင်းၵႃႈၼိူဝ်သဵၼ်ႈတၢင်းဝဵင်း ယေႇရုသလႅမ်ႇ၊ ၸိူဝ်းၼၼ်ႉလႄႈမိူင်းၸဝ်ႈတၵ်းပဵၼ်တီႈဢၼ်သဵတ်ႇဢၼ်ယဵၼ်ၵႂႃႇဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “မိူဝ်ႈၼၼ်ႉၶဝ်တၵ်းဢွၼ်ၵၼ်ဢဝ်လုပ်ႇၶုၼ်ႁေႃၶမ်း ယုတႃႉ၊ လုပ်ႇမူးမၢတ်ႈၽွင်းမိူင်း၊လုပ်ႇယဵၸ်ႈပရေႃးႁဵၵ်ႈ၊ လုပ်ႇၵူၼ်းဝဵင်း ယေႇရုသလႅမ်ႇ၊ တင်းလၢႆၸိူဝ်းၼၼ်ႉဢွၵ်ႇသေၵႃႈၼႂ်းၶုမ်ပႃႇႁဵဝ်ႈၶဝ်လႄႈ၊-
ဢဝ်ၽႄႇဝႆႉၵႃႈတႂ်ႈတႃဝၼ်း၊ၵႃႈတႂ်ႈလိူၼ်၊ၵႃႈတႂ်ႈၶိူင်ႈပိူင်ၵၢင်ႁၢဝ်တင်းလၢႆဢၼ်ၶဝ်ႁၵ်ႉပႅင်းဢၼ်ၶဝ်ပွင်ႁဵတ်းၵၢၼ်၊ဢၼ်ၶဝ်ၸွမ်းၵႂႃႇ၊ဢၼ်ၶဝ်ႁႃဢဝ်လႄႈဢၼ်ၶဝ်ၵူဝ်းၵႂၢႆႇၸိူဝ်းၼၼ်ႉဢေႃႈ။ လုပ်ႇၸိူဝ်းၼၼ်ႉဢမ်ႇလႆႈၶၢမ်ႇတၢင်းဢၼ်ဢဝ်ၸုဢဝ်ၵွင်၊ဢမ်ႇလႆႈၶၢမ်ႇတၢင်းဢၼ်ဢဝ်သၢင်းၵျူဝ်ႇ၊တၵ်းလႆႈပဵၼ်ၸိူဝ်ႉၼင်ႇၶီႈၼင်ႇဢႃႇၵႃႈၼိူဝ်ၼႃႈလိၼ်ၼၼ်ႉဢေႃႈ။-
ၵူၼ်းမဵဝ်းဢၼ်ႁၢႆႉဢၼ်ယုတ်ႈဢၼ်ၵိုတ်းၵျၢၼ်ႇဝႆႉဢၼ်မီးယူႇၵႃႈၼႂ်းတီႈဢၼ်ၵဝ်လိုပ်ႈၶဝ်ပႅတ်ႈၵူႈတီႈၵူႈလႅၼ်ၸိူဝ်းၼၼ်ႉၼႆႉတၵ်းထုၵ်ႇၸႂ်ၵျိူၵ်ႈၸႂ်တၢင်းတၢႆ၊လိူဝ်တွၼ်းၼႃႇသေတၢင်းဢၼ်ဢသၢၵ်ႈလိပ်းၼၼ်ႉဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ။
မႂ်းတၵ်းလႆႈလၢတ်ႈတီႈၶဝ်လႄႈဝႃႈ၊ ထႃႇဝရႃႉၽြႃး၊ မီးဢမိင်ႉၸမ်ႉ၊ “ပေႃးၵူၼ်းလူမ်ႉၸိုင်၊ၶဝ်ဢမ်ႇၶိုၼ်းလုၵ်ႉႁိုဝ်း။ ပေႃးၶဝ်ၽိတ်းတၢင်းပိူင်ႈတၢင်းၵႂႃႇၸိုင်၊ၶဝ်ဢမ်ႇလႆႈပွၵ်ႈၶိုၼ်းမႃးႁိုဝ်း။-
ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၵူၼ်းမဵဝ်းၼႆႉၶိုၼ်းၽိတ်းပိူင်ႈလႄႈၽွၵ်ႈပျၢၼ်ႇတႃႇသေႇၵႂႃႇၸိူဝ်ႉၼင်ႇႁိုဝ်။ ၶဝ်ဢွၼ်ၵၼ်ၸပ်းၸွႆးမုသႃႇလႄႈထဵင်ပႅတ်ႈတၢင်းဢၼ်တၵ်းလႆႈၶိုၼ်းမႃးၼၼ်ႉဢေႃႈ။-
ၵဝ်ပႂ်ႉထွမ်ႇၶဝ်ငိၼ်းၶဝ်လီလီလႄႈၶဝ်ဢမ်ႇဢွၼ်ၵၼ်လၢတ်ႈသိုဝ်ႈသိုဝ်ႈတေႃႇတေႃႇဢေႃႈ။ ၽူႈလႂ်ဢမ်ႇၶုၵ်းၸႂ်လႆႈမႆႈၸႂ်လူၺ်ႈဢပျတ်ႈတူဝ်ၸဝ်ႈၵဝ်ႇလႄႈဝႃႈ၊ ‘ၵဝ်ႁဵတ်းမႅၼ်ႈၵႃႈသင်ယဝ်ႉ၊’ ဝႃႈၼင်ႇၼႆသေၵေႃႉသေၵူၼ်း။ ၶဝ်ၵႃႈမီးတင်းသဵင်ႈတင်းလူင်ဢွၼ်ၵၼ်ပိူင်ႈတၢင်းၵႂႃႇမိူၼ်ၸိူဝ်ႉၼင်ႇဢၼ်မႃႉၶုၼ်ႇလႅၼ်ႈၽင်ႈၽိင်ႈၵႂႃႇႁႂ်ႈလႆႈတိုၵ်းသိုၵ်းၼၼ်ႉဢေႃႈ။-
ၼူၵ်ႉၵွၼ်ႇဢၼ်ၸၢင်ႈလႄႇၵႂႃႇၵႃႈၼိူဝ်ၽႃႉၵၢင်ႁၢဝ်ၼၼ်ႉၸၢင်ႈႁုၶိင်ႇႁုယၢမ်းမၼ်းလႄႈၼူၵ်ႉတူႈ၊ၼူၵ်ႉဢႅၼ်ႇၽႃႉ၊ၼူၵ်ႉယဵဝ်ႈၸိူဝ်းၼၼ်ႉၸၢင်ႈတွင်းၶိင်ႇတွင်းမိူဝ်ႈဢၼ်ၶဝ်ၶိုၼ်းမႃးၼၼ်ႉဢေႃႈ။ ၵူၺ်းၵႃႈ၊ၵူၼ်းၵဝ်တင်းလၢႆၸမ်ႉ၊ဢမ်ႇႁုဢမ်ႇၸႅင်ႈလွင်ႈပိင်းၺၢပ်ႈတြႃး၊ ထႃႇဝရႃႉၽြႃး၊ ၼၼ်ႉ။-
‘ႁဝ်းပဵၼ်ၵူၼ်းဢၼ်မီးပိင်ႇၺႃႇလႄႈတြႃး ထႃႇဝရႃႉၽြႃး၊ မီးတီႈႁဝ်းဢေႃႈ၊’ ဝႃႈၼင်ႇၼႆသူလၢတ်ႈလႆႈၸိူဝ်ႉၼင်ႇႁိုဝ်။ ၵၼ်းတႅမ်ႈလိၵ်ႈၽူႈမၢႆလူင်ၶဝ်ၸိူဝ်းၼၼ်ႉတႅမ်ႈႁႂ်ႈပဵၼ်တြႃးမုသႃႇဢမၢၼ်ႇၶၼ်ပဵၼ်ယဝ်ႉ။-
ၵူၼ်းဢၼ်မီးပိင်ႇၺႃႇၸိူဝ်းၼၼ်ႉတၵ်းလႆႈဢွၼ်ၵၼ်ဢူၵ်းဢၢႆဢေႃႈ။ ၶဝ်တၵ်းလႆႈဢွၼ်ၵၼ်တူၵ်းၸႂ်လႄႈၶဝ်ႈၵႃႈၼႂ်းတူင်ႇႁႅဝ်ႉယဝ်ႉ။ တူၺ်းလူး။ ၶဝ်ဢွၼ်ၵၼ်ပႄႇပႅတ်ႈထဵင်ပႅတ်ႈၼုၵ်ႈၵပၢတ်ႈ ထႃႇဝရႃႉၽြႃး၊ ယဝ်ႉ။ ၶဝ်မီးပိင်ႇၺႃႇမဵဝ်းၸိူဝ်ႉၼင်ႇႁိုဝ်။-
ၵွပ်ႈပိူဝ်ႈလွင်ႈၼၼ်ႉလႄႈၵဝ်တၵ်းဢဝ်မေးၶဝ်ဢၢပ်ႈပၼ်တီႈပိူၼ်ႈလႄႈ၊တၵ်းဢဝ်တူင်ႈႁႆႈတူင်ႈၼႃးၶဝ်ဢၢပ်ႈပၼ်တီႈၵေႃႉဢၼ်ပႄႉၼႅင်ႇၶဝ်ၼၼ်ႉဢေႃႈ။ လွင်ႈမၼ်းၸမ်ႉ၊ၸႃႉၸဵမ်ၶဝ်ၸိူဝ်းဢၼ်လဵၵ်ႉသေပိူၼ်ႈတေႃႇထိုင်ႁွတ်ႈၶဝ်ၸိူဝ်းဢၼ်ယႂ်ႇသေပိူၼ်ႈၼၼ်ႉဢွၼ်ၵၼ်မီးၸႂ်ဢၼ်ၶွႆၶႂ်ႈလႆႈၼႂ်းတၢင်းဢၼ်ဢမ်ႇတြႃးၼၼ်ႉဢေႃႈ။ ၸႃႉၸဵမ်ပရေႃးၽႅတ်ႈ လႄႈယဵၸ်ႈပရေႃးႁဵၵ်ႈ ၵႃႈမီးၼၼ်ႉဢွၼ်ၵၼ်လၢတ်ႈၵႂၢမ်းမုသႃႇဢေႃႈ။-
ၶဝ်ယူတ်းယႃပၼ်ၵူၼ်းမဵဝ်းၵဝ်ဢၼ်ၸဵပ်းသႅပ်ႇၼၼ်ႉမဝ်မဝ်မၢင်မၢင်လႄႈလၢတ်ႈလႄႈဝႃႈ၊ ‘ၵတ်းယဵၼ်ၶျၢမ်းသႃႇ၊ၵတ်းယဵၼ်ၶျၢမ်းသႃႇ၊’ ဝႃႈၼင်ႇၼႆၼႂ်းမိူဝ်ႈဢၼ်ဢမ်ႇမီးတၢင်းၵတ်းယဵၼ်ၶျၢမ်းသႃႇၼၼ်ႉဢေႃႈ။-
ၶဝ်ဢွၼ်ၵၼ်ႁဵတ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇၼႃႇလႄႈပဵၼ်တၢင်းဢၼ်လီဢူၵ်းလီဢၢႆၼႃႇဢေႃႈ။ ၵူၺ်းၵႃႈ၊ၶဝ်ဢမ်ႇဢူၵ်းဢမ်ႇဢၢႆလႃးလႃး။ ၶဝ်ဢမ်ႇႁုလွင်ႈဢၼ်တေလႆႈၼႃႈလု။ ပိူဝ်ႈၼႆလႄႈၵေႃႉၼိုင်ႈယဝ်ႉၵေႃႉၼိုင်ႈတၵ်းဢွၼ်ၵၼ်လူမ်ႉလႄႈယၢမ်းမိူဝ်ႈဢၼ်ၵဝ်ပၼ်တၢမ်ႇဢပျတ်ႈတီႈၶဝ်ၼၼ်ႉၸိုင်၊ၶဝ်တၵ်းဢွၼ်ၵၼ်ႁွတ်ႈထိုင်တၢင်းဢၼ်ၶျႃးတူၵ်းတီႈတႅမ်ႇဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
“ၼႂ်းမိူဝ်ႈဢၼ်ၵဝ်ၶႂ်ႈၸုသိမ်းဢဝ်ၶဝ်ၼၼ်ႉ၊တူၼ်ႈၶိူဝ်းမၢၵ်ႇၸပိတ်ႉဢမ်ႇမီးမၢၵ်ႇ၊တူၼ်ႈမၢၵ်ႇလိူဝ်ႇဢမ်ႇမီးမၢၵ်ႇ၊မႂ်မၼ်းၵေႃႈႁဵဝ်ႇၸွပ်ႈၵႂႃႇ၊လွင်ႈတၢင်းဢၼ်ၵဝ်ပၼ်တီႈၶဝ်ဝႆႉၼၼ်ႉတၵ်းလပ်ႉႁၢႆလၢႆၵႂႃႇသေၵႃႈတီႈၶဝ်ဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈႁဝ်းဢွၼ်ၵၼ်ၼင်ႈလႄႈတဵတ်ႇၼိမ်ယူႇ။ ဢွၼ်ၵၼ်ၸုၵၼ်တုမ်ၵၼ်တႃႉႁဝ်း။ ဢွၼ်ၵၼ်ၶဝ်ႈၵႃႈၼႂ်းဝဵင်းတင်းလၢႆလႄႈတၢႆၵႃႈတီႈၼၼ်ႈတႃႉႁဝ်း။ လွင်ႈမၼ်းၸမ်ႉ၊ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၼၼ်ႉၸီႇယၢင်ႇႁဝ်းႁႂ်ႈႁဝ်းတၢႆယဝ်ႉ။ မၼ်းၸဝ်ႈဢဝ်ၼမ်ႉဢၼ်ပႃးၵွင်ႉပႃးယၢင်ၼၼ်ႉပၼ်ႁဝ်းၵိၼ်ၵွပ်ႈပိူဝ်ႈဢၼ်ႁဝ်းၽိတ်းပိူင်ႈ ထႃႇဝရႃႉၽြႃး၊ ၼၼ်ႉယဝ်ႉ။-
ပိၵ်ႉသမ်ႉႁဝ်းမုင်ႈမွင်းတၢင်းၵတ်းယဵၼ်ၶျၢမ်းသႃႇယူႇသေၵေႃႈ၊ႁဝ်းဢမ်ႇထူပ်းဢမ်ႇႁၼ်ဢၼ်လီဢၼ်ငၢမ်း။ ပိၵ်ႉသမ်ႉႁဝ်းမုင်ႈမွင်းၶိင်ႇဢၼ်တၵ်းသၢၵ်ႈသႃႇၶႅၼ်းမႃးၼၼ်ႉယူႇသေၵေႃႈပဵၼ်ၽေးလွၼ်ႉလွၼ်ႉၵူၺ်းဢေႃႈ။-
လႆႈငိၼ်းသဵင်ဢၼ်သုတ်ႇၶူႈလင်မႃႉၶဝ်ၸိူဝ်းၼၼ်ႉၵႃႈတီႈမိူင်း တၢၼ်ႇ၊ လႄႈၵွပ်ႈပိူဝ်ႈသဵင်ႁႄႇမႃႉသိုၵ်းငၢၼ်လူင်ၶဝ်ၸိူဝ်းၼၼ်ႉလႄႈမိူင်းသၼ်ႇၶွၼ်းဝႆၵႂႃႇတင်းမိူင်းဢေႃႈ။ ၶဝ်ၼၼ်ႉႁွတ်ႈမႃးလႄႈဢိုၼ်ၵိၼ်မိူင်း၊ဢိၵ်ႇတင်းၵႃႈဢၼ်မီးၵႃႈၼႂ်းမၼ်းၸိူဝ်းၼၼ်ႉ၊ဢိၵ်ႇတင်းဝဵင်းၶဝ်ၸိူဝ်းဢၼ်ယူႇၵႃႈၼႂ်းမၼ်းၸိူဝ်းၼၼ်ႉပႅတ်ႈဢေႃႈ။
“တူၺ်းလူး။ ၵဝ်တၵ်းပွႆႇၸႂ်ႉငူးႁၢႆႉမႃးၸူးတီႈသူ၊တီႈငူးႁၢႆႉၼၼ်ႉဢမ်ႇၸၢင်ႈဢဝ်တင်းၵႃႇထႃႇလႄႈပႄႉၼႅင်ႇမၼ်းလႆႈ။ ၶဝ်တၵ်းဢွၼ်ၵၼ်သၵ်းသူတွတ်ႇသူဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
တၢင်းၸူမ်းသိူဝ်းၵဝ်ႁၢႆသဵင်ႈၵႂႃႇလႄႈ တၢင်းဢၼ်မႆႈၸႂ်ၶီၸႂ်တၢင်ႇတဵင်ၵႃႈၼိူဝ် ၵဝ်ဢေႃႈ။ ၵဝ်ၼႆႉလႆႈၸႂ်လုဢေႃႈ။
တူၺ်းလူး။ လႆႈငိၼ်းသဵင်ၵူၼ်းၵဝ်ဢၼ် တုၵ်ႉၶႃႉယၢၵ်ႈၽၢၼ်ၸိူဝ်းၼၼ်ႉႁွင်ႉႁႆႈယူႇ ၵူႈတီႈၵူႈလႅၼ်ၵႃႈၼႂ်းမိူင်းၼႆႉဢေႃႈ။ “ ထႃႇဝရႃႉၽြႃး၊ ဢမ်ႇမီးယူႇၵႃႈၼႂ်းဝဵင်း ၸိဢုၼ်ႇ၊ ႁိုဝ်း။ ၶုၼ်ႁေႃၶမ်းဝဵင်း ၸိဢုၼ်ႇ၊ ၵေႃႈဢမ်ႇမီးယူႇၵႃႈၼႂ်းမၼ်းႁိုဝ်း။” ထႃႇဝရႃႉၽြႃး၊ သမ်ႉလၢတ်ႈလႄႈဝႃႈ၊ “ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၶဝ်လႆႈဢဝ် ႁုၼ်ႇႁၢင်ႈသၢင်းထုၶဝ်၊ဢိၵ်ႇတင်း ႁုၼ်ႇႁၢင်ႈသၢင်းထုၵူၼ်းတၢင်ႇတီႈတၢင်ႇလႅၼ်ၸိူဝ်းၼၼ်ႉ၊တိုၵ်းသူၼ်းတၢင်းၸႂ်မႆႈၶႂ်ႈၸႃႉၵဝ်ယူႇၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
“ၶိင်ႇဢၼ်လႆႈသိမ်းဢဝ်မၢၵ်ႇဢဝ်ႁူင်းၼၼ်ႉ ပူၼ်ႉၵႂႃႇယဝ်ႉ။ ၶိင်ႇမႆႈၶိင်ႇႁွၼ်ႉသဵင်ႈယဝ်ႉလႄႈႁဝ်းဢမ်ႇ ႁွတ်ႈထိုင်တၢင်းဢၼ်ၵႄႇသႄႇၶျွတ်ႈဢဝ်၊” ၶဝ်ဢွၼ်ၵၼ်ဝႃႈၼင်ႇၼႆဢေႃႈ။
ၵဝ်မီးတၢင်းဢၼ်ၸဵပ်းဢၼ်သႅပ်ႇၵွပ်ႈပိူဝ်ႈ တၢင်းဢၼ်ၵူၼ်းမဵဝ်းၵဝ်ဢၼ်တုၵ်ႉၶႃႉ ယၢၵ်ႈၽၢၼ်ၼၼ်ႉၸဵပ်းသႅပ်ႇၼၼ်ႉဢေႃႈ။ ၵဝ်ပွင်ႉၶၢင်းႁွင်ႉႁႆႈလႄႈၵႂင်ၸႂ်ယုင်ႈၸႂ်၊ လိုမ်းတူဝ်လိုမ်းၶိင်းယူႇဢေႃႈ။
ၵႃႈတီႈမိူင်း ၵိလတ်ႉ၊ ၼၼ်ႉဢမ်ႇမီးယႃႈယႃႁိုဝ်း။ ၵႃႈတီႈမိူင်းၼၼ်ႉဢမ်ႇမီးမေႃယႃႁိုဝ်း။ ပေႃးမီးၸိုင်၊ၵွပ်ႈသင်လႄႈ တၢင်းၸဵပ်းတၢင်းသႅပ်ႇၵူၼ်းမဵဝ်းၵဝ် ဢၼ်တုၵ်ႉၶႃႉယၢၵ်ႈၽၢၼ်ၼၼ်ႉဢမ်ႇမီး တၢင်းဢၼ်သၢၵ်ႈသႃႇၶႅၼ်းမႃး ၸိူဝ်ႉၼင်ႇႁိုဝ်၊ဝႃႈၼင်ႇၼႆဢေႃႈ။
လွင်ႈၼင်ႇႁိုဝ်ၵဝ်တၵ်းလႆႈႁွင်ႉႁႆႈယူႇဢမ်ႇထၢတ်ႇတင်းဝၼ်းတင်းၶိုၼ်း၊ ပုၼ်ႈတူဝ်တၢႆဢၼ်ၸၢပ်ႈသႅင်ႇၵၼ် တင်းၵူၼ်းမဵဝ်းၵဝ်ဢၼ်တုၵ်ႉၶႃႉယၢၵ်ႈၽၢၼ်ၸိူဝ်းၼၼ်ႉၸိုင်၊ ႁႂ်ႈႁူဝ်ၵဝ်ၼႆႉပဵၼ်ၼမ်ႉဢၼ်ဢွၵ်ႇယူႇလႄႈ ႁႂ်ႈမၢၵ်ႇတႃၵဝ်ၼႆႉပဵၼ်ၼမ်ႉဢွၵ်ႇႁူးဢၼ် ၼမ်ႉတႃဢွၵ်ႇယူႇၼၼ်ႉသေၵမ်းလူၺ်ႈ။
ႁႂ်ႈၵဝ်လႆႈမီးသုမ်ႉၵႃႈၼႂ်းထိူၼ်ႇၼႂ်းၶိူဝ်း ပုၼ်ႈတၵ်းၵႂႃႇတႃႈပႆတၢင်းၼၼ်ႉ၊ ပုၼ်ႈလွင်ႈၵဝ်တၵ်းၽၢတ်ႇယၢၼ်ဢွၵ်ႇသေ ၵူၼ်းမဵဝ်းၵဝ်တင်းလၢႆလႄႈၵႂႃႇယူႇ တီႈၵႆၵႆလႆႈၼၼ်ႉသေၵမ်းလူၺ်ႈ။ ၶဝ်တင်းသဵင်ႈတင်းလူင်ဢွၼ်ၵၼ်ၽိတ်းပိူင်ႈမေႇထုင်ႇတၢင်းဢၼ်ဢမ်ႇတြႃး၊ပဵၼ်မုၵ်ႉပဵၼ် ၸိူဝ်းဢၼ်သဵတ်ႈၸႃႇလုၼၼ်ႉဢေႃႈ။
ၶဝ်ဢွၼ်ၵၼ်ဢဝ်လိၼ်ႉၶဝ်ႁႂ်ႈၵူတ်ႉငေႃး မိူၼ်ၸိူဝ်ႉၼင်ႇဝူတ်ႈၵၢင်ႇဝႆႉဢေႃႈ။ ၶဝ်ဢွၼ်ၵၼ်ယႂ်ႇမႃႈၵႃႈသုင်၊မီးဢဵၼ်မီးႁႅင်းမႃး ၵႃႈၼႂ်းမိူင်းပုၼ်ႈတၢင်းဢၼ်ၽိတ်းပိူင်ႈလႄႈ ဢမ်ႇၸႂ်ႈပုၼ်ႈတၢင်းဢၼ်မၢၼ်ႇဢၼ်မႅၼ်ႈ။ “ၶဝ်ဢွၼ်ၵၼ်ႁဵတ်းလွင်ႈတၢင်းဢၼ်ႁၢႆႉထၢပ်ႈသႂ်ႇထႅင်ႈၵႃႈၼိူဝ်လွင်ႈတၢင်းဢၼ်ႁၢႆႉဢေႃႈ။ ၶဝ်ဢမ်ႇႁုဢမ်ႇမၢတ်ႈၵဝ်လႃးလႃး၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ဢွၼ်ၵၼ်ႁဵတ်းသတိလူၺ်ႈလွင်ႈၵူၼ်းႁိူၼ်း ဢၼ်ၸမ်ၵၼ်တင်းမႂ်းၼၼ်ႉတႃႉ။ ယႃႇပေယုမ်ႇပီႈၼွင်ႉၸိူဝ်ႉၶိူဝ်းမႂ်း၊ပီႈၼွင်ႉ ၸိူဝ်ႉၶိူဝ်းမႂ်းၸိူဝ်းၼၼ်ႉပဵၼ်ၶဝ်ၸိူဝ်းဢၼ်ႁူဝ်ၸႂ်ၵူတ်ႉငေႃးလႄႈ ၵူၼ်းႁိူၼ်းဢၼ်ၸမ်ၵၼ်တင်းမႂ်းၵူႈၵေႃႉ ၵူႈၵူၼ်းၼၼ်ႉပဵၼ်ၶဝ်ၸိူဝ်းဢၼ်ၸၢင်ႈ ၶႃႉၸိုဝ်ႈၶၢႆသဵင်ပိူၼ်ႈတႃႇသေႇဢေႃႈ။
ၶဝ်တင်းသဵင်ႈဢွၼ်ၵၼ်ပႅတ်ႉလႅၼ်ၵူၼ်းႁိူၼ်းဢၼ်ၸမ်ၵၼ်တင်းၶဝ်ၼၼ်ႉလႄႈ ၽူႈလႂ်သေၵေႃႉသေၵူၼ်းဢမ်ႇလၢတ်ႈ ၶေႃႈၵႂၢမ်းဢၼ်မၢၼ်ႇဢၼ်မႅၼ်ႈ၊ၶဝ်ဢွၼ်ၵၼ်သင်ႇသွၼ်လိၼ်ႉၶဝ်၊ ႁႂ်ႈလၢတ်ႈၵႂၢမ်းမုသႃႇလႄႈၶဝ်လႆႈႁဵတ်းၸွမ်းတၢင်းဢၼ်ဢမ်ႇတြႃးလႄႈငိၼ်းယၢပ်ႇၸႂ်ၽိုတ်ႇၸႂ်ပုၼ်ႈတေလႆႈမႆႈၸႂ်ဢပျတ်ႈၼၼ်ႉဢေႃႈ။
ၶဝ်ဢဝ်တၢင်းဢၼ်တဵၵ်းငႅၼ်းတၢင်ႇသႂ်ႇ ၵႃႈၼိူဝ်တၢင်းဢၼ်တဵၵ်းငႅၼ်းလႄႈဢဝ် တၢင်းဢၼ်ပႅတ်ႉလႅၼ်တၢင်ႇသႂ်ႇၵႃႈၼိူဝ် တၢင်းဢၼ်ပႅတ်ႉလႅၼ်ဢေႃႈ။ “ၶဝ်ဢွၼ်ၵၼ်ထဵင်ပႅတ်ႈတၢင်းဢၼ် ႁုၸၵ်းၵဝ်ယဝ်ႉ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ပိူဝ်ႈၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ “တေႃႈလဵဝ် ၵဝ်တၵ်းဢွင်ႇႁႂ်ႈၶဝ်ၸိူမ်ႈလႄႈ ၸၢမ်းတူၺ်းၶဝ် ဢမ်ႇၼၼ်ၵဝ်တၵ်း တေလႆႈႁဵတ်းၸိူဝ်ႉၼင်ႇႁိုဝ်တီႈၵူၼ်းမဵဝ်းၵဝ် ဢၼ်မီးဢပျတ်ႈၼၼ်ႉဢေႃႈ။
လိၼ်ႉၶဝ်ၼၼ်ႉပဵၼ်ပိုၼ်ၵၢင်ႇဢၼ်ၸၢင်ႈႁႂ်ႈတၢႆၼၼ်ႉလႄႈဢဝ်တင်းသူပ်းသေယဝ်ႉ ၸၢင်ႈလၢတ်ႈၵႂၢမ်းဢၼ်ပႅတ်ႉလႅၼ်ဢေႃႈ။ ၶဝ်တင်းသဵင်ႈဢွၼ်ၵၼ်ဢဝ်တင်းၵႂၢမ်းဢၼ်လီ ဢၼ်ဝၢၼ်သေလႄႈလၢတ်ႈတေႃႇၵူၼ်းႁိူၼ်း ၸိူဝ်းဢၼ်ၸမ်ၵၼ်တင်းၶဝ်ၼၼ်ႉဢေႃႈ။ ၵူၺ်းၵႃႈ၊ၵႃႈၼႂ်းၸႂ်ၶဝ်ၼၼ်ႉၸၢင်ႈၵျၢမ်ႇပွင် ႁႂ်ႈလႆႈလွမ်ႁဵတ်းတၢင်းဢၼ်ဢမ်ႇလီ ဢမ်ႇငၢမ်းတီႈပိူၼ်ႈဢေႃႈ။
ၵဝ်ဢမ်ႇထုၵ်ႇလီပၼ်တၢမ်ႇတီႈၶဝ်ၵွပ်ႈလွင်ႈတၢင်းၸိူဝ်းၼႆႉၼၼ်ႉႁိုဝ်း။ ၵဝ်ဢမ်ႇထုၵ်ႇလီတွပ်ႇတႅၼ်းပၼ်၊ တီႈၵူၼ်းမဵဝ်းၸိူဝ်ႉၼင်ႇၼႆၼၼ်ႉႁိုဝ်း၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ၵဝ်တၵ်းလႆႈႁဵတ်းတၢင်းဢၼ်ႁွင်ႉႁႆႈပွင်ႉၶၢင်း ပုၼ်ႈလွႆတင်းလၢႆ၊ဢိၵ်ႇတင်းတၢင်းဢၼ် ၶၢင်းၶီၶၢင်းၽၢၼ်ပုၼ်ႈထိူၼ်ႇတီႈဢၼ်ပၢင်ႇ ဢၼ်ပဵင်းၼၼ်ႉဢေႃႈ။ လွင်ႈမၼ်းၸမ်ႉ၊ဢၼ်ၸိူဝ်းၼၼ်ႉႁႅင်ႈႁွင်သဵတ်ႇယဵၼ်ၵႂႃႇလႄႈဢမ်ႇမီးၵေႃႉဢၼ်ပႆၵႂႃႇၵၢႆၵႂႃႇ။ ဢမ်ႇလႆႈငိၼ်းသဵင်သူဝ်းသဵင်ဝူဝ်းႁွင်ႉ၊ ၼူၵ်ႉၵၢင်ႁၢဝ်၊ဢိၵ်ႇတင်းတူဝ်သတ်းတရိၵ်ႈသၢၼ်ႇ တင်းလၢႆဢွၼ်ၵၼ်ပၢႆႈၵႂႃႇသဵင်ႈသဵင်ႈ မူတ်းမူတ်းယဝ်ႉဢေႃႈ။
“ၵဝ်တၵ်းႁဵတ်းႁႂ်ႈဝဵင်း ယေႇရုသလႅမ်ႇ၊ ပဵၼ်ပုမ်ႇပဵၼ်ၵွင်တၢင်းဢၼ်လုဢၼ်လႅဝ်လႄႈ ႁႂ်ႈပဵၼ်တီႈယူႇမႃလိၼ်ဢေႃႈ။ ၵဝ်တၵ်းႁဵတ်းႁႂ်ႈဝဵင်း ယုတႃႉ၊ တင်းလၢႆ ပဵၼ်တီႈဢၼ်ပဝ်ႇဢၼ်လၢပ်ႈလႄႈဢမ်ႇမီး ၵူၼ်းယူႇၵူၼ်းသဝ်းလႃးလႃးဢေႃႈ၊” ထႃႇဝရႃႉၽြႃး၊ ဝႃႈၼင်ႇၼႆဢေႃႈ။
ၵေႃႉဢၼ်မီးပိင်ႇၺႃႇဢၼ်ႁုလွင်ႈတၢင်းၼႆႉလႆႈၸမ်ႉ၊ပဵၼ်ၽူႈလႂ်။ ၵေႃႉဢၼ်ၶၢမ်ႇဢဝ်ၵႂၢမ်းဢၼ်ဢွၵ်ႇသူပ်း ထႃႇဝရႃႉၽြႃး၊ ႁႂ်ႈလႆႈမွၵ်ႇလၢတ်ႈလွင်ႈတၢင်းၼႆႉလႆႈၼၼ်ႉၸမ်ႉ၊ပဵၼ်ၽူႈလႂ်။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမိူင်းတင်းမိူင်းလုလႅဝ်သေယဝ်ႉ၊ႁႅင်ႈႁွင်သဵတ်ႇယဵၼ်မိူၼ်ၸိူဝ်ႉၼင်ႇထိူၼ်ႇၼင်ႇၶိူဝ်းၼၼ်ႉၵႂႃႇထၢၼ်ႈပေႃးဢမ်ႇမီးၵေႃႉဢၼ်ပႆၵႂႃႇၵၢႆၵႂႃႇၸိူဝ်ႉၼင်ႇႁိုဝ်။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵွပ်ႈပိူဝ်ႈဢၼ်ၶဝ်ဢွၼ်ၵၼ်ၸုၼ်ႉပႅတ်ႈတြႃးၵဝ်၊ဢၼ်ၵဝ်ဝႆႉၵႃႈတီႈၽၢႆႇၼႃႈၶဝ်ၼၼ်ႉလႄႈၶဝ်ဢမ်ႇထွမ်ႇဢမ်ႇဢဝ်ၵႂၢမ်းၵဝ်၊ဢမ်ႇၵမ်ဢမ်ႇၵျၢင်ႉၸွမ်းၵႃႈၼင်ႇဢၼ်ၵဝ်ၸႂ်ႉႁဵတ်းၼၼ်ႉ။-
ၵူၺ်းၵႃႈ၊မီးႁူဝ်ၸႂ်ဢၼ်ၵႅၼ်ႇၶႅင်ၼႃႇလႄႈၸွမ်းဢလူဝ်ႇၵၢင်ၸႂ်တူဝ်ၸဝ်ႈၵဝ်ႇသေယဝ်ႉ၊ၸွမ်းလင် ၽြႃးပႃႇလႃႉ၊ တင်းလၢႆ၊ၵႃႈၼင်ႇဢၼ်ပူႇမွၼ်ႇၶဝ်သွၼ်ပၼ်ၼၼ်ႉဢေႃႈ။-
ပိူဝ်ႈၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊ၵဝ်တၵ်းဢဝ်ၽၵ်းဢၼ်ၶူမ်ၼႃႇလဵင်ႉပၼ်ၶဝ်လႄႈတၵ်းဢဝ်ၼမ်ႉဢၼ်ပႃးၵွင်ႉၼၼ်ႉပၼ်ၶဝ်ၵိၼ်ဢေႃႈ။-
ၵဝ်တၵ်းဢဝ်ၶဝ်ၽၢတ်ႇၽႄၵၼ်ၵႃႈၼႂ်းၵႄႈၵူၼ်းၵူႈၸိူဝ်ႉၵူႈမဵဝ်းဢၼ်ၶဝ်ဢမ်ႇႁုၸၵ်း၊ဢၼ်ပူႇမွၼ်ႇၶဝ်ဢမ်ႇႁုၸၵ်းၼၼ်ႉလႄႈၵဝ်တၵ်းပွႆႇၸႂ်ႉၽေးလၢပ်ႇၽေးလႅဝ်းၸွမ်းလင်ၶဝ်ယူႇတေႃႇထိုင်ႁွတ်ႈၵဝ်ယႃႉၽဵဝ်ႈၶဝ်ပႅတ်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ “ဢွၼ်ၵၼ်ၶႆႈၸႂ်ဝူၼ်ႉၸႂ်လႄႈ ႁွင်ႉဢဝ်မႄႈယိင်းဢၼ်မေႃႁွင်ႉႁႆႈၼႂ်းပၢင် မႃႇသႃႇၸိူဝ်းၼၼ်ႉမႃးသေ၊ ဢွၼ်ၵၼ်ပွႆႇၸႂ်ႉၵူၼ်းၵႂႃႇၸူးၵႃႈတီႈမႄႈယိင်းဢၼ်လၵ်းလႅမ်ၸိူဝ်းၼၼ်ႉႁႂ်ႈၶဝ်မႃးသေ၊” ဝႃႈၼင်ႇၼႆဢေႃႈ။
ၶဝ်သမ်ႉဢွၼ်ၵၼ်လၢတ်ႈလႄႈဝႃႈ၊ “ႁႂ်ႈၶဝ်ဢွၼ်ၵၼ်ႁဵတ်းႁိပ်ႈႁဵတ်းၼႅတ်ႈလႄႈ ႁဵတ်းၵႂၢမ်းမႃႇသႃႇပုၼ်ႈႁဝ်း၊ ႁႂ်ႈၼမ်ႉတႃႁဝ်းတူၵ်းလႄႈႁႂ်ႈၼမ်ႉတႃလႆ ဢွၵ်ႇသေၵႃႈတီႈၶွပ်ႇတႃႁဝ်းသေ။”
လႆႈငိၼ်းသဵင်ဢၼ်ႁွင်ႉႁႆႈၵႃႈၼႂ်းဝဵင်း ၸိဢုၼ်ႇ၊ ၼၼ်ႉၸမ်ႉ၊ “ႁဝ်းလႆႈၶၢမ်ႇတၢင်းဢၼ် ႁိမ်ဢဝ်ယႃႉပႅတ်ႈၼမ်ၼႃႇယဝ်ႉလူင်ပႄႇ၊ ႁဝ်းဢွၼ်ၵၼ်မီးတၢင်းဢၼ်ဢူၵ်းဢၼ် ဢၢႆယူႇ၊ၵွပ်ႈပိူဝ်ႈဢၼ်ႁဝ်းၸုၼ်ႉပႅတ်ႈ မိူင်းၸဝ်ႈ၊ဢိၵ်ႇတင်း ၵွပ်ႈပိူဝ်ႈဢၼ်ပိူၼ်ႈၵိူၼ်ႇယႃႉပႅတ်ႈတီႈယူႇတီႈသဝ်း ႁဝ်းၼၼ်ႉလူင်ပႄႇ၊” ဝႃႈၼင်ႇၼႆဢေႃႈ။
မႄႈယိင်းၶဝ်႟။ ဢွၼ်ၵၼ်ထွမ်ႇငိၼ်းၼုၵ်ႈၵပၢတ်ႈ ထႃႇဝရႃႉၽြႃး၊ လႄႈဢဝ်ႁူသူ ႁပ်ႉၶၢမ်ႇတုင်းဢဝ်ၵႂၢမ်းဢၼ်ဢွၵ်ႇသူပ်းမၼ်းၸဝ်ႈၼၼ်ႉတႃႉ။ ဢွၼ်ၵၼ်သင်ႇသွၼ်ပၼ်တၢင်းဢၼ် ႁွင်ႉႁႆႈၼၼ်ႉတီႈလုၵ်ႈယိင်းသူတင်းလၢႆ၊ ဢိၵ်ႇတင်းတၢင်းဢၼ်ပွင်ႉၶၢင်းပွင်ႉမိုၼ်ႇတီႈၵူၼ်းႁိူၼ်းၸမ်ၵၼ်တင်းသူၸိူဝ်းၼၼ်ႉတႃႉ။
ၶုၼ်တၢႆၶိုၼ်ႈၸူးၵႃႈတီႈႁူးလၢင်းတဵၼ်ႁဝ်းလႄႈၶဝ်ႈၵႃႈၼႂ်းႁၢင်ႈၼႂ်းႁေႃႁဝ်း၊ ႁႂ်ႈလႆႈပႄႇၽဵဝ်ႈလုၵ်ႈဢွၼ်ႇတင်းလၢႆပႅတ်ႈသေ ၵႃႈတီႈသဵၼ်ႈတႃသၢႆတၢင်း၊ဢိၵ်ႇတင်း ၵူၼ်းၼုမ်ႇၵူၼ်းၵမ်တင်းလၢႆသေၵႃႈၼႂ်းပၢင်ႇ ၼႂ်းဝၢင်းတင်းလၢႆယဝ်ႉ။
ဢွၼ်ၵၼ်မွၵ်ႇလၢတ်ႈလႄႈဝႃႈ၊ “ ထႃႇဝရႃႉၽြႃး၊ မီးဢမိင်ႉၸမ်ႉ၊တူဝ်တၢႆတင်းလၢႆတၵ်းတူၵ်းဝႆႉ၊ မိူၼ်ၸိူဝ်ႉၼင်ႇၶီႈဝူဝ်းၵႃႈတီႈၼႂ်း ပၢင်ႇတူင်ႈၼႃး၊ဢိၵ်ႇတင်း ၸိူဝ်ႉၼင်ႇလိုၼ်ႈၶဝ်ႈဢၼ်ၵိုတ်းၵျၢၼ်ႇဝႆႉ၊ ၵႃႈတီႈၽၢႆႇလင်ၵေႃႉဢၼ်ပၢတ်ႇၶဝ်ႈၼၼ်ႉလႄႈဢမ်ႇမီးၵေႃႉဢၼ်ၵဵပ်းဢဝ်သိမ်းဢဝ်ၼၼ်ႉဢေႃႈ၊” ဝႃႈၼင်ႇၼႆမွၵ်ႇလၢတ်ႈတီႈၶဝ်တႃႉ။
ထႃႇဝရႃႉၽြႃးမီးဢမိင်ႉၸမ်ႉ၊ “ယႃႇပေႁႂ်ႈၵေႃႉဢၼ်မီးပိင်ႇၺႃႇၼၼ်ႉဢုပ်ႇဝၢဝ်းလူၺ်ႈ လွင်ႈပိင်ႇၺႃႇမၼ်းၼၼ်ႉ။ ယႃႇပေႁႂ်ႈၵေႃႉဢၼ်မီးႁႅင်းၼၼ်ႉဢုပ်ႇဝၢဝ်းယူႇလူၺ်ႈလွင်ႈႁႅင်းမၼ်းၼၼ်ႉ။ ယႃႇပေႁႂ်ႈၵေႃႉဢၼ်မၢၵ်ႈမီးဢုၵ်ႉၸႃႇၼၼ်ႉ ဢုပ်ႇဝၢဝ်းလူၺ်ႈလွင်ႈဢုၵ်ႉၸႃႇမၼ်းၼၼ်ႉ။
ၵူၺ်းၵႃႈ၊ႁႂ်ႈၵေႃႉဢၼ်ဢုပ်ႇဝၢဝ်းၼၼ်ႉ ဢုပ်ႇဝၢဝ်းလူၺ်ႈလွင်ႈၸိူဝ်းၼႆႉဢၼ်ဝႃႈ၊ တၢင်းဢၼ်ႁုဢၼ်ၸႅင်ႈသၽေႃးၵဝ်၊ လွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢၼ်ႁဵတ်း တၢင်းဢၼ်ႁၵ်ႉဢဵတ်းလူ၊တၢင်းဢၼ်ၸီႇယၢင်ႇ ၸွမ်းၼင်ႇတြႃး၊တၢင်းဢၼ်သိုဝ်ႈတေႃႇ ၵႃႈၼိူဝ်လိၼ်မိူင်းၼႆႉၼၼ်ႉၵူၺ်းတႃႉ။ ၵဝ်ၼႆႉမူၼ်ႈပျေႃႇယူႇၵႃႈၼႂ်းလွင်ႈတၢင်း ၸိူဝ်းၼႆႉဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉထႅင်ႈၸမ်ႉ၊ “မိုဝ်ႉဝၼ်းဢၼ်ၵဝ်တၵ်းလႆႈပၼ်တၢမ်ႇၼၼ်ႉတၵ်းႁွတ်ႈထိုင်ၵႃႈၼိူဝ်ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ပၢတ်ႇပၢႆၼင်ၽၢႆႇၼိူဝ်ႉၼင်ႇၵူၺ်းၸိူဝ်းၼၼ်ႉပဵၼ်၊-
ၵူၼ်းမဵဝ်း ဢေးၵျိပ်ႉ၊ ၵူၼ်းမဵဝ်း ယုတႃႉ၊ ၵူၼ်းမဵဝ်း ဢေႇတုမ်ႇ၊ ၵူၼ်းမဵဝ်း ဢမ်ႇမုၼ်ႇ၊ ၵူၼ်းမဵဝ်း မေႃႇၽႃႉ၊ ဢိၵ်ႇတင်းၵူၼ်းမဵဝ်းဢၼ်ၸၢင်ႈထႃၶူၼ်ၵႅမ်ႈၶူၼ်ၵၢင်းလႄႈယူႇၵႃႈၼႂ်းထိူၼ်ႇၼႂ်းၶိူဝ်းၸိူဝ်းၼၼ်ႉဢေႃႈ။ လွင်ႈမၼ်းၸမ်ႉ၊ၵူၼ်းတၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉပဵၼ်ၵေႃႉဢၼ်ၶၢမ်ႇတၢင်းဢၼ်ပၢတ်ႇပၢႆၼင်ၵႃႈၼႂ်းၼိူဝ်ႉၼင်ၵူၺ်းလႄႈၸႂ်ၶဝ်ဢမ်ႇလႆႈၶၢမ်ႇတၢင်းဢၼ်ပၢတ်ႇပၢႆၼင်၊ၵူၼ်းမဵဝ်း ဢိသရေး၊ တင်းသဵင်ႈတင်းလူင်ၵေႃႈပဵၼ်ၶဝ်ၸိူဝ်းဢၼ်ဢမ်ႇၶၢမ်ႇတၢင်းဢၼ်ပၢတ်ႇပၢႆၼင်ၵႃႈၼႂ်းႁူဝ်ၸႂ်ၶဝ်ဢေႃႈ၊” ဝႃႈၼင်ႇၼႆဢေႃႈ။
ၵူၼ်းမဵဝ်း ဢိသရေး၊ တင်းလၢႆၶဝ်႟။ ဢွၼ်ၵၼ်ထွမ်ႇငိၼ်းၵႂၢမ်းဢၼ် ထႃႇဝရႃႉၽြႃး၊ မီးဢမိင်ႉဝႆႉတီႈသူၼႆႉတႃႉ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ယႃႇပေ ၸွမ်းၽႃႇသႃႇသဵၼ်ႈတၢင်းၵူၼ်း တၢင်ႇၸိူဝ်ႉတၢင်ႇၶိူဝ်းတင်းလၢႆၼၼ်ႉ။ ယႃႇပေတူၵ်းၸႂ်ၵူဝ်ႁႄၼိမိၵ်ႈလၢၵ်ႈၶၼႃႇ ၽႃႉၵၢင်ႁၢဝ်ဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်း ၶဝ်ၸၢင်ႈတူၵ်းၸႂ်ၵူဝ်ႁႄၼၼ်ႉ။
ထုင်းၽိင်ႈမဵဝ်းၵူၼ်းတင်းလၢႆၸိူဝ်းၼၼ်ႉပဵၼ် ဢၼ်ၽိတ်းပိူင်ႈဢေႃႈ။ ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ၊ ၶဝ်ဢွၼ်ၵၼ်ပွမ်ႈဢဝ်တူၼ်ႈမႆႉၵႃႈတီႈ ၼႂ်းထိူၼ်ႇၼႂ်းၶိူဝ်းဢၼ်ဝႃႈ၊ ၶိူင်ႈပိူင်တီႈဢၼ်ၸၢင်ႈမႆႉၸၢင်ႈဢဝ်တင်း တႃမၢတ်ႇႁဵတ်းၼၼ်ႉဢေႃႈ။
ၵူၼ်းတင်းလၢႆဢဝ်ငိုၼ်းဢဝ်ၶမ်းႁၢင်ႈၶိူင်ႈသႂ်ႇ တီႈၶိူင်ႈပိူင်ၸိူဝ်းၼၼ်ႉဝႆႉလႄႈ ဢဝ်တင်းၶွၼ်ႉလဵၵ်းတွၵ်ႇၸပ်းဝႆႉဢမ်ႇႁႂ်ႈမၼ်း သၼ်ႇၶွၼ်းတူင်ႉၼိုင်ဢေႃႈ။
ႁုၼ်ႇႁၢင်ႈသၢင်းထုၶဝ်ၼၼ်ႉမိူၼ်ၸိူဝ်ႉၼင်ႇတူဝ်ႁၢင်ႈဢၼ်လွၵ်ႇငိုတ်ႈၼူၵ်ႉၵႃတင်းလၢႆ၊ ဢၼ်မီးၵႃႈၼႂ်းသူၼ်တႅင်ၼၼ်ႉလႄႈဢမ်ႇ ၸၢင်ႈလၢတ်ႈၵႂၢမ်း။ ဢၼ်ၸိူဝ်းၼႆႉ ဢမ်ႇၸၢင်ႈၵႂႃႇတၢင်းပၢႆတၢင်းလႄႈ တၵ်းတေလႆႈၶၢမ်ႇတၢင်းဢၼ်ႁၢပ်ႇၵႂႃႇ ႁၢမ်ၵႂႃႇဢေႃႈ။ ယႃႇပေၵူဝ်ပေႁႄဢၼ် ၸိူဝ်းၼႆႉ။ လွင်ႈဢၼ်ႁဵတ်းႁၢႆႉႁဵတ်းလီၸိူဝ်း ၼၼ်ႉၵေႃႈ၊ႁုၼ်ႇႁၢင်ႈသၢင်းထုၸိူဝ်းၼၼ်ႉဢမ်ႇ တၢတ်ႈၼိူင်ႇႁဵတ်းလႆႈ၊” ဝႃႈၼင်ႇၼႆဢေႃႈ။
ဢူဝ်း ထႃႇဝရႃႉၽြႃး၊ တီႈၶႃႈ။ ၽူႈလႂ် သေၵေႃႉသေၵူၼ်းဢမ်ႇမိူၼ်ၵၼ်တင်း ၸဝ်ႈႁဝ်းလႃးလႃးတီႈၶႃႈ။ ၸဝ်ႈႁဝ်းပဵၼ်ဢၼ်ယႂ်ႇမျၢတ်ႈလႄႈၼႃႇမႃႉၸိုဝ်ႈသဵင်ၸဝ်ႈႁဝ်းၵေႃႈ ပဵၼ်ဢၼ်ယႂ်ႇမျၢတ်ႈ ၵွပ်ႈပိူဝ်ႈတၼ်းၶူဝ်းၸဝ်ႈႁဝ်းတီႈၶႃႈဢေႃႈ။
ဢူဝ်း၊ၶုၼ်ႁေႃၶမ်းၵူၼ်းၵူႈၸိူဝ်ႉၵူႈမဵဝ်းတီႈၶႃႈ။ မီးသေၵေႃႉသေၵူၼ်းႁိုဝ်းဢမ်ႇၵူဝ်ႁႄ ၸဝ်ႈႁဝ်း၊ၵွပ်ႈပိူဝ်ႈၸဝ်ႈႁဝ်းထုၵ်ႇလီလႆႈႁပ်ႉ ဢဝ်ၸိူဝ်ႉၼင်ႇၼႆတီႈၶႃႈယဝ်ႉ။ ၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းဢၼ်မီးပိင်ႇၺႃႇ တင်းသဵင်ႈတင်းလူင်၊ဢိၵ်ႇတင်း ၵူၼ်းၵႃႈၼႂ်းသိုင်ႇၸိုင်ႈဝၢၼ်ႈမိူင်းတင်းသဵင်ႈ တင်းလူင်ၼၼ်ႉ၊ဢမ်ႇမီးၵေႃႉဢၼ်မိူၼ်ၵၼ် တင်းၸဝ်ႈႁဝ်းသေၵေႃႉသေၵူၼ်းတီႈၶႃႈ။
ၶဝ်ၼၼ်ႉမီးၸႂ်သၽေႃးဢၼ်ၼိုၵ်းတၼ်ၼႃႇလႄႈႁၢႆႉမိူၵ်ႈမိူၼ်မိူၼ်ၵၼ်ဢေႃႈ။ တၢင်းဢၼ်ႁုၼ်ႇႁၢင်ႈသၢင်းထုၸိၼႄ သင်ႇသွၼ်ၼၼ်ႉၵေႃႈဢမ်ႇပွင်ႇလွင်ႈၵႃႈသင်ဢေႃႈ။
ၶႅပ်းငိုၼ်းဢၼ်ပေႃႉထုပ်ႉၼၼ်ႉဢဝ်ၵႃႈတီႈ မိူင်း သပဵၼ်ႇ၊ မႃးလႄႈၶမ်းၸမ်ႉ၊ ဢဝ်ၵႃႈတီႈမိူင်း ဢုၽတ်ႉ၊ မႃးဢေႃႈ။ ဢၼ်ၸိူဝ်းၼႆႉပဵၼ်ၵၢၼ်ငၢၼ်းၵေႃႉဢၼ်မေႃႁဵတ်းမေႃၶႅၵ်း၊ပဵၼ်လၢႆးမိုဝ်းၸၢင်ႈၶမ်း ၵေႃႉဢၼ်မေႃတွင်ႈမေႃၶႅၵ်းၼၼ်ႉဢေႃႈ။ ၶူဝ်းဢၼ်သွမ်ႇ၊ၶူဝ်းဢၼ်ၵမ်ႇၼၼ်ႉပဵၼ် ၶူဝ်းၼုင်ႈၶဝ်ဢေႃႈ။ ၶိူင်ႈပိူင်ၸိူဝ်းၼႆႉ ပဵၼ်ၶိူင်ႈပိူင်ဢၼ်ၵူၼ်းၵတ်ႉၶႅၼ်ႇၶဝ်ႁဵတ်းပဵၼ်လွၼ်ႉလွၼ်ႉဢေႃႈ။
ၵူၺ်းၵႃႈ၊ ထႃႇဝရႃႉၽြႃး၊ ၸမ်ႉ၊ပဵၼ်ၽြႃး ဢၼ်ၸိုဝ်ႈဢၼ်ၸႂ်ႈ၊ၽြႃးဢၼ် ဢသၢၵ်ႈလိပ်းယူႇလႄႈပဵၼ်ၶုၼ်ႁေႃၶမ်း ၼိၵ်ႈၸႃႉထႃႇဝရႃႉဢေႃႈ။ ပေႃးတေႃးသႃႉမၼ်းၸဝ်ႈဢွၵ်ႇၸိုင်၊လိၼ်မိူင်းသၼ်ႇဝႆၶွၼ်းဝႆလႄႈၵူၼ်းၵူႈၸိူဝ်ႉၵူႈမဵဝ်း ဢမ်ႇၸုၵ်းၶၢမ်ႇတၢင်းၸႂ်မႆႈၶႂ်ႈၸႃႉမၼ်းၸဝ်ႈလႆႈ။
ၵႂၢမ်းဢၼ်တၵ်းလႆႈလၢတ်ႈတီႈၶဝ်ၸိူဝ်းၼၼ်ႉၸမ်ႉ၊ၽြႃးဢၼ်ဢမ်ႇလႆႈႁဵတ်းပဵၼ်ၽႃႉၵၢင်ႁၢဝ်၊ဢိၵ်ႇတင်းလိၼ်မိူင်းၼႆႉၸိူဝ်းၼၼ်ႉတၵ်းဢွၼ်ၵၼ်လုလႅဝ်ႁၢႆလၢႆၵႂႃႇသေၵႃႈတီႈလိၼ်မိူင်းၼႆႉ၊ဢိၵ်ႇတင်းၵႃႈတီႈတႂ်ႈၽႃႉၵၢင်ႁၢဝ်ဢေႃႈ။
မၼ်းၸဝ်ႈဢဝ်တၼ်းၶူဝ်းၸဝ်ႈႁဵတ်းပဵၼ် လိၼ်မိူင်းယဝ်ႉ။ မၼ်းၸဝ်ႈဢဝ်ပိင်ႇၺႃႇၸဝ်ႈတႄႇႁဵတ်း ၵမ်ႇၽႃႇယဝ်ႉ။ မၼ်းၸဝ်ႈဢဝ်ၺၢၼ်ႇပိင်ႇၺႃႇၸဝ်ႈၶဵင်ႈမုင်း ၽႃႉၵၢင်ႁၢဝ်ယဝ်ႉ။
ယၢမ်းမိူဝ်ႈဢၼ်မၼ်းၸဝ်ႈပွႆႇသဵင်ၸဝ်ႈၼၼ်ႉၸိုင်၊ ၼမ်ႉတင်းလၢႆဢၼ်မီးၵႃႈၼိူဝ် ၽႃႉၵၢင်ႁၢဝ် ၼၼ်ႉ၊ ႁုၼ်ႈမေႃးမႃးၼႃႇလူင်လၢင်လႄႈမၼ်းၸဝ်ႈႁႂ်ႈၽႃႉၽူၼ်လုၵ်ႉသေၵႃႈတီႈႁိမ်းလႅၼ်သုတ်း လိၼ်မိူင်းၼၼ်ႉပေႃႇၶိုၼ်ႈမႃးဢေႃႈ။ မၼ်းၸဝ်ႈႁဵတ်းၽႃႉမႅပ်ႈပုၼ်ႈၽူၼ်တူၵ်းဢေႃႈ။ လူမ်းၵေႃႈမၼ်းၸဝ်ႈဢဝ်ဢွၵ်ႇသေၵႃႈၼႂ်း တိူၵ်ႈၽၢၼ်ႇတႃႇမၼ်းၸဝ်ႈမႃးဢေႃႈ။
ၵူၼ်းၵူႈၵေႃႉၵူႈၵူၼ်းၸိုင်၊မီးၸႂ်သၽေႃး ဢၼ်ၼိုၵ်းတၼ်ၼႃႇလႄႈဢမ်ႇမီး ၺၢၼ်ႇပိင်ႇၺႃႇလႃးလႃး။ ၸၢင်ႈၶမ်းၶဝ်တင်းသဵင်ႈမီးတၢင်းဢၼ်ဢူၵ်းဢၢႆၵွပ်ႈပိူဝ်ႈႁုၼ်ႇႁၢင်ႈသၢင်းထုၶဝ်ၼၼ်ႉဢေႃႈ။ လွင်ႈမၼ်းၸမ်ႉ၊ႁုၼ်ႇႁၢင်ႈသၢင်းထုၶဝ်ၼၼ်ႉ ပဵၼ်ဢၼ်ဢမ်ႇမၢၼ်ႇမႅၼ်ႈလႄႈၵႃႈၼႂ်း ႁုၼ်ႇႁၢင်ႈသၢင်းထုၼၼ်ႉဢမ်ႇမီးတၢင်းဢၼ် ထူၺ်ႈၸႂ်ၶဝ်ႈထူၺ်ႈၸႂ်ဢွၵ်ႇ။
ဢၼ်ၸိူဝ်းၼၼ်ႉပဵၼ်ဢၼ်လၢႆလၢႆ ဢမ်ႇပွင်ႇလွင်ႈၵႃႈသင်ဢေႃႈ။ ပဵၼ်ၶိူင်ႈပိူင်ဢၼ်ၽိတ်းဢၼ်ပိူင်ႈဢေႃႈ။ မိူဝ်ႈထိုင်ၶိင်ႇဢၼ်ပၼ်တၢမ်ႇဢပျတ်ႈၼၼ်ႉၶဝ်တၵ်းလုလႅဝ်ႁၢႆလၢႆၵႂႃႇဢေႃႈ။
ပုၼ်ႈတႃႇၽြႃးပဵၼ်ၸဝ်ႈၵူၼ်းမဵဝ်း ယႃႇၵုပ်ႈ၊ ၸမ်ႉ၊ဢမ်ႇမိူၼ်ၵၼ်တၢင်းၶိူင်ႈပိူင်ၸိူဝ်းၼၼ်ႉ၊ လွင်ႈမၼ်းၸမ်ႉ၊မၼ်းၸဝ်ႈပဵၼ်ၸဝ်ႈဢၼ် ႁဵတ်းပဵၼ်လွင်ႈတၢင်းၵူႈၸိူဝ်ႉၵူႈပိူင်ဢေႃႈ။ မဵဝ်း ဢိသရေး၊ ပဵၼ်ၵူၼ်းမဵဝ်းဢၼ်ၶၢမ်ႇဢဝ် ဢမူၺ်ႇမၼ်းၸဝ်ႈဢေႃႈ။ ၼႃႇမႃႉၸိုဝ်ႈသဵင်မၼ်းၸဝ်ႈၼၼ်ႉႁွင်ႉဝႃႈ၊ ထႃႇဝရႃႉၽြႃး၊ၸဝ်ႈဢၼၼ်ႇတႃႉ တၼ်းၶူဝ်း၊ ဢေႃႈ။
သူၸိူဝ်းဢၼ်လႆႈၶၢမ်ႇတၢင်းဢၼ်လွမ်ႉဝႅတ်ႉဝႆႉၼႆႉ႟။ ၸုသိမ်းဢဝ်ဢုၵ်ႉၸႃႇၶိူင်ႈပိူင်ဢွၵ်ႇသေၵႃႈၼိူဝ်ၼႃႈလိၼ်တႃႉ။-
ထႃႇဝရႃႉၽြႃး၊ မီးဢမိင်ႉၸမ်ႉ၊ “မိူဝ်ႈလဵဝ်ၼႆႉၵဝ်တၵ်းဢဝ်ၵူၼ်းဝၢၼ်ႈၵူၼ်းမိူင်းတင်းလၢႆပိုတ်းၶဝ်ဢွၵ်ႇသေၵႃႈၼႂ်းမိူင်းၼႆႉလႄႈဢဝ်တုၵ်ႉၶႃႉတၢင်းဢၼ်ယၢၵ်ႈၽၢၼ်တူၵ်းႁွတ်ႈၵႃႈၼိူဝ်ၶဝ်ဢေႃႈ။ ၵွပ်ႈၼႆလႄႈၶဝ်တၵ်းလႆႈၶၢမ်ႇၸိူဝ်ႉၼင်ႇၼႆဢေႃႈ၊” ဝႃႈၼင်ႇၼႆဢေႃႈ။
ၵဝ်ၼႆႉမီးဢႃႉမၢင်ႇၵလႃႇၵွပ်ႈပိူဝ်ႈဢၼ်လႆႈၶၢမ်ႇတၢင်းဢၼ်တိူဝ်ႉဢၼ်မၢတ်ႇၼၼ်ႉလႄႈတၢင်းၸဵပ်းၵဝ်ပဵၼ်ဢၼ်ႁႅင်းၼႃႇလူင်လၢင်ဢေႃႈ။ ၵူၺ်းၵႃႈ၊ၵဝ်လၢတ်ႈလႄႈဝႃႈ၊ “ဢၼ်ၼႆႉပဵၼ်တၢမ်ႇဢပျတ်ႈၵဝ်လႄႈၵဝ်တၵ်း လႆႈၶၢမ်ႇဢမၢၼ်ႇၶၼ်ပဵၼ်ဢေႃႈ၊” ဝႃႈၼင်ႇၼႆဢေႃႈ။
သုမ်ႉထဵင်ၵဝ်လုလႅဝ်ယဝ်ႉ။ ၸိူၵ်ႈၵဝ်ၵႃႈမီးၵေႃႈၶၢတ်ႇယဝ်ႉ။ လုၵ်ႈၵဝ်လၢၼ်ၵဝ်ဢွၼ်ၵၼ်ဢွၵ်ႇသေ ၵႃႈတီႈၵဝ်ၵႂႃႇမူတ်းယဝ်ႉ။ ဢမ်ႇမီးၵေႃႉဢၼ်တၵ်းပူၵ်းတင်ႈသုမ်ႉထဵင်ၵဝ်၊ဢမ်ႇမီးၵေႃႉဢၼ်တၵ်းတိုတ်ႉၵၢင် ၽႃႈၵင်ႈၵဝ်ထႅင်ႈၼၼ်ႉယဝ်ႉ။
လွင်ႈမၼ်းၸမ်ႉ၊ၶဝ်ၸိူဝ်းဢၼ်လဵင်ႉသူဝ်း ထိင်းသူဝ်းၼၼ်ႉမီးၸႂ်သၽေႃးဢၼ် ၼိုၵ်းတၼ်ၼႃႇလႄႈ ဢမ်ႇႁႃဢဝ်ယွၼ်းဢဝ်တီႈ ထႃႇဝရႃႉၽြႃး၊ လႄႈၶဝ်ဢမ်ႇမၢၵ်ႈမီးလီပဵၼ်၊ ၽုင်သူဝ်းၶဝ်ၵႃႈမီးၵေႃႈ ၽၢတ်ႇၽႄ တႅၵ်ႇယၢႆႈၵၼ်ၵႂႃႇမူတ်းယဝ်ႉဢေႃႈ။
ထွမ်ႇတႃႉ။ သတၢင်းသဵင်ၶၢဝ်ႇလိုဝ်ႈႁွတ်ႈမႃးယဝ်ႉ၊သဵင်ဢၼ်လင်မေႃးၼႃႇလူင်လၢင်ၼၼ်ႉ၊ လုၵ်ႉသေၵႃႈတီႈၽၢႆႇတၢင်းႁွင်ႇမႃးလႄႈ တၵ်းႁဵတ်းႁႂ်ႈဝဵင်း ယုတႃႉ၊ တင်းလၢႆ၊ ပဵၼ်ဢၼ်ပဝ်ႇဢၼ်ႁၢမ်းၵႂႃႇလႄႈႁႂ်ႈပဵၼ် တီႈဢၼ်မႃလိၼ်လႂ်ယူႇၼၼ်ႉဢေႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈ ႁုယဝ်ႉဝႃႈ၊ၵူၼ်းဢမ်ႇၸၢင်ႈဢုပ်ႉပိူင်ႇ သဵၼ်ႈတၢင်းတူဝ်ၸဝ်ႈၵဝ်ႇလႆႈ၊ ၵေႃႉဢၼ်ယင်းတိုၵ်ႉၵႂႃႇယူႇၼၼ်ႉ ဢမ်ႇၸၢင်ႈၸိၼႄဢုပ်ႉထိင်းယၢင်ႈတိၼ် တူဝ်ၸဝ်ႈၵဝ်ႇလႆႈတီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ယင်းဢမ်ႇပႃးတၢင်းဢၼ်ၸႂ်မႆႈၶႂ်ႈၸႃႉလႄႈပႃးတၢင်းဢၼ် ၸီႇယၢင်ႇၸွမ်းၼင်ႇတြႃးသေယဝ်ႉ၊ သင်ႇသွၼ်သုင်းမႃႉၶႃႈၸဝ်ႈသေၵမ်းတီႈၶႃႈ။ ပေႃးဢမ်ႇၼၼ်ၸဝ်ႈႁဝ်းတၵ်း ႁဵတ်းႁႂ်ႈၶႃႈၸဝ်ႈဢမ်ႇပွင်ႇလွင်ႈၵႃႈသင်လႄႈ ပႅတ်ႈလၢႆၵႂႃႇတီႈၶႃႈဢေႃႈ။
ဢဝ်တင်းၸႂ်မႆႈၶႂ်ႈၸႃႉၸဝ်ႈႁဝ်းသွၼ်းလေႃႇၵႃႈၼိူဝ်ၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ဢမ်ႇ ႁုၸၵ်းၸဝ်ႈႁဝ်းၸိူဝ်းၼၼ်ႉ၊ဢိၵ်ႇတင်း ၵႃႈၼိူဝ်မဵဝ်းၸိူဝ်ႉၶိူဝ်းဢၼ်ဢမ်ႇႁဵတ်း ပထၼႃႇသူးတွင်းတီႈၼႃႇမႃႉၸိုဝ်ႈသဵင် ၸဝ်ႈႁဝ်းၸိူဝ်းၼၼ်ႉသေၵမ်းတီႈၶႃႈ။ လွင်ႈမၼ်းၸမ်ႉ၊ၶဝ်ဢွၼ်ၵၼ်ၵိၼ်ၶူပ်းပႅတ်ႈမဵဝ်း ယႃႇၵုပ်ႈ၊ မူတ်းမူတ်းသဵင်ႈသဵင်ႈသေလႄႈ သမ်ႉပႄႇၽဵဝ်ႈယႃႉလႅဝ်ပႅတ်ႈတီႈယူႇၶဝ်ဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ဢၼ်ႁွတ်ႈမႃးတီႈ ယေႇရမိ၊ ၸမ်ႉ၊-
“ဢွၼ်ၵၼ်ထွမ်ႇငိၼ်းၵႂၢမ်းပတိၺိၺ်ႇၼႆႉလႄႈႁေႃးလၢတ်ႈသင်ႇဝႆႉတီႈၵူၼ်းမိူင်း ယုတႃႉ၊ ၵူၼ်းဝဵင်း ယေႇရုသလႅမ်ႇ၊ ၸိူဝ်းၼၼ်ႉတႃႉ။-
မႂ်းတၵ်းလႆႈလၢတ်ႈတီႈၶဝ်လႄႈဝႃႈ၊ ထႃႇဝရႃႉၽြႃး၊ၽြႃးပဵၼ်ၸဝ်ႈ၊ ၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊ႁႂ်ႈၵေႃႉဢၼ်ဢမ်ႇထွမ်ႇဢဝ်ၵႂၢမ်းပတိၺိၺ်ႇတြႃးၼႆႉလႆႈၶၢမ်ႇတၢင်းဢၼ်ၵိၼ်ႇဢၼ်ဝႃႈသေၵမ်း။-
လွင်ႈမၼ်းၸမ်ႉ၊ၵဝ်မီးဢမိင်ႉဝႆႉတီႈပူႇသူမွၼ်ႇသူၼႂ်းမိုဝ်ႉဝၼ်းဢၼ်ၵဝ်ဢဝ်ၶဝ်ဢွၵ်ႇသေၵႃႈၼႂ်းမုၵ်ႉၽႆးၽီးၽႆးလဵၵ်းဢၼ်ဝႃႈ၊မိူင်း ဢေးၵျိပ်ႉ၊ ၼၼ်ႉလႄႈဝႃႈ၊ထွမ်ႇဢဝ်ၵႂၢမ်းၵဝ်လႄႈၵမ်ၵျၢင်ႉၸွမ်းၼင်ႇၵႃႈဢၼ်ၵဝ်သင်ႇလၢတ်ႈတီႈသူဝႆႉၼၼ်ႉတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊သူတၵ်းပဵၼ်ၵူၼ်းၵဝ်လႄႈၵဝ်ၵေႃႈတၵ်းပဵၼ်ၽြႃးသူလႄႈ။-
ၵဝ်တၵ်းပႂ်ႉၵတိသဵတ်ႈၸႃႇဢၼ်ၵဝ်တိူင်ႇဝႃႈဝႆႉတီႈပူႇသူမွၼ်ႇသူ၊လူၺ်ႈလွင်ႈဢၼ်ၵဝ်တၵ်းဢဝ်မိူင်းဢၼ်မၢၵ်ႈမီးလီပဵၼ်လႄႈၽုၼ်ႇလီလိၼ်လီ ၼၼ်ႉပၼ်တီႈၶဝ်ၸွမ်းၵႃႈၼင်ႇဢၼ်ပဵၼ်ယူႇၼႂ်းဝၼ်းမိူဝ်ႈၼႆႉၼၼ်ႉယဝ်ႉ၊” ဝႃႈၼင်ႇၼႆဢေႃႈ။ ၵဝ်ၵေႃႈၶိုၼ်းလဝ်ႈလၢတ်ႈလႄႈဝႃႈ၊ “ႁႂ်ႈပျေႉၸုမ်ႇသေၵမ်း၊ ထႃႇဝရႃႉၽြႃး၊ တီႈၶႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉလႄႈလၢတ်ႈတီႈၵဝ်လႄႈဝႃႈ၊ “ၵႂၢမ်းဢၼ်မႂ်းတၵ်းလႆႈႁွင်ႉပၢဝ်ႇႁွင်ႉသေႃႇၵႃႈၼႂ်းဝဵင်း ယုတႃႉ၊ တင်းလၢႆ၊ဢိၵ်ႇတင်းၵႃႈၼႂ်းသဵၼ်ႈတၢင်းဝဵင်း ယေႇရုသလႅမ်ႇ၊ ၸိူဝ်းၼၼ်ႉလႄႈဝႃႈၸမ်ႉ၊သူဢွၼ်ၵၼ်ထွမ်ႇဢဝ်ၵႂၢမ်းပတိၺိၺ်ႇတြႃးၵဝ်ၼႆႉသေလႄႈၵမ်ၵျၢင်ႉၸွမ်းတႃႉ။-
လွင်ႈမၼ်းၸမ်ႉ၊ပိၵ်ႉသမ်ႉၵဝ်ပၼ်သတိတီႈပူႇသူမွၼ်ႇသူၸႃႉၸဵမ်မိုဝ်ႉဝၼ်းဢၼ်ၵဝ်ၼုၵ်ႈဢဝ်ၶဝ်ဢွၵ်ႇသေၵႃႈၼႂ်းမိူင်း ဢေးၵျိပ်ႉ၊ လႄႈပၼ်သတိယူႇၶိူဝ်းၶိူဝ်းယႂ်းယႂ်းတေႃႇထိုင်ႁွတ်ႈဝၼ်းမိူဝ်ႈၼႆႉလႄႈဝႃႈ၊ဢွၼ်ၵၼ်ထွမ်ႇဢဝ်ၵႂၢမ်းၵဝ်တႃႉ၊ဝႃႈၼင်ႇၼႆသေၵေႃႈ၊-
ၶဝ်ဢမ်ႇထွမ်ႇဢမ်ႇဢဝ်၊ဢမ်ႇႁေႈႁူဝၢႆႇႁူၸူး။ ၶဝ်ၵႃႈမီးဢွၼ်ၵၼ်ၸွမ်းၵႂႃႇတၢင်းဢၼ်ႁူဝ်ၸႂ်ၶဝ်ၵႅၼ်ႇၶႅင်လႄႈႁၢႆႉယုတ်ႈၼၼ်ႉဢေႃႈ။ ပိူဝ်ႈၼႆလႄႈၵဝ်ႁႂ်ႈပဵၼ်ၸွမ်းၵႂၢမ်းပတိၺိၺ်ႇတြႃးၵဝ်ၵူႈၸိူဝ်ႉၵူႈပိူင်ဢၼ်ၵဝ်သင်ႇလၢတ်ႈဝႆႉတီႈၶဝ်လႄႈၶဝ်ဢမ်ႇၵမ်ဢမ်ႇၵျၢင်ႉၸွမ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉတီႈၵဝ်ၸမ်ႉ၊ “ၵဝ်လႆႈထူပ်းႁၼ်တၢင်းဢၼ်ၵျၢမ်ႇပွင်ႁႂ်ႈလႆႈလုၵ်ႉၽိုၼ်ႉၵႃႈၼႂ်းၵူၼ်းမိူင်း ယုတႃႉ၊ ဢိၵ်ႇတင်းၵႃႈၼႂ်းၵူၼ်းဝဵင်း ယေႇရုသလႅမ်ႇ၊ ၸိူဝ်းၼၼ်ႉ၊-
ၶဝ်ဢွၼ်ၵၼ်ဝၢႆႇၶိုၼ်းၵႂႃႇႁႂ်ႈလႆႈႁဵတ်းတုၸရိူၵ်ႈမိူၼ်ၸိူဝ်ႉၼင်ႇပူႇၶဝ်မွၼ်ႇၶဝ်ဢၼ်တွပ်ႇထဵင်ပႄႇပႅတ်ႈၵႂၢမ်းၵဝ်ၸိူဝ်းၼၼ်ႉလႄႈၸွမ်းလင်ၽြႃးတၢင်ႇသူႇတၢင်ႇပႃးႁႂ်ႈလႆႈႁဵတ်းဝၢတ်ႈၼၼ်ႉယဝ်ႉ။ ၵူၼ်းမဵဝ်း ဢိသရေး၊ ဢိၵ်ႇတင်းၵူၼ်းမဵဝ်း ယုတႃႉ၊ ဢွၼ်ၵၼ်ယႃႉပတိၺိၺ်ႇတြႃးဢၼ်ၵဝ်ႁဵတ်းဝႆႉလူၺ်ႈၵၼ်တင်းပူႇၶဝ်မွၼ်ႇၶဝ်ၸိူဝ်းၼၼ်ႉပႅတ်ႈယဝ်ႉ။-
ပိူဝ်ႈၼႆလႄႈ ထႃႇဝရႃႉၽြႃး၊ မီးဢမိင်ႉၸမ်ႉ၊ၵဝ်တၵ်းႁႂ်ႈၽေးဢၼ်ႇတရေႇဢၼ်ၶဝ်ဢမ်ႇလွတ်ႈလႆႈၼၼ်ႉတူၵ်းႁွတ်ႈၵႃႈၼိူဝ်ၶဝ်ဢေႃႈ။ ပိၵ်ႉသမ်ႉၶဝ်ႁွင်ႉသႅၼ်ႇႁွင်ႉႁႃၵဝ်သေၵေႃႈၵဝ်တၵ်းဢမ်ႇထွမ်ႇဢဝ်လႄႈယူႇဢေႃႈ။-
ပိၵ်ႉသမ်ႉၵူၼ်းဝၢၼ်ႈၵူၼ်းဝဵင်း ယုတႃႉ၊ ဢိၵ်ႇတင်းၵူၼ်းဝဵင်း ယေႇရုသလႅမ်ႇ၊ တင်းလၢႆဢွၼ်ၵၼ်ၵႂႃႇလႄႈႁွင်ႉသႅၼ်ႇႁွင်ႉႁႆႈတီႈၽြႃးဢၼ်ၶဝ်ယၢမ်ႈလႆႈဢဝ်ၼၢမ်ႇသႃႇတုတ်ႇၽႆးလႄႈသၢၵ်ႈလူႇၸိူဝ်းၼၼ်ႉသေၵေႃႈ၊ၽြႃးၸိူဝ်းၼၼ်ႉယင်းဢမ်ႇပၼ်ၵတ်းယဵၼ်ၶျၢမ်းသႃႇၼႂ်းမိူဝ်ႈဢၼ်ၽေးႁွတ်ႈထိုင်ၼၼ်ႉလႃးလႃးလႄႈတၵ်းယူႇဢေႃႈ။-
မိူင်း ယုတႃႉ၊ ႟။ ၽြႃးမႂ်းမီးၼမ်မိူၼ်ၵၼ်တင်းဝဵင်းမႂ်းမီးၼမ်ၵႃႈႁိုဝ်ၼၼ်ႉယဝ်ႉလူင်ပႄႇ။ သူဢွၼ်ၵၼ်တႄႇႁဵတ်းၶဵင်ႇတၢင်းလူႇပုၼ်ႈၶိူင်ႈပိူင်ဢၼ်လီဢူၵ်းလီဢၢႆဢၼ်ဝႃႈ၊ၶဵင်ႇတၢင်းလူႇတီႈဢၼ်တၵ်းဢဝ်ၼၢမ်ႇသႃႇတုတ်ႇၽႆးတီႈ ၽြႃးပႃႇလႃႉ၊ ၼၼ်ႉမီးၼမ်မိူၼ်ၵၼ်တင်းသဵၼ်ႈတၢင်းဝဵင်း ယေႇရုသလႅမ်ႇ၊ ၼၼ်ႉဢေႃႈ။-
မႂ်းၸမ်ႉ၊ယႃႇပေႁဵတ်းပထၼႃႇပုၼ်ႈၵူၼ်းမဵဝ်းၼႆႉ။ ယႃႇပေႁဵတ်းတၢင်းဢၼ်ႁွင်ႉႁႆႈလႄႈသူးတွင်းပုၼ်ႈၶဝ်။ ၵဝ်ဢမ်ႇထွမ်ႇဢဝ်ၵႂၢမ်းၶဝ်ၼႂ်းမိူဝ်ႈဢၼ်ၽေးတုၵ်ႉၶႃႉႁွတ်ႈထိုင်လႄႈၶဝ်ႁွင်ႉႁႃၵဝ်ၼၼ်ႉ။
“မႄႈယိင်းဢၼ်ၵဝ်ႁၵ်ႉၼၼ်ႉၸၢပ်ႈသႅင်ႇၵၼ်တင်းႁိူၼ်းၵဝ်ၼႂ်းမိူဝ်ႈဢၼ်မၼ်းႁဵတ်းတၢင်းဢၼ်ဢမ်ႇတြႃးၼမ်ၵိုၼ်းၼႃႇၼၼ်ႉၸိူဝ်ႉၼင်ႇႁိုဝ်။ ၼိူဝ်ႉဢၼ်ၼမ်ၼႃႇပုၼ်ႈတေဢဝ်သၢၵ်ႈလူႇၼၼ်ႉၸၢင်ႈႁဵတ်းႁႂ်ႈတၢင်းဢၼ်ၵဝ်တေၸီႇယၢင်ႇပၼ်တၢမ်ႇမႂ်းပိူင်ႈၵႂႃႇလွႆးၵႂႃႇလႆႈႁိုဝ်း။ မႂ်းၵေႃႈမီးတၢင်းဢၼ်ၸူမ်းသိူဝ်းလႆႈယူႇႁိုဝ်း၊” ဝႃႈၼင်ႇၼႆဢေႃႈ။-
ထႃႇဝရႃႉၽြႃး၊ ယၢမ်ႈႁွင်ႉႁဵၵ်ႈၸိုဝ်ႈမႂ်းလႄႈဝႃႈ၊ “တူၼ်ႈသၢၼ်ႇလုၼ်ႇဢၼ်ၶဵဝ်ဢၼ်လီလူၺ်ႈမၢၵ်ႇမၢၵ်ႇဢၼ်လီ၊” ဝႃႈၼင်ႇၼႆဢေႃႈ။ ၵူၺ်းၵႃႈ၊မၼ်းၸဝ်ႈတၵ်းႁဵတ်းသဵင်ဢၼ်ႁုၼ်ႈမေႃးယႂ်ႇၼႃႇသေလႄႈဢဝ်တူၼ်ႈၼၼ်ႉတုတ်ႇၽႆးလႄႈၵိင်ႇမၼ်းၶႃႈမၼ်းတင်းလၢႆတၵ်းမႆႈၶႅမ်ႈၵႂႃႇသဵင်ႈဢေႃႈ။
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ဢၼ်ၽုၵ်ႇသွမ်ႈမႂ်းၼၼ်ႉမီးဢမိင်ႉလႄႈဝႃႈၸမ်ႉ၊ “ႁႂ်ႈလွင်ႈတၢင်းဢၼ်ဢမ်ႇလီၼၼ်ႉၶတ်းတႃႉၵၼ်တင်းမႂ်း ၵွပ်ႈပိူဝ်ႈလွင်ႈတၢင်းဢၼ်ဢမ်ႇလီဢၼ်ၵူၼ်းမဵဝ်း ဢိသရေး၊ ဢိၵ်ႇတင်းဢၼ်ၵူၼ်းမဵဝ်း ယုတႃႉ၊ ႁဵတ်းဢၼ်ဝႃႈ၊တၢင်းဢၼ်ဢဝ်ၼၢမ်ႇသႃႇတုတ်ႇၽႆးတီႈ ၽြႃးပႃႇလႃႉ၊ သေလႄႈတိုၵ်းယူင်းတၢင်းၸႂ်မႆႈၶႂ်ႈၸႃႉၵဝ်ၼၼ်ႉယဝ်ႉ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃးပဵၼ်ၸဝ်ႈ၊ ဢၼ်ၼႄပျႃးႁႂ်ႈၵဝ်ႁုလႄႈၵဝ်လႆႈႁုဢေႃႈ။ ၸဝ်ႈႁဝ်းၼႄပျႃးလွင်ႈတၢင်းဢၼ်ၶဝ်ႁဵတ်းဢၼ်ဢမ်ႇလီၸိူဝ်းၼၼ်ႉတီႈၶႃႈယဝ်ႉ။-
ၵူၺ်းၵႃႈ၊ၵဝ်ပဵၼ်ၸိူဝ်ႉၼင်ႇသူဝ်းငႄႈဢွၼ်ႇဢၼ်ဢဝ်ၵႂႃႇႁႂ်ႈလႆႈဢဝ်တၢႆၼၼ်ႉဢေႃႈ။ ၵဝ်ဢမ်ႇႁုလွင်ႈဢၼ်ၶဝ်ၵျၢမ်ႇပွင်တၢင်းၵျၢမ်ႇတၢင်းပွင်ဢၼ်ဢမ်ႇလီတေႃႇၵဝ်လႄႈဝႃႈ၊ “ဢွၼ်ၵၼ်ယႃႉၽဵဝ်ႈတူၼ်ႈမႆႉၼႆႉ၊ဢိၵ်ႇတင်းမၢၵ်ႇမၼ်းပႅတ်ႈမူတ်းမူတ်းသဵင်ႈသဵင်ႈလႄႈတႅပ်းမၼ်းပႅတ်ႈသေၵႃႈၼႂ်းမိူင်းၶဝ်ၸိူဝ်းဢၼ်ဢသၢၵ်ႈလိပ်းၼႆႉႁႂ်ႈၼႃႇမႃႉၸိုဝ်ႈသဵင်မၼ်းဢမ်ႇလႆႈၶၢမ်ႇတၢင်းဢၼ်ၶုၵ်းၸႂ်လႆႈၶႆႈၸႂ်ထူပ်းတႃႉႁဝ်း၊” ဝႃႈၼင်ႇၼႆၼၼ်ႉ။
ၶႃႈၸဝ်ႈသူးတွင်းလႄႈဝႃႈ၊ “ၵူၺ်းၵႃႈ၊ ၸဝ်ႈဢၼၼ်ႇတႃႉတၼ်းၶူဝ်း၊ထႃႇဝရႃႉၽြႃး၊ ဢၼ်ၸႅတ်ႈႁူဝ်ၸႂ်မၢၵ်ႇလၼ်းလႄႈၸီႇယၢင်ႇၸွမ်းၼင်ႇတြႃးတီႈၶႃႈ႟။ ႁႂ်ႈၶႃႈၸဝ်ႈလႆႈႁၼ်တၢင်းဢၼ်ၸဝ်ႈႁဝ်းတွပ်ႇတႅၼ်းပၼ်တၢမ်ႇဢပျတ်ႈတီႈၶဝ်ၼၼ်ႉသေၵမ်းတီႈၶႃႈ။ ဢမုၶႃႈၸဝ်ႈၸိုင်၊ၶႃႈၸဝ်ႈလဝ်ႈလၢတ်ႈတီႈၸဝ်ႈႁဝ်းတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ထႃႇဝရႃႉၽြႃး၊ မီးဢမိင်ႉလူၺ်ႈလွင်ႈၵူၼ်းဝဵင်း ဢႃႇၼသုတ်ႉ၊ တင်းလၢႆဢၼ်ၸွမ်းႁႃဢဝ်ဢသၢၵ်ႈမႂ်းလႄႈလၢတ်ႈလႄႈဝႃႈ၊ “လွင်ႈၼင်ႇႁိုဝ်မႂ်းတေဢမ်ႇလႆႈတၢႆလူၺ်ႈမိုဝ်းႁဝ်းၸိုင်၊ယႃႇပေဢဝ်ၼႃႇမႃႉၸိုဝ်ႈသဵင် ထႃႇဝရႃႉၽြႃး၊ သေလႄႈႁေႃးလၢတ်ႈၵႂၢမ်းပရေႃးၽႅတ်ႈ၊” ဝႃႈၼင်ႇၼႆၼၼ်ႉၸမ်ႉ၊-
ပိူဝ်ႈၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ “ၵဝ်တၵ်းတေပၼ်တၢမ်ႇၶဝ်လႄႈၵူၼ်းၼုမ်ႇၵူၼ်းၵမ်ၶဝ်တၵ်းဢွၼ်ၵၼ်တၢႆလူၺ်ႈလၢပ်ႇလူၺ်ႈလႅဝ်းလႄႈလုၵ်ႈၸၢႆးလုၵ်ႈယိင်းၶဝ်တၵ်းဢွၼ်ၵၼ်တၢႆလူၺ်ႈတၢင်းဢၼ်ဢိုပ်းဢၼ်ယၢၵ်ႈဢေႃႈ။-
ဢမ်ႇလႆႈမီးတၢင်းဢၼ်ၵိုတ်းဢၼ်ၵျၢၼ်ႇဝႆႉတီႈၶဝ်ၼၼ်ႉသေၵေႃႉသေၵူၼ်း။ ၵဝ်တၵ်းႁႂ်ႈၽေးဢုပၢတ်ႈဢၼ်ဝႃႈ၊ပီဢၼ်ဢၼ်ပၼ်တၢမ်ႇဢပျတ်ႈၶဝ်၊တၵ်းတူၵ်းႁွတ်ႈၵႃႈၼိူဝ်ၵူၼ်းဝဵင်း ဢႃႇၼသုတ်ႉ၊ တင်းလၢႆဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ တီႈၶႃႈ။ ယၢမ်းမိူဝ်ႈဢၼ် ၶႃႈၸဝ်ႈတွပ်ႇထဵင်ဢမုလူၺ်ႈၵၼ်တင်းၸဝ်ႈႁဝ်း ၼၼ်ႉၸိုင်၊ၸဝ်ႈႁဝ်းယူႇၽၢႆႇတၢင်းဢၼ် ထုၵ်ႇမႅၼ်ႈတြႃးတီႈၶႃႈဢေႃႈ။ ၵူၺ်းၵႃႈ၊ၶႃႈၸဝ်ႈတၵ်းလဝ်ႈထၢမ် လွင်ႈတၢင်းဢၼ်ၸဝ်ႈႁဝ်းၸႅတ်ႈထၢမ် ၸီႇယၢင်ႇၼၼ်ႉတီႈၶႃႈဢေႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈတၢင်းၵျၢမ်ႇတၢင်းပွင်ၶဝ်ၸိူဝ်းဢၼ်ဢမ်ႇသိုဝ်ႈတေႃႇၼၼ်ႉ လႆႈဢွင်ႇမႅင်ႇၸိူဝ်ႉၼင်ႇႁိုဝ်တီႈၶႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၶဝ်ၵႃႈဢၼ်သဵတ်ႈၸႃႇလုၼႃႇလူင်လၢင်ၼၼ်ႉလႆႈယူႇၵတ်းယဵၼ်ၶျၢမ်းသႃႇၸိူဝ်ႉၼင်ႇႁိုဝ်ၶႃႈ။
ၸဝ်ႈႁဝ်းၽုၵ်ႇသွမ်ႈၶဝ်လႄႈၶဝ်ၼၼ်ႉ ယင်ႇႁၢၵ်ႈသေယဝ်ႉ၊ယႂ်ႇမႃးယူႇ၊မၢၵ်ႇမၢၵ်ႇ မႃးယူႇတီႈၶႃႈဢေႃႈ။ ၸဝ်ႈႁဝ်းၸမ်ၵၼ်တင်းသူပ်းၶဝ်လႄႈ ၵႆၵၼ်တင်းႁူဝ်ၸႂ်ၶဝ်တီႈၶႃႈဢေႃႈ။
ၵူၺ်းၵႃႈ၊ ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်း ႁုၶႃႈၸဝ်ႈယူႇတီႈၶႃႈဢေႃႈ။ ၸဝ်ႈႁဝ်းႁၼ်ၶႃႈၸဝ်ႈလႄႈၸႅတ်ႈထၢမ် ၸႅတ်ႈတူၺ်းၶႃႈၸဝ်ႈတီႈၶႃႈဢေႃႈ။ ႁူဝ်ၸႂ်ၶႃႈၸဝ်ႈယူႇလူၺ်ႈၵၼ်တင်းၸဝ်ႈႁဝ်းတီႈၶႃႈဢေႃႈ။ တိုတ်ႉၸၼ်ဢဝ်ၶဝ်ၸိူဝ်းၼၼ်ႉဢွၵ်ႇ မိူၼ်ၸိူဝ်ႉၼင်ႇသူဝ်းဢၼ်တၵ်းလႆႈၶၢမ်ႇ၊ တၢင်းဢၼ်ဢဝ်တၢႆၼၼ်ႉလႄႈဢဝ်ၽႄၶဝ်ဝႆႉ၊ပုၼ်ႈမိုဝ်ႉဝၼ်းဢၼ်တၵ်းလႆႈ ဢဝ်တၢႆၼၼ်ႉသေၵမ်းတီႈၶႃႈ။
မိူင်းၸဝ်ႈတၵ်းလႆႈပွင်ႉၶၢင်းပွင်ႉမိုၼ်ႇယူႇ ၶိင်ႇၵႃႇလႃႉႁိုင်ၵႃႈႁိုဝ်တီႈၶႃႈ။ ယိူဝ်ႈယႃႈဢၼ်မီးၵႃႈတီႈၼႃႈလိၼ် ၵူႈတီႈၵူႈလႅၼ်ၼၼ်ႉတၵ်းလႆႈႁဵဝ်ႇၸွပ်ႈယူႇ ၶိင်ႇၵႃႇလႃႉႁိုင်ၵႃႈႁိုဝ်တီႈၶႃႈ။ ၵွပ်ႈပိူဝ်ႈတုၸရိူၵ်ႈဢပျတ်ႈၶဝ်ၸိူဝ်းဢၼ် ယူႇၵႃႈၼႂ်းမိူင်းၼၼ်ႉလႄႈသတ်းတရိၵ်ႈသၢၼ်ႇ တင်းလၢႆ၊ဢိၵ်ႇတင်း ၼူၵ်ႉတင်းလၢႆဢွၼ်ၵၼ်လုႁၢႆၵႂႃႇတီႈၶႃႈယဝ်ႉ။ လွင်ႈမၼ်းၸမ်ႉ၊ၶဝ်လၢတ်ႈလႄႈဝႃႈ၊ “မၼ်းၸဝ်ႈဢမ်ႇႁုဢမ်ႇႁၼ်လွင်ႈမိူဝ်းၼႃႈ ႁဝ်းၵူၺ်း၊” ဝႃႈၼင်ႇၼႆတီႈၶႃႈဢေႃႈ။
“ပေႃးမႂ်းလႅၼ်ႈၶေႉၵၼ်တင်းၵူၼ်းလႄႈ သမ်ႉႁိူဝ်ႉဢူၼ်ႈၸိုင်၊မႂ်းတၵ်းၶေႉၶဵင်ႇၵၼ် တင်းမႃႉလႆႈၸိူဝ်ႉၼင်ႇႁိုဝ်။ ပိၵ်ႉသမ်ႉမႂ်းလႆႈယူႇၵႃႈၼႂ်းမိူင်းဢၼ်လူင်ႉလီလွတ်ႈလီလႄႈယင်းလႆႈလူမ်ႉတူၵ်းသုမ်းယူႇၸိုင်၊မႂ်းတၵ်းႁဵတ်းၸိူဝ်ႉၼင်ႇႁိုဝ်ၵႃႈၼႂ်းယုမ်း ၼႂ်းၶိူဝ်းၼမ်ႉမႄႈ ယေႃးတၢၼ်ႇ၊ ၼၼ်ႉ။
တေႃႈၵႃႈပီႈမႂ်းၼွင်ႉမႂ်းဢိၵ်ႇတင်းၵူၼ်းႁိူၼ်းၵူၼ်းယေးမႂ်းၸိူဝ်းၼၼ်ႉယင်းဢွၼ်ၵၼ် ယႃႉသဵတ်ႈၸႃႇမႂ်းလႄႈႁွင်ႉသႅၼ်ႇၸွမ်းလင်မႂ်းယူႇဢေႃႈ။ ပိၵ်ႉသမ်ႉၶဝ်လၢတ်ႈၶေႃႈၵႂၢမ်းဢၼ်လီ ဢၼ်ဝၢၼ်တီႈမႂ်းသေၵေႃႈ၊ယႃႇပေယုမ်ႇၶဝ်၊” ဝႃႈၼင်ႇၼႆဢေႃႈ။
“ၵဝ်ၼႆႉၸုၼ်ႉပႅတ်ႈႁိူၼ်းၵဝ်လႄႈၸုၼ်ႉပႅတ်ႈ ဢမူၺ်ႇၵဝ်ဝႆႉယဝ်ႉ။ ၵဝ်ဢဝ်ၵူၼ်းဢၼ်ႁူဝ်ၸႂ်ၵဝ်ႁၵ်ႉၼႃႇၼၼ်ႉ ဢၢပ်ႈဝႆႉၵႃႈၼႂ်းမိုဝ်းရၢၼ်ႇသူႇၶဝ်ယဝ်ႉ။
ဢမူၺ်ႇၵဝ်ၼၼ်ႉပိၼ်ႇမႃးပဵၼ်မိူၼ်ၸိူဝ်ႉၼင်ႇသၢင်ႇသီႈဢၼ်မီးၵႃႈၼႂ်းထိူၼ်ႇၼၼ်ႉဢေႃႈ။ မၼ်းဢဝ်သဵင်မၼ်းႁွင်ႉၶၢင်းတေႃႇၵဝ်လႄႈ ၵဝ်ၸင်းမၼ်းဢေႃႈ။
ဢမူၺ်ႇၵဝ်ၼၼ်ႉပဵၼ်ၸိူဝ်ႉၼင်ႇၼူၵ်ႉႁၢႆႉ ၵႂႃႇယဝ်ႉႁိုဝ်း။ ၼူၵ်ႉႁၢႆႉတၢင်ႇတူဝ်မီးၵႃႈတီႈလဵပ်ႈႁွပ်ႈဢမူၺ်ႇၵဝ်ယူႇလႄႈဢွၼ်ၵၼ်တိုၵ်းတေႃးမၼ်းႁိုဝ်း။ ဢွၼ်ၵၼ်ၵႂႃႇလႄႈႁႂ်ႈတူဝ်ထိူၼ်ႇႁၢႆႉတင်းသဵင်ႈတင်းလူင်ၸုၵၼ်တုမ်ၵၼ်သေလႄႈ မႃးႁႂ်ႈလႆႈၶူပ်းလႆႈၵိၼ်တႃႉ။
ၶဝ်ၸိူဝ်းဢၼ်လဵင်ႉသူဝ်းထိင်းသူဝ်း ၼမ်ၼႃႇၼၼ်ႉဢွၼ်ၵၼ်ယႃႉသူၼ် မၢၵ်ႇၸပိတ်ႉၵဝ်ပႅတ်ႈယဝ်ႉ။ ၶဝ်ဢွၼ်ၵၼ်ယဵပ်ႇယမ်ႈပုၼ်ႈၵဝ်တႃႇၵဝ်ၼၼ်ႉပႅတ်ႈယဝ်ႉ။ ၶဝ်ဢွၼ်ၵၼ်ႁႂ်ႈတီႈဢၼ်လီ ဢၼ်ထုၵ်ႇၸႂ်ၵဝ်ၼၼ်ႉပဵၼ်ထိူၼ်ႇပဵၼ်ၶိူဝ်း တီႈဢၼ်သဵတ်ႇၵူၼ်းငႅဝ်ၵူၼ်းၵႂႃႇယဝ်ႉ။
ၶဝ်ႁႂ်ႈသူၼ်ၵဝ်ပဵၼ်တီႈဢၼ်သဵတ်ႇၵူၼ်းငႅဝ်ၵူၼ်းလႄႈၵွပ်ႈပိူဝ်ႈဢၼ်မီးတၢင်းဢၼ် သဵတ်ႇၵူၼ်းငႅဝ်ၵူၼ်းယူႇၼၼ်ႉလႄႈမၼ်း ၶၢင်းၶီၶၢင်းၽၢၼ်တေႃႇၵဝ်ဢေႃႈ။ မိူင်းတင်းမိူင်းပဵၼ်တၢင်းဢၼ်သဵတ်ႇၵႂႃႇ ငႅဝ်ၵႂႃႇသေၵေႃႈၽူႈလႂ်သေၵေႃႉသေၵူၼ်း ဢမ်ႇဝႆႉဢမုဢယေးၵႃႈၼႂ်းၸႂ်။
ၶဝ်ၸိူဝ်းဢၼ်ႁိမ်ႁူင်ႇဢဝ်ၼၼ်ႉဢွၼ်ၵၼ် ႁွတ်ႈထိုင်ၵႃႈၼိူဝ်တီႈဢၼ်သုင်ၵႃႈၼႂ်း ထိူၼ်ႇၵႃႈမီးၼၼ်ႉယဝ်ႉ။ လၢပ်ႇ ထႃႇဝရႃႉၽြႃး၊ ယႃႉၽဵဝ်ႈပႅတ်ႈၸႃႉၸဵမ်ႁိမ်းလႅၼ်မိူင်းၽၢႆႇၼိုင်ႈတေႃႇႁွတ်ႈထိုင်ၽၢႆႇ ၼိုင်ႈလႄႈၽူႈလႂ်သေၵေႃႉသေၵူၼ်းဢမ်ႇလႆႈ ၵတ်းယဵၼ်ၶျၢမ်းသႃႇ။
ၶဝ်ဢွၼ်ၵၼ်ဝၢၼ်ႇပိုၼ်ၸိူဝ်ႉၽၼ်းၶဝ်ႈၵျုင်ႇလႄႈလႆႈပၢတ်ႇဢဝ်တူၼ်ႈၼၢမ်ၵူၺ်းဢေႃႈ။ ၶဝ်ဢွၼ်ၵၼ်ႁဵတ်းယၢပ်ႇႁဵတ်းၽိုတ်ႇၼႃႇ လူင်လၢင်သေၵေႃႈဢမ်ႇမီးဢၵျူဝ်းၵႃႈသင်။ ၶဝ်တၵ်းဢွၼ်ၵၼ်လႆႈဢူၵ်းဢၢႆ၊ ၼႂ်းလွင်ႈတၢင်းဢၼ်ၶဝ်ပၢတ်ႇဢဝ်သိမ်းဢဝ် ၼၼ်ႉၵွပ်ႈပိူဝ်ႈတၢင်းဢၼ်ၸႂ်မႆႈၶႂ်ႈၸႃႉ ထႃႇဝရႃႉၽြႃး၊ ဢၼ်ႁႅင်းယႂ်ႇၼႃႇ ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ လၢတ်ႈလႄႈဝႃႈ၊ “လူၺ်ႈလွင်ႈၵူၼ်းၸမ်ၵၼ်တင်းၵဝ်ဢၼ်ႁၢႆႉမိူၵ်ႈဢၼ်တိူဝ်ႉထုၵ်ႇဢမူၺ်ႇဢၼ်ၵဝ်ဢဵတ်းလူပၼ်ႁႂ်ႈၵူၼ်းၵဝ်မဵဝ်း ဢိသရေး၊ ထိူၵ်ႈပိူင်ႇၼၼ်ႉၸိူဝ်းၼၼ်ႉၸမ်ႉ၊ၵဝ်တၵ်းထွတ်ႇထူၺ်ႈၼုၵ်ႈဢဝ်ၶဝ်ဢွၵ်ႇသေၵႃႈၼႂ်းမိူင်းၶဝ်ၼၼ်ႉလႄႈထွတ်ႇထူၺ်ႈၼုၵ်ႈဢဝ်ၸိူဝ်ႉၶိူဝ်း ယုတႃႉ၊ ဢွၵ်ႇသေၵႃႈၼႂ်းၶဝ်ၼၼ်ႉဢေႃႈ။-
ဝၢႆးသေၵဝ်ထွတ်ႇထူၺ်ႈၼုၵ်ႈဢဝ်ၶဝ်သေယဝ်ႉ၊ၵဝ်တၵ်းမီးတၢင်းဢၼ်ဢဵတ်းလူၵႃႈၼိူဝ်ၶဝ်ထႅင်ႈလႄႈသမ်ႉၶိုၼ်းဢဝ်ၶဝ်သူင်ႇၵႂႃႇႁွတ်ႈၵႃႈတီႈမိူင်းဢမူၺ်ႇဢၼ်ၶဝ်ထိူၵ်ႈပိူင်ႇ၊ဢိၵ်ႇတင်းၵႃႈတီႈမိူင်းၶဝ်ၵူႈၵေႃႉၵူႈၵူၼ်းဢေႃႈ။-
ပေႃးၶဝ်ၶတ်းၸႂ်ၵျူဝ်းၸႃးသွၼ်ဢဝ်သဵၼ်ႈတၢင်းၽႃႇသႃႇၵူၼ်းမဵဝ်းၵဝ်တင်းလၢႆ ႁႂ်ႈလႆႈဢဝ်ၼႃႇမႃႉၸိုဝ်ႈသဵင်ၵဝ်တိူင်ႇဝႃႈလႄႈဝႃႈ၊ ‘ၵႃႈၼင်ႇဢၼ် ထႃႇဝရႃႉၽြႃး၊ ဢသၢၵ်ႈလိပ်းယူႇၼၼ်ႉ၊’ ဝႃႈၼင်ႇၼႆ၊မိူၼ်ၸိူဝ်ႉၼင်ႇဢၼ်ၶဝ်ယၢမ်ႈသွၼ်ပၼ်တီႈၵူၼ်းၵဝ်တင်းလၢႆ ႁႂ်ႈလႆႈဢဝ် ၽြႃးပႃႇလႃႉ၊ တိူင်ႇဝႃႈၼၼ်ႉၸိုင်၊ၵဝ်တၵ်းႁႂ်ႈၶဝ်တႄႇယူႇၵႃႈၼႂ်းၵူၼ်းမဵဝ်းၵဝ်တင်းလၢႆဢေႃႈ။-
ၵူၺ်းၵႃႈ၊ပေႃးၶဝ်ယင်းဢမ်ႇထွမ်ႇဢမ်ႇဢဝ်လႄႈယူႇၸိုင်၊ၵဝ်တၵ်းထွတ်ႇထူၺ်ႈၼုၵ်ႈဢဝ်ၵူၼ်းမဵဝ်းၼၼ်ႉသေလႄႈယႃႉပႅတ်ႈမူတ်းမူတ်းသဵင်ႈသဵင်ႈဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ထႃႇဝရႃႉၽြႃး၊ မီးဢမိင်ႉတီႈၵဝ်ၸမ်ႉ၊ “မႂ်းၵႂႃႇလႄႈသိုဝ်ႉဢဝ်သၢႆႁတ်ႉဢႅဝ်ၽႃႈၽၢႆႈၵူၺ်းမႂ်းသေယဝ်ႉ၊ႁတ်ႉဢႅဝ်မႂ်းတႃႉ။ ၵူၺ်းၵႃႈ၊ဢမ်ႇလႆႈဢဝ်ၸုမ်ႇသႂ်ႇၵႃႈၼႂ်းၼမ်ႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၵဝ်သိုဝ်ႉဢဝ်သၢႆဢႅဝ်မႃးၸွမ်းၵႃႈၼင်ႇဢၼ်ဢမိင်ႉ ထႃႇဝရႃႉၽြႃး၊ မီးၼၼ်ႉလႄႈႁတ်ႉဢႅဝ်ၵဝ်ဢေႃႈ။-
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်ပွၵ်ႈထူၼ်ႈသွင်လႄႈဝႃႈၸမ်ႉ၊-
“မႂ်းဢဝ်သၢႆဢႅဝ်ဢၼ်သိုဝ်ႉမႃးလႄႈႁတ်ႉဢႅဝ်မႂ်းၼၼ်ႉၵႂႃႇၸူးၵႃႈတီႈၼမ်ႉမႄႈ ဢုၽရတ်ႉ၊ သေလႄႈဢဝ်သၢႆဢႅဝ်ၼၼ်ႉသိူင်ႇဝႆႉၵႃႈၼႂ်းႁူးမၢၵ်ႇႁိၼ်တႃႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆၸင်ႇၵဝ်ၵေႃႈၵႂႃႇလႄႈဢဝ်သိူင်ႇဝႆႉၵႃႈတီႈႁိမ်းၼမ်ႉမႄႈ ဢုၽရတ်ႉ၊ ၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉၼၼ်ႉဢေႃႈ။
လိုၼ်းၼၼ်ႉၶိင်ႇၵႃႇလႃႉမိုဝ်ႉဝၼ်းႁိုင်ၼႃႇယဝ်ႉလႄႈ ထႃႇဝရႃႉၽြႃး၊ မီးဢမိင်ႉတီႈၵဝ်လႄႈဝႃႈ၊ “မႂ်းၵႂႃႇၸူးၵႃႈတီႈၼမ်ႉမႄႈ ဢုၽရတ်ႉ၊ သေလႄႈဢဝ်သၢႆဢႅဝ်ဢၼ်ၵဝ်မီးဢမိင်ႉႁႂ်ႈမႂ်းဢဝ်သိူင်ႇဝႆႉၼၼ်ႉမႃးတႃႉ၊” ဝႃႈၼင်ႇၼႆဢေႃႈ။-
ၵဝ်ၵေႃႈၵႂႃႇၸူးၵႃႈတီႈႁိမ်းၼမ်ႉမႄႈ ဢုၽရတ်ႉ၊ သေလႄႈဢဝ်သၢႆဢႅဝ်ဢွၵ်ႇသေၵႃႈတီႈဢၼ်ၵဝ်ဢဝ်သိူင်ႇဝႆႉၼၼ်ႉဢေႃႈ။ ၵူၺ်းၵႃႈ၊တေႃႈလဵဝ်ၸိုင်၊သၢႆဢႅဝ်ၼၼ်ႉၽင်ႉဢုလုလႅဝ်လႄႈပဵၼ်ဢၼ်ဢမ်ႇၸၢင်ႈသုင်းၸႂ်ႉလႆႈယဝ်ႉဢေႃႈ။
ၵမ်းၼၼ်ႉ၊ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈ၊-
ထႃႇဝရႃႉၽြႃး၊ မီးဢမိင်ႉၸမ်ႉ၊ “မိူၼ်ၸိူဝ်ႉၼင်ႇၼၼ်ၵဝ်တၵ်းယႃႉပႅတ်ႈမႃႇၼႃႉတၢင်းဢၼ်ပူၵ်းပႅၼ်မိူင်း ယုတႃႉ၊ ဢိၵ်ႇတင်းမႃႇၼႃႉတၢင်းဢၼ်ပူၵ်းပႅၼ်ဝဵင်း ယေႇရုသလႅမ်ႇ၊ ဢၼ်ယႂ်ႇၼႃႇလူင်လၢင်ၼၼ်ႉဢေႃႈ။-
ၵူၼ်းမဵဝ်းဢၼ်ႁၢႆႉမိူၵ်ႈဢၼ်ယင်းဢမ်ႇထွမ်ႇဢမ်ႇဢဝ်ၵႂၢမ်းၵဝ်လႄႈၵမ်ၵျၢင်ႉၸွမ်းၼင်ႇသၽေႃးတၢင်းဢၼ်ႁူဝ်ၸႂ်ၶဝ်ၵႅၼ်ႇၶႅင်ဢၼ်ၸွမ်းလင်ၽြႃးတၢင်ႇသူႇတၢင်ႇပႃးႁႂ်ႈလႆႈႁဵတ်းဝၢတ်ႈၵူဝ်းၵႂၢႆႇၼၼ်ႉၸိူဝ်းၼႆႉ၊တၵ်းလႆႈပဵၼ်ၸိူဝ်ႉၼင်ႇသၢႆဢႅဝ်ဢၼ်ဢမ်ႇသုင်းဢမ်ႇၸႂ်ႉလႆႈၼၼ်ႉဢေႃႈ။-
ၸိူဝ်ႉၼင်ႇဢၼ်သၢႆဢႅဝ်ၼႆႉႁတ်ႉၸပ်းဝႆႉၵႃႈတီႈဢႅဝ်ၵူၼ်းၼၼ်ႉၵဝ်ႁႂ်ႈၵူၼ်းမဵဝ်း ဢိသရေး၊ ၵႃႈမီးဢိၵ်ႇတင်းၵူၼ်းမဵဝ်း ယုတႃႉ၊ တင်းသဵင်ႈတင်းလူင်ႁတ်ႉၸပ်းဝႆႉ၊ၵႃႈတီႈၵဝ်လွင်ႈၼင်ႇႁိုဝ်ၶဝ်တၵ်းလႆႈပဵၼ်ၵူၼ်းမဵဝ်းၵဝ်၊ႁႂ်ႈၵူၼ်းလႆႈယွင်ႈယေႃးမုၼ်သရေႇၼႃႇမႃႉၸိုဝ်ႈသဵင်ၵဝ်ၼၼ်ႉဢေႃႈ။ ၵူၺ်းၵႃႈ၊ၶဝ်ဢမ်ႇမီးဢလူဝ်ႇၶႂ်ႈထွမ်ႇဢဝ်ၵႂၢမ်းၵဝ်၊” ဝႃႈၼင်ႇၼႆဢေႃႈ။
“ၵႂၢမ်းဢၼ်မႂ်းတၵ်းလႆႈမွၵ်ႇလၢတ်ႈတီႈၶဝ်ၼၼ်ႉၸိုင်၊ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊ ‘ဢႅင်ႇၼမ်ႉမၢၵ်ႇၸပိတ်ႉၵႃႈမီးတၵ်းလႆႈတဵမ်ဝႆႉတင်းၼမ်ႉမၢၵ်ႇၸပိတ်ႉဢေႃႈ၊’ ၶဝ်ၵေႃႈတၵ်းၶိုၼ်းလၢတ်ႈတီႈမႂ်းလႄႈဝႃႈ၊ ‘မႂ်းထၢင်ႇႁဝ်းဢမ်ႇႁုလွင်ႈဢၼ်ဢႅင်ႇၼမ်ႉမၢၵ်ႇၸပိတ်ႉၵႃႈမီးတၵ်းလႆႈတဵမ်ဝႆႉတင်းၼမ်ႉမၢၵ်ႇၸပိတ်ႉၼၼ်ႉႁိုဝ်း၊’ ဝႃႈၼင်ႇၼႆသေယဝ်ႉ။-
မႂ်းတၵ်းလႆႈလၢတ်ႈတီႈၶဝ်လႄႈဝႃႈ၊ ထႃႇဝရႃႉၽြႃး၊ မီးဢမိင်ႉၸမ်ႉ၊ ‘ၵဝ်တၵ်းႁႂ်ႈၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင်ဢၼ်ဝႃႈ၊ၸႃႉၸဵမ်ၶုၼ်ႁေႃၶမ်းဢၼ်ၼင်ႈယူႇၵႃႈၼိူဝ်ရႃႇၸႃႉပလၢင်ႇၶုၼ်လူင် တႃႇဝိတ်ႈ၊ ၸိူဝ်းၼၼ်ႉလႄႈယဵၸ်ႈပရေႃးႁဵၵ်ႈ လႂ်၊ပရေႃးၽႅတ်ႈ လႂ်၊ၵူၼ်းဝဵင်း ယေႇရုသလႅမ်ႇ၊ ၵႃႈမီးလႂ်ဢိမ်ႇတဵမ်ဝႆႉတင်းတၢင်းဢၼ်မဝ်းလဝ်ႈမဝ်းၵမ်ဢေႃႈ။-
ၵဝ်တၵ်းဢဝ်ၶဝ်ၼင်ႇၵၼ်ၵၼ်၊ပေႃႈမႄႈဢိၵ်ႇတင်းလုၵ်ႈလၢင်းပေႃႉၽတ်ႉသႂ်ႇၵၼ်ႁႅင်းၼႃႇဢေႃႈ။ ၵဝ်တၵ်းဢမ်ႇမီးၵရုၼႃႇ၊ဢမ်ႇသေလၢႆ၊ဢမ်ႇဢဵတ်းလူၼႂ်းမိူဝ်ႈဢၼ်ၵဝ်တၵ်းယႃႉၶဝ်ပႅတ်ႈၼၼ်ႉဢေႃႈ၊’ ” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
သူဢွၼ်ၵၼ်ထွမ်ႇငိၼ်းလႄႈဝၢႆႇႁူႁေႈႁူၸူးတႃႉ။ ယႃႇပေဢွၼ်ၵၼ်မီးၸႂ်ဢၼ်ပူၵ်းပႅၼ် ထႃႇဝရႃႉၽြႃး၊ မီးဢမိင်ႉဝႆႉယဝ်ႉ။
ဢွၼ်ၵၼ်ယွင်ႈယေႃးမုၼ်ၵုင်ႇ ထႃႇဝရႃႉၽြႃး၊ ၽြႃးပဵၼ်ၸဝ်ႈသူၸူဝ်ႈဢၼ်မၼ်းၸဝ်ႈ ဢမ်ႇပႆႇႁႂ်ႈဝၼ်းၶမ်ႈ၊ ၸူဝ်ႈဢၼ်တိၼ်သူဢမ်ႇပႆႇၶီႈလိုတ်းလႄႈ လူမ်ႉၵႃႈၼိူဝ်လွႆမိူဝ်ႈဢၼ်လပ်းသိင်ႇမႃးၼၼ်ႉ၊ ၸူဝ်ႈဢၼ်မၼ်းၸဝ်ႈဢမ်ႇပႆႇႁႂ်ႈပဵၼ်ဢၼ်လပ်းသိင်ႇ၊ လပ်းသိင်ႇဢၼ်ၼႃတၼ်ၼႃႇ၊ၼႂ်းမိူဝ်ႈဢၼ် သူမုင်ႈမွင်းဢၼ်လႅင်းယူႇၼၼ်ႉတႃႉ။
ပေႃးသူယင်းဢမ်ႇထွမ်ႇဢမ်ႇဢဝ်လႄႈယူႇၸိုင်၊ ၸႂ်ဝိၺိၺ်ႇၵဝ်တၵ်းႁွင်ႉႁႆႈၵႃႈၼႂ်းတီႈ ဢၼ်သိူင်ႇဢၼ်မႅပ်ႉၼၼ်ႉ၊ ၵွပ်ႈပိူဝ်ႈမႃႇၼႃႉၸႂ်သုင်သူလႄႈ မၢၵ်ႇတႃၵဝ်တၵ်းႁွင်ႉႁႆႈၼႃႇလူင်လၢင်လႄႈ ပဵၼ်ၼမ်ႉတႃတူၵ်းယူႇ၊ ၵွပ်ႈပိူဝ်ႈဢၼ်ၽုင်သူဝ်း ထႃႇဝရႃႉၽြႃး၊ လႆႈ ၶၢမ်ႇတၢင်းဢၼ်သိမ်းဢဝ်ၵႂႃႇၼၼ်ႉဢေႃႈ။
မွၵ်ႇလၢတ်ႈတီႈၶုၼ်ႁေႃၶမ်း၊ဢိၵ်ႇတင်းတီႈမႄႈၸဝ်ႈလႄႈဝႃႈ၊ “ဢဝ်တီႈၼင်ႈဢၼ်တႅမ်ႇတႃႉ။ သရၽူႇဢၼ်ႁၢင်ႈလီသူၼၼ်ႉလႆႈတူၵ်းသေၵႃႈၼိူဝ်ႁူဝ်သူယဝ်ႉ။-
ဝဵင်းၵႃႈၼႂ်းမိူင်းပွတ်းတၢင်းၸၢၼ်းၸိူဝ်းၼၼ်ႉမီးတၢင်းဢၼ်ဢိုတ်းႁပ်းဝႆႉလႄႈၵေႃႉဢၼ်တၵ်းၽုၺ်ႇဢမ်ႇမီးသေၵေႃႉသေၵူၼ်း။ ၵူၼ်းဝၢၼ်ႈၵူၼ်းမိူင်း ယုတႃႉ၊ တင်းသဵင်ႈတင်းလူင်လႆႈၶၢမ်ႇတၢင်းဢၼ်တိဢဝ်သိမ်းဢဝ်ၵႂႃႇယဝ်ႉယဝ်ႉ။ လႆႈၶၢမ်ႇတၢင်းဢၼ်သိမ်းဢဝ်ၵႂႃႇတင်းသဵင်ႈတင်းမူတ်းယဝ်ႉယဝ်ႉ၊” ဝႃႈၼင်ႇၼႆဢေႃႈ။
ဢဝ်တႃမႂ်းမုင်ႈလႄႈတူၺ်းၶဝ်ၸိူဝ်းဢၼ်လုၵ်ႉသေၵႃႈတီႈၽၢႆႇတၢင်းႁွင်ႇမႃးၸိူဝ်းၼၼ်ႉတႃႉ။ ၽုင်သူဝ်းဢၼ်ၵဝ်ပၼ်တီႈမႂ်း၊ၽုင်သူဝ်းဢၼ်ႁၢင်ႈလီႁၢင်ႈငၢမ်းမႂ်းၼၼ်ႉမီးၵႃႈလႂ်။-
ၼႂ်းမိူဝ်ႈဢၼ်ၶဝ်ၸိူဝ်းဢၼ်မႂ်းသွၼ်ပၼ်ပုၼ်ႈတေပဵၼ်ၵေႃႉပဵၼ်သႄႈမႂ်းၼၼ်ႉသမ်ႉပဵၼ်ၵေႃႉဢၼ်ပဵၼ်ၸဝ်ႈပဵၼ်ၼၢႆးၵႃႈၼိူဝ်မႂ်းမႃးၸိုင်၊မႂ်းတၵ်းလၢတ်ႈၸိူဝ်ႉၼင်ႇႁိုဝ်။ မႂ်းတၵ်းလႆႈၶၢမ်ႇတၢင်းဢၼ်ၸဵပ်းသႅပ်ႇၼႃႇမိူၼ်ၸိူဝ်ႉၼင်ႇမႄႈယိင်းဢၼ်ၵိူတ်ႇလဵင်ႉလုၵ်ႈလဵင်ႉလၢင်းလႆႈၶၢမ်ႇၼၼ်ႉဢမ်ႇၸႂ်ႈႁိုဝ်း။-
ပေႃးမႂ်းလၢတ်ႈၼႂ်းၸႂ်လႄႈဝႃႈ၊ၵွပ်ႈပိူဝ်ႈၵႃႈသင်လႄႈဢမုၼႆႉႁွတ်ႈထိုင်ၵႃႈၼိူဝ်ၵဝ်။ ဝႃႈၼင်ႇၼႆၸိုင်၊ၵွပ်ႈပိူဝ်ႈဢပျတ်ႈမႂ်းပဵၼ်ဢၼ်ယႂ်ႇၼမ်ၼႃႇလႄႈၶူဝ်းၼုင်ႈမႂ်းၼၼ်ႉလႆႈၽုၺ်ႇပိုတ်ႇဝႆႉလႄႈလႆႈၶၢမ်ႇတၢင်းဢၼ်ႁဵတ်းၵၼ်ႉႁဵတ်းႁၢႆႉဢေႃႈ။-
ၵူၼ်းမဵဝ်း ဢေႇတီႇဢူဝ်းပီးယႃး၊ ၼၼ်ႉလႅၵ်ႈလၢႆႈႁၢင်ႈၽၢင်ၼိူဝ်ႉၼင်မၼ်းလႆႈႁိုဝ်း၊သိူဝ်ၸုမ်ႈၼၼ်ႉလႅၵ်ႈလၢႆႈဢၼ်လၢႆးဢၼ်လဵၼ်းတူဝ်မၼ်းလႆႈႁိုဝ်း။ ပေႃးလႅၵ်ႈလၢႆႈလႆႈၸိုင်၊သူၸိူဝ်းဢၼ်ယၢမ်ႈႁဵတ်းတုၸရိူၵ်ႈၼၼ်ႉဢွၼ်ၵၼ်တၢတ်ႈၼိူင်ႇႁႂ်ႈလႆႈႁဵတ်းတၢင်းဢၼ်လီဢၼ်ငၢမ်းဢေႃႈ။-
မၼ်းၸဝ်ႈလၢတ်ႈလႄႈဝႃႈ၊ “ၵဝ်တၵ်းဢဝ်ၶဝ်ၸၢတ်ႇ 1 ပိုၼ်ပႅတ်ႈမိူၼ်ၸိူဝ်ႉၼင်ႇၵႅပ်ႇဢၼ်လူမ်းထိူၼ်ႇလႅင်ႉပတ်ႉထူဝ်းပိဝ်သဵၼ်ၵႂႃႇၼၼ်ႉဢေႃႈ။-
ဢၼ်ၼႆႉၸမ်ႉ၊ပဵၼ်ပုၼ်ႈပဵၼ်တႃႇဢၼ်ၵဝ်တႅၵ်ႈပၼ်ပုၼ်ႈမႂ်း၊ၵွပ်ႈပိူဝ်ႈဢၼ်မႂ်းလူင်လိုမ်းၵဝ်လႄႈၸပ်းၸွမ်းမုသႃႇယူႇၼၼ်ႉဢေႃႈ။-
တူဝ်ၵဝ်တၵ်းၽုၺ်ႇပိုတ်ႇၶူဝ်းၼုင်ႈမႂ်းသေယဝ်ႉ၊ႁူမ်ႇသုမ်ႇၼႃႈတႃမႂ်းလႄႈႁႂ်ႈလွင်ႈဢၼ်မႂ်းလီဢူၵ်းလီဢၢႆၼၼ်ႉထၢင်ႇသႃးဢေႃႈ။-
ၵဝ်လႆႈႁၼ်တၢင်းဢၼ်လီႁင်ႈဢဵတ်ႇသဵတ်ႇမႂ်း၊တၢင်းဢၼ်မႂ်းၵူဝ်ႈၵိူၵ်ႇလူၺ်ႈမေႇထုင်ႇဢၼ်ဢမ်ႇတြႃး၊တၢင်းဢၼ်မႂ်းႁွင်ႉမႂ်းႁႄႇ၊တၢင်းဢၼ်မႂ်းဢမ်ႇမီးတၢင်းဢၼ်ဢူၵ်းဢၢႆလႄႈႁဵတ်းမႄႈမွၵ်ႇယႃႈၸိူဝ်းၼၼ်ႉၵႃႈၼိူဝ်လွႆၼိူဝ်ၵုင်းဢၼ်မီးၵႃႈတီႈဝၢၼ်ႈၼွၵ်ႈၼႃးပၢင်ႇၸိူဝ်းၼၼ်ႉယဝ်ႉ။ ဝဵင်း ယေႇရုသလႅမ်ႇ၊ ႟။ မႂ်းမီးဢႃႉမၢင်ႇၵလႃႇဢေႃႈ။ ယင်းဢမ်ႇႁွတ်ႈထိုင်တၢင်းဢၼ်မူတ်းသႂ်လႄႈမႂ်းတၵ်းယူႇၶိင်ႇၵႃႇလႃႉႁိုင်ၵႃႈႁိုဝ်၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးၵႃႈတီႈ ယေႇရမိ၊ လူၺ်ႈတၢင်းဢၼ်ၽႃႉၽူၼ် ႁႅင်ႈလႅင်ႉၼၼ်ႉၸမ်ႉ၊
“မိူင်း ယုတႃႉ၊ ၶၢင်းၶီၶၢင်းၽၢၼ်လႄႈၽၵ်းတူဝဵင်းမၼ်းၸိူဝ်းၼၼ်ႉဢမ်ႇပေႃးမၼ်ႈၶိူင်ႇယဝ်ႉ။ ၵူၼ်းမၼ်းၵေႃႈၼွၼ်းယူႇၵႃႈၼိူဝ်လိၼ်လူၺ်ႈတင်းၸႂ်ဢၼ်ဢမ်ႇသႃႇလႄႈသဵင်ႁွင်ႉႁႆႈဝဵင်း ယေႇရုသလႅမ်ႇ၊ ၼၼ်ႉဢူၼ်မေႃးယူႇဢေႃႈ။
မူးမၢတ်ႈၽွင်းမိူင်းတင်းလၢႆဢွၼ်ၵၼ်ပွႆႇၸႂ်ႉၵူၼ်းဢွၼ်ႇၶဝ်ၵႂႃႇတဵၵ်းၼမ်ႉလႄႈၶဝ်ၼၼ်ႉ ႁွတ်ႈထိုင်ၵႃႈတီႈဢိူင်ႇၼမ်ႉၶုမ်ၼမ်ႉသေယဝ်ႉ၊ ဢမ်ႇထူပ်းၼမ်ႉထူပ်းၼၢႆး။ ၶဝ်ဢွၼ်ၵၼ်ပႃးမေႃႈပဝ်ႇသေလႄႈၶိုၼ်းမႃးဢေႃႈ။ ၶဝ်မီးတၢင်းဢၼ်ဢူၵ်းဢၢႆငိူဝ်ႈငဝ်လႄႈ ဢွၼ်ၵၼ်ႁူမ်ႇသုမ်ႇႁူဝ်ၶဝ်ယူႇဢေႃႈ။
ၵွပ်ႈပိူဝ်ႈၽူၼ်ဢမ်ႇတူၵ်းၵႃႈၼႂ်းမိူင်းၸဝ်ႈလႄႈလိၼ်မီးတၢင်းဢၼ်တႅၵ်ႇဢႃႈဝႆႉဢေႃႈ။ ၵူၼ်းႁဵတ်းႁႆႈၼႃးတင်းသဵင်ႈတင်းလူင် မီးတၢင်းဢၼ်ၸႂ်လုလႄႈဢွၼ်ၵၼ် ႁူမ်ႇသုမ်ႇႁူဝ်ၶဝ်ယူႇဢေႃႈ။
တိုင်ႈမႄႈဢၼ်မီးၵႃႈၼႂ်းတီႈပၢင်ႇတီႈပဵင်းၵေႃႈၸုၼ်ႉပႅတ်ႈလုၵ်ႈမၼ်းဢၼ် တိုၵ်ႉႁႃၵိူတ်ႇလဵင်ႉမႃးၼၼ်ႉၵွပ်ႈပိူဝ်ႈဢၼ် ဢမ်ႇမီးယိူဝ်ႈၼၼ်ႉဢေႃႈ။
မႃႉလီႈဢၼ်ႁႄဢၼ်လိူင်းတင်းလၢႆဢွၼ်ၵၼ်ၸုၵ်းယူႇၵႃႈၼိူဝ်တီႈဢၼ်သုင်သေလႄႈ သုတ်ႇလူမ်းမိူၼ်ၸိူဝ်ႉၼင်ႇမႃလိၼ်ၼၼ်ႉလႄႈ မၢၵ်ႇတႃၶဝ်လုၵႂႃႇၵွပ်ႈပိူဝ်ႈဢၼ်ဢမ်ႇမီး ပၢင်ႇယိူဝ်ႈယႃႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ တီႈၶႃႈ၊ပိၵ်ႉသမ်ႉဢပျတ်ႈ ႁဝ်းၶႃႈၶၢမ်ႇသၢၵ်ႈသေႇယူႇၽၢႆႇၼိုင်ႈ တင်းႁဝ်းၶႃႈသေၵေႃႈ၊ ၶႅၼ်းတေႃႈထွၵ်ႈလူၺ်ႈၼႃႇမႃႉၸိုဝ်ႈသဵင် ၸဝ်ႈႁဝ်းသေလႄႈၸီႇယၢင်ႇသေၵမ်းတီႈၶႃႈ။ တၢင်းဢၼ်ႁဝ်းၶႃႈၽွၵ်ႈပျၢၼ်ႇၶိုၼ်းၵႂႃႇၼၼ်ႉ ပဵၼ်ဢၼ်ၼမ်ၼႃႇလူင်လၢင်လႄႈႁဝ်းၶႃႈ ဢွၼ်ၵၼ်ၽိတ်းပိူင်ႈၸဝ်ႈႁဝ်းတီႈၶႃႈယဝ်ႉ။
ဢူဝ်း၊ၸဝ်ႈဢၼ်ၵူၼ်းမဵဝ်း ဢိသရေး၊ မုင်ႈမွင်း၊ ၸဝ်ႈဢၼ်ၵႄႇသႄႇၶျွတ်ႈဢဝ်ၼႂ်းၶိင်ႇ မိူဝ်ႈဢၼ်ၽေးႁွတ်ႈထိုင်ၼၼ်ႉတီႈၶႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းပဵၼ်ၸိူဝ်ႉၼင်ႇၶႅၵ်ႇၵႃႈၼႂ်းမိူင်းၸဝ်ႈ၊ဢိၵ်ႇတင်း ပဵၼ်ၸိူဝ်ႉၼင်ႇၵေႃႉဢၼ်ၵႂႃႇတၢင်းပႆတၢင်း ဢၼ်ယင်ႉလိုဝ်ႈၶိုၼ်းလဵဝ်ၵူၺ်းၼၼ်ႉ ၸိူဝ်ႉၼင်ႇႁိုဝ်တီႈၶႃႈ။
ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းပဵၼ် ၸိူဝ်ႉၼင်ႇၵေႃႉဢၼ်သုၵ်ႉသၢၵ်ႉယုင်ႈၸႂ်ဝႆႉ၊ဢိၵ်ႇတင်း ၸိူဝ်ႉၼင်ႇၵူၼ်းသိုၵ်းဢၼ်ႁႅင်းယႂ်ႇၼႃႇလႄႈ ဢမ်ႇတၢတ်ႈၼိူင်ႇပုၼ်ႈတေၸွႆႈထႅမ်လႆႈၼၼ်ႉၸိူဝ်ႉၼင်ႇႁိုဝ်တီႈၶႃႈ။ ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းမီးယူႇ ၵႃႈၼႂ်းၶႃႈၸဝ်ႈႁဝ်းၶဝ်တီႈၶႃႈဢေႃႈ။ ႁဝ်းၶႃႈၼႆႉပဵၼ်ၵေႃႉဢၼ်လႆႈၶၢမ်ႇတၢင်းဢၼ် ႁွင်ႉႁဵၵ်ႈလူၺ်ႈၼႃႇမႃႉၸိုဝ်ႈသဵင်ၸဝ်ႈႁဝ်း တီႈၶႃႈဢေႃႈ။ ၶႅၼ်းတေႃႈယႃႇပေၸုၼ်ႉပႅတ်ႈ ႁဝ်းၶႃႈသေၵမ်းတီႈၶႃႈ။
ၸၢပ်ႈသႅင်ႇလူၺ်ႈလွင်ႈၵူၼ်းမဵဝ်းၼႆႉလႄႈ ထႃႇဝရႃႉၽြႃး၊ မီးဢမိင်ႉၸမ်ႉ၊ “ၶဝ်ဢွၼ်ၵၼ်ႁၵ်ႉတၢင်းဢၼ်လႄႇဢၼ်လၢဝ်းဢေႃႈ။ ၶဝ်ဢမ်ႇဢွၼ်ၵၼ်ၶျုၵ်ႈဝႆႉတိၼ်ၶဝ်လႆႈ။ ပိူဝ်ႈၼင်ႇၼႆလႄႈ ထႃႇဝရႃႉၽြႃး၊ ဢမ်ႇႁပ်ႉၶၢမ်ႇဢဝ်ၶဝ်။ မၼ်းၸဝ်ႈတၵ်းၶုၵ်းၸႂ်လႆႈၶႆႈၸႂ်ထူပ်းတုၸရိူၵ်ႈဢၼ်ၶဝ်ႁဵတ်းၼၼ်ႉလႄႈတၵ်းပၼ်တၢမ်ႇဢပျတ်ႈတီႈၶဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉတီႈၵဝ်ၸမ်ႉ၊ “ယႃႇပေသူးတွင်းယွၼ်းဢဝ်ဢၼ်လီဢၼ်ငၢမ်းပုၼ်ႈၵူၼ်းမဵဝ်းၼႆႉ။-
ပိၵ်ႉသမ်ႉၶဝ်ၵမ်တၢင်းၵိၼ်သေၵေႃႈၵဝ်တၵ်းဢမ်ႇထွမ်ႇဢမ်ႇငိၼ်းသဵင်ၶဝ်ႁွင်ႉႁႃၵဝ်ၼၼ်ႉ။ ပိၵ်ႉသမ်ႉၶဝ်သၢၵ်ႈၵၢပ်ႈၶိူင်ႈတၢင်းလူႇဢၼ်တုတ်ႇၽႆး၊ဢိၵ်ႇတင်းၶိူင်ႈတၢင်းလူႇဢၼ်ပဵၼ်မၢၵ်ႇၶဝ်ႈႁူင်းၶဝ်ႈၼၼ်ႉၵေႃႈ ၵဝ်တၵ်းဢမ်ႇႁပ်ႉတုင်းဢဝ်။ ၵဝ်တၵ်းႁႂ်ႈၶဝ်သုမ်းၸွမ်းလူၺ်ႈၽေးလၢပ်ႇ၊ၽေးတၢင်းဢၼ်ဢိုပ်းဢၼ်ယၢၵ်ႇ၊ၽေးၵႃႇလႃႉႁႃႈလႅင်မိူင်းဢေႃႈ၊” ဝႃႈၼင်ႇၼႆဢေႃႈ။
ၵဝ်ၵေႃႈလဝ်ႈလၢတ်ႈလႄႈဝႃႈ၊ “ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တီႈၶႃႈ၊ပရေႃးၽႅတ်ႈ တင်းလၢႆဢွၼ်ၵၼ်မွၵ်ႇလၢတ်ႈတီႈၶဝ်ၼႆႉလႄႈဝႃႈ၊ ‘သူတၵ်းဢမ်ႇလႆႈထူပ်းၽေးလၢပ်ႇၽေးလႅဝ်း၊သူတၵ်းဢမ်ႇလႆႈမီးၽေးတၢင်းဢၼ်ဢိုပ်းဢၼ်ယၢၵ်ႇ၊ၵဝ်တၵ်းပၼ်တၢင်းၼိမ်ဢၼ်မၢၼ်ႇဢၼ်မႅၼ်ႈတီႈသူၵႃႈတီႈၼႆႈဢေႃႈ၊’ ” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉတီႈၵဝ်လႄႈဝႃႈ၊ “ပရေႃးၽႅတ်ႈၸိူဝ်းၼၼ်ႉဢဝ်တင်းၼႃႇမႃႉၸိုဝ်ႈသဵင်ၵဝ်သေလႄႈႁေႃးလၢတ်ႈတၢင်းဢၼ်ပႅတ်ႉဢၼ်လႅၼ်ဢေႃႈ။ ၵဝ်ဢမ်ႇလႆႈပွႆႇၸႂ်ႉၶဝ်။ ၵဝ်ဢမ်ႇလႆႈသင်ႇလၢတ်ႈဝႆႉတီႈၶဝ်။ ၵဝ်ဢမ်ႇလႆႈလၢတ်ႈၵႂၢမ်းတေႃႇၶဝ်။ ၶဝ်ဢဝ်တင်းပျႃႇတိၵ်ႈဢၼ်ပႅတ်ႉဢၼ်လႅၼ်၊တၢင်းဢၼ်ၵျၢမ်ႇပွင်ဢၼ်လၢႆလၢႆ၊ဢမ်ႇပွင်ႇလွင်ႈၵႃႈသင်၊တၢင်းဢၼ်ပႅတ်ႉလႅၼ်ၸွမ်းလူၺ်ႈၺၢၼ်ႇၶဝ်လွၼ်ႉလွၼ်ႉၼၼ်ႉသေလႄႈႁေႃးလၢတ်ႈဢေႃႈ။-
ပိူဝ်ႈၼႆလႄႈၵဝ် ထႃႇဝရႃႉၽြႃး၊ မီးဢမိင်ႉလူၺ်ႈလွင်ႈပရေႃးၽႅတ်ႈဢၼ်ၵဝ်ယင်းဢမ်ႇပွႆႇဢမ်ႇၸႂ်ႉသေလႄႈဢိင်ၼႃႇမႃႉၸိုဝ်ႈသဵင်ၵဝ်သေယဝ်ႉ၊ႁေႃးလၢတ်ႈလႄႈဝႃႈ၊ ‘ၵႃႈတီႈမိူင်းၼႆႉဢမ်ႇလႆႈမီးၽေးလၢပ်ႇၽေးလႅဝ်း၊ၽေးတၢင်းဢၼ်ဢိုပ်းဢၼ်ယၢၵ်ႇ၊’ ဝႃႈၼင်ႇၼႆၸိူဝ်းၼၼ်ႉၸမ်ႉ၊ပရေႃးၽႅတ်ႈၸိူဝ်းၼၼ်ႉတၵ်းသုမ်းၸွမ်းလူၺ်ႈၽေးလၢပ်ႇၽေးလႅဝ်း၊ၽေးတၢင်းဢၼ်ဢိုပ်းယၢၵ်ႇဢေႃႈ၊ဝႃႈၼင်ႇၼႆဢေႃႈ။-
ၵူၼ်းတင်းလၢႆဢၼ်လႆႈထွမ်ႇတၢင်းဢၼ်ပရေႃးၽႅတ်ႈၸိူဝ်းၼၼ်ႉႁေႃႈလၢတ်ႈၼၼ်ႉတၵ်းလႆႈၶၢမ်ႇတၢင်းဢၼ်ဢဝ်ထိမ်ႈတူၵ်းၵႃႈၼႂ်းသဵၼ်ႈတၢင်းဝဵင်း ယေႇရုသလႅမ်ႇ၊ ၵွပ်ႈပိူဝ်ႈၽေးတၢင်းဢၼ်ဢိုပ်းဢၼ်ယၢၵ်ႇ၊ၽေးလၢပ်ႇၽေးလႅဝ်းၼၼ်ႉဢေႃႈ။ ၽူႈလႂ်သေၵေႃႉသေၵူၼ်းဢမ်ႇလႆႈသၢင်းၵျူဝ်ႇၸႃႉၸဵမ်တူဝ်ၶဝ်လႄႈမေးၶဝ်၊လုၵ်ႈၸၢႆး၊လုၵ်ႈယိင်းၶဝ်ၸိူဝ်းၼၼ်ႉ။ ၵဝ်တၵ်းဢဝ်ဢပျတ်ႈၶဝ်ထွၵ်ႇတူၵ်းသႂ်ႇၵႃႈၼိူဝ်ၶဝ်ဢေႃႈ။
“ၵႂၢမ်းဢၼ်မႂ်းတၵ်းလႆႈလၢတ်ႈတီႈၶဝ်ၸမ်ႉ၊ “‘ႁႂ်ႈမၢၵ်ႇတႃၵဝ်ၼႆႉပဵၼ်ၼမ်ႉတႃလႆတူၵ်းယူႇ တင်းဝၼ်းတင်းၶိုၼ်းသေၵမ်းလူၺ်ႈ။ ယႃႇႁႂ်ႈမၼ်းထၢတ်ႇသေၵမ်း။ ၵူၼ်းမဵဝ်းၵဝ်ၼၼ်ႉလႆႈၶၢမ်ႇတၢင်းဢၼ်လုပ်ႇမၼ်းႁၵ်းၵႂႃႇလူၺ်ႈတၢင်းၸဵပ်းဢၼ် ႁႅင်းၼႃႇလူင်လၢင်ၼၼ်ႉယဝ်ႉ။
ယၢမ်းမိူဝ်ႈဢၼ်ၵဝ်ၵႂႃႇၵႃႈတီႈၼွၵ်ႈတီႈပၢင်ႇၼၼ်ႉၸိုင်၊ၵဝ်လႆႈထူပ်းႁၼ်တူဝ်တၢႆ၊ဢၼ်တၢႆ လူၺ်ႈလၢပ်ႇလူၺ်ႈလႅဝ်းၼၼ်ႉလႄႈ ယၢမ်းမိူဝ်ႈဢၼ်ၵဝ်ၶဝ်ႈၵႃႈၼႂ်းဝဵင်းၼၼ်ႉၸိုင်၊ၵဝ်လႆႈထူပ်းႁၼ်ၶဝ်ၸိူဝ်းဢၼ်မီးတၢင်းၶႆႈတၢင်းပဵၼ်လူၺ်ႈတၢင်း ဢၼ်ဢိုပ်းဢၼ်ယၢၵ်ႇၼၼ်ႉဢေႃႈ။ ပရေႃးၽႅတ်ႈ ဢိၵ်ႇတင်းယဵၸ်ႈပရေႃးႁဵၵ်ႈ တင်းလၢႆ ယင်းဢမ်ႇႁုၵႃႈသင်လႃးလႃးလႄႈ ဢွၼ်ၵၼ်လႄႇလၢဝ်းႁဵတ်းၵၢၼ်ၶဝ်ၵႂႃႇ ၵူႈတီႈၵူႈလႅၼ်ဢေႃႈ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ၸဝ်ႈႁဝ်းပႄႇပႅတ်ႈမိူင်း ယုတႃႉ၊ တင်းသဵင်ႈ တင်းမူတ်းယဝ်ႉတီႈၶႃႈႁိုဝ်း။ ႁူဝ်ၸႂ်ၸဝ်ႈႁဝ်းလီႁင်ႈဢဵတ်ႇသဵတ်ႇ ဝဵင်း ၸိဢုၼ်ႇ၊ တီႈၶႃႈႁိုဝ်း။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းပၼ်တၢမ်ႇတီႈႁဝ်းၶႃႈႁႂ်ႈထၢၼ်ႈပေႃးဢမ်ႇလႆႈ သၢၵ်ႈသႃႇၶႅၼ်းမႃးၸိူဝ်ႉၼင်ႇႁိုဝ်တီႈၶႃႈ။ ပိၵ်ႉသမ်ႉႁဝ်းၶႃႈမုင်ႈမွင်းတၢင်းၼိမ်သေၵေႃႈဢမ်ႇလႆႈတၢင်းဢၼ်လီဢၼ်ငၢမ်းတီႈၶႃႈ။ ပိၵ်ႉသမ်ႉမုင်ႈမွင်းၵတ်းယဵၼ်ၶျၢမ်းသႃႇသေၵေႃႈလႆႈဢွၼ်ၵၼ်ထူပ်းၽေးဢုပၢတ်ႈၵူၺ်း တီႈၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ႁဝ်းၶႃႈႁုတုၸရိူၵ်ႈ ႁဝ်းၶႃႈ၊ဢိၵ်ႇတင်း ဢပျတ်ႈပူႇမွၼ်ႇႁဝ်းၶႃႈၸိူဝ်းၼၼ်ႉယူႇ ဢမၢၼ်ႇၶၼ်ပဵၼ်တီႈၶႃႈဢေႃႈ။ ႁဝ်းၶႃႈ ၽိတ်းပိူင်ႈၸဝ်ႈႁဝ်းတီႈၶႃႈယဝ်ႉ။
ၵွပ်ႈပိူဝ်ႈၼႃႇမႃႉၸိုဝ်ႈသဵင်ၸဝ်ႈႁဝ်းလႄႈ ယႃႇပေႁဵတ်းဢမ်ႇပေႃးၼင်ႇႁိုဝ်တီႈ ႁဝ်းၶႃႈသေၵမ်းတီႈၶႃႈ။ ယႃႇပေၶျႃးသရေႇပလၢင်ႇမုၼ်ၽုင်းၸဝ်ႈႁဝ်းတူၵ်းတီႈတႅမ်ႇသေၵမ်းတီႈၶႃႈ။ ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းလႄႈ ယႃႇပေယႃႉပႅတ်ႈပတိၺိၺ်ႇၸဝ်ႈႁဝ်း ဢၼ်ႁဵတ်းလူၺ်ႈၵၼ်တင်းႁဝ်းၶႃႈၼၼ်ႉ သေၵမ်းတီႈၶႃႈ။
ႁုၼ်ႇႁၢင်ႈသၢင်းထုၵူၼ်းတၢင်ႇၸိူဝ်ႉတၢင်ႇၶိူဝ်းၼၼ်ႉတၢတ်ႈၼိူင်ႇႁဵတ်းႁႂ်ႈၽူၼ်တူၵ်းလႆႈႁိုဝ်း။ ၽႃႉၵၢင်ႁၢဝ်ယူႇႁၢင်းမၼ်းလႄႈၸၢင်ႈႁႂ်ႈ ၼမ်ႉၽူၼ်တူၵ်းလႆႈႁိုဝ်း။ ပဵၼ်ၸဝ်ႈႁဝ်းၵူၺ်း ဢၼ်ႁဵတ်းလႆႈၼၼ်ႉဢမ်ႇၸႂ်ႈတီႈၶႃႈႁိုဝ်း။ ဢူဝ်း၊ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၶႃႈတီႈၶႃႈ။ ႁဝ်းၶႃႈတၵ်းမုင်ႈမွင်းၸဝ်ႈႁဝ်း ယူႇတီႈၶႃႈဢေႃႈ။ ၵွပ်ႈပိူဝ်ႈၸဝ်ႈႁဝ်းႁဵတ်းပဵၼ်လွင်ႈတၢင်းၸိူဝ်းၼႆႉၵူႈၸိူဝ်ႉၵူႈပိူင်တီႈၶႃႈဢေႃႈ။
ထႃႇဝရႃႉၽြႃး၊ မီးဢမိင်ႉတီႈၵဝ်ၸမ်ႉ၊ “ပိၵ်ႉသမ်ႉ မူဝ်းသေႇ၊ ဢိၵ်ႇတင်း သမူၺ်ႇလႃႉ၊ ၸုၵ်းယူႇၵႃႈတီႈၽၢႆႇၼႃႈၵဝ်သေၵေႃႈ၊ႁူဝ်ၸႂ်ၵဝ်တၵ်းဢမ်ႇဢဵတ်းလူတေႃႇၵူၼ်းမဵဝ်းၼႆႉ၊တၵ်းလိုပ်ႈၶဝ်ဢွၵ်ႇသေၵႃႈတီႈၵဝ်ႁႂ်ႈပူၼ်ႉသေသၢႆတႃၵဝ်ၵႂႃႇဢေႃႈ။-
ပေႃးၶဝ်တွင်ႈထၢမ်တီႈမႂ်းလႄႈဝႃႈ၊ ‘ႁဝ်းၶႃႈတၵ်းလႆႈၵႂႃႇၵႃႈတီႈလႂ်ၶႃႈ၊’ ဝႃႈၼင်ႇၼႆၸိုင်၊မႂ်းတၵ်းလႆႈလၢတ်ႈတီႈၶဝ်လႄႈဝႃႈ၊ ထႃႇဝရႃႉၽြႃး၊ မီးဢမိင်ႉဝႆႉၸမ်ႉ၊ “ၶဝ်ၸိူဝ်းဢၼ်ထုၵ်ႇလႆႈၶၢမ်ႇတၢႆၼၼ်ႉ ဢွၵ်ႇၵႂႃႇၸူးၵႃႈတီႈတၢင်းတၢႆ၊ ၶဝ်ၸိူဝ်းဢၼ်ထုၵ်ႇလႆႈၶၢမ်ႇတၢင်းဢၼ် ၶႃႈၽၼ်းလူၺ်ႈလၢပ်ႇလူၺ်ႈလႅဝ်းၼၼ်ႉ၊ ဢွၵ်ႇၵႂႃႇၸူးၵႃႈတီႈတၢင်းဢၼ်လႆႈၶၢမ်ႇ ၶႃႈၽၼ်းပႅတ်ႈလူၺ်ႈလၢပ်ႇလူၺ်ႈလႅဝ်း၊ ၶဝ်ၸိူဝ်းဢၼ်ထုၵ်ႇလႆႈၶၢမ်ႇဢိုပ်းၶၢမ်ႇယၢၵ်ႇ ၼၼ်ႉဢွၵ်ႇၵႂႃႇၸူးၵႃႈတီႈတၢင်း ဢၼ်ဢိုပ်းဢၼ်ယၢၵ်ႇ၊ ၶဝ်ၸိူဝ်းဢၼ်ထုၵ်ႇလႆႈၶၢမ်ႇတၢင်းဢၼ် သိမ်းဢဝ်ၶျုၵ်ႈဝႆႉ၊ဢွၵ်ႇၵႂႃႇၸူးၵႃႈတီႈ တၢင်းဢၼ်သိမ်းဢဝ်ၶျုၵ်ႈဝႆႉၼၼ်ႉတႃႉ၊ ဝႃႈၼင်ႇၼႆဢေႃႈ။
“ၵဝ်တၵ်းၶၢၼ်းဝႆႉရၢၼ်ႇသူႇသီႇမဵဝ်းဢၼ်ဝႃႈ၊လၢပ်ႇလႅဝ်းဢၼ်တေဢဝ်ၶဝ်တၢႆ၊မႃဢၼ်တေၶူပ်းၸၼ်သိၵ်ႇၶၢတ်ႇ၊ၼူၵ်ႉၵၢင်ႁၢဝ်၊ဢိၵ်ႇတင်းတူဝ်ႁၢႆႉဢၼ်တေၶူပ်းၵိၼ်လႄႈယႃႉပႅတ်ႈၸိူဝ်းၼၼ်ႉဝႆႉၵႃႈၼိူဝ်ၶဝ်ဢေႃႈ။-
ၵဝ်တၵ်းႁႂ်ႈၵူႈသိုင်ႇၵူႈမိူင်းၵႃႈၼိူဝ်လိၼ်မိူင်းတူၵ်းၸႂ်လႂ်တိုၼ်ႇၵွပ်ႈပိူဝ်ႈလွင်ႈတၢင်းဢၼ်ၶုၼ်ႁေႃၶမ်း မၼႃႇသေႇ၊ လုၵ်ႈၸၢႆး ႁေႇၸၵိ၊ ၶုၼ်ႁေႃၶမ်း ယုတႃႉ၊ ႁဵတ်းၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉဢေႃႈ၊” ဝႃႈၼင်ႇၼႆဢေႃႈ။
“ဝဵင်း ယေႇရုသလႅမ်ႇ၊ ႟။ ၽူႈလႂ်တၵ်းဢဵတ်းလူမႂ်း။ ၽူႈလႂ်တၵ်းၶၢင်းၶီၶၢင်းၽၢၼ်လူၺ်ႈလွင်ႈမႂ်း။ ၽူႈလႂ်တၵ်းဝႄႈၸူးငႅၵ်းၸူးႁႂ်ႈလႆႈထၢမ် လႄႈဝႃႈ၊ ‘မႂ်းယူႇလီၵိၼ်ဝၢၼ်ယူႇႁိုဝ်း၊’ ဝႃႈၼင်ႇၼႆၼၼ်ႉ။
ထႃႇဝရႃႉၽြႃး၊ မီးဢမိင်ႉၸမ်ႉ၊မႂ်းၸုၼ်ႉပႅတ်ႈ ထဵင်ပႅတ်ႈၵဝ်လႄႈမႂ်းသုတ်ႉၶိုၼ်းပွၵ်ႈၶိုၼ်း တၢင်းလင်ၵႂႃႇယဝ်ႉ။ ၵဝ်မိူဝ်ႇၸၢၼ်ႈလွင်ႈဢၼ်ၶျုၵ်ႈထိင်း တၢင်းဢၼ်ၸႂ်မႆႈၶႂ်ႈၸႃႉၵဝ်ၼၼ်ႉယဝ်ႉ။
ၵဝ်ဢဝ်လူင်ႈၽတ်းၶဝ်ၵႃႈတီႈၽၵ်းတူဝဵင်းတင်းလၢႆယဝ်ႉ။ ၵဝ်ႁႂ်ႈလုၵ်ႈလၢင်းၶဝ်တၢႆလႄႈ ယႃႉၵူၼ်းမဵဝ်းၵဝ်ပႅတ်ႈ၊ ၵွပ်ႈပိူဝ်ႈၶဝ်ဢမ်ႇဝၢႆႇၶိုၼ်းသေၵႃႈတီႈ သဵၼ်ႈတၢင်းဢၼ်ၶဝ်ၸွမ်းၵႂႃႇၼၼ်ႉယဝ်ႉ။
မႄႈမူၵ်းမႄႈမၢႆႈၶဝ်ၼၼ်ႉပဵၼ်ဢၼ်ၼမ်ၼႃႇၵႃႈတီႈၽၢႆႇၼႃႈၵဝ်လိူဝ်တွၼ်းၼႃႇသေမဵတ်ႉႁိၼ် မဵတ်ႉသၢႆးၼမ်ႉသမ်ႇမုၵ်ႈတြႃႇၼၼ်ႉယဝ်ႉ။ ၶိင်ႇၵၢင်ဝၼ်းတဵင်ႈၵဝ်ဢဝ်ၵေႃႉဢၼ်ယႃႉပႅတ်ႈလုလႅဝ်ၼၼ်ႉမႃးတိုၵ်းတေႃးမႄႈၵူၼ်းၼုမ်ႇၵူၼ်းၵမ်တင်းလၢႆလႄႈ ႁႂ်ႈပဵၼ်တၢင်းဢၼ်လီၵူဝ်လီႁႄ၊တၢင်းဢၼ် ယၢပ်ႇၸႂ်ၶၢၼ်ၸႂ်ၵိုင်ႉၵၢင်ႉတူၵ်းႁွတ်ႈ ၵႃႈၼိူဝ်မၼ်းၵမ်းလဵဝ်ယဝ်ႉ။
မႄႈယိင်းဢၼ်ၵိူတ်ႇလဵင်ႉလုၵ်ႈလဵင်ႉလၢင်းၸဵတ်းၵေႃႉၼၼ်ႉႁႅင်းဢူၼ်ႈႁႅင်းယွမ်းၵႂႃႇလႄႈ ပဵၼ်လူမ်းၵႂႃႇယဝ်ႉ။ ၵၢင်ဝၼ်းမၼ်းၼၼ်ႉတူၵ်းၸဵမ်မိူဝ်ႈၸူဝ်ႈဢၼ် ဢမ်ႇပႆႇႁွတ်ႈထိုင်ၶိင်ႇၵၢင်ၶမ်ႈယဝ်ႉ။ မၼ်းၼၼ်ႉလႆႈဢူၵ်းဢၢႆလႄႈၵႂင်ၸႂ် ယုင်ႈၸႂ်ယူႇဢေႃႈ။ ၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇၸိူဝ်းၼၼ်ႉၵေႃႈၵဝ်တၵ်းဢဝ်ဢၢပ်ႈပၼ်တီႈလၢပ်ႇ တီႈလႅဝ်းရၢၼ်ႇသူႇၶဝ်ဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
မႄႈ႟။ ၵဝ်ၼႆႉမီးဢႃႉမၢင်ႇၵလႃႇဢၼ်မႄႈႁဝ်းၵိူတ်ႇလဵင်ႉၵဝ်မႃး၊ၵဝ်ပဵၼ်ၵေႃႉဢၼ်ၽိတ်းၵၼ်ထဵင်ၵၼ်တင်းၵူၼ်းမိူင်းလေႃးၵႃႉၼႆႉတင်းမူတ်းယဝ်ႉ။ ၵဝ်ဢမ်ႇၵူႈဢမ်ႇယိမ်တီႈပိူၼ်ႈ။ ပိူၼ်ႈၵေႃႈဢမ်ႇၵူႈဢမ်ႇယိမ်ဢဝ်တီႈၵဝ်။ ၵူၺ်းၵႃႈ၊ၵူၼ်းတင်းသဵင်ႈတင်းလူင်ဢွၼ်ၵၼ်ၵိၼ်ႇလႃႇၵိၼ်ႇဝႃႈၵဝ်ဢေႃႈ။-
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵဝ်တၵ်းပၼ်ႁႂ်ႈမႂ်းၵတ်းယဵၼ်ၶျၢမ်းသႃႇဢမၢၼ်ႇၶၼ်ပဵၼ်ဢေႃႈ။ ၵဝ်တၵ်းၸီႇယၢင်ႇႁႂ်ႈရၢၼ်ႇသူႇမႂ်းလႆႈတွင်းပၢၼ်ႇတီႈမႂ်းၼႂ်းမိူဝ်ႈဢၼ်ၽေးႁွတ်ႈထိုင်၊ဢိၵ်ႇတင်းမိူဝ်ႈဢၼ်လႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသႄးၼၼ်ႉဢမၢၼ်ႇၶၼ်ပဵၼ်ဢေႃႈ။-
ၽူႈလႂ်သေၵေႃႉသေၵူၼ်းဢမ်ႇၸၢင်ႈႁၵ်းလဵၵ်းလႆႈ။ လဵၵ်းဢၼ်မႃးတၢင်းမိူင်းၽၢႆႇတၢင်းႁွင်ႇဢၼ်လေႃးပႃးတွင်းလိူင်ၼၼ်ႉယဵင်ႈၶႅၼ်းဢမ်ႇၸၢင်ႈႁၵ်းလႆႈဢေႃႈ။
“ၵဝ်တၵ်းဢဝ်တၢင်းဢၼ်မၢၵ်ႈမီးလႄႈဢုၵ်ႉၸႃႇၽၼ်ႇတႃႇၵူၼ်ၵဝ်ဢၢပ်ႈပၼ်ၵႃႈၼႂ်းမိုဝ်းရၢၼ်ႇသူႇမႂ်းႁႂ်ႈလႆႈႁိမ်ဢဝ်လၢႆလၢႆၼၼ်ႉၵွပ်ႈပိူဝ်ႈဢပျတ်ႈမႂ်းၵႃႈဢၼ်မႂ်းႁဵတ်းၵႃႈၼႂ်းမိူင်းမႂ်းၵူႈတီႈၵူႈလႅၼ်ၼၼ်ႉဢေႃႈ။-
ၵဝ်တၵ်းႁဵတ်းႁႂ်ႈမႂ်းလႆႈၶၢမ်ႇတၢင်းၸႂ်ႉသွႆတီႈရၢၼ်ႇသူႇမႂ်းၵႃႈၼႂ်းမိူင်းဢၼ်မႂ်းဢမ်ႇႁုၼၼ်ႉဢေႃႈ။ တၢင်းၸႂ်မႆႈၶႂ်ႈၸႃႉၵဝ်ၼၼ်ႉမိူၼ်ၼင်ႇၽႆးလႄႈတၵ်းႁုပ်ႇမႆႈယူႇတႃႇသေႇဢမ်ႇထၢတ်ႇဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းႁုတီႈၶႃႈဢေႃႈ။ ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းၶႃႈၸဝ်ႈလႄႈမႃးလူမႃးတူၺ်းၶႃႈၸဝ်ႈလႄႈပၼ်တၢမ်ႇတီႈၶဝ်ၸိူဝ်းဢၼ်ၼိၵ်ႈၸၢၵ်ႈငႅၼ်းသႄးၶႃႈၸဝ်ႈၼၼ်ႉ ၸွမ်းၼင်ႇတြႃးသေၵမ်းတီႈၶႃႈ။ ၶႅၼ်းတေႃႈယိူၼ်ႉၶၢမ်ႇယူႇသေလႄႈယႃႇပေယႃႉၽဵဝ်ႈၶႃႈၸဝ်ႈပႅတ်ႈသေၵမ်းၶႃႈ။ ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းလွင်ႈဢၼ်ၶႃႈၸဝ်ႈလႆႈၶၢမ်ႇတၢင်းဢၼ်သႄႉသွမ်းၵွပ်ႈပိူဝ်ႈၸဝ်ႈႁဝ်းၼၼ်ႉသေၵမ်းတီႈၶႃႈ။-
ထႃႇဝရႃႉၽြႃး၊ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ တီႈၶႃႈ။ ၶႃႈၸဝ်ႈထူပ်းႁၼ်ၼုၵ်ႈၵပၢတ်ႈၸဝ်ႈႁဝ်းလႄႈဢဝ်ၵိၼ်တီႈၶႃႈယဝ်ႉ။ ၼုၵ်ႈၵပၢတ်ႈၸဝ်ႈႁဝ်းၼၼ်ႉပဵၼ်လွင်ႈဢၼ်ၶႃႈၸဝ်ႈလီၸူမ်းသိူဝ်းသႂၢင်ႇၸႂ်တီႈၶႃႈဢေႃႈ။ ၶႃႈၸဝ်ႈလႆႈၶၢမ်ႇတၢင်းဢၼ်ႁွင်ႉႁဵၵ်ႈလူၺ်ႈၼႃႇမႃႉၸိုဝ်ႈသဵင်ၸဝ်ႈႁဝ်းတီႈၶႃႈဢေႃႈ။-
ၶႃႈၸဝ်ႈဢမ်ႇၼင်ႈၵႃႈတီႈၼႂ်းဢၼ်ၸုဢၼ်တုမ်ၶဝ်ၸိူဝ်းဢၼ်ႁဵတ်းတၢင်းဢၼ်မူၼ်ႈဢၼ်ပျေႃႇၼၼ်ႉတီႈၶႃႈ။ ၶႃႈၸဝ်ႈၼင်ႈယူႇၵေႃႉလဵဝ်ၵူၺ်းၶႃႈ၊ၵွပ်ႈပိူဝ်ႈဢၼ်ၸဝ်ႈႁဝ်းဢဝ်မိုဝ်းတၢင်ႇသႂ်ႇၼၼ်ႉတီႈၶႃႈယဝ်ႉ။ ၸဝ်ႈႁဝ်းႁႂ်ႈၶႃႈၸဝ်ႈတဵမ်ဝႆႉတင်းတေႃးသႃႉတၢင်းၸႂ်မႆႈတီႈၶႃႈယဝ်ႉ။-
ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈဝူၺ်ႇတၼႃႇၶႃႈၸဝ်ႈမၼ်ႈၶိူင်ႇယူႇလႄႈတၢင်းၸဵပ်းၶႃႈၸဝ်ႈၼၼ်ႉဢမ်ႇႁၢႆ၊ဢမ်ႇၸိုၼ်ႈဢမ်ႇၶႅၼ်းမႃးလႆႈၸိူဝ်ႉၼင်ႇႁိုဝ်တီႈၶႃႈ။ တီႈၶႃႈၸဝ်ႈၼၼ်ႉၸဝ်ႈႁဝ်းပဵၼ်မိူၼ်ၸိူဝ်ႉၼင်ႇၼမ်ႉႁွင်ႈဢၼ်ႁႅင်ႈၵႂႃႇလႄႈဢမ်ႇဝႆႉၸႂ်လႆႈၼၼ်ႉတီႈၶႃႈႁိုဝ်း။
ပိူဝ်ႈၼႆလႄႈ ထႃႇဝရႃႉၽြႃး၊ မီးဢမိင်ႉၸမ်ႉ၊ “ပေႃးမႂ်းၶိုၼ်းမႃးၸိုင်၊ၵဝ်တၵ်းႁပ်ႉဢဝ်မႂ်းၶိုၼ်းမႃးလႄႈမႂ်းတၵ်းၸုၵ်းယူႇၵႃႈတီႈၽၢႆႇၼႃႈၵဝ်ဢေႃႈ။ ပေႃးမႂ်းလၢတ်ႈၵႂၢမ်းဢၼ်မျၢတ်ႈလႄႈဢမ်ႇလၢတ်ႈၵႂၢမ်းဢၼ်ဢမ်ႇပွင်ႇလွင်ႈၵႃႈသင်ၸိုင်၊မႂ်းတၵ်းလႆႈပဵၼ်မိူၼ်ၸိူဝ်ႉၼင်ႇသူပ်းၵဝ်ဢေႃႈ။ ၶဝ်ၼၼ်ႉတၵ်းဢွၼ်ၵၼ်ၶိုၼ်းမႃးၸူးတီႈမႂ်းလႄႈမႂ်းဢမ်ႇလႆႈၶိုၼ်းၵႂႃႇၸူးတီႈၶဝ်။-
ၵဝ်တၵ်းႁႂ်ႈမႂ်းပဵၼ်လမ်းဝဵင်းတွင်းလိူင်ဢၼ်မၼ်ႈၶိူင်ႇယူႇၽၢႆႇၼိုင်ႈတင်းၵူၼ်းမဵဝ်းၼႆႉဢေႃႈ။ ၶဝ်တၵ်းဢွၼ်ၵၼ်တိုၵ်းတေႃးမႂ်းလႄႈတၵ်းဢမ်ႇလႆႈပႄႉလႆႈၼႅင်ႇမႂ်း။ ၵဝ်မီးယူႇၽၢႆႇမႂ်းႁႂ်ႈလႆႈၼုၵ်ႈဢဝ်ၶျွတ်ႈဢဝ်မႂ်းဢေႃႈ။-
ၵဝ်တၵ်းၼုၵ်ႈဢဝ်မႂ်းလွတ်ႈသေၵႃႈၼႂ်းမိုဝ်းၶဝ်ၸိူဝ်းဢၼ်ႁၢႆႉဢၼ်မိူၵ်ႈၼၼ်ႉလႄႈထုတ်ႇဢဝ်မႂ်းဢွၵ်ႇသေၵႃႈၼႂ်းမိုဝ်းၶဝ်ၸိူဝ်းဢၼ်လီၵူဝ်လီႁႄၼၼ်ႉဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ဢၼ်ႁွတ်ႈမႃးၵႃႈတီႈၵဝ်လႄႈဝႃႈၸမ်ႉ၊-
“မႂ်းၼႆႉတၵ်းဢမ်ႇလႆႈဢဝ်မေး။ တၵ်းဢမ်ႇလႆႈမီးလုၵ်ႈမီးလၢင်းၵႃႈတီႈၼႆႈ။-”
ထႃႇဝရႃႉၽြႃး၊ ဢဝ်လွင်ႈလုၵ်ႈၸၢႆး၊လုၵ်ႈယိင်းဢၼ်ၵိူတ်ႇလဵင်ႉမႃးၵႃႈတီႈၼႆႈၸိူဝ်းၼၼ်ႉ၊ဢိၵ်ႇတင်းမႄႈၶဝ်ဢၼ်ၵိူတ်ႇလဵင်ႉၶဝ်မႃးတင်းပေႃႈၶဝ်ဢၼ်ႁႂ်ႈၶဝ်ပဵၼ်မႃးၵႃႈၼႂ်းမိူင်းၼႆႉၸိူဝ်းၼၼ်ႉလႄႈလၢတ်ႈလႄႈဝႃႈၸမ်ႉ၊-
“ၶဝ်ၼၼ်ႉတၵ်းလႆႈတၢႆလူၺ်ႈတၢင်းၶႆႈတၢင်းပဵၼ်ဢၼ်လီၵူဝ်လီႁႄၼႃႇဢေႃႈ။ ဢမ်ႇမီးၽူႈလႂ်ၶၢင်းၶီၶၢင်းၽၢၼ်သေလႄႈသၢင်းၵျူဝ်ႇတူဝ်တၢႆၶဝ်၊ၶဝ်တၵ်းပဵၼ်ၸိူဝ်ႉၼင်ႇဢၼ်ဝူၺ်ႇဢၼ်ႁင်ႈၵႃႈၼိူဝ်လိၼ်မိူင်းၼၼ်ႉဢေႃႈ။ ၶဝ်တၵ်းႁွတ်ႈထိုင်တၢင်းဢၼ်လုသုမ်းလူၺ်ႈၽေးလၢပ်ႇၽေးလႅဝ်း၊ဢိၵ်ႇတင်းၽေးတၢင်းဢၼ်ဢိုပ်းဢၼ်ယၢၵ်ႇလႄႈတူဝ်တၢႆၶဝ်ၼၼ်ႉတၵ်းပဵၼ်ပုၼ်ႈၼူၵ်ႉၵၢင်ႁၢဝ်၊ဢိၵ်ႇတင်းတူဝ်ထိူၼ်ႇႁၢႆႉတၵ်းၵိၼ်ဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ယႃႇပေၶဝ်ႈၵႃႈၼႂ်းႁိူၼ်းမႃႇသႃႇ၊ယႃႇပေၵႂႃႇႁဵတ်းတၢင်းဢၼ်ႁႆႈဢၼ်ႁွင်ႉ၊တၢင်းဢၼ်ၶၢင်းၶီၶၢင်းၽၢၼ်ပုၼ်ႈၶဝ်ၼၼ်ႉ။ ၵဝ်ၼုၵ်ႈသိမ်းဢဝ်တၢင်းဢၼ်ၼိမ်ဢၼ်လီၵဝ်ဢၼ်ဝႃႈ၊မႅတ်ႈတႃႇၵရုၼႃႇၵဝ်ၼၼ်ႉသေၵႃႈတီႈၵူၼ်းမဵဝ်းၼႆႉယဝ်ႉ၊ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။-
ၶဝ်ၸဵမ်လဵၵ်ႉၸဵမ်ယႂ်ႇတၵ်းလႆႈဢွၼ်ၵၼ်တၢႆၵႃႈၼႂ်းမိူင်းၼႆႉဢေႃႈ။ ၵူၺ်းၵႃႈ၊ၶဝ်ဢမ်ႇလႆႈၶၢမ်ႇတၢင်းဢၼ်သၢင်းၵျူဝ်ႇ။ ၽူႈလႂ်ဢမ်ႇလႆႈႁဵတ်းတၢင်းဢၼ်ႁႆႈဢၼ်ႁွင်ႉ၊တၢင်းဢၼ်ၶၢင်းၶီၶၢင်းၽၢၼ်ပုၼ်ႈၶဝ်။ ဢမ်ႇလႆႈႁဵတ်းတၢင်းဢၼ်တိူဝ်ႉဢၼ်မၢတ်ႇၸဵပ်းတီႈတူဝ်ၸဝ်ႈၵဝ်ႇ၊ဢိၵ်ႇတင်းတၢင်းဢၼ်ထႃၶူၼ်ႁူဝ်။-
ၽူႈလႂ်သေၵေႃႉသေၵူၼ်းဢမ်ႇလႆႈဝိတ်းပၼ်ၶဝ်ႈမုၼ်းတီႈၶဝ်ၸိူဝ်းဢၼ်ႁူဝ်ၸႂ်ဢမ်ႇသႃႇလႄႈၶၢင်းၶီၶၢင်းၽၢၼ်ၼၼ်ႉႁႂ်ႈလႆႈပျေႇၸႂ်ၼိမ်ၸႂ်ပုၼ်ႈၶဝ်ၸိူဝ်းဢၼ်တၢႆယဝ်ႉၼၼ်ႉ၊ဢမ်ႇလႆႈဢဝ်ၵွၵ်းတၢင်းဢၼ်ႁႂ်ႈပျေႇၸႂ်ၼိမ်ၸႂ်ၼၼ်ႉပၼ်တီႈၶဝ်ပုၼ်ႈပေႃႈမႄႈဢၼ်တၢႆယဝ်ႉၼၼ်ႉဢေႃႈ။
“ယႃႇပေၶဝ်ႈၵႃႈၼႂ်းႁိူၼ်းဢၼ်ၶၢမ်ႇပွႆးၵိၼ်ပွႆးၶူပ်းၼၼ်ႉႁႂ်ႈလႆႈၼင်ႈလူၺ်ႈၵၼ်တင်းၶဝ်သေလႄႈၵိၼ်ၶူပ်း။-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊ၵဝ်တၵ်းႁႂ်ႈသဵင်ဢၼ်ၸူမ်းပျေႃႇ၊သဵင်ဢၼ်သႂၢင်ႇသိူဝ်း၊သဵင်ၵူၼ်းၸၢႆးဢၼ်သွင်ႇမၢင်ႇၵလႃႇ၊သဵင်ၵူၼ်းယိင်းဢၼ်သွင်ႇမၢင်ႇၵလႃႇထၢတ်ႇယဵၼ်သေၵႃႈတီႈၼႆႈသိုဝ်ႈၼႃႈတႂ်ႈတႃသူၼႂ်းၸူဝ်ႈပၢၼ်သူၼႆႉဢေႃႈ။
“မိူဝ်ႈဢၼ်မႂ်းဢဝ်ၵႂၢမ်းၵႃႈမီးၼႆႉမွၵ်ႇလၢတ်ႈတီႈၵူၼ်းမဵဝ်းၼႆႉလႄႈၶဝ်ထၢမ်တီႈမႂ်းလႄႈဝႃႈ၊ ‘ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ထႃႇဝရႃႉၽြႃး၊ ၸီႇယၢင်ႇၽေးတၢမ်ႇဢၼ်ယႂ်ႇၼႃႇထၢၼ်ႇၼႆႉတီႈႁဝ်းၸိူဝ်ႉၼင်ႇႁိုဝ်။ ဢပျတ်ႈဢၼ်ႁဝ်းၽိတ်းပိူင်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၼၼ်ႉၸမ်ႉ၊ပဵၼ်ၸိူဝ်ႉၼင်ႇႁိုဝ်၊’ ဝႃႈၼင်ႇၼႆၼၼ်ႉၸိုင်၊-
မႂ်းတၵ်းလႆႈဢဝ်ဢမိင်ႉ ထႃႇဝရႃႉၽြႃး၊ သင်ႇလၢတ်ႈဝႆႉတီႈၶဝ်လႄႈဝႃႈၸမ်ႉ၊ ‘ၵွပ်ႈပိူဝ်ႈဢၼ်ပူႇသူမွၼ်ႇသူဢွၼ်ၵၼ်ၸုၼ်ႉပႅတ်ႈၵဝ်၊ဢွၼ်ၵၼ်ၸွမ်းလင်ၽြႃးတၢင်ႇသူႇတၢင်ႇပႃးလႄႈဢွၼ်ၵၼ်ႁဵတ်းဝၢတ်ႈၵူဝ်းၵႂၢႆႇတီႈၶဝ်ၼၼ်ႉ၊ဢွၼ်ၵၼ်ၸုၼ်ႉပႅတ်ႈၵဝ်သေလႄႈဢမ်ႇပႂ်ႉၵမ်ပႂ်ႉၸွမ်းတြႃးၵဝ်။-
ဢိၵ်ႇတင်းၵွပ်ႈပိူဝ်ႈဢၼ်သူၵမ်ၵျၢင်ႉတၢင်းၵမ်တၢင်းၵျၢင်ႉဢၼ်ႁၢႆႉယုတ်ႈလိူဝ်တွၼ်းၼႃႇသေတၢင်းၵမ်တၢင်းၵျၢင်ႉဢၼ်ပူႇသူမွၼ်ႇသူၵမ်ၵျၢင်ႉၸိူဝ်းၼၼ်ႉသေလႄႈၸွမ်းလူၺ်ႈတၢင်းဢၼ်ႁူဝ်ၸႂ်သူပဵၼ်ဢၼ်ႁၢႆႉမိူၵ်ႈလႄႈၵႅၼ်ႇၶႅင်ႁင်းၽႂ်ႁင်းမၼ်းထၢၼ်ႈပေႃးဢမ်ႇထွမ်ႇဢမ်ႇဢဝ်ၵႂၢမ်းၵဝ်ၼၼ်ႉဢေႃႈ။-
ပိူဝ်ႈၼႆလႄႈၵဝ်တၵ်းလိုပ်ႈသူဢွၵ်ႇသေၵႃႈၼႂ်းမိူင်းၼႆႉၵႂႃႇၵႃႈတီႈမိူင်းဢၼ်သူဢိၵ်ႇတင်းပူႇမွၼ်ႇသူဢမ်ႇႁုၼၼ်ႉဢေႃႈ။ ၵႃႈတီႈမိူင်းၼၼ်ႉသူတၵ်းလႆႈဢွၼ်ၵၼ်ႁဵတ်းဝၢတ်ႈတီႈၽြႃးတၢင်ႇသူႇတၢင်ႇပႃးယူႇၵူႈဝၼ်းၵူႈၶိုၼ်းဢမ်ႇထၢတ်ႇဢေႃႈ။ ၵဝ်တၵ်းဢမ်ႇၼႄပျႃးၵျေးၸူးတီႈသူ။’ ” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ထႃႇဝရႃႉၽြႃး၊ မီးဢမိင်ႉၸမ်ႉ၊ “ၶိင်ႇမိုဝ်ႉဝၼ်းတၵ်းမႃး၊မိူဝ်ႈဢၼ်ဢမ်ႇမီးၵူၼ်းတေတိူင်ႇတေဝႃႈ၊ ‘ၵႃႈၼင်ႇဢၼ် ထႃႇဝရႃႉၽြႃး၊ ဢၼ်ဢသၢၵ်ႈလိပ်းယူႇလႄႈၼုၵ်ႈဢဝ်ၵူၼ်းမဵဝ်း ဢိသရေး၊ တင်းလၢႆဢွၵ်ႇသေၵႃႈၼႂ်းမိူင်း ဢေးၵျိပ်ႉ၊ မႃးၼၼ်ႉ၊’ ဝႃႈၼင်ႇၼႆ၊-
ၵူၺ်းၵႃႈ၊တၵ်းတိူင်ႇဝႃႈ၊ ‘ၵႃႈၼင်ႇဢၼ် ထႃႇဝရႃႉၽြႃး၊ ဢၼ်ဢသၢၵ်ႈလိပ်းယူႇလႄႈၼုၵ်ႈဢဝ်ၵူၼ်းမဵဝ်း ဢိသရေး၊ တင်းလၢႆဢွၵ်ႇသေၵႃႈၼႂ်းၸႃႉၸဵမ်မိူင်းတၢင်းႁွင်ႇ၊ဢိၵ်ႇတင်းမိူင်းၵႃႈဢၼ်မၼ်းၸဝ်ႈလိုပ်ႈၶဝ်ဢွၵ်ႇၵႂႃႇၼၼ်ႉ၊’ ဝႃႈၼင်ႇၼႆၼၼ်ႉတၵ်းႁွတ်ႈထိုင်မႃးဢမၢၼ်ႇၶၼ်ပဵၼ်ဢေႃႈ။ ၵဝ်တၵ်းသမ်ႉဢဝ်ၶဝ်ၶိုၼ်းမႃးၵႃႈတီႈမိူင်းဢၼ်ၵဝ်ပၼ်တီႈပူႇမွၼ်ႇၶဝ်ၼၼ်ႉလူးၵွၼ်ႇဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵဝ်တၵ်းပွႆႇၸႂ်ႉၵူၼ်းလႃႈၼမ်ႉၼမ်ၼႃႇၵႂႃႇလႄႈၶဝ်တၵ်းဢွၼ်ၵၼ်တိၺွပ်းဢဝ်ဢေႃႈ။ လိုၼ်းၼၼ်ႉၵဝ်တၵ်းပွႆႇၸႂ်ႉၵူၼ်းလႃႈထိူၼ်ႇၼမ်ၼႃႇၵႂႃႇလႄႈ၊ၶဝ်တၵ်းဢွၼ်ၵၼ်သွၵ်ႈႁႃၵႃႈတီႈလွႆလူင်လွႆဢွၼ်ႇ၊ဢိၵ်ႇတင်းၵႃႈတီႈငိူပ်ႇႁိၼ်ငိူပ်ႇၽႃတင်းလၢႆဢေႃႈ။-
တႃၵဝ်လူတူၺ်းသဵၼ်ႈတၢင်းၵႃႈဢၼ်ၶဝ်ၵႂႃႇၼၼ်ႉယူႇဢေႃႈ။ ၶဝ်ဢမ်ႇမီးတၢင်းဢၼ်သိူင်ႇဢၼ်လပ်ႉသေၵႃႈတီႈၽၢႆႇၼႃႈၵဝ်လႄႈတုၸရိူၵ်ႈၶဝ်ဢမ်ႇမီးတၢင်းဢၼ်သိူင်ႇဢၼ်မႅပ်းဝႆႉသေၵႃႈတီႈတႃၵဝ်လႆႈ။-
ၵဝ်တၵ်းပၼ်တၢမ်ႇဢပျတ်ႈသွင်ပုၼ်ႈတီႈၶဝ်ၵွပ်ႈပိူဝ်ႈဢၼ်ၶဝ်ႁႂ်ႈမိူင်းၵဝ်ၵူဝ်ႈၵိူၵ်ႇလူၺ်ႈတူဝ်တၢႆၶိူင်ႈပိူင်ဢၼ်လီႁင်ႈဢဵတ်ႇသဵတ်ႇၶဝ်ၸိူဝ်းၼၼ်ႉလႄႈႁႂ်ႈလိၼ်ဢၼ်ပဵၼ်ဢမူၺ်ႇၵဝ်တဵမ်ဝႆႉတင်းၶိူင်ႈပိူင်ဢၼ်ဝူၺ်ႇဢၼ်ႁင်ႈၶဝ်ၸိူဝ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ဢၼ်ပဵၼ်ႁႅင်းတၼ်းၶူဝ်းၵဝ်ၶႃႈ၊တိူၵ်ႈတီႈတိုၵ်းသိုၵ်းၵဝ်ၶႃႈ၊တီႈဢၼ်ၵဝ်ၶႃႈသွၼ်ႈပိုင်ႈၼႂ်းမိုဝ်ႉဝၼ်းဢၼ်ၽေးႁွတ်ႈထိုင်ၼၼ်ႉတီႈၶႃႈ။ ၵူၼ်းတၢင်ႇၸိူဝ်ႉတၢင်ႇမဵဝ်းတင်းလၢႆ တၵ်းဢွၼ်ၵၼ်လုၵ်ႉသေၵႃႈတီႈႁိမ်းလႅၼ်သုတ်းလိၼ်မိူင်းၸိူဝ်းၼၼ်ႉမႃးၸူးတီႈၸဝ်ႈႁဝ်းလႄႈလဝ်ႈလၢတ်ႈလႄႈဝႃႈ၊ “ပူႇမွၼ်ႇၶႃႈၸဝ်ႈႁဝ်းၶဝ်ၼၼ်ႉဢွၼ်ၵၼ်ၶၢမ်ႇဢမူၺ်ႇမုသႃႇဢၼတ်ႉတႃႉ၊လွင်ႈတၢင်းဢၼ်လၢႆလၢႆဢမ်ႇပွင်ႇလွင်ႈၵႃႈသင်ၼၼ်ႉဢမၢၼ်ႇၶၼ်ပဵၼ်တီႈၶႃႈယဝ်ႉ၊” ဝႃႈၼင်ႇၼႆတီႈၶႃႈဢေႃႈ။-
ၵူၼ်းတၵ်းလႆႈသၢင်ႈႁဵတ်းၽြႃးပုၼ်ႈတူဝ်ၸဝ်ႈၵဝ်ႇႁိုဝ်း။ ဢၼ်ၸိူဝ်းၼၼ်ႉဢမ်ႇၸႂ်ႈၽြႃးတီႈၶႃႈ။
ထႃႇဝရႃႉၽြႃး၊ မီးဢမိင်ႉလႄႈလၢတ်ႈဝႃႈ၊ “ပိူဝ်ႈၼႆလႄႈၵဝ်တၵ်းႁႂ်ႈၶဝ်ႁုဢမၢၼ်ႇၶၼ်ပဵၼ်ဢေႃႈ။ မိူဝ်ႈလဵဝ်ၼႆႉၵဝ်တၵ်းႁႂ်ႈၶဝ်ႁုဢႃႇၼႃႇၵဝ်၊ဢိၵ်ႇတင်းတၼ်းၶူဝ်းၵဝ်လႄႈၶဝ်တၵ်းလႆႈဢွၼ်ၵၼ်ႁုလွင်ႈဢၼ်ၼႃႇမႃႉၸိုဝ်ႈသဵင်ၵဝ်ပဵၼ် ထႃႇဝရႃႉၽြႃး၊ ၼၼ်ႉဢေႃႈ၊” ဝႃႈၼင်ႇၼႆဢေႃႈ။
“ဢပျတ်ႈၵူၼ်းမဵဝ်း ယုတႃႉ၊ ဢဝ်တင်းၵၼ်းတႅမ်ႈလိၵ်ႈဢၼ်ဢဝ်လဵၵ်းႁဵတ်းၼၼ်ႉတႅမ်ႈမၢႆလႄႈဢဝ်ပၢႆလႅမ်ၸိင်ႇတႅမ်ႈမၢႆဝႆႉၵႃႈတီႈၶႅပ်းႁူဝ်ၸႂ်ၶဝ်၊ဢိၵ်ႇတင်းၵႃႈတီႈၶဝ်လႅမ်ၶဵင်ႇတၢင်းလူႇၶဝ်ၼၼ်ႉဢေႃႈ။-
တေႃႈၵႃႈလုၵ်ႈၶဝ်လၢင်းၶဝ်ယင်းဢွၼ်ၵၼ်ၶုၵ်းၸႂ်လႆႈၶႆႈၸႂ်ထူပ်းၶဵင်ႇတၢင်းလူႇၶဝ်၊ဢိၵ်ႇတင်းသဝ်ႁုၼ်ႇႁၢင်ႈၼၢင်းၽီ ဢႃႇသရႃႉ၊ ၶဝ်ဢၼ်မီးၵႃႈတီႈႁိမ်းတူၼ်ႈမႆႉဢၼ်ၶဵဝ်ၵူႈတူၼ်ႈ၊ၵႃႈၼိူဝ်ၵွင်းလွႆဢၼ်သုင်ၸိူဝ်းၼၼ်ႉဢေႃႈ။-
လွႆဢၼ်မီးတီႈပၢင်ႇတီႈပဵင်းၼႆႉ႟။ ၵဝ်တၵ်းဢဝ်ဢုၵ်ႉၸႃႇမႂ်းတင်းၽၼ်ႇတႃႇၵႃႈဢၼ်မႂ်းသိမ်းဝႆႉၼၼ်ႉ၊ဢိၵ်ႇတင်းတီႈဢၼ်သုင်မႂ်းၵႃႈၼႂ်းမိူင်းမႂ်းၵူႈတီႈၵူႈလႅၼ်ဢၼ်မႂ်းၽိတ်းပိူင်ႈလူၺ်ႈၸိူဝ်းၼၼ်ႉဢၢပ်ႈပၼ်ၵႃႈၼႂ်းမိုဝ်းၵေႃႉဢၼ်ႁိမ်ဢဝ်ႁူင်ႇဢဝ်ၼၼ်ႉဢေႃႈ။-
တူဝ်မႂ်းၵေႃႈတၵ်းလႆႈၶၢႆႉ၊လႆႈပၢႆႈဢွၵ်ႇၵႂႃႇသေၵႃႈတီႈလိၼ်ဢမူၺ်ႇမႂ်း၊ဢၼ်ၵဝ်ပၼ်တီႈမႂ်းၼႆႉလႄႈတၵ်းႁႂ်ႈမႂ်းၶၢမ်ႇႁဵတ်းၶႃႈၵႃႈၼႂ်းမိုဝ်းရၢၼ်ႇသူႇမႂ်းတင်းလၢႆၵႃႈၼႂ်းမိူင်းဢၼ်မႂ်းဢမ်ႇႁုၼၼ်ႉဢေႃႈ။ လွင်ႈမၼ်းၸမ်ႉ၊တၢင်းၸႂ်မႆႈၶႂ်ႈၸႃႉၵဝ်ၼၼ်ႉမိူၼ်ၼင်ႇၽႆးလႄႈတၵ်းမႆႈယူႇတႃႇသေႇဢမ်ႇထၢတ်ႇဢေႃႈ၊” ဝႃႈၼင်ႇၼႆဢေႃႈ။
ၸဝ်ႈထႃႇဝရႃႉၽြႃး၊ သမ်ႉမီးဢမိင်ႉ တီႈၶဝ်လႄႈဝႃႈၸမ်ႉ၊ “ၵေႃႉဢၼ်ဢိင်ပိုင်ႈၵူၼ်းလႄႈဢဝ်ၵူၼ်း သတ်ႉတဝႃႇႁဵတ်းႁႅင်းမိုဝ်းမၼ်းသေလႄႈ၊ ႁူဝ်ၸႂ်မၼ်းၶၢႆႉဢွၵ်ႇသေၵႃႈတီႈ ထႃႇဝရႃႉၽြႃး၊ ၵႂႃႇၼၼ်ႉပဵၼ်ၵေႃႉဢၼ်ထုၵ်ႇၵိၼ်ႇ ထုၵ်ႇဝႃႈဢေႃႈ။
ၵေႃႉၼၼ်ႉပဵၼ်ၸိူဝ်ႉၼင်ႇတူၼ်ႈယုမ်းဢၼ်မီး ၵႃႈၼႂ်းထိူၼ်ႇလႅင်ႉၼၼ်ႉလႄႈဢမ်ႇလႆႈႁု လွင်ႈဢၼ်တၢင်းလီတၢင်းငၢမ်းႁွတ်ႈထိုင်ၼၼ်ႉ။ တၵ်းလႆႈယူႇၵႃႈၼႂ်းတီႈပၢင်ႇတီႈပဵင်းဢၼ် ႁႅင်ႈႁွင်တီႈလိၼ်ၵိူဝ်ဢၼ်ဢမ်ႇမီးၽူႈလႂ် သေၵေႃႉသေၵူၼ်းယူႇသဝ်းၼၼ်ႉဢေႃႈ။
ၵေႃႉဢၼ်ဢိင်ပိုင်ႈ ထႃႇဝရႃႉၽြႃး၊ ၵေႃႉဢၼ် ႁႂ်ႈ ထႃႇဝရႃႉၽြႃး၊ ပဵၼ်လွင်ႈဢၼ် မၼ်းလီဢိင်ပိုင်ႈၼၼ်ႉပဵၼ်ၵေႃႉဢၼ် မီးမၢင်ႇၵလႃႇဢေႃႈ။
ၵေႃႉၼၼ်ႉၸမ်ႉ၊မိူၼ်ၸိူဝ်ႉၼင်ႇတူၼ်ႈဢၼ် ၽုၵ်ႇသွမ်ႈၵႃႈတီႈႁိမ်းၼမ်ႉလႄႈယင်ႇႁၢၵ်ႈ ၽႄႁၢၵ်ႈမၼ်းၵႃႈတီႈႁိမ်းၼမ်ႉႁွင်ႈသေယဝ်ႉ၊ ယင်းဢမ်ႇႁုဢမ်ႇႁၼ်လွင်ႈတၢင်းဢၼ် ႁွတ်ႈထိုင်ၶိင်ႇမႆႈၶိင်ႇႁွၼ်ႉၼၼ်ႉဢေႃႈ။ မႂ်မၼ်းယင်းဢမ်ႇႁဵဝ်ႇဢမ်ႇၸွပ်ႈ၊ယင်းဢမ်ႇ မီးတီႈဢၼ်လီမႆႈၸႂ်လူၺ်ႈၶူပ်ႇပီဢၼ် ၽႃႉလႅင်ႉၽူၼ်လႅင်ႉၼၼ်ႉလႄႈၸၢင်ႈ မၢၵ်ႇမၢၵ်ႇယူႇတႃႇသေႇၼၼ်ႉဢေႃႈ။
ႁူဝ်ၸႂ်ၸိုင်၊ၸၢင်ႈၵူတ်ႉၸၢင်ႈငေႃးလိူဝ်တွၼ်းၼႃႇသေလွင်ႈတၢင်းၵူႈၸိူဝ်ႉၵူႈပိူင်လႄႈ မီးတၢင်းဢၼ်ၽိတ်းတၢင်းပိူင်ႈတၢင်းဢေႃႈ။ ၽူႈလႂ်ႁုသၽေႃးမၼ်းလႆႈ။
ၵဝ် ထႃႇဝရႃႉၽြႃး၊ ၸိုင်၊ၸၢင်ႈၸႅတ်ႈထၢမ် ႁူဝ်ၸႂ်လႄႈၸၢမ်းတူၺ်းမၢၵ်ႇလၼ်း ၸေးၸေးၸွတ်ႇၸွတ်ႇ၊ ႁႂ်ႈလႆႈပၼ်ဢၵျူဝ်းဢပျတ်ႈတီႈၵူၼ်းႁင်းၽႂ်ႁင်းမၼ်းၸွမ်းၵႃႈၼင်ႇဢၼ်တၢင်းၵမ်တၢင်းၵျၢင်ႉ ၶဝ်ႁဵတ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၼူၵ်ႉၶုမ်ႈငွမ်းၶႆႇဢၼ်ဢမ်ႇၸႂ်ႈၶႆႇမၼ်းၼၼ်ႉ၊ ပဵၼ်ၸိူဝ်ႉၼင်ႇ ၵေႃႉဢၼ်ႁွမ်သိမ်းဢုၵ်ႉၸႃႇဢၼ် ဢမ်ႇတြႃးၼၼ်ႉလႄႈ ဢုၵ်ႉၸႃႇၸိူဝ်းၼၼ်ႉတၵ်းႁၢႆၵႂႃႇပႅတ်ႈ ၼႂ်းမိူဝ်ႈဢၼ်မၼ်းႁွတ်ႈထိုင်ၶိုင်ႈ ဢသၢၵ်ႈၵူၼ်းၼၼ်ႉလႄႈ တၵ်းပဵၼ်ၵူၼ်းငိူဝ်ႈငႃႉၼႂ်းတီႈသုတ်းပၢႆ ဢသၢၵ်ႈမၼ်းၼၼ်ႉဢေႃႈ။
ရႃႇၸႃႉပလၢင်ႇဢၼ်မုၼ်ယႂ်ႇၽုင်းယႂ်ႇ ၼႃႇလႄႈသုင်ၼႃႇၸႃႉၸဵမ်မိူဝ်ႈ ၵေႃႇၸႃႉႁူဝ်ပိုင်းၼၼ်ႉ၊ ပဵၼ်ထႃႇၼႃႉတီႈဢၼ်မူတ်းၸၢင်ႇႁဝ်းဢေႃႈ။
ထႃႇဝရႃႉၽြႃး၊ ဢၼ်ပဵၼ်လွင်ႈဢၼ်ၵူၼ်းမဵဝ်း ဢိသရေး၊ လီမုင်ႈထႃႈမွင်းထႃႈတီႈၶႃႈ။ ၶဝ်ၸိူဝ်းဢၼ်ၸုၼ်ႉပႅတ်ႈၸဝ်ႈႁဝ်းၵႃႈမီးၼၼ်ႉ တၵ်းလႆႈဢွၼ်ၵၼ်ႁွတ်ႈထိုင်တၢင်း ဢၼ်ဢူၵ်းဢၼ်ဢၢႆဢေႃႈ။ ၶဝ်ၸိူဝ်းဢၼ်ဢွၵ်ႇသေၵႃႈတီႈၸဝ်ႈႁဝ်း ၵႂႃႇၼၼ်ႉတၵ်းလႆႈၶၢမ်ႇတၢင်းဢၼ် တႅမ်ႈမၢႆဝႆႉၵႃႈတႂ်ႈလိၼ်မိူင်းဢေႃႈ။ လွင်ႈမၼ်းၸမ်ႉ၊ၶဝ်ဢွၼ်ၵၼ်ၸုၼ်ႉပႅတ်ႈ ထႃႇဝရႃႉၽြႃး၊ ဢၼ်ဝႃႈ၊ၼမ်ႉဢသၢၵ်ႈ ဢၼ်ဢွၵ်ႇႁူးၼၼ်ႉယဝ်ႉ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈႁႂ်ႈတၢင်းၶႆႈတၢင်းပဵၼ်ၶႃႈၸဝ်ႈသၢၵ်ႈသႃႇၶႅၼ်းမႃးသေၵမ်းတီႈၶႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊တၢင်းၶႆႈတၢင်းပဵၼ်ၶႃႈၸဝ်ႈတၵ်းသၢၵ်ႈသႃႇၸိုၼ်ႈၶႅၼ်းမႃးတီႈၶႃႈဢေႃႈ။ ၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈသေၵမ်းတီႈၶႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ၶႃႈၸဝ်ႈတၵ်းႁွတ်ႈထိုင်တၢင်းဢၼ်ၵႄႇသႄႇၶျွတ်ႈဢဝ်တီႈၶႃႈဢေႃႈ။ ၸဝ်ႈႁဝ်းပဵၼ်တီႈဢၼ်ၶႃႈၸဝ်ႈယွင်ႈယေႃးတီႈၶႃႈဢေႃႈ။
တူၺ်းတီႈၶႃႈလူး။ ၶဝ်ၸၢင်ႈဢွၼ်ၵၼ်လၢတ်ႈတီႈၶႃႈၸဝ်ႈလႄႈဝႃႈ၊ “ၼုၵ်ႈၵပၢတ်ႈ ထႃႇဝရႃႉၽြႃး၊ မီးၵႃႈလႂ်။ ႁႂ်ႈမၼ်းႁွတ်ႈမႃးမိူဝ်ႈလဵဝ်ၼႆႉသေၵမ်း၊” ဝႃႈၼင်ႇၼႆတီႈၶႃႈဢေႃႈ။
ၶႃႈၸဝ်ႈၼႆႉဢမ်ႇဝႄႈပိူင်ႈသေဢရႃႇဢၼ်လဵင်ႉသူဝ်းထိင်းသူဝ်းဢၼ်ၸွမ်းလင်ၸဝ်ႈႁဝ်းၼၼ်ႉတီႈၶႃႈ။ ၶႃႈၸဝ်ႈဢမ်ႇမုင်ႈမွင်းဝၼ်းဢႃႉမၢင်ႇၵလႃႇတီႈၶႃႈ။ ၸဝ်ႈႁဝ်းႁုယူႇတီႈၶႃႈဢေႃႈ။ လွင်ႈတၢင်းဢၼ်ဢွၵ်ႇသူပ်းၶႃႈၸဝ်ႈၼၼ်ႉမီးယူႇသိုဝ်ႈၼႃႈတႂ်ႈတႃၸဝ်ႈႁဝ်းတီႈၶႃႈဢေႃႈ။-
ၶႅၼ်းတေႃႈယႃႇပေပဵၼ်ၸဝ်ႈဢၼ်ႁႂ်ႈၶႃႈၸဝ်ႈတူၵ်းၸႂ်ၵူဝ်ႁႄသေၵမ်းတီႈၶႃႈ။ ၸဝ်ႈႁဝ်းပဵၼ်ၸဝ်ႈဢၼ်ၶႃႈၸဝ်ႈသွၼ်ႈပိုင်ႈၼႂ်းမိုဝ်ႉဝၼ်းဢၼ်ၽေးႁွတ်ႈထိုင်ၼၼ်ႉတီႈၶႃႈဢေႃႈ။-
ႁႂ်ႈၶဝ်ၸိူဝ်းဢၼ်ၼိၵ်ႈၸၢၵ်ႈငႅၼ်းသႄးၶႃႈၸဝ်ႈၼၼ်ႉဢွၼ်ၵၼ်ဢူၵ်းဢၢႆသေၵမ်းလူၺ်ႈတီႈၶႃႈ။ ၵူၺ်းၵႃႈ၊ယႃႇပေႁႂ်ႈသရေႇၶႃႈၸဝ်ႈလႆႈလုသေၵမ်းတီႈၶႃႈ။ ႁႂ်ႈၶဝ်ၼၼ်ႉဢွၼ်ၵၼ်ၸႂ်လုသေၵမ်းတီႈၶႃႈ။ ၵူၺ်းၵႃႈ၊ယႃႇပေႁႂ်ႈၸႂ်ၶႃႈၸဝ်ႈလႆႈလုသေၵမ်းတီႈၶႃႈ။ ႁႂ်ႈမိုဝ်ႉဝၼ်းဢၼ်မီးၽေးဢၼ်ႇတရေႇၼၼ်ႉႁွတ်ႈထိုင်ၵႃႈၼိူဝ်ၶဝ်လႄႈပႃးတင်းတၢင်းဢၼ်ယႃႉလႅဝ်သွင်ပုၼ်ႈၼၼ်ႉသေလႄႈယႃႉၶဝ်ပႅတ်ႈသေၵမ်းတီႈၶႃႈ။
ထႃႇဝရႃႉၽြႃး၊ မီးဢမိင်ႉတီႈၵဝ်ၸမ်ႉ၊ “မႂ်းၵႂႃႇလႄႈၸုၵ်းယူႇၵႃႈၼႂ်း ၽၵ်းတူမဵဝ်းၸိူဝ်ႉၶိူဝ်းၵူၼ်းတင်းလၢႆ၊ ဢၼ်ၶုၼ်ႁေႃၶမ်း ယုတႃႉ၊ ၶဝ်ႈၶဝ်ႈဢွၵ်ႇဢွၵ်ႇ၊ဢိၵ်ႇတင်းၽၵ်းတူဝဵင်း ယေႇရုသလႅမ်ႇ၊ တင်းသဵင်ႈတင်းလူင်ၸိူဝ်းၼၼ်ႉသေလႄႈ၊-
လၢတ်ႈတီႈၶဝ်လႄႈဝႃႈ၊ၶုၼ်ႁေႃၶမ်း ယုတႃႉ၊ ဢိၵ်ႇတင်းၵႃႈပဵၼ်ၵူၼ်းမိူင်း ယုတႃႉ၊ ဢိၵ်ႇတင်းၵႃႈပဵၼ်ၵူၼ်းဝဵင်း ယေႇရုသလႅမ်ႇ၊ ဢၼ်ၶဝ်ႈၶဝ်ႈဢွၵ်ႇဢွၵ်ႇၵႃႈတီႈႁူးၽၵ်းတူၸိူဝ်းၼႆႉၶဝ်႟။ ဢွၼ်ၵၼ်ထွမ်ႇငိၼ်းၼုၵ်ႈၵပၢတ်ႈ ထႃႇဝရႃႉၽြႃး၊ တႃႉ။-
ထႃႇဝရႃႉၽြႃး၊ မီးဢမိင်ႉၸမ်ႉ၊ထွၵ်ႈလူၺ်ႈဢသၢၵ်ႈသူလႄႈတူဝ်သူႁဵတ်းသတိႁႂ်ႈတူဝ်သူဢမ်ႇလႆႈႁၢပ်ႇၶူဝ်းႁၢပ်ႇလဵင်းၼႂ်းဝၼ်းၵမ်သိၼ်လႄႈဢဝ်သႂၢင်းဢဝ်ၶဝ်ႈၵႃႈၼႂ်းႁူးၽၵ်းတူဝဵင်း ယေႇရုသလႅမ်ႇ၊ တင်းလၢႆၼၼ်ႉတႃႉ။-
ၼႂ်းဝၼ်းၵမ်သိၼ်ၼၼ်ႉ၊ယႃႇပေဢွၼ်ၵၼ်ဢဝ်ၶူဝ်းႁၢပ်ႇၶူဝ်းပႃးဢွၵ်ႇသေၵႃႈၼႂ်းႁိူၼ်းယေးသူ။ ယႃႇပေဢွၼ်ၵၼ်ႁဵတ်းၵၢၼ်တၢင်းႁဵတ်းလႃးလႃး။ ဢွၼ်ၵၼ်ဝႆႉႁႂ်ႈဝၼ်းၵမ်သိၼ်မူတ်းၸၢင်ႇၸွမ်းၵႃႈၼင်ႇဢၼ်ၵဝ်သင်ႇလၢတ်ႈဝႆႉတီႈပူႇမွၼ်ႇသူၼၼ်ႉတႃႉ။-
ၶဝ်ၼၼ်ႉယင်းဢမ်ႇထွမ်ႇဢမ်ႇဢဝ်၊ယင်းဢမ်ႇႁေႈႁူဝၢႆႇၸူးလႄႈဢွၼ်ၵၼ်ယူႇဢေႃႈ။ ၶဝ်ဢွၼ်ၵၼ်ႁႂ်ႈၶေႃးၶဝ်ၵႅၼ်ႇၶႅင်ႁႂ်ႈဢမ်ႇလႆႈငိၼ်းလႄႈဢမ်ႇၶၢမ်ႇဢဝ်တၢင်းဢၼ်သင်ႇသွၼ်သုင်းမႃႉၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ပေႃးသူထွမ်ႇဢဝ်ၵႂၢမ်းၵဝ်ၸေးၸေးၸွတ်ႇၸွတ်ႇႁႂ်ႈဢမ်ႇလႆႈဢဝ်ၶူဝ်းႁၢပ်ႇၶူဝ်းပႃးသႂၢင်းၶဝ်ႈၵႃႈၼႂ်းႁူးၽၵ်းတူဝဵင်းၼႆႉၼႂ်းဝၼ်းၵမ်သိၼ်လႄႈယင်းဢမ်ႇႁဵတ်းၵၢၼ်တၢင်းႁဵတ်းလႃးလႃး၊ႁႂ်ႈဝၼ်းၵမ်သိၼ်မူတ်းၸၢင်ႇၸိုင်၊-
ၸႃႉၸဵမ်ၶုၼ်ႁေႃၶမ်းဢၼ်ၼင်ႈၵႃႈၼိူဝ်ပလၢင်ႇၶုၼ်လူင် တႃႇဝိတ်ႈ၊ ဢိၵ်ႇတင်းၶုၼ်တင်းလၢႆတၵ်းၶီႇလေႃႉရထႃး၊တၵ်းၶီႇမႃႉလႄႈမူးမၢတ်ႈၽွင်းမိူင်း၊ၵူၼ်းမိူင်း ယုတႃႉ၊ ၵူၼ်းဝဵင်း ယေႇရုသလႅမ်ႇ၊ တင်းလၢႆတၵ်းလႆႈဢွၼ်ၵၼ်ၶဝ်ႈၵႃႈၼႂ်းႁူးၽၵ်းတူဝဵင်းၸိူဝ်းၼႆႉဢေႃႈ။ ဝဵင်းၼႆႉတၵ်းတႄႇယူႇတႃႇသေႇဢမ်ႇထၢတ်ႇဢေႃႈ။-
ၵူၼ်းတင်းလၢႆတၵ်းဢွၼ်ၵၼ်လုၵ်ႉသေၵႃႈတီႈဝဵင်း ယုတႃႉ၊ လႂ်၊တီႈဢၼ်လဵပ်ႈႁွပ်ႈဝဵင်း ယေႇရုသလႅမ်ႇ၊ လႂ်၊မိူင်း ပိၼ်ႇယႃႇမိၼ်ႇ၊ လႂ်တီႈဢၼ်ပၢင်ႇဢၼ်ပဵင်းလႂ်၊တီႈႁၢၼ်ႉလွႆလႂ်၊ပွတ်းတၢင်းၸၢၼ်းလႂ်ၸိူဝ်းၼၼ်ႉမႃးလႄႈတၵ်းပႃးဢဝ်ၶိူင်ႈတၢင်းလူႇဢၼ်တုတ်ႇၽႆး၊ၶိူင်ႈတၢင်းလူႇတၢင်ႇၸိူဝ်ႉတၢင်ႇပိူင်လႂ်၊ၶိူင်ႈတၢင်းလူႇမၢၵ်ႇၶဝ်ႈႁူင်းၶဝ်ႈလႂ်၊ၼၢမ်ႇသႃႇဢၼ်တၵ်းတုတ်ႇၽႆးလႂ်၊ၶိူင်ႈတၢင်းလူႇဢၼ်တၢင်ႇၵျေးၸူးလႂ်ၸိူဝ်းၼၼ်ႉမႃးၵႃႈတီႈၼႂ်းႁိူၼ်း ထႃႇဝရႃႉၽြႃး၊ ၽြႃးပဵၼ်ၸဝ်ႈဢေႃႈ။-
ဢမ်ႇၼၼ်ပေႃးသူဢမ်ႇထွမ်ႇဢမ်ႇဢဝ်ၵႂၢမ်းၵဝ်ဢၼ်ဝႃႈ၊ႁႂ်ႈဝၼ်းၵမ်သိၼ်မူတ်းၸၢင်ႇလႄႈယႃႇပေႁၢပ်ႇဢဝ်တဵင်ႇဢဝ်ၶူဝ်းႁၢပ်ႇၶူဝ်းပႃးသေလႄႈၶဝ်ႈၵႃႈၼႂ်းႁူးၽၵ်းတူဝဵင်း ယေႇရုသလႅမ်ႇ၊ တင်းလၢႆၼႂ်းဝၼ်းၵမ်သိၼ်ၼၼ်ႉ၊ၵဝ်တၵ်းဢဝ်ၽႆးတုတ်ႇၵႃႈၼႂ်းၽၵ်းတူဝဵင်းၸိူဝ်းၼၼ်ႉလႄႈၽႆးၼၼ်ႉယင်းဢမ်ႇမွတ်ႇဢမ်ႇယဵၼ်လႄႈတၵ်းမႆႈႁေႃၶမ်းဝဵင်း ယေႇရုသလႅမ်ႇ၊ တင်းလၢႆဢေႃႈ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ဢၼ်ႁွတ်ႈမႃးတီႈ ယေႇရမိ၊ ၸမ်ႉ၊-
“မႂ်းလုၵ်ႉလႄႈလူင်းၵႂႃႇၵႃႈတီႈႁိူၼ်းၵူၼ်းပၼ်ႈမေႃႈၼၼ်ႉတႃႉ။ ၵဝ်တၵ်းႁႂ်ႈမႂ်းငိၼ်းၵႂၢမ်းၵဝ်ၵႃႈတီႈၼၼ်ႈဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၵဝ်လူင်းၵႂႃႇၵႃႈတီႈႁိူၼ်းၸၢင်ႈပၼ်ႈမေႃႈၼၼ်ႉလႄႈထူပ်းႁၼ်မၼ်းၼၼ်ႉဢဝ်ၵူင်းသေလႄႈႁဵတ်းမေႃႈယူႇဢေႃႈ။-
မိူဝ်ႈမေႃႈဢၼ်ဢဝ်တင်းလိၼ်ၼဵဝ်ႁဵတ်းၼၼ်ႉလုလႅဝ်ၵႂႃႇၵႃႈၼႂ်းမိုဝ်းၸၢင်ႈပၼ်ႈမေႃႈၼၼ်ႉၸိုင်၊မၼ်းသမ်ႉဢဝ်မေႃႈဢၼ်လုလႅဝ်ၼၼ်ႉႁဵတ်းမေႃႈတၢင်ႇလုၵ်ႈၸွမ်းၵႃႈၼင်ႇဢၼ်ၵူၼ်းပၼ်ႈမေႃႈမီးဢလူဝ်ႇၶႂ်ႈႁဵတ်းၼၼ်ႉထႅင်ႈဢေႃႈ။
မိူဝ်ႈၼၼ်ႉၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈ၊-
ထႃႇဝရႃႉၽြႃး၊ မီးဢမိင်ႉၸမ်ႉ၊ “မဵဝ်းၵူၼ်း ဢိသရေး၊ ႟။ ၵဝ်ဢမ်ႇႁဵတ်းတီႈသူလႆႈမိူၼ်ၸိူဝ်ႉၼင်ႇဢၼ်ၵူၼ်းပၼ်ႈမေႃႈႁဵတ်းၼၼ်ႉႁိုဝ်း။ မဵဝ်းၵူၼ်း ဢိသရေး၊ ႟။ ၸိူဝ်ႉၼင်ႇဢၼ်လိၼ်ၼဵဝ်မီးၵႃႈၼႂ်းမိုဝ်းၸဝ်ႈမေႃႈၼၼ်ႉ၊သူမီးယူႇၵႃႈၼႂ်းမိုဝ်းၵဝ်ဢေႃႈ။-
မိူဝ်ႈဢၼ်ၵဝ်ဢဝ်လွင်ႈမဵဝ်းၵူၼ်းမဵဝ်းၼိုင်ႈ ဢိၵ်ႇတင်းသိုင်ႇၸိုင်ႈဝၢၼ်ႈမိူင်းမိူင်းၼိုင်ႈလႄႈမီးဢမိင်ႉႁႂ်ႈၼုၵ်ႈထွၼ်၊ႁႂ်ႈၵိူၼ်ႇတူၵ်း၊ႁႂ်ႈယႃႉပႅတ်ႈမၼ်းၼႂ်းၸူဝ်ႈၵႅပ်ႈဢွၼ်ႇၵမ်းဢွၼ်ႇၼိုင်ႈၼၼ်ႉ၊-
သိုင်ႇၸိုင်ႈဝၢၼ်ႈမိူင်းဢၼ်ၵဝ်မီးဢမိင်ႉလူၺ်ႈလွင်ႈမၼ်းၼၼ်ႉပေႃးမၼ်းၸုၼ်ႉပႅတ်ႈတုၸရိူၵ်ႈမၼ်းၸိုင်၊ၵဝ်တၵ်းပိၼ်ႇၸႂ်လွင်ႈၽေးတၢမ်ႇဢၼ်ၵဝ်ၵျၢမ်ႇပွင်တၵ်းႁဵတ်းတီႈမၼ်းၼၼ်ႉဢေႃႈ။-
မိူဝ်ႈဢၼ်ၵဝ်ဢဝ်မီးဢမိင်ႉတီႈမဵဝ်းၵူၼ်းမဵဝ်းၼိုင်ႈ၊ဢိၵ်ႇတင်းသိုင်ႇၸိုင်ႈဝၢၼ်ႈမိူင်းမိူင်းၼိုင်ႈဝႃႈ၊ၵဝ်တၵ်းတႄႇႁဵတ်းလုမ်းလႃးမၼ်း၊ၸူဝ်ႈၵႅပ်ႈဢွၼ်ႇၵမ်းဢွၼ်ႇၼိုင်ႈၼၼ်ႉ၊-
ပေႃးမၼ်းႁဵတ်းတုၸရိူၵ်ႈသိုဝ်ႈၼႃႈတႂ်ႈတႃၵဝ်ထၢၼ်ႈပေႃးဢမ်ႇထွမ်ႇဢမ်ႇဢဝ်ၵႂၢမ်းၵဝ်ၸိုင်၊ၵဝ်တၵ်းပိၼ်ႇၸႂ်လွင်ႈတၢင်းဢၼ်လီဢၼ်ငၢမ်းဢၼ်ၵဝ်ယၢမ်ႈလႆႈဝႃႈတၵ်းလုမ်းလႃးႁႂ်ႈပဵၼ်ဢၵျူဝ်းတီႈၶဝ်ၼၼ်ႉဢေႃႈ။-
ပိူဝ်ႈၼႆလႄႈတေႃႈလဵဝ်ၼႆႉႁႂ်ႈမႂ်းသင်ႇလၢတ်ႈဝႆႉတီႈၵူၼ်းမိူင်း ယုတႃႉ၊ ဢိၵ်ႇတင်းၶဝ်ၸိူဝ်းဢၼ်ယူႇၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉလႄႈဝႃႈ၊ ထႃႇဝရႃႉၽြႃး၊ မီးဢမိင်ႉၸမ်ႉ၊တူၺ်းလူး။ ၵဝ်ပဵၼ်ၵူၼ်းပၼ်ႈမေႃႈဢၼ်ပွင်မႄးပွင်ႁႅၼ်းၽေးတၢမ်ႇဝႆႉပုၼ်ႈသူလႄႈ၊ၵျၢမ်ႇပွင်တၢင်းဢၼ်ႁဵတ်းၶတ်းၵၼ်တင်းသူယူႇဢေႃႈ။ ပိူဝ်ႈၼႆလႄႈသူဢွၼ်ၵၼ်လုၵ်ႉသေၵႃႈတီႈသဵၼ်ႈတၢင်းဢၼ်ႁၢႆႉၼၼ်ႉၶိုၼ်းမႃးႁင်းၽႂ်ႁင်းမၼ်းတႃႉ။ ႁႂ်ႈသဵၼ်ႈတၢင်းသူ၊ဢိၵ်ႇတင်းတၢင်းၵမ်တၢင်းၵျၢင်ႉသူၸိူဝ်းၼၼ်ႉသိုဝ်ႈတေႃႇလီတႃႉ၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊ၶဝ်ဢွၼ်ၵၼ်လၢတ်ႈလႄႈဝႃႈ၊ “ဢမ်ႇမီးတီႈဢၼ်လီမုင်ႈထႃႈမွင်းထႃႈ။ ႁဝ်းတၵ်းၵႂႃႇတၵ်းပႆၸွမ်းၵႃႈၼင်ႇဢၼ်တၢင်းၵျၢမ်ႇတၢင်းပွင်ႁဝ်းမီးၼၼ်ႉလႄႈႁဵတ်းၸွမ်းၵႃႈၼင်ႇဢၼ်ႁူဝ်ၸႂ်ဢၼ်ႁၢႆႉမိူၵ်ႈၵႅၼ်ႇၶႅင်ႁဝ်းမီးၼၼ်ႉႁင်းၽႂ်ႁင်းမၼ်းဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ထႃႇဝရႃႉၽြႃး၊ မီးဢမိင်ႉၸမ်ႉ၊ “ဢွၼ်ၵၼ်ထၢမ်တီႈၵူၼ်းတၢင်ႇၸိူဝ်ႉ တၢင်ႇမဵဝ်းတင်းလၢႆလႄႈဝႃႈ၊ ‘ၽူႈလႂ် ယၢမ်ႈတွၼ်ႉငိၼ်းလွင်ႈတၢင်း ၸိူဝ်ႉၼင်ႇၼၼ်ၼၼ်ႉ၊’ ဝႃႈၼင်ႇၼႆတႃႉ။ ၵၼ်ႇၺႃႇလုၵ်ႈယိင်းသၢဝ် ဢိသရေး၊ ႁဵတ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇၼႃႇလူင်လၢင်ယဝ်ႉ။
မူၺ်ႁႃႇ လေႇပၼုၼ်ႇ၊ ၼၼ်ႉတၵ်းထၢတ်ႇသေမၢၵ်ႇႁိၼ်မၢၵ်ႇၽႃလႄႈတီႈတၢပ်ႈလွႆၼၼ်ႉႁိုဝ်း။ ၼမ်ႉႁွင်ႈဢၼ်ၵတ်းလီလႄႈလုၵ်ႉသေၵႃႈတီႈၼိူဝ်လွႆမႃးၼၼ်ႉတၵ်းယူတ်းႁႅင်ႈႁိုဝ်း။
ၵူၼ်းၵဝ်တင်းလၢႆၸမ်ႉ၊ဢွၼ်ၵၼ်လူင်လိုမ်းၵဝ်လႄႈဢဝ်ၼၢမ်ႇသႃႇတုတ်ႇၽႆး တီႈႁုၼ်ႇႁၢင်ႈသၢင်းထုဢၼ်ဢမ်ႇပွင်ႇလွင်ႈၵႃႈသင်ၼၼ်ႉယဝ်ႉ၊ ဢၼ်ၸိူဝ်းၼႆႉႁႂ်ႈၶဝ်ၶီႈလိုတ်းလႄႈလူမ်ႉၵႃႈၼႂ်း သဵၼ်ႈတၢင်းၶဝ်၊ၵႃႈၼႂ်းႁွႆးတၢင်းဢၼ် ယၢမ်ႈၸွမ်းၸႃႉၸဵမ်မိူဝ်ႈၵွၼ်ႇဢွၼ်ၼႆႉၼၼ်ႉလႄႈ ႁႂ်ႈၶဝ်ဢွၼ်ၵၼ်ၸွမ်းၵႃႈၼႂ်းသဵၼ်ႈတၢင်း ဢၼ်လဵၵ်ႉဢၼ်ဢွၼ်ႇ၊သဵၼ်ႈတၢင်းဢၼ် ဢမ်ႇဢဝ်လိၼ်ၵေႃႇလိၼ်တဵင်ၼၼ်ႉ။
ႁႂ်ႈမိူင်းၶဝ်လႆႈပဵၼ်တီႈဢၼ်တူၵ်းၸႂ်လႂ်တိုၼ်ႇ၊ တီႈဢၼ်လႆႈငိၼ်းသဵင်ဢၼ်ႁဵတ်းသိသိသေႃႉသေႃႉ ဢၼ်သႄႉသွမ်းၼၼ်ႉဢေႃႈ။ ၶဝ်ၸိူဝ်းဢၼ်ပႆတႃႈပႆတၢင်းၵၢႆၵႂႃႇၵႃႈမီး ၼၼ်ႉတၵ်းဢွၼ်ၵၼ်ဢၢမ်းလႄႈ သၼ်ႇႁူဝ်သၢႆႇႁူဝ်ၶဝ်ဢေႃႈ။
ၵဝ်တၵ်းဢဝ်ၶဝ်ၸၢတ်ႇပိုၼ်ပႅတ်ႈၵႃႈတီႈ ၽၢႆႇၼႃႈရၢၼ်ႇသူႇၶဝ်မိူၼ်ၸိူဝ်ႉၼင်ႇ လူမ်းၽၢႆႇတၢင်းဝၼ်းဢွၵ်ႇၼၼ်ႉဢေႃႈ။ ၼႂ်းမိုဝ်ႉဝၼ်းဢၼ်ၽေးႁွတ်ႈထိုင်ၼၼ်ႉ၊ၵဝ် တၵ်းဝၢႆႇလင်တေႃႇၶဝ်လႄႈဢမ်ႇဝၢႆႇၼႃႈ တေႃႇၶဝ်၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၶဝ်လၢတ်ႈလႄႈဝႃႈ၊ “မႃးမႃး႟။ ဢွၼ်ၵၼ်ၵျၢမ်ႇပွင်တၢင်းၵျၢမ်ႇတၢင်းပွင်ဢၼ်ၶတ်းၵၼ်တင်း ယေႇရမိ၊ တႃႉႁဝ်း။ တြႃးၸဝ်ႈတၵ်းဢမ်ႇလပ်ႉႁၢႆသေၵႃႈတီႈယဵၸ်ႈပရေႃးႁဵၵ်ႈ တၢင်းဢၼ်ပၼ်တၢင်းၵျၢမ်ႇတၢင်းပွင်တၵ်းဢမ်ႇလပ်ႉႁၢႆသေၵႃႈတီႈၵေႃႉဢၼ်မီးပိင်ႇၺႃႇ။ တၢင်းဢၼ်ႁေႃးလၢတ်ႈတၵ်းဢမ်ႇလႆႈလပ်ႉႁၢႆသေၵႃႈတီႈပရေႃးၽႅတ်ႈ ၵူၺ်း။ မႃးမႃး႟။ ဢွၼ်ၵၼ်ဢဝ်တင်းလိၼ်ႉသေလႄႈတိုၵ်းတေႃးမၼ်းတႃႉ။ ယင်းဢမ်ႇထွမ်ႇဢမ်ႇဢဝ်ၵႂၢမ်းမၼ်းလႄႈဢွၼ်ၵၼ်ယူႇတႃႉႁဝ်း၊” ဝႃႈၼင်ႇၼႆဢေႃႈ။
ဢူဝ်း၊ ထႃႇဝရႃႉၽြႃး၊ တီႈၶႃႈ။ လူတူၺ်းၶႃႈၸဝ်ႈသေၵမ်းတီႈၶႃႈ။ မၢတ်ႈတွင်းၵႂၢမ်းၶဝ်ၸိူဝ်းဢၼ်ႁဵတ်းတၢင်းဢၼ်ၶတ်းၵၼ်တင်းၶႃၸဝ်ႈၼၼ်ႉသေၵမ်းတီႈၶႃႈ။-
ထုၵ်ႇလီတႅၼ်းပၼ်တၢင်းဢၼ်ဢမ်ႇလီဢမ်ႇငၢမ်းပုၼ်ႈတၢင်းဢၼ်လီဢၼ်ငၢမ်းတီႈၶႃႈႁိုဝ်း။ ၶဝ်ၼၼ်ႉဢွၼ်ၵၼ်ၶုတ်းၶုမ်ၶုတ်းႁူးပုၼ်ႈဢသၢၵ်ႈၶႃႈၸဝ်ႈတီႈၶႃႈယဝ်ႉ။ ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းလွင်ႈဢၼ်ၶႃႈၸဝ်ႈၸုၵ်းယူႇၵႃႈတီႈၽၢႆႇၼႃႈၸဝ်ႈႁဝ်းႁႂ်ႈလႆႈလဝ်ႈလၢတ်ႈၵႂၢမ်းဢၼ်လီဢၼ်ငၢမ်းပုၼ်ႈၶဝ်ႁႂ်ႈတၢင်းၸႂ်မႆႈၶႂ်ႈၸႃႉၸဝ်ႈႁဝ်းဝႄႈပိူင်ႈသေၵႃႈတီႈၶဝ်ၼၼ်ႉသေၵမ်းတီႈၶႃႈ။-
ပိူဝ်ႈၼႆလႄႈၶႅၼ်းတေႃႈဢဝ်လုၵ်ႈၶဝ်လၢင်းၶဝ်ဢၢပ်ႈပၼ်တီႈတၢင်းဢၼ်ဢိုပ်းယၢၵ်ႈလႄႈဢဝ်ၶဝ်ဢၢပ်ႈပၼ်တီႈၽေးလၢပ်ႇၽေးလႅဝ်းသေၵမ်းတီႈၶႃႈ။ ႁႂ်ႈမႄႈယိင်းၶဝ်ဢမ်ႇမီးလုၵ်ႈမီးလၢင်ႈလႄႈပဵၼ်မႄႈမူၵ်းမႄႈမၢႆႈသေၵမ်းလူၺ်ႈ။ ႁႂ်ႈၵူၼ်းလူင်ၶဝ်လႆႈၶၢမ်ႇတၢင်းဢၼ်ဢဝ်တၢႆလႄႈၵူၼ်းၼုမ်ႇၵူၼ်းၵမ်ၶဝ်သုမ်းလူၺ်ႈလၢပ်ႇလူၺ်ႈလႅဝ်းၵႃႈၼႂ်းပၢင်သိုၵ်းၼၼ်ႉသေၵမ်းလူၺ်ႈ။-
ႁႂ်ႈလႆႈငိၼ်းသဵင်ဢၼ်ႁွင်ႉႁႆႈၵႃႈၼႂ်းႁိူၼ်းၼႂ်းယေးၶဝ်၊ယၢမ်းမိူဝ်ႈဢၼ်ၸဝ်ႈႁဝ်းႁႂ်ႈမူႇၽုင်မုၵ်ႉၸိူဝ်းၵူၼ်းဢၼ်တိုၵ်းသိုၵ်းၵိုင်ႉၵၢင်ႉႁွတ်ႈမႃးတီႈၶဝ်ၼၼ်ႉသေၵမ်းလူၺ်ႈ။ လွင်ႈမၼ်းၸမ်ႉ၊ၶဝ်ဢွၼ်ၵၼ်ၶုတ်းၶုမ်ၶုတ်းလုၵ်းႁႂ်ႈလႆႈၵၢင်ဢဝ်ၶႃႈၸဝ်ႈလႄႈသိူင်ႇမႅပ်းတူင်ႇႁႅဝ်ႉတူင်ႇၶိုမ်းပုၼ်ႈတိၼ်ၶႃႈၸဝ်ႈတီႈၶႃႈယဝ်ႉ။-
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းႁုလွင်ႈၵႃႈဢၼ်ၶဝ်ၵျၢမ်ႇပွင်ႁႂ်ႈလႆႈဢဝ်ဢသၢၵ်ႈၶႃႈၸဝ်ႈတၢႆၼၼ်ႉယူႇတီႈၶႃႈဢေႃႈ။ ယႃႇပေပွႆႇဢပျတ်ႈၶဝ်လွတ်ႈသေၵမ်းတီႈၶႃႈ။ ယႃႇပေမွတ်ႇပႅတ်ႈဢပျတ်ႈၶဝ်သေၵႃႈတီႈသိုဝ်ႈၼႃႈတႂ်ႈတႃၸဝ်ႈႁဝ်းသေၵမ်းတီႈၶႃႈ။ ႁႂ်ႈၶဝ်လႆႈၶၢမ်ႇတၢင်းဢၼ်လူမ်ႉတူၵ်းၵႃႈတီႈၽၢႆႇၼႃႈၸဝ်ႈႁဝ်းသေၵမ်းတီႈၶႃႈ။ ၶႅၼ်းတေႃႈၸီႇယၢင်ႇၶဝ်ၼႂ်းမိူဝ်ႈဢၼ်တၢင်းၸႂ်မႆႈၶႂ်ႈၸႃႉၸဝ်ႈႁဝ်းဢွၵ်ႇၼၼ်ႉသေၵမ်းတီႈၶႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “မႂ်းၵႂႃႇလႄႈသိုဝ်ႉဢဝ်ၼမ်ႉတဝ်ႈလိၼ်တီႈၵူၼ်းပၼ်ႈမေႃႈသေယဝ်ႉ၊ႁွင်ႉဢဝ်ၵူၼ်းဢၼ်ပဵၼ်ၵႄႇပဵၼ်ႁူဝ်ၵူၼ်းတင်းလၢႆ၊ဢိၵ်ႇတင်းယဵၸ်ႈပရေႃးႁဵၵ်ႈ ဢၼ်ဢသၢၵ်ႈယႂ်ႇၵမ်ႈၽွင်ႈလႄႈ၊-
ၵႂႃႇၵႃႈတီႈၶူင်ႈႁူၺ်ႈလုၵ်ႈၸၢႆး ႁိၼ်ႇၼုမ်ႇ၊ ၼွၵ်ႈၽၵ်းတူ ႁရသိတ်ႉ၊ သေလႄႈႁွင်ႉပၢဝ်ႇႁွင်ႉလၢတ်ႈၵႂၢမ်းၵႃႈဢၼ်ၵဝ်မီးဢမိင်ႉၼၼ်ႉတႃႉ။-
မႂ်းတၵ်းလႆႈလၢတ်ႈလႄႈဝႃႈ၊ ‘ၶုၼ်ႁေႃၶမ်း ယုတႃႉ၊ ဢိၵ်ႇတင်းၵူၼ်းဝဵင်း ယေႇရုသလႅမ်ႇ၊ ၶဝ်႟။ ဢွၼ်ၵၼ်ထွမ်ႇငိၼ်းဢမိင်ႉ ထႃႇဝရႃႉၽြႃး၊ တႃႉ။ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊ၵဝ်တၵ်းႁႂ်ႈၽေးႁွတ်ႈထိုင်ၵႃႈတီႈၼႆႈတေႃႇထိုင်ႁွတ်ႈထၢၼ်ႈပေႃးႁူၵေႃႉဢၼ်လႆႈငိၼ်းလွင်ႈမၼ်းၵူႈၵေႃႉၵူႈၵူၼ်းၼၼ်ႉၶူမ်ဢေႃႈ။-
လွင်ႈမၼ်းၸမ်ႉ၊ၶဝ်ဢွၼ်ၵၼ်ၸုၼ်ႉပႅတ်ႈၵဝ်လႄႈႁႂ်ႈထႃႇၼႃႉတီႈၼႆႈပဵၼ်တၢင်းဢၼ်ၵူဝ်ႈၵိူၵ်ႇလူၺ်ႈတၢင်းဢၼ်ဢဝ်ၼၢမ်ႇသႃႇတုတ်ႇၽႆးတီႈၽြႃးတၢင်ႇသူတၢင်ႇပႃးဢၼ်ၶဝ်ဢမ်ႇႁု၊ပူႇမွၼ်ႇၶဝ်ဢိၵ်ႇတင်းၶုၼ်ႁေႃၶမ်း ယုတႃႉ၊ တင်းလၢႆဢမ်ႇႁုၼၼ်ႉသေယဝ်ႉ၊ၶဝ်ဢွၼ်ၵၼ်ဢဝ်တင်းလိူတ်ႈၶဝ်ၸိူဝ်းဢၼ်ဢမ်ႇမီးဢပျတ်ႈၼၼ်ႉႁႂ်ႈတဵမ်ဝႆႉၵႃႈတီႈထႃႇၼႃႉတီႈၼႆႈယဝ်ႉ။-
ၶဝ်ဢွၼ်ၵၼ်တႄႇႁဵတ်းထႃႇၼႃႉတီႈသုင်တင်းလၢႆ၊တီႈ ၽြႃးပႃႇလႃႉ၊ ႁႂ်ႈလႆႈဢဝ်လုၵ်ႈၸၢႆးၶဝ်တုတ်ႇၽႆးလႄႈႁဵတ်းဝၢတ်ႈသၢၵ်ႈၵၢပ်ႈတၢင်းလူႇတီႈ ၽြႃးပႃႇလႃႉ၊ ဢၼ်ဝႃႈ၊ဝၢတ်ႈတၢင်းဢၼ်ၵဝ်ဢမ်ႇၸီႇယၢင်ႇ၊ဢမ်ႇသင်ႇလၢတ်ႈဝႆႉ၊ဢၼ်ႁူဝ်ၸႂ်ၵဝ်ဢမ်ႇၵျၢမ်ႇပွင်လႃးလႃးၼၼ်ႉယဝ်ႉ။-
ပိူဝ်ႈၼႆလႄႈ ထႃႇဝရႃႉၽြႃး၊ မီးဢမိင်ႉၸမ်ႉ၊မိုဝ်ႉဝၼ်းဢၼ်ဢမ်ႇလႆႈႁွင်ႉႁဵၵ်ႈထႃႇၼႃႉတီႈၼႆႈလႄႈဝႃႈ၊ တေႃးၽႅတ်ႉ၊ ဢိၵ်ႇတင်းဢၼ်ဢမ်ႇလႆႈႁွင်ႉႁဵၵ်ႈဝႃႈ၊ၶူင်ႈႁူၺ်ႈလုၵ်ႈၸၢႆး ႁိၼ်ႇၼုမ်ႇ၊ ၼၼ်ႉတၵ်းႁွတ်ႈထိုင်မႃးလႄႈတၵ်းလႆႈႁွင်ႉႁဵၵ်ႈတီႈၼၼ်ႈဝႃႈ၊ ၶူင်ႈႁူၺ်ႈတီႈဢၼ်ဢဝ်တၢႆ၊ ဝႃႈၼင်ႇၼႆဢေႃႈ။-
ၵဝ်တၵ်းယႃႉတၢင်းၵျၢမ်ႇတၢင်းပွင်ၵူၼ်းမိူင်း ယုတႃႉ၊ ၵူၼ်းဝဵင်း ယေႇရုသလႅမ်ႇ၊ တင်းလၢႆပႅတ်ႈသေၵႃႈတီႈထႃႇၼႃႉတီႈၼႆႉလႄႈတၵ်းႁႂ်ႈၶဝ်တူၵ်းသုမ်းလူၺ်ႈလၢပ်ႇလူၺ်ႈလႅဝ်းရၢၼ်ႇသူႇၶဝ်တင်းလၢႆ၊ဢိၵ်ႇတင်းလူၺ်ႈမိုဝ်းၶဝ်ၸိူဝ်းဢၼ်ၸွမ်းႁႃဢဝ်ဢသၢၵ်ႈၶဝ်ၼၼ်ႉဢေႃႈ။ ၵဝ်တၵ်းဢဝ်တူဝ်တၢႆၶဝ်ၼၼ်ႉပၼ်တီႈၼူၵ်ႉၵၢင်ႁၢဝ်တင်းတူဝ်ထိူၼ်ႇႁၢႆႉတင်းလၢႆႁႂ်ႈၵိၼ်ၼိူဝ်ႉၶဝ်ဢေႃႈ။-
ၵဝ်တၵ်းႁႂ်ႈဝဵင်းၼႆႉပဵၼ်တီႈဢၼ်တူၵ်းၸႂ်လႂ်တိုၼ်ႇ၊တီႈဢၼ်ငိၼ်းသဵင်ႁဵတ်းသိသိသေႃႉသေႃႉဢၼ်သႄႉသွမ်းၼၼ်ႉဢေႃႈ။ ၶဝ်ၸိူဝ်းဢၼ်ၵႂႃႇတႃႈပႆတၢင်းၵၢႆၵႂႃႇၵႃႈမီးၼၼ်ႉတၵ်းဢွၼ်ၵၼ်ဢၢမ်းလႄႈႁဵတ်းသဵင်ဢၼ်သိသိသေႃႉသေႃႉသႄႉသွမ်း၊ၵွပ်ႈပိူဝ်ႈၽေးဢၼ်တူၵ်းႁွတ်ႈၵႃႈၼိူဝ်ဝဵင်းၼႆႉၵူႈၸိူဝ်ႉၵူႈပိူင်ၼၼ်ႉဢေႃႈ။-
ၵဝ်တၵ်းႁႂ်ႈၶဝ်ၵိၼ်ၼိူဝ်ႉလုၵ်ႈၸၢႆးၶဝ်၊ၼိူဝ်ႉလုၵ်ႈယိင်းၶဝ်လႄႈၶဝ်ၼင်ႇၵၼ်ၵၼ်ၵေႃႉၼိုင်ႈလႄႈၵေႃႉၼိုင်ႈတၵ်းၵိၼ်ၼိူဝ်ႉၵၼ်ၼႂ်းမိူဝ်ႈဢၼ်တပ်ႉရၢၼ်ႇသူႇလွမ်ႉႁွပ်ႈၶဝ်ယူႇႁိုင်ၼၢၼ်းလႄႈၸွမ်းႁႃဢဝ်ဢသၢၵ်ႈၶဝ်ဢၼ်ႁဵတ်းႁႂ်ႈၶဝ်တူၵ်းၵႅၼ်းၼႃႇဢေႃႈ၊’ ဝႃႈၼင်ႇၼႆတႃႉ။
“မိူဝ်ႈၼၼ်ႉမႂ်းဢဝ်ၼမ်ႉတဝ်ႈၼၼ်ႉတႅၵ်ႇသိုဝ်ႈၼႃႈတႂ်ႈတႃၶဝ်ၸိူဝ်းဢၼ်ၵႂႃႇလူၺ်ႈၵၼ်တင်းမႂ်းၸိူဝ်းၼၼ်ႉလႄႈ၊-
သင်ႇလၢတ်ႈဝႆႉတီႈၶဝ်လႄႈဝႃႈ၊ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ ‘ၵဝ်တၵ်းဢဝ်ဝဵင်းၼႆႉ၊ဢိၵ်ႇတင်းၵူၼ်းတင်းလၢႆၼႆႉတႅၵ်ႇမိူၼ်ၸိူဝ်ႉၼင်ႇၼမ်ႉတဝ်ႈၵူၼ်းပၼ်ႈမေႃႈဢၼ်ဢမ်ႇၶိုၼ်းမႄးႁဵတ်းလႆႈၼၼ်ႉလႄႈၶဝ်တၵ်းဢွၼ်ၵၼ်သၢင်းၵျူဝ်ႇတူဝ်တၢႆၵႃႈၼႂ်းတီႈ တေႃးၽႅတ်ႉ၊ ၼႆႉႁႂ်ႈထၢၼ်ႈပေႃးလိၼ်တီႈဢၼ်သၢင်းၵျူဝ်ႇၼၼ်ႉဢမ်ႇပေႃးၵုမ်ႇလႆႈဢေႃႈ။-
ထႃႇဝရႃႉၽြႃး၊ မီးဢမိင်ႉၸမ်ႉ၊ၵဝ်တၵ်းႁဵတ်းတီႈဝဵင်းၼႆႉ၊ဢိၵ်ႇတင်းတီႈၵူၼ်းဢၼ်ယူႇၵႃႈၼႂ်းဝဵင်းၼႆႉၸိူဝ်းၼၼ်ႉႁႂ်ႈပဵၼ်မိူၼ်ၸိူဝ်ႉၼင်ႇတီႈ တေႃးၽႅတ်ႉ၊ ၼၼ်ႉဢေႃႈ။-
ႁိူၼ်းဝဵင်း ယေႇရုသလႅမ်ႇ၊ တင်းလၢႆ၊ႁေႃၶမ်းၶုၼ်လူင် ယုတႃႉ၊ တင်းလၢႆဢၼ်ဝႃႈ၊ႁိူၼ်းၵႃႈမီးဢၼ်ဢဝ်ၼၢမ်ႇသႃႇတုတ်ႇၽႆးၵႃႈၼိူဝ်လင်ၶႃး၊ပုၼ်ႈႁဵတ်းဝၢတ်ႈတီႈၶိူင်ႈပိူင်ၵၢင်ႁၢဝ်တင်းသဵင်ႈတင်းလူင်လႄႈသမ်ႉဢဝ်ၶိူင်ႈတၢင်းလူႇဢၼ်သွၼ်းလေႃႇၼၼ်ႉ၊သွၼ်းလေႃႇတီႈၽြႃးတၢင်ႇသူႇတၢင်ႇပႃးၸိူဝ်းၼၼ်ႉ၊တၵ်းလႆႈပဵၼ်တၢင်းဢၼ်ၵူဝ်ႈၵိူၵ်ႇမိူၼ်ၸိူဝ်ႉၼင်ႇပဵၼ်တီႈ တေႃးၽႅတ်ႉ၊ ၼႆႉဢေႃႈ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ပရေႃးၽႅတ်ႈ ယေႇရမိ၊ လုၵ်ႉသေၵႃႈတီႈ တေႃးၽႅတ်ႉ၊ တီႈဢၼ် ထႃႇဝရႃႉၽြႃး၊ ပွႆႇၸႂ်ႉမၼ်းႁႂ်ႈလႆႈၵႂႃႇႁေႃးလၢတ်ႈၼၼ်ႉၶိုၼ်းမႃးလႄႈၸုၵ်းယူႇၵႃႈၼႂ်းပၢင်ႇဝၢင်းႁိူၼ်း ထႃႇဝရႃႉၽြႃး၊ ယူႇသေယဝ်ႉ၊မွၵ်ႇလၢတ်ႈတီႈၵူၼ်းတင်းလၢႆလႄႈဝႃႈ၊-
“ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊ ‘ၵဝ်တၵ်းႁႂ်ႈၽေးတၢမ်ႇၵႃႈဢၼ်ၵဝ်မွၵ်ႇလၢတ်ႈဝႆႉၼၼ်ႉႁွတ်ႈထိုင်ၵႃႈၼိူဝ်ဝဵင်းၼႆႉ၊ဢိၵ်ႇတင်းဝၢၼ်ႈမၼ်းၵႃႈမီးၵွပ်ႈပိူဝ်ႈဢၼ်ၶဝ်ႁႂ်ႈၶေႃးၶဝ်ၵႅၼ်ႇၶႅင်လႄႈဢမ်ႇထွမ်ႇဢဝ်ၵႂၢမ်းၵဝ်ၼၼ်ႉဢေႃႈ၊’ ဝႃႈၼင်ႇၼႆဝႆႉယဝ်ႉ၊” ဝႃႈၼင်ႇၼႆဢေႃႈ။
ၼင်ႇၼၼ်လႄႈယဵၸ်ႈပရေႃးႁဵၵ်ႈ ဢၼ်ၸိုဝ်ႈဝႃႈ၊ ပႃႇသုရႃႉ၊ လုၵ်ႈၸၢႆး ဢိမေႇရႃႉ၊ ဢၼ်ပဵၼ်ၶုၼ်ၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ၼၼ်ႉငိၼ်း ယေႇရမိ၊ ႁေႃးလၢတ်ႈၸိူဝ်ႉၼင်ႇၼၼ်ၼၼ်ႉဢေႃႈ။-
ပႃႇသုရႃႉ၊ ၼၼ်ႉပေႃႉထုပ်ႉပရေႃးၽႅတ်ႈ ယေႇရမိ၊ သေယဝ်ႉ၊မတ်ႉမိုဝ်းၶင်သႂ်ႇဝႆႉၵႃႈၼႂ်းႁူးၽၵ်းတူ ပိၼ်ႇယႃႇမိၼ်ႇ၊ ႁၢၼ်ႉၼိူဝ်ၵႃႈတီႈႁိမ်း ထႃႇဝရႃႉၽြႃး၊ ၼၼ်ႉဢေႃႈ။-
ဝၼ်းမိူဝ်ႈၽုၵ်ႈ၊ ပႃႇသုရႃႉ၊ ပွႆႇ ယေႇရမိ၊ သေၵႃႈတီႈဢၼ်မတ်ႉဝႆႉၼၼ်ႉလႄႈ၊ ယေႇရမိ၊ လၢတ်ႈတီႈမၼ်းလႄႈဝႃႈ၊ “ ထႃႇဝရႃႉၽြႃး၊ ဢမ်ႇႁွင်ႉႁဵၵ်ႈတၢင်ႇပၼ်ၸိုဝ်ႈမႂ်းလႄႈဝႃႈ၊ ပႃႇသုရႃႉ၊ ၵူၺ်းၵႃႈ၊လႆႈတၢင်ႇၸိုဝ်ႈမႂ်းဝႃႈ၊ ‘လွင်ႈဢၼ်လီၵူဝ်လီႁႄၵူႈတီႈၵူႈလႅၼ်၊ ’ ဝႃႈၼင်ႇၼႆဢေႃႈ။-
ထႃႇဝရႃႉၽြႃး၊ မီးဢမိင်ႉၸမ်ႉ၊ ‘ၵဝ်တၵ်းႁႂ်ႈမႂ်းပဵၼ်လွင်ႈဢၼ်လီၵူဝ်လီႁႄတီႈတူဝ်မႂ်းဢိၵ်ႇတင်းတီႈၵေႃႉသႄႈမႂ်းတင်းလၢႆဢေႃႈ။ ၶဝ်တၵ်းဢွၼ်ၵၼ်တူၵ်းသုမ်းလူၺ်ႈလၢပ်ႇလူၺ်ႈလႅဝ်းရၢၼ်ႇသူႇၶဝ်လႄႈမၢၵ်ႇတႃမႂ်းတၵ်းလႆႈႁၼ်ဢေႃႈ။ ၵဝ်တၵ်းဢဝ်မိူင်း ယုတႃႉ၊ တင်းမူတ်းဢၢပ်ႈပၼ်ၵႃႈၼႂ်းမိုဝ်းၶုၼ်ႁေႃၶမ်း ပႃႇပုလုၼ်ႇ၊ လႄႈ၊မၼ်းၼၼ်ႉတၵ်းသိမ်းဢဝ်ၶဝ်ၵႂႃႇတီႈမိူင်း ပႃႇပုလုၼ်ႇ၊ သေယဝ်ႉ၊ဢဝ်ၶဝ်တၢႆလူၺ်ႈလၢပ်ႇလူၺ်ႈလႅဝ်းဢေႃႈ။-
ၵဝ်တၵ်းဢဝ်တၢင်းဢၼ်မၢၵ်ႈမီးဝဵင်းၼႆႉၵႃႈမီး၊ဢုၵ်ႉၸႃႇၵႃႈဢၼ်ႁဵတ်းလႄႈလႆႈ၊ရတၼႃႇၵႃႈဢၼ်ၵဵပ်းဝႆႉႁွမ်ဝႆႉဢိၵ်ႇတင်းၽၼ်ႇတႃႇၶုၼ်ႁေႃၶမ်း ယုတႃႉ၊ ၵူႈၸိူဝ်ႉၵူႈပိူင်ၸိူဝ်းၼၼ်ႉဢၢပ်ႈပၼ်ၵႃႈၼႂ်းမိုဝ်းရၢၼ်ႇသူႇၶဝ်ဢၼ်တၵ်းႁိမ်ႁူင်ႇဢဝ်ၶဝ်လႄႈသိမ်းဢဝ်ၶဝ်ၵႂႃႇၵႃႈတီႈဝဵင်း ပႃႇပုလုၼ်ႇ၊ ၸိူဝ်းၼၼ်ႉဢေႃႈ။-
မႂ်း ပႃႇသုရႃႉ၊ ဢိၵ်ႇတင်းၵူၼ်းႁိူၼ်းၵူၼ်းယေးမႂ်းတင်းသဵင်ႈတင်းလူင်ၵေႃႈ တၵ်းလႆႈၶၢမ်ႇတၢင်းဢၼ်သိမ်းဢဝ်ၵႂႃႇဢေႃႈ။ မႂ်းတၵ်းလႆႈႁွတ်ႈထိုင်ၵႃႈတီႈဝဵင်း ပႃႇပုလုၼ်ႇ၊ ပုၼ်ႉလႄႈမႂ်းဢိၵ်ႇတင်းၵေႃႉသႄႈမႂ်းဢၼ်မႂ်းဢဝ်ၵႂၢမ်းမုသႃႇႁေႃးလၢတ်ႈတီႈၶဝ်ၼၼ်ႉတင်းသဵင်ႈတင်းလူင်တၵ်းလႆႈတၢႆၵႃႈတီႈဝဵင်းၼၼ်ႉသေလႄႈၶၢမ်ႇတၢင်းဢၼ်သၢင်းၵျူဝ်ႇၵႃႈတီႈၼၼ်ႈဢေႃႈ၊’ ” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ တီႈၶႃႈ၊ၸဝ်ႈႁဝ်းပႅတ်ႉလႅၼ် ၸူဝ်းဢဝ်ၶႃႈၸဝ်ႈလႄႈ၊ၶႃႈၸဝ်ႈလႆႈၶၢမ်ႇ တၢင်းဢၼ်ပႅတ်ႉလႅၼ်ၸူဝ်းဢဝ်တီႈၶႃႈယဝ်ႉ။ ၸဝ်ႈႁဝ်းႁႅင်းယႂ်ႇလိူဝ်တွၼ်းၼႃႇသေ ၶႃႈၸဝ်ႈလႄႈပႄႉၼႅင်ႇတီႈၶႃႈယဝ်ႉ။ ၶႃႈၸဝ်ႈ လႆႈၶၢမ်ႇတၢင်းဢၼ်သႄႉသွမ်းယူႇ တင်းဝၼ်းတင်းဝၼ်းလႄႈ၊ ၵူႈၵေႃႉၵူႈၵူၼ်းၸၢင်ႈဢွၼ်ၵၼ်ႁဵတ်းတၢင်း ဢၼ်ယဝ်ႉလဵၼ်ႈ၊ယွၵ်ႇလဵၼ်ႈၶႃႈၸဝ်ႈ တီႈၶႃႈဢေႃႈ။
ၼႂ်းမိူဝ်ႈဢၼ်ၶႃႈၸဝ်ႈႁေႃးလၢတ်ႈၵူႈပွၵ်ႈၵူႈပွၵ်ႈၼၼ်ႉၶႃႈၸဝ်ႈႁွင်ႉႁႆႈႁွင်ႉသႅၼ်ႇတီႈၶႃႈဢေႃႈ။ ၶႃႈၸဝ်ႈႁွင်ႉပၢဝ်ႇႁွင်ႉသႅၼ်ႇလႄႈဝႃႈ၊ “ပဵၼ်ဢမုတၢင်းဢၼ်ၼိၵ်ႈၸၢၵ်ႈငႅၼ်းသႄး ဢမုတၢင်းဢၼ်ႁိမ်ဢဝ်ႁူင်ႇဢဝ်ဢေႃႈ၊” ဝႃႈၼင်ႇၼႆတီႈၶႃႈဢေႃႈ။ လွင်ႈမၼ်းၸမ်ႉ၊ၼုၵ်ႈၵပၢတ်ႈ ထႃႇဝရႃႉၽြႃး၊ ၼၼ်ႉပဵၼ်လွင်ႈဢၼ်ႁဵတ်းႁႂ်ႈသႄႉသွမ်း တၢင်းဢၼ်ယဝ်ႉလဵၼ်ႈ၊ယွၵ်ႇလဵၼ်ႈယူႇ ၵူႈဝၼ်းၵူႈဝၼ်းတီႈၶႃႈဢေႃႈ။
ပေႃးၵဝ်လၢတ်ႈလႄႈဝႃႈ၊ “ၵဝ်ယင်းဢမ်ႇမွၵ်ႇဢမ်ႇလၢတ်ႈလွင်ႈမၼ်းၸဝ်ႈ၊ယင်းဢမ်ႇဢိင်ၼႃႇမႃႉၸိုဝ်ႈသဵင်မၼ်းၸဝ်ႈလႄႈ ႁေႃးလၢတ်ႈယဝ်ႉ၊” ဝႃႈၼင်ၼႆသေၵေႃႈ၊ ၵႃႈၼႂ်းႁူဝ်ၸႂ်ၵဝ်ၼႆႉပဵၼ်မိူၼ်ၸိူဝ်ႉၼင်ႇၽႆး ဢၼ်မႆႈယူႇ၊မူၵ်းဝႆႉၵႃႈၼႂ်းလုပ်ႇၵဝ်တင်းလၢႆ ၼၼ်ႉလႄႈပဵၼ်ဢၼ်ႁိူဝ်ႉဢူၼ်ႈၼႃႇလူင်လၢင် ၵွပ်ႈပိူဝ်ႈဢၼ်ယိူၼ်ႉၵၼ်ႈယူႇၼၼ်ႉလႄႈ ဢမ်ႇယိူၼ်ႉလႆႈထႅင်ႈယဝ်ႉ။
ၵဝ်လႆႈငိၼ်းတၢင်းဢၼ်ပိူၼ်ႈသႄႉသွမ်းတၢင်ႇ ဢပျတ်ႈလႄႈဝႃႈ၊ “တၢင်းဢၼ်လီၵူဝ် လီႁႄၼၼ်ႉမီးၵူႈၽၢႆႇၵူႈပႃႈဢေႃႈ။ လၢတ်ႈၵႂၢမ်းတၢင်ႇဢပျတ်ႈတီႈမၼ်းတႃႉ။ ႁဝ်းဢွၼ်ၵၼ်လၢတ်ႈၵႂၢမ်းတၢင်ႇဢပျတ်ႈ တီႈမၼ်းတႃႉ။” ဝႃႈၼင်ႇၼႆဢေႃႈ။ ၵေႃႉသႄႈၵဝ်တင်းသဵင်ႈတင်းလူင်ဢွၼ်ၵၼ် ပႂ်ႉထႃႈလွင်ႈဢၼ်ၵဝ်တၵ်းလူမ်ႉတၵ်းတူၵ်း ၼၼ်ႉယူႇသေလႄႈဝႃႈ၊ “မၼ်းၸၢင်ႈၶႄးတၵ်းလႆႈၶၢမ်ႇတၢင်းဢၼ် ပႅတ်ႉလႅၼ်ၸူဝ်းဢဝ်လႄႈႁဝ်းတၵ်းပႄႉၼႅင်ႇ မၼ်းသေယဝ်ႉ၊ႁႂ်ႈလႆႈတွပ်ႇတႅၼ်းၶိုၼ်းမၼ်း ၸွမ်းၼင်ႇၸႂ်ႁဝ်းဢၼ်ဝႆႉတၢင်းၽိတ်းတီႈမၼ်း ၼၼ်ႉႁႂ်ႈပေႃးပျေႇၸႂ်ဢေႃႈ၊” ဝႃႈၼင်ႇၼႆဢေႃႈ။
ၼႂ်းဝႃႈၼၼ်သေၵေႃႈ ထႃႇဝရႃႉၽြႃး၊ မီးယူႇၽၢႆႇၵဝ်ၶႃႈမိူၼ်ၸိူဝ်ႉၼင်ႇၵူၼ်းသိုၵ်းဢၼ် ႁႅင်းယႂ်ႇၼႃႇလႄႈလီၵူဝ်လီႁႄၼၼ်ႉဢေႃႈ။ ပိူဝ်ႈၼႆလႄႈၶဝ်ၸိူဝ်းဢၼ်ၼိၵ်ႈၸၢၵ်ႈငႅၼ်းသႄးၵဝ်ၼၼ်ႉယင်းဢမ်ႇပႄႉဢမ်ႇၼႅင်ႇလႄႈ တၵ်းဢွၼ်ၵၼ်တူၵ်းသုမ်းလႄႈလူမ်ႉဢေႃႈ။ ၵွပ်ႈပိူဝ်ႈတၢင်းၵျၢမ်ႇတၢင်းပွင်ၶဝ် ဢမ်ႇထိုင် တီႈၼၼ်ႉလႄႈၶဝ်တၵ်းမီးတၢင်းဢၼ်ဢူၵ်း ဢၼ်ဢၢႆတႃႇသေႇဢၼ်ဢမ်ႇမီးဝၼ်းဢၼ် တၵ်းလိုမ်းလႆႈဢေႃႈ။
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ဢၼ်ၸၢမ်းတူၺ်းၶဝ်ၸိူဝ်းဢၼ် သိုဝ်ႈတေႃႇၼၼ်ႉလႄႈႁုႁၼ်သၽေႃး မၢၵ်ႇလၼ်းႁူဝ်ၸႂ်တီႈၶႃႈ။ ႁႂ်ႈၶႃႈၸဝ်ႈလႆႈႁၼ်လွင်ႈဢၼ်ၸဝ်ႈႁဝ်း ၸီႇယၢင်ႇပၼ်တၢမ်ႇဢပျတ်ႈတီႈရၢၼ်ႇသူႇ ၶႃႈၸဝ်ႈၼၼ်ႉသေၵမ်းၶႃႈ။ လွင်ႈမၼ်းၸမ်ႉ၊ၶႃႈၸဝ်ႈၽုၺ်ႇဢွၵ်ႇၼႄပျႃး ဢမုၶႃႈၸဝ်ႈၵႃႈတီႈၽၢႆႇၼႃႈၸဝ်ႈႁဝ်း တီႈၶႃႈယဝ်ႉ။
ဢွၼ်ၵၼ်ႁဵတ်းၵႂၢမ်းတီႈ ထႃႇဝရႃႉၽြႃး၊ တႃႉ။ ဢွၼ်ၵၼ်ယွင်ႈယေႃး ထႃႇဝရႃႉၽြႃး၊ တႃႉ။ လွင်ႈမၼ်းၸမ်ႉ၊မၼ်းၸဝ်ႈၵႄႇသႄႇၼုၵ်ႈဢဝ် ဝိၺိၺ်ႇၶဝ်ၸိူဝ်းဢၼ်ၸုတ်ႈဢၼ်လုတ်ႈၼၼ်ႉ ဢွၵ်ႇသေၵႃႈၼႂ်းမိုဝ်းၶဝ်ၸိူဝ်းဢၼ်ႁဵတ်း ဢမ်ႇတြႃးၼၼ်ႉဢေႃႈ။
ႁႂ်ႈမိုဝ်ႉဝၼ်းဢၼ်ၵဝ်ၵိူတ်ႇလဵင်ႉမႃးၼၼ်ႉ မီးဢႃႉမၢင်ႇၵလႃႇသေၵမ်းလူၺ်ႈ။ ယႃႇပေႁႂ်ႈမိုဝ်ႉဝၼ်းဢၼ်မႄႈၵဝ်ၵိူတ်ႇလဵင်ႉ ၵဝ်မႃးၼၼ်ႉမီးမၢင်ႇၵလႃႇသေၵမ်း။
ႁႂ်ႈၵေႃႉဢၼ်မွၵ်ႇလၢတ်ႈသတၢင်းသဵင်ၶၢဝ်ႇ တီႈပေႃႈၵဝ်လႄႈဝႃႈ၊ “ၸဝ်ႈလႆႈ လုၵ်ႈၸၢႆးယဝ်ႉ၊” ဝႃႈၼင်ႇၼႆသေလႄႈ ႁႂ်ႈမၼ်းၸူမ်းသိူဝ်းၼႃႇလူင်လၢင်ၼၼ်ႉ မီးဢႃႉမၢင်ႇၵလႃႇသေၵမ်းလူၺ်ႈ။
ႁႂ်ႈၵေႃႉၼၼ်ႉပဵၼ်ၸိူဝ်ႉၼင်ႇဝဵင်းဢၼ် ထႃႇဝရႃႉၽြႃး၊ ဢမ်ႇမီးတၢင်းဢၼ်ဢဵတ်းလူလႄႈ ယႃႉပႅတ်ႈၼၼ်ႉသေၵမ်းလူၺ်ႈ။ ႁႂ်ႈမၼ်းငိၼ်းသဵင်ဢၼ်ႁွင်ႉသႅၼ်ႇႁွင်ႉႁႆႈ ၼႂ်းမိူဝ်ႈၶိင်ႇၵၢင်ၼႂ်လႄႈငိၼ်းသဵင်ဢၼ် ႁွင်ႉသႅၼ်ႇႁွင်ႉၵိဝ်ၼႂ်းမိူဝ်ႈၶိင်ႇၵၢင်ဝၼ်းတဵင်ႈ ၼၼ်ႉသေၵမ်းလူၺ်ႈ။
လွင်ႈမၼ်းၸမ်ႉ၊မၼ်းယင်းဢမ်ႇဢဝ်ၵဝ်တၢႆ ၸႃႉၸဵမ်မိူဝ်ႈဢၼ်ၵဝ်ယင်းမီးယူႇၵႃႈၼႂ်း တွင်ႉမႄႈၵဝ်ၼၼ်ႉ၊ ႁႂ်ႈတွင်ႉမႄႈၵဝ်ၼၼ်ႉပဵၼ်ပႃႇႁဵဝ်ႈၵဝ်လႄႈ တွင်ႉၼၼ်ႉပဵၼ်ဢၼ်ယႂ်ႇယူႇၵႂၢင်ႈယူႇ သေႇသေႇလူင်ပေႇ။
ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၵဝ်လႆႈဢွၵ်ႇ ၵႃႈၼႂ်းတွင်ႉမႃးႁႂ်ႈၵဝ်လႆႈထူပ်းႁၼ်ၵၢၼ် တၢင်းႁဵတ်းတၢင်းသၢင်ႈဢၼ်ယၢပ်ႇၽိုတ်ႇ၊ ဢိၵ်ႇတင်းတၢင်းဢၼ်မႆႈၸႂ်၊ ထၢၼ်ႈပေႃးမိုဝ်ႉဝၼ်းၵဝ်လႆႈသုတ်းသဵင်ႈ ပူၼ်ႉၵႂႃႇလူၺ်ႈတၢင်းဢၼ်ဢူၵ်းဢၢႆၼၼ်ႉ ၸိူဝ်ႉၼင်ႇႁိုဝ်။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈ ယေႇရမိ၊ ၼႂ်းမိူဝ်ႈဢၼ်ၶုၼ်လူင် ၸေႇတၵိ၊ ပွႆႇၸႂ်ႉ ပႃႇသုရႃႉ၊ လုၵ်ႈၸၢႆး မႃႇလၶိယႃႉ၊ ဢိၵ်ႇတင်းယဵၸ်ႈပရေႃးႁဵၵ်ႈ ၸေႇၽၼိ၊ လုၵ်ႈၸၢႆး မႃႇသေႇယႃႉ၊ ၵႂႃႇၸူးၵႃႈတီႈမၼ်းလႄႈဝႃႈ၊-
“ၶႅၼ်းတေႃႈတွင်းပၢၼ်ႇတီႈ ထႃႇဝရႃႉၽြႃး၊ ပုၼ်ႈႁဝ်းၵွပ်ႈပိူဝ်ႈဢၼ် ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်း ပႃႇပုလုၼ်ႇ၊ တိုၵ်းတေႃးႁဝ်းၼၼ်ႉသေၵမ်း။ ထႃႇဝရႃႉၽြႃး၊ ၸၢင်ႈၶႄးတၵ်းႁဵတ်းတၢင်းဢၼ်လီဢၢမ်းၸွႆႈထႅမ်ႁဝ်းမိူၼ်မၼ်းၸဝ်ႈႁဵတ်းလၢႆပွၵ်ႈလႄႈႁႂ်ႈၶုၼ်ႁေႃၶမ်းၼၼ်ႉလႆႈပွၵ်ႈၶိုၼ်းမိူဝ်းၵႂႃႇၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ယေႇရမိ၊ သင်ႇလၢတ်ႈဝႆႉတီႈၶဝ်လႄႈဝႃႈ၊လွင်ႈဢၼ်သူတၵ်းလႆႈၶိုၼ်းလၢတ်ႈတီႈၶုၼ်လူင် ၸေႇတၵိ၊ ၸမ်ႉ၊-
ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉလႄႈဝႃႈ၊ “ၵဝ်တၵ်းႁႂ်ႈလၢၵ်ႈၼၢၵ်ႈဢၼ်မိုဝ်းသူယိပ်းၵမ်ၼၼ်ႉဝႄႈၵႂႃႇပိူင်ႈၵႂႃႇမိူဝ်ႈဢၼ်သူတိုၵ်းတေႃးၶုၼ်ႁေႃၶမ်း ပႃႇပုလုၼ်ႇ၊ ဢိၵ်ႇတင်းၵူၼ်းမဵဝ်း ၶႃႇလတေး၊ ဢၼ်တင်ႈတပ်ႉလွမ်ႉႁွပ်ႈသူယူႇၵႃႈတီႈၼွၵ်ႈဝဵင်းၸိူဝ်းၼၼ်ႉဢေႃႈ။ ၵဝ်တၵ်းႁႂ်ႈၶဝ်ၼၼ်ႉၸုၵၼ်တုမ်ၵၼ်ၵႃႈၼႂ်းဝဵင်းၼႆႉဢေႃႈ။-
ၵဝ်တၵ်းတိုၵ်းတေႃးသူလူၺ်ႈမိုဝ်းဢၼ်ႁႅင်းယႂ်ႇၼႃႇလႄႈၶႅၼ်မိုဝ်းဢၼ်ယဵတ်ႇဢွၵ်ႇလူၺ်ႈတၢင်းၸႂ်မႆႈၶႂ်ႈၸႃႉ၊ဢိၵ်ႇတင်းႁႅင်းတေႃးသႃႉၼၼ်ႉဢေႃႈ။-
ၵဝ်တၵ်းပၼ်တၢမ်ႇတီႈၶဝ်ၸိူဝ်းဢၼ်ယူႇၵႃႈတီႈဝဵင်းၼႆႉဢၼ်ဝႃႈ၊ၵူၼ်းသတ်ႉတဝႃႇဢိၵ်ႇတင်းတူဝ်သတ်းတရိၵ်ႈသၢၼ်ႇတင်းလၢႆလႄႈၶဝ်တၵ်းဢွၼ်ၵၼ်တၢႆလူၺ်ႈၵႃႇလႃႉႁႃႈလႅင်မိူင်းဢၼ်ႁႅင်းယႂ်ႇၼႃႇၼၼ်ႉဢေႃႈ။-
ထႃႇဝရႃႉၽြႃး၊ မီးဢမိင်ႉၸမ်ႉ၊လိုၼ်းၼၼ်ႉၵဝ်တၵ်းဢဝ်ၸႃႉၸဵမ် ၸေႇတၵိ၊ ၶုၼ်ႁေႃၶမ်း ယုတႃႉ၊ လႄႈၶႃႈမၼ်းတင်းလၢႆ၊ၵူၼ်းဝဵင်းတင်းလၢႆ၊ဢၼ်ဝႃႈၶဝ်ၸိူဝ်းဢၼ်လွတ်ႈၽေးတၢင်းၶႆႈတၢင်းပဵၼ်၊ၽေးလၢပ်ႇၽေးလႅဝ်း၊ၽေးတၢင်းဢၼ်ဢိုပ်းဢၼ်ယၢၵ်ႈလႄႈၵိုတ်းၵျၢၼ်ႇဝႆႉၸိူဝ်းၼၼ်ႉ ဢၢပ်ႈပၼ်ၵႃႈၼႂ်းမိုဝ်း ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်းမိူင်း ပႃႇပုလုၼ်ႇ၊ ဢိၵ်ႇတင်းရၢၼ်ႇသူႇၶဝ်တင်းလၢႆၸိူဝ်းဢၼ်ႁႃဢဝ်ဢသၢၵ်ႈၶဝ်ၼၼ်ႉလႄႈ၊ၶုၼ်ၼၼ်ႉယင်းဢမ်ႇသေလၢႆ၊ဢမ်ႇမီးၵရုၼႃႇတၢင်းဢၼ်ဢဵတ်းလူ၊ဢမ်ႇႁၵ်ႉဢမ်ႇႁူမ်လႄႈတၵ်းၶႃႈၽၼ်းၶဝ်ပႅတ်ႈလူၺ်ႈၶူမ်းလၢပ်ႇၶူမ်းလႅဝ်းဢေႃႈ၊” ဝႃႈၼင်ႇၼႆဢေႃႈ။
မႂ်းတၵ်းလႆႈသင်ႇလၢတ်ႈတီႈၵူၼ်းတင်းလၢႆၼႆႉလႄႈဝႃႈ၊ ထႃႇဝရႃႉၽြႃး၊ မီးဢမိင်ႉၸမ်ႉ၊ “တူၺ်းလူး။ ၵဝ်ၽုၺ်ႇသဵၼ်ႈတၢင်းဢၼ်လႆႈဢသၢၵ်ႈ၊သဵၼ်ႈတၢင်းဢၼ်လႆႈတၢင်းတၢႆ၊ဝႆႉၵႃႈတီႈၽၢႆႇၼႃႈမႂ်းဢေႃႈ။-
ၵေႃႉဢၼ်ယူႇၵႃႈၼႂ်းဝဵင်းၼႆႉၼၼ်ႉတၵ်းလႆႈတၢႆလူၺ်ႈၽေးလၢပ်ႇၽေးလႅဝ်း၊ၽေးတၢင်းဢၼ်ဢိုပ်းဢၼ်ယၢၵ်ႈ၊ၽေးၵႃႇလႃႉႁႃႈလႅင်မိူင်းဢေႃႈ။ ၵေႃႉဢၼ်ဢွၵ်ႇၵႃႈတီႈၼွၵ်ႈဝဵင်းလႄႈၶဝ်ႈၵႂႃႇယူႇၽၢႆႇၵူၼ်း ၶႃႇလတေး၊ ဢၼ်တင်ႈတပ်ႉလွမ်ႉႁွပ်ႈသူယူႇၸိူဝ်းၼၼ်ႉၼၼ်ႉ၊တၵ်းဢမ်ႇလႆႈတၢႆလႄႈတၵ်းလႆႈဢသၢၵ်ႈတူဝ်ၸဝ်ႈၵဝ်ႇမိူၼ်ၸိူဝ်ႉၼင်ႇဢုၵ်ႉၸႃႇဢၼ်ႁိမ်ဢဝ်လႆႈမႃးၼၼ်ႉဢေႃႈ။-
ထႃႇဝရႃႉၽြႃး၊ မီးဢမိင်ႉၸမ်ႉ၊ၵဝ်ဝၢႆႇၼႃႈတေႃႇဝဵင်းၼႆႉဢမ်ႇႁႂ်ႈလႆႈႁဵတ်းၵျေးၸူး၊ႁႂ်ႈလႆႈယႃႉပႅတ်ႈၵူၺ်းလႄႈဝဵင်းၼႆႉတၵ်းလႆႈၶၢမ်ႇတၢင်းဢၼ်ဢၢပ်ႈပၼ်ၵႃႈၼႂ်းမိုဝ်းၶုၼ်ႁေႃၶမ်းမိူင်း ပႃႇပုလုၼ်ႇ၊ လႄႈမၼ်းၼၼ်ႉတၵ်းဢဝ်ၽႆးတုတ်ႇပႅတ်ႈဢေႃႈ၊” ဝႃႈၼင်ႇၼႆဢေႃႈ။
ဢွၼ်ၵၼ်ထွမ်ႇငိၼ်းၵႂၢမ်းဢၼ် ထႃႇဝရႃႉၽြႃး၊ လၢတ်ႈတီႈၶိူဝ်းႁိူၼ်းၶုၼ်ႁေႃၶမ်းမိူင်း ယုတႃႉ၊ လႄႈမီးဢမိင်ႉၸမ်ႉ။-
ၶိူဝ်းႁိူၼ်းၶုၼ်လူင် တႃႇဝိတ်ႈ၊ ႟။ ထႃႇဝရႃႉၽြႃး၊ မီးဢမိင်ႉၸမ်ႉ၊ “ဢွၼ်ၵၼ်ၸီႇယၢင်ႇၸွမ်းၼင်ႇတြႃးၸႃႉၸဵမ်ၵၢင်ၼႂ်လႄႈၵႄႇသႄႇၼုၵ်ႈဢဝ်ၵေႃႉဢၼ်လႆႈၶၢမ်ႇတၢင်းဢၼ်ႁိမ်ႁူင်ႇဢဝ်ၼၼ်ႉဢွၵ်ႇသေၵႃႈၼႂ်းမိုဝ်းၵေႃႉဢၼ်ၼိၵ်ႈၸၢၵ်ႈငႅၼ်းသႄးၼၼ်ႉတႃႉ။ ပေႃးဢမ်ႇၼၼ်ဢၢႆႁႅင်းတၢင်းၸႂ်မႆႈၶႂ်ႈၸႃႉၵဝ်တၵ်းဢွၵ်ႇပဵၼ်မိူၼ်ၸိူဝ်ႉၼင်ႇၽႆးလႄႈမႆႈယူႇႁႂ်ႈၽူႈလႂ်ထၢၼ်ႈပေႃးဢမ်ႇမွတ်ႇလႆႈၵွပ်ႈပိူဝ်ႈတုၸရိူၵ်ႈဢပျတ်ႈဢၼ်သူႁဵတ်းၼၼ်ႉဢေႃႈ။-
ထႃႇဝရႃႉၽြႃး၊ မီးဢမိင်ႉၸမ်ႉ၊တူၺ်းလူး။ ၵေႃႉဢၼ်ယူႇၵႃႈတီႈပၢင်ႇႁူၺ်ႈၶူင်ႈႁူၺ်ႈ႟။ မၢၵ်ႇႁိၼ်ဢၼ်မီးၵႃႈၼႂ်းတီႈပၢင်ႇတီႈပဵင်း႟။ ၵဝ်ၶတ်းတႃႉၵၼ်တင်းမႂ်းဢေႃႈ။ သူၸၢင်ႈလၢတ်ႈလႄႈဝႃႈ၊ ‘ၽူႈလႂ်တၵ်းၶီႇသိုၵ်းၸူးႁဝ်းလႆႈ။ ၽူႈလႂ်တၵ်းၶဝ်ႈၵႃႈၼႂ်းတီႈယူႇတီႈသဝ်းႁဝ်းလႆႈ၊’ ဝႃႈၼင်ႇၼႆၼၼ်ႉၶဝ်႟။-
ၵဝ်တၵ်းပၼ်တၢမ်ႇဢပျတ်ႈတီႈသူၸွမ်းၵႃႈၼင်ႇဢၼ်ဢၵျူဝ်းတၢင်းၵမ်တၢင်းၵျၢင်ႉသူမီးၼၼ်ႉဢေႃႈ။ ၵဝ်တၵ်းဢဝ်ၽႆးတုတ်ႇပႅတ်ႈႁေႃၶုၼ်ႁေႃၶမ်းၵႃႈၼႂ်းထိူၼ်ႇပႃႇမႆႉ လႄႈၽႆးၼၼ်ႉတၵ်းမႆႈၵႃႈဢၼ်မီးၵႃႈတီႈလဵပ်ႈႁွပ်ႈမၼ်းၸိူဝ်းၼၼ်ႉဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊မႂ်းလူင်းၵႂႃႇၸူးၵႃႈတီႈႁေႃ၊ၶုၼ်ႁေႃၶမ်း ယုတႃႉ၊ ၼၼ်ႉသေလႄႈဢဝ်ၵႂၢမ်းၼႆႉသင်ႇလၢတ်ႈဝႆႉလႄႈဝႃႈ၊-
ၶုၼ်ႁေႃၶမ်း ယုတႃႉ၊ ဢၼ်ၼင်ႈၵႃႈၼိူဝ်ရႃႇၸႃႉပလၢင်ႇၶုၼ်လူင် တႃႇဝိတ်ႈ၊ တူဝ်မႂ်းဢိၵ်ႇတင်းၶႃႈမႂ်းတင်းလၢႆ၊ဢိၵ်ႇတင်းၵူၼ်းမိူင်းမႂ်းဢၼ်ၶဝ်ႈၵႃႈၼႂ်းၽၵ်းတူဝဵင်းၸိူဝ်းၼႆႉၶဝ်႟။ ဢွၼ်ၵၼ်ထွမ်ႇငိၼ်းၼုၵ်ႈၵပၢတ်ႈ ထႃႇဝရႃႉၽြႃး၊ တႃႉ။-
ထႃႇဝရႃႉၽြႃး၊ မီးဢမိင်ႉၸမ်ႉ၊ “ဢွၼ်ၵၼ်ၸီႇယၢင်ႇၸွမ်းၼင်ႇတြႃးလႄႈတႅပ်းတတ်းသိုဝ်ႈသိုဝ်ႈတေႃႇတေႃႇတႃႉ။ ဢွၼ်ၵၼ်ၵႄႇသႄႇၼုၵ်ႈဢဝ်ၵေႃႉဢၼ်လႆႈၶၢမ်ႇတၢင်းဢၼ်ႁိမ်ႁူင်ႇၼၼ်ႉလွတ်ႈသေၵႃႈၼႂ်းမိုဝ်းၵေႃႉဢၼ်ၼိၵ်ႈၸၢၵ်ႈငႅၼ်းသႄးၼၼ်ႉတႃႉ။ ယႃႇပေဢွၼ်ၵၼ်ႁဵတ်းဢၼ်ဢမ်ႇၸွမ်းၼင်ႇတြႃးသေလႄႈၼိၵ်ႈၸၢၵ်ႈငႅၼ်းသႄးၵေႃႉဢၼ်ပဵၼ်ၶႅၵ်ႇ၊ၵေႃႉဢၼ်ဢမ်ႇမီးပေႃႈမီးမႄႈ၊မႄႈမူၵ်းမႄႈမၢႆႈတင်းလၢႆ၊ယႃႇပေဢွၼ်ၵၼ်ဢဝ်ဢသၢၵ်ႈၶဝ်ၸိူဝ်းဢၼ်ဢမ်ႇမီးဢပျတ်ႈၼၼ်ႉတၢႆၵႃႈတီႈၼႆႈ။-
လွင်ႈမၼ်းၸမ်ႉ၊ပေႃးသူႁဵတ်းမႅၼ်ႈၸွမ်းၵႃႈၼင်ႇဢၼ်မီးဝႆႉၼႂ်းပိင်းၺၢပ်ႈၸဝ်ႈၼႆႉၸိုင်၊ၶုၼ်ႁေႃၶမ်းဢၼ်ၼင်ႈၵႃႈၼိူဝ်ရႃႇၸႃႉပလၢင်ႇၶုၼ်လူင် တႃႇဝိတ်ႈ၊ ဢိၵ်ႇတင်းၶႃႈၶဝ်လႄႈၵူၼ်းဝၢၼ်ႈၵူၼ်းမိူင်းၶဝ်တၵ်းၶီႇလေႃႉမႃႉသိုၵ်း၊တၵ်းၶီႇမႃႉလႄႈဢွၼ်ၵၼ်ၶဝ်ႈၵႃႈၼႂ်းႁူးၽၵ်းတူႁေႃၸဝ်ႈၸိူဝ်းၼႆႉဢေႃႈ။-
ပေႃးဢမ်ႇၼၼ်ပေႃးသူယင်းဢမ်ႇထွမ်ႇဢမ်ႇဢဝ်ဢမိင်ႉၸဝ်ႈၼႆႉလႄႈယူႇၸိုင်၊ၵဝ် ထႃႇဝရႃႉၽြႃး၊ ဢဝ်တူဝ်ၸဝ်ႈၵဝ်ႇတိူင်ႇဝႃႈၵတိသဵတ်ႈၸႃႇလႄႈဝႃႈ၊ႁေႃၸဝ်ႈၼႆႉတၵ်းလႆႈပဵၼ်တီႈဢၼ်သဵတ်ႇၵူၼ်းယဵၼ်ၵူၼ်းဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉလူၺ်ႈလွင်ႈႁေႃၶုၼ်ႁေႃၶမ်းမိူင်း ယုတႃႉ၊ ၸမ်ႉ၊ “ပိၵ်ႉသမ်ႉမႂ်းပဵၼ်ၸိူဝ်ႉၼင်ႇမိူင်း ၵိလတ်ႉ၊ ဢိၵ်ႇတင်းၸိူဝ်ႉၼင်ႇပၢႆၸိၵ်းလွႆ လေႇပၼုၼ်ႇ၊ တီႈၵဝ်သေၵေႃႈ၊ၵဝ်တၵ်းႁႂ်ႈမႂ်းပဵၼ်ထိူၼ်ႇလႅင်ႉဝဵင်းဢၼ်ၵူၼ်းဢမ်ႇယူႇဢမ်ႇသဝ်းၼၼ်ႉဢေႃႈ။-
ၵဝ်တၵ်းပွင်ႁႅၼ်းၶဝ်ၸိူဝ်းဢၼ်ပႃးတႃမၢတ်ႇၼၼ်ႉႁႂ်ႈလႆႈယႃႉၽဵဝ်ႈမႂ်းလႄႈၶဝ်ၼၼ်ႉတၵ်းဢွၼ်ၵၼ်ပွမ်ႈတူၼ်ႈဢႃႇရိတ်ႉဢၼ်လီသေပိူၼ်ႈတီႈမႂ်းၸိူဝ်းၼၼ်ႉလူမ်ႉသေလႄႈဢဝ်ၶျႃးတူၵ်းသႂ်ႇၵႃႈၼႂ်းၽႆးဢေႃႈ။
“ၵူၼ်းမဵဝ်းၼမ်ၼႃႇတၵ်းၵႂႃႇတႃႈပႆတၢင်းၵႂႃႇၵႃႈတီႈႁိမ်းဝဵင်းၼႆႉသေလႄႈၵေႃႉၼိုင်ႈလႄႈၵေႃႉၼိုင်ႈတွင်ႈထၢမ်ၵၼ်လႄႈဝႃႈ၊ ‘ၵွပ်ႈပိူဝ်ႈသင်လႄႈ ထႃႇဝရႃႉၽြႃး၊ ႁဵတ်းၸိူဝ်ႉၼင်ႇၼႆတီႈဝဵင်းလူင်ၼႆႉ၊’ မိူဝ်ႈဢၼ်ဝႃႈၼင်ႇၼႆၸိုင်၊-
ၶဝ်တၵ်းဢွၼ်ၵၼ်ၶိုၼ်းလၢတ်ႈတီႈၵၼ်လႄႈဝႃႈ၊ ‘ၵွပ်ႈပိူဝ်ႈဢၼ်ၶဝ်ၸိူဝ်းၼႆႉၸုၼ်ႉပႅတ်ႈပတိၺိၺ်ႇ ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်သေလႄႈဢွၼ်ၵၼ်ႁဵတ်းဝၢတ်ႈၵူဝ်းၵႂၢႆႇၽြႃးတၢင်ႇသူႇတၢင်ႇပႃးတင်းလၢႆၼၼ်ႉယဝ်ႉ၊’ ” ဝႃႈၼင်ႇၼႆဢေႃႈ။
ယႃႇပေဢွၼ်ၵၼ်ႁွင်ႉႁႆႈလႄႈၶၢင်းၶီၶၢင်းၽၢၼ်ၵွပ်ႈပိူဝ်ႈၵေႃႉဢၼ်တၢႆၼၼ်ႉ။ ဢွၼ်ၵၼ်ႁွင်ႉႁႆႈၵွပ်ႈပိူဝ်ႈၵေႃႉဢၼ်ၵႂႃႇ တၢင်ႇတီႈတၢင်ႇလႅၼ်ၼၼ်ႉတႃႉ။ မၼ်းၼၼ်ႉၵွပ်ႈပိူဝ်ႈဝႃႈ၊ၵမ်းလိုၼ်းဢမ်ႇလႆႈ ၶိုၼ်းမႃး။ ဢမ်ႇလႆႈႁၼ်မိူင်းဢၼ် တူဝ်ၸဝ်ႈၵဝ်ႇၵိူတ်ႇလဵင်ႉမႃးၼၼ်ႉဢေႃႈ။
ၸဝ်ႈထႃႇဝရႃႉၽြႃး၊ မီးဢမိင်ႉလူၺ်ႈလွင်ႈ သႃႇလုမ်ႇ၊ လုၵ်ႈၸၢႆးၶုၼ်လူင် ယူဝ်းသိယႃႉ၊ ဢၼ်ၼင်ႈႁၢင်ႈၼင်ႈႁေႃတၢင်တူဝ်ပေႃႈၸဝ်ႈမၼ်း ယူဝ်းသိယႃႉ၊ လႄႈလႆႈဢွၵ်ႇသေၵႃႈတီႈမိူင်းၼႆႉၵႂႃႇၼၼ်ႉၸမ်ႉ၊ “ၶုၼ်ၼၼ်ႉၵမ်းလိုၼ်းဢမ်ႇလႆႈၶိုၼ်းလႆႈမႃးၵႃႈတီႈမိူင်းၼႆႉ။-
မၼ်းတၵ်းလႆႈတၢႆၵႃႈၼႂ်းမိူင်းတီႈဢၼ်ပိူၼ်ႈတိသိမ်းဢဝ်မၼ်းၵႂႃႇၼၼ်ႉလႄႈၵမ်းလိုၼ်းမၼ်းဢမ်ႇလႆႈၶိုၼ်းႁၼ်မိူင်းၼႆႉထႅင်ႈယဝ်ႉ၊” ဝႃႈၼင်ႇၼႆဢေႃႈ။
ၵေႃႉဢၼ်ဢဝ်လွင်ႈတၢင်းဢၼ်ဢမ်ႇတြႃး တႄႇႁဵတ်းႁိူၼ်းမၼ်းလႄႈဢဝ်လွင်ႈတၢင်း ဢၼ်ဢမ်ႇသိုဝ်ႈဢမ်ႇတေႃႇႁဵတ်းလုၵ်းၶၢၼ်း ႁၢၼ်ႉၼိူဝ်မၼ်းၸိူဝ်းၼၼ်ႉၼၼ်ႉ။ ၵေႃႉဢၼ်ဢမ်ႇပၼ်ၵႃႈပၼ်ၶၼ်မၼ်းလႄႈ ၸႂ်ႉၵိၼ်ၵူၼ်းႁိူၼ်းၸမ်ၵၼ်သေယဝ်ႉ၊ ဢမ်ႇပၼ်ၵႃႈသင်ပုၼ်ႈတၢင်းႁဵတ်းၶဝ်ၼၼ်ႉ။
ၵေႃႉဢၼ်လၢတ်ႈလႄႈဝႃႈ၊ “ၵဝ်တၵ်းႁဵတ်းႁိူၼ်းဢၼ်ယႂ်ႇဢၼ်လူင်၊လုၵ်းႁၢၼ်ႉၼိူဝ် ဢၼ်ၵႂၢင်ႈလီၼၼ်ႉ၊” ဝႃႈၼႆလႄႈ မၼ်းမူင်ႇႁဵတ်းႁူးလၢင်းတဵၼ်သေလႄႈ ဢဝ်မႆႉဢႃႇရိတ်ႉႁဵတ်းၶွပ်ႇမၼ်းသေယဝ်ႉ၊ ဢဝ်တင်းၼမ်ႉယႃလႅင်တႃးဢေႃႈ။ ၶဝ်ၸိူဝ်းၼႆႉမီးဢႃႉမၢင်ႇၵလႃႇဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “မႂ်းဢုပ်ႉပိူင်ႇ ၸၢမ်ႇၸႃးၵွပ်ႈပိူဝ်ႈဢၼ်မႂ်းပိုင်ႈမုၼ်ၵုင်ႇ မႆႉဢႃႇရိတ်ႉၼၼ်ႉႁိုဝ်း။ ပေႃႈၸဝ်ႈမႂ်းၼၼ်ႉလႆႈၵိၼ်လႆႈသူတ်ႉ ဢိမ်ႇဢိမ်ႇတဵမ်တဵမ်ယူႇဢမ်ႇၸႂ်ႈႁိုဝ်း။ မၼ်းၸီႇယၢင်ႇလႄႈတႅပ်းတတ်း ၸွမ်းၼင်ႇတြႃးဢမ်ႇၸႂ်ႈႁိုဝ်း။ မိူဝ်ႈၼၼ်ႉမၼ်းမီးတၢင်းဢၼ်လႆႈလီ လႆႈပဵၼ်ဢေႃႈ။
မၼ်းပႂ်ႉဢမုၶဝ်ၸိူဝ်းဢၼ်ယၢၵ်ႈဢၼ်ၽၢၼ်၊ဢိၵ်ႇတင်းၶဝ်ၸိူဝ်းဢၼ်ၸုတ်ႈဢၼ်လုတ်ႈ ၼၼ်ႉလႄႈၸီႇယၢင်ႇၸွမ်းၼင်ႇတြႃးဢေႃႈ။ မိူဝ်ႈၼၼ်ႉမၼ်းမီးတၢင်းဢၼ်လႆႈလီလႆႈပဵၼ်ဢေႃႈ။ လွင်ႈတၢင်းၼႆႉ ပဵၼ်ဢၵျူဝ်းတၢင်းဢၼ် ႁုၸၵ်းၵဝ်ဢမ်ႇၸႂ်ႈႁိုဝ်း။
မၢၵ်ႇတႃမႂ်းဢိၵ်ႇတင်းႁူဝ်ၸႂ်မႂ်းၸမ်ႉ၊ၼွၵ်ႈသေတၢင်းဢၼ်လေႃးၽႃႉပူၼ်ႉလိူဝ်၊တၢင်းဢၼ် ထွၵ်ႇလိူတ်ႈၵေႃႉဢၼ်ဢမ်ႇမီးဢပျတ်ႈ၊ တၢင်းဢၼ်ၼိၵ်ႈၸၢၵ်ႈငႅၼ်းသႄး၊တၢင်းဢၼ် ႁိမ်ႁူင်ႇၼၼ်ႉဢမ်ႇၸၢင်ႈဝႆႉဢမုတီႈလွင်ႈတၢင်း ဢၼ်လႂ်လႃးလႃး၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ထႃႇဝရႃႉၽြႃး၊ ဢဝ်လွင်ႈ ယေႃးယၵိမ်း၊ ဢၼ်ပဵၼ်လုၵ်ႈၸၢႆး ၶုၼ်လူင် ယူဝ်းသိယႃႉ၊ ၶုၼ်ႁေႃၶမ်းမိူင်း ယုတႃႉ၊ လႄႈမီးဢမိင်ႉၸမ်ႉ၊ “ၶဝ်တၵ်းဢမ်ႇလႆႈဢွၼ်ၵၼ်ႁွင်ႉႁႆႈမိူဝ်ႈမၼ်း တၢႆလႄႈဝႃႈ၊ ‘ပီႈၸၢႆးၵဝ်႟။ ၼွင်ႉၸၢႆးၵဝ်႟၊’ ဝႃႈၼင်ႇၼႆလႄႈ ၶဝ်ဢမ်ႇလႆႈၶၢင်းၶီၶၢင်းၽၢၼ်ပုၼ်ႈမၼ်းလႄႈဝႃႈ၊ ‘ၸဝ်ႈၵဝ်႟။ မုၼ်ၽုင်းၵဝ်႟။’ ဝႃႈၼင်ႇၼႆၼၼ်ႉ။
ၶုၼ်ၼၼ်ႉတၵ်းလႆႈၶၢမ်ႇတၢင်းဢၼ်တိုတ်ႉလၢၵ်ႈလႄႈဢဝ်ဢွၵ်ႇၵႂႃႇၸူးၵႃႈတီႈၼွၵ်ႈၽၵ်းတူ ဝဵင်း ယေႇရုသလႅမ်ႇ၊ သေယဝ်ႉ၊ လႆႈၶၢမ်ႇတၢင်းဢၼ်ၽင်မိူၼ်ၸိူဝ်ႉၼင်ႇ ၽင်မႃႉလီႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵူၼ်းဝဵင်း ယေႇရုသလႅမ်ႇ၊ ၶဝ်႟။ ၶိုၼ်ႈၵႃႈၼိူဝ်လွႆ လေႇပၼုၼ်ႇ၊ သေယဝ်ႉ၊ပၢဝ်ႇသေႃႇတႃႉ။ ႁွင်ႉပၢဝ်ႇၵႃႈၼႂ်းမိူင်း ပႃႇသၢၼ်ႇ၊ တႃႉ။ ယူႇၵႃႈတီႈ ဢႃႇပရိမ်ႇ၊ လႄႈၵိဝ်သႅၼ်ႇတႃႉ။ လွင်ႈမၼ်းၸမ်ႉ၊ၵေႃႉသႄႈမႂ်းၸိူဝ်းၼၼ်ႉ ႁွတ်ႈထိုင်တၢင်းဢၼ်လုဢၼ်လႅဝ်ယဝ်ႉ။
ၵဝ်ပၼ်သတိၼႂ်းမိူဝ်ႈဢၼ်မႂ်းလႆႈလီလႆႈပဵၼ် ၼၼ်ႉလႄႈမႂ်းၶိုၼ်းလၢတ်ႈလႄႈဝႃႈ၊ “ၵဝ်ဢမ်ႇထွမ်ႇဢမ်ႇဢဝ်၊” ဝႃႈၼင်ႇၼႆဢေႃႈ။ မႂ်းယင်းဢမ်ႇထွမ်ႇဢမ်ႇဢဝ်ၵႂၢမ်းၵဝ်ၸႃႉၸဵမ် မိူဝ်ႈဢၼ်မႂ်းယင်းလဵၵ်ႉယင်းဢွၼ်ႇၼၼ်ႉလႄႈ ယူႇမႃးၸိူဝ်ႉၼင်ႇၼၼ်တႃႇသေႇဢေႃႈ။
ၵူၼ်းဢွၼ်ႁူဝ်ဢွၼ်ၵၼ်မႂ်းတင်းလၢႆၼၼ်ႉတၵ်းလႆႈၶၢမ်ႇတၢင်းဢၼ်လူမ်းထူဝ်းပတ်ႉၵႂႃႇလႄႈ ၵေႃႉႁၵ်ႉမႂ်းၸိူဝ်းၼၼ်ႉတၵ်းလႆႈၶၢမ်ႇ တၢင်းဢၼ်တိသိမ်းဢဝ်ၵႂႃႇဢေႃႈ။ မိူဝ်ႈၼၼ်ႉမႂ်းတၵ်းမီးတၢင်းဢၼ်ဢူၵ်း ဢၼ်ဢၢႆလႄႈၸႂ်လုၵွပ်ႈပိူဝ်ႈတုၸရိူၵ်ႈမႂ်း ၵႃႈမီးၼၼ်ႉဢမၢၼ်ႇၶၼ်ပဵၼ်ဢေႃႈ။
ၵေႃႉဢၼ်ၸၢင်ႈယူႇၵႃႈတီႈလွႆ လေႇပလုၼ်ႇ၊ လႄႈႁဵတ်းႁင်းယူႇ ၵႃႈတီႈတူၼ်ႈဢႃႇရိတ်ႉတင်းလၢႆၼႆႉ႟။ ယၢမ်းမိူဝ်ႈဢၼ်မႂ်းလႆႈၶၢမ်ႇဝူၺ်ႇတၼႃႇဢၼ် ၶူပ်းၶိုၼ်ႈၼႃႇမိူၼ်ၸိူဝ်ႉၼင်ႇဢၼ်မႄႈယိင်း လႆႈၶၢမ်ႇဝူၺ်ႇတၼႃႇတၢင်းဢၼ် ၵိူတ်ႇလဵင်ႉလုၵ်ႈၼၼ်ႉၸိုင်၊မႂ်းတၵ်းပဵၼ်လွင်ႈ ဢၼ်လီဢဵတ်းလူၼႃႇလူင်ပႄႇ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵႃႈၼင်ႇဢၼ်ၵဝ်ဢသၢၵ်ႈလိပ်းယူႇၼၼ်ႉပိၵ်ႉသမ်ႉ ၶေႃးၼိ လုၵ်ႈၸၢႆးၶုၼ်လူင် ယေႃးယၵိမ်း၊ ၶုၼ်ႁေႃၶမ်းမိူင်း ယုတႃႉ၊ ၼႆႉပဵၼ်မွင်းၵူၺ်းတၼ်းသိၵ်ႈဢၼ်မီးၵႃႈတီႈမိုဝ်းၶႂႃၵဝ်သေၵေႃႈ ၵဝ်တၵ်းပႄႇမႂ်းပႅတ်ႈဢေႃႈ။-
ၵဝ်တၵ်းဢဝ်မႂ်းဢၢပ်ႈပၼ်ၵႃႈၼႂ်းမိုဝ်းၵေႃႉဢၼ်ၸွမ်းႁႃဢသၢၵ်ႈမႂ်း၊ၵေႃႉဢၼ်မႂ်းၵူဝ်ႁႄၼႃႇလူင်လၢင်၊ၵႃႈၼႂ်းမိုဝ်း ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်းမိူင်း ပႃႇပုလုၼ်ႇ၊ ဢိၵ်ႇတင်းၵူၼ်း ၶႃႇလတေး၊ တင်းလၢႆၼၼ်ႉဢေႃႈ။-
ၵဝ်တၵ်းလိုပ်ႈမႂ်း၊ဢိၵ်ႇတင်းမႄႈမႂ်းဢၼ်ၵိူတ်ႇလဵင်ႉမႂ်းမႃးၼၼ်ႉ၊ဢွၵ်ႇၵႂႃႇၸူးၵႃႈတီႈမိူင်းဢၼ်ဢမ်ႇၸႂ်ႈထႃႇၼႃႉတီႈဢၼ်သူၵိူတ်ႇလဵင်ႉမႃးၼၼ်ႉသေယဝ်ႉ၊သူတၵ်းလႆႈတၢႆၵႃႈတီႈၼၼ်ႈဢေႃႈ။-
ၵမ်းလိုၼ်းၶဝ်ဢမ်ႇလႆႈဢွၼ်ၵၼ်ပွၵ်ႈၶိုၼ်းမႃးၵႃႈတီႈမိူင်းတီႈဢၼ်ၶဝ်ၶႂ်ႈပွၵ်ႈၶိုၼ်းမႃးၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၶေႃးၼိ၊ ၼႆႉပဵၼ်ၸိူဝ်ႉၼင်ႇမေႃႈလိၼ်ဢၼ်တႅၵ်ႇလႄႈဢဝ်ထိမ်ႈပႅတ်ႈၼၼ်ႉႁိုဝ်း။ ပဵၼ်ၶိူင်ႈပိူင်ဢၼ်ၽူႈလႂ်ဢမ်ႇထုၵ်ႇၸႂ်ၵျိူၵ်ႈၸႂ်ၼၼ်ႉႁိုဝ်း။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမၼ်းဢိၵ်ႇတင်းၸိူဝ်ႉၶိူဝ်းမၼ်းလႆႈၶၢမ်ႇတၢင်းဢၼ်လိုပ်ႈဢွၵ်ႇၵႂႃႇၸူးၵႃႈတီႈမိူင်းဢၼ်ၶဝ်ဢမ်ႇႁုၸၵ်းၼၼ်ႉၸိူဝ်ႉၼင်ႇႁိုဝ်။
လိၼ်မိူင်း႟။ လိၼ်မိူင်း႟။ ထွမ်ႇငိၼ်းဢမိင်ႉ ထႃႇဝရႃႉၽြႃး၊ တႃႉ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “တႅမ်ႈမၢႆဝႆႉ လွင်ႈဢၼ်ၵူၼ်းၵေႃႉၼႆႉပဵၼ်ၵေႃႉဢၼ် ဢမ်ႇမီးလုၵ်ႈဢမ်ႇမီးလၢင်း၊ ၵေႃႉဢၼ်ဢမ်ႇလႆႈလီလႆႈပဵၼ်ၸူဝ်ႈ ဢသၢၵ်ႈမၼ်းၼၼ်ႉတႃႉ။ ၵေႃႉဢၼ်ပဵၼ်ၸိူဝ်ႉၶိူဝ်းမၼ်းၼၼ်ႉ ဢမ်ႇလႆႈမီးဢၶႂၢင်ႉဢၼ်လႆႈၼင်ႈၵႃႈၼိူဝ် ရႃႇၸႃႉပလၢင်ႇၶုၼ် တႃႇဝိတ်ႈ၊ ဢိၵ်ႇတင်းဢၶႂၢင်ႉဢၼ်ဢမ်ႇလႆႈဢုပ်ႉပိူင်ႇ ၸၢမ်ႇၸႃးမိူင်း ယုတႃႉ၊ သေၵေႃႉ သေၵူၼ်းဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၶဝ်ၸိူဝ်းဢၼ်လဵင်ႉသူဝ်းထိင်းသူဝ်းဢၼ်ပဵၼ်ၵေႃႉဢၼ်ယႃႉပႅတ်ႈလႄႈႁႂ်ႈသူဝ်းဢၼ်ယၢမ်ႈၵိၼ်ယူႇၵႃႈတီႈပၢင်ႇယိူဝ်ႈၵဝ်တင်းလၢႆမၢၵ်ႇမိူဝ်ၵႂႃႇၼၼ်ႉမီးဢႃႉမၢင်ႇၵလႃႇဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉလူၺ်ႈလွင်ႈၶဝ်ၸိူဝ်းဢၼ်လဵင်ႉသူဝ်းထိင်းသူဝ်းဢၼ်လႆႈလဵင်ႉလူၵူၼ်းၵဝ်တင်းလၢႆၼၼ်ႉၸမ်ႉ၊ “သူႁႂ်ႈၽုင်သူဝ်းၵဝ်မၢၵ်ႇမိူဝ်ၵႂႃႇ၊ႁေႃႈၶဝ်ပႅတ်ႈ၊ဢမ်ႇလူတူၺ်းလုမ်းလႃးၶဝ်လႄႈၵဝ်တၵ်းႁႂ်ႈတုၸရိူၵ်ႈဢပျတ်ႈဢၼ်သူႁဵတ်းၼၼ်ႉတူၵ်းႁွတ်ႈၵႃႈၼိူဝ်သူဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။-
“ၵဝ်တၵ်းႁႂ်ႈၽုင်သူဝ်းဢၼ်ယင်းၵိုတ်းယင်းၵျၢၼ်ႇၼၼ်ႉဢွၵ်ႇသေၵႃႈၼႂ်းမိူင်းၵႃႈမီးဢၼ်ၵဝ်ႁေႃႈၶဝ်ဢွၵ်ႇၸူးၼၼ်ႉမႃးၸုၵၼ်တုမ်ၵၼ်လႄႈသမ်ႉတၵ်းဢဝ်ၶဝ်ၶိုၼ်းမႃးၸူးၵႃႈတီႈၶွၵ်ႈသူဝ်းတီႈယူႇၶဝ်ၼၼ်ႉဢေႃႈ။ ၶဝ်ၵေႃႈတၵ်းဢွၼ်ၵၼ်ၵိူတ်ႇလဵင်ႉလုၵ်ႈလဵင်ႉလၢင်းလႄႈၼမ်ၵိုၼ်းမႃးဢေႃႈ။-
ၵဝ်တၵ်းၶၢၼ်းၶဝ်ၸိူဝ်းဢၼ်လဵင်ႉသူဝ်းထိင်းသူဝ်းဢၼ်လဵင်ႉလူၶဝ်ၼၼ်ႉဝႆႉၵႃႈၼိူဝ်ၶဝ်လႄႈၶဝ်ၼၼ်ႉၵမ်းလိုၼ်းဢမ်ႇလႆႈၵူဝ်လႆႈႁႄ။ ဢမ်ႇလႆႈတူၵ်းၸႂ်လႂ်တိုၼ်ႇ။ ဢမ်ႇလႆႈၶၢမ်ႇတၢင်းဢၼ်ႁူင်ႈၵႂႃႇႁၢႆၵႂႃႇ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “မိုဝ်ႉဝၼ်းဢၼ်ၵဝ်တၵ်းႁႂ်ႈယွတ်ႈဢၼ်သိုဝ်ႈတေႃႇတႅၵ်ႇဢွၵ်ႇပုၼ်ႈ တႃႇဝိတ်ႈ၊ ၼၼ်ႉတၵ်းႁွတ်ႈထိုင်ဢေႃႈ။ မၼ်းၼၼ်ႉတၵ်းႁဵတ်းၶုၼ်ႁေႃၶမ်းလႄႈဢဝ်တင်းၺၢၼ်ႇသေယဝ်ႉ၊ၸီႇယၢင်ႇတႅပ်းတတ်းၸွမ်းတၢင်းဢၼ်ႁဵတ်းၸွမ်းၼင်ႇတြႃး၊ဢိၵ်ႇတင်းတၢင်းဢၼ်သိုဝ်ႈတေႃႇၵႃႈၼိူဝ်လိၼ်မိူင်းၼႆႉၼၼ်ႉဢေႃႈ။-
ၼႂ်းၸူဝ်ႈပၢၼ်မၼ်းၼၼ်ႉမိူင်း ယုတႃႉ၊ တၵ်းႁွတ်ႈထိုင်တၢင်းဢၼ်ၵႄႇသႄႇၶျွတ်ႈဢဝ်လႄႈ၊မိူင်း ဢိသရေး၊ ၵေႃႈတၵ်းလႆႈယူႇၼိမ်ၼိမ်လီလီဢေႃႈ။ ၼႃႇမႃႉၸိုဝ်ႈသဵင်ဢၼ်မၼ်းတၵ်းလႆႈၶၢမ်ႇတၢင်းဢၼ်ႁွင်ႉႁဵၵ်ႈၼၼ်ႉၸမ်ႉ၊ ‘ ထႃႇဝရႃႉၽြႃး၊ ပဵၼ်တၢင်းဢၼ်သိုဝ်ႈဢၼ်တေႃႇပုၼ်ႈႁဝ်းဢေႃႈ၊’ ” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ထႃႇဝရႃႉၽြႃး၊ မီးဢမိင်ႉၸမ်ႉ၊ “မိုဝ်ႉဝၼ်းဢၼ်တေမႃးထိုင်မိူဝ်ႈၵူၼ်းၶဝ်ဢမ်ႇလႆႈတိူင်ႇဝႃႈထႅင်ႈလႄႈဝႃႈ၊ ‘ၵႃႈၼင်ႇဢၼ် ထႃႇဝရႃႉၽြႃး၊ ဢၼ်ၼုၵ်ႈဢဝ်ၵူၼ်းမဵဝ်း ဢိသရေး၊ တင်းလၢႆဢွၵ်ႇသေၵႃႈၼႂ်းမိူင်း ဢေးၵျိပ်ႉ၊ မႃးၼၼ်ႉယင်းဢသၢၵ်ႈလိပ်းယူႇၼၼ်ႉ၊’ ဝႃႈၼင်ႇၼႆလႄႈ၊-
တၵ်းလႆႈတိူင်ႇဝႃႈၵတိသဵတ်ႈၸႃႇလႄႈဝႃႈ၊ ‘ၵႃႈၼင်ႇဢၼ် ထႃႇဝရႃႉၽြႃး၊ ဢၼ်ဢဝ်မဵဝ်းၸိူဝ်ႉၶိူဝ်း ဢိသရေး၊ ဢွၵ်ႇသေၵႃႈတီႈမိူင်းၽၢႆႇတၢင်းႁွင်ႇဢိၵ်ႇတင်းဢွၵ်ႇသေမိူင်းတီႈဢၼ်မၼ်းၸဝ်ႈလိုပ်ႈႁႂ်ႈၶဝ်ၵႂႃႇယူႇၼၼ်ႉ၊’ ၶဝ်တိူင်ႇဝႃႈၸိူဝ်ႉၼင်ႇၼႆ ၶဝ်တင်းမူတ်းသမ်ႉတေလႆႈဢွၼ်ၵၼ်ၶိုၼ်းလႆႈယူႇၵႃႈၼႂ်းမိူင်းတီႈယူႇၶဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵႂၢမ်းဢၼ်လၢတ်ႈလူၺ်ႈလွင်ႈပရေႃးၽႅတ်ႈ တင်းလၢႆဝႃႈၸမ်ႉ၊ၵွပ်ႈပိူဝ်ႈ ထႃႇဝရႃႉၽြႃး၊ ဢိၵ်ႇတင်း ၵွပ်ႈပိူဝ်ႈၵႂၢမ်းဢၼ်မူတ်းၸၢင်ႇမၼ်းၸဝ်ႈ ၼၼ်ႉလႄႈႁူဝ်ၸႂ်ၵဝ်မီးတၢင်းဢၼ် တႅၵ်ႇလႅဝ်ယူႇဢေႃႈ။ လုပ်ႇၵဝ်ၵႃႈမီးဢွၼ်ၵၼ်သၼ်ႇဝႆလႄႈ ၵဝ်ပဵၼ်မိူၼ်ၸိူဝ်ႉၼင်ႇၵေႃႉဢၼ်မဝ်းလဝ်ႈ၊ ဢိၵ်ႇတင်းၵေႃႉဢၼ်ၼမ်ႉၸပိတ်ႉ ပႄႉၼႅင်ႇၼၼ်ႉဢေႃႈ။
လွင်ႈမၼ်းၸမ်ႉ၊မိူင်းၼႆႉမီးတၢင်းဢၼ်တဵမ်ဝႆႉ တင်းၶဝ်ၸိူဝ်းဢၼ်ႁဵတ်းမေႇထုင်ႇဢမ်ႇတြႃး ၼၼ်ႉလႄႈမိူင်းၼႆႉလႆႈမီးတၢင်းဢၼ် ၶၢင်းၶီၶၢင်းၽၢၼ်ယူႇ၊ ၵွပ်ႈပိူဝ်ႈတၢင်းဢၼ်ၵိၼ်ႇဢၼ်ဝႃႈဢေႃႈ။ တီႈဢၼ်တူဝ်သတ်းယၢမ်ႈၵိၼ်ယူႇၵႃႈတီႈထိူၼ်ႇ တီႈၶိူဝ်းၸိူဝ်းၼၼ်ႉၵေႃႈယူတ်းႁႅင်ႈၵႂႃႇဢေႃႈ။ သဵၼ်ႈတၢင်းဢၼ်ၶဝ်ၵႂႃႇၶဝ်ၸွမ်းၼၼ်ႉ ပဵၼ်ဢၼ်ႁၢႆႉဢၼ်ယုတ်ႈလႄႈ ဢႃႇၼႃႇတၼ်းၶူဝ်းၶဝ်ဢမ်ႇၸၢင်ႈယူႇ ၽၢႆႇတြႃးဢၼ်သိုဝ်ႈတေႃႇ။
“ပရေႃးၽႅတ်ႈ ဢိၵ်ႇတင်းယဵၸ်ႈပရေႃးႁဵၵ်ႈ တင်းသွင်မဵဝ်းၼၼ်ႉဢွၼ်ၵၼ်ႁဵတ်းဢမ်ႇ ရူဝ်ႇသေႇၵူဝ်ယမ် ထႃႇဝရႃႉၽြႃး၊ ယဝ်ႉ။ တေႃႈၵႃႈ၊ၵႃႈၼႂ်းႁိူၼ်းၵဝ်ၼၼ်ႉ၊ၵဝ်ယင်း ထူပ်းႁၼ်လွင်ႈတၢင်းဢၼ်ႁၢႆႉဢၼ်မိူၵ်ႈ ဢၼ်ၶဝ်ႁဵတ်းၼၼ်ႉယဝ်ႉ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
“ပိူဝ်ႈၼႆလႄႈသဵၼ်ႈတၢင်းဢၼ်ၶဝ်ၵႂႃႇၶဝ်ၸွမ်းၼၼ်ႉတၵ်းပဵၼ်ၸိူဝ်ႉၼင်ႇသဵၼ်ႈတၢင်းဢၼ် မိုၼ်ႈၵႃႈၼႂ်းလပ်းသိင်ႇၼၼ်ႉလႄႈ ၶဝ်ၼၼ်ႉတၵ်းလႆႈဢွၼ်ၵၼ်ၶၢမ်ႇ တၢင်းဢၼ်ဢီးလႄႈလူမ်ႉဢေႃႈ။ လွင်ႈမၼ်းၸမ်ႉ၊ၵဝ်တၵ်းႁႂ်ႈၽေးဢုပၢတ်ႈ ႁွတ်ႈထိုင်ၵႃႈၼိူဝ်ၶဝ်ၼႂ်းၶူပ်ႇပီဢၼ်လႆႈ ၶၢမ်ႇတၢင်းဢၼ်ပၼ်တၢမ်ႇၼၼ်ႉဢေႃႈ။” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ၵဝ်ႁၼ်သၽေႃးဢၼ်မိူၵ်ႈၵႃႈၼႂ်းပရေႃးၽႅတ်ႈဝဵင်း သမႃႇရိ၊ ၸိူဝ်းၼၼ်ႉယဝ်ႉ၊ ၶဝ်ၼၼ်ႉဢိင် ၽြႃးပႃႇလႃႉ၊ သေလႄႈ ႁဵတ်းပရေႃးၽႅတ်ႈသေယဝ်ႉ၊ ဢွၼ်ၵၼ်ႁဵတ်းႁႂ်ႈၵူၼ်းၵဝ်မဵဝ်း ဢိသရေး၊ ၽိတ်းပိူင်ႈယဝ်ႉ။
ၵႃႈၼႂ်းပရေႃးၽႅတ်ႈဝဵင်း ယေႇရုသလႅမ်ႇ၊ ၸိူဝ်းၼၼ်ႉၵေႃႈၵဝ်ႁၼ်သၽေႃးဢၼ် လီႁင်ႈဢဵတ်ႇသဵတ်ႇၶဝ်ယဝ်ႉ။ ၶဝ်ၼၼ်ႉႁဵတ်းမေႇထုင်ႇဢၼ်ဢမ်ႇတြႃးယူႇ၊ ယၢင်ႈၸွမ်းပႆၸွမ်းမုသႃႇယူႇလႄႈ ၸၢင်ႈပၼ်ႁႅင်းတီႈမိုဝ်းၶဝ်ၸိူဝ်းဢၼ် ႁဵတ်းႁၢႆႉႁဵတ်းမိူၵ်ႈၼၼ်ႉ၊ ထၢၼ်ႈပေႃးၽူႈလႂ်သေၵေႃႉသေၵူၼ်း ဢမ်ႇၸုၼ်ႉပႅတ်ႈတၢင်းဢၼ်ႁၢႆႉဢၼ်မိူၵ်ႈ ဢၼ်ၶဝ်ႁဵတ်းၼၼ်ႉဢေႃႈ။ ၶဝ်ၵႃႈမီးၼၼ်ႉပဵၼ်ၸိူဝ်ႉၼင်ႇၵူၼ်းဝဵင်း သေႃးတုမ်ႇ၊ လႄႈၵူၼ်းဝဵင်းတင်းလၢႆၸမ်ႉ၊ ပဵၼ်မိူၼ်ၸိူဝ်ႉၼင်ႇၵူၼ်းဝဵင်း ၵေႃးမေႃးရႃႉ၊ ၼၼ်ႉဢေႃႈ။
ပိူဝ်ႈၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉလူၺ်ႈလွင်ႈပရေႃးၽႅတ်ႈၸိူဝ်းၼၼ်ႉၸမ်ႉ၊ “ၵဝ်တၵ်းဢဝ်မႂ်ဢၼ်ၶူမ်ၼႃႇလဵင်ႉလူၶဝ်လႄႈ ၶဝ်တၵ်းသူတ်ႉၵိၼ်ၼမ်ႉဢၼ်မီးၵွင်ႉ မီးငူၼ်ႉၼၼ်ႉဢေႃႈ။ တၢင်းဢၼ်ႁဵတ်းဢမ်ႇရူဝ်ႇသေႇၵူဝ်ယမ်ဢၼ် မီးၵႃႈတီႈပရေႃးၽႅတ်ႈဝဵင်း ယေႇရုသလႅမ်ႇ၊ ၸိူဝ်းၼၼ်ႉလႆႈဢွၵ်ႇမႃးလႄႈၸွတ်ႇတူဝ်ႈၵႂႃႇ တင်းမိူင်းယဝ်ႉ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ “ယႃႇပေဢွၼ်ၵၼ်ထွမ်ႇဢဝ်ၵႂၢမ်းပရေႃးၽႅတ်ႈဢၼ်ႁေႃးလၢတ်ႈတီႈသူၼၼ်ႉ၊ၶဝ်ၼၼ်ႉၸၢင်ႈႁေႃးလၢတ်ႈလွင်ႈတၢင်းဢၼ်လၢႆလၢႆလွၵ်ႇလွၵ်ႇတီႈသူဢေႃႈ။ ၶဝ်ယင်းဢမ်ႇႁေႃးလၢတ်ႈၸွမ်းၵႂၢမ်းဢၼ်ဢွၵ်ႇသူပ်း ထႃႇဝရႃႉၽြႃး၊ ၼၼ်ႉလႄႈၸၢင်ႈဢွၼ်ၵၼ်ႁေႃးလၢတ်ႈၵႂၢမ်းရူႇပႃႇရူင်ႇႁူဝ်ၸႂ်ၶဝ်ဢေႃႈ။-
ပရေႃးၽႅတ်ႈၸိူဝ်းၼၼ်ႉၸၢင်ႈဢွၼ်ၵၼ်ႁေႃးလၢတ်ႈတီႈၶဝ်ၸိူဝ်းဢၼ်ႁဵတ်းဢမ်ႇပေႃးၼင်ႇႁိုဝ်တီႈၼုၵ်ႈၵပၢတ်ႈ ထႃႇဝရႃႉၽြႃး၊ လႄႈဝႃႈ၊ ‘သူတၵ်းမီးတၢင်းဢၼ်ၼိမ်ဢၼ်လီဢေႃႈ၊’ ဝႃႈၼင်ႇၼႆဢေႃႈ။ ၶဝ်ၸၢင်ႈႁေႃးလၢတ်ႈတီႈၵူၼ်းၸိူဝ်းဢၼ်ၸွမ်းသၽေႃးတၢင်းဢၼ်ႁူဝ်ၸႂ်တူဝ်ၸဝ်ႈၵဝ်ႇၵႅၼ်ႇၶႅင်ၼၼ်ႉလႄႈဝႃႈ၊ ‘သူဢမ်ႇလႆႈထူပ်းၽေးဢုပၢတ်ႈ၊’ ” ဝႃႈၼင်ႇၼႆဢေႃႈ။
ၽူႈလႂ်ႁဵတ်းတၢင်းဢၼ်တိူင်ႇပၢင်ႇလူၺ်ႈၵၼ်တင်း ထႃႇဝရႃႉၽြႃး၊ ႁႂ်ႈလႆႈႁုႁၼ်လႄႈငိၼ်းၼုၵ်ႈၵပၢတ်ႈမၼ်းၸဝ်ႈ။ ၽူႈလႂ်ပႃးၸႂ်ပႃးၶေႃးလႄႈထွမ်ႇငိၼ်းဢဝ်ၼုၵ်ႈၵပၢတ်ႈမၼ်းၸဝ်ႈ။-
တူၺ်းလူး။ လူမ်းၽိဝ်ႁုင် ထႃႇဝရႃႉၽြႃး၊ ဢၼ်ဝႃႈ၊တေႃးသႃႉမၼ်းၸဝ်ႈၼၼ်ႉဢွၵ်ႇမႃးလႄႈပဵၼ်လူမ်းၽိဝ်ႁုင်ဢၼ်ပၼ်ႇၵၢဝ်ႉပတ်ႉထူဝ်းၼၼ်ႉဢေႃႈ။ တၵ်းပတ်ႉထူဝ်းသႂ်ႇၵႃႈၼိူဝ်ႁူဝ်ၶဝ်ၸိူဝ်းဢၼ်ဢမ်ႇတြႃးၼၼ်ႉႁႅင်းယႂ်ႇၼႃႇလူင်လၢင်ဢေႃႈ။-
တၢင်းၸႂ်မႆႈၶႂ်ႈၸႃႉ ထႃႇဝရႃႉၽြႃး၊ တၵ်းဢမ်ႇဝၢႆႇဢမ်ႇၶိုၼ်းတေႃႇထိုင်ႁွတ်ႈတၢင်းၵျၢမ်ႇတၢင်းပွင်ဢၼ်မီးၵႃႈၼႂ်းၸႂ်မၼ်းၸဝ်ႈလႆႈပျေႉၸုမ်ႇၼၼ်ႉဢေႃႈ။ ၶိင်ႇမိုဝ်ႉဝၼ်းလိုၼ်းၼၼ်ႉသူတၵ်းႁုၸႅင်ႈလီလီငၢမ်းငၢမ်းဢေႃႈ။
“ပရေႃးၽႅတ်ႈ ၸိူဝ်းၼၼ်ႉၵဝ်ယင်းဢမ်ႇပွႆႇၸႂ်ႉလႄႈၶဝ်ဢွၼ်ၵၼ်ၶုၼ်ႇလႅၼ်ႈယဝ်ႉ။ ၵဝ်ယင်းဢမ်ႇသင်ႇလၢတ်ႈဝႆႉတီႈၶဝ်လႄႈၶဝ်ဢွၼ်ၵၼ်ႁေႃးလၢတ်ႈယဝ်ႉ။-
ပေႃးၶဝ်ႁဵတ်းၵေႃႉဢၼ်တိူင်ႇပၢင်ႇႁူမ်ႈလူၺ်ႈၵၼ်တင်းၵဝ်ၸိုင်၊ၶဝ်တၵ်းႁႂ်ႈၵူၼ်းၵဝ်တင်းလၢႆလႆႈငိၼ်းၵႂၢမ်းၵဝ်လႄႈႁႂ်ႈၵူၼ်းၵဝ်ဝႄႈပိူင်ႈသေၵႃႈတီႈသဵၼ်ႈတၢင်းဢၼ်ဢမ်ႇတြႃးၶဝ်၊ဢိၵ်ႇတင်းဝႄႈပိူင်ႈသေၵႃႈတီႈတၢင်းၵမ်တၢင်းၵျၢင်ႉဢၼ်ဢမ်ႇလီဢမ်ႇငၢမ်းၶဝ်ၼၼ်ႉယဝ်ႉ။
“ၵဝ်ပဵၼ်ၽြႃးဢၼ်ယူႇၸမ်ၵူၺ်းႁိုဝ်း။ ၵႃႈတီႈဢၼ်ၵႆၵေႃႈပဵၼ်ၽြႃးယူႇဢမ်ႇၸႂ်ႈႁိုဝ်း။ ဝႃႈၼင်ႇၼႆလႄႈ ထႃႇဝရႃႉၽြႃး၊ ထၢမ်ဢေႃႈ။-
ၽူႈလႂ်တဵတ်ႇမႅပ်းယူႇၵႃႈတီႈဢၼ်သိူင်ႇဢၼ်လပ်ႉၼၼ်ႉႁႂ်ႈၵဝ်ထၢၼ်ႈပေႃးဢမ်ႇႁၼ်မၼ်းလႆႈ၊ဝႃႈၼင်ႇၼႆလႄႈ ထႃႇဝရႃႉၽြႃး၊ ထၢမ်ဢေႃႈ။ ၵဝ်ယူႇၸွတ်ႇတူဝ်ႈၵႂႃႇၵႃႈၼိူဝ်ၽႃႉၵၢင်ႁၢဝ်၊ဢိၵ်ႇတင်းၵႃႈၼိူဝ်လိၼ်မိူင်းယူႇဢမ်ႇၸႂ်ႈႁိုဝ်း။ ဝႃႈၼင်ႇၼႆလႄႈ ထႃႇဝရႃႉၽြႃး၊ ထၢမ်ဢေႃႈ။-
ၵဝ်လႆႈငိၼ်းၵႂၢမ်းပရေႃးၽႅတ်ႈဢၼ်ဢိင်ၼႃႇမႃႉၸိုဝ်ႈသဵင်ၵဝ်သေလႄႈဢဝ်ၵႂၢမ်းမုသႃႇႁေႃးလၢတ်ႈလႄႈဝႃႈ၊ ‘ၵဝ်ၼွၼ်းၽၼ်ႁၼ်ယဝ်ႉ၊ၵဝ်ၼွၼ်းၽၼ်ႁၼ်ယဝ်ႉ၊’ ဝႃႈၼင်ႇၼႆယဝ်ႉ။-
ပရေႃးၽႅတ်ႈဢၼ်ၸၢင်ႈလၢတ်ႈၵႂၢမ်းမုသႃႇ၊ဢၼ်ၸၢင်ႈႁေႃးလၢတ်ႈၸွမ်းၵႃႈၼင်ႇဢၼ်ႁူဝ်ၸႂ်ၶဝ်ပႅတ်ႉလႅၼ်ၼၼ်ႉတၵ်းဢွၼ်ၵၼ်ၵျၢမ်ႇပွင်ၸိူဝ်ႉၼင်ႇၼႆယူႇၶိင်ႇၵႃႇလႃႉႁိုင်ၵႃႈႁိုဝ်။-
ၶဝ်မီးတၢင်းၵျၢမ်ႇတၢင်းပွင်ဢၼ်တၵ်းႁႂ်ႈၵူၼ်းၵဝ်တင်းလၢႆလူင်လိုမ်းၼႃႇမႃႉၸိုဝ်ႈသဵင်ၵဝ် ၵွပ်ႈပိူဝ်ႈတၢင်းဢၼ်ၼွၼ်းၽၼ်ႁၼ်ဢၼ်ၵေႃႉၼိုင်ႈလႄႈၵေႃႉၼိုင်ႈ ၸၢင်ႈလၢတ်ႈတီႈၵူၼ်းႁိူၼ်းၸမ်ၵၼ်ၼၼ်ႉမိူၼ်ၸိူဝ်ႉၼင်ႇဢၼ်ပူႇၶဝ်မွၼ်ႇၶဝ်လူင်လိုမ်းၼႃႇမႃႉၸိုဝ်ႈသဵင်ၵဝ်ၵွပ်ႈပိူဝ်ႈ ၽြႃးပႃႇလႃႉ၊ ၼၼ်ႉဢေႃႈ။-
ႁႂ်ႈပရေႃးၽႅတ်ႈဢၼ်မီးတၢင်းဢၼ်ၼွၼ်းၽၼ်ႁၼ်ၼၼ်ႉလၢတ်ႈၵႂၢမ်းဢၼ်ၼွၼ်းၽၼ်ႁၼ်ၼၼ်ႉသေၵမ်း။ ႁႂ်ႈၵေႃႉဢၼ်လႆႈၶၢမ်ႇဢဝ်ၼုၵ်ႈၵပၢတ်ႈၵဝ်ၼၼ်ႉႁေႃးလၢတ်ႈၵႂၢမ်းၼုၵ်ႈၵပၢတ်ႈၵဝ်မၢၼ်ႇမၢၼ်ႇမႅၼ်ႈမႅၼ်ႈသေၵမ်း။ ၵႅပ်ႇတင်းၶဝ်ႈသၢၼ်တႅၵ်ႈၼိူင်းၵၼ်လႆႈၸိူဝ်ႉၼင်ႇႁိုဝ်၊ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။-
ၼုၵ်ႈၵပၢတ်ႈၵဝ်ပဵၼ်မိူၼ်ၸိူဝ်ႉၼင်ႇၽႆး၊ဢိၵ်ႇတင်းပဵၼ်မိူၼ်ၸိူဝ်ႉၼင်ႇၶွၼ်ႉလဵၵ်းဢၼ်ပေႃႉထုပ်ႉမၢၵ်ႇႁိၼ်ႁႂ်ႈလႅဝ်ၼၼ်ႉဢမ်ႇၸႂ်ႈႁိုဝ်း၊ဝႃႈၼင်ႇၼႆလႄႈ ထႃႇဝရႃႉၽြႃး၊ ထၢမ်ဢေႃႈ။-
ပိူဝ်ႈၼႆလႄႈၵဝ်တၵ်းႁဵတ်းၶတ်းၵၼ်တင်းပရေႃးၽႅတ်ႈ ဢၼ်လၵ်ႉဢဝ်ၵႂၢမ်းၵဝ်တီႈပရေႃးၽႅတ်ႈတၢင်ႇၵေႃႉၼင်ႇၵၼ်ၵၼ်ၼၼ်ႉဢေႃႈ။ ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။-
တူၺ်းလူး။ ၵဝ်တၵ်းႁဵတ်းၶတ်းၵၼ်တင်းပရေႃးၽႅတ်ႈဢၼ်ဢဝ်သူပ်းဢဝ်လိၼ်ႉၶဝ်သေလႄႈ၊ ‘မၼ်းၸဝ်ႈမီးဢမိင်ႉယဝ်ႉ၊’ ဝႃႈၼင်ႇၼႆၼၼ်ႉၸိူဝ်းၼၼ်ႉဢေႃႈ၊ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။-
ၵဝ်တၵ်းႁဵတ်းၶတ်းၵၼ်တင်းပရေႃးၽႅတ်ႈဢၼ်ႁေႃးလၢတ်ႈတၢင်းဢၼ်ၼွၼ်းၽၼ်ႁၼ်ဢၼ်ဢမ်ႇၸိုဝ်ႈဢမ်ႇၸႂ်ႈလႄႈဢဝ်တင်းၵႂၢမ်းမုသႃႇ၊ဢိၵ်ႇတင်းၵႂၢမ်းဢၼ်လၢႆလၢႆဢမ်ႇပွင်ႇလွင်ႈၵႃႈသင်၊ႁႂ်ႈၵူၼ်းၵဝ်တင်းလၢႆ ၽိတ်းပိူင်ႈၼၼ်ႉၸိူဝ်းၼၼ်ႉဢေႃႈ။ ၵဝ်ဢမ်ႇပွႆႇၸႂ်ႉၶဝ်၊ၵဝ်ဢမ်ႇသင်ႇလၢတ်ႈဝႆႉတီႈၶဝ်လႄႈၶဝ်တၵ်းဢမ်ႇပဵၼ်ဢၵျူဝ်းတီႈၵူၼ်းမဵဝ်းၼႆႉ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
“ပဵၼ်ၵူၼ်းမဵဝ်းၼႆႉသေဢမ်ႇဝႃႈ၊ပဵၼ်ပရေႃးၽႅတ်ႈသေဢမ်ႇဝႃႈ၊ပဵၼ်ယဵၸ်ႈပရေႃးႁဵၵ်ႈသေဢမ်ႇဝႃႈ၊ပေႃးသေၵေႃႉသေၵူၼ်းထၢမ်တီႈမႂ်းလႄႈဝႃႈ၊ ‘ၼုၵ်ႈၵပၢတ်ႈဢၼ်ၼၵ်းၼႂ်းၸႂ် ထႃႇဝရႃႉၽြႃး၊ ၼၼ်ႉပဵၼ်ၸိူဝ်ႉၼင်ႇႁိုဝ်၊’ ဝႃႈၼင်ႇၼႆၸိုင်၊မႂ်းတၵ်းလႆႈၶိုၼ်းလၢတ်ႈလႄႈဝႃႈ၊ ‘သူပဵၼ်ၶူဝ်းဢၼ်ၼၵ်းၵႃႈတီႈ ထႃႇဝရႃႉၽြႃး၊ လႄႈမၼ်းၸဝ်ႈလၢတ်ႈဝႃႈ၊ၵဝ်တၵ်းၸုၼ်ႉပႅတ်ႈသူဢေႃႈ၊ဝႃႈၼင်ႇၼႆယဝ်ႉ။’ ဝႃႈၼင်ႇၼႆဢေႃႈ။-
ပေႃးပရေႃးၽႅတ်ႈဢမ်ႇၼၼ်ယဵၸ်ႈပရေႃးႁဵၵ်ႈ၊ဢမ်ႇၼၼ်ၵူၼ်းသေၵေႃႉၵေႃႉလၢတ်ႈလႄႈဝႃႈ၊ ‘ၼုၵ်ႈၵပၢတ်ႈဢၼ်ၼၵ်းၼႂ်းၸႂ် ထႃႇဝရႃႉၽြႃး၊’ ဝႃႈၼင်ႇၼႆၼၼ်ႉၸိုင်၊ၵဝ်တၵ်းပၼ်တၢမ်ႇတီႈၶဝ်၊ဢိၵ်ႇတင်းတီႈၵူၼ်းႁိူၼ်းၵူၼ်းယေးၶဝ်ဢေႃႈ။-
သူၵူႈၵေႃႉၵူႈၵူၼ်းတီႈၵူၼ်းႁိူၼ်းၸမ်ၵၼ်၊တီႈပီႈၼွင်ႉၵၼ်ၵေႃႉၼိုင်ႈလႄႈၵေႃႉၼိုင်ႈၼင်ႇၵၼ်ၵၼ်ႁႂ်ႈတွင်ႈထၢမ်ၵၼ်လႄႈဝႃႈ၊ ‘ ထႃႇဝရႃႉၽြႃး၊ ၶိုၼ်းလၢတ်ႈၸိူဝ်ႉၼင်ႇႁိုဝ်ယဝ်ႉ။ ထႃႇဝရႃႉၽြႃး၊ မီးဢမိင်ႉၸိူဝ်ႉၼင်ႇႁိုဝ်ယဝ်ႉ၊’ ဝႃႈၼင်ႇၼႆဢေႃႈ။-
ၵမ်းလိုၼ်းယႃႇပေလၢတ်ႈလႄႈဝႃႈ၊ ‘ၼုၵ်ႈၵပၢတ်ႈဢၼ်ၼၵ်းၼႂ်းၸႂ် ထႃႇဝရႃႉၽြႃး၊ ’ ဝႃႈၼႆၼၼ်ႉ။ ၵႂၢမ်းၵူႈၵေႃႉၵူႈၵူၼ်းၼၼ်ႉတၵ်းပဵၼ်ၵႂၢမ်းဢၼ်ၼၵ်းၼႂ်းတူဝ်ၶဝ်ၵူၺ်းဢေႃႈ။ လွင်ႈမၼ်းၸမ်ႉ၊သူဢွၼ်ၵၼ်ယႃႉပႅတ်ႈၵႂၢမ်းၽြႃးဢၼ်ဢသၢၵ်ႈလိပ်းယူႇဢၼ်ဝႃႈ၊ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈႁဝ်းၼၼ်ႉယဝ်ႉ။-
မႂ်းတၵ်းလႆႈတွင်ႈထၢမ်တီႈပရေႃးၽႅတ်ႈ လႄႈဝႃႈ၊ ‘ ထႃႇဝရႃႉၽြႃး၊ ၶိုၼ်းလၢတ်ႈၸိူဝ်ႉၼင်ႇႁိုဝ်တီႈမႂ်းယဝ်ႉ၊ ထႃႇဝရႃႉၽြႃး၊ မီးဢမိင်ႉၸိူဝ်ႉၼင်ႇႁိုဝ်ယဝ်ႉ၊’ ဝႃႈၼင်ႇၼႆဢေႃႈ။-
ပေႃးသူဢွၼ်ၵၼ်လၢတ်ႈလႄႈဝႃႈ၊ ‘ၼုၵ်ႈၵပၢတ်ႈဢၼ်ၼၵ်းၼႂ်းၸႂ် ထႃႇဝရႃႉၽြႃး၊ ’ ဝႃႈၼႆၼၼ်ႉ၊ပိၵ်ႉသမ်ႉၵဝ်ပိင်းၺၢပ်ႈဝႆႉ၊ယႃႇႁႂ်ႈသူလၢတ်ႈလႄႈဝႃႈ၊ ‘ၼုၵ်ႈၵပၢတ်ႈဢၼ်ၼၵ်းၼႂ်းၸႂ် ထႃႇဝရႃႉၽြႃး၊’ ဝႃႈၼင်ႇၼႆသေၵေႃႈ၊ၵွပ်ႈပိူဝ်ႈဢၼ်သူဢွၼ်ၵၼ်ၸႂ်ႉၵႂၢမ်းဢၼ်လၢတ်ႈလႄႈဝႃႈ၊ ‘ၼုၵ်ႈၵပၢတ်ႈဢၼ်ၼၵ်းၼႂ်းၸႂ် ထႃႇဝရႃႉၽြႃး၊ မီးယဝ်ႉ၊’ ဝႃႈၼင်ႇၼႆလႄႈ၊-
ၵဝ်တၵ်းၵွပ်ႇဢဝ်သူ၊ဢိၵ်ႇတင်းဝဵင်းဢၼ်ပၼ်တီႈသူ၊ဢိၵ်ႇတင်းပၼ်တီႈပူႇမွၼ်ႇသူတင်းသဵင်ႈတင်းမူတ်းၼၼ်ႉတၵ်းဢဝ်ထိမ်ႈပႅတ်ႈႁႂ်ႈၵႆသေၵႃႈတီႈၽၢႆႇၼႃႈၵဝ်ဢေႃႈ။-
ၵဝ်တၵ်းႁႂ်ႈတၢင်းဢၼ်သႄႉသွမ်း၊ဢိၵ်ႇတင်းတၢင်းဢၼ်ဢူၵ်းဢၢႆ၊သိုပ်ႇတၢမ်ယူႇတႃႇသေႇဢၼ်ဢမ်ႇလူင်လႆႈလိုမ်းလႆႈၼၼ်ႉတူၵ်းႁွတ်ႈၵႃႈၼိူဝ်သူဢေႃႈ။” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၼႄပျႃးတီႈၵဝ်လႄႈၵဝ်လႆႈႁၼ်ပဵတ်ႈမၢၵ်ႇလိူဝ်သွင်လုၵ်ႈဢၼ်တမ်းဝႆႉၵႃႈတီႈၽၢႆႇၼႃႈၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ဢေႃႈ။ ဢၼ်ၼႆႉၸမ်ႉ၊ပဵၼ်မႃးဝၢႆးသေ ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်းမိူင်း ပႃႇပုလုၼ်ႇ၊ သိမ်းဢဝ်ၶုၼ် ယေႇၶေႃးၼိ၊ လုၵ်ႈၸၢႆး ယေႃးယၵိမ်း၊ ၶုၼ်ႁေႃၶမ်းမိူင်း ယုတႃႉ၊ ဢိၵ်ႇတင်းမူးမၢတ်ႈၽွင်းမိူင်း ယုတႃႉ၊ လႂ်၊ၸၢင်ႈမႆႉလႂ်၊ၸၢင်ႈလဵၵ်းလႂ်ၸိူဝ်းၼၼ်ႉဢွၵ်ႇသေၵႃႈၼႂ်းဝဵင်း ယေႇရုသလႅမ်ႇ၊ ၵႂႃႇၵႃႈတီႈမိူင်း ပႃႇပုလုၼ်ႇ၊ ၼၼ်ႉဢေႃႈ။-
ပဵတ်ႈလုၵ်ႈၼိုင်ႈၸမ်ႉ၊တဵမ်ဝႆႉတင်းမၢၵ်ႇလိူဝ်ႇဢၼ်လီၼႃႇလူင်လၢင် မိူၼ်ၸိူဝ်ႉၼင်ႇမၢၵ်ႇလိူဝ်ႇဢၼ်မၢၵ်ႇဢွၼ်တၢင်းပိူၼ်ႈၼၼ်ႉဢေႃႈ။ ထႅင်ႈလုၵ်ႈၼိုင်ႈၸမ်ႉ၊တဵမ်ဝႆႉတင်းမၢၵ်ႇလိူဝ်ႇဢၼ်ၺၢမ်ႉၼႃႇလူင်လၢင်ထၢၼ်ႈပေႃးဢမ်ႇၵိၼ်လႆႈၵွပ်ႈပိူဝ်ႈဢၼ်ၺၢမ်ႉၼႃႇၼၼ်ႉဢေႃႈ။-
ထႃႇဝရႃႉၽြႃး၊ ၵေႃႈထၢမ်ၵဝ်လႄႈဝႃႈ၊ “ ယေႇရမိ၊ ႟။ မႂ်းႁၼ်ၵႃႈသင်၊” ဝႃႈၼင်ႇၼႆလႄႈ။ ၵဝ်ၶိုၼ်းလဝ်ႈလၢတ်ႈလႄႈဝႃႈ၊ “ႁၼ်မၢၵ်ႇလိူဝ်ႇတီႈၶႃႈဢေႃႈ။ မၢၵ်ႇလိူဝ်ႇဢၼ်လီၼၼ်ႉလီၼႃႇလူင်လၢင်လႄႈမၢၵ်ႇလိူဝ်ႇဢၼ်ၺၢမ်ႉၼၼ်ႉၺၢမ်ႉထၢၼ်ႈပေႃးဢမ်ႇၵိၼ်လႆႈတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်ထႅင်ႈလႄႈဝႃႈ၊-
“ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊ၵဝ်တၵ်းမၢတ်ႈၵူၼ်းမဵဝ်း ယုတႃႉ၊ ဢၼ်လႆႈၶၢမ်ႇတၢင်းဢၼ်တိဢဝ်သိမ်းဢဝ်ၵႂႃႇဢၼ်ၵဝ်ပွႆႇဢွၵ်ႇသေၵႃႈတီႈၼႆႈၵႂႃႇၸူးၵႃႈတီႈမိူင်း ၶႃႇလတေး၊ ၸိူဝ်းၼၼ်ႉပဵၼ်ဢၼ်လီမိူၼ်ၸိူဝ်ႉၼင်ႇမၢၵ်ႇလိူဝ်ႇဢၼ်လီၸိူဝ်းၼႆႉဢေႃႈ။-
ၵဝ်တၵ်းပႂ်ႉလူပႂ်ႉတူၺ်းၶဝ်ပုၼ်ႈတၵ်းပဵၼ်ဢၵျူဝ်းတီႈၶဝ်လႄႈသမ်ႉတၵ်းဢဝ်ၶဝ်ပွၵ်ႈၶိုၼ်းမႃးၵႃႈတီႈမိူင်းၼႆႉလူးၵွၼ်ႇဢေႃႈ။ ၵမ်းလိုၼ်းၵဝ်တၵ်းဢမ်ႇၵိူၼ်ႇဢမ်ႇယႃႉၶဝ်လႄႈတၵ်းတႄႇႁဵတ်းၶဝ်ဢေႃႈ။ ၵဝ်ယင်းဢမ်ႇထူၺ်ႈဢမ်ႇထွၼ်ၶဝ်လႄႈတၵ်းၽုၵ်ႇသွမ်ႈၶဝ်ဝႆႉဢေႃႈ။-
ၵဝ်တၵ်းပၼ်ႁူဝ်ၸႂ်ဢၼ်ႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ၼၼ်ႉတီႈၶဝ်ဢေႃႈ။ ၶဝ်တၵ်းဢွၼ်ၵၼ်ပဵၼ်ၵူၼ်းၵဝ်လႄႈၵဝ်ၵေႃႈတၵ်းပဵၼ်ၽြႃးပဵၼ်ၸဝ်ႈၶဝ်ဢေႃႈ။ ၶဝ်တၵ်းဢွၼ်ၵၼ်ပႃးတင်းႁူဝ်ၸႂ်သဵင်ႈသဵင်ႈလႄႈၶိုၼ်းမႃးၸူးတီႈၵဝ်ဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “မိူၼ်ၸိူဝ်ႉၼင်ႇမၢၵ်ႇလိူဝ်ႇဢၼ်ၺၢမ်ႉထၢၼ်ႈပေႃးဢမ်ႇၵိၼ်လႆႈ၊ၵဝ်တၵ်းႁႂ်ႈ ၸေႇတၵိ၊ ၶုၼ်ႁေႃၶမ်းမိူင်း ယုတႃႉ၊ ဢိၵ်ႇတင်းမူးမၢတ်ႈၽွင်းမိူင်းမၼ်းလႂ်၊ၵူၼ်းဝဵင်း ယေႇရုသလႅမ်ႇ၊ ဢၼ်ၵိုတ်းၵျၢၼ်ႇဝႆႉၵႃႈၼႂ်းမိူင်းၼႆႉလႂ်၊ၶဝ်ၸိူဝ်းဢၼ်ယူႇၵႃႈၼႂ်းမိူင်း ဢေးၵျိပ်ႉ၊ လႂ်ၼၼ်ႉပဵၼ်ၸိူဝ်ႉၼင်ႇၼၼ်ဢေႃႈ။-
ၵဝ်တၵ်းႁႂ်ႈၶဝ်လႆႈၶၢမ်ႇတၢင်းဢၼ်ပိူၼ်ႈၸင်းၶဝ်ထၢၼ်ႈပေႃးၵူၼ်းၵူႈသိုင်ႇၵူႈမိူင်းတၵ်းလႆႈၸိၼႄးတၢင်ႇဢပျတ်ႈၶဝ်၊ႁႂ်ႈၶဝ်လႆႈပဵၼ်တီႈဢၼ်ပိူၼ်ႈသႄႉသွမ်း၊တီႈဢၼ်ပိူၼ်ႈၵိၼ်ႇလႃႇၸွတ်ႇၵႂႃႇၵႃႈၼႂ်းတီႈဢၼ်ၵဝ်လိုပ်ႈၶဝ်ဢွၵ်ႇပႅတ်ႈၵူႈတီႈၵူႈလႅၼ်ၼၼ်ႉဢေႃႈ။-
ၵဝ်တၵ်းပွႆႇၽေးလၢပ်ႇၽေးလႅဝ်း၊ၽေးတၢင်းဢၼ်ဢိုပ်းဢၼ်ယၢၵ်ႈ၊ၽေးၵႃႇလႃႉႁႃႈလႅင်မိူင်းၸူးတီႈၶဝ်တေႃႇထိုင်ႁွတ်ႈထၢၼ်ႈပေႃးၶဝ်လႆႈၶၢမ်ႇတၢင်းဢၼ်ယႃႉၽဵဝ်ႈပႅတ်ႈမူတ်းမူတ်းသေၵႃႈၼႂ်းမိူင်းဢၼ်ၵဝ်ပၼ်တီႈပူႇမွၼ်ႇၶဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈၸဝ်ႈဢၼ်ႁွတ်ႈမႃးတီႈ ယေႇရမိ၊ လူၺ်ႈလွင်ႈၵူၼ်းမိူင်း ယုတႃႉ၊ ၵႃႈမီးၼႂ်းပီဢၼ် ယေႃးယၵိမ်း၊ လုၵ်ႈၸၢႆးၶုၼ်လူင် ယူဝ်းသိယႃႉ၊ ၶုၼ်ႁေႃၶမ်းမိူင်း ယုတႃႉ၊ ၸၢမ်ႇႁၢင်ႈၸၢမ်ႇႁေႃထူၼ်ႈပီႈတီႈသီႇ၊မိူဝ်ႈဢၼ် ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်းမိူင်း ပႃႇပုလုၼ်ႇ၊ ၸၢမ်ႇႁၢင်ႈၸၢမ်ႇႁေႃပီတီႈၼိုင်ႈၼၼ်ႉ၊-
ယေႇရမိ၊ သင်ႇလၢတ်ႈႁေႃးလၢတ်ႈတီႈၵူၼ်းမိူင်း ယုတႃႉ၊ ၵႃႈမီးဢိၵ်ႇတင်းၵူၼ်းဝဵင်း ယေႇရုသလႅမ်ႇ၊ တင်းသဵင်ႈတင်းမူတ်းၼၼ်ႉၸမ်ႉ၊-
ၸႃႉၸဵမ်ပီဢၼ် ယူဝ်းသိယႃႉ၊ လုၵ်ႈၸၢႆး ဢႃႇမုၼ်ႇ၊ ၶုၼ်ႁေႃၶမ်းမိူင်း ယုတႃႉ၊ ၸၢမ်ႇႁၢင်ႈၸၢမ်ႇႁေႃလႆႈသိပ်းသၢမ်ပီလႄႈတေႃႇထိုင်ႁွတ်ႈဝၼ်းမိူဝ်ႈၼႆႉ၊လႆႈသၢဝ်းသၢမ်ပီတဵမ်တဵမ်ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈၵဝ်သင်ႇလၢတ်ႈတီႈသူၶိူဝ်းၶိူဝ်းယႂ်းယႂ်းဢေႃႈ။ ၵူၺ်းၵႃႈ၊သူယင်းဢမ်ႇထွမ်ႇဢမ်ႇဢဝ်လႄႈဢွၼ်ၵၼ်ယူႇယဝ်ႉ။-
ထႃႇဝရႃႉၽြႃး၊ ၵေႃႈပွႆႇၸႂ်ႉၶႃႈမၼ်းၸဝ်ႈပရေႃးၽႅတ်ႈတင်းသဵင်ႈတင်းလူင်မႃးတီႈသူၶိူဝ်းၶိူဝ်းယႂ်းယႂ်းဢေႃႈ။ ၵူၺ်းၵႃႈ၊သူယင်းဢမ်ႇထွမ်ႇဢမ်ႇဢဝ်၊ယင်းဢမ်ႇႁေႈႁူၸူးႁႂ်ႈလႆႈငိၼ်းလႄႈယူႇယဝ်ႉ။-
ၶဝ်ၼၼ်ႉၸၢင်ႈလၢတ်ႈလႄႈဝႃႈ၊ “ဢွၼ်ၵၼ်ၸုၼ်ႉပႅတ်ႈသေၵႃႈတီႈသဵၼ်ႈတၢင်းဢၼ်ႁၢႆႉဢၼ်မိူၵ်ႈသူ၊ဢိၵ်ႇတင်းၸုၼ်ႉပႅတ်ႈသေၵႃႈတီႈတၢင်းၵမ်တၢင်းၵျၢင်ႉဢၼ်ႁၢႆႉဢၼ်ယုတ်ႈၼၼ်ႉႁင်းၽႂ်ႁင်းမၼ်းတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊သူတၵ်းလႆႈယူႇၵႃႈၼႂ်းမိူင်းဢၼ် ထႃႇဝရႃႉၽြႃး၊ ပၼ်တီႈသူ၊ဢိၵ်ႇတင်းပၼ်တီႈပူႇမွၼ်ႇသူၸိူဝ်းၼၼ်ႉယူႇသေႇသေႇၼၼ်ႉဢေႃႈ။-
ယႃႇပေဢွၼ်ၵၼ်ၸွမ်းလင်ၽြႃးတၢင်ႇသူႇတၢင်ႇပႃးလႄႈႁဵတ်းဝၢတ်ႈၵူဝ်းၵႂၢႆႇၶဝ်။ ယႃႇပေဢဝ်လွင်ႈတၢင်းဢၼ်မိုဝ်းသူႁဵတ်းၼၼ်ႉႁဵတ်းႁႂ်ႈတၢင်းၸႂ်မႆႈၶႂ်ႈၸႃႉၵဝ်ဢွၵ်ႇ၊ပေႃးသူထွမ်ႇဢဝ်ၸိုင်၊ၵဝ်ၵေႃႈတၵ်းဢမ်ႇပၼ်တၢမ်ႇတီႈသူ၊” ဝႃႈၼင်ႇၼႆဢေႃႈ။-
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၼႂ်းဝႃႈၼၼ်သေၵေႃႈ၊သူယင်းဢမ်ႇထွမ်ႇဢမ်ႇဢဝ်ၵႂၢမ်းၵဝ်လႄႈဢွၼ်ၵၼ်ဢဝ်လွင်ႈတၢင်းဢၼ်မိုဝ်းသူႁဵတ်းၸိူဝ်းၼၼ်ႉႁဵတ်းႁႂ်ႈတၢင်းၸႂ်မႆႈၶႂ်ႈၸႃႉၵဝ်ဢွၵ်ႇလႄႈသူလႆႈၶၢမ်ႇတၢင်းဢၼ်ယႃႉပႅတ်ႈယဝ်ႉ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ “ၵွပ်ႈပိူဝ်ႈဢၼ်သူဢမ်ႇထွမ်ႇဢမ်ႇဢဝ်ၵႂၢမ်းၵဝ်လႄႈ၊-
ၵဝ်တၵ်းပွႆႇၵူၼ်းမိူင်းၽၢႆႇတၢင်းႁွင်ႇၵူႈၸိူဝ်ႉၵူႈမဵဝ်း၊ဢိၵ်ႇတင်းၶႃႈၵဝ် ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်းမိူင်း ပႃႇပုလုၼ်ႇ၊ ၸိူဝ်းၼၼ်ႉမႃးႁႂ်ႈလႆႈတိုၵ်းတေႃးမိူင်းၼႆႉ၊ဢိၵ်ႇတင်းၵူၼ်းဝၢၼ်ႈၵူၼ်းမိူင်းၼႆႉ၊တင်းၵူၼ်းၵူႈၸိူဝ်ႉၵူႈမဵဝ်းဢၼ်ယူႇၵႃႈတီႈလဵပ်ႈႁွပ်ႈႁိမ်းႁွမ်းမၼ်းၸိူဝ်းၼၼ်ႉလႄႈၵဝ်တၵ်းယႃႉၶဝ်ပႅတ်ႈမူတ်းမူတ်းသဵင်ႈသဵင်ႈ၊ႁႂ်ႈၶဝ်ပဵၼ်တီႈဢၼ်ပိူၼ်ႈၸင်းလႄႈႁဵတ်းသဵင်သိသိသေႃႉသေႃႉသႄႉသွမ်း၊ပဵၼ်တီႈဢၼ်ပဝ်ႇလၢပ်ႇႁၢမ်းယူႇတႃႇသေႇၼၼ်ႉဢေႃႈ။-
ၵဝ်တၵ်းႁႂ်ႈသဵင်ဢၼ်ၸူမ်းပျေႃႇ၊သဵင်ဢၼ်သႂၢင်ႇသိူဝ်း၊သဵင်ၵူၼ်းၸၢႆးဢၼ်သွင်ႇမၢင်ႇၵလႃႇ၊သဵင်ၵူၼ်းယိင်းဢၼ်သွင်ႇမၢင်ႇၵလႃႇ၊သဵင်မၢၵ်ႇႁိၼ်လူၺ်မေႃးလင်၊ဢိၵ်ႇတင်းဢၼ်လႅင်းဝၢၼ်ႇၽႆးတဵၼ်းၸိူဝ်းၼၼ်ႉလပ်ႉႁၢႆၵႂႃႇသေၵႃႈၼႂ်းၶဝ်ဢေႃႈ။-
မိူင်းၼႆႉတင်းမိူင်းတၵ်းတေပဵၼ်တီႈဢၼ်လုဢၼ်လႅဝ်၊တီႈဢၼ်သဵတ်ႇၵူၼ်းယဵၼ်ၵူၼ်းၵႂႃႇၼၼ်ႉဢေႃႈ။ ၵူၼ်းၵူႈၸိူဝ်ႉၵူႈမဵဝ်းၸိူဝ်းၼႆႉတၵ်းလႆႈဢွၼ်ၵၼ်ၵိုတ်ႉႁၢပ်ႇႁဵတ်းၵၢၼ်ၶုၼ်ႁေႃၶမ်းမိူင်း ပႃႇပုလုၼ်ႇ၊ ၸဵတ်းသိပ်းပီတဵမ်တဵမ်ဢေႃႈ။-
ထႃႇဝရႃႉၽြႃး၊ မီးဢမိင်ႉၸမ်ႉ၊မိူဝ်ႈဢၼ်ထူၼ်ႈထိုင်ၸဵတ်းသိပ်းပီယဝ်ႉၼၼ်ႉၸိုင်၊ၵဝ်တၵ်းပၼ်တၢမ်ႇတီႈၶုၼ်ႁေႃၶမ်းမိူင်း ပႃႇပုလုၼ်ႇ၊ ဢိၵ်ႇတင်းတီႈမိူင်းမၼ်းဢၼ်ဝႃႈ၊သိုင်ႇၸိုင်ႈဝၢၼ်ႈမိူင်း ၶႃႇလတေး၊ ၼၼ်ႉၵွပ်ႈပိူဝ်ႈဢပျတ်ႈၶဝ်လႄႈႁႂ်ႈမိူင်းၼၼ်ႉပဵၼ်တီႈဢၼ်သဵတ်ႇၵူၼ်းယဵၼ်ၵူၼ်းယူႇတႃႇသေႇဢေႃႈ။-
ၵဝ်တၵ်းႁႂ်ႈၵႂၢမ်းဢၼ်ၵဝ်မၵ်းၶၢၼ်းဝႆႉတင်းသဵင်ႈတင်းလူင်ဢၼ်ဝႃႈ၊ၵႂၢမ်းၵႃႈဢၼ် ယေႇရမိ၊ ႁေႃးလၢတ်ႈၶတ်းၶဵင်ႇၵၼ်တင်းသိုင်ႇၸိုင်ႈဝၢၼ်ႈမိူင်းတင်းသဵင်ႈတင်းလူင်လႄႈတႅမ်ႈမၢႆဝႆႉၵႃႈၼႂ်းလိၵ်ႈၸိူဝ်ႉၼႆႉၼၼ်ႉတူၵ်းႁွတ်ႈၵႃႈၼိူဝ်သိုင်ႇၸိုင်ႈဝၢၼ်ႈမိူင်း ၶႃႇလတေး၊ ဢေႃႈ။-
ၵူၼ်းမဵဝ်းဢၼ်ၼမ်ၼႃႇ၊ဢိၵ်ႇတင်းၶုၼ်ႁေႃၶမ်းဢၼ်ယႂ်ႇၼႃႇၸိူဝ်းၼၼ်ႉတၵ်းဢွၼ်ၵၼ်ဢဝ်ၶဝ်ပဵၼ်ၶႃႈၸႂ်ႉၶဝ်ၼၼ်ႉလႄႈၵဝ်တၵ်းတွပ်ႇတႅၼ်းပၼ်ဢၵျူဝ်းဢပျတ်ႈၸွမ်းၼင်ႇတၢင်းၵမ်တၢင်းၵျၢင်ႉဢၼ်ၶဝ်ၵမ်ၵျၢင်ႉ၊ဢိၵ်ႇတင်းလွင်ႈတၢင်းဢၼ်ၶဝ်ဢဝ်မိုဝ်းၶဝ်ႁဵတ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉတီႈၵဝ်ၸမ်ႉ၊ “ႁပ်ႉၶၢမ်ႇဢဝ်ၵွၵ်းၼမ်ႉမၢၵ်ႇၸပိတ်ႉတၢင်းၸႂ်မႆႈၶႂ်ႈၸႃႉၵဝ်ၼႆႉၵႃႈတီႈမိုဝ်းၵဝ်လႄႈႁႂ်ႈၵူၼ်းၵူႈၸိူဝ်ႉၵူႈမဵဝ်းဢၼ်ၵဝ်ပွႆႇၸႂ်ႉမႂ်းၵႂႃႇၸူးၸိူဝ်းၼၼ်ႉသူတ်ႉၵိၼ်တႃႉ။-
ၶဝ်ၼၼ်ႉတၵ်းသူတ်ႉၵိၼ်လႄႈႁွတ်ႈထိုင်တၢင်းဢၼ်မဝ်းသေလႄႈဝၢင်ႇဝီႈဝၢင်ႇဝိူဝ်ႈၼၼ်ႉ၊ၵဝ်တၵ်းပွႆႇၸႂ်ႉလၢပ်ႇလႅဝ်းၵႂႃႇၵႃႈၼႂ်းၵၢင်ၶဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈၵဝ်ႁပ်ႉၶၢမ်ႇဢဝ်ၵွၵ်းၼၼ်ႉၵႃႈတီႈမိုဝ်း ထႃႇဝရႃႉၽြႃး၊ လႄႈႁႂ်ႈၵူၼ်းမဵဝ်းၵႃႈမီးဢၼ် ထႃႇဝရႃႉၽြႃး၊ ပွႆႇၸႂ်ႉၵဝ်ၵႂႃႇၸူးၸိူဝ်းၼၼ်ႉသူတ်ႉၵိၼ်ဢေႃႈ။-
ၵူၼ်းမဵဝ်းၸိူဝ်းၼၼ်ႉၸမ်ႉ၊ပႃးၵူၼ်းဝဵင်း ယေႇရုသလႅမ်ႇ၊ လႂ်၊ၵူၼ်းမိူင်း ယုတႃႉ၊ လႂ်၊ၶုၼ်ႁေႃၶမ်းမိူင်း ယုတႃႉ၊ လႂ်၊မူးမၢတ်ႈၽွင်းမိူင်းလႂ်၊ဢၼ်တၵ်းလႆႈၵိၼ်ႁႂ်ႈမိူင်းၶဝ်လႆႈပဵၼ်တီႈဢၼ်သဵတ်ႇၵူၼ်းယဵၼ်ၵူၼ်း၊တီႈဢၼ်ပိူၼ်ႈသႄႉသွမ်း၊ၸွမ်းၼင်ႇဢၼ်ၶဝ်ပဵၼ်ယူႇဝၼ်းမိူဝ်ႈၼႆႉၼၼ်ႉဢေႃႈ။
ၶဝ်ၸိူဝ်းၼၼ်ႉပဵၼ်ၶုၼ်ႁေႃၶမ်းဢၼ်လႆႈ ဢုပ်ႉပိူင်ႇမိူင်း ဢေးၵျိပ်ႉ၊ ဢိၵ်ႇတင်း ၶႃႈမၼ်းၵူၼ်းမၼ်းလႂ်၊ မူးမၢတ်ႈၽွင်းမိူင်းမၼ်းလႂ်၊ၵူၼ်းဝၢၼ်ႈ ၵူၼ်းမိူင်းၵႃႈမီးလႂ်။
ၵူၼ်းတၢင်ႇၸိူဝ်ႉတၢင်ႇမဵဝ်းဢၼ်လေႃး လူၺ်ႈၵၼ်တင်းၶဝ်ၵႃႈမီးလႂ်၊ ၶုၼ်လူင်မိူင်း ဢုၸႃႉ၊ ၵႃႈမီးလႂ်၊ၶုၼ် ၽိလိတ်ႉတိ၊ ၵႃႈမီးလႂ်၊ ၵူၼ်းမိူင်း ဢႃႇသၵေႇလုၼ်ႇ၊ ၵူၼ်းမိူင်း ၵႃႇၸႃႉ၊ ၵူၼ်းမိူင်း ဢေႇၵရုၼ်ႇ၊ ၵူၼ်းမိူင်း ဢႃႇၸုတ်ႉ၊ ဢၼ်ၵိုတ်းၵျၢၼ်ႇဝႆႉလႂ်။
ၵူၼ်းမိူင်း ဢေႇတုမ်ႇ၊ ၵူၼ်းမိူင်း မေႃႇၽႃႉ၊ ၵူၼ်းမိူင်း ဢမ်ႇမုၼ်ႇ၊
ၶုၼ်လူင်မိူင်း တုရု၊ ၵႃႈမီးတင်းမူတ်း၊ၶုၼ်လူင် မိူင်း ၸိတုမ်ႇ၊ ၵႃႈမီးတင်းမူတ်း၊ ၶုၼ်လူင်ဢၼ်လႆႈဢုပ်ႉပိူင်ႇမိူင်းၵႃႈတီႈၽၢႆႇပုၼ်ႉ ပၢင်ႇလၢႆႇၸိူဝ်းၼၼ်ႉၵႃႈမီးတင်းမူတ်း။
ၵူၼ်းမိူင်း တေႇတၼ်ႇ၊ ၵူၼ်းမိူင်း တေႇမႃႉ၊ ၵူၼ်းမိူင်း ပုၸႃႉ၊ မဵဝ်းၵူၼ်းဢၼ်ၸၢင်ႈထႃ ၶူၼ်ၵႅမ်ႈၶူၼ်ၵၢင်း။
ၶုၼ်လူင် ဢရေးပီးယႃး၊ ၵႃႈမီးတင်းမူတ်း၊ ၶုၼ်လူင်ဢၼ်လႆႈဢုပ်ႉပိူင်ႇ၊ ၵူၼ်းမဵဝ်းဢၼ်လေႃးလႄးၵၼ်လႄႈယူႇၵႃႈတီႈ ထိူၼ်ႇလႅင်ႉၸိူဝ်းၼၼ်ႉၵႃႈမီးတင်းမူတ်း။
ၶုၼ်လူင်မဵဝ်း ၸိမရိ၊ ၵႃႈမီးတင်းမူတ်း၊ၶုၼ်လူင် မိူင်း ဢေႇလမ်ႇ၊ ၵႃႈမီးတင်းမူတ်း၊ၶုၼ်လူင် မိူင်း မေႇတိ၊ ၵႃႈမီးတင်းမူတ်း။
ၶုၼ်လူင်မိူင်းတၢင်းႁွင်ႇၵႃႈမီးပႃးၼိုင်ႈယဝ်ႉ ပႃးၼိုင်ႈ၊ပဵၼ်ဢၼ်ၸမ်သေဢမ်ႇဝႃႈ၊ ပဵၼ်ဢၼ်ၵႆသေဢမ်ႇဝႃႈ၊ ဢိၵ်ႇတင်းသိုင်ႇၸိုင်ႈဝၢၼ်ႈမိူင်းလေႃးၵီႇၵႃႈဢၼ်မီးၵႃႈၼိူဝ်ၼႃႈလိၼ်မိူင်းတင်းသဵင်ႈတင်းလူင်ၸိူဝ်းၼၼ်ႉဢေႃႈ။ လိုၼ်းသေၶဝ်ၸိူဝ်းၼၼ်ႉသူတ်ႉၵိၼ်ၵွၵ်းၼၼ်ႉယဝ်ႉၼၼ်ႉ၊ၶုၼ်ႁေႃၶမ်း သေးသိၵ်ႉ၊ တၵ်းလႆႈသူတ်ႉၵိၼ်ဢေႃႈ။
“မႂ်းတေလႆႈသင်ႇလၢတ်ႈဝႆႉတီႈၶဝ်လႄႈဝႃႈ၊ ‘ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉဝႃႈ၊ၵွပ်ႈပိူဝ်ႈလၢပ်ႇလႅဝ်းဢၼ်ၵဝ်တၵ်းပွႆႇၸႂ်ႉၵႂႃႇၸူးၵႃႈၼႂ်းၵႄႈၵၢင်သူၼၼ်ႉလႄႈဢွၼ်ၵၼ်သူတ်ႉၵိၼ်လႄႈမဝ်းယူႇတူၼ်ႉႁၢၵ်ႈယူႇ၊ပိၼ်ႈလူမ်ႉယူႇတႃႉ။ ၵမ်းလိုၼ်းယႃႇပေလုၵ်ႉ၊ဝႃႈၼင်ႇၼႆယဝ်ႉ၊’ ဝႃႈၼင်ႇၼႆတႃႉ။-
ပေႃးၶဝ်ဢမ်ႇႁပ်ႉၶၢမ်ႇဢဝ်ၵွၵ်းၼၼ်ႉတီႈမိုဝ်းမႂ်းလႄႈသူတ်ႉၵိၼ်ၸိုင်၊မႂ်းၶိုၼ်းလၢတ်ႈၶဝ်လႄႈဝႃႈ၊ ‘ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊သူတၵ်းလႆႈဢွၼ်ၵၼ်သူတ်ႉၵိၼ်ဢမၢၼ်ႇၶၼ်ပဵၼ်ဢေႃႈ၊ဝႃႈၼင်ႇၼႆဝႆႉယဝ်ႉ၊’ ဝႃႈၼင်ႇၼႆတႃႉ။-
လွင်ႈမၼ်းၸမ်ႉ၊ပေႃးၵဝ်ၸႃႉႁဵတ်းတၢင်းဢၼ်ပၼ်တၢမ်ႇဢပျတ်ႈတီႈဝဵင်းဢၼ်လႆႈၶၢမ်ႇတၢင်းဢၼ်ႁွင်ႉႁဵၵ်ႈလူၺ်ႈၸိုဝ်ႈသဵင်ၵဝ်ၼၼ်ႉၸိုင်၊သူယင်းဢမ်ႇလႆႈၶၢမ်ႇတၢမ်ႇဢပျတ်ႈလႃးလႃးလႄႈတၵ်းလႆႈယူႇႁိုဝ်း။ သူတေဢမ်ႇပူၼ်ႉလွတ်ႈတၢမ်ႇပိူဝ်ႈဢၼ်ၵဝ်တၵ်းႁွင်ႉဢဝ်လၢပ်ႇဢဝ်လႅဝ်းပွႆႇၸႂ်ႉၵႂႃႇၸူးတီႈၵူၼ်းလိၼ်မိူင်းၵႃႈမီးတင်းသဵင်ႈတင်းလူင်ဢေႃႈ။ ဝႃႈၼင်ႇၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ။
“ပိူဝ်ႈၼႆလႄႈၵႂၢမ်းဢၼ်မႂ်းတၵ်းလႆႈႁဵတ်းပရေႃးၽႅတ်ႈသေလႄႈႁေႃးလၢတ်ႈတီႈၶဝ်ၸမ်ႉ၊ “‘ထႃႇဝရႃႉၽြႃး၊ တၵ်းယူႇၵႃႈတီႈဢၼ်သုင်ၼၼ်ႉႁွင်ႉပၢဝ်ႇႁွင်ႉသေႃႇလႄႈ မၼ်းၸဝ်ႈတၵ်းယူႇၵႃႈတီႈၵျွင်းပိၵ်ႈမၢၼ်ႇၸဝ်ႈ ဢၼ်မူတ်းၸၢင်ႇၼၼ်ႉသေလႄႈၵိဝ်သဵင်ဢေႃႈ။ မၼ်းၸဝ်ႈတၵ်းၶတ်းၶဵင်ႇၵၼ်တင်းၶွၵ်ႈသူဝ်း မၼ်းၸဝ်ႈလႄႈႁွင်ႉပၢဝ်ႇႁွင်ႉသေႃႇႁႅင်းယႂ်ႇ ၼႃႇလူင်လၢင်လႄႈ မၼ်းၸဝ်ႈတၵ်းသႅၼ်ႇႁွင်ႉယူႇလႄႈၶတ်းၶဵင်ႇၵၼ်တင်းၵူၼ်းလိၼ်မိူင်းတင်းသဵင်ႈတင်းလူင် မိူၼ်ၸိူဝ်ႉၼင်ႇဢၼ်ၶဝ်ၸိူဝ်းဢၼ်ယဵပ်ႇၼူတ်ႈ မၢၵ်ႇၸပိတ်ႉႁွင်ႉသႅၼ်ႇၼၼ်ႉဢေႃႈ။
သဵင်ဢူၼ်မေႃးတၵ်းၸွတ်ႇတူဝ်ႈၵႂႃႇတေႃႇထိုင်ႁွတ်ႈႁိမ်းလႅၼ်သုတ်းလိၼ်မိူင်းဢေႃႈ။ ထႃႇဝရႃႉၽြႃး၊ မီးဢမုလူၺ်ႈၵၼ်တင်းၵူၼ်း ၵူႈၸိူဝ်ႉၵူႈမဵဝ်းလႄႈမၼ်းၸဝ်ႈတၵ်းၸီႇယၢင်ႇ တႅပ်းတတ်းဢမုၵႃႈတီႈၵူၼ်းတင်းသဵင်ႈ တင်းလူင်ဢေႃႈ။ ၶဝ်ၸိူဝ်းဢၼ်ဢမ်ႇသိုဝ်ႈတေႃႇၼၼ်ႉၸမ်ႉ၊ မၼ်းၸဝ်ႈတၵ်းဢဝ်ဢၢပ်ႈပၼ်တီႈလၢပ်ႇ တီႈလႅဝ်းဢေႃႈ၊’ ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ “တူၺ်းလူး။ ၽေးၼၼ်ႉတၵ်းႁွတ်ႈထိုင်ၵႃႈတီႈမိူင်းၼိုင်ႈယဝ်ႉမိူင်းၼိုင်ႈလႄႈလူမ်းၽိဝ်ႁုင်ဢၼ်ႁႅင်းယႂ်ႇၼႃႇတၵ်းလုၵ်ႉသေၵႃႈတီႈဢၼ်ၵႆတီႈၸဵင်ႇလႅၼ်လိၼ်မိူင်းၼၼ်ႉမႃးဢေႃႈ။-
မိူဝ်ႈၼၼ်ႉၶဝ်ၸိူဝ်းဢၼ်လႆႈၶၢမ်ႇတၢင်းဢၼ် ထႃႇဝရႃႉၽြႃး၊ ဢဝ်တၢႆၼၼ်ႉတၵ်းၸွတ်ႇတူဝ်ႈၵႂႃႇၸႃႉၸဵမ်လိၼ်မိူင်းၽၢႆႇၼိုင်ႈတေႃႇထိုင်ႁွတ်ႈၽၢႆႇၼိုင်ႈဢေႃႈ။ ၽူႈလႂ်ၵေႃႈဢမ်ႇလႆႈၶၢင်းၶီၶၢင်းၽၢၼ်ပုၼ်ႈၶဝ်။ ဢမ်ႇလႆႈဢဝ်ၸုၵၼ်ၵွင်ၵၼ်။ ဢမ်ႇလႆႈဢဝ်သၢင်းၵျူဝ်ႇ။ ၶဝ်တၵ်းဢွၼ်ၵၼ်ပဵၼ်ၸိူဝ်ႉၼင်ႇၽၢႆႈလူင်ၵႃႈၼိူဝ်ၼႃႈလိၼ်ၼၼ်ႉဢေႃႈ။
“သူဢၼ်ပဵၼ်ၵူၼ်းဢၼ်လဵင်ႉသူဝ်းထိင်းသူဝ်းၶဝ်႟။ ဢွၼ်ၵၼ်ႁွင်ႉႁႆႈႁွင်ႉသႅၼ်ႇတႃႉ။ သူဢၼ်ပဵၼ်ၽုင်သူဝ်းၽုင်ပႄႉၶဝ်႟။ ဢွၼ်ၵၼ်ၵိင်ႈၵိူၵ်ႇယူႇၵႃႈၼႂ်းတဝ်ႈတႃႉ။ မိုဝ်ႉဝၼ်းဢၼ်တၵ်းလႆႈဢဝ်သူတၢႆၼၼ်ႉႁွတ်ႈထိုင်ယဝ်ႉ။ ၵဝ်လိုပ်ႈသူဢွၵ်ႇၵႂႃႇၵူႈတီႈၵူႈလႅၼ်လႄႈသူတၵ်းဢွၼ်ၵၼ်လႆႈၶၢမ်ႇတၢင်းဢၼ်ဢဝ်တၢႆမိူၼ်ၸိူဝ်ႉၼင်ႇသူဝ်းပေႃႈဢၼ်လႆႈၶၢမ်ႇဢဝ်တၢႆၼၼ်ႉဢေႃႈ။-
ၶဝ်ၸိူဝ်းဢၼ်လဵင်ႉသူဝ်းထိင်းသူဝ်းၼၼ်ႉတၵ်းဢမ်ႇမီးသဵၼ်ႈတၢင်းဢၼ်ဢွၵ်ႇပၢႆႈ။ ၶဝ်ၸိူဝ်းဢၼ်ပဵၼ်ၸဝ်ႈၽုင်သူဝ်းၽုင်ပႄႉၸိူဝ်းၼၼ်ႉတၵ်းဢမ်ႇမီးသဵၼ်ႈတၢင်းဢၼ်ပၢႆႈလႄႈလွတ်ႈလႆႈ။-
လႆႈငိၼ်းသဵင်ၵူၼ်းၸိူဝ်းဢၼ်လဵင်ႉသူဝ်းထိင်းသူဝ်းၼၼ်ႉႁွင်ႉႁႆႈ၊ဢိၵ်ႇတင်းသဵင်ဢၼ်ၵူၼ်းၸိူဝ်းဢၼ်ပဵၼ်ၸဝ်ႈၽုင်သူဝ်းၽုင်ပႄႉၸိူဝ်းၼၼ်ႉပွင်ႉၶၢင်းၼၼ်ႉဢေႃႈ။ လွင်ႈမၼ်းၸမ်ႉ၊ ထႃႇဝရႃႉၽြႃး၊ ယႃႉၽဵဝ်ႈတီႈဢၼ်သူဝ်းၶဝ်ယၢမ်ႈၵိၼ်ယူႇၼၼ်ႉပႅတ်ႈဢေႃႈ။-
တီႈယူႇတၼ်းသဝ်းဢၼ်ၼိမ်လီတဵတ်ႇလီၼၼ်ႉၵေႃႈလႆႈၶၢမ်ႇတၢင်းဢၼ်ယႃႉလုလႅဝ်ၵႂႃႇၵွပ်ႈပိူဝ်ႈဢၼ် ထႃႇဝရႃႉၽြႃး၊ ၸႂ်မႆႈၶႂ်ႈၸႃႉႁႅင်းယႂ်ႇၼႃႇလူင်လၢင်ၼၼ်ႉဢေႃႈ။-
ထႃႇဝရႃႉၽြႃး၊ ၸုၼ်ႉပႅတ်ႈၵူၼ်းမဵဝ်းမၼ်းၸဝ်ႈမိူၼ်ၸိူဝ်ႉၼင်ႇသၢင်ႇသီႈၸုၼ်ႉပႅတ်ႈထမ်ႈမၼ်းၼၼ်ႉယဝ်ႉ။ မိူင်းၶဝ်ၼၼ်ႉလႆႈပဵၼ်တီႈဢၼ်သဵတ်ႇၵူၼ်းယဵၼ်ၵူၼ်းၵွပ်ႈပိူဝ်ႈသိုၵ်းတၢင်းဢၼ်လီၵူဝ်လီႁႄၼႃႇ၊ဢိၵ်ႇတင်းတၢင်းဢၼ်မၼ်းၸဝ်ႈၸႂ်မႆႈၶႂ်ႈၸႃႉႁႅင်းယႂ်ႇၼႃႇၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ် ယေႃးယၵိမ်း၊ လုၵ်ႈၸၢႆး ယူဝ်းသိယႃႉ၊ ၶုၼ်ႁေႃၶမ်းမိူင်း ယုတႃႉ၊ ၸႃႉၼင်ႈႁၢင်ႈၼင်ႈႁေႃၼၼ်ႉၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈ၊-
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၸုၵ်းယူႇၵႃႈၼႂ်းပၢင်ႇဝၢင်းႁိူၼ်း ထႃႇဝရႃႉၽြႃး၊ သေလႄႈဢဝ်ၵႂၢမ်းၵႃႈဢၼ်ၵဝ်မီးဢမိင်ႉတီႈမႂ်းၵႃႈမီးတင်းသဵင်ႈတင်းလူင်ၶိုၼ်းမွၵ်ႇလၢတ်ႈတီႈၵူၼ်းဝၢၼ်ႈၵူၼ်းဝဵင်း ယုတႃႉ၊ ဢၼ်မႃးႁွတ်ႈမႃးထိုင်ႁႂ်ႈလႆႈၵူဝ်းၵႂၢႆႇၵႃႈၼႂ်းႁိူၼ်း ထႃႇဝရႃႉၽြႃး၊ ၸိူဝ်းၼၼ်ႉတႃႉ။ ယႃႇပေသိူင်ႇဝႆႉ မႅပ်းဝႆႉသေၶေႃႈသေၵမ်း။-
ၶဝ်ၸၢင်ႈၶႄးထွမ်ႇဢဝ်လႄႈဢွၼ်ၵၼ်ဝႄႈပိူင်ႈသေၵႃႈတီႈသဵၼ်ႈတၢင်းဢၼ်ႁၢႆႉဢၼ်ယုတ်ႈၶဝ်ၼၼ်ႉႁင်းၽႂ်ႁင်းမၼ်းႁႂ်ႈၵဝ်ထၢၼ်ႈပေႃးမႄးလႅၵ်ႈလၢႆႈၸႂ်ၵဝ်လွင်ႈတၢမ်ႇဢပျတ်ႈဢၼ်ၵဝ်ၵျၢမ်ႇပွင်တၵ်းပၼ်တီႈၶဝ် ၵွပ်ႈပိူဝ်ႈတုၸရိူၵ်ႈဢၼ်ၶဝ်ႁဵတ်းၼၼ်ႉဢေႃႈ။
“ပိူဝ်ႈၼႆလႄႈမႂ်းတၵ်းလႆႈသင်ႇလၢတ်ႈတီႈၶဝ်လႄႈဝႃႈ၊ ထႃႇဝရႃႉၽြႃး၊ မီးဢမိင်ႉၸမ်ႉ၊ပေႃးသူယင်းဢမ်ႇထွမ်ႇဢမ်ႇဢဝ်ၵႂၢမ်းၵဝ်၊ဢမ်ႇၸွမ်းသဵၼ်ႈတၢင်းပိင်းၺၢပ်ႈတြႃးဢၼ်ၵဝ်ဝႆႉတီႈသူ။-
ႁႂ်ႈသူလႆႈထွမ်ႇဢဝ်ၵႂၢမ်းၶႃႈၵဝ်ပရေႃးၽႅတ်ႈဢၼ်ၵဝ်ပွႆႇၸႂ်ႉၵႂႃႇၸူးတီႈသူၶိူဝ်းၶိူဝ်းယႂ်းယႂ်းၸိူဝ်းၼၼ်ႉသေၵေႃႈ၊ပေႃးသူယင်းဢမ်ႇထွမ်ႇဢဝ်လႄႈယူႇၸိုင်၊-
ၵဝ်တၵ်းႁႂ်ႈႁိူၼ်း ထႃႇဝရႃႉၽြႃး၊ ၼႆႉပဵၼ်ၸိူဝ်ႉၼင်ႇဝဵင်း သိလေႃႇ၊ လႄႈတၵ်းႁႂ်ႈဝဵင်းၼႆႉပဵၼ်တၢင်းဢၼ်ၵိၼ်ႇဢၼ်ဝႃႈ၊တီႈၵူၼ်းၵူႈၸိူဝ်ႉၵူႈမဵဝ်းၵႃႈၼိူဝ်လိၼ်မိူင်းဢေႃႈ၊” ဝႃႈၼင်ႇၼႆဢေႃႈ။
ယဵၸ်ႈပရေႃးႁဵၵ်ႈလႂ်၊ပရေႃးၽႅတ်ႈလႂ်၊ဢိၵ်ႇတင်းၵူၼ်းတင်းသဵင်ႈတင်းလူင်ဢွၼ်ၵၼ်ငိၼ်းၵႂၢမ်းဢၼ် ယေႇရမိ၊ ႁေႃးလၢတ်ႈၵႃႈၼႂ်းႁိူၼ်း ထႃႇဝရႃႉၽြႃး၊ ဢေႃႈ။-
မိူဝ်ႈဢၼ် ယေႇရမိ၊ ဢဝ်ၵႂၢမ်းၵႃႈဢၼ် ထႃႇဝရႃႉၽြႃး၊ သင်ႇလၢတ်ႈဝႆႉတီႈမၼ်းႁႂ်ႈမၼ်းသင်ႇလၢတ်ႈတီႈၵူၼ်းတင်းသဵင်ႈတင်းလူင်ၼၼ်ႉႁေႃးလၢတ်ႈယဝ်ႉတူဝ်ႈယဝ်ႉၸိုင်၊ယဵၸ်ႈပရေႃးႁဵၵ်ႈလႂ်၊ပရေႃးၽႅတ်ႈလႂ်၊ဢိၵ်ႇတင်းၵူၼ်းတင်းသဵင်ႈတင်းလူင်လႂ်ၸိူဝ်းၼၼ်ႉဢွၼ်ၵၼ်တိၵမ်ဢဝ်မၼ်းလႄႈဝႃႈ၊ “မႂ်းတၵ်းလႆႈၶၢမ်ႇတၢင်းဢၼ်ဢဝ်တၢႆဢမၢၼ်ႇၶၼ်ပဵၼ်ဢေႃႈ။-
ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းဢိင်ၼႃႇမႃႉၸိုဝ်ႈသဵင် ထႃႇဝရႃႉၽြႃး၊ သေလႄႈႁေႃးလၢတ်ႈလႄႈဝႃႈ၊ ‘ႁိူၼ်း ထႃႇဝရႃႉၽြႃး၊ ၼႆႉတၵ်းပဵၼ်ၸိူဝ်ႉၼင်ႇဝဵင်း သိလေႃႇ၊ ၼၼ်ႉဢေႃႈ။ ဝဵင်းၼႆႉတၵ်းပဵၼ်တီႈဢၼ်သဵတ်ႇၵူၼ်းယဵၼ်ၵူၼ်း၊’ ဝႃႈၼင်ႇၼႆႁိုဝ်း။” ဝႃႈၼင်ႇၼႆသေလႄႈၵူၼ်းတင်းသဵင်ႈတင်းလူင်ၸုၵၼ်တုမ်ၵၼ်သေလႄႈလွမ်ႉဝႅင်းႁွပ်ႈ ယေႇရမိ၊ ၵႃႈၼႂ်းႁိူၼ်း ထႃႇဝရႃႉၽြႃး၊ ၼၼ်ႉဢေႃႈ။
မိူဝ်ႈဢၼ်မူးမၢတ်ႈၽွင်းမိူင်း ယုတႃႉ၊ တင်းလၢႆငိၼ်းလွင်ႈတၢင်းၸိူဝ်းၼၼ်ႉၸိုင်၊ၶဝ်ဢွၼ်ၵၼ်လုၵ်ႉသေၵႃႈတီႈႁေႃၶမ်းမႃးၵႃႈတီႈႁိူၼ်း ထႃႇဝရႃႉၽြႃး၊ လႄႈၼင်ႈယူႇၵႃႈၼႂ်း ႁူးၽၵ်းတူဢၼ်မႂ်ႇ၊ ၵႃႈတီႈႁိူၼ်း ထႃႇဝရႃႉၽြႃး၊ ၼၼ်ႉဢေႃႈ။-
မိူဝ်ႈၼၼ်ႉယဵၸ်ႈပရေႃးႁဵၵ်ႈလႂ်၊ပရေႃးၽႅတ်ႈလႂ်ၸိူဝ်းၼၼ်ႉ၊ဢွၼ်ၵၼ်လၢတ်ႈတီႈၸႃႉၸဵမ်မူးမၢတ်ႈၽွင်းမိူင်းတင်းလၢႆ၊ဢိၵ်ႇတင်းၵူၼ်းတင်းသဵင်ႈတင်းလူင်ၼၼ်ႉလႄႈဝႃႈ၊ “ၵေႃႉၼႆႉထုၵ်ႇလီလႆႈၶၢမ်ႇတၢင်းဢၼ်ဢဝ်တၢႆဢေႃႈ။ ၵႃႈၼင်ႇဢၼ်သူဢဝ်တင်းႁူတူဝ်ၸဝ်ႈၵဝ်ႇငိၼ်းၼၼ်ႉ၊မၼ်းႁဵတ်းၶတ်းၵၼ်တင်းဝဵင်းၼႆႉလႄႈႁေႃးလၢတ်ႈယဝ်ႉလူင်ပႄႇ၊” ဝႃႈၼင်ႇၼႆဢေႃႈ။
ယေႇရမိ၊ ၵေႃႈလၢတ်ႈတီႈမူးမၢတ်ႈၽွင်းမိူင်းၵႃႈမီး၊ဢိၵ်ႇတင်းၵူၼ်းတင်းသဵင်ႈတင်းလူင်လႄႈဝႃႈ၊ “ ထႃႇဝရႃႉၽြႃး၊ ပွႆႇၸႂ်ႉၵဝ်ႁႂ်ႈၵဝ်ႁဵတ်းၶတ်းၵၼ်တင်းႁိူၼ်းၸဝ်ႈၼႆႉဢိၵ်ႇတင်းဝဵင်းၸဝ်ႈၼႆႉလႄႈႁေႃးလၢတ်ႈၵႂၢမ်းၵႃႈဢၼ်သူငိၼ်းၼႆႉယဝ်ႉ။-
မိူဝ်ႈလဵဝ်ၼႆႉၸိုင်၊ဢွၼ်ၵၼ်ၶၢႆႉပုတ်ႈတၢင်းဢၼ်သူၵမ်ၵျၢင်ႉသၢင်ႈႁဵတ်းၸိူဝ်းၼၼ်ႉလႄႈထွမ်ႇဢဝ်ၵႂၢမ်း ထႃႇဝရႃႉၽြႃး၊ ၽြႃးပဵၼ်ၸဝ်ႈသူတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ ထႃႇဝရႃႉၽြႃး၊ တၵ်းမႄးပိၼ်ႇႁူဝ်ၸႂ်မၼ်းၸဝ်ႈလွင်ႈၽေးဢုပၢတ်ႈဢၼ်မၼ်းၸဝ်ႈမီးဢမိင်ႉႁႂ်ႈႁွတ်ႈထိုင်ၵႃႈၼိူဝ်သူၼၼ်ႉဢေႃႈ။-
ၵဝ်ၸမ်ႉ၊မီးယူႇၵႃႈၼႂ်းမိုဝ်းသူဢေႃႈ။ သူဢွၼ်ၵၼ်ႁဵတ်းပၼ်တီႈၵဝ်ၸွမ်းၵႃႈၼင်ႇဢၼ်သူထၢင်ႇတၵ်းပဵၼ်ဢၼ်လီဢၼ်သိုဝ်ႈတေႃႇၼၼ်ႉတႃႉ။-
ၼႂ်းဝႃႈၼၼ်သေၵေႃႈ၊ပေႃးသူဢဝ်ၵဝ်တၢႆၸိုင်၊ပဵၼ်မိူၼ်ၸိူဝ်ႉၼင်ႇဢၼ်သူတၵ်းႁႂ်ႈလိူတ်ႈၵေႃႉဢၼ်ဢမ်ႇမီးဢပျတ်ႈၼၼ်ႉႁွတ်ႈထိုင်ၵႃႈၼိူဝ်တူဝ်သူ၊ဢိၵ်ႇတင်းၵႃႈၼိူဝ်ဝဵင်းၼႆႉတင်းၵႃႈၼိူဝ်ၵူၼ်းဝဵင်းတင်းလၢႆၼႆႉဢမၢၼ်ႇၶၼ်ပဵၼ်ၼၼ်ႉသူဢွၼ်ၵၼ်ႁုတႃႉ။ ထႃႇဝရႃႉၽြႃး၊ ပွႆႇၸႂ်ႉၵဝ်ၵႂႃႇၵႃႈတီႈသူႁႂ်ႈၵဝ်လႆႈမွၵ်ႇလၢတ်ႈၵႂၢမ်းၵူႈၸိူဝ်ႉၵူႈပိူင်ၼႆႉတီႈသူဢမၢၼ်ႇၶၼ်ပဵၼ်ယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊မူးမၢတ်ႈၽွင်းမိူင်းတင်းလၢႆ၊ဢိၵ်ႇတင်းၵူၼ်းတင်းသဵင်ႈတင်းလူင်ဢွၼ်ၵၼ်လၢတ်ႈတီႈယဵၸ်ႈပရေႃးႁဵၵ်ႈ၊ဢိၵ်ႇတင်းပရေႃးၽႅတ်ႈၸိူဝ်းၼၼ်ႉလႄႈဝႃႈ၊ “ၵေႃႉၼႆႉဢမ်ႇထုၵ်ႇလီလႆႈၶၢမ်ႇတၢႆၵူၺ်း။ မၼ်းဢိင်ၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းသေလႄႈႁေႃးလၢတ်ႈတီႈႁဝ်းယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၵူၼ်းဢၼ်ပဵၼ်ၵႄႇပဵၼ်ႁူဝ်ၵႃႈၼႂ်းမိူင်းၼၼ်ႉၵမ်ႈၽွင်ႈဢွၼ်ၵၼ်လုၵ်ႉလႄႈလၢတ်ႈတီႈပရိၵ်ႈသၢတ်ႈတင်းလၢႆလႄႈဝႃႈ၊-
“ၸူဝ်ႈပၢၼ် ႁေႇၸၵိ၊ ၶုၼ်ႁေႃၶမ်းမိူင်း ယုတႃႉ၊ ၼၼ်ႉ၊ မိၶႃႇ၊ ၵူၼ်းဝၢၼ်ႈ မေႃႇရသႃႉ၊ ႁဵတ်းပရေႃးၽႅတ်ႈသေလႄႈႁေႃးလၢတ်ႈတီႈၵူၼ်းမိူင်း ယုတႃႉ၊ တင်းသဵင်ႈတင်းလူင်လႄႈဝႃႈ၊ ‘ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ “‘လွႆ ၸိဢုၼ်ႇ၊ တၵ်းလႆႈၶၢမ်ႇတၢင်းဢၼ်ထႆ မိူၼ်ၸိူဝ်ႉၼင်ႇထႆၼႃးလႄႈ ဝဵင်း ယေႇရုသလႅမ်ႇ၊ တၵ်းပဵၼ် ၵွင်ၽုၼ်ႇၵွင်လိၼ်ဢေႃႈ။ လွႆဢၼ်ႁိူၼ်း ထႃႇဝရႃႉၽြႃး၊ မီးၼၼ်ႉၵေႃႈ တၵ်းပဵၼ်ၸိူဝ်ႉၼင်ႇလွႆပႃႇမႆႉပႃႇတွၵ်ႇ ၼၼ်ႉဢေႃႈ၊’ ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ႁေႇၸၵိ၊ ၶုၼ်ႁေႃၶမ်းမိူင်း ယုတႃႉ၊ ဢိၵ်ႇတင်းၵူၼ်းမိူင်း ယုတႃႉ၊ တင်းသဵင်ႈတင်းလူင်ၼၼ်ႉလႆႈဢဝ် မိၶႃႇ၊ တၢႆယဝ်ႉႁိုဝ်း၊ၶုၼ်ၼၼ်ႉၵူဝ်ႁႄ ထႃႇဝရႃႉၽြႃး၊ လႄႈတွင်းပၢၼ်ႇၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢမ်ႇၸႂ်ႈႁိုဝ်း၊ ထႃႇဝရႃႉၽြႃး၊ မႄးပိၼ်ႇႁူဝ်ၸႂ်မၼ်းၸဝ်ႈလူၺ်ႈလွင်ႈၽေးဢုပၢတ်ႈဢၼ်မၼ်းၸဝ်ႈမီးဢမိင်ႉႁႂ်ႈႁွတ်ႈထိုင်ၵႃႈၼိူဝ်ၶဝ်ၼၼ်ႉဢမ်ႇၸႂ်ႈႁိုဝ်း။ ႁဝ်းၸမ်ႉ၊ၸမ်တၵ်းႁႂ်ႈၽေးဢုပၢတ်ႈဢၼ်ယႂ်ႇၼၼ်ႉတူၵ်းႁွတ်ႈၵႃႈၼိူဝ်ႁဝ်းယဝ်ႉလူင်ပႄႇ၊” ဝႃႈၼင်ႇၼႆဢေႃႈ။
မီးၵေႃႉဢၼ်ဢိင်ၼႃႇမႃႉၸိုဝ်ႈသဵင် ထႃႇဝရႃႉၽြႃး၊ သေလႄႈႁဵတ်းပရေႃးၽႅတ်ႈထႅင်ႈၵေႃႉၼိုင်ႈဢေႃႈ။ မၼ်းၼၼ်ႉပဵၼ် ဢုရိယႃး၊ လုၵ်ႈၸၢႆး သေႇမႃႇယႃႉ၊ ဢၼ်ယူႇၵႃႈတီႈဝဵင်း ၵိရယတ်ႉယႃႇရိမ်ႇ၊ လႄႈမၼ်းၼၼ်ႉၵေႃႈႁေႃးလၢတ်ႈလႄႈၶတ်းၶဵင်ႇၵၼ်တင်းဝဵင်းၼႆႉ၊ဢိၵ်ႇတင်းမိူင်းၼႆႉမႅၼ်ႈၸွမ်းၵႂၢမ်းၵႃႈဢၼ် ယေႇရမိ၊ ႁေႃးလၢတ်ႈၼၼ်ႉဢေႃႈ။-
မိူဝ်ႈဢၼ်ၶုၼ်ႁေႃၶမ်း ယေႃးယၵိမ်း၊ ဢိၵ်ႇတင်းၶုၼ်သိုၵ်းမၼ်းၵႃႈမီး၊ဢိၵ်ႇတင်းမူးမၢတ်ႈၽွင်းမိူင်းမၼ်းၵႃႈမီးငိၼ်းၵႂၢမ်းမၼ်းၼၼ်ႉၸိုင်၊ၶုၼ်လူင်ၼၼ်ႉၵျၢမ်ႇႁႃႁႂ်ႈလႆႈဢဝ်မၼ်းတၢႆဢေႃႈ။ ၵူၺ်းၵႃႈ၊ ဢုရိယႃး၊ ငိၼ်းလွင်ႈၼၼ်ႉသေယဝ်ႉ၊ၵူဝ်ႁႄလႄႈဢွၵ်ႇပၢႆႈၵႂႃႇၸူးၵႃႈတီႈမိူင်း ဢေးၵျိပ်ႉ၊ ဢေႃႈ။-
ၶုၼ်လူင် ယေႃးယၵိမ်း၊ ၼၼ်ႉပွႆႇၸႂ်ႉ ဢေးလႃႉၼႃႇႀၼ်ႇ၊ လုၵ်ႈၸၢႆး ဢႃႇၶပေႃႇ၊ ဢိၵ်ႇတင်းၵူၼ်းၵမ်ႈၽွင်ႈၵႂႃႇၵႃႈတီႈမိူင်း ဢေးၵျိပ်ႉ၊ ဢေႃႈ။
ၶဝ်ၼၼ်ႉဢွၼ်ၵၼ်ဢဝ် ဢုရိယႃး၊ ဢွၵ်ႇသေၵႃႈၼႂ်းမိူင်း ဢေးၵျိပ်ႉ၊ မႃးသူင်ႇႁွတ်ႈၵႃႈတီႈၶုၼ်လူင် ယေႃးယၵိမ်း၊ သေယဝ်ႉ၊ၶုၼ်လူင်ၼၼ်ႉဢဝ်တင်းလၢပ်ႇလႅဝ်းၽၼ်းမၼ်းတၢႆလႄႈဢဝ်တူဝ်တၢႆမၼ်းပႅတ်ႈဝႆႉၵႃႈၼႂ်းပႃႇႁဵဝ်ႈၵူၼ်းတင်းလၢႆဢေႃႈ။
ၼႂ်းဝႃႈၼၼ်သေၵေႃႈ၊ၶႅၼ်မိုဝ်း ဢႁိၵမ်ႇ၊ လုၵ်ႈၸၢႆး သႃႇၽၢၼ်ႇ၊ ၼၼ်ႉၸွႆႈထႅမ်မႃႉၸႃႉ ယေႇရမိ၊ လႄႈဢမ်ႇႁႂ်ႈမၼ်းလႆႈၶၢမ်ႇတၢင်းဢၼ်ဢဝ်ဢၢပ်ႈပၼ်ၵႃႈၼႂ်းမိုဝ်းၵူၼ်းတင်းလၢႆ ဢမ်ႇႁႂ်ႈမၼ်းလႆႈၶၢမ်ႇတၢင်းဢၼ်ဢဝ်တၢႆၼၼ်ႉဢေႃႈ။
မိူဝ်ႈဢၼ်ၶုၼ် ၸေႇတၵိ၊ လုၵ်ႈၸၢႆး ယူဝ်းသိယႃႉ၊ ၶုၼ်ႁေႃၶမ်းမိူင်း ယုတႃႉ၊ တႄႇတႃႉၸၢမ်ႇႁၢင်ႈၸၢမ်ႇႁေႃၼၼ်ႉ၊ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈ ယေႇရမိ၊ လႄႈဝႃႈ၊-
ထႃႇဝရႃႉၽြႃး၊ မီးဢမိင်ႉတီႈၵဝ်ၸမ်ႉ၊ “ႁဵတ်းသၢႆမတ်ႉဢိၵ်ႇတင်းၵၢၼ်းသေလႄႈဢဝ်ႁၢင်ႈသႂ်ႇၵႃႈတီႈၶေႃးမႂ်းတႃႉ။-
ဢဝ်ၶေႃႈၵႂၢမ်းသူင်ႇထိုင်ၵႂႃႇၵႃႈတီႈၶုၼ်လူင် ဢေႇတုမ်ႇ၊ ၶုၼ်လူင် မေႃႇၽႃႉ၊ ၶုၼ်လူင် ဢမ်ႇမုၼ်ႇ၊ ၶုၼ်လူင် တုရု၊ ၶုၼ်လူင် ၸိတုမ်ႇ၊ ၸိူဝ်းၼၼ်ႉလူၺ်ႈမိုဝ်းသၢၼ်ႇတမၢၼ်ႇတင်းလၢႆဢၼ်ႁွတ်ႈမႃးၵႃႈၼႂ်းဝဵင်း ယေႇရုသလႅမ်ႇ၊ တီႈၶုၼ်ႁေႃၶမ်းမိူင်း ယုတႃႉ၊ ၼၼ်ႉတႃႉ။-
ပုၼ်ႈၸဝ်ႈမိူင်းၶဝ်ၼၼ်ႉမႂ်းသင်ႇလၢတ်ႈတီႈၶဝ်ၼၼ်ႉလႄႈဝႃႈ၊ ‘ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊ဢၼ်ၼႆႉသူတၵ်းလႆႈသင်ႇလၢတ်ႈတီႈၸဝ်ႈသူဢေႃႈ။-
ၵဝ်ဢဝ်တင်းမႁႃႇတၼ်းၶူဝ်း၊ဢိၵ်ႇတင်းတၢင်းဢၼ်ယိုၼ်ႈၶႅၼ်မိုဝ်းၵဝ်သေလႄႈႁဵတ်းပဵၼ်လိၼ်မိူင်း၊ဢိၵ်ႇတင်းၵူၼ်း၊တရိၵ်ႈသၢၼ်ႇဢၼ်မီးၵႃႈၼိူဝ်ၼႃႈလိၼ်မိူင်းၸိူဝ်းၼၼ်ႉလႄႈၵဝ်ပၼ်တီႈၵေႃႉဢၼ်ၵဝ်ၶႂ်ႈပၼ်ၼၼ်ႉဢေႃႈ။-
မိူဝ်ႈလဵဝ်ၼႆႉၸိုင်၊ၵဝ်ဢဝ်မိူင်းၵႃႈမီးၼႆႉဢၢပ်ႈပၼ်ၵႃႈၼႂ်းမိုဝ်းၶႃႈၵဝ် ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်းမိူင်း ပႃႇပုလုၼ်ႇ၊ ယဝ်ႉ။ တူဝ်ထိူၼ်ႇႁၢႆႉတင်းလၢႆၵေႃႈၵဝ်ပၼ်တီႈမၼ်းပုၼ်ႈဢၼ်မၼ်းတၵ်းၸႂ်ႉၵိၼ်သွႆၵိၼ်ၼၼ်ႉယဝ်ႉ။-
ၵူၼ်းၵူႈၸိူဝ်ႉၵူႈမဵဝ်းတၵ်းလႆႈဢွၼ်ၵၼ်ၵိုတ်ႉႁၢပ်ႇၵၢၼ်ဢမုမၼ်း၊ဢိၵ်ႇတင်းၵၢၼ်ဢမုလုၵ်ႈလၢၼ်မၼ်းတေႃႇထိုင်ႁွတ်ႈၶိင်ႇမိူဝ်ႈဢၼ်သိုင်ႇၸိုင်ႈဝၢၼ်ႈမိူင်းမၼ်းလုလႅဝ်ၼၼ်ႉႁွတ်ႈမႃးၼၼ်ႉ၊မိူဝ်ႈၼၼ်ႉမဵဝ်းၵူၼ်းၼမ်ၼႃႇ၊ဢိၵ်ႇတင်းၶုၼ်ႁေႃၶမ်းဢၼ်မီးမုၼ်ၽုင်းယႂ်ႇတင်းလၢႆတၵ်းဢွၼ်ၵၼ်ဢဝ်မၼ်းပဵၼ်ၶႃႈၸႂ်ႉၶဝ်ဢေႃႈ။
“‘ထႃႇဝရႃႉၽြႃး၊ မီးဢမိင်ႉၸမ်ႉ၊မဵဝ်းၵူၼ်းဢိၵ်ႇတင်းသိုင်ႇၸိုင်ႈဝၢၼ်ႈမိူင်းဢၼ်ဢမ်ႇမီးဢလူဝ်ႇၶႂ်ႈၶၢမ်ႇတၢင်းဢၼ်ၸႂ်ႉဢၼ်သွႆတီႈ ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်းမိူင်း ပႃႇပုလုၼ်ႇ၊ လႄႈဢမ်ႇၶႂ်ႈဢဝ်ၶေႃးၵိုတ်ႉႁၢပ်ႇၵၢၼ်းၶုၼ်ႁေႃၶမ်း ပႃႇပုလုၼ်ႇ၊ ၼၼ်ႉၸိုင်၊ၵဝ်တၵ်းဢဝ်တင်းၽေးလၢပ်ႇၽေးလႅဝ်း၊ၽေးတၢင်းဢၼ်ဢိုပ်းဢၼ်ယၢၵ်ႈ၊ၽေးၵႃႇလႃႉႁႃႈလႅင်မိူင်းပၼ်တၢမ်ႇဢပျတ်ႈတီႈမဵဝ်းၵူၼ်းၼၼ်ႉတေႃႇထိုင်ႁွတ်ႈၵဝ်ထၢၼ်ႈပေႃးယႃႉၶဝ်ပႅတ်ႈလူၺ်ႈမိုဝ်းမၼ်းၼၼ်ႉဢေႃႈ။-
ပိူဝ်ႈၼႆလႄႈသူၼႆႉယႃႇပေဢွၼ်ၵၼ်ထွမ်ႇၵႂၢမ်းပရေႃးၽႅတ်ႈသြႃႇဢၼႃႇၵၢတ်ႈ၊ၵႂၢမ်းသြႃႇဢၼ်ၼွၼ်းၽၼ်ႁၼ်၊ၵႂၢမ်းသြႃႇဝိၵ်ႉၸႃႇ၊ၵႂၢမ်းသြႃႇဢၼ်ၸၢင်ႈမေႃၸၢင်ႈႁဵတ်းဢၼ်ၸၢင်ႈႁေႃးလၢတ်ႈတီႈသူလႄႈဝႃႈ၊ “သူဢမ်ႇလႆႈၶၢမ်ႇတၢင်းၸႂ်ႉတၢင်းသွႆတီႈၶုၼ်ႁေႃၶမ်းမိူင်း ပႃႇပုလုၼ်ႇ၊ ၵူၺ်း၊” ဝႃႈၼင်ႇၼႆၸိူဝ်းၼၼ်ႉ။-
ၶဝ်ၼၼ်ႉၸၢင်ႈဢွၼ်ၵၼ်ႁေႃးလၢတ်ႈၵႂၢမ်းမုသႃႇဢၵျူဝ်းဢပျတ်ႈဢၼ်ပဵၼ်မႃးၼႂ်းတၢင်းဢၼ်သူလႆႈၶၢမ်ႇတၢင်းဢၼ်သိမ်းဢဝ်ဢွၵ်ႇသေမိူင်းသူၵႂႃႇၵႃႈတီႈဢၼ်ၵႆၼၼ်ႉဢေႃႈ။ ၵဝ်ၵေႃႈတၵ်းလိုပ်ႈသူဢွၵ်ႇပႅတ်ႈလႄႈသူတၵ်းလႆႈလုသုမ်းဢေႃႈ။-
မဵဝ်းၵူၼ်းဢၼ်ဢဝ်ၶေႃးတူဝ်ၸဝ်ႈၵဝ်ႇဝႆႉၵႃႈတႂ်ႈၵၢၼ်းႁၢပ်ႇၶုၼ်ႁေႃၶမ်းမိူင်း ပႃႇပုလုၼ်ႇ၊ လႄႈၶၢမ်ႇတၢင်းဢၼ်ၸႂ်ႉဢၼ်သွႆၼၼ်ႉၸိုင်၊ၵဝ်တၵ်းပွႆႇႁႂ်ႈၶဝ်ၼၼ်ႉယူႇၵႃႈတီႈမိူင်းၶဝ်သေယဝ်ႉ၊ႁႂ်ႈၶဝ်ဢွၼ်ၵၼ်ႁဵတ်းႁႆႈႁဵတ်းၼႃးလႄႈယူႇၵႃႈၼႂ်းမိူင်းၼၼ်ႉဢေႃႈ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ၵဝ်ဢဝ်တင်းၵႂၢမ်းၸဝ်ႈၼၼ်ႉလဝ်ႈလၢတ်ႈတီႈ ၸေႇတၵိ၊ ၶုၼ်ႁေႃၶမ်းမိူင်း ယုတႃႉ၊ လႄႈဝႃႈၸမ်ႉ၊ “ဢွၼ်ၵၼ်ဢဝ်ၶေႃးသူၵိုတ်ႉႁၢပ်ႇၵၢၼ်းၶုၼ်ႁေႃၶမ်းမိူင်း ပႃႇပုလုၼ်ႇ၊ လႄႈၶၢမ်ႇတၢင်းဢၼ်ၸႂ်ႉဢၼ်သွႆတီႈမၼ်း၊ဢိၵ်ႇတင်းတီႈၵူၼ်းမၼ်းတင်းလၢႆယူႇသေလႄႈႁႂ်ႈဢသၢၵ်ႈသူလႆႈလိပ်းယူႇသေၵမ်းတီႈၶႃႈ။-
ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းဢိၵ်ႇတင်းၵူၼ်းၸဝ်ႈႁဝ်းတင်းလၢႆ တၵ်းလႆႈတၢႆလူၺ်ႈၽေးလၢပ်ႇၽေးလႅဝ်း၊ၽေးဢိုပ်းၽေးယၢၵ်ႈ၊ၽေးၵႃႇလႃႉႁႃႈလႅင်မိူင်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ ဢဝ်လွင်ႈမဵဝ်းၵူၼ်းဢၼ်ဢမ်ႇၶၢမ်ႇဢဝ်တၢင်းဢၼ်ၸႂ်ႉဢၼ်သွႆတီႈၶုၼ်ႁေႃၶမ်းမိူင်း ပႃႇပုလုၼ်ႇ၊ ၼၼ်ႉလႄႈမီးဢမိင်ႉဝႆႉၼၼ်ႉၸိူဝ်ႉၼင်ႇႁိုဝ်တီႈၶႃႈ။-
ယႃႇပေဢွၼ်ၵၼ်ထွမ်ႇဢဝ်ၵႂၢမ်းပရေႃးၽႅတ်ႈဢၼ်ႁေႃးလၢတ်ႈတီႈၸဝ်ႈႁဝ်းၶဝ်လႄႈဝႃႈ၊ ‘ယႃႇပေၶၢမ်ႇတၢင်းဢၼ်ၸႂ်ႉဢၼ်သွႆတီႈၶုၼ်ႁေႃၶမ်းမိူင်း ပႃႇပုလုၼ်ႇ၊ ’ ဢၼ်ဝႃႈၸိူဝ်ႉၼင်ႇၼၼ်ၼၼ်ႉသေၵမ်းတီႈၶႃႈ။ ၵွပ်ႈပိူဝ်ႈၶဝ်ႁေႃးလၢတ်ႈၵႂၢမ်းမုသႃႇတီႈၸဝ်ႈႁဝ်းၶဝ်တီႈၶႃႈဢေႃႈ။-
ထႃႇဝရႃႉၽြႃး၊ မီးဢမိင်ႉၸမ်ႉ၊ ‘ၵဝ်ယင်းဢမ်ႇပွႆႇၸႂ်ႉၶဝ်လႄႈၶဝ်ၼၼ်ႉၸၢင်ႈဢွၼ်ၵၼ်ဢိင်ၼႃႇမႃႉၸိုဝ်ႈသဵင်ၵဝ်သေယဝ်ႉ၊ႁေႃးလၢတ်ႈၵႂၢမ်းမုသႃႇဢေႃႈ။ ၵဝ်တၵ်းလႆႈလိုပ်ႈသူ၊ဢိၵ်ႇတင်းပရေႃးၽႅတ်ႈဢၼ်ႁေႃးလၢတ်ႈတီႈသူၸိူဝ်းၼၼ်ႉဢွၵ်ႇပႅတ်ႈလႄႈသူတၵ်းလႆႈလုလႅဝ်ဢေႃႈ၊’ ဝႃႈၼင်ႇၼႆတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
တီႈယဵၸ်ႈပရေႃးႁဵၵ်ႈတင်းလၢႆ၊ဢိၵ်ႇတင်းၵူၼ်းတင်းသဵင်ႈတင်းလူင်ၵေႃႈ၊ၵဝ်လၢတ်ႈလႄႈဝႃႈ၊ “ထႃႇဝရႃႉၽြႃး၊ မီးဢမိင်ႉၸမ်ႉ၊ယႃႇပေဢွၼ်ၵၼ်ထွမ်ႇဢဝ်ၵႂၢမ်းပရေႃးၽႅတ်ႈဢၼ်ႁေႃးလၢတ်ႈတီႈသူလႄႈဝႃႈ၊ ‘ဢမ်ႇႁိုင်ဢမ်ႇၼၢၼ်း၊ၶိူင်ႈပိူင်ႁိူၼ်း ထႃႇဝရႃႉၽြႃး၊ တၵ်းၶိုၼ်းဢဝ်သေၵႃႈတီႈမိူင်း ပႃႇပုလုၼ်ႇ၊ မႃးဢေႃႈ၊’ ဝႃႈၼင်ႇၼႆၼၼ်ႉ၊ၶဝ်ၼၼ်ႉၸၢင်ႈဢွၼ်ၵၼ်ႁေႃးလၢတ်ႈၵႂၢမ်းမုသႃႇတီႈသူဢေႃႈ။-
ယႃႇပေဢွၼ်ၵၼ်ထွမ်ႇဢဝ်ၵႂၢမ်းၶဝ်။ ဢွၼ်ၵၼ်ၶၢမ်ႇတၢင်းဢၼ်ၸႂ်ႉဢၼ်သွႆတီႈၶုၼ်ႁေႃၶမ်းမိူင်း ပႃႇပုလုၼ်ႇ၊ လႄႈႁႂ်ႈဢသၢၵ်ႈလိပ်းယူႇတႃႉ။ ၵွပ်ႈပိူဝ်ႈသင်ဝဵင်းၼႆႉတၵ်းလႆႈႁွတ်ႈထိုင်တၢင်းဢၼ်သဵတ်ႇၵူၼ်းယဵၼ်ၵူၼ်းၵႂႃႇၸိူဝ်ႉၼင်ႇႁိုဝ်။-
ပေႃးၶဝ်ၼၼ်ႉၸႂ်ႈပရေႃးၽႅတ်ႈဢၼ်မၢၼ်ႇဢၼ်ၸႅတ်ႈလႄႈၶၢမ်ႇဢဝ်ၼုၵ်ႈၵပၢတ်ႈ ထႃႇဝရႃႉၽြႃး၊ ၸိုင်၊ႁႂ်ႈၶဝ်ဢွၼ်ၵၼ်တွင်းပၢၼ်ႇတီႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ႁႂ်ႈၶိူင်ႈပိူင်ဢၼ်ယင်းၵိုတ်းယင်းၵျၢၼ်ႇဝႆႉၵႃႈၼႂ်းႁိူၼ်း ထႃႇဝရႃႉၽြႃး၊ ဢိၵ်ႇတင်းၵႃႈၼႂ်းႁေႃၶုၼ်ႁေႃၶမ်းမိူင်း ယုတႃႉ၊ တင်းၵႃႈတီႈဝဵင်း ယေႇရုသလႅမ်ႇ၊ ၸိူဝ်းၼၼ်ႉဢမ်ႇလႆႈၶၢမ်ႇတၢင်းဢၼ်ဢဝ်ၵႂႃႇၵႃႈတီႈမိူင်း ပႃႇပုလုၼ်ႇ၊ ၼၼ်ႉသေၵမ်းၶႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ဢဝ်လွင်ႈၶိူင်ႈပိူင်ဢၼ်ယင်းၵိုတ်းၵျၢၼ်ႇဝႆႉယူႇၵႃႈၼႂ်းႁိူၼ်း ထႃႇဝရႃႉၽြႃး၊ ဢိၵ်ႇတင်းၵႃႈၼႂ်းႁေႃၶုၼ်ႁေႃၶမ်းမိူင်း ယုတႃႉ၊ တင်းၵႃႈတီႈဝဵင်း ယေႇရုသလႅမ်ႇ၊ ၼၼ်ႉသေလႄႈမီးဢမိင်ႉလႄႈဝႃႈ၊-
“ၶိူင်ႈပိူင်ၸိူဝ်းၼၼ်ႉတၵ်းလႆႈၶၢမ်ႇတၢင်းဢၼ်သိမ်းဢဝ်ၵႂႃႇၵႃႈတီႈမိူင်း ပႃႇပုလုၼ်ႇ၊ ပုၼ်ႉလႄႈတၵ်းလႆႈမီးယူႇၵႃႈတီႈၼၼ်ႈတေႃႇထိုင်ႁွတ်ႈမိုဝ်ႉဝၼ်းဢၼ်ၵဝ်မႃးလူမႃးတူၺ်းၼၼ်ႉဢေႃႈ။ မိူဝ်ႈၼၼ်ႉၵဝ်တၵ်းဢဝ်ၶိူင်ႈပိူင်ၸိူဝ်းၼၼ်ႉပွၵ်ႈၶိုၼ်းမႃးလႄႈဝႆႉၵႃႈတီႈၼႆႈဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ၼႂ်းပီၼၼ်ႉၵမ်းလဵဝ်ဢၼ်ဝႃႈပီဢၼ် ၸေႇတၵိ၊ ၶုၼ်ႁေႃၶမ်းမိူင်း ယုတႃႉ၊ ၸၢမ်ႇႁၢင်ႈၸၢမ်ႇႁေႃထူၼ်ႈပီတီႈသီႇၼႂ်းလိူၼ်တီႈႁႃႈၼၼ်ႉ၊ပရေႃးၽႅတ်ႈ ႁႃႇၼၼိ၊ လုၵ်ႈၸၢႆး ဢတ်ႉၸုရႃႉ၊ ဢၼ်ယူႇၵႃႈတီႈဝဵင်း ၵိပွင်ႇ၊ ၼၼ်ႉလၢတ်ႈတီႈၵဝ်ၵႃႈၼႂ်းႁိူၼ်း ထႃႇဝရႃႉၽြႃး၊ ၵႃႈတီႈၽၢႆႇၼႃႈယဵၸ်ႈပရေႃးႁဵၵ်ႈတင်းလၢႆ၊ဢိၵ်ႇတင်းၵူၼ်းတင်းသဵင်ႈတင်းလူင်လႄႈဝႃႈ၊-
“ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊ၵဝ်ႁၵ်းႁိၵ်းၵၢၼ်းၶုၼ်ႁေႃၶမ်းမိူင်း ပႃႇပုလုၼ်ႇ၊ ပႅတ်ႈယဝ်ႉဢေႃႈ။-
ၼႂ်းသွင်ပီၵဝ်တၵ်းဢဝ်ၶိူင်ႈပိူင်ႁိူၼ်း ထႃႇဝရႃႉၽြႃး၊ ၵႃႈဢၼ် ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်းမိူင်း ပႃႇပုလုၼ်ႇ၊ သိမ်းဢဝ်သေယဝ်ႉ၊ဢဝ်ၵႂႃႇၵႃႈတီႈမိူင်း ပႃႇပုလုၼ်ႇ၊ ၸိူဝ်းၼၼ်ႉၶိုၼ်းမႃးၵႃႈတီႈၼႆႈဢေႃႈ။-
ၵဝ်တၵ်းဢဝ်ၶုၼ် ယေႇၶေႃးၼိ၊ လုၵ်ႈၸၢႆး ယေႃးယၵိမ်း၊ ၶုၼ်ႁေႃၶမ်းမိူင်း ယုတႃႉ၊ ဢိၵ်ႇတင်းၵူၼ်းမိူင်း ယုတႃႉ၊ ၵႃႈဢၼ်လႆႈၶၢမ်ႇတၢင်းဢၼ်တိဢဝ်ၵႂႃႇၸူးၵႃႈတီႈဝဵင်း ပႃႇပုလုၼ်ႇ၊ ၸိူဝ်းၼၼ်ႉၶိုၼ်းမႃးၵႃႈတီႈၼႆႈဢေႃႈ။ ၵဝ်တၵ်းႁၵ်းႁိၵ်းၵၢၼ်းၶုၼ်ႁေႃၶမ်းမိူင်း ပႃႇပုလုၼ်ႇ၊ ပႅတ်ႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉပရေႃးၽႅတ်ႈ ယေႇရမိ၊ ၶိုၼ်းလၢတ်ႈတီႈပရေႃးၽႅတ်ႈ ႁႃႇၼၼိ၊ ၼၼ်ႉတေႃႇၼႃႈယဵၸ်ႈပရေႃးႁဵၵ်ႈတင်းလၢႆ၊ဢိၵ်ႇတင်းၵူၼ်းတင်းသဵင်ႈတင်းလူင်ဢၼ်ၸုၵ်းယူႇၵႃႈၼႂ်းႁိူၼ်း ထႃႇဝရႃႉၽြႃး၊ ၸိူဝ်းၼၼ်ႉၸမ်ႉ၊-
ပရေႃးၽႅတ်ႈ ယေႇရမိ၊ ၶိုၼ်းလၢတ်ႈလႄႈဝႃႈ၊ “ဢႃမိၼ်ႈ။ ႁႂ်ႈ ထႃႇဝရႃႉၽြႃး၊ ႁဵတ်းၸိူဝ်ႉၼင်ႇၼၼ်သေၵမ်းလူၺ်ႈ။ ႁႂ်ႈ ထႃႇဝရႃႉၽြႃး၊ ႁဵတ်းၸွမ်းၵႂၢမ်းဢၼ်မႂ်းႁေႃးလၢတ်ႈၼႆႉလႄႈသမ်ႉၶိုၼ်းဢဝ်ၶိူင်ႈပိူင်ႁိူၼ်း ထႃႇဝရႃႉၽြႃး၊ ဢိၵ်ႇလူၺ်ႈၵၼ်တင်းၶဝ်ၵႃႈဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၵႃႈတီႈမိူင်း ပႃႇပုလုၼ်ႇ၊ ၸိူဝ်းၼၼ်ႉၶိုၼ်းမႃးၵႃႈတီႈၼႆႈသေၵမ်းလူၺ်ႈ။-
ၼႂ်းဝႃႈၼၼ်သေၵေႃႈ မိူဝ်ႈလဵဝ်ၼႆႉထွမ်ႇငိၼ်းဢၼ်ၵဝ်ႁေႃးလၢတ်ႈထိုင်ႁူမႂ်း၊ဢိၵ်ႇတင်းႁူၵူၼ်းတင်းသဵင်ႈတင်းလူင်တႃႉ။-
ပရေႃးၽႅတ်ႈၶဝ်ဢၼ်ယူႇမႃးမိူဝ်ႈၵွၼ်ႇဢွၼ်တၢင်းၵဝ်တင်းမႂ်းၸိူဝ်းၼၼ်ႉလႆႈဢွၼ်ၵၼ်ႁေႃးလၢတ်ႈလွင်ႈသိုၵ်းလွင်ႈသိူဝ်၊လွင်ႈၶဝ်ႈယၢၵ်ႈမၢၵ်ႇပႅင်း၊လွင်ႈၽေးၵႃႇလႃႉႁႃႈလႅင်မိူင်းဢၼ်မီးၵႃႈၼႂ်းမိူင်းတင်းလၢႆ၊ဢိၵ်ႇတင်းၵႃႈၼႂ်းသိုင်ႇၸိုင်ႈဝၢၼ်ႈမိူင်းဢၼ်ႁႅင်းယႂ်ႇၼႃႇတင်းလၢႆဢေႃႈ။-
ပေႃးမီးပရေႃးၽႅတ်ႈဢၼ်ႁေႃးလၢတ်ႈလွင်ႈဢၼ်တၵ်းပဵၼ်ဢၼ်ၼိမ်ဢၼ်လီၸိုင်၊ယၢမ်းမိူဝ်ႈဢၼ်ၵႂၢမ်းပရေႃးၽႅတ်ႈၼၼ်ႉပျေႉၸုမ်ႇပဵၼ်မႃးၸွမ်းၼၼ်ႉၸိုင်၊လႆႈႁုလွင်ႈဢၼ်ပဵၼ်ပရေႃးၽႅတ်ႈၵေႃႉဢၼ် ထႃႇဝရႃႉၽြႃး၊ ပွႆႇၸႂ်ႉမႃးတႄႉၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ပရေႃးၽႅတ်ႈ ႁႃႇၼၼိ၊ ပူတ်းဢဝ်ၵၢၼ်းၵႃႈတီႈၶေႃးပရေႃးၽႅတ်ႈ ယေႇရမိ၊ ၼၼ်ႉသေလႄႈႁၵ်းပႅတ်ႈသေဢေႃႈ။-
ႁႃႇၼၼိ၊ လၢတ်ႈၵႃႈတီႈၽၢႆႇၼႃႈၵူၼ်းတင်းသဵင်ႈတင်းလူင်လႄႈဝႃႈ၊ “ ထႃႇဝရႃႉၽြႃး၊ မီးဢမိင်ႉၸမ်ႉ၊ၼႂ်းသွင်ပီၵဝ်တၵ်းဢဝ်ၵၢၼ်း ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်းမိူင်း ပႃႇပုလုၼ်ႇ၊ ႁၵ်းပႅတ်ႈသေၵႃႈတီႈၶေႃးၵူၼ်းၵူႈၸိူဝ်ႉၵူႈမဵဝ်းမိူၼ်ၸိူဝ်ႉၼင်ႇၼႆၼၼ်ႉဢေႃႈ၊” ဝႃႈၼင်ႇၼႆဢေႃႈ။ မိူဝ်ႈၼၼ်ႉပရေႃးၽႅတ်ႈ ယေႇရမိ၊ ဢွၵ်ႇၵႂႃႇသေဢေႃႈ။
ဝၢႆးသေဢၼ်ပရေႃးၽႅတ်ႈ ႁႃႇၼၼိ၊ ႁၵ်းၵၢၼ်းပႅတ်ႈသေၵႃႈတီႈၶေႃးပရေႃးၽႅတ်ႈ ယေႇရမိ၊ ၼၼ်ႉ၊ၼုၵ်ႈၵပၢတ်ႈ ထႃႇဝရႃႉၽြႃး၊ သမ်ႉႁွတ်ႈမႃးတီႈ ယေႇရမိ၊ လႄႈဝႃႈၸမ်ႉ၊-
“မႂ်းၵႂႃႇလႄႈသင်ႇလၢတ်ႈတီႈ ႁႃႇၼၼိ၊ လႄႈဝႃႈ၊ ထႃႇဝရႃႉၽြႃး၊ မီးဢမိင်ႉၸမ်ႉ၊မႂ်းႁၵ်းပႅတ်ႈၵၢၼ်းမႆႉၸိူဝ်းၼၼ်ႉလႆႈသေၵေႃႈ၊မၼ်းၸဝ်ႈတၵ်းႁဵတ်းၵၢၼ်းလဵၵ်းမႃးတႅၼ်းၵၢၼ်းၸိူဝ်းၼၼ်ႉဢေႃႈ။-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊ၵဝ်ဢဝ်ၵၢၼ်းလဵၵ်းတၢင်ႇသႂ်ႇပၼ်ၵႃႈၼိူဝ်ၶေႃးၵူၼ်းမဵဝ်းၵႃႈမီးၸိူဝ်းၼႆႉႁႂ်ႈၶဝ်လႆႈၶၢမ်ႇတၢင်းဢၼ်ၸႂ်ႉဢၼ်သွႆတီႈ ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်းမိူင်း ပႃႇပုလုၼ်ႇ၊ ဢေႃႈ။ ၶဝ်တၵ်းလႆႈဢွၼ်ၵၼ်ၶၢမ်ႇတၢင်းဢၼ်ၸႂ်ႉဢၼ်သွႆတီႈၶုၼ်ၼၼ်ႉဢမၢၼ်ႇၶၼ်ပဵၼ်ဢေႃႈ။ တူဝ်ထိူၼ်ႇႁၢႆႉတင်းလၢႆၵေႃႈ ၵဝ်ဢဝ်ဢၢပ်ႈပၼ်တီႈၶုၼ်ၼၼ်ႉယဝ်ႉ၊” ဝႃႈၼင်ႇၼႆဢေႃႈ။
ပရေႃးၽႅတ်ႈ ယေႇရမိ၊ သမ်ႉလၢတ်ႈတီႈပရေႃးၽႅတ်ႈ ႁႃႇၼၼိ၊ လႄႈဝႃႈ၊ “ ႁႃႇၼၼိ၊ ႟။ ထွမ်ႇငိၼ်းတႃႉ။ ထႃႇဝရႃႉၽြႃး၊ ဢမ်ႇပွႆႇၸႂ်ႉမႂ်း။ မႂ်းၸၢင်ႈႁဵတ်းႁႂ်ႈၵူၼ်းမဵဝ်းၼႆႉဢိင်ပိုင်ႈမုသႃႇဢေႃႈ။-
ပိူဝ်ႈၼႆလႄႈ ထႃႇဝရႃႉၽြႃး၊ မီးဢမိင်ႉၸမ်ႉ၊တူၺ်းလူး။ ၵဝ်တၵ်းပႄႇၽဵဝ်ႈမႂ်းပႅတ်ႈသေၵႃႈၼိူဝ်ၼႃႈလိၼ်ဢေႃႈ။ မႂ်းတၵ်းလႆႈတၢႆၼႂ်းပီၼႆႉၵွပ်ႈပိူဝ်ႈမႂ်းသင်ႇသွၼ်ပၼ်တၢင်းဢၼ်လုၵ်ႉၽိုၼ်ႉၶတ်းၶဵင်ႇၵၼ်တင်း ထႃႇဝရႃႉၽြႃး၊ ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၼင်ႇၼၼ်လႄႈပရေႃးၽႅတ်ႈ ႁႃႇၼၼိ၊ ၼၼ်ႉတၢႆၼႂ်းလိူၼ်တီႈၸဵတ်းပီၼၼ်ႉၵမ်းလဵဝ်ဢေႃႈ။
ဢၼ်ၼႆႉၸမ်ႉ၊ပဵၼ်ၶေႃႈၵႂၢမ်းလိၵ်ႈဢၼ်ပရေႃးၽႅတ်ႈ ယေႇရမိ၊ တႅမ်ႈသေယဝ်ႉ၊လုၵ်ႉၵႃႈတီႈဝဵင်း ယေႇရုသလႅမ်ႇ၊ သေလႄႈသူင်ႇၵႂႃႇၸူးၵႃႈတီႈၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ဢၼ်ယင်းၵိုတ်းယင်းၵျၢၼ်ႇယူႇတီႈၼႂ်းၶဝ်ၸိူဝ်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၼၼ်ႉ၊ဢိၵ်ႇတင်းယဵၸ်ႈပရေႃးႁဵၵ်ႈလႂ်၊ပရေႃးၽႅတ်ႈလႂ်၊ၵူၼ်းၵႃႈဢၼ်လႆႈၶၢမ်ႇတၢင်းဢၼ် ၼေႇပုၶတ်ႉၼေႇၸႃႇ၊ သိမ်းဢဝ်ဢွၵ်ႇသေၵႃႈတီႈဝဵင်း ယေႇရုသလႅမ်ႇ၊ ၵႂႃႇၸူးၵႃႈတီႈမိူင်း ပႃႇပုလုၼ်ႇ၊ ၼၼ်ႉဢေႃႈ။-
လိၵ်ႈၼႆႉၸမ်ႉ၊တႅမ်ႈမိူဝ်ႈဢၼ်ဝၢႆးသေၶုၼ်ႁေႃၶမ်း ယေႇၶေႃးၼိ၊ ဢိၵ်ႇတင်းမႄႈၸဝ်ႈ၊ၶုၼ်ဢၼ်ပွင်ၵၢၼ်ၼႂ်းႁၢင်ႈၼႂ်းႁေႃလႂ်၊မူးမၢတ်ႈၽွင်းမိူင်းဝဵင်း ယေႇရုသလႅမ်ႇ၊ မိူင်း ယုတႃႉ၊ လႂ်၊ၸၢင်ႈမႆႉလႂ်၊ၸၢင်ႈလဵၵ်းလႂ်ၸိူဝ်းၼၼ်ႉဢွၵ်ႇသေၵႃႈတီႈဝဵင်း ယေႇရုသလႅမ်ႇ၊ ၵႂႃႇယဝ်ႉၼၼ်ႉဢေႃႈ။-
လိၵ်ႈၼႆႉၸိုင်၊မၼ်းဢဝ်သူင်ႇပၼ်ၵႂႃႇၵႃႈၼႂ်းမိုဝ်း ဢေးလႃႇသႃႉ၊ လုၵ်ႈၸၢႆး သႃႇၽၢၼ်ႇ၊ တင်း ၵေႇမရိ၊ လုၵ်ႈၸၢႆး ႁိလၶိ၊ သွင်ၵေႃႉၼႆႉဢၼ် ၸေႇတၵိ၊ ၶုၼ်ႁေႃၶမ်း ယုတႃႉ၊ ပွႆႇၸႂ်ႉၶဝ်ၵႂႃႇၵႃႈတီႈမိူင်း ပႃႇပုလုၼ်ႇ၊ ႁႂ်ႈၵႂႃႇၸူးၵႃႈတီႈ ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်းမိူင်း ပႃႇပုလုၼ်ႇ၊ ဢေႃႈ။ ၵႃႈၼႂ်းလိၵ်ႈၼၼ်ႉၸမ်ႉ။
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉတီႈၶဝ်ၸိူဝ်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇဢၼ်မၼ်းၸဝ်ႈႁႂ်ႈသိမ်းဢဝ်ဢွၵ်ႇသေၵႃႈတီႈဝဵင်း ယေႇရုသလႅမ်ႇ၊ ၵႂႃႇၸူးၵႃႈတီႈမိူင်း ပႃႇပုလုၼ်ႇ၊ ၵႃႈမီးၼၼ်ႉလႄႈဝႃႈၸမ်ႉ၊-
“ဢွၼ်ၵၼ်ႁဵတ်းႁိူၼ်းႁဵတ်းယေးသေလႄႈၶျႃးတီႈယူႇတႃႉ။ ဢွၼ်ၵၼ်ၽုၵ်ႇသွမ်ႈသူၼ်ဢူးယဵၼ်ႇသေလႄႈၵိၼ်မၢၵ်ႇမၼ်းႁူင်းမၼ်းတႃႉ။-
ဢွၼ်ၵၼ်ဢဝ်မေးလႄႈၵိူတ်ႇလဵင်ႉလုၵ်ႈၸၢႆးလုၵ်ႈယိင်းတႃႉ။ တီႈလုၵ်ႈၸၢႆးသူၼၼ်ႉဢဝ်မေးပၼ်လႄႈတီႈလုၵ်ႈယိင်းသူၼၼ်ႉၵေႃႈဢဝ်ၽူဝ်ပၼ်သေယဝ်ႉ၊သမ်ႉႁႂ်ႈၶဝ်ဢွၼ်ၵၼ်ၵိူတ်ႇလဵင်ႉလုၵ်ႈလၢင်းတႃႉ။ ဢွၼ်ၵၼ်ႁႂ်ႈၽႄႈယႂ်ႇၼမ်ၵိုၼ်းမႃးၵႃႈတီႈၼၼ်ႈတႃႉ။ ယႃႇပေႁႂ်ႈမီးတၢင်းဢၼ်ၵေႇၵႂႃႇယွမ်းၵႂႃႇ။-
ဢွၼ်ၵၼ်ႁႃဢဝ်တၢင်းဢၼ်ၼိမ်ဢၼ်လီပုၼ်ႈဝဵင်းဢၼ်ၵဝ်ႁႂ်ႈသူလႆႈၶၢမ်ႇတၢင်းဢၼ်သိမ်းဢဝ်ၵႂႃႇၼၼ်ႉလႄႈသူးတွင်းတီႈ ထႃႇဝရႃႉၽြႃး၊ ပုၼ်ႈဝဵင်းၼၼ်ႉတႃႉ။ ပေႃးဝဵင်းၼၼ်ႉမီးတၢင်းဢၼ်ၼိမ်ဢၼ်လီၸိုင်၊သူၵေႃႈတၵ်းမီးတၢင်းဢၼ်ၼိမ်ဢၼ်လီဢေႃႈ။-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊ယႃႇပေႁႂ်ႈပရေႃးၽႅတ်ႈ၊ဢိၵ်ႇတင်းသြႃႇဢၼ်ႁုဢၼႃႇၵၢတ်ႈဢၼ်မီးၵႃႈၼႂ်းသူၸိူဝ်းၼၼ်ႉပႅတ်ႉလႅၼ်သူ။ ယႃႇပေထွမ်ႇဢဝ်တၢင်းဢၼ်ၶဝ်ၼွၼ်းၽၼ်ႁၼ်ၸိူဝ်းၼၼ်ႉ။-
လွင်ႈမၼ်းၸမ်ႉ၊ၶဝ်ၸၢင်ႈဢိင်ၼႃႇမႃႉၸိုဝ်ႈသဵင်ၵဝ်သေလႄႈႁေႃးလၢတ်ႈၵႂၢမ်းမုသႃႇဢေႃႈ။ ၵဝ်ယင်းဢမ်ႇပွႆႇၸႂ်ႉၶဝ်၊” ဝႃႈၼင်ႇၼႆ ထႃႇဝရႃႉၽြႃး၊ မီးဢမိင်ႉဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “မိူဝ်ႈဢၼ်ၸေးၸဵတ်းသိပ်းပီၵႃႈတီႈမိူင်း ပႃႇပုလုၼ်ႇ၊ ယဝ်ႉၼၼ်ႉ၊ၵဝ်တၵ်းမႃးလူမႃးတူၺ်းလႄႈႁႂ်ႈပဵၼ်ၸွမ်းၵတိဢၼ်ၵဝ်ဝႆႉတီႈသူၼၼ်ႉပုၼ်ႈတၵ်းဢဝ်သူၶိုၼ်းမိူဝ်းၵႃႈတီႈမိူင်းသူၼၼ်ႉဢေႃႈ။-
ၵဝ်ႁုတၢင်းၵျၢမ်ႇတၢင်းပွင်ဢၼ်ၵဝ်ၵျၢမ်ႇပွင်ပုၼ်ႈသူဢၼ်ဝႃႈ၊တၢင်းၵျၢမ်ႇတၢင်းပွင်လွင်ႈတၢင်းဢၼ်ႁၢႆႉဢၼ်ယုတ်ႈဢမ်ႇၸႂ်ႈ၊ပဵၼ်တၢင်းၵျၢမ်ႇတၢင်းပွင်လွင်ႈတၢင်းဢၼ်ၼိမ်ဢၼ်လီၵူၺ်းၵူၺ်း၊ႁႂ်ႈသူလႆႈဢၵျူဝ်းတၢင်းဢၼ်မုင်ႈထႃႈမွင်းထႃႈၼႂ်းၸူဝ်ႈပၢၼ်သူဝၼ်းတႃမိူဝ်းၼႃႈဢေႃႈ၊” ဝႃႈၼင်ႇၼႆ ထႃႇဝရႃႉၽြႃး၊ မီးဢမိင်ႉဢေႃႈ။-
“မိူဝ်ႈၼၼ်ႉသူတၵ်းဢွၼ်ၵၼ်ႁွင်ႉႁႃၵဝ်ဢေႃႈ။ သူတၵ်းမႃးလႄႈသူးတွင်းတီႈၵဝ်ဢေႃႈ။ ၵဝ်ၵေႃႈတၵ်းထွမ်ႇဢဝ်ၵႂၢမ်းသူဢေႃႈ။-
ယၢမ်းမိူဝ်ႈဢၼ်သူပႃးတင်းႁူဝ်ၸႂ်သဵင်ႈသဵင်ႈသေလႄႈႁႃဢဝ်ၵဝ်ၼၼ်ႉ၊သူတၵ်းထူပ်းႁၼ်ၵဝ်ဢေႃႈ။-
သူတၵ်းထူပ်းႁၼ်ၵဝ်ဢမၢၼ်ႇၶၼ်ပဵၼ်ဢေႃႈ။” ဝႃႈၼင်ႇၼႆ ထႃႇဝရႃႉၽြႃး၊ မီးဢမိင်ႉဢေႃႈ။ “ၵဝ်တၵ်းသူင်ႇသူပွၵ်ႈၶိုၼ်းမိူဝ်းၸူးမိူင်းသူဢေႃႈ။ ၵဝ်တၵ်းၸုသိမ်းဢဝ်သူဢွၵ်ႇသေၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းၵႃႈတီႈဢၼ်သူတႅၵ်ႇၽႄၵႂႃႇယၢႆႈၵႂႃႇၵူႈတီႈၵူႈလႅၼ်ၼၼ်ႉဢေႃႈ။ လိုၼ်းၼၼ်ႉတၵ်းႁႂ်ႈသူပွၵ်ႈၶိုၼ်းမႃးသေၵႃႈတီႈမိူင်းတီႈဢၼ်သူလႆႈၶၢမ်ႇတၢင်းဢၼ်သိမ်းဢဝ်ဢွၵ်ႇၵႂႃႇၼၼ်ႉဢေႃႈ။ ဢၼ်ၼႆႉၸမ်ႉ၊ပဵၼ်ၶေႃႈၵႂၢမ်းၵဝ် ထႃႇဝရႃႉၽြႃး၊ မွၵ်ႇလၢတ်ႈဢေႃႈ၊” ဝႃႈၼင်ႇၼႆ ထႃႇဝရႃႉၽြႃး၊ မီးဢမိင်ႉဢေႃႈ။
သူလၢတ်ႈလႄႈဝႃႈ၊ “ ထႃႇဝရႃႉၽြႃး၊ ႁႂ်ႈပရေႃးၽႅတ်ႈပေႃႇမႃးပုၼ်ႈႁဝ်းၵႃႈၼႂ်းမိူင်း ပႃႇပုလုၼ်ႇ၊ ယဝ်ႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ဢဝ်လွင်ႈၶုၼ်ႁေႃၶမ်းဢၼ်ၼင်ႈၵႃႈၼိူဝ်ရႃႇၸႃႉပလၢင်ႇ တႃႇဝိတ်ႈ၊ ဢိၵ်ႇတင်းၶဝ်ၸိူဝ်းဢၼ်ယူႇၵႃႈၼႂ်းဝဵင်းၼႆႉတင်းသဵင်ႈတင်းလူင်ဢၼ်ဝႃႈ၊ပီႈသူၼွင်ႉသူဢၼ်ဢမ်ႇလႆႈၶၢမ်ႇတၢင်းဢၼ်သိမ်းဢဝ်ၵႂႃႇလူၺ်ႈၵၼ်တင်းသူၼၼ်ႉလႄႈမီးဢမိင်ႉၸမ်ႉ၊-
ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ၵဝ်တၵ်းပွႆႇၸႂ်ႉၽေးလၢပ်ႇၽေးလႅဝ်း၊ၽေးတၢင်းဢၼ်ဢိုပ်းဢၼ်ယၢၵ်ႈ၊ၽေးၵႃႇလႃႉႁႃႈလႅင်မိူင်းတူၵ်းႁွတ်ႈၵႃႈၼိူဝ်ၶဝ်ဢေႃႈ။ ႁႂ်ႈၶဝ်ပဵၼ်ၸိူဝ်ႉၼင်ႇမၢၵ်ႇလိူဝ်ႇဢၼ်တူႇၼဝ်ႈၼႃႇလူင်လၢင်ထၢၼ်ႈပေႃးဢမ်ႇၵိၼ်လႆႈၼၼ်ႉဢေႃႈ။-
ၵဝ်တၵ်းဢဝ်ၽေးလၢပ်ႇၽေးလႅဝ်း၊ၽေးတၢင်းဢၼ်ဢိုပ်းဢၼ်ယၢၵ်ႈ၊ၽေးၵႃႇလႃႉႁႃႈလႅင်မိူင်းၼိၵ်ႈၸၢၵ်ႈငႅၼ်းသႄးၶဝ်ဢေႃႈ။ ပိူဝ်ႈၼႆလႄႈမိူဝ်ႈဢၼ်ၵူၼ်းၵူႈၸိူဝ်ႉၵူႈမဵဝ်းႁၼ်ၶဝ်ၼၼ်ႉတၵ်းတေတူၵ်းၸႂ်ၵူဝ်ႁႄယွၼ်ႉၶဝ်ဢေႃႈ။ ၵႃႈတီႈဢၼ်ၵဝ်ႁႂ်ႈၶဝ်တႅၵ်ႇယၢႆႈၽၢတ်ႇၽႄၵၼ်ၵႂႃႇၵူႈတီႈၵူႈလႅၼ်ၼၼ်ႉၵူၼ်းတင်းလၢႆတၵ်းႁၼ်ၽေးတုၵ်ႉၶႃႉတၢင်းဢၼ်ၶဝ်ထူပ်းၺႃးလႄႈတၵ်းတေတူၵ်းၸႂ်သၼ်ႇဝႆၵၼ်ဢေႃႈ။ တၵ်းတေႁဵတ်းပျၢၵ်ႈႁဵတ်းၶူဝ်သႄႉသွမ်းၶဝ်လႄႈဢဝ်ၸိုဝ်ႈသဵင်ၶဝ်ၼၼ်ႉပဵၼ်တီႈဢၼ်ၵိၼ်ႇလႃႇၵၼ်ဢေႃႈ။-
လွင်ႈမၼ်းၸမ်ႉ၊ပိၵ်ႉသမ်ႉၵဝ်ပၼ်ပျႃႇတိၵ်ႈၶိူဝ်းၶိူဝ်းယႂ်းယႂ်းၵႃႈတီႈၶႃႈၵဝ်ပရေႃးၽႅတ်ႈသေလႄႈၵႂႃႇမွၵ်ႇလၢတ်ႈၶဝ်သေၵေႃႈ ၶဝ်ဢမ်ႇထွမ်ႇဢမ်ႇဢဝ်ၵႂၢမ်းၵဝ်။ ပိူဝ်ႈၼႆလႄႈဢမုၼႆႉတၵ်းတူၵ်းႁွတ်ႈထိုင်ဢေႃႈ။ ၶဝ်ပႄႇပႅတ်ႈတၢင်းဢၼ်ထွမ်ႇဢဝ်ၵႂၢမ်းပျႃႇတိၵ်ႈၸဝ်ႈဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။-
“ပိူဝ်ႈၼႆလႄႈသူၸိူဝ်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇဢၼ်ၵဝ်ပွႆႇၸႂ်ႉဢွၵ်ႇသေၵႃႈၼႂ်းဝဵင်း ယေႇရုသလႅမ်ႇ၊ ၵႂႃႇၸူးၵႃႈတီႈဝဵင်း ပႃႇပုလုၼ်ႇ၊ တင်းသဵင်ႈတင်းလူင်ၶဝ်႟။ ဢွၼ်ၵၼ်ထွမ်ႇငိၼ်းၵႂၢမ်း ထႃႇဝရႃႉၽြႃး၊ တႃႉ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ဢဝ်လွင်ႈ ဢႃႇႁပ်ႉ၊ လုၵ်ႈၸၢႆး ၵေႃးလႃႇယႃႉ၊ ဢိၵ်ႇတင်း ၸေႇတၵိ၊ လုၵ်ႈၸၢႆး မႃႇသေႇယႃႉ၊ ဢၼ်ဢိင်ၼႃႇမႃႉၸိုဝ်ႈသဵင်မၼ်းၸဝ်ႈလႄႈႁေႃးလၢတ်ႈၵႂၢမ်းမုသႃႇတီႈသူၼၼ်ႉမီးဢမိင်ႉၸမ်ႉ၊ “ၵဝ်တၵ်းဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်း ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်းမိူင်း ပႃႇပုလုၼ်ႇ၊ လႄႈၶုၼ်ၼၼ်ႉတၵ်းဢဝ်ၶဝ်တၢႆသိုဝ်ႈၼႃႈတႂ်ႈတႃသူဢေႃႈ။-
ၵူၼ်းမဵဝ်း ယုတႃႉ၊ တင်းသဵင်ႈတင်းလူင်ဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၵႃႈတီႈဝဵင်း ပႃႇပုလုၼ်ႇ၊ ၸိူဝ်းၼၼ်ႉတၵ်းဢွၼ်ၵၼ်ဢဝ်ၸိုဝ်ႈသဵင်ၶဝ်ၼၼ်ႉသေလႄႈၵိၼ်ႇဝႃႈလႄႈဝႃႈ၊ ‘ႁႂ်ႈ ထႃႇဝရႃႉၽြႃး၊ ႁဵတ်းႁႂ်ႈမႂ်းပဵၼ်ၸိူဝ်ႉၼင်ႇ ၸေႇတၵိ၊ ဢိၵ်ႇတင်း ဢႃႇႁပ်ႉ၊ ဢၼ်ၶုၼ်ႁေႃၶမ်းမိူင်း ပႃႇပုလုၼ်ႇ၊ ဢဝ်တုတ်ႇၽႆးပႅတ်ႈၼၼ်ႉသေၵမ်းလူၺ်ႈ၊’ ဝႃႈၼင်ႇၼႆဢေႃႈ။-
လွင်ႈမၼ်းၸမ်ႉ၊ၶဝ်ၼၼ်ႉဢွၼ်ၵၼ်ႁဵတ်းဢမုဢထမ်ႇမႃႉၵႃႈၼႂ်းၵူၼ်းမဵဝ်း ဢိသရေး၊ ယဝ်ႉ။ ၶဝ်ဢွၼ်ၵၼ်ၽိတ်းပိူင်ႈမေးပိူၼ်ႈယဝ်ႉ။ ၵဝ်ယင်းဢမ်ႇသင်ႇဢမ်ႇလၢတ်ႈဝႆႉတီႈၶဝ်လႄႈၶဝ်ဢွၼ်ၵၼ်ဢိင်ၼႃႇမႃႉၸိုဝ်ႈသဵင်ၵဝ်သေယဝ်ႉႁေႃးလၢတ်ႈမုသႃႇယဝ်ႉ။ ၵဝ်ႁုႁၼ်လႄႈပဵၼ်သၢၵ်ႈသေႇဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ၵႃႈတီႈ သေႇမႃႇယႃႉ၊ ၵူၼ်းဝၢၼ်ႈ ၼႁေႇလမ်ႇ၊ ၵေႃႈမႂ်းတၵ်းလႆႈလၢတ်ႈလႄႈဝႃႈ၊-
“ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊မႂ်းဢိင်ၼႃႇမႃႉၸိုဝ်ႈသဵင်မႂ်းသေလႄႈပၼ်လိၵ်ႈၵႂႃႇတီႈယဵၸ်ႈပရေႃးႁဵၵ်ႈ ၸေႇၽၼိ၊ လုၵ်ႈၸၢႆး မႃႇသေႇယႃႉ၊ ဢိၵ်ႇတင်းယဵၸ်ႈပရေႃးႁဵၵ်ႈတင်းသဵင်ႈတင်းလူင်တင်းၵူၼ်းဝဵင်း ယေႇရုသလႅမ်ႇ၊ ၵႃႈမီးၼၼ်ႉလႄႈဝႃႈ၊-
ထႃႇဝရႃႉၽြႃး၊ ၶၢၼ်းမႂ်းဝႆႉႁႂ်ႈမႂ်းပဵၼ်ယဵၸ်ႈပရေႃးႁဵၵ်ႈပုၼ်ႈတၢင်တူဝ်ယဵၸ်ႈပရေႃးႁဵၵ်ႈ ယူဝ်းယတႃႉ၊ ယဝ်ႉလႄႈတေႃႈလဵဝ်ၼႆႉမႂ်းပဵၼ်ၶုၼ်ဢၼ်ဢုပ်ႉထိင်းၵျွင်းပိၵ်ႈမၢၼ်ႇၸဝ်ႈယဝ်ႉ။ ၵၢၼ်ငၢၼ်းပုၼ်ႈၽွၼ်းမႂ်းၸမ်ႉ၊မႂ်းတၵ်းလႆႈဢဝ်ၶဝ်ၸိူဝ်းဢၼ်ယွင်ႇဢၼ်မႃႈလႄႈႁဵတ်းပရေႃးၽႅတ်ႈၸိူဝ်းၼၼ်ႉၶင်ဝႆႉၵႃႈၼႂ်းထွင်ႇလႄႈဢဝ်သႂ်ႇၶႂၢင်မိုဝ်းၶႂၢင်ၶေႃးဝႆႉဢေႃႈ။-
ၵွပ်ႈပိူဝ်ႈသင်လႄႈမႂ်းဢမ်ႇသင်ႇသွၼ်သုင်းမႃႉ ယေႇရမိ၊ ၵူၼ်းဝၢၼ်ႈ ဢႃႇၼသုတ်ႉ၊ ဢၼ်ႁဵတ်းပရေႃးၽႅတ်ႈၵႃႈၼႂ်းသူၼၼ်ႉၸိူဝ်ႉၼင်ႇႁိုဝ်။-
မၼ်းၼၼ်ႉသင်ႇလၢတ်ႈမႃးတီႈႁဝ်းဢၼ်ယူႇၵႃႈတီႈမိူင်း ပႃႇပုလုၼ်ႇ၊ ၸိူဝ်းၼႆႉလႄႈဝႃႈ၊ ‘ဢမုၼႆႉတၵ်းႁိုင်ဢေႃႈ။ ဢွၼ်ၵၼ်ႁဵတ်းႁိူၼ်းႁဵတ်းယေးသေလႄႈၶျႃးတီႈယူႇတႃႉ။ ဢွၼ်ၵၼ်ၽုၵ်ႇသွမ်ႈသူၼ်ဢူးယဵၼ်ႇလႄႈၵိၼ်မၢၵ်ႇမၼ်းႁူင်းမၼ်းတႃႉ၊’ ဝႃႈၼင်ႇၼႆယဝ်ႉလူင်ပႄႇ၊” ဝႃႈၼင်ႇၼႆဢေႃႈ။
ယဵၸ်ႈပရေႃးႁဵၵ်ႈ ၸေႇၽၼိ၊ ဢဝ်လိၵ်ႈၼႆႉၽတ်းဢၢၼ်ႇထိုင်ႁူပရေႃးၽႅတ်ႈ ယေႇရမိ၊ ဢေႃႈ။-
မိူဝ်ႈၼၼ်ႉၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈ ယေႇရမိ၊ လႄႈသင်ႇလၢတ်ႈဝႆႉၸမ်ႉ၊-
“မႂ်းပၼ်လိၵ်ႈၵႂႃႇတီႈၶဝ်ၸိူဝ်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇတင်းသဵင်ႈတင်းလူင်ၼၼ်ႉလႄႈဝႃႈ၊ ထႃႇဝရႃႉၽြႃး၊ ဢဝ်လွင်ႈ သေႇမႃႇယႃႉ၊ ၵူၼ်းဝၢၼ်ႈ ၼႁေႇလမ်ႇ၊ လႄႈမီးဢမိင်ႉၸမ်ႉ၊ၵွပ်ႈပိူဝ်ႈ သေႇမႃႇယႃႉ၊ ဢၼ်ၵဝ်ဢမ်ႇပွႆႇၸႂ်ႉၼၼ်ႉႁဵတ်းပရေႃးၽႅတ်ႈတီႈသူႁႂ်ႈသူဢိင်ပိုင်ႈမုသႃႇၼၼ်ႉလႄႈ၊-
ထႃႇဝရႃႉၽြႃး၊ မီးဢမိင်ႉၸမ်ႉ၊ၵဝ်တၵ်းပၼ်တၢမ်ႇတီႈ သေႇမႃႇယႃႉ၊ ဢိၵ်ႇတင်းမဵဝ်းၸိူဝ်ႉၶိူဝ်းမၼ်းဢေႃႈ။ ၸိူဝ်ႉၶိူဝ်းမၼ်းတၵ်းဢမ်ႇလႆႈမီးသေၵေႃႉသေၵူၼ်းဢၼ်လႆႈဢၶႂၢင်ႉယူႇၵႃႈတီႈၼႂ်းၵူၼ်းမဵဝ်းၼႆႉ၊ ထႃႇဝရႃႉၽြႃး၊ မီးဢမိင်ႉၸမ်ႉ၊မၼ်းဢမ်ႇလႆႈႁၼ်ၵျေးၸူးဢၼ်ၵဝ်တၵ်းႁဵတ်းတီႈၵူၼ်းၵဝ်တင်းလၢႆၵွပ်ႈပိူဝ်ႈဢၼ်မၼ်းသင်ႇသွၼ်ပၼ်တၢင်းဢၼ်ၶတ်းၶဵင်ႇလုၵ်ႉၽိုၼ်ႉ ထႃႇဝရႃႉၽြႃး၊ ၼၼ်ႉ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈ ယေႇရမိ၊ ဢေႃႈ။-
ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊ “တႅမ်ႈဝႆႉၵႂၢမ်းၵႃႈဢၼ်ၵဝ်လၢတ်ႈတီႈမႂ်းၸိူဝ်းၼႆႉၵႃႈၼႂ်းပပ်ႉလိၵ်ႈတႃႉ။-
ထႃႇဝရႃႉၽြႃး၊ မီးဢမိင်ႉၸမ်ႉ၊မိုဝ်ႉဝၼ်းဢၼ်ၵဝ်တၵ်းဢဝ်ၵူၼ်းၵဝ်ၵူၼ်းမဵဝ်း ဢိသရေး၊ ဢိၵ်ႇတင်းၵူၼ်းမဵဝ်း ယုတႃႉ၊ ဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၸိူဝ်းၼၼ်ႉပွၵ်ႈၶိုၼ်းမႃးၼၼ်ႉတၵ်းႁွတ်ႈထိုင်ဢေႃႈ။ ၵဝ်တၵ်းႁႂ်ႈၶဝ်ၶိုၼ်းမႃးၵႃႈတီႈမိူင်းဢၼ်ၵဝ်ပၼ်တီႈပူႇမွၼ်ႇၶဝ်ၼၼ်ႉလႄႈၶဝ်ၼၼ်ႉတၵ်းလႆႈဢွၼ်ၵၼ်ပိူင်ႇမိူင်းၼၼ်ႉဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ထႃႇဝရႃႉၽြႃး၊ မီးဢမိင်ႉတီႈၵူၼ်းမဵဝ်း ဢိသရေး၊ ဢိၵ်ႇတင်းၵူၼ်းမဵဝ်း ယုတႃႉ၊ လႄႈဝႃႈၸမ်ႉ၊
ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ႁဝ်းလႆႈငိၼ်းသဵင်ႁွင်ႉဢၼ်တူၵ်းၸႂ်လႄႈ ဢမ်ႇမီးတၢင်းဢၼ်ၼိမ်ဢၼ်လီ။ မီးလွင်ႈ တၢင်းဢၼ်လီၵူဝ်လီႁႄၵူၺ်းဢေႃႈ။
ဢွၼ်ၵၼ်တွင်ႈထၢမ်လႄႈလူတူၺ်းလွင်ႈဢၼ်ၵူၼ်းၸၢႆးၸၢင်ႈၵိူတ်ႇလဵင်ႉလုၵ်ႈ လဵင်ႉလၢင်းႁိုဝ်းၼၼ်ႉတႃႉ။ ၵွပ်ႈပိူဝ်ႈသင်လႄႈၵဝ်လႆႈႁၼ်လွင်ႈဢၼ် ၵူၼ်းၸၢႆးၵူႈၵေႃႉၵူႈၵူၼ်းဢဝ်မိုဝ်းတၢင်ႇ ၵႃႈၼိူဝ်ဢႅဝ်တူဝ်ၸဝ်ႈၵဝ်ႇ၊ မိူၼ်ၸိူဝ်ႉၼင်ႇမႄႈယိင်းဢၼ်လႆႈၶၢမ်ႇ ဝူၺ်ႇတၼႃႇတၢင်းဢၼ်ၵိူတ်ႇလဵင်ႉလုၵ်ႈ လဵင်ႉလၢင်းၼၼ်ႉလႄႈ ၼႃႈၵူၼ်းတင်းသဵင်ႈတင်းလူင်မီးတၢင်းဢၼ် ၼႃႈႁဵဝ်ႇႁႅင်ႈလႄႈဢူၼ်ႈၵႂႃႇၼၼ်ႉၸိူဝ်ႉၼင်ႇႁိုဝ်။
ဢလူဝ်း၊ဢလူဝ်း၊မိုဝ်ႉဝၼ်းၼၼ်ႉၸမ်ႉ၊ပဵၼ် မိုဝ်ႉဝၼ်းဢၼ်ယႂ်ႇၼႃႇထၢၼ်ႈပေႃးဢမ်ႇမီး တၢင်းဢၼ်တႅၵ်ႈတိူင်းလႆႈဢေႃႈ။ ပဵၼ်မိုဝ်ႉဝၼ်းဢၼ်ၽေးႁွတ်ႈထိုင်တီႈ ၵူၼ်းမဵဝ်း ယႃႇၵုပ်ႈ၊ ဢေႃႈ။ ၼႂ်းဝႃႈၼၼ်သေၵေႃႈ၊ၶဝ်တၵ်းႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၵႃႈၼႂ်းဝၼ်းၼၼ်ႉဢေႃႈ။
“ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ၼႂ်းမိုဝ်ႉဝၼ်းၼၼ်ႉၵဝ်တၵ်းဢဝ်ၵၢၼ်းဢၼ်ၶဝ်လႆႈႁၢပ်ႇၼၼ်ႉႁၵ်းပႅတ်ႈသေၵႃႈတီႈၶေႃးၶဝ်လႄႈတႅပ်းၸိူၵ်ႈဢၼ်မတ်ႉၽုၵ်ႇၶဝ်ၼၼ်ႉပႅတ်ႈဢေႃႈ။ ၵမ်းလိုၼ်းၵူၼ်းတၢင်ႇၸိူဝ်ႉတၢင်ႇမဵဝ်းတင်းလၢႆတၵ်းဢမ်ႇလႆႈဢွၼ်ၵၼ်ဢဝ်ၶဝ်ႁဵတ်းၶႃႈထႅင်ႈသေပွၵ်ႈ။-
ၶဝ်တၵ်းလႆႈဢွၼ်ၵၼ်ပွင်ႁဵတ်းဢမုၽြႃးပဵၼ်ၸဝ်ႈၶဝ်၊ဢိၵ်ႇတင်းဢမုၶုၼ်လူင် တႃႇဝိတ်ႈ၊ ၶဝ်ဢၼ်ၵဝ်တၵ်းႁႂ်ႈပေႃႇပဵၼ်မႃးပုၼ်ႈၶဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ထႃႇဝရႃႉၽြႃး၊ မီးဢမိင်ႉၸမ်ႉ၊ “ၶႃႈၵဝ် ယႃႇၵုပ်ႈ၊ ႟။ ယႃႇပေၵူဝ်ပေႁႄ။ ဢိသရေး၊ ႟။ ယႃႇပေၸႂ်လု။ ၵဝ်တၵ်းၼုၵ်ႈဢဝ်မႂ်းဢွၵ်ႇသေၵႃႈတီႈ ဢၼ်ၵႆ၊ဢိၵ်ႇတင်း မဵဝ်းၸိူဝ်ႉၶိူဝ်းမႂ်းဢွၵ်ႇသေၵႃႈတီႈမိူင်းဢၼ်ပိူၼ်ႈသိမ်းဢဝ်ၶဝ်ၵႂႃႇၼၼ်ႉပွၵ်ႈမႃးဢေႃႈ။ ယႃႇၵုပ်ႈ၊ တၵ်းၶိုၼ်းမႃးလႄႈယင်းဢမ်ႇမီး ၵေႃႉဢၼ်လွၵ်ႇဢၼ်ငိုတ်ႈမၼ်း၊မၼ်းတၵ်းလႆႈ ယူႇတဵတ်ႇလီၼိမ်လီၵတ်းယဵၼ်ၶျၢမ်းသႃႇ ၼႃႇလူင်လၢင်ဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵဝ်မီးယူႇ လူၺ်ႈၵၼ်တင်းမႂ်းႁႂ်ႈလႆႈၵႄႇသႄႇၶျွတ်ႈ ဢဝ်မႂ်းဢေႃႈ။ ပိၵ်ႉသမ်ႉၵဝ်ႁႂ်ႈၵူၼ်းၵူႈၸိူဝ်ႉၵူႈမဵဝ်းတီႈဢၼ်ၵဝ်ဢဝ်မႂ်းၽႄႈၸွတ်ႇၵႂႃႇၸိူဝ်းၼၼ်ႉသုမ်းႁၢႆၵႂႃႇသေၵေႃႈ၊ ၵဝ်တၵ်းဢမ်ႇႁႂ်ႈမႂ်းသုမ်းၸွမ်း။ ၼႂ်းဝႃႈၼၼ်သေၵေႃႈၵဝ်ယင်းဢမ်ႇပွႆႇလွတ်ႈဢပျတ်ႈမႂ်း မူတ်းမူတ်းသဵင်ႈသဵင်ႈလႄႈ တၵ်းသင်ႇသွၼ်သုင်းမႃႉမႂ်းႁႂ်ႈမႅၼ်ႈ ၸွမ်းၼင်ႇတြႃးဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊တၢင်းၸဵပ်း တၢင်းသႅပ်ႇမႂ်းၼၼ်ႉႁၢႆယၢပ်ႇၼႃႇလႄႈ ဝူၺ်ႇတၼႃႇဢၼ်မႂ်းလႆႈၶၢမ်ႇၼၼ်ႉ ႁႅင်းယႂ်ႇၼႃႇဢေႃႈ။
ၽူႈလႂ်သေၵေႃႉသေၵူၼ်းဢမ်ႇပႂ်ႉဢမုမႂ်း ႁႂ်ႈလႆႈမတ်ႉၶဵၼ်းပၼ်တၢင်းၸဵပ်းတၢင်းသႅပ်ႇမႂ်းၼၼ်ႉ။ မႂ်းဢမ်ႇမီးယႃႈယႃဢၼ်ႁႂ်ႈတၢင်းၸဵပ်း တၢင်းသႅပ်ႇမႂ်းႁၢႆလႆႈၼၼ်ႉ။
ၵေႃႉဢၼ်ႁၵ်ႉမႂ်းၵႃႈမီးၸိူဝ်းၼၼ်ႉ လူင်လိုမ်းမႂ်းလႄႈယင်းဢမ်ႇတွင်ႈႁႃ ထၢမ်ႁႃလႄႈယူႇဢေႃႈ။ ၵွပ်ႈပိူဝ်ႈဢၼ်ဢပျတ်ႈမႂ်းယႂ်ႇ၊တုၸရိူၵ်ႈဢၼ်မႂ်းႁဵတ်းၼၼ်ႉၼမ်ၼႃႇၼၼ်ႉလႄႈ ၵဝ်ဢဝ်တၢင်းၸဵပ်းတၢင်းသႅပ်ႇဢၼ်ရၢၼ်ႇသူႇ ၸၢင်ႈပၼ်ၼၼ်ႉ၊ဢိၵ်ႇတင်းတၢမ်ႇဢၼ် ၵေႃႉဢၼ်ႁၢဝ်ႈၵျၢမ်းၼႃႇၸၢင်ႈပၼ်ၼၼ်ႉ ႁႂ်ႈမႂ်းၸဵပ်းမႂ်းသႅပ်ႇယဝ်ႉ။
ၵွပ်ႈပိူဝ်ႈသင်လႄႈမႂ်းႁွင်ႉႁႆႈ ၵွပ်ႈပိူဝ်ႈတၢင်းၸဵပ်းတၢင်းသႅပ်ႇမႂ်းၼၼ်ႉၸိူဝ်ႉၼင်ႇႁိုဝ်။ ဝူၺ်ႇတၼႃႇဢၼ်မႂ်းလႆႈၶၢမ်ႇၼၼ်ႉႁၢႆယၢပ်ႇၼႃႇဢေႃႈ။ ၵွပ်ႈပိူဝ်ႈဢၼ်ဢပျတ်ႈမႂ်းယႂ်ႇလႄႈတုၸရိူၵ်ႈဢၼ်မႂ်းႁဵတ်းၼၼ်ႉၼမ်ၼႃႇၼၼ်ႉလႄႈၵဝ် လႆႈသင်ႇသွၼ်သုင်းမႃႉမႂ်းၸိူဝ်ႉၼင်ႇၼႆယဝ်ႉ။
ၼႂ်းဝႃႈၼၼ်သေၵေႃႈ ၶဝ်ၸိူဝ်းဢၼ်ၶူပ်းၵိၼ်မႂ်း တင်းသဵင်ႈတင်းလူင်ၼၼ်ႉတၵ်းလႆႈ ဢွၼ်ၵၼ်ၶၢမ်ႇတၢင်းဢၼ်ၶူပ်းၵိၼ်ဢေႃႈ။ ရၢၼ်ႇသူႇမႂ်းတင်းသဵင်ႈတင်းလူင်တၵ်းလႆႈ ၶၢမ်ႇတၢင်းဢၼ်သိမ်းဢဝ်ၵႂႃႇၵူႈၵေႃႉ ၵူႈၵူၼ်းဢေႃႈ။ ၶဝ်ၸိူဝ်းဢၼ်ႁိမ်ဢဝ်ႁူင်ႇဢဝ်ဢုၵ်ႉၸႃႇမႂ်းၼၼ်ႉ ဢုၵ်ႉၸႃႇၶဝ်ၵေႃႈတၵ်းလႆႈၶၢမ်ႇတၢင်းဢၼ် ႁိမ်ဢဝ်ႁူင်ႇဢဝ်လႄႈ ၶဝ်ၸိူဝ်းဢၼ်ယႃႉမႂ်းပႅတ်ႈတင်းသဵင်ႈ တင်းလူင်ၼၼ်ႉၸိုင်၊ၵဝ်တၵ်းဢဝ်ဢၢပ်ႈပၼ် တီႈတၢင်းဢၼ်ယႃႉပႅတ်ႈဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ၵဝ်တၵ်းႁႂ်ႈမႂ်းယူႇလီၵိၼ်ဝၢၼ်ပဵၼ်ၸိူဝ်ႉၼင်ႇပၵ်းၵဝ်ႇပိူင်ၵဝ်ႇလႄႈ ႁႂ်ႈတၢင်းၸဵပ်းတၢင်းသႅပ်ႇမႂ်းႁၢႆ ၵွပ်ႈပိူဝ်ႈဢၼ် ပိူၼ်ႈႁွင်ႉႁဵၵ်ႈၸိုဝ်ႈမႂ်းပဵၼ်ၵေႃႉဢၼ်လႆႈၶၢမ်ႇ တၢင်းဢၼ်ၸုၼ်ႉပႅတ်ႈလႄႈလၢတ်ႈလႄႈဝႃႈ၊ ‘မၼ်းၼႆႉပဵၼ်ဝဵင်း ၸိဢုၼ်ႇ၊ ဢၼ်ၽူႈလႂ်ဢမ်ႇလူတူၺ်းလုမ်းလႃး၊’ ” ဝႃႈၼင်ႇၼႆၼၼ်ႉဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “တူၺ်းလူး။ ၵဝ်တၵ်းဢဝ်သုမ်ႉထဵင် ၵူၼ်းမဵဝ်း ယႃႇၵုပ်ႈ၊ ဢၼ်လႆႈၶၢမ်ႇ တၢင်းဢၼ်သိမ်းဢဝ်ၵႂႃႇၸိူဝ်းၼၼ်ႉ၊ ၶိုၼ်းမႃးလႄႈဢဵတ်းလူလွင်ႈတၢင်းယူႇ တၢင်းသဝ်းၶဝ်ဢေႃႈ။ ဝဵင်းၵေႃႈတၵ်းမီးတၢင်းဢၼ်မႄးၶိုၼ်းမႄးႁဵတ်း ၵႃႈၼိူဝ်ၵုင်းလွႆတူဝ်ၸဝ်ႈၵဝ်ႇလႄႈ ႁေႃၶမ်းၵေႃႈတၵ်းတႄႇယူႇၸွမ်းၼင်ႇ ထုင်းၸၢမ်ႇပၵ်းၵဝ်ႇပိူင်ၵဝ်ႇၼၼ်ႉဢေႃႈ။
သဵင်တၢင်းဢၼ်ယွင်ႈယေႃးၵုင်ႇၵျေးၸူး သဵင်ၶဝ်ၸိူဝ်းဢၼ်သႂၢင်ႇသိူဝ်းၼၼ်ႉ၊ တၵ်းဢွၵ်ႇမႃးၵႃႈၼႂ်းၶဝ်ၼၼ်ႉလႄႈၵဝ်တၵ်း ႁႂ်ႈၶဝ်ပဵၼ်ဢၼ်ယႂ်ႇဢၼ်ၼမ်လႄႈတၵ်းဢမ်ႇလႆႈပဵၼ်ဢၼ်လဵၵ်ႉဢၼ်ၵေႇ၊ ၵဝ်တၵ်းႁႂ်ႈၶဝ်ႁွတ်ႈထိုင်တၢင်းဢၼ်ယွင်ႈ ဢၼ်ယေႃးလႄႈၶဝ်တၵ်းဢမ်ႇလႆႈပဵၼ် ဢၼ်လဵၵ်ႉဢၼ်တႅမ်ႇ။
လုၵ်ႈၶဝ်လၢၼ်ၶဝ်တၵ်းပဵၼ်ၸိူဝ်ႉၼင်ႇ မိူဝ်ႈဢွၼ်ၼႆႉၼၼ်ႉလႄႈ ပရိၵ်ႈသၢတ်ႈၶဝ်တင်းလၢႆ တၵ်းလႆႈတႄႇယူႇ ၵႃႈတီႈၽၢႆႇၼႃႈၵဝ်ဢေႃႈ။ ၵဝ်တၵ်းပၼ်တၢမ်ႇဢပျတ်ႈတီႈၶဝ်ၸိူဝ်းဢၼ် ၼိၵ်ႈၸၢၵ်ႈငႅၼ်းသႄးၶဝ်ၼၼ်ႉဢေႃႈ။
ၶုၼ်ၶဝ်ၼၼ်ႉ၊တၵ်းပဵၼ်ၵူၼ်းမဵဝ်းၶဝ်လႄႈ ၵေႃႉဢၼ်ဢုပ်ႉပိူင်ႇၶဝ်ၼၼ်ႉတၵ်း ပေႃႇဢွၵ်ႇပဵၼ်မႃးၵႃႈၼႂ်းၶဝ်ဢေႃႈ။ ၵဝ်တၵ်းၸူဝ်းဢဝ်မၼ်းမႃးယူႇၸမ်ၵဝ်လႄႈ မၼ်းတၵ်းသုတ်ႉၸပ်းသုတ်ႉၸူးတီႈၵဝ်ဢေႃႈ။ လိူဝ်သေၵဝ်ၸူဝ်းဢဝ်မၼ်းၽူႈလႂ်မီးၸႂ်ဢၼ်ႁတ်းႁၢၼ်ႁႂ်ႈလႆႈသုတ်ႉၸပ်းသုတ်ႉၸူးတီႈၵဝ်။
မိူဝ်ႈၼၼ်ႉသူတၵ်းပဵၼ်ၵူၼ်းၵဝ်လႄႈၵဝ်ၵေႃႈတၵ်းပဵၼ်ၽြႃးပဵၼ်ၸဝ်ႈသူဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
တူၺ်းလူး။ လူမ်းၽိဝ်ႁုင် ထႃႇဝရႃႉၽြႃး၊ ဢၼ်ဝႃႈ၊ဢၢႆတၢင်းၸႂ်မႆႈၶႂ်ႈၸႃႉမၼ်းၸဝ်ႈၼၼ်ႉဢွၵ်ႇမႃးလႄႈပဵၼ်လူမ်းၽိဝ်ႁုင်ဢၼ်ပၼ်ႇၵၢဝ်ႉပတ်ႉထူဝ်းၼၼ်ႉဢေႃႈ။ တၵ်းပတ်ႉထူဝ်းသႂ်ႇၵႃႈၼိူဝ်ႁူဝ်ၶဝ်ၸိူဝ်းဢၼ်ဢမ်ႇတြႃးၼၼ်ႉႁႅင်းယႂ်ႇၼႃႇလူင်လၢင်ဢေႃႈ။-
တၢင်းၸႂ်မႆႈၶႂ်ႈၸႃႉ ထႃႇဝရႃႉၽြႃး၊ တၵ်းဢမ်ႇဝၢႆႇဢမ်ႇၶိုၼ်းတေႃႇထိုင်ႁွတ်ႈမၼ်းၸဝ်ႈထၢၼ်ႈပေႃးႁဵတ်းယဝ်ႉတူဝ်ႈၵႃႈမီးတင်းသဵင်ႈလႄႈႁႂ်ႈတၢင်းၵျၢမ်ႇတၢင်းပွင်မၼ်းၸဝ်ႈလႆႈပျေႉၸုမ်ႇၼၼ်ႉဢေႃႈ။ ၶိင်ႇမိုဝ်ႉဝၼ်းလိုၼ်းၼၼ်ႉသူတၵ်းႁုၸႅင်ႈလီလီငၢမ်းငၢမ်းဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၶိင်ႇမိူဝ်ႈၼၼ်ႉၵဝ်တၵ်းပဵၼ်ၽြႃးပဵၼ်ၸဝ်ႈတီႈမဵဝ်းပီႈမဵဝ်းၼွင်ႉၸိူဝ်ႉၶိူဝ်း ဢိသရေး၊ တင်းသဵင်ႈတင်းလူင်လႄႈၶဝ်ၼၼ်ႉတၵ်းဢွၼ်ၵၼ်ပဵၼ်ၵူၼ်းၵဝ်ဢေႃႈ။-
ထႃႇဝရႃႉၽြႃး၊ မီးဢမိင်ႉၸမ်ႉ၊ၵူၼ်းတင်းလၢႆဢၼ်ၵၢင်းလွတ်ႈတင်းၽေးလၢပ်ႇၽေးလႅဝ်းဢၼ်ပဵၼ်၊ၵူၼ်းမဵဝ်း ဢိသရေး၊ ၸိူဝ်းၼၼ်ႉလႆႈၶၢမ်ႇဢဝ်ၵျေးၸူးၸဝ်ႈၵႃႈၼႂ်းထိူၼ်ႇၼႂ်းမိူဝ်ႈဢၼ်ၶဝ်သွၵ်ႈႁႃတၢင်းၵတ်းယဵၼ်ၶျၢမ်းသႃႇၼၼ်ႉယဝ်ႉ။-
ထႃႇဝရႃႉၽြႃး၊ ပေႃႇမႃးတီႈၶဝ်မိူဝ်ႈၵွၼ်ႇဢွၼ်ၼႆႉၼၼ်ႉလႄႈမီးဢမိင်ႉဝႃႈၸမ်ႉ၊ၵဝ်ဢဝ်တင်းမႅတ်ႈတႃႇထႃႇဝရႃႉႁၵ်ႉပႅင်းမႂ်းဢမၢၼ်ႇၶၼ်ပဵၼ်ဢေႃႈ။ ပိူဝ်ႈၼႆလႄႈၵဝ်ၼႄပျႃးၵရုၼႃႇၵဝ်တီႈမႂ်းႁိုင်ၼႃႇယဝ်ႉ။-
ၵၼ်ႇၺႃႇလုၵ်ႈယိင်းသၢဝ် ဢိသရေး၊ ႟။ ၵဝ်တၵ်းသမ်ႉၶိုၼ်းမႄးတႄႇမႄးႁဵတ်းမႂ်းလႄႈမႂ်းတၵ်းလႆႈၶၢမ်ႇတၢင်းဢၼ်မႄးတႄႇမႄးႁဵတ်းဢေႃႈ။ မႂ်းတၵ်းသမ်ႉၶိုၼ်းလႆႈဢဝ်ၵွင်ၶဵတ်ႇလႄႈဢွၵ်ႇၵႂႃႇၵႃႈဝႅၼ်လူၺ်ႈၵၼ်တင်းၶဝ်ၸိူဝ်းဢၼ်ႁဵတ်းတၢင်းဢၼ်သႂၢင်ႇဢၼ်သိူဝ်းၼၼ်ႉဢေႃႈ။-
မႂ်းတၵ်းသမ်ႉၶိုၼ်းလႆႈၽုၵ်ႇသွမ်ႈသူၼ်ဢူးယဵၼ်ႇမၢၵ်ႇၸပိတ်ႉၵႃႈၼိူဝ်လွႆ သမႃႇရိ၊ ထႅင်ႈလႄႈၶဝ်ၸိူဝ်းဢၼ်ႁဵတ်းသူၼ်ဢူးယဵၼ်ႇၼၼ်ႉတၵ်းဢွၼ်ၵၼ်ၽုၵ်ႇသွမ်ႈသေယဝ်ႉ၊လႆႈၸူမ်းသိူဝ်းလူၺ်ႈမၢၵ်ႇမၢၵ်ႇမၼ်းၼၼ်ႉဢေႃႈ။-
မိုဝ်ႉဝၼ်းဢၼ်ၵူၼ်းပႂ်ႉၵၢင်ၵႃႈၼိူဝ်ႁၢၼ်ႉလွႆ ဢေႇၽရိမ်ႇ၊ ၸိူဝ်းၼၼ်ႉတၵ်းႁွင်ႉသႅၼ်ႇလႄႈလၢတ်ႈဝႃႈ၊ ‘ဢွၼ်ၵၼ်လုၵ်ႉလႄႈၶိုၼ်ႈၸူးၵႃႈတီႈလွႆ ၸိဢုၼ်ႇ၊ တီႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းမီးၼၼ်ႉတႃႉ၊’ ဝႃႈၼင်ႇၼႆၼၼ်ႉတၵ်းႁွတ်ႈထိုင်မႃးဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ဢွၼ်ၵၼ်ႁဵတ်းၵႂၢမ်းဢၼ်သႂၢင်ႇသိူဝ်းၼႃႇ လူင်လၢင်ၵွပ်ႈပိူဝ်ႈၵူၼ်းမဵဝ်း ယႃႇၵုပ်ႈ၊ လႄႈ ပၢဝ်ႇသေႃႇၵွပ်ႈပိူဝ်ႈၶဝ်ဢၼ်ပဵၼ်ၸိၵ်းၸွမ် ၵူၼ်းၵူႈၸိူဝ်ႉၵူႈမဵဝ်းၼၼ်ႉတႃႉ။ ဢွၼ်ၵၼ်မွၵ်ႇလၢတ်ႈသေလႄႈယွင်ႈယေႃး ဢွၵ်ႇသူပ်းဝႃႈ၊ ‘ ထႃႇဝရႃႉၽြႃး၊ တီႈၶႃႈ၊ ၶႅၼ်းတေႃႈၵႄႇသႄႇၶျွတ်ႈဢဝ်ၵူၼ်းၸဝ်ႈႁဝ်း၊ ဢၼ်ဝႃႈ၊ၵူၼ်းမဵဝ်း ဢိသရေး၊ ဢၼ် ယင်းၵိုတ်းယင်းၵျၢၼ်ႇၸိူဝ်းၼၼ်ႉသေၵမ်း တီႈၶႃႈ၊’ ဝႃႈၼင်ႇၼႆတႃႉ။
တူၺ်းလူး။ ၵဝ်တၵ်းဢဝ်ၶဝ်ဢွၵ်ႇသေၵႃႈတီႈ မိူင်းၽၢႆႇတၢင်းႁွင်ႇလႄႈ သိမ်းဢဝ်ၶဝ်လုၵ်ႉသေၵႃႈတီႈႁိမ်းၸဵင်ႇသုတ်း လိၼ်မိူင်းပုၼ်ႉမႃးဢေႃႈ။ ၵေႃႉဢၼ်တႃမွတ်ႇ၊ၵေႃႉဢၼ်တိၼ်ၵႅင်ႉ၊ မႄႈယိင်းဢၼ်ပႃးတွင်ႉ၊မႄႈယိင်း ဢၼ်ၶၢမ်ႇဝူၺ်ႇတၼႃႇ တၢင်းဢၼ်ၵိူတ်ႇလဵင်ႉလုၵ်ႈလဵင်ႉလၢင်း ၸိူဝ်းၼၼ်ႉၵေႃႈပႃးမႃးလူၺ်ႈၵၼ်တင်း ၶဝ်လႄႈပဵၼ်မုၵ်ႉပဵၼ်ၸိူဝ်းဢၼ်ယႂ်ႇၼႃႇ သေယဝ်ႉ၊ဢွၼ်ၵၼ်ၶိုၼ်းမႃးဢေႃႈ။
ၶဝ်တၵ်းဢွၼ်ၵၼ်ႁွင်ႉႁႆႈယူႇသေလႄႈႁဵတ်း သူးတွင်းပထၼႃႇမိူဝ်ႈဢၼ်ၵဝ်ဢွၼ်ႁူဝ်ၶဝ် ပွၵ်ႈၶိုၼ်းမႃးၼၼ်ႉဢေႃႈ။ ၵဝ်တၵ်းႁႂ်ႈၶဝ်ၵႂႃႇၸွမ်းႁိမ်းၼမ်ႉႁွင်ႈၼမ်ႉၵႄး ၵႃႈၼႂ်းသဵၼ်ႈတၢင်းဢၼ်သိုဝ်ႈလီ ဢၼ်ၶဝ်တေဢမ်ႇလႆႈတိူဝ်ႉမႅၼ်ႈလႄႈလူမ်ႉၼၼ်ႉဢေႃႈ။ လွင်ႈမၼ်းၸမ်ႉ၊ၵဝ်ပဵၼ်ပေႃႈၵူၼ်းမဵဝ်း ဢိသရေး၊ ဢိၵ်ႇတင်းၵူၼ်းမဵဝ်း ဢေႇၽရိမ်ႇ၊ ၼၼ်ႉ ပဵၼ်လုၵ်ႈၸၢႆးတူၼ်ႈၵဝ်ဢေႃႈ။
မဵဝ်းၵူၼ်းၵူႈၸိူဝ်ႉၵူႈၶိူဝ်းၶဝ်႟။ ဢွၼ်ၵၼ် ထွမ်ႇငိၼ်း ထႃႇဝရႃႉၽြႃး၊ လႄႈႁွင်ႉပၢဝ်ႇ ႁွင်ႉသေႃႇ၊ၵႃႈတီႈၶဝ်ဢၼ်ယူႇတီႈႁိမ်း ၽင်ႇပၢင်ႇလၢႆႇဢၼ်ၵႆၼႃႇၸိူဝ်းၼၼ်ႉ သေလႄႈမွၵ်ႇလၢတ်ႈလႄႈဝႃႈ၊ ‘ၸဝ်ႈဢၼ်ဢဝ်ၵူၼ်းမဵဝ်း ဢိသရေး၊ ၸၢတ်ႇပိုၼ်ပႅတ်ႈၼၼ်ႉတၵ်းသမ်ႉၶိုၼ်း ၸုသိမ်းသေလႄႈပႂ်ႉယူႇၸိူဝ်ႉၼင်ႇဢၼ်ၵူၼ်း လဵင်ႉသူဝ်းထိင်းသူဝ်းပႂ်ႉၽုင်သူဝ်းမၼ်းယူႇ ၼၼ်ႉဢေႃႈ၊’ ဝႃႈၼင်ႇၼႆတႃႉ။
လွင်ႈမၼ်းၸမ်ႉ၊ ထႃႇဝရႃႉၽြႃး၊ ထုတ်ႇၼုၵ်ႈဢဝ် ၵူၼ်းမဵဝ်း ယႃႇၵုပ်ႈ၊ သေလႄႈ ၵႄႇၶျွတ်ႈၼုၵ်ႈဢဝ်ၶဝ်ဢွၵ်ႇသေၵႃႈၼႂ်းမိုဝ်း ၵေႃႉဢၼ်ႁႅင်းယႂ်ႇၼႃႇသေၶဝ်ၼၼ်ႉယဝ်ႉ။
ပိူဝ်ႈၼႆလႄႈမဵဝ်းၵူၼ်းၸိူဝ်းၼၼ်ႉတၵ်း ဢွၼ်ၵၼ်မႃးသေလႄႈႁဵတ်းၵႂၢမ်းၵႃႈၼိူဝ် ၸိၵ်းၸွမ်လွႆ ၸိဢုၼ်ႇ၊ လႄႈ မီးတၢင်းဢၼ်ၸူမ်းသိူဝ်းယႂ်ႇၼႃႇ၊ ၵွပ်ႈပိူဝ်ႈလႆႈၶၢမ်ႇၵျေးၸူးတၢင်းဢၼ် ထႃႇဝရႃႉၽြႃး၊ ႁဵတ်းဢၼ်ပဵၼ်၊ ၶဝ်ႈပိူၵ်ႇၶဝ်ႈသၢၼ်၊ၼမ်ႉမၢၵ်ႇၸပိတ်ႉ၊ၼမ်ႉမၼ်း၊ သူဝ်းဢွၼ်ႇ၊ဝူဝ်းဢွၼ်ႇၸိူဝ်းၼၼ်ႉဢေႃႈ။ ၸႂ်ဝိၺိၺ်ႇၶဝ်ၼၼ်ႉတၵ်းပဵၼ်မိူၼ်ၸိူဝ်ႉၼင်ႇ သူၼ်ဢူးယဵၼ်ႇဢၼ်လႆႈဢဝ်ၼမ်ႉ ႁူတ်းဝႆႉၼၼ်ႉလႄႈ ၵမ်းလိုၼ်းတၵ်းဢမ်ႇလႆႈမီးတၢင်းဢၼ် ႁဵဝ်ႇဢၼ်ၸွပ်ႈ။
မိူဝ်ႈၼၼ်ႉ၊ၵၼ်ႇၺႃႇလုၵ်ႈယိင်းသၢဝ်တၵ်း ၸူမ်းသိူဝ်းၵႃႈဝႅၼ်လႄႈၵူၼ်းၸၢႆးၼုမ်ႇၶဝ် ဢိၵ်ႇတင်းၵူၼ်းထဝ်ႈၵူၼ်းၵႄႇတင်းလၢႆ တၵ်းဢွၼ်ၵၼ်မူၼ်ႈပျေႃႇဢေႃႈ။ ၵဝ်တၵ်းႁႂ်ႈလွင်ႈတၢင်းဢၼ်ၶၢင်းၶီၶၢင်းၽၢၼ်ၼၼ်ႉပဵၼ်တၢင်းဢၼ်ၸူမ်းသိူဝ်းလႄႈ ၵဝ်တၵ်းႁဵတ်းႁႂ်ႈၸႂ်ၶဝ်သၢၵ်ႈသႃႇသေယဝ်ႉ၊ ႁႂ်ႈတၢင်းဢၼ်ၶဝ်ငိၼ်းၶီငိၼ်းၽၢၼ်ၼၼ်ႉ ပဵၼ်တၢင်းဢၼ်သႂၢင်ႇသိူဝ်းဢေႃႈ။
ၵဝ်တၵ်းလဵင်ႉႁူဝ်ၸႂ်ယဵၸ်ႈပရေႃးႁဵၵ်ႈတင်းလၢႆ လူၺ်ႈတၢင်းဢၼ်လီဢၼ်ငၢမ်းလႄႈ ၵူၼ်းၵဝ်တင်းလၢႆၵေႃႈ တၵ်းဢိမ်ႇတဵမ်ဝႆႉ တင်းၵျေးၸူးၵဝ်ဢေႃႈ။” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵႃႈၼႂ်းဝဵင်း ရႃႇမႃႉ၊ ၼၼ်ႉလႆႈငိၼ်း သဵင်ပွင်ႉသဵင်ၶၢင်း၊သဵင်ႁွင်ႉသဵင်ႁႆႈဢၼ် ၶူမ်ၼႃႇႁႅင်းၼႃႇဢေႃႈ။ ၼၢင်း ရႃႇၶေႇလႃႉ၊ ၼၼ်ႉႁွင်ႉႁႆႈယူႇ ပုၼ်ႈလုၵ်ႈလၢင်းမၼ်းလႄႈ မၼ်းဢမ်ႇလႆႈၶၢမ်ႇဢဝ်တၢင်းဢၼ်ပၼ် ႁႅင်းၸႂ်၊ၵွပ်ႈပိူဝ်ႈလုၵ်ႈလၢင်းတူဝ်ၸဝ်ႈၵဝ်ႇ ဢမ်ႇမီးယဝ်ႉၼၼ်ႉဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊မႂ်းယိူၼ်ႉၵၼ်ႈ တၢင်းဢၼ်မႂ်းႁွင်ႉႁႆႈလႄႈ ယိူၼ်ႉၵၼ်ႈၼႂ်းတၢင်းဢၼ်မႂ်းၼမ်ႉတႃ တူၵ်းၼၼ်ႉတႃႉ။ တၢင်းဢၼ်မႂ်းၵမ်ၵျၢင်ႉပွင်ႁဵတ်းၼၼ်ႉ တၵ်းပဵၼ်ဢၵျူဝ်းတီႈမႂ်းလႄႈ ၶဝ်ၼၼ်ႉတၵ်းဢွၼ်ၵၼ်လုၵ်ႉသေၵႃႈတီႈ မိူင်းရၢၼ်ႇသူႇၶိုၼ်းမႃးဢေႃႈ။
မီးလွင်ႈဢၼ်မုင်ႈထႃႈမွင်းထႃႈပုၼ်ႈ ဝၼ်းမိူဝ်းၼႃႈလႄႈ လုၵ်ႈမႂ်းလၢင်းမႂ်းၸိူဝ်းၼၼ်ႉတၵ်းဢွၼ်ၵၼ် ၶိုၼ်းမႃးၵႃႈတီႈမိူင်းဢၼ်ၶဝ်ယူႇၵဝ်ႇၵဝ်ႇၼၼ်ႉဢေႃႈ။” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ၵဝ်လႆႈငိၼ်း ဢေႇၽရိမ်ႇ၊ မီးတၢင်းဢၼ် ပွင်ႉၶၢင်းလႄႈဝႃႈၸမ်ႉ၊ “ၸဝ်ႈႁဝ်းသင်ႇသွၼ်သုင်းမႃႉၶႃႈၸဝ်ႈလႄႈ ၶႃႈၸဝ်ႈလႆႈၶၢမ်ႇတၢင်းဢၼ်သင်ႇသွၼ် သုင်းမႃႉ၊မိူၼ်ၸိူဝ်ႉၼင်ႇဝူဝ်းဢွၼ်ႇ ဢၼ်ႁႄၼၼ်ႉတီႈၶႃႈယဝ်ႉ။ ၶႅၼ်းတေႃႈဢဝ်ၶႃႈၸဝ်ႈပွၵ်ႈၶိုၼ်း သေၵမ်းတီႈၶႃႈ။ ၶႃႈၸဝ်ႈတၼ်းဝႆႉပုၼ်ႈတႃႇတေပွၵ်ႈၶိုၼ်း တီႈၶႃႈဢေႃႈ။ ၸဝ်ႈႁဝ်းပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈ ၵဝ်ၶႃႈတီႈၶႃႈဢေႃႈ။
လိုၼ်းသေဢၼ်ၶႃႈၸဝ်ႈဝၢႆႇလင်တေႃႇၸဝ်ႈႁဝ်းယဝ်ႉၼၼ်ႉ၊ၶႃႈၸဝ်ႈၶုၵ်းၸႂ်လႆႈမႆႈၸႂ်ဢပျတ်ႈ ဢမၢၼ်ႇၶၼ်ပဵၼ်တီႈၶႃႈဢေႃႈ။ လိုၼ်းသေဢၼ်ၶႃႈၸဝ်ႈလႆႈၶၢမ်ႇတၢင်းဢၼ် မၼ်းၸဝ်ႈသင်ႇသွၼ်သုင်းမႃႉယဝ်ႉၼၼ်ႉ ၶႃႈၸဝ်ႈပေႃႉယႅၼ်ႉသၼ်ၶႃတူဝ်ၸဝ်ႈၵဝ်ႇတီႈၶႃႈဢေႃႈ။ ၶႃႈၸဝ်ႈဢူၵ်းဢၢႆလႄႈမီးတၢင်းဢၼ် ငိူဝ်ႈယူႇငဝ်ယူႇ၊ၵွပ်ႈပိူဝ်ႈဢၼ်ၶႃႈၸဝ်ႈလႆႈ ၶၢမ်ႇတၢင်းဢၼ်သရေႇလု၊ လူၺ်ႈလွင်ႈဢပျတ်ႈဢၼ်ၶႃႈၸဝ်ႈႁဵတ်းမႅၼ်ႈ ၼႂ်းမိူဝ်ႈဢၼ်ဢသၢၵ်ႈယင်းလဵၵ်ႉယင်းၼုမ်ႇၼၼ်ႉ တီႈၶႃႈဢေႃႈ၊” ဝႃႈၸိူဝ်ႉၼင်ႇၼၼ်ယဝ်ႉ။
“ဢေႇၽရိမ်ႇ၊ ၼၼ်ႉပဵၼ်လုၵ်ႈၸၢႆးဢၼ်ၵဝ်ႁၵ်ႉ၊ပဵၼ်လုၵ်ႈဢၼ်ၵဝ်ထုၵ်ႇၸႂ်ၵျိူၵ်ႈၸႂ် ၼႃႇသေပိူၼ်ႈဢေႃႈ။ မိူဝ်ႈဢၼ်ၵဝ်လၢတ်ႈၵႂၢမ်းတၢင်ႇဢပျတ်ႈ ၵူႈပွၵ်ႈၵဝ်ၵေႃႈယင်းၶုၵ်းၸႂ်လႆႈၶႆႈၸႂ်ထူပ်းမၼ်းယူႇဢေႃႈ။ ပိူဝ်ႈၼႆလႄႈႁူဝ်ၸႂ်ၵဝ်မီးတၢင်းဢၼ် ၸပ်းၸွႆးႁၵ်ႉပႅင်းမၼ်းၼႃႇလႄႈၵရုၼႃႇ တၢင်းႁၵ်ႉမႅတ်ႈတႃႇၵဝ်ၼၼ်ႉ၊ တၵ်းတႄႇယူႇၵႃႈၼိူဝ်မၼ်းဢမၢၼ်ႇ ၶၼ်ပဵၼ်ဢေႃႈ။” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
မႂ်းပူၵ်းသဝ်တီႈမၢတ်ႈတီႈတွင်းတင်းလၢႆ ၵႃႈတီႈသဵၼ်ႈတၢင်းလႄႈပူၵ်းသဝ်လၵ်း ပုၼ်ႈတေမၢတ်ႈတေတွင်းပုၼ်ႈမႂ်းတႃႉ။ ႁႂ်ႈၸႂ်မႂ်းၸပ်းၸွႆးသဵၼ်ႈတၢင်းလူင်ဢၼ်ဝႃႈ၊ သဵၼ်ႈတၢင်းဢၼ်မႂ်းလႆႈၸွမ်းၵႂႃႇၼၼ်ႉတႃႉ။ ၵၼ်ႇၺႃႇလုၵ်ႈယိင်းသၢဝ် ဢိသရေး၊ ႟။ ပွၵ်ႈၶိုၼ်းမႃးတႃႉ။ ပွၵ်ႈၶိုၼ်းမႃးၸူးၵႃႈတီႈ ဝဵင်းတီႈယူႇတီႈသဝ်းမႂ်းၸိူဝ်းၼႆႉတႃႉ။
လုၵ်ႈယိင်းဢၼ်ဢမ်ႇမီးသဵတ်ႈၸႃႇၼႆႉ႟။ မႂ်းတၵ်းလႄႇၵႂႃႇလႄႇမႃးယူႇၶိင်ႇၵႃႇလႃႉ ႁိုင်ၼႃႇၵႃႈႁိုဝ်။ ထႃႇဝရႃႉၽြႃး၊ တၵ်းသၢင်ႈႁဵတ်းမဵဝ်း ဢၼ်မႂ်ႇၵႃႈၼိူဝ်လိၼ်မိူင်းမိူၼ်ၸိူဝ်ႉ ၼင်ႇဢၼ်မႄႈယိင်းတၵ်းႁႄႉၵင်ႈပုၼ်ႈ ၵူၼ်းၸၢႆးၼၼ်ႉဢေႃႈ။
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊ “ယၢမ်းမိူဝ်ႈဢၼ်ၵဝ်ဢဝ်ၵူၼ်းၸိူဝ်းၼႆႉပွၵ်ႈၶိုၼ်းသူင်ႇၵႃႈတီႈမိူင်းၶဝ်ၼၼ်ႉၸိုင်၊ၶဝ်ၸိူဝ်းဢၼ်ယူႇၵႃႈၼႂ်းဝၢၼ်ႈၼႂ်းဝဵင်းမိူင်း ယုတႃႉ၊ တင်းလၢႆၼၼ်ႉတၵ်းဢွၼ်ၵၼ်ၶိုၼ်းလၢတ်ႈထႅင်ႈပွၵ်ႈၼိုင်ႈလႄႈဝႃႈ၊ “‘ထႃႇၼႃႉတီႈယူႇတၢင်းဢၼ်သိုဝ်ႈတေႃႇ႟။ လွႆတီႈယူႇတၢင်းဢၼ်မူတ်းၸၢင်ႇ႟။ ႁႂ်ႈ ထႃႇဝရႃႉၽြႃး၊ ပၼ်တၢင်းလီတီႈမႂ်း သေၵမ်းလူၺ်ႈ၊’ ဝႃႈၼင်ႇၼႆၼၼ်ႉဢေႃႈ။
ၵူၼ်းတၵ်းယူႇသဝ်းလူၺ်ႈၵၼ်ၵႃႈၼႂ်းမိူင်း ယုတႃႉ၊ ဢိၵ်ႇတင်းၵႃႈၼႂ်းဝၢၼ်ႈဝဵင်းမၼ်းၸိူဝ်းၼၼ်ႉဢေႃႈ။ ၶဝ်ၸိူဝ်းဢၼ်ႁဵတ်းႁႆႈႁဵတ်းၼႃး၊ၶဝ်ၸိူဝ်းဢၼ်လဵင်ႉသူဝ်းၼၼ်ႉၵေႃႈတၵ်းမီးဢေႃႈ။-
ၵဝ်ႁႂ်ႈၶဝ်ၸိူဝ်းဢၼ်ႁိူဝ်ႉၸႂ်ၼူၼ်းၸႂ်ၼၼ်ႉသၢၵ်ႈသႃႇလႄႈႁႂ်ႈၶဝ်ၸိူဝ်းဢၼ်ႁဵဝ်ႇၸွပ်ႈၵႃႈမီးၼၼ်ႉလႆႈၵိၼ်ဢိမ်ႇၵိၼ်တဵမ်ဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၵူၼ်းတင်းလၢႆတၵ်းလၢတ်ႈလႄႈဝႃႈ၊ “ၵဝ်ၵႂႃႇၼွၼ်းသေယဝ်ႉ၊မီးတၢင်းဢၼ်ႁူဝ်ၸႂ်ၸိုၼ်ႈသႂ်လႄႈတိုၼ်ႇမႃးဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “မိုဝ်ႉဝၼ်းဢၼ်ၵဝ်တၵ်းႁႂ်ႈၵူၼ်း၊ဢိၵ်ႇတင်းတရိၵ်ႈသၢၼ်ႇတဵမ်ဝႆႉၵႃႈၼႂ်းမိူင်း ဢိသရေး၊ ဢိၵ်ႇတင်းၵႃႈၼႂ်းမိူင်း ယုတႃႉ၊ ၼၼ်ႉတၵ်းႁွတ်ႈထိုင်မႃးဢေႃႈ။-
မိူၼ်ၸိူဝ်ႉၼင်ႇဢၼ်ၵဝ်ပႂ်ႉတူၺ်းၶဝ်လႄႈထူၺ်ႈပႅတ်ႈ၊ၵိူၼ်ႇတူၵ်းပႅတ်ႈ၊ပိၼ်ႈၶွမ်ႈပႅတ်ႈ၊ယႃႉပႅတ်ႈလႄႈၼိၵ်ႈၸၢၵ်ႈငႅၼ်းသႄးၶဝ်ၼၼ်ႉ၊ၵဝ်တၵ်းလုမ်းလႃး၊ၵဝ်တၵ်းတႄႇႁဵတ်း၊ၵဝ်တၵ်းၽုၵ်ႇသွမ်ႈၶဝ်ဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။-
ၼႂ်းၶိင်ႇၵႃႇလႃႉမိုဝ်ႉဝၼ်းၼၼ်ႉ၊ၶဝ်တၵ်းဢမ်ႇလႆႈဢွၼ်ၵၼ်လၢတ်ႈလႄႈဝႃႈ၊ “ၵေႃႉဢၼ်ပဵၼ်ပေႃႈတင်းလၢႆၵိၼ်မၢၵ်ႇၸပိတ်ႉဢၼ်သူမ်ႈလႄႈ ၶဝ်ၸိူဝ်းဢၼ်ပဵၼ်လုၵ်ႈပဵၼ်လၢင်းၼၼ်ႉ လႆႈၶၢမ်ႇတၢင်းဢၼ်ၶဵဝ်ႈမူၺ်ႈၶဵဝ်ႈၵႅၼ်းဢေႃႈ၊” ဝႃႈၼင်ႇၼႆၼၼ်ႉ။
ၵူႈၵေႃႉၵူႈၵူၼ်းတၵ်းလႆႈတၢႆၵွပ်ႈပိူဝ်ႈဢပျတ်ႈတူဝ်ၸဝ်ႈၵဝ်ႇလႄႈၵေႃႉဢၼ်ၵိၼ်မၢၵ်ႇၸပိတ်ႉဢၼ်သူမ်ႈၵူႈၵေႃႉၵူႈၵူၼ်းၼၼ်ႉတူဝ်ၸဝ်ႈၵဝ်ႇတၵ်းလႆႈၶၢမ်ႇတၢင်းဢၼ်ၶဵဝ်ႈမူၺ်ႈၶဵဝ်ႈၵႅၼ်းဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၶိင်ႇၵႃႇလႃႉမိုဝ်ႉဝၼ်းဢၼ်ၵဝ်တၵ်းဢဝ်ပတိၺိၺ်ႇတြႃးဢၼ်မႂ်ႇပၼ်တီႈၵူၼ်းမဵဝ်း ဢိသရေး၊ ဢိၵ်ႇတင်းၵူၼ်းမဵဝ်း ယုတႃႉ၊ တင်းလၢႆၼၼ်ႉတၵ်းႁွတ်ႈထိုင်မႃးဢေႃႈ။-
ပတိၺိၺ်ႇတြႃးၼၼ်ႉတၵ်းပႅၵ်ႇပိူင်ႈၵၼ်တင်းပတိၺိၺ်ႇတြႃးဢၼ်ၵဝ်ပၼ်တီႈပူႇမွၼ်ႇၶဝ်တင်းလၢႆယၢမ်းမိူဝ်ႈဢၼ်ၵဝ်တိုတ်ႉၸုင်ဢဝ်မိုဝ်းၶဝ်ႁႂ်ႈလႆႈဢွၵ်ႇသေၵႃႈၼႂ်းမိူင်း ဢေးၵျိပ်ႉ၊ မႃးၼၼ်ႉဢေႃႈ။ ၵဝ်ပဵၼ်ၸိူဝ်ႉၼင်ႇၸဝ်ႈၼင်ႇၽူဝ်ၶဝ်သေၵေႃႈၶဝ်ဢမ်ႇပႂ်ႉၵမ်ပႂ်ႉထိင်းပတိၺိၺ်ႇတြႃးၼၼ်ႉ။-
ပတိၺိၺ်ႇတြႃးဢၼ်ၵဝ်တၵ်းပၼ်တီႈၵူၼ်းမဵဝ်း ဢိသရေး၊ မိူဝ်ႈၶိင်ႇၵႃႇလႃႉၵမ်းလိုၼ်းၼၼ်ႉၸမ်ႉ၊ၵဝ် ထႃႇဝရႃႉၽြႃး၊ တၵ်းဢဝ်ပိင်းၺၢပ်ႈတြႃးၵဝ်သႂၢင်းသႂ်ႇပၼ်ၵႃႈၼႂ်းၶဝ်ဢေႃႈ။ တၵ်းတႅမ်ႈသႂ်ႇဝႆႉၵႃႈၼႂ်းႁူဝ်ၸႂ်ၶဝ်ဢေႃႈ။ ၵဝ်တၵ်းပဵၼ်ၽြႃးၶဝ်လႄႈၶဝ်ၵေႃႈတၵ်းပဵၼ်ၵူၼ်းၵဝ်ဢေႃႈ။-
ၶဝ်ၼၼ်ႉၵူၼ်းမဵဝ်းလဵဝ်ၵၼ်၊ပီႈၼွင်ႉၼင်ႇၵၼ်ၵေႃႉၼိုင်ႈလႄႈၵေႃႉၼိုင်ႈ တၵ်းဢမ်ႇလႆႈသင်ႇသွၼ်တီႈၵၼ်လႄႈဝႃႈ၊ ‘ႁုၸၵ်း ထႃႇဝရႃႉၽြႃး၊ တႃႉ။’ ဝႃႈၼင်ႇၼႆၼၼ်ႉ၊လွင်ႈမၼ်းၸမ်ႉ၊ၶဝ်ၵႃႈမီးတင်းသဵင်ႈတင်းလူင်ၸႃႉၸဵမ်ၵေႃႉဢၼ်လဵၵ်ႉသေပိူၼ်ႈတေႃႇထိုင်ႁွတ်ႈၵေႃႉဢၼ်ယႂ်ႇသေပိူၼ်ႈၼၼ်ႉတၵ်းႁုၸၵ်းၵဝ်ဢေႃႈ။ မိူဝ်ႈၼၼ်ႉၵဝ်တၵ်းပွႆႇလွတ်ႈဢပျတ်ႈၶဝ်လႄႈတၵ်းဢမ်ႇၶုၵ်းၸႂ်လႆႈၶႆႈၸႂ်ထူပ်းတၢင်းဢၼ်ၶဝ်ၽိတ်းပိူင်ႈပူၼ်ႉလိူဝ်တင်းလၢႆၼၼ်ႉလႄႈယူႇဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ထႃႇဝရႃႉၽြႃး၊ ႁႂ်ႈတႃဝၼ်းပၼ်သၢႆလႅင်းထွင်ႇၶိင်ႇၵၢင်ဝၼ်းလႄႈ ၽၢၼ်ႇသၢင်းႁဵတ်းပဵၼ်လိူၼ်၊ဢိၵ်ႇတင်း လၢဝ်တင်းလၢႆပုၼ်ႈဢၼ်တၵ်းလႅင်းထွင်ႇ ၶိင်ႇၵၢင်ၶိုၼ်းဢေႃႈ။ မၼ်းၸဝ်ႈတဝ်ၶူၼ်းၼမ်ႉသမ်ႇမုၵ်ႈတြႃႇလႄႈ ႁႂ်ႈလႅင်းၼမ်ႉပိူပ်ႈၼမ်ႉႁွင်ႉယူႇၶၢင်းယူႇဢေႃႈ။ ၼႃႇမႃႉၸိုဝ်ႈသဵင်မၼ်းၸဝ်ႈၼၼ်ႉပဵၼ် ထႃႇဝရႃႉၽြႃး၊ၸဝ်ႈဢၼၼ်ႇတႃႉ တၼ်းၶူဝ်း၊ ဢေႃႈ။
သၽႃႇဝႃႉမိူင်းလေႃးၵႃႉတႄႇဝႆႉမီးယူႇ ႁိုင်ၵႃႈႁိုဝ်ၵေႃႈ၊ မၼ်းၸဝ်ႈဝႆႉၵတိႁႂ်ႈမဵဝ်း ဢိသရေး၊ တႄႇဝႆႉ မီးယူႇႁိုင်ၵႃႈၼၼ်ႉဢေႃႈ။
“ပေႃးၽႃႉၵၢင်ႁၢဝ်ၶၢမ်ႇတၢင်းဢၼ်တႅၵ်ႈလႆႈလႄႈ ပေႃးလႄႇလဵပ်ႈၸႅတ်ႈတူၺ်းငဝ်ႈႁၢၵ်ႈၵႃႈတႂ်ႈသုတ်းလိၼ်မိူင်းလႆႈၸိုင်၊ ၵဝ်တၵ်းၸုၼ်ႉပႅတ်ႈၵူၼ်းမဵဝ်း ဢိသရေး၊ တင်းသဵင်ႈတင်းလူင်၊ ၵွပ်ႈပိူဝ်ႈဢပျတ်ႈၵႃႈဢၼ်ၶဝ်ႁဵတ်းမႅၼ်ႈၼၼ်ႉဢေႃႈ။” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “မိုဝ်ႉဝၼ်းဢၼ်တၵ်းလႆႈမႄးႁဵတ်းဝဵင်း ယေႇရုသလႅမ်ႇ၊ ပုၼ်ႈ ထႃႇဝရႃႉၽြႃး၊ ၸႃႉၸဵမ်တိူၵ်ႈတီႈတိုၵ်းသိုၵ်း ႁႃႇၼၼေႇလႃႉ၊ တေႃႇထိုင်ႁွတ်ႈ ၽၵ်းတူၸဵင်ႇလမ်းဝဵင်း၊ ၼၼ်ႉတၵ်းႁွတ်ႈထိုင်ဢေႃႈ။-
ၸိူၵ်ႈမႆမီႈတၵ်းလႆႈမီးတၢင်းဢၼ်ၶဵင်ႈၸူးၵႃႈတီႈလွႆ ၵႃႇရိပ်ႉ၊ သိုဝ်ႈသိုဝ်ႈလႄႈသမ်ႉငႅၵ်းၸူးၵႃႈတီႈလွႆ ၵေႃးဢႃႉ၊ ဢေႃႈ။-
ၶူင်ႇႁူၺ်ႈတီႈဢၼ်ဢဝ်တူဝ်တၢႆတင်းလၢႆၽင်ဝႆႉ၊ဢိၵ်ႇတင်းတဝ်ႈဢၼ်ၸုၼ်ႉပႅတ်ႈၼၼ်ႉတင်းသဵင်ႈတင်းမူတ်း၊ဢိၵ်ႇတင်းတီႈပၢင်ႇတီႈပဵင်းၵႃႈမီးတေႃႇထိုင်ႁွတ်ႈၼမ်ႉႁွင်ႈ ၵေႇတရုၼ်ႇ၊ လႄႈတေႃႇထိုင်ႁွတ်ႈၸဵင်ႇဝဵင်း ၽၵ်းတူမႃႉ၊ ဢၼ်မီးၵႃႈတီႈၽၢႆႇဝၼ်းဢွၵ်ႇၼၼ်ႉၸိူဝ်းၼၼ်ႉတၵ်းဢွၼ်ၵၼ်မူတ်းၸၢင်ႇပုၼ်ႈ ထႃႇဝရႃႉၽြႃး၊ ဢေႃႈ။ ၵမ်းလိုၼ်းဢမ်ႇလႆႈမီးတၢင်းဢၼ်ထူၺ်ႈထွၼ်ဢွၵ်ႇပႅတ်ႈ၊ဢိၵ်ႇတင်းတၢင်းဢၼ်ၵိူၼ်ႇယႃႉၶျႃးတူၵ်းပႅတ်ႈလႃးလႃး၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈၸဝ်ႈလုၵ်ႉသေၵႃႈတီႈ ထႃႇဝရႃႉၽြႃး၊ ႁွတ်ႈထိုင်မႃးတီႈ ယေႇရမိ၊ ၼႂ်းပီဢၼ် ၸေႇတၵိ၊ ၶုၼ်ႁေႃၶမ်းမိူင်း ယုတႃႉ၊ ၸၢမ်ႇႁၢင်ႈၸၢမ်ႇႁေႃလႆႈသိပ်းပီလႄႈ ၼေႇပုၶတ်ႉၼေႇၸႃႇ၊ ၸၢမ်ႇႁၢင်ႈၸၢမ်ႇႁေႃလႆႈသိပ်းပႅတ်ႇပီၵႃႈၼႂ်းမိူင်း ပႃႇပုလုၼ်ႇ၊ ၼၼ်ႉဢေႃႈ။-
ၼႂ်းၶိင်ႇမိူဝ်ႈၼၼ်ႉ၊ႁူဝ်ႁၢၼ်ၵူၼ်းသိုၵ်းၶုၼ်ႁေႃၶမ်းမိူင်း ပႃႇပုလုၼ်ႇ၊ တင်းလၢႆဢွၼ်ၵၼ်လွမ်ႉႁွပ်ႈဝဵင်း ယေႇရုသလႅမ်ႇ၊ ဝႆႉယဝ်ႉလႄႈပရေႃးၽႅတ်ႈ ယေႇရမိ၊ ၼၼ်ႉ၊လႆႈၶၢမ်ႇတၢင်းဢၼ်ၶျုၵ်ႈဝႆႉၵႃႈၼႂ်းဝၢင်းထွင်ႇဢၼ်မီးၵႃႈၼႂ်းႁေႃၸဝ်ႈၶုၼ်ႁေႃၶမ်းမိူင်း ယုတႃႉ၊ ယူႇၼၼ်ႉဢေႃႈ။-
ၸေႇတၵိ၊ ၶုၼ်ႁေႃၶမ်းမိူင်း ယုတႃႉ၊ ၼၼ်ႉဢဝ်မၼ်းၶင်ဝႆႉၵႃႈၼႂ်းထွင်ႇလႄႈလၢတ်ႈဝႃႈ၊ “မႂ်းႁဵတ်းပရေႃးၽႅတ်ႈသေလႄႈႁေႃးလၢတ်ႈဝႃႈ၊ ထႃႇဝရႃႉၽြႃး၊ မီးဢမိင်ႉၸမ်ႉ၊ၵဝ်တၵ်းဢဝ်ဝဵင်းၼႆႉဢၢပ်ႈပၼ်ၵႃႈၼႂ်းမိုဝ်းၶုၼ်ႁေႃၶမ်းမိူင်း ပႃႇပုလုၼ်ႇ၊ လႄႈမၼ်းၼၼ်ႉတၵ်းသိမ်းဢဝ်ဢေႃႈ။-
ၸေႇတၵိ၊ ၶုၼ်ႁေႃၶမ်းမိူင်း ယုတႃႉ၊ တၵ်းဢမ်ႇၵၢင်းလွတ်ႈသေၵႃႈၼႂ်းမိုဝ်းၵူၼ်း ၶႃႇလတေး၊ တင်းလၢႆလႄႈႁွတ်ႈထိုင်ၵႃႈၼႂ်းမိုဝ်းၶုၼ်ႁေႃၶမ်းမိူင်း ပႃႇပုလုၼ်ႇ၊ ဢမၢၼ်ႇၶၼ်ပဵၼ်ဢေႃႈ။ ၶုၼ်သွင်ပႃးၼၼ်ႉတၵ်းလၢတ်ႈတေႃႇၵၼ်ပၢၵ်ႇတေႃႇပၢၵ်ႇတူၺ်းၵၼ်တႃႇတေႃႇတႃဢေႃႈ။-
မၼ်းၼၼ်ႉတၵ်းဢဝ် ၸေႇတၵိ၊ ၵႂႃႇၵႃႈတီႈမိူင်း ပႃႇပုလုၼ်ႇ၊ လႄႈမၼ်းတၵ်းလႆႈယူႇၵႃႈတီႈမိူင်းၼၼ်ႉတေႃႇထိုင်ႁွတ်ႈၵဝ်မႃးလူမႃးတူၺ်းမၼ်းၼၼ်ႉဢေႃႈ။ ပိၵ်ႉသမ်ႉသူတိုၵ်းသိုၵ်းၵၼ်တင်းၵူၼ်း ၶႃႇလတေး၊ တင်းလၢႆသေၵေႃႈ သူဢမ်ႇလႆႈပႄႉလႆႈၼႅင်ႇ၊ဝႃႈၼင်ႇၼႆယဝ်ႉ၊ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းလၢတ်ႈဝႃႈၸိူဝ်ႉၼင်ႇၼႆ၊” ဝႃႈၼင်ႇၼႆဢေႃႈ။
ယေႇရမိ၊ ၵေႃႈ လၢတ်ႈလႄႈဝႃႈ၊ “ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်ၸမ်ႉ၊-
ႁႃႇၼမေႇလႃႉ၊ လုၵ်ႈၸၢႆး သႃႇလုမ်ႇ၊ ၼႃႉမႂ်းၼၼ်ႉတၵ်းမႃးတီႈမႂ်းလႄႈလၢတ်ႈဝႃႈ၊ ‘သိုဝ်ႉဢဝ်တူင်ႈၼႃးၵဝ်ဢၼ်မီးၵႃႈတီႈဝဵင်း ဢႃႇၼသုတ်ႉ၊ ၼၼ်ႉသေၵမ်း၊လွင်ႈမၼ်းၸမ်ႉ၊မႂ်းထိူၵ်ႈပိူင်ႇတၢင်းဢၼ်ထုတ်ႇၼုၵ်ႈဢဝ်လႄႈသိုဝ်ႉဢဝ်ၼၼ်ႉဢေႃႈ၊’ ဝႃႈၼင်ႇၼႆဢေႃႈ။-
ႁႃႇၼမေႇလႃႉ၊ လုၵ်ႈၸၢႆးၼႃႉၵဝ်ၼၼ်ႉမႃးၸူးတီႈၵဝ်ၵႃႈၼႂ်းဝၢင်းထွင်ႇမႅၼ်ႈၸွမ်းၼင်ႇဢၼ် ထႃႇဝရႃႉၽြႃး၊ မီးဢမိင်ႉၼၼ်ႉလႄႈလၢတ်ႈတီႈၵဝ်လႄႈဝႃႈ၊ ‘ၶႅၼ်းတေႃႈသိုဝ်ႉဢဝ်တူင်ႈၼႃးၵဝ်ဢၼ်မီးၵႃႈတီႈဝဵင်း ဢႃႇၼသုတ်ႉ၊ ၼႂ်းဢိူင်ႇ ပိၼ်ႇယႃႇမိၼ်ႇ၊ ၼၼ်ႉသေၵမ်း။ မႂ်းမီးဢၶႂၢင်ႉဢၼ်လႆႈၶၢမ်ႇဢဝ်ဢမူၺ်ႇဢိၵ်ႇတင်းဢၶႂၢင်ႉဢၼ်လႆႈထုတ်ႇဢဝ်ၼုၵ်ႈဢဝ်ၼၼ်ႉလႄႈသိုဝ်ႉဢဝ်ပုၼ်ႈတူဝ်မႂ်းသေၵမ်း၊’ ဝႃႈၼင်ႇၼႆဢေႃႈ။ မိူဝ်ႈၼၼ်ႉၵဝ်ႁုလွင်ႈဢၼ်ၵႂၢမ်းၼႆႉပဵၼ်ၼုၵ်ႈၵပၢတ်ႈ ထႃႇဝရႃႉၽြႃး၊ ၼၼ်ႉဢေႃႈ။-
ၵဝ်သိုဝ်ႉဢဝ်ၼႃး ႁႃႇၼမေႇလႃႉ၊ လုၵ်ႈၸၢႆးၼႃႉၵဝ်ဢၼ်မီးၵႃႈတီႈဝဵင်း ဢႃႇၼသုတ်ႉ၊ ၼၼ်ႉလႄႈၸင်ႈႁိဝ်ႈပၼ်ၵႃႈၶၼ်မၼ်းငိုၼ်းသိပ်းၸဵတ်းၵျၢပ်ႈဢေႃႈ။-
လိၵ်ႈသိုဝ်ႉၶၢႆၵေႃႈ ၵဝ်ၸီႇယၢင်ႇတႅမ်ႈလႄႈတွၵ်ႇတၼ်းသိၵ်ႈသေယဝ်ႉ၊ႁွင်ႉဢဝ်သၢၵ်ႈသေႇလႄႈဢဝ်ယွႆးၸင်ႈႁိဝ်ႈငိုၼ်းပၼ်ဢေႃႈ။-
ၵဝ်ဢဝ်ၽိုၼ်လိၵ်ႈလူင်းလၢႆးမိုဝ်းဢၼ်သိုဝ်ႉၶၢႆ၊ဢၼ်တွၵ်ႇတၼ်းသိၵ်ႈၽိုၼ်ၼိုင်ႈ၊ဢိၵ်ႇတင်းလိၵ်ႈလၢၵ်ႈၶၢမ်ႇမၼ်းၽိုၼ်ၼိုင်ႈၽုၺ်ႇပိုတ်ႇဝႆႉၸွမ်းၼင်ႇထုင်းၸၢမ်ႇမၼ်းမီးၼၼ်ႉသေလႄႈ၊-
ဢဝ်ၽိုၼ်လိၵ်ႈလူင်းလၢႆးမိုဝ်းသိုဝ်ႉၶၢႆၼၼ်ႉဢၢပ်ႈပၼ်တီႈ ပႃႇရုၵ်ႉ၊ လုၵ်ႈၸၢႆး ၼေႇရိ၊ ဢၼ်ပဵၼ်လုၵ်ႈၸၢႆး မႃႇသေႇယႃႉ၊ ၼၼ်ႉသိုဝ်ႈၼႃႈတႂ်ႈတႃ ႁႃႇၼမေႇလႃႉ၊ လုၵ်ႈၸၢႆးၼႃႉၵဝ်၊ဢိၵ်ႇတင်းသိုဝ်ႈၼႃႈတႂ်ႈတႃသၢၵ်ႈသေႇဢၼ်လူင်းလၢႆးမိုဝ်းတီႈၽိုၼ်လိၵ်ႈလူင်းလၢႆးမိုဝ်းသိုဝ်ႉၶၢႆၼၼ်ႉတင်းၵူၼ်း ယုတႃႉ၊ ဢၼ်ၼင်ႈယူႇၵႃႈၼႂ်းဝၢင်းထွင်ႇတင်းသဵင်ႈတင်းလူင်ၼၼ်ႉဢေႃႈ။-
ၵဝ်သင်ႇလၢတ်ႈဝႆႉတီႈ ပႃႇရုၵ်ႉ၊ ၵႃႈတီႈၽၢႆႇၼႃႈၶဝ်ၼၼ်ႉလႄႈဝႃႈ၊-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊ဢဝ်ၽိုၼ်လိၵ်ႈလူင်းလၢႆးမိုဝ်းဢၼ်သိုဝ်ႉၶၢႆၸိူဝ်းၼႆႉဢၼ်ဝႃႈ၊လိၵ်ႈဢၼ်တွၵ်ႇတၼ်းသိၵ်ႈၽိုၼ်ၼိုင်ႈ၊ဢိၵ်ႇတင်းလိၵ်ႈလၢၵ်ႈၶၢမ်ႇမၼ်းဢၼ်ၽုၺ်ႇပိုတ်ႇဝႆႉၽိုၼ်ၼိုင်ႈလႄႈဢဝ်သႂ်ႇဝႆႉၵႃႈၼႂ်းမေႃႈလိၼ်ႁႂ်ႈတႄႇယူႇၶိင်ႇၵႃႇလႃႉႁိုင်ႁိုင်တႃႉ။-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊တၵ်းမီးတၢင်းဢၼ်သိုဝ်ႉဢဝ်ႁိူၼ်း၊ႁႆႈၼႃး၊သူၼ်မၢၵ်ႇၸပိတ်ႉၵႃႈၼႂ်းမိူင်းၼႆႉထႅင်ႈလူးၵွၼ်ႇဢေႃႈ၊” ဝႃႈၼင်ႇၼႆဢေႃႈ။
ၵဝ်ဢဝ်ၽိုၼ်လိၵ်ႈလူင်းလၢႆးမိုဝ်းသိုဝ်ႉၶၢႆဢၢပ်ႈပၼ်တီႈ ပႃႇရုၵ်ႉ၊ လုၵ်ႈၸၢႆး ၼေႇရိ၊ ၼၼ်ႉသေယဝ်ႉ၊ၵဝ်သူးတွင်းႁဵတ်းပထၼႃႇတီႈ ထႃႇဝရႃႉၽြႃး၊ လႄႈဝႃႈ၊-
“ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တီႈၶႃႈ၊ၸဝ်ႈႁဝ်းဢဝ်တင်းမႁႃႇတၼ်းၶူဝ်း၊ဢိၵ်ႇတင်းၶႅၼ်မိုဝ်းၸဝ်ႈႁဝ်းႁဵတ်းပဵၼ်ၽႃႉၵၢင်ႁၢဝ်တင်းလိၼ်မိူင်းတီႈၶႃႈယဝ်ႉ။ လွင်ႈတၢင်းဢၼ်ၸဝ်ႈႁဝ်းဢမ်ႇတၢတ်ႈၼိူင်ႇလႆႈၼၼ်ႉဢမ်ႇမီးသေၸိူဝ်ႉသေဢၼ်တီႈၶႃႈ။-
ၸဝ်ႈႁဝ်းႁဵတ်းၵျေးၸူးၵရုၼႃႇတီႈၵူၼ်းပဵၼ်ႁဵင်ပဵၼ်မိုၼ်ႇတီႈၶႃႈဢေႃႈ။ ၵူၺ်းၵႃႈ၊ၸဝ်ႈႁဝ်းႁႂ်ႈဢပျတ်ႈပေႃႈမႄႈတင်းလၢႆတူၵ်းႁွတ်ႈၵႃႈၼႂ်းႁူဝ်ဢူၵ်းလုၵ်ႈလၢၼ်ၶဝ်ၼၼ်ႉတီႈၶႃႈဢေႃႈ။ ၸဝ်ႈႁဝ်းပဵၼ်ၽြႃးဢၼ်ယႂ်ႇမျၢတ်ႈၼႃႇ၊ပဵၼ်ၽြႃးဢၼ်ပျေႉၸုမ်ႇဝႆႉတင်းမႁႃႇတၼ်းၶူဝ်းလႄႈမီးၼႃႇမႃႉၸိုဝ်ႈသဵင်ဢၼ်ဝႃႈ၊ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ တီႈၶႃႈဢေႃႈ။-
တၢင်းၵျၢမ်ႇတၢင်းပွင်ၸဝ်ႈႁဝ်းၼၼ်ႉပဵၼ်ဢၼ်လၢၵ်ႇလၢႆးလီဢၢမ်းၼႃႇလႄႈတၢင်းဢၼ်ၸဝ်ႈႁဝ်းၸီႇယၢင်ႇႁဵတ်းသၢင်ႈၼၼ်ႉ ပဵၼ်ဢၼ်ယႂ်ႇမျၢတ်ႈၼႃႇဢေႃႈ။ ၸဝ်ႈႁဝ်းလူတူၺ်းႁၼ်ၵႃႈဢၼ်ၵူၼ်းၵျၢမ်ႇပွင်ႁဵတ်းသၢင်ႈၵူႈၸိူဝ်ႉၵူႈမဵဝ်းလႄႈၶျႃးပၼ်သူးတီႈၶဝ်ၸွမ်းၼင်ႇတၢင်းဢၼ်ၶဝ်ၵမ်ၵျၢင်ႉႁဵတ်းသၢင်ႈၼၼ်ႉဢေႃႈ။-
ၸဝ်ႈႁဝ်းၼႄပျႃးၼိမိၵ်ႈလၢၵ်ႈၶၼႃႇ၊ဢိၵ်ႇတင်းလွင်ႈတၢင်းဢၼ်လီဢၢမ်းတင်းလၢႆၵႃႈၼႂ်းမိူင်း ဢေးၵျိပ်ႉ၊ ၵႃႈၼႂ်းၵူၼ်းမဵဝ်း ဢိသရေး၊ ဢိၵ်ႇတင်းၵူၼ်းတၢင်ႇၸိူဝ်ႉတၢင်ႇမဵဝ်းတင်းလၢႆတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။ ၼႃႇမႃႉၸိုဝ်ႈသဵင်ၸဝ်ႈႁဝ်းႁူင်ႁၢင်းထၢင်ႇသႃးယူႇတႃႇသေႇမိူၼ်ၸိူဝ်ႉၼင်ႇဝၼ်းမိူဝ်ႈၼႆႉတီႈၶႃႈဢေႃႈ။-
ၸဝ်ႈႁဝ်းဢဝ်တင်းၼိမိၵ်ႈလၢၵ်ႈၶၼႃႇ၊လွင်ႈတၢင်းဢၼ်လီဢၢမ်း၊မိုဝ်းၸဝ်ႈဢၼ်ႁႅင်းယႂ်ႇ၊ၶႅၼ်ၸဝ်ႈဢၼ်ယဵတ်ႇယိုၼ်း၊လွင်ႈတၢင်းဢၼ်လီၵူဝ်လီႁႄၸိူဝ်းၼၼ်ႉၼုၵ်ႈဢဝ်ၵူၼ်းၸဝ်ႈႁဝ်းမဵဝ်း ဢိသရေး၊ တင်းလၢႆ ဢွၵ်ႇသေၵႃႈၼႂ်းမိူင်း ဢေးၵျိပ်ႉ၊ မႃးၶႃႈဢေႃႈ။-
ၸဝ်ႈႁဝ်းဢဵတ်းလူပၼ်မိူင်းၼႆႉ ဢၼ်ၸဝ်ႈႁဝ်းတိူင်ႇဝႃႈၵတိဝႆႉတီႈပူႇမွၼ်ႇၶဝ်လူၺ်ႈလွင်ႈဢၼ်တၵ်းပၼ်တီႈၶဝ်ဢၼ်ဝႃႈ၊မိူင်းဢၼ်မၢၵ်ႈမီးလီပဵၼ်လႄႈၽုၼ်ႇလီလိၼ်လီ ၼၼ်ႉပၼ်တီႈၶဝ်ၶႃႈယဝ်ႉ။-
ၶဝ်ဢွၼ်ၵၼ်ၶဝ်ႈလႄႈပိူင်ႇဢဝ်ယဝ်ႉသေၵေႃႈ၊ၶဝ်ဢမ်ႇထွမ်ႇဢမ်ႇဢဝ်ဢမိင်ႉၸဝ်ႈ၊ဢမ်ႇၸွမ်းသဵၼ်ႈတၢင်းတြႃးၸဝ်ႈ၊ဢမ်ႇၵမ်ဢမ်ႇၵျၢင်ႉၸွမ်းတၢင်းၵမ်တၢင်းၵျၢင်ႉဢၼ်ၸဝ်ႈႁဝ်းသင်ႇဝႆႉၼၼ်ႉလႃးလႃးလႄႈၸဝ်ႈႁဝ်းႁႂ်ႈၽေးဢုပၢတ်ႈၵႃႈဢၼ်ၶဝ်လႆႈၶၢမ်ႇၼႆႉလႆႈႁွတ်ႈထိုင်ၵႃႈၼိူဝ်ၶဝ်တီႈၶႃႈယဝ်ႉ။-
“ၶႅၼ်းတေႃႈလူတူၺ်းတႅၼ်ႈလိၼ်လၢင်းၸီးဢၼ်ရၢၼ်ႇသူႇႁဵတ်းဝႆႉပုၼ်ႈတၵ်းတိုၵ်းဢဝ်ဝဵင်းၸဝ်ႈၼႆႉသေၵမ်းတီႈၶႃႈ။ ဝဵင်းၸဝ်ႈၼႆႉလႆႈၶၢမ်ႇတၢင်းဢၼ်ဢၢပ်ႈပၼ်ၵႃႈၼႂ်းမိုဝ်းၵူၼ်း ၶႃႇလတေး၊ ဢၼ်ပႃးဢဝ်ၽေးလၢပ်ႇၽေးလႅဝ်း၊ၽေးတၢင်းဢၼ်ဢိုပ်းယၢၵ်ႈ၊ၽေးၵႃႇလႃႉႁႃႈလႅင်မိူင်း၊မႃးတိုၵ်းတေႃးၼၼ်ႉတီႈၶႃႈယဝ်ႉ။ လွင်ႈတၢင်းဢၼ်ၸဝ်ႈႁဝ်းမီးဢမိင်ႉဝႆႉၸိူဝ်းၼၼ်ႉလႆႈပျေႉၸုမ်ႇယဝ်ႉလႄႈတူဝ်ၸဝ်ႈႁဝ်းႁၼ်ယူႇတီႈၶႃႈဢေႃႈ။-
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းမီးဢမိင်ႉတီႈၶႃႈၸဝ်ႈလႄႈဝႃႈ၊ ‘ဢဝ်ငိုၼ်းသိုဝ်ႉဢဝ်ၵႂၢၵ်ႈလိၼ်လႄႈႁႃဢဝ်သၢၵ်ႈသေႇဝႆႉတႃႉ၊’ ဝႃႈၼင်ႇၼႆတီႈၶႃႈဢေႃႈ။ ၵူၺ်းၵႃႈ၊ဝဵင်းၸဝ်ႈၼႆႉလႆႈႁွတ်ႈထိုင်ၵႃႈၼႂ်းမိုဝ်းၵူၼ်း ၶႃႇလတေး၊ ၸိူဝ်းၼၼ်ႉတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈ ယေႇရမိ၊ လႄႈဝႃႈၸမ်ႉ၊-
“ၵဝ် ထႃႇဝရႃႉၽြႃး၊ ၼႆႉပဵၼ်ၽြႃးပဵၼ်ၸဝ်ႈဢၼ်ဢုပ်ႉပိူင်ႇသတ်ႉတဝႃႇတင်းသဵင်ႈတင်းလူင်ဢေႃႈ။ လွင်ႈတၢင်းဢၼ်ၵဝ်ဢမ်ႇတၢတ်ႈၼိူင်ႇလႆႈၼၼ်ႉမီးသေၸိူဝ်ႉသေပိူင်ႁိုဝ်း။-
ပိူဝ်ႈၼႆလႄႈ ထႃႇဝရႃႉၽြႃး၊ မီးဢမိင်ႉၸမ်ႉ၊ၵဝ်တၵ်းဢဝ်ဝဵင်းၼႆႉဢၢပ်ႈပၼ်ၵႃႈၼႂ်းမိုဝ်းၵူၼ်း ၶႃႇလတေး၊ တင်းလၢႆဢိၵ်ႇတင်းၵႃႈၼႂ်းမိုဝ်း ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်းမိူင်း ပႃႇပုလုၼ်ႇ၊ လႄႈမၼ်းၼၼ်ႉတၵ်းသိမ်းဢဝ်ဢေႃႈ။-
ၵူၼ်း ၶႃႇလတေး၊ ဢၼ်တိုၵ်းဢဝ်ဝဵင်းၼႆႉၸိူဝ်းၼၼ်ႉတၵ်းဢွၼ်ၵၼ်ၶဝ်ႈသေလႄႈဢဝ်ၽႆးတုတ်ႇပႅတ်ႈဝဵင်းၼႆႉတင်းဝဵင်းဢေႃႈ။ ႁိူၼ်းဢၼ်ၶဝ်ဢဝ်ၼၢမ်ႇသႃႇတုတ်ႇၽႆးၵႃႈၼိူဝ်လင်ၶႃးႁိူၼ်းပုၼ်ႈ ၽြႃးပႃႇလႃႉ၊ လႄႈႁဵတ်းၶိူင်ႈတၢင်းလူႇဢၼ်သွၼ်းလေႃႇပုၼ်ႈၽြႃးတၢင်ႇသူႇတၢင်ႇပႃးႁႂ်ႈလႆႈတိုၵ်းယူင်းတၢင်းၸႂ်မႆႈၶႂ်ႈၸႃႉၵဝ်ၸိူဝ်းၼၼ်ႉၵေႃႈ တၵ်းမႆႈပႅတ်ႈသဵင်ႈဢေႃႈ။-
လွင်ႈမၼ်းၸမ်ႉ၊ၵူၼ်းမဵဝ်း ဢိသရေး၊ ဢိၵ်ႇတင်းၵူၼ်းမဵဝ်း ယုတႃႉ၊ တင်းလၢႆဢွၼ်ၵၼ်ႁဵတ်းတုၸရိူၵ်ႈသိုဝ်ႈၼႃႈတႂ်ႈတႃၵဝ် ၸဵမ်မိူဝ်ႈဢၼ်ဢသၢၵ်ႈၶဝ်ယင်းလဵၵ်ႉယင်းၼုမ်ႇၼၼ်ႉယဝ်ႉ။ ၵူၼ်းမဵဝ်း ဢိသရေး၊ တင်းလၢႆဢွၼ်ၵၼ်ႁဵတ်းႁႂ်ႈလႆႈတိုၵ်းယူင်းတၢင်းၸႂ်မႆႈၶႂ်ႈၸႃႉၵဝ်လူၺ်ႈၵႃႈဢၼ်ဢဝ်မိုဝ်းၶဝ်ႁဵတ်းၵူၺ်းၵူၺ်းၼၼ်ႉယဝ်ႉ။-
ဝဵင်းၼႆႉပဵၼ်ဝဵင်းဢၼ်ႁႂ်ႈတၢင်းဢၼ်ၸႂ်မႆႈၶႂ်ႈၸႃႉၵဝ်ဢွၵ်ႇလႄႈႁႂ်ႈဢၢႆႁႅင်းတေႃးသႃႉၵဝ်ႁႅင်းယႂ်ႇၼႃႇၸႃႉၸဵမ်မိုဝ်ႉဝၼ်းဢၼ်တႄႇႁဵတ်းမၼ်းၼၼ်ႉ တေႃႇထိုင်ႁွတ်ႈဝၼ်းမိူဝ်ႈၼႆႉၼၼ်ႉယဝ်ႉ။ ပိူဝ်ႈၼႆလႄႈၵဝ်တၵ်းပႄႇၽဵဝ်ႈမၼ်းပႅတ်ႈသေၵႃႈတီႈသိုဝ်ႈၼႃႈတႂ်ႈတႃၵဝ်ဢေႃႈ။-
လွင်ႈမၼ်းၸမ်ႉ၊ၵွပ်ႈပိူဝ်ႈတုၸရိူၵ်ႈၵူၼ်းမဵဝ်း ဢိသရေး၊ ဢိၵ်ႇတင်းၵူၼ်းမဵဝ်း ယုတႃႉ၊ တင်းလၢႆဢၼ်ဝႃႈ၊ၶုၼ်ႁေႃၶမ်းၶဝ်၊ယဵၸ်ႈပရေႃးႁဵၵ်ႈၶဝ်၊ပရေႃးၽႅတ်ႈၶဝ်၊ၵူၼ်းမိူင်း ယုတႃႉ၊ ဢိၵ်ႇတင်းၶဝ်ၸိူဝ်းဢၼ်ယူႇၵႃႈၼႂ်းဝဵင်း ယေႇရုသလႅမ်ႇ၊ တင်းလၢႆၸိူဝ်းၼၼ်ႉပဵၼ်ဢၼ်လႆႈတိုၵ်းယူင်းတၢင်းၸႂ်မႆႈၶႂ်ႈၸႃႉၵဝ်ၼၼ်ႉဢေႃႈ။-
ၶဝ်ၼၼ်ႉယင်းဢမ်ႇဝၢႆႇၼႃႈတေႃႇၵဝ်လႄႈဢွၼ်ၵၼ်ၵွင်ႇလင်ၸူးတီႈၵဝ်ယဝ်ႉ။ ပိၵ်ႉသမ်ႉၵဝ်သင်ႇသွၼ်သုင်းမႃႉၶဝ်ယူႇတႃႇသေႇဢမ်ႇထၢတ်ႇသေၵေႃႈ၊ၶဝ်ဢမ်ႇဢွၼ်ၵၼ်ထွမ်ႇငိၼ်းႁႂ်ႈလႆႈၶၢမ်ႇဢဝ်ဢေႃးဝႃႇတႃႉၵဝ်။-
ၶဝ်ဢွၼ်ၵၼ်ဢဝ်လွင်ႈတၢင်းဢၼ်လီႁင်ႈဢဵတ်ႇသဵတ်ႇသႂၢင်းသႂ်ႇဝႆႉၼႂ်းႁိူၼ်းဢၼ်ႁွင်ႉႁဵၵ်ႈၸွမ်းၼႃႇမႃႉၸိုဝ်ႈသဵင်ၵဝ်ၼၼ်ႉႁႂ်ႈလႆႈၵူဝ်ႈၵိူၵ်ႇယဝ်ႉ။-
ၶဝ်ဢွၼ်ၵၼ်တႄႇႁဵတ်းထႃႇၼႃႉတီႈသုင်ပုၼ်ႈ ၽြႃးပႃႇလႃႉ၊ ၵႃႈၼႂ်း ၶူင်ႈႁူၺ်ႈႁိၼ်ႇၼုမ်ႇ၊ ၼၼ်ႉႁႂ်ႈလႆႈဢဝ်လုၵ်ႈၸၢႆးၶဝ်လုၵ်ႈယိင်းၶဝ်သၢၵ်ႈလူႇတီႈၽြႃး မူးလွၵ်ႉ၊ ဢၼ်ၵဝ်ဢမ်ႇလႆႈသင်ႇလၢတ်ႈဝႆႉတီႈၶဝ်လႄႈၵဝ်ဢမ်ႇတွၼ်ႉဝူၼ်ႉထိုင်လွင်ႈဢၼ်ၶဝ်တၵ်းႁဵတ်းတၢင်းဢၼ်လီႁင်ႈဢဵတ်ႇသဵတ်ႇၼႆႉႁႂ်ႈမဵဝ်း ယုတႃႉ၊ မီးတုၸရိူၵ်ႈၼၼ်ႉယဝ်ႉ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉလွင်ႈဝဵင်းၼႆႉဢၼ်သူၸၢင်ႈလၢတ်ႈလႄႈဝႃႈ၊ “ဝဵင်းၼႆႉတၵ်းတူၵ်းႁွတ်ႈၵႃႈၼႂ်းမိုဝ်းၶုၼ်ႁေႃၶမ်းမိူင်း ပႃႇပုလုၼ်ႇ၊ လူၺ်ႈၽေးလၢပ်ႈၽေးလႅဝ်း၊ၽေးတၢင်းဢၼ်ဢိုပ်းဢၼ်ယၢၵ်ႈ၊ၽေးၵႃႇလႃႉႁႃႈလႅင်မိူင်းဢေႃႈ၊” ဝႃႈၼင်ႇၼႆၼၼ်ႉၸမ်ႉ၊-
“တူၺ်းလူး။ ၵဝ်တၵ်းသမ်ႉသိမ်းဢဝ်ၶဝ်ဢွၵ်ႇမႃးသေၵႃႈၼႂ်းဝၢၼ်ႈမိူင်းတီႈဢၼ်ၵဝ်ပႃးတင်းတၢင်းဢၼ်ၶႂ်ႈၸႃႉ၊တၢင်းဢၼ်ဢၢႆႁႅင်းတေႃးသႃႉၵဝ်ဢွၵ်ႇ၊တၢင်းဢၼ်ၸႂ်မႆႈၶႂ်ႈၸႃႉႁႅင်းယႂ်ႇၼႃႇသေလႄႈလိုပ်ႈၶဝ်ဢွၵ်ႇၵႂႃႇၸူးၼၼ်ႉဢေႃႈ။ ၵဝ်တၵ်းဢဝ်ၶဝ်ၶိုၼ်းမႃးၵႃႈတီႈၼႆႈလႄႈႁႂ်ႈၶဝ်ယူႇတဵတ်ႇလီၼိမ်လီဢေႃႈ။-
ၶဝ်တၵ်းပဵၼ်ၵူၼ်းၵဝ်လႄႈၵဝ်ၵေႃႈတၵ်းပဵၼ်ၽြႃးပဵၼ်ၸဝ်ႈၶဝ်ဢေႃႈ။-
ၼင်ႇႁိုဝ်ၶဝ်တၵ်းၵူဝ်ႁႄၵဝ်သေႇသေႇၸိုင်၊ၵဝ်တၵ်းပၼ်ၸႂ်သၽေႃးဢၼ်လဵဝ်ၵၼ်၊ဢိၵ်ႇတင်းသဵၼ်ႈတၢင်းဢၼ်လဵဝ်ၵၼ်တီႈၶဝ်ပုၼ်ႈဢၼ်တၵ်းပဵၼ်ဢၵျူဝ်းတီႈၶဝ်၊ဢိၵ်ႇတင်းတီႈလုၵ်ႈၶဝ်လၢင်းၶဝ်ဢၼ်တၵ်းပဵၼ်မႃးပႃႈလိုၼ်းၶဝ်ၼၼ်ႉဢေႃႈ။-
ၵဝ်တၵ်းႁဵတ်းပတိၺိၺ်ႇထႃႇဝရႃႉလူၺ်ႈၵၼ်တင်းၶဝ်ဢေႃႈ။ တၵ်းႁဵတ်းၵျေးၸူးတၢင်းလီတီႈၶဝ်ယူႇသေႇသေႇဢေႃႈ။ ၼင်ႇႁိုဝ်ၶဝ်တၵ်းဢမ်ႇၸုၼ်ႉပႅတ်ႈၵဝ်လႄႈဢွၵ်ႇသေၵႃႈတီႈၵဝ်ၵႂႃႇၼၼ်ႉၵဝ်တၵ်းႁႂ်ႈၶဝ်ပျေႉၸုမ်ႇဝႆႉတင်းသၽေႃးဢၼ်ၵူဝ်ႁႄၵဝ်ဢေႃႈ။-
ၵဝ်တၵ်းၸူမ်းၸႂ်သိူဝ်းၸႂ်လူၺ်ႈလွင်ႈတၢင်းဢၼ်ႁဵတ်းၵျေးၸူးတီႈၶဝ်ၼၼ်ႉလႄႈပႃးတင်းႁူဝ်ၸႂ်ၵဝ်၊ဝိၺိၺ်ႇၵဝ်မူတ်းမူတ်းသဵင်ႈသဵင်ႈသေယဝ်ႉ၊တၵ်းၶျႃးပၼ်တီႈယူႇၶဝ်ၵႃႈၼႂ်းမိူင်းၼႆႉဢမၢၼ်ႇၶၼ်ပဵၼ်ဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “မိူၼ်ၸိူဝ်ႉၼင်ႇဢၼ်ၵဝ်ႁႂ်ႈၽေးဢုပၢတ်ႈဢၼ်ယႂ်ႇၼႃႇလူင်လၢင်ႁွတ်ႈထိုင်ၵႃႈၼိူဝ်ၵူၼ်းမဵဝ်းၼႆႉၼၼ်ႉၵဝ်တၵ်းႁႂ်ႈတၢင်းလီဢၼ်ၵဝ်ဝႆႉၵတိတီႈၶဝ်တင်းသဵင်ႈတင်းလူင်ၼၼ်ႉႁွတ်ႈထိုင်ၵႃႈၼိူဝ်ၶဝ်ဢေႃႈ။-
တၵ်းမီးတၢင်းဢၼ်သိုဝ်ႉဢဝ်ႁႆႈၼႃးၵႃႈၼႂ်းမိူင်းၼႆႉဢၼ်သူယင်းလၢတ်ႈလႄႈဝႃႈ၊ ‘ပဵၼ်တီႈဢၼ်ပဝ်ႇဢၼ်လၢပ်ႈလႄႈဢမ်ႇမီးၵူၼ်းဢမ်ႇမီးတရိၵ်ႈသၢၼ်ႇၼၼ်ႉ၊လႆႈၶၢမ်ႇတၢင်းဢၼ်ဢၢပ်ႈဝႆႉၵႃႈၼႂ်းမိုဝ်းၵူၼ်း ၶႃႇလတေး၊ တင်းလၢႆယဝ်ႉ၊’ ဝႃႈၼင်ႇၼႆၼၼ်ႉဢေႃႈ။-
ၵူၼ်းတင်းလၢႆတၵ်းဢွၼ်ၵၼ်ဢဝ်ငိုၼ်းသိုဝ်ႉဢဝ်ႁႆႈၼႃးလႄႈႁဵတ်းလိၵ်ႈလူင်းလၢႆးမိုဝ်းသိုဝ်ႉၶၢႆဝႆႉ၊တွၵ်ႇတၼ်းသိၵ်ႈဝႆႉလႄႈလူင်းလၢႆးမိုဝ်းဢၼ်ပဵၼ်သၢၵ်ႈသေႇဝႆႉၸိူဝ်းၼၼ်ႉဢေႃႈ။ ၵၢၼ်ဢမုၸိူဝ်းၼႆႉတၵ်းတႄႇႁဵတ်းၵႃႈၼႂ်းမိူင်း ပိၼ်ႇယႃႇမိၼ်ႇ၊ ဢိၵ်ႇတင်းၵႃႈၼႂ်းတီႈဢၼ်လဵပ်ႈႁွပ်ႈဝဵင်း ယေႇရုသလႅမ်ႇ၊ တင်းလၢႆတင်းၵႃႈတီႈဝဵင်းဢၼ်မီးၵႃႈၼႂ်းမိူင်း ယုတႃႉ၊ ၵႃႈတီႈဝဵင်းၼိူဝ်ႁၢၼ်ႉလွႆ၊ၵႃႈတီႈဝဵင်းဢၼ်မီးၵႃႈတႂ်ႈတီႈပၢင်ႇတီႈပဵင်း၊ၵႃႈတီႈဝဵင်းဢၼ်မီးၵႃႈၼႂ်းပွတ်းတၢင်းၸၢၼ်းၼၼ်ႉၸိူဝ်းၼၼ်ႉဢေႃႈ။ လွင်ႈမၼ်းၸမ်ႉ၊ၵဝ်သမ်ႉတၵ်းဢဝ်ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၼၼ်ႉပွၵ်ႈၶိုၼ်းမႃးဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈ ယေႇရမိ၊ ပွၵ်ႈထူၼ်ႈသွင်ၼႂ်းမိူဝ်ႈဢၼ်မၼ်းယင်းတိုၵ်ႉလႆႈၶၢမ်ႇတၢင်းဢၼ်ၶျုၵ်ႈဝႆႉၵႃႈတီႈဝၢင်းထွင်ႇဢၼ်ၵူၼ်းသိုၵ်းပႂ်ႉႁေႃၶဝ်ယူႇၼၼ်ႉလႄႈဝႃႈ၊-
“ထႃႇဝရႃႉၽြႃး၊ ဢၼ်ၽၢၼ်ႇသၢင်းႁဵတ်းပဵၼ်လိၼ်မိူင်း၊ ထႃႇဝရႃႉၽြႃး၊ ဢၼ်ၸီႇယၢင်ႇပွင်ႁဵတ်းဢမုၼႆႉပဵၼ်ၽြႃးဢၼ်လႆႈၸိုဝ်ႈဝႃႈ၊ ထႃႇဝရႃႉၽြႃး၊ ၼၼ်ႉမီးဢမိင်ႉၸမ်ႉ၊-
ႁွင်ႉႁႃၵဝ်တႃႉ။ ၵဝ်တၵ်းဢိူဝ်လႄႈၼႄပျႃးလွင်ႈတၢင်းဢၼ်ယႂ်ႇမျၢတ်ႈၼႃႇ၊ဢိၵ်ႇတင်းလွင်ႈတၢင်းဢၼ်လိုၵ်ႉဢၼ်လမ်ႇဢၼ်မႂ်းဢမ်ႇယၢမ်ႈလႆႈႁုၸိူဝ်းၼၼ်ႉတီႈမႂ်းဢေႃႈ။-
ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ဢဝ်လွင်ႈႁိူၼ်းၵႃႈၼႂ်းဝဵင်းၼႆႉတင်းလၢႆဢိၵ်ႇတင်းႁေႃၸဝ်ႈၶုၼ်ႁေႃၶမ်း ယုတႃႉ၊ ဢၼ်ၵိူၼ်ႇလုၵွပ်ႈပိူဝ်ႈတႅၼ်ႈလိၼ်လၢင်းၸီး၊ဢိၵ်ႇတင်းလၢပ်ႇလႅဝ်းၼၼ်ႉၸိူဝ်းၼၼ်ႉလႄႈမီးဢမိင်ႉၸမ်ႉ၊-
ၶဝ်ဢွၼ်ၵၼ်မႃးႁႂ်ႈလႆႈတိုၵ်းသိုၵ်းၵၼ်တင်းၵူၼ်း ၶႃႇလတေး၊ တင်းလၢႆဢေႃႈ။ ၵူၺ်းၵႃႈ၊ႁိူၼ်းၶဝ်တၵ်းတဵမ်ဝႆႉတင်းတူဝ်တၢႆ၊ဢၼ်ၵဝ်ပႃးတင်းတၢင်းဢၼ်ၸႂ်မႆႈၶႂ်ႈၸႃႉ၊တၢင်းဢၼ်တေႃးသႃႉဢွၵ်ႇႁႅင်းယႂ်ႇၼႃႇသေလႄႈဢဝ်တၢႆၸိူဝ်းၼၼ်ႉဢေႃႈ။ လွင်ႈမၼ်းၸမ်ႉ၊ၵွပ်ႈပိူဝ်ႈတုၸရိူၵ်ႈၶဝ်တင်းသဵင်ႈတင်းလူင်ၼၼ်ႉလႄႈၵဝ်ဝၢႆႇၼႃႈပႅတ်ႈသေၵႃႈတီႈဝဵင်းၼႆႉယဝ်ႉ။-
ၵူၺ်းၵႃႈ၊ၵဝ်တၵ်းႁႂ်ႈတၢင်းဢၼ်ယူႇလီၵိၼ်ဝၢၼ်၊တၢင်းဢၼ်ႁႂ်ႈတၢင်းၸဵပ်းတၢင်းသႅပ်ႇႁၢႆၼၼ်ႉႁွတ်ႈထိုင်ၵႃႈၼိူဝ်ၵူၼ်းဝဵင်းၼႆႉလႄႈႁႂ်ႈၶဝ်သၢၵ်ႈသႃႇၶႅၼ်းမႃးဢေႃႈ။ ၵဝ်တၵ်းၼႄပျႃးၸေးၸိမ်ႇတၢင်းဢၼ်ၼိမ်ဢၼ်လီ၊ဢိၵ်ႇတင်းၼႄပျႃးတၢင်းဢၼ်မၼ်ႈၶိူင်ႇၼႃႇၼၼ်ႉဢေႃႈ။-
ၵဝ်တၵ်းႁႂ်ႈမိူင်း ယုတႃႉ၊ ဢိၵ်ႇတင်းမိူင်း ဢိသရေး၊ လႆႈလီလႆႈပဵၼ်လႄႈတၵ်းၶိုၼ်းတႄႇၶိုၼ်းႁဵတ်းမိူင်းၶဝ်ႁႂ်ႈပဵၼ်မိူၼ်ၸိူဝ်ႉၼင်ႇပၵ်းၵဝ်ႇပိူင်ၵဝ်ႇၼၼ်ႉဢေႃႈ။-
ၵဝ်တၵ်းပွႆႇလွတ်ႈဢပျတ်ႈၵႃႈဢၼ်ၶဝ်ၽိတ်းပိူင်ႈၵဝ်ၼၼ်ႉလႄႈတၵ်းပွႆႇလွတ်ႈၵႃႈဢၼ်ၶဝ်ၽိတ်းပိူင်ႈပူၼ်ႉလိူဝ်တြႃးၵဝ်ၸိူဝ်းၼၼ်ႉဢေႃႈ။-
ဝဵင်းၼႆႉတၵ်းပဵၼ်လွင်ႈဢၼ်ၵဝ်လီၸူမ်းလီသိူဝ်း၊လွင်ႈဢၼ်လီယွင်ႈယေႃး၊လွင်ႈဢၼ်ၵုင်ႇသရေႇႁူင်ႁၢင်းၽၢႆႇၼႃႈၵူၼ်းၵူႈၸိူဝ်ႉၵူႈမဵဝ်းၵႃႈၼိူဝ်လိၼ်မိူင်းၼႆႉဢေႃႈ။ ၶဝ်ၸိူဝ်းဢၼ်လႆႈငိၼ်းလွင်ႈၵျေးၸူးၵႃႈဢၼ်ၵဝ်ႁဵတ်းတီႈၶဝ်ၼႆႉတင်းသဵင်ႈတင်းလူင်ၼၼ်ႉထွၵ်ႈလူၺ်ႈတၢင်းဢၼ်လီဢၼ်ငၢမ်းၵႃႈမီး၊ဢိၵ်ႇတင်းၵတ်းယဵၼ်ၶျၢမ်းသႃႇၵႃႈမီးဢၼ်ၵဝ်လုမ်းလႃးတီႈဝဵင်းၼႆႉၼၼ်ႉသေလႄႈတၵ်းမီးတၢင်းဢၼ်သၼ်ႇဝႆၵူဝ်ႁႄဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵႃႈတီႈၼႆႈဢၼ်သူၸၢင်ႈလၢတ်ႈလႄႈဝႃႈ၊ ‘ပဵၼ်တီႈဢၼ်ပဝ်ႇဢၼ်လၢပ်ႈလႄႈဢမ်ႇမီးၵူၼ်းဢမ်ႇမီးတရိၵ်ႈသၢၼ်ႇ၊’ ၵႃႈတီႈဝဵင်း ယုတႃႉ၊ တင်းလၢႆ၊ဢိၵ်ႇတင်းၵႃႈၼႂ်းသဵၼ်ႈတၢင်းဝဵင်း ယေႇရုသလႅမ်ႇ၊ တင်းလၢႆပဵၼ်တီႈဢၼ်ပဝ်ႇဢၼ်လၢပ်ႈလႄႈဢမ်ႇမီးၵူၼ်းၵေႃႉဢၼ်ယူႇဢၼ်သဝ်း၊ဢမ်ႇမီးတရိၵ်ႈသၢၼ်ႇဢေႃႈ။-
ၵူၺ်းၵႃႈ၊ၵႃႈတီႈၼၼ်ႈၵမ်းလိုၼ်းတၵ်းလႆႈဢွၼ်ၵၼ်ငိၼ်းသဵင်ဢၼ်မူၼ်ႈပျေႃႇ၊သဵင်ဢၼ်ၸူမ်းသိူဝ်း၊သဵင်ၵူၼ်းၸၢႆးဢၼ်သွင်ႇမၢင်ႇၵလႃႇ၊သဵင်ၵူၼ်းယိင်းဢၼ်သွင်ႇမၢင်ႇၵလႃႇ၊ဢိၵ်ႇတင်းသဵင်ၶဝ်ၸိူဝ်းဢၼ်ဢဝ်ၶိူင်ႈတၢင်းလူႇဢၼ်တၢင်ႇၵျေးၸူးသေလႄႈမႃးၵႃႈတီႈႁိူၼ်း ထႃႇဝရႃႉၽြႃး၊ ၼၼ်ႉလၢတ်ႈလႄႈဝႃႈ၊ “‘ဢွၼ်ၵၼ်ယွင်ႈယေႃး ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း တႃႉ။ ၵွပ်ႈပိူဝ်ႈဢၼ် ထႃႇဝရႃႉၽြႃး၊ ပဵၼ်ဢၼ်မျၢတ်ႈလီလႄႈ ၵရုၼႃႇမၼ်းၸဝ်ႈတႄႇယူႇတႃႇသေႇဢမ်ႇထၢတ်ႇၼၼ်ႉဢေႃႈ၊’ ဝႃႈၼင်ႇၼႆၼၼ်ႉ။ “လွင်ႈမၼ်းၸမ်ႉ၊ၵဝ်တၵ်းသမ်ႉတေႁႂ်ႈမိူင်းၼၼ်ႉၶိုၼ်းလႆႈၶိုၼ်ႈယႂ်ႇမႂ်ႇသုင်မိူၼ်ၸိူဝ်ႉၼင်ႇပၵ်းၵဝ်ႇပိူင်ၵဝ်ႇၼၼ်ႉဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ “တီႈဢၼ်ပဵၼ်ဢၼ်ပဝ်ႇဢၼ်လၢပ်ႈလႄႈဢမ်ႇမီးၵူၼ်းဢမ်ႇမီးတရိၵ်ႈသၢၼ်ႇ၊ဢိၵ်ႇတင်းၵႃႈႁိမ်းဝဵင်းမၼ်းၵႃႈမီးၼၼ်ႉတၵ်းမီးတီႈပၢင်ႇယိူဝ်ႈဢၼ်ၵူၼ်းလဵင်ႉသူဝ်းထိင်းသူဝ်းတၵ်းဢဝ်ၽုင်သူဝ်းၶဝ်ၼွၼ်းၼၼ်ႉထႅင်ႈလူးၵွၼ်ႇဢေႃႈ။-
ၵႃႈတီႈဝဵင်းၼိူဝ်ႁၢၼ်ႉလွႆ၊ၵႃႈတီႈဝဵင်းဢၼ်မီးၵႃႈတႂ်ႈတီႈပၢင်ႇတီႈပဵင်း၊ၵႃႈတီႈဝဵင်းဢၼ်မီးၵႃႈၼႂ်းပွတ်းတၢင်းၸၢၼ်းတင်းလၢႆ၊ၵႃႈၼႂ်းမိူင်း ပိၼ်ႇယႃႇမိၼ်ႇ၊ ၵႃႈၼႂ်းတီႈဢၼ်လဵပ်ႈႁွပ်ႈဝဵင်း ယေႇရုသလႅမ်ႇ၊ တင်းလၢႆ၊ၵႃႈၼႂ်းဝဵင်း ယုတႃႉ၊ တင်းလၢႆၸိူဝ်းၼၼ်ႉ၊ၽုင်သူဝ်းလႂ်၊သမ်ႉတၵ်းလႆႈဢွၼ်ၵၼ်ပႆၵႂႃႇၵႃႈတႂ်ႈမိုဝ်းၵေႃႉဢၼ်ၼပ်ႉဢၢၼ်ႇၶဝ်ၼၼ်ႉဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “မိုဝ်ႉဝၼ်းဢၼ်ၵဝ်တၵ်းႁဵတ်းၵျေးၸူးၸွမ်းၼင်ႇၵတိဢၼ်ၵဝ်ဝႆႉၵႃႈတီႈၵူၼ်းမဵဝ်း ဢိသရေး၊ ဢိၵ်ႇတင်းၵူၼ်းမဵဝ်း ယုတႃႉ၊ တင်းလၢႆၼၼ်ႉတၵ်းႁွတ်ႈထိုင်ဢေႃႈ။-
ၼႂ်းမိုဝ်ႉဝၼ်းၼၼ်ႉ၊ၼႂ်းၶိင်ႇၵႃႇလႃႉၼၼ်ႉ၊ၵဝ်တၵ်းႁႂ်ႈယွတ်ႈတၢင်းဢၼ်သိုဝ်ႈတေႃႇတႅၵ်ႇဢွၵ်ႇမႃးပုၼ်ႈၶုၼ်လူင် တႃႇဝိတ်ႈ၊ လႄႈမၼ်းၼၼ်ႉတၵ်းၸီႇယၢင်ႇတႅပ်းတတ်းၸွမ်းၼင်ႇတြႃး၊ဢိၵ်ႇတင်းတၢင်းဢၼ်သိုဝ်ႈတေႃႇၵႃႈၼိူဝ်လိၼ်မိူင်းဢေႃႈ။-
ၼႂ်းၶိင်ႇၵႃႇလႃႉမိုဝ်ႉဝၼ်းၼၼ်ႉ၊မိူင်း ယုတႃႉ၊ တၵ်းႁွတ်ႈထိုင်တၢင်းဢၼ်ၵႄႇသႄႇၶျွတ်ႈဢဝ်လႄႈဝဵင်း ယေႇရုသလႅမ်ႇ၊ ၵေႃႈ၊တၵ်းမီးတၢင်းဢၼ်တဵတ်ႇလီၼိမ်လီဢေႃႈ။ ၼႃႇမႃႉၸိုဝ်ႈသဵင်မၼ်းတၵ်းလႆႈၶၢမ်ႇတၢင်းဢၼ်ႁွင်ႉႁဵၵ်ႈလႄႈဝႃႈ၊ ‘ ထႃႇဝရႃႉၽြႃး၊ ပဵၼ်တၢင်းဢၼ်သိုဝ်ႈတေႃႇပုၼ်ႈႁဝ်းဢေႃႈ၊’ ဝႃႈၼင်ႇၼႆဢေႃႈ။-
ထႃႇဝရႃႉၽြႃး၊ မီးဢမိင်ႉၸမ်ႉ၊ၸိူဝ်ႉၶုၼ်ၶိူဝ်းၶုၼ် တႃႇဝိတ်ႈ၊ ဢၼ်လႆႈၼင်ႈၵႃႈၼိူဝ်ရႃႇၸႃႉပလၢင်ႇမိူင်း ဢိသရေး၊ ၼၼ်ႉဢမ်ႇလႆႈသုတ်းလႆႈဝၢႆးၵႂႃႇလႃးလႃး။-
ၶိူဝ်းယဵၸ်ႈပရေႃးႁဵၵ်ႈၵူၼ်း လေႇဝိ၊ ဢၼ်တၵ်းလႆႈဢဝ်ၶိူင်ႈတၢင်းလူႇဢၼ်တုတ်ႇၽႆး၊ဢိၵ်ႇတင်းၶိူင်ႈတၢင်းလူႇမၢၵ်ႇၶဝ်ႈႁူင်းၶဝ်ႈသေလႄႈႁဵတ်းဝၢတ်ႈသၢၵ်ႈလူႇတႃႇသေႇၼၼ်ႉၵေႃႈဢမ်ႇလႆႈၵိုတ်းလႆႈထၢတ်ႇလႃးလႃး၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈ ယေႇရမိ၊ လႄႈဝႃႈ၊-
“ထႃႇဝရႃႉၽြႃး၊ မီးဢမိင်ႉၸမ်ႉ၊ၵဝ်ဝႆႉပတိၺိၺ်ႇလူၺ်ႈၵၢင်ဝၼ်းလႄႈၵၢင်ၶိုၼ်း၊ႁႂ်ႈၵၢင်ဝၼ်းလႄႈၵၢင်ၶိုၼ်းပေႃႇမႃးၸွမ်းၼင်ႇဢၶိင်ႇမၼ်းလႄႈပတိၺိၺ်ႇၼၼ်ႉဢမ်ႇမီးၽူႈလႂ်ယႃႉပႅတ်ႈလႆႈ။-
ၸိူဝ်ႉၼင်ႇၼၼ်ၵဝ်ဝႆႉပတိၺိၺ်ႇလူၺ်ႈၵၼ်တင်းၶႃႈၵဝ် တႃႇဝိတ်ႈ၊ ဢၼ်ဝႃႈ၊ၸိူဝ်ႉၶိူဝ်းမၼ်းတၵ်းသိုပ်ႇလူင်းမႃးပဵၼ်ၶုၼ်ႁေႃၶမ်းတႃႇသေႇလႄႈၵဝ်ၵေႃႈႁဵတ်းပတိၺိၺ်ႇလူၺ်ႈၵၼ်တင်းယဵၸ်ႈပရေႃးႁဵၵ်ႈမဵဝ်း လေႇဝိ၊ ဝႃႈ၊ၶဝ်တၵ်းၵိုတ်ႉႁၢပ်ႇဢမုၵဝ်တႃႇသေႇလႄႈပတိၺိၺ်ႇၼၼ်ႉဢမ်ႇမီးၽူႈလႂ်ယႃႉပႅတ်ႈလႆႈဢေႃႈ။-
ၵဝ်တၵ်းႁႂ်ႈမဵဝ်းၶႃႈၵဝ် တႃႇဝိတ်ႈ၊ ဢိၵ်ႇတင်းၵူၼ်း လေႇဝိ၊ ဢၼ်ၵိုတ်ႉႁၢပ်ႇဢမုၵဝ်ၸိူဝ်းၼၼ်ႉၼမ်ၵိုၼ်းၸိူဝ်ႉၼင်ႇဢၼ်ၶိူင်ႈပိူင်ၽႃႉၵၢင်ႁၢဝ်ၼမ်ၵိုၼ်းၼႃႇထၢၼ်ႈပေႃးဢမ်ႇၼပ်ႉဢမ်ႇဢၢၼ်ႇလႆႈၼၼ်ႉ၊ဢိၵ်ႇတင်းၸိူဝ်ႉၼင်ႇဢၼ်မဵတ်ႉႁိၼ်မဵတ်ႉသၢႆးၼမ်ႉသမ်ႇမုၵ်ႈတြႃႇၼမ်ၵိုၼ်းၼႃႇထၢၼ်ႈပေႃးဢမ်ႇဢဝ်ၵွၵ်းတူင်တူၺ်းလႆႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈ ယေႇရမိ၊ လႄႈဝႃႈၸမ်ႉ၊-
“မႂ်းဢမ်ႇၶႆႈၸႂ်ဝူၼ်ႉၸႂ်လူၺ်ႈလွင်ႈဢၼ်ၵူၼ်းတင်းလၢႆၸိူဝ်းၼႆႉၸၢင်ႈလၢတ်ႈလႄႈဝႃႈ၊ ‘ၵူၼ်းမဵဝ်းဢၼ် ထႃႇဝရႃႉၽြႃး၊ လိူၵ်ႈၵဵပ်းဢဝ်သွင်မဵဝ်းၼႆႉၸိုင်၊မၼ်းၸဝ်ႈသမ်ႉပႄႇပႅတ်ႈယဝ်ႉ၊’ ဝႃႈၼင်ႇၼႆၼၼ်ႉမႂ်းဢမ်ႇၶုၵ်းၸႂ်လႆႈႁိုဝ်း။ ၼင်ႇၼၼ်လႄႈၶဝ်ၼၼ်ႉဢွၼ်ၵၼ်ႁဵတ်းဢမ်ႇပေႃးၼင်ႇႁိုဝ်တီႈၵူၼ်းၵဝ်တင်းလၢႆထၢၼ်ႈပေႃးဢမ်ႇမၢတ်ႈပဵၼ်မဵဝ်းၵူၼ်းသိုဝ်ႈၼႃႈတႂ်ႈတႃၶဝ်ယဝ်ႉ။-
ထႃႇဝရႃႉၽြႃး၊ မီးဢမိင်ႉၸမ်ႉ၊ပေႃးပတိၺိၺ်ႇတြႃးၵၢင်ဝၼ်း၊ဢိၵ်ႇတင်းပတိၺိၺ်ႇတြႃးၵၢင်ၶိုၼ်းၼၼ်ႉဢမ်ႇမီး၊ပေႃးၵဝ်ဢမ်ႇၸီႇယၢင်ႇတြႃးၽႃႉၵၢင်ႁၢဝ် ဢိၵ်ႇတင်းလိၼ်မိူင်းၸိုင်၊-
ၵဝ်တၵ်းပႄႇပႅတ်ႈၸုၼ်ႉပႅတ်ႈမဵဝ်း ယႃႇၵုပ်ႈ၊ ဢိၵ်ႇတင်းၸိူဝ်ႉၶိူဝ်းၶႃႈၵဝ် တႃႇဝိတ်ႈ၊ ထၢၼ်ႈပေႃးၵဝ်ဢမ်ႇလိူၵ်ႈၵဵပ်းဢဝ်ၶုၼ်ၵႃႈၼႂ်းၸိူဝ်ႉၶိူဝ်း တႃႇဝိတ်ႈ၊ ဢၼ်တေလႆႈဢုပ်ႉပိူင်ႇၸိူဝ်ႉၶိူဝ်း ဢႃႇပြႃႇႁၢမ်ႇ၊ဢိၸၢၵ်ႈ၊ယႃႇၵုပ်ႈ၊ ၼၼ်ႉဢေႃႈ။ ၵွပ်ႈပိူဝ်ႈၼႆလႄႈၵဝ်တၵ်းဢဝ်ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၼၼ်ႉၶိုၼ်းမႃးလႄႈဢဵတ်းလူမီးၵရုၼႃႇတီႈၶဝ်ဢေႃႈ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈ ယေႇရမိ၊ ၼႂ်းမိူဝ်ႈဢၼ် ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်းမိူင်း ပႃႇပုလုၼ်ႇ၊ ပႃးတင်းတပ်ႉသိုၵ်းမၼ်းၵႃႈမီးၵႃႈၼႂ်းသိုင်ႇၸိုင်ႈဝၢၼ်ႈမိူင်းၵႃႈဢၼ်မၼ်းလႆႈဢုပ်ႉပိူင်ႇလႄႈမဵဝ်းၵူၼ်းၵူႈၸိူဝ်ႉၵူႈမဵဝ်းၸိူဝ်းၼၼ်ႉဢွၼ်ၵၼ်မႃးတိုၵ်းတေႃးဝဵင်း ယေႇရုသလႅမ်ႇ၊ ဢိၵ်ႇတင်းဝဵင်းၵႃႈဢၼ်ယူႇႁိမ်းႁွမ်းမၼ်းၸိူဝ်းၼၼ်ႉလႄႈဝႃႈ၊-
“ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊မႂ်းၵႂႃႇလႄႈမွၵ်ႇလၢတ်ႈတီႈ ၸေႇတၵိ၊ ၶုၼ်ႁေႃၶမ်းမိူင်း ယုတႃႉ၊ လႄႈဝႃႈ၊ ထႃႇဝရႃႉၽြႃး၊ မီးဢမိင်ႉၸမ်ႉ၊ၵဝ်တၵ်းဢဝ်ဝဵင်းၼႆႉဢၢပ်ႈပၼ်ၵႃႈၼႂ်းမိုဝ်းၶုၼ်ႁေႃၶမ်းမိူင်း ပႃႇပုလုၼ်ႇ၊ ဢေႃႈ။ ၶုၼ်ၼၼ်ႉတၵ်းဢဝ်ၽႆးတုတ်ႇပႅတ်ႈဝဵင်းၼႆႉဢေႃႈ။-
မႂ်းတၵ်းဢမ်ႇလႆႈၵၢင်းလွတ်ႈသေၵႃႈၼႂ်းမိုဝ်းၶုၼ်ၼၼ်ႉ။ မႂ်းတၵ်းလႆႈၶၢမ်ႇတၢင်းဢၼ်တိၺွပ်းသေလႄႈဢဝ်ၵႂႃႇဢၢပ်ႈပၼ်ၵႃႈၼႂ်းမိုဝ်းၶုၼ်ၼၼ်ႉဢမၢၼ်ႇၶၼ်ပဵၼ်ဢေႃႈ။ မႂ်းတၵ်းလႆႈႁၼ်ၶုၼ်ႁေႃၶမ်းမိူင်း ပႃႇပုလုၼ်ႇ၊ တႃတေႃႇတႃလႄႈတၵ်းလႆႈလၢတ်ႈတေႃႇမၼ်းသူပ်းတေႃႇသူပ်းသေယဝ်ႉ၊မႂ်းတၵ်းလႆႈၵႂႃႇၵႃႈတီႈဝဵင်း ပႃႇပုလုၼ်ႇ၊ ပုၼ်ႉဢေႃႈ။-
ၵူၺ်းၵႃႈ၊ ၸေႇတၵိ၊ ၶုၼ်ႁေႃၶမ်းမိူင်း ယုတႃႉ၊ တီႈၶႃႈ႟။ ထွမ်ႇငိၼ်းၵႂၢမ်း ထႃႇဝရႃႉၽြႃး၊ တႃႉ။ ထႃႇဝရႃႉၽြႃး၊ ဢဝ်လွင်ႈၸဝ်ႈၶုၼ်လူင်လႄႈမီးဢမိင်ႉၸမ်ႉ၊မႂ်းတေဢမ်ႇလႆႈၶၢမ်ႇတၢႆလူၺ်ႈလၢပ်ႇလူၺ်ႈလႅဝ်း။-
မႂ်းတၵ်းလႆႈတၢႆၼိမ်ၼိမ်လီလီဢေႃႈ။ ၶဝ်တၵ်းဢွၼ်ၵၼ်ဢဝ်ၼၢမ်ႇသႃႇတုတ်ႇၽႆးပုၼ်ႈမႂ်း၊မိူၼ်ၸိူဝ်ႉၼင်ႇဢၼ်ယၢမ်ႈႁဵတ်းပုၼ်ႈပူႇမွၼ်ႇမႂ်းဢၼ်ပဵၼ်ၶုၼ်ႁေႃၶမ်းဢၼ်ဢုပ်ႉပိူင်ႇၸၢမ်ႇၸႃးမိူဝ်ႈဢွၼ်တၢင်းမႂ်းၸိူဝ်းၼၼ်ႉယူႇဢေႃႈ။ ၶဝ်တၵ်းလၢတ်ႈလႄႈဝႃႈ၊ ‘ၸဝ်ႈ႟။ ၸဝ်ႈ႟။’ ဝႃႈၼင်ႇၼႆလႄႈႁွင်ႉႁႆႈပွင်ႉၶၢင်းပုၼ်ႈမႂ်းဢေႃႈ။ ၵဝ်လၢတ်ႈဝႆႉယဝ်ႉယဝ်ႉ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ပရေႃးၽႅတ်ႈ ယေႇရမိ၊ ဢဝ်ၵႂၢမ်းၵႃႈမီးၼႆႉသင်ႇလၢတ်ႈဝႆႉတီႈ ၸေႇတၵိ၊ ၶုၼ်ႁေႃၶမ်းမိူင်း ယုတႃႉ၊ ၵႃႈၼႂ်းဝဵင်း ယေႇရုသလႅမ်ႇ၊ ဢေႃႈ။-
ၼႂ်းၶိင်ႇမိူဝ်ႈၼၼ်ႉတပ်ႉသိုၵ်းၶုၼ်ႁေႃၶမ်းမိူင်း ပႃႇပုလုၼ်ႇ၊ ၸိူဝ်းၼၼ်ႉယင်းတိုၵ်းသိမ်းဢဝ်ဝဵင်း ယေႇရုသလႅမ်ႇ၊ ဢိၵ်ႇတင်းဝဵင်း ယုတႃႉ၊ ဢၼ်ယင်းၵိုတ်းယင်းၵျၢၼ်ႇဢၼ်ပဵၼ်၊ဝဵင်း လႃႇၶိသႃႉ၊ ဝဵင်း ဢၸေႇၵႃႇ၊ ဢၼ်မၼ်ႈၶိူင်ႇလႄႈယင်းၵိုတ်းဝႆႉၼႂ်းမိူင်း ယုတႃႉ၊ ၸိူဝ်းၼၼ်ႉယူႇၼၼ်ႉဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈ ယေႇရမိ၊ လိုၼ်းသေဢၼ် ၶုၼ်လူင် ၸေႇတၵိ၊ ႁဵတ်းပတိၺိၺ်ႇလူၺ်ႈၵၼ်တင်းၵူၼ်းတင်းသဵင်ႈတင်းလူင်ဢၼ်မီးၵႃႈၼႂ်းဝဵင်း ယေႇရုသလႅမ်ႇ၊ လူၺ်ႈလွင်ႈဢၼ်တၵ်းၸီႇယၢင်ႇမွၵ်ႇလၢတ်ႈတြႃးတၢင်းဢၼ်ပွႆႇလွတ်ႈၼၼ်ႉဢေႃႈ။-
ၵူၼ်းတင်းသဵင်ႈတင်းလူင်တၵ်းတေလႆႈပွႆႇလွတ်ႈၶႃႈၵူၼ်းၸၢႆးၶဝ်၊ၶႃႈၵူၼ်းယိင်းၶဝ်ဢၼ်ပဵၼ်မဵဝ်း ႁေႇပြႄး၊ ဢၼ်လႆႈၶၢမ်ႇႁဵတ်းၶႃႈၵႃႈၼႂ်းၵူၼ်း ယုတႃႉ၊ ၼင်ႇၵၼ်ၵၼ်လႄႈၵမ်းလိုၼ်းတၵ်းတေဢမ်ႇလႆႈမီးၵူၼ်းမဵဝ်း ယုတႃႉ၊ ဢၼ်ပဵၼ်ၶႃႈၼၼ်ႉဢေႃႈ။-
မူးမၢတ်ႈၽွင်းမိူင်းၵႃႈမီး၊ဢိၵ်ႇတင်းၵူၼ်းတင်းလၢႆၼၼ်ႉဢွၼ်ၵၼ်ပွႆႇလွတ်ႈၶႃႈၸႂ်ႉၶဝ်လႄႈၵမ်းလိုၼ်းတၵ်းဢမ်ႇဢဝ်ႁဵတ်းၶႃႈထႅင်ႈသေပွၵ်ႈဝႃႈၼႆၶဝ်ၽွမ်ႉၸႂ်ၵၼ်သေလႄႈဢွၼ်ၵၼ်ပွႆႇလွတ်ႈၶႃႈၸႂ်ႉၶဝ်ဢေႃႈ။-
ၵူၺ်းၵႃႈ၊ဝၢႆးသေၶဝ်ပွႆႇလွတ်ႈယဝ်ႉၼၼ်ႉႁူဝ်ၸႂ်ၶဝ်လႅၵ်ႈလၢႆႈၶိုၼ်းလႄႈသမ်ႉၶိုၼ်းႁွင်ႉဢဝ်ၶႃႈၵူၼ်းၸၢႆး၊ၶႃႈၵူၼ်းယိင်းၸိူဝ်းၼၼ်ႉမႃး၊ႁႂ်ႈလႆႈႁဵတ်းၶႃႈထႅင်ႈဢေႃႈ။
ပိူဝ်ႈၼႆလႄႈၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈ ယေႇရမိ၊ လႄႈဝႃႈ၊-
“ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊ၵဝ်ႁဵတ်းပတိၺိၺ်ႇလူၺ်ႈၵၼ်တင်းပူႇမွၼ်ႇသူၼႂ်းမိူဝ်ႈဢၼ်ၵဝ်ၼုၵ်ႈဢဝ်ၶဝ်ဢွၵ်ႇသေၵႃႈၼႂ်းမိူင်း ဢေးၵျိပ်ႉ၊ တီႈဢၼ်ၶဝ်ၶၢမ်ႇႁဵတ်းၶႃႈၼၼ်ႉဢေႃႈ။-
ၵဝ်လၢတ်ႈလႄႈဝႃႈ၊ ‘ပေႃးတဵမ်ၸဵတ်းပီယဝ်ႉၸိုင်၊သူတၵ်းလႆႈပွႆႇၶႃႈဢၼ်ပဵၼ်ၵူၼ်းမဵဝ်း ႁေႇပြႄး၊ ၼင်ႇၵၼ်ၵၼ်ဢၼ်လႆႈၶၢမ်ႇတၢင်းဢၼ်ၶၢႆပၼ်တီႈသူလႄႈလႆႈၶၢမ်ႇႁဵတ်းၶႃႈတီႈသူႁူၵ်းပီတဵမ်တႅမ်ယဝ်ႉၼၼ်ႉႁႂ်ႈလႆႈလွတ်ႈဢွၵ်ႇႁင်းၽႂ်ႁင်းမၼ်းတႃႉ၊’ ဝႃႈၼင်ႇၼႆသေၵေႃႈပူႇသူမွၼ်ႇသူၸိူဝ်းၼၼ်ႉဢမ်ႇထွမ်ႇဢမ်ႇဢဝ်ၵႂၢမ်းၵဝ်။ ဢမ်ႇဝၢႆႇႁူႁေႈႁူၸူးလႄႈယူႇဢေႃႈ။-
မိူဝ်ႈပူၼ်ႉမႃးမိုဝ်ႉဝၼ်းဢမ်ႇႁိုင်ၼၼ်ႉသူလႅၵ်ႈလၢႆႈႁူဝ်ၸႂ်သူလႄႈႁဵတ်းဢမုတၢင်းဢၼ်ၵဝ်ထုၵ်ႇၸႂ်မႅၼ်ႈၸႂ်ဢေႃႈ။ သူၵႃႈမီးတင်းသဵင်ႈတင်းလူင်ဢွၼ်ၵၼ်ပၢဝ်ႇသေႃႇလွင်ႈတင်းဢၼ်ပွႆႇလွတ်ႈတီႈၵူၼ်း ႁေႇပြႄး၊ ႁင်းၽႂ်ႁင်းမၼ်းလႄႈလႆႈဢွၼ်ၵၼ်ႁဵတ်းပတိၺိၺ်ႇၵႃႈတီႈၽၢႆႇၼႃႈၵဝ်ၵႃႈၼႂ်းႁိူၼ်းဢၼ်ႁွင်ႉႁဵၵ်ႈလူၺ်ႈၼႃႇမႃႉၸိုဝ်ႈသဵင်ၵဝ်ၼၼ်ႉယဝ်ႉဢေႃႈ။-
ၵူၺ်းၵႃႈ၊သူသမ်ႉၶိုၼ်းလႅၵ်ႈလၢႆႈၸႂ်သူလႄႈဢဝ်ၼႃႇမႃႉၸိုဝ်ႈသဵင်ၵဝ်တူၵ်းတီႈတႅမ်ႇဢေႃႈ။ သူသမ်ႉၶိုၼ်းႁွင်ႉဢဝ်ၶႃႈၵူၼ်းၸၢႆး၊ၶႃႈၵူၼ်းယိင်းဢၼ်ပွႆႇလွတ်ႈမူတ်းမူတ်းသဵင်ႈသဵင်ႈႁင်းၽႂ်ႁင်းမၼ်းၸိူဝ်းၼၼ်ႉၶိုၼ်းမႃးလႄႈႁႂ်ႈၶၢမ်ႇႁဵတ်းၶႃႈထႅင်ႈယဝ်ႉလူင်ပႄႇ။-
ပိူဝ်ႈၼႆလႄႈ ထႃႇဝရႃႉၽြႃး၊ မီးဢမိင်ႉၸမ်ႉ၊သူဢမ်ႇထွမ်ႇဢဝ်ၵႂၢမ်းၵဝ်။ သူဢမ်ႇပၼ်ဢၶႂၢင်ႉတၢင်းဢၼ်ပွႆႇလွတ်ႈတီႈပီႈသူၼွင်ႉသူၼင်ႇၵၼ်ၵၼ်၊ဢိၵ်ႇတင်းၵူၼ်းႁိူၼ်းၸမ်ၵၼ်ႁင်းၽႂ်ႁင်းမၼ်းၼၼ်ႉ၊ဝႃႈၼင်ႇၼႆဢေႃႈ။ ထႃႇဝရႃႉၽြႃး၊ မီးဢမိင်ႉလႄႈဝႃႈၸမ်ႉ၊တူၺ်းလူး။ ၵဝ်တၵ်းၸီႇယၢင်ႇမွၵ်ႇလၢတ်ႈဢၶႂၢင်ႉဢၼ်ထူပ်းၺႃးၽေးလၢပ်ႇၽေးလႅဝ်း၊ၽေးၵႃႇလႃႉႁႃႈလႅင်မိူင်း၊ၽေးတၢင်းဢၼ်ဢိုပ်းဢၼ်ယၢၵ်ႈပုၼ်ႈသူဢေႃႈ။ ဢမုၵႃႈဢၼ်ၵဝ်ႁဵတ်းတီႈသူၼၼ်ႉၵူၼ်းၵူႈၸိူဝ်ႉၵူႈမဵဝ်းဢၼ်မီးၵႃႈၼိူဝ်ၵမ်ႇၽႃႇလိၼ်မိူင်းၼႆႉတၵ်းတူၵ်းၸႂ်သၼ်ႇဝႆဢေႃႈ။-
ၵဝ်တၵ်းဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းရၢၼ်ႇသူႇၶဝ်၊ဢိၵ်ႇတင်းၵႃႈၼႂ်းမိုဝ်းၶဝ်ၸိူဝ်းဢၼ်ႁႃဢဝ်ဢသၢၵ်ႈၶဝ်ၼၼ်ႉဢေႃႈ။ တူဝ်တၢႆၶဝ်ၼၼ်ႉတၵ်းပဵၼ်ပုၼ်ႈဢၼ်ၼူၵ်ႉၵၢင်ႁၢဝ်တင်းတူဝ်ထိူၼ်ႇႁၢႆႉတင်းလၢႆတၵ်းၵိၼ်ဢေႃႈ။-
ၵဝ်တၵ်းဢဝ် ၸေႇတၵိ၊ ၶုၼ်ႁေႃၶမ်းမိူင်း ယုတႃႉ၊ ဢိၵ်ႇတင်းမူးမၢတ်ႈၽွင်းမိူင်းမၼ်းတင်းလၢႆဢၢပ်ႈပၼ်ၵႃႈၼႂ်းမိုဝ်းရၢၼ်ႇသူႇၶဝ်၊ၵႃႈၼႂ်းမိုဝ်းၶဝ်ၸိူဝ်းဢၼ်ႁႃဢဝ်ဢသၢၵ်ႈၶဝ်၊ၵႃႈၼႂ်းမိုဝ်းတပ်ႉသိုၵ်းၶုၼ်ႁေႃၶမ်းမိူင်း ပႃႇပုလုၼ်ႇ၊ ဢၼ်ဝၢႆႇပွၵ်ႈၶိုၼ်းၵႂႃႇသေၵႃႈတီႈသူယဝ်ႉၼၼ်ႉၸိူဝ်းၼၼ်ႉဢေႃႈ။-
ၵဝ်တၵ်းပၼ်ဢမိင်ႉလႄႈႁႂ်ႈၶဝ်ၼၼ်ႉၶိုၼ်းမႃးၵႃႈတီႈဝဵင်းၼႆႉဢေႃႈ။ ၶဝ်ၼၼ်ႉတၵ်းဢွၼ်ၵၼ်တိုၵ်းတေႃးလႄႈသိမ်းဢဝ်သေယဝ်ႉ၊ဢဝ်ၽႆးတုတ်ႇဢေႃႈ။ ၵဝ်တၵ်းႁႂ်ႈဝၢၼ်ႈဝဵင်း ယုတႃႉ၊ တင်းလၢႆပဵၼ်တီႈဢၼ်ပဝ်ႇဢၼ်လၢပ်ႈလႄႈဢမ်ႇမီးၵေႃႉဢၼ်ယူႇသဝ်းလႃးလႃးဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈ ယေႇရမိ၊ ၼႂ်းၸူဝ်ႈပၢၼ်ၶုၼ် ယေႃးယၵိမ်း၊ လုၵ်ႈၸၢႆး ယူဝ်းသိယႃႉ၊ ၶုၼ်ႁေႃၶမ်းမိူင်း ယုတႃႉ၊ ၼၼ်ႉလႄႈဝႃႈၸမ်ႉ၊-
“မႂ်းၵႂႃႇၸူးၵႃႈတီႈႁိူၼ်းၵူၼ်းမဵဝ်း ရေႇၶပ်ႉ၊ တင်းလၢႆလႄႈလၢတ်ႈၵၼ်တင်းၶဝ်သေယဝ်ႉ၊ႁွင်ႉဢဝ်ၶဝ်ၶဝ်ႈၵႃႈၼႂ်းလုၵ်းႁိူၼ်း ထႃႇဝရႃႉၽြႃး၊ လုၵ်းၼိုင်ႈသေလႄႈဢဝ်ၼမ်ႉမၢၵ်ႇၸပိတ်ႉတိုၵ်းပၼ်တီႈၶဝ်တႃႉ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉၵဝ်ႁွင်ႉဢဝ်ၸႃႉၸဵမ် ယႃႇၸၺႃႇ၊ လုၵ်ႈၸၢႆး ယေႇရမိ၊ ဢၼ်ပဵၼ်လုၵ်ႈၸၢႆး ႁႃႇပၸိၺႃႇ၊ လႄႈပီႈမၼ်းၼွင်ႉမၼ်း၊လုၵ်ႈၸၢႆးမၼ်းၵႃႈမီး၊ဢိၵ်ႇတင်းၵူၼ်းမဵဝ်း ရေႇၶပ်ႉ၊ တင်းသဵင်ႈတင်းလူင်ဢေႃႈ။-
ၵဝ်ဢွၼ်ၶဝ်ၶဝ်ႈၵႂႃႇၵႃႈၼႂ်းႁိူၼ်း ထႃႇဝရႃႉၽြႃး၊ ၸူးၵႃႈၼႂ်းလုၵ်းတီႈယူႇလုၵ်ႈၸၢႆး ႁႃႇၼၼ်ႇ၊ ဢၼ်ပဵၼ်လုၵ်ႈၸၢႆး ဢိၵတႃႇလိ၊ ၵူၼ်းၽြႃးပဵၼ်ၸဝ်ႈၵႃႈတီႈႁိမ်းလုၵ်းတီႈဢၼ်မူးမၢတ်ႈၽွင်းမိူင်းၸုၵၼ်တုမ်ၵၼ်၊ၵႃႈတီႈၼိူဝ်လုၵ်း မႃႇသေႇယႃႉ၊ လုၵ်ႈၸၢႆး သႃႇလုမ်ႇ၊ ဢၼ်ပဵၼ်ၵေႃႉဢၼ်ပႂ်ႉၽၵ်းတူၼၼ်ႉဢေႃႈ။-
ၵဝ်ဢဝ်မေႃႈ၊ဢိၵ်ႇတင်းၵွၵ်းဢၼ်တဵမ်ဝႆႉတင်းၼမ်ႉမၢၵ်ႇၸပိတ်ႉလႂ်သႂ်ႇတမ်းပၼ်ၵႃႈတီႈၽၢႆႇၼႃႈၵူၼ်းမဵဝ်း ရေႇၶပ်ႉ၊ ၸိူဝ်းၼၼ်ႉလႄႈလၢတ်ႈတီႈၶဝ်လႄႈဝႃႈ၊ “ဢွၼ်ၵၼ်သူတ်ႉၵိၼ်ၼမ်ႉမၢၵ်ႇၸပိတ်ႉသေၵမ်း၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ၶဝ်ၼၼ်ႉဢွၼ်ၵၼ်ၶိုၼ်းလၢတ်ႈလႄႈဝႃႈ၊ “ႁဝ်းၶႃႈၼႆႉဢမ်ႇသူတ်ႉဢမ်ႇၵိၼ်ၼမ်ႉမၢၵ်ႇၸပိတ်ႉၶႃႈ။ လွင်ႈမၼ်းၸမ်ႉ၊ ယေႃးၼတပ်ႉ၊ လုၵ်ႈၸၢႆး ရေႇၶပ်ႉ၊ ပေႃႈၵူၼ်းမဵဝ်းႁဝ်းၶႃႈၼၼ်ႉ၊သင်ႇလၢတ်ႈဝႆႉလႄႈဝႃႈ၊ ‘ၸႃႉၸဵမ်သူလႄႈၸူဝ်ႈလုၵ်ႈပၢၼ်လၢၼ်သူၼၼ်ႉဢမ်ႇလႆႈၵိၼ်ၼမ်ႉမၢၵ်ႇၸပိတ်ႉလႃးလႃး။-
ႁိူၼ်းၵေႃႈဢမ်ႇလႆႈႁဵတ်း။ ၸိူဝ်ႉၽၼ်းၵေႃႈဢမ်ႇလႆႈဝၢၼ်ႇလႆႈပိုၼ်။ သူၼ်မၢၵ်ႇၸပိတ်ႉၵေႃႈဢမ်ႇလႆႈၽုၵ်ႇလႆႈသွမ်ႈ။ ဢမ်ႇလႆႈႁႂ်ႈမီးလႃးလႃး။ လွင်ႈၼင်ႇႁိုဝ်ၸူဝ်ႈဢသၢၵ်ႈသူတၵ်းယၢဝ်းယိုၼ်းယူႇၵႃႈၼႂ်းတီႈဢၼ်သူပဵၼ်ၶႅၵ်ႇယူႇၼႆႉၸိုင်၊ၸူဝ်ႈဢသၢၵ်ႈသူၼၼ်ႉသူတၵ်းလႆႈဢွၼ်ၵၼ်ယူႇၵႃႈၼႂ်းသုမ်ႉထဵင်ၵူၺ်းဢေႃႈ၊’ ဝႃႈၼင်ၼႆဝႆႉတီႈႁဝ်းၶႃႈၶႃႈယဝ်ႉ။-
ပိူဝ်ႈၼႆလႄႈႁဝ်းၶႃႈၼႆႉလႆႈထွမ်ႇဢဝ်ၵႂၢမ်း ယေႃးၼတပ်ႉ၊ လုၵ်ႈၸၢႆး ရေႇၶပ်ႉ၊ ပေႃႈၵူၼ်းမဵဝ်းႁဝ်းၶႃႈၼၼ်ႉၼႂ်းၵႃႈဢၼ်မၼ်းသင်ႇလၢတ်ႈဝႆႉတီႈႁဝ်းၶႃႈလူၺ်ႈလွင်ႈဢၼ်ႁဝ်းၶႃႈ၊ဢိၵ်ႇတင်းမေးႁဝ်းၶႃႈ၊လုၵ်ႈၸၢႆးႁဝ်းၶႃႈ၊လုၵ်ႈယိင်းႁဝ်းၶႃႈဢမ်ႇလႆႈၵိၼ်ၼမ်ႉမၢၵ်ႇၸပိတ်ႉၸူဝ်ႈဢသၢၵ်ႈ၊-
ဢမ်ႇလႆႈႁဵတ်းႁိူၼ်းႁဵတ်းယေးပုၼ်ႈဢၼ်တၵ်းယူႇတၵ်းသဝ်း၊ဢမ်ႇလႆႈမီးသူၼ်မၢၵ်ႇၸပိတ်ႉ၊ဢမ်ႇလႆႈမီးႁႆႈမီးၼႃး၊ဢမ်ႇလႆႈမီးမဵတ်ႉၸိူဝ်ႉမဵတ်ႉၽၼ်းၼၼ်ႉၶႃႈယဝ်ႉ။-
ႁဝ်းၶႃႈယူႇၵႃႈၼႂ်းသုမ်ႉထဵင်သေလႄႈထွမ်ႇဢဝ်ႁဵတ်းၸွမ်းၵႃႈၼင်ႇဢၼ် ယေႃးၼတပ်ႉ၊ ပေႃႈၵူၼ်းမဵဝ်းႁဝ်းၶႃႈသင်ႇလၢတ်ႈဝႆႉၼၼ်ႉၶႃႈယဝ်ႉ။-
မိူဝ်ႈဢၼ် ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်းမိူင်း ပႃႇပုလုၼ်ႇ၊ ၶီႇသိုၵ်းၶိုၼ်ႈမႃးၸူးၵႃႈတီႈမိူင်းၼႆႉၼၼ်ႉႁဝ်းၶႃႈၼင်ႇၵၼ်ၵၼ်လၢတ်ႈၵၼ်လႄႈဝႃႈ၊ ‘မႃး၊မႃး႟။ ဢွၼ်ၵၼ်ၶိုၼ်ႈၸူးၵႃႈတီႈဝဵင်း ယေႇရုသလႅမ်ႇ၊ တႃႉႁဝ်း။ ၼင်ႇႁိုဝ်ႁဝ်းတေဢမ်ႇလႆႈၵူဝ်ႁႄၵူၼ်းသိုၵ်း ၶႃႇလတေး၊ ဢိၵ်ႇတင်းၵူၼ်းသိုၵ်း သီးရီးယႃး၊ တင်းလၢႆဢေႃႈ၊’ ဝႃႈၼင်ႇၼႆလႄႈမိူဝ်ႈလဵဝ်ၼႆႉႁဝ်းၶႃႈယူႇၵႃႈတီႈဝဵင်း ယေႇရုသလႅမ်ႇ၊ ၶႃႈယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈ ယေႇရမိ၊ လႄႈဝႃႈ၊-
“ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊မႂ်းၵႂႃႇလႄႈလၢတ်ႈတီႈၵူၼ်းမိူင်း ယုတႃႉ၊ ၵူၼ်းဝဵင်း ယေႇရုသလႅမ်ႇ၊ တင်းလၢႆလႄႈဝႃႈ၊ ‘သူၼႆႉဢမ်ႇလႆႈၶၢမ်ႇတၢင်းဢၼ်သင်ႇသွၼ်သုင်းမႃႉႁႂ်ႈလႆႈထွမ်ႇဢဝ်ၵႂၢမ်းၵဝ်ႁိုဝ်း၊’ ဝႃႈၼင်ႇၼႆတႃႉ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။-
“ၵႂၢမ်း ယေႃးၼတပ်ႉ၊ လုၵ်ႈၸၢႆး ရေႇၶပ်ႉ၊ ဢၼ်မၼ်းပိင်းၺၢပ်ႈဝႆႉတီႈလုၵ်ႈမၼ်းလၢၼ်မၼ်းလူၺ်ႈလွင်ႈဢၼ်ၶဝ်ဢမ်ႇလႆႈသူတ်ႉလႆႈၵိၼ်ၼမ်ႉမၢၵ်ႇၸပိတ်ႉၼၼ်ႉပဵၼ်တီႈဢၼ်ၶဝ်ၵမ်ၶဝ်ၵျၢင်ႉဢေႃႈ။ ၶဝ်ယင်းဢမ်ႇသူတ်ႉဢမ်ႇၵိၼ်ၼမ်ႉမၢၵ်ႇၸပိတ်ႉလႄႈယူႇတေႃႇထိုင်ႁွတ်ႈဝၼ်းမိူဝ်ႈၼႆႉသေယဝ်ႉ၊ဢွၼ်ၵၼ်ထွမ်ႇဢဝ်ၵႂၢမ်းပိင်းၺၢပ်ႈပေႃႈၶဝ်ဢေႃႈ။ ပိၵ်ႉသမ်ႉၵဝ်လၢတ်ႈတီႈသူယူႇၶိူဝ်းၶိူဝ်းယႂ်းယႂ်းသေၵေႃႈ၊သူဢမ်ႇဢွၼ်ၵၼ်ထွမ်ႇဢဝ်ၵႂၢမ်းၵဝ်။-
ၵဝ်ပွႆႇၸႂ်ႉၶႃႈၵဝ်ပရေႃးၽႅတ်ႈတင်းသဵင်ႈတင်းလူင်မႃးၸူးတီႈသူၶိူဝ်းၶိူဝ်းယႂ်းယႂ်းသေလႄႈသင်ႇလၢတ်ႈလႄႈဝႃႈ၊ ‘ဢွၼ်ၵၼ်ဝၢႆႇၶိုၼ်းသေၵႃႈတီႈသဵၼ်ႈတၢင်းဢၼ်ႁၢႆႉဢၼ်ယုတ်ႈဢၼ်သူၸွမ်းယူႇႁင်းၽႂ်ႁင်းမၼ်းၼၼ်ႉလႄႈမႄးပွင်မႄးႁဵတ်းတၢင်းၵမ်တၢင်းၵျၢင်ႉသူတႃႉ။ ယႃႇပေဢွၼ်ၵၼ်ၸွမ်းလင်ၽြႃးတၢင်ႇသူႇတၢင်ႇပႃးႁႂ်ႈလႆႈႁဵတ်းဝၢတ်ႈတီႈၶဝ်။ ပေႃးႁဵတ်းၸွမ်းၵႂၢမ်းၵဝ်ၸိုင်၊သူတၵ်းလႆႈဢွၼ်ၵၼ်ယူႇၵႃႈတီႈမိူင်းဢၼ်ၵဝ်ပၼ်တီႈသူ၊ဢိၵ်ႇတင်းတီႈပူႇသူမွၼ်ႇသူၼၼ်ႉဢေႃႈ၊’ ဝႃႈၼင်ႇၼႆသေၵေႃႈသူဢမ်ႇဢွၼ်ၵၼ်ဝၢႆႇႁူႁေႈႁူသူၸူးသေလႄႈယင်းဢမ်ႇထွမ်ႇဢမ်ႇဢဝ်ၵႂၢမ်းၵဝ်လႄႈယူႇယဝ်ႉ။-
လုၵ်ႈလၢၼ် ယေႃးၼတပ်ႉ၊ ဢၼ်ပဵၼ်လုၵ်ႈၸၢႆး ရေႇၶပ်ႉ၊ ၸိူဝ်းၼၼ်ႉဢွၼ်ၵၼ်ၵမ်ၵျၢင်ႉၸွမ်းၼင်ႇပိင်းၺၢပ်ႈဢၼ်ပေႃႈၶဝ်သင်ႇလၢတ်ႈဝႆႉၼၼ်ႉသေၵေႃႈ၊ၵူၼ်းမဵဝ်းၼႆႉယင်းဢမ်ႇထွမ်ႇဢမ်ႇဢဝ်ၵႂၢမ်းၵဝ်လႄႈယူႇဢေႃႈ။-
ပိူဝ်ႈၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊ၵဝ်တၵ်းႁႂ်ႈၽေးဢုပၢတ်ႈၵႃႈဢၼ်ၵဝ်လၢတ်ႈဝႆႉလူၺ်ႈလွင်ႈၶဝ်ၼၼ်ႉႁွတ်ႈထိုင်ၵႃႈၼိူဝ်ၵူၼ်းမိူင်း ယုတႃႉ၊ ဢိၵ်ႇတင်းၵႃႈၼိူဝ်ၵူၼ်းဝဵင်း ယေႇရုသလႅမ်ႇ၊ တင်းလၢႆဢေႃႈ။ လွင်ႈမၼ်းၸမ်ႉ၊ပိၵ်ႉသမ်ႉၵဝ်လၢတ်ႈတီႈၶဝ်သေၵေႃႈၶဝ်ဢမ်ႇထွမ်ႇဢမ်ႇငိၼ်း။ ပိၵ်ႉသမ်ႉၵဝ်ႁွင်ႉၶဝ်သေၵေႃႈၶဝ်ဢမ်ႇၶိုၼ်းဢိူဝ်၊” ဝႃႈၼင်ႇၼႆဢေႃႈ။
ယေႇရမိ၊ သင်ႇလၢတ်ႈဝႆႉတီႈၵူၼ်းမဵဝ်း ရေႇၶပ်ႉ၊ ၸိူဝ်းၼၼ်ႉလႄႈဝႃႈ၊ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊ “သူထွမ်ႇဢဝ်ၵႂၢမ်းပိင်းၺၢပ်ႈ ယေႃးၼတပ်ႉ၊ ပေႃႈသူလႄႈပႂ်ႉၵမ်ပႂ်ႉၵျၢင်ႉၸွမ်းၵႃႈၼင်ႇဢၼ်မၼ်းသင်ႇလၢတ်ႈဝႆႉၸိူဝ်းၼၼ်ႉယဝ်ႉ။-
ပိူဝ်ႈၼႆလႄႈၵႃႈၼႂ်းၵူၼ်းၸိူဝ်ႉၶိူဝ်း ယေႃးၼတပ်ႉ၊ လုၵ်ႈၸၢႆး ရေႇၶပ်ႉ၊ ၼၼ်ႉတၵ်းမီးၵေႃႉဢၼ်လႆႈၸုၵ်းယူႇၵႃႈတီႈၽၢႆႇၼႃႈၵဝ်ၼၼ်ႉဢမ်ႇလႆႈထၢတ်ႇလႆႈၵိုတ်းလႃးလႃး၊” ဝႃႈၼင်ႇၼႆလႄႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉဢေႃႈ။
ၼႂ်းပီဢၼ်ၶုၼ် ယေႃးယၵိမ်း၊ လုၵ်ႈၸၢႆး ယူဝ်းသိယႃႉ၊ ၶုၼ်ႁေႃၶမ်းမိူင်း ယုတႃႉ၊ ၸၢမ်ႇႁၢင်ႈၸၢမ်ႇႁေႃလႆႈသီႇပီၼၼ်ႉ၊ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈ ယေႇရမိ၊ လႄႈဝႃႈၸမ်ႉ၊-
“မႂ်းဢဝ်ၵဵၼ်လိၵ်ႈသေလႄႈဢဝ်ၵႂၢမ်းဢၼ်ၵဝ်လၢတ်ႈဝႆႉလူၺ်ႈလွင်ႈမိူင်း ဢိသရေး၊ မိူင်း ယုတႃႉ၊ ဢိၵ်ႇတင်းၵူႈသိုင်ႇၵူႈမိူင်းၸႃႉၸဵမ်မိုဝ်ႉဝၼ်းဢၼ်ၵဝ်လၢတ်ႈတီႈမႂ်းၼႂ်းၸူဝ်ႈပၢၼ်ၶုၼ် ယူဝ်းသိယႃႉ၊ တေႃႇထိုင်ႁွတ်ႈဝၼ်းမိူဝ်ႈၼႆႉၸိူဝ်းၼၼ်ႉတႅမ်ႈသႂ်ႇဝႆႉတႃႉ။-
မိူဝ်ႈဢၼ်ၵူၼ်းမဵဝ်း ယုတႃႉ၊ ၶဝ်ငိၼ်းလွင်ႈၽေးဢုပၢတ်ႈၵႃႈဢၼ်ၵဝ်ၵျၢမ်ႇပွင်တၵ်းႁဵတ်းတီႈၶဝ်ၼၼ်ႉၸိုင်၊ၶဝ်ၸၢင်ႈၶႄးတၵ်းဢွၼ်ၵၼ်ဝၢႆႇၶိုၼ်းသေၵႃႈၼႂ်းသဵၼ်ႈတၢင်းဢၼ်ႁၢႆႉဢၼ်ယုတ်ႈဢၼ်ၶဝ်ႁဵတ်းၸွမ်းယူႇၼၼ်ႉၼင်ႇႁိုဝ်ၵဝ်တေလႆႈပွႆႇလွတ်ႈတုၸရိူၵ်ႈဢပျတ်ႈၶဝ်ဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ယေႇရမိ၊ ႁွင်ႉဢဝ် ပႃႇရုၵ်ႉ၊ ၵေႃႉပဵၼ်လုၵ်ႈၸၢႆး ၼေႇရိ၊ လႄႈၵႃႈၼင်ႇဢၼ်ၵႂၢမ်း ထႃႇဝရႃႉၽြႃး၊ မီးဢမိင်ႉဝႆႉတီႈမၼ်းၼၼ်ႉဢဝ်တင်းသူပ်းတိူင်ႇပၢင်ႇလႄႈႁႂ်ႈတႅမ်ႈၸွမ်းဢေႃႈ။ ပႃႇရုၵ်ႉ၊ ၵေႃႈတႅမ်ႈမၢႆဝႆႉၵႃႈၼႂ်းၵဵၼ်လိၵ်ႈၼၼ်ႉဢေႃႈ။-
ယေႇရမိ၊ ၵေႃႈလၢတ်ႈတီႈ ပႃႇရုၵ်ႉ၊ လႄႈဝႃႈ၊ “ၵဝ်ဢမ်ႇမီးဢၶႂၢင်ႉပုၼ်ႈတေၶဝ်ႈၵႃႈၼႂ်းႁိူၼ်း ထႃႇဝရႃႉၽြႃး၊ လႆႈ။-
ပိူဝ်ႈၼႆလႄႈမႂ်းၵႂႃႇလႄႈႁေႃးၵႂၢမ်း ထႃႇဝရႃႉၽြႃး၊ ဢၼ်မႂ်းတႅမ်ႈဝႆႉၵႃႈၼႂ်းၵဵၼ်လိၵ်ႈၸွမ်းၵႃႈၼင်ႇဢၼ်သူပ်းၵဝ်လၢတ်ႈၼၼ်ႉႁွတ်ႈထိုင်ႁူၶဝ်ၸိူဝ်းဢၼ်မီးၵႃႈၼႂ်းႁိူၼ်း ထႃႇဝရႃႉၽြႃး၊ ၼႂ်းဝၼ်းဢၼ်ၵမ်တၢင်းၵိၼ်ၼၼ်ႉတႃႉ။ တီႈၵူၼ်း ယုတႃႉ၊ ဢၼ်လုၵ်ႉသေၵႃႈတီႈၵူႈဝၢၼ်ႈၵူႈဝဵင်းမႃးၵႃႈမီးၼၼ်ႉၵေႃႈ၊ႁေႃးႁႂ်ႈၶဝ်လႆႈငိၼ်းတႃႉ။-
ၶဝ်ၸၢင်ႈၶႄးတၵ်းၵူမ်ႈၵွမ်းသူးတွင်းတီႈ ထႃႇဝရႃႉၽြႃး၊ လႄႈဝၢႆႇၶိုၼ်းသေၵႃႈၼႂ်းသဵၼ်ႈတၢင်းဢၼ်ႁၢႆႉဢၼ်ယုတ်ႈၶဝ်ၼၼ်ႉဢေႃႈ။ တၢင်းၸႂ်မႆႈၶႂ်ႈၸႃႉ၊ဢိၵ်ႇတင်းတေႃးသႃႉ ထႃႇဝရႃႉၽြႃး၊ ၸီႇယၢင်ႇဝႆႉပုၼ်ႈၵူၼ်းမဵဝ်းၼႆႉၼၼ်ႉႁႅင်းယႂ်ႇၼႃႇလူင်လၢင်ဢေႃႈ၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈ ပႃႇရုၵ်ႉ၊ ၵေႃႉပဵၼ်လုၵ်ႈၸၢႆး ၼေႇရိ၊ ၼၼ်ႉႁဵတ်းၸွမ်းၵႃႈၼင်ႇဢၼ်ပရေႃးၽႅတ်ႈ ယေႇရမိ၊ သင်ႇလၢတ်ႈဝႆႉၼၼ်ႉလႄႈဢဝ်ၵဵၼ်လိၵ်ႈဢၼ်ပႃးၼုၵ်ႈၵပၢတ်ႈ ထႃႇဝရႃႉၽြႃး၊ ၼၼ်ႉႁေႃးၵႃႈၼႂ်းႁိူၼ်း ထႃႇဝရႃႉၽြႃး၊ ဢေႃႈ။
ၼႂ်းပီဢၼ် ယေႃးယၵိမ်း၊ ၵေႃႉပဵၼ်လုၵ်ႈၸၢႆး ယူဝ်းသိယႃႉ၊ ၶုၼ်ႁေႃၶမ်းမိူင်း ယုတႃႉ၊ ၸၢမ်ႇႁၢင်ႈၸၢမ်ႇႁေႃလႆႈႁႃႈပီ၊ၼႂ်းလိူၼ်တီႈၵဝ်ႈၼၼ်ႉၵူၼ်းဝဵင်း ယေႇရုသလႅမ်ႇ၊ ၵႃႈမီးဢိၵ်ႇတင်းၶဝ်ၸိူဝ်းဢၼ်လုၵ်ႉသေၵႃႈတီႈဝၢၼ်ႈဝဵင်း ယုတႃႉ၊ တင်းလၢႆၼၼ်ႉ၊ႁွတ်ႈမႃးၵႃႈတီႈဝဵင်း ယေႇရုသလႅမ်ႇ၊ လႄႈဢွၼ်ၵၼ်ပၢဝ်ႇသေႃႇၶိင်ႇဢၼ်ၵမ်တၢင်းၵိၼ်ၵႃႈတီႈၽၢႆႇၼႃႈ ထႃႇဝရႃႉၽြႃး၊ ၼၼ်ႉဢေႃႈ။-
မိူဝ်ႈၼၼ်ႉ၊ ပႃႇရုၵ်ႉ၊ ႁေႃးၵႂၢမ်း ယေႇရမိ၊ ဢၼ်ပႃးၼႂ်းၵဵၼ်လိၵ်ႈၼၼ်ႉၵႃႈၼႂ်းႁိူၼ်း ထႃႇဝရႃႉၽြႃး၊ ၵႃႈတီႈဢၼ်ၵူၼ်းတင်းသဵင်ႈတင်းလူင်ငိၼ်းလႆႈၼၼ်ႉဢေႃႈ။ မၼ်းၼၼ်ႉယူႇၵႃႈၼႂ်းလုၵ်း ၵေႇမရိ၊ လုၵ်ႈၸၢႆး သႃႇၽၢၼ်ႇ၊ ဢၼ်ပဵၼ်ၽူႈမၢႆလူင်ၼၼ်ႉလႄႈၽတ်းဢၢၼ်ႇဢေႃႈ။ လုၵ်းၼၼ်ႉမီးၵႃႈတီႈလုမ်းႁၢၼ်ႉၼိူဝ်ၵႃႈႁိမ်းတၢင်းၶဝ်ႈ ၽၵ်းတူမႂ်ႇ၊ ႁိူၼ်း ထႃႇဝရႃႉၽြႃး၊ ၼၼ်ႉဢေႃႈ။
မိူဝ်ႈဢၼ် မိၵ်ႉၶယႃႉ၊ လုၵ်ႈၸၢႆး ၵေႇမရိ၊ ဢၼ်ပဵၼ်လုၵ်ႈၸၢႆး သႃႇၽၢၼ်ႇ၊ ၼၼ်ႉငိၼ်းၵႂၢမ်း ထႃႇဝရႃႉၽြႃး၊ ၵႃႈဢၼ်ပႃးၵႃႈၼႂ်းၵဵၼ်လိၵ်ႈၼၼ်ႉၸိုင်၊-
မၼ်းလူင်းၵႂႃႇၵႃႈတီႈႁေႃၶမ်းၸူးၵႃႈၼႂ်းလုၵ်းၽူႈမၢႆလူင်လႄႈမူးမၢတ်ႈၽွင်းမိူင်းၵႃႈမီးဢၼ်ဝႃႈ၊ၽူႈမၢႆလူင် ဢေးလိသမႃႇ၊တေႇလႃႇယႃႉ၊ လုၵ်ႈၸၢႆး သေႇမႃႇယႃႉ၊ဢေးလႃႉၼႃႇႀၼ်ႇ၊ လုၵ်ႈၸၢႆး ဢႃႇၶပေႃႇ၊ၵေႇမရိ၊ လုၵ်ႈၸၢႆး သႃႇၽၢၼ်ႇ၊ၸေႇတၵိ၊ လုၵ်ႈၸၢႆး ႁႃႇၼၼိ၊ ဢိၵ်ႇတင်းမူးမၢတ်ႈၽွင်းမိူင်းတင်းသဵင်ႈတင်းလူင်ၸိူဝ်းၼၼ်ႉၼင်ႈယူႇၵႃႈတီႈၼၼ်ႈဢေႃႈ။-
မိူဝ်ႈၼၼ်ႉ၊ မိၵ်ႉၶယႃႉ၊ ၶိုၼ်းလၢတ်ႈၵႂၢမ်းၵႃႈဢၼ်မၼ်းလႆႈငိၼ်းၼႂ်းမိူဝ်ႈဢၼ် ပႃႇရုၵ်ႉ၊ ႁေႃးလိၵ်ႈၼၼ်ႉၸိူဝ်းၼၼ်ႉ ထိုင်ႁူၵူၼ်းတင်းလၢႆၼၼ်ႉဢေႃႈ။-
မူးမၢတ်ႈၽွင်းမိူင်းၵႃႈမီးၼၼ်ႉဢွၼ်ၵၼ်ပွႆႇၸႂ်ႉ ယေႇႁုတိ၊ လုၵ်ႈၸၢႆး ၼေႇသၼိ၊ ဢၼ်ပဵၼ်လၢၼ်ၸၢႆး သေႇလမိ၊ လႄႈပဵၼ်လဵၼ် ၵုသိ၊ ၼၼ်ႉၵႂႃႇၸူးၵႃႈတီႈ ပႃႇရုၵ်ႉ၊ သေလႄႈသင်ႇလၢတ်ႈၵႂႃႇလႄႈဝႃႈ၊ “ပႃးဢဝ်တင်းၵဵၼ်လိၵ်ႈဢၼ်မႂ်းႁေႃးထိုင်ႁူၵူၼ်းတင်းလၢႆၼၼ်ႉသေလႄႈမႃးတႃႉ၊” ဝႃႈၼင်ႇၼႆဢေႃႈ။ ပႃႇရုၵ်ႉ၊ လုၵ်ႈၸၢႆး ၼေႇရိ၊ ၼၼ်ႉၵေႃႈယိပ်းၵမ်ဢဝ်တင်းၵဵၼ်လိၵ်ႈၼၼ်ႉသေလႄႈမႃးဢေႃႈ။-
ၶဝ်ဢွၼ်ၵၼ်လၢတ်ႈတီႈမၼ်းလႄႈဝႃႈ၊ “ၼင်ႈလႄႈႁေႃးၼႄပၼ်ႁဝ်းတႃႉ၊” ဝႃႈၼင်ႇၼႆလႄႈ ပႃႇရုၵ်ႉ၊ ၵေႃႈႁေႃးၼႄပၼ်ၶဝ်ဢေႃႈ။-
မိူဝ်ႈဢၼ်ၶဝ်ငိၼ်းၵႂၢမ်းၵႃႈမီးၼၼ်ႉၸိုင်၊ၶဝ်ၵေႃႉၼိုင်ႈလႄႈၵေႃႉၼိုင်ႈၼင်ႇၵၼ်ၵၼ်မီးတၢင်းဢၼ်ၵူဝ်ဢၼ်ႁႄသေလႄႈတူၺ်းၼႃႈၵၼ်ယူႇလႄႈလၢတ်ႈတီႈ ပႃႇရုၵ်ႉ၊ လႄႈဝႃႈ၊ “ႁဝ်းတၵ်းလႆႈဢဝ်ၵႂၢမ်းၵႃႈမီးၼႆႉလဝ်ႈလၢတ်ႈတီႈၶုၼ်ႁေႃၶမ်းဢမၢၼ်ႇၶၼ်ပဵၼ်ဢေႃႈ၊” ဝႃႈၼင်ႇၼႆဢေႃႈ။-
ၶဝ်သမ်ႉထၢမ်တီႈ ပႃႇရုၵ်ႉ၊ လႄႈဝႃႈ၊ “လၢတ်ႈလွင်ႈဢၼ်မႂ်းႁဵတ်းၸိူဝ်ႉၼင်ႇႁိုဝ်တႅမ်ႈဝႆႉၵႂၢမ်းၵႃႈမီးၸိူဝ်းၼႆႉတီႈႁဝ်းတႃႉ။ ယေႇရမိ၊ ဢဝ်ၵႂၢမ်းဢွၵ်ႇသူပ်းမၼ်းလႄႈမႂ်းတႅမ်ႈၸွမ်းႁိုဝ်း၊” ဝႃႈၼင်ႇၼႆဢေႃႈ။
ပႃႇရုၵ်ႉ၊ ၶိုၼ်းလၢတ်ႈတီႈၶဝ်လႄႈဝႃႈ၊ “မၼ်းဢဝ်ၵႂၢမ်းၵႃႈမီးၼႆႉလၢတ်ႈဢွၵ်ႇသူပ်းမၼ်းလႄႈၵဝ်ၶႃႈဢဝ်ၼမ်ႉမိုၵ်ႉတႅမ်ႈသႂ်ႇဝႆႉၵႃႈၼႂ်းၵဵၼ်လိၵ်ႈၼႆႉၶႃႈဢေႃႈ။”
မိူဝ်ႈဢၼ်ဝႃႈၼင်ႇၼႆၸိုင်၊မူးမၢတ်ႈၽွင်းမိူင်းၸိူဝ်းၼၼ်ႉဢွၼ်ၵၼ်လၢတ်ႈတီႈ ပႃႇရုၵ်ႉ၊ လႄႈဝႃႈ၊ “မႂ်းဢိၵ်ႇတင်း ယေႇရမိ၊ ၼၼ်ႉဢွၼ်ၵၼ်ၵႂႃႇလႄႈတဵတ်ႇမႅပ်းယူႇတႃႉ။ ယႃႇပေႁႂ်ႈၽူႈလႂ်သေၵေႃႉသေၵူၼ်းလႆႈႁုလွင်ႈဢၼ်သူသွင်ၵေႃႉမီးယူႇၵႃႈတီႈလႂ်ၼၼ်ႉ၊” ဝႃႈၼင်ႇၼႆဢေႃႈ။
မူးမၢတ်ႈၸိူဝ်းၼၼ်ႉဢဝ်ၵဵၼ်လိၵ်ႈၼၼ်ႉသိမ်းဝႆႉၵႃႈၼႂ်းလုၵ်းၽူႈမၢႆလူင် ဢေးလိသမႃႇ၊ သေယဝ်ႉ၊ဢွၼ်ၵၼ်ၶဝ်ႈၸူးၵႃႈတီႈၶုၼ်ႁေႃၶမ်းၵႃႈၼႂ်းႁေႃၸဝ်ႈသေလႄႈဢဝ်ၵႂၢမ်းၵႃႈမီးၼၼ်ႉလဝ်ႈလၢတ်ႈထိုင်ႁူၶုၼ်ႁေႃၶမ်းဢေႃႈ။-
မိူဝ်ႈၼၼ်ႉၶုၼ်ႁေႃၶမ်းပွႆႇၸႂ်ႉ ယေႇႁုတိ၊ ၵႂႃႇႁႂ်ႈလႆႈဢဝ်ၵဵၼ်လိၵ်ႈၼၼ်ႉဢေႃႈ။ ယေႇႁုတိ၊ ၵေႃႈၵႂႃႇဢဝ်ဢွၵ်ႇသေၵႃႈၼႂ်းလုၵ်းၽူႈမၢႆလူင် ဢေးလိသမႃႇ၊ ၼၼ်ႉမႃးသေလႄႈမၼ်းဢဝ်ၽတ်းဢၢၼ်ႇထိုင်ႁူၶုၼ်ႁေႃၶမ်း၊ဢိၵ်ႇတင်းမူးမၢတ်ႈၽွင်းမိူင်းၸိူဝ်းဢၼ်ၸုၵ်းယူႇၵႃႈတီႈႁိမ်းၶုၼ်ႁေႃၶမ်းၼၼ်ႉဢေႃႈ။-
မိူဝ်ႈၼၼ်ႉ၊ပဵၼ်လိူၼ်တီႈၵဝ်ႈလႄႈၶုၼ်ႁေႃၶမ်းၼၼ်ႉၼင်ႈယူႇၵႃႈၼႂ်းႁေႃၸဝ်ႈဢၼ်ပဵၼ်ႁေႃတီႈယူႇမိူဝ်ႈၶၢဝ်းၶိင်ႇၵတ်းၼၼ်ႉဢေႃႈ။ ၵႃႈတီႈၽၢႆႇၼႃႈမၼ်းၸဝ်ႈၼၼ်ႉမီးၵွင်ထၢၼ်ႇၽႆးဝႆႉယူႇၵႃႈၼိူဝ်ၽၢင်ၽႆးဢေႃႈ။-
မိူဝ်ႈဢၼ် ယေႇႁုတိ၊ ၽတ်းဢၢၼ်ႇၵႂႃႇလႆႈသၢမ်သီႇတွၼ်ႈၵူၺ်းၼၼ်ႉၸိုင်၊ၶုၼ်ႁေႃၶမ်းဢဝ်မိတ်ႈထိူဝ်ထႅၵ်ႇသေလႄႈဢဝ်ၵဵၼ်လိၵ်ႈၼၼ်ႉထိမ်ႈတူၵ်းပႅတ်ႈၵႃႈၼႂ်းၽႆးဢၼ်မီးၵႃႈၼိူဝ်ၽၢင်ၽႆးၼၼ်ႉတေႃႇထိုင်ႁွတ်ႈၵဵၼ်လိၵ်ႈၼၼ်ႉထၢၼ်ႈပေႃးမႆႈပႅတ်ႈတင်းသဵင်ႈတင်းမူတ်းဢေႃႈ။-
ၶုၼ်ႁေႃၶမ်းဢိၵ်ႇတင်းၶႃႈမၼ်းဢၼ်ငိၼ်းၵႂၢမ်းၵႃႈမီးၸိူဝ်းၼၼ်ႉဢမ်ႇၵူဝ်ႁႄသေၵေႃႉသေၵူၼ်း၊ဢမ်ႇၸၵ်ႉသိၵ်ႇၶူဝ်းၼုင်ႈတၢင်းမႆၶဝ်။-
ၵူၺ်းၵႃႈ၊ ဢေးလႃႉၼႃႇႀၼ်ႇ၊တေႇလႃႇယႃႉ၊ၵေႇမရိ၊ ၸိူဝ်းၼၼ်ႉဢွၼ်ၵၼ်တွင်းပၢၼ်ႇတီႈၶုၼ်ႁေႃၶမ်းဢမ်ႇႁႂ်ႈမၼ်းဢဝ်ၵဵၼ်လိၵ်ႈၼၼ်ႉတုတ်ႇၽႆးပႅတ်ႈသေၵေႃႈ၊ၶုၼ်ႁေႃၶမ်းဢမ်ႇထွမ်ႇဢမ်ႇဢဝ်ၵႂၢမ်းၶဝ်။-
ၶုၼ်ႁေႃၶမ်းပွႆႇၸႂ်ႉ ယေႇရမေးလႃႉ၊ လုၵ်ႈၸၢႆးၸဝ်ႈ၊ ၸရႃႇယႃႉ၊ လုၵ်ႈၸၢႆး ဢႃႇၸရေးလႃႉ၊ ၸိူဝ်းၼၼ်ႉၵႂႃႇႁႂ်ႈလႆႈတိဢဝ်ၽူႈမၢႆလူင် ပႃႇရုၵ်ႉ၊ ဢိၵ်ႇတင်းပရေႃးၽႅတ်ႈ ယေႇရမိ၊ ဢေႃႈ။ ၵူၺ်းၵႃႈ၊ ထႃႇဝရႃႉၽြႃး၊ ဢဝ်ၶဝ်သွင်ၵေႃႉၼၼ်ႉသိူင်ႇဝႆႉဢေႃႈ။
လိုၼ်းသေဢၼ်ၶုၼ်ႁေႃၶမ်းဢဝ်ၵဵၼ်လိၵ်ႈဢၼ်ပႃးၵႂၢမ်းဢၼ် ပႃႇရုၵ်ႉ၊ တႅမ်ႈဝႆႉၸွမ်းၵႃႈၼင်ႇဢၼ် ယေႇရမိ၊ ဝႃႈဢွၵ်ႇသူပ်းၼၼ်ႉတုတ်ႇၽႆးပႅတ်ႈယဝ်ႉၼၼ်ႉ၊ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈ ယေႇရမိ၊ လႄႈဝႃႈၸမ်ႉ၊-
“မႂ်းဢဝ်ၵဵၼ်လိၵ်ႈတၢင်ႇဢၼ်သေလႄႈဢဝ်ၵႂၢမ်းၵႃႈဢၼ်ပႃးၵႃႈၼႂ်းၵဵၼ်လိၵ်ႈၽိုၼ်တီႈၼိုင်ႈဢၼ် ယေႃးယၵိမ်း၊ ၶုၼ်ႁေႃၶမ်းမိူင်း ယုတႃႉ၊ ဢဝ်တုတ်ႇၽႆးပႅတ်ႈၼၼ်ႉလႄႈတႅမ်ႈသႂ်ႇဝႆႉထႅင်ႈတႃႉ။-
မႂ်းတၵ်းလႆႈလၢတ်ႈလူၺ်ႈလွင်ႈ ယေႃးယၵိမ်း၊ ၶုၼ်ႁေႃၶမ်းမိူင်း ယုတႃႉ၊ လႄႈဝႃႈ၊ ‘ထႃႇဝရႃႉၽြႃး၊ လၢတ်ႈဝႃႈ၊မႂ်းဢဝ်ၵဵၼ်လိၵ်ႈၼၼ်ႉတုတ်ႇၽႆးပႅတ်ႈသေယဝ်ႉ၊မႂ်းသမ်ႉလၢတ်ႈတီႈ ယေႇရမိ၊ လႄႈဝႃႈ၊ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းတႅမ်ႈသႂ်ႇဝႆႉၵႃႈၼႂ်းၵဵၼ်လိၵ်ႈၼႆႉလႄႈဝႃႈ၊ၶုၼ်ႁေႃၶမ်းမိူင်း ပႃႇပုလုၼ်ႇ၊ တၵ်းမႃးလႄႈဢဝ်ၵူၼ်းတၢႆ၊ဢိၵ်ႇတင်းဢဝ်တရိၵ်ႈသၢၼ်ႇတင်းလၢႆတၢႆဢမၢၼ်ႇၶၼ်ပဵၼ်ဢေႃႈ။ ဝႃႈၼင်ႇၼႆၼၼ်ႉၸိူဝ်ႉၼင်ႇႁိုဝ်၊’ ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ ထႃႇဝရႃႉၽြႃး၊ ဢဝ်လွင်ႈ ယေႃးယၵိမ်း၊ ၶုၼ်ႁေႃၶမ်းမိူင်း ယုတႃႉ၊ လႄႈမီးဢမိင်ႉၸမ်ႉ၊ၸိူဝ်ႉၶိူဝ်းမၼ်းတၵ်းဢမ်ႇလႆႈၼင်ႈၵႃႈၼိူဝ်ရႃႇၸႃႉပလၢင်ႇ တႃႇဝိတ်ႈ၊ တူဝ်တၢႆမၼ်းတၵ်းလႆႈၶၢမ်ႇတၢင်းဢၼ်ဢဝ်ထိမ်ႈပႅတ်ႈၵႃႈၼႂ်းလႅတ်ႇၶိင်ႇၵၢင်ဝၼ်း၊ဢိၵ်ႇတင်းၵႃႈၼႂ်းၼမ်ႉမူၺ်ၼမ်ႉၼၢႆးၶိင်ႇၵၢင်ၶိုၼ်းဢေႃႈ။-
ၵဝ်တၵ်းၸီႇယၢင်ႇပၼ်တၢမ်ႇတီႈမၼ်း၊ဢိၵ်ႇတင်းလုၵ်ႈမၼ်းလၢၼ်မၼ်းတင်းၶႃႈမၼ်းၵူၼ်းမၼ်းတင်းလၢႆၸွမ်းၵႃႈၼင်ႇဢၼ်ဢပျတ်ႈၶဝ်မီးၼၼ်ႉဢေႃႈ။ ၵဝ်တၵ်းႁႂ်ႈၽေးဢုပၢတ်ႈၵႃႈဢၼ်ၵဝ်လၢတ်ႈဝႆႉၼၼ်ႉ ႁွတ်ႈထိုင်ၵႃႈၼိူဝ်ၶဝ်၊ဢိၵ်ႇတင်းၵႃႈၼိူဝ်ၵူၼ်းဝဵင်း ယေႇရုသလႅမ်ႇ၊ တင်းၵူၼ်းမိူင်း ယုတႃႉ၊ တင်းလၢႆၵွပ်ႈပိူဝ်ႈၶဝ်ဢမ်ႇထွမ်ႇဢမ်ႇဢဝ်ၵႂၢမ်းၵဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ယေႇရမိ၊ ဢဝ်ၵဵၼ်လိၵ်ႈတၢင်ႇဢၼ်ပၼ်တီႈၽူႈမၢႆလူင် ပႃႇရုၵ်ႉ၊ လုၵ်ႈၸၢႆး ၼေႇရမိ၊ ၼၼ်ႉဢေႃႈ။ မၼ်းၼၼ်ႉဢဝ်ၵႂၢမ်းၵႃႈဢၼ် ယေႇရမိ၊ ဝႃႈဢွၵ်ႇသူပ်းလႄႈပႃးၼႂ်းၵဵၼ်လိၵ်ႈဢၼ် ယေႃးယၵိမ်း၊ ၶုၼ်ႁေႃၶမ်းဢဝ်တုတ်ႇၽႆးပႅတ်ႈၼၼ်ႉတႅမ်ႈသႂ်ႇဝႆႉထႅင်ႈဢေႃႈ။ ၵႂၢမ်းတၢင်ႇမဵဝ်းဢၼ်ငၢႆးငၢႆးမိူၼ်ၵၼ်တင်းၵႂၢမ်းၼၼ်ႉၵေႃႈထၢပ်ႈလႄႈဢဝ်သႂ်ႇထႅင်ႈဝႆႉဢေႃႈ။
ၶုၼ်လူင် ၸေႇတၵိ၊ လုၵ်ႈၸၢႆးၶုၼ်လူင် ယူဝ်းသိယႃႉ၊ ၼင်ႈႁၢင်ႈၼင်ႈႁေႃတၢင်တူဝ် ယေႇၶေႃးၼိ၊ လုၵ်ႈၸၢႆး ယေႃးယၵိမ်း၊ ဢၼ် ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်းမိူင်း ပႃႇပုလုၼ်ႇ၊ ၶၢၼ်းဝႆႉႁႂ်ႈပဵၼ်ၶုၼ်ႁေႃၶမ်းမိူင်း ယုတႃႉ၊ ၼၼ်ႉဢေႃႈ။-
ၶုၼ်လူင်ဢိၵ်ႇတင်းၶႃႈမၼ်းၵူၼ်းမၼ်းတင်းၵူၼ်းဝၢၼ်ႈၵူၼ်းမိူင်းတင်းလၢႆယင်းဢမ်ႇဢွၼ်ၵၼ်ထွမ်ႇဢဝ်ၵႂၢမ်းဢၼ် ထႃႇဝရႃႉၽြႃး၊ ဢဝ်တင်း ယေႇရမိ၊ သေလႄႈသင်ႇလၢတ်ႈဢမိင်ႉမၼ်းၸဝ်ႈဝႆႉၸိူဝ်းၼၼ်ႉလႄႈယူႇဢေႃႈ။
မိူဝ်ႈၼၼ်ႉၶုၼ်လူင် ၸေႇတၵိ၊ ၼၼ်ႉပွႆႇၸႂ်ႉ ယေႇႁုၵလႃႉ၊ လုၵ်ႈၸၢႆး သေႇလမိ၊ ဢိၵ်ႇတင်းယဵၸ်ႈပရေႃးႁဵၵ်ႈ ၸေႇၽၼိ၊ လုၵ်ႈၸၢႆး မႃႇသေႇယႃႉ၊ ၵႂႃႇၸူးၵႃႈတီႈပရေႃးၽႅတ်ႈ ယေႇရမိ၊ လႄႈသင်ႇလၢတ်ႈၵႂႃႇလႄႈဝႃႈ၊ “သူးတွင်းတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းပုၼ်ႈႁဝ်းတႃႉ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ ယေႇရမိ၊ ၶဝ်ႈၶဝ်ႈဢွၵ်ႇဢွၵ်ႇလူၺ်ႈၵၼ်တင်းၵူၼ်းတင်းလၢႆယူႇဢေႃႈ။ လွင်ႈမၼ်းၸမ်ႉ၊ၶဝ်ဢမ်ႇပႆႇဢဝ်မၼ်းတူၵ်းၵႃႈၼႂ်းထွင်ႇ။-
မိူဝ်ႈၶိင်ႇယၢမ်းၼၼ်ႉၵူၼ်းသိုၵ်းၶုၼ်ႁေႃၶမ်းမိူင်း ဢေးၵျိပ်ႉ၊ တင်းလၢႆၶီႇသိုၵ်းဢွၵ်ႇသေၵႃႈၼႂ်းမိူင်း ဢေးၵျိပ်ႉ၊ မႃးဢေႃႈ။ မိူဝ်ႈဢၼ်ၵူၼ်း ၶႃႇလတေး၊ တင်းလၢႆဢၼ်လွမ်ႉဝဵင်း ယေႇရုသလႅမ်ႇ၊ ဝႆႉၸိူဝ်းၼၼ်ႉငိၼ်းသတၢင်းသဵင်ၶၢဝ်ႇလွင်ႈမၼ်းၼၼ်ႉၸိုင်၊ၶဝ်ဢွၼ်ၵၼ်ဢွၵ်ႇၵႂႃႇသေၵႃႈတီႈဝဵင်းၼၼ်ႉဢေႃႈ။
မိူဝ်ႈၼၼ်ႉၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးၵႃႈတီႈပရေႃးၽႅတ်ႈ ယေႇရမိ၊ လႄႈဝႃႈ၊-
“ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊ၶိုၼ်းလၢတ်ႈၸိူဝ်ႉၼင်ႇၼႆတီႈၶုၼ်ႁေႃၶမ်းမိူင်း ယုတႃႉ၊ ဢၼ်ပွႆႇၸႂ်ႉသူသွင်ၵေႃႉ၊မႃးႁႂ်ႈလႆႈလဝ်ႈလၢတ်ႈတွင်ႈထၢမ်တီႈၵဝ်ၼၼ်ႉတႃႉ။ တူၺ်းလူး။ တပ်ႉသိုၵ်းၶုၼ်ႁေႃၶမ်းမိူင်း ဢေးၵျိပ်ႉ၊ ဢၼ်မႃးႁႂ်ႈလႆႈၸွႆႈထႅမ်သိုၵ်းတီႈသူၸိူဝ်းၼၼ်ႉတၵ်းဢွၼ်ၵၼ်ၶိုၼ်းမိူဝ်းၵႂႃႇၵႃႈတီႈမိူင်း ဢေးၵျိပ်ႉ၊ တီႈဢၼ်ၶဝ်ယူႇၶဝ်သဝ်းၼၼ်ႉဢေႃႈ။-
ၵူၼ်း ၶႃႇလတေး၊ ၸိူဝ်းၼၼ်ႉတၵ်းဢွၼ်ၵၼ်ၶိုၼ်းမႃးလႄႈတိုၵ်းသိမ်းဢဝ်ဝဵင်းၼႆႉသေယဝ်ႉ၊တၵ်းဢွၼ်ၵၼ်ဢဝ်ၽႆးတုတ်ႇပႅတ်ႈဢေႃႈ။-
ထႃႇဝရႃႉၽြႃး၊ မီးဢမိင်ႉၸမ်ႉ၊တူဝ်သူယႃႇပေပႅတ်ႉလႅၼ်တူဝ်သူလႄႈဝႃႈ၊ ‘ၵူၼ်း ၶႃႇလတေး၊ ၸိူဝ်းၼၼ်ႉတၵ်းဢွၼ်ၵၼ်ဢွၵ်ႇၵႂႃႇသေၵႃႈတီႈႁဝ်းဢေႃႈ၊’ ဝႃႈၼင်ႇၼႆၼၼ်ႉ။ ၶဝ်ၼၼ်ႉတၵ်းတေဢမ်ႇဢွၵ်ႇၵႂႃႇ။-
ပိၵ်ႉသမ်ႉ သူတိုၵ်းတေႃးယႃႇပႅတ်ႈၵူၼ်းသိုၵ်း ၶႃႇလတေး၊ ဢၼ်တိုၵ်းသိုၵ်းၵၼ်တင်းသူတင်းသဵင်ႈတင်းလူင်ၼၼ်ႉလႄႈၵႃႈၼႂ်းၶဝ်ၼၼ်ႉၵိုတ်းၵျၢၼ်ႇဝႆႉၶဝ်ၸိူဝ်းဢၼ်လႆႈၶၢမ်ႇတၢင်းဢၼ်တိူဝ်ႉဢၼ်မၢတ်ႇလွၼ်ႉလွၼ်ႉၼၼ်ႉသေၵေႃႈၶဝ်ၼၼ်ႉတၵ်းလႆႈဢွၼ်ၵၼ်လုၵ်ႉသေၵႃႈတီႈသုမ်ႉထဵင်ၶဝ်ၼၼ်ႉႁင်းၽႂ်ႁင်းမၼ်းသေယဝ်ႉ၊ဢဝ်ၽႆးတုတ်ႇဝဵင်းၼႆႉပႅတ်ႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်တပ်ႉသိုၵ်းၶုၼ်ႁေႃၶမ်းမိူင်း ဢေးၵျိပ်ႉ၊ ႁွတ်ႈၽႅဝ်မႃးၸမ်ၼၼ်ႉၸိုင်၊တပ်ႉသိုၵ်း ၶႃႇလတေး၊ ၸိူဝ်းၼၼ်ႉဢွၼ်ၵၼ်ဢွၵ်ႇသေၵႃႈတီႈဝဵင်း ယေႇရုသလႅမ်ႇ၊ ၵႂႃႇဢေႃႈ။-
မိူဝ်ႈၼၼ်ႉ၊ ယေႇရမိ၊ ဢၢင်ႈတေဢွၵ်ႇသေၼႂ်းဝဵင်း ယေႇရုသလႅမ်ႇ၊ လႄႈၵႂႃႇၵႃႈတီႈမိူင်း ပိၼ်ႇယႃႇမိၼ်ႇ၊ ႁႂ်ႈလႆႈၶၢမ်ႇဢဝ်ဢမူၺ်ႇဢုၵ်ႉၸႃႇမၼ်းၵႃႈၼႂ်းၵူၼ်းမဵဝ်းမၼ်းတင်းလၢႆၼၼ်ႉဢေႃႈ။-
မိူဝ်ႈဢၼ်မၼ်းႁွတ်ႈထိုင်ၵႃႈတီႈ ၽၵ်းတူပိၼ်ႇယႃႇမိၼ်ႇ၊ ၼၼ်ႉၸိုင်၊ၵူၼ်းပႂ်ႉယၢမ်းဢၼ်လႆႈၸိုဝ်ႈ ဢိရိယႃႉ၊ ဢၼ်ပဵၼ်လုၵ်ႈၸၢႆး သေႇလမိ၊ ဢၼ်ပဵၼ်လၢၼ်ၸၢႆး ႁႃႇၼၼိ၊ ၼၼ်ႉတိၺွပ်းဢဝ်ပရေႃးၽႅတ်ႈ ယေႇရမိ၊ သေလႄႈဝႃႈ၊ “မႂ်းၼႆႉပၢႆႈၶဝ်ႈၸူးၽၢႆႇၵူၼ်း ၶႃႇလတေး၊ ၸိူဝ်းၼၼ်ႉယဝ်ႉလူင်ပႄႇ၊” ဝႃႈၼင်ႇၼႆဢေႃႈ။
ပိၵ်ႉသမ်ႉ ယေႇရမိ၊ လၢတ်ႈလႄႈဝႃႈ၊ “ဢမ်ႇၸႂ်ႈၵူၺ်း။ ၵဝ်ဢမ်ႇပၢႆႈၶဝ်ႈၵႂႃႇယူႇၽၢႆႇၵူၼ်း ၶႃႇလတေး၊ ၸိူဝ်းၼၼ်ႉၵူၺ်း၊” ဝႃႈၼင်ႇၼႆသေၵေႃႈ ဢိရိယႃႉ၊ ၼၼ်ႉယင်းဢမ်ႇထွမ်ႇဢမ်ႇယုမ်ႇၵႂၢမ်းမၼ်းလႄႈတိၺွပ်းဢဝ် ယေႇရမိ၊ သေယဝ်ႉ၊ဢဝ်သူင်ႇၵႂႃႇၵႃႈတီႈမူးမၢတ်ႈၽွင်းမိူင်းတင်းလၢႆဢေႃႈ။-
မူးမၢတ်ႈၽွင်းမိူင်းၸိူဝ်းၼၼ်ႉၸႂ်မႆႈၶႂ်ႈၸႃႉတီႈ ယေႇရမိ၊ လႄႈပေႃႉယႅၼ်ႉမၼ်းသေယဝ်ႉ၊ဢွၼ်ၵၼ်ဢဝ်မၼ်းၶင်ဝႆႉၵႃႈၼႂ်းႁိူၼ်းၽူႈမၢႆလူင် ယေႃးၼသၼ်ႇ၊ ဢေႃႈ။ ႁိူၼ်းၼၼ်ႉၸိုင်၊ၶဝ်ဢဝ်ႁဵတ်းထွင်ႇယဝ်ႉဢေႃႈ။-
ယေႇရမိ၊ လႆႈယူႇၵႃႈၼႂ်းႁိူၼ်းထွင်ႇတႂ်ႈလိၼ်ဢၼ်မီးၵႃႈတႂ်ႈႁိူၼ်းၼၼ်ႉမိုဝ်ႉဝၼ်းႁိုင်ၼႃႇဢေႃႈ။
လိုၼ်းၼၼ်ႉၶုၼ်လူင် ၸေႇတၵိ၊ သင်ႇလၢတ်ႈႁႂ်ႈဢဝ်တူဝ် ယေႇရမိ၊ ဢွၵ်ႇမႃးတဵတ်ႇတဵတ်ႇသေယဝ်ႉ၊တွင်ႈထၢမ်တီႈမၼ်းၵႃႈၼႂ်းႁေႃၶမ်းလႄႈဝႃႈ၊ “ၼုၵ်ႈၵပၢတ်ႈ ထႃႇဝရႃႉၽြႃး၊ မီးႁိုဝ်း၊” ဝႃႈၼင်ႇၼႆဢေႃႈ။ ယေႇရမိ၊ ၶိုၼ်းလဝ်ႈလၢတ်ႈလႄႈဝႃႈ၊ “မီးတီႈၶႃႈဢေႃႈ၊ၸဝ်ႈႁဝ်းတၵ်းလႆႈႁွတ်ႈထိုင်ၵႃႈၼႂ်းမိုဝ်းၶုၼ်ႁေႃၶမ်းမိူင်း ပႃႇပုလုၼ်ႇ၊ တီႈၶႃႈဢေႃႈ၊” ဝႃႈၼင်ႇၼႆဢေႃႈ။-
ယေႇရမိ၊ သမ်ႉလဝ်ႈလၢတ်ႈတီႈၶုၼ်ႁေႃၶမ်း ၸေႇတၵိ၊ လႄႈဝႃႈ၊ “ၶႃႈၸဝ်ႈၽိတ်းပိူင်ႈၸဝ်ႈႁဝ်း၊ဢိၵ်ႇတင်းၶႃႈၸဝ်ႈႁဝ်းတင်းလၢႆတင်းၵူၼ်းဝၢၼ်ႈၵူၼ်းမိူင်းတင်းလၢႆၼႆႉၸိူဝ်ႉၼင်ႇႁိုဝ်လႄႈၸဝ်ႈႁဝ်းထၢၼ်ႈပေႃးလႆႈဢဝ်ၶႃႈၸဝ်ႈၶင်ဝႆႉၵႃႈၼႂ်းထွင်ႇတီႈၶႃႈ။-
ပရေႃးၽႅတ်ႈၸဝ်ႈႁဝ်းၶဝ်ဢၼ်ႁေႃးလၢတ်ႈလႄႈဝႃႈ၊ ‘ၶုၼ်ႁေႃၶမ်းမိူင်း ပႃႇပုလုၼ်ႇ၊ တၵ်းဢမ်ႇမႃးတိုၵ်းသူ၊ဢိၵ်ႇတင်းမိူင်းၼႆႉၵူၺ်း၊’ ဝႃႈၼင်ႇၼႆၼၼ်ႉမိူဝ်ႈလဵဝ်ၼႆႉမီးၵႃႈလႂ်တီႈၶႃႈ။-
ပိူဝ်ႈၼႆလႄႈၸဝ်ႈၵဝ်ၶႃႈ။ ၸဝ်ႈၶုၼ်လူင်တီႈၶႃႈ။ ၶႅၼ်းတေႃႈႁပ်ႉတုင်းဢဝ်ၵႂၢမ်းဢၼ်ၶႃႈၸဝ်ႈတွင်းပၢၼ်ႇယွၼ်းဢဝ်ၼႆႉလႄႈယႃႇပေႁႂ်ႈၶႃႈၸဝ်ႈၶိုၼ်းလႆႈၵႂႃႇၵႃႈတီႈႁိူၼ်းၽူႈမၢႆလူင် ယေႃးၼသၼ်ႇ၊ ၼၼ်ႉလႄႈလႆႈတၢႆၵႃႈတီႈၼၼ်ႈသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၶုၼ်လူင် ၸေႇတၵိ၊ မီးဢမိင်ႉလႄႈၶဝ်ဢွၼ်ၵၼ်ဢဝ် ယေႇရမိ၊ ဝႆႉၵႃႈၼႂ်းဝၢင်းထွင်ႇဢေႃႈ။ ၶဝ်ဢဝ်ၶဝ်ႈမုၼ်းယေႈဝၼ်းယေႈလုၵ်ႈသေၵႃႈတီႈၸဝ်ႈႁဵတ်းၶဝ်ႈမုၼ်းၼၼ်ႉသေလႄႈပၼ်မၼ်းၵိၼ်တေႃႇထိုင်ႁွတ်ႈၶဝ်ႈမုၼ်းၵႃႈၼႂ်းဝဵင်းၼၼ်ႉမူတ်းၵႂႃႇဢေႃႈ။ ၼင်ႇၼၼ်လႄႈ ယေႇရမိ၊ လႆႈယူႇၵႃႈၼႂ်းဝၢင်းထွင်ႇၼၼ်ႉဢေႃႈ။
မိူဝ်ႈဢၼ် သေႇၽတိ၊ လုၵ်ႈၸၢႆး မတ်ႉတၼ်ႇ၊ၵေႇတလိ၊ လုၵ်ႈၸၢႆး ပႃႇသုရႃႉ၊ယေႇႁုၵလႃႉ၊ လုၵ်ႈၸၢႆး သေႇလမိ၊ပႃႇသုရႃႉ၊ လုၵ်ႈၸၢႆး မႃႇလၶိယႃႉ၊ ၸိူဝ်းၼၼ်ႉငိၼ်းၵႂၢမ်းဢၼ် ယေႇရမိ၊ ႁေႃးလၢတ်ႈတီႈၵူၼ်းတင်းသဵင်ႈတင်းလူင်လႄႈဝႃႈ၊-
“ထႃႇဝရႃႉၽြႃး၊ မီးဢမိင်ႉၸမ်ႉ၊ၵေႃႉဢၼ်ယူႇၵႃႈၼႂ်းဝဵင်းၼႆႉၼၼ်ႉတၵ်းလႆႈတၢႆလူၺ်ႈၽေးလၢပ်ႇၽေးလႅဝ်း၊ၽေးတၢင်းဢၼ်ဢိုပ်းဢၼ်ယၢၵ်ႈ၊ၽေးၵႃႇလႃႉႁႃႈလႅင်မိူင်းဢေႃႈ။ ၵေႃႉဢၼ်ဢွၵ်ႇၵႂႃႇလႄႈယူႇၸွမ်းၵူၼ်း ၶႃႇလတေး၊ ၼၼ်ႉၸမ်ႉ၊ဢသၢၵ်ႈတၵ်းလႆႈလွတ်ႈဢေႃႈ။ မၼ်းတၵ်းလႆႈဢသၢၵ်ႈမိူၼ်ၸိူဝ်ႉၼင်ႇသူးဢၼ်လႆႈတီႈပၢင်သိုၵ်းၼၼ်ႉလႄႈတၵ်းလႆႈဢသၢၵ်ႈလိပ်းယူႇဢေႃႈ။-
ထႃႇဝရႃႉၽြႃး၊ မီးဢမိင်ႉၸမ်ႉ၊ဝဵင်းၼႆႉတၵ်းလႆႈၶၢမ်ႈတၢင်းဢၼ်ဢဝ်ဢၢပ်ႈပၼ်ၵႃႈၼႂ်းမိုဝ်းၵူၼ်းသိုၵ်းၶုၼ်ႁေႃၶမ်းမိူင်း ပႃႇပုလုၼ်ႇ၊ တင်းလၢႆဢမၢၼ်ႇၶၼ်ပဵၼ်လႄႈမၼ်းၼၼ်ႉတၵ်းသိမ်းဢဝ်ဢေႃႈ၊” ဝႃႈၼင်ႇၼႆၼၼ်ႉဢေႃႈ။
မိူဝ်ႈၼၼ်ႉ၊မူးမၢတ်ႈၽွင်းမိူင်းၸိူဝ်းၼၼ်ႉလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “ၵူၼ်းၵေႃႉၼႆႉ ထုၵ်ႇလီဢဝ်မၼ်းတၢႆၶႃႈဢေႃႈ။ လွင်ႈမၼ်းၸမ်ႉ၊မၼ်းႁေႃးလၢတ်ႈၵႂၢမ်းၸိူဝ်းၼႆႉႁႂ်ႈႁူဝ်ႁၢၼ်ၵူၼ်းသိုၵ်းဢၼ်ယင်းၵိုတ်းယင်းၵျၢၼ်ႇယူႇၵႃႈၼႂ်းဝဵင်းၼႆႉတင်းလၢႆ၊ဢိၵ်ႇတင်းၵူၼ်းတင်းသဵင်ႈတင်းလူင်ႁႅင်းဢူၼ်ႈၵႂႃႇတီႈၶႃႈဢေႃႈ။ မၼ်းၼႆႉဢမ်ႇၸၢင်ႈလုမ်းလႃးပွင်ႁဵတ်းဢၵျူဝ်းၵူၼ်းမဵဝ်းၼႆႉလႄႈၸၢင်ႈယႃႉပႅတ်ႈၵူၺ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၶုၼ်လူင် ၸေႇတၵိ၊ မီးဢမိင်ႉလႄႈဝႃႈ၊ “မၼ်းၼၼ်ႉမီးယူႇၵႃႈၼႂ်းမိုဝ်းသူဢေႃႈ။ ၶုၼ်ႁေႃၶမ်းဢမ်ႇႁၢမ်ႈတၢပ်ႈႁႄႉၶႅၼ်ဢလူဝ်ႇသူလႆႈ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ၶဝ်ဢွၼ်ၵၼ်ဢဝ်တင်းၸိူၵ်ႈလႄႈဢဝ်တူဝ် ယေႇရမိ၊ ယွၼ်ႇလူင်းၵႂႃႇၵႃႈၼႂ်းၼမ်ႉမေႃႇ မႃႇလၶိ၊ လုၵ်ႈၸၢႆးၸဝ်ႈဢၼ်မီးၵႃႈၼႂ်းဝၢင်းထွင်ႇၼၼ်ႉဢေႃႈ။ ၵႃႈၼႂ်းၼမ်ႉမေႃႇၼၼ်ႉဢမ်ႇမီးၼမ်ႉ၊မီးၵူမ်ႇၵူၺ်းလႄႈ ယေႇရမိ၊ ၵေႃႈ၊တူၵ်းၸူမ်ၵႃႈၼႂ်းၵူမ်ႇယူႇဢေႃႈ။
ၵူၺ်းၵႃႈ၊ ဢေးပတမေႇလႅၵ်ႉ၊ ၵူၼ်းမဵဝ်း ဢေႇတီႇဢူဝ်းပီးယႃး၊ ဢၼ်ပဵၼ်ၵူၼ်းထိင်းၼၢင်းၵႃႈၼႂ်းႁေႃၶမ်းၼၼ်ႉႁုငိၼ်းလွင်ႈဢၼ်ၶဝ်ဢဝ် ယေႇရမိ၊ ၶျႃးတူၵ်းသႂ်ႇဝႆႉၵႃႈၼႂ်းၼမ်ႉမေႃႇၼၼ်ႉဢေႃႈ။ မႅၼ်ႈၶိင်ႇယၢမ်းဢၼ်ၶုၼ်ႁေႃၶမ်းၼင်ႈယူႇၵႃႈတီႈ ၽၵ်းတူပိၼ်ႇယႃႇမိၼ်ႇ၊ ၼၼ်ႉဢေႃႈ။-
ပိူဝ်ႈၼႆလႄႈ ဢေးပတမေႇလႅၵ်ႉ၊ ၼၼ်ႉဢွၵ်ႇသေၵႃႈၼႂ်းႁေႃၶမ်းလႄႈၵႂႃႇၸူးၵႃႈတီႈၶုၼ်ႁေႃၶမ်းသေယဝ်ႉ၊လဝ်ႈလၢတ်ႈလႄႈဝႃႈ၊-
“ၸဝ်ႈၵဝ်ၶႃႈ၊ၸဝ်ႈၶုၼ်လူင်တီႈၶႃႈ။ ၶဝ်ၼၼ်ႉဢွၼ်ၵၼ်ၽိတ်းပိူင်ႈၼႂ်းလွင်ႈၵႃႈဢၼ်ၶဝ်ႁဵတ်းတီႈပရေႃးၽႅတ်ႈ ယေႇရမိ၊ ဢၼ်ၶဝ်ဢွၼ်ၵၼ်ဢဝ်ၶျႃးတူၵ်းသႂ်ႇဝႆႉၵႃႈၼႂ်းၼမ်ႉမေႃႇၼၼ်ႉတီႈၶႃႈယဝ်ႉ။ မၼ်းတၵ်းတၢႆၵႃႈၼႂ်းၼၼ်ႉၵွပ်ႈပိူဝ်ႈတၢင်းဢၼ်ဢိုပ်းဢၼ်ယၢၵ်ႈတီႈၶႃႈဢေႃႈ။ လွင်ႈမၼ်းၸမ်ႉ၊ဢမ်ႇမီးၶဝ်ႈမုၼ်းဢၼ်ၵိုတ်းၵျၢၼ်ႇၵႃႈၼႂ်းဝဵင်းၼႆႉတီႈၶႃႈယဝ်ႉ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉၶုၼ်ႁေႃၶမ်းမီးဢမိင်ႉတီႈ ဢေးပတမေႇလႅၵ်ႉ၊ ၵူၼ်းမဵဝ်း ဢေႇတီႇဢူဝ်းပီးယႃး၊ ၼၼ်ႉလႄႈဝႃႈ၊ “ႁွင်ႉဢဝ်ၵူၼ်းသၢမ်ၵေႃႉၵႂႃႇလူၺ်ႈၵၼ်တင်းမႂ်းလႄႈၼုၵ်ႈဢဝ်ပရေႃးၽႅတ်ႈ ယေႇရမိ၊ ဢွၵ်ႇမႃးသေၵႃႈၼႂ်းၼမ်ႉမေႃႇၼၼ်ႉၸူဝ်ႈဢၼ်မၼ်းဢမ်ႇပႆႇတၢႆၼၼ်ႉတႃႉ၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈ ဢေးပတမေႇလႅၵ်ႉ၊ ႁွင်ႉဢဝ်ၵူၼ်းသေလႄႈၶဝ်ႈၵႃႈၼႂ်းႁေႃၶမ်းၵႃႈၼႂ်းတိူၵ်ႈၽၼ်ႇတႃႇသေယဝ်ႉ၊ဢဝ်ၶူဝ်းၼုင်ႈဢၼ်ၵဝ်ႇဢၼ်မွင်၊ဢၼ်သိၵ်ႇဢၼ်ၶၢတ်ႇ၊ဢိၵ်ႇတင်းၸိူၵ်ႈသေလႄႈယွၼ်ႇလူင်းၸူးတီႈ ယေႇရမိ၊ ၵႃႈၼႂ်းၼမ်ႉမေႃႇၼၼ်ႉဢေႃႈ။-
မိူဝ်ႈၼၼ်ႉ၊ ဢေးပတမေႇလႅၵ်ႉ၊ ၵူၼ်းမဵဝ်း ဢေႇတီႇဢူဝ်းပီးယႃး၊ ၼၼ်ႉလၢတ်ႈတီႈ ယေႇရမိ၊ လႄႈဝႃႈ၊ “ဢဝ်ၶူဝ်းၼုင်ႈဢၼ်ၵဝ်ႇဢၼ်မွင်၊ဢၼ်သိၵ်ႇဢၼ်ၶၢတ်ႇၼႆႉဢဝ်ႁွင်းၸိူၵ်ႈၵႃႈတႂ်ႈၵိင်ႇႁႄႉမႂ်းတႃႉ၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈၶဝ်ဢွၼ်ၵၼ်ဢဝ်တင်းၸိူၵ်ႈတိုတ်ႉၸၼ်ဢဝ် ယေႇရမိ၊ ဢွၵ်ႇသေၵႃႈၼႂ်းၼမ်ႉမေႃႇၼၼ်ႉဢေႃႈ။ လိုၼ်းၼၼ်ႉ ယေႇရမိ၊ ၶိုၼ်းလႆႈယူႇၵႃႈၼႂ်းဝၢင်းထွင်ႇဢေႃႈ။
ၶုၼ်လူင် ၸေႇတၵိ၊ ပွႆႇၸႂ်ႉၵူၼ်းၵႂႃႇႁွင်ႉဢဝ် ယေႇရမိ၊ ႁႂ်ႈမႃးၸူးတီႈမၼ်းၸွမ်းသဵၼ်ႈတၢင်းသဵၼ်ႈတီႈသၢမ်ဢၼ်ၶဝ်ႈၵႂႃႇၵႃႈၼႂ်းၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ၼၼ်ႉဢေႃႈ။ ၶုၼ်ႁေႃၶမ်းလၢတ်ႈတီႈ ယေႇရမိ၊ လႄႈဝႃႈ၊ “ၵဝ်တၵ်းတွင်ႈထၢမ်သေၸိူဝ်ႉသေပိူင်တီႈမႂ်းဢေႃႈ။ ယႃႇပေဢဝ်သိူင်ႇဝႆႉလပ်ႉဝႆႉလွင်ႈတၢင်းသေၸိူဝ်ႉသေဢၼ်တီႈၵဝ်၊” ဝႃႈၼင်ႇၼႆဢေႃႈ။
ယေႇရမိ၊ ၵေႃႈလဝ်ႈလၢတ်ႈတီႈ ၸေႇတၵိ၊ လႄႈဝႃႈ၊ “ပေႃးၶႃႈၸဝ်ႈဢဝ်လွင်ႈၼၼ်ႉလဝ်ႈလၢတ်ႈတီႈၸဝ်ႈႁဝ်းၸိုင်၊ၸဝ်ႈႁဝ်းတၵ်းဢဝ်ၶႃႈၸဝ်ႈတၢႆဢမၢၼ်ႇၶၼ်ပဵၼ်ဢမ်ႇၸႂ်ႈတီႈၶႃႈႁိုဝ်း၊ပေႃးၶႃႈၸဝ်ႈပၼ်တၢင်းၵျၢမ်ႇတၢင်းပွင်တီႈၸဝ်ႈႁဝ်းၸိုင်၊ၸဝ်ႈႁဝ်းတၵ်းဢမ်ႇထွမ်ႇဢမ်ႇဢဝ်ၵႂၢမ်းၶႃႈၸဝ်ႈလႄႈယူႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၶုၼ်လူင် ၸေႇတၵိ၊ ၼၼ်ႉတိူင်ႇၵၢဝ်ႇၵတိတီႈ ယေႇရမိ၊ လႄႈဝႃႈ၊ “ၵႃႈၼင်ႇဢၼ် ထႃႇဝရႃႉၽြႃး၊ ဢသၢၵ်ႈလိပ်းယူႇလႄႈပၼ်ဢသၢၵ်ႈဝိၺိၺ်ႇတီႈႁဝ်းၼႆႉၼၼ်ႉ၊ၵဝ်တၵ်းဢမ်ႇဢဝ်မႂ်းတၢႆလႄႈဢမ်ႇဢၢပ်ႈပၼ်ၵႃႈၼႂ်းမိုဝ်းၶဝ်ၸိူဝ်းဢၼ်ၸွမ်းႁႃဢသၢၵ်ႈမႂ်းယူႇၸိူဝ်းၼၼ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ယေႇရမိ၊ လဝ်ႈလၢတ်ႈတီႈ ၸေႇတၵိ၊ လႄႈဝႃႈ၊ “ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊ပေႃးၸဝ်ႈႁဝ်းၼွမ်းတူဝ်ၸူးၵႃႈတီႈမူးမၢတ်ႈၽွင်းမိူင်းၶုၼ်ႁေႃၶမ်းမိူင်း ပႃႇပုလုၼ်ႇ၊ ၸိူဝ်းၼၼ်ႉၸိုင်၊ဢသၢၵ်ႈၸဝ်ႈႁဝ်းတၵ်းလႆႈလွတ်ႈတီႈၶႃႈဢေႃႈ။ ဝဵင်းၼႆႉၵေႃႈတၵ်းလွတ်ႈသေတၢင်းဢၼ်ဢဝ်ၽႆးတုတ်ႇပႅတ်ႈတီႈၶႃႈဢေႃႈ။ ၸဝ်ႈႁဝ်းဢိၵ်ႇတင်းပီႈၼွင်ႉၸိူဝ်ႉၶိူဝ်းၸဝ်ႈႁဝ်းၸိူဝ်းၼၼ်ႉတၵ်းလႆႈဢသၢၵ်ႈလိပ်းတီႈၶႃႈဢေႃႈ။-
ပေႃးဢမ်ႇၼၼ်ပေႃးၸဝ်ႈႁဝ်းဢမ်ႇၼွမ်းတူဝ်ၸူးၵႃႈတီႈမူးမၢတ်ႈၽွင်းမိူင်းၶုၼ်ႁေႃၶမ်းမိူင်း ပႃႇပုလုၼ်ႇ၊ ၸိူဝ်းၼၼ်ႉၸိုင်၊ဝဵင်းၼႆႉတၵ်းလႆႈၶၢမ်ႇတၢင်းဢၼ်ဢဝ်ဢၢပ်ႈၵႃႈၼႂ်းမိုဝ်းၵူၼ်း ၶႃႇလတေး၊ တင်းလၢႆဢေႃႈ။ ၶဝ်ၼၼ်ႉတၵ်းဢွၼ်ၵၼ်ဢဝ်ၽႆးတုတ်ႇပႅတ်ႈလႄႈၸဝ်ႈႁဝ်းၵေႃႈ တၵ်းဢမ်ႇလွတ်ႈၵႃႈၼႂ်းမိုဝ်းၶဝ်ၼၼ်ႉတီႈၶႃႈ၊” ဝႃႈၼင်ႇၼႆဢေႃႈ။
ၶုၼ်လူင် ၸေႇတၵိ၊ ၵေႃႈလၢတ်ႈတီႈ ယေႇရမိ၊ လႄႈဝႃႈ၊ “ၵဝ်ၵူဝ်ႁႄၵူၼ်း ယုတႃႉ၊ ဢၼ်ၵႂႃႇၶဝ်ႈယူႇၽၢႆႇၵူၼ်း ၶႃႇလတေး၊ ၸိူဝ်းၼၼ်ႉဢေႃႈ။ ၵူၼ်း ၶႃႇလတေး၊ ၶဝ်တၵ်းဢဝ်ၵဝ်ဢၢပ်ႈပၼ်ၵႃႈၼႂ်းမိုဝ်းၶဝ်ၼၼ်ႉလႄႈၶဝ်တၵ်းဢွၼ်ၵၼ်ၼိၵ်ႈၸၢၵ်ႈၵဝ်ဢေႃႈ၊” ဝႃႈၼင်ႇၼႆဢေႃႈ။
ယေႇရမိ၊ လဝ်ႈလၢတ်ႈလႄႈဝႃႈ၊ “ၶဝ်တၵ်းဢမ်ႇလႆႈဢဝ်ၸဝ်ႈႁဝ်းဢၢပ်ႈတီႈၶႃႈၵူၺ်း။ ၶႅၼ်းတေႃႈထွမ်ႇဢဝ်ၵႂၢမ်း ထႃႇဝရႃႉၽြႃး၊ ဢၼ်ၶႃႈၸဝ်ႈသင်ႇလၢတ်ႈတီႈၸဝ်ႈႁဝ်းၼႆႉသေၵမ်းတီႈၶႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ၸဝ်ႈႁဝ်းတၵ်းလႆႈၵတ်းယဵၼ်ၶျၢမ်းသႃႇလႄႈဢသၢၵ်ႈတၵ်းလႆႈလိပ်းတီႈၶႃႈဢေႃႈ။-
ပေႃးဢမ်ႇၼၼ်ပေႃးၸဝ်ႈႁဝ်းထဵင်ပႅတ်ႈလူၺ်ႈလွင်ႈဢၼ်တၵ်းၼွမ်းတူဝ်ၸူးၼၼ်ႉၸိုင်၊ၵႂၢမ်းဢၼ် ထႃႇဝရႃႉၽြႃး၊ ၼႄပျႃးတီႈၶႃႈၸဝ်ႈၼၼ်ႉမီးဝႆႉၸိူဝ်ႉၼင်ႇၼႆၶႃႈဢေႃႈ။-
တူၺ်းလူး။ မႄႈယိင်းဢၼ်ယင်းၵိုတ်းယင်းၵျၢၼ်ႇၵႃႈၼႂ်းႁေႃၶုၼ်ႁေႃၶမ်းမိူင်း ယုတႃႉ၊ ၼၼ်ႉၸိူဝ်းၼၼ်ႉတၵ်းလႆႈၶၢမ်ႇတၢင်းဢၼ်ဢဝ်ဢွၵ်ႇၸူးၵႃႈတီႈမူးမၢတ်ႈၽွင်းမိူင်းၶုၼ်ႁေႃၶမ်းမိူင်း ပႃႇပုလုၼ်ႇ၊ ၸိူဝ်းၼၼ်ႉဢေႃႈ။ မႄႈယိင်းၸိူဝ်းၼၼ်ႉတၵ်းဢွၼ်ၵၼ်လၢတ်ႈတီႈၸဝ်ႈႁဝ်းလႄႈဝႃႈ၊ “‘ၵေႃႉသႄႈၸဝ်ႈႁဝ်းၸိူဝ်းၼၼ်ႉတိုၵ်းယူင်းၸူဝ်းဢဝ်ၸဝ်ႈႁဝ်းလႄႈပႄႉၼႅင်ႇၸဝ်ႈႁဝ်းတီႈၶႃႈယဝ်ႉ။ တေႃႈလဵဝ်ၼႆႉတိၼ်ၸဝ်ႈႁဝ်းၸူမ်ၶဝ်ႈၵႃႈၼႂ်းၵူမ်ႇၼႂ်းဢုင်လႄႈ ၶဝ်ၼၼ်ႉဢွၼ်ၵၼ်ၸုၼ်ႉပႅတ်ႈၸဝ်ႈႁဝ်းတီႈၶႃႈယဝ်ႉ၊’ ဝႃႈၼင်ႇၼႆတီႈၶႃႈဢေႃႈ။
“ၼင်ႇၼၼ်လႄႈၶဝ်တၵ်းဢွၼ်ၵၼ်ဢဝ်မေးၸဝ်ႈႁဝ်း၊လုၵ်ႈလၢင်းၸဝ်ႈႁဝ်းၵႃႈမီးဢွၵ်ႇၸူးၵႃႈတီႈၵူၼ်း ၶႃႇလတေး၊ ၸိူဝ်းၼၼ်ႉတီႈၶႃႈဢေႃႈ။ ၸဝ်ႈႁဝ်းၵေႃႈတေဢမ်ႇၵၢင်းလွတ်ႈသေၵႃႈၼႂ်းမိုဝ်းၶဝ်ၼၼ်ႉလႄႈတၵ်းႁွတ်ႈထိုင်ၵႃႈၼႂ်းမိုဝ်းၶုၼ်ႁေႃၶမ်းမိူင်း ပႃႇပုလုၼ်ႇ၊ ဢေႃႈ။ ဝဵင်းၼႆႉၵေႃႈတၵ်းလႆႈၶၢမ်ႇတၢင်းဢၼ်ဢဝ်ၽႆးတုတ်ႇပႅတ်ႈတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၸေႇတၵိ၊ ၵေႃႈမီးဢမိင်ႉတီႈ ယေႇရမိ၊ လႄႈဝႃႈ၊ “ယႃႇပေႁႂ်ႈၽူႈလႂ်သေၵေႃႉသေၵူၼ်းလႆႈႁုလႆႈငိၼ်းလွင်ႈၵႂၢမ်းဢၼ်ႁဝ်းလၢတ်ႈၸိူဝ်းၼႆႉ။ ပေႃးဢမ်ႇၼၼ်ၸိုင်၊မႂ်းတၵ်းလႆႈတၢႆဢေႃႈ။-
ပေႃးမူးမၢတ်ႈၽွင်းမိူင်းတင်းလၢႆငိၼ်းလွင်ႈဢၼ်ၵဝ်လၢတ်ႈၵႂၢမ်းတေႃႇၵၼ်တင်းမႂ်းၼၼ်ႉၶဝ်တၵ်းဢွၼ်ၵၼ်မႃးတီႈမႂ်းလႄႈတွင်ႈထၢမ်ဢေႃႈ။ ၶဝ်တၵ်းထၢမ်လႄႈဝႃႈ၊ ‘မွၵ်ႇလၢတ်ႈလွင်ႈဢၼ်မႂ်းလႆႈလၢတ်ႈၵႃႈသင်တီႈၶုၼ်ႁေႃၶမ်းလႄႈၶုၼ်ႁေႃၶမ်းသမ်ႉလၢတ်ႈၵႃႈသင်တီႈမႂ်းၼၼ်ႉလၢတ်ႈၼႄပၼ်ႁဝ်းသေၵမ်း။ ယႃႇပေသိူင်ႇဝႆႉလပ်ႉဝႆႉသေၵမ်း။ ပေႃးဢမ်ႇၼၼ်ၸိုင်၊ႁဝ်းတၵ်းဢဝ်မႂ်းတၢႆဢေႃႈ၊’ မိူဝ်ႈဢၼ်ဝႃႈၼင်ႇၼႆၸိုင်၊-
မႂ်းၶိုၼ်းလၢတ်ႈတီႈၶဝ်လႄႈဝႃႈ၊ ‘ၵဝ်တွင်းပၢၼ်ႇလဝ်ႈယွၼ်းဢဝ်ၵႃႈတီႈၽၢႆႇၼႃႈၶုၼ်ႁေႃၶမ်းၼင်ႇႁိုဝ်တေဢမ်ႇဢဝ်ၵဝ်ၶႃႈၶိုၼ်းၵႂႃႇၵႃႈတီႈႁိူၼ်း ယေႃးၼသၼ်ႇ၊ ႁႂ်ႈလႆႈတၢႆၵႃႈတီႈၼၼ်ႈဢေႃႈ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉမူးမၢတ်ႈၽွင်းမိူင်းတင်းသဵင်ႈတင်းလူင်ဢွၼ်ၵၼ်မႃးတီႈ ယေႇရမိ၊ လႄႈၸႅတ်ႈထၢမ်မၼ်းဢေႃႈ။ မၼ်းၵေႃႈၶိုၼ်းလၢတ်ႈၸွမ်းၵႃႈၼင်ႇဢၼ်ၶုၼ်ႁေႃၶမ်းမီးဢမိင်ႉသင်ႇလၢတ်ႈဝႆႉၼၼ်ႉသေယဝ်ႉ၊ၶဝ်ၼၼ်ႉယင်းဢမ်ႇဢွၼ်ၵၼ်ၸႅတ်ႈထၢမ်ထႅင်ႈလႄႈယူႇဢေႃႈ။ ၽူႈလႂ်သေၵေႃႉသေၵူၼ်းဢမ်ႇႁုလွင်ႈႁုတၢင်းၼၼ်ႉ။-
ၼင်ႇၼၼ်လႄႈ ယေႇရမိ၊ လႆႈယူႇၵႃႈၼႂ်းဝၢင်းထွင်ႇတေႃႇထိုင်ႁွတ်ႈဝၼ်းဢၼ်ဝဵင်း ယေႇရုသလႅမ်ႇ၊ လႆႈၶၢမ်ႇတၢင်းဢၼ်သိမ်းဢဝ်ၼၼ်ႉဢေႃႈ။
ၼႂ်းပီဢၼ် ၸေႇတၵိ၊ ၶုၼ်ႁေႃၶမ်းမိူင်း ယုတႃႉ၊ ၸၢမ်ႇႁၢင်ႈၸၢမ်ႇႁေႃလႆႈၵဝ်ႈပီၼႂ်းလိူၼ်သိပ်းၼၼ်ႉ ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်းမိူင်း ပႃႇပုလုၼ်ႇ၊ ဢိၵ်ႇတင်းႁူဝ်ႁၢၼ်ၵူၼ်းသိုၵ်းမၼ်းတင်းသဵင်ႈတင်းလူင်ဢွၼ်ၵၼ်ၶီႇသိုၵ်းမႃးလႄႈလွမ်ႉဝဵင်း ယေႇရုသလႅမ်ႇ၊ ဝႆႉဢေႃႈ။-
ၼႂ်းပီဢၼ်ၶုၼ်လူင် ၸေႇတၵိ၊ ၸၢမ်ႇႁၢင်ႈၸၢမ်ႇႁေႃလႆႈသိပ်းဢဵတ်းပီၼႂ်းလိူၼ်သီႇ၊ဝၼ်းတီႈၵဝ်ႈၼၼ်ႉလမ်းဝဵင်းလႆႈၶၢမ်ႇတၢင်းဢၼ်ယႃႉပွင်ႇယႃႉလႅဝ်ဢေႃႈ။
ၼႂ်းမိူဝ်ႈဢၼ်ၶဝ်သိမ်းဢဝ်ဝဵင်း ယေႇရုသလႅမ်ႇ၊ ယဝ်ႉၼၼ်ႉ၊မူးမၢတ်ႈၽွင်းမိူင်းၶုၼ်ႁေႃၶမ်းမိူင်း ပႃႇပုလုၼ်ႇ၊ ၵႃႈမီးဢၼ်ဝႃႈ၊ ၼေႇရၵႃႇလႃႉသရေႇၸႃႇ၊သမ်ႇၵႃႇၼိပူဝ်ႇ၊ၸႃႇသၶိမ်ႇ၊ ၵေႃႉဢၼ်ဢုပ်ႉၵႃႈၼိူဝ်ၵူၼ်းထိင်းၼၢင်း၊ ၼေႇရၵႃႇလႃႉသရေႇၸႃႇ၊ ၵေႃႉဢၼ်ဢုပ်ႉၵႃႈၼိူဝ်ၵူၼ်းဢၼ်မီးပိင်ႇၺႃႇ၊ဢိၵ်ႇတင်းမူးမၢတ်ႈၽွင်းမိူင်းၶုၼ်ႁေႃၶမ်းမိူင်း ပႃႇပုလုၼ်ႇ၊ ၵႃႈဢၼ်ၵိုတ်းဢၼ်ၵျၢၼ်ႇၼၼ်ႉဢွၼ်ၵၼ်ၶဝ်ႈၵႃႈၼႂ်းဝဵင်းလႄႈၼင်ႈၵႃႈတီႈ ၽၵ်းတူၶိုင်ႈၵၢင်၊ ၼၼ်ႉဢေႃႈ။-
မိူဝ်ႈဢၼ် ၸေႇတၵိ၊ ၶုၼ်ႁေႃၶမ်းမိူင်း ယုတႃႉ၊ ဢိၵ်ႇတင်းႁူဝ်ႁၢၼ်ၵူၼ်းသိုၵ်းမၼ်းတင်းသဵင်ႈတင်းလူင်ႁၼ်ၶဝ်ၸိူဝ်းၼၼ်ႉၸိုင်၊ၶဝ်ဢွၼ်ၵၼ်ဢွၵ်ႇပၢႆႈၶိင်ႇၵၢင်ၶိုၼ်းဢေႃႈ။ ၶဝ်ဢွၵ်ႇပၢႆႈၸွမ်းသဵၼ်ႈတၢင်းသူၼ်ဢူးယဵၼ်ႇၶုၼ်ႁေႃၶမ်းသေလႄႈဢွၵ်ႇႁူးၽၵ်းတူဝူင်ႈၵၢင်လမ်းဝဵင်းသွင်ဢၼ်သေယဝ်ႉ၊ၸွမ်းသဵၼ်ႈတၢင်းဢၼ်ၵႂႃႇၸူးပၢင်ႇပဵင်း ဢႃႇရၽႃႇ၊ ၼၼ်ႉဢေႃႈ။-
ၵူၺ်းၵႃႈ၊ႁူဝ်ႁၢၼ်ၵူၼ်းသိုၵ်း ၶႃႇလတေး၊ တင်းလၢႆဢွၼ်ၵၼ်လိုပ်ႈၸွမ်းလမ်းၸွမ်းၶဝ်လႄႈၶိုတ်းၶုၼ် ၸေႇတၵိ၊ ၵႃႈၼႂ်းပၢင်ႇပဵင်း ယေႇရိၶူဝ်း၊ သေလႄႈတိၺွပ်းဢဝ်မၼ်းဢေႃႈ။ ၶဝ်ဢွၼ်ၵၼ်ဢဝ်မၼ်းၵႂႃႇၵႃႈတီႈဝဵင်း ရိပလႃႉ၊ မိူင်း ႁႃႇမၢတ်ႈ၊ တီႈဢၼ် ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်းမိူင်း ပႃႇပုလုၼ်ႇ၊ မီးၼၼ်ႉလႄႈၶုၼ်ၼၼ်ႉၸႅတ်ႈထၢမ်ၸီႇယၢင်ႇဢမုမၼ်းဢေႃႈ။-
ၶုၼ်ႁေႃၶမ်းမိူင်း ပႃႇပုလုၼ်ႇ၊ ၼၼ်ႉဢဝ်လုၵ်ႈၸၢႆး ၸေႇတၵိ၊ တင်းလၢႆတၢႆသိုဝ်ႈၼႃႈတႂ်ႈတႃမၼ်းၵႃႈတီႈဝဵင်း ရိပလႃႉ၊ ၼၼ်ႉလႄႈၶုၼ်ႁေႃၶမ်းမိူင်း ပႃႇပုလုၼ်ႇ၊ ဢဝ်မူးမၢတ်ႈၽွင်းမိူင်း ယုတႃႉ၊ တင်းသဵင်ႈတင်းလူင်တၢႆဢေႃႈ။-
ၶုၼ်ၼၼ်ႉ၊ၶွၵ်းဢဝ်ႁူၺ်ႇတႃ ၸေႇတၵိ၊ ဢွၵ်ႇပႅတ်ႈလႄႈဢဝ်ၸိူၵ်ႈတွင်းလိူင်မတ်ႉၽုၵ်ႇမၼ်းသေယဝ်ႉ၊ဢဝ်ၵႂႃႇၵႃႈတီႈဝဵင်း ပႃႇပုလုၼ်ႇ၊ ဢေႃႈ။-
ၵူၼ်း ၶႃႇလတေး၊ တင်းလၢႆဢွၼ်ၵၼ်ဢဝ်ၽႆးတုတ်ႇႁေႃၶမ်း၊ဢိၵ်ႇတင်းႁိူၼ်းၵူၼ်းဝဵင်းတင်းလၢႆလႄႈၵိူၼ်ႇယႃႉလမ်းဝဵင်း ယေႇရုသလႅမ်ႇ၊ ပႅတ်ႈဢေႃႈ။-
မိူဝ်ႈၼၼ်ႉ၊ ၼေႇပုၸႃႇရႃႇတၢၼ်ႇ၊ ဢၼ်ပဵၼ်ၽူႈၵွၼ်းတပ်ႉၼၼ်ႉသိမ်းဢဝ်ၵူၼ်းဢၼ်ယင်းၵိုတ်းယင်းၵျၢၼ်ႇဝႆႉၵႃႈၼႂ်းဝဵင်း၊ဢိၵ်ႇတင်းၶဝ်ၸိူဝ်းဢၼ်ပၢႆႈၵႂႃႇၶဝ်ႈယူႇၽၢႆႇၵူၼ်း ၶႃႇလတေး၊ ၵႃႈမီးၼၼ်ႉဢဝ်ၵႂႃႇၵႃႈတီႈဝဵင်း ပႃႇပုလုၼ်ႇ၊ ဢေႃႈ။-
ၵူၺ်းၵႃႈ၊ ၼေႇပုၸႃႇရႃႇတၢၼ်ႇ၊ ဢဝ်ၶဝ်ၸိူဝ်းဢၼ်ယၢၵ်ႈဢၼ်ၽၢၼ်ဢၼ်ဢမ်ႇမီးဢုၵ်ႉၸႃႇလႃးလႃးၼၼ်ႉၵိုတ်းၵျၢၼ်ႇဝႆႉၵႃႈၼႂ်းမိူင်း ယုတႃႉ၊ လႄႈပၼ်သူၼ်မၢၵ်ႇၸပိတ်ႉ၊ဢိၵ်ႇတင်းႁႆႈၼႃးတီႈၶဝ်ၼၼ်ႉၶိင်ႇလဵဝ်ယၢမ်းလဵဝ်ၵၼ်ဢေႃႈ။
ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်းမိူင်း ပႃႇပုလုၼ်ႇ၊ ၼၼ်ႉသင်ႇလၢတ်ႈလွင်ႈ ယေႇရမိ၊ ဝႆႉတီႈၽူႈၵွၼ်းတပ်ႉမၼ်း ၼေႇပုၸႃႇရႃႇတၢၼ်ႇ၊ လႄႈဝႃႈ၊-
“လူတူၺ်းလုမ်းလႃးမၼ်းဝႆႉလီလီငၢမ်းငၢမ်းတႃႉ။ ယႃႇပေၼိၵ်ႈၸၢၵ်ႈငႅၼ်းသႄးမၼ်း၊ႁဵတ်းၸွမ်းၵႃႈၼင်ႇဢၼ်မၼ်းလၢတ်ႈၼၼ်ႉတႃႉ၊” ဝႃႈၼင်ႇၼႆဢေႃႈ။-
ၼေႇပုၸႃႇရႃႇတၢၼ်ႇ၊ ဢၼ်ပဵၼ်ၽူႈၵွၼ်းတပ်ႉတင်းၶုၼ်သိုၵ်းလူင်မၼ်း ၼေႇပုသႃႇလပၼ်ႇ၊ ပဵၼ်ၵေႃႉဢၼ်ဢုပ်ႉၵႃႈၼိူဝ်ၵူၼ်းဢၼ်ထိင်းၼၢင်း၊ ၼေႇရၵႃႇလႃႉသရေႇၸႃႇ၊ ၵေႃႉဢၼ်ဢုပ်ႉၵႃႈၼိူဝ်ၵူၼ်းမီးပိင်ႇၺႃႇၶဝ်ဢိၵ်ႇတင်းမူးမၢတ်ႈၽွင်းမိူင်းၶုၼ်ႁေႃၶမ်းမိူင်း ပႃႇပုလုၼ်ႇ၊ တင်းသဵင်ႈတင်းလူင်ၼၼ်ႉႁဵတ်းၸိူဝ်ႉၼင်ႇၼၼ်ဢေႃႈ။-
ၶဝ်ပွႆႇၸႂ်ႉၵူၼ်းၵႂႃႇႁႂ်ႈလႆႈၼုၵ်ႈဢဝ် ယေႇရမိ၊ ဢွၵ်ႇသေၵႃႈၼႂ်းဝၢင်းထွင်ႇသေယဝ်ႉ၊ဢွၼ်ၵၼ်ဢဝ်မၼ်းဢၢပ်ႈပၼ်တီႈ ၵေႇတလိ၊ လုၵ်ႈၸၢႆး ဢႁိၵမ်ႇ၊ ဢၼ်ပဵၼ်လုၵ်ႈၸၢႆး သႃႇၽၢၼ်ႇ၊ ၼၼ်ႉႁႂ်ႈလႆႈဢဝ်မၼ်းၵႂႃႇသူင်ႇၵႃႈတီႈႁိူၼ်းမၼ်းၼၼ်ႉဢေႃႈ။ ပိူဝ်ႈၼႆလႄႈ ယေႇရမိ၊ လႆႈယူႇလူၺ်ႈၵၼ်တင်းၵူၼ်းဝၢၼ်ႈၵူၼ်းမိူင်းမၼ်းတင်းလၢႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈ ယေႇရမိ၊ ၼႂ်းမိူဝ်ႈဢၼ်မၼ်းလႆႈၶၢမ်ႇတၢင်းဢၼ်ၶျုၵ်ႈဝႆႉၵႃႈၼႂ်းဝၢင်းထွင်ႇၼၼ်ႉလႄႈဝႃႈ၊-
“မႂ်းၵႂႃႇလႄႈသင်ႇလၢတ်ႈတီႈ ဢေးပတမေႇလႅၵ်ႉ၊ ၵူၼ်းမဵဝ်း ဢေႇတီႇဢူဝ်းပီးယႃး၊ ၼၼ်ႉလႄႈဝႃႈ၊ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊တူၺ်းလူး။ ၸွမ်းၼင်ႇၵႂၢမ်းၵဝ်ၼၼ်ႉၵဝ်တၵ်းႁႂ်ႈပဵၼ်မႃးၵႃႈၼိူဝ်ဝဵင်းၼႆႉပုၼ်ႈဢၼ်တၵ်းပွင်ဢၵျူဝ်းမၼ်းဢမ်ႇၸႂ်ႈ၊ပုၼ်ႈဢၼ်တၵ်းယႃႉဢၵျူဝ်းမၼ်းဢေႃႈ။ ၵႂၢမ်းၵဝ်တၵ်းပျေႉၸုမ်ႇၵႃႈတီႈၽၢႆႇၼႃႈမႂ်းၼႂ်းမိူဝ်ႈဢၼ်မိုဝ်ႉဝၼ်းမၼ်းႁွတ်ႈထိုင်ၼၼ်ႉဢေႃႈ။-
ၼႂ်းဝႃႈၼၼ်သေၵေႃႈ ထႃႇဝရႃႉၽြႃး၊ မီးဢမိင်ႉၸမ်ႉ၊ၼႂ်းမိုဝ်ႉဝၼ်းၼၼ်ႉၵဝ်တၵ်းၵႄႇသႄႇၼုၵ်ႈဢဝ်မႂ်းဢေႃႈ။ မႂ်းတၵ်းဢမ်ႇလႆႈႁွတ်ႈထိုင်ၵႃႈၼႂ်းမိုဝ်းၵူၼ်းၸိူဝ်းဢၼ်မႂ်းၵူဝ်ႁႄၼၼ်ႉ။-
ၵဝ်တၵ်းၵႄႇသႄႇၼုၵ်ႈဢဝ်မႂ်းဢမၢၼ်ႇၶၼ်ပဵၼ်လႄႈမႂ်းတၵ်းဢမ်ႇလႆႈတၢႆလူၺ်ႈလၢပ်ႇလႅဝ်း။ ဢသၢၵ်ႈမႂ်းတၵ်းလႆႈပဵၼ်ၸိူဝ်ႉၼင်ႇသူးလၢပ်ႈဢၼ်လႆႈတီႈပၢင်တိုၵ်းသိုၵ်းၼၼ်ႉဢေႃႈ။ လွင်ႈမၼ်းၸမ်ႉ၊ပဵၼ်ၵွပ်ႈပိူဝ်ႈဢၼ်မႂ်းယုမ်ႇမၢတ်ႈဢိင်ပိုင်ႈၵဝ်ဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈ ယေႇရမိ၊ လိုၼ်းသေဢၼ်ၽူႈၵွၼ်းတပ်ႉ ၼေႇပုၸႃႇရႃႇတၢၼ်ႇ၊ ပွႆႇမၼ်းလွတ်ႈဢွၵ်ႇသေတၢင်းဢၼ်မတ်ႉၽုၵ်ႇဝႆႉ ၵႃႈတီႈဝဵင်း ရႃႇမႃႉ၊ ၼၼ်ႉဢေႃႈ။ မၼ်းယၢမ်ႈလႆႈၶၢမ်ႇတၢင်းဢၼ်သိမ်းဢဝ်ၵႂႃႇၵႃႈတီႈဝဵင်း ရႃႇမႃႉ၊ ႁူမ်ႈလူၺ်ႈၵၼ်တင်းၵူၼ်းမိူင်း ယုတႃႉ၊ ၵူၼ်းဝဵင်း ယေႇရုသလႅမ်ႇ၊ ဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇပဵၼ်ၶႃႈၵႃႈတီႈဝဵင်း ပႃႇပုလုၼ်ႇ၊ ၼၼ်ႉဢေႃႈ။
ၽူႈၵွၼ်းတပ်ႉၼၼ်ႉႁွင်ႉဢဝ် ယေႇရမိ၊ လႄႈလၢတ်ႈဝႃႈ၊ “ ထႃႇဝရႃႉၽြႃး၊ ၽြႃးပဵၼ်ၸဝ်ႈမႂ်းၼၼ်ႉၸီႇယၢင်ႇမွၵ်ႇလၢတ်ႈဢမုဢၼ်ႁွတ်ႈထိုင်ၵႃႈတီႈမိူင်းၼႆႉၼၼ်ႉထႃႈဝႆႉယဝ်ႉ။-
ထႃႇဝရႃႉၽြႃး၊ ႁႂ်ႈဢမုၼၼ်ႉႁွတ်ႈထိုင်လႄႈၸီႇယၢင်ႇႁဵတ်းၸွမ်းၵႃႈၼင်ႇဢၼ်မၼ်းၸဝ်ႈမွၵ်ႇလၢတ်ႈၼၼ်ႉယဝ်ႉ။ ၵွပ်ႈပိူဝ်ႈသူတင်းလၢႆယင်းဢမ်ႇထွမ်ႇဢဝ်ဢမိင်ႉၸဝ်ႈလႄႈၽိတ်းပိူင်ႈတီႈ ထႃႇဝရႃႉၽြႃး၊ ၼၼ်ႉလႄႈဢမုၼႆႉႁွတ်ႈထိုင်ၵႃႈၼိူဝ်သူယဝ်ႉ။-
မိူဝ်ႈလဵဝ်ၼႆႉၵဝ်တၵ်းၵႄႈၸိူၵ်ႈလဵၵ်းဢၼ်မတ်ႉၽုၵ်ႇၵႃႈတီႈမိုဝ်းမႂ်းၼၼ်ႉပႅတ်ႈဢေႃႈ။ ပေႃးမႂ်းၶႂ်ႈၸွမ်းလူၺ်ႈၵဝ်ၵႂႃႇၵႃႈတီႈဝဵင်း ပႃႇပုလုၼ်ႇ၊ ၸိုင်၊ၸွမ်းၵႂႃႇတႃႉ။ ၵဝ်တၵ်းလူတူၺ်းလုမ်းလႃးမႂ်းလီလီငၢမ်းငၢမ်းဢေႃႈ။ ပေႃးမႂ်းဢမ်ႇၶႂ်ႈၸွမ်းၵႂႃႇၵႃႈတီႈဝဵင်း ပႃႇပုလုၼ်ႇ၊ ၸိုင်၊ယႃႇပေၸွမ်း။ မိူင်း ယုတႃႉ၊ တင်းမိူင်းတီႈဢၼ်မႂ်းထၢင်ႇပဵၼ်ဢၼ်လီဢၼ်ငၢမ်းလႄႈထုၵ်ႇလီၵႂႃႇၼၼ်ႉၸိုင်၊ၵႂႃႇၸူးၵႃႈတီႈၼၼ်ႈသေၵမ်း၊” ဝႃႈၼင်ႇၼႆဢေႃႈ။
ၼႂ်းမိူဝ်ႈဢၼ် ယေႇရမိ၊ ဢမ်ႇၶိုၼ်းလၢတ်ႈၵႃႈသင်ၼၼ်ႉၸိုင်၊ ၼေႇပုၸႃႇရႃႇတၢၼ်ႇ၊ ၼၼ်ႉလၢတ်ႈထႅင်ႈလႄႈဝႃႈ၊ “မႂ်းၶိုၼ်းမိူဝ်းၵႂႃႇၸူးၵႃႈတီႈ ၵေႇတလိ၊ လုၵ်ႈၸၢႆး ဢႁိၵမ်ႇ၊ လၢၼ်ၸၢႆး သႃႇၽၢၼ်ႇ၊ ဢၼ်ၶုၼ်ႁေႃၶမ်းမိူင်း ပႃႇပုလုၼ်ႇ၊ ၶၢၼ်းဝႆႉႁႂ်ႈပဵၼ်ၵေႃႉဢုပ်ႉထိင်းၵႃႈၼိူဝ်ဝဵင်းဢၼ်မီးၵႃႈၼႂ်းမိူင်း ယုတႃႉ၊ တင်းလၢႆၸိူဝ်းၼၼ်ႉလႄႈယူႇလူၺ်ႈၵၼ်တင်းမၼ်းၼၼ်ႉၵႃႈၼႂ်းၵႄႈဝူင်ႈၵၢင်ၵူၼ်းဝၢၼ်ႈၵူၼ်းမိူင်းတင်းလၢႆသေၵမ်း၊ဢမ်ႇၼၼ်ၵေႃႈၵႂႃႇၵႃႈတီႈဢၼ်မႂ်းထၢင်ႇဝႃႈ၊တီႈဢၼ်ထုၵ်ႇလီၵႂႃႇယူႇၼၼ်ႉသေၵမ်း၊” ဝႃႈၼင်ႇၼႆဢေႃႈ။ ၼင်ႇၼၼ်လႄႈ ၼေႇပုၸႃႇရႃႇတၢၼ်ႇ၊ ပၼ်ၸရိပ်ႈတၢင်းၵိၼ်၊ဢိၵ်ႇတင်းလၢၵ်ႈသွင်ႇတီႈ ယေႇရမိ၊ သေလႄႈပွႆႇမၼ်းၵႂႃႇသေဢေႃႈ။-
မိူဝ်ႈၼၼ်ႉ၊ ယေႇရမိ၊ ၵႂႃႇၸူးၵႃႈတီႈ ၵေႇတလိ၊ လုၵ်ႈၸၢႆး ဢႁိၵမ်ႇ၊ ၵႃႈတီႈဝဵင်း မိၸပႃႇ၊ ၼၼ်ႉလႄႈယူႇလူၺ်ႈၵၼ်တင်းၵူၼ်းတင်းလၢႆဢၼ်ယင်းၵိုတ်းယင်းၵျၢၼ်ႇၵႃႈၼႂ်းမိူင်းၼၼ်ႉဢေႃႈ။
မိူဝ်ႈၼၼ်ႉ၊ၽူႈၵွၼ်းတပ်ႉဢိၵ်ႇတင်းႁူဝ်ႁၢၼ်ၵူၼ်းသိုၵ်းၵမ်ႈၽွင်ႈဢၼ်မီးၵႃႈၼႂ်းထိူၼ်ႇၸိူဝ်းၼၼ်ႉလႆႈငိၼ်းလွင်ႈဢၼ်ၶုၼ်ႁေႃၶမ်းမိူင်း ပႃႇပုလုၼ်ႇ၊ ဢဝ် ၵေႇတလိ၊ လုၵ်ႈၸၢႆး ဢႁိၵမ်ႇ၊ ၶၢၼ်းဝႆႉႁႂ်ႈပဵၼ်ၵေႃႉဢၼ်ဢုပ်ႉၵႃႈၼိူဝ်ဝၢၼ်ႈမိူင်းသေယဝ်ႉ၊ဢဝ်ၵူၼ်းၸၢႆးၵူၼ်းယိင်း၊လုၵ်ႈဢွၼ်ႇ၊ၵူၼ်းဢၼ်ယၢၵ်ႈဢၼ်ၽၢၼ်ဢၼ်ဢမ်ႇပႃးလူၺ်ႈၵၼ်တင်းၶဝ်ၸိူဝ်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၵႃႈတီႈမိူင်း ပႃႇပုလုၼ်ႇ၊ ၸိူဝ်းၼၼ်ႉဢၢပ်ႈဝႆႉၵႃႈၼႂ်းမိုဝ်း ၵေႇတလိ၊ ဢေႃႈ။-
ပိူဝ်ႈၼႆလႄႈ ဢိသမေႇလႃႉ၊ လုၵ်ႈၸၢႆး ၼေႇသၼိ၊ယေႃးႁၼၼ်ႇ၊ လုၵ်ႈၸၢႆး ၵႃႇရႃႇ၊ၸရႃႇယႃႉ၊ လုၵ်ႈၸၢႆး တႃႇၼုမိတ်ႉ၊ လုၵ်ႈၸၢႆး ဢေးၽေႇ၊ ၵူၼ်းဝဵင်း ၼေႇတေႃႇၽႃႉ၊ တင်းလၢႆ၊ ယေႇၸၼိ၊ လုၵ်ႈၸၢႆးၵူၼ်းမဵဝ်း မႃႇၶႃႇသိ၊ ၸိူဝ်းၼၼ်ႉဢိၵ်ႇလူၺ်ႈၵၼ်တင်းၵူၼ်းၶဝ်တင်းလၢႆဢွၼ်ၵၼ်မႃးၸူးၵႃႈတီႈ ၵေႇတလိ၊ ၵႃႈတီႈဝဵင်း မိၸပႃႇ၊ ၼၼ်ႉဢေႃႈ။-
ၵေႇတလိ၊ လုၵ်ႈၸၢႆး ဢႁိၵမ်ႇ၊ လၢၼ်ၸၢႆး သႃႇၽၢၼ်ႇ၊ ၼၼ်ႉတိူင်ႇၵၢဝ်ႇဝႆႉၵတိတီႈၶဝ်၊ဢိၵ်ႇတင်းၵႃႈတီႈၵူၼ်းၶဝ်တင်းလၢႆလႄႈဝႃႈ၊ “သူယႃႇပေဢွၼ်ၵၼ်မႆႈၸႂ်ပုၼ်ႈတေလႆႈၵိုတ်ႉႁၢပ်ႇဢမုၵူၼ်းမဵဝ်း ၶႃႇလတေး၊ ၼၼ်ႉသေၵမ်း။ ဢွၼ်ၵၼ်ယူႇၵႃႈၼႂ်းမိူင်းၼႆႉလႄႈၵိုတ်ႉႁၢပ်ႇဢမုၶုၼ်ႁေႃၶမ်းမိူင်း ပႃႇပုလုၼ်ႇ၊ ၵႂႃႇတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊တၵ်းပဵၼ်ဢၼ်ၵတ်းယဵၼ်ၶျၢမ်းသႃႇပုၼ်ႈသူဢေႃႈ။-
ၵဝ်ၸမ်ႉ၊တၵ်းယူႇၵႃႈတီႈဝဵင်း မိၸပႃႇ၊ ၼႆႉႁႂ်ႈလႆႈၶၢမ်ႇဢဝ်ဢမိင်ႉၵူၼ်း ၶႃႇလတေး၊ တင်းလၢႆဢၼ်တၵ်းမႃးၸူးတီႈႁဝ်းၼၼ်ႉဢေႃႈ။ သူၸမ်ႉ၊ဢွၼ်ၵၼ်သိမ်းဢဝ်ၼမ်ႉမၢၵ်ႇၸပိတ်ႉ၊မၢၵ်ႇမႆႉဢၼ်ဢွၵ်ႇၼႂ်းၶိင်ႇမႆႈၶိင်ႇႁိုဝ်ႉ၊ဢိၵ်ႇတင်းၼမ်ႉမၼ်းသၢၼ်ႇလုၼ်ႇလႄႈၵဵပ်းသႂ်ႇဝႆႉၵႃႈၼႂ်းမေႃႈသူဢုမ်သူသေယဝ်ႉ၊ယူႇၵႃႈၼႂ်းဝဵင်းဢၼ်သူၶိုၼ်းၶဝ်ႈယူႇမိူဝ်ႈလဵဝ်ၼႆႉၸိူဝ်းၼၼ်ႉတႃႉ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉၵူၼ်း ယုတႃႉ၊ ၵႃႈဢၼ်မီးယူႇၵႃႈၼႂ်းမိူင်း မေႃႇၽႃႉ၊ ၵႃႈၼႂ်းမိူင်း ဢမ်ႇမုၼ်ႇ၊ ၵႃႈၼႂ်းမိူင်း ဢေႇတုမ်ႇ၊ ဢိၵ်ႇတင်းၵႃႈၼႂ်းၵူႈသိုင်ႇၵူႈမိူင်းၸိူဝ်းၼၼ်ႉငိၼ်းလွင်ႈဢၼ်ၶုၼ်ႁေႃၶမ်းမိူင်း ပႃႇပုလုၼ်ႇ၊ ႁႂ်ႈၵူၼ်းၵမ်ႈၽွင်ႈၵိုတ်းၵျၢၼ်ႇဝႆႉၵႃႈၼႂ်းမိူင်း ယုတႃႉ၊ လႄႈဢဝ် ၵေႇတလိ၊ လုၵ်ႈၸၢႆး ဢႁိၵမ်ႇ၊ ဢၼ်ပဵၼ်လၢၼ်ၸၢႆး သႃႇၽၢၼ်ႇ၊ ၼၼ်ႉၶၢၼ်းဝႆႉႁႂ်ႈပဵၼ်ၶုၼ်ၵႃႈၼိူဝ်ၶဝ်ၼၼ်ႉဢေႃႈ။-
ၵူၼ်း ယုတႃႉ၊ တင်းသဵင်ႈတင်းလူင်လုၵ်ႉသေၵႃႈတီႈမိူင်းဢၼ်ၶဝ်လႆႈၶၢမ်ႇတၢင်းဢၼ်လိုပ်ႈဢွၵ်ႇၵႂႃႇၸိူဝ်းၼၼ်ႉၶိုၼ်းမႃးၸူးၵႃႈတီႈမိူင်း ယုတႃႉ၊ ဢေႃႈ။ ၶဝ်မႃးၸူးၵႃႈတီႈ ၵေႇတလိ၊ ၵႃႈတီႈၼႂ်းဝဵင်း မိၸပႃႇ၊ ၼၼ်ႉသေလႄႈဢွၼ်ၵၼ်သိမ်းဢဝ်ၼမ်ႉမၢၵ်ႇၸပိတ်ႉ ဢိၵ်ႇတင်းမၢၵ်ႇမႆႉဢၼ်ဢွၵ်ႇၼႂ်းၶိင်ႇမႆႈၶိင်ႇႁိုဝ်ႉၼမ်ၼႃႇလူင်လၢင်ၼၼ်ႉဢေႃႈ။
လိုၼ်းသေ ယေႃးႁၼၼ်ႇ၊ လုၵ်ႈၸၢႆး ၵႃႇရႃႇ၊ တင်းၽူႈၵွၼ်းတပ်ႉၵႃႈဢၼ်မီးၵႃႈတီႈၼႂ်းထိူၼ်ႇၸိူဝ်းၼၼ်ႉဢွၼ်ၵၼ်မႃးၸူးၵႃႈတီႈ ၵေႇတလိ၊ ၵႃႈတီႈဝဵင်း မိၸပႃႇ၊ ၼၼ်ႉလႄႈလဝ်ႈထၢမ်လႄႈဝႃႈ၊-
“ၸဝ်ႈႁဝ်းႁုလွင်ႈဢၼ် ပႃႇလဵတ်ႉ၊ ၶုၼ်ႁေႃၶမ်း ဢမ်ႇမုၼ်ႇ၊ ပွႆႇၸႂ်ႉ ဢိသမေႇလႃႉ၊ လုၵ်ႈၸၢႆး ၼႃႇသၼိ၊ သေလႄႈမႃးႁႂ်ႈလႆႈဢဝ်ၸဝ်ႈႁဝ်းတၢႆၼၼ်ႉမၢၼ်ႇၶၼ်ပဵၼ်ယဝ်ႉၶႃႈႁိုဝ်း၊” ဝႃႈၼင်ႇၼႆဢေႃႈ။ ၵူၺ်းၵႃႈ၊ ၵေႇတလိ၊ လုၵ်ႈၸၢႆး ဢႁိၵမ်ႇ၊ ၼၼ်ႉဢမ်ႇယုမ်ႇၵႂၢမ်းၶဝ်။-
မိူဝ်ႈၼၼ်ႉ၊ ယေႃးႁၼၼ်ႇ၊ လုၵ်ႈၸၢႆး ၵႃႇရႃႇ၊ ၼၼ်ႉလွမ်လဝ်ႈလၢတ်ႈတီႈ ၵေႇတလိ၊ ၵႃႈၼႂ်းဝဵင်း မိၸပႃႇ၊ လႄႈဝႃႈ၊ “ပၼ်ဢၶႂၢင်ႉႁႂ်ႈၵဝ်ၶႃႈလႆႈၵႂႃႇဢဝ် ဢိသမေႇလႃႉ၊ လုၵ်ႈၸၢႆး ၼေႇသၼိ၊ ၼၼ်ႉတၢႆသေၵမ်း။ ၽူႈလႂ်သေၵေႃႉသေၵူၼ်းဢမ်ႇလႆႈႁုလွင်ႈမၼ်းၶႃႈၵူၺ်း။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမၼ်းတၵ်းလႆႈဢဝ်ၸဝ်ႈႁဝ်းတၢႆႁႂ်ႈၵူၼ်း ယုတႃႉ၊ ၵႃႈဢၼ်ၸုၵၼ်တုမ်ၵၼ်ယူႇၵႃႈတီႈၸဝ်ႈႁဝ်းၸိူဝ်းၼႆႉလႆႈၶၢမ်ႇတၢင်းဢၼ်ဢဝ်ၸၢတ်ႇပိုၼ်ၽၢတ်ႇၽႄၵၼ်ပႅတ်ႈသေယဝ်ႉ၊ႁႂ်ႈၵူၼ်းဢၼ်ၵိုတ်းဢၼ်ၵျၢၼ်ႇၵႃႈတီႈမိူင်း ယုတႃႉ၊ ၼႆႉၸိူဝ်းၼၼ်ႉလႆႈလုလႅဝ်ၸိူဝ်ႉၼင်ႇႁိုဝ်ၶႃႈ၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊ ၵေႇတလိ၊ လုၵ်ႈၸၢႆး ဢႁိၵမ်ႇ၊ ၶိုၼ်းလၢတ်ႈတီႈ ယေႃးႁၼၼ်ႇ၊ လုၵ်ႈၸၢႆး ၵႃႇရႃႇ၊ လႄႈဝႃႈ၊ “မႂ်းဢမ်ႇလႆႈႁဵတ်းၸိူဝ်ႉၼင်ႇၼၼ်။ မႂ်းလၢတ်ႈၵႂၢမ်းဢၼ်ဢမ်ႇၸိုဝ်ႈဢမ်ႇၸႂ်ႈလူၺ်ႈလွင်ႈ ဢိသမေႇလႃႉ၊ ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၼႂ်းလိူၼ်တီႈၸဵတ်းၼၼ်ႉ ဢိသမေႇလႃႉ၊ လုၵ်ႈၸၢႆး ၼေႇသၼိ၊ လၢၼ်ၸၢႆး ဢေးလိသမႃႇ၊ ဢၼ်ပဵၼ်ၸိူဝ်ႉၸဝ်ႈၶိူဝ်းၸဝ်ႈဢၼ်ၶဝ်ႈပႃးၵႃႈၼႂ်းၶဝ်ၸိူဝ်းဢၼ်မီးဢရႃႇဢၼ်ယႂ်ႇတီႈၶုၼ်ႁေႃၶမ်းၼၼ်ႉပႃးဢဝ်ၵူၼ်းသိပ်းၼိုင်ႈသေလႄႈမႃးၸူးၵႃႈတီႈ ၵေႇတလိ၊ လုၵ်ႈၸၢႆး ဢႁိၵမ်ႇ၊ ၵႃႈတီႈဝဵင်း မိၸပႃႇ၊ ၼၼ်ႉဢေႃႈ။ မိူဝ်ႈဢၼ်ၶဝ်ၵိၼ်လူၺ်ႈၵၼ်ယူႇၵႃႈတီႈဝဵင်း မိၸပႃႇ၊ ၼၼ်ႉၸိုင်၊-
ဢိသမေႇလႃႉ၊ လုၵ်ႈၸၢႆး ၼေႇသၼိ၊ ဢိၵ်ႇတင်းၵူၼ်းမၼ်းသိပ်းၼိုင်ႈၼၼ်ႉဢွၼ်ၵၼ်လုၵ်ႉလႄႈဢဝ်လၢပ်ႇၽၼ်းတၢႆ ၵေႇတလိ၊ လုၵ်ႈၸၢႆး ဢႁိၵမ်ႇ၊ လၢၼ်ၸၢႆး သႃႇၽၢၼ်ႇ၊ ၵေႃႉဢၼ်ၶုၼ်ႁေႃၶမ်းမိူင်း ပႃႇပုလုၼ်ႇ၊ ၶၢၼ်းဝႆႉႁႂ်ႈလႆႈဢုပ်ႉၵႃႈၼိူဝ်မိူင်းၶဝ်ၼၼ်ႉဢေႃႈ။-
ဢိသမေႇလႃႉ၊ ၼၼ်ႉဢဝ်တၢႆပႅတ်ႈၵူၼ်း ယုတႃႉ၊ ၵႃႈဢၼ်မီးလူၺ်ႈၵၼ်တင်း ၵေႇတလိ၊ ၵႃႈၼႂ်းဝဵင်း မိၸပႃႇ၊ ဢိၵ်ႇတင်းႁူဝ်ႁၢၼ်ၵူၼ်းသိုၵ်း ၶႃႇလတေး၊ ၵႃႈဢၼ်မၼ်းထူပ်းႁၼ်ၸိူဝ်းၼၼ်ႉတင်းသဵင်ႈတင်းမူတ်းဢေႃႈ။
ဝၢႆးသေဢဝ် ၵေႇတလိ၊ တၢႆယဝ်ႉဝၼ်းၼိုင်ႈၼၼ်ႉၽူႈလႂ်ဢမ်ႇပႆႇႁုလွင်ႈဢမုၼႆႉၼၼ်ႉ။-
ၵူၼ်းပႅတ်ႇသိပ်းၵေႃႉဢၼ်လုၵ်ႉသေၵႃႈတီႈဝဵင်း သေးၶိမ်ႇ၊ ဝဵင်း သိလေႃႇ၊ ဝဵင်း သမႃႇရိ၊ ၼၼ်ႉႁွတ်ႈမႃးဢေႃႈ။ ၶဝ်ၼၼ်ႉထႃၼူတ်ႇၵၢင်းၶဝ်သေလႄႈၼုင်ႈၶူဝ်းၼုင်ႈဢၼ်ယွၵ်းဢၼ်ၶၢတ်ႇသေယဝ်ႉ၊တူဝ်ၶိင်းၶဝ်ၵေႃႈ တိူဝ်ႉမၢတ်ႇဝႆႉဢေႃႈ။ ၶဝ်ပႃးဢဝ်ၶိူင်ႈတၢင်းလူႇ ဢိၵ်ႇတင်းၼၢမ်ႇသႃႇႁႂ်ႈလႆႈဢဝ်မႃးၵႃႈတီႈၵျွင်းပိၵ်ႈမၢၵ်ႇ ထႃႇဝရႃႉၽြႃး၊ ပုၼ်ႈတၵ်းသၢၵ်ႈလူႇဢေႃႈ။-
ဢိသမေႇလႃႉ၊ လုၵ်ႈၸၢႆး ၼေႇသၼိ၊ ၼၼ်ႉဢွၵ်ႇသေၵႃႈတီႈဝဵင်း မိၸပႃႇ၊ ၵႂႃႇႁႂ်ႈလႆႈႁပ်ႉႁူဝ်တၢင်းၶဝ်ၼၼ်ႉႁွင်ႉႁႆႈၸွမ်းတၢင်းၵႂႃႇဢေႃႈ။ မၼ်းထူပ်းႁၼ်ၶဝ်ၼၼ်ႉသေယဝ်ႉ၊လၢတ်ႈတီႈၶဝ်လႄႈဝႃႈ၊ “ဢွၼ်ၵၼ်မႃးၸူးၵႃႈတီႈ ၵေႇတလိ၊ လုၵ်ႈၸၢႆး ဢႁိၵမ်ႇ၊ တႃႉ၊” ဝႃႈၼင်ႇၼႆဢေႃႈ။-
ၶဝ်ၼၼ်ႉႁွတ်ႈထိုင်ၵႃႈၼႂ်းဝဵင်းသေယဝ်ႉ၊ ဢိသမေႇလႃႉ၊ လုၵ်ႈၸၢႆး ၼေႇသၼိ၊ ဢိၵ်ႇတင်းၵူၼ်းဢၼ်ပႃးၸွမ်းမၼ်းၸိူဝ်းၼၼ်ႉဢွၼ်ၵၼ်ဢဝ်ၶဝ်တၢႆလႄႈဢဝ်ပႅတ်ႈတူၵ်းၵႃႈၼႂ်းထၢင်လိၼ်ၶုမ်လိၼ်သေဢေႃႈ။
ၵူၼ်းသိပ်းၼိုင်ႈဢၼ်ပႃးၵႃႈၼႂ်းၶဝ်ၼၼ်ႉလၢတ်ႈလႄႈဝႃႈ၊ “ယႃႇပေဢဝ်ႁဝ်းၶႃႈတၢႆသေၵမ်း။ ႁဝ်းၶႃႈမီးၶဝ်ႈၵျုင်ႇ၊ၶဝ်ႈမုယေႃး၊ၼမ်ႉမၼ်းတင်းၼမ်ႉၽိုင်ႈဢၼ်သိူင်ႇဝႆႉသိမ်းဝႆႉၵႃႈၼႂ်းထိူၼ်ႇဢေႃႈ၊” ဝႃႈၼင်ႇၼႆဢေႃႈ။ ပိူဝ်ႈၼႆလႄႈမၼ်းဢမ်ႇဢဝ်ၶဝ်တၢႆၸွမ်းၵၼ်တင်းၵေႃႉသႄႈၶဝ်ဢေႃႈ။-
ႁူးၶုမ်လိၼ်ဢၼ် ဢိသမေႇလႃႉ၊ ဢဝ်တူဝ်တၢႆၵူၼ်းဢၼ်မၼ်းဢဝ်တၢႆၸိူဝ်းၼၼ်ႉပႅတ်ႈတူၵ်းသႂ်ႇၼၼ်ႉ၊ပဵၼ်ႁူးၶုမ်ဢၼ်ယႂ်ႇဢၼ်ၶုၼ်လူင် ဢႃႇသႃႉ၊ ၶုတ်းဝႆႉပုၼ်ႈတၵ်းႁႄႉၵင်ႈၽေးၶုၼ်ႁေႃၶမ်း ပႃႇသႃႇ၊ ဢၼ်ဢုပ်ႉပိူင်ႇမိူင်း ဢိသရေး၊ ၼၼ်ႉဢေႃႈ။ ႁူးၶုမ်ၼၼ်ႉၸမ်ႉ၊ ဢိသမေႇလႃႉ၊ လုၵ်ႈၸၢႆး ၼေႇသၼိ၊ ဢဝ်တူဝ်တၢႆတင်းလၢႆသႂ်ႇတဵမ်ဝႆႉဢေႃႈ။-
မိူဝ်ႈၼၼ်ႉ၊ ဢိသမေႇလႃႉ၊ တိဢဝ်ၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇဢၼ်မီးၵႃႈတီႈဝဵင်း မိၸပႃႇ၊ ဢၼ်ဝႃႈ၊လုၵ်ႈယိင်းၶုၼ်လူင်တင်းလၢႆ၊ဢိၵ်ႇတင်းၶဝ်ၵႃႈဢၼ်ၵိုတ်းယူႇသဝ်းယူႇၵႃႈတီႈဝဵင်း မိၸပႃႇ၊ ဢၼ်ၽူႈၵွၼ်းတပ်ႉ ၼေႇပုၸႃႇရႃႇတၢၼ်ႇ၊ ဢဝ်ဢၢပ်ႈဝႆႉၵႃႈတီႈ ၵေႇတလိ၊ လုၵ်ႈၸၢႆး ဢႁိၵမ်ႇ၊ ၸိူဝ်းၼၼ်ႉဢေႃႈ။ ၼင်ႇၼၼ်လႄႈ ဢိသမေႇလႃႉ၊ လုၵ်ႈၸၢႆး ၼေႇသၼိ၊ သိမ်းဢဝ်ၶဝ်ဢွၵ်ႇၵႂႃႇၸူးၵႃႈတီႈၵူၼ်းမဵဝ်း ဢမ်ႇမုၼ်ႇ၊ တင်းလၢႆသေဢေႃႈ။
မိူဝ်ႈဢၼ် ယေႃးႁၼၼ်ႇ၊ လုၵ်ႈၸၢႆး ၵႃႇရႃႇ၊ ဢိၵ်ႇတင်းၽူႈၵွၼ်းတပ်ႉၵႃႈဢၼ်မီးၵႃႈတီႈမၼ်းၸိူဝ်းၼၼ်ႉငိၼ်းလွင်ႈဢမုဢၼ်ႁၢႆႉယုတ်ႈၵူႈၸိူဝ်ႉၵူႈပိူင်ဢၼ် ဢိသမေႇလႃႉ၊ လုၵ်ႈၸၢႆး ၼေႇသၼိ၊ ႁဵတ်းၼၼ်ႉၸိုင်၊-
ၶဝ်ဢွၼ်ၵၼ်ႁွင်ႉဢဝ်ၵူၼ်းတင်းသဵင်ႈတင်းလူင်ဢွၵ်ႇၵႂႃႇႁႂ်ႈလႆႈတိုၵ်းတေႃး ဢိသမေႇလႃႉ၊ လုၵ်ႈၸၢႆး ၼေႇသၼိ၊ ၼၼ်ႉဢေႃႈ။ ၶဝ်ႁူပ်ႉထူပ်းမၼ်းၵႃႈတီႈႁိမ်းၼမ်ႉၼွင်ဢၼ်ယႂ်ႇၼႃႇၵႃႈၼႂ်းဝဵင်း ၵိပွင်ႇ၊ ၼၼ်ႉဢေႃႈ။-
မိူဝ်ႈဢၼ်ၶဝ်ၸိူဝ်းဢၼ်ပႃးလူၺ်ႈၵၼ်တင်း ဢိသမေႇလႃႉ၊ ၵႃႈမီးၼၼ်ႉႁၼ် ယေႃးႁၼၼ်ႇ၊ လုၵ်ႈၸၢႆး ၵႃႇရႃႇ၊ ဢိၵ်ႇတင်းၽူႈၵွၼ်းတပ်ႉၵႃႈဢၼ်ပႃးလူၺ်ႈၵၼ်တင်းမၼ်းၸိူဝ်းၼၼ်ႉၸိုင်၊ၶဝ်ဢွၼ်ၵၼ်မီးတၢင်းဢၼ်ၸူမ်းသိူဝ်းဢေႃႈ။-
မိူဝ်ႈၼၼ်ႉ၊ၵူၼ်းၵႃႈဢၼ် ဢိသမေႇလႃႉ၊ သိမ်းဢဝ်သေၵႃႈတီႈဝဵင်း မိၸပႃႇ၊ ၵႂႃႇၸိူဝ်းၼၼ်ႉဢွၼ်ၵၼ်ဢွၵ်ႇပၢႆႈသေၵႃႈတီႈမၼ်းလႄႈဝၢႆႇၶိုၼ်းမႃးၸူးၵႃႈတီႈ ယေႃးႁၼၼ်ႇ၊ လုၵ်ႈၸၢႆး ၵႃႇရႃႇ၊ ဢေႃႈ။-
ၵူၺ်းၵႃႈ၊ ဢိသမေႇလႃႉ၊ လုၵ်ႈၸၢႆး ၼေႇသၼိ၊ ဢိၵ်ႇလူၺ်ႈၵၼ်တင်းၵူၼ်းပႅတ်ႇၵေႃႉလွတ်ႈဢွၵ်ႇသေၵႃႈၼႂ်းမိုဝ်း ယေႃးႁၼၼ်ႇ၊ လႄႈၵႂႃႇၸူးၵႃႈတီႈၵူၼ်းမဵဝ်း ဢမ်ႇမုၼ်ႇ၊ ဢေႃႈ။
မိူဝ်ႈၼၼ်ႉ၊ ယေႃးႁၼၼ်ႇ၊ လုၵ်ႈၸၢႆး ၵႃႇရႃႇ၊ ဢိၵ်ႇတင်းၽူႈၵွၼ်းတပ်ႉၵႃႈဢၼ်မီးလူၺ်ႈၵၼ်တင်းမၼ်းၸိူဝ်းၼၼ်ႉဢွၼ်ၵၼ်ဢဝ်ၵူၼ်းဢၼ်ၵိုတ်းဢၼ်ၵျၢၼ်ႇၼႂ်းၶဝ်ၸိူဝ်းဢၼ် ဢိသမေႇလႃႉ၊ သိမ်းဢဝ်ၵႂႃႇသေၵႃႈတီႈဝဵင်း မိၸပႃႇ၊ ဝၢႆးသေမၼ်းဢဝ် ၵေႇတလိ၊ တၢႆၼၼ်ႉ၊ ယေႃးႁၼၼ်ႇ၊ ဢွၼ်ဢဝ်လုၵ်ႈသိုၵ်းမၼ်းလႂ်၊မႄႈယိင်းလႂ်၊လုၵ်ႈဢွၼ်ႇလႂ်၊ဢိၵ်ႇတင်းၵူၼ်းဢၼ်ထိင်းၼၢင်းလႂ်ၸိူဝ်းၼၼ်ႉဢွၵ်ႇသေဝဵင်း ၵိပွင်ႇ၊ မႃးဢေႃႈ။-
ၶဝ်ဢွၼ်ၵၼ်ဢွၵ်ႇၵႂႃႇၸွမ်းသဵၼ်ႈတၢင်းဢၼ်ၵႂႃႇမိူင်း ဢေးၵျိပ်ႉ၊ လႄႈၵိုတ်းသဝ်းၵႃႈတီႈဝၢၼ်ႈ ၶိမ်ႁမ်ႇ၊ ဢၼ်ၸမ်ၵၼ်တင်းဝဵင်း ပႅတ်ႉလႁႅမ်ႇ၊ ၼၼ်ႉဢေႃႈ။ ၼင်ႇႁိုဝ်တေၵႆယၢၼ်ၵၼ်တင်းၽေးၵူၼ်းမဵဝ်း ပႃႇပုလုၼ်ႇ၊ ၼၼ်ႉၶဝ်တၵ်းတေၵႂႃႇတီႈမိူင်း ဢေးၵျိပ်ႉ၊ ဢေႃႈ။-
လွင်ႈမၼ်းၸမ်ႉ၊ၶဝ်ၵူဝ်ႁႄၵူၼ်းမဵဝ်း ပႃႇပုလုၼ်ႇ၊ ၼၼ်ႉၵွပ်ႈပိူဝ်ႈ ဢိသမေႇလႃႉ၊ လုၵ်ႈၸၢႆး ၼေႇသၼိ၊ ဢဝ် ၵေႇတလိ၊ တၢႆဢၼ်ပဵၼ်လုၵ်ႈၸၢႆး ဢႁိၵမ်ႇ၊ လႄႈပဵၼ်ၵေႃႉဢၼ်ၶုၼ်ႁေႃၶမ်းမိူင်း ပႃႇပုလုၼ်ႇ၊ ၶၢၼ်းမၼ်းဝႆႉႁႂ်ႈပဵၼ်ၶုၼ်ဢၼ်ဢုပ်ႉပိူင်ႇၵႃႈၼိူဝ်မိူင်းၶဝ်ၼၼ်ႉဢေႃႈ။
မိူဝ်ႈၼၼ်ႉၽူႈၵွၼ်းတပ်ႉၵႃႈမီး၊ဢိၵ်ႇတင်း ယေႃးႁၼၼ်ႇ၊ လုၵ်ႈၸၢႆး ၵႃႇရႃႇ၊ ဢႃႇၸရိ၊ လုၵ်ႈၸၢႆး ႁေႃးသႃႇယႃႉ၊ တင်းၵူၼ်းလူင်ၵူၼ်းဢွၼ်ႇတင်းသဵင်ႈတင်းလူင်ၸိူဝ်းၼၼ်ႉဢွၼ်ၵၼ်သုတ်ႉၸပ်းသုတ်ႉၸူးလႄႈလၢတ်ႈတီႈပရေႃးၽႅတ်ႈ ယေႇရမိ၊ လႄႈဝႃႈ၊-
“ၵႃႈၼင်ႇဢၼ်ႁဝ်းၶႃႈတၢင်ႇလဝ်ႈတီႈၸဝ်ႈၼၼ်ႉၶႅၼ်းတေႃႈႁဵတ်းပၼ်သေၵမ်းၶႃႈ။ သူးတွင်းတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈပုၼ်ႈႁဝ်းၶႃႈသေၵမ်း။ သူးတွင်းပုၼ်ႈႁဝ်းၶႃႈဢၼ်လႆႈၵိုတ်းလႆႈၵျၢၼ်ႇယူႇၸိူဝ်းၼႆႉသေၵမ်း။ မိူဝ်ႈဢွၼ်တၢင်းၼၼ်ႉႁဝ်းၶႃႈပဵၼ်ၶဝ်ၸိူဝ်းဢၼ်ၼမ်ၼႃႇတီႈၶႃႈဢေႃႈ။ ၵူၺ်းၵႃႈ၊တေႃႈလဵဝ်ၼႆႉၵႃႈၼင်ႇဢၼ်ၸဝ်ႈႁဝ်းႁၼ်ၼၼ်ႉႁဝ်းၶႃႈၵိုတ်းၵျၢၼ်ႇဝႆႉၵေႇၼႃႇလူင်လၢင်တီႈၶႃႈဢေႃႈ။-
ႁႂ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းလႆႈၼႄပျႃးသဵၼ်ႈတၢင်းတီႈႁဝ်းၶႃႈ၊ဢၼ်ႁဝ်းၶႃႈတၵ်းလႆႈၵႂႃႇ၊ဢိၵ်ႇတင်းလွင်ႈတၢင်းဢၼ်ႁဝ်းၶႃႈတၵ်းလႆႈႁဵတ်းၼၼ်ႉသေၵမ်းၶႃႈ၊” ဝႃႈၼင်ႇၼႆဢေႃႈ။
ပရေႃးၽႅတ်ႈ ယေႇရမိ၊ ၵေႃႈလၢတ်ႈတီႈၶဝ်လႄႈဝႃႈ၊ “ၵဝ်ငိၼ်းဢၼ်သူလၢတ်ႈယဝ်ႉ။ ၵဝ်တၵ်းသူးတွင်းတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူၸွမ်းၵႃႈၼင်ႇဢၼ်သူလၢတ်ႈၼႆႉဢေႃႈ။ ၵဝ်တၵ်းၶိုၼ်းလၢတ်ႈၵႃႈဢၼ် ထႃႇဝရႃႉၽြႃး၊ မီးဢမိင်ႉတီႈသူၼၼ်ႉဢေႃႈ။ ၵဝ်တၵ်းဢမ်ႇသိူင်ႇဢမ်ႇမႅပ်းဝႆႉလွင်ႈတၢင်းသေၸိူဝ်ႉသေပိူင်၊” ဝႃႈၼင်ႇၼႆဢေႃႈ။
ၶဝ်ၵေႃႈဢွၼ်ၵၼ်လၢတ်ႈတီႈ ယေႇရမိ၊ လႄႈဝႃႈ၊ “ပေႃးႁဝ်းၶႃႈဢမ်ႇႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသင်ႇလၢတ်ႈဝႆႉတီႈႁဝ်းၶႃႈၼၼ်ႉၸိုင်၊ႁႂ်ႈ ထႃႇဝရႃႉၽြႃး၊ ပဵၼ်သၢၵ်ႈသေႇဢၼ်ၸိုဝ်ႈဢၼ်ၸႂ်ႈ၊ဢိၵ်ႇတင်းမီးသဵတ်ႈၸႃႇသေလႄႈႁဵတ်းၶတ်းတႃႉၵၼ်တင်းႁဝ်းၶႃႈသေၵမ်းလူၺ်ႈ။-
ႁဝ်းၶႃႈယွၼ်းတွင်းပၢၼ်ႇၸဝ်ႈႁဝ်းႁႂ်ႈသူးတွင်းၵႃႈတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈပုၼ်ႈႁဝ်းၶႃႈၶႃႈဢေႃႈ။ ပဵၼ်ဢၼ်လီသေဢမ်ႇဝႃႈ၊ဢမ်ႇလီသေဢမ်ႇဝႃႈ၊ႁဝ်းၶႃႈတၵ်းထွမ်ႇဢဝ်ၸွမ်းဢဝ်ဢမိင်ႉၸဝ်ႈတီႈၶႃႈဢေႃႈ။ ပေႃးႁဝ်းၶႃႈထွမ်ႇဢဝ်ၸွမ်းဢဝ်ဢမိင်ႉ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၶႃႈၼၼ်ႉၸိုင်၊ႁဝ်းၶႃႈတၵ်းလႆႈၵတ်းယဵၼ်ၶျၢမ်းသႃႇၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်လႆႈသိပ်းဝၼ်းယဝ်ႉၼၼ်ႉ၊ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈ ယေႇရမိ၊ ဢေႃႈ။-
မိူဝ်ႈၼၼ်ႉ၊မၼ်းႁွင်ႉဢဝ် ယေႃးႁၼၼ်ႇ၊ လုၵ်ႈၸၢႆး ၵႃႇရႃႇ၊ ဢိၵ်ႇတင်းၽူႈၵွၼ်းတပ်ႉၵႃႈဢၼ်ၸွမ်းလူၺ်ႈၵၼ်တင်းမၼ်း၊ဢိၵ်ႇတင်းၵူၼ်းလူင်ၵူၼ်းဢွၼ်ႇတင်းသဵင်ႈတင်းလူင်မႃးလႄႈလၢတ်ႈဝႃႈ၊-
“သူပွႆႇၸႂ်ႉၵဝ်ၵႂႃႇႁႂ်ႈလႆႈသူးတွင်းၵႃႈတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ လႄႈမၼ်းၸဝ်ႈၼၼ်ႉမီးဢမိင်ႉၸမ်ႉ၊-
ပေႃးသူယူႇသဝ်းၵႃႈတီႈမိူင်းၼႆႉဢမၢၼ်ႇၶၼ်ပဵၼ်ၸိုင်၊ၵဝ်တၵ်းႁႂ်ႈသူမၼ်ႈၶိူင်ႇလႄႈဢမ်ႇၵိူၼ်ႇဢမ်ႇယႃႉသူပႅတ်ႈ။ ၵဝ်တၵ်းၽုၵ်ႇသွမ်ႈသူလႄႈဢမ်ႇထွၼ်ဢမ်ႇထူၺ်ႈသူပႅတ်ႈ။ ၵဝ်ၶုၵ်းၸႂ်လႆႈမႆႈၸႂ်ၵွပ်ႈပိူဝ်ႈၽေးတၢမ်ႇဢၼ်ၵဝ်ႁႂ်ႈႁွတ်ႈထိုင်ၵႃႈၼိူဝ်သူၼၼ်ႉဢေႃႈ။-
ယႃႇပေၵူဝ်ပေႁႄၶုၼ်ႁေႃၶမ်းမိူင်း ပႃႇပုလုၼ်ႇ၊ ဢၼ်သူၸၢင်ႈၵူဝ်ႁႄၼၼ်ႉ။ ထႃႇဝရႃႉၽြႃး၊ မီးဢမိင်ႉၸမ်ႉ၊ယႃႇပေၵူဝ်ႁႄမၼ်းၼၼ်ႉ။ ၵဝ်မီးယူႇလူၺ်ႈၵၼ်တင်းသူႁႂ်ႈလႆႈၵႄႇသႄႇၶျွတ်ႈဢဝ်သူလႄႈၼုၵ်ႈဢဝ်သူဢွၵ်ႇသေၵႃႈၼႂ်းမိုဝ်းမၼ်းၼၼ်ႉဢေႃႈ။-
ၵဝ်တၵ်းဢဵတ်းလူၵႄႇသႄႇၸွႆႈထႅမ်သူ ႁႂ်ႈမၼ်းလႆႈမီးၸႂ်ဢၼ်ဢဵတ်းလူသူသေလႄႈႁႂ်ႈသူၶိုၼ်းလႆႈမိူဝ်းၵႂႃႇၵႃႈတီႈမိူင်းသူ၊တီႈယူႇသူၼၼ်ႉဢေႃႈ။
“ပေႃးဢမ်ႇၼၼ်၊ပေႃးသူလၢတ်ႈလႄႈဝႃႈ၊ ‘ႁဝ်းတၵ်းဢမ်ႇယူႇၵႃႈၼႂ်းမိူင်းၼႆႉ၊’ ဝႃႈၼင်ႇၼႆယူႇတေႃႇထိုင်ႁွတ်ႈထၢၼ်ႈပေႃးဢမ်ႇထွမ်ႇဢမ်ႇဢဝ်ၵႂၢမ်းဢမိင်ႉ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းလႄႈလၢတ်ႈဝႃႈ၊-
‘ဢမ်ႇၸႂ်ႈၵူၺ်း၊ႁဝ်းတၵ်းၵႂႃႇၵႃႈတီႈမိူင်း ဢေးၵျိပ်ႉ၊ တီႈဢၼ်ဢမ်ႇမီးသိုၵ်းမီးသိူဝ်၊တီႈဢၼ်ဢမ်ႇလႆႈငိၼ်းသဵင်ပဝ်ႇၼႄးၶရႃႇ၊တီႈဢၼ်ဢမ်ႇဢိုပ်းဢမ်ႇယၢၵ်ႈၼၼ်ႉႁဝ်းတၵ်းယူႇၵႃႈတီႈၼၼ်ႈဢေႃႈ၊’ ဝႃႈၼင်ႇၼႆၸိုင်၊-
ၵူၼ်းမဵဝ်း ယုတႃႉ၊ ဢၼ်ယင်းၵိုတ်းယင်းၵျၢၼ်ႇၶဝ်႟။ ဢွၼ်ၵၼ်ထွမ်ႇငိၼ်းဢမိင်ႉ ထႃႇဝရႃႉၽြႃး၊ တႃႉ။ ၸဝ်ႈထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊ပေႃးသူတႅပ်းတတ်းၸႂ်သူလႄႈတေၵႂႃႇႁႂ်ႈလႆႈသွၼ်ႈပိုင်ႈယူႇၵႃႈတီႈမိူင်း ဢေးၵျိပ်ႉ၊ ၼၼ်ႉဢမၢၼ်ႇၶၼ်ပဵၼ်ၸိုင်၊-
ၽေးလၢပ်ႇၽေးလႅဝ်းဢၼ်သူၵူဝ်ႁႄၼၼ်ႉတၵ်းၶိုတ်းသူၵႃႈတီႈမိူင်း ဢေးၵျိပ်ႉ၊ လႄႈၽေးတၢင်းဢၼ်ဢိုပ်းဢၼ်ယၢၵ်ႈဢၼ်သူၵူဝ်ႁႄၼၼ်ႉၵေႃႈတၵ်းလိုပ်ႈၸွမ်းလမ်းၸွမ်းသူၵႂႃႇၵႃႈတီႈမိူင်း ဢေးၵျိပ်ႉ၊ ၼၼ်ႉတိၵ်းတိၵ်းဢေႃႈ။ သူတၵ်းလႆႈတၢႆၵႃႈတီႈမိူင်းၼၼ်ႉဢေႃႈ။-
ၶဝ်ၸိူဝ်းဢၼ်တႅပ်းတတ်းၸႂ်လုမ်းလုမ်းလႄႈတေၵႂႃႇသွၼ်ႈပိုင်ႈယူႇၵႃႈတီႈမိူင်း ဢေးၵျိပ်ႉ၊ ၵႃႈမီးၼၼ်ႉတၵ်းလႆႈဢွၼ်ၵၼ်တၢႆလူၺ်ႈၽေးလၢပ်ႇၽေးလႅဝ်း၊ၽေးတၢင်းဢၼ်ဢိုပ်းဢၼ်ယၢၵ်ႈ၊ၽေးၵႃႇလႃႉႁႃႈလႅင်မိူင်းဢေႃႈ။ ၽူႈလႂ်သေၵေႃႉသေၵူၼ်းဢမ်ႇလႆႈလွတ်ႈၽေးတၢမ်ႇဢၼ်ၵဝ်တၵ်းႁႂ်ႈႁွတ်ႈထိုင်ၵႃႈၼိူဝ်ၶဝ်ၼၼ်ႉ။ ဢမ်ႇလႆႈမီးၵေႃႉဢၼ်ၵိုတ်းဝႆႉၵျၢၼ်ႇဝႆႉသေၵေႃႉသေၵူၼ်း။
“ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊မိူၼ်ၸိူဝ်ႉၼင်ႇဢၢႆႁႅင်းတေႃးသႃႉတၢင်းၸႂ်မႆႈၵဝ်တၵ်းတူၵ်းႁွတ်ႈၵႃႈၼိူဝ်ၵူၼ်းဝဵင်း ယေႇရုသလႅမ်ႇ၊ တင်းလၢႆၼၼ်ႉ၊တေႃးသႃႉတၢင်းၸႂ်မႆႈၵဝ်တၵ်းတူၵ်းႁွတ်ႈၵႃႈၼိူဝ်သူၼႂ်းမိူဝ်ႈဢၼ်သူၶဝ်ႈၵႃႈၼႂ်းမိူင်း ဢေးၵျိပ်ႉ၊ ၼၼ်ႉဢေႃႈ။ သူတၵ်းလႆႈပဵၼ်တီႈဢၼ်ပိူၼ်ႈလႃႇလင်၊တီႈဢၼ်လီၵူဝ်၊တီႈဢၼ်ပိူၼ်ႈၵိၼ်ႇလႃႇ၊တီႈဢၼ်ပိူၼ်ႈသႄႉသွမ်းဢေႃႈ။ ၵမ်းလိုၼ်းသူဢမ်ႇလႆႈၶိုၼ်းထူပ်းၶိုၼ်းႁၼ်မိူင်းၼႆႉထႅင်ႈ။
“ၵူၼ်းမဵဝ်း ယုတႃႉ၊ ဢၼ်ယင်းၵိုတ်းယင်းၵျၢၼ်ႇၶဝ်႟။ ထႃႇဝရႃႉၽြႃး၊ မီးဢမိင်ႉလူၺ်ႈလွင်ႈသူလႄႈဝႃႈ၊ ‘ယႃႇပေဢွၼ်ၵၼ်ၵႂႃႇၵႃႈတီႈမိူင်း ဢေးၵျိပ်ႉ၊ ပုၼ်ႉ၊’ ဝႃႈၼင်ႇၼႆဢေႃႈ။ သူဢွၼ်ၵၼ်ႁုမၢတ်ႈလွင်ႈဢၼ်ၵဝ်ပၼ်သတိတီႈသူဝႆႉဝၼ်းမိူဝ်ႈၼႆႉၼၼ်ႉတႃႉ။-
ၵွပ်ႈပိူဝ်ႈသူႁဵတ်းတၢင်းၽိတ်းဢၼ်ယႂ်ႇၼႃႇလူင်လၢင်ဢေႃႈ။ လွင်ႈမၼ်းၸမ်ႉ၊သူပွႆႇၸႂ်ႉၵဝ်ၸူးၵႃႈတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူလႄႈဢွၼ်ၵၼ်လၢတ်ႈလႄႈဝႃႈ၊ ‘သူးတွင်းတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၶႃႈပုၼ်ႈႁဝ်းၶႃႈသေၵမ်း။ ၶိုၼ်းမွၵ်ႇလၢတ်ႈၸွမ်းၵႃႈဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၶႃႈမီးဢမိင်ႉၼၼ်ႉသေၵမ်း၊ႁဝ်းၶႃႈတၵ်းထွမ်ႇဢဝ်ၸွမ်းဢဝ်ဢေႃႈ၊’ ဝႃႈၼင်ႇၼႆဢေႃႈ။-
ၵဝ်ၶိုၼ်းမွၵ်ႇလၢတ်ႈလွင်ႈမၼ်းတီႈသူၼႂ်းဝၼ်းမိူဝ်ႈၼႆႉဢေႃႈ။ ၵူၺ်းၵႃႈ၊သူယင်းဢမ်ႇထွမ်ႇဢမ်ႇဢဝ်ဢမိင်ႉ ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢၼ်မၼ်းၸဝ်ႈဢဝ်ၵဝ်သင်ႇလၢတ်ႈဝႆႉတီႈသူၼၼ်ႉသေၸိူဝ်ႉသေပိူင်လႄႈယူႇလူင်ပႄႇ။-
ၵွပ်ႈပိူဝ်ႈပဵၼ်ၼင်ႇၼၼ်လႄႈသူဢွၼ်ၵၼ်ႁုမၢတ်ႈလွင်ႈဢၼ်သူတၵ်းလႆႈတၢႆလူၺ်ႈၽေးလၢပ်ႇၽေးလႅဝ်း၊ၽေးတၢင်းဢၼ်ဢိုပ်းဢၼ်ယၢၵ်ႈ၊ၽေးၵႃႇလႃႉႁႃႈလႅင်မိူင်းၵႃႈတီႈဢၼ်သူၶၢႆႉၵႂႃႇသွၼ်ႈပိုင်ႈယူႇၼၼ်ႉဢမၢၼ်ႇၶၼ်ပဵၼ်တႃႉ၊” ဝႃႈၼင်ႇၼႆဢေႃႈ။
မိူဝ်ႈဢၼ် ယေႇရမိ၊ ဢဝ်ၵႂၢမ်း ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်ၵႃႈမီးဢၼ်မၼ်းၸဝ်ႈသင်ႇလၢတ်ႈဝႆႉတီႈမၼ်းၼၼ်ႉၵူႈၸိူဝ်ႉၵူႈမဵဝ်းၵႂႃႇမွၵ်ႇလၢတ်ႈတီႈၵူၼ်းတင်းသဵင်ႈတင်းလူင်ယဝ်ႉၼၼ်ႉၸိုင်၊-
ဢႃႇၸရိ၊ လုၵ်ႈၸၢႆး ႁေႃးသႃႇယႃႉ။ ယေႃးႁၼၼ်ႇ၊ လုၵ်ႈၸၢႆး ၵႃႇရႃႇ၊ ဢိၵ်ႇတင်းၶဝ်ၸိူဝ်းဢၼ်မႃႇၼႃႉပူၵ်းပႅၼ်တင်းသဵင်ႈတင်းလူင်ၼၼ်ႉဢွၼ်ၵၼ်လၢတ်ႈတီႈ ယေႇရမိ၊ လႄႈဝႃႈ၊ “မႂ်းၼႆႉလၢတ်ႈၵႂၢမ်းမုသႃႇဢေႃႈ။ ထႃႇဝရႃႉၽြႃး၊ ၽြႃးပဵၼ်ၸဝ်ႈဢမ်ႇဢဝ်မႂ်းသင်ႇလၢတ်ႈဝႆႉတီႈႁဝ်းလႄႈဝႃႈ၊ ‘သူဢမ်ႇလႆႈၵႂႃႇၵႃႈတီႈမိူင်း ဢေးၵျိပ်ႉ၊ ႁႂ်ႈလႆႈသွၼ်ႈပိုင်ႈယူႇၵႃႈတီႈၼၼ်ႈ၊’ ဝႃႈၼင်ႇၼႆၼၼ်ႉ။-
ပႃႇရုၵ်ႉ၊ လုၵ်ႈၸၢႆး ၼေႇရိ၊ ၼၼ်ႉတိုၵ်းယူင်းၸူဝ်းဢဝ်မႂ်းႁႂ်ႈၶတ်းတႃႉၵၼ်တင်းႁဝ်းႁႂ်ႈမႂ်းလႆႈဢဝ်ႁဝ်းဢၢပ်ႈပၼ်ၵႃႈၼႂ်းမိုဝ်းၵူၼ်း ၶႃႇလတေး၊ တင်းလၢႆႁႂ်ႈၶဝ်ဢဝ်ႁဝ်းတၢႆ၊ဢမ်ႇၼၼ်ၵေႃႈသိမ်းဢဝ်ႁဝ်းၵႂႃႇၵႃႈတီႈမိူင်း ပႃႇပုလုၼ်ႇ၊ ပုၼ်ႉဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ ယေႃးႁၼၼ်ႇ၊ လုၵ်ႈၸၢႆး ၵႃႇရႃႇ၊ ဢိၵ်ႇတင်းၽူႈၵွၼ်းတပ်ႉၵႃႈမီးတင်းၵူၼ်းတင်းသဵင်ႈတင်းလူင်ၼၼ်ႉယင်းဢမ်ႇထွမ်ႇဢမ်ႇဢဝ်ဢမိင်ႉ ထႃႇဝရႃႉၽြႃး၊ ဢၼ်ႁႂ်ႈၶဝ်ယူႇၵႃႈၼႂ်းမိူင်း ယုတႃႉ၊ ၼၼ်ႉဢေႃႈ။-
ယေႃးႁၼၼ်ႇ၊ ဢိၵ်ႇတင်းၽူႈၵွၼ်းတပ်ႉၵႃႈမီးၸိူဝ်းၼၼ်ႉပႃးဢဝ်ၵူၼ်းဢၼ်ၵိုတ်းဢၼ်ၵျၢၼ်ႇၵႃႈမီးတင်းသဵင်ႈတင်းလူင်ဢၼ်မီးၵႃႈၼႂ်းမိူင်း ယုတႃႉ၊ ၼၼ်ႉသေယဝ်ႉ၊ဢွၵ်ႇၵႂႃႇၸူးမိူင်း ဢေးၵျိပ်ႉ၊ ဢေႃႈ။ ၵူၼ်းၸိူဝ်းၼၼ်ႉပဵၼ်ၶဝ်ၸိူဝ်းဢၼ်လုၵ်ႉသေၵႃႈတီႈမိူင်းဢၼ်ၶဝ်လႆႈၶၢမ်ႇတၢင်းဢၼ်တိသိမ်းဢဝ်ၵႂႃႇလႄႈပွၵ်ႈၶိုၼ်းမႃးႁႂ်ႈလႆႈသွၼ်ႈပိုင်ႈယူႇၵႃႈၼႂ်းမိူင်း ယုတႃႉ၊-
ဢၼ်ပဵၼ်ၵူၼ်းၸၢႆး၊ၵူၼ်းယိင်း၊လုၵ်ႈဢွၼ်ႇ၊လုၵ်ႈယိင်းၶုၼ်ႁေႃၶမ်းတင်းလၢႆ၊ဢိၵ်ႇတင်းပရေႃးၽႅတ်ႈ ယေႇရမိ၊ ဢိၵ်ႇတင်း ပႃႇရုၵ်ႉ၊ လုၵ်ႈၸၢႆး ၼေႇရိ၊ ဢိၵ်ႇတင်းၶဝ်ၸိူဝ်းဢၼ်ၽူႈၵွၼ်းတပ်ႉ ၼေႇပုၸႃႇရႃႇတၢၼ်ႇ၊ ဢဝ်ဢၢပ်ႈပၼ်ဝႆႉတီႈ ၵေႇတလိ၊ ၸိူဝ်းၼၼ်ႉဢေႃႈ။-
ၶဝ်ယင်းဢမ်ႇထွမ်ႇဢမ်ႇဢဝ်ဢမိင်ႉ ထႃႇဝရႃႉၽြႃး၊ လႄႈၵႂႃႇၵႃႈတီႈမိူင်း ဢေးၵျိပ်ႉ၊ သေယဝ်ႉ၊ႁွတ်ႈထိုင်ၵႃႈတီႈဝဵင်း တႃႇပၼိတ်ႉ၊ ဢေႃႈ။
လိုၼ်းၼၼ်ႉမႂ်းတၵ်းလႆႈမွၵ်ႇလၢတ်ႈတီႈၶဝ်လႄႈဝႃႈ၊ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊ၵဝ်တၵ်းပွႆႇၸႂ်ႉလႄႈဢဝ်ၶႃႈၵဝ် ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်းမိူင်း ပႃႇပုလုၼ်ႇ၊ မႃးဢေႃႈ။ မၼ်းတၵ်းဢဝ်ရႃႇၸႃႉပလၢင်ႇမၼ်းတမ်းဝႆႉၵႃႈၼိူဝ်မၢၵ်ႇႁိၼ်ဢၼ်ၵဝ်ၽင်ဝႆႉၸိူဝ်းၼႆႉဢေႃႈ။ မၼ်းတၵ်းပိုတ်ႇၵီႈသုမ်ႉထဵင်မၼ်းၵႃႈၼိူဝ်မၢၵ်ႇႁိၼ်ၸိူဝ်းၼႆႉဢေႃႈ။-
မၼ်းတၵ်းႁွတ်ႈမႃးလႄႈပၼ်တၢမ်ႇတီႈမိူင်း ဢေးၵျိပ်ႉ၊ ဢေႃႈ။ ၶဝ်ၸိူဝ်းဢၼ်ထုၵ်ႇလီလႆႈၶၢမ်ႇတၢင်းတၢႆလူၺ်ႈၽေးၵႃႇလႃႉႁႃႈလႅင်မိူင်းၼၼ်ႉတၵ်းလႆႈၶၢမ်ႇတၢႆလူၺ်ႈၽေးၵႃႇလႃႉႁႃႈလႅင်မိူင်း၊ၶဝ်ၸိူဝ်းဢၼ်ထုၵ်ႇလီၶၢမ်ႇတၢင်းဢၼ်သိမ်းဢဝ်ၵႂႃႇၼၼ်ႉတၵ်းလႆႈၶၢမ်ႇတၢင်းဢၼ်သိမ်းဢဝ်ၵႂႃႇ၊ၶဝ်ၸိူဝ်းဢၼ်ထုၵ်ႇလီၶၢမ်ႇတၢင်းဢၼ်ၶႃႈၽၼ်းပႅတ်ႈလူၺ်ႈလၢပ်ႈလူၺ်ႈလႅဝ်းၼၼ်ႉၵေႃႈ တၵ်းလႆႈၶၢမ်ႇတၢင်းဢၼ်ၶႃႈၽၼ်းပႅတ်ႈလူၺ်ႈလၢပ်ႇလူၺ်ႈလႅဝ်းဢေႃႈ။-
ၵဝ်တၵ်းဢဝ်ၽႆးတုတ်ႇႁိူၼ်းၽြႃး ဢေးၵျိပ်ႉ၊ တင်းလၢႆဢေႃႈ။ ၶုၼ်ႁေႃၶမ်းမိူင်း ပႃႇပုလုၼ်ႇ၊ တၵ်းဢဝ်ၽႆးတုတ်ႇႁိူၼ်းၽြႃးၸိူဝ်းၼၼ်ႉပႅတ်ႈလႄႈသိမ်းဢဝ်ၶဝ်ၵႂႃႇဢေႃႈ။ ၶုၼ်ႁေႃၶမ်းမိူင်း ပႃႇပုလုၼ်ႇ၊ တၵ်းႁဵတ်းႁႂ်ႈမိူင်း ဢေးၵျိပ်ႉ၊ မူတ်းၵဵင်ႈမိူၼ်ၸိူဝ်ႉၼင်ႇၵူၼ်းဢၼ်လဵင်ႉသူဝ်းထိင်းသူဝ်းႁႃႁဝ်ဢွၵ်ႇပႅတ်ႈသေၵႃႈတီႈၶူဝ်းၼုင်ႈမၼ်းႁႂ်ႈၵဵင်ႈသႂ်ၼၼ်ႉသေယဝ်ႉ၊မၼ်းတၵ်းဢွၵ်ႇသေၵႃႈတီႈၼၼ်ႈၵႂႃႇလူၺ်ႈတၢင်းၼိမ်တၢင်းလီဢေႃႈ။-
မၼ်းတၵ်းယႃႉႁၵ်းႁိၵ်းသဝ်မၢၵ်ႇႁိၼ်ဢၼ်မီးၵႃႈတီႈပိၵ်ႈမၢၼ်ႇၵၢင်ဝၼ်းၵႃႈၼႂ်းမိူင်း ဢေးၵျိပ်ႉ၊ ၼၼ်ႉၸိူဝ်းၼၼ်ႉပႅတ်ႈလႄႈဢဝ်ၽႆးတုတ်ႇႁိူၼ်းၽြႃးမိူင်း ဢေးၵျိပ်ႉ၊ တင်းလၢႆပႅတ်ႈဢေႃႈ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈၸဝ်ႈဢၼ်လၢတ်ႈလွင်ႈၵူၼ်း ယုတႃႉ၊ ဢၼ်ယူႇၵႃႈၼႂ်းမိူင်း ဢေးၵျိပ်ႉ၊ ၵႃႈတီႈဝဵင်း မိၵတေႃးလႃႉ၊ ဝဵင်း တႃႇပၼိတ်ႉ၊ ဝဵင်း မႅမ်းၽိ၊ ဢိၵ်ႇတင်းၵႃႈၼႂ်းမိူင်း ပႃႇသရု၊ ၸိူဝ်းၼၼ်ႉလႄႈႁွတ်ႈမႃးထိုင်တီႈ ယေႇရမိ၊ ၼၼ်ႉၸမ်ႉ၊-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉလႄႈဝႃႈ၊ “သူဢွၼ်ၵၼ်ႁၼ်ၽေးတၢမ်ႇၵႃႈဢၼ်ၵဝ်ႁႂ်ႈႁွတ်ႈထိုင်ၵႃႈၼိူဝ်ဝဵင်း ယေႇရုသလႅမ်ႇ၊ ဢိၵ်ႇတင်းဝၢၼ်ႈဝဵင်း ယုတႃႉ၊ တင်းသဵင်ႈတင်းလူင်ၼၼ်ႉယဝ်ႉယဝ်ႉ။ တူၺ်းလူး။ ဝၼ်းမိူဝ်ႈၼႆႉဝၢၼ်ႈဝဵင်းၸိူဝ်းၼၼ်ႉပဵၼ်တီႈဢၼ်ပဝ်ႇဢၼ်လၢပ်ႈၵႂႃႇလႄႈဢမ်ႇမီးၵေႃႉဢၼ်ယူႇဢၼ်သဝ်း။-
ၼႂ်းလွင်ႈတၢင်းဢၼ်ပဵၼ်မႃးၸိူဝ်ႉၼင်ႇၼႆၼၼ်ႉ၊ၵွပ်ႈပိူဝ်ႈၵူၼ်းတင်းလၢႆႁဵတ်းတုၸရိူၵ်ႈဢပျတ်ႈဢၼ်ႁဵတ်းႁႂ်ႈလႆႈတိုၵ်းယူင်းတၢင်းၸႂ်မႆႈၶႂ်ႈၸႃႉၵဝ်ၼၼ်ႉဢေႃႈ။ ၶဝ်ဢဝ်ၼၢမ်ႇသႃႇတုတ်ႇၽႆးလႄႈႁဵတ်းဝၢတ်ႈၵူဝ်းၵႂၢႆႇတီႈၽြႃးတၢင်ႇသူႇတၢင်ႇပႃးဢၼ်ၶဝ်ဢမ်ႇတွၼ်ႉႁုၸၵ်း၊ဢၼ်သူဢိၵ်ႇတင်းပူႇမွၼ်ႇသူဢမ်ႇတွၼ်ႉႁုၸၵ်းၼၼ်ႉဢေႃႈ။-
ပိၵ်ႉသမ်ႉၵဝ်ပွႆႇၸႂ်ႉၶႃႈၵဝ်ပရေႃးၽႅတ်ႈတင်းသဵင်ႈတင်းလူင်ၵႂႃႇၸူးတီႈသူၶိူဝ်းၶိူဝ်းယႂ်းယႂ်းယူႇသေလႄႈလၢတ်ႈဝႃႈ၊ ‘ယႃႇပေႁဵတ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇဢၼ်ၵဝ်ၸင်းၼႆႉ၊’ ဝႃႈၼင်ႇၼႆသေၵေႃႈ၊-
ၶဝ်ၼၼ်ႉယင်းဢမ်ႇထွမ်ႇဢမ်ႇဢဝ်။ ယင်းဢမ်ႇဝၢႆႇႁူႁေႈႁူၸူးႁႂ်ႈလႆႈဝႄႈပႅတ်ႈတုၸရိူၵ်ႈဢပျတ်ႈၶဝ်လႄႈယင်းဢဝ်ၼၢမ်ႇသႃႇတုတ်ႇၽႆးလူႇပၼ်တီႈၽြႃးတၢင်ႇသူႇတၢင်ႇပႃးၼၼ်ႉယူႇဢေႃႈ။-
ပိူဝ်ႈၼႆၸင်ႇဢၢႆႁႅင်းတေႃးသႃႉတၢင်းၸႂ်မႆႈၶႂ်ႈၸႃႉၵဝ်လႆႈတူၵ်းႁွတ်ႈထိုင်လႄႈဢဝ်ၽႆးတုတ်ႇၵႃႈၼႂ်းဝၢၼ်ႈဝဵင်းဢၼ်မီးၵႃႈၼႂ်းမိူင်း ယုတႃႉ၊ တင်းလၢႆဢိၵ်ႇတင်းၵႃႈၼႂ်းသဵၼ်ႈတၢင်းဝဵင်း ယေႇရုသလႅမ်ႇ၊ ၸိူဝ်းၼၼ်ႉဢေႃႈ။ ဝဵင်းၸိူဝ်းၼၼ်ႉလႆႈပဵၼ်တီႈဢၼ်ၽဵဝ်ႈပႅတ်ႈလႄႈပဝ်ႇလၢပ်ႈဝႆႉၸိူဝ်ႉၼင်ႇဢၼ်ပဵၼ်ယူႇဝၼ်းမိူဝ်ႈၼႆႉၼၼ်ႉဢေႃႈ။
“မိူဝ်ႈလဵဝ်ၼႆႉၸိုင်၊ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈသူႁဵတ်းတုၸရိူၵ်ႈဢၼ်ယႂ်ႇၼႃႇထၢၼ်ႈပေႃးႁႂ်ႈၽေးဢၼ်ႇတရေႇဢၼ်လီၵူဝ်လီႁႄၼၼ်ႉတူၵ်းႁွတ်ႈၵႃႈၼိူဝ်သူၸိူဝ်ႉၼင်ႇႁိုဝ်။ သူတၵ်းပႄႇပႅတ်ႈတႅပ်းပႅတ်ႈၵူၼ်းၸၢႆး၊ၵူၼ်းယိင်း၊လုၵ်ႈဢွၼ်ႇ၊လုၵ်ႈဢွၼ်ႇလႅင်ဢၼ်ၵိၼ်ၼူမ်းယူႇတင်းလၢႆသေၵႃႈတီႈမိူင်း ယုတႃႉ၊ ထၢၼ်ႈပေႃးဢမ်ႇၵိုတ်းဢမ်ႇၵျၢၼ်ႇသေၵေႃႉသေၵူၼ်းႁိုဝ်း။-
ႁဵတ်းသင်လႄႈသူတိုၵ်းယူင်းတၢင်းၸႂ်မႆႈၶႂ်ႈၸႃႉၵဝ်လူၺ်ႈတၢင်းဢၼ်ဢဝ်မိုဝ်းသူႁဵတ်း၊ဢၼ်သူဢဝ်ၼၢမ်ႇသႃႇတုတ်ႇၽႆးလူႇပၼ်တီႈၽြႃးတၢင်ႇသူႇတၢင်ႇပႃးတင်းလၢႆၵႃႈၼႂ်းမိူင်း ဢေးၵျိပ်ႉ၊ တီႈဢၼ်သူၵႂႃႇႁႂ်ႈလႆႈသွၼ်ႈပိုင်ႈၼၼ်ႉၸိူဝ်ႉၼင်ႇႁိုဝ်။ သူတၵ်းလႆႈၶၢမ်ႇတၢင်းဢၼ်ပႄႇပႅတ်ႈတႅပ်းပႅတ်ႈ၊ဢိၵ်ႇတင်းၵူၼ်းၵူႈၸိူဝ်ႉၵူႈမဵဝ်းဢၼ်မီးၵႃႈၼိူဝ်လိၼ်မိူင်းၼႆႉတၵ်းသႄႉသွမ်းၵိၼ်ႇလႃႇသူဢေႃႈ။-
သူလူင်လိုမ်းတုၸရိူၵ်ႈပူႇသူမွၼ်ႇသူ၊တုၸရိူၵ်ႈၶုၼ်ႁေႃၶမ်းမိူင်း ယုတႃႉ၊ တင်းလၢႆ၊တုၸရိူၵ်ႈၼၢင်းႁေႃၶမ်းတင်းလၢႆ၊တုၸရိူၵ်ႈတူဝ်သူ၊တုၸရိူၵ်ႈမေးသူဢၼ်ၶဝ်ႁဵတ်းၵႃႈၼႂ်းမိူင်း ယုတႃႉ၊ ဢိၵ်ႇတင်းၵႃႈၼႂ်းသဵၼ်ႈတၢင်းဝဵင်း ယေႇရုသလႅမ်ႇ၊ ၸိူဝ်းၼၼ်ႉယဝ်ႉႁိုဝ်း။-
ၶဝ်ၼၼ်ႉဢမ်ႇမီးၸႂ်ဢၼ်ၶျႃးတႅမ်ႇတေႃႇထိုင်ႁွတ်ႈဝၼ်းမိူဝ်ႈၼႆႉ။ ဢမ်ႇမီးၸႂ်ဢၼ်ၵူဝ်ဢၼ်ႁႄ။ ဢမ်ႇၸွမ်းသဵၼ်ႈတၢင်းတြႃးၵဝ်။ ဢမ်ႇပႂ်ႉၵမ်ပႂ်ႉၵျၢင်ႉပိင်းၺၢပ်ႈၵဝ်တင်းလၢႆဢၼ်ၵဝ်ဝႆႉၵႃႈတီႈၽၢႆႇၼႃႈသူ၊ဢိၵ်ႇတင်းၵႃႈတီႈၽၢႆႇၼႃႈပူႇသူမွၼ်ႇသူၸိူဝ်းၼၼ်ႉလႄႈယူႇဢေႃႈ။
“ပိူဝ်ႈၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊ၵဝ်တၵ်းဝၢႆႇၼႃႈပႅတ်ႈသူလႄႈတၵ်းပၼ်တၢမ်ႇတီႈသူဢေႃႈ။ တၵ်းတႅပ်းပႅတ်ႈယႃႉပႅတ်ႈၵူၼ်းမဵဝ်း ယုတႃႉ၊ တင်းသဵင်ႈတင်းလူင်ဢေႃႈ။-
ၵဝ်တၵ်းဢဝ်ၵူၼ်းမဵဝ်း ယုတႃႉ၊ ဢၼ်ၵိုတ်းဢၼ်ၵျၢၼ်ႇဢၼ်ဝၢႆႇၼႃႈၵႂႃႇၸူးၵႃႈတီႈမိူင်း ဢေးၵျိပ်ႉ၊ ႁႂ်ႈလႆႈသွၼ်ႈပိုင်ႈၵႃႈတီႈၼၼ်ႈတင်းသဵင်ႈတင်းလူင်ၼၼ်ႉလုလႅဝ်လူမ်ႉတူၵ်းၵႃႈၼႂ်းမိူင်း ဢေးၵျိပ်ႉ၊ ဢေႃႈ။ ၶဝ်တၵ်းလႆႈလုလႅဝ်ႁၢႆဝၢႆးၵႂႃႇလူၺ်ႈၽေးလၢပ်ႇၽေးလႅဝ်း၊ဢိၵ်ႇတင်းၽေးတၢင်းဢၼ်ဢိုပ်းဢၼ်ယၢၵ်ႈဢေႃႈ။ ၶဝ်ၸႃႉၸဵမ်ၵေႃႉဢၼ်လဵၵ်ႉသေပိူၼ်ႈတေႃႇထိုင်ႁွတ်ႈၵေႃႉဢၼ်ယႂ်ႇသေပိူၼ်ႈၼၼ်ႉတၵ်းလႆႈတၢႆလူၺ်ႈၽေးလၢပ်ႇၽေးလႅဝ်း၊ဢိၵ်ႇတင်းၽေးဢၼ်ဢိုပ်းဢၼ်ယၢၵ်ႈဢေႃႈ။ ၶဝ်တၵ်းလႆႈၶၢမ်ႇတၢင်းဢၼ်ပိူၼ်ႈလႃႇလင်လႄႈပဵၼ်တီႈဢၼ်ပိူၼ်ႈတူၵ်းၸႂ်၊ၶၢမ်ႇတၢင်းဢၼ်ပိူၼ်ႈၵိၼ်ႇလႃႇလႄႈသႄႉသွမ်းဢေႃႈ။-
ၵဝ်တၵ်းပၼ်တၢမ်ႇတီႈၶဝ်ၸိူဝ်းဢၼ်ယူႇၵႃႈၼႂ်းမိူင်း ဢေးၵျိပ်ႉ၊ ၼၼ်ႉမိူၼ်ၸိူဝ်ႉၼင်ႇဢၼ်ၵဝ်ဢဝ်ၽေးလၢပ်ႇၽေးလႅဝ်း၊ၽေးတၢင်းဢၼ်ဢိုပ်းဢၼ်ယၢၵ်ႈ၊ၽေးၵႃႇလႃႉႁႃႈလႅင်မိူင်းသေလႄႈပၼ်တၢမ်ႇတီႈၵူၼ်းဝဵင်း ယေႇရုသလႅမ်ႇ၊ ၸိူဝ်းၼၼ်ႉဢေႃႈ။-
ၵူၼ်းမဵဝ်း ယုတႃႉ၊ ဢၼ်ၵိုတ်းဢၼ်ၵျၢၼ်ႇဢၼ်ဢွၵ်ႇၵႂႃႇၵႃႈတီႈမိူင်း ဢေးၵျိပ်ႉ၊ ႁႂ်ႈလႆႈသွၼ်ႈပိုင်ႈယူႇၵႃႈတီႈၼၼ်ႈၸိူဝ်းၼၼ်ႉဢမ်ႇလႆႈလွတ်ႈၽေးလွတ်ႈရၢၼ်ႇ၊ဢမ်ႇလႆႈၵိုတ်းဝႆႉၵျၢၼ်ႇဝႆႉသေၵေႃႉသေၵူၼ်းပုၼ်ႈတႃႇၶိုၼ်းမိူဝ်းၵႂႃႇၵႃႈတီႈမိူင်း ယုတႃႉ၊ တီႈဢၼ်ၶဝ်မီးဢလူဝ်ႇၶႂ်ႈၶိုၼ်းမိူဝ်းလႄႈယူႇၵႃႈတီႈၼၼ်ႈၼၼ်ႉဢေႃႈ။ လွင်ႈမၼ်းၸမ်ႉ၊ၶဝ်ၸိူဝ်းဢၼ်ၵၢင်းလွတ်ႈတင်းၽေးၼၼ်ႉၵူၺ်းတၵ်းလႆႈဢွၼ်ၵၼ်ၶိုၼ်းမိူဝ်းဢေႃႈ၊” ဝႃႈၼင်ႇၼႆဢေႃႈ။
ၵူၼ်းၸၢႆးၸိူဝ်းဢၼ်ႁုလွင်ႈဢၼ်မေးၶဝ်ဢဝ်တင်းၼၢမ်ႇသႃႇတုတ်ႇၽႆးလူႇပၼ်တီႈၽြႃးတၢင်ႇသူႇတၢင်ႇပႃး၊ဢိၵ်ႇတင်းမႄႈယိင်းၸိူဝ်းဢၼ်ၸုၵ်းယူႇၵႃႈတီႈႁိမ်းႁွမ်းၼၼ်ႉ၊ဢိၵ်ႇတင်းမုၵ်ႉၸိူဝ်းဢၼ်ယႂ်ႇၼႃႇဢၼ်ပဵၼ်ၶဝ်ၸိူဝ်းဢၼ်ယူႇၽၢႆႇတၢင်းၸၢၼ်းမိူင်း ဢေးၵျိပ်ႉ၊ တင်းသဵင်ႈတင်းလူင်ၼၼ်ႉဢွၼ်ၵၼ်ၶိုၼ်းလၢတ်ႈတီႈ ယေႇရမိ၊ လႄႈဝႃႈၸမ်ႉ၊-
“ၵႂၢမ်းဢၼ်မႂ်းဢိင်ၼႃႇမႃႉၸိုဝ်ႈသဵင် ထႃႇဝရႃႉၽြႃး၊ သေလႄႈႁေႃးလၢတ်ႈတီႈႁဝ်းၼၼ်ႉၸိုင်၊ႁဝ်းဢမ်ႇထွမ်ႇဢမ်ႇဢဝ်။-
ႁဝ်းတၵ်းႁဵတ်းၸွမ်းၵႃႈၼင်ႇဢၼ်ဢွၵ်ႇသူပ်းဢွၵ်ႇပၢၵ်ႇႁဝ်းၼၼ်ႉႁႂ်ႈလႆႈဢဝ်ၼၢမ်ႇသႃႇတုတ်ႇၽႆးလူႇပၼ်တီႈ ၼၢင်းႁေႃၶမ်းၵၢင်ႁၢဝ်၊ လႄႈႁဵတ်းၶိူင်ႈတၢင်းလူႇဢၼ်သွၼ်းလေႃႇတီႈမၼ်းၼၢင်းမိူၼ်ၸိူဝ်ႉၼင်ႇဢၼ်ႁဝ်း၊ဢိၵ်ႇတင်းပူႇႁဝ်း၊မွၼ်ႇႁဝ်း၊ၶုၼ်ႁေႃၶမ်းႁဝ်း၊မူးမၢတ်ႈၽွင်းမိူင်းႁဝ်းတင်းလၢႆ ယၢမ်ႈႁဵတ်းၵႃႈၼႂ်းဝၢၼ်ႈၼႂ်းဝဵင်း ယုတႃႉ၊ ဢိၵ်ႇတင်းၵႃႈၼႂ်းသဵၼ်ႈတၢင်းၵႃႈၼႂ်းဝဵင်း ယေႇရုသလႅမ်ႇ၊ ၸိူဝ်းၼၼ်ႉဢမၢၼ်ႇၶၼ်ပဵၼ်ဢေႃႈ။ မိူဝ်ႈဢွၼ်တၢင်းၼၼ်ႉႁဝ်းလႆႈၵိၼ်ဢိမ်ႇဢိမ်ႇတဵမ်တဵမ်ဢေႃႈ။ ႁဝ်းလႆႈၵၢင်းလွတ်ႈတင်းၽေးလႄႈၵတ်းယဵၼ်ၶျၢမ်းသႃႇဢေႃႈ။-
မိူဝ်ႈဢၼ်ႁဝ်းဢမ်ႇဢဝ်ၼၢမ်ႇသႃႇတုတ်ႇၽႆးလူႇပၼ်တီႈ ၼၢင်းႁေႃၶမ်းၵၢင်ႁၢဝ်၊ လႄႈဢမ်ႇႁဵတ်းၶိူင်ႈတၢင်းလူႇဢၼ်သွၼ်းလေႃႇတီႈမၼ်းၼၢင်းၼၼ်ႉၸိုင်၊ႁဝ်းလႆႈႁွတ်ႈထိုင်တၢင်းဢၼ်ယၢၵ်ႈဢၼ်ၽၢၼ်၊ၵူႈၸိူဝ်ႉၵူႈပိူင်ၼႃႇလူင်လၢင်လႄႈလုလႅဝ်လူၺ်ႈၽေးလၢပ်ႇၽေးလႅဝ်း၊ၽေးတၢင်းဢၼ်ဢိုပ်းဢၼ်ယၢၵ်ႈမႃးယဝ်ႉ၊” ဝႃႈၼင်ႇၼႆဢေႃႈ။
မႄႈယိင်းတင်းလၢႆလၢတ်ႈလႄႈဝႃႈ၊ “မိူဝ်ႈဢၼ်ႁဝ်းႁဵတ်းၶဝ်ႈမုၼ်းဢၼ်ႁုၼ်ႇႁၢင်ႈမၼ်းမိူၼ်ႁုၼ်ႇႁၢင်ႈ ၼၢင်းႁေႃၶမ်းၵၢင်ႁၢဝ်၊ လႄႈဢဝ်သၢၵ်ႈလူႇတီႈမၼ်းၼၢင်း၊ဢိၵ်ႇတင်းသွၼ်းလေႃႇၼမ်ႉမၢၵ်ႇၸပိတ်ႉၼၼ်ႉၸိုင်၊ၽူဝ်ႁဝ်းယင်းဢမ်ႇႁႄႉဢမ်ႇၶႅၼ်လႄႈပၼ်ဢၶႂၢင်ႉလီလီငၢမ်းငၢမ်းယူႇဢမ်ႇၸႂ်ႈႁိုဝ်း၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ယေႇရမိ၊ ၶိုၼ်းလၢတ်ႈတီႈၵူၼ်းတင်းသဵင်ႈတင်းလူင်ၸဵမ်ယိင်းၸဵမ်ၸၢႆးဢၼ်ၶိုၼ်းလၢတ်ႈၸိူဝ်ႉၼင်ႇၼၼ်တီႈမၼ်းၼၼ်ႉလႄႈဝႃႈၸမ်ႉ၊-
“သူဢိၵ်ႇတင်းပူႇမွၼ်ႇၶုၼ်ႁေႃၶမ်းသူ၊မူးမၢတ်ႈၽွင်းမိူင်းသူ၊ၵူၼ်းဝၢၼ်ႈၵူၼ်းမိူင်းသူၸိူဝ်းၼၼ်ႉဢဝ်ၼၢမ်ႇသႃႇတုတ်ႇၽႆးၵႃႈၼႂ်းဝၢၼ်ႈၼႂ်းဝဵင်း ယုတႃႉ၊ တင်းလၢႆဢိၵ်ႇတင်းၵႃႈၼႂ်းသဵၼ်ႈတၢင်းဝဵင်း ယေႇရုသလႅမ်ႇ၊ တင်းလၢႆၼၼ်ႉသူထၢင်ႇဝႃႈ၊ ထႃႇဝရႃႉၽြႃး၊ ဢမ်ႇၶုၵ်းၸႂ်လႆႈၶႆႈၸႂ်ထူပ်း၊ဢမ်ႇဢဝ်သႂၢင်းသႂ်ႇၼႂ်းၸႂ်မၼ်းၸဝ်ႈလႄႈယူႇႁိုဝ်း။-
ပိူဝ်ႈၼႆလႄႈ ထႃႇဝရႃႉၽြႃး၊ ဢမ်ႇယိူၼ်ႉၶၢမ်ႇလႆႈထႅင်ႈ ၵွပ်ႈပိူဝ်ႈတုၸရိူၵ်ႈဢၼ်သူႁဵတ်း၊ဢိၵ်ႇတင်းၵွပ်ႈပိူဝ်ႈလွင်ႈတၢင်းဢၼ်လီႁင်ႈဢဵတ်ႇသဵတ်ႇဢၼ်သူၵမ်ၵျၢင်ႉၸိူဝ်းၼၼ်ႉ။ ပိူဝ်ႈၼႆၸင်ႇ၊မိူင်းသူၼႆႉလႆႈပဵၼ်တီႈဢၼ်ပဝ်ႇဢၼ်လၢပ်ႈ၊ပဵၼ်တီႈဢၼ်လီၵူဝ်လီႁႄ၊တီႈဢၼ်ပိူၼ်ႈၵိၼ်ႇလႃႇ၊တီႈဢၼ်ဢမ်ႇမီးၵူၼ်းယူႇသဝ်းမိူၼ်ၸိူဝ်ႉၼင်ႇဢၼ်ပဵၼ်ယူႇဝၼ်းမိူဝ်ႈၼႆႉၼၼ်ႉယဝ်ႉ။-
ၵွပ်ႈပိူဝ်ႈဢၼ်သူဢဝ်ၼၢမ်ႇသႃႇတုတ်ႇၽႆးလႄႈလူႇပၼ်တီႈၽြႃးတၢင်ႇသူႇတၢင်ႇပႃးလႄႈၽိတ်းပိူင်ႈတီႈ ထႃႇဝရႃႉၽြႃး၊ ဢိၵ်ႇတင်းၵွပ်ႈပိူဝ်ႈဢၼ်သူဢမ်ႇထွမ်ႇဢမ်ႇဢဝ်သဵင်ၵႂၢမ်း ထႃႇဝရႃႉၽြႃး၊ ဢမ်ႇၸွမ်းဢမ်ႇၵႂႃႇၵႃႈၼႂ်းသဵၼ်ႈတၢင်းပိင်းၺၢပ်ႈတြႃးၸဝ်ႈ။ ဢိၵ်ႇတင်းထုင်းၽိင်ႈတြႃးၸဝ်ႈလႄႈ၊ၽေးၼႆႉႁွတ်ႈထိုင်တီႈသူၸိူဝ်ႉၼင်ႇဢၼ်ပဵၼ်ယူႇၼႂ်းဝၼ်းမိူဝ်ႈၼႆႉၼၼ်ႉယဝ်ႉ၊” ဝႃႈၼင်ႇၼႆဢေႃႈ။
ယေႇရမိ၊ သမ်ႉႁေႃးလၢတ်ႈတီႈၵူၼ်းတင်းသဵင်ႈတင်းလူင် ဢိၵ်ႇတင်းမႄႈယိင်းတင်းသဵင်ႈတင်းလူင်လႄႈဝႃႈၸမ်ႉ၊ “ၵူၼ်း ယုတႃႉ၊ ၵႃႈဢၼ်မီးၵႃႈၼႂ်းမိူင်း ဢေးၵျိပ်ႉ၊ တင်းလၢႆၶဝ်႟။ ဢွၼ်ၵၼ်ထွမ်ႇငိၼ်းဢမိင်ႉ ထႃႇဝရႃႉၽြႃး၊ တႃႉ။-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊သူဢိၵ်ႇတင်းမေးသူတင်းလၢႆႁဵတ်းၵတိသဵတ်ႈၸႃႇဝႆႉလူၺ်ႈၵၼ်တင်း ၼၢင်းႁေႃၶမ်းၵၢင်ႁၢဝ်၊ ဢေႃႈ။ သူဝႆႉၵတိသဵတ်ႈၸႃႇလႄႈႁဵတ်းၸွမ်းၵတိသဵတ်ႈၸႃႇဢၼ်ဝႃႈ၊ ‘ႁဝ်းတၵ်းဢဝ်ၼၢမ်ႇသႃႇတုတ်ႇၽႆးလႄႈလူႇပၼ်တီႈ ၼၢင်းႁေႃၶမ်းၵၢင်ႁၢဝ်၊ လႄႈႁဵတ်းၶိူင်ႈတၢင်းလူႇဢၼ်သွၼ်းလေႃႇတီႈမၼ်းၼၢင်းဢမၢၼ်ႇၶၼ်ပဵၼ်ဢေႃႈ၊’ ဝႃႈၼင်ႇၼႆဢေႃႈ။ ၵွပ်ႈလွင်ႈၼႆႉလႄႈသူဢွၼ်ၵၼ်ႁႂ်ႈၵတိသဵတ်ႈၸႃႇသူၼၼ်ႉတႄႇမၼ်ႈယူႇတႃႉ။ ႁဵတ်းၸွမ်းၵႃႈၼင်ႇဢၼ်သူဝႆႉၵတိသဵတ်ႈၸႃႇၼၼ်ႉတႃႉ။-
ပိူဝ်ႈၼႆလႄႈၵူၼ်း ယုတႃႉ၊ ၵႃႈဢၼ်ယူႇၵႃႈၼႂ်းမိူင်း ဢေးၵျိပ်ႉ၊ တင်းသဵင်ႈတင်းလူင်ၶဝ်႟။ ဢွၼ်ၵၼ်ထွမ်ႇငိၼ်းဢမိင်ႉ ထႃႇဝရႃႉၽြႃး၊ တႃႉ။ ထႃႇဝရႃႉၽြႃး၊ မီးဢမိင်ႉၸမ်ႉ၊ၵဝ်ဢဝ်မႁႃႇၼႃႇမႃႉၸိုဝ်ႈသဵင်ၵဝ်တိူင်ႇဝႃႈၵတိသဵတ်ႈၸႃႇ၊တေဢမ်ႇႁႂ်ႈၵူၼ်း ယုတႃႉ၊ ဢၼ်မီးၵႃႈၼႂ်းမိူင်း ဢေးၵျိပ်ႉ၊ ၵူႈတီႈၵူႈလႅၼ်ၸိူဝ်းၼၼ်ႉလႆႈဢဝ်ၼႃႇမႃႉၸိုဝ်ႈသဵင်ၵဝ်ဢွၵ်ႇသူပ်းလႄႈဝႃႈ၊ ‘ၵႃႈၼင်ႇဢၼ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ဢသၢၵ်ႈလိပ်းယူႇၼၼ်ႉ၊’ ဝႃႈၼင်ႇၼႆၼၼ်ႉသေၵေႃႉသေၵူၼ်းဢေႃႈ။-
ၵဝ်ပႂ်ႉတူၺ်းၶဝ်ယူႇႁႂ်ႈလႆႈႁဵတ်းဢၼ်လီဢၼ်ငၢမ်းတီႈၶဝ်ဢမ်ႇၸႂ်ႈ။ ႁႂ်ႈလႆႈႁဵတ်းဢၼ်ႁၢႆႉဢၼ်ၸႃႉတီႈၶဝ်ဢေႃႈ။ ၵူၼ်း ယုတႃႉ၊ ၵႃႈဢၼ်မီးၵႃႈၼႂ်းမိူင်း ဢေးၵျိပ်ႉ၊ ၸိူဝ်းၼၼ်ႉတၵ်းဢွၼ်ၵၼ်လုသုမ်းၸွမ်းလူၺ်ႈၽေးလၢပ်ႇၽေးလႅဝ်း၊ၽေးတၢင်းဢၼ်ဢိုပ်းဢၼ်ယၢၵ်ႈ၊တေႃႇထိုင်ႁွတ်ႈလုသုမ်းဢမ်ႇၵိုတ်းဢမ်ႇၵျၢၼ်ႇသေၸိူဝ်ႉသေမဵဝ်းဢေႃႈ။-
ၼႂ်းဝႃႈၼၼ်သေၵေႃႈ ၶဝ်ၸိူဝ်းဢၼ်ၵၢင်းလွတ်ႈတင်းၽေးလၢပ်ႇၽေးလႅဝ်းၼၼ်ႉတၵ်းလုၵ်ႉသေၵႃႈတီႈမိူင်း ဢေးၵျိပ်ႉ၊ လႄႈပွၵ်ႈၶိုၼ်းမိူဝ်းၵႂႃႇၸူးၵႃႈတီႈမိူင်း ယုတႃႉ၊ ၼၼ်ႉတၵ်းတေပဵၼ်ဢၼ်ၵေႇၼႃႇဢေႃႈ။ ၵူၼ်း ယုတႃႉ၊ ဢၼ်ၵိုတ်းဢၼ်ၵျၢၼ်ႇဢၼ်ၵႂႃႇၵႃႈတီႈမိူင်း ဢေးၵျိပ်ႉ၊ ႁႂ်ႈလႆႈသွၼ်ႈပိုင်ႈယူႇၵႃႈတီႈၼၼ်ႈတင်းသဵင်ႈတင်းလူင်ၼၼ်ႉတၵ်းဢွၼ်ၵၼ်ႁုလွင်ႈဢၼ်ၵႂၢမ်းၵဝ်တၵ်းပဵၼ်မႃးႁိုဝ်၊ၵႂၢမ်းၶဝ်တၵ်းပဵၼ်မႃးႁိုဝ်ၼၼ်ႉဢေႃႈ။-
ထႃႇဝရႃႉၽြႃး၊ မီးဢမိင်ႉလႄႈဝႃႈ၊ၵဝ်ပၼ်ၼိမိၵ်ႈလၢၵ်ႈၶၼႃႇတီႈသူလူၺ်ႈလွင်ႈဢၼ်ၵဝ်တၵ်းသင်ႇသွၼ်သုင်းမႃႉသူၵႃႈတီႈၼႆႈႁႂ်ႈသူလႆႈႁုလွင်ႈဢၼ်ၵႂၢမ်းၵဝ်တၵ်းၶတ်းတႃႉၵၼ်တင်းသူ ပုၼ်ႈဢၼ်တၵ်းႁဵတ်းဢၼ်ႁၢႆႉဢၼ်ၸႃႉတီႈသူၼၼ်ႉဢေႃႈ။-
ၵဝ်တၵ်းဢဝ် ၽရေႃးႁေႃးၽရႃႉ၊ ၶုၼ်ႁေႃၶမ်းမိူင်း ဢေးၵျိပ်ႉ၊ ဢၢပ်ႈပၼ်ၵႃႈၼႂ်းမိုဝ်းရၢၼ်ႇသူႇမၼ်း၊ဢိၵ်ႇတင်းၵႃႈၼႂ်းမိုဝ်းၶဝ်ၸိူဝ်းဢၼ်ၸွမ်းႁႃဢသၢၵ်ႈမၼ်းယူႇၸိူဝ်းၼၼ်ႉမိူၼ်ၸိူဝ်ႉၼင်ႇဢၼ်ၵဝ်ဢဝ် ၸေႇတၵိ၊ ၶုၼ်ႁေႃၶမ်းမိူင်း ယုတႃႉ၊ ဢၢပ်ႈပၼ်ၵႃႈၼႂ်းမိုဝ်း ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်းမိူင်း ပႃႇပုလုၼ်ႇ၊ ဢၼ်ဝႃႈ၊ရၢၼ်ႇသူႇဢၼ်ႁႃဢဝ်ဢသၢၵ်ႈမၼ်းၼၼ်ႉယူႇၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၼႂ်းပီဢၼ်ၶုၼ်ႁေႃၶမ်း ယေႃးယၵိမ်း၊ လုၵ်ႈၸၢႆး ယူဝ်းသိယႃႉ၊ ဢၼ်ပဵၼ်ၶုၼ်ႁေႃၶမ်းမိူင်း ယုတႃႉ၊ ၸၢမ်ႇႁၢင်ႈၸၢမ်ႇႁေႃလႆႈသီႇပီၼၼ်ႉ၊ ပႃႇရုၵ်ႉ၊ ဢၼ်ပဵၼ်လုၵ်ႈၸၢႆး ၼေႇရိ၊ တႅမ်ႈမၢႆဝႆႉၼုၵ်ႈၵပၢတ်ႈၸဝ်ႈဢၼ် ယေႇရမိ၊ သင်ႇလၢတ်ႈဝႆႉတီႈမၼ်းၼၼ်ႉလႄႈဝႃႈ၊-
“ပႃႇရုၵ်ႉ၊ ႟။ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉလူၺ်ႈလွင်ႈမႂ်းဝႆႉဢေႃႈ။-
မႂ်းလၢတ်ႈတီႈတူဝ်မႂ်းလႄႈဝႃႈ၊ ‘ၵဝ်ၼႆႉမီးဢႃႉမၢင်ႇၵလႃႇဢေႃႈ။ ထႃႇဝရႃႉၽြႃး၊ ဢဝ်လွင်ႈတၢင်းဢၼ်ၶီၸႂ်ၶူမ်ၸႂ်ထၢပ်ႈသႂ်ႇထႅင်ႈၵႃႈၼိူဝ်တၢင်းဢၼ်မႆႈၸႂ်ၵိၼ်းၸႂ်ၵဝ်လႄႈၵဝ်လႆႈပွင်ႉၶၢင်းပွင်ႉမိုၼ်ႇယူႇ၊ႁိူဝ်ႉၸႂ်ၼူၼ်းၸႂ်ယူႇဢေႃႈ။ ၵဝ်ဢမ်ႇလႆႈမီးတၢင်းဢၼ်သၢၵ်ႈသႃႇလႃးလႃး၊’ ဝႃႈၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉတီႈ ယေႇရမိ၊ ၸမ်ႉ၊ “မႂ်းတၵ်းလႆႈသင်ႇလၢတ်ႈတီႈ ပႃႇရုၵ်ႉ၊ လႄႈဝႃႈ၊ၵဝ်တၵ်းၵိူၼ်ႇယႃႉလွင်ႈတၢင်းဢၼ်ၵဝ်တႄႇႁဵတ်းၼၼ်ႉပႅတ်ႈဢေႃႈ။ ၵဝ်တၵ်းထွတ်ႇထူၺ်ႈလွင်ႈတၢင်းဢၼ်ၵဝ်ၽုၵ်ႇသွမ်ႈဢၼ်ဝႃႈ၊မိူင်းၼႆႉတင်းမိူင်းပႅတ်ႈဢေႃႈ။-
မႂ်းႁႃလွင်ႈတၢင်းဢၼ်ယႂ်ႇဢၼ်မျၢတ်ႈပုၼ်ႈမႂ်းႁိုဝ်း။ ယႃႇပေႁႃ။ လွင်ႈမၼ်းၸမ်ႉ၊ၵဝ်တၵ်းႁႂ်ႈၽေးႁွတ်ႈထိုင်ၵႃႈၼိူဝ်သတ်ႉတဝႃႇတင်းသဵင်ႈတင်းလူင်ဢေႃႈ။ ၵဝ်တၵ်းပၼ်ဢသၢၵ်ႈမႂ်းမိူၼ်ၸိူဝ်ႉၼင်ႇပၼ်သူးတီႈမႂ်း ၼႂ်းၵူႈတီႈၵူႈတၢင်းၵႃႈဢၼ်မႂ်းႁွတ်ႈမႂ်းထိုင်ၼၼ်ႉဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ဢၼ်လၢတ်ႈလွင်ႈၵူၼ်းၵူႈၸိူဝ်ႉၸၢတ်ႈတင်းလၢႆၼၼ်ႉႁွတ်ႈမႃးတီႈပရေႃးၽႅတ်ႈ ယေႇရမိ၊ ဢေႃႈ။-
ဢၼ်ၸၢပ်ႈသႅင်ႇလူၺ်ႈလွင်ႈမိူင်း ဢေးၵျိပ်ႉ၊ ၼၼ်ႉ၊တပ်ႉသိုၵ်း ၼေႇၶေႃႇ၊ ဢၼ်ပဵၼ်ၶုၼ်ႁေႃၶမ်းမိူင်း ဢေးၵျိပ်ႉ၊ ဢၼ်ၶျႃးတပ်ႉၵႃႈတီႈႁိမ်းမႄႈၼမ်ႉ ဢုၽရတ်ႉ၊ ၵႃႈတီႈ ၶႃႇသေႇမိတ်ႉ၊ လႄႈ ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်းမိူင်း ပႃႇပုလုၼ်ႇ၊ တိုၵ်းတေႃးယႃႉပႅတ်ႈၼႂ်းၸူဝ်ႈပၢၼ် ယေႃးယၵိမ်း၊ လုၵ်ႈၸၢႆး ယူဝ်းသိယႃႉ၊ ၶုၼ်ႁေႃၶမ်းမိူင်း ယုတႃႉ၊ ၼၼ်ႉၸမ်ႉ၊မီးၸိူဝ်ႉၼင်ႇၼႆဢေႃႈ။
“ဢွၼ်ၵၼ်မႄႈႁႅၼ်းၶိူင်ႈႁႄႉလၢၵ်ႈၼၢၵ်ႈ ၸဵမ်လဵၵ်ႉၸဵမ်ယႂ်ႇသေလႄႈ သုတ်ႉၸပ်းသုတ်ႉၸူးႁႂ်ႈလႆႈတိုၵ်းသိုၵ်းတႃႉ။
ဢွၼ်ၵၼ်မႄးႁၢင်ႈႁႅၼ်းၶိူင်ႈၵၵ်ႉၶိူင်ႈမႃႉ သေလႄႈၶီႇသိုၵ်းတႃႉ။ တိုဝ်းမွၵ်ႇႁူဝ်လဵၵ်းသူယူႇသေလႄႈ ဢွၼ်ၵၼ်ဢွၵ်ႇတႃႉ။ သူၸိူဝ်းဢၼ်ၶီႇမႃႉၶဝ်႟။ ဢွၼ်ၵၼ်ပွတ်ႈသီ ႁွၵ်ႇသူသေလႄႈၼုင်ႈသိူဝ်ႈၶႅပ်းလဵၵ်းတႃႉ။
ၵူၺ်းၵႃႈ၊တၢင်းဢၼ်ၵဝ်လႆႈႁၼ်ၼၼ်ႉ ပဵၼ်ၸိူဝ်ႉၼင်ႇႁိုဝ်ဝႆႉ။ ၶဝ်ၵူဝ်ႁႄလႄႈဢွၼ်ၵၼ်သုတ်ႉၶိုၼ်း မိူဝ်းၵႂႃႇယဝ်ႉ။ ၵူၼ်းသိုၵ်းၶဝ်ၸိူဝ်းဢၼ်ႁႅင်းယႂ်ႇၼႃႇၼၼ်ႉ တူၵ်းသုမ်းလႄႈဢွၼ်ၵၼ်ဢွၵ်ႇပၢႆႈဢေႃႈ။ ၶဝ်ဢမ်ႇႁတ်းဝၢႆႇၶိုၼ်းတူၺ်းၶိုၼ်း။ ၽေးတၢင်းဢၼ်လီၵူဝ်လီႁႄမီးလဵပ်ႈႁွပ်ႈ ဝႆႉယူႇၵူႈၽၢႆႇၵူႈပႃႈဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ၵေႃႉဢၼ်ၶုၼ်ႇလႅၼ်ႈၶၼ်ၽႂ်းၼႃႇၼၼ်ႉ ဢမ်ႇပူၼ်ႉဢမ်ႇလွတ်ႈလႆႈ။ ၵေႃႉဢၼ်ႁႅင်း ယႂ်ႇၼႃႇဢမ်ႇလႆႈၵၢင်းလႆႈလွတ်ႈ။ ၶဝ်တၵ်းဢွၼ်ၵၼ်ၶီႈလိုတ်းမႅၼ်ႈလႄႈ လူမ်ႉၵႃႈတီႈႁိမ်းမႄႈၼမ်ႉ ဢုၽရတ်ႉ၊ ၽၢႆႇတၢင်းႁွင်ႇၼၼ်ႉဢေႃႈ။
ၵေႃႉဢၼ်လုၵ်ႉၶိုၼ်ႈမိူၼ်ၸိူဝ်ႉၼင်ႇ မႄႈၼမ်ႉ ၼၢႆးလ်၊ ၼွင်းမႃးထူမ်ႈၽင်ႇ ၼၼ်ႉလႄႈသင်၊ဢိၵ်ႇတင်း မိူၼ်ၸိူဝ်ႉၼင်ႇဢၼ်မႄႈၼမ်ႉတင်းလၢႆဢၼ် ၼမ်ႉလူၼ်ႉၽင်ႇလူၼ်ႉႁိုၵ်းယူႇၼၼ်ႉၸမ်ႉ၊ ပဵၼ်ၽူႈလႂ်။
မိူင်း ဢေးၵျိပ်ႉ၊ လုၵ်ႉၶိုၼ်ႈယူႇမိူၼ် ၸိူဝ်ႉၼင်ႇဢၼ်မႄႈၼမ်ႉ ၼၢႆးလ်၊ ၼွင်းမႃး ထူမ်ႈၽင်ႇၼၼ်ႉလႄႈ မႄႈၼမ်ႉတင်းလၢႆၼၼ်ႉလူၼ်ႉၽင်ႇ လူၼ်ႉႁိုၵ်းယူႇဢေႃႈ။ မိူင်း ဢေးၵျိပ်ႉ၊ လၢတ်ႈလႄႈဝႃႈ၊ “ၵဝ်ၼႆႉတၵ်း လုၵ်ႉၶိုၼ်ႈလႄႈထူမ်ႈႁူမ်ႇလိၼ်မိူင်းဢေႃႈ။ ၵဝ်တၵ်းယႃႉပႅတ်ႈဝဵင်း၊ဢိၵ်ႇတင်းၵူၼ်း ဢၼ်ယူႇၵႃႈၼႂ်းဝဵင်းၸိူဝ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
မႃႉတင်းလၢႆၶဝ်႟။ ဢွၼ်ၵၼ်ၶိုၼ်ႈတႃႉ။ လေႃႉမႃႉသိုၵ်းၶဝ်႟။ ဢွၼ်ၵၼ်ႁေႃႈဢွၵ်ႇ ၵႂႃႇဝႆးဝႆးတႃႉ။ ႁႂ်ႈၵူၼ်းဢၼ်ႁႅင်းယႂ်ႇၼႃႇဢၼ်ဝႃႈ၊ ၵူၼ်းမဵဝ်း ဢေႇတီႇဢူဝ်းပီးယႃး၊ ၵူၼ်းမဵဝ်း လိပ်ႉပီးယႃး၊ ဢၼ်ၸၢင်ႈယိပ်း ၶႅပ်းႁႄႉလၢၵ်ႈၼၢၵ်ႈ၊ၵူၼ်းမဵဝ်း လိတ်ႉတီးယႃး၊ ဢၼ်ၸၢင်ႈယိပ်းၵၢင်ႇ ၸိူဝ်းၼၼ်ႉဢွၼ်ၵၼ်ဢွၵ်ႇတႃႉ။
မိုဝ်ႉဝၼ်းၼၼ်ႉပဵၼ်မိုဝ်ႉဝၼ်း ၸဝ်ႈပူဝ်ႇပႃႇၵၢင်ႁၢဝ်၊ၸဝ်ႈထႃႇဝရႃႉၽြႃး၊ လႄႈ မိုဝ်ႉဝၼ်းဢၼ်၊မၼ်းၸဝ်ႈတွပ်ႇတႅၼ်းၶိုၼ်းႁႂ်ႈ လႆႈပၼ်တၢမ်ႇတီႈရၢၼ်ႇသူႇမၼ်းၸဝ်ႈဢေႃႈ။ လၢပ်ႇမၼ်းၸဝ်ႈၼၼ်ႉတၵ်းၶူပ်းၵိၼ်ၼိူဝ်ႉၶဝ်လႄႈ တၵ်းသူတ်ႉၵိၼ်လိူတ်ႈၶဝ်ဢိမ်ႇဢိမ်ႇ တဵမ်တဵမ်ဢေႃႈ။ လွင်ႈမၼ်းၸမ်ႉ၊ ၸဝ်ႈပူဝ်ႇပႃႇၵၢင်ႁၢဝ်၊ ၸဝ်ႈထႃႇဝရႃႉၽြႃး၊ မီးလွင်ႈဢၼ် တၵ်းလႆႈသၢၵ်ႈလူႇတူဝ်တၢင်းလူႇ ၵႃႈတီႈၽၢႆႇတၢင်းႁွင်ႇၵႃႈႁိမ်းမႄႈၼမ်ႉ ဢုၽရတ်ႉ၊ ၼၼ်ႉဢေႃႈ။
ၵၼ်ႇၺႃႇလုၵ်ႈယိင်းသၢဝ် ဢေးၵျိပ်ႉ၊ ႟။ ၶိုၼ်ႈၵႂႃႇၵႃႈတီႈဝဵင်း ၵိလတ်ႉ၊ လႄႈ သွၵ်ႈႁႃဢဝ်ယႃႈယႃတႃႉ။ မႂ်းၸၢင်ႈသုင်းၸႂ်ႉယႃႈယႃၼမ်ၼႃႇလၢႆလၢႆ လွၵ်ႇလွၵ်ႇလႄႈတၢင်းၸဵပ်းမႂ်းဢမ်ႇႁၢႆလႆႈ။
ၵူၼ်းၵူႈၸိူဝ်ႉၵူႈမဵဝ်းလႆႈငိၼ်းလွင်ႈဢၼ်မႂ်း သရေႇလုၼၼ်ႉယဝ်ႉ။ သဵင်ဢၼ်မႂ်းပွင်ႉၶၢင်းပွင်ႉမိုၼ်ႇၼၼ်ႉ ၸွတ်ႇတူဝ်ႈၵႃႈၼိူဝ်လိၼ်မိူင်းယဝ်ႉ။ ႁူဝ်ႁၢၼ်ၵူၼ်းသိုၵ်းၼင်ႇၵၼ်ၵၼ်ၵေႃႉၼိုင်ႈလႄႈ ၵေႃႉၼိုင်ႈ၊တိူဝ်ႉထုၵ်ႇၵၼ်လႄႈတင်းသွင်ၽၢႆႇ သွင်ပႃႈၼၼ်ႉဢွၼ်ၵၼ်လူမ်ႉတူၵ်းၵႃႈၼိူဝ် လိၼ်ယဝ်ႉ၊ဝႃႈၼင်ႇၼႆဢေႃႈ။
ၵႂၢမ်းဢၼ် ထႃႇဝရႃႉၽြႃး၊ မီးဢမိင်ႉတီႈပရေႃးၽႅတ်ႈ ယေႇရမိ၊ လၢတ်ႈလွင်ႈဢၼ် ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်းမိူင်း ပႃႇပုလုၼ်ႇ၊ တၵ်းမႃးလႄႈတိုၵ်းယႃႉပႅတ်ႈမိူင်း ဢေးၵျိပ်ႉ၊ ၼၼ်ႉလႄႈဝႃႈၸမ်ႉ။
“ဢွၼ်ၵၼ်ပၢဝ်ႇသေႃႇၵႃႈၼႂ်းမိူင်း ဢေးၵျိပ်ႉ၊ လႄႈဢွၼ်ၵၼ်မွၵ်ႇလၢတ်ႈတီႈဝဵင်း မိၵတေႃးလႃႉ၊ ဝဵင်း မႅမ်းၽိ၊ တင်းဝဵင်း တႃႇပၼိတ်ႉ၊ လႄႈဝႃႈ၊ ဢွၼ်ၵၼ်ဢွၵ်ႇမႃးလႄႈမႄးႁႅၼ်း တူဝ်ၸဝ်ႈၵဝ်ႇဝႆႉတႃႉ။ လွင်ႈမၼ်းၸမ်ႉ၊လၢပ်ႇၸဝ်ႈၶူပ်းၵိၼ်ၵူၼ်း ၵႃႈတီႈႁိမ်းႁွမ်းလဵပ်ႈႁွပ်ႈမႂ်းၼၼ်ႉယဝ်ႉ။
ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၽြႃးသူဢၼ် တၼ်းၶူဝ်းယႂ်ႇၼႃႇၽြႃး ဢႃႇပိ၊ ၼၼ်ႉ လႆႈလူမ်ႉပင်းတူၵ်းၸိူဝ်ႉၼင်ႇႁိုဝ်။ ၵွပ်ႈပိူဝ်ႈ ထႃႇဝရႃႉၽြႃး၊ ဢီးမၼ်းတူၵ်းလႄႈ မၼ်းဢမ်ႇၸုၵ်းဢမ်ႇၶၢမ်ႇယူႇလႆႈ။
မၼ်းၸဝ်ႈႁဵတ်းႁႂ်ႈၵူၼ်းၼမ်ၼႃႇတိူဝ်ႉမႅၼ်ႈ သႂ်ႇၵၼ်လႄႈလူမ်ႉဢေႃႈ။ ၶဝ်ၵေႃႉၼိုင်ႈလႄႈၵေႃႉၼိုင်ႈလၢတ်ႈတီႈၵၼ်လႄႈဝႃႈ၊ ‘ႁဝ်းဢွၼ်ၵၼ်လုၵ်ႉတႃႉ။ ၵွပ်ႈပိူဝ်ႈလၢပ်ႇဢၼ်ၼိၵ်ႈၸၢၵ်ႈငႅၼ်းသႄးႁဝ်း ၼၼ်ႉလႄႈႁဝ်းဢွၼ်ၵၼ်ၶိုၼ်းမိူဝ်းၸူး ၵႃႈတီႈပီႈၼွင်ႉၸိူဝ်ႉၶိူဝ်းႁဝ်း၊ဢိၵ်ႇတင်း ၵႃႈတီႈမိူင်းတီႈယူႇႁဝ်းဢၼ်ႁဝ်းၵိူတ်ႇလဵင်ႉမႃး ၼၼ်ႉတႃႉႁဝ်း၊’ ဝႃႈၼင်ႇၼႆဢေႃႈ။
ၵႃႈတီႈၶုၼ်ႁေႃၶမ်းမိူင်း ဢေးၵျိပ်ႉ၊ ၼၼ်ႉ ပၼ်ၸိုဝ်ႈသဵင်ဢၼ်မႂ်ႇလႄႈဝႃႈ၊ ‘ၵေႃႉဢၼ်ႁဵတ်းႁႂ်ႈဢၶႂၢင်ႉဢယေးဢၼ်လီၼၼ်ႉ လႆႈလုတ်ႈပိူင်ႈၵႂႃႇၼၼ်ႉ၊ပဵၼ်ၵူၼ်း လူမ်းလူင်ဢေႃႈ၊’ ဝႃႈၼင်ႇၼႆဢေႃႈ။
ၵဝ်ပဵၼ်ၸဝ်ႈၶုၼ်ႁေႃၶမ်းဢၼ်မီးၼႃႇမႃႉ ၸိုဝ်ႈသဵင် ထႃႇဝရႃႉၽြႃး၊ၸဝ်ႈဢၼၼ်ႇတႃႉ တၼ်းၶူဝ်း၊ လႄႈမီးဢမိင်ႉၸမ်ႉ၊ ၵဝ်ပဵၼ်ၽြႃးပဵၼ်ၸဝ်ႈဢၼ် ဢသၢၵ်ႈလိပ်းယူႇဢေႃႈ။ ၵေႃႉဢၼ်တေမႃးတိုၵ်းတေႃးသူၼၼ်ႉ ပဵၼ်ၵေႃႉဢၼ်ဢဵၼ်ႁႅင်းယႂ်ႇသေပိူၼ်ႈ မိူၼ်ၸိူဝ်ႉၼင်ႇၸိၵ်းလွႆ တႃႇပေႃႇ၊ သုင်သေ လွႆၵႃႈမီးတင်းသဵင်ႈလႄႈ လွႆ ၵရမေႇလႃႉ၊ တႄႇမီးယူႇသုင်ၼႃႇၵႃႈႁိမ်း ပၢင်ႇလၢႆႇၼၼ်ႉဢေႃႈ။
ၵူၼ်းမိူင်း ဢေးၵျိပ်ႉ၊ ၶဝ်႟။ မႄးႁႅၼ်းပုၼ်ႈဢၼ်တၵ်းလႆႈၶၢမ်ႇတၢင်းဢၼ်သိမ်းဢဝ်ၵႂႃႇၼၼ်ႉတႃႉ၊လွင်ႈမၼ်းၸမ်ႉ။ ဝဵင်း မႅမ်းၽိ၊ ၼၼ်ႉတၵ်းလႆႈပဵၼ်တီႈဢၼ်ပဝ်ႇဢၼ်ႁၢမ်းလႄႈလုလႅဝ်ႁၵ်းပင်းဢမ်ႇမီး ၽူႈလႂ်ယူႇသဝ်းဢေႃႈ။
မိူင်း ဢေးၵျိပ်ႉ၊ ၼၼ်ႉပဵၼ်ဝူဝ်းမႄႈသိုဝ်ႇဢၼ် ႁၢင်ႈလီႁၢင်ႈငၢမ်းဢေႃႈ။ ၼႂ်းဝႃႈၼၼ်သေၵေႃႈလွင်ႈတၢင်းဢၼ် ယႃႉၽဵဝ်ႈပႅတ်ႈလုၵ်ႉသေၵႃႈတီႈၼႃႈ တၢင်းႁွင်ႇပေႃႇမႃးတီႈမၼ်းမိူၼ်ၸိူဝ်ႉၼင်ႇ ၽုင်လိူၵ်ႇၼၼ်ႉဢေႃႈ။
ၵူၼ်းသိုၵ်းဢၼ်ၵိၼ်ၸၢင်ႈၵိၼ်ငႃၼႂ်းဝူင်ႈၵၢင်မၼ်းၸိူဝ်းၼၼ်ႉပဵၼ်မိူၼ်ၸိူဝ်ႉၼင်ႇ လဵင်ႉဝူဝ်းမႄႈဢွၼ်ႇႁႂ်ႈပီးလီၼၼ်ႉ၊ ၶဝ်ဢမ်ႇၸုၵ်းၶၢမ်ႇလႄႈတိုၵ်းတေႃး၊ ဢွၼ်ၵၼ်ဝၢႆႇလင်ၵွင်လင်လႄႈဢွၵ်ႇပၢႆႈ လူၺ်ႈၵၼ်ဢေႃႈ။ လွင်ႈမၼ်းၸမ်ႉ၊မိုဝ်ႉဝၼ်းတၢင်းဢၼ်လု ဢၼ်လႅဝ်၊ၶိင်ႇဢၼ်လႆႈၶၢမ်ႇတၢမ်ႇ ဢပျတ်ႈၼၼ်ႉႁွတ်ႈထိုင်မႃးၼၼ်ႉဢေႃႈ။
မိူဝ်ႈဢၼ်ရၢၼ်ႇသူႇႁွတ်ႈမႃးၸမ်ၼၼ်ႉၸိုင်၊ ၵူၼ်းမိူင်း ဢေးၵျိပ်ႉ၊ ၶဝ်ႁဵတ်းသဵင်မိူၼ် ၸိူဝ်ႉၼင်ႇသဵင်ဢၼ်ငူးလိူၼ်ႈဢွၵ်ႇပၢႆႈၼၼ်ႉဢေႃႈ။ ရၢၼ်ႇသူႇၶဝ်မိူၼ်ၸိူဝ်ႉၼင်ႇၵူၼ်းပွမ်ႈ တူၼ်ႈမႆႉလႄႈတၵ်းဢဝ်တင်းတႃမၢတ်ႇ သေလႄႈတိုၵ်းတေႃးၶဝ်ဢေႃႈ။
ၶဝ်တၵ်းတိုၵ်းတေႃးမိူၼ်ၸိူဝ်ႉၼင်ႇပွမ်ႈ ပႃႇမႆႉပႃႇတွၵ်ႇလူမ်ႉတူၵ်းၼၼ်ႉဢေႃႈ။ ၵူၼ်းၶဝ်တင်းလၢႆၼၼ်ႉၼမ်ၼႃႇထၢၼ်ႈပေႃး ဢမ်ႇၼပ်ႉဢမ်ႇဢၢၼ်ႇလႆႈလႄႈ ႁူဝ်ႁၢၼ်ၵူၼ်းသိုၵ်းၶဝ်ၼၼ်ႉၼမ်ၼႃႇ လိူဝ်တွၼ်းၼႃႇသေၸၵ်းတႅၼ်ဢၼ် ဢမ်ႇၼပ်ႉဢမ်ႇဢၢၼ်ႇလႆႈၼၼ်ႉဢေႃႈ။
လုၵ်ႈယိင်း ဢေးၵျိပ်ႉ၊ တၵ်းလႆႈၶၢမ်ႇ တၢင်းဢၼ်ဢူၵ်းဢၼ်ဢၢႆလႄႈ မၼ်းတၵ်းတူၵ်းႁွတ်ႈၵႃႈၼႂ်းမိုဝ်းၵူၼ်းမိူင်း ၽၢႆႇတၢင်းႁွင်ႇၸိူဝ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊ “တူၺ်းလူး။ ၵဝ်တၵ်းပၼ်တၢမ်ႇဢပျတ်ႈတီႈၽြႃး ဢႃႇမုၼ်ႇ၊ ဢၼ်မီးၵႃႈတီႈဝဵင်း ႀေးပိ ၊ဢိၵ်ႇတင်းၶုၼ်ႁေႃၶမ်းမိူင်း ဢေးၵျိပ်ႉ၊ လႄႈၽြႃးမၼ်းတင်းလၢႆ၊ဢိၵ်ႇတင်းၶဝ်ၸိူဝ်းဢၼ်ဢိင်ပိုင်ႈမၼ်းၵႃႈမီးတင်းသဵင်ႈတင်းလူင်ၼၼ်ႉဢေႃႈ။-
ၵဝ်တၵ်းဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းၶဝ်ၸိူဝ်းဢၼ်ႁႃဢဝ်ဢသၢၵ်ႈၶဝ်ဢၼ်ဝႃႈ၊ၵႃႈၼႂ်းမိုဝ်း ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်းမိူင်း ပႃႇပုလုၼ်ႇ၊ တင်းၶုၼ်ဢၼ်ပွင်ၵၢၼ်မၼ်းတင်းလၢႆၼၼ်ႉဢေႃႈ။ ၵူၺ်းၵႃႈ၊လိုၼ်းၼၼ်ႉမိူင်း ဢေးၵျိပ်ႉ၊ ၸိုင်၊တၵ်းသမ်ႉၶိုၼ်းမီးၵူၼ်းယူႇၵူၼ်းသဝ်းမိူၼ်ၸိူဝ်ႉၼင်ႇမိူဝ်ႈဢွၼ်တၢင်းၼၼ်ႉဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
“ၶႃႈၵဝ် ယႃႇၵုပ်ႈ၊ ႟။ ယႃႇပေၵူဝ်ပေႁႄ။ မဵဝ်း ဢိသရေး၊ ႟။ ယႃႇပေၸႂ်လု။ ၵဝ်တၵ်းၼုၵ်ႈဢဝ်မႂ်းဢိၵ်ႇတင်းပီႈၼွင်ႉ ၸိူဝ်ႉၶိူဝ်းမႂ်းတင်းလၢႆ၊ ဢွၵ်ႇသေၵႃႈတီႈမိူင်းဢၼ်ၶဝ်လႆႈၶၢမ်ႇ တၢင်းဢၼ်သိမ်းဢဝ်ၵႂႃႇၼၼ်ႉဢေႃႈ။ မဵဝ်း ယႃႇၵုပ်ႈ၊ တၵ်းလႆႈၶိုၼ်းမႃးသေလႄႈ ယူႇတဵတ်ႇလီၼိမ်လီၵတ်းယဵၼ်ၶျၢမ်းသႃႇလႄႈဢမ်ႇမီးၵေႃႉဢၼ်လွၵ်ႇဢၼ်ငိုတ်ႈၶဝ်ဢေႃႈ။
ၶႃႈၵဝ် ယႃႇၵုပ်ႈ၊ ႟။ ယႃႇပေမႆႈၸႂ်ၶီၸႂ်။ ၵဝ်မီးယူႇလူၺ်ႈၵၼ်တင်းမႂ်းဢေႃႈ။ ပိၵ်ႉသမ်ႉၵဝ်ႁႂ်ႈၵူၼ်းၵူႈၸိူဝ်ႉၵူႈမဵဝ်းတီႈဢၼ်ၵဝ် လိုပ်ႈမႂ်းဢွၵ်ႇၵႂႃႇၸူးၼၼ်ႉလုသုမ်းသေၵေႃႈ၊ ၵဝ်တၵ်းဢမ်ႇႁႂ်ႈမႂ်းလုသုမ်း၊ၵဝ်ယင်းဢမ်ႇပွႆႇဢပျတ်ႈမႂ်းလွတ်ႈမူတ်းမူတ်းသဵင်ႈသဵင်ႈလႄႈ တၵ်းသင်ႇသွၼ်သုင်းမႃႉမႂ်းႁႂ်ႈမႅၼ်ႈၸွမ်းၼင်ႇ တြႃးဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးထိုင်တီႈပရေႃးၽႅတ်ႈ ယေႇရမိ၊ လၢတ်ႈလွင်ႈၵူၼ်းမဵဝ်း ၽိလိတ်ႉတိ၊ ၶိင်ႇဢွၼ်တၢင်းဢၼ်ၶုၼ်ႁေႃၶမ်းမိူင်း ဢေးၵျိပ်ႉ၊ ဢမ်ႇပႆႇတိုၵ်းတေႃးယႃႉပႅတ်ႈဝဵင်း ၵႃႇၸႃႉ၊ ၼၼ်ႉၸမ်ႉ၊-
ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “တူၺ်းလူး။ ၼမ်ႉတၵ်းလုၵ်ႉသေၵႃႈတီႈၽၢႆႇတၢင်းႁွင်ႇမႃးလႄႈထူမ်ႈၽင်ႇသေယဝ်ႉ၊ တၵ်းလႆလူင်းမႃးမိူၼ်ၸိူဝ်ႉၼင်ႇမႄႈၼမ်ႉဢေႃႈ။ ၼမ်ႉၼၼ်ႉတၵ်းႁူမ်ႇထူမ်ႈလိၼ်မိူင်း၊ ဢိၵ်ႇတင်းၵႃႈဢၼ်မီးၵႃႈၼိူဝ်လိၼ်မိူင်း တင်းသဵင်ႈ၊ဝဵင်းတင်းလၢႆ၊ဢိၵ်ႇတင်း ၶဝ်ၸိူဝ်းဢၼ်ယူႇၼႂ်းမၼ်းတင်းသဵင်ႈ တင်းလူင်ၼၼ်ႉဢေႃႈ။ ၵူၼ်းတင်းလၢႆတၵ်းဢွၼ်ၵၼ်ႁွင်ႉႁႆႈ ႁွင်ႉသႅၼ်ႇပုၼ်ႈႁႂ်ႈလႆႈၶၢမ်ႇတၢင်းဢၼ် ၵႄႇသႄႇဢဝ်ၶဝ်ၼၼ်ႉဢေႃႈ။ ၵူၼ်းဝၢၼ်ႈၵူၼ်းမိူင်းၵႃႈမီးတင်းသဵင်ႈတင်းလူင် တၵ်းဢွၼ်ၵၼ်ပွင်ႉမိုၼ်ႇပွင်ႉၶၢင်းဢေႃႈ။
ၶဝ်တၵ်းငိၼ်းသဵင်ၵိပ်ႇမႃႉဢၼ်ထိပ်ႇၽင်ႈ၊ သဵင်လေႃႉရထႃးသိုၵ်းမေႃးလင်၊ ဢိၵ်ႇတင်းသဵင်မၢၵ်ႇလေႃႉရထႃးသိုၵ်း ၶုၼ်ႇလႅၼ်ႈၼၼ်ႉဢေႃႈ။ ၶဝ်ၸိူဝ်းဢၼ်ပဵၼ်ပေႃႈၼၼ်ႉႁႅင်းမိုဝ်း ဢူၼ်ႈၵႂႃႇလႄႈ ၶဝ်ဢမ်ႇၸၢင်ႈဢွၼ်ၵၼ်ဝၢႆႇၶိုၼ်းလူတူၺ်း လုၵ်ႈၶဝ်လၢင်းၶဝ်လႆႈ။
လွင်ႈမၼ်းၸမ်ႉ၊မိုဝ်ႉဝၼ်းဢၼ်ယႃႉၽဵဝ်ႈပႅတ်ႈၵူၼ်းမဵဝ်း ၽိလိတ်ႉတိ၊ တင်းသဵင်ႈတင်းလူင်၊ မိုဝ်ႉဝၼ်းဢၼ်လႆႈပႄႇပႅတ်ႈတႅပ်းပႅတ်ႈ ၶဝ်ၸိူဝ်းဢၼ်ၸွႆႈသိုၵ်းထႅမ်သိုၵ်း ၵႃႈတီႈဝဵင်း တုရု၊ ဝဵင်း ၸိတုမ်ႇ၊ ၼၼ်ႉ ႁွတ်ႈထိုင်မႃးဢေႃႈ။ ထႃႇဝရႃႉၽြႃး၊ တၵ်းပႄႇၽဵဝ်ႈပႅတ်ႈ ၵူၼ်းမဵဝ်း ၽိလိတ်ႉတိ၊ ဢိၵ်ႇတင်း ၵူၼ်းဢၼ်ယူႇၵႃႈႁိမ်းပၢင်ႇလၢႆႇဢၼ်ၵိုတ်း ဢၼ်ၵျၢၼ်ႇလႄႈယူႇၵႃႈၼိူဝ် ၵုၼ် ၵရေႇတေႇ၊ ၸိူဝ်းၼၼ်ႉဢေႃႈ။
ၵူၼ်းဝဵင်း ၵႃႇၸႃႉ၊ တင်းလၢႆမီးတၢင်းဢၼ် ၼွႆႉၸႂ်ၶူမ်ၸႂ်ၼႃႇလူင်လၢင်ဢေႃႈ။ ၵူၼ်းဝဵင်း ဢႃႇသၵေႇလုၼ်ႇ၊ တင်းလၢႆၵေႃႈ ယူႇသဵတ်ႇသဵတ်ႇယဵၼ်ယဵၼ်ယူႇဢေႃႈ။ ၵူၼ်းမိူင်း ၽိလိတ်ႉတိ၊ ဢၼ်ၵိုတ်းဢၼ်ၵျၢၼ်ႇ ၼၼ်ႉတၵ်းတေႁွင်ႉႁႆႈပွင်ႉၶၢင်းလႆႈႁိုင်ၵႃႈႁိုဝ်။
လၢပ်ႇလႅဝ်း ထႃႇဝရႃႉၽြႃး၊ ႟။ မႂ်းတၵ်း တႅပ်းၽၼ်းယူႇၶိင်ႇၵႃႇလႃႉႁိုင်ၵႃႈႁိုဝ်။ ဢဝ်တူဝ်မႂ်းၶဝ်ႈၵႃႈၼႂ်းၵပ်းမႂ်းသေလႄႈယူႇတႃႉ။ လိုဝ်ႈသဝ်းယူႇၼိမ်ၼိမ်လီလီတႃႉ။
ၵူၺ်းၵႃႈ၊မႂ်းတၵ်းယူႇၼိမ်ၼိမ်လီလီလႆႈ ၸိူဝ်ႉၼင်ႇႁိုဝ်။ ထႃႇဝရႃႉၽြႃး၊ ပၼ်ဝႆႉပုၼ်ႈတၵ်းတေ ထၢမ်းႁဵတ်းၵၢၼ်ဢမုဢေႃႈ။ ထႃႇဝရႃႉၽြႃး၊ ပၼ်ဢမိင်ႉႁႂ်ႈၶတ်းတႃႉ ၵၼ်တင်းဝဵင်း ဢႃႇသၵေႇလုၼ်ႇ၊ တင်းၽင်ႇပၢင်ႇလၢႆႇၼၼ်ႉလႄႈ တိုၵ်းတေႃးၵူၼ်းၸိူဝ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ဢဝ်လွင်ႈ မိူင်း မေႃႇၽႃႉ၊ သေလႄႈမီးဢမိင်ႉၸမ်ႉ၊ “ဝဵင်း ၼေႇပေႃႇ၊ မီးဢႃႉမၢင်ႇၵလႃႇဢေႃႈ။ မၼ်းႁွတ်ႈထိုင်တၢင်းဢၼ်လုဢၼ်လႅဝ်ယဝ်ႉ။ ဝဵင်း ၵိရိယသိမ်း၊ လႆႈၶၢမ်ႇတၢင်း ဢၼ်ဢူၵ်းဢၼ်ဢၢႆလႄႈမီးတၢင်းဢၼ် ပိူၼ်ႈႁိမ်ႁူင်ႇသိမ်းဢဝ်ယဝ်ႉ။ တိူၵ်ႈတီႈတိုၵ်းသိုၵ်းလႆႈၶၢမ်ႇတၢင်းဢၼ်ဢူၵ်းဢၼ်ဢၢႆလႄႈမီးတၢင်းဢၼ်လုပင်းၵႂႃႇယဝ်ႉ။
တၢင်းဢၼ်ဢုပ်ႇဢၢတ်ႇမိူင်း မေႃႇၽႃႉ၊ ၼၼ်ႉ ၵမ်းလိုၼ်းဢမ်ႇလႆႈမီးလႃးလႃး။ ၵႃႈၼႂ်းဝဵင်း ႁေႇသၽုၼ်ႇ၊ ၼၼ်ႉပိူၼ်ႈ ဢွၼ်ၵၼ်ၵျၢမ်ႇပွင်တၢင်းၵျၢမ်ႇတၢင်းပွင် ဢၼ်ၶတ်းတႃႉၵၼ်တင်းမၼ်းလႄႈဝႃႈ၊ ‘မႃးမႃး႟။ ဢွၼ်ၵၼ်ပႄႇၽဵဝ်ႈမိူင်း မေႃႇၽႃႉ၊ ပႅတ်ႈႁႂ်ႈမၼ်းထၢၼ်ႈပေႃးဢမ်ႇပဵၼ်ဝၢၼ်ႈ ပဵၼ်မိူင်းလႆႈတႃႉႁဝ်း၊’ ဝႃႈၼင်ႇၼႆဢေႃႈ။ ဝဵင်း မႃႇတမေႇၼႃႉ၊ ႟။ မႂ်းၵေႃႈ တၵ်းလႆႈႁွတ်ႈထိုင်တၢင်းဢၼ်သဵတ်ႇဢၼ်ယဵၼ်ဢေႃႈ။ ၽေးလၢပ်ႇၽေးလႅဝ်းတၵ်းလိုပ်ႈၸွမ်း လမ်းၸွမ်းမႂ်းဢေႃႈ။
လႆႈငိၼ်းသဵင်ဢၼ်သႅၼ်ႇႁွင်ႉၵႃႈတီႈဝဵင်း ႁေႃးရၼိမ်ႇ၊ လႄႈ မီးတၢင်းဢၼ်ၼိၵ်ႈၸၢၵ်ႈငႅၼ်းသႄး၊ ဢိၵ်ႇတင်းတၢင်းဢၼ်ယႃႉၽဵဝ်ႈပႅတ်ႈ ဢၼ်ယႂ်ႇၼႃႇဢေႃႈ။
မိူင်း မေႃႇၽႃႉ၊ ၼၼ်ႉႁွတ်ႈထိုင်တၢင်း ဢၼ်လုလႅဝ်လႄႈ လုၵ်ႈယိင်းဢွၼ်ႇမၼ်းၸိူဝ်းၼၼ်ႉ ဢွၼ်ၵၼ်ႁွင်ႉႁႆႈဢေႃႈ။
ၵႃႈတီႈတီႈဢၼ်ၶိုၼ်ႈၸူးၵႃႈၼိူဝ်လွႆ လုႁိတ်ႉ၊ ၼၼ်ႉလႆႈငိၼ်းတၢင်းဢၼ်ႁွင်ႉႁႆႈ ယူႇသေႇသေႇလႄႈ ၵႃႈတီႈဢၼ်လူင်းၸူးဝဵင်း ႁေႃးရၼိမ်ႇ၊ ၼၼ်ႉၵေႃႈဢွၼ်ၵၼ်လႆႈငိၼ်းသဵင်ႁွင်ႉႁႆႈ၊ၵွပ်ႈပိူဝ်ႈ တၢင်းတုၵ်ႉၶႃႉၶၢၼ်ၸႂ်ၼၼ်ႉဢေႃႈ။
ဢွၼ်ၵၼ်ပၢႆႈႁႂ်ႈဢသၢၵ်ႈသူလႆႈလွတ်ႈတႃႉ။ ဢွၼ်ၵၼ်လႅၼ်ႈပၢႆႈမိူၼ်ၸိူဝ်ႉၼင်ႇမႃႉလီႈထိူၼ်ႇ လႅၼ်ႈၵႃႈၼႂ်းထိူၼ်ႇလႅင်ႉၼၼ်ႉတႃႉ။
မႂ်းဢိင်ပိုင်ႈဢႃးၵူဝ်းဢဵၼ်ႁႅင်းမႂ်း၊ဢိၵ်ႇတင်း ဢုၵ်ႉၸႃႇၽၼ်ႇတႃႇမႂ်းဢေႃႈ။ ၵွပ်ႈၼၼ်လႄႈမႂ်းတၵ်းလႆႈႁွတ်ႈထိုင် ၵႃႈၼႂ်းမိုဝ်းပိူၼ်ႈဢေႃႈ။ ၽြႃး ၶေးမုသႃႉ၊ ဢိၵ်ႇတင်းယဵၸ်ႈပရေႃးႁဵၵ်ႈမၼ်း တင်းၶုၼ်မၼ်းၸိူဝ်းၼၼ်ႉ တၵ်းလႆႈၶၢမ်ႇ တၢင်းဢၼ်သိမ်းဢဝ်ၵႂႃႇဢေႃႈ။
ၵေႃႉဢၼ်ယႃႉလႅဝ်ၼၼ်ႉတၵ်းႁွတ်ႈမႃး ၵႃႈတီႈဝဵင်းၵူႈဝဵင်းလႄႈ ဢမ်ႇလႆႈၵၢင်း လႆႈလွတ်ႈသေဝဵင်း။ ပၢင်ႇႁူၺ်ႈတၵ်းလႆႈၶၢမ်ႇတၢင်းဢၼ် ယႃႉၽဵဝ်ႈပႅတ်ႈလႄႈ ပၢင်ႇပဵင်းတၵ်းလႆႈႁွတ်ႈထိုင်တၢင်းဢၼ်လု ဢၼ်လႅဝ်ဢေႃႈ။ ထႃႇဝရႃႉၽြႃး၊ မီးဢမိင်ႉ ၸိူဝ်ႉၼင်ႇၼၼ်ယဝ်ႉ။
ဢဝ်ၵိူဝ်ပိုၼ်ၽၢဝ်ႇၵႃႈၼိူဝ်မိူင်း မေႃႇၽႃႉ၊ တႃႉ။ မိူင်းၼၼ်ႉဢမ်ႇပေႃးႁိုင်တၵ်းတေလုလႅဝ်ဢေႃႈ။ ဝဵင်းမၼ်းၸိူဝ်းၼၼ်ႉတၵ်းလႆႈပဵၼ်တီႈဢၼ် ပဝ်ႇဢၼ်လၢပ်ႈ၊ဢမ်ႇမီးၵေႃႉဢၼ်ယူႇ ဢၼ်သဝ်းလႃးလႃး၊” ဝႃႈၼင်ႇၼႆဢေႃႈ။
ႁႂ်ႈၵေႃႉဢၼ်ဢမ်ႇပႃးတင်းႁူဝ်ၸႂ်သဵင်ႈသဵင်ႈသေလႄႈသၢင်ႈႁဵတ်းၵၢၼ်ဢမုၽြႃးပဵၼ်ၸဝ်ႈၼၼ်ႉလႆႈၶၢမ်ႇတၢင်းဢၼ်ၵိၼ်ႇဝႃႈသေၵမ်းလူၺ်ႈ။ ၵေႃႉဢၼ်ဢမ်ႇႁႂ်ႈလၢပ်ႇမၼ်းလႆႈၽၼ်းသေလႄႈဢဝ်တၢႆၼၼ်ႉႁႂ်ႈလႆႈၶၢမ်ႇတၢင်းဢၼ်ၵိၼ်ႇဝႃႈသေၵမ်းလူၺ်ႈ။
“မိူင်း မေႃႇၽႃႉ၊ ၼႆႉၸႃႉၸဵမ်မိူဝ်ႈဢၼ်ဢသၢၵ်ႈဢရွႆႇမၼ်းယင်းလဵၵ်ႉယင်းၼုမ်ႇၼၼ်ႉလႆႈယူႇလွတ်ႈၽေးလွတ်ႈရၢၼ်ႇၵတ်းယဵၼ်ၶျၢမ်းသႃႇလႄႈဢမ်ႇလႆႈၶၢမ်ႇတၢင်းဢၼ်သိမ်းဢဝ်ၵႂႃႇတၢင်ႇဝၢၼ်ႈတၢင်ႇမိူင်းသေၽဝ်ႇသေပွၵ်ႈ။ မိူင်း မေႃႇၽႃႉ၊ ၼႆႉမိူၼ်ၼမ်ႉမၢၵ်ႇၸပိတ်ႉဢၼ်ၵဵပ်းဝႆႉဢၼ်ဢမ်ႇလႆႈၶၢမ်ႇတၢင်းဢၼ်ဢဝ်သေၵႃႈတီႈမေႃႈလုၵ်ႈၼိုင်ႈသေထွၵ်ႇသႂ်ႇၵႃႈၼႂ်းမေႃႈလုၵ်ႈၼိုင်ႈလႄႈတၢင်းဝၢၼ်တၢင်းၸဵမ်းမၼ်းၼၼ်ႉၵေႃႈယင်းၵိုတ်းဝႆႉမီးဝႆႉယူႇဢေႃႈ။ ဢၢႆႁွမ်ဢၢႆႁူၺ်းမၼ်းၼၼ်ႉၵေႃႈဢမ်ႇလုဢမ်ႇႁၢႆ။
“ၼႂ်းဝႃႈၼၼ်သေၵေႃႈမိုဝ်ႉဝၼ်းဢၼ်ၵဝ်တၵ်းပွႆႇၸႂ်ႉၶဝ်ၸိူဝ်းဢၼ်ၸၢင်ႈထွၵ်ႇၸၢင်ႈႁိုဝ်ႈၸိူဝ်းၼၼ်ႉတၵ်းႁွတ်ႈထိုင်ဢေႃႈ။ ၶဝ်ၼၼ်ႉတၵ်းဢွၼ်ၵၼ်ထွၵ်ႇႁိုဝ်ႈ မေႃႇၽႃႉ၊ ပႅတ်ႈလႄႈထွၵ်ႇႁိုဝ်ႈမေႃႈဝၢၼ်ႇၶဝ်ပႅတ်ႈမူတ်းသေယဝ်ႉ၊ပေႃႉၼမ်ႉတဝ်ႈၶဝ်တႅၵ်ႇယွႆႈပႅတ်ႈဢေႃႈ။-
ၵူၼ်းမဵဝ်း မေႃႇၽႃႉ၊ ၼၼ်ႉတၵ်းလႆႈမီးတၢင်းဢၼ်ဢူၵ်းဢၼ်ဢၢႆၵွပ်ႈပိူဝ်ႈၽြႃး ၶေးမုသႃႉ၊ မိူၼ်ၸိူဝ်ႉၼင်ႇဢၼ်ၵူၼ်းမဵဝ်း ဢိသရေး၊ လႆႈမီးတၢင်းဢၼ်ဢူၵ်းဢၼ်ဢၢႆၵွပ်ႈပိူဝ်ႈၽြႃးဢၼ်မီးၼႂ်းမိူင်း ပေႇသလႃႉ၊ ဢၼ်ၶဝ်ၵူဝ်းၵႂၢႆႇၼၼ်ႉဢေႃႈ။
“သူဢွၼ်ၵၼ်လၢတ်ႈလႄႈဝႃႈ၊ ‘ႁဝ်းၼႆႉ ပဵၼ်ၵေႃႉဢၼ်ႁႅင်းယႂ်ႇၼႃႇ၊ ပဵၼ်ၵေႃႉဢၼ်တၢတ်ႈၼိူင်ႇလႆႈႁႂ်ႈလႆႈ တိုၵ်းတေႃးဢေႃႈ၊’ ဝႃႈၼင်ႇၼႆၼၼ်ႉ ၸိူဝ်ႉၼင်ႇႁိုဝ်။
မိူင်း မေႃႇၽႃႉ၊ ၼၼ်ႉလုလႅဝ်ယဝ်ႉ။ ဝဵင်းမၼ်းၸိူဝ်းၼၼ်ႉလုလႅဝ်ပႅတ်ႈယဝ်ႉ။ ၵူၼ်းၼုမ်ႇၵူၼ်းၵမ်မၼ်းဢၼ်ၵတ်ႉဢၼ်ၶႅၼ်ႇ ၸိူဝ်းၼၼ်ႉဢွၼ်ၵၼ်ၵႂႃႇၸူးႁႂ်ႈလႆႈၶၢမ်ႇ တၢင်းဢၼ်ဢဝ်တၢႆယဝ်ႉ၊” ဝႃႈၼင်ႇၼႆဢေႃႈ။ ဝႃႈၼင်ႇၼႆလႄႈၶုၼ်ႁေႃၶမ်းဢၼ်မီးၼႃႇမႃႉၸိုဝ်ႈသဵင်ဢၼ်ဝႃႈ၊ ထႃႇဝရႃႉၽြႃး၊ၸဝ်ႈ ဢၼၼ်ႇတႃႉတၼ်းၶူဝ်း၊ ၼၼ်ႉမီးဢမိင်ႉဢေႃႈ။
ၽေးဢၼ်တၵ်းလႆႈႁွတ်ႈထိုင် မေႃႇၽႃႉ၊ ၼၼ်ႉၸမ်မႃးယဝ်ႉ။ ၽေးဢုပၢတ်ႈဢၼ်မၼ်းတၵ်းလႆႈၶၢမ်ႇၼၼ်ႉ မႃးၶၼ်ၶၼ်ၽႂ်းၽႂ်းယူႇဢေႃႈ။
ၶဝ်ၸိူဝ်းဢၼ်ယူႇႁိမ်းႁွမ်းမၼ်းတင်းသဵင်ႈ တင်းလူင်ၶဝ်႟။ ဢွၼ်ၵၼ်ပွင်ႉၶၢင်းပွင်ႉမိုၼ်ႇ ပုၼ်ႈမၼ်းတႃႉ။ သူၸိူဝ်းဢၼ်ႁုၸၵ်းၼႃႇမႃႉၸိုဝ်ႈသဵင်မၼ်းတင်းသဵင်ႈတင်းလူင်ၶဝ်႟။ ဢွၼ်ၵၼ်လၢတ်ႈလႄႈဝႃႈ၊ “ၵၼ်းႁွၵ်ႇဢၼ် တၼ်းၶူဝ်းယႂ်ႇ၊ၶွၼ်ႉတဝ်ႉၸဝ်ႈဢၼ်မီး သရေႇႁၢင်ႈလီႁၢင်ႈငၢမ်းၼၼ်ႉႁၵ်းယဝ်ႉ လူင်ပႄႇ၊” ဝႃႈၼင်ႇၼႆတႃႉ။
လုၵ်ႈယိင်းဢွၼ်ႇဢၼ်ယူႇၵႃႈၼႂ်းဝဵင်း တိၽုၼ်ႇ၊ ႟။ လူင်းသေတီႈဢၼ်မႂ်းၸၢမ်ႇၸႃးၼၼ်ႉလႄႈ ၼင်ႈၵႃႈၼိူဝ်လိၼ်တႃႉ။ ၵေႃႉဢၼ်ႁိမ်ဢဝ်ႁူင်ႇဢဝ် မေႃႇၽႃႉ၊ ၼၼ်ႉ တၵ်းမႃးၶတ်းတႃႉၵၼ်တင်းမႂ်းလႄႈ ယႃႉၽဵဝ်ႈပႅတ်ႈတိူၵ်ႈတီႈတိုၵ်းသိုၵ်းမႂ်းဢေႃႈ။
ၵူၼ်းဢၼ်ယူႇၵႃႈတီႈဝဵင်း ဢႃႇရေႃႇ၊ ႟။ ၸုၵ်းယူႇၵႃႈတီႈႁိမ်းသဵၼ်ႈတၢင်းသေလႄႈလူတူၺ်းတႃႉ။ တွင်ႈထၢမ်တီႈၵူၼ်းၸၢႆးဢၼ်ဢွၵ်ႇပၢႆႈ၊ဢိၵ်ႇတင်း မႄႈယိင်းဢၼ်လွတ်ႈဢသၢၵ်ႈၸိူဝ်းၼၼ်ႉ လႄႈဝႃႈ၊ “လွင်ႈမၼ်းပဵၼ်ဢီႈသင်၊” ဝႃႈၼင်ႇၼႆတႃႉ။
ၶဝ်ၼၼ်ႉတၵ်းလၢတ်ႈလႄႈဝႃႈ၊ “မိူင်း မေႃႇၽႃႉ၊ လူမ်ႉပင်းယဝ်ႉယဝ်ႉ။ ဢွၼ်ၵၼ်ႁွင်ႉႁႆႈပုၼ်ႈမိူင်းၼၼ်ႉတႃႉ။ ဢွၼ်ၵၼ်ဢဝ်လွင်ႈမိူင်း မေႃႇၽႃႉ၊ ဢၼ် လုလႅဝ်ၼၼ်ႉမွၵ်ႇလၢတ်ႈတီႈႁိမ်းမႄႈၼမ်ႉ ဢႃႇၼုၼ်ႇ၊ တႃႉ၊” ဝႃႈၼင်ႇၼႆဢေႃႈ။
“တၢင်းဢၼ်ၸီႇယၢင်ႇတၢမ်ႇဢပျတ်ႈလႆႈႁွတ်ႈထိုင်ၵႃႈၼိူဝ်တီႈပၢင်ႇတီႈပဵင်း၊ဢိၵ်ႇတင်းဝဵင်း ႁေႃႇလုၼ်ႇ၊ ဝဵင်း ယႃႇႁတ်ႉ၊ ဝဵင်း မေႇၽတ်ႉ၊-
ဝဵင်း တိၽုၼ်ႇ၊ ဝဵင်း ၼေႇပေႃႇ၊ ဝဵင်း ပႅတ်ႉတိပလႃႇသိမ်း၊-
ဝဵင်း ၵိရိယသိမ်း၊ ဝဵင်း ပႅတ်ႉၵမုလႃႉ၊ ဝဵင်း ပႅတ်ႉမွင်ႇ၊-
ဝဵင်း ၵိရဢုတ်ႉ၊ ဝဵင်း ပေႃႇၸရႃႉ၊ ဢိၵ်ႇတင်းဝဵင်းဢၼ်ၵႆဢၼ်ၸမ် ၵႃႈဢၼ်မီးၵႃႈၼႂ်းမိူင်း မေႃႇၽႃႉ၊ ၸိူဝ်းၼၼ်ႉဢေႃႈ။-
ဢႃႇၼႃႇတၼ်းၶူဝ်းမိူင်း မေႃႇၽႃႉ၊ ၼၼ်ႉပုတ်းၵႂႃႇၶၢတ်ႇၵႂႃႇယဝ်ႉ။ ၶႅၼ်မိုဝ်းမၼ်းၼၼ်ႉႁၵ်းၵႂႃႇၵႅင်ႉၵႂႃႇယဝ်ႉ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
“ၵွပ်ႈပိူဝ်ႈဢၼ်မိူင်း မေႃႇၽႃႉ၊ ဢုပ်ႇဢၢတ်ႇၶတ်းတႃႉၵၼ်တင်း ထႃႇဝရႃႉၽြႃး၊ လႄႈဢွၼ်ၵၼ်ႁဵတ်းႁႂ်ႈမၼ်းမဝ်းလဝ်ႈမဝ်းၵမ်တႃႉ။ မိူင်း မေႃႇၽႃႉ၊ လႆႈၵိင်ႈဢိူၵ်ႇယူႇၵႃႈၼႂ်းႁၢၵ်ႈမၼ်းလႄႈမၼ်းလႆႈၶၢမ်ႇတၢင်းဢၼ်ပိူၼ်ႈႁဵတ်းပျၢၵ်ႈႁဵတ်းၶူဝ်ၼႃႇလူင်လၢင်ဢေႃႈ။-
မိူင်း ဢိသရေး၊ ၼႆႉပဵၼ်တီႈဢၼ်မႂ်းႁဵတ်းပျၢၵ်ႈႁဵတ်းၶူဝ်ဢမ်ႇၸႂ်ႈႁိုဝ်း။ မႂ်းဢမ်ႇယၢမ်ႈထူပ်းႁၼ်မၼ်းႁူမ်ႈပွင်းယူႇလူၺ်ႈၵၼ်တင်းၽူႈလၵ်ႉၵူၼ်းၸူၼ်။ ၵူၺ်းၵႃႈ၊ၼႂ်းမိူဝ်ႈဢၼ်မႂ်းလၢတ်ႈလွင်ႈမၼ်းၵူႈပွၵ်ႈၼၼ်ႉမႂ်းသၢႆႇႁူဝ်မႂ်းပႅတ်ႈလူင်ပႄႇ။
“သူၸိူဝ်းဢၼ်ယူႇၵႃႈတီႈမိူင်း မေႃႇၽႃႉ၊ ၶဝ်႟။ ဢွၼ်ၵၼ်ၸုၼ်ႉပႅတ်ႈဝဵင်းတင်းလၢႆသေလႄႈယူႇၵႃႈၼႂ်းၵႄႈမၢၵ်ႇႁိၼ်မၢၵ်ႇၽႃတႃႉ။ ဢွၼ်ၵၼ်ႁဵတ်းၸိူဝ်ႉၼင်ႇၼူၵ်ႉတူႈဢၼ်ၸၢင်ႈႁဵတ်းႁင်းယူႇၵႃႈတီႈႁိမ်းႁူးထမ်ႈၼၼ်ႉတႃႉ။-
ႁဝ်းလႆႈႁုငိၼ်းမႃႇၼႃႉၸႂ်သုင်မိူင်း မေႃႇၽႃႉ၊ တၢင်းဢၼ်မၼ်းၸႂ်ၽႅၼ်သုင်ၼႃႇ၊တၢင်းဢၼ်မၼ်းတူၺ်းဢၵျူဝ်းပုၼ်ႈတူဝ်မၼ်းၵူၺ်းလႄႈမႃႇၼႃႉၸႂ်သုင်မၼ်းဢၼ်ပူၵ်းပႅၼ်ၽႅၼ်သုင်၊ဢိၵ်ႇတင်းတၢင်းဢၼ်မၼ်းဢမ်ႇၼပ်ႉဢမ်ႇၶၢၼ်းပိူၼ်ႈၸိူဝ်းၼၼ်ႉယဝ်ႉ။-
ၵဝ်ႁုလွင်ႈဢၼ်မၼ်းဢမ်ႇၼပ်ႉဢမ်ႇၶၢၼ်းပိူၼ်ႈ၊လွင်ႈဢၼ်မၼ်းႁဵတ်းၼၼ်ႉပဵၼ်ဢၼ်လၢႆလၢႆလွၵ်ႇလွၵ်ႇဢေႃႈ။ တၢင်းဢၼ်မၼ်းလၢတ်ႈၵႂၢမ်းဢုပ်ႇဢၢတ်ႇၼၼ်ႉဢမ်ႇပွင်ႇလွင်ႈၵႃႈသင်၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။-
“ပိူဝ်ႈၼႆလႄႈၵဝ်တၵ်းႁွင်ႉႁႆႈပွင်ႉၶၢင်းၵွပ်ႈပိူဝ်ႈမိူင်း မေႃႇၽႃႉ၊ ဢေႃႈ။ တၵ်းႁွင်ႉသႅၼ်ႇၵိဝ်သဵင် ၵွပ်ႈပိူဝ်ႈမိူင်း မေႃႇၽႃႉ၊ တင်းမိူင်းဢေႃႈ။ ၵဝ်တၵ်းလႆႈမီးတၢင်းဢၼ်ၶၢင်းၶီၶၢင်းၽၢၼ်ၵွပ်ႈပိူဝ်ႈၵူၼ်းမဵဝ်း ၵိရႃႉႁရိတ်ႉ၊ ၸိူဝ်းၼၼ်ႉဢေႃႈ။-
ဝဵင်း ၸိပမႃႇ၊ ႟။ ၵဝ်တၵ်းၼမ်ႉတႃတူၵ်းပုၼ်ႈမႂ်းလိူဝ်တွၼ်းၼႃႇသေၼမ်ႉတႃတူၵ်းပုၼ်ႈဝဵင်း ယႃႇၸႃႇ၊ ၼၼ်ႉဢေႃႈ။ မႂ်းပဵၼ်မိူၼ်ၶိူဝ်းဢၼ်ၵိင်ႇၶႃႈမၼ်းပူၼ်ႉပၢင်ႇလၢႆႇၵႂႃႇလႄႈၽႅဝ်ႁွတ်ႈတေႃႇထိုင်ဝဵင်း ယႃႇၸႃႇ၊ ဢေႃႈ။ ၵူၺ်းၵႃႈ၊ၵေႃႉဢၼ်ယႃႉပႅတ်ႈၼၼ်ႉႁိမ်ဢဝ်ႁူင်ႇဢဝ်မၢၵ်ႇမႆႉမၢၵ်ႇတွၵ်ႇမႂ်း၊ဢိၵ်ႇတင်းမၢၵ်ႇၸပိတ်ႉမႂ်းဢေႃႈ။-
တၢင်းဢၼ်မူၼ်ႈပျေႃႇ၊တၢင်းဢၼ်ၸူမ်းသိူဝ်းထၢတ်ႇၵႂႃႇသေၵႃႈတီႈပၢင်ႇတီႈပဵင်းဢၼ်ၶွၼ်ႇၼမ်ႉမၼ်းလိၼ်လီဢၼ်ဝႃႈ၊မိူင်း မေႃႇၽႃႉ၊ ၼၼ်ႉယဝ်ႉ။ ၵဝ်ႁႂ်ႈၼမ်ႉမၢၵ်ႇၸပိတ်ႉထၢတ်ႇၵႂႃႇသေၵႃႈတီႈၶိူင်ႈၼူတ်ႈမၢၵ်ႇၸပိတ်ႉၼၼ်ႉယဝ်ႉ။ ၽူႈလႂ်ၵေႃႈဢမ်ႇလႆႈႁဵတ်းသဵင်ဢၼ်ပျေႃႇဢၼ်မူၼ်ႈသေလႄႈယဵပ်ႇၼူတ်ႈမၢၵ်ႇၸပိတ်ႉ။ တၢင်းဢၼ်ႁွင်ႉပၢဝ်ႇၼၼ်ႉတၵ်းဢမ်ႇႁႂ်ႈလႆႈပဵၼ်သဵင်တၢင်းဢၼ်ပျေႃႇမူၼ်ႈၸူမ်းသိူဝ်းဢေႃႈ။
“သဵင်ႁွင်ႉသဵင်ႁႆႈၵူၼ်းဝဵင်း ႁေႇသၽုၼ်ႇ၊ ဢိၵ်ႇတင်းဝဵင်း ဢေးလႃႇလေး၊ ၼၼ်ႉငိၼ်းႁွတ်ႈၽႅဝ်ထိုင်ဝဵင်း ယႃႇႁတ်ႉ၊ ပုၼ်ႉဢေႃႈ။ သဵင်ၶဝ်ၼၼ်ႉလႆႈငိၼ်းႁွတ်ႈထိုင်ၸႃႉၸဵမ်ဝဵင်း ၸေႃႇရႃႉ၊ ဝဵင်း ႁေႃးရၼိမ်ႇ၊ လႄႈဝဵင်း ဢိၵ်ႉလတ်ႉသေးလိၸိယႃႉ၊ ဢေႃႈ။ ၼမ်ႉႁွင်ႈ ၼိမ်းရိမ်း၊ ၵေႃႈယူတ်းၵႂႃႇႁႅင်ႈၵႂႃႇဢေႃႈ။-
ၵဝ်တၵ်းႁႂ်ႈၵေႃႉဢၼ်သၢၵ်ႈလူႇတၢင်းလူႇၵႃႈၼိူဝ်ထႃႇၼႃႉတီႈသုင်၊ၵေႃႉဢၼ်ဢဝ်ၼၢမ်ႇသႃႇတုတ်ႇၽႆးလူႇတီႈၽြႃးမၼ်းၸိူဝ်းၼၼ်ႉထၢတ်ႇၵႂႃႇသေၵႃႈတီႈမိူင်း မေႃႇၽႃႉ၊ ဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
“ၵူၼ်းမိူင်း မေႃႇၽႃႉ၊ ဢိၵ်ႇတင်းၵူၼ်းဝဵင်း ၵိရႁရိၵ်ႉ၊ ၸိူဝ်းၼၼ်ႉလႆႈလုသုမ်းဢုၵ်ႉၸႃႇဢၼ်ၶဝ်ၵဵပ်းႁွမ်သိမ်းပႅင်းဝႆႉၵႃႈမီးၼၼ်ႉလႄႈႁူဝ်ၸႂ်ၵဝ်ၼႆႉမီးတၢင်းဢၼ်ၶၢင်းၶီၶၢင်းၽၢၼ်မေႃးလင်ယူႇမိူၼ်ၸိူဝ်ႉၼင်ႇပီႇၼင်ႇၼႄးဢေႃႈ။-
ၵူႈၵေႃႉၵူႈၵူၼ်းလႆႈၶၢမ်ႇတၢင်းဢၼ်ထႃႁူဝ်ယူႇ၊ၶၢမ်ႇတၢင်းဢၼ်ထႃၼူတ်ႇၵၢင်းယူႇ၊တိူဝ်ႉမၢတ်ႇၵႃႈတီႈမိုဝ်းၶဝ်ယူႇ၊ၵူႈၵေႃႉၵူႈၵူၼ်းၼုင်ႈၼင်ပေႃယူႇဢေႃႈ။-
ၵႃႈတီႈၼိူဝ်လင်ၶႃးႁိူၼ်းၼႂ်းမိူင်း မေႃႇၽႃႉ၊ တင်းလၢႆ၊ဢိၵ်ႇတင်းၵႃႈၼႂ်းသဵၼ်ႈတၢင်းမၼ်းၵႃႈမီးၼၼ်ႉမီးတၢင်းဢၼ်ၶၢင်းၶီၶၢင်းၽၢၼ်ပွင်ႉမိုၼ်ႇပွင်ႉၶၢင်းၵူႈတီႈၵူႈလႅၼ်ဢေႃႈ။ လွင်ႈမၼ်းၸမ်ႉ၊ၵဝ်ဢဝ်မိူင်း မေႃႇၽႃႉ၊ တႅၵ်ႇလႅဝ်မိူၼ်ၸိူဝ်ႉၼင်ႇဢၼ်ဢဝ်မေႃႈဢၼ်ဢမ်ႇလူဝ်ႇဢမ်ႇၸႂ်ႉၼၼ်ႉတႅၵ်ႇလႅဝ်ပႅတ်ႈၼၼ်ႉဢေႃႈ။-
ၶဝ်ဢွၼ်ၵၼ်ၶၢင်းၶီၶၢင်းၽၢၼ်ပွင်ႉမိုၼ်ႇလႄႈဝႃႈ၊ ‘မိူင်း မေႃႇၽႃႉ၊ ၼၼ်ႉၵိူၼ်ႇပင်းၵႂႃႇယဝ်ႉလူင်ပႄႇ။ ဢူၵ်းဢၢႆလႄႈသုတ်ႉၶိုၼ်းၵႂႃႇယဝ်ႉလူင်ပႄႇ၊’ ဝႃႈၼင်ႇၼႆဢေႃႈ။ မိူင်း မေႃႇၽႃႉ၊ ၼၼ်ႉတၵ်းလႆႈပဵၼ်တီႈဢၼ်ပိူၼ်ႈႁဵတ်းပျၢၵ်ႈႁဵတ်းၶူဝ်၊ဢိၵ်ႇတင်းတီႈဢၼ်လီၵူဝ်လီႁႄပုၼ်ႈၶဝ်ၸိူဝ်းဢၼ်ယူႇႁိမ်းႁွမ်းလဵပ်ႈႁွပ်ႈမၼ်းၼၼ်ႉဢေႃႈ၊” ထႃႇဝရႃႉၽြႃး၊ မီးဢမိင်ႉၸိူဝ်ႉၼင်ႇၼၼ်ဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “တူၺ်းလူး။ ရၢၼ်ႇသူႇၼၼ်ႉတၵ်းမိၼ်မႃးမိူၼ်ၸိူဝ်ႉၼင်ႇၼူၵ်ႉၶၢင်ႇလေႃႉၼၼ်ႉလႄႈဢဝ်ပိၵ်ႇမၼ်းႁူမ်ႇသုမ်ႇမိူင်း မေႃႇၽႃႉ၊ ဢေႃႈ။-
ဝဵင်းတင်းလၢႆ၊ဢိၵ်ႇတင်းတိူၵ်ႈတီႈတိုၵ်းသိုၵ်းၸိူဝ်းၼၼ်ႉတၵ်းလႆႈၶၢမ်ႇတၢင်းဢၼ်သိမ်းဢဝ်ဢေႃႈ။ ၼႂ်းမိုဝ်ႉဝၼ်းၼၼ်ႉၸႂ်ႁူဝ်ႁၢၼ်ၵူၼ်းသိုၵ်း မေႃႇၽႃႉ၊ တင်းလၢႆတၵ်းမီးတၢင်းဢၼ်ၵူဝ်ႁႄၼႃႇမိူၼ်ၸိူဝ်ႉၼင်ႇႁူဝ်ၸႂ်မႄႈယိင်းဢၼ်လႆႈၶၢမ်ႇဝူၺ်ႇတၼႃႇတၢင်းဢၼ်ၵိူတ်ႇလဵင်ႉလုၵ်ႈလဵင်ႉလၢင်းၼၼ်ႉဢေႃႈ။-
မေႃႇၽႃႉ၊ တၵ်းလႆႈလုလႆႈလႅဝ်ထၢၼ်ႈပေႃးဢမ်ႇပဵၼ်မိူင်းလႆႈၵွပ်ႈပိူဝ်ႈမၼ်းဢုပ်ႇဢၢတ်ႇယူႇၽၢႆႇၼိုင်ႈတင်း ထႃႇဝရႃႉၽြႃး၊ ၼၼ်ႉဢေႃႈ။-
ၵူၼ်းဢၼ်ယူႇၵႃႈတီႈမိူင်း မေႃႇၽႃႉ၊ ႟။ တၢင်းဢၼ်လီၵူဝ်လီႁႄ၊ၶုမ်လိၼ်ႁူးလိၼ်၊တူင်ႇႁႅဝ်ႉတူင်ႇၶိုမ်းပႂ်ႉထႃႈယူႇတၢင်းၼႃႈမႂ်းယဝ်ႉ။-
ၵေႃႉဢၼ်ဢွၵ်ႇပၢႆႈသေၵႃႈတီႈတၢင်းဢၼ်လီၵူဝ်လီႁႄၼၼ်ႉတၵ်းတူၵ်းသႂ်ႇၵႃႈၼႂ်းၶုမ်လိၼ်ႁူးလိၼ်ဢေႃႈ။ ၵေႃႉဢၼ်ဢွၵ်ႇသေၶုမ်လိၼ်ႁူးလိၼ်ၼၼ်ႉတၵ်းထုၵ်ႇမႅၼ်ႈၵႃႈၼႂ်းတူင်ႇႁႅဝ်ႉတူင်ႇၶိုမ်းဢေႃႈ။ ၵဝ်တၵ်းႁႂ်ႈၶူပ်ႇပီဢၼ်လႆႈၶၢမ်ႇတၢမ်ႇၼၼ်ႉႁွတ်ႈထိုင်ၵႃႈၼိူဝ်မိူင်း မေႃႇၽႃႉ၊ ဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။-
“ၶဝ်ၸိူဝ်းဢၼ်ဢွၵ်ႇပၢႆႈၼၼ်ႉႁႅင်းဢူၼ်ႈႁႅင်းသဵင်ႈလႄႈဢွၼ်ၵၼ်သွၼ်ႈပိုင်ႈယူႇၵႃႈတႂ်ႈႁူမ်ႈဝဵင်း ႁေႇသၽုၼ်ႇ၊ ဢေႃႈ။ ၵူၺ်းၵႃႈ၊ၽႆးမႆႈယူႇၵႃႈၼႂ်းဝဵင်း ႁေႇသၽုၼ်ႇ၊ လႄႈပိဝ်ၽႆးဢွၵ်ႇသေၵႃႈၼႂ်းတီႈယူႇၶုၼ် သိႁုၼ်ႇ၊ ဢေႃႈ။ ၽႆးၼၼ်ႉမႆႈတီႈၸွၵ်ႉတီႈၸဵင်ႇလိၼ်မိူင်း မေႃႇၽႃႉ၊ ဢိၵ်ႇတင်းၸိၵ်းႁူဝ်ၶဝ်ၸိူဝ်းဢၼ်မႃႇၼႃႉပူၵ်းပႅၼ်လႄႈဢူၼ်ဢဵၼ်မေႃးမႄးၼၼ်ႉဢေႃႈ။-
မေႃႇၽႃႉ၊ ႟။ မႂ်းၼႆႉမီးဢႃႉမၢင်ႇၵလႃႇဢေႃႈ။ တပႄးတပၢၼ်းၽြႃး ၶေးမုသႃႉ၊ ၸိူဝ်းၼၼ်ႉႁၢႆလၢႆၵႂႃႇယဝ်ႉ။ လုၵ်ႈၸၢႆးမႂ်းတင်းလၢႆလႆႈၶၢမ်ႇတၢင်းဢၼ်သိမ်းဢဝ်ၵႂႃႇလႄႈလုၵ်ႈယိင်းမႂ်းတင်းလၢႆလႆႈၶၢမ်ႇတၢင်းဢၼ်တိဢဝ်သိမ်းဢဝ်ၵႂႃႇယဝ်ႉ။
“ၼႂ်းဝႃႈၼၼ်သေၵေႃႈ၊ၶိင်ႇၵႃႇလႃႉမိုဝ်ႉဝၼ်းၵမ်းလိုၼ်းၼၼ်ႉၵဝ်တၵ်းဢဝ်ၵူၼ်းမဵဝ်း မေႃႇၽႃႉ၊ ၶိုၼ်းလႆႈလီလႆႈပဵၼ်ဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။ ဢၼ်ၼႆႉၸမ်ႉ၊ပဵၼ်လွင်ႈတီႈသုတ်းဢၼ်မိူင်း မေႃႇၽႃႉ၊ လႆႈၶၢမ်ႇတၢင်းဢၼ်တႅပ်းတတ်းၸီႇယၢင်ႇတြႃးၼၼ်ႉဢေႃႈ။
ၸၢပ်ႈသႅင်ႇလူၺ်ႈၵူၼ်းမဵဝ်း ဢမ်ႇမုၼ်ႇ၊ တင်းလၢႆၼၼ်ႉ ထႃႇဝရႃႉၽြႃး၊ မီးဢမိင်ႉလႄႈဝႃႈၸမ်ႉ၊ “ ဢိသရေး၊ ၼၼ်ႉဢမ်ႇမီးလုၵ်ႈၸၢႆးႁိုဝ်း။ ဢမ်ႇမီးၵေႃႉဢၼ်ၶၢမ်ႇဢမူၺ်ႇႁိုဝ်း။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၽြႃး မႃႇလၶမ်ႇ၊ သိမ်းဢဝ်မိူင်းဢၼ်ၸိူဝ်ႉၶိူဝ်း ၵၢတ်ႉ၊ ပိူင်ႇၼၼ်ႉသေယဝ်ႉ၊ၵူၼ်းမၼ်းတင်းလၢႆၵေႃႈ ယင်းဢွၼ်ၵၼ်ယူႇၵႃႈၼႂ်းမိူင်းၼၼ်ႉၸိူဝ်ႉၼင်ႇႁိုဝ်။-
ပိူဝ်ႈၼႆလႄႈ ထႃႇဝရႃႉၽြႃး၊ မီးဢမိင်ႉၸမ်ႉ၊မိုဝ်ႉဝၼ်းဢၼ်ၵဝ်တၵ်းႁႂ်ႈငိၼ်းသဵင်တၢင်းဢၼ်တိုၵ်းၵၼ်တင်းဝဵင်း ရပ်ႉပႃႇ၊ တီႈယူႇၵူၼ်းမဵဝ်း ဢမ်ႇမုၼ်ႇ၊ ၸိူဝ်းၼၼ်ႉတၵ်းႁွတ်ႈထိုင်ဢေႃႈ။ ဝဵင်းၼၼ်ႉတၵ်းလုလႅဝ်လႄႈဝၢၼ်ႈၼွၵ်ႈၼႃးပၢင်ႇမၼ်းၵႃႈမီးတၵ်းလႆႈၶၢမ်ႇတၢင်းဢၼ်ဢဝ်ၽႆးတုတ်ႇပႅတ်ႈမႆႈပႅတ်ႈဢေႃႈ။ မိူဝ်ႈၼၼ်ႉမဵဝ်း ဢိသရေး၊ သမ်ႉတၵ်းလႆႈၶိုၼ်းသိမ်းဢဝ်လႄႈၶိုၼ်းဢုပ်ႉပိူင်ႇၵႃႈၼိူဝ်ၵူၼ်းၸိူဝ်းဢၼ်ယၢမ်ႈသိမ်းဢဝ်လႄႈဢုပ်ႉပိူင်ႇၶဝ်မႃးၼၼ်ႉဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။-
ဝဵင်း ႁေႇသၽုၼ်ႇ၊ ႟။ ႁွင်ႉႁႆႈပွင်ႉၶၢင်းတႃႉ။ ဝဵင်း ဢႃႇဢိ၊ ၼၼ်ႉလုလႅဝ်ယဝ်ႉ။ လုၵ်ႈယိင်းဝဵင်း ရပ်ႉပႃႇ၊ ၶဝ်႟။ ဢွၼ်ၵၼ်ႁွင်ႉႁႆႈလႄႈၼုင်ႈၶူဝ်းၼုင်ႈၼင်ပေႃယူႇတႃႉ။ ဢွၼ်ၵၼ်ပွင်ႉၶၢင်းယူႇသေလႄႈလႅၼ်ႈၵႂႃႇလႅၼ်ႈမႃးၵႃႈတီႈႁိမ်းႁူဝ်ႉႁိမ်းဝၢင်းတႃႉ။ လွင်ႈမၼ်းၸမ်ႉ၊ၽြႃး မႃႇလၶမ်ႇ၊ ၼၼ်ႉလႆႈၶၢမ်ႇတၢင်းဢၼ်သိမ်းဢဝ်ၵႂႃႇလူၺ်ႈၵၼ်တင်းယဵၸ်ႈပရေႃးႁဵၵ်ႈမၼ်းတင်းၶုၼ်မၼ်းတင်းလၢႆယဝ်ႉ။-
ၵူၼ်းမဵဝ်းဢၼ်ၽွၵ်ႈပျၢၼ်ႇၶိုၼ်းၼႆႉ႟။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းဢုပ်ႇဢၢတ်ႇလွင်ႈဢဵၼ်ႁႅင်းတူဝ်ၸဝ်ႈၵဝ်ႇယူႇၸိူဝ်ႉၼင်ႇႁိုဝ်။ ဢဵၼ်ႁႅင်းမႂ်းၼၼ်ႉပဵၼ်ဢၼ်သုတ်ႉဢၼ်ယွမ်းယူႇယဝ်ႉ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းဢိင်ပိုင်ႈၸေးၸိမ်ႇတူဝ်ၸဝ်ႈၵဝ်ႇသေယဝ်ႉ၊လၢတ်ႈဝႃႈ၊ “ၽူႈလႂ်တၵ်းတိုၵ်းတေႃးၵဝ်၊” ဝႃႈၼႆၸိူဝ်ႉၼင်ႇႁိုဝ်။-
ၸဝ်ႈထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ “ၵဝ်တၵ်းႁႂ်ႈတၢင်းဢၼ်လီၵူဝ်လီႁႄဢၼ်လုၵ်ႉသေတီႈၶဝ်ၸိူဝ်းဢၼ်ယူႇၵႃႈတီႈႁိမ်းႁွမ်းလဵပ်ႈႁွပ်ႈမႂ်းၼၼ်ႉႁွတ်ႈထိုင်မႃးၵႃႈတီႈမႂ်းဢေႃႈ။ သူၵႃႈမီးတၵ်းလႆႈၶၢမ်ႇတၢင်းဢၼ်လိုပ်ႈဢွၵ်ႇပႅတ်ႈႁင်းၽႂ်ႁင်းမၼ်းလႄႈဢမ်ႇမီးၵေႃႉဢၼ်တၵ်းႁႂ်ႈၶဝ်ၸိူဝ်းဢၼ်ၽၢတ်ႇၽႄၵၼ်ၵႂႃႇယဝ်ႉၼၼ်ႉၶိုၼ်းလႆႈၸုၵၼ်တုမ်ၵၼ်ထႅင်ႈဢေႃႈ။
“ၼႂ်းဝႃႈၼၼ်သေၵေႃႈ၊ၵမ်းလိုၼ်းၼၼ်ႉၵဝ်တၵ်းဢဝ်ၵူၼ်းမဵဝ်း ဢမ်ႇမုၼ်ႇ၊ ၶိုၼ်းလႆႈလီလႆႈပဵၼ်ဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ဢဝ်လွင်ႈမိူင်း ဢေႇတုမ်ႇ၊ သေလႄႈမီးဢမိင်ႉၸမ်ႉ၊ “ပိင်ႇၺႃႇသဵင်ႈမူတ်းသေၵႃႈၼႂ်းမိူင်း တေႇမၼ်ႇ၊ ၵႂႃႇယဝ်ႉႁိုဝ်း။ ၵေႃႉဢၼ်မီးပိင်ႇၺႃႇသတိၼၼ်ႉဢမ်ႇပၼ်တၢင်းၵျၢမ်ႇတၢင်းပွင်လႆႈႁိုဝ်း။ ၺၢၼ်ႇၶဝ်ၼၼ်ႉႁၢႆလၢႆၵႂႃႇယဝ်ႉႁိုဝ်း။-
ၵူၼ်းဝဵင်း တေႇတၼ်ႇ၊ ၶဝ်႟။ ဢွၼ်ၵၼ်ဢွၵ်ႇပၢႆႈပွၵ်ႈၶိုၼ်းလႄႈတဵတ်ႇမႅပ်းယူႇတႃႉ။ ၵဝ်တၵ်းႁႂ်ႈၽေးဢၼ် ဢေးသေႃး၊ ထူပ်းၼၼ်ႉႁွတ်ႈထိုင်ၵႃႈၼိူဝ်ၵူၼ်းဝဵင်းၼႆႉမိူဝ်ႈဢၼ်ၵဝ်ပၼ်တၢမ်ႇၶဝ်ၼၼ်ႉဢေႃႈ။-
ပေႃးၶဝ်ၸိူဝ်းဢၼ်ဝိတ်းမၢၵ်ႇၸပိတ်ႉၼၼ်ႉမႃးၸိုင်၊ၶဝ်တၵ်းႁႂ်ႈၵိုတ်းၵျၢၼ်ႇဝႆႉပုၼ်ႈပိူၼ်ႈတၵ်းၵဵပ်းဢဝ်ၼၼ်ႉဢမ်ႇၸႂ်ႈႁိုဝ်း။ ပေႃးၽူႈလၵ်ႉမႃးၶိင်ႇၵၢင်ၶိုၼ်းၸိုင်၊မၼ်းတၵ်းႁိမ်ႁူင်ႇဢဝ်ဢုၵ်ႉၸႃႇၶူဝ်းလဵင်းဢၼ်မၼ်းထုၵ်ႇၸႂ်ၵျိူၵ်ႈၸႂ်ၼၼ်ႉၵူၺ်းဢမ်ႇၸႂ်ႈႁိုဝ်း။-
ၵူၺ်းၵႃႈ၊ၵဝ်ၸမ်ႉ၊တၵ်းထွတ်ႇၶူဝ်းၼုင်ႈ ဢေးသေႃး၊ ပႅတ်ႈလႄႈၽုၺ်ႇပိုတ်ႇတီႈဢၼ်သိူင်ႇဢၼ်လပ်ႉမၼ်းၸိူဝ်းၼၼ်ႉထၢၼ်ႈပေႃးမၼ်းဢမ်ႇတဵတ်ႇဢမ်ႇမႅပ်းယူႇလႆႈဢေႃႈ။ မဵဝ်းၸိူဝ်ႉၶိူဝ်းမၼ်းတၵ်းႁွတ်ႈထိုင်တၢင်းလုတၢင်းလႅဝ်လႄႈပီႈၼွင်ႉမၼ်း၊ၵူၼ်းႁိူၼ်းၸမ်ၵၼ်တင်းမၼ်း၊ဢိၵ်ႇတင်းတူဝ်မၼ်းတၵ်းလႆႈႁၢႆၵႂႃႇဢေႃႈ။-
ဢဝ်လုၵ်ႈၽၢၼ်ပေႃႈၽၢၼ်မႄႈၸိူဝ်းၼၼ်ႉၵိုတ်းၵျၢၼ်ႇဝႆႉတႃႉ။ ၵဝ်တၵ်းပႂ်ႉတူၺ်းၶဝ်ယူႇဢေႃႈ။ ႁႂ်ႈမႄႈမူၵ်းမႄႈမၢႆႈၸိူဝ်းၼၼ်ႉဢိင်ပိုင်ႈဝႆႉၸႂ်တီႈၵဝ်သေၵမ်း။
“ထႃႇဝရႃႉၽြႃး၊ မီးဢမိင်ႉၸမ်ႉ၊ပေႃးၶဝ်ၸိူဝ်းဢၼ်ဢမ်ႇထိူၵ်ႈသူတ်ႉၵိၼ်ၵွၵ်းဝၢၼ်ႇၸိူဝ်းၼၼ်ႉလႄႈသမ်ႉတၵ်းလႆႈသူတ်ႉၵိၼ်ၸိုင်၊မႂ်းတၵ်းပူၼ်ႉလွတ်ႈသေတၢမ်ႇဢပျတ်ႈၼၼ်ႉလႆႈႁိုဝ်း။ ပူၼ်ႉလွတ်ႈဢပျတ်ႈၼၼ်ႉဢမ်ႇလႆႈ၊မႂ်းတၵ်းလႆႈသူတ်ႉၵိၼ်ဢမၢၼ်ႇၶၼ်ပဵၼ်ဢေႃႈ။-
ၵဝ်တၵ်းဢဝ်တူဝ်ၸဝ်ႈၵဝ်ႇတိူင်ႇၵၢဝ်ႇဝႆႉၵတိလူၺ်ႈမိူင်း ပေႃႇၸရႃႉ၊ တၵ်းလႆႈပဵၼ်တီႈဢၼ်လီၵူဝ်လီႁႄ၊တီႈဢၼ်ပိူၼ်ႈသႄႉသွမ်းလႄႈသဵတ်ႇၵူၼ်းယဵၼ်ၵူၼ်း၊တီႈဢၼ်ပိူၼ်ႈၵိၼ်ႇလႃႇၼၼ်ႉဢေႃႈ။ ဝဵင်းမၼ်းၵႃႈမီးတင်းသဵင်ႈတင်းလူင်တၵ်းလႆႈပဵၼ်တီႈဢၼ်ပဝ်ႇလၢပ်ႈယူႇသေႇသေႇဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။-
“ၵဝ်ငိၼ်းသဵင်ၶၢဝ်ႇတီႈ ထႃႇဝရႃႉၽြႃး၊ လႄႈမၼ်းၸဝ်ႈပွႆႇၸႂ်ႉသၢၼ်ႇတမၢၼ်ႇၵႂႃႇၸူးၵႃႈတီႈၵူၼ်းတၢင်ႇၸိူဝ်ႉတၢင်ႇမဵဝ်းလႄႈဝႃႈ၊ ‘သူၸုၵၼ်တုမ်ၵၼ်သေလႄႈဢွၼ်ၵၼ်ၶီႇသိုၵ်းမႃးႁႂ်ႈလႆႈတိုၵ်းမၼ်းတႃႉ၊’ ဝႃႈၼင်ႇၼႆၼၼ်ႉယဝ်ႉ။-
တူၺ်းလူး။ ၵဝ်တၵ်းႁဵတ်းႁႂ်ႈမႂ်းပဵၼ်ဢၼ်ယုတ်ႈဢၼ်ယွမ်းၵႃႈၼႂ်းၵူၼ်းတၢင်ႇၸိူဝ်ႉတၢင်ႇမဵဝ်းတင်းလၢႆ၊ဢိၵ်ႇတင်းႁႂ်ႈမႂ်းလႆႈၶၢမ်ႇတၢင်းဢၼ်ၶျႃးတူၵ်းတီႈတႅမ်ႈၵႃႈၼႂ်းၵူၼ်းတင်းလၢႆဢေႃႈ။-
မႂ်းဢၼ်ယူႇၵႃႈၼႂ်းၵႄႈမၢၵ်ႇႁိၼ်မၢၵ်ႇၽႃလႄႈသွၼ်ႈပိုင်ႈၸိၵ်းလွႆပၢႆလွႆၼႆႉ႟။ လွင်ႈတၢင်းဢၼ်လီၵူဝ်လီႁႄမႂ်းၼၼ်ႉလႆႈပႅတ်ႉလႅၼ်မႂ်းယဝ်ႉ။ ပိၵ်ႉသမ်ႉမႂ်းႁဵတ်းႁင်းသေလႄႈယူႇၵႃႈတီႈဢၼ်သုင်မိူၼ်ၸိူဝ်ႉၼင်ႇၼူၵ်ႉၶၢင်ႇလေႃႉၼၼ်ႉသေၵေႃႈၵဝ်တၵ်းဢဝ်မႂ်းၶျႃးတူၵ်းသေၵႃႈတီႈၼၼ်ႈဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
“မိူင်း ဢေႇတုမ်ႇ၊ တၵ်းပဵၼ်တီႈဢၼ်လီၵူဝ်လီႁႄလႄႈၵူႈၵေႃႉဢၼ်ပႆတၢင်းၵၢႆၵႂႃႇၼၼ်ႉ၊တၵ်းဢွၼ်ၵၼ်တူၵ်းၸႂ်ၵွပ်ႈပိူဝ်ႈၽေးဢုပၢတ်ႈဢၼ်မၼ်းလႆႈၶၢမ်ႇတင်းသဵင်ႈတင်းလူင်ၼၼ်ႉဢေႃႈ။-
မိူၼ်ၸိူဝ်ႉၼင်ႇဝဵင်း သေႃးတုမ်ႇ၊ ဢိၵ်ႇတင်းဝဵင်း ၵေႃးမေႃးရႃႉ၊ တင်းဝဵင်းဢၼ်ၸပ်းၵၼ်ၸမ်ၵၼ်တင်းမၼ်းၸိူဝ်းၼၼ်ႉလုလႅဝ်ၼၼ်ႉလႄႈၽူႈလႂ်ဢမ်ႇလႆႈယူႇလႆႈသဝ်းၵႃႈတီႈၼၼ်ႈသေၵေႃႉသေၵူၼ်း။ လုၵ်ႈၵူၼ်းသေၵေႃႉသေၵူၼ်းဢမ်ႇလႆႈတူၵ်းတီႈယူႇတီႈသဝ်းၵႃႈၼႂ်းမၼ်း၊ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။-
ၵဝ်တၵ်းဢွၵ်ႇမႃးမိူၼ်ၸိူဝ်ႉၼင်ႇသၢင်ႇသီႈဢၼ်လုၵ်ႉသေၵႃႈတီႈထိူၼ်ႇလိုၵ်ႉလူင်ဢၼ်ယူႇၸွမ်းၼမ်ႉ ယေႃးတၢၼ်ႇ၊ ၼၼ်ႉသေယဝ်ႉ၊ဢွၵ်ႇမႃးတီႈပၢင်ႇယိူဝ်ႈၶဵဝ်လီၼၼ်ႉသေလႄႈတၵ်းႁႂ်ႈၵူၼ်းမဵဝ်း ဢေႇတုမ်ႇ၊ ဢွၵ်ႇပၢႆႈသေၵႃႈတီႈမိူင်းၶဝ်ၼၼ်ႉဢေႃႈ။ လိုၼ်းၼၼ်ႉၵဝ်တၵ်းၶၢၼ်းဝႆႉၶုၼ်ဢၼ်တၵ်းဢုပ်ႉပိူင်ႇမိူင်းၼၼ်ႉဢေႃႈ။ ၽူႈလႂ်တၵ်းမိူၼ်ၵၼ်တင်းၵဝ်။ ၽူႈလႂ်တၵ်းမၵ်းၶၢၼ်းၶိင်ႇမိုဝ်ႉမၼ်းဝႆႉတီႈၵဝ်။ ၵေႃႉဢၼ်လဵင်ႉသူဝ်းထိင်းသူဝ်းၵေႃႉလႂ်ၼၼ်ႉ၊တၵ်းၸုၵ်းယူႇၵႃႈတီႈၽၢႆႇၼႃႈၵဝ်လႆႈ။-
ပိူဝ်ႈလႆလႄႈဢွၼ်ၵၼ်ထွမ်ႇငိၼ်းတၢင်းၵျၢမ်ႇတၢင်းပွင်ဢၼ် ထႃႇဝရႃႉၽြႃး၊ ဢၼ်ၶတ်းတႃႉၵၼ်တင်းမိူင်း ဢေႇတုမ်ႇ၊ တၢင်းၵျၢမ်ႇတၢင်းပွင်ဢၼ်မၼ်းၸဝ်ႈၵျၢမ်ႇပွင်ၶတ်းတႃႉၵၼ်တင်းၵူၼ်းမိူင်း တေႇမၼ်ႇ၊ ၼၼ်ႉတႃႉ။ ရၢၼ်ႇသူႇၶဝ်ၼၼ်ႉတၵ်းတိုတ်ႉၸၼ်ဢဝ်လုၵ်ႈၶဝ်လၢင်းၶဝ်ၸိူဝ်းၼၼ်ႉၵႂႃႇဢမၢၼ်ႇၶၼ်ပဵၼ်ဢေႃႈ။ ၶဝ်ၸိူဝ်းဢၼ်ႁၼ်ၵူႈၵေႃႉၵူႈၵူၼ်းၼၼ်ႉတၵ်းတေတူၵ်းၸႂ်သၼ်ႇဝႆၵႂႃႇဢေႃႈ။-
လိၼ်မိူင်းသၼ်ႇဝႆၵွပ်ႈပိူဝ်ႈသဵင်ဢၼ်ၶဝ်လူမ်ႉပင်းၼၼ်ႉလႄႈ၊သဵင်ဢၼ်ၶဝ်ႁွင်ႉသႅၼ်ႇၼၼ်ႉလႆႈငိၼ်းၵႂႃႇတေႃႇထိုင်ႁွတ်ႈပၢင်ႇလၢႆႇ ဢေႇတုမ်ႇ၊ ဢေႃႈ။-
တူၺ်းလူး။ ရၢၼ်ႇသူႇၶဝ်တၵ်းၶိုၼ်ႈလႄႈမိၼ်မိူၼ်ၸိူဝ်ႉၼင်ႇၼူၵ်ႉၶၢင်ႇလေႃႉၼၼ်ႉယူႇသေလႄႈၵီႈပိၵ်ႇမၼ်းသေလႄႈတိုၵ်းတေႃးဝဵင်း ပေႃႇၸရႃႉ၊ ဢေႃႈ။ ၼႂ်းမိုဝ်ႉဝၼ်းၼၼ်ႉၸႂ်ႁူဝ်ႁၢၼ်ၵူၼ်းသိုၵ်းမိူင်း ဢေႇတုမ်ႇ၊ ၸိူဝ်းၼၼ်ႉတၵ်းပဵၼ်မိူၼ်ၸိူဝ်ႉၼင်ႇႁူဝ်ၸႂ်မႄႈယိင်းဢၼ်လႆႈၶၢမ်ႇဝူၺ်ႇတၼႃႇတၢင်းဢၼ်ၵိူတ်ႇလဵင်ႉလုၵ်ႈလဵင်ႉလၢင်းၼၼ်ႉၵႂႃႇဢေႃႈ၊” ဝႃႈၼင်ႇၼႆဢေႃႈ။
ၵႂၢမ်းၸဝ်ႈဢၼ်ၸၢပ်ႈသႅင်ႇၵၼ်တင်းဝဵင်း တမ်ႇမတ်ႉသၵတ်ႉ၊ ၼၼ်ႉလႄႈဝႃႈၸမ်ႉ၊ “ဝဵင်း ႁႃႇမတ်ႉ၊ ဢိၵ်ႇတင်းဝဵင်း ဢႃႇပတ်ႉ၊ ၸိူဝ်းၼၼ်ႉမီးတၢင်းဢၼ်မႆႈၸႂ်ၶီၸႂ် ၵွပ်ႈပိူဝ်ႈဢၼ်ငိၼ်းသတၢင်းသဵင်ၶၢဝ်ႇဢၼ်ဢမ်ႇလီၼၼ်ႉလႄႈၵူဝ်ႁႄၸိူမ်ႈယၢႆႈၵႂႃႇဢေႃႈ။ တၢင်းဢၼ်မႆႈၸႂ်ၶီၸႂ်ၶဝ်ၼၼ်ႉမိူၼ်ၸိူဝ်ႉၼင်ႇလႅင်းၼမ်ႉပိူပ်ႈၼမ်ႉပၢင်ႇလၢႆႇထူမ်ႈၵႃႈၼိူဝ်ၶဝ်လႄႈၶဝ်ဢမ်ႇမီးတၢင်းဢၼ်တဵတ်ႇလီၼိမ်လီလႆႈ။-
ဝဵင်း တမ်ႇမတ်ႉသၵတ်ႉ၊ ႁႅင်းဢူၼ်ႈႁႅင်းယွမ်းၵႂႃႇယဝ်ႉ။ မၼ်းဝၢႆႇတူဝ်မၼ်းႁႂ်ႈလႆႈဢွၵ်ႇပၢႆႈယဝ်ႉ။ တၢင်းဢၼ်သၼ်ႇဢၼ်ဝႆတိၵမ်ဢဝ်မၼ်းယဝ်ႉ။ မၼ်းလႆႈၶၢမ်ႇတုၵ်ႉၶႃႉတၢင်းၽၢၼ်၊ဢိၵ်ႇတင်းဝူၺ်ႇတၼႃႇဢၼ်ယႂ်ႇၼႃႇၼၼ်ႉမိူၼ်ၸိူဝ်ႉၼင်ႇမႄႈယိင်းဢၼ်ၵိူတ်ႇလဵင်ႉလုၵ်ႈလဵင်ႉလၢင်းၼၼ်ႉဢေႃႈ။-
ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈဝဵင်းဢၼ်မီးၸိုဝ်ႈသဵင်ၼၼ်ႉလႆႈၶၢမ်ႇတၢင်းဢၼ်ၸုၼ်ႉပႅတ်ႈယဝ်ႉၼေႃ။ ဝဵင်းၼၼ်ႉပဵၼ်ဝဵင်းဢၼ်တဵမ်ဝႆႉတင်းတၢင်းဢၼ်လီသႂၢင်ႇသိူဝ်းၸႂ်ၼၼ်ႉယဝ်ႉ။-
ပိူဝ်ႈဢၼ်ပဵၼ်ၼင်ႇၼႆလႄႈၵူၼ်းၼုမ်ႇၵူၼ်းၵမ်မၼ်းတင်းလၢႆတၵ်းလူမ်ႉတူၵ်းၵႃႈၼိူဝ်သဵၼ်ႈတၢင်းဝဵင်းတင်းလၢႆ၊ဢိၵ်ႇတင်းႁူဝ်ႁၢၼ်ၵူၼ်းသိုၵ်းမၼ်းတင်းသဵင်ႈတင်းလူင်တၵ်းလႆႈၶၢမ်ႇတၢင်းဢၼ်ယႃႉလုယႃႉလႅဝ်ပႅတ်ႈဢေႃႈ။-
ၵဝ်တၵ်းဢဝ်ၽႆးတုတ်ႇၵႃႈတီႈလမ်းဝဵင်း တမ်ႇမတ်ႉသၵတ်ႉ၊ လႄႈႁႂ်ႈမႆႈႁေႃၶမ်း ပိၼ်ႇႁႃႇတတ်ႉ၊ ၸိူဝ်းၼၼ်ႉဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ။
ၵႂၢမ်းၸဝ်ႈဢၼ်ၸၢပ်ႈသႅင်ႇလူၺ်ႈၵၼ်တင်းမိူင်း ၵေႇတႃႇ၊ ဢိၵ်ႇတင်းမိူင်း ႁႃႇၸေႃႇ၊ ဢၼ် ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်းမိူင်း၊ ပႃႇပုလုၼ်ႇ၊ တိုၵ်းတေႃးယႃႉပႅတ်ႈၸိူဝ်းၼၼ်ႉလႄႈဝႃႈၸမ်ႉ၊ ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ဢွၼ်ၵၼ်လုၵ်ႉလႄႈၶီႇသိုၵ်းၵႂႃႇၸူးၵႃႈတီႈၵူၼ်းမဵဝ်း ၵေႇတႃႇ၊ သေယဝ်ႉ၊ယႃႉၽဵဝ်ႈပႅတ်ႈၵူၼ်းဢၼ်ယူႇၵႃႈတီႈၽၢႆႇတၢင်းဝၼ်းဢွၵ်ႇၸိူဝ်းၼၼ်ႉတႃႉ။-
ဢွၼ်ၵၼ်သိမ်းဢဝ်သုမ်ႉထဵင်ၶဝ်၊ၽုင်သူဝ်းၶဝ်၊ၽႃႈၵင်ႈၶဝ်၊ၶိူင်ႈယိပ်းၶိူင်ႈတိုဝ်းၶဝ်၊ၵလႃႇဢုၵ်ႈၶဝ်ၸိူဝ်းၼၼ်ႉပုၼ်ႈတူဝ်ၸဝ်ႈၵဝ်ႇတႃႉ။ တၵ်းလႆႈဢွၼ်ၵၼ်ႁွင်ႉပၢဝ်ႇႁွင်ႉသေႃႇလႄႈဝႃႈ၊ ‘တၢင်းဢၼ်လီၵူဝ်လီႁႄမီးလဵပ်ႈႁွပ်ႈဝႆႉယူႇၵူႈၽၢႆႇၵူႈပႃႈဢေႃႈ၊’ ” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵူၼ်းဢၼ်ယူႇၵႃႈတီႈမိူင်း ႁႃႇၸေႃႇ၊ ၶဝ်႟။ ဢွၼ်ၵၼ်ဢွၵ်ႇပၢႆႈၵႂႃႇၵႆၵႆလႄႈတဵတ်ႇမႅပ်းယူႇတႃႉ။ ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်းမိူင်း ပႃႇပုလုၼ်ႇ၊ ၼၼ်ႉၵျၢမ်ႇပွင်တၢင်းၵျၢမ်ႇတၢင်းပွင်ဢၼ်ၶတ်းတႃႉၵၼ်တင်းမႂ်းလႄႈဢၢင်ႈတၵ်းႁဵတ်းဢမုယူႇၽၢႆႇၼိုင်ႈတင်းမႂ်းဢေႃႈ။-
ထႃႇဝရႃႉၽြႃး၊ မီးဢမိင်ႉၸမ်ႉ၊မႃးတႃႉ။ ဢွၼ်ၵၼ်ၶိုၼ်ႈတိုၵ်းၵူၼ်းမဵဝ်းဢၼ်ထၢင်ႇတူဝ်ၶဝ်လွတ်ႈၽေးရၢၼ်ႇယဝ်ႉၼၼ်ႉတႃႉႁဝ်း။ ၶဝ်ဢမ်ႇမီးၽၵ်းတူဝဵင်း၊ဢိၵ်ႇတင်းဢမ်ႇမီးၵိူၼ်ႇၽၵ်းတူလႄႈဢမ်ႇမီးတၢင်းဢၼ်မႆႈၸႂ်ၶီၸႂ်လႄႈယူႇဢေႃႈ၊” ဝႃႈၼင်ႇၼႆဢေႃႈ။
“ဢွၼ်ၵၼ်ႁိမ်ႁူင်ႇသိမ်းဢဝ်ၵလႃႇဢုၵ်ႈၶဝ်၊ဢိၵ်ႇတင်းတရိၵ်ႈသၢၼ်ႇၶဝ်တင်းသဵင်ႈတင်းမူတ်းတႃႉ။ ၵဝ်တၵ်းဢဝ်ၵူၼ်းမဵဝ်းဢၼ်ၸၢင်ႈထႃၼူတ်ႇၵႅမ်ႈၼူတ်ႇၵၢင်းၶဝ်ၸိူဝ်းၼၼ်ႉၸၢတ်ႇပိုၼ်ၵႂႃႇၵူႈၽၢႆႇၵူႈပႃႈလႄႈၵဝ်တၵ်းႁႂ်ႈၽေးဢုပၢတ်ႈလုၵ်ႉသေၵူႈတီႈၵူႈလႅၼ်ႁွတ်ႈထိုင်မႃးၵႃႈၼိူဝ်ၶဝ်ဢေႃႈ။
မိူင်း ႁႃႇၸေႃႇ၊ ၼၼ်ႉတၵ်းလႆႈပဵၼ်တီႈယူႇမႃလိၼ်၊တီႈဢၼ်သဵတ်ႇၵူၼ်းယဵၼ်ၵူၼ်းယူႇသေႇသေႇလႄႈၽူႈလႂ်သေၵေႃႉသေၵူၼ်းဢမ်ႇလႆႈယူႇလႆႈသဝ်းၵႃႈတီႈၼၼ်ႈ။ လုၵ်ႈၵူၼ်းသေၵေႃႉသေၵူၼ်းဢမ်ႇလႆႈတင်ႈလႆႈယူႇၵႃႈၼႂ်းမၼ်းဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ဢဝ်လွင်ႈဢၼ်ၸၢပ်ႈသႅင်ႇၵၼ်တင်းမိူင်း ဢေႇလမ်ႇ၊ သေလႄႈႁွတ်ႈမႃးၵႃႈတီႈပရေႃးၽႅတ်ႈ ယေႇရမိ၊ ၼႂ်းမိူဝ်ႈဢၼ် ၸေႇတၵိ၊ ၶုၼ်ႁေႃၶမ်းမိူင်း ယုတႃႉ၊ တႄႇၸႃႉၸၢမ်ႇႁၢင်ႈၸၢမ်ႇႁေႃၼၼ်ႉၸမ်ႉ၊-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉလႄႈဝႃႈ၊ “တူၺ်းလူး။ ၵဝ်တၵ်းႁၵ်းပႅတ်ႈၵၢင်ႇ ဢေႇလမ်ႇ၊ ဢၼ်ဝႃႈ၊ဢၼ်ထွတ်ႈဢၼ်မျၢတ်ႈ၊တၢင်းၵတ်ႉတၢင်းၶၼ်မၼ်းၼၼ်ႉသေဢေႃႈ။-
ၵဝ်တၵ်းဢဝ်လူမ်းသီႇမဵဝ်းလုၵ်ႉၵႃႈတီႈသီႇၽၢႆႇသီႇၼႃႈၵၢင်ႁၢဝ်ၸိူဝ်းၼၼ်ႉမႃးတီႈမိူင်း ဢေႇလမ်ႇ၊ လႄႈၵဝ်တၵ်းဢဝ်ၵူၼ်းဝၢၼ်ႈၵူၼ်းမိူင်းမၼ်းတင်းလၢႆၸၢတ်ႇပိုၼ်ပႅတ်ႈၵႃႈၼႂ်းလူမ်းၵႃႈမီးၼၼ်ႉဢေႃႈ။ သိုင်ႇၸိုင်ႈဝၢၼ်ႈမိူင်းဢၼ်ၵူၼ်း ဢေႇလမ်ႇ၊ ဢၼ်လႆႈၶၢမ်ႇတၢင်းဢၼ်လိုပ်ႈဢွၵ်ႇပႅတ်ႈ၊ဢမ်ႇႁွတ်ႈဢမ်ႇထိုင်ၸိူဝ်းၼၼ်ႉတေဢမ်ႇလႆႈမီးသေသိုင်ႇသေမိူင်း။-
ၵဝ်တၵ်းႁႂ်ႈၵူၼ်းမိူင်း ဢေႇလမ်ႇ၊ ၸိူဝ်းၼၼ်ႉၵူဝ်ႁႄၵႃႈတီႈၽၢႆႇၼႃႈရၢၼ်ႇသူႇၶဝ်တင်းလၢႆ၊ဢိၵ်ႇတင်းၵႃႈတီႈၽၢႆႇၼႃႈၶဝ်ၸိူဝ်းဢၼ်ႁႃဢဝ်ဢသၢၵ်ႈၶဝ်ၼၼ်ႉဢေႃႈ။ ၵဝ်တၵ်းႁႂ်ႈၽေးဢုပၢတ်ႈဢၼ်ဝႃႈ၊တၢင်းၸႂ်မႆႈၶႂ်ႈၸႃႉၵဝ် ဢၼ်ႁႅင်းယႂ်ႇၼႃႇၼၼ်ႉႁွတ်ႈထိုင်ၵႃႈၼိူဝ်ၶဝ်ဢေႃႈ။ ၵဝ်တၵ်းပွႆႇလၢပ်ႇပွႆႇလႅဝ်းလိုပ်ႈၸွမ်းလမ်းၸွမ်းၶဝ်တေႃႇထိုင်ႁွတ်ႈထၢၼ်ႈပေႃးယႃႉၶဝ်ပႅတ်ႈမူတ်းမူတ်းသဵင်ႈသဵင်ႈၼၼ်ႉဢေႃႈ၊” ဝႃႈၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။-
“ၵဝ်တၵ်းတႄႇႁဵတ်းပလၢင်ႇၵဝ်ဝႆႉၵႃႈၼႂ်းမိူင်း ဢေႇလမ်ႇ၊ လႄႈယူႇတီႈၼၼ်ႈသေယဝ်ႉ၊ပႄႇၽဵဝ်ႈၶုၼ်ႁေႃၶမ်းဢိၵ်ႇတင်းမူးမၢတ်ႈၽွင်းမိူင်းတင်းလၢႆပႅတ်ႈဢေႃႈ၊ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ၵူၺ်းၵႃႈ၊ၶိင်ႇၵႃႇလႃႉမိုဝ်ႉဝၼ်းၵမ်းလိုၼ်းၼၼ်ႉ၊ၵဝ်တၵ်းႁႂ်ႈၵူၼ်းမဵဝ်း ဢေႇလမ်ႇ၊ ၶိုၼ်းလႆႈလီလႆႈပဵၼ်ဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ဢၼ်လၢတ်ႈလူၺ်ႈလွင်ႈဝဵင်း ပႃႇပုလုၼ်ႇ၊ ဢိၵ်ႇတင်းမိူင်း ၶႃႇလတေး၊ ဢဝ်တင်းပရေႃးၽႅတ်ႈ ယေႇရမိ၊ လႄႈမီးဢမိင်ႉၸမ်ႉ၊
“ဢွၼ်ၵၼ်မွၵ်ႇလၢတ်ႈၵႃႈၼႂ်းၵူၼ်း ၵူႈၸိူဝ်ႉၵူႈမဵဝ်းတႃႉ။ ဢွၼ်ၵၼ်ပၢဝ်ႇသေႃႇသေလႄႈပူၵ်းတုင်းတႃႉ။ ယင်းဢမ်ႇသိူင်ႇဢမ်ႇမႅပ်းဝႆႉလႄႈဢွၼ်ၵၼ် ပၢဝ်ႇသေႃႇလႄႈလၢတ်ႈဝႃႈ၊ ဝဵင်း ပႃႇပုလုၼ်ႇ၊ လႆႈၶၢမ်ႇတၢင်းဢၼ် တိုၵ်းဢဝ်ယဝ်ႉယဝ်ႉ။ ၽြႃး ပေႇလႃႉ၊ ၼၼ်ႉသရေႇလုယဝ်ႉ။ ၽြႃး မေႇရေႃးတၵ်ႉ၊ ႁၵ်းႁိၵ်းၵႂႃႇယဝ်ႉယဝ်ႉ။ ႁုၼ်ႇႁၢင်ႈသၢင်းထုမၼ်းၸိူဝ်းၼၼ်ႉ သရေႇလုလႄႈတုမ်မႆႉဢၼ်မီးပုင်ႇႁၢင်ႈမၼ်း ၸိူဝ်းၼၼ်ႉႁၵ်းပုတ်းၵႂႃႇယဝ်ႉယဝ်ႉ။
“ၵူၼ်းမဵဝ်းၼိုင်ႈတၵ်းလုၵ်ႉသေၵႃႈတီႈၼႃႈတၢင်းႁွင်ႇမႃးလႄႈႁႂ်ႈမိူင်းၼၼ်ႉပဵၼ်ဢၼ်ပဝ်ႇဢၼ်လၢပ်ႈၵႂႃႇဢေႃႈ။ ဢမ်ႇလႆႈမီးၵေႃႉဢၼ်ယူႇသဝ်း။ ၵူၼ်းဢိၵ်ႇတင်းတရိၵ်ႈသၢၼ်ႇတင်းလၢႆဢွၼ်ၵၼ်ဢွၵ်ႇပၢႆႈၵႂႃႇသဵင်ႈသဵင်ႈမူတ်းမူတ်းယဝ်ႉ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၼႂ်းၶိင်ႇၵႃႇလႃႉမိုဝ်ႉဝၼ်းၼၼ်ႉၵူၼ်းမဵဝ်း ဢိသရေး၊ တင်းလၢႆတၵ်းႁူမ်ႈပွင်းလူၺ်ႈၵၼ်တင်းၵူၼ်းမဵဝ်း ယုတႃႉ၊ တင်းလၢႆသေလႄႈဢွၼ်ၵၼ်မႃးဢေႃႈ။ ၶဝ်ၼၼ်ႉတၵ်းမီးတၢင်းဢၼ်ႁွင်ႉႁႆႈသေယဝ်ႉ၊ပႆတၢင်းယူႇသေလႄႈသွၵ်ႈႁႃဢဝ် ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်ဢေႃႈ။-
ၶဝ်တၵ်းဢွၼ်ၵၼ်ထၢမ်ႁႃသဵၼ်ႈတၢင်းဢၼ်ၵႂႃႇဝဵင်း ၸိဢုၼ်ႇ၊ သေလႄႈဝၢႆႇၼႃႈၵႂႃႇၸူးဢေႃႈ။ ၶဝ်ၼၼ်ႉတၵ်းႁဵတ်းပတိၺိၺ်ႇထႃႇဝရႃႉႁႂ်ႈလႆႈသုတ်ႉၸပ်းသုတ်ႉၸူးတီႈ ထႃႇဝရႃႉၽြႃး၊ လႄႈတၵ်းတေဢမ်ႇၽွၵ်ႈဢမ်ႇပျၢၼ်ႇသေၽဝ်ႇသေပွၵ်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
“ၵူၼ်းၵဝ်တင်းလၢႆပဵၼ်သူဝ်းဢၼ်ႁၢႆၵႂႃႇယဝ်ႉယဝ်ႉ။ ၶဝ်ၸိူဝ်းဢၼ်လဵင်ႉသူဝ်းထိင်းသူဝ်းၶဝ်ၼၼ်ႉဢွၼ်ၵၼ်ႁႂ်ႈၶဝ်ၽိတ်းတၢင်းၵႂၢင်တၢင်းလႄႈၵႂႃႇၵႂႃႇမႃးမႃးယူႇၵႃႈၼိူဝ်လွႆတင်းလၢႆယဝ်ႉ။ ၶဝ်ၼၼ်ႉဢွၼ်ၵၼ်ၽိတ်းတၢင်းၵႂၢင်တၢင်းဢၼ်လုၵ်ႉၵႃႈတီႈလွႆလုၵ်ႈၼိုင်ႈၵႂႃႇၸူးၵႃႈတီႈလွႆလုၵ်ႈၼိုင်ႈယူႇလႄႈလူင်လိုမ်းတီႈယူႇတီႈၵိၼ်ၶဝ်ၼၼ်ႉပႅတ်ႈယဝ်ႉ။-
ၵူၼ်းၵႃႈဢၼ်ထူပ်းႁၼ်ၶဝ်ၼၼ်ႉဢွၼ်ၵၼ်တိုၵ်းတေႃးၶဝ်လႄႈရၢၼ်ႇသူႇၶဝ်တင်းလၢႆၼၼ်ႉလၢတ်ႈလႄႈဝႃႈ၊ ‘ႁဝ်းဢမ်ႇလႆႈႁဵတ်းပူၼ်ႉႁဵတ်းလိူဝ်မိူၼ်ၸိူဝ်ႉၼင်ႇဢၼ်ၶဝ်ၽိတ်းပိူင်ႈ ထႃႇဝရႃႉၽြႃး၊ ဢၼ်ပဵၼ်တီႈယူႇဢၼ်ၸႅတ်ႈဢၼ်မၢၼ်ႇၶဝ်ဢၼ်ဝႃႈ၊ ထႃႇဝရႃႉၽြႃး၊ ဢၼ်ပဵၼ်တီႈဢၼ်ပူႇမွၼ်ႇၶဝ်သွၼ်ႈပိုင်ႈၼၼ်ႉယဝ်ႉ၊’ ” ဝႃႈၼင်ႇၼႆဢေႃႈ။
“ဢွၼ်ၵၼ်ဢွၵ်ႇပၢႆႈသေၵႃႈၼႂ်းဝဵင်း ပႃႇပုလုၼ်ႇ၊ တႃႉ။ ဢွၼ်ၵၼ်ဢွၵ်ႇသေၵႃႈၼႂ်းမိူင်း ၶႃႇလတေး၊ ၵႂႃႇတႃႉ။ ဢွၼ်ၵၼ်ႁဵတ်းၸိူဝ်ႉၼင်ႇသူဝ်းပေႃႈဢၼ်ဢွၼ်ႁူဝ်ၽုင်သူဝ်းၼၼ်ႉတႃႉ။-
လွင်ႈမၼ်းၸမ်ႉ၊ၵဝ်တၵ်းတိုၵ်းယူင်းလႄႈႁႂ်ႈမူႇၽုင်ၵူၼ်းဢၼ်ယႂ်ႇၼႃႇလုၵ်ႉသေၵႃႈတီႈၽၢႆႇတၢင်းႁွင်ႇၼၼ်ႉမႃးတိုၵ်းတေႃးဝဵင်း ပႃႇပုလုၼ်ႇ၊ ဢေႃႈ။ ၶဝ်ၼၼ်ႉတၵ်းၶၢင်းတပ်ႉယူႇၽၢႆႇၼိုင်ႈတင်းဝဵင်းၼၼ်ႉလႄႈမၼ်းတၵ်းလႆႈၶၢမ်ႇတၢင်းဢၼ်တိုၵ်းဢဝ်သိမ်းဢဝ်ဢေႃႈ။ ပိုၼ်ဢၼ်ၶဝ်ယိုဝ်းၸိူဝ်းၼၼ်ႉတၵ်းပဵၼ်ၸိူဝ်ႉၼင်ႇပိုၼ်ႁူဝ်ႁၢၼ်ၵူၼ်းသိုၵ်းဢၼ်ၵတ်ႉဢၼ်ၶႅၼ်ႇလႄႈယိုဝ်းဢမ်ႇၽိတ်းဢမ်ႇၵၢတ်ႈၼၼ်ႉဢေႃႈ။-
မိူင်း ၶႃႇလတေး၊ တၵ်းလႆႈၶၢမ်ႇတၢင်းဢၼ်ႁိမ်ဢဝ်ႁူင်ႇဢဝ်လႄႈၶဝ်ၸိူဝ်းဢၼ်ႁိမ်ဢဝ်ႁူင်ႇဢဝ်ၼၼ်ႉတၵ်းဢိမ်ႇတဵမ်ဝႆႉဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
သူၸိူဝ်းဢၼ်ႁိမ်ႁူင်ႇဢဝ်ဢမူၺ်ႇၵဝ်ၶဝ်႟။ ပိၵ်ႉသမ်ႉသူဢွၼ်ၵၼ်ၸူမ်းသိူဝ်းလႄႈသႂၢင်ႇၸႂ်၊ဢွၼ်ၵၼ်ၵျွၵ်းဝႅၼ်မိူၼ်ၸိူဝ်ႉၼင်ႇဝူဝ်းမႄႈသိုဝ်ႇဢၼ်ယဵပ်ႇၶဝ်ႈယူႇၼၼ်ႉလႄႈဢွၼ်ၵၼ်ႁွင်ႉယူႇႁႄႇယူႇၸိူဝ်ႉၼင်ႇမႃႉငၢၼ်ၼၼ်ႉသေၵေႃႈ၊-
မႄႈသူၼၼ်ႉတၵ်းဢူၵ်းဢၢႆၼႃႇလူင်လၢင်လႄႈၵေႃႉဢၼ်ၵိူတ်ႇလဵင်ႉသူၼၼ်ႉတၵ်းၼႃႈမႆႈၼႃႈလႅင်ဢေႃႈ။ တူၺ်းလူး။ မၼ်းၼၼ်ႉတၵ်းပဵၼ်မိူင်းဢၼ်ယုတ်ႈယွမ်းၼႃႇသေပိူၼ်ႈၵႃႈၼႂ်းမိူင်းတင်းလၢႆ၊တီႈဢၼ်ပဵၼ်ထိူၼ်ႇပဵၼ်ၶိူဝ်း၊ပဵၼ်တီႈဢၼ်ႁႅင်ႈဢၼ်ႁွင်ၵႂႃႇဢေႃႈ။-
ၵွပ်ႈပိူဝ်ႈတၢင်းၸႂ်မႆႈၶႂ်ႈၸႃႉ ထႃႇဝရႃႉၽြႃး၊ လႄႈၵမ်းလိုၼ်းၵူၼ်းဢမ်ႇလႆႈယူႇလႆႈသဝ်းၼႂ်းမၼ်း။ တၵ်းလႆႈပဵၼ်တီႈဢၼ်ပဝ်ႇဢၼ်လၢပ်ႈလွၼ်ႉလွၼ်ႉဢေႃႈ။ ၵႃႈပဵၼ်ၵေႃႉဢၼ်ပႆတၢင်းၵၢႆၵႂႃႇႁိမ်းဝဵင်း ပႃႇပုလုၼ်ႇ၊ ၼၼ်ႉၸိူဝ်းၼၼ်ႉတၵ်းတူၵ်းၸႂ်လႂ်တိုၼ်ႇၵွပ်ႈပိူဝ်ႈၽေးဢုပၢတ်ႈၵႃႈဢၼ်မၼ်းလႆႈၶၢမ်ႇၸိူဝ်းၼၼ်ႉယူႇသေလႄႈဢွၼ်ၵၼ်သႄႉသွမ်းမၼ်းဢေႃႈ။
ဢွၼ်ၵၼ်ယၼ်ႇတပ်ႉၶၢင်းတပ်ႉၵႃႈတီႈလဵပ်ႈႁွပ်ႈဝဵင်း ပႃႇပုလုၼ်ႇ၊ တႃႉ။ သူၵႃႈဢၼ်ပဵၼ်ၸဝ်ႈၵၢင်ႇၸဝ်ႈၵူင်တင်းလၢႆၶဝ်႟။ ယင်းဢမ်ႇသေလၢႆပိုၼ်ၵၢင်ႇသေလႄႈဢွၼ်ၵၼ်ယိုဝ်းတႃႉ။ လွင်ႈမၼ်းၸမ်ႉ၊မၼ်းၽိတ်းပိူင်ႈ ထႃႇဝရႃႉၽြႃး၊ ယဝ်ႉ။-
ဢွၼ်ၵၼ်ႁွင်ႉပၢဝ်ႇႁွင်ႉသေႃႇၵႃႈတီႈလဵပ်ႈႁွပ်ႈမၼ်းတႃႉ။ မၼ်းၼွမ်းတူဝ်ဝၢင်းၶျႃးလၢၵ်ႈၼၢၵ်ႈယဝ်ႉ။ တမ်ႇတိူင်းဝဵင်းမၼ်းတင်းလၢႆၵိူၼ်ႇလူမ်ႉယဝ်ႉ။ လမ်းဝဵင်းမၼ်းတင်းလၢႆပင်းတူၵ်းယဝ်ႉ။ ပဵၼ်တၢင်းဢၼ်ၽေႇတၢင်းၸႂ်မႆႈၶႂ်ႈၸႃႉ ထႃႇဝရႃႉၽြႃး၊ တွပ်ႇတႅၼ်းၶိုၼ်းလႄႈဢွၼ်ၵၼ်ၸီႇယၢင်ႇမၼ်းၸွမ်းၵႃႈၼင်ႇဢၼ်ထုၵ်ႇလီတွပ်ႇတႅၼ်းပၼ်ဢပျတ်ႈမၼ်းၼၼ်ႉတႃႉ။ ဢွၼ်ၵၼ်ႁဵတ်းတီႈမၼ်းၸွမ်းၵႃႈၼင်ႇဢၼ်မၼ်းယၢမ်ႈႁဵတ်းၼၼ်ႉတႃႉ။-
ဢွၼ်ၵၼ်ပႄႇပႅတ်ႈၵေႃႉဢၼ်ဝၢၼ်ႇပိုၼ်ၸိူဝ်ႉၽၼ်းၼၼ်ႉဢွၵ်ႇသေဝဵင်း ပႃႇပုလုၼ်ႇ၊ ဢိၵ်ႇတင်းပႄႇပႅတ်ႈၵေႃႉဢၼ်ပၢတ်ႇၶဝ်ႈၼႂ်းၶိင်ႇမိူဝ်ႈဢၼ်ပၢတ်ႇၶဝ်ႈၼၼ်ႉတႃႉ။ ၵွပ်ႈပိူဝ်ႈၵူဝ်လၢပ်ႇၵူဝ်လႅဝ်းဢၼ်ၸၢင်ႈၼိၵ်ႈၸၢၵ်ႈငႅၼ်းသႄးၼၼ်ႉလႄႈၶဝ်တၵ်းဢွၼ်ၵၼ်ၶိုၼ်းမိူဝ်းၸူးၵႃႈတီႈၵူၼ်းမဵဝ်းၶဝ်ၼၼ်ႉႁင်းၽႂ်ႁင်းမၼ်းလႄႈၶဝ်တၵ်းဢွၵ်ႇပၢႆႈၵႂႃႇၸူးၵႃႈတီႈမိူင်းၶဝ်ႁင်းၽႂ်ႁင်းမၼ်းဢေႃႈ။
ၵူၼ်းမဵဝ်း ဢိသရေး၊ မိူၼ်ၵၼ်တင်းသူဝ်းဢၼ်ၽၢတ်ႇၽႄၵၼ်မၢၵ်ႇမိူဝ်ၵႂႃႇလႄႈသၢင်ႇသီႈတင်းလၢႆဢွၼ်ၵၼ်ႁေႃႈၶဝ်ပႅတ်ႈယဝ်ႉ။ ၶုၼ်ႁေႃၶမ်းမိူင်း ဢႃႇသီးရီးယႃး၊ ၼၼ်ႉၶူပ်းၵိၼ်ၶဝ်ဢွၼ်တၢင်းပိူၼ်ႈယဝ်ႉ။ ၵမ်းလိုၼ်းသုတ်းၸိုင်၊ ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်းမိူင်း ပႃႇပုလုၼ်ႇ၊ ၼၼ်ႉႁၵ်းႁိၵ်းလုပ်ႇၶဝ်ပႅတ်ႈယဝ်ႉ။-
ပိူဝ်ႈၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊ “ၵဝ်တၵ်းပၼ်တၢမ်ႇတီႈၶုၼ်ႁေႃၶမ်းမိူင်း ပႃႇပုလုၼ်ႇ၊ ဢိၵ်ႇတင်းသိုင်ႇၸိုင်ႈဝၢၼ်ႈမိူင်းမၼ်းမိူၼ်ၸိူဝ်ႉၼင်ႇၵဝ်ပၼ်တၢမ်ႇတီႈၶုၼ်ႁေႃၶမ်းမိူင်း ဢႃႇသီးရီးယႃး၊ ၼၼ်ႉဢေႃႈ။-
ၵဝ်တၵ်းဢဝ်ၵူၼ်းမဵဝ်း ဢိသရေး၊ ၶိုၼ်းမႃးၸူးၵႃႈတီႈဢၼ်ၶဝ်ယၢမ်ႈၵိၼ်ယူႇၼၼ်ႉဢေႃႈ။ ၶဝ်တၵ်းလႆႈၵိၼ်ယူႇၵႃႈၼိူဝ်လွႆ ၵရမေႇလႃႉ၊ ဢိၵ်ႇတင်းၵႃႈၼႂ်းမိူင်း ပႃႇသၢၼ်ႇ၊ လႄႈၵိၼ်ဢိမ်ႇၵိၼ်တဵမ်ၵႃႈၼိူဝ်လွႆ ဢေႇၽရိမ်ႇ၊ ဢိၵ်ႇတင်းၵႃႈၼႂ်းမိူင်း ၵိလတ်ႉ၊ ဢေႃႈ။-
ၼႂ်းၶိင်ႇၵႃႇလႃႉမိုဝ်ႉဝၼ်းၼၼ်ႉတၵ်းၸႅတ်ႈထၢမ်ႁႃဢဝ်ဢပျတ်ႈၵူၼ်းမဵဝ်း ဢိသရေး၊ ၼၼ်ႉဢမ်ႇမီးလႃးလႃး။ ၸႅတ်ႈထၢမ်ႁႃဢဝ်တုၸရိူၵ်ႈၵူၼ်းမဵဝ်း ယုတႃႉ၊ လႄႈဢမ်ႇထူပ်းဢမ်ႇႁၼ်။ ၵဝ်တၵ်းၽေႇဢပျတ်ႈၶဝ်ၸိူဝ်းဢၼ်ၵဝ်ဢဝ်ၵိုတ်းၵျၢၼ်ႇဝႆႉၼၼ်ႉဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
“ဢွၼ်ၵၼ်ၶီႇသိုၵ်းၶိုၼ်ႈၸူးၵႃႈတီႈမိူင်း မေႇရိသိမ်ႇ၊ ဢိၵ်ႇတင်းၵႃႈတီႈၵူၼ်းဝၢၼ်ႈၵူၼ်းမိူင်း ၽိၵွတ်ႉ၊ ၸိူဝ်းၼၼ်ႉတႃႉ။ ဢွၼ်ၵၼ်ဢဝ်တၢႆလႄႈယႃႉၽဵဝ်ႈပႅတ်ႈမဵဝ်းၸိူဝ်ႉၶိူဝ်းၶဝ်မူတ်းမူတ်းသဵင်ႈသဵင်ႈတႃႉ။ ဢွၼ်ၵၼ်ႁဵတ်းၸွမ်းၵႃႈၼင်ႇဢၼ်ၵဝ်သင်ႇလၢတ်ႈဝႆႉတီႈမႂ်းၼၼ်ႉတႃႉ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။-
ၵဝ်လႆႈငိၼ်းသဵင်တၢင်းဢၼ်တိုၵ်းသိုၵ်း၊သဵင်တၢင်းဢၼ်ယႃႉၽဵဝ်ႈပႅတ်ႈဢၼ်ယႂ်ႇၼႃႇလူင်လၢင်ၵႃႈတီႈမိူင်းၼၼ်ႉဢေႃႈ။-
ၶွၼ်ႉလဵၵ်းဢၼ်ပေႃႉယႅၼ်ႉၼႃႈၽႅၼ်ႇလိၼ်မိူင်းတင်းသဵင်ႈၼၼ်ႉလႆႈၶၢမ်ႇတၢင်းဢၼ်တႅပ်းၽၼ်းလႄႈႁၵ်းႁိၵ်းလုလႅဝ်ယဝ်ႉ။ ဝဵင်း ပႃႇပုလုၼ်ႇ၊ ၼၼ်ႉလႆႈပဵၼ်တီႈဢၼ်လီၵူဝ်လီႁႄပုၼ်ႈၵူၼ်းၵူႈၸိူဝ်ႉၵူႈမဵဝ်းယဝ်ႉ။-
ဝဵင်း ပႃႇပုလုၼ်ႇ၊ ႟။ ၵဝ်ၵၢင်တူင်ႇႁႅဝ်ႉတူင်ႇၶိုမ်းတီႈမႂ်းလႄႈ၊မႂ်းယင်းဢမ်ႇႁုလႄႈတူၵ်းၶမ်မႅၼ်ႈယဝ်ႉ။ ရၢၼ်ႇသူႇထူပ်းႁၼ်မႂ်းလႄႈတိုၵ်းဢဝ်သိမ်းဢဝ်မႂ်းၵွပ်ႈပိူဝ်ႈဢၼ်မႂ်းႁဵတ်းၶတ်းၵၼ်တင်း ထႃႇဝရႃႉၽြႃး၊ ၼၼ်ႉယဝ်ႉ။-
ထႃႇဝရႃႉၽြႃး၊ ၽုၺ်ႇတိူၵ်ႈလၢၵ်ႈၼၢၵ်ႈၸုမ်ႇမၼ်းၸဝ်ႈလႄႈဢဝ်လၢၵ်ႈၼၢၵ်ႈတၢင်းၸႂ်မႆႈၶႂ်ႈၸႃႉမၼ်းၸဝ်ႈဢွၵ်ႇယဝ်ႉ။ လွင်ႈမၼ်းၸမ်ႉ၊ ၸဝ်ႈပူဝ်ႇပႃႇၵၢင်ႁၢဝ်၊ၸဝ်ႈထႃႇဝရႃႉၽြႃး၊ မီးလွင်ႈဢၼ်တၵ်းလႆႈႁဵတ်းတီႈမိူင်း ၶႃႇလတေး၊ ဢေႃႈ။-
ဢွၼ်ၵၼ်လုၵ်ႉသေၵႃႈတီႈၵူႈၽၢႆႇၵူႈပႃႈမႃးတိုၵ်းတေႃးမၼ်းလႄႈၽုၺ်ႇပိုတ်ႇယွင်ၶဝ်ႈယေးၶဝ်ႈမၼ်းတင်းလၢႆတႃႉ။ ဢွၼ်ၵၼ်ဢဝ်မၼ်းၵွင်ဝႆႉပဵၼ်ပုမ်ႇပဵၼ်ၵွင်လႄႈယႃႉမၼ်းပႅတ်ႈမူတ်းမူတ်းသဵင်ႈသဵင်ႈႁႂ်ႈထၢၼ်ႈပေႃးဢမ်ႇၵိုတ်းဢမ်ႇၵျၢၼ်ႇလႃးလႃးၼၼ်ႉတႃႉ။-
ဢွၼ်ၵၼ်ဢဝ်ဝူဝ်းငၢၼ်မၼ်းၵႃႈမီးၼၼ်ႉတၢႆလႄႈႁႂ်ႈၶဝ်လူင်းၸူးၵႃႈတီႈပၢင်ဢၼ်ဢဝ်တူဝ်သတ်းတၢႆၼၼ်ႉတႃႉ။ ၶဝ်ၼၼ်ႉမီးဢႃႉမၢင်ႇၵလႃႇဢေႃႈ။ မိုဝ်ႉဝၼ်းၶဝ်၊ၶိင်ႇၵႃႇလႃႉဢၼ်ၶဝ်တၵ်းလႆႈၶၢမ်ႇတၢင်းဢၼ်ၸီႇယၢင်ႇပၼ်တၢမ်ႇၼၼ်ႉႁွတ်ႈထိုင်ယဝ်ႉ။
လႆႈငိၼ်းသဵင်ၶဝ်ၸိူဝ်းဢၼ်ဢွၵ်ႇပၢႆႈသေၵႃႈၼႂ်းမိူင်း ပႃႇပုလုၼ်ႇ၊ ၸိူဝ်းၼၼ်ႉဢေႃႈ။ ၶဝ်ဢွၼ်ၵၼ်မွၵ်ႇလၢတ်ႈၵႃႈၼႂ်းဝဵင်း ၸိဢုၼ်ႇ၊ လူၺ်ႈလွင်ႈတၢင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းတွပ်ႇတႅၼ်းပၼ်တၢမ်ႇၸွမ်းၼင်ႇဢပျတ်ႈၵူၼ်းမဵဝ်း ပႃႇပုလုၼ်ႇ၊ ဢၼ်ယႃႉပႅတ်ႈၵျွင်းပိၵ်ႈမၢၼ်ႇမၼ်းၸဝ်ႈၼၼ်ႉဢေႃႈ။
“ဢွၼ်ၵၼ်ႁွင်ႉဢဝ်ၶဝ်ၵႃႈဢၼ်မေႃယိုဝ်းၵၢင်ႇၸိူဝ်းၼၼ်ႉမႃးတိုၵ်းတေႃးဝဵင်း ပႃႇပုလုၼ်ႇ၊ တႃႉ။ ဢွၼ်ၵၼ်ၶျႃးတပ်ႉၵႃႈတီႈလဵပ်ႈႁွပ်ႈမၼ်းလႄႈယႃႇပေႁႂ်ႈၵူၼ်းဝၢၼ်ႈၵူၼ်းမိူင်းလွတ်ႈသေၵေႃႉသေၵူၼ်း။ ဢွၼ်ၵၼ်ပၼ်ဢပျတ်ႈၸွမ်းၼင်ႇတၢင်းၵမ်တၢင်းၵျၢင်ႉဢၼ်မၼ်းၵမ်ၵျၢင်ႉၼၼ်ႉလႄႈႁဵတ်းတီႈမၼ်းၸွမ်းၵႃႈၼင်ႇဢၼ်မၼ်းယၢမ်ႈႁဵတ်းၼၼ်ႉတႃႉ။ မၼ်းဢုပ်ႇဝၢဝ်းလႄႈၶတ်းတႃႉၵၼ်တင်း ထႃႇဝရႃႉၽြႃး၊ ၽြႃးဢၼ်မူတ်းၸၢင်ႇၵူၼ်းမဵဝ်း ဢိသရေး၊ ယဝ်ႉလူင်ပႄႇ။-
ပိူဝ်ႈၼႆလႄႈၵူၼ်းၼုမ်ႇၵူၼ်းၵမ်မၼ်းတင်းလၢႆတၵ်းလူမ်ႉတူၵ်းၵႃႈၼႂ်းသဵၼ်ႈတၢင်းမၼ်းတင်းလၢႆလႄႈၼႂ်းမိုဝ်ႉဝၼ်းၼၼ်ႉႁူဝ်ႁၢၼ်ၵူၼ်းသိုၵ်းမၼ်းတင်းသဵင်ႈတင်းလူင်တၵ်းလုတၵ်းသုမ်းဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ၸဝ်ႈထႃႇဝရႃႉၽြႃး၊ မီးဢမိင်ႉၸမ်ႉ၊ “ၵေႃႉဢၼ်မႃႇၼႃႉယႂ်ႇၼႆႉ႟။ ၵဝ်တၵ်းၶႅင်ႇတႃႉၵၼ်တင်းမႂ်းဢေႃႈ။ မိုဝ်ႉဝၼ်းမႂ်း၊ၶိင်ႇၵႃႇလႃႉဢၼ်ၵဝ်တၵ်းလႆႈပၼ်တၢမ်ႇတီႈမႂ်းၼၼ်ႉႁွတ်ႈထိုင်ယဝ်ႉ။-
ၵေႃႉဢၼ်မႃႇၼႃႉယႂ်ႇၼၼ်ႉတၵ်းၶီႈလိုတ်းလႄႈလူမ်ႉဢေႃႈ။ ၽူႈလႂ်ဢမ်ႇယူၵ်ႉဢမ်ႇပူၵ်းမၼ်းသေၵေႃႉသေၵူၼ်း။ ၵဝ်တၵ်းဢဝ်ၽႆးတုတ်ႇဝဵင်းမၼ်းတင်းလၢႆလႄႈမႆႈၶဝ်ၸိူဝ်းဢၼ်ယူႇႁိမ်းႁွမ်းလဵပ်ႈႁွပ်ႈမၼ်းၵႃႈမီႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ “ၵူၼ်းမဵဝ်း ဢိသရေး၊ ဢိၵ်ႇတင်းၵူၼ်းမဵဝ်း ယုတႃႉ၊ တင်းလၢႆလႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသႄးမိူဝ်ႈလဵဝ်ၵမ်းလဵဝ်ၵၼ်ယဝ်ႉ။ ၶဝ်ၸိူဝ်းဢၼ်သိမ်းဢဝ်ၶဝ်ၵႂႃႇၵႃႈမီးၼၼ်ႉၶျုၵ်ႈၶင်ၶဝ်ဝႆႉလႄႈထဵင်ပႅတ်ႈလွင်ႈတၢင်းဢၼ်တၵ်းပွႆႇၶဝ်လွတ်ႈၼၼ်ႉယဝ်ႉ။-
ၼႂ်းဝႃႈၼၼ်သေၵေႃႈ၊ၸဝ်ႈဢၼ်ထုတ်ႇၼုၵ်ႈဢဝ်ၶဝ်ၼၼ်ႉႁႅင်းယႂ်ႇၼႃႇလႄႈမီးၸိုဝ်ႈသဵင်ဢၼ်ဝႃႈ၊ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ” ဝႃႈၼင်ႇၼႆဢေႃႈ။ မၼ်းၸဝ်ႈတၵ်းၵႄႈလိတ်ႈဢမုၶဝ်ႁႂ်ႈလိၼ်မိူင်းၸဝ်ႈတဵတ်ႇလီၼိမ်လီဢေႃႈ။ ၵူၺ်းၵႃႈ၊တၵ်းယႃႉယူၵ်ႉၵူၼ်းဝၢၼ်ႈၵူၼ်းမိူင်း ပႃႇပုလုၼ်ႇ၊ ယူႇဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၽေးလၢပ်ႇၽေးလႅဝ်းတၵ်းႁွတ်ႈထိုင် ၵႃႈၼိူဝ်ၵူၼ်းမိူင်း ၶႃႇလတေး၊ ၵူၼ်းမိူင်း ပႃႇပုလုၼ်ႇ၊ ဢိၵ်ႇတင်း မူးမၢတ်ႈၽွင်းမိူင်းမၼ်း၊ၵူၼ်းဢၼ်မီးၺၢၼ်ႇ ပိင်ႇၺႃႇမၼ်းၸိူဝ်းၼၼ်ႉဢေႃႈ။
ၽေးလၢပ်ႇၽေးလႅဝ်းတၵ်းႁွတ်ႈထိုင် ၵႃႈၼိူဝ်ပရေႃးၽႅတ်ႈဢၼ်တုဢၼ်ပွမ် တင်းလၢႆလႄႈၶဝ်တၵ်းဢွၼ်ၵၼ်ပဵၼ် ၵူၼ်းယွင်ႇၵူၼ်းမႃႈဢေႃႈ။ ၽေးလၢပ်ႇၽေးလႅဝ်းတၵ်းႁွတ်ႈထိုင် ၵႃႈၼိူဝ်ႁူဝ်ႁၢၼ်ၵူၼ်းသိုၵ်းမၼ်း တင်းလၢႆလႄႈၶဝ်တၵ်းဢွၼ်ၵၼ်ၸႂ်လုဢေႃႈ။
ၽေးလၢပ်ႇၽေးလႅဝ်းတၵ်းႁွတ်ႈထိုင်ၵႃႈၼိူဝ် မႃႉမၼ်း၊ၵႃႈၼိူဝ်လေႃႉမႃႉသိုၵ်းမၼ်း၊ ဢိၵ်ႇတင်းၵူၼ်းတၢင်ႇၸိူဝ်ႉတၢင်ႇမဵဝ်းၵႃႈဢၼ် လေႃးလႄးလူၺ်ႈၵၼ်တင်းၶဝ် ယူႇၵႃႈၼႂ်းဝဵင်းၸိူဝ်းၼၼ်ႉလႄႈၶဝ်ၼၼ်ႉ တၵ်းပဵၼ်ၸိူဝ်ႉၼင်ႇမႄႈယိင်းၵႂႃႇဢေႃႈ။ ၽေးလၢပ်ႇၽေးလႅဝ်းတၵ်းႁွတ်ႈထိုင်ၵႃႈၼိူဝ် ၽၼ်ႇတႃႇဢုၵ်ႉၸႃႇမၼ်းလႄႈပိူၼ်ႈတၵ်း ႁိမ်ဢဝ်ႁူင်ႇဢဝ်ဢေႃႈ။
ၽေးတၢင်းဢၼ်ႁႅင်ႈဢၼ်ႁွင်တၵ်းႁွတ်ႈထိုင် ၵႃႈၼိူဝ်ၼမ်ႉတင်းလၢႆလႄႈၼမ်ႉၸိူဝ်းၼၼ်ႉ တၵ်းႁႅင်ႈႁွင်ၵႂႃႇဢေႃႈ။ လွင်ႈမၼ်းၸမ်ႉ၊မိူင်းၼၼ်ႉပဵၼ်မိူင်းဢၼ် မီးတဵမ်ဝႆႉတင်းႁုၼ်ႇႁၢင်ႈသၢင်းထုလႄႈ ၵူၼ်းဝၢၼ်ႈၵူၼ်းမိူင်းၸိူဝ်းၼၼ်ႉဢိင်ပိုင်ႈ ႁုၼ်ႇႁၢင်ႈသၢင်းထုၸိူဝ်းၼၼ်ႉသေယဝ်ႉ၊ႁဵတ်း လွင်ႈတၢင်းဢၼ်ငိူဝ်ႈငႃႉယူႇဢေႃႈ။
“ပိူဝ်ႈၼႆလႄႈတူဝ်ထိူၼ်ႇႁၢႆႉ၊ဢိၵ်ႇတင်းမႃထိူၼ်ႇတင်းလၢႆတၵ်းဢွၼ်ၵၼ်ယူႇၵႃႈတီႈဝဵင်း ပႃႇပုလုၼ်ႇ၊ လႄႈၼူၵ်ႉၵလႃႇဢုၵ်ႈတင်းလၢႆ တၵ်းဢွၼ်ၵၼ်ယူႇၵႃႈတီႈၼၼ်ႈဢေႃႈ။ ၵမ်းလိုၼ်းၽူႈလႂ်ဢမ်ႇလႆႈယူႇလႆႈသဝ်းၵႃႈတီႈၼၼ်ႈသေၵေႃႉသေၵူၼ်း။ ဢမ်ႇလႆႈပဵၼ်တီႈဢၼ်ၵူၼ်းယူႇၵူၼ်းသဝ်းယူႇၵူႈၸူဝ်ႈၵူႈပၢၼ်သိုပ်ႇသိုပ်ႇတၢမ်တၢမ်။-
တၵ်းပဵၼ်ၸိူဝ်ႉၼင်ႇတၢင်းဢၼ်ၽြႃးပဵၼ်ၸဝ်ႈၵိူၼ်ႇယႃႉပႅတ်ႈဝဵင်း သေႃးတုမ်ႇ၊ ဢိၵ်ႇတင်းဝဵင်း ၵေႃးမေႃးရႃႉ၊ တင်းဝဵင်းဢၼ်မီးၸမ်ၵၼ်တင်းမၼ်းၼၼ်ႉၸိူဝ်းၼၼ်ႉလႄႈၽူႈလႂ်ဢမ်ႇလႆႈယူႇလႆႈသဝ်းၵႃႈတီႈၼၼ်ႈသေၵေႃႉသေၵူၼ်း။ ၵေႃႉၼိုင်ႈၵေႃႈဢမ်ႇလႆႈယူႇၵႃႈၼႂ်းမၼ်း၊” ဝႃႈၼင်ႇၼႆဢေႃႈ။
“တူၺ်းလူး။ ၵူၼ်းမဵဝ်းၼိုင်ႈလုၵ်ႉသေၵႃႈတီႈ ၼႃႈတၢင်းႁွင်ႇမႃးလႄႈ ပဵၼ်ၸိူဝ်ႉၶိူဝ်းၵူၼ်းဢၼ်ယႂ်ႇၼႃႇ၊ဢိၵ်ႇတင်း ၶုၼ်ႁေႃၶမ်းၼမ်ၼႃႇ၊ ဢွၼ်ၵၼ်လုၵ်ႉသေၵႃႈတီႈႁိမ်းၸဵင်ႇသုတ်း လိၼ်မိူင်းပုၼ်ႉပေႃႇမႃးဢေႃႈ။
ၶဝ်ဢွၼ်ၵၼ်ယိပ်းၵမ်ၵၢင်ႇ၊ဢိၵ်ႇတင်း ႁွၵ်ႇယူႇဢေႃႈ။ ၶဝ်ပဵၼ်မဵဝ်းဢၼ်လိူင်းၵျၢမ်းၼႃႇလႄႈဢမ်ႇမီးၵရုၼႃႇတၢင်းဢၼ်ႁၵ်ႉဢဵတ်းလူၼၼ်ႉဢေႃႈ။ သဵင်ၶဝ်ၼၼ်ႉလင်မေႃးမိူၼ်ၸိူဝ်းၼင်ႇသဵင် ၼမ်ႉသမ်ႇမုၵ်ႈတြႃႇလႄႈ ၶဝ်ဢွၼ်ၵၼ်ၶီႇမႃႉမႃးသေလႄႈၶၢင်းတပ်ႉ ၶၢင်းငႃးမိူၼ်ၸိူဝ်ႉၼင်ႇႁူဝ်ႁၢၼ်ၵူၼ်းသိုၵ်း ၼၼ်ႉႁင်းၽႂ်ႁင်းမၼ်းလႄႈၶီႇသိုၵ်းမႃးၸူး တီႈမႂ်းယဝ်ႉ။ လုၵ်ႈယိင်း ပႃႇပုလုၼ်ႇ၊ ႟။
ၶုၼ်ႁေႃၶမ်းမိူင်း ပႃႇပုလုၼ်ႇ၊ ငိၼ်း သတၢင်းသဵင်ၶၢဝ်ႇၼၼ်ႉလႄႈႁႅင်းမိုဝ်း မၼ်းဢူၼ်ႈၵႂႃႇဢေႃႈ။ တုၵ်ႉၶႃႉတၢင်းၽၢၼ်၊မိူၼ်ၸိူဝ်ႉၼင်ႇဝူၺ်ႇတၼႃႇတၢင်းၸဵပ်းဢၼ်မႄႈယိင်းလႆႈၶၢမ်ႇ မိူဝ်ႈၶိင်ႇၵႃႇလႃႉဢၼ်လဵင်ႉလုၵ်ႈလဵင်ႉလၢင်းတူၵ်းႁွတ်ႈထိုင်မႃးတီႈမၼ်းၼၼ်ႉဢေႃႈ။
“ၵဝ်တၵ်းဢွၵ်ႇမႃးမိူၼ်ၸိူဝ်ႉၼင်ႇသၢင်ႇသီႈဢၼ်လုၵ်ႉသေၵႃႈတီႈထိူၼ်ႇတိုပ်းဢၼ်ၸွမ်းၼမ်ႉ ယေႃးတၢၼ်ႇ၊ ၼၼ်ႉသေယဝ်ႉ၊ဢွၵ်ႇမႃးတီႈပၢင်ႇယိူဝ်ႈၶဵဝ်လီၼၼ်ႉသေလႄႈတၵ်းႁႂ်ႈၶဝ်ဢွၵ်ႇပၢႆႈသေၵႃႈတီႈမိူင်းၶဝ်ၼၼ်ႉဢေႃႈ။ လိုၼ်းၼၼ်ႉၵဝ်တၵ်းၶၢၼ်းဝႆႉၶုၼ်ဢၼ်တၵ်းဢုပ်ႉပိူင်ႇမိူင်းၼၼ်ႉဢေႃႈ။ ၽူႈလႂ်တၵ်းမိူၼ်ၵၼ်တင်းၵဝ်။ ၽူႈလႂ်တၵ်းမၵ်းၶၢၼ်းၶိင်ႇယၢမ်းဝႆႉတီႈၵဝ်။ ၵေႃႉဢၼ်လဵင်ႉသူဝ်းထိင်းသူဝ်းၵေႃႉလႂ် တၵ်းၸုၵ်းယူႇၵႃႈတီႈၽၢႆႇၼႃႈၵဝ်၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈဢွၼ်ၵၼ်ထွမ်ႇငိၼ်းတၢင်းၵျၢမ်ႇတၢင်းပွင် ထႃႇဝရႃႉၽြႃး၊ ဢၼ်ၶတ်းၵၼ်တင်းဝဵင်း ပႃႇပုလုၼ်ႇ၊ တၢင်းၵျၢမ်ႇတၢင်းပွင်ဢၼ်ၶတ်းၵၼ်တင်းမိူင်း ၶႃႇလတေး၊ တင်းလၢႆၼၼ်ႉတႃႉ။ သူဝ်းဢၼ်ႁႅင်းလဵၵ်ႉသေပိူၼ်ႈၸိူဝ်းၼၼ်ႉတၵ်းလႆႈၶၢမ်ႇတၢင်းဢၼ်တိုတ်ႉၸၼ်ဢဝ်ၵႂႃႇဢမၢၼ်ႇၶၼ်ပဵၼ်လႄႈတူဝ်ဢၼ်ယူႇၼႂ်းၶွၵ်ႈၼၼ်ႉတၵ်းတူၵ်းၸႂ်ဢေႃႈ။-
လိၼ်မိူင်းသၼ်ႇဝႆၵွပ်ႈပိူဝ်ႈသဵင်ဢၼ်တိုၵ်းဢဝ်ဝဵင်း ပႃႇပုလုၼ်ႇ၊ ၼၼ်ႉလႄႈသဵင်ၼၼ်ႉငိၼ်းၵႂႃႇတေႃႇထိုင်ႁွတ်ႈတီႈၵူၼ်းၵူႈၸိူဝ်ႉၵူႈမဵဝ်းဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵဝ်တၵ်းႁဵတ်းႁႂ်ႈလူမ်းဢၼ်ၸၢင်ႈယႃႉပႅတ်ႈၼၼ်ႉၶတ်းၶႅင်ႁႅင်းတႃႉၵၼ်တင်းဝဵင်း ပႃႇပုလုၼ်ႇ၊ ဢိၵ်ႇတင်းၵူၼ်းဝၢၼ်ႈၵူၼ်းဝဵင်းမၼ်းဢေႃႈ။-
ၵဝ်တၵ်းပွႆႇၸႂ်ႉၶဝ်ၸိူဝ်းဢၼ်ၸၢင်ႈဢဝ်လူင်ႈၽတ်း၊ၽတ်းၼၼ်ႉၵႂႃႇၸူးၵႃႈတီႈဝဵင်း ပႃႇပုလုၼ်ႇ၊ ဢေႃႈ။ ၶဝ်ၼၼ်ႉတၵ်းဢွၼ်ၵၼ်ၽတ်းပႅတ်ႈမိူင်းၼၼ်ႉတင်းမိူင်းထၢၼ်ႈပေႃးႁႂ်ႈမိူင်းၼၼ်ႉပဵၼ်ဢၼ်ပဝ်ႇဢၼ်လၢပ်ႈၵႂႃႇဢေႃႈ။ ၼႂ်းမိုဝ်ႉဝၼ်းဢၼ်ၽေးႁွတ်ႈထိုင်ၼၼ်ႉ၊ၶဝ်ၼၼ်ႉတၵ်းဢွၼ်ၵၼ်တိုၵ်းတေႃးၵႃႈတီႈႁိမ်းႁွမ်းလဵပ်ႈႁွပ်ႈမၼ်းဢေႃႈ။-
ယႃႇပေႁႂ်ႈၶဝ်လႆႈဝူတ်ႈၵၢင်ႇၶဝ်၊ဢိၵ်ႇတင်းယႃႇႁႂ်ႈၶဝ်လႆႈၼုင်ႈၶူဝ်းၶႅပ်းလဵၵ်းၸိူဝ်းၼၼ်ႉ၊ယင်းဢမ်ႇသေလၢႆၵူၼ်းၼုမ်ႇၵူၼ်းၵမ်မၼ်းတင်းလၢႆလႄႈဢွၼ်ၵၼ်ယႃႉၽဵဝ်ႈမူႇၽုင်ၵူၼ်းသိုၵ်းမၼ်းၵႃႈမီးၼၼ်ႉပႅတ်ႈမူတ်းမူတ်းသဵင်ႈသဵင်ႈတႃႉ။-
ၼင်ႇၼၼ်လႄႈၶဝ်ၼၼ်ႉတၵ်းလူမ်ႉတူၵ်းၵႃႈၼႂ်းမိူင်း ၶႃႇလတေး၊ လႄႈလႆႈၶၢမ်ႇတၢင်းဢၼ်မၢတ်ႇၸဵပ်းမီးယူႇၵႃႈၼႂ်းသဵၼ်ႈတၢင်းလူင်မိူင်းၼၼ်ႉဢေႃႈ။-
ပိၵ်ႉသမ်ႉ၊မိူင်းတီႈယူႇၵူၼ်းမဵဝ်း ဢိသရေး၊ ဢိၵ်ႇတင်းမိူင်းတီႈယူႇၵူၼ်းမဵဝ်း ယုတႃႉ၊ ၼၼ်ႉတဵမ်ဝႆႉတင်းဢပျတ်ႈဢၼ်ၽိတ်းပိူင်ႈၽြႃးဢၼ်မူတ်းၸၢင်ႇၵူၼ်းမဵဝ်း ဢိသရေး၊ ၼၼ်ႉသေၵေႃႈ၊ ထႃႇဝရႃႉၽြႃး၊ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ ၶဝ်ၼၼ်ႉဢမ်ႇၸုၼ်ႉပႅတ်ႈၶဝ်။-
ဢွၼ်ၵၼ်ဢွၵ်ႇပၢႆႈသေၵႃႈၼႂ်းဝဵင်း ပႃႇပုလုၼ်ႇ၊ လႄႈၵႄႇသႄႇၼုၵ်ႈဢဝ်ဢသၢၵ်ႈတူဝ်ၸဝ်ႈၵဝ်ႇႁင်းၽႂ်ႁင်းမၼ်းတႃႉ။ ယႃႇပေၶၢမ်ႇတၢင်းဢၼ်လုသုမ်းၵွပ်ႈပိူဝ်ႈဢပျတ်ႈတၢင်းၽိတ်းမၼ်းၼၼ်ႉ။ ၶိင်ႇၵႃႇလႃႉၼႆႉၸမ်ႉ၊ပဵၼ်ၶိင်ႇၵႃႇလႃႉဢၼ်ၽြႃးပဵၼ်ၸဝ်ႈတၵ်းပၼ်တၢမ်ႇၼင်ႇႁိုဝ်တၢင်းၸႂ်မႆႈၶႂ်ႈၸႃႉမၼ်းၸဝ်ႈတၵ်းပျေႇလႄႈမၼ်းၸဝ်ႈတၵ်းတွပ်ႇတႅၼ်းပၼ်ၸွမ်းၼင်ႇဢၵျူဝ်းဢပျတ်ႈဢေႃႈ။-
ဝဵင်း ပႃႇပုလုၼ်ႇ၊ ပဵၼ်ၵွၵ်းၶမ်းဢၼ် ထႃႇဝရႃႉၽြႃး၊ ယိပ်းၵမ်လႄႈႁႂ်ႈလိၼ်မိူင်းတင်းသဵင်ႈတင်းမူတ်းမဝ်းလဝ်ႈမဝ်းၵမ်ဢေႃႈ။ ၵူၼ်းၵူႈၸိူဝ်ႉၵူႈမဵဝ်းဢွၼ်ၵၼ်သူတ်ႉၵိၼ်ၼမ်ႉမၢၵ်ႇၸပိတ်ႉဢၼ်မီးၵႃႈၼႂ်းၵွၵ်းၼၼ်ႉလႄႈပဵၼ်ၵူၼ်းယွင်ႇၵူၼ်းမႃႈၵႂႃႇဢေႃႈ။-
ဝဵင်း ပႃႇပုလုၼ်ႇ၊ ၵိုင်ႉၵၢင်ႉလူမ်ႉပင်းၵမ်းလဵဝ်လႄႈလုလႅဝ်ၵႂႃႇဢေႃႈ။ ဢွၼ်ၵၼ်ႁွင်ႉႁႆႈပွင်ႉၶၢင်းပုၼ်ႈမၼ်းတႃႉ။ ဢွၼ်ၵၼ်ဢဝ်ယႃႈယႃတႃးသႂ်ႇၵႃႈတီႈၸဵပ်းမၼ်းတႃႉ။ ၸၢင်ႈၶႄးမၼ်းတၵ်းတေႁၢႆမႃးၶႅၼ်းမႃးဢေႃႈ။-
ပိၵ်ႉသမ်ႉႁဝ်းၶတ်းၸႂ်ႁဵတ်းႁႂ်ႈတၢင်းၸဵပ်းဝဵင်း ပႃႇပုလုၼ်ႇ၊ ႁၢႆသေၵေႃႈ တၢင်းၸဵပ်းမၼ်းဢမ်ႇႁၢႆလႆႈ။ ႁဝ်းဢွၼ်ၵၼ်ၸုၼ်ႉပႅတ်ႈမၼ်းသေလႄႈၵႂႃႇၵႃႈတီႈမိူင်းဢၼ်ႁဝ်းယူႇႁဝ်းသဝ်းၼၼ်ႉႁင်းၽႂ်ႁင်းမၼ်းတႃႉႁဝ်း။ တၢင်းၸီႇယၢင်ႇဢပျတ်ႈဢၼ်မၼ်းလႆႈၶၢမ်ႇၼၼ်ႉႁႅင်းၼႃႇတေႃႇပေႃးႁွတ်ႈၽႅဝ်ထိုင်ၽႃႉထိုင်မွၵ်ႇၵႃႈၼိူဝ်ၵၢင်ႁၢဝ်ပုၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၽုၺ်ႇဢွၵ်ႇၼႄပျႃးတၢင်းဢၼ်ႁဝ်းသိုဝ်ႈတေႃႇၼၼ်ႉယဝ်ႉ။ မႃးမႃး႟။ ဢွၼ်ၵၼ်မွၵ်ႇလၢတ်ႈလွင်ႈတၢင်းဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၸီႇယၢင်ႇႁဵတ်းၵႃႈၼႂ်းဝဵင်း ၸိဢုၼ်ႇ၊ ၼၼ်ႉတႃႉႁဝ်း။
ဢွၼ်ၵၼ်လပ်ႉၶူမ်းပိုၼ်ၵၢင်ႇတင်းလၢႆတႃႉ။ ဢွၼ်ၵၼ်ယိပ်းၵမ်ၶိူင်ႈႁႄႉလၢၵ်ႈၼၢၵ်ႈတင်းလၢႆတႃႉ။ ထႃႇဝရႃႉၽြႃး၊ တိုၵ်းယူင်းႁူဝ်ၸႂ်ၶုၼ်ႁေႃၶမ်းၵူၼ်းမဵဝ်း မေႇတိ၊ ၸိူဝ်းၼၼ်ႉယဝ်ႉ။ မၼ်းၸဝ်ႈမီးတၢင်းၵျၢမ်ႇတၢင်းပွင်ဢၼ်ၶတ်းၵၼ်တင်းဝဵင်း ပႃႇပုလုၼ်ႇ၊ ႁႂ်ႈလႆႈယႃႉၽဵဝ်ႈမၼ်းပႅတ်ႈဢေႃႈ။ လွင်ႈမၼ်းၸမ်ႉ၊ပဵၼ်တၢင်းဢၼ် ထႃႇဝရႃႉၽြႃး၊ ႁႂ်ႈတၢင်းၸႂ်မႆႈၶႂ်ႈၸႃႉမၼ်းၸဝ်ႈပျေႇယဵၼ်၊ဢိၵ်ႇတင်းတၢင်းဢၼ်တွပ်ႇတႅၼ်းပၼ်တၢမ်ႇၸွမ်းၼင်ႇဢပျတ်ႈဢၼ်ယႃႉၵျွင်းပိၵ်ႈမၢၼ်ႇၸဝ်ႈပႅတ်ႈၼၼ်ႉဢေႃႈ။-
ဢွၼ်ၵၼ်ပၼ်ဢၶျၢၵ်ႈပုၼ်ႈတၵ်းတိုၵ်းတေႃးၵိူၼ်ႇယႃႉလမ်းဝဵင်း ပႃႇပုလုၼ်ႇ၊ တႃႉ။ ဢွၼ်ၵၼ်ႁႂ်ႈမီးၵူၼ်းဢၼ်ႁႂ်ႈပႂ်ႉၼမ်ၼမ်လႄႈဝႆႉၵူၼ်းဢၼ်လွမ်ပႂ်ႉတူၺ်းသဵၼ်ႈတၢင်းတင်းလၢႆတႃႉ။ ဢွၼ်ၵၼ်ႁႅၼ်းတပ်ႉသိုၵ်းမူၵ်းတင်းလၢႆတႃႉ။ ထႃႇဝရႃႉၽြႃး၊ ၵျၢမ်ႇပွင်လႄႈႁဵတ်းၵႃႈဢၼ်မၼ်းၸဝ်ႈဢၢင်ႈတၵ်းႁဵတ်းတီႈဝဵင်း ပႃႇပုလုၼ်ႇ၊ ၼၼ်ႉဢေႃႈ။-
မႂ်းဢၼ်ယူႇၵႃႈတီႈႁိမ်းၼမ်ႉႁွင်ႈဢၼ်ၼမ်ၼႃႇလႄႈၸေးၸိမ်ႇယႂ်ႇၼႃႇၼႆႉ႟။ ၶိင်ႇမိူဝ်ႈဢၼ်ပဵၼ်တီႈသုတ်းတီႈၵွႆမႂ်းဢၼ်ဝႃႈ၊ၸူဝ်ႈတႃႇဢသၢၵ်ႈမႂ်းၼၼ်ႉလႆႈၶၢမ်ႇတၢင်းဢၼ်တႅပ်းပႅတ်ႈယဝ်ႉ။-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ဢဝ်တူဝ်ၸဝ်ႈၵဝ်ႇတိူင်ႇၵၢဝ်ႇဝႆႉၵတိလႄႈဝႃႈၸမ်ႉ၊ “ၵဝ်တၵ်းႁႂ်ႈမႂ်းတဵမ်ဝႆႉတင်းၵူၼ်းသိုၵ်းၼမ်ၼႃႇမိူၼ်ၸိူဝ်ႉၼင်ႇဢၼ်ႁႂ်ႈတဵမ်ဝႆႉတင်းၸၵ်းတႅၼ်ၼၼ်ႉလႄႈၶဝ်တၵ်းၵိဝ်သဵင်ပၢဝ်ႇသေႃႇယူႇလႄႈၶတ်းတႃႉၵၼ်တင်းမႂ်းဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈဢဝ်တၼ်းၶူဝ်းမၼ်းၸဝ်ႈ သေလႄႈႁဵတ်းပဵၼ်လိၼ်မိူင်းယဝ်ႉ။ မၼ်းၸဝ်ႈဢဝ်ပိင်ႇၺႃႇၸဝ်ႈတႄႇႁဵတ်း ၵမ်ႇၽႃႇလေႃးၵႃႉယဝ်ႉ။ မၼ်းၸဝ်ႈဢဝ်ၺၢၼ်ႇပိင်ႇၺႃႇၸဝ်ႈ ၶဵင်ႈမုင်းၽႃႉၵၢင်ႁၢဝ်ယဝ်ႉ။
ယၢမ်းမိူဝ်ႈဢၼ်မၼ်းၸဝ်ႈပွႆႇသဵင်မၼ်းၸဝ်ႈ ၼၼ်ႉၸိုင်၊ ၼမ်ႉတင်းလၢႆဢၼ်မီးၵႃႈၼိူဝ်ၽႃႉၵၢင်ႁၢဝ် ၼၼ်ႉႁုၼ်ႈမေႃးမႃးၼႃႇလူင်လၢင်လႄႈ မၼ်းၸဝ်ႈႁႂ်ႈၽႃႈၽူၼ်လုၵ်ႉသေၵႃႈတီႈႁိမ်း လႅၼ်သုတ်းလိၼ်မိူင်းၶိုၼ်ႈမႃးဢေႃႈ။ မၼ်းၸဝ်ႈႁဵတ်းၽႃႉမႅပ်ႈပုၼ်ႈတႃႇ ၽူၼ်တၵ်းတူၵ်းဢေႃႈ။ လူမ်းၵေႃႈမၼ်းၸဝ်ႈဢဝ်ဢွၵ်ႇသေၵႃႈၼႂ်း တိူၵ်ႈၽၼ်ႇတႃႇမၼ်းၸဝ်ႈမႃးဢေႃႈ။
ၵူၼ်းၵူႈၵေႃႉၵူႈၵူၼ်းၸိုင်၊မီးၸႂ်သၽေႃး ဢၼ်ၼိုၵ်းတၼ်ၼႃႇလႄႈဢမ်ႇမီး ၺၢၼ်ႇပိင်ႇၺႃႇလႃးလႃး။ ၸၢင်ႈၶမ်းၵူႈၵေႃႉၵူႈၵူၼ်းမီးတၢင်းဢၼ် ဢူၵ်းဢၼ်ဢၢႆၵွပ်ႈပိူဝ်ႈႁုၼ်ႇႁၢင်ႈသၢင်းထု ဢၼ်တူဝ်ၸဝ်ႈၵဝ်ႇႁဵတ်းၼၼ်ႉယူႇဢေႃႈ။ လွင်ႈမၼ်းၸမ်ႉ၊ႁုၼ်ႇႁၢင်ႈသၢင်းထုၶဝ်ၼၼ်ႉ ပဵၼ်ဢၼ်ဢမ်ႇမၢၼ်ႇမႅၼ်ႈလႄႈ ဢမ်ႇမီးတၢင်းဢၼ်ထူၺ်ႈၸႂ်ၶဝ်ႈ ထူၺ်ႈၸႂ်ဢွၵ်ႇ။
ဢၼ်ၸိူဝ်းၼၼ်ႉပဵၼ်ဢၼ်လၢႆလၢႆ ဢမ်ႇပွင်ႇလွင်ႈၵႃႈသင်ဢေႃႈ။ ပဵၼ်ၶိူင်ႈပိူင်ဢၼ်ၸၢင်ႈပႅတ်ႉၸၢင်ႈလႅၼ် ၵူၺ်းၵူၺ်းဢေႃႈ။ မိူဝ်ႈထိုင်ၶိင်ႇဢၼ်ပၼ်တၢမ်ႇဢပျတ်ႈၼၼ်ႉ ၶဝ်တၵ်းလုလႅဝ်ႁၢႆလၢႆၵႂႃႇဢေႃႈ။
ပုၼ်ႈတႃႇၽြႃးပဵၼ်ၸဝ်ႈၵူၼ်းမဵဝ်း ယႃႇၵုပ်ႈ၊ ၸမ်ႉ၊ဢမ်ႇမိူၼ်ၵၼ်တင်းၶိူင်ႈပိူင်ၸိူဝ်းၼၼ်ႉ၊ လွင်ႈမၼ်းၸမ်ႉ၊မၼ်းၸဝ်ႈပဵၼ်ၸဝ်ႈဢၼ် ႁဵတ်းပဵၼ်လွင်ႈတၢင်းၵူႈၸိူဝ်ႉၵူႈပိူင်ဢေႃႈ။ မဵဝ်း ဢိသရေး၊ ပဵၼ်ၵူၼ်းမဵဝ်းဢၼ်မၼ်းၸဝ်ႈလိူၵ်ႈၵဵပ်းႁႂ်ႈလႆႈၶၢမ်ႇဢဝ်ဢမူၺ်ႇမၼ်းၸဝ်ႈဢေႃႈ။ ၼႃႇမႃႉၸိုဝ်ႈသဵင်မၼ်းၸဝ်ႈၼၼ်ႉႁွင်ႉဝႃႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉ တၼ်းၶူဝ်း၊ ဢေႃႈ။
ထႃႇဝရႃႉၽြႃး၊ လၢတ်ႈလႄႈဝႃႈ၊ “ဝဵင်း ပႃႇပုလုၼ်ႇ၊ ႟။ မႂ်းၼႆႉပဵၼ်ၶွၼ်ႉတွၵ်ႇ လူင်လႄႈပဵၼ်လၢၵ်ႈၼၢၵ်ႈပုၼ်ႈဢၼ် ၵဝ်တၵ်းဢဝ်တိုၵ်းသိုၵ်းဢေႃႈ။ ၵဝ်ယိပ်းၵမ်မႂ်းသေလႄႈႁၵ်းႁိၵ်းၵူၼ်း ၵူႈၸိူဝ်ႉၵူႈမဵဝ်း၊ ဢိၵ်ႇတင်းယႃႉၽဵဝ်ႈသိုင်ႇၸိုင်ႈဝၢၼ်းမိူင်း တင်းသဵင်ႈတင်းလူင်ပႅတ်ႈယဝ်ႉ။
ၵဝ်ယိပ်းၵမ်ဢဝ်မႂ်းသေလႄႈႁၵ်းႁိၵ်းမႃႉ၊ဢိၵ်ႇတင်းၵူၼ်းသိုၵ်းၶီႇမႃႉတင်းလၢႆပႅတ်ႈယဝ်ႉ။ ၵဝ်ယိပ်းၵမ်ဢဝ်မႂ်းသေလႄႈႁၵ်းႁိၵ်း လေႃႉရထႃးဢိၵ်ႇတင်း ၵူၼ်းသိုၵ်းၶီႇလေႃႉရထႃးတင်းလၢႆပႅတ်ႈယဝ်ႉ။
ၵဝ်ယိပ်းၵမ်ဢဝ်မႂ်းသေလႄႈႁၵ်းႁိၵ်းၵူၼ်းၸၢႆး၊ဢိၵ်ႇတင်းၵူၼ်းယိင်းပႅတ်ႈယဝ်ႉ။ ၵဝ်ယိပ်းၵမ်ဢဝ်မႂ်းသေလႄႈႁၵ်းႁိၵ်းၵေႃႉဢၼ်ဢသၢၵ်ႈယႂ်ႇ၊ဢိၵ်ႇတင်းၵေႃႉဢၼ် ဢသၢၵ်ႈလဵၵ်ႉၼၼ်ႉပႅတ်ႈယဝ်ႉ။ ၵဝ်ယိပ်းၵမ်ဢဝ်မႂ်းသေလႄႈႁၵ်းႁိၵ်းၵူၼ်းၸၢႆးဢွၼ်ႇ၊ဢိၵ်ႇတင်းၵူၼ်းယိင်းဢွၼ်ႇပႅတ်ႈယဝ်ႉ။
ၵဝ်ယိပ်းဢဝ်မႂ်းသေလႄႈႁၵ်းႁိၵ်းၵေႃႉဢၼ် လဵင်ႉသူဝ်းထိင်းသူဝ်း၊ဢိၵ်ႇတင်းၽုင်သူဝ်း မၼ်းပႅတ်ႈယဝ်ႉ။ ၵဝ်ယိပ်းၵမ်ဢဝ်မႂ်းသေလႄႈႁၵ်းႁိၵ်းၵေႃႉဢၼ်ႁဵတ်းၼႃး၊ဢိၵ်ႇတင်းဝူဝ်းၵူႈမၼ်းပႅတ်ႈယဝ်ႉ။ ၵဝ်ယိပ်းၵမ်ဢဝ်မႂ်းသေလႄႈႁၵ်းႁိၵ်း ၶုၼ်တင်းလၢႆ၊ဢိၵ်ႇတင်းမူးမၢတ်ႈၽွင်းမိူင်း တင်းလၢႆပႅတ်ႈယဝ်ႉ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵဝ်တၵ်းတွပ်ႇတႅၼ်းတီႈဝဵင်း ပႃႇပုလုၼ်ႇ၊ ဢိၵ်ႇတင်းၵူၼ်းမိူင်း ၶႃႇလတေး၊ တင်းသဵင်ႈတင်းလူင်ၸွမ်းၵႃႈၼင်ႇဢၼ်တုၸရိူၵ်ႈၵႃႈဢၼ်ၶဝ်ႁဵတ်းတီႈဝဵင်း ၸိဢုၼ်ႇ၊ ၼၼ်ႉသိုဝ်ႈၼႃႈတႂ်ႈတႃသူဢေႃႈ၊” ဝႃႈၼင်ႇၼႆဢေႃႈ။-
ထႃႇဝရႃႉၽြႃး၊ မီးဢမိင်ႉၸမ်ႉ၊ “တူၺ်းလူး။ လွႆလူင်ဢၼ်မီးသၽေႃးဢၼ်ၸၢင်ႈယႃႉပႅတ်ႈလႄႈၸၢင်ႈယႃႉၽဵဝ်ႈလိၼ်မိူင်းတင်းသဵင်ႈတင်းမူတ်းပႅတ်ႈၼႆႉ႟။ ၵဝ်ၶတ်းတႃႉၵၼ်တင်းမႂ်းဢေႃႈ။ ၵဝ်တၵ်းယဵတ်ႇမိုဝ်းယိုၼ်းမိုဝ်းၵဝ်ၵႃႈၼိူဝ်မႂ်းသေလႄႈ ဢဝ်မႂ်းၵိင်ႈတူၵ်းသေၵႃႈၼိူဝ်မၢၵ်ႇႁိၼ်မၢၵ်ႇၽႃၸိူဝ်းၼၼ်ႉဢေႃႈ။ ၵဝ်တၵ်းႁႂ်ႈမႂ်းပဵၼ်လွႆဢၼ်မႆႈႁႂ်ႈသဵင်ႈသုတ်းဢေႃႈ။-
ၶဝ်ဢမ်ႇလႆႈထွၼ်ဢဝ်မၢၵ်ႇႁိၼ်ႁူဝ်ၸႅင်ႈတိူၵ်ႈဢမ်ႇၼၼ်မၢၵ်ႇႁိၼ်ငဝ်ႈႁၢၵ်ႈတိူၵ်ႈသေၸိူဝ်ႉသေဢၼ်ၵႃႈတီႈမႂ်း။ မႂ်းတၵ်းလႆႈလုလႅဝ်ယူႇသေႇသေႇဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ဢွၼ်ၵၼ်ပူၵ်းတုင်းၵႃႈၼႂ်းမိူင်းၼၼ်ႉတႃႉ။ ဢွၼ်ၵၼ်ပဝ်ႇၼႄးၶရႃႇၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းလႄႈမႄႈႁႅၼ်းၵူၼ်းၵူႈၸိူဝ်ႉၵူႈမဵဝ်းပုၼ်ႈတၵ်းၶတ်းတႃႉၵၼ်တင်းမၼ်းတႃႉ။ ဢွၼ်ၵၼ်ႁႂ်ႈၵူၼ်းမိူင်း ဢႃႇရရတ်ႉ၊ မိူင်း မိၼ်ႇၼိ၊ မိူင်း ဢႃႇသၵေႇၼတ်ႉ၊ ၸိူဝ်းၼၼ်ႉၸုၵၼ်တုမ်ၵၼ်လႄႈၶတ်းတႃႉၵၼ်တင်းမၼ်းၼၼ်ႉတႃႉ။ ဢွၼ်ၵၼ်ၶၢၼ်းၶုၼ်သိုၵ်းႁၢၼ်လူင်ဝႆႉၶတ်းတႃႉၵၼ်တင်းမၼ်းလႄႈႁႂ်ႈႁူဝ်ႁၢၼ်ၵူၼ်းသိုၵ်းၶီႇမႃႉတင်းလၢႆၶီႇသိုၵ်းမႃးမိူၼ်ၸိူဝ်ႉၼင်ႇၽုင်ၸၵ်းတႅၼ်လူင်ၸိူဝ်းၼၼ်ႉတႃႉ။-
ဢွၼ်ၵၼ်မႄးႁႅၼ်းမဵဝ်းၵူၼ်းတင်းလၢႆ၊ဢိၵ်ႇတင်းၶုၼ်ႁေႃၶမ်း မေႇတိ၊ တင်းလၢႆ၊ၶုၼ်မၼ်းတင်းလၢႆ၊မူးမၢတ်ႈၽွင်းမိူင်းမၼ်းတင်းလၢႆ၊ၵူၼ်းသိုင်ႇၵူၼ်းမိူင်းမၼ်းတင်းသဵင်ႈတင်းလူင်ၶတ်းတႃႉၵၼ်တင်းမၼ်းလႄႈႁဵတ်းသိုၵ်းတေႃႇမၼ်းတႃႉ။-
ဝဵင်းၼၼ်ႉတၵ်းသၼ်ႇဝႆလႄႈၸဵပ်းသႅပ်ႇဢေႃႈ။ လွင်ႈတၢင်းၵျၢမ်ႇတၢင်းပွင်ၵႃႈဢၼ် ထႃႇဝရႃႉၽြႃး၊ ၵျၢမ်ႇပွင်ႁႂ်ႈလႆႈၶတ်းတႃႉၵၼ်တင်းမိူင်း ပႃႇပုလုၼ်ႇ၊ ၼၼ်ႉတၵ်းလႆႈပျေႉၸုမ်ႇလႄႈႁႂ်ႈမိူင်း ပႃႇပုလုၼ်ႇ၊ လႆႈပဵၼ်တီႈဢၼ်ပဝ်ႇဢၼ်လၢပ်ႈ၊တီႈဢၼ်ဢမ်ႇမီးၵူၼ်းယူႇသဝ်းၼၼ်ႉဢေႃႈ။-
ႁူဝ်ႁၢၼ်ၵူၼ်းသိုၵ်းမိူင်း ပႃႇပုလုၼ်ႇ၊ ၸိူဝ်းၼၼ်ႉၵိုတ်းသဝ်းသေတၢင်းဢၼ်တိုၵ်းသိုၵ်းလႄႈဢွၼ်ၵၼ်ယူႇၵႃႈတီႈတိူၵ်ႈဢၼ်တိုၵ်းသိုၵ်းၶဝ်ဢေႃႈ။ ႁႅင်းၶဝ်ဢူၼ်ႈၵႂႃႇယွမ်းၵႂႃႇလႄႈၶဝ်ပဵၼ်ၸိူဝ်ႉၼင်ႇမႄႈယိင်းၵႂႃႇဢေႃႈ။ ႁိူၼ်းတီႈယူႇၵူၼ်းမၼ်းတင်းလၢႆလႆႈၶၢမ်ႇတၢင်းဢၼ်ဢဝ်ၽႆးတုတ်ႇပႅတ်ႈလႄႈၵိူၼ်ႇၽၵ်းတူမၼ်းတင်းလၢႆလႆႈၶၢမ်ႇတၢင်းဢၼ်ႁၵ်းႁိၵ်းပႅတ်ႈဢေႃႈ။-
ၵူၼ်းဢွၼ်ႇဢၼ်သူင်ႇၶၢဝ်ႇၵေႃႉၼိုင်ႈလႄႈၵေႃႉၼိုင်ႈႁူပ်ႉထူပ်းၵၼ်ယူႇ၊သၢၼ်ႇတမၢၼ်ႇၵေႃႉၼိုင်ႈလႄႈၵေႃႉၼိုင်ႈႁူပ်ႉထူပ်းၵၼ်ယူႇသေလႄႈဢွၼ်ၵၼ်ၶုၼ်ႇလႅၼ်ႈႁႂ်ႈလႆႈလဝ်ႈလၢတ်ႈတီႈၶုၼ်ႁေႃၶမ်းမိူင်း ပႃႇပုလုၼ်ႇ၊ လူၺ်ႈလွင်ႈဢၼ်ရၢၼ်ႇသူႇတိုၵ်းတေႃးသိမ်းဢဝ်ဝဵင်းၸဝ်ႈၵူႈတီႈၵူႈလႅၼ်ယဝ်ႉ။-
တႃႈၶၢမ်ႈၼမ်ႉၵေႃႈၶၢမ်ႇတၢင်းဢၼ်သိမ်းဢဝ်ယဝ်ႉ။ တူၼ်ႈၶႅမ်ၵႃႈတီႈႁိမ်းၼမ်ႉႁိမ်းၼွင်ၵေႃႈ၊ၶၢမ်ႇတၢင်းဢၼ်ၽႆးမႆႈပႅတ်ႈယဝ်ႉ။ ႁူဝ်ႁၢၼ်ၵူၼ်းသိုၵ်းတင်းလၢႆမီးတၢင်းဢၼ်တူၵ်းၸႂ်ၵူဝ်ႁႄယူႇဢေႃႈ။-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးၵူၼ်းမဵဝ်း ဢိသရေး၊ မီးဢမိင်ႉၸမ်ႉ၊ “လုၵ်ႈယိင်းမိူင်း ပႃႇပုလုၼ်ႇ၊ ၼၼ်ႉပဵၼ်မိူၼ်ၸိူဝ်ႉၼင်ႇတလၢင်းယဵပ်ႇၶဝ်ႈၼႂ်းၶိင်ႇမိူဝ်ႈဢၼ်မၼ်းလႆႈၶၢမ်ႇတၢင်းဢၼ်ယဵပ်ႇၼၼ်ႉဢေႃႈ။ ထႅင်ႈၵႅပ်ႉၼိုင်ႈၵမ်းဢွၼ်ႇၼိုင်ႈၶိင်ႇပၢတ်ႇၶဝ်ႈတၵ်းႁွတ်ႈထိုင်ယဝ်ႉဢေႃႈ၊” ဝႃႈၼင်ႇၼႆဢေႃႈ။
ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်း မိူင်း ပႃႇပုလုၼ်ႇ၊ ၼၼ်ႉၶူပ်းၵိၼ် ႁဝ်းလႄႈၶိုတ်ႈႁဝ်းလႅဝ်ပႅတ်ႈယဝ်ႉ။ မၼ်းႁႂ်ႈႁဝ်းပဵၼ်မေႃႈဢၼ်ပဝ်ႇလၢပ်ႈဝႆႉယဝ်ႉ။ မၼ်းဢိုၼ်ၵိၼ်ႁဝ်းမိူၼ်ၸိူဝ်ႉၼင်ႇၼၵႃး ၸၢင်ႈဢိုၼ်ၵိၼ်ၼၼ်ႉလႄႈ ဢဝ်လွင်ႈတၢင်းဢၼ်ထုၵ်ႇၸႂ်ၵျိူၵ်ႈၸႂ် ၸိူဝ်းၼၼ်ႉသတ်ႉတဵမ်ၵႃႈၼႂ်းတွင်ႉ တူဝ်မၼ်းဝႆႉယဝ်ႉလႄႈသမ်ႉၸုၼ်ႉပႅတ်ႈဢၼ် မၼ်းဢမ်ႇလူဝ်ႇၼၼ်ႉဢေႃႈ။
လုၵ်ႈယိင်းဝဵင်း ၸိဢုၼ်ႇ၊ တၵ်းလၢတ်ႈလႄႈဝႃႈ၊ “ႁႂ်ႈဢမုဢထမ်ႇမႃႉဢၼ်ႁဵတ်းတီႈတူဝ်ၶိင်းၵဝ်၊ ဢိၵ်ႇတင်းတီႈၼိူဝ်ႉၵဝ်ၼင်ၵဝ်ၼၼ်ႉ၊ ႁွတ်ႈထိုင်ၵႃႈၼိူဝ်ဝဵင်း ပႃႇပုလုၼ်ႇ၊ သေၵမ်းလူၺ်ႈ၊” ဝႃႈၼင်ႇၼႆဢေႃႈ။ ဝဵင်း ယေႇရုသလႅမ်ႇ၊ ၵေႃႈတၵ်းလၢတ်ႈလႄႈဝႃႈ၊ “ႁႂ်ႈလိူတ်ႈၵဝ်ႁွတ်ႈထိုင်ၵႃႈၼိူဝ်ၵူၼ်းမိူင်း ၶႃႇလတေး၊ တင်းလၢႆသေၵမ်းလူၺ်ႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵဝ်တၵ်းၵႄႈလိတ်ႈပၼ်ဢမုမႂ်းလႄႈတွပ်ႇတႅၼ်းၶိုၼ်းတၢင်းဢၼ်ရၢၼ်ႇသူႇႁဵတ်းတီႈမႂ်းၼၼ်ႉဢေႃႈ။ ၵဝ်တၵ်းႁႂ်ႈပၢင်ႇလၢႆႇမၼ်းႁႅင်ႈယူတ်းၵႂႃႇလႄႈႁႂ်ႈၼမ်ႉဢွၵ်ႇႁူးမၼ်းႁႅင်ႈႁွင်ၵႂႃႇဢေႃႈ။-
ဝဵင်း ပႃႇပုလုၼ်ႇ၊ ၼၼ်ႉတၵ်းပဵၼ်ၵွင်ၽုၼ်ႇၵွင်လိၼ်တီႈဢၼ်မႃလိၼ်ယူႇ၊တီႈဢၼ်လီၵူဝ်လီႁႄ၊တီႈဢၼ်သႄႉသွမ်း၊တီႈဢၼ်ဢမ်ႇမီးၵူၼ်းယူႇသဝ်းဢေႃႈ။-
ထႃႇဝရႃႉၽြႃး၊ မီးဢမိင်ႉၸမ်ႉ၊ၶဝ်ၼၼ်ႉတၵ်းဢွၼ်ၵၼ်ႁွင်ႉၶၢင်းမိူၼ်ၸိူဝ်ႉၼင်ႇသၢင်ႇသီႈလႄႈတၵ်းႁွင်ႉသႅၼ်ႇမိူၼ်သၢင်ႇသီႈဢွၼ်ႇဢေႃႈ။-
မိူဝ်ႈဢၼ်ၶဝ်မီးတၢင်းဢၼ်ၸႂ်ႁႅင်းယႂ်ႇၼႃႇလူင်လၢင်ၼၼ်ႉၵဝ်တၵ်းဢဝ်တၢင်းၵိၼ်တိုၵ်းပၼ်ဢွႆႇပၼ်လႄႈႁႂ်ႈၶဝ်မဝ်းလဝ်ႈမဝ်းၵမ်ယူႇ၊လွင်ႈၼင်ႇႁိုဝ်ၶဝ်တၵ်းမူၼ်ႈပျေႃႇဢေႃႈ။ ၵမ်းလိုၼ်းၶဝ်ယင်းဢမ်ႇတိုၼ်ႇလႄႈတၵ်းၼွၼ်းလပ်းယူႇသေႇသေႇဢေႃႈ။-
ၵဝ်တၵ်းတိုတ်ႉၸၼ်ဢဝ်ၶဝ်ၶျႃးတူၵ်းမိူၼ်ၸိူဝ်ႉၼင်ႇဢဝ်သူဝ်းဢွၼ်ႇ၊သူဝ်းပေႃႈ၊ပႄႉပေႃႈၸိူဝ်းၼၼ်ႉ ၵႂႃႇၸူးတီႈဢၼ်တၵ်းလႆႈၶၢမ်ႇတၢင်းဢၼ်ဢဝ်တၢႆၼၼ်ႉဢေႃႈ။
“ဝဵင်း ပႃႇပုလုၼ်ႇ၊ လႆႈၶၢမ်ႇတၢင်းဢၼ်တိုတ်ႉဢဝ်သိမ်းဢဝ်ယဝ်ႉလူင်ပႄႇ။ ဝဵင်းဢၼ်ပိူၼ်ႈယုၵ်ႉယွင်ႈ၊ယွင်ႈယေႃးၵႃႈၼိူဝ်လိၼ်မိူင်းတင်းသဵင်ႈတင်းမူတ်းၼႆႉလႆႈၶၢမ်ႇတၢင်းဢၼ်ႁိမ်ဢဝ်ႁူင်ႇဢဝ်ယဝ်ႉလူင်ပႄႇ။ ဝဵင်း ပႃႇပုလုၼ်ႇ၊ ၼၼ်ႉပဵၼ်တီႈဢၼ်တူၵ်းၸႂ်လႂ်တိုၼ်ႇၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းယဝ်ႉလူင်ပႄႇ။-
ၼမ်ႉပၢင်ႇလၢႆႇၼွင်းၶိုၼ်ႈၵႃႈၼိူဝ်ဝဵင်း ပႃႇပုလုၼ်ႇ၊ လႄႈမၼ်းလႆႈၶၢမ်ႇတၢင်းဢၼ်လႅင်းၼမ်ႉပိူပ်ႈၼမ်ႉဢၼ်ၼမ်ၼႃႇၼၼ်ႉႁူမ်ႇသုမ်ႇယဝ်ႉလူင်ပႄႇ။-
ဝဵင်းမၼ်းတင်းလၢႆပဵၼ်တီႈဢၼ်တူၵ်းၸႂ်လႂ်တိုၼ်ႇ၊လိၼ်ဢၼ်ႁႅင်ႈဢၼ်ႁွင်၊ပၢင်ႇပဵင်းဢၼ်လႆႈၶၢမ်ႇတၢင်းဢၼ်ၸုၼ်ႉပႅတ်ႈ၊မိူင်းဢၼ်ဢမ်ႇမီးၵူၼ်းသေၵေႃႉသေၵူၼ်းယူႇသဝ်းလႄႈဢမ်ႇမီးလုၵ်ႈၵူၼ်းသေၵေႃႉသေၵူၼ်းပႆတႃႈပႆတၢင်းၵၢႆၵႂႃႇၸမ်ၵႂႃႇႁိမ်းမၼ်းၼၼ်ႉယဝ်ႉ။-
ၵဝ်တၵ်းပၼ်တၢမ်ႇတီႈၽြႃး ပေႇလႃႉ၊ ၵႃႈၼႂ်းဝဵင်း ပႃႇပုလုၼ်ႇ၊ ၼၼ်ႉလႄႈၵဝ်တၵ်းသမ်ႉၶိုၼ်းႁႂ်ႈမၼ်းႁၢၵ်ႈဢွၵ်ႇမႃးလွင်ႈတၢင်းဢၼ်မၼ်းဢိုၼ်ၵိၼ်ၼၼ်ႉဢေႃႈ။ ၵမ်းလိုၼ်းၵူၼ်းၵူႈၸိူဝ်ႉၵူႈမဵဝ်းၸိူဝ်းၼၼ်ႉဢမ်ႇလႆႈၸုၵၼ်တုမ်ၵၼ်ၵႃႈတီႈမၼ်း။ “လမ်းဝဵင်းလူင်ဝဵင်း ပႃႇပုလုၼ်ႇ၊ ၵေႃႈလူမ်ႉပင်းယဝ်ႉ။
ၵူၼ်းၵဝ်တင်းလၢႆၶဝ်႟။ ဢွၼ်ၵၼ်ဢွၵ်ႇသေၵႃႈၼႂ်းမၼ်းလႄႈၵႄႇသႄႇၼုၵ်ႈဢဝ်တူဝ်ၸဝ်ႈၵဝ်ႇသေၵႃႈတီႈတၢင်းၸႂ်မႆႈၶႂ်ႈၸႃႉ ထႃႇဝရႃႉၽြႃး၊ ဢၼ်ႁႅင်းယႂ်ႇၼႃႇၼၼ်ႉႁင်းၽႂ်ႁင်းမၼ်းတႃႉ။-
ယႃႇပေဢွၼ်ၵၼ်မီးတၢင်းဢၼ်ၸႂ်လု။ ယႃႇပေၵူဝ်ပေႁႄၵွပ်ႈပိူဝ်ႈသတၢင်းသဵင်ၶၢဝ်ႇဢၼ်လႆႈငိၼ်းၵႃႈၼႂ်းမိူင်းၼၼ်ႉၼၼ်ႉ။ ပီၼိုင်ႈတၵ်းလႆႈငိၼ်းသတၢင်းသဵင်ၶၢဝ်ႇဢၼ်ဢမ်ႇလီဢမ်ႇငၢမ်းဢၼ်ၼိုင်ႈလႄႈပီၼႃႈၵေႃႈတၵ်းလႆႈငိၼ်းထႅင်ႈဢၼ်ၼိုင်ႈဢေႃႈ။ တၵ်းလႆႈမီးတၢင်းဢၼ်ၼိၵ်ႈၸၢၵ်ႈငႅၼ်းသႄးၵႃႈတီႈမိူင်းၼၼ်ႉလႄႈၶုၼ်ၼင်ႇၵၼ်ၵၼ်ၵေႃႉၼိုင်ႈလႄႈၵေႃႉၼိုင်ႈတၵ်းမီးတၢင်းဢၼ်ၶတ်းၶႅင်ႇၵၼ်ဢေႃႈ။-
ပိူဝ်ႈၼႆလႄႈၶိင်ႇၵႃႇလႃႉမိုဝ်ႉဝၼ်းဢၼ်ၵဝ်တၵ်းပၼ်တၢမ်ႇတီႈႁုၼ်ႇႁၢင်ႈသၢင်းထုဢၼ်တွင်ႈႁဵတ်းၶႅၵ်းႁဵတ်းၵႃႈတီႈဝဵင်း ပႃႇပုလုၼ်ႇ၊ တၵ်းႁွတ်ႈထိုင်လႄႈမိူင်းတင်းမိူင်းတၵ်းလႆႈဢူၵ်းဢၢႆဢေႃႈ။ ၵူၼ်းမိူင်းမၼ်းသဵင်ႈတင်းမူတ်းတၵ်းလႆႈၶၢမ်ႇတၢင်းဢၼ်ဢဝ်တၢႆဢေႃႈ။-
မိူဝ်ႈၼၼ်ႉၽႃႉၵၢင်ႁၢဝ်ဢိၵ်ႇတင်းလိၼ်မိူင်းဢိၵ်ႇတင်းၵႃႈဢၼ်မီးၵႃႈၼႂ်းမၼ်းၼၼ်ႉတၵ်းဢွၼ်ၵၼ်ႁဵတ်းသဵင်ဢၼ်သႂၢင်ႇဢၼ်သိူဝ်းလူၺ်ႈလွင်ႈဝဵင်း ပႃႇပုလုၼ်ႇ၊ ဢေႃႈ။ လွင်ႈမၼ်းၸမ်ႉ၊ၶဝ်ၸိူဝ်းဢၼ်တိုၵ်းတေႃးယႃႉပႅတ်ႈၼၼ်ႉတၵ်းလုၵ်ႉသေၵႃႈတီႈၼႃႈတၢင်းႁွင်ႇမႃးဢေႃႈ၊ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။-
ဝဵင်း ပႃႇပုလုၼ်ႇ၊ တၵ်းလူမ်ႉတူၵ်းဢေႃႈ။ လွင်ႈမၼ်းၸမ်ႉ၊ၶဝ်ဢဝ်ၵူၼ်းမဵဝ်း ဢိသရေး၊ လူမ်ႉတၢႆၼမ်ၼႃႇယဝ်ႉ။ ၵူၼ်းဝဵင်း ပႃႇပုလုၼ်ႇ၊ တင်းလၢႆတၵ်းလူမ်ႉတၢႆဢေႃႈ။ လွင်ႈမၼ်းၸမ်ႉ၊ၶဝ်ဢဝ်ၵူၼ်းၵူႈဝၢၼ်ႈၵူႈမိူင်းလူမ်ႉတၢႆယဝ်ႉ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
သူၸိူဝ်းဢၼ်ၵၢင်းလွတ်ႈတင်းၽေးလၢပ်ႇၽေးလႅဝ်းၶဝ်႟။ ဢွၼ်ၵၼ်ၵႂႃႇတႃႉ။ ယႃႇပေဢွၼ်ၵၼ်ၵိုတ်းသဝ်းယူႇ။ ၶုၵ်းၸႂ်လႆႈၶႆႈၸႂ်ထူပ်း ထႃႇဝရႃႉၽြႃး၊ ၼႂ်းတီႈမိူင်းၵႆၼၼ်ႉလႄႈလွင်ႈဝဵင်း ယေႇရုသလႅမ်ႇ၊ ၵေႃႈမၢတ်ႈတွင်းဝႆႉၼႂ်းၸႂ်တႃႉ။-
ႁဝ်းဢွၼ်ၵၼ်ဢူၵ်းဢၢႆယူႇၵွပ်ႈပိူဝ်ႈဢၼ်ႁဝ်းငိၼ်းသဵင်ဢၼ်သႄႉသွမ်းၼၼ်ႉလႄႈၼႃႈႁဝ်းလုယူႇဢေႃႈ။ ၵူၼ်းတၢင်ႇၸိူဝ်ႉတၢင်ႇမဵဝ်းတင်းလၢႆ ဢွၼ်ၵၼ်ၶဝ်ႈၵႃႈၼႂ်းထႃႇၼႃႉတီႈဢၼ်မူတ်းၸၢင်ႇၸဝ်ႈၵႃႈၼႂ်းႁိူၼ်း ထႃႇဝရႃႉၽြႃး၊ ယဝ်ႉယဝ်ႉ။-
ပိူဝ်ႈၼႆလႄႈ ထႃႇဝရႃႉၽြႃး၊ မီးဢမိင်ႉၸမ်ႉ၊ “ၶိင်ႇၵႃႇလႃႉမိုဝ်ႉဝၼ်းဢၼ်ၵဝ်တၵ်းပၼ်တၢမ်ႇတီႈႁုၼ်ႇႁၢင်ႈသၢင်းထုမိူင်း ပႃႇပုလုၼ်ႇ၊ တၵ်းႁွတ်ႈထိုင်လႄႈၶိင်ႇၵႃႇလႃႉၶဝ်ၸိူဝ်းဢၼ်ၶၢင်းၶီၶၢင်းၽၢၼ်လူၺ်ႈတၢင်းဢၼ်တိူဝ်ႉဢၼ်မၢတ်ႇၼၼ်ႉတၵ်းႁွတ်ႈထိုင်ဢေႃႈ။-
ပိၵ်ႉသမ်ႉ၊ဝဵင်း ပႃႇပုလုၼ်ႇ၊ ၶိုၼ်ႈၵႂႃႇယူႇၵႃႈၼိူဝ်ၽႃႉၵၢင်ႁၢဝ်လႄႈတႄႇႁဵတ်းၸိၵ်းၸွမ်လမ်းဝဵင်းဢၼ်မၼ်ႈဢၼ်ၶိူင်ႇဝႆႉသေၵေႃႈ၊ၶဝ်ၸိူဝ်းဢၼ်ၵဝ်ပွႆႇၸႂ်ႉလႄႈတိုၵ်းတေႃးယႃႉပႅတ်ႈၼၼ်ႉတၵ်းဢွၼ်ၵၼ်ႁွတ်ႈထိုင်ၵႃႈတီႈမၼ်းဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ထွမ်ႇငိၼ်းသဵင်ဢၼ်ႁွင်ႉႁႆႈၵႃႈတီႈ ဝဵင်း ပႃႇပုလုၼ်ႇ၊ ဢိၵ်ႇတင်း သဵင်တၢင်းဢၼ်လုလႅဝ်ဢၼ်ႁႅင်းယႂ်ႇၼႃႇ ၵႃႈတီႈမိူင်း ၶႃႇလတေး၊ တႃႉ။
လွင်ႈမၼ်းၸမ်ႉ၊ ထႃႇဝရႃႉၽြႃး၊ ယႃႉၽဵဝ်ႈ ဝဵင်း ပႃႇပုလုၼ်ႇ၊ ပႅတ်ႈလႄႈ ႁႂ်ႈသဵင်ဢၼ်လင်မေႃးႁႅင်းၼႃႇၼၼ်ႉ ထၢတ်ႇယဵၼ်ဢေႃႈ။ လႅင်းၼမ်ႉပိူပ်ႈၼမ်ႉမၼ်းၸိူဝ်းၼၼ်ႉမေႃးယူႇ ႁိူင်းႁိူင်းမိူၼ်ၸိူဝ်ႉၼင်ႇၼမ်ႉဢၼ်ႁႅင်းယႂ်ႇၼႃႇ ၼၼ်ႉလႄႈၸၢင်ႈႁဵတ်းသဵင်ဢၼ် ယႂ်ႇဢၼ်လူင်ဢေႃႈ။
ၵေႃႉဢၼ်တိုၵ်းတေႃးယႃႉပႅတ်ႈၼၼ်ႉ ႁွတ်ႈထိုင်ၵႃႈတီႈမၼ်းဢၼ်ဝႃႈ၊ဝဵင်း ပႃႇပုလုၼ်ႇ၊ ၼၼ်ႉဢေႃႈ။ ႁူဝ်ႁၢၼ်ၵူၼ်းသိုၵ်းမၼ်းၸိူဝ်းၼၼ်ႉလႆႈၶၢမ်ႇတၢင်းဢၼ်ရၢၼ်ႇသူႇတိၺွပ်းလႆႈဢေႃႈ။ ၵၢင်ႇဢၼ်ၶဝ်ယိပ်းၵမ်ဢဝ်ၸိူဝ်းၼၼ်ႉၵေႃႈလႆႈၶၢမ်ႇတၢင်းဢၼ်ႁၵ်းႁိၵ်းပႅတ်ႈဢေႃႈ။ ထႃႇဝရႃႉၽြႃး၊ ပဵၼ်ၽြႃးဢၼ်ၸၢင်ႈပၼ် ဢၵျူဝ်းဢပျတ်ႈလႄႈ မၼ်းၸဝ်ႈတၵ်းတွပ်ႇတႅၼ်းပၼ်ဢမၢၼ်ႇ ၶၼ်ပဵၼ်ဢေႃႈ။
“ၵဝ်တၵ်းႁႂ်ႈၶုၼ်မၼ်း၊မူးမၢတ်ႈၽွင်းမိူင်းမၼ်း၊ၵူၼ်းမၼ်းၸိူဝ်းဢၼ်မီးပိင်ႇၺႃႇ၊ၶုၼ်မၼ်း ၸိူဝ်းဢၼ်မီးဢႃႇၼႃႇလႂ်၊ ၶုၼ်သိုၵ်းႁူဝ်ႁၢၼ်လူင်မၼ်း၊ၵူၼ်းမၼ်းဢၼ်ႁႅင်းယႂ်ႇၼႃႇၸိူဝ်းၼၼ်ႉမဝ်းလဝ်ႈမဝ်းၵမ်လႄႈ ၵမ်းလိုၼ်းၶဝ်ၼၼ်ႉယင်းဢမ်ႇတိုၼ်ႇလႄႈၼွၼ်းလပ်းယူႇသေႇသေႇဢေႃႈ၊” ဝႃႈၼင်ႇၼႆလႄႈ ၶုၼ်ႁေႃၶမ်းဢၼ်မီးၼႃႇမႃႉၸိုဝ်ႈသဵင်ဢၼ်ဝႃႈ၊ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ဝႃႈၼင်ႇၼႆၼၼ်ႉမီးဢမိင်ႉဢေႃႈ။
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ “လမ်းဝဵင်းလူင် ပႃႇပုလုၼ်ႇ၊ ဢၼ်ယႂ်ႇၼႃႇ ဢၼ်ၼႃၼႃႇၸိူဝ်းၼၼ်ႉ၊ တၵ်းလႆႈၶၢမ်ႇတၢင်းဢၼ်ၵိူၼ်ႇယႃႉပႅတ်ႈ မူတ်းမူတ်းသဵင်ႈသဵင်ႈဢေႃႈ။ ၽၵ်းတူမၼ်းဢၼ်သုင်ၼႃႇၸိူဝ်းၼၼ်ႉ တၵ်းလႆႈၶၢမ်ႇတၢင်းဢၼ်ဢဝ်ၽႆး တုတ်ႇပႅတ်ႈဢေႃႈ။ မဵဝ်းၵူၼ်းတင်းလၢႆဢွၼ်ၵၼ်သၢင်ႈႁဵတ်း မဵဝ်းဢၼ်လၢႆလၢႆလွၵ်ႇလွၵ်ႇဢမ်ႇပွင်ႇလွင်ႈ ၵႃႈသင်ၼၼ်ႉဢေႃႈ။ ၵူၼ်းၵူႈၸိူဝ်ႉၵူႈမဵဝ်းဢွၼ်ၵၼ်သၢင်ႈႁဵတ်း ပုၼ်ႈဢၼ်ၽႆးတၵ်းမႆႈၼၼ်ႉလႄႈၶဝ်တၵ်း လႆႈမီးတၢင်းဢၼ်ႁိူဝ်ႉၸႂ်ၼုၼ်းၸႂ်ဢေႃႈ၊” ဝႃႈၼင်ႇၼႆဢေႃႈ။
ဢၼ်ၼႆႉပဵၼ်ၵႂၢမ်းဢၼ်ပရေႃးၽႅတ်ႈ ယေႇရမိ၊ သင်ႇလၢတ်ႈဝႆႉတီႈ ၸရႃႇယႃႉ၊ လုၵ်ႈၸၢႆး ၼေႇရိ၊ ဢၼ်ပဵၼ်လၢၼ်ၸၢႆး မႃႇသေႇယႃႉ၊ ၼႂ်းမိူဝ်ႈဢၼ်မၼ်းၸွမ်းလူၺ်ႈၵၼ်တင်း ၸေႇတၵိ၊ ၶုၼ်ႁေႃၶမ်းမိူင်း ယုတႃႉ၊ ၵႂႃႇၵႃႈတီႈဝဵင်း ပႃႇပုလုၼ်ႇ၊ ၼႂ်းပီဢၼ် ၸေႇတၵိ၊ ၸၢမ်ႇႁၢင်ႈၸၢမ်ႇႁေႃလႆႈသီႇပီၼၼ်ႉဢေႃႈ။ ၸရႃႇယႃႉ၊ ၸမ်ႉ၊ပဵၼ်ဢတႂၢင်းဝုၼ်ႇလူင်ဢေႃႈ။-
ယေႇရမိ၊ ဢဝ်လွင်ႈၽေးဢုပၢတ်ႈၵႃႈဢၼ်တၵ်းႁွတ်ႈထိုင်ၵႃႈၼိူဝ်ဝဵင်း ပႃႇပုလုၼ်ႇ၊ ၼၼ်ႉတႅမ်ႈမၢႆဝႆႉၵႃႈၼႂ်းၵဵၼ်လိၵ်ႈလႄႈပဵၼ်လွင်ႈဢၼ်ၸၢပ်ႈသႅင်ႇၵၼ်တင်းဝဵင်း ပႃႇပုလုၼ်ႇ၊ ဢေႃႈ။-
ယေႇရမိ၊ လၢတ်ႈတီႈ ၸရႃႇယႃႉ လႄႈဝႃႈ၊ “မိူဝ်ႈဢၼ်မႂ်းႁွတ်ႈထိုင်ၵႃႈတီႈဝဵင်း ပႃႇပုလုၼ်ႇ၊ ၼၼ်ႉၸိုင်၊မႂ်းတၵ်းလႆႈလူတူၺ်းလႄႈႁေႃးလိၵ်ႈၵႂၢမ်းၵႃႈမီးၼႆႉဢေႃႈ။-
မိူဝ်ႈၼၼ်ႉမႂ်းတၵ်းလႆႈလဝ်ႈလၢတ်ႈလႄႈဝႃႈ၊ ‘ ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းမီးဢမိင်ႉလူၺ်ႈလွင်ႈဢၼ်ၸဝ်ႈႁဝ်းတၵ်းပႄႇၽဵဝ်ႈယႃႉပႅတ်ႈတီႈၼႆႈလႄႈႁႂ်ႈပဵၼ်တီႈဢၼ်ဢမ်ႇမီးၽူႈလႂ်ယူႇသဝ်း။ ဢမ်ႇမီးၽူႈမီးၵူၼ်း၊ဢမ်ႇမီးတရိၵ်ႈသၢၼ်ႇ၊ပဵၼ်တီႈဢၼ်သဵတ်ႇဢၼ်ယဵၼ်ယူႇသေႇသေႇၼၼ်ႉဝႆႉတီႈၶႃႈယဝ်ႉ၊’ ဝႃႈၼင်ႇၼႆဢေႃႈ။-
မႂ်းႁေႃးလိၵ်ႈၼႆႉတင်းသဵင်ႈတင်းမူတ်းသေယဝ်ႉ၊ဢဝ်မၢၵ်ႇႁိၼ်မတ်ႉၸပ်းလိၵ်ႈၼႆႉသေလႄႈဢဝ်ၶျႃးတူၵ်းပႅတ်ႈၵႃႈၼႂ်းၵၢင်မႄႈၼမ်ႉ ဢုၽရတ်ႉ၊ ၼၼ်ႉသေယဝ်ႉ။-
ဢွၵ်ႇသူပ်းလၢတ်ႈလႄႈဝႃႈ၊ ‘ဝဵင်း ပႃႇပုလုၼ်ႇ၊ ၼႆႉတၵ်းလႆႈၸူမ်တူၵ်းပႅတ်ႈမိူၼ်ၸိူဝ်ႉၼင်ႇၵဵၼ်လိၵ်ႈၸူမ်တူၵ်းၼႆႉလႄႈၵမ်းလိုၼ်းဢမ်ႇလႆႈလုၵ်ႉၶိုၼ်း၊ၵွပ်ႈပိူဝ်ႈၽေးဢုပၢတ်ႈဢၼ်ၵဝ်တၵ်းႁႂ်ႈႁွတ်ႈထိုင်ၵႃႈၼိူဝ်မၼ်းၼၼ်ႉဢေႃႈ၊’ ဝႃႈၼင်ႇၼႆတႃႉ။” ဝႃႈၼင်ႇၼႆဢေႃႈ။ ၵႂၢမ်းဢၼ်ဝႃႈမႃးၸိူဝ်းၼႆႉၸမ်ႉ၊ပဵၼ်ၵႂၢမ်း ယေႇရမိ၊ ဢေႃႈ။
ၶုၼ် ၸေႇတၵိ၊ ၼၼ်ႉမိူဝ်ႈဢၼ်တႄႇၸႃႉၼင်ႈႁၢင်ႈၼင်ႈႁေႃၼၼ်ႉၸိုင်၊ဢသၢၵ်ႈမၼ်းလႆႈသၢဝ်းဢဵတ်းပီလႄႈဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်း ယေႇရုသလႅမ်ႇ၊ သိပ်းဢဵတ်းပီဢေႃႈ။ မႄႈၸဝ်ႈၸမ်ႉ၊ပဵၼ် ႁႃႇမုတလႃႉ၊ လုၵ်ႈယိင်း ယေႇရမိ၊ ၵူၼ်းဝဵင်း လိပၼႃႉ၊ ဢေႃႈ။-
မၼ်းႁဵတ်းတုၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး၊ ၸွမ်းဢၼ် ယေႃးယၵိမ်း၊ ႁဵတ်းမႃးၼၼ်ႉဢေႃႈ။-
ထႃႇဝရႃႉၽြႃး၊ ၸႂ်မႆႈၶႂ်ႈၸႃႉတေႃႇၵူၼ်းဝဵင်း ယေႇရုသလႅမ်ႇ၊ ဢိၵ်ႇတင်းၵူၼ်းမိူင်း ယုတႃႉ၊ ၼႃႇလူင်လၢင်လႄႈ မၼ်းၸဝ်ႈႁေႃႈၶဝ်ဢွၵ်ႇပႅတ်ႈသေၵႃႈတီႈၽၢႆႇၼႃႈမၼ်းၸဝ်ႈဢေႃႈ။ ၸေႇတၵိ၊ ၼၼ်ႉလုၵ်ႉၽိုၼ်ႉၶတ်းၵၼ်တင်းၶုၼ်ႁေႃၶမ်းမိူင်း ပႃႇပုလုၼ်ႇ၊ ဢေႃႈ။-
ၼႂ်းပီဢၼ်မၼ်းၸၢမ်ႇႁၢင်ႈၸၢမ်ႇႁေႃလႆႈၵဝ်ႈပီ၊လိူၼ်တီႈသိပ်း၊ဝၼ်းတီႈသိပ်းၼၼ်ႉ ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်းမိူင်း ပႃႇပုလုၼ်ႇ၊ ပႃးဢဝ်ႁူဝ်ႁၢၼ်ၵူၼ်းသိုၵ်းၵႃႈမီးတင်းသဵင်ႈတင်းလူင်သေလႄႈၶီႇသိုၵ်းၶိုၼ်ႈၸူးတီႈဝဵင်း ယေႇရုသလႅမ်ႇ၊ ဢေႃႈ။ ၶဝ်ၶျႃးတပ်ႉယူႇၽၢႆႇၼိုင်ႈတင်းဝဵင်းသေလႄႈတႄႇႁဵတ်းႁူးၶုမ်လိၼ်ၵႃႈတီႈႁိမ်းႁွမ်းလဵပ်ႈႁွပ်ႈဝဵင်းဝႆႉဢေႃႈ။-
ပိူဝ်ႈၼႆလႄႈဝဵင်းၼၼ်ႉလႆႈၶၢမ်ႇတၢင်းဢၼ်လွမ်ႉဝႆႉတေႃႇထိုင်ႁွတ်ႈ ၸေႇတၵိ၊ ၸၢမ်ႇႁၢင်ႈၸၢမ်ႇႁေႃလႆႈသိပ်းဢဵတ်းပီၼၼ်ႉဢေႃႈ။-
ၼႂ်းလိူၼ်သီႇဝၼ်းတီႈၵဝ်ႈၼၼ်ႉ၊မီးတၢင်းဢၼ်ၶဝ်ႈၵႃႈမၢၵ်ႇပႅင်းၼႃႇလူင်လၢင်ၵႃႈၼႂ်းဝဵင်းၼၼ်ႉလႄႈထၢၼ်ႈပေႃးဢမ်ႇမီးတၢင်းၵိၼ်တၢင်းၶူပ်းပုၼ်ႈၵူၼ်းဝၢၼ်ႈၵူၼ်းဝဵင်းတင်းလၢႆဢေႃႈ။-
ၶဝ်ၸီးမူင်ႇလမ်းဝဵင်းႁႂ်ႈပဵၼ်ႁူးၵူင်သေလႄႈ၊ပိၵ်ႉသမ်ႉၵူၼ်းမဵဝ်း ပႃႇပုလုၼ်ႇ၊ တင်းလၢႆလွမ်ႉႁွပ်ႈႁွပ်ႈဝႆႉသေၵေႃႈ၊ႁူဝ်ႁၢၼ်ၵူၼ်းသိုၵ်းၵႃႈမီးတင်းသဵင်ႈတင်းလူင်ဢွၼ်ၵၼ်ဢွၵ်ႇပၢႆႈၶိင်ႇၵၢင်ၶိုၼ်း၊ၸွမ်းသဵၼ်ႈတၢင်းၵႄႈလမ်းဝဵင်းသွင်ထၢပ်ႈၵႃႈတီႈႁိမ်းသူၼ်ဢူးယဵၼ်ႇၸဝ်ႈၼၼ်ႉလႄႈဢွၵ်ႇပၢႆႇၵႂႃႇၸူးတီႈပၢင်ႇႁူၺ်ႈၼမ်ႉ ယေႃးတၢၼ်ႇ၊ ၼၼ်ႉသေဢေႃႈ။-
ၵူၺ်းၵႃႈ၊တပ်ႉသိုၵ်းၵူၼ်းမဵဝ်း ပႃႇပုလုၼ်ႇ၊ ၶဝ်လိုပ်ႈၸွမ်းလမ်းၸွမ်းၶုၼ်ႁေႃၶမ်း ၸေႇတၵိ၊ လႄႈတိဢဝ်လႆႈမၼ်းၵႃႈတီႈပၢင်ႇပဵင်းႁိမ်းဝဵင်း ယေႇရိၶူဝ်း၊ ပုၼ်ႉသေလႄႈႁူဝ်ႁၢၼ်ၵူၼ်းသိုၵ်းမၼ်းတႅၵ်ႇယၢႆႈၽၢတ်ႇၽႄၵၼ်ၵႂႃႇသေတင်းမၼ်းဢေႃႈ။-
ၶဝ်ဢွၼ်ၵၼ်တိၺွပ်းဢဝ်မၼ်းသေလႄႈဢဝ်ၵႂႃႇၸူးၵႃႈတီႈၶုၼ်ႁေႃၶမ်းမိူင်း ပႃႇပုလုၼ်ႇ၊ ၵႃႈတီႈဝဵင်း ရိပလႃႉ၊ မိူင်း ႁႃႇမတ်ႉ၊ ဢေႃႈ။ ၼေႇပုၶတ်ႉၼေႇၸႃႇ၊ ၸႅတ်ႈထၢမ်ၸီႇယၢင်ႇဢမု ၸေႇတၵိ၊ ဢေႃႈ။-
မၼ်းဢဝ်လုၵ်ႈၸၢႆး ၸေႇတၵိ၊ တင်းလၢႆတၢႆသိုဝ်ႈၼႃႈတႂ်ႈတႃမၼ်းလႄႈဢဝ်မူးမၢတ်ႈၽွင်းမိူင်း၊မိူင်း ယုတႃႉ၊ ၵႃႈမီးတၢႆၵႃႈၼႂ်းဝဵင်း ရိပလႃႉ၊ ၼၼ်ႉဢေႃႈ။-
ၶုၼ်ႁေႃၶမ်းမိူင်း ပႃႇပုလုၼ်ႇ၊ ၶွၵ်းမၢၵ်ႇတႃ ၸေႇတၵိ၊ ပႅတ်ႈသေယဝ်ႉ၊သမ်ႉဢဝ်ၸိူၵ်ႈတွင်းလိူင်မတ်ႉၽုၵ်ႇမၼ်းသေလႄႈဢဝ်မၼ်းၵႂႃႇၵႃႈတီႈဝဵင်း ပႃႇပုလုၼ်ႇ၊ ဢေႃႈ။ ၶဝ်ဢဝ်မၼ်းၶင်ဝႆႉၵႃႈၼႂ်းထွင်ႇတေႃႇထိုင်ႁွတ်ႈမိုဝ်ႉဝၼ်းဢၼ်မၼ်းတၢႆၼၼ်ႉဢေႃႈ။
ၼႂ်းပီဢၼ်ၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ မိူင်း ပႃႇပုလုၼ်ႇ၊ ၸၢမ်ႇႁၢင်ႈၸၢမ်ႇႁေႃလႆႈသိပ်းၵဝ်ႈပီ၊လိူၼ်တီႈႁႃႈ၊ဝၼ်းတီႈသိပ်းၼၼ်ႉ ၼေႇပုၸႃႇရႃႇတၢၼ်ႇ၊ ၽူႈၵွၼ်းတပ်ႉဢၼ်ပႂ်ႉဢသၢၵ်ႈၶုၼ်ႁေႃၶမ်းမိူင်း ပႃႇပုလုၼ်ႇ၊ ၼၼ်ႉမႃးၵႃႈတီႈဝဵင်း ယေႇရုသလႅမ်ႇ၊ သေလႄႈ၊-
ဢဝ်ၽႆးတုတ်ႇႁိူၼ်း ထႃႇဝရႃႉၽြႃး၊ ဢိၵ်ႇတင်းႁေႃၸဝ်ႈပႅတ်ႈလႄႈႁိူၼ်းယေးၵႃႈၼႂ်းဝဵင်း ယေႇရုသလႅမ်ႇ၊ ၵႃႈမီးဢၼ်ဝႃႈ၊ႁိူၼ်းယႂ်ႇႁိူၼ်းလူင်တင်းသဵင်ႈတင်းလူင်ၵေႃႈၽႆးမႆႈပႅတ်ႈမူတ်းဢေႃႈ။-
တပ်ႉသိုၵ်းၵူၼ်း ၶႃႇလတေး၊ ၵႃႈဢၼ်ယူႇၵႃႈတႂ်ႈၽူႈၵွၼ်းတပ်ႉဢၼ်ပႂ်ႉဢသၢၵ်ႈၸိူဝ်းၼၼ်ႉဢွၼ်ၵၼ်ၵိူၼ်ႇယႃႉပႅတ်ႈလမ်းဝဵင်း ယေႇရုသလႅမ်ႇ၊ ၵႃႈမီးတင်းသဵင်ႈတင်းမူတ်းဢေႃႈ။-
မိူဝ်ႈၼၼ်ႉ၊ၽူႈၵွၼ်းတပ်ႉ ၼေႇပုၸႃႇရႃႇတၢၼ်ႇ၊ ၼၼ်ႉတိသိမ်းဢဝ်ၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၵမ်ႈၽွင်ႈဢၼ်ယင်းၵိုတ်းယင်းၵျၢၼ်ႇယူႇၵႃႈၼႂ်းဝဵင်း၊ဢိၵ်ႇတင်းၶဝ်ၸိူဝ်းဢၼ်ၶဝ်ႈၵႂႃႇယူႇၽၢႆႇၶုၼ်ႁေႃၶမ်းမိူင်း ပႃႇပုလုၼ်ႇ၊ လႄႈဢိၵ်ႇတင်းမုၵ်ႉၵူၼ်းၸိူဝ်းဢၼ်မီးၼမ်ႉတိၼ်လၢႆးမိုဝ်းလႄႈမီးတၢင်းႁု၊ဢၼ်ယင်းၵိုတ်းယင်းၵျၢၼ်ႇယူႇၸိူဝ်းၼၼ်ႉၵႂႃႇဢေႃႈ။-
ၼႂ်းဝႃႈၼၼ်သေၵေႃႈ၊ ၼေႇပုၸႃႇရႃႇတၢၼ်ႇ၊ ၽူႈၵွၼ်းတပ်ႉဢၼ်ပႂ်ႉဢသၢၵ်ႈၶုၼ်ႁေႃၶမ်းၼၼ်ႉဝႆႉၵိုတ်းၵူၼ်းၽၢၼ်ၵမ်ႈၽွင်ႈႁႂ်ႈလႆႈလုမ်းလႃးသူၼ်မၢၵ်ႇၸပိတ်ႉ၊ဢိၵ်ႇတင်းႁဵတ်းသူၼ်ႁဵတ်းၼႃးဢေႃႈ။
ၵူၼ်း ၶႃႇလတေး၊ ၸိူဝ်းၼၼ်ႉဢွၼ်ၵၼ်ဢဝ်သဝ်တွင်းလိူင်ဢၼ်မီးၵႃႈၼႂ်းႁိူၼ်း ထႃႇဝရႃႉၽြႃး၊ ဢိၵ်ႇတင်းဢၢင်ႇၼမ်ႉတွင်းလိူင်၊ဢိၵ်ႇတင်းတိၼ်တင်ႈမၼ်းၸိူဝ်းၼၼ်ႉႁၵ်းႁိၵ်းပႅတ်ႈသေယဝ်ႉ၊သိမ်းဢဝ်တွင်းလိူင်ၵႃႈမီးတင်းမူတ်းမိူဝ်းၵႂႃႇၵႃႈတီႈဝဵင်း ပႃႇပုလုၼ်ႇ၊ သေဢေႃႈ။-
ၸႃႉၸဵမ်ၵူၵ်ႇၸေႃႉလႂ်၊မေႃႈဢၼ်သႂ်ႇတဝ်ႈလႂ်၊ၵိမ်းၺၢပ်ႈၽႆးလႂ်၊မေႃႈဢၼ်တုင်းၶၢမ်ႇလိူတ်ႈဢၼ်လႆဢွၵ်ႇတီႈတူဝ်တၢင်းလူႇၼၼ်ႉလႂ်၊မေႃႈဢၼ်ၽဝ်ၼၢမ်ႇသႃႇလႂ်၊ဢိၵ်ႇတင်းၶိူင်ႈတွင်းလိူင်ၸိူဝ်းဢၼ်ၸႂ်ႉဢၼ်တိုဝ်းၵႃႈၼႂ်းၵျွင်းပိၵ်ႈမၢၼ်ႇၸဝ်ႈတင်းသဵင်ႈတင်းလူင်ၵေႃႈၶဝ်ဢဝ်ၵႂႃႇဢေႃႈ။-
မေႃႈမႅၼ်လႂ်၊လၢင်ႇပၢၼ်းလႂ်၊ဝၢၼ်ႇလႂ်၊မေႃႈလႂ်၊ၶဵင်ႇတီႈတႆႈၽႆးလႂ်၊ၸေႃႉလႂ်၊ၵွၵ်းဢႅင်ႇလႂ်ဢၼ်ဝႃႈ၊ၶိူင်ႈၶမ်း၊ၶိူင်ႈငိုၼ်းၸိူဝ်းၼၼ်ႉၸိုင်၊ပဵၼ်ၶမ်းသေဢမ်ႇဝႃႈ၊ပဵၼ်ငိုၼ်းသေဢမ်ႇဝႃႈ၊ၽူႈၵွၼ်းတပ်ႉၼၼ်ႉဢဝ်ၵႂႃႇဢေႃႈ။-
တွင်းလိူင်ဢၼ်ပႃးၵႃႈတီႈသဝ်သွင်လႅမ်ႈ၊ဢၢင်ႇၼမ်ႉလူင်ဢၼ်ၼိုင်ႈ၊ဝူဝ်းတွင်းလိူင်သိပ်းသွင်တူဝ်ဢၼ်ပဵၼ်တီႈတၢင်ႇဢၢင်ႇၼမ်ႉလူင်ဢၼ် သေႃးလမုၼ်ႇ၊ ႁဵတ်းပုၼ်ႈႁိူၼ်း ထႃႇဝရႃႉၽြႃး၊ ၸိူဝ်းၼၼ်ႉၵေႃႈဢဝ်ၵႂႃႇဢေႃႈ။ ၶိူင်ႈတွင်းလိူင်ၵႃႈမီးၸိူဝ်းၼၼ်ႉၼၵ်းၼႃႇထၢၼ်ႈပေႃးၶဝ်ဢမ်ႇၸၢင်ႈၸင်ႈၼမ်ႉၼၵ်းမၼ်းလႆႈဢေႃႈ။-
တၢင်းသုင်သဝ်ၼၼ်ႉၸမ်ႉ၊မီးသိပ်းပႅတ်ႈသွၵ်ႇဢေႃႈ။ ပၼ်ႇမူၼ်းမီးသိပ်းသွင်သွၵ်ႇဢေႃႈ။ တၢင်းၼႃမၼ်းမီးသီႇၼိဝ်ႉလႄႈပဵၼ်ၵူင်ဝႆႉဢေႃႈ။-
ၵႃႈၼိူဝ်မၼ်းမီးႁူဝ်သဝ်တွင်းလိူင်ဢေႃႈ။ တၢင်းသုင်ႁူဝ်သဝ်ၼၼ်ႉၸမ်ႉ၊မီးႁႃႈသွၵ်ႇလႄႈၵႃႈတီႈလဵပ်ႈႁွပ်ႈႁူဝ်သဝ်ၼၼ်ႉႁၢင်ႈၶိူင်ႈလူၺ်ႈတႃၶႄဢိၵ်ႇတင်းလုၵ်ႈမၢၵ်ႇၸင်ႈတွင်းလိူင်ၵူၺ်းၵူၺ်းၼၼ်ႉသေလႄႈသဝ်တင်းသွင်တူၼ်ႈၼၼ်ႉၵေႃႈပဵၼ်မိူၼ်ၸိူဝ်ႉၼင်ႇၼၼ်လႄႈႁၢင်ႈၶိူင်ႈဝႆႉတင်းမၢၵ်ႇၸင်ႈတွင်းလိူင်လႂ်ဝႆႉဢေႃႈ။-
ၵႃႈတီႈသဝ်တင်းသီႇၼႃႈမီးမၢၵ်ႇၸင်ႈၵဝ်ႈသိပ်းႁူၵ်းလုၵ်ႈလႄႈၵႃႈတီႈတႃၶႄဢၼ်လဵပ်ႈႁွပ်ႈၼၼ်ႉလုၵ်ႈမၢၵ်ႇၸင်ႈမီးပၢၵ်ႇၼိုင်ႈဢေႃႈ။
ၽူႈၵွၼ်းတပ်ႉၼၼ်ႉ၊တိဢဝ်ယဵၸ်ႈပရေႃးႁဵၵ်ႈလူင် ၸရႃႇယႃႉ၊ ဢိၵ်ႇတင်းယဵၸ်ႈပရေႃးႁဵၵ်ႈၽူႈၵမ်ႉၵႅမ် ၸေႇၽၼိ၊ ဢိၵ်ႇတင်းၵူၼ်းဢၼ်ပဵၼ်ၵႄႇၵျွင်းပိၵ်ႈမၢၼ်ႇၸဝ်ႈသၢမ်ၵေႃႉၸိူဝ်းၼၼ်ႉဢေႃႈ။-
မၼ်းၼၼ်ႉ၊ႁွင်ႉဢဝ်ၶုၼ်သိုၵ်းႁၢၼ်ဢၼ်ဢုပ်ႉထိင်းၵူၼ်းသိုၵ်းတင်းလၢႆၼၼ်ႉၵေႃႉၼိုင်ႈ၊မူးမၢတ်ႈၽွင်းမိူင်းဢၼ်ယၢမ်ႈလႆႈယူႇၸမ်ၵၼ်တင်းၶုၼ်ႁေႃၶမ်းဢၼ်ၶဝ်ထူပ်းႁၼ်ၵႃႈၼႂ်းဝဵင်းၼၼ်ႉၸဵတ်းၵေႃႉ၊ၽူႈၵမ်ႉၵႅမ်ၸွမ်သိုၵ်းလူင်ဢၼ်ပဵၼ်ၸရေးမၢႆၸရၢင်းၵူၼ်းဝၢၼ်ႈၵူၼ်းမိူင်းတင်းလၢႆၼၼ်ႉၵေႃႉၼိုင်ႈ၊ဢိၵ်ႇတင်းၵူၼ်းဝၢၼ်ႈၵူၼ်းမိူင်းဢၼ်ထူပ်းမႅၼ်ႈၵႃႈၼႂ်းဝဵင်းႁူၵ်းသိပ်းၵေႃႉၸိူဝ်းၼၼ်ႉလႄႈ၊-
ၼေႇပုၸႃႇရႃႇတၢၼ်ႇ၊ ၽူႈၵွၼ်းတပ်ႉၼၼ်ႉဢဝ်ၶဝ်ၵႂႃႇသူင်ႇတီႈၶုၼ်ႁေႃၶမ်းမိူင်း ပႃႇပုလုၼ်ႇ၊ ဢၼ်မီးၵႃႈတီႈဝဵင်း ရိပလႃႉ၊ ၼၼ်ႉဢေႃႈ။-
ၶုၼ်ႁေႃၶမ်းမိူင်း ပႃႇပုလုၼ်ႇ၊ ၼၼ်ႉပၼ်တၢမ်ႇတီႈၶဝ်ၼၼ်ႉလႄႈဢဝ်ၶဝ်တင်းသဵင်ႈတၢႆၵႃႈတီႈဝဵင်း ရိပလႃႉ၊ မိူင်း ႁႃႇမတ်ႉ၊ ၼၼ်ႉဢေႃႈ။ ၼင်ႇၼၼ်လႄႈၵူၼ်းမဵဝ်း ယုတႃႉ၊ လႆႈၶၢမ်ႇတၢင်းဢၼ်သိမ်းဢဝ်ဢွၵ်ႇသေၵႃႈၼႂ်းမိူင်းၶဝ်ၵႂႃႇဢေႃႈ။-
ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ သိမ်းဢဝ်ၵႂႃႇၼၼ်ႉၸမ်ႉ၊ၼႂ်းပီဢၼ်မၼ်းၸၢမ်ႇႁၢင်ႈၸၢမ်ႇႁေႃလႆႈၸဵတ်းပီၼၼ်ႉမၼ်းသိမ်းဢဝ်ၵူၼ်းမဵဝ်း ယုတႃႉ၊ သၢမ်ႁဵင်ပၢႆသၢဝ်းသၢမ်ၵေႃႉၵႂႃႇဢေႃႈ။-
ၼႂ်းပီဢၼ်ၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ ၸၢမ်ႇႁၢင်ႈၸၢမ်ႇႁေႃလႆႈသိပ်းပႅတ်ႇပီၼၼ်ႉ၊မၼ်းသိမ်းဢဝ်ၵူၼ်းပႅတ်ႇပၢၵ်ႇသၢမ်သိပ်းပၢႆသွင်ၵေႃႉဢွၵ်ႇသေၵႃႈတီႈဝဵင်း ယေႇရုသလႅမ်ႇ၊ ၵႂႃႇဢေႃႈ။-
ၼႂ်းပီဢၼ်ၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ ၸၢမ်ႇႁၢင်ႈၸၢမ်ႇႁေႃလႆႈသၢဝ်းသၢမ်ပီၼၼ်ႉၽူႈၵွၼ်းတပ်ႉ ၼေႇပုၸႃႇရႃႇတၢၼ်ႇ၊ သိမ်းဢဝ်ၵူၼ်းမဵဝ်း ယုတႃႉ၊ ၸဵတ်းပၢၵ်ႇသီႇသိပ်းႁႃႈၵေႃႉၵႂႃႇဢေႃႈ။ ၵူၼ်းတင်းသဵင်ႈတင်းမူတ်းပွင်းၵၼ်ၸမ်ႉ၊မီးသီႇႁဵင်ႁူၵ်းပၢၵ်ႇၵေႃႉဢေႃႈ။
ၼႂ်းပီဢၼ် ယေႇၶေႃးၼိ၊ ၶုၼ်ႁေႃၶမ်း ယုတႃႉ၊ လႆႈၶၢမ်ႇတၢင်းဢၼ်ၶျုၵ်ႈဝႆႉသၢမ်သိပ်းပၢႆၸဵတ်းပီ၊လိူၼ်တီႈသိပ်းသွင်၊ဝၼ်းတီႈသၢဝ်းႁႃႈၼၼ်ႉ ဢေးဝိလႃႉမေႇရေႃးတၵ်ႉ၊ ၶုၼ်ႁေႃၶမ်းမိူင်း ပႃႇပုလုၼ်ႇ၊ ၼုၵ်ႈဢဝ် ယေႇၶေႃးၼိ၊ ဢၼ်ပဵၼ်ၶုၼ်ႁေႃၶမ်းမဵဝ်း ယုတႃႉ၊ ဢွၵ်ႇသေၵႃႈၼႂ်းထွင်ႇလႄႈပၼ်ၵတ်းယဵၼ်ၶျၢမ်းသႃႇၼႂ်းပီဢၼ်မၼ်းတႄႇၸႃႉၼင်ႈႁၢင်ႈၼင်ႈႁေႃၼၼ်ႉဢေႃႈ။-
ဢေးဝိလႃႉမေႇရေႃးတၵ်ႉ၊ ၼၼ်ႉတၵ်ႉလၢတ်ႈတေႃႇၵၼ်တင်းမၼ်းၼၼ်ႉလီလီငၢမ်းငၢမ်းသေလႄႈယုၵ်ႉယွင်ႈမၼ်းဝႆႉသုင်သေၶုၼ်လူင်တင်းလၢႆဢၼ်မီးၵႃႈၼႂ်းဝဵင်း ပႃႇပုလုၼ်ႇ၊ ၼၼ်ႉဢေႃႈ။-
မၼ်းၼၼ်ႉလႆႈပုတ်ႈလၢႆႈၶူဝ်းၼုင်ႈဢၼ်မၼ်းၼုင်ႈၵႃႈၼႂ်းထွင်ႇၼၼ်ႉသေလႄႈလႆႈၵိၼ်လႆႈၶူပ်းၵႃႈတီႈၽိုၼ်တီႈၵိၼ်ၶဝ်ႈၶုၼ်ႁေႃၶမ်းၼၼ်ႉတေႃႇၸူဝ်ႈဢသၢၵ်ႈမၼ်းၼၼ်ႉဢေႃႈ။-
ပုၼ်ႈတႃႇမၼ်းတၵ်းၵိၼ်တၵ်းၶူပ်းၼၼ်ႉၸမ်ႉ၊ၶုၼ်ႁေႃၶမ်းမိူင်း ပႃႇပုလုၼ်ႇ၊ ပၼ်ပုၼ်ႈတႃႇၵႃႈၸႂ်ႉၸၢႆႇၵႂႃႇၵူႈဝၼ်းၸူဝ်ႈဢၼ်မၼ်းယင်းဢသၢၵ်ႈလိပ်းယူႇလႄႈတေႃႇထိုင်ႁွတ်ႈဝၼ်းတၢႆမၼ်းဢေႃႈ။ ၵျၢမ်းပရေႃးၽႅတ်ႈယေႇရမိယဝ်ႉယဝ်ႉဢေႃႈ။
ဝဵင်း ယေႇရုသလႅမ်ႇ၊ ဢၼ်ယၢမ်ႈမီးၵူၼ်းၼမ်ၵိုၼ်းၼႃႇၼၼ်ႉမိူဝ်ႈလဵဝ်သဵတ်ႇၵူၼ်းယဵၼ်ၵူၼ်း ၵႂႃႇယဝ်ႉ၊ ယၢမ်ႈပဵၼ်မႄႈယိင်းဢၼ်လႆႈၶၢမ်ႇတၢင်းဢၼ် ယုၵ်ႉယွင်ႈၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းၼၼ်ႉ ပဵၼ်မိူၼ်ၸိူဝ်ႉၼင်ႇမႄႈမၢႆႈၵႂႃႇယဝ်ႉ၊ ၸဝ်ႈၼၢင်းပိူၼ်ႈၵူႈသိုင်ႇၵူႈမိူင်းၼၼ်ႉမိူဝ်ႈလဵဝ်တူၵ်းပဵၼ်ၶႃႈပိူၼ်ႈယဝ်ႉလူင်ပႄႇ။
မၼ်းႁွင်ႉႁႆႈၶူမ်ၸႂ်ၶူမ်ၶေႃးၼႃႇတင်းၶိုၼ်းလႄႈ ၼမ်ႉတႃလႆယူႇၵႃႈတီႈၵႅမ်ႈမၼ်းဢေႃႈ။ ၵႃႈၼႂ်းၸုမၼ်းၸူဝ်းမၼ်းၸိူဝ်းၼၼ်ႉဢမ်ႇမီး ၽူႈလႂ်သေၵေႃႉသေၵူၼ်းမႃးႁဵတ်းႁႂ်ႈမၼ်းပျေႇၸႂ်ၼိမ်ၸႂ်လႆႈ၊ ၵႃႈပဵၼ်ၵေႃႉသႄႈမၼ်းၼၼ်ႉသဵတ်ႈၸႃႇလုလႄႈဢွၼ်ၵၼ်ပဵၼ်ရၢၼ်ႇသူႇမၼ်းၵႂႃႇမူတ်းယဝ်ႉ။
ၵူၼ်းမိူင်း ယုတႃႉ၊ ၶဝ်လႆႈၶၢမ်ႇတၢင်းဢၼ်ပိူၼ်ႈသိမ်းဢဝ်ၵႂႃႇလႄႈတဵၵ်းငႅၼ်းႁႂ်ႈၶဝ်ပဵၼ်ၶႃႈ ၵႃႈၼႂ်းမိူင်းပိူၼ်ႈယဝ်ႉ၊ ၶဝ်လႆႈယူႇၵႃႈၼႂ်းမိူင်းၵူၼ်းမဵဝ်းတၢင်ႇၸိူဝ်ႉ တၢင်ႇၶိူဝ်းလႄႈဢမ်ႇမီးတၢင်းဢၼ် ၵတ်းၸႂ်ယဵၼ်ၸႂ်လႃးလႃး၊ ရၢၼ်ႇသူႇတင်းလၢႆလွမ်ႉႁွပ်ႈၶဝ်ဝႆႉလႄႈဢမ်ႇမီးတၢင်းဢၼ်လွတ်ႈလႆႈယဝ်ႉ။
သဵၼ်ႈတၢင်းႁၢမ်းၸိူဝ်းဢၼ်ၵႂႃႇၸူးတီႈဝဵင်း ၸိဢုၼ်ႇ၊ မီးတၢင်းဢၼ်မွင်ၸႂ်၊ ၵွပ်ႈပိူဝ်ႈၽူႈလႂ်ဢမ်ႇၵႂႃႇၶဝ်ႈပွႆးၼၼ်ႉဢေႃႈ။ ၽၵ်းတူမၼ်းၸိူဝ်းပဵၼ်ဢၼ်သဵတ်ႇၵူၼ်း ငႅဝ်ၵူၼ်းလႄႈယဵၸ်ႈပရေႃးႁဵၵ်ႈ ၸိူဝ်းၼၼ်ႉၵေႃႈ ဢွၼ်ၵၼ်ၶၢင်းၶီၶၢင်းၽၢၼ်ယူႇဢေႃႈ။ သၢဝ်ၵၼ်ႇၺႃႇမၼ်းၸိူဝ်းၼၼ်ႉၵေႃႈ မီးၸႂ်ဢၼ်တုၵ်ႉၶႃႉယူႇလႄႈဝဵင်း ၸိဢုၼ်ႇ၊ ၼၼ်ႉလႆႈၶီၸႂ်ၶူမ်ၸႂ်ယူႇဢေႃႈ။
ရၢၼ်ႇသူႇမၼ်းၸိူဝ်းၼၼ်ႉလႆႈလီလႆႈပဵၼ်လႄႈဢဝ်တင်းတၼ်းၶူဝ်းၶဝ်ယိပ်းၵမ်ဢဝ်မၼ်းဝႆႉ၊ ၵွပ်ႈပိူဝ်ႈဢၼ် ထႃႇဝရႃႉၽြႃး၊ ပၼ်တၢမ်ႇ ပုၼ်ႈဢပျတ်ႈမၼ်းဢၼ်ၼမ်ၼႃႇၼၼ်ႉလႄႈ လုၵ်ႈလၢၼ်ၸိူဝ်ႉၶိူဝ်းမၼ်းလႆႈၶၢမ်ႇတၢင်းဢၼ် ရၢၼ်ႇသူႇမၼ်းသိမ်းဢဝ်ၵႂႃႇယဝ်ႉယဝ်ႉ။
မုၼ်သရေႇဝဵင်း ယေႇရုသလႅမ်ႇ၊ ၼၼ်ႉလပ်ႉႁၢႆၵႂႃႇ မူတ်းမူတ်းယဝ်ႉ၊ ၶုၼ်မၼ်းၵွၼ်းမၼ်းၸိူဝ်းၼၼ်ႉပဵၼ်ၸိူဝ်ႉၼင်ႇ ၽုင်တိုင်ၽုင်ယီး၊ ဢၼ်ႁႃပၢင်ႇယိူဝ်ႈတီႈၵိၼ်သေၵေႃႈ ဢမ်ႇထူပ်းၼၼ်ႉလႄႈ ယင်းဢမ်ႇမီးဢဵၼ်မီးႁႅင်းလႆႈဢွၼ်ၵၼ် ၼီပၢႆႈသေၵႃႈတီႈၵေႃႉဢၼ်လိုပ်ႈၸွမ်း လမ်းၸွမ်းၼၼ်ႉယဝ်ႉ။
ၵူၼ်းဝဵင်း ယေႇရုသလႅမ်ႇ၊ ၼၼ်ႉၶႆႈၸႂ်ထူပ်း မိုဝ်ႉဝၼ်းဢၼ်ၶဝ်လႆႈထူပ်းၽေးဢိၵ်ႇတင်း တၢင်းဢၼ်ၶဝ်လႄႇၵႂႃႇလႄႇမႃးလႂ်၊ ၶႆႈၸႂ်ထူပ်းၸေးၸိမ်ႇဢၼ်ယၢမ်ႈ ၸၢမ်ႇၸႃးမိူဝ်ႈဢွၼ်ၼႆႉၼၼ်ႉဢေႃႈ။ ၼႂ်းမိူဝ်ႈဢၼ်ၵူၼ်းမၼ်းတင်းလၢႆ လႆႈ တူၵ်းသုမ်းၵႃႈၼႂ်းမိုဝ်းရၢၼ်ႇသူႇလႄႈ ရၢၼ်ႇသူႇမၼ်းႁၼ်မၼ်းသေလႄႈ သႄႉသွမ်းတၢင်းဢၼ်မၼ်းသုမ်းၼၼ်ႉၸိုင်၊ ၵေႃႉဢၼ်ၸွႆႈဢၼ်ထႅမ်မၼ်းဢမ်ႇမီး သေၵေႃႉသေၵူၼ်း။
ၵူၼ်းဝဵင်း ယေႇရုသလႅမ်ႇ၊ ၼၼ်ႉမီးဢပျတ်ႈ တုၸရိူၵ်ႈၼမ်ၼႃႇလႄႈႁွတ်ႈထိုင် တၢင်းဢၼ်လီႁင်ႈဢဵတ်ႇသဵတ်ႇယဝ်ႉ၊ ၶဝ်ၸိူဝ်းဢၼ်ယၢမ်ႈရူဝ်ႇသေႇၵူဝ်ယမ်မၼ်း ၼၼ်ႉဢွၼ်ၵၼ်ႁဵတ်းဢမ်ႇပေႃးၼင်ႇႁိုဝ် တီႈမၼ်းၵွပ်ႈပိူဝ်ႈၶဝ်ႁၼ်မၼ်းယူႇ တူဝ်ပူၺ်ယူႇၼၼ်ႉဢေႃႈ။ တူဝ်မၼ်းၵေႃႈၶၢင်းၶီၶၢင်းၽၢၼ်လႄႈ ဝၢႆႇၼႃႈပႅတ်ႈတၢင်ႇတၢင်းဢေႃႈ။
တၢင်းဢၼ်ဢမ်ႇမူတ်းၸၢင်ႇမၼ်းၼၼ်ႉ ပေႃႇဢွၵ်ႇထၢင်ႇသႃးဝႆႉသေၵေႃႈ၊ မၼ်းယင်းဢမ်ႇၶႆႈၸႂ်ထူပ်းဢပျတ်ႈတၢမ်ႇ ဢၼ်မၼ်းတၵ်းလႆႈၶၢမ်ႇၼၼ်ႉ၊ ပိူဝ်ႈၼႆလႄႈတၢင်းဢၼ်မၼ်းတူၵ်းသုမ်းၼၼ်ႉ ပဵၼ်ဢၼ်လီၵူဝ်လီႁႄၼႃႇ၊ ဢမ်ႇမီးၽူႈလႂ်ႁဵတ်းႁႂ်ႈမၼ်းပျေႇၸႂ် ၼိမ်ၸႂ်လႆႈဢေႃႈ။ ရၢၼ်ႇသူႇမၼ်းၸိူဝ်းၼၼ်ႉပႄႉၼႅင်ႇမၼ်းယဝ်ႉ လႄႈမၼ်းၶေႃယွၼ်းၵရုၼႃႇတၢင်းဢၼ် ၸွႆႈထႅမ်တီႈ ထႃႇဝရႃႉၽြႃး၊ ဢေႃႈ။
ရၢၼ်ႇသူႇတင်းလၢႆႁိမ်ႁူင်ႇၸူၼ်ဢဝ်ဢုၵ်ႉၸႃႇ ၶူဝ်းလဵင်းမၼ်းၵႃႈမီးမူတ်းၵဵင်ႈယဝ်ႉ၊ တူဝ်မၼ်းလႆႈႁၼ်ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်း တင်းလၢႆႁဵတ်းပႄႉႁဵတ်းၼႅင်ႇလႄႈ ၶဝ်ႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈ၊ ထႃႇၼႃႉတီႈဢၼ် ထႃႇဝရႃႉၽြႃး၊ ႁၢမ်ႈဝႆႉ၊ဢမ်ႇႁႂ်ႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်း ၶဝ်ႈၼၼ်ႉဢေႃႈ။
ၵူၼ်းမၼ်းတင်းသဵင်ႈတင်းလူင်ဢွၼ်ၵၼ်ပွင်ႉႁႆႈ ပွင်ႉၶၢင်းမိူဝ်ႈဢၼ်ၶဝ်ႁႃတၢင်းၵိၼ်တၢင်းၶူပ်း ယူႇၼၼ်ႉဢေႃႈ။ ၶဝ်ဢဝ်ၸေးၸိမ်ႇဢုၵ်ႉၸႃႇၶဝ်လႅၵ်ႈဢဝ် တၢင်းၵိၼ်တၢင်းၶူပ်းႁႂ်ႈလႆႈလွတ်ႈၽေး တၢင်းတၢႆဢေႃႈ။ ၶဝ်ႁွင်ႉႁႆႈလႄႈဝႃႈ “ ထႃႇဝရႃႉၽြႃး၊ တီႈၶႃႈ၊ ၶႅၼ်းတေႃႈလူတူၺ်းလႄႈႁၼ်သေၵမ်းတီႈၶႃႈ၊ ၶႃႈၸဝ်ႈႁဝ်းၶဝ်လႆႈၶၢမ်ႇတၢင်းဢၼ်ၶျႃးတူၵ်းတီႈတႅမ်ႇတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
မၼ်းႁွင်ႉႁႆႈႁွင်ႉပၢဝ်ႇၵႃႈတီႈၶဝ်ၸိူဝ်းဢၼ်ၵၢႆၵႂႃႇ ၼၼ်ႉလႄႈဝႃႈ၊ “သူဢမ်ႇတိူဝ်ႉၸႂ် လႃးလႃးႁိုဝ်း၊ ၽူႈလႂ်သေၵေႃႉသေၵူၼ်းဢမ်ႇလႆႈၶၢမ်ႇ တုၵ်ႉၶႃႉမိူၼ်ၼင်ႇဢၼ်ၵဝ်လႆႈၶၢမ်ႇတုၵ်ႉၶႃႉ မဵဝ်းဢၼ် ထႃႇဝရႃႉၽြႃး၊ ၼိၵ်ႈၸၢၵ်ႈ ငႅၼ်းသႄးၵဝ်၊ ၼႂ်းမိုဝ်ႉဝၼ်းဢၼ်မၼ်းၸဝ်ႈၸႂ်မႆႈၶႂ်ႈၸႃႉၼၼ်ႉ။
မၼ်းၸဝ်ႈပွႆႇၽႆးလူင်းမႃးသေၵႃႈတီႈၼိူဝ် ၽႃႉလႄႈၽႆးၼၼ်ႉမႆႈၵႃႈၼႂ်းတူဝ်ၵဝ်ဢေႃႈ။ မၼ်းၸဝ်ႈၵၢင်တူင်ႇႁႅဝ်ႉတူင်ႇၶိုမ်းလႄႈ တိၼ်ၵဝ်ထုၵ်ႇမႅၼ်ႈလႄႈႁႂ်ႈၵဝ် ဝၢႆႇၶိုၼ်းၵႂႃႇတၢင်းလင်ဢေႃႈ။ မၼ်းၸဝ်ႈပွႆႇပႅတ်ႈၸုၼ်ႉပႅတ်ႈၵဝ်လႄႈ ႁႂ်ႈၵဝ်မီးတၢင်းဢၼ်ၸႂ်လုႁႅင်းဢူၼ်ႈ တင်းဝၼ်းတင်းဝၼ်း။
မၼ်းၸဝ်ႈမၢတ်ႈမၢႆတုၸရိူၵ်ႈၵဝ်ၵႃႈမီးလႄႈ လိမ်ႇၽၼ်ႉၶဵၼ်းၶွတ်ႇၸပ်းၵၼ်ဝႆႉတင်းသဵင်ႈတင်းလူင်သေယဝ်ႉ။ မၼ်းၸဝ်ႈဢဝ်ႁွႆႈဝႆႉၵႃႈတီႈၶေႃးၵဝ်ထၢၼ်ႈပေႃးႁႂ်ႈၵဝ်ႁႅင်းဢူၼ်ႈၵႂႃႇတႂ်ႈၼမ်ႉၼၵ်းၼၼ်ႉယဝ်ႉ။ ၸဝ်ႈၽြႃးဢဝ်ၵဝ်ဢၢပ်ႈပၼ်ၵႃႈၼႂ်းမိုဝ်း ရၢၼ်ႇသူႇၵဝ်တင်းလၢႆလႄႈၵဝ်ဢမ်ႇၸၢင်ႈ ႁႄႉၶႅၼ်ၶဝ်လႆႈယဝ်ႉ။
ၸဝ်ႈၽြႃးယဵပ်ႇယမ်ႈၵူၼ်းသိုၵ်းၵဝ်ဢၼ် ႁႅင်းယႂ်ႇၸိူဝ်းၼၼ်ႉလႄႈ မၼ်းၸဝ်ႈပွႆႇၸႂ်ႉတပ်ႉသိုၵ်းၶီႇၶိုၼ်ႈယႃႉပႅတ်ႈ ၵူၼ်းၼုမ်ႇၵူၼ်းၵမ်ၵဝ်ယဝ်ႉ၊ မၼ်းၸဝ်ႈယဵပ်ႇၼူတ်ႈၵူၼ်းၵဝ်တင်းလၢႆ မိူၼ်ၸိူဝ်ႉၼင်ႇယဵပ်ႇမၢၵ်ႇၸပိတ်ႉၵႃႈၼႂ်း ၶိူင်ႈၼူတ်ႈမၼ်းၼၼ်ႉယဝ်ႉ။
ၵွပ်ႈပိူဝ်ႈၼႆလႄႈၵဝ်လႆႈႁွင်ႉႁႆႈလႄႈ ၼမ်ႉတႃၵဝ်တူၵ်းယူႇဢေႃႈ။ ၽူႈလႂ်သေၵေႃႉသေၵူၼ်းဢမ်ႇႁဵတ်းႁႂ်ႈၵဝ် ပျေႇၸႂ်ၼိမ်ၸႂ်လႆႈလႄႈ ဢမ်ႇပၼ်ဢဵၼ်ပၼ်ႁႅင်းၵဝ်လႆႈ၊ ရၢၼ်ႇသူႇၵဝ်တင်းလၢႆပႄႉၼႅင်ႇၵဝ်ယဝ်ႉလႄႈ ၵူၼ်းၵဝ်တင်းလၢႆဢမ်ႇမီးၵႃႈသင် ၵိုတ်းၵျၢၼ်ႇဝႆႉသေၸိူဝ်ႉသေမဵဝ်းယဝ်ႉ။
ပိၵ်ႉသမ်ႉၵဝ်ယဵတ်ႇမိုဝ်းဢႃႈမိုဝ်းၵဝ်သေၵေႃႈ ဢမ်ႇမီးၵေႃႉဢၼ်ၸွႆႈဢၼ်ထႅမ်ၵဝ် သေၵေႃႉသေၵူၼ်း၊ ထႃႇဝရႃႉၽြႃး၊ ပူင်ဢမိင်ႉႁႂ်ႈရၢၼ်ႇသူႇ တင်းလၢႆလုၵ်ႉသေၵူႈၽၢႆႇၵူႈပႃႈမႃး ၶတ်းတႃႉၵၼ်တင်းၵဝ်သေလႄႈ၊ ၶဝ်ၼၼ်ႉႁဵတ်းတီႈၵဝ်မိူၼ်ၸိူဝ်ႉၼင်ႇဢၼ် ၵဝ်ပဵၼ်ၶိူင်ႈဢၼ်လီႁင်ႈဢဵတ်ႇသဵတ်ႇ ၼၼ်ႉဢေႃႈ။
ၼႂ်းဝႃႈၼၼ်သေၵေႃႈ၊ ထႃႇဝရႃႉၽြႃး၊ ၸီႇယၢင်ႇၸွမ်းၼင်ႇတြႃးဢေႃႈ။ လွင်ႈမၼ်းၸမ်ႉ၊ၵဝ်ပူၼ်ႉလိူဝ်ပိင်းၺၢပ်ႈတြႃး မၼ်းၸဝ်ႈလူင်လၢင်၊ ၵူၼ်းၵဝ်ၵူႈၸိူဝ်ႉၵူႈမဵဝ်းၶဝ်႟။ ဢွၼ်ၵၼ် ထွမ်ႇငိၼ်းလူး၊ဢွၼ်ၵၼ်လူတူၺ်း တုၵ်ႉၶႃႉၵဝ်ၼႆႉလူး၊ၶဝ်သိမ်းဢဝ်ၽူႈမၢဝ်ႇ ၽူႈသၢဝ်ၵဝ်တင်းလၢႆၵႂႃႇယဝ်ႉ။
ၵဝ်ႁွင်ႉႁႃၸုၵဝ်ၸူဝ်းၵဝ်တင်းလၢႆဢေႃႈ။ ၵူၺ်းၵႃႈ၊ၶဝ်ဢမ်ႇမႃးၸွႆႈမႃးထႅမ် ၵဝ်လႃးလႃး၊ယဵၸ်ႈပရေႃးႁဵၵ်ႈ တင်းလၢႆ၊ ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ် တင်းလၢႆဢွၼ်ၵၼ်သုမ်းဢသၢၵ်ႈၶဝ် ၵႃႈၼႂ်းၶူးၼႂ်းဝဵင်း၊ၼႂ်းမိူဝ်ႈဢၼ်ၶဝ်ယင်း တိုၵ်ႉႁႃဢဝ်တၢင်းၵိၼ်တၢင်းၶူပ်းပုၼ်ႈဢၼ် တၵ်းလဵင်ႉဢသၢၵ်ႈၶဝ်ယူႇၼၼ်ႉဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈလူတူၺ်း တုၵ်ႉၶႃႉၶႃႈၸဝ်ႈၼႆႉသေၵမ်းတီႈၶႃႈ၊ ၸႂ်ဝိၺိၺ်ႇၶႃႈၸဝ်ႈယၢပ်ႇၸႂ်ၽိုတ်ႇၸႂ် တီႈၶႃႈဢေႃႈ။ ႁူဝ်ၸႂ်ၶႃႈၸဝ်ႈတႅၵ်ႇယၢႆႈၵွပ်ႈပိူဝ်ႈတုၸရိူၵ်ႈ ဢပျတ်ႈၶႃႈၸဝ်ႈတီႈၶႃႈဢေႃႈ။ ၵႃႈၼိူဝ်ၶူၼ်တၢင်းၼၼ်ႉမီးတၢင်းဢၼ်ၶႃႈတၢႆ ၽၼ်းတၢႆၵူၼ်းဝဵင်းယူႇလႄႈၵႃႈတီႈၼႂ်း ႁိူၼ်းၵေႃႈမီးတၢင်းတၢႆယူႇဢေႃႈ။
ၶဝ်လႆႈငိၼ်းတၢင်းဢၼ်ၶႃႈၸဝ်ႈႁႆႈႁွင်ႉ ပွင်ႉၶၢင်းၼၼ်ႉဢေႃႈ။ ၵူၺ်းၵႃႈ၊ဢမ်ႇမီးၽူႈလႂ်သေၵေႃႉသေၵူၼ်း ႁဵတ်းႁႂ်ႈၶႃႈၸဝ်ႈပျေႇၸႂ်ၼိမ်ၸႂ်လႆႈ၊ ရၢၼ်ႇသူႇၶႃႈၸဝ်ႈၸိူဝ်းၼၼ်ႉယင်းငိၼ်း ၸူမ်းလူၺ်ႈလွင်ႈဢၼ်ၸဝ်ႈႁဝ်းႁဵတ်းႁႂ်ႈ ၶႃႈၸဝ်ႈထူပ်းၽေးတုၵ်ႉၶႃႉ ၸိူဝ်ႉၼင်ႇၼၼ်ၼၼ်ႉဢေႃႈ။ ၶႅၼ်းတေႃႈႁႂ်ႈမိုဝ်ႉဝၼ်းဢၼ်ၸဝ်ႈႁဝ်းၶိၼ်းဝႆႉ ၼၼ်ႉႁွတ်ႈထိုင်သေၵမ်းတီႈၶႃႈ၊ ႁဵတ်းႁႂ်ႈၶဝ်လႆႈၶၢမ်ႇမိူၼ်ၸိူဝ်ႉၼင်ႇၵဝ်ၶႃႈ လႆႈၶၢမ်ႇၼႆႉသေၵမ်းတီႈၶႃႈ။
ၶႅၼ်းတေႃႈၸီႇယၢင်ႇပၼ်တၢမ်ႇတီႈၶဝ် ၵွပ်ႈပိူဝ်ႈတၢင်းဢၼ်ၶဝ်ႁဵတ်းတုၸရိူၵ်ႈၼၼ်ႉသေၵမ်းတီႈၶႃႈ၊ ပၼ်တၢမ်ႇတီႈၶဝ်မိူၼ်ၸိူဝ်ႉၼင်ႇဢၼ်ၸဝ်ႈႁဝ်း ပၼ်တၢမ်ႇတီႈၶႃႈၸဝ်ႈၼၼ်ႉသေၵမ်းတီႈၶႃႈ၊ ၶႃႈၸဝ်ႈႁွင်ႉႁႆႈပွင်ႉၶၢင်းႁႅင်းယႂ်ႇၼႃႇလႄႈႁူဝ်ၸႂ်ၶႃႈၸဝ်ႈမီးတၢင်းဢၼ်ႁိူဝ်ႉဢူၼ်ႈၼႃႇ တီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈၽြႃးမီးတၢင်းဢၼ်ၸႂ်မႆႈၶႂ်ႈၸႃႉလႄႈ ဢဝ်တၢင်းဢၼ်လပ်းသိင်ႇမုင်းႁူမ်ႇဝဵင်း ၸိဢုၼ်ႇ၊ ဢေႃႈ။ မၼ်းၸဝ်ႈဢဝ်မုၼ်သရေႇၵူၼ်းမဵဝ်း ဢိသရေး၊ ၼၼ်ႉ ၶျႃးတူၵ်းသေၵႃႈတီႈၵၢင်ႁၢဝ်မႃးလူင်းထိုင်လိၼ်မိူင်းယဝ်ႉ၊ ၼႂ်းဝၼ်းဢၼ်မၼ်းၸဝ်ႈၸႂ်မႆႈၶႂ်ႈၸႃႉၼၼ်ႉ မၼ်းၸဝ်ႈယင်းၸုၼ်ႉပႅတ်ႈ ၵျွင်းပိၵ်ႈမၢၼ်ႇၸဝ်ႈယူႇယဝ်ႉလူင်ပႄႇ။
ၸဝ်ႈၽြႃးယင်းဢမ်ႇဢဵတ်းလူလႄႈယႃႉၽဵဝ်ႈ တီႈယူႇတီႈသဝ်းၵူၼ်းမဵဝ်း ယုတႃႉ၊ ၵႃႈမီးပႅတ်ႈယဝ်ႉလႄႈ၊ ၵိူၼ်ႇယႃႉတိူၵ်ႈတီႈတိုၵ်းသိုၵ်းဢၼ်ၵႅတ်ႇၶႄ ဝၢၼ်ႈမိူင်းတင်းလၢႆၼၼ်ႉပႅတ်ႈယဝ်ႉ၊ မၼ်းၸဝ်ႈၶျႃးသိုင်ႇၸိုင်ႈဝၢၼ်ႈမိူင်းၵူၼ်းမဵဝ်း ယုတႃႉ၊ တင်းၶုၼ်ဢၼ်ဢုပ်ႉပိူင်ႇၵူၼ်းမဵဝ်း ယုတႃႉ၊ တင်းလၢႆတူၵ်းတီႈတႅမ်ႇယဝ်ႉ။
တၢင်းၸႂ်မႆႈၶႂ်ႈၸႃႉမၼ်းၸဝ်ႈဢွၵ်ႇႁႅင်းယႂ်ႇၼႃႇသေလႄႈတႅပ်းပႅတ်ႈဢဵၼ်ႁႅင်းၵူၼ်းမဵဝ်း ဢိသရေး၊ ၵႃႈမီးၼၼ်ႉယဝ်ႉ၊ မၼ်းၸဝ်ႈတိုၼ်းဢမ်ႇၸွႆႈဢမ်ႇထႅမ်ၶဝ် ၼႂ်းမိူဝ်ႈဢၼ်ရၢၼ်ႇသူႇၶဝ်တင်းလၢႆ မႃးယူႇၼၼ်ႉဢေႃႈ။ မၼ်းၸဝ်ႈဢဝ်တင်းၽႆးတေႃးသႃႉမၼ်းၸဝ်ႈၼၼ်ႉယႃႉၽဵဝ်ႈပႅတ်ႈၵူႈၸိူဝ်ႉၵူႈပိူင်ယဝ်ႉ။
မၼ်းၸဝ်ႈဝူတ်ႈၵၢင်ႇယဵင်းၵူၼ်းႁဝ်းမိူၼ်ၸိူဝ်ႉၼင်ႇ ရၢၼ်ႇသူႇၼၼ်ႉယူႇလႄႈ ယုၵ်ႉမိုဝ်းၶွၼ်ၶႂႃမၼ်းၸဝ်ႈသေယဝ်ႉ၊ငႃဝႆႉလႄႈ ဢဝ်ၶဝ်ၸိူဝ်းဢၼ်ႁဝ်းထုၵ်ႇၸႂ်ႁၵ်ႉပႅင်း တင်းသဵင်ႈတင်းလူင်ၼၼ်ႉတၢႆယဝ်ႉ၊ ၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉၵေႃႈ ၽႆးတေႃးသႃႉမၼ်းၸဝ်ႈမႆႈယူႇဢေႃႈ။
ၸဝ်ႈၽြႃးၵျွမႃးမိူၼ်ၸိူဝ်ႉၼင်ႇရၢၼ်ႇသူႇလႄႈယႃႉၽဵဝ်ႈပႅတ်ႈၵူၼ်း ဢိသရေး၊ တင်းလၢႆယဝ်ႉ၊ မၼ်းၸဝ်ႈယႃႉႁေႃၶမ်းၵႃႈမီးပႅတ်ႈလႄႈၵိူၼ်ႇယႃႉတိူၵ်ႈပုၼ်ႈတိုၵ်းသိုၵ်းၶဝ် တင်းလၢႆပႅတ်ႈယဝ်ႉ၊ မၼ်းၸဝ်ႈႁႂ်ႈတၢင်းဢၼ်ၶီၸႂ်ၶူမ်ၸႂ်၊ တၢင်းဢၼ်ႁွင်ႉႁႆႈပွင်ႉၶၢင်းယဵင်ႈၶႅၼ်းၼမ်မႃး တီႈၵူၼ်းမဵဝ်း ယုတႃႉ၊ ၶဝ်ဢေႃႈ။
မၼ်းၸဝ်ႈၵိူၼ်ႇယႃႉၵျွင်းပိၵ်ႈမၢၼ်ႇၸဝ်ႈ ယွၵ်းယွႆႈၵႂႃႇမိူၼ်ၸိူဝ်ႉၼင်ႇဢၼ် ယႃႉထဵင်ၼႃးပႅတ်ႈၼၼ်ႉယဝ်ႉ၊ မၼ်းၸဝ်ႈယႃႉမွတ်ႇပႅတ်ႈမိုဝ်ႉဝၼ်းဢၼ်ႁဵတ်းပွႆးထမ်ႇမႃႉမၼ်းၸဝ်ႈၼၼ်ႉယဝ်ႉ၊ ထႃႇဝရႃႉၽြႃး၊ ႁႂ်ႈလူင်လိုမ်းပႅတ်ႈဝၼ်းထွတ်ႈဝၼ်းမျၢတ်ႈတင်းလၢႆ၊ဢိၵ်ႇတင်း ဝၼ်းၵမ်သိၼ်တင်းလၢႆယဝ်ႉ၊ ဢၢႆႁႅင်းတေႃးသႃႉမၼ်းၸဝ်ႈႁႅင်းယႂ်ႇၼႃႇလႄႈ ႁဵတ်းတၢင်းဢၼ်လူလၢႆတီႈၶုၼ်ႁေႃၶမ်း တင်းယဵၸ်ႈပရေႃးႁဵၵ်ႈ ယဝ်ႉ။
ၸဝ်ႈၽြႃးပႄႇပႅတ်ႈၶဵင်ႇတၢင်းလူႇမၼ်းၸဝ်ႈလႄႈ ၵျွင်းပိၵ်ႈမၢၼ်ႇဢၼ်မူတ်းၸၢင်ႇ ၸဝ်ႈၼၼ်ႉယဝ်ႉ၊ မၼ်းၸဝ်ႈယင်းပၼ်ဢၶႂၢင်ႉႁႂ်ႈရၢၼ်ႇသူႇ တင်းလၢႆၵိူၼ်ႇယႃႉႁူဝ်ႉဝၢင်းၵျွင်းပိၵ်ႈမၢၼ်ႇ တင်းလၢႆပႅတ်ႈယဝ်ႉ၊ ၶဝ်ၼၼ်ႉဢွၼ်ၵၼ်ႁဵတ်းသဵင်ဢၼ်ပႄႉၼႅင်ႇ ၵႃႈၼႂ်းထႃႇၼႃႉတီႈဢၼ်ႁဝ်း ယၢမ်ႈႁဵတ်းပွႆးထမ်ႇမႃႉၼၼ်ႉယဝ်ႉ။
ထႃႇဝရႃႉၽြႃး၊ တႅပ်းတတ်းၸႂ်ဢၼ်တၵ်း ယႃႉၽဵဝ်ႈလမ်းဝဵင်း ယေႇရုသလႅမ်ႇ၊ ႁႂ်ႈလုလႅဝ်ပႅတ်ႈလႄႈ၊ မၼ်းၸဝ်ႈဢဝ်ၸိူၵ်ႈတႅၵ်ႈလမ်းဝဵင်း ၸိူဝ်းၼၼ်ႉသေႇၶျႃႇလီငၢမ်းသေယဝ်ႉ၊ ၵိူၼ်ႇယႃႉပႅတ်ႈလုမ်းလုမ်းဢေႃႈ။ ထႃႇဝရႃႉၽြႃး၊ ၵိူၼ်ႇယႃႉတိူၵ်ႈပုၼ်ႈတိုၵ်းသိုၵ်း ဢိၵ်ႇတင်းလမ်းဝဵင်း ယေႇရုသလႅမ်ႇ၊ တင်းလၢႆဢၼ်ပွင်ႉႁႆႈ ပွင်ႉၶၢင်းၸိူဝ်းၼၼ်ႉလုလႅဝ်ပင်းတူၵ်း လူၺ်ႈၵၼ်တင်းမူတ်းဢေႃႈ။
မႂ်ၽၵ်းတူဝဵင်းၸိူဝ်းၼၼ်ႉၸူမ်ၶဝ်ႈလိၼ်မူတ်း ယဝ်ႉလႄႈၵိူၼ်ႇမၼ်းတင်းလၢႆၵေႃႈမၼ်းၸဝ်ႈႁၵ်းပႅတ်ႈယဝ်ႉ၊ ၶုၼ်ႁေႃၶမ်းမၼ်း၊ဢိၵ်ႇတင်းၶုၼ်မၼ်းၵွၼ်း မၼ်းတင်းလၢႆ၊လႆႈၶၢမ်ႇတၢင်းဢၼ် တူၵ်းၵႅၼ်းယူႇၵႃႈၼႂ်းမိုဝ်းပိူၼ်ႈယဝ်ႉ၊ ဢမ်ႇမီးတၢင်းဢၼ်သွၼ်ပၼ်ပိင်းၺၢပ်ႈတြႃး ယဝ်ႉလႄႈပရေႃးၽႅတ်ႈ တင်းလၢႆၵေႃႈ ဢမ်ႇလႆႈပျႃႇတိၵ်ႈရူႇပႃႇရူင်ႇသေၵႃႈတီႈ ထႃႇဝရႃႉၽြႃး၊ ယဝ်ႉ။
ၵူၼ်းထဝ်ႈၵူၼ်းၵႄႇဝဵင်း ယေႇရုသလႅမ်ႇ၊ ၸိူဝ်းၼၼ်ႉဢွၼ်ၵၼ်ၼင်ႈယူႇၵႃႈၼိူဝ် လိၼ်လႄႈယူႇတဵတ်ႇတဵတ်ႇယူႇ၊ ဢဝ်မုၼ်ႈလိၼ်ၽုၵ်ႇသႂ်ႇၵႃႈၼိူဝ်ၵွၵ်းႁူဝ်ၶဝ်ယူႇ၊ ဢဝ်ၼင်ပေႃႁတ်ႉဢႅဝ်ၶဝ်ယူႇဢေႃႈ။ သၢဝ်ၵၼ်ႇၺႃႇဝဵင်း ယေႇရုသလႅမ်ႇ၊ တင်း လၢႆၵေႃႈ၊ဢွၼ်ၵၼ်ၵူမ်ႈႁူဝ်ၶဝ်လူင်း တေႃႇထိုင်ႁွတ်ႈလိၼ်လႄႈငဝ်ယူႇဢေႃႈ။
ၵွပ်ႈပိူဝ်ႈဢၼ်ၼမ်ႉတႃတူၵ်းလႄႈမၢၵ်ႇတႃၵဝ် လုယဝ်ႉ၊ႁူဝ်ၸႂ်ၵဝ်ၵေႃႈၸဵပ်းသႅပ်ႇၼႃႇယဝ်ႉ၊ ၵဝ်မီးတၢင်းဢၼ်ၸဵပ်းၸႂ်ၸဵပ်းၶေႃးၼႃႇ ၵႃႈတီႈလွင်ႈတၢင်းဢၼ်ၵူၼ်းၵဝ် တင်းလၢႆလုလႅဝ်ၼၼ်ႉဢေႃႈ။ လွင်ႈမၼ်းၸမ်ႉ၊လုၵ်ႈဢွၼ်ႇႁၢႆးတင်း လုၵ်ႈဢွၼ်ႇလႅင်တင်းလၢႆမီးတၢင်းဢၼ် တၢႆလိုမ်းယူႇၵႃႈၼႂ်းသဵၼ်ႈတၢင်းဝဵင်းဢေႃႈ။
ၶဝ်ၸၢင်ႈႁွင်ႉသႅၼ်ႇတီႈမႄႈၶဝ်လႄႈဝႃႈ၊ “တွင်ႉမႆႈဢေႃႈ။ ယၢၵ်ႇၼမ်ႉဢေႃႈ၊” ဝႃႈၼင်ႇၼႆလႄႈ၊ၶဝ်ပိၼ်ႈလူမ်ႉၵႃႈၼႂ်း သဵၼ်ႈတၢင်းပဵၼ်ၸိူဝ်ႉၼင်ႇဢၼ် ၵူၼ်းမၢတ်ႇၸဵပ်းယူႇၼၼ်ႉသေယဝ်ႉ၊ တိုတ်ႉၸႂ်တၢႆၵႂႃႇလွႆးလွႆးၵႃႈၼႂ်းႁူဝ်ဢူၵ်း မႄႈၶဝ်ယူႇၼၼ်ႉယဝ်ႉ။
ဢူဝ်း။ ဝဵင်း ယေႇရုသလႅမ်ႇ၊ ဝဵင်းဢၼ် လီႁၵ်ႉပႅင်းၼႃႇ႟။ ၵဝ်တေလႆႈလၢတ်ႈၼႄပျႃးတီႈမႂ်းၸိူဝ်ႉၼင်ႇႁိုဝ်၊ ၵဝ်တၵ်းတေလႆႈဢဝ်မဵဝ်းဢၼ်လႂ်လႄႈတႅၵ်ႈတိူင်းၵၼ်တင်းမႂ်းလႄႈႁႂ်ႈမႂ်းလႆႈပျေႇၸႂ်ၼိမ်ၸႂ်၊ ၵွပ်ႈပိူဝ်ႈတၢင်းဢၼ်လုလႅဝ်မႂ်းၼၼ်ႉယႂ်ႇၵႂၢင်ႈ ထၼ်ႇၼမ်ႉသမ်ႇမုၵ်ႈတြႃႇလႄႈၽူႈလႂ် တၵ်းၶိုၼ်းမႄးၵုမ်းမႄးႁဵတ်းမႂ်းလႆႈ။
ပရေႃးၽႅတ်ႈ မႂ်းၸိူဝ်းၼၼ်ႉလႆႈႁၼ်ရူႇပႃႇရူင်ႇ ဢၼ်ၽိတ်းဢၼ်ပိူင်ႈ၊ဢၼ်ပႅတ်ႉဢၼ်လႅၼ်ၵူၺ်းလႄႈမႃးလၢတ်ႈမႂ်း၊ တၢင်းဢၼ်ၶဝ်ႁေႃးလၢတ်ႈၼၼ်ႉပဵၼ်မုသႃႇလႄႈ ဢမ်ႇၽုၺ်ႇၼႄဢပျတ်ႈသူလႃးလႃး၊ ၶဝ်ယင်းႁဵတ်းႁႂ်ႈသူထၢင်ႇဝႃႈ၊သူဢမ်ႇလူဝ်ႇမႆႈၸႂ်လူၺ်ႈဢပျတ်ႈလႄႈပိၼ်ႇၸႂ်သူဢေႃႈ။
ၵူၼ်းဢၼ်ၵၢႆၵႂႃႇၸိူဝ်းၼၼ်ႉၸၢင်ႈဢွၼ်ၵၼ် ငႅၵ်းႁူဝ်သၼ်ႇႁူဝ်ယူႇႁဵတ်းသဵင်ဢၼ်သႄႉသွမ်း သိသိသေႃႉသေႃႉယူႇလႄႈလၢတ်ႈဝႃႈ၊ “ဝဵင်းဢၼ်ပိူၼ်ႈႁွင်ႉႁဵၵ်ႈၸိုဝ်ႈဝဵင်းႁၢင်ႈလီ တီႈသုတ်း၊ဝဵင်းဢၼ်လီသႂၢင်ႇလီသိူဝ်း ၵႃႈၼိူဝ်လိၼ်မိူင်းၼႆႉၼၼ်ႉပဵၼ်ဝဵင်းၼႆႉႁိုဝ်း၊” ဝႃႈၼင်ႇၼႆဢေႃႈ။
ရၢၼ်ႇသူႇမႂ်းတင်းလၢႆဢွၼ်ၵၼ်သႄႉသွမ်း တၢင်ႇဢပျတ်ႈသိသိသေႃႉသေႃႉယူႇ၊ ၵိုဝ်တႃတူၺ်းမႂ်းလူၺ်ႈၸႂ်ဢၼ်ၸင်းမႂ်း ယူႇသေလႄႈၶဝ်ၵတ်းၶဵဝ်ႈၵတ်းၽၼ်း ယူႇသေလႄႈလၢတ်ႈဝႃႈ၊ “ႁဝ်းၵိူၼ်ႇယႃႉမၼ်းပႅတ်ႈယဝ်ႉ၊ဝၼ်းမိူဝ်ႈၼႆႉ ပဵၼ်ဝၼ်းဢၼ်ႁဝ်းမုင်ႈမွင်းလႄႈ မိူဝ်ႈလဵဝ်ၼႆႉႁဝ်းလႆႈထူပ်းႁၼ်မၼ်းယဝ်ႉ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ႁဵတ်းၸွမ်းၵႃႈၼင်ႇဢၼ် မၼ်းၸဝ်ႈဢၢင်ႈဢၢၼ်းၼၼ်ႉလႄႈႁဵတ်းႁႂ်ႈ ဢမိင်ႉမၼ်းၸဝ်ႈယဝ်ႉတူဝ်ႈလီငၢမ်းယဝ်ႉ၊ မၼ်းၸဝ်ႈယင်းဢမ်ႇသေလၢႆလႄႈယႃႉပႅတ်ႈ ၸွမ်းၵႃႈၼင်ႇဢၼ်မၼ်းၸဝ်ႈပျႃႇတိၵ်ႈ ဝႆႉႁိုင်ၼႃႇၼၼ်ႉယဝ်ႉ၊ မၼ်းၸဝ်ႈပၼ်ဢၶႂၢင်ႉႁႂ်ႈရၢၼ်ႇသူႇမႂ်းလႆႈ ပႄႉၼႅင်ႇလႄႈႁႂ်ႈၶဝ်လႆႈၸူမ်းသိူဝ်းၵွပ်ႈပိူဝ်ႈ မႂ်းတူၵ်းသုမ်းၼၼ်ႉယဝ်ႉ။
ဢူဝ်း။ ဝဵင်း ယေႇရုသလႅမ်ႇ၊ ႟။ ႁႂ်ႈလမ်းဝဵင်း မႂ်းႁွင်ႉသႅၼ်ႇတီႈၸဝ်ႈၽြႃးတႃႉ၊ ႁႂ်ႈၼမ်ႉတႃမႂ်းလႆယူႇဝၼ်းဝၼ်းၶိုၼ်းၶိုၼ်း မိူၼ်ၼမ်ႉႁွင်ႈၼမ်ႉၵႄးတႃႉ၊ ယင်းဢမ်ႇထၢတ်ႇဢမ်ႇယဵၼ်လႄႈႁႂ်ႈၼမ်ႉတႃမႂ်း လႆယူႇတႃႇသေႇတႃႉ။
မိူဝ်ႈၶိင်ႇၵၢင်ၶိုၼ်းၼၼ်ႉၵမ်းၵမ်းလုၵ်ႉလႄႈ ႁွင်ႉသႅၼ်ႇတီႈၸဝ်ႈၽြႃးယူႇတင်းၶိုၼ်းတႃႉ၊ ၵႃႈဢၼ်မီးၵႃႈၼႂ်းႁူဝ်ၸႂ်မႂ်းၼၼ်ႉဢဝ်ၽုၺ်ႇဢွၵ်ႇ ၼႄပျႃးတီႈၸဝ်ႈၽြႃးတႃႉ၊ ႁွမ်းမိုဝ်းမႂ်းၸူးတီႈမၼ်းၸဝ်ႈႁႂ်ႈလုၵ်ႈဢွၼ်ႇမႂ်း ၸိူဝ်းဢၼ်မီးယူႇၸွမ်းတႃႈၸွမ်းတၢင်း၊ ဢၼ်ဢိုပ်းယၢၵ်ႈလႄႈႁႅင်းဢူၼ်ႈႁႅင်းယွမ်း ၵႂႃႇယူႇၼၼ်ႉလႆႈဢသၢၵ်ႈၵတ်းယဵၼ် ၶျၢမ်းသႃႇတႃႉ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈ တူၺ်းႁၼ်လွင်ႈဢၼ်၊ ၸဝ်ႈႁဝ်းၸီႇယၢင်ႇၸိူဝ်ႉၼင်ႇၼႆတီႈၽူႈလႂ် ၼၼ်ႉသေၵမ်းတီႈၶႃႈ၊ မႄႈယိင်းတင်းလၢႆသမ်ႉပေႃးလႆႈၵိၼ် ၼိူဝ်ႉတူဝ်တၢႆလုၵ်ႈလၢင်းဢၼ်ၶဝ်ႁၵ်ႉပႅင်းၼႃႇ ၼၼ်ႉယဝ်ႉလူင်ပႄႇ၊ ယဵၸ်ႈပရေႃးႁဵၵ်ႈ တင်းလၢႆပရေႃးၽႅတ်ႈ တင်းလၢႆၵေႃႈသမ်ႉပေႃးလႆႈၶၢမ်ႇတၢင်းဢၼ် ဢဝ်တၢႆၵႃႈၼႂ်းၵျွင်းပိၵ်ႈမၢၼ်ႇၸဝ်ႈ ယဝ်ႉလူင်ပႄႇ။
ၵူၼ်းၼုမ်ႇဢိၵ်ႇတင်းၵူၼ်းထဝ်ႈတင်းလၢႆလႆႈဢွၼ်ၵၼ်လူမ်ႉတၢႆၵႃႈၼႂ်းသဵၼ်ႈတႃသၢႆတၢင်းယူႇ၊ ၽူႈမၢဝ်ႇၽူႈသၢဝ်တင်းလၢႆလႆႈၶၢမ်ႇတၢင်းဢၼ် ရၢၼ်ႇသူႇၶႃႈၽၼ်းဢဝ်တၢႆယဝ်ႉ၊ ၼႂ်းမိုဝ်ႉဝၼ်းဢၼ်ၸဝ်ႈႁဝ်းၸႂ်မႆႈၶႂ်ႈၸႃႉၼၼ်ႉ ၸဝ်ႈႁဝ်းယင်းဢမ်ႇဢဵတ်းလူလႄႈ ၶႃႈၽၼ်းဢဝ်တၢႆၶဝ်တင်းလၢႆပႅတ်ႈတီႈၶႃႈယဝ်ႉ။
ၸိူဝ်ႉၼင်ႇဢၼ်ၸဝ်ႈႁဝ်းႁွင်ႉဢဝ်ၵူၼ်းတင်းလၢႆ မႃးၶဝ်ႈပွႆးထမ်ႇမႃႉၼၼ်ႉ၊ ၸဝ်ႈႁဝ်းႁွင်ႉဢဝ်ရၢၼ်ႇသူႇတင်းလၢႆမႃးတိုၵ်းတေႃးၶႃႈၸဝ်ႈၵူႈၽၢႆႇၵူႈပႃႈတီႈၶႃႈယဝ်ႉ၊ ၼႂ်းမိုဝ်ႉဝၼ်းဢၼ် ထႃႇဝရႃႉၽြႃး၊ ၸႂ်မႆႈၶႂ်ႈၸႃႉၼၼ်ႉ ၽူႈလႂ်သေၵေႃႉသေၵူၼ်းဢမ်ႇလွတ်ႈ ဢမ်ႇၵၢင်းလႆႈတီႈၶႃႈ၊ ၶဝ်ၸိူဝ်းၼၼ်ႉၶႃႈၽၼ်းဢဝ်တၢႆလုၵ်ႈလၢင်း ၶႃႈၸဝ်ႈၸိူဝ်းဢၼ်ၶႃႈၸဝ်ႈဢုမ်ႈႁွပ်ႇလႄႈ လဵင်ႉလူၼၼ်ႉတီႈၶႃႈယဝ်ႉဢေႃႈ။
ၵဝ်ပဵၼ်ၵေႃႉဢၼ်ႁုလွင်ႈတၢင်းဢၼ်ၶၢမ်ႇ တုၵ်ႉၶႃႉတၢင်းၽၢၼ်၊ ၵႃႈတီႈတႂ်ႈၶွၼ်ႉဝၢႆတၢင်းၸႂ်မႆႈၶႂ်ႈၸႃႉ မၼ်းၸဝ်ႈဢေႃႈ။
မၼ်းၸဝ်ႈသူင်ႇၵဝ်ၵႂႃႇၵႃႈၼႂ်းတီႈဢၼ်လပ်းသိင်ႇ၊ တီႈဢၼ်ဢမ်ႇမီးဢၼ်လႅင်းၼၼ်ႉဢေႃႈ။
မၼ်းၸဝ်ႈယင်းဢမ်ႇဢဵတ်းလူၵဝ်လႄႈ ပေႃႉယႅၼ်ႉၵဝ်ယူႇၶိူဝ်းၶိူဝ်းယႂ်းယႂ်းဢေႃႈ။
မၼ်းၸဝ်ႈႁႂ်ႈၼင်ၵဝ်တင်းၼိူဝ်ႉၵဝ်ၽင်ႉလၢၼ်ႈ ၵႂႃႇလႄႈ ႁၵ်းႁိၵ်းလုပ်ႇၵဝ်တင်းလၢႆပႅတ်ႈဢေႃႈ။
မၼ်းၸဝ်ႈယူႇလွမ်ႉႁွပ်ႈၵဝ်လႄႈၶင်ၵဝ်ဝႆႉၼၼ်ႉ၊ ၵဝ်မီးတၢင်းဢၼ်တုၵ်ႉၶႃႉၶူမ်ၸႂ်ၼႃႇဢေႃႈ။
မၼ်းၸဝ်ႈဢဝ်ၵဝ်ဝႆႉၵႃႈၼႂ်းတီႈဢၼ်လပ်းသိင်ႇ၊ မိူၼ်ၸိူဝ်ႉၼင်ႇဢၼ်လႆႈယူႇၵႃႈၼႂ်းၶုမ်ပႃႇႁဵဝ်ႈ ၵေႃႉဢၼ်တၢႆပူၼ်ႉၵႂႃႇႁိုင်ၼႃႇယဝ်ႉၼၼ်ႉဢေႃႈ။
မၼ်းၸဝ်ႈႁဵတ်းႁူဝ်ႉလွမ်ႉၵဝ်ဝႆႉ၊ႁႂ်ႈၵဝ်ထၢၼ်ႈပေႃးဢမ်ႇဢွၵ်ႇလႆႈလႄႈ မၼ်းၸဝ်ႈဢဝ်ၸိူၵ်ႈလဵၵ်းဢၼ်ၼၵ်းၼႃႇ မတ်ႉၽုၵ်ႇၵဝ်ဝႆႉဢေႃႈ။
ၵဝ်ႁွင်ႉႁႃတၢင်းဢၼ်ၸွႆႈထႅမ်မႃႉၸႃႉၵဝ် သေၵေႃႈ၊ ၽြႃးပဵၼ်ၸဝ်ႈထဵင်ပႅတ်ႈတၢင်းဢၼ်ၵဝ် သူးတွင်းၼၼ်ႉဢေႃႈ။
မၼ်းၸဝ်ႈဢမ်မၢၵ်ႇႁိၼ်ဢၼ်ထၢၵ်ႇ ဢၼ်သပ်းၼၼ်ႉႁႄႉဢိုတ်းသဵၼ်ႈတၢင်းဢၼ်ၵဝ်ၵႂႃႇၼၼ်ႉဝႆႉလႄႈ ႁႂ်ႈသဵၼ်ႈတၢင်းဢၼ်ၵဝ်ၵႂႃႇၼၼ်ႉၵူတ်ႉငွၵ်းဢေႃႈ။
မၼ်းၸဝ်ႈပဵၼ်ၸိူဝ်ႉၼင်ႇမီလႄႈလွမ်ပႂ်ႉလွမ်တူၺ်း ၵဝ်ယူႇ၊ဢိၵ်ႇတင်း ပဵၼ်ၸိူဝ်ႉၼင်ႇသၢင်ႇသီႈဢၼ်ၵျွၵ်းဝႅၼ်သႂ်ႇ ၵႃႈၼိူဝ်ၵဝ်ၼၼ်ႉဢေႃႈ။
မၼ်းၸဝ်ႈလိုပ်ႈႁေႃႈၵဝ်ဢွၵ်ႇသေသဵၼ်ႈတၢင်း ၵႂႃႇသေယဝ်ႉ၊ တႅပ်းၵဝ်ၶၢတ်ႇပဵၼ်ပွတ်းပဵၼ်တွၼ်ႈလႄႈ ယႃႉၵဝ်ပႅတ်ႈဢေႃႈ။
မၼ်းၸဝ်ႈဝူတ်ႈၵၢင်ႇမၼ်းၸဝ်ႈလႄႈဢဝ်ၵဝ် ပဵၼ်ၸၢၵ်ႈမၢႆပုၼ်ႈဢၼ်တၵ်းယိုဝ်းဢေႃႈ။
မၼ်းၸဝ်ႈဢဝ်လိမ်ႈပိုၼ်မၼ်းၸဝ်ႈယိုဝ်းသႂ်ႇၵဝ်၊ ႁႂ်ႈသဵပ်ႇတႅင်းလိုၵ်ႉၼႃႇၵႃႈၼႂ်းတူဝ်ၵဝ်ဢေႃႈ။
ၵူၼ်းတင်းလၢႆဢွၼ်ၵၼ်ၶူဝ်ၵဝ်တင်းဝၼ်း တင်းဝၼ်းလႄႈ၊ ၵဝ်လႆႈပဵၼ်တီႈဢၼ်ၶဝ်ႁဵတ်းၵႂၢမ်းပျၢၵ်ႈၶူဝ် သႄႉသွမ်းယဝ်ႉ။
တုၵ်ႉၶႃႉတၢင်းၽၢၼ်ဢၼ်ၶူမ်ၼႃႇၼၼ်ႉ ၵူၺ်းၵူၺ်း၊ပဵၼ်တၢင်းၵိၼ်တၢင်းၶူပ်း ဢၼ်မၼ်းၸဝ်ႈပၼ်တီႈၵဝ်ဢေႃႈ။
မၼ်းၸဝ်ႈဢဝ်ၼႃႈၵဝ်ထူသႂ်ႇၵႃႈၼိူဝ်လိၼ်လႄႈ ဢဝ်မၢၵ်ႇႁိၼ်တွႆႇသႂ်ႇၶဵဝ်ႈၵဝ်ႁၵ်းႁိၵ်းၵႂႃႇဢေႃႈ။
ၸဝ်ႈႁဝ်းၼုၵ်ႈဢဝ်တၢင်းဢၼ်ၵတ်းယဵၼ် ၶျၢမ်းသႃႇ၊ ဢွၵ်ႇသေၵႃႈတီႈဝိၺိၺ်ႇၶႃႈၸဝ်ႈယဝ်ႉလႄႈ ၶႃႈၸဝ်ႈသမ်ႉပေႃးလူင်လိုမ်းလွင်ႈတၢင်း ဢၼ်လီဢၼ်ငၢမ်း၊ၵႂႃႇတီႈၶႃႈဢေႃႈ။
ပိူဝ်ႈၼႆလႄႈၶႃႈၸဝ်ႈၸင်ႇၶႆႈၸႂ်လႄႈလၢတ်ႈဝႃႈ၊ “တၢင်းဢၼ်လီမုင်ႈထႃႈမွင်းထႃႈၵႃႈတီႈ ထႃႇဝရႃႉၽြႃး၊ ၼၼ်ႉလုယဝ်ႉလႄႈ ၵဝ်တေမီးဢသၢၵ်ႈထႅင်ႈဢမ်ႇႁိုင်ယဝ်ႉ၊” ဝႃႈၼင်ႇၼႆဢေႃႈ။
တၢင်းဢၼ်ၶုၵ်းၸႂ်လႆႈၶႆႈၸႂ်ထူပ်းတုၵ်ႉၶႃႉ တၢင်းၽၢၼ်ၶႃႈၸဝ်ႈ၊ တၢင်းဢၼ်ၶႃႈၸဝ်ႈလႄႇၵႂႃႇလႄႇမႃး ယူႇၸိူဝ်းၼၼ်ႉ၊ ပဵၼ်တၢင်းဢၼ်လီၶူမ်ၸႂ်ၼႃႇတီႈၶႃႈဢေႃႈ။
ၶႃႈၸဝ်ႈၶုၵ်းၸႂ်လႆႈၶႆႈၸႂ်ထူပ်းလွင်ႈတၢင်း ၸိူဝ်းၼၼ်ႉသေယဝ်ႉ၊ မီးတၢင်းဢၼ်ၸႂ်လဵၵ်ႉၼႃႇတီႈၶႃႈဢေႃႈ။
ၵူၺ်းၵႃႈ၊ၶႃႈၸဝ်ႈမီးတၢင်းဢၼ်မုင်ႈထႃႈ မွင်းထႃႈယူႇ၊ ၵွပ်ႈပိူဝ်ႈဢၼ်ႁူဝ်ၸႂ်ၶႃႈၸဝ်ႈမီးသတိလႄႈ ၸဵၼ်းၸႃးလႆႈဝႃႈ၊
မႅတ်ႈတႃႇဢိၵ်ႇတင်းၵရုၼႃႇ ထႃႇဝရႃႉၽြႃး၊ ၸိုင်၊ ဢမ်ႇမီးတၢင်းဢၼ်သုတ်းဢၼ်သဵင်ႈလႄႈ။
ယင်းပဵၼ်ဢၼ်မႂ်ႇယူႇၵူႈၼႂ်ဢေႃႈ။ သဵတ်ႈၸႃႇၸဝ်ႈႁဝ်းယႂ်ႇမျၢတ်ႈၼႃႇဢေႃႈ။
ဝိၺိၺ်ႇၵဝ်ဝႃႈၸမ်ႉ၊ “ ထႃႇဝရႃႉၽြႃး၊ ပဵၼ်ပုၼ်ႈၵဝ်တႃႇၵဝ်ဢေႃႈ။ ပိူဝ်ႈၼႆလႄႈၵဝ်တၵ်းဢိင်ပိုင်ႈမၼ်းၸဝ်ႈ သေလႄႈမီးတၢင်းမုင်ႈထႃႈ မွင်းထႃႈဢေႃႈ” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ႁဵတ်းၵျေးၸူးတီႈၶဝ် ၸိူဝ်းဢၼ်မုင်ႈမွင်းမၼ်းၸဝ်ႈ၊ ဢိၵ်ႇတင်းဝိၺိၺ်ႇၶဝ်ၸိူဝ်းဢၼ်ႁႃဢဝ် မၼ်းၸဝ်ႈၼၼ်ႉဢေႃႈ။
ပိူဝ်ႈၼႆလႄႈတၢင်းဢၼ်မီးတင်းၸႂ်ယိုၼ်း ၸႂ်ယၢဝ်းလႄႈပႂ်ႉထႃႈ၊ တၢင်းဢၼ်မၼ်းၸဝ်ႈၵႄႇသႄႇၶျွတ်ႈဢဝ်ၼၼ်ႉပဵၼ်ဢၼ်ထုၵ်ႇဢၼ်လီဢေႃႈ။
တၢင်းဢၼ်ၵူၼ်းႁၢပ်ႇၵၢၼ်းၸဵမ်မိူဝ်ႈဢၼ်၊ ဢသၢၵ်ႈမၼ်းယင်းလဵၵ်ႉယင်းၼုမ်ႇၼၼ်ႉ ပဵၼ်ဢၼ်ထုၵ်ႇဢၼ်လီဢေႃႈ။
ႁႂ်ႈမၼ်းၼင်ႈယူႇၵေႃႉလဵဝ်တဵတ်ႇတဵတ်ႇၼိမ်ၼိမ်၊ ယၢမ်းမိူဝ်ႈဢၼ်မၼ်းၸဝ်ႈဢဝ်ၵၢၼ်း တၢင်ႇသႂ်ႇၼၼ်ႉတႃႉ။
ႁႂ်ႈမၼ်းဢဝ်တူဝ်ၸႂ်ၵူမ်ႈၵွမ်းၼွမ်းၶၢမ်ႇတႃႉ။ ၸၢင်ႈၶႄးတၵ်းမီးတၢင်းဢၼ်မုင်ႈမွင်းဢေႃႈ။
ႁႂ်ႈမၼ်းဝၢႆႇၼႃႈပၼ်တီႈၵေႃႉဢၼ်ပေႃႉယႅၼ်ႉ မၼ်းၼၼ်ႉလႄႈ ႁပ်ႉဢဝ်တၢင်းဢၼ်ပိူၼ်ႈသႄႉသွမ်း တၢင်ႇဢပျတ်ႈၼၼ်ႉတႃႉ။
ၸဝ်ႈၽြႃးၸၢင်ႈဢဵတ်းလူႁၵ်ႉပႅင်းလႄႈ ဢမ်ႇၸၢင်ႈၸုၼ်ႉပႅတ်ႈယူႇသေႇသေႇ။
မၼ်းၸဝ်ႈၸၢင်ႈႁႂ်ႈငိၼ်းၽၢၼ်ထိုင်ၸႂ်ဢေႃႈ။ ၵူၺ်းၵႃႈ၊မၼ်းၸဝ်ႈဢဵတ်းလူႁၵ်ႉပႅင်းႁဝ်း ယႂ်ႇၼႃႇလူင်လၢင်ဢေႃႈ။
မၼ်းၸဝ်ႈဢမ်ႇမီးၸႂ်ဢၼ်ၶႂ်ႈႁႂ်ႈၵူၼ်းမီး တုၵ်ႉၶႃႉတၢင်းၽၢၼ်လႄႈ ႁႂ်ႈလႆႈငိၼ်းၽၢၼ်ထိုင်ၸႂ်ဢေႃႈ။
တၢင်းဢၼ်ယဵပ်ႇယမ်ႈၵူၼ်းမိူင်းၸိူဝ်းဢၼ် တူၵ်းၵႅၼ်းယူႇလႂ်။
တၢင်းဢၼ်ယႃႉတြႃးဢၼ်ၵူၼ်းထုၵ်ႇၶၢမ်ႇ သိုဝ်ႈၼႃႈတႂ်ႈတႃ၊ ၽြႃးဢၼ်သုင်ၼႃႇသေပိူၼ်ႈၼၼ်ႉလႂ်။
တၢင်းဢၼ်ပိၼ်ႈၶွမ်ႈပႅတ်ႈတၢင်းဢၼ်ၸီႇယၢင်ႇၸွမ်းၼင်ႇတြႃးႁႂ်ႈပိူၼ်ႈတူၵ်းသုမ်းလႂ် ၸိူဝ်းၼၼ်ႉၸိုင်၊ ၸဝ်ႈၽြႃး၊ဢမ်ႇထုၵ်ႇၸႂ်ၵျိူၵ်ႈၸႂ်။
ၼွၵ်ႈသေတၢင်းဢၼ်ၸဝ်ႈၽြႃးမီးဢလူဝ်ႇ လႄႈႁဵတ်းၼၼ်ႉ၊ ၽူႈလႂ်သေၵေႃႈသေၵူၼ်းၸၢင်ႈႁဵတ်းႁႂ်ႈ ပဵၼ်သေၸိူဝ်ႉသေပိူင်လႆႈ။
မၢင်ႇၵလႃႇဢိၵ်ႇတင်းဢႃႉမၢင်ႇၵလႃႇ ပဵၼ်မႃးလူၺ်ႈ ဢမိင်ႉမၼ်းၸဝ်ႈမိူၼ်မိူၼ်ၵၼ်ဢေႃႈ။
ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၵူၼ်းသတ်ႉတဝႃႇဢၼ် ဢသၢၵ်ႈလိပ်းယူႇၼႆႉ၊ ပွင်ႉမိုၼ်ႇလူၺ်ႈဢပျတ်ႈတၢမ်ႇဢၼ်မၼ်း လႆႈၶၢမ်ႇယူႇၼၼ်ႉၼင်ႇႁိုဝ်။
ႁဝ်းဢွၼ်ၵၼ်ၸႅတ်ႈသေးၸၢမ်းတူၺ်းသဵၼ်ႈတၢင်းဢၼ်ႁဝ်းပႆၸိူဝ်းၼၼ်ႉလႄႈ ဢွၼ်ၵၼ်ဝၢႆႇၶိုၼ်းၸူးတီႈ ထႃႇဝရႃႉၽြႃး၊ တႃႉ။
ဢွၼ်ၵၼ်ၽုၺ်ႇပိုတ်ႇႁူဝ်ၸႂ်ႁဝ်းၸူးတီႈ ၽြႃးပဵၼ်ၸဝ်ႈၽုင်ႇၵၢင်ႁၢဝ်၊ ႁဵတ်းပထၼႃႇတၢင်းဢၼ်သူးတွင်းလႄႈဝႃႈ၊
“ၶႃႈၸဝ်ႈႁဝ်းၶဝ်ၽိတ်းပိူင်ႈလႄႈလုၵ်ႉၽိုၼ်ႉ မႅၼ်ႈတီႈၶႃႈယဝ်ႉ၊ ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်း ယင်းဢမ်ႇပွႆႇလွတ်ႈဢပျတ်ႈတီႈၶႃႈ။
တေႃးသႃႉတၢင်းၸႂ်မႆႈၶႂ်ႈၸႃႉၸဝ်ႈႁဝ်းႁူမ်ႇသုမ်ႇ ၸႂ်ၵရုၼႃႇၸဝ်ႈႁဝ်းယဝ်ႉလႄႈ ၸဝ်ႈႁဝ်းလိုပ်ႈလမ်းၸွမ်းၶႃႈၸဝ်ႈႁဝ်းၶဝ်လႄႈ ဢဝ်တၢႆတီႈၶႃႈဢေႃႈ။
မွၵ်ႇၵုမ်ႈတၢင်းၸႂ်မႆႈၶႂ်ႈၸႃႉၸဝ်ႈႁဝ်းၼၼ်ႉ ၼႃတၼ်ၼႃႇလႄႈ ၵႂၢမ်းသူးတွင်းၶႃႈၸဝ်ႈႁဝ်းၶဝ်ဢမ်ႇၵႂႃႇၽႅဝ်ႁွတ်ႈၵႃႈတီႈၸဝ်ႈႁဝ်းလႆႈတီႈၶႃႈယဝ်ႉ။
ၸဝ်ႈႁဝ်းႁႂ်ႈၶႃႈၸဝ်ႈႁဝ်းၶဝ်ပဵၼ်ၸိူဝ်ႉၼင်ႇ မုၼ်ဢၢင်ႉဢၢၵ်ႇ၊ ဢၼ်ၽဵဝ်ႈပတ်းဢွၵ်ႇပႅတ်ႈသေၵႃႈၼႂ်းၵူၼ်းမဵဝ်း တင်းလၢႆၼၼ်ႉတီႈၶႃႈဢေႃႈ။
ရၢၼ်ႇသူႇၶႃႈၸဝ်ႈႁဝ်းၶဝ်ၸိူဝ်းၼၼ်ႉ တင်းသဵင်ႈတင်းလူင်၊ ဢွၼ်ၵၼ်ယႃႉယူၵ်ႉသႄႉသွမ်းၶႃႈၸဝ်ႈႁဝ်းၶဝ် တီႈၶႃႈဢေႃႈ။
တၢင်းဢၼ်လီၵူဝ်လီႁႄ၊တၢင်းဢၼ်တူၵ်း ၵႃႈၼႂ်းလုၵ်းၼႂ်းၶုမ်၊ တၢင်းဢၼ်သဵတ်ႇဢၼ်ငႅဝ်၊တၢင်းဢၼ် ပႄႇၽဵဝ်ႈယႃႉပႅတ်ႈၸိူဝ်းၼၼ်ႉ၊ ဢွၼ်ၵၼ်ႁွတ်ႈထိုင်တီႈၶႃႈၸဝ်ႈႁဝ်းၶဝ် တီႈၶႃႈယဝ်ႉ၊
မၢၵ်ႇတႃၵဝ်ၼႆႉၼမ်ႉတႃလႆယူႇမိူၼ်ၼင်ႇ ၼမ်ႉႁွင်ႈလႆယူႇ၊ ၵွပ်ႈပိူဝ်ႈဢၼ်ၵူၼ်းၵဝ်တင်းလၢႆ လုလႅဝ်ၼၼ်ႉဢေႃႈ။
ၼမ်ႉတႃၵဝ်ဢွၵ်ႇလႄႈလႆယူႇ၊ ပဵၼ်ႁွင်ႈပဵၼ်ၵႄးဢၼ်ဢမ်ႇယူတ်း ဢမ်ႇႁႅင်ႈၼၼ်ႉ။
တေႃႇထိုင်ႁွတ်ႈ ထႃႇဝရႃႉၽြႃး၊ ယူႇၵႃႈၼိူဝ်၊ ၽုင်ႇၵၢင်ႁၢဝ်လူတူၺ်းႁဝ်းၼၼ်ႉဢေႃႈ။
ႁူဝ်ၸႂ်ၵဝ်မႆႈႁွၼ်ႉယူႇမိူဝ်ႈဢၼ်ၵဝ်ႁၼ်၊ ၵႃႈဢၼ်ပဵၼ်မႃးတီႈၽူႈယိင်းဢၼ်မီး ၵႃႈၼႂ်းဝဵင်းလူင်ၵဝ်ၼၼ်ႉဢေႃႈ။
ရၢၼ်ႇသူႇၸိူဝ်းဢၼ်ယင်းဢမ်ႇမီးလွင်ႈ မီးတၢင်းလႄႈၸင်းၵဝ်ၼၼ်ႉ၊ ဢွၼ်ၵၼ်ၵၢင်ဢဝ်ၵဝ်မိူၼ်ၸိူဝ်ႉၼင်ႇဢၼ် ၵၢင်ဢဝ်ၼူၵ်ႉၼၼ်ႉယဝ်ႉ။
ၶဝ်ဢွၼ်ၵၼ်ဢဝ်ၵဝ်ထိမ်ႈသႂ်ႇၼႂ်းလုၵ်းၼႂ်းၶုမ် တင်းလိပ်းသေယဝ်ႉ၊ ဢဝ်မၢၵ်ႇႁိၼ်ဢိုတ်းပၢၵ်ႇမၼ်းဝႆႉယဝ်ႉ။
ၼမ်ႉထူမ်ႈႁူဝ်ၵဝ်လႄႈ ၵဝ်ထၢင်ႇဝႃႈ၊ၵဝ်ၸမ်တၵ်းတၢႆယဝ်ႉဢေႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈယူႇၵႃႈတီႈဢၼ်လိုၵ်ႉသေပိူၼ်ႈၼႂ်းလုၵ်းၼႂ်းၶုမ်၊ ႁွင်ႉႁႃၼႃႇမႃႉၸိုဝ်ႈသဵင်ၸဝ်ႈႁဝ်း တီႈၶႃႈဢေႃႈ။
ၼင်ႇၼၼ်လႄႈမိူဝ်ႈဢၼ်ၶႃႈၸဝ်ႈ တွင်းပၢၼ်ႇၸဝ်ႈႁဝ်း၊ ႁႂ်ႈၸဝ်ႈႁဝ်းဢဵတ်းလူထွမ်ႇဢဝ်ၼၼ်ႉ၊ၸဝ်ႈႁဝ်း ငိၼ်းသဵင်ၶႃႈၸဝ်ႈတီႈၶႃႈဢေႃႈ။
ၸဝ်ႈႁဝ်းၶိုၼ်းတွပ်ႇၶႃႈၸဝ်ႈလႄႈမီးဢမိင်ႉဝႃႈ၊ ‘ယႃႇပေၵူဝ်ပေႁႄ’ ဝႃႈၼင်ႇၼႆတီႈၶႃႈဢေႃႈ။
ၸဝ်ႈၽြႃးတီႈၶႃႈ။ ၸဝ်ႈႁဝ်းမႃးၵႄႇၼုၵ်ႈဢဝ် ၶႃႈၸဝ်ႈလႄႈ ၵႄႇသႄႇဢဝ်ဢသၢၵ်ႈၶႃႈၸဝ်ႈတီႈၶႃႈယဝ်ႉ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းႁၼ်လွင်ႈတၢင်းဢၼ်ရၢၼ်ႇသူႇၶႃႈၸဝ်ႈၸိူဝ်းၼၼ်ႉ၊ ၼိၵ်ႈၸၢၵ်ႈငႅၼ်းသႄးၶႃႈၸဝ်ႈထၼ်ႇလႂ် ယူႇၼၼ်ႉတီႈၶႃႈယဝ်ႉ၊ ၶႅၼ်းတေႃႈၸီႇယၢင်ႇတြႃးၽၢႆႇၶႃႈၸဝ်ႈ သေၵမ်းတီႈၶႃႈ။
ၸဝ်ႈႁဝ်းႁၼ်ၵႃႈၼင်ႇဢၼ်ၶဝ်ၸင်းၶႃႈၸဝ်ႈထၢၼ်ႇႁိုဝ်၊ဢိၵ်ႇတင်း ၶဝ်လွမ်ၵျၢမ်ႇပွင်ဢၼ်ဢမ်ႇလီဢမ်ႇငၢမ်းတီႈ ၶႃႈၸဝ်ႈၸိူဝ်းၼၼ်ႉတီႈၶႃႈယဝ်ႉ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းငိၼ်း တၢင်းဢၼ်သႄႉသွမ်း၊ တၢင်းဢၼ်လွမ်ၵျၢမ်ႇပွင်ဢမ်ႇလီဢမ်ႇငၢမ်း ၵႃႈမီးတီႈၶႃႈၸဝ်ႈ။
ၶဝ်လၢတ်ႈၸႃလွင်ႈၶႃႈၸဝ်ႈလႄႈၶိုင်ပွင်ဢၼ်ဢမ်ႇလီ ဢမ်ႇငၢမ်းတီႈၶႃႈၸဝ်ႈယူႇ၊ တင်းဝၼ်းတင်းဝၼ်းတီႈၶႃႈယဝ်ႉ။
ၸဝ်ႈႁဝ်းၶႅၼ်းတေႃႈတူၺ်းၶႃႈလူး။ ဢမ်ႇဝႃႈၶဝ်တေၸုၵ်းယူႇဢမ်ႇၼၼ်ၼွၼ်းယူႇ၊ တူဝ်ၶႃႈၼႆႉပဵၼ်တီႈဢၼ်ၶဝ်ႁဵတ်းၵႂၢမ်း ၸၢပ်ႈလဵၼ်ႈၵူၺ်းၶႃႈဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈ ၸီႇယၢင်ႇပၼ်တၢမ်ႇတီႈတၢင်းဢၼ် ၶဝ်လႆႈႁဵတ်းၼၼ်ႉသေၵမ်းတီႈၶႃႈ။
ၶႅၼ်းတေႃႈႁႂ်ႈၶဝ်ၸႂ်လုႁႅင်းဢူၼ်ႈလႄႈ ႁႂ်ႈတၢင်းဢၼ်ၸဝ်ႈႁဝ်းၵိၼ်ႇဝႃႈၼၼ်ႉ၊ တူၵ်းႁွတ်ႈၵႃႈၼိူဝ်ၶဝ်သေၵမ်းလူၺ်ႈ။
ဢူဝ်း ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈ ပႃးတင်းတေႃးသႃႉသေလႄႈ လိုပ်ႈလမ်းၶဝ်၊ယႃႉၽဵဝ်ႈၶဝ်ပႅတ်ႈသေ ၵႃႈတီႈမိူင်းလေႃးၵႃႉၼႆႉ သေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ၶမ်းၸိုင်၊မွင်ၵႂႃႇလႄႈၶမ်းလွတ်ႈငၢၼ်ႇၼၼ်ႉ ပႅၵ်ႇပိူင်ႈၵႂႃႇဢေႃႈ။ သႅင်ရတၼႃႇၵျွင်းပိၵ်ႈမၢၼ်ႇၸဝ်ႈၵေႃႈ မၢၵ်ႇမိူဝ်ၵႂႃႇၵႃႈတီႈသဵၼ်ႈတႃ သၢႆတၢင်းလႂ်ယဝ်ႉ။
ၵူၼ်းၼုမ်ႇဝဵင်း ၸိဢုၼ်ႇ၊ တင်းလၢႆယၢမ်ႈလႆႈပဵၼ် ဢၼ်ထိူၵ်ႈၵႃႈထိူၵ်ႈၶၼ်တၢၼ်ႇၶမ်းမႃးယဝ်ႉ၊ မိူဝ်ႈလဵဝ်ၼႆႉၶဝ်လႆႈၶၢမ်ႇတၢင်းဢၼ်ဝႆႉၵႃႈၶၼ် မိူၼ်မေႃႈလိၼ်ဢၼ်ၺၢမ်ႉၼၼ်ႉယဝ်ႉ။
တေႃႈၵႃႈမႃလိၼ်တူဝ်မႄႈတင်းလၢႆယင်းၸၢင်ႈ တိုၵ်းၼူမ်းပၼ်တီႈလုၵ်ႈၶဝ်ဢေႃႈ။ ၵူၼ်းၵဝ်တင်းလၢႆၸမ်ႉ၊လိူင်းၵျၢမ်းမိူၼ် ၼူၵ်ႉၵလႃႇဢုၵ်ႈဢၼ်ပွႆႇပႅတ်ႈ လုၵ်ႈမၼ်းၼၼ်ႉယဝ်ႉ။
လုၵ်ႈဢွၼ်ႇၶဝ်ၸိူဝ်းၼၼ်ႉဢိုပ်းၼူမ်းလႄႈ လိၼ်ႉၶဝ်ၸပ်းယူႇၵႃႈတီႈႁိူၵ်ႇဢေႃႈ။ ၶဝ်သမ်ႉယွၼ်းၵိၼ်တၢင်းၵိၼ်သေၵေႃႈ ဢမ်ႇမီးၵေႃႉဢၼ်တၵ်းပၼ်တီႈၶဝ်။
ၶဝ်ၸိူဝ်းဢၼ်ယၢမ်ႈၵိၼ်လီၼၼ်ႉလႆႈဢိုပ်းတၢႆ ၵႃႈတီႈသဵၼ်ႈတႃသၢႆတၢင်းလႄႈ ၶဝ်ၸိူဝ်းဢၼ်ယၢမ်ႈယႂ်ႇမႃးၵႃႈၼိူဝ် ၽႃႈၵွပ်းဢၼ်လႅင်ၵမ်ႇၼၼ်ႉ၊ လႆႈၵၢၼ်းၵႃႈတီႈၵွင်ယုပ်းယၢပ်းႁႂ်ႈလႆႈသွၵ်ႈႁႃ ဢဝ်တၢင်းၵိၼ်တၢင်းၶူပ်းဢေႃႈ။
ၵူၼ်းၵဝ်တင်းလၢႆလႆႈၶၢမ်ႇတၢမ်ႇဢပျတ်ႈဢၼ် ယဵင်ႈၶႅၼ်းယႂ်ႇၼႃႇသေၵူၼ်းဝဵင်း သေႃးတုမ်ႇ၊ ဝဵင်းဢၼ်လုလႅဝ်ၵႂႃႇၵမ်းလဵဝ်လူၺ်ႈမိုဝ်း ၽြႃးပဵၼ်ၸဝ်ႈၼၼ်ႉဢေႃႈ။
ၸဝ်ႈၶုၼ်ၸဝ်ႈၵွၼ်းႁဝ်းတင်းလၢႆ ၼၼ်ႉ ယၢမ်ႈမူတ်းသႂ်ၼႃႇသေမူၺ်ႁႃႇ၊ ၽိူၵ်ႇၶၢဝ်ၼႃႇသေၼမ်ႉၼူမ်းလႄႈ၊ၼိူဝ်ႉၶဝ်ၼင်ၶဝ် လႅင်ၼႃႇသေသႅင်လႅင်လႄႈ ဢဵၼ်လိူတ်ႈၶဝ်ၼၼ်ႉမိူၼ်ၸိူဝ်ႉၼင်ႇ သႅင်ႇသွမ်ႇဢေႃႈ။
မိူဝ်ႈလဵဝ်ၼႆႉၸမ်ႉ၊ႁၢင်ႈၽၢင်ၶဝ်လမ်ၼႃႇသေ ထၢၼ်ႇမီႈလႄႈ ၽူႈလႂ်ယင်းဢမ်ႇတွင်းၶဝ်လႆႈၵႃႈတီႈ သဵၼ်ႈတႃသၢႆတၢင်းယဝ်ႉ၊ ၼင်ၶဝ်ၼၼ်ႉၸပ်းယူႇၵႃႈတီႈလုပ်ႇၶဝ်လႄႈႁႅင်ႈႁွင်ၵႂႃႇမိူၼ်ၸိူဝ်ႉၼင်ႇၽိုၼ်းၼၼ်ႉဢေႃႈ။
ၶဝ်ၸိူဝ်းဢၼ်တၢႆၵႃႈၼႂ်းၼႃႈသိုၵ်းၼၼ်ႉ ယဵင်ႈၶႅၼ်းမီးမၢင်ႇၵလႃႇ၊ ၼႃႇသေၶဝ်ၸိူဝ်းဢၼ်တၢႆလိုၼ်းလင်ၵွပ်ႈပိူဝ်ႈ ဢိုပ်းတၢင်းၵိၼ်လႄႈတၢႆၵႂႃႇလွႆးလွႆး၊ ပိူဝ်ႈဢၼ်ဢမ်ႇမီးတၢင်းၵိၼ်တၢင်းၶူပ်းပုၼ်ႈဢၼ် တၵ်းလဵင်ႉလူဢသၢၵ်ႈၶဝ်ၸိူဝ်းၼၼ်ႉဢေႃႈ။
မႄႈယိင်းၸိူဝ်းဢၼ်မီးၸႂ်ဢဵတ်းလူလႄႈ ၸႂ်ဢူၼ်ႈဢွၼ်ႇသေၵေႃႈ၊ လႆႈဢဝ်တင်းမိုဝ်းၶဝ်တူမ်ႈႁုင်လုၵ်ႈလၢင်းၶဝ်လႄႈ လုၵ်ႈလၢင်းၶဝ်ၸိူဝ်းၼၼ်ႉလႆႈပဵၼ် တၢင်းၵိၼ်တၢင်းၶူပ်းပုၼ်ႈၶဝ်၊ ၼႂ်းမိူဝ်ႈဢၼ်ၵူၼ်းမဵဝ်းၵဝ်လုလႅဝ်ၼၼ်ႉဢေႃႈ။
ထႃႇဝရႃႉၽြႃး၊ ႁႂ်ႈတၢင်းၸႂ်မႆႈၶႂ်ႈၸႃႉၸဝ်ႈ လေႃႇလႆထူၼ်ႈတဵမ်ယဝ်ႉလႄႈ ဢဝ်ၽႆးတုတ်ႇဝဵင်း ၸိဢုၼ်ႇ၊ ႁႂ်ႈမႆႈ တေႃႇထိုင်ႁွတ်ႈႁၢၵ်ႈလမ်းဝဵင်းယဝ်ႉ။
ၶုၼ်ႁေႃၶမ်းလေႃးၵီႇတင်းလၢႆ၊ဢိၵ်ႇတင်း ၵူၼ်းသတ်ႉတဝႃႇၵႃႈၼိူဝ်လိၼ်မိူင်း၊ တင်းသဵင်ႈတင်းလူင်ဢမ်ႇမီးၽူႈလႂ် သေၵေႃႉသေၵူၼ်းယုမ်ႇ၊ လွင်ႈဢၼ်ရၢၼ်ႇသူႇ၊ဢိၵ်ႇတင်းၵူၼ်းၸိူဝ်းဢၼ် မႃးတိုၵ်းတေႃးၼၼ်ႉ၊ တၵ်းၶဝ်ႈၵႃႈၼႂ်းၽၵ်းတူဝဵင်း ယေႇရုသလႅမ်ႇ၊ လႆႈၼၼ်ႉဢေႃႈ။
လွင်ႈၼႆႉလႆႈပဵၼ်မႃးၵွပ်ႈပိူဝ်ႈဢပျတ်ႈ ပရေႃးၽႅတ်ႈ မၼ်းဢိၵ်ႇတင်း ယဵၸ်ႈပရေႃးႁဵၵ်ႈ မၼ်းတင်းလၢႆဢၼ်ၸၢင်ႈဢဝ်၊ ၶဝ်ၸိူဝ်းဢၼ်သိုဝ်ႈတေႃႇၼၼ်ႉ တၢႆပႅတ်ႈၼၼ်ႉဢေႃႈ။
ပရေႃးၽႅတ်ႈတင်းယဵၸ်ႈပရေႃးႁဵၵ်ႈ ၸိူဝ်းၼၼ်ႉလႄႇၵႂႃႇလႄႇမႃးၵႃႈၼႂ်း သဵၼ်ႈတႃသၢႆတၢင်း၊ မိူၼ်ၸိူဝ်ႉၼင်ႇၵူၼ်းတႃမွတ်ႇလႄႈ ၵူဝ်ႈၵိူၵ်ႇဝႆႉတင်းလိူတ်ႈယူႇ၊ တေႃႇထိုင်ႁွတ်ႈၽူႈလႂ်ထၢၼ်ႈပေႃး ဢမ်ႇႁတ်းတိူဝ်ႉထုၵ်ႇၶဝ်ဢေႃႈ။
ပိူၼ်ႈဢွၼ်ၵၼ်သႅၼ်ႇႁွင်ႉတီႈၶဝ်လႄႈဝႃႈ၊ “ၵႂႃႇတႃႉ။ သူၸိူဝ်းဢၼ်ဢမ်ႇမူတ်းသႂ်ၶဝ်႟။ ၵႂႃႇတႃႉ၊ၵႂႃႇတႃႉ။ ယႃႇပေတိူဝ်ႉထုၵ်ႇၵဝ်” ဝႃႈၼင်ႇၼႆဢေႃႈ။ ၵွပ်ႈပိူဝ်ႈၸိူဝ်ႉၼင်ႇၼႆလႄႈၶဝ်လႆႈပဵၼ်ၵူၼ်း ဢၼ်ၼီပၢႆႈလႄႈ လႄႇလဵပ်ႈၵႂႃႇမႃးယူႇၵူႈတီႈၵူႈလႅၼ်သေယဝ်ႉ၊ ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၸၢင်ႈလၢတ်ႈ တီႈၶဝ်လႄႈဝႃႈ၊ “ၶဝ်ၼၼ်ႉဢမ်ႇထုၵ်ႇလီယူႇလူၺ်ႈၵၼ်တင်းႁဝ်း လႃးလႃး” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ယင်းဢမ်ႇဝႆႉဢမုတီႈၶဝ်လႄႈ ႁႂ်ႈၶဝ်ၽၢတ်ႇၽႄၵၼ်ယဝ်ႉ၊ ပိူၼ်ႈၵေႃႈဢမ်ႇရူဝ်ႇသေႇၵူဝ်ယမ်ယဵၸ်ႈပရေႃးႁဵၵ်ႈ ၶဝ်ယဝ်ႉလႄႈ ယင်းဢမ်ႇၼပ်ႉယမ်ၵေႃႉဢၼ်ထဝ်ႈဢၼ်ၵႄႇ ၸိူဝ်းၼၼ်ႉလႄႈယူႇဢေႃႈ။
ႁဝ်းယင်းတိုၵ်ႉပႂ်ႉမုင်ႈပႂ်ႉမွင်းတၢင်းၸွႆႈ တၢင်းထႅမ်သေၵေႃႈတၢင်းမုင်ႈမွင်းၼၼ်ႉ ဢမ်ႇမီးဢၵျူဝ်းလႄႈ တေႃႇထိုင်ႁွတ်ႈႁႂ်ႈသၢႆတႃႁဝ်း ဢူၼ်ႈၵႂႃႇၼၼ်ႉယဝ်ႉ၊ ႁဝ်းပႂ်ႉမုင်ႈပႂ်ႉမွင်းထႃႈႁႂ်ႈလႆႈတၢင်းဢၼ်ၸွႆႈ ဢၼ်ထႅမ်တီႈၵူၼ်းမဵဝ်းဢၼ်၊ ဢမ်ႇၵႄႇသႄႇၶျွတ်ႈဢဝ်ႁဝ်းလႆႈၼၼ်ႉလူင်ပႄႇ။
ရၢၼ်ႇသူႇႁဝ်းၶႂ်ႈၸွမ်းႁွႆးတိၼ်ႁဝ်းတေႃႇထိုင်ႁွတ်ႈ ႁဝ်းထၢၼ်ႈပေႃးဢမ်ႇၸၢင်ႈၵႂႃႇၵႃႈၼႂ်း သဵၼ်ႈတႃသၢႆတၢင်းလႆႈယဝ်ႉ၊ မိုဝ်ႉဝၼ်းဢသၢၵ်ႈႁဝ်းၸေးယဝ်ႉလႄႈ တီႈသုတ်းတီႈၵွႆႁဝ်းၵေႃႈႁွတ်ႈထိုင်ယဝ်ႉ။
ၶဝ်ၸွမ်းၶႆႈၸွမ်းႁႃႁဝ်းၶၼ်ၽႂ်းလိူဝ်တွၼ်းၼႃႇ သေၼူၵ်ႉၶၢင်ႇလေႃႉဢၼ်လုၵ်ႉၵႃႈၼိူဝ် ၽႃႉၵၢင်ႁၢဝ်လေႃႇလူင်းမႃးၼၼ်ႉလႄႈ ၶဝ်ဢွၼ်ၵၼ်ၸွမ်းႁႃႁဝ်းၵႃႈၼိူဝ်သၼ်လွႆ သေလႄႈပႂ်ႉထႃႈတိဢဝ်ႁဝ်းၵႃႈတီႈ ၼႂ်းထိူၼ်ႇလႅင်ႉယူႇဢေႃႈ။
လူမ်းႁၢႆၸႂ်ႁဝ်းဢၼ်ဝႃႈ၊ၶုၼ်ႁေႃၶမ်းဢၼ် ထႃႇဝရႃႉၽြႃး၊ ပၼ်ၽိၵ်ႈသိၵ်ႈဝႆႉလႄႈ ႁဝ်းလႆႈလၢတ်ႈဝႃႈ၊ “ႁဝ်းလႆႈဢွၼ်ၵၼ် သွၼ်ႈႁူမ်ႈသွၼ်ႈၽူၺ်းမၼ်း၊ ႁႂ်ႈႁဝ်းလႆႈဢသၢၵ်ႈၵတ်းယဵၼ်ၶျၢမ်းသႃႇ ယူႇၵႃႈၼႂ်းၵူၼ်းတၢင်ႇၸိူဝ်ႉတၢင်ႇမဵဝ်း ၼၼ်ႉဢေႃႈ၊” ဝႃႈၼင်ႇၼႆၼၼ်ႉ၊ ၵူၺ်းၵႃႈ၊ၵေႃႉၼၼ်ႉလႆႈၶၢမ်ႇတၢင်းဢၼ်တိလႆႈၵႃႈၼႂ်းၶုမ်လိၼ်လုၵ်းလိၼ်ရၢၼ်ႇသူႇၶဝ်ယဝ်ႉ။
ၵူၼ်းဝဵင်း ဢေႇတုမ်ႇ၊ မိူင်း ဢုၸႃႉ၊ ၶဝ်႟။ ဢွၼ်ၵၼ်ၶူဝ်ႁုၼ်းတႃႉ၊ ဢွၼ်ၵၼ်ၸူမ်းသိူဝ်းယၢမ်းမိူဝ်ႈဢၼ် မီးဢၶႂၢင်ႉၼၼ်ႉတႃႉ၊ တၢင်းဢၼ်သူတၵ်းလုလႅဝ်ၼၼ်ႉယင်းတိုၵ်ႉ မႃးယူႇဢေႃႈ။ သူၵေႃႈတၵ်းတေဝၢင်ႇဝီႈဝၢင်ႇဝိူဝ်ႈလူၺ်ႈ တူဝ်ပူၺ်ဢၼ်လီဢၢႆၼၼ်ႉဢေႃႈ။
ၵူၼ်းဝဵင်း ၸိဢုၼ်ႇ၊ ႟။ တၢမ်ႇဢပျတ်ႈ ၵႃႈဢၼ်မႂ်းလႆႈၶၢမ်ႇၼၼ်ႉယဝ်ႉတူဝ်ႈ ယဝ်ႉယဝ်ႉ၊မၼ်းၸဝ်ႈတၵ်းဢမ်ႇပွႆႇမႂ်းပဵၼ် ၶႃႈၵူၼ်းတၢင်ႇမိူင်းထႅင်ႈယဝ်ႉ၊ ၵူၼ်းဝဵင်း ဢေႇတုမ်ႇ၊ ႟၊ ထႃႇဝရႃႉၽြႃး၊ တၵ်းၸီႇယၢင်ႇပၼ်တၢမ်ႇတီႈမႂ်းယူႇလႄႈ မၼ်းၸဝ်ႈတၵ်းၽုၺ်ႇဢွၵ်ႇၼႄပျႃးဢပျတ်ႈ မႂ်းၸိူဝ်းၼၼ်ႉဢေႃႈ။
ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈၶုၵ်းၸႂ်လႆႈ ၶႆႈၸႂ်ထူပ်းလွင်ႈတၢင်းဢၼ်၊ ပဵၼ်မႃးၵႃႈတီႈၶႃႈၸဝ်ႈႁဝ်းၶဝ် ၼၼ်ႉသေၵမ်းတီႈၶႃႈ၊ ၶႅၼ်းတေႃႈလူတူၺ်းလႄႈႁၼ်လွင်ႈ တၢင်းဢၼ်ၶႃႈၸဝ်ႈႁဝ်းၶဝ် လႆႈသရေႇလုၼၼ်ႉသေၵမ်းတီႈၶႃႈ။
လိၼ်ဢမူၺ်ႇၶႃႈၸဝ်ႈႁဝ်းၶဝ်ၼၼ်ႉလႆႈႁွတ်ႈ ထိုင်ၵႃႈၼႂ်းမိုဝ်း၊ ၵူၼ်းတၢင်ႇၸိူဝ်ႉတၢင်ႇၶိူဝ်းယဝ်ႉလႄႈ ႁိူၼ်းၶႃႈၸဝ်ႈႁဝ်းၶဝ်လႆႈႁွတ်ႈထိုင်၊ ၵႃႈၼႂ်းမိုဝ်းၵူၼ်းတၢင်ႇသိုင်ႇတၢင်ႇမိူင်း တီႈၶႃႈယဝ်ႉ။
ၶႃႈၸဝ်ႈႁဝ်းၶဝ်လႆႈပဵၼ်လုၵ်ႈၽၢၼ်ပေႃႈ ဢၼ်ပေႃႈတၢႆတီႈၶႃႈယဝ်ႉ၊မႄႈၶႃႈၸဝ်ႈ ႁဝ်းၶဝ်လႆႈပဵၼ်မႄႈမၢႆႈတီႈၶႃႈယဝ်ႉ။
ပၼ်ငိုၼ်းၸင်ႇလႆႈၵိၼ်ၼမ်ႉတီႈၶႃႈယဝ်ႉ၊ ၽိုၼ်းၵေႃႈလႆႈပၼ်ၵႃႈၶၼ်မၼ်းလႄႈ သိုဝ်ႉဢဝ်တီႈၶႃႈဢေႃႈ။
လႆႈၵိုတ်ႉႁၢပ်ႇၼၵ်းၼႃႇလႄႈၶၢမ်ႇ တၢင်းဢၼ်ၼိၵ်ႈၸၢၵ်ႈငႅၼ်းသႄး တီႈၶႃႈလႄႈႁိူဝ်ႉမွႆႈၼႃႇသေၵေႃႈ ဢမ်ႇလႆႈလိုဝ်ႈလႆႈသဝ်းတီႈၶႃႈ။
ၶႃႈၸဝ်ႈႁဝ်းၶဝ်လႆႈၶၢမ်ႇႁဵတ်းၶႃႈလႄႈ ယွၼ်းၵိၼ်တီႈၵူၼ်းမိူင်း ဢေးၵျိပ်ႉ၊ ဢိၵ်ႇတင်းၵူၼ်းမိူင်း ဢႃႇသီးရီးယႃး၊ ၸိူဝ်းၼၼ်ႉ၊ ႁႂ်ႈလႆႈတၢင်းၵိၼ်တၢင်းၶူပ်းဢၼ်ပေႃးၵုမ်ႇ လဵင်ႉၸႂ်တီႈၶႃႈဢေႃႈ။
ပူႇမွၼ်ႇၶႃႈၸဝ်ႈႁဝ်းၶဝ်လႆႈႁဵတ်းဢပျတ်ႈလႄႈ တၢႆၵႂႃႇသဵင်ႈယဝ်ႉ၊ ၶႃႈၸဝ်ႈႁဝ်းၶဝ်သမ်ႉလႆႈၶၢမ်ႇတၢမ်ႇဢပျတ်ႈ ၶဝ်ၼၼ်ႉတီႈၶႃႈဢေႃႈ။
ၶဝ်ၸိူဝ်းဢၼ်ပဵၼ်ၶႃႈၼၼ်ႉလႆႈဢုပ်ႉပိူင်ႇ ၵႃႈၼိူဝ်ၶႃႈၸဝ်ႈႁဝ်းၶဝ်လႄႈ ဢမ်ႇမီးၽူႈလႂ်တႃႇတေၵႄႇသႄႇၼုၵ်ႈဢဝ်၊ ၶႃႈၸဝ်ႈႁဝ်းၶဝ်ဢွၵ်ႇသေၵႃႈၼႂ်းမိုဝ်း ၶဝ်ၼၼ်ႉတီႈၶႃႈ။
ၶႃႈၸဝ်ႈႁဝ်းၶဝ်လႆႈဢဝ်ဢသၢၵ်ႈလႅၵ်ႈ ပုၼ်ႈဢၼ်တၵ်းလႆႈႁႃတၢင်းၵိၼ် တၢင်းၶူပ်းၵႃႈတီႈဝၢၼ်ႈၼွၵ်ႈၼႃးပၢင်ႇ၊ ၵွပ်ႈပိူဝ်ႈဢၼ်ရၢၼ်ႇသူႇတင်းလၢႆလႄႇလဵပ်ႈ ၵူႈတီႈၵူႈလႅၼ်ယူႇၼၼ်ႉတီႈၶႃႈဢေႃႈ။
ဢၢႆႁႅင်းတၢင်းဢၼ်ဢိုပ်းဢၼ်ယၢၵ်ႈၼၼ်ႉ မႆႈႁွၼ်ႉၼႃႇလူင်လၢင်၊ တေႃႇထိုင်ႁွတ်ႈၽိဝ်ၼင်ၶႃႈၸဝ်ႈႁဝ်းၶဝ်မႆႈႁွၼ်ႉမိူၼ်ၸိူဝ်ႉၼင်ႇတဝ်ႈၽႆးတီႈၶႃႈယဝ်ႉ။
ၶဝ်ဢွၼ်ၵၼ်ႁဵတ်းဢထမ်ႇမႃႉတီႈ မႄႈယိင်းတင်းလၢႆ၊ ၵႃႈၼႂ်းဝဵင်း ၸိဢုၼ်ႇ၊ ဢိၵ်ႇတင်း ၽူႈသၢဝ်တင်းလၢႆၵႃႈၼႂ်းဝၢၼ်ႈၵႃႈၼႂ်း ဝဵင်း၊မိူင်း ယုတႃႉ၊ တီႈၶႃႈဢေႃႈ။
ၸဝ်ႈၶုၼ်ၸဝ်ႈၵွၼ်းတင်းလၢႆလႆႈၶၢမ်ႇတၢင်းဢၼ် မတ်ႉမိုဝ်းသေယဝ်ႉႁွႆႈၶႅၼ်ဝႆႉလႄႈ ၵူၼ်းၵႄႇၵူၼ်းလူင်တင်းလၢႆလႆႈၶၢမ်ႇတၢင်းဢၼ် ႁဵတ်းဢမ်ႇရူဝ်ႇဢမ်ႇသေႇတီႈၶႃႈယဝ်ႉ။
ၵူၼ်းၼုမ်ႇၵူၼ်းၵမ်တင်းလၢႆလႆႈၶိုတ်ႈလႆႈမူဝ်ႈ လူၺ်မၢၵ်ႇႁိၼ်မိူၼ်ၸိူဝ်ႉၼင်ႇ ပဵၼ်ၶႃႈယဝ်ႉလႄႈ ၽူႈမၢဝ်ႇတင်းလၢႆ၊ပႆၸၢႆႉပႆၸိူၼ်းလႆႈႁၢပ်ႇၽိုၼ်း ဢၼ်ၼၵ်းၼႃႇၼၼ်ႉယဝ်ႉ။
ၵူၼ်းထဝ်ႈၵူၼ်းၵႄႇတင်းလၢႆလပ်းႁၢႆၵႂႃႇသေ ၵႃႈတီႈပၢင်ၵုမ်ၼႃႈၽၵ်းတူဝဵင်းယဝ်ႉလႄႈ ၵူၼ်းၼုမ်ႇၵူၼ်းၵမ်တင်းလၢႆလပ်းႁၢႆၵႂႃႇသေ ၵႃႈတီႈပၢင်ပွႆးဢၼ်ႁဵတ်းၵႂၢမ်းၼၼ်ႉယဝ်ႉ။
တၢင်းဢၼ်ႁူဝ်ၸႂ်ၶႃႈၸဝ်ႈႁဝ်းၶဝ်သႂၢင်ႇသိူဝ်း ၼၼ်ႉထၢတ်ႇႁၢႆဝၢႆးဝွတ်ႈၵႂႃႇလႄႈ တၢင်းဢၼ်ၵႃႈဢၼ်ဝႅၼ်ၶႃႈၸဝ်ႈႁဝ်းၶဝ် ၼၼ်ႉပိၼ်ႇၵႂႃႇပဵၼ်တၢင်းဢၼ် ၶၢင်းၶီၶၢင်းၽၢၼ်ၼၼ်ႉယဝ်ႉ။
လွင်ႈတၢင်းဢၼ်ၶႃႈၸဝ်ႈႁဝ်းၶဝ်လီဢုပ်ႇဝၢဝ်း ၼၼ်ႉဢမ်ႇၵိုတ်းဢမ်ႇၵျၢၼ်ႇလႃးလႃးယဝ်ႉ၊ ၶႃႈၸဝ်ႈႁဝ်းၶဝ်မီးဢႃႉမၢင်ႇၵလႃႇၵွပ်ႈပိူဝ်ႈ ဢၼ်ၽိတ်းပိူင်ႈၼၼ်ႉယဝ်ႉ။
ၵွပ်ႈပိူဝ်ႈလွင်ႈတၢင်းၼႆႉလႄႈႁူဝ်ၸႂ် ၶႃႈၸဝ်ႈႁဝ်းၶဝ်လုၵႂႃႇလႄႈ ၵွပ်ႈလွင်ႈတၢင်းၸိူဝ်းၼႆႉလႄႈမၢၵ်ႇတႃ ၶႃႈၸဝ်ႈႁဝ်းၶဝ်မူဝ်းၵႂႃႇ။
ဢိၵ်ႇတင်းၵွပ်ႈပိူဝ်ႈလွႆ ၸိဢုၼ်ႇ၊ လႆႈပဵၼ်တီႈဢၼ် သဵတ်ႇၵူၼ်းငႅဝ်ၵူၼ်းလႄႈ မႃလိၼ်တင်းလၢႆဢွၼ်ၵၼ်ၵႂႃႇမႃးယူႇ ၵႃႈၼိူဝ်မၼ်းၼၼ်ႉဢေႃႈ။
ၼႂ်းဝႃႈၼၼ်သေၵေႃႈ၊ ထႃႇဝရႃႉၽြႃး၊ တီႈၶႃႈ၊ ၸဝ်ႈႁဝ်းဢုပ်ႉပိူင်ႇၸၢမ်ႇၸႃးယူႇ ၼိၵ်ႈၸႃႉထႃႇဝရႃႉတီႈၶႃႈဢေႃႈ။ ဢႃႇၼႃႇၸၢၵ်ႈၽုင်းတၼ်းၶူဝ်းၸဝ်ႈႁဝ်း တႄႇယူႇၵူႈၸူဝ်ႈၵူႈပၢၼ်သိုပ်ႇသိုပ်ႇ တၢမ်တၢမ်တီႈၶႃႈဢေႃႈ။
ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်း ၸုၼ်ႉပႅတ်ႈၶႃႈၸဝ်ႈႁဝ်ႈၶဝ်ၶိင်ႇၵႃႇလႃႉ ႁိုင်ၼႃႇထၢၼ်ႇၼႆႉတီႈၶႃႈ။ ၸဝ်ႈႁဝ်းယင်းဢမ်ႇၶိုၼ်းၶုၵ်းၸႂ်လႆႈၶႆႈၸႂ်ထူပ်း ၶႃႈၸဝ်ႈႁဝ်းၶဝ်တီႈၶႃႈယဝ်ႉႁိုဝ်း။
ထႃႇဝရႃႉၽြႃး၊ တီႈၶႃႈ။ ႁႂ်ႈၶႃႈၸဝ်ႈႁဝ်းၶဝ် ၶိုၼ်းဝၢႆႇၸူးတီႈၸဝ်ႈႁဝ်းသေၵမ်းတီႈၶႃႈ၊ ၶိုၼ်းဢဝ်ၶႃႈၸဝ်ႈႁဝ်းၶဝ်ဝၢႆႇၸူးတီႈ ၸဝ်ႈႁဝ်းသေၵမ်းတီႈၶႃႈ၊ ၶႅၼ်းတေႃႈပွင်ႁဵတ်းမႄးႁဵတ်းမိုဝ်ႉဝၼ်း ၶႃႈၸဝ်ႈႁဝ်းၶဝ်ႁႂ်ႈၶိုၼ်းမိူၼ်ပၵ်းၵဝ်ႇ ပိူင်ၵဝ်ႇၼၼ်ႉသေၵမ်းတီႈၶႃႈ။
ဢမ်ႇၼၼ်ၵေႃႈ၊ၸဝ်ႈႁဝ်းတိုၼ်းထဵင်ပႅတ်ႈ ၶႃႈၸဝ်ႈႁဝ်းၶဝ်လုမ်းလုမ်းတီႈၶႃႈ ယဝ်ႉႁိုဝ်း၊ၼင်ႇၼၼ်လႄႈၸဝ်ႈႁဝ်းၸႂ်မႆႈ ၶႂ်ႈၸႃႉတေႃႇၶႃႈၸဝ်ႈႁဝ်းၶဝ်ႁႅင်းယႂ်ႇၼႃႇ လူင်လၢင်တီႈၶႃႈယဝ်ႉႁိုဝ်း၊ဝႃႈၼင်ႇၼႆလႄႈ ယေႇရမိ၊ ပွင်ႉၶၢင်းပွင်ႉဝႃႈဢေႃႈ။ လိၵ်ႈတၢင်းဢၼ်ပွင်ႉၶၢင်းပွင်ႈဝႃႈယဝ်ႉယဝ်ႉဢေႃႈ။
ၼႂ်းပီဢၼ်ထူၼ်ႈထိုင်သၢမ်သိပ်းပီလိူၼ်တီႈသီႇဝၼ်းတီႈႁႃႈယၢမ်းမိူဝ်ႈဢၼ်ၵဝ်ယဵၸ်ႈပရေႃးႁဵၵ်ႈ ယေႇၸၵျေႇလႃႉ၊ ဢၼ်ပဵၼ်လုၵ်ႈၸၢႆး ပုၸိ၊ မီးယူႇၵႃႈႁိမ်းၼမ်ႉ ၶေႇပႃႇ ၊လူၺ်ႈၵၼ်တင်းၵူၼ်းမဵဝ်း ၵျူး၊ ၸိူဝ်းဢၼ်လႆႈၶၢမ်ႇသိမ်းဢဝ်ၵႂႃႇၵႃႈၼႂ်းမိူင်း ပႃႇပုလုၼ်ႇ၊ ယူႇၼၼ်ႉ၊ၽႃႉၵၢင်ႁၢဝ်ၽုၺ်ႇပိုတ်ႇလႄႈၵဝ်လႆႈႁၼ်ရူႇပႃႇရူင်ႇၽြႃးပဵၼ်ၸဝ်ႈဢေႃႈ။-
(လွင်ႈတၢင်းၼႆႉပဵၼ်မႃးမိူဝ်ႈပီဢၼ်ၶုၼ်ႁေႃၶမ်း ယေႇၶေႃးၼိ၊ တူၵ်းသေႁၢင်ႈသေႁေႃလႄႈလႆႈၶၢမ်ႇတၢင်းဢၼ်သိမ်းဢဝ်ၵႂႃႇလႆႈႁႃႈပီယဝ်ႉၼၼ်ႉဢေႃႈ။-)
ၵႃႈတီႈၼၼ်ႈၼုၵ်ႈၵပၢတ်ႈ ထႃႇဝရႃႉၽြႃး ၊ႁွတ်ႈထိုင်မႃးတီႈၵဝ်ၵႃႈႁိမ်းၼမ်ႉ ၶေႇပႃႇ ၊ၼၼ်ႉလႄႈၵဝ်လႆႈႁပ်ႉဢဝ်ၽုင်းတၼ်းၶူဝ်းမၼ်းၸဝ်ႈဢေႃႈ။
ၵဝ်လူတူၺ်းလႄႈႁၼ်လူမ်းၽိဝ်ႁုင်လုၵ်ႉသေၽၢႆႇတၢင်းႁွင်ႇပတ်ႉထူဝ်းမႃးဢေႃႈ။ ၽႃႉၽူၼ်ဢၼ်ယႂ်ႇၼႃႇဢၼ်ပႃးၽႃႉမႅပ်ႈ၊ဢိၵ်ႇတင်းသၢႆလႅင်းၽႆးႁိူဝ်ႈမၢပ်ႈယူႇဢမ်ႇထၢတ်ႇလႄႈ၊ၵႃႈၼႂ်းမၼ်းၼၼ်ႉမီးသေၸိူဝ်ႉသေပိူင်ဢၼ်ႁိူဝ်ႈႁိူင်းမိူၼ်ၸိူဝ်ႉၼင်ႇတွင်းလိူင်ၼၼ်ႉဢေႃႈ။-
ၵႃႈၼႂ်းသၢႆလႅင်းၽႆးၼၼ်ႉမီးသတ်ႉတဝႃႇသီႇပႃးဢွၼ်ၵၼ်ပေႃႇမႃးဢေႃႈ။ ႁၢင်ႈၽၢင်ၶဝ်ပဵၼ်မိူၼ်ၸိူဝ်ႉၼင်ႇႁၢင်ႈၽၢင်ၵူၼ်းလႄႈ၊-
ၶဝ်ၼၼ်ႉယေႈပႃးမီးၼႃႈသီႇၼႃႈ၊ဢိၵ်ႇတင်းမီးပိၵ်ႇသီႇဢၼ်ၼင်ႇၵၼ်ဢေႃႈ။-
ၶႃၶဝ်ၼၼ်ႉသိုဝ်ႈဝႆႉလႄႈတိၼ်ၶဝ်ပဵၼ်မိူၼ်ၵိပ်ႇတိၼ်ဝူဝ်းဢွၼ်ႇဢၼ်ႁိူဝ်ႈမၢပ်ႈယူႇမိူၼ်ၸိူဝ်ႉၼင်ႇတွင်းလိူင်ဢၼ်ပွတ်ႈသီဝႆႉမႂ်ႇမႂ်ႇၼၼ်ႉဢေႃႈ။-
ၼွၵ်ႈသေၶဝ်မီးၼႃႈသီႇၼႃႈ၊ဢိၵ်ႇတင်းပိၵ်ႇသီႇဢၼ်ႁင်းၽႂ်ႁင်းမၼ်းၼၼ်ႉ၊ယေႈပႃးသမ်ႉယင်းမီးမိုဝ်းၵူၼ်းထႅင်ႈသီႇၶွၼ်ဢၼ်ဢွၵ်ႇတႂ်ႈပိၵ်ႇၶဝ်ၼၼ်ႉဢေႃႈ။-
ပႃးလႂ်ပႃးၼၼ်ႉၵီႈၽႄႇပိၵ်ႇသွင်ဢၼ်ၼင်ႇၵၼ်ပၢႆပိၵ်ႇဢၼ်ၼိုင်ႈလႄႈဢၼ်ၼိုင်ႈၸပ်းၵၼ်ယူႇသေယဝ်ႉ၊ၼႂ်းမိူဝ်ႈဢၼ်ၶဝ်မိၼ်ၵႂႃႇၼၼ်ႉၶဝ်ယင်းဢမ်ႇဝၢႆႇတူဝ်ၶဝ်လႄႈၸၢင်ႈဢွၼ်ၵၼ်ၵႂႃႇသိုဝ်ႈသိုဝ်ႈၵမ်းလဵဝ်ဢေႃႈ။
သတ်ႉတဝႃႇၸိူဝ်းၼၼ်ႉယေႈပႃးမီးၼႃႈဢၼ်ပႅၵ်ႇၵၼ်သီႇၼႃႈၼင်ႇၵၼ်လႄႈၽၢႆႇၼႃႈပဵၼ်ၼႃႈၵူၼ်း၊ၽၢႆႇၶႂႃပဵၼ်ၼႃႈသၢင်ႇသီႈ၊ၽၢႆႇသၢႆႉပဵၼ်ၼႃႈဝူဝ်း၊ၽၢႆႇလင်သမ်ႉပဵၼ်ၼႃႈၼူၵ်ႉၶၢင်ႇလေႃႉဢေႃႈ။-
သတ်ႉတဝႃႇၸိူဝ်းၼၼ်ႉပႃးလႂ်ပႃးၼၼ်ႉဢဝ်ပိၵ်ႇသွင်ဢၼ်ၽႄႇၵီႈႁႂ်ႈပၢႆပိၵ်ႇၶဝ်ပႃးၼိုင်ႈလႄႈပႃးၼိုင်ႈၸပ်းၵၼ်ဝႆႉသေယဝ်ႉ၊ပိၵ်ႇသွင်ဢၼ်သမ်ႉဢဝ်ႁူမ်ႇသုမ်ႇတူဝ်ၶဝ်ဝႆႉဢေႃႈ။-
ၶဝ်ၼၼ်ႉၸၢင်ႈၵႂႃႇသိုဝ်ႈၼႃႈၽႂ်သိုဝ်ႈၼႃႈမၼ်းၼၼ်ႉၵမ်းလဵဝ်ဢေႃႈ။ ဝိၺိၺ်ႇၸဝ်ႈၵႂႃႇတၢင်းလႂ်ၵေႃႈ ၶဝ်ၵႂႃႇၸွမ်းတၢင်းၼၼ်ႉလႄႈၶဝ်ယင်းဢမ်ႇဝၢႆႇတူဝ်ဝၢႆႇၶိင်းလႄႈၵႂႃႇဢေႃႈ။
ၵႃႈၼႂ်းၵၢင်သတ်ႉတဝႃႇၸိူဝ်းၼၼ်ႉမီးသေၸိူဝ်ႉသေပိူင်ဢၼ်မိူၼ်ထၢၼ်ႇၽႆးလႅင်ဢၼ်ဢရွင်ႇမၼ်းမိူၼ်ၸိူဝ်ႉၼင်ႇမူၵ်ႇၽႆးလႄႈလႄႇၵႂႃႇလႄႇမႃးၵႃႈၼႂ်းၵႄႇသတ်ႉတဝႃႇၸိူဝ်းၼၼ်ႉဢေႃႈ။ ၽႆးၼၼ်ႉႁိူဝ်ႈႁိူင်းၼႃႇလႄႈၽႃႉမႅပ်ႈဢွၵ်ႇသေၵႃႈၼႂ်းၽႆးၼၼ်ႉမႃးဢေႃႈ။-
သတ်ႉတဝႃႇၸိူဝ်းၼၼ်ႉပုင်ႈၵႂႃႇပုင်ႈမႃးၶၼ်ၽႂ်းၼႃႇမိူၼ်ၼင်ႇၽႃႉမႅပ်ႈၼၼ်ႉဢေႃႈ။
မိူဝ်ႈဢၼ်ၵဝ်ယင်းတိုၵ်ႉလူတူၺ်းသတ်ႉတဝႃႇၸိူဝ်းၼၼ်ႉယူႇၼၼ်ႉၸိုင်၊ၵဝ်ႁၼ်မၢၵ်ႇလေႃႉသီႇဢၼ်မီးယူႇၵႃႈၼိူဝ်လိၼ်လႄႈမၢၵ်ႇလေႃႉယေႈဢၼ်မီးၵႃႈတီႈႁိမ်းသတ်ႉတဝႃႇယေႈပႃးဢေႃႈ။-
မၢၵ်ႇလေႃႉတင်းသီႇဢၼ်မီးပုင်ႇႁၢင်ႈမိူၼ်ၵၼ်ဝႆႉသေယဝ်ႉ၊မၢၵ်ႇလေႃႉယေႈဢၼ်ယေႈဢၼ်ၼၼ်ႉဢရွင်ႇႁိူဝ်ႈမၢပ်ႈမိူၼ်ဢရွင်ႇသႅင်လႅင်ဢၼ်မီးၵႃႈၶၼ်ၼၼ်ႉလႄႈ၊တီႈမၢၵ်ႇလေႃႉယေႈဢၼ်ၼၼ်ႉသမ်ႉဢဝ်မၢၵ်ႇလေႃႉတၢင်ႇဢၼ်ႁဵတ်းၶႂၢင်ၵၼ်ဝႆႉဢေႃႈ။-
ပိူဝ်ႈၼႆၸင်ႇမၢၵ်ႇလေႃႉၼၼ်ႉၵိင်ႈၵႂႃႇမႃးလႆႈတင်းသီႇၽၢႆႇသီႇၼႃႈဢေႃႈ။-
ၶွပ်ႇမူၼ်းမၢၵ်ႇလေႃႉၼၼ်ႉသုင်လႄႈပဵၼ်ဢၼ်လီၵူဝ်လီႁႄဢေႃႈ။ လွင်ႈမၼ်းၸမ်ႉ၊ၵႃႈတီႈၶွပ်ႇမူၼ်းမၢၵ်ႇလေႃႉၼၼ်ႉမီးမၢၵ်ႇတႃတင်းလၢႆၸွမ်းႁိမ်းမၼ်းႁွပ်ႈႁွပ်ႈဝႆႉဢေႃႈ။-
ယၢမ်ႈမိူဝ်ႈဢၼ်သတ်ႉတဝႃႇၸိူဝ်းၼၼ်ႉၵႂႃႇၼၼ်ႉၸိုင်၊မၢၵ်ႇလေႃႉၸိူဝ်းၼၼ်ႉဢွၼ်ၵၼ်ၸပ်းၸွမ်းယူႇဢေႃႈ။ ယၢမ်းမိူဝ်ႈဢၼ်သတ်ႉတဝႃႇၸိူဝ်းၼၼ်ႉယုၵ်ႉၽၢၵ်ႈၶိုၼ်ႈသေၵႃႈတီႈလိၼ်ၼၼ်ႉၸိုင်၊မၢၵ်ႇလေႃႉၸိူဝ်းၼၼ်ႉၵေႃႈဢွၼ်ၵၼ်ၶိုၼ်ႈၸွမ်းဢေႃႈ။-
သတ်ႉတဝႃႇၸိူဝ်းၼၼ်ႉၵႂႃႇၸွမ်းၵႃႈၼင်ႇဢၼ်ဝိၺိၺ်ႇၸႂ်ႉၵႂႃႇၼၼ်ႉလႄႈမၢၵ်ႇလေႃႉၸိူဝ်းၼၼ်ႉၵေႃႈဢွၼ်ၵၼ်ၸပ်းၸွမ်းၵွပ်ႈပိူဝ်ႈသတ်ႉတဝႃႇၸိူဝ်းၼၼ်ႉဢုပ်ႉထိင်းမၢၵ်ႇလေႃႉၼၼ်ႉဝႆႉဢေႃႈ။-
ပိူဝ်ႈၼႆလႄႈမိူဝ်ႈလႂ်သေဢမ်ႇဝႃႈ၊ပေႃးသတ်ႉတဝႃႇၸိူဝ်းၼၼ်ႉၵႂႃႇသေဢမ်ႇဝႃႈ၊ၵိုတ်းသဝ်းသေဢမ်ႇဝႃႈ၊ၶိုၼ်ႈၽႃႉၵႂႃႇသေဢမ်ႇဝႃႈ၊မၢၵ်ႇလေႃႉၸိူဝ်းၼၼ်ႉဢွၼ်ၵၼ်ႁဵတ်းၸွမ်းၸေးၸေးၸွတ်ႇၸွတ်ႇဢေႃႈ။ လွင်ႈမၼ်းၸမ်ႉ၊ဝိၺိၺ်ႇသတ်ႉတဝႃႇၸိူဝ်းၼၼ်ႉမီးယူႇၵႃႈၼႂ်းမၢၵ်ႇလေႃႉၸိူဝ်းၼၼ်ႉဢေႃႈ။
ၵႃႈၼိူဝ်ႁူဝ်သတ်ႉတဝႃႇၸိူဝ်းၼၼ်ႉမီးၶိူင်ႈပိူင်ဢၼ်မိူၼ်ႁၢင်ႈၽၢင်ၼႃႈၽႃႉၵၢင်ႁၢဝ်ဢၼ်ႁိူဝ်ႈမၢပ်ႈမိူၼ်ဢရွင်ႇႁိၼ်ၸိင်ႇၼၼ်ႉမုင်းႁူမ်ႇဝႆႉဢေႃႈ။-
ၵႃႈတႂ်ႈႁၢင်ႈၽၢင်ၼႃႈၽႃႉၵၢင်ႁၢဝ်ၼၼ်ႉသတ်ႉတဝႃႇၸိူဝ်းၼၼ်ႉၸုၵ်းယူႇလႄႈယေႈပႃးဢဝ်ပိၵ်ႇမၼ်းသွင်ဢၼ်ၽႄႇၵီႈၸူးတီႈၵၼ်ၼင်ႇၵၼ်ၵၼ်သေယဝ်ႉ၊ပိၵ်ႇဢၼ်ၵိုတ်းယူႇသွင်ဢၼ်ၼၼ်ႉသမ်ႉဢဝ်ႁူမ်ႇသုမ်ႇတူဝ်ၶဝ်ဝႆႉယူႇဢေႃႈ။-
မိူဝ်ႈဢၼ်ၶဝ်ၵႂႃႇၼၼ်ႉၸိုင်၊ၵဝ်ငိၼ်းသဵင်ပိၵ်ႇၶဝ်လင်မေႃးမိူၼ်ၸိူဝ်ႉၼင်ႇသဵင်ၼမ်ႉသမ်ႇမုၵ်ႈတြႃႇ၊မိူၼ်ၸိူဝ်ႉၼင်ႇသဵင်တပ်ႉသိုၵ်းလူင်၊မိူၼ်ၸိူဝ်ႉၼင်ႇသဵင် ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ ၼၼ်ႉဢေႃႈ။ ယၢမ်းမိူဝ်ႈဢၼ်ၶဝ်ၵိုတ်းသဝ်းၼၼ်ႉ၊ၶဝ်ဢွၼ်ၵၼ်ၶျႃးပိၵ်ႇၶဝ်သေလႄႈယူႇဢေႃႈ။-
ၵမ်းၼၼ်ႉ သဵင်ၵႂၢမ်းဢွၵ်ႇမႃးသေၵႃႈၼႂ်းၼႃႈၽႃႉၵၢင်ႁၢဝ်ဢၼ်မီးၵႃႈၼိူဝ်ႁူဝ်ၶဝ်ၼၼ်ႉဢေႃႈ။
ၵႃႈၼိူဝ်ၼႃႈၽႃႉၵၢင်ႁၢဝ်ဢၼ်မီးၵႃႈတီႈၼိူဝ်ႁူဝ်ၶဝ်ၼၼ်ႉသမ်ႉမီးၶိူင်ႈပိူင်ဢၼ်ပဵၼ်မိူၼ်ရႃႇၸႃႉပလၢင်ႇဢၼ်ဢဝ်တင်းသႅင်ၼီႇလႃႇႁဵတ်းဝႆႉၼၼ်ႉလႄႈ၊ၵႃႈတီႈၼိူဝ်ႁၢင်ႈၽၢင်ရႃႇၸႃႉပလၢင်ႇၼၼ်ႉသမ်ႉမီးႁၢင်ႈၽၢင်ၸိူဝ်ႉၼင်ႇပုင်ႇႁၢင်ႈၵူၼ်းၼၼ်ႉၼင်ႈယူႇဢေႃႈ။-
ႁၢင်ႈၽၢင်မၼ်းၼၼ်ႉႁိူဝ်ႈမၢပ်ႈယူႇမိူၼ်ၸိူဝ်ႉၼင်ႇတွင်းလိူင်ဢၼ်ယင်းမီးယူႇၵႃႈၼႂ်းၽႆးၼၼ်ႉလႄႈဢရွင်ႇမၼ်းႁိူဝ်ႈလႅင်းၸွတ်ႇတူဝ်ႈၵႂႃႇၵူႈတီႈၵူႈလႅၼ်ဢေႃႈ။-
ဢရွင်ႇဢၼ်ႁိူဝ်ႈလႅင်းယူႇၼၼ်ႉပဵၼ်ၸိူဝ်ႉၼင်ႇဢရွင်ႇႁူင်းႁႆးၼၼ်ႉဢေႃႈ။ ဢၼ်ၼႆႉၸမ်ႉ၊ပဵၼ်ဢရွင်ႇမုၼ်ၽုင်း ထႃႇဝရႃႉၽြႃး ၼၼ်ႉဢေႃႈ။ မိူဝ်ႈၵဝ်ႁၼ်ရူႇပႃႇရူင်ႇၼၼ်ႉၸိုင်၊ၵဝ်ၶုပ်ႉမူပ်ႇလႄႈသမ်ႉလႆႈငိၼ်းသဵင်ၸဝ်ႈလၢတ်ႈၵႂၢမ်းဢေႃႈ။
ၸဝ်ႈၼၼ်ႉလၢတ်ႈတီႈၵဝ်လႄႈဝႃႈ၊ “လုၵ်ႈၵူၼ်း႟။ လုၵ်ႉၸုၵ်းတႃႉ၊ၵဝ်တၵ်းလၢတ်ႈတေႃႇမႂ်းဢေႃႈ၊” ဝႃႈၼင်ႇၼႆဢေႃႈ။-
ယၢမ်းမိူဝ်ႈဢၼ်သဵင်ၸဝ်ႈလင်မႃးယူႇၼၼ်ႉၸိုင်၊ဝိၺိၺ်ႇၸဝ်ႈၶဝ်ႈၵႃႈၼႂ်းၵဝ်လႄႈပူၵ်းႁႂ်ႈၵဝ်ၸုၵ်းယူႇဢေႃႈ။ ၵဝ်သမ်ႉငိၼ်းသဵင်ၵႂၢမ်းၸဝ်ႈထႅင်ႈလႄႈဝႃႈ၊-
“လုၵ်ႈၵူၼ်း႟။ ၵဝ်တၵ်းပွႆႇၸႂ်ႉမႂ်းၵႂႃႇၸူးတီႈၵူၼ်းမဵဝ်း ဢိသရေး၊ ဢေႃႈ။ ၶဝ်ၼၼ်ႉလုၵ်ႉၽိုၼ်ႉၵဝ်လႄႈဝၢႆႇပႅတ်ႈသေၵႃႈတီႈၵဝ်ယဝ်ႉ။ ၶဝ်ယင်းတိုၵ်ႉလုၵ်ႉၽိုၼ်ႉယူႇၸိူဝ်ႉၼင်ႇဢၼ်ပူႇမွၼ်ႇၶဝ်ယၢမ်ႈလုၵ်ႉၽိုၼ်ႉၵဝ်မႃးၼၼ်ႉဢေႃႈ။-
ၶဝ်ၸိူဝ်းၼၼ်ႉမီးႁူဝ်ၸႂ်ဢၼ်ၵႅၼ်ႇၶႅင်လႄႈႁဵတ်းဢမ်ႇရူဝ်ႇဢမ်ႇသေႇတီႈၵဝ်ယဝ်ႉ။ ပိူဝ်ႈၼႆလႄႈၵဝ်တၵ်းပွႆႇၸႂ်ႉမႂ်းၵႂႃႇၸူးတီႈၶဝ် ႁႂ်ႈမွၵ်ႇလၢတ်ႈၵႂၢမ်းဢၼ်ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉတီႈၶဝ်ၼၼ်ႉဢေႃႈ။-
ၵူၼ်းဢၼ်ၸၢင်ႈလုၵ်ႉၽိုၼ်ႉၸိူဝ်းၼၼ်ႉတၵ်းထွမ်ႇဢဝ်သေဢမ်ႇဝႃႈ၊ဢမ်ႇထွမ်ႇဢဝ်သေဢမ်ႇဝႃႈ၊ၶဝ်တၵ်းႁုလွင်ႈဢၼ်ပရေႃးၽႅတ်ႈ ႁွတ်ႈထိုင်မႃးၵႃႈၼႂ်းၶဝ်ၼၼ်ႉဢေႃႈ။
“လုၵ်ႈၵူၼ်း႟။ မႂ်းၸမ်ႉ၊ယႃႇပေၵူဝ်ပေႁႄၶဝ်။ ၵႂၢမ်းၶဝ်ၵေႃႈယႃႇပေၵူဝ်ပေႁႄ။ ၶဝ်တၵ်းႁဵတ်းၽေးသႂ်ႇတီႈမႂ်း၊ႁဵတ်းဢမ်ႇပေႃးၼင်ႇႁိုဝ်တီႈမႂ်းမိူၼ်ၸိူဝ်ႉၼင်ႇဢၼ်မႂ်းလႆႈယူႇၵႃႈၼႂ်းၵႄႈမႅင်းၵူၼ်ႈငေႃးသေၵေႃႈ ယႃႇပေၵူဝ်ပေႁႄၵူၼ်းဢၼ်ၸၢင်ႈလုၵ်ႉၽိုၼ်ႉၸိူဝ်းၼၼ်ႉ၊ၵႂၢမ်းၶဝ်ၵေႃႈယႃႇပေၵူဝ်ပေႁႄ။-
ၵွပ်ႈပိူဝ်ႈဢၼ်ၶဝ်ပဵၼ်ၵူၼ်းဢၼ်ၸၢင်ႈလုၵ်ႉၽိုၼ်ႉၼၼ်ႉလႄႈတၵ်းထွမ်ႇဢဝ်သေဢမ်ႇဝႃႈ၊ဢမ်ႇထွမ်ႇဢဝ်သေဢမ်ႇဝႃႈ၊မႂ်းတၵ်းလႆႈဢဝ်ၵႂၢမ်းၵဝ်ႁေႃးလၢတ်ႈတီႈၶဝ်ဢေႃႈ။
“လုၵ်ႈၵူၼ်း႟။ မႂ်းၸမ်ႉ၊ထွမ်ႇငိၼ်းၵႂၢမ်းဢၼ်ၵဝ်လၢတ်ႈတီႈမႂ်းၼႆႉတႃႉ။ ယႃႇပေမီးၸႂ်ဢၼ်လုၵ်ႉၽိုၼ်ႉမိူၼ်ၶဝ်။ ဢႃႈပၢၵ်ႇမႂ်းလႄႈၵိၼ်ဢၼ်ၵဝ်တၵ်းပၼ်တီႈမႂ်းၼၼ်ႉတႃႉ၊” ဝႃႈၼင်ႇၼႆဢေႃႈ။-
ၵဝ်ႁၼ်မိုဝ်းၶွၼ်ၼိုင်ႈယဵတ်ႇယိုၼ်းၸူးတီႈၵဝ်လႄႈၵႃႈၼႂ်းမိုဝ်းၼၼ်ႉယိပ်းၵမ်ၵဵၼ်လိၵ်ႈၽိုၼ်ၼိုင်ႈဝႆႉဢေႃႈ။-
မၼ်းၸဝ်ႈၵီႈၽႄႇၽိုၼ်လိၵ်ႈၼၼ်ႉၵႃႈတီႈၽၢႆႇၼႃႈၵဝ်လႄႈ၊မီးတၢင်းဢၼ်တႅမ်ႈမၢႆဝႆႉၵႃႈတီႈၽၢႆႇၼႃႈၽၢႆႇလင်သေယဝ်ႉ၊ပဵၼ်ၵႂၢမ်းဢၼ်ႁွင်ႉႁႆႈပွင်ႉၶၢင်း၊ၵႂၢမ်းဢၼ်ၸႂ်ဢမ်ႇသႃႇၶၢင်းၶီၶၢင်းၽၢၼ်၊ဢိၵ်ႇတင်းၵႂၢမ်းဢႃႉမၢင်ႇၵလႃႇၵူၺ်းၵူၺ်းၼၼ်ႉတႅမ်ႈသႂ်ႇဝႆႉဢေႃႈ။
ၽြႃးပဵၼ်ၸဝ်ႈမီးဢမိင်ႉလႄႈဝႃႈ၊ “လုၵ်ႈၵူၼ်း႟။ ဢဝ်ၵဵၼ်လိၵ်ႈၼၼ်ႉၵိၼ်သေယဝ်ႉ၊ၵႂႃႇလႄႇႁေႃးလၢတ်ႈၵႃႈတီႈၵူၼ်းမဵဝ်း ဢိသရေး၊ တင်းလၢႆတႃႉ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈၵဝ်ဢႃႈပၢၵ်ႇလႄႈမၼ်းၸဝ်ႈဢဝ်ၵဵၼ်လိၵ်ႈၼၼ်ႉပွၼ်ႈသႂ်ႇပၢၵ်ႇၵဝ်ႁႂ်ႈၵဝ်ၵိၼ်ဢေႃႈ။-
မၼ်းၸဝ်ႈၵေႃႈမီးဢမိင်ႉလႄႈဝႃႈ၊ “လုၵ်ႈၵူၼ်း႟။ ၵိၼ်လႄႈႁႂ်ႈတွင်ႉမႂ်းတဵမ်ဝႆႉတင်းၵဵၼ်လိၵ်ႈဢၼ်ၵဝ်ပၼ်ၼႆႉတႃႉ။” ဝႃႈၼင်ႇၼႆဢေႃႈ။ ၵဝ်ၵေႃႈၵိၼ်ၵဵၼ်လိၵ်ႈၼၼ်ႉလႄႈၼမ်ႉဝၢၼ်ၼမ်ႉၸဵမ်းမၼ်းဝၢၼ်မိူၼ်ၸိူဝ်ႉၼင်ႇၼမ်ႉၽိုင်ႈဝႆႉဢေႃႈ။
မိူဝ်ႈၼၼ်ႉၽြႃးပဵၼ်ၸဝ်ႈမီးဢမိင်ႉလႄႈဝႃႈ၊ “ၵႂႃႇၸူးတီႈၵူၼ်းမဵဝ်း ဢိသရေး၊ လႄႈဢဝ်ၵႂၢမ်းဢၼ်ၵဝ်သင်ႇလၢတ်ႈတီႈမႂ်းၼၼ်ႉႁေႃးလၢတ်ႈတီႈၶဝ်တႃႉ။-
ၵဝ်ပွႆႇၸႂ်ႉမႂ်းၵႂႃႇၸူးတီႈၵူၼ်းမဵဝ်းဢၼ်လၢတ်ႈၵႂၢမ်းၽႃႇသႃႇတၢင်ႇမဵဝ်းဢၼ်ယၢပ်ႇဢၼ်ယဵၼ်းၼၼ်ႉဢမ်ႇၸႂ်ႈ။ ပွႆႇၸႂ်ႉၵႂႃႇၸူးတီႈၵူၼ်းမဵဝ်း ဢိသရေး၊ ဢေႃႈ။-
ပေႃးၵဝ်ပွႆႇၸႂ်ႉမႂ်းၵႂႃႇၸူးတီႈမဵဝ်းၵူၼ်းမိူင်းယႂ်ႇတင်းလၢႆဢၼ်လၢတ်ႈၵႂၢမ်းၽႃႇသႃႇဢၼ်ယၢပ်ႇဢၼ်ၽိုတ်ႇဢၼ်မႂ်းဢမ်ႇႁုဢမ်ႇၸႅင်ႈလႃးလႃးၼၼ်ႉၸိုင်၊ၶဝ်တၵ်းဢွၼ်ၵၼ်ထွမ်ႇဢဝ်ၵႂၢမ်းမႂ်းဢေႃႈ။-
ၵူၼ်းမဵဝ်း ဢိသရေး၊ ၸမ်ႉ၊ၽူႈလႂ်ၵေႃႈဢမ်ႇမီးၸႂ်ဢၼ်ၶႂ်ႈထွမ်ႇဢဝ်ၵႂၢမ်းမႂ်းသေၵေႃႉသေၵူၼ်း။ ၵႂၢမ်းၵဝ်ၼႆႉၵေႃႈယင်းဢမ်ႇၶႂ်ႈထွမ်ႇၶႂ်ႈဢဝ်လႃးလႃး။ ၶဝ်ၼၼ်ႉဢွၼ်ၵၼ်မီးႁူဝ်ၸႂ်ဢၼ်ၵႅၼ်ႇၶႅင်လႄႈဝႃႈယၢပ်ႇတင်းသဵင်ႈတင်းမူတ်းဢေႃႈ။-
မိူဝ်ႈလဵဝ်ၼႆႉၵဝ်တၵ်းႁႂ်ႈမႂ်းမီးႁူဝ်ၸႂ်ဢၼ်ၵႅၼ်ႇၶႅင်လႄႈႁဵတ်းၶတ်းတႃႉၵၼ်တင်းၶဝ်ဢေႃႈ။-
ၵဝ်တၵ်းႁႂ်ႈမႂ်းၵႅၼ်ႇၶႅင်မိူၼ်မၢၵ်ႇႁိၼ်ဢမ်ႇၵႃး၊ႁႂ်ႈၵႅၼ်ႇၶႅင်လိူဝ်တွၼ်းၼႃႇသေသႅင်ၸိင်ႇၼၼ်ႉယဝ်ႉ။ ပိၵ်ႉသမ်ႉၶဝ်ပဵၼ်ၵူၼ်းမဵဝ်းဢၼ်ၸၢင်ႈလုၵ်ႉၽိုၼ်ႉသေၵေႃႈယႃႇပေၵူဝ်ပေႁႄၶဝ်၊” ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈမီးဢမိင်ႉတီႈၵဝ်လႄႈဝႃႈ၊ “လုၵ်ႈၵူၼ်း႟။ ႁႄႈႁူမႂ်းသေလႄႈထွမ်ႇငိၼ်းၵႂၢမ်းၵႃႈဢၼ်ၵဝ်တၵ်းလၢတ်ႈတီႈမႂ်းၼၼ်ႉသေယဝ်ႉ၊ဢဝ်သႂၢင်းသႂ်ႇဝႆႉၵႃႈၼႂ်းၸႂ်လီလီတႃႉ။-
ၵႂႃႇၸူးတီႈၵူၼ်းမဵဝ်းမႂ်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၸိူဝ်းၼၼ်ႉလႄႈၶဝ်တၵ်းထွမ်ႇဢဝ်သေဢမ်ႇဝႃႈ၊ဢမ်ႇထွမ်ႇဢဝ်သေဢမ်ႇဝႃႈ၊ႁေႃးလၢတ်ႈလႄႈဝႃႈ၊ ‘ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉတီႈမႂ်းဢေႃႈ၊’ ဝႃႈၼႆတႃႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉဝိၺိၺ်ႇၽြႃးပဵၼ်ၸဝ်ႈဢုမ်ႈယွင်ႈဢဝ်ၵဝ်ၶိုၼ်ႈၵႂႃႇလႄႈၵဝ်လႆႈငိၼ်းသဵင်ဢၼ်ႁုၼ်ႈမေႃးယႂ်ႇၼႃႇၽၢႆႇတၢင်းလင်ၵဝ်လႄႈလၢတ်ႈဝႃႈ၊ “ယွင်ႈယေႃးမုၼ်ၽုင်း ထႃႇဝရႃႉၽြႃး၊ ဢၼ်ၵိင်းဝၢပ်ႈယူႇၵႃႈၼိူဝ်မိူင်းၵၢင်ႁၢဝ်ၼၼ်ႉတီႈၶႃႈဢေႃႈ၊” ဝႃႈၼင်ႇၼႆၼၼ်ႉဢေႃႈ။-
ၵဝ်လႆႈငိၼ်းသဵင်သတ်ႉတဝႃႇၸိူဝ်းၼၼ်ႉတူပ်းပိၵ်ႇၶဝ်ယူႇၵႃႈၼႂ်းဢႃႇၵႃႇသႃႉ၊ဢိၵ်ႇတင်းသဵင်မၢၵ်ႇလေႃႉၸိူဝ်းဢၼ်မီးၵႃႈတီႈႁိမ်းသတ်ႉတဝႃႇၸိူဝ်းၼၼ်ႉလင်မေႃးသဵင်ယႂ်ႇၼႃႇမိူၼ်ၸိူဝ်ႉၼင်ႇသဵင်ဢိင်ႇသၼ်ႇၼၼ်ႉဢေႃႈ။-
တၼ်းၶူဝ်းဝိၺိၺ်ႇ ထႃႇဝရႃႉၽြႃး၊ တၢင်ႇတဵင်ၵႃႈၼိူဝ်ၵဝ်ၼၵ်းၼႃႇလႄႈမိူဝ်ႈဢၼ်ဝိၺိၺ်ႇၸဝ်ႈဢုမ်ႈယွင်ႈဢဝ်ၵဝ်ၵႂႃႇၼၼ်ႉၵဝ်မီးၸႂ်ဢၼ်ၶူမ်ၸႂ်ဢၼ်မႆႈႁွၼ်ႉယူႇသေလႄႈၸွမ်းၵႂႃႇဢေႃႈ။-
မိူဝ်ႈၼၼ်ႉၵဝ်ႁွတ်ႈထိုင်ၵႃႈတီႈဝဵင်း တေးလပိပ်ႉ ၊ၵႃႈႁိမ်းၼမ်ႉ ၶေႇပႃႇ၊ တီႈဢၼ်ၵူၼ်းၸိူဝ်းဢၼ်လႆႈၶၢမ်ႇတၢင်းဢၼ်တိသိမ်းဢဝ်ၵႂႃႇတင်းလၢႆတူၵ်းတီႈယူႇတီႈသဝ်းၼၼ်ႉဢေႃႈ။ ၵဝ်ယူႇသဝ်းၵႃႈတီႈၼၼ်ႈၸဵတ်းဝၼ်းလႄႈမီးတၢင်းဢၼ်ယုင်ႈၸႂ်ၵႂင်ၸႂ်လူၺ်ႈၵႃႈဢၼ်ၵဝ်ႁုၵဝ်ႁၼ်မႃးၼၼ်ႉလႄႈယူႇဢေႃႈ၊ ဝႃႈၼင်ႇၼႆဢေႃႈ။
ပူၼ်ႉၸဵတ်းဝၼ်းသေယဝ်ႉ၊ ထႃႇဝရႃႉၽြႃး၊ မီးဢမိင်ႉတီႈၵဝ်လႄႈဝႃႈ၊
“လုၵ်ႈၵူၼ်း႟။ ၵဝ်ၶၢၼ်းမႂ်းဝႆႉႁႂ်ႈပဵၼ်ၵူၼ်းပႂ်ႉယၢမ်းၼႂ်းၵူၼ်းမဵဝ်း ဢိသရေး၊ ဢေႃႈ။ မႂ်းတၵ်းလႆႈဢဝ်ၵႂၢမ်းတြႃးဢၼ်ၵဝ်သင်ႇလၢတ်ႈတီႈမႂ်းၼၼ်ႉလႄႈပၼ်သတိတီႈၶဝ်ဢေႃႈ။-
ပေႃးၵဝ်လၢတ်ႈပၼ်တီႈၵူၼ်းႁၢႆႉသေၵေႃႉၵေႃႉလႄႈဝႃႈ၊ ‘မႂ်းၼႆႉတၵ်းလႆႈတၢႆဢမၢၼ်ႇၶၼ်ပဵၼ်ဢေႃႈ၊’ ဝႃႈၼႆလႄႈ၊မႂ်းယင်းဢမ်ႇပၼ်သတိတီႈမၼ်း၊ယင်းဢမ်ႇလၢတ်ႈၵႂၢမ်းဢၼ်ပၼ်သတိတီႈမၼ်းႁႂ်ႈမၼ်းလႆႈဝႄႈပႅတ်ႈသေသဵၼ်ႈတၢင်းဢၼ်ႁၢႆႉဢၼ်ယုတ်ႈမၼ်းပုၼ်ႈလွင်ႈၼင်ႇႁိုဝ်ဢသၢၵ်ႈမၼ်းတၵ်းလႆႈၵတ်းယဵၼ်ၶျၢမ်းသႃႇၸိုင်၊ၵူၼ်းႁၢႆႉၼၼ်ႉတၵ်းလႆႈတၢႆၼႂ်းဢပျတ်ႈမၼ်းဢေႃႈ။ ၵဝ်တၵ်းပၼ်တၢမ်ႇဢပျတ်ႈတီႈမႂ်းၵွပ်ႈပိူဝ်ႈမႂ်းမီးပုၼ်ႈၽွၼ်းတၢင်းဢၼ်မၼ်းလႆႈတၢႆၼၼ်ႉဢေႃႈ။-
ပေႃးမႂ်းပၼ်သတိတီႈၵူၼ်းႁၢႆႉလႄႈမၼ်းယင်းဢမ်ႇဝႄႈပႅတ်ႈသေတၢင်းဢၼ်ႁဵတ်းတုၸရိူၵ်ႈၸိုင်၊မၼ်းတၵ်းလႆႈတၢႆၼႂ်းဢပျတ်ႈမၼ်းဢေႃႈ။ မႂ်းၸမ်ႉ၊ၵႄႇသႄႇၼုၵ်ႈဢဝ်ဢသၢၵ်ႈဝိၺိၺ်ႇမႂ်းယဝ်ႉ။
“ထႅင်ႈပိူင်ၼိုင်ႈၸမ်ႉ၊ပေႃးၵေႃႉဢၼ်သိုဝ်ႈတေႃႇၼၼ်ႉၸၢင်ႈႁဵတ်းတုၸရိူၵ်ႈလႄႈၵဝ်သမ်ႉဢဝ်ၽေးတုၵ်ႉၶႃႉၸီႇယၢင်ႇတၢင်ႇတဵင်ၵႃႈၼိူဝ်မၼ်းၸိုင်၊မႂ်းယင်းဢမ်ႇပၼ်သတိတီႈမၼ်းလႄႈမၼ်းတၵ်းလႆႈတၢႆဢေႃႈ။ မၼ်းတၵ်းလႆႈတၢႆၵွပ်ႈပိူဝ်ႈတုၸရိူၵ်ႈမၼ်းၼၼ်ႉလႄႈၵဝ်တၵ်းဢမ်ႇမၢတ်ႈဢမ်ႇမၢႆတြႃးတၢင်းသိုဝ်ႈတေႃႇဢၼ်မၼ်းယၢမ်ႈၵမ်ၵျၢင်ႉၼၼ်ႉ။ ၵဝ်တၵ်းပၼ်တၢမ်ႇဢပျတ်ႈမႂ်းၵွပ်ႈပိူဝ်ႈမႂ်းမီးပုၼ်ႈၽွၼ်းတၢင်းဢၼ်မၼ်းလႆႈတၢႆၼၼ်ႉဢေႃႈ။-
ဢမ်ႇၼၼ်ပေႃးမႂ်းပၼ်သတိတီႈၵေႃႉဢၼ်သိုဝ်ႈတေႃႇၼၼ်ႉ၊ႁႂ်ႈမၼ်းဢမ်ႇႁဵတ်းတုၸရိူၵ်ႈလႄႈ၊မၼ်းၵေႃႈထွမ်ႇဢဝ်ၵႂၢမ်းမႂ်းသေယဝ်ႉ၊ဢမ်ႇႁဵတ်းတုၸရိူၵ်ႈယဝ်ႉၸိုင်၊ဢသၢၵ်ႈမၼ်းတၵ်းလႆႈၵတ်းယဵၼ်ၶျၢမ်းသႃႇဢမၢၼ်ႇၶၼ်ပဵၼ်ဢေႃႈ။ မႂ်းၵေႃႈၵႄႇသႄႇၼုၵ်ႈဢဝ်ဢသၢၵ်ႈဝိၺိၺ်ႇမႂ်းယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉတၼ်းၶူဝ်းဝိၺိၺ်ႇ ထႃႇဝရႃႉၽြႃး ၊တၢင်ႇတဵင်ၵႃႈၼိူဝ်ၵဝ်လႄႈၵဝ်လႆႈငိၼ်းသဵင်ၵႂၢမ်းဢၼ်မၼ်းၸဝ်ႈမီးဢမိင်ႉတီႈၵဝ်လႄႈဝႃႈ၊ “မႂ်းလုၵ်ႉလႄႈဢွၵ်ႇၵႂႃႇၸူးတီႈပၢင်ႇႁူၺ်ႈၼၼ်ႉတႃႉ။ ၵဝ်တၵ်းလၢတ်ႈတေႃႇမႂ်းၵႃႈတီႈၼၼ်ႈဢေႃႈ၊” ဝႃႈၼင်ႇၼႆဢေႃႈ။
ၵဝ်ၵေႃႈလုၵ်ႉလႄႈဢွၵ်ႇၵႂႃႇၸူးတီႈပၢင်ႇႁူၺ်ႈသေယဝ်ႉ၊ၵဝ်လႆႈႁၼ်မုၼ်ၽုင်း ထႃႇဝရႃႉၽြႃး၊ ဢၼ်ပဵၼ်ၸိူဝ်ႉၼင်ႇဢၼ်ၵဝ်ယၢမ်ႈႁၼ်ၵႃႈႁိမ်းၼမ်ႉ ၶေႇပႃႇ ၊ၼၼ်ႉဢေႃႈ။ ၵဝ်ၵေႃႈၶုပ်ႉမူပ်ႇၵႃႈၼိူဝ်လိၼ်ဢေႃႈ။-
မိူဝ်ႈၼၼ်ႉဝိၺိၺ်ႇၽြႃးပဵၼ်ၸဝ်ႈၶဝ်ႈၵႃႈၼႂ်းၵဝ်လႄႈပူၵ်းၵဝ်ႁႂ်ႈလုၵ်ႉၸုၵ်းဢေႃႈ။ ထႃႇဝရႃႉၽြႃး မီးဢမိင်ႉတီႈၵဝ်လႄႈဝႃႈ၊ “မႂ်းၵႂႃႇလႄႈတဵတ်ႇမႅပ်းယူႇၵႃႈၼႂ်းႁိူၼ်းမႂ်းတႃႉ။-
လုၵ်ႈၵူၼ်း႟။ မႂ်းတၵ်းလႆႈၶၢမ်ႇတၢင်းဢၼ်ဢဝ်ၸိူၵ်ႈမတ်ႉၽုၵ်ႇဝႆႉဢမ်ႇႁႂ်ႈမႂ်းလႆႈဢွၵ်ႇၸူးၵႃႈတီႈၵႄႈၵူၼ်းတင်းလၢႆဢေႃႈ။-
ၵဝ်တၵ်းႁႂ်ႈလိၼ်ႉမႂ်းၸပ်းယူႇၵႃႈတီႈႁိူၵ်ႇမႂ်း၊ႁႂ်ႈမႂ်းဢႃႉယူႇထၢၼ်ႈပေႃးဢမ်ႇၸၢင်ႈပၼ်သတိတီႈၵူၼ်းဢၼ်ၸၢင်ႈလုၵ်ႉၽိုၼ်ႉၸိူဝ်းၼၼ်ႉဢေႃႈ။-
ၵူၺ်းၵႃႈ၊မိူဝ်ႈဢၼ်ၵဝ်လၢတ်ႈတေႃႇမႂ်းထႅင်ႈၼၼ်ႉၸိုင်၊ၵဝ်တၵ်းပိုတ်ႇပၢၵ်ႇမႂ်းၶိုၼ်းလႄႈမႂ်းတၵ်းတေႁေႃးလၢတ်ႈတီႈၶဝ်လႄႈဝႃႈ၊ ‘ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉတီႈမႂ်းဢေႃႈ၊’ ဝႃႈၼႆဢေႃႈ။ ႁႂ်ႈၵေႃႉဢၼ်ထွမ်ႇဢဝ်ၼၼ်ႉထွမ်ႇဢဝ်တႃႉ။ ႁႂ်ႈၵေႃႉဢၼ်ဢမ်ႇထွမ်ႇဢဝ်ၼၼ်ႉယင်းဢမ်ႇထွမ်ႇဢဝ်လႄႈယူႇတႃႉ။ လွင်ႈမၼ်းၸမ်ႉ၊ၶဝ်ပဵၼ်ၵူၼ်းမဵဝ်းဢၼ်ၸၢင်ႈလုၵ်ႉၽိုၼ်ႉဢေႃႈ၊” ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈမီးဢမိင်ႉလႄႈဝႃႈ၊ “လုၵ်ႈၵူၼ်း႟။ ဢဝ်ၶႅပ်းမၢၵ်ႇဢုတ်ႇၵွၼ်ႈၼိုင်ႈဝႆႉၵႃႈတီႈၽၢႆႇၼႃႈမႂ်းသေယဝ်ႉ၊တႅမ်ႈပုင်ႇႁၢင်ႈဝဵင်း ယေႇရုသလႅမ်ႇ၊ ဝႆႉၵႃႈၼိူဝ်မၼ်းတႃႉ။-
ႁွပ်ႈႁွပ်ႈဝဵင်းၼၼ်ႉၶုတ်းၶူးဝဵင်းလႂ်၊ၵေႃႇတႅၼ်ႈလိၼ်လမ်းဝဵင်းလႂ်၊တႄႇႁဵတ်းတပ်ႉႁဵတ်းတႃႇလႂ်လႄႈဢဝ်တုမ်သၢၵ်ႇတွင်ႈတင်းလၢႆႁွႆႈလဵပ်ႈႁွပ်ႈဝဵင်းဝႆႉတႃႉ။-
ၼွၵ်ႈသေၼၼ်ႉဢဝ်ၶႅပ်းလဵၵ်းပူၵ်းတင်ႈႁႂ်ႈပဵၼ်ၽႃသၢင်ႉလဵၵ်းၵႃႈတီႈဝူင်ႈၵၢင်မႂ်းတင်းဝဵင်းသေယဝ်ႉ၊ဝၢႆႇၼႃႈတေႃႇမၼ်းယူႇတႃႉ။ ဝဵင်းၼၼ်ႉလႆႈၶၢမ်ႇတၢင်းဢၼ်လွမ်ႉႁွပ်ႈဝႆႉလႄႈမႂ်းပဵၼ်ၵေႃႉဢၼ်လွမ်ႉႁွပ်ႈမၼ်းဢေႃႈ။ ဢၼ်ၼႆႉၸမ်ႉ၊ပဵၼ်လၢၵ်ႈၶၼႃႇဢၼ်မွၵ်ႇၼႄတီႈၵူၼ်းမဵဝ်း ဢိသရေး ၊ဢေႃႈ။
“လိူဝ်သေၼၼ်ႉ၊မႂ်းၼွၼ်းသီႈၵႅင်းယူႇၽၢႆႇသၢႆႉတႃႉ။ ၵဝ်တၵ်းဢဝ်ဢပျတ်ႈၵူၼ်းမဵဝ်း ဢိသရေး တၢင်ႇဝႆႉၵႃႈၼိူဝ်မႂ်းဢေႃႈ။ မႂ်းတၵ်းလႆႈၶၢမ်ႇဢဝ်တၢင်းဢၼ်ၸီႇယၢင်ႇပၼ်တၢမ်ႇပိူဝ်ႈဢပျတ်ႈၶဝ်ၼၼ်ႉၸွမ်းၵႃႈၼင်ႇဢၼ်ၼပ်ႉဢၢၼ်ႇဝၼ်းဢၼ်မႂ်းလႆႈၼွၼ်းၸိူဝ်ႉၼင်ႇၼၼ်ၼၼ်ႉဢေႃႈ။-
လွင်ႈမၼ်းၸမ်ႉ၊ၵဝ်မၵ်းၶၢၼ်းဝႆႉမိုဝ်ႉဝၼ်းတီႈမႂ်းဢၼ်ၼပ်ႉဢၢၼ်ႇတင်းသဵင်ႈမီးဝႆႉသၢမ်ပၢၵ်ႇပၢႆၵဝ်ႈသိပ်းဝၼ်း၊ဢၼ်ယေႈဝၼ်းမိူၼ်ၵၼ်တင်းယေႈပီ၊ၸွမ်းၼင်ႇၶဝ်တၵ်းလႆႈၶၢမ်ႇဢပျတ်ႈတၢမ်ႇၶဝ်ၼၼ်ႉဢေႃႈ။-
မိူဝ်ႈဢၼ်မိုဝ်ႉဝၼ်းၸိူဝ်းၼၼ်ႉၸေးယဝ်ႉၸိုင်၊မႂ်းဝၢႆႇလႄႈၼွၼ်းသီႈၵႅင်းၽၢႆႇၶႂႃမႂ်းလႄႈၶၢမ်ႇဢဝ်ဢပျတ်ႈၵူၼ်းမဵဝ်း ယုတႃႉ၊ ထႅင်ႈသီႇသိပ်းဝၼ်းလူးၵွၼ်ႇတႃႉ။ ယေႈဝၼ်းပဵၼ်ပုၼ်ႈယေႈပီ၊ၸွမ်းၼင်ႇၶဝ်လႆႈၶၢမ်ႇဢပျတ်ႈတၢမ်ႇၶဝ်ၼၼ်ႉဢေႃႈ။
“မႂ်းတၵ်းလႆႈယႅၵ်ႉတႃတူၺ်းတၢင်းဢၼ်လွမ်ႉလဵပ်ႈႁွပ်ႈဝဵင်း ယေႇရုသလႅမ်ႇ၊ ဝႆႉၼၼ်ႉၸေးၸေးသေလႄႈဝူတ်ႈၶႅၼ်ဝူတ်ႈမိုဝ်းမႂ်းယဵတ်ႇယိုၼ်းလႄႈႁေႃးလၢတ်ႈၵႂၢမ်းပရေႃးၽႅတ်ႈ ဢၼ်ၶတ်းၵၼ်တင်းဝဵင်းၼၼ်ႉဢေႃႈ။-
ၵဝ်တၵ်းမတ်ႉၽုၵ်ႇမႂ်းဝႆႉႁႂ်ႈမႂ်းဢမ်ႇၽိုၼ်ႉတူဝ်ၽိုၼ်ႉၶိင်းလႆႈတေႃႇထိုင်ႁွတ်ႈမိုဝ်ႉဝၼ်းဢၼ်လႆႈႁဵတ်းတၢင်းဢၼ်လွမ်ႉလဵပ်ႈႁွပ်ႈဝဵင်းၼၼ်ႉဝႆႉထၢၼ်ႈပေႃးၸေးၼၼ်ႉဢေႃႈ။
“ၼွၵ်ႈသေၼၼ်ႉ၊မႂ်းဢဝ်သၢၼ်ၶဝ်ႈၵျုင်ႇ၊ၶဝ်ႈမုယေႃး၊သၢၼ်ထူဝ်ႇ၊သၢၼ်ထူဝ်ႇႁူဝ်ၸၢင်ႉ၊သၢၼ်ထူဝ်ႇတႅပ်ႇ၊သၢၼ်ၶဝ်ႈငုၵ်းၼၼ်ႉသႂ်ႇလေႃးၵၼ်ၵႃႈၼႂ်းမေႃႈလုၵ်ႈလဵဝ်လႄႈႁဵတ်းၶဝ်ႈမုၼ်းတႃႉ။ ဢၼ်ၼႆႉပဵၼ်တၢင်းၵိၼ်ပုၼ်ႈမႂ်းၼႂ်းၸူဝ်ႈသၢမ်ပၢၵ်ႇပၢႆၵဝ်ႈသိပ်းဝၼ်းဢၼ်မႂ်းၼွၼ်းသီႈၵႅင်းၽၢႆႇသၢႆႉယူႇၼၼ်ႉဢေႃႈ။-
ၶဝ်ႈမုၼ်းဢၼ်မႂ်းလႆႈၵိၼ်ၼၼ်ႉၸိုင်၊ယေႈဝၼ်းယေႈဝၼ်းမႂ်းတၵ်းလႆႈၸင်ႈႁိဝ်ႈဢဝ်သၢဝ်းၵျၢပ်ႈဢေႃႈ။-
ၼမ်ႉၵေႃႈမႂ်းတၵ်းလႆႈမၵ်းၶၢၼ်းလႄႈတူင်ၵိၼ်ယေႈဝၼ်းသွင်ၵွၵ်းၼႂ်းၶိင်ႇဢၼ်မၵ်းၶၢၼ်းဝႆႉၼၼ်ႉဢေႃႈ။-
မႂ်းတၵ်းလႆႈဢဝ်ၽၢႆႈလူင်ၵူၼ်းသႂ်ႇၽႆးလႄႈဢဝ်ၶဝ်ႈမုၼ်းမုယေႃးၽဝ်မူၵ်းၵႃႈၼႂ်းၽႆးၼၼ်ႉသေယဝ်ႉ၊ၵိၼ်ၵႃႈတီႈၽၢႆႇၼႃႈၵူၼ်းတင်းလၢႆဢေႃႈ။
“ဢၼ်ၼႆႉပဵၼ်လၢၵ်ႈၶၼႃႇတၢင်းဢၼ်ၵူၼ်းမဵဝ်း ဢိသရေး ၊တၵ်းလႆႈဢွၼ်ၵၼ်ၵိၼ်တၢင်းၵိၼ်ဢၼ်တြႃးၵဝ်ႁၢမ်ႈဝႆႉၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆတီႈဢၼ်ၵဝ်ႁေႃႈၶဝ်ဢွၵ်ႇၸူးၼၼ်ႉဢေႃႈ၊” ထႃႇဝရႃႉၽြႃး ၊မီးဢမိင်ႉဢေႃႈ။
ၵဝ်ၶိုၼ်းလဝ်ႈလၢတ်ႈလႄႈဝႃႈ၊ “ဢူဝ်း၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈဢမ်ႇပႆႇတွၼ်ႉႁႂ်ႈတူဝ်ၸဝ်ႈၵဝ်ႇလႆႈၵူဝ်ႈၵိူၵ်ႇလႃးလႃးတီႈၶႃႈ။ ၸႃႉၸဵမ်မိူဝ်ႈဢၼ်ဢသၢၵ်ႈၶႃႈၸဝ်ႈယင်းလဵၵ်ႉယင်းဢွၼ်ႇၼၼ်ႉၶႃႈၸဝ်ႈဢမ်ႇပႆႇတွၼ်ႉၵိၼ်ၼိူဝ်ႉတူဝ်ဢၼ်တၢႆၵွႆးမၼ်းလႂ်၊တူဝ်ဢၼ်တူဝ်ထိူၼ်ႇၶူပ်းတၢႆလႂ်၊ဢိၵ်ႇတင်းတူဝ်ဢၼ်လီႁင်ႈဢဵတ်ႇသဵတ်ႇၼၼ်ႉၵေႃႈ ဢမ်ႇပႆႇတွၼ်ႉၶဝ်ႈၵႃႈၼႂ်းသူပ်းၶႃႈၸဝ်ႈတီႈၶႃႈ၊” ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈၵေႃႈမီးဢမိင်ႉလႄႈဝႃႈ၊ “လီယဝ်ႉ။ ၵဝ်တၵ်းပၼ်ၶီႈဝူဝ်းပုၼ်ႈတႃႇတေတႅၼ်းၽၢႆႈလူင်ၵူၼ်းၼၼ်ႉဢေႃႈ။ မႂ်းတၵ်းလႆႈဢဝ်ဢၼ်ၼၼ်ႉၽဝ်မူၵ်းၶဝ်ႈမုၼ်းမႂ်းဢေႃႈ၊” ဝႃႈၼင်ႇၼႆသေယဝ်ႉ။
သမ်ႉသိုပ်ႇမီးဢမိင်ႉထႅင်ႈလႄႈဝႃႈ၊ “လုၵ်ႈၵူၼ်း႟။ ၵဝ်တၵ်းတိုတ်းပႅတ်ႈၶဝ်ႈၼမ်ႉတၢင်းၵိၼ် ဢၼ်ၵမ်ႉထွၵ်ႈဝဵင်း ယေႇရုသလႅမ်ႇ၊ ၼၼ်ႉဢေႃႈ။ ၵူၼ်းဝဵင်းၸိူဝ်းၼၼ်ႉတၵ်းဢွၼ်ၵၼ်မီးၸႂ်ဢၼ်တူၵ်းၶီတူၵ်းၽၢၼ်၊မႆႈၸႂ်ၶီၸႂ်ၼႂ်းမိူဝ်ႈဢၼ်ၶဝ်လႆႈဢွၼ်ၵၼ်ၸင်ႈႁိဝ်ႈၶဝ်ႈမုၼ်းလႄႈၵိၼ်၊ဢိၵ်ႇတင်းတူင်ၼမ်ႉလႄႈၵိၼ်ၼၼ်ႉဢေႃႈ။-
ၶဝ်ႈၼမ်ႉတၢင်းၵိၼ်ၶဝ်တၵ်းသဵင်ႈတၵ်းမူတ်းၵႂႃႇလႄႈၶဝ်တၵ်းဢွၼ်ၵၼ်မီးတၢင်းဢၼ်ယုင်ႈၸႂ်ၵႂင်ၸႂ်ယူႇသေယဝ်ႉ၊ယွမ်ၵႂႃႇႁဵဝ်ႇၵႂႃႇၵွပ်ႈပိူဝ်ႈဢပျတ်ႈၶဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၸဝ်ႈ ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “လုၵ်ႈၵူၼ်း႟။ မႂ်းဢဝ်လၢပ်ႇဢၼ်ၽၢႆၽၢႆၼၼ်ႉမႃးၸႂ်ႉပုၼ်ႈတၵ်းထႃပႅတ်ႈၶူၼ်ႁူဝ်မႂ်းတင်းၼူတ်ႇမႂ်းတင်းသဵင်ႈသေယဝ်ႉ၊ဢဝ်ယႃႇၸူႇၸင်ႈႁိဝ်ႈလႄႈၽႄဝႆႉပဵၼ်သၢမ်ပုၼ်ႈတႃႉ။-
ဢဝ်ၶူၼ်ၼၼ်ႉပုၼ်ႈၼိုင်ႈသေၵႃႈၼႂ်းသၢမ်ပုၼ်ႈၼၼ်ႉတုတ်ႇၽႆးပႅတ်ႈၵႃႈၼႂ်းဝဵင်း ယၢမ်းမိူဝ်ႈဢၼ်တၢင်းဢၼ်လွမ်ႉလဵပ်ႈႁွပ်ႈဝဵင်းၼၼ်ႉၸေးယဝ်ႉၼၼ်ႉတႃႉ။ ပုၼ်ႈၼိုင်ႈၸိုင်၊ဢဝ်လၢပ်ႇမႂ်းၼၼ်ႉၽၵ်ႉယွႆႈၸွမ်းတၢင်းမိူဝ်ႈဢၼ်မႂ်းပႆလဵပ်ႈႁွပ်ႈဝဵင်းၵႂႃႇၼၼ်ႉလႄႈပုၼ်ႈၼိုင်ႈသမ်ႉဢဝ်ၸၢတ်ႇပိုၼ်ပႅတ်ႈၵႃႈၼႂ်းတီႈဢၼ်လူမ်းထူဝ်းၼၼ်ႉတႃႉ။ ၵဝ်တၵ်းပွႆႇလၢပ်ႇၵႂႃႇၸွမ်းလင်ၶဝ်ၼၼ်ႉဢေႃႈ။-
ဢဝ်ၶူၼ်ႁူဝ်မႂ်းၵႃႈၼႂ်းၸိူဝ်းၼၼ်ႉဢိတ်းဢွၼ်ႇၼိုင်ႈလႄႈပူၵ်ႉႁေႃႇဝႆႉၵႃႈၼႂ်းၶူဝ်းၼုင်ႈမႂ်းတႃႉ။-
သမ်ႉဢဝ်ၵႃႈၼႂ်းဢိတ်းဢွၼ်ႇၼိုင်ႈၼၼ်ႉတုတ်ႈပႅတ်ႈၵႃႈၼႂ်းၽႆးတႃႉ။ ၽႆးတၵ်းဢွၵ်ႇသေၵႃႈတီႈၼၼ်ႈသေယဝ်ႉ၊ၽႄၸွတ်ႇတူဝ်ႈၵႂႃႇၵႃႈၼႂ်းၵူၼ်းမဵဝ်း ဢိသရေး၊ တင်းမူတ်းဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊သမ်ႉမီးဢမိင်ႉထႅင်ႈလႄႈဝႃႈၸမ်ႉ၊ “တူၺ်းဝဵင်း ယေႇရုသလႅမ်ႇ ၼၼ်ႉလူး။ ၵဝ်ဢဝ်မၼ်းဝႆႉၵႃႈၼႂ်းၵႄႈၵူၼ်းၵူႈၸိူဝ်ႉၸၢတ်ႈလႄႈသိုင်ႇၸိုင်ႈဝၢၼ်ႈမိူင်းတင်းလၢႆလွမ်ႉႁွပ်ႈမၼ်းဝႆႉယူႇဢေႃႈ။-
ၵူၺ်းၵႃႈ၊ဝဵင်း ယေႇရုသလႅမ်ႇ ၼၼ်ႉလုၵ်ႉၽိုၼ်ႉႁဵတ်းၶတ်းၵၼ်တင်းပိင်းၺၢပ်ႈတြႃးၵဝ်တင်းလၢႆလႄႈၼႄပျႃးလွင်ႈဢၼ်မၼ်းယဵင်ႈၶႅၼ်းႁဵတ်းဢၼ်ဢမ်ႇတြႃးလိူဝ်တွၼ်းၼႃႇသေၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းလႂ်၊ယဵင်ႈၶႅၼ်းဢမ်ႇထွမ်ႇဢမ်ႇၸွမ်းၵဝ် လိူဝ်တွၼ်းၼႃႇသေသိုင်ႇၸိုင်ႈဝၢၼ်ႈမိူင်းၸိူဝ်းဢၼ်လဵပ်ႈႁွပ်ႈႁိမ်းႁွမ်းမၼ်းၸိူဝ်းၼၼ်ႉသေယဝ်ႉ၊ဝဵင်း ယေႇရုသလႅမ်ႇ၊ ၼၼ်ႉထဵင်ပႅတ်ႈတြႃးၸိူဝ်းဢၼ်ၵဝ်ၸီႇယၢင်ႇဝႆႉၼၼ်ႉလႄႈယင်းဢမ်ႇၸွမ်းသဵၼ်ႈတၢင်းထုင်းၽိင်ႈတြႃးၵဝ်ၸိူဝ်းၼၼ်ႉလႄႈယူႇယဝ်ႉ။-
ဝဵင်း ယေႇရုသလႅမ်ႇ၊ ႟။ တေႃႈလဵဝ်ၼႆႉထွမ်ႇဢဝ်ၵႂၢမ်းဢၼ်ၵဝ်၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉၼၼ်ႉတႃႉ။ ၵွပ်ႈပိူဝ်ႈမႂ်းဢမ်ႇထွမ်ႇဢဝ်ၵႂၢမ်းတြႃးၵဝ်တင်းလၢႆ၊ဢမ်ႇပႂ်ႉၵမ်ၸွမ်းပိင်းၺၢပ်ႈတြႃးၵဝ်တင်းလၢႆၼၼ်ႉလႄႈမႂ်းႁဵတ်းတုၸရိူၵ်ႈဢၼ်ယဵင်ႈၶႅၼ်းလိူဝ်တွၼ်းၼႃႇသေၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းဢၼ်ယူႇလဵပ်ႈႁွပ်ႈႁိမ်းႁွမ်းမႂ်းၸိူဝ်းၼၼ်ႉသေယဝ်ႉ၊ဢွၼ်ၵၼ်ႁဵတ်းၸွမ်းထုင်းၽိင်ႈတြႃးၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၼၼ်ႉယဝ်ႉ။-
ၵွပ်ႈပိူဝ်ႈလွင်ႈတၢင်းၼႆႉလႄႈၵဝ်၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ၵဝ်ၼႆႉပဵၼ်ရၢၼ်ႇသူႇမႂ်းယဝ်ႉဢေႃႈ။ ၵဝ်တၵ်းၸီႇယၢင်ႇပၼ်တၢမ်ႇဢပျတ်ႈၵႃႈၼိူဝ်မႂ်းၵႃႈတီႈၽၢႆႇၼႃႈၵူၼ်းတၢင်ႇၸိူဝ်ႉတၢင်ႇၶိူဝ်းဢေႃႈ။-
ၵွပ်ႈပိူဝ်ႈလွင်ႈတၢင်းဢၼ်မႂ်းၵမ်ၵျၢင်ႉသၢင်ႈႁဵတ်းမဵဝ်းဢၼ်ၵဝ်ဢဵတ်ႇသဵတ်ႇၵႃႈမီးၼၼ်ႉလႄႈၵဝ်တၵ်းၸီႇယၢင်ႇပၼ်တၢမ်ႇဢပျတ်ႈဢၼ်ဢမ်ႇတွၼ်ႉၸီႇယၢင်ႇၼၼ်ႉလႄႈၵမ်းလိုၼ်းတၵ်းဢမ်ႇၸီႇယၢင်ႇၵႃႈၼိူဝ်မႂ်းထႅင်ႈယဝ်ႉဢေႃႈ။-
ၵွပ်ႈၼႆလႄႈၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉၶဝ်ၸိူဝ်းဢၼ်ပဵၼ်ပေႃႈၼၼ်ႉတၵ်းဢွၼ်ၵၼ်ၵိၼ်လုၵ်ႈလၢင်းတူဝ်ၸဝ်ႈၵဝ်ႇၵႃႈၼႂ်းၵႄႈသူဢေႃႈ။ လုၵ်ႈလၢင်းၵေႃႈတၵ်းဢွၼ်ၵၼ်ၵိၼ်ပေႃႈတူဝ်ၸဝ်ႈၵဝ်ႇဢေႃႈ။ ၵဝ်တၵ်းၸီႇယၢင်ႇတၢမ်ႇဢပျတ်ႈတီႈမႂ်းလႄႈဢဝ်ၸိူဝ်းဢၼ်ၵိုတ်းဢၼ်ၵျၢၼ်ႇၼၼ်ႉၸၢတ်ႇပိုၼ်ပႅတ်ႈၵႂႃႇၸွမ်းလူမ်းၵူႈပႃႈၵူႈၽၢႆႇဢေႃႈ။
“ၵွပ်ႈပိူဝ်ႈၸိူဝ်ႉၼင်ႇၼႆလႄႈ၊ၸွမ်းၵႃႈၼင်ႇဢၼ်ၵဝ်ပဵၼ်ၽြႃးပဵၼ်ၸဝ်ႈဢၼ်ဢသၢၵ်ႈလိပ်းၼၼ်ႉ၊ဢၼ်ၼႆႉပဵၼ်ၼုၵ်ႈၵပၢတ်ႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊လႄႈဝႃႈၸမ်ႉ၊ၵွပ်ႈပိူဝ်ႈဢၼ်မႂ်းဢဝ်လွင်ႈတၢင်းဢၼ်ဝူၺ်ႇဢၼ်ႁင်ႈ၊ဢိၵ်ႇတင်းလွင်ႈတၢင်းဢၼ်လီႁင်ႈဢဵတ်ႇသဵတ်ႇမႂ်းတင်းသဵင်ႈတင်းလူင် ႁႂ်ႈၵျွင်းပိၵ်ႈမၢၼ်ႇၵူဝ်ႈၵိူၵ်ႇၼၼ်ႉလႄႈ၊ၵဝ်ယင်းတၵ်းဢမ်ႇသေလၢႆဢမ်ႇဢဵတ်းလူလႃးလႃးလႄႈပွမ်ႈမႂ်းလူမ်ႉတူၵ်းဢေႃႈ။-
ၼႂ်းၵူၼ်းမႂ်းသၢမ်ပုၼ်ႈၼၼ်ႉပုၼ်ႈၼိုင်ႈတၵ်းတၢႆလူၺ်ႈၵႃႇလႃႉႁႃႈလႅင်မိူင်း၊ဢိၵ်ႇတင်းလူၺ်ႈၽေးဢၼ်ဢိုပ်းယၢၵ်ႈၵႃႈၼႂ်းဝဵင်း၊ပုၼ်ႈၼိုင်ႈၸိုင်၊တၵ်းတၢႆလူၺ်ႈၽေးလၢပ်ႇၽေးလႅဝ်းၵႃႈၼွၵ်ႈဝဵင်း၊ပုၼ်ႈလိုၼ်းသုတ်းၸမ်ႉ၊ၵဝ်တၵ်းဢဝ်ၸၢတ်ႇပိုၼ်ပႅတ်ႈၵႂႃႇၸွမ်းလူမ်းၵူႈပႃႈၵူႈၽၢႆႇၼၼ်ႉလႄႈပွႆႇၸႂ်ႉလၢပ်ႇလႅဝ်းၵႂႃႇၸွမ်းလင်ၶဝ်ဢေႃႈ။
“မႂ်းတၵ်းတေလႆႈၶၢမ်ႇဢၢႆႁႅင်းၸႂ်မႆႈၶႂ်ႈၸႃႉၵဝ်တင်းသဵင်ႈ၊ဢိၵ်ႇတင်းႁႅင်းတေႃးသႃႉတၢင်းၸႂ်မႆႈၶႂ်ႈၸႃႉၵဝ်တေႃႇထိုင်ႁွတ်ႈၵဝ်ပျေႇၸႂ်ပျေႇၶေႃးၵႂႃႇၼၼ်ႉဢေႃႈ။ ၼႂ်းမိူဝ်ႈဢၼ်လွင်ႈတၢင်းတင်းမူတ်းၼႆႉယင်းပဵၼ်ယူႇၼၼ်ႉမႂ်းတၵ်းတေလႆႈႁုလွင်ႈဢၼ်ၵဝ်၊ ထႃႇဝရႃႉၽြႃး၊ မီးဢမိင်ႉတီႈမႂ်းၵွပ်ႈပိူဝ်ႈဢၼ်ၵဝ်ဢွၵ်ႇတေႃးသႃႉတၢင်းၸႂ်မႆႈၶႂ်ႈၸႃႉတီႈတၢင်းဢၼ်မႂ်းဢမ်ႇပႂ်ႉသဵတ်ႈၸႃႇၼၼ်ႉဢေႃႈ။-
ၵူၼ်းမဵဝ်းၸိူဝ်းဢၼ်ယူႇလဵပ်ႈႁွပ်ႈႁိမ်းႁွမ်းမႂ်းၼၼ်ႉတၵ်းသႄႉသွမ်းပျၢၵ်ႈၶူဝ်မႂ်းမိူဝ်ႈဢၼ်ၶဝ်ပႆတၢင်းၵၢႆၵႂႃႇႁႂ်ႈလႆႈယၢၼ်ၵၢႆၵၼ်တင်းမႂ်းၼၼ်ႉဢေႃႈ။
“မိူဝ်ႈဢၼ်ၵဝ်ဢဝ်တၢင်းၸႂ်မႆႈၶႂ်ႈၸႃႉၵဝ်တင်းႁႅင်းတေႃးသႃႉၵဝ်ၸီႇယၢင်ႇတၢမ်ႇဢပျတ်ႈတီႈမႂ်းၼၼ်ႉၵူၼ်းမဵဝ်းၸိူဝ်းဢၼ်ယူႇလဵပ်ႈႁွပ်ႈႁိမ်းႁွမ်းမႂ်းတင်းသဵင်ႈတင်းလူင်တၵ်းဢွၼ်ၵၼ်ၵူဝ်ႁႄဢေႃႈ။ ၶဝ်တၵ်းဢွၼ်ၵၼ်တူၺ်းမႂ်းလူၺ်ႈတင်းတႃဢၼ်လီႁင်ႈဢဵတ်ႇသဵတ်ႇလႄႈတၵ်းဢွၼ်ၵၼ်သႄႉသွမ်းမႂ်းဢေႃႈ။-
ၵဝ်တၵ်းတိုတ်းပႅတ်ႈတၢင်းဢၼ်ၵမ်ႉဢၼ်ထွၵ်ႈၶဝ်ႈၼမ်ႉတၢင်းၵိၼ်မႂ်းၼၼ်ႉလႄႈပွႆႇႁႂ်ႈမႂ်းဢိုပ်းယၢၵ်ႈယူႇဢေႃႈ။ မႂ်းတၵ်းလႆႈၶၢမ်ႇဝူၺ်ႇတၼႃႇတၢင်းဢၼ်ဢိုပ်းယၢၵ်ႈတွင်ႉမႆႈၼၼ်ႉမိူၼ်ၸိူဝ်ႉၼင်ႇပိုၼ်ၵၢင်ႇဢၼ်ပၢႆလႅမ်ၼႃႇပွႆႇမႃးယႃႉမႃးၵဝ်းမႂ်းၼၼ်ႉဢေႃႈ။-
ၵဝ်တၵ်းပွႆႇၸႂ်ႉၽေးတၢင်းဢၼ်ဢိုပ်းယၢၵ်ႈ၊ဢိၵ်ႇတင်းတူဝ်ထိူၼ်ႇတင်းလၢႆမႃးႁႂ်ႈလႆႈဢဝ်လုၵ်ႈလၢင်းမႂ်းတၢႆဢေႃႈ။ ၵဝ်သမ်ႉတၵ်းပွႆႇၸႂ်ႉၽေးၵႃႇလႃႉႁႃႈလႅင်မိူင်း၊ၽေးလိူတ်ႈၽေးယၢင်၊ၽေးသိုၵ်းၽေးသိူဝ်မႃးဢဝ်မႂ်းတၢႆပႅတ်ႈဢေႃႈ။ ၵဝ် ထႃႇဝရႃႉၽြႃး ၊သင်ႇလၢတ်ႈဝႆႉၸိူဝ်ႉၼင်ႇၼႆဢေႃႈ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။ မႂ်းဝၢႆႇၼႃႈတေႃႇလွႆ ဢိသရေး ၊တင်းလၢႆသေလႄႈဢဝ်ၵႂၢမ်းဢမိင်ႉၵဝ်ၼၼ်ႉသင်ႇလၢတ်ႈတီႈၶဝ်တႃႉ။-
သင်ႇလၢတ်ႈႁႂ်ႈလွႆ ဢိသရေး၊ တင်းလၢႆဢွၼ်ၵၼ်ထွမ်ႇငိၼ်းၼုၵ်ႈၵပၢတ်ႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တႃႉ။ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ သင်ႇလၢတ်ႈတီႈလွႆလူင်လွႆဢွၼ်ႇတင်းလၢႆ၊ၼမ်ႉႁွင်ႈၼမ်ႉၵႄး၊ပၢင်ႇႁူၺ်ႈၶူင်ႈႁူၺ်ႈတင်းလၢႆလႄႈဝႃႈ၊ၵဝ်တၵ်းႁႂ်ႈလၢပ်ႇလႅဝ်းႁွတ်ႈထိုင်ၵႃႈၼိူဝ်ထႃႇၼႃႉတီႈဢၼ်ၵူၼ်းတင်းလၢႆဝႆႈႁုၼ်ႇႁၢင်ႈသၢင်းထုလႂ်ၼၼ်ႉဢေႃႈ။-
ၶဵင်ႇၽြႃးလႂ်တၵ်းလႆႈၶၢမ်ႇတၢင်းဢၼ်ထွၼ်ပႅတ်ႈယႃႉပႅတ်ႈလႄႈၶဵင်ႇတီႈဢၼ်သၢၵ်ႈလူႇဢၼ်ႁွမ်ဢၼ်ႁူၺ်းတင်းလၢႆ တၵ်းလႆႈၶၢမ်ႇတၢင်းဢၼ်ႁၵ်းပႅတ်ႈယႃႉပႅတ်ႈဢေႃႈ။ ၵူၼ်းဢၼ်မီးၵႃႈတီႈၼၼ်ႈတင်းသဵင်ႈတင်းလူင် တၵ်းလႆႈၶၢမ်ႇတၢင်းဢၼ်ဢဝ်တၢႆၽၢႆႇၼႃႈႁုၼ်ႇႁၢင်ႈသၢင်းထုၸိူဝ်းၼၼ်ႉဢေႃႈ။-
ၵဝ်တၵ်းဢဝ်တူဝ်တၢႆၵူၼ်းမဵဝ်း ဢိသရေး၊ တင်းလၢႆၸၢတ်ႇပိုၼ်မၢၵ်ႇမိူဝ်ၵႂႃႇၵႃႈတီႈၽၢႆႇၼႃႈႁုၼ်ႇႁၢင်ႈသၢင်းထုတင်းလၢႆလႄႈဢဝ်လုပ်ႇၶဝ်ၸၢတ်ႇပိုၼ်မၢၵ်ႇမိူဝ်လဵပ်ႈႁွပ်ႈၶဵင်ႇၽြႃးၶဝ်ၸိူဝ်းၼၼ်ႉဢေႃႈ။
ၵႃႈဢၼ်ပဵၼ်ဝဵင်းလူင်မိူင်း ဢိသရေး၊ ၶဝ်တင်းသဵင်ႈတင်းလူင်တၵ်းလႆႈမီးတၢင်းဢၼ်လုလႅဝ်ယူႇ၊ပုၼ်ႈလွင်ႈၼင်ႇႁိုဝ်ၶဵင်ႇၽြႃးၶဝ်၊ဢိၵ်ႇတင်းႁုၼ်ႇႁၢင်ႈသၢင်းထုၶဝ်တၵ်းလႆႈၶၢမ်ႇတၢင်းဢၼ်ပေႃႉထုပ်ႉယွႆႈယႅၵ်းသေလႄႈ၊ၶဵင်ႇဢၼ်သၢၵ်ႈလူႇဢၼ်ႁွမ်ဢၼ်ႁူၺ်းၶဝ် တၵ်းလႆႈမီးတၢင်းဢၼ်လုလႅဝ်ပဵၼ်ၽၢၵ်ႇပဵၼ်ၽႅၵ်ႇၵႂႃႇ၊ဢိၵ်ႇတင်းလွင်ႈတၢင်းဢၼ်ၶဝ်ႁဵတ်းၶဝ်သၢင်ႈၵူႈၸိူဝ်ႉၵူႈပိူင်တၵ်းႁၢႆလၢႆၵႂႃႇၼၼ်ႉဢေႃႈ။-
ၵူၼ်းတၵ်းလႆႈၶၢမ်ႇတၢင်းဢၼ်ဢဝ်တၢႆၵူႈတီႈၵူႈလႅၼ်လႄႈ၊ၶဝ်ၸိူဝ်းဢၼ်ဢသၢၵ်ႈယင်းလႆႈၵတ်းယဵၼ်ၶျၢမ်းသႃႇယူႇၸိူဝ်းၼၼ်ႉတၵ်းဢွၼ်ၵၼ်ႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ။
“ၼႂ်းဝႃႈၼၼ်သေၵေႃႈၵဝ်တၵ်းႁႂ်ႈၶဝ်လွတ်ႈၵမ်ႈၽွင်ႈဢေႃႈ။ ၼႂ်းၶဝ်ၵမ်ႈၽွင်ႈတၵ်းၵၢင်းလွတ်ႈၽေးလၢပ်ႇၽေးလႅဝ်းၵႃႈၼႂ်းၵႄႈၵူၼ်းမဵဝ်းတင်းလၢႆသေယဝ်ႉ၊လႆႈၶၢမ်ႇတၢင်းဢၼ်ၸၢတ်ႇပိုၼ်ၵႂႃႇၵူႈသိုင်ႇၵူႈမိူင်း၊တီႈဢၼ်ၶဝ်တၵ်းလႆႈၶၢမ်ႇတူၵ်းၵႅၼ်းယူႇၼၼ်ႉဢေႃႈ။-
ၵႃႈတီႈၼၼ်ႈၶဝ်တၵ်းဢွၼ်ၵၼ်ၶုၵ်းၸႂ်လႆႈၶႆႈၸႂ်ထူပ်းၵဝ်လႄႈတၵ်းဢွၼ်ၵၼ်ႁုလွင်ႈဢၼ်ၵဝ်ပၼ်တၢမ်ႇဢပျတ်ႈတီႈၶဝ်၊ဢိၵ်ႇတင်းႁႂ်ႈၶဝ်လႆႈဢူၵ်းလႆႈဢၢႆၵွပ်ႈပိူဝ်ႈႁူဝ်ၸႂ်ၶဝ်ဢၼ်ဢမ်ႇၸၢင်ႈပႂ်ႉသဵတ်ႈၸႃႇၼၼ်ႉဢွၵ်ႇသေၵႃႈတီႈၵဝ်ၵႂႃႇလႄႈထုၵ်ႇၸႂ်ၵျိူၵ်ႈၸႂ်ႁုၼ်ႇႁၢင်ႈသၢင်းထုၼႃႇသေတၢင်းဢၼ်ထုၵ်ႇၸႂ်ၵျိူၵ်ႈၸႂ်ၵဝ်ၼၼ်ႉဢေႃႈ။ ၼင်ႇၼၼ်လႄႈၶဝ်တၵ်းဢွၼ်ၵၼ်ဢူၵ်းဢၢႆတူဝ်ၸဝ်ႈၵဝ်ႇၵွပ်ႈပိူဝ်ႈၶဝ်ၵမ်ၵျၢင်ႉသၢင်ႈႁဵတ်းမဵဝ်းဢၼ်လီႁင်ႈဢဵတ်ႇသဵတ်ႇၼႃႇၸိူဝ်းၼၼ်ႉဢေႃႈ။-
ၶဝ်တၵ်းဢွၼ်ၵၼ်ႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး ၊ဢိၵ်ႇတင်းလွင်ႈဢၼ်ဢမိင်ႉၵဝ်ဢၼ်ပၼ်သတိဝႃႈ၊တၵ်းပၼ်တၢမ်ႇၼၼ်ႉဢမ်ႇပဵၼ်ဢၼ်လၢႆလၢႆလွၵ်ႇလွၵ်ႇၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉၸမ်ႉ၊ “တူပ်းဢူၵ်းမႂ်းလႄႈတိၼ်တိုပ်ႈတီႈလိၼ်တႃႉ။ ႁွင်ႉႁႆႈလူၺ်ႈၸႂ်မႆႈၸႂ်ၶီ၊ၵွပ်ႈပိူဝ်ႈၵူၼ်းမဵဝ်း ဢိသရေး လႆႈၵမ်ၵျၢင်ႉသၢင်ႈႁဵတ်းဢၼ်ဢမ်ႇတြႃး၊ဢၼ်လီဢူၵ်းလီဢၢႆယဝ်ႉၼၼ်ႉတႃႉ။ လွင်ႈမၼ်းၸမ်ႉ၊ၶဝ်တၵ်းဢွၼ်ၵၼ်လူမ်ႉတၢႆလူၺ်ႈၽေးသိုၵ်းၽေးသိူဝ်၊ၽေးဢၼ်ဢိုပ်းဢၼ်ယၢၵ်ႈ၊ၽေးၵႃႇလႃႉႁႃႈလႅင်မိူင်းဢေႃႈ။-
ၶဝ်ၸိူဝ်းဢၼ်မီးတီႈၵႆၼၼ်ႉတၵ်းတၢႆလူၺ်ႈၽေးၵႃႇလႃႉႁႃႈလႅင်မိူင်း၊ၶဝ်ၸိူဝ်းဢၼ်မီးတီႈၸမ်ၼၼ်ႉ၊တၵ်းတၢႆလူၺ်ႈၽေးသိုၵ်းၽေးသိူဝ်၊ၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇလႄႈဢသၢၵ်ႈလိပ်းယူႇတၵ်းတၢႆလူၺ်ႈၽေးတၢင်းဢၼ်ဢိုပ်းဢၼ်ယၢၵ်ႈဢေႃႈ။ ၶဝ်တၵ်းဢွၼ်ၵၼ်လႆႈၶၢမ်ႇဢၢႆႁႅင်းတေႃးသႃႉတၢင်းၸႂ်မႆႈၵဝ်ၼၼ်ႉဢေႃႈ။-
တူဝ်တၢႆတင်းလၢႆတၵ်းမီးတၢင်းဢၼ်မၢၵ်ႇမိူဝ်ၵႃႈၼိူဝ်လွႆသုင်ၵူႈလွႆ၊ၵႃႈၼိူဝ်ပၢႆၸိၵ်းသၼ်လွႆတႄးလွႆတင်းလၢႆၵႃႈတႂ်ႈတူၼ်ႈမႆႉဢၼ်ၶဵဝ်ၵႃႈမီး၊ဢိၵ်ႇတင်းတူၼ်ႈမႆႉၼိမ်လူင်ၵူႈတူၼ်ႈ၊ဢိၵ်ႇတင်းၵႃႈတီႈထႃႇၼႃႉဢၼ်ၶဝ်ၽဝ်ၶိူင်ႈတၢင်းလူႇတီႈႁုၼ်ႇႁၢင်ႈသၢင်းထုၵူႈတီႈၵူႈလႅၼ်ၼၼ်ႉဢေႃႈ။ လိုၼ်းၼၼ်ႉၶဝ်တၵ်းဢွၼ်ၵၼ်ႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ၼၼ်ႉဢေႃႈ။-
ၸႂ်ႈယဝ်ႉ။ ၵဝ်တၵ်းယဵတ်ႇမိုဝ်းယိုၼ်းမိုဝ်းၵဝ်လႄႈယႃႉပႅတ်ႈသိုင်ႇၸိုင်ႈဝၢၼ်ႈမိူင်းၶဝ်ဢေႃႈ။ ၵဝ်တၵ်းႁႂ်ႈမိူင်းၼၼ်ႉပဵၼ်ဢၼ်ပဝ်ႇလၢပ်ႈဢၼ်သဵတ်ႇယဵၼ်ၸႃႉဢဝ်ၵႃႈတီႈထိူၼ်ႇလႅင်ႉၽၢႆႇတၢင်းၸၢၼ်းၵႂႃႇတေႃႇထိုင်ႁွတ်ႈဝဵင်း ရိပလႃႉ ၊ၽၢႆႇတၢင်းႁွင်ႇၸွတ်ႇတူဝ်ႈၵႂႃႇၵႃႈၼႂ်းတီႈယူႇတီႈသဝ်းၵူၼ်းမဵဝ်း ဢိသရေး တင်းလၢႆ၊လိုၼ်းၼၼ်ႉၶဝ်တၵ်းဢွၼ်ၵၼ်ႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ သမ်ႉႁွတ်ႈမႃးတီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉတီႈၵူၼ်းမိူင်း ဢိသရေး၊ လႄႈဝႃႈၸမ်ႉ၊ဢၼ်ၼႆႉပဵၼ်တီႈဢၼ်သုတ်းဢၼ်ၵွႆမိူင်းၼႆႉတင်းသဵင်ႈတင်းမူတ်းယဝ်ႉ။-
“မဵဝ်း ဢိသရေး၊ ႟။ တီႈဢၼ်သုတ်းဢၼ်ၵွႆႁွတ်ႈမႃးတီႈမႂ်းယဝ်ႉ။ ၵဝ်တၵ်းပွႆႇတၢင်းၸႂ်မႆႈၶႂ်ႈၸႃႉၵဝ်ႁွတ်ႈထိုင်ၵႃႈၼိူဝ်မႂ်းဢေႃႈ။ ၵဝ်တၵ်းၸီႇယၢင်ႇတြႃးၸွမ်းၵႃႈၼင်ႇတၢင်းၵမ်တၢင်းၵျၢင်ႉမႂ်းဢေႃႈ။ ၵဝ်တၵ်းပၼ်တၢမ်ႇဢပျတ်ႈတၢင်းဢၼ်လီႁင်ႈဢဵတ်ႇသဵတ်ႇမႂ်းၼၼ်ႉဢေႃႈ။-
ၵဝ်တၵ်းဢမ်ႇသေလၢႆမႂ်း၊ဢမ်ႇဢဵတ်းလူမႂ်းလႃးလႃး။ ၵဝ်တၵ်းပၼ်တၢမ်ႇဢပျတ်ႈၸွမ်းတၢင်းဢၼ်မႂ်းၵမ်ၵျၢင်ႉမိူဝ်ႈဢၼ်တၢင်းဢၼ်လီႁင်ႈဢဵတ်ႇသဵတ်ႇယင်းမီးၵႃႈၼႂ်းၶိုင်ႈၵၢင်မႂ်းယူႇၼၼ်ႉဢေႃႈ။ လိုၼ်းၼၼ်ႉမႂ်းတၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ သမ်ႉမီးဢမိင်ႉၸမ်ႉ၊ “ၽေးဢုပၢတ်ႈဢၼ်ၼိုင်ႈယဝ်ႉဢၼ်ၼိုင်ႈႁွတ်ႈမႃးယဝ်ႉ၊တူၺ်းလူး။ ၽေးဢုပၢတ်ႈႁွတ်ႈမႃးယူႇဢေႃႈ။-
ဢၼ်ၼႆႉပဵၼ်တီႈဢၼ်သုတ်းဢၼ်ၵွႆယဝ်ႉ။ မႂ်းၵေႃႈသုတ်းၵွႆသဵင်ႈယဝ်ႉ။-
ၵူၼ်းဢၼ်ယူႇၵႃႈၼႂ်းမိူင်းၸဝ်ႈ႟။ လႄႉၵမ်းဢၼ်မႂ်းလႆႈၶၢမ်ႇၼၼ်ႉႁွတ်ႈမႃးယဝ်ႉ၊ၶိင်ႇမၼ်းမိုဝ်ႉမၼ်းၸေးယဝ်ႉ၊မိုဝ်ႉဝၼ်းဢၼ်ယင်းဢမ်ႇလႆႈမီးတၢင်းဢၼ်ႁွင်ႉသႅၼ်ႇပၢဝ်ႇသေႃႇၸူမ်းၸူမ်းသိူဝ်းသိူဝ်းၵႃႈၼိူဝ်လွႆတင်းလၢႆၸမ်မႃးယဝ်ႉ၊တၢင်းဢၼ်ဢူၼ်ဢဵၼ်မေႃးမႄးၼၼ်ႉၸမ်မႃးယဝ်ႉ။
“ဢမ်ႇႁိုင်ယဝ်ႉ၊မႂ်းတၵ်းလႆႈၶၢမ်ႇဢၢႆႁႅင်းတေႃးသႃႉတၢင်းၸႂ်မႆႈၵဝ်ဢေႃႈ။ ၵဝ်တၵ်းၸီႇယၢင်ႇၸွမ်းၵႃႈၼင်ႇတၢင်းၵမ်တၢင်းၵျၢင်ႉမႂ်းဢေႃႈ။ ၵဝ်တၵ်းပၼ်တၢမ်ႇဢပျတ်ႈတၢင်းဢၼ်လီႁင်ႈဢဵတ်ႇသဵတ်ႇမႂ်းဢေႃႈ။-
ၵဝ်တၵ်းဢမ်ႇသေလၢႆမႂ်း၊ဢမ်ႇဢဵတ်းလူမႂ်းလႃးလႃး။ ၵဝ်တၵ်းပၼ်တၢမ်ႇဢပျတ်ႈၸွမ်းတၢင်းဢၼ်မႂ်းၵမ်ၵျၢင်ႉမိူဝ်ႈဢၼ်တၢင်းဢၼ်လီႁင်ႈဢဵတ်ႇသဵတ်ႇယင်းမီးယူႇၵႃႈၼႂ်းၵၢင်မႂ်းၼၼ်ႉဢေႃႈ။ လိုၼ်းၼၼ်ႉမႂ်းတၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး ၸဝ်ႈဢၼ်ပၼ်တၢမ်ႇဢပျတ်ႈတီႈမႂ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိုဝ်ႉဝၼ်းၽေးဢုပၢတ်ႈႁွတ်ႈမႃးပုၼ်ႈၵူၼ်းမဵဝ်း ဢိသရေး ၊ယဝ်ႉ။ တၢင်းဢၼ်ႁဵတ်းၵျၢမ်းထၢမ်းတူဝ်းတွၼ်းမႃးတိၵ်းတိၵ်းလႄႈမႃႇၼႃႉၽႅၼ်သုင်ႁွတ်ႈထိုင်တီႈၸိၵ်းတီႈၸွမ်မၼ်းယဝ်ႉ။-
တၢင်းဢၼ်ႁဵတ်းၵျၢမ်းႁဵတ်းထၢမ်းၼၼ်ႉႁႂ်ႈလွင်ႈတၢင်းႁၢႆႉၼမ်ၵိုၼ်းမႃးဢေႃႈ။ တၢင်းဢၼ်မၢၵ်ႈမီးလီပဵၼ်ၶဝ်၊ၸေးၸိမ်ႇဢုၵ်ႉၸႃႇၶဝ်၊မုၼ်သရေႇၶဝ်ၸိူဝ်းၼၼ်ႉတေဢမ်ႇၵိုတ်းဢမ်ႇၵျၢၼ်ႇဝႆႉလႃးလႃး။
ၶိင်ႇမၼ်းမိုဝ်ႉမၼ်းၸေးယဝ်ႉ။ မိုဝ်ႉမၼ်းဝၼ်းမၼ်းၸမ်ယဝ်ႉ။ ယႃႇပေႁႂ်ႈၵေႃႉဢၼ်သိုဝ်ႉဢဝ်ၼၼ်ႉမီးတၢင်းဢၼ်ၸူမ်းဢၼ်သိူဝ်း။ ယႃႇပေႁႂ်ႈၵေႃႉဢၼ်ၶၢႆပၼ်ၼၼ်ႉမီးၸႂ်ဢၼ်ဢမ်ႇသႃႇၶၢင်းၶီၶၢင်းၽၢၼ်ၵွပ်ႈပိူဝ်ႈဢၼ်ၽြႃးပဵၼ်ၸဝ်ႈတၵ်းၸီႇယၢင်ႇမိူၼ်မိူၼ်ၵၼ်တီႈၵူႈၵေႃႉဢေႃႈ။-
ၵူၼ်းဢၼ်ၶၢႆဢုၵ်ႉၸႃႇတီႈလိၼ်ၵေႃႉလႂ်သေဢမ်ႇဝႃႈ၊မိူဝ်ႈဢၼ်ၶဝ်ယင်းမီးဢသၢၵ်ႈယူႇသေၵေႃႈ ဢမ်ႇပွၵ်ႈၵႂႃႇထိုင်တီႈၶိူင်ႈပိူင်ဢၼ်ၶဝ်ၶၢႆၵႂႃႇၼၼ်ႉလႆႈ။ ပျႃႇတိၵ်ႈရူႇပႃႇရူင်ႇၼႆႉၸၢပ်ႈသႅင်ႇၵၼ်တင်းၵူၼ်းမၼ်းၸဝ်ႈတင်းသဵင်ႈတင်းမူတ်းလႄႈၽူႈလႂ်ဢမ်ႇလႆႈပွၵ်ႈၶိုၼ်းမႃးလႃးလႃး။ ၵွပ်ႈပိူဝ်ႈဝူတ်ႈဢပျတ်ႈၶဝ်ၼၼ်ႉလႄႈဢမ်ႇမီးၽူႈလႂ်ထိင်းဢသၢၵ်ႈတူဝ်ၸဝ်ႈၵဝ်ႇဝႆႉလႆႈ။-
ၶဝ်ဢွၼ်ၵၼ်ပဝ်ႇၼႄးၶရႃႇႁႂ်ႈႁၢင်ႈႁႅၼ်းၼႃႈသိုၵ်းဢေႃႈ။ ၵူၺ်းၵႃႈ၊ၽူႈလႂ်ဢမ်ႇၶီႇသိုၵ်းၶိုၼ်ႈတိုၵ်းသိုၵ်းသေၵေႃႉသေၵူၼ်း။ လွင်ႈမၼ်းၸမ်ႉ၊ဢၢႆႁႅင်းတေႃးသႃႉတၢင်းၸႂ်မႆႈၽြႃးပဵၼ်ၸဝ်ႈတူၵ်းႁွတ်ႈမိူၼ်မိူၼ်ၵၼ်တီႈၵူႈၵေႃႉဢေႃႈ။
မီးတၢင်းဢၼ်တိုၵ်းတေႃးၵၼ်ၸွမ်းတႃႈၸွမ်းတၢင်း၊မီးၵႃႇလႃႉႁႃႈလႅင်မိူင်း၊ဢိၵ်ႇတင်းတၢင်းဢၼ်ဢိုပ်းဢၼ်ယၢၵ်ႈၵႃႈၼႂ်းႁေႃၼႂ်းႁိူၼ်းဢေႃႈ။ ၵေႃႉဢၼ်မီးၵႃႈတီႈၼွၵ်ႈတီႈပၢင်ႇၼၼ်ႉတၵ်းတၢႆလူၺ်ႈလၢပ်ႇလူၺ်ႈလႅဝ်းလႄႈၵေႃႉဢၼ်မီးၵႃႈၼႂ်းၶူးၼႂ်းဝဵင်းၸမ်ႉ၊တၵ်းတၢႆလူၺ်ႈၵႃႇလႃႉႁႃႈလႅင်မိူင်း၊ဢိၵ်ႇတင်းတၢင်းဢၼ်ဢိုပ်းဢၼ်ယၢၵ်ႈဢေႃႈ။
ၵမ်ႈၽွင်ႈၸမ်ႉ၊တၵ်းပၢႆႈလွတ်ႈၸူးတီႈလွႆတင်းလၢႆမိူၼ်ၸိူဝ်ႉၼင်ႇၼူၵ်ႉတူႈဢၼ်တိုၼ်ႇပၢႆႈသေၵႃႈတီႈပၢင်ႇတီႈႁူၺ်ႈၼၼ်ႉဢေႃႈ။ ၶဝ်တၵ်းဢွၼ်ၵၼ်ၶၢင်းၶီၶၢင်ႈၽၢၼ်ယူႇၵွပ်ႈပိူဝ်ႈဢပျတ်ႈၶဝ်ဢေႃႈ။-
ႁႅင်းမိုဝ်းၶဝ်တၵ်းဢူၼ်ႈၵႂႃႇလႄႈႁူဝ်ၶဝ်ႇၶဝ်တၵ်းသၼ်ႇတၵ်းသၢႆၵူႈၵေႃႉၵူႈၵူၼ်းဢေႃႈ။-
ၶဝ်တၵ်းဢွၼ်ၵၼ်ဢဝ်ၼင်ပေႃႁတ်ႉဢႅဝ်ယူႇ၊တၵ်းမီးတၢင်းဢၼ်တူၵ်းၸႂ်တိုၼ်ႇယူႇၵူႈၶိင်ႇၵူႈၶႃႇ၊တၢင်းဢၼ်ဢူၵ်းဢၢႆတၵ်းမီးၵႃႈတီႈၼႃႈၶဝ်လႄႈတၢင်းဢၼ်ထႃႁူဝ်ၵႅတ်းႁူဝ်တၵ်းမီးၵႃႈတီႈႁူဝ်ၶဝ်ၵူႈၵေႃႉဢေႃႈ။-
ၶဝ်တၵ်းဢဝ်ငိုၼ်းၶမ်းၶဝ်ထိမ်ႈပႅတ်ႈၵႃႈၼိူဝ်သဵၼ်ႈတႃသၢႆတၢင်းလႄႈမၢတ်ႈပဵၼ်ၸိူဝ်ႉၼင်ႇလွင်ႈတၢင်းဢၼ်ၵူဝ်ႈၵိူၵ်ႇၼၼ်ႉ၊ၵွပ်ႈပိူဝ်ႈငိုၼ်းၶဝ်ၶမ်းၶဝ်ၼၼ်ႉဢမ်ႇၵႄႇသႄႇၼုၵ်ႈဢဝ်ၶဝ်လႆႈၼႂ်းမိူဝ်ႈဢၼ် ထႃႇဝရႃႉၽြႃး၊ ဢွၵ်ႇတေႃးသႃႉတၢင်းၸႂ်မႆႈၼၼ်ႉဢေႃႈ။ ဢမ်ႇၽေႇဢလူဝ်ႇသၼ်ႇတႃႉႁူဝ်ၸႂ်ၶဝ်လႆႈ။ ဢမ်ႇလဵင်ႉတွင်ႉလဵင်ႉပုမ်ၶဝ်ဢိမ်ႇဢိမ်ႇတဵမ်တဵမ်လႆႈ။ ငိုၼ်းၶမ်းၶဝ်ၼၼ်ႉႁဵတ်းႁႂ်ႈၶဝ်ႁဵတ်းတုၸရိူၵ်ႈမႅၼ်ႈဢေႃႈ။-
မိူဝ်ႈၵွၼ်ႇဢွၼ်ၼၼ်ႉၶဝ်မႃႇၼႃႉၽႅၼ်သုင်လူၺ်ႈၵႅဝ်ႈသႅင်ငိုၼ်းၶမ်းၶဝ်ၼၼ်ႉဢေႃႈ။ ၵူၺ်းၵႃႈ၊ၶဝ်ဢဝ်ၶိူင်ႈၶူဝ်းၸိူဝ်းၼၼ်ႉႁဵတ်းႁုၼ်ႇႁၢင်ႈသၢင်းထုဢၼ်လီႁင်ႈဢဵတ်ႇသဵတ်ႇၼၼ်ႉယဝ်ႉ။ ၵွပ်ႈပိူဝ်ႈၼႆလႄႈ ထႃႇဝရႃႉၽြႃး၊ ႁႂ်ႈၶိူင်ႈၶူဝ်းၸိူဝ်းၼၼ်ႉပဵၼ်ဢၼ်ၵူဝ်ႈၵိူၵ်ႇတီႈၶဝ်ဢေႃႈ။
ထႃႇဝရႃႉၽြႃး၊ မီးဢမိင်ႉလႄႈဝႃႈၸမ်ႉ၊ “ၵဝ်တၵ်းၸႂ်ႉၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆႁႂ်ႈၸူၼ်ၶဝ်လႄႈ၊ႁႂ်ႈၵူၼ်းဢထမ်ႇမႃႉတင်းလၢႆႁိမ်ဢဝ်ႁူင်ႇဢဝ်ဢုၵ်ႉၸႃႇၶဝ်သေယဝ်ႉ၊တၵ်းႁဵတ်းႁႂ်ႈဢုၵ်ႉၸႃႇၶဝ်ၵူဝ်ႈၵိူၵ်ႇဢေႃႈ။-
ၵဝ်တၵ်းဝၢႆႇၼႃႈၵဝ်ပႅတ်ႈၼႂ်းမိူဝ်ႈဢၼ်ပိူၼ်ႈႁဵတ်းႁႂ်ႈၵျွင်းပိၵ်ႈမၢၼ်ႇဢၼ်ပဵၼ်ၽၼ်ႇတႃႇၵဝ်ၼၼ်ႉၵူဝ်ႈၵိူၵ်ႇ၊ၵူၼ်းၸူၼ်တင်းလၢႆဢွၼ်ၵၼ်ၶဝ်ႈၵႃႈၼႂ်းမၼ်းလႄႈႁႂ်ႈၵူဝ်ႈၵိူၵ်ႇၼၼ်ႉဢေႃႈ။
“လွင်ႈတၢင်းၵူႈၸိူဝ်ႉၵူႈပိူင်ပဵၼ်ဢၼ်ယုင်ႈယၢင်ႈမူတ်းယဝ်ႉ။ ၵႃႈၼႂ်းမိူင်းၸဝ်ႈတဵမ်ဝႆႉတင်း တၢင်းဢၼ်ၶႃႈၽၼ်းၵၼ်တၢႆလႄႈၵႃႈၼႂ်းဝဵင်းၵေႃႈတဵမ်ဝႆႉတင်း တၢင်းဢၼ်တဵၵ်းငႅၼ်းၵၼ်ဢေႃႈ။-
ၵဝ်တၵ်းပွႆႇၸႂ်ႉၵူၼ်းတၢင်ႇၸိူဝ်ႉတၢင်ႇၶိူဝ်း ဢၼ်ႁၢဝ်ႈၵျၢမ်းၼႃႇသေပိူၼ်ႈၼၼ်ႉမႃးလႄႈႁႂ်ႈၶဝ်သိမ်းဢဝ်ႁိူၼ်းသူဢေႃႈ။ ၵူၼ်းသူဢၼ်ႁႅင်းယႂ်ႇၼႃႇသေပိူၼ်ႈၼၼ်ႉႁႅင်းၶဝ်တၵ်းသုမ်းႁၢႆပႅတ်ႈ၊ယၢမ်းမိူဝ်ႈဢၼ်ၵဝ်ပွႆႇၸႂ်ႉၵူၼ်းတၢင်ႇၸိူဝ်ႉတၢင်ႇၶိူဝ်းမႃးႁဵတ်းႁႂ်ႈထႃႇၼႃႉတီႈဢၼ်သူၵူဝ်းၵႂၢႆႇၵူဝ်ႈၵိူၵ်ႇၵႂႃႇၼၼ်ႉဢေႃႈ။-
ၽေးတၢင်းဢၼ်လုလႅဝ်မႃးယဝ်ႉ။ သူတၵ်းဢွၼ်ၵၼ်ႁႃတၢင်းဢၼ်တဵတ်ႇလီၼိမ်လီၼၼ်ႉသေၵေႃႈဢမ်ႇထူပ်းလႃးလႃး။-
ၽေးတၢင်းဢၼ်လုလႅဝ်ဢၼ်ၼိုင်ႈယဝ်ႉဢၼ်ၼိုင်ႈမႃးၸွမ်းၵၼ်ယူႇယဝ်ႉ။ ၶၢဝ်ႇငၢဝ်းဢၼ်ဢမ်ႇလီတင်းလၢႆၵေႃႈမႃးၸွမ်းၵၼ်မိူၼ်ၼမ်ႉၵႄးဢၼ်လႆယူႇၼၼ်ႉယဝ်ႉ။ သူတၵ်းဢွၼ်ၵၼ်ယွၼ်းဢဝ်ပျႃႇတိၵ်ႈရူႇပႃႇရူင်ႇတီႈပရေႃးၽႅတ်ႈ ဢေႃႈ။ ၵူၺ်းၵႃႈ၊ဢၶႂၢင်ႉဢၼ်ႁေႃးတြႃးတၵ်းထၢတ်ႇသေတီႈယဵၸ်ႈပရေႃးႁဵၵ်ႈ တင်းလၢႆလႄႈဢၶႂၢင်ႉဢၼ်ပၼ်တၢင်းၵျၢမ်ႇတၢင်းပွင်တၵ်းထၢတ်ႇသေတီႈၵူၼ်းထဝ်ႈၵူၼ်းၵႄႇတင်းလၢႆဢေႃႈ။-
ၶုၼ်ႁေႃၶမ်းတၵ်းၶၢင်းၶီၶၢင်းၽၢၼ်ပွင်ႉမိုၼ်ႇ၊လုၵ်ႈၸဝ်ႈလုၵ်ႈၵွၼ်းတၵ်းဢမ်ႇမီးတီႈမုင်ႈမွင်း၊ၶႃႈဝၢၼ်ႈၵူၼ်းမိူင်းတင်းလၢႆတၵ်းသၼ်ႇသၢႆၵူဝ်ႁႄဢေႃႈ။ ၵဝ်တၵ်းပၼ်တၢမ်ႇဢပျတ်ႈၸွမ်းၵႃႈၼင်ႇဢၼ်သူၵမ်ၵျၢင်ႉသၢင်ႈႁဵတ်းမႃးလႄႈၵဝ်တၵ်းၸီႇယၢင်ႇတြႃးတီႈသူမိူၼ်ၸိူဝ်ႉၼင်ႇဢၼ်သူၸီႇယၢင်ႇတီႈပိူၼ်ႈၼၼ်ႉဢေႃႈ။ လွင်ႈတၢင်းၼႆႉတၵ်းၼႄပျႃးႁႂ်ႈသူႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။
ၼႂ်းတၢင်းဢၼ်ႁဝ်းၶႃႈလႆႈၶၢမ်ႇတၢင်းဢၼ်တိသိမ်းဢဝ်မႃးထူၼ်ႈထိုင်ပီတီႈႁူၵ်း၊လိူၼ်တီႈႁူၵ်းဝၼ်းတီႈႁႃႈၼၼ်ႉယၢမ်းမိူဝ်ႈဢၼ်ၵဝ်ယင်းတိုၵ်ႉၼင်ႈယူႇၵႃႈၼႂ်းႁိူၼ်းၵဝ်လူၺ်ႈၵၼ်တင်းၵူၼ်းဢၼ်ပဵၼ်ၵႄႇပဵၼ်ႁူဝ်မိူင်း ယုတႃႉ၊ တင်းလၢႆၼၼ်ႉၸိုင်၊တၼ်းၶူဝ်း ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊တူၵ်းႁွတ်ႈၵႃႈၼိူဝ်ၵဝ်ဢေႃႈ။-
ၵဝ်ႁႅၼ်တူၺ်းလႄႈႁၼ်ရူႇပႃႇရူင်ႇပုင်ႇႁၢင်ႈၵူၼ်းၽႆးဢေႃႈ။ ၸႃႉဢဝ်တီႈဢႅဝ်မၼ်းလူင်းမႃးပဵၼ်ၸိူဝ်ႉၼင်ႇၽႆးလႄႈ၊ဢဝ်တီႈဢႅဝ်မၼ်းၶိုၼ်ႈၼိူဝ်မီးတၢင်းဢၼ်ႁိူဝ်ႈမၢပ်ႈမိူၼ်ၸိူဝ်ႉၼင်ႇတွင်းလိူင်ဢၼ်ပွတ်ႈသီဝႆႉၼၼ်ႉဢေႃႈ။-
မၼ်းယဵတ်ႇဢွၵ်ႇမိူၼ်ႁၢင်ႈၽၢင်မိုဝ်းသေလႄႈယိပ်းၵမ်ဢဝ်ၶူၼ်ႁူဝ်ၵဝ်ယွမ်ႇၼိုင်ႈဢေႃႈ။ ၼႂ်းရူႇပႃႇရူင်ႇၼၼ်ႉဝိၺိၺ်ႇၽြႃးပဵၼ်ၸဝ်ႈဢုမ်ႈယွင်ႈဢဝ်ၵဝ်ၶိုၼ်ႈၵႂႃႇၵႃႈၼႂ်းဢႃႇၵႃႇသႃႉဢၼ်သုင်ၼႃႇၼၼ်ႉလႄႈ၊ဢဝ်ၵႂႃႇၸူးၵႃႈတီႈဝဵင်း ယေႇရုသလႅမ်ႇ၊ ပုၼ်ႉသေယဝ်ႉ၊ဢဝ်ၵႂႃႇၶျႃးဝႆႉၵႃႈတီႈၽၵ်းတူၸၼ်ႉၼႂ်းတီႈၽၵ်းတူလူင်ၽၢႆႇတၢင်းႁွင်ႇၵျွင်းပိၵ်ႈမၢၼ်ႇၸဝ်ႈ၊တီႈဢၼ်မီးႁုၼ်ႇႁၢင်ႈသၢင်းထုဢၼ်တိုၵ်းယူင်းႁႂ်ႈတၢင်းၸႂ်မႆႈၶႂ်ႈၸႃႉၽြႃးပဵၼ်ၸဝ်ႈဢွၵ်ႇၼၼ်ႉဢေႃႈ။
ၵႃႈတီႈၼၼ်ႈၵဝ်လၢႆႁၼ်မုၼ်ၽုင်းၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ဢၼ်မီးယူႇၵႃႈတီႈၼၼ်ႈမိူၼ်ၸိူဝ်ႉၼင်ႇဢၼ်ၵဝ်လႆႈႁၼ်မိူဝ်ႈဢၼ်ၵဝ်မီးယူႇၵႃႈႁိမ်းၼမ်ႉ ၶေႇပႃႇ၊ ၼၼ်ႉဢေႃႈ။-
မၼ်းၸဝ်ႈမီးဢမိင်ႉတီႈၵဝ်လႄႈဝႃႈ၊ “လုၵ်ႈၵူၼ်း႟။ မုင်ႈတူၺ်းၵႃႈတီႈၼႃႈတၢင်းႁွင်ႇပုၼ်ႉတႃႉ၊” ဝႃႈၼင်ႇၼႆသေယဝ်ႉ၊ၵဝ်မုင်ႈတူၺ်းလႄႈႁၼ်ႁုၼ်ႇႁၢင်ႈသၢင်းထုဢၼ်တိုၵ်းယူင်းႁႂ်ႈတေႃးသႃႉတၢင်းၸႂ်မႆႈၽြႃးပဵၼ်ၸဝ်ႈဢွၵ်ႇၼၼ်ႉမီးယူႇၵႃႈႁိမ်းၶဵင်ႇတၢင်းလူႇၵႃႈတီႈၽၵ်းတူလူင်ၼၼ်ႉဢေႃႈ။
ၽြႃးပဵၼ်ၸဝ်ႈမီးဢမိင်ႉတီႈၵဝ်ထႅင်ႈလႄႈဝႃႈ၊ “လုၵ်ႈၵူၼ်း႟။ မႂ်းႁၼ်လွင်ႈတၢင်းဢၼ်ပဵၼ်ယူႇၼၼ်ႉႁိုဝ်း။ တူၺ်းတၢင်းဢၼ်လီႁင်ႈဢဵတ်ႇသဵတ်ႇၼႃႇလူင်လၢင်ဢၼ်ၵူၼ်းမဵဝ်း ဢိသရေး၊ ၶဝ်ႁဵတ်းၼၼ်ႉလူး။ ၶဝ်လိုပ်ႈႁေႃႈၵဝ်ႁႂ်ႈၽၢတ်ႇယၢၼ်ၵၼ်တင်းထႃႇၼႃႉတီႈဢၼ်မူတ်းၸၢင်ႇၵဝ်ၵႂႃႇၵႆၵႆၼၼ်ႉယဝ်ႉ။ မႂ်းသမ်ႉတၵ်းႁၼ်လွင်ႈတၢင်းဢၼ်လီႁင်ႈဢဵတ်ႇသဵတ်ႇဢၼ်ယဵင်ႈၶႅၼ်းယႂ်ႇၼႃႇၼၼ်ႉလူးၵွၼ်ႇဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈသမ်ႉဢဝ်ၵဝ်ၵႂႃႇတီႈၽၵ်းတူၽၢႆႇတၢင်းၼွၵ်ႈပၢင်ႇဝၢင်းၸဝ်ႈသေလႄႈပျႃးၼႄႁူးပွင်ႇၽႃဢုတ်ႇၼၼ်ႉတီႈၵဝ်ဢေႃႈ။-
မၼ်းၸဝ်ႈသမ်ႉမီးဢမိင်ႉတီႈၵဝ်လႄႈဝႃႈ၊ “ယႃႉၶဝ်ႈၵႃႈတီႈႁူးပွင်ႇၽႃၼႆႉၵႂႃႇတႃႉ၊” ဝႃႈၼင်ႇၼႆလႄႈၵဝ်ၵေႃႈယႃႉၶဝ်ႈၵႂႃႇလႄႈႁၼ်ၽၵ်းတူဢေႃႈ။-
မၼ်းၸဝ်ႈသမ်ႉမီးဢမိင်ႉတီႈၵဝ်လႄႈဝႃႈ၊ “ၶဝ်ႈလႄႈတူၺ်းလွင်ႈတၢင်းဢၼ်ႁၢႆႉယုတ်ႈဢၼ်လီႁင်ႈဢဵတ်ႇသဵတ်ႇဢၼ်ၶဝ်ဢွၼ်ၵၼ်ႁဵတ်းယူႇၵႃႈတီႈၼၼ်ႈၼၼ်ႉတႃႉ၊” ဝႃႈၼင်ႇၼႆဢေႃႈ။-
ၵဝ်ၵေႃႈၶဝ်ႈၵႂႃႇလႄႈတူၺ်းဢေႃႈ။ ၵႃႈတီႈၽႃဢုတ်ႇလဵပ်ႈႁွပ်ႈၼၼ်ႉၵဝ်လႆႈႁၼ်ပုင်ႇႁၢင်ႈငူးလႂ်၊တူဝ်သတ်းဢၼ်လီႁင်ႈဢဵတ်ႇသဵတ်ႇလႂ် ႁုၼ်ႇႁၢင်ႈသၢင်းထုဢၼ်ၵူၼ်းမဵဝ်း ဢိသရေး၊ ၶဝ်ဝႆႈၵႃႈမီးတင်းသဵင်ႈၸိူဝ်းၼၼ်ႉတႅမ်ႈသႂ်ႇဝႆႉဢေႃႈ။-
ၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်း ဢိသရေး ၊ၸဵတ်းသိပ်းၵေႃႉၼၼ်ႉမီးယူႇၵႃႈတီႈၼၼ်ႈလႄႈ ယႃႇၸၺႃႇ၊ လုၵ်ႈၸၢႆး သႃႇၽၢၼ်ႇ၊ ၵေႃႈမီးယူႇၵႃႈၼႂ်းၶိုင်ႈၵၢင်ၶဝ်ယူႇဢေႃႈ။ ၵႃႈၼႂ်းမိုဝ်းၵူႈၵေႃႉၼၼ်ႉမီးၽၢင်ၽႆးဢၼ်ၽဝ်ၼၢမ်ႇသႃႇဢၢႆႁွမ်ဢၢႆႁူၺ်းႁင်းၽႂ်ႁင်းမၼ်းလႄႈဢၢႆႁွမ်ဢၢႆၵႂၼ်းၽႆးၼၢမ်ႇသႃႇၵေႃႈၶိုၼ်ႈၵႂႃႇၵႃႈၼိူဝ်ဢေႃႈ။-
မၼ်းၸဝ်ႈသမ်ႉမီးဢမိင်ႉတီႈၵဝ်လႄႈဝႃႈ၊ “လုၵ်ႈၵူၼ်း႟။ မႂ်းႁၼ်လွင်ႈတၢင်းဢၼ်ၵူၼ်းဢၼ်ပဵၼ်ၵႄႇပဵၼ်ႁူဝ်ၵႃႈၼႂ်းၵူၼ်းမဵဝ်း ဢိသရေး၊ ႁင်းၽႂ်ႁင်းမၼ်းလၵ်ႉလွမ်ႁဵတ်းယူႇၼၼ်ႉယဝ်ႉႁိုဝ်း။ ၶဝ်ဢွၼ်ၵၼ်ဝႆႈသႃယူႇၵႃႈၼႂ်းႁွင်ႈဢၼ်တဵမ်ဝႆႉတင်းႁုၼ်ႇႁၢင်ႈသၢင်းထုၼၼ်ႉယဝ်ႉ။ ၶဝ်ဢွၼ်ၵၼ်ဝႃႈ၊ ‘ ထႃႇဝရႃႉၽြႃး၊ ဢမ်ႇႁၼ်ႁဝ်း။ မၼ်းၸဝ်ႈၸုၼ်ႉပႅတ်ႈမိူင်းၼႆႉယဝ်ႉ၊’ ဝႃႈၼႆဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉတီႈၵဝ်လႄႈဝႃႈ၊ “မႂ်းတၵ်းႁၼ်လွင်ႈတၢင်းဢၼ်လီႁင်ႈဢဵတ်ႇသဵတ်ႇဢၼ်ယဵင်ႈၶႅၼ်းယႂ်ႇၼႃႇသေဢၼ်ၶဝ်ႁဵတ်းၼၼ်ႉလူးၵွၼ်ႇဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈမၼ်းၸဝ်ႈဢဝ်ၵဝ်ၵႂႃႇၸူးၵႃႈတီႈၽၵ်းတူၵျွင်းပိၵ်ႈမၢၼ်ႇၸဝ်ႈဢၼ်မီးၵႃႈတီႈၽၢႆႇတၢင်းႁွင်ႇသေယဝ်ႉ၊ၵႃႈတီႈၼၼ်ႈၵဝ်ႁၼ်မႄႈယိင်းတင်းလၢႆဢွၼ်ၵၼ်ၼင်ႈလႄႈႁွင်ႉႁႆႈပုၼ်ႈၽြႃး တမ်ႇမု ယူႇၼၼ်ႉဢေႃႈ။
မၼ်းၸဝ်ႈသမ်ႉမီးဢမိင်ႉတီႈၵဝ်လႄႈဝႃႈ၊ “လုၵ်ႈၵူၼ်း႟။ မႂ်းႁၼ်လွင်ႈတၢင်းၼၼ်ႉယဝ်ႉႁိုဝ်း။ မႂ်းတၵ်းႁၼ်လွင်ႈတၢင်းဢၼ်လီႁင်ႈဢဵတ်ႇသဵတ်ႇဢၼ်ယဵင်ႈၶႅၼ်းယႂ်ႇၼႃႇသေၸိူဝ်းၼၼ်ႉလူးၵွၼ်ႇဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈမၼ်းၸဝ်ႈဢဝ်ၵဝ်ၶဝ်ႈၵႂႃႇၸၼ်ႉၼႂ်းပၢင်ႇဝၢင်းၵျွင်းပိၵ်ႈမၢၼ်ႇၸဝ်ႈပုၼ်ႉဢေႃႈ။ ၵႃႈတီႈၽၵ်းတူထႃႇၼႃႉဢၼ်မူတ်းၸၢင်ႇၸဝ်ႈၵႃႈၼႂ်းၵႄႈဝူင်ႈၵၢင်ၶဵင်ႇတၢင်းလူႇတင်းၼႃႈၵျွင်းပိၵ်ႈမၢၼ်ႇၸဝ်ႈၼၼ်ႉမီးၵူၼ်းၸၢႆးသၢဝ်းႁႃႈၵေႃႉဢေႃႈ။ ၶဝ်ၸိူဝ်းၼၼ်ႉဝၢႆႇလင်တေႃႇထႃႇၼႃႉတီႈမူတ်းၸၢင်ႇၸဝ်ႈယူႇ၊ဝၢႆႇၼႃႈၶဝ်ႈၸူးၽၢႆႇဝၼ်းဢွၵ်ႇယူႇသေလႄႈၵူမ်ႈဝႆႈၵၢင်ဝၼ်းဢၼ်ဢွၵ်ႇမႃးယူႇၼၼ်ႉဢေႃႈ။
ထႃႇဝရႃႉၽြႃး၊ မီးဢမိင်ႉတီႈၵဝ်လႄႈဝႃႈ၊ “လုၵ်ႈၵူၼ်း႟။ မႂ်းႁၼ်လွင်ႈတၢင်းၼၼ်ႉယဝ်ႉႁိုဝ်း။ ၵူၼ်းမဵဝ်း ယုတႃႉ၊ ၸိူဝ်းၼႆႉႁဵတ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇထၢၼ်ႇၼႆႉၵႃႈတီႈၼႆႈၼၼ်ႉဢိၵ်ႇတင်းၶဝ်ဢွၼ်ၵၼ်ႁႂ်ႈမိူင်းၸဝ်ႈတဵမ်ဝႆႉတင်းဢမုဢထမ်ႇမႃႉထၢၼ်ႇၼႆႉၼၼ်ႉၶဝ်ယင်းဢမ်ႇပႆႇပျေႇၸႂ်လူးၵွၼ်ႇ။ ၶဝ်ယင်းဢွၼ်ၵၼ်မႃးလႄႈဢွၼ်ၵၼ်ထၢမ်းႁဵတ်းလွင်ႈတၢင်းၸိူဝ်းၼႆႉၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼႆႉၼၼ်ႉပဵၼ်တၢင်းဢၼ်တိုၵ်းယူင်းတေႃးသႃႉတၢင်းၸႂ်မႆႈၵဝ်ၼမ်ၶိုၼ်ႈယဝ်ႉ။ တူၺ်းလူးၵႃႈၼင်ႇဢၼ်ၶဝ်တၢတ်ႈၼိူင်ႇလႆႈၼၼ်ႉၶဝ်ဢွၼ်ၵၼ်တိုၵ်းယူင်းယႃႉယုၵ်ႉတၢင်းၸႂ်မႆႈၶႂ်ႈၸႃႉၵဝ်လူၺ်ႈတၢင်းဢၼ်ၶဝ်ဢဝ်ၵိင်ႇမႆႉၸမ်ႈသႂ်ႇတီႈၶူႈလင်ၶဝ်ဢေႃႈ။-
ၶဝ်တၵ်းလႆႈၶၢမ်ႇဢဝ်ဢၢႆႁႅင်းတေႃးသႃႉတၢင်းၸႂ်မႆႈၵဝ်ၵႃႈမီးၼၼ်ႉဢေႃႈ။ ၵဝ်တၵ်းဢမ်ႇသေလၢႆၶဝ်၊ဢမ်ႇဢဵတ်းလူၶဝ်လႃးလႃး။ ပိၵ်ႉသမ်ႉၶဝ်ႁဵတ်းတင်းသဵင်ဢၼ်ယႂ်ႇၼႃႇႁွင်ႉသႅၼ်ႇလႄႈလဝ်ႈယွၼ်းတီႈၵဝ်သေၵေႃႈၵဝ်တၵ်းဢမ်ႇထွမ်ႇဢမ်ႇငိၼ်းၵႂၢမ်းၶဝ်၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၵဝ်ငိၼ်းၽြႃးပဵၼ်ၸဝ်ႈလၢတ်ႈတင်းသဵင်ဢၼ်ယႂ်ႇၼႃႇလႄႈဝႃႈ၊ “သူၸိူဝ်းဢၼ်ပႂ်ႉထႃႈပုၼ်ႈတႃႇတေပၼ်တၢမ်ႇတီႈဝဵင်းၼၼ်ႉၶဝ်႟။ မႃးၵႃႈတီႈၼႆႈတႃႉ။ ပႃးဢဝ်ၶိူင်ႈလၢၵ်ႈၼၢၵ်ႈသူမႃးတႃႉ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉၵမ်းလဵဝ်ၵူၼ်းၸၢႆးႁူၵ်းၵေႃႉယိပ်းၵမ်လၢၵ်ႈၼၢၵ်ႈၽႂ်လၢၵ်ႈၼၢၵ်ႈမၼ်းသေလႄႈဢွၵ်ႇသေၵႃႈတီႈၽၵ်းတူလူင်ၸၼ်ႉၼွၵ်ႈဢၼ်မီးၽၢႆႇတၢင်းႁွင်ႇၵျွင်းပိၵ်ႈမၢၼ်ႇၸဝ်ႈၼၼ်ႉမႃးဢေႃႈ။ ၵူၼ်းၵေႃႉၼိုင်ႈမႃးလူၺ်ႈၵၼ်တင်းၶဝ်လႄႈမၼ်းၼၼ်ႉၼုင်ႈၶူဝ်းပိၵ်ႈၶျေႃးသေယဝ်ႉ၊ဢဝ်ၵွၵ်းၼမ်ႉမိုၵ်ႉပႃးၸပ်းႁိမ်းပဵမ်ႉမၼ်းပုၼ်ႈဢၼ်တႅမ်ႈမၢႆၼၼ်ႉဢေႃႈ။ ၶဝ်ၼၼ်ႉဢွၼ်ၵၼ်ၶဝ်ႈလႄႈၸုၵ်းယူႇၵႃႈတီႈႁိမ်းၶဵင်ႇတၢင်းလူႇတွင်းလိူင်ၼၼ်ႉဢေႃႈ။
မိူဝ်ႈၼၼ်ႉမုၼ်ၽုင်းၽြႃးပဵၼ်ၸဝ်ႈၵူၼ်းမဵဝ်း ဢိသရေး ၊ဢၼ်မီးယူႇၵႃႈတီႈၼၼ်ႈၼၼ်ႉလုၵ်ႉသေၵႃႈတီႈဢၼ်သဝ်းယူႇၵႃႈတီႈၶေႇရုၽဵမ်ႇ ၼၼ်ႉသုတ်ႉၶၢႆႉၸူးတီႈၽၵ်းတူၵျွင်းပိၵ်ႈမၢၼ်ႇၸဝ်ႈၵႂႃႇသေယဝ်ႉ၊ ထႃႇဝရႃႉၽြႃး၊ ႁွင်ႉဢဝ်ၵေႃႉဢၼ်ၼုင်ႈၶူဝ်းပိၵ်ႈၶျေႃးၼၼ်ႉသေလႄႈပႃးၵွၵ်းၼမ်ႉမိုၵ်ႉဝႆႉၵႃႈတီႈပဵမ်ႉမၼ်းပုၼ်ႈဢၼ်တၵ်းတႅမ်ႈမၢႆၼၼ်ႉဢေႃႈ။-
ထႃႇဝရႃႉၽြႃး၊ မီးဢမိင်ႉတီႈမၼ်းၼၼ်ႉလႄႈဝႃႈ၊ “လႄႇၵႂႃႇၵႃႈၼႂ်းဝဵင်း ယေႇရုသလႅမ်ႇ၊ တင်းဝဵင်းသေယဝ်ႉ၊တႅမ်ႈမၢႆႁႂ်ႈပဵၼ်တီႈမၢတ်ႈတီႈတွင်းၵႃႈတီႈၼႃႈၽၢၵ်ႇၶဝ်ၸိူဝ်းဢၼ်ၶၢင်းၶီၶၢင်းၽၢၼ်လႄႈႁွင်ႉႁႆႈၵွပ်ႈလူၺ်ႈတၢင်းႁဵတ်းဢၼ်လီႁင်ႈဢဵတ်ႇသဵတ်ႇၵႃႈၼႂ်းဝဵင်းၸိူဝ်းၼၼ်ႉတႃႉ၊” ဝႃႈၼင်ႇၼႆဢေႃႈ။
ၵဝ်သမ်ႉလႆႈငိၼ်းၽြႃးပဵၼ်ၸဝ်ႈမီးဢမိင်ႉထႅင်ႈတီႈတၢင်ႇၵေႃႉတၢင်ႇၵူၼ်းၸိူဝ်းၼၼ်ႉလႄႈဝႃႈ၊ “ဢွၼ်ၵၼ်ၸွမ်းလင်ၵေႃႉၼၼ်ႉၵႂႃႇၵႃႈၼႂ်းဝဵင်းၸွတ်ႇၸွတ်ႇလႄႈၶႃႈၽၼ်းႁႂ်ႈတၢႆတႃႉ။ ယႃႇပေသေလၢႆၽူႈလႂ်။ ယႃႇပေဢဵတ်းလူၶဝ်လႃးလႃး။-
ဢွၼ်ၵၼ်ဢဝ်တၢႆၸႃႉၸဵမ်ၵူၼ်းထဝ်ႈလႂ်၊ၽူႈမၢဝ်ႇၽူႈသၢဝ်လႂ်၊မႄႈႁိူၼ်းတင်းလုၵ်ႈဢွၼ်ႇလႅင်လႂ်တႃႉ။ ၼႂ်းဝႃႈၼၼ်သေၵေႃႈ၊တီႈၶဝ်ၸိူဝ်းဢၼ်လႆႈၶၢမ်ႇမၢႆဝႆႉႁႂ်ႈပဵၼ်တီႈမၢတ်ႈတီႈတွင်းၼၼ်ႉၸမ်ႉ၊ယႃႇပေတိူဝ်ႉပေထုၵ်ႇၶဝ်လႃးလႃး။ ဢွၼ်ၵၼ်တႄႇၸႃႉႁဵတ်းၵႃႈတီႈၵျွင်းပိၵ်ႈမၢၼ်ႇၵဝ်ၼႆႉၵႂႃႇတႃႉ၊” ဝႃႈၼင်ႇၼႆဢေႃႈ။ ပိူဝ်ႈၼႆလႄႈၶဝ်ၵေႃႈဢွၼ်ၵၼ်တႄႇၸႃႉဢဝ်တၢႆၵူၼ်းဢၼ်ပဵၼ်ၵႄႇပဵၼ်ႁူဝ်ၸိူဝ်းဢၼ်ၸုၵ်းယူႇၵႃႈတီႈၵျွင်းပိၵ်ႈမၢၼ်ႇၸဝ်ႈၼၼ်ႉဢွၼ်တၢင်းပိူၼ်ႈဢေႃႈ။
မၼ်းၸဝ်ႈသမ်ႉမီးဢမိင်ႉတီႈၶဝ်ထႅင်ႈလႄႈဝႃႈ၊ “ႁႂ်ႈၵျွင်းပိၵ်ႈမၢၼ်ႇၸဝ်ႈၵူဝ်ႈၵိူၵ်ႇလႄႈႁႂ်ႈပၢင်ႇဝၢင်းၵျွင်းၼၼ်ႉတဵမ်ဝႆႉတင်းတူဝ်တၢႆတင်းလၢႆသေယဝ်ႉ၊ဢွၵ်ႇၵႂႃႇထၢမ်းၼႃႈၵၢၼ်တႃႉ၊” ဝႃႈၼင်ႇၼႆဢေႃႈ။ ၶဝ်ၵေႃႈဢွၼ်ၵၼ်ဢွၵ်ႇၵႂႃႇလႄႈၶႃႈၽၼ်းတၢႆၵူၼ်းၵႃႈၼႂ်းဝဵင်းဢေႃႈ။
ယၢမ်းမိူဝ်ႈဢၼ်ၶဝ်ယင်းတိုၵ်ႉၶႃႈၽၼ်းၵူၼ်းတၢႆယူႇၼၼ်ႉၵဝ်မီးယူႇၵွႆးၶေႃၵဝ်လႄႈၵဝ်ၶုပ်ႉမူပ်ႇသေယဝ်ႉ၊ႁွင်ႉသႅၼ်ႇလဝ်ႈလၢတ်ႈဝႃႈ၊ “ဢူဝ်း၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းႁႂ်ႈႁႅင်းတေႃးသႃႉတၢင်းၸႂ်မႆႈၸဝ်ႈဢွၵ်ႇတေႃႇဝဵင်း ယေႇရုသလႅမ်ႇ၊ ထၢၼ်ႈပေႃးၸဝ်ႈႁဝ်းတၵ်းယႃႉၽဵဝ်ႈၵူၼ်းမဵဝ်း ဢိသရေး၊ ၵႃႈဢၼ်ၵိုတ်းဢၼ်ၵျၢၼ်ႇၼၼ်ႉပႅတ်ႈတီႈၶႃႈႁိုဝ်း၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၽြႃးပဵၼ်ၸဝ်ႈသမ်ႉမီးဢမိင်ႉတီႈၵဝ်လႄႈဝႃႈ၊ “ဢပျတ်ႈၵူၼ်းမဵဝ်း ဢိသရေး၊ တင်းၵူၼ်းမဵဝ်း ယုတႃႉ၊ ၼႆႉယႂ်ႇၼႃႇလူင်လၢင်ဢေႃႈ။ ၶဝ်ႁဵတ်းတၢင်းဢၼ်ၶႃႈၽၼ်းဢဝ်တၢႆၵၼ်ၵႃႈၼႂ်းမိူင်းၼႆႉၸွတ်ႇတူဝ်ႈၵႂႃႇယဝ်ႉလႄႈႁႂ်ႈဝဵင်း ယေႇရုသလႅမ်ႇ၊ တဵမ်ဝႆႉတင်းဢမုတၢင်းၽိတ်းတင်းလၢႆယဝ်ႉ။ ၶဝ်ယင်းလၢတ်ႈလႄႈဝႃႈ၊ ‘ ထႃႇဝရႃႉၽြႃး၊ ၸုၼ်ႉပႅတ်ႈလိၼ်မိူင်းႁဝ်းယဝ်ႉလႄႈ၊မၼ်းၸဝ်ႈဢမ်ႇႁၼ်ႁဝ်းယဝ်ႉ၊’ ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၵဝ်တၵ်းဢမ်ႇသေလၢႆၶဝ်။ ၵဝ်တၵ်းဢမ်ႇဢဵတ်းလူၶဝ်လႃးလႃး။ ၵဝ်တၵ်းႁဵတ်းတီႈၶဝ်မိူၼ်ၸိူဝ်ႉၼင်ႇဢၼ်ၶဝ်ႁဵတ်းတီႈပိူၼ်ႈတၢင်ႇၵေႃႉၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၵေႃႉဢၼ်ၼုင်ႈၶူဝ်းပိၵ်ႈၶျေႃးၼၼ်ႉၶိုၼ်းမႃးလႄႈလဝ်ႈလၢတ်ႈတီႈ ထႃႇဝရႃႉၽြႃး၊ လႄႈဝႃႈ၊ “ၶႃႈၸဝ်ႈႁဵတ်းၸွမ်းၵႃႈၼင်ႇဢၼ်ၸဝ်ႈႁဝ်းသင်ႇလၢတ်ႈဝႆႉၼၼ်ႉတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
ၵဝ်မုင်ႈတူၺ်းၵႃႈတီႈတွင်ႉၽႃႉဢၼ်မုင်းႁူမ်ႇၵႃႈၼိူဝ်ႁူဝ်ၶေႇရုၽဵမ်ႇ လႄႈၵႃႈၼိူဝ်ၶဝ်ၼၼ်ႉသမ်ႉမီးသေၸိူဝ်ႉသေပိူင်ဢၼ်မိူၼ်ႁၢင်ႈၽၢင်ရႃႇၸႃႉပလၢင်ႇဢၼ်ဢဝ်တင်းသႅင်ၼီႇလႃႇႁဵတ်းၼၼ်ႉဢေႃႈ။-
ၽြႃးပဵၼ်ၸဝ်ႈမီးဢမိင်ႉတီႈၵေႃႉဢၼ်ၼုင်ႈၶူဝ်းပိၵ်ႈၶျေႃးၼၼ်ႉလႄႈဝႃႈ၊ “မႂ်းၶဝ်ႈၵႃႈၼႂ်းၵႄႈဝူင်ႈၵၢင်မၢၵ်ႇလေႃႉၵႃႈတီႈတႂ်ႈၶေႇရုၽဵမ်ႇၼၼ်ႉလႄႈဢဝ်မိုဝ်းသွင်ၶွၼ်ၵွပ်ႇဢဝ်ထၢၼ်ႇၽႆးလႅင်သေယဝ်ႉ၊ၸၢတ်ႇပိုၼ်သႂ်ႇၵႃႈၼိူဝ်ဝဵင်းတႃႉ၊” ဝႃႈၼင်ႇၼႆဢေႃႈ။ ၵဝ်ပႂ်ႉတူၺ်းမိူဝ်ႈဢၼ်မၼ်းၵႂႃႇၼၼ်ႉဢေႃႈ။-
မိူဝ်ႈဢၼ်မၼ်းၶဝ်ႈၵႂႃႇၼၼ်ႉ၊ၶေႇရုၽဵမ်ႇၸိူဝ်းၼၼ်ႉၸုၵ်းယူႇၵႃႈတီႈၽၢႆႇတၢင်းၸၢၼ်းၵျွင်းပိၵ်ႈမၢၼ်ႇၸဝ်ႈလႄႈမွၵ်ႇၵုမ်ႈတဵမ်ၵႃႈၼႂ်းဝၢင်းၵျွင်းၸၼ်ႉၼႂ်းယူႇဢေႃႈ။-
မုၼ်ၽုင်းၽြႃးပဵၼ်ၸဝ်ႈၼၼ်ႉၶၢႆႉသေၵႃႈတီႈၶေႇရုၽဵမ်ႇသေယဝ်ႉ၊ၶိုၼ်ႈၵႂႃႇၵိင်းဝၢပ်ႈယူႇၵႃႈၼိူဝ်ၶူင်ႇၽၵ်းတူၵျွင်းပိၵ်ႈမၢၼ်ႇၸဝ်ႈဢေႃႈ။ မိူဝ်ႈၼၼ်ႉမွၵ်ႇၵုမ်ႈတဵမ်ၵျွင်းပိၵ်ႈမၢၼ်ႇၸဝ်ႈၵႂႃႇသေလႄႈၵႃႈတီႈဝၢင်းၵျွင်းၵေႃႈတဵမ်ဝႆႉတင်းသၢႆဢရွင်ႇဢၼ်ႁိူဝ်ႈလႅင်းၼၼ်ႉယူႇဢေႃႈ။-
သဵင်ဢၼ်ၶေႇရုၽဵမ်ႇတင်းလၢႆ တူပ်းပိၵ်ႇၶဝ်ၼၼ်ႉလႆႈငိၼ်းထိုင်ဝၢင်းၵျွင်းၸၼ်ႉၼွၵ်ႈပုၼ်ႉလႄႈပဵၼ်သဵင်ဢၼ်မိူၼ်ၸိူဝ်ႉၼင်ႇသဵင်ဢၼ် ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း ၊မီးဢမိင်ႉၼၼ်ႉဢေႃႈ။
မိူဝ်ႈဢၼ် ထႃႇဝရႃႉၽြႃး၊ ပူင်ဢမိင်ႉတီႈၵေႃႉဢၼ်ၼုင်ႈၶူဝ်းပိၵ်ႈၶျေႃးၼၼ်ႉႁႂ်ႈမၼ်းဢဝ်ၽႆးၵႃႈၼႂ်းၵႄႈဝူင်ႈၵၢင်မၢၵ်ႇလေႃႉၸိူဝ်းဢၼ်မီးၵႃႈတႂ်ႈၶေႇရုၽဵမ်ႇတင်းလၢႆၼၼ်ႉ၊ၵေႃႉၼၼ်ႉၶဝ်ႈၵႂႃႇၸုၵ်းယူႇၵႃႈတီႈႁိမ်းမၢၵ်ႇလေႃႉလုၵ်ႈၼိုင်ႈဢေႃႈ။-
ၶေႇရုၽဵမ်ႇပႃးၼိုင်ႈဢဝ်မိုဝ်းမၼ်းယိုၼ်ႈၶဝ်ႈၵႃႈၼႂ်းၽႆးဢၼ်မီးၵႃႈၼႂ်းၵႄႈဝူင်ႈၵၢင်ၶေႇရုၽဵမ်ႇၸိူဝ်းၼၼ်ႉသေယဝ်ႉ၊ယိပ်းဢဝ်ထၢၼ်ႇၽႆးလႄႈသႂ်ႇပၼ်ၼႂ်းမိုဝ်းၵေႃႉဢၼ်ၼုင်ႈၶူဝ်းပိၵ်ႈၶျေႃးၼၼ်ႉဢေႃႈ။ ၵေႃႉၼၼ်ႉၵေႃႈႁပ်ႉဢဝ်လႄႈဢွၵ်ႇၵႂႃႇဢေႃႈ။
ၵဝ်လႆႈႁၼ်ၶေႇရုၽဵမ်ႇၸိူဝ်းၼၼ်ႉမိူၼ်ၸိူဝ်ႉၼင်ႇဢၼ်မီးမိုဝ်းၵူၼ်းယူႇၵႃႈတီႈတႂ်ႈပိၵ်ႇၶဝ်ၼၼ်ႉႁင်းၽႂ်ႁင်းမၼ်းဢေႃႈ။-
ၵဝ်လူတူၺ်းလႄႈႁၼ်မၢၵ်ႇလေႃႉသီႇလုၵ်ႈမီးၵႃႈတီႈႁိမ်းၶေႇရုၽဵမ်ႇၸိူဝ်းၼၼ်ႉယေႈပႃးယေႈလုၵ်ႈၼင်ႇၵၼ်လႄႈဢရွင်ႇႁၢင်ႈၽၢင်မၢၵ်ႇလေႃႉၸိူဝ်းၼၼ်ႉပဵၼ်မိူၼ်ၸိူဝ်ႉၼင်ႇဢရွင်ႇသႅင်မျၵ်ႈယွႆးဢေႃႈ။-
ႁၢင်ႈၽၢင်ၶဝ်ၼၼ်ႉတင်းသီႇလုၵ်ႈမီးပုင်ႇႁၢင်ႈဢၼ်လဵဝ်ၵၼ်လႄႈပဵၼ်ၸိူဝ်ႉၼင်ႇဢၼ်ဢဝ်လုၵ်ႈၼိုင်ႈသႂ်ႇဝႆႉၵႃႈၼႂ်းလုၵ်ႈၼိုင်ႈဢေႃႈ။-
ယၢမ်းမိူဝ်ႈဢၼ်ၶဝ်ၵႂႃႇၼၼ်ႉၸိုင်၊ၶဝ်ၸၢင်ႈၵႂႃႇတင်းသီႇၼႃႈသီႇၽၢႆႇဢမ်ႇဝႃႈၽၢႆႇလႂ်ယင်းဢမ်ႇဝၢႆႇဢမ်ႇငႅၵ်းလႄႈၸၢင်ႈဢွၼ်ၵၼ်ၵႂႃႇဢေႃႈ။ ၶဝ်တင်းမူတ်းၸၢင်ႈဢွၼ်ၵၼ်ၵႂႃႇၸွမ်းၼင်ႇၶဝ်ၶႂ်ႈၵႂႃႇၽၢႆႇတၢင်းလႂ်ၵေႃႈယင်းဢမ်ႇလူဝ်ႇဝၢႆႇၶိုၼ်းဢေႃႈ။-
တင်းတူဝ်တင်းၶိင်းၶဝ်၊လင်ၶဝ်၊မိုဝ်းၶဝ်၊ပိၵ်ႇၶဝ်ဢိၵ်ႇတင်းမၢၵ်ႇလေႃႉၸိူဝ်းၼၼ်ႉတဵမ်လူၺ်ႈတင်းမၢၵ်ႇတႃဢေႃႈ။-
ၵဝ်လႆႈငိၼ်းပိူၼ်ႈႁွင်ႉမၢၵ်ႇလေႃႉၸိူဝ်းၼၼ်ႉဝႃႈ၊ “မၢၵ်ႇလေႃႉဢၼ်ပၼ်ႇၵိင်ႈယူႇ၊” ဝႃႈၼင်ႇၼႆဢေႃႈ။
ၶေႇရုၽဵမ်ႇၸိူဝ်းၼၼ်ႉယေႈပႃးမီးၼႃႈသီႇၼႃႈလႄႈၼႃႈတီႈၼိုင်ႈပဵၼ်ၼႃႈဝူဝ်း၊ၼႃႈတီႈသွင်ပဵၼ်ၼႃႈၵူၼ်း၊ၼႃႈတီႈသၢမ်ပဵၼ်ၼႃႈသၢင်ႇသီႈ၊ၼႃႈတီႈသီႇပဵၼ်ၼႃႈၼူၵ်ႉၶၢင်ႇလေႃႉဢေႃႈ။-
ဢၼ်ၼႆႉၸမ်ႉ၊ပဵၼ်သတ်ႉတဝႃႇၸိူဝ်းဢၼ်ၵဝ်လႆႈႁၼ်ၵႃႈတီႈႁိမ်းၼမ်ႉ ၶေႇပႃႇ၊ ယဝ်ႉၼၼ်ႉဢေႃႈ။ ၼႂ်းမိူဝ်ႈဢၼ်ၶဝ်ယုၵ်ႉတူဝ်ၶိုၼ်ႈၵႃႈၼႂ်းလူမ်းၵႂႃႇသေလႄႈ၊-
ၶၢႆႉတူဝ်ၵႂႃႇယူႇၼၼ်ႉၸိုင်၊မၢၵ်ႇလေႃႉၸိူဝ်းၼၼ်ႉဢွၼ်ၵၼ်ၸပ်းၸွမ်းယူႇဢေႃႈ။ ယၢမ်းမိူဝ်ႈဢၼ်ၶဝ်ၵီႈပိၵ်ႇလႄႈမိၼ်ၶိုၼ်ႈၵႂႃႇၼၼ်ႉၵေႃႈမၢၵ်ႇလေႃႉၸိူဝ်းၼၼ်ႉယင်းဢွၼ်ၵၼ်ၸပ်းၸွမ်းယူႇဢေႃႈ။-
ယၢမ်းမိူဝ်ႈဢၼ်ၶဝ်ၵိုတ်းသဝ်းၼၼ်ႉမၢၵ်ႇလေႃႉၸိူဝ်းၼၼ်ႉၵိုတ်းသဝ်းလႄႈ၊ယၢမ်းမိူဝ်ႈဢၼ်ၶဝ်မိၼ်ၶိုၼ်ႈၵေႃႈမၢၵ်ႇလေႃႉၸိူဝ်းၼၼ်ႉၸပ်းၸွမ်းယုၵ်ႉၶိုၼ်ႈဢေႃႈ။ လွင်ႈမၼ်းၸမ်ႉ၊ဝိၺိၺ်ႇသတ်ႉတဝႃႇၸိူဝ်းၼၼ်ႉမီးၵႃႈၼႂ်းမၢၵ်ႇလေႃႉတင်းလၢႆဢေႃႈ။
မိူဝ်ႈၼၼ်ႉမုၼ်ၽုင်းၽြႃးပဵၼ်ၸဝ်ႈဢၼ်မီးယူႇၵႃႈတီႈၼၼ်ႈၼၼ်ႉ ၶၢႆႉသေၵႃႈတီႈၽၵ်းတူၵျွင်းပိၵ်ႈမၢၼ်ႇၸဝ်ႈသေလႄႈၵႂႃႇတႄႇယူႇၵႃႈၼိူဝ်ၶေႇရုၽဵမ်ႇၸိူဝ်းၼၼ်ႉဢေႃႈ။-
ၼႂ်းမိူဝ်ႈဢၼ်ၵဝ်ယင်းပႂ်ႉတူၺ်းယူႇၼၼ်ႉၶေႇရုၽဵမ်ႇတင်းလၢႆၵီႈပိၵ်ႇၶဝ်လႄႈဢွၼ်ၵၼ်ၽၢတ်ႇယၢၼ်လိၼ်မိူင်းသေလႄႈယုၵ်ႉၶိုၼ်ႈၵႂႃႇဢေႃႈ။ မၢၵ်ႇလေႃႉတင်းလၢႆၵေႃႈဢွၼ်ၵၼ်ၸပ်းၸွမ်းယူႇသေယဝ်ႉ၊ၶဝ်ၵႂႃႇၸုၵ်းၵိုတ်းယူႇၵႃႈတီႈၽၵ်းတူၼႃႈဝၼ်းဢွၵ်ႇၵျွင်းပိၵ်ႈမၢၼ်ႇၸဝ်ႈဢေႃႈ။ မုၼ်ၽုင်းၽြႃးပဵၼ်ၸဝ်ႈတႄႇယူႇၵႃႈၼိူဝ်ၶဝ်ဢေႃႈ။-
ဢၼ်ၼႆႉပဵၼ်သတ်ႉတဝႃႇဢၼ်ၵဝ်လႆႈႁၼ်ၵႃႈတႂ်ႈၽြႃးပဵၼ်ၸဝ်ႈ၊ဢၼ်ပဵၼ်ၽြႃးၵူၼ်းမဵဝ်း ဢိသရေး၊ ၵႃႈႁိမ်းၼမ်ႉ ၶေႇပႃႇ၊ ယဝ်ႉၼၼ်ႉဢေႃႈ။ ၵဝ်ႁုလွင်ႈဢၼ်ၶဝ်ပဵၼ်ၶေႇရုၽဵမ်ႇဢေႃႈ။
ၶဝ်ၼၼ်ႉယေႈပႃးမီးၼႃႈသီႇၼႃႈမိူၼ်ၵၼ်ၵူႈပႃးလႄႈ၊မီးပိၵ်ႇသီႇပိၵ်ႇၼင်ႇၵၼ်၊မီးလၢၵ်ႈၶၼႃႇမိူၼ်မိုဝ်းၵူၼ်းယူႇၵႃႈတႂ်ႈပိၵ်ႇၶဝ်ၼၼ်ႉဢေႃႈ။-
ၸွမ်းၼင်ႇၵႃႈဢၼ်ပုင်ႇႁၢင်ႈၼႃႈၶဝ်ပဵၼ်ယူႇၼၼ်ႉမိူၼ်ၵၼ်တင်းၼႃႈဢၼ်ၵဝ်လႆႈႁၼ်ၵႃႈႁိမ်းၼမ်ႉ ၶေႇပႃႇ ယဝ်ႉၼၼ်ႉဢေႃႈ။ ၶဝ်ၵူႈပႃးၼၼ်ႉဢွၼ်ၵၼ်ၵႂႃႇတၢင်းၼႃႈသိုဝ်ႈသိုဝ်ႈဢေႃႈ။
လိုၼ်းၼၼ်ႉ၊ဝိၺိၺ်ႇၸဝ်ႈဢုမ်ႈယွင်ႈဢဝ်ၵဝ်ၵႂႃႇၵႃႈတီႈၽၵ်းတူၼႃႈဝၼ်းဢွၵ်ႇၵျွင်းပိၵ်ႈမၢၼ်ႇၸဝ်ႈဢေႃႈ။ ၵႃႈတီႈၽၵ်းတူၼၼ်ႉၵဝ်ႁၼ်ၵူၼ်းၸၢႆးသၢဝ်းႁႃႈၵေႃႉဢၼ်ပႃးတင်း ယႃႇၸၺႃႇ၊ လုၵ်ႈၸၢႆး ဢၸရႃႉ ၊ဢိၵ်ႇတင်း ပေႇလတိ၊ လုၵ်ႈၸၢႆး ပေႇၼႃႇယႃႉ ၊ၶဝ်သွင်ၵေႃႉပဵၼ်ၵူၼ်းၵႄႇၵူၼ်းႁူဝ်ၵႃႈၼႂ်းၵူၼ်းတင်းလၢႆၼၼ်ႉဢေႃႈ။
ၽြႃးပဵၼ်ၸဝ်ႈမီးဢမိင်ႉတီႈၵဝ်လႄႈဝႃႈ၊ “လုၵ်ႈၵူၼ်း႟။ ၵူၼ်းၸိူဝ်းၼႆႉဢွၼ်ၵၼ်ၵျၢမ်ႇပွင်ဢၼ်ႁၢႆႉဢၼ်ယုတ်ႈလႄႈပၼ်တၢင်းၵျၢမ်ႇတၢင်းပွင်ဢၼ်ဢမ်ႇတြႃးၵႃႈၼႂ်းဝဵင်းၼႆႉယဝ်ႉ။-
ၶဝ်ၸၢင်ႈဢွၼ်ၵၼ်လၢတ်ႈလႄႈဝႃႈ၊ ‘ၶိင်ႇဢၼ်တၵ်းလႆႈႁဵတ်းႁိူၼ်းႁဵတ်းယေးၼၼ်ႉဢမ်ႇပႆႇထိုင်။ ဝဵင်းၼႆႉၸိုင်၊ပဵၼ်မေႃႈလႄႈႁဝ်းၸမ်ႉ၊ပဵၼ်ၼိူဝ်ႉဢေႃႈ၊’ ဝႃႈၼႆဢေႃႈ။-
ၵွပ်ႈပိူဝ်ႈပဵၼ်ၼင်ႇၼႆလႄႈ၊လုၵ်ႈၵူၼ်း႟။ မွၵ်ႇလၢတ်ႈတၢင်းၽိတ်းၶဝ်သေလႄႈႁေႃးလၢတ်ႈတႃႉ၊” ဝႃႈၼႆဢေႃႈ။
ဝိၺိၺ်ႇ ထႃႇဝရႃႉၽြႃး၊ ဢုပ်ႉထိင်းၵဝ်သေယဝ်ႉ၊ ထႃႇဝရႃႉၽြႃး၊ ၸႂ်ႉႁႂ်ႈၵဝ်သင်ႇလၢတ်ႈတြႃးၸဝ်ႈတီႈၵူၼ်းတင်းလၢႆလႄႈဝႃႈၸမ်ႉ၊ “ၵူၼ်းမဵဝ်း ဢိသရေး၊ ႟။ ၵဝ်ႁုလွင်ႈတၢင်းဢၼ်သူဢွၼ်ၵၼ်လၢတ်ႈၵႃႈသင်ယူႇ၊သူၵျၢမ်ႇပွင်ၵႃႈသင်ယူႇၼၼ်ႉဢေႃႈ။-
သူဢွၼ်ၵၼ်ၶႃႈၽၼ်းဢဝ်တၢႆၵူၼ်းၼမ်ၼႃႇလူင်လၢင်ၵႃႈၼႂ်းဝဵင်းၼႆႉလႄႈႁႂ်ႈသဵၼ်ႈတၢင်းတင်းလၢႆတဵမ်ဝႆႉတင်းတူဝ်တၢႆၸိူဝ်းၼၼ်ႉယဝ်ႉ။
“ပိူဝ်ႈၼႆလႄႈ၊ၵဝ်ဢၼ်ပဵၼ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉတီႈသူၸမ်ႉ၊တူဝ်တၢႆၸိူဝ်းဢၼ်သူဝႆႉၵႃႈၼႂ်းဝဵင်းၼၼ်ႉပဵၼ်ၼိူဝ်ႉလႄႈဝဵင်းၼႆႉပဵၼ်မေႃႈတႄႉယဝ်ႉ။ ၵူၺ်းၵႃႈ၊ၵဝ်တၵ်းဢဝ်သူဢွၵ်ႇသေၵႃႈၼႂ်းဝဵင်းၼႆႉလႄႈသူတၵ်းဢမ်ႇမီးၵႃႈတီႈၼႆႈ။-
သူၵူဝ်ႁႄလၢပ်ႇလႅဝ်းလႄႈၵဝ်တၵ်းႁႂ်ႈလၢပ်ႇလႅဝ်းႁွတ်ႈထိုင်ၵႃႈၼိူဝ်သူဢေႃႈ။-
ၵဝ်တၵ်းဢဝ်သူဢွၵ်ႇသေၵႃႈၼႂ်းဝဵင်းၼႆႉလႄႈဢဝ်သူဢၢပ်ႈပၼ်ၵႃႈၼႂ်းမိုဝ်းၵူၼ်းတၢင်ႇဝၢၼ်ႈတၢင်ႇမိူင်းတင်းလၢႆဢေႃႈ။ ၵဝ်လႆႈၸီႇယၢင်ႇႁႂ်ႈသူႁွတ်ႈထိုင်တၢင်းတၢႆယဝ်ႉယဝ်ႉ။-
ၼင်ႇၼၼ်လႄႈသူတၵ်းလႆႈၶၢမ်ႇတၢင်းဢၼ်ၶႃႈတၢႆၵႃႈၼႂ်းၼႃႈသိုၵ်း၊ၵႃႈၼႂ်းဝၢၼ်ႈၼႂ်းဝဵင်းတူဝ်ၸဝ်ႈၵဝ်ႇဢေႃႈ။ လိုၼ်းၼၼ်ႉသူတၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ၼၼ်ႉၵူႈၵေႃႉၵူႈၵူၼ်းဢေႃႈ။-
ဝဵင်းၼႆႉတၵ်းဢမ်ႇၵႅတ်ႇၶႄႁႄႉၵင်ႈသူမိူၼ်ၸိူဝ်ႉၼင်ႇဢၼ်မေႃႈၵႅတ်ႇၶႄႁႄႉၵင်ႈၼိူဝ်ႉဢၼ်မီးၵႃႈၼႂ်းမၼ်းၼၼ်ႉ။ ၵဝ်တၵ်းၸီႇယၢင်ႇတၢမ်ႇဢပျတ်ႈတီႈသူၵႃႈတီႈၶွပ်ႇၼမ်ႉလႅၼ်လိၼ်မိူင်း ဢိသရေး၊ ဢေႃႈ။-
သူတၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢိၵ်ႇတင်းတၵ်းႁုဝႃႈ၊ယၢမ်းမိူဝ်ႈဢၼ်သူဢွၼ်ၵၼ်ၵမ်ၵျၢင်ႉၸွမ်းပိင်းၺၢပ်ႈတြႃးၵူၼ်းမဵဝ်းဢၼ်ယူႇလဵပ်ႈႁွပ်ႈႁိမ်းႁွမ်းသူယူႇၼၼ်ႉၸိုင်၊သူပဵၼ်ၵေႃႉဢၼ်ပူၼ်ႉလိူဝ်ပိင်းၺၢပ်ႈတြႃးၵဝ်၊ဢိၵ်ႇတင်းဢမ်ႇထွမ်ႇဢမ်ႇဢဝ်တၢင်းဢၼ်ၵဝ်ၸီႇယၢင်ႇဝႆႉၸိူဝ်းၼၼ်ႉယဝ်ႉ၊” ဝႃႈၼင်ႇၼႆဢေႃႈ။
ၼႂ်းမိူဝ်ႈဢၼ်ၵဝ်ယင်းတိုၵ်ႉႁေႃးလၢတ်ႈပျႃႇတိၵ်ႈၸဝ်ႈယူႇၼၼ်ႉ၊ ပေႇလတိ၊ လုၵ်ႈၸၢႆး ပေႇၼႃႇယႃႉ၊ ၼၼ်ႉလူမ်ႉတၢႆဢေႃႈ။ ၵဝ်ၵေႃႈၶုပ်ႉၶဝ်ႇသေလႄႈႁဵတ်းတင်းသဵင်ဢၼ်ယႂ်ႇၼႃႇႁွင်ႉသႅၼ်ႇလႄႈဝႃႈ၊ “ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းတၵ်းႁႂ်ႈၵူၼ်းမဵဝ်း ဢိသရေး၊ ဢၼ်ၵိုတ်းဢၼ်ၵျၢၼ်ႇတင်းလၢႆတၢႆပႅတ်ႈၵူႈၵေႃႉၵူႈၵူၼ်းတီႈၶႃႈႁိုဝ်း၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။ ၵူၼ်းဢၼ်ယူႇၵႃႈၼႂ်းဝဵင်း ယေႇရုသလႅမ်ႇ၊ ၸိူဝ်းၼၼ်ႉဢွၼ်ၵၼ်လၢတ်ႈၸႃလူၺ်ႈလွင်ႈမႂ်း၊ဢိၵ်ႇတင်းလွင်ႈၵူၼ်းမဵဝ်းမႂ်း ဢိသရေး၊ ၸိူဝ်းဢၼ်လႆႈၶၢမ်ႇတၢင်းဢၼ်တိသိမ်းဢဝ်ၵႂႃႇၸိူဝ်းၼၼ်ႉဢေႃႈ။ ၶဝ်လၢတ်ႈလႄႈဝႃႈ၊ ‘ၵူၼ်းဢၼ်လႆႈၶၢမ်ႇတၢင်းဢၼ်တိသိမ်းဢဝ်ၵႂႃႇၸိူဝ်းၼၼ်ႉမီးၵႆၼႃႇပုၼ်ႈဢၼ်တၵ်းဝႆႈ ထႃႇဝရႃႉၽြႃး၊ ဢေႃႈ။ မၼ်းၸဝ်ႈဢဝ်မိူင်းၼႆႉဢၢပ်ႈပၼ်ႁႂ်ႈပဵၼ်လိၼ်ဢမူၺ်ႇပုၼ်ႈႁဝ်းတၵ်းပိူင်ႇၼၼ်ႉယဝ်ႉ၊’ ဝႃႈၼႆယဝ်ႉ။
“တေႃႈလဵဝ်ၼႆႉမွၵ်ႇလၢတ်ႈလွင်ႈၶဝ်ၸိူဝ်းဢၼ်လႆႈၶၢမ်ႇတၢင်းဢၼ်တိသိမ်းဢဝ်ၵႂႃႇၼၼ်ႉလႄႈဝႃႈ၊ ‘ ထႃႇဝရႃႉၽြႃး ၊မီးဢမိင်ႉၸမ်ႉ၊ၵဝ်ပဵၼ်ၸဝ်ႈဢၼ်ပွႆႇၸႂ်ႉၶဝ်ၵႂႃႇယူႇၵႃႈတီႈမိူင်းဢၼ်ၵႆၼႃႇလႄႈၸၢတ်ႇပိုၼ်ပႅတ်ႈၵႃႈၼႂ်းၵူႈသိုင်ႇၵူႈမိူင်းဢေႃႈ။ ၼႂ်းဝႃႈၼၼ်သေၵေႃႈ ၵဝ်တၵ်းမီးလူၺ်ႈၵၼ်တင်းၶဝ်ၵႃႈၼႂ်းမိူင်းဢၼ်ၶဝ်ႁွတ်ႈထိုင်ၸိူဝ်းၼၼ်ႉၵမ်းဢွၼ်ႇၼိုင်ႈၵူၺ်းဢေႃႈ၊’ ဝႃႈၼႆဢေႃႈ။
“ပိူဝ်ႈၼႆလႄႈမွၵ်ႇလၢတ်ႈတီႈၶဝ်လႄႈဝႃႈ၊ ‘ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ၵဝ်တၵ်းၸုဢဝ်သိမ်းဢဝ်သူဢွၵ်ႇသေၵႃႈတီႈသိုင်ႇၸိုင်ႈဝၢၼ်ႈမိူင်းၸိူဝ်းဢၼ်ၵဝ်ဢဝ်သူၸၢတ်ႇပိုၼ်ပႅတ်ႈဝႆႉၼၼ်ႉသေယဝ်ႉ၊တၵ်းဢဝ်မိူင်း ဢိသရေး၊ ၶိုၼ်းပၼ်တီႈသူဢေႃႈ။-
မိူဝ်ႈဢၼ်သူၶိုၼ်းပွၵ်ႈမႃးၼၼ်ႉသူတၵ်းလႆႈပႄႇၽဵဝ်ႈလွင်ႈတၢင်းဢၼ်ဝူၺ်ႇဢၼ်ႁင်ႈၵႃႈမီး၊ဢိၵ်ႇတင်းလွင်ႈတၢင်းဢၼ်လီႁင်ႈဢဵတ်ႇသဵတ်ႇၵႃႈမီးၼၼ်ႉပႅတ်ႈဢေႃႈ။-
ၵဝ်တၵ်းပၼ်ႁူဝ်ၸႂ်ပဵၼ်ၼမ်ႉၼိုင်ႈၸႂ်လဵဝ်ၵၼ်တီႈသူလႄႈဢဝ်သၽေႃးဢၼ်မႂ်ႇသႂၢင်းသႂ်ႇပၼ်ၵႃႈၼႂ်းသူဢေႃႈ။ ၵဝ်တၵ်းၼုၵ်ႈထွၼ်ဢဝ်ႁူဝ်ၸႂ်မၢၵ်ႇႁိၼ်ဢွၵ်ႇသေၵႃႈၼႂ်းတူဝ်ၶၼ်ႇထႃႇသူပႅတ်ႈလႄႈပၼ်ႁူဝ်ၸႂ်ၼိူဝ်ႉတီႈသူဢေႃႈ။-
ၼင်ႇၼၼ်လႄႈသူတၵ်းၸွမ်းသဵၼ်ႈတၢင်းပိင်းၺၢပ်ႈတြႃးၵဝ်လႄႈတၵ်းဢွၼ်ၵၼ်ပႃးတင်းသဵတ်ႈၸႃႇပႂ်ႉၵမ်ပႂ်ႉၵျၢင်ႉၸွမ်းၼင်ႇဢၼ်ၵဝ်ၸီႇယၢင်ႇဝႆႉၼၼ်ႉဢေႃႈ။ သူတၵ်းပဵၼ်ၵူၼ်းၵဝ်လႄႈၵဝ်ၵေႃႈတၵ်းပဵၼ်ၽြႃးပဵၼ်ၸဝ်ႈသူဢေႃႈ။-
တီႈၶဝ်ၸိူဝ်းဢၼ်ထုၵ်ႇၸႂ်ၼႂ်းတၢင်းဢၼ်ဝႆႈသႃလွင်ႈတၢင်းဢၼ်ဝူၺ်ႇဢၼ်ႁင်ႈ၊ဢိၵ်ႇတင်းဝႆႈသႃႁုၼ်ႇႁၢင်ႈသၢင်းထုဢၼ်လီႁင်ႈဢဵတ်ႇသဵတ်ႇၼၼ်ႉၸမ်ႉ၊ၵဝ်တၵ်းပၼ်တၢမ်ႇဢပျတ်ႈတီႈၶဝ်ဢေႃႈ။ ၵဝ်တၵ်းပၼ်တၢမ်ႇဢပျတ်ႈၸွမ်းၵႃႈၼင်ႇဢၼ်ၶဝ်ႁဵတ်းၼၼ်ႉဢေႃႈ၊’ ဝႃႈၼင်ႇၼႆယဝ်ႉ၊” ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ။
မိူဝ်ႈၼၼ်ႉ၊ၶေႇရုၽဵမ်ႇၸိူဝ်းၼၼ်ႉၵီႈပိၵ်ႇလႄႈမိၼ်ဢေႃႈ။ မၢၵ်ႇလေႃႉၸိူဝ်းၼၼ်ႉၵေႃႈဢွၼ်ၵၼ်ၸပ်းၸွမ်းဢေႃႈ။ မုၼ်ၽုင်းၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးယူႇၵႃႈၼိူဝ်ၶဝ်ဢေႃႈ။-
မိူဝ်ႈၼၼ်ႉမုၼ်ၽုင်းၽြႃးပဵၼ်ၸဝ်ႈၼၼ်ႉလုၵ်ႉသေၵႃႈၼႂ်းဝဵင်းပေႃႇဢွၵ်ႇမႃးလႄႈၵိုတ်းသဝ်းယူႇၵႃႈၼိူဝ်လွႆဢၼ်မီးၽၢႆႇတၢင်းဢွၵ်ႇဝဵင်းၼၼ်ႉဢေႃႈ။-
ၵႃႈၼႂ်းရူႇပႃႇရူင်ႇၼၼ်ႉဝိၺိၺ်ႇၸဝ်ႈႁွပ်ႇဢုမ်ႈဢဝ်ၵဝ်လႄႈဢဝ်ၵဝ်ၵႂႃႇၸူးတီႈမိူင်း ပႃႇပုလုၼ်ႇ၊ တီႈၶဝ်ၸိူဝ်းဢၼ်လႆႈၶၢမ်ႇတၢင်းဢၼ်တိသိမ်းဢဝ်ၵႂႃႇၼၼ်ႉဢေႃႈ။ လိုၼ်းၼၼ်ႉရူႇပႃႇရူင်ႇၸဝ်ႈၵေႃႈလပ်ႉႁၢႆၵႂႃႇသေဢေႃႈ။-
မိူဝ်ႈၼၼ်ႉၵဝ်ဢဝ်လွင်ႈတၢင်းဢၼ် ထႃႇဝရႃႉၽြႃး ၊ၼႄပျႃးတီႈၵဝ်မႃးယဝ်ႉၵႃႈမီးၸိူဝ်းၼၼ်ႉမွၵ်ႇလၢတ်ႈတီႈၶဝ်ၸိူဝ်းဢၼ်လႆႈၶၢမ်ႇတၢင်းဢၼ်တိသိမ်းဢဝ်ၵႂႃႇၼၼ်ႉဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။ မႂ်းယူႇၵႃႈၼႂ်းၵူၼ်းမဵဝ်းဢၼ်ၸၢင်ႈလုၵ်ႉၽိုၼ်ႉၼၼ်ႉဢေႃႈ။ ၶဝ်မီးမၢၵ်ႇတႃသေၵေႃႈဢမ်ႇၸၢင်ႈႁၼ်။ မီးႁူသေၵေႃႈဢမ်ႇၸၢင်ႈငိၼ်းၵွပ်ႈပိူဝ်ႈၶဝ်ပဵၼ်ၵူၼ်းမဵဝ်းဢၼ်ၸၢင်ႈလုၵ်ႉၽိုၼ်ႉၼၼ်ႉဢေႃႈ။
“လုၵ်ႈၵူၼ်း႟။ ႁႅၼ်းပူၵ်ႉၶူဝ်းမႂ်းတေႃႈလဵဝ်ၼႆႉလႄႈပုၼ်ႈတႃႇတေလႆႈၶၢမ်ႇတၢင်းဢၼ်တိသိမ်းဢဝ်ၵႂႃႇၼႂ်းၶိင်ႇၵၢင်ဝၼ်းလႄႈလႆႈၵႂႃႇတၢင်ႇတီႈတၢင်ႇလႅၼ်သိုဝ်ႈၼႃႈတႂ်ႈတႃၶဝ်တႃႉ။ ပိၵ်ႉသမ်ႉၶဝ်ပဵၼ်မဵဝ်းဢၼ်ၸၢင်ႈလုၵ်ႉၽိုၼ်ႉသေၵေႃႈၶဝ်ၸၢင်ႈၶႄးတေလႆႈပွင်ႇၸႂ် လွင်ႈၼၼ်ႉဢေႃႈ။-
မႂ်းတၵ်းလႆႈႁႅၼ်းပူၵ်ႉၶူဝ်းမႂ်းၶိင်ႇၵၢင်ဝၼ်း ႁႂ်ႈပဵၼ်ၸိူဝ်ႉၼင်ႇပူၵ်ႉၶူဝ်းဢၼ်ပႃးၵႂႃႇၸွမ်းၼႂ်းတၢင်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၼၼ်ႉတႃႉ။ ဢွၵ်ႇၵႂႃႇၶိင်ႇႁူဝ်ၶမ်ႈသိုဝ်ႈၼႃႈတႂ်ႈတႃၶဝ်မိူၼ်ၸိူဝ်ႉၼင်ႇၵေႃႉဢၼ်ၵႂႃႇၼႂ်းတၢင်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၼၼ်ႉတႃႉ။-
ယၢမ်းမိူဝ်ႈဢၼ်ၶဝ်ယင်းပႂ်ႉတူၺ်းမႂ်းယူႇၼၼ်ႉၽွၵ်ႈႁူးၵႃႈတီႈၽႃႁိူၼ်းမႂ်းလႄႈဢဝ်ပူၵ်ႉၶူဝ်းမႂ်းဢွၵ်ႇၵႂႃႇတႃႉ။-
ဢဝ်ပူၵ်ႉၶူဝ်းမႂ်းၼၼ်ႉမႅၵ်ႇတၢင်ႇႁူဝ်မႃႇမႂ်းလႄႈဢွၵ်ႇၵႂႃႇသိုဝ်ႈၼႃႈတႂ်ႈတႃၶဝ်ၶိင်ႇၵၢင်ၶမ်ႈတႃႉ။ မႂ်းတၵ်းလႆႈႁူမ်ႇၼႃႈႁူမ်ႇတႃသေဢမ်ႇႁႂ်ႈမႂ်းလႆႈႁၼ်မိူင်းဢၼ်မႂ်းဢွၵ်ႇမႃးၼၼ်ႉဢေႃႈ။ တၢင်းႁဵတ်းမႂ်းၼၼ်ႉတၵ်းပဵၼ်တၢင်းဢၼ်ပၼ်သတိတီႈၵူၼ်းမဵဝ်း ဢိသရေး၊ ယဝ်ႉ၊” ဝႃႈၼင်ႇၼႆဢေႃႈ။
ၵဝ်ႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃး ၊မီးဢမိင်ႉတီႈၵဝ်ၼၼ်ႉဢေႃႈ။ ၼႂ်းဝၼ်းၼၼ်ႉၵဝ်ႁႅၼ်းပူၵ်ႉၶူဝ်းဢၼ်ပဵၼ်ၸိူဝ်ႉၼင်ႇဢုၵ်ႉၸႃႇၶူဝ်းလဵင်းၵေႃႉဢၼ်ပၢႆႈၵႂႃႇၼၼ်ႉသေယဝ်ႉ၊ၼႂ်းၶိင်ႇႁူဝ်ၶမ်ႈၼၼ်ႉၵဝ်ဢဝ်မိုဝ်းၵဝ်ၽွၵ်ႈႁူးၵႃႈတီႈၽႃႁိူၼ်းလႄႈမႅၵ်ႇပူၵ်ႉၶူဝ်းၵဝ်ဢွၵ်ႇၵႂႃႇမိူဝ်ႈၶိင်ႇၵၢင်ၶမ်ႈယၢမ်းမိူဝ်ႈဢၼ်ၶဝ်ပႂ်ႉတူၺ်းၵဝ်ယူႇၼၼ်ႉဢေႃႈ။
ၼႂ်းဝၼ်းမိူဝ်ႈၽုၵ်ႈၶိင်ႇၵၢင်ၼႂ် ထႃႇဝရႃႉၽြႃး ၊မီးဢမိင်ႉတီႈၵဝ်လႄႈဝႃႈ၊-
“လုၵ်ႈၵူၼ်း႟။ မိူဝ်ႈလဵဝ်ၼႆႉၵူၼ်းမဵဝ်း ဢိသရေး ၊ဢၼ်ၸၢင်ႈလုၵ်ႉၽိုၼ်ႉၼၼ်ႉတွင်ႈထၢမ်တီႈမႂ်းလႄႈဝႃႈ၊ ‘မႂ်းႁဵတ်းၵႃႈသင်ယူႇ’ ဝႃႈၼႆယူႇယဝ်ႉ။-
မႂ်းမွၵ်ႇလၢတ်ႈတီႈၶဝ်လႄႈဝႃႈ၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ပျႃႇတိၵ်ႈၸဝ်ႈၼႆႉၸၢပ်ႈသႅင်ႇၵၼ်တင်းၶုၼ်ဢၼ်ဢုပ်ႉပိူင်ႇဝဵင်း ယေႇရုသလႅမ်ႇ ၊ဢိၵ်ႇတင်းၵူၼ်းမဵဝ်း ဢိသရေး၊ ၵႃႈဢၼ်မီးၵႃႈၼႂ်းဝဵင်းၼၼ်ႉဢေႃႈ။-
လၢတ်ႈတီႈၶဝ်လူၺ်ႈလွင်ႈဢၼ်မႂ်းႁဵတ်းၼႆႉပဵၼ်ၼိမိၵ်ႈဢၼ်တၵ်းပဵၼ်မႃးတီႈၶဝ်၊လွင်ႈဢၼ်ၶဝ်တၵ်းလႆႈပဵၼ်ၵူၼ်းဢၼ်လႆႈၶၢမ်ႇတၢင်းဢၼ်တိသိမ်းဢဝ်ၵႂႃႇၼၼ်ႉဢေႃႈ။-
ၶုၼ်ဢၼ်ဢုပ်ႉပိူင်ႇၶဝ်ယူႇၼၼ်ႉတၵ်းဢဝ်ပူၵ်ႉၶူဝ်းမႅၵ်ႇတၢင်ႇႁူဝ်မႃႇမၼ်းၶိင်ႇၵၢင်ၶမ်ႈလႄႈပၢႆႈၼီၸွမ်းႁူးၽႃဢၼ်ၶဝ်ၽွၵ်ႈပၼ်မၼ်းၼၼ်ႉဢေႃႈ။ မၼ်းတၵ်းတေလႆႈဢဝ်ၽႃႈႁူမ်ႇၼႃႈ၊ႁူမ်ႇတႃမၼ်းသေလႄႈဢမ်ႇႁႂ်ႈတႃမၼ်းလႆႈႁၼ်မိူင်းဢၼ်မၼ်းဢွၵ်ႇမႃးၼၼ်ႉဢေႃႈ။-
ၵဝ်တၵ်းၽႄႇၵီႈၼႅင်ႈၵဝ်ၶႄၵဝ်ဝႆႉႁႂ်ႈမၼ်းတူၵ်းၶမ်မႅၼ်ႈၵႃႈၼႂ်းၼႅင်ႈၼႂ်းၶႄၼၼ်ႉဢေႃႈ။ ၵဝ်တၵ်းဢဝ်မၼ်းၵႂႃႇၵႃႈတီႈမိူင်း ပႃႇပုလုၼ်ႇ၊ လႄႈပိၵ်ႉသမ်ႉပဵၼ်တီႈဢၼ်မၼ်းတၵ်းလႆႈတၢႆၵႃႈတီႈၼၼ်ႈသေၵေႃႈမၼ်းဢမ်ႇလႆႈႁၼ်ဝဵင်းၼၼ်ႉ။-
ၵဝ်တၵ်းဢဝ်ၶုၼ်လုမ်းမၼ်းတင်းလၢႆ၊ဢိၵ်ႇတင်းၵူၼ်းဢၼ်ပၼ်တၢင်းၵျၢမ်ႇမၼ်းလႄႈၵူၼ်းသိုၵ်းဢၼ်ပႂ်ႉဢသၢၵ်ႈမၼ်းၵႃႈမီးတင်းသဵင်ႈတင်းလူင်ၸၢတ်ႇပိုၼ်ပႅတ်ႈလႄႈၵူၼ်းတင်းလၢႆတၵ်းဢွၼ်ၵၼ်သွၵ်ႈႁႃၶဝ်ႁႂ်ႈလႆႈဢဝ်ၶဝ်တၢႆဢေႃႈ။
“မိူဝ်ႈဢၼ်ၵဝ်ဢဝ်ၶဝ်ၸၢတ်ႇပိုၼ်ပႅတ်ႈၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းၵႃႈၼႂ်းၵူႈသိုင်ႇၵူႈမိူင်းၼၼ်ႉၸိုင်၊ၶဝ်တၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ။-
ၼႂ်းဝႃႈၼၼ်သေၵေႃႈ ၵဝ်တၵ်းႁႂ်ႈၵူၼ်းၶဝ်ၵိုတ်းၵျၢၼ်ႇၵေႇၼႃႇလႄႈလွတ်ႈဢသၢၵ်ႈၼႂ်းၽေးၼႃႈသိုၵ်း၊ၽေးဢၼ်ဢိုပ်းဢၼ်ယၢၵ်ႈ၊ၽေးၵႃႇလႃႉႁႃႈလႅင်မိူင်းဝႆႉ၊ႁႂ်ႈၶဝ်ၸၢင်ႈၶႆႈၸႂ်ထူပ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇၵႃႈဢၼ်ၶဝ်ႁဵတ်းၵႃႈၼႂ်းၵူၼ်းမဵဝ်းတင်းလၢႆၼၼ်ႉ၊ဢိၵ်ႇတင်းၶႆႈၸႂ်ထူပ်းလွင်ႈဢၼ်ၵဝ်ပဵၼ် ထႃႇဝရႃႉၽြႃး ၊ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈ၊
“လုၵ်ႈၵူၼ်း႟။ မႂ်းၵိၼ်တၢင်းၵိၼ်တၢင်းၶူပ်းလူၺ်ႈတၢင်းဢၼ်သၼ်ႇသၼ်ႇလႄႈၵိၼ်ၼမ်ႉလူၺ်ႈတၢင်းဢၼ်ၵူဝ်ႁႄၼၼ်ႉတႃႉ။-
မွၵ်ႇလၢတ်ႈတီႈၵူၼ်းမဵဝ်းတၢင်ႇမဵဝ်းလႄႈဝႃႈ၊ပျႃႇတိၵ်ႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ပုၼ်ႈၵူၼ်းဝဵင်း ယေႇရုသလႅမ်ႇ၊ ၸိူဝ်းဢၼ်ယင်းတိုၵ်ႉယူႇသဝ်းၵႃႈၼႂ်းမိူင်းၶဝ်ယူႇၼၼ်ႉၸမ်ႉ၊ၶဝ်တၵ်းမီးတၢင်းဢၼ်သၼ်ႇဢၼ်သၢႆယၢမ်းမိူဝ်ႈဢၼ်ၵိၼ်တၢင်းၵိၼ်တၢင်းၶူပ်း၊တၵ်းသၼ်ႇသၢႆလူၺ်ႈဢၼ်ၵူဝ်ဢၼ်ႁႄယၢမ်းမိူဝ်ႈဢၼ်ၵိၼ်ၼမ်ႉဢေႃႈ။ လွင်ႈမၼ်းၸမ်ႉ၊ၵႃႈဢၼ်မီးၵႃႈၼႂ်းမိူင်းၶဝ်ၼၼ်ႉတၵ်းလႆႈၶၢမ်ႇတၢင်းဢၼ်ဢဝ်ၵႂႃႇပႅတ်ႈၵွပ်ႈပိူဝ်ႈၵူၼ်းၸိူဝ်းဢၼ်ယူႇသဝ်းၵႃႈတီႈၼၼ်ႈႁဵတ်းလွင်ႈတၢင်းဢၼ်ဢမ်ႇတြႃးၼၼ်ႉဢေႃႈ။-
ဝဵင်းယႂ်ႇဝဵင်းလူင်ဢၼ်ၵူၼ်းၼမ်ၵိုၼ်းၼႃႇၸိူဝ်းၼၼ်ႉတၵ်းလုလႅဝ်လႄႈမိူင်းၸဝ်ႈတၵ်းပဵၼ်တီႈသဵတ်ႇၵူၼ်းငႅဝ်ၵူၼ်းဢေႃႈ။ မိူဝ်ႈၼၼ်ႉၶဝ်တၵ်းဢွၼ်ၵၼ်ႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးထိုင်တီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။ ထုင်းၵႂၢမ်းဢၼ်သူၸၢင်ႈလၢတ်ႈၵႃႈၼႂ်းမိူင်း ဢိသရေး၊ လႄႈဝႃႈ၊ ‘ၶိင်ႇၶႃႇၵေႃႈပူၼ်ႉၵႂႃႇ၊ဢၼ်ႁေႃးထႃႈဝႆႉၵေႃႈဢမ်ႇပဵၼ်မႃးၸွမ်း၊’ ဝႃႈၼႆၼၼ်ႉပဵၼ်ၸိူဝ်ႉၼင်ႇႁိုဝ်၊-
တေႃႈလဵဝ်ၼႆႉၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးလွင်ႈဢၼ်ၶႂ်ႈလၢတ်ႈၼၼ်ႉမွၵ်ႇလၢတ်ႈတီႈၶဝ်လႄႈဝႃႈ၊ ‘ၵဝ်တၵ်းႁႂ်ႈထုင်းၵႂၢမ်းၼၼ်ႉႁၢႆလႄႈၵမ်းလိုၼ်းၶဝ်တၵ်းဢမ်ႇလႆႈဢဝ်ထုင်းၵႂၢမ်းၼၼ်ႉလၢတ်ႈထႅင်ႈၵႃႈၼႂ်းမိူင်း ဢိသရေး၊ ၼၼ်ႉလႃးလႃး၊’ ဝႃႈၼႆတႃႉ။ ၵူၺ်းၵႃႈ၊လၢတ်ႈတီႈၶဝ်လႄႈဝႃႈ၊ ‘ၶိင်ႇၶႃႇႁွတ်ႈမႃးယဝ်ႉ၊ၵႂၢမ်းၸဝ်ႈဢၼ်ႁေႃးထႃႈဝႆႉၼၼ်ႉတၵ်းပျေႉၸုမ်ႇဢေႃႈ၊’ ဝႃႈၼႆတႃႉ။
“ၵႃႈၼႂ်းၵူၼ်းမဵဝ်း ဢိသရေး၊ ၼႆႉၵမ်းလိုၼ်းဢမ်ႇလႆႈမီးရူႇပႃႇရူင်ႇဢၼ်လၢႆလၢႆဢမ်ႇပွင်ႇလွင်ႈၵႃႈသင်၊ဢမ်ႇလႆႈမီးၵႂၢမ်းပရေႃးၽႅတ်ႈဢၼ်သွၼ်ၽိတ်းသွၼ်ပိူင်ႈၼၼ်ႉလႃးလႃး။-
ၵဝ် ထႃႇဝရႃႉၽြႃး တၵ်းလၢတ်ႈတေႃႇၶဝ်လႄႈၵႂၢမ်းဢၼ်ၵဝ်လၢတ်ႈၼၼ်ႉတၵ်းပျေႉၸုမ်ႇဢေႃႈ။ မိုဝ်ႉဝၼ်းမၼ်းတၵ်းဢမ်ႇလႆႈထိူင်းလႆႈၼၢၼ်း။ မဵဝ်းဢၼ်ၸၢင်ႈလုၵ်ႉၽိုၼ်ႉ႟။ ၸွမ်းၵႃႈၼင်ႇဢၼ်ၵဝ်ပၼ်သတိတီႈသူဢၼ်ဝႃႈ၊ၵဝ်တၵ်းႁဵတ်းၸိူဝ်ႉၼင်ႇႁိုဝ်ၼၼ်ႉတၵ်းႁႂ်ႈမၼ်းပျေႉၸုမ်ႇပဵၼ်မႃးၼႂ်းၸူဝ်ႈပၢၼ်သူဢေႃႈ။ ဝႃႈၼႆ၊ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈ၊-
“လုၵ်ႈၵူၼ်း႟။ ၵူၼ်းမဵဝ်း ဢိသရေး၊ ၼၼ်ႉထၢင်ႇဝႃႈ၊ရူႇပႃႇရူင်ႇဢၼ်မႂ်းႁေႃးလၢတ်ႈၼၼ်ႉပဵၼ်ပုၼ်ႈၶိင်ႇမိုဝ်ႉဝၼ်းဢၼ်ၵႆၼႃႇၼၼ်ႉဢေႃႈ။-
ပိူဝ်ႈၼႆလႄႈမွၵ်ႇလၢတ်ႈၶဝ်လႄႈဝႃႈ၊ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊တၵ်းဢမ်ႇပဵၼ်ဢၼ်ထိူင်းဢၼ်ၼၢၼ်းလႄႈၵႃႈၼင်ႇဢၼ်ၵဝ်မီးဢမိင်ႉၼၼ်ႉတၵ်းပျေႉၸုမ်ႇဢေႃႈ၊ဝႃႈၼႆၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးထိုင်တီႈၵဝ်လႄႈဝႃႈ၊-
“လုၵ်ႈၵူၼ်း႟။ လၢတ်ႈၵႂၢမ်းတၢင်ႇဢပျတ်ႈတီႈပရေႃးၽႅတ်ႈ ၵူၼ်းမဵဝ်း ဢိသရေး၊ ၶဝ်ဢၼ်ႁေႃးလၢတ်ႈၸွမ်းဢလူဝ်ႇတူဝ်ၸဝ်ႈၵဝ်ႇၼၼ်ႉတႃႉ။ မွၵ်ႇလၢတ်ႈႁႂ်ႈၶဝ်ထွမ်ႇငိၼ်းဢမိင်ႉ ထႃႇဝရႃႉၽြႃး၊ တႃႉ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉၸမ်ႉ၊ “ပရေႃးၽႅတ်ႈဢၼ်ငိူဝ်ႈငႃႉတင်းလၢႆမီးဢႃႉမၢင်ႇၵလႃႇဢေႃႈ။ လွင်ႈမၼ်းၸမ်ႉ၊ၶဝ်ၼၼ်ႉႁဵတ်းၸွမ်းဢလူဝ်ႇတူဝ်ၸဝ်ႈၵဝ်ႇလႄႈသၢင်ႈႁဵတ်းရူႇပႃႇရူင်ႇတူဝ်ၸဝ်ႈၵဝ်ႇဢေႃႈ။-
ၵူၼ်းမဵဝ်း ဢိသရေး၊ ႟။ ပရေႃးၽႅတ်ႈၸိူဝ်းၼၼ်ႉပဵၼ်ၸိူဝ်ႉၼင်ႇမႃလိၼ်ဢၼ်ယူႇၵႃႈၼႂ်းဝဵင်းဢၼ်လုလႅဝ်လႄႈႁၢမ်းၼၼ်ႉဢေႃႈ။-
ၶဝ်ဢမ်ႇပႂ်ႉဢမ်ႇၵၢင်တီႈၽႃဢုတ်ႇဢၼ်မီးႁွႆးပင်းႁွႆးလု၊ဢမ်ႇမႄးလွမ်ႉလမ်းဝဵင်းပုၼ်ႈမဵဝ်း ဢိသရေး၊ ႁႂ်ႈလႆႈၸုၵ်းၶၢမ်ႇသိုၵ်းၼႂ်းမိုဝ်ႉဝၼ်း ထႃႇဝရႃႉၽြႃး၊ ၼၼ်ႉ။-
ရူႇပႃႇရူင်ႇၶဝ်ပဵၼ်ဢၼ်ၽိတ်းဢၼ်ပိူင်ႈလႄႈလွင်ႈတၢင်းဢၼ်ၶဝ်ႁေႃးထႃႈၼၼ်ႉပဵၼ်မုသႃႇဢေႃႈ။ ၶဝ်ၵၢဝ်ႇလၢတ်ႈလႄႈဝႃႈ၊ ‘ ထႃႇဝရႃႉၽြႃး၊ မီးဢမိင်ႉဢေႃႈ၊’ ဝႃႈၼင်ႇၼႆသေၵေႃႈ၊ ထႃႇဝရႃႉၽြႃး၊ ဢမ်ႇလႆႈပွႆႇလႆႈၸႂ်ႉၶဝ်။ ၼႂ်းဝႃႈၼၼ်သေၵေႃႈၶဝ်ယင်းမုင်ႈထႃႈမွင်းထႃႈလွင်ႈဢၼ်ၵႂၢမ်းၶဝ်တၵ်းပျေႉၸုမ်ႇၼၼ်ႉယူႇဢေႃႈ။-
ၵဝ်ယင်းလၢတ်ႈတီႈၶဝ်လႄႈဝႃႈ၊ ‘ရူႇပႃႇရူင်ႇသူပဵၼ်ဢၼ်ၽိတ်းဢၼ်ပိူင်ႈလႄႈလွင်ႈတၢင်းဢၼ်သူႁေႃးထႃႈၼၼ်ႉပဵၼ်မုသႃႇလွၼ်ႉလွၼ်ႉဢေႃႈ၊’ ဝႃႈၼႆသေၵေႃႈ၊သူဢွၼ်ၵၼ်လၢတ်ႈလႄႈဝႃႈ၊ ‘ပဵၼ်ဢမိင်ႉ ထႃႇဝရႃႉၽြႃး ဢေႃႈ၊’ ဝႃႈၼင်ႇၼႆယဝ်ႉ။ ၵူၺ်းၵႃႈ၊ၵဝ်ဢမ်ႇလႆႈမီးဢမိင်ႉတီႈသူ၊” ဝႃႈၼင်ႇၼႆဢေႃႈ။
ပိူဝ်ႈဢၼ်ပဵၼ်ၸိူဝ်ႉၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵႂၢမ်းသူၼၼ်ႉပဵၼ်ၵႂၢမ်းဢၼ်ၽိတ်းဢၼ်ပိူင်ႈလႄႈ၊ပျႃႇတိၵ်ႈရူႇပႃႇရူင်ႇသူၼၼ်ႉၵေႃႈ ပဵၼ်မုသႃႇလႄႈၵဝ်ၶတ်းတႃႉၵၼ်တင်းသူဢေႃႈ။-
ၵဝ်တၵ်းၸီႇယၢင်ႇတၢမ်ႇဢပျတ်ႈတီႈသူဢၼ်ဝႃႈ၊ပရေႃးၽႅတ်ႈ ဢၼ်ၸၢင်ႈႁၼ်ရူႇပႃႇရူင်ႇဢၼ်ၽိတ်းဢၼ်ပိူင်ႈၸၢင်ႈဢဝ်လွင်ႈဢၼ်ႁေႃးထႃႈႁႂ်ႈႁဵတ်းၽိတ်းႁဵတ်းပိူင်ႈၼၼ်ႉဢေႃႈ။ သူတၵ်းတေဢမ်ႇလႆႈၶဝ်ႈပႃးၼႂ်းတီႈၸုတီႈတုမ်ၵူၼ်းၵဝ်တင်းလၢႆ၊ၸိုဝ်ႈသဵင်သူဢမ်ႇလႆႈတႅမ်ႈမၢႆသႂ်ႇဝႆႉၵႃႈၼႂ်းၸရၢင်းၵူၼ်းမဵဝ်း ဢိသရေး၊ ဢမ်ႇလႆႈၶိုၼ်းပွၵ်ႈမိူဝ်းၸူးတီႈမိူင်းၸဝ်ႈလႃးလႃး။ မိူဝ်ႈၼၼ်ႉ သူတၵ်းႁုလွင်ႈဢၼ်ၵဝ်ပဵၼ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊ဢေႃႈ။
“ၵွပ်ႈပိူဝ်ႈဢၼ်ၶဝ်ႁဵတ်းႁႂ်ႈၵူၼ်းၵဝ်တင်းလၢႆႁဵတ်းၽိတ်းႁဵတ်းပိူင်ႈလႄႈဝႃႈ၊ ‘မီးတၢင်းၼိမ်ဢေႃႈ၊’ ဝႃႈၼႆသေၵေႃႈဢမ်ႇမီးတၢင်းဢၼ်ၼိမ်ဢၼ်လီ၊ဢိၵ်ႇတင်းၵွပ်ႈပိူဝ်ႈဢၼ်ၵူၼ်းတင်းလၢႆဢဝ်မၢၵ်ႇႁိၼ်ၵေႃႇႁဵတ်းလမ်းဝဵင်းဢၼ်ဢမ်ႇပေႃးမၼ်းၶိူင်ႇၼၼ်ႉ၊ပရေႃးၽႅတ်ႈၸိူဝ်းၼၼ်ႉႁဵတ်းႁၢင်ႈဢဝ်ထုၼ်ၽိူၵ်ႇမႃးတႃးဝႆႉဢေႃႈ။-
မွၵ်ႇလၢတ်ႈလွင်ႈဢၼ်လမ်းဝဵင်းၶဝ်တၵ်းလူမ်ႉတၵ်းပင်းၵႂႃႇၼၼ်ႉတီႈပရေႃးၽႅတ်ႈၸိူဝ်းၼၼ်ႉတႃႉ။ ၵဝ်တၵ်းႁႂ်ႈၽူၼ်လူင်တူၵ်းလူင်းမႃးဢေႃႈ။ ၽူၼ်မၢၵ်ႇႁဵပ်းတၵ်းတူၵ်းသႂ်ႇၵႃႈၼိူဝ်ၼၼ်ႉလႄႈလူမ်းလူင်တၵ်းပတ်ႉထူဝ်းယႃႉပႅတ်ႈဢေႃႈ။-
လမ်းဝဵင်းၼၼ်ႉတၵ်းၵိူၼ်ႇလူမ်ႉသေယဝ်ႉ၊ပိူၼ်ႈတၵ်းဢွၼ်ၵၼ်ထၢမ်လႄႈဝႃႈ၊ ‘ထုၼ်ၽိူၵ်ႇဢၼ်တႃးၼၼ်ႉတၵ်းမီးလွင်ႈလီၸိူဝ်ႉၼင်ႇႁိုဝ်၊’ ဝႃႈၼႆဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး မီးဢမိင်ႉၸမ်ႉ၊ “ၵဝ်တၵ်းပႃးတင်းတေႃးသႃႉလႄႈပွႆႇၸႂ်ႉၽူၼ်လူင်လူမ်းလူင်တင်းၽူၼ်မၢၵ်ႇႁဵပ်းမႃးယႃႉလမ်းဝဵင်းၼၼ်ႉပႅတ်ႈဢေႃႈ။-
ၵဝ်တၵ်းၵိူၼ်ႇယႃႉလမ်းဝဵင်းဢၼ်တႃးထုၼ်ၽိူၵ်ႇၼၼ်ႉႁႂ်ႈမၼ်းလႅဝ်ၵႂႃႇယွႆႈၵႂႃႇတေႃႇထိုင်ႁွတ်ႈငဝ်ႈႁၢၵ်ႈမၼ်းပေႃႇဢွၵ်ႇယူႇသေယဝ်ႉ၊လမ်းဝဵင်းၼၼ်ႉတၵ်းၵိူၼ်ႇတူၵ်းလႄႈတဵင်သူတၢႆပႅတ်ႈတင်းသဵင်ႈတင်းလူင်ဢေႃႈ။ မိူဝ်ႈၼၼ်ႉသူတၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး ၊ဢေႃႈ။
“တေႃးသႃႉၵဝ်တၵ်းဢွၵ်ႇၵႃႈၼိူဝ်လမ်းဝဵင်း ဢိၵ်ႇတင်းၶဝ်ၸိူဝ်းဢၼ်ဢဝ်ထုၼ်ၽိူၵ်ႇတႃးႁၢင်ႈၶိူင်ႈဝႆႉၼၼ်ႉဢေႃႈ။ ၵဝ်တၵ်းလၢတ်ႈတီႈသူလႄႈဝႃႈ၊ ‘လမ်းဝဵင်းဢမ်ႇမီးယဝ်ႉ။ ၶဝ်ၸိူဝ်းဢၼ်ဢဝ်ထုၼ်ၽိူၵ်ႇတႃးၼၼ်ႉၵေႃႈဢမ်ႇမီးယဝ်ႉ။-
ၶဝ်ၸိူဝ်းဢၼ်ဢဝ်ထုၼ်ၽိူၵ်ႇတႃးၼၼ်ႉပဵၼ်ပရေႃးၽႅတ်ႈၸိူဝ်းဢၼ်ႁေႃးလၢတ်ႈတီႈဝဵင်း ယေႇရုသလႅမ်ႇ ၊လႄႈဝႃႈ၊ “မီးတၢင်းၼိမ်ဢေႃႈ၊” ဝႃႈၼႆသေၵေႃႈတၢင်းဢၼ်ၼိမ်ဢၼ်လီဢမ်ႇမီးယဝ်ႉ၊ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ၊’” ဝႃႈၼင်ႇၼႆဢေႃႈ။
လိုၼ်းသေၼၼ်ႉ၊ ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵမ်းၼႆႉ၊လုၵ်ႈၵူၼ်း႟။ မႂ်းယႅၵ်ႉၼႃႈယႅၵ်ႉတႃတူၺ်းမႄႈယိင်းဢၼ်ပဵၼ်ၵူၼ်းမဵဝ်းမႂ်းၸိူဝ်းဢၼ်ႁဵတ်းပရေႃးၽႅတ်ႈၸွမ်းဢလူဝ်ႇတူဝ်ၸဝ်ႈၵဝ်ႇၼၼ်ႉသေယဝ်ႉ၊ႁေႃးလၢတ်ႈၶတ်းၵၼ်တင်းၶဝ်လႄႈမွၵ်ႇလၢတ်ႈတီႈၶဝ်တႃႉ။-
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉၸမ်ႉ၊ “မႄႈယိင်းၸိူဝ်းသူၼႆႉမီးဢႃႉမၢင်ႇၵလႃႇဢေႃႈ။ လွင်ႈမၼ်းၸမ်ႉ၊ပုၼ်ႈတႃႇတေတိဢဝ်ဢသၢၵ်ႈဝိၺိၺ်ႇတင်းလၢႆၼၼ်ႉသူႁဵတ်းသၢႆလၢၵ်ႈၽွႆးသေလႄႈမတ်ႉသႂ်ႇၵႃႈတီႈပွင်ႈၶႅၼ်ပွင်ႈမိုဝ်းပိူၼ်ႈ၊ဢိၵ်ႇတင်းႁဵတ်းၽႃႈၶဵၼ်းႁူဝ်လႄႈဝဵၼ်းပၼ်ၵႃႈၼိူဝ်ႁူဝ်ပိူၼ်ႈပုၼ်ႈတႃႇတၵ်းမီးဢႃႇၼႃႇတိဢဝ်ဢသၢၵ်ႈဝိၺိၺ်ႇၵူၼ်းၵဝ်သေလႄႈပႂ်ႉထိင်းဢသၢၵ်ႈဝိၺိၺ်ႇတၢင်ႇဢၼ်ႁႂ်ႈမီးယူႇပုၼ်ႈဢၵျူဝ်းတူဝ်ၸဝ်ႈၵဝ်ႇႁိုဝ်း။-
သူဢွၼ်ၵၼ်ႁဵတ်းဢမ်ႇရူဝ်ႇဢမ်ႇသေႇတီႈၵဝ်ၵႃႈၼႂ်းၵူၼ်းၵဝ်တင်းလၢႆပုၼ်ႈဢၼ်တၵ်းလႆႈၶဝ်ႈမုယေႃးဝၵ်ႉၼိုင်ႈ၊ဢိၵ်ႇတင်းၶဝ်ႈမုၼ်းၽၢၵ်ႇၼိုင်ႈၼၼ်ႉယဝ်ႉ။ ဢဝ်ဢသၢၵ်ႈၵေႃႉဢၼ်ဢမ်ႇထုၵ်ႇလီတၢႆၼၼ်ႉတၢႆလႄႈ၊ပၼ်ဢသၢၵ်ႈၵေႃႉဢၼ်ဢမ်ႇထုၵ်ႇလီလိပ်းၼၼ်ႉလိပ်းယဝ်ႉ။ သူသမ်ႉလၢတ်ႈၵႂၢမ်းမုသႃႇတီႈၵူၼ်းၵဝ်တင်းလၢႆလႄႈၶဝ်ၵေႃႈဢွၼ်ၵၼ်ယုမ်ႇယဝ်ႉ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉၸမ်ႉ၊ “ၵဝ်ၸင်းသၢႆလၢၵ်ႈၽွႆးဢၼ်သူၸႂ်ႉၼႂ်းတၢင်းဢၼ်ႁဵတ်းႁႂ်ႈဢသၢၵ်ႈလိပ်းဢိၵ်ႇတင်းတၢင်းဢၼ်ႁႂ်ႈတၢႆၼၼ်ႉဢေႃႈ။ ၵဝ်တၵ်းတိုတ်ႉထွတ်ႇဢဝ်ဢွၵ်ႇသေၵႃႈတီႈၶႅၼ်သူသေလႄႈပွႆႇဢသၢၵ်ႈဝိၺိၺ်ႇဢၼ်သူတိဢဝ်ၼၼ်ႉႁႂ်ႈလွတ်ႈဢေႃႈ။-
ၵဝ်တၵ်းသိၵ်ႇပႅတ်ႈၽႃႈၶဵၼ်းႁူဝ်သူၸိူဝ်းၼၼ်ႉသေလႄႈၵႄႇသႄႇၼုၵ်ႈဢဝ်ၵူၼ်းၵဝ်တင်းလၢႆလွတ်ႈသေၵႃႈၼႂ်းဢႃႇၼႃႇသူယူႇတႃႇသေႇဢမ်ႇထၢတ်ႇၼၼ်ႉဢေႃႈ။ မိူဝ်ႈၼၼ်ႉသူတၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး ၊ဢေႃႈ။
“သူလၢတ်ႈၵႂၢမ်းမုသႃႇႁဵတ်းႁႂ်ႈႁူဝ်ၸႂ်ၵူၼ်းၵေႃႉဢၼ်သိုဝ်ႈတေႃႇ၊ဢိၵ်ႇတင်းၵေႃႉဢၼ်ၵဝ်ယင်းဢမ်ႇလႆႈဢဝ်မိုဝ်းတိူဝ်ႉထုၵ်ႇႁႂ်ႈၸဵပ်းသႅပ်ႇၼၼ်ႉၸႂ်လုႁႅင်းဢူၼ်ႈယဝ်ႉဢေႃႈ။ သူႁၢမ်ႈတၢပ်ႈႁႄႉၶႅၼ်ၵူၼ်းႁၢႆႉၵူၼ်းမိူၵ်ႈၸိူဝ်းဢၼ်ဢၢင်ႈတၵ်းၸုၼ်ႉပႅတ်ႈတၢင်းဢၼ်ႁၢႆႉဢၼ်မိူၵ်ႈၶဝ်ၼၼ်ႉႁႂ်ႈလႆႈၵႄႇသႄႇဢဝ်ဢသၢၵ်ႈတူဝ်ၸဝ်ႈၵဝ်ႇၼၼ်ႉဢေႃႈ။-
ပိူဝ်ႈၼႆလႄႈရူႇပႃႇရူင်ႇသူဢၼ်ဢမ်ႇၸိုဝ်ႈဢမ်ႇၸႂ်ႈ၊ဢိၵ်ႇတင်းၵႂၢမ်းပရေႃးၽႅတ်ႈသူဢၼ်ဢွၼ်ၽိတ်းဢွၼ်ပိူင်ႈၼၼ်ႉသုတ်းသဵင်ႈတေႃႈလဵဝ်ၼႆႉယဝ်ႉ။ ၵဝ်ၵႄႇၼုၵ်ႈဢဝ်ၵူၼ်းၵဝ်တင်းလၢႆႁႂ်ႈလွတ်ႈဢွၵ်ႇသေၵႃႈၼႂ်းမိုဝ်းသူပုၼ်ႈလွင်ႈၼင်ႇႁိုဝ်သူတၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၵူၼ်းဢၼ်ပဵၼ်ၵႄႇပဵၼ်ႁူဝ်ၵူၼ်းမဵဝ်း ဢိသရေး ၊ၶဝ်ၵမ်ႈၽွင်ႈမႃးဢုပ်ႇၵုမ်ၵဝ်လူၺ်ႈလွင်ႈဢလူဝ်ႇၽြႃးပဵၼ်ၸဝ်ႈဢေႃႈ။-
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈ၊-
“လုၵ်ႈၵူၼ်း႟။ ၵူၼ်းၸိူဝ်းၼႆႉဢဝ်ၸႂ်ၶဝ်ဢၢပ်ႈဝၢင်းၵႃႈၼႂ်းႁုၼ်ႇႁၢင်ႈသၢင်းထုတင်းလၢႆလႄႈႁႂ်ႈႁုၼ်ႇႁၢင်ႈသၢင်းထုၸိူဝ်းၼၼ်ႉတိုၵ်းယူင်းႁႂ်ႈၶဝ်ႁဵတ်းတုၸရိူၵ်ႈယဝ်ႉ။ ၸွင်ႇၶဝ်ထၢင်ႇၵဝ်တၵ်းတွပ်ႇတၢင်းဢၼ်ၶဝ်လဝ်ႈထၢမ်ႁိုဝ်း။
“ၵွပ်ႈပိူဝ်ႈပဵၼ်ၸိူဝ်ႉၼင်ႇၼႆလႄႈမႂ်းလၢတ်ႈတီႈၶဝ်လႄႈဝႃႈ၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ၵူၼ်းမဵဝ်း ဢိသရေး၊ ၸိူဝ်းဢၼ်ဢဝ်ႁူဝ်ၸႂ်ၶဝ်ဢၢပ်ႈဝၢင်းၵႃႈၼႂ်းႁုၼ်ႇႁၢင်ႈသၢင်းထုလႄႈႁႂ်ႈႁုၼ်ႇႁၢင်ႈသၢင်းထုၸိူဝ်းၼၼ်ႉတိုၵ်းယူင်းႁႂ်ႈၶဝ်ႁဵတ်းတုၸရိူၵ်ႈၼၼ်ႉၵူႈၵေႃႉၵူႈၵူၼ်းလႄႈယင်းမႃးဢုပ်ႇၵုမ်ပရေႃးၽႅတ်ႈ ၼၼ်ႉ၊ၵဝ် ထႃႇဝရႃႉၽြႃး၊ တၵ်းၶိုၼ်းတွပ်ႇၸွမ်းၵႃႈၼင်ႇဢၼ်ႁုၼ်ႇႁၢင်ႈသၢင်းထုၶဝ်မီးၼမ်ၼႃႇၼၼ်ႉဢေႃႈ။-
လွင်ႈမၼ်းၸမ်ႉ၊ႁုၼ်ႇႁၢင်ႈသၢင်းထုၸိူဝ်းၼၼ်ႉၸူဝ်ႈဢဝ်ၵူၼ်းမဵဝ်း ဢိသရေး၊ တင်းလၢႆယၢၼ်ၵႆၵၼ်တင်းၵဝ်ၵႂႃႇယဝ်ႉ။ ၵူၺ်းၵႃႈ၊ၵဝ်မုင်ႈမွင်းႁႂ်ႈၵႂၢမ်းတွပ်ႇၵဝ်တၵ်းၶိုၼ်းပႄႉၼႅင်ႇဢဝ်ႁူဝ်ၸႂ်ၶဝ်ယူႇဢေႃႈ။
“ပိူဝ်ႈၼႆလႄႈမွၵ်ႇလၢတ်ႈတီႈၵူၼ်းမဵဝ်း ဢိသရေး ၊တေႃႈလဵဝ်ၼႆႉလႄႈဝႃႈ၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ၸုၼ်ႉပႅတ်ႈႁုၼ်ႇႁၢင်ႈသၢင်းထုဢၼ်လီႁင်ႈဢဵတ်ႇသဵတ်ႇၸိူဝ်းၼၼ်ႉသေလႄႈဝၢႆႇၼႃႈၶိုၼ်းမႃးတႃႉ။
“ၵေႃႉဢၼ်ပဵၼ်ၵူၼ်းမဵဝ်း ဢိသရေး၊ သေဢမ်ႇဝႃႈ၊ပဵၼ်ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၸိူဝ်းဢၼ်သွၼ်ႈပိုင်ႈယူႇၵႃႈၼႂ်းမိူင်း ဢိသရေး၊ သေဢမ်ႇဝႃႈ၊ၸိူဝ်းဢၼ်ဝၢႆႇၼႃႈပႅတ်ႈသေၵႃႈတီႈၵဝ်သေလႄႈၵႂႃႇဝႆႈႁုၼ်ႇႁၢင်ႈသၢင်းထုတင်းလၢႆသေယဝ်ႉ၊မႃးဢုပ်ႇၵုမ်ပရေႃးၽႅတ်ႈၼၼ်ႉၵဝ် ထႃႇဝရႃႉၽြႃး၊ တၵ်းၶိုၼ်းတွပ်ႇလၢတ်ႈတီႈၵေႃႉၼၼ်ႉလူၺ်ႈတူဝ်ၵဝ်ဢေႃႈ။-
ၵဝ်တၵ်းႁဵတ်းၶတ်းၵၼ်တင်းမၼ်းလႄႈႁႂ်ႈမၼ်းပဵၼ်လၢၵ်ႈၶၼႃႇတီႈဢၼ်ပိူၼ်ႈတၢင်ႇၵေႃႉသႄႉသွမ်းသေယဝ်ႉ၊ပႄႇမၼ်းဢွၵ်ႇပႅတ်ႈသေၵႃႈၼႂ်းၵူၼ်းၵဝ်တင်းလၢႆဢေႃႈ။ မိူဝ်ႈၼၼ်ႉသူတၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ။
“ပေႃးပရေႃးၽႅတ်ႈလႆႈၶၢမ်ႇတၢင်းဢၼ်ၸူဝ်းဢဝ်လႄႈႁေႃးလၢတ်ႈဢၼ်ၽိတ်းဢၼ်ပိူင်ႈၸိုင်၊ၵဝ် ထႃႇဝရႃႉၽြႃး၊ ၼႆႉ ႁႂ်ႈပရေႃးၽႅတ်ႈၼၼ်ႉၸွမ်းတၢင်းဢၼ်ၽိတ်းဢၼ်ပိူင်ႈဢေႃႈ။ ၼင်ႇၼၼ်လႄႈၵဝ်တၵ်းယဵတ်ႇမိုဝ်းၵဝ်ၸူးတီႈမၼ်းလႄႈပႄႇမၼ်းပႅတ်ႈသေၵႃႈၼႂ်းၵူၼ်းၵဝ်မဵဝ်း ဢိသရေး၊ ဢေႃႈ။-
ၸႃႉၸဵမ်ပရေႃးၽႅတ်ႈဢိၵ်ႇတင်းၶဝ်ၸိူဝ်းဢၼ်မႃးဢုပ်ႇၵုမ်တွင်ႈထၢမ်မၼ်းၼၼ်ႉတၵ်းလႆႈၶၢမ်ႇတၢမ်ႇမိူၼ်မိူၼ်ၵၼ်ဢေႃႈ။-
ၵဝ်တၵ်းႁဵတ်းၸိူဝ်ႉၼင်ႇၼႆပုၼ်ႈလွင်ႈၼင်ႇႁိုဝ်ၵမ်းလိုၼ်းၵူၼ်းမဵဝ်း ဢိသရေး တၵ်းဢမ်ႇဝႄႈဢမ်ႇပိူင်ႈၵဝ်၊တၵ်းဢမ်ႇဢဝ်တင်းဢပျတ်ႈဢၼ်ၶဝ်ၽိတ်းပိူင်ႈၵႃႈမီးၼၼ်ႉႁႂ်ႈၶဝ်ၵူဝ်ႈၵိူၵ်ႇလႄႈၶဝ်တၵ်းဢွၼ်ၵၼ်ပဵၼ်ၵူၼ်းၵဝ်ဢေႃႈ။ ၵဝ်ၵေႃႈတၵ်းလႆႈပဵၼ်ၽြႃးပဵၼ်ၸဝ်ႈၶဝ်ဢေႃႈ။ ဝႃႈၼႆ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉဢေႃႈ၊ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။ ပေႃးသိုင်ႇၸိုင်ႈဝၢၼ်ႈမိူင်းႁဵတ်းတုၸရိူၵ်ႈဢပျတ်ႈလႄႈဢမ်ႇပႂ်ႉသဵတ်ႈၸႃႇတေႃႇၵဝ်ၸိုင်၊ၵဝ်တၵ်းယဵတ်ႇမိုဝ်းၵဝ်သေလႄႈယႃႉပႅတ်ႈၶဝ်ႈၼမ်ႉတၢင်းၵိၼ်ဢၼ်ၵမ်ႉထွၵ်ႈဝဵင်းၼၼ်ႉဢေႃႈ။ ၵဝ်တၵ်းႁႂ်ႈပဵၼ်ၽေးတၢင်းဢၼ်ၶဝ်ႈၵႃႈမၢၵ်ႇပႅင်းလႄႈဢဝ်တၢႆၸႃႉၸဵမ်ၵူၼ်း၊ဢိၵ်ႇတင်းသတ်းတင်းလၢႆမိူၼ်ၵၼ်ဢေႃႈ။-
ပိၵ်ႉသမ်ႉၵူၼ်းသၢမ်ၵေႃႉဢၼ်ဝႃႈ၊ ၼူဝ်းဢႃႇ၊တၢၼ်ႇယေႇလႃႉ၊ တင်း ယေႃးၽႃႉ၊ ၶဝ်မီးယူႇၵႃႈတီႈၼၼ်ႈသေၵေႃႈၶဝ်ၼၼ်ႉတၢတ်ႈၼိူင်ႇၵႄႇသႄႇဢဝ်ပုၼ်ႈဢသၢၵ်ႈဝိၺိၺ်ႇၶဝ်ၵူၺ်းလူၺ်ႈတၢင်းသိုဝ်ႈတေႃႇၶဝ်ၼၼ်ႉဢေႃႈ၊ဝႃႈၼႆ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉဢေႃႈ။
“ပေႃးဢမ်ႇၼၼ်ၵေႃႈမၢင်ၽဝ်ႇၵဝ်တၵ်းပွႆႇၸႂ်ႉၽေးတူဝ်ထိူၼ်ႇတင်းလၢႆမႃးဢဝ်ၵူၼ်းတင်းလၢႆတၢႆပႅတ်ႈ ႁႂ်ႈမိူင်းၼၼ်ႉႁၢမ်းၵႂႃႇလႄႈပဵၼ်တီႈဢၼ်သဵတ်ႇၵူၼ်းငႅဝ်ၵူၼ်းဢေႃႈ။-
ပိၵ်ႉသမ်ႉၵူၼ်းသၢမ်ၵေႃႉၼၼ်ႉယူႇသဝ်းၵႃႈတီႈၼၼ်ႈသေၵေႃႈ၊ၵႃႈၼင်ႇဢၼ်ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊ပဵၼ်ၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉ၊ၶဝ်ယင်းဢမ်ႇၸၢင်ႈၵႄႇသႄႇဢဝ်လုၵ်ႈၶဝ်လၢင်းၶဝ်လႆႈလႄႈၶဝ်တၵ်းၵႄႇသႄႇဢဝ်ဢသၢၵ်ႈဝိၺိၺ်ႇၶဝ်ၵူၺ်းဢေႃႈ။ ၼင်ႇၼၼ်လႄႈမိူင်းၼၼ်ႉတၵ်းပဵၼ်တီႈဢၼ်သဵတ်ႇၵူၼ်းငႅဝ်ၵူၼ်းဢမၢၼ်ႇၶၼ်ပဵၼ်ဢေႃႈ။
“ပေႃးဢမ်ႇၼၼ်ၵေႃႈမၢင်ၽဝ်ႇၵဝ်တၵ်းႁႂ်ႈၽေးသိုၵ်းႁွတ်ႈထိုင်ၵႃႈၼိူဝ်မိူင်းၼၼ်ႉလႄႈပွႆႇၸႂ်ႉလၢၵ်ႈၼၢၵ်ႈဢၼ်ၸၢင်ႈယႃႉလုယႃႉလႅဝ်ၼၼ်ႉၵႂႃႇပႄႇၽဵဝ်ႈပႅတ်ႈၸႃႉၸဵမ်ၵူၼ်း၊ဢိၵ်ႇတင်းသတ်းတင်းလၢႆမိူၼ်ၵၼ်ဢေႃႈ။-
ပိၵ်ႉသမ်ႉၵူၼ်းသၢမ်ၵေႃႉၼၼ်ႉယူႇသဝ်းၵႃႈတီႈၼၼ်ႈသေၵေႃႈ၊ၵႃႈၼင်ႇဢၼ်ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊ပဵၼ်ၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉ၊ၶဝ်ယင်းဢမ်ႇၸၢင်ႈၵႄႇသႄႇဢဝ်လုၵ်ႈၶဝ်လၢင်းၶဝ်လႆႈလႄႈၶဝ်တၵ်းၵႄႇသႄႇဢဝ်ဢသၢၵ်ႈဝိၺိၺ်ႇၶဝ်ၵူၺ်းဢေႃႈ။
“ပေႃးဢမ်ႇၼၼ်ၵေႃႈမၢင်ၽဝ်ႇၵဝ်တၵ်းပွႆႇၸႂ်ႉၽေးၵႃႇလႃႉႁႃႈလႅင်မိူင်းတူၵ်းႁွတ်ႈၵႃႈၼိူဝ်မိူင်းၼၼ်ႉလႄႈတၵ်းဢဝ်ႁႅင်းတေႃးသႃႉၵဝ်လေႃႇၽင်ႈလႄႈတၵ်းဢဝ်ဢသၢၵ်ႈၵူၼ်း၊ဢိၵ်ႇတင်းဢသၢၵ်ႈသတ်းတၢႆၼမ်ၼႃႇလူင်လၢင်ဢေႃႈ။-
ပိၵ်ႉသမ်ႉ၊ ၼူဝ်းဢႃႇ၊တၢၼ်ႇယေႇလႃႉ # ၊ဢိၵ်ႇတင်း ယေႃးၽႃႉ၊ ၶဝ်ယူႇသဝ်းၵႃႈတီႈၼၼ်ႈသေၵေႃႈ၊ၵႃႈၼင်ႇဢၼ်ၵဝ်ပဵၼ်ၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉ၊ၶဝ်ယင်းဢမ်ႇၸၢင်ႈၵႄႇသႄႇဢဝ်လုၵ်ႈၶဝ်လၢင်းၶဝ်လႆႈယဝ်ႉ။ တၢင်းသိုဝ်ႈတေႃႇၶဝ်ၼၼ်ႉတၵ်းၵႄႇသႄႇဢဝ်ဢသၢၵ်ႈဝိၺိၺ်ႇၶဝ်ၵူၺ်းဢေႃႈ၊” ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ။
ပိူဝ်ႈၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး မီးဢမိင်ႉၸမ်ႉ၊ “တၵ်းယဵင်ႈၶႅၼ်းႁၢႆႉႁႅင်းၼႃႇမိူဝ်ႈဢၼ်ၵဝ်တၵ်းပွႆႇၸႂ်ႉၽေးတၢမ်ႇသီႇမဵဝ်းဢၼ်ႁၢႆႉၼႃႇဢၼ်ဝႃႈ၊ၽေးသိုၵ်းၽေးသိူဝ်၊ၽေးၶဝ်ႈၵႃႈမၢၵ်ႇပႅင်း၊ၽေးတူဝ်ထိူၼ်ႇ၊ၽေးၵႃႇလႃႉႁႃႈလႅင်မိူင်းၸိူဝ်းၼၼ်ႉတူၵ်းၵႃႈၼိူဝ်ဝဵင်း ယေႇရုသလႅမ်ႇ ၊ႁႂ်ႈလႆႈယႃႉၽဵဝ်ႈပႅတ်ႈၸႃႉၸဵမ်ၵူၼ်း၊ဢိၵ်ႇတင်းသတ်းတင်းလၢႆမိူၼ်ၵၼ်ဢေႃႈ။-
ပေႃးသေၵေႃႉသေၵူၼ်းလွတ်ႈတၢင်းတၢႆလႄႈယင်းၵႄႇသႄႇလုၵ်ႈမၼ်းလၢင်းမၼ်းလႆႈသေယဝ်ႉ၊ဢွၵ်ႇမႃးၸူးတီႈသူၸိုင်၊သူတေလႆႈႁုႁၼ်တၢင်းဢၼ်ၶဝ်ၵမ်ၵျၢင်ႉႁၢႆႉယုတ်ႈထၼ်ႇႁိုဝ်ၼၼ်ႉယူႇသေယဝ်ႉ၊သူတေလႆႈတၢင်းဢၼ်သၢၵ်ႈသႃႇၵွပ်ႈပိူဝ်ႈသူႁုႁၼ်လွင်ႈတၢင်းဢၼ်ၵဝ်ပၼ်တၢမ်ႇဢပျတ်ႈတီႈဝဵင်း ယေႇရုသလႅမ်ႇ၊ ၼၼ်ႉပဵၼ်တြႃးဢၼ်သိုဝ်ႈသိုဝ်ႈၼၼ်ႉဢေႃႈ။-
ၼင်ႇၼၼ်လႄႈသူတၵ်းဢွၼ်ၵၼ်ႁုႁၼ်လွင်ႈဢၼ်ဝႃႈ၊ၵႃႈဢၼ်ၵဝ်ၸီႇယၢင်ႇၼၼ်ႉပဵၼ်ဢၼ်ထုၵ်ႇဢၼ်လီၵူႈၸိူဝ်ႉၵူႈပိူင်ၼၼ်ႉဢေႃႈ၊ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။ ၶိူဝ်းမၢၵ်ႇၸပိတ်ႉၼၼ်ႉတႅၵ်ႈၼိူင်းၵၼ်တင်းတူၼ်ႈမႆႉၸိင်လႆႈႁိုဝ်း။ ၵိင်ႇၶိူဝ်းမၢၵ်ႇၸပိတ်ႉၼၼ်ႉလီမျၢတ်ႈလိူဝ်တွၼ်းၼႃႇသေၼိူဝ်ႉမႆႉၸိင်လႆႈႁိုဝ်း။-
မႂ်းတၵ်းဢဝ်မႆႉၶိူဝ်းမၢၵ်ႇၸပိတ်ႉၼၼ်ႉႁဵတ်းဢွၵ်ႇၵႃႈသင်လႆႈ။ မႂ်းတၵ်းဢဝ်မၼ်းႁဵတ်းမႆႉသဵပ်ႇမႆႉႁၢဝ်းပုၼ်ႈဢၼ်တၵ်းႁွႆႈတၵ်းၶႅၼ်သေၸိူဝ်ႉသေပိူင်ႁိုဝ်း။-
လီႁႂ်ႈပဵၼ်ၽိုၼ်းပုၼ်ႈတၵ်းဢဝ်သႂ်ႇၽႆးမဵဝ်းလဵဝ်ၵူၺ်းဢေႃႈ။ ၽႆးမႆႈငဝ်ႈမၼ်းပၢႆမၼ်းယဝ်ႉလႄႈၵၢင်မၼ်းဢၼ်ၵိုတ်းၵျၢၼ်ႇၼၼ်ႉဢမ်ႇၸၢင်ႈဢဝ်ႁဵတ်းၵႃႈသင်လႆႈယဝ်ႉ။-
မၼ်းယင်းဢမ်ႇမီးဢၵျူဝ်းၼႃႇသေဢွၼ်တၢင်းၽႆးဢမ်ႇပႆႇမႆႈၼၼ်ႉဢေႃႈ။ တေႃႈလဵဝ်ၼႆႉၽႆးမႆႈလႄႈမၼ်းပဵၼ်ထၢၼ်ႇမီႈၵႂႃႇသေယဝ်ႉ၊ယဵင်ႈၶႅၼ်းဢမ်ႇပွင်ႇလွင်ႈၵႃႈသင်လႃးလႃးယဝ်ႉဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး မီးဢမိင်ႉၸမ်ႉ၊ “မိူၼ်ၸိူဝ်ႉၼင်ႇဢၼ်မႆႉၶိူဝ်းမၢၵ်ႇၸပိတ်ႉဢၼ်ဢဝ်ဢွၵ်ႇသေၵႃႈတီႈပႃႇမႆႉၸိင်မႃးႁႂ်ႈလႆႈပဵၼ်ပုၼ်ႈဢၼ်တၵ်းသႂ်ႇၽႆးသုမ်ၽႆးၼၼ်ႉတီႈၵူၼ်းဝဵင်း ယေႇရုသလႅမ်ႇ ၊ၵေႃႈၵဝ်တၵ်းႁႂ်ႈပဵၼ်ၸိူဝ်ႉၼင်ႇၼၼ်လႄႈ၊-
ၵဝ်တၵ်းဝၢႆႇၼႃႈပႅတ်ႈသေၵႃႈတီႈၶဝ်ဢေႃႈ။ ၶဝ်တၵ်းပၢႆႈလွတ်ႈၽႆးတီႈၼိုင်ႈယဝ်ႉသေၵေႃႈၽႆးတၢင်ႇတီႈသမ်ႉတၵ်းမႆႈၶဝ်ပႅတ်ႈဢေႃႈ။ မိူဝ်ႈဢၼ်ၵဝ်ၸီႇယၢင်ႇပၼ်တၢမ်ႇဢပျတ်ႈတီႈၶဝ်ၼၼ်ႉၸိုင်၊သူတၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး ဢေႃႈ။-
ၶဝ်ၼၼ်ႉဢမ်ႇပႂ်ႉသဵတ်ႈၸႃႇတေႃႇၵဝ်ယဝ်ႉ၊ပိူဝ်ႈၼႆလႄႈၵဝ်တၵ်းႁႂ်ႈမိူင်းၶဝ်သဵတ်ႇၵူၼ်းငႅဝ်ၵူၼ်းဢေႃႈ၊” ဝႃႈၼႆ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်ထႅင်ႈလႄႈဝႃႈ၊-
“လုၵ်ႈၵူၼ်း႟။ ႁဵတ်းႁႂ်ႈဝဵင်း ယေႇရုသလႅမ်ႇ၊ ႁုလွင်ႈတၢင်းဢၼ်လီႁင်ႈဢဵတ်ႇသဵတ်ႇတူဝ်ၸဝ်ႈၵဝ်ႇၸိူဝ်းၼၼ်ႉတႃႉ။-
မွၵ်ႇလၢတ်ႈတီႈဝဵင်း ယေႇရုသလႅမ်ႇ၊ လႄႈဝႃႈ၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉၸမ်ႉ၊ “တီႈဢၼ်မႂ်းၵိူတ်ႇလဵင်ႉလႄႈၽင်ႁူၵ်ႉၽင်ႁႄႇမႂ်းၼၼ်ႉပဵၼ်မိူင်း ၶႃႇၼၼ်ႇ၊ ဢေႃႈ။ ပေႃႈမႂ်းပဵၼ်ၵူၼ်း ဢႃႇမေႃးရိ၊ လႄႈမႄႈမႂ်းပဵၼ်မဵဝ်း ႁိတ်ႉတိ၊ ဢေႃႈ။-
လူၺ်ႈလွင်ႈဢၼ်မႂ်းၵိူတ်ႇလဵင်ႉၼၼ်ႉၸမ်ႉ၊ၼႂ်းဝၼ်းဢၼ်မႂ်းၵိူတ်ႇလဵင်ႉမႃးၼၼ်ႉၸိုင်၊ဢမ်ႇလႆႈၵႅတ်းသၢႆႁႄႇမႂ်း၊ဢမ်ႇလႆႈဢၢပ်ႇၼမ်ႉႁႂ်ႈမႂ်းမူတ်းသႂ်၊ဢမ်ႇလႆႈဢဝ်ၵိူဝ်တႃးပၼ်၊ဢမ်ႇလႆႈဢဝ်ၶူဝ်းလဵင်းပူၵ်ႉႁေႃႇပၼ်။-
ၽူႈလႂ်ဢမ်ႇမီးၸႂ်ဢဵတ်းလူႁႂ်ႈလႆႈလုမ်းလႃးၸိူဝ်ႉၼင်ႇၼၼ်တီႈမႂ်းသေၵေႃႉသေၵူၼ်း။ မိူဝ်ႈဢၼ်မႂ်းၵိူတ်ႇလဵင်ႉမႃးၼၼ်ႉၽူႈလႂ်ၵေႃႈဢမ်ႇႁၵ်ႉမႂ်းလႄႈမႂ်းလႆႈၶၢမ်ႇတၢင်းဢၼ်ပႅတ်ႈဝႆႉၵႃႈတီႈၼွၵ်ႈတီႈပၢင်ႇဢေႃႈ။
“မိူဝ်ႈၼၼ်ႉၵဝ်ပႆၵၢႆၵႂႃႇႁိမ်းမႂ်းလႄႈႁၼ်မႂ်းၵူဝ်ႈၵိူၵ်ႇလိူတ်ႈယူႇဢေႃႈ။ မႂ်းၵိင်ႈဢိူၵ်ႇယူႇၵႃႈၼႂ်းလိူတ်ႈမႂ်းဢေႃႈ။ ၵူၺ်းၵႃႈ၊ၵဝ်ဢမ်ႇႁႂ်ႈမႂ်းလႆႈတၢႆ။ ၵဝ်လၢတ်ႈတီႈမႂ်းလႄႈဝႃႈ၊ ‘ဢသၢၵ်ႈလိပ်းယူႇတႃႉ၊’ ဝႃႈၼႆဢေႃႈ။-
ၵဝ်ႁဵတ်းႁႂ်ႈမႂ်းယႂ်ႇသုင်မႃးမိူၼ်ၸိူဝ်ႉၼင်ႇတူၼ်ႈယိူဝ်ႈၼၼ်ႉလႄႈ၊မႂ်းၵေႃႈယႂ်ႇသုင်မႃးယဝ်ႉ၊ပဵၼ်သၢဝ်ဢွၼ်ႇဢၼ်ႁၢင်ႈလီႁၢင်ႈငၢမ်းမႃးယဝ်ႉ။ တဝ်ႈၼူမ်းမႂ်းသူတ်ႇၶိုၼ်ႈၵွင်ၶိုၼ်ႈလႄႈၶူၼ်ဢွၵ်ႇမႃးတီႈတူဝ်ၶိင်းမႂ်းဢေႃႈ။ ၵူၺ်းၵႃႈ၊မႂ်းဢမ်ႇမီးၶူဝ်းၼုင်ႈၶူဝ်းမႆလႄႈလႆႈယူႇတူဝ်ပူၺ်ယူႇဢေႃႈ။
“မိူဝ်ႈဢၼ်ၵဝ်သမ်ႉပႆၵၢႆၵႂႃႇထႅင်ႈၼၼ်ႉၸိုင်၊ၵဝ်လႆႈႁၼ်မႂ်းႁွတ်ႈထိုင်ပၢၼ်ဢၼ်ၸၢင်ႈႁၵ်ႉၵၼ်ပႅင်းၵၼ်လႆႈယဝ်ႉၼၼ်ႉဢေႃႈ။ ၵဝ်ဢဝ်သိူဝ်ႈယၢဝ်းၵဝ် ႁူမ်ႇသုမ်ႇပၼ်တူဝ်ၶိင်းမႂ်းသေယဝ်ႉ၊ႁဵတ်းၵတိသဵတ်ႈၸႃႇဢၼ်ႁၵ်ႉၵၼ်ပႅင်းၵၼ်တင်းမႂ်းဢေႃႈ။ ၸႂ်ႈတႄႉတႄႉယဝ်ႉ၊ၵဝ်ႁဵတ်းပတိၺိၺ်ႇဢၼ်သွင်ႇမၢင်ႇၵလႃႇလူၺ်ႈၵၼ်တင်းမႂ်းလႄႈမႂ်းပဵၼ်မေးၵဝ်ဢေႃႈ၊” ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး မီးဢမိင်ႉဢေႃႈ။
“မိူဝ်ႈၼၼ်ႉၵဝ်ဢဝ်မႂ်းဢၢပ်ႇၼမ်ႉလႄႈသုၵ်ႈပွတ်ႈလိူတ်ႈၵႃႈမီးဢၼ်ၵူဝ်ႈၵိူၵ်ႇမႂ်းယူႇၼၼ်ႉပႅတ်ႈသေယဝ်ႉ၊ဢဝ်ၼမ်ႉမၼ်းမၢၵ်ႇသၢၼ်ႇလုၼ်ႇတႃးပၼ်ၽိဝ်ၼင်မႂ်းဢေႃႈ။-
ၵဝ်ဢဝ်ၶူဝ်းၼုင်ႈဢၼ်တေႃးႁၢင်ႈၶိူင်ႈၼၼ်ႉၼုင်ႈပၼ်မႂ်းလႄႈဢဝ်သွၵ်းတိၼ်ၼင်မဵဝ်းဢၼ်လီလီၼၼ်ႉတိုဝ်းပၼ်မႂ်းဢေႃႈ။ ၵဝ်ဢဝ်ပိၵ်ႈၶျေႃးၶဵၼ်းပၼ်တူဝ်မႂ်းလႄႈဢဝ်ၶူဝ်းလၢႆႈၶူဝ်းၽႄးသုမ်ႇမႆပၼ်မႂ်းဢေႃႈ။-
ၵဝ်ဢဝ်ၶူဝ်းသႅင်ၶူဝ်းၶမ်းႁၢင်ႈၶိူင်ႈပၼ်မႂ်းလႄႈဢဝ်ဝႅၼ်တိုဝ်းပၼ်တီႈၶေႃႈမိုဝ်းမႂ်း၊ဢိၵ်ႇတင်းဢဝ်သွႆႈၶေႃးႁွႆႈပၼ်မႂ်းဢေႃႈ။-
ၵဝ်ဢဝ်သွႆႈၶူႈလင်လႂ်၊ပေႇႁူလႂ်၊သႂ်ႇပၼ်မႂ်းသေယဝ်ႉ၊ဢဝ်သရၽူႇဢၼ်ႁၢင်ႈလီႁၢင်ႈငၢမ်းတိုဝ်းပၼ်မႂ်းဢေႃႈ။-
ၼင်ႇၼၼ်လႄႈမႂ်းလႆႈႁၢင်ႈၶိူင်ႈငိုၼ်းၶိူင်ႈၶမ်းလႄႈၶူဝ်းၼုင်ႈတၢင်းမႆမႂ်းပဵၼ်ပိၵ်ႈၶျေႃး၊ပဵၼ်လၢႆႈပဵၼ်ၽႄး၊ပဵၼ်ၶူဝ်းၼုင်ႈဢၼ်တေႃးႁၢင်ႈၶိူင်ႈၼၼ်ႉယူႇလႄႈ၊လႆႈၵိၼ်ၶဝ်ႈမုၼ်းဢၼ်ဢဝ်ၽွင်ၶဝ်ႈၵျုင်ႇမဵဝ်းဢၼ်လီလီၼၼ်ႉႁဵတ်း၊လႆႈၵိၼ်ၼမ်ႉၽိုင်ႈ၊ၼမ်ႉမၼ်းမၢၵ်ႇသၢၼ်ႇလုၼ်ႇယဝ်ႉလႄႈတၢင်းႁၢင်ႈလီႁၢင်ႈငၢမ်းမႂ်းႁိူဝ်ႈႁိူင်းမႃးလႄႈၵိုင်ႇထိူၵ်ႈပဵၼ်ၼၢင်းႁေႃၶမ်းယဝ်ႉ။-
ၸိုဝ်ႈသဵင်မႂ်းႁူင်ႁၢင်းသႃႇၸွတ်ႇၵႂႃႇၵႃႈၼႂ်းၵူႈသိုင်ႇၵူႈမိူင်း ၵွပ်ႈပိူဝ်ႈဢၼ်မႂ်းႁၢင်ႈလီၽၢင်လီၼၼ်ႉဢေႃႈ။ လွင်ႈမၼ်းၸမ်ႉ၊ပဵၼ်ဢၼ်ၸေးၸုမ်ႇၵွပ်ႈပိူဝ်ႈသရေႇၵဝ်ဢၼ်ၵဝ်ဢဝ်ဢၢပ်ႈပၼ်တီႈမႂ်းၼၼ်ႉဢေႃႈ။
“ၼႂ်းဝႃႈၼၼ်သေၵေႃႈ မႂ်းၸႂ်ၽႅၼ်သုင်လူၺ်ႈႁၢင်ႈၽၢင်ဢၼ်ႁၢင်ႈလီႁၢင်ႈငၢမ်းမႂ်း၊ဢိၵ်ႇတင်းတၢင်းဢၼ်ၵုင်ႇသရေႇမႂ်းႁူင်ႁၢင်းၼၼ်ႉလႄႈႁဵတ်းမေႇထုင်ႇဢၼ်ဢမ်ႇတြႃးလူၺ်ႈၵၼ်တင်းၵူၼ်းၸၢႆးၸိူဝ်းဢၼ်ပႆၵၢႆၵႂႃႇႁိမ်းမႂ်းၼၼ်ႉဢေႃႈ။-
မႂ်းဢဝ်ၶူဝ်းၼုင်ႈမႂ်းၵမ်ႈၽွင်ႈႁၢင်ႈၶိူင်ႈထႃႇၼႃႉတီႈတၵ်းၵူဝ်းၵႂၢႆႇၼၼ်ႉသေယဝ်ႉ၊မႂ်းဢဝ်တူဝ်မႂ်းဢၢပ်ႈပၼ်တီႈၵူႈၵေႃႉၵူႈၵူၼ်းမိူၼ်ၸိူဝ်ႉၼင်ႇမႂ်းပဵၼ်မႄႈမွၵ်ႇယႃႈဢေႃႈ။ လွင်ႈၸိူဝ်းၼၼ်ႉဢမ်ႇတွၼ်ႉပဵၼ်သေပွၵ်ႈ ၵမ်းလိုၼ်းၵေႃႈတၵ်းဢမ်ႇလႆႈပဵၼ်ၸိူဝ်ႉၼင်ႇၼၼ်ထႅင်ႈ။-
မႂ်းဢဝ်ၶိူင်ႈၵႅဝ်ႈသႅင်ငိုၼ်းၶမ်းၸိူဝ်းဢၼ်ၵဝ်ပၼ်မႂ်းၼၼ်ႉႁဵတ်းႁုၼ်ႇႁၢင်ႈၵူၼ်းၸၢႆးသေယဝ်ႉ၊ၽိတ်းပိူင်ႈမေႇထုင်ႇဢၼ်ဢမ်ႇတြႃးလူၺ်ႈၵၼ်တင်းႁုၼ်ႇႁၢင်ႈၸိူဝ်းၼၼ်ႉဢေႃႈ။-
မႂ်းဢဝ်ၶူဝ်းၼုင်ႈဢၼ်တေႃးႁၢင်ႈၶိူင်ႈဢၼ်ၵဝ်ပၼ်မႂ်းၼၼ်ႉသုမ်ႇမႆပၼ်ႁုၼ်ႇႁၢင်ႈသၢင်းထုၸိူဝ်းၼၼ်ႉသေလႄႈဢဝ်ၼမ်ႉမၼ်းတင်းၼၢမ်ႇသႃႇဢၼ်ၵဝ်ပၼ်မႂ်းၼၼ်ႉသၢၵ်ႈလူႇတီႈၶဝ်ယဝ်ႉလူင်ပႄႇ။-
ၶဝ်ႈၼမ်ႉတၢင်းၵိၼ်ဢၼ်ဝႃႈ၊ၽွင်ၶဝ်ႈၵျုင်ႇဢၼ်လီ၊ၼမ်ႉမၼ်းတင်းၼမ်ႉၽိုင်ႈဢၼ်ၵဝ်လဵင်ႉမႂ်းၼၼ်ႉ၊မႂ်းဢဝ်သၢၵ်ႈလူႇႁႂ်ႈပဵၼ်ဢၢႆႁွမ်ဢၢႆႁူၺ်းယဝ်ႉလူင်ပႄႇ၊” ဝႃႈၼႆ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ။
“ၼွၵ်ႈသေၼၼ်ႉမႂ်းဢဝ်လုၵ်ႈၸၢႆးလုၵ်ႈယိင်းဢၼ်မႂ်းၵိူတ်ႇလဵင်ႉမႃးၵႃႈတီႈၵဝ်ၸိူဝ်းၼၼ်ႉသၢၵ်ႈလူႇတီႈႁုၼ်ႇႁၢင်ႈသၢင်းထုၸိူဝ်းၼၼ်ႉယဝ်ႉ။ တၢင်းဢၼ်မႂ်းၽိတ်းၵႃႇမေႇသုထၢၼ်ႇၼႆႉၼၼ်ႉဢမ်ႇပႆႇပျေႇၸႂ်မႂ်းလူးၵွၼ်ႇႁိုဝ်း။-
မႂ်းၶႃႈၽၼ်းလုၵ်ႈၵဝ်လၢင်းၵဝ်တၢႆသေလႄႈသၢၵ်ႈလူႇတီႈၶဝ်ယဝ်ႉလူင်ပႄႇ။-
ၼႂ်းၸူဝ်ႈဢၼ်မႂ်းႁဵတ်းဢၼ်ဝူၺ်ႇဢၼ်ႁင်ႈဢၼ်ဝႃႈ၊ပဵၼ်မႄႈမွၵ်ႇယႃႈယူႇၼႆႉမႂ်းတိုၼ်းတေဢမ်ႇၶုၵ်းၸႂ်လႆႈဢမ်ႇၶႆႈၸႂ်ထူပ်းမိုဝ်ႉဝၼ်းဢၼ်ဢသၢၵ်ႈမႂ်းယင်းလဵၵ်ႉလႄႈယူႇတူဝ်ပူၺ်ယူႇ၊ၵူဝ်ႈၵိူၵ်ႇလိူတ်ႈယူႇၼၼ်ႉလႃးလႃးလူင်ပႄႇ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉလႄႈဝႃႈ၊ “မႂ်းၼႆႉမီးဢႃႉမၢင်ႇၵလႃႇဢေႃႈ။ မီးဢႃႉမၢင်ႇၵလႃႇဢေႃႈ။ မႂ်းႁဵတ်းၵႃႈဢၼ်ပဵၼ်တုၸရိူၵ်ႈတင်းမူတ်းသေယဝ်ႉ၊-
မႂ်းတႄႇႁဵတ်းထႃႇၼႃႉတီႈဝႆႈႁုၼ်ႇႁၢင်ႈသၢင်းထုတင်းလၢႆၵႃႈႁိမ်းသဵၼ်ႈတၢင်းၵူႈသဵၼ်ႈလႄႈႁဵတ်းမႄႈမွၵ်ႇယႃႈဢေႃႈ။-
မႂ်းၼႆႉတႄႇႁဵတ်းၸၢၼ်းသုင်ၵႃႈတီႈပၢၵ်ႇတၢင်းႁူဝ်တၢင်းၵူႈတီႈလႄႈႁႂ်ႈတၢင်းဢၼ်ႁၢင်ႈလီႁၢင်ႈငၢမ်းမႂ်းပဵၼ်တီႈဢၼ်လီႁင်ႈဢဵတ်ႇသဵတ်ႇသေလႄႈဢဝ်တူဝ်မႂ်းဢၢပ်ႈပၼ်တီႈၶဝ်ၸိူဝ်းဢၼ်ပႆၵၢႆၵႂႃႇႁိမ်းမႂ်းၼၼ်ႉႁဵတ်းဢမုမႄႈမွၵ်ႇယႃႈၼမ်ၶိုၼ်ႈၵူႈဝၼ်းဢေႃႈ။-
မႂ်းႁႂ်ႈၵူၼ်း ဢေးၵျိပ်ႉ၊ ၵူၼ်းႁိူၼ်းဢၼ်ၸမ်ၵၼ်တင်းမႂ်းဢၼ်တဵမ်လူၺ်ႈတင်းၵိလေႇသႃႇၼၼ်ႉမႃးႁဵတ်းမေႇထုင်ႇဢၼ်ဢမ်ႇတြႃးလူၺ်ႈၵၼ်တင်းမႂ်းၼမ်ၼႃႇႁႂ်ႈလႆႈတိုၵ်းယူင်းတေႃးသႃႉတၢင်းၸႂ်မႆႈၶႂ်ႈၸႃႉၵဝ်ယဝ်ႉ။
“တေႃႈလဵဝ်ၼႆႉၵဝ်လႆႈဢဝ်မိုဝ်းၵဝ်ယဵတ်ႇၵႃႈၼိူဝ်မႂ်း၊ႁႂ်ႈလႆႈပၼ်တၢမ်ႇဢပျတ်ႈတီႈမႂ်း၊ဢိၵ်ႇတင်းႁႂ်ႈလႆႈယိုတ်းပႅတ်ႈတၢင်းလီမၢင်ႇၵလႃႇဢၼ်ပဵၼ်ပုၼ်ႈတႃႇမႂ်းၼၼ်ႉဢေႃႈ။ ၵဝ်ဢဝ်မႂ်းဢၢပ်ႈပၼ်ၵႃႈၼႂ်းမိုဝ်းၵူၼ်း ၽိလိတ်ႉတိ ၊ၸိူဝ်းဢၼ်ၸင်းမႂ်းလႄႈလီႁင်ႈဢဵတ်ႇသဵတ်ႇတၢင်းႁဵတ်းဢၼ်ဢမ်ႇတြႃးမႂ်းၼၼ်ႉဢေႃႈ။
“ၵွပ်ႈပိူဝ်ႈဢၼ်ၸႂ်ၵိလေႇသႃႇမႂ်းဢမ်ႇပျေႇၸႂ်လႆႈၼၼ်ႉမႂ်းယင်းလႅၼ်ႈၵႂႃႇၸွမ်းလႄႈၽိတ်းပိူင်ႈလူၺ်ႈၵၼ်တင်းၵူၼ်းမဵဝ်း ဢႃႇသီးရီးယႃး၊ ၶဝ်ဢေႃႈ။ မႂ်းၵႂႃႇပဵၼ်မႄႈမွၵ်ႇယႃႈတီႈၶဝ်သေၵေႃႈ မႂ်းဢမ်ႇပျေႇၸႂ်လႆႈ။-
မႂ်းသမ်ႉၵႂႃႇပဵၼ်မႄႈမွၵ်ႇယႃႈတီႈၵူၼ်းမိူင်း ပႃႇပုလုၼ်ႇ ၊ၸိူဝ်းဢၼ်ပဵၼ်ၸဝ်ႈၵုၼ်ႇၶူဝ်းသိၼ်ၼၼ်ႉသေၵေႃႈမႂ်းယင်းဢမ်ႇပျေႇၸႂ်လႆႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉလႄႈဝႃႈၸမ်ႉ၊ “မႂ်းၼႆႉႁဵတ်းမႄႈမွၵ်ႇယႃႈဢၼ်ဢမ်ႇမီးတၢင်းဢူၵ်းတၢင်းဢၢႆၸိူဝ်ႉၼင်ႇၼႆယဝ်ႉ။-
မႂ်းတႄႇႁဵတ်းထႃႇၼႃႉတီႈဝႆႈႁုၼ်ႇႁၢင်ႈသၢင်းထုတင်းလၢႆၵႃႈတီႈႁူဝ်တၢင်းပၢၵ်ႇတၢင်းၵူႈတီႈလႄႈႁဵတ်းမႄႈမွၵ်ႇယႃႈယဝ်ႉ။ တၢင်းႁဵတ်းမႂ်းၼႆႉဢမ်ႇမိူၼ်ၵၼ်တင်းမႄႈမွၵ်ႇယႃႈတၢင်ႇၵေႃႉတၢင်ႇၵူၼ်းတင်းလၢႆၵွပ်ႈပိူဝ်ႈမႂ်းဢမ်ႇဢဝ်ၵႃႈမၼ်းၶၼ်မၼ်းၼၼ်ႉယဝ်ႉ။-
မႂ်းမိူၼ်ၵၼ်တင်းမႄႈယိင်းဢၼ်လဵၼ်ႈၸုလူၺ်ႈၵၼ်တင်းၵူၼ်းၸၢႆးဢၼ်မႂ်းဢမ်ႇႁုၸၵ်းမၵ်ႉၵိုဝ်းၼၼ်ႉမႃးတၢင်တူဝ်ၽူဝ်မႂ်းယဝ်ႉလူင်ပႄႇ။-
မႄႈမွၵ်ႇယႃႈၸိုင်၊လႆႈၵႃႈလႆႈၶၼ်မၼ်းဢေႃႈ။ မႂ်းၸမ်ႉ၊ယင်းၸၢင်ႈပၼ်လၢၵ်ႈသွင်ႇတီႈၸုမႂ်းလႄႈၸၢင်ႈငႃဢဝ်ၶဝ်သေလႄႈႁႂ်ႈၶဝ်လုၵ်ႉသေၵူႈတီႈၵူႈလႅၼ်မႃးလႄႈႁဵတ်းမေႇထုင်ႇဢၼ်ဢမ်ႇတြႃးလူၺ်ႈၵၼ်တင်းမႂ်းလူင်ပႄႇ။-
မႂ်းၼႆႉပဵၼ်မႄႈမွၵ်ႇယႃႈဢၼ်ပႅၵ်ႇဢၼ်ပိူင်ႈဢေႃႈ။ ၽူႈလႂ်ဢမ်ႇတိုၵ်းယူင်းႁႂ်ႈမႂ်းႁဵတ်းမေႇထုင်ႇဢၼ်ဢမ်ႇတြႃးၼၼ်ႉသေၵေႃႉသေၵူၼ်း။ မႂ်းဢမ်ႇႁပ်ႉဢမ်ႇဢဝ်ၵႃႈမၼ်းၶၼ်မၼ်းလႄႈမႂ်းပၼ်ၵႃႈမၼ်းၶၼ်မၼ်းတီႈၶဝ်ဢေႃႈ။ ၸႂ်ႈတႄႉတႄႉယဝ်ႉ။ မႂ်းႁဵတ်းပႅၵ်ႇၵၼ်ပိူင်ႈၵၼ်တင်းမႄႈမွၵ်ႇယႃႈတၢင်ႇၵေႃႉတၢင်ႇၵူၼ်းၸိူဝ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ဝဵင်း ယေႇရုသလႅမ်ႇ၊ ႟။ မႂ်းလဵၼ်ႈၸုဢေႃႈ။ ၵွပ်ႈပိူဝ်ႈၼႆလႄႈထွမ်ႇဢဝ်ဢမိင်ႉ ထႃႇဝရႃႉၽြႃး၊ တႃႉ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဝႃႈၸမ်ႉ၊ “မႂ်းထွတ်ႇလွၼ်ႈၶူဝ်းၼုင်ႈမႂ်းႁဵတ်းမိူၼ်ၸိူဝ်ႉၼင်ႇမႄႈမွၵ်ႇယႃႈသေလႄႈဢဝ်တူဝ်ၶိင်းမႂ်းဢၢပ်ႈပၼ်တီႈၸုမႂ်းတင်းလၢႆ၊ဢိၵ်ႇတင်းႁုၼ်ႇႁၢင်ႈသၢင်းထုဢၼ်လီႁင်ႈဢဵတ်ႇသဵတ်ႇၵႃႈမီးၼၼ်ႉသေယဝ်ႉ၊မႂ်းဢဝ်လုၵ်ႈလၢင်းမႂ်းတင်းလၢႆႁဵတ်းၶိူင်ႈတၢင်းလူႇတီႈႁုၼ်ႇႁၢင်ႈသၢင်းထုၸိူဝ်းၼၼ်ႉလူင်ပႄႇ။-
ၵွပ်ႈပိူဝ်ႈလွင်ႈတၢင်းၼႆႉလႄႈၵဝ်ႁႂ်ႈၸုမႂ်းဢၼ်မႂ်းမူၼ်ႈပျေႃႇလူၺ်ႈၵၼ်တင်းၶဝ်ၵႃႈမီး၊ဢိၵ်ႇတင်းၶဝ်ၸိူဝ်းဢၼ်မႂ်းႁၵ်ႉမႂ်းပႅင်းၵႃႈမီး၊ဢိၵ်ႇတင်းၶဝ်ၸိူဝ်းဢၼ်မႂ်းၸင်းၵႃႈမီးၼၼ်ႉၸုတုမ်ၵၼ်ဢေႃႈ။ ၵဝ်တၵ်းဢဝ်ၶဝ်လွမ်ႉႁွပ်ႈမႂ်းသေယဝ်ႉ၊ထွတ်ႇလွၼ်ႈၶူဝ်းၼုင်ႈမႂ်းတင်းလၢႆလႄႈႁႂ်ႈၶဝ်လႆႈႁၼ်တၢင်းဢၼ်မႂ်းယူႇတူဝ်ပူၺ်ၼၼ်ႉဢေႃႈ။-
ၵဝ်တၵ်းၸီႇယၢင်ႇပၼ်တၢမ်ႇဢပျတ်ႈတီႈမႂ်းလူၺ်ႈတၢင်းဢၼ်မႂ်းလဵၼ်ႈၽူဝ်ၼွႆႉ၊ဢိၵ်ႇတင်းတၢင်းဢၼ်မႂ်းဢဝ်ဢသၢၵ်ႈၵူၼ်းတၢႆၼၼ်ႉလႄႈၵဝ်တၵ်းဢဝ်ႁႅင်းတေႃးသႃႉတၢင်းၸႂ်မႆႈၶႂ်ႈၸႃႉၵဝ်လႄႈၸီႇယၢင်ႇပၼ်တၢမ်ႇတၢႆတီႈမႂ်းဢေႃႈ။-
ၵဝ်တၵ်းဢဝ်မႂ်းဢၢပ်ႈပၼ်ၼႂ်းမိုဝ်းၶဝ်လႄႈၶဝ်တၵ်းဢွၼ်ၵၼ်ယႃႉၸၢၼ်းမႄႈမွၵ်ႇယႃႈမႂ်းပႅတ်ႈဢိၵ်ႇတင်းၵိူၼ်ႇယႃႉပႅတ်ႈထႃႇၼႃႉတီႈဢၼ်မႂ်းဝႆႈႁုၼ်ႇႁၢင်ႈသၢင်းထုတင်းလၢႆၼၼ်ႉဢေႃႈ။ ၶဝ်တၵ်းဢွၼ်ၵၼ်ႁိမ်ႁူင်ႇဢဝ်ၶူဝ်းၼုင်ႈမႂ်းတင်းလၢႆၶူဝ်းငိုၼ်းၶူဝ်းၶမ်းမႂ်းတင်းလၢႆသေယဝ်ႉ၊ပွႆႇႁႂ်ႈမႂ်းၵိုတ်းယူႇတူဝ်ပူၺ်ဢေႃႈ။
“ၶဝ်ၼၼ်ႉတၵ်းတိုၵ်းယူင်းမူႇၵူၼ်းၸိူဝ်းၵူၼ်းႁႂ်ႈၶဝ်ဢဝ်မၢၵ်ႇႁိၼ်ထိမ်ႈသႂ်ႇမႂ်းလႄႈဢဝ်လၢပ်ႇၶဝ်ၽၼ်းမႂ်းၶၢတ်ႇပဵၼ်ပွတ်းဢေႃႈ။-
ၶဝ်တၵ်းဢွၼ်ၵၼ်ဢဝ်ၽႆးတုတ်ႇႁိူၼ်းမႂ်းတင်းလၢႆလႄႈႁႂ်ႈၽုင်မူႇၽူႈယိင်းၼမ်ၼႃႇလႆႈႁၼ်ဢပျတ်ႈတၢမ်ႇမႂ်းဢေႃႈ။ ၵဝ်တၵ်းႁဵတ်းႁႂ်ႈမႂ်းၵိုတ်းသဝ်းသေတၢင်းဢၼ်မႂ်းႁဵတ်းမႄႈမွၵ်ႇယႃႈ၊ဢိၵ်ႇတင်းႁဵတ်းႁႂ်ႈမႂ်းၵိုတ်းသဝ်းသေတၢင်းဢၼ်ပၼ်လၢၵ်ႈသွင်ႇတီႈၸုမႂ်းတင်းလၢႆၼၼ်ႉဢေႃႈ။-
မိူဝ်ႈၼၼ်ႉတေႃးသႃႉၵဝ်တၵ်းပျေႇၵႂႃႇလႄႈတၢင်းၸႂ်မႆႈၶႂ်ႈၸႃႉၵဝ်တၵ်းထၢတ်ႇယဵၼ်ၵႂႃႇဢေႃႈ။ ၵဝ်တၵ်းယူႇၼိမ်ၼိမ်လီလီလႄႈဢမ်ႇၸႂ်မႆႈၶႂ်ႈၸႃႉမႂ်းထႅင်ႈ။-
မႂ်းၼႆႉလူင်လိုမ်းလွင်ႈတၢင်းဢၼ်ၵဝ်လုမ်းလႃးမႂ်းၼႂ်းမိုဝ်ႉဝၼ်းဢၼ်ဢသၢၵ်ႈမႂ်းယင်းလဵၵ်ႉယင်းဢွၼ်ႇၼၼ်ႉသေယဝ်ႉ၊ႁဵတ်းႁႂ်ႈၵဝ်ဢွၵ်ႇတေႃးသႃႉၸႂ်မႆႈၶႂ်ႈၸႃႉတီႈလွင်ႈတၢင်းဢၼ်မႂ်းႁဵတ်းမႃးတင်းသဵင်ႈတင်းလူင်ၼၼ်ႉယဝ်ႉ။ ၵွပ်ႈပိူဝ်ႈၸိူဝ်ႉၼင်ႇၼႆလႄႈၵဝ်ႁဵတ်းႁႂ်ႈမႂ်းလႆႈၶၢမ်ႇတႅၼ်းၶိုၼ်းပုၼ်ႈလွင်ႈတၢင်းဢၼ်မႂ်းႁဵတ်းတင်းသဵင်ႈၼၼ်ႉယဝ်ႉ။ ၵွပ်ႈပိူဝ်ႈသင်လႄႈမႂ်းဢဝ်ၸႂ်ၵိလေႇသႃႇထၢပ်ႈသႂ်ႇထႅင်ႈၵႃႈတီႈလွင်ႈတၢင်းဢၼ်လီႁင်ႈဢဵတ်ႇသဵတ်ႇၸိူဝ်းၼၼ်ႉသေလႄႈၵမ်ၵျၢင်ႉၸိူဝ်ႉၼင်ႇႁိုဝ်၊ၸဝ်ႈပူဝ်ႇပႃႇၵၢင်ႁၢဝ်၊ ၸဝ်ႈထႃႇဝရႃႉၽြႃး ၊မီးဢမိင်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ဝဵင်း ယေႇရုသလႅမ်ႇ၊ ႟။ ပိူၼ်ႈဢွၼ်ၵၼ်ဢဝ်တင်းထုင်းၵႂၢမ်းလၢတ်ႈၸၢပ်ႈမႂ်းလႄႈဝႃႈ၊ ‘လုၵ်ႈယိင်းပဵၼ်ၸိူဝ်ႉၼင်ႇမႄႈဢေႃႈ၊’ ဝႃႈၼင်ႇၼႆဢေႃႈ။-
မႂ်းပဵၼ်လုၵ်ႈယိင်းမႄႈမႂ်းဢၼ်ငိၼ်းၸင်းဢဵတ်ႇသဵတ်ႇၽူဝ်တူဝ်ၸဝ်ႈၵဝ်ႇဢိၵ်ႇတင်းလုၵ်ႈလၢင်းတူဝ်ၸဝ်ႈၵဝ်ႇၼၼ်ႉဢေႃႈ။ မႂ်းပဵၼ်မိူၼ်ပီႈၼၢင်းမႂ်းတင်းၼွင်ႉယိင်းမႂ်းတင်းလၢႆဢၼ်ၸင်းၽူဝ်ၶဝ်တင်းလုၵ်ႈၶဝ်လၢင်းၶဝ်တင်းလၢႆၼၼ်ႉဢေႃႈ။ မႄႈမႂ်းၼၼ်ႉပဵၼ်ၵူၼ်းမဵဝ်း ႁိတ်ႉတိ ၊လႄႈပေႃႈမႂ်းပဵၼ်ၵူၼ်းမဵဝ်း ဢႃႇမေႃးရိ၊ ဢေႃႈ။
“ပီႈၼၢင်းမႂ်းၼၼ်ႉပဵၼ်ဝဵင်း သမႃႇရိ၊ ဢၼ်မီးၽၢႆႇတၢင်းႁွင်ႇ၊ဢိၵ်ႇတင်းဝၢၼ်ႈမၼ်းတင်းလၢႆလႄႈၼွင်ႉယိင်းမႂ်းသမ်ႉပဵၼ်ဝဵင်း သေႃးတုမ်ႇ၊ တင်းဝၢၼ်ႈမၼ်းတင်းလၢႆဢၼ်မီးၽၢႆႇတၢင်းၸၢၼ်းၼၼ်ႉဢေႃႈ။-
မႂ်းႁဵတ်းၸွမ်းၼႄးလၢႆးၶဝ်၊ဢိၵ်ႇတင်းၵမ်ၵျၢင်ႉၸွမ်းတၢင်းဢၼ်လီႁင်ႈဢဵတ်ႇသဵတ်ႇၶဝ်ၼၼ်ႉၵူၺ်းဢမ်ႇၵႃး၊ၼႂ်းၸူဝ်ႈၵမ်းဢွၼ်ႇၼိုင်ႈၼၼ်ႉၵူၺ်းလႄႈမႂ်းယဵင်ႈၶႅၼ်းႁၢႆႉယုတ်ႈလိူဝ်တွၼ်းၼႃႇသေၶဝ်ၼႂ်းလွင်ႈတၢင်းဢၼ်မႂ်းႁဵတ်းၵူႈၸိူဝ်ႉၵူႈပိူင်ၼၼ်ႉယဝ်ႉ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉလႄႈဝႃႈၸမ်ႉ၊ “ၵႃႈၼင်ႇဢၼ်ၵဝ်ပဵၼ်ၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉ၊ၼွင်ႉယိင်းမႂ်းဝဵင်း သေႃးတုမ်ႇ၊ ဢိၵ်ႇတင်းဝၢၼ်ႈမၼ်းတင်းလၢႆ ယင်းဢမ်ႇတွၼ်ႉႁဵတ်းႁၢႆႉႁဵတ်းယုတ်ႈမဵဝ်းဢၼ်မႂ်းဢိၵ်ႇတင်းဝၢၼ်ႈမႂ်းတင်းလၢႆႁဵတ်းၼၼ်ႉ။-
ၼွင်ႉယိင်းမႂ်းတင်းလုၵ်ႈယိင်းမၼ်းတင်းလၢႆၼၼ်ႉမီးၸႂ်ဢၼ်ၽႅၼ်သုင်ၵွပ်ႈပိူဝ်ႈဢၼ်ၶဝ်ပျေႉၸုမ်ႇတဵမ်ဝႆႉတင်းတၢင်းၵိၼ်တၢင်းၶူပ်းလႄႈလႆႈယူႇၵတ်းယဵၼ်ၶျၢမ်းသႃႇၼိမ်ၼိမ်လီလီၼၼ်ႉဢေႃႈ။ ၵူၺ်းၵႃႈ၊ၶဝ်ၼၼ်ႉဢမ်ႇၵမ်ႉဢမ်ႇထွၵ်ႈၶဝ်ၸိူဝ်းဢၼ်ယၢၵ်ႈဢၼ်ၽၢၼ်၊ဢိၵ်ႇတင်းၶဝ်ၸိူဝ်းဢၼ်ၸုတ်ႈဢၼ်လုတ်ႈၼၼ်ႉလႄႈယူႇဢေႃႈ။-
ၶဝ်ၼၼ်ႉမႃႇၼႃႉပူၵ်းပႅၼ်ႁူဝ်ၶႅင်လႄႈႁဵတ်းမဵဝ်းဢၼ်ၵဝ်ၸင်းၼၼ်ႉယဝ်ႉလႄႈၵဝ်ပႄႇၽဵဝ်ႈၶဝ်ပႅတ်ႈၸွမ်းၵႃႈၼင်ႇဢၼ်သူလႆႈႁုႁၼ်ၼၼ်ႉယဝ်ႉ။
“ဝဵင်း သမႃႇရိ၊ ယင်းဢမ်ႇႁဵတ်းတုၸရိူၵ်ႈၸိူဝ်းဢၼ်မႂ်းႁဵတ်းၼၼ်ႉၶိုင်ႈၼိုင်ႈ။ မႂ်းၸမ်ႉ၊ႁဵတ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇၼမ်ၼႃႇလူင်လၢင်လိူဝ်တွၼ်းၼႃႇသေၶဝ်ႁဵတ်းၼၼ်ႉဢေႃႈ။ တၢင်းဢၼ်မႂ်းႁဵတ်းဢမ်ႇလီဢမ်ႇငၢမ်းၼၼ်ႉပေႃးတႅၵ်ႈၼိူင်းၵၼ်တင်းပီႈၼၢင်းမႂ်းၼွင်ႉယိင်းမႂ်းၸိူဝ်းၼၼ်ႉၸိုင်၊ၶဝ်ယင်းပဵၼ်ဢၼ်သိုဝ်ႈဢၼ်တေႃႇယဝ်ႉ။-
ပိူဝ်ႈၼႆလႄႈမႂ်းထုၵ်ႇလႆႈယိူၼ်ႉၸႂ်လႄႈၶၢမ်ႇဢဝ်တၢင်းဢၼ်လီဢူၵ်းလီဢၢႆၼၼ်ႉယဝ်ႉ။ တုၸရိူၵ်ႈမႂ်းၼၼ်ႉႁၢႆႉယုတ်ႈၼႃႇလူင်လၢင်လိူဝ်တွၼ်းၼႃႇသေၼွင်ႉယိင်းမႂ်းၸိူဝ်းၼၼ်ႉၶဝ်လႆႈပဵၼ်ၸိူဝ်ႉၼင်ႇဢၼ်ဢမ်ႇမီးဢပျတ်ႈမိူဝ်ႈဢၼ်တႅၵ်ႈၼိူင်းၵၼ်တင်းမႂ်းၼၼ်ႉယဝ်ႉ။ တေႃႈလဵဝ်ၼႆႉမႂ်းလႆႈသရေႇလုလႄႈလႆႈဢၢႆၵွပ်ႈပိူဝ်ႈဢၼ်မႂ်းႁဵတ်းႁႂ်ႈပီႈၼၢင်းမႂ်း၊ၼွင်ႉယိင်းမႂ်းပဵၼ်ၸိူဝ်ႉၼင်ႇၵေႃႉဢၼ်သိုဝ်ႈတေႃႇၼၼ်ႉယဝ်ႉ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉတီႈဝဵင်း ယေႇရုသလႅမ်ႇ လႄႈဝႃႈ၊ “ၵဝ်သမ်ႉတၵ်းႁႂ်ႈဝဵင်း သေႃးတုမ်ႇ၊ ဢိၵ်ႇတင်းဝၢၼ်ႈမၼ်းတင်းလၢႆ၊ဢိၵ်ႇတင်းဝဵင်း သမႃႇရိ ဢိၵ်ႇတင်းဝၢၼ်ႈမၼ်းတင်းလၢႆၶိုၼ်းလႆႈၶိုၼ်ႈယႂ်ႇမႂ်ႇသုင်ဢေႃႈ။ ၸႂ်ႈတႄႉတႄႉဢေႃႈ။ ၵဝ်သမ်ႉတၵ်းႁဵတ်းႁႂ်ႈမႂ်းလႆႈၶိုၼ်ႈယႂ်ႇမႂ်ႇသုင်ၼင်ႇၵဝ်ႇဢေႃႈ။-
မႂ်းတၵ်းလႆႈဢူၵ်းဢၢႆလူၺ်ႈလွင်ႈတၢင်းဢၼ်မႂ်းသရေႇလုၵွပ်ႈပိူဝ်ႈၵႃႈဢၼ်မႂ်းႁဵတ်းၼၼ်ႉႁႂ်ႈပီႈၼၢင်းဢိၵ်ႇတင်းၼွင်ႉယိင်းမႂ်းႁၼ်ဝႃႈ၊တူဝ်ၸဝ်ႈၵဝ်ႇၼၼ်ႉယင်းပဵၼ်ၵူၼ်းလီၵႃႈႁိုဝ်ၼၼ်ႉဢေႃႈ။-
ၶဝ်ၸိူဝ်းၼၼ်ႉတၵ်းဢွၼ်ၵၼ်ႁွတ်ႈထိုင်တၢင်းဢၼ်ၶိုၼ်ႈယႂ်ႇမႂ်ႇသုင်ၶိုၼ်းမႃးလႄႈ၊မႂ်းဢိၵ်ႇတင်းဝၢၼ်ႈမႂ်းတင်းလၢႆၵေႃႈတၵ်းၶိုၼ်ႈယႂ်ႇမႂ်ႇသုင်ၶိုၼ်းမႃးၼင်ႇၵဝ်ႇဢေႃႈ။-
မႂ်းယင်းယွၵ်ႇယဝ်ႈသႄႉသွမ်းလွင်ႈဝဵင်း သေႃးတုမ်ႇ ၊ၼႂ်းမိုဝ်ႉဝၼ်းဢၼ်မႂ်းယင်းတိုၵ်ႉမီးတၢင်းဢၼ်မႃႇၼႃႉပူၵ်းပႅၼ်ယူႇ၊-
ၸူဝ်ႈဢၼ်ဢပျတ်ႈတၢင်းဢၼ်ႁၢႆႉယုတ်ႈမႂ်းဢမ်ႇပႆႇထၢင်ႇသႃးၼၼ်ႉဢမ်ႇၸႂ်ႈႁိုဝ်း။ တေႃႈလဵဝ်ၼႆႉမႂ်းလႆႈပဵၼ်ၵေႃႉဢၼ်ၶၢမ်ႇတၢင်းဢၼ်သႄႉဢၼ်သွမ်းမိူၼ်ၸိူဝ်ႉၼင်ႇဝဵင်း သေႃးတုမ်ႇ၊ ၼၼ်ႉၵႃႈတီႈၵူၼ်းမဵဝ်း ဢေႇတုမ်ႇ၊ တင်းလၢႆ၊ၵူၼ်းမဵဝ်း ၽိလိတ်ႉတိ၊ တင်းလၢႆ၊ဢိၵ်ႇတင်းၵႃႈတီႈၶဝ်ၸိူဝ်းဢၼ်ယူႇႁိမ်းႁွမ်းလဵပ်ႈႁွပ်ႈမႂ်းလႄႈၸင်းမႂ်းၼၼ်ႉယဝ်ႉ။-
ပိူဝ်ႈၼႆလႄႈမႂ်းတၵ်းလႆႈၶၢမ်ႇတၢမ်ႇဢပျတ်ႈမႂ်း ၵွပ်ႈပိူဝ်ႈလွင်ႈတၢင်းဢၼ်လီႁင်ႈဢဵတ်ႇသဵတ်ႇမႂ်းၸိူဝ်းၼၼ်ႉဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉၸမ်ႉ၊ “ၵဝ်တၵ်းႁဵတ်းတီႈမႂ်းၸွမ်းၵႃႈၼင်ႇဢၼ်မႂ်းထိူၵ်ႈလႆႈၶၢမ်ႇၼၼ်ႉ၊ၵွပ်ႈပိူဝ်ႈဢၼ်မႂ်းပႄႇပႅတ်ႈၵတိသဵတ်ႈၸႃႇမႂ်းလႄႈယႃႉပႅတ်ႈပတိၺိၺ်ႇၼၼ်ႉဢေႃႈ။-
ၼႂ်းဝႃႈၼၼ်သေၵေႃႈ၊ၵဝ်တၵ်းႁဵတ်းၸွမ်းပတိၺိၺ်ႇဢၼ်ၵဝ်ႁဵတ်းလူၺ်ႈၵၼ်တင်းမႂ်းၼႂ်းမိူဝ်ႈဢၼ်မႂ်းယင်းလဵၵ်ႉယင်းၼုမ်ႇၼၼ်ႉသေလႄႈသမ်ႉႁဵတ်းပတိၺိၺ်ႇထႃႇဝရႃႉလူၺ်ႈၵၼ်တင်းမႂ်းဢေႃႈ။-
မိူဝ်ႈၼၼ်ႉမႂ်းတၵ်းၶုၵ်းၸႂ်လႆႈၶႆႈၸႂ်ထူပ်းတၢင်းဢၼ်မႂ်းႁဵတ်းသၢင်ႈၵျၢမ်ႇပွင်ၼၼ်ႉလႄႈဢူၵ်းဢၢႆၼႂ်းမိူဝ်ႈဢၼ်မႂ်းၶိုၼ်းလႆႈႁပ်ႉတုင်းဢဝ်ပီႈၼၢင်းမႂ်းတင်းလၢႆ၊ဢိၵ်ႇတင်းၼွင်ႉယိင်းမႂ်းၸိူဝ်းၼၼ်ႉဢေႃႈ။ ၵဝ်တၵ်းဢဝ်ၶဝ်ဢၢပ်ႈပၼ်တီႈမႂ်းၸိူဝ်ႉၼင်ႇဢၼ်ပဵၼ်လုၵ်ႈယိင်းမႂ်းဢေႃႈ။ ၵူၺ်းၵႃႈ၊တၵ်းဢၢပ်ႈပၼ်ၵွပ်ႈပိူဝ်ႈပတိၺိၺ်ႇၵဝ်ဢၼ်ႁဵတ်းဝႆႉလူၺ်ႈၵၼ်တင်းမႂ်းဢမ်ႇၸႂ်ႈ။-
ၵဝ်တၵ်းၶိုၼ်းမႄႈႁဵတ်းပတိၺိၺ်ႇဢၼ်မႂ်ႇလူၺ်ႈၵၼ်တင်းမႂ်း၊ႁႂ်ႈမႂ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး ၊ၼၼ်ႉဢေႃႈ။
“ၵဝ်တၵ်းပွႆႇလွတ်ႈလွင်ႈတၢင်းၵႃႈဢၼ်မႂ်းႁဵတ်းၽိတ်းပူၼ်ႉမႃးၸိူဝ်းၼၼ်ႉဢေႃႈ။ ၵူၺ်းၵႃႈ၊မႂ်းတၵ်းၶုၵ်းၸႂ်လႆႈၶႆႈၸႂ်ထူပ်းတၢင်းၽိတ်းၸိူဝ်းၼၼ်ႉတေႃႇထိုင်ႁွတ်ႈမႂ်းဢူၵ်းဢၢႆၼႃႇလူင်လၢင်ထၢၼ်ႈပေႃးဢမ်ႇပိုတ်ႇပၢၵ်ႇပိုတ်ႇသူပ်းမႂ်းထႅင်ႈဢေႃႈ၊” ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈၸမ်ႉ၊-
“မႂ်းဢဝ်တင်းၵႂၢမ်းသိူင်ႇၵႂၢမ်းဢမ်သေယဝ်ႉ၊လၢတ်ႈတီႈၵူၼ်းမဵဝ်း ဢိသရေး၊ လႄႈဝႃႈ၊-
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊မီးၼူၵ်ႉၶၢင်ႇလေႃႉလူင်ဢၼ်ၶူၼ်မၼ်းႁၢင်ႈလီႁၢင်ႈငၢမ်းလႄႈမီးဢရွင်ႇလၢႆၸိူဝ်ႉလၢႆမဵဝ်း၊မီးပိၵ်ႇဢၼ်ယႂ်ႇဢၼ်ယၢဝ်းၼႃႇၵီႈဝႆႉၵႂၢင်ႈၼႃႇဢေႃႈ။ မၼ်းမိၼ်ၵႂႃႇၸူးတီႈလွႆ လေႇပၼုၼ်ႇ၊ လႄႈၵၢပ်ႈဢဝ်ယွတ်ႈမႆႉဢႃႇရိတ်ႉသေယဝ်ႉ၊-
မၼ်းၵၢပ်ႈယွတ်ႈမႆႉတီႈဢၼ်သုင်သေပိူၼ်ႈၼၼ်ႉသေလႄႈဢဝ်ၵႂႃႇၸူးတီႈမိူင်းဢၼ်ၵႃႉဢၼ်ၶၢႆၼၼ်ႉသေယဝ်ႉ၊ဢဝ်ဝၢင်းဝႆႉၵႃႈၼႂ်းဝဵင်းၸဝ်ႈၵုၼ်ႇၸဝ်ႈသိၼ်ဢေႃႈ။-
မၼ်းသမ်ႉဢဝ်ၸိူဝ်ႉၽၼ်းမႆႉမိူင်း ဢိသရေး၊ ၵႂႃႇဝၢၼ်ႇဝႆႉၽုၵ်ႇဝႆႉၵႃႈတီႈဢၼ်ၶွၼ်ႇၼမ်ႉမၼ်းလိၼ်လီတီႈဢၼ်မီးၼမ်ႉလိူင်ႇၼၼ်ႉမိူၼ်ၸိူဝ်ႉၼင်ႇဢၼ်ၽုၵ်ႇတူၼ်ႈမႆႉၶႆႉၼၼ်ႉဢေႃႈ။-
မၼ်းပူင်ႇၽိူဝ်လႄႈပဵၼ်တူၼ်ႈၶိူဝ်းမၢၵ်ႇၸပိတ်ႉတူၼ်ႈတႅမ်ႇ၊တူၼ်ႈဢႅၵ်းလႄႈတူၼ်ႈၶိူဝ်းမၼ်းယၢဝ်းၽႄၵႂၢင်ႈၼႃႇၼၼ်ႉဢေႃႈ။ ၵိင်ႇမၼ်းၶႃႈမၼ်းတင်းလၢႆၶိုၼ်ႈၸူးတီႈၼူၵ်ႉၶၢင်ႇလေႃႉလႄႈႁၢၵ်ႈမၼ်းယၼ်ႇလူင်းလိုၵ်ႉလိုၵ်ႉဢေႃႈ။ တူၼ်ႈၶိူဝ်းမၢၵ်ႇၸပိတ်ႉၼၼ်ႉတႅၵ်ႇၵိင်ႇတႅၵ်ႇၶႃႈလႄႈယွတ်ႈမၼ်းၽိူဝ်မၼ်းႁူမ်ႇသုမ်ႇဝႆႉဢေႃႈ။
“ယင်းမီးၼူၵ်ႉၶၢင်ႇလေႃႉလူင်ဢၼ်မီးပိၵ်ႇဢၼ်ယႂ်ႇၼႃႇလႄႈၶူၼ်မၼ်းၼႃတၼ်ၼႃႇၼၼ်ႉထႅင်ႈတူဝ်ၼိုင်ႈ၊သမ်ႉမီးတူၼ်ႈၶိူဝ်းမၢၵ်ႇၸပိတ်ႉဢၼ်ဢဝ်ႁၢၵ်ႈမၼ်းၶူတ်းငေႃးၵႂႃႇၸူးတီႈၼူၵ်ႉၶၢင်ႇလေႃႉၼၼ်ႉလႄႈသမ်ႉဢဝ်ၵိင်ႇၶႃႈမၼ်းသႄႇၸူးတီႈၼူၵ်ႉသေယဝ်ႉ၊ႁႂ်ႈၼူၵ်ႉၼၼ်ႉႁူတ်းၼမ်ႉပၼ်ၵႃႈၼႂ်းသူၼ်တီႈဢၼ်မၼ်းၽုၵ်ႇဝႆႉၼၼ်ႉဢေႃႈ။-
တူၼ်ႈၶိူဝ်းမၢၵ်ႇၸပိတ်ႉၼၼ်ႉသမ်ႉလႆႈၶၢမ်ႇတၢင်းဢၼ်ၶၢႆႉၵႂႃႇၽုၵ်ႇဝႆႉၵႃႈတီႈဢၼ်ၶွၼ်ႇၼမ်ႉမၼ်းလိၼ်လီ၊တီႈဢၼ်မီးၼမ်ႉလိူင်ႇၼႃႇၼၼ်ႉယဝ်ႉ၊ႁႂ်ႈမၼ်းတႅၵ်ႇၵိင်ႇတႅၵ်ႈၶႃႈယူႇ၊ဢွၵ်ႇမၢၵ်ႇယူႇသေလႄႈပဵၼ်တူၼ်ႈၶိူဝ်းမၢၵ်ႇၸပိတ်ႉဢၼ်လီဢၼ်ငၢမ်းယူႇၼၼ်ႉဢေႃႈ။
“ပိူဝ်ႈၼႆလႄႈၵဝ်၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ထၢမ်လႄႈဝႃႈၸမ်ႉ၊တူၼ်ႈၼၼ်ႉတၵ်းလႆႈလီလႆႈပဵၼ်ႁိုဝ်း။ ၼူၵ်ႉၶၢင်ႇလေႃႉတူဝ်ဢွၼ်တၢင်းၼၼ်ႉတၵ်းထူၺ်ႈႁၢၵ်ႈမၼ်းဢွၵ်ႇပႅတ်ႈ၊ဝိတ်းဢဝ်မၢၵ်ႇမၼ်းပႅတ်ႈ၊ႁၵ်းၵိင်ႇမၼ်းၶႃႈမၼ်းပႅတ်ႈ၊ႁႂ်ႈမၼ်းႁဵဝ်ႇႁႅင်ႈၵႂႃႇဢမ်ႇၸႂ်ႈႁိုဝ်း။ ယင်းဢမ်ႇလူဝ်ႇဢဝ်မႃႇဢဝ်ႁႅင်း၊ဢမ်ႇလူဝ်ႇဢဝ်မူႇၵူၼ်းၽုင်ၵူၼ်းဢၼ်မီးဢႃႇၼႃႇ ႁႂ်ႈလႆႈထူၺ်ႈဢွၵ်ႇပႃးႁၢၵ်ႈမၼ်းပႅတ်ႈၼၼ်ႉဢေႃႈ။-
ၸႂ်ႈတႄႉတႄႉယဝ်ႉ။ မီးတၢင်းဢၼ်ၽုၵ်ႇသွမ်ႈယူႇယဝ်ႉ။ ၵူၺ်းၵႃႈ၊မၼ်းတၵ်းလႆႈလီလႆႈပဵၼ်ယူႇႁိုဝ်း။ ယၢမ်းမိူဝ်ႈဢၼ်လူမ်းတၢင်းဝၼ်းဢွၵ်ႇထူဝ်းပတ်ႉသႂ်ႇမၼ်းၼၼ်ႉၸိုင်၊မၼ်းတၵ်းႁဵဝ်ႇတၵ်းၸွပ်ႈၵႂႃႇဢမ်ႇၸႂ်ႈႁိုဝ်း။ မၼ်းတၵ်းႁဵဝ်ႇတၵ်းၸွပ်ႈၵႂႃႇၵႃႈၼိူဝ်တီႈလိၼ်ဢၼ်ၽုၵ်ႇမၼ်းဝႆႉၼၼ်ႉဢေႃႈ၊ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈၸမ်ႉ၊-
“မႂ်းထၢမ်တီႈၵူၼ်းဢၼ်ၸၢင်ႈလုၵ်ႉၽိုၼ်ႉၸိူဝ်းၼၼ်ႉလႄႈဝႃႈ၊ ‘သူႁုလွင်ႈဢၼ်ၵႂၢမ်းၼႆႉၶႂ်ႈဝႃႈၸိူဝ်ႉၼင်ႇႁိုဝ်ၼၼ်ႉႁိုဝ်း၊’ ဝႃႈၼႆလႄႈ၊သမ်ႉမွၵ်ႇလၢတ်ႈၶဝ်လႄႈဝႃႈ၊ ‘ၶုၼ်ႁေႃၶမ်းမိူင်း ပႃႇပုလုၼ်ႇ၊ မႃးၵႃႈတီႈဝဵင်း ယေႇရုသလႅမ်ႇ ၊လႄႈသိမ်းဢဝ်ၶုၼ်ႁေႃၶမ်း၊ဢိၵ်ႇတင်းမူးမၢတ်ႈၽွင်းမိူင်းမၼ်းတင်းလၢႆၵႂႃႇၵႃႈတီႈမိူင်း ပႃႇပုလုၼ်ႇ၊ ယဝ်ႉ။-
မၼ်းဢဝ်ၵႃႈၼႂ်းၸိူဝ်ႉၸဝ်ႈၶိူဝ်းၶုၼ်ၵေႃႉၼိုင်ႈႁဵတ်းပတိၺိၺ်ႇလူၺ်ႈၵၼ်တင်းမၼ်းသေလႄႈႁႂ်ႈမၼ်းတိူင်ႇဝႃႈသဵတ်ႈၸႃႇၵတိသေယဝ်ႉ၊သိမ်းဢဝ်ၵူၼ်းဝၢၼ်ႈၵူၼ်းမိူင်းဢၼ်မီးၸိုဝ်ႈမီးသဵင်တင်းလၢႆၵႂႃႇ၊-
ႁႂ်ႈသိုင်ႇၸိုင်ႈဝၢၼ်ႈမိူင်းသုတ်ႉယွမ်းၵႂႃႇထၢၼ်ႈပေႃးဢမ်ႇၶိုၼ်းလုၵ်ႉလႆႈ ၵူၺ်းၵႃႈ၊တၢင်းဢၼ်ပႂ်ႉၵတိသဵတ်ႈၸႃႇၸဝ်ႈၼၼ်ႉတႄႇမၼ်ႈယူႇဢေႃႈ။-
ၵူၺ်းၵႃႈ၊ၶုၼ်ႁေႃၶမ်းမိူင်း ယုတႃႉ၊ ၼၼ်ႉလုၵ်ႉၽိုၼ်ႉလႄႈပွႆႇၸႂ်ႉတမၢၼ်ႇတင်းလၢႆၵႂႃႇၵႃႈတီႈမိူင်း ဢေးၵျိပ်ႉ၊ ႁႂ်ႈလႆႈယွၼ်းဢဝ်မႃႉတင်းလၢႆ၊ဢိၵ်ႇတင်းတပ်ႉသိုၵ်းလူင်ဢေႃႈ။ မၼ်းၼၼ်ႉတၵ်းပႄႉၼႅင်ႇလႆႈႁိုဝ်း။ တၵ်းလွတ်ႈၽေးလႆႈႁိုဝ်း။ မၼ်းဢမ်ႇၸၢင်ႈၽွၵ်ႈသဵတ်ႈၸႃႇလႄႈလွတ်ႈၽေးတၢမ်ႇလႆႈၵူၺ်း၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵႃႈၼင်ႇဢၼ်ၵဝ်ပဵၼ်ၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉ၊ၶုၼ်ႁေႃၶမ်းၼၼ်ႉတၵ်းလႆႈတၢႆၵႃႈၼႂ်းမိူင်း ပႃႇပုလုၼ်ႇ၊ ၵွပ်ႈပိူဝ်ႈမၼ်းယႃႉပတိၺိၺ်ႇဢၼ်မၼ်းႁဵတ်းလူၺ်ႈၵၼ်တင်းၶုၼ်ႁေႃၶမ်းမိူင်း ပႃႇပုလုၼ်ႇ ၊ဢၼ်ၶၢၼ်းမၼ်းဝႆႉၵႃႈၼႂ်းဢရႃႇၶုၼ်ႁေႃၶမ်းၼၼ်ႉဢေႃႈ။-
ပိၵ်ႉသမ်ႉတပ်ႉသိုၵ်းၶုၼ်ႁေႃၶမ်းမိူင်း ဢေးၵျိပ်ႉ၊ ဢၼ်ႁႅင်းယႂ်ႇၼႃႇလူင်လၢင်ၼၼ်ႉမႃးသေၵေႃႈဢမ်ႇၸွႆႈဢမ်ႇထႅမ်ဝဵင်း ယေႇရုသလႅမ်ႇ၊ ၼႂ်းမိူဝ်ႈဢၼ်ၵူၼ်းမဵဝ်း ပႃႇပုလုၼ်ႇ၊ ၶဝ်ၵေႃႇတႅၼ်လိၼ်ဢၼ်ယႂ်ႇသုင်ၼႃႇလွမ်ႉႁွပ်ႈဝဵင်းဝႆႉႁႂ်ႈလႆႈဢဝ်ၵူၼ်းၼမ်ၼႃႇတၢႆပႅတ်ႈၼၼ်ႉဢေႃႈ။-
မၼ်းၼၼ်ႉယႃႉပႅတ်ႈပတိၺိၺ်ႇဢၼ်မၼ်းႁဵတ်းၼၼ်ႉယဝ်ႉ။ မၼ်းႁဵတ်းလွင်ႈတၢင်းၵႃႈမီးၸိူဝ်းၼႆႉယဝ်ႉလႄႈမၼ်းတေဢမ်ႇလႆႈၵၢင်းလႆႈလွတ်ႈၽေးဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉၸမ်ႉ၊ “ၸွမ်းၼင်ႇဢၼ်ၵဝ်ပဵၼ်ၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉၵဝ်တၵ်းၸီႇယၢင်ႇတၢမ်ႇဢပျတ်ႈတီႈမၼ်းၵွပ်ႈပိူဝ်ႈဢၼ်မၼ်းယႃႉပႅတ်ႈပတိၺိၺ်ႇဢၼ်မၼ်းတိူင်ႇဝႃႈ၊ၵႃႈၼႂ်းၼႃႇမႃႉၸိုဝ်ႈသဵင်ၵဝ်ၼၼ်ႉဢေႃႈ။-
ၵဝ်တၵ်းၵီႈၽႄႇၼႅင်ႈၵဝ်ၶႄၵဝ်ႁူမ်ႇသုမ်ႇမၼ်းလႄႈတိဢဝ်မၼ်းဢေႃႈ။ ၵဝ်တၵ်းဢဝ်မၼ်းမိူဝ်းၵႂႃႇၸူးတီႈမိူင်း ပႃႇပုလုၼ်ႇ၊ လႄႈၸီႇယၢင်ႇပၼ်တၢမ်ႇဢပျတ်ႈမၼ်းၵႃႈတီႈၼၼ်ႈၵွပ်ႈပိူဝ်ႈဢၼ်မၼ်းဢမ်ႇပႂ်ႉသဵတ်ႈၸႃႇတေႃႇၵဝ်ၼၼ်ႉဢေႃႈ။-
ႁူဝ်ႁၢၼ်ၵူၼ်းသိုၵ်းမၼ်းဢၼ်လီဢၼ်ငၢမ်းၸိူဝ်းၼၼ်ႉ တၵ်းဢွၼ်ၵၼ်တၢႆပႅတ်ႈၵႃႈၼႂ်းၼႃႈသိုၵ်းသေယဝ်ႉ၊ၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇၼၼ်ႉတၵ်းလႆႈၶၢမ်ႇတၢင်းဢၼ်ဢဝ်ၸၢတ်ႇပိုၼ်ပႅတ်ႈၵူႈၽၢႆႇၵူႈပႃႈဢေႃႈ။ မိူဝ်ႈၼၼ်ႉသူတၵ်းႁုလွင်ႈဢၼ်ၵဝ် ထႃႇဝရႃႉၽြႃး ၊မီးဢမိင်ႉဝႆႉၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉၸမ်ႉ၊ “ၵဝ်တၵ်းဢဝ်ယွတ်ႈမႆႉၵႃႈတီႈတူၼ်ႈဢႃႇရိတ်ႉဢၼ်သုင်ၼၼ်ႉလႄႈ ဝိတ်းဢဝ်ယွတ်ႈဢၼ်ၼုမ်ႇလီၵႃႈတီႈပၢႆယွတ်ႈမၼ်းတင်းလၢႆသေယဝ်ႉ၊ ၵဝ်တၵ်းဢဝ်ၽုၵ်ႇဝႆႉၵႃႈၼိူဝ်လွႆဢၼ်သုင်ၼႃႇလူင်လၢင်ၼၼ်ႉဢေႃႈ။
ၵႃႈၼိူဝ်လွႆသုင်သေပိူၼ်ႈၵႃႈၼႂ်းမိူင်း ဢိသရေး၊ ၼၼ်ႉ မၼ်းတၵ်းတႅၵ်ႇၵိင်ႇတႅၵ်ႇၶႃႈလႄႈမၢၵ်ႇမၢၵ်ႇမႃးသေယဝ်ႉ၊ ပဵၼ်တူၼ်ႈဢႃႇရိတ်ႉဢၼ်လီဢၼ်ငၢမ်းဢေႃႈ။ မဵဝ်းၼူၵ်ႉတင်းသဵင်ႈတင်းလူင်တၵ်းဢွၼ်ၵၼ်ယူႇသဝ်းၵႃႈၼႂ်းမၼ်း တၵ်းဢွၼ်ၵၼ်သွၼ်ႈႁူမ်ႈသွၼ်ႈၽူၺ်းမၼ်းဢေႃႈ။
တူၼ်ႈမႆႉၵႃႈမီးၵႃႈၼႂ်းမိူင်းၼၼ်ႉတၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ။ ၵဝ်ပွမ်ႈတူၼ်ႈမႆႉဢၼ်သုင်တင်းလၢႆႁႂ်ႈတႅမ်ႇလႄႈသမ်ႉႁဵတ်းႁႂ်ႈတူၼ်ႈမႆႉဢၼ်တႅမ်ႇၼၼ်ႉသုင်ၶိုၼ်ႈဢေႃႈ။ ႁႂ်ႈတူၼ်ႈမႆႉဢၼ်ၶဵဝ်ၼၼ်ႉႁဵဝ်ႇႁႅင်ႈၵႂႃႇသေယဝ်ႉ၊ဢဝ်တူၼ်ႈဢၼ်ႁဵဝ်ႇႁႅင်ႈၼၼ်ႉႁႂ်ႈၶဵဝ် လီမႃးဢေႃႈ။ ၵဝ် ထႃႇဝရႃႉၽြႃး၊ မီးဢမိင်ႉယဝ်ႉ၊ၵဝ်တၵ်းႁဵတ်းၸွမ်းၵႃႈၼင်ႇဢၼ်ၵဝ်မီးဢမိင်ႉဝႆႉၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈၸမ်ႉ၊-
“ထုင်းၵႂၢမ်းဢၼ်ၵူၼ်းၵႃႈၼႂ်းမိူင်း ဢိသရေး ၊တင်းလၢႆၵႆႉလၢတ်ႈဝႃႈ၊ “‘ပေႃႈမႄႈၵိၼ်မၢၵ်ႇၸပိတ်ႉဢၼ်သူမ်ႈလႄႈ လုၵ်ႈလၢင်းတင်းလၢႆပဵၼ်ၶဵဝ်ႈမူၺ်ႈၶဵဝ်ႈၵႅၼ်း၊’ ဝႃႈၼင်ႇၼႆၼၼ်ႉပွင်ႇဢထိၵ်ႈပႄႇဝႃႈၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉၸမ်ႉ၊ “ၵႃႈၼင်ႇဢၼ်ၵဝ်ပဵၼ်ၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉ၊ၵမ်းလိုၼ်းသူတၵ်းဢမ်ႇလႆႈလၢတ်ႈထုင်းၵႂၢမ်းၼႆႉထႅင်ႈၵႃႈၼႂ်းမိူင်း ဢိသရေး။-
ဢသၢၵ်ႈဝိၺိၺ်ႇၵူၼ်းၵူႈၵေႃႉမီးၼႂ်းမိုဝ်းၵဝ်ဢေႃႈ။ ၵဝ်ဢုပ်ႉပိူင်ႇဢသၢၵ်ႈပေႃႈမႄႈဢိၵ်ႇတင်းဢသၢၵ်ႈလုၵ်ႈလၢင်းဢေႃႈ။ ၵေႃႉဢၼ်ႁဵတ်းဢပျတ်ႈမႅၼ်ႈၼၼ်ႉတၵ်းလႆႈတၢႆဢေႃႈ။
“ပေႃးမီးၵူၼ်းၵေႃႉၼိုင်ႈမီးသၽေႃးဢၼ်သိုဝ်ႈလီလႄႈၵမ်ၵျၢင်ႉၸွမ်းၼင်ႇတြႃးယူႇ၊-
ဢမ်ႇဝႆႈသႃႁုၼ်ႇႁၢင်ႈသၢင်းထုဢၼ်ၵူၼ်းမဵဝ်း ဢိသရေး ၊ၶဝ်ၵူဝ်းၵႂၢႆႇလႄႈဢမ်ႇၵိၼ်ၶိူင်ႈတၢင်းလူႇဢၼ်သၢၵ်ႈလူႇတီႈၶဵင်ႇတၢင်းလူႇဢၼ်ႁၢမ်ႈဝႆႉၼၼ်ႉ၊ဢမ်ႇၽိတ်းပိူင်ႈမေးပိူၼ်ႈ၊ဢမ်ႇၼွၼ်းလူၺ်ႈမႄႈယိင်းဢၼ်မီးလိူတ်ႈႁူဝ်လိူၼ်မႃး၊-
ဢမ်ႇပႅတ်ႉၵိၼ်လႅၼ်ၵိၼ်ၽူႈလႂ်၊ယင်းၸၢင်ႈၶိုၼ်းတႅၼ်းၼီႈတႅၼ်းၶွတ်ႇဢၼ်ပွင်ႇဢၼ်တၢင်ဝႆႉ၊မၼ်းၸၢင်ႈလဵင်ႉလူၵေႃႉဢၼ်ဢိုပ်းဢၼ်ယၢၵ်ႈ၊ၸၢင်ႈဢဝ်ၶူဝ်းၼုင်ႈမႆပၼ်တီႈၵေႃႉဢၼ်ယူႇတူဝ်ပူၺ်ယူႇ၊-
ယင်းဢမ်ႇဢဝ်ၶီႈဢဝ်ႁၢင်မၼ်းလႄႈမၼ်းၸၢင်ႈပၼ်ၵူႈပၼ်ယိမ်ငိုၼ်းယူႇ၊ၸၢင်ႈဝႄႈပႅတ်ႈတၢင်းၵမ်တၢင်းၵျၢင်ႉဢၼ်ႁၢႆႉဢၼ်ယုတ်ႈ၊ၸၢင်ႈတႅပ်းတတ်းၸွမ်းၼင်ႇတြႃးပုၼ်ႈၶဝ်ၸိူဝ်းဢၼ်ၽိတ်းဢၼ်မေႃးၵၼ်ၼၼ်ႉၸိုင်၊-
ၵေႃႉၸိူဝ်ႉၼင်ႇၼၼ်ၼၼ်ႉပဵၼ်ၵေႃႉဢၼ်ထွမ်ႇဢဝ်ပိင်းၺၢပ်ႈၵဝ်လႄႈပႂ်ႉၵမ်ပႂ်ႉၸွမ်းထုင်းတြႃးၵဝ်တင်းလၢႆဢေႃႈ။ မၼ်းပဵၼ်ၵေႃႉဢၼ်သိုဝ်ႈတေႃႇလႄႈတၵ်းလႆႈဢသၢၵ်ႈလိပ်းဢမၢၼ်ႇၶၼ်ပဵၼ်ဢေႃႈ၊” ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉဢေႃႈ။
“ပေႃးၵေႃႉၼၼ်ႉမီးလုၵ်ႈၸၢႆးဢၼ်ပဵၼ်ၸူၼ်ဢၼ်ၸၢင်ႈဢဝ်ဢသၢၵ်ႈၵူၼ်းတၢႆလႄႈပဵၼ်ၵေႃႉဢၼ်ႁဵတ်းလွင်ႈတၢင်းၸိူဝ်းၼၼ်ႉၵူႈၸိူဝ်ႉၵူႈပိူင်၊-
မဵဝ်းဢၼ်ပေႃႈမၼ်းဢမ်ႇႁဵတ်းဢၼ်ဝႃႈ၊တၢင်းဢၼ်ၵိၼ်ၶိူင်ႈတၢင်းလူႇဢၼ်သၢၵ်ႈလူႇတီႈၶဵင်ႇတၢင်းလူႇဢၼ်ႁၢမ်ႈဝႆႉလႂ်၊ၽိတ်းပိူင်ႈမေးပိူၼ်ႈလႂ်၊-
ပႅတ်ႉၵိၼ်လႅၼ်ၵိၼ်ၵူၼ်းယၢၵ်ႈၵူၼ်းၽၢၼ်လႂ်၊ၸူၼ်ပိူၼ်ႈလႂ်၊ဢမ်ႇၶိုၼ်းပၼ်ဢုၵ်ႉၸႃႇဢၼ်ပိူၼ်ႈပွင်ႇဝႆႉတၢင်ဝႆႉၼၼ်ႉလႂ်၊ၵႂႃႇၸူးတီႈဢၼ်သုင်ၵူၼ်းၼွၵ်ႈသႃႇသၼႃႇသေလႄႈဝႆႈသႃႁုၼ်ႇႁၢင်ႈသၢင်းထုဢၼ်လီႁင်ႈဢဵတ်ႇသဵတ်ႇလႂ်၊-
ၸၢင်ႈပၼ်ၵူႈယိမ်ငိုၼ်းလႄႈၵိၼ်ၶီႈၵိၼ်ႁၢင်မၼ်းလႂ်ယူႇၸိုင်၊ၵေႃႉၼၼ်ႉဢသၢၵ်ႈမၼ်းတၵ်းတေလႆႈလိပ်းႁိုဝ်း။ မၼ်းဢမ်ႇလႆႈဢသၢၵ်ႈလိပ်းလႃးလႃး။ ၵွပ်ႈပိူဝ်ႈဢၼ်မၼ်းႁဵတ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇၵႃႈမီးၸိူဝ်းၼႆႉၼၼ်ႉလႄႈမၼ်းတၵ်းလႆႈတၢႆဢမၢၼ်ႇၶၼ်ပဵၼ်ဢေႃႈ။ မၼ်းတၵ်းလႆႈၶၢမ်ႇတၢင်းဢၼ်ၸီႇယၢင်ႇတၢမ်ႇတၢႆၵွပ်ႈပိူဝ်ႈဢပျတ်ႈတူဝ်ၸဝ်ႈၵဝ်ႇဢေႃႈ။
“ပေႃးၵေႃႉတီႈသွင်ၼႆႉသမ်ႉမီးလုၵ်ႈၸၢႆးဢၼ်ၸၢင်ႈႁၼ်တုၸရိူၵ်ႈဢၼ်ပေႃႈမၼ်းႁဵတ်းၼၼ်ႉလႄႈၶႆႈၸႂ်ဝူၼ်ႉၸႂ်သေယဝ်ႉ၊ဢမ်ႇႁဵတ်းလွင်ႈတၢင်းၸိူဝ်းၼၼ်ႉ၊-
ဢၼ်ဝႃႈဢမ်ႇဝႆႈသႃႁုၼ်ႇႁၢင်ႈသၢင်းထုဢၼ်ၵူၼ်းမဵဝ်း ဢိသရေး၊ ၶဝ်ၵူဝ်းၵႂၢႆႇ၊ဢမ်ႇၵိၼ်ၶိူင်ႈတၢင်းလူႇဢၼ်သၢၵ်ႈလူႇတီႈၶဵင်ႇတၢင်းလူႇဢၼ်ႁၢမ်ႈဝႆႉ၊ဢမ်ႇၽိတ်းပိူင်ႈမေးပိူၼ်ႈ၊-
ဢမ်ႇတဵၵ်းငႅၼ်းၵႅၼ်ႉၶေႃးၽူႈလႂ်၊ဢမ်ႇၸူၼ်ဢဝ်ၶွင်ပိူၼ်ႈ၊ၸၢင်ႈၶိုၼ်းပၼ်ၼီႈၶွတ်ႇဢၼ်ပွင်ႇဢၼ်တၢင်ဝႆႉ၊ၸၢင်ႈလဵင်ႉလူၵေႃႉဢၼ်ဢိုပ်းယၢၵ်ႈ၊ၸၢင်ႈပၼ်ၶူဝ်းၼုင်ႈတီႈၵေႃႉဢၼ်ယူႇတူဝ်ပူၺ်၊-
ၸၢင်ႈဝႄႈပႅတ်ႈတၢင်းဢၼ်ၵမ်ၵျၢင်ႉဢၼ်ႁၢႆႉယုတ်ႈလႄႈယင်းဢမ်ႇဢဝ်ၶီႈဢဝ်ႁၢင်လႄႈၸၢင်ႈၵူႈၸၢင်ႈယိမ်ငိုၼ်းပၼ်၊ၸၢင်ႈပႂ်ႉၵမ်ပႂ်ႉၵျၢင်ႉၸွမ်းထုင်းတြႃးၵဝ်တင်းလၢႆလႄႈထွမ်ႇဢဝ်ပိင်းၺၢပ်ႈၵဝ်တင်းလၢႆယူႇၼၼ်ႉၸိုင်၊မၼ်းဢမ်ႇလႆႈတၢႆၵွပ်ႈပိူဝ်ႈဢပျတ်ႈပေႃႈမၼ်းၼၼ်ႉ။ မၼ်းတၵ်းလႆႈဢသၢၵ်ႈလိပ်းယူႇဢမၢၼ်ႇၶၼ်ပဵၼ်ဢေႃႈ။-
ပေႃႈမၼ်းၼၼ်ႉၸမ်ႉ၊ၵွပ်ႈပိူဝ်ႈဢၼ်ပႅတ်ႉလႅၼ်ၵိၼ်ပိူၼ်ႈ၊ၸူၼ်ပိူၼ်ႈလႄႈႁဵတ်းလွင်ႈတၢင်းဢၼ်ႁၢႆႉဢၼ်ယုတ်ႈတီႈပိူၼ်ႈတၢင်ႇၵေႃႉယူႇသေႇသေႇၼၼ်ႉလႄႈမၼ်းတၵ်းလႆႈၶၢမ်ႇတၢႆၵွပ်ႈပိူဝ်ႈဢပျတ်ႈမၼ်းၼၼ်ႉဢေႃႈ။
“ၵူၺ်းၵႃႈ၊သူယင်းဢွၼ်ၵၼ်ထၢမ်လႄႈဝႃႈ၊ ‘ႁဵတ်းသင်လႄႈလုၵ်ႈၸၢႆးဢမ်ႇလႆႈၶၢမ်ႇၵွပ်ႈပိူဝ်ႈဢပျတ်ႈပေႃႈမၼ်းၼၼ်ႉၸိူဝ်ႉၼင်ႇႁိုဝ်၊’ ဝႃႈၼႆဢေႃႈ။ ၵႂၢမ်းတွပ်ႇမၼ်းၸမ်ႉ၊လုၵ်ႈၸၢႆးႁဵတ်းလွင်ႈတၢင်းဢၼ်ၸွမ်းၼင်ႇတြႃး၊လွင်ႈတၢင်းဢၼ်ၸိုဝ်ႈဢၼ်ၸႂ်ႈလႄႈၵမ်ၵျၢင်ႉထုင်းၽိင်ႈတြႃးၵဝ်ၵႃႈမီးယူႇ၊ပႂ်ႉၸွမ်းတြႃးၸိူဝ်းၼၼ်ႉလီလီငၢမ်းငၢမ်းယူႇလႄႈမၼ်းတၵ်းလႆႈဢသၢၵ်ႈလိပ်းဢမၢၼ်ႇၶၼ်ပဵၼ်ဢေႃႈ။-
ၵေႃႉဢၼ်ႁဵတ်းၽိတ်းဢပျတ်ႈၼၼ်ႉတၵ်းလႆႈၶၢမ်ႇတၢႆဢေႃႈ။ လုၵ်ႈၸၢႆးဢမ်ႇလႆႈၶၢမ်ႇဢပျတ်ႈပေႃႈ၊ပေႃႈဢမ်ႇလႆႈၶၢမ်ႇဢပျတ်ႈလုၵ်ႈၸၢႆး။ ၵူၼ်းလီၵူၼ်းငၢမ်းတၵ်းလႆႈၶၢမ်ႇဢဝ်ဢၵျူဝ်းဢၼ်မၼ်းႁဵတ်းဢၼ်လီဢၼ်ငၢမ်းၼၼ်ႉလႄႈၵူၼ်းႁၢႆႉၵူၼ်းယုတ်ႈတၵ်းလႆႈၶၢမ်ႇဢဝ်ဢပျတ်ႈဢၼ်မၼ်းႁဵတ်းဢၼ်ႁၢႆႉဢၼ်ယုတ်ႈၼၼ်ႉဢေႃႈ။
“ၼႂ်းဝႃႈၼၼ်သေၵေႃႈ၊ပေႃးၵူၼ်းႁၢႆႉၵူၼ်းယုတ်ႈၼၼ်ႉဝႄႈပႅတ်ႈတုၸရိူၵ်ႈသေလႄႈပႂ်ႉၵမ်ပႂ်ႉၸွမ်းထုင်းၽိင်ႈတြႃးၵဝ်ၵႃႈမီးသေယဝ်ႉ၊ႁဵတ်းလွင်ႈတၢင်းဢၼ်သိုဝ်ႈတေႃႇတၢင်းဢၼ်လီဢၼ်ငၢမ်းၸိုင်၊မၼ်းဢမ်ႇလႆႈတၢႆ၊တၵ်းလႆႈဢသၢၵ်ႈလိပ်းဢမၢၼ်ႇၶၼ်ပဵၼ်ဢေႃႈ။-
ၵဝ်တၵ်းပွႆႇလွတ်ႈဢပျတ်ႈၵႃႈဢၼ်မၼ်းႁဵတ်းမႅၼ်ႈၸိူဝ်းၼၼ်ႉသေယဝ်ႉ၊မၼ်းတၵ်းဢသၢၵ်ႈလိပ်းယူႇၵွပ်ႈပိူဝ်ႈလွင်ႈတၢင်းဢၼ်မၼ်းႁဵတ်းလီႁဵတ်းငၢမ်းၼၼ်ႉဢေႃႈ။-
‘သူထၢင်ႇၵဝ်မီးၸႂ်ဢၼ်ၸူမ်းသိူဝ်းလူၺ်ႈတၢင်းဢၼ်ၵဝ်ႁၼ်ၵူၼ်းႁၢႆႉၵူၼ်းယုတ်ႈတၢႆၼၼ်ႉႁိုဝ်း၊’ ဝႃႈၼႆ၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ထၢမ်ဢေႃႈ။ ဢမ်ႇၸႂ်ႈၸိူဝ်ႉၼင်ႇၼၼ်၊ၵဝ်ယဵင်ႈၶႅၼ်းၶႂ်ႈႁၼ်မၼ်းၶုၵ်းၸႂ်လႆႈမႆႈၸႂ်ဢပျတ်ႈလႄႈဢသၢၵ်ႈလိပ်းယူႇၼၼ်ႉဢေႃႈ။
“ၵူၺ်းၵႃႈ၊ပေႃးၵူၼ်းသိုဝ်ႈတေႃႇဝႄႈပႅတ်ႈသုၸရိူၵ်ႈလႄႈႁဵတ်းတုၸရိူၵ်ႈဢၼ်လီႁင်ႈဢဵတ်ႇသဵတ်ႇမဵဝ်းဢၼ်ၵူၼ်းႁၢႆႉၵူၼ်းယုတ်ႈၶဝ်ႁဵတ်းၼၼ်ႉၸိုင်၊မၼ်းတၵ်းလႆႈဢသၢၵ်ႈလိပ်းယူႇၶိူဝ်းၶိူဝ်းႁိုဝ်း။ ဢမ်ႇၸႂ်ႈၸိူဝ်ႉၼင်ႇၼၼ်၊တၵ်းဢမ်ႇလႆႈမၢတ်ႈတွင်းတၢင်းလီဢၼ်မၼ်းႁဵတ်းမႃးယဝ်ႉၸိူဝ်းၼၼ်ႉလႃးလႃး။ မၼ်းတၵ်းလႆႈၶၢမ်ႇတၢႆၵွပ်ႈပိူဝ်ႈမၼ်းဢမ်ႇပႂ်ႉသဵတ်ႈၸႃႇ၊ဢိၵ်ႇတင်းလႆႈၶၢမ်ႇတၢႆၵွပ်ႈပိူဝ်ႈဢပျတ်ႈမၼ်းၼၼ်ႉဢေႃႈ။
“ၵူၺ်းၵႃႈ၊သူဢွၼ်ၵၼ်လၢတ်ႈလႄႈဝႃႈ၊ ‘တၢင်းဢၼ် ထႃႇဝရႃႉၽြႃး၊ ၸီႇယၢင်ႇၼၼ်ႉဢမ်ႇသိုဝ်ႈဢမ်ႇၽဵင်ႇပဵင်းလီ၊’ ဝႃႈၼႆဢေႃႈ။ ၵူၼ်းမဵဝ်း ဢိသရေး၊ ႟။ ထွမ်ႇငိၼ်းတႃႉ။ သူထၢင်ႇလွင်ႈတၢင်းဢၼ်ၵဝ်ၸီႇယၢင်ႇၶိုင်ပွင်ၼႆႉဢမ်ႇသိုဝ်ႈဢမ်ႇၽဵင်ႇပဵင်းလီႁိုဝ်း။ သဵၼ်ႈတၢင်းသူၼၼ်ႉပဵၼ်ဢၼ်ၵူတ်ႉဢၼ်ငွၵ်းဢမ်ႇၸႂ်ႈႁိုဝ်း။-
ပေႃးၵေႃႉဢၼ်သိုဝ်ႈတေႃႇၼၼ်ႉဝႄႈပႅတ်ႈသုၸရိူၵ်ႈလႄႈတႄႇႁဵတ်းတုၸရိူၵ်ႈၸိုင်၊မၼ်းတၵ်းလႆႈတၢႆဢေႃႈ။ မၼ်းတၵ်းလႆႈတၢႆၵွပ်ႈပိူဝ်ႈတၢင်းႁဵတ်းမၼ်းႁၢႆႉယုတ်ႈၼၼ်ႉဢေႃႈ။-
ပေႃးၵူၼ်းႁၢႆႉၵူၼ်းယုတ်ႈဝႄႈပႅတ်ႈတုၸရိူၵ်ႈလႄႈႁဵတ်းသုၸရိူၵ်ႈၸိုင်၊မၼ်းၵႄႇသႄႇဢဝ်ဢသၢၵ်ႈမၼ်းယဝ်ႉ။-
ၵွပ်ႈပိူဝ်ႈဢၼ်မၼ်းႁုၸၵ်းတၢင်းၽိတ်းတူဝ်ၸဝ်ႈၵဝ်ႇလႄႈဝႄႈပႅတ်ႈတုၸရိူၵ်ႈၼၼ်ႉမၼ်းဢမ်ႇလႆႈတၢႆ၊တၵ်းလႆႈဢသၢၵ်ႈလိပ်းဢမၢၼ်ႇၶၼ်ပဵၼ်ဢေႃႈ။-
ၼႂ်းဝႃႈၼၼ်သေၵေႃႈ၊ၵူၼ်းမဵဝ်း ဢိသရေး၊ သူယင်းဢွၼ်ၵၼ်လၢတ်ႈလႄႈဝႃႈ၊ ‘တၢင်းဢၼ် ထႃႇဝရႃႉၽြႃး၊ ၸီႇယၢင်ႇၼၼ်ႉဢမ်ႇသိုဝ်ႈလီဢမ်ႇၽဵင်ႇပဵင်းလီ၊’ ဝႃႈၼႆလူင်ပႄႇ။ သူထၢင်ႇလွင်ႈတၢင်းဢၼ်ၵဝ်ၸီႇယၢင်ႇၶိုင်ပွင်ၼႆႉဢမ်ႇသိုဝ်ႈလီဢမ်ႇၽဵင်ႇပဵင်းႁိုဝ်း။ သဵၼ်ႈတၢင်းသူၼၼ်ႉၸၢင်ႈပဵၼ်ဢၼ်ၵူတ်ႉဢၼ်ငွၵ်းဢမ်ႇၸႂ်ႈႁိုဝ်း။
“ပိူဝ်ႈဢၼ်ပဵၼ်ၸိူဝ်ႉၼင်ႇၼႆလႄႈ၊ၵူၼ်းမဵဝ်း ဢိသရေး၊ ႟။ ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊တၵ်းၸီႇယၢင်ႇသူ ၸွမ်းလူၺ်ႈတၢင်းႁဵတ်းသူႁင်းၽႂ်ႁင်းမၼ်းၼၼ်ႉဢေႃႈ၊ဝႃႈၼင်ႇၼႆလႄႈ ထႃႇဝရႃႉၽြႃး ၊မီးဢမိင်ႉဢေႃႈ။ သူဢွၼ်ၵၼ်ဝၢႆႇပႅတ်ႈသေတၢင်းဢၼ်ႁဵတ်းႁၢႆႉႁဵတ်းယုတ်ႈၵႃႈမီးလႄႈယႃႇပေပၼ်ဢၶႂၢင်ႉႁႂ်ႈဢပျတ်ႈလႆႈယႃႉသူလုလႅဝ်။-
ၸုၼ်ႉပႅတ်ႈတၢင်းဢၼ်ႁဵတ်းႁၢႆႉႁဵတ်းယုတ်ႈၵႃႈမီးသေလႄႈပွင်ႁဵတ်းပွင်မႄးႁူဝ်ၸႂ်ဢၼ်မႂ်ႇ၊ၸႂ်သၽေႃးဢၼ်မႂ်ႇတႃႉ။ ၵူၼ်းမဵဝ်း ဢိသရေး၊ ႟။ ၵွပ်ႈသင်လႄႈသူမီးဢလူဝ်ႇၶႂ်ႈၶၢမ်ႇတၢႆၸိူဝ်ႉၼင်ႇႁိုဝ်။-
ၵဝ်ဢမ်ႇမီးဢလူဝ်ႇၶႂ်ႈႁႂ်ႈသူလႆႈတၢႆသေၵေႃႉသေၵူၼ်း။ ပိူဝ်ႈၼႆလႄႈဢွၼ်ၵၼ်ဝၢႆႇပႅတ်ႈသေၵႃႈတီႈတုၸရိူၵ်ႈလႄႈဢသၢၵ်ႈလိပ်းယူႇတႃႉ၊” ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉဢေႃႈ။
ၽြႃးပဵၼ်ၸဝ်ႈၸႂ်ႉႁႂ်ႈၵဝ်ႁဵတ်းလိၵ်ႈႁဵတ်းၵႂၢမ်းပုၵ်ႈဢၼ်မႆႈၸႂ်ၶီၸႂ်ပုၼ်ႈၸိူဝ်ႉၸဝ်ႈၶိူဝ်းၶုၼ်တင်းလၢႆၼႂ်းၵူၼ်းမဵဝ်း ဢိသရေး၊ လႄႈဝႃႈၸမ်ႉ၊
“မႄႈမႂ်းၸိုင်ပဵၼ်ၽူႈလႂ်။ ပဵၼ်သၢင်ႇသီႈမႄႈဢေႃႈ။ မၼ်းမူပ်ႇၼွၼ်းယူႇၵႃႈၼႂ်းၵႄႈသၢင်ႇသီႈၼုမ်ႇတင်းလၢႆလႄႈလဵင်ႉလူလုမ်းလႃးလုၵ်ႈလၢင်းမၼ်းယူႇဢေႃႈ။
ၼႂ်းလုၵ်ႈလၢင်းမၼ်းၸိူဝ်းၼၼ်ႉမၼ်းလဵင်ႉလူလုမ်းလႃးတူဝ်ၼိုင်ႈလႄႈတူဝ်ၼၼ်ႉၵေႃႈပဵၼ်သၢင်ႇသီႈၼုမ်ႇမႃး၊ သွၼ်ဢဝ်ႁႂ်ႈမေႃတိဢဝ်တူဝ်သတ်းတင်းလၢႆသေယဝ်ႉ၊ပဵၼ်သၢင်ႇသီႈဢၼ်ၸၢင်ႈၵိၼ်ၶူပ်းၵူၼ်းဢေႃႈ။
ၸိူဝ်ႉၶိူဝ်းမဵဝ်းၵူၼ်းတင်းလၢႆငိၼ်းလွင်ႈမၼ်းလႄႈပိူၼ်ႈၵၢင်ဢဝ်မၼ်းၵႃႈၼႂ်းၶုမ်လိၼ်ႁူးလိၼ်သေယဝ်ႉ၊ ဢဝ်ၶေႃလဵၵ်းၵဵဝ်ႇတူဝ်မၼ်းလႄႈလၢၵ်ႈၵႂႃႇၵႃႈတီႈမိူင်း ဢေးၵျိပ်ႉ၊ ပုၼ်ႉဢေႃႈ။
မႄႈမၼ်းပႂ်ႉထႃႈယူႇတေႃႇထိုင်ႁွတ်ႈဢမ်ႇမီးတီႈမုင်ႈမွင်းလႃးလႃးယဝ်ႉလႄႈ မၼ်းသမ်ႉလဵင်ႉလူလုမ်းလႃးလုၵ်ႈမၼ်းတၢင်ႇတူဝ်ႁႂ်ႈယႂ်ႇမႃးသုင်မႃးလႄႈပဵၼ်သၢင်ႇသီႈၼုမ်ႇထႅင်ႈတူဝ်ၼိုင်ႈဢေႃႈ။
မိူဝ်ႈဢၼ်မၼ်းထူၼ်ႈၵႄႇယဝ်ႉၼၼ်ႉၸိုင်၊မၼ်းၵႂႃႇမႃးလူၺ်ႈၵၼ်တင်းသၢင်ႇသီႈ တင်းလၢႆယူႇဢေႃႈ။ မၼ်းၵေႃႈလႆႈသွၼ်ဢဝ်ႁႂ်ႈမေႃတိဢဝ်တူဝ်သတ်းတင်းလၢႆသေယဝ်ႉ၊မၼ်းပဵၼ်သၢင်ႇသီႈဢၼ်ၸၢင်ႈၵိၼ်ၵူၼ်းမႃးဢေႃႈ။
မၼ်းၵိူၼ်ႇယႃႉပႅတ်ႈတိူၵ်ႈတီႈတိုၵ်းသိုၵ်းတင်းလၢႆယႃႉပႅတ်ႈဝဵင်းတင်းလၢႆလႄႈ ၼႂ်းမိူဝ်ႈဢၼ်မၼ်းႁွင်ႉသႅၼ်ႇၵူႈပွၵ်ႈၼၼ်ႉၵူၼ်းမိူင်းမီးတၢင်းဢၼ်ၵူဝ်ႁႄလႄႈ သဵတ်ႇယဵၼ်ၵႂႃႇဢေႃႈ။
မိူဝ်ႈၼၼ်ႉ၊ၸိူဝ်ႉၶိူဝ်းမဵဝ်းၵူၼ်းတင်းလၢႆၸုတုမ်ၵၼ်မႃးတိုၵ်းတေႃးမၼ်းဢေႃႈ။ ၶဝ်ဢွၼ်ၵၼ်လုၵ်ႉသေၵႃႈတီႈၵူႈဢိူင်ႇၵူႈဝၢၼ်ႈမႃးလႄႈဢဝ်ၼႅင်ႈၶဝ်ၶႄၶဝ်ၵီႈၽႄႇသေလႄႈ၊မၼ်းလႆႈၶၢမ်ႇတၢင်းဢၼ်တိဢဝ်ၵႃႈၼႂ်းဢၼ်ၶဝ်ၵၢင်ဝႆႉၼၼ်ႉဢေႃႈ။
ၶဝ်ဢဝ်မၼ်းသႂ်ႇၵႃႈၼႂ်းတိူၵ်ႈသေလႄႈဢဝ်ၵႂႃႇၸူးတီႈၶုၼ်ႁေႃၶမ်းမိူင်း ပႃႇပုလုၼ်ႇ ၊ပုၼ်ႉဢေႃႈ။ ပိူၼ်ႈဢွၼ်ၵၼ်ဢဝ်မၼ်းၶင်ဝႆႉၵႃႈၼႂ်းၶွၵ်ႈဢၼ်မၼ်ႈၶိူင်ႇဢမ်ႇႁႂ်ႈလႆႈငိၼ်းသဵင်ႁွင်ႉမၼ်းထႅင်ႈၵႃႈၼိူဝ်လွႆၼိူဝ်ၵုင်းမိူင်း ဢိသရေး ဢေႃႈ။
မႄႈမၼ်းၼၼ်ႉပဵၼ်ၸိူဝ်ႉၼင်ႇတူၼ်ႈၶိူဝ်းမၢၵ်ႇၸပိတ်ႉဢၼ်ၽုၵ်ႇၵႃႈႁိမ်းၼမ်ႉၵႄးၼၼ်ႉလႄႈ ၵွပ်ႈပိူဝ်ႈဢၼ်ၼမ်ႉလိူင်ႇလီၼႃႇၼၼ်ႉမၼ်းၸၢင်ႈမၢၵ်ႇမၢၵ်ႇၼမ်ၼႃႇ၊ဢိၵ်ႇတင်းၵိင်ႇၶႃႈမၼ်းတဵမ်ဝႆႉဢေႃႈ။
ၵိင်ႇမၼ်းၶႃႈမၼ်းဢၼ်ၵႅၼ်ႇၶႅင်သေပိူၼ်ႈၼၼ်ႉလႆႈပဵၼ်ၵၼ်းႁွၵ်ႇရႃႇၸႃႉပုၼ်ႈၸဝ်ႈပုၼ်ႈၶုၼ်ၸိူဝ်းၼၼ်ႉဢေႃႈ။ တူၼ်ႈၶိူဝ်းမၢၵ်ႇၸပိတ်ႉၼၼ်ႉယႂ်ႇသုင်ၶိုၼ်ႈထိုင်ၽႃႉထိုင်မွၵ်ႇလႄႈ ၵူၼ်းတင်းလၢႆလႆႈႁၼ်မႂ်မၼ်းၽိူဝ်မၼ်းပူင်ႇၵႃႈႁိုဝ်ဢိၵ်ႇတင်းမၼ်းယႂ်ႇသုင်မႃးၵႃႈႁိုဝ်ၼၼ်ႉဢေႃႈ။
ၵူၺ်းၵႃႈ၊မၼ်းလႆႈၶၢမ်ႇတၢင်းဢၼ်ထူၺ်ႈထွၼ်ပႅတ်ႈၵွပ်ႈပိူဝ်ႈဢၢႆႁႅင်းတေႃးသႃႉလႄႈလူမ်ႉတူၵ်းပႅတ်ႈၵႃႈၼိူဝ်လိၼ်ဢေႃႈ။ လူမ်းတၢင်းဢွၵ်ႇထူဝ်းပတ်ႉသႂ်ႇႁႂ်ႈမၢၵ်ႇမၼ်းႁဵဝ်ႇႁႅင်ႈၵႂႃႇဢေႃႈ။ ၵိင်ႇမၼ်းၶႃႈမၼ်းဢၼ်ၵႅၼ်ႇၶႅင်ၸိူဝ်းၼၼ်ႉႁၵ်းႁိၵ်းလႄႈယူတ်းႁႅင်ႈၵႂႃႇသေယဝ်ႉ၊ၽႆးမႆႈၶဝ်ပႅတ်ႈဢေႃႈ။
တေႃႈလဵဝ်ၼႆႉၸမ်ႉ၊ဢဝ်မၼ်းၵႂႃႇၽုၵ်ႇဝႆႉၵႃႈၼႂ်းထိူၼ်ႇလႅင်ႉ တီႈလိၼ်ဢၼ်ႁႅင်ႈဢၼ်ႁွင်လႄႈဢမ်ႇမီးၼမ်ႉၼၼ်ႉယဝ်ႉ။
ၽႆးဢွၵ်ႇသေၵႃႈၼႂ်းလမ်းတူၼ်ႈမၼ်းၸိူဝ်းၼၼ်ႉသေယဝ်ႉ၊မႆႈပႅတ်ႈၵိင်ႇမၼ်းၶႃႈမၼ်းတင်းမၢၵ်ႇမၼ်းၸိူဝ်းၼၼ်ႉဢေႃႈ။ ၵိင်ႇမၼ်းၶႃႈမၼ်းၸိူဝ်းၼၼ်ႉဢမ်ႇၵႅၼ်ႇၶႅင်ၶိုၼ်းလႆႈထႅင်ႈယဝ်ႉလႄႈဢမ်ႇလႆႈပဵၼ်ၵၼ်းႁွၵ်ႇရႃႇၸႃႉပုၼ်ႈၸဝ်ႈပုၼ်ႈၶုၼ်ထႅင်ႈ သေပွၵ်ႈယဝ်ႉ။” ဢၼ်ၼႆႉၸမ်ႉ၊ပဵၼ်လိၵ်ႈႁဵတ်းၵႂၢမ်းတၢင်းဢၼ်မႆႈၸႂ်ၶီၸႂ်လႄႈပဵၼ်လိၵ်ႈႁဵတ်းၵႂၢမ်းဢၼ်ယၢမ်ႈလႆႈႁဵတ်းသမ်ႉၵၼ်ပွၵ်ႈၼိုင်ႈယဝ်ႉပွၵ်ႈၼိုင်ႈၼၼ်ႉဢေႃႈ။
ၼႂ်းပီဢၼ်ႁဝ်းလႆႈၶၢမ်ႇတၢင်းဢၼ်တိသိမ်းဢဝ်ၵႂႃႇထူၼ်ႈထိုင်ၸဵတ်းပီ၊မိူဝ်ႈလိူၼ်ႁႃႈလႆႈသိပ်းဝၼ်းၼၼ်ႉၵူၼ်းဢၼ်ပဵၼ်ၵႄႇပဵၼ်ႁူဝ်ၵႃႈၼႂ်းမူႇၸုမ်းၵူၼ်းမဵဝ်း ဢိသရေး ၊မႃးဢုပ်ႇၵုမ်ၵၼ်တင်းၵဝ်လူၺ်ႈလွင်ႈဢလူဝ်ႇၽြႃးပဵၼ်ၸဝ်ႈလႄႈၶဝ်ဢွၼ်ၵၼ်ၼင်ႈယူႇၵႃႈတီႈၽၢႆႇၼႃႈၵဝ်ဢေႃႈ။-
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။ မႂ်းမွၵ်ႇလၢတ်ႈတီႈၵူၼ်းဢၼ်ပဵၼ်ၵႄႇပဵၼ်ႁူဝ်ၵူၼ်းမဵဝ်း ဢိသရေး၊ ၸိူဝ်းၼၼ်ႉလႄႈဝႃႈ၊ ‘ၵဝ်၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉၸမ်ႉ၊သူဢွၼ်ၵၼ်မႃးႁႂ်ႈလႆႈလဝ်ႈထၢမ်ဢလူဝ်ႇၵဝ်ၸိူဝ်ႉႁိုဝ်ၼၼ်ႉႁိုဝ်း။ ၵႃႈၼင်ႇဢၼ်ၵဝ်ပဵၼ်ၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼႆႉၼၼ်ႉၵဝ်တၵ်းဢမ်ႇပၼ်ဢၶႂၢင်ႉႁႂ်ႈသူလဝ်ႈထၢမ်ၵဝ်သေၸိူဝ်ႉသေမဵဝ်း။ ၵဝ်၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ၊’ ဝႃႈၼင်ႇၼႆတႃႉ။
“လုၵ်ႈၵူၼ်း႟။ မႂ်းဢၢင်ႈတၵ်းၸီႇယၢင်ႇတြႃးၵႃႈၼိူဝ်ၶဝ်ႁိုဝ်း။ ၸီႇယၢင်ႇတြႃးၵႃႈၼိူဝ်ၶဝ်တႃႉ။ ၽုၺ်ႇဢွၵ်ႇမွၵ်ႇလၢတ်ႈလွင်ႈတၢင်းဢၼ်လီႁင်ႈဢဵတ်ႇသဵတ်ႇဢၼ်ပူႇၶဝ်မွၼ်ႇၶဝ်ႁဵတ်းမႃးယဝ်ႉၸိူဝ်းၼၼ်ႉတႃႉ။-
မွၵ်ႇလၢတ်ႈတီႈၶဝ်လႄႈဝႃႈ၊ၼႂ်းမိူဝ်ႈဢၼ်ၵဝ်လိူၵ်ႈဢဝ်ၵူၼ်းမဵဝ်း ဢိသရေး၊ ၼၼ်ႉၵဝ်ႁဵတ်းၵတိသဵတ်ႈၸႃႇလူၺ်ႈၵၼ်တင်းၶဝ်ဢေႃႈ။ ၵဝ်ပေႃႇမႃးထၢင်ႇသႃးၵႃႈတီႈၶဝ်ၼႂ်းမိူင်း ဢေးၵျိပ်ႉ၊ လႄႈမီးဢမိင်ႉတီႈၶဝ်လႄႈဝႃႈၸမ်ႉ၊ ‘ၵဝ်ပဵၼ် ထႃႇဝရႃႉၽြႃး ၽြႃးပဵၼ်ၸဝ်ႈသူဢေႃႈ၊’ ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ၵဝ်ဝႆႉၵတိသဵတ်ႈၸႃႇႁႂ်ႈလႆႈဢဝ်ၶဝ်ဢွၵ်ႇသေၵႃႈၼႂ်းမိူင်း ဢေးၵျိပ်ႉ၊ လႄႈဢွၼ်သူင်ႇၶဝ်ၵႂႃႇၵႃႈတီႈမိူင်းဢၼ်ၵဝ်လိူၵ်ႈဝႆႉပုၼ်ႈၶဝ်၊မိူင်းဢၼ်မၢၵ်ႈမီးလီပဵၼ်လႄႈၽုၼ်ႇလီလိၼ်လီ မိူင်းဢၼ်ပဵၼ်ၸိၵ်းပဵၼ်ၸွမ်ၵႃႈၼိူဝ်ဝၢၼ်ႈမိူင်းတင်းသဵင်ႈတင်းလူင်ၼၼ်ႉဢေႃႈ။-
ၵဝ်သင်ႇလၢတ်ႈႁႂ်ႈၶဝ်ပႄႇပႅတ်ႈႁုၼ်ႇႁၢင်ႈသၢင်းထုဢၼ်လီႁင်ႈဢဵတ်ႇသဵတ်ႇဢၼ်ၶဝ်ထုၵ်ႇၸႂ်ၵျိူၵ်ႈၸႂ်ၼၼ်ႉ၊ဢိၵ်ႇတင်းဢမ်ႇႁႂ်ႈႁုၼ်ႇႁၢင်ႈသၢင်းထုဢၼ်ၽိတ်းဢၼ်ပိူင်ႈၵူၼ်းမိူင်း ဢေးၵျိပ်ႉ ၶဝ်ၼၼ်ႉ၊ႁဵတ်းႁႂ်ႈတူဝ်ၶဝ်ၵူဝ်ႈၵိူၵ်ႇ၊ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်ဢေႃႈ။-
ၵူၺ်းၵႃႈ၊ၶဝ်ၶတ်းၶႅင်တေႃႇၵဝ်လႄႈဢမ်ႇထွမ်ႇဢမ်ႇဢဝ်ၵႂၢမ်းၵဝ်။ ၶဝ်ဢမ်ႇပႄႇပႅတ်ႈႁုၼ်ႇႁၢင်ႈသၢင်းထုဢၼ်လီႁင်ႈဢဵတ်ႇသဵတ်ႇၸိူဝ်းၼၼ်ႉ၊ယင်းဢမ်ႇဝႄႈပႅတ်ႈၽြႃးၵူၼ်းမဵဝ်း ဢေးၵျိပ်ႉ၊ ၸိူဝ်းၼၼ်ႉလႄႈယူႇဢေႃႈ။ ၵွပ်ႈပိူဝ်ႈလွင်ႈတၢင်းၼၼ်ႉလႄႈ၊ၼင်ႇႁိုဝ်ႁႅင်းတေႃးသႃႉၵဝ်တၵ်းပျေႇၼၼ်ႉၵဝ်ဢၢင်ႈတၵ်းဢဝ်ႁႅင်းတေႃးသႃႉတၢင်းၸႂ်မႆႈၶႂ်ႈၸႃႉၵဝ်တူၵ်းႁွတ်ႈၵႃႈၼိူဝ်ၶဝ်ၵႃႈၼႂ်းမိူင်း ဢေးၵျိပ်ႉ ၊ၼၼ်ႉဢေႃႈ။-
ၵူၺ်းၵႃႈ၊ၵဝ်ဢမ်ႇႁဵတ်းၸိူဝ်ႉၼင်ႇၼၼ်၊ၵွပ်ႈပိူဝ်ႈဢမ်ႇၶႂ်ႈႁႂ်ႈၼႃႇမႃႉၸိုဝ်ႈသဵင်ၵဝ်သရေႇလုၼၼ်ႉဢေႃႈ။ လွင်ႈမၼ်းၸမ်ႉ၊ၵႃႈတီႈၽၢႆႇၼႃႈၵူၼ်းတင်းလၢႆဢၼ်ၶဝ်ယူႇသဝ်းႁူမ်ႈလူၺ်ႈၵၼ်ၼၼ်ႉၵဝ်လႆႈပၢဝ်ႇသေႃႇတီႈၵူၼ်းမဵဝ်း ဢိသရေး လႄႈဝႃႈ၊ ‘ၵဝ်တၵ်းဢွၼ်သူင်ႇသူဢွၵ်ႇသေမိူင်း ဢေးၵျိပ်ႉ၊ ၵႂႃႇဢေႃႈ၊’ ဝႃႈၼႆဝႆႉၼၼ်ႉဢေႃႈ။
“ၼင်ႇၼၼ်လႄႈၵဝ်ဢွၼ်ၶဝ်ဢွၵ်ႇသေမိူင်း ဢေးၵျိပ်ႉ ၊မႃးလႄႈသူင်ႇၶဝ်ၵႂႃႇၵႃႈၼႂ်းထိူၼ်ႇလႅင်ႉၼၼ်ႉဢေႃႈ။-
ၵဝ်ပၼ်ပိင်းၺၢပ်ႈတြႃးၵဝ်တင်းလၢႆတီႈၶဝ်လႄႈသွၼ်ပၼ်ထုင်းၽိင်ႈတြႃးၵဝ်လွင်ႈဢၼ်ၵေႃႉဢၼ်ၵမ်ၵျၢင်ႉၼၼ်ႉဢသၢၵ်ႈတၵ်းလႆႈလိပ်းၼၼ်ႉၸိူဝ်းၼၼ်ႉဢေႃႈ။-
လိူဝ်သေၼၼ်ႉၵဝ်ပၼ်ဝၼ်းၵမ်သိၼ်ဝႆႉတီႈၶဝ်ႁႂ်ႈပဵၼ်ပုၼ်ႈသၢၵ်ႈသေႇၵတိသဵတ်ႈၸႃႇဢၼ်ႁဵတ်းၵႃႈၼႂ်းၵႄႈဝူင်ႈၵၢင်ႁဝ်းဝႆႉ၊ႁႂ်ႈလႆႈပၼ်သတိတီႈၶဝ်လွင်ႈဢၼ်ၵဝ် ထႃႇဝရႃႉၽြႃး ႁႂ်ႈၶဝ်မူတ်းၸၢင်ႇၼၼ်ႉဢေႃႈ။-
ၼႂ်းဝႃႈၼၼ်သေၵေႃႈ၊ၶဝ်ယင်းၶတ်းၶႅင်ႁႅင်းတႃႉၵဝ်ၵႃႈၼႂ်းထိူၼ်ႇလႅင်ႉလႄႈၸုၼ်ႉပႅတ်ႈထုင်းၽိင်ႈတြႃးၵဝ်တင်းလၢႆၼၼ်ႉဢေႃႈ။ ၶဝ်ဢွၼ်ၵၼ်ၸုၼ်ႉပႅတ်ႈပိင်းၺၢပ်ႈတြႃးၵဝ်ဢၼ်သွၼ်ပၼ်လွင်ႈတၢင်းဢၼ်ၵေႃႉဢၼ်ၵမ်ၵျၢင်ႉၸွမ်းၼၼ်ႉတၵ်းလႆႈဢသၢၵ်ႈလိပ်းၼၼ်ႉဢေႃႈ။ ၶဝ်ႁဵတ်းႁႂ်ႈဝၼ်းၵမ်သိၼ်ၼၼ်ႉၵူဝ်ႈၵိူၵ်ႇၵႂႃႇလုမ်းလုမ်းဢေႃႈ။ ၵဝ်ဢၢင်ႈတၵ်းဢဝ်ႁႅင်းတေႃးသႃႉတၢင်းၸႂ်မႆႈၶႂ်ႈၸႃႉၵဝ်ၼၼ်ႉ တူၵ်းႁွတ်ႈၵႃႈၼိူဝ်ၶဝ်ၵႃႈတီႈထိူၼ်ႇလႅင်ႉလႄႈယႃႉၽဵဝ်ႈၶဝ်ပႅတ်ႈဢေႃႈ။-
ၵူၺ်းၵႃႈ၊ၵဝ်ဢမ်ႇႁဵတ်းၸိူဝ်ႉၼင်ႇၼၼ်။ ၵွပ်ႈပိူဝ်ႈဢၼ်ၵဝ်ဢမ်ႇၶႂ်ႈႁႂ်ႈၼႃႇမႃႉၸိုဝ်ႈသဵင်ၵဝ်သရေႇလုၵႃႈၼႂ်းၸိူဝ်ႉၶိူဝ်းမဵဝ်းၵူၼ်းဢၼ်လႆႈႁၼ်လွင်ႈတၢင်းဢၼ်ၵဝ်ဢွၼ်ဢဝ်ၵူၼ်းမဵဝ်း ဢိသရေး ဢွၵ်ႇမိူင်း ဢေးၵျိပ်ႉ၊ မႃးၼၼ်ႉဢေႃႈ။-
ၵဝ်ဝႆႉၵတိသဵတ်ႈၸႃႇတီႈၶဝ်ၵႃႈၼႂ်းထိူၼ်ႇလႅင်ႉၼၼ်ႉလူၺ်ႈလွင်ႈဢၼ်ၵဝ်တၵ်းဢမ်ႇဢဝ်ၶဝ်သူင်ႇၵႂႃႇႁွတ်ႈထိုင်ၵႃႈၼႂ်းမိူင်းဢၼ်ၵဝ်ပၼ်ၶဝ်၊မိူင်းဢၼ်မၢၵ်ႈမီးလီပဵၼ်လႄႈၽုၼ်ႇလီလိၼ်လီ မိူင်းဢၼ်ပဵၼ်ၸိၵ်းပဵၼ်ၸွမ်ၵႃႈၼိူဝ်ဝၢၼ်ႈမိူင်းတင်းသဵင်ႈတင်းလူင်ၼၼ်ႉဢေႃႈ။-
ၵဝ်ဝႆႉၵတိသဵတ်ႈၸႃႇၸိူဝ်ႉၼင်ႇၼၼ် ၵွပ်ႈပိူဝ်ႈဢၼ်ၶဝ်ထဵင်ပႅတ်ႈပိင်းၺၢပ်ႈတြႃးၵဝ်တင်းလၢႆ၊ဢွၼ်ၵၼ်ယႃႉသိၼ်ၵဝ်တင်းလၢႆလႄႈႁဵတ်းႁႂ်ႈဝၼ်းၵမ်သိၼ်ၼၼ်ႉၵူဝ်ႈၵိူၵ်ႇၵႂႃႇၵွပ်ႈပိူဝ်ႈတၢင်းဢၼ်ၶဝ်ၸႂ်ၸပ်းၸႂ်ၸွႆးႁႂ်ႈလႆႈဝႆႈႁုၼ်ႇႁၢင်ႈသၢင်းထုၶဝ်ၼၼ်ႉဢေႃႈ။
“ၼႂ်းဝႃႈၼၼ်သေၵေႃႈ၊ၵဝ်မီးၸႂ်ဢၼ်ဢဵတ်းလူၶဝ်လႄႈၵဝ်တႅပ်းတတ်းဢမ်ႇဢဝ်ၶဝ်တၢႆပႅတ်ႈၵႃႈၼႂ်းထိူၼ်ႇလႅင်ႉၼၼ်ႉ။-
ၵဝ်သင်ႇလၢတ်ႈတီႈလုၵ်ႈလၢၼ်ၶဝ်ၵႃႈၼႂ်းထိူၼ်ႇလႅင်ႉၼၼ်ႉလႄႈဝႃႈၸမ်ႉ၊ ‘ယႃႇပေဢွၼ်ၵၼ်ပႂ်ႉၵမ်ပႂ်ႉၵျၢင်ႉၸွမ်းထုင်းၽိင်ႈတြႃးပူႇမွၼ်ႇသူၸိူဝ်းၼၼ်ႉ။ ယႃႇပေၸပ်းၸွမ်းထုင်းၸၢမ်ႇၶဝ်ၸိူဝ်းၼၼ်ႉ။ ယႃႇပေႁႂ်ႈတူဝ်သူလႆႈၵူဝ်ႈၵိူၵ်ႇလူၺ်ႈႁုၼ်ႇႁၢင်ႈသၢင်းထုၶဝ်ၸိူဝ်းၼၼ်ႉ။-
ၵဝ်ၼႆႉပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢေႃႈ။ ဢွၼ်ၵၼ်ထွမ်ႇဢဝ်ထုင်းၽိင်ႈတြႃးၵဝ်ၸိူဝ်းၼၼ်ႉလႄႈၵမ်ၵျၢင်ႉၸွမ်းပိင်းၺၢပ်ႈတြႃးၵဝ်တင်းလၢႆတႃႉ။-
ဢွၼ်ၵၼ်ႁႂ်ႈဝၼ်းၵမ်သိၼ်ၼၼ်ႉပဵၼ်ဝၼ်းဢၼ်မူတ်းၸၢင်ႇပုၼ်ႈလွင်ႈၼင်ႇႁိုဝ်ဝၼ်းၵမ်သိၼ်ၼၼ်ႉတၵ်းပဵၼ်ပုင်ႇသၢၵ်ႈသေႇလွင်ႈဢၼ်ၵဝ်ႁဵတ်းပတိၺိၺ်ႇလူၺ်ႈၵၼ်တင်းသူၼၼ်ႉသေယဝ်ႉ၊ႁႂ်ႈဝၼ်းၼၼ်ႉပဵၼ်ဝၼ်းဢၼ်ပၼ်သတိတီႈသူႁႂ်ႈသူႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူၼၼ်ႉဢေႃႈ၊’ ဝႃႈၼင်ႇၼႆဢေႃႈ။
“ၵူၺ်းၵႃႈ၊လုၵ်ႈလၢၼ်ၶဝ်ၼၼ်ႉၵေႃႈၶတ်းၶႅင်ႁႅင်းတႃႉၵဝ်ၼင်ႇၵဝ်ႇဢေႃႈ။ ၶဝ်ဢွၼ်ၵၼ်ၸုၼ်ႉပႅတ်ႈထုင်းၽိင်ႈတြႃးၵဝ်တင်းလၢႆလႄႈဢမ်ႇပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၵဝ်တင်းလၢႆဢၼ်သွၼ်ပၼ်လွင်ႈတၢင်းဢၼ်ၵေႃႉဢၼ်ၵမ်ၵျၢင်ႉၼၼ်ႉတၵ်းလႆႈဢသၢၵ်ႈလိပ်းၼၼ်ႉဢေႃႈ။ ၶဝ်ႁဵတ်းႁႂ်ႈဝၼ်းၵမ်သိၼ်ၵဝ်ၵူဝ်ႈၵိူၵ်ႇဢေႃႈ။ ၵဝ်ဢၢင်ႈတၵ်းဢဝ်ႁႅင်းတေႃးသႃႉတၢင်းၸႂ်မႆႈၶႂ်ႈၸႃႉၵဝ်ၼၼ်ႉတူၵ်းႁွတ်ႈၵႃႈၼိူဝ်ၶဝ်ၵႃႈၼႂ်းထိူၼ်ႇလႅင်ႉၼၼ်ႉႁႂ်ႈလႆႈဢဝ်ၶဝ်တၢႆပႅတ်ႈတင်းသဵင်ႈတင်းလူင်ဢေႃႈ။-
ၵူၺ်းၵႃႈ၊ၵဝ်ဢမ်ႇႁဵတ်းၸိူဝ်ႉၼင်ႇၼၼ်။ ၵွပ်ႈပိူဝ်ႈဢမ်ႇၶႂ်ႈႁႂ်ႈၼႃႇမႃႉၸိုဝ်ႈသဵင်ၵဝ်သရေႇလုၵႃႈၼႂ်းၸိူဝ်ႉၶိူဝ်းမဵဝ်းၵူၼ်းဢၼ်လႆႈႁၼ်လွင်ႈတၢင်းဢၼ် ၵဝ်ဢွၼ်ၵူၼ်းမဵဝ်း ဢိသရေး ၊ဢွၵ်ႇမိူင်း ဢေးၵျိပ်ႉ၊ မႃးၼၼ်ႉဢေႃႈ။-
ၵဝ်ႁဵတ်းၵတိသဵတ်ႈၸႃႇတၢင်ႇဢၼ်ၵႃႈၼႂ်းထိူၼ်ႇလႅင်ႉၼၼ်ႉထႅင်ႈဢေႃႈ။ ၵဝ်တိူင်ႇၵၢဝ်ႇဝႆႉၵတိဝႃႈ၊ႁႂ်ႈလႆႈဢဝ်ၶဝ်ၵႃႈမီးၸၢတ်ႇပိုၼ်ပႅတ်ႈၵႃႈၼႂ်းမိူင်းလေႃးၵႃႉၸွတ်ႇတူဝ်ႈၵႂႃႇဢေႃႈ။-
ၵဝ်ႁဵတ်းၸိူဝ်ႉၼင်ႇၼၼ်ၵွပ်ႈပိူဝ်ႈဢၼ်ၶဝ်ထဵင်ပႅတ်ႈပိင်းၺၢပ်ႈတြႃးၵဝ်တင်းလၢႆ၊ၶဝ်ဢွၼ်ၵၼ်ၸုၼ်ႉပႅတ်ႈထုင်းၽိင်ႈတြႃးၵဝ်တင်းလၢႆ၊ႁဵတ်းႁႂ်ႈဝၼ်းၵမ်သိၼ်ၵဝ်ၵူဝ်ႈၵိူၵ်ႇၵႂႃႇလႄႈဢွၼ်ၵၼ်ဝႆႈသႃႁုၼ်ႇႁၢင်ႈသၢင်းထုဢၼ်ပူႇမွၼ်ႇၶဝ်တင်းလၢႆႁဵတ်းဝၢတ်ႈၵူဝ်းၵႂၢႆႇမႃးၼၼ်ႉဢေႃႈ။
“ၵွပ်ႈပိူဝ်ႈလွင်ႈတၢင်းၼႆႉလႄႈၵဝ်ပၼ်ထုင်းၽိင်ႈတြႃးဢၼ်ဢမ်ႇလီဢမ်ႇငၢမ်း၊ဢိၵ်ႇတင်းပိင်းၺၢပ်ႈတြႃးဢၼ်ၸီႇယၢင်ႇႁႂ်ႈဢသၢၵ်ႈဢမ်ႇလႆႈလိပ်းၸိူဝ်းၼၼ်ႉဝႆႉတီႈၶဝ်ဢေႃႈ။-
ၵဝ်ပွႆႇႁႂ်ႈၶဝ်ၵူဝ်ႈၵိူၵ်ႇလူၺ်ႈတႃႇၼႃႉတၢင်းလူႇၶဝ်လႄႈၵဝ်ပွႆႇႁႂ်ႈၶဝ်ဢဝ်လုၵ်ႈတူၼ်ႈၶဝ်သၢၵ်ႈလူႇလူၺ်ႈၶိူင်ႈတၢင်းလူႇဢၼ်ၽဝ်ၽႆးဢေႃႈ။ ဢၼ်ၼႆႉၸမ်ႉ၊ပဵၼ်တၢင်းဢၼ်ပၼ်တၢမ်ႇဢပျတ်ႈတီႈၶဝ်လႄႈၼႄပျႃးၶဝ်လွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ။
“ပိူဝ်ႈၼႆလႄႈလုၵ်ႈၵူၼ်း႟။ မႂ်းမွၵ်ႇလၢတ်ႈတီႈၵူၼ်းမဵဝ်း ဢိသရေး၊ လႄႈဝႃႈ၊ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊လွင်ႈတၢင်းၼႆႉပဵၼ်ၼႄးလၢႆးဢၼ်ပူႇသူမွၼ်ႇသူၸိူဝ်းၼၼ်ႉဢွၼ်ၵၼ်ၽိတ်းပိူင်ႈၵဝ် ၼႂ်းလွင်ႈတၢင်းဢၼ်ၶဝ်ဢမ်ႇပႂ်ႉသဵတ်ႈၸႃႇတေႃႇၵဝ်ၼၼ်ႉထႅင်ႈမဵဝ်းၼိုင်ႈဢေႃႈ။-
ၵဝ်ဢဝ်ၶဝ်သႂၢင်းၶဝ်ႈၵႃႈၼႂ်းမိူင်းဢၼ်ၵဝ်ဝႆႉၵတိႁႂ်ႈလႆႈပၼ်တီႈၶဝ်ၼၼ်ႉယဝ်ႉ။ မိူဝ်ႈဢၼ်ၶဝ်ႁၼ်လွႆဢၼ်သုင်ၵႃႈမီး၊ဢိၵ်ႇတင်းတူၼ်ႈမႆႉဢၼ်ၶဵဝ်လီၼုမ်ႇလီတင်းလၢႆၼၼ်ႉၸိုင်၊ၶဝ်ဢွၼ်ၵၼ်သၢၵ်ႈလူႇၶိူင်ႈတၢင်းလူႇၵႃႈတီႈလွႆ၊ဢိၵ်ႇတင်းၵႃႈတီႈတူၼ်ႈမႆႉၵႃႈမီးၸိူဝ်းၼၼ်ႉဢေႃႈ။ ၶဝ်တိုၵ်းယူင်းႁႅင်းတေႃးသႃႉတၢင်းၸႂ်မႆႈၶႂ်ႈၸႃႉၵဝ်လူၺ်ႈၶိူင်ႈတၢင်းလူႇဢၼ်ၶဝ်ၽဝ်ၽႆးလႂ်၊ဢိၵ်ႇတင်းၼမ်ႉမၢၵ်ႇၸပိတ်ႉဢၼ်ၶဝ်သွၼ်းလေႃႇၸိူဝ်ႉၼင်ႇၶိူင်ႈတႃႇၼႃႉတၢင်းလူႇၼၼ်ႉဢေႃႈ။-
ၵဝ်ၵေႃႈထၢမ်ၶဝ်လႄႈဝႃႈ၊ထႃႇၼႃႉတီႈဢၼ်သုင်ၸိူဝ်းဢၼ်သူၸၢင်ႈၵႂႃႇၸူးၼၼ်ႉပဵၼ်ၵႃႈသင်၊ဝႃႈၼင်ႇၼႆလႄႈ၊ၶဝ်ႁွင်ႉႁဵၵ်ႈၸိုဝ်ႈတီႈၼၼ်ႈဝႃႈ၊ ‘ထႃႇၼႃႉတီႈသုင်’ ယူႇတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။-
တေႃႈလဵဝ်ၼႆႉမွၵ်ႇလၢတ်ႈတီႈၵူၼ်းမဵဝ်း ဢိသရေး၊ လႄႈဝႃႈ၊ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ၵွပ်ႈပိူဝ်ႈသင်လႄႈသူဢွၼ်ၵၼ်ႁဵတ်းတုၸရိူၵ်ႈမိူၼ်ၸိူဝ်ႉၼင်ႇဢၼ်ပူႇသူမွၼ်ႇသူတင်းလၢႆ လႆႈႁဵတ်းမႃးၼၼ်ႉသေယဝ်ႉ၊ၵႂႃႇဝႆႈႁုၼ်ႇႁၢင်ႈသၢင်းထုၶဝ်ၼၼ်ႉၸိူဝ်ႉၼင်ႇႁိုဝ်။-
သူယင်းတိုၵ်ႉသၢၵ်ႈလူႇတႃႇၼႃႉတၢင်းလူႇမဵဝ်းၼၼ်ႉယူႇလႄႈ၊ႁႂ်ႈတူဝ်သူၵူဝ်ႈၵိူၵ်ႇလူၺ်ႈႁုၼ်ႇႁၢင်ႈသၢင်းထုၸိူဝ်းၼၼ်ႉၼႂ်းတၢင်းဢၼ်ဢဝ်လုၵ်ႈသူလၢင်းသူသၢၵ်ႈလူႇလူၺ်ႈတၢင်းဢၼ်ၽဝ်ၽႆးၼၼ်ႉတေႃႇထိုင်ႁွတ်ႈဝၼ်းမိူဝ်ႈၼႆႉလူင်ပႄႇ။ ပိၵ်ႉသမ်ႉသူႁဵတ်းထၢၼ်ႇၼၼ်ႉသေၵေႃႈ သူယင်းဢွၼ်ၵၼ်မႃးလဝ်ႈထၢမ်လွင်ႈဢၼ်ၵဝ်မီးဢလူဝ်ႇၸိူဝ်ႉၼင်ႇႁိုဝ်ၼၼ်ႉလူင်ပႄႇ။ ၵႃႈၼင်ႇဢၼ်ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊ပဵၼ်ၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉၵဝ်တၵ်းဢမ်ႇပၼ်ဢၶႂၢင်ႉႁႂ်ႈသူလဝ်ႈထၢမ်ၵဝ်သေၸိူဝ်ႉသေပိူင်။-
သူဢွၼ်ၵၼ်တႅပ်းတတ်းၸႂ်သူလႄႈဝႃႈ၊သူတၵ်းပဵၼ်ၸိူဝ်ႉၼင်ႇၵူၼ်းတၢင်ႇၸိူဝ်ႉတၢင်ႇမဵဝ်းမိူၼ်ၵူၼ်းတၢင်ႇဝၢၼ်ႈတၢင်ႇမိူင်းလႄႈဝႆႈသႃၽြႃးမႆႉ၊ၽြႃးႁိၼ်ၸိူဝ်းၼၼ်ႉယဝ်ႉဢေႃႈ။ ၵူၺ်းၵႃႈ၊လွင်ႈတၢင်းၼၼ်ႉတၵ်းဢမ်ႇလႆႈပဵၼ်လႃးလႃး။
“ၵႃႈၼင်ႇဢၼ်ၵဝ်၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ဢၼ်ဢသၢၵ်ႈလိပ်းယူႇၼၼ်ႉမီးဢမိင်ႉတီႈသူၼၼ်ႉဝႃႈ၊ၵဝ်တၵ်းဢဝ်မိုဝ်းဢၼ်ႁႅင်းယႂ်ႇၼႃႇ၊ဢိၵ်ႇတင်းတၼ်းၶူဝ်းၵဝ်ၵႃႈမီးလႄႈဢုပ်ႉပိူင်ႇသူလူၺ်ႈၸႂ်တေႃးသႃႉတၢင်းၸႂ်မႆႈၶႂ်ႈၸႃႉၵဝ်ၼၼ်ႉဢေႃႈ။-
ၼႂ်းမိူဝ်ႈဢၼ်ၵဝ်ဢဝ်သူဢွၵ်ႇသေၵႃႈတီႈၵူႈသိုင်ႇၵူႈမိူင်းဢၼ်ၵဝ်ၸၢတ်ႇပိုၼ်သူပႅတ်ႈၸိူဝ်ႉၼၼ်ႉၶိုၼ်းမႃးၸုၵၼ်တုမ်ၵၼ်ယဝ်ႉၼၼ်ႉၸိုင်၊ၵဝ်တၵ်းၼႄပျႃးႁႅင်းတၼ်းၶူဝ်းၵဝ်၊ဢိၵ်ႇတင်းႁႅင်းတေႃးသႃႉတၢင်းၸႂ်မႆႈၶႂ်ႈၸႃႉၵဝ်ၼၼ်ႉတီႈသူဢေႃႈ။
“ၵဝ်တၵ်းဢဝ်သူသႂၢင်းၶဝ်ႈၵႃႈၼႂ်း ‘ထိူၼ်ႇလႅင်ႉမဵဝ်းၵူၼ်းတင်းလၢႆ၊’ ၼၼ်ႉသေလႄႈၵႃႈတီႈၼၼ်ႈၵဝ်တၵ်းၸီႇယၢင်ႇတြႃးတီႈသူၼႃႈတေႃႇၼႃႈဢေႃႈ။-
တေႃႈလဵဝ်ၼႆႉၸမ်ႉ၊ၵဝ်တၵ်းၸီႇယၢင်ႇတြႃးတီႈသူမိူၼ်ၸိူဝ်ႉၼင်ႇဢၼ်ၵဝ်ၸီႇယၢင်ႇတီႈပူႇမွၼ်ႇသူၵႃႈၼႂ်းထိူၼ်ႇလႅင်ႉၵႃႈတီႈႁိမ်းမိူင်း ဢေးၵျိပ်ႉ၊ ၼၼ်ႉဢေႃႈ၊ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ။
“ၵဝ်တၵ်းဢုပ်ႉထိင်းသူလီလီငၢမ်းငၢမ်း၊ႁႂ်ႈသူလႆႈၵမ်ၵျၢင်ႉၸွမ်းပတိၺိၺ်ႇၵဝ်ဢေႃႈ။-
ၵဝ်တၵ်းၼုၵ်ႈထွၼ်ၶဝ်ၸိူဝ်းဢၼ်လုၵ်ႉၽိုၼ်ႉဢိၵ်ႇတင်းၶဝ်ၸိူဝ်းဢၼ်ႁဵတ်းတုၸရိူၵ်ႈၸိူဝ်းၼၼ်ႉပႅတ်ႈသေၵႃႈၼႂ်းသူလႄႈတၵ်းဢဝ်ၶဝ်ဢွၵ်ႇသေၵႃႈၼႂ်းမိူင်းဢၼ်ၶဝ်ယူႇသဝ်းယူႇမိူဝ်ႈလဵဝ်ၼႆႉၼၼ်ႉဢေႃႈ။ ၵူၺ်းၵႃႈ၊ၵဝ်တၵ်းဢမ်ႇႁႂ်ႈၶဝ်လႆႈၶိုၼ်းပွၵ်ႈမႃးၵႃႈၼႂ်းမိူင်း ဢိသရေး၊ မိူဝ်ႈၼၼ်ႉသူတၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ။
“ၵူၼ်းမဵဝ်း ဢိသရေး၊ ၵႃႈမီးၶဝ်႟။ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ႁဵတ်းၸွမ်းၸႂ်သူတႃႉ။ ဢွၼ်ၵၼ်ၵႂႃႇႁဵတ်းဝၢတ်ႈၵူဝ်းၵႂၢႆႇႁုၼ်ႇႁၢင်ႈသၢင်းထုၸိူဝ်းၼၼ်ႉတႃႉ။ ၼႂ်းဝႃႈၼၼ်သေၵေႃႈ၊ၵဝ်ပၼ်သတိတီႈသူၸမ်ႉ၊ၵမ်းလိုၼ်းသူတၵ်းလႆႈဢွၼ်ၵၼ်ထွမ်ႇဢဝ်ၵႂၢမ်းၵဝ်လႄႈယိုတ်းၶၢတ်ႇတၢင်းဢၼ်ႁဵတ်းဢမ်ႇရူဝ်ႇဢမ်ႇသေႇၼႃႇမႃႉၸိုဝ်ႈသဵင်ၵဝ်ဢၼ်မူတ်းၸၢင်ႇလူၺ်ႈတၢင်းဢၼ်သူႁဵတ်းတႃႇၼႃႉတၢင်းလူႇၵႃႈတီႈႁုၼ်ႇႁၢင်ႈသၢင်းထုသူၸိူဝ်းၼၼ်ႉဢေႃႈ။-
ၵႃႈတီႈမိူင်းၸဝ်ႈၼၼ်ႉၵႃႈဢၼ်ပဵၼ်ၵူၼ်းမဵဝ်း ဢိသရေး တင်းသဵင်ႈတင်းလူင်တၵ်းဢွၼ်ၵၼ်ႁဵတ်းဝၢတ်ႈၵူဝ်းၵႂၢႆႇၵဝ်ၵႃႈၼိူဝ်လွႆဢၼ်မူတ်းၸၢင်ႇလွႆဢၼ်သုင်ၵႃႈၼႂ်းမိူင်း ဢိသရေး ၼၼ်ႉဢေႃႈ။ ၵဝ်တၵ်းႁပ်ႉတုင်းဢဝ်သူလႄႈယွၼ်းႁႂ်ႈသူဢွၼ်ၵၼ်ဢဝ်ၶိူင်ႈတၢင်းလူႇတင်းလၢႆ၊တၢင်းလူႇဢၼ်လီသေပိူၼ်ႈ၊ဢိၵ်ႇတင်းၶိူင်ႈတၢင်းလူႇဢၼ်မူတ်းၸၢင်ႇတင်းလၢႆမႃးသၢၵ်ႈလူႇတီႈၵဝ်ဢေႃႈ။-
လိုၼ်းသေဢၼ်ၵဝ်ဢဝ်သူဢွၵ်ႇသေၵႃႈၼႂ်းၵူႈမိူင်းမိူင်း၊တီႈဢၼ်သူလႆႈၶၢမ်ႇတၢင်းဢၼ်ၸၢတ်ႇပိုၼ်ပႅတ်ႈဝႆႉၼၼ်ႉလႄႈၶိုၼ်းမႃးၸုၵၼ်တုမ်ၵၼ်ယဝ်ႉၼၼ်ႉၸိုင်၊ၵဝ်တၵ်းႁပ်ႉတုင်းသူ၊ဢိၵ်ႇတင်းၶိူင်ႈဢၼ်ႁွမ်ဢၼ်ႁူၺ်းဢၼ်ၽဝ်ၽႆးတင်းလၢႆသေလႄႈႁႂ်ႈၸိူဝ်ႉၶိူဝ်းမဵဝ်းၵူၼ်းတင်းလၢႆ ႁၼ်ၵဝ်ပဵၼ်ၽြႃးဢၼ်မူတ်းၸၢင်ႇဢေႃႈ။-
မိူဝ်ႈဢၼ်ၵဝ်ဢဝ်သူသႂၢင်းၶဝ်ႈၵႃႈၼႂ်းမိူင်း ဢိသရေး ၊မိူင်းဢၼ်ၵဝ်ဝႆႉၵတိသဵတ်ႈၸႃႇႁႂ်ႈလႆႈပၼ်တီႈပူႇသူမွၼ်ႇသူယဝ်ႉၼၼ်ႉၸိုင်၊သူတၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး ၊ဢေႃႈ။-
မိူဝ်ႈၼၼ်ႉ၊သူတၵ်းၶုၵ်းၸႂ်လႆႈၶႆႈၸႂ်ထူပ်းၵႃႈဢၼ်သူလႆႈႁဵတ်းလွင်ႈတၢင်းဢၼ်လီဢူၵ်းလီဢၢႆမႃး၊ဢိၵ်ႇတင်းလွင်ႈတၢင်းဢၼ်သူၵမ်ၵျၢင်ႉႁႂ်ႈတူဝ်သူၵူဝ်ႈၵိူၵ်ႇၸိူဝ်းၼၼ်ႉလႄႈသူတၵ်းလီႁင်ႈတူဝ်သူၵွပ်ႈပိူဝ်ႈတုၸရိူၵ်ႈဢၼ်သူႁဵတ်းမႅၼ်ႈၼၼ်ႉဢေႃႈ။-
ၵူၼ်းမဵဝ်း ဢိသရေး၊ ၶဝ်႟။ ၼႂ်းမိူဝ်ႈဢၼ်ၵဝ်ႁဵတ်းတၢင်းဢၼ်ႁႄႉၶႅၼ်မုၼ်သရေႇၵဝ်ၼၼ်ႉ၊သူတၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ၵွပ်ႈပိူဝ်ႈဢၼ်ၵဝ်ဢမ်ႇၸီႇယၢင်ႇၸွမ်းၵႃႈၼင်ႇဢၼ်သူႁဵတ်းတုၸရိူၵ်ႈ၊ဢိၵ်ႇတင်းသူၵမ်ၵျၢင်ႉဢၼ်ႁၢႆႉဢၼ်ယုတ်ႈၸိူဝ်းၼၼ်ႉဢေႃႈ၊” ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈ၊-
“လုၵ်ႈၵူၼ်း႟။ မုင်ႈတူၺ်းၽၢႆႇတၢင်းၸၢၼ်းၼၼ်ႉလူး။ လၢတ်ႈၶတ်းၵၼ်တင်းၽၢႆႇတၢင်းၸၢၼ်းၼၼ်ႉလႄႈႁေႃးလၢတ်ႈၶတ်းၵၼ်တင်းထိူၼ်ႇတၢင်းၸၢၼ်းၼၼ်ႉတႃႉ။-
ႁေႃးလၢတ်ႈတီႈပႃႇမႆႉပႃႇတွၵ်ႇတီႈထိူၼ်ႇတီႈၶိူဝ်းဢၼ်မီးၵႃႈၼႂ်းပွတ်းတၢင်းၸၢၼ်းၼၼ်ႉလႄႈဝႃႈ၊ထွမ်ႇငိၼ်းဢမိင်ႉ ထႃႇဝရႃႉၽြႃး တႃႉ။ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ၵဝ်တၵ်းဢဝ်ၽႆးၸပ်းတီႈမႂ်းလႄႈၽႆးၼၼ်ႉတၵ်းမႆႈတူၼ်ႈလိပ်းတူၼ်ႈၶဵဝ်၊ဢိၵ်ႇတင်းတူၼ်ႈလွၵ်ႇတူၼ်ႈႁႅင်ႈ ၵႃႈဢၼ်မီးၵႃႈၼႂ်းမႂ်းၼၼ်ႉဢေႃႈ။ ပိဝ်ၽႆးၼၼ်ႉဢမ်ႇပႄႉမွတ်ႇပႅတ်ႈလႆႈ။ တၵ်းၽႄဢွၵ်ႇသေၽၢႆႇၸၢၼ်းၵႂႃႇတေႃႇထိုင်ႁွတ်ႈၽၢႆႇႁွင်ႇလႄႈၵူၼ်းၵူႈၵေႃႉတၵ်းငိၼ်းမႆႈၼႃႇၵွပ်ႈၽႆးၼၼ်ႉဢေႃႈ။-
သတ်ႉတဝႃႇၵႃႈမီးတင်းသဵင်ႈတင်းလူင် တၵ်းႁၼ်လွင်ႈဢၼ်ၵဝ်၊ ထႃႇဝရႃႉၽြႃး၊ ဢဝ်ၽႆးတုတ်ႇၼၼ်ႉလႄႈၽူႈလႂ်ဢမ်ႇပႄႉမွတ်ႇပႅတ်ႈလႆႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵဝ်ၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တီႈၶႃႈ။ ယႃႇပေၸႂ်ႉၶႃႈၸဝ်ႈႁဵတ်းလွင်ႈတၢင်းၼႆႉသေၵမ်းတီႈၶႃႈ။ လွင်ႈမၼ်းၸမ်ႉ၊ၵူၼ်းတင်းလၢႆဢွၼ်ၵၼ်တၢင်ႇဢပျတ်ႈတီႈၶႃႈၸဝ်ႈလႄႈဝႃႈ၊ ‘ၵေႃႉၼႆႉၸၢင်ႈဢဝ်ၵႂၢမ်းဢုပမႃႇသေလႄႈႁေႃးလၢတ်ႈၵူၺ်းဢေႃႈ၊’ ဝႃႈၼႆတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။ လၢတ်ႈၵႂၢမ်းတၢင်ႇဢပျတ်ႈတီႈဝဵင်း ယေႇရုသလႅမ်ႇ၊ တႃႉ။ လၢတ်ႈတၢင်ႇဢပျတ်ႈတီႈထႃႇၼႃႉဢၼ်ၵူၼ်းတင်းလၢႆႁဵတ်းဝၢတ်ႈၵူဝ်းၵႂၢႆႇၼၼ်ႉတႃႉ။ ႁေႃးလၢတ်ႈတီႈမိူင်း ဢိသရေး ၊လႄႈဝႃႈ၊-
ထႃႇဝရႃႉၽြႃး၊ မီးဢမိင်ႉၸမ်ႉ၊ၵဝ်ပဵၼ်ရၢၼ်ႇသူႇသူဢေႃႈ။ ၵဝ်တၵ်းထွတ်ႇလၢပ်ႇၵဝ်လႄႈၽၼ်းသူတၢႆပႅတ်ႈၵူၼ်းလီၵူၼ်းၸႃႉမိူၼ်မိူၼ်ၵၼ်တင်းသဵင်ႈတင်းမူတ်းဢေႃႈ။-
ၵဝ်တၵ်းၸႂ်ႉလၢပ်ႇၵဝ်ၼၼ်ႉၶတ်းၵၼ်တႃႉၵၼ်တင်းသတ်ႉတဝႃႇတင်းသဵင်ႈတင်းလူင်ၵႃႈတီႈၽၢႆႇတၢင်းၸၢၼ်းတေႃႇထိုင်ႁွတ်ႈၽၢႆႇတၢင်းႁွင်ႇဢေႃႈ။-
သတ်ႉတဝႃႇတင်းသဵင်ႈတင်းမူတ်းတၵ်းႁုလွင်ႈဢၼ်ၵဝ်၊ ထႃႇဝရႃႉၽြႃး ထွတ်ႇလၢပ်ႇဢွၵ်ႇသေၵပ်းယဝ်ႉ၊တၵ်းဢမ်ႇၶိုၼ်းသႂ်ႇၵႃႈၼႂ်းၵပ်းမၼ်းဢေႃႈ။
“ၵွပ်ႈပိူဝ်ႈပဵၼ်ၸိူဝ်ႉၼင်ႇၼၼ်လႄႈလုၵ်ႈၵူၼ်း႟။ မီးတၢင်းဢၼ်ႁူဝ်ၸႂ်တႅၵ်ႇလႅဝ်ယူႇသေလႄႈၶၢင်းၶီၶၢင်းၽၢၼ်ယူႇတႃႉ။ မီးတၢင်းဢၼ်မႆႈၸႂ်ၶီၸႂ်သေလႄႈၶၢင်းၶီၶၢင်းၽၢၼ်ယူႇၵႃႈတီႈၽၢႆႇၼႃႈပိူၼ်ႈတင်းလၢႆတႃႉ။-
မိူဝ်ႈဢၼ်ၶဝ်ထၢမ်မႂ်းလႄႈဝႃႈ၊ ‘ၵွပ်ႈသင်လႄႈမႂ်းၶၢင်းၶီၶၢင်းၽၢၼ်ယူႇ၊’ ဝႃႈၼႆၸိုင်၊ၶိုၼ်းလၢတ်ႈလႄႈဝႃႈ၊ ‘ၵွပ်ႈပိူဝ်ႈၶၢဝ်ႇငၢဝ်းဢၼ်ယင်းမႃးယူႇၼၼ်ႉဢေႃႈ၊’ ဝႃႈၼႆတႃႉ။ မိူဝ်ႈဢၼ်ၶၢဝ်ႇငၢဝ်းၼၼ်ႉႁွတ်ႈမႃးၸိုင်၊ၶဝ်တၵ်းမီးၸႂ်ဢၼ်ၵူဝ်ဢၼ်ႁႄ၊မိုဝ်းၶဝ်တၵ်းဢူၼ်ႈၵႂႃႇ၊ၸႂ်ႁတ်းၸႂ်ႁၢၼ်ၶဝ်ၼၼ်ႉတၵ်းၸူမ်တၵ်းႁၢႆၵႂႃႇလႄႈႁူဝ်ၶဝ်ႇၶဝ်တၵ်းသၼ်ႇတၵ်းသၢႆဢေႃႈ။ ၶိင်ႇၵႃႇလႃႉၼၼ်ႉႁွတ်ႈမႃးလႄႈထိုင်ၵႃႈတီႈၼႆႈယူႇယဝ်ႉ၊” ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈ၊-
“လုၵ်ႈၵူၼ်း႟။ ႁေႃးလၢတ်ႈၵႂၢမ်းပရေႃးၽႅတ်ႈတႃႉ။ မွၵ်ႇလၢတ်ႈၵူၼ်းတင်းလၢႆလႄႈဝႃႈ၊ ထႃႇဝရႃႉၽြႃး ၊မီးဢမိင်ႉၸမ်ႉ၊ “လၢပ်ႇၸဝ်ႈၼၼ်ႉ၊လပ်ႉဝႆႉၽၢႆၼႃႇလူင်လၢင်ယဝ်ႉ၊ ပွတ်ႈသီဝႆႉထၢၼ်ႈပေႃးႁိူဝ်ႈမၢပ်ႈၼႃႇလူင်လၢင်ယဝ်ႉ။
ပဵၼ်ဢၼ်လပ်ႉဝႆႉၽၢႆၽၢႆႁႂ်ႈလႆႈၶႃႈၽၼ်းဢဝ်တၢႆလႄႈ ပဵၼ်ဢၼ်ပွတ်ႈသီဝႆႉႁိူဝ်ႈမၢပ်ႈမိူၼ်ၽႃႉမႅပ်ႈဢေႃႈ။ ႁဝ်းတၵ်းႁဵတ်းၸိူဝ်ႉၼင်ႇႁိုဝ်လႄႈမူၼ်ႈပျေႃႇလႆႈ။ သူဢွၼ်ၵၼ်ႁဵတ်းဢမ်ႇပေႃးၼင်ႇႁိုဝ်တီႈၵၼ်းႁွၵ်ႇရႃႇၸႃႉ၊ ဢိၵ်ႇတင်းၼႄးဢုပတေႇတင်းလၢႆယဝ်ႉလူင်ပႄႇ။
ပဵၼ်ဢၼ်ပွတ်ႈသီလၢပ်ႇဝႆႉပုၼ်ႈတႃႇတၵ်းယိပ်းတၵ်းၵမ်ယဝ်ႉ၊ လၢပ်ႇၼၼ်ႉလပ်ႉဝႆႉၽၢႆၽၢႆ၊ပွတ်ႈသီဝႆႉလိူမ်ႈမၢပ်ႈႁႂ်ႈလႆႈဢၢပ်ႈပၼ်ၵႃႈၼႂ်းမိုဝ်းၵေႃႉဢၼ်ၶႃႈၽၼ်းဢဝ်တၢႆၼၼ်ႉယဝ်ႉ။
လုၵ်ႈၵူၼ်း႟။ မီးတၢင်းဢၼ်မႆႈၸႂ်မႆႈၶေႃးလႄႈႁွင်ႉႁႆႈႁွင်ႉသႅၼ်ႇတႃႉ၊လၢပ်ႇၼႆႉပဵၼ်ပုၼ်ႈၵူၼ်းၵဝ်တင်းလၢႆဢိၵ်ႇတင်း ၵူၼ်းဢၼ်ပဵၼ်ၵႄႇပဵၼ်ႁူဝ်ၵူၼ်းမဵဝ်း ဢိသရေး ၵႃႈမီးၼၼ်ႉဢေႃႈ။ ၶဝ်တၵ်းလႆႈၶၢမ်ႇတၢင်းဢၼ်ၶႃႈၽၼ်းတၢႆ ႁူမ်ႈလူၺ်ႈၵၼ်တင်းၵူၼ်းၵဝ်ၵႃႈမီးတင်းသဵင်ႈတင်းလူင်ၼၼ်ႉဢေႃႈ။ ပိူဝ်ႈၼႆလႄႈတူပ်းဢူၵ်းမႂ်းတႃႉ။
ပဵၼ်လွင်ႈတၢင်းဢၼ်ၵဝ်ၸႅတ်ႈထၢမ်ၸၢမ်းတူၺ်းၵူၼ်းၵဝ်တင်းလၢႆဢေႃႈ။ ပေႃးၶဝ်ဢမ်ႇၸၢင်ႈၶုၵ်းၸႂ်လႆႈၶႆႈၸႂ်ထူပ်းလႄႈပိၼ်ႇၸႂ်ၸိုင်၊လွင်ႈတၢင်းၸိူဝ်းၼႆႉၵႃႈမီးတၵ်းပဵၼ်ၵႃႈတီႈၶဝ်ဢေႃႈ။
“လုၵ်ႈၵူၼ်း႟။ ႁေႃးလၢတ်ႈၵႂၢမ်းပရေႃးၽႅတ်ႈၵမ်းလဵဝ်တႃႉ။ တူပ်းမိုဝ်းတႃႉ။ လၢပ်ႇၼၼ်ႉၵေႃႈတၵ်းၽၼ်းယဝ်ႉၽၼ်းထႅင်ႈယူႇၶိူဝ်းၶိူဝ်းယႂ်းယႂ်းဢေႃႈ။ ပဵၼ်လၢပ်ႇပုၼ်ႈဢၼ်တၵ်းၶႃႈၽၼ်းဢဝ်တၢႆဢၼ်ယႂ်ႇၼႃႇလူင်လၢင်လႄႈပဵၼ်လၢပ်ႇဢၼ်လွမ်ႉဝႅတ်ႉၶဝ်ဝႆႉၼၼ်ႉဢေႃႈ။-
လၢပ်ႇၼၼ်ႉႁဵတ်းႁႂ်ႈၵူၼ်းၵဝ်တင်းလၢႆႁႅင်းၸႂ်ဢူၼ်ႈဢွၼ်ႇယွမ်းၵႂႃႇလႄႈႁႂ်ႈၶဝ်ၶီႈလိုတ်းလႄႈလူမ်ႉဢေႃႈ။ ၵဝ်ဢဝ်လၢပ်ႇဢၼ်ႁိူဝ်ႈမၢပ်ႈမိူၼ်ၽႃႉမႅပ်ႈလႄႈႁႅၼ်းဝႆႉတႃႇတေၶႃႈၽၼ်းဢဝ်တၢႆၼၼ်ႉလွၵ်ႇငိုတ်ႈဝဵင်းၶဝ်ဢေႃႈ။-
လၢပ်ႇဢၼ်ၽၢႆၼႆႉ႟။ ၽၼ်းၽၢႆႇသၢႆႉၽၢႆႇၶႂႃမႂ်းတႃႉ။ ၽၼ်းၵူႈၽၢႆႇၵႃႈဢၼ်မႂ်းဝၢႆႇၼႃႈၸူးၼၼ်ႉတႃႉ။-
ၵဝ်ၵေႃႈတၵ်းတူပ်းမိုဝ်းလႄႈႁႂ်ႈႁႅင်းတေႃးသႃႉတၢင်းၸႂ်မႆႈၵဝ်ထၢတ်ႇယဵၼ်ဢေႃႈ။ ၵဝ် ထႃႇဝရႃႉၽြႃး ၊မီးဢမိင်ႉၸိူဝ်ႉၼင်ႇၼႆယဝ်ႉ၊ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးၵႃႈတီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။ မႂ်းမၢတ်ႈမၢႆသဵၼ်ႈတၢင်းသွင်သဵၼ်ႈပုၼ်ႈၶုၼ်ႁေႃၶမ်းမိူင်း ပႃႇပုလုၼ်ႇ၊ တၵ်းပႃးဢဝ်လၢပ်ႇမၼ်းလႄႈမႃးၼၼ်ႉတႃႉ။ သဵၼ်ႈတၢင်းသွင်သဵၼ်ႈၼၼ်ႉတၵ်းလႆႈဢွၵ်ႇၵႃႈၼႂ်းမိူင်းလဵဝ်ၵၼ်ဢေႃႈ။ ၵႃႈတီႈတၢင်းၽႄၼၼ်ႉႁဵတ်းသဝ်ဢၼ်ၸိၼႄသဵၼ်ႈတၢင်းဢၼ်ၵႂႃႇၸူးၵႃႈတီႈဝဵင်းၼၼ်ႉတႃႉ။-
ၽၢႆႇၼိုင်ႈတၵ်းၸိၼႄႁႂ်ႈၶုၼ်ႁေႃၶမ်းၵႂႃႇၸူးတီႈဝဵင်း ရပ်ႉပႃႇ၊ မိူင်း ဢမ်ႇမုၼ်ႇ ဢိၵ်ႇတင်းၽၢႆႇၼိုင်ႈၵႂႃႇၸူးတီႈဝဵင်း ယေႇရုသလႅမ်ႇ ၊ဢၼ်မၼ်ႈၶိူင်ႇၵႃႈၼႂ်းမိူင်း ယုတႃႉ၊ ၼၼ်ႉဢေႃႈ။-
ၶုၼ်ႁေႃၶမ်းမိူင်း ပႃႇပုလုၼ်ႇ၊ ၼၼ်ႉၸုၵ်းၵႃႈတီႈႁူဝ်တၢင်းၽႄတၢင်းၸုလႄႈပုၼ်ႈလွင်ႈၼင်ႇႁိုဝ်မၼ်းတၵ်းႁုသဵၼ်ႈတၢင်းဢၼ်မၼ်းတၵ်းလႆႈၸွမ်းၵႂႃႇပဵၼ်သဵၼ်ႈတၢင်းဢၼ်လႂ်ၼၼ်ႉၸိုင်၊မၼ်းၶဝ်ႇပိုၼ်ၵၢင်ႇတင်းလၢႆ၊ တွင်ႈထၢမ်တီႈႁုၼ်ႇႁၢင်ႈသၢင်းထုတင်းလၢႆလႄႈလူတူၺ်းတပ်းတူဝ်သတ်းဢၼ်သၢၵ်ႈလူႇၼၼ်ႉဢေႃႈ။-
ၵမ်းၼၼ်ႉ၊ၵႃႈၼႂ်းမိုဝ်းၶွၼ်ၶႂႃမၼ်းၼၼ်ႉယိပ်းၵမ်ပိုၼ်ၵၢင်ႇဢၼ်ၸိၼႄဝဵင်း ယေႇရုသလႅမ်ႇ၊ ယဝ်ႉ။ ဢၼ်ၼၼ်ႉမွၵ်ႇဝႃႈ၊ႁႂ်ႈမၼ်းၵႂႃႇလႄႈဢဝ်တုမ်တွင်ႈၼၼ်ႉႁွႆႈဝႆႉ၊ႁႂ်ႈလႆႈႁွင်ႉပၢဝ်ႇသဵင်ဢၼ်တိုၵ်းသိုၵ်း၊ႁႂ်ႈလႆႈႁွႆႈတုမ်တွင်ႈၼၼ်ႉၵႃႈတီႈၽၵ်းတူဝဵင်းဝႆႉ၊ႁႂ်ႈလႆႈၵေႃႇတႅၼ်ၵေႃႇလမ်း၊ႁႂ်ႈလႆႈၶုတ်းႁွင်ႈၶုတ်းၶူးဢေႃႈ။-
ၵူၼ်းဝဵင်း ယေႇရုသလႅမ်ႇ၊ တင်းလၢႆဢမ်ႇယုမ်ႇလွင်ႈတၢင်းၼၼ်ႉ၊ၵွပ်ႈပိူဝ်ႈၶဝ်လႆႈၵိၼ်ၼမ်ႉသဵတ်ႈၸႃႇလူၺ်ႈၵၼ်တင်းၶုၼ်ႁေႃၶမ်းမိူင်း ပႃႇပုလုၼ်ႇ ၊ဝႆႉယဝ်ႉၼၼ်ႉဢေႃႈ။ ၵူၺ်းၵႃႈ၊ၶုၼ်ႁေႃၶမ်း ပႃႇပုလုၼ်ႇ ၊တၵ်းႁႂ်ႈၶဝ်ၶုၵ်းၸႂ်လႆႈတုၸရိူၵ်ႈဢၼ်ၶဝ်ႁဵတ်းမႅၼ်ႈ၊ဢိၵ်ႇတင်းႁႂ်ႈလႆႈပၼ်သတိတီႈၶဝ်လွင်ႈဢၼ်ၶဝ်တၵ်းလႆႈၶၢမ်ႇတၢင်းဢၼ်တိဢဝ်ၵႂႃႇၼၼ်ႉဢေႃႈ။-
ပိူဝ်ႈဢၼ်ပဵၼ်ၼင်ႇၼႆလႄႈ၊ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ဢပျတ်ႈတုၸရိူၵ်ႈသူပေႃႇဢွၵ်ႇထၢင်ႇသႃးမႃးယဝ်ႉလႄႈပိူၼ်ႈလႆႈႁုလွင်ႈတၢင်းဢၼ်သူပူၼ်ႉလိူဝ်ထၢၼ်ႇႁိုဝ်ၼၼ်ႉယဝ်ႉ။ ၵႃႈဢၼ်သူႁဵတ်းၵူႈၸိူဝ်ႉၵူႈမဵဝ်းလႆႈၼႄပျႃးဢပျတ်ႈသူၼၼ်ႉသူတေလႆႈၶၢမ်ႇတၢင်းၸီႇယၢင်ႇပၼ်တၢမ်ႇၼၼ်ႉယူႇဢေႃႈ။ ပိူဝ်ႈၼႆလႄႈၵဝ်တၵ်းဢဝ်သူဢၢပ်ႈၵႃႈၼႂ်းမိုဝ်းရၢၼ်ႇသူႇတင်းလၢႆၼၼ်ႉဢေႃႈ။
“ၵူၼ်းႁၢႆႉၵူၼ်းယုတ်ႈ၊ၶုၼ်မဵဝ်း ဢိသရေး ၊ဢၼ်ဢမ်ႇမူတ်းသႂ်႟။ မိုဝ်ႉဝၼ်းမႂ်းဢၼ်ဝႃႈ၊ဝၼ်းဢၼ်ပၼ်တၢမ်ႇၵမ်းလိုၼ်းသုတ်းတီႈမႂ်းၼၼ်ႉႁွတ်ႈမႃးယူႇယဝ်ႉ။-
ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉၸမ်ႉ၊ပူတ်းဢဝ်ၶဵၼ်းႁူဝ်တင်းသရၽူႇရႃႇၸႃႉပႅတ်ႈတႃႉ။ ၵူႈၸိူဝ်ႉၵူႈမဵဝ်းတၵ်းဢမ်ႇမိူၼ်ၵဝ်ႇလႃးလႃး။ ယုၵ်ႉတၢင်ႇၵူၼ်းယၢၵ်ႈၵူၼ်းၽၢၼ်တင်းလၢႆႁႂ်ႈမီးတၼ်းၶူဝ်းလႄႈဢဝ်ၵေႃႉဢၼ်ဢုပ်ႉပိူင်ႇၼၼ်ႉၶျႃးတူၵ်းတႃႉ။-
တၢင်းဢၼ်လုလႅဝ်၊တၢင်းဢၼ်လုလႅဝ်၊တၢင်းဢၼ်လုလႅဝ်၊ၸႂ်ႈတႄႉတႄႉယဝ်ႉ၊ၵဝ်တၵ်းႁဵတ်းႁႂ်ႈဝဵင်းၼၼ်ႉပဵၼ်တၢင်းဢၼ်လုဢၼ်လႅဝ်ဢေႃႈ။ လွင်ႈတၢင်းဢၼ်လုဢၼ်လႅဝ်မဵဝ်းၼႆႉတၵ်းဢမ်ႇလႆႈပဵၼ်တေႃႇထိုင်ႁွတ်ႈၵေႃႉဢၼ်ၵဝ်လိူၵ်ႈဢဝ်ဝႆႉႁႂ်ႈမၼ်းၸီႇယၢင်ႇပၼ်တၢမ်ႇတီႈဝဵင်းၼၼ်ႉထၢၼ်ႈပေႃးႁွတ်ႈထိုင်မႃးၼၼ်ႉဢေႃႈ။ မိူဝ်ႈၼၼ်ႉၵဝ်တၵ်းဢဝ်ဝဵင်းၼၼ်ႉဢၢပ်ႈပၼ်တီႈၵေႃႉၼၼ်ႉဢေႃႈ။
“လုၵ်ႈၵူၼ်း႟။ ႁေႃးလၢတ်ႈၵႂၢမ်းပရေႃးၽႅတ်ႈတႃႉ။ သင်ႇလၢတ်ႈလွင်ႈတၢင်းဢၼ်ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉတီႈၵူၼ်းမဵဝ်း ဢမ်ႇမုၼ်ႇ ၊ၸိူဝ်းဢၼ်သႄႉသွမ်းၵူၼ်းမဵဝ်း ဢိသရေး ၊ၼၼ်ႉတႃႉ။ ၵႂၢမ်းဢၼ်တၵ်းလႆႈလၢတ်ႈတီႈၶဝ်ၼၼ်ႉၸမ်ႉ၊ “‘ပုၼ်ႈတႃႇတေယႃႉၽဵဝ်ႈပႅတ်ႈၼၼ်ႉႁႅၼ်းထႃႈဝႆႉလၢပ်ႇမၢၵ်ႈၼိုင်ႈယဝ်ႉ၊ လၢပ်ႇဢၼ်ပွတ်ႈသီဝႆႉတႃႇတေၶႃႈၽၼ်းဢဝ်တၢႆၼၼ်ႉ၊ ႁိူဝ်ႈမၢပ်ႈယူႇမိူၼ်ၽႃႉမႅပ်ႈၼၼ်ႉယဝ်ႉ။
ပျႃႇတိၵ်ႈရူႇပႃႇရူင်ႇဢၼ်သူႁၼ်ၼၼ်ႉပဵၼ်ဢၼ်ၽိတ်းဢၼ်ပိူင်ႈလႄႈလွင်ႈတၢင်းဢၼ်သူႁေႃးထႃႈလၢတ်ႈထႃႈၼၼ်ႉပဵၼ်မုသႃႇလွၼ်ႉလွၼ်ႉဢေႃႈ။ သူပဵၼ်ၵူၼ်းဢၼ်ဢမ်ႇတြႃး၊ပဵၼ်ၵူၼ်းႁၢႆႉၵူၼ်းယုတ်ႈလႄႈမိုဝ်ႉဝၼ်းသူဢၼ်ဝႃႈ၊မိုဝ်ႉဝၼ်းၸီႇယၢင်ႇပၼ်တၢမ်ႇဢပျတ်ႈၵမ်းလိုၼ်းသုတ်းတီႈသူၼၼ်ႉႁွတ်ႈမႃးယူႇယဝ်ႉ။ လၢပ်ႇၼၼ်ႉတၵ်းတူၵ်းၵႃႈၼိူဝ်ၶေႃးသူဢေႃႈ။
“‘ဢဝ်လၢပ်ႇသႂ်ႇၶိုၼ်းၵႃႈၼႂ်းၵပ်းမၼ်းတႃႉ။ ၵဝ်တၵ်းၸီႇယၢင်ႇသူၵႃႈတီႈဢၼ်ၵဝ်ၽၢၼ်ႇသၢင်းႁဵတ်းပဵၼ်သူ၊တီႈဢၼ်သူၵိူတ်ႇလဵင်ႉမႃးၼၼ်ႉဢေႃႈ။-
ၵဝ်တၵ်းႁႂ်ႈတၢင်းၸႂ်မႆႈၶႂ်ႈၸႃႉၵဝ်တူၵ်းႁွတ်ႈၵႃႈၼိူဝ်သူလႄႈဢဝ်ၽႆးတေႃးသႃႉၵဝ်ပဝ်ႇသႂ်ႇသူဢေႃႈ။ ၵဝ်တၵ်းဢဝ်သူဢၢပ်ႈပၼ်ၵႃႈၼႂ်းမိုဝ်းၶဝ်ၸိူဝ်းဢၼ်မီးသၽေႃးဢၼ်ႁၢဝ်ႈၵျၢမ်းၼႃႇလႄႈၸၢင်ႈယႃႉၽဵဝ်ႈပႅတ်ႈၼၼ်ႉဢေႃႈ။-
သူတၵ်းလႆႈၶၢမ်ႇတၢင်းဢၼ်ယႃႉၽဵဝ်ႈပႅတ်ႈလူၺ်ႈၽႆးဢေႃႈ။ တၵ်းလႆႈဢဝ်လိူတ်ႈသူၵႂႃႇထွၵ်ႇပႅတ်ႈၵႃႈၼႂ်းမိူင်းတူဝ်ၸဝ်ႈၵဝ်ႇလႄႈၵမ်းလိုၼ်းၽူႈလႂ်တၵ်းဢမ်ႇၶုၵ်းၸႂ်လႆႈၶႆႈၸႂ်ထူပ်းသူလႃးလႃးယဝ်ႉ။ ၵဝ် ထႃႇဝရႃႉၽြႃး၊ မီးဢမိင်ႉယဝ်ႉ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။ မႂ်းတၼ်းဝႆႉပုၼ်ႈတႃႇတေၸီႇယၢင်ႇတြႃးတီႈဝဵင်းဢၼ်ၸၢင်ႈၶႃႈၽၼ်းလႄႈဢဝ်ၵူၼ်းတၢႆၼၼ်ႉယဝ်ႉႁိုဝ်း။ ႁႂ်ႈဝဵင်းၼၼ်ႉႁုႁၼ်လွင်ႈတၢင်းဢၼ်လီႁင်ႈဢဵတ်ႇသဵတ်ႇၵႃႈဢၼ်မၼ်းႁဵတ်းၸိူဝ်းၼၼ်ႉၸေးၸေးတႃႉ။-
မႂ်းလၢတ်ႈလႄႈဝႃႈ၊ ‘ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ၵွပ်ႈပိူဝ်ႈဢၼ်မႂ်းၶႃႈၽၼ်းဢဝ်တၢႆၵူၼ်းတူဝ်ၸဝ်ႈၵဝ်ႇတင်းလၢႆၼမ်ၼႃႇ၊ဢိၵ်ႇတင်းမႂ်းႁဵတ်းႁႂ်ႈတူဝ်ၸဝ်ႈၵဝ်ႇၵူဝ်ႈၵိူၵ်ႇလူၺ်ႈတၢင်းဢၼ်ဝႆႈသႃႁုၼ်ႇႁၢင်ႈသၢင်းထုယဝ်ႉၼၼ်ႉလႄႈၶိင်ႇမိုဝ်ႉဝၼ်းမႂ်းလႆႈႁွတ်ႈထိုင်ယဝ်ႉ။-
မႂ်းမီးဢပျတ်ႈၵွပ်ႈပိူဝ်ႈဢၼ်မႂ်းဢဝ်ဢသၢၵ်ႈၵူၼ်းတၢႆ၊ဢိၵ်ႇတင်းၵွပ်ႈပိူဝ်ႈမႂ်းႁႂ်ႈတူဝ်ၸဝ်ႈၵဝ်ႇၵူဝ်ႈၵိူၵ်ႇလူၺ်ႈႁုၼ်ႇႁၢင်ႈသၢင်းထုဢၼ်မႂ်းႁဵတ်းၸိူဝ်းၼၼ်ႉဢေႃႈ။ ၵွပ်ႈပိူဝ်ႈၼႆလႄႈမိုဝ်ႉဝၼ်းမႂ်းၼၼ်ႉႁွတ်ႈထိုင်ယဝ်ႉလႄႈဢၶိင်ႇၼႃႇရီႇမၼ်းၵေႃႈၸေးယဝ်ႉ။ ပိူဝ်ႈဢၼ်ပဵၼ်ၸိူဝ်ႉၼင်ႇၼႆလႄႈၵဝ်ႁႂ်ႈၸိူဝ်ႉၶိူဝ်းမဵဝ်းၵူၼ်းတင်းလၢႆသႄႉသွမ်းမႂ်းလႄႈၵူၼ်းၵူႈသိုင်ႇၵူႈမိူင်းဢွၼ်ၵၼ်ႁဵတ်းပျၢၵ်ႈႁဵတ်းၶူဝ်တီႈမႂ်းဢေႃႈ။-
ၵူၼ်းမိူင်းတီႈၸမ်ၵၼ်၊ဢိၵ်ႇတင်းၵူၼ်းမိူင်းဢၼ်ၵႆၼၼ်ႉဢွၼ်ၵၼ်ႁဵတ်းပျၢၵ်ႈႁဵတ်းၶူဝ်တီႈမႂ်း၊ၵွပ်ႈပိူဝ်ႈမႂ်းၽိတ်းပိူင်ႈတြႃးၼၼ်ႉဢေႃႈ။-
ၶုၼ်မိူင်း ဢိသရေး၊ ၵႃႈမီးတင်းသဵင်ႈတင်းလူင်ဢွၼ်ၵၼ်ဢိင်ပိုင်ႈတၼ်းၶူဝ်းတူဝ်ၸဝ်ႈၵဝ်ႇသေလႄႈၶႃႈၽၼ်းဢဝ်ဢသၢၵ်ႈၵူၼ်းတၢႆဢေႃႈ။-
ၵူၼ်းဝဵင်း ယေႇရုသလႅမ်ႇ၊ ဢွၼ်ၵၼ်ႁဵတ်းဢမ်ႇရူဝ်ႇဢမ်ႇသေႇပေႃႈမႄႈၶဝ်လႄႈၸၢင်ႈၼိၵ်ႈၸၢၵ်ႈငႅၼ်းသႄးၵူၼ်းတၢင်ႇဝၢၼ်ႈတၢင်ႇမိူင်း၊ဢိၵ်ႇတင်းၸၢင်ႈဢွၼ်ၵၼ်ႁဵတ်းဢမ်ႇတြႃးတီႈမႄႈမၢႆႈလႂ်၊တင်းလုၵ်ႈဢွၼ်ႇဢၼ်ၽၢၼ်ပေႃႈၽၢၼ်မႄႈလႂ်ၼၼ်ႉဢေႃႈ။-
မႂ်းႁဵတ်းဢမ်ႇပေႃးၼင်ႇႁိုဝ်တီႈထႃႇၼႃႉဢၼ်မူတ်းၸၢင်ႇတင်းလၢႆ၊ဢိၵ်ႇတင်းမႂ်းဢမ်ႇပႂ်ႉဝၼ်းၵမ်သိၼ်ၼၼ်ႉလူင်ပႄႇ။-
ၼႂ်းၵူၼ်းမႂ်းၼၼ်ႉၵမ်ႈၽွင်ႈလၢတ်ႈမုသႃႇတီႈပိူၼ်ႈႁႂ်ႈလႆႈဢဝ်ပိူၼ်ႈတၢႆဢေႃႈ။ ၵမ်ႈၽွင်ႈလႆႈၵိၼ်တၢင်းၵိၼ်ၶိူင်ႈတၢင်းလူႇဢၼ်သၢၵ်ႈလူႇတီႈႁုၼ်ႇႁၢင်ႈသၢင်းထုတင်းလၢႆယဝ်ႉၼၼ်ႉဢေႃႈ။ ၵမ်ႈၽွင်ႈၵူဝ်ႈၵိူၵ်ႇလူၺ်ႈၵႃႇမႃႉရႃႇၵႃႉဢေႃႈ။-
ၵမ်ႈၽွင်ႈႁဵတ်းမေႇထုင်ႇဢၼ်ဢမ်ႇတြႃးလူၺ်ႈၵၼ်တင်းမေးၼွႆႉပေႃႈၶဝ်ၼၼ်ႉဢေႃႈ။ ၵမ်ႈၽွင်ႈၽိတ်းပိူင်ႈမႄႈယိင်းဢၼ်လိူတ်ႈႁူဝ်လိူၼ်မႃးလႄႈဢမ်ႇမူတ်းသႂ်ၼၼ်ႉဢေႃႈ။-
ၵမ်ႈၽွင်ႈၽိတ်းပိူင်ႈမေးၵူၼ်းႁိူၼ်းၸမ်ၵၼ်လႄႈၵမ်ႈၽွင်ႈၽိတ်းပိူင်ႈလုၵ်ႈပႂ်ႉၶဝ်၊ၵမ်ႈၽွင်ႈၽိတ်းပိူင်ႈလုၵ်ႈဢၼ်ၸွမ်းၽၢႆႇပေႃႈ ဢမ်ႇၼၼ်လုၵ်ႈဢၼ်ၸွမ်းၽၢႆႇမႄႈၶဝ်ၼၼ်ႉဢေႃႈ။-
ၼႂ်းၵူၼ်းမႂ်းၼၼ်ႉၵမ်ႈၽွင်ႈၵိၼ်ၸၢင်ႈဢဝ်ဢသၢၵ်ႈၵူၼ်းတၢႆဢေႃႈ။ ၵမ်ႈၽွင်ႈၵိၼ်ၶီႈငိုၼ်းႁၢင်ငိုၼ်းတီႈၵူၼ်းမဵဝ်း ဢိသရေး၊ ၼင်ႇၵၼ်ၵၼ်ၼၼ်ႉလႄႈၵမ်ႈၽွင်ႈႁဵတ်းႁႂ်ႈတူဝ်ၸဝ်ႈၵဝ်ႇမၢၵ်ႈမီးလီပဵၼ်လူၺ်ႈတၢင်းဢၼ်ႁဵတ်းပႄႉႁဵတ်းၼႅင်ႇႁိမ်ႁူင်ႇဢဝ်ဢုၵ်ႉၸႃႇပိူၼ်ႈၼၼ်ႉဢေႃႈ။ ၶဝ်ဢွၼ်ၵၼ်လူင်လိုမ်းပႅတ်ႈၵဝ်ယဝ်ႉ၊’” ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ။
“‘ပိူဝ်ႈဢၼ်ပဵၼ်ၸိူဝ်ႉၼင်ႇၼႆလႄႈၵဝ်တၵ်းၶႂ်ႈၸႃႉလႄႈၵဝ်ယိုၼ်းတႃမိုဝ်းၵဝ်ၵႃႈၼိူဝ်တၢင်းဢၼ်မႂ်းႁိမ်ႁူင်ႇၸူၼ်ဢဝ်၊ဢိၵ်ႇတင်းမႂ်းၶႃႈၽၼ်းဢဝ်ဢသၢၵ်ႈၵူၼ်းတၢႆၸိူဝ်းၼၼ်ႉဢေႃႈ။-
ၼႂ်းဝၼ်းဢၼ်ၵဝ်ၸီႇယၢင်ႇမႂ်းၼၼ်ႉမႂ်းထၢင်ႇဝႃႈၸႂ်မႂ်းတၵ်းႁတ်းႁၢၼ်ယူႇလႄႈမႂ်းတၵ်းမီးႁႅင်းဢၼ်ယုၵ်ႉမိုဝ်းမႂ်းလႆႈယူႇလူးၵွၼ်ႇႁိုဝ်း။ ၵဝ် ထႃႇဝရႃႉၽြႃး၊ လႆႈမီးဢမိင်ႉယဝ်ႉလႄႈတၵ်းႁဵတ်းၸွမ်းဢေႃႈ။-
ၵဝ်တၵ်းဢဝ်မႂ်းၸၢတ်ႇပိုၼ်ပႅတ်ႈၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းလႄႈႁႂ်ႈႁွတ်ႈထိုင်ၵႂႃႇၵူႈသိုင်ႇၵူႈမိူင်းဢေႃႈ။ ၵဝ်တၵ်းပႄႇၽဵဝ်ႈဢၼ်ဝူၺ်ႇဢၼ်ႁင်ႈမႂ်းပႅတ်ႈသေၵႃႈၼႂ်းမႂ်းဢေႃႈ။-
ၼင်ႇၼၼ်လႄႈၵူၼ်းတၢင်ႇၸိူဝ်ႉတၢင်ႇမဵဝ်းတၵ်းဢွၼ်ၵၼ်ႁဵတ်းဢမ်ႇရူဝ်ႇဢမ်ႇသေႇမႂ်းဢေႃႈ။ မႂ်းၸမ်ႉ၊တၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။ ၵူၼ်းမဵဝ်း ဢိသရေး၊ တင်းလၢႆပဵၼ်ဢၼ်ဢမ်ႇပွင်ႇလွင်ႈၵႃႈသင်တီႈၵဝ်ယဝ်ႉ။ ၶဝ်ပဵၼ်ၸိူဝ်ႉၼင်ႇဢၼ်ပဵၼ်ၶီႈပဵၼ်ဝၢၵ်ႇတွင်းလိူင်၊လဵၵ်းၽိူၵ်ႇ၊လဵၵ်း၊ၸိုၼ်းဢၼ်ၵိုတ်းၵျၢၼ်ႇဝႆႉလိုၼ်းသေၶႃႇဢဝ်ငိုၼ်းဢွၵ်ႇၵႃႈၼႂ်းတဝ်ၽႆးၼၼ်ႉယဝ်ႉ။-
ပိူဝ်ႈဢၼ်ပဵၼ်ၸိူဝ်ႉၼင်ႇၼႆလႄႈၵဝ်၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ၵွပ်ႈပိူဝ်ႈသူပဵၼ်ၶီႈပဵၼ်ဝၢၵ်ႇၵႂႃႇလႄႈၵဝ်တၵ်းႁႂ်ႈသူၸုတုမ်ၵၼ်ၵႃႈၼႂ်းဝဵင်း ယေႇရုသလႅမ်ႇ၊-
မိူၼ်ၸိူဝ်ႉၼင်ႇဢၼ်ဢဝ်ငိုၼ်း၊တွင်းလိူင်၊လဵၵ်း၊ၸိုၼ်းသႂ်ႇၶဝ်ႈၵႃႈၼႂ်းတဝ်ၽႆးၼၼ်ႉဢေႃႈ။ ၼင်ႇၼၼ်လႄႈႁႅင်းတေႃးသႃႉတၢင်းၸႂ်မႆႈၶႂ်ႈၸႃႉၵဝ်ၼၼ်ႉတၵ်းဢွင်ႇသူၸိူမ်ႈမိူၼ်ၸိူဝ်ႉၼင်ႇဢၼ်ၽႆးဢွင်ႇႁႂ်ႈငိုၼ်းၶမ်းၸိူမ်ႈၼၼ်ႉဢေႃႈ။-
ၸႂ်ႈတႄႉတႄႉဢေႃႈ။ ၵဝ်တၵ်းၸုသိမ်းဢဝ်သူဝႆႉၵႃႈၼႂ်းဝဵင်း ယေႇရုသလႅမ်ႇ၊ လႄႈၵဝ်တၵ်းပဝ်ႇၽႆးထူဝ်းသဝ်ႇၵႃႈတႂ်ႈသူဢွင်ႇႁႂ်ႈသူၸိူမ်ႈပႅတ်ႈလူၺ်ႈႁႅင်းတေႃးသႃႉၵဝ်ဢေႃႈ။-
သူတၵ်းလႆႈၶၢမ်ႇတၢင်းဢၼ်ဢွင်ႇၸိူမ်ႈၵႃႈၼႂ်းဝဵင်း ယေႇရုသလႅမ်ႇ၊ မိူၼ်ၵၼ်တင်းငိုၼ်းၶမ်းလႆႈၶၢမ်ႇတၢင်းဢၼ်ဢွင်ႇၸိူမ်ႈၵႃႈၼႂ်းတဝ်ၽႆးၼၼ်ႉလႄႈႁုလွင်ႈဢၼ်ၵဝ်၊ ထႃႇဝရႃႉၽြႃး ဢဝ်ႁႅင်းတေႃးသႃႉတင်းၸႂ်မႆႈၶႂ်ႈၸႃႉၵဝ်တူၵ်းႁွတ်ႈထိုင်ၵႃႈၼိူဝ်သူၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်ထႅင်ႈလႄႈဝႃႈၸမ်ႉ၊-
“လုၵ်ႈၵူၼ်း႟။ မႂ်းလၢတ်ႈတီႈၵူၼ်းမဵဝ်း ဢိသရေး ၊လႄႈဝႃႈ၊မိူင်းၼႆႉပဵၼ်မိူင်းဢၼ်ဢမ်ႇမူတ်းသႂ်၊မိူင်းဢၼ်ၽူၼ်ဢမ်ႇတူၵ်းၼႂ်းမိုဝ်ႉဝၼ်းဢၼ်တၢင်းမႆႈၸႂ်ၶႂ်ႈၸႃႉၵဝ်ဢွၵ်ႇၼၼ်ႉဢေႃႈ။-
ပရေႃးၽႅတ်ႈႁဵတ်းမုၵ်ႉႁဵတ်းၸုမ်းမိူၼ်ၸိူဝ်ႉၼင်ႇၽုင်သၢင်ႇသီႈဢၼ်ႁွင်ႉလႄႈႁႃၵိၼ်တူဝ်သတ်းလႂ်ၼၼ်ႉဢေႃႈ။ ၶဝ်ဢဝ်ဢသၢၵ်ႈၵူၼ်းတၢႆလႄႈသိမ်းဢဝ်ဢုၵ်ႉၸႃႇငိုၼ်းၶမ်းၵႃႈမီးတင်းသဵင်ႈတင်းလူင်ဢေႃႈ။ ၵွပ်ႈပိူဝ်ႈတၢင်းဢၼ်ၶဝ်ဢဝ်ဢသၢၵ်ႈၵူၼ်းတၢႆၼၼ်ႉလႄႈမီးမႄႈမၢႆႈၼမ်ၼႃႇဢေႃႈ။-
ယဵၸ်ႈပရေႃးႁဵၵ်ႈ မၼ်းတင်းလၢႆၵေႃႈ ဢွၼ်ၵၼ်ယႃႉတြႃးၵဝ်လႄႈႁႂ်ႈထႃႇၼႃႉတီႈမူတ်းၸၢင်ႇၵဝ်တင်းလၢႆၵူဝ်ႈၵိူၵ်ႇဢေႃႈ။ ၶဝ်ဢမ်ႇႁႂ်ႈလွင်ႈတၢင်းဢၼ်မူတ်းၸၢင်ႇလႂ်၊လွင်ႈတၢင်းဢၼ်ဢမ်ႇမူတ်းၸၢင်ႇလႂ်၊ပႅၵ်ႇပိူင်ႈၵၼ်လႄႈၶဝ်ဢမ်ႇသွၼ်ပၼ်ႁႂ်ႈၵူၼ်းတင်းလၢႆႁုလွင်ႈတၢင်းဢၼ်မူတ်းၸၢင်ႇလႂ်၊လွင်ႈတၢင်းဢၼ်ဢမ်ႇမူတ်းၸၢင်ႇလႂ်၊ပႅၵ်ႇပိူင်ႈၵၼ်ၸိူဝ်ႉၼင်ႇႁိုဝ်ၼၼ်ႉသေယဝ်ႉ၊ၶဝ်ဢွၼ်ၵၼ်ဝၢႆႇၼႃႈဝၢႆႇတႃၶဝ်ပႅတ်ႈသေဝၼ်းၵမ်သိၼ်ၼၼ်ႉဢေႃႈ။ ၵွပ်ႈပိူဝ်ႈၼႆလႄႈၵူၼ်းမဵဝ်း ဢိသရေး၊ တင်းလၢႆႁဵတ်းဢမ်ႇရူဝ်ႇဢမ်ႇသေႇတီႈၵဝ်ဢေႃႈ။-
မူးမၢတ်ႈၽွင်းမိူင်းမၼ်းတင်းလၢႆၵေႃႈပဵၼ်ၸိူဝ်ႉၼင်ႇမႃၼႆးဢၼ်ၵိၼ်ၶူပ်းတူဝ်သတ်းတင်းလၢႆလႄႈၶဝ်ဢွၼ်ၵၼ်ၶႃႈၽၼ်းဢဝ်ဢသၢၵ်ႈၵူၼ်းတၢႆပုၼ်ႈလွင်ႈၼင်ႇႁိုဝ်ၶဝ်တၵ်းမၢၵ်ႈမီးလီပဵၼ်ၼၼ်ႉဢေႃႈ။-
ပရေႃးၽႅတ်ႈ မၼ်းတင်းလၢႆၵေႃႈႁူမ်ႇသုမ်ႇဢပျတ်ႈတင်းလၢႆဝႆႉမိူၼ်ၸိူဝ်ႉၼင်ႇဢၼ်ပိူၼ်ႈဢဝ်ထုၼ်ၽိူၵ်ႇတႃးလႄႈႁၢင်ႈၶိူင်ႈၽႃဢုတ်ႇၼၼ်ႉဢေႃႈ။ ၶဝ်ႁၼ်ပျႃႇတိၵ်ႈရူႇပႃႇရူင်ႇဢၼ်ဢမ်ႇၸိုဝ်ႈဢမ်ႇၸႂ်ႈလႄႈႁေႃးလၢတ်ႈၵႂၢမ်းမုသႃႇဢေႃႈ။ ပိၵ်ႉသမ်ႉ ထႃႇဝရႃႉၽြႃး၊ ယင်းဢမ်ႇမီးဢမိင်ႉသေၵေႃႈၶဝ်လၢတ်ႈဝႃႈ၊ ‘ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး မီးဢမိင်ႉဢေႃႈ၊’ ဝႃႈၼင်ႇၼႆဢေႃႈ။-
ၵူၼ်းဝၢၼ်ႈၵူၼ်းမိူင်းမၼ်းတင်းလၢႆၵေႃႈဢွၼ်ၵၼ်ႁဵတ်းတၢင်းဢၼ်ၼိၵ်ႈၸၢၵ်ႈငႅၼ်းသႄး၊တၢင်းဢၼ်တိုၵ်းဢဝ်ၸူၼ်ဢဝ်လႄႈတဵၵ်းၼႅၼ်ႉၵႅၼ်ႉၶေႃးႁဵတ်းႁၢႆႉတီႈၶဝ်ၸိူဝ်းဢၼ်ယၢၵ်ႈဢၼ်ၽၢၼ်၊တီႈၶဝ်ၸိူဝ်းဢၼ်ၸုတ်ႈဢၼ်လုတ်ႈလႄႈႁဵတ်းတၢင်းဢၼ်ဢမ်ႇတြႃးတီႈၵူၼ်းတၢင်ႇၸိူဝ်ႉတၢင်ႇမဵဝ်းဢေႃႈ။-
ၵဝ်သွၵ်ႈႁႃၵေႃႉဢၼ်တၵ်းၶိုၼ်းမႄးၵုမ်းမႄးႁဵတ်းလမ်းဝဵင်း၊ဢၼ်တၵ်းၸုၵ်းယူႇၵႃႈၼႂ်းႁူးၵူင်ပွင်ႇလမ်းဝဵင်းသေယဝ်ႉ၊ႁႄႉၶႅၼ်ဝဵင်းလႄႈဢမ်ႇႁႂ်ႈၵဝ်လႆႈယႃႉၽဵဝ်ႈမိူင်းၼၼ်ႉပႅတ်ႈသေၵေႃႈ၊ၵဝ်ဢမ်ႇထူပ်းဢမ်ႇႁၼ်သေၵေႃႉသေၵူၼ်း။-
ပိူဝ်ႈဢၼ်ပဵၼ်ၼင်ႇၼၼ်လႄႈၵဝ်ပွႆႇတေႃးသႃႉတၢင်းၸႂ်မႆႈၶႂ်ႈၸႃႉၵဝ်ဢၼ်မိူၼ်ၸိူဝ်ႉၼင်ႇၽႆးၼၼ်ႉတူၵ်းႁွတ်ႈၵႃႈၼိူဝ်ၶဝ်၊ၵွပ်ႈပိူဝ်ႈတၢင်းၵမ်တၢင်းၵျၢင်ႉၶဝ်လႄႈၵဝ်တၵ်းယႃႉၽဵဝ်ႈၶဝ်ဢေႃႈ။ ဝႃႈၼင်ႇၼႆ၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉယဝ်ႉ၊ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။ မိူဝ်ႈၵွၼ်ႇဢွၼ်တၢင်းၼၼ်ႉမီးမႄႈယိင်းသွင်ၵေႃႉပီႈၼွင်ႉဢေႃႈ။-
မိူဝ်ႈဢၼ်ဢသၢၵ်ႈၶဝ်ယင်းလဵၵ်ႉယင်းဢွၼ်ႇၼၼ်ႉၶဝ်ယူႇၵႃႈၼႂ်းမိူင်း ဢေးၵျိပ်ႉ၊ ပုၼ်ႉလႄႈဢွၼ်ၵၼ်ႁဵတ်းမေႇထုင်ႇဢၼ်ဢမ်ႇတြႃးလႄႈသၢဝ်ၵၼ်ႇၺႃႇၶဝ်ၼၼ်ႉလုယဝ်ႉဢေႃႈ။ ၼင်ႇၼၼ်လႄႈၶဝ်ပဵၼ်မႄႈမွၵ်ႇယႃႈၵႃႈၼႂ်းမိူင်းၼၼ်ႉယဝ်ႉ။-
ၵေႃႉပီႈၼၢင်းၼၼ်ႉလႆႈၸိုဝ်ႈ ဢႁေႃႇလႃႉ၊ လႄႈ (ဢၼ်ၶႂ်ႈဝႃႈ၊ သမႃႇရိ၊ ) လႄႈ ၵေႃႉၼွင်ႉယိင်းၸမ်ႉ၊လႆႈၸိုဝ်ႈ ဢႁေႃႇလိပႃႉ၊ (ဢၼ်ၶႂ်ႈဝႃႈ၊ ယေႇရုသလႅမ်ႇ၊ ) ဢေႃႈ။ ၵဝ်ဢဝ်တင်းသွင်ပီႈၼွင်ႉပဵၼ်မေးၵဝ်လႄႈၶဝ်ၵေႃႈဢွၼ်ၵၼ်ၵိူတ်ႇလဵင်ႉလုၵ်ႈၸၢႆးလုၵ်ႈယိင်းဢေႃႈ။-
ဢႁေႃႇလႃႉ၊ ပိၵ်ႉသမ်ႉမၼ်းပဵၼ်မေးၵဝ်သေၵေႃႈမၼ်းယင်းတိုၵ်ႉသိုပ်ႇႁဵတ်းမႄႈမွၵ်ႇယႃႈယူႇလႄႈမီးၸႂ်ၸပ်းၸႂ်ၸွႆးၸုမၼ်းတင်းလၢႆဢၼ်ဝႃႈ၊ၵူၼ်းမဵဝ်း ဢႃႇသီးရီးယႃး၊ ၸိူဝ်းၼၼ်ႉဢေႃႈ။-
ၶဝ်ၼၼ်ႉပဵၼ်ၶုၼ်သိုၵ်းႁၢၼ်ဢၼ်ၼုင်ႈၶူဝ်းသွမ်ႇတင်းမူတ်းၼၼ်ႉလႄႈပဵၼ်ၵူၼ်းယႂ်ႇၵူၼ်းလူင်၊ပဵၼ်ၶုၼ်ဢၼ်ဢရႃႇသုင်လွၼ်ႉလွၼ်ႉ၊ပဵၼ်ၶုၼ်သိုၵ်းႁၢၼ်တပ်ႉၶီႇမႃႉၵူၺ်းၵူၺ်းလႄႈပဵၼ်ၵူၼ်းဢၼ်ယင်းၼုမ်ႇယင်းၵမ်ဢၼ်လီႁၵ်ႉလီပႅင်းၼၼ်ႉဢေႃႈ။-
မၼ်းၼၼ်ႉႁဵတ်းမေႇထုင်ႇဢၼ်ဢမ်ႇတြႃးလူၺ်ႈၵၼ်တင်းၶဝ်ဢၼ်ပဵၼ်၊ၶုၼ်ဢရႃႇသိမဵဝ်း ဢႃႇသီးရီးယႃး ၊တင်းလၢႆၼၼ်ႉလႄႈႁႂ်ႈတူဝ်မၼ်းၵူဝ်ႈၵိူၵ်ႇလူၺ်ႈၵၼ်တင်းၶဝ်ၸိူဝ်းဢၼ်မၼ်းၸႂ်ၸပ်းၸႂ်ၸွႆးၼၼ်ႉဢိၵ်ႇတင်းႁုၼ်ႇႁၢင်ႈသၢင်းထုဢၼ်ၶဝ်ဝႆႈၼၼ်ႉဢေႃႈ။-
မၼ်းယင်းတိုၵ်ႉသိုပ်ႇႁဵတ်းမႄႈမွၵ်ႇယႃႈယူႇမိူၼ်ၸိူဝ်ႉၼင်ႇဢၼ်မၼ်းယၢမ်ႈႁဵတ်းမႃးၵႃႈၼႂ်းမိူင်း ဢေးၵျိပ်ႉ၊ တီႈဢၼ်ၵၼ်ႇၺႃႇသၢဝ်မၼ်းလႆႈလုၼၼ်ႉဢေႃႈ။ ၸဵမ်မိူဝ်ႈဢၼ်မၼ်းယင်းပဵၼ်သၢဝ်လဵၵ်ႉသၢဝ်ဢွၼ်ႇၼၼ်ႉ၊ၵူၼ်းၸၢႆးတင်းလၢႆဢွၼ်ၵၼ်ၶဝ်ႈၸူးၼွၼ်းလူၺ်ႈၵၼ်တင်းမၼ်းလႄႈႁဵတ်းမေႇထုင်ႇတီႈမၼ်းမိူၼ်ၸိူဝ်ႉၼင်ႇမၼ်းပဵၼ်မႄႈမွၵ်ႇယႃႈၼၼ်ႉဢေႃႈ။-
မိူဝ်ႈဢၼ်ပဵၼ်ၸိူဝ်ႉၼင်ႇၼၼ်လႄႈၵဝ်ဢဝ်မၼ်းဢၢပ်ႈပၼ်ၵႃႈၼႂ်းမိုဝ်းၸုမၼ်းမဵဝ်း ဢႃႇသီးရီးယႃး ဢၼ်မၼ်းၵျိူၵ်ႈၸႂ်ထုၵ်ႇၸႂ်ၼႃႇလူင်လၢင်ၼၼ်ႉဢေႃႈ။-
ၶဝ်ၼၼ်ႉဢွၼ်ၵၼ်ထွတ်ႇၶူဝ်းၼုင်ႈမၼ်းႁႂ်ႈယူႇတူဝ်ပူၺ်သေယဝ်ႉ၊တိဢဝ်လုၵ်ႈၸၢႆးလုၵ်ႈယိင်းမၼ်းၵႂႃႇလႄႈဢဝ်မၼ်းတၢႆလူၺ်ႈလၢပ်ႇသေဢေႃႈ။ ၼင်ႇၼၼ်လႄႈမႄႈယိင်းဢၼ်မီးၵူႈတီႈၵူႈလႅၼ်ဢွၼ်ၵၼ်ၶႃႉၸိုဝ်ႈၶၢႆသဵင်မၼ်းလူၺ်ႈလွင်ႈတၢင်းဢၼ်မၼ်းႁဵတ်းပူၼ်ႉမႃးမိူဝ်ႈၵွၼ်ႇဢွၼ်ၼၼ်ႉၼၼ်ႉဢေႃႈ။
“ပိၵ်ႉသမ်ႉၼွင်ႉယိင်းမၼ်း ဢႁေႃႇလိပႃႉ၊ ႁၼ်လွင်ႈတၢင်းၼၼ်ႉသေၵေႃႈယဵင်ႈၶႅၼ်းမီးၸႂ်ဢၼ်ၸပ်းဢၼ်ၸွႆးႁႅင်းၼႃႇ၊ဢိၵ်ႇတင်းယဵင်ႈၶႅၼ်းႁဵတ်းမႄႈမွၵ်ႇယႃႈလိူဝ်တွၼ်းၼႃႇသေပီႈၼၢင်းမၼ်း ဢႁေႃႇလႃႉ၊ ယၢမ်ႈႁဵတ်းမႃးၼၼ်ႉလူးၵွၼ်ႇဢေႃႈ။-
မၼ်းၵေႃႈမီးၸႂ်ဢၼ်ၸပ်းၸွႆးၵူၼ်းယႂ်ႇၵူၼ်းလူင်၊ၶုၼ်ဢၼ်ပွင်ၵၢၼ်ၵူၼ်းမဵဝ်း ဢႃႇသီးရီးယႃး၊ ၶဝ်ဢၼ်ပဵၼ်၊ၶုၼ်သိုၵ်းႁၢၼ်ဢၼ်ၼုင်ႈၶူဝ်းသိုၵ်းတဵမ်ထူၼ်ႈ၊ဢိၵ်ႇတင်းႁူဝ်ႁၢၼ်တပ်ႉၶီႇမႃႉၸိူဝ်းဢၼ်ပဵၼ်ၵူၼ်းဢၼ်ယင်းၼုမ်ႇယင်းၵမ်ဢၼ်လီႁၵ်ႉလီပႅင်းၼၼ်ႉဢေႃႈ။-
ၵဝ်လႆႈႁၼ်တၢင်းဢၼ်ၶဝ်ပီႈၼွင်ႉႁဵတ်းမေႇထုင်ႇဢၼ်ဢမ်ႇတြႃးဢၼ်ႁၢႆႉၼႃႇၼၼ်ႉမိူၼ်ၵၼ်ဢေႃႈ။
“မၼ်းယဵင်ႈၶႅၼ်းတူၵ်းၸူမ်ၵႂႃႇၵႃႈၼႂ်းၵႃႇမႃႉႁႅင်းၼႃႇထႅင်ႈတိၵ်းတိၵ်းဢေႃႈ။ မၼ်းႁၼ်ႁၢင်ႈၵူၼ်းၸၢႆးဢၼ်ပိူၼ်ႈတႅမ်ႈသႂ်ႇဝႆႉၵႃႈတီႈၽႃဢုတ်ႇ၊ဢၼ်ပဵၼ်ပုင်ႇႁၢင်ႈၵူၼ်းမိူင်း ပႃႇပုလုၼ်ႇ၊ ဢၼ်မီးဢရႃႇသုင်ဢၼ်ပိူၼ်ႈဢဝ်ႁၢၼ်လႅင်တႅမ်ႈသႂ်ႇဝႆႉၼၼ်ႉ၊-
ဢဝ်သၢႆၼင်ႁတ်ႉဢႅဝ်ယူႇ၊ၶဵၼ်းႁူဝ်ဢၼ်ယွမ်ႉဢၼ်မီးမွၵ်ႇမီးမႂ်ဝႆႉယူႇၸိူဝ်းၼၼ်ႉဢေႃႈ။-
မိူဝ်ႈဢၼ်မၼ်းႁၼ်ၶဝ်ၼၼ်ႉၸိုင်၊မၼ်းမီးၸႂ်ဢၼ်ၸပ်းဢၼ်ၸွႆးၶဝ်လႄႈပွႆႇၸႂ်ႉၵူၼ်းဢွၼ်ႇတင်းလၢႆၵႂႃႇၸူးတီႈၶဝ်ၵႃႈၼႂ်းမိူင်း ပႃႇပုလုၼ်ႇ၊ ပုၼ်ႉဢေႃႈ။-
ၵူၼ်းဝဵင်း ပႃႇပုလုၼ်ႇ၊ ၸိူဝ်းၼၼ်ႉဢွၼ်ၵၼ်မႃးၸူးမၼ်းတီႈၵူႇၼွၼ်းမၼ်းဢၼ်ႁဵတ်းမေႇထုင်ႇၼၼ်ႉလႄႈႁဵတ်းႁႂ်ႈမၼ်းၵူဝ်ႈၵိူၵ်ႇလူၺ်ႈႁဵတ်းမေႇထုင်ႇဢၼ်ဢမ်ႇတြႃးၼၼ်ႉဢေႃႈ။ မၼ်းၵေႃႈၶၢမ်ႇဢဝ်တၢင်းဢၼ်ၵူဝ်ႈၵိူၵ်ႇယူႇတေႃႇထိုင်ႁွတ်ႈထၢၼ်ႈပေႃးမိူဝ်ႇပေႃးၸၢၼ်ႈၶဝ်ၼၼ်ႉဢေႃႈ။-
မၼ်းၽုၺ်ႇပိုတ်ႇၼႄပျႃးလွင်ႈဢၼ်မၼ်းႁဵတ်းမေႇထုင်ႇဢၼ်ဢမ်ႇတြႃးၼၼ်ႉဢိၵ်ႇတင်းလွင်ႈဢၼ်မၼ်းယူႇတူဝ်ပူၺ်ၼၼ်ႉလႄႈၵဝ်မိူဝ်ႇၸၢၼ်ႈမၼ်းၼႃႇလူင်လၢင်မိူၼ်ၸိူဝ်ႉၼင်ႇဢၼ်ၵဝ်မိူဝ်ႇၸၢၼ်ႈပီႈၼၢင်းမၼ်းၼၼ်ႉဢေႃႈ။-
မၼ်းယဵင်ႈၶႅၼ်းႁဵတ်းၵၢၼ်မႄႈမွၵ်ႇယႃႈလိူဝ်တွၼ်းၼႃႇသေမိူဝ်ႈဢွၼ်တၢင်းၼၼ်ႉလႄႈ၊မၼ်းႁဵတ်းမေႇထုင်ႇဢၼ်ဢမ်ႇတြႃးမိူၼ်ၸိူဝ်ႉၼင်ႇမိူဝ်ႈဢၼ်မၼ်းယင်းပဵၼ်သၢဝ် မိူဝ်ႈဢၼ်မၼ်းယင်းယူႇတီႈမိူင်း ဢေးၵျိပ်ႉ၊ ၼၼ်ႉဢေႃႈ။-
မၼ်းၸႂ်ၸပ်းၸႂ်ၸွႆးၸုမၼ်းလူၺ်ႈၸႂ်ၵႃႇမႃႉဢၼ်ႁႅင်းယႂ်ႇ၊ဢၢင်ႇၵႃႇယႂ်ႇမိူၼ်မႃႉလီႈလႄႈမီးၼမ်ႉသုၵ်ႉမိူၼ်ၸိူဝ်ႉၼင်ႇၼမ်ႉသုၵ်ႉမႃႉၼၼ်ႉလူင်ပႄႇ။-”
( ဢႁေႃႇလိပႃႉ၊ ႟။ မႂ်းယင်းတိုၵ်ႉမီးဢလူဝ်ႇၶႂ်ႈႁဵတ်းမေႇထုင်ႇဢၼ်ဢမ်ႇတြႃးဢၼ်မႂ်းႁဵတ်းဢပျတ်ႈယၢမ်းမိူဝ်ႈဢၼ်မႂ်းပဵၼ်သၢဝ်ယူႇၵႃႈၼႂ်းမိူင်း ဢေးၵျိပ်ႉ၊ တီႈဢၼ်ၵူၼ်းၸၢႆးတင်းလၢႆပိၼ်ႇၼႃႈၵၼ်သေလႄႈမႃးၼွၼ်ႉၼႅၼ်ႉႁူဝ်ၼူမ်းမႂ်းယူႇ၊ၽၼ်ႉၼူတ်ႈၼူမ်းသၢဝ်မႂ်းယူႇၼၼ်ႉၶိူဝ်းၶိူဝ်းယႂ်းယႂ်းယူႇႁိုဝ်း။)
“ၵဝ်၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉတီႈမႂ်းၸမ်ႉ၊ ဢႁေႃႇလိပႃႉ၊ ႟။ မႂ်းႁိူဝ်ႉၼူၼ်းလူၺ်ႈၸုမႂ်းၸိူဝ်းၼၼ်ႉယဝ်ႉ။ ၵူၺ်းၵႃႈ၊ၵဝ်တၵ်းႁႂ်ႈၶဝ်ၸႂ်မႆႈၶႂ်ႈၸႃႉတေႃႇမႂ်းလႄႈတၵ်းဢဝ်ၶဝ်မႃးလွမ်ႉႁွပ်ႈမႂ်းဢေႃႈ။-
ၵဝ်တၵ်းဢဝ်ၵူၼ်းမိူင်း ပႃႇပုလုၼ်ႇ ဢိၵ်ႇတင်းၵူၼ်း ၶႃႇလတေး၊ တင်းသဵင်ႈတင်းလူင်ဢၼ်ပဵၼ်ၵူၼ်းမဵဝ်း ၽိၵွတ်ႉ၊ ၵူၼ်းမဵဝ်း သူဝ်းဢႃႇ ၵူၼ်းမဵဝ်း ၵူဝ်းဢႃႇ၊ ဢိၵ်ႇတင်းၵူၼ်းမဵဝ်း ဢႃႇသီးရီးယႃး ၊တင်းသဵင်ႈတင်းလူင်ၸိူဝ်းဢၼ်ပဵၼ်ၵူၼ်းယႂ်ႇၵူၼ်းလူင်၊ၶုၼ်ဢၼ်ပွင်ၵၢၼ်ဢၼ်ယင်းၼုမ်ႇယင်းၵမ်လႄႈလီႁၵ်ႉလီပႅင်းၸိူဝ်းၼၼ်ႉ၊ဢိၵ်ႇတင်းၶုၼ်သိုၵ်းႁူဝ်ႁၢၼ်တင်းလၢႆတင်းၶုၼ်သိုၵ်းတပ်ႉဢၼ်ၶီႇမႃႉတင်းလၢႆၸုတုမ်ၵၼ်မႃးတီႈမႂ်းဢေႃႈ။-
ၶဝ်ၼၼ်ႉတၵ်းဢွၼ်ၵၼ်ပႃးဢဝ်တပ်ႉသိုၵ်းလူင်ဢၼ်မီးလၢၵ်ႈၼၢၵ်ႈတိုၵ်းသိုၵ်း၊ဢိၵ်ႇတင်းလေႃႉမႃႉသိုၵ်းမႃးတိုၵ်းတေႃးၵၼ်တင်းမႂ်းဢေႃႈ။ ဢွၼ်ၵၼ်ပႃးဢဝ်ၶိူင်ႈႁႄႉလၢၵ်ႈၼၢၵ်ႈၶိူင်ႈႁႄႉလၢပ်ႇ၊ဢိၵ်ႇတင်းမွၵ်ႇႁူဝ်လဵၵ်းလႂ်သေလႄႈလွမ်ႉႁွပ်ႈမႂ်းဢေႃႈ။ ၵဝ်တၵ်းဢဝ်မႂ်းဢၢပ်ႈပၼ်ၵႃႈၼႂ်းမိုဝ်းၶဝ်လႄႈ၊ၶဝ်ၵေႃႈတၵ်းဢဝ်တင်းတြႃးဢုပတေႇၶဝ်လႄႈၸီႇယၢင်ႇတြႃးတီႈမႂ်းဢေႃႈ။-
ၵွပ်ႈပိူဝ်ႈဢၼ်ၵဝ်ၸႂ်မႆႈၶႂ်ႈၸႃႉမႂ်းၼၼ်ႉလႄႈ၊ၵဝ်ၸႂ်ႉႁႂ်ႈၶဝ်ႁဵတ်းပႄႉႁဵတ်းၼႅင်ႇတီႈမႂ်းလူၺ်ႈၸႂ်ဢၼ်ႁၢဝ်ႈဢၼ်ၵျၢမ်းၼႃႇလူင်လၢင်ၼၼ်ႉဢေႃႈ။ ၶဝ်တၵ်းပၢတ်ႇၶူႈလင်ပၢတ်ႇႁူမႂ်းလႄႈတၵ်းၶႃႈၽၼ်းဢဝ်တၢႆလုၵ်ႈလၢင်းမႂ်းဢေႃႈ။ ၸႂ်ႈတႄႉတႄႉဢေႃႈ။ ၶဝ်တၵ်းဢဝ်လုၵ်ႈၸၢႆးလုၵ်ႈယိင်းမႂ်း၊ဢိၵ်ႇတင်းၸိူဝ်းဢၼ်ၵိုတ်းၵျၢၼ်ႇယူႇတင်းလၢႆသေၵႃႈတီႈမႂ်းၵႂႃႇလႄႈၽဝ်ၶဝ်ပႅတ်ႈတင်းလိပ်းလူၺ်ႈၽႆးဢေႃႈ။-
ၶဝ်တၵ်းဢွၼ်ၵၼ်ထွတ်ႇဢဝ်ၶူဝ်းၼုင်ႈမႂ်းလႄႈသိမ်းဢဝ်ၶူဝ်းသႅင်ငိုၼ်းၶမ်းမႂ်းဢေႃႈ။-
ၼင်ႇၼၼ်လႄႈ၊ၵဝ်တၵ်းႁႂ်ႈၸႂ်ဢၼ်ၸပ်းဢၼ်ၸွႆးဢၼ်ႁၢႆႉယုတ်ႈဢၼ်မႂ်းႁဵတ်း၊ဢိၵ်ႇတင်းမေႇထုင်ႇဢၼ်ဢမ်ႇတြႃးဢၼ်မႂ်းဢဝ်ၵႃႈတီႈမိူင်း ဢေးၵျိပ်ႉ၊ မႃးၼၼ်ႉၵိုတ်းၵႂႃႇသေ၊ၵမ်းလိုၼ်းမႂ်းတေဢမ်ႇဢဝ်တႃမႂ်းမုင်ႈတူၺ်းႁုၼ်ႇႁၢင်ႈသၢင်းထုၶဝ်၊ဢမ်ႇၶုၵ်းၸႂ်လႆႈၶႆႈၸႂ်ထူပ်းမိူင်း ဢေးၵျိပ်ႉ၊ ထႅင်ႈယဝ်ႉဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵဝ်တၵ်းဢဝ်မႂ်းဢၢပ်ႈပၼ်ၵႃႈၼႂ်းမိုဝ်းၵေႃႉဢၼ်မႂ်းၸင်းလႄႈမႂ်းမိူဝ်ႇမႂ်းၸၢၼ်ႈၼၼ်ႉဢေႃႈ။-
ၵွပ်ႈပိူဝ်ႈဢၼ်ၶဝ်ၵေႃႈၸင်းမႂ်းလႄႈသိမ်းဢဝ်ဢုၵ်ႉၸႃႇမႂ်းၵႃႈဢၼ်မႂ်းၶတ်းၸႂ်ၵျူဝ်းၸႃးလႄႈႁွမ်ဝႆႉသိမ်းဝႆႉၼၼ်ႉၵႂႃႇသေယဝ်ႉ။ ၶဝ်တၵ်းပွႆႇပႅတ်ႈႁႂ်ႈမႂ်းယူႇတူဝ်ပူၺ်ယူႇ၊ပေႃႇဢွၵ်ႇထၢင်ႇသႃးယူႇမိူၼ်ၸိူဝ်ႉၼင်ႇမႄႈမွၵ်ႇယႃႈဢေႃႈ။ တၢင်းဢၼ်ၸႂ်ၵိလေႇသႃႇမႂ်းႁႅင်းယႂ်ႇ၊ဢိၵ်ႇတင်းတၢင်းဢၼ်မႂ်းႁဵတ်းမႄႈမွၵ်ႇယႃႈၼၼ်ႉ၊-
လႆႈဢဝ်လွင်ႈၸိူဝ်းၼႆႉမႃးႁွတ်ႈၵႃႈၼိူဝ်မႂ်းယဝ်ႉ။ မႂ်းႁဵတ်းမႄႈမွၵ်ႇယႃႈပုၼ်ႈၵူၼ်းမဵဝ်းတင်းလၢႆလႄႈႁဵတ်းႁႂ်ႈတူဝ်မႂ်းၵူဝ်ႈၵိူၵ်ႇလူၺ်ႈၵၼ်တင်းႁုၼ်ႇႁၢင်ႈသၢင်းထုၸိူဝ်းၼၼ်ႉဢေႃႈ။-
ၵွပ်ႈပိူဝ်ႈဢၼ်မႂ်းၸွမ်းသဵၼ်ႈတၢင်းဢၼ်ပီႈၼၢင်းမႂ်းႁဵတ်းၼၼ်ႉလႄႈၶဝ်တၵ်းဢဝ်ၵွၵ်းဢၼ်ၸီႇယၢင်ႇပၼ်တၢမ်ႇဢၼ်မၼ်းၵိၼ်ၼၼ်ႉတိုၵ်းႁႂ်ႈမႂ်းၵိၼ်ဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉၸမ်ႉ၊ “မႂ်းတၵ်းလႆႈဢိုၵ်ႉၵိၼ်ၵွၵ်းဢၼ်ပီႈၼၢင်းမႂ်းၵိၼ် ၵွၵ်းဢၼ်လိုၵ်ႉလႄႈၵႂၢင်ႈၼႃႇၼၼ်ႉဢေႃႈ။ ပိူၼ်ႈတၵ်းႁဵတ်းပျၢၵ်ႈမႂ်းလႄႈသႄႉသွမ်းမႂ်းဢေႃႈ။ ၵွၵ်းၼၼ်ႉပဵၼ်ဢၼ်တဵမ်ဝႆႉယူႇဢေႃႈ။
မႂ်းတၵ်းမီးတဵမ်ဝႆႉတၢင်းဢၼ်မဝ်းလဝ်ႈမဝ်းၵမ်လႄႈတၢင်းဢၼ်ယၢပ်ႇၸႂ်မႆႈၸႂ်ဢေႃႈ။ ပဵၼ်ၵွၵ်းဢၼ်ၸၢင်ႈႁဵတ်းႁႂ်ႈငဝ်ငိူဝ်ႈၵႂင်ၸႂ်လႄႈပဵၼ်ဢၼ်သဵတ်ႇဢၼ်ငႅဝ်ၵႂႃႇၼၼ်ႉ၊ ပဵၼ်ၵွၵ်းဢၼ်ပီႈၼၢင်းမႂ်း သမႃႇရိ၊ ဢိုၵ်ႉၵိၼ်ၼၼ်ႉဢေႃႈ။
မႂ်းတၵ်းသူတ်ႉဢိုၵ်ႉၵိၼ်တေႃႇပေႃးမူတ်းသေယဝ်ႉ၊ ဢဝ်တင်းၽၢၵ်ႇၵွၵ်းၼၼ်ႉပၢတ်ႇထိူဝ် ၼူမ်းမႂ်းဢေႃႈ။ ၵဝ်လၢတ်ႈယဝ်ႉ၊” ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ။
ပိူဝ်ႈၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး မီးဢမိင်ႉၸမ်ႉ၊ “ၵွပ်ႈပိူဝ်ႈဢၼ်မႂ်းလူင်လိုမ်းၵဝ်၊ဢဝ်ၵဝ်ထိမ်ႈပႅတ်ႈၽၢႆႇတၢင်းလင်မႂ်းၼၼ်ႉလႄႈမႂ်းတၵ်းလႆႈႁပ်ႉၶၢမ်ႇဢဝ်တၢမ်ႇ ၵွပ်ႈပိူဝ်ႈမႂ်းမီးၸႂ်ၵိလေႇသႃႇဢၼ်ႁႅင်းယႂ်ႇလႄႈႁဵတ်းမႄႈမွၵ်ႇယႃႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉတီႈၵဝ်လႄႈဝႃႈၸမ်ႉ၊ “လုၵ်ႈၵူၼ်း႟။ မႂ်းႁႅၼ်းဝႆႉတႃႇတေၸႅတ်ႈသေးၸီႇယၢင်ႇတြႃးတီႈ ဢႁေႃႇလႃႉ၊ တင်း ဢႁေႃႇလိပႃႉ ယဝ်ႉႁိုဝ်း။ ၸွႆးတၢင်ႇဢမုလွင်ႈတၢင်းဢၼ်လီႁင်ႈဢဵတ်ႇသဵတ်ႇဢၼ်ၶဝ်ႁဵတ်းၸိူဝ်းၼၼ်ႉတႃႉ။-
ၶဝ်ၼၼ်ႉဢွၼ်ၵၼ်ၽိတ်းပိူင်ႈၵႃႇမေႇသု၊ဢိၵ်ႇတင်းဢဝ်ဢသၢၵ်ႈၵူၼ်းတၢႆယဝ်ႉ။ ၶဝ်ဢွၼ်ၵၼ်ၽိတ်းပိူင်ႈၵႃႇမေႇသုလူၺ်ႈၵၼ်တင်းႁုၼ်ႇႁၢင်ႈသၢင်းထုၶဝ်ယဝ်ႉ။ လုၵ်ႈၸၢႆးဢၼ်ၶဝ်ၵိူတ်ႇမႃးပုၼ်ႈၵဝ်ၸိူဝ်းၼၼ်ႉၵေႃႈ ၶဝ်ဢွၼ်ၵၼ်ဢဝ်တၢႆလႄႈဢဝ်ႁဵတ်းၶိူင်ႈတၢင်းလူႇဢၼ်ၽဝ်ၽႆးပုၼ်ႈႁုၼ်ႇႁၢင်ႈသၢင်းထုတၵ်းၵိၼ်ၼၼ်ႉယဝ်ႉ။-
ႁဵတ်းၸိူဝ်ႉၼင်ႇၼႆၵူၺ်းဢမ်ႇၵႃး၊ၶဝ်ဢွၼ်ၵၼ်ႁဵတ်းႁႂ်ႈၵျွင်းပိၵ်ႈမၢၼ်ႇၵဝ်ၵူဝ်ႈၵိူၵ်ႇလႄႈယႃႉပႅတ်ႈဝၼ်းၵမ်သိၼ်ဢၼ်ၵဝ်တႄႇတင်ႈဝႆႉၼၼ်ႉယဝ်ႉ။-
ၼႂ်းမိုဝ်ႉဝၼ်းဢၼ်ၶဝ်ၶႃႈၽၼ်းတၢႆလုၵ်ႈလၢင်းၵဝ်သေလႄႈဢဝ်ႁဵတ်းပဵၼ်ၶိူင်ႈတၢင်းလူႇဢၼ်ၽဝ်ၽႆးတီႈႁုၼ်ႇႁၢင်ႈသၢင်းထုၼၼ်ႉယဝ်ႉတူဝ်ႈသေယဝ်ႉ၊ၶဝ်ဢွၼ်ၵၼ်မႃးၵႃႈတီႈၵျွင်းပိၵ်ႈမၢၼ်ႇၵဝ်သေလႄႈႁဵတ်းႁႂ်ႈၵူဝ်ႈၵိူၵ်ႇဢေႃႈ။
“ၶဝ်ၵမ်းၵမ်းပွႆႇၸႂ်ႉတမၢၼ်ႇၵႂႃႇႁွင်ႉဢဝ်ၵူၼ်းၸၢႆးၵႃႈတီႈဢၼ်ၵႆလႄႈၵူၼ်းၸိူဝ်းၼၼ်ႉဢွၼ်ၵၼ်မႃးဢေႃႈ။ ၶဝ်သွင်ပီႈၼွင်ႉၼၼ်ႉဢၢပ်ႇၼမ်ႉသီတူဝ်ယဝ်ႉ၊တႅမ်ႈၶူၼ်တႃလႄႈႁၢင်ႈၶိူင်ႈလူၺ်ႈၶူဝ်းသႅင်ၶူဝ်းၶမ်းသေယဝ်ႉ၊-
ၼင်ႈယူႇၵႃႈၼိူဝ်ၵူႇဢၼ်ႁၢင်ႈလီၼႃႇလႄႈၵႃႈတီႈၽၢႆႇၼႃႈၶဝ်မီးၽိူၼ်လုၵ်ႈၼိုင်ႈဢဝ်ၼၢမ်ႇသႃႇတင်းၼမ်ႉမၼ်းသၢၼ်ႇလုၼ်ႇဢၼ်ၵဝ်ပၼ်တီႈၶဝ်ၼၼ်ႉတမ်းဝႆႉဝၢင်းဝႆႉဢေႃႈ။-
လႆႈငိၼ်းသဵင်ႁုၼ်ႈသဵင်မေႃးဢၼ်မုၵ်ႉၵူၼ်းၸိူဝ်းၵူၼ်းမူၼ်ႈပျေႃႇလူၺ်ႈၵၼ်တင်းၶဝ်ပီႈၼွင်ႉ၊ၶဝ်ၸိူဝ်းဢၼ်မဝ်းလဝ်ႈဢၼ်လုၵ်ႉသေၵႃႈတီႈထိူၼ်ႇမႃးၸိူဝ်းၼၼ်ႉဢဝ်ဝႅၼ်တိုဝ်းပၼ်တီႈမိုဝ်းၶဝ်လႄႈဢဝ်သရၽူႇသုပ်းပၼ်တီႈႁူဝ်ၶဝ်သွင်ပီႈၼွင်ႉၼၼ်ႉဢေႃႈ။
“ၵဝ်ၵေႃႈလၢတ်ႈတီႈတူဝ်ၸဝ်ႈၵဝ်ႇလႄႈဝႃႈ၊မႄႈယိင်းဢၼ်ႁဵတ်းမႄႈမွၵ်ႇယႃႈမႃးထၢၼ်ႈပေႃးထဝ်ႈယဝ်ႉသေၵေႃႈ ၵူၼ်းတင်းလၢႆယင်းဢွၼ်ၵၼ်ၶဝ်ႈၸူးလႄႈႁဵတ်းမေႇထုင်ႇလူၺ်ႈၵၼ်တင်းၶဝ်ယူႇလူင်ပႄႇ၊ဝႃႈၼင်ႇၼႆဢေႃႈ။-
ၵူၼ်းၸိူဝ်းၼၼ်ႉၵမ်းၵမ်းၶဝ်ႈၸူးတီႈမႄႈမွၵ်ႇယႃႈၸိူဝ်းၼၼ်ႉဢေႃႈ။ ၶဝ်ၶိုၼ်းၵႂႃႇၶဝ်ႈၸူးတီႈ ဢႁေႃႇလႃႉ၊ ဢိၵ်ႇတင်း ဢႁေႃႇလိပႃႉ၊ မႄႈယိင်းဢၼ်ႁၢႆႉယုတ်ႈၼၼ်ႉဢေႃႈ။-
ပိူဝ်ႈၼႆလႄႈၵူၼ်းသိုဝ်ႈတေႃႇတင်းလၢႆတၵ်းဢွၼ်ၵၼ်ၸီႇယၢင်ႇတၢင်ႇဢပျတ်ႈတီႈၶဝ်ပီႈၼွင်ႉလူၺ်ႈဢမုဢၼ်ၽိတ်းပိူင်ႈၵႃႇမေႇသု၊ဢိၵ်ႇတင်းဢမုဢၼ်ဢဝ်ဢသၢၵ်ႈၵူၼ်းတၢႆၼၼ်ႉ၊ၵွပ်ႈပိူဝ်ႈၶဝ်ပီႈၼွင်ႉၽိတ်းပိူင်ႈၵႃႇမေႇသု၊ဢိၵ်ႇတင်းမိုဝ်းၶဝ်ဢိူၵ်ႇလိူတ်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵွပ်ႈပိူဝ်ႈပဵၼ်ၸိူဝ်ႉၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵဝ်တၵ်းႁႂ်ႈမုၵ်ႉၵူၼ်းၸိူဝ်းၵူၼ်းမႃးၸူၼ်ၶဝ်လႄႈႁႂ်ႈၶဝ်တူၵ်းၸႂ်ၵူဝ်ႁႄၼႃႇဢေႃႈ။-
မုၵ်ႉၵူၼ်းၸိူဝ်းၵူၼ်းၸိူဝ်းၼၼ်ႉတၵ်းဢွၼ်ၵၼ်ဢဝ်မၢၵ်ႇႁိၼ်ထိမ်ႈသႂ်ႇၶဝ်သွင်ၵေႃႉလႄႈဢဝ်လၢပ်ႇၽၼ်းပႅတ်ႈဢေႃႈ။ ၶဝ်တၵ်းဢွၼ်ၵၼ်ဢဝ်ဢသၢၵ်ႈလုၵ်ႈလၢင်းၶဝ်သွင်ၵေႃႉတၢႆလႄႈဢဝ်ၽႆးတုတ်ႇႁိူၼ်းၶဝ်ပႅတ်ႈဢေႃႈ။-
ၼင်ႇၼၼ်လႄႈၵဝ်တၵ်းပႄႇၽဵဝ်ႈပႅတ်ႈလွင်ႈတၢင်းဢၼ်ႁဵတ်းမေႇထုင်ႇဢၼ်ဢမ်ႇတြႃးသေၵႃႈၼႂ်းမိူင်းၸဝ်ႈမူတ်းမူတ်းသဵင်ႈသဵင်ႈထၢၼ်ႈပေႃးမႄႈယိင်းၵႃႈမီးလႆႈသွၼ်ဢဝ်ၼင်ႇႁိုဝ်တၵ်းဢမ်ႇႁဵတ်းတၢင်းဢၼ်ၽိတ်းပိူင်ႈၵႃႇမေႇသုမိူၼ်ၸိူဝ်ႉၼင်ႇၶဝ်သွင်ၵေႃႉၼၼ်ႉဢေႃႈ။-
တီႈသူတင်းသွင်ၵေႃႉပီႈၼွင်ႉၸမ်ႉ၊ၵဝ်တၵ်းပၼ်တၢမ်ႇဢပျတ်ႈတီႈဢၼ်သူသွင်ၵေႃႉႁဵတ်းမေႇထုင်ႇဢၼ်ဢမ်ႇတြႃး၊ဢိၵ်ႇတင်းဢပျတ်ႈဢၼ်ဝႆႈသႃႁုၼ်ႇႁၢင်ႈသၢင်းထုၼၼ်ႉဢေႃႈ။ မိူဝ်ႈၼၼ်ႉ သူတၵ်းႁုလွင်ႈဢၼ်ၵဝ်ပဵၼ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။
ၼႂ်းပီဢၼ်ႁဝ်းလႆႈၶၢမ်ႇတၢင်းဢၼ်တိသိမ်းဢဝ်ၵႂႃႇထူၼ်ႈထိုင်ၵဝ်ႈပီ၊လိူၼ်သိပ်းလႆႈသိပ်းဝၼ်းၼၼ်ႉၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။ မႂ်းတႅမ်ႈၸိုဝ်ႈဝၼ်းမိူဝ်ႈၼႆႉဝႆႉတႃႉ။ ၼႂ်းဝၼ်းမိူဝ်ႈၼႆႉပဵၼ်ဝၼ်းဢၼ်ၶုၼ်ႁေႃၶမ်းမိူင်း ပႃႇပုလုၼ်ႇ ၊တၵ်းတႄႇၸႃႉႁဵတ်းတၢင်းဢၼ်လွမ်ႉဝဵင်း ယေႇရုသလႅမ်ႇ ၊ဝႆႉဢေႃႈ။-
မႂ်းဢဝ်ၵႂၢမ်းဢုပမႃႇၼႆႉၶႆႈၼႄတီႈၵူၼ်းၸိူဝ်းဢၼ်ၸၢင်ႈလုၵ်ႉၽိုၼ်ႉၵဝ်လႄႈဝႃႈ၊ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ “ဢဝ်မေႃႈၶၢင်တၢင်ႇၵႃႈၼိူဝ်ၵဵင်းသေယဝ်ႉ၊ဢဝ်ၼမ်ႉသႂ်ႇဝႆႉတႃႉ။
ဢဝ်ၵွၼ်ႈၼိူဝ်ႉမွၼ်းၵႃႈမီးဢၼ်ဝႃႈ၊ၼိူဝ်ႉႁူဝ်မႃႇ၊ၼိူဝ်ႉၶႃ၊ၼိူဝ်ႉၶႃၼႃႈ၊ၶႃလင် ၸႃႉၸဵမ်လုပ်ႇဢၼ်လီသေပိူၼ်ႈၼၼ်ႉသႂ်ႇႁႂ်ႈတဵမ်မေႃႈတႃႉ။
ႁႂ်ႈဢဝ်ၼိူဝ်ႉသူဝ်းတူဝ်ဢၼ်လီသေပိူၼ်ႈၼၼ်ႉတႃႉ။ ဢဝ်ၽိုၼ်းသုမ်ၵႃႈတႂ်ႈမေႃႈၶၢင်ၼၼ်ႉလႄႈႁႂ်ႈၼမ်ႉထၢၼ်ႈပေႃးလိူတ်ႇယူႇၽူတ်ႉယူႇသေလႄႈ၊ တူမ်ႈလုပ်ႇတင်းၼိူဝ်ႉၸိူဝ်းၼၼ်ႉႁႂ်ႈသုၵ်းတႃႉ၊ဝႃႈၼင်ႇၼႆတႃႉ။” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး မီးဢမိင်ႉၸမ်ႉ၊ “ဝဵင်းဢၼ်ၸၢင်ႈဢဝ်ဢသၢၵ်ႈၵူၼ်းတၢႆၼၼ်ႉမီးဢႃႉမၢင်ႇၵလႃႇဢေႃႈ။ လွင်ႈမၼ်းၸမ်ႉ၊မၼ်းပဵၼ်မိူၼ်ၸိူဝ်ႉၼင်ႇမေႃႈၶၢင်ဢၼ်ႁေႃသႆႉၵိၼ်လႄႈဢမ်ႇတွၼ်ႉမီးတၢင်းဢၼ်ၵဵင်ႈဢၼ်သႂ်။ ဢဝ်ၵွၼ်ႈၼိူဝ်ႉဢွၵ်ႇၵွၼ်ႈၼိုင်ႈယဝ်ႉၵွၼ်ႈၼိုင်ႈတႃႉ။ ယႃႇပေႁႂ်ႈၵိုတ်းၵျၢၼ်ႇယူႇသေၵွၼ်ႈသေလႂ်။-
ၵႃႈၼႂ်းဝဵင်းၼၼ်ႉမီးတၢင်းဢၼ်ဢဝ်ဢသၢၵ်ႈၵူၼ်းတၢႆဢေႃႈ။ ၵူၺ်းၵႃႈ၊လိူတ်ႈဢၼ်မၼ်းထွၵ်ႇပႅတ်ႈၼၼ်ႉမၼ်းဢမ်ႇထွၵ်ႇသႂ်ႇၵႃႈၼိူဝ်လိၼ်ဢၼ်ဢဝ်မုၼ်ႈလိၼ်ၵူမ်ႁူမ်ႇလႆႈၼၼ်ႉလႄႈမၼ်းဢဝ်ထွၵ်ႇသႂ်ႇၵႃႈၼိူဝ်မၢၵ်ႇႁိၼ်ဢၼ်ၵဵင်ႈဢၼ်လိူမ်ႈၼၼ်ႉဢေႃႈ။-
ၵဝ်ဢဝ်လိူတ်ႈဝႆႉၵႃႈတီႈၼၼ်ႈတီႈဢၼ်ဢမ်ႇႁူမ်ႇဢမ်ႇၵူမ်လႆႈတီႈဢၼ်ႁႂ်ႈတေႃးသႃႉတၢင်းဢၼ်ၶိုၼ်းတွပ်ႇတႅၼ်းပေႃႇပဵၼ်မႃးလႆႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး မီးဢမိင်ႉၸမ်ႉ၊ “ဝဵင်းဢၼ်ၸၢင်ႈဢဝ်ဢသၢၵ်ႈၵူၼ်းတၢႆၼၼ်ႉမီးဢႃႉမၢင်ႇၵလႃႇဢေႃႈ။ တူဝ်ၵဝ်တၵ်းၵွင်ၽိုၼ်းလႄႈသုမ်ၽႆးဢေႃႈ။-
ဢဝ်ၽိုၼ်းၵွင်သႂ်ႇထႅင်ႈတႃႉ။ ဝီးႁႂ်ႈမုၵ်ႉၽႆးလုၵ်ႉၶိုၼ်ႈတႃႉ။ တူမ်ႈၼိူဝ်ႉလီလီႁႂ်ႈမၼ်းပူၺ်ႇၵႂႃႇလၢၼ်ႈၵႂႃႇတႃႉ။ တူမ်ႈႁႂ်ႈလုပ်ႇၸိူဝ်းၼၼ်ႉမႆႈပႅတ်ႈသေ။-
လိုၼ်းၼၼ်ႉဢဝ်မေႃႈၶၢင်တွင်းလိူင်ဢၼ်ပဝ်ႇၼၼ်ႉတၢင်ႇသႂ်ႇၵႃႈၼိူဝ်ထၢၼ်ႇၽႆးႁႂ်ႈမေႃႈၼၼ်ႉထၢၼ်ႈပေႃးလႅင်တႃႉ။ ႁဵတ်းၼၼ်ႁႂ်ႈမေႃႈတၵ်းၶိုၼ်းမူတ်းသႂ်မႃးလႄႈႁေႃမၼ်းမႆႈၶႅမ်ႈၵႂႃႇမူတ်းယဝ်ႉၼၼ်ႉဢေႃႈ။-
ပိၵ်ႉသမ်ႉၵဝ်ႁိူဝ်ႉၸႂ်မႆႈၸႂ်သေၵေႃႈ ဢမ်ႇမီးဢၵျူဝ်း။ လွင်ႈမၼ်းၸမ်ႉ၊ႁေႃဢၼ်ၼႃၼႃႇလူင်လၢင်ၼၼ်ႉဢမ်ႇဢွၵ်ႇသေၵႃႈၼႂ်းမၼ်းလႆႈငၢႆႈငၢႆႈ။ ၽႆးမႆႈၶႅမ်ႈသေၵေႃႈဢမ်ႇသူႈသဵင်ႈမူတ်းလႆႈ။-
ဝဵင်း ယေႇရုသလႅမ်ႇ၊ ႟။ တၢင်းဢၼ်မႂ်းႁဵတ်းဢမုဢၼ်ဢမ်ႇတြႃးၼၼ်ႉႁဵတ်းႁႂ်ႈမႂ်းၵူဝ်ႈၵိူၵ်ႇယဝ်ႉ။ ပိၵ်ႉသမ်ႉၵဝ်ၶတ်းၸႂ်ၵျူဝ်းၸႃးသုၵ်ႈသီႁႂ်ႈမႂ်းမူတ်းသႂ်သေၵေႃႈမႂ်းယင်းတိုၵ်ႉၵူဝ်ႈၵိူၵ်ႇယူႇဢေႃႈ။ မႂ်းတၵ်းဢမ်ႇၶိုၼ်းႁွတ်ႈထိုင်တၢင်းဢၼ်မူတ်းသႂ်တေႃႇထိုင်ႁွတ်ႈမႂ်းလႆႈၶၢမ်ႇဢဝ်တေႃးသႃႉတၢင်းၸႂ်မႆႈၶႂ်ႈၸႃႉၵဝ်ၼၼ်ႉဢေႃႈ။-
ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဝႆႉယဝ်ႉ။ ၶိင်ႇဢၼ်ၵဝ်တၵ်းၸီႇယၢင်ႇၼၼ်ႉႁွတ်ႈမႃးယဝ်ႉ။ ၵဝ်တၵ်းဢမ်ႇယိူၼ်ႉၵၼ်ႈလွင်ႈတုၸရိူၵ်ႈမႂ်း။ ဢမ်ႇသေလၢႆမႂ်း၊ဢမ်ႇမီးၸႂ်ဢဵတ်းလူမႂ်းလႃးလႃး။ သူတၵ်းလႆႈၶၢမ်ႇဢဝ်တၢမ်ႇဢပျတ်ႈၸွမ်းၵႃႈၼင်ႇဢၼ်မႂ်းႁဵတ်းၼၼ်ႉဢေႃႈ၊” ဝႃႈၼင်ႇၼႆ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။ ၵဝ်တၵ်းဢဝ်တၢမ်ႇဢၼ်ပေႃႉၵမ်းလဵဝ်ၼၼ်ႉပႄႇၽဵဝ်ႈၵေႃႉဢၼ်မႂ်းႁၵ်ႉပႅင်းၼၼ်ႉဢေႃႈ။ မႂ်းဢမ်ႇမီးဢၶႂၢင်ႉဢၼ်တၵ်းပွင်ႉမိုၼ်ႇလႄႈဢမ်ႇမီးဢၶႂၢင်ႉဢၼ်လႆႈႁႆႈ၊ဢမ်ႇႁႂ်ႈၼမ်ႉတႃမႂ်းလႆႈတူၵ်းလႃးလႃး။-
တၢင်းဢၼ်မႂ်းၶၢင်းၶီၶၢင်းၽၢၼ်ၼၼ်ႉယႃႇႁႂ်ႈဢွၵ်ႇသဵင်။ ယႃႇပေႁဵတ်းတၢင်းဢၼ်ႁႆႈႁွင်ႉပွင်ႉၶၢင်းပုၼ်ႈၵူၼ်းတၢႆ။ ၶဵၼ်းႁူဝ်မႂ်းသေလႄႈတိုဝ်းၶႅပ်းတိၼ်မႂ်းတႃႉ။ ယႃႇပေႁူမ်ႇသူပ်းတူမ်းသူပ်းမႂ်း၊ယႃႇပေၵိၼ်ၶဝ်ႈမုၼ်းဢၼ်ၶဝ်ၸိူဝ်းဢၼ်ၶၢင်းၶီၶၢင်းၽၢၼ်ၵိၼ်ၼၼ်ႉ၊” ဝႃႈၼင်ႇၼႆဢေႃႈ။
ၼင်ႇၼၼ်လႄႈၵဝ်မွၵ်ႇလၢတ်ႈတီႈၵူၼ်းတင်းလၢႆမိူဝ်ႈၶိင်ႇၵၢင်ၼႂ်လႄႈ၊ၼႂ်းဝၼ်းၼၼ်ႉၵမ်းလဵဝ်မေးၵဝ်တၢႆၵႂႃႇၶိင်ႇႁူဝ်ၶမ်ႈဢေႃႈ။ ၼႂ်းဝၼ်းမိူဝ်ႈၽုၵ်ႈၼၼ်ႉၵဝ်ႁဵတ်းၸွမ်းၵႃႈၼင်ႇဢၼ်မၼ်းၸဝ်ႈသင်ႇလၢတ်ႈဝႆႉၼၼ်ႉဢေႃႈ။-
ၵူၼ်းတင်းလၢႆၵေႃႈထၢမ်တီႈၵဝ်လႄႈဝႃႈ၊ “တၢင်းဢၼ်ၸဝ်ႈႁဵတ်းၼၼ်ႉၸၢပ်ႈသႅင်ႇၵၼ်တင်းႁဝ်းၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ၵဝ်ၵေႃႈလၢတ်ႈတီႈၶဝ်လႄႈဝႃႈ၊ “ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်၊-
ႁႂ်ႈၵဝ်သင်ႇလၢတ်ႈတီႈသူ ၵူၼ်းမဵဝ်း ဢိသရေး၊ လႄႈဝႃႈၸမ်ႉ၊သူမီးၸႂ်ဢၼ်ဢုပ်ႇဝၢဝ်းလူၺ်ႈၵျွင်းပိၵ်ႈမၢၼ်ႇၸဝ်ႈဢေႃႈ။ သူမီးဢလူဝ်ႇၵၢင်ၸႂ်ၶႂ်ႈလူၶႂ်ႈတူၺ်းမၼ်းလႄႈၶႂ်ႈၵႂႃႇလႄႇၵႂႃႇလဵပ်ႈတီႈမၼ်းဢေႃႈ။ ၵူၺ်းၵႃႈ၊ ထႃႇဝရႃႉၽြႃး၊ တၵ်းႁဵတ်းႁႂ်ႈမၼ်းၵူဝ်ႈၵိူၵ်ႇၵႂႃႇဢေႃႈ။ ၼင်ႇၼၼ်လႄႈလုၵ်ႈသူလၢင်းသူဢၼ်ၵိုတ်းၵျၢၼ်ႇယူႇၵႃႈၼႂ်းဝဵင်း ယေႇရုသလႅမ်ႇ၊ ၸိူဝ်းၼၼ်ႉတၵ်းလႆႈၶၢမ်ႇတၢင်းဢၼ်ၶႃႈၽၼ်းတၢႆၵႃႈၼႂ်းၼႃႈသိုၵ်းဢေႃႈ။-
မိူဝ်ႈၼၼ်ႉသူတၵ်းဢွၼ်ၵၼ်လႆႈႁဵတ်းမိူၼ်ၸိူဝ်ႉၼင်ႇဢၼ်ၵဝ်ႁဵတ်းၼႆႉလႄႈဢမ်ႇလႆႈဢွၼ်ၵၼ်ႁူမ်ႇသူပ်းတူမ်းသူပ်း၊ဢမ်ႇလႆႈၵိၼ်ၶဝ်ႈမုၼ်းၶဝ်ၸိူဝ်းဢၼ်ၶၢင်းၶီၶၢင်းၽၢၼ်ၵိၼ်ၼၼ်ႉ၊ဝႃႈၼင်ႇၼႆဢေႃႈ။-
ၶဵၼ်းႁူဝ်သူၵေႃႈတၵ်းၶဵၼ်းဝႆႉၵႃႈတီႈႁူဝ်သူယူႇ၊ၶႅပ်းတိၼ်သူၵေႃႈ တၵ်းတိုဝ်းဝႆႉၵႃႈတီႈတိၼ်သူယူႇလႄႈယင်းဢမ်ႇလႆႈႁွင်ႉႁႆႈ၊ဢမ်ႇလႆႈပွင်ႉၶၢင်းလႄႈယူႇဢေႃႈ။ သူတၵ်းဢွၼ်ၵၼ်ယွမ်ႁဵဝ်ႇၵႂႃႇၵွပ်ႈပိူဝ်ႈဢပျတ်ႈတုၸရိူၵ်ႈသူလႄႈၵေႃႉၼိုင်ႈလႄႈၵေႃႉၼိုင်ႈၶၢင်းၶီၶၢင်းၽၢၼ်တေႃႇၵၼ်ယူႇဢေႃႈ။-
မိူဝ်ႈၼၼ်ႉၵဝ်တၵ်းပဵၼ်ၼိမိၵ်ႈပုၼ်ႈသူတၵ်းႁဵတ်းၸွမ်းၵႃႈဢၼ်ၵဝ်ႁဵတ်းၵူႈၸိူဝ်ႉၵူႈပိူင်ၼၼ်ႉဢေႃႈ။ ထႃႇဝရႃႉၽြႃး ၊မီးဢမိင်ႉၸမ်ႉ၊မိူဝ်ႈဢၼ်လွင်ႈတၢင်းၸိူဝ်းၼႆႉပဵၼ်မႃးယဝ်ႉၼၼ်ႉၸိုင်၊သူတၵ်းႁုလွင်ႈဢၼ်မၼ်းၸဝ်ႈပဵၼ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၼၼ်ႉဢေႃႈ။” ဝႃႈၼင်ႇၼႆ။
ၽြႃးပဵၼ်ၸဝ်ႈမီးဢမိင်ႉၸမ်ႉ၊ “လုၵ်ႈၵူၼ်း႟။ ၵဝ်တၵ်းၼုၵ်ႈသိမ်းဢဝ်ၵျွင်းပိၵ်ႈမၢၼ်ႇၸဝ်ႈ၊ဢၼ်ပဵၼ်တီႈၶဝ်ၸူမ်းသိူဝ်းဢုပ်ႇဝၢဝ်းလႄႈမီးဢလူဝ်ႇၵၢင်ၸႂ်ၶႂ်ႈလူၶႂ်ႈတူၺ်းမၼ်းလႄႈၶႂ်ႈၵႂႃႇလႄႇလဵပ်ႈတီႈမၼ်းဢေႃႈ။ လုၵ်ႈၸၢႆးၶဝ်လုၵ်ႈယိင်းၶဝ်ၵေႃႈၵဝ်တၵ်းၼုၵ်ႈသိမ်းဢဝ်ဢေႃႈ။-
ၼႂ်းမိုဝ်ႉဝၼ်းဢၼ်ၵဝ်ႁဵတ်းၸိူဝ်ႉၼင်ႇၼႆၼၼ်ႉၵူၼ်းၵေႃႉၼိုင်ႈဢၼ်လွတ်ႈသေတၢင်းဢၼ်လုဢၼ်လႅဝ်ၼၼ်ႉတၵ်းမႃးမွၵ်ႇလၢတ်ႈလွင်ႈတၢင်းၼၼ်ႉတီႈမႂ်းဢေႃႈ။-
ၼႂ်းမိုဝ်ႉဝၼ်းလဵဝ်ၵၼ်ၼၼ်ႉမႂ်းတၵ်းၶိုၼ်းလႆႈဢၶႂၢင်ႉဢၼ်လၢတ်ႈၵႂၢမ်းလႆႈလႄႈပူၼ်ႉသေတၢင်းဢၼ်မႂ်းဢႃႉၼၼ်ႉ၊မႂ်းတၵ်းႁေႃးလၢတ်ႈတီႈၵေႃႉၼၼ်ႉဢေႃႈ။ ၼင်ႇၼၼ်လႄႈမႂ်းတၵ်းပဵၼ်လၢၵ်ႈၶၼႃႇဢၼ်မွၵ်ႇၼႄတီႈၶဝ်လႄႈၶဝ်တၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။ လၢတ်ႈၵႂၢမ်းတၢင်ႇဢပျတ်ႈတီႈၵူၼ်းမဵဝ်း ဢမ်ႇမုၼ်ႇ၊ တႃႉ။-
လၢတ်ႈတီႈၵူၼ်းမဵဝ်း ဢမ်ႇမုၼ်ႇ၊ တင်းလၢႆလႄႈဝႃႈ၊ဢွၼ်ၵၼ်ထွမ်ႇငိၼ်းဢမိင်ႉ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တႃႉ။ မၼ်းၸဝ်ႈမီးဢမိင်ႉၸမ်ႉ၊ပိူဝ်ႈဢၼ်သူဝႃႈ၊ ‘ႁႃးႁႃး’ ဝႃႈၼင်ႇၼႆတီႈၵျွင်းပိၵ်ႈမၢၼ်ႇၵဝ်မိူဝ်ႈဢၼ်မၼ်းၵူဝ်ႈၵိူၵ်ႇၵႂႃႇ၊တီႈထႃႇၼႃႉတီႈမူတ်းၸၢင်ႇၵဝ်မိူဝ်ႈဢၼ်မၼ်းသဵတ်ႇၵူၼ်းငႅဝ်ၵူၼ်းၵႂႃႇ၊တီႈၶိူဝ်းႁိူၼ်း ယုတႃႉ၊ ၶိူဝ်းႁိူၼ်းဢၼ်လႆႈၶၢမ်ႇတၢင်းဢၼ်တိသိမ်းဢဝ်ၵႂႃႇၼၼ်ႉလႄႈ။-
ၵွပ်ႈပိူဝ်ႈဢၼ်သူႁဵတ်းၸိူဝ်ႉၼင်ႇၼၼ်လႄႈၵဝ်တၵ်းပွႆႇၸႂ်ႉၸိူဝ်ႉၶိူဝ်းၵူၼ်းမိူင်းၽၢႆႇတၢင်းဝၼ်းဢွၵ်ႇမႃးပႄႉၼႅင်ႇသူဢေႃႈ။ ၶဝ်တၵ်းၶျႃးပၢင်တပ်ႉၵႃႈၼႂ်းဝၢၼ်ႈၼႂ်းမိူင်းသူလႄႈယူႇသဝ်းၵႃႈၼႂ်းၼၼ်ႉဢေႃႈ။ ၶဝ်တၵ်းၵိၼ်မၢၵ်ႇၶဝ်ႈႁူင်းၼမ်ႉသူတၵ်းၵိၼ်ၼမ်ႉၼူမ်းသူၸိူဝ်းၼၼ်ႉဢေႃႈ။-
ၵဝ်တၵ်းႁဵတ်းႁႂ်ႈဝဵင်း ရပ်ႉပႃႇ၊ လႆႈပဵၼ်ၶွၵ်ႈၵလႃႇဢုၵ်ႈ၊ဢိၵ်ႇတင်းမိူင်း ဢႃႇမုၼ်ႇ၊ တင်းမိူင်းပဵၼ်ပၢင်ႇလဵင်ႉသူဝ်းၵႂႃႇဢေႃႈ။ မိူဝ်ႈၼၼ်ႉသူတၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ။
“ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊လၢတ်ႈတီႈၶဝ်လႄႈဝႃႈ၊သူဢွၼ်ၵၼ်တူပ်းမိုဝ်းလႄႈၵႃႈဝႅၼ်ယူႇမူၼ်ႈမူၼ်ႈပျေႃႇပျေႃႇယူႇဢေႃႈ။ သူႁဵတ်းဢမ်ႇၼပ်ႉဢမ်ႇၶၢၼ်းမိူင်း ဢိသရေး၊ ယူႇဢေႃႈ။-
ၵွပ်ႈပိူဝ်ႈသူႁဵတ်းၸိူဝ်ႉၼင်ႇၼႆလႄႈၵဝ်တၵ်းဢဝ်သူဢၢပ်ႈပၼ်ၵႃႈၼႂ်းမိုဝ်းၵူၼ်းတၢင်ႇၸိူဝ်ႉတၢင်ႇၶိူဝ်းႁႂ်ႈၶဝ်ၸူၼ်ဢဝ်ႁိမ်ႁူင်ႇဢဝ်သူဢေႃႈ။ ၵဝ်တၵ်းယႃႉၽဵဝ်ႈသူပႅတ်ႈလုမ်းလုမ်းလႄႈဢမ်ႇႁႂ်ႈသူလႆႈပဵၼ်ၸိူဝ်ႉၶိူဝ်းၵူၼ်းထႅင်ႈသေပွၵ်ႈလႄႈသူတၵ်းဢမ်ႇမီးမိူင်းဢၼ်တူဝ်ၸဝ်ႈၵဝ်ႇပိူင်ႇၼၼ်ႉဢေႃႈ။ မိူဝ်ႈၼၼ်ႉသူတၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵွပ်ႈပိူဝ်ႈဢၼ်ၵူၼ်းမိူင်း မေႃႇၽႃႉ၊ လၢတ်ႈလႄႈဝႃႈ၊ ‘ၵူၼ်းမဵဝ်းၸိူဝ်ႉၶိူဝ်း ယုတႃႉ၊ ၼၼ်ႉမိူၼ်ၵၼ်တင်းၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းတင်းလၢႆဢေႃႈ၊’ ဝႃႈၼႆလႄႈ၊-
ၵဝ်တၵ်းႁႂ်ႈဝဵင်းၸိူဝ်းဢၼ်ပႂ်ႉယၢမ်းယူႇတီႈၶွပ်ႇၼမ်ႉလႅၼ်လိၼ်မိူင်း မေႃႇၽႃႉ၊ ၼၼ်ႉလႆႈၶၢမ်ႇတၢင်းဢၼ်တိုၵ်းတေႃးယႃႉပႅတ်ႈ၊ဢၼ်ၶဝ်ႈပႃးဝဵင်းဢၼ်လီဢၼ်ငၢမ်းဢၼ်ဝႃႈ၊ဝဵင်း ပႅတ်ႉယေႇသိမုတ်ႉ၊ ဝဵင်း ပႃႇလႃႉမွင်ႇ ၊တင်းဝဵင်း ၵိရိယသိမ်း၊ ၸိူဝ်းၼၼ်ႉဢေႃႈ။-
ၵဝ်တၵ်းပွႆႇၸႂ်ႉၸိူဝ်ႉၶိူဝ်းၵူၼ်းဢၼ်ယူႇၽၢႆႇတၢင်းမိူင်းဝၼ်းဢွၵ်ႇမႃးပႄႉၼႅင်ႇမိူင်း မေႃႇၽႃႉ၊ ႁူမ်ႈလူၺ်ႈၵၼ်တင်းမိူင်း ဢႃႇမုၼ်ႇ၊ ႁႂ်ႈမိူင်း မေႃႇၽႃႉ၊ ၵေႃႈ ဢမ်ႇလႆႈပဵၼ်ၵူၼ်းၸိူဝ်ႉၶိူဝ်းမိူင်းထႅင်ႈၼၼ်ႉၼင်ႇၵဝ်ႇဢေႃႈ။-
ၵဝ်တၵ်းပၼ်တၢမ်ႇဢပျတ်ႈတီႈမိူင်း မေႃႇၽႃႉ ၊သေလႄႈၶဝ်တၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵွပ်ႈပိူဝ်ႈဢၼ်ၵူၼ်းမိူင်း ဢေႇတုမ်ႇ၊ တင်းလၢႆႁဵတ်းၶတ်းတေႃႇၵူၼ်း ယုတႃႉ၊ လႄႈတွပ်ႇတႅၼ်းၶိုၼ်းႁႅင်းၼႃႇလူင်လၢင်ၼၼ်ႉၵဝ်တၵ်းႁႂ်ႈတုၸရိူၵ်ႈဢပျတ်ႈဢၼ်ဢမ်ႇၸၢင်ႈထၢတ်ႇၸၢင်ႈဝၢႆးၼၼ်ႉတူၵ်းႁွတ်ႈၵႃႈၼိူဝ်မိူင်း ဢေႇတုမ်ႇ၊ ဢေႃႈ။-
ၵွပ်ႈပိူဝ်ႈၸိူဝ်ႉၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ၵဝ်တၵ်းပၼ်တၢမ်ႇဢပျတ်ႈတီႈမိူင်း ဢေႇတုမ်ႇ၊ လႄႈဢဝ်တၢႆၵူၼ်း၊ဢိၵ်ႇတင်းဢဝ်တၢႆတူဝ်သတ်းတင်းသဵင်ႈတင်းမူတ်းဢေႃႈ။ ၵဝ်တၵ်းႁႂ်ႈဝဵင်းၼၼ်ႉသဵတ်ႇၵူၼ်းငႅဝ်ၵူၼ်းၵႂႃႇၸႃႉၸဵမ်ဝဵင်း တေႇမၼ်ႇ ၊တေႃႇထိုင်ႁွတ်ႈဝဵင်း တေႇတၼ်ႇ သေယဝ်ႉ၊ၵူၼ်းၵႃႈမီးတင်းသဵင်ႈတင်းလူင်တၵ်းလႆႈၶၢမ်ႇတၢင်းဢၼ်ၶႃႈၽၼ်းဢဝ်တၢႆၵႃႈၼႂ်းၼႃႈသိုၵ်းဢေႃႈ။-
ၵူၼ်းၵဝ်မဵဝ်း ဢိသရေး၊ တၵ်းဢွၼ်ၵၼ်တွပ်ႇတႅၼ်းၶိုၼ်းတီႈၵူၼ်း ဢေႇတုမ်ႇ၊ ပုၼ်ႈၵဝ်ဢေႃႈ။ ၶဝ်တၵ်းႁဵတ်းႁႂ်ႈၵူၼ်း ဢေႇတုမ်ႇ၊ တင်းလၢႆလႆႈၶၢမ်ႈႁႅင်းတေႃးသႃႉတၢင်းၸႂ်မႆႈၶႂ်ႈၸႃႉၵဝ်ၼၼ်ႉဢေႃႈ။ ၼင်ႇၼၼ်လႄႈၶဝ်တၵ်းႁုတၢမ်ႇဢပျတ်ႈဢၼ်ၵဝ်တွပ်ႇတႅၼ်းပၼ်ၼၼ်ႉဢေႃႈ၊” ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵွပ်ႈပိူဝ်ႈဢၼ်ၵူၼ်း ၽိလိတ်ႉတိ၊ တင်းလၢႆဢဝ်တၢင်းၽိတ်းရၢၼ်ႇသူႇဝႆႉၼႂ်းၸႂ်ၶဝ်ၶိင်ႇၵႃႇလႃႉႁိုင်ၼႃႇလူင်လၢင်သေယဝ်ႉ၊ပႃးတင်းၸႂ်ဢၼ်ၸင်းၼႃႇလူင်လၢင်ယႃႉၽဵဝ်ႈၶဝ်ပႅတ်ႈၼၼ်ႉ၊-
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ၵဝ်တၵ်းတိုၵ်းတေႃးၵူၼ်းမဵဝ်း ၽိလိတ်ႉတိ၊ ၶဝ်လႄႈပႄႇၽဵဝ်ႈပႅတ်ႈၵူၼ်းမဵဝ်း ၶေႇရသိ၊ တင်းလၢႆ၊ဢိၵ်ႇတင်းၶဝ်ၸိူဝ်းဢၼ်ယင်းၵိုတ်းၵျၢၼ်ႇယူႇၵႃႈၼႂ်းပၢင်ႇပဵင်းမိူင်း ၽိလိတ်ႉတိ၊ ၼၼ်ႉဢေႃႈ။-
ၵဝ်တၵ်းပၼ်တၢမ်ႇတီႈၶဝ်ႁၢဝ်ႈၵျၢမ်းၼႃႇလႄႈတွပ်ႇတႅၼ်းၶိုၼ်းတီႈၶဝ်ထူၼ်ႈထူၼ်ႈတဵမ်တဵမ်ဢေႃႈ။ ၶဝ်တၵ်းလႆႈၶၢမ်ႇၽေးႁႅင်းတေႃးသႃႉတင်းၸႂ်မႆႈၶႂ်ႈၸႃႉၵဝ်ဢေႃႈ။ မိူဝ်ႈၼၼ်ႉၶဝ်တၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး ဢေႃႈ၊” ဝႃႈၼင်ႇၼႆဢေႃႈ။
ၼႂ်းပီဢၼ်ႁဝ်းလႆႈၶၢမ်ႇတၢင်းဢၼ်တိသိမ်းဢဝ်ၵႂႃႇထူၼ်ႈထိုင်သိပ်းဢဵတ်းပီလိူၼ်မႂ်ႇဝၼ်းတီႈၼိုင်ႈၼၼ်ႉၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။ ဢၼ်ၼႆႉၸမ်ႉ၊ပဵၼ်လွင်ႈတၢင်းဢၼ်ၵူၼ်းဝဵင်း တုရု၊ တင်းလၢႆသိူဝ်းၸူမ်းမူၼ်ႈပျေႃႇလူၺ်ႈၼၼ်ႉယဝ်ႉ။ လွင်ႈမၼ်းၸမ်ႉ၊ၶဝ်ႁွင်ႉပၢဝ်ႇလႄႈဝႃႈ၊ ‘ဝဵင်း ယေႇရုသလႅမ်ႇ၊ တႅၵ်ႇယၢႆႈၽၢတ်ႇၽႄမူတ်းယဝ်ႉ။ ႁႅင်းၵႃႉႁႅင်းၶၢႆၶဝ်ဝွတ်ႈဝၢႆးႁၢႆၵႂႃႇယဝ်ႉ။ မၼ်းဢမ်ႇၶိုၼ်းၶတ်းၶဵင်ႇၵၼ်တင်းႁဝ်းလႆႈလႃးလႃးယဝ်ႉ၊’ ဝႃႈၼင်ႇၼႆဢေႃႈ။-
“ၵွပ်ႈပိူဝ်ႈလွင်ႈတၢင်းၼႆႉလႄႈ၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ဝဵင်း တုရု၊ ႟။ ၵဝ်ပဵၼ်ရၢၼ်ႇသူႇမႂ်းယဝ်ႉ။ ၵဝ်တၵ်းပွႆႇၸႂ်ႉၵူၼ်းမဵဝ်းၼမ်ၼႃႇမႃးတိုၵ်းတေႃးမႂ်းလႄႈၶဝ်တၵ်းၶီႇသိုၵ်းၶိုၼ်ႈမႃးမိူၼ်ၸိူဝ်ႉၼင်ႇလႅင်းၼမ်ႉပၢင်ႇလၢႆႇဢေႃႈ။-
ၶဝ်တၵ်းယႃႉလမ်းဝဵင်းမႂ်းတင်းလၢႆလႄႈၵိူၼ်ႇသဝ်လၢင်းမႂ်းတင်းလၢႆတူၵ်းဢေႃႈ။ ၵဝ်တၵ်းပတ်းၽဵဝ်ႈမုၼ်ႈလိၼ်တင်းလၢႆပႅတ်ႈလႄႈဝႆႉၵိုတ်းမၢၵ်ႇႁိၼ်ဢၼ်ၵဵင်ႈဢၼ်လိူမ်ႈၼၼ်ႉၵူၺ်းဢေႃႈ။-
ၵူၼ်းလႃႈၼမ်ႉတင်းလၢႆတၵ်းတၢၵ်ႇၼႅင်ႈတၢၵ်ႇၶႄၶဝ်ၵႃႈၼိူဝ်မၢၵ်ႇႁိၼ်ဢၼ်မီးၵႃႈၼႂ်းၵၢင်ပၢင်ႇလၢႆႇၼၼ်ႉဢေႃႈ။ ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ၵူၼ်းမဵဝ်းတင်းလၢႆတၵ်းဢွၼ်ၵၼ်မႃးႁိမ်ႁူင်ႇဢဝ်ဝဵင်း တုရု၊ လႄႈ၊-
ၶဝ်တၵ်းဢဝ်လၢပ်ႇၶႃႈၽၼ်းဢဝ်တၢႆၶဝ်ၸိူဝ်းဢၼ်မီးၵႃႈၼႂ်းဝၢၼ်ႈဢၼ်ယူႇတၢင်းၼွၵ်ႈၵႃႈၼႂ်းပၢင်ႇတင်းလၢႆဢေႃႈ။ မိူဝ်ႈၼၼ်ႉၵူၼ်းဝဵင်း တုရု တၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး ဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵဝ်တၵ်းဢဝ်ၶုၼ်ႁေႃၶမ်းဢၼ်ယႂ်ႇမျၢတ်ႈလိူဝ်တွၼ်းၼႃႇသေပိူၼ်ႈဢၼ်ဝႃႈ၊ၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ မိူင်း ပႃႇပုလုၼ်ႇ၊ ၼၼ်ႉမႃးတိုၵ်းတေႃးဝဵင်း တုရု ဢေႃႈ။ မၼ်းတၵ်းလုၵ်ႉသေၵႃႈတီႈမိူင်းတၢင်းႁွင်ႇမႃးလူၺ်ႈၵၼ်တင်းတပ်ႉသိုၵ်းလူင်၊လူၺ်ႈမႃႉလႂ်တင်းလေႃႉမႃႉသိုၵ်းလႂ်၊ဢိၵ်ႇတင်းတပ်ႉသိုၵ်းဢၼ်ၶီႇမႃႉလႂ်ဢေႃႈ။-
ၶဝ်ၸိူဝ်းဢၼ်မီးယူႇၵႃႈၼႂ်းဝဵင်းတီႈပၢင်ႇတီႈပဵင်းၸိူဝ်းၼၼ်ႉတၵ်းလႆႈတၢႆၵႃႈၼႂ်းၼႃႈသိုၵ်းဢေႃႈ။ ရၢၼ်ႇသူႇၸိူဝ်းၼၼ်ႉတၵ်းၶုတ်းႁွင်ႈၶုတ်းၶူး၊ၵေႃႇႁဵတ်းတႅၼ်လိၼ်လႄႈယုၵ်ႉၶိူင်ႈႁႄႉလၢၵ်ႈၼၢၵ်ႈႁႄႉဝႆႉႁႂ်ႈပဵၼ်တၢင်းဢၼ်ၶတ်းတႃႉၵၼ်တင်းမႂ်းဢေႃႈ။-
ၶဝ်တၵ်းဢဝ်တုမ်သၢၵ်ႇတွင်ႈ၊တွင်ႈလမ်းဝဵင်းမႂ်းလႄႈဢဝ်တႃမၢတ်ႇၵိူၼ်ႇယႃႉသဝ်လၢင်းမႂ်းတင်းလၢႆလူမ်ႉတူၵ်းဢေႃႈ။-
ၽုၼ်ႇမုၵ်ႉဢၼ်လုၵ်ႉၶိုၼ်ႈၵွပ်ႈပိူဝ်ႈမႃႉတင်းလၢႆၼၼ်ႉတၵ်းႁူမ်ႇသုမ်ႇမႂ်းဢေႃႈ။ သဵင်တပ်ႉသိုၵ်းၶီႇမႃႉၶဝ်၊သဵင်ဢၼ်မႃႉၶဝ်တိုတ်ႉလၢၵ်ႈၶိူင်ႈလၢၵ်ႈၼၢၵ်ႈၶဝ်၊သဵင်လေႃႉမႃႉသိုၵ်းၶဝ်မေႃးလင်ၼႃႇထၢၼ်ႈပေႃးလမ်းဝဵင်းမႂ်းတင်းလၢႆတၵ်းသၼ်ႇဝႆၵႂႃႇယၢမ်းမိူဝ်ႈဢၼ်ၶဝ်ၶဝ်ႈၸွမ်းၽၵ်းတူဝဵင်းဢၼ်လုဢၼ်လႅဝ်ၸိူဝ်းၼၼ်ႉဢေႃႈ။-
ႁူဝ်ႁၢၼ်ၵူၼ်းသိုၵ်းတပ်ႉမႃႉၶဝ်တၵ်းဢွၼ်ၵၼ်ၶဝ်ႈမႃးတဵမ်သဵၼ်ႈတၢင်းမႂ်းၵႂႃႇလႄႈဢဝ်လၢပ်ႇၶဝ်ၶႃႈၽၼ်းဢဝ်ၵူၼ်းမႂ်းတင်းလၢႆတၢႆဢေႃႈ။ သဝ်ဢၼ်မၼ်ႈဢၼ်ၶိူင်ႇမႂ်းၸိူဝ်းၼၼ်ႉတၵ်းလူမ်ႉတူၵ်းၵႃႈၼိူဝ်လိၼ်ဢေႃႈ။-
ရၢၼ်ႇသူႇမႂ်းၸိူဝ်းၼၼ်ႉတၵ်းဢွၼ်ၵၼ်ႁိမ်ဢဝ်ဢုၵ်ႉၸႃႇမႂ်းၸိူဝ်းၼၼ်ႉလႄႈသိမ်းဢဝ်ၵုၼ်ႇသိၼ်မႂ်းတင်းလၢႆၵႂႃႇဢေႃႈ။ ၶဝ်တၵ်းဢွၼ်ၵၼ်ၵိူၼ်ႇယႃႉၽႃသၢင်ႉမႂ်းလႄႈယႃႉၽဵဝ်ႈႁေႃႁိူၼ်းမႂ်းဢၼ်သႃႇယႃႇလီငၢမ်းတင်းလၢႆပႅတ်ႈဢေႃႈ။ ၶဝ်တၵ်းဢဝ်မၢၵ်ႇႁိၼ်၊မႆႉၸိင်၊မုၼ်ႈလိၼ်မႂ်းၶျႃးပႅတ်ႈၵႃႈၼႂ်းၼမ်ႉပၢင်ႇလၢႆႇဢေႃႈ။-
ၵဝ်တၵ်းႁႂ်ႈသဵင်ႁဵတ်းၵႂၢမ်းမႂ်းတဵတ်ႇယဵၼ်ၵႂႃႇလႄႈၵမ်းလိုၼ်းဢမ်ႇလႆႈငိၼ်းသဵင်တိင်ႇသဵင်တရေႃးမႂ်း။-
ၵဝ်တၵ်းပွႆႇႁႂ်ႈမႂ်းပဵၼ်မိူၼ်မၢၵ်ႇႁိၼ်ဢၼ်ၵဵင်ႈဢၼ်လိူမ်ႈတီႈဢၼ်ၵူၼ်းလႃႈၼမ်ႉၶဝ်တၢၵ်ႇၼႅင်ႈတၢၵ်ႇၶႄၼၼ်ႉၵူၺ်းဢေႃႈ။ ၵမ်းလိုၼ်းဢမ်ႇလႆႈၶိုၼ်းတႄႇၶိုၼ်းတင်ႈဝဵင်းမႂ်း။ ၵဝ်၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဝႆႉယဝ်ႉ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉတီႈဝဵင်း တုရု၊ လႄႈဝႃႈၸမ်ႉ၊ “ၼႂ်းမိုဝ်ႉဝၼ်းဢၼ်မႂ်းလႆႈၶၢမ်ႇတၢင်းဢၼ်ပႄႉဢၼ်ၼႅင်ႇၼၼ်ႉၶဝ်ၸိူဝ်းဢၼ်ယူႇသဝ်းၸွမ်းၽင်ႇပၢင်ႇလၢႆႇတင်းလၢႆတၵ်းဢွၼ်ၵၼ်သၼ်ႇၶွၼ်းဝႆ၊ၵွပ်ႈပိူဝ်ႈသဵင်ၵူၼ်းမႂ်းၸိူဝ်းဢၼ်လႆႈၶၢမ်ႇတၢင်းဢၼ်တိူဝ်ႉမၢတ်ႇတင်းလၢႆႁွင်ႉပၢဝ်ႇႁွင်ႉသႅၼ်ႇၼၼ်ႉဢေႃႈ။-
ၶုၼ်ႁေႃၶမ်းမိူင်းဢၼ်မီးႁိမ်းပၢင်ႇလၢႆႇၸိူဝ်းၼၼ်ႉတၵ်းဢွၼ်ၵၼ်လူင်းသေၵႃႈၼိူဝ်ပလၢင်ႇၶဝ်၊ထွတ်ႇသိူဝ်ႈယၢဝ်းၶဝ်၊ထွတ်ႇၶူဝ်းၼုင်ႈၶဝ်ဢၼ်ပၵ်းဢၼ်ထူဝ်းၼၼ်ႉသေယဝ်ႉ၊သၼ်ႇဝႆလႄႈၼင်ႈၵႃႈၼိူဝ်လိၼ်ယူႇ၊သၼ်ႇဝႆၵူႈၵႅပ်ႈၵူႈၸူဝ်ႈယူႇလႄႈတူၵ်းၸႂ်ၵူဝ်ႁႄၵွပ်ႈပိူဝ်ႈလွင်ႈဢၼ်ပဵၼ်မႃးတီႈမႂ်းၼၼ်ႉဢေႃႈ။-
ၶဝ်တၵ်းဢွၼ်ၵၼ်ႁဵတ်းၵႂၢမ်းမႃႇသႃႇပုၼ်ႈမႂ်းလႄႈဝႃႈ၊ “ဝဵင်းဢၼ်မီးၸိုဝ်ႈမီးသဵင်ဢၼ်ႁူင်ႁၢင်း႟။ မႂ်းလုလႅဝ်ယဝ်ႉ။ ႁိူဝ်းသၢင်းၽေႃးမႂ်းတင်းလၢႆလႆႈၶၢမ်ႇပတ်းၽဵဝ်ႈဢွၵ်ႇပၢင်ႇလၢႆႇၵႂႃႇလႄႈ၊ ၵူၼ်းဝဵင်းမႂ်းတင်းလၢႆယၢမ်ႈဢုပ်ႉပိူင်ႇပၢင်ႇလၢႆႇမႃးသေယဝ်ႉ၊ႁႂ်ႈၵူၼ်းသၢပ်ႇပၢင်ႇလၢႆႇၵႃႈမီးလႆႈၵူဝ်လႆႈႁႄမႂ်းမႃးယဝ်ႉ။
တေႃႈလဵဝ်ၼႆႉၸမ်ႉ၊ၼႂ်းမိုဝ်ႉဝၼ်းဢၼ်မႂ်းလူမ်ႉပင်းၼၼ်ႉ ၵုၼ်ၼႂ်းၼမ်ႉပၢင်ႇလၢႆႇတၵ်းဢွၼ်ၵၼ်သၼ်ႇၶွၼ်းဝႆလႄႈ ၵူၼ်းဢၼ်ယူႇႁိမ်းၽင်ႇပၢင်ႇလၢႆႇၸိူဝ်းၼၼ်ႉတၵ်းဢွၼ်ၵၼ်တူၵ်းၸႂ် ၵွပ်ႈပိူဝ်ႈဢၼ်မႂ်းလုလႅဝ်ၵႂႃႇၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵဝ်တၵ်းႁႂ်ႈမႂ်းပဵၼ်ဝဵင်းဢၼ်သဵတ်ႇဢၼ်ငႅဝ်ၵူၼ်းမိူၼ်ၸိူဝ်ႉၼင်ႇဝဵင်းႁၢမ်းဢၼ်ၵူၼ်းဢမ်ႇယူႇသေၵေႃႉသေၵူၼ်းၼၼ်ႉဢေႃႈ။ ၵဝ်တၵ်းဢဝ်ၼမ်ႉသမ်ႇမုၵ်ႈတြႃႇဢၼ်လိုၵ်ႉၼႃႇၼၼ်ႉမႃးႁူမ်ႇထူမ်ႈမႂ်းဢေႃႈ။-
ၵဝ်တၵ်းဢဝ်မႂ်းတူၵ်းတီႈမိူင်းမရၼႃႉႁႂ်ႈမႂ်းယူႇလူၺ်ႈၵၼ်တင်းၵူၼ်းမိူဝ်ႈၵွၼ်ႇမိူဝ်ႈမိုၼ်ႉၸိူဝ်းၼၼ်ႉဢေႃႈ။ ၵဝ်တၵ်းႁႂ်ႈမႂ်းယူႇတႂ်ႈလိၼ်တီႈဢၼ်လုလႅဝ်တူႇၼဝ်ႈယူႇတႃႇသေႇဢမ်ႇထၢတ်ႇၼၼ်ႉလႄႈႁႂ်ႈမႂ်းယူႇသဝ်းလူၺ်ႈၵၼ်တင်းၵူၼ်းတၢႆတင်းလၢႆဢေႃႈ။ ၼင်ႇၼၼ်လႄႈမႂ်းတၵ်းဢမ်ႇၶိုၼ်းမီးႁေႃမီးႁိူၼ်း၊ဢမ်ႇမီးတီႈယူႇတီႈသဝ်းၵႃႈၼႂ်းမိူင်းၵူၼ်းဢၼ်ဢသၢၵ်ႈလိပ်းၼၼ်ႉထႅင်ႈ၊-
ၵဝ်တၵ်းႁႂ်ႈမႂ်းပဵၼ်တၢင်းဢၼ်လီၵူဝ်လီႁႄလႄႈ၊ၵမ်းလိုၼ်းဢမ်ႇလႆႈမီးမႂ်းထႅင်ႈယဝ်ႉ။ ပိူၼ်ႈတၵ်းသွၵ်ႈႁႃမႂ်းသေၵေႃႈဢမ်ႇထူပ်းမႂ်းလႆႈလႃးလႃး၊” ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈၸမ်ႉ၊-
ၶွပ်ႇၼမ်ႉလႅၼ်လိၼ်မႂ်းၼၼ်ႉမီးၵႃႈၼႂ်းပၢင်ႇလၢႆႇလႄႈ ၵူၼ်းဢၼ်တႄႇတင်ႈမႂ်းၼၼ်ႉႁဵတ်းႁႂ်ႈမႂ်းႁၢင်ႈလီမိူၼ်ႁိူဝ်းသၢင်းၽေႃးဢၼ်ႁၢင်ႈလီၼၼ်ႉဢေႃႈ။
ၶဝ်ဢဝ်မႆႉပႅၵ်ႇၵႃႈတီႈလွႆ ႁေႇရမုၼ်ႇ၊ ၼၼ်ႉမႃးလိူဝ်ႈႁဵတ်းပဵၼ်မႆႉပႅၼ်ႈၵႃႈၼႂ်းမႂ်းလႄႈ ဢဝ်မႆႉဢႃႇရိတ်ႉၵႃႈတီႈလွႆ လေႇပၼုၼ်ႇ၊ မႃးႁဵတ်းသဝ်ၽႃႈလၢင်းယၢၼ်းမႂ်းယဝ်ႉ။
ၶဝ်ဢဝ်မႆႉၼိမ်ၵႃႈတီႈ ပႃႇသၢၼ်ႇ၊ ႁဵတ်းလၢမ်ႈၽၢႆးမႂ်းလႄႈ ဢဝ်မႆႉပႅၵ်ႇႁွမ်ၵႃႈတီႈၵုၼ် သႆးပရၢတ်ႈ၊ ႁဵတ်းပႅၼ်ႈသိူဝ်ႇမႂ်းလႄႈဢဝ်ငႃးၸၢင်ႉႁၢင်ႈၶိူင်ႈဝႆႉယဝ်ႉ။
ၽႃႈလၢင်းယၢၼ်းမႂ်းၸိုင်၊ပဵၼ်ၽႃႈပၢၼ်ႇဢၼ်ဝႃႈ၊ ၽႃႈပၢၼ်ႇဢၼ်ပၵ်းလၢႆးဝႆႉလႄႈဢဝ်တီႈမိူင်း ဢေးၵျိပ်ႉ၊ မႃးၼၼ်ႉ၊ လုၵ်ႉသေၵႃႈတီႈၵႆမုင်ႈတူၺ်းသေၵေႃႈတွင်းလႆႈယူႇဢေႃႈ။ ပိၵ်ႈတၢၼ်ႇမႂ်းၵေႃႈပဵၼ်ၶူဝ်းဢၼ်သွမ်ႇဢၼ်ၵမ်ႇဢၼ်ဢဝ်ၵႃႈတီႈၵုၼ် သႆးပရၢတ်ႈ၊ မႃးၼၼ်ႉဢေႃႈ။
ၵူၼ်းၽၢႆးႁိူဝ်းမႂ်းတင်းလၢႆပဵၼ်ၵူၼ်းဝဵင်း ၸိတုမ်ႇ ၊တင်းၵူၼ်းဝဵင်း ဢႃႇဝတ်ႉ၊ ဢေႃႈ။ ၵူၼ်းၶတ်းႁၢင်ႁိူဝ်းမႂ်းၸိူဝ်းၼၼ်ႉသမ်ႉပဵၼ်ၵူၼ်းၵတ်ႉၵူၼ်းၶႅၼ်ႇၵူၺ်းၵူၺ်းဢေႃႈ။
ၸၢင်ႈမႆႉတင်းလၢႆဢၼ်မေႃဢၼ်ၸၢင်ႈလုၵ်ႉၵႃႈတီႈမိူင်း ၵေႇပလႃႉ၊ မႃးလႄႈ ၵူၼ်းၶတ်းႁၢင်ႁိူဝ်းၸိူဝ်းၼၼ်ႉပဵၼ်ၵူၼ်းႁိူဝ်းသၢင်းၽေႃးဢၼ်ၶၢမ်ႇပၢင်ႇလၢႆႇၵႃႈမီးႁႂ်ႈလႆႈသိုဝ်ႉလႆႈၶၢႆၵုၼ်ႇသိၼ်မႂ်းဢေႃႈ။
“ႁူဝ်ႁၢၼ်ၵူၼ်းသိုၵ်းမိူင်း ပႃးသျႃး၊ မိူင်း လိတ်ႉတီးယႃး၊ မိူင်း လိပ်ႉပီးယႃး၊ ၸိူဝ်းၼၼ်ႉဢွၼ်ၵၼ်ထၢမ်းၵၢၼ်ၼႂ်းတပ်ႉသိုၵ်းမႂ်းဢေႃႈ။ ၶဝ်ဢွၼ်ၵၼ်ဢဝ်ၶိူင်ႈႁႄႉလၢၵ်ႈၼၢၵ်ႈဢိၵ်ႇတင်းမွၵ်ႇႁူဝ်လဵၵ်းႁွႆႈဝႆႉလႄႈမီးယူႇၵႃႈၼႂ်းတပ်ႉမႂ်းလႄႈႁဵတ်းႁႂ်ႈမုၼ်သရေႇမႂ်းယႂ်ႇဢေႃႈ။-
ႁူဝ်ႁၢၼ်ၵူၼ်းသိုၵ်းမိူင်း ဢႃႇဝတ်ႉ၊ တင်းလၢႆပႂ်ႉထိင်းလမ်းဝဵင်းမႂ်းလႄႈၵူၼ်းမိူင်း ၵႃႇမတ်ႉ၊ သမ်ႉပဵၼ်ၵူၼ်းပႂ်ႉထိင်းသဝ်လၢင်းမႂ်းတင်းလၢႆဢေႃႈ။ ၶဝ်ဢွၼ်ၵၼ်ဢဝ်ၶိူင်ႈႁႄႉလၢၵ်ႈၼၢၵ်ႈႁွႆႈဝႆႉတီႈလမ်းဝဵင်းမႂ်းလႄႈပဵၼ်တၢင်းဢၼ်ႁၢင်ႈၶိူင်ႈႁႂ်ႈမႂ်းႁၢင်ႈလီႁၢင်ႈငၢမ်းဢေႃႈ။
“မႂ်းႁဵတ်းၵႃႉႁဵတ်းၶၢႆၵႃႈၼႂ်းမိူင်း သပဵၼ်ႇ၊ လႄႈႁပ်ႉဢဝ်ၶိူင်ႈငိုၼ်း၊ၶိူင်ႈလဵၵ်း၊ၶိူင်ႈလဵၵ်းၽိူၵ်ႇ၊ၸိုၼ်း၊ၵႃႈတီႈၶဝ်သေပဵၼ်ၵုၼ်ႇၵႃႉၵုၼ်ႇၶၢႆမႂ်းဢေႃႈ။-
မိူင်း ၵရိၵ်ႉ မိူင်း တုပလႃႉ၊ မိူင်း မႄႇသႅၵ်ႉ ၊ၸိူဝ်းၼၼ်ႉၵႃႉၵုၼ်ႇၶၢႆသိၼ်တေႃႇၵၼ်တင်းမႂ်းလႄႈၶဝ်ဢဝ်ၶႃႈၶဝ်ၵူၼ်းၶဝ်၊ဢိၵ်ႇတင်းၶိူင်ႈတွင်းလိူင်လႂ်သေလႄႈ၊လႅၵ်ႈဢဝ်ၵုၼ်ႇသိၼ်မႂ်းဢေႃႈ။-
ၵူၼ်းဝဵင်း ပႅတ်ႉတေႃႇၵမႃႉ တင်းလၢႆဢဝ်မႃႉလႂ်၊မႃႉသိုၵ်းလႂ်၊တင်းမႃႉလေႃႈလႂ်သေလႄႈမႃးလႅၵ်ႈဢဝ်ၵုၼ်ႇသိၼ်မႂ်းဢေႃႈ။-
ၵူၼ်းမဵဝ်း ရူဝ်းတေႇ၊ ၶဝ်ဢွၼ်ၵၼ်ၵႃႉၶၢႆတေႃႇမႂ်းလႄႈ၊ၵူၼ်းတၢင်ႇမိူင်းဢၼ်ယူႇၸွမ်းသၢပ်ႇပၢင်ႇလၢႆႇၼမ်ၼႃႇၵေႃႈပဵၼ်ၵၢတ်ႇပဵၼ်သႃးမႂ်းလႄႈဢွၼ်ၵၼ်ဢဝ်ငႃးၸၢင်ႉလႂ်၊မႆႉၼိူဝ်ႉလမ်လႂ်၊မႃးလႅၵ်ႈဢဝ်ၵုၼ်ႇသိၼ်မႂ်းဢေႃႈ။-
ၵူၼ်းမိူင်း သီးရီးယႃး၊ ၶဝ်သိုဝ်ႉဢဝ်ၵုၼ်ႇသိၼ်မႂ်း၊ဢိၵ်ႇတင်းၶူဝ်းဢၼ်မႂ်းႁဵတ်းဢွၵ်ႇၼၼ်ႉၼမ်ၼႃႇလႄႈဢွၼ်ၵၼ်ဢဝ်သႅင်ပတ်ႈတမျႃးလႂ်၊ၶူဝ်းဢၼ်သွမ်ႇလႂ်၊ၶူဝ်းၼုင်ႈဢၼ်ထူဝ်းပၵ်းလၢႆးလႂ်၊ပိၵ်ႈၶျေႃးလႂ်၊ႁိၼ်မွၵ်ႇႁိၼ်မႂ်လႂ်၊ဢိၵ်ႇတင်းသႅင်လႅင်လႂ်၊မႃးလႅၵ်ႈဢဝ်ၵုၼ်ႇသိၼ်မႂ်းဢေႃႈ။-
ၵူၼ်းမိူင်း ယုတႃႉ၊ တင်းၵူၼ်းမိူင်း ဢိသရေး ၸိူဝ်းၼၼ်ႉဢဝ်ၶဝ်ႈၵျုင်ႇလႂ်၊ၼမ်ႉၽိုင်ႈလႂ်၊ၼမ်ႉမၼ်းမၢၵ်ႇသၢၼ်ႇလုၼ်ႇလႂ်၊ဢိၵ်ႇတင်းၼၢမ်ႇသႃႇမႃးလႅၵ်ႈဢဝ်ၵုၼ်ႇသိၼ်မႂ်းဢေႃႈ။-
ၵူၼ်းဝဵင်း တမ်ႇမတ်ႉသၵတ်ႉ၊ ၶဝ်ၵေႃႈပဵၼ်ၵူၼ်းၸိူဝ်းဢၼ်သိုဝ်ႉၵုၼ်ႇသိုဝ်ႉသိၼ်မႂ်း၊ဢိၵ်ႇတင်းၶူဝ်းဢၼ်မႂ်းႁဵတ်းဢွၵ်ႇၼမ်ၼႃႇၼၼ်ႉလႄႈ၊ၶဝ်ဢွၼ်ၵၼ်ဢဝ်ၼမ်ႉမၢၵ်ႇၸပိတ်ႉၵႃႈတီႈဝၢၼ်ႈ ႁေႇလပုၼ်ႇ၊ ဢိၵ်ႇတင်းၶူၼ်သူဝ်းၽိူၵ်ႇၼၼ်ႉမႃးလႅၵ်ႈဢဝ်ၵုၼ်ႇသိၼ်မႂ်းဢေႃႈ။-
ၶဝ်ၸိူဝ်းၼၼ်ႉမႃးႁဵတ်းတၢင်းၵႃႉတၢင်းၶၢႆတေႃႇမႂ်းလႄႈဢွၼ်ၵၼ်ဢဝ်လဵၵ်းလေႃႇဢၼ်လိူမ်ႈလီၶျေႃးလီ၊မႆႉႁွမ်ႁိုတ်း၊ဢိၵ်ႇတင်းဢွႆႈလႂ်၊မႃးလႅၵ်ႈဢဝ်ၵုၼ်ႇသိၼ်မႂ်းဢေႃႈ။-
ၵူၼ်းဝဵင်း တေႇတၼ်ႇ၊ ၶဝ်ၵေႃႈဢွၼ်ၵၼ်မႃးၵႃႉၶၢႆၵွပ်းမႃႉ၊ဢိၵ်ႇတင်းသၢႆၶိူင်ႈႁၢင်ႈၵွပ်းမႃႉတင်းလၢႆတေႃႇမႂ်းဢေႃႈ။-
ၵူၼ်းမိူင်း ဢရေးပီးယႃး၊ ၶဝ်ဢိၵ်ႇတင်းၶုၼ်မိူင်း ၵေႇတႃႇ၊ ၶဝ်ၵေႃႈဢွၼ်ၵၼ်ဢဝ်သူဝ်းဢွၼ်ႇ၊သူဝ်းပေႃႈတင်းပႄႉလႂ်၊မႃးၵႃႉၵုၼ်ႇၶၢႆသိၼ်တေႃႇမႂ်းဢေႃႈ။-
ၸဝ်ႈၵုၼ်ႇၸဝ်ႈသိၼ်မိူင်း သေးပႃႉ၊ တင်းမိူင်း ရႃႇမႃႉ၊ ၸိူဝ်းၼၼ်ႉသမ်ႉဢဝ်သႅင်ၶဵဝ်၊ၶမ်း၊တင်းမဵဝ်းၼၢမ်ႇသႃႇဢၼ်လီသေပိူၼ်ႈလႂ်၊မႃးလႅၵ်ႈဢဝ်ၵုၼ်ႇသိၼ်မႂ်းဢေႃႈ။-
ၵူၼ်းဝဵင်း ႁႃႇရၼ်ႇ၊ ၵူၼ်းဝဵင်း ၵႃႇၼေႇ ၊ၵူၼ်းဝဵင်း ဢေႇတိၼ်ႇ၊ ၸဝ်ႈၵုၼ်ႇၸဝ်ႈသိၼ်မိူင်း သေးပႃႉ၊ ၵူၼ်းဝဵင်း ဢႃႇသုရိ ဢိၵ်ႇတင်း ၶိလမတ်ႉ၊ ၸိူဝ်းၼၼ်ႉ၊ပဵၼ်ၵေႃႉဢၼ်ၵႃႉၶၢႆတေႃႇမႂ်းဢေႃႈ။-
ၶဝ်ဢဝ်ၶူဝ်းၼုင်ႈဢၼ်ဢၼ်လီၼႃႇဢၼ်ဝႃႈ၊ၶူဝ်းၼုင်ႈဢၼ်သွမ်ႇ၊ၶူဝ်းၼုင်ႈဢၼ်ပၵ်းဢၼ်ထူဝ်းလၢႆး၊ၸဵၼ်သိူဝ်ႇဢၼ်မီးသီၼၼ်ႉဢဝ်သႂ်ႇတိူၵ်ႈသႂ်ႇတႃလႄႈဢဝ်သၢႆၸိူၵ်ႈမတ်ႉဝႆႉလီလီသေယဝ်ႉ၊မႃးၶၢႆပၼ်ၼႂ်းၵၢတ်ႇၼႂ်းသႃးမႂ်းဢေႃႈ။-
ၵုၼ်ႇသိၼ်မႂ်းၸိူဝ်းၼၼ်ႉမႂ်းဢဝ်ႁိူဝ်းသၢင်းၽေႃးယႂ်ႇယႂ်ႇတၢင်ႇတေႃႉဢဝ်ၵႂႃႇႁူမ်ႈလူၺ်ႈၵၼ်တင်းမူႇၽုင်ႁိူဝ်းသၢင်းၽေႃးၼမ်ၼႃႇၸိူဝ်းၼၼ်ႉ၊ မႂ်းမိူၼ်ၸိူဝ်ႉၼင်ႇႁိူဝ်းသၢင်းၽေႃးဢၼ်တၢင်ႇၵုၼ်ႇၼၵ်းလႄႈမီးယူႇၼႂ်းၵၢင်ပၢင်ႇလၢႆႇၼၼ်ႉဢေႃႈ။
ၵူၼ်းၽၢႆးႁိူဝ်းမႂ်းတင်းလၢႆဢဝ်မႂ်းၶဝ်ႈၸူးတီႈၼမ်ႉပၢင်ႇလၢႆႇလႄႈ လူမ်းတၢင်းဢွၵ်ႇပတ်ႉထူဝ်းဢဝ်မႂ်းႁၵ်းပႅတ်ႈၵႃႈၼႂ်းၵၢင်ပၢင်ႇလၢႆႇဢေႃႈ။
ၵႃႈဢၼ်ပဵၼ်ဢုၵ်ႉၸႃႇၶူဝ်းၵုၼ်ႇၶူဝ်းသိၼ်မႂ်း၊ ၵႃႈဢၼ်ပဵၼ်ၵူၼ်းၶတ်းႁၢင်ႁိူဝ်းၵႃႈၼႂ်းႁိူဝ်းသၢင်းၽေႃးမႂ်း၊ ၵူၼ်းမေႃဢိုတ်းမေႃယႃႁိူဝ်းသၢင်းၽေႃးမႂ်းတင်းၸဝ်ႈၵုၼ်ႇၸဝ်ႈသိၼ်မႂ်း၊ ႁူဝ်ႁၢၼ်ၵူၼ်းသိုၵ်းၵႃႈၼႂ်းႁိူဝ်းသၢင်းၽေႃးမႂ်း ၵႃႈမီးတင်းသဵင်ႈတင်းလူင်ဢွၼ်ၵၼ်ၸူမ်ႁၢႆသဵင်ႈမူတ်းၵႃႈၼႂ်းၵၢင်ပၢင်ႇလၢႆႇ ၼႂ်းဝၼ်းဢၼ်ႁိူဝ်းသၢင်းၽေႃးမႂ်းႁၵ်းလႄႈလုလႅဝ်ၼၼ်ႉဢေႃႈ။
သဵင်ႁွင်ႉသဵင်သႅၼ်ႇၵူၼ်းၶတ်းႁၢင်ႁိူဝ်းတင်းလၢႆၼၼ်ႉ သဵင်လင်ၵွင်ႈႁွတ်ႈထိုင်ၽင်ႇပၢင်ႇလၢႆႇ ၵႂႃႇဢေႃႈ။
ၵူၼ်းႁိူဝ်းသၢင်းၽေႃးတၢင်ႇလမ်းၵႃႈမီးၼၼ်ႉပႅတ်ႈႁိူဝ်းၶဝ်ဝႆႉလႄႈဢွၵ်ႇၵႂႃႇသေယဝ်ႉ၊ ၵူၼ်းၶတ်းႁၢင်ႁိူဝ်းၶဝ်ၵူႈၵေႃႉၵူႈၵူၼ်းၵေႃႈႁွတ်ႈၵႂႃႇၵႃႈတီႈၽင်ႇယဝ်ႉ။
ၶဝ်ႁွင်ႉသႅၼ်ႁွင်ႉႁႆႈလူၺ်ႈသဵင်ဢၼ်ယႂ်ႇၼႃႇၵွပ်ႈပိူဝ်ႈမႂ်းလႄႈ ဢွၼ်ၵၼ်ဢဝ်မုၼ်ႈလိၼ်ပိုၼ်သႂ်ႇၵႃႈၼိူဝ်ၵွၵ်းႁူဝ်ၶဝ်သေလႄႈၵိင်ႈဢိူၵ်ႇယူႇၵႃႈၼႂ်းတဝ်ႈဢေႃႈ။
ဢွၼ်ၵၼ်ထႃႁူဝ်ပုၼ်ႈမႂ်းလႄႈၼုင်ႈမႆၼင်ပေႃယူႇဢေႃႈ။ ၶဝ်မႆႈၸႂ်ၶေႃးၶူမ်ၼႃႇလႄႈႁွင်ႉႁႆႈပွင်ႉၶၢင်းယူႇဢေႃႈ။
ဢွၼ်ၵၼ်ႁဵတ်းၵႂၢမ်းမႃႇသႃႇပုၼ်ႈမႂ်းလႄႈဝႃႈ၊ ‘ဝဵင်းဢၼ်လႂ်မိူၼ်ၵၼ်တင်းဝဵင်း တုရု၊ ဝဵင်းဢၼ်ၸူမ်ႁၢႆၵႃႈၼႂ်းၵၢင်ပၢင်ႇလၢႆႇၼၼ်ႉ။
မိူဝ်ႈဢၼ်ၶူဝ်းၵုၼ်ႇၶူဝ်းသိၼ်မႂ်းၶၢမ်ႈပၢင်ႇလၢႆႇၵႂႃႇၼၼ်ႉ မႂ်းႁႂ်ႈၵူၼ်းမဵဝ်းၼမ်ၼႃႇလႆႈဢိမ်ႇလႆႈတဵမ်ၵူႈၵေႃႉဢေႃႈ။ ၶုၼ်ႁေႃၶမ်းတင်းလၢႆလႆႈမၢၵ်ႈမီးလီပဵၼ်ၵွပ်ႈပိူဝ်ႈၵုၼ်ႇသိၼ်မႂ်းဢေႃႈ။
မိူဝ်ႈလဵဝ်ၼႆႉၸမ်ႉ၊မႂ်းလႆႈႁၵ်းလႅဝ်ၵႂႃႇၵႃႈၼႂ်းၼမ်ႉပၢင်ႇလၢႆႇယဝ်ႉ၊ မႂ်းၸူမ်ႁၢႆတၢႆၵႂႃႇၵႃႈၼႂ်းၼမ်ႉသမ်ႇမုၵ်ႈတြႃႇတီႈဢၼ်ၼမ်ႉလိုၵ်ႉၼၼ်ႉယဝ်ႉ၊ ဢုၵ်ႉၸႃႇၵုၼ်ႇသိၼ်မႂ်းဢိၵ်ႇတင်းၵူၼ်းႁဵတ်းၵၢၼ်မႂ်းတင်းလၢႆဢွၼ်ၵၼ်လုလႅဝ်တၢႆၸွမ်းမႂ်းၵႂႃႇယဝ်ႉ၊’ ဝႃႈၼႆဢေႃႈ။
“ၶဝ်ၸိူဝ်းဢၼ်မီးၸွမ်းၽင်ႇပၢင်ႇလၢႆႇၸိူဝ်းၼၼ်ႉဢွၼ်ၵၼ်ငိူဝ်ႈငဝ်ၵႂၢင်ၸႂ်ယူႇၵွပ်ႈမႂ်းလႄႈၶုၼ်ႁေႃၶမ်းၶဝ်ၸိူဝ်းၼၼ်ႉၵေႃႈဢွၼ်ၵၼ်တူၵ်းၸႂ်လႂ်တိုၼ်ႇသေလႄႈၼႃႈလုယူႇဢေႃႈ။-
မႂ်းၸမ်ႉသုမ်းႁၢႆၵႂႃႇယဝ်ႉ၊သုမ်းႁၢႆၵႂႃႇလုမ်းလုမ်းသေလႄႈၸဝ်ႈၵုၼ်ႇၸဝ်ႈသိၼ်ၵႃႈၼႂ်းလေႃးၵႃႉၼႆႉၵူႈတီႈၵူႈလႅၼ်ဢွၼ်ၵၼ်ၵူဝ်ႁႄၼႃႇ၊ၶဝ်ၵူဝ်ႁႄလွင်ႈဢၼ်ဢႃႉမၢင်ႇၵလႃႇမႂ်းၼၼ်ႉတၵ်းတူၵ်းႁွတ်ႈမႃးတီႈၶဝ်ၼၼ်ႉဢေႃႈ၊ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။ မႂ်းမွၵ်ႇလၢတ်ႈတီႈၶုၼ် တုရု၊ လႄႈဝႃႈ၊ ၸဝ်ႈပူဝ်ႇပႃႇၵၢင်ႁၢဝ်၊ၸဝ်ႈထႃႇဝရႃႉၽြႃး ၊မီးဢမိင်ႉၸမ်ႉ၊မႂ်းမီးႁူဝ်ၸႂ်ၽႅၼ်သုင်လႄႈဢုပ်ႇဝၢဝ်းတူဝ်ၸဝ်ႈၵဝ်ႇလႄႈဝႃႈ၊ ‘ၵဝ်ပဵၼ်ၽြႃးဢေႃႈ။ ၵဝ်ၼင်ႈၵႃႈၼိူဝ်ပလၢင်ႇၽြႃးၵႃႈၼႂ်းၵၢင်ပၢင်ႇလၢႆႇဢေႃႈ၊’ ဝႃႈၼင်ႇၼႆလူင်ပႄႇ။ မႂ်းႁဵတ်းႁၢင်ႈပဵၼ်ၽြႃးသေၵေႃႈ၊တူဝ်မႂ်းၸမ်ႉ၊ပဵၼ်ၵူၼ်းယူဝ်းယူဝ်းၵူၺ်းဢေႃႈ။-
မႂ်းထၢင်ႇတူဝ်မႂ်းမီးပိင်ႇၺႃႇသေ တၢၼ်ႇယေႇလႃႉ၊ လႄႈလွင်ႈဢၼ်ပိူၼ်ႈသိူင်ႇမႅပ်းဝႆႉႁႂ်ႈမႂ်းဢမ်ႇႁုဢမ်ႇႁၼ်လႆႈၼၼ်ႉဢမ်ႇမီးသေမဵဝ်းဝႃႈၼႆလူင်ပႄႇ။-
ၼင်ႇၼၼ်လႄႈပိင်ႇၺႃႇဢိၵ်ႇတင်းတၢင်းဢၼ်မေႃဢၼ်ၸၢင်ႈမႂ်းၼၼ်ႉႁဵတ်းႁႂ်ႈမႂ်းလႆႈလီလႆႈပဵၼ်လူၺ်ႈၽၼ်ႇတႃႇငိုၼ်းၶမ်းယဝ်ႉလူင်ပႄႇ။-
မႂ်းဢဝ်တၢင်းဢၼ်လၵ်းလႅမ်မႂ်းသေလႄႈႁဵတ်းၵၢၼ်ၵႃႉၵၢၼ်ၶၢႆႁႂ်ႈလႆႈဢမျတ်ႈဢတူဝ်းမၼ်းဢေႃႈ။ မႂ်းၸၢင်ႈမီးႁူဝ်ၸႂ်ဢၼ်ဢုပ်ႇဢၢတ်ႇၽႅၼ်သုင်ၼႃႇၵွပ်ႈပိူဝ်ႈၸေးၸိမ်ႇမႂ်းၼၼ်ႉဢေႃႈ။
“ပိူဝ်ႈဢၼ်ပဵၼ်ၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ၵွပ်ႈပိူဝ်ႈဢၼ်မႂ်းထၢင်ႇမႂ်းမီးပိင်ႇၺႃႇပဵင်းတၢၼ်ႇၽြႃးၼၼ်ႉလႄႈ၊-
ၵဝ်တၵ်းၸႂ်ႉၵူၼ်းဢၼ်ႁၢဝ်ႈဢၼ်ၵျၢမ်းတင်းလၢႆမႃးတိုၵ်းတေႃးမႂ်းဢေႃႈ။ ၶဝ်ၼၼ်ႉတၵ်းဢွၼ်ၵၼ်ယႃႉမုၼ်သရေႇဢၼ်ႁၢင်ႈလီႁၢင်ႈငၢမ်းမႂ်းဢၼ်မႂ်းဢဝ်တင်းတၢင်းၵတ်ႉတၢင်းၶၼ်မႂ်းလႄႈႁႃလႆႈမႃးၼၼ်ႉမူတ်းမူတ်းသဵင်ႈသဵင်ႈဢေႃႈ။-
ၶဝ်တၵ်းၶႃႈၽၼ်းဢဝ်မႂ်းတၢႆသေယဝ်ႉ၊သူင်ႇမႂ်းၵႂႃႇၸူးၵႃႈၼႂ်းၼမ်ႉပၢင်ႇလၢႆႇၼၼ်ႉဢေႃႈ။-
ယၢမ်းမိူဝ်ႈဢၼ်ၶဝ်မႃးၶႃႈၽၼ်းဢဝ်မႂ်းတၢႆယူႇၼၼ်ႉမႂ်းယင်းတၵ်းလၢတ်ႈပိူၼ်ႈလႄႈဝႃႈ၊မႂ်းပဵၼ်ၽြႃးဝႃႈၼႆလူးၵွၼ်ႇႁိုဝ်း။ ယၢမ်းမိူဝ်ႈဢၼ်မႂ်းထူပ်းၺႃးၶဝ်ၸိူဝ်းဢၼ်ၶႃႈၽၼ်းဢဝ်မႂ်းတၢႆၼၼ်ႉမႂ်းတၵ်းပဵၼ်ၵူၼ်းယူဝ်းယူဝ်းၵူၺ်းလႄႈဢမ်ႇပဵၼ်ၽြႃးလႃးလႃး။-
မႂ်းတၵ်းလႆႈတၢႆမိူၼ်ၵူၼ်းဢၼ်ဢမ်ႇလႆႈၶၢမ်ႇတၢင်းဢၼ်ပၢတ်ႇပၢႆၼင်ၵႃႈၼႂ်းမိုဝ်းၵူၼ်းတၢင်ႇၸိူဝ်ႉတၢင်ႇၶိူဝ်းၼၼ်ႉဢေႃႈ။ ၵဝ်လၢတ်ႈဝႆႉယဝ်ႉ၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉယဝ်ႉ၊ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်ထႅင်ႈလႄႈဝႃႈၸမ်ႉ၊-
“လုၵ်ႈၵူၼ်း႟။ ႁဵတ်းတၢင်းဢၼ်ႁွင်ႉႁႆႈပွင်ႉၶၢင်းပွင်ႉမိုၼ်ႇပုၼ်ႈဢႃႉမၢင်ႇၵလႃႇဢၼ်တူၵ်းႁွတ်ႈမႃးၵႃႈၼိူဝ်ၶုၼ်ႁေႃၶမ်းဝဵင်း တုရု၊ ၼၼ်ႉတႃႉ။ မွၵ်ႇလၢတ်ႈပၼ်မၼ်းလႄႈဝႃႈၸမ်ႉ၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊မိူဝ်ႈၵွၼ်ႇဢွၼ်ၼၼ်ႉမႂ်းယၢမ်ႈပဵၼ်ပုင်ႇပမႃႇလွင်ႈဢၼ်ၸေးၸုမ်ႇလီငၢမ်းၼၼ်ႉယဝ်ႉ။ မႂ်းပျေႉၸုမ်ႇဝႆႉတင်းပိင်ႇၺႃႇလႄႈမီးတၢင်းဢၼ်ၸေးၸုမ်ႇဝႆႉတင်း တၢင်းဢၼ်ႁၢင်ႈလီႁၢင်ႈငၢမ်းယဝ်ႉ။-
မႂ်းယၢမ်ႈယူႇၵႃႈၼႂ်းသူၼ် ဢေႇတိၼ်ႇ၊ ဢၼ်ပဵၼ်သူၼ်ဢူးယဵၼ်ႇၽြႃးပဵၼ်ၸဝ်ႈၼၼ်ႉယဝ်ႉ။ မႂ်းယၢမ်ႈတိုဝ်းသႅင်မျၢတ်ႈၵူႈၸိူဝ်ႉၵူႈမဵဝ်းဢၼ်ဝႃႈ၊သႅင်လႅင်၊သႅင်ဢုႀၽယႃး၊သႅင်ၸိင်ႇ၊သႅင်မျၵ်ႈယွႆး၊သႅင်ၸၢႆးၶႃးယွတ်ႇ၊သႅင်ၼၵႃးသွႆႈ၊သႅင်ၼီႇလႃႇ၊သႅင်ပတ်ႈတမျႃး၊သႅင်မျႃႉ၊ဢိၵ်ႇတင်းၶိူင်ႈၶူဝ်းၶမ်းယဝ်ႉ။ ၶိူင်ႈၶူဝ်းၸိူဝ်းၼၼ်ႉပေႃးႁဵတ်းပုၼ်ႈမႂ်းဝႆႉၸႃႉၸဵမ်မိုဝ်ႉဝၼ်းဢၼ်ၽၢၼ်ႇသၢင်းႁဵတ်းပဵၼ်မႂ်းၼၼ်ႉယဝ်ႉ၊-
ၵဝ်ၸႂ်ႉ ၶေႇရုၽဵမ်ႇ၊ ဢၼ်ၵီႈၽႄႇႁူမ်ႇသုမ်ႇၼၼ်ႉႁႂ်ႈပႂ်ႉဢသၢၵ်ႈမႂ်းယဝ်ႉ။ မႂ်းတူၵ်းတီႈတူၵ်းလႅၼ်ၵႃႈၼိူဝ်လွႆဢၼ်မူတ်းၸၢင်ႇၵဝ်လႄႈလႆႈၵႂႃႇမႃးၵႃႈၼႂ်းၵႄႈၵၢင်မၢၵ်ႇႁိၼ်ဢၼ်ၽႆးလုၵ်ႉယူႇၼၼ်ႉဢေႃႈ။-
ၸႃႉၸဵမ်မိုဝ်ႉဝၼ်းဢၼ်ၽၢၼ်ႇသၢင်းႁဵတ်းပဵၼ်မႂ်းတေႃႇထိုင်ႁွတ်ႈဝၼ်းဢၼ်မႂ်းၸၢင်ႈႁဵတ်းတုၸရိူၵ်ႈၼၼ်ႉလွင်ႈယူႇလွင်ႈသဝ်းမႂ်းၵေႃႈပဵၼ်ဢၼ်ၸေးၸုမ်ႇဝႆႉဢေႃႈ။-
ၵွပ်ႈပိူဝ်ႈမႂ်းမိုင်ႉၵၢၼ်တၢင်းႁဵတ်းဢၼ်သိုဝ်ႉၵုၼ်ႇၶၢႆသိၼ်ၼၼ်ႉလွင်ႈတၢင်းၼၼ်ႉႁဵတ်းႁႂ်ႈမႂ်းမီးၸႂ်ဢၼ်ႁၢဝ်ႈဢၼ်ၵျၢမ်းလႄႈႁဵတ်းဢပျတ်ႈတၢင်းၽိတ်းဢေႃႈ။ ပိူဝ်ႈဢၼ်ပဵၼ်ၼင်ႇၼၼ်လႄႈၵဝ်လႆႈႁႂ်ႈမႂ်းဢွၵ်ႇသေၵႃႈတီႈလွႆဢၼ်မူတ်းၸၢင်ႇၵဝ်ၼၼ်ႉသေယဝ်ႉ၊တမၢၼ်ႇၵၢင်ႁၢဝ်ဢၼ်ပႂ်ႉထိင်းမႂ်းၼၼ်ႉလႆႈႁေႃႈမႂ်းဢွၵ်ႇသေၵႄႈၵၢင်မၢၵ်ႇႁိၼ်ဢၼ်ၽႆးလုၵ်ႉယူႇၼၼ်ႉဢေႃႈ။-
မႂ်းမီးၸႂ်ဢၼ်ဢုပ်ႇဝၢဝ်းလူၺ်ႈတၢင်းႁၢင်ႈလီႁၢင်ႈငၢမ်းမႂ်း၊မႂ်းႁႂ်ႈသၽေႃးမႂ်းပဵၼ်ဢၼ်ငိူဝ်ႈငႃႉၵႂႃႇယဝ်ႉ။ ပိူဝ်ႈၼႆလႄႈၵဝ်လႆႈၶျႃးမႂ်းတူၵ်းတီႈတႅမ်ႇတေႃႇႁွတ်ႈထိုင်လိၼ်ယဝ်ႉ၊ႁႂ်ႈလွင်ႈၼႆႉပဵၼ်ပုၼ်ႈဢၼ်ပၼ်သတိတီႈၶုၼ်ႁေႃၶမ်းတၢင်ႇပႃးၼၼ်ႉ။-
ၵွပ်ႈပိူဝ်ႈဢၼ်မႂ်းႁဵတ်းတၢင်းဢၼ်ၵႃႉၵုၼ်ႇၶၢႆသိၼ်ဢၼ်ဢထမ်ႇမႃႉလႄႈႁႂ်ႈထႃႇၼႃႉတီႈမူတ်းၸၢင်ႇမႂ်းတင်းလၢႆၵူဝ်ႈၵိူၵ်ႇယဝ်ႉ။ ပိူဝ်ႈၼႆလႄႈၵဝ်လႆႈဢဝ်ၽႆးတုတ်ႇဝဵင်းႁႂ်ႈမႆႈမူတ်းယဝ်ႉ။ ပိူၼ်ႈတၢင်ႇၵေႃႉတူၺ်းႁၼ်မႂ်းပဵၼ်တဝ်ႈဢၼ်ၵိုတ်းၵျၢၼ်ႇဝႆႉၵူၺ်းယဝ်ႉ။-
မႂ်းလပ်ႉႁၢႆၵႂႃႇယဝ်ႉလႄႈဢမ်ႇလႆႈပေႃႇမႃးလႃးလႃးတေႃႇထိုင်ႁွတ်ႈၵူၼ်းၵူႈၸိူဝ်ႉၵူႈမဵဝ်းၸိူဝ်းဢၼ်ႁုၸၵ်းမႂ်းၼၼ်ႉၵႂၢင်ၸႂ်ယုင်ႈၸႂ်လႄႈလီၵူဝ်လီႁႄၵွပ်ႈပိူဝ်ႈမႂ်းဢေႃႈ၊ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈၸမ်ႉ၊-
“မႂ်းၵႂႃႇလၢတ်ႈၵႂၢမ်းပရေႃးၽႅတ်ႈဢၼ်တၢင်ႇဢပျတ်ႈတီႈဝဵင်း ၸိတုမ်ႇ၊ လႄႈဝႃႈ၊-
‘ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ဝဵင်း ၸိတုမ်ႇ၊ ႟။ ၵဝ်ၼႆႉပဵၼ်ရၢၼ်ႇသူႇမႂ်းယဝ်ႉ။ ၵူၼ်းတင်းလၢႆတၵ်းဢွၼ်ၵၼ်ယွင်ႈယေႃးၵဝ်ၵွပ်ႈပိူဝ်ႈလွင်ႈတၢင်းဢၼ်ၵဝ်ႁဵတ်းတီႈမႂ်းၼၼ်ႉဢေႃႈ။ မိူဝ်ႈဢၼ်ၵဝ်ၼႄပျႃးတၢင်းဢၼ်ၵဝ်မူတ်းၸၢင်ႇၼၼ်ႉလူၺ်ႈတၢင်းဢၼ်ပၼ်တၢမ်ႇဢပျတ်ႈတီႈၶဝ်ၸိူဝ်းဢၼ်ယူႇၵႃႈၼႂ်းမႂ်းၼၼ်ႉၸိုင်၊ၶဝ်တၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ။-
ၵဝ်တၵ်းပွႆႇၸႂ်ႉၵႃႇလႃႉႁႃႈလႅင်မိူင်းမႃးထိုင်ၵႃႈတီႈမႂ်း၊ဢိၵ်ႇတင်းႁႂ်ႈလိူတ်ႈလႆၵႃႈၼႂ်းသဵၼ်ႈတၢင်းမႂ်းတင်းလၢႆဢေႃႈ။ မႂ်းတၵ်းလႆႈၶၢမ်ႇတၢင်းဢၼ်ပိူၼ်ႈတိုၵ်းတေႃးၵူႈၽၢႆႇၵူႈပႃႈလႄႈၵူၼ်းမႂ်းတင်းလၢႆတၵ်းဢွၼ်ၵၼ်လူမ်ႉတၢႆဢေႃႈ။ ၼင်ႇၼၼ်လႄႈသူတၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး ၊ဢေႃႈ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ၵူၼ်းမဵဝ်းၸိူဝ်ႉၶိူဝ်းဢၼ်မီးလဵပ်ႈႁွပ်ႈတီႈႁိမ်းၵူၼ်းမဵဝ်း ဢိသရေး လႄႈယၢမ်ႈၼိၵ်ႈၸၢၵ်ႈငႅၼ်းသႄးၶဝ်ၼၼ်ႉၵမ်းလိုၼ်းတၵ်းဢမ်ႇပဵၼ်သဵၼ်ႈပဵၼ်ၼၢမ်ဢၼ်ၸၢင်ႈသဵပ်ႇၸၢင်ႈၸူၵ်ႉတီႈၶဝ်ထႅင်ႈလႃးလႃး။ ၼင်ႇၼၼ်လႄႈၶဝ်တၵ်းႁုလွင်ႈဢၼ်ၵဝ်ပဵၼ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉလႄႈဝႃႈၸမ်ႉ၊ “ၵဝ်တၵ်းၶိုၼ်းၸုဢဝ်သိမ်းဢဝ်ၵူၼ်းမဵဝ်း ဢိသရေး၊ တင်းလၢႆဢွၵ်ႇသေၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းတီႈဢၼ်ၵဝ်ဢဝ်ၶဝ်ၸၢတ်ႇပိုၼ်ၵႂႃႇၼၼ်ႉဢေႃႈ။ မိူဝ်ႈၼၼ်ႉၵူၼ်းၵူႈၸိူဝ်ႉၵူႈမဵဝ်းတၵ်းႁုလွင်ႈဢၼ်ၵဝ်မူတ်းၸၢင်ႇဢေႃႈ။ ၵူၼ်းမဵဝ်း ဢိသရေး ၸိူဝ်းၼၼ်ႉတၵ်းဢွၼ်ၵၼ်ယူႇသဝ်းၵႃႈၼႂ်းမိူင်းၶဝ်ဢၼ်ၵဝ်ပၼ်တီႈၶႃႈၵဝ် ယႃႇၵုပ်ႈ၊ ဝႆႉၼၼ်ႉဢေႃႈ။-
ၶဝ်တၵ်းဢွၼ်ၵၼ်ယူႇသဝ်းၵႃႈၼႂ်းမိူင်းၼၼ်ႉလူင်ႈလီလွတ်ႈလီဢေႃႈ။ ၶဝ်တၵ်းဢွၼ်ၵၼ်ႁဵတ်းႁိူၼ်းႁဵတ်းယေး၊ဢွၼ်ၵၼ်ၽုၵ်ႇသူၼ်မၢၵ်ႇၸပိတ်ႉတင်းလၢႆဢေႃႈ။ ၵဝ်တၵ်းပၼ်တၢမ်ႇဢပျတ်ႈတီႈၶဝ်ၸိူဝ်းဢၼ်ယူႇၸမ်ၵၼ်တင်းၶဝ်လႄႈယၢမ်ႈၼိၵ်ႈၸၢၵ်ႈငႅၼ်းသႄးၶဝ်ၼၼ်ႉသေယဝ်ႉ၊ၵူၼ်းမဵဝ်း ဢိသရေး ၸမ်ႉ၊တၵ်းဢွၼ်ၵၼ်ယူႇသဝ်းလူင်ႈလီလွတ်ႈလီဢေႃႈ။ ၼင်ႇၼၼ်လႄႈၶဝ်တၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ၽြႃးပဵၼ်ၸဝ်ႈ၊ ၶဝ်ဢေႃႈ၊” ဝႃႈၼင်ႇၼႆဢေႃႈ။
ၼႂ်းပီဢၼ်ႁဝ်းလႆႈၶၢမ်ႇတၢင်းဢၼ်တိသိမ်းဢဝ်ၵႂႃႇလႆႈသိပ်းပီ၊လိူၼ်သိပ်းမႂ်ႇသိပ်းသွင်ဝၼ်းၼၼ်ႉၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။ ႁေႃးလၢတ်ႈၵႂၢမ်းပရေႃးၽႅတ်ႈတီႈၶုၼ်ႁေႃၶမ်းမိူင်း ဢေးၵျိပ်ႉ၊ တႃႉ။ မွၵ်ႇလၢတ်ႈလွင်ႈဢၼ်မၼ်းဢိၵ်ႇတင်းမိူင်းမၼ်း ဢေးၵျိပ်ႉ ၼၼ်ႉတၵ်းလႆႈၶၢမ်ႇတၢမ်ႇဢပျတ်ႈၼၼ်ႉတႃႉ။-
မွၵ်ႇလၢတ်ႈၼႄဝႃႈ၊ၼုၵ်ႈၵပၢတ်ႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ႁွတ်ႈမႃးတီႈၶုၼ်ႁေႃၶမ်းမိူင်း ဢေးၵျိပ်ႉ ၊လႄႈဝႃႈၸမ်ႉ၊ငိူၵ်ႈလူင်ဢၼ်ယူႇၵႃႈၼႂ်းၼမ်ႉႁွင်ႈၼမ်ႉၵႄးၼႆႉ႟။ ၵဝ်ပဵၼ်ရၢၼ်ႇသူႇမႂ်းဢေႃႈ။ ‘မႄႈၼမ်ႉ ၼၢႆးလ်၊ ၼႆႉပဵၼ်မႄႈၼမ်ႉဢၼ်ၵဝ်ပိူင်ႇ၊ၵဝ်ႁဵတ်းပဵၼ်မၼ်းဝႆႉပုၼ်ႈၵဝ်၊’ ဝႃႈၼႆ၊မႂ်းၸၢင်ႈလၢတ်ႈဝႃႈၸိူဝ်ႉၼင်ႇၼႆဢေႃႈ။-
ၵဝ်တၵ်းပွႆႇမဵတ်းၵွင်ႉသႂ်ႇၵၢင်းမႂ်းလႄႈႁႂ်ႈပႃဢၼ်ယူႇၵႃႈၼႂ်းၼမ်ႉႁွင်ႈၼမ်ႉၵႄးမႂ်းၸိူဝ်းၼၼ်ႉၸပ်းၵႃႈတီႈၵဵတ်းမႂ်းဢေႃႈ၊ၵဝ်တၵ်းတိုတ်ႉၸၼ်ဢဝ်မႂ်းဢွၵ်ႇသေၵႃႈၼႂ်းၼမ်ႉႁူမ်ႈလူၺ်ႈၵၼ်တင်းပႃဢၼ်ၸပ်းယူႇၵႃႈၼႂ်းၵဵတ်းမႂ်းၸိူဝ်းၼၼ်ႉဢေႃႈ။-
ၵဝ်တၵ်းဢဝ်မႂ်းဢိၵ်ႇတင်းပႃတင်းသဵင်ႈတင်းလူင်ၸိူဝ်းၼၼ်ႉပႅတ်ႈဝႆႉၵႃႈၼႂ်းထိူၼ်ႇၼႂ်းၶိူဝ်းဢေႃႈ။ တူဝ်မႂ်းၸမ်ႉ၊တၵ်းတူၵ်းယူႇၵႃႈၼိူဝ်လိၼ်ဝႆႉသေယဝ်ႉ၊တၵ်းဢမ်ႇလႆႈၽင်လႄႈပွႆႇပႅတ်ႈဝႆႉၵူၺ်းဢေႃႈ။ ၵဝ်တၵ်းဢဝ်တူဝ်တၢႆမႂ်းဢွႆႇၼူၵ်ႉတင်းလၢႆ၊ဢိၵ်ႇတင်းတူဝ်သတ်းထိူၼ်ႇတင်းလၢႆဢေႃႈ။-
ၼင်ႇၼၼ်လႄႈၵူၼ်းမိူင်း ဢေးၵျိပ်ႉ၊ တင်းလၢႆတၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။ ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵူၼ်းမဵဝ်း ဢိသရေး၊ လႆႈဢိင်လႆႈပိုင်ႈသူၸိူဝ်းဢၼ်ပဵၼ်ၵူၼ်းမဵဝ်း ဢေးၵျိပ်ႉ၊ သေၵေႃႈ၊သူသမ်ႉပဵၼ်မိူၼ်ၶွၼ်ႉတဝ်ႉမႆႉဢေႃႈဢၼ်ဢမ်ႇလီဢိင်လီပိုင်ႈၼၼ်ႉလူင်ပႄႇ။-
မိူဝ်ႈဢၼ်ၶဝ်ဢိင်သူၼၼ်ႉသူႁၵ်းၵႂႃႇလႄႈႁႂ်ႈႁူဝ်မႃႇၶဝ်လုတ်ႈၵႂႃႇလႄႈႁႂ်ႈဢႅဝ်ၶဝ်ငၢင်ႇၵႂႃႇဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈဢၼ်ပဵၼ်ၸိူဝ်ႉၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵဝ်တၵ်းႁႂ်ႈၵူၼ်းဢွၼ်ၵၼ်ဢဝ်လၢပ်ႇဢဝ်လႅဝ်းမႃးတိုၵ်းတေႃးမႂ်းလႄႈၶႃႈၽၼ်းဢဝ်တၢႆၵူၼ်းမႂ်းတင်းလၢႆ၊ဢိၵ်ႇတင်းတရိၵ်ႈသၢၼ်ႇမႂ်းတင်းလၢႆဢေႃႈ။-
မိူင်း ဢေးၵျိပ်ႉ၊ တၵ်းပဵၼ်မိူင်းႁၢမ်းၵႂႃႇဢေႃႈ။ ၼင်ႇၼၼ်လႄႈသူတၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ။ “ၵွပ်ႈပိူဝ်ႈမႂ်းလၢတ်ႈဝႃႈ၊ ‘ၼမ်ႉ ၼၢႆးလ်၊ ၼႆႉပဵၼ်မႄႈၼမ်ႉဢၼ်ၵဝ်ပိူင်ႇ၊ဢၼ်ၵဝ်ႁဵတ်းပဵၼ်မႃးဝႆႉပုၼ်ႈၵဝ်ဢေႃႈ၊’ ဝႃႈၼႆၼၼ်ႉလႄႈ၊-
ၵဝ်ၼႆႉပဵၼ်ရၢၼ်ႇသူႇမႂ်း၊ပဵၼ်ရၢၼ်ႇသူႇၼမ်ႉ ၼၢႆးလ် ၊ဢၼ်မႂ်းပိူင်ႇၼၼ်ႉဢေႃႈ။ ၵဝ်တၵ်းႁဵတ်းႁႂ်ႈမိူင်း ဢေးၵျိပ်ႉ၊ လုလႅဝ်ပႅတ်ႈမူတ်းမူတ်းသဵင်ႈသဵင်ႈ၊ႁႂ်ႈပဵၼ်မိူင်းႁၢမ်းၵႂႃႇဢဝ်ၸႃႉၸဵမ်ဝဵင်း မိၵတေႃးလႃႉ ၊ဢၼ်မီးတၢင်းပွတ်းႁွင်ႇတေႃႇထိုင်ႁွတ်ႈဝဵင်း သုၼေႇ ၊ပွတ်းၸၢၼ်း၊တေႃႇထိုင်ႁွတ်ႈၶွပ်ႇၼမ်ႉလႅၼ်လိၼ်မိူင်း ဢေႇတီႇဢူဝ်းပီးယႃး၊ သုတ်းၵႂႃႇဢေႃႈ။-
ၵူၼ်းလႄႈသင်၊တူဝ်သတ်းလႄႈသင် ယင်းဢမ်ႇၵႂႃႇတႃႈပႆတၢင်းလတ်းၵႂႃႇၵႃႈတီႈၼၼ်ႈလႄႈဢမ်ႇမီးၽူႈလႂ်ယူႇသဝ်းၵႃႈတီႈၼၼ်ႈလႃးလႃးသီႇသိပ်းပီတဵမ်တဵမ်ဢေႃႈ။-
ၵဝ်တၵ်းႁႂ်ႈမိူင်း ဢေးၵျိပ်ႉ၊ ပဵၼ်မိူင်းဢၼ်သဵတ်ႇၵူၼ်းငႅဝ်ၵူၼ်းလိူဝ်တွၼ်းၼႃႇသေပိူၼ်ႈၵႃႈၼႂ်းမိူင်းလေႃးၵႃႉၼႆႉဢေႃႈ။ သီႇသိပ်းပီတဵမ်တဵမ်မိူင်း ဢေးၵျိပ်ႉ၊ တၵ်းလုလႅဝ်ယူႇ၊ပဵၼ်ဢၼ်လုလႅဝ်လိူဝ်တွၼ်းၼႃႇသေၵူႈသိုင်ႇၵူႈမိူင်းဢေႃႈ။ ၵဝ်တၵ်းႁႂ်ႈၵူၼ်းမဵဝ်း ဢေးၵျိပ်ႉ တင်းလၢႆပဵၼ်ၶဝ်ၸိူဝ်းဢၼ်ပၢႆႈတဵတ်ႇပၢႆႈသွၼ်ႈယူႇၵႃႈၼႂ်းပႃႇၽိူင်းမိူင်းပိူၼ်ႈႁႂ်ႈပၢႆႈၵႂႃႇယူႇၵႃႈၼႂ်းၵႄႈၵၢင်ၵူၼ်းလၢႆဝၢၼ်ႈလၢႆမိူင်းဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ “မိူဝ်ႈဢၼ်ၸေးသီႇသိပ်းပီယဝ်ႉၼၼ်ႉၵဝ်တၵ်းဢဝ်ၵူၼ်းမဵဝ်း ဢေးၵျိပ်ႉ၊ တင်းလၢႆပွၵ်ႈၶိုၼ်းမႃးသေၵႃႈတီႈၵူၼ်းၵူႈၸိူဝ်ႉၶိူဝ်းတင်းလၢႆ တီႈဢၼ်ၵဝ်ဢဝ်ၶဝ်ၸၢတ်ႇပိုၼ်ၼၼ်ႉလႄႈ၊-
ႁႂ်ႈၶဝ်ယူႇသဝ်းပွတ်းၸၢၼ်းမိူင်း ဢေးၵျိပ်ႉ၊ ဢၼ်ပဵၼ်မိူင်းတီႈၽင်ႁူၵ်ႉၽင်ႁႄႇၶဝ်ၼၼ်ႉဢေႃႈ။ ၵႃႈတီႈၼၼ်ႈၶဝ်တၵ်းပဵၼ်သိုင်ႇၸိုင်ႈဝၢၼ်ႈမိူင်းဢၼ်ဢမ်ႇမီးႁႅင်းတၼ်းၶူဝ်း၊-
ပဵၼ်သိုင်ႇၸိုင်ႈဝၢၼ်ႈမိူင်းဢၼ်ႁႅင်းလဵၵ်ႉႁႅင်းၵေႇလိူဝ်တွၼ်းၼႃႇသေပိူၼ်ႈလႄႈ၊ၶဝ်တၵ်းဢမ်ႇလႆႈဢုပ်ႉပိူင်ႇၵႃႈၼိူဝ်တၢင်ႇသိုင်ႇတၢင်ႇမိူင်းထႅင်ႈလႃးလႃး။ ၵဝ်တၵ်းႁႂ်ႈၶဝ်ပဵၼ်ဢၼ်ဢမ်ႇပွင်ႇလွင်ႈၵႃႈသင်လႄႈဢမ်ႇၸၢင်ႈႁဵတ်းႁႂ်ႈပိူၼ်ႈၸွမ်းဢလူဝ်ႇၵၢင်ၸႂ်ၶဝ်လႆႈၼၼ်ႉလႃးလႃး။-
ၵမ်းလိုၼ်းၵူၼ်းမဵဝ်း ဢိသရေး၊ ၶဝ်တၵ်းဢမ်ႇၶိုၼ်းဢိင်ပိုင်ႈၶဝ်ထႅင်ႈသေပွၵ်ႈသေပၢၼ်ယဝ်ႉ။ ၵူၼ်းမဵဝ်း ဢိသရေး ၊ၶဝ်တၵ်းၽိတ်းၸႂ်ၵွပ်ႈပိူဝ်ႈဢၼ်လႆႈဢိင်ပိုင်ႈၵူၼ်းမဵဝ်း ဢေးၵျိပ်ႉ၊ မႃးၼၼ်ႉဢေႃႈ။ ၼင်ႇၼၼ်လႄႈၵူၼ်းမဵဝ်း ဢိသရေး၊ တၵ်းႁုလွင်ႈဢၼ်ၵဝ်ပဵၼ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။
ၼႂ်းပီဢၼ်ႁဝ်းလႆႈၶၢမ်ႇတၢင်းဢၼ်တိသိမ်းဢဝ်ၵႂႃႇလႆႈသၢဝ်းၸဵတ်းပီ၊လိူၼ်တီႈၼိုင်ႈဝၼ်းတီႈၼိုင်ႈၼၼ်ႉၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။ ၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ မိူင်း ပႃႇပုလုၼ်ႇ၊ ၼၼ်ႉၶီႇသိုၵ်းထူဝ်းၶိုၼ်ႈတိုၵ်းတေႃးဝဵင်း တုရု၊ ယဝ်ႉ။ မၼ်းၸႂ်ႉႁႂ်ႈႁူဝ်ႁၢၼ်ၵူၼ်းသိုၵ်းမၼ်းတင်းလၢႆႁၢပ်ႇၵၢၼ်ငၢၼ်းဢၼ်ၼၵ်းၼႃႇလူင်လၢင်တေႃႇထိုင်ႁွတ်ႈထူပွတ်ႈႁူဝ်ၶဝ်ထၢၼ်ႈပေႃးလၢၼ်ႉပေႃးၵဵင်ႈမူတ်း၊ႁူဝ်မႃႇၶဝ်ထၢၼ်ႈပေႃးလွၵ်ႈပေႃးၸဵပ်းမူတ်းယဝ်ႉ။ ၵူၺ်းၵႃႈ၊ၸႃႉၸဵမ်ၶုၼ်ႁေႃၶမ်း၊ဢိၵ်ႇတင်းၵူၼ်းသိုၵ်းမၼ်းတင်းလၢႆ ဢမ်ႇလႆႈၶၢမ်ႇဢဝ်ဢၵျူဝ်းၵႃႈၼိူဝ်တၢင်းဢၼ်ၶဝ်ၶၢမ်ႇတုၵ်ႉၶႃႉၼၼ်ႉ၊-
မိူဝ်ႈဢၼ်ပဵၼ်ၸိူဝ်ႉၼင်ႇၼၼ်လႄႈၵဝ်၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ၵဝ်တၵ်းဢဝ်မိူင်း ဢေးၵျိပ်ႉ ၊ဢၢပ်ႈပၼ်တီႈ ၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ ဢေႃႈ။ မၼ်းၼၼ်ႉတၵ်းႁိမ်ႁူင်ႇသိမ်းဢဝ်ဢုၵ်ႉၸႃႇၶူဝ်းလဵင်းမိူင်း ဢေးၵျိပ်ႉ၊ ၵႂႃႇလႄႈၽႄမႅင်ႇပၼ်ႁႂ်ႈပဵၼ်ၵႃႈႁႅင်းၵူၼ်းသိုၵ်းမၼ်းတင်းလၢႆဢေႃႈ။-
ၵွပ်ႈပိူဝ်ႈဢၼ်တပ်ႉသိုၵ်းမၼ်းၵိုတ်ႉႁၢပ်ႇၵၢၼ်ငၢၼ်းၵဝ်ၼၼ်ႉလႄႈၵဝ်ဢဝ်မိူင်း ဢေးၵျိပ်ႉ၊ ပၼ်ပုၼ်ႈၵႃႈၶၼ်ဢၼ်မၼ်းၵိုတ်ႉႁၢပ်ႇၼႃႈၵၢၼ်ၵဝ်ၼၼ်ႉဢေႃႈ၊ဝႃႈၼင်ႇၼႆ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ။
“မိူဝ်ႈဢၼ်လွင်ႈတၢင်းၼၼ်ႉပဵၼ်မႃးၸိုင်၊ၵဝ်တၵ်းႁႂ်ႈၵူၼ်းမဵဝ်း ဢိသရေး၊ တင်းလၢႆမီးဢဵၼ်ႁႅင်းယႂ်ႇမႃးသေယဝ်ႉ၊ၸႂ်ႉမႂ်း ယေႇၸၵျေႇလႃႉ၊ ႁေႃးလၢတ်ႈတီႈဢၼ်ၵူၼ်းၵူႈၵေႃႉငိၼ်းသဵင်မႂ်းလႆႈၼၼ်ႉဢေႃႈ။ ၼင်ႇၼၼ်လႄႈၶဝ်တၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။ မႂ်းႁေႃးလၢတ်ႈၵႂၢမ်းပရေႃးၽႅတ်ႈသေလႄႈလၢတ်ႈဝႃႈ၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉၸမ်ႉ၊မႂ်းတၵ်းလႆႈႁွင်ႉသႅၼ်ႇလႄႈဝႃႈ၊ “မိုဝ်ႉဝၼ်းဢၼ်မီးဢႃႉမၢင်ႇၵလႃႇၼၼ်ႉႁွတ်ႈမႃးယဝ်ႉ။
ဝၼ်းၼၼ်ႉၸမ်ယဝ်ႉ။ ဝၼ်းဢၼ် ထႃႇဝရႃႉၽြႃး ၊တၵ်းသၢင်ႈႁဵတ်း၊ ဝၼ်းဢၼ်ၽႃႉမိုတ်ႈ၊ဝၼ်းၽေးတုၵ်ႉၶႃႉပုၼ်ႈၸိူဝ်ႉၶိူဝ်းမဵဝ်းၵူၼ်းတင်းလၢႆၼၼ်ႉၸမ်ယဝ်ႉ။
တၵ်းမီးၽေးသိုၵ်းၽေးသိူဝ်ၵႃႈၼႂ်းမိူင်း ဢေးၵျိပ်ႉ ၊ၽေးဢၼ်မႆႈၸႂ်ႁွၼ်ႉၸႂ် တၵ်းမီးၵႃႈၼႂ်းမိူင်း ဢေႇတီႇဢူဝ်းပီးယႃး၊ ၵူၼ်းၼမ်ၼႃႇတၵ်းလူမ်ႉတၢႆၵႃႈၼႂ်းမိူင်း ဢေးၵျိပ်ႉ ၊ပိူၼ်ႈတၵ်းႁိမ်ႁူင်ႇဢဝ်ဢုၵ်ႉၸႃႇမိူင်းၼၼ်ႉလႄႈမိူင်းၼၼ်ႉတၵ်းလုလႅဝ် ၵႂႃႇသဵင်ႈဢေႃႈ။
“ၵူၼ်းသိုၵ်းဢၼ်ၸၢင်ႈငႃဢဝ်တီႈမိူင်း ဢေႇတီႇဢူဝ်းပီးယႃး၊ မိူင်း ၽုတႃႉ၊ မိူင်း လိပ်ႉပီးယႃး၊ မိူင်း ဢရေးပီးယႃး၊ မိူင်း ၶုၽႃႉ၊ မႃးၸိူဝ်းၼၼ်ႉတၵ်းဢွၼ်ၵၼ်လူမ်ႉတၢႆလူၺ်ႈၽေးလၢပ်ႇၽေးလႅဝ်းၵႃႈၼႂ်းၼႃႈသိုၵ်းႁူမ်ႈလူၺ်ႈၵၼ်တင်းၵူၼ်းမိူင်းဢၼ်ဝႆႉၵတိသဵတ်ႈၸႃႇၸိူဝ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ “ဢဝ်ၸႃႉၸဵမ်ဝဵင်း မိၵတေႃးလႃႉ၊ ဢၼ်မီးတၢင်းပွတ်းႁွင်ႇတေႃႇထိုင်ႁွတ်ႈဝဵင်း သုၼေႇ၊ ပွတ်းၸၢၼ်းၼၼ်ႉၵႃႈဢၼ်ပဵၼ်ႁူဝ်ႁၢၼ်ၵူၼ်းသိုၵ်းၵႃႈမီးဢၼ်ႁႄႉၵင်ႈမိူင်း ဢေးၵျိပ်ႉ၊ ၼၼ်ႉတၵ်းလႆႈဢွၼ်ၵၼ်လူမ်ႉတၢႆၵႃႈၼႂ်းၼႃႈသိုၵ်းဢေႃႈ။ တပ်ႉသိုၵ်းမဵဝ်း ဢေးၵျိပ်ႉ၊ ဢၼ်မီးၵုင်ႇသရေႇယႂ်ႇၼႃႇၼၼ်ႉတၵ်းသုမ်းၸွမ်းဢေႃႈ။ ဝႃႈၼႆ ၵဝ်၊ၸဝ်ႈ ထႃႇဝရႃႉၽြႃး၊ မီးဢမိင်ႉဢေႃႈ။-
မိူင်းၼၼ်ႉတၵ်းပဵၼ်ဢၼ်သဵတ်ႇၵူၼ်းငႅဝ်ၵူၼ်းလိူဝ်တွၼ်းၼႃႇသေပိူၼ်ႈၵႃႈၼႂ်းလေႃးၵႃႉၼႆႉလႄႈဝဵင်းတင်းလၢႆတၵ်းလုလႅဝ်ယူႇလုမ်းလုမ်းဢေႃႈ။-
ၵဝ်တၵ်းဢဝ်ၽႆးၸပ်းသႂ်ႇမိူင်း ဢေးၵျိပ်ႉ၊ လႄႈၶဝ်ၵႃႈဢၼ်ပဵၼ်ၵူၼ်းၵႅတ်ႇၶႄႁႄႉၵင်ႈၸိူဝ်းၼၼ်ႉ တၵ်းလူမ်ႉတၢႆဢေႃႈ။ ၼင်ႇၼၼ်လႄႈၶဝ်တၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး ဢေႃႈ။
“ၼႂ်းမိူဝ်ႈဢၼ်မိုဝ်ႉဝၼ်းၼၼ်ႉႁွတ်ႈထိုင်မႃးလႄႈမိူင်း ဢေးၵျိပ်ႉ၊ လႆႈလုလႅဝ်ၵႂႃႇၼၼ်ႉၸိုင်၊ၵဝ်တၵ်းပွႆႇၸႂ်ႉတမၢၼ်ႇၵဝ်တင်းလၢႆၶီႇႁိူဝ်းသၢင်းၽေႃးၵႂႃႇတိုၵ်းသူၼ်းၸႂ်ၵူၼ်းမိူင်း ဢေႇတီႇဢူဝ်းပီးယႃး၊ ၸိူဝ်းဢၼ်ဢမ်ႇမီးတၢင်းဢၼ်မႆႈၸႂ်ၶီၸႂ်ၼၼ်ႉႁႂ်ႈၶဝ်ဢွၼ်ၵၼ်ယၢပ်ႇၸႂ်ၶၢၼ်ၸႂ်ၼႃႇလူင်လၢင်ဢေႃႈ။ တူၺ်းလူး။ မိုဝ်ႉဝၼ်းၼၼ်ႉၸမ်မႃးယူႇဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵဝ်တၵ်းၸႂ်ႉၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ မိူင်း ပႃႇပုလုၼ်ႇ၊ ႁႂ်ႈမၼ်းပႄႇၽဵဝ်ႈဢုၵ်ႉၸႃႇၸေးၸိမ်ႇမိူင်း ဢေးၵျိပ်ႉ၊ ၼၼ်ႉဢေႃႈ။-
မၼ်းဢိၵ်ႇတင်းႁူဝ်ႁၢၼ်ၵူၼ်းသိုၵ်းမၼ်းဢၼ်ႁၢဝ်ႈၵျၢမ်းၼႃႇၸိူဝ်းၼၼ်ႉတၵ်းဢွၼ်ၵၼ်မႃးယႃႉၽဵဝ်ႈမိူင်းပႅတ်ႈလႄႈတၵ်းဢွၼ်ၵၼ်ဢဝ်လၢပ်ႇဢဝ်လႅဝ်းတိုၵ်းတေႃးမိူင်း ဢေးၵျိပ်ႉ ၊တေႃႇထိုင်ႁွတ်ႈတူဝ်တၢႆတင်းလၢႆထၢၼ်ႈပေႃးတဵမ်ဝၢၼ်ႈတဵမ်မိူင်းၵႂႃႇဢေႃႈ။-
ၵဝ်တၵ်းႁႂ်ႈၼမ်ႉ ၼၢႆးလ်၊ ယူတ်းႁႅင်ႈၵႂႃႇလႄႈဢဝ်မိူင်းဢၢပ်ႈပၼ်ၼႂ်းမိုဝ်းၵူၼ်းႁၢႆႉၵူၼ်းယုတ်ႈတင်းလၢႆဢေႃႈ။ ၵဝ်တၵ်းႁႂ်ႈၵူၼ်းတၢင်ႇသိုင်ႇတၢင်ႇမိူင်းယႃႉၽဵဝ်ႈပႅတ်ႈတင်းမိူင်းဢေႃႈ၊” ဝႃႈၼႆၵဝ် ၸဝ်ႈထႃႇဝရႃႉၽြႃး၊ မီးဢမိင်ႉဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵဝ်တၵ်းယႃႉၽဵဝ်ႈႁုၼ်ႇႁၢင်ႈသၢင်းထုတင်းလၢႆလႄႈပႄႇပႅတ်ႈၽြႃးဢၼ်ၽိတ်းဢၼ်ပိူင်ႈတင်းလၢႆႁၢႆၵႂႃႇၵႃႈၼႂ်းဝဵင်း မႅမ်းၽိ၊ ဢေႃႈ။ ၵမ်းလိုၼ်းတၵ်းဢမ်ႇမီးၸဝ်ႈမီးၶုၼ်ၼႂ်းမိူင်း ဢေးၵျိပ်ႉ၊ လႃးလႃး။ ၵဝ်တၵ်းႁဵတ်းလွင်ႈတၢင်းဢၼ်လီၵူဝ်လီႁႄတီႈၵူၼ်းမိူင်း ဢေးၵျိပ်ႉ၊ ဢေႃႈ။-
ၵဝ်တၵ်းႁဵတ်းႁႂ်ႈမိူင်း ဢေးၵျိပ်ႉ၊ ပွတ်းၸၢၼ်းတဵတ်ႇယဵၼ်လႄႈဢဝ်ၽႆးၸပ်းသႂ်ႇဝဵင်း ၸေႃးၼႃႉ၊ ဢၼ်မီးပွတ်းႁွင်ႇပုၼ်ႉၼၼ်ႉဢေႃႈ။ ၵဝ်တၵ်းပၼ်တၢမ်ႇဢပျတ်ႈတီႈဝဵင်းလူင် ႀေးပိ၊ ဢေႃႈ။-
ၵဝ်တၵ်းႁႂ်ႈဝဵင်း ၽိလုသိမ်း ဢၼ်ပဵၼ်ဝဵင်းဢၼ်ၶိူင်ႇဢၼ်ၶမ်ႉသေပိူၼ်ႈ ၵႃႈၼႂ်းမိူင်း ဢေးၵျိပ်ႉ၊ ၼၼ်ႉထူပ်းၽေးတၢင်းၸႂ်မႆႈၶႂ်ႈၸႃႉၵဝ်ဢေႃႈ။ ၵဝ်တၵ်းယႃႉၽဵဝ်ႈပႅတ်ႈတပ်ႉၸုမ်းသိုၵ်းဝဵင်း ႀေးပိ၊ ဢေႃႈ။-
ၵဝ်တၵ်းဢဝ်ၽႆးၸပ်းသႂ်ႇမိူင်း ဢေးၵျိပ်ႉ၊ လႄႈဝဵင်း ၽိလုသိမ်း၊ တၵ်းလႆႈၶၢမ်ႇဝူၺ်ႇတၼႃႇယႂ်ႇၼႃႇလူင်လၢင်ဢေႃႈ။ လမ်းဝဵင်း ႀေးပိ တၵ်းလူမ်ႉပင်းလႄႈ ဝဵင်း မႅမ်းၽိ၊ တၵ်းလႆႈၶၢမ်ႇတၢင်းဢၼ်ရၢၼ်ႇသူႇတိုၵ်းၼႂ်းၶိင်ႇၵၢင်ဝၼ်းဢေႃႈ။-
ၵူၼ်းၼုမ်ႇၵူၼ်းၵမ်ဝဵင်း ဢႃႇဝၼ်ႇ ဢိၵ်ႇတင်းဝဵင်း ၽိၽေးသႅတ်ႉ၊ ၸိူဝ်းၼၼ်ႉတၵ်းလႆႈတၢႆၵႃႈၼႂ်းၼႃႈသိုၵ်းလႄႈတၢင်ႇၵေႃႉတၢင်ႇၵူၼ်းၸိူဝ်းၼၼ်ႉၸမ်ႉ၊တၵ်းလႆႈၶၢမ်ႇတၢင်းဢၼ်ပိူၼ်ႈသိမ်းဢဝ်ၵႂႃႇဢေႃႈ။-
တၢင်းလပ်းသိင်ႇတၵ်းမုင်းႁူမ်ႇၵႃႈၼိူဝ်ဝဵင်း တႃႇပၼိတ်ႉ ၊ယၢမ်းမိူဝ်ႈဢၼ်ၵဝ်ႁၵ်းပႅတ်ႈတၼ်းၶူဝ်း၊ဢိၵ်ႇတင်းဢဵၼ်ႁႅင်းမိူင်း ဢေးၵျိပ်ႉ၊ ဢၼ်မၼ်းဢုပ်ႇဝၢဝ်းၼၼ်ႉဢေႃႈ။ မွၵ်ႇၵုမ်ႈၽႃႉၽူၼ်တၵ်းႁူမ်ႇသုမ်ႇမိူင်း ဢေးၵျိပ်ႉ၊ လႄႈၵူၼ်းဝၢၼ်ႈၵူၼ်းမိူင်းမၼ်းတင်းလၢႆတၵ်းလႆႈၶၢမ်ႇတၢင်းဢၼ်ပိူၼ်ႈသိမ်းဢဝ်ၵႂႃႇဢေႃႈ။-
မိူဝ်ႈဢၼ်ၵဝ်ၸီႇယၢင်ႇပၼ်တၢမ်ႇမိူင်း ဢေးၵျိပ်ႉ၊ ၸိူဝ်ႉၼင်ႇၼႆၼၼ်ႉ၊ၶဝ်တၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး ၊ဢေႃႈ၊” ဝႃႈၼင်ႇၼႆဢေႃႈ။
ၼႂ်းပီဢၼ်ႁဝ်းၶၢမ်ႇတၢင်းဢၼ်တိသိမ်းဢဝ်ၵႂႃႇလႆႈသိပ်းဢဵတ်းပီလိူၼ်တီႈၼိုင်ႈ၊ဝၼ်းတီႈၸဵတ်းၼၼ်ႉၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။ ၵဝ်ႁၵ်းပႅတ်ႈၶႅၼ်မိုဝ်းၶုၼ်ႁေႃၶမ်းမိူင်း ဢေးၵျိပ်ႉ၊ ယဝ်ႉ။ ၽူႈလႂ်တၵ်းဢမ်ႇဢဝ်ၽႃႈပူၵ်ႉႁေႃႇပၼ်၊ဢမ်ႇဢဝ်ယႃၵွပ်ႈႁေႃႇပၼ်ႁႂ်ႈလႆႈယူတ်းယႃၸဵပ်းမၼ်းထၢၼ်ႈပေႃးၶႅၼ်းလႄႈၶိုၼ်းမီးႁႅင်းဢၼ်တၵ်းယိပ်းၵမ်လၢပ်ႇၵမ်လႅဝ်းထႅင်ႈၼၼ်ႉဢေႃႈ။-
ပိူဝ်ႈၼႆလႄႈၵဝ်၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉၸမ်ႉ၊ၵဝ်ပဵၼ်ရၢၼ်ႇသူႇၶုၼ်ႁေႃၶမ်းမိူင်း ဢေးၵျိပ်ႉ ၊ဢေႃႈ။ ၵဝ်တၵ်းႁၵ်းၶႅၼ်မိုဝ်းမၼ်းတင်းသွင်ၶွၼ်၊ၸႃႉၸဵမ်ၶွၼ်ဢၼ်ႁႅင်းၶႅင်ယူႇ၊ဢိၵ်ႇတင်းၶွၼ်ဢၼ်ႁၵ်းပႅတ်ႈယဝ်ႉၼၼ်ႉႁႂ်ႈလၢပ်ႇလုတ်ႈတူၵ်းမိုဝ်းမၼ်းၵႂႃႇဢေႃႈ။-
ၵဝ်တၵ်းဢဝ်ၵူၼ်းမဵဝ်း ဢေးၵျိပ်ႉ၊ ၸၢတ်ႇပိုၼ်ၸွတ်ႇတူဝ်ႈၵႂႃႇၵႃႈၼႂ်းလေႃးၵႃႉၼႆႉဢေႃႈ။-
မိူဝ်ႈၼၼ်ႉ၊ၵဝ်တၵ်းႁႂ်ႈၶႅၼ်မိုဝ်းၶုၼ်ႁေႃၶမ်းမိူင်း ပႃႇပုလုၼ်ႇ ၊ၵႅၼ်ႇၶႅင်လႄႈဢဝ်လၢပ်ႇၵဝ်သႂ်ႇပၼ်ၵႃႈၼႂ်းမိုဝ်းမၼ်းဢေႃႈ။ ၶႅၼ်မိုဝ်းၶုၼ်ႁေႃၶမ်းမိူင်း ဢေးၵျိပ်ႉ၊ ၸမ်ႉ၊ၵဝ်တၵ်းႁၵ်းပႅတ်ႈလႄႈမၼ်းတၵ်းသႅၼ်ႇႁွင်ႉတၢႆၵႂႃႇၵႃႈတီႈၽၢႆႇၼႃႈရၢၼ်ႇသူႇမၼ်းဢေႃႈ။-
ၸႂ်ႈတႄႉဢေႃႈ။ ၵဝ်တၵ်းႁႂ်ႈၶႅၼ်မိုဝ်းၶုၼ်ႁေႃၶမ်းမိူင်း ဢေးၵျိပ်ႉ ၊ဢူၼ်ႈတူၵ်းၵႂႃႇလႄႈႁႂ်ႈၶႅၼ်မိုဝ်းၶုၼ်ႁေႃၶမ်းမိူင်း ပႃႇပုလုၼ်ႇ ၊ၵႅၼ်ႇၶႅင်ဢေႃႈ။ မိူဝ်ႈဢၼ်ၵဝ်ဢဝ်လၢပ်ႇၵဝ်ဢၢပ်ႈပၼ်ၵႃႈၼႂ်းမိုဝ်းမၼ်းလႄႈမၼ်းၸိသႂ်ႇတီႈမိူင်း ဢေးၵျိပ်ႉ၊ ၸိုင်၊ၵူၼ်းၵူႈၵေႃႉၵူႈၵူၼ်းတၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး ၊ဢေႃႈ။-
ၵဝ်တၵ်းၸၢတ်ႇပိုၼ်ၵူၼ်းမဵဝ်း ဢေးၵျိပ်ႉ၊ ၸွတ်ႇတူဝ်ႈၵႂႃႇၵႃႈၼႂ်းလေႃးၵႃႉၼႆႉဢေႃႈ။ ၼင်ႇၼၼ်လႄႈၶဝ်တၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။
ၼႂ်းပီဢၼ်ႁဝ်းလႆႈၶၢမ်ႇတၢင်းဢၼ်တိသိမ်းဢဝ်ၵႂႃႇလႆႈသိပ်းဢဵတ်းပီလိူၼ်တီႈသၢမ်၊ဝၼ်းတီႈၼိုင်ႈၼၼ်ႉၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးၵႃႈတီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။ မႂ်းႁေႃးလၢတ်ႈတီႈၶုၼ်ႁေႃၶမ်းမိူင်း ဢေးၵျိပ်ႉ၊ ဢိၵ်ႇတင်းၵူၼ်းဝၢၼ်ႈၵူၼ်းမိူင်းမၼ်းၵႃႈမီးလႄႈဝႃႈ၊ “မႂ်းၼႆႉၽုင်းတၼ်းၶူဝ်းယႂ်ႇၼႃႇလႄႈ ၵဝ်တၵ်းဢဝ်ဢီႈသင်တႅၵ်ႈတိူင်းၵၼ်တင်းမႂ်း။
မႂ်းၼႆႉပဵၼ်မိူၼ်ၸိူဝ်ႉၼင်ႇတူၼ်ႈမႆႉဢႃႇရိတ်ႉမိူင်း လေႇပၼုၼ်ႇ၊ လႄႈ မီးၵိင်ႇမီးၶႃႈဢၼ်ႁၢင်ႈလီႁၢင်ႈငၢမ်းၼႃႇၽိူဝ်မၼ်းမႂ်မၼ်းႁူမ်ႈလီၼႃႇသေယဝ်ႉ။ လမ်းမၼ်းသုင်ၼႃႇထိုင်ၽႃႉထိုင်မွၵ်ႇဢေႃႈ။
မီးၼမ်ႉပုၼ်ႈတၵ်းႁဵတ်းႁႂ်ႈမၼ်းဢွၵ်ႇမႃးယႂ်ႇမႃး၊ဢိၵ်ႇတင်း ၼမ်ႉၼႂ်းလိၼ်ၼၼ်ႉလေႃႇလဵင်ႉႁႂ်ႈမၼ်းသုင်လီဢေႃႈ။ ၼမ်ႉႁွင်ႈၼမ်ႉၵႄးၸိူဝ်းၼၼ်ႉလႆယူႇၵႃႈတီႈႁိမ်းႁွမ်းတူၼ်ႈမႆႉဢၼ်ၽုၵ်ႇဝႆႉသွမ်ႈဝႆႉၼၼ်ႉလႄႈ ၼမ်ႉႁွင်ႈဢွၼ်ႇမၼ်းတင်းလၢႆလႆၵႂႃႇၸူးတီႈတူၼ်ႈထိူၼ်ႇတူၼ်ႈၶိူဝ်းၵႃႈမီးၸွတ်ႇတူဝ်ႈ ၵႂႃႇဢေႃႈ။
ၵွပ်ႈပိူဝ်ႈၼမ်ႉၼၼ်ႉလႄႈတူၼ်ႈမၼ်းသုင်ၼႃႇသေတူၼ်ႈၵႃႈမီးၸိူဝ်းၼၼ်ႉဢေႃႈ။ ၵိင်ႇမၼ်းၶႃႈမၼ်းၵေႃႈၼႃတၼ်ၼႃႇလႄႈယၢဝ်းယဵတ်ႇၼႃႇဢေႃႈ။
ၼူၵ်ႉၵူႈၸိူဝ်ႉၵူႈမဵဝ်းၵေႃႈႁဵတ်းႁင်းၶဝ်ၵႃႈၼိူဝ်ၵိင်ႇမၼ်းၶႃႈမၼ်းလႄႈ တူဝ်ထိူၼ်ႇတင်းလၢႆဢွၼ်ၵၼ်ၵိူတ်ႇလုၵ်ႈၵႃႈတီႈႁူမ်ႈငဝ်းမၼ်းဢေႃႈ။ ၵူၼ်းမဵဝ်းလေႃးၵီႇတင်းလၢႆဢွၼ်ၵၼ်သွၼ်ႈႁူမ်ႈၽူၺ်းမၼ်းဢေႃႈ။
ၼင်ႇၼၼ်လႄႈတူၼ်ႈၼၼ်ႉႁၢင်ႈလီ ၽၢင်လီလူၺ်ႈ တၢင်းသုင်မၼ်းဢိၵ်ႇတင်းၵိင်ႇမၼ်းၶႃႈမၼ်းယၢဝ်းယဵတ်ႇၼႃႇၼၼ်ႉဢေႃႈ။ ႁၢၵ်ႈမၼ်းယင်ႇလူင်းၸူးတီႈၼမ်ႉဢၼ်လိုၵ်ႉၼႃႇၼၼ်ႉဢေႃႈ။
တူၼ်ႈဢႃႇရိတ်ႉဢၼ်မီးၼႂ်းသူၼ်ဢူးယဵၼ်ႇ ၽြႃးပဵၼ်ၸဝ်ႈၼၼ်ႉ ယင်းဢမ်ႇတႅၵ်ႈတိူင်းၵၼ်တင်းမၼ်းလႆႈလႃးလႃး တူၼ်ႈပႅၵ်ႇဢမ်ႇတွၼ်ႉမီးၵိင်ႇၶႃႈၸိူဝ်ႉၼင်ႇၼႆ တူၼ်ႈမႆႉဢႃႇရမုၼ်ႇဢမ်ႇမီးၵိင်ႇၶႃႈမိူၼ်မၼ်းလႆႈသေတူၼ်ႈ တူၼ်ႈဢၼ်မီးၼႂ်းသူၼ်ဢူးယဵၼ်ႇ ၽြႃးပဵၼ်ၸဝ်ႈၼၼ်ႉ ယင်းဢမ်ႇႁၢင်ႈလီႁၢင်ႈငၢမ်းမိူၼ်မၼ်းလႆႈသေတူၼ်ႈ။
ၵဝ်ႁဵတ်းႁႂ်ႈမၼ်းႁၢင်ႈလီႁၢင်ႈငၢမ်းၼႃႇလူၺ်ႈ ၵိင်ႇၶႃႈမၼ်းဢၼ်ၵီႈၽႄႇၸိူဝ်းၼၼ်ႉ တေႃႇထိုင်ႁွတ်ႈတူၼ်ႈမႆႉၵႃႈဢၼ်မီးၼႂ်းသူၼ်ဢူးယဵၼ်ႇ ဢေႇတိၼ်ႇ၊ သူၼ်ဢူးယဵၼ်ႇၽြႃးပဵၼ်ၸဝ်ႈၸိူဝ်းၼၼ်ႉထၢၼ်ႈပေႃးၶွႆမၼ်းဢေႃႈ။
“ၵမ်းၼႆႉၵဝ်၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊တၵ်းမွၵ်ႇလၢတ်ႈတီႈသူလူၺ်ႈလွင်ႈဢၼ်တၵ်းပဵၼ်မႃးၸိူဝ်ႉႁိုဝ်တီႈတူၼ်ႈမႆႉဢၼ်ယႂ်ႇသုင်ထၢၼ်ႈပေႃးထိုင်ၽႃႉထိုင်မွၵ်ႇၼၼ်ႉဢေႃႈ။ တူၼ်ႈမႆႉၼၼ်ႉယဵင်ႈသုင်ယဵင်ႈၶႅၼ်းမီးတၢင်းဢၼ်ပူၵ်းပႅၼ်ၽႅၼ်သုင်ဢေႃႈ။-
ၵွပ်ႈပိူဝ်ႈၸိူဝ်ႉၼင်ႇၼႆလႄႈၵဝ်ပႄႇပႅတ်ႈမၼ်းသေလႄႈႁႂ်ႈၶုၼ်တၢင်ႇသိုင်ႇတၢင်ႇမိူင်းမႃးဢုပ်ႉပိူင်ႇမၼ်းဢေႃႈ။ ၶုၼ်ၼၼ်ႉတၵ်းၸီႇယၢင်ႇမၼ်းၸွမ်းၵႃႈၼင်ႇဢၼ်မၼ်းႁၢႆႉယုတ်ႈၼၼ်ႉဢေႃႈ။-
ၵူၼ်းတၢင်ႇသိုင်ႇတၢင်ႇမိူင်းဢၼ်ႁၢဝ်ႈၵျၢမ်းၼႃႇၸိူဝ်းၼၼ်ႉတၵ်းဢွၼ်ၵၼ်ပွမ်ႈမၼ်းလူမ်ႉလႄႈပႅတ်ႈမၼ်းဝႆႉဢေႃႈ။ ၵိင်ႇမၼ်းၶႃႈမၼ်းတင်းလၢႆတၵ်းႁၵ်းတူၵ်းၵႃႈၼိူဝ်လွႆၵႃႈတီႈပၢင်ႇတီႈႁူၺ်ႈၵူႈတီႈၵူႈလႅၼ်ၸွတ်ႇတူဝ်ႈၵႂႃႇတင်းမိူင်းဢေႃႈ။ ၵူၼ်းမဵဝ်းၸိူဝ်ႉၶိူဝ်းဢၼ်ယၢမ်ႈသွၼ်ႈႁူမ်ႈမၼ်းၸိူဝ်းၼၼ်ႉတၵ်းဢွၼ်ၵၼ်ၸုၼ်ႉပႅတ်ႈမၼ်းဢေႃႈ။-
ၼူၵ်ႉတင်းလၢႆတၵ်းဢွၼ်ၵၼ်မႃးၸပ်းၵႃႈၼိူဝ်တေႃမႆႉၼၼ်ႉ၊ဢိၵ်ႇတင်းတူဝ်သတ်းထိူၼ်ႇတင်းလၢႆ တၵ်းယဵပ်ႇယမ်ႈၵႃႈၼိူဝ်ၵိင်ႇၶႃႈမၼ်းၸိူဝ်းၼၼ်ႉဢေႃႈ။-
ပိူဝ်ႈၼႆလႄႈဢဝ်ၼႆႉၵႂႃႇမိူဝ်းၼႃႈတူၼ်ႈမႆႉဢၼ်လႆႈၼမ်ႉလီလီထၢၼ်ႇႁိုဝ်သေဢမ်ႇဝႃႈ၊တူၼ်ႈဢၼ်တၵ်းသုင်ပဵင်းမိူၼ်မၼ်း၊တူၼ်ႈဢၼ်ႁႂ်ႈပၢႆၸိၵ်းမၼ်းထိုင်ၽႃႉထိုင်မွၵ်ႇလႄႈၶိုတ်းတၢင်းဢၼ်သုင်ယၢဝ်းမၼ်းၼၼ်ႉတၵ်းဢမ်ႇမီးထႅင်ႈသေတူၼ်ႈသေလႂ်။ လွင်ႈမၼ်းၸမ်ႉ၊တူၼ်ႈတင်းသဵင်ႈတင်းလူင်လႆႈၶၢမ်ႇတၢႆမိူၼ်ၸိူဝ်ႉၼင်ႇလုၵ်ႈၵူၼ်းဢၼ်လႆႈၶၢမ်ႇတၢမ်ႇဢၼ်လူင်းၸူးၵႃႈၼႂ်းမိူင်း မရၼႃႉ၊ ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ “ၼႂ်းဝၼ်းဢၼ်တူၼ်ႈမႆႉၼၼ်ႉလူင်းၵႂႃႇၵႃႈၼႂ်းမိူင်း မရၼႃႉ၊ ၼၼ်ႉၵဝ်တၵ်းႁႂ်ႈၼမ်ႉတႂ်ႈလိၼ်ထူမ်ႈမၼ်းႁႂ်ႈပဵၼ်သၢႆငၢႆတၢင်းဢၼ်ၶၢင်းၶီၶၢင်းၽၢၼ်ပုၼ်ႈမၼ်းဢေႃႈ။ ၵဝ်တၵ်းႁႂ်ႈၼမ်ႉႁွင်ႈၼမ်ႉၵႄးတင်းလၢႆ ယိုတ်းထၢတ်ႇလႄႈၼမ်ႉႁွင်ႈဢွၼ်ႇၼမ်ၼႃႇတၵ်းဢမ်ႇလႆယဝ်ႉဢေႃႈ။ ၵွပ်ႈပိူဝ်ႈဢၼ်တူၼ်ႈမႆႉၼၼ်ႉတၢႆယဝ်ႉလႄႈၵဝ်တၵ်းႁႂ်ႈလပ်းသိင်ႇႁူမ်ႇသုမ်ႇလွႆ လေႇပၼုၼ်ႇ၊ သေယဝ်ႉ၊ႁႂ်ႈတူၼ်ႈမႆႉၵႃႈဢၼ်မီးၵႃႈၼႂ်းထိူၼ်ႇၼၼ်ႉႁဵဝ်ႇႁႅင်ႈၵႂႃႇတင်းသဵင်ႈတင်းမူတ်းဢေႃႈ။-
ၵဝ်တၵ်းပွႆႇႁႂ်ႈတူၼ်ႈမႆႉၼၼ်ႉတူၵ်းၵႃႈၼႂ်းမိူင်း မရၼႃႉ ၊ၵႂႃႇလႄႈသဵင်ဢၼ်မၼ်းတူၵ်းၵႂႃႇၵႃႈၼႂ်းၼမ်ႉၼၼ်ႉတၵ်းႁႂ်ႈၵူၼ်းမဵဝ်းၸိူဝ်ႉၶိူဝ်းတင်းလၢႆသၼ်ႇၶွၼ်းဝႆဢေႃႈ။ ၵႃႈဢၼ်ပဵၼ်တူၼ်ႈမႆႉၼႂ်းသူၼ် ဢေႇတိၼ်ႇ၊ လႂ်၊တူၼ်ႈမႆႉဢၼ်မျၢတ်ႈလီလႂ်၊တူၼ်ႈမႆႉဢၼ်လႆႈၼမ်ႉလီလီငၢမ်းငၢမ်းလႂ်ၸိူဝ်းဢၼ်တူၵ်းၼႂ်းမိူင်းၶူင်းတႂ်ႈယဝ်ႉၼၼ်ႉတၵ်းဢွၼ်ၵၼ်ၸူမ်းသိူဝ်းၵွပ်ႈပိူဝ်ႈဢၼ်မၼ်းတူၵ်းသုမ်းၼၼ်ႉဢေႃႈ။-
ၶဝ်တၵ်းဢွၼ်ၵၼ်ၵႂႃႇလူၺ်ႈၵၼ်တင်းမၼ်းၵႂႃႇၸူးတီႈမိူင်း မရၼႃႉ၊ ႁႂ်ႈလႆႈၽွမ်ႉၵၼ်တင်းၶဝ်ၸိူဝ်းဢၼ်တူၵ်းႁွတ်ႈဝႆႉဢွၼ်တၢင်းယဝ်ႉၼၼ်ႉဢေႃႈ။ ၼင်ႇၼၼ်လႄႈၶဝ်ၸိူဝ်းဢၼ်သွၼ်ႈတႂ်ႈႁူမ်ႈၽူၺ်းမၼ်းတင်းသဵင်ႈတင်းလူင်ၼၼ်ႉတၵ်းၽၢတ်ႇၽႄၵၼ်ၵႂႃႇၵႃႈၼႂ်းၵူၼ်းမဵဝ်းၸိူဝ်ႉၶိူဝ်းတင်းလၢႆဢေႃႈ။
“တူၼ်ႈမႆႉၼၼ်ႉပဵၼ်ၶုၼ်ႁေႃၶမ်းမိူင်း ဢေးၵျိပ်ႉ ဢိၵ်ႇတင်းၵူၼ်းဝၢၼ်ႈၵူၼ်းမိူင်းမၼ်းၵႃႈမီးတင်းသဵင်ႈတင်းလူင်ဢေႃႈ။ တူၼ်ႈမႆႉၸိူဝ်းဢၼ်မီးၵႃႈၼႂ်းသူၼ် ဢေႇတိၼ်ႇ ၊ၼၼ်ႉယင်းဢမ်ႇသုင်ၼႃႇလူင်လၢင်၊ဢမ်ႇပဵၼ်ဢၼ်လီမၢတ်ႈလီတွင်းပဵင်းမၼ်း၊ၵူၺ်းၵႃႈမိူဝ်ႈလဵဝ်ၼႆႉ၊မၼ်းတၵ်းတူၵ်းလူင်းၸူးတီႈမိူင်း မရၼႃႉ၊ မိူၼ်ၸိူဝ်ႉၼင်ႇဢၼ်ၶဝ်ၼၼ်ႉတူၵ်းလူင်းၵႂႃႇၼၼ်ႉ၊ႁူမ်ႈလူၺ်ႈတင်းၶဝ်ၸိူဝ်းဢၼ်ဢမ်ႇၵူဝ်ယမ် ထႃႇဝရႃႉၽြႃး၊ ဢိၵ်ႇတင်းၶဝ်ၸိူဝ်းဢၼ်တၢႆၼႂ်းၼႃႈသိုၵ်းၼႃႈသိူဝ်ၼၼ်ႉဢေႃႈ၊ဝႃႈၼင်ႇၼႆၵဝ်၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ၊” ဝႃႈၼင်ႇၼႆဢေႃႈ။
ၼႂ်းပီဢၼ်ႁဝ်းလႆႈၶၢမ်ႇတၢင်းဢၼ်တိသိမ်းဢဝ်ၵႂႃႇလႆႈသိပ်းသွင်ပီ၊လိူၼ်သိပ်းသွင်၊ဝၼ်းတီႈၼိုင်ႈၼၼ်ႉၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။ ဢဝ်တင်းၵႂၢမ်းပၼ်သတိတီႈၶုၼ်ႁေႃၶမ်းမိူင်း ဢေးၵျိပ်ႉ၊ တႃႉ။ ဢဝ်ၵႂၢမ်းၵဝ်ၼႆႉသင်ႇလၢတ်ႈတီႈမၼ်းလႄႈဝႃႈ၊တၢင်းႁဵတ်းတၢင်းသၢင်ႈမႂ်းမိူၼ်ၸိူဝ်ႉၼင်ႇသၢင်ႇသီႈၵႃႈၼႂ်းၵူၼ်းမဵဝ်းၸိူဝ်ႉၶိူဝ်းတင်းလၢႆၵူၺ်းဢမ်ႇၵႃး၊ယဵင်ႈၶႅၼ်းပဵၼ်မိူၼ်ငိူၵ်ႈဢၼ်ယဵပ်ႇၶၢမ်ႈၼမ်ႉႁွင်ႈၼမ်ႉၵႄးတင်းလၢႆတူင်ႉၵႂႃႇၼိုင်ၵႂႃႇလႄႈႁႂ်ႈၶုၼ်ႇၵႂႃႇဢူၼ်ၵႂႃႇၼၼ်ႉဢေႃႈ။-
ယၢမ်းမိူဝ်ႈဢၼ်ၵူၼ်းမဵဝ်းၸိူဝ်ႉၶိူဝ်းတင်းလၢႆၸုတုမ်ၵၼ်ၼၼ်ႉၵဝ်တၵ်းဢဝ်ၶႄၵဝ်ႁူမ်ႇသုမ်ႇမႂ်းလႄႈႁႂ်ႈၶဝ်လၢၵ်ႈဢဝ်ၶႄၼၼ်ႉၵႂႃႇၵႃႈတီႈၽင်ႇၼမ်ႉဢေႃႈ။-
ၵဝ်တၵ်းဢဝ်မႂ်းထိမ်ႈဢွၵ်ႇၵႃႈၼိူဝ်လိၼ်လႄႈႁႂ်ႈၼူၵ်ႉတင်းတူဝ်သတ်းတင်းလၢႆ ဢၼ်မီးၵႃႈၼႂ်းလေႃးၵႃႉၼႆႉမႃးၵိၼ်ၼိူဝ်ႉမႂ်းဢေႃႈ။-
ၵဝ်တၵ်းဢဝ်တူဝ်တၢႆမႂ်းၽႄႇသိူဝ်ႇၵႃႈၼိူဝ်လွႆတင်းလၢႆ၊ဢိၵ်ႇတင်းပၢင်ႇႁူၺ်ႈတင်းလၢႆဢေႃႈ။-
ၵဝ်တၵ်းဢဝ်လိူတ်ႈမႂ်းထွၵ်ႇသႂ်ႇတေႃႇထိုင်ႁွတ်ႈၸွတ်ႇၽႄၵႂႃႇၵႃႈၼိူဝ်လွႆတင်းလၢႆလႄႈတဵမ်ဝႆႉၵႃႈၼႂ်းၼမ်ႉႁွင်ႈၼမ်ႉၵႄးတင်းလၢႆဢေႃႈ။-
မိူဝ်ႈဢၼ်ၵဝ်ႁႂ်ႈမႂ်းလုသုမ်းၼၼ်ႉၸိုင်၊ၵဝ်တၵ်းႁူမ်ႇသုမ်ႇၽႃႉၵၢင်ႁၢဝ်လႄႈႁႂ်ႈလၢဝ်တင်းလၢႆလပ်းသိင်ႇဢေႃႈ။ ၵဝ်တၵ်းႁႂ်ႈၽႃႉမိုတ်ႈတီႈၵၢင်ဝၼ်းလႄႈလိူၼ်ၵေႃႈဢမ်ႇလႆႈပၼ်ဢၼ်လႅင်းမၼ်း။-
ၵဝ်တၵ်းႁႂ်ႈဢၼ်ႁိူဝ်ႈလႅင်းၵႃႈၼိူဝ်ၽႃႉၵၢင်ႁၢဝ်ၵႃႈမီးၼၼ်ႉလပ်းသိင်ႇၵွပ်ႈပိူဝ်ႈမႂ်းလႄႈဢဝ်လပ်းသိင်ႇႁူမ်ႇသုမ်ႇမိူင်းမႂ်းဢေႃႈ၊ဝႃႈၼင်ႇၼႆၵဝ်၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ။
“မိူဝ်ႈဢၼ်ၵဝ်ပိုၼ်ၽၢဝ်ႇၶၢဝ်ႇငၢဝ်းလွင်ႈဢၼ်မႂ်းလုလႅဝ်ၼၼ်ႉႁွတ်ႈထိုင်ၵႃႈတီႈၵူၼ်းၵူႈၸိူဝ်ႉၵူႈမဵဝ်းၵႃႈၼႂ်းၵူႈသိုင်ႇၵူႈမိူင်းဢၼ်မႂ်းဢမ်ႇတွၼ်ႉႁုၼၼ်ႉၸိုင်၊တၵ်းႁႂ်ႈၵူၼ်းမဵဝ်းၸိူဝ်ႉၶိူဝ်းၼမ်ၼႃႇမႆႈၸႂ်ႁွၼ်ႉၸႂ်ဢေႃႈ။-
ၵႃႈဢၼ်ၵဝ်ႁဵတ်းတီႈမႂ်းၼၼ်ႉတၵ်းႁႂ်ႈၵူၼ်းမဵဝ်းၸိူဝ်ႉၶိူဝ်းတင်းလၢႆတူၵ်းၸႂ်ဢေႃႈ။ မိူဝ်ႈဢၼ်ၵဝ်ဢဝ်လၢပ်ႇၵဝ်ငႃၼၼ်ႉၶုၼ်ႁေႃၶမ်းတင်းလၢႆတၵ်းဢွၼ်ၵၼ်သၼ်ႇသၢႆၵူဝ်ႁႄဢေႃႈ။ ၼႂ်းမိုဝ်ႉဝၼ်းဢၼ်မႂ်းတူၵ်းသုမ်းၼၼ်ႉၶဝ်ၵႃႈမီးတၵ်းဢွၼ်ၵၼ်သၼ်ႇၶွၼ်းဝႆယူႇ၊ၵူဝ်ႁႄပုၼ်ႈဢသၢၵ်ႈၶဝ်ႁင်းၽႂ်ႁင်းမၼ်းယူႇဢေႃႈ၊” ဝႃႈၼင်ႇၼႆ ထႃႇဝရႃႉၽြႃး ၊မီးဢမိင်ႉဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉတီႈၶုၼ်ႁေႃၶမ်းမိူင်း ဢေးၵျိပ်ႉ၊ လႄႈဝႃႈၸမ်ႉ၊ “မႂ်းတၵ်းထူပ်းၽေးလၢပ်ႇၽေးလႅဝ်းၶုၼ်ႁေႃၶမ်းမိူင်း ပႃႇပုလုၼ်ႇ၊ ဢေႃႈ။-
ၵဝ်တၵ်းၸႂ်ႉႁူဝ်ႁၢၼ်ၵူၼ်းသိုၵ်းၼႂ်းၵူၼ်းမဵဝ်းဢၼ်ႁၢဝ်ႈၵျၢမ်းၼႃႇႁႂ်ႈၶဝ်ထွတ်ႇလၢပ်ႇၶဝ်လႄႈၶႃႈၽၼ်းဢဝ်တၢႆၵူၼ်းမႂ်းၵႃႈမီးၼၼ်ႉဢေႃႈ။ ၵူၼ်းမႂ်းၵႃႈမီး၊ဢိၵ်ႇတင်းဢုၵ်ႉၸႃႇၸေးၸိမ်ႇဢၼ်မႂ်းဢုပ်ႇဝၢဝ်းလူၺ်ႈၸိူဝ်းၼၼ်ႉတၵ်းလႆႈလုလႅဝ်ဢေႃႈ။-
ၵဝ်တၵ်းယႃႉၽဵဝ်ႈပႅတ်ႈတူဝ်သတ်းမႂ်းၵႃႈဢၼ်မီးၵႃႈတီႈႁိမ်းၼမ်ႉၵူႈတီႈၵူႈလႅၼ်ၼၼ်ႉဢေႃႈ။ ၵမ်းလိုၼ်းတိၼ်ၵူၼ်းလႄႈသင်၊တိၼ်တူဝ်သတ်းလႄႈသင် ဢမ်ႇလႆႈႁဵတ်းႁႂ်ႈၼမ်ႉၶုၼ်ႇၵႂႃႇဢူၼ်ၵႂႃႇ။-
မိူဝ်ႈၼၼ်ႉၵဝ်တၵ်းႁႂ်ႈၼမ်ႉမႂ်းတင်းလၢႆသႂ်လီမႃးလႄႈ၊ႁႂ်ႈၼမ်ႉႁွင်ႈၼမ်ႉၵႄးမႂ်းတင်းလၢႆလႆၵႂႃႇၼိမ်ၼိမ်လီလီဢေႃႈ၊ဝႃႈၼင်ႇၼႆၵဝ်၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉဢေႃႈ။-
မိူဝ်ႈဢၼ်ၵဝ်ႁႂ်ႈမိူင်း ဢေးၵျိပ်ႉ၊ သဵတ်ႇငႅဝ်ၵႂႃႇလႄႈယႃႉၽဵဝ်ႈၵႃႈဢၼ်ယူႇၵႃႈၼႂ်းမိူင်းၼၼ်ႉယဝ်ႉတူဝ်ႈယဝ်ႉၼၼ်ႉၸိုင်၊ၶဝ်တၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ။-
ၵႂၢမ်းပၼ်သတိၼႆႉတၵ်းပဵၼ်လိၵ်ႈႁဵတ်းၵႂၢမ်းမႃႇသႃႇၵႂႃႇသေယဝ်ႉ၊မႄႈယိင်းၵူၼ်းမဵဝ်းၸိူဝ်ႉၶိူဝ်းတင်းလၢႆတၵ်းဢွၼ်ၵၼ်ဢဝ်လိၵ်ႈႁဵတ်းၵႂၢမ်းၼၼ်ႉႁဵတ်းတၢင်းဢၼ်ပွင်ႉၶၢင်းပွင်ႉမိုၼ်ႇပုၼ်ႈမိူင်း ဢေးၵျိပ်ႉ၊ ဢိၵ်ႇတင်းၵူၼ်းဝၢၼ်ႈၵူၼ်းမိူင်းမၼ်းၵႃႈမီးၸိူဝ်းၼၼ်ႉဢေႃႈ။ ဝႃႈၼင်ႇၼႆၵဝ်၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ၊” ဝႃႈၼင်ႇၼႆဢေႃႈ။
ၼႂ်းပီဢၼ်ႁဝ်းလႆႈၶၢမ်ႇတၢင်းဢၼ်တိသိမ်းဢဝ်ၵႂႃႇလႆႈသိပ်းသွင်ပီ၊လိူၼ်တီႈၼိုင်ႈ၊ဝၼ်းတီႈသိပ်းႁႃႈၼၼ်ႉၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။” မႂ်းႁဵတ်းတၢင်းဢၼ်ပွင်ႉၶၢင်းပွင်ႉမိုၼ်ႇပုၼ်ႈၵူၼ်းမိူင်း ဢေးၵျိပ်ႉ၊ ဢၼ်ၼမ်ၼႃႇၼၼ်ႉတႃႉ။ ဢဝ်ၶဝ်ၸိူဝ်းၼၼ်ႉၶျႃးတူၵ်းၵႃႈၼႂ်းမိူင်း မရၼႃႉ၊ ႁူမ်ႈလူၺ်ႈၵၼ်တင်းၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းဢၼ်မီးၽုင်းတၼ်းၶူဝ်းၼၼ်ႉတႃႉ။-
မႂ်းတၵ်းလႆႈသင်ႇလၢတ်ႈတီႈၶဝ်လႄႈဝႃႈၸမ်ႉ၊ “မႂ်းထၢင်ႇဝႃႈမႂ်းႁၢင်ႈလီႁၢင်ႈငၢမ်း၊လိူဝ်တွၼ်းသေပိူၼ်ႈႁိုဝ်း မႂ်းတၵ်းလူင်းၸူးတီႈၼႂ်းမိူင်း မရၼႃႉ၊ သေလႄႈ တူၵ်းတီႈယူႇတီႈသဝ်းၵႃႈၼႂ်းၵႄႈၵူၼ်းဢၼ်ဢမ်ႇၵူဝ်ယမ် ထႃႇဝရႃႉၽြႃး၊ ၸိူဝ်းၼၼ်ႉဢေႃႈ။
“ၵူၼ်းမိူင်း ဢေးၵျိပ်ႉ၊ တင်းလၢႆတၵ်းလူမ်ႉတၢႆလူၺ်ႈၵၼ်တင်းၶဝ်ၸိူဝ်းဢၼ်တၢႆၵႃႈၼႂ်းၼႃႈသိုၵ်းၼၼ်ႉဢေႃႈ။ လၢပ်ႇလႅဝ်းပေႃးႁႅၼ်းထႃႈဝႆႉပုၼ်ႈတႃႇတေၶႃႈၽၼ်းၶဝ်ၵႃႈမီးတင်းသဵင်ႈတၢႆၼၼ်ႉယဝ်ႉ။-
ႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇသေပိူၼ်ႈၸိူဝ်းၼၼ်ႉ၊ဢိၵ်ႇတင်းၶဝ်ၸိူဝ်းဢၼ်ၸွႆႈထႅမ်မႃႉၸႃႉၽၢႆႇၵူၼ်းမဵဝ်း ဢေးၵျိပ်ႉ၊ ၸိူဝ်းၼၼ်ႉဢွၼ်ၵၼ်တွၼ်ႈႁပ်ႉၵူၼ်းမဵဝ်း ဢေးၵျိပ်ႉ၊ တင်းလၢႆၶဝ်ႈၵႃႈၼႂ်းမိူင်း မရၼႃႉ၊ ဢေႃႈ။ ၶဝ်ဢွၼ်ၵၼ်ႁွင်ႉသႅၼ်ႇလႄႈဝႃႈ၊ ‘ၶဝ်ၸိူဝ်းဢၼ်ဢမ်ႇၵူဝ်ယမ် ထႃႇဝရႃႉၽြႃး လႄႈတၢႆၵႃႈၼႂ်းၼႃႈသိုၵ်းၸိူဝ်းၼၼ်ႉဢွၼ်ၵၼ်လူင်းမႃးၵႃႈတီႈၼႆႈယဝ်ႉ။ တူၺ်းလူး။ ၶဝ်လႆႈတူၵ်းတီႈယူႇတီႈသဝ်းၵႃႈတီႈၼႆႈယဝ်ႉ၊’ ဝႃႈၼင်ႇၼႆဢေႃႈ။
“ ဢႃႇသီးရီးယႃး၊ ၵေႃႈမီးယူႇၵႃႈတီႈၼၼ်ႈလႄႈၶုမ်ပႃႇႁဵဝ်ႈလုၵ်ႈသိုၵ်းလုၵ်ႈသိူဝ်မၼ်းတင်းလၢႆမီးယူႇလဵပ်ႈႁွပ်ႈၵူႈတီႈၵူႈလႅၼ်ဢေႃႈ။ ၶဝ်ၸိူဝ်းၼၼ်ႉလႆႈတၢႆၵႃႈၼႂ်းၼႃႈသိုၵ်းသေလႄႈ၊-
ၶုမ်ပႃႇႁဵဝ်ႈၶဝ်ၼၼ်ႉမီးၵႃႈတီႈတီႈဢၼ်လိုၵ်ႉသေပိူၼ်ႈၵႃႈၼႂ်းမိူင်း မရၼႃႉ၊ ဢေႃႈ။ လုၵ်ႈသိုၵ်းလုၵ်ႈသိူဝ်မၼ်းၵႃႈမီးၸိူဝ်းၼၼ်ႉလႆႈတၢႆၵႃႈၼႂ်းၼႃႈသိုၵ်းလႄႈၶုမ်ပႃႇႁဵဝ်ႈၶဝ်မီးလဵပ်ႈႁွပ်ႈၶုမ်ပႃႇႁဵဝ်ႈမၼ်းယူႇဢေႃႈ။ ၶဝ်ၸိူဝ်းၼၼ်ႉယၢမ်ႈပဵၼ်ၵေႃႉဢၼ်ၸၢင်ႈႁႂ်ႈပိူၼ်ႈၵူဝ်ႁႄမိူဝ်ႈဢၼ်ၶဝ်ဢသၢၵ်ႈလိပ်းယူႇၼၼ်ႉဢေႃႈ။
“ ဢေႇလမ်ႇ၊ ၵေႃႈမီးယူႇၵႃႈတီႈၼၼ်ႈလႄႈ၊ၶုမ်ပႃႇႁဵဝ်ႈလုၵ်ႈသိုၵ်းမၼ်းတင်းလၢႆမီးယူႇလဵပ်ႈႁွပ်ႈၵူႈတီႈၵူႈလႅၼ်ဢေႃႈ။ ၶဝ်ၸိူဝ်းၼၼ်ႉလႆႈတၢႆၵႃႈၼႂ်းၼႃႈသိုၵ်းသေလႄႈ၊ယင်းဢမ်ႇလႆႈၶၢမ်ႇဢဝ်မၢင်ႇၵလႃႇဢၼ်ပၢတ်ႇပၢႆၼင်၊ဢွၼ်ၵၼ်လူင်းၸူးတီႈတီႈဢၼ်လိုၵ်ႉၵႃႈၼႂ်းမိူင်း မရၼႃႉ ၊ၼၼ်ႉဢေႃႈ။ မိူဝ်ႈဢၼ်ၶဝ်ယင်းဢသၢၵ်ႈလိပ်းယူႇၼၼ်ႉၶဝ်ယၢမ်ႈပဵၼ်ၵေႃႉဢၼ်ၸၢင်ႈႁဵတ်းႁႂ်ႈပိူၼ်ႈၵူဝ်ႁႄၶဝ်သေၵေႃႈ၊တေႃႈလဵဝ်ၼႆႉၸမ်ႉ၊ၶဝ်လူမ်ႉတၢႆလႄႈလႆႈဢူၵ်းလႆႈဢၢႆယူႇယဝ်ႉ။-
ဢေႇလမ်ႇ၊ လႆႈတူၵ်းတီႈယူႇတီႈသဝ်းလူၺ်ႈၵၼ်တင်းၶဝ်ၸိူဝ်းဢၼ်လႆႈတၢႆၵႃႈၼႂ်းၼႃႈသိုၵ်းလႄႈၶုမ်ပႃႇႁဵဝ်ႈလုၵ်ႈသိုၵ်းမၼ်းမီးယူႇလဵပ်ႈႁွပ်ႈမၼ်းဝႆႉဢေႃႈ။ ၶဝ်ၸိူဝ်းၼၼ်ႉယင်းဢမ်ႇလႆႈၶၢမ်ႇဢဝ်မၢင်ႇၵလႃႇဢၼ်ပၢတ်ႇပၢႆၼင်ယူႇလႄႈတၢႆၵႃႈၼႂ်းၼႃႈသိုၵ်းယဝ်ႉ။ မိူဝ်ႈဢၼ်ၶဝ်ဢသၢၵ်ႈယင်းလိပ်းယူႇၼၼ်ႉၶဝ်ယၢမ်ႈပဵၼ်ၵေႃႉဢၼ်ၸၢင်ႈႁႂ်ႈပိူၼ်ႈၵူဝ်ႁႄၶဝ်သေၵေႃႈ၊တေႃႈလဵဝ်ၼႆႉၸမ်ႉ၊ၶဝ်လူမ်ႉတၢႆယဝ်ႉလႄႈလႆႈဢူၵ်းလႆႈဢၢႆသေယဝ်ႉ၊ဢွၼ်ၵၼ်ၶၢမ်ႇဢဝ်ဢႃႉမၢင်ႇၵလႃႇလူၺ်ႈၵၼ်တင်းၶဝ်ၸိူဝ်းဢၼ်လႆႈတၢႆၵႃႈၼႂ်းၼႃႈသိုၵ်းၼၼ်ႉယဝ်ႉ။
“ မႄႇသႅၵ်ႉ၊ တင်း တုပလႃႉ၊ ၶဝ်ၵေႃႈမီးယူႇၵႃႈတီႈၼၼ်ႈလႄႈ၊ၶုမ်ပႃႇႁဵဝ်ႈလုၵ်ႈသိုၵ်းၶဝ်တင်းလၢႆမီးယူႇလဵပ်ႈႁွပ်ႈၵူႈတီႈၵူႈလႅၼ်ဢေႃႈ။ ၶဝ်ၸိူဝ်းၼၼ်ႉယင်းဢမ်ႇၶၢမ်ႇဢဝ်မၢင်ႇၵလႃႇဢၼ်ပၢတ်ႇပၢႆၼင်လႄႈလႆႈတၢႆၵႃႈၼႂ်းၼႃႈသိုၵ်းတင်းသဵင်ႈတင်းလူင်ဢေႃႈ။ ၼႂ်းဝႃႈၼၼ်သေၵေႃႈၶဝ်ယၢမ်ႈပဵၼ်ၵေႃႉဢၼ်ၸၢင်ႈႁဵတ်းႁႂ်ႈပိူၼ်ႈၸိူဝ်းဢၼ်ဢသၢၵ်ႈလိပ်းတင်းလၢႆၵူဝ်ႁႄၼၼ်ႉဢေႃႈ။-
ၶဝ်တၵ်းဢမ်ႇလႆႈၼွၼ်းလူၺ်ႈၵၼ်တင်းၵူၼ်းယႂ်ႇၵူၼ်းလူင်ဢၼ်ဢမ်ႇလႆႈၶၢမ်ႇဢဝ်မၢင်ႇၵလႃႇဢၼ်ပၢတ်ႇပၢႆၼင်ၸိူဝ်းဢၼ်ပႃးတင်းၶိူင်ႈလၢၵ်ႈၼၢၵ်ႈတိုၵ်းသိုၵ်းၶဝ်လႄႈတူၵ်းၼႂ်းမိူင်း မရၼႃႉ၊ သေယဝ်ႉ၊ဢဝ်လၢပ်ႇၶဝ်လႅဝ်းၶဝ်သေလႄႈမွၼ်ႁူဝ်ၶဝ်ယူႇ၊ၶိူင်ႈႁႄႉလၢၵ်ႈၼၢၵ်ႈ တင်းလၢႆႁူမ်ႇတူဝ်ၶဝ်ယူႇၼၼ်ႉဢေႃႈ။ ႁူဝ်ႁၢၼ်ၵူၼ်းသိုၵ်းၸိူဝ်းၼႆႉယၢမ်ႈမီးဢႃႇၼႃႇတၼ်းၶူဝ်းဢၼ်ႁႂ်ႈၶဝ်ၸိူဝ်းဢၼ်ဢသၢၵ်ႈလိပ်းၼၼ်ႉၵူဝ်ႁႄဢေႃႈ။
“ဢၼ်ၼႆႉၸမ်ႉ၊ပဵၼ်တၢင်းဢၼ်သူၵူၼ်းမဵဝ်း ဢေးၵျိပ်ႉ ၊တင်းလၢႆတၵ်းလႆႈၶၢမ်ႇတၢင်းဢၼ်ႁၵ်းလႅဝ်လႄႈၼွၼ်းလူၺ်ႈၵၼ်တင်းၶဝ်ၸိူဝ်းဢၼ်ယင်းဢမ်ႇလႆႈၶၢမ်ႇဢဝ်မၢင်ႇၵလႃႇဢၼ်ပၢတ်ႇပၢႆၼင်လႄႈလႆႈတၢႆၵႃႈၼႂ်းၼႃႈသိုၵ်းၼၼ်ႉယဝ်ႉ။
“ ဢေႇတုမ်ႇ၊ ၵေႃႈ မီးယူႇၵႃႈတီႈၼၼ်ႈလူၺ်ႈၵၼ်တင်းၶုၼ်ႁေႃၶမ်းမၼ်းတင်းလၢႆ၊ဢိၵ်ႇတင်းမူးမၢတ်ႈၽွင်းမိူင်းမၼ်းတင်းလၢႆဢေႃႈ။ ၶဝ်ၸိူဝ်းၼၼ်ႉပဵၼ်လုၵ်ႈသိုၵ်းဢၼ်ယၢမ်ႈမီးမုၼ်ၽုင်းတၼ်းၶူဝ်းမႃးသေၵေႃႈ၊တေႃႈလဵဝ်ၼႆႉၸမ်ႉ၊ၶဝ်ၼွၼ်းလူၺ်ႈၵၼ်တင်းၵူၼ်းၸိူဝ်းဢၼ်ဢမ်ႇလႆႈၶၢမ်ႇဢဝ်မၢင်ႇၵလႃႇဢၼ်ပၢတ်ႇပၢႆၼင်လႄႈလႆႈတၢႆၵႃႈၼႂ်းၼႃႈသိုၵ်းၼၼ်ႉလႄႈတူၵ်းတီႈယူႇတီႈသဝ်းၵႃႈၼႂ်းမိူင်း မရၼႃႉ ယဝ်ႉ။
“လုၵ်ႈၶုၼ်လုၵ်ႈၵွၼ်းၽၢႆႇပွတ်းႁွင်ႇၵႃႈမီးၸိူဝ်းၼၼ်ႉၵေႃႈ မီးယူႇၵႃႈတီႈၼၼ်ႈႁူမ်ႈလူၺ်ႈၵၼ်တင်းၶုၼ် ၸိတုမ်ႇ ၊ၵႃႈမီးတင်းလၢႆဢေႃႈ။ ဢႃႇၼႃႇတၼ်းၶူဝ်းၶဝ်ၸိူဝ်းၼၼ်ႉယၢမ်ႈႁဵတ်းႁႂ်ႈပိူၼ်ႈၵူဝ်ႁႄသေၵေႃႈ၊တေႃႈလဵဝ်ၼႆႉၸမ်ႉ၊ၶဝ်ယင်းဢမ်ႇလႆႈၶၢမ်ႇဢဝ်မၢင်ႇၵလႃႇဢၼ်ပၢတ်ႇပၢႆၼင်လႄႈလူင်းၸူးၵႃႈတီႈဢၼ်လီဢူၵ်းလီဢၢႆလႄႈၼွၼ်းယူႇလူၺ်ႈၵၼ်တင်းၶဝ်ၸိူဝ်းဢၼ်လႆႈတၢႆၵႃႈၼႂ်းၼႃႈသိုၵ်းယူႇလႄႈလႆႈၶၢမ်ႇဢဝ်တၢင်းဢၼ်လီဢူၵ်းလီဢၢႆလူၺ်ႈၵၼ်တင်းၶဝ်ၸိူဝ်းဢၼ်လူင်းၸူးၵႃႈၼႂ်းမိူင်း မရၼႃႉ ၼၼ်ႉယဝ်ႉ။
“တၢင်းဢၼ်ႁၼ်ၵူၼ်းၼမ်ၼႃႇဢၼ်လႆႈတၢႆၵႃႈတီႈၼႃႈသိုၵ်းၼၼ်ႉတၵ်းပဵၼ်တီႈဢၼ်သၢၵ်ႈသႃႇၸႂ်ၶုၼ်ႁေႃၶမ်းမိူင်း ဢေးၵျိပ်ႉ၊ ဢိၵ်ႇတင်းတပ်ႉသိုၵ်းမၼ်းၼၼ်ႉဢေႃႈ၊ဝႃႈၼင်ႇၼႆ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉဢေႃႈ။
“ၵဝ်ႁဵတ်းႁႂ်ႈၶုၼ်ႁေႃၶမ်းမိူင်း ဢေးၵျိပ်ႉ၊ ႁႂ်ႈၶဝ်ၸိူဝ်းဢၼ်ဢသၢၵ်ႈလိပ်းတင်းလၢႆလႆႈၵူဝ်ႁႄမၼ်းယဝ်ႉ။ ၵူၺ်းၵႃႈ၊မၼ်းဢိၵ်ႇတင်းၵူၼ်းသိုၵ်းမၼ်းတင်းလၢႆလႆႈတၢႆလႄႈၼွၼ်းယူႇႁူမ်ႈလူၺ်ႈၵၼ်တင်းၶဝ်ၸိူဝ်းဢၼ်ယင်းဢမ်ႇၶၢမ်ႇဢဝ်မၢင်ႇၵလႃႇဢၼ်ပၢတ်ႇပၢႆၼင်လႄႈတၢႆၵႃႈၼႂ်းၼႃႈသိုၵ်းၸိူဝ်းၼၼ်ႉယဝ်ႉ၊” ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးၵႃႈတီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။ မႂ်းၵႂႃႇႁေႃးလၢတ်ႈတီႈၵူၼ်းမႂ်းတင်းလၢႆလွင်ႈဢၼ်မိူဝ်ႈဢၼ်ၵဝ်ႁႂ်ႈပဵၼ်သိုၵ်းပဵၼ်သိူဝ်ၵႃႈတီႈမိူင်းသေမိူင်းမိူင်းၸိုင်၊တၵ်းပဵၼ်မႃးၸိူဝ်ႉၼင်ႇႁိုဝ်ၼၼ်ႉတႃႉ။ ၵူၼ်းမိူင်းၼၼ်ႉတေလႆႈလိူၵ်ႈဢဝ်ၵူၼ်းၵႃႈၼႂ်းၶဝ်ၵေႃႉၼိုင်ႈၶၢၼ်းဝႆႉႁႂ်ႈပဵၼ်ၵူၼ်းပႂ်ႉၵၢင်ပႂ်ႉယၢမ်းဢေႃႈ။-
မိူဝ်ႈဢၼ်မၼ်းႁၼ်ရၢၼ်ႇသူႇၽုတ်းမႃးယူႇၼၼ်ႉၸိုင်၊မၼ်းပဝ်ႇၼႄးၶရႃႇသေလႄႈပၼ်သတိတီႈၵူၼ်းတင်းလၢႆဢေႃႈ။-
ပေႃးသေၵေႃႉသေၵူၼ်းငိၼ်းသဵင်ၼႄးၶရႃႇသေယဝ်ႉ၊ယင်းဢမ်ႇႁဵတ်းသတိလႄႈရၢၼ်ႇသူႇႁွတ်ႈမႃးၶႃႈၽၼ်းမၼ်းတၢႆၸိုင်၊မၼ်းလႆႈတၢႆၵွပ်ႈပိူဝ်ႈဢပျတ်ႈတူဝ်ႈၸဝ်ႈၵဝ်ႇဢေႃႈ။-
ၵွပ်ႈပိူဝ်ႈမၼ်းဢမ်ႇႁဵတ်းသတိၼၼ်ႉလႄႈၽေးတၢင်းတၢႆၼၼ်ႉပဵၼ်တၢင်းဢၼ်တၢင်ႇဢပျတ်ႈတီႈမၼ်းယဝ်ႉ။ သင်မၼ်းႁဵတ်းသတိၸိုင်၊ဢသၢၵ်ႈမၼ်းတၵ်းလွတ်ႈတၢင်းတၢႆဢေႃႈ။-
ၼႂ်းဝႃႈၼၼ်သေၵေႃႈ ပေႃးၵူၼ်းပႂ်ႉယၢမ်းၼၼ်ႉႁၼ်ရၢၼ်ႇသူႇမႃးယူႇသေၵေႃႈယင်းဢမ်ႇပဝ်ႇၼႄးၶရႃႇလႄႈရၢၼ်ႇသူႇမႃးၶႃႈၽၼ်းဢဝ်တၢႆၵူၼ်းတင်းလၢႆၸိုင်၊ပိၵ်ႉသမ်ႉၶဝ်ၼၼ်ႉတၢႆၵႂႃႇၵွပ်ႈပိူဝ်ႈဢပျတ်ႈၶဝ်သေၵေႃႈ၊ၵဝ်တၵ်းပၼ်တၢမ်ႇဢပျတ်ႈတီႈၵူၼ်းပႂ်ႉၵၢင်ပႂ်ႉယၢမ်းၵွပ်ႈလူၺ်ႈတၢင်းတၢႆၶဝ်ၸိူဝ်းၼၼ်ႉဢေႃႈ။
“တေႃႈလဵဝ်ၼႆႉၸမ်ႉ၊လုၵ်ႈၵူၼ်း႟။ ၵဝ်ၶၢၼ်းႁႂ်ႈမႂ်းပဵၼ်ၵူၼ်းပႂ်ႉၵၢင်ပႂ်ႉယၢမ်းပုၼ်ႈၵူၼ်းမဵဝ်း ဢိသရေး ယဝ်ႉ။ မႂ်းတၵ်းလႆႈဢဝ်ၵႂၢမ်းဢၼ်ၵဝ်ပၼ်သတိတီႈမႂ်းၼၼ်ႉမွၵ်ႇလၢတ်ႈတီႈၶဝ်ဢေႃႈ။-
ပေႃးၵဝ်ၸီႇယၢင်ႇတြႃးလႄႈဝႃႈ၊ ‘ၵူၼ်းဢၼ်ႁၢႆႉဢၼ်မိူၵ်ႈၼၼ်ႉတၵ်းလႆႈတၢႆဢေႃႈ၊’ ဝႃႈၼႆလႄႈ၊မႂ်းယင်းဢမ်ႇပၼ်သတိႁႂ်ႈမၼ်းၶုၵ်းၸႂ်လႆႈမႆႈၸႂ်ဢပျတ်ႈပုၼ်ႈတၵ်းလွတ်ႈဢပျတ်ႈမၼ်းၼၼ်ႉၸိုင်၊ၵူၼ်းႁၢႆႉမိူၵ်ႈၼၼ်ႉတၵ်းလႆႈတၢႆၵွပ်ႈပိူဝ်ႈဢပျတ်ႈမၼ်းဢေႃႈ။ ပိၵ်ႉသမ်ႉမၼ်းလႆႈတၢႆၵွပ်ႈပိူဝ်ႈဢပျတ်ႈဢၼ်မၼ်းႁၢႆႉမိူၵ်ႈၼၼ်ႉသေၵေႃႈ၊ၵဝ်တၵ်းပၼ်တၢမ်ႇဢပျတ်ႈတီႈမႂ်းၵွပ်ႈလူၺ်ႈတၢင်းတၢႆမၼ်းၼၼ်ႉဢေႃႈ။-
ပေႃးမႂ်းပၼ်သတိတီႈၵေႃႉဢၼ်ႁၢႆႉဢၼ်မိူၵ်ႈၼၼ်ႉယဝ်ႉလႄႈမၼ်းသမ်ႉယင်းသိုပ်ႇႁဵတ်းဢပျတ်ႈယူႇၸိုင်၊မၼ်းတၵ်းလႆႈတၢႆၵွပ်ႈပိူဝ်ႈဢပျတ်ႈမၼ်းဢေႃႈ။ မႂ်းၸမ်ႉ၊ၵႄႇသႄႇဢဝ်ဢသၢၵ်ႈမႂ်းယဝ်ႉ။” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးၵႃႈတီႈၵဝ်လႄႈဝႃႈၸမ်ႉ၊ “လုၵ်ႈၵူၼ်း႟။ ႁေႃးလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈ၊သူလၢတ်ႈဝႃႈ၊ ‘တုၸရိူၵ်ႈဢပျတ်ႈဢၼ်ႁဝ်းႁဵတ်းပူၼ်ႉလိူဝ်ၸိူဝ်းၼၼ်ႉပဵၼ်ဝူတ်ႈပဵၼ်တၢမ်ႇဢၼ်ၼၵ်းၼႃႇပုၼ်ႈႁဝ်းယဝ်ႉ။ ႁဝ်းၼႆႉသုတ်ႉယွမ်းၵႂႃႇယူႇယဝ်ႉ။ ႁဝ်းတၵ်းဢသၢၵ်ႈလိပ်းလႆႈၸိူဝ်ႉၼင်ႇႁိုဝ်၊’ ဝႃႈၼင်ႇၼႆဢေႃႈ။-
မွၵ်ႇလၢတ်ႈတီႈၶဝ်လႄႈဝႃႈ၊ၵႃႈၼင်ႇဢၼ်ၵဝ်၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ပဵၼ်ၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉဢမ်ႇထုၵ်ႇၸႂ်ၵျိူၵ်ႈၸႂ်တၢင်းဢၼ်ၵူၼ်းႁၢႆႉၵူၼ်းမိူၵ်ႈလႆႈတၢႆၼၼ်ႉ။ ၵဝ်မီးဢလူဝ်ႇၶႂ်ႈႁႂ်ႈၵူၼ်းႁၢႆႉၵူၼ်းမိူၵ်ႈၵိုတ်းပႅတ်ႈသေတၢင်းဢၼ်ႁဵတ်းတုၸရိူၵ်ႈလႄႈဢသၢၵ်ႈလိပ်းယူႇၼၼ်ႉဢေႃႈ။ မဵဝ်း ဢိသရေး၊ ႟။ ဢွၼ်ၵၼ်ၵိုတ်းပႅတ်ႈသေတၢင်းဢၼ်ႁဵတ်းႁၢႆႉႁဵတ်းမိူၵ်ႈၼၼ်ႉတႃႉ။ ဢွၼ်ၵၼ်ဝႄႈပိူင်ႈတႃႉ။ ၵွပ်ႈသင်လႄႈသူၶႂ်ႈတၢႆၸိူဝ်ႉၼင်ႇႁိုဝ်၊ဝႃႈၸိူဝ်ႉၼင်ႇၼႆတႃႉ။
“ပိူဝ်ႈၼႆလႄႈလုၵ်ႈၵူၼ်း႟။ မႂ်းႁေႃးလၢတ်ႈတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈ၊ပေႃးၵူၼ်းသိုဝ်ႈတေႃႇႁဵတ်းတုၸရိူၵ်ႈၸိုင်၊တၢင်းသိုဝ်ႈတေႃႇဢၼ်မၼ်းႁဵတ်းယဝ်ႉၼၼ်ႉဢမ်ႇၸၢင်ႈၵႄႇသႄႇဢဝ်မၼ်းလႆႈ။ ပေႃးၵူၼ်းႁၢႆႉၵူၼ်းမိူၵ်ႈၵိုတ်းပႅတ်ႈသေတၢင်းဢၼ်ႁဵတ်းႁၢႆႉႁဵတ်းမိူၵ်ႈၸိုင်၊မၼ်းတၵ်းဢမ်ႇလႆႈၶၢမ်ႇဢပျတ်ႈ။ ၼင်ႇၼၼ်လႄႈပေႃးၵူၼ်းသိုဝ်ႈတေႃႇႁဵတ်းတုၸရိူၵ်ႈမႅၼ်ႈၸိုင်၊မၼ်းဢမ်ႇလႆႈမီးဢၶႂၢင်ႉဢၼ်ဢသၢၵ်ႈလိပ်း။-
ပိၵ်ႉသမ်ႉၵဝ်ဝႆႉၵတိႁႂ်ႈၵူၼ်းသိုဝ်ႈတေႃႇဢသၢၵ်ႈလိပ်းဢမၢၼ်ႇၶၼ်ပဵၼ်သေၵေႃႈ၊ပေႃးမၼ်းဢိင်ပိုင်ႈတၢင်းသိုဝ်ႈတေႃႇမၼ်းသေလႄႈႁဵတ်းတုၸရိူၵ်ႈၸိုင်၊ၵဝ်တၵ်းဢမ်ႇၶုၵ်းၸႂ်လႆႈလႄႈမၢတ်ႈတွင်းတၢင်းသိုဝ်ႈတေႃႇဢၼ်မၼ်းႁဵတ်းမႃးၼၼ်ႉသေၸိူဝ်ႉသေပိူင်။ မၼ်းတၵ်းလႆႈတၢႆၵွပ်ႈပိူဝ်ႈတုၸရိူၵ်ႈမၼ်းၼၼ်ႉဢေႃႈ။-
ပိၵ်ႉသမ်ႉၵဝ်ပၼ်သတိတီႈၵူၼ်းႁၢႆႉၵူၼ်းမိူၵ်ႈလႄႈဝႃႈ၊မႂ်းတၵ်းလႆႈတၢႆဢမၢၼ်ႇၶၼ်ပဵၼ်ဢေႃႈ၊ဝႃႈၼႆသေၵေႃႈ၊ပေႃးမၼ်းၵိုတ်းပႅတ်ႈသေတၢင်းဢၼ်ႁဵတ်းတုၸရိူၵ်ႈလႄႈၵမ်ၵျၢင်ႉၸွမ်းၼင်ႇတြႃးသိုဝ်ႈသိုဝ်ႈလႄႈႁဵတ်းတၢင်းဢၼ်လီဢၼ်ငၢမ်းယူႇ။-
ပေႃးမၼ်းပၼ်ၶိုၼ်းဢုၵ်ႉၸႃႇဢၼ်ပွင်ႇဝႆႉၵမ်ႉဝႆႉ၊ပၼ်ၶိုၼ်းဢုၵ်ႉၸႃႇဢၼ်ႁိမ်ဢဝ်ႁူင်ႇဢဝ်လႆႈမႃးၼၼ်ႉလႄႈ၊သမ်ႉၵိုတ်းပႅတ်ႈသေတၢင်းဢၼ်ႁဵတ်းတုၸရိူၵ်ႈၼၼ်ႉသေယဝ်ႉ၊ၵမ်ၵျၢင်ႉၸွမ်းထုင်းၽိင်ႈတြႃးၸဝ်ႈဢၼ်ႁႂ်ႈဢသၢၵ်ႈလိပ်းယူႇၸိူဝ်းၼၼ်ႉယူႇၸိုင်၊မၼ်းတၵ်းဢမ်ႇလႆႈတၢႆဢမၢၼ်ႇၶၼ်ပဵၼ်ဢေႃႈ။-
ၵဝ်တၵ်းပွႆႇလွတ်ႈဢပျတ်ႈတုၸရိူၵ်ႈၸိူဝ်းဢၼ်မၼ်းႁဵတ်းၽိတ်းႁဵတ်းပိူင်ႈမႃးၼၼ်ႉဢေႃႈ။ ၵွပ်ႈပိူဝ်ႈမၼ်းၵမ်ၵျၢင်ႉၸွမ်းၼင်ႇတြႃးသိုဝ်ႈသိုဝ်ႈလႄႈႁဵတ်းတၢင်းဢၼ်လီဢၼ်ငၢမ်းၼၼ်ႉမၼ်းတၵ်းလႆႈဢသၢၵ်ႈလိပ်းဢမၢၼ်ႇၶၼ်ပဵၼ်ဢေႃႈ။
“ၵူၺ်းၵႃႈ၊ၵူၼ်းမႂ်းၸိူဝ်းၼၼ်ႉယင်းဢွၼ်ၵၼ်လၢတ်ႈလႄႈဝႃႈ၊ ‘တၢင်းဢၼ် ထႃႇဝရႃႉၽြႃး၊ ၸီႇယၢင်ႇၼၼ်ႉဢမ်ႇသိုဝ်ႈတေႃႇ၊’ ဝႃႈၼႆဢေႃႈ။ ဢမ်ႇၸႂ်ႈၸိူဝ်ႉၼင်ႇၼၼ်။ သဵၼ်ႈတၢင်းၶဝ်ၼၼ်ႉပဵၼ်ဢၼ်ဢမ်ႇသိုဝ်ႈတေႃႇဢေႃႈ။-
မိူဝ်ႈဢၼ်ၵူၼ်းသိုဝ်ႈတေႃႇၵိုတ်းပႅတ်ႈသေတၢင်းႁဵတ်းဢၼ်သိုဝ်ႈတေႃႇလႄႈသမ်ႉႁဵတ်းႁၢႆႉႁဵတ်းမိူၵ်ႈၸိုင်၊မၼ်းတၵ်းလႆႈၶၢမ်ႇတၢႆၵွပ်ႈပိူဝ်ႈဢပျတ်ႈၼၼ်ႉဢမၢၼ်ႇၶၼ်ပဵၼ်ဢေႃႈ။-
မိူဝ်ႈဢၼ်ၵူၼ်းႁၢႆႉၵူၼ်းမိူၵ်ႈဝႄႈပႅတ်ႈတုၸရိူၵ်ႈလႄႈၵမ်ၵျၢင်ႉၸွမ်းၼင်ႇတြႃးသိုဝ်ႈသိုဝ်ႈလႄႈႁဵတ်းတၢင်းဢၼ်လီဢၼ်ငၢမ်းၸိုင်၊မၼ်းၵႄႇသႄႇဢဝ်ဢသၢၵ်ႈမၼ်းယဝ်ႉ။-
ၵူၺ်းၵႃႈ၊ၵူၼ်းမဵဝ်း ဢိသရေး၊ ၶဝ်႟။ သူဢွၼ်ၵၼ်လၢတ်ႈလႄႈဝႃႈ၊ ‘တၢင်းဢၼ် ထႃႇဝရႃႉၽြႃး ၊ၸီႇယၢင်ႇၼၼ်ႉဢမ်ႇသိုဝ်ႈတေႃႇ၊’ ဝႃႈၼႆယဝ်ႉ။ ၵဝ်တၵ်းၸီႇယၢင်ႇသူၸွမ်းၵႃႈၼင်ႇဢၼ်သူႁဵတ်းႁင်းၽႂ်ႁင်းမၼ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၼႂ်းပီဢၼ်ႁဝ်းလႆႈၶၢမ်ႇတၢင်းဢၼ်တိသိမ်းဢဝ်ၵႂႃႇလႆႈသိပ်းသွင်ပီ၊လိူၼ်တီႈသိပ်း၊ဝၼ်းတီႈႁႃႈၼၼ်ႉၵေႃႉဢၼ်ပၢႆႈလွတ်ႈဢွၵ်ႇသေဝဵင်း ယေႇရုသလႅမ်ႇ၊ ၼၼ်ႉမႃးတီႈၵဝ်လႄႈမွၵ်ႇလၢတ်ႈလွင်ႈဢၼ်ဝဵင်းလူင်တူၵ်းသုမ်းယဝ်ႉၼၼ်ႉဢေႃႈ။-
ၶိင်ႇႁူဝ်ၶမ်ႈၸူဝ်ႈဢၼ်ၵေႃႉၼၼ်ႉဢမ်ႇပႆႇႁွတ်ႈမႃးၼၼ်ႉၽုင်းတၼ်းၶူဝ်းၽြႃးပဵၼ်ၸဝ်ႈတၢင်ႇသႂ်ႇၵႃႈၼိူဝ်ၵဝ်လႄႈၽုၺ်ႇပၢၵ်ႇၵဝ်ဝႆႉတေႃႇထိုင်ႁွတ်ႈၵေႃႉၼၼ်ႉႁွတ်ႈမႃးထိုင်ၶိင်ႇၵၢင်ၼႂ်ၼၼ်ႉၸိုင်၊ ထႃႇဝရႃႉၽြႃး၊ ၶိုၼ်းပၼ်တၼ်းၶူဝ်းတီႈၵဝ်ၶိုၼ်းႁႂ်ႈလၢတ်ႈၵႂၢမ်းလႆႈမႃးၼၼ်ႉဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။ ၶဝ်ၸိူဝ်းဢၼ်ယူႇၵႃႈတီႈဝဵင်းလုဝဵင်းလႅဝ်တင်းလၢႆၵႃႈၼႂ်းမိူင်း ဢိသရေး၊ ၼၼ်ႉဢွၼ်ၵၼ်လၢတ်ႈလႄႈဝႃႈ၊ ‘ ဢႃႇပြႃႇႁၢမ်ႇ၊ ၵေႃႉလဵဝ်ၵူၺ်းလႆႈၶၢမ်ႇဢဝ်ဢမူၺ်ႇမိူင်းၼႆႉတင်းမိူင်းဢေႃႈ။ ႁဝ်းၼႆႉပဵၼ်ဢၼ်ၼမ်ၼႃႇလႄႈတေႃႈလဵဝ်ၼႆႉမိူင်းၼႆႉပဵၼ်မိူင်းႁဝ်းယဝ်ႉ၊’ ဝႃႈၼင်ႇၼႆဢေႃႈ။-
“ပိူဝ်ႈၼႆလႄႈမႂ်းၵႂႃႇမွၵ်ႇလၢတ်ႈတီႈၶဝ်လႄႈဝႃႈ၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ ‘သူၵိၼ်ၼိူဝ်ႉဢၼ်ပႃးလိူတ်ႈၼၼ်ႉဢေႃႈ။ သူဝႆႈသႃႁုၼ်ႇႁၢင်ႈသၢင်းထုဢေႃႈ။ သူၶႃႈၽၼ်းဢသၢၵ်ႈၵူၼ်းတၢႆဢေႃႈ။ သူထၢင်ႇဝႃႈသူတၵ်းပိူင်ႇဢဝ်ဢမူၺ်ႇမိူင်းၼႆႉဝႃႈၼင်ႇၼႆႁိုဝ်း။-
သူဢိင်ပိုင်ႈလၢပ်ႇသူလႅဝ်းသူဢေႃႈ။ တၢင်းႁဵတ်းသူၼၼ်ႉပဵၼ်ဢၼ်လီႁင်ႈဢဵတ်ႇသဵတ်ႇဢေႃႈ။ သူၽိတ်းပိူင်ႈမေႇထုင်ႇဢၼ်ဢမ်ႇတြႃးဢေႃႈ။ သူထၢင်ႇဝႃႈသူတၵ်းပိူင်ႇဢဝ်ဢမူၺ်ႇမိူင်းၼႆႉဝႃႈၼင်ႇၼႆႁိုဝ်း၊’ ဝႃႈၼင်ႇၼႆတႃႉ။-
“မႂ်းမွၵ်ႇလၢတ်ႈတီႈၶဝ်လႄႈဝႃႈ၊ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ပၼ်သတိတီႈၶဝ်တႃႉ။ ၵႃႈၼင်ႇဢၼ်ၵဝ်ပဵၼ်ၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉ၊ၶဝ်ၸိူဝ်းဢၼ်ယူႇၵႃႈၼႂ်းဝဵင်းလုဝဵင်းလႅဝ်တင်းလၢႆၼၼ်ႉတၵ်းလႆႈၶၢမ်ႇတၢႆလူၺ်ႈလၢပ်ႇလူၺ်ႈလႅဝ်းဢေႃႈ။ ၶဝ်ၸိူဝ်းဢၼ်ယူႇၵႃႈတီႈဝၢၼ်ႈၼွၵ်ႈၼႃးပၢင်ႇၼၼ်ႉတၵ်းလႆႈၶၢမ်ႇတူဝ်ထိူၼ်ႇတင်းလၢႆၵိၼ်ပႅတ်ႈဢေႃႈ။ ၶဝ်ၸိူဝ်းဢၼ်ပၢႆႈတဵတ်ႇပၢႆႈသွၼ်ႈယူႇၵႃႈၼိူဝ်လွႆလႂ်၊ၵႃႈၼႂ်းႁူးထမ်ႈလႂ်ၸိူဝ်းၼၼ်ႉတၵ်းလႆႈၶၢမ်ႇတၢႆလူၺ်ႈၵႃႇလႃႉႁႃႈလႅင်မိူင်းဢေႃႈ။-
ၵဝ်တၵ်းႁဵတ်းႁႂ်ႈမိူင်းၼႆႉသဵတ်ႇၵူၼ်းငႅဝ်ၵူၼ်းပဵၼ်တီႈဢၼ်ဢမ်ႇလီလႄႈၽုင်းတၼ်းၶူဝ်းဢၼ်ၶဝ်ဢုပ်ႇဝၢဝ်းလူၺ်ႈၼၼ်ႉတၵ်းသဵင်ႈႁၢႆၵႂႃႇဢေႃႈ။ ၵႃႈတီႈလွႆ ဢိသရေး ၸိူဝ်းၼၼ်ႉတၵ်းပဵၼ်တီႈဢၼ်သဵတ်ႇဢၼ်ယဵၼ်ထၢၼ်ႈပေႃးၽူႈလႂ်ဢမ်ႇလတ်းၵႂႃႇလတ်းမႃးၵႃႈၼႂ်းမၼ်းဢေႃႈ။-
မိူဝ်ႈဢၼ်ၵဝ်ပၼ်တၢမ်ႇတီႈၵူၼ်းတင်းလၢႆၵွပ်ႈပိူဝ်ႈဢပျတ်ႈၶဝ်သေလႄႈႁႂ်ႈမိူင်းၼႆႉပဵၼ်တီႈဢၼ်လုႁၢမ်းၸိုင်၊ၶဝ်တၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ၊ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “လုၵ်ႈၵူၼ်း႟။ ၵူၼ်းမႂ်းၸိူဝ်းၼၼ်ႉၸၢင်ႈဢွၼ်ၵၼ်လၢတ်ႈလူၺ်ႈလွင်ႈမႂ်းမိူဝ်ႈဢၼ်ၶဝ်ႁူပ်ႉထူပ်းၵၼ်ၵႃႈတီႈလမ်းဝဵင်းလႂ်၊ၵႃႈတီႈၽၵ်းတူႁိူၼ်းၶဝ်လႂ်ၼၼ်ႉဢေႃႈ။ ၶဝ်ၵေႃႉၼိုင်ႈလႄႈၵေႃႉၼိုင်ႈလၢတ်ႈတီႈၵၼ်လႄႈဝႃႈ၊ ‘ၵႂႃႇတႃႉႁဝ်း႟။ ဢွၼ်ၵၼ်ထွမ်ႇငိၼ်းလွင်ႈဢၼ် ထႃႇဝရႃႉၽြႃး၊ ပၼ်ပျႃႇတိၵ်ႈၸိူဝ်ႉၼင်ႇႁိုဝ်ၼၼ်ႉတႃႉႁဝ်း၊’ ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၵူၼ်းၵဝ်တင်းလၢႆဢွၼ်ၵၼ်မႃးၸုတုမ်ၵၼ်ၵႃႈတီႈမႂ်းႁႂ်ႈလႆႈထွမ်ႇငိၼ်းၵႂၢမ်းဢၼ်မႂ်းတေလႆႈလၢတ်ႈၸိူဝ်ႉၼင်ႇႁိုဝ်ၼၼ်ႉဢေႃႈ။ ၵူၺ်းၵႃႈ၊ၶဝ်ဢမ်ႇႁဵတ်းၸွမ်းၵႂၢမ်းဢၼ်မႂ်းမွၵ်ႇလၢတ်ႈႁႂ်ႈၶဝ်ႁဵတ်းၼၼ်ႉ။ သူပ်းၶဝ်ၼႄပျႃးလၢၵ်ႈၶၼႃႇတၢင်းဢၼ်ႁၵ်ႉဢၼ်ပႅင်းသေၵေႃႈ၊ၸႂ်ၶဝ်မီးတၢင်းဢၼ်ၸပ်းၸွႆးဢုၵ်ႉၸႃႇလေႃးၵီႇဢေႃႈ။
ပုၼ်ႈၶဝ်ၼၼ်ႉၸိုင်၊ၶဝ်မၢတ်ႈမႂ်းပဵၼ်မိူၼ်ၸိူဝ်ႉၼင်ႇၵူၼ်းဢၼ်ႁွင်ႉၵႂၢမ်းႁၵ်ႉၵႂၢမ်းပႅင်းဢၼ်လီထွမ်ႇလီငိၼ်းလႄႈလဵတ်းတိင်ႇၼၼ်ႉၵူၺ်းဢေႃႈ။ ၶဝ်ထွမ်ႇငိၼ်းၵႂၢမ်းမႂ်းၵူႈၶေႃႈၵူႈၵမ်းသေၵေႃႈၶဝ်ဢမ်ႇဢဝ်ဢမ်ႇႁဵတ်းၸွမ်းလႄႈယူႇဢေႃႈ။-
ၵူၺ်းၵႃႈ၊ၵႂၢမ်းမႂ်းတၵ်းပဵၼ်ၸွမ်းဢေႃႈ။ မိူဝ်ႈဢၼ်ၵႂၢမ်းမႂ်းၸိူဝ်းၼၼ်ႉပဵၼ်ၸွမ်းလႄႈပျေႉၸုမ်ႇၵူႈၶေႃႈၵူႈၵမ်းၸိုင်၊ၶဝ်တၵ်းႁုလွင်ႈဢၼ်ပရေႃးၽႅတ်ႈ ယၢမ်ႈမီးယူႇၵႃႈၼႂ်းၶဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။ ႁေႃးလၢတ်ႈၵႂၢမ်းပရေႃးၽႅတ်ႈတီႈၸဝ်ႈတီႈၶုၼ်မဵဝ်း ဢိသရေး၊ တင်းလၢႆတႃႉ။ ႁေႃးလၢတ်ႈၵႂၢမ်းပရေႃးၽႅတ်ႈတီႈၶဝ်လႄႈမွၵ်ႇလၢတ်ႈဝႃႈ၊ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ ‘သူၸိူဝ်းဢၼ်လဵင်ႉသူဝ်းထိင်းသူဝ်းမဵဝ်း ဢိသရေး၊ ႟။ သူမီးဢႃႉမၢင်ႇၵလႃႇဢေႃႈ။ သူလဵင်ႉတူဝ်ၸဝ်ႈၵဝ်ႇၵူၺ်းလႄႈဢမ်ႇလဵင်ႉလူၽုင်သူဝ်းတင်းလၢႆလႃးလႃး။-
သူဢွၼ်ၵၼ်ၵိၼ်ၶႆမၼ်းၼမ်ႉၼူမ်းသူဝ်းသေဢဝ်ၶူၼ်သူဝ်းႁဵတ်းၶူဝ်းၼုင်ႈလႄႈႁႅမ်ၵိၼ်ၼိူဝ်ႉသူဝ်းတူဝ်ဢၼ်ပီးလီမၼ်းလီၼၼ်ႉဢေႃႈ။ ၵူၺ်းၵႃႈ၊သူဢမ်ႇလဵင်ႉဢမ်ႇလူၽုင်သူဝ်းတင်းလၢႆလႃးလႃး။-
သူဢမ်ႇလူတူၺ်းလုမ်းလႃးတူဝ်ဢၼ်ႁႅင်းဢူၼ်ႈႁႅင်းၵေႇ၊ဢမ်ႇယူတ်းဢမ်ႇယႃပၼ်တူဝ်ဢၼ်ဢမ်ႇယူႇလီ၊ဢမ်ႇပူၵ်ႉဢမ်ႇႁေႃႇပၼ်တူဝ်ဢၼ်မၢတ်ႇဢၼ်ၸဵပ်း၊ဢမ်ႇၸွမ်းဢမ်ႇတူၺ်းတူဝ်ဢၼ်ၽိတ်းတၢင်းပိူင်ႈတၢင်း၊ဢမ်ႇၶႆႈဢမ်ႇႁႃတူဝ်ဢၼ်ႁၢႆၵႂႃႇၸိူဝ်းၼၼ်ႉလႄႈ၊သူယင်းဢွၼ်ၵၼ်ႁဵတ်းႁၢဝ်ႈႁဵတ်းၵျၢမ်းတီႈၶဝ်ၼႃႇလူင်လၢင်ဢေႃႈ။-
ၵွပ်ႈပိူဝ်ႈဢၼ်ၽုင်သူဝ်းၼၼ်ႉဢမ်ႇမီးၵေႃႉလဵင်ႉၵေႃႉထိင်းလႄႈၶဝ်လႆႈၽၢတ်ႇၽႄၽၢတ်ႇၽုင်ၵၼ်ၵႂႃႇသေယဝ်ႉ၊လႆႈၶၢမ်ႇတၢင်းဢၼ်တူဝ်ထိူၼ်ႇတင်းလၢႆၶူပ်းၵိၼ်ဢေႃႈ။-
ပိူဝ်ႈၼႆလႄႈသူဝ်းၵဝ်ၸိူဝ်းၼၼ်ႉလႆႈလႄႇၵႂႃႇလႄႇမႃးယူႇၵႃႈၼိူဝ်လွႆၼိူဝ်ၵုင်းလႂ်ဢေႃႈ။ သူဝ်းၵဝ်ၸိူဝ်းၼၼ်ႉလႆႈၽၢတ်ႇၽႄၽၢတ်ႇၽုင်ၵၼ်လႄႈယူႇၸွတ်ႇတူဝ်ႈၵႂႃႇၵႃႈၼိူဝ်ၼႃႈလိၼ်ယူႇလႄႈဢမ်ႇမီးၽူႈလႂ်သေၵေႃႉသေၵူၼ်းၸွမ်းသွၵ်ႈၸွမ်းႁႃၶဝ်၊’ ဝႃႈၼင်ႇၼႆတႃႉ။
“ပိူဝ်ႈၼႆလႄႈသူၸိူဝ်းဢၼ်လဵင်ႉသူဝ်းထိင်းသူဝ်းၶဝ်႟။ ဢွၼ်ၵၼ်ထွမ်ႇငိၼ်းဢမိင်ႉဢၼ်ၵဝ်၊ ထႃႇဝရႃႉၽြႃး ၊မွၵ်ႇလၢတ်ႈတီႈသူၼၼ်ႉတႃႉ။-
ၵႃႈၼင်ႇဢၼ်ၵဝ်ပဵၼ်ၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉသူထုၵ်ႇလီထွမ်ႇငိၼ်းဢဝ်ဢမိင်ႉၵဝ်ဢေႃႈ။ သူဝ်းၵဝ်ၸိူဝ်းၼၼ်ႉလႆႈၶၢမ်ႇတၢင်းဢၼ်တူဝ်ထိူၼ်ႇတင်းလၢႆတိုၵ်းတေႃးၶူပ်းၵိၼ်ပႅတ်ႈၵွပ်ႈပိူဝ်ႈဢၼ်ဢမ်ႇမီးၵေႃႉဢၼ်လဵင်ႉဢၼ်ထိင်းၶဝ်ၼၼ်ႉယဝ်ႉ။ ၵူၼ်းလဵင်ႉသူဝ်းထိင်းသူဝ်းၵဝ်ၸိူဝ်းၼၼ်ႉဢမ်ႇသွၵ်ႈဢမ်ႇႁႃသူဝ်းတင်းလၢႆ။ ၶဝ်ၼၼ်ႉလဵင်ႉလူတူဝ်ႈၸဝ်ႈၵဝ်ႇၵူၺ်းသေယဝ်ႉ၊ဢမ်ႇလဵင်ႉဢမ်ႇလူသူဝ်းတင်းလၢႆလႄႈယူႇဢေႃႈ။-
ပိူဝ်ႈၼႆလႄႈသူၸိူဝ်းဢၼ်လဵင်ႉသူဝ်းထိင်းသူဝ်းၶဝ်႟။ ဢွၼ်ၵၼ်ထွမ်ႇငိၼ်းဢမိင်ႉၵဝ်တႃႉ။-
ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး လၢတ်ႈလႄႈဝႃႈၸမ်ႉ၊ၵဝ်ပဵၼ်ရၢၼ်ႇသူႇသူဢေႃႈ။ ၵဝ်တၵ်းသိမ်းဢဝ်သူဝ်းၵဝ်ၸိူဝ်းၼၼ်ႉသေၵႃႈၼႂ်းမိုဝ်းသူသေယဝ်ႉ၊ၵမ်းလိုၼ်းသူဢမ်ႇလႆႈပဵၼ်ၵူၼ်းလဵင်ႉသူဝ်းထိင်းသူဝ်းထႅင်ႈသေပွၵ်ႈလႄႈ၊ၵမ်းလိုၼ်းၵဝ်တၵ်းဢမ်ႇႁႂ်ႈသူလဵင်ႉလူတူဝ်ၸဝ်ႈၵဝ်ႇလႆႈဢေႃႈ။ ၵဝ်တၵ်းၵႄႇၼုၵ်ႈဢဝ်သူဝ်းၵဝ်တင်းလၢႆသေၵႃႈတီႈသူလႄႈဢမ်ႇပၼ်ဢၶႂၢင်ႉႁႂ်ႈသူလႆႈၵိၼ်ၼိူဝ်ႉၶဝ်။
“ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉၸမ်ႉ၊တူဝ်ၵဝ်တၵ်းၸွမ်းၶႆႈၸွမ်းႁႃသူဝ်းၵဝ်ၸိူဝ်းၼၼ်ႉလႄႈလဵင်ႉလူၶဝ်ဢေႃႈ။-
ၸိူဝ်ႉၼင်ႇဢၼ်ၵူၼ်းလဵင်ႉသူဝ်းထိင်းသူဝ်းၸွမ်းသွၵ်ႈၸွမ်းႁႃဢဝ်သူဝ်းမၼ်းၸိူဝ်းဢၼ်ၽၢတ်ႇၽႄၵၼ်ၵႂႃႇၶိုၼ်းဢဝ်မႃးၸုတုမ်ၵၼ်ၼၼ်ႉ၊ၵဝ်တၵ်းဢဝ်သူဝ်းၸိူဝ်းၼၼ်ႉမႃးဢေႃႈ။ ၵဝ်တၵ်းၼုၵ်ႈဢဝ်ၶဝ်ဢွၵ်ႇမႃးသေၵႃႈတီႈဢၼ်ၶဝ်လႆႈယူႇၽၢတ်ႇၽႄၵၼ်ၵူႈတီႈၵူႈလႅၼ်ၼႂ်းမိူဝ်ႈဝၼ်းဢၼ်ၽႃႉမိုတ်ႈလႄႈလပ်းသိင်ႇၼၼ်ႉဢေႃႈ။-
ၵဝ်တၵ်းႁွင်ႉဢဝ်ၶဝ်ဢွၵ်ႇသေၵႃႈၼႂ်းတၢင်ႇသိုင်ႇတၢင်ႇမိူင်းတင်းလၢႆမႃးၸုတုမ်ၵၼ်လႄႈၵႄႇၼုၵ်ႈဢဝ်ၶဝ်မႃးၸူးတီႈမိူင်းဢၼ်ၶဝ်ပိူင်ႇၼၼ်ႉဢေႃႈ။ ၵဝ်တၵ်းဢွၼ်ၶဝ်သူင်ႇၶိုၼ်းၵႃႈၼိူဝ်လွႆ၊ဢိၵ်ႇတင်းၵႃႈတီႈၼမ်ႉႁွင်ႈၼမ်ႉၵႄးၼႂ်းမိူင်း ဢိသရေး၊ တင်းလၢႆသေယဝ်ႉ၊လဵင်ႉၶဝ်ၵႃႈတီႈပၢင်ႇယိူဝ်ႈယႃႈဢၼ်ၶဵဝ်လီၼုမ်ႇလီၼၼ်ႉဢေႃႈ။-
ၵဝ်တၵ်းလဵင်ႉလူၶဝ်ၵႃႈၼႂ်းတီႈဢၼ်ယၢမ်ႈၵိၼ်ယူႇဢၼ်လီၼၼ်ႉလႄႈၶွၵ်ႈၶဝ်တၵ်းလႆႈမီးၵႃႈၼိူဝ်လွႆမိူင်း ဢိသရေး ၊ဢၼ်သုင်တင်းလၢႆဢေႃႈ။ ၶဝ်တၵ်းလႆႈၼွၼ်းၵႃႈၼႂ်းၶွၵ်ႈဢၼ်လီဢၼ်ငၢမ်းလႄႈၵိၼ်ယူႇၵႃႈၼႂ်းတီႈပၢင်ႇယႃႈၶဵဝ်ဢၼ်လိူင်ႇလီၼႃႇၵႃႈၼိူဝ်လွႆမိူင်း ဢိသရေး၊ တင်းလၢႆဢေႃႈ။-
တူဝ်ၵဝ်တၵ်းလဵင်ႉလူသူဝ်းၵဝ်တင်းလၢႆလႄႈပၼ်တီႈဢၼ်ၶဝ်တၵ်းၼွၼ်းဢေႃႈ။ ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ။
“ၵဝ်တၵ်းၸွမ်းၶႆႈၸွမ်းႁႃသူဝ်းၸိူဝ်းဢၼ်ႁၢႆၵႂႃႇလႄႈၶိုၼ်းဢဝ်သူဝ်းၸိူဝ်းဢၼ်ၽိတ်းတၢင်းပိူင်ႈတၢင်းၼၼ်ႉမႃးသေယဝ်ႉ၊ပူၵ်ႉႁေႃႇပၼ်တူဝ်ဢၼ်မၢတ်ႇဢၼ်ၸဵပ်း၊ယူတ်းယႃပၼ်တူဝ်ဢၼ်ဢမ်ႇယူႇလီၸိူဝ်းၼၼ်ႉဢေႃႈ။ သူဝ်းၸိူဝ်းဢၼ်ပီးလီမၼ်းလီ၊မီးဢဵၼ်မီးႁႅင်းၼၼ်ႉၸမ်ႉ၊ၵဝ်တၵ်းဢဝ်တၢႆပႅတ်ႈၵွပ်ႈပိူဝ်ႈဢၼ်ၵဝ်ပဵၼ်ၵူၼ်းလဵင်ႉၵူၼ်းထိင်းဢၼ်ၸီႇယၢင်ႇၸွမ်းၼင်ႇတြႃးဢေႃႈ။
“ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊သူၸိူဝ်းဢၼ်ပဵၼ်ၽုင်သူဝ်းၵဝ်႟။ ၵဝ်တၵ်းၸီႇယၢင်ႇၸၵ်းၽႄၼႂ်းဝူင်ႈၵၢင်သူ၊ၸၵ်းၽႄဢဝ်တူဝ်ဢၼ်လီဢွၵ်ႇသေၵႃႈၼႂ်းတူဝ်ဢၼ်ႁၢႆႉလႂ်၊ဢိၵ်ႇတင်းၸၵ်းၽႄဢဝ်သူဝ်းဢွၵ်ႇသေၵႃႈၼႂ်းပႄႉပေႃႈတင်းလၢႆဢေႃႈ။-
ၼႂ်းသူၵမ်ႈၽွင်ႈဢမ်ႇပျေႇၸႂ်လူၺ်ႈတၢင်းဢၼ်လႆႈၵိၼ်ယိူဝ်ႈယႃႈဢၼ်လီဢၼ်ဝၢၼ်လိူဝ်ပိူၼ်ႈၼၼ်ႉလႄႈ၊သူယင်းဢဝ်တိၼ်ယဵပ်ႇယမ်ႈယိူဝ်ႈယႃႈၸိူဝ်းဢၼ်သူဢမ်ႇၵိၼ်ၼၼ်ႉပႅတ်ႈလူင်ပႄႇ။ သူၵိၼ်ၼမ်ႉဢၼ်သႂ်လီလႄႈဢၼ်သူဢမ်ႇၵိၼ်ၼၼ်ႉသူတဝ်ၶုၼ်ႇဢူၼ်ၵႂႃႇယဝ်ႉလူင်ပႄႇ။-
သူဝ်းၵဝ်ၸိူဝ်းဢၼ်ၵိုတ်းဢၼ်ၵျၢၼ်ႇၼၼ်ႉလႆႈၵိၼ်ယိူဝ်ႈယႃႈဢၼ်သူယဵပ်ႇယမ်ႈၼၼ်ႉ၊ဢိၵ်ႇတင်းၵိၼ်ၼမ်ႉဢၼ်သူတဝ်ၶုၼ်ႇဢူၼ်ၵႂႃႇၼၼ်ႉဢေႃႈ။
“ပိူဝ်ႈဢၼ်ပဵၼ်ၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ၵဝ်တၵ်းၸီႇယၢင်ႇၵႄႈဝူင်ႈၵၢင်သူဝ်းဢၼ်ႁႅင်းယႂ်ႇတင်းလၢႆ၊ဢိၵ်ႇတင်းသူဝ်းဢၼ်ႁႅင်းဢူၼ်ႈတင်းလၢႆၼၼ်ႉဢေႃႈ။-
သူဢဝ်ပဵမ်ႉသူ၊ႁူဝ်မႃႇသူတွၵ်ႈဢီးသူဝ်းဢၼ်ဢမ်ႇယူႇလီၼၼ်ႉပႅတ်ႈ၊ဢိၵ်ႇတင်းဢဝ်ၶဝ်လႅမ်သူပတ်ႉတေႃးသူဝ်းဢၼ်ႁႅင်းဢူၼ်ႈတင်းလၢႆဢွၵ်ႇသေၵႃႈတီႈၽုင်သူဝ်းၵႂႃႇဢေႃႈ။-
ၵူၺ်းၵႃႈ၊ၵဝ်တၵ်းၵႄႇၼုၵ်ႈဢဝ်သူဝ်းၵဝ်ၸိူဝ်းၼၼ်ႉလႄႈၶဝ်ၼၼ်ႉၵမ်းလိုၼ်းဢမ်ႇလႆႈၶၢမ်ႇတၢင်းဢၼ်ႁဵတ်းပႄႉႁဵတ်းၼႅင်ႇလႃးလႃး။ ၵဝ်တၵ်းၸီႇယၢင်ႇသူဝ်းၵဝ်တင်းလၢႆလႄႈၸၵ်းၽႄဢဝ်တူဝ်ဢၼ်လီတင်းတူဝ်ဢၼ်ႁၢႆႉၸိူဝ်းၼၼ်ႉဢေႃႈ။-
ၵဝ်တၵ်းၶၢၼ်းၶုၼ်ႁေႃၶမ်းပႃးၼိုင်ႈဢၼ်ပဵၼ်ၵူၼ်းၸႂ်ႉၵဝ် တႃႇဝိတ်ႈ၊ ၼၼ်ႉႁႂ်ႈပဵၼ်ၵူၼ်းလဵင်ႉသူဝ်းထိင်းသူဝ်းဢၼ်လဵင်ႉထိင်းၶဝ်ဢေႃႈ။ မၼ်းၼၼ်ႉတၵ်းပဵၼ်ၵေႃႉဢၼ်လဵင်ႉထိင်းၶဝ်ဢေႃႈ။-
ၵဝ်၊ ထႃႇဝရႃႉၽြႃး၊ တၵ်းပဵၼ်ၽြႃးပဵၼ်ၸဝ်ႈၶဝ်လႄႈၶုၼ်ႁေႃၶမ်းၵေႃႉဢၼ်ပဵၼ်ၵူၼ်းၸႂ်ႉၵဝ် တႃႇဝိတ်ႈ ၊သမ်ႉတၵ်းပဵၼ်ၶုၼ်ၶဝ်ဢေႃႈ။ ၵဝ် ထႃႇဝရႃႉၽြႃး ၊မီးဢမိင်ႉဝႆႉယဝ်ႉ။-
ၵဝ်တၵ်းႁဵတ်းပတိၺိၺ်ႇတၢင်းဢၼ်ၼိမ်ဢၼ်လီလူၺ်ႈၵၼ်တင်းၶဝ်ဢေႃႈ။ ၵဝ်တၵ်းပႄႇၽဵဝ်ႈပႅတ်ႈၽေးတူဝ်ထိူၼ်ႇတင်းလၢႆၵႃႈၼႂ်းမိူင်းၸဝ်ႈ၊ပုၼ်ႈလွင်ႈၼင်ႇႁိုဝ်သူဝ်းၵဝ်ၸိူဝ်းၼၼ်ႉတၵ်းမီးတၢင်းဢၼ်ယူႇလူင်ႈလီလွတ်ႈလီၵႃႈတီႈပၢင်ႇတီႈပိဝ်လႄႈလႆႈၼွၼ်းလီၵႃႈၼႂ်းထိူၼ်ႇၼႂ်းၶိူဝ်းဢေႃႈ။
“ၵဝ်တၵ်းပၼ်တၢင်းလီတီႈၶဝ်သေယဝ်ႉ၊ပၼ်ဢၶႂၢင်ႉႁႂ်ႈၶဝ်ယူႇသဝ်းၵႃႈတီႈလဵပ်ႈႁွပ်ႈလွႆဢၼ်မူတ်းၸၢင်ႇၵဝ်ၼၼ်ႉဢေႃႈ။ ၵဝ်တၵ်းပၼ်တၢင်းလီၶဝ်လူၺ်ႈႁႃႇၽူၼ်တူၵ်းမႃးမိူဝ်ႈဢၼ်ၶဝ်လူဝ်ႇၼမ်ႉၽူၼ်ၼၼ်ႉဢေႃႈ။-
တူၼ်ႈမႆႉတင်းလၢႆတၵ်းမၢၵ်ႇမၢၵ်ႇမႃးလႄႈတူင်ႈႁႆႈတူင်ႈၼႃးတင်းလၢႆၵေႃႈတၵ်းပၼ်မၢၵ်ႇပၼ်ႁူင်းသေယဝ်ႉ၊ၶဝ်တၵ်းမီးတၢင်းဢၼ်ယူႇၼိမ်ၼိမ်လီလီၵႃႈၼႂ်းမိူင်းၶဝ်ႁင်းၽႂ်ႁင်းမၼ်းၵူႈၵေႃႉၵူႈၵူၼ်းဢေႃႈ။ မိူဝ်ႈဢၼ်ၵဝ်တႅပ်းၸိူၵ်ႈလဵၵ်းၶၢတ်ႇသေၵႃႈတီႈၵူၼ်းၵဝ်တင်းလၢႆလႄႈပွႆႇႁႂ်ႈၶဝ်လွတ်ႈသေတၢင်းဢၼ်ပဵၼ်ၶႃႈပိူၼ်ႈၼၼ်ႉၸိုင်၊ၶဝ်တၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး ဢေႃႈ။-
ၵမ်းလိုၼ်းၵူၼ်းတၢင်ႇၸိူဝ်ႉတၢင်ႇၶိူဝ်းဢမ်ႇလႆႈႁိမ်ဢဝ်ၶဝ်။ တူဝ်ထိူၼ်ႇတင်းလၢႆၵေႃႈဢမ်ႇလႆႈၶူပ်းလႆႈၵိၼ်ၶဝ်။ ၶဝ်တၵ်းမီးတၢင်းဢၼ်ယူႇလူင်ႈလီလွတ်ႈလီလႄႈၽူႈလႂ်ဢမ်ႇလႆႈႁဵတ်းႁႂ်ႈၶဝ်ၵူဝ်ႁႄလႃးလႃး။-
ၵဝ်တၵ်းပၼ်လိၼ်လီဢၼ်မီးၽုၼ်ႇမီးၶွၼ်ႇၼၼ်ႉတီႈၶဝ်လႄႈၵမ်းလိုၼ်းၶဝ်ဢမ်ႇလႆႈဢိုပ်းလႆႈယၢၵ်ႈၵႃႈၼႂ်းမိူင်းၸဝ်ႈၼၼ်ႉ။ ၶဝ်ဢမ်ႇလႆႈၶၢမ်ႇတၢင်းဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်းသႄႉသွမ်းလႃးလႃး။-
ၵူၼ်းၵူႈၵေႃႉတၵ်းႁုလွင်ႈဢၼ်ၵဝ်ၵႅတ်ႇၶႄႁႄႉၵင်ႈၵူၼ်းမဵဝ်း ဢိသရေး၊ ဢိၵ်ႇတင်းလွင်ႈဢၼ်ၶဝ်ပဵၼ်ၵူၼ်းၵဝ်ၼၼ်ႉဢေႃႈ။ ဝႃႈၼင်ႇၼႆလႄႈ၊ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ။
“သူဢၼ်ပဵၼ်သူဝ်းၵဝ်၊ၽုင်သူဝ်းဢၼ်ၵဝ်လဵင်ႉလူၼႆႉပဵၼ်ၵူၼ်းၵဝ်လႄႈ၊ၵဝ်ပဵၼ်ၽြႃးပဵၼ်ၸဝ်ႈသူဢေႃႈ၊” ဝႃႈၼင်ႇၼႆ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးၵႃႈတီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။ ႁေႃးလၢတ်ႈၵႂၢမ်းပရေႃးၽႅတ်ႈဢၼ်ၶတ်းတႃႉၵၼ်တင်းမိူင်း ဢေႇတုမ်ႇ တႃႉ၊-
မွၵ်ႇလၢတ်ႈတီႈၵူၼ်းတင်းလၢႆလႄႈဝႃႈ၊ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ “လွႆ ဢေႇတုမ်ႇ၊ ႟။ ၵဝ်ပဵၼ်ရၢၼ်ႇသူႇမႂ်းဢေႃႈ။ ၵဝ်တၵ်းႁႂ်ႈမႂ်းပဵၼ်တီႈဢၼ်သဵတ်ႇငႅဝ် တီႈဢၼ်လုႁၢမ်းဢေႃႈ။
ၵဝ်တၵ်းပွႆႇဝႆႉႁႂ်ႈဝဵင်းမႂ်းတင်းလၢႆလုလႅဝ်ယူႇလႄႈ မိူင်းမႂ်းပဵၼ်တီႈဢၼ်သဵတ်ႇၵူၼ်းငႅဝ်ၵူၼ်းဢေႃႈ။ ၼင်ႇၼၼ်လႄႈမႂ်းတၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ။
“မႂ်းၼႆႉပဵၼ်ရၢၼ်ႇသူႇၵူၼ်းမဵဝ်း ဢိသရေး၊ ယူႇတႃႇသေႇလႄႈႁႂ်ႈၵူၼ်းမၼ်းတင်းလၢႆလႆႈၶၢမ်ႇတၢႆလူၺ်ႈလၢပ်ႇလူၺ်ႈလႅဝ်းၼႂ်းၶိင်ႇမိူဝ်ႈဢၼ်ၽေးႁွတ်ႈထိုင်ၶဝ်ၶိင်ႇမိူဝ်ႈဢၼ်ပၼ်တၢမ်ႇဢပျတ်ႈၶဝ်ၵမ်းလိုၼ်းသုတ်းၼၼ်ႉဢေႃႈ။-
ၵွပ်ႈပိူဝ်ႈလွင်ႈတၢင်းၼႆႉလႄႈ၊ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ၵႃႈၼင်ႇဢၼ်ၵဝ်ပဵၼ်ၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉမႂ်းတၵ်းလႆႈၶၢမ်ႇတၢႆလႄႈမႂ်းဢမ်ႇပၢႆႈလွတ်ႈလႆႈ။ မႂ်းထုၵ်ႇဢမုဢၼ်ဢဝ်ဢသၢၵ်ႈၵူၼ်းတၢႆၼၼ်ႉလႄႈဢမုတၢင်းဢၼ်ဢဝ်ဢသၢၵ်ႈၵူၼ်းတၢႆၼၼ်ႉတၵ်းလိုပ်ႈလမ်းၸွမ်းမႂ်းဢေႃႈ။-
ၵဝ်တၵ်းႁႂ်ႈလွႆ ဢေႇတုမ်ႇ၊ ပဵၼ်တီႈဢၼ်လုႁၢမ်း၊တီႈဢၼ်သဵတ်ႇၵူၼ်းငႅဝ်ၵူၼ်းလႄႈၵဝ်တၵ်းဢဝ်တၢႆပႅတ်ႈၶဝ်ၸိူဝ်းဢၼ်ပႆလတ်းၵႂႃႇလတ်းမႃးၼၼ်ႉဢေႃႈ။-
ၵဝ်တၵ်းဢဝ်တူဝ်တၢႆၵူၼ်းတင်းလၢႆႁူမ်ႇသုမ်ႇလွႆၸိူဝ်းၼၼ်ႉ၊ဢိၵ်ႇတင်းတူဝ်တၢႆၶဝ်ၸိူဝ်းဢၼ်တၢႆၵႃႈၼႂ်းၼႃႈသိုၵ်းၼၼ်ႉတၵ်းႁူမ်ႇသုမ်ႇၵႃႈၼိူဝ်ၵုင်းတင်းၵႃႈတီႈပၢင်ႇႁူၺ်ႈတင်းလၢႆဢေႃႈ။-
ၵဝ်တၵ်းႁႂ်ႈမႂ်းပဵၼ်တီႈဢၼ်သဵတ်ႇၵူၼ်းငႅဝ်ၵူၼ်းယူႇသေလႄႈၽူႈလႂ်ဢမ်ႇယူႇဢမ်ႇသဝ်းၵႃႈၼႂ်းဝဵင်းမႂ်းၸိူဝ်းၼၼ်ႉသေၵေႃႉသေၵူၼ်း။ ၼင်ႇၼၼ်လႄႈမႂ်းတၵ်းႁုလွင်ႈဢၼ်ၵဝ်ပဵၼ် ၸဝ်ႈထႃႇဝရႃႉၽြႃး၊ ဢေႃႈ။
“မႂ်းလၢတ်ႈဝႃႈ၊ ‘ၵူၼ်း ယုတႃႉ၊ တင်းၵူၼ်း ဢိသရေး သွင်ၸိူဝ်ႉသွင်မဵဝ်း၊ဢိၵ်ႇတင်းမိူင်းၶဝ်ၼႆႉပဵၼ်ဢၼ်ႁဝ်းပိူင်ႇဢေႃႈ။ ပိၵ်ႉသမ်ႉ ထႃႇဝရႃႉၽြႃး ၊ပဵၼ်ၽြႃးၶဝ်သေၵေႃႈႁဝ်းတၵ်းသိမ်းဢဝ်ဢေႃႈ၊’ ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉၸမ်ႉ၊ၵႃႈၼင်ႇဢၼ်ၵဝ်ပဵၼ်ၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉ၊ၵဝ်တၵ်းတွပ်ႇတႅၼ်းတၢင်းၸႂ်မႆႈၶႂ်ႈၸႃႉမႂ်း၊ၸႂ်ဢၼ်သီႈၵေႉႁေႈတႃ၊ဢိၵ်ႇတင်းတၢင်းဢၼ်မႂ်းၸင်းၵူၼ်းၵဝ်တင်းလၢႆၼၼ်ႉဢေႃႈ။ ၶဝ်တၵ်းႁုလွင်ႈဢၼ်ၵဝ်ပၼ်တၢမ်ႇဢပျတ်ႈတီႈမႂ်း၊ပုၼ်ႈလွင်ႈတၢင်းဢၼ်မႂ်းႁဵတ်းတီႈၶဝ်ၼၼ်ႉဢေႃႈ။-
မိူဝ်ႈၼၼ်ႉမႂ်းတၵ်းႁုလွင်ႈဢၼ်ၵဝ် ထႃႇဝရႃႉၽြႃး ၊ငိၼ်းၵႂၢမ်းၵူႈၸိူဝ်ႉၵူႈပိူင်ဢၼ်မႂ်းသႄႉသွမ်းလႄႈဝႃႈ၊ ‘လွႆ ဢိသရေး၊ တင်းလၢႆတၵ်းပဵၼ်ဢၼ်သဵတ်ႇဢၼ်ငႅဝ်လႄႈပဵၼ်တီႈဢၼ်ႁဝ်းတၵ်းၵိၼ်ဢေႃႈ၊’ ဝႃႈၼင်ႇၼႆဢေႃႈ။-
ၵဝ်ငိၼ်းၵႂၢမ်းမႂ်းဢၼ်ပူၼ်ႉလိူဝ်၊ၵႂၢမ်းဢၼ်ဢုပ်ႇဝၢဝ်းယွင်ႈယေႃးတူဝ်ၸဝ်ႈၵဝ်ႇလႄႈလၢတ်ႈၵႂၢမ်းဢၼ်ၶတ်းၵၼ်တင်းၵဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵဝ်တၵ်းႁႂ်ႈမႂ်းပဵၼ်တီႈဢၼ်သဵတ်ႇဢၼ်ငႅဝ်ၼႃႇလူင်လၢင်လႄႈၵူၼ်းလေႃးၵီႇတင်းလၢႆတၵ်းဢွၼ်ၵၼ်မီးတၢင်းဢၼ်သႂၢင်ႇသိူဝ်းပိူဝ်ႈဢၼ်မႂ်းတူၵ်းသုမ်းလုလႅဝ်ၼၼ်ႉ၊-
မိူၼ်ၸိူဝ်ႉၼင်ႇဢၼ်မႂ်းသႂၢင်ႇသိူဝ်းလူၺ်ႈလွင်ႈတၢင်းဢၼ်လိၼ်ဢမူၺ်ႇၵူၼ်းမဵဝ်း ဢိသရေး၊ လုလႅဝ်သဵတ်ႇယဵၼ်ၼၼ်ႉဢေႃႈ။ လွႆ ၸိရႃႉ၊ ႟။ မႂ်းဢိၵ်ႇတင်းမိူင်း ဢေႇတုမ်ႇ တင်းမိူင်းတၵ်းလုလႅဝ်ပႅတ်ႈမူတ်းမူတ်းသဵင်ႈသဵင်ႈဢေႃႈ။ ၼင်ႇၼၼ်လႄႈၵူၼ်းၵူႈၵေႃႉတၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “လုၵ်ႈၵူၼ်း႟။ ႁေႃးလၢတ်ႈၵႂၢမ်းပရေႃးၽႅတ်ႈ တီႈလွႆမိူင်း ဢိသရေး တင်းလၢႆလႄႈသင်ႇလၢတ်ႈႁႂ်ႈၶဝ်ထွမ်ႇငိၼ်းဢမိင်ႉ ထႃႇဝရႃႉၽြႃး၊ တႃႉ။-
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ၶဝ်ၸိူဝ်းဢၼ်ပဵၼ်ရၢၼ်ႇသူႇၵူၼ်းမဵဝ်း ဢိသရေး၊ ၼၼ်ႉဢွၼ်ၵၼ်လၢတ်ႈလႄႈဝႃႈ၊ ‘ႁႃးႁႃး။ လွႆ ထႃႇဝရႃႉၽြႃး ၊ၸိူဝ်းၼၼ်ႉႁွတ်ႈထိုင်ၵႃႈၼႂ်းမိူင်းႁဝ်းယဝ်ႉ၊’ ဝႃႈၼင်ႇၼႆယဝ်ႉ။
“ပိူဝ်ႈၼႆလႄႈႁႂ်ႈႁေႃးလၢတ်ႈၵႂၢမ်းပရေႃးၽႅတ်ႈတီႈၶဝ်လႄႈဝႃႈ၊ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉၸမ်ႉ၊မိူဝ်ႈဢၼ်ၵူၼ်းမဵဝ်းဢၼ်ယူႇႁိမ်းႁွမ်းၸိူဝ်းၼၼ်ႉသိမ်းဢဝ်လွႆ ဢိသရေး၊ တင်းလၢႆလႄႈယႃႉလုယႃႉလႅဝ်ၼၼ်ႉ၊ၶဝ်တင်းသဵင်ႈဢွၼ်ၵၼ်သႄႉသွမ်းၵူၼ်းမဵဝ်း ဢိသရေး ၊ဢေႃႈ။-
ပိူဝ်ႈၼႆလႄႈဢွၼ်ၵၼ်ထွမ်ႇငိၼ်းဢမိင်ႉၵဝ်၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ လၢတ်ႈတီႈသူဢၼ်ပဵၼ်လွႆလူင်လွႆဢွၼ်ႇလႂ်၊တီႈသူဢၼ်ပဵၼ်ႁူၺ်ႈပဵၼ်ထူင်ႉလႂ်၊တီႈသူဢၼ်ပဵၼ်တီႈဢၼ်လုဢၼ်လႅဝ်လႂ်၊တီႈသူဢၼ်ပဵၼ်ဝဵင်းဢၼ်သဵတ်ႇၵူၼ်းငႅဝ်ၵူၼ်းလႂ်၊ၸိူဝ်းဢၼ်ၵူၼ်းမဵဝ်းၵႃႈဢၼ်ယူႇႁိမ်းႁွမ်းသူဢွၼ်ၵၼ်ယႃႉလုယႃႉလႅဝ်သေလႄႈသႄႉသွမ်းသူၼၼ်ႉတႃႉ။
“ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊ပႃးတင်းၽႆးတေႃးသႃႉဢၼ်ၶတ်းၵၼ်တင်းၵူၼ်းမဵဝ်းဢၼ်ယူႇလဵပ်ႈႁွပ်ႈႁိမ်းႁွမ်းသူလႄႈၶတ်းၵၼ်တင်းၵူၼ်းမဵဝ်း ဢေႇတုမ်ႇ၊ ၼႃႇသေပိူၼ်ႈဢေႃႈ။ ၶဝ်ၼၼ်ႉပျေႇၸႂ်ပျေႇၶေႃးပႃးတၢင်းဢၼ်ၸူမ်းသိူဝ်းၼႃႇလူင်လၢင်တိုၵ်းသိမ်းဢဝ်မိူင်းၵဝ်သေလႄႈႁိမ်ႁူင်ႇဢဝ်ပၢင်ႇယိူဝ်ႈယႃႈတင်းလၢႆယဝ်ႉ။
“ပိူဝ်ႈဢၼ်ပဵၼ်ၸိူဝ်ႉၼင်ႇၼႆလႄႈႁေႃးလၢတ်ႈၵႂၢမ်းပရေႃးၽႅတ်ႈ တီႈမိူင်း ဢိသရေး၊ ဢၼ်ပဵၼ်လွႆလူင်လွႆဢွၼ်ႇ၊ၼမ်ႉႁွင်ႈၼမ်ႉၵႄး၊ၶူင်ႈႁူၺ်ႈတင်းလၢႆလႄႈဝႃႈ၊ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးၸႂ်ၶႂ်ႈၸႃႉ၊ဢိၵ်ႇတၢင်းၸႂ်ဢၼ်ၶႅၼ်တီႈလွင်ႈတၢင်းဢၼ်ၵူၼ်းမဵဝ်းတင်းလၢႆယႃႉယူၵ်ႉသႄႉသွမ်းၶဝ်လႄႈၶျႃးၶဝ်တူၵ်းတီႈတႅမ်ႇၼၼ်ႉယဝ်ႉ။-
ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးၵတိဝႆႉလႄႈဝႃႈၸမ်ႉ၊ၵူၼ်းမဵဝ်းဢၼ်ယူႇလဵပ်ႈႁွပ်ႈႁိမ်းႁွမ်းၸိူဝ်းၼၼ်ႉတၵ်းလႆႈၶၢမ်ႇတၢင်းဢၼ်ၶျႃးတူၵ်းတီႈတႅမ်ႇဢေႃႈ။-
လွႆ ဢိသရေး၊ ၶဝ်႟။ ၵႃႈၼိူဝ်သူၸမ်ႉ၊တူၼ်ႈမႆႉတင်းလၢႆတၵ်းဢွၼ်ၵၼ်ပူင်ႇၽိူဝ်ၶိုၼ်ႈလႄႈမၢၵ်ႇမၢၵ်ႇမႃးပုၼ်ႈၵူၼ်းၵဝ်မဵဝ်း ဢိသရေး၊ ဢေႃႈ။ ဢမ်ႇပေႃးႁိုင်သူတၵ်းလႆႈပွၵ်ႈၶိုၼ်းႁိူၼ်းယဝ်ႉဢေႃႈ။-
ၵဝ်ယူႇၽၢႆႇသူလႄႈတၵ်းႁႂ်ႈလိၼ်သူလႆႈထႆလႆႈၽိူဝ်သေယဝ်ႉ၊လႆႈဝၢၼ်ႇၸိူဝ်ႉဝၢၼ်ႇၽၼ်းဢေႃႈ။-
ၵဝ်တၵ်းႁႂ်ႈၵူၼ်းသူယႂ်ႇၽႄၼမ်ၵိုၼ်းမႃးလႄႈ သူတၵ်းလႆႈယူႇလႆႈသဝ်းၵႃႈၼႂ်းဝဵင်းတင်းလၢႆသေယဝ်ႉ၊မႄးၵုမ်းမႄးႁဵတ်းၵႃႈဢၼ်လုလႅဝ်ၵႂႃႇၸိူဝ်းၼၼ်ႉၵူႈၸိူဝ်ႉၵူႈပိူင်ဢေႃႈ။-
ၵဝ်တၵ်းႁႂ်ႈၵူၼ်းသူ၊ဢိၵ်ႇတင်းတူဝ်သတ်းသူၼမ်ၵိုၼ်းမႃးဢေႃႈ။ သူတၵ်းၼမ်ၵိုၼ်းၼႃႇသေမိူဝ်ႈဢွၼ်တၢင်းၼၼ်ႉလႄႈတၵ်းၵိူတ်ႇလဵင်ႉလုၵ်ႈလၢင်းၼမ်ၼႃႇဢေႃႈ။ ၵဝ်တၵ်းႁႂ်ႈသူယူႇသဝ်းမိူၼ်ၸိူဝ်ႉၼင်ႇဢၼ်သူယၢမ်ႈယူႇၵႃႈတီႈၼၼ်ႈမႃးၼၼ်ႉလႄႈ၊ၵဝ်တၵ်းႁႂ်ႈသူၶိုၼ်ႈယႂ်ႇမႂ်ႇသုင်သေဢွၼ်တွၼ်းသေၵဝ်ႇဢေႃႈ။ မိူဝ်ႈၼၼ်ႉသူတၵ်းႁုလွင်ႈဢၼ်ၵဝ်ပဵၼ် ၸဝ်ႈထႃႇဝရႃႉၽြႃး ၊ဢေႃႈ။-
ၵဝ်တၵ်းဢဝ်သူဢၼ်ဝႃႈ၊ၵူၼ်းၵဝ်မဵဝ်း ဢိသရေး ၊ၶိုၼ်းမႃးယူႇၵႃႈၼႂ်းမိူင်းၸဝ်ႈဢေႃႈ။ မိူင်းၼၼ်ႉတၵ်းပဵၼ်မိူင်းဢၼ်သူပိူင်ႇလႄႈမိူင်းၼၼ်ႉၵမ်းလိုၼ်းတၵ်းဢမ်ႇႁႂ်ႈလုၵ်ႈလၢင်းသူတၢႆလူၺ်ႈတၢင်းဢၼ်ဢိုပ်းၶဝ်ႈၼမ်ႉတၢင်းၵိၼ်လႃးလႃး။
“ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ၸႂ်ႈတႄႉမီးထုင်းၵႂၢမ်းဢၼ်ပိူၼ်ႈဝႃႈ၊ ‘လိၼ်မိူင်းၸၢင်ႈၶူပ်းၵိၼ်ၵူၼ်း၊ၸၢင်ႈၸူၼ်ဢဝ်ႁိမ်ဢဝ်ၵူၼ်းမဵဝ်းလုၵ်ႈလၢင်းမၼ်း၊’ ဝႃႈၼႆၼၼ်ႉဢေႃႈ။-
ၵူၺ်းၵႃႈ၊ၵမ်းလိုၼ်းလိၼ်မိူင်းတၵ်းဢမ်ႇလႆႈၶူပ်းၵိၼ်ၵူၼ်း၊ဢမ်ႇလႆႈၸူၼ်ဢဝ်ႁိမ်ဢဝ်ၵူၼ်းမဵဝ်းလုၵ်ႈလၢင်းမႂ်းလႃးလႃး၊ဝႃႈၼင်ႇၼႆ၊ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ။-
လိၼ်မိူင်းၼၼ်ႉၵမ်းလိုၼ်းတၵ်းဢမ်ႇလႆႈငိၼ်းၵႂၢမ်းဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်းသႄႉသွမ်းၼၼ်ႉ။ ၵမ်းလိုၼ်းဢမ်ႇလႆႈၶၢမ်ႇတၢင်းဢၼ်ၵူၼ်းတင်းလၢႆတၢင်ႇဢပျတ်ႈ။ လိၼ်မိူင်းၼၼ်ႉၵမ်းလိုၼ်းတၵ်းဢမ်ႇၸူၼ်ဢဝ်ႁိမ်ဢဝ်ၵူၼ်းမဵဝ်းလုၵ်ႈလၢင်းမၼ်းထႅင်ႈလႃးလႃး၊ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးၵႃႈတီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။ မိူဝ်ႈဢၼ်ၵူၼ်းမဵဝ်း ဢိသရေး၊ တင်းလၢႆယူႇၵႃႈၼႂ်းမိူင်းၶဝ်ယူႇၼၼ်ႉၸိုင်၊ၶဝ်ဢွၼ်ၵၼ်ႁဵတ်းႁႂ်ႈမိူင်းၼၼ်ႉၵူဝ်ႈၵိူၵ်ႇလူၺ်ႈတၢင်းယူႇတၢင်းသဝ်းၶဝ်၊ဢိၵ်ႇတင်းတၢင်းၵမ်တၢင်းၵျၢင်ႉၶဝ်ၼၼ်ႉဢေႃႈ။ ၵဝ်မၢတ်ႈတၢင်းႁဵတ်းတၢင်းသၢင်ႈၶဝ်ၼၼ်ႉပဵၼ်ၸိူဝ်ႉၼင်ႇဢၼ်ဝူၺ်ႇဢၼ်ႁင်ႈမႄႈယိင်းမိူဝ်ႈဢၼ်မီးလိူတ်ႈႁူဝ်လိူၼ် ၼၼ်ႉၵႃႈတီႈၽၢႆႇၼႃႈၵဝ်ဢေႃႈ။-
ပိူဝ်ႈၼႆလႄႈၵဝ်ဢဝ်တေႃးသႃႉတၢင်းၸႂ်မႆႈၶႂ်ႈၸႃႉၵဝ်ထွၵ်ႇသႂ်ႇၵႃႈၼိူဝ်ၶဝ် ၵွပ်ႈပိူဝ်ႈၶဝ်ဢဝ်ဢသၢၵ်ႈၵူၼ်းတၢႆၵႃႈၼႂ်းမိူင်းၼၼ်ႉ၊ဢိၵ်ႇတင်းၵွပ်ႈပိူဝ်ႈၶဝ်ႁႂ်ႈၵူဝ်ႈၵိူၵ်ႇလူၺ်ႈႁုၼ်ႇႁၢင်ႈသၢင်းထုၼၼ်ႉယဝ်ႉ။-
ၵဝ်ၸီႇယၢင်ႇပၼ်တၢမ်ႇၵႃႈၼိူဝ်ၶဝ်ၸွမ်းၵႃႈၼင်ႇဢၼ်တၢင်းယူႇတၢင်းသဝ်းၶဝ်၊ဢိၵ်ႇတင်းတၢင်းၵမ်တၢင်းၵျၢင်ႉၶဝ်ၼၼ်ႉသေယဝ်ႉ၊ဢဝ်ၶဝ်ၸၢတ်ႇပိုၼ်ပႅတ်ႈၸွတ်ႇတူဝ်ႈၵႂႃႇၵႃႈၼႂ်းၵူႈသိုင်ႇၵူႈမိူင်းယဝ်ႉ။-
တီႈဢၼ်ၶဝ်ႁွတ်ႈထိုင်ၵႂႃႇတီႈလႂ်တၢင်းလႂ်သေဢမ်ႇဝႃႈ၊ၶဝ်ႁဵတ်းႁႂ်ႈၼႃႇမႃႉၸိုဝ်ႈသဵင်ၵဝ်ဢၼ်မူတ်းၸၢင်ႇၼၼ်ႉၶျႃးတူၵ်းတီႈတႅမ်ႇၵႂႃႇ၊ၵွပ်ႈပိူဝ်ႈၵူၼ်းတင်းလၢႆဢွၼ်ၵၼ်လၢတ်ႈဝႃႈ၊ ‘ၵူၼ်းၸိူဝ်းၼႆႉပဵၼ်ၵူၼ်း ထႃႇဝရႃႉၽြႃး၊ ၵူၺ်းၵႃႈ၊ၶဝ်လႆႈဢွၵ်ႇသေမိူင်းမၼ်းၸဝ်ႈယဝ်ႉ၊’ ဝႃႈၼင်ႇၼႆဢေႃႈ။-
လွင်ႈတၢင်းၼၼ်ႉ ႁဵတ်းႁႂ်ႈၵဝ်သေလၢႆၼႃႇမႃႉၸိုဝ်ႈသဵင်မျၢတ်ႈၵဝ်ဢၼ်ၵူၼ်းမဵဝ်း ဢိသရေး၊ တင်းလၢႆႁဵတ်းႁႂ်ႈၶျႃးတူၵ်းတီႈတႅမ်ႇၵႃႈၼႂ်းၵူၼ်းၵူႈၸိူဝ်ႉၵူႈၶိူဝ်းတီႈဢၼ်ၶဝ်ႁွတ်ႈထိုင်ၼၼ်ႉဢေႃႈ။
“ၵွပ်ႈပိူဝ်ႈလွင်ႈတၢင်းၼႆႉလႄႈမႂ်းမွၵ်ႇလၢတ်ႈတီႈၵူၼ်းမဵဝ်း ဢိသရေး ၊တင်းလၢႆလႄႈဝႃႈ၊ ‘ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊မဵဝ်း ဢိသရေး၊ ႟။ ၵဝ်ထွၵ်ႈလူၺ်ႈၼႃႈသူလႄႈႁဵတ်းလွင်ႈၼႆႉဢမ်ႇၸႂ်ႈ။ ၵဝ်ထွၵ်ႈလူၺ်ႈၼႃႇမႃႉၸိုဝ်ႈသဵင်မျၢတ်ႈၵဝ်ဢၼ်သူၶျႃးတူၵ်းတီႈတႅမ်ႇၵႃႈၼႂ်းၵူႈသိုင်ႇၵူႈမိူင်းတီႈဢၼ်သူႁွတ်ႈထိုင်ၼၼ်ႉၵူၺ်းလႄႈႁဵတ်းဢေႃႈ။-
မိူဝ်ႈဢၼ်ၵဝ်ယွင်ႈယေႃးမႁႃႇၼႃႇမႃႉၸိုဝ်ႈသဵင်မျၢတ်ႈၵဝ်ဢၼ်သူၶျႃးတူၵ်းတီႈတႅမ်ႇၼၼ်ႉၵႃႈတီႈၵူၼ်းၵူႈၸိူဝ်ႉၵူႈမဵဝ်းတင်းလၢႆ ၵႃႈၼႂ်းၶိုင်ႈၵၢင်ၶဝ်ၼၼ်ႉၸိုင်၊ၶဝ်တၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ၊ဝႃႈၼင်ႇၼႆလႄႈၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉဢေႃႈ။ ၵဝ်တၵ်းႁႂ်ႈသူပဵၼ်ပုင်ႇသၢၵ်ႈသေႇၵႃႈတီႈသိုဝ်ႈၼႃႈတႂ်ႈတႃၵူၼ်းမဵဝ်းတင်းလၢႆလွင်ႈဢၼ်ၵဝ်မူတ်းၸၢင်ႇၼၼ်ႉဢေႃႈ။-
ၵဝ်တၵ်းဢဝ်သူဢွၵ်ႇသေၵႃႈၼႂ်းၵူၼ်းၵူႈၸိူဝ်ႉၵူႈမဵဝ်း၊ၵႃႈၼႂ်းၵူႈသိုင်ႇၵူႈမိူင်းသေလႄႈဢွၼ်ၵၼ်သူင်ႇၸူးၶိုၼ်းတီႈမိူင်းဢၼ်သူယူႇၵဝ်ႇၵဝ်ႇၼၼ်ႉဢေႃႈ။-
ၵဝ်တၵ်းဢဝ်ၼမ်ႉသႂ်သႂ်ၽႅတ်းသႂ်ႇၵႃႈၼိူဝ်သူလႄႈႁႂ်ႈသူမူတ်းသႂ်သေၵႃႈတီႈတၢင်းဢၼ်ဝူၺ်ႇဢၼ်ႁင်ႈသူၵူႈၸိူဝ်ႉၵူႈပိူင်၊ဢိၵ်ႇတင်းႁႂ်ႈမူတ်းသႂ်သေႁုၼ်ႇႁၢင်ႈသၢင်းထုၵႃႈမီးၼၼ်ႉဢေႃႈ။-
ၵဝ်တၵ်းပၼ်ႁူဝ်ၸႂ်ဢၼ်မႂ်ႇတီႈသူလႄႈဢဝ်သၽေႃးဢၼ်မႂ်ႇသႂၢင်းသႂ်ႇပၼ်ၵႃႈၼႂ်းသူဢေႃႈ။ ၵဝ်တၵ်းၼုၵ်ႈဢဝ်ႁူဝ်ၸႂ်မၢၵ်ႇႁိၼ်ဢၼ်တိုဝ်တၼ်ၼၼ်ႉဢွၵ်ႇသေၵႃႈၼႂ်းတူဝ်ၶၼ်ႇထႃႇသူလႄႈပၼ်ႁူဝ်ၸႂ်ၼိူဝ်ႉဢၼ်ၸၢင်ႈထွမ်ႇငိၼ်းၼၼ်ႉတီႈသူဢေႃႈ။-
ၵဝ်တၵ်းဢဝ်ဝိၺိၺ်ႇၵဝ်သႂၢင်းသႂ်ႇပၼ်ၵႃႈၼႂ်းသူသေယဝ်ႉ၊ႁဵတ်းႁႂ်ႈသူဢွၼ်ၵၼ်ၵမ်ၵျၢင်ႉၸွမ်းထုင်းတြႃးၵဝ်လႄႈပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၵႃႈဢၼ်ၵဝ်ပၼ်ဝႆႉၸိူဝ်းၼၼ်ႉဢေႃႈ။-
မိူဝ်ႈၼၼ်ႉသူတၵ်းမီးဢၶႂၢင်ႉဢၼ်ယူႇသဝ်းၵႃႈၼႂ်းမိူင်းဢၼ်ၵဝ်ပၼ်တီႈပူႇမွၼ်ႇသူၼၼ်ႉဢေႃႈ။ သူတၵ်းပဵၼ်ၵူၼ်းၵဝ်လႄႈၵဝ်တၵ်းပဵၼ်ၽြႃးပဵၼ်ၸဝ်ႈသူဢေႃႈ။-
ၵဝ်တၵ်းၵႄႇသႄႇဢဝ်သူဢွၵ်ႇသေလွင်ႈတင်းဢၼ်ဝူၺ်ႇဢၼ်ႁင်ႈသူၵႃႈမီးဢေႃႈ။ ၵဝ်တၵ်းပူင်ဢမိင်ႉတီႈမၢၵ်ႇၶဝ်ႈႁူင်းၼမ်ႉႁႂ်ႈလႆႈၶွၼ်ႇၼမ်မႃးသေလႄႈတၵ်းဢမ်ႇႁႂ်ႈၽေးတၢင်းဢၼ်ၶဝ်ႈၵႃႈမၢၵ်ႇပႅင်းႁွတ်ႈထိုင်ၵႃႈၼိူဝ်သူ။-
ၵဝ်တၵ်းႁႂ်ႈမၢၵ်ႇမႆႉမၢၵ်ႇတွၵ်ႇ၊ဢိၵ်ႇတင်းမၢၵ်ႇၼမ်ႉႁူင်းလိၼ်ၵွၼ်ႈလီပူင်းလီၼႃႇႁႂ်ႈသူဢမ်ႇလႆႈၶၢမ်ႇတၢင်းဢၼ်ၵူၼ်းတၢင်ႇၸိူဝ်ႉတၢင်ႇမဵဝ်းသႄႉသွမ်း၊လူၺ်ႈလွင်ႈတၢင်းဢၼ်ၶဝ်ႈၵႃႈမၢၵ်ႇပႅင်းၼၼ်ႉဢေႃႈ။-
သူတၵ်းဢွၼ်ၵၼ်ၶုၵ်းၸႂ်လႆႈၶႆႈၸႂ်ထူပ်းလွင်ႈတၢင်းဢၼ်သူႁဵတ်းႁၢႆႉႁဵတ်းယုတ်ႈ၊ဢိၵ်ႇတင်းလွင်ႈတၢင်းဢၼ်သူႁဵတ်းၽိတ်းႁဵတ်းပိူင်ၼၼ်ႉလႄႈတူဝ်သူတၵ်းဢွၼ်ၵၼ်လီႁင်ႈတူဝ်သူၵွပ်ႈပိူဝ်ႈဢပျတ်ႈတုၸရိူၵ်ႈ၊ဢိၵ်ႇတင်းလွင်ႈတၢင်းဢၼ်လီႁင်ႈဢဵတ်ႇသဵတ်ႇသူၸိူဝ်းၼၼ်ႉဢေႃႈ။-
ၵူၼ်းမဵဝ်း ဢိသရေး၊ ႟။ ၵဝ်ၶႂ်ႈႁႂ်ႈသူႁုလွင်ႈဢၼ်ၵဝ်ထွၵ်ႈလူၺ်ႈသူလႄႈႁဵတ်းဢမ်ႇၸႂ်ႈ၊ၵဝ်ၶႂ်ႈႁႂ်ႈသူၶုၵ်းၸႂ်လႆႈတၢင်းဢၼ်လီဢူၵ်းလီဢၢႆဢၼ်သူႁဵတ်းယူႇၼၼ်ႉဢေႃႈ၊’ ဝႃႈၼင်ႇၼႆ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ “ၼႂ်းမိုဝ်ႉဝၼ်းဢၼ်ၵဝ်ႁႂ်ႈသူလွတ်ႈသေဢပျတ်ႈတုၸရိူၵ်ႈသူၵႃႈမီးလႄႈႁွတ်ႈထိုင်တၢင်းဢၼ်မူတ်းသႂ်ၼၼ်ႉၸိုင်၊ၵဝ်တၵ်းႁႂ်ႈသူလႆႈယူႇသဝ်းၵႃႈၼႂ်းဝဵင်းသူတင်းလၢႆလႄႈလႆႈၶိုၼ်းမႄးၵုမ်းမႄးႁဵတ်းၸိူဝ်းဢၼ်လုဢၼ်လႅဝ်ၼၼ်ႉဢေႃႈ။-
ၼႂ်းလိၼ်တီႈဢၼ်သဵတ်ႇဢၼ်ငႅဝ်သိုဝ်ႈၼႃႈတႂ်ႈတႃၶဝ်ၸိူဝ်းဢၼ်ပႆတၢင်းလတ်းၵႂႃႇလတ်းမႃးၸိူဝ်းၼၼ်ႉ၊ၵဝ်တၵ်းႁႂ်ႈသူၶိုၼ်းလႆႈႁဵတ်းသူၼ်ႁဵတ်းၼႃးဢေႃႈ။-
မိူဝ်ႈၼၼ်ႉၵူၼ်းတင်းလၢႆတၵ်းဢွၼ်ၵၼ်လၢတ်ႈဝႃႈ၊ ‘မိူင်းဢၼ်ယၢမ်ႈပဵၼ်ထိူၼ်ႇလႅင်ႉၼၼ်ႉမိူဝ်ႈလဵဝ်ပဵၼ်ၸိူဝ်ႉၼင်ႇသူၼ်ဢူးယဵၼ်ႇ ဢေႇတိၼ်ႇ၊ သေယဝ်ႉ၊ဝဵင်းယႂ်ႇဝဵင်းလူင်ၸိူဝ်းဢၼ်လုဢၼ်လႅဝ်၊ဢၼ်သဵတ်ႇဢၼ်ယဵၼ်၊ဢၼ်ၵိူၼ်ႇဢၼ်ပင်းၼႆႉၵေႃႈဢွၼ်ၵၼ်ပျေႉၸုမ်ႇဝႆႉတင်းၽူႈတင်းၵူၼ်းလႄႈပဵၼ်ဝဵင်းဢၼ်မၼ်ႈၶိူင်ႇဝႆႉယဝ်ႉ၊’ ဝႃႈၼင်ႇၼႆဢေႃႈ။-
မိူဝ်ႈၼၼ်ႉၵူၼ်းတၢင်ႇၸိူဝ်ႉတၢင်ႇမဵဝ်းဢၼ်ယင်းၵိုတ်းယင်းၵျၢၼ်ႇယူႇလဵပ်ႈႁွပ်ႈႁိမ်းႁွမ်းသူၸိူဝ်းၼၼ်ႉတၵ်းဢွၼ်ၵၼ်ႁုလွင်ႈဢၼ်ၵဝ် ထႃႇဝရႃႉၽြႃး၊ မႄးၵုမ်းမႄးႁဵတ်းဝဵင်းၸိူဝ်းၼၼ်ႉ၊ဢိၵ်ႇတင်းလွင်ႈဢၼ်ၵဝ်ၽုၵ်ႇသွမ်ႈၵႃႈတီႈလိၼ်ဢၼ်လုႁၢမ်းၼၼ်ႉဢေႃႈ။ ၵဝ်၊ ထႃႇဝရႃႉၽြႃး ၊မီးဢမိင်ႉဝႆႉယဝ်ႉ။ ၵဝ်တၵ်းႁဵတ်းၸွမ်းဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉၸမ်ႉ၊ “ၵဝ်သမ်ႉတၵ်းပၼ်ဢၶႂၢင်ႉႁႂ်ႈၵူၼ်းမဵဝ်း ဢိသရေး၊ တင်းလၢႆတွင်းပၢၼ်ႇႁႂ်ႈၵဝ်ၸွႆႈထႅမ်မႃႉၸႃႉၶဝ်ဢေႃႈ။ ၵဝ်တၵ်းႁႂ်ႈၶဝ်ယႂ်ႇၽႄႈၼမ်ၵိုၼ်းမႃးယူႇတိၵ်းတိၵ်းလူၺ်ႈၽူႈလူၺ်ႈၵူၼ်းမိူၼ်ၸိူဝ်ႉၼင်ႇၽုင်သူဝ်းဢေႃႈ။-
ဝဵင်းဢၼ်လုလႅဝ်ၸိူဝ်းၼၼ်ႉတၵ်းမီးတၢင်းဢၼ်တဵမ်ဝႆႉတင်းမုၵ်ႉၵူၼ်းၸိူဝ်းၵူၼ်းမိူၼ်ဝဵင်း ယေႇရုသလႅမ်ႇ၊ ဢၼ်ယၢမ်ႈတဵမ်ဝႆႉတင်းမူႇသူဝ်းၽုင်သူဝ်း ဢၼ်ဢဝ်သၢၵ်ႈလူႇၵႃႈတီႈပွႆးထမ်ႇမႃႉၼၼ်ႉဢေႃႈ။ ၼင်ႇၼၼ်လႄႈၶဝ်တၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။
ၵဝ်လႆႈၶၢမ်ႇတၢင်းဢၼ်မိုဝ်း ထႃႇဝရႃႉၽြႃး၊ တိူဝ်ႉထုၵ်ႇၵႃႈၼိူဝ်ၵဝ်သေယဝ်ႉ၊ဝိၺိၺ်ႇမၼ်းၸဝ်ႈဢဝ်ၵဝ်ၵႂႃႇၶျႃးဝႆႉၵႃႈတီႈထူင်ႉႁူၺ်ႈဢၼ်တဵမ်ဝႆႉတင်းလုပ်ႇတင်းလၢဝ်ႈၼၼ်ႉဢေႃႈ။-
မၼ်းၸဝ်ႈဢဝ်ၵဝ်ၵႂႃႇပၼ်ႇႁွပ်ႈထူင်ႉႁူၺ်ႈၼၼ်ႉလႄႈ၊ၵဝ်လႆႈႁၼ်မီးလုပ်ႇမီးလၢဝ်ႈၼမ်ၼႃႇလူင်လၢင်လႄႈလုပ်ႇလၢဝ်ႈၸိူဝ်းၼၼ်ႉပဵၼ်ဢၼ်ႁႅင်ႈဝႆႉဢေႃႈ။-
မၼ်းၸဝ်ႈလၢတ်ႈတီႈၵဝ်လႄႈဝႃႈ၊ “လုၵ်ႈၵူၼ်း႟။ လုပ်ႇၸိူဝ်းၼႆႉတၵ်းဢသၢၵ်ႈလိပ်းမႃးလႆႈႁိုဝ်း၊” ဝႃႈၼင်ႇၼႆဢေႃႈ။ ၵဝ်ၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းၵူၺ်းႁုတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈမီးဢမိင်ႉလႄႈဝႃႈ၊ “မႂ်းႁေႃးလၢတ်ႈၵႂၢမ်းပရေႃးၽႅတ်ႈတီႈလုပ်ႇၸိူဝ်းၼၼ်ႉတႃႉ။ သင်ႇလၢတ်ႈႁႂ်ႈလုပ်ႇႁႅင်ႈၸိူဝ်းၼၼ်ႉထွမ်ႇဢဝ်ဢမိင်ႉ ထႃႇဝရႃႉၽြႃး၊ တႃႉ။-
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉတီႈလုပ်ႇႁႅင်ႈၸိူဝ်ႉၼႆႉလႄႈဝႃႈၸမ်ႉ၊တူၺ်းလူး။ ၵဝ်တၵ်းသႂၢင်းလူမ်းထူၺ်ႈၸႂ်သႂ်ႇၵႃႈၼႂ်းသူလႄႈ ႁႂ်ႈသူဢသၢၵ်ႈၶိုၼ်းလိပ်းဢေႃႈ။-
ၵဝ်တၵ်းသႂၢင်းပၼ်ဢဵၼ်ဢိၵ်ႇတင်းၼိူဝ်ႉမုၼ်းၶိုၼ်းတီႈသူသေယဝ်ႉ၊ဢဝ်ၼင်ႁူမ်ႇသုမ်ႇပၼ်ဢေႃႈ။ ၵဝ်တၵ်းသႂၢင်းလူမ်းထူၺ်ႈၸႂ်သႂ်ႇၵႃႈၼႂ်းသူလႄႈႁႂ်ႈသူဢသၢၵ်ႈၶိုၼ်းလိပ်းဢေႃႈ။ မိူဝ်ႈၼၼ်ႉသူတၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။
ၵဝ်ၵေႃႈလၢတ်ႈၵႂၢမ်းပရေႃးၽႅတ်ႈၸွမ်းၵႃႈၼင်ႇဢၼ်မၼ်းၸဝ်ႈသင်ႇလၢတ်ႈဝႆႉၼၼ်ႉဢေႃႈ။ ယၢမ်းမိူဝ်ႈဢၼ်ယင်းတိုၵ်ႉႁေႃးလၢတ်ႈယူႇၼၼ်ႉၵဝ်လႆႈငိၼ်းသဵင်မေႃးမႃးလႄႈလုပ်ႇၸိူဝ်းၼၼ်ႉသုတ်ႉၸူးၶဝ်ႈႁႃၵၼ်တီႈၽႂ်တီႈမၼ်းဢေႃႈ။-
မိူဝ်ႈဢၼ်ၵဝ်ယင်းတိုၵ်ႉပႂ်ႉတူၺ်းယူႇၼၼ်ႉဢဵၼ်တင်းလၢႆပေႃႇမႃးလႄႈၼိူဝ်ႉၵေႃႈမုၼ်းၶိုၼ်ႈမႃးသေယဝ်ႉ၊ၼင်ၵေႃႈႁူမ်ႇသုမ်ႇလုပ်ႇၸိူဝ်းၼၼ်ႉဢေႃႈ။ ၵူၺ်းၵႃႈ၊ဢမ်ႇပႆႇမီးလူမ်းထူၺ်ႈၸႂ်။
ၽြႃးပဵၼ်ၸဝ်ႈမီးဢမိင်ႉတီႈၵဝ်လႄႈဝႃႈ၊ “လုၵ်ႈၵူၼ်း႟။ ႁေႃးလၢတ်ႈၵႂၢမ်းပရေႃးၽႅတ်ႈတီႈလူမ်းတႃႉ။ သင်ႇလၢတ်ႈတီႈလူမ်းလႄႈဝႃႈ၊ ‘ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉလႄႈဝႃႈ၊လူမ်းထူၺ်ႈၸႂ်႟။ လုၵ်ႉသေၵႃႈၼႂ်းလူမ်းသီႇၸဵင်ႇပႅတ်ႇၼႃႈၸိူဝ်းၼၼ်ႉမႃးလႄႈပဝ်ႇသႂ်ႇၵႃႈၼိူဝ်တူဝ်တၢႆၸိူဝ်းၼႆႉႁႂ်ႈၶဝ်ဢသၢၵ်ႈလိပ်းမႃးတႃႉ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈၵဝ်ႁေႃးလၢတ်ႈၵႂၢမ်းပရေႃးၽႅတ်ႈၸွမ်းၵႃႈၼင်ႇဢၼ်မၼ်းၸဝ်ႈလၢတ်ႈဝႆႉၼၼ်ႉဢေႃႈ။ လူမ်းထူၺ်ႈၸႂ်ၶဝ်ႈၵႃႈၼႂ်းတူဝ်ၶဝ်လႄႈဢသၢၵ်ႈလိပ်းမႃးသေယဝ်ႉ၊လုၵ်ႉၸုၵ်းယူႇပဵၼ်တပ်ႉသိုၵ်းလူင်ဢေႃႈ။
ၽြႃးပဵၼ်ၸဝ်ႈမီးဢမိင်ႉတီႈၵဝ်လႄႈဝႃႈ၊ “လုၵ်ႈၵူၼ်း႟။ ၵူၼ်းမဵဝ်း ဢိသရေး၊ တင်းလၢႆမိူၼ်ၵၼ်တင်းလုပ်ႇၸိူဝ်းၼႆႉယဝ်ႉ။ တူၺ်းလူး။ ၶဝ်ၸၢင်ႈဢွၼ်ၵၼ်လၢတ်ႈလႄႈဝႃႈ၊ ‘လုပ်ႇႁဝ်းၼႆႉပဵၼ်ဢၼ်ႁႅင်ႈႁွင်ၵႂႃႇယဝ်ႉ။ ႁဝ်းၼႆႉဢမ်ႇမီးတီႈလီမုင်ႈမွင်းၵႃႈသင်ယဝ်ႉ။ ႁဝ်းၼႆႉသုမ်းၸွမ်းယဝ်ႉ၊’ ဝႃႈၼင်ႇၼႆဢေႃႈ။-
ပိူဝ်ႈၼႆလႄႈမႂ်းႁေႃးလၢတ်ႈၵႂၢမ်းပရေႃးၽႅတ်ႈတီႈၵူၼ်းမဵဝ်း ဢိသရေး၊ လႄႈဝႃႈ၊ ‘ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ၵူၼ်းၵဝ်တင်းလၢႆၶဝ်႟။ ၵဝ်တၵ်းၽုၺ်ႇပိုတ်ႇႁူးၶုမ်ပႃႇႁဵဝ်ႈသူတင်းလၢႆလႄႈဢဝ်သူဢွၵ်ႇမႃးသေယဝ်ႉ၊သူင်ႇႁွတ်ႈထိုင်ၵႃႈၼႂ်းမိူင်း ဢိသရေး ၊ဢေႃႈ။-
ၵူၼ်းၵဝ်တင်းလၢႆၶဝ်႟။ မိူဝ်ႈဢၼ်ၵဝ်ၽုၺ်ႇပိုတ်ႇႁူးၶုမ်ပႃႇႁဵဝ်ႈသူလႄႈဢဝ်သူဢွၵ်ႇမႃးသေၵႃႈၼႂ်းၼၼ်ႉၸိုင်၊သူတၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ။-
ၵဝ်တၵ်းဢဝ်ဝိၺိၺ်ႇၵဝ်သႂၢင်းသႂ်ႇပၼ်ၵႃႈၼႂ်းသူႁႂ်ႈသူဢသၢၵ်ႈလိပ်းမႃးသေယဝ်ႉ၊ႁႂ်ႈသူလႆႈယူႇလႆႈသဝ်းၵႃႈၼႂ်းမိူင်းဢၼ်သူယူႇၵဝ်ႇၵဝ်ႇၼၼ်ႉဢေႃႈ။ ၼင်ႇၼၼ်လႄႈသူတၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး ၊ဢေႃႈ။ ၵဝ်လႆႈဝႆႉၵတိတႃႇတေႁဵတ်းၸိူဝ်ႉၼင်ႇၼႆယဝ်ႉလႄႈၵဝ်တၵ်းႁဵတ်းၸွမ်းဢေႃႈ။ ထႃႇဝရႃႉၽြႃး ၊မီးဢမိင်ႉယဝ်ႉ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးၵႃႈတီႈၵဝ်လႄႈဝႃႈၸမ်ႉ၊-
“လုၵ်ႈၵူၼ်း႟။ မႂ်းဢဝ်ၶွၼ်ႉမႆႉၸိင်လႅမ်ႈၼိုင်ႈလႄႈတႅမ်ႈၸိုဝ်ႈဝႃႈ၊ ‘မိူင်း ယုတႃႉ ၊’ ဝႃႈၼႆသေယဝ်ႉ၊သမ်ႉဢဝ်တၢင်ႇလႅမ်ႈတႅမ်ႈၸိုဝ်ႈဝႃႈ၊ ‘မိူင်း ဢိသရေး ၊’ ဝႃႈၼႆတႃႉ။-
ဢဝ်ၶွၼ်ႉသွင်လႅမ်ႈၼၼ်ႉသိုပ်ႇတေႃႇၵၼ်ႁႂ်ႈပဵၼ်လႅမ်ႈလဵဝ်ၵၼ်ၵႃႈၼႂ်းမိုဝ်းမႂ်းတႃႉ။-
ပေႃးၵူၼ်းမႂ်းတင်းလၢႆထၢမ်လႄႈဝႃႈ၊ ‘ဢၼ်ၼႆႉပွင်ႇဝႃႈၸိူဝ်ႉၼင်ႇႁိုဝ်၊’ ဝႃႈၼႆၸိုင်၊-
မွၵ်ႇလၢတ်ႈတီႈၶဝ်လႄႈဝႃႈ၊ ‘ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ၵဝ်ဢဝ်ၶွၼ်ႉဢၼ်တၢင်တူဝ်ၵူၼ်းမဵဝ်း ဢိသရေး၊ ၼၼ်ႉၸပ်းသႂ်ႇၵၼ်တင်းၶွၼ်ႉလႅမ်ႈဢၼ်တၢင်တူဝ်ၵူၼ်းမဵဝ်း ယုတႃႉ၊ ဢေႃႈ။ ၵဝ်ဢဝ်ၶွၼ်ႉသွင်လႅမ်ႈၼႆႉႁဵတ်းႁႂ်ႈပဵၼ်လႅမ်ႈလဵဝ်ၵၼ်သေယဝ်ႉ၊ယိပ်းၵမ်ဝႆႉၵႃႈၼႂ်းမိုဝ်းၵဝ်ဢေႃႈ၊’ ဝႃႈၼင်ႇၼႆတႃႉ။
“ယိပ်းၵမ်ၶွၼ်ႉသွင်လႅမ်ႈၼၼ်ႉၵႃႈၼႂ်းမိုဝ်းမႂ်းႁႂ်ႈၵူၼ်းတင်းလၢႆတူၺ်းႁၼ်လႆႈတႃႉ။-
မႂ်းသမ်ႉလၢတ်ႈတီႈၶဝ်လႄႈဝႃႈ၊ ‘ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ၵဝ်တၵ်းႁွင်ႉဢဝ်ၵူၼ်းၵဝ်ၵႃႈမီးတင်းသဵင်ႈတင်းမူတ်းဢွၵ်ႇသေၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းတီႈဢၼ်ၶဝ်ႁွတ်ႈထိုင်ၼၼ်ႉလႄႈႁႂ်ႈၶဝ်လုၵ်ႉသေၵူႈတီႈၵူႈလႅၼ်မႃးၸုတုမ်ၵၼ်သေယဝ်ႉ၊ဢဝ်ၶဝ်သူင်ႇႁွတ်ႈၵႃႈၼႂ်းမိူင်းဢၼ်ၶဝ်ယူႇၵဝ်ႇၵဝ်ႇၼၼ်ႉဢေႃႈ။-
ၵဝ်တၵ်းဢဝ်ၶဝ်ႁူမ်ႈပွင်းႁႂ်ႈပဵၼ်ၵူၼ်းမဵဝ်းလဵဝ်ၵၼ်ၵႃႈၼိူဝ်လွႆ ဢိသရေး၊ တင်းလၢႆၵႃႈၼႂ်းမိူင်းၸဝ်ႈဢေႃႈ။ ၶုၼ်ႁေႃၶမ်းပႃးလဵဝ်ၵူၺ်းတၵ်းဢုပ်ႉပိူင်ႇၸၢမ်ႇၸႃးၶဝ်လႄႈၵမ်းလိုၼ်းၶဝ်တၵ်းဢမ်ႇလႆႈပဵၼ်ၵူၼ်းသွင်ၸိူဝ်ႉသွင်မဵဝ်း၊တၵ်းဢမ်ႇပဵၼ်သွင်သိုင်ႇသွင်မိူင်းလႃးလႃး။-
ၵမ်းလိုၼ်းၶဝ်တၵ်းဢမ်ႇလႆႈၵူဝ်ႈၵိူၵ်ႇလူၺ်ႈႁုၼ်ႇႁၢင်ႈသၢင်းထုၶဝ်၊လွင်ႈတၢင်းဢၼ်လီႁင်ႈဢဵတ်ႇသဵတ်ႇၶဝ်၊လွင်ႈတၢင်းဢၼ်ႁဵတ်းတုၸရိူၵ်ႈၼၼ်ႉထႅင်ႈ။ ၵဝ်တၵ်းၵႄႇသႄႇၼုၵ်ႈဢဝ်ၶဝ်ဢွၵ်ႇသေၵႃႈၼႂ်းတၢင်းဢၼ်ၶဝ်ၽိတ်းပိူင်ႈၵဝ်ၵူႈမဵဝ်းၼၼ်ႉ၊ၵဝ်တၵ်းႁႂ်ႈၶဝ်မူတ်းသႂ်သေယဝ်ႉ၊ၶဝ်တၵ်းပဵၼ်ၵူၼ်းၵဝ်လႄႈၵဝ်တၵ်းပဵၼ်ၽြႃးပဵၼ်ၸဝ်ႈၶဝ်ဢေႃႈ။-
ၶုၼ်ႁေႃၶမ်းဢၼ်ပဵၼ်ၶႃႈၵဝ် တႃႇဝိတ်ႈ၊ ၼၼ်ႉတၵ်းပဵၼ်ၶုၼ်ႁေႃၶမ်းၶဝ်ဢေႃႈ။ ၶဝ်တၵ်းဢွၼ်ၵၼ်ႁူမ်ႈပွင်းၵၼ်ယူႇတႂ်ႈမိုဝ်းၶုၼ်ပႃးလဵဝ်ၵူၺ်းသေယဝ်ႉ၊တၵ်းပႃးသဵတ်ႈၸႃႇလႄႈဢွၼ်ၵၼ်ပႂ်ႉၵမ်ပႂ်ႉၸွမ်းထုင်းတြႃးၵဝ်တင်းလၢႆဢေႃႈ။-
ၶဝ်တၵ်းဢွၼ်ၵၼ်လႆႈယူႇၵႃႈၼႂ်းမိူင်းဢၼ်ၵဝ်ပၼ်ၵႃႈတီႈၶႃႈၵဝ် ယႃႇၵုပ်ႈ၊ မိူင်းဢၼ်ပူႇမွၼ်ႇၶဝ်ယၢမ်ႈယူႇမႃးၼၼ်ႉဢေႃႈ။ ၶဝ်ဢိၵ်ႇတင်းလုၵ်ႈလၢၼ်ၶဝ်သိုပ်ႇသိုပ်ႇတၢမ်တၢမ်ၸိူဝ်းၼၼ်ႉတၵ်းဢွၼ်ၵၼ်လႆႈယူႇၵႃႈၼႂ်းမိူင်းၼၼ်ႉဢေႃႈ။ ၶုၼ်ႁေႃၶမ်းဢၼ်ပဵၼ်ၶႃႈၵဝ် တႃႇဝိတ်ႈ ၊ၼၼ်ႉတၵ်းဢုပ်ႉပိူင်ႇၸၢမ်ႇၸႃးၶဝ်ယူႇသေႇသေႇဢေႃႈ။
လိူဝ်သေၼၼ်ႉၵဝ်တၵ်းႁဵတ်းပတိၺိၺ်ႇမိၵ်ႈသႁႃႇယႃႉလူၺ်ႈၵၼ်တင်းၶဝ်ႁႂ်ႈပဵၼ်ပတိၺိၺ်ႇဢၼ်မၼ်ႈၵႅၼ်ႇပုၼ်ႈလွင်ႈတၢင်းဢၼ်တၵ်းလႆႈယူႇလူင်ႈလီလွတ်ႈလီတႃႇသေႇဢမ်ႇထၢတ်ႇၼၼ်ႉဢေႃႈ။ ၵဝ်တၵ်းၶျႃးပၼ်တီႈယူႇတီႈသဝ်းၶဝ်လႄႈႁႂ်ႈၶဝ်ယႂ်ႇၽႄၼမ်ၵိုၼ်းမႃးသေယဝ်ႉ၊ဢဝ်ၵျွင်းပိၵ်ႈမၢၼ်ႇၵဝ်ပူၵ်းတင်ႈၵႃႈၼႂ်းမိူင်းၶဝ်တႄႇယူႇၼိၵ်ႈၸႃႉထႃႇဝရႃႉဢေႃႈ။-
ၵဝ်တၵ်းယူႇၵႃႈတီႈၼၼ်ႈႁူမ်ႈလူၺ်ႈၵၼ်တင်းၶဝ်သေယဝ်ႉ၊ၵဝ်တၵ်းပဵၼ်ၽြႃးပဵၼ်ၸဝ်ႈၶဝ်လႄႈၶဝ်တၵ်းပဵၼ်ၵူၼ်းၵဝ်ဢေႃႈ။-
ၼင်ႇၼၼ်လႄႈမိူဝ်ႈဢၼ်ၵဝ်ဢဝ်ၵျွင်းပိၵ်ႈမၢၼ်ႇၵဝ်တႄႇယူႇၵႃႈၼႂ်းဝူင်ႈၵၢင်ၶဝ်တႃႇသေႇၼၼ်ႉၵူၼ်းၵူႈၸိူဝ်ႉၵူႈမဵဝ်းတၵ်းႁုလွင်ႈဢၼ်ၵဝ် ထႃႇဝရႃႉၽြႃး၊ လိူၵ်ႈဢဝ်ၵူၼ်းမဵဝ်း ဢိသရေး၊ ႁႂ်ႈပဵၼ်ၵူၼ်းၵဝ်ဢေႃႈ၊ဝႃႈၼင်ႇၼႆဝႆႉယဝ်ႉ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးၵႃႈတီႈၵဝ်လႄႈဝႃႈ၊-
“လုၵ်ႈၵူၼ်း႟။ မႂ်းႁေႃးလၢတ်ႈၵႂၢမ်းပရေႃးၽႅတ်ႈတီႈၶုၼ် ၵေႃးၵႃႉ၊ ဢၼ်ဢုပ်ႉပိူင်ႇၵူၼ်းမဵဝ်း မႄႇသႅၵ်ႉ ၊တင်းၵူၼ်းမဵဝ်း တုပလႃႉ၊ ၵႃႈၼႂ်းမိူင်း မႃႇၵေႃးၵႃႉ ၊ၸိူဝ်းၼၼ်ႉတႃႉ။-
ႁေႃးလၢတ်ႈလႄႈဝႃႈ၊ ‘ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ၶုၼ် ၵေႃးၵႃႉ၊ ႟။ ၵဝ်ပဵၼ်ရၢၼ်ႇသူႇမႂ်းဢေႃႈ။-
ၵဝ်တၵ်းႁႂ်ႈမႂ်းဝၢႆႇၶိုၼ်းဢေႃႈ။ ၵဝ်တၵ်းဢဝ်ၶေႃလဵၵ်းၵွင်ႉလုပ်ႇၵၢင်းမႂ်းသေလႄႈတိုတ်ႉလၢၵ်ႈဢဝ်မႂ်း၊ဢိၵ်ႇတင်းႁူဝ်ႁၢၼ်ၵူၼ်းသိုၵ်းမႂ်းတင်းသဵင်ႈတင်းမူတ်းဢေႃႈ။ ႁူဝ်ႁၢၼ်ၵူၼ်းသိုၵ်းမႂ်း ဢိၵ်ႇလူၺ်ႈတပ်ႉမႃႉမႂ်းတင်းၵူၼ်းသိုၵ်းၶီႇမႃႉမႂ်းၸိူဝ်းၼၼ်ႉမီးၼမ်ၼႃႇလူင်လၢင်လႄႈႁူဝ်ႁၢၼ်ၵူၼ်းသိုၵ်းၸိူဝ်းၼၼ်ႉဢွၼ်ၵၼ်ယိပ်းၵမ်ၶိူင်ႈလၢၵ်ႈၼၢၵ်ႈ၊ဢိၵ်ႇတင်းလၢပ်ႇလႅဝ်းဝႆႉၵူႈၵေႃႉၵူႈၵူၼ်းဢေႃႈ။-
ဢၼ်ပဵၼ်ၵူၼ်းမိူင်း ပႃးသျႃး ၵူၼ်းမိူင်း ဢေႇတီႇဢူဝ်းပီးယႃး၊ တင်းၵူၼ်းမိူင်း လိပ်ႉပီးယႃး၊ ဢၼ်ယိပ်းၵမ်ၶိူင်ႈႁႄႉလၢၵ်ႈၼၢၵ်ႈ၊ဢိၵ်ႇတင်းတိုဝ်းမွၵ်ႇႁူဝ်လဵၵ်းၸိူဝ်းၼၼ်ႉၵေႃႈယူႇၽၢႆႇမႂ်းဢေႃႈ။-
ႁူဝ်ႁၢၼ်ၵူၼ်းသိုၵ်းၵႃႈဢၼ်မီးၼႂ်းမိူင်း ၵေႃးမႃႇ၊ တင်းၵႃႈၼႂ်းမိူင်း ပႅတ်ႉတေႃႇၵမႃႉ၊ ၽၢႆႇႁွင်ႇၸိူဝ်းၼၼ်ႉၵေႃႈမီးၽၢႆႇမႂ်းဢိၵ်ႇတင်းၵူၼ်းတၢင်ႇၸိူဝ်ႉတၢင်ႇမဵဝ်းၼမ်ၼႃႇၵေႃႈယူႇၽၢႆႇမႂ်းဢေႃႈ။-
မႂ်းဢိၵ်ႇတင်းႁူဝ်ႁၢၼ်ၵူၼ်းသိုၵ်းမႂ်းၵႃႈမီးၼၼ်ႉဢွၼ်ၵၼ်မႄးႁႅၼ်းထႃႈႁႂ်ႈလႆႈတၼ်းဝႆႉလႄႈပႂ်ႉၶဝ်ယူႇတႃႉ။-
ဝၢႆးသေဢၼ်ပီမိူင်းပူၼ်ႉၵႂႃႇႁိုင်ၼႃႇၼၼ်ႉမႂ်းတၵ်းလႆႈၶီႇသိုၵ်းတိုၵ်းဢဝ်မိူင်းဢၼ်ၵူၼ်းမိူင်းမၼ်းလႆႈၶၢမ်ႇတၢင်းဢၼ်ၼုၵ်ႈဢဝ်ဢွၵ်ႇသေၵႃႈၼႂ်းၵူၼ်းမဵဝ်းၼမ်ၼႃႇၼၼ်ႉသေလႄႈလႆႈယူႇၼိမ်လီလွတ်ႈလီၽေးသိုၵ်းၽေးသိူဝ်ၼၼ်ႉဢေႃႈ။ မႂ်းတၵ်းတေလႆႈၶီႇသိုၵ်းတိုၵ်းဢဝ်လွႆ ဢိသရေး၊ ဢၼ်ယၢမ်ႈလႆႈပဵၼ်တီႈဢၼ်သဵတ်ႇဢၼ်ငႅဝ်ၵူၼ်းယူႇလႄႈပဵၼ်ထိူၼ်ႇလႅင်ႉႁိုင်ၼႃႇယဝ်ႉၼၼ်ႉဢေႃႈ။ ၵူၺ်းၵႃႈ၊တေႃႈလဵဝ်ၼႆႉၵူၼ်းတင်းလၢႆလႆႈယူႇလူင်ႈလီလွတ်ႈလီယဝ်ႉ။-
မႂ်းဢိၵ်ႇတင်းႁူဝ်ႁၢၼ်ၵူၼ်းသိုၵ်းမႂ်းဢိၵ်ႇတင်းၵူၼ်းမဵဝ်းၼမ်ၼႃႇဢၼ်ယူႇၽၢႆႇမႂ်းၸိူဝ်းၼၼ်ႉတၵ်းဢွၼ်ၵၼ်ၶီႇသိုၵ်းၽူတ်းၶိုၼ်ႈမိူၼ်ၸိူဝ်ႉၼင်ႇၽူၼ်လူင်လူမ်းလူင်သေလႄႈ တၵ်းပဵၼ်ၸိူဝ်ႉၼင်ႇလူမ်းလႅင်ႉၽူၼ်လူင်ၵႃႈၼႂ်းမိူင်းၼၼ်ႉဢေႃႈ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ “မိူဝ်ႈဢၼ်ဝၼ်းၼၼ်ႉႁွတ်ႈမႃးၸိုင်၊မႂ်းတၵ်းမီးတၢင်းၵျၢမ်ႇတၢင်းပွင်ၵႃႈၼႂ်းႁူဝ်ၸႂ်မႂ်းလႄႈၶိုင်ပွင်ဢၼ်ဢမ်ႇလီဢေႃႈ။-
မႂ်းတၵ်းလၢတ်ႈလႄႈဝႃႈ၊ ‘ၵဝ်တၵ်းၶီႇသိုၵ်းၶိုၼ်ႈၸူးတီႈဝၢၼ်ႈၼွၵ်ႈၼႃးပၢင်ႇဢၼ်ဢမ်ႇမီးႁူဝ်ႉၼၼ်ႉဢေႃႈ။ ၵဝ်တၵ်းၶီႇသိုၵ်းၶိုၼ်ႈတိုၵ်းဢဝ်ၵူၼ်းၸိူဝ်းဢၼ်လႆႈယူႇၼိမ်ၼိမ်လီလီလႄႈလႆႈယူႇလူင်ႈလီလွတ်ႈလီဢၼ်ဝၢၼ်ႈၶဝ်ဝဵင်းၶဝ်ယင်းဢမ်ႇမီးလမ်းဝဵင်း၊ဢမ်ႇမီးၵိူၼ်ႇဢမ်ႇမီးၽၵ်းတူၼၼ်ႉဢေႃႈ၊’ ဝႃႈၼင်ႇၼႆ၊-
ႁႂ်ႈလႆႈသိမ်းဢဝ်ဢုၵ်ႉၸႃႇၶဝ်လႄႈႁိမ်ႁူင်ႇဢဝ်ၶူဝ်းလဵင်းၶဝ်ၵႃႈၼႂ်းဝဵင်းဢၼ်မိူဝ်ႈဢွၼ်တၢင်းလုလႅဝ်ဝႆႉၼၼ်ႉဢေႃႈ။ ၶဝ်ၸိူဝ်းၼၼ်ႉလႆႈၶၢမ်ႇတၢင်းဢၼ်ဢဝ်ၸုတုမ်သေၵႃႈတီႈၵူၼ်းမဵဝ်းၼမ်ၼႃႇမႃးလႄႈ၊တေႃႈလဵဝ်ၼႆႉမီးၽူႈမီးၵူၼ်း၊မီးဢုၵ်ႉၸႃႇၽုင်တရိၵ်ႈသၢၼ်ႇၼမ်ၼႃႇသေယဝ်ႉ၊လႆႈယူႇၵႃႈတီႈတၢင်းၸုတၢင်းႁွမ်းၼႂ်းမိူင်းလေႃးၵႃႉၼႆႉယဝ်ႉ။-
ၵူၼ်းမိူင်း သေးပႃႉ၊ တင်းၵူၼ်းမိူင်း တေႇတၼ်ႇ ၊ဢိၵ်ႇတင်းၸဝ်ႈၵုၼ်ႇၸဝ်ႈသိၼ်မိူင်း သပဵၼ်ႇ တင်းႁူဝ်ႁၢၼ်ၵူၼ်းသိုၵ်းၼုမ်ႇမၼ်းၸိူဝ်းၼၼ်ႉတၵ်းဢွၼ်ၵၼ်ထၢမ်တီႈမႂ်းလႄႈဝႃႈ၊ ‘ၸဝ်ႈၼႆႉၸုတုမ်ဢဝ်ႁူဝ်ႁၢၼ်ၵူၼ်းသိုၵ်းၸဝ်ႈတင်းလၢႆမႃးတိုၵ်းတေႃးႁႂ်ႈလႆႈႁိမ်ဢဝ်ႁူင်ႇဢဝ်ဢုၵ်ႉၸႃႇပိူၼ်ႈၶႃႈႁိုဝ်း။ ၸဝ်ႈဢၢင်ႈတၵ်းသိမ်းဢဝ်ငိုၼ်းၶမ်းပိူၼ်ႈ၊ဢုၵ်ႉၸႃႇတူဝ်သတ်းပိူၼ်ႈလႄႈတေႁိမ်ဢဝ်ၵႂႃႇၼမ်ၼႃႇလူင်လၢင်ၶႃႈႁိုဝ်း၊’ ဝႃႈၼင်ႇၼႆယဝ်ႉ။
“ပိူဝ်ႈၼႆလႄႈလုၵ်ႈၵူၼ်း႟။ ႁေႃးလၢတ်ႈၵႂၢမ်းပရေႃးၽႅတ်ႈ တီႈၶုၼ် ၵေႃးၵႃႉ၊ လႄႈဝႃႈ၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ၼႂ်းမိုဝ်ႉဝၼ်းဢၼ်ၵူၼ်းၵဝ်ၵူၼ်းမဵဝ်း ဢိသရေး၊ လႆႈယူႇလူင်ႈလီလွတ်ႈလီၼၼ်ႉ၊မႂ်းတၵ်းလုၵ်ႉသေၵႃႈတီႈ၊-
တီႈယူႇမႂ်းဢၼ်မီးၸဵင်ႇပွတ်းႁွင်ႇတီႈသုတ်းၼၼ်ႉသေလႄႈဢွၼ်ဢဝ်တပ်ႉႁူဝ်ႁၢၼ်ၵူၼ်းသိုၵ်းဢၼ်ယႂ်ႇၼႃႇ၊ဢၼ်မီးဢႃႇၼႃႇတၼ်းၶူဝ်းလႄႈဢွၼ်ၵၼ်ၶီႇမႃႉၶိုၼ်ႈသိုၵ်းမႃးဢေႃႈ။-
မႂ်းတၵ်းတိုၵ်းတေႃးၵူၼ်းၵဝ်မဵဝ်း ဢိသရေး၊ တင်းလၢႆမိူၼ်ၸိူဝ်ႉၼင်ႇၽူၼ်လူင်လူမ်းလူင်ပတ်ႉထူဝ်းၶၢမ်ႈဝၢၼ်ႈၶၢမ်ႈမိူင်းမႃးၼၼ်ႉဢေႃႈ။ ၼႂ်းၶိင်ႇၵႃႇလႃႉႁွတ်ႈထိုင်မႃးၼၼ်ႉၵဝ်တၵ်းပွႆႇၸႂ်ႉမႂ်းႁႂ်ႈတိုၵ်းတေႃးမိူင်းၵဝ်ႁႂ်ႈၵူၼ်းတင်းလၢႆလႆႈႁုလွင်ႈဢၼ်ၵဝ်ပဵၼ်ၽူႈလႂ်၊ဢိၵ်ႇတင်းႁုလွင်ႈဢၼ်ၵဝ်မူတ်းၸၢင်ႇၵွပ်ႈပိူဝ်ႈၵဝ်ၸႂ်ႉႁႂ်ႈမႂ်းႁဵတ်းၸိူဝ်းၼၼ်ႉဢေႃႈ။
မႂ်းပဵၼ်ၵေႃႉဢၼ်ၵဝ်ဢဝ်ၶႃႈၵဝ်ပရေႃးၽႅတ်ႈ ၵူၼ်းမဵဝ်း ဢိသရေး၊ ႁေႃးလၢတ်ႈၵႂၢမ်းပရေႃးၽႅတ်ႈဝႆႉလွင်ႈမႂ်းႁိုင်ၼႃႇယဝ်ႉၼၼ်ႉဢေႃႈ။ ၵဝ်ပျႃႇတိၵ်ႈဝႆႉလႄႈဝႃႈ၊ၼႂ်းၶိင်ႇၵႃႇလႃႉမိုဝ်ႉဝၼ်းၼၼ်ႉၵဝ်တၵ်းဢဝ်ၵူၼ်းၵေႃႉၼိုင်ႈမႃးတိုၵ်းတေႃးၵူၼ်းမဵဝ်း ဢိသရေး၊ ဢေႃႈ၊” ဝႃႈၼင်ႇၼႆ၊ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ “ၼႂ်းမိုဝ်ႉဝၼ်းဢၼ်ၶုၼ် ၵေႃးၵႃႉ၊ မႃးတိုၵ်းတေႃးမိူင်း ဢိသရေး၊ ၼၼ်ႉၵဝ်တၵ်းၸႂ်မႆႈၶႂ်ႈၸႃႉဢွၵ်ႇတေႃးသႃႉႁႅင်းၼႃႇဢေႃႈ။-
ၵဝ်ပႃးတင်းဢၢႆႁွၼ်ႉတၢင်းၸႂ်မႆႈၶႂ်ႈၸႃႉၵဝ်လႄႈလၢတ်ႈဝႃႈ၊ၼႂ်းမိုဝ်ႉဝၼ်းၼၼ်ႉတၵ်းပဵၼ်ဢိင်ႇသၼ်ႇႁႅင်းယႂ်ႇၼႃႇလူင်လၢင်ၵႃႈၼႂ်းမိူင်း ဢိသရေး၊ ဢေႃႈ။-
ၵႃႈဢၼ်ပဵၼ်ပႃလႂ်၊ၼူၵ်ႉလႂ်၊တူဝ်သတ်းၸဵမ်လဵၵ်ႉၸဵမ်ယႂ်ႇ၊ဢိၵ်ႇတင်းၵူၼ်းလေႃးၵီႇဢၼ်မီးၵႃႈၼိူဝ်လိၼ်မိူင်းတင်းသဵင်ႈတင်းလူင်တၵ်းဢွၼ်ၵၼ်ၵူဝ်ႁႄၵဝ်လႄႈသၼ်ႇဝႆဢေႃႈ။ လွႆတင်းလၢႆတၵ်းၵိူၼ်ႇပင်းယူႇ၊ၽႃႁိၼ်တင်းလၢႆတၵ်းလူမ်ႉတူၵ်းယူႇ၊လမ်းဝဵင်းတင်းလၢႆပိၼ်ႈလူမ်ႉယူႇဢေႃႈ။-
ၵဝ်တၵ်းဢဝ်ၽေးတုၵ်ႉၶႃႉၽေးလၢပ်ႇၽေးလႅဝ်းတၢင်းၽၢၼ်ဢၼ်ယႂ်ႇၼႃႇၵူႈၸိူဝ်ႉၵူႈမဵဝ်းလွၵ်ႇငိူၵ်ႈ ၶုၼ် ၵေႃးၵႃႉ၊ ဢေႃႈ။ ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ။ ၵူၼ်းမၼ်းတင်းလၢႆၵေႃႉၼိုင်ႈလႄႈၵေႃႉၼိုင်ႈ တၵ်းဢဝ်လၢပ်ႇၶဝ်လႅဝ်းၶဝ်ၶႃႈၵၼ်ၽၼ်းၵၼ်ဢေႃႈ။-
ၵဝ်တၵ်းဢဝ်ၽေးၵႃႇလႃႉႁႃႈလႅင်မိူင်းဢိၵ်ႇတင်းၽေးတၢင်းဢၼ်ထွၵ်ႇလိူတ်ႈထွၵ်ႇယၢင်ပၼ်တၢမ်ႇတီႈမၼ်းဢေႃႈ။ ၵဝ်တၵ်းႁႂ်ႈၽူၼ်တူၵ်းႁႅင်းလႄႈၼမ်ႉၸႅဝ်ႈၼႃႇ၊မၢၵ်ႇႁဵပ်းယႂ်ႇၼႃႇ၊ၽူၼ်ၽႆးဢၼ်လေႃးၵၼ်တင်းၵၢၼ်ႉၼၼ်ႉတူၵ်းသႂ်ႇၵႃႈၼိူဝ်မၼ်း၊တပ်ႉသိုၵ်းမၼ်းဢိၵ်ႇတင်းၵူၼ်းမဵဝ်းၸိူဝ်းဢၼ်ၽွမ်ႉၽၢႆႇမၼ်းၼၼ်ႉဢေႃႈ။-
ၼင်ႇၼၼ်လႄႈၵဝ်တၵ်းၼႄပျႃးလွင်ႈတၢင်းဢၼ်ၵဝ်ယႂ်ႇမျၢတ်ႈ၊ဢိၵ်ႇတင်းလွင်ႈဢၼ်ၵဝ်မူတ်းၸၢင်ႇၼၼ်ႉၵႃႈတီႈၵူၼ်းမဵဝ်းတင်းသဵင်ႈတင်းလူင်ဢေႃႈ။ မိူဝ်ႈၼၼ်ႉၶဝ်တၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ “လုၵ်ႈၵူၼ်း႟။ မႂ်းႁေႃးလၢတ်ႈၵႂၢမ်းပရေႃးၽႅတ်ႈတီႈၶုၼ် ၵေႃးၵႃႉ၊ ဢၼ်ဢုပ်ႉပိူင်ႇၸၢမ်ႇၸႃးၵႃႈၼိူဝ်ၵူၼ်းမဵဝ်း မႄႇသႅၵ်ႉ၊ တင်းၵူၼ်းမဵဝ်း တုပလႃႉ ၊လႄႈမွၵ်ႇလၢတ်ႈတီႈမၼ်းလွင်ႈဢၼ်ၵဝ်ပဵၼ်ရၢၼ်ႇသူႇမၼ်းၼၼ်ႉတႃႉ။-
ၵဝ်တၵ်းႁႂ်ႈမၼ်းဝၢႆႇၶိုၼ်းငႅၵ်းၶိုၼ်းၸွမ်းၼႂ်းသဵၼ်ႈတၢင်းဢၼ်မႂ်ႇလႄႈတၵ်းဢဝ်မၼ်းဢွၵ်ႇၵႂႃႇသေၵႃႈတီႈၽၢႆႇတၢင်းႁွင်ႇၼၼ်ႉလႄႈသူင်ႇႁွတ်ႈၵႃႈၼိူဝ်လွႆ ဢိသရေး၊ တင်းလၢႆဢေႃႈ။-
မိူဝ်ႈၼၼ်ႉ၊ၵဝ်တၵ်းပေႃႉၽတ်ႉၵၢင်ႇမၼ်းႁႂ်ႈတူၵ်းသေၵႃႈတီႈမိုဝ်းၶွၼ်သၢႆႉမၼ်းသေလႄႈႁႂ်ႈပိုၼ်မၼ်းတူၵ်းသေၵႃႈတီႈမိုဝ်းၶွၼ်ၶႂႃမၼ်းဢေႃႈ။-
ၶုၼ် ၵေႃးၵႃႉ ဢိၵ်ႇတင်းတပ်ႉသိုၵ်းမၼ်းတင်းၵူၼ်းမဵဝ်းၼမ်ၼႃႇဢၼ်ၽွမ်ႉၽၢႆႇမၼ်းၸိူဝ်းၼၼ်ႉ၊တၵ်းဢွၼ်ၵၼ်လူမ်ႉတၢႆၵႃႈၼိူဝ်လွႆ ဢိသရေး၊ ၸိူဝ်းၼၼ်ႉဢေႃႈ။ ၵဝ်တၵ်းႁႂ်ႈတူဝ်တၢႆၶဝ်ပဵၼ်တၢင်းၵိၼ်တၢင်းၶူပ်းပုၼ်ႈၼူၵ်ႉႁၢႆႉတင်းလၢႆ၊ဢိၵ်ႇတင်းတူဝ်ထိူၼ်ႇႁၢႆႉတင်းလၢႆဢေႃႈ။-
ၶဝ်တၵ်းလူမ်ႉတၢႆၵႃႈၼႂ်းတီႈပၢင်ႇတီႈပိဝ်ဢေႃႈ။ ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉဝႆႉယဝ်ႉ။-
ၵဝ်တၵ်းဢဝ်ၽႆးပွႆႇၸပ်းသႂ်ႇၵႃႈၼႂ်းမိူင်း မႃႇၵေႃးၵႃႉ ၊ဢိၵ်ႇတင်းၵႃႈဢၼ်ၵူၼ်းၸိူဝ်းဢၼ်ယူႇလူင်ႈလီလွတ်ႈလီမီးၸွမ်းသၢပ်ႇပၢင်ႇလၢႆႇၸိူဝ်းၼၼ်ႉဢေႃႈ။ ၼင်ႇၼၼ်လႄႈၵူၼ်းၵူႈၵေႃႉတၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး ၊ဢေႃႈ။-
ၵဝ်တၵ်းႁႂ်ႈၼႃႇမႃႉၸိုဝ်ႈသဵင်မျၢတ်ႈၵဝ်ၸွတ်ႇသႃႇႁူင်ႁၢင်းၵႃႈၼႂ်းၵူၼ်းမဵဝ်း ဢိသရေး၊ ဢေႃႈ။ ၵမ်းလိုၼ်းၵဝ်တၵ်းဢမ်ႇပၼ်ဢၶႂၢင်ႉ ႁႂ်ႈၼႃႇမႃႉၸိုဝ်ႈသဵင်မျၢတ်ႈၵဝ်လႆႈၶၢမ်ႇတၢင်းဢၼ်ၶျႃးတူၵ်းတီႈတႅမ်ႇလႃးလႃး။ မိူဝ်ႈၼၼ်ႉၵူၼ်းတၢင်ႇၸိူဝ်ႉတၢင်ႇမဵဝ်းတင်းလၢႆတၵ်းႁုလွင်ႈဢၼ်ၵဝ်၊ ထႃႇဝရႃႉၽြႃး၊ ပဵၼ်ၽြႃးပဵၼ်ၸဝ်ႈဢၼ်မူတ်းၸၢင်ႇၵူၼ်းမဵဝ်း ဢိသရေး ဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ “ၶိင်ႇၵႃႇလႃႉမိုဝ်ႉဝၼ်းဢၼ်ၵဝ်လၢတ်ႈလူၺ်ႈလွင်ႈမၼ်းၼၼ်ႉတၵ်းႁွတ်ႈမႃးဢမၢၼ်ႇၶၼ်ပဵၼ်ဢေႃႈ။-
ၶဝ်ၸိူဝ်းဢၼ်ယူႇၵႃႈၼႂ်းဝဵင်း ဢိသရေး တင်းလၢႆၼၼ်ႉတၵ်းဢွၼ်ၵၼ်ဢွၵ်ႇၵႂႃႇၵဵပ်းဢဝ်ၶိူင်ႈလၢၵ်ႈၼၢၵ်ႈဢၼ်မီးၼမ်ၼႃႇၼၼ်ႉမႃးႁဵတ်းလူဝ်ႁဵတ်းၽိုၼ်းၶဝ်ဢေႃႈ။ ၶဝ်တၵ်းဢဝ်ၶိူင်ႈႁႄႉလၢၵ်ႈၼၢၵ်ႈလႂ်၊ၵၢင်ႇလႂ်၊ပိုၼ်လႂ်၊ႁွၵ်ႇလႂ်၊ၶွၼ်ႉလႂ်ၸိူဝ်းၼၼ်ႉမႃးသႂ်ႇၽႆးသုမ်ၽႆးထၢၼ်ႈပေႃးႁိုင်ၵႂႃႇၸဵတ်းပီဢေႃႈ။-
ၼႂ်းၶိင်ႇမိူဝ်ႈၼၼ်ႉၶဝ်ဢမ်ႇလူဝ်ႇႁႃၽိုၼ်းၵဵပ်းၽိုၼ်းၵႃႈၼႂ်းသူၼ်ၼႂ်းႁိူၵ်ႈ၊ဢမ်ႇလူဝ်ႇပွမ်ႈဢဝ်ၽၼ်းဢဝ်မႆႉၵႃႈၼႂ်းထိူၼ်ႇၼႂ်းၶိူဝ်း၊ၵွပ်ႈပိူဝ်ႈဢၼ်ၶဝ်တၵ်းမီးၶိူင်ႈလၢၵ်ႈၼၢၵ်ႈၼမ်ၼႃႇလူင်လၢင်ဢၼ်တၵ်းသႂ်ႇၽႆးသုမ်ၽႆးဢေႃႈ။ ၶဝ်တၵ်းဢွၼ်ၵၼ်ယႃႉပႅတ်ႈၶဝ်ၸိူဝ်းဢၼ်မႃးယႃႉပႅတ်ႈၶဝ်ၼၼ်ႉလႄႈ၊ၶဝ်တၵ်းႁိမ်ဢဝ်ဢုၵ်ႉၸႃႇၶူဝ်းလဵင်းတီႈၵူၼ်းၸိူဝ်းဢၼ်ယၢမ်ႈႁိမ်ဢဝ်ဢုၵ်ႉၸႃႇၶဝ်မႃးၼၼ်ႉဢေႃႈ၊” ဝႃႈၼင်ႇၼႆ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “မိူဝ်ႈဢၼ်လွင်ႈတၢင်းၸိူဝ်းၼႆႉပဵၼ်မႃးၼၼ်ႉၵဝ်တၵ်းပၼ်လိၼ်ပုၼ်ႈဢၼ်တၵ်းသၢင်းၵျူဝ်ႇၶုၼ် ၵေႃးၵႃႉ၊ ၼႂ်းမိူင်း ဢိသရေး၊ ၵႃႈတီႈၶူင်ႈႁူၺ်ႈၶဝ်ၸိူဝ်းဢၼ်ၵႂႃႇတႃႈပႆတၢင်းဢၼ်မီးၽၢႆႇဝၼ်းဢွၵ်ႇ ပၢင်ႇလၢႆႇတၢႆ၊ ၼၼ်ႉဢေႃႈ။ ၶုၼ် ၵေႃးၵႃႉ ၊ဢိၵ်ႇတင်းၵူၼ်းသိုၵ်းမၼ်းၵႃႈမီးတၵ်းလႆႈသၢင်းၵျူဝ်ႇၵႃႈတီႈၼၼ်ႈလႄႈၶူင်ႈႁူၺ်ႈၼၼ်ႉတၵ်းလႆႈႁွင်ႉၸိုဝ်ႈဝႃႈ၊ ‘ၶူင်ႈႁူၺ်ႈတပ်ႉသိုၵ်းၶုၼ်ၵေႃးၵႃႉ’ ဢေႃႈ။-
ၵူၼ်းမဵဝ်း ဢိသရေး၊ တင်းလၢႆတၵ်းဢွၼ်ၵၼ်ဢဝ်တူဝ်တၢႆၶဝ်ၽင်ၼၼ်ႉႁိုင်ၸဵတ်းလိူၼ်တဵမ်တဵမ်လႄႈႁဵတ်းႁႂ်ႈမိူင်းၼၼ်ႉၶိုၼ်းမူတ်းသႂ်မႃးဢေႃႈ။-
ၵူၼ်းဝၢၼ်ႈၵူၼ်းမိူင်းတၵ်းဢွၼ်ၵၼ်ၸွႆႈထႅမ်ၵၼ်ဢဝ်တူဝ်တၢႆၶဝ်ၽင်လႄႈ၊ၵူၼ်းဝၢၼ်ႈၵူၼ်းမိူင်းၼၼ်ႉတၵ်းလႆႈႁပ်ႉဢဝ်သရေႇၼႂ်းဝၼ်းဢၼ်ၵဝ်ၼႄပျႃးမုၼ်ၽုင်းၵဝ်ၼၼ်ႉဢေႃႈ။ ဝႃႈၼင်ႇၼႆလႄႈ၊ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉဢေႃႈ။-
မိူဝ်ႈဢၼ်ပူၼ်ႉသေၸဵတ်းလိူၼ်ယဝ်ႉၼၼ်ႉၶဝ်တၵ်းဢွၼ်ၵၼ်ၶၢၼ်းၵူၼ်းၵမ်ႈၽွင်ႈလႄႈၸႂ်ႉၶဝ်ၵႂႃႇၵႃႈၼႂ်းမိူင်းၵူႈတီႈၵူႈလႅၼ်ႁႂ်ႈလႆႈသွၵ်ႈႁႃတူဝ်တၢႆဢၼ်ယင်းၵိုတ်းယင်းၵျၢၼ်ႇၵႃႈၼိူဝ်လိၼ်ပုၼ်ႈလွင်ႈၼင်ႇႁိုဝ်ၶဝ်တၵ်းႁဵတ်းႁႂ်ႈမိူင်းမူတ်းသႂ်ဢေႃႈ။-
မိူဝ်ႈဢၼ်ၶဝ်ၶိုၼ်ႈၶိုၼ်ႈလူင်းလူင်းၵႃႈၼႂ်းမိူင်းလႄႈပေႃးၶဝ်ထူပ်းႁၼ်လုပ်ႇၵူၼ်းၸိုင်၊ၶဝ်ပူၵ်းလၵ်းႁႂ်ႈပဵၼ်တီႈမၢတ်ႈတီႈတွင်းဝႆႉၵႃႈတီႈႁိမ်းလုပ်ႇၼၼ်ႉပုၼ်ႈလွင်ႈၼင်ႇႁိုဝ်ၶဝ်ၸိူဝ်းဢၼ်ၶုတ်းၶုမ်ပႃႇႁဵဝ်ႈၼၼ်ႉမႃးဢဝ်ၵႂႃႇၽင်ၵႃႈတီႈ ၶူင်ႈႁူၺ်ႈတပ်ႉသိုၵ်းၶုၼ်ၵေႃးၵႃႉ၊ ဢေႃႈ။-
ဝဵင်းဢၼ်ၸိုဝ်ႈ ႁႃႇမုၼ်ႇ ၵေႃႈမီးၵႃႈတီႈၼၼ်ႈဢေႃႈ၊ၶဝ်တၵ်းဢွၼ်ၵၼ်ႁဵတ်းၸိူဝ်ႉၼင်ႇၼႆႁႂ်ႈမိူင်းၼၼ်ႉမူတ်းသႂ်ဢေႃႈ။
“လုၵ်ႈၵူၼ်း႟။ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉၸမ်ႉ၊မႂ်းႁွင်ႉဢဝ်ၼူၵ်ႉ၊ဢိၵ်ႇတင်းတူဝ်သတ်းၵႃႈမီးၵူႈၸိူဝ်ႉၵူႈမဵဝ်းဢၼ်မီးႁိမ်းႁွမ်းၵူႈတီႈၵူႈလႅၼ်ၸိူဝ်းၼၼ်ႉမႃးၵိၼ်ၶူပ်းၶိူင်ႈတၢင်းလူႇဢၼ်ၵဝ်မႄးႁႅၼ်းဝႆႉပုၼ်ႈၶဝ်ၼၼ်ႉတႃႉ။ တၵ်းပဵၼ်ပွႆးလဵင်ႉပွႆးလူဢၼ်ယႂ်ႇဢၼ်လူင်ၵႃႈၼိူဝ်လွႆ ဢိသရေး ၊တင်းလၢႆပုၼ်ႈဢၼ်ၶဝ်တၵ်းၵိၼ်ၼိူဝ်ႉလႄႈသူတ်ႉၵိၼ်လိူတ်ႈၼၼ်ႉဢေႃႈ။-
ၶဝ်တၵ်းဢွၼ်ၵၼ်ၵိၼ်ၼိူဝ်ႉၵူၼ်းသိုၵ်းတင်းလၢႆလႄႈသူတ်ႉၵိၼ်လိူတ်ႈၶုၼ်လေႃးၵီႇတင်းလၢႆၸိူဝ်းဢၼ်လႆႈၶၢမ်ႇတၢႆမိူၼ်ၸိူဝ်ႉၼင်ႇသူဝ်းပေႃႈလႂ်၊သူဝ်းဢွၼ်ႇလႂ်၊ပႄႉလႂ် ဢမ်ႇၼၼ်ၵေႃႈမိူၼ်ၸိူဝ်ႉၼင်ႇဝူဝ်းငၢၼ်ဢၼ်ပီးလီမၼ်းလီၵႃႈတီႈမိူင်း ပႃႇသၢၼ်ႇ၊ ၸိူဝ်းၼၼ်ႉဢေႃႈ။-
မိူဝ်ႈဢၼ်ၵဝ်ဢဝ်ၵူၼ်းတင်းလၢႆတၢႆမိူၼ်ၸိူဝ်ႉၼင်ႇတူဝ်ၶိူင်ႈတၢင်းလူႇၼၼ်ႉၼူၵ်ႉတင်းလၢႆဢိၵ်ႇတင်းတူဝ်သတ်းတင်းလၢႆတၵ်းဢွၼ်ၵၼ်ၵိၼ်ၵွၼ်ႈၶႆၵွၼ်ႈမၼ်းဢိမ်ႇဢိမ်ႇတဵမ်တဵမ်လႄႈဢွၼ်ၵၼ်သူတ်ႉၵိၼ်လိူတ်ႈတေႃႇထိုင်ႁွတ်ႈထၢၼ်ႈပေႃးမဝ်းဢေႃႈ။-
ၼင်ႇၼၼ်လႄႈၶဝ်တၵ်းဢွၼ်ၵၼ်ၵိၼ်ၼိူဝ်ႉမႃႉ၊ၼိူဝ်ႉၵူၼ်းဢၼ်ၶီႇမႃႉ၊ၼိူဝ်ႉၵူၼ်းသိုၵ်း၊ဢိၵ်ႇတင်းၼိူဝ်ႉၵူၼ်းႁတ်းၵူၼ်းႁၢၼ်တင်းလၢႆ ဢိမ်ႇဢိမ်ႇတဵမ်တဵမ်ၵႃႈတီႈၽိူၼ်ၶဝ်ႈဢၼ်ၵဝ်မႄႈႁႅၼ်းဝႆႉၼၼ်ႉဢေႃႈ၊ဝႃႈၼင်ႇၼႆယဝ်ႉ၊” ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵဝ်တၵ်းႁႂ်ႈမုၼ်ၽုင်းၵဝ်ထၢင်ႇသႃးၵႃႈၼႂ်းၵူၼ်းမဵဝ်းၵူႈၸိူဝ်ႉၵူႈၶိူဝ်းတင်းလၢႆလႄႈၶဝ်တၵ်းလႆႈႁၼ်တၢင်းဢၼ်ၵဝ်ၸီႇယၢင်ႇတႅပ်းတတ်းလူၺ်ႈတင်းမိုဝ်းဢၼ်ၵဝ်ဢဝ်တၢင်ႇသႂ်ႇၵႃႈၼိူဝ်ၶဝ်ၼၼ်ႉဢေႃႈ။-
ၼင်ႇၼၼ်လႄႈၵူၼ်းမဵဝ်း ဢိသရေး၊ တၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်ဢေႃႈ။-
ၵူၼ်းတၢင်ႇၸိူဝ်ႉတၢင်ႇမဵဝ်းၸိူဝ်းၼၼ်ႉတၵ်းႁုလွင်ႈဢၼ်ၵူၼ်းမဵဝ်း ဢိသရေး၊ ၶဝ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၵွပ်ႈပိူဝ်ႈဢပျတ်ႈၶဝ်ၼၼ်ႉဢေႃႈ။ ၵဝ်ဝၢႆႇၼႃႈပႅတ်ႈၶဝ်ၵွပ်ႈပိူဝ်ႈၶဝ်ၽိတ်းပိူင်ႈၵဝ်ၼၼ်ႉလႄႈဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းရၢၼ်ႇသူႇၶဝ်သေယဝ်ႉ၊ၶဝ်ၵႃႈမီးလႆႈလူမ်ႉတၢႆၵႃႈၼႂ်းၼႃႈသိုၵ်းဢေႃႈ။-
ၵဝ်ႁဵတ်းတီႈၶဝ်ၸွမ်းၼင်ႇဢၼ်ၶဝ်လႆႈႁဵတ်းတၢင်းဢၼ်ၵူဝ်ႈၵိူၵ်ႇ၊ဢိၵ်ႇတင်းတၢင်းဢၼ်ၶဝ်ၽိတ်းပိူင်ႈပူၼ်ႉလိူဝ်ၸိူဝ်းၼၼ်ႉလႄႈၵဝ်ဝၢႆႇၼႃႈပႅတ်ႈသေၵႃႈတီႈၶဝ်ယဝ်ႉ။”
“ပိူဝ်ႈၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉၸမ်ႉ၊မိူဝ်ႈလဵဝ်ၼႆႉၵဝ်တၵ်းမီးတၢင်းဢၼ်ဢဵတ်းလူလုၵ်ႈလၢၼ်ၸိူဝ်ႉၶိူဝ်း ယႃႇၵုပ်ႈ၊ ၵူၼ်းမဵဝ်း ဢိသရေး ၊လႄႈႁႂ်ႈၶဝ်ၶိုၼ်ႈယႂ်ႇမႂ်ႇသုင်မႃးၶိုၼ်းဢေႃႈ။ ၵဝ်တၵ်းၵႅတ်ႇၶႄၼႃႇမႃႉၸိုဝ်ႈသဵင်မျၢတ်ႈၵဝ်ဝႆႉဢေႃႈ။-
မိူဝ်ႈဢၼ်ၶဝ်သမ်ႉလႆႈယူႇလူင်ႈလီလွတ်ႈလီၵႃႈၼႂ်းမိူင်းၶဝ်ၶိုၼ်းလႄႈဢမ်ႇမီးၽူႈလႂ်ႁႂ်ႈၶဝ်လႆႈၵူဝ်လႆႈႁႄၼၼ်ႉၶဝ်တၵ်းမီးဢၶႂၢင်ႉဢၼ်လူင်လိုမ်းတၢင်းဢၼ်ၶဝ်လႆႈသရေႇလုၵွပ်ႈပိူဝ်ႈဢၼ်ၸုၼ်ႉပႅတ်ႈၵဝ်ၼၼ်ႉဢေႃႈ။-
ပုၼ်ႈလွင်ႈၼင်ႇႁိုဝ်ၵူၼ်းမဵဝ်းတင်းလၢႆတၵ်းႁုလွင်ႈဢၼ်ၵဝ်မူတ်းၸၢင်ႇသိုဝ်ႈတေႃႇၼၼ်ႉၸိုင်၊ၵဝ်တၵ်းႁွင်ႉဢဝ်ၵူၼ်းၵဝ်တင်းလၢႆဢွၵ်ႇသေၵႃႈၼႂ်းမိူင်းရၢၼ်ႇသူႇၼၼ်ႉၶိုၼ်းပွၵ်ႈမႃးဢေႃႈ။-
မိူဝ်ႈၼၼ်ႉ၊ၵူၼ်းၵဝ်တင်းလၢႆတၵ်းႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်ဢေႃႈ။ ၶဝ်တၵ်းႁုလွင်ႈၼႆႉၵွပ်ႈပိူဝ်ႈဢၼ်ၵဝ်ပွႆႇႁႂ်ႈၶဝ်လႆႈၶၢမ်ႇတၢင်းဢၼ်တိဢဝ်သိမ်းဢဝ်ၵႂႃႇသေယဝ်ႉ၊မိူဝ်ႈလဵဝ်ၼႆႉလႆႈၶၢမ်ႇတၢင်းဢၼ်ႁွင်ႉဢဝ်မႃးၸုတုမ်ၵၼ်ႁႂ်ႈလႆႈယူႇၵႃႈၼႂ်းမိူင်းဢၼ်ၶဝ်ယူႇၵဝ်ႇၵဝ်ႇၼၼ်ႉသေလႄႈဢမ်ႇပႅတ်ႈႁႂ်ႈၶဝ်ၵိုတ်းၵျၢၼ်ႇဝႆႉသေၵေႃႉသေၵူၼ်းဢေႃႈ။-
ၵဝ်တၵ်းသွၼ်းလေႃႇဝိၺိၺ်ႇၵဝ်သႂ်ႇၵႃႈၼိူဝ်ၵူၼ်းမဵဝ်း ဢိသရေး၊ တင်းလၢႆသေယဝ်ႉ၊ၵမ်းလိုၼ်းၵဝ်တၵ်းဢမ်ႇဝၢႆႇၼႃႈၵဝ်ပႅတ်ႈသေၵႃႈတီႈၶဝ်လႃးလႃး၊ဝႃႈၼင်ႇၼႆလႄႈၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉဢေႃႈ၊” ဝႃႈၼင်ႇၼႆဢေႃႈ။
ၼႂ်းပီဢၼ်ႁဝ်းလႆႈၶၢမ်ႇတၢင်းဢၼ်သိမ်းဢဝ်ၵႂႃႇသေယဝ်ႉ၊ထူၼ်ႈထိုင်သၢဝ်းႁႃႈပီၼႂ်းလိူၼ်တီႈၼိုင်ႈ၊ဝၼ်းတီႈသိပ်းၼၼ်ႉ၊ပဵၼ်ဝၼ်းဢၼ်ယႃႉၽဵဝ်ႈဝဵင်း ယေႇရုသလႅမ်ႇ ၊လႆႈသိပ်းသီႇပီၼၼ်ႉ၊ၼႂ်းဝၼ်းၼၼ်ႉ ထႃႇဝရႃႉၽြႃး ၊မီးယူႇလူၺ်ႈၵၼ်တင်းၵဝ်လႄႈမၼ်းၸဝ်ႈပႃးဢဝ်ၵဝ်ၵႂႃႇၵႃႈတီႈၼၼ်ႈဢေႃႈ။-
ၵႃႈၼႂ်းရူႇပႃႇရူင်ႇၼၼ်ႉၽြႃးပဵၼ်ၸဝ်ႈဢဝ်ၵဝ်ၵႂႃႇၵႃႈတီႈမိူင်း ဢိသရေး၊ သေလႄႈဢဝ်ၵဝ်ၵႂႃႇဝႆႉၵႃႈၼိူဝ်လွႆဢၼ်သုင်ၼႃႇၵႃႈတီႈၽၢႆႇၸၢၼ်းၼၼ်ႉမီးႁိူၼ်းတိူၵ်ႈၼမ်ၼႃႇလႄႈတူၺ်းႁၼ်မိူၼ်ၼင်ႇႁၢင်ႈပဵၼ်ဝဵင်းဝႆႉဢေႃႈ။-
မၼ်းၸဝ်ႈဢဝ်ၵဝ်ၵႂႃႇၸမ်ၸမ်လႄႈၵဝ်လႆႈႁၼ်ၵူၼ်းၵေႃႉၼိုင်ႈဢၼ်ႁၢင်ႈၽၢင်မၼ်းႁိူဝ်ႈမၢပ်ႈယူႇမိူၼ်ၸိူဝ်ႉၼင်ႇတွင်းလိူင်ဝႆႉဢေႃႈ။ မၼ်းၼၼ်ႉယိပ်းၵမ်ၸိူၵ်ႈမႆၵုၺ်၊ဢိၵ်ႇတင်းမႆႉတႅၵ်ႈယူႇသေလႄႈၸုၵ်းယူႇၵႃႈတီႈၽၵ်းတူဝဵင်းၼၼ်ႉဢေႃႈ။-
မၼ်းလၢတ်ႈတီႈၵဝ်လႄႈဝႃႈ၊ “လုၵ်ႈၵူၼ်း႟။ မႂ်းလူတူၺ်းလီလီလႄႈထွမ်ႇလီလီတႃႉ။ ၵႃႈဢၼ်ၵဝ်ၼႄပျႃးမႂ်းၵူႈၸိူဝ်ႉၵူႈပိူင်ၼၼ်ႉဢဝ်သႂၢင်းသႂ်ႇၼႂ်းၸႂ်မႂ်းဝႆႉတႃႉ။ ၵွပ်ႈပိူဝ်ႈလွင်ႈတၢင်းၸိူဝ်းၼႆႉလႄႈမႂ်းလႆႈၶၢမ်ႇတၢင်းဢၼ်ဢဝ်မႃးၵႃႈတီႈၼႆႈယဝ်ႉ။ မႂ်းတၵ်းလႆႈဢဝ်ၵႃႈဢၼ်မႂ်းႁၼ်ၵူႈၸိူဝ်ႉၵူႈပိူင်ၼႆႉသေလႄႈမွၵ်ႇလၢတ်ႈတီႈၵူၼ်းမဵဝ်း ဢိသရေး၊ တင်းလၢႆဢေႃႈ၊” ဝႃႈၼင်ႇၼႆဢေႃႈ။
ၵဝ်လႆႈႁၼ်ၵျွင်းပိၵ်ႈမၢၼ်ႇၸဝ်ႈလႄႈမီးႁူဝ်ႉမီးဝၢင်းလွမ်ႉႁွပ်ႈဝႆႉဢေႃႈ။ ၵေႃႉၼၼ်ႉယိပ်းၵမ်မႆႉတႅၵ်ႈဢၼ်ယၢဝ်းႁူၵ်းသွၵ်ႇၼၼ်ႉလႄႈဢဝ်တႅၵ်ႈတီႈၽႃႁူဝ်ႉၼၼ်ႉဢေႃႈ။ ၽႃႁူဝ်ႉၼၼ်ႉတၢင်းသုင်မၼ်းမီးႁူၵ်းသွၵ်ႇ၊တၢင်းၼႃမၼ်းမီးႁူၵ်းသွၵ်ႇဢေႃႈ။-
မိူဝ်ႈၼၼ်ႉမၼ်းၵႂႃႇၸူးတီႈၽၵ်းတူၽၢႆႇတၢင်းဝၼ်းဢွၵ်ႇလႄႈၶိုၼ်ႈၶူဝ်လႆၵႂႃႇသေယဝ်ႉ၊တႅၵ်ႈတီႈၶိုဝ်ႇၽၵ်းတူ ဢိၵ်ႇတင်းၶူင်ႇၽၵ်းတူလႄႈမီးႁူၵ်းသွၵ်ႇၼင်ႇၵၼ်တင်းသွင်ၼႃႈဢေႃႈ။-
ပူၼ်ႉသေၵႃႈတီႈၼၼ်ႈၵႂႃႇမီးသဵၼ်ႈတၢင်းၽႃႇဝူင်ႈၵၢင်သဵၼ်ႈၼိုင်ႈသေယဝ်ႉ၊ယေႈၽၢႆႇမီးလုၵ်းပုၼ်ႈတႃႇပႂ်ႉယၢမ်းၼၼ်ႉသၢမ်လုၵ်းၼင်ႇၵၼ်ဢေႃႈ။ ၵူႈလုၵ်းၼၼ်ႉ၊ပဵၼ်သီႇၸဵင်ႇၽဵင်ႇၵၼ်ဝႆႉၼင်ႇၵၼ်လႄႈယေႈၼႃႈမီးႁူၵ်းသွၵ်ႇဢေႃႈ။ ၽႃၶၼ်ႈမၼ်းလုၵ်းၼိုင်ႈလႄႈလုၵ်းၼိုင်ႈၼၼ်ႉၼႃႁႃႈသွၵ်ႇၼင်ႇၵၼ်ဢေႃႈ။ ပူၼ်ႉသေလုၵ်းပုၼ်ႈတႃႇပႂ်ႉယၢမ်းၸိူဝ်းၼၼ်ႉၵႂႃႇလႄႈမီးသဵၼ်ႈတၢင်းၽႃႇဝူင်ႈၵၢင်သဵၼ်ႈၼိုင်ႈယၢဝ်းႁူၵ်းသွၵ်ႇလႄႈၶဝ်ႈၸူးၵႃႈၼႂ်းလုၵ်းလူင်ဢၼ်တေႃႇၼႃႈၵၼ်တင်းၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။-
မၼ်းတႅၵ်ႈတီႈလုၵ်းလူင်တၢင်းၼႂ်းၼၼ်ႉမီးႁူၵ်းသွၵ်ႈဢေႃႈ။-
မုၵ်ႈၽၵ်းတူၵေႃႈမၼ်းတႅၵ်ႈတူၺ်းလႄႈမီးပႅတ်ႇသွၵ်ႇဢေႃႈ။ သဝ်မုၵ်ႈမၼ်းၵေႃႈမီးသွင်သွၵ်ႇၼင်ႇၵၼ်ဢေႃႈ။ မုၵ်ႈၽၵ်းတူၼၼ်ႉမီးၵႃႈတီႈၽၢႆႇတၢင်းၼႂ်းဢေႃႈ။-
(လုၵ်းပုၼ်ႈတႃႇပႂ်ႉယၢမ်းဢၼ်မီးသွင်ၽၢၵ်ႇၶၢင်ႈသဵၼ်ႈတၢင်းၽႃႇဝူင်ႈၵၢင်ၼၼ်ႉယေႈၽၢၵ်ႇၶၢင်ႈၼၼ်ႉတၢင်းယႂ်ႇတၢင်းၵႂၢင်ႈမၼ်းမိူၼ်ၵၼ်ဝႆႉၵူႈလုၵ်းလႄႈၽႃၶၼ်ႈလုၵ်းၸိူဝ်းၼၼ်ႉၵေႃႈတၢင်းၼႃမၼ်းမိူၼ်ၵၼ်ဝႆႉၵူႈဢၼ်ဢေႃႈ။)
မၼ်းသမ်ႉတႅၵ်ႈတၢင်းၵႂၢင်ႈသဵၼ်ႈတၢင်းၽႃႇဝူင်ႈၵၢင်ပွတ်းၵႃႈတီႈႁိမ်းၽၵ်းတူၼၼ်ႉမီးသိပ်းသွၵ်ႇဢေႃႈ။ ပၢင်ႇပိဝ်ဝူင်ႈၵၢင်ၽၵ်းတူၸိူဝ်းၼၼ်ႉယၢၼ်ၵၼ်သိပ်းသၢမ်သွၵ်ႇဢေႃႈ။-
ၵႃႈတီႈၽၢႆႇၼႃႈလုၵ်းပုၼ်ႈတႃႇပႂ်ႉယၢမ်းၸိူဝ်းၼၼ်ႉမီးၽႃၵင်ႈဢွၼ်ႇဢၼ်သုင်သွၵ်ႇၼိုင်ႈ၊ၼႃသွၵ်ႇၼိုင်ႈၼင်ႇၵၼ်ၼၼ်ႉဢေႃႈ။ လုၵ်းၸိူဝ်းၼၼ်ႉမီးႁူၵ်းသွၵ်ႇသီႇၸဵင်ႇမိူၼ်ၵၼ်ဝႆႉဢေႃႈ။-
လိုၼ်းၼၼ်ႉမၼ်းတႅၵ်ႈတီႈၽႃဢၼ်မီးၽၢႆႇတၢင်းလင်လုၵ်းၼၼ်ႉယၢၼ်ၵၼ်တင်းၽႃဢၼ်မီးၽၢႆႇတၢင်းလင်ၶူၼ်တၢင်းဝူင်ႈၵၢင်ဢၼ်တေႃႇၼႃႈမၼ်းၼၼ်ႉလႄႈမီးၼႃႈၵႂၢင်ႈသၢဝ်းႁႃႈသွၵ်ႇဢေႃႈ။-
လုၵ်းဢၼ်မီးတၢင်းၼႂ်းသုတ်းပိူၼ်ႈၼၼ်ႉယိုၼ်ႈဢွၵ်ႇၵႂႃႇၸူးတီႈပၢင်ႇဝၢင်းၵျွင်းဢေႃႈ။ မၼ်းတႅၵ်ႈလုၵ်းၼၼ်ႉမီးႁူၵ်းသိပ်းသွၵ်ႇပၼ်ႇမူၼ်းဢေႃႈ။-
တႄႇဢဝ်ၵႃႈတီႈၽၵ်းတူၽၢႆႇတၢင်းၼွၵ်ႈတေႃႇထိုင်ႁွတ်ႈမုၵ်ႈၽၵ်းတူၽၢႆႇတၢင်းၼႂ်းၼၼ်ႉမီးႁႃႈသိပ်းသွၵ်ႇဢေႃႈ။-
ၵႃႈတီႈၽၢႆႇတၢင်းၼွၵ်ႈၽၢႆႇတၢင်းၼႂ်းလုၵ်းၵႃႈမီးၸိူဝ်းၼၼ်ႉမီးႁူးလၢင်းတဵၼ်ဢၼ်လဵၵ်ႉဢၼ်ဢွၼ်ႇလႂ်ဢေႃႈ။ ၵႃႈတီႈၽႃဢၼ်မီးၽၢႆႇတၢင်းၼႂ်းၸိူဝ်းဢၼ်လွမ်ႉၸွမ်းသဵၼ်ႈသီႇၸဵင်ႇတၢင်းဝူင်ႈၵၢင်ၼၼ်ႉၶွၵ်းပုင်ႇႁၢင်ႈတူၼ်ႈထၢၼ်လႂ်ဝႆႉဢေႃႈ။
ၵေႃႉၼၼ်ႉဢဝ်ၵဝ်ၵႂႃႇၸွမ်းသဵၼ်ႈတၢင်းၽၵ်းတူၵႂႃႇလႄႈၶဝ်ႈထိုင်ၵႃႈၼႂ်းပၢင်ႇဝၢင်းၵျွင်းဢေႃႈ။ ၵႃႈတီႈၽၢႆႇတၢင်းၼွၵ်ႈၽႃၼၼ်ႉတႄႇႁဵတ်းလုၵ်းဝႆႉသၢမ်သိပ်းဢေႃႈ။ ၵႃႈတီႈၽၢႆႇၼႃႈလုၵ်းၸိူဝ်းၼၼ်ႉမီးပၢင်ႇဢၼ်ဢဝ်မၢၵ်ႇႁိၼ်သိူဝ်ႇဝႆႉၼၼ်ႉလႄႈ၊-
မီးယူႇလဵပ်ႈႁွပ်ႈပၢင်ႇဝၢင်းၵျွင်းၼၼ်ႉႁွပ်ႈႁွပ်ႈဢေႃႈ။ ပၢင်ႇဝၢင်းၵျွင်းဢၼ်မီးၽၢႆႇတၢင်းၼွၵ်ႈၼၼ်ႉၼႃႈလိၼ်မၼ်းတႅမ်ႇသေပၢင်ႇဝၢင်းၵျွင်းဢၼ်မီးၽၢႆႇတၢင်းၼႂ်းၼၼ်ႉဢေႃႈ။
ၵႃႈတီႈၼႃႈလိၼ်ဢၼ်သုင်ၼၼ်ႉမီးၽၵ်းတူဢၼ်ၶဝ်ႈၸူးတီႈပၢင်ႇဝၢင်းၵျွင်းဢၼ်မီးၽၢႆႇတၢင်းၼႂ်းဢေႃႈ။ ၵေႃႉၼၼ်ႉတႅၵ်ႈတူၺ်းဝူင်ႈၵၢင်ၽၵ်းတူသွင်ဢၼ်ၼၼ်ႉမီးပၢၵ်ႇသွၵ်ႇဢေႃႈ။
ၵေႃႉၼၼ်ႉသမ်ႉတႅၵ်ႈၽၵ်းတူဢၼ်မီးၽၢႆႇတၢင်းႁွင်ႇဢၼ်ဢွၵ်ႇၸူးတီႈပၢင်ႇဝၢင်းၵျွင်းဢၼ်မီးၽၢႆႇတၢင်းၼွၵ်ႈၼၼ်ႉဢေႃႈ။-
မီးလုၵ်းပုၼ်ႈတႃႇပႂ်ႉယၢမ်းသၢမ်လုၵ်းၵႃႈတီႈသွင်ၽၢၵ်ႇၶၢင်ႈသဵၼ်ႈတၢင်းၽႃႇဝူင်ႈၵၢင်ၼၼ်ႉလႄႈ၊ၽႃၸိူဝ်းဢၼ်မီးၼႂ်းဝူင်ႈၵၢင်ၶဝ်၊ဢိၵ်ႇတင်းလုၵ်းလူင်ၸိူဝ်းၼၼ်ႉတၢင်းယႂ်ႇတၢင်းၵႂၢင်ႈမၼ်းမိူၼ်မိူၼ်ၵၼ်တင်းၸိူဝ်းဢၼ်မီးၵႃႈတီႈၽၵ်းတူၽၢႆႇတၢင်းဝၼ်းဢွၵ်ႇၼၼ်ႉဢေႃႈ။ ၼႃႈယၢဝ်းၽၵ်းတူၼၼ်ႉမီးႁႃႈသိပ်းသွၵ်ႇလႄႈၼႃႈၵႂၢင်ႈသမ်ႉမီးသၢဝ်းႁႃႈသွၵ်ႈဢေႃႈ။-
လုၵ်းလူင်ဢိၵ်ႇတင်းႁူးလၢင်းတဵၼ်တင်းလၢႆတင်းပုင်ႇႁၢင်ႈတူၼ်ႈထၢၼ်ၸိူဝ်းၼၼ်ႉၵေႃႈ မိူၼ်ၵၼ်တင်းၸိူဝ်းဢၼ်မီးၵႃႈတီႈၽၵ်းတူဢၼ်မီးၽၢႆႇတၢင်းဝၼ်းဢွၵ်ႇၼၼ်ႉဢေႃႈ။ ၵႃႈတီႈၼႆႈမီးၶူဝ်လႆၸဵတ်းသိၵ်ႈဢၼ်ၶိုၼ်ႈၸူးတီႈၽၵ်းတူလႄႈ၊လုၵ်းလူင်ၼၼ်ႉမီးယူႇတီႈသုတ်းတၢင်းၼႂ်းၼၼ်ႉတေႃႇၼႃႈၵၼ်တင်းပၢင်ႇဝၢင်းၵျွင်းဝႆႉဢေႃႈ။-
ပူၼ်ႉသေၽၵ်းတူၵျွင်းၽၢႆႇတၢင်းႁွင်ႇၶၢမ်ႈပၢင်ႇဝၢင်းၵျွင်းၵႂႃႇၼၼ်ႉမီးၽၵ်းတူတၢင်ႇဢၼ်ၶဝ်ႈၸူးတီႈပၢင်ႇဝၢင်းၵျွင်းၽၢႆႇတၢင်းၼႂ်းမိူၼ်ၵၼ်တင်းဢၼ်မီးၽၢႆႇတၢင်းဝၼ်းဢွၵ်ႇၼၼ်ႉဢေႃႈ။ ၵေႃႉၼၼ်ႉတႅၵ်ႈတူၺ်းဝူင်ႈၵၢင်ၽၵ်းတူသွင်ဢၼ်ၼၼ်ႉလႄႈယၢၼ်ၵၼ်ပၢၵ်ႇသွၵ်ႇဢေႃႈ။
လိုၼ်းၼၼ်ႉမၼ်းဢဝ်ၵဝ်ၵႂႃႇၸူးတီႈၼႃႈတၢင်းၸၢၼ်းလႄႈၵႃႈတီႈၼၼ်ႈၵဝ်လႆႈႁၼ်ၽၵ်းတူတၢင်ႇဢၼ်ဢေႃႈ။ မၼ်းတႅၵ်ႈတူၺ်းၽၵ်းတူၼၼ်ႉလႄႈပဵၼ်ဢၼ်မိူၼ်မိူၼ်ၵၼ်တင်းၽၵ်းတူဢွၼ်တၢင်းၸိူဝ်းၼၼ်ႉဢေႃႈ။-
ႁူးလၢင်းတဵၼ်ၵႃႈတီႈလုၵ်းၸိူဝ်းဢၼ်မီးတီႈၽၵ်းတူ၊ဢိၵ်ႇတင်းႁူးလၢင်းတဵၼ်ဢၼ်ၵႃႈတီႈၽၵ်းတူဢွၼ်တၢင်းၸိူဝ်းၼၼ်ႉမိူၼ်ၵၼ်လႄႈၼႃႈယၢဝ်းမၼ်းမီးႁႃႈသိပ်းသွၵ်ႇၼႃႈၵႂၢင်ႈသၢဝ်းႁႃႈသွၵ်ႇဢေႃႈ။-
မီးၶူဝ်လႆၸဵတ်းသိၵ်ႈၶိုၼ်ႈၸူးတီႈၽၵ်းတူလႄႈလုၵ်းမၼ်းၵေႃႈမီးသိုဝ်ႈၼႃႈပၢင်ႇဝၢင်းၵျွင်းယူႇဢေႃႈ။ ပုင်ႇႁၢင်ႈတူၼ်ႈထၢၼ်တင်းလၢႆၵေႃႈၶွၵ်းဝႆႉၵႃႈၼိူဝ်ၽႃၽၢႆႇတၢင်းၼႂ်းဢၼ်သိုဝ်ႈၼႃႈသဵၼ်ႈတၢင်းၽႃႇဝူင်ႈၵၢင်ၼၼ်ႉဢေႃႈ။-
ၵႃႈတီႈၼႆႈၵေႃႈမီးၽၵ်းတူဢၼ်ၶဝ်ႈၸူးတီႈပၢင်ႇဝၢင်းၵျွင်းၽၢႆႇတၢင်းၼႂ်းၼၼ်ႉၼင်ႇၵဝ်ႇဢေႃႈ။ မၼ်းတႅၵ်ႈတူၺ်းဝူင်ႈၵၢင်ၽၵ်းတူတင်းသွင်ၼႆႉမီးပၢၵ်ႇသွၵ်ႇဢေႃႈ။
မၼ်းသမ်ႉဢဝ်ၵဝ်ၽႃလတ်းၵႂႃႇၸွမ်းၽၵ်းတူၽၢႆႇတၢင်းၸၢၼ်းလႄႈၶဝ်ႈၵႂႃႇၵႃႈၼႂ်းပၢင်ႇဝၢင်းၵျွင်းၽၢႆႇတၢင်းၼႂ်းၼၼ်ႉဢေႃႈ။ မၼ်းတႅၵ်ႈၽၵ်းတူၼၼ်ႉလႄႈ၊ၽၵ်းတူၼၼ်ႉတၢင်းယႂ်ႇတၢင်းၵႂၢင်ႈမၼ်းမိူၼ်မိူၼ်ၵၼ်တင်းၽၵ်းတူဢၼ်မီးၵႃႈတီႈၽႃတၢင်းၼွၵ်ႈၼၼ်ႉဢေႃႈ။-
လုၵ်းပုၼ်ႈတႃႇပႂ်ႉယၢမ်းၼႃႈၽၵ်းတူၵျွင်းမၼ်း၊ၽႃတၢင်းၼႂ်းမၼ်းတင်းလၢႆၸိူဝ်းၼၼ်ႉတၢင်းယႂ်ႇၵႂၢင်ႈၶဝ်မိူၼ်မိူၼ်ၵၼ်တင်းၸိူဝ်းဢၼ်မီးၵႃႈတီႈၽၵ်းတူတၢင်ႇဢၼ်ၸိူဝ်းၼၼ်ႉဢေႃႈ။ ႁူးလၢင်းတဵၼ်တင်းလၢႆၵႃႈတီႈၽႃလုၵ်းၽၵ်းတူၸိူဝ်းၼႆႉၵေႃႈမီးသေလႄႈမုၵ်ႈတင်းလၢႆမီးလဵပ်ႈႁွပ်ႈဝႆႉလႄႈ၊ၼႃႈယၢဝ်းမီးႁႃႈသိပ်းသွၵ်ႇ၊ၼႃႈၵႂၢင်ႈမီးသၢဝ်းႁႃႈသွၵ်ႇဢေႃႈ။-
ႁူးလၢင်းတဵၼ်တင်းလၢႆၵႃႈတီႈၽႃလုၵ်းၶၢၼ်းၽၵ်းတူၸိူဝ်းၼႆႉၵေႃႈမီးသေလႄႈမုၵ်ႈၽၵ်းတူတင်းလၢႆမီးလဵပ်ႈႁွပ်ႈဝႆႉလႄႈ၊ၼႃႈယၢဝ်းမီးသၢဝ်းႁႃႈသွၵ်ႇ၊ၼႃႈၵႂၢင်ႈမီးႁႃႈသွၵ်ႇဢေႃႈ။-
ၼႃႈၽၵ်းတူၵျွင်းၼၼ်ႉမီးသိုဝ်ႈၼႃႈပၢင်ႇဝၢင်းၵျွင်းလႄႈပုင်ႇႁၢင်ႈတူၼ်ႈထၢၼ်တင်းလၢႆၶွၵ်းဝႆႉၵႃႈၼိူဝ်ၽႃဢၼ်မီးၸွမ်းသဵၼ်ႈတၢင်းၽႃႇဝူင်ႈၵၢင်ၵႂႃႇၼၼ်ႉသေယဝ်ႉ၊မီးၶူဝ်လႆပႅတ်ႇသိၵ်ႈဢၼ်ၶိုၼ်ႈၵႂႃႇၸူးတီႈၽၵ်းတူဢေႃႈ။
ၵေႃႉၼၼ်ႉသမ်ႉဢဝ်ၵဝ်ၽႃႇလတ်းၽၵ်းတူၵႂႃႇၽၢႆႇတၢင်းဝၼ်းဢွၵ်ႇလႄႈၶဝ်ႈၵႂႃႇၵႃႈၼႂ်းပၢင်ႇဝၢင်းၵျွင်းတၢင်းၼႂ်းဢေႃႈ။ မၼ်းတႅၵ်ႈတူၺ်းၽၵ်းတူၼၼ်ႉလႄႈ၊တၢင်းယႂ်ႇတၢင်းၵႂၢင်ႈမၼ်းပဵၼ်ဢၼ်မိူၼ်မိူၼ်ၵၼ်တင်းဢွၼ်တၢင်းၸိူဝ်းၼၼ်ႉဢေႃႈ။-
လုၵ်းပုၼ်ႈတႃႇပႂ်ႉယၢမ်းမၼ်း၊ၼႃႈၽၵ်းတူၵျွင်းမၼ်း၊ၽႃတၢင်းၼႂ်းမၼ်းတင်းလၢႆၸိူဝ်းၼၼ်ႉတၢင်းယႂ်ႇတၢင်းၵႂၢင်ႈမၼ်းမိူၼ်မိူၼ်ၵၼ်တင်းၸိူဝ်းဢၼ်မီးၵႃႈတီႈၽၵ်းတူတၢင်ႇဢၼ်ၸိူဝ်းၼၼ်ႉဢေႃႈ။ မီးႁူးလၢင်းတဵၼ်လဵပ်ႈႁွပ်ႈမၼ်းဢိၵ်ႇတင်းၵႃႈၼႂ်းလုၵ်းလူင်ၼၼ်ႉလႄႈ၊ၼႃႈယၢဝ်းမၼ်းမီးႁႃႈသိပ်းသွၵ်ႇ၊ၼႃႈၵႂၢင်ႈမၼ်းမီးသၢဝ်းႁႃႈသွၵ်ႇဢေႃႈ။-
ၼႃႈၽၵ်းတူၵျွင်းမၼ်းမီးသိုဝ်ႈၼႃႈပၢင်ႇဝၢင်းၵျွင်းလႄႈပုင်ႇႁၢင်ႈတူၼ်ႈထၢၼ်တင်းလၢႆ ၶွၵ်းဝႆႉၵႃႈၼိူဝ်ၽႃဢၼ်မီးၸွမ်းသဵၼ်ႈတၢင်းဝူင်ႈၵၢင်ၵႂႃႇၼၼ်ႉသေယဝ်ႉ၊မီးၶူဝ်လႆပႅတ်ႇသိၵ်ႈဢၼ်ၶိုၼ်ႈၵႂႃႇၸူးတီႈၽၵ်းတူဢေႃႈ။
ၵေႃႉၼၼ်ႉသမ်ႉဢဝ်ၵဝ်ၵႂႃႇၸူးတီႈၽၵ်းတူၽၢႆႇတၢင်းႁွင်ႇဢေႃႈ။ မၼ်းတႅၵ်ႈၽၵ်းတူၼၼ်ႉတၢင်းယႂ်ႇတၢင်းၵႂၢင်ႈမၼ်းမိူၼ်ၵၼ်တင်းၽၵ်းတူတၢင်ႇဢၼ်ၸိူဝ်းၼၼ်ႉဢေႃႈ။-
တီႈၽၵ်းတူၼၼ်ႉၵေႃႈမီးလုၵ်းပုၼ်ႈတႃႇပႂ်ႉၵၢင်လႂ်၊ၽႃတၢင်းၼႂ်းဢၼ်ႁၢင်ႈၶိူင်ႈဝႆႉတင်းလၢႆ၊လုၵ်းလူင်ဢိၵ်ႇတင်းႁူးလၢင်းတဵၼ်လႂ်လဵပ်ႈႁွပ်ႈမၼ်းဝႆႉဢေႃႈ။ ၼႃႈယၢဝ်းမီးႁႃႈသိပ်းသွၵ်ႇ၊ၼႃႈၵႂၢင်ႈမီးသၢဝ်းႁႃႈသွၵ်ႇဢေႃႈ။-
လုၵ်းလူင်ၼၼ်ႉမီးသိုဝ်ႈၼႃႈပၢင်ႇဝၢင်းၵျွင်းၽၢႆႇၼွၵ်ႈၼၼ်ႉဢေႃႈ။ ပုင်ႇႁၢင်ႈတူၼ်ႈထၢၼ်တင်းလၢႆၶွၵ်းဝႆႉၵႃႈၼိူဝ်ၽႃဢၼ်မီးၸွမ်းသဵၼ်ႈတၢင်းၽႃႇဝူင်ႈၵၢင်ၵႂႃႇၼၼ်ႉသေယဝ်ႉ၊မီးၶူဝ်လႆပႅတ်ႇသိၵ်ႈၶိုၼ်ႈၸူးတီႈၽၵ်းတူဢေႃႈ။
ၵႃႈၼႂ်းပၢင်ႇဝၢင်းၵျွင်းၽၢႆႇၼွၵ်ႈၼၼ်ႉမီးလုၵ်းဢွၼ်ႇဢၼ်သိုပ်ႇၸပ်းၵၼ်တင်းၽၵ်းတူၽၢႆႇတၢင်းၼႂ်းဢၼ်မီးတီႈၸဵင်ႇႁွင်ႇၼၼ်ႉဢေႃႈ။ မၼ်းပဵၼ်လုၵ်းဢွၼ်ႇဢၼ်ၶဝ်ႈၸူးၼႂ်းလုၵ်းလူင်ဢၼ်သိုဝ်ႈၼႃႈပၢင်ႇဝၢင်းၵျွင်းၼၼ်ႉသေယဝ်ႉ၊ၵႃႈတီႈၼၼ်ႈၶဝ်သုၵ်ႈသၢႆႇၼမ်ႉတူဝ်တၢင်းလူႇဢၼ်ၶဝ်တၵ်းသၢၵ်ႈလူႇၶိူင်ႈတၢင်းလူႇဢၼ်ၽဝ်ၽႆးၼၼ်ႉဢေႃႈ။-
ၵႃႈၼႂ်းလုၵ်းလူင်ၼႆႉမီးၽိူၼ်သီႇဢၼ်၊တမ်းဝႆႉယေႈၽၢႆႇသွင်ဢၼ်ဢေႃႈ။ ၵႃႈၼိူဝ်ၽိူၼ်ၸိူဝ်းၼၼ်ႉၶဝ်ႁႅမ်တူဝ်တၢင်းလူႇပုၼ်ႈတၵ်းသၢၵ်ႈလူႇၶိုင်ႈတၢင်းလူႇဢၼ်ၽဝ်ၽႆး၊ၶိူင်ႈတၢင်းလူႇဢၼ်ၽေႇဢပျတ်ႈဢမ်ႇၼၼ်ၶိူင်ႈတၢင်းလူႇဢၼ်ၽေႇတၢင်းၽိတ်းတုၸရိူၵ်ႈၸိူဝ်းၼၼ်ႉဢေႃႈ။-
ၽၢႆႇတၢင်းဢွၵ်ႇလုၵ်းၼၼ်ႉၵေႃႈ၊မီးၽိူၼ်ဢၼ်မိူၼ်ၵၼ်ၼၼ်ႉသီႇဢၼ်လႄႈတမ်းဝႆႉယေႈၽၢႆႇသွင်ဢၼ်ၵႃႈတီႈၽၵ်းတူၸဵင်ႇတၢင်းႁွင်ႇၼၼ်ႉဢေႃႈ။-
ၽိူၼ်တင်းမူတ်းပွင်းၵၼ်မီးပႅတ်ႇဢၼ်၊ၵႃႈၼႂ်းလုၵ်းသီႇဢၼ်၊ၵႃႈၼွၵ်ႈတီႈပၢင်ႇဝၢင်းၵျွင်းၼၼ်ႉသီႇဢၼ်လႄႈၵႃႈၼိူဝ်ၽိူၼ်ၸိူဝ်းၼၼ်ႉၶဝ်ႁႅမ်တူဝ်တၢင်းလူႇဢေႃႈ။-
ၽိူၼ်သီႇဢၼ်ၸိူဝ်းဢၼ်မီးၵႃႈၼႂ်းလုၵ်းၼၼ်ႉဢဝ်မၢၵ်ႇႁိၼ်ထၢၵ်ႇႁဵတ်းဝႆႉလႄႈပဵၼ်ၽိူၼ်ပုၼ်ႈတႃႇတေမႄးႁႅၼ်းၶိူင်ႈတၢင်းလူႇဢၼ်ၽဝ်ၽႆးတင်းတူဝ်ၼၼ်ႉဢေႃႈ။ ၽိူၼ်ၸိူဝ်းၼၼ်ႉတၢင်းသုင်မီးသွၵ်ႇၼိုင်ႈလႄႈၼႃႈၵႂၢင်ႈမီးသွၵ်ႇၶိုပ်ႈသီႇၸဵင်ႇဝႆႉဢေႃႈ။ ၶိူင်ႈယိပ်းၶိူင်ႈတိုဝ်းတင်းလၢႆပုၼ်ႈဢၼ်တၵ်းႁႅမ်တူဝ်တၢင်းလူႇၼၼ်ႉၶဝ်ဢဝ်တၢင်ႇဝႆႉၵႃႈၼိူဝ်ၽိူၼ်ၸိူဝ်းၼၼ်ႉဢေႃႈ။-
မီးပႅၵ်ႇဢၼ်တၢင်းၵႂၢင်ႈမီးၽႃႇမိုဝ်းၼိုင်ႈၼၼ်ႉသႂ်ႇၸပ်းၸွမ်းၶွပ်ႇၽိူၼ်ဝႆႉဢေႃႈ။ ၵႃႈဢၼ်ပဵၼ်ၼိူဝ်ႉပုၼ်ႈဢၼ်တၵ်းသၢၵ်ႈလူႇၸိူဝ်းၼၼ်ႉတၢင်ႇဝႆႉၵႃႈၼိူဝ်ၽိူၼ်ၸိူဝ်းၼၼ်ႉဢေႃႈ။
လိုၼ်းၼၼ်ႉမၼ်းဢဝ်ၵဝ်ၶဝ်ႈၵႃႈၼႂ်းပၢင်ႇဝၢင်းၵျွင်းၽၢႆႇတၢင်းၼႂ်းပုၼ်ႉဢေႃႈ။ ၵႃႈတီႈၼၼ်ႈမီးလုၵ်းသွင်လုၵ်းပုၼ်ႈတႃႇၵူၼ်းႁဵတ်းၵႂၢမ်းၶဝ်ယူႇၼၼ်ႉလႄႈလုၵ်းၼိုင်ႈမီးၵႃႈႁိမ်းၽၵ်းတူၽၢႆႇတၢင်းႁွင်ႇလႄႈဝၢႆႇၼႃႈတေႃႇၽၢႆႇတၢင်းၸၢၼ်းယူႇ၊လုၵ်းၼိုင်ႈသမ်ႉမီးၵႃႈႁိမ်းၽၵ်းတူၽၢႆႇတၢင်းၸၢၼ်းဢၼ်ဝၢႆႇၼႃႈတေႃႇၽၢႆႇတၢင်းႁွင်ႇယူႇဢေႃႈ။-
ၵေႃႉၼၼ်ႉမွၵ်ႇလၢတ်ႈတီႈၵဝ်လႄႈဝႃႈ၊ “လုၵ်းဢၼ်ဝၢႆႇၼႃႈတေႃႇၽၢႆႇတၢင်းၸၢၼ်းယူႇၼႆႉၸမ်ႉ၊ပဵၼ်ပုၼ်ႈယဵၸ်ႈပရေႃးႁဵၵ်ႈ ၸိူဝ်းဢၼ်ၵိုတ်ႉႁၢပ်ႇၼႃႈၵၢၼ်ၵႃႈၼႂ်းၵျွင်းပိၵ်ႈမၢၼ်ႇၸဝ်ႈတၵ်းယူႇၼၼ်ႉဢေႃႈ။-
လုၵ်းဢၼ်ဝၢႆႇၼႃႈတေႃႇၽၢႆႇတၢင်းႁွင်ႇယူႇၼႆႉ သမ်ႉပဵၼ်ပုၼ်ႈယဵၸ်ႈပရေႃးႁဵၵ်ႈၸိူဝ်းဢၼ်ၵိုတ်ႉႁၢပ်ႇၼႃႈၵၢၼ်ၶဵင်ႇတၢင်းလူႇတၵ်းယူႇၼၼ်ႉဢေႃႈ။ ယဵၸ်ႈပရေႃးႁဵၵ်ႈၸိူဝ်းၼၼ်ႉတင်းမူတ်းပဵၼ်လုၵ်ႈလၢၼ်ၸိူဝ်ႉၶိူဝ်း ၸႃႇတုၵ်ႉ၊ လႄႈ၊ၶဝ်ၸိူဝ်းၼႆႉၵူၺ်းပဵၼ်လုၵ်ႈပဵၼ်လၢၼ်မဵဝ်း လေႇဝိ၊ ဢၼ်မီးဢၶႂၢင်ႉလႆႈၶဝ်ႈၸူးၵႃႈတီႈၽၢႆႇၼႃႈ ထႃႇဝရႃႉၽြႃး၊ ႁႂ်ႈလႆႈၵိုတ်ႉႁၢပ်ႇၼႃႈၵၢၼ်မၼ်းၸဝ်ႈဢေႃႈ၊” ဝႃႈၼင်ႇၼႆဢေႃႈ။
ၵေႃႉၼၼ်ႉတႅၵ်ႈပၢင်ႇဝၢင်းၵျွင်းၽၢႆႇတၢင်းၼႂ်းၼၼ်ႉလႄႈမီးပၢၵ်ႇသွၵ်ႇသီႇၸဵင်ႇပဵင်းၵၼ်ဢေႃႈ။ ၵျွင်းပိၵ်ႈမၢၼ်ႇၸဝ်ႈမီးၽၢႆႇတၢင်းတူၵ်းမၼ်းလႄႈမီးၶဵင်ႇတၢင်းလူႇၵႃႈတီႈၽၢႆႇၼႃႈၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။-
မိူဝ်ႈၼၼ်ႉမၼ်းဢဝ်ၵဝ်ၵႂႃႇၵႃႈတီႈၼႃႈၽၵ်းတူၵျွင်းပိၵ်ႈမၢၼ်ႇၸဝ်ႈဢေႃႈ။ မၼ်းတႅၵ်ႈၼႃႈၽၵ်းတူၼၼ်ႉလႄႈတၢင်းလိုၵ်ႉမၼ်းမီးႁႃႈသွၵ်ႇ၊ဢိၵ်ႇတင်းၼႃႈၵႂၢင်ႈမၼ်းမီးသိပ်းသီႇသွၵ်ႇသေယဝ်ႉ၊တၢင်းၼႃၽႃမၼ်းမီးသၢမ်သွၵ်ႇတင်းသွင်ၽၢၵ်ႇၶၢင်ႈမၼ်းဝႆႉဢေႃႈ။-
တၢင်းယၢဝ်းၼႃႈၵျွင်းပိၵ်ႈမၢၼ်ႇၸဝ်ႈၼၼ်ႉၸမ်ႉ၊မီးသၢဝ်းသွၵ်ႇ၊ၼႃႈပွတ်းသမ်ႉမီးသိပ်းသွင်သွၵ်ႇ ဢေႃႈ။ လႆႈၶိုၼ်ႈၶူဝ်လႆသိပ်းသိၵ်ႈၵႂႃႇၸူးဢေႃႈ။ ၵႃႈတီႈၼႃႈၽၵ်းတူၵျွင်းပိၵ်ႈမၢၼ်ႇၸဝ်ႈၼၼ်ႉမီးသဝ်သွင်လႅမ်ႈ၊ယေႈၽၢၵ်ႇၶၢင်ႈယေႈလႅမ်ႈဢေႃႈ။
လိုၼ်းၼၼ်ႉ၊မၼ်းႁွင်ႉၵဝ်ၶဝ်ႈၵႂႃႇၵႃႈၼႂ်းလုၵ်းဢၼ်မီးၼႂ်းၶိုင်ႈၵၢင်ဢၼ်ဝႃႈ၊ထႃႇၼႃႉတီႈမူတ်းၸၢင်ႇၼၼ်ႉသေယဝ်ႉ၊မၼ်းတႅၵ်ႈသဵၼ်ႈတၢင်းၽႃႇဝူင်ႈၵၢင်ဢၼ်ၶဝ်ႈၸူးတၢင်းၼႂ်းၼၼ်ႉလႄႈသွင်ၽၢၵ်ႇၶၢင်ႈမၼ်းမီးႁူၵ်းသွၵ်ႇ၊-
ဢိၵ်ႇတင်းၼႃႈၵႂၢင်ႈမၼ်းမီးသိပ်းသွၵ်ႇလႄႈၽႃမၼ်းမီးတၢင်းၼႃႁႃႈသွၵ်ႇၼၼ်ႉမီးသွင်ၽၢၵ်ႇၶၢင်ႈမၼ်းဝႆႉဢေႃႈ။ မၼ်းတႅၵ်ႈလုၵ်းၼၼ်ႉၼႃႈယၢဝ်းမီးသီႇသိပ်းသွၵ်ႇ၊ၼႃႈၵႂၢင်ႈမီးသၢဝ်းသွၵ်ႇဢေႃႈ။
လိုၼ်းၼၼ်ႉ၊မၼ်းႁွင်ႉၵဝ်ၶဝ်ႈၵႂႃႇၵႃႈၼႂ်းလုၵ်းၸၼ်ႉၼႂ်းသေပိူၼ်ႈၼၼ်ႉသေယဝ်ႉ၊တႅၵ်ႈသဵၼ်ႈတၢင်းၽႃႇဝူင်ႈၵၢင် ဢၼ်ၶဝ်ႈၸူးၵႃႈၼႂ်းမၼ်းၼၼ်ႉလႄႈၼႃႈပွတ်းမၼ်းမီးသွင်သွၵ်ႇ၊ၼႃႈၵႂၢင်ႈမီးႁူၵ်းသွၵ်ႇ၊တၢင်းၼႃၽႃၼၼ်ႉမီးၸဵတ်းသွၵ်ႇဢေႃႈ။-
မၼ်းတႅၵ်ႈလုၵ်းၸၼ်ႉၼႂ်းၼၼ်ႉမီးသၢဝ်းသွၵ်ႇသီႇၸဵင်ႇပႅင်းၵၼ်ဢေႃႈ။ မၼ်းလၢတ်ႈတီႈၵဝ်လႄႈဝႃႈ၊ “ဢၼ်ၼႆႉပဵၼ် ထႃႇၼႃႉတီႈဢၼ်မူတ်းၸၢင်ႇသေပိူၼ်ႈ၊ ဢေႃႈ၊” ဝႃႈၼင်ႇၼႆဢေႃႈ။
ၵေႃႉၼၼ်ႉတႅၵ်ႈတၢင်းၼႃၽႃၸၼ်ႉၼႂ်းတိူၵ်ႈၵျွင်းပိၵ်ႈမၢၼ်ႇၸဝ်ႈၼၼ်ႉမီးႁူၵ်းသွၵ်ႇဢေႃႈ။ လဵပ်ႈႁွပ်ႈၵျွင်းပိၵ်ႈမၢၼ်ႇၸဝ်ႈၼၼ်ႉမီးလုၵ်းဢွၼ်ႇဢၼ်မီးသီႇသွၵ်ႇၼင်ႇၵၼ်ၼၼ်ႉၸပ်းၵႂႃႇၸွမ်းၽႃၵျွင်းပိၵ်ႈမၢၼ်ႇဝႆႉဢေႃႈ။-
လုၵ်းဢွၼ်ႇၸိူဝ်းၼၼ်ႉမီးႁၢၼ်ႉသၢမ်ႁၢၼ်ႉသွၼ်ႉၵၼ်ဝႆႉသေလႄႈယေႈႁၢၼ်ႉမီးလုၵ်းသၢမ်သိပ်းလုၵ်းဢေႃႈ။ လုၵ်းၸိူဝ်းဢၼ်ယင်းဢမ်ႇၶဝ်ႈၵႃႈၼႂ်းၽႃႁိူၼ်းၸဝ်ႈလႄႈၵၢႆႇသႂ်ႇၵႃႈၼိူဝ်ႁၢၼ်ႉၽႃႁိူၼ်းၸဝ်ႈပႅၼ်ဢွၵ်ႇၸွမ်းလဵပ်ႈႁွပ်ႈၸိူဝ်းၼၼ်ႉ၊ႁႂ်ႈပဵၼ်ဢၼ်မၼ်ႈဢၼ်ၶိူင်ႇမၼ်းဢေႃႈ။-
ပေႃးယူႇပႃႈၼွၵ်ႈလႄႈတူၺ်းၸိုင်၊လႆႈႁၼ်ၽႃၵျွင်းပိၵ်ႈမၢၼ်ႇပဵၼ်မိူၼ်ၼင်ႇႁၢင်ႈၸႃႉဢဝ်တႂ်ႈၶိုၼ်ႈၵႂႃႇတေႃႇပၢႆၼၼ်ႉတၢင်းၼႃမၼ်းမိူၼ်ၵၼ်ဝႆႉဢေႃႈ။ ၵႃႈတီႈၽႃၸၼ်ႉၼွၵ်ႈၵျွင်းပိၵ်ႈမၢၼ်ႇၸဝ်ႈၽၢႆႇတၢင်းလင်လုၵ်းၸိူဝ်းၼၼ်ႉၸိုင်၊မီးၶူဝ်လႆဢၼ်ၵႂၢင်ႈၼႃႇသွင်ဢၼ်လဵပ်ႈၶိုၼ်ႈပဵၼ်ႁၢၼ်ႉပဵၼ်ႁၢၼ်ႉပုၼ်ႈတႃႇၵူၼ်းဢၼ်လုၵ်ႉသေၵႃႈတႂ်ႈၶိုၼ်ႈမႃးတီႈၸၼ်ႉၵၢင်ဢိၵ်ႇတင်းၸၼ်ႉၼိူဝ်ၼၼ်ႉဢေႃႈ။-
ၵဝ်လႆႈႁၼ်ၸၢၼ်းပုၼ်ႈၵူၼ်းတၵ်းပႆ၊တၢင်းၵႂၢင်ႈမၼ်းမီးႁူၵ်းသွၵ်ႇၼၼ်ႉမီးယူႇလဵပ်ႈႁွပ်ႈၵျွင်းပိၵ်ႈမၢၼ်ႇၸဝ်ႈလႄႈသုင်သေၼႃႈလိၼ်ႁူၵ်းသွၵ်ႇသေယဝ်ႉ၊သုင်ပဵင်းတၢၼ်ႇငဝ်ႈႁၢၵ်ႈလုၵ်းၽႃၸိူဝ်းၼၼ်ႉဢေႃႈ။-
တၢင်းၼႃၽႃၸၼ်ႉၼွၵ်ႈဢၼ်မီးၽၢၵ်ႇၶၢင်ႈလုၵ်းၽႃၸိူဝ်းၼၼ်ႉမီးႁႃႈသွၵ်ႇလႄႈမီးတီႈဢၼ်ၵိုတ်းဢၼ်လွတ်ႈၵႃႈၼႂ်းဝူင်ႈၵၢင်လုၵ်းၽႃၸိူဝ်းၼၼ်ႉ၊ဢိၵ်ႇတင်းၵျွင်းပိၵ်ႈမၢၼ်ႇၸဝ်ႈဢေႃႈ။-
ၵႃႈတီႈၵႄႈဝူင်ႈၵၢင်လုၵ်းၸိူဝ်းၼၼ်ႉ၊ဢိၵ်ႇတင်းတိူၵ်ႈၵျွင်းၼၼ်ႉမီးတီႈဢၼ်ပဝ်ႇဢၼ်လၢပ်ႈပုၼ်ႈယဵၸ်ႈပရေႃးႁဵၵ်ႈ ၸိူဝ်းၼၼ်ႉၵႂၢင်ႈသၢဝ်းသွၵ်ႇလႄႈပၼ်ႇႁွပ်ႈၵျွင်းပိၵ်ႈမၢၼ်ႇၸဝ်ႈဝႆႉဢေႃႈ။-
ၽၵ်းတူၸိူဝ်းၼၼ်ႉၽုၺ်ႇပိုတ်ႇၸူးၵႃႈတီႈတီႈဢၼ်ပဝ်ႇဢၼ်လၢပ်ႈၼၼ်ႉလႄႈ၊ၽၵ်းတူႁူးၼိုင်ႈဝၢႆႇၵႂႃႇၸူးၽၢႆႇတၢင်းႁွင်ႇ၊ဢိၵ်ႇတင်းႁူးၼိုင်ႈသမ်ႉဝၢႆႇၵႂႃႇၸူးၽၢႆႇတၢင်းၸၢၼ်းဢေႃႈ။ သဵၼ်ႈတၢင်းၼွႆႉဢၼ်ပဝ်ႇဝႆႉလၢပ်ႈဝႆႉၼၼ်ႉၼႃႈၵႂၢင်ႈမၼ်းမီးႁႃႈသွၵ်ႇလဵပ်ႈႁွပ်ႈၵျွင်းပိၵ်ႈမၢၼ်ႇၸဝ်ႈဝႆႉဢေႃႈ။
တိူၵ်ႈႁိူၼ်းဢၼ်ယူႇတီႈသုတ်းတီႈဢၼ်ပဝ်ႇဢၼ်လၢပ်ႈလႄႈမီးၽၢႆႇတၢင်းတူၵ်းၵျွင်းပိၵ်ႈမၢၼ်ႇၸဝ်ႈၼၼ်ႉၼႃႈယၢဝ်းမၼ်းမီးၵဝ်ႈသိပ်းသွၵ်ႇၼႃႈၵႂၢင်ႈမၼ်းမီးၸဵတ်းသိပ်းသွၵ်ႇလႄႈၽႃမၼ်းဢၼ်လွမ်ႉႁွပ်ႈႁွပ်ႈၼၼ်ႉတၢင်းၼႃမၼ်းမီးႁႃႈသွၵ်ႇဢေႃႈ။
ၵေႃႉၼၼ်ႉတႅၵ်ႈၽၢႆႇတၢင်းၼွၵ်ႈၵျွင်းပိၵ်ႈမၢၼ်ႇၸဝ်ႈလႄႈၼႃႈယၢဝ်းမၼ်းမီးပၢၵ်ႇသွၵ်ႇဢေႃႈ။ ၽၢႆႇတၢင်းလင်ၵျွင်းပိၵ်ႈမၢၼ်ႇၸဝ်ႈၵေႃႈ တႅၵ်ႈၽႃႇလတ်းၵႂႃႇတီႈဢၼ်ပဝ်ႇဢၼ်လၢပ်ႈတေႃႇထိုင်ႁွတ်ႈတိူၵ်ႈႁိူၼ်းၽၢႆႇတၢင်းတူၵ်းၼၼ်ႉယၢၼ်ၵၼ်ပၢၵ်ႇသွၵ်ႇၼင်ႇၵဝ်ႇဢေႃႈ။-
ဢၼ်တႅၵ်ႈၽႃႇလတ်းၵႂႃႇၽၢႆႇၼႃႈၵျွင်းပိၵ်ႈမၢၼ်ႇၸဝ်ႈ၊ဢၼ်ၶဝ်ႈပႃးၸႃႉၸဵမ်တီႈဢၼ်ပဝ်ႇဢၼ်လၢပ်ႈတင်းသွင်ၽၢႆႇၼၼ်ႉၵေႃႈမီးပၢၵ်ႇသွၵ်ႇၼင်ႇၵဝ်ႇဢေႃႈ။-
မၼ်းသမ်ႉတႅၵ်ႈၼႃႈယၢဝ်းတိူၵ်ႈႁိူၼ်းၽၢႆႇတၢင်းတူၵ်း၊ဢၼ်ၶဝ်ႈပႃးၸၢၼ်းပုၼ်ႈတႃႇၵူၼ်းပႆတၢင်းသွင်ၽၢႆႇၼၼ်ႉၵေႃႈ မီးပၢၵ်ႇသွၵ်ႇၼင်ႇၵဝ်ႇဢေႃႈ။ တၢင်းၶဝ်ႈၵႂႃႇတီႈလုၵ်းၵႃႈၼႂ်းၵျွင်းပိၵ်ႈမၢၼ်ႇၸဝ်ႈထႃႇၼႃႉတီႈဢၼ်မူတ်းၸၢင်ႇ၊ဢိၵ်ႇတင်းထႃႇၼႃႉတီႈမူတ်းၸၢင်ႇသေပိူၼ်ႈၼၼ်ႉ၊-
ဢဝ်ၵႃႈတီႈၽၢၵ်ႈသိူဝ်ႇမၼ်းတေႃႇထိုင်ႁွတ်ႈႁူးလၢင်းတဵၼ်မၼ်းၸိူဝ်းၼၼ်ႉဢဝ်ပႅၼ်ႈႁူမ်ႇဝႆႉဢေႃႈ။ ႁူးလၢင်းတဵၼ်ၸိူဝ်းၼၼ်ႉမီးတၢင်းဢၼ်ၵင်ႈဝႆႉလပ်ႉဝႆႉဢေႃႈ။-
ၽႃၽၢႆႇတၢင်းၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉမီးပုင်ႇႁၢင်ႈလႂ်တွင်ႈႁဵတ်းသႂ်ႇဝႆႉတဵမ်တဵမ်တေႃႇထိုင်ႁွတ်ႈသုင်ထိုင်ၶိုဝ်ႇၽၵ်းတူၸိူဝ်းၼၼ်ႉဢေႃႈ။-
ပုင်ႇႁၢင်ႈၸိူဝ်းၼၼ်ႉပဵၼ်ပုင်ႇႁၢင်ႈတူၼ်ႈထၢၼ်၊ဢိၵ်ႇတင်းပုင်ႇႁၢင်ႈၶေႇရုၽဵမ်ႇ လႄႈ၊တူၼ်ႈထၢၼ်ဢိၵ်ႇတင်းၶေႇရုၽဵမ်ႇၸိူဝ်းၼၼ်ႉဢၼ်ၼိုင်ႈလႄႈဢၼ်ၼိုင်ႈၸွမ်ႇၵႄႈၵၼ်ယူႇလႄႈလဵပ်ႈႁွပ်ႈလုၵ်းဝႆႉဢေႃႈ။ ၶေႇရုၽဵမ်ႇၸိူဝ်းၼၼ်ႉယေႈဢၼ်မီးၼႃႈသွင်ၼႃႈသေယဝ်ႉ။-
ၼႃႈၼိုင်ႈပဵၼ်ၼႃႈၵူၼ်းဢၼ်ဝၢႆႇၸူးတူၼ်ႈထၢၼ်ၽၢႆႇၼိုင်ႈယူႇ၊ဢိၵ်ႇတင်းၼႃႈၼိုင်ႈပဵၼ်ၼႃႈသၢင်ႇသီႈဢၼ်ဝၢႆႇၸူးတူၼ်ႈထၢၼ်ထႅင်ႈၽၢႆႇၼိုင်ႈဢေႃႈ။ ပဵၼ်ၸိူဝ်ႉၼင်ႇၼႆယူႇႁွပ်ႈႁွပ်ႈၽႃလႄႈ၊-
တႄႇဢဝ်ၵႃႈတီႈၽၢၵ်ႈသိူဝ်ႇမၼ်းၶိုၼ်ႈၵႂႃႇတေႃႇထိုင်ႁွတ်ႈၶိုဝ်ႇၽၵ်းတူၸိူဝ်းၼၼ်ႉဢေႃႈ။-
သဝ်ၽၵ်းတူထႃႇၼႃႉတီႈမူတ်းၸၢင်ႇၼၼ်ႉပဵၼ်သီႇၸဵင်ႇဝႆႉဢေႃႈ။ ၵႃႈတီႈၽၢႆႇၼႃႈၽၵ်းတူထႃႇၼႃႉတီႈဢၼ်မူတ်းၸၢင်ႇသေပိူၼ်ႈၼၼ်ႉမီးမဵဝ်းၼိုင်ႈဢၼ်မိူၼ်ၸိူဝ်ႉၼင်ႇ၊-
ၶဵင်ႇတၢင်းလူႇမႆႉၸိင်သေယဝ်ႉ၊တၢင်းသုင်မၼ်းမီးသၢမ်သွၵ်ႇ၊ၼႃႈယၢဝ်းမၼ်းမီးသွင်သွၵ်ႇ၊ၼႃႈၵႂၢင်ႈမၼ်းမီးသွင်သွၵ်ႇဢေႃႈ။ သဝ်ၸဵင်ႇမၼ်း၊ၶူင်ႇႁၢၼ်ႉတိၼ်မၼ်း၊ၼႃႈၽႃမၼ်းၸိူဝ်းၼၼ်ႉဢဝ်မႆႉၸိင်ႁဵတ်းဝႆႉတင်းမူတ်းဢေႃႈ။ ၵေႃႉၼၼ်ႉလၢတ်ႈတီႈၵဝ်လႄႈဝႃႈ၊ “ဢၼ်ၼႆႉၸမ်ႉ၊ပဵၼ်ၽိူၼ်ဢၼ်တင်ႈဝႆႉၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။
မီးၽၵ်းတူႁူးၼိုင်ႈၵႃႈတီႈပၢႆသဵၼ်ႈတၢင်းၽႃႇဝူင်ႈၵၢင်ဢၼ်ၶဝ်ႈၸူးထႃႇၼႃႉတီႈဢၼ်မူတ်းၸၢင်ႇ၊ဢိၵ်ႇတင်းမီးထႅင်ႈၽၵ်းတူႁူးၼိုင်ႈ ၵႃႈတီႈပၢႆသဵၼ်ႈတၢင်းၽႃႇဝူင်ႈၵၢင်ဢၼ်ၶဝ်ႈၸူးတီႈထႃႇၼႃႉတီႈဢၼ်မူတ်းၸၢင်ႇသေပိူၼ်ႈၼၼ်ႉဢေႃႈ။-
ၽၵ်းတူၸိူဝ်းၼၼ်ႉယေႈဢၼ်မီးမႂ်ၽၵ်းတူသွင်မႂ်ၼင်ႇၵၼ်လႄႈၽုၺ်ႇၶိုင်ႈၵၢင်မၼ်းဝႆႉဢေႃႈ။-
ပုင်ႇႁၢင်ႈတူၼ်ႈထၢၼ်ဢိၵ်ႇတင်းပုင်ႇႁၢင်ႈၶေႇရုၽဵမ်ႇတင်းလၢႆတွင်ႈႁဵတ်းသႂ်ႇဝႆႉၵႃႈၼိူဝ်မႂ်ၽၵ်းတူထႃႇၼႃႉတီႈဢၼ်မူတ်းၸၢင်ႇၼၼ်ႉမိူၼ်ၸိူဝ်ႉၼင်ႇဢၼ်မီးဝႆႉၵႃႈၼိူဝ်ၽႃၸိူဝ်းၼၼ်ႉဢေႃႈ။ မီးပႅၼ်ႈဢၼ်ၼႃႁူမ်ႇသုမ်ႇၽၢႆႇတၢင်းၼွၵ်ႈၼႃႈၽၵ်းတူဢၼ်ၶဝ်ႈၸူးတီႈလုၵ်းၼၼ်ႉဢေႃႈ။-
ၵႃႈတီႈႁိမ်းၶၢင်ႈလုၵ်းၼႆႉမီးႁူးလၢင်းတဵၼ်တင်းလၢႆလႄႈၽႃၸိူဝ်းၼၼ်ႉၶဝ်ႁၢင်ႈၶိူင်ႈလူၺ်ႈတၢင်းဢၼ်တွင်ႈႁဵတ်းပုင်ႇႁၢင်ႈတူၼ်ႈထၢၼ်လႂ်ဝႆႉဢေႃႈ။
လိုၼ်းၼၼ်ႉ၊မၼ်းႁွင်ႉဢဝ်ၵဝ်ၶဝ်ႈၵႂႃႇၵႃႈၼႂ်းပၢင်ႇဝၢင်းၵျွင်းသေယဝ်ႉ၊ဢွၼ်ၵဝ်ၵႂႃႇႁွတ်ႈၵႃႈတီႈႁိူၼ်းတိူၵ်ႈဢၼ်မီးၽၢႆႇတၢင်းႁွင်ႇၵျွင်းပိၵ်ႈမၢၼ်ႇၸဝ်ႈဢၼ်ဢမ်ႇပေႃးၵႆယၢၼ်ၵၼ်တင်းႁိူၼ်းတိူၵ်ႈဢၼ်မီးၸဵင်ႇတၢင်းတူၵ်းၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။-
ႁိူၼ်းတိူၵ်ႈလင်ၼႆႉၼႃႈယၢဝ်းမၼ်းမီးပၢၵ်ႇသွၵ်ႇလႄႈၼႃႈၵႂၢင်ႈမီးႁႃႈသိပ်းသွၵ်ႇဢေႃႈ။-
ၼႃႈၶၢင်ႈမၼ်းၽၢႆႇၼိုင်ႈဝၢႆႇၼႃႈၸူးတီႈဢၼ်ပဝ်ႇဢၼ်လၢပ်ႈဢၼ်ၵႂၢင်ႈသၢဝ်းသွၵ်ႇလႄႈၽႃၸွမ်းၶၢင်ႈၵျွင်းပိၵ်ႈမၢၼ်ႇၸဝ်ႈ၊ဢိၵ်ႇတင်းၼႃႈၶၢင်ႈမၼ်းတၢင်ႇၽၢႆႇလႄႈသမ်ႉဝၢႆႇၸူးတီႈမၢၵ်ႇႁိၼ်သိူဝ်ႇပၢင်ႇဝၢင်းၵျွင်းၽၢႆႇတၢင်းၼွၵ်ႈၼၼ်ႉဢေႃႈ။ ႁိူၼ်းတိူၵ်ႈၼၼ်ႉတႄႇႁဵတ်းၸၼ်ႉလုၵ်းသၢမ်ႁၢၼ်ႉဝႆႉလႄႈႁၢၼ်ႉၼိူဝ်ၸိူဝ်းၼၼ်ႉလူမ်ႇလွၵ်းၵႂႃႇသေႁၢၼ်ႉတႂ်ႈမၼ်းၸိူဝ်းၼၼ်ႉဢေႃႈ။-
ၵႃႈတီႈႁိမ်းၶၢင်ႈၸွမ်းၽၢႆႇတၢင်းႁွင်ႇႁိူၼ်းတိူၵ်ႈၼၼ်ႉမီးတၢင်းပႆၵႂႃႇပႆမႃးလႄႈတၢင်းၵႂၢင်ႈမၼ်းမီးသိပ်းသွၵ်ႇ၊တၢင်းယၢဝ်းမၼ်းမီးပၢၵ်ႇသွၵ်ႇထိုင်ၵႂႃႇတီႈၼႃႈၽၵ်းတူၽၢႆႇလဵဝ်ၵၼ်ၼၼ်ႉဢေႃႈ။-
လုၵ်းႁၢၼ်ႉၼိူဝ်ၸိူဝ်းၼၼ်ႉၵႅပ်ႈသေႁၢၼ်ႉတႂ်ႈတင်းလၢႆၵွပ်ႈပိူဝ်ႈဢၼ်ၸၢၼ်းမၼ်းၵႂၢင်ႈၼႃႇၼၼ်ႉဢေႃႈ။-
လုၵ်းတင်းသၢမ်ႁၢၼ်ႉၼၼ်ႉၵၢႆႇၵႃႈၼိူဝ်ပႄမၼ်းၵူၺ်းလႄႈဢမ်ႇမီးသဝ်မိူၼ်ၸိူဝ်ႉၼင်ႇႁိူၼ်းတိူၵ်ႈတၢင်ႇလင်ဢၼ်မီးၼႂ်းပၢင်ႇဝၢင်းၵျွင်းၼၼ်ႉ။-
ၵႃႈတီႈႁၢၼ်ႉတႂ်ႈၽႃႁိူၼ်းတိူၵ်ႈၽၢႆႇၼွၵ်ႈၼၼ်ႉလွမ်ႉတၼ်ဝႆႉႁႃႈသိပ်းသွၵ်ႇ၊ဢၼ်မီးၶိုင်ႈၼိုင်ႈၼႃႈယၢဝ်းမၼ်းၼၼ်ႉဢေႃႈ။ ၵႃႈတီႈဢၼ်ယင်းၵိုတ်းဝႆႉႁႃႈသိပ်းသွၵ်ႇၼၼ်ႉသမ်ႉမီးလုၵ်းထႅင်ႈဢေႃႈ။
ၵႃႈတီႈႁၢၼ်ႉၼိူဝ်သုတ်းပိူၼ်ႈၼၼ်ႉၸမ်ႉ၊မီးလုၵ်းတင်းလၢႆႁွတ်ႈသုတ်းၵႂႃႇတီႈၼႃႈယၢဝ်းႁိူၼ်းတိူၵ်ႈၼၼ်ႉဢေႃႈ။-
ၵႃႈတႂ်ႈလုၵ်းဢၼ်မီးၽၢႆႇဝၼ်းဢွၵ်ႇႁိူၼ်းတိူၵ်ႈၵႃႈတီႈႁိမ်းၽႃတႄႇၸႃႉလွမ်ႉၵႂႃႇၼၼ်ႉၸိုင်၊မီးၽၵ်းတူဢၼ်ၶဝ်ႈၸူးၵႃႈၼႂ်းပၢင်ႇဝၢင်းၵျွင်းၽၢႆႇၼွၵ်ႈၼၼ်ႉဢေႃႈ။
ၵႃႈတီႈၽၢႆႇတၢင်းၸၢၼ်းၵျွင်းပိၵ်ႈမၢၼ်ႇၸဝ်ႈၼၼ်ႉမီးႁိူၼ်းတိူၵ်ႈဢၼ်မီးပုင်ႇၸၢမ်ႇဢၼ်လဵဝ်ၵၼ်လႄႈမီးတီႈဢၼ်ဢမ်ႇပေႃးၵႆယၢၼ်ၵၼ်တင်းႁိူၼ်းတိူၵ်ႈဢၼ်မီးၽၢႆႇဝၼ်းတူၵ်းသုတ်းၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။-
ၵႃႈတီႈၽၢႆႇၼႃႈလုၵ်းၸိူဝ်းၼၼ်ႉမီးတၢင်းပႆၵႂႃႇပႆမႃးဢၼ်မိူၼ်ၵၼ်တင်းတၢင်းပႆၵႂႃႇပႆမႃးၽၢႆႇတၢင်းႁွင်ႇၼၼ်ႉဢေႃႈ။ တၢင်းဢၼ်ယႂ်ႇဢၼ်ၵႂၢင်ႈမၼ်း၊ပုင်ႇႁၢင်ႈဢိၵ်ႇတင်းၼႃႈၽၵ်းတူၸိူဝ်းၼၼ်ႉမိူၼ်မိူၼ်ၵၼ်ဝႆႉဢေႃႈ။-
ၵႃႈတႂ်ႈလုၵ်းၸိူဝ်းဢၼ်မီးၽၢႆႇတၢင်းၸၢၼ်းႁိူၼ်းတိူၵ်ႈတီႈသုတ်းၽၢႆႇဝၼ်းဢွၵ်ႇ၊ၵႃႈတီႈဢၼ်ၽႃတႄႇၸႃႉလွမ်ႉၵႂႃႇၼၼ်ႉ မီးၽၵ်းတူႁူးၼိုင်ႈဢေႃႈ။
ၵေႃႉၼၼ်ႉလၢတ်ႈတီႈၵဝ်လႄႈဝႃႈ၊ “လုၵ်းၼႃႈတၢင်းႁွင်ႇဢိၵ်ႇတင်းလုၵ်းတၢင်းၸၢၼ်းပဵၼ်ဢၼ်မူတ်းၸၢင်ႇဢေႃႈ။ ပဵၼ်တီႈဢၼ်ယဵၸ်ႈပရေႃးႁဵၵ်ႈ ဢၼ်ၶဝ်ႈၶႃးၸႃးၽၢႆႇၼႃႈ ထႃႇဝရႃႉၽြႃး၊ ၸိူဝ်းၼၼ်ႉၵိၼ်ၶိူင်ႈတၢင်းလူႇဢၼ်မူတ်းၸၢင်ႇသေပိူၼ်ႈၼၼ်ႉဢေႃႈ။ ၵွပ်ႈပိူဝ်ႈဢၼ်လုၵ်းၸိူဝ်းၼၼ်ႉမူတ်းၸၢင်ႇလႄႈယဵၸ်ႈပရေႃးႁဵၵ်ႈၶဝ်ဢဝ်ၶိူင်ႈတၢင်းလူႇဢၼ်မူတ်းၸၢင်ႇသေပိူၼ်ႈၸိူဝ်းဢၼ်ဝႃႈ၊ၶိူင်ႈတၢင်းလူႇမၢၵ်ႇၶဝ်ႈႁူင်းၶဝ်ႈ၊ၶိူင်ႈတၢင်းလူႇဢၼ်ၽေႇဢပျတ်ႈ၊ၶိူင်ႈတၢင်းလူႇဢၼ်ၽေႇတုၸရိူၵ်ႈၸိူဝ်းၼၼ်ႉဝႆႉၵႃႈတီႈၼၼ်ႈဢေႃႈ။-
မိူဝ်ႈဢၼ်ယဵၸ်ႈပရေႃးႁဵၵ်ႈတင်းလၢႆလႆႈၶဝ်ႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈယဝ်ႉသေလႄႈသမ်ႉၶႂ်ႈၵႂႃႇၸူးတီႈပၢင်ႇဝၢင်းၵျွင်းၽၢႆႇၼွၵ်ႈၼၼ်ႉၸိုင်၊ၶဝ်တၵ်းလႆႈဢဝ်ၶူဝ်းၼုင်ႈဢၼ်မူတ်းၸၢင်ႇဢၼ်ၶဝ်ၼုင်ႈယၢမ်းမိူဝ်ႈဢၼ်ၵိုတ်ႉႁၢပ်ႇၼႃႈၵၢၼ် ထႃႇဝရႃႉၽြႃး ၊ၼၼ်ႉဝႆႉၵႃႈၼႂ်းလုၵ်းၸိူဝ်းၼၼ်ႉသေယဝ်ႉ၊ၼုင်ႈၶူဝ်းတၢင်ႇၽိုၼ်ယဝ်ႉၸင်ႇ၊တၵ်းလႆႈဢွၼ်ၵၼ်ဢွၵ်ႇၵႂႃႇၸူးတီႈပၢင်ၵူၼ်းဢၼ်ၸုဢၼ်တုမ်ၵၼ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၵေႃႉၼၼ်ႉတႅၵ်ႈပၢင်ႇဝၢင်းၵျွင်းၽၢႆႇတၢင်းၼႂ်းယဝ်ႉတူဝ်ႈလီငၢမ်းယဝ်ႉၼၼ်ႉၸိုင်၊မၼ်းဢဝ်ၵဝ်ဢွၵ်ႇၵႂႃႇၸွမ်းသဵၼ်ႈတၢင်းၽၵ်းတူၽၢႆႇဝၼ်းဢွၵ်ႇၼၼ်ႉသေယဝ်ႉ၊တႅၵ်ႈၽႃဢၼ်လွမ်ႉႁွပ်ႈၽၢႆႇတၢင်းၼွၵ်ႈၼၼ်ႉဢေႃႈ။-
မၼ်းဢဝ်မႆႉတႅၵ်ႈၼၼ်ႉတႅၵ်ႈၽၢႆႇၼႃႈဝၼ်းဢွၵ်ႇလႄႈမီးႁႃႈ ပၢၵ်ႇသွၵ်ႇဢေႃႈ။-
ပိူဝ်ႈၼႆလႄႈၽႃဢၼ်လွမ်ႉၼၼ်ႉယေႈၼႃႈမီးႁႃႈပၢၵ်ႇသွၵ်ႇၼင်ႇၵၼ်ပဵၼ်ၼႃႈပဵင်းၵၼ်ဝႆႉဢေႃႈ။ ၽႃၼၼ်ႉပဵၼ်ၽႃဢၼ်မႅင်ႇၽႄဢွၵ်ႇတီႈဢၼ်မူတ်းၸၢင်ႇလႄႈတီႈဢၼ်ဢမ်ႇမူတ်းၸၢင်ႇၼၼ်ႉဢေႃႈ။
လိုၼ်းၼၼ်ႉမၼ်းႁွင်ႉဢဝ်ၵဝ်ၵႂႃႇၵႃႈတီႈၽၵ်းတူဢၼ်ဝၢႆႇၼႃႈၵႂႃႇၽၢႆႇတၢင်းဝၼ်းဢွၵ်ႇၼၼ်ႉသေယဝ်ႉ၊-
ၵဝ်ႁၼ်မုၼ်ၽုင်းၽြႃးပဵၼ်ၸဝ်ႈၵူၼ်းမဵဝ်း ဢိသရေး ၊ၼၼ်ႉလုၵ်ႉသေၵႃႈတီႈၽၢႆႇတၢင်းဝၼ်းဢွၵ်ႇမႃးလႄႈသဵင်မၼ်းပဵၼ်ၸိူဝ်ႉၼင်ႇသဵင်ၼမ်ႉသမ်ႇမုၵ်ႈတြႃႇၼၼ်ႉဢေႃႈ။ ၵွပ်ႈပိူဝ်ႈသၢႆဢရွင်ႇမၼ်းၸဝ်ႈၼၼ်ႉလႄႈၼႃႈလိၼ်မိူင်းႁိူဝ်ႈလႅင်းၵႂႃႇတင်းမူတ်းဢေႃႈ။-
ရူႇပႃႇရူင်ႇၼႆႉမိူၼ်ၵၼ်တင်းရူႇပႃႇရူင်ႇဢၼ်ၵဝ်လႆႈႁၼ်မိူဝ်ႈဢၼ်ၽြႃးပဵၼ်ၸဝ်ႈၵျွမႃးႁႂ်ႈလႆႈယႃႉလႅဝ်ပႅတ်ႈဝဵင်း ယေႇရုသလႅမ်ႇ၊ ဢိၵ်ႇတင်းရူႇပႃႇရူင်ႇဢၼ်ၵဝ်လႆႈႁၼ်ၵႃႈတီႈၼမ်ႉ ၶေႇပႃႇ၊ ၼၼ်ႉဢေႃႈ။ ၵဝ်ၵေႃႈၶုပ်ႉမူပ်ႇဢဝ်ၼႃႈၵဝ်ၸပ်းၵႃႈၼိူဝ်လိၼ်ဝႆႉဢေႃႈ။-
သၢႆဢရွင်ႇမုၼ်ၽုင်းၸဝ်ႈၼၼ်ႉၶဝ်ႈၸွမ်းသဵၼ်ႈတၢင်းၽၵ်းတူၽၢႆႇတၢင်းဝၼ်းဢွၵ်ႇၼၼ်ႉလႄႈၶဝ်ႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈဢေႃႈ။
မိူဝ်ႈၼၼ်ႉဝိၺိၺ်ႇ ထႃႇဝရႃႉၽြႃး၊ ဢုမ်ႈႁွပ်ႇဢဝ်ၵဝ်ၶဝ်ႈၸူးၵႃႈၼႂ်းပၢင်ႇဝၢင်းၵျွင်းၸၼ်ႉၼႂ်းလႄႈ၊တီႈၼၼ်ႈမုၼ်ၽုင်း ထႃႇဝရႃႉၽြႃး၊ တဵမ်ဝႆႉၵႃႈၼႂ်းၵျွင်းပိၵ်ႈမၢၼ်ႇၸဝ်ႈဢေႃႈ။-
ၵေႃႉၼၼ်ႉၸုၵ်းယူႇႁိမ်းၶၢင်ႈၵဝ်လႄႈ၊ၵဝ်လႆႈငိၼ်းသဵင်ဢၼ် ထႃႇဝရႃႉၽြႃး၊ ယူႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈလႄႈလၢတ်ႈတေႃႇၵဝ်လႄႈဝႃႈ၊-
“လုၵ်ႈၵူၼ်း႟။ ရႃႇၸႃႉပလၢင်ႇၵဝ်တႄႇယူႇၵႃႈတီႈၼႆႈဢေႃႈ။ ၵဝ်တၵ်းယူႇၵႃႈတီႈၼႆႈၵႃႈၼႂ်းၵူၼ်းမဵဝ်း ဢိသရေး၊ လႄႈဢုပ်ႉပိူင်ႇၵႃႈၼိူဝ်ၶဝ်တႃႇသေႇဢမ်ႇထၢတ်ႇဢေႃႈ။ ၵူၼ်းမဵဝ်း ဢိသရေး၊ တင်းလၢႆ၊ဢိၵ်ႇတင်းၶုၼ်ႁေႃၶမ်းၶဝ်ၸိူဝ်းၼၼ်ႉၵမ်းလိုၼ်းတၵ်းဢမ်ႇလႆႈဢဝ်ၼႃႇမႃႉၸိုဝ်ႈသဵင်မျၢတ်ႈၵဝ်တူၵ်းတီႈတႅမ်ႇလူၺ်ႈတၢင်းဢၼ်ၶဝ်ဝႆႈၽြႃးတၢင်ႇသူႇတၢင်ႇပႃးတင်းလၢႆဢိၵ်ႇတင်းလူၺ်ႈတၢင်းဢၼ်သၢင်းၵျူဝ်ႇတူဝ်တၢႆၶုၼ်ႁေႃၶမ်းၶဝ်ၸိူဝ်းၼၼ်ႉၵႃႈၼိူဝ်တီႈဢၼ်သုင်ၶဝ်တင်းလၢႆၼၼ်ႉ။-
ၼႂ်းလွင်ႈတၢင်းဢၼ်ၶဝ်တႄႇႁဵတ်းၶူင်ႇၽၵ်းတူၶဝ်၊ဢိၵ်ႇတင်းပူၵ်းသဝ်ၽၵ်းတူႁေႃၶဝ်သိုဝ်ႈၼႃႈၶူင်ႇၽၵ်းတူၵဝ်၊ဢိၵ်ႇတင်းသဝ်ၽၵ်းတူၵျွင်းပိၵ်ႈမၢၼ်ႇၵဝ်လႄႈမီးၽႃဢၼ်လဵဝ်ၵူၺ်းၶၼ်ႈဝူင်ႈၵၢင်ၵဝ်တင်းၶဝ်ဢေႃႈ။ ၶဝ်ဢဝ်လွင်ႈတၢင်းဢၼ်လီႁင်ႈဢဵတ်ႇသဵတ်ႇဢၼ်ၶဝ်ႁဵတ်းၸိူဝ်းၼၼ်ႉႁႂ်ႈၼႃႇမႃႉၸိုဝ်ႈသဵင်မျၢတ်ႈၵဝ်တူၵ်းတီႈတႅမ်ႇလႄႈၵဝ်ပႃးတင်းၸႂ်မႆႈၶႂ်ႈၸႃႉသေယဝ်ႉ၊ယႃႉၽဵဝ်ႈၶဝ်ပႅတ်ႈယဝ်ႉ။-
မိူဝ်ႈလဵဝ်ၼႆႉၸမ်ႉ၊ၶဝ်တၵ်းလႆႈၵိုတ်းပႅတ်ႈဝႆႉသေတၢင်းဢၼ်ဝႆႈၽြႃးတၢင်ႇသူႇတၢင်ႇပႃးတင်းလၢႆ၊ဢိၵ်ႇတင်းၶၢႆႉတူဝ်တၢႆၶုၼ်ႁေႃၶမ်းၶဝ်ၸိူဝ်းၼၼ်ႉသေၵႃႈတီႈၵဝ်ၵႆၵႆဢေႃႈ။ ပေႃးၶဝ်ႁဵတ်းၸိုင်၊ၵဝ်တၵ်းယူႇၵႃႈၼႂ်းၵၢင်ၶဝ်တႃႇသေႇဢမ်ႇထၢတ်ႇဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သိုပ်ႇလၢတ်ႈထႅင်ႈလႄႈဝႃႈ၊ “လုၵ်ႈၵူၼ်း႟။ မွၵ်ႇလၢတ်ႈလွင်ႈၵျွင်းပိၵ်ႈမၢၼ်ႇၸဝ်ႈတီႈၵူၼ်းမဵဝ်း ဢိသရေး၊ တင်းလၢႆသေလႄႈႁႂ်ႈၶဝ်တႅၵ်ႈတူၺ်းပုင်ႇႁၢင်ႈမၼ်းတႃႉ။ ႁဵတ်းႁႂ်ႈၶဝ်လႆႈဢူၵ်းဢၢႆၵွပ်ႈပိူဝ်ႈဢပျတ်ႈတုၸရိူၵ်ႈၶဝ်တႃႉ။-
ပေႃးၶဝ်ဢူၵ်းဢၢႆၵွပ်ႈပိူဝ်ႈဢပျတ်ႈတုၸရိူၵ်ႈၶဝ်တႄႉတႄႉယဝ်ႉၸိုင်၊မွၵ်ႇလၢတ်ႈၼႄပျႃးပုင်ႇၸၢမ်ႇၵျွင်းပိၵ်ႈမၢၼ်ႇၸဝ်ႈတီႈၶဝ်၊လူၺ်ႈလွင်ႈပုင်ႇႁၢင်ႈမၼ်း၊ႁူးၽၵ်းတူဢၼ်ဢွၵ်ႇဢၼ်ၶဝ်ႈမၼ်း၊ႁၢင်ႈၽၢင်ၽၢႆႇပႃႈၼွၵ်ႈမၼ်း၊တၢင်းဢၼ်ၶပ်ႉၸႅၼ်ႇတမ်းဝၢင်းၶိူင်ႈပိူင်မၼ်းၵူႈၸိူဝ်ႉၵူႈပိူင်၊ဢိၵ်ႇတင်းထုင်းၽိင်ႈတြႃးမၼ်းဢၼ်ၸီႇယၢင်ႇႁဵတ်းထုင်းဝႆႉၵႃႈမီးၼၼ်ႉသေယဝ်ႉ၊တႅမ်ႈမၢႆလွင်ႈတၢင်းၸိူဝ်းၼႆႉတင်းသဵင်ႈတင်းလူင်ဝႆႉပုၼ်ႈၶဝ်ႁႂ်ႈၶဝ်လႆႈႁုလႆႈႁၼ်ၵႃႈဢၼ်သၢင်ႈႁဵတ်းၶိုင်ပွင်ဝႆႉၼၼ်ႉသေလႄႈႁႂ်ႈၶဝ်ၸၢင်ႈၵမ်ၵျၢင်ႉၸွမ်းထုင်းတြႃးမၼ်းၸေးၸေးတႃႉ။-
ပိင်းၺၢပ်ႈတြႃးၵျွင်းပိၵ်ႈမၢၼ်ႇၸဝ်ႈၸမ်ႉ၊ၵႃႈတီႈလႅၼ်လိၼ်ႁွပ်ႈႁွပ်ႈၵျွင်းပိၵ်ႈမၢၼ်ႇၸဝ်ႈၵႃႈၼိူဝ်ပၢႆၸိၵ်းလွႆၼၼ်ႉပဵၼ်တီႈဢၼ်မူတ်းၸၢင်ႇၼႃႇလူင်လၢင်ဢေႃႈဢေႃႈ။
“တၢင်းယႂ်ႇတၢင်းၵႂၢင်ႈၶဵင်ႇတၢင်းလူႇၸမ်ႉ၊ဢဝ်မႆႉတႅၵ်ႈဢၼ်တႅၵ်ႈၵျွင်းပိၵ်ႈမၢၼ်ႇၼၼ်ႉတႅၵ်ႈလႄႈ၊ၶွပ်ႇတိၼ်မၼ်းမီးသွၵ်ႇၼိုင်ႈ၊ၼႃႈၵႂၢင်ႈမၼ်းမီးသွၵ်ႇၼိုင်ႈ၊တၢင်းၵႂၢင်ႈၶွပ်ႇႁိမ်းၽၢႆႇၼွၵ်ႈမၼ်းမီးၶိုပ်ႈၼိုင်ႈဢေႃႈ။
ၵႃႈတီႈႁၢၼ်ႉလိၼ်ၶဵင်ႇတၢင်းလူႇၼၼ်ႉလုၵ်ႉသေၵႃႈတီႈလိၼ်တေႃႇထိုင်ႁၢၵ်ႈႁၢၼ်ႉၵၢင်ၼၼ်ႉသုင်သွင်သွၵ်ႇဢေႃႈ။ ထႅင်ႈႁၢၼ်ႉၼိုင်ႈၼၼ်ႉလုၵ်ႉသေၵႃႈတီႈၶွပ်ႇႁိမ်းမၼ်းလဵၵ်ႉလူင်းၵႂႃႇသွၵ်ႇၼိုင်ႈပၼ်ႇမူၼ်းလႄႈတၢင်းသုင်မၼ်းမီးသီႇသွၵ်ႇဢေႃႈ။ သမ်ႉထႅင်ႈႁၢၼ်ႉၼိုင်ႈၼၼ်ႉၵေႃႈ လုၵ်ႉသေၵႃႈတီႈၶွပ်ႇႁိမ်းမၼ်းလဵၵ်ႉလူင်းၵႂႃႇသွၵ်ႇၼိုင်ႈပၼ်ႇမူၼ်းဢေႃႈ။-
ႁၢၼ်ႉသုင်သုတ်းတီႈဢၼ်ႁဵတ်းတၢင်းလူႇဢၼ်ၽဝ်ၽႆးၵေႃႈတၢင်းသုင်မၼ်းမီးသီႇသွၵ်ႇၼင်ႇၵဝ်ႇဢေႃႈ။ ႁူဝ်ၸဵင်ႇမၼ်းတင်းသီႇၽၢႆႇၼၼ်ႉလႅမ်ၶိုၼ်ႈသုင်သေၼႃႈမၼ်းႁႂ်ႈပဵၼ်ၶဝ်လႅမ်ဝႆႉဢေႃႈ။-
ၼႃႈၶဵင်ႇတၢင်းလူႇၸဝ်ႈၼၼ်ႉပဵၼ်သီႇၸဵင်ႇပဵင်းၵၼ်ဝႆႉလႄႈယေႈၽၢႆႇမီးသိပ်းသွင်သွၵ်ႇၼင်ႇၵၼ်ဢေႃႈ။-
ႁၢၼ်ႉၵၢင်ၵေႃႈပဵၼ်သီႇၸဵင်ႇပဵင်းၵၼ်ၼင်ႇၵဝ်ႇလႄႈယေႈၽၢႆႇမီးသိပ်းသီႇသွၵ်ႇၼင်ႇၵၼ် ဢၼ်ပႃးၶွပ်ႇႁိမ်းမၼ်းသုင်ၶိုပ်ႈၼိုင်ႈဢေႃႈ။ ၶူင်ႇႁၢၼ်ႉတိၼ်မၼ်းပႅၼ်ဢွၵ်ႇၵူႈၼႃႈသွၵ်ႇၼိုင်ႈလဵပ်ႈႁွပ်ႈဢေႃႈ။ ၶူဝ်လႆဢၼ်ၶိုၼ်ႈၸူးတီႈၶဵင်ႇတၢင်းလူႇၸဝ်ႈၼၼ်ႉမီးၽၢႆႇဝၼ်းဢွၵ်ႇဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉတီႈၵဝ်လႄႈဝႃႈ၊ “လုၵ်ႈၵူၼ်း႟။ ၵႃႈဢၼ်ၵဝ်သင်ႇလၢတ်ႈတီႈမႂ်းၼၼ်ႉထွမ်ႇလီလီတႃႉ။ မိူဝ်ႈဢၼ်တႄႇႁဵတ်းၶဵင်ႇတၢင်းလူႇယဝ်ႉတူဝ်ႈလီငၢမ်းၼၼ်ႉမႂ်းတၵ်းလႆႈဢဝ်သၢၵ်ႈၵၢပ်ႈလူၺ်ႈၶိူင်ႈတၢင်းလူႇဢၼ်ၽဝ်ၽႆးၵႃႈၼိူဝ်ၶဵင်ႇတၢင်းလူႇၼၼ်ႉ၊ဢိၵ်ႇတင်းဢဝ်လိူတ်ႈတူဝ်တၢင်းလူႇဢၼ်သၢၵ်ႈလူႇၼၼ်ႉၽႅတ်းသႂ်ႇၶဵင်ႇတၢင်းလူႇၼၼ်ႉဢေႃႈ။-
ယဵၸ်ႈပရေႃးႁဵၵ်ႈ ၸိူဝ်းဢၼ်ပဵၼ်ၸိူဝ်ႉၶိူဝ်းမဵဝ်း လေႇဝိ၊ လုၵ်ႈလၢၼ် ၸႃႇတုၵ်ႉ၊ ၼၼ်ႉၵူၺ်း၊မီးဢၶႂၢင်ႉဢၼ်လႆႈၶဝ်ႈၸူးၽၢႆႇၼႃႈၵဝ်လႄႈၵိုတ်ႉႁၢပ်ႇၼႃႈၵၢၼ်ၵဝ်ဢေႃႈ။ ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ။ မႂ်းတၵ်းလႆႈဢဝ်ဝူဝ်းပေႃႈၼုမ်ႇတူဝ်ၼိုင်ႈပၼ်ႁႂ်ႈၶဝ်ႁဵတ်းတၢင်းလူႇဢၼ်ၽေႇဢပျတ်ႈဢေႃႈ။-
မႂ်းတၵ်းလႆႈဢဝ်လိူတ်ႈမၼ်းၵမ်ႈၽွင်ႈတႃးၶဝ်လႅမ်ၸိူဝ်းဢၼ်မီးတီႈၸဵင်ႇၶဵင်ႇတၢင်းလူႇၼၼ်ႉ၊ဢိၵ်ႇတင်းၵႃႈတီႈသီႇၸဵင်ႇႁၢၼ်ႉၵၢင်တင်းၶွပ်ႇႁိမ်းမၼ်းႁွပ်ႈႁွပ်ႈၼၼ်ႉဢေႃႈ။ ၼင်ႇၼၼ်လႄႈမႂ်းတၵ်းႁဵတ်းႁႂ်ႈၶဵင်ႇတၢင်းလူႇမူတ်းၸၢင်ႇဢေႃႈ။-
မႂ်းတၵ်းလႆႈဢဝ်ဝူဝ်းပုၼ်ႈတူဝ်တၢင်းလူႇဢၼ်ၽေႇဢပျတ်ႈၼၼ်ႉလႄႈဢဝ်ၽဝ်ၽႆးၵႃႈတီႈတီႈဢၼ်မၵ်းၶၢၼ်းဝႆႉၽၢႆႇၼွၵ်ႈဝၢင်းၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။-
ၼႂ်းဝၼ်းမိူဝ်ႈၽုၵ်ႈၼၼ်ႉမႂ်းတၵ်းလႆႈဢဝ်ပႄႉပေႃႈတူဝ်ၼိုင်ႈဢၼ်ဢမ်ႇမီးတီႈၸိတီႈၼႄးၼၼ်ႉသၢၵ်ႈလူႇႁႂ်ႈပဵၼ်ၶိူင်ႈတၢင်းလူႇဢၼ်ၽေႇဢပျတ်ႈၼၼ်ႉဢေႃႈ။ ဢဝ်လိူတ်ႈပႄႉၼၼ်ႉႁဵတ်းႁႂ်ႈၶဵင်ႇတၢင်းလူႇမူတ်းၸၢင်ႇမိူၼ်ၸိူဝ်ႉၼင်ႇဢၼ်မႂ်းဢဝ်ဝူဝ်းသေလႄႈႁဵတ်းႁႂ်ႈမူတ်းၸၢင်ႇၼၼ်ႉတႃႉ။-
မိူဝ်ႈဢၼ်မႂ်းႁဵတ်းၸိူဝ်းၼႆႉယဝ်ႉၼၼ်ႉမႂ်းတၵ်းလႆႈဢဝ်ဝူဝ်းပေႃႈၼုမ်ႇ၊ဢိၵ်ႇတင်းသူဝ်းပေႃႈၼုမ်ႇဢၼ်ဢမ်ႇမီးတီႈၸိတီႈၼႄးၼၼ်ႉလႄႈ၊-
ဢဝ်မႃးၵႃႈတီႈၵဝ်ဢေႃႈ။ ယဵၸ်ႈပရေႃးႁဵၵ်ႈၸိူဝ်းၼၼ်ႉတၵ်းဢဝ်ၵိူဝ်ၽွၵ်းသႂ်ႇသေလႄႈဢဝ်တူဝ်ၸိူဝ်းၼၼ်ႉၽဝ်ၽႆးႁႂ်ႈပဵၼ်ၶိူင်ႈတၢင်းလူႇတီႈၵဝ်ဢေႃႈ။-
မႂ်းတၵ်းလႆႈဢဝ်ပႄႉပေႃႈတူဝ်ၼိုင်ႈ၊ဝူဝ်းပေႃႈတူဝ်ၼိုင်ႈတင်းသူဝ်းပေႃႈတူဝ်ၼိုင်ႈဢၼ်ဢမ်ႇမီးတီႈၸိတီႈၼႄးၸိူဝ်းၼၼ်ႉႁဵတ်းတူဝ်တၢင်းလူႇဢၼ်ၽေႇဢပျတ်ႈၵူႈဝၼ်းၵူႈဝၼ်းၸဵတ်းဝၼ်းတဵမ်တဵမ်ဢေႃႈ။-
ၸဵတ်းဝၼ်းတဵမ်တဵမ်ယဵၸ်ႈပရေႃးႁဵၵ်ႈၸိူဝ်းၼၼ်ႉတၵ်းလႆႈႁဵတ်းႁႂ်ႈၶဵင်ႇတၢင်းလူႇမူတ်းၸၢင်ႇလႄႈႁႂ်ႈလႆႈမႄးႁဵတ်းမႄးႁႅၼ်းဝႆႉပုၼ်ႈဢၼ်တၵ်းသုင်းတၵ်းတိုဝ်းၵႂႃႇဢေႃႈ။-
လိုၼ်းသေၸေးၸဵတ်းဝၼ်းယဝ်ႉၼၼ်ႉ၊ဢဝ်ဝၼ်းတီႈပႅတ်ႇၵႂႃႇတၢင်းၼႃႈယဵၸ်ႈပရေႃးႁဵၵ်ႈၸိူဝ်းၼၼ်ႉတၵ်းလႆႈႁဵတ်းၶိူင်ႈတၢင်းလူႇဢၼ်တုတ်ႇၽႆးလႂ်၊ၶိူင်ႈတၢင်းလူႇမိၵ်ႈသႁႃႇယႃႉပုၼ်ႈၵူၼ်းတင်းလၢႆလႂ်၊ၵႃႈၼိူဝ်ၶဵင်ႇတၢင်းလူႇၼၼ်ႉဢေႃႈ။ မိူဝ်ႈၼၼ်ႉၵဝ်တၵ်းထုၵ်ႇၸႂ်ၵျိူၵ်ႈၸႂ်သူဢေႃႈ၊ဝႃႈၼင်ႇၼႆ၊ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ၊” ဝႃႈၼင်ႇၼႆဢေႃႈ။
ၵေႃႉၼၼ်ႉဢဝ်ၵဝ်ၵႂႃႇၸူးတီႈၽၵ်းတူၽၢႆႇတၢင်းၼွၵ်ႈဢၼ်မီးယူႇၵႃႈတီႈၽၢႆႇတၢင်းဝၼ်းဢွၵ်ႇၵျွင်းပိၵ်ႈမၢၼ်ႇၼၼ်ႉဢေႃႈ။ ၽၵ်းတူၼၼ်ႉဢိုတ်းႁပ်းဝႆႉလႄႈ၊-
ထႃႇဝရႃႉၽြႃး၊ မီးဢမိင်ႉတီႈၵဝ်လႄႈဝႃႈ၊ “ၽၵ်းတူၼႆႉတၵ်းလႆႈဢိုတ်းႁပ်းဝႆႉယူႇလႄႈဢမ်ႇလႆႈၽုၺ်ႇပိုတ်ႇလႃးလႃး။ ၵူၼ်းဢမ်ႇလႆႈၶဝ်ႈၵႃႈၼႂ်းမၼ်းသေၵေႃႉသေၵူၼ်း။ ၵွပ်ႈပိူဝ်ႈဝႃႈ၊ၵဝ် ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ လႆႈၶဝ်ႈၵႃႈၼႂ်းမၼ်းယဝ်ႉလႄႈ၊တၵ်းလႆႈဢိုတ်းႁပ်းဝႆႉယူႇဢေႃႈ။-
မီးၶုၼ်ၵေႃႉလဵဝ်ၵူၺ်း၊ၵွပ်ႈပိူဝ်ႈဢၼ်မၼ်းပဵၼ်ၸဝ်ႈပဵၼ်ၶုၼ်ၼၼ်ႉလႄႈမီးဢၶႂၢင်ႉလႆႈၼင်ႈၵႃႈၼႂ်းမၼ်းလႄႈၵိၼ်ၶူပ်းၵႃႈတီႈၽၢႆႇၼႃႈ ထႃႇဝရႃႉၽြႃး၊ ဢေႃႈ။ ၶုၼ်ၼၼ်ႉတၵ်းလႆႈၽႃႇလတ်းလုၵ်းလူင်ၸၼ်ႉၼႂ်းၼၼ်ႉလႄႈၶဝ်ႈၵႃႈတီႈႁူးၽၵ်းတူၼၼ်ႉသေယဝ်ႉ၊ၶိုၼ်းၸွမ်းသဵၼ်ႈတၢင်းၵဝ်ႇၵဝ်ႇၼၼ်ႉဢွၵ်ႇၵႂႃႇဢေႃႈ၊” ဝႃႈၼင်ႇၼႆဢေႃႈ။
လိုၼ်းၼၼ်ႉမၼ်းဢဝ်ၵဝ်ၽႃႇလတ်းၽၵ်းတူၽၢႆႇတၢင်းႁွင်ႇလႄႈၶဝ်ႈၸူးတီႈၽၢႆႇၼႃႈၵျွင်းပိၵ်ႈမၢၼ်ႇၸဝ်ႈဢေႃႈ။ ၵဝ်တူၺ်းႁၼ်သၢႆဢရွင်ႇမုၼ်ၽုင်း ထႃႇဝရႃႉၽြႃး၊ မီးတဵမ်ၵျွင်းပိၵ်ႈမၢၼ်ႇၸဝ်ႈယူႇလႄႈၵဝ်ၶုပ်ႉမူပ်ႇယူႇဢဝ်ၼႃႈၵဝ်ငူပ်ႉၸပ်းၵႃႈၼိူဝ်လိၼ်ဝႆႉဢေႃႈ။-
ထႃႇဝရႃႉၽြႃး၊ မီးဢမိင်ႉတီႈၵဝ်လႄႈဝႃႈ၊ “လုၵ်ႈၵူၼ်း႟။ မၢတ်ႈတွင်းဝႆႉၵႃႈဢၼ်မႂ်းႁၼ်၊ၵႃႈဢၼ်မႂ်းငိၼ်းၵူႈၸိူဝ်ႉၵူႈပိူင်ၼၼ်ႉတႃႉ။ ၵဝ်တၵ်းမွၵ်ႇလၢတ်ႈၼႄးလၢႆး၊ဢိၵ်ႇတင်းထုင်းတြႃးၵျွင်းပိၵ်ႈမၢၼ်ႇၸဝ်ႈၼၼ်ႉတီႈမႂ်းဢေႃႈ။ မၢတ်ႈတွင်းလွင်ႈဢၼ်ၽူႈလႂ်မီးဢၶႂၢင်ႉဢၼ်ၶဝ်ႈၶဝ်ႈဢွၵ်ႇဢွၵ်ႇၵျွင်းပိၵ်ႈမၢၼ်ႇၸဝ်ႈ၊ဢိၵ်ႇတင်းၽူႈလႂ်ဢမ်ႇမီးဢၶႂၢင်ႉၼၼ်ႉဝႆႉလီလီတႃႉ။
“မႂ်းတၵ်းလႆႈလၢတ်ႈဝႆႉတီႈၵူၼ်းမဵဝ်း ဢိသရေး ဢၼ်ၸၢင်ႈလုၵ်ႉၽိုၼ်ႉၸိူဝ်းၼၼ်ႉလႄႈဝႃႈ၊ ‘ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ၵူၼ်းမဵဝ်း ဢိသရေး၊ ၶဝ်႟။ ႁႂ်ႈလွင်ႈတၢင်းဢၼ်လီႁင်ႈဢဵတ်ႇသဵတ်ႇသူၼၼ်ႉသုတ်းသဵင်ႈႁၢႆဝၢႆးသေ၊ဝႃႈၼင်ႇၼႆဢေႃႈ။-
သူႁႂ်ႈၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ဢမ်ႇလႆႈၶၢမ်ႇတၢင်းဢၼ်ပၢတ်ႇပၢႆၼင်လႄႈဢၼ်ဢမ်ႇထွမ်ႇဢဝ်ၵႂၢမ်းၵဝ်ၼၼ်ႉၶဝ်ႈၵႃႈၼႂ်းတီႈဢၼ်မူတ်းၸၢင်ႇၸဝ်ႈ၊ႁဵတ်းႁႂ်ႈၵျွင်းပိၵ်ႈမၢၼ်ႇၸဝ်ႈလႆႈၵူဝ်ႈၵိူၵ်ႇၼႂ်းမိူဝ်ႈဢၼ်သူသၢၵ်ႈလူႇမၢၵ်ႇၶဝ်ႈႁူင်းၶဝ်ႈတီႈၵဝ်ဢၼ်ဝႃႈ၊ၵွၼ်ႈၶႆၵွၼ်ႈမၼ်း၊ဢိၵ်ႇတင်းလိူတ်ႈၼၼ်ႉယဝ်ႉ။ လိူဝ်သေၼၼ်ႉသူယႃႉပႅတ်ႈပတိၺိၺ်ႇတြႃးၵဝ်လူၺ်ႈလွင်ႈတၢင်းဢၼ်လီႁင်ႈဢဵတ်ႇသဵတ်ႇၵႃႈဢၼ်သူႁဵတ်းၼၼ်ႉယဝ်ႉ။-
သူယင်းဢမ်ႇပႂ်ႉဢမ်ႇထိင်းၶိူင်ႈပိူင်ဢၼ်မူတ်းၸၢင်ႇၵဝ်တင်းလၢႆလႄႈသူၶၢၼ်းၵူၼ်းတၢင်ႇၸိူဝ်ႉတၢင်ႇမဵဝ်းတင်းလၢႆ ႁႂ်ႈပႂ်ႉထိင်းထႃႇၼႃႉတီႈမူတ်းၸၢင်ႇၵဝ်ယဝ်ႉ။’
“ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ဢမ်ႇလႆႈၶၢမ်ႇတၢင်းဢၼ်ပၢတ်ႇပၢႆၼင်၊ဢၼ်ဢမ်ႇထွမ်ႇဢဝ်ၵႂၢမ်းၵဝ်ဢၼ်ယူႇၵႃႈၼႂ်းၵႄႈဝူင်ႈၵၢင်ၵူၼ်းမဵဝ်း ဢိသရေး ၸိူဝ်းၼၼ်ႉၵဝ်ဢမ်ႇပၼ်ဢၶႂၢင်ႉႁႂ်ႈၶဝ်လႆႈၶဝ်ႈၵႃႈၼႂ်းထႃႇၼႃႉတီႈမူတ်းၸၢင်ႇၵဝ်လႃးလႃး။ ဝႃႈၼင်ႇၼႆ၊ ထႃႇဝရႃႉၽြႃး၊ မီးဢမိင်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉတီႈၵဝ်လႄႈဝႃႈ၊ “ၵဝ်တၵ်းၸီႇယၢင်ႇပၼ်တၢမ်ႇတီႈၵူၼ်းမဵဝ်း လေႇဝိ၊ တင်းလၢႆႁူမ်ႈလူၺ်ႈၵၼ်တင်းၵူၼ်းမဵဝ်း ဢိသရေး၊ တင်းလၢႆၸိူဝ်းဢၼ်ဢွၵ်ႇသေၵႃႈတီႈၵဝ်ၵႂႃႇသေယဝ်ႉ၊ၵႂႃႇဝႆႈႁုၼ်ႇႁၢင်ႈသၢင်းထုတင်းလၢႆၼၼ်ႉဢေႃႈ။-
ၶဝ်တေမီးဢၶႂၢင်ႉဢၼ်ၵိုတ်ႉႁၢပ်ႇၼႃႈၵၢၼ်ၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼႂ်းတၢင်းဢၼ်ပႂ်ႉၽၵ်းတူလႂ်၊ၼႂ်းတၢင်းဢၼ်ထၢမ်းႁဵတ်းၵၢၼ်ဢမုၵႃႈၼႂ်းၵျွင်းပိၵ်ႈမၢၼ်ႇၸဝ်ႈလႂ်၊ၼႂ်းတၢင်းဢၼ်ႁႅမ်တူဝ်သတ်းဢၼ်ၵူၼ်းတင်းလၢႆတၵ်းသၢၵ်ႈလူႇၶိူင်ႈတၢင်းလူႇဢၼ်တုတ်ႇၽႆး၊ဢိၵ်ႇတင်းၶိူင်ႈတၢင်းလူႇတၢင်ႇမဵဝ်း၊ဢိၵ်ႇတင်းၼႂ်းတၢင်းဢၼ်ၸုၵ်းပႂ်ႉၵႃႈတီႈၽၢႆႇၼႃႈၵူၼ်းတင်းလၢႆႁႂ်ႈလႆႈၵိုတ်ႉႁၢပ်ႇၼႃႈၵၢၼ်ၸဝ်ႈပုၼ်ႈၵူၼ်းတင်းလၢႆဢေႃႈ။-
ၵွပ်ႈပိူဝ်ႈၶဝ်ဢွၼ်ႁူဝ်ၵူၼ်းမဵဝ်း ဢိသရေး၊ တင်းလၢႆဝႆႈႁုၼ်ႇႁၢင်ႈသၢင်းထုလႂ်လႄႈႁဵတ်းႁႂ်ႈၵူၼ်းတင်းလၢႆႁဵတ်းတုၸရိူၵ်ႈမႅၼ်ႈၼၼ်ႉ၊ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တိူင်ႇၵတိဝႆႉဝႃႈ၊တၵ်းပၼ်တၢမ်ႇဢပျတ်ႈတီႈၶဝ်ဢေႃႈ။-
ၶဝ်ဢမ်ႇလႆႈၵိုတ်ႉႁၢပ်ႇၼႃႈၵၢၼ်ၵႃႈတီႈၽၢႆႇၼႃႈၵဝ်ႁႂ်ႈလႆႈပဵၼ်ယဵၸ်ႈပရေႃးႁဵၵ်ႈ၊ ဢမ်ႇလႆႈၵႂႃႇၸမ်ၵၼ်တင်းထႃႇၼႃႉတီႈဢၼ်မူတ်းၸၢင်ႇ၊ဢမ်ႇလႆႈၶဝ်ႈၵႃႈၼႂ်းထႃႇၼႃႉတီႈဢၼ်မူတ်းၸၢင်ႇသေပိူၼ်ႈၼၼ်ႉ၊ဢၼ်ၼႆႉၸမ်ႉ၊ပဵၼ်တၢမ်ႇဢပျတ်ႈတီႈလွင်ႈတၢင်းဢၼ်လီႁင်ႈဢဵတ်ႇသဵတ်ႇဢၼ်ၶဝ်ႁဵတ်းၼၼ်ႉယဝ်ႉ။-
ၵဝ်တၵ်းၸႂ်ႉၶဝ်ၵိုတ်ႉႁၢပ်ႇၵၢၼ်ယွႆႈၵၢၼ်ယႅမ်းဢၼ်လူဝ်ႇႁဵတ်းလူဝ်ႇသၢင်ႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉၵူၺ်းဢေႃႈ၊ဝႃႈၼင်ႇၼႆ ထႃႇဝရႃႉၽြႃး၊ မီးဢမိင်ႉဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ယဵၸ်ႈပရေႃးႁဵၵ်ႈၸိူဝ်းဢၼ်ပဵၼ်ၸိူဝ်ႉၶိူဝ်းမဵဝ်း လေႇဝိ၊ လႄႈပဵၼ်လုၵ်ႈလၢၼ် ၸႃႇတုၵ်ႉ ၊ၼၼ်ႉဢွၼ်ၵၼ်ပႃးတင်းသဵတ်ႈၸႃႇလႄႈၵိုတ်ႉႁၢပ်ႇၼႃႈၵၢၼ်ၵႃႈၼႂ်းၵျွင်းပိၵ်ႈမၢၼ်ႇၸဝ်ႈ ၼႂ်းမိူဝ်ႈဢၼ်ၵူၼ်းမဵဝ်း ဢိသရေး၊ တင်းလၢႆဝၢႆႇလင်ဢွၵ်ႇသေၵႃႈတီႈၵဝ်ၵႂႃႇၼၼ်ႉဢေႃႈ။ ပိူဝ်ႈၼႆလႄႈ၊မိူဝ်ႈလဵဝ်ၼႆႉၶဝ်ၸိူဝ်းၼႆႉၵူၺ်းတၵ်းလႆႈၵိုတ်ႉႁၢပ်ႇၼႃႈၵၢၼ်ၵဝ်၊လႆႈသုတ်ႉၸပ်းသုတ်ႉၸူးၵႃႈတီႈၽၢႆႇၼႃႈၵဝ် ႁႂ်ႈလႆႈသၢၵ်ႈလူႇၶိူင်ႈတၢင်းလူႇၵွၼ်ႈၶႆၵွၼ်ႈမၼ်းဢိၵ်ႇတင်းလိူတ်ႈၵႃႈတီႈၵဝ်ဢေႃႈ။-
ၶဝ်ၸိူဝ်းၼႆႉၵူၺ်းတၵ်းလႆႈၶဝ်ႈၵႃႈၼႂ်းၵျွင်းပိၵ်ႈမၢၼ်ႇၵဝ်၊ၵိုတ်ႉႁၢပ်ႇၼႃႈၵၢၼ်ၶဵင်ႇတၢင်းလူႇၵဝ်၊ဢိၵ်ႇတင်းတၢင်းဢၼ်ဢွၼ်ႁူဝ်ႁဵတ်းဝၢတ်ႈၵူဝ်းၵႂၢႆႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈဢေႃႈ။-
မိူဝ်ႈဢၼ်ၶဝ်ၶဝ်ႈၵႃႈၼႂ်းၽၵ်းတူပၢင်ႇဝၢင်းၵျွင်းၸၼ်ႉၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉၶဝ်တၵ်းလႆႈၼုင်ႈၶူဝ်းၽႃႈပၢၼ်ႇဢေႃႈ။ ၼႂ်းမိူဝ်ႈဢၼ်ၶဝ်ၵိုတ်ႉႁၢပ်ႇၼႃႈၵၢၼ်ၸဝ်ႈၵႃႈၼႂ်းပၢင်ႇဝၢင်းၵျွင်းသေဢမ်ႇဝႃႈ၊ၵႃႈၼႂ်းၵျွင်းပိၵ်ႈမၢၼ်ႇၸဝ်ႈသေဢမ်ႇဝႃႈ၊ၶဝ်ဢမ်ႇလႆႈၼုင်ႈၶူဝ်းၶူၼ်သူဝ်း။-
ၼင်ႇႁိုဝ်ၶဝ်တၵ်းဢမ်ႇလႆႈဢွၵ်ႇႁိူဝ်ႇၸိုင်၊တၵ်းလႆႈတိုဝ်းမွၵ်ႇႁူဝ်ၽႃႈပၢၼ်ႇ၊ၼုင်ႈၵူၼ်ၽႃႈပၢၼ်ႇဢေႃႈ။ ၵူၺ်းၵႃႈ၊တၵ်းဢမ်ႇလႆႈႁတ်ႉသၢႆဢႅဝ်။-
ၸူဝ်ႈဢၼ်ၶဝ်ဢမ်ႇပႆႇဢွၵ်ႇၵႂႃႇၵႃႈတီႈပၢင်ႇဝၢင်းၵျွင်းၸၼ်ႉၼွၵ်ႈတီႈဢၼ်ၵူၼ်းတင်းလၢႆမီးယူႇၼၼ်ႉၶဝ်တၵ်းလႆႈထွတ်ႇလွၼ်ႈၶူဝ်းၼုင်ႈဢၼ်ၶဝ်ၼုင်ႈၼႂ်းမိူဝ်ႈဢၼ်ၶဝ်ၵိုတ်ႉႁၢပ်ႇၼႃႈၵၢၼ်ၸဝ်ႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉသေယဝ်ႉ၊ဢဝ်ဝႆႉၵႃႈၼႂ်းလုၵ်းဢၼ်မူတ်းၸၢင်ႇၸိူဝ်းၼၼ်ႉဢေႃႈ။ ၶဝ်တၵ်းလႆႈၼုင်ႈၶူဝ်းၼုင်ႈတၢင်ႇၽိုၼ်ပုၼ်ႈလွင်ႈၼင်ႇႁိုဝ်ၶူဝ်းၼုင်ႈဢၼ်မူတ်းၸၢင်ႇၶဝ်ၼၼ်ႉတၵ်းဢမ်ႇလႆႈႁဵတ်းႁႂ်ႈၵူၼ်းတင်းလၢႆ၊လႆႈမူတ်းၸၢင်ႇၼၼ်ႉဢေႃႈ။
“ယဵၸ်ႈပရေႃးႁဵၵ်ႈဢမ်ႇလႆႈထႃႁူဝ်။ ဢမ်ႇလႆႈဝႆႉၶူၼ်ႁူဝ်ယၢဝ်း။ တၵ်းလႆႈၵႅတ်းႁႆးဝႆႉလီလီငၢမ်းငၢမ်းဢေႃႈ။-
ယဵၸ်ႈပရေႃးႁဵၵ်ႈဢမ်ႇလႆႈၵိၼ်ၼမ်ႉမၢၵ်ႇၸပိတ်ႉၸူဝ်ႈဢၼ်ဢမ်ႇပႆႇၶဝ်ႈၵႃႈၼႂ်းပၢင်ႇဝၢင်းၵျွင်းၸၼ်ႉၼႂ်းၼၼ်ႉ။-
ယဵၸ်ႈပရေႃးႁဵၵ်ႈဢမ်ႇလႆႈဢဝ်မႄႈႁၢင်ႉ၊မႄႈမၢႆႈမႃးႁဵတ်းမေးမၼ်း။ ၶဝ်တၵ်းလႆႈဢဝ်ၵၼ်တင်းသၢဝ်ၵၼ်ႇၺႃႇမဵဝ်း ဢိသရေး၊ ၵူၺ်း ဢမ်ႇၼၼ်ၵေႃႈဢဝ်ၵၼ်တင်းမႄႈမၢႆႈဢၼ်ယၢမ်ႈပဵၼ်မေးယဵၸ်ႈပရေႃးႁဵၵ်ႈတၢင်ႇၵေႃႉၼၼ်ႉၵူၺ်းဢေႃႈ။
“ယဵၸ်ႈပရေႃးႁဵၵ်ႈ တၵ်းလႆႈဢွၼ်ၵၼ်သွၼ်ပၼ်ႁႂ်ႈၵူၼ်းၵဝ်တင်းလၢႆၸၵ်းၽႄလွင်ႈတၢင်းဢၼ်မူတ်းၸၢင်ႇလႂ်၊လွင်ႈတၢင်းဢၼ်ဢမ်ႇမူတ်းၸၢင်ႇလႂ်၊ဢိၵ်ႇတင်းႁႂ်ႈၶဝ်ႁုလွင်ႈတၢင်းဢၼ်မူတ်းသႂ်ၸွမ်းၼင်ႇၽႃႇသႃႇတြႃးလႂ်၊တင်းလွင်ႈတၢင်းဢၼ်ဢမ်ႇမူတ်းသႂ်လႂ်ၼၼ်ႉဢေႃႈ။-
ၼႂ်းမိူဝ်ႈဢၼ်မီးတၢင်းဢၼ်တၢင်ႇဢမုသႂ်ႇၵၼ်ၼၼ်ႉယဵၸ်ႈပရေႃးႁဵၵ်ႈၶဝ်တၵ်းလႆႈတႅပ်းတတ်းဢမုၼၼ်ႉၸွမ်းၼင်ႇထုင်းၸၢမ်ႇဢုပတေႇၵဝ်ဢေႃႈ။ ၶဝ်တၵ်းလႆႈပႂ်ႉၸွမ်းႁဵတ်းၸွမ်းပွႆးထမ်ႇမႃႉတင်းလၢႆ မႅၼ်ႈၸွမ်းၼႄးလၢႆးမၼ်း၊ဢိၵ်ႇတင်းထုင်းၽိင်ႈတြႃးမၼ်းၸိူဝ်းၼၼ်ႉသေလႄႈ၊ၶဝ်တၵ်းလႆႈပႂ်ႉဝၼ်းၵမ်သိၼ်ၵဝ်တင်းလၢႆႁႂ်ႈမူတ်းၸၢင်ႇဢေႃႈ။
“ယဵၸ်ႈပရေႃးႁဵၵ်ႈတၵ်းဢမ်ႇလႆႈႁႂ်ႈႁွတ်ႈထိုင်တၢင်းၵူဝ်ႈၵိူၵ်ႇလူၺ်ႈတၢင်းဢၼ်တိူဝ်ႉထုၵ်ႇတူဝ်တၢႆ။ ၵူၺ်းၵႃႈ၊မီးဢၶႂၢင်ႉဢၼ်ႁႂ်ႈတူဝ်ၸဝ်ႈၵဝ်ႇၵူဝ်ႈၵိူၵ်ႇၵွပ်ႈလူၺ်ႈတူဝ်တၢႆပေႃႈမႄႈမၼ်း၊လုၵ်ႈလၢင်းမၼ်း၊ပီႈဢၢႆႈၼွင်ႉၸၢႆးမၼ်းဢမ်ႇၼၼ်ၵေႃႈၼွင်ႉယိင်းမၼ်းဢၼ်ယင်းပဵၼ်သၢဝ်ယူႇၼၼ်ႉၵူၺ်းဢေႃႈ။-
မၼ်းတေလႆႈႁဵတ်းတၢင်းဢၼ်ၶိုၼ်းမူတ်းသႂ်သေယဝ်ႉ၊တၵ်းလႆႈပႂ်ႉယူႇၸဵတ်းဝၼ်းတဵမ်တဵမ်။-
ႁႂ်ႈမၼ်းၶဝ်ႈၵႃႈၼႂ်းပၢင်ႇဝၢင်းၸၼ်ႉၼႂ်းၵျွင်းပိၵ်ႈမၢၼ်ႇၸဝ်ႈလႄႈသၢၵ်ႈလူႇၶိူင်ႈတၢင်းလူႇဢၼ်ႁႂ်ႈတူဝ်ၸဝ်ႈၵဝ်ႇမူတ်းၸၢင်ႇၼၼ်ႉဢေႃႈ။ လိုၼ်းၼၼ်ႉ၊မၼ်းၶိုၼ်းလႆႈဢၶႂၢင်ႉဢၼ်ၵိုတ်ႉႁၢပ်ႇၼႃႈၵၢၼ်ၵႃႈၼႂ်းၵျွင်းပိၵ်ႈမၢၼ်ႇၸဝ်ႈဢေႃႈ။ ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ။
“တၢင်းဢၼ်ပဵၼ်ယဵၸ်ႈပရေႃးႁဵၵ်ႈၼၼ်ႉပဵၼ်ဢမူၺ်ႇဢၼ်ၵဝ်ပၼ်တီႈၶဝ်ႁႂ်ႈသိုပ်ႇၵႂႃႇၸူဝ်ႈလုၵ်ႈပၢၼ်လၢၼ်သိုပ်ႇသိုပ်ႇတၢမ်တၢမ်ၼၼ်ႉယဝ်ႉ။ ၶဝ်ဢမ်ႇလူဝ်ႇသိမ်းပႅင်းဢမူၺ်ႇဢုၵ်ႉၸႃႇၵႃႈၼႂ်းမိူင်း ဢိသရေး၊ ၵဝ်ပဵၼ်ဢမူၺ်ႇဢုၵ်ႉၸႃႇၵႃႈဢၼ်ၶဝ်လူဝ်ႇၼၼ်ႉဢေႃႈ။-
ၶိူင်ႈတၢင်းလူႇမၢၵ်ႇၶဝ်ႈႁူင်းၶဝ်ႈလႂ်၊ၶိူင်ႈတၢင်းလူႇဢၼ်ၽေႇဢပျတ်ႈလႂ်၊ဢိၵ်ႇတင်းၶိူင်ႈတၢင်းလူႇဢၼ်ၽေႇပၼ်တၢင်းၽိတ်းပိူင်ႈတုၸရိူၵ်ႈလႂ်ၸိူဝ်းၼၼ်ႉတၵ်းလႆႈပဵၼ်တၢင်းၵိၼ်တၢင်းၶူပ်းယဵၸ်ႈပရေႃးႁဵၵ်ႈၶဝ်ဢေႃႈ။ ၶဝ်သမ်ႉတၵ်းလႆႈႁပ်ႉတုင်းဢဝ်ၵႃႈဢၼ်မဵဝ်း ဢိသရေး၊ ၸတ်းဝႆႉပုၼ်ႈၵဝ်ၼၼ်ႉၵူႈၸိူဝ်ႉၵူႈပိူင်ဢေႃႈ။-
ယဵၸ်ႈပရေႃးႁဵၵ်ႈတၵ်းလႆႈၶၢမ်ႇဢဝ်မၢၵ်ႇၶဝ်ႈႁူင်းၼမ်ႉဢၼ်လီသေပိူၼ်ႈ ဢၼ်ပၢတ်ႇဢဝ်ဢွၼ်တၢင်းသုတ်းပိူၼ်ႈ၊ဢိၵ်ႇတင်းၶိူင်ႈပိူင်ၵူႈမဵဝ်းၵႃႈဢၼ်သၢၵ်ႈလူႇတီႈၵဝ်ၸိူဝ်းၼၼ်ႉဢေႃႈ။ မိူဝ်ႈဢၼ်ၵူၼ်းတင်းလၢႆ၊ၽဝ်ၶဝ်ႈမုၼ်းႁူၺ်ႇဢၼ်ၽဝ်ဢွၼ်တၢင်းသုတ်းပိူၼ်ႈၼၼ်ႉတေလႆႈပၼ်တီႈယဵၸ်ႈပရေႃးႁဵၵ်ႈႁႂ်ႈပဵၼ်ၶိူင်ႈတၢင်းလူႇဢေႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊တၢင်းလီမၢင်ႇၵလႃႇၵဝ်တၵ်းတူၵ်းႁွတ်ႈၵႃႈၼိူဝ်ႁိူၼ်းယေးၶဝ်ဢေႃႈ။-
ယဵၸ်ႈပရေႃးႁဵၵ်ႈတၵ်းဢမ်ႇလႆႈၵိၼ်ၼိူဝ်ႉၼူၵ်ႉလႂ်၊ဢမ်ႇၼၼ်ၵေႃႈတူဝ်သတ်းလႂ်ဢၼ်တၢႆၵူၺ်းမၼ်း၊ဢိၵ်ႇတင်းတူဝ်ဢၼ်တူဝ်ထိူၼ်ႇၶူပ်းလႄႈတၢႆၸိူဝ်းၼၼ်ႉ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
မိူဝ်ႈဢၼ်ၽႄမႅင်ႇပၼ်ဢမူၺ်ႇလိၼ်တီႈၸိူဝ်ႉၶိူဝ်းယေႈမဵဝ်းယေႈမဵဝ်းၼၼ်ႉတၵ်းလႆႈဢဝ်ၵႂၢၵ်ႈလိၼ်ၵႂၢၵ်ႈၼိုင်ႈသၢၵ်ႈၵၢပ်ႈပၼ်တီႈ ထႃႇဝရႃႉၽြႃး၊ ဢေႃႈ။ ၵႂၢၵ်ႈၼၼ်ႉၼႃႈယၢဝ်းမၼ်းတၵ်းလႆႈမီးသွင်မိုၼ်ႇႁႃႈႁဵင်သွၵ်ႇ၊ၼႃႈၵႂၢင်ႈမၼ်းမိုၼ်ႇၼိုင်ႈ ဢေႃႈ။ ၶွပ်ႇၼမ်ႉလႅၼ်လိၼ်မၼ်းတၵ်းပဵၼ်ဢၼ်မူတ်းၸၢင်ႇယူႇဢေႃႈ။-
ၵႃႈၼႂ်းလႅၼ်လိၼ်ၼၼ်ႉတၵ်းလႆႈမီးၵႂၢၵ်ႈလိၼ်သီႇၸဵင်ႇပဵင်းၵၼ်ၼၼ်ႉၵႂၢၵ်ႈၼိုင်ႈပုၼ်ႈၵျွင်းပိၵ်ႈမၢၼ်ႇၸဝ်ႈလႄႈယေႈၼႃႈတၵ်းလႆႈမီးႁႃႈပၢၵ်ႇသွၵ်ႇၼင်ႇၵၼ်ဢေႃႈ။ သမ်ႉတၵ်းလႆႈဝႆႉၵႂၢၵ်ႈလိၼ်ဢၼ်ပဝ်ႇဢၼ်လၢပ်ႈတၢင်းၵႂၢင်ႈႁွပ်ႈႁွပ်ႈမၼ်းမီးႁႃႈသိပ်းသွၵ်ႇၼၼ်ႉဢေႃႈ။-
လႅၼ်လိၼ်ၼၼ်ႉၶိုင်ႈၼိုင်ႈဢၼ်ၸွမ်းၽၢႆႇတၢင်းၼႃႈယၢဝ်းမၼ်းသွင်မိုၼ်ႇႁႃႈႁဵင်သွၵ်ႇၼၼ်ႉတၵ်းလႆႈတႅၵ်ႈလႄႈၸတ်းႁႂ်ႈၼႃႈၵႂၢင်ႈမၼ်းမီးႁႃႈႁဵင်သွၵ်ႇဝႆႉလႄႈၵျွင်းပိၵ်ႈမၢၼ်ႇၸဝ်ႈဢၼ်ဝႃႈ၊ထႃႇၼႃႉတီႈဢၼ်မူတ်းၸၢင်ႇသုတ်းလိူဝ်ပိူၼ်ႈတၵ်းလႆႈမီးၼႂ်းၼၼ်ႉဢေႃႈ။-
ၵႂၢၵ်ႈလိၼ်ၼၼ်ႉတၵ်းလႆႈပဵၼ်တီႈဢၼ်မူတ်းၸၢင်ႇတီႈဢၼ်ၸတ်းဝႆႉ ပုၼ်ႈယဵၸ်ႈပရေႃးႁဵၵ်ႈ ၸိူဝ်းဢၼ်ၵိုတ်ႉႁၢပ်ႇၼႃႈၵၢၼ် ထႃႇဝရႃႉၽြႃး ၊ၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။ ၵႃႈၼႂ်းလႅၼ်လိၼ်ၼၼ်ႉတၵ်းလႆႈမီးတီႈဢၼ်ၶဝ်တၵ်းႁဵတ်းႁိူၼ်းၶဝ် ဢိၵ်ႇတင်းတီႈဢၼ်တႄႇႁဵတ်းၵျွင်းပိၵ်ႈမၢၼ်ႇၸဝ်ႈဢေႃႈ။-
တီႈဢၼ်ၵိုတ်းယူႇၶိုင်ႈၼိုင်ႈၸွမ်းၼႃႈယၢဝ်းမၼ်းၼၼ်ႉတၵ်းလႆႈပဵၼ်ပုၼ်ႈတႃႇၵူၼ်း လေႇဝိ၊ ၸိူဝ်းဢၼ်ထၢမ်းႁဵတ်းၼႃႈၵၢၼ်ၸဝ်ႈၵႃႈၼႂ်းၵျွင်းပိၵ်ႈမၢၼ်ႇၼၼ်ႉတၵ်းပိူင်ႇဢဝ်ဢေႃႈ။ တၵ်းလႆႈပဵၼ်ဝဵင်းပုၼ်ႈတႃႇၶဝ်တၵ်းယူႇသဝ်းဢေႃႈ။
ၵႂၢၵ်ႈလိၼ်ဢၼ်ၸပ်းၽၢႆႇၶၢင်ႈထႃႇၼႃႉတီႈမူတ်းၸၢင်ႇၼၼ်ႉတၵ်းလႆႈၸတ်းဝႆႉႁႂ်ႈပဵၼ်လႅၼ်လိၼ်ဝဵင်းပုၼ်ႈဢၼ်ၵူၼ်းမဵဝ်း ဢိသရေး၊ တၵ်းယူႇသဝ်းဢေႃႈ။ ၸွမ်းၶၢင်ႈၼႃႈလိၼ်ၼၼ်ႉယၢဝ်းသွင်မိုၼ်ႇႁႃႈႁဵင်သွၵ်ႇလႄႈၼႃႈၵႂၢင်ႈတၵ်းလႆႈမီးႁႃႈႁဵင်သွၵ်ႇဢေႃႈ။
တၵ်းလႆႈၸတ်းပၼ်ၵႂၢၵ်ႈလိၼ်ပုၼ်ႈလုၵ်ႈၶုၼ်လုၵ်ႈၵွၼ်းဢေႃႈ။ တႄႇဢဝ်ၵႃႈတီႈၸဵင်ႇဝၼ်းတူၵ်းထႃႇၼႃႉတီႈဢၼ်မူတ်းၸၢင်ႇၼၼ်ႉၶႂၢၵ်ႈၵႂႃႇတေႃႇထိုင်ႁွတ်ႈပၢင်ႇလၢႆႇ မေႇတိထေးရီးယၼ်း၊ ဢိၵ်ႇတင်းတႄႇဢဝ်ၵႃႈတီႈၸဵင်ႇဝၼ်းဢွၵ်ႇတၵ်းလႆႈၶႂၢၵ်ႈၵႂႃႇတေႃႇထိုင်ႁွတ်ႈၸဵင်ႇဝၼ်းဢွၵ်ႇမိူင်းၸဝ်ႈၼၼ်ႉ၊ပုၼ်ႈလွင်ႈၼင်ႇႁိုဝ်ၼႃႈတၢင်းယၢဝ်းမၼ်းတၵ်းမိူၼ်ၵၼ်တင်းၼႃႈတၢင်းယၢဝ်းလႅၼ်လိၼ်ဢၼ်ၽႄမႅင်ႇႁႂ်ႈပဵၼ်ဢမူၺ်ႇတီႈၵူၼ်းမဵဝ်း ဢိသရေး၊ ၸွမ်းလူၺ်ႈၸိူဝ်ႉၶိူဝ်းၽႂ်ၸိူဝ်ႉၶိူဝ်းမၼ်းၼၼ်ႉဢေႃႈ။-
ၵႂၢၵ်ႈလိၼ်ၼၼ်ႉတၵ်းလႆႈပဵၼ်လႅၼ်လိၼ်ဢၼ်လုၵ်ႈၶုၼ်လုၵ်ႈၵွၼ်းၸိူဝ်းဢၼ်ဢုပ်ႉပိူင်ႇမိူင်းၸဝ်ႈၶဝ် တၵ်းပိူင်ႇၵႃႈၼႂ်းမိူင်း ဢိသရေး၊ ပုၼ်ႈလွင်ႈၼင်ႇႁိုဝ်ၵမ်းလိုၼ်းမၼ်းတၵ်းဢမ်ႇတဵၵ်းငႅၼ်းၶႃႈဝၢၼ်ႈၵူၼ်းမိူင်းလႄႈ တၵ်းပၼ်ႁႂ်ႈမိူင်းဢၼ်ၵိုတ်းဢၼ်ၵျၢၼ်ႇၼၼ်ႉပဵၼ်မိူင်းၵူၼ်းမဵဝ်း ဢိသရေး ၊ၸွမ်းလူၺ်ႈၸိူဝ်ႉၶိူဝ်းၽႂ်ၸိူဝ်ႉၶိူဝ်းမၼ်းၼၼ်ႉဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ၶုၼ်မိူင်း ဢိသရေး၊ ၶဝ်႟။ သူဢွၼ်ၵၼ်ႁဵတ်းတုၸရိူၵ်ႈမႃးႁိုင်ၼႃႇယဝ်ႉ။ ဢွၼ်ၵၼ်ၵိုတ်းပႅတ်ႈတၢင်းဢၼ်ႁဵတ်းႁၢဝ်ႈႁဵတ်းၵျၢမ်းတၢင်းဢၼ်တဵၵ်းငႅၼ်းပိူၼ်ႈၼၼ်ႉတႃႉ။ ၵမ်းလိုၼ်းယႃႇပေႁေႃႈၵူၼ်းၵဝ်တင်းလၢႆဢွၵ်ႇသေၵႃႈၼႂ်းမိူင်းၶဝ်ထႅင်ႈယဝ်ႉ။ ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉဝႆႉ ႁႂ်ႈသူၵမ်ၵျၢင်ႉၸိူဝ်ႉၼင်ႇၼႆယဝ်ႉ။-
“သူတၵ်းလႆႈဢွၼ်ၵၼ်သုင်းတိုဝ်းၶိူင်ႈၸင်ႈၶိူင်ႈႁိဝ်ႈဢၼ်မၢၼ်ႇဢၼ်မႅၼ်ႈ၊ဢိၵ်ႇတင်းၶိူင်ႈတူင်ၶိူင်ႈတႅၵ်ႈဢၼ်မၢၼ်ႇဢၼ်မႅၼ်ႈဢေႃႈ။
“ဢေးၽႃႇၼိုင်ႈဢၼ်တူင်မဵဝ်းဢၼ်ႁႅင်ႈၼၼ်ႉတၵ်းလႆႈတၢၼ်ႇၵၼ်ပဵင်းၵၼ်တင်းပတ်ႉ ဢၼ်တူင်ၼမ်ႉၼၼ်ႉဢေႃႈ။ သွင်ၸိူဝ်ႉသွင်ပိူင်ၼၼ်ႉတၵ်းလႆႈဢိင်ႁေႃးမႄး သေလႄႈ၊ၼိုင်ႈႁေႃးမႄးတၵ်းလႆႈမီးသိပ်းဢေးၽႃႇ၊ဢမ်ႇၼၼ်ၵေႃႈမီးသိပ်းပတ်ႉဢေႃႈ။
“တၢင်းၼၵ်းဢၼ်ၸင်ႈဢၼ်ႁိဝ်ႈၸမ်ႉ၊သၢဝ်းၵေးရႃႉမီးၼိုင်ႈၵျၢပ်ႈသၶေးလႃႉ ႁူၵ်းသိပ်းၵျၢပ်ႈသၶေးလႃႉမီးၼိုင်ႈမိၼႃးဢေႃႈ။
“ၶိူင်ႈတၢင်းလူႇဢၼ်သူတၵ်းလႆႈႁဵတ်းလႆႈႁႅၼ်းၸမ်ႉ၊ၶဝ်ႈသၢၼ်ၵျုင်ႇၵႃႈဢၼ်ဢွၵ်ႇၼႂ်းႁႆႈၼၼ်ႉႁူၵ်းသိပ်းပုၼ်ႈလူႇပုၼ်ႈၼိုင်ႈ။ ၶဝ်ႈသၢၼ်မုယေႃးဢၼ်ဢွၵ်ႇၼႂ်းႁႆႈႁူၵ်းသိပ်းပုၼ်ႈလူႇပုၼ်ႈၼိုင်ႈ။-
ၼမ်ႉမၼ်းမၢၵ်ႇသၢၼ်ႇလုၼ်ႇၵႃႈဢၼ်ဢိတ်ႇလႆႈၼၼ်ႉပၢၵ်ႇပုၼ်ႈလူႇပုၼ်ႈၼိုင်ႈဢေႃႈ။ တၵ်းလႆႈတူင်တႅၵ်ႈလူၺ်ႈပတ်ႉဢၼ်သိပ်းပတ်ႉမီးၼိုင်ႈႁေႃးမႄး၊ဢမ်ႇၼၼ်ၵေႃႈၼိုင်ႈၵေႃးရႃႉၼၼ်ႉဢေႃႈ။-
သူဝ်းၵေႃႈၼႂ်းသွင်ပၢၵ်ႇတူဝ်ၼၼ်ႉတၵ်းလႆႈလူႇယေႈတူဝ်ဢေႃႈ။ သူတၵ်းလႆႈပႃးဢဝ်ၶိူင်ႈတၢင်းလူႇမၢၵ်ႇၶဝ်ႈႁူင်းၶဝ်ႈလႂ်၊ၶိူင်ႈတၢင်းလူႇဢၼ်ၽဝ်ၽႆးတင်းတူဝ်လႂ်၊တူဝ်းသတ်းပုၼ်ႈၶိူင်ႈတၢင်းလူမိၵ်ႈသႁႃႇယႃႉလႂ်ၸိူဝ်းၼၼ်ႉ၊သၢၵ်ႈလူႇပုၼ်ႈဢပျတ်ႈသူတၵ်းလွတ်ႈၼၼ်ႉဢေႃႈ။ ၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ။
“ၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင်တၵ်းလႆႈဢွၼ်ၵၼ်ၽွမ်ႉၵၼ်တင်းၶုၼ်မိူင်း ဢိသရေး၊ ၼႂ်းတၢင်းဢၼ်ႁဵတ်းတၢင်းလူႇၼႆႉဢေႃႈ။-
ၶုၼ်ၼၼ်ႉတၵ်းလႆႈႁပ်ႉဢဝ်ပုၼ်ႈၽွၼ်းတၢင်းဢၼ်သၢၵ်ႈလူႇၶိူင်ႈတၢင်းလူႇဢၼ်ၽဝ်ၽႆးတင်းတူဝ်၊ၶိူင်ႈတၢင်းလူႇမၢၵ်ႇၶဝ်ႈႁူင်းၶဝ်ႈ၊ဢိၵ်ႇတင်းၶိူင်ႈတၢင်းလူႇဢၼ်သွၼ်းလေႃႇပုၼ်ႈၵူၼ်းမဵဝ်း ဢိသရေး၊ တင်းဝၢၼ်ႈတင်းမိူင်းၵႃႈၼႂ်းဝၼ်းပွႆးလိူၼ်မႂ်ႇ၊ၼႂ်းဝၼ်းၵမ်သိၼ်ဢိၵ်ႇတင်းၼႂ်းဝၼ်းပွႆးတၢင်ႇၸိူဝ်ႉတၢင်ႇမဵဝ်းၼၼ်ႉဢေႃႈ။ မၼ်းတၵ်းလႆႈသၢၵ်ႈလူႇၶိူင်ႈတၢင်းလူႇဢၼ်ၽေႇဢပျတ်ႈလႂ်၊ၶိူင်ႈတၢင်းလူႇမၢၵ်ႇၶဝ်ႈႁူင်းၶဝ်ႈလႂ်၊ၶိူင်ႈတၢင်းလူႇဢၼ်ၽဝ်ၽႆးတင်းတူဝ်လႂ်၊ဢိၵ်ႇတင်းၶိူင်ႈတၢင်းလူႇမိၵ်ႈသႁႃႇယႃႉလႂ်၊ႁႂ်ႈလႆႈၽေႇဢပျတ်ႈၵူၼ်းမဵဝ်း ဢိသရေး၊ တင်းလၢႆဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ၼႂ်းလိူၼ်တီႈၼိုင်ႈဝၼ်းတီႈၼိုင်ႈၼၼ်ႉသူတၵ်းလႆႈဢဝ်ဝူဝ်းပေႃႈၼုမ်ႇဢၼ်ဢမ်ႇမီးတီႈၸိတီႈၼႄးၼၼ်ႉတူဝ်ၼိုင်ႈသၢၵ်ႈလူႇပုၼ်ႈတၵ်းႁႂ်ႈၵျွင်းပိၵ်ႈမၢၼ်ႇၸဝ်ႈမူတ်းသႂ်ဢေႃႈ။-
ယဵၸ်ႈပရေႃးႁဵၵ်ႈ ၸိူဝ်းၼၼ်ႉတၵ်းလႆႈဢဝ်လိူတ်ႈတူဝ်တၢင်းလူႇဢၼ်ၽေႇဢပျတ်ႈၼၼ်ႉၵမ်ႈၽွင်ႈလႄႈတႃးသႂ်ႇၵႃႈတီႈသဝ်ၽၵ်းတူၵျွင်းပိၵ်ႈမၢၼ်ႇၸဝ်ႈ၊ၵႃႈတီႈသီႇၸဵင်ႇႁၢၼ်ႉလိၼ်ၶဵင်ႇတၢင်းလူႇ၊ဢိၵ်ႇတင်းၵႃႈတီႈသဝ်ၽၵ်းတူပၢင်ႇဝၢင်းၵျွင်းၸၼ်ႉၼႂ်းၸိူဝ်းၼၼ်ႉဢေႃႈ။-
ၼွၵ်ႈသေၼၼ်ႉၼႂ်းလိူၼ်ၼၼ်ႉလႆႈၸဵတ်းဝၼ်းၵေႃႈသူတၵ်းလႆႈႁဵတ်းမိူၼ်ၸိူဝ်ႉၼင်ႇၼၼ်ပုၼ်ႈၵေႃႉဢၼ်ဢမ်ႇလႆႈတင်ႈၸႂ်ႁဵတ်းလႄႈၽိတ်းပိူင်ႈ၊ဢိၵ်ႇတင်းၵေႃႉဢၼ်ဢမ်ႇႁုလႄႈၽိတ်းပိူင်ႈၼၼ်ႉ၊ၼႆႉပဵၼ်တၢင်းဢၼ်သုၵ်ႈသၢႆႇႁႂ်ႈၵျွင်းပိၵ်ႈမၢၼ်ႇၸဝ်ႈမူတ်းသႂ်ဢေႃႈ။
“ၼႂ်းလိူၼ်တီႈၼိုင်ႈလႆႈသိပ်းသီႇဝၼ်းၼၼ်ႉသူတၵ်းလႆႈႁဵတ်းပွႆး ပသၶႃႇ၊ ဢေႃႈ။ ၼႂ်းၸူဝ်ႈပွႆးၼၼ်ႉ၊ၸဵတ်းဝၼ်းတဵမ်တဵမ်တၵ်းလႆႈၵိၼ်ၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈၼၼ်ႉၵူၺ်းဢေႃႈ။-
ၼႂ်းဝၼ်းတႄႇၸႃႉပွႆးၼၼ်ႉ၊ၶုၼ်ဢၼ်ဢုပ်ႉပိူင်ႇၼၼ်ႉတၵ်းလႆႈဢဝ်ဝူဝ်းပေႃႈတူဝ်ၼိုင်ႈသၢၵ်ႈလူႇႁႂ်ႈပဵၼ်ၶိူင်ႈတၢင်းလူႇဢၼ်ၽေႇဢပျတ်ႈပုၼ်ႈတူဝ်ၸဝ်ႈၵဝ်ႇ၊ဢိၵ်ႇတင်းပုၼ်ႈၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင်ဢေႃႈ။-
ၼႂ်းဝၼ်းပွႆးၸဵတ်းဝၼ်းတဵမ်တဵမ်ၼၼ်ႉမၼ်းတၵ်းလႆႈဢဝ်ဝူဝ်းပေႃႈၸဵတ်းတူဝ်၊သူဝ်းပေႃႈၸဵတ်းတူဝ်ဢၼ်ဢမ်ႇမီးတီႈၸိတီႈၼႄးၼၼ်ႉႁဵတ်းၶိူင်ႈတၢင်းလူႇဢၼ်ၽဝ်ၽႆးတင်းတူဝ်ဢေႃႈ။ မၼ်းသမ်ႉတၵ်းလႆႈဢဝ်ပႄႉပေႃႈသၢၵ်ႈလူႇပဵၼ်ၶိူင်ႈတၢင်းလူႇဢၼ်ၽေႇဢပျတ်ႈယေႈဝၼ်းယေႈတူဝ်ဢေႃႈ။-
တၢင်းဢၼ်ႁဵတ်းတၢင်းလူႇဝူဝ်းပေႃႈယေႈတူဝ်လႄႈသူဝ်းပေႃႈယေႈတူဝ်ၼၼ်ႉတၵ်းလႆႈသၢၵ်ႈလူႇပႃးၶိူင်ႈတၢင်းလူႇမၢၵ်ႇၶဝ်ႈႁူင်းၶဝ်ႈ၊ၽွင်ၶဝ်ႈမုၼ်းၸဵတ်းပႄႇ၊ဢိၵ်ႇတင်းၶိူင်ႈတၢင်းလူႇဢၼ်သွၼ်းလေႃႇၼမ်ႉမၼ်းမၢၵ်ႇသၢၼ်ႇလုၼ်ႇၶၼ်ပၢႆပႅတ်ႇၵျၢပ်ႈဢေႃႈ။
“ၼႂ်းလိူၼ်ၸဵတ်းဝၼ်းတီႈသိပ်းႁႃႈၼၼ်ႉၶုၼ်ၼၼ်ႉတၵ်းလႆႈႁဵတ်းတၢင်းလူႇၸဵတ်းဝၼ်းတဵမ်တဵမ်ၸွမ်းၵႃႈၼင်ႇဢၼ်ႁဵတ်းၶိူင်ႈတၢင်းလူႇဢၼ်ၽေႇဢပျတ်ႈ၊ၶိူင်ႈတၢင်းလူႇဢၼ်ၽဝ်ၽႆးတင်းတူဝ်လႄႈၶိူင်ႈတၢင်းလူႇမၢၵ်ႇၶဝ်ႈႁူင်းၶဝ်ႈ၊ဢိၵ်ႇတင်းၶိူင်ႈတၢင်းလူႇဢၼ်သွၼ်းလေႃႇၼမ်ႉမၼ်းဢၼ်လႆႈဝႃႈမႃးယဝ်ႉၸိူဝ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ၽၵ်းတူၽၢႆႇဝၼ်းဢွၵ်ႇဢၼ်ၶဝ်ႈၸူးတီႈပၢင်ႇဝၢင်းၵျွင်းၸၼ်ႉၼႂ်းၼၼ်ႉတၵ်းလႆႈဢိုတ်းႁပ်းဝႆႉၼႂ်းဝၼ်းဢၼ်ႁဵတ်းၵၢၼ်ႁူၵ်းဝၼ်းတဵမ်တဵမ်ၼၼ်ႉလႄႈၼႂ်းဝၼ်းၵမ်သိၼ်၊ဢိၵ်ႇတင်းၼႂ်းဝၼ်းပွႆးလိူၼ်မႂ်ႇၸိူဝ်းၼၼ်ႉၸမ်ႉ၊တၵ်းလႆႈၽုၺ်ႇပိုတ်ႇဝႆႉဢေႃႈ။-
ၶုၼ်ဢၼ်ဢုပ်ႉပိူင်ႇတၵ်းၸွမ်းသဵၼ်ႈတၢင်းပၢင်ႇဝၢင်းၵျွင်းၸၼ်ႉၼွၵ်ႈလႄႈၶဝ်ႈၵႃႈတီႈၽၵ်းတူလုၵ်းလူင်သေယဝ်ႉ၊ၸုၵ်းတီႈႁိမ်းသဝ်ၽၵ်းတူ၊မိူဝ်ႈဢၼ်ယဵၸ်ႈပရေႃးႁဵၵ်ႈ တင်းလၢႆဢဝ်ၶိူင်ႈတၢင်းလူႇမၼ်းဢၼ်ၽဝ်ၽႆးတင်းတူဝ်၊ဢိၵ်ႇတင်းၶိူင်ႈတၢင်းလူႇမိၵ်ႈသႁႃႇယႃႉၼၼ်ႉသၢၵ်ႈလူႇၼၼ်ႉဢေႃႈ။ ၵႃႈတီႈၽၵ်းတူၼၼ်ႉမၼ်းတၵ်းလႆႈႁဵတ်းဝၢတ်ႈဝႆႈသႃသေလႄႈၶိုၼ်းဢွၵ်ႇၵႂႃႇဢေႃႈ။ ၽၵ်းတူၼၼ်ႉတၵ်းဢမ်ႇလႆႈဢိုတ်းႁပ်းဝႆႉတေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။-
ၼႂ်းဝၼ်းၵမ်သိၼ်ၵူႈသိၼ်၊ဢိၵ်ႇတင်းဝၼ်းပွႆးလိူၼ်မႂ်ႇၸိူဝ်းၼၼ်ႉၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင် တၵ်းလႆႈဢွၼ်ၵၼ်မႃးၵူမ်ႈႁူဝ်ၵွမ်းႁူဝ်လႄႈဝႆႈသႃ ထႃႇဝရႃႉၽြႃး ၊ၵႃႈတီႈၽၢႆႇၼႃႈၽၵ်းတူၼၼ်ႉဢေႃႈ။
“ၼႂ်းဝၼ်းၵမ်သိၼ်ၼၼ်ႉၶိူင်ႈတၢင်းလူႇဢၼ်ၽဝ်ၽႆးတင်းတူဝ်ဢၼ်ၶုၼ်မိူင်းတၵ်းလႆႈသၢၵ်ႈလူႇတီႈ ထႃႇဝရႃႉၽြႃး ၊ၸမ်ႉ၊သူဝ်းဢွၼ်ႇႁူၵ်းတူဝ်တင်းသူဝ်းပေႃႈတူဝ်ၼိုင်ႈဢၼ်ဢမ်ႇမီးတီႈၸိတီႈၼႄးၸိူဝ်းၼၼ်ႉဢေႃႈ။-
ၶိူင်ႈတၢင်းလူႇမၢၵ်ႇၶဝ်ႈႁူင်းၶဝ်ႈဢၼ်တၵ်းသၢၵ်ႈလူႇလူၺ်ႈၵၼ်တင်းသူဝ်းပေႃႈယေႈတူဝ်ၼၼ်ႉတၵ်းလႆႈမီးၽွင်ၶဝ်ႈမုၼ်းၸဵတ်းပႄႇသေလႄႈ၊ဢၼ်တၵ်းသၢၵ်ႈလူႇလူၺ်ႈၵၼ်တင်းသူဝ်းဢွၼ်ႇယေႈတူဝ်ၼၼ်ႉၸမ်ႉ၊တၵ်းလႆႈပဵၼ်ၸွမ်းဢလူဝ်ႇၵၢင်ၸႂ်မၼ်းၶႂ်ႈလူႇၼၼ်ႉဢေႃႈ။ ပုၼ်ႈၶိူင်ႈတၢင်းလူႇမၢၵ်ႇၶဝ်ႈႁူင်းၶဝ်ႈဢၼ်ႁႅၼ်းယေႈပွၵ်ႈၼၼ်ႉတၵ်းလႆႈႁႅၼ်းၶိူင်ႈတၢင်းလူႇဢၼ်သွၼ်းလေႃႇၼမ်ႉမၼ်းမၢၵ်ႇသၢၼ်ႇလုၼ်ႇၶၼ်ပၢႆပႅတ်ႇၵျၢပ်ႈဢေႃႈ။-
ၼႂ်းဝၼ်းပွႆးလိူၼ်မႂ်ႇၸမ်ႉ၊ၶုၼ်ၼၼ်ႉတၵ်းလႆႈသၢၵ်ႈလူႇဝူဝ်းပေႃႈၼုမ်ႇတူဝ်ၼိုင်ႈ၊သူဝ်းဢွၼ်ႇႁူၵ်းတူဝ်၊ဢိၵ်ႇတင်းသူဝ်းပေႃႈတူဝ်ၼိုင်ႈဢၼ်ဢမ်ႇမီးတီႈၸိတီႈၼႄးၸိူဝ်းၼၼ်ႉဢေႃႈ။-
မၼ်းတၵ်းလႆႈသၢၵ်ႈလူႇပႃးၶိူင်ႈတၢင်းလူႇမၢၵ်ႇၶဝ်ႈႁူင်းၶဝ်ႈဢၼ်မီးၽွင်ၶဝ်ႈမုၼ်းၸဵတ်းပႄႇလူၺ်ႈၵၼ်တင်းဝူဝ်းပေႃႈၼုမ်ႇယေႈတူဝ်၊ဢိၵ်ႇတင်းသူဝ်းပေႃႈယေႈတူဝ်ၼၼ်ႉဢေႃႈ။ ဢၼ်တၵ်းသၢၵ်ႈလူႇလူၺ်ႈၵၼ်တင်းသူဝ်းဢွၼ်ႇယေႈတူဝ်ၼၼ်ႉၸမ်ႉ၊တၵ်းလႆႈပဵၼ်ၸွမ်းဢလူဝ်ႇၵၢင်ၸႂ်မၼ်းၶႂ်ႈလူႇၼၼ်ႉဢေႃႈ။ ပုၼ်ႈၶိူင်ႈတၢင်းလူႇမၢၵ်ႇၶဝ်ႈႁူင်းၶဝ်ႈဢၼ်ႁႅၼ်းယေႈပွၵ်ႈၼၼ်ႉတၵ်းလႆႈႁႅၼ်းၶိူင်ႈတၢင်းလူႇဢၼ်သွၼ်းလေႃႇၼမ်ႉမၼ်းမၢၵ်ႇသၢၼ်ႇလုၼ်ႇၶၼ်ပၢႆပႅတ်ႇၵျၢပ်ႈဢေႃႈ။-
ၶုၼ်မိူင်းၼၼ်ႉတၵ်းလႆႈဢွၵ်ႇသေၵႃႈတီႈလုၵ်းၶၢၼ်းလူင်ၼၼ်ႉသေလႄႈၵႂႃႇၸွမ်းသဵၼ်ႈတၢင်းၽၵ်းတူဢၼ်မၼ်းၶဝ်ႈမႃးၼၼ်ႉဢေႃႈ။
“ယၢမ်းမိူဝ်ႈဢၼ်ၵူၼ်းဝၢၼ်ႈၵူၼ်းမိူင်းတင်းလၢႆဢွၼ်ၵၼ်မႃးဝႆႈသႃ ထႃႇဝရႃႉၽြႃး၊ ၵႃႈတီႈပွႆးဢၼ်လႂ်သေဢမ်ႇဝႃႈ၊ၶဝ်ၸိူဝ်းဢၼ်ၶဝ်ႈမႃးၸွမ်းသဵၼ်ႈတၢင်းၽၵ်းတူၽၢႆႇတၢင်းႁွင်ႇႁႂ်ႈလႆႈႁဵတ်းဝၢတ်ႈၵူဝ်းၵႂၢႆႇၼၼ်ႉတၵ်းလႆႈဢွၼ်ၵၼ်ဢွၵ်ႇၸွမ်းသဵၼ်ႈတၢင်းၽၵ်းတူၽၢႆႇတၢင်းၸၢၼ်းလႄႈၶဝ်ၸိူဝ်းဢၼ်ၶဝ်ႈမႃးၽၢႆႇတၢင်းၸၢၼ်းၼၼ်ႉတၵ်းလႆႈဢွၵ်ႇၸွမ်းၽၢႆႇတၢင်းႁွင်ႇၵႂႃႇဢေႃႈ။ ၶဝ်ဢမ်ႇလႆႈၶိုၼ်းဢွၵ်ႇတီႈၽၵ်းတူဢၼ်ၶဝ်ၶဝ်ႈမႃးၼၼ်ႉလႄႈတၵ်းလႆႈဢွၵ်ႇၵႂႃႇသိုဝ်ႈၼႃႈၶဝ်ၼၼ်ႉဢေႃႈ။-
ၶုၼ်မိူင်းၼၼ်ႉတၵ်းလႆႈၶဝ်ႈမႃးမိူဝ်ႈဢၼ်ၵူၼ်းတင်းလၢႆၶဝ်ႈမႃးယူႇၼၼ်ႉလႄႈသမ်ႉဢွၵ်ႇၵႂႃႇမိူဝ်ႈဢၼ်ၶဝ်ဢွၵ်ႇၵႂႃႇၼၼ်ႉဢေႃႈ။-
ၼႂ်းဝၼ်းပွႆးဢၼ်ၵိၼ်ၶူပ်း၊ဢိၵ်ႇတင်းဝၼ်းပွႆးထမ်ႇမႃႉၸိူဝ်းၼၼ်ႉၶိူင်ႈတၢင်းလူႇမၢၵ်ႇၶဝ်ႈႁူင်းၶဝ်ႈတၵ်းလႆႈပဵၼ်ၽွင်ၶဝ်ႈမုၼ်းၸဵတ်းပႄႇလူၺ်ႈၵၼ်တင်းဝူဝ်းပေႃႈၼုမ်ႇယေႈတူဝ်ဢမ်ႇၼၼ်ၵေႃႈသူဝ်းပေႃႈယေႈတူဝ်၊ဢိၵ်ႇတင်းမဵဝ်းဢၼ်ၶဝ်ၸိူဝ်းဢၼ်မႃးႁဵတ်းဝၢတ်ႈၵူဝ်းၵႂၢႆႇၸိူဝ်းၼၼ်ႉမီးၸေႇတၼႃႇလႄႈသၢၵ်ႈလူႇၼၼ်ႉသၢၵ်ႈလူႇလူၺ်ႈၵၼ်တင်းသူဝ်းဢွၼ်ႇယေႈတူဝ်ၼၼ်ႉဢေႃႈ။ ပုၼ်ႈၶိူင်ႈတၢင်းလူႇမၢၵ်ႇၶဝ်ႈႁူင်းၶဝ်ႈဢၼ်ႁႅၼ်းယေႈပွၵ်ႈၼၼ်ႉတၵ်းလႆႈႁဵတ်းၶိူင်ႈတၢင်းလူႇဢၼ်သွၼ်းလေႃႇၼမ်ႉမၼ်းမၢၵ်ႇသၢၼ်ႇလုၼ်ႇၶၼ်ပၢႆပႅတ်ႇၵျၢပ်ႈဢေႃႈ။
“မိူဝ်ႈဢၼ်ၶုၼ်ဢၼ်ဢုပ်ႉပိူင်ႇၼၼ်ႉမီးဢလူဝ်ႇၶႂ်ႈႁဵတ်းတၢင်းလူႇဢၼ်ၸွမ်းၼင်ႇၵၢင်ၸႂ်မၼ်းၼၼ်ႉတီႈ ထႃႇဝရႃႉၽြႃး ၊ၸိုင်၊ပဵၼ်ၶိူင်ႈတၢင်းလူႇဢၼ်ၽဝ်ၽႆးတင်းတူဝ်သေဢမ်ႇဝႃႈ၊ၶိူင်ႈတၢင်းလူႇမိၵ်ႈသႁႃႇယႃႉသေဢမ်ႇဝႃႈ၊ၽၵ်းတူၽၢႆႇဝၼ်းဢွၵ်ႇဢၼ်ၶဝ်ႈၸူးၼႂ်းပၢင်ႇဝၢင်းၵျွင်းၸၼ်ႉၼႂ်းၼၼ်ႉတၵ်းလႆႈၽုၺ်ႇပိုတ်ႇဝႆႉပုၼ်ႈမၼ်းဢေႃႈ။ မၼ်းတၵ်းလႆႈႁဵတ်းတၢင်းလူႇၼၼ်ႉမိူၼ်မိူၼ်ၵၼ်တင်းၶိူင်ႈတၢင်းလူႇဢၼ်မၼ်းသၢၵ်ႈလူႇၼႂ်းဝၼ်းၵမ်သိၼ်ၼၼ်ႉသေယဝ်ႉ၊လိုၼ်းသေဢၼ်မၼ်းဢွၵ်ႇၵႂႃႇယဝ်ႉၸိုင်၊တၵ်းလႆႈၶိုၼ်းဢိုတ်းႁပ်းၽၵ်းတူၼၼ်ႉဝႆႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “မႂ်းတၵ်းလႆႈဢဝ်သူဝ်းဢွၼ်ႇဢၼ်ဢမ်ႇပႆႇၶွပ်ႈၶူပ်ႇလႄႈဢမ်ႇမီးတီႈၸိတီႈၼႄးတူဝ်ၼိုင်ႈသေလႄႈႁဵတ်းတၢင်းလူႇဢၼ်ၽဝ်ၽႆးတင်းတူဝ်၊ယၢမ်းၶိင်ႇၵၢင်ၼႂ် တီႈ ထႃႇဝရႃႉၽြႃး၊ ဢေႃႈ။ ၶိူင်ႈတၢင်းလူႇၼႆႉတၵ်းလႆႈႁဵတ်းၵူႈဝၼ်းၵူႈဝၼ်းဢေႃႈ။-
ၵူႈၼႂ်ၵူႈၼႂ်မႂ်းတၵ်းလႆႈႁဵတ်းတၢင်းလူႇမၢၵ်ႇၶဝ်ႈႁူင်းၶဝ်ႈဢၼ်ပႃးၽွင်ၶဝ်ႈမုၼ်းသွင်ၶၼ်ႁႃႈၵျၢပ်ႈလူၺ်ႈၵၼ်တင်းၼမ်ႉမၼ်းမၢၵ်ႇသၢၼ်ႇလုၼ်ႇသၢမ်ၵျၢပ်ႈပုၼ်ႈဢၼ်တၵ်းလေႃးလူၺ်ႈၵၼ်တင်းၽွင်ၶဝ်ႈမုၼ်းၼၼ်ႉဢေႃႈ။ ထုင်းတြႃးဢၼ်ႁဵတ်းတၢင်းလူႇတီႈ ထႃႇဝရႃႉၽြႃး၊ ၼႆႉတၵ်းလႆႈႁဵတ်းၵႂႃႇတႃႇသေႇဢမ်ႇထၢတ်ႇသိုပ်ႇသိုပ်ႇတၢမ်တၢမ်ဢေႃႈ။-
သူဝ်းဢွၼ်ႇ၊ၽွင်ၶဝ်ႈမုၼ်း၊ဢိၵ်ႇတင်းၼမ်ႉမၼ်းမၢၵ်ႇသၢၼ်ႇလုၼ်ႇၸိုင်၊တၵ်းလႆႈသၢၵ်ႈလူႇတီႈ ထႃႇဝရႃႉၽြႃး ၊ၵူႈၼႂ်ၵူႈၼႂ်ၵႂႃႇတႃႇသေႇဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ “ပေႃးၶုၼ်ၼၼ်ႉဢဝ်လိၼ်ဢၼ်မၼ်းပိူင်ႇၼၼ်ႉပၼ်ႁႂ်ႈပဵၼ်လၢၵ်ႈသွင်ႇတီႈလုၵ်ႈၸၢႆးမၼ်းသေၵေႃႉၵေႃႉၸိုင်၊လိၼ်ၼၼ်ႉတၵ်းလႆႈပဵၼ်ဢမူၺ်ႇတီႈလုၵ်ႈၸၢႆးမၼ်းၸိူဝ်းၼၼ်ႉဢေႃႈ။ တေလႆႈပဵၼ်တၢင်းဢၼ်ၶဝ်ၶၢမ်ႇဢမူၺ်ႇလႄႈသိမ်းဢဝ်ဢေႃႈ။-
ၵူၺ်းၵႃႈ၊ပေႃးၶုၼ်ၼၼ်ႉဢဝ်လိၼ်ဢၼ်မၼ်းပိူင်ႇသေၵႂၢၵ်ႈသေလႂ်ပၼ်တီႈၶႃႈမၼ်းသေၵေႃႉၵေႃႉၸိုင်၊ၵႂၢၵ်ႈလိၼ်ၼၼ်ႉတၵ်းလႆႈၶိုၼ်းပဵၼ်ၶွင်ၶုၼ်ၼႂ်းပီဢၼ်ပၼ်ၶိုၼ်း ၼၼ်ႉထိုင်မႃးၼၼ်ႉဢေႃႈ။ မၼ်းၵေႃႉလဵဝ်ၵူၺ်းဢမ်ႇၼၼ်ၵေႃႈ လုၵ်ႈၸၢႆးမၼ်းၸိူဝ်းၼၼ်ႉၵူၺ်းတၵ်းလႆႈပိူင်ႇၵႂၢၵ်ႈလိၼ်ၼၼ်ႉမၼ်ႈမၼ်ႈၶိူင်ႇၶိူင်ႇဢေႃႈ။-
ၶုၼ်မိူင်းတၵ်းဢမ်ႇလႆႈႁဵတ်းပႄႉႁဵတ်းၼႅင်ႇသိမ်းဢဝ်ဢုၵ်ႉၸႃႇၶူဝ်းၶွင်ၵူၼ်းဝၢၼ်ႈၵူၼ်းမိူင်းပိူင်ႇၼၼ်ႉ။ ၵႂၢၵ်ႈလိၼ်ဢၼ်မၼ်းၽႄမႅင်ႇပၼ်ဢမူၺ်ႇတီႈလုၵ်ႈၸၢႆးမၼ်းၼၼ်ႉတၵ်းလႆႈပဵၼ်လိၼ်ဢၼ်မၼ်းပိူင်ႇၼၼ်ႉဢေႃႈ။ မၼ်းတၵ်းဢမ်ႇလႆႈႁဵတ်းပႄႉႁဵတ်းၼႅင်ႇလႄႈသိမ်းဢဝ်လိၼ်ဢမူၺ်ႇဢၼ်ၵူၼ်းမိူင်းပိူင်ႇၼၼ်ႉဢေႃႈ၊” ဝႃႈၼင်ႇၼႆဢေႃႈ။
လိုၼ်းၼၼ်ႉမၼ်းဢဝ်ၵဝ်ၵႂႃႇၸွမ်းသဵၼ်ႈတၢင်းဢၼ်ၶဝ်ႈၵႂႃႇၵႃႈၼႂ်းလုၵ်းဢၼ်မီးသိုဝ်ႈၼႃႈၵၼ်တင်းၽၢႆႇတၢင်းႁွင်ႇ ၵႃႈႁိမ်းၽၵ်းတူၽၢႆႇၸၢၼ်းပၢင်ႇဝၢင်းၵျွင်းၸၼ်ႉၼႂ်းၼၼ်ႉဢေႃႈ။ လုၵ်းၸိူဝ်းၼႆႉပဵၼ်လုၵ်းမူတ်းၸၢင်ႇပုၼ်ႈယဵၸ်ႈပရေႃးႁဵၵ်ႈ ၶဝ်ဢေႃႈ။ မၼ်းၸိၼႄတီႈၼိုင်ႈဢၼ်မီးၽၢႆႇဝၼ်းတူၵ်းလုၵ်းၸိူဝ်းၼၼ်ႉသေယဝ်ႉ၊-
လၢတ်ႈလႄႈဝႃႈ၊ “တီႈၼႆႈၸမ်ႉ၊ပဵၼ်တီႈဢၼ်ယဵၸ်ႈပရေႃးႁဵၵ်ႈတင်းလၢႆတၵ်းလႆႈတူမ်ႈၼိူဝ်ႉဢၼ်ႁဵတ်းတၢင်းလူႇဢၼ်ၽေႇဢပျတ်ႈလႂ်၊ႁဵတ်းတၢင်းလူႇဢၼ်ၽေႇတုၸရိူၵ်ႈပၼ်လႂ်၊ၽဝ်ၶဝ်ႈမုၼ်းပုၼ်ႈၶိူင်ႈတၢင်းလူႇမၢၵ်ႇၶဝ်ႈႁူင်းၶဝ်ႈလႂ်ၸိူဝ်းၼၼ်ႉၼင်ႇႁိုဝ်တၵ်းဢမ်ႇလႆႈဢဝ်ၶိူင်ႈဢၼ်မူတ်းၸၢင်ႇၵႂႃႇၸူးတီႈပၢင်ႇဝၢင်းၵျွင်းၸၼ်ႉၼွၵ်ႈ၊တၵ်းဢမ်ႇလႆႈႁဵတ်းႁႂ်ႈၵူၼ်းတင်းလၢႆလႆႈမူတ်းၸၢင်ႇၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵေႃႉၼၼ်ႉသမ်ႉဢဝ်ၵဝ်ၵႂႃႇၸူးတီႈပၢင်ႇဝၢင်းၵျွင်းၸၼ်ႉၼွၵ်ႈလႄႈၼႄပျႃးပၼ်ၵႃႈတီႈသီႇၸဵင်ႇပၢင်ႇဝၢင်းၵျွင်းၼၼ်ႉသေယဝ်ႉ၊ၵဝ်လႆႈႁၼ်ပၢင်ႇဝၢင်းၵျွင်းဢွၼ်ႇဢၼ်မီးၵႃႈတီႈႁူဝ်ၸဵင်ႇမၼ်းယေႈၸဵင်ႇယေႈဢၼ်ၼၼ်ႉဢေႃႈ။-
ပၢင်ႇဝၢင်းၵျွင်းဢွၼ်ႇယေႈဢၼ်ၼၼ်ႉၼႃႈယၢဝ်းမၼ်းမီးသီႇသိပ်းသွၵ်ႇ၊ၼႃႈပွတ်းမၼ်းမီးသၢမ်သိပ်းသွၵ်ႇဢေႃႈ။-
ၵႃႈတီႈလဵပ်ႈႁွပ်ႈပၢင်ႇဝၢင်းၵျွင်းဢွၼ်ႇၽၢႆႇတၢင်းၼႂ်းၸိူဝ်းၼၼ်ႉမီးၽႃသၢင်ႉႁိၼ်ၵေႃႇဝႆႉသေယဝ်ႉ၊သမ်ႉမီးပုင်းတဝ်ႈၽႆးလႄႈၵႃႈတႂ်ႈမၼ်းၼၼ်ႉပဵၼ်ၵူင်ပဵၼ်ႁူးဝႆႉဢေႃႈ။-
ၵေႃႉၼၼ်ႉမွၵ်ႇလၢတ်ႈတီႈၵဝ်လႄႈဝႃႈ၊ “ၵႃႈတီႈၸိူဝ်းၼႆႉၸမ်ႉ၊ပဵၼ်သွင်ႇၽႆးပုၼ်ႈၶႃႈၵျွင်းပိၵ်ႈမၢၼ်ႇၸဝ်ႈတင်းလၢႆတၵ်းတူမ်ႈႁုင်ၶိူင်ႈတၢင်းလူႇဢၼ်ၵူၼ်းတင်းလၢႆသၢၵ်ႈလူႇၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵေႃႉၼၼ်ႉသမ်ႉဢဝ်ၵဝ်ၶိုၼ်းမႃးတီႈၽၵ်းတူၵျွင်းပိၵ်ႈမၢၼ်ႇၸဝ်ႈလႄႈၵဝ်ႁၼ်ၼမ်ႉဢွၵ်ႇသေၵႃႈၼႂ်းၶူင်ႈၽၵ်းတူၼၼ်ႉသေလႄႈလႆၵႂႃႇၽၢႆႇတၢင်းဝၼ်းဢွၵ်ႇ၊ၽၢႆႇဢၼ်ၼႃႈၵျွင်းပိၵ်ႈမၢၼ်ႇၸဝ်ႈဝၢႆႇၸူးၼၼ်ႉဢေႃႈ။ ၼမ်ႉၼၼ်ႉလုၵ်ႉသေၵႃႈတီႈၽၢႆႇတၢင်းၸၢၼ်းၵျွင်းပိၵ်ႈမၢၼ်ႇၸဝ်ႈလႆၵႂႃႇၵႃႈႁိမ်းၶၢင်ႈၶဵင်ႇတၢင်းလူႇၽၢႆႇတၢင်းၸၢၼ်းၼၼ်ႉဢေႃႈ။-
ၵေႃႉၼၼ်ႉသမ်ႉဢဝ်ၵဝ်ဢွၵ်ႇၸွမ်းသဵၼ်ႈတၢင်းၽၵ်းတူၼႃႈတၢင်းႁွင်ႇၵႂႃႇလႄႈဢွၼ်ၵဝ်လဵပ်ႈၵႂႃႇၸူးတီႈၽၵ်းတူၽၢႆႇတၢင်းဝၼ်းဢွၵ်ႇဢေႃႈ။ ၼမ်ႉႁွင်ႈဢွၼ်ႇၵႄးၼိုင်ႈ လႆယူႇၽၢႆႇတၢင်းၸၢၼ်းၽၵ်းတူၼၼ်ႉဢေႃႈ။-
ၵေႃႉၼၼ်ႉဢဝ်တင်းမႆႉတႅၵ်ႈလႄႈတႅၵ်ႈလူင်းၸွမ်းၼမ်ႉႁွင်ႈၵႂႃႇႁဵင်သွၵ်ႇၵႂႃႇၽၢႆႇတၢင်းဝၼ်းဢွၵ်ႇသေယဝ်ႉ၊ၸႂ်ႉႁႂ်ႈၵဝ်ၶၢမ်ႈၵႂႃႇဢေႃႈ။ ၼမ်ႉၼၼ်ႉၶိုတ်းထိုင်တႃတိၼ်ၵူၺ်းဢေႃႈ။-
မၼ်းသမ်ႉတႅၵ်ႈၵႂႃႇထႅင်ႈႁဵင်သွၵ်ႇလႄႈၼမ်ႉၼၼ်ႉၶိုတ်းထိုင်ႁူဝ်ၶဝ်ႇဢေႃႈ။ သမ်ႉတႅၵ်ႈထႅင်ႈႁဵင်သွၵ်ႇလႄႈၼမ်ႉၼၼ်ႉၶိုတ်းထိုင်ဢႅဝ်ဢေႃႈ။-
မၼ်းသမ်ႉတႅၵ်ႈထႅင်ႈႁဵင်သွၵ်ႇလႄႈၼမ်ႉႁွင်ႈၼၼ်ႉလိုၵ်ႉၼႃႇထၢၼ်ႈပေႃးၵဝ်ဢမ်ႇၶၢမ်ႈလႆႈဢေႃႈ။ ၼမ်ႉႁွင်ႈၼၼ်ႉလိုၵ်ႉၼႃႇလႄႈပေႃးယင်းဢမ်ႇလုၺ်းၼမ်ႉၸိုင်၊ဢမ်ႇယၢင်ႈၶၢမ်ႈလႆႈယဝ်ႉဢေႃႈ။-
ၵေႃႉၼၼ်ႉလၢတ်ႈတီႈၵဝ်လႄႈဝႃႈ၊ “လုၵ်ႈၵူၼ်း႟။ မၢတ်ႈတွင်းလွင်ႈတၢင်းၸိူဝ်းၼႆႉဝႆႉလီလီတႃႉ၊” ဝႃႈၼင်ႇၼႆဢေႃႈ။ ဝၢႆးသေၼၼ်ႉမၼ်းႁွင်ႉၵဝ်ႁႂ်ႈၶိုၼ်ႈမႃးၵႃႈတီႈၽင်ႇၼမ်ႉႁွင်ႈဢေႃႈ။-
မိူဝ်ႈဢၼ်ၵဝ်ၶိုၼ်ႈမႃးၼၼ်ႉၵဝ်ႁၼ်တူၼ်ႈမႆႉဢၼ်မီးၼမ်ၼႃႇလူင်လၢင်ၵႃႈတီႈၼိူဝ်ၽင်ႇတင်းသွင်ၽၢႆႇဢေႃႈ။-
မၼ်းၼၼ်ႉလၢတ်ႈတီႈၵဝ်လႄႈဝႃႈ၊ “ၼမ်ႉၼႆႉလႆၵႂႃႇၽႃႇလတ်းမိူင်းတၢင်းဝၼ်းဢွၵ်ႇလႄႈလူင်းၸွမ်းႁူၺ်ႈၼမ်ႉ ယေႃးတၢၼ်ႇ သေယဝ်ႉ၊လႆၶဝ်ႈၵႃႈၼႂ်း ပၢင်ႇလၢႆႇတၢႆ၊ ၵႂႃႇဢေႃႈ။ မိူဝ်ႈဢၼ်ၼမ်ႉၼၼ်ႉလႆၶဝ်ႈ ပၢင်ႇလၢႆႇတၢႆ၊ ၵႂႃႇၸိုင်၊မၼ်းႁႂ်ႈၼမ်ႉၵိူဝ်ပဵၼ်ဢၼ်ဝၢၼ်မႃးဢေႃႈ။-
ၵႃႈတီႈဢၼ်ၼမ်ႉႁွင်ႈလႆၵႂႃႇထိုင်ၼၼ်ႉတူဝ်သတ်းတူဝ်မႅင်းတင်းလၢႆယူႇသဝ်းဢေႃႈ။ တၵ်းမီးပႃၼမ်ၼႃႇလူင်လၢင်ဢေႃႈ။ ၼမ်ႉႁွင်ႈၼၼ်ႉတၵ်းႁႂ်ႈ ပၢင်ႇလၢႆႇတၢႆ၊ ပဵၼ်ဢၼ်ဝၢၼ်မႃးလႄႈၵႃႈတီႈဢၼ်မၼ်းလႆႁွတ်ႈထိုင်ၵႂႃႇၼၼ်ႉတူဝ်သတ်ႉတဝႃႇၵႃႈမီးတၵ်းဢသၢၵ်ႈလိပ်းယူႇဢေႃႈ။-
ဢဝ်ၵႃႈတီႈၸႃႉၸဵမ်ၼမ်ႉဢွၵ်ႇႁူး ဢႅၼ်ႇၵေးတိ၊ လူင်းၵႂႃႇထိုင်ႁွတ်ႈၼမ်ႉဢွၵ်ႇႁူး ဢေႇၼိၵလိမ်း၊ ၼၼ်ႉတၵ်းမီးၵူၼ်းလႃႈၼမ်ႉလႂ်ဢွၼ်ၵၼ်ၸုၵ်းယူႇၵႃႈၼိူဝ်ၽင်ႇပၢင်ႇလၢႆႇၼၼ်ႉလႄႈဝၢၼ်ႇၶႄယူႇဢေႃႈ။ ၵႃႈတီႈၼၼ်ႈၵေႃႈတၵ်းမီးပႃၵူႈၸိူဝ်ႉၵူႈမဵဝ်းၼမ်ၵိုၼ်းၼႃႇမိူၼ်ၸိူဝ်ႉၼင်ႇပႃၼႂ်းပၢင်ႇလၢႆႇ မေႇတိထေးရီးယၼ်း၊ ၼၼ်ႉဢေႃႈ။-
ၵူၺ်းၵႃႈ၊ၼမ်ႉၶုၼ်ႇၼမ်ႉဢူၼ်တင်းလၢႆ၊ဢိၵ်ႇတင်းၼမ်ႉၵူမ်ႇၼမ်ႉဢုင်ႁိမ်းၽင်ႇၼမ်ႉပၢင်ႇလၢႆႇတင်းလၢႆၸမ်ႉ၊ဢမ်ႇလႆႈပဵၼ်ၼမ်ႉဝၢၼ်။ တၵ်းပဵၼ်မေႃႇၵိူဝ်ယူႇသေႇသေႇဢေႃႈ။-
ၵႃႈတီႈသွင်ၽၢႆႇၽင်ႇၼမ်ႉႁွင်ႈၼၼ်ႉတၵ်းမီးတူၼ်ႈဢၼ်လီၵိၼ်ၵူႈၸိူဝ်ႉၵူႈမဵဝ်းဢၼ်မႂ်မၼ်းဢမ်ႇၸၢင်ႈႁဵဝ်ႇၸၢင်ႈႁႅင်ႈ၊မၢၵ်ႇမၼ်းၵေႃႈဢမ်ႇၸၢင်ႈထၢတ်ႇၸၢင်ႈဝၢႆးလႄႈမီးမၢၵ်ႇဢၼ်ၼုမ်ႇၵူႈလိူၼ်သေႇသေႇ၊လွင်ႈမၼ်းၸမ်ႉ၊ၼမ်ႉပုၼ်ႈတႃႇတူၼ်ႈမႆႉၼၼ်ႉလႆဢွၵ်ႇသေၵႃႈတီႈၵျွင်းပိၵ်ႈမၢၼ်ႇၸဝ်ႈမႃးဢေႃႈ။ မၢၵ်ႇမၼ်းၸိူဝ်းၼၼ်ႉပဵၼ်မၢၵ်ႇဢၼ်လီၵိၼ်လီၶူပ်းလႄႈမႂ်မၼ်းၵေႃႈပဵၼ်ယႃႈယႃပုၼ်ႈၵူၼ်းတင်းလၢႆဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ “ဢၼ်ၸိူဝ်းၼႆႉၸိုင်၊ပဵၼ်ၶွပ်ႇၼမ်ႉလႅၼ်လိၼ်မိူင်းၸဝ်ႈပုၼ်ႈတႃႇတေၽႄမႅင်ႇပၼ်ဢမူၺ်ႇတီႈၸိူဝ်ႉၶိူဝ်းၵူၼ်း ဢိသရေး ၊သိပ်းသွင်ၶိူဝ်းၼၼ်ႉလႄႈၸိူဝ်ႉၶိူဝ်း ယူဝ်းသႅပ်ႈ၊ ၸိုင်၊ႁႂ်ႈမၼ်းလႆႈၶၢမ်ႇဢဝ်သွင်ပုၼ်ႈ တႃႉ။-
ၵဝ်လႆႈႁဵတ်းဝႆႉၵတိသဵတ်ႈၸႃႇတီႈပူႇမွၼ်ႇသူႁႂ်ႈၶဝ်လႆႈၶၢမ်ႇဢဝ်ဢမူၺ်ႇလိၼ်ၸဝ်ႈၼႆႉယဝ်ႉလႄႈ၊တေႃႈလဵဝ်ၼႆႉၽႄမႅင်ႇႁႂ်ႈၽဵင်ႇၽဵင်ႇၵၼ်ၵႃႈၼႂ်းသူၼင်ႇၵၼ်ၵၼ်တႃႉ။
“ၶွပ်ႇၼမ်ႉလႅၼ်လိၼ်ၼႃႈတၢင်းႁွင်ႇၸမ်ႉ၊ဢဝ်သေၵႃႈတီႈပၢင်ႇလၢႆႇ မေႇတိထေးရီးယၼ်း၊ ၶိုၼ်ႈၵႂႃႇၽၢႆႇတၢင်းဝၼ်းဢွၵ်ႇၸွမ်းသဵၼ်ႈတၢင်းဝဵင်း ႁေႇသလုၼ်ႇ၊ ၵႂႃႇၸူးၵႄႈလွႆ ႁႃႇမတ်ႉ၊ ၵႂႃႇၸူးတီႈဝဵင်း ၸေႇတတ်ႉ၊-
ၵႂႃႇၸူးတီႈဝဵင်း ပေႇရေႃးသႃႇ၊ တင်းဝဵင်း သိပရိမ်း၊ (ဝဵင်းၸိူဝ်းဢၼ်မီးၵႄႈဝူင်ႈၵၢင်သိုင်ႇတိူင်းမိူင်း တမ်ႇမတ်ႉသၵတ်ႉ ၊လႂ်၊တင်းသိုင်ႇတိူင်းမိူင်း ႁႃႇမတ်ႉ ) ဢိၵ်ႇတင်းၶိုၼ်ႈၸူးတီႈဝဵင်း တိၵွၼ်ႇ (ဢၼ်မီးႁိမ်းသိုင်ႇတိူင်းမိူင်း ႁေႃႇရၼ်ႇ၊ ) ဢေႃႈ။-
ၶွပ်ႇၼမ်ႉလႅၼ်လိၼ်ၽၢႆႇတၢင်းႁွင်ႇၸိုင်၊ဢဝ်သေၵႃႈတီႈပၢင်ႇလၢႆႇ မေႇတိထေးရီးယၼ်း၊ ၶိုၼ်ႈၵႂႃႇၽၢႆႇတၢင်းဝၼ်းဢွၵ်ႇၵႂႃႇၸူးတီႈဝဵင်း ႁႃႇၸႃႇရေးၼၼ်ႇ၊ ပႃးတင်းလႅၼ်လိၼ်သိုင်ႇတိူင်းမိူင်း တမ်ႇမတ်ႉသၵတ်ႉ ၊ဢိၵ်ႇတင်းသိုင်ႇတိူင်းမိူင်း ႁႃႇမတ်ႉ၊ ဢၼ်မီးၽၢႆႇတၢင်းႁွင်ႇမၼ်းၼၼ်ႉဢေႃႈ။ ဢၼ်ၼႆႉၸမ်ႉ၊ပဵၼ်ၶွပ်ႇၼမ်ႉလႅၼ်လိၼ်ၽၢႆႇတၢင်းႁွင်ႇဢေႃႈ။
“ၶွပ်ႇၼမ်ႉလႅၼ်လိၼ်ၽၢႆႇတၢင်းဝၼ်းဢွၵ်ႇၸမ်ႉ၊ဢဝ်သေၵႃႈတီႈၸဵင်ႇၵႄႈဝူင်ႈၵၢင်ဝဵင်း တမ်ႇမတ်ႉသၵတ်ႉ၊ တင်းဝဵင်း ႁေႃႇရၼ်ႇ၊ တႆႇလူင်းၸွမ်းၼမ်ႉ ယေႃးတၢၼ်ႇ ၊ႁႂ်ႈပဵၼ်လႅၼ်လိၼ်ၵႄႈဝူင်ႈၵၢင်မိူင်း ဢိသရေး၊ ၽၢႆႇတၢင်းဝၼ်းတူၵ်းတင်းမိူင်း ၵိလတ်ႉ၊ ၽၢႆႇတၢင်းဝၼ်းဢွၵ်ႇတေႃႇထိုင်ႁွတ်ႈဝဵင်း တႃႇမႃႇ၊ ဢၼ်မီးၵႃႈတီႈႁိမ်း ပၢင်ႇလၢႆႇတၢႆ၊ ၼၼ်ႉဢေႃႈ။ ဢၼ်ၼႆႉသမ်ႉပဵၼ်ၶွပ်ႇၼမ်ႉလႅၼ်လိၼ်ၽၢႆႇတၢင်းဝၼ်းဢွၵ်ႇဢေႃႈ။
“ၶွပ်ႇၼမ်ႉလႅၼ်လိၼ်ၽၢႆႇတၢင်းၸၢၼ်းၸမ်ႉ၊ဢဝ်သေၵႃႈတီႈဝဵင်း တႃႇမႃႇ၊ ၵႂႃႇၸွမ်းၸဵင်ႇၸၢၼ်းဝၼ်းတူၵ်းၵႂႃႇၸူးတီႈပၢင်ႇၼမ်ႉႁူး ၵႃႇတေးသႃႉ၊ လႄႈငႅၵ်းၵႂႃႇၸဵင်ႇႁွင်ႇဝၼ်းတူၵ်းၸွမ်းလႅၼ်လိၼ်မိူင်း ဢေးၵျိပ်ႉ၊ ၸူးတီႈပၢင်ႇလၢႆႇ မေႇတိထေးရီးယၼ်း၊ ဢေႃႈ။ ဢၼ်ၼႆႉသမ်ႉပဵၼ်ၶွပ်ႇၼမ်ႉလႅၼ်လိၼ်ၽၢႆႇတၢင်းၸၢၼ်းဢေႃႈ။
“ၶွပ်ႇၼမ်ႉလႅၼ်လိၼ်ၽၢႆႇတၢင်းဝၼ်းတူၵ်းၸမ်ႉ၊ဢဝ်ၽင်ႇပၢင်ႇလၢႆႇ မေႇတိထေးရီးယၼ်း၊ ပဵၼ်ဢၼ်ၶၼ်ႈဢၼ်ၶႅၼ်ႈလႄႈၶိုၼ်ႈၵႂႃႇတေႃႇထိုင်ႁွတ်ႈၸဵင်ႇႁွင်ႇၵႃႈတီႈၽၢႆႇဝၼ်းတူၵ်းၵႄႈလွႆ ႁႃႇမတ်ႉ၊ ၼၼ်ႉဢေႃႈ။ ဢၼ်ၼႆႉၸမ်ႉ၊ပဵၼ်ၶွပ်ႇၼမ်ႉလႅၼ်လိၼ်ၽၢႆႇဝၼ်းတူၵ်းဢေႃႈ။
“ဢဝ်မိူင်းၸဝ်ႈၼႆႉၽႄမႅင်ႇပၼ်ၵႃႈၼႂ်းၸိူဝ်ႉၶိူဝ်းသူႁင်းၽႂ်ႁင်းမၼ်းတႃႉ။-
တၵ်းလႆႈပဵၼ်လိၼ်ဢမူၺ်ႇဢၼ်သူလႆႈႁပ်ႉဢဝ်မၼ်ႈၶိူင်ႇၼႅၼ်ႈၼႃဝႆႉသေႇသေႇဢေႃႈ။ ၵူၼ်းတၢင်ႇၸိူဝ်ႉတၢင်ႇမဵဝ်းဢၼ်ယူႇၵႃႈၼႂ်းသူ၊ဢိၵ်ႇတင်းၶဝ်ၸိူဝ်းဢၼ်လုၵ်ႈလၢင်းၶဝ်ၵိူတ်ႇလဵင်ႉၵႃႈတီႈၼႆႈၸိူဝ်းၼၼ်ႉၵေႃႈသူတၵ်းလႆႈၽႄမႅင်ႇဢမူၺ်ႇပၼ်တီႈၶဝ်ၼင်ႇၵဝ်ႇဢေႃႈ။ ၶဝ်ၸိူဝ်းၼၼ်ႉတၵ်းလႆႈမၢတ်ႈပဵၼ်မိူၼ်ၵၼ်တင်းၵူၼ်းမဵဝ်း ဢိသရေး၊ ၶဝ်တၵ်းလႆႈတူၵ်းၸႃႇၵွၵ်ႈပုၼ်ႈဢမူၺ်ႇၶဝ် မိူၼ်မိူၼ်ၵၼ်တင်းၸိူဝ်ႉၶိူဝ်းမဵဝ်း ဢိသရေး ၊တင်းလၢႆၼၼ်ႉဢေႃႈ။-
တီႈယူႇတီႈသဝ်းၵူၼ်းတၢင်ႇၸိူဝ်ႉတၢင်ႇမဵဝ်းၼၼ်ႉတၵ်းလႆႈၶၢမ်ႇဢဝ်လိၼ်ဢမူၺ်ႇၵႃႈၼႂ်းၸိူဝ်ႉၶိူဝ်းဢၼ်ၶဝ်ယူႇၸွမ်းၵၼ်ၼၼ်ႉဢေႃႈ၊ဝႃႈၼင်ႇၼႆလႄႈၵဝ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ၊မီးဢမိင်ႉဢေႃႈ၊” ဝႃႈၼင်ႇၼႆဢေႃႈ။
သူတၵ်းလႆႈမီးၵႂၢၵ်ႈလိၼ်ၵႂၢၵ်ႈၼိုင်ႈၸတ်းဝႆႉပုၼ်ႈလိၼ်ဢမူၺ်ႇဢၼ်မူတ်းၸၢင်ႇဢေႃႈ။ ၼႃႈၵႂၢင်ႈၵႂၢၵ်ႈလိၼ်ၼၼ်ႉတၵ်းလႆႈမီးသွင်မိုၼ်ႇႁႃႈႁဵင်သွၵ်ႇဢဝ်သေၵႃႈတီႈၸဵင်ႇႁွင်ႇၵႂႃႇၸူးၸဵင်ႇၸၢၼ်းပုၼ်ႉဢေႃႈ။ ၼႃႈယၢဝ်းမၼ်းၸမ်ႉ၊ဢဝ်ၵႃႈတီႈၽၢႆႇဝၼ်းဢွၵ်ႇတေႃႇထိုင်ႁွတ်ႈၵႃႈတီႈၽၢႆႇဝၼ်းတူၵ်းမိူၼ်မိူၼ်ၵၼ်တင်းၼႃႈယၢဝ်းဢိူင်ႇဢၼ်ၽႄမႅင်ႇပၼ်တီႈၵူၼ်းၸိူဝ်ႉၶိူဝ်းယေႈမဵဝ်းၼၼ်ႉဢေႃႈ။ ၵျွင်းပိၵ်ႈမၢၼ်ႇၸဝ်ႈတၵ်းလႆႈမီးၵႃႈၼႂ်းၵႂၢၵ်ႈလိၼ်ၼႆႉဢေႃႈ။
ၵႃႈၼႂ်းၶိုင်ႈၵၢင်ၵႂၢၵ်ႈလိၼ်ၼႆႉၼၼ်ႉပဵၼ်တီႈဢၼ်မူတ်းၸၢင်ႇဢၼ်ၼႃႈယၢဝ်းမၼ်းမီးသွင်မိုၼ်ႇႁႃႈႁဵင်သွၵ်ႇ၊ၼႃႈၵႂၢင်ႈၼိုင်ႈမိုၼ်ႇသွၵ်ႇၼၼ်ႉတၵ်းလႆႈသၢၵ်ႈၵၢပ်ႈတီႈ ထႃႇဝရႃႉၽြႃး၊ ဢေႃႈ။-
ယဵၸ်ႈပရေႃးႁဵၵ်ႈ တင်းလၢႆတၵ်းလႆႈၶၢမ်ႇဢဝ်ဢမူၺ်ႇလိၼ်ၶဝ်ၵႃႈၼႂ်းၵႂၢၵ်ႈလိၼ်ဢၼ်မူတ်းၸၢင်ႇၼႆႉဢေႃႈ။ ဢဝ်သေၵႃႈတီႈၼႃႈဝၼ်းဢွၵ်ႇတေႃႇထိုင်ႁွတ်ႈၼႃႈဝၼ်းတူၵ်းၼၼ်ႉတၵ်းလႆႈတႅၵ်ႈဢဝ်သွင်မိုၼ်ႇႁႃႈႁဵင်သွၵ်ႇလႄႈဢဝ်တီႈၸဵင်ႇႁွင်ႇလူင်းၸူးတီႈၸဵင်ႇၸၢၼ်းၼိုင်ႈမိုၼ်ႇသွၵ်ႇသေယဝ်ႉ၊ၵျွင်းပိၵ်ႈမၢၼ်ႇ ထႃႇဝရႃႉၽြႃး ၊တၵ်းလႆႈမီးတီႈၶိုင်ႈၵၢင်ၵႂၢၵ်ႈလိၼ်ၼႆႉဢေႃႈ။-
ၵႂၢၵ်ႈလိၼ်တီႈမူတ်းၸၢင်ႇၼႆႉတၵ်းလႆႈပဵၼ်ပုၼ်ႈယဵၸ်ႈပရေႃးႁဵၵ်ႈၸိူဝ်းဢၼ်သိုပ်ႇလူင်းမႃးၼႂ်းၸိူဝ်ႉၶိူဝ်း ၸႃႇတုၵ်ႉ၊ ၼၼ်ႉဢေႃႈ။ လွင်ႈမၼ်းၸမ်ႉ၊ၶဝ်ပႃးတင်းသဵတ်ႈၸႃႇလႄႈၵိုတ်ႉႁၢပ်ႇၼႃႈၵၢၼ်ၵဝ်ယူႇသေလႄႈဢမ်ႇၽိတ်းတၢင်းပိူင်ႈတၢင်းမိူၼ်ၸိူဝ်ႉၼင်ႇၵူၼ်း လေႇဝိ၊ ၼႂ်းမိူဝ်ႈဢၼ်ၵူၼ်းမဵဝ်း ဢိသရေး ၽိတ်းတၢင်းပိူင်ႈတၢင်းၵႂႃႇၼၼ်ႉဢေႃႈ။-
ပိူဝ်ႈၼႆလႄႈၶဝ်တၵ်းလႆႈယူႇၵႃႈႁိမ်းလိၼ်တီႈယူႇၵူၼ်း လေႇဝိ၊ ၶဝ်လႄႈတၵ်းလႆႈပဵၼ်လိၼ်တီႈဢၼ်မူတ်းၸၢင်ႇသေပိူၼ်ႈဢေႃႈ။-
တီႈယူႇၵူၼ်း လေႇဝိ၊ ၶဝ်တၵ်းလႆႈမီးၽၢႆႇတၢင်းၸၢၼ်းၵႂၢၵ်ႈလိၼ်ယဵၸ်ႈပရေႃးႁဵၵ်ႈၶဝ်ၼၼ်ႉလႄႈၼႃႈယၢဝ်းမၼ်းတၵ်းလႆႈမီးသွင်မိုၼ်ႇႁႃႈႁဵင်သွၵ်ႇလႄႈၼႃႈပွတ်းမၼ်းမီးၼိုင်ႈမိုၼ်ႇသွၵ်ႇဢေႃႈ။-
ၵႂၢၵ်ႈလိၼ်ဢၼ်သၢၵ်ႈၵၢပ်ႈတီႈ ထႃႇဝရႃႉၽြႃး၊ ၼၼ်ႉပဵၼ်ပွတ်းဢၼ်ယဵင်ႈၶႅၼ်းလီၼႃႇသေလိၼ်ၵႃႈမီးၼၼ်ႉလႄႈၶဝ်ဢမ်ႇလႆႈၶၢႆ၊ဢမ်ႇလႆႈလႅၵ်ႈ၊ဢမ်ႇလႆႈဢၢပ်ႈပၼ်တီႈပိူၼ်ႈတၢင်ႇၵေႃႉလႃးလႃး။ ပဵၼ်ဢၼ်မူတ်းၸၢင်ႇလႄႈပဵၼ်လိၼ်ဢၼ် ထႃႇဝရႃႉၽြႃး၊ ပိူင်ႇဢေႃႈ။
ၵႂၢၵ်ႈလိၼ်ဢၼ်ၶိုၵ်ႉဢၼ်ၶမ်ႇဢၼ်ၵိုတ်းဢၼ်ၵျၢၼ်ႇဢၼ်ၼႃႈယၢဝ်းမၼ်းမီးသွင်မိုၼ်ႇႁႃႈႁဵင်သွၵ်ႇ၊ၼႃႈၵႂၢင်ႈမၼ်းမီးႁႃႈႁဵင်သွၵ်ႇၼၼ်ႉၸမ်ႉ၊ဢမ်ႇမူတ်းၸၢင်ႇ။ ပဵၼ်ပုၼ်ႈၵူၼ်းတင်းလၢႆတၵ်းယူႇသဝ်းၵႃႈတီႈၼၼ်ႈလႄႈၽုၵ်ႇၵိၼ်သွမ်ႈၵိၼ်ဢေႃႈ။ ဝဵင်းလူင်တၵ်းလႆႈမီးၵႃႈတီႈၶိုင်ႈၵၢင်မၼ်းလႄႈ၊-
တၢင်းၵႂၢင်ႈမၼ်းယေႈၼႃႈတၵ်းလႆႈမီးသီႇႁဵင်ႁႃႈပၢၵ်ႇသွၵ်ႇတင်းသီႇၼႃႈၽဵင်ႇပဵင်းၵၼ်ဢေႃႈ။-
ၵႃႈတီႈဢၼ်ပၼ်ႇလဵပ်ႈႁွပ်ႈဝဵင်းတင်းသီႇၼႃႈၼၼ်ႉတၵ်းလႆႈဝႆႉပၢင်ႇဢၼ်ပဝ်ႇဢၼ်လၢပ်ႈဝႆႉသွင်ပၢၵ်ႇႁႃႈသိပ်းသွၵ်ႇၼင်ႇၵၼ်ဢေႃႈ။-
လိုၼ်းသေဢၼ်ဝဵင်းၼၼ်ႉတႄႇတင်ႈယဝ်ႉလႄႈၵႂၢၵ်ႈလိၼ်ဢၼ်ၵိုတ်းၵျၢၼ်ႇယူႇဢၼ်ၸၢပ်ႈလႅၼ်လိၼ်ၽၢႆႇတၢင်းၸၢၼ်းၵႂၢၵ်ႈလိၼ်ဢၼ်မူတ်းၸၢင်ႇ ႁႂ်ႈမီးၼႃႈၵႂၢင်ႈၼိုင်ႈမိုၼ်ႇသွၵ်ႇ၊ဢိၵ်ႇတင်းၽၢႆႇတၢင်းဝၼ်းတူၵ်းၵေႃႈ ႁႂ်ႈမီးၼိုင်ႈမိုၼ်ႇသွၵ်ႇၼင်ႇၵၼ်ၼၼ်ႉပဵၼ်ပုၼ်ႈၶဝ်ၸိူဝ်းဢၼ်ယူႇသဝ်းၵႃႈၼႂ်းဝဵင်းၼၼ်ႉတၵ်းဢွၼ်ၵၼ်ႁဵတ်းသူၼ်ႁဵတ်းႁႆႈၵိၼ်ဢေႃႈ။-
ၶဝ်ၸိူဝ်းဢၼ်ယူႇသဝ်းၵႃႈၼႂ်းဝဵင်းၼၼ်ႉပိၵ်ႉသမ်ႉပဵၼ်ၵူၼ်းၸိူဝ်ႉၶိူဝ်းမဵဝ်းလႂ်သေဢမ်ႇဝႃႈ၊မီးဢၶႂၢင်ႉဢၼ်တၵ်းႁဵတ်းသူၼ်ႁဵတ်းႁႆႈၵိၼ်ၵႃႈတီႈလိၼ်ၼၼ်ႉဢေႃႈ။
ၵွပ်ႈပိူဝ်ႈၸိူဝ်ႉၼင်ႇၼႆလႄႈၵႂၢၵ်ႈလိၼ်ဢၼ်မီးၵႃႈၼႂ်းၶိုင်ႈၵၢင်လိၼ်ဢၼ်သၢၵ်ႈၵၢပ်ႈဝႆႉတင်းသဵင်ႈတင်းလူင်ၼၼ်ႉတၵ်းလႆႈပဵၼ်သီႇၸဵင်ႇၽဵင်ႇပဵင်းၵၼ်ဝႆႉလႄႈယေႈၼႃႈတၵ်းလႆႈမီးသွင်မိုၼ်ႇႁႃႈႁဵင်သွၵ်ႇဢေႃႈ။ လိၼ်ၼၼ်ႉတၵ်းလႆႈၶဝ်ႈပႃးၵႃႈၼႂ်းၵႂၢၵ်ႈလိၼ်ဢၼ်ဝဵင်းလူင်ပိူင်ႇၼၼ်ႉဢေႃႈ။
ၵႂၢၵ်ႈလိၼ်ဢၼ်ၵိုတ်းၵျၢၼ်ႇၵႃႈတီႈသွင်ၽၢၵ်ႇၶၢင်ႈၵႂၢၵ်ႈလိၼ်ဢၼ်မူတ်းၸၢင်ႇ၊ဢိၵ်ႇတင်းၵႂၢၵ်ႈလိၼ်ၶၢင်ႈဝဵင်းၸဝ်ႈၼၼ်ႉ၊ပဵၼ်ၵႂၢၵ်ႈလိၼ်ၶုၼ်ဝဵင်းပိူင်ႇဢေႃႈ။ မီးၵႃႈတီႈၽၢႆႇတၢင်းဝၼ်းဢွၵ်ႇ၊ၵႃႈတီႈၽၢႆႇၼႃႈၵႂၢၵ်ႈလိၼ်ဢၼ်သၢၵ်ႈလူႇသွင်မိုၼ်ႇႁႃႈႁဵင်သွၵ်ႇ၊ဢိၵ်ႇတင်းၵႃႈတီႈၽၢႆႇတၢင်းဝၼ်းတူၵ်းၵႃႈတီႈၽၢႆႇၼႃႈသွင်မိုၼ်ႇႁႃႈႁဵင်သွၵ်ႇၼၼ်ႉ၊တၵ်းလႆႈပဵၼ်ပုၼ်ႈၶုၼ်ဢေႃႈ။ ၵႂၢၵ်ႈလိၼ်ဢၼ်မူတ်းၸၢင်ႇ၊ဢိၵ်ႇတင်းထႃႇၼႃႉတီႈမူတ်းၸၢင်ႇၸဝ်ႈၼၼ်ႉတၵ်းလႆႈတူၵ်းတီႈယူႇၵႃႈၼႂ်းၵႄႈဝူင်ႈၵၢင်သွင်ၵႂၢၵ်ႈၼၼ်ႉဢေႃႈ။-
ၼင်ႇၼၼ်လႄႈလိၼ်ၵႃႈဢၼ်မီးၵႃႈတီႈတၢင်းၼွၵ်ႈသွင်ၽၢၵ်ႇၶၢင်ႈတၢင်းဢၼ်ၶၼ်ႈဢၼ်ၶႅၼ်ႈလိၼ်တီႈယူႇၵူၼ်း လေႇဝိ ၊ဢိၵ်ႇတင်း တၢင်းဢၼ်ၶၼ်ႈဢၼ်ၶႅၼ်ႈလိၼ်ဢၼ်ဝဵင်းလူင်ပိူင်ႇၼၼ်ႉလႄႈတူၵ်းၵႃႈတီႈၵႄႈဝူင်ႈၵၢင်ဢိူင်ႇ ယုတႃႉ၊ ဢိၵ်ႇတင်းဢိူင်ႇ ပိၼ်ႇယႃႇမိၼ်ႇ၊ ၼၼ်ႉ တၵ်းလႆႈပဵၼ်ပုၼ်ႈၶုၼ်ဢေႃႈ။
ဢိူင်ႇ ဢိသရေး၊ ဢၼ်ယင်းၵိုတ်းယင်းၵျၢၼ်ႇၸိူဝ်းၼၼ်ႉၸမ်ႉ၊ဢဝ်ၵႃႈတီႈၽၢႆႇဝၼ်းဢွၵ်ႇတေႃႇထိုင်ႁွတ်ႈၽၢႆႇဝၼ်းတူၵ်းတၵ်းလႆႈမီးဢိူင်ႇ ပိၼ်ႇယႃႇမိၼ်ႇ၊ ဢေႃႈ။-
ၵႃႈတီႈႁိမ်းဢိူင်ႇ ပိၼ်ႇယႃႇမိၼ်ႇ ၼၼ်ႉဢဝ်ၵႃႈတီႈၽၢႆႇတၢင်းဝၼ်းဢွၵ်ႇတေႃႇထိုင်ႁွတ်ႈၽၢႆႇတၢင်းဝၼ်းတူၵ်းတၵ်းလႆႈမီးဢိူင်ႇ သိမုၼ်ႇ ဢေႃႈ။-
ၵႃႈတီႈႁိမ်းဢိူင်ႇ သိမုၼ်ႇ၊ ၼၼ်ႉဢဝ်ၵႃႈတီႈၽၢႆႇတၢင်းဝၼ်းဢွၵ်ႇတေႃႇထိုင်ႁွတ်ႈၽၢႆႇတၢင်းဝၼ်းတူၵ်းတၵ်းလႆႈမီးဢိူင်ႇ ဢိသၶႃႇ၊ ဢေႃႈ။-
ၵႃႈတီႈႁိမ်းဢိူင်ႇ ဢိသၶႃႇ၊ ၼၼ်ႉဢဝ်ၵႃႈတီႈၽၢႆႇတၢင်းဝၼ်းဢွၵ်ႇတေႃႇထိုင်ႁွတ်ႈၽၢႆႇတၢင်းဝၼ်းတူၵ်းတၵ်းလႆႈမီးဢိူင်ႇ ၸေႇပုလုၼ်ႇ၊ ဢေႃႈ။-
ၵႃႈတီႈႁိမ်းဢိူင်ႇ ၸေႇပုလုၼ်ႇ၊ ၼၼ်ႉဢဝ်ၵႃႈတီႈၽၢႆႇတၢင်းဝၼ်းဢွၵ်ႇတေႃႇထိုင်ႁွတ်ႈၽၢႆႇတၢင်းဝၼ်းတူၵ်းတၵ်းလႆႈမီးဢိူင်ႇ ၵၢတ်ႉ၊ ဢေႃႈ။
ၶွပ်ႇၼမ်ႉလႅၼ်လိၼ်ၽၢႆႇတၢင်းၸၢၼ်းၸမ်ႉ၊ဢဝ်သေၵႃႈတီႈဝဵင်း တႃႇမႃႇ၊ ၵႂႃႇၸွမ်းၸဵင်ႇၸၢၼ်းဝၼ်းတူၵ်းၵႂႃႇၸူးတီႈပၢင်ႇၼမ်ႉႁူး ၵႃႇတေးသႃႉ၊ လႄႈငႅၵ်းၵႂႃႇၸဵင်ႇႁွင်ႇဝၼ်းတူၵ်းၸွမ်းလႅၼ်လိၼ်မိူင်း ဢေးၵျိပ်ႉ၊ ၵႂႃႇၸူးတီႈပၢင်ႇလၢႆႇ မေႇတိထေးရီးယၼ်း ဢေႃႈ။ ဢၼ်ၼႆႉသမ်ႉပဵၼ်ၶွပ်ႇၼမ်ႉလႅၼ်လိၼ်ၽၢႆႇတၢင်းၸၢၼ်းဢေႃႈ။-
“ဢၼ်ၼႆႉၸမ်ႉ၊ပဵၼ်လိၼ်ဢၼ်သူတၵ်းလႆႈတူၵ်းၸႃႇၵွၵ်ႈသေလႄႈၽႄမႅင်ႇပၼ်ပုၼ်ႈၵူၼ်းမဵဝ်း ဢိသရေး၊ ၵူႈမဵဝ်းႁႂ်ႈလႆႈႁပ်ႉၶၢမ်ႇဢဝ်ဢမူၺ်ႇဢေႃႈ။ ဢၼ်ၼႆႉၸမ်ႉ၊ပဵၼ်ဢိူင်ႇဢၼ်ၶၼ်ႈၶႅၼ်ႈသေလႄႈယူႇႁင်းၽႂ်ႁင်းမၼ်းဢေႃႈ။” ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉဢေႃႈ။
ၽၵ်းတူတင်းလၢႆဢၼ်ဢွၵ်ႇသေၵႃႈၼႂ်းဝဵင်းၼၼ်ႉမီးသိပ်းသွင်ႁူး၊လမ်းဝဵင်းၼႃႈၽၢႆႇတၢင်းႁွင်ႇယၢဝ်းသီႇႁဵင်ႁႃႈပၢၵ်ႇသွၵ်ႇလႄႈ၊-
ၽၵ်းတူဝဵင်းၸိူဝ်းၼၼ်ႉပႃးၸိုဝ်ႈပႃးသဵင်ၸွမ်းလူၺ်ႈၵူၼ်းမဵဝ်း ဢိသရေး၊ ၵူႈၸိူဝ်ႉၶိူဝ်းယူႇသေလႄႈ ၵႃႈတီႈၽၢႆႇတၢင်းႁွင်ႇတၵ်းလႆႈမီးၽၵ်းတူသၢမ်ႁူးဢၼ်ဝႃႈ၊ ၽၵ်းတူရုပိၼ်ႇ၊ၽၵ်းတူယုတႃႉ၊ၽၵ်းတူလေႇဝိ၊ ဢေႃႈ။-
ၵႃႈတီႈၽၢႆႇတၢင်းဝၼ်းဢွၵ်ႇလမ်းဝဵင်းယၢဝ်းသီႇႁဵင်ႁႃႈပၢၵ်ႇသွၵ်ႇလႄႈတၵ်းလႆႈမီးၽၵ်းတူသၢမ်ႁူးဢၼ်ဝႃႈ၊ ၽၵ်းတူယူဝ်းသႅပ်ႈ၊ၽၵ်းတူပိၼ်ႇယႃႇမိၼ်ႇ၊ၽၵ်းတူတၢၼ်ႇ ဢေႃႈ။-
ၵႃႈတီႈၽၢႆႇၼႃႈတၢင်းၸၢၼ်းလမ်းဝဵင်းယၢဝ်းသီႇႁဵင်ႁႃႈ ပၢၵ်ႇသွၵ်ႇလႄႈတၵ်းလႆႈမီးၽၵ်းတူသၢမ်ႁူးဢၼ်ဝႃႈ၊ ၽၵ်းတူသိမုၼ်ႇ၊ၽၵ်းတူဢိသၶႃႇ၊ၽၵ်းတူၸေႇပုလုၼ်ႇ၊ ဢေႃႈ။-
ၵႃႈတီႈၽၢႆႇၼႃႈဝၼ်းတူၵ်းလမ်းဝဵင်းယၢဝ်းသီႇႁဵင်ႁႃႈပၢၵ်ႇသွၵ်ႇလႄႈတၵ်းလႆႈမီးၽၵ်းတူသၢမ်ႁူးဢၼ်ဝႃႈ၊ ၽၵ်းတူၵၢတ်ႉ၊ၽၵ်းတူဢႃႇသျႃႇ၊ၽၵ်းတူၼပ်ႉထလိ၊ ဢေႃႈ။-
ၼင်ႇၼၼ်လႄႈတၢင်းဢၼ်ၶပ်ႉဢၼ်တႅၵ်ႈလဵပ်ႈႁွပ်ႈဝဵင်းၸမ်ႉ၊တၵ်းလႆႈမီးမိုၼ်ႇပၢႆပႅတ်ႇႁဵင်သွၵ်ႇဢေႃႈ။ ဢဝ်ၸႃႉၸဵမ်မိုဝ်ႉဝၼ်းၼၼ်ႉၵႂႃႇလႄႈဝဵင်းၼၼ်ႉတၵ်းလႆႈမီးၸိုဝ်ႈႁွင်ႉဝႃႈ၊ “ ထႃႇဝရႃႉၽြႃး၊ၵိင်းဝၢပ်ႈယူႇၵႃႈတီႈၼႆႈ၊ ဢေႃႈ၊” ဝႃႈၼင်ႇၼႆဢေႃႈ။ ၵျၢမ်းပရေႃးၽႅတ်ႈယေႇၸၵျေႇလႃႉယဝ်ႉယဝ်ႉဢေႃႈ။
ၼႂ်းပီဢၼ် ယေႃးယၵိမ်း၊ ၸၢမ်ႇႁၢင်ႈၸၢမ်ႇႁေႃမိူင်း ယုတႃႉ၊ လႆႈသၢမ်ပီယဝ်ႉၼၼ်ႉ ၼေႇပုၶတ်ႉၼေႇၸႃႇ၊ ၶုၼ်ႁေႃၶမ်းမိူင်း ပႃႇပုလုၼ်ႇ၊ ၶီႇသိုၵ်းမႃးတိုၵ်းတေႃးဝဵင်း ယေႇရုသလႅမ်ႇ၊ လႄႈလွမ်ႉဝႅင်းဝႆႉဢေႃႈ။-
ထႃႇဝရႃႉၽြႃး၊ ပၼ်ဢၶႂၢင်ႉႁႂ်ႈမၼ်းတိုၵ်းပႄႉတိဢဝ်ၶုၼ်ႁေႃၶမ်း ယေႃးယၵိမ်း၊ သေယဝ်ႉ၊သမ်ႉသိမ်းဢဝ်ၽၼ်ႇတႃႇၵျွင်းပိၵ်ႈမၢၼ်ႇၸဝ်ႈၵမ်ႈၽွင်ႈဢေႃႈ။ မၼ်းတိဢဝ်ၵူၼ်း ဢိသရေး၊ ၵမ်ႈၽွင်ႈပွၵ်ႈမိူဝ်းၸွမ်းမၼ်းၵႂႃႇၵႃႈတီႈမိူင်း ပႃႇပုလုၼ်ႇ၊ ၼၼ်ႉသေလႄႈဢဝ်ၽၼ်ႇတႃႇၸိူဝ်းၼၼ်ႉသႂၢင်းသႂ်ႇဝႆႉၵႃႈၼႂ်းတိူၵ်ႈၽၼ်ႇတႃႇၽြႃးမၼ်းဢေႃႈ။
မိူဝ်ႈၼၼ်ႉၶုၼ်ႁေႃၶမ်းၸႂ်ႉ ဢႃႇသပေးၼတ်ႉ၊ ၵူၼ်းငဝ်ႈၼႂ်းၶုၼ်ဢၼ်ပွင်ၵၢၼ်ၼႂ်းႁေႃၸဝ်ႈၼၼ်ႉ ႁႂ်ႈမၼ်းလိူၵ်ႈၽူႈမၢဝ်ႇၵႃႈၼႂ်းၵူၼ်းမဵဝ်း ဢိသရေး၊ ၵမ်ႈၽွင်ႈလႄႈၶဝ်ၼၼ်ႉတၵ်းလႆႈပဵၼ်ၵႃႈၼႂ်းၸိူဝ်ႉၶိူဝ်းၶုၼ်လႂ်၊မူးမၢတ်ႈၽွင်းမိူင်းလႂ်ဢေႃႈ။-
ဢိၵ်ႇတင်းၶဝ်တၵ်းလႆႈပဵၼ်ၽူႈမၢဝ်ႇဢၼ်ႁၢင်ႈလီၽၢင်လီ၊ၺၢၼ်ႇလီ၊သွၼ်ဢဝ်ဢတၢတ်ႈပိင်ႇၺႃႇဝႆႉယဝ်ႉလီလီ၊သွၼ်ငၢႆႈလႄႈတူဝ်ႁၢင်ႈၵၢင်းလွတ်ႈလၢၵ်ႈၶၼႃႇဢၼ်ဢမ်ႇလီသေယဝ်ႉ၊ၶဝ်တၵ်းလႆႈပဵၼ်ၵူၼ်းဢၼ်ၵိုင်ႇထိူၵ်ႈၶႃးၸႃးၵႃႈၼႂ်းႁေႃၸဝ်ႈဢေႃႈ။ မၼ်းၼၼ်ႉတၵ်းလႆႈသွၼ်ႁႂ်ႈၶဝ်မေႃလိၵ်ႈမေႃၵႂၢမ်းၽႃႇသႃႇၵူၼ်းမဵဝ်း ပႃႇပုလုၼ်ႇ၊ ဢေႃႈ။-
ၶုၼ်ႁေႃၶမ်းပူင်ဢမိင်ႉႁႂ်ႈဢဝ်တၢင်းၵိၼ်တၢင်းၶူပ်း၊ဢိၵ်ႇတင်းၼမ်ႉမၢၵ်ႇၸပိတ်ႉဢၼ်ၵိၼ်ၼႂ်းႁေႃၸဝ်ႈၼၼ်ႉလဵင်ႉလူၶဝ်ဢေႃႈ။ ဝၢႆးသေဢၼ်သွၼ်ပၼ်ယဝ်ႉသၢမ်ပီၸိုင်၊တၵ်းလႆႈဢဝ်ၶဝ်ၶဝ်ႈၸူးၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။-
ၼႂ်းၶဝ်ၼၼ်ႉပႃး တၢၼ်ႇယေႇလႃႉ၊ႁႃႇၼၼိ၊မိသေႇလႃႉ၊ တင်း ဢႃႇၸရိ၊ လႄႈၶဝ်ပဵၼ်ၸိူဝ်ႉၶိူဝ်း ယုတႃႉ၊ တင်းမူတ်းဢေႃႈ။-
ၵူၼ်းငဝ်ႈၼႂ်းၶုၼ်ဢၼ်ပွင်ၵၢၼ်တင်းလၢႆၼၼ်ႉတၢင်ႇၸိုဝ်ႈပၼ်သဵင်မႂ်ႇတီႈၶဝ်လႄႈဝႃႈ၊ ပေႇလတႃႉသႃႇၸႃႇ၊သႃႇတရႅၵ်ႉ၊မေးသိၵ်ႉ၊ တင်း ဢပေႇတၼေႇၵေႃး၊ ဢေႃႈ။
တၢၼ်ႇယေႇလႃႉ၊ ၼၼ်ႉဝႆႉၸႂ်ဝႃႈတေဢမ်ႇႁႂ်ႈတူဝ်မၼ်းလႆႈၵူဝ်ႈၵိူၵ်ႇလူၺ်ႈတၢင်းၵိၼ်တၢင်းၶူပ်း၊ဢိၵ်ႇတင်းၼမ်ႉမၢၵ်ႇၸပိတ်ႉၶုၼ်ႁေႃၶမ်းၼၼ်ႉဝႃႈၼႆလႄႈယွၼ်းႁႂ်ႈ ဢႃႇသပေးၼတ်ႉ၊ ၸွႆႈထႅမ်မၼ်းဢေႃႈ။-
ၽြႃးပဵၼ်ၸဝ်ႈႁႂ်ႈ ဢႃႇသပေးၼတ်ႉ၊ မီးၸႂ်ႁၵ်ႉဢဵတ်းလူ တၢၼ်ႇယေႇလႃႉ၊ ဢေႃႈ။-
ၵူၺ်းၵႃႈ၊ ဢႃႇသပေးၼတ်ႉ၊ ၵူဝ်ၶုၼ်ႁေႃၶမ်းလႄႈလၢတ်ႈတီႈ တၢၼ်ႇယေႇလႃႉ၊ လႄႈဝႃႈ၊ “တူဝ်ၶုၼ်ႁေႃၶမ်းလႆႈပူင်ဢမိင်ႉဝႆႉႁႂ်ႈသူလႆႈၵိၼ်တၢင်းၵိၼ်တၢင်းၶူပ်း၊ဢိၵ်ႇတင်းၼမ်ႉမၢၵ်ႇၸပိတ်ႉၸိူဝ်ႉႁိုဝ်ၼၼ်ႉဝႆႉယဝ်ႉ။ ပေႃးသူဢမ်ႇမီးႁၢင်ႈၽၢင်ဢၼ်ၼိူဝ်ႉၼင်တဵမ်လီမိူၼ်ၸိူဝ်ႉၼင်ႇၽူႈမၢဝ်ႇတၢင်ႇၵေႃႉတၢင်ႇၵူၼ်းၸိူဝ်းၼၼ်ႉၸိုင်၊မၼ်းၸဝ်ႈတၵ်းဢဝ်ၵဝ်တၢႆဢေႃႈ၊” ဝႃႈၼင်ႇၼႆဢေႃႈ။
တၢၼ်ႇယေႇလႃႉ၊ ၵေႃႈၵႂႃႇၸူးတီႈၵေႃႉဢၼ်ႁုင်ၶဝ်ႈႁုင်ၽၵ်းဢၼ် ဢႃႇသပေးၼတ်ႉ၊ ၶၢၼ်းဝႆႉႁႂ်ႈလႆႈလဵင်ႉလူလုမ်းလႃးမၼ်း၊ဢိၵ်ႇတင်းၵေႃႉသႄႈမၼ်းသၢမ်ၵေႃႉၼၼ်ႉလႄႈ၊-
လၢတ်ႈဝႃႈ၊ “ၸၢမ်းတူၺ်းၶႃႈၸဝ်ႈႁဝ်းၶဝ်ၸိူဝ်းၼႆႉသိပ်းဝၼ်းတဵမ်တဵမ်တႃႉ၊ပၼ်ၽၵ်းယိူဝ်ႈၽၵ်းၶဵဝ်၊ဢိၵ်ႇတင်းၼမ်ႉၵူၺ်းပုၼ်ႈဢၼ်ႁဝ်းၶႃႈတၵ်းၵိၼ်ၼၼ်ႉသေၵမ်း။-
လိုၼ်းၼၼ်ႉၸဝ်ႈႁဝ်းၸႅတ်ႈသေးၼႃႈတႃႁဝ်းၶႃႈလႄႈဢဝ်တႅၵ်ႈၵၼ်တင်းၽူႈမၢဝ်ႇၸိူဝ်းဢၼ် ၵိၼ်တၢင်းၵိၼ်တၢင်းၶူပ်းဢိၵ်ႇတင်းၼမ်ႉမၢၵ်ႇၸပိတ်ႉၶုၼ်ႁေႃၶမ်းၼၼ်ႉလႄႈၶႅၼ်းတေႃႈၸီႇယၢင်ႇတီႈႁဝ်းၶႃႈၸွမ်းၵႃႈၼင်ႇဢၼ်ၸဝ်ႈႁဝ်းႁၼ်ၼၼ်ႉသေၵမ်း၊” ဝႃႈၼင်ႇၼႆဢေႃႈ။
မၼ်းၼၼ်ႉၽွမ်ႉၸႂ်လႄႈႁႂ်ႈၶဝ်ၸၢမ်းတူၺ်းသိပ်းဝၼ်းဢေႃႈ။-
ၸေးသိပ်းဝၼ်းသေယဝ်ႉၶဝ်ၸိူဝ်းၼၼ်ႉယဵင်ႈၶႅၼ်းယူႇလီပီးမၼ်းလႄႈမီးဢဵၼ်မီးႁႅင်းၼႃႇသေၽူႈမၢဝ်ႇၸိူဝ်းဢၼ်ၵိၼ်တၢင်းၵိၼ်တၢင်းၶူပ်းၶုၼ်ႁေႃၶမ်းၼၼ်ႉဢေႃႈ။-
ၼင်ႇၼၼ်လႄႈတႄႇဢဝ်မိူဝ်ႈၼၼ်ႉၵႂႃႇၵူၼ်းတူမ်ႈၶဝ်ႈႁုင်ၽၵ်းၼၼ်ႉယင်းဢမ်ႇပၼ်တၢင်းၵိၼ်တၢင်းၶူပ်းဢၼ်ၶုၼ်ႁေႃၶမ်းလဵင်ႉလူၼၼ်ႉယဝ်ႉလႄႈဢဝ်ၽၵ်းယိူဝ်ႈၽၵ်းၶဵဝ်ၵူၺ်းလဵင်ႉလူၶဝ်ဢေႃႈ။
ၽြႃးပဵၼ်ၸဝ်ႈဢဵတ်းလူပၼ်တၢင်းၵတ်ႉတၢင်းၶၼ်၊ဢိၵ်ႇတင်းၺၢၼ်ႇဢၼ်ၶုတ်းမူင်ႇၸီးၸွင်ႇလႄႈႁုဢတၢတ်ႈပိင်ႇၺႃႇဢၼ်လၢၵ်ႇဢၼ်လၢႆးၵူႈၸိူဝ်ႉၵူႈပိူင်လႆႈၼၼ်ႉတီႈၵူၼ်းၼုမ်ႇသီႇၵေႃႉၼႆႉဢေႃႈ။ မၼ်းၸဝ်ႈယင်းထၢပ်ႈလႄႈပၼ်ထႅင်ႈပိင်ႇၺႃႇဢၼ်ၸၢင်ႈႁုပျႃႇတိၵ်ႈရူႇပႃႇရူင်ႇ၊ဢိၵ်ႇတင်းတၢင်းဢၼ်ၼွၼ်းၽၼ်ႁၼ်ၼၼ်ႉတီႈ တၢၼ်ႇယေႇလႃႉ၊ ဢေႃႈ။
မိူဝ်ႈဢၼ်တဵမ်သၢမ်ပီၸွမ်းၵႃႈၼင်ႇဢၼ်ၶုၼ်ႁေႃၶမ်းၶၢၼ်းဝႆႉၼၼ်ႉယဝ်ႉၸိုင်၊ ဢႃႇသပေးၼတ်ႉ၊ ဢဝ်ၽူႈမၢဝ်ႇၵႃႈမီးၸိူဝ်းၼၼ်ႉသႂၢင်းသႂ်ႇၶဝ်ႈၵႃႈတီႈၽၢႆႇၼႃႈၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ ဢေႃႈ။-
ၶုၼ်ႁေႃၶမ်းတိူင်ႇပၢင်ႇတွင်ႈထၢမ်ၵၼ်တင်းၶဝ်ၵူႈၵေႃႉၵူႈၵူၼ်းသေယဝ်ႉ၊ တၢၼ်ႇယေႇလႃႉ၊ႁႃႇၼၼိ၊မိသေႇလႃႉ၊ တင်း ဢႃႇၸရိ ၸိူဝ်းၼၼ်ႉယဵင်ႈၶႅၼ်းပဵၼ်ဢၼ်လီထုၵ်ႇၸႂ်မႅၼ်ႈၸႂ်မၼ်းၸဝ်ႈလိူဝ်တွၼ်းၼႃႇသေၽူႈမၢဝ်ႇတၢင်ႇၵေႃႉတၢင်ႇၵူၼ်းၸိူဝ်းၼၼ်ႉဢေႃႈ။ ပိူဝ်ႈၼႆလႄႈၶဝ်လႆႈဢရႃႇဢၼ်ၶဝ်ႈၶႃးၸႃးၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။-
ၶုၼ်ႁေႃၶမ်းတွင်ႈထၢမ်လွင်ႈတၢင်းဢၼ်လႂ်၊ဢိၵ်ႇတင်းတၢင်းႁုမဵဝ်းလႂ်သေဢမ်ႇဝႃႈ၊ၶဝ်သီႇၵေႃႉၼႆႉယဵင်ႈၶႅၼ်းၸၢင်ႈၶႅၼ်းမေႃလိူဝ်တွၼ်းၼႃႇသေၵူၼ်းဢၼ်မီးပိင်ႇၺႃႇ၊ဢိၵ်ႇတင်းမေႃပေႇတၢင်ႇၵႃႈဢၼ်မီးၵႃႈၼႂ်းမိူင်းၸဝ်ႈၵူႈတီႈၵူႈလႅၼ်ၼၼ်ႉသိပ်းပုၼ်ႈလူးၵွၼ်ႇဢေႃႈ။-
တၢၼ်ႇယေႇလႃႉ၊ ၸမ်ႉ၊မီးယူႇၼႂ်းႁေႃၸဝ်ႈတေႃႇထိုင်ႁွတ်ႈၶုၼ်ႁေႃၶမ်း သႆးရတ်ႉ၊ မိူင်း ပႃးသျႃး၊ မႃးပႄႉၼႅင်ႇဢဝ်မိူင်း ပႃႇပုလုၼ်ႇ၊ ၼၼ်ႉဢေႃႈ။
ၼႂ်းပီဢၼ်ၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ ၸၢမ်ႇႁၢင်ႈၸၢမ်ႇႁေႃလႆႈသွင်ပီၼၼ်ႉမၼ်းၼွၼ်းၽၼ်ႁၼ်ဢေႃႈ။ တၢင်းၼွၼ်းၽၼ်ႁၼ်ၼၼ်ႉႁႂ်ႈမၼ်းတူၵ်းၸႂ်သေလႄႈၼွၼ်းဢမ်ႇလပ်းလႆႈ။-
ပိူဝ်ႈၼႆလႄႈမၼ်းပူင်ဢမိင်ႉႁႂ်ႈႁွင်ႉဢဝ်ၵူၼ်းၸိူဝ်းဢၼ်မီးပိင်ႇၺႃႇလႂ်၊သြႃႇမေႃပေႇတၢင်ႇလႂ်၊သြႃႇဢၼ်ၸၢင်ႈႁေႃးၸၢင်ႈလၢတ်ႈလႂ်၊သြႃႇမေႃၽီလႂ်၊မႃးႁႂ်ႈၶဝ်မွၵ်ႇလၢတ်ႈဢၼၢၵ်ႈဢထိၵ်ႈပႄႇတၢင်းၼွၼ်းၽၼ်ႁၼ်ၼၼ်ႉတီႈမၼ်းဢေႃႈ။ မိူဝ်ႈဢၼ်ၶဝ်မႃးၸုၵ်းၶႃးၸႃးၽၢႆႇၼႃႈၶုၼ်ႁေႃၶမ်းယူႇၼၼ်ႉၸိုင်၊-
ၶုၼ်ႁေႃၶမ်းမီးဢမိင်ႉတီႈၶဝ်လႄႈဝႃႈ၊ “ၵဝ်မီးတၢင်းဢၼ်တူၵ်းၸႂ်လူၺ်ႈတၢင်းဢၼ်ၵဝ်ၼွၼ်းၽၼ်ႁၼ်ၼၼ်ႉဢေႃႈ။ ၵဝ်ၶႂ်ႈႁုဢၼၢၵ်ႈဢထိၵ်ႈပႄႇတၢင်းၼွၼ်းၽၼ်ႁၼ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၶဝ်ၸိူဝ်းၼၼ်ႉဢွၼ်ၵၼ်ဢဝ်ၽႃႇသႃႇၵႂၢမ်းဢႃႇရမိၵ်ႉ လဝ်ႈလၢတ်ႈလႄႈဝႃႈ၊ “ႁႂ်ႈၸဝ်ႈမုၼ်ယႂ်ႇၶုၼ်ႁေႃၶမ်းဢသၢၵ်ႈယၢဝ်းယိုၼ်းသေၵမ်းလူၺ်ႈတီႈၶႃႈ။ ၶႅၼ်းတေႃႈလၢတ်ႈၼႄလွင်ႈဢၼ်ၸဝ်ႈႁဝ်းၼွၼ်းၽၼ်ႁၼ်ၼၼ်ႉတီႈၶႃႈၸဝ်ႈႁဝ်းၶဝ်သေၵမ်းတီႈၶႃႈ။ ၶႃႈၸဝ်ႈႁဝ်းၶဝ်တၵ်းၽုၺ်ႇဢွၵ်ႇမွၵ်ႇၼႄပၼ်ဢၼၢၵ်ႈဢထိၵ်ႈပႄႇမၼ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းၵေႃႈလၢတ်ႈတီႈၶဝ်ၸိူဝ်းၼၼ်ႉလႄႈဝႃႈ၊ “ၵဝ်တႅပ်းတတ်းၸႂ်ၵဝ်ဝႆႉမၼ်ႈမၼ်ႈယဝ်ႉ၊သူတၵ်းလႆႈမွၵ်ႇလၢတ်ႈတၢင်းၼွၼ်းၽၼ်ႁၼ်ၵဝ်ဢိၵ်ႇတင်းဢၼၢၵ်ႈဢထိၵ်ႈပႄႇမၼ်းဢေႃႈ။ ပေႃးသူဢမ်ႇမွၵ်ႇလၢတ်ႈလႆႈၸိုင်၊သူတၵ်းလႆႈၶၢမ်ႇတၢင်းဢၼ်တႅပ်းၽၼ်းပဵၼ်ပွတ်းပဵၼ်တွၼ်ႈပႅတ်ႈလႄႈႁိူၼ်းသူၵေႃႈတၵ်းလႆႈၶၢမ်ႇတၢင်းဢၼ်ႁဵတ်းႁႂ်ႈပဵၼ်ၵွင်ၶီႈဝူဝ်းၶီႈၵႂၢႆးပႅတ်ႈဢေႃႈ။-
ပေႃးသူမွၵ်ႇလၢတ်ႈတၢင်းၼွၼ်းၽၼ်ႁၼ်ၵဝ်၊ဢိၵ်ႇတင်းဢၼၢၵ်ႈဢထိၵ်ႈပႄႇမၼ်းလႆႈၸိုင်၊ၵဝ်တၵ်းႁႂ်ႈသူလႆႈၶၢမ်ႇဢဝ်တၢင်းဢၼ်မုၼ်ႁူမ်ႇ၊ဢိၵ်ႇတင်းသူးလၢပ်ႈတင်းမုၼ်ၵုင်ႇသရေႇၼမ်ၼႃႇဢေႃႈ။ ပိူဝ်ႈၼႆလႄႈတေႃႈလဵဝ်ၼႆႉၽုၺ်ႇဢွၵ်ႇမွၵ်ႇလၢတ်ႈလွင်ႈတၢင်းၼွၼ်းၽၼ်ႁၼ်ၵဝ်၊ဢိၵ်ႇတင်းဢၼၢၵ်ႈဢထိၵ်ႈပႄႇမၼ်းတီႈၵဝ်တႃႉ၊” ဝႃႈၼင်ႇၼႆဢေႃႈ။
ၶဝ်ၸိူဝ်းၼၼ်ႉသမ်ႉလဝ်ႈလၢတ်ႈတီႈၶုၼ်ႁေႃၶမ်းထႅင်ႈလႄႈဝႃႈ၊ “ၸဝ်ႈမုၼ်ယႂ်ႇၶုၼ်ႁေႃၶမ်းတီႈၶႃႈ။ ၶႅၼ်းတေႃႈလၢတ်ႈၼႄလွင်ႈတၢင်းၼွၼ်းၽၼ်ႁၼ်ၸဝ်ႈႁဝ်းၼၼ်ႉတီႈၶႃႈၸဝ်ႈႁဝ်းၶဝ်သေၵမ်းတီႈၶႃႈ။ ၶႃႈၸဝ်ႈႁဝ်းၶဝ်တၵ်းၽုၺ်ႇၼႄဢၼၢၵ်ႈဢထိၵ်ႈပႄႇမၼ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၶုၼ်ႁေႃၶမ်းသမ်ႉမီးဢမိင်ႉလႄႈဝႃႈ၊ “မႅၼ်ႈၸွမ်းၵႃႈၼင်ႇဢၼ်ၵဝ်ထၢင်ႇၼၼ်ႉယဝ်ႉ။ သူဢွၼ်ၵၼ်ဢၢင်ႈဢၢၼ်းၶႂ်ႈႁဵတ်းႁႂ်ႈမိုဝ်ႉဝၼ်းၶိင်ႇၶႃႇမၼ်းႁိုင်ၵႂႃႇၼၢၼ်းၵႂႃႇၵွပ်ႈပိူဝ်ႈသူႁုလွင်ႈတၢင်းဢၼ်ၵဝ်တႅပ်းတတ်းၸႂ်ၵဝ်မၼ်ႈမၼ်ႈၼၼ်ႉဢေႃႈ။-
သူႁုလွင်ႈဢၼ်ပေႃးသူဢမ်ႇၽုၺ်ႇမွၵ်ႇလၢတ်ႈလႆႈၸိုင်၊သူတၵ်းလႆႈၶၢမ်ႇတၢမ်ႇဢပျတ်ႈမိူၼ်မိူၼ်ၵၼ်ၼၼ်ႉလႄႈသူၽွမ်ႉၵၼ်ႁႂ်ႈလႆႈမႄးႁႅၼ်းမႄးပွင်ၵႂၢမ်းဢၼ်ၵူတ်ႉငွၵ်းပႅတ်ႉလႅၼ်ပုၼ်ႈဢၼ်တၵ်းလဝ်ႈလၢတ်ႈတီႈၵဝ်ႁႂ်ႈထၢၼ်ႈပေႃးၶိင်ႇၶႃႇမၼ်းၶၢႆႉပုတ်ႈၵႂႃႇယဝ်ႉၼၼ်ႉဢမၢၼ်ႇၶၼ်ပဵၼ်ဢေႃႈ။ ပိူဝ်ႈၼႆလႄႈဢွၼ်ၵၼ်မွၵ်ႇလၢတ်ႈလွင်ႈတၢင်းၼွၼ်းၽၼ်ႁၼ်ၵဝ်ၼၼ်ႉတႃႉ။ ပေႃးလၢတ်ႈၸိူဝ်ႉၼင်ႇၼၼ်ၸိုင်၊ၵဝ်တၵ်းႁုလွင်ႈဢၼ်သူၸၢင်ႈၽုၺ်ႇဢွၵ်ႇမွၵ်ႇလၢတ်ႈဢၼၢၵ်ႈဢထိၵ်ႈပႄႇမၼ်းလႆႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
သြႃႇၸိူဝ်းၼၼ်ႉဢွၼ်ၵၼ်ၶိုၼ်းလဝ်ႈလၢတ်ႈလႄႈဝႃႈ၊ “ၵေႃႉဢၼ်ၸၢင်ႈမွၵ်ႇလၢတ်ႈလွင်ႈတၢင်းဢၼ်ၸဝ်ႈႁဝ်းၶႂ်ႈႁုၼၼ်ႉၵႃႈၼိူဝ်လိၼ်မိူင်းၼႆႉဢမ်ႇမီးသေၵေႃႉသေၵူၼ်းတီႈၶႃႈ။ ၶုၼ်ႁေႃၶမ်းပႃးလႂ်သေဢမ်ႇဝႃႈ၊ပိၵ်ႉသမ်ႉမီးမုၼ်ၽုင်းတၼ်းၶူဝ်းယႂ်ႇၼႃႇသေၵေႃႈဢမ်ႇတွင်ႈထၢမ်တီႈၵူၼ်းၸိူဝ်းဢၼ်မီးပိင်ႇၺႃႇလႂ်၊သြႃႇမေႃပေႇတၢင်ႇလႂ်၊သြႃႇမေႃၽီလႂ်ၸိူဝ်ႉၼင်ႇၼႆတီႈၶႃႈ။-
လွင်ႈတၢင်းဢၼ်ၸဝ်ႈမုၼ်ယႂ်ႇၶုၼ်ႁေႃၶမ်းတွင်ႈထၢမ်ၼႆႉပဵၼ်လွင်ႈတၢင်းဢၼ်လိုၵ်ႉဢၼ်လမ်ႇတီႈၶႃႈဢေႃႈ။ ၼွၵ်ႈသေၽြႃးဢၼ်ဢမ်ႇယူႇလူၺ်ႈၼိူဝ်ႉလူၺ်ႈၼင်ၼၼ်ႉၽူႈလႂ်သေၵေႃႉသေၵူၼ်းဢမ်ႇမွၵ်ႇလၢတ်ႈၼႄၸဝ်ႈႁဝ်းလႆႈတီႈၶႃႈ၊” ဝႃႈၼင်ႇၼႆဢေႃႈ။
ၵွပ်ႈပိူဝ်ႈၵႂၢမ်းၼၼ်ႉလႄႈၶုၼ်ႁေႃၶမ်းၸႂ်မႆႈၶႂ်ႈၸႃႉလႄႈဢွၵ်ႇတေႃးသႃႉႁႅင်းယႂ်ႇၼႃႇလူင်လၢင်သေလႄႈပူင်ဢမိင်ႉႁႂ်ႈပႄႇၽဵဝ်ႈၵူၼ်းဢၼ်မီးပိင်ႇၺႃႇၵႃႈဢၼ်မီးၵႃႈၼႂ်းမိူင်း ပႃႇပုလုၼ်ႇ၊ ၼၼ်ႉဢေႃႈ။-
မီးဢမိင်ႉလွင်ႈဢၼ်တၵ်းလႆႈဢဝ်ၵူၼ်းဢၼ်မီးပိင်ႇၺႃႇတင်းလၢႆတၢႆၼၼ်ႉ တၢၼ်ႇယေႇလႃႉ၊ ဢိၵ်ႇတင်းၵေႃႉသႄႈမၼ်းၵေႃႈပႃးၵႃႈၼႂ်းတၢင်းဢၼ်တေလႆႈဢဝ်တၢႆၼၼ်ႉဢေႃႈ။
မိူဝ်ႈၼၼ်ႉ၊ တၢၼ်ႇယေႇလႃႉ၊ ၵႂႃႇၸူးတီႈ ဢႃႇရွၵ်ႉ၊ ၶုၼ်သိုၵ်းဢၼ်ၵွၼ်းတပ်ႉဢၼ်ပႂ်ႉဢသၢၵ်ႈၶုၼ်ႁေႃၶမ်းလႄႈတူၵ်းတႃႇဝုၼ်ႇပုၼ်ႈၽွၼ်းဢၼ်ၶုၼ်ႁေႃၶမ်းၸႂ်ႉႁႂ်ႈဢဝ်ၵူၼ်းဢၼ်မီးပိင်ႇၺႃႇၸိူဝ်းၼၼ်ႉတၢႆၼၼ်ႉဢေႃႈ။ တၢၼ်ႇယေႇလႃႉ၊ ပႃးတင်းသတိပိင်ႇၺႃႇသေလႄႈ၊-
တွင်ႈထၢမ် ဢႃႇရွၵ်ႉ၊ လႄႈဝႃႈ၊ “ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈဢမိင်ႉၶုၼ်ႁေႃၶမ်းၼၼ်ႉၶၼ်ၽႂ်းထၢၼ်ႇၼႆႉၼင်ႇႁိုဝ်၊” ဝႃႈၼင်ႇၼႆလႄႈ၊ ဢႃႇရွၵ်ႉ၊ ၵေႃႈမွၵ်ႇလၢတ်ႈလွင်ႈမၼ်းတၢင်းမၼ်းတီႈ တၢၼ်ႇယေႇလႃႉ၊ ဢေႃႈ။
တၢၼ်ႇယေႇလႃႉ၊ ၵေႃႈၶဝ်ႈၸူးတီႈၶုၼ်ႁေႃၶမ်းလႄႈလဝ်ႈယွၼ်းဢဝ်ဢၶႂၢင်ႉႁႂ်ႈမၼ်းၸဝ်ႈပၼ်ၶိင်ႇမိုဝ်ႉဝၼ်းဢိတ်းဢွၼ်ႇၼိုင်ႈ ပုၼ်ႈတႃႇမၼ်းတၵ်းၽုၺ်ႇၼႄဢၼၢၵ်ႈဢထိၵ်ႈပႄႇတၢင်းၼွၼ်းၽၼ်ႁၼ်တီႈၶုၼ်ႁေႃၶမ်းၼၼ်ႉဢေႃႈ။-
ၵမ်းၼၼ်ႉ တၢၼ်ႇယေႇလႃႉ၊ ၶိုၼ်းမိူဝ်းၵႂႃႇၵႃႈတီႈႁိူၼ်းမၼ်းလႄႈမွၵ်ႇလၢတ်ႈလွင်ႈၼၼ်ႉၵႃႈတီႈၵေႃႉသႄႈမၼ်း ႁႃႇၼၼိ၊မိသေႇလႃႉ၊ တင်း ဢႃႇၸရိ၊ ၸိူဝ်းၼၼ်ႉ၊-
ႁႂ်ႈၶဝ်ဢွၼ်ၵၼ်သူးတွင်းႁႂ်ႈလႆႈၶၢမ်ႇဢဝ်ၵျေးၸူးၵရုၼႃႇၽြႃးပဵၼ်ၸဝ်ႈ၊ၸဝ်ႈၽုင်ႇၵၢင်ႁၢဝ်ႁႂ်ႈဢဝ်လွင်ႈတၢင်းဢၼ်လိုၵ်ႉဢၼ်လမ်ႇၼၼ်ႉၽုၺ်ႇၼႄၶဝ်လႄႈဢမ်ႇႁႂ်ႈၶဝ်လႆႈတၢႆလူၺ်ႈၵၼ်တင်းၵူၼ်းဢၼ်မီးပိင်ႇၺႃႇမိူင်း ပႃႇပုလုၼ်ႇ၊ ၸိူဝ်းၼၼ်ႉဢေႃႈ။-
ၼႂ်းၶိုၼ်းၼၼ်ႉၵမ်းလဵဝ်လွင်ႈတၢင်းဢၼ်လိုၵ်ႉဢၼ်လမ်ႇၼၼ်ႉထၢင်ႇသႃးပေႃႇမႃးတီႈ တၢၼ်ႇယေႇလႃႉ၊ ၼႂ်းပျႃႇတိၵ်ႈရူႇပႃႇရူင်ႇဢေႃႈ။ မိူဝ်ႈၼၼ်ႉ တၢၼ်ႇယေႇလႃႉ၊ ယွင်ႈယေႃးၵျေးၸူးၽြႃးပဵၼ်ၸဝ်ႈၸဝ်ႈၽုင်ႇၵၢင်ႁၢဝ်လႄႈဝႃႈ။
“ၽြႃးပဵၼ်ၸဝ်ႈပျေႉၸုမ်ႇဝႆႉတင်းပိင်ႇၺႃႇဢိၵ်ႇတင်းတၼ်းၶူဝ်းဢႃႇၼုၽေႃႇတီႈၶႃႈဢေႃႈ။ ႁႂ်ႈမီးတၢင်းဢၼ်ယုၵ်ႉယွင်ႈယွင်ႈယေႃးမၼ်းၸဝ်ႈယူႇၼိၵ်ႈၸႃႉထႃႇဝရႃႉသေၵမ်းလူၺ်ႈ။
မၼ်းၸဝ်ႈၶၢႆႉလၢႆႈၶိင်ႇၶႃႇဢုတုတီႈၶႃႈဢေႃႈ။ မၼ်းၸဝ်ႈၶျႃးၶုၼ်ႁေႃၶမ်းတူၵ်း၊ ဢိၵ်ႇတင်းမၼ်းၸဝ်ႈယွင်ႈတၢင်ႇၶုၼ်ႁေႃၶမ်း တီႈၶႃႈဢေႃႈ။ မၼ်းၸဝ်ႈပၼ်ပိင်ႇၺႃႇတီႈၵေႃႉဢၼ်မီးပိင်ႇၺႃႇၼၼ်ႉလႄႈ ပၼ်တၢင်းဢၼ်ၶုတ်းမုၵ်းၸီးၸွင်ႇ ႁုၸႅင်ႈ တီႈၵေႃႉဢၼ်မီးၺၢၼ်ႇၼၼ်ႉဢေႃႈ။
မၼ်းၸဝ်ႈၼႄပျႃးလွင်ႈတၢင်းဢၼ်လိုၵ်ႉ ဢၼ်လမ်ႇၸိူဝ်းၼၼ်ႉဢေႃႈ။ မၼ်းၸဝ်ႈႁုႁၼ်ၵႃႈဢၼ်မီးၵႃႈၼႂ်း လပ်းသိင်ႇၼၼ်ႉလႄႈ ဢၼ်လႅင်းတႄႇယူႇၼႂ်းမၼ်းၸဝ်ႈဝႆႉ တီႈၶႃႈဢေႃႈ။
ၽြႃးပဵၼ်ၸဝ်ႈပူႇမွၼ်ႇၶႃႈၸဝ်ႈတီႈၶႃႈ။ ၶႃႈၸဝ်ႈယွင်ႈယေႃးၵျေးၸူးၸဝ်ႈႁဝ်းလႄႈ ႁဵတ်းထေႃးပၼႃႇတၢင်းဢၼ်ရူဝ်ႇသေႇ ၸဝ်ႈႁဝ်းတီႈၶႃႈဢေႃႈ။ ၸဝ်ႈႁဝ်းပၼ်ပိင်ႇၺႃႇဢိၵ်ႇတင်းႁႅင်းတၼ်းၶူဝ်း တီႈၶႃႈၸဝ်ႈသေယဝ်ႉ၊ ၸဝ်ႈႁဝ်းထွမ်ႇဢဝ်ၵႂၢမ်းသူးတွင်းၶႃႈၸဝ်ႈလႄႈ ၽုၺ်ႇၼႄႁႂ်ႈၶႃႈၸဝ်ႈႁဝ်းၶဝ်ႁုလွင်ႈတၢင်းဢၼ် တၵ်းလႆႈမွၵ်ႇလၢတ်ႈတီႈၶုၼ်ႁေႃၶမ်းၼၼ်ႉ တီႈၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ တၢၼ်ႇယေႇလႃႉ၊ ၵႂႃႇၸူးတီႈ ဢႃႇရွၵ်ႉ၊ ၵေႃႉဢၼ်ၶုၼ်ႁေႃၶမ်းပူင်ဢမိင်ႉႁႂ်ႈမၼ်းဢဝ်ၵူၼ်းဢၼ်မီးပိင်ႇၺႃႇတင်းလၢႆတၢႆၼၼ်ႉလႄႈ၊လၢတ်ႈတီႈမၼ်းလႄႈဝႃႈ၊ “ယႃႇပေဢဝ်ၶဝ်ၸိူဝ်းၼႆႉတၢႆသေၵမ်း၊ဢဝ်ၵဝ်ၶႃႈသႂၢင်းၶဝ်ႈၸူးၶုၼ်ႁေႃၶမ်းတႃႉ။ ၵဝ်ၶႃႈတၵ်းၽုၺ်ႇဢွၵ်ႇမွၵ်ႇလၢတ်ႈဢၼၢၵ်ႈဢထိၵ်ႈပႄႇတၢင်းၼွၼ်းၽၼ်ႁၼ်ၼၼ်ႉတီႈၶုၼ်ႁေႃၶမ်းဢေႃႈ၊” ဝႃႈၼင်ႇၼႆဢေႃႈ။
ဢႃႇရွၵ်ႉ၊ ၵေႃႈႁိပ်ႈၼႅတ်ႈဢဝ် တၢၼ်ႇယေႇလႃႉ၊ သႂၢင်းၶဝ်ႈၵႃႈတီႈၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ ၵမ်းလဵဝ်လႄႈလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “ၶႃႈၸဝ်ႈထူပ်းႁၼ်ၵူၼ်းမဵဝ်း ၵျူး၊ ဢၼ်လႆႈၶၢမ်ႇတၢင်းဢၼ်တိသိမ်းဢဝ်မႃးၵေႃႉၼိုင်ႈ၊ဢၼ်ၸၢင်ႈၽုၺ်ႇဢွၵ်ႇမွၵ်ႇၼႄဢၼၢၵ်ႈဢထိၵ်ႈပႄႇတၢင်းၼွၼ်းၽၼ်ႁၼ်ၸဝ်ႈမုၼ်ယႂ်ႇၶုၼ်ႁေႃၶမ်းလႆႈၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းၵေႃႈလၢတ်ႈတီႈ တၢၼ်ႇယေႇလႃႉ၊ ဢၼ်လႆႈၸိုဝ်ႈပေႇလတႃႉသႃႇၸႃႇၼၼ်ႉလႄႈဝႃႈ၊ “မႂ်းၸၢင်ႈၽုၺ်ႇဢွၵ်ႇမွၵ်ႇၼႄပၼ်တၢင်းၼွၼ်းၽၼ်ႁၼ်ၵဝ်၊ဢိၵ်ႇတင်းဢၼၢၵ်ႈဢထိၵ်ႈပႄႇမၼ်းလႆႈႁိုဝ်း၊” ဝႃႈၼင်ႇၼႆဢေႃႈ။
တၢၼ်ႇယေႇလႃႉ၊ ၵေႃႈလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “ၸဝ်ႈမုၼ်ယႂ်ႇၶုၼ်ႁေႃၶမ်းတီႈၶႃႈ။ ၵူၼ်းဢၼ်မီးပိင်ႇၺႃႇလႂ်လႄႈသင်၊သြႃႇမေႃပေႇတၢင်ႇလႂ်လႄႈသင်၊သြႃႇမေႃၽီလႂ်လႄႈသင်၊သြႃႇဢၼ်ၸၢင်ႈႁေႃးၸၢင်ႈလၢတ်ႈလႄႈသင်၊ဢမ်ႇၸၢင်ႈၽုၺ်ႇဢွၵ်ႇမွၵ်ႇလၢတ်ႈၼႄလွင်ႈတၢင်းဢၼ်လိုၵ်ႉဢၼ်လမ်ႇဢၼ်ၸဝ်ႈႁဝ်းထၢမ်ၼၼ်ႉလႆႈသေၵေႃႉသေၵူၼ်းတီႈၶႃႈ။-
ၵူၺ်းၵႃႈ၊မီးၽြႃးပဵၼ်ၸဝ်ႈသူႇၼိုင်ႈဢၼ်မီးၵႃႈၼိူဝ်ၽုင်ႇၵၢင်ႁၢဝ်ၼၼ်ႉၸၢင်ႈၽုၺ်ႇၼႄမွၵ်ႇလၢတ်ႈဢၼ်လိုၵ်ႉဢၼ်လမ်ႇၼၼ်ႉတီႈၶႃႈဢေႃႈ။ မၼ်းၸဝ်ႈၼၼ်ႉမွၵ်ႇလၢတ်ႈပၼ်ငိၼ်းလွင်ႈတၢင်းဢၼ်တၵ်းပဵၼ်ၸိူဝ်ႉႁိုဝ်မႃးၶိင်ႇၵႃႇလႃႉၵမ်းလိုၼ်းပုၼ်ႉတီႈၶုၼ်လူင် ၼေႇပုၶတ်ႉၼေႇၸႃႇ၊ တီႈၶႃႈဢေႃႈ။ တေႃႈလဵဝ်ၼႆႉၵဝ်ၶႃႈတၵ်းမွၵ်ႇလၢတ်ႈတၢင်းၼွၼ်းၽၼ်ႁၼ်ၸဝ်ႈဢၼ်ဝႃႈ၊ပျႃႇတိၵ်ႈရူႇပႃႇရူင်ႇဢၼ်ၸဝ်ႈႁဝ်းလႆႈၶၢမ်ႇဢဝ်ယၢမ်းမိူဝ်ႈဢၼ်ၸဝ်ႈႁဝ်းၼွၼ်းလပ်းယူႇၼၼ်ႉတီႈၶႃႈဢေႃႈ။
“ၸဝ်ႈမုၼ်ယႂ်ႇၶုၼ်ႁေႃၶမ်းတီႈၶႃႈ။ ယၢမ်းမိူဝ်ႈဢၼ်ၸဝ်ႈႁဝ်းၼွၼ်းလပ်းယူႇၼၼ်ႉၸဝ်ႈႁဝ်းၽၼ်ႁၼ်တၢင်းဢၼ်တၵ်းပဵၼ်မႃးၵမ်းလိုၼ်းမိူဝ်းၼႃႈၼၼ်ႉတီႈၶႃႈဢေႃႈ။ ၽြႃးပဵၼ်ၸဝ်ႈၸဝ်ႈဢၼ်ၽုၺ်ႇဢွၵ်ႇၼႄပျႃးလွင်ႈတၢင်းဢၼ်လိုၵ်ႉဢၼ်လမ်ႇၼၼ်ႉၼႄပျႃးလွင်ႈတၢင်းဢၼ်တၵ်းပဵၼ်မႃးၸိူဝ်ႉၼင်ႇႁိုဝ်ၼၼ်ႉတီႈၸဝ်ႈႁဝ်းတီႈၶႃႈယဝ်ႉ။-
တေႃႈလဵဝ်ၼႆႉလွင်ႈတၢင်းဢၼ်လိုၵ်ႉဢၼ်လမ်ႇၼၼ်ႉထၢင်ႇသႃးမႃးၵႃႈတီႈၶႃႈၸဝ်ႈႁဝ်း၊ၵွပ်ႈပိူဝ်ႈဢၼ်ၶႃႈၸဝ်ႈယဵင်ႈၶႅၼ်းမီးပိင်ႇၺႃႇလိူဝ်တွၼ်းၼႃႇသေၵူၼ်းသတ်ႉတဝႃႇ တၢင်ႇၵေႃႉတၢင်ႇၵူၼ်းဢမ်ႇၸႂ်ႈတီႈၶႃႈ။ လွင်ႈတၢင်းၼႆႉၸႅင်ႈမႃးလႅင်းမႃးတီႈၶႃႈၸဝ်ႈပုၼ်ႈလွင်ႈၼင်ႇႁိုဝ်ၸဝ်ႈၶုၼ်လူင်တၵ်းတေလႆႈသွၼ်ဢဝ်ဢၼၢၵ်ႈဢထိၵ်ႈပႄႇမၼ်းလႄႈတၵ်းတေႁုၸႅင်ႈတၢင်းဢၼ်ၸဝ်ႈႁဝ်းထၢင်ႇထိူမ်ၵႃႈၼႂ်းၸႂ်ၸဝ်ႈႁဝ်းၼၼ်ႉတီႈၶႃႈဢေႃႈ။
“ၸဝ်ႈမုၼ်ယႂ်ႇၶုၼ်ႁေႃၶမ်းတီႈၶႃႈ။ ၵႃႈၼႂ်းပျႃႇတိၵ်ႈရူႇပႃႇရူင်ႇၸဝ်ႈႁဝ်းၼၼ်ႉၸဝ်ႈႁဝ်းႁၼ်ႁုၼ်ႇႁၢင်ႈသၢင်းထုလူင်ဢၼ်ၸုၵ်းယူႇၽၢႆႇၼႃႈၸဝ်ႈႁဝ်းဢေႃႈ။ ႁုၼ်ႇႁၢင်ႈသၢင်းထုၼၼ်ႉယႂ်ႇသုင်လႄႈမီးဢရွင်ႇဢၼ်သွင်ႇဢၼ်ႁိူဝ်ႈၼႃႇလူင်လၢင်မီးႁၢင်ႈၽၢင်ဢၼ်လီၵူဝ်လီႁႄၼႃႇဢေႃႈ။-
ႁုၼ်ႇႁၢင်ႈသၢင်းထုၼၼ်ႉၵွၵ်းႁူဝ်မၼ်းပဵၼ်ၶမ်းလွတ်ႈငၢၼ်ႇ၊ႁူဝ်ဢူၵ်းမၼ်းတင်းၶႅၼ်မၼ်းသွင်ၶွၼ်ပဵၼ်ငိုၼ်း၊တွင်ႉမၼ်းတင်းၶႃလူင်မၼ်းသွင်ၶွၼ်ပဵၼ်တွင်းလိူင်၊-
ပွင်ႈၵၢဝ်ႈမၼ်းတင်းသွင်ၶွၼ်ပဵၼ်လဵၵ်းလႄႈ၊တိၼ်မၼ်းၼၼ်ႉပဵၼ်လဵၵ်းပွတ်ႈၼိုင်ႈ၊လိၼ်ၼဵဝ်ပွတ်းၼိုင်ႈတီႈၶႃႈဢေႃႈ။-
ယၢမ်းမိူဝ်ႈဢၼ်ၸဝ်ႈႁဝ်းယင်းတိုၵ်ႉတူၺ်းႁုၼ်ႇႁၢင်ႈသၢင်းထုၼၼ်ႉယူႇၼၼ်ႉ၊မၢၵ်ႇႁိၼ်လုၵ်ႈၼိုင်ႈဢၼ်ဢမ်ႇမီးၽူႈလႂ်ဢဝ်မၼ်းထိမ်ႈၼၼ်ႉလုၵ်ႉသေၵႃႈတီႈၼႃႈၽႃသေလႄႈတူၵ်းသႂ်ႇၵႃႈၼိူဝ်ႁုၼ်ႇႁၢင်ႈသၢင်းထုၵႃႈတီႈတိၼ်ဢၼ်ပဵၼ်လဵၵ်း၊ဢိၵ်ႇတင်းလိၼ်ၼဵဝ်ၼၼ်ႉလႄႈႁၵ်းႁိၵ်းတႅၵ်ႇယွႆႈၵႂႃႇဢေႃႈ။-
မိူဝ်ႈၼၼ်ႉၵမ်းလဵဝ်၊လဵၵ်း၊လိၼ်ၼဵဝ်၊တွင်းလိူင်၊ငိုၼ်း၊ၶမ်းၸိူဝ်းၼၼ်ႉတႅၵ်ႇယၢႆႈၵႂႃႇမိူၼ်ၸိူဝ်ႉၼင်ႇမုၼ်ႈလိၼ်ၵႃႈၼႂ်းတလၢင်းယဵပ်ႇၶဝ်ႈၼႂ်းၶိင်ႇႁႅင်ႈၼၼ်ႉဢေႃႈ။ လူမ်းပတ်ႉထူဝ်းၽူင်ႉပိဝ်ၵႂႃႇလႄႈႁွႆးမၼ်းယင်းဢမ်ႇၵိုတ်းဢမ်ႇၵျၢၼ်ႇဝႆႉလႃးလႃးဢေႃႈ။ ၵူၺ်းၵႃႈ၊မၢၵ်ႇႁိၼ်ဢၼ်မႃးတူၵ်းသႂ်ႇႁုၼ်ႇႁၢင်ႈသၢင်းထုၼၼ်ႉၸမ်ႉ၊ယႂ်ႇၽႄႈၵႂၢင်ႈမႃးပဵၼ်လွႆလူင်ၵႂႃႇလႄႈလူၼ်ႉတဵမ်ၵႃႈၼိူဝ်ၼႃႈလိၼ်မိူင်းၵႂႃႇတီႈၶႃႈဢေႃႈ။
“ဢၼ်ၼႆႉၸမ်ႉ၊ပဵၼ်တၢင်းၼွၼ်းၽၼ်ႁၼ်ၼၼ်ႉတီႈၶႃႈဢေႃႈ။ ၸဝ်ႈမုၼ်ယႂ်ႇၶုၼ်ႁေႃၶမ်းတီႈၶႃႈ။ တေႃႈလဵဝ်ၼႆႉၶႃႈၸဝ်ႈႁဝ်းသမ်ႉတေမွၵ်ႇလၢတ်ႈဢၼၢၵ်ႈဢထိၵ်ႈပႄႇမၼ်းတီႈၸဝ်ႈႁဝ်းတီႈၶႃႈဢေႃႈ။-
ၸဝ်ႈမုၼ်ယႂ်ႇၶုၼ်ႁေႃၶမ်းတီႈၶႃႈ။ ၸဝ်ႈႁဝ်းပဵၼ်ၶုၼ်ႁေႃၶမ်းၼိူဝ်ၶုၼ်ႁေႃၶမ်းတင်းလၢႆတီႈၶႃႈဢေႃႈ။ ၽြႃးပဵၼ်ၸဝ်ႈၽုင်ႇၵၢင်ႁၢဝ်ႁႂ်ႈၸဝ်ႈႁဝ်းပဵၼ်ၸဝ်ႈမုၼ်ယႂ်ႇၶုၼ်ႁေႃၶမ်းတီႈၶႃႈယဝ်ႉလႄႈဢဝ်တၼ်းၶူဝ်းဢႃႇၼုၽေႃႇတၢင်းၵတ်ႉတၢင်းၶၼ်၊ဢိၵ်ႇတင်းမုၼ်သရေႇပၼ်တီႈၸဝ်ႈႁဝ်းၶႃႈယဝ်ႉ၊-
မၼ်းၸဝ်ႈႁႂ်ႈၸဝ်ႈႁဝ်းလႆႈဢုပ်ႉပိူင်ႇၵႃႈၼိူဝ်ၵူၼ်းသတ်ႉတဝႃႇတင်းလၢႆ၊ဢိၵ်ႇတင်းၵႃႈၼိူဝ်တူဝ်သတ်းလႄႈၼူၵ်ႉတင်းလၢႆတီႈၶႃႈယဝ်ႉ။ ၸဝ်ႈႁဝ်းၸမ်ႉ၊ပဵၼ်ၵွၵ်းႁူဝ်ၶမ်းမၼ်းၼၼ်ႉတီႈၶႃႈဢေႃႈ။-
လိုၼ်းသေၸဝ်ႈႁဝ်းၼၼ်ႉတၵ်းမီးသိုင်ႇၸိုင်ႈဝၢၼ်ႈမိူင်းဢၼ်ဢမ်ႇယႂ်ႇမျၢတ်ႈထၢၼ်ႇသိုင်ႇၸိုင်ႈဝၢၼ်ႈမိူင်းၸဝ်ႈႁဝ်းၼၼ်ႉမိူင်းၼိုင်ႈတီႈၶႃႈဢေႃႈ။ လိုၼ်းၼၼ်ႉသိုင်ႇၸိုင်ႈဝၢၼ်ႈမိူင်းထူၼ်ႈသၢမ်ဢၼ်ဝႃႈသိုင်ႇၸိုင်ႈဝၢၼ်ႈမိူင်းတွင်းလိူင်ဢၼ်လႆႈဢုပ်ႉပိူင်ႇၵႃႈၼိူဝ်ၼႃႈလိၼ်မိူင်းတင်းၼႃႈၼၼ်ႉတၵ်းပေႃႇပဵၼ်မႃးတီႈၶႃႈဢေႃႈ။-
လိုၼ်းသေၼၼ်ႉတၵ်းမီးသိုင်ႇၸိုင်ႈဝၢၼ်ႈမိူင်းထူၼ်ႈသီႇဢၼ်ၵႅၼ်ႇၶႅင်မိူၼ်ၸိူဝ်ႉၼင်ႇလဵၵ်းဢၼ်ယႃႉႁၵ်းတင်းသဵင်ႈတင်းလူင်တႅၵ်ႇလႅဝ်ပႅတ်ႈၼၼ်ႉတီႈၶႃႈဢေႃႈ။ သိုင်ႇၸိုင်ႈဝၢၼ်ႈမိူင်းၼၼ်ႉတၵ်းယႃႉႁၵ်းသိုင်ႇၸိုင်ႈဝၢၼ်ႈမိူင်းၵဝ်ႇၵဝ်ႇၸိူဝ်းၼၼ်ႉယွၵ်းယွႆႈမူတ်းလႄႈပႄႉၼႅင်တီႈၶႃႈဢေႃႈ။-
ၸဝ်ႈႁဝ်းသမ်ႉၽၼ်ႁၼ်တိၼ်မၼ်းတင်းၼိဝ်ႉတိၼ်မၼ်းပဵၼ်လိၼ်ၼဵဝ်ပွတ်းၼိုင်ႈ၊လဵၵ်းပွတ်းၼိုင်ႈၼၼ်ႉတၵ်းပဵၼ်သိုင်ႇၸိုင်ႈဝၢၼ်ႈမိူင်းဢၼ်တႅၵ်ႇၽႄၵၼ်ၼၼ်ႉတီႈၶႃႈဢေႃႈ။ ၸွမ်းၼင်ႇဢၼ်ၸဝ်ႈႁဝ်းၽၼ်ႁၼ်လဵၵ်းလေႃးလႄးၵၼ်တင်းလိၼ်ၼဵဝ်ယူႇၼၼ်ႉသိုင်ႇၸိုင်ႈဝၢၼ်ႈမိူင်းၼၼ်ႉတၵ်းမီးႁႅင်းဢၼ်ၵႅၼ်ႇၶႅင်မိူၼ်လဵၵ်းၼၼ်ႉတီႈၶႃႈဢေႃႈ။-
ၼိဝ်ႉတိၼ်ၸိူဝ်းဢၼ်ပဵၼ်လဵၵ်းပွတ်းၼိုင်ႈ၊လိၼ်ၼဵဝ်ပွတ်းၼိုင်ႈၼၼ်ႉပွင်ႇဝႃႈသိုင်ႇၸိုင်ႈဝၢၼ်ႈမိူင်းၽၢၵ်ႇၼိုင်ႈတၵ်းမီးႁႅင်းဢၼ်ၵႅၼ်ႇၶႅင်လႄႈ၊ၽၢၵ်ႇၼိုင်ႈၸမ်ႉ၊တၵ်းဢူၼ်ႈဢွၼ်ႇဢေႃႈ။-
တၢင်းဢၼ်ၸဝ်ႈႁဝ်းၽၼ်ႁၼ်လဵၵ်းလေႃးလႄးၵၼ်တင်းလိၼ်ၼဵဝ်ၼၼ်ႉပွင်ႇဝႃႈ၊ၶုၼ်ဢၼ်ဢုပ်ႉပိူင်ႇသိုင်ႇၸိုင်ႈဝၢၼ်ႈမိူင်းၼၼ်ႉတၵ်းၶတ်းၸႂ်တႄႇၼႃႈႁိူၼ်းလူၺ်ႈၵၼ်တင်းၵူၼ်းတၢင်ႇၸိူဝ်ႉတၢင်ႇၶိူဝ်းႁႂ်ႈပဵၼ်ၼမ်ႉၼိုင်ႈၸႂ်လဵဝ်ၵၼ်ဢေႃႈ။ ၵူၺ်းၵႃႈ၊ၶဝ်ဢမ်ႇၽွမ်ႉသဵင်ပဵင်းပၢၵ်ႇၵၼ်လႆႈမိူၼ်ၸိူဝ်ႉၼင်ႇလဵၵ်းတင်းလိၼ်ၼဵဝ်ဢမ်ႇၶဝ်ႈၵၼ်လႆႈၼၼ်ႉတီႈၶႃႈဢေႃႈ။-
ၼႂ်းၸူဝ်ႈပၢၼ်ၶုၼ်ႁေႃၶမ်းၸိူဝ်းၼၼ်ႉၽြႃးပဵၼ်ၸဝ်ႈ၊ၸဝ်ႈၽုင်ႇၵၢင်ႁၢဝ်တၵ်းတႄႇတင်ႈသိုင်ႇၸိုင်ႈဝၢၼ်ႈမိူင်းဢၼ်ဢမ်ႇႁွတ်ႈတၢင်းဢၼ်လုဢၼ်လႅဝ်လႆႈၼၼ်ႉဢၼ်ၼိုင်ႈဢေႃႈ။ မိူင်းၼၼ်ႉတၵ်းဢမ်ႇတွၼ်ႉတူၵ်းသုမ်းလုလႅဝ်လႃးလႃးလႄႈ၊တၵ်းယႃႉၽဵဝ်ႈသိုင်ႇၸိုင်ႈဝၢၼ်ႈမိူင်းဢၼ်ဝႃႈမႃးယဝ်ႉၸိူဝ်းၼၼ်ႉလုလႅဝ်ပႅတ်ႈလုမ်းလုမ်းသေယဝ်ႉ၊တၵ်းတႄႇယူႇတႃႇသေႇမၼ်ႈၶိူင်ႇတီႈၶႃႈဢေႃႈ။-
ၸဝ်ႈႁဝ်းသမ်ႉၽၼ်ႁၼ်မၢၵ်ႇႁိၼ်လုၵ်ႈၼိုင်ႈဢၼ်ဢမ်ႇမီးၽူႈလႂ်ဢဝ်မၼ်းထိမ်ႈၼၼ်ႉလုၵ်ႉသေၵႃႈတီႈၼႃႈၽႃသေလႄႈတူၵ်းသႂ်ႇၵႃႈၼိူဝ်ႁုၼ်ႇႁၢင်ႈသၢင်းထုဢၼ်ပဵၼ်လဵၵ်း၊တွင်းလိူင်၊လိၼ်ၼဵဝ်၊ငိုၼ်း၊ၶမ်းၼၼ်ႉတႅၵ်ႇလႅဝ်ၵႂႃႇၼၼ်ႉဢေႃႈ။ ၽြႃးပဵၼ်ၸဝ်ႈဢၼ်ယႂ်ႇမျၢတ်ႈၼႃႇၼၼ်ႉမွၵ်ႇလၢတ်ႈလွင်ႈတၢင်းဢၼ်တၵ်းပဵၼ်မႃးမိူဝ်ႈၵမ်းလိုၼ်းပုၼ်ႉၼၼ်ႉတီႈၸဝ်ႈမုၼ်ယႂ်ႇၶုၼ်ႁေႃၶမ်းတီႈၶႃႈဢေႃႈ။ တၢင်းၼွၼ်းၽၼ်ႁၼ်၊ဢိၵ်ႇတင်းဢၼၢၵ်ႈဢထိၵ်ႈပႄႇမၼ်းပဵၼ်ဢၼ်မၢၼ်ႇမႅၼ်ႈတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ ၶုပ်ႉမူပ်ႇဝႆႈ တၢၼ်ႇယေႇလႃႉ၊ သေယဝ်ႉ၊ပူင်ဢမိင်ႉႁႂ်ႈဢဝ်ၶိူင်ႈတၢင်းလူႇ၊ဢိၵ်ႇတင်းၶိူင်ႈၼၢမ်ႇသႃႇဢၼ်ၽဝ်ၽႆးသေလႄႈသၢၵ်ႈၵၢပ်ႈတီႈမၼ်းဢေႃႈ။-
ၶုၼ်ႁေႃၶမ်းၵေႃႈလၢတ်ႈလႄႈဝႃႈ၊ “ၽြႃးပဵၼ်ၸဝ်ႈ၊ၸဝ်ႈမႂ်းၼၼ်ႉပဵၼ်ၽြႃးၼိူဝ်ၽြႃးတင်းလၢႆ၊ပဵၼ် ထႃႇဝရႃႉၽြႃး၊ ၵႃႈၼိူဝ်ၶုၼ်ႁေႃၶမ်းတင်းလၢႆ၊ၸဝ်ႈဢၼ်ၽုၺ်ႇဢွၵ်ႇၼႄပျႃးလွင်ႈတၢင်းဢၼ်လိုၵ်ႉဢၼ်လမ်ႇလႆႈၼၼ်ႉဢေႃႈ၊” ဝႃႈၼင်ႇၼႆဢေႃႈ။-
ၶုၼ်ႁေႃၶမ်းယုၵ်ႉတၢင်ႇပၼ်ဢရႃႇ တၢၼ်ႇယေႇလႃႉ၊ လႄႈၶျႃးပၼ်သူးလၢပ်ႈဢၼ်ယႂ်ႇၼမ်ၼႃႇလူင်လၢင်သေယဝ်ႉ၊ၶၢၼ်းမၼ်းဝႆႉႁႂ်ႈပဵၼ်ဝုၼ်ႇလူင်ၼႂ်းမိူင်း ပႃႇပုလုၼ်ႇ၊ ဢိၵ်ႇတင်းဝုၼ်ႇဢၼ်ဢုပ်ႉၵႃႈၼိူဝ်ၵူၼ်းဢၼ်မီးပိင်ႇၺႃႇမိူင်း ပႃႇပုလုၼ်ႇ၊ တင်းလၢႆဢေႃႈ။-
ၸွမ်းၵႃႈၼင်ႇဢၼ် တၢၼ်ႇယေႇလႃႉ၊ လဝ်ႈယွၼ်းၼၼ်ႉ၊ၶုၼ်ႁေႃၶမ်းၵေႃႈၶၢၼ်း သႃႇတရႅၵ်ႉ၊မေးသိၵ်ႉ၊ တင်း ဢပေႇတၼေႇၵေႃး၊ ၸိူဝ်းၼၼ်ႉဝႆႉ ႁႂ်ႈပဵၼ်ဝုၼ်ႇၵႃႈၼႂ်းမိူင်း ပႃႇပုလုၼ်ႇ၊ ဢေႃႈ။ တၢၼ်ႇယေႇလႃႉ၊ ၸမ်ႉ၊လႆႈယူႇၵႃႈၼႂ်းလုမ်းႁေႃၶမ်းဢေႃႈ။
ၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ ႁဵတ်းႁုၼ်ႇႁၢင်ႈသၢင်းထုၶမ်းဢၼ်သုင်ႁူၵ်းသိပ်းသွၵ်ႇ၊ၵႂၢင်ႈႁူၵ်းသွၵ်ႇၼၼ်ႉသေယဝ်ႉ၊ဢဝ်ပူၵ်းတင်ႈဝႆႉၵႃႈတီႈၼႂ်းပၢင်ႇပဵင်း တုရႃႉ၊ ၵႃႈၼႂ်းမိူင်း ပႃႇပုလုၼ်ႇ၊ ၼၼ်ႉဢေႃႈ။-
မိူဝ်ႈၼၼ်ႉၶုၼ်ႁေႃၶမ်းပူင်ဢမိင်ႉတီႈၸဝ်ႈၽႃႉ၊မဵဝ်ႉဝုၼ်ႇ၊ဝုၼ်ႇလူင်ၽၢႆႇၵဵပ်းၶွၼ်ႇ၊ၶုၼ်ၸွမ်သိုၵ်း၊ဝုၼ်ႇလူင်ၽၢႆႇၸီႇယၢင်ႇတြႃး၊ဢမၢတ်ႈလူင်ၽၢႆႇၸတ်းၵၢၼ်၊ဢမၢတ်ႈလူင်ၽၢႆႇတိူင်ႇပၢင်ႇ၊မူးမၢတ်ႈၽွင်းမိူင်းၼႂ်းသိုင်ႇတိူင်းမိူင်းၸဝ်ႈတင်းသဵင်ႈတင်းလူင်ဢွၼ်ၵၼ်မႃးၸုတုမ်ၵၼ်ၵႃႈတီႈပွႆးႁုၼ်ႇႁၢင်ႈသၢင်းထုဢၼ်ၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ ပူၵ်းတင်ႈဝႆႉၼၼ်ႉဢေႃႈ။-
မိူဝ်ႈဢၼ်ၶုၼ်ဢၼ်ပွင်ၵၢၼ်တင်းသဵင်ႈတင်းလူင်ၸုတုမ်ၵၼ်မႃးၵႃႈတီႈပွႆးႁုၼ်ႇႁၢင်ႈသၢင်းထုၼၼ်ႉလႄႈဢွၼ်ၵၼ်ၸုၵ်းယူႇၵႃႈတီႈၽၢႆႇၼႃႈႁုၼ်ႇႁၢင်ႈသၢင်းထုၼၼ်ႉယူႇၸိုင်၊-
ၵူၼ်းဢၼ်ပၢဝ်ႇသေႃႇၼၼ်ႉႁွင်ႉပၢဝ်ႇႁွင်ႉသေႃႇတင်းသဵင်ဢၼ်ယႂ်ႇၼႃႇလႄႈဝႃႈ၊ “ၵူၼ်းၵူႈၸိူဝ်ႉၵူႈမဵဝ်းဢၼ်လၢတ်ႈၵႂၢမ်းၽႃႇသႃႇၶေႃၶေႃႁင်းၽႂ်ႁင်းမၼ်းၶဝ်႟။ ဢမိင်ႉၸဝ်ႈမီးၸမ်ႉ၊-
မိူဝ်ႈဢၼ်သူလႆႈငိၼ်းသဵင်ဢၼ်ပဝ်ႇၼႄးပဝ်ႇၶရႃႇ၊ပဝ်ႇပီႇလႂ်၊သဵင်ဢၼ်လဵတ်းတိင်ႇလဵတ်းတရေႃးလႂ်၊သဵင်ဢၼ်ႁႆႇၵွင်ၶဵတ်ႇလႂ်လႄႈတူႇရိယႃႇၵူႈၸိူဝ်ႉၵူႈမဵဝ်းၼၼ်ႉၸိုင်၊သူတၵ်းလႆႈဢွၼ်ၵၼ်ၶုပ်ႉမူပ်ႇဝႆႈႁုၼ်ႇႁၢင်ႈသၢင်းထုၶမ်းဢၼ်ၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ ပူၵ်းတင်ႈဝႆႉၼၼ်ႉဢေႃႈ။-
ၽူႈလႂ်သေဢမ်ႇဝႃႈ၊ၵေႃႉဢၼ်ဢမ်ႇၶုပ်ႉမူပ်ႇလႄႈဢမ်ႇဝႆႈၼၼ်ႉႁႂ်ႈဢဝ်ထိမ်ႈၶျႃးတူၵ်းသႂ်ႇၵႃႈၼႂ်းမုၵ်ႉၽႆးဢၼ်လုၵ်ႉမႆႈယူႇၼၼ်ႉၵမ်းလဵဝ်သေ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈမိူဝ်ႈဢၼ်ၶဝ်ငိၼ်းသဵင်တူႇရိယႃႇၼၼ်ႉၵူၼ်းၵူႈၸိူဝ်ႉၵူႈမဵဝ်းဢၼ်လၢတ်ႈၵႂၢမ်းၽႃႇသႃႇၶေႃၶေႃႁင်းၽႂ်ႁင်းမၼ်းတင်းသဵင်ႈတင်းလူင်ၼၼ်ႉဢွၼ်ၵၼ်ၶုပ်ႉမူပ်ႇလႄႈဝႆႈႁုၼ်ႇႁၢင်ႈသၢင်းသုၶမ်းဢၼ်ၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ ပူၵ်းတင်ႈဝႆႉၼၼ်ႉဢေႃႈ။
မိူဝ်ႈၶိင်ႇၼၼ်ႉၵူၼ်းမဵဝ်း ပႃႇပုလုၼ်ႇ၊ ၵမ်ႈၽွင်ႈဢဝ်ဢၶႂၢင်ႉဢယေးဢၼ်တၢင်ႇဢပျတ်ႈတီႈၵူၼ်းမဵဝ်း ၵျူး၊ ၸိူဝ်းၼၼ်ႉဢေႃႈ။-
ၶဝ်လဝ်ႈလၢတ်ႈတီႈ ၼေႇပုၶတ်ႉၼေႇၸႃႇ၊ လႄႈဝႃႈ၊ “ႁႂ်ႈၸဝ်ႈမုၼ်ယႂ်ႇၶုၼ်ႁေႃၶမ်းဢသၢၵ်ႈယၢဝ်းယိုၼ်းသေၵမ်းလူၺ်ႈ။-
ၸဝ်ႈမုၼ်ယႂ်ႇၶုၼ်ႁေႃၶမ်းပူင်ဢမိင်ႉလႄႈဝႃႈ၊ ‘မိူဝ်ႈဢၼ်ပဝ်ႇတိုင်ႈလဵတ်းတူႇရိယႃႇၼၼ်ႉႁႂ်ႈၵူၼ်းတင်းလၢႆဢွၼ်ၵၼ်ၶုပ်ႉမူပ်ႇလႄႈဝႆႈႁုၼ်ႇႁၢင်ႈသၢင်းထုၶမ်းၵူႈၵေႃႉၵူႈၵူၼ်းသေ။-
ၵေႃႉဢၼ်ဢမ်ႇၶုပ်ႉမူပ်ႇလႄႈဝႆႈၼၼ်ႉႁႂ်ႈဢဝ်ထိမ်ႈၶျႃးတူၵ်းသႂ်ႇၵႃႈၼႂ်းမုၵ်ႉၽႆးဢၼ်လုၵ်ႉမႆႈယူႇၼၼ်ႉသေ၊’ ဝႃႈၼႆတီႈၶႃႈဢေႃႈ။-
မီးၵူၼ်း ၵျူး၊ ၸိူဝ်းဢၼ်ၸဝ်ႈႁဝ်းၶၢၼ်းဝႆႉႁႂ်ႈပဵၼ်ဝုၼ်ႇၵႃႈၼႂ်းမိူင်း ပႃႇပုလုၼ်ႇ၊ ဢၼ်ဝႃႈ၊ သႃႇတရႅၵ်ႉ၊မေးသိၵ်ႉ၊ဢပေႇတၼေႇၵေႃး၊ ၼၼ်ႉၶဝ်ဢမ်ႇထွမ်ႇဢဝ်ဢမိင်ႉၸဝ်ႈႁဝ်းၼၼ်ႉတီႈၶႃႈ။ ၶဝ်ယင်းဢမ်ႇဝႆႈၽြႃးၸဝ်ႈႁဝ်း ဢမ်ႇၶုပ်ႉမူပ်ႇလႄႈၵူမ်ႈႁူဝ်ပၼ်တီႈႁုၼ်ႇႁၢင်ႈသၢင်းထုၶမ်းဢၼ်ၸဝ်ႈႁဝ်းပူၵ်းတင်ႈဝႆႉၼၼ်ႉတီႈၶႃႈ၊” ဝႃႈၼင်ႇၼႆဢေႃႈ။
ၵွပ်ႈပိူဝ်ႈလွင်ႈတၢင်းၼႆႉလႄႈၶုၼ်ႁေႃၶမ်းၸႂ်မႆႈၶႂ်ႈၸႃႉလႄႈဢၢႆႁႅင်းတေႃးသႃႉမၼ်းၸဝ်ႈဢွၵ်ႇႁႅင်းၼႃႇလူင်လၢင်လႄႈပူင်ဢမိင်ႉႁႂ်ႈႁွင်ႉဢဝ်ၶဝ်သၢမ်ၵေႃႉၼၼ်ႉမႃးၵႃႈတီႈၽၢႆႇၼႃႈမၼ်းၸဝ်ႈဢေႃႈ။-
မၼ်းၸဝ်ႈၵေႃႈမီးဢမိင်ႉတီႈၶဝ်လႄႈဝႃႈ၊ “ သႃႇတရႅၵ်ႉ၊မေးသိၵ်ႉ၊ဢပေႇတၼေႇၵေႃး၊ ၶဝ်႟။ သူထဵင်ပႅတ်ႈတၢင်းဢၼ်ဝႆႈၽြႃးၵဝ်လႄႈဢမ်ႇၶုပ်ႉမူပ်ႇၵူမ်ႈၵွမ်းႁူဝ်ပၼ်တီႈႁုၼ်ႇႁၢင်ႈသၢင်းထုၶမ်းဢၼ်ၵဝ်ပူၵ်းတင်ႈဝႆႉၼၼ်ႉၸႂ်ႈတႄႉႁိုဝ်း။-
ၵမ်းၼႆႉမိူဝ်ႈဢၼ်သူလႆႈငိၼ်းသဵင်ဢၼ်ပဝ်ႇႁႆႇၸႃႉၸဵမ်ၼႄးၶရႃႇ၊တိင်ႇ၊ပီႇ၊တရေႃး၊ၵွင်ၶဵတ်ႇလႂ်တူႇရိယႃႇၵူႈၸိူဝ်ႉၵူႈမဵဝ်းၼၼ်ႉၸိုင်၊ဢွၼ်ၵၼ်ၶုပ်ႉမူပ်ႇလႄႈဝႆႈႁုၼ်ႇႁၢင်ႈသၢင်းထုၼၼ်ႉတႃႉ။ ပေႃးသူယင်းဢမ်ႇဝႆႈၸိုင်၊တၵ်းလႆႈဢဝ်သူထိမ်ႈတူၵ်းသႂ်ႇၵႃႈၼႂ်းမုၵ်ႉၽႆးဢၼ်လုၵ်ႉမႆႈယူႇၼၼ်ႉၵမ်းလဵဝ်ဢေႃႈ။ တၵ်းမီးၽြႃးသူႇလႂ်ဢၼ်တၵ်းၵႄႇသႄႇဢဝ်သူလွတ်ႈသေၵႃႈၼႂ်းမိုဝ်းၵဝ်လႆႈ၊” ဝႃႈၼင်ႇၼႆဢေႃႈ။
သႃႇတရႅၵ်ႉ၊မေးသိၵ်ႉ၊ဢပေႇတၼေႇၵေႃး၊ ၶဝ်ၵေႃႈၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈမုၼ်ယႂ်ႇၶုၼ်ႁေႃၶမ်းတီႈၶႃႈ။ ၶႃႈၸဝ်ႈႁဝ်းၶဝ်ဢမ်ႇမီးလွင်ႈတၵ်းတွပ်ႇၶိုၼ်းလၢတ်ႈလွင်ႈၼႆႉတီႈၸဝ်ႈႁဝ်းတီႈၶႃႈ။-
ပေႃးၽြႃးပဵၼ်ၸဝ်ႈဢၼ်ၶႃႈၸဝ်ႈႁဝ်းၶဝ်ၵူဝ်းၵႂၢႆႇၼၼ်ႉၵႄႇသႄႇၼုၵ်ႈဢဝ်ၶႃႈၸဝ်ႈႁဝ်းၶဝ်ဢွၵ်ႇသေၵႃႈၼႂ်းမုၵ်ႉၽႆးဢၼ်လုၵ်ႉမႆႈယူႇၼၼ်ႉလႆႈၸိုင်၊ၵႃႈၼႂ်းမိုဝ်းၸဝ်ႈႁဝ်းၵေႃႈမၼ်းၸဝ်ႈတၵ်းၵႄႇသႄႇၼုၵ်ႈဢဝ်ၶႃႈၸဝ်ႈႁဝ်းၶဝ်ဢွၵ်ႇလႆႈတီႈၶႃႈဢေႃႈ။-
ပိၵ်ႉသမ်ႉဢမ်ႇပဵၼ်ၸိူဝ်ႉၼင်ႇၼၼ်သေၵေႃႈ၊ၸဝ်ႈမုၼ်ယႂ်ႇၶုၼ်ႁေႃၶမ်းတီႈၶႃႈ။ ႁႂ်ႈၸဝ်ႈႁဝ်းလႆႈႁုလွင်ႈဢၼ်ၶႃႈၸဝ်ႈႁဝ်းၶဝ်ဢမ်ႇဝႆႈၽြႃးၸဝ်ႈႁဝ်းၸိူဝ်းၼၼ်ႉလႄႈဢမ်ႇၶုပ်ႉမူပ်ႇၵူမ်ႈၵွမ်းၸူးတီႈႁုၼ်ႇႁၢင်ႈသၢင်းထုၶမ်းဢၼ်ၸဝ်ႈႁဝ်းပူၵ်းတင်ႈဝႆႉၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ ဢွၵ်ႇတေႃးသႃႉႁႅင်းယႂ်ႇၼႃႇလူင်လၢင်လႄႈၼႃႈၸဝ်ႈလႅင်ၵမ်ႇဝႆႉလူၺ်ႈတၢင်းၸႂ်မႆႈၶႂ်ႈၸႃႉတေႃႇ သႃႇတရႅၵ်ႉ၊မေးသိၵ်ႉ၊ဢပေႇတၼေႇၵေႃး၊ ၸိူဝ်းၼၼ်ႉယူႇဢေႃႈ။ ပိူဝ်ႈၼႆလႄႈမၼ်းၸဝ်ႈပူင်ဢမိင်ႉတီႈၵူၼ်းမၼ်းႁႂ်ႈၶဝ်သႂ်ႇၽႆးဢၼ်ယဵင်ႈၶႅၼ်းလုၵ်ႉမႆႈလိူဝ်တွၼ်းၼႃႇသေဢွၼ်တၢင်းၼၼ်ႉၸဵတ်းပုၼ်ႈဢေႃႈ။-
မၼ်းသမ်ႉပူင်ဢမိင်ႉတီႈႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၵမ်ႈၽွင်ႈႁႂ်ႈမတ်ႉၽုၵ်ႇၶဝ်သၢမ်ၵေႃႉၼၼ်ႉထိမ်ႈတူၵ်းသႂ်ႇၵႃႈၼႂ်းမုၵ်ႉၽႆးဢၼ်လုၵ်ႉမႆႈယူႇၼၼ်ႉဢေႃႈ။-
ပိူဝ်ႈၼႆလႄႈၵူၼ်းၸိူဝ်းၼၼ်ႉမတ်ႉၽုၵ်ႇၶဝ်သၢမ်ၵေႃႉၼၼ်ႉပႃးလူၺ်ႈၵၼ်တင်း၊ၵူၼ်၊သိူဝ်ႈ၊သိူဝ်ႈယၢဝ်း၊ၶူဝ်းၼုင်ႈၶဝ်သေလႄႈထိမ်ႈသႂ်ႇၵႃႈၼႂ်းမုၵ်ႉၽႆးဢၼ်မႆႈၼႃႇၼၼ်ႉဢေႃႈ။-
ၵွပ်ႈပိူဝ်ႈဢမိင်ႉၶုၼ်ႁေႃၶမ်းၵျၢမ်းထၢမ်းၼႃႇႁႂ်ႈမုၵ်ႉၽႆးမႆႈၼႃႇလူင်လၢင်ၼၼ်ႉလႄႈပိဝ်ၽႆးႁုပ်ႈမႆႈႁူဝ်ႁၢၼ်ၵူၼ်းသိုၵ်းၸိူဝ်းဢၼ်ဢဝ်ၶဝ်သၢမ်ၵေႃႉထိမ်ႈသႂ်ႇၵႃႈၼႂ်းမုၵ်ႉၽႆးၼၼ်ႉတၢႆဢေႃႈ။-
သႃႇတရႅၵ်ႉ၊မေးသိၵ်ႉ၊ဢပေႇတၼေႇၵေႃး၊ ၸိူဝ်းၼၼ်ႉၸမ်ႉ၊ၶၢမ်ႇတၢင်းဢၼ်ယင်းမတ်ႉၽုၵ်ႇဝႆႉယူႇသေလႄႈတူၵ်းႁွတ်ႈၵႃႈၼႂ်းမုၵ်ႉၽႆးဢၼ်လုၵ်ႉမႆႈႁႅင်းယႂ်ႇၼႃႇလူင်လၢင်ၼၼ်ႉဢေႃႈ။
မိူဝ်ႈၼၼ်ႉ၊ ၼေႇပုၶတ်ႉၼေႇၸႃႇ၊ မီးတၢင်းဢၼ်ဢၢမ်းၼႃႇၵႂင်ၸႂ်ယုင်ႈၸႂ်ယူႇသေလႄႈၽုတ်းလုၵ်ႉသေယဝ်ႉ၊ထၢမ်တီႈဢမၢတ်ႈလူင်ၽၢႆႇတိူင်ႇပၢင်ႇၸိူဝ်းၼၼ်ႉလႄႈဝႃႈ၊ “ႁဝ်းမတ်ႉၽုၵ်ႇဢဝ်ၵူၼ်းသၢမ်ၵေႃႉထိမ်ႈတူၵ်းၵႃႈၼႂ်းၽႆးဢမ်ႇၸႂ်ႈႁိုဝ်း၊” ဝႃႈၼင်ႇၼႆဢေႃႈ။ ၶဝ်ၵေႃႈဢွၼ်ၵၼ်ၶိုၼ်းလဝ်ႈလၢတ်ႈလႄႈဝႃႈ၊ “ၸႂ်ႈတီႈၶႃႈယဝ်ႉ။ ၸဝ်ႈမုၼ်ယႂ်ႇၶုၼ်ႁေႃၶမ်းတီႈၶႃႈ၊” ဝႃႈၼင်ႇၼႆဢေႃႈ။
မၼ်းသမ်ႉမီးဢမိင်ႉလႄႈဝႃႈ၊ “ၵွပ်ႈသင်လႄႈၵဝ်လႆႈႁၼ်ၵူၼ်းသီႇၵေႃႉပႆၵႂႃႇပႆမႃးၵႃႈၼႂ်းၵၢင်မုၵ်ႉၽႆးယူႇၸိူဝ်ႉၼင်ႇႁိုဝ်။ ၶဝ်ၼၼ်ႉဢမ်ႇမီးတၢင်းဢၼ်မတ်ႉဢၼ်ၽုၵ်ႇယဝ်ႉလႄႈၶဝ်ၵၢင်းလွတ်ႈတင်းဢၼ်ၶၢမ်ႇၽေးဢုပၢတ်ႈယူႇယဝ်ႉလူင်ပႄႇ။ ၵေႃႉတီႈသီႇၼၼ်ႉတူၺ်းႁၢင်ႈမိူၼ်လုၵ်ႈၽြႃးဝႆႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ၼေႇပုၶတ်ႉၼေႇၸႃႇ၊ လုၵ်ႉၵႂႃႇၸူးတီႈႁိမ်းပၢၵ်ႇမုၵ်ႉၽႆးဢၼ်လုၵ်ႉမႆႈယူႇၼၼ်ႉသေလႄႈႁွင်ႉပၢဝ်ႇလႄႈဝႃႈ၊ “ သႃႇတရႅၵ်ႉ၊မေးသိၵ်ႉ၊ဢပေႇတၼေႇၵေႃး၊ ၶႃႈၽြႃးပဵၼ်ၸဝ်ႈဢၼ်သုင်ၼႃႇသေပိူၼ်ႈၼၼ်ႉၶဝ်႟။ ဢွၼ်ၵၼ်ဢွၵ်ႇမႃးၵႃႈတီႈၼႆႈတႃႉ၊” ဝႃႈၼင်ႇၼႆဢေႃႈ။ ၶဝ်ၵေႃႈဢွၼ်ၵၼ်ဢွၵ်ႇမႃးၵမ်းလဵဝ်ဢေႃႈ။-
ၵႃႈဢၼ်ပဵၼ်ၸဝ်ႈၽႃႉ၊မဵဝ်ႉဝုၼ်ႇ၊ၶုၼ်ၸွမ်သိုၵ်းဢိၵ်ႇတင်းၶုၼ်ဢၼ်ပွင်ၵၢၼ်တင်းသဵင်ႈတင်းလူင်ဢွၼ်ၵၼ်ဢုမ်ႇလွမ်ႉႁွပ်ႈမႃးလူတူၺ်းၶဝ်သၢမ်ၵေႃႉဢၼ်ဢမ်ႇလႆႈၶၢမ်ႇၽေးဢုပၢတ်ႈဢၼ်ၽႆးမႆႈၶႅမ်ႈၼၼ်ႉလႄႈလႆႈႁုႁၼ်လွင်ႈဢၼ်ၶူၼ်ႁူဝ်ၶဝ်ဢမ်ႇၶႅမ်ႈ၊သိူဝ်ႈၶဝ်ဢမ်ႇမႆႈ၊တူဝ်ၶဝ်ၵေႃႈယင်းဢမ်ႇမီးဢၢႆၵႂၼ်းၽႆးလႃးလႃးၼၼ်ႉဢေႃႈ။
ၶုၼ်ႁေႃၶမ်းၵေႃႈ မီးဢမိင်ႉလႄႈဝႃႈ၊ “ယွင်ႈယေႃးၽြႃးပဵၼ်ၸဝ်ႈ သႃႇတရႅၵ်ႉ၊မေးသိၵ်ႉ၊ဢပေႇတၼေႇၵေႃး၊ ၼၼ်ႉတီႈၶႃႈဢေႃႈ။ မၼ်းၸဝ်ႈၼၼ်ႉပွႆႇၸႂ်ႉတမၢၼ်ႇၵၢင်ႁၢဝ်မႃးလႄႈၵႄႇသႄႇၶျွတ်ႈဢဝ်ၶဝ်ၸိူဝ်းဢၼ်ႁဵတ်းဝၢတ်ႈၵူဝ်းၵႂၢႆႇယုမ်ႇမၢတ်ႈဢိင်ပိုင်ႈမၼ်းၸဝ်ႈၼၼ်ႉယဝ်ႉ။ ၶဝ်ၼၼ်ႉႁတ်းပူၼ်ႉလိူဝ်ဢမိင်ႉၶုၼ်လူင်သေလႄႈၶၢမ်ႇဢဝ်တူဝ်ၶၼ်ႇထႃႇၶဝ်ဢၢပ်ႈပၼ်ဢမ်ႇႁႂ်ႈလႆႈဝႆႈၽြႃးတၢင်ႇသူႇတၢင်ႇပႃးၼွၵ်ႈသေၽြႃးပဵၼ်ၸဝ်ႈၶဝ်ၼၼ်ႉယဝ်ႉ။
“ပိူဝ်ႈၼႆလႄႈၵဝ်ပူင်ဢမိင်ႉလႄႈဝႃႈၸမ်ႉ၊ၼႂ်းၵူၼ်းၵူႈၸိူဝ်ႉၵူႈမဵဝ်းဢၼ်လၢတ်ႈၵႂၢမ်းၽႃႇသႃႇၶေႃၶေႃႁင်းၽႂ်ႁင်းမၼ်းၼၼ်ႉ၊ၵေႃႉဢၼ်လၢတ်ႈၵႂၢမ်းဢၼ်ၽိတ်းပိူင်ႈတီႈၽြႃးပဵၼ်ၸဝ်ႈ သႃႇတရႅၵ်ႉ၊မေးသိၵ်ႉ၊ဢပေႇတၼေႇၵေႃး၊ ၼႆႉၼၼ်ႉတၵ်းလႆႈၶၢမ်ႇတၢင်းဢၼ်တႅပ်းၽၼ်းပဵၼ်ပွတ်းပဵၼ်တွၼ်ႈပႅတ်ႈလႄႈႁိူၼ်းမၼ်းၵေႃႈတၵ်းလႆႈႁႂ်ႈပဵၼ်ၵွင်ၶီႈၽုၼ်ႇပႅတ်ႈဢေႃႈ၊ၽြႃးဢၼ်ၵႄႇသႄႇၼုၵ်ႈဢဝ်လႆႈထၢၼ်ႇၼႆႉၼၼ်ႉဢမ်ႇမီးတၢင်ႇသူႇတၢင်ႇပႃး၊” ဝႃႈၼင်ႇၼႆဢေႃႈ။
လိုၼ်းၼၼ်ႉၶုၼ်ႁေႃၶမ်းယုၵ်ႉယွင်ႈပၼ်ဢရႃႇတီႈ သႃႇတရႅၵ်ႉ၊မေးသိၵ်ႉ၊ဢပေႇတၼေႇၵေႃး၊ ဝႆႉၵႃႈၼႂ်းမိူင်း ပႃႇပုလုၼ်ႇ၊ ဢေႃႈ။
ၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ သင်ႇလၢတ်ႈၶေႃႈၵႂၢမ်းၵႂႃႇၵႃႈတီႈၵူၼ်းၵူႈၸိူဝ်ႉၵူႈမဵဝ်းဢၼ်မီးယူႇၵူႈတီႈၵူႈလႅၼ်လႄႈလၢတ်ႈၵႂၢမ်းၽႃႇသႃႇၶေႃၶေႃႁင်းၽႂ်ႁင်းမၼ်းၵႃႈၼႂ်းၵမ်ႇၽႃႇၼႆႉလႄႈဝႃႈၸမ်ႉ၊ “ႁႂ်ႈတၢင်းဢၼ်ၼိမ်ဢၼ်လီၵတ်းယဵၼ်ၶျၢမ်းသႃႇမီးၼမ်ၼႃႇတီႈသူသေၵမ်းလူၺ်ႈ။-
ဢွၼ်ၵၼ်ထွမ်ႇငိၼ်းလွင်ႈတၢင်းဢၼ်လီဢၢမ်း၊ဢိၵ်ႇတင်းၼိမိၵ်ႈလၢၵ်ႈၶၼႃႇဢၼ်ၽြႃးပဵၼ်ၸဝ်ႈဢၼ်မျၢတ်ႈသုင်ၼႃႇသေပိူၼ်ႈၼၼ်ႉႁဵတ်းၼႄတီႈၵဝ်ၼၼ်ႉသေၵမ်း။
“လွင်ႈတၢင်းဢၼ်လီဢၢမ်းၸိူဝ်းဢၼ် ၽြႃးပဵၼ်ၸဝ်ႈ၊ ႁဵတ်းၼႄၼၼ်ႉမျၢတ်ႈယႂ်ႇၼႃႇလူင်လၢင်ဢေႃႈ။ ၼိမိၵ်ႈလၢၵ်ႈၶၼႃႇၸိူဝ်းဢၼ်မၼ်းၸဝ်ႈ ႁဵတ်းၼၼ်ႉ၊ မီးႁႅင်းတၼ်းၶူဝ်းဢၼ်ယႂ်ႇၼႃႇ လူင်လၢင်ဢေႃႈ။ ၽြႃးပဵၼ်ၸဝ်ႈပဵၼ်ၶုၼ်ႁေႃၶမ်းယူႇ တႃႇသေႇဢမ်ႇထၢတ်ႇ၊ဢိၵ်ႇတင်း ဢႃႇၼႃႇၸၢၵ်ႈမၼ်းၸဝ်ႈ တႄႇယူႇၵူႈၵၢပ်ႈၵမ်ႇၽႃႇသိုပ်ႇသိုပ်ႇ တၢမ်တၢမ်ဢေႃႈ။
“ၵဝ် ၼေႇပုၶတ်ႉၼေႇၸႃႇ၊ ၼႆႉယူႇတဵတ်ႇလီၼိမ်လီယူႇၵႃႈၼႂ်းႁၢင်ႈၼႂ်းႁေႃၵဝ်လႄႈမူၼ်ႈပျေႃႇလူၺ်ႈၸေးၸိမ်ႇဢၼ်ယႂ်ႇၼႃႇၼၼ်ႉယူႇဢေႃႈ။-
ၵူၺ်းၵႃႈ၊ၵဝ်ၼွၼ်းၽၼ်ႁၼ်တၢင်းၽၼ်ဢၼ်လီတူၵ်းၸႂ်ၼႃႇလႄႈသမ်ႉလႆႈႁၼ်ပျႃႇတိၵ်ႈရူႇပႃႇရူင်ႇဢၼ်ႁႂ်ႈၵဝ်ပဵၼ်ၸႂ်သၼ်ႇၸႂ်ဝႆယၢမ်းမိူဝ်ႈဢၼ်ၵဝ်ၼွၼ်းလပ်းယူႇၼၼ်ႉဢေႃႈ။-
ပိူဝ်ႈၼႆလႄႈၵဝ်ပူင်ဢမိင်ႉႁႂ်ႈဢဝ်ၵူၼ်းဢၼ်မီးပိင်ႇၺႃႇမိူင်း ပႃႇပုလုၼ်ႇ၊ ၵႃႈမီးသႂၢင်းၶဝ်ႈၵႃႈတီႈၵဝ်၊ႁႂ်ႈၶဝ်ၽုၺ်ႇၼႄဢၼၢၵ်ႈဢထိၵ်ႈပႄႇတီႈၵဝ်လွင်ႈတၢင်းၼွၼ်းၽၼ်ႁၼ်ၼၼ်ႉဢေႃႈ။-
မိူဝ်ႈၼၼ်ႉ၊ၵႃႈပဵၼ်ၸဝ်ႈဢၼ်မီးပိင်ႇၺႃႇတင်းလၢႆလႂ်၊သြႃႇမေႃပေႇတၢင်ႇလႂ်၊သြႃႇမေႃၽီလႂ်၊သြႃႇဢၼ်ၸၢင်ႈႁေႃးၸၢင်ႈလၢတ်ႈလႂ်၊ဢွၼ်ၵၼ်ၶဝ်ႈမႃးလႄႈ၊ၵဝ်လၢတ်ႈၼႄလွင်ႈတၢင်းၽၼ်ႁၼ်ၵဝ်ၼၼ်ႉတီႈၶဝ်သေၵေႃႈ၊ၶဝ်ဢမ်ႇၽုၺ်ႇၼႄဢၼၢၵ်ႈဢထိၵ်ႈပႄႇမၼ်းလႆႈ။-
မိူဝ်ႈၼၼ်ႉ တၢၼ်ႇယေႇလႃႉ၊ ၶဝ်ႈမႃးဢေႃႈ။ (မၼ်းၼၼ်ႉလႆႈၸိုဝ်ႈမႂ်ႇႁွင်ႉဝႃႈ၊ ပေႇလတႃႉသႃႇၸႃႇ၊ ၸွမ်းလူၺ်ႈၼႃႇမႃႉၸိုဝ်ႈသဵင်ၽြႃးဢၼ်ၵဝ်ၵူဝ်းၵႂၢႆႇၼၼ်ႉဢေႃႈ။) ဝိၺိၺ်ႇၽြႃးဢၼ်မူတ်းၸၢင်ႇတင်းလၢႆ မီးယူႇၵႃႈၼႂ်းမၼ်းလႄႈၵဝ်လၢတ်ႈၼႄတၢင်းၼွၼ်းၽၼ်ႁၼ်ၵဝ်ၼၼ်ႉတီႈမၼ်းလႄႈဝႃႈ၊-
‘ ပေႇလတႃႉသႃႇၸႃႇ၊ ဢၼ်ဢုပ်ႉၵႃႈၼိူဝ်ၸဝ်ႈဢၼ်မီးပိင်ႇၺႃႇတင်းလၢႆၼႆႉ႟။ ၵဝ်ႁုလွင်ႈဢၼ်ဝိၺိၺ်ႇၽြႃးဢၼ်မူတ်းၸၢင်ႇတင်းလၢႆ ၼၼ်ႉမီးယူႇၵႃႈၼႂ်းမႂ်းလႄႈ၊ႁုထွမ်ႇပွင်ႇလႅင်းလွင်ႈတၢင်းဢၼ်လိုၵ်ႉဢၼ်လမ်ႇတင်းလၢႆဢေႃႈ။ ပျႃႇတိၵ်ႈရူႇပႃႇရူင်ႇတၢင်းၽၼ်ႁၼ်ၵဝ်ၸမ်ႉ၊မီးၸိူဝ်ႉၼင်ႇၼႆယဝ်ႉ။ ၽုၺ်ႇၼႄဢၼၢၵ်ႈဢထိၵ်ႈပႄႇမၼ်းသေၵမ်း။
“‘ယၢမ်းမိူဝ်ႈဢၼ်ၵဝ်ယင်းတိုၵ်ႉၼွၼ်းလပ်းယူႇၼၼ်ႉၵဝ်လႆႈပျႃႇတိၵ်ႈရူႇပႃႇရူင်ႇဢၼ်မီးတူၼ်ႈမႆႉလူင်တူၼ်ႈၼိုင်ႈၵႃႈတီႈၶိုင်ႈၵၢင်လိၼ်မိူင်းဢေႃႈ။-
တူၼ်ႈမႆႉၼၼ်ႉယႂ်ႇမႃးယႂ်ႇမႃးတိၵ်းတိၵ်းတေႃႇႁွတ်ႈထိုင်ၽႃႉထိုင်မွၵ်ႇၵႂႃႇသေယဝ်ႉ၊ၵူၼ်းၼိူဝ်လိၼ်မိူင်းမုင်ႈႁၼ်မၼ်းလႆႈၵူႈၵေႃႉၵူႈၵူၼ်းဢေႃႈ။-
မႂ်မၼ်းပဵၼ်ဢၼ်ႁၢင်ႈလီလႄႈမၢၵ်ႇမၼ်းၵွၼ်ႈလီပူင်းလီလႄႈပေႃးၵုမ်ႇပုၼ်ႈဢၼ်သတ်ႉတဝႃႇတင်းသဵင်ႈတင်းလူင်ၵိၼ်ဢေႃႈ။ တူဝ်ထိူၼ်ႇတင်းလၢႆဢွၼ်ၵၼ်သွၼ်ႈႁူမ်ႈသွၼ်ႈၽူၺ်းမၼ်းလႄႈၼူၵ်ႉၵႃႈမီးၵေႃႈႁဵတ်းႁင်းၵႃႈၼႂ်းၵႄႇၵိင်ႇမၼ်းၶႃႈမၼ်းဢေႃႈ။ သတ်ႉတဝႃႇတင်းသဵင်ႈတင်းလူင်လႆႈၵိၼ်မၢၵ်ႇမၼ်းဢေႃႈ။
“ယၢမ်းမိူဝ်ႈဢၼ်ၵဝ်ယင်းတိုၵ်ႉၶႆႈၸႂ်ဝူၼ်ႉၸႂ်တူၺ်းလွင်ႈပျႃႇတိၵ်ႈရူႇပႃႇရူင်ႇၼၼ်ႉယူႇၼၼ်ႉၸိုင်၊ၵဝ်ႁၼ်တမၢၼ်ႇၵၢင်ႁၢဝ်ဢၼ်မူတ်းၸၢင်ႇပႃးၼိုင်ႈလုၵ်ႉၵႃႈၼိူဝ်ၵၢင်ႁၢဝ်လူင်းမႃးဢေႃႈ။-
မၼ်းၼၼ်ႉႁွင်ႉပၢဝ်ႇႁွင်ႉသေႃႇတင်းသဵင်ဢၼ်ယႂ်ႇၼႃႇလႄႈဝႃႈ၊ ‘ပွမ်ႈတူၼ်ႈမႆႉၼၼ်ႉလူမ်ႉပႅတ်ႈလႄႈတႅပ်းၽၼ်းၵိင်ႇမၼ်းၶႃႈမၼ်းပႅတ်ႈတႃႉ။ တိုတ်ႉႁွတ်ႈမႂ်မၼ်းပႅတ်ႈလႄႈဢဝ်မၢၵ်ႇမၼ်းပိုၼ်ၽၢဝ်ႇပႅတ်ႈတႃႉ။ ႁေႃႈပႅတ်ႈတူဝ်သတ်းတင်းလၢႆဢၼ်သွၼ်ႈႁူမ်ႈမၼ်းဢိၵ်ႇတင်းၼူၵ်ႉတင်းလၢႆသေၵႃႈတီႈၵိင်ႇမၼ်းၶႃႈမၼ်းတႃႉ။-
ၼႂ်းဝႃႈၼၼ်သေၵေႃႈ ႁႂ်ႈတေႃမၼ်းၶမ်လိၼ်ယူႇလူၺ်ႈၵၼ်တင်းႁၢၵ်ႈမၼ်းတႃႉ။ ပိူဝ်ႈၼႆလႄႈဢဝ်ၸိူၵ်ႈလဵၵ်းၸိူၵ်ႈတွင်းလိူင်မတ်ႉၽုၵ်ႇတေႃမၼ်းၵႃႈၼႂ်းယိူဝ်ႈယႃႈဢၼ်ၼုမ်ႇလီၶဵဝ်လီၼၼ်ႉတႃႉ။ “‘ႁႂ်ႈမၼ်းလႆႈၶၢမ်ႇယမ်းၽူၼ်ယမ်းၼၢႆးယူႇလႄႈႁႂ်ႈမၼ်းယူႇႁူမ်ႈပွင်းၵၼ်လူၺ်ႈတူဝ်သတ်းတင်းလၢႆၵႃႈတီႈပၢင်ႇယိူဝ်ႈယႃႈတႃႉ။-
ႁႂ်ႈၸႂ်သၽေႃးၵူၼ်း ဢွၵ်ႇသေၵႃႈတီႈမၼ်းလႄႈႁႂ်ႈမီးၸႂ်သၽေႃးသတ်းၵူၺ်းတႃႉ။ ႁႂ်ႈပဵၼ်ၸိူဝ်ႉၼင်ႇၼႆၸဵတ်းပီတဵမ်တဵမ်တႃႉ။-
လွင်ႈမၼ်းၸမ်ႉ၊လွင်ႈၼင်ႇႁိုဝ်ၶဝ်ၸိူဝ်းဢၼ်ဢသၢၵ်ႈလိပ်းယူႇၼၼ်ႉ၊တၵ်းလႆႈမီးဢၶႂၢင်ႉဢၼ်လႆႈႁုလွင်ႈဢၼ်ၽြႃးဢၼ်သုင်ၼႃႇသေပိူၼ်ႈၼၼ်ႉဢုပ်ႉပိူင်ႇၵႃႈၼိူဝ်သိုင်ႇၸိုင်ႈဝၢၼ်ႈမိူင်းၵူၼ်းလေႃးၵီႇလႄႈပၼ်တီႈၵေႃႉဢၼ်မၼ်းၸဝ်ႈမီးဢလူဝ်ႇၶႂ်ႈပၼ်ၼၼ်ႉဢေႃႈ။ ဢိၵ်ႇတင်းလွင်ႈဢၼ်မၼ်းၸဝ်ႈယုၵ်ႉယွင်ႈၵေႃႉဢၼ်ယုတ်ႈဢၼ်ယွမ်းၼၼ်ႉဝႆႉၵႃႈၼိူဝ်ဝၢၼ်ႈမိူင်းၼၼ်ႉၸိုင်၊ၶဝ်ၸိူဝ်းဢၼ်ပႂ်ႉၼၼ်ႉဢွၼ်ၵၼ်ၸီႇယၢင်ႇၸိူဝ်ႉၼင်ႇၼႆယဝ်ႉ။ ၶဝ်ၸိူဝ်းဢၼ်မူတ်းၸၢင်ႇၼၼ်ႉဢွၼ်ၵၼ်ပၼ်ဢမိင်ႉတႅပ်းတတ်းဝႆႉယဝ်ႉ၊’” ဝႃႈၼင်ႇၼႆဢေႃႈ။-
ၼေႇပုၶတ်ႉၼေႇၸႃႇ၊ လၢတ်ႈလႄႈဝႃႈ၊ “ဢၼ်ၼႆႉၸမ်ႉ၊ပဵၼ်တၢင်းဢၼ်ၼွၼ်းၽၼ်ႁၼ်ၵဝ်ယဝ်ႉ။ တေႃႈလဵဝ်ၼႆႉ ပေႇလတႃႉသႃႇၸႃႇ၊ ႟။ ၽုၺ်ႇၼႄဢၼၢၵ်ႈဢထိၵ်ႈပႄႇမၼ်းတီႈၵဝ်တႃႉ။ ၵူၼ်းဢၼ်မီးပိင်ႇၺႃႇၵႃႈၼႂ်းႁေႃၶမ်းၵဝ်ၼႆႉဢမ်ႇၽုၺ်ႇၼႄဢၼၢၵ်ႈဢထိၵ်ႈပႄႇလႆႈသေၵေႃႉသေၵူၼ်းယဝ်ႉ။ ၵူၺ်းၵႃႈ၊မႂ်းၸမ်ႉ ၸၢင်ႈၽုၺ်ႇၼႄလႆႈၵွပ်ႈပိူဝ်ႈဢၼ်ဝိၺိၺ်ႇၽြႃးဢၼ်မူတ်းၸၢင်ႇတင်းလၢႆ မီးယူႇၵႃႈၼႂ်းမႂ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
တၢၼ်ႇယေႇလႃႉ၊ ဢၼ်လႆႈၸိုဝ်ႈလႆႈသဵင် ပေႇလတႃႉသႃႇၸႃႇ၊ ၼၼ်ႉတူၵ်းၸႂ်ၵႂႃႇၵမ်းဢွၼ်ႇၼိုင်ႈလႄႈၵႂင်ၸႂ်ယုင်ႈၸႂ်ဢေႃႈ။ မိူဝ်ႈၼၼ်ႉၶုၼ်ႁေႃၶမ်းမီးဢမိင်ႉတီႈမၼ်းလႄႈဝႃႈ၊ “ ပေႇလတႃႉသႃႇၸႃႇ၊ ႟။ ယႃႇပေမႆႈၸႂ်ႁွၼ်ႉၸႂ်ၵွပ်ႈပိူဝ်ႈတၢင်းၼွၼ်းၽၼ်ႁၼ်၊ဢိၵ်ႇတင်းဢၼၢၵ်ႈဢထိၵ်ႈပႄႇမၼ်းၼၼ်ႉသေၵမ်း၊” ဝႃႈၼင်ႇၼႆဢေႃႈ။ ပေႇလတႃႉသႃႇၸႃႇ၊ ၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈမုၼ်ယႂ်ႇၶုၼ်ႁေႃၶမ်းတီႈၶႃႈ။ ၶႃႈၸဝ်ႈႁဝ်းယွၼ်းယႃႇႁႂ်ႈတၢင်းၽၼ်ႁၼ်ၼႆႉ၊ဢိၵ်ႇတင်းဢၼၢၵ်ႈဢထိၵ်ႈပႄႇမၼ်းၼႆႉယင်းဢမ်ႇႁွတ်ႈထိုင်တီႈၸဝ်ႈႁဝ်းလႄႈႁႂ်ႈႁွတ်ႈထိုင်တီႈရၢၼ်ႇသူႇၸဝ်ႈႁဝ်းသေၵမ်းလူၺ်ႈ။-
တူၼ်ႈမႆႉၼၼ်ႉသုင်ၼႃႇႁွတ်ႈထိုင်ၽႃႉထိုင်မွၵ်ႇ၊ၵူၼ်းၼိူဝ်လိၼ်မိူင်းမုင်ႈႁၼ်မၼ်းလႆႈၵူႈၵေႃႉၵူႈၵူၼ်းလႄႈ၊-
မႂ်မၼ်းပဵၼ်ဢၼ်ႁၢင်ႈလီ၊မၢၵ်ႇမၼ်းပေႃးၵုမ်ႇပုၼ်ႈသတ်ႉတဝႃႇတင်းသဵင်ႈတင်းလူင်ၵိၼ်၊ဢိၵ်ႇတင်းတူဝ်သတ်းတင်းလၢႆသွၼ်ႈႁူမ်ႈမၼ်းလႄႈၼူၵ်ႉတင်းလၢႆႁဵတ်းႁင်းၵႃႈၼႂ်းၵိင်ႇမၼ်းၶႃႈမၼ်းဢေႃႈ။
“ၸဝ်ႈမုၼ်ယႂ်ႇၶုၼ်ႁေႃၶမ်းတီႈၶႃႈ။ တူၼ်ႈမႆႉၼၼ်ႉပဵၼ်ၸဝ်ႈႁဝ်းဢၼ်ယႂ်ႇမႃးလႄႈမီးဢဵၼ်ႁႅင်းဢၼ်ၶႅင်ၼၼ်ႉဢေႃႈ။ ၸဝ်ႈႁဝ်းသုင်ယႂ်ႇမျၢတ်ႈမႃးႁွတ်ႈထိုင်ၽႃႉၵၢင်ႁၢဝ်လႄႈဢႃႇၼႃႇၸၢၵ်ႈၽုင်းတၼ်းၶူဝ်းၸဝ်ႈႁဝ်းယႂ်ႇၵႂၢင်ႈမႃးၸွတ်ႇတူဝ်ႈမိူင်းလေႃးၵႃႉၼႆႉဢေႃႈ။-
ယၢမ်းမိူဝ်ႈဢၼ်ၸဝ်ႈမုၼ်ယႂ်ႇၶုၼ်လူင်ယင်းတိုၵ်ႉပႂ်ႉလူပႂ်ႉတူၺ်းယူႇၼၼ်ႉတမၢၼ်ႇၵၢင်ႁၢဝ်လုၵ်ႉသေၵႃႈၼိူဝ်ၵၢင်ႁၢဝ်လူင်းမႃးလႄႈလၢတ်ႈဝႃႈ၊ ‘ပွမ်ႈတူၼ်ႈမႆႉၼၼ်ႉလႄႈယႃႉၽဵဝ်ႈပႅတ်ႈတႃႉ။ ႁႂ်ႈတေႃမၼ်းၵိုတ်းၵျၢၼ်ႇယူႇၵႃႈၼႂ်းလိၼ်တႃႉ။ ဢဝ်ၸိူၵ်ႈလဵၵ်းၸိူၵ်ႈတွင်းလိူင်မတ်ႉၽုၵ်ႇလႄႈႁႂ်ႈမၼ်းမီးယူႇၵႃႈၼႂ်းပႃႇယိူဝ်ႈယႃႈတႃႉ၊ႁႂ်ႈၼမ်ႉၽူၼ်ၼမ်ႉၼၢႆးတူၵ်းသႂ်ႇၵႃႈၼိူဝ်မၼ်းလႄႈႁႂ်ႈမၼ်းယူႇလူၺ်ႈၵၼ်တင်းတူဝ်သတ်းတင်းလၢႆယူႇၸဵတ်းပီတဵမ်တဵမ်တႃႉ၊’ ဝႃႈၼင်ႇၼႆၼၼ်ႉ။
“ဢၼၢၵ်ႈဢထိၵ်ႈပႄႇမၼ်းၸိုင်၊မီးၸိူဝ်ႉၼင်ႇၼႆယဝ်ႉလႄႈၸဝ်ႈမုၼ်ယႂ်ႇၶုၼ်ႁေႃၶမ်းတီႈၶႃႈ။ လွင်ႈတၢင်းၼႆႉသမ်ႉပဵၼ်ဢမိင်ႉၽြႃးပဵၼ်ၸဝ်ႈဢၼ်သုင်ၼႃႇသေပိူၼ်ႈၸီႇယၢင်ႇၶိုင်ပွင်ဝႆႉႁႂ်ႈပဵၼ်တီႈၸဝ်ႈႁဝ်းတီႈၶႃႈဢေႃႈ။-
ၸဝ်ႈႁဝ်းတၵ်းလႆႈၶၢမ်ႇတၢင်းဢၼ်ႁေႃႈဢွၵ်ႇပႅတ်ႈသေၵႃႈၼႂ်းမုၵ်ႉၵူၼ်းၸိူဝ်းၵူၼ်းလႄႈတၵ်းတေယူႇလူၺ်ႈၵၼ်တင်းတူဝ်သတ်းတင်းလၢႆယူႇဢေႃႈ။ ၸဵတ်းပီတဵမ်တဵမ်ၸဝ်ႈႁဝ်းတၵ်းတေၵိၼ်ယိူဝ်ႈယႃႈမိူၼ်ၸိူဝ်ႉၼင်ႇဝူဝ်းလႄႈၼွၼ်းယူႇၵႃႈတီႈပၢင်ႇတီႈပိဝ်၊ယမ်းၽူၼ်ယမ်းၼၢႆးယူႇတီႈၶႃႈဢေႃႈ။ မိူဝ်ႈၼၼ်ႉၸဝ်ႈႁဝ်းတၵ်းတေႁုၸႅင်ႈလွင်ႈဢၼ်ၽြႃးပဵၼ်ၸဝ်ႈဢၼ်သုင်ၼႃႇသေပိူၼ်ႈၼၼ်ႉဢုပ်ႉပိူင်ႇၵႃႈၼိူဝ်သိုင်ႇၸိုင်ႈဝၢၼ်ႈမိူင်းၵူၼ်းလေႃးၵီႇလႄႈပၼ်တီႈၵေႃႉဢၼ်မၼ်းၸဝ်ႈမီးဢလူဝ်ႇၶႂ်ႈပၼ်ၼၼ်ႉဢေႃႈ။-
တမၢၼ်ႇၵၢင်ႁၢဝ်ပူင်ဢမိင်ႉဝႆႉႁႂ်ႈတေႃမႆႉၼၼ်ႉၵိုတ်းၵျၢၼ်ႇယူႇၵႃႈၼႂ်းလိၼ်ဢေႃႈ။ လွင်ႈၼႆႉပွင်ႇဝႃႈၸဝ်ႈႁဝ်းတၵ်းၶိုၼ်းပဵၼ်ၶုၼ်ႁေႃၶမ်းထႅင်ႈ မိူဝ်ႈဢၼ်ၸဝ်ႈႁဝ်းႁုလွင်ႈဢၼ်ၽြႃးပဵၼ်ၸဝ်ႈဢုပ်ႉပိူင်ႇလေႃးၵႃႉၼႆႉၼၼ်ႉဢေႃႈ။-
ၵွပ်ႈပိူဝ်ႈလွင်ႈတၢင်းၼႆႉလႄႈၸဝ်ႈမုၼ်ယႂ်ႇၶုၼ်ႁေႃၶမ်းတီႈၶႃႈ႟။ ႁဵတ်းၸွမ်းၵႃႈၼင်ႇဢၼ်ၶႃႈၸဝ်ႈႁဝ်းပၼ်တၢင်းၵျၢမ်ႇၼႆႉသေၵမ်း။ ၶႅၼ်းတေႃႈယႃႇပေႁဵတ်းတုၸရိူၵ်ႈလႄႈႁႂ်ႈၸီႇယၢင်ႇၸွမ်းၼင်ႇတြႃး၊ဢိၵ်ႇတင်းမီးၸႂ်ၵရုၼႃႇဢၼ်ႁၵ်ႉဢဵတ်းလူၵူၼ်းယၢၵ်ႈၵူၼ်းၽၢၼ်တင်းလၢႆသေၵမ်းတီႈၶႃႈ။ ပေႃးႁဵတ်းၸိူဝ်ႉၼင်ႇၼႆၸိုင်၊တၢင်းၵတ်းယဵၼ်ၶျၢမ်းသႃႇၸဝ်ႈႁဝ်းၸၢင်ႈၶႄးယိုၼ်းယၢဝ်းထႅင်ႈတီႈၶႃႈဢေႃႈ၊” ဝႃႈၼင်ႇၼႆဢေႃႈ။
လွင်ႈတၢင်းၸိူဝ်းၼႆႉပဵၼ်မႃးတီႈၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ ၵူႈၸိူဝ်ႉၵူႈပိူင်ဢေႃႈ။-
လိုၼ်းၼၼ်ႉသိပ်းသွင်လိူၼ်ၵူၺ်း၊ယၢမ်းမိူဝ်ႈဢၼ်မၼ်းၸဝ်ႈၽၢႆႈသၢင်းၵျၢၼ်ႇယူႇၵႃႈၼိူဝ်ၸွမ်ၼိူဝ်ၵုင်းႁေႃၸဝ်ႈမိူင်း ပႃႇပုလုၼ်ႇ၊ ယူႇၼၼ်ႉမၼ်းၸဝ်ႈလၢတ်ႈလႄႈဝႃႈ၊-
“တူၺ်းလူး။ ဝဵင်း ပႃႇပုလုၼ်ႇ၊ ၼႆႉပဵၼ်ဝဵင်းယႂ်ႇဝဵင်းလူင်ဢေႃႈ။ ၵဝ်တႄႇတင်ႈဝဵင်းၼႆႉႁႂ်ႈပဵၼ်ဝဵင်းၸဝ်ႈဝဵင်းၶုၼ်ႁႂ်ႈလႆႈၽုၺ်ႇဢွၵ်ႇၼႄပျႃးတၼ်းၶူဝ်းဢႃႇၼုၽေႃႇၵဝ်၊ဢိၵ်ႇတင်းမုၼ်သရေႇၽုင်းတၼ်းၶူဝ်းၵဝ်ဢေႃႈ၊” ဝႃႈၼင်ႇၼႆဢေႃႈ။
ၸူဝ်ႈဢၼ်ၶေႃႈၵႂၢမ်းဢၼ်မၼ်းၸဝ်ႈလၢတ်ႈယင်းဢမ်ႇပႆႇသုတ်းၼၼ်ႉသဵင်ဢၼ်လၢတ်ႈဢွၵ်ႇသေၵႃႈတီႈၵၢင်ႁၢဝ်မႃးလႄႈဝႃႈၸမ်ႉ၊ “ၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ ႟။ ထွမ်ႇငိၼ်းဢမိင်ႉၵဝ်ၼႆႉတႃႉ။ တၼ်းၶူဝ်းဢႃႇၼုၽေႃႇၸိုင်၊ၵဝ်ဢဝ်ဢွၵ်ႇသေၵႃႈတီႈမႂ်းမိူဝ်ႈလဵဝ်ၼႆႉယဝ်ႉ။-
မႂ်းတၵ်းလႆႈၶၢမ်ႇတၢင်းဢၼ်ႁေႃႈဢွၵ်ႇပႅတ်ႈသေၵႃႈၼႂ်းမုၵ်ႉၵူၼ်းၸိူဝ်းၵူၼ်းလႄႈတၵ်းလႆႈယူႇလူၺ်ႈၵၼ်တင်းတူဝ်သတ်းလႄႈ၊ၵိၼ်ယိူဝ်ႈၵိၼ်ယႃႈယူႇမိူၼ်ၸိူဝ်ႉၼင်ႇဝူဝ်း၊ယူႇၸဵတ်းပီတဵမ်တဵမ်ဢေႃႈ။ မိူဝ်ႈၼၼ်ႉမႂ်းတၵ်းႁုၸႅင်ႈလွင်ႈဢၼ်ၽြႃးပဵၼ်ၸဝ်ႈဢၼ်သုင်ၼႃႇသေပိူၼ်ႈၼၼ်ႉဢုပ်ႉပိူင်ႇသိုင်ႇၸိုင်ႈဝၢၼ်ႈမိူင်းၵူၼ်းလေႃးၵီႇလႄႈပၼ်တီႈၵေႃႉဢၼ်မၼ်းၸဝ်ႈမီးဢလူဝ်ႇၶႂ်ႈပၼ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ဢမိင်ႉၼၼ်ႉပဵၼ်ၸွမ်းမႃးၵမ်းလဵဝ်ဢေႃႈ။ ၼေႇပုၶတ်ႉၼေႇၸႃႇ၊ လႆႈၶၢမ်ႇတၢင်းဢၼ်ႁေႃႈဢွၵ်ႇသေၵႃႈၼႂ်းမုၵ်ႉၵူၼ်းၸိူဝ်းၵူၼ်းလႄႈလႆႈၵိၼ်ယိူဝ်ႈယႃႈမိူၼ်ၸိူဝ်ႉၼင်ႇဝူဝ်းဢေႃႈ။ မၼ်းလႆႈယမ်းၽူၼ်ယမ်းၼၢႆးယူႇတေႃႇထိုင်ႁွတ်ႈၶူၼ်တူဝ်ၶူၼ်ၶိင်းမၼ်းယၢဝ်းထၢၼ်ႈပေႃးပဵၼ်ၸိူဝ်ႉၼင်ႇၶူၼ်ၼူၵ်ႉၶၢင်ႇလေႃႉ၊ဢိၵ်ႇတင်းၼဵပ်ႉတိၼ်ၼဵပ်ႉမိုဝ်းမၼ်းပဵၼ်ၸိူဝ်ႉၼင်ႇၼဵပ်ႉတိၼ်ၼူၵ်ႉဢေႃႈ။
ၶုၼ်ႁေႃၶမ်းလၢတ်ႈလႄႈဝႃႈ၊ “မိူဝ်ႈဢၼ်ပူၼ်ႉၸဵတ်းပီယဝ်ႉၼၼ်ႉ၊ၵဝ် ၼေႇပုၶတ်ႉၼေႇၸႃႇ၊ ႁႅၼ်တူၺ်းၵႃႈၼိူဝ်ၽႃႉၵၢင်ႁၢဝ်လႄႈသမ်ႉၶိုၼ်းလႆႈသတိမႃးဢေႃႈ။ ၵဝ်ၸင်ႇယွင်ႈယေႃးႁဵတ်းထေႃးပၼႃႇတီႈၽြႃးပဵၼ်ၸဝ်ႈဢၼ်သုင်ၼႃႇသေပိူၼ်ႈၼၼ်ႉလႄႈတၢင်ႇၵုင်ႇတၢင်ႇမုၼ်တီႈၸဝ်ႈဢၼ်ဢသၢၵ်ႈလိပ်းယူႇထႃႇဝရႃႉၼၼ်ႉလႄႈဝႃႈၸမ်ႉ၊ “ဢႃႇၼႃႇၸၢၵ်ႈမၼ်းၸဝ်ႈပဵၼ်ဢႃႇၼႃႇၸၢၵ်ႈထႃႇဝရႃႉလႄႈ သိုင်ႇၸိုင်ႈဝၢၼ်ႈမိူင်းမၼ်းၸဝ်ႈတႄႇယူႇၵူႈၵၢပ်ႈၵမ်ႇၽႃႇသိုပ်ႇသိုပ်ႇတၢမ်တၢမ်ဢေႃႈ။
ၵူၼ်းလေႃးၵီႇၵႃႈမီးပဵၼ်ဢၼ်လၢႆလၢႆဢမ်ႇ ပွင်ႇလွင်ႈၵႃႈသင်ပုၼ်ႈမၼ်းၸဝ်ႈလႄႈ မၼ်းၸဝ်ႈပွင်ႁဵတ်းပွင်မႄးၸွမ်းၵႃႈၼင်ႇဢၼ် ဢလူဝ်ႇမၼ်းၸဝ်ႈမီးၼၼ်ႉ၊ တီႈတမၢၼ်ႇၵၢင်ႁၢဝ်လႂ်၊ဢိၵ်ႇတင်းတီႈ ၵူၼ်းလေႃးၵီႇလႂ်ဢေႃႈ။ ၽူႈလႂ်ဢမ်ႇႁႄႉၶႅၼ်ဢလူဝ်ႇမၼ်းၸဝ်ႈလႆႈ သေၵေႃႉသေၵူၼ်း၊ လွင်ႈတၢင်းႁဵတ်းမၼ်းၸဝ်ႈၼၼ်ႉၵေႃႈ ဢမ်ႇမီးၵေႃႉဢၼ်ၸႅတ်ႈဢၼ်ထၢမ် တီႈမၼ်းၸဝ်ႈလႆႈ။
“မိူဝ်ႈဢၼ်ၵဝ်ၶိုၼ်းလႆႈသတိမႃးယဝ်ႉၼၼ်ႉၵဝ်လႆႈႁပ်ႉဢဝ်မုၼ်ၽုင်း၊ဢိၵ်ႇတင်းဢႃႇၼုၽေႃႇၵဝ်၊တင်းမုၼ်သရေႇသိုင်ႇၸိုင်ႈဝၢၼ်ႈမိူင်းၵဝ်ၶိုၼ်းဢေႃႈ။ ၶုၼ်ဢၼ်ပွင်ၵၢၼ်ၵႃႈၼႂ်းႁေႃၵဝ်၊ဢိၵ်ႇတင်းမူးမၢတ်ႈၽွင်းမိူင်းၵဝ်တင်းလၢႆဢွၼ်ၵၼ်ႁပ်ႉတွၼ်ႈၵဝ်လႄႈမုၼ်ၽုင်းဢႃႇၼုၽေႃႇၵဝ်ယဵင်ႈၶႅၼ်းယႂ်ႇၽႄတူဝ်းတွၼ်းသေဢွၼ်တၢင်းၼၼ်ႉမႃးဢေႃႈ။
“မိူဝ်ႈလဵဝ်ၼႆႉ၊ၵဝ် ၼေႇပုၶတ်ႉၼေႇၸႃႇ၊ ႁဵတ်းထေႃးပၼႃႇယွင်ႈယေႃးၸဝ်ႈၶုၼ်ႁေႃၶမ်းၽုင်ႇၵၢင်ႁၢဝ်ဢေႃႈ။ လွင်ႈတၢင်းဢၼ်မၼ်းၸဝ်ႈၸီႇယၢင်ႇႁဵတ်းပဵၼ်ၸိူဝ်းၼၼ်ႉပဵၼ်ဢၼ်ၸိုဝ်ႈၸႂ်ႈသိုဝ်ႈတေႃႇတီႈၶႃႈဢေႃႈ။ မၼ်းၸဝ်ႈဢဝ်ၵေႃႉဢၼ်မႃႇၼႃႉပူၵ်းပႅၼ်ၼၼ်ႉၶျႃးတူၵ်းတီႈတႅမ်ႇလႆႈယူႇဢေႃႈ၊” ဝႃႈၼင်ႇၼႆဢေႃႈ။
မီးၶမ်ႈၼိုင်ႈ၊ၶုၼ်ႁေႃၶမ်း ပေႇလသႃႇၸႃႇ၊ ၽိတ်ႈႁွင်ႉမူးမၢတ်ႈၽွင်းမိူင်းမၼ်းဢၼ်မီးပဵၼ်ႁဵင်ၼၼ်ႉမႃးၵိၼ်လဵင်ႉပွႆးၶဝ်ႈၶမ်ႈလႄႈဢွၼ်ၵၼ်သူတ်ႉၵိၼ်ၼမ်ႉမၢၵ်ႇၸပိတ်ႉလူၺ်ႈၵၼ်ဢေႃႈ။-
မိူဝ်ႈဢၼ်ၶဝ်ယင်းတိုၵ်ႉဢွၼ်ၵၼ်သူတ်ႉၵိၼ်ယူႇၼၼ်ႉၶုၼ်ႁေႃၶမ်း ပေႇလသႃႇၸႃႇ၊ ပူင်ဢမိင်ႉႁႂ်ႈဢဝ်ၵွၵ်းၶမ်းၵွၵ်းငိုၼ်းဢၼ်ၸဝ်ႈပေႃႈမၼ်း ၼေႇပုၶတ်ႉၼေႇၸႃႇ၊ သိမ်းဢဝ်ၵႃႈၼႂ်းၵျွင်းပိၵ်ႈမၢၼ်ႇၸဝ်ႈဝဵင်း ယေႇရုသလႅမ်ႇ၊ မႃးၸိူဝ်းၼၼ်ႉႁႂ်ႈတူဝ်မၼ်း၊ဢိၵ်ႇတင်းမူးမၢတ်ႈၽွင်းမိူင်းမၼ်းလႂ်၊ၼၢင်းႁေႃၶမ်းမၼ်းလႂ်၊ၸိူင်ႉၼၢင်းမၼ်းလႂ်၊လႆႈၵိၼ်လႆႈသူတ်ႉၼမ်ႉမၢၵ်ႇၸပိတ်ႉဢေႃႈ။-
မိူဝ်ႈၼၼ်ႉၵမ်းလဵဝ် ၶဝ်ဢဝ်ၵွၵ်းငိုၼ်းၵွၵ်းၶမ်းၸိူဝ်းၼၼ်ႉမႃးလႄႈၶဝ်ၵႃႈမီးဢွၼ်ၵၼ်သႂ်ႇၼမ်ႉမၢၵ်ႇၸပိတ်ႉၼႂ်းၵွၵ်းငိုၼ်းၵွၵ်းၶမ်းၸိူဝ်းၼၼ်ႉၵိၼ်လႄႈ၊-
ဢွၼ်ၵၼ်ယွင်ႈယေႃးၽြႃးၶမ်း၊ၽြႃးငိုၼ်း၊ၽြႃးတွင်းလိူင်၊ၽြႃးလဵၵ်း၊ၽြႃးမႆႉ၊ၽြႃးမၢၵ်ႇႁိၼ်တင်းလၢႆဢေႃႈ။
ၼႂ်းၶိင်ႇၼၼ်ႉၵမ်းလဵဝ် ၼိဝ်ႉမိုဝ်းၵူၼ်းပေႃႇမႃးလႄႈတႅမ်ႈတူဝ်လိၵ်ႈဢႅၵ်ႉၶရႃႇသႂ်ႇဝႆႉၵႃႈတီႈၽႃဢုတ်ႇႁေႃၶမ်း၊သိုဝ်ႈၵႃႈတီႈဢၼ်သၢႆလႅင်းၵွၵ်းၽႆးထွင်ႇသႂ်ႇဢၼ်လႅင်းလီၼႃႇသေပိူၼ်ႈၼၼ်ႉဢေႃႈ။ ၼင်ႇၼၼ်လႄႈၶုၼ်ႁေႃၶမ်းလႆႈႁၼ်ၼိဝ်ႉမိုဝ်းမိူဝ်ႈဢၼ်ယင်းတိုၵ်ႉတႅမ်ႈယူႇၼၼ်ႉသေယဝ်ႉ၊-
ၼႃႈၶုၼ်ႁေႃၶမ်းႁဵဝ်ႇၸွပ်ႈၵႂႃႇၵွပ်ႈပိူဝ်ႈၵူဝ်ႁႄၼႃႇလူင်လၢင်ထၢၼ်ႈပေႃးႁူဝ်ၶဝ်ႇမၼ်းၸဝ်ႈတုမ်ႉၵၼ်လေႃႇၵၼ်ယူႇဢေႃႈ။-
မၼ်းၸဝ်ႈႁွင်ႉသႅၼ်ႇႁႂ်ႈႁွင်ႉဢဝ်သြႃႇမေႃပေႇတၢင်ႇလႂ်၊သြႃႇမေႃၽီလႂ်၊သြႃႇဢၼ်ၸၢင်ႈႁေႃးၸၢင်ႈလၢတ်ႈလႂ်မႃးဢေႃႈ။ ၶဝ်ၸိူဝ်းၼၼ်ႉႁွတ်ႈထိုင်မႃးလႄႈၶုၼ်ႁေႃၶမ်းလၢတ်ႈတီႈၶဝ်လႄႈဝႃႈ၊ “ၽူႈလႂ်သေဢမ်ႇဝႃႈ၊ၵေႃႉဢၼ်ၽတ်းဢၢၼ်ႇလိၵ်ႈၼႆႉလႆႈလႄႈၽုၺ်ႇၼႄဢၼၢၵ်ႈဢထိၵ်ႈပႄႇမၼ်းပၼ်ၵဝ်လႆႈၼၼ်ႉတၵ်းႁႂ်ႈမၼ်းလႆႈၼုင်ႈၶူဝ်းဢၼ်လႅင်ၵမ်ႇ၊လႆႈႁွႆႈၸရွႆႇၶမ်းတီႈၶေႃးမၼ်း၊ဢိၵ်ႇတင်းတၵ်းလႆႈပဵၼ်ၶုၼ်ပႃးတီႈသၢမ်ၵႃႈၼႂ်းသိုင်ႇၸိုင်ႈဝၢၼ်းမိူင်းၸဝ်ႈဢေႃႈ၊” ဝႃႈၼင်ႇၼႆဢေႃႈ။-
ၵူၼ်းဢၼ်မီးပိင်ႇၺႃႇၶုၼ်ႁေႃၶမ်းၼၼ်ႉဢွၼ်ၵၼ်သုတ်ႉၶိုၼ်ႈမႃးလႄႈၵေႃႉလႂ်ၵေႃႈဢမ်ႇၽတ်းဢၢၼ်ႇလိၵ်ႈၼၼ်ႉလႆႈ၊ဢမ်ႇၽုၺ်ႇၼႄဢၼၢၵ်ႈဢထိၵ်ႈပႄႇမၼ်းတီႈၶုၼ်ႁေႃၶမ်းလႆႈသေၵေႃႉသေၵူၼ်း။-
ပိူဝ်ႈၼႆလႄႈၶုၼ်ႁေႃၶမ်း ပေႇလသႃႇၸႃႇ၊ မီးတၢင်းဢၼ်ယဵင်ႈၶႅၼ်းၵူဝ်ႁႄလႄႈၼႃႈမၼ်းၸဝ်ႈယဵင်ႈၶႅၼ်းႁဵဝ်ႇၸွပ်ႈၵႂႃႇဢေႃႈ။ မူးမၢတ်ႈၽွင်းမိူင်းတင်းလၢႆၵေႃႈဢွၼ်ၵၼ်ၵႂင်ၸႂ်ယုင်ႈၸႂ်ယူႇဢေႃႈ။
မိူဝ်ႈၼၼ်ႉ၊မႄႈၶုၼ်ႁေႃၶမ်းလႆႈႁုလႆႈငိၼ်းလွင်ႈၶုၼ်ႁေႃၶမ်း၊ဢိၵ်ႇတင်းမူးမၢတ်ႈၽွင်းမိူင်းမၼ်းၸိူဝ်းၼၼ်ႉသေလႄႈၶဝ်ႈၸူးၵႃႈတီႈပွႆးၵိၼ်လဵင်ႉၸဝ်ႈသေယဝ်ႉ၊လဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “ၸဝ်ႈမုၼ်ယႂ်ႇၶုၼ်ႁေႃၶမ်း႟။ ႁႂ်ႈဢသၢၵ်ႈၸဝ်ႈယၢဝ်းယိုၼ်းသေၵမ်းလူၺ်ႈ။ ယႃႇပေတူၵ်းၸႂ်လႄႈၼႃႈႁဵဝ်ႇၸွပ်ႈထၢၼ်ႇၼၼ်ႉသေၵမ်း။-
ၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈၼႆႉမီးၵူၼ်းဢၼ်ပျေႉၸုမ်ႇတဵမ်ဝႆႉတင်းဝိၺိၺ်ႇၽြႃးဢၼ်မူတ်းၸၢင်ႇတင်းလၢႆၼၼ်ႉၵေႃႉၼိုင်ႈဢေႃႈ။ ၼႂ်းၸူဝ်ႈပၢၼ်ၸဝ်ႈပေႃႈၸဝ်ႈႁဝ်းၼၼ်ႉလႆႈထူပ်းတၢင်းၵတ်ႉတၢင်းၶၼ်ၺၢၼ်ႇပိင်ႇၺႃႇဢၼ်မိူၼ်ပိင်ႇၺႃႇၽြႃးတင်းလၢႆၼၼ်ႉၵႃႈၼႂ်းၵေႃႉၼၼ်ႉဢေႃႈ။ ၸဝ်ႈပေႃႈၸဝ်ႈႁဝ်းၶုၼ်ႁေႃၶမ်း ၼေႇပုၶတ်ႉၼေႇၸႃႇ၊ ဢဝ်ၵေႃႉၼၼ်ႉၶၢၼ်းဝႆႉၼႂ်းဢရႃႇဢၼ်ဢုပ်ႉၵႃႈၼိူဝ်ၵူၼ်းဢၼ်မီးပိင်ႇၺႃႇလႂ်၊မေႃပေႇတၢင်ႇလႂ်၊သြႃႇမေႃၽီလႂ်၊သြႃႇဢၼ်ၸၢင်ႈႁေႃးၸၢင်ႈလၢတ်ႈၸိူဝ်းၼၼ်ႉဢေႃႈ။-
ၵေႃႉၼၼ်ႉမီးတၢင်းၵတ်ႉတၢင်းၶၼ်ဢၼ်လၢၵ်ႇဢၼ်လၢႆး၊ဢိၵ်ႇတင်းပိင်ႇၺႃႇၺၢၼ်ႇဢၼ်ၸၢင်ႈၽုၺ်ႇၼႄဢၼၢၵ်ႈဢထိၵ်ႈပႄႇတၢင်းၼွၼ်းၽၼ်ႁၼ်လႂ်၊ၸၢင်ႈၵႄႈလိတ်ႈၵႂၢမ်းတွင်ႈထၢမ်ဢၼ်ယၢပ်ႇလႂ်၊ၸၢင်ႈၽုၺ်ႇဢွၵ်ႇၼႄပျႃးလွင်ႈတၢင်းဢၼ်လိုၵ်ႉဢၼ်လမ်ႇဢၼ်ယၢပ်ႇၽိုတ်ႇလႂ်ၸိူဝ်းၼၼ်ႉဢေႃႈ။ မၼ်းၼၼ်ႉပဵၼ် တၢၼ်ႇယေႇလႃႉ၊ ဢၼ်ၶုၼ်ႁေႃၶမ်းဢဵတ်းလူပၼ်ၸိုဝ်ႈပၼ်သဵင်ဢၼ်မႂ်ႇတီႈမၼ်းလႄႈႁွင်ႉဝႃႈ၊ ပေႇလတႃႉသႃႇၸႃႇ၊ ဢေႃႈ။ ႁွင်ႉဢဝ်မၼ်းမႃးတႃႉ။ မၼ်းတၵ်းၽုၺ်ႇၼႄဢၼၢၵ်ႈဢထိၵ်ႈပႄႇတူဝ်လိၵ်ႈၼၼ်ႉပၼ်တီႈၸဝ်ႈဢေႃႈ၊” ဝႃႈၼင်ႇၼႆဢေႃႈ။
တၢၼ်ႇယေႇလႃႉ၊ လႆႈၶၢမ်ႇတၢင်းဢၼ်ဢဝ်သႂၢင်းၶဝ်ႈၸူးတီႈၶုၼ်ႁေႃၶမ်းၵမ်းလဵဝ်ဢေႃႈ။ ၶုၼ်ႁေႃၶမ်းထၢမ်တီႈ တၢၼ်ႇယေႇလႃႉ၊ လႄႈဝႃႈ၊ “မႂ်းၸႂ်ႈ တၢၼ်ႇယေႇလႃႉ၊ ဢၼ်ၶဝ်ႈပႃးၼႂ်းမုၵ်ႉၵူၼ်းၸိူဝ်းၵူၼ်း ၵျူး၊ ဢၼ်ၸဝ်ႈပေႃႈၵဝ်ၶုၼ်ႁေႃၶမ်းလႆႈတိသိမ်းဢဝ်ဢွၵ်ႇသေၵႃႈၼႂ်းမိူင်း ယုတႃႉ၊ မႃးၼၼ်ႉႁိုဝ်း။-
ၵဝ်ငိၼ်းၶၢဝ်ႇလွင်ႈဢၼ်မႂ်းပျေႉၸုမ်ႇဝႆႉတင်းဝိၺိၺ်ႇၽြႃးဢၼ်မူတ်းၸၢင်ႇတင်းလၢႆ၊ဢိၵ်ႇတင်းလွင်ႈဢၼ်မႂ်းၵတ်ႉၶႅၼ်ႇလႄႈမီးၺၢၼ်ႇပိင်ႇၺႃႇၼၼ်ႉယဝ်ႉ။-
သြႃႇဢၼ်မီးပိင်ႇၺႃႇလႂ်၊ဢိၵ်ႇတင်းသြႃႇမေႃႁေႃးပေႇတၢင်ႇလႂ်၊လႆႈၶၢမ်ႇတၢင်းဢၼ်သႂၢင်းၶဝ်ႈမႃးႁႂ်ႈၽတ်းဢၢၼ်ႇလိၵ်ႈၼၼ်ႉလႄႈလၢတ်ႈၼႄဢၼၢၵ်ႈဢထိၵ်ႈပႄႇမၼ်းတီႈၵဝ်သေၵေႃႈၶဝ်ၼၼ်ႉယင်းဢမ်ႇၽုၺ်ႇမွၵ်ႇလၢတ်ႈၼႄလႆႈသေၵေႃႉသေၵူၼ်း။-
တေႃႈလဵဝ်ၼႆႉၵဝ်လႆႈငိၼ်းလွင်ႈဢၼ်မႂ်းၸၢင်ႈႁုႁၼ်ဢၼၢၵ်ႈဢထိၵ်ႈပႄႇတၢင်းဢၼ်သိူင်ႇဝႆႉဢမ်ဝႆႉ၊ဢိၵ်ႇတင်းၸၢင်ႈၽုၺ်ႇၼႄလွင်ႈဢၼ်လိုၵ်ႉဢၼ်လမ်ႇၼၼ်ႉယဝ်ႉ။ ပေႃးမႂ်းၸၢင်ႈၽတ်းဢၢၼ်ႇလိၵ်ႈၼႆႉလႄႈၽုၺ်ႇၼႄဢၼၢၵ်ႈဢထိၵ်ႈပႄႇမၼ်းလႆႈၸိုင်၊မႂ်းတၵ်းတေလႆႈၼုင်ႈမႆၶူဝ်းဢၼ်လႅင်ၵမ်ႇလႄႈႁွႆႈၸရွႆႇၶမ်းၵႃႈတီႈၶေႃးမႂ်းသေလႄႈႁႂ်ႈမႂ်းပဵၼ်ၶုၼ်ပႃးတီႈသၢမ်ၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈဢေႃႈ၊” ဝႃႈၼင်ႇၼႆဢေႃႈ။
တၢၼ်ႇယေႇလႃႉ၊ ၶိုၼ်းလဝ်ႈလၢတ်ႈလႄႈဝႃႈ၊ “သူးလၢပ်ႈၸိူဝ်းၼၼ်ႉဢဝ်ဝႆႉပုၼ်ႈၸဝ်ႈႁဝ်းၶုၼ်လူင်သေၵမ်းတီႈၶႃႈ။ ဢမ်ႇၼၼ်ၵေႃႈဢဝ်သူးၸိူဝ်းၼၼ်ႉပၼ်တီႈပိူၼ်ႈတၢင်ႇၵေႃႉသေၵမ်းတီႈၶႃႈ။ ၶႃႈၸဝ်ႈႁဝ်းတၵ်းၽတ်းဢၢၼ်ႇလိၵ်ႈဢၼ်တႅမ်ႈဝႆႉၼၼ်ႉလႄႈၽုၺ်ႇၼႄဢၼၢၵ်ႈဢထိၵ်ႈပႄႇမၼ်းပၼ်တီႈၸဝ်ႈႁဝ်းတီႈၶႃႈဢေႃႈ။
“ၽြႃးပဵၼ်ၸဝ်ႈဢၼ်သုင်ၼႃႇသေပိူၼ်ႈၼၼ်ႉဢဵတ်းလူပၼ်ႁႂ်ႈၸဝ်ႈပေႃႈၸဝ်ႈႁဝ်း ၼေႇပုၶတ်ႉၼေႇၸႃႇ၊ ၼၼ်ႉပဵၼ်ၶုၼ်ႁေႃၶမ်းဢၼ်ယႂ်ႇမျၢတ်ႈၼႃႇလႄႈႁႂ်ႈမၼ်းၸဝ်ႈမီးမုၼ်ၽုင်းတင်းၵုင်ႇသရေႇဢိၵ်ႇတင်းတၼ်းၶူဝ်းဢႃႇၼုၽေႃႇတီႈၶႃႈဢေႃႈ။-
မၼ်းၸဝ်ႈယႂ်ႇမျၢတ်ႈၼႃႇထၢၼ်ႈပေႃးၵူၼ်းၵူႈၸိူဝ်ႉၵူႈမဵဝ်းဢၼ်လၢတ်ႈၵႂၢမ်းၽႃႇသႃႇၶေႃၶေႃႁင်းၽႂ်ႁင်းမၼ်းတင်းသဵင်ႈတင်းလူင်ၼၼ်ႉဢွၼ်ၵၼ်ၵူဝ်ႁႄသၼ်ႇဝႆယူႇၵႃႈတီႈၽၢႆႇၼႃႈမၼ်းၸဝ်ႈတီႈၶႃႈဢေႃႈ။ ပေႃးမၼ်းၸဝ်ႈမီးဢလူဝ်ႇၶႂ်ႈဢဝ်ၽူႈလႂ်တၢႆၵေႃႈဢဝ်တၢႆလႄႈ၊မီးဢလူဝ်ႇၶႂ်ႈႁႂ်ႈၽူႈလႂ်ဢသၢၵ်ႈလိပ်းၵေႃႈဢသၢၵ်ႈလိပ်းယူႇတီႈၶႃႈဢေႃႈ။ မၼ်းၸဝ်ႈမီးဢလူဝ်ႇၶႂ်ႈယုၵ်ႉယွင်ႈၽူႈလႂ်လႄႈၶႂ်ႈၶျႃးၽူႈလႂ်တူၵ်းတႅမ်ႇၵေႃႈမၼ်းၸဝ်ႈႁဵတ်းတီႈၶႃႈဢေႃႈ။-
ၵူၺ်းၵႃႈ၊မၼ်းၸဝ်ႈမီးၸႂ်မႃႇၼႃႉၽႅၼ်သုင်၊ဢိၵ်ႇတင်းမီးႁူဝ်ၸႂ်ၵႅၼ်ႇၶႅင်လႄႈလိူင်းၵျၢမ်းၼႃႇထၢၼ်ႈပေႃးလႆႈၶၢမ်ႇတၢင်းဢၼ် ဢဝ်ၶျႃးတူၵ်းသေၵႃႈၼိူဝ်ရႃႇၸႃႉပလၢင်ႇလႄႈမုၼ်ၽုင်းတၼ်းၶူဝ်းမၼ်းၸဝ်ႈလပ်ႉႁၢႆၵႂႃႇတီႈၶႃႈဢေႃႈ။-
မၼ်းၸဝ်ႈလႆႈၶၢမ်ႇတၢင်းဢၼ်ႁေႃႈဢွၵ်ႇသေၵႃႈတီႈမုၵ်ႉၵူၼ်းၸိူဝ်းၵူၼ်းလႄႈမီးၸႂ်သၽေႃးဢၼ်မိူၼ်သတ်းၵႂႃႇတီႈၶႃႈဢေႃႈ။ မၼ်းၸဝ်ႈလႆႈယူႇလူၺ်ႈၵၼ်တင်းမႃႉလီႈဢၼ်လိူင်းတင်းလၢႆယူႇ၊ၵိၼ်ယိူဝ်ႈၵိၼ်ယႃႈမိူၼ်ဝူဝ်းယူႇသေလႄႈလႆႈၼွၼ်းၵႃႈတီႈၼႂ်းၵၢင်ပၢင်ႇၵၢင်ပိဝ်၊ယမ်းၽူၼ်ယမ်းၼၢႆးယူႇတီႈၶႃႈဢေႃႈ။ ဝၼ်းလိုၼ်းသုတ်းၼၼ်ႉမၼ်းၸဝ်ႈႁုၸႅင်ႈလွင်ႈဢၼ်ၽြႃးပဵၼ်ၸဝ်ႈဢၼ်သုင်ၼႃႇသေပိူၼ်ႈၼၼ်ႉဢုပ်ႉပိူင်ႇၵႃႈၼိူဝ်သိုင်ႇၸိုင်ႈဝၢၼ်ႈမိူင်းၵူၼ်းလေႃးၵီႇလႄႈဢၢပ်ႈပၼ်တီႈၵေႃႉဢၼ်မၼ်းၸဝ်ႈမီးဢလူဝ်ႇၶႂ်ႈပၼ်ၼၼ်ႉတီႈၶႃႈဢေႃႈ။
“ၵူၺ်းၵႃႈ၊ၸဝ်ႈႁဝ်းဢၼ်ပဵၼ်လုၵ်ႈၸၢႆးမၼ်းၸဝ်ႈၼၼ်ႉႁုႁၼ်လွင်ႈတၢင်းၸိူဝ်းၼၼ်ႉၵူႈၸိူဝ်ႉၵူႈပိူင်သေၵေႃႈၸဝ်ႈႁဝ်းယင်းဢမ်ႇၶျႃးႁူဝ်ၸႂ်ၸဝ်ႈႁဝ်းတူၵ်းတီႈတႅမ်ႇလႄႈ၊-
ႁဵတ်းၶတ်းၵၼ်တင်းၸဝ်ႈၽြႃး၊ၸဝ်ႈၽုင်ႇၵၢင်ႁၢဝ်ယူႇသေယဝ်ႉ၊ႁႂ်ႈဢဝ်ၵွၵ်းၸိူဝ်းဢၼ်သိမ်းဢဝ်သေၵႃႈတီႈၼႂ်းၵျွင်းပိၵ်ႈမၢၼ်ႇၸဝ်ႈမႃးၼၼ်ႉဢဝ်ၶဝ်ႈၸူးတီႈၸဝ်ႈႁဝ်းတီႈၶႃႈဢေႃႈ။ ၸဝ်ႈႁဝ်းဢိၵ်ႇတင်းမူးမၢတ်ႈၽွင်းမိူင်းၸဝ်ႈႁဝ်း၊ၼၢင်းႁေႃၶမ်းၸဝ်ႈႁဝ်း၊ၸိူင်ႉၼၢင်းၸဝ်ႈႁဝ်းၸိူဝ်းၼၼ်ႉဢွၼ်ၵၼ်ဢဝ်ၵွၵ်းၸိူဝ်းၼၼ်ႉသႂ်ႇၼမ်ႉမၢၵ်ႇၸပိတ်ႉလႄႈ၊သူတ်ႉၵိၼ်သေယဝ်ႉ၊ယွင်ႈယေႃးၽြႃးငိုၼ်း၊ၽြႃးၶမ်း၊ၽြႃးတွင်းလိူင်၊ၽြႃးလဵၵ်း၊ၽြႃးမႆႉ၊ၽြႃးမၢၵ်ႇႁိၼ်ဢၼ်ဢမ်ႇၸၢင်ႈႁၼ်၊ဢမ်ႇၸၢင်ႈငိၼ်း၊ဢမ်ႇၸၢင်ႈႁုၵႃႈသင်လႃးလႃးၸိူဝ်းၼၼ်ႉယူႇတီႈၶႃႈဢေႃႈ။ ၸဝ်ႈႁဝ်းယင်းဢမ်ႇယွင်ႈယေႃးၽြႃးပဵၼ်ၸဝ်ႈဢၼ်ဢုပ်ႉပိူင်ႇဢသၢၵ်ႈတၢင်းဢၼ်ထူၺ်ႈၸႂ်ၶဝ်ႈထူၺ်ႈၸႂ်ဢွၵ်ႇၸဝ်ႈႁဝ်း၊ဢၼ်ၸီႇယၢင်ႇသဵၼ်ႈတၢင်းၵႃႈဢၼ်ၸဝ်ႈႁဝ်းၸွမ်းၸိူဝ်းၼၼ်ႉလႄႈယူႇယဝ်ႉတီႈၶႃႈလူင်ပႄႇ။-
ၵွပ်ႈပိူဝ်ႈလွင်ႈတၢင်းၼႆႉလႄႈၽြႃးပဵၼ်ၸဝ်ႈပွႆႇၸႂ်ႉၼိဝ်ႉမိုဝ်းၼၼ်ႉမႃးလႄႈတႅမ်ႈလိၵ်ႈၼၼ်ႉဝႆႉတီႈၶႃႈဢေႃႈ။
“ၶေႃႈၵႂၢမ်းလိၵ်ႈဢၼ်တႅမ်ႈဝႆႉၼၼ်ႉ၊ ‘မေႇၼေႇ၊မေႇၼေႇ၊တေႇၵလႃႉ၊ဢုၽႃႇၸိၼ်း၊’ ဝႃႈၼင်ႇၼႆဢေႃႈ။-
ဢၼၢၵ်ႈဢထိၵ်ႈပႄႇၵႂၢမ်းၼၼ်ႉဝႃႈၸမ်ႉ၊ ‘မေႇၼေႇ’ ပွင်ႇဝႃႈ၊ၽြႃးပဵၼ်ၸဝ်ႈၼပ်ႉဢၢၼ်ႇမိုဝ်ႉဝၼ်းသိုင်ႇၸိုင်ႈဝၢၼ်ႈမိူင်းၸဝ်ႈႁဝ်းလႄႈႁႂ်ႈမၼ်းသုတ်းၵႂႃႇၵွႆၵႂႃႇတီႈၶႃႈဢေႃႈ။-
‘တေႇၵလႃႉ’ ပွင်ႇဝႃႈ၊ၸဝ်ႈႁဝ်းလႆႈၶၢမ်ႇတၢင်းဢၼ်ၸင်ႈႁိဝ်ႈလူၺ်ႈယႃႇၸူႇလႄႈထူပ်းႁၼ်လွင်ႈဢၼ်ၸဝ်ႈႁဝ်းမဝ်မၢင်ယွမ်းၵႂႃႇတီႈၶႃႈဢေႃႈ။-
‘ဢုၽႃႇၸိၼ်း’ ပွင်ႇဝႃႈ၊ဢိၵ်ႇတင်းသိုင်ႇၸိုင်ႈဝၢၼ်ႈမိူင်းၸဝ်ႈႁဝ်းလႆႈၶၢမ်ႇတၢင်းဢၼ်ႁႂ်ႈၽၢတ်ႇၽႄလႄႈမႅင်ႇပၼ်တီႈၵူၼ်း မေႇတိ၊ တင်းၵူၼ်း ပႃးသျႃး၊ ၸိူဝ်းၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၶုၼ်ႁေႃၶမ်း ပေႇလသႃႇၸႃႇ၊ ပူင်ဢမိင်ႉလႄႈၶဝ်ဢွၼ်ၵၼ်ဢဝ်ၶူဝ်းဢၼ်လႅင်ၵမ်ႇၼုင်ႈမႆပၼ် တၢၼ်ႇယေႇလႃႉ၊ လႄႈဢဝ်ၸရွႆႇၶမ်းႁွႆႈသႂ်ႇပၼ်ၵႃႈတီႈၶေႃးမၼ်းသေယဝ်ႉ၊ဢဝ်လွင်ႈမၼ်းႁွင်ႉပၢဝ်ႇႁွင်ႉသေႃႇလူၺ်ႈလွင်ႈဢၼ်မၼ်းပဵၼ်ၶုၼ်ပႃးတီႈသၢမ်ၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈၼၼ်ႉဢေႃႈ။-
ၼႂ်းၶိုၼ်းၼၼ်ႉၵမ်းလဵဝ်၊ ပေႇလသႃႇၸႃႇ၊ ၶုၼ်ႁေႃၶမ်းမိူင်း ပႃႇပုလုၼ်ႇ၊ ၼၼ်ႉလႆႈၶၢမ်ႇတၢင်းဢၼ်ၶႃႈတၢႆပႅတ်ႈဢေႃႈ။-
ၶုၼ် တႃႇရိ၊ ၵူၼ်းမဵဝ်း မေႇတိ၊ ဢၼ်မီးဢသၢၵ်ႈႁူၵ်းသိပ်းပၢႆသွင်ပီၼၼ်ႉသိမ်းဢဝ်သိုင်ႇၸိုင်ႈဝၢၼ်ႈမိူင်းၸဝ်ႈၼၼ်ႉဢေႃႈ။
ၶုၼ်လူင် တႃႇရိ၊ ၼၼ်ႉၸွမ်းလူၺ်ႈဢလူဝ်ႇမၼ်းၵျိူၵ်ႈၸႂ်ၼၼ်ႉၶၢၼ်းဝႆႉမူးမၢတ်ႈၽွင်းမိူင်းပၢၵ်ႇပၢႆသၢဝ်းၵေႃႉ ပုၼ်ႈဢၼ်တၵ်းၶိုင်ပွင်ၵၢၼ်ၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈဢေႃႈ။-
ၵႃႈၼိူဝ်မူးမၢတ်ႈၽွင်းမိူင်းၸိူဝ်းၼၼ်ႉမၼ်းလိူၵ်ႈဢဝ် တၢၼ်ႇယေႇလႃႉ၊ ဢိၵ်ႇတင်းၵူၼ်းသွင်ၵေႃႉႁႂ်ႈပဵၼ်ဝုၼ်ႇလူင်ဢၼ်လူတူၺ်းၵၢၼ်ငၢၼ်းမူးမၢတ်ႈၽွင်းမိူင်း၊ၼင်ႇႁိုဝ်ဢၵျူဝ်းၶုၼ်ႁေႃၶမ်းတၵ်းဢမ်ႇလႆႈလုသုမ်းၼၼ်ႉဢေႃႈ။-
တၢၼ်ႇယေႇလႃႉ၊ ယဵင်ႈၶႅၼ်းမီးတၢင်းၵတ်ႉတၢင်းၶၼ်သေဝုၼ်ႇလူင်တင်းလၢႆ၊ဢိၵ်ႇတင်းမူးမၢတ်ႈၽွင်းမိူင်းၸိူဝ်းၼၼ်ႉလႄႈၶုၼ်ႁေႃၶမ်းႁုလွင်ႈတၢင်းဢၼ်မၼ်းမီးၺၢၼ်ႇဢၼ်လၢၵ်ႇလၢႆးၼၼ်ႉသေယဝ်ႉ၊ၶုၼ်ႁေႃၶမ်းမီးတၢင်းၵျၢမ်ႇတၢင်းပွင်တၵ်းဢဝ်မၼ်းၶၢၼ်းဝႆႉၵႃႈၼိူဝ်သိုင်ႇၸိုင်ႈဝၢၼ်ႈမိူင်းၸဝ်ႈတင်းသဵင်ႈတင်းလူင်ဢေႃႈ။-
ၵွပ်ႈပိူဝ်ႈလွင်ႈတၢင်းၼႆႉလႄႈဝုၼ်ႇလူင်တင်းလၢႆ၊ဢိၵ်ႇတင်းမူးမၢတ်ႈၽွင်းမိူင်းၸိူဝ်းၼၼ်ႉဢွၼ်ၵၼ်ႁႃတၢင်းၽိတ်းသႂ်ႇၵႃႈတီႈ တၢၼ်ႇယေႇလႃႉ၊ လူၺ်ႈလွင်ႈဢၼ်ထၢမ်းၵၢၼ်ၼႃႈမိူင်းၼၼ်ႉသေၵေႃႈၶဝ်ဢမ်ႇထူပ်းႁၼ်တီႈၽိတ်းတီႈပိူင်ႈလႃးလႃး။ လွင်ႈမၼ်းၸမ်ႉ၊မၼ်းမီးသဵတ်ႈၸႃႇလႄႈဢမ်ႇႁဵတ်းလွင်ႈဢၼ်ၽိတ်းသေၸိူဝ်ႉသေပိူင်ဢေႃႈ။-
မိူဝ်ႈၼၼ်ႉၶဝ်ၼင်ႇၵၼ်ၵၼ်ဢုပ်ႇၵုမ်ၵၼ်လႄႈဝႃႈ၊ “ၼွၵ်ႈသေလွင်ႈပိင်းၺၢပ်ႈတြႃးၽြႃးပဵၼ်ၸဝ်ႈဢၼ်မၼ်းၵူဝ်းၵႂၢႆႇၼၼ်ႉႁဝ်းဢမ်ႇၸၢင်ႈႁႃတၢင်းၽိတ်းသႂ်ႇၵႃႈတီႈ တၢၼ်ႇယေႇလႃႉ၊ လႆႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈၶဝ်ၸိူဝ်းၼၼ်ႉဢွၼ်ၵၼ်ၶဝ်ႈၸူးတီႈၶုၼ်ႁေႃၶမ်းသေလႄႈလဝ်ႈလၢတ်ႈဝႃႈ၊ “ၶုၼ်ႁေႃၶမ်း တႃႇရိ၊ တီႈၶႃႈ။ ႁႂ်ႈဢသၢၵ်ႈၸဝ်ႈႁဝ်းယၢဝ်းယိုၼ်းသေၵမ်းလူၺ်ႈ။-
ၶႃႈၸဝ်ႈႁဝ်းၶဝ်ၸိူဝ်းဢၼ်ပွင်ၼႃႈၵၢၼ်သိုင်ႇၸိုင်ႈဝၢၼ်ႈမိူင်းၸဝ်ႈႁဝ်းယူႇ၊ဢၼ်ဝႃႈဝုၼ်ႇလူင်လႂ်၊ၸဝ်ႈၽႃႉဢိၵ်ႇတင်းမူးမၢတ်ႈၽွင်းမိူင်းလႂ်၊ၸဝ်ႈၶုၼ်သိုၵ်းတင်းလၢႆဢိၵ်ႇတင်းၶုၼ်ဢၼ်ပွင်ၵၢၼ်ႁေႃၸဝ်ႈၵႃႈမီးတင်းသဵင်ႈတင်းလူင်တိူင်ႇပၢင်ႇၽွမ်ႉသဵင်ပဵင်းပၢၵ်ႇၵၼ်ႁႂ်ႈၸဝ်ႈမုၼ်ယႂ်ႇၶုၼ်လူင်ႁဝ်းထုတ်ႇဢွၵ်ႇဢမိင်ႉလႄႈႁႂ်ႈၵူၼ်းမိူင်းၵမ်ၵျၢင်ႉႁဵတ်းၸွမ်းၵျၢပ်ႈၵျၢပ်ႈ၊ၼႂ်းသၢမ်သိပ်းဝၼ်းတဵမ်တဵမ်ၼွၵ်ႈသေတၢင်းဢၼ်သူးတွင်းလႄႈဝႆႈၸဝ်ႈႁဝ်းၼႆႉၽူႈလႂ်သေဢမ်ႇဝႃႈ၊ပေႃးၵေႃႉဢၼ်ၶုပ်ႉဝႆႈသူးတွင်းတီႈၽြႃးသေသူႇသေပႃး၊ဢမ်ႇၼၼ်ဝႆႈတီႈၵူၼ်းသေၵေႃႉသေၵူၼ်းၸိုင်၊ၵေႃႉၼၼ်ႉတၵ်းလႆႈၶၢမ်ႇတၢင်းဢၼ်ထိမ်ႈတူၵ်းသႂ်ႇၵႃႈၼႂ်းၶုမ်ဢၼ်ၶင်သၢင်ႇသီႈဝႆႉၼၼ်ႉသေ၊ဝႃႈၼင်ႇၼႆၼၼ်ႉတီႈၶႃႈဢေႃႈ။-
ပိူဝ်ႈၼႆလႄႈႁႂ်ႈၸဝ်ႈမုၼ်ယႂ်ႇၶုၼ်ႁေႃၶမ်းႁဝ်းပူင်ဢမိင်ႉလႄႈတွၵ်ႇတၼ်းသိၵ်ႈလိၵ်ႈဢမိင်ႉၸဝ်ႈလႄႈႁႂ်ႈၵူၼ်းမိူင်းၵမ်ၵျၢင်ႉႁဵတ်းၸွမ်းၵျၢပ်ႈၵျၢပ်ႈဢၼ်ပဵၼ်ဢုပတေႇၵူၼ်းမဵဝ်း မေႇတိ၊ လႄႈၵူၼ်းမဵဝ်း ပႃးသျႃး၊ ဢၼ်ဢမ်ႇၸၢင်ႈလႅၵ်ႈလၢႆႈၼၼ်ႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။-
ၶုၼ်ႁေႃၶမ်း တႃႇရိ၊ ၵေႃႈတွၵ်ႇတၼ်းသိၵ်ႈဢမိင်ႉၸဝ်ႈဢၼ်ဢမ်ႇႁၢမ်ႈတၢပ်ႈလႆႈၼၼ်ႉသေဢေႃႈ။-
မိူဝ်ႈဢၼ် တၢၼ်ႇယေႇလႃႉ၊ လႆႈႁုငိၼ်းလွင်ႈဢၼ်ဢမိင်ႉၸဝ်ႈမီးတၢင်းဢၼ်ထုတ်ႇဢွၵ်ႇလႄႈတွၵ်ႇတၼ်းသိၵ်ႈဝႆႉယဝ်ႉၼၼ်ႉၸိုင်၊မၼ်းပွၵ်ႈမိူဝ်းၵႂႃႇဢေႃႈ။ ၵႃႈတီႈႁိူၼ်းမၼ်းႁၢၼ်ႉၼိူဝ်ၼၼ်ႉမီးႁူးလၢင်းတဵၼ်ဢၼ်ဝၢႆႇၼႃႈတေႃႇဝဵင်း ယေႇရုသလႅမ်ႇ၊ ၼၼ်ႉဢေႃႈ။ ၵႃႈတီႈႁူးလၢင်းတဵၼ်ဢၼ်ၽုၺ်ႇပိုတ်ႇဝႆႉၼၼ်ႉမၼ်းၶုပ်ႉမူပ်ႇသေလႄႈသူးတွင်းတီႈၽြႃးပဵၼ်ၸဝ်ႈယေႈဝၼ်းသၢမ်ပွၵ်ႈမိူၼ်ၸိူဝ်ႉၼင်ႇမၼ်းယၢမ်ႈႁဵတ်းမႃးၵူႈပွၵ်ႈၼၼ်ႉဢေႃႈ။
မိူဝ်ႈဢၼ်ၶုၼ်ဢၼ်ပွင်ၵၢၼ်ၼႂ်းႁေႃၸိူဝ်းဢၼ်ႁႃတၢင်းၽိတ်းသႂ်ႇတီႈ တၢၼ်ႇယေႇလႃႉ၊ ၼၼ်ႉထူပ်းႁၼ်မၼ်းၶုပ်ႉဝႆႈသူးတွင်းတီႈၽြႃးပဵၼ်ၸဝ်ႈယူႇၼၼ်ႉသေယဝ်ႉ။-
ၶဝ်ၵႃႈမီးဢွၼ်ၵၼ်ၸုတုမ်ၵၼ်လႄႈၶဝ်ႈၸူးတီႈၶုၼ်ႁေႃၶမ်းလႄႈၸွႆးတၢင်ႇဢမုတီႈ တၢၼ်ႇယေႇလႃႉ၊ ဢေႃႈ။ ၶဝ်ဢွၼ်ၵၼ်လဝ်ႈလၢတ်ႈလႄႈဝႃႈ၊ “ၸဝ်ႈမုၼ်ယႂ်ႇၶုၼ်ႁေႃၶမ်းတီႈၶႃႈ။ ၸဝ်ႈႁဝ်းတွၵ်ႇတၼ်းသိၵ်ႈဝႆႉတီႈဢမိင်ႉၸဝ်ႈဢၼ်ဝႃႈ၊ၼႂ်းသၢမ်သိပ်းဝၼ်းတဵမ်တဵမ်ၼွၵ်ႈသေတၢင်းဢၼ်သူးတွင်းလႄႈဝႆႈၸဝ်ႈႁဝ်းၼႆႉၽူႈလႂ်သေဢမ်ႇဝႃႈ၊ၵေႃႉဢၼ်ၶုပ်ႉဝႆႈသူးတွင်းတီႈၽြႃးသေသူႇသေပႃး၊ဢမ်ႇၼၼ်တီႈၵူၼ်းသေၵေႃႉသေၵူၼ်းၼၼ်ႉၸိုင်၊ၵေႃႉၼၼ်ႉတၵ်းလႆႈၶၢမ်ႇတၢင်းဢၼ်ထိမ်ႈၶျႃးတူၵ်းသႂ်ႇၵႃႈၼႂ်းၶုမ်ဢၼ်ၶင်သၢင်ႇသီႈၼၼ်ႉသေ၊ဝႃႈၼႆဢမ်ႇၸႂ်ႈတီႈၶႃႈႁိုဝ်း၊” ဝႃႈၼင်ႇၼႆဢေႃႈ။ ၶုၼ်ႁေႃၶမ်းၶိုၼ်းလၢတ်ႈလႄႈဝႃႈ၊ “ၸႂ်ႈယဝ်ႉ။ ပဵၼ်ဢမိင်ႉဢၼ်ႁႅင်းၼႃႇ၊ဢၼ်ပဵၼ်ဢုပတေႇၵူၼ်းမဵဝ်း မေႇတိ၊ တင်းၵူၼ်းမဵဝ်း ပႃးသျႃး၊ ဢၼ်ဢမ်ႇၸၢင်ႈလႅၵ်ႈလၢႆႈ လႆႈၼၼ်ႉယဝ်ႉ၊” ဝႃႈၼင်ႇၼႆဢေႃႈ။
ၵူၼ်းၸိူဝ်းၼၼ်ႉၵေႃႈ ဢွၼ်ၵၼ်လဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “ တၢၼ်ႇယေႇလႃႉ၊ ဢၼ်ၶဝ်ႈပႃးၵူၼ်းမိူင်း ယုတႃႉ၊ ဢၼ်လႆႈၶၢမ်ႇတိသိမ်းဢဝ်မႃးၼၼ်ႉဢမ်ႇရူဝ်ႇသေႇၸဝ်ႈမုၼ်ယႂ်ႇၶုၼ်ႁေႃၶမ်းလႄႈဢမ်ႇထွမ်ႇဢမ်ႇဢဝ်ဢမိင်ႉၸဝ်ႈဢၼ်ထုတ်ႇဢွၵ်ႇၼၼ်ႉတီႈၶႃႈ။ မၼ်းယင်းသူးတွင်းယေႈဝၼ်းသၢမ်ပွၵ်ႈမၢၼ်ႇမၢၼ်ႇယူႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၶုၼ်ႁေႃၶမ်းငိၼ်းၵႂၢမ်းၼၼ်ႉၸိုင်၊တူၵ်းၸႂ်တူၵ်းၶေႃးလႄႈႁႃလွင်ႈႁႃတၢင်းႁႂ်ႈလႆႈၵႄႇၼုၵ်ႈဢဝ် တၢၼ်ႇယေႇလႃႉ၊ ဢေႃႈ။ မၼ်းၶတ်းၸႂ်ၵျူဝ်းၸႃးႁႃဢၶႂၢင်ႉႁႂ်ႈလႆႈဢဝ်မၼ်းလွတ်ႈတေႃႇထိုင်ႁွတ်ႈၵၢင်ဝၼ်းထၢၼ်ႈပေႃးတူၵ်းဢေႃႈ။-
မိူဝ်ႈၼၼ်ႉၵူၼ်းၸိူဝ်းၼၼ်ႉၶိုၼ်းမႃးၸူးတီႈၶုၼ်ႁေႃၶမ်းလႄႈလဝ်ႈလၢတ်ႈဝႃႈ၊ “ၸဝ်ႈမုၼ်ယႂ်ႇၶုၼ်ႁေႃၶမ်းတီႈၶႃႈ။ ၸဝ်ႈႁဝ်းႁုလွင်ႈဢုပတေႇၵူၼ်းမဵဝ်း မေႇတိ၊ တင်းၵူၼ်းမဵဝ်း ပႃးသျႃး၊ ဢၼ်ပဵၼ်ဢမိင်ႉၶုၼ်ႁေႃၶမ်းဢၼ်တွၵ်ႇတၼ်းသိၵ်ႈလႄႈထုတ်ႇဢွၵ်ႇၼၼ်ႉဢမ်ႇလႅၵ်ႈလၢႆႈလႆႈၼၼ်ႉယူႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈၶုၼ်ႁေႃၶမ်းထုတ်ႇဢွၵ်ႇဢမိင်ႉႁႂ်ႈတိဢဝ် တၢၼ်ႇယေႇလႃႉ၊ လႄႈဢဝ်မၼ်းထိမ်ႈၶျႃးတူၵ်းသႂ်ႇၵႃႈၼႂ်းၶုမ်ဢၼ်ၶင်သၢင်ႇသီႈဝႆႉၼၼ်ႉဢေႃႈ။ မၼ်းလၢတ်ႈတီႈ တၢၼ်ႇယေႇလႃႉ၊ လႄႈဝႃႈ၊ “ၽြႃးဢၼ်မႂ်းၵူဝ်းၵႂၢႆႇယူႇသေႇသေႇၼၼ်ႉႁႂ်ႈၵႄႇသႄႇၶျွတ်ႈဢဝ်မႂ်းသေၵမ်း၊” ဝႃႈၼင်ႇၼႆဢေႃႈ။-
ၶႅပ်းမၢၵ်ႇႁိၼ်လူင်ၵေႃႈၶဝ်ဢဝ်မႃးလႄႈႁူမ်ႇဢိုတ်းဝႆႉၵႃႈၼိူဝ်ပၢၵ်ႇၶုမ်ၼၼ်ႉသေယဝ်ႉ၊ၶုၼ်ႁေႃၶမ်းတွၵ်ႇတၼ်းသိၵ်ႈဢၼ်ပဵၼ်ၸုမ်ႈၶုၼ်ႁေႃၶမ်း၊ဢိၵ်ႇတင်းၸုမ်ႈၶုၼ်ၸိူဝ်းၼၼ်ႉတွၵ်ႇၵႃႈၼိူဝ်ၶႅပ်းမၢၵ်ႇႁိၼ်ၼၼ်ႉပုၼ်ႈဢၼ်ၽူႈလႂ်တၵ်းဢမ်ႇၵႄႇၼုၵ်ႈဢဝ် တၢၼ်ႇယေႇလႃႉ၊ လႆႈဢေႃႈ။-
မိူဝ်ႈၼၼ်ႉ၊ၶုၼ်ႁေႃၶမ်းၶိုၼ်းမိူဝ်းၵႂႃႇတီႈႁေႃၶမ်းလႄႈယင်းဢမ်ႇၵိၼ်ဢမ်ႇသူတ်ႉၵႃႈသင်လႃးလႃး၊ဢမ်ႇႁဵတ်းတၢင်းဢၼ်သိူဝ်းဢၼ်ပျေႃႇသေၸိူဝ်ႉသေဢၼ်လႄႈထၢၼ်ႈပေႃးပူၼ်ႉၶိုၼ်းတင်းၶိုၼ်းၼွၼ်းဢမ်ႇလပ်းလႆႈဢေႃႈ။
မိူဝ်ႈထိုင်ၶိင်ႇႁူဝ်မိူင်းသႂ်မႃးၼၼ်ႉၸိုင်၊ၶုၼ်ႁေႃၶမ်းလုၵ်ႉၸဝ်ႉၸဝ်ႉလႄႈ၊လႄႇၵႂႃႇၸူးတီႈၶုမ်သၢင်ႇသီႈၼၼ်ႉၶၼ်ၶၼ်ၽႂ်းၽႂ်းဢေႃႈ။-
မၼ်းႁွတ်ႈထိုင်ၵႃႈတီႈၼၼ်ႈသေယဝ်ႉ၊ပႃးတင်းသဵင်ႁႆႈလႄႈႁွင်ႉတီႈ တၢၼ်ႇယေႇလႃႉ၊ လႄႈဝႃႈ၊ “ တၢၼ်ႇယေႇလႃႉ၊ ၶႃႈၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇ႟။ ၽြႃးပဵၼ်ၸဝ်ႈဢၼ်မႂ်းၵူဝ်းၵႂၢႆႇယူႇသေႇသေႇၼၼ်ႉၵႄႇသႄႇၶျွတ်ႈဢဝ်မႂ်းလွတ်ႈသေၵႃႈၼႂ်းၽေးသၢင်ႇသီႈလႆႈႁိုဝ်း၊” ဝႃႈၼင်ႇၼႆဢေႃႈ။
တၢၼ်ႇယေႇလႃႉ၊ ၶိုၼ်းလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊ “ႁႂ်ႈၸဝ်ႈမုၼ်ယႂ်ႇၶုၼ်ႁေႃၶမ်းဢသၢၵ်ႈယၢဝ်းယိုၼ်းသေၵမ်းလူၺ်ႈ။-
ၽြႃးပဵၼ်ၸဝ်ႈပွႆႇၸႂ်ႉတမၢၼ်ႇၵၢင်ႁၢဝ်မႃးဢိုတ်းသူပ်းသၢင်ႇသီႈဝႆႉလႄႈၶႃႈၸဝ်ႈၵၢင်းလွတ်ႈတင်းၽေးသၢင်ႇသီႈယူႇတီႈၶႃႈဢေႃႈ။ ၸဝ်ႈမုၼ်ယႂ်ႇၶုၼ်ႁေႃၶမ်းတီႈၶႃႈ။ မၼ်းၸဝ်ႈႁဵတ်းၸိူဝ်ႉၼင်ႇၼႆၵွပ်ႈပိူဝ်ႈဢၼ်မၼ်းၸဝ်ႈႁုလွင်ႈဢၼ်ၶႃႈၸဝ်ႈၵၢင်းလွတ်ႈတင်းဢပျတ်ႈ၊ဢိၵ်ႇတင်းလွင်ႈဢၼ်ၶႃႈၸဝ်ႈဢမ်ႇၽိတ်းပိူင်ႈၵႃႈတီႈၽၢႆႇၼႃႈၸဝ်ႈႁဝ်းလႃးလႃးၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းၸူမ်းသိူဝ်းၼႃႇလူင်လၢင်လႄႈပူင်ဢမိင်ႉႁႂ်ႈတိုတ်ႉၸၼ်ဢဝ် တၢၼ်ႇယေႇလႃႉ၊ ဢွၵ်ႇသေၵႃႈၼႂ်းၶုမ်မႃးဢေႃႈ။ ပိူဝ်ႈၼႆလႄႈၶဝ်ဢွၼ်ၵၼ်တိုတ်ႉၸၼ်ဢဝ် တၢၼ်ႇယေႇလႃႉ၊ ဢွၵ်ႇသေၵႃႈၼႂ်းၶုမ်ၼၼ်ႉမႃးလႄႈလႆႈႁၼ်မၼ်းဢမ်ႇမီးႁွႆးၸဵပ်းသေၸိူဝ်ႉသေပိူင်လႃးလႃး၊ၵွပ်ႈပိူဝ်ႈဢၼ်မၼ်းယုမ်ႇမၢတ်ႈဢိင်ပိုင်ႈၽြႃးပဵၼ်ၸဝ်ႈၼၼ်ႉဢေႃႈ။-
လိုၼ်းၼၼ်ႉ ၶုၼ်ႁေႃၶမ်းပူင်ဢမိင်ႉႁႂ်ႈတိဢဝ်ၵူၼ်းၸိူဝ်းဢၼ်ၸွႆးတၢင်ႇဢမုသႂ်ႇတီႈ တၢၼ်ႇယေႇလႃႉ၊ ၼၼ်ႉတင်းသဵင်ႈတင်းမူတ်းသေယဝ်ႉ၊ၶဝ်ၸိူဝ်းၼၼ်ႉလႆႈၶၢမ်ႇတၢင်းဢၼ်ထိမ်ႈၶျႃးတူၵ်းသႂ်ႇၵႃႈၼႂ်းၶုမ်ဢၼ်ၶင်သၢင်ႇသီႈၼၼ်ႉႁူမ်ႈလူၺ်ႈၵၼ်တင်းလုၵ်ႈၶဝ်မေးၶဝ်ဢေႃႈ။ ၸဵမ်မိူဝ်ႈၸူဝ်ႈဢၼ်ၶဝ်ယင်းဢမ်ႇပႆႇတူၵ်းထိုင်ပိုၼ်ႉၶုမ်ၼၼ်ႉသၢင်ႇသီႈတင်းလၢႆၵျွၵ်းဝႅၼ်ၶိုၼ်ႈၵႃႈၼိူဝ်ၶဝ်သေယဝ်ႉ၊သိၵ်ႇယႃႉႁၵ်းလုပ်ႇၶဝ်ပႅတ်ႈယဝ်ႉဢေႃႈ။
မိူဝ်ႈၼၼ်ႉၶုၼ်ႁေႃၶမ်း တႃႇရိ၊ တႅမ်ႈလိၵ်ႈဢမိင်ႉၸဝ်ႈသူင်ႇႁွတ်ႈထိုင်ၵႂႃႇတီႈၵူၼ်းၵူႈၸိူဝ်ႉၵူႈမဵဝ်း၊ၵူႈၶိူဝ်းၶိူဝ်းဢၼ်လၢတ်ႈၵႂၢမ်းၽႃႇသႃႇၶေႃၶေႃႁင်းၽႂ်ႁင်းမၼ်းၵႃႈၼိူဝ်ၼႃႈလိၼ်မိူင်းတင်းမူတ်းၼၼ်ႉလႄႈဝႃႈၸမ်ႉ၊ “ႁႂ်ႈမီးတၢင်းဢၼ်ၼိမ်ဢၼ်လီ ၵတ်းယဵၼ်ၶျၢမ်းသႃႇတီႈသူသေၵမ်းလူၺ်ႈ။-
ၵဝ်ပူင်ဢမိင်ႉၸဝ်ႈႁႂ်ႈၵူၼ်းဢၼ်ယူႇၵႃႈၼႂ်းသိုင်ႇၸိုင်ႈဝၢၼ်ႈမိူင်းဢၼ်ၵဝ်ဢုပ်ႉပိူင်ႇတင်းမိူင်းၼႆႉၸိူဝ်းၼၼ်ႉမီးတၢင်းဢၼ်ၵူဝ်ႁႄလႄႈရူဝ်ႇသေႇၵူဝ်ယမ်ၽြႃးပဵၼ်ၸဝ်ႈဢၼ် တၢၼ်ႇယေႇလႃႉ၊ ၵူဝ်းၵႂၢႆႇၼၼ်ႉဢေႃႈ။ “လွင်ႈမၼ်းၸမ်ႉ၊မၼ်းၸဝ်ႈပဵၼ်ၽြႃးပဵၼ်ၸဝ်ႈ ဢၼ်ဢသၢၵ်ႈလိပ်းလႄႈ မၼ်းၸဝ်ႈဢုပ်ႉပိူင်ႇၽွင်းငမ်းယူႇၼိၵ်ႈၸႃႉထႃႇဝရႃႉဢေႃႈ။ သိုင်ႇၸိုင်ႈဝၢၼ်ႈမိူင်းမၼ်းၸဝ်ႈၼၼ်ႉ ဢမ်ႇလုဢမ်ႇလႅဝ်လႆႈ၊ ဢႃႇၼႃႇၸၢၵ်ႈမၼ်းၸဝ်ႈၵေႃႈဢမ်ႇမီး တီႈသုတ်းတီႈဝၢႆးလႃးလႃး။
မၼ်းၸဝ်ႈၸၢင်ႈၵႄႇသႄႇၼုၵ်ႈဢဝ်လႄႈ ၸၢင်ႈၵႄႇသႄႇၶျွတ်ႈဢဝ်ဢေႃႈ။ မၼ်းၸဝ်ႈ ႁဵတ်းၼႄၼိမိၵ်ႈလၢၵ်ႈၶၼႃႇ၊ဢိၵ်ႇတင်း တၢင်းဢၼ်လီဢၢမ်းတင်းလၢႆ၊ ၵႃႈၼႂ်းၽႃႉၵၢင်ႁၢဝ်ဢိၵ်ႇတင်းၵႃႈၼိူဝ် လိၼ်မိူင်းဢေႃႈ။ မၼ်းၸဝ်ႈၵႄႇသႄႇၶျွတ်ႈဢဝ် တၢၼ်ႇယေႇလႃႉ၊ လွတ်ႈဢွၵ်ႇသေတၢင်းဢၼ်၊ သၢင်ႇသီႈတင်းလၢႆၶူပ်းတၢႆၼၼ်ႉ လႆႈဢေႃႈ၊” ဝႃႈၼင်ႇၼႆဢေႃႈ။
ၼင်ႇၼၼ်လႄႈ တၢၼ်ႇယေႇလႃႉ၊ လႆႈလီလႆႈပဵၼ်ၼႂ်းၸူဝ်ႈပၢၼ်ၶုၼ်ႁေႃၶမ်း တႃႇရိ၊ ဢိၵ်ႇတင်းၼႂ်းၸူဝ်ႈပၢၼ်ၶုၼ်ႁေႃၶမ်း သႆးရတ်ႉ၊ မိူင်း ပႃးသျႃး၊ ၼၼ်ႉဢေႃႈ။
ၼႂ်းပီဢၼ် ပေႇလသႃႇၸႃႇ၊ ၸၢမ်ႇႁၢင်ႈၸၢမ်ႇႁေႃမိူင်း ပႃႇပုလုၼ်ႇ၊ ပီဢွၼ်တၢင်းသုတ်းၼၼ်ႉ တၢၼ်ႇယေႇလႃႉ၊ ၼွၼ်းၽၼ်ႁၼ်လႄႈရူႇပႃႇရူင်ႇၶဝ်ႈၵႃႈၼႂ်းၸႂ်မၼ်းမႃး၊ယၢမ်းမိူဝ်ႈဢၼ်ယင်းၼွၼ်းယူႇၶိင်ႇၵၢင်ၶိုၼ်းဢေႃႈ။ မၼ်းၵေႃႈတႅမ်ႈမၢႆလွင်ႈတၢင်းၼွၼ်းၽၼ်ႁၼ်ၼၼ်ႉဝႆႉႁူဝ်ႁုပ်ႈမၼ်းလႄႈဝႃႈၸမ်ႉ၊-
ၵဝ် တၢၼ်ႇယေႇလႃႉ၊ ႁၼ်ရူႇပႃႇရူင်ႇၼႂ်းၶိင်ႇၵၢင်ၶိုၼ်းၼၼ်ႉ။ လူမ်းပတ်ႉမႃးသေၵႃႈတီႈသီႇၸဵင်ႇပႅတ်ႇၼႃႈလႄႈထိပ်ႇၽင်ႈၵႃႈၼိူဝ်ၼႃႈၼမ်ႉသမ်ႇမုၵ်ႈတြႃႇဢေႃႈ။-
တူဝ်ထိူၼ်ႇလူင်သီႇတူဝ်ဢၼ်ႁၢင်ႈၽၢင်ၶဝ်ဢမ်ႇမိူၼ်ၵၼ်ၼၼ်ႉဢွၼ်ၵၼ်ဢွၵ်ႇသေၵႃႈၼႂ်းၼမ်ႉသမ်ႇမုၵ်ႈတြႃႇမႃးဢေႃႈ။-
တူဝ်ထိူၼ်ႇလူင်တီႈၼိုင်ႈၼၼ်ႉတူၺ်းႁၢင်ႈမၼ်းၸိုင်၊မိူၼ်သၢင်ႇသီႈဝႆႉသေလႄႈမီးပိၵ်ႇၼူၵ်ႉၶၢင်ႇလေႃႉဝႆႉဢေႃႈ။ ယၢမ်းမိူဝ်ႈဢၼ်ၵဝ်ယင်းတိုၵ်ႉတူၺ်းယူႇၼၼ်ႉပိၵ်ႇမၼ်းၸိူဝ်းၼၼ်ႉလႆႈၶၢမ်ႇတၢင်းဢၼ်ထူၺ်ႈထွၼ်ပႅတ်ႈလႄႈတူဝ်မၼ်းလႆႈၶၢမ်ႇယုၵ်ႉၶိုၼ်ႈႁႂ်ႈမၼ်းၸုၵ်းယူႇမိူၼ်ၵူၼ်းၼၼ်ႉသေယဝ်ႉ၊ဢဝ်ၸႂ်သၽေႃးၵူၼ်းသႂၢင်းသႂ်ႇပၼ်ဢေႃႈ။
သမ်ႉတူဝ်ထိူၼ်ႇတူဝ်ၼိုင်ႈဢၼ်ပဵၼ်တူဝ်တီႈသွင်ၼၼ်ႉမိူၼ်မီဝႆႉသေလႄႈၸုၵ်းယူႇၵႃႈၼိူဝ်တိၼ်ၶွၼ်လင်မၼ်းဝႆႉဢေႃႈ။ ၵၢပ်ႈလုပ်ႇၶီႈၶၢင်ႈသၢမ်သိၵ်ႈၵႃႈၼႂ်းပၢၵ်ႇမၼ်းၵႃႈတီႈၵႄႈဝူင်ႈၵၢင်ၶဵဝ်ႈမၼ်းဝႆႉလႄႈမီးသဵင်မွၵ်ႇလၢတ်ႈတီႈမၼ်းလႄႈဝႃႈ၊ “လုၵ်ႉလႄႈၶူပ်းၵိၼ်ၼိူဝ်ႉၼမ်ၼမ်တႃႉ၊” ဝႃႈၼင်ႇၼႆဢေႃႈ။
ယၢမ်းမိူဝ်ႈဢၼ်ၵဝ်ယင်းတိုၵ်ႉတူၺ်းယူႇၼၼ်ႉတူဝ်ထိူၼ်ႇတၢင်ႇတူဝ်ပေႃႇမႃးလႄႈတူၺ်းႁၢင်ႈမၼ်းၸိုင်၊မိူၼ်သိူဝ်ၸုမ်ႈဝႆႉသေလႄႈၵႃႈၼိူဝ်ၵုင်းလင်မၼ်းမီးပိၵ်ႇၼူၵ်ႉသီႇဢၼ်ဢေႃႈ။ မၼ်းမီးၵွၵ်းႁူဝ်သီႇႁူဝ်ဝႆႉလႄႈမီးဢႃႇၼႃႇဢၼ်လႆႈဢုပ်ႉပိူင်ႇဢေႃႈ။
ယၢမ်းမိူဝ်ႈဢၼ်ၵဝ်ယင်းတိုၵ်ႉတူၺ်းယူႇၼၼ်ႉတူဝ်ထိူၼ်ႇတူဝ်တီႈသီႇပေႃႇမႃးဢေႃႈ။ တူဝ်ၼႆႉၸမ်ႉ၊မီးႁႅင်းတၼ်းၶူဝ်းဢၼ်လီၵူဝ်လီႁႄၼႃႇလူင်လၢင်ၼၼ်ႉဢေႃႈ။ မၼ်းမီးၶဵဝ်ႈလဵၵ်းဢၼ်ယႂ်ႇၼႃႇၶူပ်းၵၢပ်ႈၸၵ်ႉသိၵ်ႇယႃႉပႅတ်ႈတူဝ်ဢၼ်မၼ်းတိလႆႈၼၼ်ႉသေလႄႈဢဝ်တိၼ်ယဵပ်ႇၼူတ်ႈၵႃႈဢၼ်ၵိုတ်းဢၼ်ၵျၢၼ်ႇၼၼ်ႉပႅတ်ႈဢေႃႈ။ မၼ်းၼၼ်ႉပႅၵ်ႇပိူင်ႈသေတူဝ်ထိူၼ်ႇဢွၼ်တၢင်းၸိူဝ်းၼၼ်ႉလႄႈမီးၶဝ်လႅမ်သိပ်းလႅမ်ႈဢေႃႈ။-
ယၢမ်းမိူဝ်ႈဢၼ်ၵဝ်ယင်းတိုၵ်ႉယႅၵ်ႉတူၺ်းၶဝ်ၸိူဝ်းၼၼ်ႉယူႇၼၼ်ႉၸိုင်၊ၵဝ်ႁၼ်ၶဝ်လႅမ်ဢွၼ်ႇလႅမ်ႈၼိုင်ႈ ဢွၵ်ႇသေၵႃႈၼႂ်းၶိုင်ႈၵၢင်ၶဝ်လႅမ်ၸိူဝ်းၼၼ်ႉဢေႃႈ။ ၶဝ်လႅမ်ဢွၼ်ႇၼၼ်ႉထူၺ်ႈထွၼ်ဢဝ်ၶဝ်လႅမ်သၢမ်လႅမ်ႈဢၼ်မီးယူႇၵဝ်ႇၵဝ်ႇၼၼ်ႉဢေႃႈ။ ၶဝ်လႅမ်ဢွၼ်ႇၼၼ်ႉမီးမၢၵ်ႇတႃတင်းလၢႆဢၼ်မိူၼ်မၢၵ်ႇတႃၵူၼ်း၊ဢိၵ်ႇတင်းသူပ်းဢၼ်ၸၢင်ႈလၢတ်ႈၵႂၢမ်းဢုပ်ႇဝၢဝ်းၽႅၼ်သုင်ၼႃႇၼၼ်ႉဢေႃႈ။
ယၢမ်းမိူဝ်ႈဢၼ်ၵဝ်ယင်းတိုၵ်ႉလူတူၺ်းယူႇၼၼ်ႉၸိုင်၊ရႃႇၸႃႉပလၢင်ႇပေႃႇမႃးတင်ႈဝႆႉလႄႈၸဝ်ႈဢၼ်ပဵၼ်ယူႇမီးယူႇၸဵမ်မိူဝ်ႈဝၼ်းမိူဝ်ႈၵွၼ်ႇမိူဝ်ႈမိုၼ်ႉၼၼ်ႉၼင်ႈၵႃႈၼိူဝ်ပလၢင်ႇဢၼ်ၼိုင်ႈယူႇဢေႃႈ။ ၶူဝ်းၼုင်ႈမၼ်းၸဝ်ႈၽိူၵ်ႇၶၢဝ်မိူၼ်မူၺ်ႁႃႇလႄႈၶူၼ်ႁူဝ်မၼ်းၸဝ်ႈၽိူၵ်ႇၶၢဝ်မိူၼ်ၶူၼ်သူဝ်းဢေႃႈ။ ရႃႇၸႃႉပလၢင်ႇမၼ်းၸဝ်ႈၼၼ်ႉပဵၼ်ပိဝ်ၽႆးဝႆႉလႄႈမၢၵ်ႇလေႃႉမၼ်းၸိူဝ်းၼၼ်ႉပဵၼ်ၸၢၵ်ႈၽႆးဢေႃႈ။
သၢႆဢရွင်ႇၽႆးၽူတ်းဢွၵ်ႇမၢပ်ႈဢွၵ်ႇမႃးသေၵႃႈတီႈၽၢႆႇၼႃႈမၼ်းၸဝ်ႈဢေႃႈ။ ၵူၼ်းပဵၼ်မိုၼ်ႇပဵၼ်သႅၼ်ဢွၼ်ၵၼ်ၵိုတ်ႉႁၢပ်ႇၼႃႈၵၢၼ်ၸဝ်ႈလႄႈၵူၼ်းၵုၵ်ႉတႄႇသၢင်ႇၶျေႇဢမ်ႇၵႃးၸုၵ်းၶႃးၸႃးၽၢႆႇၼႃႈၸဝ်ႈဢေႃႈ။ တၢင်းဢၼ်ၸီႇယၢင်ႇတြႃးမီးတၢင်းဢၼ်မႄးပွင်မႄးႁဵတ်းဝႆႉလႄႈၽိုၼ်လိၵ်ႈတင်းလၢႆမီးတၢင်းဢၼ်ၽုၺ်ႇပိုတ်ႇဝႆႉဢေႃႈ။
မိူဝ်ႈၼၼ်ႉယၢမ်းမိူဝ်ႈဢၼ်ၵဝ်ယင်းတိုၵ်ႉလူတူၺ်းၵွပ်ႈပိူဝ်ႈၶဝ်လႅမ်ဢွၼ်ႇလၢတ်ႈၵႂၢမ်းဢၼ်ဢုပ်ႇဝၢဝ်းၽႅၼ်သုင်ယူႇၼၼ်ႉၸိုင်၊ၵဝ်တူၺ်းယူႇတေႃႇထိုင်ႁွတ်ႈတူဝ်ထိူၼ်ႇတူဝ်တီႈသီႇၼၼ်ႉလႆႈၶၢမ်ႇတၢင်းဢၼ်ဢဝ်တၢႆပႅတ်ႈလႄႈတူဝ်တၢႆမၼ်းလႆႈၶၢမ်ႇတၢင်းဢၼ်ထိမ်ႈသႂ်ႇၵႃႈၼႂ်းမုၵ်ႉၽႆးလႄႈမႆႈပႅတ်ႈၼၼ်ႉဢေႃႈ။-
တူဝ်ထိူၼ်ႇတၢင်ႇတူဝ်ၸိူဝ်းၼၼ်ႉၸမ်ႉ၊ပိၵ်ႉသမ်ႉဢၶႂၢင်ႉတၼ်းၶူဝ်းဢၼ်လႆႈဢုပ်ႉပိူင်ႇၼၼ်ႉလႆႈၶၢမ်ႇတၢင်းဢၼ်သိမ်းဢဝ်ယဝ်ႉသေၵေႃႈ ၶဝ်ယင်းမီးဢၶႂၢင်ႉဢၼ်ဢသၢၵ်ႈလိပ်းယူႇထႅင်ႈၸူဝ်ႈၼိုင်ႈၶၢဝ်းၼိုင်ႈလူးၵွၼ်ႇဢေႃႈ။
ၼႂ်းၸူဝ်ႈၶၢဝ်းဢၼ်ၵဝ်လႆႈရူႇပႃႇရူင်ႇၶိင်ႇၵၢင်ၶိုၼ်းၼၼ်ႉယူႇၼၼ်ႉၸိုင်၊ၵဝ်ႁၼ်ၵေႃႉၼိုင်ႈဢၼ်မိူၼ်ၸိူဝ်ႉၼင်ႇလုၵ်ႈၵူၼ်းၼၼ်ႉၶီႇမွၵ်ႇၵုမ်ႈသေလႄႈႁွတ်ႈမႃးၵႃႈတီႈၸဝ်ႈဢၼ်ပဵၼ်ယူႇမီးယူႇၸႃႉၸဵမ်မိူဝ်ႈဝၼ်းမိူဝ်ႈၵွၼ်ႇမိူဝ်ႈမိုၼ်ႉၼၼ်ႉဢေႃႈ။ ၵေႃႉၼၼ်ႉလႆႈၶၢမ်ႇတၢင်းဢၼ်ဢဝ်သႂၢင်းၶဝ်ႈၵႃႈတီႈၽၢႆႇၼႃႈမၼ်းၸဝ်ႈဢေႃႈ။-
ၵေႃႉၼၼ်ႉလႆႈႁပ်ႉဢဝ်ဢႃႇၼႃႇၸၢၵ်ႈတၼ်းၶူဝ်းဢႃႇၼုၽေႃႇ၊ဢိၵ်ႇတင်းမုၼ်သရေႇတင်းဢရႃႇၶုၼ်ႁေႃၶမ်းႁႂ်ႈၵူၼ်းၵႃႈမီးတင်းသဵင်ႈတင်းလူင်၊ၵူႈၸိူဝ်ႉၵူႈမဵဝ်းဢၼ်လၢတ်ႈၵႂၢမ်းၽႃႇသႃႇၶေႃၶေႃႁင်းၽႂ်ႁင်းမၼ်းလႆႈၵိုတ်ႉႁၢပ်ႇၼႃႈၵၢၼ်မၼ်းၼၼ်ႉဢေႃႈ။ ဢႃႇၼႃႇၸၢၵ်ႈမၼ်းၼၼ်ႉပဵၼ်ဢႃႇၼႃႇၸၢၵ်ႈၼိၵ်ႈၸႃႉထႃႇဝရႃႉဢၼ်ဢမ်ႇႁၢႆဢမ်ႇဝၢႆးလႆႈၼၼ်ႉဢေႃႈ။ ဢရႃႇၶုၼ်ႁေႃၶမ်းမၼ်းၼၼ်ႉၵေႃႈဢမ်ႇႁွတ်ႈထိုင်တၢင်းလုတၢင်းလႅဝ်လႆႈ။
ၵဝ် တၢၼ်ႇယေႇလႃႉ၊ ႁၼ်ရူႇပႃႇရူင်ႇၼၼ်ႉလႄႈမီးတၢင်းဢၼ်တူၵ်းၸႂ်သေယဝ်ႉ၊ႁႂ်ႈၵဝ်မႆႈၸႂ်ၶီၸႂ်ၵႂႃႇဢေႃႈ။-
ၵဝ်ၵႂႃႇၸူးတီႈၵူၼ်းၵေႃႉၼိုင်ႈၵႃႈၼႂ်းၶဝ်ၸိူဝ်းဢၼ်ၸုၵ်းၶႃးၸႃးၵႃႈတီႈႁိမ်းၼၼ်ႉလႄႈတွင်ႈထၢမ်တီႈၸိုဝ်ႈတီႈၸႂ်ႈမၼ်းလူၺ်ႈလွင်ႈၵႃႈမီးၸိူဝ်းၼႆႉၼၼ်ႉတီႈမၼ်းဢေႃႈ။ မၼ်းၵေႃႈၽုၺ်ႇၼႄဢၼၢၵ်ႈဢထိၵ်ႈပႄႇလွင်ႈတၢင်းၸိူဝ်းၼၼ်ႉတီႈၵဝ်ဢေႃႈ။-
ဢၼ်ၵေႃႉၼၼ်ႉဝႃႈၸမ်ႉ၊ “တူဝ်ထိူၼ်ႇသီႇတူဝ်ၼႆႉပဵၼ်ၶုၼ်ႁေႃၶမ်းသီႇပႃးဢၼ်တၵ်းပေႃႇမႃးၵႃႈၼိူဝ်လိၼ်မိူင်းဢေႃႈ။-
ၵူၼ်းၽြႃးပဵၼ်ၸဝ်ႈဢၼ်သုင်ၼႃႇသေပိူၼ်ႈၼၼ်ႉတၵ်းဢွၼ်ၵၼ်ႁပ်ႉၶၢမ်ႇဢဝ်သိုင်ႇၸိုင်ႈဝၢၼ်ႈမိူင်းလႄႈၸၢမ်ႇၸႃးသိုင်ႇၸိုင်ႈဝၢၼ်ႈမိူင်းၼၼ်ႉၵမ်ႇၽႃႇသိုပ်ႇသိုပ်ႇတၢမ်တၢမ်တႃႇသေႇဢမ်ႇထၢတ်ႇဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၵဝ်မီးဢလူဝ်ႇၶႂ်ႈႁုတီႈၸိုဝ်ႈတီႈၸႂ်ႈမၼ်းလူၺ်ႈလွင်ႈတူဝ်ထိူၼ်ႇတူဝ်တီႈသီႇၼၼ်ႉဢၼ်ပႅၵ်ႇပိူင်ႈသေတူဝ်ထိူၼ်ႇတၢင်ႇတူဝ်ၸိူဝ်းၼၼ်ႉလႄႈပဵၼ်ဢၼ်လီၵူဝ်လီႁႄၼႃႇလူင်လၢင်ယူႇသေလႄႈၼဵပ်ႉတိၼ်ၼဵပ်ႉမိုဝ်းတွင်းလိူင်တင်းၶဵဝ်ႈလဵၵ်းၸိူဝ်းၼၼ်ႉၶူပ်းၵၢပ်ႈၸၵ်ႉသိၵ်ႇႁၵ်းလႅဝ်သေလႄႈဢဝ်တိၼ်ယဵပ်ႇၼူတ်ႈၵႃႈၼိူဝ်ၸိူဝ်းဢၼ်ၵိုတ်းဢၼ်ၵျၢၼ်ႇၼၼ်ႉဢေႃႈ။-
ၵဝ်သမ်ႉၶႂ်ႈႁုလွင်ႈၶဝ်လႅမ် သိပ်းလႅမ်ႈၵႃႈၼိူဝ်ႁူဝ်မၼ်း၊ဢိၵ်ႇတင်းၶဝ်လႅမ် လႅမ်ႈဢၼ်ဢွၵ်ႇမႃးၵမ်းလိုၼ်းၼၼ်ႉထူၺ်ႈထွၼ်ၶဝ်လႅမ်ဢၼ်မီးၵဝ်ႇၵဝ်ႇၼၼ်ႉပႅတ်ႈသၢမ်လႅမ်ႈၼၼ်ႉဢေႃႈ။ မၼ်းယင်းမီးမၢၵ်ႇတႃတင်းလၢႆ၊ဢိၵ်ႇတင်းသူပ်းဢၼ်ၸၢင်ႈလၢတ်ႈဢုပ်ႇဝၢဝ်းၽႅၼ်သုင်ၼႃႇၼၼ်ႉဢေႃႈ။ မၼ်းသမ်ႉမီးႁၢင်ႈၽၢင်ဢၼ်လီၵူဝ်လီႁႄၼႃႇသေၶဝ်တၢင်ႇလႅမ်ႈၸိူဝ်းၼၼ်ႉလူးၵွၼ်ႇဢေႃႈ။
ယၢမ်းမိူဝ်ႈဢၼ်ၵဝ်ယင်းတိုၵ်ႉလူတူၺ်းယူႇၼၼ်ႉၸိုင်၊ၶဝ်လႅမ်လႅမ်ႈၼၼ်ႉတိုၵ်းတေႃးၵူၼ်းၽြႃးပဵၼ်ၸဝ်ႈတင်းလၢႆလႄႈပႄႉၼႅင်ႇၶဝ်ဢေႃႈ။-
မိူဝ်ႈၼၼ်ႉ၊ၸဝ်ႈဢၼ်ပဵၼ်ယူႇမီးယူႇၸႃႉၸဵမ်မိူဝ်ႈဝၼ်းမိူဝ်ႈၵွၼ်ႇမိူဝ်ႈမိုၼ်ႉၼၼ်ႉႁွတ်ႈမႃးလႄႈလႆႈၸီႇယၢင်ႇတြႃးတီႈၵူၼ်းၽြႃးပဵၼ်ၸဝ်ႈဢၼ်သုင်ၼႃႇသေပိူၼ်ႈၼၼ်ႉဢေႃႈ။ ၼင်ႇၼၼ်လႄႈၶိင်ႇၵႃႇလႃႉဢၼ်မၵ်းၶဵၼ်းဝႆႉၼၼ်ႉႁွတ်ႈထိုင်ယဝ်ႉလႄႈၵူၼ်းၽြႃးပဵၼ်ၸဝ်ႈတင်းလၢႆသိမ်းဢဝ်ဢႃႇၼႃႇၶုၼ်မိူင်းသေဢေႃႈ။
ၵေႃႉၼၼ်ႉၽုၺ်ႇလၢတ်ႈၼႄၵဝ်လႄႈလၢတ်ႈဝႃႈၸမ်ႉ၊ “တူဝ်ထိူၼ်ႇတူဝ်တီႈသီႇၼၼ်ႉပဵၼ်သိုင်ႇၸိုင်ႈဝၢၼ်ႈမိူင်းတီႈသီႇၵႃႈၼိူဝ်လိၼ်မိူင်းဢၼ်လၢၵ်ႇလၢႆးပႅၵ်ႇပိူင်ႈသေသိုင်ႇၸိုင်ႈဝၢၼ်ႈမိူင်းၵႃႈမီးၼၼ်ႉဢေႃႈ။ တူဝ်ၼၼ်ႉတၵ်းၶူပ်းၵၢပ်ႈသိၵ်ႇၶၢတ်ႇယဵပ်ႇၼူတ်ႈလိၼ်မိူင်းၵႃႈမီးပႅတ်ႈဢေႃႈ။-
ၶဝ်လႅမ်သိပ်းလႅမ်ႈၼၼ်ႉပဵၼ်ၶုၼ်ႁေႃၶမ်းသိပ်းပႃးဢၼ်တၵ်းဢုပ်ႉသိုင်ႇၸိုင်ႈဝၢၼ်ႈမိူင်းၼၼ်ႉဢေႃႈ။ လိုၼ်းၶဝ်ၼၼ်ႉၶုၼ်ႁေႃၶမ်းတၢင်ႇပႃးတၵ်းပေႃႇမႃးဢေႃႈ။ မၼ်းတၵ်းလၢၵ်ႇလၢႆးပႅၵ်ႇပိူင်ႈသေ ၶုၼ်လူင်ဢွၼ်တၢင်းၸိူဝ်းၼၼ်ႉလႄႈတၵ်းၶျႃးတူၵ်းၶုၼ်ႁေႃၶမ်းသၢမ်ပႃးတူၵ်းတီႈတႅမ်ႇဢေႃႈ။-
မၼ်းတၵ်းလၢတ်ႈၶတ်းၵၼ်တင်းၽြႃးပဵၼ်ၸဝ်ႈဢၼ်သုင်ၼႃႇသေပိူၼ်ႈၼၼ်ႉလႄႈၼိၵ်ႈၸၢၵ်ႈငႅၼ်းသႄးၵူၼ်းၽြႃးပဵၼ်ၸဝ်ႈတင်းလၢႆဢေႃႈ။ မၼ်းၶတ်းၸႂ်ၵျူဝ်းၸႃးလႅၵ်ႈလၢႆႈပႅတ်ႈၼႄးဢုပတေႇၽႃႇသႃႇတြႃး၊ဢိၵ်ႇတင်းပွႆးထမ်ႇမႃႉတင်းလၢႆၼၼ်ႉဢေႃႈ။ ၵူၼ်းၽြႃးပဵၼ်ၸဝ်ႈၸိူဝ်းၼၼ်ႉတၵ်းတူၵ်းႁွတ်ႈၵႃႈၼႂ်းမိုဝ်းမၼ်းယူႇသၢမ်ပီပၢႆၶိုင်ႈဢေႃႈ။-
လိုၼ်းၼၼ်ႉ၊တၵ်းမီးတၢင်းဢၼ်ၸီႇယၢင်ႇတြႃးၵႃႈၼိူဝ်ၽုင်ၵၢင်ႁၢဝ်သေယဝ်ႉ၊ဢႃႇၼႃႇတၼ်းၶူဝ်းမၼ်းတၵ်းလႆႈၶၢမ်ႇတၢင်းဢၼ်ၼုၵ်ႈထွၼ်ပႅတ်ႈလႄႈလႆႈၶၢမ်ႇတၢင်းဢၼ်ယႃႉၽဵဝ်ႈပႅတ်ႈလုမ်းလုမ်းဢေႃႈ။-
ဢႃႇၼႃႇဢိၵ်ႇတင်းမုၼ်ၽုင်းဢႃႇၼုၽေႃႇဝၢၼ်ႈမိူင်းၵႃႈၼိူဝ်လိၼ်မိူင်းတင်းသဵင်ႈတင်းလူင်ၼႆႉတၵ်းလႆႈဢၢပ်ႈပၼ်ၵႃႈၼႂ်းမိုဝ်းၵူၼ်းၽြႃးပဵၼ်ၸဝ်ႈဢၼ်သုင်ၼႃႇသေပိူၼ်ႈဢေႃႈ။ တၼ်းၶူဝ်းဢိၵ်ႇတင်းဢႃႇၼႃႇၸၢၵ်ႈၶဝ်ၼၼ်ႉပဵၼ်ဢႃႇၼႃႇၸၢၵ်ႈၼိၵ်ႈၸႃႉထႃႇဝရႃႉလႄႈၶုၼ်ဢၼ်ဢုပ်ႉပိူင်ႇလေႃးၵီႇတင်းလၢႆတၵ်းဢွၼ်ၵၼ်ၵိုတ်ႉႁၢပ်ႇၼႃႈၵၢၼ်ၵူၼ်းၽြႃးပဵၼ်ၸဝ်ႈလႄႈထွမ်ႇဢဝ်ၵႂၢမ်းၶဝ်ဢေႃႈ၊” ဝႃႈၼင်ႇၼႆဢေႃႈ။
ဢၼ်ၼႆႉၸမ်ႉ၊ပဵၼ်ဢၼၢၵ်ႈဢထိၵ်ႈပႄႇမၼ်းယဝ်ႉ၊ၵဝ် တၢၼ်ႇယေႇလႃႉ၊ ၼႆႉတူၵ်းၸႂ်တူၵ်းၶေႃးၼႃႇလူင်လၢင်လႄႈၼႃႈၵဝ်ႁဵဝ်ႇၸွပ်ႈၵႂႃႇဢေႃႈ။ ၼႂ်းဝႃႈၼၼ်သေၵေႃႈၵဝ်ဢဝ်လွင်ႈတၢင်းၸိူဝ်းၼႆႉမၢတ်ႈတွင်းဝႆႉၵႃႈၼႂ်းႁူဝ်ၸႂ်ၵဝ်ဢေႃႈ။
ၼႂ်းပီဢၼ် ပေႇလသႃႇၸႃႇ၊ ပဵၼ်ၶုၼ်ႁေႃၶမ်းလႄႈၸၢမ်ႇႁၢင်ႈၸၢမ်ႇႁေႃလႆႈသၢမ်ပီၼၼ်ႉၵဝ်သမ်ႉႁၼ်ပျႃႇတိၵ်ႈရူႇပႃႇရူင်ႇထႅင်ႈဢၼ်ၼိုင်ႈဢေႃႈ။-
ပျႃႇတိၵ်ႈရူႇပႃႇရူင်ႇဢၼ်ၵဝ်ႁၼ်ၼၼ်ႉၸမ်ႉ၊ၵဝ်လႆႈႁုႁၼ်တူဝ်ၵဝ်မီးယူႇၵႃႈၼႂ်းဝဵင်းလူင် သုသႃႇ၊ ဢၼ်မီးၵႃႈၼႂ်းဢိူင်ႇ ဢေႇလမ်ႇ၊ ၼၼ်ႉဢေႃႈ။ ၵဝ်ၸုၵ်းယူႇႁိမ်းမႄႈၼမ်ႉ ဢုလႆး၊ သေလႄႈ၊-
ၵႃႈတီႈႁိမ်းမႄႈၼမ်ႉၼၼ်ႉၵဝ်လႆႈႁၼ်သူဝ်းပေႃႈတူဝ်ၼိုင်ႈဢၼ်မီးၶဝ်လႅမ်ဢၼ်ယၢဝ်းၼႃႇသွင်လႅမ်ႈ၊လႅမ်ႈဢၼ်ဢွၵ်ႇၵမ်းလိုၼ်းၼၼ်ႉယဵင်ႈၶႅၼ်းယၢဝ်းလႄႈမႂ်ႇၼႃႇသေထႅင်ႈလႅမ်ႈၼိုင်ႈၼၼ်ႉဢေႃႈ။-
ၵဝ်လႆႈႁၼ်သူဝ်းပေႃႈၼၼ်ႉဢဝ်ၶဝ်မၼ်းပတ်ႉတေႃးတၢင်းဝၼ်းတူၵ်း၊တၢင်းႁွင်ႇ၊တၢင်းၸၢၼ်းသၢမ်ၼႃႈလႄႈတူဝ်သတ်းတင်းလၢႆဢမ်ႇၸုၵ်းဢမ်ႇၶၢမ်ႇမၼ်းလႆႈသေတူဝ်လႄႈၽူႈလႂ်ၵေႃႈဢမ်ႇၼီပၢႆႈလွတ်ႈသေၵႃႈတီႈမၼ်းလႆႈ၊မၼ်းႁဵတ်းၸွမ်းၵႃႈၼင်ႇဢလူဝ်ႇမၼ်းမီးၼၼ်ႉယူႇသေလႄႈႁႅင်းယႂ်ႇမႃးတိၵ်းတိၵ်းဢေႃႈ။
ယၢမ်းမိူဝ်ႈဢၼ်ၵဝ်ယင်းတိုၵ်ႉၶႆႈၸႂ်ဝူၼ်ႉၸႂ်လူၺ်ႈလွင်ႈၼၼ်ႉယူႇၼၼ်ႉၸိုင်၊ပႄႉပေႃႈတူဝ်ၼိုင်ႈလုၵ်ႉၵႃႈတီႈၽၢႆႇတၢင်းဝၼ်းတူၵ်းၶုၼ်ႇလႅၼ်ႈမႃးၶၼ်ၽႂ်းၼႃႇလူင်လၢင်၊တိၼ်မၼ်းထၢၼ်ႈပေႃးဢမ်ႇယဵပ်ႇလိၼ်ဢမ်ႇတိူဝ်ႉလိၼ်ဢေႃႈ။ မၼ်းမီးၶဝ်ဢၼ်မၼ်ႈၶိူင်ႇၼၼ်ႉလႅမ်ႈလဵဝ်၊မီးၵႃႈတီႈငၢမ်ႈတႃမၼ်းဝႆႉဢေႃႈ။-
မၼ်းၶုၼ်ႇလႅၼ်ႈၸူးတီႈသူဝ်းပေႃႈတူဝ်ဢၼ်ၵဝ်ႁၼ်မၼ်းၸုၵ်းယူႇႁိမ်းၽင်ႇမႄႈၼမ်ႉၼၼ်ႉလႄႈဢဝ်တင်းႁႅင်းဢၼ်ယႂ်ႇၼႃႇၽင်ႈသႂ်ႇသူဝ်းပေႃႈၼၼ်ႉဢေႃႈ။-
ၵဝ်ပႂ်ႉတူၺ်းတၢင်းဢၼ်မၼ်းတိုၵ်းတေႃးသူဝ်းပေႃႈၼၼ်ႉလႄႈႁၼ်ပႄႉပေႃႈၼၼ်ႉပႃးတင်းတေႃးသႃႉဢၼ်ယႂ်ႇၼႃႇ၊ပတ်ႉတေႃးသူဝ်းပေႃႈၼၼ်ႉလႄႈႁၵ်းပုတ်းၶဝ်လႅမ်မၼ်းၼၼ်ႉတင်းသွင်လႅမ်ႈပႅတ်ႈဢေႃႈ။ သူဝ်းပေႃႈၼၼ်ႉဢမ်ႇမီးႁႅင်းတၼ်းၶူဝ်းဢၼ်ၸုၵ်းၶၢမ်ႇလႆႈလႄႈလႆႈလူမ်ႉတူၵ်းၵႃႈၼိူဝ်လိၼ်ၵႂႃႇသေယဝ်ႉ၊ပႄႉပေႃႈၼၼ်ႉယဵပ်ႇယမ်ႈမၼ်းဢေႃႈ။ ၽူႈလႂ်ဢမ်ႇၵႄႇသႄႇၼုၵ်ႈဢဝ်သူဝ်းပေႃႈၼၼ်ႉလွတ်ႈဢွၵ်ႇလႆႈသေၵေႃႉသေၵူၼ်း။
မိူဝ်ႈၼၼ်ႉ၊ပႄႉပေႃႈၼၼ်ႉယဵင်ႈၶႅၼ်းႁႅင်းယႂ်ႇၼႃႇမႃးတိၵ်းတိၵ်းလႄႈမိူဝ်ႈဢၼ်ႁႅင်းမၼ်းယႂ်ႇတိူၵ်ႈၼၼ်ႉၸိုင်၊ၶဝ်လႅမ်လူင်မၼ်းလႆႈၶၢမ်ႇတၢင်းဢၼ်ႁၵ်းပုတ်းပႅတ်ႈဢေႃႈ။ ၵႃႈတီႈႁွႆးၶဝ်လႅမ်ၼၼ်ႉမီးၶဝ်လႅမ်မႂ်ႇသီႇလႅမ်ႈဢွၵ်ႇမႃးလႄႈဝၢႆႇၼႃႈၸူးသီႇၼႃႈၽႃႉၵၢင်ႁၢဝ်ယူႇဢေႃႈ။-
ၵႃႈၼႂ်းၶဝ်ၸိူဝ်းၼၼ်ႉ၊တီႈၶဝ်လႅမ်ႈၼိုင်ႈသမ်ႉဢွၵ်ႇမႃးထႅင်ႈၶဝ်လႅမ်ဢွၼ်ႇလႅမ်ႈၼိုင်ႈသေယဝ်ႉ၊ႁႅင်းတၼ်းၶူဝ်းမၼ်းယႂ်ႇၽႄႈၼႃႇလူင်လၢင်ဝၢႆႇၼႃႈၵႂႃႇၸူးၽၢႆႇတၢင်းၸၢၼ်းၽၢႆႇဝၼ်းဢွၵ်ႇ၊ဢိၵ်ႇတင်းၽၢႆႇမိူင်းဢၼ်ၽြႃးပဵၼ်ၸဝ်ႈဝႆႉၵတိၼၼ်ႉယူႇဢေႃႈ။-
မၼ်းၼၼ်ႉယႂ်ႇမႃးတေႃႇထိုင်ႁွတ်ႈထၢၼ်ႈပေႃးတိုၵ်းတေႃးတပ်ႉၽုင်ႇၵၢင်ႁၢဝ်လႄႈဢဝ်လၢဝ်ၵၢင်ႁၢဝ်ၵမ်ႈၽွင်ႈထိမ်ႈတူၵ်းၵႃႈတီႈလိၼ်မိူင်းလႄႈယဵပ်ႇၼူတ်ႈၵႃႈၼိူဝ်ၶဝ်ဢေႃႈ။-
ထၢၼ်ႇၼၼ်ႉၵူၺ်းဢမ်ႇၵႃး၊မၼ်းႁဵတ်းတၢင်းဢၼ်ပူၵ်းပႅၼ်တေႃႇၸဝ်ႈၶုၼ်သိုၵ်းလူင်တပ်ႉၵၢင်ႁၢဝ်ၼၼ်ႉသေလႄႈပႄႇပႅတ်ႈဝၢတ်ႈတၢင်းဢၼ်သၢၵ်ႈၵၢပ်ႈၶိူင်ႈတၢင်းလူႇဢၼ်ႁဵတ်းၵူႈမိူဝ်ႈၵူႈဝၼ်းၼၼ်ႉသေၵႃႈတီႈၸဝ်ႈၶုၼ်သိုၵ်းလူင်ၼၼ်ႉ၊ဢိၵ်ႇတင်းဢဝ်ၵျွင်းပိၵ်ႈမၢၼ်ႇၸဝ်ႈတူၵ်းတီႈတႅမ်ႇဢေႃႈ။-
ၵူၼ်းတင်းလၢႆဢွၼ်ၵၼ်ႁဵတ်းတုၸရိူၵ်ႈလႄႈပႄႇပႅတ်ႈတၢင်းဢၼ်ႁဵတ်းတၢင်းလူႇၵူႈမိူဝ်ႈၵူႈဝၼ်းၼၼ်ႉဢိၵ်ႇတင်းဢဝ်သမ်ႇမႃႇတြႃးၶျႃးတူၵ်းၵႃႈတီႈလိၼ်ဢေႃႈ။ ၶဝ်လႅမ်ၼၼ်ႉလႆႈလီလႆႈပဵၼ်ၸွမ်းၼင်ႇဢလူဝ်ႇမၼ်းၼၼ်ႉဢေႃႈ။
မိူဝ်ႈၼၼ်ႉၵဝ်ငိၼ်းသဵင်တမၢၼ်ႇၵၢင်ႁၢဝ်ပႃးၼိုင်ႈထၢမ်တမၢၼ်ႇၵၢင်ႁၢဝ်တီႈတၢင်ႇပႃးလႄႈဝႃႈ၊ “လွင်ႈတၢင်းဢၼ်ႁၼ်ၼႂ်းရူႇပႃႇရူင်ႇၸိူဝ်းၼႆႉတၵ်းသိုပ်ႇလႄႈပဵၼ်ယူႇႁိုင်ၵႃႈႁိုဝ်။ တုၸရိူၵ်ႈဢၼ်လီႁင်ႈဢဵတ်ႇသဵတ်ႇၼႃႇၼႆႉမႃးမီးယူႇၵႃႈတီႈဝၢတ်ႈတၢင်းဢၼ်ႁဵတ်းတၢင်းလူႇၵူႈမိူဝ်ႈၵူႈဝၼ်းၼႆႉႁိုင်ၵႃႈႁိုဝ်။ တပ်ႉၵၢင်ႁၢဝ်ဢိၵ်ႇတင်းၵျွင်းပိၵ်ႈမၢၼ်ႇၸဝ်ႈတၵ်းတေလႆႈၶၢမ်ႇတၢင်းဢၼ်ယဵပ်ႇၼူတ်ႈယူႇၶိင်ႇၵႃႇလႃႉႁိုင်ၵႃႈႁိုဝ်၊” ဝႃႈၼင်ႇၼႆဢေႃႈ။
ၵဝ်သမ်ႉငိၼ်းတမၢၼ်ႇၵၢင်ႁၢဝ်တၢင်ႇပႃးၼၼ်ႉၶိုၼ်းလၢတ်ႈလႄႈဝႃႈ၊ “လွင်ႈတၢင်းၼႆႉတၵ်းသိုပ်ႇလႄႈပဵၼ်ယူႇႁဵင်ပၢႆပၢၵ်ႇႁႃႈသိပ်းဝၼ်း ၼႂ်းၸူဝ်ႈၶၢဝ်းဢၼ်ၶိူင်ႈတၢင်းလူႇၶိင်ႇႁူဝ်ၶမ်ႈတင်းၶိူင်ႈတၢင်းလူႇၶိင်ႇႁူဝ်ၼႂ်ဢမ်ႇလႆႈသၢၵ်ႈၵၢပ်ႈၼၼ်ႉဢေႃႈ။ လိုၼ်းၼၼ်ႉၸင်ႇၵျွင်းပိၵ်ႈမၢၼ်ႇၸဝ်ႈတၵ်းတေလႆႈၶိုၼ်းတႄႇၶိုၼ်းတင်ႈဢေႃႈ၊” ဝႃႈၼင်ႇၼႆဢေႃႈ။
ၵဝ် တၢၼ်ႇယေႇလႃႉ၊ ၼႆႉၼႂ်းမိူဝ်ႈဢၼ်ႁၼ်ရူႇပႃႇရူင်ႇၼၼ်ႉလႄႈႁႂ်ႈလႆႈၶတ်းၸႂ်ႁုလွင်ႈဢၼၢၵ်ႈဢထိၵ်ႈပႄႇမၼ်းယူႇၼၼ်ႉၸိုင်၊ၵေႃႉၼိုင်ႈၽူတ်းမႃးၸုၵ်းယူႇၵႃႈတီႈၽၢႆႇၼႃႈၵဝ်ဢေႃႈ။-
ၵဝ်ငိၼ်းသဵင်ၵူၼ်းဢၼ်ယူႇၵႃႈတီႈႁိမ်းၽင်ႇမႄႈၼမ်ႉ ဢုလႆး၊ လႄႈႁွင်ႉတီႈၵေႃႉၼၼ်ႉလႄႈဝႃႈ၊ “ ၵႃႇပရေႇလႃႉ၊ ႟။ ၽုၺ်ႇၼႄဢၼၢၵ်ႈဢထိၵ်ႈပႄႇပျႃႇတိၵ်ႈရူႇပႃႇရူင်ႇၼၼ်ႉပၼ်တီႈမၼ်းတႃႉ၊” ဝႃႈၼင်ႇၼႆဢေႃႈ။
ၵႃႇပရေႇလႃႉ၊ ၵေႃႈမႃးၸုၵ်းယူႇၵႃႈႁိမ်းၵဝ်လႄႈၵဝ်ၵူဝ်ႁႄၼႃႇၶုပ်ႉမူပ်ႇယူႇဢေႃႈ။ မၼ်းၼၼ်ႉလၢတ်ႈတီႈၵဝ်လႄႈဝႃႈ၊ “ဢူဝ်း၊လုၵ်ႈၵူၼ်း႟။ ႁုၸႅင်ႈတႃႉ။ ပျႃႇတိၵ်ႈရူႇပႃႇရူင်ႇၼႆႉၵပ်းၵၢႆႇလူၺ်ႈၶိင်ႇၵႃႇလႃႉတီႈသုတ်းတီႈၵွႆလေႃးၵႃႉဢေႃႈ၊” ဝႃႈၼင်ႇၼႆဢေႃႈ။-
ယၢမ်းမိူဝ်ႈဢၼ်မၼ်းယင်းတိုၵ်ႉလၢတ်ႈယူႇၼၼ်ႉၵဝ်လူမ်ႉၵႂႃႇၵႃႈၼိူဝ်လိၼ်လႄႈလိုမ်းတူဝ်ၵႂႃႇဢေႃႈ။ ၵူၺ်းၵႃႈ၊မၼ်းၼၼ်ႉယိပ်းဢဝ်ၵဝ်လႄႈတိုတ်ႉႁႂ်ႈၵဝ်လုၵ်ႉၸုၵ်းသေယဝ်ႉ၊-
လၢတ်ႈလႄႈဝႃႈ၊ “ၵဝ်တၵ်းၽုၺ်ႇဢွၵ်ႇမွၵ်ႇၼႄလွင်ႈတၢင်းဢၼ်တၢင်းၸႂ်မႆႈၶႂ်ႈၸႃႉၽြႃးပဵၼ်ၸဝ်ႈတၵ်းပဵၼ်ၸိူဝ်ႉၼင်ႇႁိုဝ်မႃးၼၼ်ႉဢေႃႈ။ ရူႇပႃႇရူင်ႇၼႆႉၵပ်းၵၢႆႇလူၺ်ႈၵၼ်တင်းတီႈသုတ်းတီႈၵွႆၶိင်ႇၵႃႇလႃႉဢၼ်မၵ်းၶဵၼ်းဝႆႉၼၼ်ႉဢေႃႈ။
“သူဝ်းပေႃႈဢၼ်မႂ်းႁၼ်လႄႈမီးၶဝ်လႅမ်သွင်လႅမ်ႈၼၼ်ႉပဵၼ်ၶုၼ်ႁေႃၶမ်းမိူင်း မေႇတိ၊ တင်းၶုၼ်ႁေႃၶမ်းမိူင်း ပႃးသျႃး၊ ဢေႃႈ။-
ပႄႉပေႃႈၼၼ်ႉသမ်ႉပဵၼ်ၶုၼ်ႁေႃၶမ်းမိူင်း ၵရိၵ်ႉ၊ ဢေႃႈ။ ၶဝ်လႅမ်လူင်ဢၼ်မီးတီႈငၢမ်ႈတႃမၼ်းၼၼ်ႉပဵၼ်ၶုၼ်ႁေႃၶမ်းၵေႃႉဢွၼ်တၢင်းသုတ်းပိူၼ်ႈဢေႃႈ။-
ၶဝ်လႅမ်လူင်ဢၼ်ႁၵ်းပုတ်းသေယဝ်ႉ၊ၶဝ်လႅမ်သီႇလႅမ်ႈဢၼ်ဢွၵ်ႇမႃးၵႃႈတီႈႁွႆးမၼ်းၼၼ်ႉၸမ်ႉ၊မိူင်းသီႇမိူင်းတၵ်းတႅၵ်ႇဢွၵ်ႇၽႄဢွၵ်ႇသေၵႃႈတီႈမိူင်းဢွၼ်တၢင်းၼၼ်ႉလႄႈၶဝ်တေဢမ်ႇမီးႁႅင်းတၼ်းၶူဝ်းမိူၼ်မိူင်းဢွၼ်တၢင်းၼၼ်ႉယဝ်ႉ။
“ၼႂ်းၶိင်ႇၵႃႇလႃႉဢၼ်မိူင်းၶဝ်ၸမ်တၵ်းသုတ်းၵွႆလႄႈမိူဝ်ႈဢၼ်ဢပျတ်ႈတုၸရိူၵ်ႈၶဝ်ပျေႉၸုမ်ႇတဵမ်ထူၼ်ႈယဝ်ႉၼၼ်ႉၸိုင်၊ၶုၼ်ႁေႃၶမ်းပႃးၼိုင်ႈဢၼ်တိုဝ်တၼ်လႄႈၸၢင်ႈၸႂ်ႉပရိယႄႇၼၼ်ႉတၵ်းပေႃႇမႃးဢေႃႈ။-
မၼ်းၼၼ်ႉတၵ်းယႂ်ႇမႃး၊ၵူၺ်းၵႃႈဢမ်ႇၸႂ်ႈလူၺ်ႈတၼ်းၶူဝ်းတူဝ်ၸဝ်ႈၵဝ်ႇဢေႃႈ။ မၼ်းတၵ်းႁဵတ်းတၢင်းဢၼ်ယႃႉၽဵဝ်ႈဢၼ်လီၵူဝ်လီႁႄၼၼ်ႉလႄႈလႆႈလီလႆႈပဵၼ်ယူႇၸွမ်းဢလူဝ်ႇဢၼ်မၼ်းၶႂ်ႈႁဵတ်းၼၼ်ႉဢေႃႈ။ မၼ်းတၵ်းယႃႉၽဵဝ်ႈပႅတ်ႈၶဝ်ၸိူဝ်းဢၼ်ႁႅင်းတၼ်းၶူဝ်းယႂ်ႇတင်းလၢႆ၊ဢိၵ်ႇတင်းၵူၼ်းၽြႃးပဵၼ်ၸဝ်ႈတင်းလၢႆဢေႃႈ။-
ၵွပ်ႈပိူဝ်ႈဢၼ်မၼ်းလၵ်းလႅမ်ၼႃႇလႄႈမၼ်းတၵ်းတေလႆႈလီလႆႈပဵၼ်လူၺ်ႈတၢင်းဢၼ်မၼ်းပႅတ်ႉၵိၼ်လႅၼ်ၵိၼ်ၼၼ်ႉဢေႃႈ။ မၼ်းတၵ်းမီးႁူဝ်ၸႂ်ဢၼ်ပူၵ်းပႅၼ်ၽႅၼ်သုင်ၼႃႇလူင်လၢင်လႄႈယင်းဢမ်ႇပၼ်သတိလႄႈတၵ်းယႃႉၽဵဝ်ႈပႅတ်ႈၵူၼ်းၼမ်ၼႃႇဢေႃႈ။ မၼ်းယင်းတေႁဵတ်းၶတ်းၵၼ်တင်းၸဝ်ႈၼိူဝ်ၸဝ်ႈတင်းလၢႆ၊ၼႂ်းဝႃႈၼၼ်သေၵေႃႈ၊မိုဝ်းၵူၼ်းယင်းဢမ်ႇတိူဝ်ႉထုၵ်ႇမၼ်းလႄႈမၼ်းတၵ်းလႆႈႁၵ်းပုတ်းလုလႅဝ်ဢေႃႈ။-
ပျႃႇတိၵ်ႈရူႇပႃႇရူင်ႇဢၼ်လၢတ်ႈၼႄလွင်ႈႁူဝ်ၶမ်ႈ၊ဢိၵ်ႇတင်းလွင်ႈႁူဝ်ၼႂ်ၸိူဝ်းၼၼ်ႉပဵၼ်ဢၼ်မၢၼ်ႇမႅၼ်ႈၸိုဝ်ႈၸႂ်ႈလႄႈမႂ်းသိူင်ႇဝႆႉဢမ်ဝႆႉၵႃႈၼႂ်းၸႂ်ဝႆႉလူးၵွၼ်ႇတႃႉ။ လွင်ႈမၼ်းၸမ်ႉ၊ၸူဝ်ႈဢၼ်ဢမ်ႇပႆႇပဵၼ်ၸွမ်းမႃးၼၼ်ႉယင်းမီးၶိင်ႇၵႃႇလႃႉႁိုင်ၼႃႇလူင်လၢင်လူးၵွၼ်ႇဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈၵဝ် တၢၼ်ႇယေႇလႃႉ၊ ၼႆႉႁႅင်းဢူၼ်ႈႁႅင်းၸွပ်ႈၵႂႃႇလႄႈပဵၼ်ၶႆႈပဵၼ်ၼၢဝ်ၵႂႃႇႁိုင်တၢၼ်ႇတၢၼ်ႇဢေႃႈ။ လိုၼ်းၼၼ်ႉ၊ၵဝ်ၶႅၼ်းမႃးလႄႈၵႂႃႇၵိုတ်ႉႁၢပ်ႇၼႃႈၵၢၼ်ၶုၼ်ႁေႃၶမ်းဢေႃႈ။ ၼႂ်းဝႃႈၼၼ်သေၵေႃႈၵဝ်ယင်းတိုၵ်ႉၵႂင်ၸႂ်ယုင်ႈၸႂ်လူၺ်ႈပျႃႇတိၵ်ႈရူႇပႃႇရူင်ႇၼၼ်ႉယူႇလႄႈဢမ်ႇႁုပွင်ႇဢၼၢၵ်ႈဢထိၵ်ႈပႄႇမၼ်းလႆႈလႄႈယူႇဢေႃႈ။
တႃႇရိ၊ လုၵ်ႈၸၢႆး ဢႃႇသူၺ်ႇရု ၸႃႇတိၵူၼ်း မေႇတိ၊ လႆႈဢုပ်ႉပိူင်ႇမိူင်း ပႃႇပုလုၼ်ႇ၊ လႄႈၸၢမ်ႇႁၢင်ႈၸၢမ်ႇႁေႃယူႇၼႂ်းပီတီႈၼိုင်ႈၼၼ်ႉ၊-
ၵဝ် တၢၼ်ႇယေႇလႃႉ၊ ၽတ်းဢၢၼ်ႇၵျၢမ်းလိၵ်ႈသေလႄႈၶႆႈၸႂ်ဝူၼ်ႉတူၺ်းလွင်ႈဢၼ်ဝဵင်း ယေႇရုသလႅမ်ႇ၊ တၵ်းလုလႅဝ်ယူႇၸဵတ်းသိပ်းပီၸွမ်းၵႃႈၼင်ႇဢၼ် ထႃႇဝရႃႉၽြႃး၊ ပျႃႇတိၵ်ႈဝႆႉတီႈပရေႃးၽႅတ်ႈ ယေႇရမိ၊ ၼၼ်ႉဢေႃႈ။-
မိူဝ်ႈၼၼ်ႉ၊ၵဝ်ဝၢႆႇၸူးတီႈၸဝ်ႈၽြႃးပဵၼ်ၸဝ်ႈသေလႄႈပႃးတၢင်းဢၼ်ၵမ်တၢင်းၵိၼ်ယူႇ၊ၼုင်ႈၶူဝ်းၼင်ပေႃယူႇၼင်ႈထူၵႃႈၼႂ်းတဝ်ႈယူႇသေယဝ်ႉ၊ပႃးၸႂ်ပႃးၶေႃးႁဵတ်းသူးတွင်းပထၼႃႇလဝ်ႈယွၼ်းဢေႃႈ။-
ၵဝ်ႁဵတ်းသူးတွင်းပထၼႃႇလႄႈဝုၼ်ႇၶၢမ်ႇတီႈၸဝ်ႈၽြႃး၊ၽြႃးပဵၼ်ၸဝ်ႈၵဝ်လႄႈဝႃႈၸမ်ႉ။ “ၸဝ်ႈၽြႃး၊ၽြႃးပဵၼ်ၸဝ်ႈတီႈၶႃႈ။ ၸဝ်ႈႁဝ်းယႂ်ႇမျၢတ်ႈၼႃႇလူင်လၢင်လႄႈၶႃႈၸဝ်ႈႁဝ်းၶဝ်မီးတၢင်းဢၼ်ရူဝ်ႇသေႇၵူဝ်ယမ်ၸဝ်ႈႁဝ်းတီႈၶႃႈဢေႃႈ။ ၸဝ်ႈႁဝ်းပႂ်ႉသဵတ်ႈၸႃႇၵႃႈၼိူဝ်ပတိၺိၺ်ႇတြႃးၸဝ်ႈႁဝ်းၼၼ်ႉလႄႈၼႄပျႃးၵရုၼႃႇၸဝ်ႈႁဝ်းၵႃႈတီႈၶဝ်ၸိူဝ်းဢၼ်ႁၵ်ႉၸဝ်ႈႁဝ်းလႄႈႁဵတ်းၸွမ်းၵႃႈဢၼ်ၸဝ်ႈႁဝ်းမီးဢမိင်ႉၼၼ်ႉတီႈၶႃႈဢေႃႈ။
“ၶႃႈၸဝ်ႈႁဝ်းၶဝ်ႁဵတ်းႁၢႆႉႁဵတ်းမိူၵ်ႈ၊ႁဵတ်းၽိတ်းႁဵတ်းပိူင်ႈလႄႈမီးဢပျတ်ႈတီႈၶႃႈဢေႃႈ။ ၶႃႈၸဝ်ႈႁဝ်းၶဝ်လုၵ်ႉၽိုၼ်ႉၸဝ်ႈႁဝ်းလႄႈပႄႇပႅတ်ႈဢမိင်ႉၸဝ်ႈ၊ဢိၵ်ႇတင်းၵႃႈဢၼ်ၸဝ်ႈႁဝ်းၸီႇယၢင်ႇဝႆႉၸိူဝ်းၼၼ်ႉတီႈၶႃႈယဝ်ႉ။-
ၶႃႈၸဝ်ႈႁဝ်းၶဝ်ယင်းဢမ်ႇဢွၼ်ၵၼ်ထွမ်ႇဢဝ်ၵႂၢမ်းၵေႃႉပဵၼ်ၶႃႈၸႂ်ႉၸဝ်ႈႁဝ်းဢၼ်ပဵၼ်ပရေႃးၽႅတ်ႈတင်းလၢႆဢၼ်ဢိင်ပိုင်ႈၼႃႇမႃႉၸိုဝ်ႈသဵင်ၸဝ်ႈႁဝ်းသေလႄႈႁေႃးလၢတ်ႈတီႈၶုၼ်ႁေႃၶမ်းၶႃႈၸဝ်ႈႁဝ်းၶဝ်လႂ်၊တီႈမူးမၢတ်ႈၽွင်းမိူင်းၶႃႈၸဝ်ႈႁဝ်းၶဝ်လႂ်၊တီႈပူႇမွၼ်ႇၶႃႈၸဝ်ႈႁဝ်းၶဝ်လႂ်၊တီႈၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင်လႂ်ၼၼ်ႉတီႈၶႃႈယဝ်ႉ။-
ၸဝ်ႈၽြႃးတီႈၶႃႈ။ ၸဝ်ႈႁဝ်းၸီႇယၢင်ႇသိုဝ်ႈသိုဝ်ႈတေႃႇတေႃႇတႃႇသေႇတီႈၶႃႈဢေႃႈ။ ၶႃႈၸဝ်ႈႁဝ်းၶဝ်ၸမ်ႉ၊ႁႃဢဝ်တၢင်းဢၼ်ယႃႉသရေႇလုသႂ်ႇတူဝ်ၸဝ်ႈၵဝ်ႇယူႇသေႇသေႇတီႈၶႃႈဢေႃႈ။ လွင်ႈတၢင်းၼႆႉၸိုင်၊ပဵၼ်တီႈၶႃႈၸဝ်ႈႁဝ်းၶဝ်ၸိူဝ်းဢၼ်ယူႇသဝ်းၵႃႈၼႂ်းမိူင်း ယုတႃႉ၊ တင်းၵႃႈၼႂ်းမိူင်း ယေႇရုသလႅမ်ႇ ဢိၵ်ႇတင်းၵူၼ်းမဵဝ်း ဢိသရေး၊ တင်းသဵင်ႈတင်းလူင်ၸိူဝ်းဢၼ်ၸဝ်ႈႁဝ်းဢဝ်ၸၢတ်ႇၽႄၵႃႈၼႂ်းမိူင်းတီႈၸမ်တီႈၵႆၵွပ်ႈပိူဝ်ႈဢၼ်ၶဝ်ဢမ်ႇပႂ်ႉသဵတ်ႈၸႃႇတေႃႇၸဝ်ႈႁဝ်းၼၼ်ႉတႄႉတႄႉတီႈၶႃႈယဝ်ႉ။-
ၸဝ်ႈၽြႃးတီႈၶႃႈ။ ၶုၼ်ႁေႃၶမ်းၶႃႈၸဝ်ႈႁဝ်းၶဝ်လႂ်၊မူးမၢတ်ႈၽွင်းမိူင်းၶႃႈၸဝ်ႈႁဝ်းၶဝ်လႂ်၊ဢိၵ်ႇတင်းပူႇမွၼ်ႇၶႃႈၸဝ်ႈႁဝ်းၶဝ်လႂ်၊ဢွၼ်ၵၼ်ၵမ်ၵျၢင်ႉမဵဝ်းဢၼ်လီဢူၵ်းလီဢၢႆလႄႈၽိတ်းပိူင်ႈၸဝ်ႈႁဝ်းတီႈၶႃႈယဝ်ႉ။-
ပိၵ်ႉသမ်ႉၶႃႈၸဝ်ႈႁဝ်းၶဝ်လုၵ်ႉၽိုၼ်ႉၸဝ်ႈႁဝ်းယဝ်ႉသေၵေႃႈၸဝ်ႈႁဝ်းယင်းမီးၸႂ်ၵရုၼႃႇလႄႈပွႆႇလွတ်ႈဢပျတ်ႈၶႃႈၸဝ်ႈႁဝ်းၶဝ်ယူႇတီႈၶႃႈဢေႃႈ။-
ၶႃႈၸဝ်ႈႁဝ်းၶဝ်ယင်းဢမ်ႇထွမ်ႇဢဝ်ပျႃႇတိၵ်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းၶႃႈ၊ယၢမ်းမိူဝ်ႈဢၼ်ၸဝ်ႈႁဝ်းဢဝ်တင်းၶႃႈၸႂ်ႉၸဝ်ႈႁဝ်းပရေႃးၽႅတ်ႈတင်းလၢႆ၊ႁေႃးလၢတ်ႈႁႂ်ႈၶႃႈၸဝ်ႈႁဝ်းၶဝ်လႆႈၵမ်ၵျၢင်ႉၸွမ်းၼင်ႇပိင်းၺၢပ်ႈတြႃးၸဝ်ႈႁဝ်းတင်းလၢႆၼၼ်ႉတီႈၶႃႈယဝ်ႉ။-
ၵူၼ်းမဵဝ်း ဢိသရေး၊ ၵႃႈမီးတင်းသဵင်ႈတင်းလူင်ဢွၼ်ၵၼ်ပူၼ်ႉလိူဝ်ပိင်းၺၢပ်ႈတြႃးၸဝ်ႈႁဝ်းတင်းလၢႆသေလႄႈထဵင်ပႅတ်ႈတၢင်းဢၼ်ထွမ်ႇဢဝ်သဵင်ပျႃႇတိၵ်ႈၸဝ်ႈႁဝ်းၸိူဝ်းၼၼ်ႉတီႈၶႃႈယဝ်ႉ။ ၶႃႈၸဝ်ႈႁဝ်းၶဝ်ၽိတ်းပိူင်ႈၸဝ်ႈႁဝ်းသေလႄႈၸဝ်ႈႁဝ်းဢဝ်တၢင်းဢၼ်ၵိၼ်ႇဢၼ်ဝႃႈၸိူဝ်းဢၼ်တႅမ်ႈမၢႆဝႆႉၵႃႈၼႂ်းၵျၢမ်းလိၵ်ႈပိင်းၺၢပ်ႈတြႃး မူဝ်းသေႇ၊ ၶႃႈၸႂ်ႉၸဝ်ႈႁဝ်းၼၼ်ႉ၊တၢင်ႇသႂ်ႇၵႃႈၼိူဝ်ၶႃႈၸဝ်ႈႁဝ်းၶဝ်တီႈၶႃႈယဝ်ႉ။-
ၵႃႈၼင်ႇဢၼ်ၸဝ်ႈႁဝ်းပျႃႇတိၵ်ႈဝႆႉၼၼ်ႉၸဝ်ႈႁဝ်းႁဵတ်းတီႈၶႃႈၸဝ်ႈႁဝ်းၶဝ်၊ဢိၵ်ႇတင်းတီႈမူးမၢတ်ႈၽွင်းမိူင်းၶႃႈၸဝ်ႈႁဝ်းၶဝ်တင်းလၢႆၼၼ်ႉတီႈၶႃႈယဝ်ႉ။ ၸဝ်ႈႁဝ်းဢဝ်ၽေးဢုပၢတ်ႈဢၼ်ဢမ်ႇတွၼ်ႉႁွတ်ႈထိုင်သေတီႈသေလႂ်ၸိူဝ်းၼၼ်ႉပၼ်တၢမ်ႇၵႃႈၼိူဝ်ဝဵင်း ယေႇရုသလႅမ်ႇ၊ တီႈၶႃႈယဝ်ႉ။-
ၽေးဢုပၢတ်ႈၵႃႈဢၼ်တႅမ်ႈမၢႆဝႆႉၵႃႈၼႂ်းၵျၢမ်းလိၵ်ႈပိင်းၺၢပ်ႈတြႃး မူဝ်းသေႇ၊ ၸိူဝ်းၼၼ်ႉၸဝ်ႈႁဝ်းဢဝ်လႄႈပၼ်တၢမ်ႇတီႈၶႃႈၸဝ်ႈႁဝ်းၶဝ်ယဝ်ႉ။ ၼႂ်းဝႃႈၼၼ်သေၵေႃႈ၊ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းတီႈၶႃႈ။ ႁၢၼ်ႉတေႃႈမိူဝ်ႈလဵဝ်ၼႆႉၶႃႈၸဝ်ႈႁဝ်းၶဝ်ယင်းဢမ်ႇဝႄႈပႅတ်ႈတုၸရိူၵ်ႈၶႃႈၸဝ်ႈႁဝ်းၶဝ်ၼၼ်ႉသေလႄႈဢမ်ႇပႆႇၵမ်ၵျၢင်ႉၸွမ်းသမ်ႇမႃႇတြႃးၸဝ်ႈလူးၵွၼ်ႇတီႈၶႃႈ။-
ဢူဝ်း၊ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းတီႈၶႃႈ။ ၸဝ်ႈႁဝ်းႁႅၼ်းၸႂ်ႁႅၼ်းၶေႃးႁႂ်ႈလႆႈပၼ်တၢမ်ႇတီႈၶႃႈၸဝ်ႈႁဝ်းၶဝ်လႄႈၸဝ်ႈႁဝ်းႁႂ်ႈၽေးဢုပၢတ်ႈတူၵ်းႁွတ်ႈၵႃႈၼိူဝ်ၶႃႈၸဝ်ႈႁဝ်းၶဝ်တီႈၶႃႈယဝ်ႉ။ ၵႃႈၼင်ႇဢၼ်ၸဝ်ႈႁဝ်းၶႃႈႁဵတ်းၼၼ်ႉသိုဝ်ႈတေႃႇတီႈၶႃႈဢေႃႈ။ ၼႂ်းဝႃႈၼၼ်သေၵေႃႈ၊ၶႃႈၸဝ်ႈႁဝ်းၶဝ်ယင်းဢမ်ႇပႆႇထွမ်ႇဢဝ်သဵင်ပျႃႇတိၵ်ႈၸဝ်ႈႁဝ်းလူးၵွၼ်ႇတီႈၶႃႈ။
“ဢူဝ်း။ ၸဝ်ႈၽြႃး၊ၽြႃးပဵၼ်ၸဝ်ႈႁဝ်းၶႃႈတီႈၶႃႈ။ ၸဝ်ႈႁဝ်းၼႄပျႃးႁႅင်းတၼ်းၶူဝ်းၸဝ်ႈႁဝ်းလူၺ်ႈတၢင်းဢၼ်ၵႄႇသႄႇၼုၵ်ႈဢဝ်ၵူၼ်းၸဝ်ႈႁဝ်းတင်းလၢႆဢွၵ်ႇမိူင်း ဢေးၵျိပ်ႉ၊ မႃးလႄႈႁႅင်းတၼ်းၶူဝ်းၸဝ်ႈႁဝ်းၼၼ်ႉယင်းပဵၼ်တၢင်းဢၼ်ၶုၵ်းၸႂ်လႆႈၶႆႈၸႂ်ထူပ်းယူႇတီႈၶႃႈဢေႃႈ။ ၶႃႈၸဝ်ႈႁဝ်းၶဝ်မီးဢပျတ်ႈတီႈၶႃႈယဝ်ႉ။ ၶႃႈၸဝ်ႈႁဝ်းၶဝ်ၽိတ်းပိူင်ႈတီႈၶႃႈယဝ်ႉ။-
ၸွမ်းၼင်ႇဢၼ်ၸဝ်ႈႁဝ်းၵႅတ်ႇၶႄႁႄႉၵင်ႈၶႃႈၸဝ်ႈႁဝ်းၶဝ်ၼႂ်းဝၼ်းဢၼ်ပူၼ်ႉမႃးၸိူဝ်းၼၼ်ႉၸိုင်၊ၶႅၼ်းတေႃႈယႃႇပေၶႂ်ႈၸႃႉဝဵင်း ယေႇရုသလႅမ်ႇ၊ သေၵမ်းတီႈၶႃႈ။ လွင်ႈမၼ်းၸမ်ႉ၊ဝဵင်းလူင်ၼၼ်ႉပဵၼ်ဝဵင်းၸဝ်ႈႁဝ်းဢၼ်ဝႃႈလွႆဢၼ်မူတ်းၸၢင်ႇၸဝ်ႈၼၼ်ႉတီႈၶႃႈဢေႃႈ။ ၵွပ်ႈပိူဝ်ႈဢပျတ်ႈၶႃႈၸဝ်ႈႁဝ်းၶဝ်၊ဢိၵ်ႇတင်းတုၸရိူၵ်ႈပူႇမွၼ်ႇၶႃႈၸဝ်ႈႁဝ်းၶဝ်ၸိူဝ်းၼၼ်ႉလႄႈဝဵင်း ယေႇရုသလႅမ်ႇ၊ တင်းၵူၼ်းၸဝ်ႈႁဝ်းတင်းလၢႆၼႆႉပဵၼ်တီႈဢၼ်လီသႄႉသွမ်းၵႃႈၼႂ်းၶဝ်ၸိူဝ်းဢၼ်မီးၵႃႈတီႈႁိမ်းႁွမ်းလဵပ်ႈႁွပ်ႈၶႃႈၸဝ်ႈႁဝ်းၶဝ်ၸိူဝ်းၼၼ်ႉတီႈၶႃႈဢေႃႈ။-
ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈထွမ်ႇဢဝ်ၵႂၢမ်းဢၼ်ၶႃႈၸဝ်ႈႁဵတ်းသူးတွင်းပထၼႃႇလႄႈတွင်းပၢၼ်ႇၼႆႉသေၵမ်းတီႈၶႃႈ။ ၶႅၼ်းတေႃႈၶိုၼ်းမႄးၵုမ်းမႄးႁဵတ်းၵျွင်းပိၵ်ႈမၢၼ်ႇၸဝ်ႈႁဝ်းဢၼ်လႆႈၶၢမ်ႇတၢင်းဢၼ်ယႃႉလုယႃႉလႅဝ်ၼၼ်ႉလႄႈၶႅၼ်းတေႃႈမႄးၵုမ်းမႄးႁဵတ်းႁႂ်ႈပိူၼ်ႈလႆႈႁုလွင်ႈဢၼ်ၸဝ်ႈႁဝ်းပဵၼ်ၽြႃးပဵၼ်ၸဝ်ႈၼၼ်ႉသေၵမ်းတီႈၶႃႈ။-
ၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈႁႄႈႁူလႄႈထွမ်ႇဢဝ်သေၵမ်းတီႈၶႃႈ။ ၶႅၼ်းတေႃႈၽုၺ်ႇမၢၵ်ႇတႃၸဝ်ႈႁဝ်းသေလႄႈလူတူၺ်းၶႃႈၸဝ်ႈႁဝ်းၶဝ်ႁႂ်ႈလႆႈႁၼ်တုၵ်ႉၶႃႉဝူၺ်ႇတၼႃႇၶႃႈၸဝ်ႈႁဝ်းၶဝ်၊ဢိၵ်ႇတင်းဝဵင်းလူင်ဢၼ်ႁွင်ႉႁဵၵ်ႈၸွမ်းၼႃႇမႃႉၸိုဝ်ႈသဵင်ၸဝ်ႈႁဝ်းၼႆႉသေၵမ်းတီႈၶႃႈ။ ၶႃႈၸဝ်ႈႁဝ်းၶဝ်ဢမ်ႇဢိင်ပိုင်ႈၵုသူဝ်ႇတူဝ်ၸဝ်ႈၵဝ်ႇ၊ဢိင်ပိုင်ႈမႁႃႇၵရုၼႃႇၸဝ်ႈႁဝ်းသေလႄႈႁဵတ်းသူးတွင်းပထၼႃႇတီႈၸဝ်ႈႁဝ်းတီႈၶႃႈဢေႃႈ။-
ၸဝ်ႈၽြႃးတီႈၶႃႈ။ ၶႅၼ်းတေႃႈထွမ်ႇဢဝ်ၶႃႈၸဝ်ႈႁဝ်းၶဝ်သေၵမ်းတီႈၶႃႈ။ ၸဝ်ႈၽြႃးတီႈၶႃႈ။ ၶႅၼ်းတေႃႈပွႆႇလွတ်ႈဢပျတ်ႈၶႃႈၸဝ်ႈႁဝ်းၶဝ်သေၵမ်းတီႈၶႃႈ။ ၸဝ်ႈၽြႃးတီႈၶႃႈ။ ၶႅၼ်းတေႃႈထွမ်ႇဢဝ်လႄႈၸွႆႈထႅမ်သေၵမ်းတီႈၶႃႈ။ ပုၼ်ႈလွင်ႈၼင်ႇႁိုဝ်ပိူၼ်ႈတၵ်းဢွၼ်ၵၼ်လႆႈႁုလွင်ႈဢၼ်ၸဝ်ႈႁဝ်းပဵၼ်ၽြႃးပဵၼ်ၸဝ်ႈၼၼ်ႉၸိုင်၊ယႃႇပေႁဵတ်းထိူင်းႁဵတ်းၼၢၼ်းသေၵမ်းတီႈၶႃႈ။ လွင်ႈမၼ်းၸမ်ႉ၊ဝဵင်းလူင်ၼႆႉဢိၵ်ႇတင်းၵူၼ်းၸိူဝ်းၼႆႉမီးတၢင်းဢၼ်ႁွင်ႉႁဵၵ်ႈၸွမ်းၼႃႇမႃႉၸိုဝ်ႈသဵင်ၸဝ်ႈႁဝ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၵဝ်ယင်းသိုပ်ႇသူးတွင်းယူႇၶိူဝ်းၶိူဝ်းယႂ်းယႂ်းလႄႈ၊ဝုၼ်ႇၶၢမ်ႇဢပျတ်ႈၵဝ်ဢိၵ်ႇတင်းဢပျတ်ႈၵူၼ်းၵဝ်မဵဝ်း ဢိသရေး၊ ယူႇသေလႄႈတွင်းပၢၼ်ႇတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၵဝ်၊ႁႂ်ႈမႄးၵုမ်းမႄးႁဵတ်းၵျွင်းပိၵ်ႈမၢၼ်ႇမူတ်းၸၢင်ႇၸဝ်ႈၼၼ်ႉယူႇဢေႃႈ။-
ယၢမ်းမိူဝ်ႈဢၼ်ၵဝ်ယင်းတိုၵ်ႉႁဵတ်းသူးတွင်းပထၼႃႇယူႇၼၼ်ႉ၊ ၵႃႇပရေႇလႃႉ၊ ၵေႃႉဢၼ်ၵဝ်လႆႈႁၼ်ၵႃႈၼႂ်းပျႃႇတိၵ်ႈရူႇပႃႇရူင်ႇၵမ်းဢွၼ်တၢင်းၼၼ်ႉမိၼ်လူင်းမႃးၸူးတီႈဢၼ်ၵဝ်မီးၼၼ်ႉဢေႃႈ။ မိူဝ်ႈၼၼ်ႉ၊ပဵၼ်ၶိင်ႇဢၼ်တၵ်းသၢၵ်ႈၵၢပ်ႈၶိူင်ႈတၢင်းလူႇႁူဝ်ၶမ်ႈၼၼ်ႉလႄႈ၊-
မၼ်းမွၵ်ႇလၢတ်ႈတီႈၵဝ်လႄႈဝႃႈ၊ “ တၢၼ်ႇယေႇလႃႉ၊ ႟။ ၵဝ်ႁွတ်ႈမႃးႁႂ်ႈလႆႈပၼ်ၺၢၼ်ႇပိင်ႇၺႃႇၵႃႈတီႈမႂ်းယဝ်ႉ။-
မိူဝ်ႈဢၼ်မႂ်းသူးတွင်းယွၼ်းတွင်းပၢၼ်ႇတီႈၽြႃးပဵၼ်ၸဝ်ႈၼၼ်ႉမၼ်းၸဝ်ႈထွမ်ႇဢဝ်ၵႂၢမ်းမႂ်းယဝ်ႉ။ မၼ်းၸဝ်ႈႁၵ်ႉမႂ်းဢေႃႈ။ ၵွပ်ႈပိူဝ်ႈလွင်ႈတၢင်းၼႆႉလႄႈၵဝ်ႁွတ်ႈမႃးႁႂ်ႈလႆႈမွၵ်ႇလၢတ်ႈဢၼၢၵ်ႈဢထိၵ်ႈပႄႇမၼ်းတီႈမႂ်းယဝ်ႉ။ တေႃႈလဵဝ်ၼႆႉပႃးၸႂ်ပႃးၶေႃးထွမ်ႇဢဝ်ယၢမ်းမိူဝ်ႈဢၼ်ၵဝ်ၽုၺ်ႇၼႄမွၵ်ႇလၢတ်ႈဢၼၢၵ်ႈဢထိၵ်ႈပႄႇရူႇပႃႇရူင်ႇၼၼ်ႉလီလီတႃႉ။
“ၸဵတ်းသိပ်းပၢတ်ႈၼႆႉ၊ပဵၼ်ၸူဝ်ႈၶၢဝ်းၶိင်ႇၵႃႇလႃႉဢၼ်ၽြႃးပဵၼ်ၸဝ်ႈပွႆႇၶႂၢင်းႁႂ်ႈၵူၼ်းမႂ်းတင်းလၢႆ၊ဢိၵ်ႇတင်းဝဵင်းမူတ်းၸၢင်ႇမႂ်းလႆႈလွတ်ႈဢပျတ်ႈတုၸရိူၵ်ႈဢေႃႈ။ ၶိင်ႇၵႃႇလႃႉၼၼ်ႉဢပျတ်ႈတုၸရိူၵ်ႈၵေႃႈပွႆႇလွတ်ႈယဝ်ႉလႄႈတြႃးတၢင်းသိုဝ်ႈတေႃႇထႃႇဝရႃႉၵေႃႈတႄႇတင်ႈဝႆႉပုၼ်ႈလွင်ႈၼင်ႇႁိုဝ်ပျႃႇတိၵ်ႈရူႇပႃႇရူင်ႇ၊ဢိၵ်ႇတင်းၵႂၢမ်းပျႃႇတိၵ်ႈပရေႃးၽႅတ်ႈတၵ်းတေပဵၼ်ၸွမ်းဢမၢၼ်ႇၶၼ်ပဵၼ်လႄႈၵျွင်းပိၵ်ႈမၢၼ်ႇမူတ်းၸၢင်ႇၸဝ်ႈၵေႃႈတၵ်းတေလႆႈၶိုၼ်းႁဵတ်းပွႆးဢၼုမေႃးတၼႃႇဢေႃႈ။-
ပိူဝ်ႈၼႆလႄႈႁုၸႅင်ႈမၢတ်ႈတွင်းဢဝ်လွင်ႈဢၼ်ၸႃႉၸဵမ်ဝၼ်းဢၼ်ပူင်ဢမိင်ႉႁႂ်ႈၶိုၼ်းမႄးၵုမ်းမႄးႁဵတ်းဝဵင်း ယေႇရုသလႅမ်ႇ၊ ၼၼ်ႉၵႂႃႇတေႃႇထိုင်ႁွတ်ႈၸဝ်ႈဢၼ်ၽြႃးပဵၼ်ၸဝ်ႈပၼ်ၽိၵ်ႈသိၵ်ႈဝႆႉၼၼ်ႉတၵ်းႁွတ်ႈမႃးၼၼ်ႉတၢင်းႁိုင်မၼ်းၸဵတ်းပၢတ်ႈဢေႃႈ။ ဝဵင်း ယေႇရုသလႅမ်ႇ၊ ၵေႃႈတၵ်းတေမႄးၵုမ်းမႄးႁဵတ်းဝႆႉပႃးလူၺ်ႈၵၼ်တင်းၶူၼ်တၢင်း၊ဢိၵ်ႇတင်းၶိူင်ႈႁႄႉၵင်ႈႁၢမ်ႈတၢပ်ႈဢၼ်မၼ်ႈၶိူင်ႇတင်းလၢႆလႄႈတၵ်းတႄႇတင်ႈယူႇႁူၵ်းသိပ်းသွင်ပၢတ်ႈဢေႃႈ။ ၵူၺ်းၵႃႈ၊မိူဝ်ႈၼၼ်ႉတၵ်းပဵၼ်ၶိင်ႇၵႃႇလႃႉဢၼ်လႆႈၶၢမ်ႇတၢင်းဢၼ်ယႃႉယုၵ်ႉဢေႃႈ။-
မိူဝ်ႈဢၼ်ၶိင်ႇၵႃႇလႃႉၼၼ်ႉသုတ်းသဵင်ႈၵႂႃႇၸိုင်၊ၸဝ်ႈဢၼ်ၽြႃးပဵၼ်ၸဝ်ႈပၼ်ၽိၵ်ႈသိၵ်ႈဝႆႉၼၼ်ႉတၵ်းလႆႈၶၢမ်ႇတၢင်းဢၼ်ဢဝ်တၢႆလႄႈဢမ်ႇမီးၸဝ်ႈမီးၸွမ်တီႈၵူၼ်းတင်းလၢႆ၊မိူဝ်ႈၼၼ်ႉတပ်းသိုၵ်းၶုၼ်ဢၼ်ဢုပ်ႉပိူင်ႇၼၼ်ႉတၵ်းမႃးလႄႈတိုၵ်းဢဝ်ယႃႉပႅတ်ႈဝဵင်းၸဝ်ႈ၊ဢိၵ်ႇတင်းၵျွင်းပိၵ်ႈမၢၼ်ႇၸဝ်ႈဢေႃႈ။ ၶိင်ႇၵႃႇလႃႉလိုၼ်းသုတ်းတၵ်းႁွတ်ႈမႃးမိူၼ်ၸိူဝ်ႉၼင်ႇၼမ်ႉထူမ်ႈႁူမ်ႇပႅတ်ႈ၊ဢၼ်ပႃးတင်းသိုၵ်းသိူဝ်၊ဢိၵ်ႇတင်းတၢင်းဢၼ်ၵိူၼ်ႇယႃႉလုလႅဝ်ပႅတ်ႈဢၼ်ပဵၼ်တၢင်းဢၼ်ၽြႃးပဵၼ်ၸဝ်ႈမႄးႁႅၼ်းဝႆႉၼၼ်ႉဢေႃႈ။-
ၶုၼ်ၼၼ်ႉတၵ်းႁဵတ်းပတိၺိၺ်ႇၵတိဢၼ်မၼ်ႈၶိူင်ႇလူၺ်ႈၵၼ်တင်းၵူၼ်းၼမ်ၼႃႇပုၼ်ႈပၢတ်ႈၼိုင်ႈလႄႈႁႂ်ႈတၢင်းဢၼ်သၢၵ်ႈလူႇတူဝ်သတ်းပဵၼ်ၶိူင်ႈတၢင်းလူႇ၊ဢိၵ်ႇတင်းၶိူင်ႈတၢင်းလူႇတၢင်ႇမဵဝ်းၼၼ်ႉႁၢႆလၢႆၵႂႃႇၶိုင်ႈပၢတ်ႈၼိုင်ႈဢေႃႈ။ တၢင်းဢၼ်လီႁင်ႈဢဵတ်ႇသဵတ်ႇၼၼ်ႉတၵ်းႁွတ်ႈထိုင်ၵႃႈတီႈဢၼ်သုင်သုတ်းၵႃႈၼႂ်းၵျွင်းပိၵ်ႈမၢၼ်ႇၸဝ်ႈလႄႈတၵ်းတႄႇယူႇတီႈၼၼ်ႈတေႃႇထိုင်ႁွတ်ႈၵေႃႉဢၼ်ယႃႉလုယႃႉလႅဝ်ဢၼ်တင်ႈမၼ်းဝႆႉ၊လႆႈၶၢမ်ႇတၢင်းဢၼ်ၽြႃးပဵၼ်ၸဝ်ႈၸီႇယၢင်ႇတႅပ်းတတ်းဝႆႉၼၼ်ႉယဝ်ႉ၊” ဝႃႈၼင်ႇၼႆဢေႃႈ။
ၼႂ်းပီဢၼ် သႆးရတ်ႉ၊ ပဵၼ်ၶုၼ်ႁေႃၶမ်းမိူင်း ပႃးသျႃး၊ လႄႈ ၸၢမ်ႇႁၢင်ႈၸၢမ်ႇႁေႃလႆႈသၢမ်ပီၼၼ်ႉၵႂၢမ်းပျႃႇတိၵ်ႈပေႃႇမႃးႁွတ်ႈထိုင်တီႈ တၢၼ်ႇယေႇလႃႉ၊ ဢၼ်မီးၸိုဝ်ႈသဵင် ပေႇလတႃႉသႃႇၸႃႇ၊ ၼၼ်ႉဢေႃႈ။ ပျႃႇတိၵ်ႈၸဝ်ႈၼၼ်ႉပဵၼ်ဢၼ်မၢၼ်ႇမႅၼ်ႈၸိုဝ်ႈၸႂ်ႈလႄႈပဵၼ်ဢၼ်ႁုထွမ်ႇပွင်ႇလႅင်းယၢပ်ႇၼႃႇလူင်လၢင် ဢေႃႈ။ မၼ်းလႆႈႁုၸႅင်ႈလွင်ႈပျႃႇတိၵ်ႈၸဝ်ႈ ၵွပ်ႈပိူဝ်ႈမၼ်းလႆႈႁၼ်ရူႇပႃႇရူင်ႇၼၼ်ႉဢေႃႈ။
ၼႂ်းၶိင်ႇၵႃႇလႃႉမိူဝ်ႈၼၼ်ႉၵဝ် တၢၼ်ႇယေႇလႃႉ၊ မီးၸႂ်တုၵ်ႉၶႃႉယူႇသၢဝ်းဢဵတ်းဝၼ်းတဵမ်တဵမ်လႄႈ။-
ၸူဝ်ႈဢၼ်သၢဝ်းဢဵတ်းဝၼ်းဢမ်ႇပႆႇၸေးၼၼ်ႉၵဝ်ဢမ်ႇၵိၼ်တၢင်းၵိၼ်ဢၼ်လီဢၼ်ဝၢၼ်လႂ်၊ဢမ်ႇၵိၼ်ၼိူဝ်ႉလႂ်၊ဢမ်ႇၵိၼ်ၼမ်ႉမၢၵ်ႇၸပိတ်ႉလႂ်၊ဢိၵ်ႇတင်းယင်းဢမ်ႇဝီႁူဝ်လႄႈယူႇဢေႃႈ။
ၼႂ်းလိူၼ်တီႈၼိုင်ႈၼႂ်းပီၼၼ်ႉလႆႈသၢဝ်းသီႇဝၼ်းၵဝ်ယင်းတိုၵ်ႉၸုၵ်းယူႇၵႃႈတီႈၽင်ႇၼမ်ႉ ထႆးၵရိတ်ႈ၊ ၼၼ်ႉဢေႃႈ။-
ၵဝ်ႁႅၼ်တူၺ်းလႄႈမုင်ႈႁၼ်ၵူၼ်းၵေႃႉၼိုင်ႈဢၼ်ၼုင်ႈၶူဝ်းၽႃႈပၢၼ်ႇၶျေႃးသေလႄႈႁတ်ႉသၢႆဢႅဝ်ၶမ်းလွတ်ႈငၢၼ်ႇၼၼ်ႉဢေႃႈ။-
တူဝ်မၼ်းႁိူဝ်ႈမၢပ်ႈ မိူၼ်ၸိူဝ်ႉၼင်ႇသႅင်ပတ်ႈတမျႃးလႄႈၼႃႈမၼ်းပဵၼ်ၸိူဝ်ႉၼင်ႇသၢႆလႅင်းၽႃႉမႅပ်ႈၼၼ်ႉဢေႃႈ။ မၢၵ်ႇတႃမၼ်းသွင်ႇမိူၼ်ၽႆးဢၼ်လုၵ်ႉႁိူဝ်ႈၼႃႇၼၼ်ႉလႄႈတိၼ်မၼ်းမိုဝ်းမၼ်းႁိူဝ်ႈမၢပ်ႈမၢပ်ႈမိူၼ်တွင်းလိူင်ဢၼ်ၸင်ႇပွတ်ႈသီမႂ်ႇမႂ်ႇဝႆႉၼၼ်ႉဢေႃႈ။ သဵင်ၵႂၢမ်းမၼ်းႁုၼ်ႈမေႃးမိူၼ်ၸိူဝ်ႉၼင်ႇသဵင်မုၵ်ႉၵူၼ်းၸိူဝ်းၵူၼ်းဢၼ်ၼမ်ၵိုၼ်းၼႃႇၼၼ်ႉဢေႃႈ။
ၵဝ် တၢၼ်ႇယေႇလႃႉ၊ ၵေႃႉလဵဝ်ၵူၺ်းလႆႈႁၼ်ရူႇပႃႇရူင်ႇၼၼ်ႉဢေႃႈ။ ၶဝ်ၸိူဝ်းဢၼ်မီးယူႇလူၺ်ႈၵၼ်တင်းၵဝ်ၼၼ်ႉဢမ်ႇလႆႈႁၼ်သေၸိူဝ်ႉသေပိူင်။ ၵူၺ်းၵႃႈ၊တၢင်းဢၼ်ၵူဝ်ႁႄသၼ်ႇဝႆၼႃႇလူင်လၢင်တူၵ်းႁွတ်ႈၵႃႈၼိူဝ်ၶဝ်လႄႈၶဝ်ဢွၼ်ၵၼ်ၼီပၢႆႈႁႂ်ႈလႆႈတဵတ်ႇမႅပ်းဢေႃႈ။-
မီးၵဝ်ၵေႃႉလဵဝ်ၵိုတ်းၵျၢၼ်ႇယူႇၵူၺ်းလႄႈႁၼ်ရူႇပႃႇရူင်ႇဢၼ်ယႂ်ႇၼႃႇလူင်လၢင်ၼၼ်ႉသေယဝ်ႉ၊ဢဵၼ်ႁႅင်းၵဝ်ဢူၼ်ႈဢွၼ်ႇၵႂႃႇလႄႈၼႃႈၵဝ်ႁဵဝ်ႇၸွပ်ႈပႅၵ်ႇပိူင်ႈၵႂႃႇဢေႃႈ။-
မိူဝ်ႈဢၼ်ၵဝ်ငိၼ်းသဵင်ၵႂၢမ်းမၼ်းၼၼ်ႉၸိုင်၊ၵဝ်လူမ်ႉဢူပ်ႇပူပ်ႇလိုမ်းတူဝ်ယူႇလႄႈဢဝ်ၼႃႈၵဝ်ငူပ်ႉၵႃႈၼိူဝ်လိၼ်ယူႇဢေႃႈ။-
မိူဝ်ႈၼၼ်ႉ၊မီးမိုဝ်းၶွၼ်ၼိုင်ႈပူၵ်းဢဝ်ၵဝ်လႄႈၵဝ်ၵေႃႈၵူင်ႇယူင်ႇယူႇၵႃႈၼိူဝ်ႁူဝ်ၶဝ်ႇတင်းမိုဝ်းၵဝ်ဢေႃႈ။ မိူဝ်ႈၼၼ်ႉၵဝ်ယင်းတိုၵ်ႉမီးတၢင်းဢၼ်ၵူဝ်ႁႄသၼ်ႇဝႆယူႇဢေႃႈ။
တမၢၼ်ႇၵၢင်ႁၢဝ်ၼၼ်ႉလၢတ်ႈတီႈၵဝ်လႄႈဝႃႈ၊ “ တၢၼ်ႇယေႇလႃႉ၊ ႟။ ၽြႃးပဵၼ်ၸဝ်ႈႁၵ်ႉပႅင်းမႂ်းဢေႃႈ။ လုၵ်ႉၸုၵ်းလႄႈထွမ်ႇဢဝ်ၵႂၢမ်းဢၼ်ၵဝ်တေလၢတ်ႈတီႈမႂ်းၼႆႉ လီလီငၢမ်းငၢမ်းတႃႉ။ ၵဝ်လႆႈၶၢမ်ႇတၢင်းဢၼ်ပွႆႇၸႂ်ႉမႃးၸူးတီႈမႂ်းမိူဝ်ႈလဵဝ်ၼႆႉယဝ်ႉ၊” ဝႃႈၼင်ႇၼႆဢေႃႈ။ မိူဝ်ႈဢၼ်မၼ်းဝႃႈၼင်ႇၼႆယဝ်ႉၼၼ်ႉၸိုင်၊ၵဝ်သၼ်ႇသၼ်ႇသၢႆသၢႆလႄႈၸုၵ်းယူႇဢေႃႈ။
မိူဝ်ႈၼၼ်ႉတမၢၼ်ႇၵၢင်ႁၢဝ်ၵေႃႈလၢတ်ႈတီႈၵဝ်လႄႈဝႃႈ၊ “ တၢၼ်ႇယေႇလႃႉ၊ ႟။ ယႃႇပေၵူဝ်ပေႁႄ။ ၽြႃးပဵၼ်ၸဝ်ႈလႆႈငိၼ်းသဵင်ၵႂၢမ်းသူးတွင်းမႂ်းၸႃႉၸဵမ်ဝၼ်းဢွၼ်တၢင်းသုတ်းဢၼ်မႂ်းတႅပ်းတတ်းၸႂ်ႁႂ်ႈလႆႈၶျႃးတူဝ်မႂ်းတူၵ်းတႅမ်ႇပုၼ်ႈလွင်ႈၼင်ႇႁိုဝ်တၵ်းၸၢင်ႈႁုၸႅင်ႈၼၼ်ႉယဝ်ႉ။ ၵဝ်တိုၼ်းႁွတ်ႈမႃးႁႂ်ႈလႆႈၶိုၼ်းတွပ်ႇလၢတ်ႈၵႂၢမ်းသူးတွင်းမႂ်းယဝ်ႉ။-
ၶုၼ်ဢၼ်ပႂ်ႉသိုင်ႇၸိုင်ႈဝၢၼ်ႈမိူင်း ပႃးသျႃး၊ ၼၼ်ႉႁၢမ်ႈတၢပ်ႈႁႄႉၶႅၼ်ၵဝ်ယူႇသၢဝ်းဢဵတ်းဝၼ်းတဵမ်တဵမ်ဢေႃႈ။ မိူဝ်ႈၼၼ်ႉ၊ မိၵ်ႉၶေႇလႃႉ၊ ဢၼ်ၶဝ်ႈပႃးၼႂ်းၶုၼ်တမၢၼ်ႇၵၢင်ႁၢဝ်ပႃးၼိုင်ႈၼၼ်ႉမႃးၸွႆႈမႃးထႅမ်ၵဝ်၊ၵွပ်ႈပိူဝ်ႈဢၼ်ၵဝ်လႆႈၵိုတ်းသဝ်းယူႇၵေႃႉလဵဝ်ၵူၺ်းၼႂ်းမိူင်း ပႃးသျႃး၊ ၼၼ်ႉဢေႃႈ။-
ၵဝ်ႁွတ်ႈမႃးႁႂ်ႈလႆႈႁဵတ်းႁႂ်ႈမႂ်း ႁုၸႅင်ႈလွင်ႈဢၼ်တၵ်းပဵၼ်မႃးၵႃႈတီႈၵူၼ်းမဵဝ်းမႂ်းၼႂ်းဝၼ်းလိုၼ်းမိူဝ်းၼႃႈၼၼ်ႉယဝ်ႉ။ ပျႃႇတိၵ်ႈရူႇပႃႇရူင်ႇၼႆႉပဵၼ်ဢၼ်ၼႄပျႃးလွင်ႈတၢင်းမိုဝ်ႉဝၼ်းၵမ်းလိုၼ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်မၼ်းၸဝ်ႈလၢတ်ႈၸိူဝ်ႉၼင်ႇၼႆၼၼ်ႉၵဝ်ယႅၵ်ႉတူၺ်းၵႃႈတီႈလိၼ်ယူႇဢမ်ႇလၢတ်ႈၵႂၢမ်းလႄႈယူႇဢေႃႈ။-
မိူဝ်ႈၼၼ်ႉ၊တမၢၼ်ႇၵၢင်ႁၢဝ်ပႃးဢၼ်မိူၼ်ၸိူဝ်ႉၼင်ႇႁၢင်ႈၽၢင်ၵူၼ်းၼၼ်ႉယိုၼ်းမိုဝ်းမၼ်းလႄႈတိူဝ်ႉထုၵ်ႇသႂ်ႇသီႇသူပ်းၵဝ်ဢေႃႈ။ ၵဝ်ၵေႃႈလၢတ်ႈတီႈမၼ်းလႄႈဝႃႈ၊ “ၸဝ်ႈတီႈၶႃႈ႟။ ပျႃႇတိၵ်ႈရူႇပႃႇရူင်ႇၼႆႉႁဵတ်းႁႂ်ႈၵဝ်ၶႃႈပဵၼ်တၢင်းဢၼ်ဢဵၼ်ႁႅင်းဢူၼ်ႈၼႃႇလူင်လၢင်ထၢၼ်ႈပေႃးတၢင်းဢၼ်ၵဝ်ၶႃႈသၼ်ႇသၼ်ႇသၢႆသၢႆၼၼ်ႉဢမ်ႇၵိုတ်းဢမ်ႇထၢတ်ႇလႆႈတီႈၶႃႈယဝ်ႉ။-
ၵဝ်ၶႃႈၼႆႉပဵၼ်ၸိူဝ်ႉၼင်ႇၶႃႈဢၼ်ၸုၵ်းယူႇၵႃႈတီႈၽၢႆႇၼႃႈၸဝ်ႈမၼ်းၼၼ်ႉတီႈၶႃႈဢေႃႈ။ ၵဝ်ၶႃႈတေလၢတ်ႈတေႃႇၸဝ်ႈႁဝ်းလႆႈၸိူဝ်ႉၼင်ႇႁိုဝ်ၶႃႈ။ ၵဝ်ၶႃႈဢမ်ႇမီးႁႅင်းလႃးလႃးယဝ်ႉ။ လူမ်းထူၺ်ႈၸႂ်ၵေႃႈဢမ်ႇၵိုတ်းဢမ်ႇၵျၢၼ်ႇဝႆႉတီႈၵဝ်ၶႃႈၶႃႈယဝ်ႉ၊” ဝႃႈၼင်ႇၼႆဢေႃႈ။
မၼ်းသမ်ႉယိပ်းၵမ်မိုဝ်းၵဝ်ထႅင်ႈပွၵ်ႈၼိုင်ႈလႄႈၵဝ်မီးဢဵၼ်မီးႁႅင်းမႃးဢေႃႈ။-
မၼ်းလၢတ်ႈလႄႈဝႃႈ၊ “ၽြႃးပဵၼ်ၸဝ်ႈႁၵ်ႉပႅင်းမႂ်းဢေႃႈ။ ၵွပ်ႈပိူဝ်ႈၼႆလႄႈယႃႇပေႁႂ်ႈသေၸိူဝ်ႉသေပိူင်လႆႈယုင်ႈယၢင်ႈႁူဝ်ၸႂ်မႂ်း။ ယႃႇပေႁႂ်ႈလႆႈၵူဝ်လႆႈႁႄ၊” ဝႃႈၼင်ႇၼႆဢေႃႈ။ မိူဝ်ႈဢၼ်မၼ်းဝႃႈၼင်ႇၼႆၼၼ်ႉၵဝ်ယဵင်ႈၶႅၼ်းမီးႁႅင်းမႃးလႄႈလၢတ်ႈဝႃႈ၊ “ၸဝ်ႈတီႈၶႃႈ႟။ ၸဝ်ႈႁဝ်းမီးလွင်ႈတၢင်းၸိူဝ်ႉႁိုဝ်ၵေႃႈမွၵ်ႇလၢတ်ႈတီႈၵဝ်ၶႃႈသေၵမ်း။ ၸဝ်ႈႁဝ်းပၼ်ႁႅင်းတီႈၵဝ်ၶႃႈယဝ်ႉ၊” ဝႃႈၼင်ႇၼႆဢေႃႈ။
“ၵဝ်ၸမ်ႉ၊ၼႂ်းပီဢၼ်ၶုၼ်လူင် တႃႇရိ၊ ၸၢမ်ႇႁၢင်ႈၸၢမ်ႇႁေႃမိူင်း မေႇတိ၊ ပီတီႈၼိုင်ႈၼၼ်ႉၵဝ်ၸုၵ်းၶၢမ်ႇၵမ်ႉထွၵ်ႈမၼ်းၸဝ်ႈလႄႈပၼ်ဢဵၼ်ပၼ်ႁႅင်းမၼ်းယဝ်ႉ။-
မိူဝ်ႈလဵဝ်ၼႆႉၸမ်ႉ၊ၵဝ်တၵ်းမွၵ်ႇလၢတ်ႈၼႄလွင်ႈတၢင်းဢၼ်မၢၼ်ႇမႅၼ်ႈၸိုဝ်ႈၸႂ်ႈၼၼ်ႉတီႈမႂ်းဢေႃႈ။” “ၶုၼ်ႁေႃၶမ်းသၢမ်ပႃးတၵ်းပေႃႇမႃးၵႃႈၼႂ်းမိူင်း ပႃးသျႃး၊ လူးၵွၼ်ႇဢေႃႈ။ ပႃးတီႈသီႇၼၼ်ႉယဵင်ႈၶႅၼ်းတၵ်းမၢၵ်ႇမီးလိူဝ်တွၼ်းၼႃႇသေၶဝ်သၢမ်ပႃးၼၼ်ႉဢေႃႈ။ မိူဝ်ႈဢၼ်မၼ်းမၢၵ်ႈမီးလႄႈႁႅင်းတၼ်းၶူဝ်းယႂ်ႇမႃးယဝ်ႉၼၼ်ႉၸိုင်၊မၼ်းတၵ်းၶတ်းၶႅင်ႁႅင်းတႃႉၵၼ်တင်းၵူၼ်းမိူင်း ၵရိၵ်ႉ၊ ဢေႃႈ။
“မိူဝ်ႈၼၼ်ႉၶုၼ်ႁေႃၶမ်းဢၼ်တၼ်းၶူဝ်းယႂ်ႇၼႃႇပႃးၼိုင်ႈတၵ်းပေႃႇမႃးဢေႃႈ။ မၼ်းၼၼ်ႉတၵ်းဢုပ်ႉပိူင်ႇၵႃႈၼိူဝ်သိုင်ႇၸိုင်ႈဝၢၼ်ႈမိူင်းဢၼ်ယႂ်ႇၼႃႇလူင်လၢင်သေလႄႈႁဵတ်းၸွမ်းၵႃႈၼင်ႇဢၼ်ဢလူဝ်ႇမၼ်းမီးၼၼ်ႉဢေႃႈ။-
ၵူၺ်းၵႃႈ၊မိူဝ်ႈဢၼ်တၼ်းၶူဝ်းမၼ်းယႂ်ႇမႃးယဝ်ႉၼၼ်ႉၸိုင်၊သိုင်ႇၸိုင်ႈဝၢၼ်ႈမိူင်းမၼ်းတၵ်းတႅၵ်ႇယၢႆႈၵႂႃႇပဵၼ်သီႇၽၢၵ်ႇဢေႃႈ။ ၶုၼ်ႁေႃၶမ်းၸိူဝ်းဢၼ်ဢမ်ႇၸႂ်ႈၸိူဝ်ႉၸဝ်ႈၶိူဝ်းၶုၼ်ၼၼ်ႉတၵ်းၼင်ႈႁၢင်ႈၼင်ႈႁေႃဢေႃႈ။ ၵူၺ်းၵႃႈ၊ၶဝ်ၸိူဝ်းၼၼ်ႉတၵ်းဢမ်ႇမီးႁႅင်းတၼ်းၶူဝ်းယႂ်ႇမိူၼ်မၼ်း။
“ၶုၼ်ႁေႃၶမ်းမိူင်း ဢေးၵျိပ်ႉ၊ ၼၼ်ႉတၼ်းၶူဝ်းတၵ်းယႂ်ႇမႃးဢေႃႈ။ ၼႂ်းဝႃႈၼၼ်သေၵေႃႈ ၵႃႈၼႂ်းၶုၼ်ဢၼ်ပွင်ၵၢၼ်မၼ်းၸိူဝ်းၼၼ်ႉၵေႃႉၼိုင်ႈ တၼ်းၶူဝ်းတၵ်းယႂ်ႇမႃးသေမၼ်းလႄႈတၵ်းဢုပ်ႉပိူင်ႇသိုင်ႇၸိုင်ႈဝၢၼ်ႈမိူင်းဢၼ်ယဵင်ႈၶႅၼ်းယႂ်ႇၼႃႇၼၼ်ႉဢေႃႈ။-
မိူဝ်ႈဢၼ်ပူၼ်ႉၵႂႃႇပီမိူင်းလၢႆပီယဝ်ႉၼၼ်ႉၸိုင်၊ၶုၼ်ႁေႃၶမ်းမိူင်း ဢေးၵျိပ်ႉ၊ တင်းၶုၼ်ႁေႃၶမ်းမိူင်း သီးရီးယႃး၊ တၵ်းႁဵတ်းၵေႃႉႁဵတ်းသႄႈၵၼ်လႄႈၶုၼ်ႁေႃၶမ်းမိူင်း ဢေးၵျိပ်ႉ၊ တၵ်းဢဝ်လုၵ်ႈယိင်းသၢဝ်မၼ်းဢၢပ်ႈပၼ်ႁႂ်ႈပဵၼ်ၼၢင်းႁေႃၶမ်းမိူင်း သီးရီးယႃး၊ ၼၼ်ႉဢေႃႈ။ ၵူၺ်းၵႃႈ၊ၵၢၼ်မိၵ်ႈသႁႃႇယႃႉၼၼ်ႉဢမ်ႇတႄႇဢမ်ႇမၼ်ႈလႄႈၼၢင်းယိင်းၼၼ်ႉလႆၶၢမ်ႇတၢင်းဢၼ်ဢဝ်တၢႆလူၺ်ႈၵၼ်တင်းၽူဝ်မၼ်း၊လုၵ်ႈလၢင်းမၼ်း၊ဢိၵ်ႇတင်းၶႃႈၸိူဝ်းဢၼ်ၵႂႃႇယူႇလူၺ်ႈၵၼ်တင်းမၼ်းၸိူဝ်းၼၼ်ႉဢေႃႈ။-
လိုၼ်းၼၼ်ႉဢမ်ႇႁိုင်ဢမ်ႇၼၢၼ်း၊ၵႃႈၼႂ်းၸိူဝ်ႉၸၢတ်ႈၼၢင်းယိင်းၼၼ်ႉၵေႃႉၼိုင်ႈတၵ်းမႃးပုတ်ႈမႃးတႅၼ်းပေႃႈမႄႈမၼ်းသေယဝ်ႉ၊တၵ်းၶီႇသိုၵ်းတိုၵ်းတေႃးၶုၼ်ႁေႃၶမ်းမိူင်း သီးရီးယႃး၊ လႄႈၶဝ်ႈထိုင်ၵႃႈၼႂ်းတိူၵ်ႈတီႈတိုၵ်းသိုၵ်းသေပႄႉၼႅင်ႇၶဝ်ဢေႃႈ။-
မၼ်းတၵ်းဢဝ်ႁုၼ်ႇႁၢင်ႈသၢင်းထုၽြႃးၶဝ်လႂ်၊ၶိူင်ႈၶမ်းၶိူင်ႈငိုၼ်းဢၼ်လႆႈသၢၵ်ႈလူႇတီႈၽြႃးၶဝ်ဝႆႉၸိူဝ်းၼၼ်ႉလႂ်၊ၶိုၼ်းပွၵ်ႈမိူဝ်းၸူးတီႈမိူင်း ဢေးၵျိပ်ႉ၊ ဢေႃႈ။ မၼ်းဢမ်ႇႁဵတ်းသိုၵ်းႁဵတ်းသိူဝ်လူၺ်ႈၵၼ်တင်းမိူင်း သီးရီးယႃး၊ ယူႇပီမိူင်းႁိုင်တၢၼ်ႇတၢၼ်ႇယဝ်ႉၸင်ႇ၊-
ၶုၼ်ႁေႃၶမ်းမိူင်း သီးရီးယႃး၊ တၵ်းၶီႇသိုၵ်းၸူးတီႈမိူင်း ဢေးၵျိပ်ႉ၊ ဢေႃႈ။ ၵူၺ်းၵႃႈ၊မၼ်းတၵ်းတေလႆႈၶိုၼ်းမိူဝ်းၸူးၵႂႃႇၵႃႈတီႈမိူင်းမၼ်းဢေႃႈ။
“လုၵ်ႈၸၢႆးၶုၼ်ႁေႃၶမ်းမိူင်း သီးရီးယႃး၊ ၸိူဝ်းၼၼ်ႉတၵ်းဢွၼ်ၵၼ်ၸုတုမ်ဢဝ်တပ်ႉသိုၵ်းလူင်ဢၼ်ယႂ်ႇၼႃႇၼၼ်ႉဢေႃႈ။ ၼႂ်းလုၵ်ႈၸၢႆးၼၼ်ႉၵေႃႉၼိုင်ႈတၵ်းလုပ်ႇၶဝ်ႈမႃးမိူၼ်ၸိူဝ်ႉၼင်ႇၼမ်ႉၼွင်းလႄႈတိုၵ်းတေႃးတိူၵ်ႈတီႈတိုၵ်းသိုၵ်းရၢၼ်ႇသူႇဢေႃႈ။-
ၶုၼ်ႁေႃၶမ်းမိူင်း ဢေးၵျိပ်ႉ၊ ၵေႃႈ ပႃးတင်းၸႂ်လမ်သႆႈၵမ်ႇလႄႈတၵ်းၶီႇၶိုၼ်ႈတိုၵ်းတေႃးၶုၼ်ႁေႃၶမ်းမိူင်း သီးရီးယႃး၊ ပႄႉၼႅင်ႇသိမ်းဢဝ်တပ်ႉသိုၵ်းလူင်မၼ်းၼၼ်ႉသေဢေႃႈ။-
ႁူဝ်ၸႂ်မၼ်းတၵ်းမီးတၢင်းဢၼ်ၽႅၼ်သုင်ၵွပ်ႈလူၺ်ႈတၢင်းဢၼ်မၼ်းပႄႉၼႅင်ႇ၊ဢိၵ်ႇတင်းတၢင်းဢၼ်မၼ်းလႆႈဢဝ်ႁူဝ်ႁၢၼ်ၵူၼ်းသိုၵ်းပဵၼ်မိုၼ်ႇပဵၼ်သႅၼ်တၢႆပႅတ်ႈၼၼ်ႉဢေႃႈ။ ၵူၺ်းၵႃႈ၊ဢႃႇၼႃႇမၼ်းတၵ်းတေဢမ်ႇလႆႈတႄႇလႆႈမၼ်ႈ။
“ၶုၼ်ႁေႃၶမ်းမိူင်း သီးရီးယႃး၊ တၵ်းပွၵ်ႈၶိုၼ်းတၢင်းလင်သေလႄႈၸုတုမ်ဢဝ်တပ်ႉသိုၵ်းဢၼ်ယဵင်ႈၶႅၼ်းယႂ်ႇၼႃႇသေဢွၼ်တၢင်းၼၼ်ႉဢေႃႈ။ မိူဝ်ႈဢၼ်ၶိင်ႇမၼ်းထုၵ်ႇၸိုင်၊မၼ်းတၵ်းပွၵ်ႈၶိုၼ်းမႃးလူၺ်ႈတၢင်းဢၼ်ၶီႇသိုၵ်းဢၼ်ယႂ်ႇၼႃႇဢၼ်ပျေႉၸုမ်ႇဝႆႉတင်းလၢၵ်ႈၼၢၵ်ႈၼၼ်ႉဢေႃႈ။-
ၼႂ်းၶိင်ႇၵႃႇလႃႉၼၼ်ႉၵူၼ်းၼမ်ၼႃႇတၵ်းဢွၼ်ၵၼ်လုၵ်ႉၽိုၼ်ႉၶုၼ်ႁေႃၶမ်းမိူင်း ဢေးၵျိပ်ႉ၊ ဢေႃႈ။ ၵမ်းၼၼ်ႉ တၢၼ်ႇယေႇလႃႉ၊ ႟။ ၵူၼ်းဢၼ်ႁၢဝ်ႈဢၼ်ၵျၢမ်းၵမ်ႈၽွင်ႈၵႃႈၼႂ်းၵူၼ်းမဵဝ်းမႂ်းၼၼ်ႉၵေႃႈတၵ်းဢွၼ်ၵၼ်လုၵ်ႉၽိုၼ်ႉႁႂ်ႈရူႇပႃႇရူင်ႇလႆႈပျေႉၸုမ်ႇၼၼ်ႉဢေႃႈ။ ၵူၺ်းၵႃႈ၊ၶဝ်တၵ်းသုမ်းသိုၵ်းဢေႃႈ။-
ပိူဝ်ႈၼႆလႄႈၶုၼ်ႁေႃၶမ်း သီးရီးယႃး၊ တၵ်းၶီႇသိုၵ်းမႃးလႄႈၵေႃႇႁဵတ်းတဵင်ႁဵတ်းတႅၼ်လိၼ်ၵႃႈတီႈဝဵင်းဢၼ်မၼ်ႈဢၼ်ၶိူင်ႇတိုၵ်းသိမ်းဢဝ်ဝဵင်းၼၼ်ႉဢေႃႈ။ ႁူဝ်ႁၢၼ်ၵူၼ်းသိုၵ်းမဵဝ်း ဢေးၵျိပ်ႉ၊ ၶဝ်တေဢမ်ႇၶိုၼ်းတိုၵ်းတေႃးထႅင်ႈလႄႈယူႇဢေႃႈ။ တေႃႈၵႃႈၵူၼ်းသိုၵ်းၶဝ်ဢၼ်မီးႁႅင်းယႂ်ႇၼႃႇၸိူဝ်းၼၼ်ႉယင်းဢမ်ႇၸၢင်ႈႁဵတ်းၸိူဝ်ႉၼင်ႇႁိုဝ်တိုၵ်းတေႃးဢေႃႈ။-
ၵူၼ်းမဵဝ်း သီးရီးယႃး၊ ဢၼ်ၶဝ်ႈမႃးတိုၵ်းပႄႉၶဝ်ၼၼ်ႉတၵ်းႁဵတ်းၸွမ်းၵႃႈၼင်ႇဢၼ်ဢလူဝ်ႇမၼ်းမီးလႄႈဢမ်ႇမီးၽူႈလႂ်တေႁႄႉၶႅၼ်မၼ်းလႆႈ။ မၼ်းတၵ်းၸုၵ်းယူႇၵႃႈၼႂ်းမိူင်းဢၼ်ၽြႃးပဵၼ်ၸဝ်ႈဝႆႉၵတိၼၼ်ႉလႄႈမိူင်းၼၼ်ႉတၵ်းမီးတႂ်ႈမိုဝ်းမၼ်းမူတ်းမူတ်းသဵင်ႈသဵင်ႈဢေႃႈ။
“ၶုၼ်ႁေႃၶမ်းမိူင်း သီးရီးယႃး၊ တၵ်းပႃးဢဝ်တပ်ႉသိုၵ်းမၼ်းတင်းမူတ်းၶိုင်ႁၢင်ႈသၢင်ႈပွင်ၼႄးလၢႆးဢၼ်တၵ်းယႃႉသိုင်ႇၸိုင်ႈဝၢၼ်ႈမိူင်းရၢၼ်ႇသူႇမၼ်းၼၼ်ႉပႅတ်ႈၼႂ်းတၢင်းဢၼ်ႁဵတ်းမိၵ်ႈသႁႃႇယႃႉလူၺ်ႈၵၼ်တင်းမၼ်းၼၼ်ႉသေယဝ်ႉ၊ဢဝ်လုၵ်ႈယိင်းဢၢပ်ႈပၼ်ၵၼ်တင်းမၼ်းၼၼ်ႉဢေႃႈ။ ၼႂ်းဝႃႈၼၼ်သေၵေႃႈ တၢင်းၵျၢမ်ႇတၢင်းပွင်မၼ်းၼၼ်ႉဢမ်ႇပဵၼ်ၸွမ်း။-
လိုၼ်းၼၼ်ႉ၊မၼ်းတၵ်းဝၢႆႇၸူးမိူင်းဢၼ်ယူႇႁိမ်းၽင်ႇပၢင်ႇလၢႆႇသေလႄႈတိုၵ်းပႄႉဢဝ်ၵူၼ်းၼမ်ၼႃႇဢေႃႈ။ ၵူၺ်းၵႃႈ၊ၶုၼ်မိူင်းၼွၵ်ႈၵေႃႉၼိုင်ႈတၵ်းပႄႉၼႅင်ႇမၼ်းသေလႄႈဢဝ်တၢင်းဢၼ်မၼ်းႁူဝ်ၸႂ်ၽႅၼ်သုင်ၼၼ်ႉႁၢႆလၢႆၵႂႃႇလႄႈၶုၼ်ၼၼ်ႉတၵ်းႁႂ်ႈတၢင်းဢၼ်ၶုၼ်ႁေႃၶမ်းမိူင်း သီးရီးယႃး၊ ႁူဝ်ၸႂ်ၽႅၼ်သုင်ၼၼ်ႉၶိုၼ်းႁွတ်ႈထိုင်ၵႃႈၼိူဝ်တူဝ်ၸဝ်ႈၵဝ်ႇဢေႃႈ။-
မၼ်းတၵ်းၶိုၼ်းမိူဝ်းၸူးတီႈဝဵင်းဢၼ်မၼ်ႈၶိူင်ႇမၼ်းၸိူဝ်းၼၼ်ႉဢေႃႈ။ ၵူၺ်းၵႃႈ၊မၼ်းတၵ်းသုမ်းသိုၵ်းလႄႈတၵ်းလပ်ႉႁၢႆၵႂႃႇဢေႃႈ။
“ၶုၼ်ႁေႃၶမ်းပႃးၼိုင်ႈတၵ်းပုတ်ႈႁၢင်ႈပုတ်ႈႁေႃမၼ်းဢေႃႈ။ မၼ်းၼၼ်ႉပဵၼ်ၵေႃႉဢၼ်ပွႆႇၸႂ်ႉၶုၼ်ဢၼ်ပွင်ၵၢၼ်မၼ်းၵေႃႉၼိုင်ႈၵႂႃႇၽႃႇငိုၼ်းၵဵပ်းငိုၼ်းႁႂ်ႈမုၼ်ၸေးၸိမ်ႇဝၢၼ်ႈမိူင်းမၼ်းတၵ်းၶိုၼ်ႈယႂ်ႇမႃးၼၼ်ႉဢေႃႈ။ ၵူၺ်းၵႃႈ၊ဝၢႆးသေၼၼ်ႉဢမ်ႇပေႃးႁိုင်ပေႃးၼၢၼ်းမၼ်းတၵ်းလႆႈၶၢမ်ႇဢဝ်တၢႆလူၺ်ႈဢၼ်ဢမ်ႇၸႂ်ႈတိုၵ်းသိုၵ်းတိုၵ်းသိူဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
တမၢၼ်ႇၵၢင်ႁၢဝ်ၼၼ်ႉလၢတ်ႈထႅင်ႈလႄႈဝႃႈ၊ “ၶုၼ်ႁေႃၶမ်းမိူင်း သီးရီးယႃး၊ တၢင်ႇပႃးဢၼ်တၵ်းပေႃႇမႃးထႅင်ႈၼၼ်ႉပဵၼ်ၵူၼ်းဢၼ်ႁၢႆႉဢၼ်မိူၵ်ႈ၊ဢၼ်ဢမ်ႇမီးဢၶႂၢင်ႉဢယေးဢၼ်ပဵၼ်ၶုၼ်ႁေႃၶမ်း၊ယင်းဢမ်ႇထၢင်ႇဢမ်ႇထိူမ်တၵ်းပေႃႇမႃးလႄႈဢဝ်တင်းပရိယႄႇသေလႄႈသိမ်းဢဝ်ဢႃႇၼႃႇဢေႃႈ။-
ၽူႈလႂ်သေၵေႃႉသေၵူၼ်းဢမ်ႇႁဵတ်းၶတ်းၵၼ်တင်းမၼ်းလႆႈ၊ပဵၼ်ၶုၼ်ယဵၸ်ႈပရေႃးႁဵၵ်ႈၽြႃးပဵၼ်ၸဝ်ႈသေၵေႃႈမၼ်းတၵ်းပႄႇၽဵဝ်ႈပႅတ်ႈလႄႈဢဝ်လပ်ႉႁၢႆပႅတ်ႈဢေႃႈ။-
မၼ်းတၵ်းၸၢင်ႈပႅတ်ႉလႅၼ်သေလႄႈႁဵတ်းမိၵ်ႈသႁႃႇယႃႉလူၺ်ႈၵၼ်တင်းၵူၼ်းတၢင်ႇမဵဝ်းသေယဝ်ႉ၊ပိၵ်ႉသမ်ႉမၼ်းဢုပ်ႉပိူင်ႇမိူင်းလဵၵ်ႉမိူင်းၼွႆႉဢွၼ်ႇၵူၺ်းသေၵေႃႈမၼ်းတၵ်းႁႅင်းယႂ်ႇမႃးတိၵ်းတိၵ်းဢေႃႈ။-
မၼ်းဢမ်ႇမွၵ်ႇဢမ်ႇလၢတ်ႈၵႃႈသင်လႄႈမၼ်းၸၢင်ႈၶဝ်ႈၵႃႈၼႂ်းဢိူင်ႇၼႂ်းၵႅၵ်ႈဢၼ်မၢၵ်ႇၶဝ်ႈႁူင်းၼမ်ႉၼမ်ၼႃႇသေပိူၼ်ႈၼၼ်ႉသေယဝ်ႉ၊ႁဵတ်းလွင်ႈတၢင်းဢၼ်ပူႇမၼ်းမွၼ်ႇမၼ်းဢမ်ႇတွၼ်ႉႁဵတ်းၼၼ်ႉဢေႃႈ။ မိူဝ်ႈၼၼ်ႉမၼ်းၸၢင်ႈဢဝ်ဢုၵ်ႉၸႃႇ၊ဢိၵ်ႇတင်းၶူဝ်းၵုၼ်ႇၶူဝ်းသိၼ်ဢၼ်မၼ်းႁိမ်ဢဝ်လႆႈမႃးၸိူဝ်းၼၼ်ႉၽႄမႅင်ႇပၼ်ၵၼ်ဢေႃႈ။ မၼ်းတၵ်းၵျၢမ်ႇပွင်ႁႂ်ႈလႆႈတိုၵ်းတေႃးဝဵင်းဢၼ်မၼ်ႈဢၼ်ၶိူင်ႇတင်းလၢႆသေၵေႃႈ၊ၶိင်ႇၵႃႇလႃႉမၼ်းတၵ်းၸဵဝ်းသုတ်းၸဵဝ်းၵွႆဢေႃႈ။
“မၼ်းၼၼ်ႉတၵ်းမီးတင်းၸႂ်ဢၼ်ႁတ်းႁၢၼ်ၶီႇတပ်ႉသိုၵ်းဢၼ်ယႂ်ႇၼႃႇ ၵႂႃႇတိုၵ်းတေႃးၶုၼ်ႁေႃၶမ်းမိူင်း ဢေးၵျိပ်ႉ၊ လႄႈ၊ၶုၼ်ႁေႃၶမ်းမိူင်း ဢေးၵျိပ်ႉ၊ ၼၼ်ႉတၵ်းႁၢင်ႈႁႅၼ်းတပ်ႉသိုၵ်းဢၼ်ယဵင်ႈၶႅၼ်းႁႅင်းယႂ်ႇၼႃႇလႄႈႁႄႉတိုၵ်းတေႃးဢေႃႈ။ ၵူၺ်းၵႃႈ၊ၶုၼ်ႁေႃၶမ်းမိူင်း ဢေးၵျိပ်ႉ၊ ၼၼ်ႉတၵ်းတေလႆႈၶၢမ်ႇတၢင်းဢၼ်ပႅတ်ႉဢၼ်လႅၼ်လႄႈတၵ်းသုမ်းသိုၵ်းဢေႃႈ။-
ၶဝ်ၸိူဝ်းဢၼ်ယူႇႁိမ်းမၼ်းလႄႈပၼ်တၢင်းၵျၢမ်ႇတီႈမၼ်းၼၼ်ႉတၵ်းယႃႉဢၵျူဝ်းမၼ်းဢေႃႈ။ ႁူဝ်ႁၢၼ်ၵူၼ်းသိုၵ်းမၼ်းတၵ်းလႆႈၶၢမ်ႇတၢင်းဢၼ်ဢဝ်တၢႆၼမ်ၼႃႇလႄႈတပ်ႉသိုၵ်းမၼ်းတင်းလၢႆ၊တၵ်းလႆႈၶၢမ်ႇတၢင်းဢၼ်ပႄႇၽဵဝ်ႈပႅတ်ႈဢေႃႈ။-
ၶုၼ်ႁေႃၶမ်းသွင်ပႃးၼၼ်ႉတၵ်းဢွၼ်ၵၼ်ၼင်ႈတီႈၽိူၼ်ၶဝ်ႈဢၼ်လဵဝ်ၵၼ်လႄႈၵိၼ်ၶူပ်းလူၺ်ႈၵၼ်ဢေႃႈ။ ၵူၺ်းၵႃႈ၊တၢင်းၵျၢမ်ႇတၢင်းပွင်ၶဝ်ၼၼ်ႉဢမ်ႇလီလႄႈၶဝ်တၵ်းပႅတ်ႉၵၼ်လႅၼ်ၵၼ်ဢေႃႈ။ ၼႂ်းဝႃႈၼၼ်သေၵေႃႈ၊တၢင်းၵျၢမ်ႇတၢင်းပွင်ၶဝ်ၼၼ်ႉဢမ်ႇလႆႈပဵၼ်။ လွင်ႈမၼ်းၸမ်ႉ၊ၶိင်ႇၶႃႇၵႃႇလႃႉမၼ်းယင်းဢမ်ႇပႆႇထိုင်ဢေႃႈ။-
ၶုၼ်ႁေႃၶမ်းမိူင်း သီးရီးယႃး၊ ၼၼ်ႉတၵ်းပႃးဢဝ်တင်းဢုၵ်ႉၸႃႇၸေးၸိမ်ႇၼမ်ၼႃႇယူႇသေလႄႈၶိုၼ်းမိူဝ်းၸူးတီႈမိူင်းမၼ်းဢေႃႈ။ မၼ်းၼၼ်ႉဝႆႉၸႂ်ႁႂ်ႈလႆႈယႃႉပႅတ်ႈသႃႇသၼႃႇၵူၼ်းၽြႃးပဵၼ်ၸဝ်ႈၼၼ်ႉသေလႄႈဢၢင်ႈႁဵတ်းၸွမ်းၵႃႈၼင်ႇဢၼ်ဢလူဝ်ႇမၼ်းမီးၼၼ်ႉယဝ်ႉၸင်ႇ၊ၶိုၼ်းမိူဝ်းၸူးတီႈမိူင်းမၼ်းဢေႃႈ။
“ၶိင်ႇၵႃႇလႃႉဢၼ်မၼ်းမၵ်းၶၢၼ်းၼၼ်ႉ၊မၼ်းတၵ်းၶီႇသိုၵ်းၶိုၼ်ႈၸူးတီႈမိူင်း ဢေးၵျိပ်ႉ၊ ထႅင်ႈဢေႃႈ။ ၵူၺ်းၵႃႈ၊ၵမ်းၼႆႉတၵ်းဢမ်ႇပဵၼ်ၸိူဝ်ႉၼင်ႇၵမ်းဢွၼ်တၢင်းၼၼ်ႉ။-
လွင်ႈမၼ်းၸမ်ႉ၊ၵူၼ်းမဵဝ်း ရူဝ်းမႃႉ၊ ၶဝ်တၵ်းႁွတ်ႈမႃးလူၺ်ႈႁိူဝ်းသၢင်းၽေႃးတင်းလၢႆလႄႈႁႄႉၶႅၼ်မၼ်းသေယဝ်ႉ၊မၼ်းတၵ်းၵူဝ်တၵ်းႁႄဢေႃႈ။ “ၵွပ်ႈပိူဝ်ႈၸိူဝ်ႉၼင်ႇၼၼ်လႄႈမၼ်းတၵ်းပႃးတင်းတေႃးသႃႉၶိုၼ်းမိူဝ်းၵႂႃႇႁႂ်ႈလႆႈၶတ်းၸႂ်ၵျူဝ်းၸႃးယႃႉပႅတ်ႈသႃႇသၼႃႇၵူၼ်းၽြႃးပဵၼ်ၸဝ်ႈဢေႃႈ။ မၼ်းတၵ်းႁဵတ်းၸွမ်းတၢင်းၵျၢမ်ႇတၢင်းပွင်ၶဝ်ၸိူဝ်းဢၼ်ၸုၼ်ႉပႅတ်ႈသႃႇသၼႃႇၵူၼ်းၽြႃးပဵၼ်ၸဝ်ႈၼၼ်ႉလႄႈပၼ်တၢင်းၵျၢမ်ႇၼၼ်ႉဢေႃႈ။-
ႁူဝ်ႁၢၼ်ၵူၼ်းသိုၵ်းမၼ်းၵမ်ႈၽွင်ႈတၵ်းဢွၼ်ၵၼ်ႁဵတ်းဢၼ်ဝူၺ်ႇဢၼ်ႁင်ႈတီႈၵျွင်းပိၵ်ႈမၢၼ်ႇၸဝ်ႈဢေႃႈ။ ၶဝ်ၼၼ်ႉတၵ်းဢွၼ်ၵၼ်ပႄႇပႅတ်ႈဝၢတ်ႈတၢင်းဢၼ်သၢၵ်ႈၵၢပ်ႈတၢင်းလူႇဢၼ်ႁဵတ်းၵူႈမိူဝ်ႇၵူႈဝၼ်းတႃႇသေႇၼၼ်ႉပႅတ်ႈလႄႈပူၵ်းတင်ႈၶိူင်ႈပိူင်ဢၼ်လီႁင်ႈဢဵတ်ႇသဵတ်ႇၼၼ်ႉဝႆႉဢေႃႈ။-
ၶုၼ်ႁေႃၶမ်းၼၼ်ႉတၵ်းၶျေႃးဝွၼ်းၶဝ်ၸိူဝ်းဢၼ်ၸုၼ်ႉပႅတ်ႈသႃႇသၼႃႇၶဝ်ယဝ်ႉၸိူဝ်းၼၼ်ႉႁႂ်ႈၶဝ်မႃးၽွမ်ႉၽၢႆႇမၼ်းဢေႃႈ။ ၵူၺ်းၵႃႈ၊ၶဝ်ၸိူဝ်းဢၼ်ႁုၸၵ်းၽြႃးပဵၼ်ၸဝ်ႈၶဝ်ၼၼ်ႉတၵ်းဢဝ်တင်းႁႅင်းယႂ်ႇၼႃႇလႄႈႁႄႉၵင်ႈဢေႃႈ။-
ၶဝ်ၸိူဝ်းဢၼ်မီးပိင်ႇၺႃႇၼၼ်ႉတၵ်းဢွၼ်ၵၼ်သင်ႇသွၼ်ၵူၼ်းၼမ်ၼႃႇဢေႃႈ။ ၵူၺ်းၵႃႈ၊ၼႂ်းၶဝ်ၼၼ်ႉၵမ်ႈၽွင်ႈတၵ်းတေလႆႈလူမ်ႉတၢႆၼႂ်းပၢင်သိုၵ်း၊ဢိၵ်ႇတင်းတၵ်းလႆႈၶၢမ်ႇတၢင်းဢၼ်ဢဝ်ၽႆးတုတ်ႇတၢႆၼၼ်ႉႁိုင်တၢၼ်ႇတၢၼ်ႇဢေႃႈ။ ၵမ်ႈၽွင်ႈသမ်ႉလႆႈၶၢမ်ႇတၢင်းဢၼ်ပိူၼ်ႈၸူၼ်ဢဝ်ႁိမ်ဢဝ်၊ဢိၵ်ႇတင်းလႆႈၶၢမ်ႇတၢင်းဢၼ်တိဢဝ်ၵႂႃႇဢေႃႈ။-
ယၢမ်းမိူဝ်ႈဢၼ်ယင်းတိုၵ်ႉဢဝ်ၶဝ်တၢႆယူႇၼၼ်ႉၵူၼ်းၽြႃးပဵၼ်ၸဝ်ႈတင်းလၢႆတၵ်းတေလႆႈၶၢမ်ႇတၢင်းဢၼ်ၸွႆႈထႅမ်မႃႉၸႃႉဢိတ်းဢွၼ်ႇၼိုင်ႈၵူၺ်းဢေႃႈ။ ၵူၼ်းၼမ်ၼႃႇတၵ်းဢွၼ်ၵၼ်ၸပ်းၸွမ်းၶဝ်ယူႇလူၺ်ႈတၢင်းဢၼ်ၶျေႃးဝွၼ်းဢၼ်ဢမ်ႇသိုဝ်ႈဢမ်ႇယူဝ်းၼၼ်ႉဢေႃႈ။-
ၶဝ်ၸိူဝ်းဢၼ်မီးပိင်ႇၺႃႇၼၼ်ႉၵမ်ႈၽွင်ႈတၵ်းတေလႆႈလူမ်ႉတၢႆဢေႃႈ။ ၵူၺ်းၵႃႈ၊ဢၵျူဝ်းၵျေးၸူးၼၼ်ႉၸမ်ႉ၊ၵူၼ်းတင်းလၢႆတၵ်းဢွၼ်ၵၼ်မူတ်းၸၢင်ႇၶၢဝ်သႂ်ဢေႃႈ။ လွင်ႈတၢင်းၼႆႉတၵ်းပဵၼ်ယူႇၶိူဝ်းၶိူဝ်းယႂ်းယႂ်းတေႃႇထိုင်ႁွတ်ႈတီႈသုတ်းတီႈၵွႆဢၼ်ပဵၼ်ၶိင်ႇၵႃႇလႃႉဢၼ်ၽြႃးပဵၼ်ၸဝ်ႈမၵ်းၶၢၼ်းဝႆႉၼၼ်ႉဢေႃႈ။
“ၶုၼ်ႁေႃၶမ်းမိူင်း သီးရီးယႃး၊ ၼၼ်ႉတၵ်းႁဵတ်းၸွမ်းၵႃႈၼင်ႇဢၼ်ဢလူဝ်ႇမၼ်းမီးၼၼ်ႉလႄႈ၊မၼ်းတၵ်းဢုပ်ႇဝၢဝ်းတူဝ်မၼ်းႁႂ်ႈတူဝ်မၼ်းပဵၼ်ဢၼ်ယဵင်ႈၶႅၼ်းယႂ်ႇမျၢတ်ႈၼႃႇသေၽြႃးတင်းသဵင်ႈတင်းလူင်ဢမ်ႇၵႃး၊ယင်းယူၵ်ႉတူဝ်မၼ်းသုင်ၼႃႇသေၽြႃးပဵၼ်ၸဝ်ႈဢၼ်သုင်မျၢတ်ႈၼႃႇၼၼ်ႉလူးၵွၼ်ႇဢေႃႈ။ မၼ်းတၵ်းတၢတ်ႈၼိူင်ႇလႆႈၸိူဝ်ႉၼင်ႇၼႆယူႇတေႃႇထိုင်ႁွတ်ႈၶိင်ႇၵႃႇလႃႉဢၼ်ၽြႃးပဵၼ်ၸဝ်ႈပၼ်တၢမ်ႇတီႈမၼ်းႁွတ်ႈထိုင်မႃးၼၼ်ႉဢေႃႈ။ ၽြႃးပဵၼ်ၸဝ်ႈတၵ်းတႅပ်းတတ်းမႅၼ်ႈၸွမ်းၵႃႈၼင်ႇဢၼ်မၼ်းၸဝ်ႈၶိုင်ႁၢင်ႈသၢင်ႈပွင်ဝႆႉၼၼ်ႉဢေႃႈ။-
ၶုၼ်ႁေႃၶမ်းၼၼ်ႉတၵ်းဢမ်ႇဝႆႉဢမုတီႈၽြႃးဢၼ်ပူႇမွၼ်ႇမၼ်းၵူဝ်းၵႂၢႆႇတင်းလၢႆ၊ဢိၵ်ႇတင်းတီႈၽြႃးဢၼ်မႄႈယိင်းတင်းလၢႆႁၵ်ႉၸိူဝ်းၼၼ်ႉဢေႃႈ။ မၼ်းတၵ်းႁဵတ်းဢမ်ႇပေႃးၼင်ႇႁိုဝ်တီႈၽြႃးၵူႈသူႇၵူႈပႃးၵွပ်ႈပိူဝ်ႈဢၼ်မၼ်းမၢတ်ႈတူဝ်မၼ်းပဵၼ်ဢၼ်ယႂ်ႇမျၢတ်ႈလိူဝ်တွၼ်းၼႃႇသေပိူၼ်ႈတင်းသဵင်ႈတင်းလူင်ဢေႃႈ။-
မၼ်းတၵ်းယုၵ်ႉယွင်ႈၽြႃးဢၼ်ႁႄႉၶႅၼ်တိူၵ်ႈတီႈတိုၵ်းသိုၵ်းဝႆႉၼႂ်းဢရႃႇၽြႃးမၼ်းလႄႈ၊တၵ်းဢဝ်ငိုၼ်းၶမ်း၊သႅင်မျၢတ်ႈၶိူင်ႈပိူင်ဢၼ်ထိူၵ်ႈၵႃႈထိူၵ်ႈၶၼ်ၼၼ်ႉသၢၵ်ႈလူႇတီႈၽြႃးဢၼ်ပူႇမွၼ်ႇမၼ်းဢမ်ႇႁုၼၼ်ႉဢေႃႈ။-
မၼ်းတၵ်းၸႂ်ႉႁႂ်ႈၶဝ်ၸိူဝ်းဢၼ်ဝႆႈၽြႃးမိူင်းၼွၵ်ႈတင်းလၢႆၼၼ်ႉလုမ်းလႃးတိူၵ်ႈတီႈတိုၵ်းသိုၵ်းဢၼ်မၼ်ႈဢၼ်ၶိူင်ႇတင်းလၢႆဢေႃႈ။ မၼ်းတၵ်းယုၵ်ႉယွင်ႈမုၼ်ၵုင်ႇသရေႇတီႈၶဝ်ၸိူဝ်းဢၼ်ႁပ်ႉတုင်းဢဝ်မၼ်းပဵၼ်ၸဝ်ႈပဵၼ်ၶုၼ်ၼၼ်ႉသေယဝ်ႉ၊ၶၢၼ်းပၼ်ဢရႃႇဢၼ်သုင်လႄႈဢဝ်လိၼ်ၽႄမႅင်ႇပၼ်ႁႂ်ႈပဵၼ်သူးလၢပ်ႈပုၼ်ႈၶဝ်ဢေႃႈ။
“မိူဝ်ႈဢၼ်ၶိင်ႇၵႃႇလႃႉၶုၼ်ႁေႃၶမ်းမိူင်း သီးရီးယႃး၊ ၸမ်တၵ်းသုတ်းတၵ်းၵွႆၼၼ်ႉၶုၼ်ႁေႃၶမ်းမိူင်း ဢေးၵျိပ်ႉ၊ တၵ်းၶီႇသိုၵ်းမႃးတိုၵ်းတေႃးမၼ်းဢေႃႈ။ မိူဝ်ႈၼၼ်ႉၶုၼ်ႁေႃၶမ်းမိူင်း သီးရီးယႃး၊ ၵေႃႈတၵ်းပႃးဢဝ်လေႃႉမႃႉသိုၵ်းလႂ်၊ႁူဝ်ႁၢၼ်ၵူၼ်းသိုၵ်းၶီႇမႃႉလႂ်၊ႁိူဝ်းသၢင်းၽေႃးလႂ်သေလႄႈႁႄႉႁပ်ႉတိုၵ်းတေႃးဢေႃႈ။ မၼ်းတၵ်းတိုၵ်းပႄႉသိမ်းဢဝ်သိုင်ႇၸိုင်ႈဝၢၼ်ႈမိူင်းၼမ်ၼႃႇ မိူၼ်ၸိူဝ်ႉၼင်ႇၼမ်ႉထူမ်ႈလုပ်ႇၵႂႃႇၼၼ်ႉဢေႃႈ။-
မၼ်းယင်းတၵ်းတိုၵ်းတေႃးမိူင်းဢၼ်ၽြႃးပဵၼ်ၸဝ်ႈဝႆႉၵတိၼၼ်ႉလႄႈဢဝ်ၵူၼ်းပဵၼ်မိုၼ်ႇပဵၼ်သႅၼ်တၢႆဢေႃႈ။ ၵူၺ်းၵႃႈ၊မိူင်း ဢေႇတုမ်ႇ၊ မိူင်း မေႃႇၽႃႉ၊ ဢိၵ်ႇတင်းၵူၼ်းမိူင်း ဢမ်ႇမုၼ်ႇ၊ ၸိူဝ်းဢၼ်ယင်းၵိုတ်းယင်းၵျၢၼ်ႇယူႇၼၼ်ႉၸိူဝ်းၼၼ်ႉၸမ်ႉ၊တၵ်းလွတ်ႈဢေႃႈ။-
မိူဝ်ႈဢၼ်မၼ်းတိုၵ်းတေႃးမိူင်းၸိူဝ်းၼၼ်ႉယူႇၼၼ်ႉမိူင်း ဢေးၵျိပ်ႉ၊ ဢမ်ႇလႆႈလွတ်ႈ။-
မၼ်းတၵ်းပိူင်ႇဢဝ်ၽၼ်ႇတႃႇငိုၼ်း၊ၽၼ်ႇတႃႇၶမ်း၊ဢုၵ်ႉၸႃႇဢၼ်ထိူၵ်ႈၵႃႈထိူၵ်ႈၶၼ်ၵႃႈဢၼ်မီးၵႃႈၼႂ်းမိူင်း ဢေးၵျိပ်ႉ၊ ၼၼ်ႉဢေႃႈ။ မၼ်းတၵ်းပႄႉၼႅင်ႇမိူင်း လိပ်ႉပီးယႃး၊ တင်းမိူင်း ဢေႇတီႇဢူဝ်းပီးယႃး၊ ဢေႃႈ။-
မိူဝ်ႈၼၼ်ႉသဵင်ၶၢဝ်ႇဢၼ်ဢွၵ်ႇသေၵႃႈတီႈၽၢႆႇတၢင်းဝၼ်းဢွၵ်ႇ၊ဢိၵ်ႇတင်းၽၢႆႇတၢင်းႁွင်ႇမႃးၼၼ်ႉတၵ်းႁႂ်ႈမၼ်းတူၵ်းၸႂ်ဢေႃႈ။ မၼ်းတၵ်းပႃးတင်းတေႃးသႃႉသေလႄႈဢွၵ်ႇၵႂႃႇဢဝ်ၵူၼ်းတၢႆၼမ်ၼႃႇလူင်လၢင်ဢေႃႈ။-
မၼ်းတၵ်းတႄႇႁဵတ်းသုမ်ႉႁေႃၶမ်းမၼ်းၵႃႈၼႂ်းဝူင်ႈၵၢင်ပၢင်ႇလၢႆႇတင်းလွႆဢၼ်မီးၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။ ၵူၺ်းၵႃႈ၊မၼ်းတၵ်းႁွတ်ႈထိုင်တၢင်းတၢႆလႄႈၽူႈလႂ်ဢမ်ႇၸွႆႈဢမ်ႇထႅမ်မၼ်းလႆႈသေၵေႃႉသေၵူၼ်း၊” ဝႃႈၼင်ႇၼႆဢေႃႈ။
တမၢၼ်ႇၵၢင်ႁၢဝ်ဢၼ်ၼုင်ႈမႆၶူဝ်းၽႃႈပၢၼ်ႇၶျေႃးၼၼ်ႉလၢတ်ႈလႄႈဝႃႈ၊ “ၼႂ်းၶိင်ႇမိူဝ်ႈၼၼ်ႉတမၢၼ်ႇၵၢင်ႁၢဝ်လူင် မိၵ်ႉၶေႇလႃႉ၊ ၸဝ်ႈဢၼ်ပႂ်ႉတူၺ်းၵူၼ်းမဵဝ်းမႂ်းၼၼ်ႉတၵ်းပေႃႇမႃးဢေႃႈ။ မိူဝ်ႈၼၼ်ႉတၵ်းပဵၼ်ၶိင်ႇၵႃႇလႃႉတုၵ်ႉၶႃႉတၢင်းၽၢၼ်မဵဝ်းဢၼ်ယုတ်ႈႁၢႆႉၼႃႇလူင်လၢင်ဢၼ်ဢမ်ႇတွၼ်ႉပဵၼ်မႃးၸႃႉၸဵမ်မိူဝ်ႈမဵဝ်းၵူၼ်းတင်းလၢႆဢမ်ႇပႆႇပဵၼ်မႃးၼၼ်ႉဢေႃႈ။ ၼႂ်းၶိင်ႇၵႃႇလႃႉၼၼ်ႉၵူၼ်းမဵဝ်းမႂ်းၵႃႈဢၼ်ၸိုဝ်ႈသဵင်ၶဝ် ၶဝ်ႈပႃးၼႂ်းၸရၢင်းၽိုၼ်လိၵ်ႈၽြႃးပဵၼ်ၸဝ်ႈၸိူဝ်းၼၼ်ႉတၵ်းဢွၼ်ၵၼ်ႁွတ်ႈထိုင်တၢင်းဢၼ်ၵႄႇသႄႇဢဝ်ဢေႃႈ။-
မိူဝ်ႈၼၼ်ႉ၊ၶဝ်ၼမ်ၼႃႇၸိူဝ်းဢၼ်တၢႆယဝ်ႉၼၼ်ႉတၵ်းဢွၼ်ၵၼ်လုၵ်ႉၶိုၼ်းလိပ်းမႃးသေယဝ်ႉ၊ၵမ်ႈၽွင်ႈလုၵ်ႉၶိုၼ်းလိပ်းမႃးၸူးတီႈဢၼ်ဢသၢၵ်ႈလိပ်းထႃႇဝရႃႉလႄႈ၊ၵမ်ႈၽွင်ႈၸူးတီႈတၢင်းဢၼ်ဢူၵ်းဢၢႆဢၼ်သရေႇလုထႃႇဝရႃႉဢေႃႈ။-
ၶဝ်ၸိူဝ်းဢၼ်မီးပိင်ႇၺႃႇၼၼ်ႉတၵ်းဢွၼ်ၵၼ်ႁိူဝ်ႈႁိူင်းမိူၼ်ၸိူဝ်ႉၼင်ႇဢရွင်ႇသၢႆလႅင်းၽႃႉၵၢင်ႁၢဝ်၊ဢိၵ်ႇတင်းၶဝ်ၸိူဝ်းဢၼ်ၸၢင်ႈသင်ႇသွၼ်ႁႂ်ႈၵူၼ်းတင်းလၢႆၵမ်ၵျၢင်ႉၸွမ်းတြႃးသိုဝ်ႈသိုဝ်ႈတေႃႇတေႃႇၼၼ်ႉတၵ်းႁိူဝ်ႈႁိူင်းမိူၼ်ၸိူဝ်ႉၼင်ႇလၢဝ်တင်းလၢႆတႃႇသေႇဢမ်ႇထၢတ်ႇဢေႃႈ၊” ဝႃႈၼင်ႇၼႆဢေႃႈ။
မၼ်းလၢတ်ႈတီႈၵဝ်လႄႈဝႃႈ၊ “ တၢၼ်ႇယေႇလႃႉ၊ ႟။ မႂ်းႁူမ်ႇဝႆႉဢိုတ်းဝႆႉၵႂၢမ်းၸဝ်ႈၸိူဝ်းၼၼ်ႉသေလႄႈတွၵ်ႇတၼ်းသိၵ်ႈတီႈၽိုၼ်လိၵ်ႈဝႆႉတေႃႇထိုင်ႁွတ်ႈၶိင်ႇၵႃႇလႃႉတီႈသုတ်းတီႈၵွႆပုၼ်ႉတႃႉ။ ၵူၼ်းၼမ်ၼႃႇတၵ်းလႅၼ်ႈၵႂႃႇလႅၼ်ႈမႃးလႄႈသွၵ်ႈႁႃပိင်ႇၺႃႇႁႂ်ႈယႂ်ႇၽႄတူဝ်းတွၼ်းမႃးဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ ၵဝ် တၢၼ်ႇယေႇလႃႉ၊ လႆႈႁၼ်သွင်ၸဝ်ႈသွင်ပႃးၸုၵ်းယူႇၵႃႈတီႈၽင်ႇၼမ်ႉယေႈၸဝ်ႈၸုၵ်းယူႇယေႈၽၢႆႇဢေႃႈ။-
ပႃးၼိုင်ႈၼၼ်ႉတွင်ႈထၢမ်တီႈၵူၼ်းၵေႃႉဢၼ်ၼုင်ႈၶူဝ်းၽႃႈပၢၼ်ႇၶျေႃးဢၼ်ၸုၵ်းယူႇၽၢႆႇႁူဝ်ၼမ်ႉႁမ်ႉၵႆတၢၼ်ႇတၢၼ်ႇၼၼ်ႉလႄႈဝႃႈ၊ “ၸူဝ်ႈဢၼ်လွင်ႈတၢင်းဢၼ်လီဢၢမ်းၸိူဝ်းၼႆႉဢမ်ႇပႆႇသဵင်ႈပႆႇမူတ်းၼၼ်ႉၸိုင်၊တၵ်းႁိုင်ၵႃႈႁိုဝ်လူးၵွၼ်ႇ၊” ဝႃႈၼင်ႇၼႆဢေႃႈ။
တမၢၼ်ႇၵၢင်ႁၢဝ်ပႃးၼၼ်ႉၵေႃႈ ဢဝ်မိုဝ်းမၼ်းယူၵ်ႉၶိုၼ်ႈၽႃႉတင်းသွင်ၶွၼ်သေယဝ်ႉ၊ဢဝ်ၽြႃးဢၼ်ဢသၢၵ်ႈလိပ်းယူႇၵမ်ႇၽႃႇသိုပ်ႇသိုပ်ႇတၢမ်တၢမ်ၼၼ်ႉတိူင်ႇဝႃႈလႄႈဝႃႈ၊ “တၵ်းပဵၼ်သၢမ်ပီပၢႆၶိုင်ႈဢေႃႈ။ ၼႂ်းမိူဝ်ႈဢၼ်တၢင်းဢၼ်ၼိၵ်ႈၸၢၵ်ႈငႅၼ်းသႄးတီႈၵူၼ်းၽြႃးပဵၼ်ၸဝ်ႈတင်းလၢႆယဝ်ႉတူဝ်ႈၵႂႃႇယဝ်ႉၼၼ်ႉ၊လွင်ႈတၢင်းၵူႈၸိူဝ်ႉၵူႈပိူင်တင်းသဵင်ႈတင်းမူတ်းတၵ်းပဵၼ်မႃးဢေႃႈ၊” ဝႃႈၼင်ႇၼႆဢေႃႈ။
ၵဝ်ငိၼ်းၵႂၢမ်းၼၼ်ႉသေၵေႃႈၵဝ်ဢမ်ႇႁုဢမ်ႇၸႅင်ႈ။ ပိူဝ်ႈၼႆလႄႈၵဝ်ၸင်ႇထၢမ်လႄႈဝႃႈ၊ “ၸဝ်ႈတီႈၶႃႈ႟။ တီႈသဵင်ႈတီႈမူတ်းလွင်ႈတၢင်းၸိူဝ်းၼႆႉၼႆႉတၵ်းပဵၼ်ၸိူဝ်ႉၼင်ႇႁိုဝ်ၶႃႈ၊” ဝႃႈၼင်ႇၼႆသေယဝ်ႉ။
ၵေႃႉၼၼ်ႉလၢတ်ႈလႄႈဝႃႈ၊ “ တၢၼ်ႇယေႇလႃႉ၊ ႟။ မႂ်းၵႂႃႇလႆႈယဝ်ႉ။ ၵႂၢမ်းၸိူဝ်းၼႆႉပဵၼ်ၵႂၢမ်းဢၼ်သိူင်ႇဝႆႉဢမ်ဝႆႉသေလႄႈတွၵ်ႇတၼ်းသိၵ်ႈဝႆႉတေႃႇထိုင်ႁွတ်ႈၶိင်ႇၵႃႇလႃႉတီႈသုတ်းတီႈၵွႆပုၼ်ႉဢေႃႈ။-
ၵူၼ်းၵမ်ႈၼမ်တၵ်းဢွၼ်ၵၼ်ႁွတ်ႈထိုင်တၢင်းဢၼ်မူတ်းသႂ်ၶၢဝ်ၸၢင်ႇဢေႃႈ။ ၶဝ်ၸိူဝ်းဢၼ်ဢမ်ႇတြႃးၼၼ်ႉတၵ်းဢမ်ႇႁုဢမ်ႇၸႅင်ႈလႆႈလႄႈတၵ်းႁဵတ်းၸွမ်းဢၼ်ဢမ်ႇတြႃးယူႇဢေႃႈ။ ၶဝ်ၸိူဝ်းဢၼ်မီးပိင်ႇၺႃႇၼၼ်ႉၵူၺ်းတၵ်းဢွၼ်ၵၼ်ႁုၸႅင်ႈဢေႃႈ။
“ၸႃႉဢဝ်သေၶိင်ႇဝၼ်းဢၼ်ႁႂ်ႈပႄႇပႅတ်ႈတၢင်းဢၼ်သၢၵ်ႈၵၢပ်ႈတၢင်းလူႇၵူႈမိူဝ်ႈၵူႈဝၼ်းတႃႇသေႇၼၼ်ႉသေယဝ်ႉ၊သမ်ႉႁႂ်ႈဢဝ်ၶိူင်ႈဢၼ်လီႁင်ႈဢဵတ်ႇသဵတ်ႇၼၼ်ႉတင်ႈဝႆႉၼၼ်ႉတၵ်းႁိုင်ႁဵင်သွင်ပၢၵ်ႇပၢႆၵဝ်ႈသိပ်းဝၼ်းဢေႃႈ။-
ၵေႃႉဢၼ်ပႂ်ႉသဵတ်ႈၸႃႇယူႇလႄႈႁွတ်ႈမႃးထိုင်ႁဵင်သၢမ်ပၢၵ်ႇသၢမ်သိပ်းပၢႆႁႃႈဝၼ်းၼၼ်ႉၸမ်ႉ၊မီးမၢင်ႇၵလႃႇဢေႃႈ။
“ တၢၼ်ႇယေႇလႃႉ၊ ႟။ မႂ်းၸမ်ႉ၊ပႂ်ႉသဵတ်ႈၸႃႇတေႃႇထိုင်ႁွတ်ႈတီႈသုတ်းတီႈၵွႆတႃႉ။ လိုၼ်းၼၼ်ႉမႂ်းတၵ်းတၢႆဢေႃႈ။ ၵူၺ်းၵႃႈ၊မႂ်းတၵ်းလုၵ်ႉၶိုၼ်းႁႂ်ႈလႆႈႁပ်ႉဢဝ်သူးၵႃႈၼႂ်းၶိင်ႇၵႃႇလႃႉတီႈသုတ်းတီႈၵွႆၼၼ်ႉဢေႃႈ၊” ဝႃႈၼင်ႇၼႆဢေႃႈ။ ၵျၢမ်းလိၵ်ႈပရေႃးၽႅတ်ႈတၢၼ်ႇယေႇလႃႉယဝ်ႉယဝ်ႉဢေႃႈ။
ၼႆႉၸမ်ႉ၊ပဵၼ်ၼုၵ်ႈၵပၢတ်ႈ ထႃႇဝရႃႉၽြႃး၊ ဢၼ်ပျႃႇတိၵ်ႈဝႆႉတီႈ ႁူဝ်းသေႇ၊ လုၵ်ႈၸၢႆး ပေႇရိ၊ ၼႂ်းၸူဝ်ႈပၢၼ်ၶုၼ် ဢူဝ်းၸိယႃႉ၊ ၶုၼ် ယူဝ်းထမ်ႇ၊ ၶုၼ် ဢႃႇၶတ်ႉ၊ တင်းၶုၼ် ႁေႇၸၵိ၊ ၶဝ်ပဵၼ်ၶုၼ်ႁေႃၶမ်းၵႃႈၼႂ်းမိူင်း ယုတႃႉ၊ ဢိၵ်ႇတင်း ယေႇရူဝ်းပုမ်ႇ၊ လုၵ်ႈၸၢႆး ယႁေႃးသႃႉ၊ ပဵၼ်ၶုၼ်ႁေႃၶမ်းၵႃႈၼႂ်းမိူင်း ဢိသရေး၊ ၼၼ်ႉဢေႃႈ။
မိူဝ်ႈဢၼ် ထႃႇဝရႃႉၽြႃး၊ ဢဝ် ႁူဝ်းသေႇ၊ သေလႄႈႁေႃးၵႂၢမ်းပျႃႇတိၵ်ႈတီႈၵူၼ်းမဵဝ်း ဢိသရေး၊ ဢွၼ်တၢင်းသေပိူၼ်ႈၼၼ်ႉ၊မၼ်းၸဝ်ႈမီးဢမိင်ႉတီႈ ႁူဝ်းသေႇ၊ လႄႈဝႃႈ၊ “မႂ်းၵႂႃႇလႄႈဢဝ်မႄႈမွၵ်ႇယႃႈမႃးပဵၼ်မေးမႂ်းတႃႉ။ မေးမႂ်းၼၼ်ႉတၵ်းသဵတ်ႈၸႃႇလုလႄႈလုၵ်ႈလၢင်းမႂ်းၸိူဝ်းၼၼ်ႉၵေႃႈတၵ်းပဵၼ်မိူၼ်မၼ်းဢေႃႈ။ မိူၼ်ၸိူဝ်ႉၼင်ႇၼၼ်ၵူၼ်းၵဝ်တင်းလၢႆၸုၼ်ႉပႅတ်ႈၵဝ်သေလႄႈပဵၼ်ၶဝ်ၸိူဝ်းဢၼ်သဵတ်ႈၸႃႇလုဢေႃႈ၊” ဝႃႈၼင်ႇၼႆဢေႃႈ။
ၵွပ်ႈၼႆလႄႈ ႁူဝ်းသေႇ၊ ဢဝ်မႄႈယိင်းဢၼ်လႆႈႁွင်ႉႁဵၵ်ႈၸိုဝ်ႈဝႃႈ၊ ၵေႃးမႃႇ၊ လုၵ်ႈယိင်း တိပလိမ်ႇ၊ သေယဝ်ႉ၊မၼ်းၼၼ်ႉပႃးပတိၵ်ႈသၼ်ႇထေႇလႄႈၵိူတ်ႇလဵင်ႉလုၵ်ႈၸၢႆးမႃးဢေႃႈ။-
ထႃႇဝရႃႉၽြႃး၊ မီးဢမိင်ႉတီႈမၼ်းလႄႈဝႃႈ၊ “ႁွင်ႉႁဵၵ်ႈၸိုဝ်ႈလုၵ်ႈၸၢႆးၼၼ်ႉဝႃႈ၊ ယေႇၸရေး၊ ဝႃႈၼႆတႃႉ။ လွင်ႈမၼ်းၸမ်ႉ၊ဢမ်ႇႁိုင်ဢမ်ႇၼၢၼ်းၵဝ်တၵ်းပၼ်တၢမ်ႇတီႈၶုၼ်ႁေႃၶမ်းၵူၼ်းမဵဝ်း ဢိသရေး၊ ၵွပ်ႈပိူဝ်ႈဢပျတ်ႈဢၼ်ပူႇမွၼ်ႇၶဝ် ယေႇႁု၊ ႁဵတ်းမိူဝ်ႈမၼ်းဢဝ်ၵူၼ်းတၢႆၵႃႈတီႈဝဵင်း ယေႇၸရေး၊ ၼၼ်ႉဢေႃႈ။ ၵဝ်တၵ်းႁႂ်ႈၶိူဝ်းၶုၼ်ႁေႃၶမ်း ယေႇႁု၊ ၼၼ်ႉႁၢႆဝၢႆးဢေႃႈ။-
ၼင်ႇၼၼ်လႄႈၵႃႈၼႂ်းၶူင်ႈႁူၺ်ႈ ယေႇၸရေး၊ ၼၼ်ႉၵဝ်တၵ်းယႃႉတၼ်းၶူဝ်းသိုၵ်းၵူၼ်းမဵဝ်း ဢိသရေး၊ ပႅတ်ႈဢေႃႈ၊” ဝႃႈၼင်ႇၼႆဢေႃႈ။
ၵေႃးမႃႇ၊ ၼၼ်ႉသမ်ႉၵိူတ်ႇလဵင်ႉလုၵ်ႈမႃးထႅင်ႈၵေႃႉၼိုင်ႈလႄႈ၊ၵေႃႉၼႆႉၸမ်ႉ၊ပဵၼ်လုၵ်ႈယိင်းဢေႃႈ။ ထႃႇဝရႃႉၽြႃး၊ မီးဢမိင်ႉတီႈ ႁူဝ်းသေႇ၊ လႄႈဝႃႈ၊ “ႁွင်ႉႁဵၵ်ႈၸိုဝ်ႈမၼ်း လေႃႇရုႁႃႇမႃႇ၊ တႃႉ။ လွင်ႈမၼ်းၸမ်ႉ၊ၵမ်းလိုၼ်းၵဝ်ယင်းဢမ်ႇဢဵတ်းလူႁၵ်ႉပႅင်းၵူၼ်းမဵဝ်း ဢိသရေး၊ လႄႈတၵ်းဢမ်ႇပွႆႇလွတ်ႈဢပျတ်ႈၶဝ်။-
ၵူၼ်းမဵဝ်း ယုတႃႉ၊ ၸမ်ႉ၊ၵဝ်တၵ်းဢဵတ်းလူႁၵ်ႉပႅင်းဢေႃႈ။ ၵဝ်၊ ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်ၼၼ်ႉတၵ်းၵႄႇသႄႇၶျွတ်ႈဢဝ်ၶဝ်ဢေႃႈ။ ၵူၺ်းၵႃႈ၊ၵဝ်တေဢမ်ႇဢဝ်သိုၵ်းဢဝ်သိူဝ်၊ဢမ်ႇဢဝ်လၢပ်ႇ၊ဢမ်ႇဢဝ်ၵၢင်ႇဢဝ်ပိုၼ်၊ဢမ်ႇဢဝ်မႃႉဢိၵ်ႇတင်းၵူၼ်းသိုၵ်းၶီႇမႃႉသေယဝ်ႉ၊မႃးၵႄႇသႄႇဢဝ်ၶဝ်လႃးလႃး၊” ဝႃႈၼင်ႇၼႆဢေႃႈ။
လိုၼ်းသေဢၼ် ၵေႃးမႃႇ၊ ႁႂ်ႈ လေႃႇရုႁႃႇမႃႇ၊ ၽၢတ်ႇၼူမ်းယဝ်ႉၼၼ်ႉသမ်ႉပႃးပတိၵ်ႈသၼ်ႇထေႇထႅင်ႈလႄႈၵိူတ်ႇလဵင်ႉလုၵ်ႈၸၢႆးထႅင်ႈဢေႃႈ။-
ထႃႇဝရႃႉၽြႃး၊ မီးဢမိင်ႉတီႈ ႁူဝ်းသေႇ၊ လႄႈဝႃႈ၊ “ႁွင်ႉႁဵၵ်ႈၸိုဝ်ႈမၼ်း လေႃးဢမ်ႇမိ၊ တႃႉ။ လွင်ႈမၼ်းၸမ်ႉ၊ၵူၼ်းမဵဝ်း ဢိသရေး၊ တင်းလၢႆဢမ်ႇၸႂ်ႈၵူၼ်းၵဝ်ယဝ်ႉ။ ၵဝ်ၵေႃႈဢမ်ႇၸႂ်ႈၽြႃးပဵၼ်ၸဝ်ႈၶဝ်ယဝ်ႉ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ၵူၼ်းမဵဝ်း ဢိသရေး၊ တင်းလၢႆတၵ်းပဵၼ်ဢၼ်ၼမ်ၵိုၼ်းၼႃႇလူင်လၢင်မိူၼ်ၸိူဝ်ႉၼင်ႇမဵတ်ႉႁိၼ်မဵတ်ႉသၢႆးၼမ်ႉသမ်ႇမုၵ်ႈတြႃႇဢၼ်ဢမ်ႇတူင်တူၺ်းလႆႈဢမ်ႇၼပ်ႉဢၢၼ်ႇလႆႈၼၼ်ႉဢေႃႈ။ ဝၼ်းမိူဝ်ႈလဵဝ်ၼႆႉၸိုင်၊ၽြႃးပဵၼ်ၸဝ်ႈလၢတ်ႈတီႈၶဝ်လႄႈဝႃႈ၊ “သူဢမ်ႇၸႂ်ႈၵူၼ်းၵဝ်” ဝႃႈၼႆသေၵေႃႈတၵ်းမီးၶိင်ႇဢၼ်လၢတ်ႈတီႈၶဝ်လႄႈဝႃႈ၊ “သူပဵၼ်လုၵ်ႈလၢင်းၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉဢေႃႈ၊” ဝႃႈၼင်ႇၼႆဢေႃႈ။-
ၵူၼ်းမဵဝ်း ယုတႃႉ၊ ဢိၵ်ႇတင်းၵူၼ်းမဵဝ်း ဢိသရေး၊ တၵ်းၶိုၼ်းၽွမ်ႉၸႂ်ၵၼ်ဢေႃႈ။ ၶဝ်တၵ်းဢွၼ်ၵၼ်ယုၵ်ႉယွင်ႈၶုၼ်ပႃးလဵဝ်ၵူၺ်းပုၼ်ႈၶဝ်လႄႈၶဝ်တၵ်းၶိုၼ်ႈယႂ်ႇမႂ်ႇသုင်မႃးၶိုၼ်းဢေႃႈ။ တၵ်းၶိုၼ်းမၢၵ်ႈမီးလီပဵၼ်မႃးၵႃႈၼႂ်းမိူင်းၶဝ်ဢေႃႈ။ မိုဝ်ႉဝၼ်း ယေႇၸရေး၊ ၼၼ်ႉတၵ်းပဵၼ်ဝၼ်းဢၼ်ယႂ်ႇမျၢတ်ႈဢေႃႈ။
ပိူဝ်ႈၼႆလႄႈသမ်ႉၶိုၼ်းႁွင်ႉတီႈပီႈဢၢႆႈၼွင်ႉၸၢႆးမဵဝ်း ဢိသရေး၊ သူၼၼ်ႉဝႃႈ၊ “ၵူၼ်းၽြႃးပဵၼ်ၸဝ်ႈ၊” ဝႃႈၼႆသေလႄႈသမ်ႉႁွင်ႉတီႈပီႈသၢဝ်ၼွင်ႉယိင်းသူလႄႈဝႃႈ၊ “လုၵ်ႈယိင်းဢၼ်လႆႈႁပ်ႉဢဝ်တၢင်းႁၵ်ႉမႅတ်ႈတႃႇ၊” ဝႃႈၼင်ႇၼႆတႃႉ။
လုၵ်ႈလၢင်းၵဝ်ၶဝ်႟။ တွင်းပၢၼ်ႇလႄႈၸူဝ်းဢဝ်မႄႈသူတႃႉ။ မၼ်းၼၼ်ႉဢမ်ႇပဵၼ်မေးၵဝ်ယဝ်ႉ၊ၵဝ်ၵေႃႈဢမ်ႇပဵၼ်ၽူဝ်မၼ်းယဝ်ႉ။ တွင်းပၢၼ်ႇလႄႈၸူဝ်းဢဝ်ႁႂ်ႈမၼ်းဝႄႈပႅတ်ႈမေႇထုင်ႇဢၼ်ဢမ်ႇတြႃးမၼ်း၊ဢိၵ်ႇတင်းၵၢၼ်မႄႈမွၵ်ႇယႃႈမၼ်းၸိူဝ်းၼၼ်ႉတႃႉ။-
ပေႃးမၼ်းယင်းဢမ်ႇဝႄႈပႅတ်ႈၸိုင်၊ၵဝ်တၵ်းထွတ်ႇၶူဝ်းၼုင်ႈမၼ်းပႅတ်ႈႁႂ်ႈမၼ်းပဵၼ်တူဝ်ပူၺ်ယူႇမိူၼ်ၸိူဝ်ႉၼင်ႇဝၼ်းဢၼ်မၼ်းၵိူတ်ႇလဵင်ႉမႃးၼၼ်ႉဢေႃႈ။ ၵဝ်တၵ်းႁႂ်ႈမၼ်းပဵၼ်မိူၼ်ၸိူဝ်ႉၼင်ႇလိၼ်ဢၼ်ႁႅင်ႈသေလႄႈတႅၵ်ႇၶၢပ်ႇၼၼ်ႉ၊ႁႂ်ႈမၼ်းတၢႆလူၺ်ႈတၢင်းဢၼ်ယၢၵ်ႇၼမ်ႉယၢၵ်ႇၼၢႆးဢေႃႈ။-
လုၵ်ႈလၢင်းမၼ်းၸိူဝ်းၼၼ်ႉၵေႃႈၵဝ်တၵ်းဢမ်ႇဢဵတ်းလူႁၵ်ႉပႅင်းၶဝ်၊ၵွပ်ႈပိူဝ်ႈၶဝ်ပဵၼ်လုၵ်ႈလၢင်းမႄႈမွၵ်ႇယႃႈလႄႈ၊-
မႄႈၶဝ်ၼၼ်ႉပဵၼ်မႄႈမွၵ်ႇယႃႈသေပႃးပတိၵ်ႈသၼ်ႇထေႇလႄႈၶဝ်ၼၼ်ႉႁဵတ်းဢမုဢၼ်လီဢူၵ်းလီဢၢႆလႄႈတူဝ်မၼ်းၵေႃႈလၢတ်ႈလႄႈဝႃႈ၊ “ၵဝ်တၵ်းၵႂႃႇၸွမ်းၸုၵဝ်တင်းလၢႆ၊ပိူဝ်ႈဢၼ်ၶဝ်ၸၢင်ႈပၼ်ၶဝ်ႈၼမ်ႉတၢင်းၵိၼ်လႂ်၊ၶူဝ်းဢၼ်တေႃးလူၺ်ႈၶူၼ်သူဝ်း၊ဢိၵ်ႇတင်းၶူဝ်းပိၵ်ႈၶျေႃးလႂ်၊ၼမ်ႉမၼ်းသၢၼ်ႇလုၼ်ႇတင်းၼမ်ႉမၢၵ်ႇၸပိတ်ႉလႂ်တီႈၵဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵွပ်ႈပိူဝ်ႈၼႆလႄႈၵဝ်တၵ်းဢဝ်တူၼ်ႈၶိူဝ်းၼၢမ်ႁဵတ်းႁူဝ်ႉလွမ်ႉမၼ်း၊ဢိၵ်ႇတင်းႁဵတ်းၽႃဢုတ်ႇဢိုတ်းသဵၼ်ႈတၢင်းမၼ်းဢေႃႈ။-
မၼ်းတၵ်းလႅၼ်ႈၸွမ်းၸုမၼ်းတင်းလၢႆၵေႃႈဢမ်ႇၶိုတ်း။ မၼ်းတၵ်းသွၵ်ႈႁႃၶဝ်ၵေႃႈဢမ်ႇထူပ်းဢမ်ႇႁၼ်။ မိူဝ်ႈၼၼ်ႉမၼ်းလၢတ်ႈလႄႈဝႃႈ၊ “ၵဝ်တၵ်းၶိုၼ်းမိူဝ်းၵႂႃႇၸူးတီႈၽူဝ်ၵဝ်ႇၵဝ်ၼၼ်ႉဢေႃႈ။ တီႈယူႇဢွၼ်တၢင်းၼၼ်ႉယဵင်ႈၶႅၼ်းလီၼႃႇသေတီႈယူႇမိူဝ်ႈလဵဝ်ၼႆႉဢေႃႈ၊” ဝႃႈၼင်ႇၼႆဢေႃႈ။
မၼ်းယင်းဢမ်ႇႁုလွင်ႈဢၼ်ၵဝ်ပၼ်ၶဝ်ႈပိူၵ်ႇၶဝ်ႈသၢၼ်၊ၼမ်ႉမၢၵ်ႇၸပိတ်ႉ၊ၼမ်ႉမၼ်းသၢၼ်ႇလုၼ်ႇ၊ဢိၵ်ႇတင်းငိုၼ်းၶမ်းဢၼ်မၼ်းသုင်းသွင်ႇၼႂ်းတၢင်းဢၼ်ဝႆႈ ၽြႃးပႃႇလႃႉ၊ ၼၼ်ႉလူင်ပႄႇ။-
ပိူဝ်ႈဢၼ်ပဵၼ်ၼင်ႇၼႆလႄႈၵဝ်တၵ်းၶိုၼ်းသိမ်းဢဝ်လၢၵ်ႈသွင်ႇၵဝ်ဢၼ်ပဵၼ်ၶဝ်ႈပိူၵ်ႇတင်းၼမ်ႉမၢၵ်ႇၸပိတ်ႉၼႂ်းၶိင်ႇမိူဝ်ႈဢၼ်ပၢတ်ႇၶဝ်ႈၼၼ်ႉ၊ဢိၵ်ႇတင်းၵဝ်တၵ်းၶိုၼ်းသိမ်းဢဝ်ၶူၼ်သူဝ်း၊ဢိၵ်ႇတင်းပၢၼ်ႇဢၼ်ၵဝ်ပၼ်ႁႂ်ႈလႆႈတေႃးပဵၼ်ၶူဝ်းၼုင်ႈၶူဝ်းမႆမၼ်းၼၼ်ႉဢေႃႈ။-
ၵဝ်တၵ်းထွတ်ႇပႅတ်ႈၶူဝ်းၼုင်ႈမၼ်းႁႂ်ႈပဵၼ်တူဝ်ပူၺ်ယူႇၵႃႈတီႈၽၢႆႇၼႃႈၸုမၼ်းတင်းလၢႆလႄႈဢမ်ႇမီးၵေႃႉဢၼ်ၵႄႇသႄႇဢဝ်မၼ်းသေၵႃႈၼႂ်းႁႅင်းတၼ်းၶူဝ်းၵဝ်လႆႈ။-
ၵဝ်တၵ်းႁႂ်ႈတၢင်းဢၼ်မၼ်းၶၢမ်ႇပွႆးမူၼ်ႈပွႆးပျေႃႇဢၼ်ဝႃႈပွႆးပီမႂ်ႇ၊ပွႆးလိူၼ်မႂ်ႇမၼ်း၊ဢိၵ်ႇတင်းဝၼ်းၵမ်သိၼ်မၼ်းလႄႈပွႆးထုင်းၽိင်ႈမၼ်းၵႃႈမီးၼၼ်ႉထၢတ်ႇၵိုတ်းၵႂႃႇဢေႃႈ။-
ၵဝ်တၵ်းယႃႉၽဵဝ်ႈသူၼ်မၢၵ်ႇၸပိတ်ႉတင်းသူၼ်မၢၵ်ႇလိူဝ်ႇမၼ်းၸိူဝ်းဢၼ်မၼ်းဝႃႈ၊ၸုႁၵ်ႉမၼ်းတင်းလၢႆပၼ်ဝႆႉပဵၼ်လၢၵ်ႈသွင်ႇၼၼ်ႉသေယဝ်ႉ၊ႁႂ်ႈပဵၼ်ထိူၼ်ႇႁူၵ်ႉထိူၼ်ႇႁၢမ်း၊တီႈဢၼ်တူဝ်ထိူၼ်ႇႁၢႆႉတင်းလၢႆဢွၼ်ၵၼ်ၶူပ်းၵိၼ်တူၼ်ႈမၢၵ်ႇၸိူဝ်းၼၼ်ႉဢေႃႈ။-
ၵဝ်တၵ်းၸီႇယၢင်ႇဢပျတ်ႈၵွပ်ႈပိူဝ်ႈမိုဝ်ႉဝၼ်းဢၼ်မၼ်းလူင်လိုမ်းၵဝ်၊ယၢမ်းမိူဝ်ႈဢၼ်မၼ်းၽဝ်ၼၢမ်ႇသႃႇၵႃႈတီႈ ၽြႃးပႃႇလႃႉ၊ ၼၼ်ႉ၊ဢိၵ်ႇတင်းမိူဝ်ႈဢၼ်မၼ်းဢဝ်ၶူဝ်းသႅင်ၶူဝ်းၶမ်းႁၢင်ႈၶိူင်ႈသေလႄႈလိုပ်ႈလမ်းၸွမ်းၸုႁၵ်ႉမၼ်းၸိူဝ်းၼၼ်ႉၼၼ်ႉဢေႃႈ၊ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ၼႂ်းဝႃႈၼၼ်သေၵေႃႈၵဝ်တၵ်းဢဝ်မၼ်းၵႂႃႇၵႃႈၼႂ်းထိူၼ်ႇၼႂ်းၶိူဝ်းထႅင်ႈသေလႄႈလၢတ်ႈတေႃႇမၼ်းလူၺ်ႈၵႂၢမ်းဢၼ်ထုၵ်ႇၸႂ်ၵျိူၵ်ႈၸႂ်မၼ်းဢေႃႈ။-
ၵဝ်တၵ်းဢဝ်သူၼ်မၢၵ်ႇၸပိတ်ႉတင်းလၢႆဢၼ်မၼ်းမီးၼၼ်ႉၶိုၼ်းပၼ်တီႈမၼ်းသေယဝ်ႉ၊သမ်ႉႁဵတ်းၶူင်ႈႁူၺ်ႈ ဢႃႇၶေႃႇ၊ ႁႂ်ႈပဵၼ်ၽၵ်းတူဢၼ်မုင်ႈထႃႈမွင်းထႃႈတီႈမၼ်းဢေႃႈ။ မၼ်းတၵ်းၶိုၼ်းလီတေႃႇၵဝ်ၵႃႈတီႈၼၼ်ႈမိူၼ်ၸိူဝ်ႉၼင်ႇၸူဝ်ႈဢၼ်ဢသၢၵ်ႈမၼ်းယင်းၼုမ်ႇၼႂ်းၶိင်ႇဝၼ်းဢၼ်မၼ်းဢွၵ်ႇသေၵႃႈတီႈမိူင်း ဢေးၵျိပ်ႉ၊ မႃးၼၼ်ႉဢေႃႈ။-
ထႃႇဝရႃႉၽြႃး၊ လၢတ်ႈလႄႈဝႃႈ၊ၼႂ်းဝၼ်းၼၼ်ႉ၊မၼ်းတၵ်းႁွင်ႉၵဝ်ဝႃႈ၊ “ၽူဝ်” လႄႈၵမ်းလိုၼ်းတၵ်းဢမ်ႇႁွင်ႉၵဝ်ဝႃႈ၊ “ပႃႇလႃႉ။-”
ၵဝ်တၵ်းဢမ်ႇၶိုၼ်းပၼ်ဢၶႂၢင်ႉႁႂ်ႈမၼ်းႁွင်ႉၼႃႇမႃႉၸိုဝ်ႈသဵင် ပႃႇလႃႉ၊ ၼၼ်ႉထႅင်ႈ။
ၼႂ်းမိုဝ်ႉဝၼ်းၼၼ်ႉ၊ၵဝ်တၵ်းႁဵတ်းပတိၺိၺ်ႇလူၺ်ႈၵၼ်တင်းတူဝ်ထိူၼ်ႇႁၢႆႉလႂ်၊ဢိၵ်ႇတင်းၼူၵ်ႉတင်းလၢႆ၊တူဝ်ဢၼ်ၸၢင်ႈလိူၼ်ႈၸၢင်ႈၵၢၼ်းလႂ်၊ပုၼ်ႈလွင်ႈၼင်ႇႁိုဝ်ၶဝ်တၵ်းဢမ်ႇႁဵတ်းၽေးဢၼ်ႇတရေႇသႂ်ႇၵႃႈတီႈၵူၼ်းၵဝ်တင်းလၢႆၼၼ်ႉဢေႃႈ။ ၵဝ်တၵ်းပႄႇပႅတ်ႈၶိူင်ႈလၢၵ်ႈၼၢၵ်ႈတိုၵ်းသိုၵ်းတင်းလၢႆဢၼ်ဝႃႈ၊လၢပ်ႇလႅဝ်းလႂ်၊ၵၢင်ႇလႂ်သေၵႃႈၼိူဝ်လိၼ်မိူင်းသေယဝ်ႉ၊ပၼ်ဢၶႂၢင်ႉႁႂ်ႈၵူၼ်းၵဝ်တင်းလၢႆလႆႈယူႇလူင်ႉလီလွတ်ႈလီဢေႃႈ။
မဵဝ်း ဢိသရေး၊ ႟။ ၵဝ်တၵ်းသိမ်းဢဝ်မႂ်းမႃးပဵၼ်မေးၵဝ်ဢေႃႈ။ ၵဝ်တၵ်းသိုဝ်ႈတေႃႇလႄႈပႂ်ႉသဵတ်ႈၸႃႇဢေႃႈ။ ၵဝ်တၵ်းၼႄပျႃးတၢင်းႁၵ်ႉမႅတ်ႈတႃႇဢၼ်မၼ်ႈၶိူင်ႇ၊ဢိၵ်ႇတင်းၵရုၼႃႇလႄႈ သိမ်းဢဝ်မႂ်းဝႆႉႁႂ်ႈပဵၼ်ပုၼ်ႈၵဝ်တႃႇသေႇဢေႃႈ။
ၵဝ်တၵ်းပႂ်ႉသဵတ်ႈၸႃႇလႄႈသိမ်းဢဝ်မႂ်းဝႆႉပုၼ်ႈၵဝ်သေယဝ်ႉ၊ မႂ်းတၵ်းႁုၸၵ်းၵဝ်ပဵၼ် ထႃႇဝရႃႉၽြႃး၊ ဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ၼႂ်းမိုဝ်ႉဝၼ်းၼၼ်ႉ၊ ၵဝ်တၵ်းဢိူဝ်ၵႂၢမ်းသူးတွင်းၵူၼ်းၵဝ်မဵဝ်း ဢိသရေး၊ ဢေႃႈ။
ၵဝ်တၵ်းႁႂ်ႈၽူၼ်တူၵ်းၵႃႈၼိူဝ်လိၼ်မိူင်းဢေႃႈ။ လိၼ်မိူင်းတၵ်းဢွၵ်ႇၶဝ်ႈပိူၵ်ႇ၊မၢၵ်ႇၸပိတ်ႉ၊မၢၵ်ႇသၢၼ်ႇလုၼ်ႇမႃးဢေႃႈ။
ၵဝ်တၵ်းၶိုၼ်းတႄႇၶိုၼ်းတင်ႈၵူၼ်းၵဝ်ၵႃႈၼႂ်းမိူင်းၸဝ်ႈၼၼ်ႉလႄႈႁႂ်ႈၶဝ်ၶိုၼ်ႈယႂ်ႇမႂ်ႇသုင်မႃးဢေႃႈ။ ၵဝ်တၵ်းၼႄပျႃးတၢင်းႁၵ်ႉမႅတ်ႈတႃႇတီႈၶဝ် ၸိူဝ်းဢၼ်ၶၢမ်ႇတၢင်းဢၼ်ႁွင်ႉဝႃႈ၊ “ဢမ်ႇႁၵ်ႉဢမ်ႇပႅင်း” ဢိၵ်ႇတင်းၶဝ်ၸိူဝ်းဢၼ် ၶၢမ်ႇတၢင်းဢၼ်ႁွင်ႉဝႃႈ၊ “ဢမ်ႇၸႂ်ႈ ၵူၼ်းၵဝ်၊” ၸိူဝ်းၼၼ်ႉဢေႃႈ။ ၵဝ်တၵ်းလၢတ်ႈလႄႈဝႃႈ၊ “သူပဵၼ်ၵူၼ်းၵဝ်ဢေႃႈ၊” ၶဝ်ၵေႃႈတၵ်းတွပ်ႇလႄႈဝႃႈ၊ “ၸဝ်ႈႁဝ်းပဵၼ်ၽြႃးပဵၼ်ၸဝ်ႈႁဝ်းၶႃႈ တီႈၶႃႈဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉတီႈၵဝ်လႄႈဝႃႈ၊ “မႂ်းသမ်ႉၵႂႃႇလႄႈႁၵ်ႉပႅင်းမႄႈယိင်းဢၼ်ႁဵတ်းမေႇထုင်ႇဢၼ်ဢမ်ႇတြႃးလူၺ်ႈၵၼ်တင်းၸုႁၵ်ႉမၼ်းၼၼ်ႉတႃႉ။ မႂ်းတၵ်းလႆႈႁၵ်ႉပႅင်းၵၼ်တင်းမၼ်းမိူၼ်ၸိူဝ်ႉၼင်ႇဢၼ်ၵဝ်ယင်းတိုၵ်ႉႁၵ်ႉပႅင်းၵူၼ်းၵဝ်မဵဝ်း ဢိသရေး၊ တင်းလၢႆ၊ပိၵ်ႉသမ်ႉၶဝ်ဢွၼ်ၵၼ်ဝၢႆႇၸူးတီႈၽြႃးတၢင်ႇသူႇတၢင်ႇပႃးလႄႈၵျိူၵ်ႈႁၵ်ႉထုၵ်ႇၸႂ်တၢင်းဢၼ်ဢဝ်ၶႅပ်းမၢၵ်ႇၸပိတ်ႉႁႅင်ႈသၢၵ်ႈလူႇတီႈႁုၼ်ႇႁၢင်ႈသၢင်းထုတင်းလၢႆၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵဝ်ၵေႃႈဢဝ်ငိုၼ်းၶႅပ်းသိပ်းႁႃႈၶႅပ်း၊ဢိၵ်ႇတင်းၶဝ်ႈသၢၼ်မုယေႃးႁႃႈတၢင်သိုဝ်ႉဢဝ်မၼ်းသေလႄႈ၊-
လၢတ်ႈတီႈမၼ်းလႄႈဝႃႈ၊ “မႂ်းတၵ်းလႆႈပႂ်ႉၵဝ်မိုဝ်ႉဝၼ်းႁိုင်ၼႃႇလူင်လၢင်လႄႈ၊ယင်းဢမ်ႇလႆႈႁဵတ်းမႄႈမွၵ်ႇယႃႈ၊ဢမ်ႇလႆႈယူႇလူၺ်ႈၵၼ်တင်းၽူႈၸၢႆးတၢင်ႇၵေႃႉတၢင်ႇၵူၼ်း။ ၼႂ်းမိုဝ်ႉဝၼ်းၸိူဝ်းၼၼ်ႉၵဝ်ၵေႃႈတၵ်းပႂ်ႉမႂ်းဢေႃႈ။-”
လွင်ႈမၼ်းၸမ်ႉ၊ၵူၼ်းၵဝ်မဵဝ်း ဢိသရေး၊ တင်းလၢႆယင်းဢမ်ႇမီးၶုၼ်ႁေႃၶမ်း၊ဢမ်ႇမီးၶုၼ်မီးၵွၼ်း၊ဢမ်ႇမီးၶိူင်ႈတၢင်းလူႇ၊ဢမ်ႇမီးသဝ်ၼၢင်းၽီတီႈတၵ်းဝႆႈသႃ၊ဢမ်ႇမီးႁုၼ်ႇႁၢင်ႈသၢင်းထုလႄႈတၵ်းလႆႈယူႇမိုဝ်ႉဝၼ်းႁိုင်ၼႃႇလူင်လၢင်ဢေႃႈ။-
လိုၼ်းၼၼ်ႉၵူၼ်းမဵဝ်း ဢိသရေး၊ တင်းလၢႆတၵ်းဢွၼ်ၵၼ်ၶိုၼ်းမႃးၸူးတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်၊ဢိၵ်ႇတင်းတီႈၸိူဝ်ႉၶိူဝ်း တႃႇဝိတ်ႈ၊ ၶုၼ်ႁေႃၶမ်းၶဝ်ၼၼ်ႉဢေႃႈ။ မိူဝ်ႈၼၼ်ႉၶဝ်တၵ်းဢွၼ်ၵၼ်ၵူဝ်ႁႄ ထႃႇဝရႃႉၽြႃး၊ လႄႈတၵ်းတေလႆႈႁပ်ႉၶၢမ်ႇဢဝ်ၵျေးၸူးတၢင်းလီမၼ်းၸဝ်ႈၼႂ်းမိုဝ်ႉဝၼ်းလိုၼ်းၼၼ်ႉဢေႃႈ။
ထႃႇဝရႃႉၽြႃး၊ မီးဢမုၵၼ်တင်းၵူၼ်းဝၢၼ်ႈၵူၼ်းမိူင်းတင်းလၢႆဢေႃႈ။ မဵဝ်း ဢိသရေး၊ ႟။ ဢွၼ်ၵၼ်ထွမ်ႇငိၼ်းဢဝ်ဢမိင်ႉ ထႃႇဝရႃႉၽြႃး၊ ဢၼ်လၢတ်ႈလႄႈဝႃႈ၊ “ၵႃႈတီႈမိူင်းၼၼ်ႉဢမ်ႇမီးသဵတ်ႈၸႃႇ၊ဢမ်ႇမီးၵရုၼႃႇ၊ဢမ်ႇမီးတၢင်းဢၼ်ႁုၸၵ်းၵဝ်ဢၼ်ပဵၼ်ၽြႃးပဵၼ်ၸဝ်ႈၼၼ်ႉလႃးလႃး။-
မီးတၢင်းဢၼ်ၵိၼ်ႇလႃႇလႄႈမီးတၢင်းဢၼ်ပႅတ်ႉလႅၼ်၊မီးတၢင်းဢၼ်ဢဝ်ဢသၢၵ်ႈၵူၼ်းတၢႆ၊မီးတၢင်းဢၼ်လၵ်ႉဢၼ်လိူတ်ႇ၊မီးတၢင်းဢၼ်ႁဵတ်းမေႇထုင်ႇဢၼ်ဢမ်ႇတြႃးဢေႃႈ။ တၢင်းဢၼ်ၵေႃႉၼိုင်ႈသိုပ်ႇၽၼ်းတၢႆၵေႃႉၼိုင်ႈၼၼ်ႉယႂ်ႇၼမ်ၵိုၼ်းမႃးတိၵ်းတိၵ်းဢေႃႈ။-
ၵွပ်ႈပိူဝ်ႈၸိူဝ်ႉၼင်ႇၼႆလႄႈမိူင်းၼၼ်ႉတၵ်းႁႅင်ႈၵႂႃႇယူတ်းၵႂႃႇၵႃႈဢၼ်မီးၵႃႈၼိူဝ်လိၼ်မိူင်းၼၼ်ႉၵေႃႈတၵ်းတၢႆၵႂႃႇဢေႃႈ။ ၵႃႈဢၼ်ပဵၼ်တူဝ်သတ်းလႂ်၊ၼူၵ်ႉလႂ်၊ဢိၵ်ႇတင်းပႃတင်းလၢႆၵေႃႈ တၵ်းတၢႆမူတ်းမူတ်းဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ယႃႇပေႁႂ်ႈၽူႈလႂ်လႆႈတၢင်ႇဢပျတ်ႈၵူၼ်းတင်းလၢႆ။ ယႃႇပေႁႂ်ႈၽူႈလႂ်လႆႈသင်ႇသွၼ်သုင်းမႃႉၶဝ်။ လွင်ႈမၼ်းၸမ်ႉ၊တၢင်းဢၼ်ၵဝ်ႁဵတ်းဢမုၼၼ်ႉၶတ်းၵၼ်တင်းယဵၸ်ႈပရေႃးႁဵၵ်ႈ တင်းလၢႆယူႇယဝ်ႉ။-
သူၶီႈလိုတ်းလႄႈလူမ်ႉယူႇဝၼ်းဝၼ်းၶိုၼ်းၶိုၼ်းလႄႈပရေႃးၽႅတ်ႈ တင်းလၢႆၵေႃႈ ၶီႈလိုတ်းမိူၼ်သူၵူၺ်းဢေႃႈ။ ၵဝ်တၵ်းယႃႉၽဵဝ်ႈပႅတ်ႈမဵဝ်း ဢိသရေး၊ ဢၼ်ဝႃႈမႄႈသူၼၼ်ႉဢေႃႈ။-
ၵူၼ်းၵဝ်တင်းလၢႆလႆႈလုလႆႈသုမ်းၵွပ်ႈပိူဝ်ႈၶဝ်ဢမ်ႇႁုၸၵ်းၵဝ်ၼၼ်ႉဢေႃႈ။ သူဢၼ်ပဵၼ်ယဵၸ်ႈပရေႃးႁဵၵ်ႈ ၼႆႉထဵင်ပႅတ်ႈလွင်ႈတၢင်းဢၼ်တေလႆႈႁုၸၵ်းၵဝ်လႄႈပႄႇပႅတ်ႈၵႂၢမ်းဢေႃးဝႃႇတႃႉၵဝ်တင်းလၢႆယဝ်ႉ။ ပိူဝ်ႈၼႆလႄႈၵဝ်တၵ်းပႄႇပႅတ်ႈသူသေယဝ်ႉ၊တၵ်းဢမ်ႇမၢတ်ႈလုၵ်ႈၸၢႆးသူတင်းလၢႆပဵၼ်ယဵၸ်ႈပရေႃးႁဵၵ်ႈၵဝ်။
“ၸွမ်းၵႃႈၼင်ႇဢၼ်သူဢၼ်ပဵၼ်ယဵၸ်ႈပရေႃးႁဵၵ်ႈၼမ်ၵိုၼ်းမႃးၼၼ်ႉသူယဵင်ႈၶႅၼ်းႁဵတ်းဢပျတ်ႈဢေႃႈ။ ပိူဝ်ႈၼႆလႄႈၵဝ်တၵ်းႁႂ်ႈမုၼ်ၽုင်းသူပဵၼ်တၢင်းဢၼ်ဢူၵ်းဢၼ်ဢၢႆဢေႃႈ။-
သူၼႆႉမၢၵ်ႈမီးလီပဵၼ်လူၺ်ႈဢပျတ်ႈတုၸရိူၵ်ႈၵူၼ်းၵဝ်တင်းလၢႆဢေႃႈ။ ပိူဝ်ႈၼႆလႄႈသူၶႂ်ႈႁႂ်ႈၶဝ်ယဵင်ႈၶႅၼ်းႁဵတ်းဢပျတ်ႈတုၸရိူၵ်ႈၶိူဝ်းၶိူဝ်းယႂ်းယႂ်းဢေႃႈ။-
ၵွပ်ႈပိူဝ်ႈၸိူဝ်ႉၼင်ႇၼႆလႄႈသူတၵ်းလႆႈၶၢမ်ႇတၢမ်ႇဢပျတ်ႈမိူၼ်မိူၼ်ၵၼ်တင်းၵူၼ်းတင်းလၢႆလႆႈၶၢမ်ႇၼၼ်ႉဢေႃႈ။ ၵဝ်တၵ်းပၼ်တၢမ်ႇဢပျတ်ႈတီႈသူသေလႄႈႁႂ်ႈသူလႆႈၶၢမ်ႇဢဝ်ဢၵျူဝ်းဢပျတ်ႈဢၼ်သူႁဵတ်းၼၼ်ႉဢေႃႈ။-
သူတၵ်းၵိၼ်ၶိူင်ႈတၢင်းလူႇတင်းလၢႆသေၵေႃႈဢမ်ႇဢိမ်ႇဢမ်ႇတဵမ်လႆႈ။ သူႁဵတ်းမေႇထုင်ႇဢၼ်ဢမ်ႇတြႃးသေၵေႃႈ သူတၵ်းဢမ်ႇလႆႈယႂ်ႇၽႄၼမ်ၵိုၼ်းမီးလုၵ်ႈမီးလၢင်း၊ၵွပ်ႈပိူဝ်ႈသူဝၢႆႇပႅတ်ႈသေၵႃႈတီႈၵဝ်သေလႄႈပၢႆႈၵႂႃႇၸွမ်းၽြႃးတၢင်ႇသူႇတၢင်ႇပႃးၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၼမ်ႉမၢၵ်ႇၸပိတ်ႉၸႃႉၸဵမ်ဢၼ်ၵဝ်ႇ၊ဢိၵ်ႇတင်းဢၼ်မႂ်ႇသွင်ၸိူဝ်ႉသွင်မဵဝ်းၼၼ်ႉ၊ၸၢင်ႈႁဵတ်းႁႂ်ႈႁူဝ်ၸႂ်ၵူၼ်းၵဝ်တင်းလၢႆမဝ်းမိင်းလိုမ်းတူဝ်ဢေႃႈ။-
ၶဝ်ၼၼ်ႉၸၢင်ႈတွင်ႈထၢမ်ၵႃႈတီႈၼိူဝ်ႉမႆႉၸိင်ဢေႃႈ။ ၶွၼ်ႉတဝ်ႉၶဝ်ၸၢင်ႈမွၵ်ႇလၢတ်ႈလွင်ႈတၢင်းဢၼ်ၶဝ်ၶႂ်ႈႁုၼၼ်ႉဢေႃႈ။ ၶဝ်ၼၼ်ႉၸုၼ်ႉပႅတ်ႈၵဝ်ယဝ်ႉဢေႃႈ။ ၶဝ်ပဵၼ်ၸိူဝ်ႉၼင်ႇမႄႈယိင်းဢၼ်ႁဵတ်းမႄႈမွၵ်ႇယႃႈလႄႈဢဝ်တူဝ်ၶဝ်ဢၢပ်ႈပၼ်တီႈၽြႃးတၢင်ႇသူႇတၢင်ႇပႃးယဝ်ႉဢေႃႈ။-
ၶဝ်ၸၢင်ႈသၢၵ်ႈၶိူင်ႈတၢင်းလူႇၵႃႈတီႈလွႆဢၼ်မူတ်းၸၢင်ႇၵႃႈၼိူဝ်ပၢႆၸိၵ်းလွႆလူင်၊ဢိၵ်ႇတင်းၽဝ်ၼၢမ်ႇသႃႇတႂ်ႈတူၼ်ႈမႆႉဢၼ်သုင်၊ဢၼ်ပူင်ႇၽိူဝ်ပူင်ႇၵိင်ႇလႄႈမီးႁူမ်ႈဢၼ်သႃႇယႃႇၵႃႈတီႈလွႆဢွၼ်ႇတင်းလၢႆဢေႃႈ။ “ဢၵျူဝ်းဢၼ်ပဵၼ်မႃးၸမ်ႉ၊လုၵ်ႈသၢဝ်သူဢွၼ်ၵၼ်ႁဵတ်းမႄႈမွၵ်ႇယႃႈ၊ဢိၵ်ႇတင်းလုၵ်ႈပႂ်ႉသူဢွၼ်ၵၼ်လဵၼ်ႈၽူဝ်ၼွႆႉဢေႃႈ။-
ၼႂ်းဝႃႈၼၼ်သေၵေႃႈ ၵဝ်တၵ်းဢမ်ႇပၼ်တၢမ်ႇတီႈလုၵ်ႈသၢဝ်သူ၊လုၵ်ႈပႂ်ႉသူၸိူဝ်းၼၼ်ႉၵွပ်ႈပိူဝ်ႈဢၼ်သူၵႂႃႇလႄႈႁူမ်ႈပွင်းလူၺ်ႈၵၼ်တင်းမႄႈမွၵ်ႇယႃႈၵျွင်းပိၵ်ႈမၢၼ်ႇ တင်းလၢႆၼၼ်ႉ၊ဢိၵ်ႇတင်းသူၵႂႃႇလႄႈႁဵတ်းတၢင်းဢၼ်သၢၵ်ႈလူႇၵႃႈတီႈၽြႃးတၢင်ႇသူႇတၢင်ႇပႃးႁူမ်ႈလူၺ်ႈၵၼ်တင်းမႄႈမွၵ်ႇယႃႈၸိူဝ်းၼၼ်ႉဢေႃႈ။ ၵွပ်ႈပိူဝ်ႈၼင်ႇၼၼ်လႄႈထုင်းၵႂၢမ်းမီးဝႆႉဝႃႈ၊ ‘ၵူၼ်းဢၼ်ငိူဝ်ႈငႃႉၼၼ်ႉတၵ်းလုသုမ်းဢေႃႈ၊’ ဝႃႈၼင်ႇၼႆဢေႃႈ။
“ၵူၼ်းမဵဝ်း ဢိသရေး၊ ႟။ ပိၵ်ႉသမ်ႉမႂ်းဢမ်ႇပႂ်ႉသဵတ်ႈၸႃႇတေႃႇၵဝ်သေၵေႃႈ ယႃႇပေႁႂ်ႈၵူၼ်းမဵဝ်း ယုတႃႉ၊ ၽိတ်းပိူင်ႈသေၵမ်း။ ယႃပေၶဝ်ႈၸူးၵႃႈတီႈဝဵင်း ၵိလႃႉၵႃႇလႃႉ၊ ဢိၵ်ႇတင်းဝဵင်း ပေႇႀဝႅၼ်ႇ၊ လႄႈဝႆႈသႃ၊ယႃႇပေတိူင်ႇဝႃႈၵႃႈၼႂ်းၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ဢၼ်ဢသၢၵ်ႈလိပ်းၼၼ်ႉ။-
ၵူၼ်းမဵဝ်း ဢိသရေး၊ ၼၼ်ႉမီးၸႂ်တိုဝ်ၸႂ်တၼ်မိူၼ်ၸိူဝ်ႉၼင်ႇမႃႉလီႈမႄႈဢေႃႈ။ ၵဝ်တၵ်းလဵင်ႉထိင်းၶဝ်မိူၼ်ၸိူဝ်ႉၼင်ႇသူဝ်းဢွၼ်ႇၵႃႈၼႂ်းပၢင်ႇယႃႈဢၼ်ၶဵဝ်လီၼၼ်ႉလႆႈၸိူဝ်ႉၼင်ႇႁိုဝ်။-
ၵူၼ်းမဵဝ်း ဢိသရေး၊ ၶဝ်ၸိုင်၊မီးၼႂ်းဢူင်ႈမိုဝ်းႁုၼ်ႇႁၢင်ႈသၢင်းထုတင်းလၢႆယဝ်ႉ။ ယႃႇမၼ်းတႃႉ။-
မိူဝ်ႈဢၼ်ၵိၼ်ၼမ်ႉမၢၵ်ႇၸပိတ်ႉပူၼ်ႉလိူဝ်ယဝ်ႉၼၼ်ႉၶဝ်ၸၢင်ႈမူၼ်ႈပျေႃႇၼႂ်းၵၢၼ်မႄႈမွၵ်ႇယႃႈလႄႈ၊ထုၵ်ႇၸႂ်တၢင်းဢၼ်ဢူၵ်းဢၼ်ဢၢႆၼႃႇသေတၢင်းဢၼ်မီးသရေႇၼႃႈတႃဢေႃႈ။-
လူမ်းတၵ်းပတ်ႉထူဝ်းမႃးဢဝ်ၶဝ်ပိဝ်သဵၼ်ၵႂႃႇသေလႄႈၶဝ်တၵ်းဢူၵ်းဢၢႆၵွပ်ႈပိူဝ်ႈၶဝ်သၢၵ်ႈလူႇတီႈၽြႃးတၢင်ႇသူႇတၢင်ႇပႃးၼၼ်ႉဢေႃႈ။
“ယဵၸ်ႈပရေႃးႁဵၵ်ႈ ၶဝ်႟။ ဢွၼ်ၵၼ်ထွမ်ႇငိၼ်းတႃႉ။ ၵူၼ်းမဵဝ်း ဢိသရေး၊ ၶဝ်႟။ ဢွၼ်ၵၼ်ထွမ်ႇငိၼ်းတႃႉ။ ၵူၼ်းၼႂ်းႁၢင်ႈၼႂ်းႁေႃၶဝ်႟။ ဢွၼ်ၵၼ်ထွမ်ႇဢဝ်တႃႉ။ သူထုၵ်ႇလီလႆႈၶၢမ်ႇတၢင်းဢၼ်ၸီႇယၢင်ႇတြႃးလူၺ်ႈတြႃးဢၼ်သိုဝ်ႈတေႃႇၵွပ်ႈပိူဝ်ႈသူပဵၼ်တူင်ႇႁႅဝ်ႉတူင်ႇၶိုမ်းၵၢင်ယူႇၵႃႈတီႈလွႆ မိၸပႃႇ၊ ဢိၵ်ႇတင်းပဵၼ်ၼႅင်ႈၵႃႈတီႈလွႆ တႃႇပေႃႇ၊ -
ပဵၼ်ႁူးၶုမ်ဢၼ်လိုၵ်ႉၼႃႇၵႃႈတီႈဝဵင်း ဢၵႃႇသိ၊ လႄႈၵဝ်တၵ်းပၼ်တၢမ်ႇဢပျတ်ႈတီႈသူတင်းသဵင်ႈတင်းလူင်ဢေႃႈ။-
ၵူၼ်းမဵဝ်း ဢိသရေး၊ ပဵၼ်ၸိူဝ်ႉၼင်ႇႁိုဝ်ဝႆႉၼၼ်ႉၵဝ်ႁုယူႇလႄႈမၼ်းဢမ်ႇတဵတ်ႇဢမ်ႇမႅပ်းသေၵႃႈတီႈၽၢႆႇၼႃႈၵဝ်လႆႈ။ မၼ်းဢမ်ႇပႂ်ႉသဵတ်ႈၸႃႇတေႃႇၵဝ်လႄႈ၊ၵူၼ်းမဵဝ်းမၼ်းဢမ်ႇၵိုင်ႇဝႆႈသႃၵဝ်ယဝ်ႉ၊” ဝႃႈၼင်ႇၼႆဢေႃႈ။
တၢင်းဢၼ်ႁဵတ်းႁၢႆႉႁဵတ်းမိူၵ်ႈၼၼ်ႉပဵၼ်တၢင်းဢၼ်ႁၢမ်ႈတၢပ်ႈႁႄႉၶႅၼ်ၵူၼ်းတင်းလၢႆဢမ်ႇႁႂ်ႈဝၢႆႇၶိုၼ်းၸူးတီႈၽြႃးပဵၼ်ၸဝ်ႈၶဝ်ဢေႃႈ။ တၢင်းဢၼ်ဝႆႈသႃႁုၼ်ႇႁၢင်ႈသၢင်းထုၼၼ်ႉႁႅင်းယႂ်ႇၼႃႇထၢၼ်ႈပေႃးဢူမ်ဢိုၼ်ၶဝ်ဝႆႉလႄႈၶဝ်ဢမ်ႇႁုၸၵ်း ထႃႇဝရႃႉၽြႃး ။-
မႃႇၼႃႉၸႂ်သုင်ၵူၼ်းမဵဝ်း ဢိသရေး၊ ၼၼ်ႉၶၢမ်ႇသၢၵ်ႈသေႇၶတ်းၵၼ်တင်းၶဝ်ယူႇဢေႃႈ။ ပိူဝ်ႈၼႆလႄႈတုၸရိူၵ်ႈဢၼ်ၶဝ်ႁဵတ်းၼၼ်ႉႁဵတ်းႁႂ်ႈၶဝ်ၶီႈလိုတ်းလႄႈလူမ်ႉယဝ်ႉ။ ၵူၼ်းမဵဝ်း ယုတႃႉ၊ ၵေႃႈတၵ်းလူမ်ႉတူၵ်းၸွမ်းၶဝ်ဢေႃႈ။-
ၶဝ်ဢဝ်သူဝ်းဝူဝ်းၶဝ်သၢၵ်ႈလူႇတီႈ ထႃႇဝရႃႉၽြႃး၊ သေၵေႃႈ၊ဢမ်ႇမီးဢၵျူဝ်းၵျေးၸူးၵႃႈသင်လႃးလႃး။ ၶဝ်ဢမ်ႇထူပ်းဢမ်ႇႁၼ်မၼ်းၸဝ်ႈ။ လွင်ႈမၼ်းၸမ်ႉ၊မၼ်းၸဝ်ႈၽၢတ်ႇယၢၼ်ပႅတ်ႈၵၼ်တင်းၶဝ်ယဝ်ႉ။-
ၶဝ်ဢမ်ႇပႂ်ႉသဵတ်ႈၸႃႇတေႃႇ ထႃႇဝရႃႉၽြႃး၊ လုၵ်ႈၶဝ်လၢင်းၶဝ်ဢမ်ႇၸႂ်ႈၵူၼ်းဢၼ်မၼ်းၸဝ်ႈပိူင်ႇၼၼ်ႉယဝ်ႉ။ ၵွပ်ႈပိူဝ်ႈၸိူဝ်ႉၼင်ႇၼႆလႄႈၶဝ်ဢိၵ်ႇတင်းႁႆႈၼႃးၶဝ်တၵ်းလႆႈၶၢမ်ႇတၢင်းဢၼ်ယႃႉလုယႃႉလႅဝ်ပႅတ်ႈဢေႃႈ။
ပဝ်ႇတိုင်ႈၼႄးၶရႃႇသိုၵ်းၵႃႈၼႂ်းဝဵင်း ၵိပိယႃႉ၊ ၼၼ်ႉတႃႉ။ ႁဵတ်းသဵင်ဢၼ်ပူၵ်းဝဵင်း ရႃႇမႃႉ၊ လႄႈႁွင်ႉသႅၼ်ႇသဵင်တိုၵ်းသိုၵ်းၵႃႈၼႂ်းဝဵင်း ပေႇႀဝႅၼ်ႇ၊ ၼၼ်ႉတႃႉ။ ၸိူဝ်ႉၶိူဝ်း ပိၼ်ႇယႃႇမိၼ်ႇ၊ ႟။ ဝႆႉသတိလႄႈတူၺ်းၶိုၼ်းတၢင်းလင်တႃႉ။-
ဝၼ်းဢၼ်ၸီႇယၢင်ႇပၼ်တၢမ်ႇၼၼ်ႉႁွတ်ႈမႃးယဝ်ႉလႄႈမဵဝ်း ဢိသရေး၊ တၵ်းတေလႆႈလုလႅဝ်ယဝ်ႉ။ မဵဝ်း ဢိသရေး၊ ႟။ လွင်ႈတၢင်းၼႆႉတၵ်းပဵၼ်မႃးဢမၢၼ်ႇၶၼ်ပဵၼ်ဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵဝ်ဢွၵ်ႇတေႃးသႃႉၵွပ်ႈပိူဝ်ႈၶုၼ် ယုတႃႉ၊ တင်းလၢႆပဵၼ်ၸိူဝ်ႉၼင်ႇၵေႃႉဢၼ်ၶၢႆႉသဝ်ၶၢႆႉလၵ်းဢၼ်မၢတ်ႈမၢႆလႅၼ်လိၼ်ၼၼ်ႉဢေႃႈ။ ၵွပ်ႈပိူဝ်ႈၼႆလႄႈၵဝ်တၵ်းထွၵ်ႇႁိူဝ်ႈတၢင်းၸႂ်မႆႈၶႂ်ႈၸႃႉသႂ်ႇၵႃႈၼိူဝ်ၶဝ်မိူၼ်ၸိူဝ်ႉၼင်ႇၼမ်ႉၼွင်းၼၼ်ႉဢေႃႈ။-
မဵဝ်း ဢိသရေး၊ လႆႈၶၢမ်ႇတၢင်းဢၼ်တဵၵ်းငႅၼ်းလႄႈ၊လႆႈသုမ်းလိၼ်မၼ်းတႄႉတႄႉၼၼ်ႉ၊ၵွပ်ႈပိူဝ်ႈဢၼ်မၼ်းဢၢင်ႈဢၢၼ်းၶႂ်ႈယွၼ်းတၢင်းၸွႆႈတၢင်းထႅမ်ၵႃႈတီႈၵေႃႉဢၼ်ဢမ်ႇမီးတႃႇတေပၼ်ၼၼ်ႉဢေႃႈ။-
ပိူဝ်ႈၼႆလႄႈၵဝ်တၵ်းႁႂ်ႈတၢင်းဢၼ်လုလႅဝ်တူၵ်းႁွတ်ႈၵႃႈၼိူဝ်မဵဝ်း ဢိသရေး၊ ဢိၵ်ႇတင်းလွင်ႈတၢင်းဢၼ်ၵိူၼ်ႇယႃႉလူမ်ႉပင်းတူၵ်းႁွတ်ႈၵႃႈၼိူဝ်မဵဝ်း ယုတႃႉ၊ ဢေႃႈ။
“မိူဝ်ႈဢၼ် ဢိသရေး၊ (ဢေႇၽရိမ်ႇ) ႁၼ်တၢင်းၶႆႈတၢင်းပဵၼ်တူဝ်ၸဝ်ႈၵဝ်ႇလႄႈမိူဝ်ႈဢၼ် ယုတႃႉ၊ ႁၼ်ႁွႆးၸဵပ်းတူဝ်ၸဝ်ႈၵဝ်ႇၼၼ်ႉၸိုင်၊ ဢိသရေး၊ ၵႂႃႇၸူးတီႈမိူင်း ဢႃႇသီးရီးယႃး၊ ႁႂ်ႈလႆႈလဝ်ႈယွၼ်းတၢင်းၸွႆႈတၢင်းထႅမ်တီႈၸဝ်ႈမုၼ်ယႂ်ႇၶုၼ်ႁေႃၶမ်းမိူင်းၼၼ်ႉဢေႃႈ။ ၵူၺ်းၵႃႈ၊ၶုၼ်ၼၼ်ႉဢမ်ႇယူတ်းယႃပၼ်ၶဝ်လႆႈ။ ဢမ်ႇၸၢင်ႈႁဵတ်းႁႂ်ႈတၢင်းၸဵပ်းၶဝ်ႁၢႆလႆႈလႃးလႃး။-
လွင်ႈမၼ်းၸမ်ႉ၊ၵဝ်တၵ်းတိုၵ်းတေႃးၵူၼ်းမဵဝ်း ဢိသရေး၊ တင်းၵူၼ်းမဵဝ်း ယုတႃႉ၊ ႁၢႆႉၵျၢမ်းမိူၼ်ၸိူဝ်ႉၼင်ႇသၢင်ႇသီႈၼုမ်ႇဢေႃႈ။ ၵဝ်ၼႆႉယဝ်ႉ၊ၵဝ်ၼႆႉယဝ်ႉတၵ်းသိၵ်ႇၶဝ်ၶၢတ်ႇပဵၼ်ပွတ်းပဵၼ်တွၼ်ႈလႄႈပႅတ်ႈၶဝ်ဝႆႉဢေႃႈ။ မိူဝ်ႈဢၼ်ၵဝ်တိုတ်ႉၸၼ်လၢၵ်ႈဢဝ်ၶဝ်ၵႂႃႇၼၼ်ႉၽူႈလႂ်ဢမ်ႇၼုၵ်ႈထွၼ်ဢဝ်လႆႈ။
“ၵဝ်တၵ်းၸုၼ်ႉပႅတ်ႈၵူၼ်းၵဝ်တင်းလၢႆဝႆႉတေႃႇထိုင်ႁွတ်ႈၶဝ်ထၢၼ်ႈပေႃးၶၢမ်ႇဝူၺ်ႇတၼႃႇဢပျတ်ႈတၢမ်ႇၶဝ်သေလႄႈမႃးႁႃၵဝ်ၼၼ်ႉဢေႃႈ။ မိူဝ်ႈဢၼ်ၶဝ်ထူပ်းၽေးၼၼ်ႉၸိုင်၊ၶဝ်တၵ်းႁိပ်ႈၼႅတ်ႈႁႃၵဝ်ဢေႃႈ။”
ၵူၼ်းတင်းလၢႆလၢတ်ႈလႄႈဝႃႈ၊ “မႃးမႃး႟။ ဢွၼ်ၵၼ်ၶိုၼ်းမိူဝ်းၸူးတီႈ ထႃႇဝရႃႉၽြႃး၊ တႃႉႁဝ်း။ မၼ်းၸဝ်ႈၸၵ်ႉသိၵ်ႇႁဝ်းၶၢတ်ႇသေၵေႃႈမၼ်းၸဝ်ႈတၵ်းႁႂ်ႈၶိုၼ်းပဵၼ်ၸိူဝ်ႉၼင်ႇပၵ်းၵဝ်ႇပိူင်ၵဝ်ႇယူႇ။ မၼ်းၸဝ်ႈႁႂ်ႈႁဝ်းတိူဝ်ႉမၢတ်ႇသေၵေႃႈ၊မၼ်းၸဝ်ႈတၵ်းမတ်ႉၵွပ်ႈၶဵၼ်းပၼ်ႁွႆးၸဵပ်းႁဝ်းယူႇဢမ်ႇၸႂ်ႈႁိုဝ်း။-
ၼႂ်းၸူဝ်ႈသွင်သၢမ်ဝၼ်းၼႆႉမၼ်းၸဝ်ႈတၵ်းႁႂ်ႈႁဝ်းဢသၢၵ်ႈၶိုၼ်းလိပ်းယူႇလႄႈႁဝ်းတၵ်းလႆႈဢၶႂၢင်ႉဢၼ်ဢသၢၵ်ႈလိပ်းယူႇၵႃႈတီႈၽၢႆႇၼႃႈမၼ်းၸဝ်ႈဢေႃႈ။-
ႁဝ်းဢွၼ်ၵၼ်ၶတ်းၸႂ်ႁႂ်ႈႁုၸၵ်း ထႃႇဝရႃႉၽြႃး၊ ၵၼ်တႃႉႁဝ်း။ မၼ်းၸဝ်ႈတၵ်းၵျွမႃးတီႈႁဝ်းမိူၼ်ၸိူဝ်ႉၼင်ႇသၢႆလႅင်းဢၼ်ၶိုၼ်ႈမႃးၶိင်ႇႁူဝ်ၼႂ်၊မိူၼ်ၸိူဝ်ႉၼင်ႇၽူၼ်ႁူဝ်ပီလႄႈၽူၼ်ႁၢင်ပီတူၵ်းမႃးယမ်းသႂ်ႇၵႃႈၼိူဝ်လိၼ်ၼၼ်ႉဢမၢၼ်ႇၶၼ်ပဵၼ်ဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ၵူၼ်းမဵဝ်း ဢိသရေး၊ လႄႈၵူၼ်းမဵဝ်း ယုတႃႉ၊ ၶဝ်႟။ ၵဝ်တၵ်းလႆႈႁဵတ်းၸိူဝ်ႉၼင်ႇႁိုဝ်တီႈသူ။ ၸႂ်ဢၼ်သူႁၵ်ႉပႅင်းၵဝ်ၼၼ်ႉပဵၼ်ၸိူဝ်ႉၼင်ႇမွၵ်ႇၵုမ်ႈၶိင်ႇၵၢင်ၼႂ်၊ဢိၵ်ႇတင်းၼမ်ႉၼၢႆးဢၼ်ၸၢင်ႈႁၢႆၵႂႃႇၵၢင်ၼႂ်ၸဝ်ႉၸဝ်ႉၼၼ်ႉဢေႃႈ။-
ၵွပ်ႈပိူဝ်ႈၼႆလႄႈၵဝ်လႆႈဢဝ်တင်းပရေႃးၽႅတ်ႈ တင်းလၢႆႁေႃးလၢတ်ႈၵႂၢမ်းၵဝ်ဢၼ်ဝႃႈ၊သူတၵ်းလႆႈၶၢမ်ႇတၢင်းၸီႇယၢင်ႇလုလႅဝ်ယဝ်ႉ။ ၵဝ်လႆႈဢဝ်ၵႂၢမ်းဢၼ်ဢွၵ်ႇသူပ်းၵဝ်လႄႈဢဝ်သူတၢႆပႅတ်ႈယဝ်ႉ။ တၢင်းဢၼ်ၵဝ်ၸီႇယၢင်ႇတီႈသူၸိူဝ်းၼၼ်ႉပဵၼ်ၸိူဝ်ႉၼင်ႇသၢႆလႅင်းၽႃႉမႅပ်ႈၼၼ်ႉဢေႃႈ။-
ၵဝ်ၵျိူၵ်ႈတၢင်းႁၵ်ႉမၼ်ႈၵိုမ်းလိူဝ်တွၼ်းၼႃႇသေၶိူင်ႈတၢင်းလူႇတူဝ်သတ်း၊ဢိၵ်ႇတင်းတၢင်းဢၼ်မိုတ်ႈၵိုဝ်းႁုၸၵ်းၽြႃးပဵၼ်ၸဝ်ႈလိူဝ်တွၼ်းၼႃႇသေတၢင်းဢၼ်ၽဝ်တူဝ်တၢင်းလူႇၼၼ်ႉဢေႃႈ။
“ၵူၺ်းၵႃႈ၊ၶဝ်ပူၼ်ႉလိူဝ်ပတိၺိၺ်ႇၵႃႈတီႈဝဵင်း ဢႃႇတမ်ႇ၊ ၼၼ်ႉယဝ်ႉ။ ၶဝ်ႁဵတ်းပရိယႄႇသေလႄႈယႃႉပႅတ်ႈသဵတ်ႈၸႃႇၵႃႈတီႈၼၼ်ႈၼၼ်ႉယဝ်ႉ။-
ဝဵင်း ၵိလတ်ႉ၊ ၼၼ်ႉပဵၼ်ဝဵင်းဢၼ်တဵမ်ဝႆႉတင်းၵူၼ်းႁၢႆႉၵူၼ်းမိူၵ်ႈ၊ဢိၵ်ႇတင်းၵူၼ်းဢၼ်ၶႃႈၽၼ်းပိူၼ်ႈတၢႆၼၼ်ႉၼမ်ၼႃႇဢေႃႈ။-
ယဵၸ်ႈပရေႃးႁဵၵ်ႈ တင်းလၢႆၵေႃႈ ပဵၼ်ၸိူဝ်ႉၼင်ႇမုၵ်ႉၸုမ်းၵူၼ်းၸူၼ်ဢၼ်လွမ်ပႂ်ႉပိူၼ်ႈယူႇၼၼ်ႉဢေႃႈ။ ၵႃႈတီႈသဵၼ်ႈတၢင်းဢၼ်ၵႂႃႇၸူးတီႈဝဵင်း သေးၶိမ်ႇ၊ ၼၼ်ႉၶဝ်ယင်းၸၢင်ႈၶႃႈၽၼ်းၵူၼ်းတၢႆလူးၵွၼ်ႇဢေႃႈ။ ၶဝ်မီးၸႂ်ဢၼ်ႁဵတ်းႁၢႆႉႁဵတ်းမိူၵ်ႈဢမၢၼ်ႇၶၼ်ပဵၼ်ဢေႃႈ။-
ၵဝ်လႆႈႁၼ်လွင်ႈတၢင်းဢၼ်လီၵူဝ်လီႁႄၼၼ်ႉၵႃႈၼႂ်းၵူၼ်းမဵဝ်း ဢိသရေး၊ ယဝ်ႉ။ ၵူၼ်းၵဝ်တင်းလၢႆႁဵတ်းႁႂ်ႈတူဝ်ၶဝ်ၵူဝ်ႈၵိူၵ်ႇလူၺ်ႈတၢင်းဢၼ်ဝႆႈသႃႁုၼ်ႇႁၢင်ႈသၢင်းထုတင်းလၢႆၼၼ်ႉယဝ်ႉ။
“ၵူၼ်းမဵဝ်း ယုတႃႉ၊ ၶဝ်႟။ ပုၼ်ႈသူၵေႃႈၵဝ်လႆႈၸတ်းဝႆႉၶိင်ႇၵႃႇလႃႉဢၼ်တၵ်းပၼ်တၢမ်ႇတီႈသူၵွပ်ႈပိူဝ်ႈလွင်ႈတၢင်းဢၼ်သူၵမ်ၵျၢင်ႉၼၼ်ႉဢေႃႈ။
“ၼႂ်းမိူဝ်ႈဢၼ်ၵဝ်ဢၢင်ႈဢၢၼ်းတၵ်းယူတ်းယႃၵူၼ်းၵဝ်မဵဝ်း ဢိသရေး၊ လႄႈႁႂ်ႈၶဝ်ၶိုၼ်ႈယႂ်ႇမႂ်ႇသုင်မႃးၼၼ်ႉၵူႈပွၵ်ႈ၊ၵႃႈဢၼ်ၵဝ်လႆႈႁၼ်ၸမ်ႉ၊ပဵၼ်တၢင်းဢၼ်ၶဝ်ၵမ်ၵျၢင်ႉဢမ်ႇလီဢမ်ႇငၢမ်း၊ဢိၵ်ႇတင်းတၢင်းဢၼ်ၶဝ်ႁၢႆႉမိူၵ်ႈၼၼ်ႉၵူၺ်းၵူၺ်းဢေႃႈ။ ၶဝ်ၼၼ်ႉၵေႃႉၼိုင်ႈလႄႈၵေႃႉၼိုင်ႈပႅတ်ႉလႅၼ်ၵၼ်၊ယႃႉႁိူၼ်းပိူၼ်ႈလႄႈလၵ်ႉဢဝ်ၶူဝ်းၶွင်ပိူၼ်ႈ၊ၸူၼ်ပိူၼ်ႈၼႂ်းၵၢင်တႃႈၵၢင်တၢင်းဢေႃႈ။-
ၶဝ်ယင်းဢမ်ႇၸၢင်ႈၶႆႈၸႂ်ထူပ်းၵႃႈၼႂ်းႁူဝ်ၸႂ်ၶဝ် လူၺ်ႈလွင်ႈဢၼ်ၵဝ်မၢတ်ႈမၢႆတွင်းဝႆႉလွင်ႈဢၼ်ႁၢႆႉမိူၵ်ႈဢၼ်ၶဝ်ႁဵတ်းၼၼ်ႉလူင်ပႄႇ။ မိူဝ်ႈလဵဝ်ၼႆႉတုၸရိူၵ်ႈၶဝ်လွမ်ႉႁွပ်ႈၶဝ်ဝႆႉယဝ်ႉလႄႈမီးယူႇသိုဝ်ႈၼႃႈတႂ်ႈတႃၵဝ်ဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉလႄႈဝႃႈ၊ “ၵူၼ်းတင်းလၢႆဢွၼ်ၵၼ်ပႅတ်ႉလႅၼ်ၶုၼ်ႁေႃၶမ်း၊ဢိၵ်ႇတင်းမူးမၢတ်ႈၽွင်းမိူင်းမၼ်းလူၺ်ႈတၢင်းဢၼ်ႁၢႆႉမိူၵ်ႈၶဝ်ၼၼ်ႉဢေႃႈ။-
ၶဝ်တင်းသဵင်ႈတင်းလူင်ၼၼ်ႉပဵၼ်ၵေႃႉဢၼ်ႁဵတ်းမေႇထုင်ႇဢၼ်ဢမ်ႇတြႃးလႄႈပဵၼ်မုၵ်ႉၽႆးၽီးၽႆးဢၼ်ၸဝ်ႈၽဝ်ၶဝ်ႈမုၼ်းသႂ်ႇၽႆးဝႆႉသေယဝ်ႉ၊ယင်းဢမ်ႇသူၼ်းၽႆးမၼ်းလႄႈယူႇၼိမ်ၼိမ်ၸႃႉၸဵမ်ၶိင်ႇဢၼ်ၼူတ်ႈၶဝ်ႈမုၼ်းတေႃႇထိုင်ႁွတ်ႈၶဝ်ႈမုၼ်းလိပ်းၼၼ်ႉပွင်းၶိုၼ်ႈမႃးၼၼ်ႉဢေႃႈ။-
ၼႂ်းဝၼ်းဢၼ်ၶုၼ်ႁေႃၶမ်းၶၢမ်ႇပွႆးလဵင်ႉပွႆးလူၼၼ်ႉၶုၼ်တင်းလၢႆမိင်းမဝ်းၼမ်ႉမၢၵ်ႇၸပိတ်ႉလႄႈၶုၼ်ႁေႃၶမ်းၵေႃႈယဵတ်ႇဢႃႈမိုဝ်းသေလႄႈႁူမ်ႈပွင်းလူၺ်ႈၵၼ်တင်းၶဝ်ၸိူဝ်းၼၼ်ႉသေယဝ်ႉ၊ႁဵတ်းတၢင်းဢၼ်ပျၢၵ်ႈဢၼ်ၶူဝ်တီႈပိူၼ်ႈဢေႃႈ။-
ၶဝ်ၼၼ်ႉမီးႁူဝ်ၸႂ်ဢၼ်မႆႈႁွၼ်ႉမိူၼ်ၸိူဝ်ႉၼင်ႇမုၵ်ႉၽႆးၽီးၽႆးလူၺ်ႈတၢင်းဢၼ်ၶဝ်လွမ်ၵျၢမ်ႇလွမ်ပွင်ၼၼ်ႉဢေႃႈ။ တေႃးသႃႉတၢင်းၸႂ်မႆႈၶႂ်ႈၸႃႉၶဝ်ၼၼ်ႉႁူမ်ႇငမ်းဝႆႉယူႇတင်းၶိုၼ်းသေယဝ်ႉ၊ၶိင်ႇၵၢင်ၼႂ်ၸဝ်ႉ၊မၼ်းလုၵ်ႉပဵၼ်ပိဝ်ၽႆးဢၼ်ယႂ်ႇဢၼ်ၵိုၼ်းၼႃႇၼၼ်ႉဢေႃႈ။
“ၶဝ်တင်းသဵင်ႈတင်းလူင်မႆႈႁွၼ်ႉမိူၼ်ၸိူဝ်ႉၼင်ႇမုၵ်ႉၽႆးၽီးၽႆးလႄႈမႆႈၶုၼ်ဢုပ်ႉပိူင်ႇမိူင်းၶဝ်တင်းလၢႆပႅတ်ႈယဝ်ႉ။ ၶုၼ်ႁေႃၶမ်းၶဝ်တင်းလၢႆၵေႃႈလူမ်ႉတူၵ်းယဝ်ႉ။ ၼႂ်းၶဝ်ၼၼ်ႉဢမ်ႇမီးၽူႈလႂ်ႁွင်ႉသႅၼ်ႇႁႃၵဝ်သေၵေႃႉသေၵူၼ်း၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ လၢတ်ႈဝႃႈ၊ “ၵူၼ်းမဵဝ်း ဢိသရေး၊ တင်းလၢႆပဵၼ်ၸိူဝ်ႉၼင်ႇၶဝ်ႈမုၼ်းဢၼ်ၽဝ်ၽၢၵ်ႇလဵဝ်ၵူၺ်းၼၼ်ႉဢေႃႈ။ လွင်ႈမၼ်းၸမ်ႉ၊ၶဝ်ႁူမ်ႈပွင်းလေႃးလႄးလူၺ်ႈၵၼ်တင်းၵူၼ်းတၢင်ႇၸိူဝ်ႉတၢင်ႇမဵဝ်းတင်းလၢႆသေလႄႈ၊-
ၶဝ်ယင်းဢမ်ႇႁုလွင်ႈတၢင်းဢၼ်ႁဵတ်းမိၵ်ႈသႁႃႇယႃႉလူၺ်ႈၵၼ်တင်းၵူၼ်းတၢင်ႇၸိူဝ်ႉတၢင်ႇၶိူဝ်းၼၼ်ႉပဵၼ်တၢင်းဢၼ်ႁႂ်ႈၶဝ်ႁႅင်းဢူၼ်ႈႁႅင်းဢွၼ်ႇၵႂႃႇၼၼ်ႉ။ မိုဝ်ႉဝၼ်းၶဝ်ၸမ်တၵ်းသဵင်ႈသုတ်းယဝ်ႉၵေႃႈၶဝ်ယင်းဢမ်ႇႁု။-
ႁူဝ်ၸႂ်ဢၼ်တိုဝ်တၼ်ၵူၼ်းမဵဝ်း ဢိသရေး၊ ၼၼ်ႉပဵၼ်သၢၵ်ႈသေႇၶတ်းၵၼ်တင်းၶဝ်ဢေႃႈ။ ပိၵ်ႉသမ်ႉလွင်ႈတၢင်းၸိူဝ်းၼႆႉပဵၼ်မႃးၵူႈၸိူဝ်ႉၵူႈပိူင်သေၵေႃႈၶဝ်ယင်းဢမ်ႇဝၢႆႇၶိုၼ်းမႃးၸူးတီႈၵဝ်၊ ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်ၼၼ်ႉဢေႃႈ။-
မဵဝ်း ဢိသရေး၊ ၸၢင်ႈမိၼ်ၵႂႃႇမိၼ်မႃးမိူၼ်ၸိူဝ်ႉၼင်ႇၼူၵ်ႉတူႈဢၼ်ငိူဝ်ႈငႃႉၼၼ်ႉဢေႃႈ။ ဢွၼ်တၢင်းသေပိူၼ်ႈမၼ်းၵႂႃႇၸူးတီႈမိူင်း ဢေးၵျိပ်ႉ၊ ပုၼ်ႈတၵ်းလႆႈတၢင်းၸွႆႈတၢင်းထႅမ်လႄႈဝၢႆးၼၼ်ႉမၼ်းသမ်ႉလႅၼ်ႈၵႂႃႇၸူးတီႈမိူင်း ဢႃႇသီးရီးယႃး၊ ဢေႃႈ။-
ၼႂ်းမိူဝ်ႈဢၼ်ၶဝ်ယင်းတိုၵ်ႉၵႂႃႇယူႇၼၼ်ႉၵဝ်တၵ်းၵီႈၽႄႇၶႄသေလႄႈႁူမ်ႇသုမ်ႇဢဝ်ၶဝ် မိူၼ်ၸိူဝ်ႉၼင်ႇဢၼ်တိဢဝ်ၼူၵ်ႉၼၼ်ႉဢေႃႈ။ ၵဝ်တၵ်းပၼ်တၢမ်ႇၶဝ်ၵွပ်ႈပိူဝ်ႈတၢင်းႁၢႆႉတၢင်းမိူၵ်ႈၶဝ်ၼၼ်ႉဢေႃႈ။
“ၶဝ်ၼၼ်ႉမီးဢႃႉမၢင်ႇၵလႃႇဢေႃႈ။ လွင်ႈမၼ်းၸမ်ႉ၊ၶဝ်ဢွၵ်ႇသေၵႃႈတီႈၵဝ်ၵႂႃႇလႄႈလုၵ်ႉၽိုၼ်ႉၵဝ်ဢေႃႈ။ ပိူဝ်ႈၼႆလႄႈၶဝ်တၵ်းလႆႈၶၢမ်ႇတၢင်းဢၼ်ၵိူၼ်ႇယႃႉပႅတ်ႈဢေႃႈ။ ၵဝ်မီးဢလူဝ်ႇၶႂ်ႈၵႄႇသႄႇဢဝ်ၶဝ်ဢေႃႈ။ ၵူၺ်းၵႃႈ၊တၢင်းဢၼ်ၶဝ်ၵူဝ်းၵႂၢႆႇဝႆႈသႃၵဝ်ၼၼ်ႉၽိတ်းပိူင်ႈဝႆႉဢေႃႈ။-
ၶဝ်ဢမ်ႇပႃးၸႂ်ၸေႇတၼႃႇသေလႄႈသူးတွင်းတီႈၵဝ်။ ၶဝ်ယင်းပႅတ်ႈတူဝ်ၶဝ်လူမ်ႉတူၵ်းလႄႈပွင်ႉၶၢင်းပွင်ႉမိုၼ်ႇမိူၼ်ၸိူဝ်ႉၼင်ႇၵူၼ်းဢၼ်ဝႆႈသႃႁုၼ်ႇႁၢင်ႈသၢင်းထုတင်းလၢႆႁဵတ်းၼၼ်ႉဢေႃႈ။ မိူဝ်ႈဢၼ်ၶဝ်သူးတွင်းယွၼ်းၶဝ်ႈၼမ်ႉတၢင်းၵိၼ်ၼၼ်ႉၶဝ်ထႅၵ်ႇၼိူဝ်ႉထႅၵ်ႇၼင်ၶဝ်မိူၼ်ၸိူဝ်ႉၼင်ႇၵူၼ်းဢၼ်ဝႆႈသႃႁုၼ်ႇႁၢင်ႈသၢင်းထုၶဝ်ႁဵတ်းၼၼ်ႉဢေႃႈ။ ၶဝ်ပဵၼ်ၵူၼ်းဢၼ်လုၵ်ႉၽိုၼ်ႉတႄႉတႄႉဢေႃႈ။-
ပိၵ်ႉသမ်ႉၵဝ်ပဵၼ်ၽူႈဢၼ်လဵင်ႉလူၶဝ်ႁႂ်ႈမီးဢဵၼ်မီးႁႅင်းသေၵေႃႈၶဝ်ယင်းလွမ်ၵျၢမ်ႇပွင်ဢၼ်ဢမ်ႇလီတေႃႇၵဝ်ယူႇလူးၵွၼ်ႇဢေႃႈ။-
ၶဝ်ယင်းဝၢႆႇဢွၵ်ႇသေၵႃႈၼႂ်းသဵၼ်ႈတၢင်းၵဝ်ၶိူဝ်းၶိူဝ်းယႂ်းယႂ်းယူႇလႄႈၵႂႃႇၸူးတီႈၽြႃးဢၼ်ဢမ်ႇမီးတၼ်းၶူဝ်းၼၼ်ႉဢေႃႈ။ ၶဝ်ပဵၼ်ဢၼ်ဢမ်ႇလီဝႆႉၸႂ်တမ်းၸႂ်မိူၼ်ၸိူဝ်ႉၼင်ႇလႅမ်ႈၵၢင်ႇဢၼ်ၵူတ်ႉၼၼ်ႉဢေႃႈ။ ၵွပ်ႈပိူဝ်ႈၶုၼ်ၶဝ်တင်းလၢႆသူပ်းၼမ်ၵႂၢမ်းႁၢႆႉၼၼ်ႉၶဝ်တၵ်းလႆႈတၢႆလူၺ်ႈလၢပ်ႇလူၺ်ႈလႅဝ်းသေယဝ်ႉ၊ၵူၼ်းမဵဝ်း ဢေးၵျိပ်ႉ၊ ၶဝ်တၵ်းဢွၼ်ၵၼ်ႁဵတ်းပျၢၵ်ႈႁဵတ်းၶူဝ်တီႈၶဝ်ဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ႁဵတ်းသဵင်ဢၼ်တူင်ႉတိုၼ်ႇတႃႉ။ ရၢၼ်ႇသူႇတင်းလၢႆၵိုင်ႉၵၢင်ႉလူင်းမႃးၵႃႈၼႂ်းမိူင်းၵဝ်မိူၼ်ၸိူဝ်ႉၼင်ႇၼူၵ်ႉၶၢင်ႇလေႃႉၼမ်ၼႃႇလေႃႇလူင်းမႃးၼၼ်ႉဢေႃႈ။ ၵူၼ်းၵဝ်တင်းလၢႆယႃႉပတိၺိၺ်ႇတြႃးဢၼ်ၵဝ်ႁဵတ်းဝႆႉလူၺ်ႈၵၼ်တင်းၶဝ်ၼၼ်ႉသေလႄႈပူၼ်ႉလိူဝ်ၵႂၢမ်းဢေႃးဝႃႇတႃႉၵဝ်တင်းလၢႆယဝ်ႉ။-
ပိၵ်ႉသမ်ႉၶဝ်ႁွင်ႉသႅၼ်ႇႁႃၵဝ်လႄႈဝႃႈ၊ ‘ၽြႃးပဵၼ်ၸဝ်ႈႁဝ်းၶႃႈတီႈၶႃႈ။ ၶႃႈၸဝ်ႈႁဝ်းၶဝ်ပဵၼ်ၵူၼ်းၸဝ်ႈႁဝ်းလႄႈႁုၸၵ်းၸဝ်ႈႁဝ်းတီႈၶႃႈဢေႃႈ၊’ ဝႃႈၼႆသေၵေႃႈ၊-
ၶဝ်ၸုၼ်ႉပႅတ်ႈလွင်ႈတၢင်းဢၼ်လီဢၼ်ငၢမ်းဢေႃႈ။ ၵွပ်ႈပိူဝ်ႈလွင်ႈတၢင်းၼႆႉလႄႈရၢၼ်ႇသူႇၶဝ်တၵ်းလိုပ်ႈလမ်းၸွမ်းၶဝ်ဢေႃႈ။
“ၵူၼ်းၵဝ်တင်းလၢႆလိူၵ်ႈဢဝ်ၶုၼ်ႁေႃၶမ်းၶဝ်လူၺ်ႈဢလူဝ်ႇၵၢင်ၸႂ်ၶဝ်ၵူၺ်းဢေႃႈ။ ၶဝ်ယင်းဢမ်ႇလႆႈဢဝ်ဢၶႂၢင်ႉတီႈၵဝ်လႄႈၶၢၼ်းဝႆႉၶုၼ်ၶဝ်ဢေႃႈ။ ၶဝ်ဢဝ်ငိုၼ်းၶမ်းၶဝ်ႁဵတ်းႁုၼ်ႇႁၢင်ႈသၢင်းထုတင်းလၢႆဝႆႉဢၼ်ပဵၼ်လွင်ႈတၢင်းဢၼ်တူဝ်ၶဝ်တၵ်းလုတၵ်းလႅဝ်ၼၼ်ႉဢေႃႈ။-
ၵဝ်ငိၼ်းၸင်းဝူဝ်းၶမ်းဢၼ်ၵူၼ်းဝဵင်း သမႃႇရိ၊ ၶဝ်ဝႆႈသႃၵူဝ်းၵႂၢႆႇၼၼ်ႉလႄႈၵဝ်ၸႂ်မႆႈၶႂ်ႈၸႃႉတေႃႇၶဝ်ဢေႃႈ။ ၶဝ်ၼၼ်ႉယင်းဢမ်ႇပႄႇပႅတ်ႈတၢင်းဢၼ်ဝႆႈသႃႁုၼ်ႇႁၢင်ႈသၢင်းထုတင်းလၢႆလႄႈတေယူႇႁိုင်ၵႃႈႁိုဝ်။-
ႁုၼ်ႇႁၢင်ႈသၢင်းထုဢၼ်သြႃႇဢၼ်မေႃတိၼ်မေႃမိုဝ်းၵူၼ်းမဵဝ်း ဢိသရေး၊ ၶဝ်ႁဵတ်းၼၼ်ႉဢမ်ႇၸႂ်ႈၽြႃးလႃးလႃး။ ဝူဝ်းၶမ်းဢၼ်ၵူၼ်းဝဵင်း သမႃႇရိ၊ ၶဝ်ဝႆႈသႃၼၼ်ႉတၵ်းလႆႈၶၢမ်ႇတၢင်းဢၼ်ႁၵ်းႁိၵ်းပဵၼ်ပွတ်းပဵၼ်တွၼ်ႈပႅတ်ႈဢေႃႈ။-
မိူဝ်ႈဢၼ်ၶဝ်ဝၢၼ်ႇလူမ်းၼၼ်ႉတၵ်းလႆႈပၢတ်ႇဢဝ်လူမ်းၽိဝ်ႁုင်ဢေႃႈ။ တူၼ်ႈၶဝ်ႈဢမ်ႇမီးမၢၵ်ႇမီးႁူင်း၊ဢမ်ႇမီးၽွင်ၶဝ်ႈၵျုင်ႇပုၼ်ႈတၵ်းႁဵတ်းၶဝ်ႈမုၼ်း၊ပိၵ်ႉသမ်ႉမီးမၢၵ်ႇမႃးသေၵေႃႈၵူၼ်းတၢင်ႇသိုင်ႇတၢင်ႇမိူင်းတင်းလၢႆဢဝ်ၵိၼ်ပႅတ်ႈယဝ်ႉဢေႃႈ။-
ၵူၼ်းမဵဝ်း ဢိသရေး၊ ပဵၼ်ၸိူဝ်ႉၼင်ႇၵူၼ်းတၢင်ႇၸိူဝ်ႉတၢင်ႇမဵဝ်းမႃးယဝ်ႉလႄႈပဵၼ်ဢၼ်ဢမ်ႇမီးဢၵျူဝ်းမိူၼ်ၸိူဝ်ႉၼင်ႇမေႃႈဢၼ်တႅၵ်ႇယဝ်ႉၼၼ်ႉဢေႃႈ။-
ၵူၼ်းမဵဝ်း ဢိသရေး၊ တင်းလၢႆၸႂ်တိုဝ်ၸႂ်တၼ်မိူၼ်ၸိူဝ်ႉၼင်ႇမႃႉလီႈလိူင်းတင်းလၢႆလႄႈၵႂႃႇယူႇၸွမ်းဢလူဝ်ႇၵၢင်ၸႂ်ၶဝ်ဢေႃႈ။ ၶဝ်ၶိုၼ်ႈၵႂႃႇႁႂ်ႈလႆႈယွၼ်းတၢင်းၸွႆႈတၢင်းထႅမ်တီႈမိူင်း ဢႃႇသီးရီးယႃး၊ လႄႈၸၢင်ႈငႃဢဝ်ၵူၼ်းတၢင်ႇၸိူဝ်ႉတၢင်ႇမဵဝ်းမႃးၵႅတ်ႇၶႄႁႄႉၵင်ႈၶဝ်ဢေႃႈ။-
ၵူၺ်းၵႃႈ၊ၵဝ်တၵ်းႁႂ်ႈၶဝ်ၸုၵၼ်တုမ်ၵၼ်ၵမ်းလဵဝ်လႄႈပၼ်တၢမ်ႇတီႈၶဝ်ဢေႃႈ။ ဢမ်ႇႁိုင်ဢမ်ႇၼၢၼ်းၶဝ်တၵ်းၸဵပ်းသႅပ်ႇၼႃႇလူင်လၢင်လႄႈပၼ်ႇယူႇၵိင်ႈယူႇၼႂ်းမိူဝ်ႈဢၼ်ၸဝ်ႈမုၼ်ယႂ်ႇၶုၼ်ႁေႃၶမ်းမိူင်း ဢႃႇသီးရီးယႃး၊ တဵၵ်းငႅၼ်းၶဝ်ၼၼ်ႉဢေႃႈ။
“ၵူၼ်းမဵဝ်း ဢိသရေး၊ ၶဝ်ၼၼ်ႉယဵင်ႈၶႅၼ်းႁဵတ်းၶဵင်ႇတၢင်းလူႇဢၼ်ၼမ်ၼႃႇပုၼ်ႈတၵ်းၽေႇဢပျတ်ႈၶဝ်သေၵေႃႈ၊ၶဵင်ႇတၢင်းလူႇၸိူဝ်းၼၼ်ႉယဵင်ႈၶႅၼ်းႁဵတ်းႁႂ်ႈၶဝ်မီးဢပျတ်ႈၼမ်မႃးတိၵ်းတိၵ်းဢေႃႈ။-
ၵဝ်တႅမ်ႈၵႂၢမ်းဢေႃးဝႃႇတႃႉဢၼ်ဢမ်ႇၼပ်ႉဢမ်ႇဢၢၼ်ႇလႆႈၼၼ်ႉပုၼ်ႈၵူၼ်းတင်းလၢႆယဝ်ႉ။ ၵူၺ်းၵႃႈ၊ၶဝ်မၢတ်ႈပဵၼ်ဢၼ်ပႅၵ်ႇဢၼ်ပိူင်ႈဢၼ်ဢမ်ႇၸၢပ်ႈဢမ်ႇသႅင်ႇၵၼ်တင်းၶဝ်ၼၼ်ႉဢေႃႈ။-
ၶဝ်သၢၵ်ႈလူႇၶိူင်ႈတၢင်းလူႇတီႈၵဝ်သေယဝ်ႉ၊ဢဝ်ၼိူဝ်ႉၶိူင်ႈတၢင်းလူႇၸိူဝ်းၼၼ်ႉၵိၼ်ဢေႃႈ။ ၵူၺ်းၵႃႈ၊ၵဝ် ထႃႇဝရႃႉၽြႃး၊ ဢမ်ႇႁပ်ႉတုင်းဢဝ်ၶဝ်။ ၵဝ်တၵ်းမၢတ်ႈတွင်းဢပျတ်ႈၶဝ်တင်းလၢႆလႄႈပၼ်တၢမ်ႇတီႈၶဝ်၊ၵဝ်တၵ်းသူင်ႇၶဝ်ၶိုၼ်းမိူဝ်းၵႂႃႇၸူးတီႈမိူင်း ဢေးၵျိပ်ႉ၊ ဢေႃႈ။
“ၵူၼ်းမဵဝ်း ဢိသရေး၊ ဢွၼ်ၵၼ်တႄႇႁဵတ်းႁၢင်ႈႁဵတ်းႁေႃလႂ်သေၵေႃႈၶဝ်လူင်လိုမ်းပႅတ်ႈၸဝ်ႈဢၼ်ၽၢၼ်ႇသၢင်းႁဵတ်းပဵၼ်ၶဝ်ၼၼ်ႉဢေႃႈ။ ၵူၼ်းမဵဝ်း ယုတႃႉ၊ တင်းလၢႆတႄႇႁဵတ်းဝဵင်းဢၼ်မၼ်ႈၶိူင်ႇၼမ်ၼႃႇဢေႃႈ။ ၵူၺ်းၵႃႈ၊ၵဝ်တၵ်းဢဝ်ၽႆးတုတ်ႇပႅတ်ႈဝဵင်းၸိူဝ်းၼၼ်ႉ၊ဢိၵ်ႇတင်းႁၢင်ႈႁေႃၶဝ်ၸိူဝ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵူၼ်းမဵဝ်း ဢိသရေး၊ ၶဝ်႟။ ယႃႇပေၸူမ်းသိူဝ်းမိူၼ်ၸိူဝ်ႉၼင်ႇၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၸူမ်းသိူဝ်းၼၼ်ႉ။ မႂ်းဝၢႆႇလင်တေႃႇၽြႃးပဵၼ်ၸဝ်ႈမႂ်းသေလႄႈမီးၸႂ်ဢၼ်ဢမ်ႇပႂ်ႉသဵတ်ႈၸႃႇတေႃႇမၼ်းၸဝ်ႈယဝ်ႉ။ ၵႃႈၼိူဝ်လိၼ်မိူင်းတင်းမိူင်းၼၼ်ႉမႂ်းၶၢႆတူဝ်မႂ်းႁႂ်ႈပဵၼ်ၸိူဝ်ႉၼင်ႇမႄႈမွၵ်ႇယႃႈတီႈ ၽြႃးပႃႇလႃႉ၊ သေလႄႈမႂ်းၵျိူၵ်ႈႁၵ်ႉထုၵ်ႇၸႂ်ၶဝ်ႈသၢၼ်ၵႃႈတီႈတလၢင်းယဵပ်ႇၶဝ်ႈဢၼ်မႂ်းထၢင်ႇပဵၼ်ၵႃႈၶၼ်ဢၼ် ၽြႃးပႃႇလႃႉ၊ ပၼ်တီႈမႂ်းၼၼ်ႉဢေႃႈ။-
ၵူၺ်းၵႃႈ၊ဢမ်ႇႁိုင်ဢမ်ႇၼၢၼ်းၶဝ်ႈသၢၼ်၊ဢိၵ်ႇတင်းၼမ်ႉမၼ်းသၢၼ်ႇလုၼ်ႇတၵ်းဢမ်ႇၵုမ်ႇၵိၼ်ပုၼ်ႈသူ၊ဢိၵ်ႇတင်းၼမ်ႉမၢၵ်ႇၸပိတ်ႉတၵ်းဢမ်ႇမီးၵႃႈတီႈၼၼ်ႈယဝ်ႉဢေႃႈ။-
ၵူၼ်းမဵဝ်း ဢိသရေး၊ တင်းလၢႆတၵ်းဢမ်ႇလႆႈၵိုတ်းၵျၢၼ်ႇယူႇၵႃႈၼႂ်းမိူင်း ထႃႇဝရႃႉၽြႃး၊ ဢေႃႈ။ ၶဝ်တၵ်းလႆႈၶိုၼ်းမိူဝ်းၵႂႃႇၵႃႈတီႈမိူင်း ဢေးၵျိပ်ႉ၊ လႄႈၶဝ်တၵ်းလႆႈၵိၼ်တၢင်းၵိၼ်ဢၼ်ဢမ်ႇမူတ်းသႂ်ၵႃႈၼႂ်းမိူင်း ဢႃႇသီးရီးယႃး၊ ဢေႃႈ။-
ၵႃႈၼႂ်းသိုင်ႇတိူင်းမိူင်းပိူၼ်ႈၸိူဝ်းၼၼ်ႉၶဝ်တၵ်းဢမ်ႇႁဵတ်းပွႆးသၢၵ်ႈၵၢပ်ႈၼမ်ႉမၢၵ်ႇၸပိတ်ႉ၊ဢမ်ႇၼၼ်ဢဝ်ၶိူင်ႈတၢင်းလူႇမႃးတီႈ ထႃႇဝရႃႉၽြႃး၊ တၢင်းၵိၼ်တၢင်းၶူပ်းၶဝ်ၼၼ်ႉတၵ်းႁႂ်ႈၵေႃႉဢၼ်ၵိၼ်ၼၼ်ႉၵူဝ်ႈၵိူၵ်ႇၵႂႃႇမိူၼ်ၸိူဝ်ႉၼင်ႇဢၼ်ၵိၼ်ၼိူဝ်ႉၵႃႈတီႈႁိူၼ်းမႃႇသႃႇၼၼ်ႉဢေႃႈ။ တၢင်းၵိၼ်တၢင်းၶူပ်းၼၼ်ႉပဵၼ်ပုၼ်ႈတႃႇတၵ်းၵိၼ်ဢိမ်ႇတွင်ႉၵူၺ်းလႄႈ၊ဢမ်ႇလႆႈဢဝ်ၶဝ်ႈၵႃႈၼႂ်းၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ႁႂ်ႈပဵၼ်ၶိူင်ႈတၢင်းလူႇၼၼ်ႉလႃးလႃး။-
ပေႃးပဵၼ်ၸိူဝ်ႉၼင်ႇၼႆၸိုင်၊မိူဝ်ႈဢၼ်ထိုင်ၶိင်ႇထိုင်ၶႃႇဢၼ်ၶၢမ်ႇပွႆးထမ်ႇမႃႉ၊ဝၼ်းပွႆးဢၼ်ယုၵ်ႉယွင်ႈ ထႃႇဝရႃႉၽြႃး၊ ၼၼ်ႉ၊ၶဝ်တၵ်းႁဵတ်းၸိူဝ်ႉၼင်ႇႁိုဝ်။-
တူၺ်းလူး။ မိူဝ်ႈဢၼ်ၽေးတၢင်းလုတၢင်းလႅဝ်ႁွတ်ႈမႃးလႄႈၵူၼ်းတင်းလၢႆၽၢတ်ႇၽႄၵၼ်ယဝ်ႉၼၼ်ႉ၊ၵူၼ်းမဵဝ်း ဢေးၵျိပ်ႉ၊ ၶဝ်တၵ်းဢဝ်ၶဝ်ၸုၵၼ်တုမ်ၵၼ်ဝႆႉလႄႈဢဝ်ၶဝ်သၢင်းၵျူဝ်ႇတီႈဝဵင်း မႅမ်းၽိ၊ ဢေႃႈ။ ဢုၵ်ႉၸႃႇၶဝ်ဢၼ်ပဵၼ်ၶမ်းလႂ်၊ဢိၵ်ႇတင်းထႃႇၼႃႉတီႈလိၼ်ဢၼ်ႁိူၼ်းၶဝ်ယၢမ်ႈပူၵ်းတင်ႈၸိူဝ်းၼၼ်ႉလႂ်၊တူၼ်ႈၼၢမ်ၶိူဝ်းၼၢမ်တၵ်းမုင်းႁူမ်ႇဝႆႉၵူႈတီႈၵူႈလႅၼ်ဢေႃႈ။
မိုဝ်ႉဝၼ်းဢၼ်ပၼ်တၢမ်ႇၼၼ်ႉႁွတ်ႈထိုင်ယဝ်ႉ။ ၶိင်ႇၶႃႇမိူဝ်ႈဢၼ်ၵူၼ်းတင်းလၢႆလႆႈၶၢမ်ႇတၢမ်ႇဢပျတ်ႈၸွမ်းၵႃႈၼင်ႇဢၼ်ၶဝ်ၵမ်ၵျၢင်ႉၼၼ်ႉႁွတ်ႈထိုင်ယဝ်ႉ။ မိူဝ်ႈဢၼ်လွင်ႈတၢင်းၸိူဝ်းၼၼ်ႉပဵၼ်မႃးၼၼ်ႉၸိုင်၊ၵူၼ်းမဵဝ်း ဢိသရေး၊ တၵ်းလႆႈႁုဢေႃႈ။ သူလၢတ်ႈလႄႈဝႃႈ၊ “ပရေႃးၽႅတ်ႈ ၼႆႉပဵၼ်ၵူၼ်းမိူၵ်ႈဢေႃႈ။ ၵေႃႉဢၼ်ၶၢမ်ႇသုၵျေးၸူးဝိၺိၺ်ႇၸဝ်ႈၼႆႉပဵၼ်ၵူၼ်းယွင်ႇ” ဝႃႈၼင်ႇၼႆဢေႃႈ။ သူငိၼ်းၸင်းၵဝ်ၼႃႇလူင်လၢင်ၵွပ်ႈပိူဝ်ႈဢပျတ်ႈသူမီးၼမ်ၼႃႇၼၼ်ႉဢေႃႈ။-
ၽြႃးပဵၼ်ၸဝ်ႈပွႆႇၸႂ်ႉၵဝ်မႃးမိူၼ်ၸိူဝ်ႉၼင်ႇပရေႃးၽႅတ်ႈဢၼ်တၵ်းမႃးပၼ်သတိတီႈၵူၼ်းမၼ်းၸဝ်ႈမဵဝ်း ဢိသရေး၊ ၼၼ်ႉဢေႃႈ။ ၼႂ်းဝႃႈၼၼ်သေၵေႃႈ ၵႃႈတီႈဢၼ်ၵဝ်ၵႂႃႇၼၼ်ႉသူဢဝ်တူင်ႇႁႅဝ်ႉတူင်ႇၶိုမ်းၵၢင်ဝႆႉ မိူၼ်ၸိူဝ်ႉၼင်ႇဢၼ်ၵၢင်ၼူၵ်ႉၼၼ်ႉဢေႃႈ။ ၵႃႈၼႂ်းၵျွင်းပိၵ်ႈမၢၼ်ႇၽြႃးပဵၼ်ၸဝ်ႈၼၼ်ႉၵူၼ်းတင်းလၢႆယင်းပဵၼ်ရၢၼ်ႇသူႇတီႈပရေႃးၽႅတ်ႈဢေႃႈ။-
ၶဝ်ဢွၼ်ၵၼ်ႁႂ်ႈတူဝ်ၸဝ်ႈၵဝ်ႇႁၢႆႉမိူၵ်ႈၼႃႇလူင်လၢင်ၼႂ်းတၢင်းဢၼ်ၶဝ်ၵမ်ၵျၢင်ႉၼၼ်ႉမိူၼ်ၸိူဝ်ႉၼင်ႇၼႂ်းၸူဝ်ႈၼႂ်းပၢၼ်ဝဵင်း ၵိပိယႃႉ၊ ၼၼ်ႉယဝ်ႉ။ ၽြႃးပဵၼ်ၸဝ်ႈတၵ်းမၢတ်ႈတွင်းတုၸရိူၵ်ႈၶဝ်ဝႆႉလႄႈပၼ်တၢမ်ႇၶဝ်ဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “မိူဝ်ႈဢၼ်ၵဝ်တႄႇၸႃႉထူပ်းႁၼ်ၵူၼ်းမဵဝ်း ဢိသရေး၊ ၼၼ်ႉမၼ်းပဵၼ်ၸိူဝ်ႉၼင်ႇဢၼ်ထူပ်းႁၼ်မၢၵ်ႇၸပိတ်ႉၵႃႈၼႂ်းထိူၼ်ႇၼၼ်ႉဢေႃႈ။ မိူဝ်ႈဢၼ်ၵဝ်ထူပ်းႁၼ်ပူႇမွၼ်ႇသူၼၼ်ႉမၼ်းပဵၼ်ၸိူဝ်ႉၼင်ႇဢၼ်လႆႈထူပ်းႁၼ်မၢၵ်ႇလိူဝ်ႇဢၼ်သုၵ်းဢွၼ်တၢင်းပိူၼ်ႈၵႃႈၼႂ်းၶိင်ႇဢုတုဢၼ်မၼ်းမၢၵ်ႇၼၼ်ႉဢေႃႈ။ ၵူၺ်းၵႃႈ၊မိူဝ်ႈဢၼ်ၶဝ်မႃးၵႃႈတီႈလွႆ ပုရႃႉ၊ ၼၼ်ႉၶဝ်ဝႆႈသႃ ၽြႃးပႃႇလႃႉ၊ လႄႈ၊ၶဝ်လႆႈႁွတ်ႈထိုင်တၢင်းဢၼ်လီႁင်ႈဢဵတ်ႇသဵတ်ႇမိူၼ်ၸိူဝ်ႉၼင်ႇၽြႃးဢၼ်ၶဝ်ၵျိူၵ်ႈၸႂ်ထုၵ်ႇၸႂ်ၼၼ်ႉၵမ်းလဵဝ်ဢေႃႈ။-
မုၼ်ၽုင်းၵူၼ်းမဵဝ်း ဢိသရေး၊ တၵ်းမိၼ်ၵႂႃႇမိူၼ်ၸိူဝ်ႉၼင်ႇၼူၵ်ႉလႄႈၶဝ်တၵ်းဢမ်ႇမီးတၢင်းဢၼ်ၵိူတ်ႇလဵင်ႉလုၵ်ႈလဵင်ႉလၢင်း၊တၢင်းဢၼ်ပႃးတွင်ႉ၊တၢင်းဢၼ်ၸပ်းပတိၵ်ႈသၼ်ႇထေႇလႃးလႃး။-
ပိၵ်ႉသမ်ႉၶဝ်လဵင်ႉလူလုၵ်ႈလၢင်းၶဝ်ႁႂ်ႈယႂ်ႇသုင်မႃးသေၵေႃႈ၊ၵဝ်တၵ်းဢဝ်ၵႂႃႇမူတ်းမူတ်းသေလႄႈဢမ်ႇႁႂ်ႈလႆႈၵိုတ်းလႆႈၵျၢၼ်ႇသေၵေႃႉသေၵူၼ်း။ မိူဝ်ႈဢၼ်ၵဝ်ၸုၼ်ႉပႅတ်ႈၵူၼ်းမဵဝ်းၼႆႉၼၼ်ႉဢႃႉမၢင်ႇၵလႃႇတၵ်းတူၵ်းႁွတ်ႈၵႃႈၼိူဝ်ၶဝ်ဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈလႆႈႁၼ်တၢင်းဢၼ်လုၵ်ႈလၢင်းၶဝ်လႆႈၶၢမ်ႇတၢင်းဢၼ်ၸွမ်းၼိၵ်ႈၸၢၵ်ႈငႅၼ်းသႄးလႄႈလႆႈၶၢမ်ႇတၢႆၼၼ်ႉဢေႃႈ။-
ၶႃႈၸဝ်ႈတၵ်းလႆႈလဝ်ႈယွၼ်းႁႂ်ႈၸဝ်ႈႁဝ်းႁဵတ်းၸိူဝ်ႉၼင်ႇႁိုဝ်တီႈၵူၼ်းၸိူဝ်းၼႆႉတီႈၶႃႈ။ ၶႅၼ်းတေႃႈပၼ်ႁႂ်ႈမႄႈယိင်းၶဝ်မၼ်သေၵမ်းတီႈၶႃႈ။ ၶႅၼ်းတေႃႈပၼ်တဝ်ႈၼူမ်းဢၼ်ဢမ်ႇဢွၵ်ႇၼမ်ႉၼူမ်းလႆႈၼၼ်ႉတီႈၶဝ်သေၵမ်းတီႈၶႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “တုၸရိူၵ်ႈၵႃႈဢၼ်ၶဝ်ႁဵတ်းၼၼ်ႉတႄႇၸႃႉႁဵတ်းတီႈဝဵင်း ၵိလႃႉၵႃႇလႃႉ၊ ဢေႃႈ။ ၵဝ်ၵေႃႈတႄႇၸႃႉၸင်းၶဝ်ၵႃႈတီႈၼၼ်ႈဢေႃႈ။ ၵွပ်ႈပိူဝ်ႈတုၸရိူၵ်ႈဢပျတ်ႈဢၼ်ၶဝ်ႁဵတ်းၼၼ်ႉလႄႈၵဝ်တၵ်းႁေႃႈၶဝ်ဢွၵ်ႇသေၵႃႈၼႂ်းမိူင်းၵဝ်ဢေႃႈ။ ၵမ်းလိုၼ်းၵဝ်တၵ်းဢမ်ႇႁၵ်ႉၶဝ်။ ၶုၼ်ၶဝ်ၵႃႈမီးၼၼ်ႉပဵၼ်ၵေႃႉဢၼ်ၸၢင်ႈလုၵ်ႉၽိုၼ်ႉဢေႃႈ။-
ၵူၼ်းမဵဝ်း ဢိသရေး၊ တင်းလၢႆပဵၼ်ၸိူဝ်ႉၼင်ႇတူၼ်ႈဢၼ်ႁၢၵ်ႈမၼ်းႁႅင်ႈယဝ်ႉၼၼ်ႉသေလႄႈဢမ်ႇမၢၵ်ႇမၢၵ်ႇလႆႈ။ ၶဝ်တၵ်းဢမ်ႇမီးလုၵ်ႈမီးလၢင်း။ ပိၵ်ႉသမ်ႉၵိူတ်ႇလဵင်ႉလုၵ်ႈလဵင်ႉလၢင်းမႃးသေၵေႃႈၵဝ်တၵ်းဢဝ်လုၵ်ႈလၢင်းဢၼ်ၶဝ်ႁၵ်ႉၼႃႇၼၼ်ႉတၢႆပႅတ်ႈဢေႃႈ၊” ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈၵဝ်တၵ်းၸုၼ်ႉပႅတ်ႈၵူၼ်းမၼ်းၸဝ်ႈၵွပ်ႈပိူဝ်ႈဢၼ်ၶဝ်ဢမ်ႇထွမ်ႇဢဝ်ၵႂၢမ်းမၼ်းၸဝ်ႈၼၼ်ႉဢေႃႈ။ ၼင်ႇၼၼ်လႄႈၶဝ်တၵ်းလႆႈပဵၼ်ၵေႃႉဢၼ်လႄႇၵႂႃႇလႄႇမႃးၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆဢေႃႈ။
ၵူၼ်းမဵဝ်း ဢိသရေး၊ တင်းလၢႆပဵၼ်ၸိူဝ်ႉၼင်ႇတူၼ်ႈၶိူဝ်းမၢၵ်ႇၸပိတ်ႉဢၼ်ၵွၼ်ႈလီပူင်းလီၼၼ်ႉဢေႃႈ။ ၸွမ်းၵႃႈၼင်ႇဢၼ်ၶဝ်ယဵင်ႈၶႅၼ်းမၢၵ်ႈမီးလီပဵၼ်ၼၼ်ႉၶဝ်ယဵင်ႈၶႅၼ်းတႄႇႁဵတ်းၶဵင်ႇတၢင်းလူႇၼမ်ၼမ်ဢေႃႈ။ ၸွမ်းၵႃႈၼင်ႇဢၼ်ၽုၼ်ႇၼမ်ႉမၼ်းၶဝ်လီၼၼ်ႉၶဝ်ယဵင်ႈၶႅၼ်းပူၵ်းတင်ႈသဝ်ၼၢင်းၽီတီႈဢၼ်ဝႆႈသႃဢၼ်ႁၢင်ႈလီႁၢင်ႈငၢမ်းၼႃႇဢေႃႈ။-
ၶဝ်ၸိူဝ်းဢၼ်မီးႁူဝ်ၸႂ်သွင်ငၢမ်ႈၸိူဝ်းၼၼ်ႉတၵ်းလႆႈၶၢမ်ႇတၢမ်ႇပုၼ်ႈဢပျတ်ႈၶဝ်မိူဝ်ႈလဵဝ်ၼႆႉၵမ်းလဵဝ်ဢေႃႈ။ ၽြႃးပဵၼ်ၸဝ်ႈတၵ်းၵိူၼ်ႇယႃႉပႅတ်ႈၶဵင်ႇတၢင်းလူႇၶဝ်တင်းလၢႆလႄႈယႃႉၽဵဝ်ႈပႅတ်ႈသဝ်ဢၼ်ၶဝ်ဝႆႈသႃၼၼ်ႉဢေႃႈ။
ၵူၼ်းတင်းလၢႆတၵ်းလႆႈလၢတ်ႈလႄႈဝႃႈ၊ “ၵွပ်ႈပိူဝ်ႈဢၼ်ႁဝ်းဢမ်ႇၵူဝ်ႁႄ ထႃႇဝရႃႉၽြႃး၊ လႄႈႁဝ်းဢမ်ႇမီးၶုၼ်ႁေႃၶမ်းယဝ်ႉ။ ပိၵ်ႉသမ်ႉမီးသေၵေႃႈ၊ၶုၼ်ႁေႃၶမ်းၼၼ်ႉတၵ်းႁဵတ်းဢၵျူဝ်းပုၼ်ႈႁဝ်းလႆႈၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။-
ၶဝ်ၼၼ်ႉၸၢင်ႈလၢတ်ႈၵႂၢမ်းပဝ်ႇၵႂၢမ်းလၢႆလႄႈႁဵတ်းၵတိသဵတ်ႈၸႃႇလူၺ်ႈၵၼ်သေယဝ်ႉ၊သမ်ႉလၢတ်ႈၵႂၢမ်းမုသႃႇၵူၺ်းဢေႃႈ။ တြႃးတၢင်းဢၼ်သိုဝ်ႈတေႃႇၼၼ်ႉပဵၼ်တြႃးဢၼ်ဢမ်ႇသိုဝ်ႈတေႃႇသေလႄႈယႂ်ႇသုင်မႃးမိူၼ်ၸိူဝ်ႉၼင်ႇတူၼ်ႈယႃႈၶူမ်ၵႃႈတီႈတိူၵ်ႇၼႃးၼၼ်ႉဢေႃႈ။
ၵူၼ်းဝဵင်း သမႃႇရိ၊ ၸိူဝ်းၼၼ်ႉတၵ်းဢွၼ်ၵၼ်ၵူဝ်ႁႄလႄႈႁွင်ႉႁႆႈပွင်ႉၶၢင်းၵွပ်ႈပိူဝ်ႈဢၼ်ၶဝ်သုမ်းဝူဝ်းၶမ်းၵႃႈတီႈဝဵင်း ပေႇသလႃႉ၊ ၼၼ်ႉဢေႃႈ။ ၶဝ်ဢိၵ်ႇတင်းယဵၸ်ႈပရေႃးႁဵၵ်ႈ ၸိူဝ်းဢၼ်ႁဵတ်းဝၢတ်ႈတီႈႁုၼ်ႇႁၢင်ႈသၢင်းထုၼၼ်ႉတၵ်းႁွင်ႉႁႆႈပုၼ်ႈႁုၼ်ႇႁၢင်ႈသၢင်းထုၼၼ်ႉဢေႃႈ။ ၶဝ်ႁွင်ႉႁႆႈၵွပ်ႈပိူဝ်ႈမုၼ်ၽုင်းမၼ်းႁၢႆလၢႆၵႂႃႇၼၼ်ႉဢေႃႈ။-
ႁုၼ်ႇႁၢင်ႈသၢင်းထုၼၼ်ႉတၵ်းလႆႈၶၢမ်ႇတၢင်းဢၼ်ဢဝ်ၵႂႃႇၵႃႈတီႈမိူင်း ဢႃႇသီးရီးယႃး၊ ပုၼ်ႈတႃႇတေဢဝ်ၵႂႃႇသၢၵ်ႈပၼ်တီႈၸဝ်ႈမုၼ်ယႂ်ႇၶုၼ်ႁေႃၶမ်းၼၼ်ႉဢေႃႈ။ မဵဝ်း ဢိသရေး၊ တၵ်းလႆႈဢူၵ်းဢၢႆၵွပ်ႈပိူဝ်ႈတၢင်းၵျၢမ်ႇတၢင်းပွင်တူဝ်ၸဝ်ႈၵဝ်ႇၼၼ်ႉဢေႃႈ။-
သမႃႇရိ၊ ၼႆႉ၊ၶုၼ်ႁေႃၶမ်းမၼ်းၼၼ်ႉတၵ်းလႆႈၶၢမ်ႇတၢင်းဢၼ်ဢဝ်ၵႂႃႇမိူၼ်ၸိူဝ်ႉၼင်ႇၸၢၵ်ႇမႆႉဢၼ်လွင်ႈၵႃႈၼိူဝ်ၽိဝ်ၼမ်ႉၼၼ်ႉဢေႃႈ။-
ထႃႇၼႃႉတီႈသုင်ဝဵင်း ဢႃႇဝိၼ်ႇ၊ ၵႃႈၼိူဝ်ပၢႆၸိၵ်းလွႆတင်းလၢႆတီႈဢၼ်ၵူၼ်း ဢိသရေး၊ ဝႆႈသႃႁုၼ်ႇႁၢင်ႈသၢင်းထုၼၼ်ႉတၵ်းလႆႈၶၢမ်ႇတၢင်းဢၼ်ၵိူၼ်ႇယႃႉပႅတ်ႈသေလႄႈတူၼ်ႈၼၢမ်ၶိူဝ်းၼၢမ်တၵ်းလႆႈဢွၵ်ႇၵႃႈၼိူဝ်ၶဵင်ႇတၢင်းလူႇၶဝ်တင်းလၢႆဢေႃႈ။ ၵူၼ်းတင်းလၢႆတၵ်းႁွင်ႉၸူးတီႈလွႆတင်းလၢႆလႄႈဝႃႈ၊ “ႁူမ်ႇသုမ်ႇႁဝ်းသေၵမ်း၊” ဝႃႈၼႆလႄႈ၊သမ်ႉဝႃႈတီႈၵုင်းတင်းလၢႆလႄႈဝႃႈ၊ “တူၵ်းတဵင်သႂ်ႇႁဝ်းသေၵမ်း၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵူၼ်းမဵဝ်း ဢိသရေး၊ တင်းလၢႆႁဵတ်းတုၸရိူၵ်ႈၸဵမ်မိူဝ်ႈၸူဝ်ႈပၢၼ်ဝဵင်း ၵိပိယႃႉ၊ ၼၼ်ႉမႃးလႄႈဢမ်ႇယဝ်ႉဢမ်ႇဝၢႆးသေပွၵ်ႈ။ ပိူဝ်ႈၼႆလႄႈၽေးသိုၵ်းတၵ်းၶိုတ်းၶဝ်ၵႃႈတီႈဝဵင်း ၵိပိယႃႉ၊ ၼၼ်ႉဢေႃႈ။-
ၵဝ်တၵ်းတိုၵ်းတေႃးၵူၼ်းဢၼ်မီးဢပျတ်ႈၸိူဝ်းၼၼ်ႉသေလႄႈပၼ်တၢမ်ႇတီႈၶဝ်ဢေႃႈ။ ၵႃႈၼႂ်းၼႃႈသိုၵ်းၼၼ်ႉၸိုင်၊ၵူၼ်းမဵဝ်းတင်းလၢႆတၵ်းၽွမ်ႉၵၼ်ႁဵတ်းၶတ်းၵၼ်တင်းၶဝ်လႄႈ၊ၶဝ်တၵ်းလႆႈၶၢမ်ႇတၢင်းဢၼ်ပၼ်တၢမ်ႇပုၼ်ႈဢပျတ်ႈၶဝ်ဢၼ်ၼမ်ၼႃႇလူင်လၢင်ၼၼ်ႉဢေႃႈ။
“ၵူၼ်းမဵဝ်း ဢိသရေး၊ ၼၼ်ႉမိူဝ်ႈၵွၼ်ႇၼၼ်ႉမိူၼ်ၸိူဝ်ႉၼင်ႇဢၼ်ဝူဝ်းမႄႈသိုဝ်ႇဢၼ်ၽိုၵ်းဝႆႉသွၼ်ဝႆႉလီလီႁႂ်ႈမၼ်းၶႂ်ႈယဵပ်ႇၶဝ်ႈၼၼ်ႉဢေႃႈ။ ၵူၺ်းၵႃႈ၊ၵဝ်တႅပ်းတတ်းႁႂ်ႈလႆႈဢဝ်ၵၢၼ်းတၢင်ႇသႂ်ႇၶေႃးမၼ်းဢၼ်ႁၢင်ႈလီၼၼ်ႉလႄႈႁၢင်ႈႁႅၼ်းႁႂ်ႈမၼ်းလႆႈႁဵတ်းၵၢၼ်ဢၼ်ယဵင်ႈၶႅၼ်းၼၵ်းၼႃႇၼၼ်ႉဢေႃႈ။ ၵဝ်တၵ်းႁႂ်ႈမဵဝ်း ယုတႃႉ၊ ထႆလႄႈႁႂ်ႈမဵဝ်း ဢိသရေး၊ ၽိူဝ်ဢေႃႈ။-
ၵဝ်လၢတ်ႈလႄႈဝႃႈ၊ ‘ဢွၼ်ၵၼ်ထႆလိၼ်မႂ်ႇမႂ်ႇလႄႈၽုၵ်ႇတၢင်းဢၼ်သိုဝ်ႈတေႃႇသေယဝ်ႉ၊ပၢတ်ႇဢဝ်တၢင်းလီဢၼ်ဢွၵ်ႇမႃးလူၺ်ႈတၢင်းဢၼ်သူရူဝ်ႇသေႇၵူဝ်ယမ်ၵဝ်ၼၼ်ႉတႃႉ။ ၶိင်ႇမိူဝ်ႈယၢမ်းၼႆႉ ပဵၼ်ၶိင်ႇၶႃႇဢၼ်သူတၵ်းဝၢႆႇၶိုၼ်းမႃးၸူးတီႈၵဝ်၊ဢၼ်ပဵၼ် ထႃႇဝရႃႉၽြႃး၊ သူၼၼ်ႉလႄႈပဵၼ်ၶိင်ႇၶႃႇဢၼ်ၵဝ်တၵ်းသွၼ်းလေႃႇတၢင်းလီၵႃႈၼိူဝ်သူၼၼ်ႉယဝ်ႉ၊’ ဝႃႈၼင်ႇၼႆဢေႃႈ။-
သူယင်းၽုၵ်ႇတူၼ်ႈတုၸရိူၵ်ႈလႄႈပၢတ်ႇဢဝ်ဢပျတ်ႈယဝ်ႉ။ သူဢွၼ်ၵၼ်ၵိၼ်မၢၵ်ႇၵိၼ်ႁူင်းမုသႃႇယဝ်ႉ။ “ၵွပ်ႈပိူဝ်ႈဢၼ်မႂ်းဢိင်ပိုင်ႈလေႃႉမႃႉသိုၵ်းမႂ်းတင်းလၢႆ၊ဢိၵ်ႇတင်းၵူၼ်းသိုၵ်းမႂ်းဢၼ်ၼမ်ၵိုၼ်းၼႃႇၼၼ်ႉလႄႈ၊-
ၼႃႈသိုၵ်းတၵ်းႁွတ်ႈမႃးတီႈၵူၼ်းမႂ်းသေယဝ်ႉ၊တိူၵ်ႈတီႈတိုၵ်းသိုၵ်းမႂ်းတင်းလၢႆတၵ်းလုလႅဝ်ၵႂႃႇမိူၼ်ၸိူဝ်ႉၼင်ႇၸူဝ်ႈပၢၼ်ဢၼ်ၶုၼ်ႁေႃၶမ်း သႃႇလမၼ်ႇ၊ ယႃႉၽဵဝ်ႈဝဵင်း ပေႇႀပေႇလႃႉ၊ ပႅတ်ႈၼၼ်ႉလႄႈၶဝ်ၸိူဝ်းဢၼ်ပဵၼ်မႄႈဢိၵ်ႇလူၺ်ႈၵၼ်တင်းလုၵ်ႈၶဝ်လၢင်းၶဝ်ၸိူဝ်းၼၼ်ႉလႆႈၶၢမ်ႇတၢင်းဢၼ်ဢဝ်တၢႆၼၼ်ႉဢေႃႈ။-
လွင်ႈတၢင်းၼၼ်ႉတၵ်းပဵၼ်မႃးတီႈသူၵူၼ်းဝဵင်း ပေႇသလႃႉ၊ ၵွပ်ႈပိူဝ်ႈဢပျတ်ႈတုၸရိူၵ်ႈသူဢၼ်ယႂ်ႇၼႃႇလူင်လၢင်ၼၼ်ႉဢေႃႈ။ မိူဝ်ႈဢၼ်ၼႃႈသိုၵ်းတႄႇၸႃႉပဵၼ်မႃးၵမ်းလဵဝ်ၼၼ်ႉၶုၼ်ႁေႃၶမ်းမိူင်း ဢိသရေး၊ တၵ်းလႆႈတၢႆဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “မိူဝ်ႈဢၼ် ဢိသရေး၊ ယင်းလဵၵ်ႉယင်းၼုမ်ႇ ၼၼ်ႉၸိုင်၊ၵဝ်ႁၵ်ႉပႅင်းမၼ်းလႄႈ ၵဝ်ႁွင်ႉဢဝ်လုၵ်ႈၸၢႆးၵဝ်ဢွၵ်ႇသေၵႃႈတီႈ မိူင်း ဢေးၵျိပ်ႉ၊ မႃးဢေႃႈ။
ၵူၺ်းၵႃႈ၊ၸွမ်းၼင်ႇဢၼ်ၵဝ် ယဵင်ႈၶႅၼ်း ႁွင်ႉဢဝ်ၶဝ်ၼၼ်ႉ ၶဝ်ယဵင်ႈၶႅၼ်းဢွၼ်ၵၼ်ဢွၵ်ႇပၢႆႈသေ ၵႃႈတီႈၵဝ်ၵႂႃႇဢေႃႈ။ ၵူၼ်းၵဝ်ၸိူဝ်းၼၼ်ႉဢဝ်ၶိူင်ႈတၢင်းလူႇသၢၵ်ႈတီႈ ၽြႃးပႃႇလႃႉ၊ ဢဝ်ၼၢမ်ႇသႃႇၽဝ်ၵႃႈတီႈ ႁုၼ်ႇႁၢင်ႈသၢင်းထုဢေႃႈ။
ၼႂ်းဝႃႈၼၼ်သေၵေႃႈ၊ၵဝ်ပဵၼ်ၵေႃႉဢၼ်သွၼ်ႁႂ်ႈၵူၼ်းမဵဝ်း ဢိသရေး၊ ၽိုၵ်းပႆဢေႃႈ။ ၵဝ်ဢုမ်ႈႁွပ်ႇဢဝ်ၵူၼ်းၵဝ်လူၺ်ႈၶႅၼ်မိုဝ်း ၵဝ်ဢေႃႈ။ ၵူၺ်းၵႃႈ၊ၶဝ်ယင်းဢမ်ႇႁုၵျေးၸူးတၢင်းဢၼ် ၵဝ်လုမ်းလႃးၶဝ်ၼၼ်ႉ
ၵဝ်ဢဝ်တင်းၸိူၵ်ႈမႅတ်ႈတႃႇတိုတ်ႉၸၼ် ဢဝ်ၶဝ်ဢေႃႈ။ ၵဝ်ဢုမ်ႈႁွပ်ႇဢဝ်ၶဝ်လႄႈၵွတ်ႇဢဝ်ၶဝ်ဝႆႉၸပ်းတူဝ်ၸပ်းၵႅမ်ႈၵဝ်ဢေႃႈ။ ၵဝ်ၵူမ်ႈလူင်းၸူးၶဝ်သေယဝ်ႉ၊လဵင်ႉလူပွၼ်ႈႁႂ်ႈ ၶဝ်ၵိၼ်ဢေႃႈ။
“ၵွပ်ႈပိူဝ်ႈဢၼ်ၶဝ်ထဵင်ပႅတ်ႈတၢင်းဢၼ်တၵ်းၶိုၼ်းမႃးတီႈၵဝ်ၼၼ်ႉလႄႈ၊ၶဝ်တၵ်းလႆႈၶိုၼ်းမိူဝ်းၸူးတီႈမိူင်း ဢေးၵျိပ်ႉ၊ သေယဝ်ႉ၊ၶုၼ်ႁေႃၶမ်း ဢႃႇသီးရီးယႃး၊ တၵ်းဢုပ်ႉပိူင်ႇၶဝ်ဢေႃႈ။-
ၽေးသိုၵ်းတၵ်းတူၵ်းႁွတ်ႈၵႃႈၼိူဝ်ဝဵင်းၶဝ်လႄႈၵိူၼ်ႇၽၵ်းတူဝဵင်းၶဝ်လုလႅဝ်ၵွပ်ႈပိူဝ်ႈၵူၼ်းၵဝ်တင်းလၢႆႁဵတ်းၸွမ်းဢလူဝ်ႇၵၢင်ၸႂ်ၶဝ်ၼၼ်ႉဢေႃႈ။-
ၶဝ်မီးၸႂ်သၽေႃးဢၼ်ၶႂ်ႈဝၢႆႇပႅတ်ႈသေၵႃႈတီႈၵဝ်ဢေႃႈ။ ၶဝ်တၵ်းလႆႈႁွင်ႉႁႆႈၵွပ်ႈပိူဝ်ႈၵၢၼ်းၶေႃးၶဝ်ၼၼ်ႉလႄႈဢမ်ႇမီးၽူႈလႂ်တၵ်းၸွႆႈယုၵ်ႉဢွၵ်ႇပၼ်သေၵၢၼ်းၶေႃးၶဝ်ၼၼ်ႉသေၵေႃႉသေၵူၼ်း။
“မဵဝ်း ဢိသရေး၊ ႟။ ၵဝ်တၵ်းၸုၼ်ႉပႅတ်ႈမႂ်းလႆႈၸိူဝ်ႉၼင်ႇႁိုဝ်၊ ၵဝ်တၵ်းပႄႇပႅတ်ႈမႂ်းလႆႈၸိူဝ်ႉၼင်ႇႁိုဝ်၊ ၵဝ်တၵ်းယႃႉပႅတ်ႈမႂ်းမိူၼ်ၸိူဝ်ႉၼင်ႇၵဝ်ယႃႉပႅတ်ႈဝဵင်း ဢႃႇတမႃႇ၊ ၼၼ်ႉလႆႈၸိူဝ်ႉၼင်ႇႁိုဝ်၊ ၵဝ်တၵ်းႁဵတ်းပႄႉႁဵတ်းၼႅင်ႇမႂ်းမိူၼ်ၸိူဝ်ႉၼင်ႇဢၼ်ၵဝ်ႁဵတ်းပႄႉႁဵတ်းၼႅင်ႇဝဵင်း ၸေႇပူဝ်းဢိမ်း၊ ၼၼ်ႉလႆႈၸိူဝ်ႉၼင်ႇႁိုဝ်၊ ႁူဝ်ၸႂ်ၵဝ်တိုၼ်းဢမ်ႇပၼ်ဢၶႂၢင်ႉ ႁႂ်ႈၵဝ် ႁဵတ်းၸိူဝ်ႉၼင်ႇၼၼ် လွင်ႈမၼ်းၸမ်ႉ၊ၵဝ်ႁၵ်ႉပႅင်းမႂ်းၼႃႇ လူင်လၢင်ဢေႃႈ။
ၵဝ်တၵ်းဢမ်ႇပၼ်တၢမ်ႇတီႈမႂ်းၸွမ်းၼင်ႇ တေႃးသႃႉၵဝ်ဢွၵ်ႇၼၼ်ႉ ၵဝ်တၵ်းဢမ်ႇယႃႉပႅတ်ႈၵူၼ်းမဵဝ်း ဢိသရေး၊ ထႅင်ႈသေပွၵ်ႈ၊ လွင်ႈမၼ်းၸမ်ႉ၊ၵဝ်ဢမ်ႇၸႂ်ႈၵူၼ်း။ ၵဝ်ပဵၼ် ၽြႃးပဵၼ်ၸဝ်ႈဢေႃႈ။ ၵဝ်ၸဝ်ႈဢၼ်မူတ်းၸၢင်ႇၼႆႉမီးယူႇ လူၺ်ႈၵၼ်တင်းမႂ်းဢေႃႈ။ ၵဝ်တၵ်းဢမ်ႇပႃးတေႃးသႃႉလႄႈမႃးၸူး တီႈမႂ်းဢေႃႈ။
“ၵူၼ်းၵဝ်တင်းလၢႆတၵ်းၸွမ်းလင်ၵဝ်မိူဝ်ႈဢၼ်ၵဝ်ႁွင်ႉမိူၼ်သဵင်သၢင်ႇသီႈႁွင်ႉၼၼ်ႉၸိုင်၊ၶဝ်တၵ်းဢွၼ်ၵၼ်ႁိပ်ႈၼႅတ်ႈဢွၵ်ႇသေၽၢႆႇဝၼ်းတူၵ်းသေလႄႈမႃးၸူးတီႈၵဝ်ဢေႃႈ။-
ၶဝ်တၵ်းဢွၼ်ၵၼ်ဢွၵ်ႇပၢႆႈမႃးမိူၼ်ၸိူဝ်ႉၼင်ႇၼူၵ်ႉတင်းလၢႆဢၼ်လုၵ်ႉသေၵႃႈတီႈမိူင်း ဢေးၵျိပ်ႉ၊ ဢွၵ်ႇပၢႆႈမႃးၶၼ်ၶၼ်ၽႂ်းၽႂ်းၼၼ်ႉ၊ဢိၵ်ႇတင်းမိူၼ်ၸိူဝ်ႉၼင်ႇၼူၵ်ႉတူႈတင်းလၢႆဢွၵ်ႇပၢႆႈသေၵႃႈတီႈမိူင်း ဢႃႇသီးရီးယႃး၊ မႃးၼၼ်ႉဢေႃႈ။ ၵဝ်တၵ်းဢဝ်ၶဝ်ၶိုၼ်းမိူဝ်းၸူးတီႈႁိူၼ်းၵဝ်ႇၵဝ်ႇၶဝ်ၼၼ်ႉဢေႃႈ။ ဝႃႈၼင်ႇၼႆ ၵဝ် ထႃႇဝရႃႉၽြႃး၊ မီးဢမိင်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵူၼ်းမဵဝ်း ဢိသရေး၊ တင်းလၢႆဢဝ်ၵႂၢမ်းမုသႃႇ၊ဢိၵ်ႇတင်းတၢင်းဢၼ်ပႅတ်ႉဢၼ်လႅၼ်လွမ်ႉႁွပ်ႈၵဝ်ဢေႃႈ။ ၵူၼ်းမဵဝ်း ယုတႃႉ၊ ၵေႃႈ ယင်းဢွၼ်ၵၼ်လုၵ်ႉၽိုၼ်ႉၵဝ်ဢၼ်ပဵၼ်ၽြႃးပဵၼ်ၸဝ်ႈဢၼ်ပႂ်ႉသဵတ်ႈၸႃႇလႄႈမူတ်းၸၢင်ႇၼၼ်ႉဢေႃႈ။
“ၵႃႈဢၼ်ၵူၼ်းမဵဝ်း ဢိသရေး၊ ၵမ်ၵျၢင်ႉၸႃႉၸဵမ်ႁူဝ်ၼႂ်တေႃႇထိုင်ၵၢင်ၶမ်ႈၼၼ်ႉၵႃႈမီးတင်းသဵင်ႈတင်းလူင်ပဵၼ်ဢၼ်ဢမ်ႇပွင်ႇလွင်ႈၵႃႈသင်လႄႈပဵၼ်ဢၼ်ၸၢင်ႈလုလႅဝ်လွၼ်ႉလွၼ်ႉဢေႃႈ။ လွင်ႈတၢင်းဢၼ်ပႅတ်ႉၵိၼ်လႅၼ်ၵိၼ်၊ဢိၵ်ႇတင်းတၢင်းဢၼ်ႁၢဝ်ႈၵျၢမ်းၼမ်ၵိုၼ်းမႃးၵႃႈၼႂ်းၶဝ်ယူႇတိၵ်းတိၵ်းဢေႃႈ။ ၶဝ်ႁဵတ်းမိၵ်ႈသႁႃႇယႃႉလူၺ်ႈၵၼ်တင်းမိူင်း ဢႃႇသီးရီးယႃး၊ သေယဝ်ႉ၊သမ်ႉဢဝ်ၼမ်ႉမၼ်းၵႂႃႇသၢၵ်ႈပၼ်တီႈမိူင်း ဢေးၵျိပ်ႉ၊ ဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၶတ်းတႃႉလႄႈႁဵတ်းဢမုၵၼ်တင်းၵူၼ်းမဵဝ်း ယုတႃႉ၊ ဢေႃႈ။ မၼ်းၸဝ်ႈသမ်ႉတၵ်းပၼ်တၢမ်ႇတီႈၵူၼ်းမဵဝ်း ဢိသရေး၊ ၸွမ်းၼင်ႇတၢင်းၵမ်တၢင်းၵျၢင်ႉၶဝ်ၼၼ်ႉဢေႃႈ။ မၼ်းၸဝ်ႈတၵ်းတွပ်ႇတႅၼ်းပၼ်ၸွမ်းၵႃႈၼင်ႇဢၼ်ၶဝ်ပွင်ၶဝ်ႁဵတ်းၸိူဝ်းၼၼ်ႉဢေႃႈ။-
ပူႇမွၼ်ႇၶဝ် ယႃႇၵုပ်ႈ၊ ၼၼ်ႉၶတ်းၶဵင်ႇၵၼ်တင်းပီႈဢၢႆႈၽႃၽႄမၼ်း ဢေးသေႃး၊ ၵႃႈၼႂ်းတွင်ႉမႄႈၶဝ်သေယဝ်ႉ၊မိူဝ်ႈဢၼ်မၼ်းယႂ်ႇမႃးၼၼ်ႉၸိုင်၊မၼ်းၶေႉၶဵင်ႇၵၼ်တင်းၽြႃးပဵၼ်ၸဝ်ႈဢေႃႈ။-
မၼ်းၶေႉၶဵင်ႇၵၼ်တင်းတမၢၼ်ႇၵၢင်ႁၢဝ်လႄႈပႄႉၼႅင်ႇဢေႃႈ။ မၼ်းၼမ်ႉတႃတူၵ်းလႄႈလဝ်ႈယွၼ်းတၢင်းလီမၢင်ႇၵလႃႇဢေႃႈ။ ၼင်ႇၼၼ်လႄႈၵႃႈတီႈ ပေႇသလႃႉ၊ ၼၼ်ႉၽြႃးပဵၼ်ၸဝ်ႈၵျွမႃးၵႃႈတီႈပူႇမွၼ်ႇႁဝ်း ယႃႇၵုပ်ႈ၊ လႄႈမီးပျႃႇတိၵ်ႈတီႈမၼ်း ဢေႃႈ။-
ၼႃႇမႃႉၸိုဝ်ႈသဵင်မၼ်းၸဝ်ႈဢၼ်တၵ်းလႆႈႁဵတ်းဝၢတ်ႈၵူဝ်းၵႂၢႆႇၼၼ်ႉပဵၼ် ထႃႇဝရႃႉၽြႃး၊ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ ဢေႃႈ။-
ပိူဝ်ႈၼႆလႄႈ၊ၸိူဝ်ႉၶိူဝ်းလုၵ်ႈလၢၼ် ယႃႇၵုပ်ႈ၊ ၶဝ်႟။ ယုမ်ႇမၢတ်ႈဢိင်ပိုင်ႈၽြႃးပဵၼ်ၸဝ်ႈသူလႄႈၶိုၼ်းမႃးၸူးတီႈမၼ်းၸဝ်ႈတႃႉ။ ပႂ်ႉၵမ်ပႂ်ႉၸွမ်းတြႃးၵရုၼႃႇ၊ဢိၵ်ႇတင်းတြႃးတၢင်းဢၼ်သိုဝ်ႈတေႃႇလႄႈမုင်ႈမွင်းၽြႃးပဵၼ်ၸဝ်ႈသူယူႇတႃႇသေႇဢမ်ႇထၢတ်ႇတႃႉ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵူၼ်းမဵဝ်း ဢိသရေး၊ မိူၼ်ၵူၼ်းမဵဝ်း ၶႃႇၼၼိ၊ ဢၼ်ဢမ်ႇမီးသဵတ်ႈၸႃႇၼၼ်ႉယိပ်းၵမ်ယႃႇၸူႇဢၼ်ဢမ်ႇမၢၼ်ႇဢမ်ႇမႅၼ်ႈဢၼ်ပႅတ်ႉဢၼ်လႅၼ်ၼၼ်ႉဢေႃႈ။-
ၶဝ်ၸၢင်ႈလၢတ်ႈလႄႈဝႃႈ၊ ‘ႁဝ်းၼႆႉမၢၵ်ႈမီးလႄႈၸၢင်ႈႁႃဢုၵ်ႉၸႃႇငိုၼ်းၶမ်းလႆႈယဝ်ႉ။ ၵူၺ်းၵႃႈ၊ဢမ်ႇမီးၵေႃႉဢၼ်တၢင်ႇဢပျတ်ႈႁဝ်းဝႃႈ၊သူလႆႈမၢၵ်ႈမီးလူၺ်ႈတၢင်းဢၼ်ဢမ်ႇတြႃး၊’ ဝႃႈၼင်ႇၼႆဢေႃႈ။-
ၵူၺ်းၵႃႈ၊ၵဝ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢၼ်ဢွၼ်ဢဝ်သူဢွၵ်ႇသေမိူင်း ဢေးၵျိပ်ႉ၊ မႃးၼၼ်ႉတၵ်းႁႂ်ႈသူလႆႈယူႇၼႂ်းသုမ်ႉထဵင်ထႅင်ႈ မိူၼ်ၸိူဝ်ႉၼင်ႇဝၼ်းဢၼ်ၵဝ်မႃးၸူးတီႈသူၵႃႈၼႂ်းထိူၼ်ႇလႅင်ႉၼၼ်ႉဢေႃႈ။
“ၵဝ်ပၼ်ပျႃႇတိၵ်ႈတီႈပရေႃးၽႅတ်ႈ တင်းလၢႆလႄႈၼႄပျႃးရူႇပႃႇရူင်ႇၼမ်ၼႃႇၼၼ်ႉယဝ်ႉ။ ၵဝ်ဢဝ်ပရေႃးၽႅတ်ႈတင်းလၢႆဝႆႉပဵၼ်ပုင်ႇပမႃႇၼမ်ၼႃႇႁႂ်ႈလႆႈပၼ်သတိတီႈၵူၼ်းၵဝ်တင်းလၢႆယဝ်ႉ။-
ၼႂ်းဝႃႈၼၼ်သေၵေႃႈၵူၼ်းမိူင်း ၵိလတ်ႉ၊ ၶဝ်ယင်းတိုၵ်ႉဝႆႈႁုၼ်ႇႁၢင်ႈသၢင်းထုယူႇဢေႃႈ။ ပိူဝ်ႈၼႆလႄႈၶဝ်ၸိူဝ်းဢၼ်ဝႆႈၼၼ်ႉတၵ်းလႆႈတၢႆဢေႃႈ။ ၶဝ်ဢဝ်ဝူဝ်းတင်းလၢႆသၢၵ်ႈလူႇၵႃႈၼႂ်းဝဵင်း ၵိလႃႉၵႃႇလႃႉ၊ လႄႈၶဵင်ႇတၢင်းလူႇၶဝ်ၼၼ်ႉတၵ်းလႆႈပိၼ်ႇပဵၼ်ၵွင်ႁိၼ်ၵႃႈတီႈႁွႆးထႆၼႂ်းတူင်ႈၼႃးတင်းလၢႆၼၼ်ႉဢေႃႈ၊” ဝႃႈၼင်ႇၼႆဢေႃႈ။
ပူႇပေႃႈႁဝ်း ယႃႇၵုပ်ႈ၊ ၼၼ်ႉဢွၵ်ႇပၢႆႈၵႂႃႇၸူးတီႈမိူင်း မေႇသူဝ်ႇပူဝ်ႇတေးမီးယႃး၊ လႄႈ၊ၵႃႈတီႈၼၼ်ႈၼင်ႇႁိုဝ်မၼ်းတၵ်းတေလႆႈမေးၸိုင်၊လႆႈႁဵတ်းၶႃႈတီႈၵူၼ်းၵေႃႉၼိုင်ႈလႄႈလဵင်ႉထိင်းသူဝ်းၵေႃႉၼၼ်ႉဢေႃႈ။-
ထႃႇဝရႃႉၽြႃး၊ ပွႆႇၸႂ်ႉပရေႃးၽႅတ်ႈၵေႃႉၼိုင်ႈႁႂ်ႈလႆႈၵႄႇၼုၵ်ႈဢဝ်ၵူၼ်းမဵဝ်း ဢိသရေး၊ ဢွၵ်ႇသေမိူင်း ဢေးၵျိပ်ႉ၊ မိူင်းဢၼ်ၶဝ်လႆႈၶၢမ်ႇႁဵတ်းၶႃႈၼၼ်ႉမႃးႁႂ်ႈလႆႈပႂ်ႉလူလုမ်းလႃးၶဝ်ဢေႃႈ။-
ၵူၼ်းမဵဝ်း ဢိသရေး၊ တင်းလၢႆၼၼ်ႉတိုၵ်းယူင်းတၢင်းဢၼ်ၸႂ်မႆႈၶႂ်ႈၸႃႉ ထႃႇဝရႃႉၽြႃး၊ ၼႃႇလူင်လၢင်ယဝ်ႉ။ ပိူဝ်ႈၼႆလႄႈၶဝ်လႆႈၶၢမ်ႇတၢင်းတၢႆပုၼ်ႈဢမုဢၼ်ၶဝ်ၽိတ်းပိူင်ႈၼၼ်ႉဢေႃႈ။ ထႃႇဝရႃႉၽြႃး၊ တၵ်းပၼ်တၢမ်ႇတီႈၶဝ်ႁႂ်ႈတၢင်းဢၼ်ၶဝ်သႄႉသွမ်းၼၼ်ႉၶိုၼ်းတူၵ်းႁွတ်ႈၵႃႈၼိူဝ်ၶဝ်ဢေႃႈ။
မိူဝ်ႈဢၼ်ၸိူဝ်ႉၶိူဝ်း ဢေႇၽရိမ်ႇ၊ လၢတ်ႈၵႂၢမ်းၼၼ်ႉၸိုင်၊ၸိူဝ်ႉၶိူဝ်း ဢိသရေး၊ တၢင်ႇၶိူဝ်းဢွၼ်ၵၼ်ၵူဝ်ႁႄလႄႈယုၵ်ႉယွင်ႈၸိူဝ်ႉၶိူဝ်း ဢေႇၽရိမ်ႇ၊ ဢေႃႈ။ လိုၼ်းၼၼ်ႉၶဝ်ၽိတ်းပိူင်ႈၵွပ်ႈလူၺ်ႈ ၽြႃးပႃႇလႃႉ၊ လႄႈၶဝ်လႆႈတၢႆဢေႃႈ။-
ၶဝ်ယင်းဢွၼ်ၵၼ်ၽိတ်းပိူင်ႈယူႇၶိူဝ်းၶိူဝ်းယႂ်းယႂ်းလူၺ်ႈတၢင်းဢၼ်ဢဝ်ငိုၼ်းၶဝ်ႁဵတ်းႁုၼ်ႇႁၢင်ႈသၢင်းထုဢၼ်ႁဵတ်းၸွမ်းၼမ်ႉတိၼ်လၢႆးမိုဝ်း၊ဢိၵ်ႇတင်းၸွမ်းလူၺ်ႈတၢင်းၵျၢမ်ႇႁူဝ်ၸႂ်ၵူၼ်းၼၼ်ႉသေယဝ်ႉ၊သမ်ႉလၢတ်ႈဝႃႈ၊ “ဢွၼ်ၵၼ်သၢၵ်ႈလူႇတီႈၸိူဝ်းၼႆႉတႃႉႁဝ်း၊” ဝႃႈၼင်ႇၼႆဢေႃႈ။ ၶဝ်ဢွၼ်ၵၼ်ၸုပ်ႇၼူမ်ႁုၼ်ႇႁၢင်ႈသၢင်းထုဢၼ်ပဵၼ်ပုင်ႇႁၢင်ႈဝူဝ်းၼၼ်ႉဢေႃႈ။-
ပိူဝ်ႈၼႆလႄႈၶဝ်ၸိူဝ်းၼၼ်ႉတၵ်းႁၢႆၵႂႃႇမိူၼ်ၸိူဝ်ႉၼင်ႇမွၵ်ႇၵုမ်ႈၶိင်ႇၵၢင်ၼႂ်ၼၼ်ႉ၊ဢိၵ်ႇတင်းၸိူဝ်ႉၼင်ႇၼမ်ႉၼၢႆးလပ်ႉႁၢႆၵႂႃႇၶိင်ႇၵၢင်ၼႂ်ၸဝ်ႉၸဝ်ႉၼၼ်ႉ၊ပဵၼ်ၸိူဝ်ႉၼင်ႇၵႅပ်ႇဢၼ်ပိဝ်ၵႂႃႇၸွမ်းလူမ်းဢၼ်ပတ်းမႃးမိူဝ်ႈဢၼ်လၢင်ၶဝ်ႈ၊သမ်ႉမိူၼ်ၸိူဝ်ႉၼင်ႇၵႂၼ်းၽႆးဢၼ်ဢွၵ်ႇၵႃႈၼႂ်းမူၵ်ႇၵႂၼ်းၽႆးၼၼ်ႉဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူဢၼ်ဢွၼ်ဢဝ်သူဢွၵ်ႇသေမိူင်း ဢေးၵျိပ်ႉ၊ မႃးၼၼ်ႉဢေႃႈ။ ၼွၵ်ႈသေၵဝ်ၼႆႉ၊သူဢမ်ႇမီးၽြႃးတၢင်ႇသူႇတၢင်ႇပႃး။ ၵဝ်သူႇလဵဝ်ပႃးလဵဝ်ၼႆႉၵူၺ်းပဵၼ်ၸဝ်ႈဢၼ်ၵႄႇသႄႇၶျွတ်ႈဢဝ်သူဢေႃႈ။-
ၵဝ်ပႂ်ႉလူလုမ်းလႃးသူၵႃႈၼႂ်းထိူၼ်ႇတီႈဢၼ်ႁႅင်ႈႁွင်ၼႃႇလူင်လၢင်ၼၼ်ႉမႃးယဝ်ႉ။-
မိူဝ်ႈဢၼ်သူလႆႈၶဝ်ႈၵႃႈၼႂ်းမိူင်းဢၼ်လီဢၼ်ငၢမ်းလႄႈဢွၼ်ၵၼ်လႆႈၵိၼ်ဢိမ်ႇၵိၼ်တဵမ်ၼၼ်ႉၸိုင်၊သူမီးၸႂ်ဢၼ်ဢုပ်ႇဝၢဝ်းလႄႈလူင်လိုမ်းပႅတ်ႈၵဝ်ဢေႃႈ။-
ပိူဝ်ႈၼႆလႄႈၵဝ်တၵ်းပဵၼ်ၸိူဝ်ႉၼင်ႇသၢင်ႇသီႈလႄႈတိုၵ်းတေႃးသူဢေႃႈ။ ၵဝ်တၵ်းပဵၼ်ၸိူဝ်ႉၼင်ႇသိူဝ်ၸုမ်ႈလႄႈပႂ်ႉမူပ်ႇၸွမ်းတႃႈၸွမ်းတၢင်းသူဢေႃႈ။-
ၵဝ်တၵ်းတိုၵ်းတေႃးသူၸိူဝ်ႉၼင်ႇမီမႄႈဢၼ်လုၵ်ႈလၢင်းမၼ်းႁၢႆၵႂႃႇၼၼ်ႉလႄႈသိၵ်ႇယႃႉၽင်ႉၽၢပ်ႇဢၼ်ႁူမ်ႇသုမ်ႇႁူဝ်ၸႂ်သူၼၼ်ႉပႅတ်ႈဢေႃႈ။ ၵဝ်တၵ်းပဵၼ်ၸိူဝ်ႉၼင်ႇသၢင်ႇသီႈၶူပ်းၵိၼ်ပႅတ်ႈၵမ်းလဵဝ်လႄႈတၵ်းသိၵ်ႇသူပႅတ်ႈပဵၼ်ပိတ်းပဵၼ်ပွတ်းမိူၼ်ၸိူဝ်ႉၼင်ႇသိၵ်ႇၼိူဝ်ႉတူဝ်ထိူၼ်ႇၼၼ်ႉဢေႃႈ။
“ၵူၼ်းမဵဝ်း ဢိသရေး၊ ၶဝ်႟။ ၵဝ်တၵ်းယႃႉၽဵဝ်ႈသူပႅတ်ႈဢေႃႈ။ ပေႃးပဵၼ်ၸိူဝ်ႉၼင်ႇၼႆၸိုင်၊ၽူႈလႂ်တၵ်းၸွႆႈထႅမ်သူလႆႈ။-
သူယွၼ်းဢဝ်ၶုၼ်ႁေႃၶမ်းဢိၵ်ႇတင်းၶုၼ်တင်းလၢႆၼၼ်ႉယဝ်ႉ။ ၵူၺ်းၵႃႈ၊ၶဝ်တၵ်းႁဵတ်းၸိူဝ်ႉၼင်ႇႁိုဝ်ၵႄႇသႄႇဢဝ်ၵူၼ်းမဵဝ်းသူလႆႈ။-
ၵဝ်ပႃးတင်းတေႃးသႃႉလႄႈပၼ်ၶုၼ်ႁေႃၶမ်းတီႈသူယဝ်ႉ။ ၵမ်းလိုၼ်းၵဝ်ၸႂ်မႆႈၶႂ်ႈၸႃႉၼႃႇလူင်လၢင်သေလႄႈပႄႇၶဝ်ပႅတ်ႈယဝ်ႉ။
“တုၸရိူၵ်ႈဢိၵ်ႇတင်းဢမုဢၼ် ဢိသရေး၊ ႁဵတ်းၸိူဝ်းၼၼ်ႉမၢတ်ႈမၢႆဝႆႉယဝ်ႉလႄႈပပ်ႉဢၼ်မၢတ်ႈမၢႆၸိူဝ်းၼၼ်ႉဢဝ်သိမ်းဝႆႉသိူင်ႇဝႆႉလီလီယဝ်ႉ။-
ဢိသရေး၊ မီးဢၶႂၢင်ႉဢယေးတႃႇတေဢသၢၵ်ႈလိပ်းယူႇသေၵေႃႈ၊မၼ်းငိူဝ်ႈငႃႉလႄႈဢမ်ႇႁပ်ႉဢမ်ႇဢဝ်၊ပဵၼ်ၸိူဝ်ႉၼင်ႇဢၼ်လုၵ်ႈလၢင်းဢၼ်ၸမ်တၵ်းၵိူတ်ႇလဵင်ႉမႃးလႄႈ၊သမ်ႉထဵင်ပႅတ်ႈတၢင်းဢၼ်တေဢွၵ်ႇတွင်ႉမႃးၼၼ်ႉဢေႃႈ။-
ၵဝ်တၵ်းဢမ်ႇၵႄႇသႄႇၶျွတ်ႈဢဝ်ၵူၼ်းၸိူဝ်းၼႆႉဢွၵ်ႇသေမိူင်းမရၼႃႉ၊တၵ်းဢမ်ႇၵႄႇၼုၵ်ႈဢဝ်ၶဝ်ဢွၵ်ႇသေၵႃႈၼႂ်းမိုဝ်းၶုၼ်တၢႆ။ ၶုၼ်တၢႆ႟။ ၽေးဢုပၢတ်ႈမႂ်းမီးၵႃႈလႂ်။ မိူင်းမရၼႃႉ႟။ တၢင်းဢၼ်မႂ်းၸၢင်ႈယႃႉၼၼ်ႉမီးၵႃႈလႂ်။ ၵမ်းလိုၼ်းၵဝ်တၵ်းဢမ်ႇမီးၸႂ်ဢၼ်ဢဵတ်းလူၵူၼ်းၸိူဝ်းၼႆႉလႃးလႃး။-
ပိၵ်ႉသမ်ႉ ဢိသရေး၊ ႁႂ်ႈမၢၵ်ႇမၼ်းပူင်းလီၵႃႈၼႂ်းပီႈၼႂ်းၼွင်ႉမၼ်းသေၵေႃႈ၊ၵဝ်တၵ်းၸႂ်ႉလူမ်းမႆႈတၢင်းဢွၵ်ႇဢၼ်လုၵ်ႉသေၵႃႈတီႈထိူၼ်ႇလႅင်ႉၼၼ်ႉပတ်ႉထူဝ်းမႃးလႄႈတၵ်းႁႂ်ႈၼမ်ႉဢွၵ်ႇႁူးမၼ်းဢိၵ်ႇတင်းၼမ်ႉမေႃႇမၼ်းတင်းလၢႆႁႅင်ႈၵႂႃႇႁွင်ၵႂႃႇသေယဝ်ႉ၊တၵ်းသမ်ႉဢဝ်ၵႃႈဢၼ်ပဵၼ်ဢၼ်လီဢၼ်မျၢတ်ႈၵူႈၸိူဝ်ႉၵူႈပိူင်ၼၼ်ႉပႅတ်ႈဢေႃႈ။-
ဝဵင်း သမႃႇရိ၊ တၵ်းလႆႈၶၢမ်ႇတၢမ်ႇဢပျတ်ႈၵွပ်ႈပိူဝ်ႈဢၼ်ၶဝ်ႁဵတ်းၶတ်းၶႅင်ႁႅင်းတႃႉၵဝ်ၼၼ်ႉဢေႃႈ။ ၵူၼ်းဝၢၼ်ႈၵူၼ်းမိူင်းမၼ်းတၵ်းတၢႆၵႃႈၼႂ်းၼႃႈသိုၵ်းလႄႈလုၵ်ႈဢွၼ်ႇလႅင်တင်းလၢႆတၵ်းလႆႈၶၢမ်ႇတၢင်းဢၼ်ဢဝ်ပေႃႉၽတ်ႉသေလႄႈ၊မႄႈယိင်းဢၼ်ပႃးပတိၵ်ႈသၼ်ႇထေႇတင်းလၢႆၼၼ်ႉတၵ်းလႆႈၶၢမ်ႇတၢင်းဢၼ်ၽႃႇတွင်ႉၽႃႇပုမ်ဢေႃႈ၊” ဝႃႈၼင်ႇၼႆဢေႃႈ။
ၵူၼ်းမဵဝ်း ဢိသရေး၊ ႟။ ၶိုၼ်းမႃးၸူးတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈမႂ်းတႃႉ။ တုၸရိူၵ်ႈဢၼ်မႂ်းႁဵတ်းၼၼ်ႉႁႂ်ႈမႂ်းလႆႈၶီႈလိုတ်းလႄႈလူမ်ႉယဝ်ႉ။-
ၶိုၼ်းမႃးၸူးတီႈ ထႃႇဝရႃႉၽြႃး၊ လႄႈႁႂ်ႈၵႂၢမ်းသူးတွင်းၼႆႉပဵၼ်ၶိူင်ႈတၢင်းလူႇတီႈမၼ်းၸဝ်ႈသေယဝ်ႉ။ သူးတွင်းဝႃႈ၊ “ၶႅၼ်းတေႃႈပွႆႇလွတ်ႈဢပျတ်ႈၶႃႈၸဝ်ႈႁဝ်းၶဝ်ၵႃႈမီးလႄႈႁပ်ႉတုင်းဢဝ်ၵႂၢမ်းသူးတွင်းပထၼႃႇၶႃႈၸဝ်ႈႁဝ်းၶဝ်ၼႆႉသေၵမ်းတီႈၶႃႈ။ ၼင်ႇၼၼ်လႄႈၶႃႈၸဝ်ႈႁဝ်းၶဝ်တၵ်းယုၵ်ႉယွင်ႈယွင်ႈယေႃးၸဝ်ႈႁဝ်းၸွမ်းၵႃႈၼင်ႇဢၼ်ၶႃႈၸဝ်ႈႁဝ်းၶဝ်ဝႆႉၵတိၼၼ်ႉတီႈၶႃႈဢေႃႈ။-
ၶုၼ် ဢႃႇသီးရီးယႃး၊ ဢမ်ႇၵႄႇသႄႇဢဝ်ၶႃႈၸဝ်ႈႁဝ်းၶဝ်လႆႈ၊မႃႉသိုၵ်းတင်းလၢႆၵေႃႈဢမ်ႇၵႅတ်ႇဢမ်ႇၶႄၶႃႈၸဝ်ႈႁဝ်းၶဝ်လႆႈတီႈၶႃႈ။ ၵမ်းလိုၼ်းၶႃႈၸဝ်ႈႁဝ်းၶဝ်တၵ်းဢမ်ႇႁွင်ႉႁုၼ်ႇႁၢင်ႈသၢင်းထုတင်းလၢႆလႄႈဝႃႈ၊ ‘ၶဝ်ပဵၼ်ၽြႃးပဵၼ်ၸဝ်ႈႁဝ်းၶႃႈတီႈၶႃႈဢေႃႈ၊’ ဝႃႈၼႆထႅင်ႈတီႈၶႃႈယဝ်ႉ။ ဢူဝ်း။ ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းၸၢင်ႈႁၵ်ႉဢဵတ်းလူၶဝ်ၸိူဝ်းဢၼ်ဢမ်ႇမီးတီႈဢိင်တီႈပိုင်ႈၼၼ်ႉတီႈၶႃႈဢေႃႈ၊” ဝႃႈၼင်ႇၼႆတႃႉ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵဝ်တၵ်းဢဝ်ၵူၼ်းၵဝ်တင်းလၢႆၶိုၼ်းမႃးၸူး တီႈၵဝ်ဢေႃႈ။ ၵဝ်တၵ်းပႃးၸႂ်ပႃးၶေႃးႁၵ်ႉပႅင်းၶဝ်လႄႈပိူဝ်ႈဝႃႈတေႃးသႃႉၵဝ်ၼၼ်ႉပျေႇတေႃႇၶဝ်ယဝ်ႉ။
ၵဝ်တၵ်းပဵၼ်ၸိူဝ်ႉၼင်ႇၼမ်ႉၼၢႆးၵႃႈတီႈ မဵဝ်း ဢိသရေး၊ ဢေႃႈ။ ၶဝ်တၵ်းၵီႈမိူၼ်မွၵ်ႇႁဵဝ်းငိုၼ်းလႄႈတၵ်း ယင်ႇႁၢၵ်ႈမိူၼ်ၸိူဝ်ႉၼင်ႇတူၼ်ႈမႆႉ ၵႃႈတီႈထိူၼ်ႇ လေႇပၼုၼ်ႇ၊ ပုၼ်ႉၼၼ်ႉဢေႃႈ။
ၵိင်ႇမၼ်းယွတ်ႈမၼ်းတၵ်းယႂ်ႇၽႄႈၼမ်ၵိုၼ်းမႃးလႄႈမၼ်းတၵ်းမီးသရေႇႁၢင်ႈလီႁၢင်ႈငၢမ်း မိူၼ်တူၼ်ႈသၢၼ်ႇလုၼ်ႇ၊ တၵ်းႁွမ်ႁိုၼ်းမိူၼ်ၸိူဝ်ႉၼင်ႇတူၼ်ႈ ဢႃႇရိတ်ႉ၊ တီႈထိူၼ်ႇ လေႇပၼုၼ်ႇ၊ ဢေႃႈ။
ၶဝ်တၵ်းမီးဢၶႂၢင်ႉဢၼ်ယူႇၵႃႈတႂ်ႈတၢင်းဢၼ်ၵဝ်ၵႅတ်ႇၶႄႁႄႉၵင်ႈၼၼ်ႉထႅင်ႈဢေႃႈ။ ၶဝ်တၵ်းႁိူဝ်ႈႁိူင်းပိူင်းသႂ်မႃးမိူၼ်သူၼ်ဢူးယဵၼ်ႇလႄႈ တၵ်းမၢၵ်ႇမၢၵ်ႇမႃးၵွၼ်ႈလီပူင်းလီမိူၼ်ၸိူဝ်ႉၼင်ႇၶိူဝ်းမၢၵ်ႇၸပိတ်ႉလႄႈမီးၸိုဝ်ႈမီးသဵင်မိူၼ်ၼမ်ႉမၢၵ်ႇၸပိတ်ႉ လေႇပၼုၼ်ႇ၊ ဢေႃႈ။
ၵူၼ်းမဵဝ်း ဢိသရေး၊ ၼၼ်ႉၵမ်းလိုၼ်းတၵ်းဢမ်ႇႁဵတ်းဢၼ်ၸၢပ်ႈသႅင်ႇ ၵၼ်တင်းႁုၼ်ႇႁၢင်ႈသၢင်းထုလႃးလႃး၊ ၵဝ်တၵ်းထွမ်ႇဢဝ်ၵႂၢမ်းပထၼႃႇၶဝ်ၼၼ်ႉလႄႈပႂ်ႉ လူလုမ်းလႃးၶဝ်ဢေႃႈ။ ၵဝ်တၵ်းပဵၼ်ၸိူဝ်ႉၼင်ႇ တူၼ်ႈမႆႉၶဵဝ်လႄႈမုင်းႁူမ်ႇၶဝ်ဝႆႉဢေႃႈ။ ၵဝ်တၵ်းပဵၼ်ငဝ်ႈႁၢၵ်ႈတၢင်းလီမၢင်ႇၵလႃႇၵူႈမဵဝ်းတီႈၶဝ်ဢေႃႈ၊” ဝႃႈၼင်ႇၼႆဢေႃႈ။
ႁႂ်ႈၵေႃႉဢၼ်မီးပိင်ႇၺႃႇၼၼ်ႉႁုၸႅင်ႈၶေႃႈၵႂၢမ်းဢၼ်တႅမ်ႈမၢႆဝႆႉၵႃႈတီႈၼႆႉၼၼ်ႉလႄႈ၊ႁႂ်ႈၵေႃႉဢၼ်ၺၢၼ်ႇလီၼၼ်ႉႁုၸႅင်ႈလီသေၵမ်းလူၺ်ႈ။ သဵၼ်ႈတၢင်း ထႃႇဝရႃႉၽြႃး၊ တင်းလၢႆပဵၼ်ဢၼ်သိုဝ်ႈတေႃႇလႄႈၶဝ်ၸိူဝ်းဢၼ်သိုဝ်ႈတေႃႇၼၼ်ႉဢွၼ်ၵၼ်ပႆၸွမ်းဢေႃႈ။ ၶဝ်ၸိူဝ်းဢၼ်ႁဵတ်းႁၢႆႉႁဵတ်းမိူၵ်ႈၸမ်ႉ၊တိူဝ်ႉမႅၼ်ႈသဵၼ်ႈတၢင်းၸိူဝ်းၼၼ်ႉလႄႈလူမ်ႉၵွပ်ႈပိူဝ်ႈၶဝ်ပႄႇပႅတ်ႈၶေႃႈၵႂၢမ်းၸိူဝ်းၼၼ်ႉဢေႃႈ။ ၵျၢမ်းပရေႃးၽႅတ်ႈႁူဝ်းသေႇယဝ်ႉယဝ်ႉဢေႃႈ။
ၼုၵ်ႈၵပၢတ်ႈၸဝ်ႈၽြႃးဢၼ်ႁွတ်ႈမႃးၵႃႈတီႈ ယူဝ်းဢေႇလႃႉ၊ လုၵ်ႈၸၢႆး ပေႇသူၺ်ႇလႃႉ၊ ၼၼ်ႉၸမ်ႉ။
ၵူၼ်းၸိူဝ်းဢၼ်ဢသၢၵ်ႈယႂ်ႇၶဝ်႟။ ဢွၼ်ၵၼ်ထွမ်ႇငိၼ်းတႃႉ။ ၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင်ၶဝ်႟။ ဢွၼ်ၵၼ်ႁေႈႁူၸူးတႃႉ။ လွင်ႈတၢင်းၸိူဝ်ႉၼင်ႇၼႆၼႆႉယၢမ်ႈပဵၼ် ၼႂ်းၸူဝ်ႈပၢၼ်သူႁိုဝ်း။ ယၢမ်ႈပဵၼ်ၼႂ်း ၸူဝ်ႈပၢၼ်ပူႇသူမွၼ်ႇသူႁိုဝ်း။
ဢွၼ်ၵၼ်မွၵ်ႇလၢတ်ႈတီႈလုၵ်ႈသူလၢင်းသူတႃႉ။ ႁႂ်ႈလုၵ်ႈလၢင်းသူၸိူဝ်းၼၼ်ႉဢွၼ်ၵၼ်သိုပ်ႇ မွၵ်ႇလၢတ်ႈတီႈလုၵ်ႈၶဝ်လၢင်းၶဝ်တႃႉ။ ႁႂ်ႈလုၵ်ႈလၢင်းၶဝ်ၸိူဝ်းၼၼ်ႉဢွၼ်ၵၼ် မွၵ်ႇလၢတ်ႈတီႈၶဝ်ၸိူဝ်းဢၼ်သိုပ်ႇလၢမ်း ၵႂႃႇၵႃႈၼႂ်းၸိူဝ်ႉၶိူဝ်းမဵဝ်းၶဝ်ၼၼ်ႉတႃႉ။
တၢင်းဢၼ်ၸၵ်းတႅၼ်ၵိၼ်လႄႈလိူဝ်ၸိူဝ်းၼၼ်ႉ၊ ၸၵ်းတႅၼ်ဢၼ်ၸၢင်ႈမိၼ်ၸိူဝ်းၼၼ်ႉ ၵိၼ်ပႅတ်ႈဢေႃႈ။ တၢင်းဢၼ်ၸၵ်းတႅၼ်ဢၼ်ၸၢင်ႈမိၼ် ၸိူဝ်းၼၼ်ႉၵိၼ်လိူဝ်ၼၼ်ႉ၊ ၸၵ်းတႅၼ်ဢၼ်ၸၢင်ႈၵျွၵ်းဝႅၼ် ၸိူဝ်းၼၼ်ႉၵိၼ်ပႅတ်ႈဢေႃႈ။ တၢင်းဢၼ်ၸၵ်းတႅၼ်ဢၼ်ၸၢင်ႈ ၵျွၵ်းဝႅၼ်ၸိူဝ်းၼၼ်ႉၵိၼ်လိူဝ်ၼၼ်ႉ၊ ၸၵ်းတႅၼ်ဢၼ်ၸၢင်ႈၵၢၼ်း ၸိူဝ်းၼၼ်ႉၵိၼ်ပႅတ်ႈဢေႃႈ။
ၵူၼ်းဢၼ်ၵိၼ်လဝ်ႈပူၼ်ႉလိူဝ်ၶဝ်႟။ ဢွၼ်ၵၼ် တိုၼ်ႇလႄႈႁွင်ႉႁႆႈတႃႉ။ ၵူၼ်းဢၼ်ၵိၼ်ၼမ်ႉမၢၵ်ႇၸပိတ်ႉပူၼ်ႉလိူဝ် ၶဝ်႟။ ဢွၼ်ၵၼ်ႁွင်ႉႁႆႈပွင်ႉၶၢင်းတႃႉ။ ၵွပ်ႈပိူဝ်ႈၼမ်ႉမၢၵ်ႇၸပိတ်ႉဢၼ်ဝၢၼ်ၼၼ်ႉထၢတ်ႇၵႂႃႇသေၵႃႈတီႈသူပ်းသူၼၼ်ႉယဝ်ႉ။
လွင်ႈမၼ်းၸမ်ႉ၊မဵဝ်းၵူၼ်းဢၼ်ႁႅင်းယႂ်ႇၼႃႇလႄႈၼမ်ၼႃႇ၊ ထၢၼ်ႈပေႃးဢမ်ႇၼပ်ႉဢမ်ႇဢၢၼ်ႇလႆႈၼၼ်ႉ ၶိုၼ်ႈမႃးတိုၵ်းတေႃးၵႃႈတီႈမိူင်းၵဝ်ယဝ်ႉ၊ ၶဵဝ်ႈမဵဝ်းၶဝ်ၼၼ်ႉပဵၼ်ၸိူဝ်ႉၼင်ႇၶဵဝ်ႈ သၢင်ႇသီႈလႄႈ ငႃးမၼ်းၵေႃႈမိူၼ်ၸိူဝ်ႉၼင်ႇငႃး သၢင်ႇသီႈမႄႈၼၼ်ႉဢေႃႈ။
မၼ်းယႃႉတူၼ်ႈၶိူဝ်းမၢၵ်ႇၸပိတ်ႉၵဝ်ပႅတ်ႈလႄႈႁႂ်ႈ တူၼ်ႈမၢၵ်ႇလိူဝ်ႇၵဝ်ႁၵ်းလႅဝ်ပႅတ်ႈယဝ်ႉ၊ မၼ်းထၢၵ်ႇပႅတ်ႈပွၵ်ႇပႅတ်ႈပိူၵ်ႇမၼ်းလႄႈ ဢဝ်လူမ်ႉပႅတ်ႈယဝ်ႉ၊ မၼ်းႁႂ်ႈၵိင်ႇမၼ်းၶႃႈမၼ်း ၽိူၵ်ႇၶၢဝ်ဝႆႉဢေႃႈ။
ႁွင်ႉႁႆႈၶၢင်းၶီၶၢင်းၽၢၼ်လႄႈႁႂ်ႈမိူၼ်ၸိူဝ်ႉၼင်ႇ လုၵ်ႈယိင်းသၢဝ်ဢၼ်၊ ဢဝ်ၼင်ပေႃႁတ်ႉဢႅဝ်မၼ်းၵွပ်ႈပိူဝ်ႈၽူဝ်ဢၼ် မၼ်းသွင်ႇမၢင်ႇၵလႃႇ၊ လူၺ်ႈၵၼ်တင်းမၼ်းၸဵမ်မိူဝ်ႈဢၼ်ဢသၢၵ်ႈ မၼ်းယင်းလဵၵ်ႉယင်းဢွၼ်ႇၼၼ်ႉ တၢႆၵႂႃႇၼၼ်ႉဢေႃႈ။
ၶိူင်ႈတၢင်းလူႇမၢၵ်ႇၶဝ်ႈႁူင်းၶဝ်ႈ၊ဢိၵ်ႇတင်း ၶိူင်ႈတၢင်းလူႇဢၼ်သွၼ်းလေႃႇၼၼ်ႉ၊ ထၢတ်ႇၵႂႃႇသေၵႃႈတီႈႁိူၼ်း ထႃႇဝရႃႉၽြႃး၊ ဢေႃႈ။ ယဵၸ်ႈပရေႃးႁဵၵ်ႈ ဢၼ်ဝႃႈ၊ၶဝ်ၸိူဝ်းဢၼ် ပွင်ၵၢၼ်ဢမု ထႃႇဝရႃႉၽြႃး၊ ၼၼ်ႉ၊ ဢွၼ်ၵၼ်ႁွင်ႉႁႆႈပွင်ႉၶၢင်းယူႇဢေႃႈ။
ႁႆႈၼႃးၵေႃႈလုၵႂႃႇယဝ်ႉ၊လိၼ်တမ်ႇၼွႆႉ မွင်ၸႂ်ဢေႃႈ။ လွင်ႈမၼ်းၸမ်ႉ၊ ၶဝ်ႈပိူၵ်ႇလႆႈၶၢမ်ႇတၢင်းဢၼ်ယႃႉပႅတ်ႈဢေႃႈ။ ၼမ်ႉမၢၵ်ႇၸပိတ်ႉႁႅင်ႈၵႂႃႇယဝ်ႉ၊ၼမ်ႉမၼ်း ၵေႃႈသဵင်ႈၵႂႃႇယဝ်ႉ။
ၵူၼ်းဢၼ်ႁဵတ်းၼႃးၶဝ်႟။ ဢွၼ်ၵၼ်မီး တၢင်းဢၼ်ဢူၵ်းဢၼ်ဢၢႆတႃႉ။ ၵူၼ်းဢၼ်လုမ်းလႃးတူၼ်ႈသူၼ်ဢူးယဵၼ်ႇ တူၼ်ႈၶိူဝ်းမၢၵ်ႇၸပိတ်ႉၶဝ်႟။ ႁွင်ႉႁႆႈပွင်ႉၶၢင်းပုၼ်ႈၶဝ်ႈၵျုင်ႇတင်း ၶဝ်ႈမုယေႃးတႃႉ။ လွင်ႈမၼ်းၸမ်ႉ၊မၢၵ်ႇႁူင်းဢၼ်တၵ်းလႆႈပၢတ်ႇဢဝ် ၵႃႈၼႂ်းတူင်ႈၼႃးၼၼ်ႉၵေႃႈလုၵႂႃႇယဝ်ႉ။
တူၼ်ႈၶိူဝ်းမၢၵ်ႇၸပိတ်ႉႁဵဝ်ႇၸွပ်ႈလႄႈတူၼ်ႈ မၢၵ်ႇလိူဝ်ႇႁႅင်ႈႁဵဝ်ႇၵႂႃႇယဝ်ႉ၊ တူၼ်ႈမၢၵ်ႇၸင်ႈ၊တူၼ်ႈထၢၼ်၊တူၼ်ႈမၢၵ်ႇၶီႈၼူ၊ တူၼ်ႈမႆႉထိူၼ်ႇၵႃႈမီးၵေႃႈႁဵဝ်ႇၸွပ်ႈၵႂႃႇယဝ်ႉ၊ လွင်ႈတၢင်းဢၼ်လီၸူမ်းလီသိူဝ်းၼၼ်ႉ ႁၢႆၵႂႃႇသေၵႃႈတီႈလုၵ်ႈၵူၼ်းတင်းလၢႆ ဢမၢၼ်ႇၶၼ်ပဵၼ်ယဝ်ႉ။
ယဵၸ်ႈပရေႃးႁဵၵ်ႈၶဝ်႟။ ဢွၼ်ၵၼ်ၼုင်ႈၶူဝ်းၼင်ပေႃႁတ်ႉဢႅဝ်သူသေလႄႈႁွင်ႉႁႆႈတႃႉ။ ၵႂႃႇၵႃႈတီႈၼႂ်းပိၵ်ႈမၢၼ်ႇၸဝ်ႈလႄႈႁွင်ႉႁႆႈယူႇ ၵူႈၶမ်ႈၶိုၼ်းတႃႉ။ သူၸိူဝ်းဢၼ်ပွင်ၵၢၼ်ဢမုယဵၸ်ႈပရေႃးႁဵၵ်ႈ ၸဝ်ႈၶဝ်႟။ ဢွၼ်ၵၼ်ပွင်ႉၶၢင်းတႃႉ။ သူၸိူဝ်းဢၼ်ပွင်ၵၢၼ်ဢမုၽြႃးပဵၼ်ၸဝ်ႈ ၶဝ်႟။ ဢွၼ်ၵၼ်မႃးလႄႈၼုင်ႈၼင်ပေႃ သေယဝ်ႉ၊ၼွၼ်းယူႇတင်းၶိုၼ်းတႃႉ။ လွင်ႈမၼ်းၸမ်ႉ၊ၶိူင်ႈတၢင်းလူႇမၢၵ်ႇၶဝ်ႈႁူင်းၶဝ်ႈ၊ ဢိၵ်ႇတင်းၶိူင်ႈတၢင်းလူႇဢၼ် သွၼ်းလေႃႇၼၼ်ႉ၊ ဢမ်ႇမီးတၢင်းဢၼ်ဢဝ်သၢၵ်ႈၵၢပ်ႈၵႃႈတီႈ ႁိူၼ်းၽြႃးပဵၼ်ၸဝ်ႈသူယဝ်ႉလူင်ပႄႇ။
မႄႈႁႅၼ်းဝႆႉပုၼ်ႈတႃႇတၵ်းၵမ်တၢင်းၵိၼ် တၢင်းၶူပ်းတႃႉ။ ႁွင်ႉပၢဝ်ႇႁွင်ႉသေႃႇႁႂ်ႈမႃးၸုတုမ်ၵၼ်ပဵၼ်မုၵ်ႉ ပဵၼ်ၸိူဝ်းတႃႉ။ ႁႂ်ႈၶဝ်ၸိူဝ်းဢၼ်ဢသၢၵ်ႈယႂ်ႇဢိၵ်ႇတင်း ၵူၼ်းဝၢၼ်ႈၵူၼ်းမိူင်း၊ တင်းသဵင်ႈတင်းလူင်မႃးၸုၵၼ်တုမ်ႇၵၼ် ၵႃႈတီႈႁိူၼ်း ထႃႇဝရႃႉၽြႃး၊ ၽြႃးပဵၼ်ၸဝ်ႈ သူသေလႄႈႁွင်ႉသႅၼ်ႇႁႃႇ ထႃႇဝရႃႉၽြႃး၊ တႃႉ။
မိုဝ်ႉဝၼ်း ထႃႇဝရႃႉၽြႃး၊ ၸမ်ယဝ်ႉ။ မိုဝ်ႉဝၼ်းၼၼ်ႉတၵ်းႁွတ်ႈမႃးလႄႈ ပဵၼ်ဝၼ်းဢၼ်ၸဝ်ႈဢၼၼ်ႇတႃႉတၼ်းၶူဝ်း ယႃႉပႅတ်ႈၼၼ်ႉဢေႃႈ။
တၢင်းၵိၼ်တၢင်းၶူပ်းႁဝ်းၼၼ်ႉထၢတ်ႇၵႂႃႇသေ ၵႃႈတီႈသိုဝ်ႈၼႃႈတႂ်ႈတႃႁဝ်းယဝ်ႉဢမ်ႇၸႂ်ႈႁိုဝ်း၊ လွင်ႈတၢင်းဢၼ်လီၸူမ်းသိူဝ်းသႂၢင်ႇၸႂ်ၼၼ်ႉ ထၢတ်ႇၵႂႃႇသေၵႃႈတီႈ၊ ႁိူၼ်းၽြႃးပဵၼ်ၸဝ်ႈႁဝ်းယဝ်ႉဢမ်ႇၸႂ်ႈႁိုဝ်း။
ၸိူဝ်ႉၽၼ်းတင်းလၢႆၼဝ်ႈၵႂႃႇၵႃႈတႂ်ႈ ၽႅၼ်ႇလိၼ်ဢေႃႈ။ ယွင်ႈၶဝ်ႈယေးၶဝ်ႈလုၵႂႃႇလႄႈ တိူၵ်ႈၽၼ်ႇတႃႇတင်းလၢႆ၊ ၵိူၼ်ႇပင်းၵွပ်ႈပိူဝ်ႈတူၼ်ႈၶဝ်ႈႁဵဝ်ႇႁႅင်ႈ ၵႂႃႇၼၼ်ႉဢေႃႈ။
တူဝ်သတ်းတင်းလၢႆၶၢင်းၶီၶၢင်းၽၢၼ်ၼႃႇ လူင်လၢင်ဢေႃႈ။ ၽုင်ဝူဝ်းတင်းလၢႆၵေႃႈဢမ်ႇလႆႈလိုဝ်ႈ လႆႈသဝ်း၊တီႈဢၼ်ၵိၼ်ယူႇသေႇသေႇၼၼ်ႉ ဢမ်ႇမီးယဝ်ႉဢေႃႈ။ ၽုင်သူဝ်းတင်းလၢႆၵေႃႈလႆႈတုၵ်ႉၶႃႉ ၶၢၼ်ၸႂ်ဢေႃႈ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈႁွင်ႉသႅၼ်ႇ ႁွင်ႉႁႃတီႈၸဝ်ႈႁဝ်းတီႈၶႃႈဢေႃႈ။ ၽႆးမႆႈၵႂႃႇၵႃႈတီႈပၢင်ႇယိူဝ်ႈယႃႈဢၼ် ယၢမ်ႈၵိၼ်ယူႇသေႇသေႇၵႃႈၼႂ်းထိူၼ်ႇ ၸိူဝ်းၼၼ်ႉဢေႃႈ။ ပိဝ်ၽႆးမႆႈတူၼ်ႈမႆႉထိူၼ်ႇၵႃႈမီးၼၼ်ႉ ပႅတ်ႈတီႈၶႃႈယဝ်ႉ။
တူဝ်ထိူၼ်ႇႁၢႆႉတင်းလၢႆၵေႃႈဢွၼ်ၵၼ်ႁွင်ႉသႅၼ်ႇ ႁွင်ႉႁႃတီႈၸဝ်ႈႁဝ်းတီႈၶႃႈဢေႃႈ။ ၼမ်ႉႁွင်ႈၼမ်ႉၵႄးတင်းလၢႆယူတ်းႁႅင်ႈၵႂႃႇလႄႈ ၽႆးမႆႈပႅတ်ႈ၊ ပၢင်ႇယိူဝ်ႈယႃႈဢၼ်ယၢမ်ႈၵိၼ်ယူႇသေႇသေႇ ၵႃႈၼႂ်းထိူၼ်ႇၼၼ်ႉၸိူဝ်းၼၼ်ႉတီႈၶႃႈယဝ်ႉ။
ဢွၼ်ၵၼ်ပဝ်ႇၼႄးၶရႃႇၵႃႈၼိူဝ်လွႆ ၸိဢုၼ်ႇ၊ တႃႉ။ ဢွၼ်ၵၼ်ႁဵတ်းသဵင်ႈဢၼ်ပၼ်သတိၵႃႈၼိူဝ်လွႆဢၼ်မူတ်းၸၢင်ႇၵဝ်ၼၼ်ႉတႃႉ။ ႁႂ်ႈၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင် သၼ်ႇသၼ်ႇသၢႆသၢႆတႃႉ။ လွင်ႈမၼ်းၸမ်ႉ၊မိုဝ်ႉဝၼ်း ထႃႇဝရႃႉၽြႃး၊ မႃးယူႇလႄႈၸမ်ၼႃႇယဝ်ႉ။
ပဵၼ်ဝၼ်းဢၼ်လပ်းသိင်ႇလပ်းႁူမ်ႈ၊ ဝၼ်းဢၼ်ၽူၼ်ၵုမ်ႈၽူၼ်ဢုမ်ႇလႄႈ လပ်းသိင်ႇၼႃႇတၼ်ၼႃႇဢေႃႈ။ ၸိူဝ်ႉၼင်ႇဢၼ်လပ်းသိင်ႇၸွတ်ႇတူဝ်ႈ ၵႃႈၼိူဝ်လွႆတင်းလၢႆၼၼ်ႉ၊ ၵူၼ်းသိုၵ်းဢၼ်ၼမ်ၼႃႇလႄႈႁႅင်းယႂ်ႇၼၼ်ႉ မႃးယူႇဢေႃႈ။ မိူဝ်ႈၵွၼ်ႇဢွၼ်ၼႆႉၼၼ်ႉဢမ်ႇတွၼ်ႉ ပဵၼ်ၸိူဝ်ႉၼင်ႇၼၼ်၊ ၵမ်းလိုၼ်းၵူႈၸူဝ်ႈၵူႈပၢၼ်သိုပ်ႇသိုပ်ႇတၢမ်တၢမ် ၵေႃႈတၵ်းဢမ်ႇလႆႈပဵၼ်။
ၽႆးမႆႈယူႇၵႃႈတီႈၽၢႆႇၼႃႈၶဝ်လႄႈၵႃႈတီႈ ၽၢႆႇတၢင်းလင်ၵေႃႈပိဝ်ၽႆးလုၵ်ႉယူႇဢေႃႈ။ မိူင်းဢၼ်မီးၵႃႈတီႈၽၢႆႇၼႃႈၶဝ်ၼၼ်ႉ ပဵၼ်ၸိူဝ်ႉၼင်ႇသူၼ်ဢူးယဵၼ်ႇ ဢေႇတိၼ်ႇ၊ ဝႆႉလႄႈၵႃႈတီႈၽၢႆႇလင်ၶဝ်ၸမ်ႉ၊ပဵၼ်ထိူၼ်ႇ ဢၼ်လၢပ်ႈယူႇပဝ်ႇယူႇၼၼ်ႉဢေႃႈ။ လွင်ႈတၢင်းမဵဝ်းလႂ်ဢမ်ႇလႆႈလွတ်ႈသေ ၵႃႈၼႂ်းမိုဝ်းၶဝ်ၼၼ်ႉသေၸိူဝ်ႉသေပိူင်။
ၶဝ်မီးႁၢင်ႈၽၢင်မိူၼ်ၸိူဝ်ႉၼင်ႇႁၢင်ႈမႃႉလႄႈ ၶဝ်ၶုၼ်ႇလႅၼ်ႈမိူၼ်ၸိူဝ်ႉၼင်ႇတပ်ႉၵူၼ်းသိုၵ်း ၶီႇမႃႉၼၼ်ႉဢေႃႈ။
မိူၼ်ၸိူဝ်ႉၼင်ႇသဵင်လေႃႉမႃႉသိုၵ်းလင်ယူႇ မေႃးယူႇၼၼ်ႉၶဝ်ဢွၼ်ၵၼ်ႁဵတ်း သဵင်လင်သဵင်မေႃးလႄႈ ၵျွၵ်းတဵၼ်ႈၵျွၵ်းဝႅၼ်ယူႇၵႃႈၼိူဝ်ပၢႆလွႆ ၸိၵ်းလွႆတင်းလၢႆဢေႃႈ။ ၶဝ်ဢွၼ်ၵၼ်ႁဵတ်းသဵင်မိူၼ်ၸိူဝ်ႉၼင်ႇသဵင်ၽႆးဢၼ်မႆႈယိူဝ်ႈႁႅင်ႈ၊ဢိၵ်ႇတင်းမိူၼ်ၸိူဝ်ႉၼင်ႇ၊ သဵင်မုၵ်ႉၵူၼ်းၸိူဝ်းဢၼ်ဢၼ်ႁႅင်းယႂ်ႇၼႃႇၼၼ်ႉမႄးႁႅၼ်းဝႆႉႁႂ်ႈလႆႈတိုၵ်းသိုၵ်းၼၼ်ႉဢေႃႈ။
မဵဝ်းၵူၼ်းတင်းလၢႆသၼ်ႇသၼ်ႇသၢႆသၢႆယူႇ ၵႃႈတီႈၽၢႆႇၼႃႈၶဝ်ၼၼ်ႉလႄႈ ၼႃႈၶဝ်တင်းသဵင်ႈတင်းလူင်ႁိူတ်ႇၵႂႃႇ ႁႅင်ႈၵႂႃႇဢေႃႈ။
ၶဝ်ၼၼ်ႉတိုၵ်းတေႃးမိူၼ်ၸိူဝ်ႉၼင်ႇၵူၼ်းသိုၵ်း ဢၼ်ႁတ်းႁၢၼ်ၼႃႇၼၼ်ႉလႄႈ ၶိုၼ်ႈလမ်းဝဵင်းမိူၼ်ၸိူဝ်ႉၼင်ႇႁူဝ်ႁၢၼ် ၵူၼ်းသိုၵ်းဢေႃႈ။ ၶဝ်ၼၼ်ႉယင်းဢမ်ႇယႃႉမုၵ်ႉယႃႉၸိူဝ်းၶဝ်လႄႈ ၸွမ်းသဵၼ်ႈတၢင်းၶဝ်ႈၵႂႃႇယူႇ သိုဝ်ႈသိုဝ်ႈႁင်းၽႂ်ႁင်းမၼ်းဢေႃႈ။
ၵေႃႉၼိုင်ႈလႄႈၵေႃႉၼိုင်ႈယင်းဢမ်ႇတွၵ်ႈ ဢမ်ႇဢီးၵၼ်လႄႈၸွမ်းသဵၼ်ႈတၢင်းၽႂ် သဵၼ်ႈတၢင်းမၼ်းဢေႃႈ။ ပိၵ်ႉသမ်ႉ၊ၶဝ်ပႆၽႃႇလတ်းၵႂႃႇၵႃႈၼႂ်း ၵႄႈၶူမ်းလၢပ်ႇၶူမ်းလႅဝ်းသေၵေႃႈ၊ ဢမ်ႇမီးၽူႈလႂ်ၵိုတ်းသဝ်းၶဝ်လႆႈ၊
ၶဝ်ၶုၼ်ႇလႅၼ်ႈၵႂႃႇၵႂႃႇၶိုၼ်းၶိုၼ်းၵႃႈၼႂ်းဝဵင်းယူႇ၊ၶၢမ်ႈလမ်းဝဵင်းယူႇ၊ ၶိုၼ်ႈၵႃႈၼိူဝ်ႁိူၼ်းယူႇ၊ၶဝ်ႈၵႃႈၼႂ်း ႁူးလၢင်းတဵၼ်ယူႇ မိူၼ်ၸိူဝ်ႉၼင်ႇၽူႈလၵ်ႉၼၼ်ႉဢေႃႈ။
လိၼ်မိူင်းတူင်ႉၼိုင်ယူႇၵႃႈတီႈၽၢႆႇၼႃႈ ၶဝ်လႄႈၽႃႉၵၢင်ႁၢဝ်ၵေႃႈသၼ်ႇဝႆ ၶွၼ်းၶဝ်းယူႇဢေႃႈ။ တႃဝၼ်းဢိၵ်ႇတင်းလိူၼ်လပ်းသိင်ႇ ၵႂႃႇလႄႈလၢဝ်တင်းလၢႆယင်း ဢမ်ႇႁိူဝ်ႈလႅင်းလႄႈယူႇဢေႃႈ။
ထႃႇဝရႃႉၽြႃး၊ ၵိဝ်သဵင်ၸဝ်ႈၵႃႈတီႈၽၢႆႇၼႃႈ တပ်ႉမၼ်းၸဝ်ႈဢေႃႈ။ တပ်ႉမၼ်းၸဝ်ႈၼၼ်ႉၶိုၵ်ႉၶမ်ႇယႂ်ႇၼႃႇၵႃႈႁိုဝ်၊ ၶဝ်ၸိူဝ်းဢၼ်ထွမ်ႇဢဝ်ဢမိင်ႉၸဝ်ႈၼၼ်ႉ၊ မီးၼမ်ၼႃႇထၢၼ်ႈပေႃးဢမ်ႇၼပ်ႉ ဢမ်ႇဢၢၼ်ႇလႆႈဢေႃႈ။ မိုဝ်ႉဝၼ်း ထႃႇဝရႃႉၽြႃး၊ ၼၼ်ႉပဵၼ်ဝၼ်းယႂ်ႇဝၼ်းလူင်၊ ပဵၼ်ဝၼ်းဢၼ်လီၵူဝ်လီႁႄၼႃႇလူင်လၢင်ဢေႃႈ။ ၽူႈလႂ်တၵ်းၸုၵ်းၶၢမ်ႇယူႇလႆႈ။
ပိူဝ်ႈၼႆလႄႈ ထႃႇဝရႃႉၽြႃး၊ မီးဢမိင်ႉၸမ်ႉ၊ “တေႃႈလဵဝ်ၼႆႉ၊ပႃးတင်းႁူဝ်ၸႂ်သဵင်ႈသဵင်ႈ၊ ဢိၵ်ႇတင်းတၢင်းဢၼ်ၵမ်တၢင်းၵိၼ်၊ တၢင်းဢၼ်ႁႆႈဢၼ်ႁွင်ႉ၊တၢင်းဢၼ် ပွင်ႉၶၢင်းပွင်ႉမိုၼ်ႇသေလႄႈဢွၼ်ၵၼ်ၶိုၼ်းမႃး ၸူးၵႃႈတီႈၵဝ်တႃႉ၊” ဝႃႈၼင်ႇၼႆဢေႃႈ။
ယင်းဢမ်ႇၸၵ်ႉဢမ်ႇသိၵ်ႇၶူဝ်းၼုင်ႈသူလႄႈ ၸၵ်ႉသိၵ်ႇႁူဝ်ၸႂ်သူတႃႉ။ ဢွၼ်ၵၼ်ၶိုၼ်းမႃးၸူးၵႃႈတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူတႃႉ။ မၼ်းၸဝ်ႈမီးၸႂ်သၽေႃးဢၼ်ၸၢင်ႈဢဵတ်းလူ ႁၵ်ႉပႅင်း၊ၸႂ်သၽေႃးဢၼ်ပျေႉၸုမ်ႇဝႆႉ တင်းမႅတ်ႈတႃႇၵရုၼႃႇ၊ ၸႂ်သၽေႃးဢၼ်ယႂ်ႇဢၼ်ယၢဝ်း၊ၸႂ်သၽေႃး ဢၼ်ၶႂ်ႈႁဵတ်းၵျေးၸူး၊ၸႂ်သၽေႃးဢၼ် ပွႆႇလွတ်ႈဢပျတ်ႈတႃႇသေႇလႄႈ တေဢမ်ႇပၼ်တၢမ်ႇၼၼ်ႉဢေႃႈ။
ၽူႈလႂ်တေႁုလႆႈလွင်ႈဢၼ်မၼ်းၸဝ်ႈတၵ်း ပိၼ်ႇၸႂ်လႄႈမီးၸႂ်ဢၼ်ႁၵ်ႉဢဵတ်းလူၶဝ် သေယဝ်ႉ၊ပၼ်တၢင်းလီမၢင်ႇၵလႃႇၵႃႈၼိူဝ် ၶိူင်ႈတၢင်းလူႇမၢၵ်ႇၶဝ်ႈႁူင်းၶဝ်ႈ၊ ဢိၵ်ႇတင်းၶိူင်ႈတၢင်းလူႇဢၼ်သွၼ်းလေႃႇ၊ ပုၼ်ႈတႃႈတေသၢၵ်ႈၵၢပ်ႈတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူၼၼ်ႉၸိူဝ်းၼၼ်ႉဢေႃႈ။
ဢွၼ်ၵၼ်ပဝ်ႇတိုင်ႈၼႄးၶရႃႇၵႃႈတီႈၼိူဝ် လွႆ ၸိဢုၼ်ႇ၊ တႃႉ။ မႄးႁႅၼ်းဝႆႉပုၼ်ႈတႃႇတေၵမ်တၢင်းၵိၼ် တၢင်းၶူပ်းတႃႉ။ ႁွင်ႉပၢဝ်ႇႁွင်ႉသေႃႇႁႂ်ႈမႂ်းၸုတုမ်ၵၼ် ပဵၼ်မုၵ်ႉပဵၼ်ၸိူဝ်းတႃႉ။
ဢွၼ်ၵၼ်ႁွင်ႉဢဝ်ၵူၼ်းတင်းလၢႆမႃးလႄႈႁဵတ်းႁႂ်ႈၵူၼ်းပရိၵ်ႈသၢတ်ႈတင်းလၢႆမူတ်းၸၢင်ႇတႃႉ။ ႁႂ်ႈၶဝ်ၸိူဝ်းဢၼ်ဢသၢၵ်ႈယႂ်ႇတင်းလၢႆ၊ဢိၵ်ႇတင်း ၶဝ်ၸိူဝ်းဢၼ်ယင်းလဵၵ်ႉယင်းၼုမ်ႇ၊ ၶဝ်ၸိူဝ်းဢၼ်ယင်းၵိၼ်ၼူမ်းယူႇၸိူဝ်းၼၼ်ႉ မႃးၸုၵၼ်တုမ်ၵၼ်တႃႉ။ ႁႂ်ႈၽူႈမၢဝ်ႇဢၼ်သွင်ႇမၢင်ႇၵလႃႇၼၼ်ႉ ဢွၵ်ႇသေၵႃႈၼႂ်းလုၵ်းမၼ်းလႄႈ ႁႂ်ႈလုၵ်ႈယိင်းသၢဝ်ဢၼ်သွင်ႇမၢင်ႇၵလႃႇၼၼ်ႉ ဢွၵ်ႇမႃးသေၵႃႈၼႂ်းၽႃႈၵင်ႈဢၼ် လပ်ႉၵင်ႈမၼ်းဝႆႉၼၼ်ႉတႃႉ။
ႁႂ်ႈယဵၸ်ႈပရေႃးႁဵၵ်ႈ တင်းလၢႆ၊ၶဝ်ၸိူဝ်းဢၼ် ပွင်ၵၢၼ်ဢမု ထႃႇဝရႃႉၽြႃး၊ ၸိူဝ်းၼၼ်ႉ၊ ႁွင်ႉႁႆႈၵႃႈတီႈၵႄႈဝူင်ႈၵၢင်ၼႃႈႁိူၼ်းၸဝ်ႈ ဢိၵ်ႇတင်းၶဵင်ႇတၢင်းလူႇၸဝ်ႈတႃႉ။ ႁႂ်ႈၶဝ်လဝ်ႈလၢတ်ႈလႄႈဝႃႈ၊ “ ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈဢဵတ်းလူၵူၼ်းၸဝ်ႈႁဝ်းတင်းလၢႆ သေၵမ်းတီႈၶႃႈ။ ယႃႇပေဢဝ်ဢမူၺ်ႇၸဝ်ႈႁဝ်းဢၢပ်ႈပၼ်တီႈ ၶဝ်ၸိူဝ်းဢၼ်သႄႉဢၼ်သွမ်းသေလႄႈ ယႃႇပေႁႂ်ႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ ႁဵတ်းပျၢၵ်ႈႁဵတ်းၶူဝ်တီႈၶဝ်သေၵမ်းတီႈၶႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၵူၼ်းတၢင်ႇၸိူဝ်ႉ တၢင်ႇၶိူဝ်းတင်းလၢႆတၵ်းလႆႈ ဢွၼ်ၵၼ်လၢတ်ႈလႄႈဝႃႈ၊ ‘ၽြႃးပဵၼ်ၸဝ်ႈၶဝ်ၸမ်ႉ၊မီးၵႃႈလႂ်၊’ ဝႃႈၼင်ႇၼႆၸိူဝ်ႉၼင်ႇႁိုဝ်တီႈၶႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ မႆႈၸႂ်ၼႅင်ၸႂ် ပုၼ်ႈလိၼ်မိူင်းမၼ်းၸဝ်ႈလႄႈ မီးၸႂ်ဢၼ်ဢဵတ်းလူၵူၼ်းမၼ်းၸဝ်ႈ တင်းလၢႆဢေႃႈ။
ထႃႇဝရႃႉၽြႃး၊ ၶိုၼ်းဢိူဝ်လႄႈမီးဢမိင်ႉတီႈ ၵူၼ်းမၼ်းၸဝ်ႈလႄႈဝႃႈ၊ “ၵဝ်တၵ်းပၼ်ၶဝ်ႈပိူၵ်ႇၶဝ်ႈသၢၼ်၊ၼမ်ႉ မၢၵ်ႇၸပိတ်ႉ၊ၼမ်ႉမၼ်းမႃးတီႈသူလႄႈ သူတၵ်းလႆႈၵိၼ်ဢိမ်ႇၵိၼ်တဵမ်ဢေႃႈ။ ၵမ်းလိုၼ်းၵဝ်တၵ်းဢမ်ႇဢဝ်သူ ဢၢပ်ႈပၼ်ႁႂ်ႈပဵၼ်တီႈဢၼ်ၵူၼ်းတၢင်ႇၸိူဝ်ႉ တၢင်ႇၶိူဝ်းသႄႉသွမ်း။
ၵဝ်တၵ်းဢဝ်တပ်ႉသိုၵ်းရၢၼ်ႇသူႇၽၢႆႇတၢင်းႁွင်ႇ ၸိူဝ်းၼၼ်ႉဝႆႉၵႃႈတီႈဢၼ်ၵႆယၢၼ်ၵၼ် တင်းသူၼၼ်ႉဢေႃႈ။ ၵဝ်တၵ်းႁေႃႈၶဝ်ဢွၵ်ႇပႅတ်ႈၸူးၵႃႈၼႂ်း တီႈဢၼ်ႁႅင်ႈဢၼ်ႁွင်တီႈဢၼ်ၽူႈလႂ် ဢမ်ႇယူႇဢမ်ႇသဝ်းၼၼ်ႉဢေႃႈ။ ႁူဝ်တပ်ႉမၼ်းတၵ်းၶဝ်ႈၵႂႃႇၵႃႈၼႂ်းပၢင်ႇလၢႆႇ ၽၢႆႇတၢင်းဝၼ်းဢွၵ်ႇလႄႈ ႁၢင်တပ်ႉမၼ်းတၵ်းၶဝ်ႈၵႂႃႇၵႃႈၼႂ်းပၢင်ႇလၢႆႇ ၽၢႆႇတၢင်းဝၼ်းတူၵ်းဢေႃႈ။ ဢၢႆဢၼ်မဵၼ်တူႇမၼ်းတၵ်းဢွၵ်ႇလႄႈဢၢႆဢၼ်မဵၼ်ၼဝ်ႈမၼ်းတၵ်းၸွတ်ႇတူဝ်ႈၵႂႃႇ၊ ၵွပ်ႈပိူဝ်ႈဢၼ်မၼ်းၸဝ်ႈႁဵတ်းလွင်ႈတၢင်း ဢၼ်ယႂ်ႇၼႃႇလူင်လၢင်ၼၼ်ႉဢေႃႈ။
လိၼ်မိူင်း႟။ ယႃႇပေၵူဝ်ႁႄ။ မီးတၢင်းဢၼ် ၸူမ်းသိူဝ်းလႄႈသႂၢင်ႇၸႂ်တႃႉ။ ထႃႇဝရႃႉၽြႃး၊ လႆႈႁဵတ်းလွင်ႈတၢင်းဢၼ် ယႂ်ႇၼႃႇလူင်လၢင်ယဝ်ႉဢေႃႈ။
တူဝ်တရိၵ်ႈသၢၼ်ႇၶဝ်႟။ ယႃႇပေၵူဝ်ႁႄ။ တူၼ်ႈယိူဝ်ႈတူၼ်ႈယႃႈၵႃႈတီႈထိူၼ်ႇ တီႈၶိူဝ်းၼၼ်ႉဢွၵ်ႇမႃးယူႇ၊ တူၼ်ႈမႆႉတူၼ်ႈတွၵ်ႇမၢၵ်ႇမၢၵ်ႇယူႇ၊ တူၼ်ႈမၢၵ်ႇလိူဝ်ႇ၊ဢိၵ်ႇတင်း တူၼ်ႈၶိူဝ်းမၢၵ်ႇၸပိတ်ႉၵေႃႈဢွၵ်ႇတူၼ်ႈ မႃးၼမ်ယူႇဢေႃႈ။
ၵူၼ်းဝဵင်း ၸိဢုၼ်ႇ၊ ၶဝ်႟။ ဢွၼ်ၵၼ်ၸူမ်းသိူဝ်းလႄႈဢိင်ပိုင်ႈ ထႃႇဝရႃႉၽြႃး၊ ၽြႃးပဵၼ်ၸဝ်ႈ သူသေယဝ်ႉ၊သႂၢင်ႇၸႂ်သိူဝ်းၸႂ်ယူႇတႃႉ။ လွင်ႈမၼ်းၸမ်ႉ၊မၼ်းၸဝ်ႈတၵ်းႁႂ်ႈ ၽူၼ်ႁူဝ်ပီတူၵ်းမၢၼ်ႇလီမႅၼ်ႈလီလႄႈ ႁႂ်ႈၽူၼ်ဢၼ်ယႂ်ႇၼႃႇဢၼ်ဝႃႈ၊ၽူၼ်ႁူဝ်ပီ ဢိၵ်ႇတင်းၽူၼ်ႁၢင်ပီၸိူဝ်းၼၼ်ႉတူၵ်းပုၼ်ႈသူ မိူၼ်ၸိူဝ်ႉၼင်ႇမိူဝ်ႈဢွၼ်တၢင်းၼၼ်ႉဢေႃႈ။
တီႈတလၢင်းယဵပ်ႇၶဝ်ႈတင်းလၢႆၵေႃႈ၊တၵ်း တဵမ်ဝႆႉတင်းၶဝ်ႈပိူၵ်ႇလႄႈ ၼမ်ႉမၢၵ်ႇၸပိတ်ႉ၊ဢိၵ်ႇတင်းၼမ်ႉမၼ်းၵေႃႈ တၵ်းလူၼ်ႉယူႇၵႃႈတီႈထၢင်ဢေႃႈ။
ၵဝ်တၵ်းၶိုၼ်းပၼ်တီႈသူပုၼ်ႈၶူပ်ႇပီၼီႈမိူင်းဢၼ် ၸၵ်းတႅၼ်ဢၼ်ဢုမ်ႇဢၼ်တွမ်၊ ၸၵ်းတႅၼ်ဢၼ်ၸၢင်ႈမိၼ်၊ၸၵ်းတႅၼ်ဢၼ် ၸၢင်ႈၵျွၵ်းဝႅၼ်၊ၸၵ်းတႅၼ်ဢၼ် ၸၢင်ႈၵၢၼ်း၊လႆႈၶူပ်းၵိၼ်ယဝ်ႉ၊ၸိူဝ်းၼၼ်ႉဢေႃႈ။ ဢၼ်ၸိူဝ်းၼႆႉပဵၼ်မႁႃႇတပ်ႉသိုၵ်းလူင်ၵဝ် ဢၼ်ၵဝ်ပွႆႇၸႂ်ႉၸူးတီႈသူပုၼ်ႈတၵ်းၶတ်းၶႅင်ႇ သူၼၼ်ႉဢေႃႈ။
သူတၵ်းလႆႈၵိၼ်ၼမ်ၼႃႇလႄႈဢိမ်ႇတဵမ်ဢေႃႈ။ သူတၵ်းလႆႈယွင်ႈယေႃးၼႃႇမႃႉၸိုဝ်ႈသဵင်၊ ထႃႇဝရႃႉၽြႃး၊ ၽြႃးပဵၼ်ၸဝ်ႈသူ ဢၼ်ႁဵတ်းလွင်ႈတၢင်းဢၼ်လီဢၢမ်းၼႃႇ တီႈသူၼၼ်ႉဢေႃႈ။ ၵမ်းလိုၼ်းၵူၼ်းၵဝ်တင်းလၢႆဢမ်ႇလႆႈမီး တၢင်းဢၼ်ဢူၵ်းဢၼ်ဢၢႆ။
သူတၵ်းလႆႈႁုလွင်ႈဢၼ်ၵဝ်မီးယူႇၵႃႈၼႂ်းဝူင်ႈၵၢင်ၵူၼ်းမဵဝ်း ဢိသရေး၊ ဢိၵ်ႇတင်း လွင်ႈတၢင်းဢၼ်ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူလႄႈဢမ်ႇမီးၽြႃးတၢင်ႇသူႇတၢင်ႇပႃးၼၼ်ႉဢေႃႈ။ ၵမ်းလိုၼ်းၵူၼ်းၵဝ်တင်းလၢႆဢမ်ႇလႆႈမီး တၢင်းဢၼ်ဢူၵ်းဢၼ်ဢၢႆဢေႃႈ။
လိုၼ်းၼၼ်ႉၸင်ႇ၊ၵဝ်တၵ်းဢဝ်ဝိၺိၺ်ႇၵဝ်သွၼ်းလေႃႇ ၵႃႈၼိူဝ်မဵဝ်းၵူၼ်းတင်းသဵင်ႈတင်းလူင်ဢေႃႈ။ လုၵ်ႈၸၢႆး၊လုၵ်ႈယိင်းသူတင်းလၢႆၼၼ်ႉ တၵ်းလႆႈဢဝ်တင်းၺၢၼ်ႇပရေႃးၽႅတ်ႈ ႁေႃးလၢတ်ႈဢေႃႈ။ ၵူၼ်းထဝ်ႈၵူၼ်းၵႄႇသူၼၼ်ႉတၵ်းလႆႈၼွၼ်းၽၼ်ႁၼ်ၼိမိၵ်ႈလၢၵ်ႈၶၼႃႇတင်းလၢႆဢေႃႈ။ ၵူၼ်းၼုမ်ႇၵူၼ်းၵမ်သူၼၼ်ႉၵေႃႈတၵ်းလႆႈႁၼ် ရူႇပႃႇရူင်ႇပျႃႇတိၵ်ႈၸဝ်ႈဢေႃႈ။
ၼႂ်းၶိင်ႇၼၼ်ႉၵဝ်တၵ်းဢဝ်ဝိၺိၺ်ႇၵဝ် သွၼ်းလေႃႇၵႃႈၼိူဝ်၊ၶႃႈၵူၼ်းၸၢႆး၊ၶႃႈ ၵူၼ်းယိင်းတင်းလၢႆဢေႃႈ။
ၵဝ်တၵ်းၼႄပျႃးၼိမိၵ်ႈဢၼ်လီဢၢမ်း ၵႃႈၼိူဝ်ၽႃႉၵၢင်ႁၢဝ်လႄႈ ၵႃႈၼိူဝ်လိၼ်မိူင်းႁႂ်ႈပဵၼ်လိူတ်ႈၵႂႃႇ၊ဢိၵ်ႇတင်း ပိဝ်ၽႆးလႄႈၵႂၼ်းၽႆးဢေႃႈ။
ၸူဝ်ႈဢၼ်ဝၼ်းယႂ်ႇဝၼ်းလူင်ဢၼ်လီၵူဝ်လီႁႄ ထႃႇဝရႃႉၽြႃး၊ ဢမ်ႇပႆႇႁွတ်ႈမႃးၼၼ်ႉၸိုင်၊ ၵၢင်ဝၼ်းတၵ်းပဵၼ်ဢၼ်လပ်းသိင်ႇ ၽိတ်းၽိတ်းၵႂႃႇဢေႃႈ။ လိူၼ်ၵေႃႈ တၵ်းပဵၼ်လိူတ်ႈၵႂႃႇဢေႃႈ။
မိူဝ်ႈၼၼ်ႉ၊ၶဝ်ၸိူဝ်းဢၼ်ႁဵတ်းသူးတွင်း ပထၼႃႇတီႈၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ၵႃႈမီးၸိူဝ်းၼၼ်ႉ၊ တၵ်းလႆႈႁွတ်ႈထိုင်တၢင်းဢၼ်ၵႄႇသႄႇ ၶျွတ်ႈဢဝ်ဢေႃႈ။ လွင်ႈမၼ်းၸမ်ႉ၊ၵႃႈတီႈလွႆ ၸိဢုၼ်ႇ၊ လႄႈ ၵႃႈတီႈဝဵင်း ယေႇရုသလႅမ်ႇ၊ ၼၼ်ႉ၊ တၵ်းလႆႈမီးၶဝ်ၸိူဝ်းဢၼ်လွတ်ႈဢွၵ်ႇ၊ ၸွမ်းၵႃႈၼင်ႇဢၼ် ထႃႇဝရႃႉၽြႃး၊ မီးဢမိင်ႉၼၼ်ႉ၊ဢိၵ်ႇတင်း ၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇဢၼ် ထႃႇဝရႃႉၽြႃး၊ ႁွင်ႉဢဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
“ၼႂ်းၶိင်ႇၵႃႇလႃႉမိုဝ်ႉဝၼ်းၼၼ်ႉ၊မိူဝ်ႈဢၼ် ၵဝ်တၵ်းဢဝ်ၵူၼ်း ယုတႃႉ၊ ၵူၼ်း ဝဵင်း ယေႇရုသလႅမ်ႇ၊ ဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇ ၸိူဝ်းၼၼ်ႉၶိုၼ်းမႃးၼၼ်ႉၸိုင်၊
ၵဝ်တၵ်းႁႂ်ႈၵူၼ်းၵူႈၸိူဝ်ႉၵူႈမဵဝ်းၸုၵၼ်တုမ်ၵၼ်သေလႄႈႁွင်ႉဢဝ်ၶဝ်လူင်းမႃး၊ ၵႃႈတီႈၶူင်ႈႁူၺ်ႈ ယေႃးသၽတ်ႉ၊ ဢေႃႈ။ ၵဝ်တၵ်းယူႇၽၢႆႇၵူၼ်းမဵဝ်း ဢိသရေး၊ ဢၼ်ပဵၼ်ဢမူၺ်ႇၵဝ်ၼၼ်ႉသေလႄႈၸီႇယၢင်ႇ တြႃးၵႃႈတီႈၶဝ်တင်းလၢႆၼၼ်ႉဢေႃႈ။ လွင်ႈမၼ်းၸမ်ႉ၊ၶဝ်ဢဝ်ၵူၼ်းမဵဝ်း ဢိသရေး၊ ၸၢတ်ႇပိုၼ်ပႅတ်ႈၵႃႈၼႂ်းၵူႈသိုင်ႇၵူႈမိူင်းဢေႃႈ။
ၶဝ်ၽႃႇတႅပ်းဝၢၼ်ႈမိူင်းၵဝ်လႄႈ တူၵ်းလိၵ်ႈၸႃႇၵွၵ်ႈပုၼ်ႈၵူၼ်းၵဝ် တင်းလၢႆယဝ်ႉ။ ၶဝ်ဢဝ်ၽူႈၸၢႆးဢွၼ်ႇ လႅၵ်ႈဢဝ်လၢႆႈဢဝ်မႄႈမွၵ်ႇယႃႈလႄႈ ဢဝ်မႄႈယိင်းဢွၼ်ႇၶၢႆသေယဝ်ႉ၊သိုဝ်ႉဢဝ်ၼမ်ႉမၢၵ်ႇၸပိတ်ႉပုၼ်ႈဢၼ်ၶဝ်တၵ်းၵိၼ်ဢေႃႈ။
“ဢူဝ်းဝဵင်း တုရု၊ ဝဵင်း ၸိတုမ်ႇ၊ သိုင်ႇၸိုင်ႈဝၢၼ်ႈမိူင်း ၽိလိတ်ႉတိ၊ ၵႃႈမီးၶဝ်႟။ သူၸၢပ်ႈသႅင်ႇၵၼ်တင်းၵဝ်ၸိူဝ်ႉၼင်ႇႁိုဝ်၊သူတၵ်းတွပ်ႇတႅၼ်းၶိုၼ်းၽေးရၢၼ်ႇတီႈၵဝ်ႁိုဝ်း။ ပေႃးတွပ်ႇၶိုၼ်းတႅၼ်းၶိုၼ်းတီႈၵဝ်ၸိုင်၊ၵဝ်တၵ်းႁႂ်ႈတၢင်းၽိတ်းၼၼ်ႉၶိုၼ်းႁွတ်ႈထိုင်ၵႃႈၼိူဝ်ႁူဝ်သူၶၼ်ၶၼ်ၽႂ်းၽႂ်းဢေႃႈ။-
သူသိမ်းဢဝ်ငိုၼ်းၵဝ်၊ၶမ်းၵဝ် ဢိၵ်ႇတင်းဢုၵ်ႉၸႃႇမျၢတ်ႈဢၼ်ထုၵ်ႇၸႂ်ၵျိူၵ်ႈၸႂ်ၵဝ်ၼၼ်ႉသႂၢင်းၶဝ်ႈၵႃႈၼႂ်းပိၵ်ႈမၢၼ်ႇသူဢေႃႈ။-
သူဢဝ်ၵူၼ်းမဵဝ်း ယုတႃႉ၊ ၵူၼ်းဝဵင်း ယေႇရုသလႅမ်ႇ၊ တင်းလၢႆၶၢႆပၼ်တီႈၵူၼ်းမဵဝ်း ၵရိၵ်ႉ၊ တင်းလၢႆလႄႈႁႂ်ႈၵူၼ်းမဵဝ်း ၵရိၵ်ႉ၊ ၶဝ်ဢဝ်ၶၢႆႉၵႂႃႇၵႃႈတီႈဢၼ်ၵႆၵၼ်တင်းမိူင်းၶဝ်ၼၼ်ႉဢေႃႈ။-
ၵူၺ်းၵႃႈ၊တေႃႈလဵဝ်ၼႆႉၵဝ်တၵ်းႁႂ်ႈၶဝ်လုၵ်ႉသေၵႃႈတီႈဢၼ်သူၶၢႆပႅတ်ႈၶဝ်ၼၼ်ႉၶိုၼ်းမႃးလႄႈႁႂ်ႈတၢင်းဢၼ်သူတွပ်ႇၶိုၼ်းတႅၼ်းၶိုၼ်းတၢင်းၽိတ်းၼၼ်ႉၶိုၼ်းႁွတ်ႈၵႃႈၼိူဝ်ႁူဝ်သူဢေႃႈ။-
လုၵ်ႈၸၢႆးလုၵ်ႈယိင်းသူတင်းလၢႆၵေႃႈၵဝ်တၵ်းဢဝ်ၶၢႆတေႃႇၵူၼ်းမဵဝ်း ယုတႃႉ၊ လႄႈၶဝ်တၵ်းသမ်ႉဢဝ်ၶၢႆပၼ်တီႈၵူၼ်းမဵဝ်း သေႇၽႃႉ၊ ၵူၼ်းမဵဝ်းဢၼ်ယူႇၵႆၼၼ်ႉဢေႃႈ၊” ထႃႇဝရႃႉၽြႃး၊ မီးဢမိင်ႉဝႆႉၸိူဝ်ႉၼင်ႇၼၼ်ယဝ်ႉ။
“မွၵ်ႇလၢတ်ႈလွင်ႈတၢင်းၼႆႉတီႈၵူၼ်းၵူႈၸိူဝ်ႉ ၵူႈၶိူဝ်းတင်းလၢႆတႃႉ။ ပွင်ႁႅၼ်းပွင်မႄးႁႂ်ႈလႆႈတိုၵ်းသိုၵ်းလႄႈ တိုၵ်းယူင်းၵူၼ်းသိုၵ်းဢၼ်ႁတ်းႁၢၼ်တင်းလၢႆတႃႉ။ ႁႂ်ႈၵူၼ်းသိုၵ်းတင်းသဵင်ႈတင်းလူင်သုတ်ႉၸပ်းသုတ်ႉၸူးလႄႈႁႂ်ႈၶဝ်ဢွၼ်ၵၼ်ၶိုၼ်ႈၸူးတႃႉ။
ဢွၼ်ၵၼ်ဢဝ်သိၵ်ႈၽိူဝ်လဵၵ်းသူတင်းလၢႆၶဵၼ်ႇႁဵတ်းလၢပ်ႇလႄႈ ဢဝ်ၶဵဝ်းသူတင်းလၢႆၶဵၼ်ႇႁဵတ်းႁွၵ်ႇတႃႉ။ ႁႂ်ႈၶဝ်ၸိူဝ်းဢၼ်ႁႅင်းလဵၵ်ႉၼၼ်ႉလၢတ်ႈ လႄႈဝႃႈ၊ ‘ၵဝ်ႁႅင်းယႂ်ႇၼႃႇဢေႃႈ၊’ ဝႃႈၼင်ႇၼႆဢေႃႈ။
ၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ယူႇလဵပ်ႈႁွပ်ႈတင်းသဵင်ႈတင်းလူင်ၶဝ်႟။ ဢွၼ်ၵၼ်ႁိပ်ႈၼႅတ်ႈသေမႃးတႃႉ။ ဢွၼ်ၵၼ်မႃးၸုတုမ်ၵၼ်တႃႉ။” ထႃႇဝရႃႉၽြႃး၊ တီႈၶႃႈ။ ႁႂ်ႈၵူၼ်းသိုၵ်းၸဝ်ႈႁဝ်းလူင်းမႃးၸူး ၵႃႈတီႈၼၼ်ႈသေၵမ်းတီႈၶႃႈ။
“ႁႂ်ႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ၊ လုၵ်ႉလႄႈၶိုၼ်းၸူးၵႃႈတီႈၶူင်ႈႁူၺ်ႈ ယေႃးသၽတ်ႉ၊ သေၵမ်း။ ၵဝ်တၵ်းၼင်ႈၵႃႈတီႈၼၼ်ႈႁႂ်ႈလႆႈၸႅတ်ႈထၢမ် ၸီႇယၢင်ႇၵူၼ်းတၢင်ႇၸိူဝ်ႉတၢင်ႇၶိူဝ်းဢၼ် ယူႇလဵပ်ႈႁွပ်ႈတင်းသဵင်ႈတင်းလူင်ၼၼ်ႉဢေႃႈ။
ၵွပ်ႈပိူဝ်ႈၶဝ်ႈဢၼ်လီပၢတ်ႇၼၼ်ႉသုၵ်းယဝ်ႉလႄႈဢွၼ်ၵၼ်ယိပ်းၵမ်ဢဝ်ၶဵဝ်းတႃႉ။ ၵွပ်ႈပိူဝ်ႈထၢင်ဢၼ်ၼူတ်ႈမၢၵ်ႇၸပိတ်ႉ တဵမ်ဝႆႉယဝ်ႉလႄႈဢွၼ်ၵၼ်မႃးလူင်းယဵပ်ႇၼူတ်ႈတႃႉ။ ႁၢင်းၼမ်ႉမၢၵ်ႇၸပိတ်ႉတင်းလၢႆလူၼ်ႉလိူဝ်ဝႆႉ ယဝ်ႉဢေႃႈ။ လွင်ႈမၼ်းၸမ်ႉ၊တုၸရိူၵ်ႈ ဢပျတ်ႈဢၼ်ၶဝ်ႁဵတ်းၼၼ်ႉယႂ်ႇၼႃႇဢေႃႈ၊” ဝႃႈၼင်ႇၼႆဢေႃႈ။
ၵူၼ်းၼမ်ၼႃႇၸုတုမ်ၵၼ်ယူႇ၊ၵူၼ်းၼမ်ၼႃႇ ၸုတုမ်ၵၼ်ယူႇၵႃႈၼႂ်းပၢင်ႇႁူၺ်ႈဢၼ် တၵ်းၸီႇယၢင်ႇတႅပ်းတတ်းၼၼ်ႉဢေႃႈ။ မိုဝ်ႉဝၼ်း ထႃႇဝရႃႉၽြႃး၊ ၸမ်တၵ်း ႁွတ်ႈထိုင်ၵႃႈတီႈ ပၢင်ႇႁူၺ်ႈဢၼ် တၵ်းၸီႇယၢင်ႇတႅပ်းတတ်း၊ ၼၼ်ႉယဝ်ႉ။
တႃဝၼ်းဢိၵ်ႇတင်းလိူၼ်တၵ်းလပ်းသိင်ႇ ၵႂႃႇလႄႈလၢဝ်တင်းလၢႆယင်းဢမ်ႇႁိူဝ်ႈ ဢမ်ႇလႅင်းလႄႈတၵ်းယူႇဢေႃႈ။
ထႃႇဝရႃႉၽြႃး၊ တၵ်းယူႇၵႃႈၼိူဝ်လွႆ ၸိဢုၼ်ႇ၊ ႁွင်ႉပၢဝ်ႇသေလႄႈယူႇၵႃႈၼႂ်းဝဵင်း ယေႇရုသလႅမ်ႇ၊ ၵိဝ်သဵင်မၼ်းၸဝ်ႈဢေႃႈ။ ၽႃႉၵၢင်ႁၢဝ်ဢိၵ်ႇတင်းလိၼ်မိူင်းတၵ်းသၼ်ႇၶွၼ်းဝႆဢေႃႈ။ ၵူၺ်းၵႃႈ၊ ထႃႇဝရႃႉၽြႃး၊ ၼၼ်ႉတၵ်းပဵၼ် တီႈဢၼ်သွၼ်ႈဢၼ်ပိုင်ႈလႄႈ ႁႂ်ႈပဵၼ်တီႈဢၼ်ႁႄႉဢၼ်ၵင်ႈတီႈၵူၼ်း မဵဝ်း ဢိသရေး၊ တင်းလၢႆဢေႃႈ။
“ၼင်ႇၼၼ်လႄႈသူတၵ်းလႆႈႁုလွင်ႈဢၼ်ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈသူ၊ ဢၼ်ၵဵင်းဝၢပ်ႈယူႇၵႃႈၼိူဝ်လွႆၵဝ် ၸိဢုၼ်ႇ၊ ဢၼ်မူတ်းၸၢင်ႇၼၼ်ႉဢေႃႈ။ ဝဵင်း ယေႇရုသလႅမ်ႇ၊ ၵေႃႈတၵ်း ပဵၼ်ဢၼ်မူတ်းၸၢင်ႇလႄႈ ၵမ်းလိုၼ်းၵူၼ်းတၢင်ႇၸိူဝ်ႉတၢင်ႇမဵဝ်း ဢမ်ႇလႆႈယဵပ်ႇလႆႈၶၢမ်ႈဝဵင်းၼၼ်ႉ။
ၼႂ်းမိုဝ်ႉဝၼ်းၼၼ်ႉၼမ်ႉမၢၵ်ႇၸပိတ်ႉတၵ်း ယွတ်ႇလႆဢွၵ်ႇသေၵႃႈတီႈလွႆတင်းလၢႆ မႃးလႄႈၼမ်ႉၼူမ်းတၵ်းလႆဢွၵ်ႇသေ ၵႃႈတီႈၵွင်းတင်းလၢႆမႃးဢေႃႈ။ ၼမ်ႉႁွင်ႈ ယုတႃႉ၊ ၵႃႈမီးၼၼ်ႉတၵ်းမီး တၢင်းဢၼ်ၼမ်ႉလႆယူႇလႄႈ ၼမ်ႉဢွၵ်ႇႁူးတၵ်းဢွၵ်ႇသေၵႃႈၼႂ်းႁိူၼ်း ထႃႇဝရႃႉၽြႃး၊ သေလႄႈႁႂ်ႈ ပၢင်ႇႁူၺ်ႈ သိတ်ႉတိမ်ႇ၊ ယမ်းဢေႃႈ။
မိူင်း ဢေးၵျိပ်ႉ၊ တၵ်းမီးတၢင်းဢၼ် သဵတ်ႇၵူၼ်းယဵၼ်ၵူၼ်းၵႂႃႇလႄႈ မိူင်း ဢေႇတုမ်ႇ၊ တၵ်းပဵၼ်ထိူၼ်ႇပဵၼ်ၶိူဝ်းဢၼ် သဵတ်ႇၵူၼ်းငႅဝ်ၵူၼ်းဢေႃႈ။ လွင်ႈမၼ်းၸမ်ႉ၊ၶဝ်ၼိၵ်ႈၸၢၵ်ႈငႅၼ်းသႄး ၵူၼ်းမဵဝ်း ယုတႃႉ၊ တင်းလၢႆလႄႈ ထွၵ်ႇလိူတ်ႈၶဝ်ၸိူဝ်းဢၼ်ဢမ်ႇမီးဢပျတ်ႈၼၼ်ႉၵႃႈၼႂ်းမိူင်းၶဝ်ၼၼ်ႉဢေႃႈ။
မိူင်း ယုတႃႉ၊ ၸမ်ႉ၊တၵ်းလႆႈပဵၼ်မိူင်း ထႃႇဝရႃႉလႄႈဝဵင်း ယေႇရုသလႅမ်ႇ၊ ၸမ်ႉ၊ တၵ်းလႆႈပဵၼ်ဝဵင်းဢၼ်၊ တႄႇယူႇၶိင်ႇၵႃႇလႃႉတႃႇသေႇ ဢမ်ႇထၢတ်ႇဢေႃႈ။
ၵဝ်တၵ်းတႅၼ်းပၼ်တၢင်းဢၼ်ၶဝ်ထွၵ်ႇလိူတ်ႈပႅတ်ႈဢၼ်ၵဝ်ဢမ်ႇမၢတ်ႈဝႃႈ၊ပဵၼ်တၢင်းဢၼ် ၵၢင်းလွတ်ႈတင်းဢပျတ်ႈၼၼ်ႉဢေႃႈ။ လွင်ႈမၼ်းၸမ်ႉ၊ ထႃႇဝရႃႉၽြႃး၊ ၵိင်းဝၢပ်ႈယူႇၵႃႈၼိူဝ်လွႆ ၸိဢုၼ်ႇ၊ ၼၼ်ႉဢေႃႈ၊” ဝႃႈၼင်ႇၼႆဢေႃႈ။ ၵျၢမ်းပရေႃးၽႅတ်ႈယူဝ်းဢေးလႃႉယဝ်ႉယဝ်ႉဢေႃႈ။
ၵႂၢမ်းပျႃႇတိၵ်ႈၸဝ်ႈဢၼ် ဢႃႇမူတ်ႉ၊ ၵေႃႉဢၼ်ၶဝ်ႈပႃးၵႃႈၼႂ်းမုၵ်ႉၸိူဝ်းၵူၼ်းဢၼ်လဵင်ႉထိင်းသူဝ်းၵႃႈတီႈဝၢၼ်ႈ တေႇၵေႃႇ၊ ၼၼ်ႉလႆႈၶၢမ်ႇဢဝ်ပုၼ်ႈမိူင်း ဢိသရေး၊ ၼႂ်းၸူဝ်ႈပၢၼ်ၶုၼ် ဢူဝ်းၸိယႃႉ၊ ၶုၼ်ႁေႃၶမ်းမိူင်း ယုတႃႉ၊ ဢိၵ်ႇတင်းၼႂ်းၸူဝ်ႈပၢၼ်ၶုၼ် ယေႇရူဝ်းပုမ်ႇ၊ လုၵ်ႈၸၢႆး ယႁေႃးသႃႉ၊ ၶုၼ်ႁေႃၶမ်းမိူင်း ဢိသရေး၊ ဢွၼ်တၢင်းပီဢၼ်ဢိင်ႇသၼ်ႇသွင်ပီၼၼ်ႉၸမ်ႉ။
ဢႃႇမူတ်ႉ၊ လၢတ်ႈလႄႈဝႃႈ၊ “ ထႃႇဝရႃႉၽြႃး၊ ယူႇၵႃႈၼိူဝ်လွႆ ၸိဢုၼ်ႇ၊ ႁွင်ႉပၢဝ်ႇလႄႈယူႇၵႃႈၼႂ်းဝဵင်း ယေႇရုသလႅမ်ႇ၊ ၵိဝ်သဵင်ဢေႃႈ။ ပၢင်ႇယိူဝ်ႈတီႈဢၼ်ၵူၼ်းလဵင်ႉသူဝ်းထိင်းသူဝ်းယူႇၸိူဝ်းၼၼ်ႉႁဵဝ်ႇႁႅင်ႈၵႂႃႇလႄႈ ပၢႆၸိၵ်းလွႆ ၵရမေႇလႃႉ၊ ၼၼ်ႉႁဵဝ်ႇၸွပ်ႈၵႂႃႇဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵွပ်ႈပိူဝ်ႈၵူၼ်းဝဵင်း တမ်ႇမတ်ႉသၵတ်ႉ၊ ၽိတ်းပိူင်ႈဢပျတ်ႈၶိူဝ်းၶိူဝ်းယႂ်းယႂ်းလႄႈၵဝ်တၵ်းပၼ်တၢမ်ႇၶဝ်ဢမၢၼ်ႇၶၼ်ပဵၼ်။ လွင်ႈမၼ်းၸမ်ႉ၊ၶဝ်ဢဝ်ၸၢၵ်ႈလဵၵ်းဢၼ်ၶိုတ်ႈၼူတ်ႈၶဝ်ႈပိူၵ်ႇၸိူဝ်းၼၼ်ႉၶိုတ်ႈၼူတ်ႈမိူင်း ၵိလတ်ႉ၊ ၼၼ်ႉယဝ်ႉယဝ်ႉ။-
ၵဝ်တၵ်းပွႆႇၸႂ်ႉၽႆးတူၵ်းသႂ်ႇၵႃႈၼိူဝ်မဵဝ်းၶုၼ် ႁႃႇၸေႇလႃႉ၊ လႄႈႁႂ်ႈမႆႈပႅတ်ႈတိူၵ်ႈတီႈတိုၵ်းသိုၵ်း ပိၼ်ႇႁႃႇတတ်ႉ၊ တင်းလၢႆဢေႃႈ။-
ၵဝ်တၵ်းႁၵ်းႁိၵ်းၵိူၼ်ႇၽၵ်းတူဝဵင်း တမ်ႇမတ်ႉသၵတ်ႉ၊ ပႅတ်ႈလႄႈၵဝ်တၵ်းပႄႇၽဵဝ်ႈၵူၼ်းၸိူဝ်းဢၼ်ယူႇသဝ်းၵႃႈတီႈပၢင်ႇႁူၺ်ႈ ဢႃႇဝိၼ်ႇ၊ တင်းသဵင်ႈတင်းမူတ်းၼၼ်ႉ၊ဢိၵ်ႇတင်းၶုၼ်ဢၼ်ယိပ်းၵၼ်းႁွၵ်ႇရႃႇၸႃႉမၼ်းပႅတ်ႈသေၵႃႈတီႈဝဵင်း ပႅတ်ႉဢေႇတိၼ်ႇ၊ ၼၼ်ႉဢေႃႈ။ ၵူၼ်းမိူင်း သီးရီးယႃး၊ တင်းလၢႆတၵ်းလႆႈၶၢမ်ႇတၢင်းဢၼ်သိမ်းဢဝ်ၵႂႃႇၸူးၵႃႈတီႈဝဵင်း ၵိရႃႉ၊ ဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉၸမ်ႉ၊ “ၵွပ်ႈပိူဝ်ႈၵူၼ်းဝဵင်း ၵႃႇၸႃႉ၊ ၽိတ်းပိူင်ႈဢပျတ်ႈၶိူဝ်းၶိူဝ်းယႂ်းယႂ်းလႄႈၵဝ်တၵ်းပၼ်တၢမ်ႇၶဝ်ဢမၢၼ်ႇၶၼ်ပဵၼ်ဢေႃႈ။ လွင်ႈမၼ်းၸမ်ႉ၊ၶဝ်သိမ်းဢဝ်ၵူၼ်းမိူင်းတင်းသဵင်ႈတင်းလူင်ၵႂႃႇႁႂ်ႈလႆႈဢၢပ်ႈပၼ်တီႈၶုၼ်မိူင်း ဢေႇတုမ်ႇ၊ ၼၼ်ႉဢေႃႈ။-
ၵဝ်တၵ်းပွႆႇၸႂ်ႉၽႆးတူၵ်းသႂ်ႇၵႃႈၼိူဝ်လမ်းဝဵင်း ၵႃႇၸႃႉ၊ လႄႈႁႂ်ႈမႆႈတိူၵ်ႈတီႈတိုၵ်းသိုၵ်းမၼ်းတင်းလၢႆဢေႃႈ။-
ၵဝ်တၵ်းပႄႇၽဵဝ်ႈၵူၼ်းၸိူဝ်းဢၼ်ယူႇသဝ်းၵႃႈၼႂ်းဝဵင်း ဢႃႇၸုတ်ႉ၊ ၼၼ်ႉဢိၵ်ႇတင်းၶုၼ်ဢၼ်ယိပ်းၵၼ်းႁွၵ်ႇရႃႇၸႃႉပႅတ်ႈသေၵႃႈတီႈဝဵင်း ဢႃႇသၵေႇလုၼ်ႇ၊ ၼၼ်ႉဢေႃႈ။ ၵဝ်တၵ်းဢဝ်မိုဝ်းၵဝ်ဝၢႆႇၶိုၼ်ႈၸူးၵႃႈတီႈဝဵင်း ဢေႇၵရုၼ်ႇ၊ လႄႈၵူၼ်း ၽိလိတ်ႉတိ၊ ဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉတၵ်းလႆႈလုလႅဝ်ဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉၸမ်ႉ၊ “ၵွပ်ႈပိူဝ်ႈၵူၼ်းဝဵင်း တုရု၊ ၽိတ်းပိူင်ႈဢပျတ်ႈၶိူဝ်းၶိူဝ်းယႂ်းယႂ်းလႄႈၵဝ်တၵ်းပၼ်တၢမ်ႇၶဝ်ဢမၢၼ်ႇၶၼ်ပဵၼ်ဢေႃႈ။ လွင်ႈမၼ်းၸမ်ႉ၊ၶဝ်ယင်းဢမ်ႇၶုၵ်းၸႂ်လႆႈမိၵ်ႈသႁႃႇယႃႉဢၼ်မီးဝႆႉတီႈပီႈၼွင်ႉၵၼ်ၼၼ်ႉလႄႈသိမ်းဢဝ်ၵူၼ်းမိူင်းတင်းသဵင်ႈတင်းလူင်ၼၼ်ႉၵႂႃႇဢၢပ်ႈပၼ်တီႈၶုၼ် ဢေႇတုမ်ႇ၊ ၼၼ်ႉဢေႃႈ။-
ၵဝ်တၵ်းပွႆႇၸႂ်ႉၽႆးတူၵ်းသႂ်ႇၵႃႈၼိူဝ်လမ်းဝဵင်း တုရု၊ လႄႈႁႂ်ႈမႆႈတိူၵ်ႈတီႈတိုၵ်းသိုၵ်းမၼ်းတင်းလၢႆဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉၸမ်ႉ၊ “ၵွပ်ႈပိူဝ်ႈၵူၼ်းမိူင်း ဢေႇတုမ်ႇ၊ ၽိတ်းပိူင်ႈဢပျတ်ႈၶိူဝ်းၶိူဝ်းယႂ်းယႂ်းလႄႈၵဝ်တၵ်းပၼ်တၢမ်ႇၶဝ်ဢမၢၼ်ႇၶၼ်ပဵၼ်ဢေႃႈ။ လွင်ႈမၼ်းၸမ်ႉ၊မၼ်းဢမ်ႇမီးတၢင်းဢၼ်ဢဵတ်းလူသေလႄႈဢဝ်လၢပ်ႇဢဝ်လႅဝ်းလိုပ်ႈၸွမ်းလမ်းၸွမ်းပီႈမၼ်းၼွင်ႉမၼ်း ဢေႃႈ။ မၼ်းႁဵတ်းႁႂ်ႈတေႃးသႃႉတၢင်းၸႂ်မႆႈမၼ်းတႄႇယူႇတႃႇသေႇလႄႈမၼ်းဢမ်ႇႁႂ်ႈၸႂ်တေႃးသႃႉလႆႈထၢတ်ႇယဵၼ်ၼၼ်ႉဢေႃႈ။-
ၵဝ်တၵ်းပွႆႇၸႂ်ႉၽႆးတူၵ်းသႂ်ႇၵႃႈၼိူဝ်ဝဵင်း တေႇမၼ်ႇ၊ လႄႈႁႂ်ႈမႆႈတိူၵ်ႈတီႈတိုၵ်းသိုၵ်းဝဵင်း ပေႃႇၸရႃႉ၊ တင်းလၢႆဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉၸမ်ႉ၊ “ၵွပ်ႈပိူဝ်ႈၵူၼ်းဝဵင်း ဢမ်ႇမုၼ်ႇ၊ ၽိတ်းပိူင်ႈဢပျတ်ႈၶိူဝ်းၶိူဝ်းယႂ်းယႂ်းလႄႈၵဝ်တၵ်းပၼ်တၢမ်ႇၶဝ်ဢမၢၼ်ႇၶၼ်ပဵၼ်ဢေႃႈ။ လွင်ႈမၼ်းၸမ်ႉ၊မိူဝ်ႈဢၼ်ၶဝ်တိုၵ်းသိုၵ်းႁႂ်ႈၶွပ်ႇၼမ်ႉလႅၼ်လိၼ်ၶဝ်လႆႈၵႂၢင်ႈမႃးၼၼ်ႉၸိုင်၊ၶဝ်ၼိၵ်ႈၸၢၵ်ႈလႄႈၽႃႇတွင်ႉမႄႈယိင်းဢၼ်ပႃးပတိၵ်ႈသၼ်ႇထေႇၵႃႈတီႈမိူင်း ၵိလတ်ႉ၊ ၼၼ်ႉဢေႃႈ။-
ၵဝ်တၵ်းဢဝ်ၽႆးၸပ်းသႂ်ႇၵႃႈတီႈလမ်းဝဵင်း ရပ်ႉပႃႇ၊ လႄႈႁႂ်ႈမႆႈတိူၵ်ႈတီႈတိုၵ်းသိုၵ်းမၼ်းတင်းလၢႆဢေႃႈ။ တၵ်းမီးတၢင်းဢၼ်သႅၼ်ႇႁွင်ႉၼႂ်းမိုဝ်ႉဝၼ်းဢၼ်တိုၵ်းသိုၵ်း၊ဢိၵ်ႇတင်းတၢင်းဢၼ်ပိဝ်သဵၼ်ၵႂႃႇၼႂ်းဝၼ်းဢၼ်ၽူၼ်လူင်လူမ်းလူင်ႁွတ်ႈမႃးၼၼ်ႉဢေႃႈ။-
ၶုၼ်ႁေႃၶမ်းၶဝ်ဢိၵ်ႇလူၺ်ႈၵၼ်တင်းမူးမၢတ်ႈၽွင်းမိူင်းမၼ်းၸိူဝ်းၼၼ်ႉတၵ်းလႆႈၶၢမ်ႇတၢင်းဢၼ်သိမ်းဢဝ်ၵႂႃႇဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉၸမ်ႉ၊ “ၵွပ်ႈပိူဝ်ႈၵူၼ်းမိူင်း မေႃႇၽႃႉ၊ ၽိတ်းပိူင်ႈဢပျတ်ႈၶိူဝ်းၶိူဝ်းယႂ်းယႂ်းလႄႈၵဝ်တၵ်းပၼ်တၢမ်ႇၶဝ်ဢမၢၼ်ႇၶၼ်ပဵၼ်ဢေႃႈ။ လွင်ႈမၼ်းၸမ်ႉ၊မၼ်းဢဝ်ၽႆးတုတ်ႇၽဝ်လုပ်ႇၶုၼ်ႁေႃၶမ်းမိူင်း ဢေႇတုမ်ႇ၊ ႁႂ်ႈပဵၼ်ထုၼ်ၵႂႃႇယဝ်ႉယဝ်ႉ။-
ၵဝ်တၵ်းပွႆႇၸႂ်ႉၽႆးတူၵ်းသႂ်ႇၵႃႈၼိူဝ်မိူင်း မေႃႇၽႃႉ၊ လႄႈႁႂ်ႈမႆႈတိူၵ်ႈတီႈတိုၵ်းသိုၵ်းဝဵင်း ၵိရဢုတ်ႉ၊ တင်းလၢႆဢေႃႈ။ ၵူၼ်းမိူင်း မေႃႇၽႃႉ၊ ၼၼ်ႉတၵ်းႁဵတ်းတၢင်းဢၼ်ဢူၼ်ဢဵၼ်မေႃးမႄး၊ႁဵတ်းတၢင်းဢၼ်ႁွင်ႉသႅၼ်ႇ၊တၢင်းဢၼ်ပဝ်ႇၼႄးၶရႃႇသေလႄႈသုမ်းၸွမ်းတၢႆၸွမ်းၵႂႃႇဢေႃႈ။-
ၵဝ်တၵ်းပႄႇၽဵဝ်ႈၶုၼ်ဢၼ်ဢုပ်ႉပိူင်ႇပႅတ်ႈသေၵႃႈၼႂ်းၵၢင်မိူင်း မေႃႇၽႃႉ၊ လႄႈဢဝ်မၼ်းဢိၵ်ႇတင်းမူးမၢတ်ႈၽွင်းမိူင်းမၼ်းတင်းလၢႆတၢႆပႅတ်ႈဢေႃႈ၊” ဝႃႈၼင်ႇၼႆဢေႃႈ၊ ထႃႇဝရႃႉၽြႃး၊ မီးဢမိင်ႉဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉၸမ်ႉ၊ “ၵွပ်ႈပိူဝ်ႈၵူၼ်းမိူင်း ယုတႃႉ၊ ၽိတ်းပိူင်ႈဢပျတ်ႈၶိူဝ်းၶိူဝ်းယႂ်းယႂ်းလႄႈၵဝ်တၵ်းပၼ်တၢမ်ႇၶဝ်ဢမၢၼ်ႇၶၼ်ပဵၼ်ဢေႃႈ။ လွင်ႈမၼ်းၸမ်ႉ၊ၶဝ်ၸုၼ်ႉပႅတ်ႈပိင်းၺၢပ်ႈတြႃး ထႃႇဝရႃႉၽြႃး၊ လႄႈဢမ်ႇပႂ်ႉၵမ်ပႂ်ႉၸွမ်းထုင်းၽိင်ႈတြႃးမၼ်းၸဝ်ႈ။ ၶဝ်ႁဵတ်းၸွမ်းမိၵ်ႉသႃႇတိၵ်ႉထိဢၼ်ပူႇၶဝ်မွၼ်ႇၶဝ်ယၢမ်ႈၸွမ်းၼၼ်ႉလႄႈၽိတ်းပိူင်ႈယဝ်ႉယဝ်ႉ။-
ၵဝ်တၵ်းပွႆႇၸႂ်ႉၽႆးတူၵ်းသႂ်ႇၵႃႈၼိူဝ်မိူင်း ယုတႃႉ၊ လႄႈႁႂ်ႈမႆႈတိူၵ်ႈတီႈတိုၵ်းသိုၵ်းဝဵင်း ယေႇရုသလႅမ်ႇ၊ တင်းလၢႆဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉၸမ်ႉ၊ “ၵွပ်ႈပိူဝ်ႈၵူၼ်းမဵဝ်း ဢိသရေး၊ ၽိတ်းပိူင်ႈဢပျတ်ႈၶိူဝ်းၶိူဝ်းယႂ်းယႂ်းလႄႈၵဝ်တၵ်းပၼ်တၢမ်ႇၶဝ်ဢမၢၼ်ႇၶၼ်ပဵၼ်ဢေႃႈ။ လွင်ႈမၼ်းၸမ်ႉ၊ၶဝ်ဢဝ်ၵေႃႉဢၼ်သိုဝ်ႈတေႃႇၼၼ်ႉ၊ၶၢႆပုၼ်ႈတၵ်းလႆႈငိုၼ်းလႄႈဢဝ်ၵေႃႉဢၼ်ၸုတ်ႈဢၼ်လုတ်ႈၼၼ်ႉၶၢႆပုၼ်ႈတၵ်းလႆႈၶႅပ်းတိၼ်ၵူႈၼိုင်ႈဢေႃႈ။-
ၶဝ်ယဵပ်ႇယမ်ႈၵူၼ်းႁႅင်းလဵၵ်ႉႁႅင်းၵေႇဢၼ်ဢမ်ႇမီးတီႈပိုင်ႈၼၼ်ႉလႄႈလၢၵ်ႈၵူၼ်းယၢၵ်ႈၵူၼ်းၽၢၼ်ဢွၵ်ႇသေၼွၵ်ႈတၢင်းဢေႃႈ။ ပေႃႈဢိၵ်ႇတင်းလုၵ်ႈၸၢႆးႁူမ်ႈပွင်းၼွၼ်းလူၺ်ႈၵၼ်တင်းမႄႈယိင်းၵေႃႉလဵဝ်ၵူၺ်းသေယဝ်ႉ၊ႁဵတ်းႁႂ်ႈၼႃႇမႃႉၸိုဝ်ႈသဵင်ၵဝ်ဢၼ်မူတ်းၸၢင်ႇၼၼ်ႉၵူဝ်ႈၵိူၵ်ႇဢေႃႈ။-
ၶဝ်ဢဝ်ၶူဝ်းၼုင်ႈတၢင်းမႆဢၼ်ပိူၼ်ႈပွင်ႇပိူၼ်ႈၵမ်ႉဝႆႉၸိူဝ်းၼၼ်ႉသိူဝ်ႇၵႃႈတီႈႁိမ်းၶဵင်ႇတၢင်းလူႇၵူႈဢၼ်ၵူႈဢၼ်သေလႄႈဢွၼ်ၵၼ်ၼွၼ်းဢေႃႈ။ ၶဝ်ဢဝ်ငိုၼ်းဢၼ်ပဵၼ်ၵႃႈၶၼ်ဢၼ်ပိူၼ်ႈယေႃႇပိူၼ်ႈသေပၼ်ၶဝ်ၼၼ်ႉ၊သိုဝ်ႉၼမ်ႉလဝ်ႈမၢၵ်ႇၸပိတ်ႉသေလႄႈၵိၼ်ၼႂ်းႁိူၼ်းၽြႃးပဵၼ်ၸဝ်ႈၶဝ်ဢေႃႈ။
“ၵဝ်ပႄႇၽဵဝ်ႈၵူၼ်းမဵဝ်း ဢႃႇမေႃးရိ၊ ဢၼ်တၢင်းသုင်မၼ်းမိူၼ်ၸိူဝ်ႉၼင်ႇတူၼ်ႈဢႃႇရိတ်ႉလႄႈၵႅၼ်ႇၶႅင်မိူၼ်ၸိူဝ်ႉၼင်ႇတူၼ်ႈမႆႉၼိမ်ၼၼ်ႉပႅတ်ႈသေၵႃႈတီႈၽၢႆႇၼႃႈၶဝ်ဢေႃႈ။ ၵဝ်ယႃႉမၢၵ်ႇၶဝ်ပႅတ်ႈသေၵႃႈၼိူဝ်တူၼ်ႈ၊ဢိၵ်ႇတင်းႁၢၵ်ႈၶဝ်ပႅတ်ႈသေၵႃႈတီႈတႂ်ႈလိၼ်ယဝ်ႉယဝ်ႉ။-
ၵဝ်ၼုၵ်ႈဢဝ်သူဢွၵ်ႇသေၵႃႈၼႂ်းမိူင်း ဢေးၵျိပ်ႉ၊ လႄႈဢွၼ်သူင်ႇၵႂႃႇၵႃႈၼႂ်းထိူၼ်ႇယူႇသီႇသိပ်းပီတဵမ်တဵမ်ႁႂ်ႈသူလႆႈၶဝ်ႈပိူင်ႇၸၢမ်ႇၸႃးမိူင်း ဢႃႇမေႃးရိ၊ ဢေႃႈ။-
ၵဝ်ၶၢၼ်းလုၵ်ႈၸၢႆးသူၵမ်ႈၽွင်ႈဝႆႉၵႃႈၼႂ်းဢရႃႇပရေႃးၽႅတ်ႈ ဢိၵ်ႇတင်းၵူၼ်းၼုမ်ႇၵူၼ်းၵမ်သူၵမ်ႈၽွင်ႈဝႆႉၵႃႈၼႂ်းဢရႃႇၵူၼ်း ၼႃႇၸရိ၊ ယဝ်ႉ။ ၵူၼ်းမဵဝ်း ဢိသရေး၊ တင်းလၢႆၶဝ်႟။ ၵႂၢမ်းၼႆႉမၢၼ်ႇမႅၼ်ႈဢမ်ႇၸႂ်ႈႁိုဝ်း၊ဝႃႈၼင်ႇၼႆလႄႈ ထႃႇဝရႃႉၽြႃး၊ ထၢမ်ဢေႃႈ။-
သူၸမ်ႉ၊ဢွၼ်ၵၼ်ဢဝ်ၼမ်ႉမၢၵ်ႇၸပိတ်ႉပၼ်ႁႂ်ႈၵူၼ်း ၼႃႇၸရိ၊ ၵိၼ်ယဝ်ႉ။ ပရေႃးၽႅတ်ႈတင်းလၢႆၵေႃႈသူဢွၼ်ၵၼ်ႁႄႉၶႅၼ်ၶဝ်လႄႈလၢတ်ႈလႄႈဝႃႈ၊ ‘ယႃႇပေႁဵတ်းပရေႃးၽႅတ်ႈသေလႄႈႁေႃးလၢတ်ႈ၊’ ဝႃႈၼင်ႇၼႆယဝ်ႉ။-
ပိူဝ်ႈၼႆလႄႈၵဝ်တၵ်းတဵၵ်းၶီႇတဵၵ်းတဵင်သူယူႇၵႃႈၼႂ်းတီႈယူႇသူမိူၼ်ၸိူဝ်ႉၼင်ႇဢၼ်လေႃႉဢၼ်သတ်ႉတဵမ်ဝႆႉတင်းလိုၼ်ႈၶဝ်ႈလႄႈၼၵ်းၼႃႇတဵၵ်းတဵင်ၼၼ်ႉဢေႃႈ။
“ၵေႃႉဢၼ်ၶုၼ်ႇလႅၼ်ႈဝႆးၼႃႇၼၼ်ႉတၵ်းဢမ်ႇပူၼ်ႉလွတ်ႈ။ ၵေႃႉဢၼ်ႁႅင်းယႂ်ႇၼၼ်ႉတၵ်းသုမ်းဢဵၼ်ႁႅင်းၶဝ်ဢေႃႈ။ ႁူဝ်ႁၢၼ်ၵူၼ်းသိုၵ်းၼၼ်ႉဢမ်ႇၸၢင်ႈၵႄႇသႄႇဢဝ်တူဝ်မၼ်းလွတ်ႈလႆႈ။-
ၵေႃႉဢၼ်ယိပ်းၵၢင်ႇၼၼ်ႉဢမ်ႇလႆႈၸုၵ်းလႆႈၶၢမ်ႇ၊ၵေႃႉဢၼ်တိၼ်ၶၼ်တိၼ်ၽႂ်းၼၼ်ႉဢမ်ႇလႆႈၵႄႇသႄႇဢဝ်တူဝ်မၼ်းလွတ်ႈ၊ႁူဝ်ႁၢၼ်ၵူၼ်းသိုၵ်းၶီႇမႃႉၵေႃႈ ဢမ်ႇလႆႈၵႄႇသႄႇဢဝ်တူဝ်မၼ်းလွတ်ႈ။-
ၵူၼ်းသိုၵ်းဢၼ်ႁတ်းဢၼ်ႁၢၼ်ၼၼ်ႉတၵ်းလႆႈယူႇတူဝ်ပူၺ်သေလႄႈဢွၵ်ႇပၢႆႈၵႂႃႇၼႂ်းဝၼ်းမိူဝ်ႈၼၼ်ႉဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ၵူၼ်းမဵဝ်း ဢိသရေး၊ တင်းလၢႆၶဝ်႟။ ဢွၼ်ၵၼ်ထွမ်ႇငိၼ်းၵႂၢမ်းဢၼ် ထႃႇဝရႃႉၽြႃး၊ လၢတ်ႈလွင်ႈသူၼၼ်ႉတႃႉ။ “သူပဵၼ်ၵူၼ်းမဵဝ်းဢၼ်ၵဝ်ၼုၵ်ႈဢဝ်ဢွၵ်ႇသေၵႃႈၼႂ်းမိူင်း ဢေးၵျိပ်ႉ၊ မႃးတင်းသဵင်ႈတင်းလူင်ဢေႃႈ။-
ၵႃႈၼႂ်းမဵဝ်းၵူၼ်းတင်းသဵင်ႈတင်းလူင်ဢၼ်ယူႇၵႃႈၼိူဝ်လိၼ်မိူင်းၼႆႉၼၼ်ႉ၊ၵဝ်ႁပ်ႉတုင်းဢဝ်သူမဵဝ်းလဵဝ်ၵူၺ်းဢေႃႈ။ ပိူဝ်ႈၼႆလႄႈၵဝ်တၵ်းၸီႇယၢင်ႇပၼ်တၢမ်ႇသူပုၼ်ႈဢပျတ်ႈသူတင်းသဵင်ႈဢေႃႈ၊” ဝႃႈၼင်ႇၼႆဢေႃႈ။
ၵူၼ်းသွင်ၵေႃႉပေႃးၸႂ်သၽေႃးဢမ်ႇမိူၼ်ၵၼ်ၸိုင်၊တၵ်းႁူမ်ႈလူၺ်ႈၵၼ်သေလႄႈၵႂႃႇတၢင်းပႆတၢင်းလႆႈႁိုဝ်း။
သၢင်ႇသီႈၼၼ်ႉ၊ပေႃးဢမ်ႇမီးတူဝ်ဢၼ်တေတိဢဝ်ၸိုင်၊တၵ်းႁွင်ႉၶၢင်းၵႃႈၼႂ်းထိူၼ်ႇႁိုဝ်း။ သၢင်ႇသီႈၼုမ်ႇၼၼ်ႉပေႃးဢမ်ႇတိဢဝ်လွင်ႈတၢင်းသေၸိူဝ်ႉသေပိူင်ႈယဝ်ႉၸိုင်၊တၵ်းႁဵတ်းသဵင်ၵႃႈၼႂ်းၶုမ်မၼ်းႁူးမၼ်းႁိုဝ်း။
ပေႃးဢမ်ႇၵၢင်ဝႆႉၸိုင်၊ၼူၵ်ႉတၵ်းထုၵ်ႇၶမ်မႅၼ်ႈၵႃႈၼႂ်းတူင်ႇႁႅဝ်ႉတူင်ႇၶိုမ်းၵႃႈၼိူဝ်ၼႃႈလိၼ်ႁိုဝ်း။ ၸူဝ်ႈဢၼ်ဢမ်ႇပႆႇလႆႈသေၸိူဝ်ႉသေပိူင်ၸိုင်၊တူင်ႇႁႅဝ်ႉတူင်ႇၶိုမ်းတၵ်းမီးတၢင်းဢၼ်ထွတ်ႇထူၺ်ႈဢွၵ်ႇသေၵႃႈတီႈလိၼ်ၼၼ်ႉႁိုဝ်း။
ပေႃးပဝ်ႇၼႄးၶရႃႇၵႃႈၼႂ်းဝဵင်းၸိုင်၊ၵူၼ်းတင်းလၢႆယင်းဢမ်ႇၵူဝ်ဢမ်ႇႁႄလႄႈတၵ်းယူႇႁိုဝ်း။ ထႃႇဝရႃႉၽြႃး၊ ယင်းဢမ်ႇၸီႇယၢင်ႇလႄႈၽေးသေၸိူဝ်ႉသေပိူင်တၵ်းႁွတ်ႈထိုင်ၵႃႈၼႂ်းဝၢၼ်ႈၼႂ်းဝဵင်းႁိုဝ်း။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ယင်းဢမ်ႇၽုၺ်ႇဢွၵ်ႇၼႄပျႃးတီႈၶႃႈမၼ်းၸဝ်ႈပရေႃးၽႅတ်ႈတင်းလၢႆလႄႈမၼ်းၸဝ်ႈဢမ်ႇၸီႇယၢင်ႇလွင်ႈတၢင်းသေၸိူဝ်ႉသေပိူင်။
မိူဝ်ႈဢၼ်သၢင်ႇသီႈႁွင်ႉၶၢင်းၼၼ်ႉၸိုင်၊ၽူႈလႂ်ယင်းဢမ်ႇၵူဝ်ဢမ်ႇႁႄလႄႈတၵ်းယူႇလႆႈႁိုဝ်း။ မိူဝ်ႈဢၼ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၼၼ်ႉၸိုင်၊မီးၽူႈလႂ်ယင်းဢမ်ႇႁဵတ်းပရေႃးၽႅတ်ႈလႄႈတၵ်းယူႇလႆႈႁိုဝ်း။
တၵ်းလႆႈႁွင်ႉပၢဝ်ႇႁွင်ႉလၢတ်ႈ ၵႃႈၼႂ်းႁေႃၶမ်းဝဵင်း ဢႃႇၸုတ်ႉ၊ ဢိၵ်ႇတင်းၵႃႈၼႂ်းႁေႃၶမ်းမိူင်း ဢေးၵျိပ်ႉ၊ ၸိူဝ်းၼၼ်ႉလႄႈဝႃႈၸမ်ႉ၊သူၸုၵၼ်တုမ်ၵၼ်ၵႃႈၼိူဝ်လွႆ သမႃႇရိ၊ တင်းလၢႆလႄႈလူတူၺ်းလွင်ႈတၢင်းဢၼ်ႁုၼ်ႈႁၢၼ်ႈဢူၼ်ဢဵၼ်မေႃးမႄးၵႃႈၼႂ်းဝဵင်းၼၼ်ႉ၊ဢိၵ်ႇတင်းလွင်ႈတၢင်းဢၼ်ၼိၵ်ႈၸၢၵ်ႈငႅၼ်းသႄးၵႃႈၼႂ်းၵၢင်ဝဵင်းၼၼ်ႉတႃႉ။
“ၶဝ်ၼၼ်ႉပဵၼ်ၶဝ်ၸိူဝ်းဢၼ်ဢမ်ႇႁုတၢင်းဢၼ်ၸၢင်ႈႁဵတ်းၸွမ်းၼင်ႇတြႃးလႄႈၸၢင်ႈဢွၼ်ၵၼ်ဢဝ်ဢုၵ်ႉၸႃႇဢၼ်ႁဵတ်းပႄႉႁဵတ်းၼႅင်ႇလႄႈႁိမ်ႁူင်ႇဢဝ်မႃးၼၼ်ႉသိမ်းဝႆႉၵႃႈၼႂ်းႁေႃၶမ်းၶဝ်ၼၼ်ႉဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။-
ပိူဝ်ႈၼႆလႄႈၸဝ်ႈၽြႃး၊ၽြႃးပဵၼ်ၸဝ်ႈမီးဢမိင်ႉၸမ်ႉ၊ “ရၢၼ်ႇသူႇတၵ်းလွမ်ႉလဵပ်ႈႁွပ်ႈမိူင်းဝႆႉသေလႄႈဢွၼ်ၵၼ်ယႃႉပႅတ်ႈတၢင်းဢၼ်ႁႄႉဢၼ်ၵင်ႈမႂ်းသေယဝ်ႉ၊ႁိမ်ဢဝ်ယႃႉၽဵဝ်ႈႁေႃၶမ်းမႂ်းတင်းလၢႆပႅတ်ႈဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “မိူၼ်ၸိူဝ်ႉၼင်ႇဢၼ်ၵူၼ်းဢၼ်လဵင်ႉသူဝ်းထိင်းသူဝ်းႁိမ်ဢဝ်ၶိုၼ်းတိၼ်သွင်ၶွၼ်၊ဢမ်ႇၼၼ်၊မႂ်ႁူပွတ်းၼိုင်ႈဢွၵ်ႇသေၵႃႈၼႂ်းသူပ်းသၢင်ႇသီႈၼၼ်ႉလႄႈၵူၼ်းမဵဝ်း ဢိသရေး၊ ဢၼ်ယူႇၵႃႈၼႂ်းဝဵင်း သမႃႇရိ၊ ဢိတ်းဢွၼ်ႇၼိုင်ႈၵူၺ်းလႆႈၶၢမ်ႇတၢင်းဢၼ်ၵႄႇၼုၵ်ႈပႃးၸွမ်းႁူဝ်ၸဵင်ႇၵူႇတီႈၼွၼ်း၊ဢိၵ်ႇတင်းၽႃႈၵွပ်းပွတ်းဢွၼ်ႇၼိုင်ႈၵူၺ်းဢေႃႈ။-”
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ “သူဢွၼ်ၵၼ်ထွမ်ႇငိၼ်းလႄႈၶၢမ်ႇသၢၵ်ႈသေႇဢၼ်ၶတ်းၵၼ်တင်းၸိူဝ်ႉၶိူဝ်း ယႃႇၵုပ်ႈ၊ တႃႉ။-
ၼႂ်းမိုဝ်ႉဝၼ်းဢၼ်ၵဝ်ပၼ်တၢမ်ႇဢပျတ်ႈၵူၼ်းမဵဝ်း ဢိသရေး၊ ၵဝ်တၵ်းပၼ်တၢမ်ႇဢပျတ်ႈတီႈၶဵင်ႇတၢင်းလူႇ ပေႇသလႃႉ၊ တင်းလၢႆဢမၢၼ်ႇၶၼ်ပဵၼ်ဢေႃႈ။ ၶဝ်လႅမ်ၶဵင်ႇတၢင်းလူႇၼၼ်ႉတၵ်းလႆႈၶၢမ်ႇတၢင်းဢၼ်တႅပ်းၶၢတ်ႇလႄႈတူၵ်းပႅတ်ႈၵႃႈၼိူဝ်လိၼ်ဢေႃႈ။-
ၵဝ်တၵ်းယႃႉၽဵဝ်ႈပႅတ်ႈႁိူၼ်းႁေႃဢၼ်ၶဝ်ယူႇၼႂ်းမိူဝ်ႈၶိင်ႇၵတ်း၊ဢိၵ်ႇတင်းႁိူၼ်းႁေႃဢၼ်ၶဝ်ယူႇၼႂ်းမိူဝ်ႈၶိင်ႇမႆႈၸိူဝ်းၼၼ်ႉလႄႈႁိူၼ်းႁေႃဢၼ်ႁၢင်ႈၶိူင်ႈဝႆႉလူၺ်ႈငႃးၸၢင်ႉၸိူဝ်းၼၼ်ႉတၵ်းလႆႈလုလႅဝ်သေယဝ်ႉ။ ႁိူၼ်းယႂ်ႇႁိူၼ်းလူင်တင်းလၢႆၵေႃႈ တၵ်းလႆႈၶၢမ်ႇတၢင်းဢၼ်ယႃႉပႅတ်ႈဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
မႄႈယိင်းဢၼ်ယူႇၵႃႈၼိူဝ်လွႆ သမႃႇရိ၊ ဢၼ်ပီးလီမၼ်းလီမိူၼ်ၸိူဝ်ႉၼင်ႇဝူဝ်း ပႃႇသၢၼ်ႇ၊ ဢၼ်လႆႈၶၢမ်ႇတၢင်းဢၼ်လဵင်ႉဝႆႉလီၼႃႇလႄႈပဵၼ်ၵေႃႉဢၼ်ၼိၵ်ႈၸၢၵ်ႈၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉယူႇ၊ဢၼ်တဵၵ်းငႅၼ်းၵႅၼ်ႉၶေႃးၶဝ်ၸိူဝ်းဢၼ်ၸုတ်ႈဢၼ်လုတ်ႈၼၼ်ႉယူႇ၊ဢၼ်ၸၢင်ႈလၢတ်ႈတီႈၸဝ်ႈၽူဝ်ၶဝ်တင်းလၢႆလႄႈဝႃႈ၊ “ဢဝ်မႃးသေၸိူဝ်ႉသေပိူင်သေလႄႈသူတ်ႉၵိၼ်တႃႉႁဝ်း၊” ဝႃႈၼင်ႇၼႆယူႇၼၼ်ႉၶဝ်႟။ ဢွၼ်ၵၼ်ထွမ်ႇဢဝ်ၵႂၢမ်းၼႆႉတႃႉ။-
ၵႃႈၼင်ႇဢၼ် ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ဢဝ်တၢင်းဢၼ်မူတ်းၸၢင်ႇမၼ်းၸဝ်ႈတိူင်ႇၵၢဝ်ႇဝႆႉၵတိဝႆႉၼၼ်ႉ “ၶိင်ႇမိူဝ်ႈဢၼ်ၶဝ် တေဢဝ်တင်းမဵတ်းသေလႄႈတိၺွပ်းဢဝ်သူၵႂႃႇၵႃႈတီႈဢၼ်ၵႆၼၼ်ႉလႄႈသူၵူႈၵေႃႉၵူႈၵူၼ်းၵေႃႈတၵ်းမိူၼ်ၸိူဝ်ႉၼင်ႇပႃဢၼ်လႆႈၶၢမ်ႇတၢင်းဢၼ်မဵတ်းၼၼ်ႉတၵ်းႁွတ်ႈမႃးတီႈသူဢမၢၼ်ႇၶၼ်ပဵၼ်ဢေႃႈ။-
သူတၵ်းလႆႈဢွၵ်ႇၸွမ်းၵႃႈၼႂ်းႁူးလမ်းဝဵင်းတီႈဢၼ်ၵိူၼ်ႇဢၼ်လုလႅဝ်သိုဝ်ႈၼႃႈသူႁင်းၽႂ်ႁင်းမၼ်းသေလႄႈၶၢမ်ႇတၢင်းဢၼ်ထိမ်ႈတူၵ်းၵႃႈၼႂ်းမိူင်း ႁႃႇမုၼ်ႇ၊ ဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
“ဢွၼ်ၵၼ်မႃးၵႃႈတီႈဝဵင်း ပေႇသလႃႉ၊ လႄႈၽိတ်းပိူင်ႈတႃႉ။ ၵႃႈတီႈဝဵင်း ၵိလႃႉၵႃႇလႃႉ၊ ၵေႃႈဢွၼ်ၵၼ်ၵႂႃႇလႄႈႁဵတ်းတၢင်းၽိတ်းပိူင်ႈၼမ်ၼမ်တႃႉ။ ဢွၼ်ၵၼ်ဢဝ်မႃးၶိူင်ႈတၢင်းလူႇဢၼ်သၢၵ်ႈလူႇၵူႈၼႂ်၊ဢိၵ်ႇတင်းဢုၵ်ႉၸႃႇသိပ်းပုၼ်ႈပုၼ်ႈၼိုင်ႈဢၼ်လူႇသၢမ်ဝၼ်းယေႈပွၵ်ႈၼၼ်ႉတႃႉ။-
ဢွၼ်ၵၼ်ဢဝ်ၶိူင်ႈတၢင်းလူႇၶဝ်ႈမုၼ်းဢၼ်ပႃးၸိူဝ်ႉပႅင်ႈၼၼ်ႉသၢၵ်ႈလူႇႁႂ်ႈပဵၼ်တၢင်းဢၼ်တၢင်ႇၵျေးၸူးၽြႃးပဵၼ်ၸဝ်ႈတႃႉ။ ဢွၼ်ၵၼ်ႁဵတ်းတၢင်းဢၼ်ပၢဝ်ႇသေႃႇသေလႄႈဢဝ်ၶိူင်ႈတၢင်းလူႇဢၼ်ပႃးၸႂ်ၸေႇတၼႃႇၸိူဝ်းၼၼ်ႉမႃးတႃႉ။ ၵူၼ်းမဵဝ်း ဢိသရေး၊ တင်းလၢႆၶဝ်႟။ သူၸၢင်ႈထုၵ်ႇၸႂ်ၵျိူၵ်ႈၸႂ်လွင်ႈတၢင်းဢၼ်ႁဵတ်းၸိူဝ်ႉၼင်ႇၼၼ်ၼၼ်ႉဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
“ပိၵ်ႉသမ်ႉၵဝ်ပၼ်ႁႂ်ႈမီးတၢင်းဢၼ်ၶဝ်ႈၵႃႈမၢၵ်ႇပႅင်းၵႃႈၼႂ်းဝၢၼ်ႈၼႂ်းဝဵင်းသူၵႃႈမီးတေႃႇပေႃးသူဢမ်ႇမီးဢၼ်တေၵိၼ်တေယႅမ်ႉသေၵေႃႈ၊သူယင်းဢမ်ႇဢွၼ်ၵၼ်ၶိုၼ်းမႃးၸူးၵႃႈတီႈၵဝ်၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။-
“ၵဝ်ႁၢမ်ႈတၢပ်ႈႁႄႉၶႅၼ်ၽူၼ်ဝႆႉ ႁႂ်ႈၽူၼ်ဢမ်ႇတူၵ်းၼႂ်းသၢမ်လိူၼ်ၸူဝ်ႈဢၼ်ဢမ်ႇပႆႇႁွတ်ႈထိုင်ၶိင်ႇဢၼ်ပၢတ်ႇၶဝ်ႈၼၼ်ႉယဝ်ႉ။ ၵဝ်ႁဵတ်းႁႂ်ႈၽူၼ်တူၵ်းသႂ်ႇၵႃႈၼိူဝ်ဝဵင်းဝဵင်းၼိုင်ႈလႄႈၵႃႈၼိူဝ်တၢင်ႇဝဵင်းၼၼ်ႉၽူၼ်တၵ်းဢမ်ႇတူၵ်း။ လိၼ်ၵႂၢၵ်ႈၼိုင်ႈၽူၼ်တၵ်းတူၵ်းသႂ်ႇလႄႈလိၼ်ၵႂၢၵ်ႈၼိုင်ႈၽူၼ်ဢမ်ႇတူၵ်းသႂ်ႇၼၼ်ႉလႆႈႁႅင်ႈႁွင်ဝႆႉဢေႃႈ။-
ၼင်ႇၼၼ်လႄႈၵူၼ်းသွင်ဝဵင်း၊သၢမ်ဝဵင်းၸိူဝ်းၼၼ်ႉဢွၼ်ၵၼ်ၵႂႃႇၸူးၵႃႈတီႈဝဵင်းၼိုင်ႈႁႂ်ႈလႆႈၵိၼ်ၼမ်ႉသေၵေႃႈ ဢမ်ႇလႆႈဢိမ်ႇလႆႈတဵမ်။ ၵူၺ်းၵႃႈ၊သူဢမ်ႇဢွၼ်ၵၼ်ၶိုၼ်းမႃးၸူးၵႃႈတီႈၵဝ်၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
“ၵဝ်ဢဝ်ၽေးဢၼ်ပဵၼ်လူမ်းႁၢႆႉထူဝ်းႁႂ်ႈတူၼ်ႈၶဝ်ႈႁဵဝ်ႇႁႅင်ႈလႄႈတၢႆၼၼ်ႉပၼ်တၢမ်ႇတီႈသူယဝ်ႉ။ ၵဝ်ဢဝ်သူၼ်သူ၊သူၼ်မၢၵ်ႇၸပိတ်ႉသူၸိူဝ်းၼၼ်ႉႁႂ်ႈလုလႅဝ်ယဝ်ႉ။ ၸၵ်းတႅၼ်တင်းလၢႆဢွၼ်ၵၼ်ၶူပ်းတူၼ်ႈမၢၵ်ႇလိူဝ်ႇသူ၊ဢိၵ်ႇတင်းတူၼ်ႈသၢၼ်ႇလုၼ်ႇသူၸိူဝ်းၼၼ်ႉယဝ်ႉယဝ်ႉ။ ၵူၺ်းၵႃႈ၊သူဢမ်ႇဢွၼ်ၵၼ်ၶိုၼ်းမႃးၸူးၵႃႈတီႈၵဝ်၊” ထႃႇဝရႃႉၽြႃး၊ လၢတ်ႈဝႃႈၼင်ႇၼႆဢေႃႈ။
“ၵဝ်ပွႆႇၸႂ်ႉၽေးၵႃႇလႃႉႁႃႈလႅင်မိူင်းဢၼ်မိူင်း ဢေးၵျိပ်ႉ၊ လႆႈၶၢမ်ႇၼၼ်ႉမႃးၸူးၵႃႈတီႈသူယဝ်ႉယဝ်ႉ။ ၵဝ်ဢဝ်ၵူၼ်းၼုမ်ႇၵူၼ်းၵမ်သူတင်းလၢႆတၢႆလူၺ်ႈလၢပ်ႇလူၺ်ႈလႅဝ်းယဝ်ႉ။ ၵဝ်ဢဝ်မႃႉသူတင်းလၢႆၵႂႃႇယဝ်ႉ။ ၵဝ်ႁႂ်ႈဢၢႆမဵၼ်တူႇမဵၼ်ၼဝ်ႈၵႃႈၼႂ်းတပ်ႉသူၼၼ်ႉမဵၼ်ဝႆႉၵႃႈၼႂ်းၶူႈလင်သူယဝ်ႉယဝ်ႉ။ ၵူၺ်းၵႃႈ၊သူဢမ်ႇဢွၼ်ၵၼ်ၶိုၼ်းမႃးၸူးၵႃႈတီႈၵဝ်၊” ထႃႇဝရႃႉၽြႃး၊ လၢတ်ႈဝႃႈၼင်ႇၼႆဢေႃႈ။ “သူပဵၼ်ၸိူဝ်ႉၼင်ႇလုၼ်ႈၽႆးဢၼ်ယိုတ်ႈဢဝ်ဢွၵ်ႇသေၵႃႈၼႂ်းၵွင်ၽႆးၼၼ်ႉယဝ်ႉယဝ်ႉ။ ၵူၺ်းၵႃႈ၊သူဢမ်ႇဢွၼ်ၵၼ်ၶိုၼ်းမႃးၸူးၵႃႈတီႈၵဝ်၊” ထႃႇဝရႃႉၽြႃး၊ လၢတ်ႈဝႃႈၼင်ႇၼႆဢေႃႈ။-
“ၵဝ်ၶွမ်ႈပိၼ်ႈသူပႅတ်ႈၵမ်ႈၽွင်ႈမိူၼ်ၸိူဝ်ႉၼင်ႇဢၼ်ၵဝ်ၶွမ်ႈပိၼ်ႈဝဵင်း သေႃးတုမ်ႇ၊ တင်းဝဵင်း ၵေႃးမေႃးရႃႉ၊ ပႅတ်ႈၼၼ်ႉလႄႈသူပဵၼ်ၸိူဝ်ႉၼင်ႇလုၼ်ႈၽႆးဢၼ်ယိုတ်းဢဝ်ဢွၵ်ႇသေၵႃႈၼႂ်းၵွင်ၽႆးၼၼ်ႉယဝ်ႉယဝ်ႉ၊ၵူၺ်းၵႃႈသူဢမ်ႇဢွၼ်ၵၼ်မႃးၸူးတီႈၵဝ်၊” ထႃႇဝရႃႉၽြႃး၊ လၢတ်ႈဝႃႈၼင်ႇၼႆဢေႃႈ။-
ပိူဝ်ႈၼႆလႄႈၵူၼ်းမဵဝ်း ဢိသရေး၊ ႟။ ၵဝ်တၵ်းၸီႇယၢင်ႇပၼ်တၢမ်ႇသူဢေႃႈ။ ၵွပ်ႈပိူဝ်ႈၵဝ်တၵ်းႁဵတ်းၸိူဝ်ႉၼင်ႇၼၼ်လႄႈၵူၼ်းမဵဝ်း ဢိသရေး၊ ႟။ မႄးႁႅၼ်းတူဝ်သူဝႆႉႁႂ်ႈသူလႆႈထူပ်းၵၼ်တင်းၽြႃးပဵၼ်ၸဝ်ႈသူတႃႉ။
တူၺ်းလူး၊ၸဝ်ႈဢၼ်ႁဵတ်းပဵၼ်လွႆတင်းလၢႆ၊ၸဝ်ႈဢၼ်ၽၢၼ်ႇသၢင်းႁဵတ်းပဵၼ်လူမ်း၊ ၸဝ်ႈဢၼ်ၽုၺ်ႇဢွၵ်ႇၼႄပျႃးတၢင်းၵျၢမ်ႇတၢင်းပွင်မၼ်းၸဝ်ႈတီႈၵူၼ်း၊ ၸဝ်ႈဢၼ်ႁႂ်ႈဢၼ်လႅင်းၶိင်ႇၵၢင်ၼႂ်ပဵၼ်ဢၼ်လပ်းသိင်ႇ၊ ၸဝ်ႈဢၼ်ယဵပ်ႇၶၢမ်ႈတီႈဢၼ်သုင်လိၼ်မိူင်းတင်းလၢႆၼၼ်ႉ၊ မီးၸိုဝ်ႈသဵင်ႁွင်ႉဝႃႈ၊ ထႃႇဝရႃႉၽြႃး၊ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ ဢေႃႈ။
ၵူၼ်းမဵဝ်း ဢိသရေး၊ ႟။ ထွမ်ႇငိၼ်းၵႂၢမ်းဢၼ်ဢွၵ်ႇသူပ်းၵဝ်ဢၼ်ဝႃႈလူၺ်ႈလွင်ႈသူလႄႈပွင်ႉၶၢင်းပွင်ႉမိုၼ်ႇပုၼ်ႈသူယူႇၼႆႉတႃႉ။-
ၵၼ်ႇၺႃႇလုၵ်ႈယိင်းသၢဝ် ဢိသရေး၊ ၼၼ်ႉလူမ်ႉယဝ်ႉယဝ်ႉ၊ ၵမ်းလိုၼ်းမၼ်းဢမ်ႇလႆႈလုၵ်ႉၶိုၼ်းထႅင်ႈ၊ မၼ်းၼွၼ်းယဵတ်ႇယူႇၵေႃႉလဵဝ်ၵႃႈၼိူဝ်လိၼ်မၼ်းယဝ်ႉယဝ်ႉ၊ ဢမ်ႇမီးၵေႃႉဢၼ်ဢုမ်ႈဢဝ်ယွင်ႈဢဝ်မၼ်း။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ “ဝဵင်းၼႂ်းမိူင်း ဢိသရေး၊ ဢၼ်ယၢမ်ႈမီးၵူၼ်းသိုၵ်းၶီႇသိုၵ်းဢွၵ်ႇၵႂႃႇႁဵင်ၼိုင်ႈၼၼ်ႉတၵ်းမီးတၢင်းဢၼ်ၵိုတ်းၵျၢၼ်ႇပၢၵ်ႇၼိုင်ႈၵူၺ်းလႄႈဝဵင်းဢၼ်ယၢမ်ႈမီးၵူၼ်းသိုၵ်းၶီႇသိုၵ်းဢွၵ်ႇၵႂႃႇပၢၵ်ႇၼိုင်ႈၼၼ်ႉတၵ်းမီးတၢင်းဢၼ်ၵိုတ်းဢၼ်ၵျၢၼ်ႇယူႇသိပ်းၼိုင်ႈၵူၺ်းဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ မီးဢမိင်ႉတီႈၵူၼ်းမဵဝ်း ဢိသရေး၊ ၸမ်ႉ၊ “သူဢွၼ်ၵၼ်ႁႃၵဝ်တႃႉ။ ပေႃးႁႃၸိုင်၊ဢသၢၵ်ႈသူတၵ်းလႆႈၵတ်းယဵၼ်ၶျၢမ်းသႃႇဢေႃႈ။-
ယႃႇပေႁႃဝဵင်း ပေႇသလႃႉ၊ ယႃႇပေၶဝ်ႈၵႃႈၼႂ်းဝဵင်း ၵိလႃႉၵႃႇလႃႉ ။ ယႃႇပေၵႂႃႇၵႃႈတီႈဝဵင်း ပေႇရသေးၽႃႉ ။ လွင်ႈမၼ်းၸမ်ႉ၊ၵူၼ်းဝဵင်း ၵိလႃႉၵႃႇလႃႉ၊ ၼၼ်ႉတၵ်းလႆႈၶၢမ်ႇတၢင်းဢၼ်သိမ်းဢဝ်ၵႂႃႇဢမၢၼ်ႇၶၼ်ပဵၼ်လႄႈဝဵင်း ပေႇသလႃႉ၊ ၵေႃႈတၵ်းလႆႈႁွတ်ႈထိုင်တၢင်းဢၼ်သုမ်းႁၢႆၵႂႃႇဢေႃႈ၊” ဝႃႈၼင်ႇၼႆဢေႃႈ။
ဢွၼ်ၵၼ်ႁႃ ထႃႇဝရႃႉၽြႃး၊ တႃႉ။ ပေႃးႁႃၸိုင်၊ဢသၢၵ်ႈသူတၵ်းလႆႈၵတ်းယဵၼ်ၶျၢမ်းသႃႇဢေႃႈ။ ပေႃးဢမ်ႇၼၼ်၊မၼ်းၸဝ်ႈတၵ်းလူင်းၸူးၵႃႈၼိူဝ်ၵူၼ်းၸိူဝ်ႉၶိူဝ်း ယူဝ်းသႅပ်ႈ၊ မိူၼ်ၸိူဝ်ႉၼင်ႇၽႆးလႄႈမႆႈပႅတ်ႈတင်းသဵင်ႈဢေႃႈ။ ၽႆးတၵ်းမႆႈပႅတ်ႈၵူၼ်းဝဵင်း ပေႇသလႃႉ၊ လႄႈၽူႈလႂ်သေၵေႃႉသေၵူၼ်းဢမ်ႇမွတ်ႇမၼ်းလႆႈ။-
သူၸိူဝ်းဢၼ်ႁဵတ်းႁႂ်ႈတၢင်းဢၼ်ၸီႇယၢင်ႇၸွမ်းၼင်ႇတြႃးပဵၼ်မႂ်ယႃၶူမ်ၵႂႃႇလႄႈဢဝ်တြႃးတၢင်းဢၼ်သိုဝ်ႈတေႃႇၼၼ်ႉၶျႃးတူၵ်းၵႃႈတီႈလိၼ်ၶဝ်႟။
ထႃႇဝရႃႉၽြႃး၊ ၽၢၼ်ႇသၢင်းႁဵတ်းပဵၼ်မုၵ်ႉလၢဝ်ဝီးတင်းမုၵ်ႉလၢဝ်တဝ်ႇဢေႃႈ။ မၼ်းၸဝ်ႈႁႂ်ႈဢၼ်လပ်းသိင်ႇၽိတ်းၽိတ်းပဵၼ်ဢၼ်လႅင်းၶိင်ႇၵၢင်ၼႂ်လႄႈႁႂ်ႈဢၼ်လႅင်းၶိင်ႇၵၢင်ဝၼ်းပဵၼ်ဢၼ်လပ်းသိင်ႇၵႂႃႇၼႂ်းၶိင်ႇၵၢင်ၶိုၼ်းဢေႃႈ။ မၼ်းၸဝ်ႈႁွင်ႉဢဝ်ၼမ်ႉပၢင်ႇလၢႆႇႁူတ်းလေႃႇသွၼ်းလေႃႇၵႃႈၼိူဝ်ၼႃႈလိၼ်မိူင်းဢေႃႈ။ ၸိုဝ်ႈသဵင်မၼ်းၸဝ်ႈၸမ်ႉ၊ပဵၼ် ထႃႇဝရႃႉၽြႃး၊
မၼ်းၸဝ်ႈႁႂ်ႈတၢင်းဢၼ်လုလႅဝ်ယႃႉပႅတ်ႈၼၼ်ႉတူၵ်းႁွတ်ႈၵႃႈၼိူဝ်ၶဝ်ၸိူဝ်းဢၼ်ႁႅင်းယႂ်ႇ ၼႃႇၼၼ်ႉ၊ ထၢၼ်ႈပေႃးတၢင်းဢၼ်ယႃႉပႅတ်ႈၼၼ်ႉလႆႈႁွတ်ႈထိုင်ၵႃႈတီႈတိူၵ်ႈတီႈတိုၵ်းသိုၵ်း ၼၼ်ႉဢေႃႈ။
ၶဝ်ငိၼ်းၸင်းၵေႃႉဢၼ်ၸၢင်ႈသင်ႇသွၼ်သုင်းမႃႉလႄႈၸီႇယၢင်ႇတြႃး၊ဢိၵ်ႇတင်းလီႁင်ႈၵေႃႉဢၼ်ၸၢင်ႈလၢတ်ႈသိုဝ်ႈသိုဝ်ႈတေႃႇတေႃႇၼၼ်ႉယဝ်ႉဢေႃႈ။-
ပိူဝ်ႈၼႆလႄႈၵွပ်ႈပိူဝ်ႈဢၼ်သူၸၢင်ႈၼိၵ်ႈၸၢၵ်ႈငႅၼ်းသႄးၶဝ်ၸိူဝ်းဢၼ်ယၢၵ်ႈဢၼ်ၽၢၼ်၊လၵ်ႉဢဝ်ၶဝ်ႈၵျုင်ႇၶဝ်ၼၼ်ႉလႄႈပိၵ်ႉသမ်ႉသူဢဝ်မၢၵ်ႇႁိၼ်ဢၼ်ထၢၵ်ႇဢၼ်သပ်းၼၼ်ႉႁဵတ်းႁိူၼ်းတိူၵ်ႈသေၵေႃႈ၊သူဢမ်ႇလႆႈယူႇလႆႈထင်ၵႃႈၼႂ်းႁိူၼ်းတိူၵ်ႈၼၼ်ႉ။ ပိၵ်ႉသမ်ႉသူၽုၵ်ႇသူၼ်မၢၵ်ႇၸပိတ်ႉဢၼ်လီၸူမ်းသိူဝ်းထုၵ်ႇၸႂ်ၼၼ်ႉသေၵေႃႈသူဢမ်ႇလႆႈသူတ်ႉလႆႈၵိၼ်ၼမ်ႉမၢၵ်ႇၸပိတ်ႉမၼ်း၊-
ၵဝ်ႁုလွင်ႈဢၼ်တုၸရိူၵ်ႈဢၼ်သူၽိတ်းပိူင်ႈၼၼ်ႉယႂ်ႇၼမ်ၼႃႇ၊ဢိၵ်ႇတင်းလွင်ႈတၢင်းဢၼ်ဢပျတ်ႈသူၼၵ်းၼႃႇလူင်လၢင်ၼၼ်ႉယူႇဢေႃႈ။ သူၸၢင်ႈယႃႉယူၵ်ႉၵေႃႉဢၼ်သိုဝ်ႈတေႃႇလႄႈၸၢင်ႈၵိၼ်ငိုၼ်းၵမ်ႉငိုၼ်းမွၼ်ဢေႃႈ။ သူၸၢင်ႈၸီႇယၢင်ႇတီႈၶဝ်ၸိူဝ်းဢၼ်ၸုတ်ႈဢၼ်လုတ်ႈၼၼ်ႉဢမ်ႇၸွမ်းၼင်ႇတြႃးၵႃႈတီႈလုမ်းၽၵ်းတူဝဵင်း ဢေႃႈ။-
ပိူဝ်ႈၼႆလႄႈၵေႃႉဢၼ်မီးပိင်ႇၺႃႇၼၼ်ႉတၵ်းယူႇတဵတ်ႇတဵတ်ႇယဵၼ်ယဵၼ်ယူႇၼႂ်းၶိင်ႇၵႃႇလႃႉၸိူဝ်ႉၼင်ႇၼၼ်ၼၼ်ႉၵွပ်ႈပိူဝ်ႈဢၼ်ၶိင်ႇၵႃႇလႃႉၼၼ်ႉပဵၼ်ဢၼ်ႁၢႆႉယုတ်ႈဢေႃႈ။
ဢွၼ်ၵၼ်ႁႃဢဝ်တၢင်းဢၼ်လီဢၼ်ငၢမ်းလႄႈဝႄႈပိူင်ႈတၢင်းဢၼ်ႁၢႆႉဢၼ်မိူၵ်ႈႁႂ်ႈဢသၢၵ်ႈသူလႆႈၵတ်းယဵၼ်ၶျၢမ်းသႃႇတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ ထႃႇဝရႃႉၽြႃး၊ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ တၵ်းမီးယူႇလူၺ်ႈၵၼ်တင်းသူၸွမ်းၵႃႈၼင်ႇဢၼ်သူၸၢင်ႈလၢတ်ႈၸၢင်ႈဝႃႈၼၼ်ႉဢေႃႈ။-
ဢွၼ်ၵၼ်ၸင်းတၢင်းဢၼ်ႁၢႆႉဢၼ်မိူၵ်ႈလႄႈႁၵ်ႉတၢင်းဢၼ်လီဢၼ်ငၢမ်းတႃႉ။ ဢွၼ်ၵၼ်ႁႂ်ႈတြႃးတႄႇယူႇၵႃႈၼႂ်းလုမ်းၽၵ်းတူဝဵင်းတႃႉ။ ထႃႇဝရႃႉၽြႃး၊ ၼၼ်ႉၸၢင်ႈၶႄးတၵ်းဢဵတ်းလူၸိူဝ်ႉၶိူဝ်း ယူဝ်းသႅပ်ႈ၊ ဢၼ်ၵိုတ်းဢၼ်ၵျၢၼ်ႇၼၼ်ႉဢေႃႈ။
ပိူဝ်ႈၼႆလႄႈ ၸဝ်ႈပူဝ်ႇပႃႇၵၢင်ႁၢဝ်၊ၸဝ်ႈထႃႇဝရႃႉၽြႃး၊ မီးဢမိင်ႉၸမ်ႉ၊ “တၢင်းဢၼ်ပွင်ႉၶၢင်းပွင်ႉႁႆႈတၵ်းမီးၵႃႈၼႂ်းတီႈဢၼ်ၵႂၢင်ႈလီလႃးလီၵႃႈမီးလႄႈၶဝ်တၵ်းလၢတ်ႈၵၼ်ၵႃႈၼႂ်းသဵၼ်ႈတၢင်းတင်းလၢႆလႄႈဝႃႈ၊ ‘ဢလူဝ်း၊ဢလူဝ်း’ ဝႃႈၼင်ႇၼႆဢေႃႈ။ ၶဝ်တၵ်းႁွင်ႉဢဝ်ၵေႃႉဢၼ်ႁဵတ်းႁႆႈႁဵတ်းၼႃးၼၼ်ႉမႃးႁႂ်ႈလႆႈၶၢင်းၶီၶၢင်းၽၢၼ်၊ဢိၵ်ႇတင်းၵေႃႉဢၼ်ၸၢင်ႈမေႃႁဵတ်းသဵင်ဢၼ်ႁွင်ႉႁႆႈၼၼ်ႉမႃးႁႂ်ႈလႆႈႁွင်ႉႁႆႈပွင်ႉၶၢင်းဢေႃႈ။-
ၵႃႈၼႂ်းသူၼ်မၢၵ်ႇၸပိတ်ႉတင်းသဵင်ႈတင်းလူင်ၵေႃႈတၵ်းမီးတၢင်းဢၼ်ႁွင်ႉႁႆႈပွင်ႉၶၢင်းဢေႃႈ။ လွင်ႈမၼ်းၸမ်ႉ၊ၵဝ်တၵ်းပႆလတ်းၵႂႃႇၵႃႈၼႂ်းၵၢင်သူဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
သူၸိူဝ်းဢၼ်မုင်ႈမွင်းမိုဝ်ႉဝၼ်း ထႃႇဝရႃႉၽြႃး၊ ယူႇၼၼ်ႉမီးဢႃႉမၢင်ႇၵလႃႇဢေႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈသူမီးဢလူဝ်ႇမိုဝ်ႉဝၼ်း ထႃႇဝရႃႉၽြႃး၊ ဝၼ်းၼၼ်ႉတၵ်းတေဢမ်ႇပဵၼ်ဢၼ်လႅင်းတီႈသူလႄႈတၵ်းပဵၼ်ဢၼ်လပ်းသိင်ႇဢေႃႈ။-
တၵ်းပဵၼ်မိူၼ်ၸိူဝ်ႉၼင်ႇဢၼ်ၵူၼ်းဢွၵ်ႇပၢႆႈသေၵႃႈတီႈသၢင်ႇသီႈလႄႈထူပ်းၺႃးမီၼၼ်ႉ၊ဢိၵ်ႇတင်းမိူၼ်ၸိူဝ်ႉၼင်ႇဢၼ်မၼ်းၶဝ်ႈၵႃႈၼႂ်းႁိူၼ်းလႄႈၼႂ်းမိူဝ်ႈဢၼ်ဢဝ်မိုဝ်းတဝ်ႉၽႃယူႇၼၼ်ႉၸိုင်၊ငူးတွတ်ႇသႂ်ႇမၼ်းၼၼ်ႉဢေႃႈ။-
မိုဝ်ႉဝၼ်း ထႃႇဝရႃႉၽြႃး၊ ၼၼ်ႉယင်းဢမ်ႇလႅင်းလႄႈတၵ်းလပ်းသိင်ႇဢမ်ႇၸႂ်ႈႁိုဝ်း။ ယင်းဢမ်ႇမီးတၢင်းဢၼ်ႁိူဝ်ႈလႅင်းလႃးလႃးလႄႈတၵ်းပဵၼ်ဢၼ်လပ်းသိင်ႇလွၼ်ႉလွၼ်ႉဢမ်ႇၸႂ်ႈႁိုဝ်း။
“ၵဝ်ၸင်းဝၼ်းပွႆးသူၸိူဝ်းၼၼ်ႉလႄႈလီႁင်ႈဢဵတ်ႇသဵတ်ႇဢေႃႈ။ ၵဝ်ဢမ်ႇမူၼ်ႈပျေႃႇၵႃႈၼႂ်းတၢင်းဢၼ်သူၸုၵၼ်တုမ်ၵၼ်လႄႈပဵၼ်မုၵ်ႉပဵၼ်ၸိူဝ်းၼၼ်ႉ။-
ပိၵ်ႉသမ်ႉသူသၢၵ်ႈလူႇၶိူင်ႈတၢင်းလူႇဢၼ်တုတ်ႇၽႆး၊ဢိၵ်ႇတင်းၶိူင်ႈတၢင်းလူႇမၢၵ်ႇၶဝ်ႈႁူင်းၶဝ်ႈတင်းလၢႆတီႈၵဝ်သေၵေႃႈ၊ၵဝ်တၵ်းဢမ်ႇထုၵ်ႇၸႂ်ၵျိူၵ်ႈၸႂ်။ ပိၵ်ႉသမ်ႉသူဢဝ်တရိၵ်ႈသၢၼ်ႇဢၼ်ပီးလီမၼ်းလီတင်းလၢႆသၢၵ်ႈလူႇပုၼ်ႈႁႂ်ႈပဵၼ်ၶိူင်ႈတၢင်းလူႇမိၵ်ႈသႁႃႇယႃႉသေၵေႃႈ ၵဝ်တၵ်းဢမ်ႇႁပ်ႉတုင်းဢဝ်။-
ၵိုတ်းပႅတ်ႈသဵင်ဢၼ်သူႁဵတ်းၵႂၢမ်းၵႃႈတီႈၵဝ်ၼၼ်ႉတႃႉ။ ၵဝ်ဢမ်ႇၶႂ်ႈထွမ်ႇသဵင်လဵတ်းတိင်ႇသူၸိူဝ်းၼၼ်ႉဢေႃႈ။-
ႁႂ်ႈတၢင်းဢၼ်ၸီႇယၢင်ႇၸွမ်းၼင်ႇတြႃးၼၼ်ႉလႆယူႇမိူၼ်ၸိူဝ်ႉၼင်ႇၼမ်ႉလႄႈႁႂ်ႈတၢင်းဢၼ်သိုဝ်ႈတေႃႇၼၼ်ႉလႆယူႇၸိူဝ်ႉၼင်ႇၼမ်ႉမႄႈဢၼ်ဢမ်ႇယူတ်းဢမ်ႇႁႅင်ႈၼၼ်ႉ။-
ၵူၼ်းမဵဝ်း ဢိသရေး၊ ႟။ ၸွင်ႇသူလႆႈဢွၼ်ၵၼ်ဢဝ်တူဝ်တၢင်းလူႇဢိၵ်ႇတင်းၶိူင်ႈတၢင်းလူႇလႂ်မႃးသၢၵ်ႈၵၢပ်ႈတီႈၵဝ်ၵႃႈၼႂ်းထိူၼ်ႇလႅင်ႉၼၼ်ႉသီႇသိပ်းပီတဵမ်တဵမ်ႁိုဝ်း၊-
ၵူၺ်းၵႃႈ၊တေႃႈလဵဝ်ၼႆႉသူဢွၼ်ၵၼ်ႁဵတ်းဝၢတ်ႈၵူဝ်းၵႂၢႆႇႁုၼ်ႇႁၢင်ႈ သၶုတ်ႉ၊ ဢၼ်ပဵၼ်ၽြႃးၶုၼ်ႁေႃၶမ်းသူဢိၵ်ႇတင်းႁုၼ်ႇႁၢင်ႈလၢဝ် ၶီးဝၼ်း၊ ဢၼ်သူမၢတ်ႈပဵၼ်ၽြႃးၼၼ်ႉလႄႈႁၢပ်ႇႁၢမ်ၵႂႃႇယဝ်ႉလူင်ပႄႇ။-
ပိူဝ်ႈၼႆလႄႈၵဝ်တၵ်းႁဵတ်းႁႂ်ႈသူလႆႈၶၢမ်ႇတၢင်းဢၼ်သိမ်းဢဝ်ၵႂႃႇတီႈၽၢႆႇပုၼ်ႉဝဵင်း တမ်ႇမတ်ႉသၵတ်ႉ ဢေႃႈ” ဝႃႈၼင်ႇၼႆလႄႈ ထႃႇဝရႃႉၽြႃး၊ ဢၼ်မီးၸိုဝ်ႈႁွင်ႉဝႃႈ၊ ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ ၼၼ်ႉမီးဢမိင်ႉဢေႃႈ။
ၶဝ်ၸိူဝ်းဢၼ်ယူႇၵႃႈၼႂ်းဝဵင်း ၸိဢုၼ်ႇ၊ ၼိမ်ၼိမ်လီလီ၊ၶဝ်ၸိူဝ်းဢၼ်ယူႇလူင်ႈလီလွတ်ႈလီၵႃႈၼိူဝ်လွႆ သမႃႇရိ၊ ၶဝ်ၸိူဝ်းဢၼ်ပဵၼ်ဢၼ်ထွတ်ႈဢၼ်မျၢတ်ႈၵႃႈၼႂ်းမဵဝ်းၵူၼ်းတင်းလၢႆ၊ၶဝ်ၸိူဝ်းဢၼ်ၵူၼ်းမဵဝ်း ဢိသရေး၊ သုတ်ႉၸပ်းသုတ်ႉၸူးၼၼ်ႉမီးဢႃႉမၢင်ႇၵလႃႇဢေႃႈ။-
ဢွၼ်ၵၼ်ၵႂႃႇၸူးၵႃႈတီႈဝဵင်း ၵႃႇလၼႄႇ၊ လႄႈလူတူၺ်းတႃႉ။ သမ်ႉလုၵ်ႉသေၵႃႈတီႈဝဵင်းၼၼ်ႉၵႂႃႇၸူးၵႃႈတီႈဝဵင်းလူင် ႁႃႇမတ်ႉ၊ တႃႉ။ သမ်ႉလူင်းၵႂႃႇၸူးၵႃႈတီႈဝဵင်း ၵႃႇသႃႉ၊ ဢၼ်ၵူၼ်း ၽိလိတ်ႉတိ၊ တင်းလၢႆယူႇၼၼ်ႉတႃႉ။ သိုင်ႇၸိုင်ႈဝၢၼ်ႈမိူင်းၸိူဝ်းၼၼ်ႉယဵင်ႈၶႅၼ်းလီၼႃႇသေသိုင်ႇၸိုင်ႈဝၢၼ်ႈမိူင်း ယုတႃႉ၊ တင်း ဢိသရေး၊ ႁိုဝ်း။ ၶွပ်ႇၼမ်ႉလႅၼ်လိၼ်ၶဝ်ၼၼ်ႉယဵင်ႈၶႅၼ်းၵႂၢင်ႈၼႃႇသေၶွပ်ႇၼမ်ႉလႅၼ်လိၼ်သူႁိုဝ်း။-
သူၸိူဝ်းဢၼ်ႁဵတ်းတၢင်းဢၼ်ၶၢႆႉမိုဝ်ႉၶၢႆႉဝၼ်းဢၼ်ႁၢႆႉယုတ်ႈၼၼ်ႉယဵင်ႈၶႅၼ်းႁႂ်ႈဝၼ်းဢၼ်ႁၢႆႉဢၼ်ယုတ်ႈၼၼ်ႉၸမ်မႃးဢေႃႈ။-
ၶဝ်ၸိူဝ်းဢၼ်ၼွၼ်းၵႃႈၼိူဝ်ၵူႇငႃးၸၢင်ႉလႄႈယဵတ်ႇတူဝ်လိူၼ်းတူဝ်ၵႃႈၼိူဝ်ၽႃႈၵွပ်း၊ၶဝ်ၸိူဝ်းဢၼ်ၼုၵ်ႈဢဝ်သူဝ်းဢွၼ်ႇဢွၵ်ႇသေၵႃႈၼႂ်းၽုင်သူဝ်း၊ဝူဝ်းဢွၼ်ႇဢွၵ်ႇသေၵႃႈၼႂ်းၶွၵ်ႈဝူဝ်းလႄႈႁဵတ်းတၢင်းဢၼ်ၵိၼ်မူၼ်ႈၵိၼ်ပျေႃႇ၊-
ၶဝ်ၸိူဝ်းဢၼ်ပႃးသဵင်ဢၼ်လဵတ်းတိင်ႇသေလႄႈႁဵတ်းၵႂၢမ်းမႂ်ႇဢၼ်သူၸၢပ်ႈဝႆႉၵေႃႉလဵဝ်မိူၼ်ၸိူဝ်ႉၼင်ႇ တႃႇဝိတ်ႈ၊ ၼၼ်ႉ၊-
ၶဝ်ၸိူဝ်းဢၼ်ဢဝ်ဝၢၼ်ႇဢဝ်ၵွၵ်းသေလႄႈသူတ်ႉၵိၼ်ၼမ်ႉမၢၵ်ႇၸပိတ်ႉ၊ၶဝ်ၸိူဝ်းဢၼ်ဢဝ်ၼမ်ႉမၼ်းၼၢမ်ႇသႃႇဢၼ်ထိူၵ်ႈၵႃႈထိူၵ်ႈၶၼ်ၼၼ်ႉတႃးတူင်ၶဝ်၊ၶဝ်ၸိူဝ်းဢၼ်ယင်းဢမ်ႇမီးတၢင်းဢၼ်ၸဵပ်းၸႂ်လူၺ်ႈလွင်ႈဢၼ်ၸိူဝ်ႉၶိူဝ်း ယူဝ်းသႅပ်ႈ၊ လႆႈၶၢမ်ႇတုၵ်ႉၶႃႉတၢင်းၽၢၼ်ၼၼ်ႉလႄႈယူႇၸိူဝ်းၼၼ်ႉမီးဢႃႉမၢင်ႇၵလႃႇဢေႃႈ။-
ပိူဝ်ႈၼႆလႄႈၶဝ်ၼၼ်ႉတၵ်းလႆႈၶဝ်ႈပႃးလူၺ်ႈၵၼ်တင်းၶဝ်ၸိူဝ်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇဢွၼ်တၢင်းသုတ်းပိူၼ်ႈၼၼ်ႉဢေႃႈ။ သဵင်ႁုၼ်ႈသဵင်မေႃးပွႆးၶဝ်ၸိူဝ်းဢၼ်ၼွၼ်းယဵတ်ႇတူဝ်ယူႇၼၼ်ႉၵေႃႈတၵ်းလႆႈထၢတ်ႇႁၢႆၵႂႃႇဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ၵဝ်လီႁင်ႈဢဵတ်ႇသဵတ်ႇမႃႇၼႃႉၸႂ်သုင်ၸိူဝ်ႉၶိူဝ်း ယႃႇၵုပ်ႈ၊ လႄႈၸင်းႁၢင်ႈၸင်းႁေႃၶဝ်တင်းလၢႆ၊ၵဝ်တၵ်းဢဝ်ဝဵင်းၼၼ်ႉ၊ဢိၵ်ႇတင်းၵႃႈဢၼ်မီးၵႃႈၼႂ်းမၼ်းၼၼ်ႉဢၢပ်ႈပၼ်ၼႂ်းမိုဝ်းရၢၼ်ႇသူႇဢေႃႈ။
ပိၵ်ႉသမ်ႉၵူၼ်းသိပ်းၼိုင်ႈၵိုတ်းၵျၢၼ်ႇဝႆႉၵႃႈၼႂ်းႁိူၼ်းလင်ၼိုင်ႈသေၵေႃႈ၊ၶဝ်ၼၼ်ႉတၵ်းလႆႈတၢႆဢေႃႈ။-
ၵေႃႉဢၼ်ပဵၼ်ပီႈပဵၼ်ၼွင်ႉလႄႈလႆႈဢဝ်သၢင်းၵျူဝ်ႇၽႆးၼၼ်ႉၼႂ်းမိူဝ်ႈဢၼ်ယင်းတိုၵ်ႉယွင်ႈဢဝ်တူဝ်တၢႆဢွၵ်ႇသေၵႃႈၼႂ်းႁိူၼ်းယူႇၼၼ်ႉၸိုင်၊တၵ်းႁွင်ႉထၢမ်တီႈၵေႃႉဢၼ်မီးၵႃႈၼႂ်းႁိူၼ်းၼၼ်ႉလႄႈဝႃႈ၊ “တီႈမႂ်းယင်းၵိုတ်းယင်းၵျၢၼ်ႇသေၵေႃႉသေၵူၼ်းႁိုဝ်း” မိူဝ်ႈဢၼ်ဝႃႈၼင်ႇၼႆၸိုင်၊ မၼ်းတၵ်းၶိုၼ်းလၢတ်ႈလႄႈဝႃႈ၊ “ဢမ်ႇၵိုတ်းဢမ်ႇၵျၢၼ်ႇၵူၺ်း၊” ဝႃႈၼင်ႇၼႆဢေႃႈ။ မၼ်းၼၼ်ႉတၵ်းၶိုၼ်းလၢတ်ႈလႄႈဝႃႈ၊ “ယူႇတဵတ်ႇတဵတ်ႇယဵၼ်ယဵၼ်တႃႉ။ ႁဝ်းဢမ်ႇမီးဢၶႂၢင်ႉဢၼ်လႆႈဢဝ်ၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ဢွၵ်ႇသူပ်းဝႃႈၵူၺ်း၊” ဝႃႈၼင်ႇၼႆဢေႃႈ။
တူၺ်းလူး။ ထႃႇဝရႃႉၽြႃး၊ မီးဢမိင်ႉသေယဝ်ႉ၊မၼ်းၸဝ်ႈတၵ်းၵိူၼ်ႇယႃႉႁိူၼ်းဢၼ်ယႂ်ႇဢၼ်လူင်ပႅတ်ႈလႄႈႁိူၼ်းဢၼ်လဵၵ်ႉဢၼ်ဢွၼ်ႇၵေႃႈမၼ်းၸဝ်ႈတၵ်းႁႂ်ႈတႅၵ်ႇလႅဝ်ပႅတ်ႈဢေႃႈ။-
မႃႉၸၢင်ႈၶုၼ်လႅၼ်ႈၵႃႈၼိူဝ်မၢၵ်ႇႁိၼ်မၢၵ်ႇၽႃႁိုဝ်း။ ၵူၼ်းၸၢင်ႈဢဝ်ဝူဝ်းထႆၵႃႈၼိူဝ်ၼမ်ႉပၢင်ႇလၢႆႇ ႁိုဝ်း။ သူႁဵတ်းႁႂ်ႈတၢင်းဢၼ်ၸီႇယၢင်ႇၸွမ်းၼင်ႇတြႃးပဵၼ်ၵွင်ႉပဵၼ်ယၢင်ၵႂႃႇလႄႈႁႂ်ႈတၢင်းဢၼ်သိုဝ်ႈတေႃႇပဵၼ်မႂ်ယႃၶူမ်ၵႂႃႇယဝ်ႉဢေႃႈ။
သူမူၼ်ႈပျေႃႇၸူမ်းသိူဝ်းယူႇၵႃႈၼႂ်းဝဵင်း လူဝ်ႇတီႇပႃႇ၊ လႄႈၸၢင်ႈလၢတ်ႈလႄႈဝႃႈ၊ “ႁဝ်းၼႆႉဢဝ်တၢင်းၵတ်ႉတၢင်းၶၼ်ႁဝ်းသိမ်းဢဝ်ဝဵင်း ၶႃႇၼေႇဢိမ်ႇ၊ တင်းလၢႆယဝ်ႉယဝ်ႉ၊” ဝႃႈၼင်ႇၼႆယဝ်ႉလူင်ပႄႇ။
“ၵူၼ်းမဵဝ်း ဢိသရေး၊ ႟။ ၵဝ်တၵ်းႁႂ်ႈလုၵ်ႈသိုၵ်းတၢင်ႇမိူင်းမႃးတိုၵ်းဢဝ်မိူင်းသူသေယဝ်ႉ၊ၶဝ်ၼၼ်ႉတၵ်းၼိၵ်ႈၸၢၵ်ႈငႅၼ်းသႄးသူတႄႇဢဝ်ၵႃႈတီႈၸႃႉၸဵမ်ပၢၵ်ႇတၢင်းၵႄႈလွႆဝဵင်း ႁႃႇမတ်ႉ၊ ၵႂႃႇတေႃႇထိုင်ႁွတ်ႈၶူင်ႈႁူၺ်ႈ ဢႃႇရပႃႇ၊ ၼၼ်ႉဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ သမ်ႉၼႄပျႃးၼိမိၵ်ႈတီႈၵဝ်ၸမ်ႉ၊မၼ်းၸဝ်ႈၽၢၼ်ႇသၢင်းႁဵတ်းပဵၼ်ၸၵ်းတႅၼ်တင်းလၢႆၵမ်းလိုၼ်းဢၼ်ပၢတ်ႇတူၼ်ႈယိူဝ်ႈတူၼ်ႈယႃႈဢၼ်ပဵၼ်ပုၼ်ႈၶုၼ်ႁေႃၶမ်းယဝ်ႉလႄႈတူၼ်ႈယိူဝ်ႈတူၼ်ႈယႃႈၶိုၼ်းတႄႇၸႃႉဢွၵ်ႇမႃးထႅင်ႈၼၼ်ႉဢေႃႈ။-
ၸၵ်းတႅၼ်ၸိူဝ်းၼၼ်ႉၵိၼ်တူၼ်ႈယိူဝ်ႈတူၼ်ႈယႃႈၵႃႈဢၼ်မီးၵႃႈၼႂ်းမိူင်းၼၼ်ႉသဵင်ႈသေယဝ်ႉ၊ၵဝ်လဝ်ႈလၢတ်ႈလႄႈဝႃႈ၊ “ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ တီႈၶႃႈ၊ၶႅၼ်းတေႃႈပွႆႇလွတ်ႈဢပျတ်ႈ သေၵမ်းတီႈၶႃႈ၊ၶႃႈယွၼ်းတွင်းပၢၼ်ႇၶႃႈဢေႃႈ။ ၸိူဝ်ႉၶိူဝ်း ယႃႇၵုပ်ႈ၊ ၼၼ်ႉၵွပ်ႈပိူဝ်ႈပဵၼ်ဢၼ်လဵၵ်ႉဢၼ်ၼွႆႉၵူၺ်းလႄႈတၵ်းဢသၢၵ်ႈလိပ်းယူႇလႆႈၸိူဝ်ႉၼင်ႇႁိုဝ်တီႈၶႃႈ၊” မိူဝ်ႈဢၼ်ဝႃႈၼင်ႇၼႆၸိုင်။
ထႃႇဝရႃႉၽြႃး၊ ၶုၵ်းၸႂ်လႆႈမႆႈၸႂ်ၵွပ်ႈလွင်ႈတၢင်းၼႆႉလႄႈမီးဢမိင်ႉလႄႈဝႃႈ၊ “တၵ်းဢမ်ႇလႆႈပဵၼ်ၸိူဝ်ႉၼင်ႇၼႆ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ သမ်ႉၼႄပျႃးၼိမိၵ်ႈတီႈၵဝ်ထႅင်ႈၸမ်ႉ၊ ထႃႇဝရႃႉၽြႃး၊ မႄးႁႅၼ်းႁႂ်ႈလႆႈဢဝ်ၽႆးပၼ်တၢမ်ႇတီႈၵူၼ်းမဵဝ်းမၼ်းၸဝ်ႈဢေႃႈ။ ၽႆးၼၼ်ႉမႆႈၼမ်ႉပၢင်ႇလၢႆႇဢၼ်ယႂ်ႇဢၼ်လူင်ၵႃႈတီႈတႂ်ႈလိၼ်မိူင်းလႄႈတႄႇၸႃႉမႆႈၵႃႈၼိူဝ်လိၼ်မိူင်းဢေႃႈ။-
ၵဝ်ၵေႃႈလဝ်ႈလၢတ်ႈလႄႈဝႃႈ၊ “ၸဝ်ႈပူဝ်ႇပႃႇၵၢင်ႁၢဝ်၊ၸဝ်ႈထႃႇဝရႃႉၽြႃး၊ တီႈၶႃႈ။ ၶႃႈယွၼ်းတွင်းပၢၼ်ႇၸဝ်ႈႁဝ်းၶႅၼ်းတေႃႈၵိုတ်းသဝ်းလူးၵွၼ်ႇသေၵမ်းတီႈၶႃႈ။ ၸိူဝ်ႉၶိူဝ်း ယႃႇၵုပ်ႈ၊ ၼၼ်ႉၵွပ်ႈပိူဝ်ႈပဵၼ်ဢၼ်လဵၵ်ႉဢၼ်ၼွႆႉၵူၺ်းလႄႈတၵ်းဢသၢၵ်ႈလိပ်းယူႇလႆႈၸိူဝ်ႉၼင်ႇႁိုဝ်တီႈၶႃႈ၊” မိူဝ်ႈဢၼ်ဝႃႈၼင်ႇၼႆၸိုင်။
ထႃႇဝရႃႉၽြႃး၊ ၶုၵ်းၸႂ်လႆႈမႆႈၸႂ်ၵွပ်ႈလွင်ႈတၢင်းၼႆႉလႄႈမီးဢမိင်ႉလႄႈဝႃႈ၊ “လွင်ႈတၢင်းၼႆႉၵေႃႈတၵ်းဢမ်ႇလႆႈပဵၼ်၊” ဝႃႈၼင်ႇၼႆဢေႃႈ။
မၼ်းၸဝ်ႈသမ်ႉၼႄပျႃးတီႈၵဝ်ထႅင်ႈၸမ်ႉ၊ ထႃႇဝရႃႉၽြႃး၊ ၸုၵ်းယူႇၵႃႈႁိမ်းတႄးမၢၵ်ႇႁိၼ်ဢၼ်ဢဝ်ၸိူၵ်ႈမႆမီႈယွၼ်ႇလႄႈဢဝ်မိုဝ်းမၼ်းၸဝ်ႈယိပ်းၵမ်ၸိူၵ်ႈမႆမီႈဝႆႉယူႇဢေႃႈ။-
ထႃႇဝရႃႉၽြႃး၊ ထၢမ်တီႈၵဝ်လႄႈဝႃႈ၊ “ ဢႃႇမူတ်ႉ၊ ႟။ မႂ်းႁၼ်ၵႃႈသင်၊” မိူဝ်ႈဢၼ်ဝႃႈၼင်ႇၼႆၸိုင်၊ၵဝ်လဝ်ႈလၢတ်ႈလႄႈဝႃႈ၊ “ၶႃႈၸဝ်ႈႁၼ်ၸိူၵ်ႈမႆမီႈတီႈၶႃႈဢေႃႈ၊” ဝႃႈၼင်ႇၼႆဢေႃႈ။ ထႃႇဝရႃႉၽြႃး၊ သမ်ႉလၢတ်ႈလႄႈဝႃႈ။ “တူၺ်းလူး။ ၵဝ်တၵ်းဢဝ်ၸိူၵ်ႈမႆမီႈယွၼ်ႇတူၵ်းၵႃႈၼႂ်းၵၢင်ၵူၼ်းၵဝ်ၵူၼ်းမဵဝ်း ဢိသရေး၊ တင်းလၢႆဢေႃး။ ၵမ်းလိုၼ်းၵဝ်တၵ်းဢမ်ႇယိူၼ်ႉဢမ်ႇၶၢမ်ႇၶဝ်။-
တီႈသုင်ဢၼ်ၸိူဝ်ႉၶိူဝ်း ဢိၸၢၵ်ႈ၊ ဝႆႈသႃၸိူဝ်းၼၼ်ႉတၵ်းမီးတၢင်းဢၼ်သဵတ်ႇယဵၼ်၊တီႈဢၼ်မူတ်းၸၢင်ႇၸိူဝ်ႉၶိူဝ်း ဢိသရေး၊ ၸိူဝ်းၼၼ်ႉတၵ်းမီးတၢင်းဢၼ်ပႄႇၽဵဝ်ႈပႅတ်ႈဢေႃႈ။ ၵဝ်တၵ်းဢဝ်လၢပ်ႇဢဝ်လႅဝ်းတိုၵ်းတေႃးမဵဝ်းၸိူဝ်ႉၶိူဝ်း ယေႇရူဝ်းပုမ်ႇ၊ ဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ဢႃႇမၸိ၊ ယဵၸ်ႈပရေႃးႁဵၵ်ႈဝဵင်း ပေႇသလႃႉ၊ ၼၼ်ႉပွႆႇၸႂ်ႉၵူၼ်းၵႂႃႇၸူးၵႃႈတီႈ ယေႇရူဝ်းပုမ်ႇ၊ ၶုၼ်ႁေႃၶမ်းမိူင်း ဢိသရေး၊ လႄႈသင်ႇလၢတ်ႈၵႂႃႇလႄႈဝႃႈ၊ “ ဢႃႇမူတ်ႉ၊ ၵျၢမ်ႇပွင်တၢင်းၵျၢမ်ႇတၢင်းပွင်ဢၼ်ဢမ်ႇလီယူႇၽၢႆႇၼိုင်ႈတင်းၸဝ်ႈႁဝ်းၵႃႈၼႂ်းၵၢင်ၵူၼ်းမဵဝ်း ဢိသရေး၊ တီႈၶႃႈယဝ်ႉ။ မိူင်းၸဝ်ႈဢမ်ႇၶၢမ်ႇဢဝ်ၵႂၢမ်းၵူႈၸိူဝ်ႉၵူႈပိူင်မၼ်းလႆႈၶႃႈ။-
လွင်ႈမၼ်းၸမ်ႉ၊ ဢႃႇမူတ်ႉ၊ လၢတ်ႈလႄႈဝႃႈ၊ ‘ ယေႇရူဝ်းပုမ်ႇ၊ တၵ်းလႆႈတၢႆလူၺ်ႈလၢပ်ႇလူၺ်ႈလႅဝ်းလႄႈၵူၼ်းမဵဝ်း ဢိသရေး၊ တင်းလၢႆတၵ်းလႆႈၶၢမ်ႇတၢင်းဢၼ်သိမ်းဢဝ်ဢွၵ်ႇသေၵႃႈၼႂ်းမိူင်းၸဝ်ႈၼႆႉၵႂႃႇဢမၢၼ်ႇၶၼ်ပဵၼ်ဢေႃႈ၊’ ဝႃႈၼင်ႇၼႆတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
ဢႃႇမၸိ၊ သမ်ႉလၢတ်ႈတီႈ ဢႃႇမူတ်ႉ၊ လႄႈဝႃႈ၊ “ၵေႃႉဢၼ်ႁူပွင်ႇတႃလႅင်းၼႆႉ႟။ ၵႂႃႇလႄႈဢွၵ်ႇပၢႆႈၸူးၵႃႈတီႈမိူင်း ယုတႃႉ၊ ပုၼ်ႉသေယဝ်ႉ၊ႁဵတ်းပရေႃးၽႅတ်ႈလႄႈလဵင်ႉဢသၢၵ်ႈမႂ်းယူႇၵႃႈၼႂ်းမိူင်းၼၼ်ႉတႃႉ။-
ၵမ်းလိုၼ်းယႃႇပေႁဵတ်းပရေႃးၽႅတ်ႈ ၵႃႈၼႂ်းဝဵင်း ပေႇသလႃႉ၊ ၼႆႉ။ ၵွပ်ႈပိူဝ်ႈပဵၼ်ထႃႇၼႃႉတီႈၶုၼ်ႁေႃၶမ်းၵူဝ်းၵႂၢႆႇလႄႈပဵၼ်ဝဵင်းဢၼ်မီးၵျွင်းပိၵ်ႈမၢၼ်ႇမိူင်းႁဝ်းဢေႃႈ၊” ဝႃႈၼင်ႇၼႆသေယဝ်ႉ။
ဢႃႇမူတ်ႉ၊ ၶိုၼ်းလၢတ်ႈတီႈ ဢႃႇမၸိ၊ လႄႈဝႃႈ၊ “ၵဝ်ၼႆႉယင်းဢမ်ႇၸႂ်ႈပရေႃးၽႅတ်ႈ၊ယင်းဢမ်ႇပဵၼ်လုၵ်ႈၸၢႆးပရေႃးၽႅတ်ႈလႄႈပဵၼ်ၵေႃႉဢၼ်လဵင်ႉဝူဝ်း၊ၵေႃႉဢၼ်ႁဵတ်းသူၼ်မၢၵ်ႇလိူဝ်ႇၵူၺ်းဢေႃႈ။-
ထႃႇဝရႃႉၽြႃး၊ ၼုၵ်ႈဢဝ်ၵဝ်ဢွၵ်ႇသေ ၵႃႈၼႂ်းတီႈဢၼ်လဵင်ႉဝူဝ်းၼၼ်ႉလႄႈမီးဢမိင်ႉတီႈၵဝ်လႄႈဝႃႈ၊ ‘မႂ်းၵႂႃႇတႃႉ။ ႁဵတ်းပရေႃးၽႅတ်ႈၵႃႈၼႂ်းၵူၼ်းၵဝ်မဵဝ်း ဢိသရေး၊ တင်းလၢႆၼၼ်ႉတႃႉ။-’
ပိူဝ်ႈၼႆလႄႈတေႃႈလဵဝ်ၼႆႉ ထွမ်ႇငိၼ်းဢမိင်ႉ ထႃႇဝရႃႉၽြႃး၊ သေၵမ်း။ မႂ်းလၢတ်ႈလႄႈဝႃႈ၊ ‘ယႃႇပေႁဵတ်းပရေႃးၽႅတ်ႈလႄႈၶတ်းၵၼ်တင်းၵူၼ်းမဵဝ်း ဢိသရေး၊ ယႃႇပေႁေႃးၶတ်းၵၼ်တင်းၸိူဝ်ႉၶိူဝ်း ဢိၸၢၵ်ႈ၊ ’ ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ ထႃႇဝရႃႉၽြႃး၊ မီးဢမိင်ႉၸမ်ႉ၊ ‘မေးမႂ်းၼၼ်ႉတၵ်းပဵၼ်မႄႈမွၵ်ႇယႃႈၵႃႈၼႂ်းဝဵင်းလႄႈလုၵ်ႈၸၢႆးမႂ်းလုၵ်ႈယိင်းမႂ်းၸိူဝ်းၼၼ်ႉတၵ်းလႆႈလူမ်ႉတၢႆလူၺ်ႈလၢပ်ႇလူၺ်ႈလႅဝ်းဢေႃႈ။ လိၼ်မႂ်းတၵ်းလႆႈၶၢမ်ႇတၢင်းဢၼ် ပိူၼ်ႈၶဵင်ႈၸိူၵ်ႈမႆမီႈတႅၵ်ႈသေယဝ်ႉ၊ၽႄမႅင်ႇပၼ်ၵၼ်လႄႈတူဝ်မႂ်းတၵ်းလႆႈတၢႆၵႃႈၼႂ်းမိူင်းဢၼ်ၵူဝ်ႈၵိူၵ်ႇဢေႃႈ။ ၵူၼ်းမဵဝ်း ဢိသရေး၊ တၵ်းလႆႈၶၢမ်ႇတၢင်းဢၼ်သိမ်းဢဝ်ဢွၵ်ႇသေၵႃႈၼႂ်းမိူင်းတီႈဢၼ်ၶဝ်ယူႇၼႆႉၵႂႃႇဢမၢၼ်ႇၶၼ်ပဵၼ်ဢေႃႈ၊’ ” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ သမ်ႉၼႄပျႃးတီႈၵဝ်ထႅင်ႈၸမ်ႉ၊တူၺ်းလူး။ မီးပဵတ်ႈဢၼ်သႂ်ႇမၢၵ်ႇၶိင်ႇမႆႈပဵတ်ႈၼိုင်ႈဢေႃႈ။-
မၼ်းၸဝ်ႈထၢမ်လႄႈဝႃႈ၊ “ ဢႃႇမူတ်ႉ၊ ႟။ မႂ်းႁၼ်ၵႃႈသင်၊” ဝႃႈၼင်ႇၼႆလႄႈၵဝ်ၵေႃႈလဝ်ႈလၢတ်ႈလႄႈဝႃႈ။ “ႁၼ်ပဵတ်ႈဢၼ်သႂ်ႇမၢၵ်ႇဢၼ်သုၵ်းၼႂ်းၶိင်ႇမႆႈဝႆႉၼၼ်ႉတီႈၶႃႈဢေႃႈ၊” မိူဝ်ႈဢၼ်ဝႃႈၼင်ႇၼႆၸိုင်။ ထႃႇဝရႃႉၽြႃး၊ မီးဢမိင်ႉတီႈၵဝ်လႄႈဝႃႈ၊ “ၶိင်ႇၵႃႇလႃႉလိုၼ်းလင်သုတ်းၼၼ်ႉႁွတ်ႈထိုင်ၵႃႈတီႈၵူၼ်းၵဝ်မဵဝ်း ဢိသရေး၊ တင်းလၢႆယဝ်ႉယဝ်ႉ။ ၵမ်းလိုၼ်းၵဝ်တၵ်းဢမ်ႇယိူၼ်ႉဢမ်ႇၶၢမ်ႇၶဝ်။-
ၼႂ်းမိုဝ်ႉဝၼ်းၼၼ်ႉသဵင်ဢၼ်ႁဵတ်းၵႂၢမ်းယူႇၵႃႈတီႈၵျွင်းပိၵ်ႈမၢၼ်ႇမၼ်းၼၼ်ႉၸိူဝ်းၼၼ်ႉတၵ်းပဵၼ်တၢင်းဢၼ်ႁွင်ႉႁႆႈႁွင်ႉသႅၼ်ႇၵႂႃႇဢေႃႈ။ တူဝ်တၢႆတၵ်းမီးၼမ်ၼႃႇသေယဝ်ႉ၊ၵူၼ်းတင်းလၢႆဢဝ်တူဝ်တၢႆဢွၵ်ႇၵႂႃႇတဵတ်ႇတဵတ်ႇလႄႈဢဝ်ၵႂႃႇပႅတ်ႈတူၵ်းၵူႈတီႈၵူႈလႅၼ်ဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ ၽြႃးပဵၼ်ၸဝ်ႈလၢတ်ႈဝႃႈၸိူဝ်ႉၼင်ႇၼႆဢေႃႈ။
သူၸိူဝ်းဢၼ်ယဵပ်ႇၶၢမ်ႈၶဝ်ၸိူဝ်းဢၼ်ၸုတ်ႈဢၼ်လုတ်ႈၼၼ်ႉလႄႈမီးဢလူဝ်ႇၶႂ်ႈယႃႉၽဵဝ်ႈၵူၼ်းဝၢၼ်ႈၵူၼ်းမိူင်းဢၼ်ယၢၵ်ႈဢၼ်ၽၢၼ်တင်းလၢႆပႅတ်ႈၼႃႇလူင်လၢင်သေလႄႈလၢတ်ႈလႄႈဝႃႈ၊-
“ၼင်ႇႁိုဝ် ႁဝ်းတၵ်းလႆႈၶၢႆၶဝ်ႈပိူၵ်ႇၸိုင်၊ဝၼ်းလိူၼ်မႂ်ႇၼၼ်ႉတၵ်းပူၼ်ႉမိူဝ်ႈလႂ်၊လွင်ႈၼင်ႇႁိုဝ်ႁဝ်းတၵ်းဢဝ်ၶဝ်ႈၵျုင်ႇဢွၵ်ႇၽႄဝႆႉပုၼ်ႈတေၶၢႆၼၼ်ႉဝၼ်းၵမ်သိၼ်တေပူၼ်ႉမိူဝ်ႈလႂ်။ တၵ်းလႆႈႁဵတ်းၵွၵ်းဢေးၽႃႇလဵၵ်ႉ၊ႁႂ်ႈလုၵ်ႈၵျၢပ်ႈယႂ်ႇသေလႄႈသုင်းတိုဝ်းယႃႇၸူႇဢၼ်ဢမ်ႇမၢၼ်ႇဢမ်ႇမႅၼ်ႈပုၼ်ႈဢၼ်ပႅတ်ႉလႅၼ်ပိူၼ်ႈ။-
ႁဝ်းတၵ်းလႆႈဢဝ်ငိုၼ်းသိုဝ်ႉဢဝ်ၵေႃႉဢၼ်ယၢၵ်ႈဢၼ်ၽၢၼ်လႄႈဢဝ်ၶႅပ်းတိၼ်ၵူႈၼိုင်ႈသိုဝ်ႉဢဝ်ၵေႃႉဢၼ်ၸုတ်ႈဢၼ်လုတ်ႈၼၼ်ႉ၊ႁဝ်းတၵ်းလႆႈၶၢႆၶဝ်ႈသၢၼ်ၵျုင်ႇဢၼ်ယုတ်ႈဢၼ်ၺၢမ်ႉၼၼ်ႉ၊” သူၸိူဝ်းဢၼ်ဝႃႈၼင်ႇၼႆၶဝ်႟။ ဢွၼ်ၵၼ်ထွမ်ႇငိၼ်းၵႂၢမ်းၼႆႉတႃႉ။
ထႃႇဝရႃႉၽြႃး၊ ၽြႃးပဵၼ်ၸဝ်ႈၸိူဝ်ႉၶိူဝ်း ယႃႇၵုပ်ႈ၊ တိူင်ႇဝႃႈၵတိၸမ်ႉ၊ “ၵဝ်တၵ်းဢမ်ႇလူင်ဢမ်ႇလိုမ်းၵႃႈဢၼ်ၶဝ်ၵမ်ၵျၢင်ႉသၢင်ႈႁဵတ်းၼၼ်ႉယူႇတႃႇသေႇဢမ်ႇထၢတ်ႇ။-
ၵွပ်ႈပိူဝ်ႈဢပျတ်ႈၼၼ်ႉလႄႈမိူင်းၸဝ်ႈတၵ်းသၼ်ႇဝႆ၊ၵူၼ်းမိူင်းၸဝ်ႈတင်းသဵင်ႈတင်းလူင်တၵ်းၶၢင်းၶီၶၢင်းၽၢၼ်ဢမ်ႇၸႂ်ႈႁိုဝ်း။ ဝၢၼ်ႈမိူင်းတင်းသဵင်ႈတင်းလူင်တၵ်းသၼ်ႇဝႆသေယဝ်ႉ၊တၵ်းလုၵ်ႉၶိုၼ်ႈလႄႈသမ်ႉတၵ်းယွမ်းလူင်းၵႂႃႇမိူၼ်ၸိူဝ်ႉၼင်ႇမႄႈၼမ်ႉ ၼၢႆးလ်၊ မိူင်း ဢေးၵျိပ်ႉ၊ ၼၼ်ႉဢမ်ႇၸႂ်ႈႁိုဝ်း။-
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ၼႂ်းမိုဝ်ႉဝၼ်းၼၼ်ႉၵဝ်တၵ်းႁႂ်ႈၵၢင်ဝၼ်းတူၵ်းၶိင်ႇၵၢင်ဝၼ်းတဵင်ႈလႄႈႁႂ်ႈလိၼ်မိူင်းလပ်းသိင်ႇၼႂ်းဝၼ်းဢၼ်သႂ်လီလႅင်းလီၼၼ်ႉဢေႃႈ။-
ၵဝ်တၵ်းႁႂ်ႈတၢင်းဢၼ်သူၶၢမ်ႇပွႆးၼၼ်ႉပဵၼ်တၢင်းဢၼ်ၶၢင်းၶီၶၢင်းၽၢၼ်ၵႂႃႇလႄႈႁႂ်ႈတၢင်းဢၼ်သူႁဵတ်းၵႂၢမ်းၵႃႈမီးၼၼ်ႉပဵၼ်တၢင်းဢၼ်ႁွင်ႈႁႆႈပွင်ႉၶၢင်းၵႂႃႇဢေႃႈ။ ၵဝ်တၵ်းႁဵတ်းႁႂ်ႈၵူၼ်းတင်းသဵင်ႈတင်းလူင်ဢဝ်ၶူဝ်းၼင်ပေႃၼုင်ႈလႄႈႁႂ်ႈၵူႈၵေႃႉၵူႈၵူၼ်းလႆႈၶၢမ်ႇတၢင်းဢၼ်ထႃၶူၼ်ႁူဝ်ပႅတ်ႈဢေႃႈ။ ၵဝ်တၵ်းႁႂ်ႈလွင်ႈတၢင်းၼၼ်ႉပဵၼ်ၸိူဝ်ႉၼင်ႇလွင်ႈတၢင်းဢၼ်ၶၢင်းၶီၶၢင်ႈၽၢၼ်ၵွပ်ႈပိူဝ်ႈလုၵ်ႈၸၢႆးၵေႃႉလဵဝ်ၵူၺ်းတၢႆၼၼ်ႉ၊ဢိၵ်ႇတင်းႁႂ်ႈတီႈသုတ်းတီႈၵွႆမၼ်းပဵၼ်ၸိူဝ်ႉၼင်ႇမိုဝ်ႉဝၼ်းဢၼ်ၶူမ်ၼႃႇၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ မီးဢမိင်ႉၸမ်ႉ၊ “ၶိင်ႇမိုဝ်ႉဝၼ်းဢၼ်ၵဝ်တၵ်းႁႂ်ႈၽေးတၢင်းဢၼ်ဢိုပ်းဢၼ်ယၢၵ်ႈပဵၼ်ၵႃႈၼႂ်းမိူင်းၸဝ်ႈၼၼ်ႉတၵ်းႁွတ်ႈထိုင်ဢမၢၼ်ႇၶၼ်ပဵၼ်သေၵေႃႈတၵ်းဢမ်ႇပဵၼ်ၽေးတၢင်းဢၼ်ၶဝ်ႈၵႃႈမၢၵ်ႇပႅင်းလႄႈၽေးတၢင်းဢၼ်ဢိုပ်းၼမ်ႉယၢၵ်ႇၼမ်ႉၼၼ်ႉလႄႈတၵ်းပဵၼ်ၽေးတၢင်းဢၼ်ဢိုပ်းဢၼ်ယၢၵ်ႈဢၼ်ဝႃႈ၊တၢင်းဢၼ်ဢမ်ႇလႆႈငိၼ်းဢမိင်ႉ ထႃႇဝရႃႉၽြႃး၊ ဢေႃႈ။-
ၵူၼ်းတင်းလၢႆတၵ်းလႄႇၵႂႃႇလဵပ်ႈၵႂႃႇဢဝ်ၵႃႈတီႈၼမ်ႉပၢင်ႇလၢႆႇမႄႈၼိုင်ႈတေႃႇထိုင်ႁွတ်ႈၼမ်ႉပၢင်ႇလၢႆႇမႄႈၼိုင်ႈ၊ဢိၵ်ႇတင်းဢဝ်ၵႃႈတီႈၽၢႆႇတၢင်းႁွင်ႇတေႃႇထိုင်ႁွတ်ႈၽၢႆႇတၢင်းဢွၵ်ႇၼၼ်ႉလႄႈပိၵ်ႉသမ်ႉၶဝ်လႅၼ်ႈၵႂႃႇလႅၼ်ႈမႃးႁႂ်ႈလႆႈႁႃဢဝ်ဢမိင်ႉ ထႃႇဝရႃႉၽြႃး၊ သေၵေႃႈၶဝ်ဢမ်ႇလႆႈထူပ်းလႆႈႁၼ်။-
ၼႂ်းမိုဝ်ႉဝၼ်းၼၼ်ႉၽူႈသၢဝ်ဢၼ်ႁၢင်ႈလီၽၢင်လီ၊ဢိၵ်ႇတင်းၽူႈမၢဝ်ႇတင်းလၢႆတၵ်းဢိုပ်းၼမ်ႉယၢၵ်ႇၼမ်ႉလႄႈႁိူဝ်ႉၼုၼ်းဢေႃႈ။-
ၶဝ်ၸိူဝ်းဢၼ်ဢဝ်ၽြႃး ဢႃႇသိမႃႉ၊ ဝဵင်း သမႃႇရိ၊ တိူင်ႇၵၢဝ်ႇလႄႈဝႃႈ၊ ‘ တၢၼ်ႇ၊ ႟။ ၵႃႈၼင်ႇဢၼ်ၽြႃးမႂ်းဢသၢၵ်ႈလိပ်း၊’ ဢိၵ်ႇတင်း ‘ၵႃႈၼင်ႇဢၼ်ဢသၢၵ်ႈၽႃႇသႃႇသဵၼ်ႈတၢင်း ပေႇရသေႇၽႃႉ၊ တႄႇယူႇၼၼ်ႉ၊’ ဝႃႈၼင်ႇၼႆ၊ၶဝ်ၸိူဝ်းဢၼ်ဝႃႈၸိူဝ်ႉၼင်ႇၼႆၼၼ်ႉတၵ်းလႆႈလူမ်ႉတူၵ်းလႄႈၵမ်းလိုၼ်းတၵ်းဢမ်ႇလႆႈၶိုၼ်းလုၵ်ႉထႅင်ႈ၊” ဝႃႈၼင်ႇၼႆဢေႃႈ။
ၵဝ်ႁၼ် ထႃႇဝရႃႉၽြႃး၊ ၸုၵ်းယူႇၵႃႈႁိမ်းၶဵင်ႇတၢင်းလူႇလႄႈမီးဢမိင်ႉလႄႈဝႃႈ၊ “ပေႃႉထုပ်ႉပၢႆၸိၵ်းသဝ်ၵျွင်းပိၵ်ႈမၢၼ်ႇၸဝ်ႈႁႅင်းယႂ်ႇၼႃႇတေႃႇထိုင်ႁွတ်ႈငဝ်ႈႁၢၵ်ႈမၼ်းသၼ်ႇၶွၼ်းလႄႈၵိူၼ်ႇပင်းတူၵ်းသႂ်ႇၵႃႈၼိူဝ်ႁူဝ်ၵူၼ်းၵႃႈမီးတႃႉ။ ၶဝ်ၸိူဝ်းဢၼ်ၵိုတ်းၵျၢၼ်ႇၼၼ်ႉၵဝ်တၵ်းဢဝ်ၶဝ်တၢႆလူၺ်ႈလၢပ်ႇလူၺ်ႈလႅဝ်းဢေႃႈ။ ဢမ်ႇမီးသေၵေႃႉသေၵူၼ်းဢၼ်ဢွၵ်ႇပၢႆႈလႆႈ။ ၵေႃႉၼိုင်ႈၵေႃႈဢမ်ႇလႆႈလွတ်ႈဢွၵ်ႇ။-
ပိၵ်ႉသမ်ႉၶဝ်ၶုတ်းၶုမ်ၶုတ်းႁူးပွင်ႇၶဝ်ႈႁွတ်ႈထိုင်ၵႃႈၼႂ်းမိူင်းမရၼႃႉသေၵေႃႈၶႅၼ်မိုဝ်းၵဝ်တၵ်းၼုၵ်ႈဢဝ်ၶဝ်ဢွၵ်ႇသေၵႃႈၼႂ်းၼၼ်ႉဢေႃႈ။ ပိၵ်ႉသမ်ႉၶဝ်ၶိုၼ်ႈၵႃႈၼိူဝ်ၽႃႉၵၢင်ႁၢဝ်သေၵေႃႈၵဝ်တၵ်းၶျႃးၶဝ်တူၵ်းသေၵႃႈတီႈၼၼ်ႉဢေႃႈ။-
ပိၵ်ႉသမ်ႉၶဝ်တဵတ်ႇမႅပ်းယူႇၵႃႈၼိူဝ်ပၢႆၸိၵ်းလွႆ ၵရမေႇလႃႉ၊ သေၵေႃႈၵဝ်တၵ်းႁႃလႄႈဢဝ်ၶဝ်ဢွၵ်ႇသေၵႃႈတီႈၼၼ်ႈဢေႃႈ။ ပိၵ်ႉသမ်ႉၶဝ်တဵတ်ႇမႅပ်းသေမၢၵ်ႇတႃၵဝ်လႄႈယူႇၵႃႈတီႈတႂ်ႈပိုၼ်ႉၼမ်ႉသမ်ႇမုၵ်ႈတြႃႇသေၵေႃႈၵဝ်တၵ်းသင်ႇလၢတ်ႈတီႈၼၵႃး လႄႈႁႂ်ႈမၼ်းၶူပ်းၶဝ်ဢေႃႈ။-
ပိၵ်ႉသမ်ႉၶဝ်ၶၢမ်ႇတၢင်းဢၼ်ရၢၼ်ႇသူႇသိမ်းဢဝ်ၶဝ်ၵႂႃႇပဵၼ်ၶႃႈသေၵေႃႈၵဝ်တၵ်းသင်ႇလၢတ်ႈတီႈလၢပ်ႇလႅဝ်းလႄႈႁႂ်ႈဢဝ်ၶဝ်တၢႆဢေႃႈ။ ၵဝ်တၵ်းဢဝ်တႃၵဝ်ယႅၵ်ႉတူၺ်းၶဝ်ႁႂ်ႈလႆႈႁဵတ်းၵျေးၸူးဢမ်ႇၸႂ်ႈ၊ႁႂ်ႈလႆႈႁဵတ်းၽေးတၢမ်သႂ်ႇၵူၺ်းဢေႃႈ၊” ဝႃႈၼင်ႇၼႆဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃးပဵၼ်ၸဝ်ႈ၊ ဢၼ်တိူဝ်ႉသႂ်ႇလိၼ်မိူင်းလႄႈလိၼ်မိူင်းပဵၼ်ၼမ်ႉၵႂႃႇဢေႃႈ။ ၶဝ်ၵႃႈဢၼ်ယူႇၵႃႈၼိူဝ်မၼ်းၼၼ်ႉလႆႈၶၢင်းၶီၶၢင်းၽၢၼ်ယူႇၼၼ်ႉဢေႃႈ။ ၵႃႈမီးတင်းသဵင်ႈတင်းလူင်ၼၼ်ႉတၵ်းလုၵ်ႉၶိုၼ်ႈလႄႈသမ်ႉတၵ်းယွမ်းလူင်းၵႂႃႇမိူၼ်ၸိူဝ်ႉၼင်ႇမႄႈၼမ်ႉ ၼၢႆးလ်၊ မိူင်း ဢေးၵျိပ်ႉ၊ ၼၼ်ႉဢေႃႈ။
မၼ်းၸဝ်ႈႁဵတ်းလုၵ်းႁၢၼ်ႉၼိူဝ်ၸဝ်ႈၵႃႈၼိူဝ်ၽႃႉၵၢင်ႁၢဝ်လႄႈ တႄႇႁဵတ်းတိုမ်းၼႃႈၽႃႉၸဝ်ႈၵင်ႈႁူမ်ႇဝႆႉၵႃႈၼိူဝ်လိၼ်မိူင်းဢေႃႈ။ မၼ်းၸဝ်ႈႁွင်ႉဢဝ်ၼမ်ႉသမ်ႇမုၵ်ႈတြႃႇလႄႈ ဢဝ်သွၼ်းလေႃႇသႂ်ႇၵႃႈၼိူဝ်ၼႃႈလိၼ်မိူင်းဢေႃႈ။ ၸိုဝ်ႈသဵင်မၼ်းၸဝ်ႈႁွင်ႉဝႃႈ၊ ထႃႇဝရႃႉၽြႃး၊ ဢေႃႈ။
“ၵူၼ်းမဵဝ်း ဢိသရေး၊ တင်းလၢႆၶဝ်႟။ သူပဵၼ်ၸိူဝ်ႉၼင်ႇၵူၼ်းမဵဝ်း ဢေႇတီႇဢူဝ်းပီးယႃး၊ ၸိူဝ်းၼၼ်ႉတီႈၵဝ်ဢမ်ႇၸႂ်ႈႁိုဝ်း။ ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။ ၵဝ်ၼုၵ်ႈဢဝ်ၵူၼ်းမဵဝ်း ဢိသရေး၊ ဢွၵ်ႇသေၵႃႈၼႂ်းမိူင်း ဢေးၵျိပ်ႉ၊ ၼုၵ်ႈဢဝ်ၵူၼ်း ၽိလိတ်ႉတိ၊ တင်းလၢႆဢွၵ်ႇသေၵႃႈၼႂ်းမိူင်း ၵပ်ႉတေႃး၊ ၼုၵ်ႈဢဝ်ၵူၼ်း သီးရီးယႃး၊ တင်းလၢႆဢွၵ်ႇသေၵႃႈၼႂ်းမိူင်း ၵိရႃႉ၊ မႃးယဝ်ႉဢမ်ႇၸႂ်ႈႁိုဝ်း။-
တႃ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ လူတူၺ်းသိုင်ႇၸိုင်ႈဝၢၼ်ႈမိူင်းဢၼ်မီးဢပျတ်ႈၼၼ်ႉလႄႈၵဝ်တၵ်းပႄႇမၼ်းပႅတ်ႈသေၵႃႈၼိူဝ်ၼႃႈလိၼ်မိူင်းဢေႃႈ။ ၼႂ်းဝႃႈၼၼ်သေၵေႃႈ ၵဝ်တၵ်းဢမ်ႇယႃႉၸိူဝ်ႉၶိူဝ်း ယႃႇၵုပ်ႈ၊ ပႅတ်ႈမူတ်းမူတ်းသဵင်ႈသဵင်ႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
တူၺ်းလူး။ ၵဝ်တၵ်းမီးဢမိင်ႉသေဢဝ်ၶိုင်၊ၶိုင်ဢဝ်ၵူၼ်းမဵဝ်း ဢိသရေး၊ ၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းမိူၼ်ၸိူဝ်ႉၼင်ႇဢၼ်ဢဝ်ၶိုင်၊ၶိုင်ၶဝ်ႈသၢၼ်ၼၼ်ႉဢေႃႈ။ ဢမ်ႇလႆႈတူၵ်းၵႃႈတီႈလိၼ်သေမဵတ်ႉ။-
ၵူၼ်းၵဝ်ၵႃႈဢၼ်ဢပျတ်ႈၼမ်ၼႃႇလႄႈလၢတ်ႈလႄႈဝႃႈ၊ “ၽေးဢုပၢတ်ႈၼၼ်ႉတၵ်းဢမ်ႇၶိုတ်းႁဝ်းလႆႈ။ ဢမ်ႇႁႄႉၶႅၼ်ႁဝ်းလႆႈ၊” ဝႃႈၼင်ႇၼႆၼၼ်ႉတၵ်းလႆႈတၢႆလူၺ်ႈလၢပ်ႇလူၺ်ႈလႅဝ်းဢေႃႈ။
“ၼႂ်းမိုဝ်ႉဝၼ်းၼၼ်ႉၵဝ်တၵ်းၶိုၼ်းမႄးၵုမ်းမႄးႁဵတ်းသိုင်ႇၸိုင်ႈဝၢၼ်ႈမိူင်း တႃႇဝိတ်ႈ၊ ဢၼ်လူမ်ႉၼၼ်ႉလႄႈႁႂ်ႈတီႈဢၼ်တႅၵ်ႇဢႃႈမၼ်းၸိူဝ်းၼၼ်ႉၶိုၼ်းငီႇငႅၼ်ႇၵၼ်သေလႄႈၶိုၼ်းတႄႇၶိုၼ်းႁဵတ်းတီႈဢၼ်ၵိူၼ်ႇပင်းလုလႅဝ်မၼ်းတင်းလၢႆလႄႈႁႂ်ႈမၼ်းၶိုၼ်းတင်ႈသိုဝ်ႈယူႇမိူၼ်ၸိူဝ်ႉၼင်ႇဢၼ်ပဵၼ်မႃးမိူဝ်ႈၵွၼ်ႇဢွၼ်တၢင်းၼၼ်ႉ၊-
ၵဝ်တၵ်းႁႂ်ႈၶဝ်လႆႈသိမ်းဢဝ်ၸႃႉၸဵမ်ၵူၼ်းမဵဝ်း ဢေႇတုမ်ႇ၊ ဢၼ်ၵိုတ်းဢၼ်ၵျၢၼ်ႇဝႆႉၼၼ်ႉ၊ဢိၵ်ႇတင်းၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ၶၢမ်ႇတၢင်းဢၼ်ဢဝ်ၼႃႇမႃႉၸိုဝ်ႈသဵင်ၵဝ်ႁွင်ႉႁဵၵ်ႈၵႃႈမီးတင်းသဵင်ႈတင်းလူင်ၼၼ်ႉမႃးဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ ဢၼ်ၸီႇယၢင်ႇလွင်ႈၼႆႉၼၼ်ႉမီးဢမိင်ႉဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၶိင်ႇမိုဝ်ႉဝၼ်းၵေႃႉဢၼ်ထႆၼႃးတၵ်းၶိုတ်းၵေႃႉဢၼ်ပၢတ်ႇၶဝ်ႈလႄႈ ၵေႃႉဢၼ်ၼူတ်ႈမၢၵ်ႇၸပိတ်ႉတၵ်းၶိုတ်းၵေႃႉဢၼ်ဝၢၼ်ႇၸိူဝ်ႉဝၢၼ်ႇၽၼ်း၊ လွႆတင်းလၢႆတၵ်းယွတ်ႇႁူဝ်ႈဢွၵ်ႇၼမ်ႉမၢၵ်ႇၸပိတ်ႉဢၼ်ဝၢၼ်လႄႈၼမ်ႉမၢၵ်ႇၸပိတ်ႉတၵ်းလႆဢွၵ်ႇသေၵႃႈတီႈၵုင်းလွႆတင်းလၢႆၼၼ်ႉတၵ်းႁွတ်ႈထိုင်မႃးဢေႃႈ။
ၵဝ်တၵ်းဢဝ်ၵူၼ်းၵဝ်ၵူၼ်းမဵဝ်း ဢိသရေး၊ ဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၸိူဝ်းၼၼ်ႉၶိုၼ်းမႃးလႄႈ ၶဝ်ၼၼ်ႉတၵ်းဢွၼ်ၵၼ်မႄးၵုမ်းမႄးႁဵတ်းဝဵင်းဢၼ်လုလႅဝ်ၸိူဝ်းၼၼ်ႉသေယဝ်ႉ၊ယူႇၵႃႈၼႂ်းဝဵင်းၸိူဝ်းၼၼ်ႉဢေႃႈ။ ၶဝ်တၵ်းဢွၼ်ၵၼ်ၽုၵ်ႇသူၼ်မၢၵ်ႇၸပိတ်ႉတင်းလၢႆလႄႈသူတ်ႉၵိၼ်ၼမ်ႉမၢၵ်ႇၸပိတ်ႉဢေႃႈ။ ၶဝ်တၵ်းဢွၼ်ၵၼ်လုမ်းလႃးႁႆႈၼႃးလႄႈၵိၼ်မၢၵ်ႇမၼ်းႁူင်းမၼ်းဢေႃႈ။
ၵဝ်တၵ်းဢဝ်ၶဝ်ၽုၵ်ႇဝႆႉၵႃႈၼႂ်းမိူင်းၶဝ်ၼၼ်ႉလႄႈ ၵမ်းလိုၼ်းၶဝ်တၵ်းဢမ်ႇလႆႈၶၢမ်ႇတၢင်းဢၼ်ၽူႈလႂ်ၼုၵ်ႈဢဝ်ၶဝ်ဢွၵ်ႇသေၵႃႈၼႂ်းမိူင်းၶဝ်ၼၼ်ႉ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ ၽြႃးပဵၼ်ၸဝ်ႈသူမီးဢမိင်ႉဢေႃႈ။ ၵျၢမ်းပရေႃးၽႅတ်ႈဢႃႇမူတ်ႉယဝ်ႉယဝ်ႉဢေႃႈ။
ၼႆႉပဵၼ်ရူႇပႃႇရူင်ႇ ဢေႃးပတိ၊ ဢၼ် ၸဝ်ႈပူဝ်ႇပႃႇၵၢင်ႁၢဝ်၊ၸဝ်ႈထႃႇဝရႃႉၽြႃး၊ လၢတ်ႈလွင်ႈၵူၼ်းမိူင်း ဢေႇတုမ်ႇ၊ ဢေႃႈ။ ထႃႇဝရႃႉၽြႃး၊ ပွႆႇၵူၼ်းၸႂ်ႉၸဝ်ႈၵႂႃႇၵႃႈၼႂ်းၵူၼ်းၵူႈၶိူဝ်းၶိူဝ်းဢေႃႈ။ ႁဝ်းၶႃႈလႆႈငိၼ်းသဵင်ၶၢဝ်ႇမၼ်းၸဝ်ႈလၢတ်ႈဝႃႈ၊ “သူဢွၼ်ၵၼ်လုၵ်ႉတႃႉ။ ၶီႇသိုၵ်းႁႂ်ႈလႆႈတိုၵ်းတေႃးၵူၼ်းမဵဝ်း ဢေႇတုမ်ႇ၊ တႃႉ။”
ထႃႇဝရႃႉၽြႃး၊ မီးဢမိင်ႉတီႈၵူၼ်းမိူင်း ဢေႇတုမ်ႇ၊ ၸမ်ႉ၊ ၵဝ်တၵ်းႁဵတ်းႁႂ်ႈမႂ်းႁႅင်းလဵၵ်ႉလႄႈပိူၼ်ႈတၵ်းသႄႉသွမ်းလူလၢႆတီႈမႂ်းဢေႃႈ။
မႃႇၼႃႉၸႂ်သုင်မႂ်းၼၼ်ႉပႅတ်ႉလႅၼ်မႂ်းယဝ်ႉ။ မႂ်းသမ်ႉလၢတ်ႈဝႃႈ၊ ဝဵင်းၵဝ်ၼႆႉမၼ်ႈၶိူင်ႇၼႃႇလူၺ်ႈမၢၵ်ႇႁိၼ်၊ ႁိူၼ်းၵဝ်ၵေႃႈ တႄႇယူႇၵႃႈၼိူဝ်လွႆ ဢၼ်သုင်ၼႃႇၼၼ်ႉ။ ၽူႈလႂ်တၵ်းတိုတ်ႉၸၼ်ဢဝ်တူၵ်းလႆႈဝႃႈၼႆမႂ်းလၢတ်ႈၼႂ်းၸႂ်မႂ်းယဝ်ႉ။
ပိၵ်ႉသမ်ႉမႂ်းမိၼ်ၶိုၼ်ႈတီႈသုင်မိူၼ်ၸိူဝ်ႉၼင်ႇ ၼူၵ်ႉၶၢင်ႇလေႃႉလႄႈႁဵတ်းႁိူၼ်းယူႇ ၵႃႈၼႂ်းၵႄႈၵၢင်လၢဝ်တင်းလၢႆသေၵေႃႈ၊ ၵဝ်တၵ်းၸၼ်မႂ်းတူၵ်းတီႈတႅမ်ႇဢေႃႈ။
“မိူဝ်ႈဢၼ်ၽူႈလၵ်ႉမႃးၶိင်ႇၵၢင်ၶိုၼ်း မၼ်းတၵ်းဢဝ်ၵႃႈဢၼ်မၼ်းမီး ဢလူဝ်ႇၼၼ်ႉၵူၺ်းဢေႃႈ။ မိူဝ်ႈၵူၼ်းဝိတ်းဢဝ်မၢၵ်ႇၸပိတ်ႉၼၼ်ႉ မၼ်းၸၢင်ႈတၵ်းဝႆႉၵိုတ်းၵျၢၼ်ႇ ဢိတ်းၼိုင်ႈယူႇဢေႃႈ။ ၵူၺ်းၵႃႈ၊ရၢၼ်ႇသူႇမႂ်းၼၼ်ႉတၵ်းၽဵဝ်ႈ သိမ်းမႂ်းပႅတ်ႈသဵင်ႈသဵင်ႈဢမ်ႇၵိုတ်းဝႆႉ သေဢိတ်းယဝ်ႉဢေႃႈ။
ၸိူဝ်ႉၶိူဝ်း ဢေးသေႃး၊ ႟။ ၽၼ်ႇတႃႇမႂ်းၼၼ်ႉလႆႈၶၢမ်ႇတၢင်းဢၼ်ႁိမ်ႁူင်ႇဢဝ်ယဝ်ႉ။
ၶဝ်ၸိူဝ်းဢၼ်ပဵၼ်မႁႃႇမိၵ်ႈမႂ်းၼၼ်ႉၵေႃႈပႅတ်ႉလႅၼ်မႂ်းယဝ်ႉ။ ၶဝ်လႆႈႁေႃႈမႂ်းဢွၵ်ႇပႅတ်ႈသေၵႃႈၼႂ်းမိူင်းမႂ်းယဝ်ႉဢေႃႈ။ ၶဝ်ၸိူဝ်းဢၼ်ႁဵတ်းၵေႃႉသႄႈလူၺ်ႈမႂ်းၼၼ်ႉၵေႃႈပႄႉၼႅင်ႇၵႃႈၼိူဝ်မႂ်းယဝ်ႉဢေႃႈ။ ၶဝ်ၸိူဝ်းဢၼ်ၵိၼ်လူၺ်ႈၵၼ်တင်းမႂ်းၸိူဝ်းၼၼ်ႉၵေႃႈႁၢင်ႈတူင်ႇႁႅဝ်ႉတူင်ႇၶိုမ်းတီႈမႂ်းယဝ်ႉ။ ၶဝ်ဝႃႈလွင်ႈမႂ်း ‘တၢင်းၵတ်ႉတၢင်းၶၼ်မၼ်းမီးၵႃႈတီႈလႂ်၊’ ဝႃႈၼင်ႇၼႆဢေႃႈ။
မိုဝ်ႉဝၼ်းၵဝ်ၸီႇယၢင်ႇမိူင်း ဢေႇတုမ်ႇ၊ ၼၼ်ႉ ၵဝ်တၵ်းယႃႉၽဵဝ်ႈပႅတ်ႈၵူၼ်းၵတ်ႉ ၵူၼ်းၶၼ်မၼ်း၊တၵ်းပႄႇၽဵဝ်ႈပႅတ်ႈ ၺၢၼ်ႇပိင်ႇၺႃႇမၼ်းမူတ်းၵဵင်ႈဢေႃႈ။
ၵူၼ်းသိုၵ်းဝဵင်း တေႇမၼ်ႇ၊ ႟။ မႂ်းတၵ်းမီး တၢင်းဢၼ်ၵူဝ်ႁႄၼႃႇဢေႃႈ။ ၵူၼ်းသိုၵ်း ဢေႇတုမ်ႇ၊ တင်းလၢႆတၵ်းလႆႈၶၢမ်ႇတၢင်းဢၼ်ၶႃႈၽၼ်းလႄႈတၢႆမူတ်းဢေႃႈ။
ၵွပ်ႈပိူဝ်ႈမႂ်းၸူၼ်လႄႈဢဝ်ပီႈၼွင်ႉမႂ်းဢၼ်သိုပ်ႇလူင်းမႃးတီႈ ယႃႇၵုပ်ႈ၊ ၼၼ်ႉတၢႆပႅတ်ႈလႄႈ မႂ်းတၵ်းလႆႈၶၢမ်ႇတၢင်းဢၼ်ယႃႉလုယႃႉလႅဝ်၊ တၵ်းလႆႈၶၢမ်ႇတၢင်းဢၼ်ဢူၵ်းဢၼ်ဢၢႆတႃႇသေႇဢေႃႈ။
မိူဝ်ႈဢၼ်ရၢၼ်ႇသူႇလႂ်ယႃႉၵိူၼ်ႇပႅတ်ႈၽၵ်းတူဝဵင်းယူႇၼၼ်ႉမႂ်းၵေႃႈၸုၵ်းသေၵွတ်ႇၵႆႇတူၺ်း ယူႇဢေႃႈ။ မိူဝ်ႈဢၼ်တၢင်ႇဝၢၼ်ႈတၢင်ႇမိူင်းယႃႉသိမ်းဢဝ်ၶူဝ်းလဵင်းဝဵင်း ယေႇရုသလႅမ်ႇ၊ လႄႈတူၵ်းၸႃႇၵွၵ်ႈမႅင်ႇၵၼ်ၼၼ်ႉ၊ မႂ်းၵေႃႈပဵၼ်ၸိူဝ်ႉၼင်ႇၵူၼ်းမိူၵ်ႈၸိူဝ်းၼၼ်ႉၵေႃႉၼိုင်ႈဢေႃႈ။
မႂ်းဢမ်ႇထုၵ်ႇလီမီးတၢင်းဢၼ်မူၼ်ႈသိူဝ်းၸႂ်မိူဝ်ႈပီႈၼွင်ႉမႂ်းဢၼ်မီးၼႂ်းမိူင်း ယုတႃႉ၊ လႆႈၶၢမ်ႇတၢင်းလုတၢင်းလႅဝ်ၼၼ်ႉမႂ်းဢမ်ႇထုၵ်ႇလီၸူမ်းသိူဝ်းၼႂ်းတၢင်းဢၼ်ၶဝ်လႆႈၶၢမ်ႇတုၵ်ႉၶႃႉယၢၵ်ႈၽၢၼ်ၼၼ်ႉ၊ မႂ်းဢမ်ႇထုၵ်ႇလီႁဵတ်းတၢင်းဢၼ်ဢမ်ႇၼပ်ႉ ဢမ်ႇၶၢၼ်းတီႈၶဝ်၊မိူဝ်ႈဢၼ်ၶဝ် ယၢၵ်ႈၽၢၼ်ၼၼ်ႉ။
မႂ်းယင်းဢမ်ႇထုၵ်ႇလီၶဝ်ႈၵႃႈၼႂ်းဝဵင်းဢၼ်ၵူၼ်းၵဝ်ယူႇသေလႄႈၸူမ်းသိူဝ်းၵွပ်ႈပိူဝ်ႈၶဝ် ထူပ်းၽေးလႄႈ ႁိမ်ႁူင်ႇဢဝ်ၶူဝ်းၶွင်တၢင်းမၢၵ်ႈမီးၶဝ် မိူဝ်ႈဢၼ်ၶဝ်လႆႈၶၢမ်ႇတုၵ်ႉၶႃႉမႆႈၸႂ်ၼၼ်ႉဢေႃႈ။
မႂ်းယင်းဢမ်ႇထုၵ်ႇလီၸုၵ်းယူႇၵႃႈတီႈတၢင်းၽႄႁႂ်ႈလႆႈတိၺွပ်းဢဝ်ၶဝ်ၸိူဝ်းဢၼ်ပၢႆႈတဵတ်ႇႁႂ်ႈလႆႈလွတ်ႈၼၼ်ႉလႄႈ ဢမ်ႇထုၵ်ႇလီဢဝ်ၶဝ်ၵႂႃႇဢၢပ်ႈပၼ်ၵႃႈၼႂ်းမိုဝ်းရၢၼ်ႇသူႇၶဝ်။ ယၢမ်းမိူဝ်ႈဢၼ်ၶဝ်လႆႈၶၢမ်ႇတုၵ်ႉၶႃႉမႆႈၸႂ် ၼၼ်ႉဢေႃႈ။
မိုဝ်ႉဝၼ်းဢၼ်ၵဝ် ထႃႇဝရႃႉၽြႃး၊ တၵ်းၸီႇယၢင်ႇၵူၼ်းၵူႈမဵဝ်းမဵဝ်းၸမ်မႃးယဝ်ႉ။ မိူင်း ဢေႇတုမ်ႇ၊ ႟။ ၸိူဝ်ႉၼင်ႇဢၼ်မႂ်းႁဵတ်းၼၼ်ႉမႂ်းတၵ်းလႆႈၶၢမ်ႇဢေႃႈ။ ၸိူဝ်ႉၼင်ႇဢၼ်မႂ်းပၼ်တီႈပိူၼ်ႈၼၼ်ႉမႂ်းတၵ်းၶိုၼ်းလႆႈဢေႃႈ။
မိူၼ်ၸိူဝ်ႉၼင်ႇၵူၼ်းၵဝ်ဢိုၵ်ႉၵိၼ်ၽေးတၢမ်ႇယူႇၵႃႈၼိူဝ်လွႆမူတ်းၸၢင်ႇၼၼ်ႉ၊ ၵူၼ်းမဵဝ်းၸိူဝ်းဢၼ်ယူႇႁိမ်းႁွမ်းလဵပ်ႈႁွပ်ႈၸိူဝ်းၼၼ်ႉၵေႃႈ၊ တၵ်းလႆႈသူတ်ႉလႆႈဢိုၼ်ၵိၼ်ၽေးတၢမ်ႇၼၼ်ႉတေႃႇထိုင်ႁွတ်ႈတူဝ်ၶဝ်ထၢၼ်ႈပေႃးႁၢႆတၢႆဝၢႆးၵႂႃႇဢေႃႈ။
ၵူၺ်းၵႃႈ၊ၵႃႈၼိူဝ်လွႆ ၸိဢုၼ်ႇ၊ ၸမ်ႉ၊ၵူၼ်းၵမ်ႈၽွင်ႈတၵ်းလႆႈလွတ်ႈၽေးယူႇဢေႃႈ။ တီႈၼၼ်ႈတၵ်းပဵၼ်တီႈဢၼ် မူတ်းၸၢင်ႇဢေႃႈ။ ၸိူဝ်ႉၶိူဝ်း ယႃႇၵုပ်ႈ၊ ၼၼ်ႉတၵ်းလႆႈပိူင်ႇဢဝ်လိၼ်ဢၼ်ၶဝ်ထိူၵ်ႈပိူင်ႇၼၼ်ႉဢေႃႈ။
ၸိူဝ်ႉၶိူဝ်း ယႃႇၵုပ်ႈ၊ ၸိူဝ်ႉၶိူဝ်း ယူဝ်းသႅပ်ႈ၊ တၵ်းပဵၼ်ၸိူဝ်ႉၼင်ႇၽႆးဢေႃႈ။ ၶဝ်တၵ်းယႃႉၽဵဝ်ႈၸိူဝ်ႉၶိူဝ်း ဢေးသေႃး၊ မိူၼ်ၸိူဝ်ႉၼင်ႇၽႆးမႆႈယိူဝ်ႈယႃႈၼၼ်ႉ၊ တေႃႇပေႃးဢမ်ႇၵိုတ်းဢမ်ႇၵျၢၼ်ႇဝႆႉသေၵေႃႉသေၵူၼ်းဢေႃႈ။” ဝႃႈၼႆ ၸဝ်ႈထႃႇဝရႃႉၽြႃး၊ မီးဢမိင်ႉဢေႃႈ။
“ၵူၼ်းၸိူဝ်းဢၼ်ယူႇၽၢႆႇတၢင်းၸၢၼ်းမိူင်း ယုတႃႉ၊ တၵ်းသိမ်းဢဝ်မိူင်း ဢေႇတုမ်ႇ၊ ဢေႃႈ။ ၵူၼ်းၸိူဝ်းဢၼ်ယူႇတီႈတိၼ်လွႆၽၢႆႇတၢင်းတူၵ်းၸမ်ႉ၊တၵ်းသိမ်းဢဝ်မိူင်း ၽိလိတ်ႉတိ၊ ဢေႃႈ။ ၵူၼ်းမဵဝ်း ဢိသရေး၊ တၵ်းပိူင်ႇဢဝ်မိူင်း ဢေႇၽရိမ်ႇ၊ တင်းမိူင်း သမႃႇရိ၊ လႄႈ ၵူၼ်းမဵဝ်း ပိၼ်ႇယႃႇမိၼ်ႇ၊ တၵ်းသိမ်းဢဝ် မိူင်း ၵိလတ်ႉ၊ ဢေႃႈ။
ၵူၼ်းသိုၵ်း ဢိသရေး၊ ဢၼ်လႆႈၶၢမ်ႇတၢင်းဢၼ်ႁေႃႈဢွၵ်ႇမိူင်းၸိူဝ်းၼၼ်ႉ၊ တၵ်းလႆႈသိမ်းဢဝ်မိူင်း ၽိၼိတ်ႉ၊ တေႃႇထိုင်ႁွတ်ႈမိူင်း ၸႃႇရိပ်ႉတႃႉ၊ ဢၼ်မီးၽၢႆႇတၢင်းႁွင်ႇၼၼ်ႉဢေႃႈ။ ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ႁေႃႈဢွၵ်ႇသေၼႂ်းဝဵင်း ယေႇရုသလႅမ်ႇ၊ ၵႂႃႇၵႃႈတီႈမိူင်း သႃႇတိ၊ တၵ်းသိမ်းဢဝ်မိူင်း ယုတႃႉ၊ ပွတ်းၸၢၼ်းဢေႃႈ။
ၵူၼ်းဝဵင်း ယေႇရုသလႅမ်ႇ၊ ဢၼ်ပႄႉၼႅင်ႇ ၼၼ်ႉၸမ်ႉ၊ တၵ်းတိုၵ်းသိမ်းဢဝ်လႄႈဢုပ်ႉပိူင်ႇ မိူင်း ဢေႇတုမ်ႇ၊ ဢေႃႈ။ ထႃႇဝရႃႉၽြႃး၊ ၵေႃႈတၵ်းပဵၼ်ၶုၼ်ႁေႃၶမ်း ၶဝ်ဢေႃႈ၊” ဝႃႈၼင်ႇၼႆဢေႃႈ။ ၵျၢမ်းရူႇပႃႇရူင်ႇဢေႃးပတိယဝ်ႉယဝ်ႉဢေႃႈ။
ဝၼ်းၼိုင်ႈ ထႃႇဝရႃႉၽြႃး၊ မီးဢမိင်ႉတီႈ ယူဝ်းၼႃႉ၊ လုၵ်ႈၸၢႆး ဢမိတ်ႉတေႇ၊ ဢေႃႈ။-
မၼ်းၸဝ်ႈမီးဢမိင်ႉလႄႈဝႃႈ၊ “ၵႂႃႇၵႃႈတီႈဝဵင်း ၼိၼေႇဝူၺ်ႇ၊ ဢၼ်ပဵၼ်ဝဵင်းလူင်ၼၼ်ႉသေယဝ်ႉ၊ႁေႃးလၢတ်ႈၼုၵ်ႈၵပၢတ်ႈတြႃးၶတ်းတႃႉၵၼ်တင်းမၼ်းတႃႉ။ ၵဝ်လႆႈႁုငိၼ်းလွင်ႈဢၼ်ၵူၼ်းမၼ်းႁၢႆႉမိူၵ်ႈလိူင်းၵျၢမ်းၵႃႈႁိုဝ်ၼႃႇၼၼ်ႉယဝ်ႉ၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊ ယူဝ်းၼႃႉ၊ ၵျၢမ်ႇပွင်တၵ်းဢွၵ်ႇပၢႆႈသေၵႃႈတီႈ ထႃႇဝရႃႉၽြႃး၊ ဢေႃႈ။ မၼ်းၵႂႃႇၵႃႈတီႈဝဵင်း ယွပ်ႉပႃႉ၊ လႄႈထူပ်းႁိူဝ်းသၢင်းၽေႃးဢၼ်တၵ်းၵႂႃႇၵႃႈတီႈမိူင်း သပဵၼ်ႇ၊ ပုၼ်ႉဢေႃႈ။ မၼ်းပၼ်ၵႃႈႁိူဝ်းသၢင်းၽေႃးသေယဝ်ႉ၊လူင်းၵႂႃႇၵႃႈၼႂ်းႁိူဝ်းသၢင်းၽေႃးၸွမ်းလူၺ်ႈၵၼ်တင်းၵူၼ်းႁိူဝ်းသၢင်းၽေႃးဢၼ်တၵ်းၵႂႃႇၵႃႈတီႈမိူင်း သပဵၼ်ႇ၊ ၼၼ်ႉႁႂ်ႈလႆႈပၢႆႈလွတ်ႈသေၵႃႈတီႈ ထႃႇဝရႃႉၽြႃး၊ ဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ ပွႆႇၸႂ်ႉလူမ်းလႅင်ႉလူင်ဢၼ်ႁႅင်းယႂ်ႇၼႃႇမႃးၵႃႈၼိူဝ်ပၢင်ႇလၢႆႇလႄႈၽူၼ်လူင်လူမ်းလူင်ႁႅင်းယႂ်ႇၼႃႇထူဝ်းပတ်ႉတေႃႇထိုင်ႁိူဝ်းသၢင်းၽေႃးထၢၼ်ႈပေႃးၸမ်တၵ်းလုတၵ်းလႅဝ်ဢေႃႈ။-
ၵူၼ်းႁိူဝ်းသၢင်းၽေႃးၸိူဝ်းၼၼ်ႉတူၵ်းၸႂ်ၵူဝ်ႁႄၼႃႇသေယဝ်ႉ၊ႁွင်ႉသႅၼ်ႇႁွင်ႉႁႃတၢင်းဢၼ်ၸွႆႈထႅမ်တီႈၽြႃးၽႂ်ၽြႃးမၼ်းဢေႃႈ။ ၼင်ႇႁိုဝ်ႁိူဝ်းသၢင်းၽေႃးတေမဝ်လႄႈဢမ်ႇၸူမ်ၵႂႃႇၼႂ်းၼမ်ႉၼၼ်ႉၶဝ်ဢဝ်ၶူဝ်းၵုၼ်ႇၶဝ်ပႅတ်ႈတူၵ်းၵႃႈၼႂ်းၼမ်ႉပၢင်ႇလၢႆႇဢေႃႈ။ မိူဝ်ႈၶိင်ႇၼၼ်ႉ ယူဝ်းၼႃႉ၊ ၸမ်ႉ၊ၵႂႃႇယူႇၵႃႈတီႈၼႂ်းတွင်ႉႁိူဝ်းသၢင်းၽေႃးလႄႈၼွၼ်းလပ်းယူႇဢေႃႈ။
ၵေႃႉဢၼ်ပဵၼ်ႁူဝ်ၼႃႈၵူၼ်းႁိူဝ်းသၢင်းၽေႃးမႃးၸူးၵႃႈတီႈမၼ်းလႄႈလၢတ်ႈဝႃႈ၊ “ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းမႃးၼွၼ်းလပ်းယူႇၵႃႈတီႈၼႆႈ။ လုၵ်ႉသေလႄႈသူးတွင်းတီႈၽြႃးမႂ်းႁႂ်ႈလႆႈတၢင်းဢၼ်ၸွႆႈထႅမ်မႃႉၸႃႉသေၵမ်း။ ၽြႃးမႂ်းၸၢင်ႈၶႄးတၵ်းဢဵတ်းလူႁဝ်းလႄႈပၼ်ႁႂ်ႈဢသၢၵ်ႈႁဝ်းလႆႈလွတ်ႈဢေႃႈ၊” ဝႃႈၼင်ႇၼႆဢေႃႈ။
လိုၼ်းၼၼ်ႉၵူၼ်းႁိူဝ်းသၢင်းၽေႃးၼင်ႇၵၼ်ၵၼ်လၢတ်ႈၵၼ်လႄႈဝႃႈ၊ “ႁဝ်းတူၵ်းၸႃႇၵွၵ်ႈၵၼ်ႁႂ်ႈပေႃးလႆႈႁုလွင်ႈတၢင်းၽေးဢုပၢတ်ႈဢၼ်ပဵၼ်မႃးၼႆႉ၊ပဵၼ်ၵွပ်ႈပိူဝ်ႈဢပျတ်ႈၽူႈလႂ်ၼၼ်ႉသေၵမ်း၊” ဝႃႈၼင်ႇၼႆဢေႃႈ။ မိူဝ်ႈၼၼ်ႉၶဝ်ၵေႃႈႁဵတ်းၸိူဝ်ႉၼင်ႇၼၼ်လႄႈလိၵ်ႈၸႃႇၵွၵ်ႈတူၵ်းတီႈ ယူဝ်းၼႃႉ၊ ဢေႃႈ။-
ၵွပ်ႈၼၼ်လႄႈၶဝ်ဢွၼ်ၵၼ်ထၢမ်တီႈမၼ်းလႄႈဝႃႈ၊ “လၢတ်ႈၼႄႁဝ်းလွင်ႈတၢင်းဢၼ်ၽေးတုၵ်ႉၶႃႉဢၼ်တူၵ်းႁွတ်ႈၵႃႈၼိူဝ်ႁဝ်းၼႆႉဝဵၼ်းမႃးၵွပ်ႈပိူဝ်ႈၽူႈလႂ်၊မႂ်းႁဵတ်းၵၢၼ်သင်၊မႂ်းလုၵ်ႉၵႃႈလႂ်မႃး၊ၸိုဝ်ႈမိူင်းမႂ်းၸိုဝ်ႈသင်၊မႂ်းပဵၼ်ၸိူဝ်ႉၶိူဝ်းၵူၼ်းမဵဝ်းလႂ်၊” ဝႃႈၼင်ႇၼႆဢေႃႈ။
မၼ်းၶိုၼ်းလၢတ်ႈတီႈၶဝ်လႄႈဝႃႈ၊ “ၵဝ်ပဵၼ်ၵူၼ်းမဵဝ်း ႁေႇပြႄး၊ ဢေႃႈ၊ၵဝ်ပဵၼ်ၵေႃႉဢၼ်ၵူဝ်းၵႂၢႆႇ ထႃႇဝရႃႉၽြႃး၊ ၽြႃးပဵၼ်ၸဝ်ႈၵၢင်ႁၢဝ်ဢၼ်ၽၢၼ်ႇသၢင်းႁဵတ်းပဵၼ်ပၢင်ႇလၢႆႇတင်းလိၼ်မိူင်းဢေႃႈ၊” ဝႃႈၼင်ႇၼႆဢေႃႈ။-
ယူဝ်းၼႃႉ၊ သမ်ႉသိုပ်ႇလၢတ်ႈၼႄလွင်ႈဢၼ်မၼ်းလႆႈဢွၵ်ႇပၢႆႈသေၵႃႈတီႈ ထႃႇဝရႃႉၽြႃး၊ မႃးၼၼ်ႉဢေႃႈ။ မိူဝ်ႈၼၼ်ႉၵူၼ်းႁိူဝ်းသၢင်းၽေႃးၸိူဝ်းၼၼ်ႉၵူဝ်ႁႄၼႃႇလႄႈလၢတ်ႈတီႈမၼ်းလႄႈဝႃႈ၊ “ၼႆႉၸမ်ႉ၊ပဵၼ်တၢင်းႁဵတ်းဢၼ်ႁၢႆႉယုတ်ႈၼႃႇဢေႃႈ၊” ဝႃႈၼင်ႇၼႆဢေႃႈ။-
လႅင်းၼမ်ႉပိူပ်ႈၼမ်ႉၸမ်ႉ၊ယဵင်ႈၶႅၼ်းလုၵ်ႉႁႅင်းယႂ်ႇၼႃႇလႄႈၵူၼ်းႁိူဝ်းသၢင်းၽေႃးၸိူဝ်းၼၼ်ႉထၢမ်မၼ်းလႄႈဝႃႈ၊ “ၼင်ႇႁိုဝ်လႅင်းၼမ်ႉပိူပ်ႈၼမ်ႉပေႃးတေထၢတ်ႇယဵၼ်ၼၼ်ႉႁဝ်းတေလႆႈႁဵတ်းၸိူဝ်ႉၼင်ႇႁိုဝ်တီႈမႂ်း၊” မိူဝ်ႈဢၼ်ဝႃႈၸိူဝ်ႉၼင်ႇၼၼ်ၸိုင်။
ယူဝ်းၼႃႉ၊ ၶိုၼ်းလၢတ်ႈလႄႈဝႃႈ၊ “ဢဝ်တူဝ်ၵဝ်ထိမ်ႈပႅတ်ႈတူၵ်းၵႃႈၼႂ်းၼမ်ႉပၢင်ႇလၢႆႇတႃႉ။ ပေႃးသူႁဵတ်းၸိူဝ်ႉၼင်ႇၼၼ်ၸိုင်၊လႅင်းၼမ်ႉပိူပ်ႈၼမ်ႉတၵ်းထၢတ်ႇယဵၼ်ဢေႃႈ။ ၼႆႉၸမ်ႉ၊ပဵၼ်ၵွပ်ႈပိူဝ်ႈဢပျတ်ႈတၢင်းၽိတ်းၵဝ်ၵူၺ်းလႄႈသူလႆႈၶၢမ်ႇၽေးၽူၼ်လူင်လူမ်းလူင်ၼႆႉၵဝ်ႁုယူႇဢေႃႈ၊” ဝႃႈၼင်ႇၼႆဢေႃႈ။
ပိၵ်ႉသမ်ႉဝႃႈၼင်ႇၼၼ်သေၵေႃႈ ၵူၼ်းႁိူဝ်းသၢင်းၽေႃးၸိူဝ်းၼၼ်ႉယင်းဢွၼ်ၵၼ်ၽၢႆးႁိူဝ်းယၢပ်ႇၼႃႇႁႂ်ႈလႆႈၵႂႃႇၸူးတီႈၽင်ႇၵႃႈၼိူဝ်ၵုင်းပုၼ်ႉသေၵေႃႈလႅင်းၼမ်ႉပိူပ်ႈၼမ်ႉယဵင်ႈၶႅၼ်းႁၢဝ်ႈၵျၢမ်းၼႃႇလႄႈၶဝ်ဢမ်ႇႁွတ်ႈထိုင်တီႈၽင်ႇၵုင်းလႆႈ။-
ၵွပ်ႈပိူဝ်ႈၼႆလႄႈၶဝ်ႁွင်ႉသႅၼ်ႇတီႈ ထႃႇဝရႃႉၽြႃး၊ လႄႈဝႃႈ၊ “ပေႃးႁဝ်းၶႃႈလႆႈဢဝ်ဢသၢၵ်ႈၵူၼ်းၵေႃႉၼႆႉတၢႆၸိုင်၊ယႃႇပေပၼ်တၢမ်ႇတီႈႁဝ်းၶႃႈသေၵမ်းတီႈၶႃႈဝႃႈၼႆႁဝ်းၶႃႈတွင်းပၢၼ်ႇတီႈၶႃႈဢေႃႈ။ ဢူဝ်း ထႃႇဝရႃႉၽြႃး၊ တီႈၶႃႈ၊ၸဝ်ႈႁဝ်းႁဵတ်းၸွမ်းၼင်ႇဢလူဝ်ႇၸဝ်ႈႁဝ်းမီးၼၼ်ႉတီႈၶႃႈယဝ်ႉ၊” ဝႃႈၼင်ႇၼႆသေယဝ်ႉ၊-
ၶဝ်ဢုမ်ႈဢဝ်တူဝ် ယူဝ်းၼႃႉ၊ သေယဝ်ႉ၊ထိမ်ႈတူၵ်းၵႂႃႇၵႃႈၼႂ်းၼမ်ႉပၢင်ႇလၢႆႇဢေႃႈ။ မိူဝ်ႈၼၼ်ႉၵမ်းလဵဝ်လႅင်းၼမ်ႉပိူပ်ႈၼမ်ႉၵေႃႈထၢတ်ႇယဵၼ်ၵႂႃႇၵမ်းလဵဝ်ဢေႃႈ။-
လွင်ႈတၢင်းၼႆႉယဵင်ႈၶႅၼ်းႁဵတ်းႁႂ်ႈၵူၼ်းႁိူဝ်းသၢင်းၽေႃးၵူဝ်ႁႄ ထႃႇဝရႃႉၽြႃး၊ ၼႃႇလႄႈၶဝ်ၼၼ်ႉႁဵတ်းတၢင်းဢၼ်သၢၵ်ႈလူႇလႄႈဝႆႉၵတိတီႈမၼ်းၸဝ်ႈဢေႃႈ။
ၸွမ်းၼင်ႇဢမိင်ႉ ထႃႇဝရႃႉၽြႃး၊ ၼၼ်ႉပႃလူင်ဢိုၼ်ၵိၼ် ယူဝ်းၼႃႉ၊ လႄႈမၼ်းၼၼ်ႉလႆႈယူႇၵႃႈၼႂ်းတွင်ႉပႃသၢမ်ဝၼ်းသၢမ်ၶိုၼ်းဢေႃႈ။
ယူဝ်းၼႃႉ၊ ၼၼ်ႉယူႇၵႃႈၼႂ်းတွင်ႉပႃလူင်သေယဝ်ႉ၊သူးတွင်းတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈမၼ်းလႄႈဝႃႈၸမ်ႉ၊
“မိူဝ်ႈဢၼ်ၶႃႈၸဝ်ႈလႆႈၶၢမ်ႇတုၵ်ႉၶႃႉတၢင်းယၢၵ်ႈတၢင်းၽၢၼ်လႄႈၵၢဝ်ႇႁႃၸဝ်ႈႁဝ်းၼၼ်ႉ၊ ၸဝ်ႈႁဝ်းယင်းဢိူဝ်ၶႃႈၸဝ်ႈယူႇဢေႃႈ။ မိူဝ်ႈဢၼ်ယူႇၵႃႈၼႂ်းမိူင်း မရၼႃႉ၊ ဢၼ်လိုၵ်ႉလမ်ႇသေလႄႈ ႁွင်ႉသႅၼ်ႇႁႃတၢင်းဢၼ်ၸွႆႈထႅမ်ၼၼ်ႉၸဝ်ႈႁဝ်းထွမ်ႇငိၼ်းၵႂၢမ်းၶႃႈၸဝ်ႈဢေႃႈ။
ၸဝ်ႈႁဝ်းပႅတ်ႈၶႃႈၸဝ်ႈတူၵ်းၼႂ်းၵႃႈတီႈဢၼ်လိုၵ်ႉၼႃႇသေပိူၼ်ႈ၊ ၵႃႈၼႂ်းပၢင်ႇလၢႆႇတီႈဢၼ်ၼမ်ႉလွမ်ႉႁွပ်ႈၶႃႈၸဝ်ႈလႄႈ လႅင်းၼမ်ႉပိူပ်ႈၼမ်ႉဢၼ်ယႂ်ႇၼႃႇၸဝ်ႈႁဝ်းၼၼ်ႉႁူမ်ႇသုမ်ႇၶႃႈၸဝ်ႈလႄႈ။
ၶႃႈၸဝ်ႈထၢင်ႇၸဝ်ႈႁဝ်းဢဝ်ၶႃႈၸဝ်ႈပႅတ်ႈသေၵႃႈတီႈၽၢႆႇၼႃႈၸဝ်ႈႁဝ်းလႄႈ ၶႃႈၸဝ်ႈတၵ်းႁဵတ်းၸိူဝ်ႉၼင်ႇႁိုဝ်ႁႂ်ႈလႆႈၶိုၼ်းႁၼ်ၵျွင်းပိၵ်ႈမၢၼ်ႇၸဝ်ႈႁဝ်းထႅင်ႈ။
ၼမ်ႉၸိူဝ်းၼၼ်ႉလႆႈလွမ်ႉႁွပ်ႈၶႃႈၸဝ်ႈဝႆႉ၊ႁႂ်ႈၶႃႈၸဝ်ႈထူၺ်ႈၸႂ်ဢမ်ႇလႆႈ ၶႃႈၸဝ်ႈလႆႈၶၢမ်ႇတၢင်းဢၼ်ၶျုၵ်ႈဝႆႉယူႇၵႃႈၼႂ်းပၢင်ႇလၢႆႇတီႈၶႃႈဢေႃႈ။ တူၼ်ႈယိူဝ်ႈတူၼ်ႈယႃႈပၢင်ႇလၢႆႇၵႃႈမီးမတ်ႉၶဵၼ်းႁွပ်ႈၵွၵ်းႁူဝ်ၶႃႈၸဝ်ႈဝႆႉတီႈၶႃႈယဝ်ႉ။
ပိၵ်ႉသမ်ႉၶႃႈၸဝ်ႈလႆႈလူင်းၸူးၵႃႈတီႈငဝ်ႈႁၢၵ်ႈလွႆလူင်သေယဝ်ႉ၊ ၵိူၼ်ႇၽၵ်းတူလိၼ်လႆႈၶၢမ်ႇတၢင်းဢၼ်ဢိုတ်းႁပ်းဝႆႉတႃႇသေႇသေၵေႃႈ၊ ထႃႇဝရႃႉၽြႃး၊ ၽြႃးပဵၼ်ၸဝ်ႈၶႃႈၸဝ်ႈတီႈၶႃႈ၊ ၸဝ်ႈႁဝ်းဢဝ်ၶႃႈၸဝ်ႈဢွၵ်ႇမႃးသေၵႃႈၼႂ်းတၢင်းဢၼ်လိုၵ်ႉဢၼ်လမ်ႇၼၼ်ႉလႄႈႁႂ်ႈၶႃႈၸဝ်ႈလႆႈမီးဢသၢၵ်ႈလိပ်းယူႇဢေႃႈ။
မိူဝ်ႈၸူဝ်ႈတႃႇဢသၢၵ်ႈၶႃႈၸဝ်ႈၸမ်တၵ်းလု တၵ်းလႅဝ်ၼၼ်ႉ၊ ၶႃႈၸဝ်ႈသူးတွင်းၵၢဝ်ႇတိူင်ႇတီႈ ထႃႇဝရႃႉၽြႃး၊ လႄႈ ၸဝ်ႈႁဝ်းယူႇၵႃႈၼႂ်းပိၵ်ႈမၢၼ်ႇၸဝ်ႈဢၼ်မူတ်းၸၢင်ႇလႄႈထွမ်ႇငိၼ်းၵႂၢမ်းၶႃႈၸဝ်ႈဢေႃႈ။
ၶဝ်ၸိူဝ်းဢၼ်ဝႆႈႁုၼ်ႇႁၢင်ႈသၢင်းထုဢၼ်ဢမ်ႇပွင်ႇလွင်ႈၵႃႈသင်ၼၼ်ႉ၊ ပဵၼ်ၶဝ်ၸိူဝ်းဢၼ်ဢမ်ႇမီးသဵတ်ႈၸႃႇ တေႃႇၸဝ်ႈႁဝ်းဢေႃႈ။
ၵူၺ်းၵႃႈ၊ၶႃႈၸဝ်ႈၸမ်ႉ၊တၵ်းပႃးတင်းသဵင်ယွင်ႈယေႃးၵျေးၸူးၸဝ်ႈသေလႄႈ သၢၵ်ႈလူႇၶိူင်ႈတၢင်းလူႇတီႈၸဝ်ႈႁဝ်းၸွမ်းၵႃႈၼင်ႇဢၼ်လႆႈဝႆႉၵတိတီႈၸဝ်ႈႁဝ်း ၼၼ်ႉဢေႃႈ။ တၢင်းဢၼ်ၵႄႇၶျွတ်ႈဢဝ်ၼၼ်ႉလႆႈပေႃႇဢွၵ်ႇပဵၼ်မႃးၵႃႈတီႈ ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ထႃႇဝရႃႉၽြႃး၊ ပၼ်ဢမိင်ႉတီႈ ပႃလူင်လႄႈ ပႃလူင်ၼၼ်ႉႁၢၵ်ႈၶၢႆး ယူဝ်းၼႃႉ၊ ဢွၵ်ႇဝႆႉ ၵႃႈၼိူဝ်ၵုင်းသေဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးၵႃႈတီႈ ယူဝ်းၼႃႉ၊ ထႅင်ႈဢေႃႈ။
မၼ်းၸဝ်ႈမီးဢမိင်ႉလႄႈဝႃႈၸမ်ႉ၊ “ၵႂႃႇၵႃႈတီႈဝဵင်းလူင် ၼိၼေႇဝူၺ်ႇ၊ သေလႄႈႁွင်ႉသေႃႇၸွမ်းၵႃႈၼင်ႇဢၼ်ၵဝ်သင်ႇလၢတ်ႈဝႆႉတီႈမႂ်းၼၼ်ႉတႃႉ၊” ဝႃႈၼင်ႇၼႆဢေႃႈ။-
ယူဝ်းၼႃႉ၊ ၵေႃႈ ထွမ်ႇဢဝ်ဢမိင်ႉ ထႃႇဝရႃႉၽြႃး၊ သေယဝ်ႉ၊ၵႂႃႇၵႃႈတီႈဝဵင်းလူင် ၼိၼေႇဝူၺ်ႇ၊ ဢေႃႈ။ ဝဵင်းၼၼ်ႉယႂ်ႇၵႂၢင်ႈၼႃႇလူင်လၢင်လႄႈမၼ်းလႆႈပႆတၢင်းႁိုင်သၢမ်ဝၼ်းဢေႃႈ။-
ယူဝ်းၼႃႉ၊ ၸႃႉတႄႇၶဝ်ႈၵႂႃႇၵႃႈၼႂ်းဝဵင်းလႄႈၸူဝ်ႈတႃႇၶၢဝ်းတၢင်းဝၼ်းၼိုင်ႈၼၼ်ႉမၼ်းႁွင်ႉသေႃႇႁွင်ႉပၢဝ်ႇလႄႈဝႃႈ၊ “ပေႃးပူၼ်ႉသေသီႇသိပ်းဝၼ်းယဝ်ႉၸိုင်၊ဝဵင်း ၼိၼေႇဝူၺ်ႇ၊ တၵ်းလႆႈၶၢမ်ႇတၢင်းဢၼ်ယႃႉလုလႅဝ်ဢေႃႈ၊” ဝႃႈၼင်ႇၼႆဢေႃႈ။
ၵူၼ်းဝဵင်း ၼိၼေႇဝူၺ်ႇ၊ ယုမ်ႇမၢတ်ႈဢမိင်ႉၽြႃးပဵၼ်ၸဝ်ႈလႄႈၶဝ်ႁွင်ႉသေႃႇႁႂ်ႈၵူၼ်းၵႃႈမီးၸဵမ်လဵၵ်ႉတေႃႇယႂ်ႇၵမ်တၢင်းၵိၼ်သေယဝ်ႉ၊ၼုင်ႈၶူဝ်းၼင်ပေႃသေႁဵတ်းၼႄလွင်ႈဢၼ်ၶဝ်ၶုၵ်းၸႂ်လႆႈမႆႈၸႂ်ဢပျတ်ႈၶဝ်ၼၼ်ႉဢေႃႈ။
မိူဝ်ႈဢၼ်ၶုၼ်ႁေႃၶမ်းမိူင်း ၼိၼေႇဝူၺ်ႇ၊ ငိၼ်းလွင်ႈတၢင်းၸိူဝ်းၼၼ်ႉၸိုင်၊မၼ်းလုၵ်ႉသေၵႃႈတီႈပလၢင်ႇၸဝ်ႈသေယဝ်ႉ၊ထွတ်ႇၶူဝ်းၼုင်ႈၸဝ်ႈသေလႄႈၼုင်ႈမႆၼင်ပေႃသေယဝ်ႉ၊ၼင်ႈယူႇၵႃႈၼႂ်းၵွင်တဝ်ႈဢေႃႈ။-
ၶုၼ်ႁေႃၶမ်းၵေႃႈပူင်ဢမိင်ႉၵႂႃႇၵႃႈတီႈၵူၼ်းဝဵင်း ၼိၼေႇဝူၺ်ႇ၊ လႄႈဝႃႈ၊ “ၼႆႉၸမ်ႉ၊ပဵၼ်ဢမိင်ႉၶုၼ်ႁေႃၶမ်းလႄႈမူးမၢတ်ႈၽွင်းမိူင်းဢေႃႈ။ ၽူႈလႂ်သေၵေႃႉသေၵူၼ်းတၵ်းတေဢမ်ႇလႆႈၵိၼ်တၢင်းၵိၼ်၊ၵူၼ်းသေဢမ်ႇဝႃႈ၊တူဝ်တရိၵ်ႈသၢၼ်ႇဢၼ်ပဵၼ်ဝူဝ်းလႂ်၊သူဝ်းလႂ်တၵ်းတေဢမ်ႇလႆႈၵိၼ်တၢင်းၵိၼ်လႄႈၼမ်ႉ၊ဝႃႈၼင်ႇၼႆၼၼ်ႉ၊ပဵၼ်ဢမိင်ႉၸဝ်ႈဢေႃႈ။-
ၵူၼ်းဢိၵ်ႇတင်းတရိၵ်ႈသၢၼ်ႇလႂ်ၵႃႈမီးတေလႆႈၼုင်ႈမႆၶူဝ်းၼင်ပေႃဢေႃႈ။ ၵူၼ်းၵူႈၵေႃႉတၵ်းလႆႈသူးတွင်းတီႈၽြႃးပဵၼ်ၸဝ်ႈၼႃႇၼႃႇသေယဝ်ႉ၊ႁႂ်ႈဢွၼ်ၵၼ်ဝႄႈပႅတ်ႈသဵၼ်ႈတၢင်းဢၼ်ႁၢႆႉမိူၵ်ႈဢၼ်ဢမ်ႇတြႃးလႄႈဢမုဢထမ်ႇမႃႉဢၼ်ၶဝ်လႆႈႁဵတ်းမႃးႁင်းၽႂ်ႁင်းမၼ်းၼၼ်ႉဢေႃႈ။-
ပေႃးႁဵတ်းၸိူဝ်ႉၼင်ႇၼၼ်ၸိုင်၊မၼ်းၸဝ်ႈၸၢင်ႈၶႄးတၵ်းပိၼ်ႇၸႂ်လႄႈမၼ်းၸဝ်ႈၸၢင်ႈၶႄးတၵ်းၵိုတ်းပႅတ်ႈတၢင်းၸႂ်မႆႈၶႂ်ႈၸႃႉမၼ်းၸဝ်ႈသေယဝ်ႉ၊ႁႂ်ႈႁဝ်းလႆႈလွတ်ႈသေတၢင်းတၢႆၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈႁၼ်လွင်ႈတၢင်းဢၼ်ၶဝ်ၸုၼ်ႉပႅတ်ႈတၢင်းၵမ်တၢင်းၵျၢင်ႉဢၼ်ႁၢႆႉမိူၵ်ႈၶဝ်ၼၼ်ႉလႄႈမၼ်းၸဝ်ႈပိၼ်ႇၸႂ်မၼ်းၸဝ်ႈသေယဝ်ႉ၊ၽေးတၢမ်ႇဢၼ်မၼ်းၸဝ်ႈဝႃႈတၵ်းပၼ်တီႈၶဝ်ၼၼ်ႉမၼ်းၸဝ်ႈယင်းဢမ်ႇပၼ်လႄႈယူႇဢေႃႈ။
ၵွပ်ႈပိူဝ်ႈလွင်ႈတၢင်းၼႆႉလႄႈ ယူဝ်းၼႃႉ၊ ၸႂ်ဢမ်ႇသႃႇလႄႈၸႂ်မႆႈၶႂ်ႈၸႃႉၼႃႇလူင်လၢင်ဢေႃႈ။
ၵွပ်ႈၼႆလႄႈမၼ်းသူးတွင်းလႄႈဝႃႈ၊ “ ထႃႇဝရႃႉၽြႃး၊ တီႈၶႃႈ။ မိူဝ်ႈဢၼ်ၶႃႈၸဝ်ႈယင်းမီးယူႇၵႃႈၼႂ်းမိူင်းၶႃႈၸဝ်ႈၼၼ်ႉၸိုင်၊ၶႃႈၸဝ်ႈလဝ်ႈလၢတ်ႈၸိူဝ်ႉၼင်ႇၼႆယဝ်ႉဢမ်ႇၸႂ်ႈတီႈၶႃႈႁိုဝ်း။ ပိူဝ်ႈၼႆလႄႈၶႃႈၸဝ်ႈႁိပ်ႈၼႅတ်ႈဢွၵ်ႇပၢႆႈၵႂႃႇၸူးမိူင်း သပဵၼ်ႇ၊ တီႈၶႃႈဢေႃႈ။ ၶႃႈၸဝ်ႈႁုလွင်ႈဢၼ်ၸဝ်ႈႁဝ်းပဵၼ်ၽြႃးဢၼ်ဢဵတ်းလူႁၵ်ႉပႅင်းလႄႈမီးၸႂ်ယႂ်ႇၸႂ်ယၢဝ်း၊ၸႂ်ၶႂ်ႈႁဵတ်းၵျေးၸူး၊ၸႂ်ဢၼ်ၶုၵ်းၸႂ်လႆႈမႆႈၸႂ်လူၺ်ႈတၢင်းဢၼ်တၵ်းပၼ်တၢမ်ႇၼၼ်ႉယူႇတီႈၶႃႈဢေႃႈ။-
ၵွပ်ႈပိူဝ်ႈဢၼ်ပဵၼ်ၸိူဝ်ႉၼင်ႇၼႆလႄႈၸဝ်ႈ ထႃႇဝရႃႉၽြႃး၊ တီႈၶႃႈ။ ၶႅၼ်းတေႃႈထွတ်ႇထူၺ်ႈဢဝ်ဢသၢၵ်ႈၶႃႈၸဝ်ႈသေၵမ်းၶႃႈ။ တၢင်းဢၼ်ၶႃႈၸဝ်ႈတၢႆၼၼ်ႉယဵင်ႈၶႅၼ်းတေလီသေတၢင်းဢၼ်ၶႃႈၸဝ်ႈဢသၢၵ်ႈလိပ်းၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၵေႃႈတွင်ႈထၢမ်မၼ်းလႄႈဝႃႈ၊ “မႂ်းထုၵ်ႇလီၸႂ်မႆႈၶႂ်ႈၸႃႉၼႃႇလူင်လၢင်ႁိုဝ်း၊” ဝႃႈၼင်ႇၼႆဢေႃႈ။
ယူဝ်းၼႃႉ၊ ၼၼ်ႉဢွၵ်ႇၵႂႃႇၼင်ႈယူႇၵႃႈတီႈတၢင်းၼွၵ်ႈဝဵင်းလႄႈမၼ်းႁဵတ်းသုမ်ႉထဵင်ပုၼ်ႈတၵ်းလိုဝ်ႈသဝ်းၵႃႈတႂ်ႈႁူမ်ႈၼၼ်ႉလႄႈပႂ်ႉတူၺ်းလွင်ႈဢၼ်တၵ်းပဵၼ်မႃးၸိူဝ်ႉၼင်ႇႁိုဝ်ၵႃႈတီႈဝဵင်း ၼိၼေႇဝူၺ်ႇ၊ ၼၼ်ႉဢေႃႈ။-
ထႃႇဝရႃႉၽြႃး၊ ၽြႃးပဵၼ်ၸဝ်ႈႁဵတ်းႁႂ်ႈတူၼ်ႈၵုင်ႈဢွၵ်ႇလႄႈယႂ်ႇမႃးႁူမ်ႇၵႃႈၼိူဝ်ႁူဝ် ယူဝ်းၼႃႉ၊ သေယဝ်ႉ၊ႁႂ်ႈၸႂ်မၼ်းလႆႈသၢၵ်ႈသႃႇၼၼ်ႉဢေႃႈ။ မိူဝ်ႈၼၼ်ႉ ယူဝ်းၼႃႉ၊ ၵေႃႈမီးၸႂ်ဢၼ်ၸူမ်းသိူဝ်းလႄႈထုၵ်ႇၸႂ်တူၼ်ႈၵုင်ႈၼၼ်ႉၼႃႇဢေႃႈ။-
ၼႂ်းဝၼ်းမိူဝ်ႈၽုၵ်ႈမိူဝ်ႈဢၼ်မိူင်းလႅင်းမႃးၼၼ်ႉမူင်ႈမႅင်းဢၼ်ၽြႃးပဵၼ်ၸဝ်ႈၸႂ်ႉမႃးၸိူဝ်းၼၼ်ႉၵေႃႈ ၶူပ်းၵိၼ်တူၼ်ႈၵုင်ႈၼၼ်ႉလႄႈတူၼ်ႈၵုင်ႈၼၼ်ႉႁဵဝ်ႇၸွပ်ႈၵႂႃႇဢေႃႈ။-
မိူဝ်ႈဢၼ်ၵၢင်ဝၼ်းဢွၵ်ႇမႃးၼၼ်ႉၽြႃးပဵၼ်ၸဝ်ႈပွႆႇၸႂ်ႉလူမ်းၽၢႆႇတၢင်းဝၼ်းဢွၵ်ႇဢၼ်မႆႈႁွၼ်ႉၼႃႇလူင်လၢင်၊ဢိၵ်ႇတင်းလႅတ်ႇဢၼ်မႆႈႁွၼ်ႉၼႃႇၼၼ်ႉထွင်ႇသႂ်ႇၵႃႈၼိူဝ်ႁူဝ် ယူဝ်းၼႃႉ၊ တေႃႇထိုင်ႁွတ်ႈမၼ်းပေႃးဢူၼ်ႈဢွၼ်ႇၵႂႃႇထၢၼ်ႈပေႃးၸမ်တၵ်းတၢႆလႄႈမၼ်းပွင်ႉမိုၼ်ႇပွင်ႉၶၢင်းလႄႈဝႃႈ၊ “ပုၼ်ႈၵဝ်ၼႆႉတၢင်းတၢႆၼၼ်ႉယဵင်ႈၶႅၼ်းလီၼႃႇသေတၢင်းဢၼ်ၵဝ်ဢသၢၵ်ႈလိပ်းယူႇၼႆႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃးပဵၼ်ၸဝ်ႈ၊ ၵေႃႈတွင်ႈထၢမ်တီႈ ယူဝ်းၼႃႉ၊ လႄႈဝႃႈ၊ “မႂ်းထုၵ်ႇလီၸႂ်မႆႈၶႂ်ႈၸႃႉတီႈတူၼ်ႈၵုင်ႈၼၼ်ႉၸိူဝ်ႉၼင်ႇႁိုဝ်၊” မိူဝ်ႈဢၼ်ဝႃႈၸိူဝ်ႉၼင်ႇၼႆၸိုင်၊ ယူဝ်းၼႃႉ၊ ၶိုၼ်းလဝ်ႈလၢတ်ႈလႄႈဝႃႈ၊ “ၶႃႈၸဝ်ႈထုၵ်ႇလီၸႂ်မႆႈၶႂ်ႈၸႃႉတေႃႇထိုင်ႁွတ်ႈထၢၼ်ႈပေႃးတၵ်းတၢႆတီႈၶႃႈယဝ်ႉ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၵေႃႈလၢတ်ႈလႄႈဝႃႈ၊ “မႂ်းမီးတၢင်းဢၼ်သေလၢႆတူၼ်ႈၵုင်ႈဢၼ်မႂ်းယင်းဢမ်ႇလႆႈဢွၵ်ႇႁႅင်းလႄႈလုမ်းလႃးႁႂ်ႈမၼ်းယႂ်ႇမႃးသုင်မႃး၊ဢၼ်ဢွၵ်ႇပဵၼ်မႃးၼႂ်းၶိုၼ်းလဵဝ်ၵူၺ်းသေလႄႈႁဵဝ်ႇၸွပ်ႈၵႂႃႇယဝ်ႉၼၼ်ႉလူင်ပႄႇ။
ၵဝ်ဢမ်ႇထုၵ်ႇလီသေလၢႆဢဵတ်းလူဝဵင်းလူင် ၼိၼေႇဝူၺ်ႇ၊ ဢၼ်မီးၵူၼ်းဢၼ်ဢမ်ႇႁုသၢႆႉႁုၶႂႃသႅၼ်ပၢႆသွင်မိုၼ်ႇ၊ဢိၵ်ႇတင်းတူဝ်တရိၵ်ႈသၢၼ်ႇဢၼ်ၼမ်ၵိုၼ်းၼႃႇၼၼ်ႉလိူဝ်တွၼ်းၼႃႇသေဢၼ်မႂ်းသေလၢႆတူၼ်ႈၵုင်ႈၼၼ်ႉႁိုဝ်း၊” ဝႃႈၼင်ႇၼႆဢေႃႈ။ ၵျၢမ်းပရေႃးၽႅတ်ႈယူဝ်းၼႃႉယဝ်ႉယဝ်ႉဢေႃႈ။
ပျႃႇတိၵ်ႈ ထႃႇဝရႃႉၽြႃး၊ ႁွတ်ႈမႃးတီႈ မိၶႃႇ၊ ၵူၼ်းဝၢၼ်ႈ မေႃႇရသႃႉ၊ ၼၼ်ႉၼႂ်းၸူဝ်ႈပၢၼ်ၶုၼ်လူင် ယူဝ်းထမ်ႇ၊ ၶုၼ်လူင် ဢႃႇၶတ်ႉ၊ ၶုၼ်လူင် ႁေႇၸၵိ၊ ၸိူဝ်းဢၼ်ပဵၼ်ၶုၼ်ႁေႃၶမ်းမိူင်း ယုတႃႉ၊ ၸိူဝ်းၼၼ်ႉဢေႃႈ။ ထႃႇဝရႃႉၽြႃး၊ ၼႄပျႃးႁႂ်ႈ မိၶႃႇ၊ ႁုႁၼ်လွင်ႈဝဵင်း သမႃႇရိ၊ ဢိၵ်ႇတင်းဝဵင်း ယေႇရုသလႅမ်ႇ၊ ၼၼ်ႉဢေႃႈ။
မဵဝ်းၵူၼ်းၵူႈၸိူဝ်ႉၵူႈၶိူဝ်းတင်းလၢႆၶဝ်႟။ ဢွၼ်ၵၼ်ထွမ်ႇငိၼ်းတႃႉ။ လိၼ်မိူင်းဢိၵ်ႇတင်းၵႃႈဢၼ်မီးၵႃႈၼႂ်းမၼ်းၶဝ်႟။ ဢွၼ်ၵၼ်ထွမ်ႇတႃႉ။ ႁႂ်ႈ ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး၊ ၼၼ်ႉယူႇၵႃႈၼႂ်းၵျွင်းပိၵ်ႈမၢၼ်ႇဢၼ်မူတ်းၸၢင်ႇမၼ်းၸဝ်ႈသေလႄႈ ၶၢမ်ႇသၢၵ်ႈသေႇဢၼ်ၶတ်းၵၼ်တင်းသူၼၼ်ႉသေၵမ်းလူၺ်ႈ။
တူၺ်းလူး။ ထႃႇဝရႃႉၽြႃး၊ တၵ်းဢွၵ်ႇသေၵႃႈၼႂ်းထႃႇၼႃႉ၊ တီႈဢၼ်မၼ်းၸဝ်ႈၵိင်းဝၢပ်ႈယူႇၼၼ်ႉလူင်းမႃးလႄႈ ယဵပ်ႇယမ်ႈၵႃႈတီႈလိၼ်မိူင်းဢၼ်သုင် တင်းလၢႆဢေႃႈ။
လွႆတင်းလၢႆၸိုမ်းပဵၼ်ၼမ်ႉၵႂႃႇၵႃႈတီႈတႂ်ႈမၼ်းၸဝ်ႈလႄႈ ၶူင်ႈႁူၺ်ႈပၢင်ႇႁူၺ်ႈတင်းလၢႆတၵ်းတႅၵ်ႇဢႃႈၵႂႃႇ မိူၼ်ၸိူဝ်ႉၼင်ႇၶီႈၽိုင်ႈၵႃႈတီႈၽၢႆႇၼႃႈၽႆးဢိၵ်ႇတင်း ၸိူဝ်ႉၼင်ႇၼမ်ႉဢၼ်တူၵ်းလူင်းသေၵႃႈတီႈဢၼ်သုင်ၸၼ်းမႃးၼၼ်ႉဢေႃႈ။
လွင်ႈတၢင်းၵႃႈမီးၼႆႉပဵၼ်ၵွပ်ႈပိူဝ်ႈတၢင်းဢၼ်ၸိူဝ်ႉၶိူဝ်း ယႃႇၵုပ်ႈ၊ ပူၼ်ႉလိူဝ် ဢိၵ်ႇတင်းတၢင်းဢၼ်ၵူၼ်းမဵဝ်း ဢိသရေး၊ ၽိတ်းပိူင်ႈၼၼ်ႉဢေႃႈ။ တၢင်းဢၼ်ၸိူဝ်ႉၶိူဝ်း ယႃႇၵုပ်ႈ၊ ပူၼ်ႉလိူဝ်ၸမ်ႉ၊ပဵၼ်လွင်ႈၵႃႈသင်၊ပဵၼ်လွင်ႈဝဵင်း သမႃႇရိ၊ ဢမ်ႇၸႂ်ႈႁိုဝ်း။ ထႃႇၼႃႉတီႈသုင်တီႈဢၼ်ၶဝ်ဝႆႈသႃႁုၼ်ႇႁၢင်ႈသၢင်းထုၵႃႈၼႂ်းမိူင်း ယုတႃႉ၊ ၼၼ်ႉၸမ်ႉ၊ပဵၼ်ၵႃႈတီႈလႂ်၊ပဵၼ်ဝဵင်း ယေႇရုသလႅမ်ႇ၊ ဢမ်ႇၸႂ်ႈႁိုဝ်း။-
ပိူဝ်ႈၼႆလႄႈၵဝ်တၵ်းႁႂ်ႈဝဵင်း သမႃႇရိ၊ ပဵၼ်ၸိူဝ်ႉၼင်ႇၵွင်ၽုၼ်ႇၵွင်လိၼ်ၵႃႈၼႂ်းပၢင်ႇတူင်ႈၼႃး၊ဢိၵ်ႇတင်းၸိူဝ်ႉၼင်ႇတီႈဢၼ်ၽုၵ်ႇသူၼ်မၢၵ်ႇၸပိတ်ႉၼၼ်ႉဢေႃႈ။ ၵဝ်တၵ်းဢဝ်မၢၵ်ႇႁိၼ်လမ်းဝဵင်းၸိူဝ်းၼၼ်ႉထွၵ်ႇပႅတ်ႈၵႃႈၼႂ်းၶူင်ႈႁူၺ်ႈလႄႈၽုၺ်ႇပိုတ်ႇၼႄပျႃးႁၢၵ်ႈလမ်းဝဵင်းဢေႃႈ။-
ႁုၼ်ႇႁၢင်ႈသၢင်းထုမၼ်းၵႃႈမီးတၵ်းလႆႈၶၢမ်ႇတၢင်းဢၼ်ႁၵ်းႁိၵ်းပႅတ်ႈလႄႈၵူႈၸိူဝ်ႉၵူႈမဵဝ်းဢၼ်ပဵၼ်ၵႃႈၶၼ်ဢၼ်မၼ်းႁဵတ်းမႄႈမွၵ်ႇယႃႈလႄႈလႆႈမႃးၵႃႈမီးၼၼ်ႉတၵ်းလႆႈၶၢမ်ႇတၢင်းဢၼ်ဢဝ်တုတ်ႇၽႆးပႅတ်ႈဢေႃႈ။ ၽြႃးမၼ်းဢၼ်ဢမ်ႇၸိုဝ်ႈဢမ်ႇၸႂ်ႈၵႃႈမီးၼၼ်ႉၵဝ်တၵ်းယႃႉၽဵဝ်ႈပႅတ်ႈဢေႃႈ။ ၵွပ်ႈပိူဝ်ႈၵႃႈၶၼ်တၢင်းဢၼ်မၼ်းႁဵတ်းမႄႈမွၵ်ႇယႃႈၼၼ်ႉမၼ်းလႆႈၸုႁွမ်သိမ်းပႅင်းဢုၵ်ႉၸႃႇဝႆႉလႄႈဢုၵ်ႉၸႃႇၸိူဝ်းၼၼ်ႉရၢၼ်ႇသူႇတၵ်းလႆႈၶိုၼ်းသိမ်းဢဝ်ၵႂႃႇႁႂ်ႈလႆႈပဵၼ်ၵႃႈၶၼ်မႄႈမွၵ်ႇယႃႈတၢင်ႇတီႈထႅင်ႈဢေႃႈ။
ၵွပ်ႈပိူဝ်ႈလွင်ႈတၢင်းၼၼ်ႉလႄႈၵဝ်တၵ်းႁွင်ႉႁႆႈလႄႈပွင်ႉၶၢင်းဢေႃႈ။ ၵဝ်တၵ်းပႆၵႂႃႇမႃးလူၺ်ႈတိၼ်လၢႆလႄႈယူႇတူဝ်ပူၺ်ဢေႃႈ။ ၵဝ်တၵ်းႁွၼ်မိူၼ်ၸိူဝ်ႉၼင်ႇမႃလိၼ်လႄႈဢိုတ်ႇႁွင်ႉမိူၼ်ၸိူဝ်ႉၼင်ႇၼူၵ်ႉၵလႃႇဢုၵ်ႈဢေႃႈ။-
တၢမ်ႇတၢင်းၸဵပ်းတၢင်းသႅပ်ႇဢၼ်ဝဵင်း သမႃႇရိ၊ လႆႈၶၢမ်ႇၼၼ်ႉဢမ်ႇႁၢႆလႆႈ။ တၢမ်ႇၼၼ်ႉၶၢမ်ႇၵႂႃႇတေႃႇထိုင်ႁွတ်ႈမိူင်း ယုတႃႉ၊ ဢေႃႈ။ တၢမ်ႇၼၼ်ႉႁွတ်ႈၵႂႃႇၵႃႈတီႈၽၵ်းတူတီႈယူႇၵူၼ်းၵဝ်တင်းလၢႆဢၼ်ပဵၼ်ဝဵင်း ယေႇရုသလႅမ်ႇ၊ ၼၼ်ႉယဝ်ႉ။
ယႃႇပေဢွၼ်ၵၼ်ဢဝ်လွင်ႈမၼ်းမွၵ်ႇလၢတ်ႈတီႈဝဵင်း ၵႃႇသႃႉ၊ ယႃႇပေဢွၼ်ၵၼ်ႁွင်ႉႁႆႈလႃးလႃး။ ဢဝ်တူဝ်သူၵိင်ႈၵိူၵ်ႇယူႇၵႃႈၼႂ်းမုၼ်ႈလိၼ်ၵႃႈတီႈဝဵင်း ပႅတ်ႉလေႇဢၽရႃႉ၊ တႃႉ။-
ၶဝ်ၸိူဝ်းဢၼ်ယူႇသဝ်းၵႃႈၼႂ်းဝဵင်း သၽိရႃႉ၊ ႟။ မီးတၢင်းဢၼ်ယူႇတူဝ်ပူၺ်၊တၢင်းဢၼ်ဢူၵ်းဢၢႆသေလႄႈၵႂႃႇတႃႉ။ ၶဝ်ၸိူဝ်းဢၼ်ယူႇသဝ်းၵႃႈၼႂ်းဝဵင်း ၸႃႇၼၼ်ႇ၊ ၼၼ်ႉဢမ်ႇလႆႈဢွၵ်ႇၵႂႃႇ။ တၢင်းဢၼ်ႁွင်ႉႁႆႈပွင်ႉၶၢင်းၼႂ်းဝဵင်း ပႅတ်ႉဢေႇၸေႇလႃႉ၊ ၼၼ်ႉႁႂ်ႈသူႁုဝႃႈ၊ၵႃႈတီႈၼၼ်ႈဢမ်ႇမီးတီႈဢၼ်သွၼ်ႈပိုင်ႈယဝ်ႉဢေႃႈ။-
ၶဝ်ၸိူဝ်းဢၼ်ယူႇသဝ်းၵႃႈၼႂ်းဝဵင်း မႃႇရုတ်ႈ၊ ၵေႃႈမႆႈၸႂ်လႄႈမုင်ႈမွင်းလွင်ႈတၢင်းဢၼ်ၸွႆႈဢၼ်ထႅမ်ယူႇဢေႃႈ။ လွင်ႈမၼ်းၸမ်ႉ၊ၽေးတၢမ်ႇလုၵ်ႉသေၵႃႈတီႈ ထႃႇဝရႃႉၽြႃး၊ ၼၼ်ႉလူင်းမႃးႁွတ်ႈထိုင်ၵႃႈတီႈၽၵ်းတူဝဵင်း ယေႇရုသလႅမ်ႇ၊ ယဝ်ႉ။-
ၶဝ်ၸိူဝ်းဢၼ်ယူႇသဝ်းၵႃႈၼႂ်းဝဵင်း လႃႇၶိသႃႉ၊ ႟။ ဢဝ်မႃႉဢၼ်ၶၼ်ၽႂ်းၼၼ်ႉႁၢင်ႈလေႃႉရထႃးတႃႉ။ မႂ်းပဵၼ်လွင်ႈဢၼ်ႁဵတ်းႁႂ်ႈၵူၼ်းဝဵင်း ယေႇရုသလႅမ်ႇ၊ မီးဢပျတ်ႈၼၼ်ႉလႄႈပိူၼ်ႈလႆႈႁူပ်ႉထူပ်းတၢင်းဢၼ်ၵူၼ်းမဵဝ်း ဢိသရေး၊ ပူၼ်ႉလိူဝ်ၸိူဝ်းၼၼ်ႉၵႃႈၼႂ်းမႂ်းဢမၢၼ်ႇၶၼ်ပဵၼ်ယဝ်ႉ။-
ပိူဝ်ႈၼႆလႄႈမႂ်းတၵ်းလႆႈပၼ်လၢၵ်ႈသွင်ႇဢၼ်ၽၢတ်ႇယၢၼ်ၵၼ်ၼၼ်ႉတီႈဝဵင်း မေႃးရသိတ်ႉၵႃႇသႃႉ၊ ၼၼ်ႉဢေႃႈ။ ၵူၼ်းဝဵင်း ဢႃႇၶၸိပ်ႉ၊ ၸိူဝ်းၼၼ်ႉတၵ်းပႅတ်ႉလႅၼ်ၶုၼ်ႁေႃၶမ်းမိူင်း ဢိသရေး၊ ဢေႃႈ။
ၵူၼ်းၸိူဝ်းဢၼ်ယူႇသဝ်းၵႃႈၼႂ်းဝဵင်း မရေးသႃႉ၊ ႟။ ၵဝ်တၵ်းႁွင်ႉဢဝ်ၵေႃႉဢၼ်ပႄႉၼႅင်ႇမႂ်းၼၼ်ႉမႃးတီႈမႂ်းလႄႈၶဝ်ၸိူဝ်းဢၼ်ပဵၼ်မုၼ်ၽုင်းမိူင်း ဢိသရေး၊ ၼၼ်ႉတၵ်းၵႂႃႇသွၼ်ႈပိုင်ႈၵႃႈၼႂ်းထမ်ႈ ဢတုလမ်ႇ၊ ဢေႃႈ။-
ထႃႁူဝ်မႂ်းႁႂ်ႈၵဵင်ႈႁႂ်ႈလႆႈၼႄပျႃးလွင်ႈတၢင်းဢၼ်မႆႈၸႂ်ပုၼ်ႈလုၵ်ႈလၢင်းဢၼ်မႂ်းႁၵ်ႉပႅင်းၼၼ်ႉတႃႉ။ ႁဵတ်းတၢင်းဢၼ်ထႃႁူဝ်ႁႂ်ႈၵဵင်ႈမိူၼ်ၸိူဝ်ႉၼင်ႇၼူၵ်ႉလၢင်းတႃႉၼၼ်ႉယူႇတႃႉ။ လွင်ႈမၼ်းၸမ်ႉ၊လုၵ်ႈလၢင်းမႂ်းၸိူဝ်းၼၼ်ႉလႆႈၶၢမ်ႇတၢင်းဢၼ်သိမ်းဢဝ်ၵႂႃႇသေၵႃႈတီႈမႂ်းယဝ်ႉဢေႃႈ။
ၶဝ်ၸိူဝ်းဢၼ်ၼွၼ်းလႄႈၵျၢမ်ႇပွင်တၢင်းၵျၢမ်ႇတၢင်းပွင်ဢၼ်ႁၢႆႉဢၼ်မိူၵ်ႈယူႇၵႃႈၼိူဝ်ၵူႇတီႈၼွၼ်းၶဝ်ၼၼ်ႉမီးဢႃႉမၢင်ႇၵလႃႇဢေႃႈ။ မိူဝ်ႈဢၼ်မိူင်းလႅင်းမႃးၼၼ်ႉၸိုင်၊ၶဝ်ၸၢင်ႈႁဵတ်းတၢင်းဢၼ်ႁၢႆႉမိူၵ်ႈၵွပ်ႈပိူဝ်ႈႁႅင်းတၼ်းၶူဝ်းမီးၵႃႈၼႂ်းမိုဝ်းၶဝ်ၼၼ်ႉဢေႃႈ။-
ၶဝ်ၸႂ်ၸပ်းၸႂ်ၸွႆးႁႆႈၼႃးလႄႈႁဵတ်းဢထမ်ႇမႃႉသိမ်းဢဝ်ဢေႃႈ။ ႁိူၼ်းတင်းလၢႆၵေႃႈၶဝ်သိမ်းဢဝ်ဢေႃႈ။ ၶဝ်ၼိၵ်ႈၸၢၵ်ႈငႅၼ်းသႄးၸဝ်ႈႁိူၼ်းလႄႈႁိမ်ဢဝ်ႁိုၼ်းမၼ်း၊ဢိၵ်ႇတင်းဢမူၺ်ႇဢုၵ်ႉၸႃႇမၼ်းဢေႃႈ။
ပိူဝ်ႈၼႆလႄႈ ထႃႇဝရႃႉၽြႃး၊ မီးဢမိင်ႉၸမ်ႉ၊ၵဝ်တၵ်းယူႇၶတ်းတႃႉၵၼ်တင်းၵူၼ်းမဵဝ်းၸိူဝ်ႉၶိူဝ်းၼႆႉလႄႈၵျၢမ်ႇပွင်ႁႂ်ႈထူပ်းၽေးတၢမ်ႇဢၼ်သူဢမ်ႇလွတ်ႈလႆႈၼၼ်ႉဢေႃႈ။ သူတေဢမ်ႇလႆႈငွၵ်းႁူဝ်ဢုပ်ႇဝၢဝ်းထႅင်ႈယဝ်ႉ။ ပိူဝ်ႈဢၼ်တၵ်းပဵၼ်ၶိင်ႇၵႃႇလႃႉဢၼ်ႁၢႆႉၼၼ်ႉဢေႃႈ။-
ၶိင်ႇမိုဝ်ႉဝၼ်းၼၼ်ႉၶဝ်တၵ်းႁဵတ်းၵႂၢမ်းလူၺ်ႈလွင်ႈၽေးတၢမ်ႇဢၼ်သူၶၢမ်ႇၼၼ်ႉသေလႄႈသူပွင်ႉၶၢင်းပွင်ႉမိုၼ်ႇႁႅင်းယႂ်ႇၼႃႇလူင်လၢင်လႄႈဝႃႈၸမ်ႉ၊ “ႁဝ်းၼႆႉလုလႅဝ်ပႅတ်ႈမူတ်းမူတ်းသဵင်ႈသဵင်ႈယဝ်ႉ။ “မၼ်းၸဝ်ႈလႅၵ်ႈလၢႆႈဢဝ်ဢမူၺ်ႇလိၼ်ၵူၼ်းမဵဝ်းၵဝ်တင်းလၢႆလႄႈ ယုၵ်ႉသိမ်းဢဝ်သေၵႃႈၼႂ်းမိုဝ်းၵဝ်ၵႂႃႇယဝ်ႉ။ မၼ်းၸဝ်ႈဢဝ်တူင်ႈၼႃးႁဝ်း၊ ဢဝ်ပၼ်ၶဝ်ၸိူဝ်းဢၼ်တိဢဝ်ႁဝ်း ၼၼ်ႉယဝ်ႉ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈသူတၵ်းဢမ်ႇလႆႈမီးၵေႃႉဢၼ်တူၵ်းၸႃႇၵွၵ်ႈသေလႄႈဢဝ်ၸိူၵ်ႈၶဵင်ႈလႄႈတႅၵ်ႈၶိုပ်ႈတီႈလိၼ်မႅင်ႇၵၼ်ၵႃႈၼႂ်းပရိၵ်ႈသၢတ်ႈ ထႃႇဝရႃႉၽြႃး၊
ၶဝ်ႁေႃးလၢတ်ႈလႄႈဝႃႈ၊ “ယႃႇပေႁေႃးလၢတ်ႈ။ ယႃႇပေႁႂ်ႈၽူႈၼိုင်ႈၽူႈလႂ်ႁေႃးလၢတ်ႈလွင်ႈတၢင်းၸိူဝ်းၼၼ်ႉ၊တၢင်းဢၼ်သႄႉဢၼ်သွမ်းတၵ်းဢမ်ႇလႆႈတူၵ်းႁွတ်ႈတီႈႁဝ်းဢေႃႈ၊” ဝႃႈၼင်ႇၼႆဢေႃႈ။-
ၸိူဝ်ႉၶိူဝ်း ယႃႇၵုပ်ႈ၊ ၼႆႉ႟။ ဢၼ်ၼႆႉထုၵ်ႇလီလၢတ်ႈႁိုဝ်း၊တၢင်းဢၼ် ထႃႇဝရႃႉၽြႃး၊ ယိူၼ်ႉၶၢမ်ႇၼႆႉသုတ်းတိူၵ်ႉယဝ်ႉႁိုဝ်း။ လွင်ႈတၢင်းၸိူဝ်းၼႆႉပဵၼ်တြႃးဢမ်ႇၸႂ်ႈႁိုဝ်း။ ၵႂၢမ်းၵဝ်ၸၢင်ႈပၼ်ဢၵျူဝ်းတီႈၵေႃႉဢၼ်ၵမ်ၵျၢင်ႉသိုဝ်ႈသိုဝ်ႈတေႃႇတေႃႇၼၼ်ႉဢမ်ႇၸႂ်ႈႁိုဝ်း။
ၵူၺ်းၵႃႈ၊သူဢွၼ်ၵၼ်လုၵ်ႉလႄႈၶတ်းတႃႉၵၼ်တင်းၵူၼ်းၵဝ်မိူၼ်ၸိူဝ်ႉၼင်ႇရၢၼ်ႇသူႇဢေႃႈ။ သူဢွၼ်ၵၼ်ႁိမ်ဢဝ်ထွတ်ႇဢဝ်ၶူဝ်းၼုင်ႈၶဝ်ၸိူဝ်းဢၼ်ၵႂႃႇတႃႈပႆတၢင်းလူင်ႈလီလွတ်ႈလီဢၼ်ဢမ်ႇမီးဢလူဝ်ႇၶႂ်ႈတိုၵ်းသိုၵ်းၼၼ်ႉဢေႃႈ။-
သူႁေႃႈမႄႈယိင်းၵူၼ်းၵဝ်တင်းလၢႆဢွၵ်ႇသေၵႃႈၼႂ်းႁိူၼ်းတီႈယူႇဢၼ်ၶဝ်မိုတ်ႈၶဝ်ပျေႃႇၼၼ်ႉလႄႈၼုၵ်ႈဢဝ်မုၼ်ၽုင်းၵဝ်ဢွၵ်ႇသေၵႃႈတီႈလုၵ်ႈၶဝ်လၢင်းၶဝ်ၼၼ်ႉယူႇသေႇသေႇဢေႃႈ။-
ဢွၼ်ၵၼ်လုၵ်ႉလႄႈၵႂႃႇတႃႉ။ မိူင်းၼႆႉပဵၼ်တီႈဢၼ်သူၼိမ်ၸႂ်ၼိမ်ၶေႃးယူႇလီလီငၢမ်းငၢမ်းဢမ်ႇၸႂ်ႈ။ လွင်ႈမၼ်းၸမ်ႉ၊ၵႃႈတီႈၼႆႈၵွပ်ႈပိူဝ်ႈဢၼ်ပဵၼ်ဢၼ်ၵူဝ်ႈၵိူၵ်ႇလႄႈတၵ်းလႆႈလုလႆႈလႅဝ်လူၺ်ႈတၢင်းဢၼ်လုလႅဝ်ဢၼ်ယႂ်ႇၼႃႇဢေႃႈ။
ပေႃးၵေႃႉဢၼ်ၸွမ်းသၽေႃးတူဝ်ၸဝ်ႈၵဝ်ႇသေလႄႈၸႂ်ႉၵႂၢမ်းမုသႃႇလႄႈလၢတ်ႈဝႃႈ၊ “ၵဝ်တၵ်းႁဵတ်းပရေႃးၽႅတ်ႈလႄႈႁေႃးလၢတ်ႈလွင်ႈၼမ်ႉမၢၵ်ႇၸပိတ်ႉ၊ဢိၵ်ႇတင်းၼမ်ႉလဝ်ႈဢေႃႈ၊” ဝႃႈၼင်ႇၼႆၸိုင်၊ၵေႃႉၼၼ်ႉတၵ်းလႆႈပဵၼ်ပရေႃးၽႅတ်ႈပုၼ်ႈၵူၼ်းတင်းလၢႆၸိူဝ်းၼၼ်ႉဢေႃႈ။
ၸိူဝ်ႉၶိူဝ်း ယႃႇၵုပ်ႈ၊ ႟။ ၵဝ်တၵ်းႁႂ်ႈၵူၼ်းမဵဝ်းမႂ်းၵႃႈမီးၼၼ်ႉၸုတုမ်ၵၼ်လႄႈႁႂ်ႈၵူၼ်းမဵဝ်း ဢိသရေး၊ ဢၼ်ယင်းၵိုတ်းယင်းၵျၢၼ်ႇၸိူဝ်းၼၼ်ႉပဵၼ်မုၵ်ႉပဵၼ်ၸိူဝ်းဢမၢၼ်ႇၶၼ်ပဵၼ်ဢေႃႈ။ ၵဝ်တၵ်းဢဝ်ၶဝ်ၸုၵၼ်တုမ်ၵၼ်ဝႆႉမိူၼ်ၸိူဝ်ႉၼင်ႇသူဝ်းဢၼ်ယူႇၼႂ်းၶွၵ်ႈ၊မိူၼ်ၸိူဝ်ႉၼင်ႇၽုင်သူဝ်းဢၼ်ယူႇၵႃႈၼႂ်းတီႈဢၼ်ၶဝ်ယၢမ်ႈၵိၼ်ယူႇသေႇသေႇၼၼ်ႉလႄႈတၵ်းပဵၼ်သဵင်ယႂ်ႇသဵင်လူင်ၵွပ်ႈပိူဝ်ႈၵူၼ်းၼမ်ၼႃႇၼၼ်ႉဢေႃႈ။
ၽြႃးပဵၼ်ၸဝ်ႈတၵ်းၽုၺ်ႇတၢင်းပၼ်ၶဝ်လႄႈဢွၼ်ႁူဝ်ၶဝ်ဢွၵ်ႇသေၵႃႈတီႈတၢင်းဢၼ်လႆႈၶၢမ်ႇသိမ်းဢဝ်ဝႆႉၼၼ်ႉ၊ၶဝ်တၵ်းၽၢင်ႈၽၵ်းတူဝဵင်းသေယဝ်ႉ၊ဢွၵ်ႇၵႂႃႇလွတ်ႈလွတ်ႈလႅဝ်းလႅဝ်းဢေႃႈ။ ထႃႇဝရႃႉၽြႃး၊ ၽူႈဢၼ်ပဵၼ်ၶုၼ်ႁေႃၶမ်းၶဝ်တၵ်းဢွၼ်ႁူဝ်ၶဝ်ဢွၵ်ႇၵႂႃႇဢေႃႈ။
ၵဝ်ဝႃႈၸမ်ႉ၊သူၸိူဝ်းဢၼ်ပဵၼ်ငဝ်ႈပဵၼ်ႁူဝ်ၸိူဝ်ႉၶိူဝ်း ယႃႇၵုပ်ႈ၊ ၶဝ်႟။ သူၸိူဝ်းဢၼ်ဢုပ်ႉပိူင်ႇၵူၼ်းမဵဝ်း ဢိသရေး၊ ၶဝ်႟။ ဢွၼ်ၵၼ်ထွမ်ႇငိၼ်းသေၵမ်း။ သူထုၵ်ႇလီႁုၸႅင်ႈလွင်ႈတၢင်းဢၼ်ၸီႇယၢင်ႇၸွမ်းၼင်ႇတြႃးၼၼ်ႉဢမ်ႇၸႂ်ႈႁိုဝ်း။-
သူပဵၼ်ၶဝ်ၸိူဝ်းဢၼ်ၸင်းတၢင်းဢၼ်လီဢၼ်ငၢမ်းလႄႈထုၵ်ႇၸႂ်ၵျိူၵ်ႈၸႂ်တၢင်းဢၼ်ႁၢႆႉဢၼ်ႁုၵ်း၊ဢိၵ်ႇတင်းသိၵ်ႇၼင်ၵူၼ်းၵဝ်လႄႈဢဝ်ၼိူဝ်ႉၵႃႈတီႈလုပ်ႇၶဝ်။-
ၵိၼ်ၼိူဝ်ႉၵူၼ်းၵဝ်တင်းလၢႆယူႇ၊သိၵ်ႇလွၵ်ႈၼင်ၶဝ်ယူႇ၊ႁၵ်းလုပ်ႇႁၵ်းလဝ်းၶဝ်ပဵၼ်ပွတ်းပဵၼ်ပွတ်းယူႇ၊ၽၵ်ႉလုပ်ႇၽၵ်ႉၼိူဝ်ႉၶဝ်မိူၼ်ၸိူဝ်ႉၼင်ႇပုၼ်ႈမေႃႈၽၵ်းတေတူမ်ႈတေႁုင်ၼၼ်ႉယူႇဢေႃႈ။-
မိူဝ်ႈၼၼ်ႉပိၵ်ႉသမ်ႉသူသႅၼ်ႇႁွင်ႉႁႃ ထႃႇဝရႃႉၽြႃး၊ သေၵေႃႈ၊မၼ်းၸဝ်ႈတၵ်းဢမ်ႇဢိူဝ်။ ၵွပ်ႈပိူဝ်ႈသူႁဵတ်းတုၸရိူၵ်ႈဢပျတ်ႈလႄႈၼႂ်းၶိင်ႇမိူဝ်ႈၼၼ်ႉမၼ်းၸဝ်ႈတၵ်းဝၢႆႇၼႃႈပႅတ်ႈသေၵႃႈတီႈသူဢေႃႈ။
ထႃႇဝရႃႉၽြႃး၊ ဢဝ်လွင်ႈပရေႃးၽႅတ်ႈဢၼ်ႁႂ်ႈၵူၼ်းၵဝ်တင်းလၢႆၽိတ်းပိူင်ႈယူႇလႄႈ၊ႁွင်ႉပၢဝ်ႇႁွင်ႉသေႃႇၼႂ်းမိူဝ်ႈဢၼ်ၶဝ်လႆႈသေၸိူဝ်ႉသေပိူင်လႄႈဝႃႈ၊ “တၵ်းမီးတၢင်းဢၼ်ၼိမ်ဢၼ်လီယဝ်ႉ၊” ဝႃႈၼင်ႇၼႆယူႇ၊ၵူၺ်းၵႃႈ၊ၶဝ်မႄးႁႅၼ်းႁႂ်ႈလႆႈတိုၵ်းတေႃးၵူၼ်းၸိူဝ်းဢၼ်ဢမ်ႇႁဵတ်းလဵင်ႉႁဵတ်းလူတီႈၶဝ်ၸိူဝ်းၼၼ်ႉသေလႄႈ ထႃႇဝရႃႉၽြႃး၊ မီးဢမိင်ႉၸမ်ႉ၊-
“သူတၵ်းႁွတ်ႈထိုင်ၶိင်ႇၵၢင်ၶိုၼ်းႁႂ်ႈထၢၼ်ႈပေႃးဢမ်ႇလႆႈႁၼ်ရူႇပႃႇရူင်ႇ၊တၵ်းပဵၼ်ဢၼ်လပ်းသိင်ႇတီႈသူထၢၼ်ႈပေႃးတၵ်းဢမ်ႇမီးပျႃႇတိၵ်ႈ၊ၵၢင်ဝၼ်းတၵ်းတူၵ်းႁၢႆသေၵႃႈတီႈပရေႃးၽႅတ်ႈတင်းလၢႆလႄႈၶိင်ႇၵၢင်ဝၼ်းၵေႃႈဢၼ်လပ်းသိင်ႇတၵ်းမုင်းႁူမ်ႇၶဝ်ဢေႃႈ။-
မိူဝ်ႈၼၼ်ႉၶဝ်ၸိူဝ်းဢၼ်ႁူပွင်ႇတႃလႅင်းၼၼ်ႉတၵ်းသရေႇလုလႄႈၶဝ်ၸိူဝ်းဢၼ်ႁေႃးလၢတ်ႈလွင်ႈဝၼ်းမိူဝ်းၼႃႈၼၼ်ႉတၵ်းဢူၵ်းဢၢႆဢေႃႈ။ ၵွပ်ႈပိူဝ်ႈဢၼ်ၽြႃးပဵၼ်ၸဝ်ႈဢမ်ႇဢိူဝ်ၶဝ်လႄႈၶဝ်တင်းသဵင်ႈတင်းလူင်တၵ်းတူမ်းသူပ်းၶဝ်ယူႇဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ၵဝ်ၸမ်ႉ၊ပျေႉၸုမ်ႇဝႆႉတင်းႁႅင်းတၼ်းၶူဝ်း၊ပျေႉၸုမ်ႇဝႆႉတင်းဝိၺိၺ်ႇ ထႃႇဝရႃႉၽြႃး၊ ဢိၵ်ႇတင်းတၢင်းၵတ်ႉတၢင်းၶၼ်ဢၼ်သိုဝ်ႈတြႃး၊တၢင်းၵတ်ႉတၢင်းၶၼ်ဢၼ်ႁဵတ်းႁႂ်ႈလႆႈၽုၺ်ႇဢွၵ်ႇၼႄပျႃးတၢင်းဢၼ်ၸိူဝ်ႉၶိူဝ်း ယႃႇၵုပ်ႈ၊ ပူၼ်ႉလိူဝ်၊တၢင်းဢၼ်ၵူၼ်းမဵဝ်း ဢိသရေး၊ ၽိတ်းပိူင်ႈၼၼ်ႉဢေႃႈ။-
သူၸိူဝ်းဢၼ်ဢုပ်ႉပိူင်ႇၸိူဝ်ႉၶိူဝ်း ယႃႇၵုပ်ႈ၊ လႄႈၵူၼ်းဢၼ်ပဵၼ်ငဝ်ႈပဵၼ်ႁူဝ်ၵူၼ်းမဵဝ်း ဢိသရေး၊ ဢၼ်လီႁင်ႈဢဵတ်ႇသဵတ်ႇတၢင်းဢၼ်ၸီႇယၢင်ႇသိုဝ်ႈသိုဝ်ႈတေႃႇတေႃႇလႄႈယႃႉတၢင်းဢၼ်ႁဵတ်းၸွမ်းၼင်ႇတြႃးၼၼ်ႉပႅတ်ႈယူႇ၊-
ၶဝ်ၸိူဝ်းဢၼ်တႄႇႁဵတ်းလုမ်းလႃးဝဵင်း ၸိဢုၼ်ႇ၊ လူၺ်ႈတၢင်းဢၼ်ဢဝ်ၵူၼ်းတၢႆ၊ၶဝ်ၸိူဝ်းဢၼ်တႄႇႁဵတ်းလုမ်းလႃးဝဵင်း ယေႇရုသလႅမ်ႇ၊ လူၺ်ႈတၢင်းဢၼ်ၽိတ်းဢၼ်ပိူင်ႈၼၼ်ႉၶဝ်႟။ ဢွၼ်ၵၼ်ထွမ်ႇငိၼ်းသေၵမ်း။-
ၶဝ်ၸိူဝ်းဢၼ်ဢုပ်ႉပိူင်ႇဝဵင်းၼၼ်ႉၸၢင်ႈဢွၼ်ၵၼ်ၸီႇယၢင်ႇဢမုတြႃးႁႂ်ႈလႆႈငိုၼ်းသူးငိုၼ်းမွၼ်ၵူၺ်းလႄႈယဵၸ်ႈပရေႃးႁဵၵ်ႈမၼ်းၸိူဝ်းၼၼ်ႉၸၢင်ႈဢွၼ်ၵၼ်သွၼ်ပၼ်ႁႂ်ႈလႆႈၵႃႈမၼ်းၶၼ်မၼ်းၵူၺ်းဢေႃႈ။ ပရေႃးၽႅတ်ႈမၼ်းၸိူဝ်းၼၼ်ႉၵေႃႈၸၢင်ႈဢွၼ်ၵၼ်ႁေႃးလၢတ်ႈလွင်ႈမိူဝ်းၼႃႈႁႂ်ႈလႆႈငိုၼ်းၵူၺ်းဢေႃႈ။ ၼႂ်းဝႃႈၼၼ်သေၵေႃႈ၊ၶဝ်ၸၢင်ႈဢွၼ်ၵၼ်ဢိင်ပိုင်ႈ ထႃႇဝရႃႉၽြႃး၊ ယူႇသေလႄႈလၢတ်ႈလႄႈဝႃႈ၊ “ ထႃႇဝရႃႉၽြႃး၊ မီးယူႇလူၺ်ႈၵၼ်တင်းႁဝ်းဢမၢၼ်ႇၶၼ်ပဵၼ်ဢေႃႈ။ ၽေးဢုပၢတ်ႈဢမ်ႇႁွတ်ႈထိုင်ၵႃႈၼိူဝ်ႁဝ်းလႆႈၵူၺ်း၊” ဝႃႈၼင်ႇၼႆယဝ်ႉလူင်ပႄႇ။
ပိူဝ်ႈၼႆလႄႈၵွပ်ႈပိူဝ်ႈသူလႄႈလွႆ ၸိဢုၼ်ႇ၊ ၼၼ်ႉတၵ်းလႆႈၶၢမ်ႇတၢင်းဢၼ်ထႆမိူၼ်ၸိူဝ်ႉၼင်ႇၼႃးလႄႈဝဵင်း ယေႇရုသလႅမ်ႇ၊ တၵ်းလႆႈပဵၼ်ၵွင်လိၼ်ဢၼ်လုဢၼ်လႅဝ်ဢေႃႈ။ လွႆဢၼ်မီးႁိူၼ်းၸဝ်ႈၵေႃႈတၵ်းလႆႈပဵၼ်ၸိူဝ်ႉၼင်ႇလွႆၼႂ်းထိူၼ်ႇၼႂ်းၶိူဝ်းၼၼ်ႉဢေႃႈ။
ၼႂ်းၶိင်ႇၵႃႇလႃႉမိုဝ်ႉဝၼ်းဢၼ်တေမႃး၊လွႆတီႈဢၼ်ႁိူၼ်း ထႃႇဝရႃႉၽြႃး၊ မီးယူႇၼၼ်ႉ၊ တၵ်းပဵၼ်လွႆဢၼ်သုင်လိူဝ်ပိူၼ်ႈတင်းလၢႆလႄႈမီးတၢင်းဢၼ်ယုၵ်ႉယွင်ႈယူႇၵႃႈၼိူဝ်လွႆဢွၼ်ႇတင်းလၢႆဢေႃႈ။ မဵဝ်းၵူၼ်းၵူႈၸိူဝ်ႉၵူႈၶိူဝ်းတၵ်းမႃးၸုၵၼ်တုမ်ၵၼ်ၵႃႈတီႈလွႆၼၼ်ႉဢေႃႈ။
မဵဝ်းၵူၼ်းၼမ်ၼႃႇၵေႃႈ တၵ်းမႃးလႄႈလၢတ်ႈဝႃႈ၊ “မႃး၊မႃး႟။ ဢွၼ်ၵၼ်ၶိုၼ်ႈၸူးၵႃႈတီႈလွႆ ထႃႇဝရႃႉၽြႃး၊ ႁိူၼ်းၽြႃးပဵၼ်ၸဝ်ႈၸိူဝ်ႉၶိူဝ်း ယႃႇၵုပ်ႈ၊ ၼၼ်ႉတႃႉႁဝ်း။ မၼ်းၸဝ်ႈတၵ်းသင်ႇပၼ်သွၼ်ပၼ်သဵၼ်ႈတၢင်းမၼ်းၸဝ်ႈၸိူဝ်းၼၼ်ႉလႄႈ ႁဝ်းတၵ်းၸွမ်းႁွႆးသဵၼ်ႈတၢင်းမၼ်းၸဝ်ႈၸိူဝ်းၼၼ်ႉၵႂႃႇဢေႃႈ၊” ဝႃႈၼင်ႇၼႆဢေႃႈ။ တြႃးၸဝ်ႈတၵ်းပေႃႇဢွၵ်ႇမႃးသေၵႃႈတီႈ လွႆ ၸိဢုၼ်ႇ၊ လႄႈ ၼုၵ်ႈၵပၢတ်ႈ ထႃႇဝရႃႉၽြႃး၊ တၵ်းပေႃႇဢွၵ်ႇမႃးသေၵႃႈတီႈဝဵင်း ယေႇရုသလႅမ်ႇ၊ ဢေႃႈ။
မၼ်းၸဝ်ႈတၵ်းၸီႇယၢင်ႇတြႃးၼႂ်းမဵဝ်းၵူၼ်းၼမ်ၼႃႇလႄႈ သင်ႇသွၼ်သုင်းမႃႉမဵဝ်းၵူၼ်းဢၼ်ႁႅင်းယႂ်ႇၼႃႇဢၼ်ယူႇၵႃႈတီႈဢၼ်ၵႆၼႃႇ ၸိူဝ်းၼၼ်ႉဢေႃႈ။ ၶဝ်ၼၼ်ႉတၵ်းဢွၼ်ၵၼ်ဢဝ်လၢၵ်ႈၼၢၵ်ႈလၢပ်ႇလႅဝ်းၶဝ်တင်းလၢႆၶဵၼ်ႇႁဵတ်းသိၵ်ႈထႆသိၵ်ႈၽိူဝ်လႄႈဢဝ်ႁွၵ်ႇၶဝ်တင်းလၢႆၶဵၼ်ႇ ႁဵတ်းၶဵဝ်းဢေႃႈ။ မိူင်းၼိုင်ႈလႄႈမိူင်းၼိုင်ႈၼင်ႇၵၼ်ၵၼ်တၵ်းဢမ်ႇယူၵ်ႉလၢပ်ႇယူၵ်ႉလႅဝ်းၸူးၵၼ်၊ ၵမ်းလိုၼ်းတၵ်းဢမ်ႇဢွၼ်ၵၼ်သွၼ်ဢဝ်တၢင်းဢၼ်ၸၢင်ႈမေႃတိုၵ်းသိုၵ်းတိုၵ်းသိူဝ်။
ၶဝ်တင်းသဵင်ႈတင်းလူင်တၵ်းၼင်ႈယူႇၵႃႈတႂ်ႈတူၼ်ႈၶိူဝ်းမၢၵ်ႇၸပိတ်ႉၶဝ်ဢိၵ်ႇတင်း ၵႃႈတႂ်ႈတူၼ်ႈမၢၵ်ႇလိူဝ်ႇၶဝ်ႁင်းၽႂ်ႁင်းမၼ်းဢေႃႈ။ တၵ်းဢမ်ႇမီးၵေႃႉဢၼ်ႁႂ်ႈၶဝ်လႆႈၵူဝ်လႆႈႁႄသေၵေႃႉသေၵူၼ်း။ သူပ်း ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ပူင်ဢမိင်ႉၸဝ်ႈဝႆႉယဝ်ႉ။
မဵဝ်းၵူၼ်းတင်းသဵင်ႈတင်းလူင်ၸၢင်ႈဢွၼ်ၵၼ်ဢိင်ၼႃႇမႃႉၸိုဝ်ႈသဵင်ၽြႃးၽႂ်ၽြႃးမၼ်းသေလႄႈၵႂႃႇမႃးယူႇဢေႃႈ။ ႁဝ်းၸမ်ႉ၊တၵ်းဢွၼ်ၵၼ်ဢိင်ၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းသေလႄႈၵႂႃႇမႃးယူႇတႃႇသေႇဢမ်ႇထၢတ်ႇဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ၼႂ်းမိုဝ်ႉဝၼ်းၼၼ်ႉၵဝ်တၵ်းႁွင်ႉဢဝ်ၵေႃႉဢၼ်တိၼ်ၵႅင်ႉ၊ၵေႃႉဢၼ်လႆႈၶၢမ်ႇတၢင်းဢၼ်ႁေႃႈဢွၵ်ႇပႅတ်ႈ၊ဢိၵ်ႇတင်းၵေႃႉဢၼ်ၵဝ်ယၢမ်ႈၼိၵ်ႈၸၢၵ်ႈငႅၼ်းသႄးၼၼ်ႉမႃးၸုၵၼ်တုမ်ၵၼ်ဢေႃႈ။-
ၵဝ်တၵ်းႁဵတ်းႁႂ်ႈၵေႃႉဢၼ်တိၼ်ၵႅင်ႉၼၼ်ႉႁႂ်ႈၵိုတ်းဝႆႉၵျၢၼ်ႇဝႆႉလႄႈႁႂ်ႈၵေႃႉဢၼ်လႆႈၶၢမ်ႇတၢင်းဢၼ်ႁေႃႈဢွၵ်ႇပႅတ်ႈၵႂႃႇတီႈဢၼ်ၵႆၼၼ်ႉပဵၼ်မဵဝ်းၵူၼ်းဢၼ်ယႂ်ႇၼႃႇဢေႃႈ။ ထႃႇဝရႃႉၽြႃး၊ တၵ်းဢုပ်ႉပိူင်ႇၸၢမ်ႇၸႃးၶဝ်ၵႃႈၼိူဝ်လွႆ ၸိဢုၼ်ႇ၊ ၼၼ်ႉယူႇ၊ဢဝ်ၸႃႉၸဵမ်မိူဝ်ႈလဵဝ်ၼႆႉၵႂႃႇမိူဝ်းၼႃႈတႃႇသေႇဢမ်ႇထၢတ်ႇဢေႃႈ။
ထဵင်လၢင်းတီႈဢၼ်ယူႇလႄႈလူတူၺ်းၽုင်သူဝ်း႟။ ၵုင်းလွႆတီႈယူႇလုၵ်ႈယိင်းသၢဝ် ၸိဢုၼ်ႇ၊ ႟။ ဢႃႇၼႃႇဢၼ်ယၢမ်ႈမီးတီႈမႂ်းတႄႇမိူဝ်ႈဢွၼ်ဢၼ်ဝႃႈ၊သိုင်ႇၸိုင်ႈဝၢၼ်ႈမိူင်းလုၵ်ႈယိင်းသၢဝ်ဝဵင်း ယေႇရုသလႅမ်ႇ၊ ၼၼ်ႉတၵ်းသမ်ႉၶိုၼ်းႁွတ်ႈထိုင်ၵႃႈၼႂ်းမိုဝ်းမႂ်းဢေႃႈ။-
မိူဝ်ႈလဵဝ်ၼႆႉၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းႁဵတ်းတင်းသဵင်ဢၼ်ယႂ်ႇၼႃႇသေလႄႈႁွင်ႉသႅၼ်ႇယူႇၸိူဝ်ႉၼင်ႇႁိုဝ်။ ၵႃႈၼႂ်းမႂ်းဢမ်ႇမီးၶုၼ်ႁေႃၶမ်းသေၸဝ်ႈသေပႃးႁိုဝ်း။ မူးမၢတ်ႈၽွင်းမိူင်းဢၼ်ပၼ်တၢင်းၵျၢမ်ႇတၢင်းပွင်ၸိူဝ်းၼၼ်ႉလုႁၢႆၵႂႃႇယဝ်ႉႁိုဝ်း။ မႂ်းလႆႈၶၢမ်ႇဝူၺ်ႇတၼႃႇမိူၼ်ၸိူဝ်ႉၼင်ႇမႄႈယိင်းဢၼ်ၵိူတ်ႇလဵင်ႉလုၵ်ႈၼၼ်ႉယဝ်ႉလူင်ပႄႇ။-
လုၵ်ႈယိင်းသၢဝ် ၸိဢုၼ်ႇ၊ ႟။ ၶၢမ်ႇဝူၺ်ႇတၼႃႇသေလႄႈ ဢဝ်ႁႅင်းဢွၵ်ႇမိူၼ်ၸိူဝ်ႉၼင်ႇမႄႈယိင်းဢၼ်ၵိူတ်ႇလဵင်ႉလုၵ်ႈၼၼ်ႉတႃႉ။ မိူဝ်ႈလဵဝ်ၼႆႉမႂ်းတၵ်းလႆႈဢွၵ်ႇသေၵႃႈၼႂ်းဝဵင်းၵႂႃႇလႄႈယူႇၵႃႈၼႂ်းပၢင်ႇတူင်ႈႁႆႈတူင်ႈၼႃးဢေႃႈ။ မႂ်းတၵ်းလႆႈၵႂႃႇတေႃႇထိုင်ႁွတ်ႈဝဵင်း ပႃႇပုလုၼ်ႇ၊ ဢေႃႈ။ ထႃႇဝရႃႉၽြႃး၊ တၵ်းထုတ်ႇၼုၵ်ႈဢဝ်မႂ်းသေၵႃႈၼႂ်းမိုဝ်းရၢၼ်ႇသူႇမႂ်းတင်းလၢႆ၊ၵႃႈတီႈဝဵင်းၼၼ်ႉဢေႃႈ။-
မိူဝ်ႈလဵဝ်ၼႆႉၸိုင်၊ၵူၼ်းတၢင်ႇၸိူဝ်ႉတၢင်ႇမဵဝ်းၼမ်ၼႃႇၸုၵၼ်တုမ်ၵၼ်သေၶတ်းတႃႉၵၼ်တင်းမႂ်းလႄႈဢွၼ်ၵၼ်လၢတ်ႈလႄႈဝႃႈ၊ “ႁႂ်ႈဝဵင်း ၸိဢုၼ်ႇ၊ ပဵၼ်ဢၼ်ၵူဝ်ႈၵိူၵ်ႇသေၵမ်းလူၺ်ႈ။ ႁႂ်ႈမၢၵ်ႇတႃႁဝ်းလူတူၺ်းၵႃႈၼိူဝ်လွႆ ၸိဢုၼ်ႇ၊ သေၵမ်းလူၺ်ႈ၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊ၶဝ်ဢမ်ႇႁုၸႂ် ထႃႇဝရႃႉၽြႃး၊ ၶဝ်ဢမ်ႇႁုၸႅင်ႈတၢင်းၵျၢမ်ႇတၢင်းပွင်မၼ်းၸဝ်ႈ။ မၼ်းၸဝ်ႈဢဝ်ၶဝ်ၼၼ်ႉၸုၵၼ်တုမ်ၵၼ်ဝႆႉမိူၼ်ၸိူဝ်ႉၼင်ႇဢၼ်ဢဝ်လိုၼ်ႈၶဝ်ႈၵွင်ဝႆႉၵႃႈတီႈတလၢင်းယဵပ်ႇၶဝ်ႈၼၼ်ႉဢေႃႈ။
လုၵ်ႈယိင်း ၸိဢုၼ်ႇ၊ ႟။ လုၵ်ႉလႄႈယဵပ်ႇၼူတ်ႈတႃႉ။ ၵဝ်တၵ်းႁႂ်ႈၶဝ်လႅမ်မႂ်းပဵၼ်ၶဝ်လဵၵ်းလႄႈႁႂ်ႈၵိပ်ႇမႂ်းပဵၼ်ၵိပ်ႇတွင်းလိူင်ဢေႃႈ။ မႂ်းတၵ်းလႆႈပေႃႉထုပ်ႉမဵဝ်းၵူၼ်းႁႂ်ႈယွႆႈၵႂႃႇလႅဝ်ၵႂႃႇၼမ်ၼႃႇဢေႃႈ။ မႂ်းတၵ်းလႆႈဢဝ်ၵႃႈဢၼ်လႆႈၵႃႈတီႈၶဝ်မႃးၼၼ်ႉ၊ဢိၵ်ႇတင်းၸေးၸိမ်ႇဢုၵ်ႉၸႃႇၶဝ်ၼၼ်ႉသၢၵ်ႈလူႇတီႈ ထႃႇဝရႃႉၽြႃး၊ ဢၼ်ဢုပ်ႉပိူင်ႇၼႃႈလိၼ်မိူင်းတင်းသဵင်ႈတင်းမူတ်းၼၼ်ႉဢေႃႈ။
မိူဝ်ႈလဵဝ်ၼႆႉၸမ်ႉ၊ၵူၼ်းဝဵင်း ယေႇရုသလႅမ်ႇ၊ ၶဝ်႟။ ၸုၵၼ်တုမ်ၵၼ်လႄႈပဵၼ်မုၵ်ႉပဵၼ်ၸိူဝ်းယူႇတႃႉ၊ပိူၼ်ႈလွမ်ႉလဵပ်ႈႁွပ်ႈႁဝ်းဝႆႉယဝ်ႉ။ ၶဝ်ဢဝ်ၶွၼ်ႉဝၢႆပေႃႉယႅၼ်ႉသႂ်ႇၵႅမ်ႈၶုၼ် ဢိသရေး၊ ယဝ်ႉလူင်ပႄႇ။
ဝဵင်း ပႅတ်ႉလႁႅမ်ႇဢေႇၽရတ်ႉ၊ ႟။ ပိၵ်ႉသမ်ႉမႂ်းၼႆႉပဵၼ်ဝဵင်းလဵၵ်ႉဝဵင်းၼွႆႉၵႃႈၼႂ်းမိူင်း ယုတႃႉ၊ သေၵေႃႈၸဝ်ႈဢၼ်တၵ်းလႆႈဢုပ်ႉပိူင်ႇၵူၼ်းမဵဝ်း ဢိသရေး၊ ၼၼ်ႉတၵ်းပေႃႇမႃးၵႃႈၼႂ်းမႂ်းပုၼ်ႈၵဝ်ဢေႃႈ။ ၸဝ်ႈၼၼ်ႉပဵၼ်ၸဝ်ႈဢၼ်မီးယူႇၸႃႉၸဵမ်ၵၢပ်ႈၵမ်ႇၽႃႇမိူဝ်ႈမိုၼ်ႉမိူဝ်ႈၵွၼ်ႇၼၼ်ႉဢေႃႈ။
ပိူဝ်ႈၼႆလႄႈၸဝ်ႈၼၼ်ႉတၵ်းၸုၼ်ႉပႅတ်ႈၵူၼ်းမၼ်းၸဝ်ႈတေႃႇထိုင်ႁွတ်ႈၶိင်ႇမိူဝ်ႈဢၼ်မႄႈယိင်းဢၼ်ၶၢမ်ႇဝူၺ်ႇတၼႃႇတၢင်းဢၼ်ၵိူတ်ႇလဵင်ႉလုၵ်ႈၼၼ်ႉထၢၼ်ႈပေႃးၵိူတ်ႇလဵင်ႉယဝ်ႉလႄႈပီႈမၼ်းၼွင်ႉမၼ်းဢၼ်ယင်းၵိုတ်းယင်းၵျၢၼ်ႇၸိူဝ်းၼၼ်ႉထၢၼ်ႈပေႃးၶိုၼ်းမႃးၸူးၵႃႈတီႈၵူၼ်းမဵဝ်း ဢိသရေး၊ တင်းလၢႆၼၼ်ႉဢေႃႈ။-
ၸဝ်ႈၼၼ်ႉတၵ်းၸုၵ်းယူႇလႄႈဢိင်ပိုင်ႈတၢင်းၵတ်ႉတၢင်းၶၼ် ထႃႇဝရႃႉၽြႃး၊ ဢိၵ်ႇတင်းတၼ်းၶူဝ်းဢႃႇၼုၽေႃႇၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ၽြႃးပဵၼ်ၸဝ်ႈမၼ်းၼၼ်ႉသေလႄႈလဵင်ႉလူၽုင်သူဝ်းမၼ်းတင်းလၢႆဢေႃႈ။ ၶဝ်ၵေႃႈတၵ်းလႆႈယူႇလူင်ႈလီလွတ်ႈလီဢေႃႈ။ လွင်ႈမၼ်းၸမ်ႉ၊ၸဝ်ႈၼၼ်ႉတၵ်းယႂ်ႇမျၢတ်ႈၼႃႇၸွတ်ႇၵႂႃႇတေႃႇထိုင်ႁွတ်ႈတီႈသုတ်းလိၼ်မိူင်းဢေႃႈ။-
ၸဝ်ႈၼၼ်ႉတၵ်းပဵၼ်ၸဝ်ႈတၢင်းၼိမ်ဢေႃႈ။ မိူဝ်ႈဢၼ်ၵူၼ်းမိူင်း ဢႃႇသီးရီးယႃး၊ ၶီႇသိုၵ်းမႃးၵႃႈတီႈမိူင်းႁဝ်းလႄႈယဵပ်ႇယမ်ႈသိုင်ႇၸိုင်ႈဝၢၼ်ႈမိူင်းႁဝ်းၸိူဝ်းၼၼ်ႉၸိုင်၊ႁဝ်းတၵ်းႁႂ်ႈၵူၼ်းဢၼ်လဵင်ႉသူဝ်းထိင်းသူဝ်းၸဵတ်းပႃး၊ဢိၵ်ႇတင်းၵူၼ်းဢၼ်ပဵၼ်ငဝ်ႈပဵၼ်ႁူဝ်ပႅတ်ႇပႃးပေႃႇဢွၵ်ႇမႃးၶတ်းတႃႉၵၼ်တင်းၶဝ်ဢေႃႈ။-
ၶဝ်ၼၼ်ႉတၵ်းဢုပ်ႉပိူင်ႇမိူင်း ဢႃႇသီးရီးယႃး၊ ဢိၵ်ႇတင်းမိူင်း ၼိမ်ႇရေႃးတႃႉ၊ လူၺ်ႈလၢပ်ႇလူၺ်ႈလႅဝ်းလႄႈၸဝ်ႈၼၼ်ႉတၵ်းၵႄႇသႄႇဢဝ်ႁဝ်းလွတ်ႈသေၵႃႈၼႂ်းမိုဝ်းၵူၼ်း ဢႃႇသီးရီးယႃး၊ ၼႂ်မိူဝ်ႈဢၼ်ၶဝ်ၶီႇသိုၵ်းမႃးၵႃႈၼႂ်းမိူင်းႁဝ်းလႄႈယဵပ်ႇယမ်ႈၵႃႈၼႂ်းၶွပ်ႇၼမ်ႉလႅၼ်လိၼ်ႁဝ်းၼၼ်ႉဢေႃႈ။
ၵူၼ်းၸိူဝ်ႉၶိူဝ်း ယႃႇၵုပ်ႈ၊ ဢၼ်ၵိုတ်းဝႆႉၵျၢၼ်ႇဝႆႉၸိူဝ်းၼၼ်ႉတၵ်းယူႇၵႃႈၼႂ်းဝူင်ႈၵၢင်ၵူၼ်းတၢင်ႇၸိူဝ်ႉတၢင်ႇမဵဝ်းၼမ်ၼႃႇလႄႈပဵၼ်ၸိူဝ်ႉၼင်ႇၼမ်ႉၼၢႆးဢၼ် ထႃႇဝရႃႉၽြႃး၊ ပၼ် ဢိၵ်ႇတင်းပဵၼ်ၸိူဝ်ႉၼင်ႇႁႃႇၽူၼ်ဢၼ်ဢမ်ႇပႂ်ႉထႃႈၵူၼ်း၊ဢမ်ႇၸွမ်းဢလူဝ်ႇၵူၼ်းသေလႄႈတူၵ်းၵႃႈၼိူဝ်တူၼ်ႈယိူဝ်ႈတူၼ်ႈယႃႈၼၼ်ႉဢေႃႈ။-
ၵူၼ်းၸိူဝ်ႉၶိူဝ်း ယႃႇၵုပ်ႈ၊ ဢၼ်ၵိုတ်းဝႆႉၵျၢၼ်ႇဝႆႉၸိူဝ်းၼၼ်ႉတၵ်းလႆႈယူႇၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ၊ၵႃႈၼႂ်းဝူင်ႈၵၢင်မဵဝ်းၵူၼ်းၼမ်ၼႃႇလႄႈပဵၼ်ၸိူဝ်ႉၼင်ႇသၢင်ႇသီႈဢၼ်ယူႇၵႃႈၼႂ်းတူဝ်ထိူၼ်ႇႁၢႆႉတင်းလၢႆ၊ဢိၵ်ႇတင်းပဵၼ်ၸိူဝ်ႉၼင်ႇသၢင်ႇသီႈၼုမ်ႇယူႇၵႃႈၼႂ်းၽုင်သူဝ်းၸိူဝ်းၼၼ်ႉဢေႃႈ။ ပေႃးမၼ်းၶဝ်ႈမႃးၸိုင်၊မၼ်းၸၢင်ႈယဵပ်ႇသေလႄႈၶူပ်းၵိၼ်သိၵ်ႇယႃႉထၢၼ်ႈပေႃးၽူႈလႂ်ဢမ်ႇၵႄႇသႄႇၼုၵ်ႈဢဝ်လႆႈဢေႃႈ။-
မႂ်းတၵ်းယုၵ်ႉမိုဝ်းမႂ်းၵႃႈၼိူဝ်ရၢၼ်ႇသူႇမႂ်းၸိူဝ်းဢၼ်ႁဵတ်းၶတ်းၵၼ်တင်းမႂ်းၼၼ်ႉလႄႈၶဝ်တင်းသဵင်ႈတင်းလူင်တၵ်းဢွၼ်ၵၼ်လုသုမ်းဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၼႂ်းမိုဝ်ႉဝၼ်းၼၼ်ႉၵဝ်တၵ်းပႄႇၽဵဝ်ႈမႃႉမႂ်းတင်းလၢႆပႅတ်ႈသေၵႃႈၼႂ်းမႂ်းလႄႈယႃႉၽဵဝ်ႈလေႃႉမႃႉသိုၵ်းမႂ်းတင်းလၢႆပႅတ်ႈဢေႃႈ။-
ၵဝ်တၵ်းပႄႇၽဵဝ်ႈဝဵင်းၼႂ်းမိူင်းမႂ်းတင်းလၢႆပႅတ်ႈလႄႈၵိူၼ်ႇယႃႉပႅတ်ႈတိူၵ်ႈတီႈတိုၵ်းသိုၵ်းမႂ်းၵႃႈမီးဢေႃႈ။-
ၵဝ်တၵ်းပႄႇၽဵဝ်ႈၶဝ်ၸိူဝ်းဢၼ်ႁဵတ်းဢတၢတ်ႈၽီမေႃႇၼၼ်ႉပႅတ်ႈသေၵႃႈတီႈၼႂ်းမိုဝ်းမႂ်းလႄႈမႂ်းတၵ်းဢမ်ႇလႆႈမီးၵေႃႉဢၼ်တႂၢၵ်ႈပေႇတၢင်ႇၵႃႇလႃးၼၼ်ႉသေၵေႃႉသေၵူၼ်း။-
ၵဝ်တၵ်းပႄႇၽဵဝ်ႈႁုၼ်ႇႁၢင်ႈသၢင်းထုမႂ်းဢၼ်တွင်ႈႁဵတ်းၶၵ်းႁဵတ်းၸိူဝ်းၼၼ်ႉ၊ဢိၵ်ႇတင်းသဝ်ၼၢင်းၽီတီႈဢၼ်မႂ်းၵူဝ်းၵႂၢႆႇတင်းလၢႆပႅတ်ႈသေၵႃႈၼႂ်းၵၢင်မႂ်းလႄႈၵမ်းလိုၼ်းမႂ်းဢမ်ႇလႆႈၵူဝ်းၵႂၢႆႇလွင်ႈတၢင်းဢၼ်မႂ်းဢဝ်မိုဝ်းမႂ်းႁဵတ်းၼၼ်ႉ။-
သဝ်ဢၼ်မျၢတ်ႈ မႂ်းတင်းလၢႆၵေႃႈ ၵဝ်တၵ်းထွတ်ႇထူၺ်ႈဢွၵ်ႇသေၵႃႈၼႂ်းၵၢင်မႂ်းလႄႈယႃႉၽဵဝ်ႈဝဵင်းမႂ်းတင်းလၢႆပႅတ်ႈဢေႃႈ။-
ၵဝ်တၵ်းဢဝ်တင်းဢၢႆႁႅင်းတေႃးသႃႉတၢင်းၸႂ်မႆႈၶႂ်ႈၸႃႉသေလႄႈၸီႇယၢင်ႇပၼ်တၢမ်ႇဢပျတ်ႈတီႈၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ဢမ်ႇထွမ်ႇဢမ်ႇဢဝ်ၵႂၢမ်းၵဝ်ၸိူဝ်းၼၼ်ႉဢေႃႈ။”
ဢွၼ်ၵၼ်ထွမ်ႇငိၼ်းဢမိင်ႉ ထႃႇဝရႃႉၽြႃး၊ တႃႉ။ မႂ်းလုၵ်ႉလႄႈၽုၺ်ႇဢမုမႂ်းတေႃႇလွႆလူင်တင်းလၢႆလႄႈႁႂ်ႈလွႆဢွၼ်ႇတင်းလၢႆထွမ်ႇငိၼ်းၵႂၢမ်းမႂ်းသေ။
လွႆတင်းလၢႆၶဝ်႟။ မၢၵ်ႇႁိၼ်မၢၵ်ႇၽႃဢၼ်မၼ်ႈဢၼ်ၵႅၼ်ႇဢၼ်ပဵၼ်ငဝ်ႈႁၢၵ်ႈလိၼ်မိူင်းၶဝ်႟။ ဢွၼ်ၵၼ်ထွမ်ႇငိၼ်းဢမု ထႃႇဝရႃႉၽြႃး၊ တႃႉ။ ထႃႇဝရႃႉၽြႃး၊ မီးဢမုလူၺ်ႈၵၼ်တင်းၵူၼ်းမဵဝ်းမၼ်းၸဝ်ႈတင်းလၢႆလႄႈမၼ်းၸဝ်ႈတၵ်းတွပ်ႇၵၼ်ထဵင်ၵၼ်တင်းၵူၼ်းမဵဝ်း ဢိသရေး၊ ဢေႃႈ။
ၵူၼ်းၵဝ်တင်းလၢႆၶဝ်႟။ ၵဝ်ယၢမ်ႈႁဵတ်းၵႃႈသင်တီႈသူယဝ်ႉ။ ၸွင်ႇၵဝ်လႆႈႁဵတ်းႁႂ်ႈသူၼၵ်းၸႂ်ယၢပ်ႇၸႂ်ႁိုဝ်း။ ၶိုၼ်းတွပ်ႇၵဝ်တႃႉ။-
ၵဝ်ၼုၵ်ႈဢဝ်သူဢွၵ်ႇသေၵႃႈၼႂ်းမိူင်း ဢေးၵျိပ်ႉ၊ မႃးလႄႈထုတ်ႇဢဝ်သူဢွၵ်ႇသေၵႃႈၼႂ်းတီႈဢၼ်လႆႈၶၢမ်ႇႁဵတ်းၶႃႈၼၼ်ႉမႃးယဝ်ႉယဝ်ႉ။ ၵဝ်ဢဝ်၊ မူဝ်းသေႇ၊ဢႃႇရုၼ်ႇ၊ တင်း မေႇရီႇယမ်ႇ၊ ၸိူဝ်းၼၼ်ႉပွႆႇၸႂ်ႉဢွၼ်ႁူဝ်သူယဝ်ႉယဝ်ႉ။-
ၵူၼ်းၵဝ်တင်းလၢႆၶဝ်႟။ ၶုၵ်းၸႂ်လႆႈၶႆႈၸႂ်ထူပ်းလွင်ႈတၢင်းဢၼ် ပႃႇလၵ်ႉ၊ ၶုၼ်လူင်မိူင်း မေႃႇၽႃႉ၊ ၵျၢမ်ႇပွင်တၵ်းႁဵတ်းတီႈသူၼၼ်ႉ၊ဢိၵ်ႇတင်းၵႂၢမ်းဢၼ် ပႃႇလၢမ်ႇ၊ လုၵ်ႈၸၢႆး ပေႃးရႃႉ၊ ၶိုၼ်းလၢတ်ႈတီႈၶုၼ်ၼၼ်ႉတႃႉ။ လွင်ႈတၢင်းဢၼ်ပဵၼ်မႃးၸွမ်းတၢင်းတႄႇဢဝ်ၵႃႈတီႈ သိတ်ႉတိမ်ႇ၊ တေႃႇထိုင်ႁွတ်ႈဝဵင်း ၵိလႃႉၵႃႇလႃႉ၊ ၼၼ်ႉႁႂ်ႈသူလႆႈႁုၸႅင်ႈတၢင်းဢၼ် ထႃႇဝရႃႉၽြႃး၊ ၵႄႇၶျွတ်ႈဢဝ်သူမႃးၸိူဝ်ႉၼင်ႇႁိုဝ်ၼၼ်ႉတႃႉ။
ၵဝ်တၵ်းလႆႈပႃးဢဝ်ၵႃႈသင်သေလႄႈသုတ်ႉၸပ်းသုတ်ႉၸူးၵႃႈတီႈၽၢႆႇၼႃႈ ထႃႇဝရႃႉၽြႃး၊ လႄႈၶုပ်ႉမူပ်ႇၵူဝ်းၵႂၢႆႇၵႃႈတီႈၽၢႆႇၼႃႈမၼ်းၸဝ်ႈဢၼ်သုင်ၼႃႇသေပိူၼ်ႈၼၼ်ႉ။ တၵ်းလႆႈပႃးဢဝ်တၢင်းလူႇဢၼ်တုတ်ႇၽႆးဢၼ်ဝႃႈ၊ဝူဝ်းဢွၼ်ႇဢၼ်ၶွပ်ႈၶူပ်ႇတင်းလၢႆသေလႄႈသုတ်ႉၸပ်းသုတ်ႉၸူးၵႃႈတီႈၽၢႆႇၼႃႈမၼ်းၸဝ်ႈႁိုဝ်း။-
ထႃႇဝရႃႉၽြႃး၊ တၵ်းထုၵ်ႇၸႂ်ၵျိူၵ်ႈၸႂ်သူဝ်းပေႃႈပဵၼ်ႁဵင်ပဵၼ်ႁဵင်၊ဢိၵ်ႇတင်းၼမ်ႉႁွင်ႈၼမ်ႉၵႄးမၼ်းပဵၼ်မိုၼ်ႇပဵၼ်မိုၼ်ႇၼၼ်ႉႁိုဝ်း။ ၵဝ်တၵ်းလႆႈဢဝ်လုၵ်ႈၸၢႆးတူၼ်ႈၵဝ်သၢၵ်ႈလူႇပုၼ်ႈဢၼ်ၵဝ်ပူၼ်ႉလိူဝ်ၼၼ်ႉလႄႈသမ်ႉဢဝ်မၢၵ်ႇတွင်ႉၵဝ်သၢၵ်ႈလူႇပုၼ်ႈဢပျတ်ႈၸႂ်ဝိၺိၺ်ႇၵဝ်ၼၼ်ႉႁိုဝ်း။-
ၵူၼ်း႟။ မၼ်းၸဝ်ႈၼႄပျႃးလွင်ႈတၢင်းဢၼ်လီဢၼ်ငၢမ်းတီႈမႂ်းယဝ်ႉယဝ်ႉ။ ၼွၵ်ႈသေတၢင်းဢၼ်ႁဵတ်းၸွမ်းၼင်ႇတြႃး၊တၢင်းဢၼ်မီးၸႂ်မႅတ်ႈတႃႇၵရုၼႃႇ၊တၢင်းဢၼ်မီးၸႂ်ဢၼ်ၶျႃးတႅမ်ႇသေလႄႈၵႂႃႇမႃးယူႇၵႃႈတီႈၽၢႆႇၼႃႈၽြႃးပဵၼ်ၸဝ်ႈမႂ်းၼၼ်ႉ၊ ထႃႇဝရႃႉၽြႃး၊ ယင်းယွၼ်းဢဝ်ၵႃႈသင်တီႈမႂ်းလူးၵွၼ်ႇ။
သဵင် ထႃႇဝရႃႉၽြႃး၊ သႅၼ်ႇႁွင်ႉၸူးၵႃႈတီႈဝဵင်းယူႇလႄႈၵေႃႉဢၼ်မီးပိင်ႇၺႃႇၼၼ်ႉတၵ်းရူဝ်ႇသေႇၵူဝ်ယၢမ်းၼႃႇမႃႉၸိုဝ်ႈသဵင်မၼ်းၸဝ်ႈဢေႃႈ။ ၵူၼ်းတင်းလၢႆဢၼ်ၸုၵၼ်တုမ်ၵၼ်ၵႃႈၼႂ်းဝဵင်းၼၼ်ႉ႟။ ဢွၼ်ၵၼ်ထွမ်ႇငိၼ်းတႃႉ။-
ၵႃႈၼႂ်းႁိူၼ်းၶဝ်ၸိူဝ်းဢၼ်ဢမ်ႇတြႃးၼၼ်ႉယင်းမီးဢုၵ်ႉၸႃႇၸေးၸိမ်ႇဢၼ်ဢမ်ႇတြႃး၊ဢိၵ်ႇတင်းၵွၵ်းတူင်ဢၼ်လဵၵ်ႉဢၼ်ဢွၼ်ႇဢၼ်လီႁင်ႈဢဵတ်ႇသဵတ်ႇၼၼ်ႉလႄႈ။-
ၵဝ်တၵ်းပွႆႇလွတ်ႈၶဝ်ၸိူဝ်းဢၼ်မီးယႃႇၸူႇဢၼ်ဢမ်ႇတြႃးလႄႈၸႂ်ႉလုၵ်ႈၶၼ်ဢၼ်ပႅတ်ႉဢၼ်လႅၼ်ၼၼ်ႉလႆႈၸိူဝ်ႉၼင်ႇႁိုဝ်။-
သထေးၵူၼ်းဝဵင်းၸိူဝ်းၼၼ်ႉၸၢင်ႈႁဵတ်းဢထမ်ႇမႃႉလႄႈၶဝ်ၸိူဝ်းဢၼ်ယူႇၵႃႈၼႂ်းဝဵင်းၸိူဝ်းၼၼ်ႉၸၢင်ႈလၢတ်ႈမုသႃႇယူႇသေလႄႈလိၼ်ႉဢၼ်မီးၵႃႈၼႂ်းသူပ်းၶဝ်ၼၼ်ႉၸၢင်ႈပႅတ်ႉၸၢင်ႈလႅၼ်ဢေႃႈ။-
ပိူဝ်ႈၼႆၸင်ႇ၊ၵဝ်တႄႇၸႃႉပၼ်တၢမ်ႇဢၼ်ၸဵပ်းဢၼ်သႅပ်ႇၼႃႇလူင်လၢင်တီႈသူ၊ႁႂ်ႈသူလႆႈၶၢမ်ႇတၢင်းဢၼ်ပႄႇၽဵဝ်ႈပႅတ်ႈၵွပ်ႈပိူဝ်ႈဢပျတ်ႈသူဢေႃႈ။-
သူတေလႆႈၵိၼ်သေၵေႃႈ၊ဢမ်ႇလႆႈဢိမ်ႇလႆႈတဵမ်။ သူတေမီးတၢင်းဢၼ်ဢိုပ်းယၢၵ်ႈယူႇဢမၢၼ်ႇၶၼ်ပဵၼ်ဢေႃႈ။ သူတေၵဵပ်းဝႆႉသိမ်းဝႆႉသေၵေႃႈ၊ဢမ်ႇလႆႈလွတ်ႈတၢင်းသုမ်း၊ပိၵ်ႉသမ်ႉလွတ်ႈတၢင်းသုမ်းသေၵေႃႈ၊ၵဝ်တၵ်းဢဝ်ဢၢပ်ႈပၼ်တီႈၽေးလၢပ်ႇၽေးလႅဝ်းဢေႃႈ။-
သူတေဝၢၼ်ႇၸိူဝ်ႉဝၢၼ်ႇၽၼ်းသေၵေႃႈ၊ဢမ်ႇလႆႈပၢတ်ႇဢဝ်ထိူဝ်ဢဝ်။ သူတေယဵပ်ႇၼူတ်ႈမၢၵ်ႇသၢၼ်ႇလုၼ်ႇသေၵေႃႈ၊ဢမ်ႇလႆႈၼမ်ႉမၼ်းပုၼ်ႈတၵ်းလုပ်ႈတႃးတူဝ်သူ။ သူယဵပ်ႇၼူတ်ႈမၢၵ်ႇၸပိတ်ႉသေၵေႃႈ၊ဢမ်ႇလႆႈသူတ်ႉၵိၼ်ၼမ်ႉမၢၵ်ႇၸပိတ်ႉၼၼ်ႉ။-
လွင်ႈမၼ်းၸမ်ႉ၊သူၸၢင်ႈပႂ်ႉၵမ်ပႂ်ႉၸွမ်းထုင်းၽိင်ႈတၢင်းဢၼ်ၶုၼ် ဢေႃးမရိ၊ ၸီႇယၢင်ႇဝႆႉၸိူဝ်းၼၼ်ႉ၊ဢိၵ်ႇတင်းတၢင်းၵမ်တၢင်းၵျၢင်ႉဢၼ်ၸိူဝ်ႉၶိူဝ်းၶုၼ် ဢႃႇႁပ်ႉ၊ ၵမ်ၵျၢင်ႉၵႃႈမီးၼၼ်ႉလႄႈၸွမ်းၵႂႃႇၵႃႈၼႂ်းသဵၼ်ႈတၢင်းဢၼ်ၶဝ်တိုၵ်းယူင်းၸူဝ်းဢဝ်ၸိူဝ်းၼၼ်ႉဢေႃႈ။ ပိူဝ်ႈၼႆလႄႈၵဝ်တၵ်းႁႂ်ႈသူပဵၼ်ဝဵင်းဢၼ်သဵတ်ႇၵူၼ်းယဵၼ်ၵူၼ်းလႄႈၵူၼ်းဝဵင်းသူတၵ်းလႆႈၶၢမ်ႇတၢင်းဢၼ်လူလၢႆ၊သူတၵ်းလႆႈၶၢမ်ႇတၢင်းဢၼ်ၵူၼ်းမဵဝ်းတင်းလၢႆငိၼ်းၸင်းလႄႈသႄႉသွမ်းဢေႃႈ။
ၵဝ်မီးဢႃႉမၢင်ႇၵလႃႇဢေႃႈ။ ၵဝ်ပဵၼ်မိူၼ်ၸိူဝ်ႉၼင်ႇၵေႃႉဢၼ်တွင်ႉမႆႈလႄႈႁႃၵိၼ်မၢၵ်ႇလိူဝ်ႇဢၼ်ဝိတ်းဢဝ်ၼႂ်းၶိင်ႇမႆႈၶိင်ႇႁွၼ်ႉၼၼ်ႉ၊ဢိၵ်ႇတင်းမၢၵ်ႇၸပိတ်ႉဢၼ်ၵိုတ်းဢၼ်ၵျၢၼ်ႇဢၼ်ၸွမ်းၵဵပ်းဢဝ်ၼၼ်ႉ။ ၵူၺ်းၵႃႈ၊ဢမ်ႇမီးပုၵ်ႉမၢၵ်ႇၸပိတ်ႉဢၼ်လီၵိၼ်လီယႅမ်ႉ၊ဢမ်ႇမီးမၢၵ်ႇလိူဝ်ႇဢၼ်သုၵ်းဢွၼ်တၢင်းဢၼ်ၸႂ်ၵဝ်တူၵ်းဢၢင်ႈၶႂ်ႈၵိၼ်ၼၼ်ႉ။-
ၵူၼ်းဢၼ်သိုဝ်ႈတေႃႇၼၼ်ႉလပ်ႉႁၢႆၵႂႃႇသေၵႃႈၼိူဝ်လိၼ်မိူင်းယဝ်ႉယဝ်ႉ။ ၼႂ်းၵူၼ်းတင်းလၢႆဢမ်ႇမီးၵေႃႉဢၼ်သိုဝ်ႈတေႃႇသေၵေႃႉသေၵူၼ်း။ ၶဝ်တင်းသဵင်ႈတင်းလူင်ၸၢင်ႈဢွၼ်ၵၼ်လွမ်ပႂ်ႉယူႇႁႂ်ႈလႆႈဢဝ်ဢသၢၵ်ႈၵူၼ်းတၢႆဢေႃႈ။ ၶဝ်ၼင်ႇၵၼ်ၵၼ်ၵေႃႉၼိုင်ႈလႄႈၵေႃႉၼိုင်ႈၸၢင်ႈဢဝ်တူင်ႇႁႅဝ်ႉတူင်ႇၶိုမ်းၵၢင်ဢဝ်တိဢဝ်ၵၼ်ဢေႃႈ။-
မိုဝ်းၶဝ်ၼၼ်ႉၸၢင်ႈမေႃၸၢင်ႈႁဵတ်းတၢင်းဢၼ်ဢမ်ႇလီဢမ်ႇငၢမ်းဢေႃႈ။ ၵေႃႉဢၼ်ပဵၼ်ၶုၼ်၊ၵေႃႉဢၼ်ပဵၼ်ၵူၼ်းလူင်ဢၼ်တႅပ်းတတ်းတြႃးၼၼ်ႉၸၢင်ႈၵိၼ်သူးၵိၼ်လၢပ်ႈဢေႃႈ။ ၵေႃႉဢၼ်ပဵၼ်ၵူၼ်းယႂ်ႇၵူၼ်းလူင်ၼၼ်ႉၸၢင်ႈႁဵတ်းၸွမ်းၵႃႈၼင်ႇဢၼ်ဢလူဝ်ႇမၼ်းမီးၼၼ်ႉဢေႃႈ။ ၼင်ႇၼၼ်လႄႈ ၶဝ်ၸၢင်ႈၽွမ်ႉၵၼ်ႁဵတ်းဢမုဢၼ်ဢမ်ႇတြႃးဢေႃႈ။-
ၵေႃႉဢၼ်လီၼႃႇသေပိူၼ်ႈၼၼ်ႉပဵၼ်ၸိူဝ်ႉၼင်ႇတူၼ်ႈၼၢမ်လႄႈၵေႃႉဢၼ်သိုဝ်ႈတေႃႇသေပိူၼ်ႈၼၼ်ႉပဵၼ်ၸိူဝ်ႉၼင်ႇႁူဝ်ႉၼၢမ်ဢေႃႈ။ မိုဝ်ႉဝၼ်းဢၼ်ၵူၼ်းပႂ်ႉၵၢင်ပႂ်ႉယၢမ်းမႂ်းၸိူဝ်းၼၼ်ႉပၼ်သတိ၊မိုဝ်ႉဝၼ်းဢၼ်လႆႈၶၢမ်ႇတၢင်းဢၼ်ၸီႇယၢင်ႇဢပျတ်ႈၼၼ်ႉႁွတ်ႈမႃးယဝ်ႉ။ တေႃႈလဵဝ်ၼႆႉပဵၼ်ၶိင်ႇဢၼ်မီးမီးတၢင်းဢၼ်ယုင်ႈၸႂ်ၵႂင်ၸႂ်ဢေႃႈ။-
ယႃႇပေဝႆႉၸႂ်ၵူၼ်းဢၼ်ႁိူၼ်းၸမ်ၵၼ်တင်းမႂ်းၼၼ်ႉ။ ယႃႇပေဝႆႉၸႂ်တမ်းၸႂ်တီႈၵေႃႉသႄႈမႂ်း။ ယႃႇပေယုမ်ႇမေးဢၼ်ၼွၼ်းၵႃႈၼႂ်းဝၢင်ႈႁူဝ်ဢူၵ်းမႂ်းလႄႈဝႆႉသတိသူပ်းမႂ်းတႃႉ။-
လွင်ႈမၼ်းၸမ်ႉ၊လုၵ်ႈၸၢႆးတၵ်းယႃႉသရေႇပေႃႈမၼ်းလႄႈလုၵ်ႈယိင်းတၵ်းၶတ်းတႃႉၵၼ်တင်းမႄႈမၼ်း၊လုၵ်ႈပႂ်ႉတၵ်းၶတ်းတႃႉၵၼ်တင်းမႄႈၸဝ်ႈမၼ်းဢေႃႈ။ ရၢၼ်ႇသူႇတူဝ်ၸဝ်ႈၵဝ်ႇၼၼ်ႉတၵ်းပဵၼ်ၼႂ်းၵူၼ်းႁိူၼ်းၵူၼ်းယေးတူဝ်ၸဝ်ႈၵဝ်ႇဢေႃႈ။
ၵဝ်ၸမ်ႉ၊တၵ်းမုင်ႈမွင်း ထႃႇဝရႃႉၽြႃး၊ ယူႇလႄႈသွၼ်ႈပိုင်ႈၽြႃးပဵၼ်ၸဝ်ႈဢၼ်ၵႄႇသႄႇၶျွတ်ႈဢဝ်ၵဝ်ၼၼ်ႉဢေႃႈ။ ၽြႃးပဵၼ်ၸဝ်ႈၵဝ်တၵ်းထွမ်ႇဢဝ်ၵႂၢမ်းၵဝ်ဢေႃႈ။
ရၢၼ်ႇသူႇၵဝ်႟။ ယႃႇပေမီးတၢင်းဢၼ်ဢုပ်ႇဝၢဝ်းလႄႈၸူမ်းသိူဝ်းၵႃႈၼိူဝ်ၵဝ်ယူႇ။ ပိၵ်ႉသမ်ႉၵဝ်လူမ်ႉသေၵေႃႈ ၵဝ်တၵ်းၶိုၼ်းလုၵ်ႉဢေႃႈ။ ပိၵ်ႉသမ်ႉၵဝ်လႆႈၼင်ႈယူႇၵႃႈၼႂ်းလပ်းသိင်ႇသေၵေႃႈ ထႃႇဝရႃႉၽြႃး၊ တၵ်းပဵၼ်ဢၼ်လႅင်းၵဝ်ဢေႃႈ။-
ၵဝ်တၵ်းလႆႈၶၢမ်ႇတၢင်းၸႂ်မႆႈၶႂ်ႈၸႃႉ ထႃႇဝရႃႉၽြႃး၊ ၵွပ်ႈပိူဝ်ႈဢၼ်ၵဝ်ၽိတ်းပိူင်ႈမၼ်းၸဝ်ႈၼၼ်ႉယူႇတေႃႇထိုင်ႁွတ်ႈမၼ်းၸဝ်ႈၸႅတ်ႈတူၺ်းဢမုၵဝ်လႄႈတႅပ်းတတ်းတြႃးၵဝ်ၼၼ်ႉဢေႃႈ။ မၼ်းၸဝ်ႈတၵ်းဢဝ်ၵဝ်ဢွၵ်ႇၸူးတီႈဢၼ်လႅင်းလႄႈၵဝ်တၵ်းလႆႈႁၼ်ပႃႇရမီႇတၢင်းဢၼ်သိုဝ်ႈတေႃႇမၼ်းၸဝ်ႈဢေႃႈ။-
မိူဝ်ႈၼၼ်ႉရၢၼ်ႇသူႇၵဝ်ဢၼ်ထၢမ်တီႈၵဝ်လႄႈဝႃႈ၊ “ ထႃႇဝရႃႉၽြႃး၊ ၽြႃးပဵၼ်ၸဝ်ႈမႂ်းၸမ်ႉ၊မီးၵႃႈလႂ်၊” ဝႃႈၼင်ႇၼႆၼၼ်ႉတၵ်းႁၼ်လွင်ႈတၢင်းၼၼ်ႉလႄႈတၢင်းဢၼ်ဢူၵ်းဢၼ်ဢၢႆတၵ်းႁူမ်ႇသုမ်ႇမၼ်းဝႆႉဢေႃႈ။ မၢၵ်ႇတႃၵဝ်တၵ်းႁၼ်မၼ်းလုသုမ်းလႄႈမၼ်းတၵ်းလႆႈၶၢမ်ႇတၢင်းဢၼ်ယဵပ်ႇဢၼ်ယမ်ႈမိူၼ်ၸိူဝ်ႉၼင်ႇၵူမ်ႇၵႃႈၼိူဝ်သဵၼ်ႈတၢင်းၼၼ်ႉဢေႃႈ။
ၶိင်ႇမိုဝ်ႉဝၼ်းဢၼ်တႄႇႁဵတ်းလမ်းဝဵင်းမႂ်းၼၼ်ႉတၵ်းႁွတ်ႈမႃးဢေႃႈ။ ၼႂ်းၶိင်ႇမိုဝ်ႉဝၼ်းၼၼ်ႉၶွပ်ႇၼမ်ႉလႅၼ်လိၼ်တၵ်းမီးတၢင်းဢၼ်ၵႂၢင်ႈဢၼ်ၵႆဢေႃႈ။-
ၼႂ်းၶိင်ႇမိုဝ်ႉဝၼ်းၼၼ်ႉ၊ၵူၼ်းၼမ်ၼႃႇတၵ်းဢွၼ်ၵၼ်လုၵ်ႉသေၵႃႈတီႈၸႃႉၸဵမ်မိူင်း ဢႃႇသီးရီးယႃး၊ တေႃႇထိုင်ႁွတ်ႈမိူင်း ဢေးၵျိပ်ႉ၊ ဢိၵ်ႇတင်းၸႃႉၸဵမ်ၵႃႈတီႈမိူင်း ဢေးၵျိပ်ႉ၊ တေႃႇထိုင်ႁွတ်ႈမႄႈၼမ်ႉ ဢုၽရတ်ႉ၊ ဢိၵ်ႇတင်းၸႃႉၸဵမ်ၵႃႈတီႈပၢင်ႇလၢႆႇၼိုင်ႈတေႃႇထိုင်ႁွတ်ႈပၢင်ႇလၢႆႇၼိုင်ႈ၊ၸႃႉၸဵမ်လုၵ်ႉသေၵႃႈတီႈလွႆလူင်လုၵ်ႈၼိုင်ႈတေႃႇထိုင်ႁွတ်ႈလွႆလူင်လုၵ်ႈၼိုင်ႈလႄႈမႃးၸူးၵႃႈတီႈမႂ်းဢေႃႈ။-
ၵူၺ်းၵႃႈ၊ၵွပ်ႈပိူဝ်ႈတုၸရိူၵ်ႈဢပျတ်ႈဢၼ်ၵူၼ်းဝၢၼ်ႈၵူၼ်းမိူင်းႁဵတ်းၸိူဝ်းၼၼ်ႉလႄႈလိၼ်မိူင်းၼၼ်ႉတၵ်းလႆႈမီးတၢင်းဢၼ်သဵတ်ႇၵူၼ်းယဵၼ်ၵူၼ်းယူႇဢေႃႈ။
ၶႅၼ်းတေႃႈဢဝ်ၶွၼ်ႉတဝ်ႉဢၼ်ၸဝ်ႈႁဝ်းဢၼ်လဵင်ႉထိင်းသူဝ်းၼၼ်ႉလဵင်ႉထိင်းၽုင်သူဝ်းၸဝ်ႈႁဝ်းဢၼ်လႆႈယူႇၵူၺ်းၶဝ်ၵႃႈၼႂ်းထိူၼ်ႇၼႂ်းၶိူဝ်းဢၼ်မီးၵႃႈၼႂ်းၵၢင်ၽႅၼ်ႇလိၼ်ဢၼ်မၢၵ်ႈမီးလီပဵၼ်ဢၼ်ပဵၼ်၊ၵူၼ်းၸဝ်ႈႁဝ်းတင်းလၢႆၼၼ်ႉသေၵမ်းတီႈၶႃႈ။ ၶႅၼ်းတေႃႈပၼ်ဢၶႂၢင်ႉႁႂ်ႈၶဝ်လႆႈၵိၼ်ယူႇၵႃႈၼႂ်းမိူင်း ပႃႇသၢၼ်ႇ၊ ဢိၵ်ႇတင်းၵႃႈၼႂ်းမိူင်း ၵိလတ်ႉ၊ မိူၼ်ၸိူဝ်ႉၼင်ႇမိူဝ်ႈၵွၼ်ႇဢွၼ်ၼႆႉၼၼ်ႉသေၵမ်းတီႈၶႃႈ။
မိူၼ်ၸိူဝ်ႉၼင်ႇမိုဝ်ႉဝၼ်းဢၼ်မႂ်းဢွၵ်ႇသေၵႃႈၼႂ်းမိူင်း ဢေးၵျိပ်ႉ၊ မႃးၼၼ်ႉၵဝ်တၵ်းၼႄပျႃးလွင်ႈတၢင်းဢၼ်လီဢၢမ်းၼႃႇတင်းလၢႆတီႈၶဝ်ဢေႃႈ။-
ၵူၼ်းၵူႈၸိူဝ်ႉၵူႈမဵဝ်းဢၼ်ႁၼ်လွင်ႈၼၼ်ႉလႄႈမီးတၢင်းဢၼ်ဢူၵ်းဢၢႆၵွပ်ႈလူၺ်ႈတၼ်းၶူဝ်းၶဝ်ဢၼ်လဵၵ်ႉၼႃႇၼၼ်ႉ၊ၶဝ်တၵ်းဢဝ်မိုဝ်းၶဝ်တူမ်းသူပ်းၶဝ်ယူႇသေလႄႈႁူၶဝ်ၵေႃႈတၵ်းၼူၵ်ႇဢေႃႈ။-
ၶဝ်ၼၼ်ႉတၵ်းလေးၵိၼ်လိၼ်ၸိူဝ်ႉၼင်ႇငူးလႄႈမိူၼ်တူဝ်ဢၼ်လိူၼ်ႈဢၼ်ၵၢၼ်းၵႃႈၼိူဝ်လိၼ်သေယဝ်ႉ၊သၼ်ႇသၼ်ႇသၢႆဢွၵ်ႇမႃးသေၵႃႈတီႈတိူၵ်ႈတီႈတိုၵ်းသိုၵ်းၶဝ်ဢေႃႈ။ ၶဝ်တၵ်းဢွၼ်ၵၼ်ၵူဝ်ႁႄၼႃႇလူင်လၢင်လႄႈမႃးတီႈ ထႃႇဝရႃႉၽြႃး၊ ၽြႃးပဵၼ်ၸဝ်ႈႁဝ်းဢေႃႈ။ ၶဝ်တၵ်းတူၵ်းၸႂ်ၵူဝ်ႁႄၵွပ်ႈပိူဝ်ႈမႂ်းဢေႃႈ။
ၽြႃးဢၼ်မိူၼ်ၸိူဝ်ႉၼင်ႇၸဝ်ႈႁဝ်းၼၼ်ႉဢမ်ႇမီးၽြႃးသူႇလႂ်ပႃးလႂ်ၶႃႈ။ ၸဝ်ႈႁဝ်းပွႆႇလွတ်ႈဢပျတ်ႈလႄႈယိူၼ်ႉၶၢမ်ႇတၢင်းဢၼ်ၵူၼ်းၸဝ်ႈႁဝ်းဢၼ်ယင်းၵိုတ်းယင်းၵျၢၼ်ႇယူႇဢၼ်လႆႈၽိတ်းပိူင်ႈၼၼ်ႉတီႈၶႃႈဢေႃႈ။ မၼ်းၸဝ်ႈဢမ်ႇမီးတၢင်းၸႂ်မႆႈၶႂ်ႈၸႃႉယူႇသေႇသေႇၵွပ်ႈပိူဝ်ႈမၼ်းၸဝ်ႈမူၼ်ႈပျေႃႇၵႃႈၼႂ်းတၢင်းဢၼ်ၼႄပျႃးၵရုၼႃႇမၼ်းၸဝ်ႈၼၼ်ႉဢေႃႈ။
မၼ်းၸဝ်ႈတၵ်းၶိုၼ်းဢဵတ်းလူႁဝ်းလႄႈယဵပ်ႇယမ်ႈတုၸရိူၵ်ႈႁဝ်းၵႃႈမီးၼၼ်ႉပႅတ်ႈတႂ်ႈတိၼ်မၼ်းၸဝ်ႈဢေႃႈ။ ၸဝ်ႈႁဝ်းတၵ်းဢဝ်ဢပျတ်ႈႁဝ်းၶႃႈၵူႈၸိူဝ်ႉၵူႈပိူင်ၼၼ်ႉၶျႃးတူၵ်းပႅတ်ႈၵႃႈၼႂ်းပၢင်ႇလၢႆႇဢၼ်လိုၵ်ႉဢၼ်လမ်ႇၼၼ်ႉတီႈၶႃႈဢေႃႈ။-
ၸဝ်ႈႁဝ်းတၵ်းၼႄပျႃးတၢင်းဢၼ်ပႂ်ႉသဵတ်ႈၸႃႇတီႈၸိူဝ်ႉၶိူဝ်း ယႃႇၵုပ်ႈ၊ တၢင်းဢၼ်ႁဵတ်းၵျေးၸူးတီႈၸိူဝ်ႉၶိူဝ်း ဢႃႇပြႃႇႁၢမ်ႇ၊ ၸွမ်းၵႃႈၼင်ႇဢၼ်ၸဝ်ႈႁဝ်းတိူင်ႇဝႃႈဝႆႉၵတိ တီႈပူႇမွၼ်ႇၶႃႈၸဝ်ႈႁဝ်းၶဝ်ၸႃႉၸဵမ်မိူဝ်ႈၵွၼ်ႇဢွၼ်ၼၼ်ႉမႃးယဝ်ႉဢေႃႈ။ ၵျၢမ်းပရေႃးၽႅတ်ႈမိၶႃႇယဝ်ႉယဝ်ႉဢေႃႈ။
ဢၼ်ၼႆႉပဵၼ်ပျႃႇတိၵ်ႈၸဝ်ႈလူၺ်ႈလွင်ႈဝဵင်း ၼိၼေႇဝူၺ်ႇ၊ လႄႈပဵၼ်လိၵ်ႈလွင်ႈရူႇပႃႇရူင်ႇဢၼ် ၼႃႇႁုမ်ႇ၊ ၵေႃႉပဵၼ်ၵူၼ်းဝၢၼ်ႈ ဢေးလႃႉၵေႃးသႃႉ၊ လႆႈႁၼ်ၼၼ်ႉဢေႃႈ။
ထႃႇဝရႃႉၽြႃး၊ ပဵၼ်ၽြႃးဢၼ်ၶႅၼ်ၵူၼ်းမၼ်းၸဝ်ႈလႄႈၸၢင်ႈပၼ်တၢမ်ႇဢပျတ်ႈဢေႃႈ။ ထႃႇဝရႃႉၽြႃး၊ ၸၢင်ႈပၼ်တၢမ်ႇလႄႈမီးတၢင်းၸႂ်မႆႈၶႂ်ႈၸႃႉဢၼ်ႁႅင်းယႂ်ႇၼႃႇဢေႃႈ။ ထႃႇဝရႃႉၽြႃး၊ ၸၢင်ႈပၼ်တၢမ်ႇတီႈၶဝ်ၸိူဝ်းဢၼ်ႁဵတ်းၶတ်းၵၼ်တင်းမၼ်းၸဝ်ႈၼၼ်ႉလႄႈ ဝႆႉတၢင်းၽိတ်းတီႈရၢၼ်ႇသူႇမၼ်းၸဝ်ႈတင်းလၢႆဢေႃႈ။
ထႃႇဝရႃႉၽြႃး၊ ၸႂ်ယႂ်ႇၸႂ်ယၢဝ်းလႄႈမီးတၼ်းၶူဝ်းဢၼ်ယႂ်ႇၼႃႇဢေႃႈ။ ၼႂ်းဝႃႈၼၼ်သေၵေႃႈမၼ်းၸဝ်ႈဢမ်ႇပွႆႇၵေႃႉဢၼ်မီးဢပျတ်ႈၼၼ်ႉလွတ်ႈသေၵႃႈၼႂ်းတၢင်းဢၼ်ၸီႇယၢင်ႇပၼ်တၢမ်ႇ။ သဵၼ်ႈတၢင်း ထႃႇဝရႃႉၽြႃး၊ ၼၼ်ႉမီးၵႃႈၼႂ်းလူမ်းၽိဝ်ႁုင်၊ဢိၵ်ႇတင်း ၽူၼ်လူင်လူမ်းလူင်လႄႈၽႃႈၽူၼ်တင်းလၢႆပဵၼ်ၸိူဝ်ႉၼင်ႇမုၼ်ႈလိၼ်ၵႃႈတႂ်ႈ ၽႃႇတိၼ်မၼ်းၸဝ်ႈဢေႃႈ။
မၼ်းၸဝ်ႈသင်ႇသွၼ်သုင်းမႃႉၼမ်ႉပၢင်ႇလၢႆႇသေလႄႈႁႂ်ႈၼမ်ႉယူတ်းႁႅင်ႈၵႂႃႇ၊ ႁႂ်ႈၼမ်ႉႁွင်ႈၼမ်ႉၵႄးတင်းသဵင်ႈတင်းလူင်ႁႅင်ႈႁွင်ၵႂႃႇဢေႃႈ။ လွႆ ပႃႇသၢၼ်ႇ၊ တင်းလွႆ ၵရမေႇလႃႉ၊ ၸိူဝ်းၼၼ်ႉလႆႈႁဵဝ်ႇၸွပ်ႈၵႂႃႇလႄႈမွၵ်ႇ လေႇပၼုၼ်ႇ၊ ၸိူဝ်းၼၼ်ႉၵေႃႈလႆႈႁဵဝ်ႇႁႅင်ႈၵႂႃႇဢေႃႈ။
လွႆတင်းလၢႆသၼ်ႇဝႆၶွၼ်းၶဝ်ႇယူႇ၊ၵုင်းတင်းလၢႆၸိူမ်ႈပဵၼ်ၼမ်ႉၵႂႃႇယူႇၵႃႈတီႈၽၢႆႇၼႃႈ မၼ်းၸဝ်ႈဢေႃႈ။ ၸႃႉၸဵမ်လိၼ်မိူင်းလေႃးၵႃႉ၊ဢိၵ်ႇတင်းၵူၼ်းၵႃႈဢၼ်ယူႇၵႃႈၼႂ်းမၼ်းၼၼ်ႉၶၢႆႉသေၵႃႈတီႈၽၢႆႇၼႃႈမၼ်းၸဝ်ႈယူႇဢေႃႈ။
ၽူႈလႂ်တၵ်းၸုၵ်းၶၢမ်ႇယူႇၵႃႈတီႈၽၢႆႇၼႃႈတၢင်းၸႂ်မႆႈၶႂ်ႈၸႃႉမၼ်းၸဝ်ႈၼၼ်ႉလႆႈ။ ၽူႈလႂ်တၵ်းၸုၵ်းသဝ်းၵႃႈၼႂ်းဢၢႆႁႅင်းတၢင်းၸႂ်မႆႈၶႂ်ႈၸႃႉမၼ်းၸဝ်ႈၼၼ်ႉလႆႈ။ ဢၢႆႁႅင်းတေႃးသႃႉမၼ်းၸဝ်ႈလႆႈၶၢမ်ႇတၢင်းဢၼ်ထွၵ်ႇႁိုဝ်ႈ၊ မိူၼ်ၸိူဝ်ႉၼင်ႇၽႆးမႆႈၼၼ်ႉလႄႈမၢၵ်ႇႁိၼ်မၢၵ်ႇၽႃတင်းလၢႆလႆႈၶၢမ်ႇတၢင်းဢၼ်မၼ်းၸဝ်ႈၵိူၼ်ႇယႃႉၶျႃးတူၵ်းပဵၼ်ၽွင်ၵႂႃႇဢေႃႈ။
ထႃႇဝရႃႉၽြႃး၊ ပဵၼ်ဢၼ်လီဢၼ်ငၢမ်းလႄႈပဵၼ်တိူၵ်ႈတီႈတိုၵ်းသိုၵ်းၼႂ်းမိူဝ်ႈဢၼ်ၽေးႁွတ်ႈထိုင်ၼၼ်ႉဢေႃႈ။ မၼ်းၸဝ်ႈၵႅတ်ႇၶႄႁႄႉၵင်ႈၶဝ်ၸိူဝ်းဢၼ်သွၼ်ႈပိုင်ႈမၼ်းၸဝ်ႈၼၼ်ႉယူႇဢေႃႈ။
မၼ်းၸဝ်ႈတၵ်းဢဝ်ၼမ်ႉၼွင်းထူမ်ႈႁူမ်ႇၶဝ်ၸိူဝ်းဢၼ်ၶတ်းၶႅင်ႇမၼ်းၸဝ်ႈႁႂ်ႈလုသုမ်း သဵင်ႈမူတ်းလႄႈ တၵ်းလိုပ်ႈၸွမ်းလမ်းၸွမ်းရၢၼ်ႇသူႇမၼ်းၸဝ်ႈတင်းလၢႆၶဝ်ႈၵႃႈၼႂ်းလပ်းသိင်ႇဢေႃႈ။
မႂ်းၵျၢမ်ႇပွင်ၶတ်းတႃႉၵၼ်တင်း ထႃႇဝရႃႉၽြႃး၊ ၸိူဝ်ႉၼင်ႇႁိုဝ်။ မၼ်းၸဝ်ႈတၵ်းယႃႉမႂ်း ပႅတ်ႈဢေႃႈ။ ၵမ်းလိုၼ်းၵူၼ်းဢၼ်ၶတ်းၶဵင်ႇမၼ်းၸဝ်ႈဢမ်ႇလႆႈပေႃႇလႆႈမႃးထႅင်ႈ။
ၶဝ်ၼၼ်ႉၶွင်ႈၶမ်ၸပ်းၵၼ်ယူႇမိူၼ်ၸိူဝ်ႉၼင်ႇတူၼ်ႈၼၢမ်ဢိၵ်ႇတင်းမဝ်းယူႇမိူၼ်ၸိူဝ်ႉၼင်ႇၵူၼ်းမဝ်းလဝ်ႈၼၼ်ႉဢေႃႈ။ ၶဝ်ၼၼ်ႉတၵ်းလႆႈၶၢမ်ႇတၢင်းဢၼ်ၽႆးမႆႈပႅတ်ႈမိူၼ်ၸိူဝ်ႉၼင်ႇၽႆးမႆႈၽိူင်းႁႅင်ႈၼၼ်ႉဢေႃႈ။
ၵေႃႉဢၼ်ၵျၢမ်ႇပွင်ဢၼ်ဢမ်ႇလီဢၼ်ၶတ်းတႃႉၵၼ်တင်း ထႃႇဝရႃႉၽြႃး၊ ၵေႃႉဢၼ်သွၼ်ပၼ်ပိူၼ်ႈႁႂ်ႈႁဵတ်းဢၼ်ႁၢႆႉဢၼ်မိူၵ်ႈၼၼ်ႉပေႃႇဢွၵ်ႇပဵၼ်မႃးၵႃႈၼႂ်းသူတင်းလၢႆယဝ်ႉ။-
ထႃႇဝရႃႉၽြႃး၊ မီးဢမိင်ႉၸမ်ႉ၊ “ပိၵ်ႉသမ်ႉၵူၼ်းမဵဝ်း ဢႃႇသီးရီးယႃး၊ တဵမ်ဝႆႉတင်းဢဵၼ်ႁႅင်းလႄႈၼပ်ႉဢၢၼ်ႇမီးၼမ်ၼႃႇသေၵေႃႈ ၶဝ်တၵ်းလႆႈၶၢမ်ႇတၢင်းဢၼ်ယႃႉပႅတ်ႈလႄႈလပ်ႉႁၢႆၵႂႃႇဢေႃႈ။ ပိၵ်ႉသမ်ႉၵဝ်ယၢမ်ႈၼိၵ်ႈၸၢၵ်ႈငႅၼ်းသႄးမႂ်းသေၵေႃႈၵမ်းလိုၼ်းၵဝ်တၵ်းဢမ်ႇၼိၵ်ႈၸၢၵ်ႈငႅၼ်းသႄးမႂ်းထႅင်ႈ။-
မိူဝ်ႈလဵဝ်ၼႆႉၸိုင်၊ၵဝ်တၵ်းႁၵ်းႁိၵ်းၵၢၼ်းၶဝ်ဢၼ်မီးယူႇၵႃႈၼိူဝ်မႂ်းပႅတ်ႈလႄႈတိုတ်ႉၸိူၵ်ႈဢၼ်မတ်ႉၽုၵ်ႇမႂ်းၸိူဝ်းၼၼ်ႉၶၢတ်ႇပႅတ်ႈဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၸီႇယၢင်ႇလူၺ်ႈလွင်ႈၵူၼ်းမဵဝ်း ဢႃႇသီးရီးယႃး၊ ၸမ်ႉ၊ “ၸိုဝ်ႈသူတၵ်းဢမ်ႇလႆႈတႄႇယူႇမီးယူႇထႅင်ႈသေပွၵ်ႈ။ ၵဝ်တၵ်းပႄႇၽဵဝ်ႈႁုၼ်ႇႁၢင်ႈသၢင်းထုဢၼ်သူတွင်ႈႁဵတ်းၶၵ်းႁဵတ်း၊ဢိၵ်ႇတင်းႁုၼ်ႇႁၢင်ႈသၢင်းထုဢၼ်သူသွၼ်းႁဵတ်းလေႃႇႁဵတ်းၼၼ်ႉပႅတ်ႈသေၵႃႈၼႂ်းၵျွင်းၽြႃးသူဢေႃႈ။ ၵွပ်ႈပိူဝ်ႈသူဢမ်ႇပွင်ႇလွင်ႈၵႃႈသင်လႄႈၵဝ်တၵ်းမႄးႁႅၼ်းပႃႇႁဵဝ်ႈသၢင်းၶႅင်းပုၼ်ႈသူဝႆႉဢေႃႈ၊” ဝႃႈၼင်ႇၼႆဢေႃႈ။
တူၺ်းလူး၊ၵေႃႉဢၼ်မွၵ်ႇလၢတ်ႈၶၢဝ်ႇသတၢင်းသိူဝ်းပျေႃႇလႄႈႁွင်ႉပၢဝ်ႇႁွင်ႉသေႃႇလွင်ႈတၢင်းဢၼ်ၼိမ်ဢၼ်လီၼၼ်ႉပႆတၢင်းမႃးယူႇၵႃႈၼိူဝ်လွႆတင်းလၢႆၼၼ်ႉ။ ၵူၼ်းမဵဝ်း ယုတႃႉ၊ ႟။ ၶၢမ်ႇပွႆးထမ်ႇမႃႉသူၸိူဝ်းၼၼ်ႉတႃႉ။ ၽေႇဝၢတ်ႈၸွမ်းၼင်ႇဢၼ်သူဝႆႉၵတိသဵတ်ႈၸႃႇၼၼ်ႉတႃႉ။ ၵမ်းလိုၼ်းၵေႃႉဢၼ်ႁၢႆႉဢၼ်မိူၵ်ႈၼၼ်ႉတေဢမ်ႇလႆႈယဵပ်ႇလႆႈၶၢမ်ႈသူ။ မၼ်းၼၼ်ႉလႆႈၶၢမ်ႇတၢင်းဢၼ်ပႄႇတႅပ်းပႅတ်ႈမူတ်းမူတ်းသဵင်ႈသဵင်ႈယဝ်ႉ။
ၵေႃႉဢၼ်ႁႂ်ႈလုသုမ်းၼၼ်ႉႁွတ်ႈမႃးလႄႈၶတ်းတႃႉၵၼ်တင်းမႂ်းယဝ်ႉယဝ်ႉ။ ႁဵတ်းသတိတီႈတိူၵ်ႈတီႈတိုၵ်းသိုၵ်းမႂ်းလႄႈ ပႂ်ႉတႃႈပႂ်ႉတၢင်းယူႇတႃႉ။ ႁတ်ႉသၢႆဢႅဝ်မႂ်းလႄႈႁွမ်ႁႅင်းမႂ်းၵႃႈမီး တင်းသဵင်ႈတင်းလူင်တႃႉ။
လွင်ႈမၼ်းၸမ်ႉ၊ ထႃႇဝရႃႉၽြႃး၊ မႄးၵုမ်းမႄးႁဵတ်းမုၼ်ၽုင်းၸိူဝ်ႉၶိူဝ်း ယႃႇၵုပ်ႈ၊ လႄႈမုၼ်ၽုင်းၵူၼ်းမဵဝ်း ဢိသရေး၊ ဢေႃႈ။ ပိၵ်ႉသမ်ႉၶဝ်ၸိူဝ်းဢၼ်ႁိမ်ဢဝ်ၼၼ်ႉႁဵတ်းပႄႉႁဵတ်းၼႅင်ႇယႃႉပႅတ်ႈလႄႈၵိင်ႇၶဝ်ၶႃႈၶဝ်ၼၼ်ႉၵေႃႈလႆႈၶၢမ်ႇတၢင်းဢၼ်ယႃႉပႅတ်ႈဢေႃႈ။
ၶိူင်ႈႁႄႉလၢၵ်ႈၼၢၵ်ႈၵူၼ်းသိုၵ်းရၢၼ်ႇသူႇမႂ်းဢၼ်ႁႅင်းယႂ်ႇၼႃႇၸိူဝ်းၼၼ်ႉပဵၼ်ဢၼ်လႅင်လႄႈ ႁူဝ်ႁၢၼ်ၵူၼ်းသိုၵ်းမၼ်းတင်းလၢႆၼုင်ႈၶူဝ်းၼုင်ႈ ဢၼ်လႅင်ၵမ်ႇဢေႃႈ။ ၼႂ်းမိုဝ်ႉဝၼ်းဢၼ် မၼ်းၸုတုမ်တပ်ႉသိုၵ်းမၼ်းၼၼ်ႉ၊ လၢၵ်ႈၼၢၵ်ႈလဵၵ်းဢၼ်မီးၵႃႈၼိူဝ် လေႃႉမႃႉသိုၵ်းတင်းလၢႆႁိူဝ်ႈမၢပ်ႈမႅပ်ႈလႄႈမႃႉတင်းလၢႆဢွၼ်ၵၼ်ၵျွၵ်းဝႅၼ်ယူႇဢေႃႈ။
လေႃႉမႃႉသိုၵ်းၸိူဝ်းၼၼ်ႉမေႃးယူႇႁိုင်းႁိုင်း ႁၢင်းႁၢင်းၵႃႈၼႂ်းသဵၼ်ႈတၢင်းလႄႈ ၶုၼ်ႇလႅၼ်ႈတၢင်းတႂ်ႈတၢင်းၼိူဝ်ၵႃႈၼႂ်းတီႈဢၼ်ၵႂၢင်ႈလီလႃးလီၸိူဝ်းၼၼ်ႉဢေႃႈ။ ၶဝ်မီးဢရွင်ႇႁိူဝ်ႈလႅင်းမိူၼ်ၸိူဝ်ႉၼင်ႇ ၵၢၼ်ႈၽႆးလႄႈႁိူဝ်ႈမၢပ်ႈမႅပ်ႈယူႇ မိူၼ်ၸိူဝ်ႉၼင်ႇၽႃႉမႅပ်ႈၼၼ်ႉဢေႃႈ။
မူးမၢတ်ႈၽွင်းမိူင်းတင်းလၢႆလႆႈၶၢမ်ႇတၢင်းဢၼ်ႁွင်ႉမႃးဢေႃႈ။ ၼႂ်းမိူဝ်ႈဢၼ်ၶဝ်ယင်းတိုၵ်ႉမႃး တၢင်းၼႃႈယူႇၼၼ်ႉၶဝ်ဢွၼ်ၵၼ် ၶီႈလိုတ်းလႄႈလူမ်ႉဢေႃႈ။ ၶဝ်ႁိပ်ႈၼႅတ်ႈသုတ်ႉၸပ်းသုတ်ႉၸူးၵႃႈတီႈလမ်းဝဵင်းလႄႈပွင်မႄးပွင်ႁဵတ်းတီႈဢၼ်ႁႄႉ ဢၼ်ၵင်ႈဢေႃႈ။
ၽၵ်းတူမႄႈၼမ်ႉတင်းလၢႆမီးတၢင်းဢၼ်ၽုၺ်ႇပိုတ်ႇလႄႈ ႁေႃၶမ်းၸဝ်ႈၼၼ်ႉမီးတၢင်းဢၼ် သၼ်ႇဝႆဢေႃႈ။
မီးတၢင်းဢၼ်ၸီႇယၢင်ႇတႅပ်းတတ်းဝႆႉလႄႈဝႃႈ၊ၵူၼ်းဝဵင်းၼၼ်ႉတၵ်းလႆႈၶၢမ်ႇတၢင်းဢၼ်သိမ်းဢဝ်ၵႂႃႇဢေႃႈ။ ၸိူင်ႉၼၢင်းမၼ်းၸိူဝ်းၼၼ်ႉလႆႈႁွင်ႉၶၢင်းၶီၶၢင်းၽၢၼ်မိူၼ်ၸိူဝ်ႉၼင်ႇၼူၵ်ႉတူႈႁွင်ႉလႄႈ တူပ်းဢူၵ်းၶဝ်လူၺ်ႈတၢင်းဢၼ်ၸႂ်လဵၵ်ႉ ၶေႃးၶူမ်ဢေႃႈ။
မိူၼ်ၸိူဝ်ႉၼင်ႇၼမ်ႉဢၼ်ဢွၵ်ႇမႃးၵႃႈတီႈၽၢႆဢၼ်လုပင်းၼၼ်ႉ ၵူၼ်းတင်းလၢႆတၵ်းဢွၼ်ၵၼ်ႁိပ်ႈၼႅတ်ႈလႅၼ်ႈဢွၵ်ႇသေၵႃႈတီႈဝဵင်း ၼိၼေႇဝူၺ်ႇ၊ ဢေႃႈ။ ပိၵ်ႉသမ်ႉၶဝ်ဢွၼ်ၵၼ်ႁွင်ႉသႅၼ်ႇလႄႈဝႃႈ၊ “ၵိုတ်းသဝ်းတႃႉ၊” ဝႃႈၼင်ႇၼႆသေၵေႃႈ ၽူႈလႂ်သေၵေႃႉသေၵူၼ်းဢမ်ႇဝၢႆႇၶိုၼ်း တူၺ်းၶိုၼ်း။
ဢွၼ်ၵၼ်ႁိမ်ဢဝ်ႁူင်ႇဢဝ်ငိုၼ်းမၼ်းတႃႉ။ ၶမ်းမၼ်းၵေႃႈဢွၼ်ၵၼ်ႁိမ်ဢဝ်ႁူင်ႇဢဝ်တႃႉ။ ဢုၵ်ႉၸႃႇငိုၼ်းၶမ်း၊ဢိၵ်ႇတင်းၶိူင်ႈပိူင်ဢၼ်ထိူၵ်ႈၵႃႈထိူၵ်ႈၶၼ်မီးၼမ်ၼႃႇထၢၼ်ႈပေႃးဢမ်ႇမူတ်းဢမ်ႇသဵင်ႈလႆႈ။
ဝဵင်းၼၼ်ႉလႆႈလုသုမ်းမူတ်းလႄႈပဝ်ႇဝႆႉလၢပ်ႈ ဝႆႉဢေႃႈ။ ပဵၼ်ဢၼ်သဵတ်ႇၵူၼ်း ယဵၼ်ၵူၼ်းဝႆႉဢေႃႈ။ ႁူဝ်ၸႂ်ၶဝ်မီးတၢင်းဢၼ်လုယူႇ၊ႁူဝ်ၶဝ်ႇၶဝ်မီးတၢင်းဢၼ်သၼ်ႇယူႇတူင်ႉယူႇ၊ ဢဵၼ်ႁႅင်းၶဝ်မူတ်းၵႂႃႇသဵင်ႈၵႂႃႇလႄႈၼႃႈၶဝ်မီးတၢင်းဢၼ်ႁိူတ်ႇႁႅင်ႈယူႇဢေႃႈ။
ဝဵင်းဢၼ်မိူၼ်ၵၼ်တင်းထမ်ႈသၢင်ႇသီႈၼၼ်ႉ မီးၵႃႈတီႈလႂ်၊တီႈဢၼ်သၢင်ႇသီႈၼုမ်ႇၵိၼ်၊ တီႈဢၼ်သၢင်ႇသီႈပေႃႈ၊သၢင်ႇသီႈမႄႈ ၵႂႃႇၵႂႃႇမႃးမႃးယူႇလႄႈသၢင်ႇသီႈဢွၼ်ႇ လႆႈလွတ်ႈၽေးၼၼ်ႉ။
သၢင်ႇသီႈတူဝ်ပေႃႈၼၼ်ႉၶူပ်းၶၢတ်ႇတၢင်းၵိၼ်ဝႆႉ ပုၼ်ႈလုၵ်ႈဢွၼ်ႇလၢင်းဢွၼ်ႇမၼ်း တင်းလၢႆယူႇ၊ ၵၢပ်ႈငႅၼ်းၶေႃးတူဝ်သတ်းပုၼ်ႈသၢင်ႇသီႈတူဝ်မႄႈယူႇသေလႄႈ ႁႂ်ႈထမ်ႈမၼ်းႁူးမၼ်းတဵမ်ဝႆႉတင်းတူဝ်ဢၼ်တိလႆႈၺွပ်းလႆႈၸိူဝ်းၼၼ်ႉယူႇ၊ ဢိၵ်ႇတင်းႁူးတီႈယူႇမၼ်းတဵမ်ဝႆႉတင်းတူဝ်ဢၼ်သိၵ်ႇပႅတ်ႈယႃႉပႅတ်ႈၼၼ်ႉဢေႃႈ။
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊တူၺ်းလူး။ ၵဝ်ၶတ်းတႃႉၵၼ်တင်းမႂ်းဢေႃႈ။ ၵဝ်တၵ်းဢဝ်လေႃႉမႃႉသိုၵ်းမႂ်းၸိူဝ်းၼၼ်ႉတုတ်ႇၽႆးပႅတ်ႈႁႂ်ႈပဵၼ်ၵႂၼ်းၽႆးၵႂႃႇလႄႈလၢပ်ႇလႅဝ်းတၵ်းၵိၼ်သၢင်ႇသီႈၼုမ်ႇမႂ်းၸိူဝ်းၼၼ်ႉပႅတ်ႈဢေႃႈ။ ၵဝ်တၵ်းပႄႇၽဵဝ်ႈဢုၵ်ႉၸႃႇမႂ်းဢၼ်မႂ်းႁိမ်ႁူင်ႈဢဝ်မႃးၼၼ်ႉပႅတ်ႈသေၵႃႈၼိူဝ်လိၼ်မိူင်းလႄႈၵမ်းလိုၼ်းၽူႈလႂ်သေၵေႃႉသေၵူၼ်းဢမ်ႇလႆႈငိၼ်းသဵင်ၵႂၢမ်းသၢၼ်ႇတမၢၼ်ႇမႂ်းၸိူဝ်းၼၼ်ႉယဝ်ႉဢေႃႈ။
ႁႂ်ႈဢႃႉမၢင်ႇၵလႃႇမီးတီႈဝဵင်းဢၼ်ၸၢင်ႈထွၵ်ႇလိူတ်ႈၵူၼ်းပႅတ်ႈၼၼ်ႉသေၵမ်းလူၺ်ႈ။ ဝဵင်းၼၼ်ႉပျေႉၸုမ်ႇတဵမ်ဝႆႉတင်းတၢင်းဢၼ် ပႅတ်ႉလႅၼ်တၢင်းဢၼ်ႁဵတ်းဢထမ်ႇမႃႉဢေႃႈ။ ဝဵင်းၼၼ်ႉတဵမ်ဝႆႉတင်းဢုၵ်ႉၸႃႇဢၼ်သိမ်းဢဝ်မႃးၸိူဝ်းၼၼ်ႉဢေႃႈ။
လႆႈငိၼ်းသဵင်ဢၼ်ဢဝ်ၶွၼ်ႉပေႃႉယႅၼ်ႉ၊သဵင်ဢၼ်မၢၵ်ႇလေႃႉၵိင်ႈ၊ သဵင်ဢၼ်မႃႉဝႅၼ်၊သဵင်လေႃႉမႃႉသိုၵ်း လႅၼ်ႈဢေႃႈ။
မီးတၢင်းဢၼ်ၵူၼ်းသိုၵ်းၶီႇမႃႉယူႇ၊တၢင်းဢၼ်လၢပ်ႇႁိူဝ်ႈမၢပ်ႈယူႇ၊ တၢင်းဢၼ်ႁွၵ်ႇႁိူဝ်ႈမၢပ်ႈယူႇ၊ၵူၼ်းၼမ်ၼႃႇလႆႈၶၢမ်ႇတၢင်းဢၼ်ဢဝ်တၢႆယူႇ၊တူဝ်တၢႆၶဝ်ပဵၼ်ၵွင်ယူႇဢေႃႈ။ ၼပ်ႉဢၢၼ်ႇတူဝ်တၢႆၸိူဝ်းၼၼ်ႉလႄႈဢမ်ႇသဵင်ႈလႆႈ။ ၶဝ်ဢွၼ်ၵၼ်ၶီႈလိုတ်းမႅၼ်ႈတူဝ်တၢႆၸိူဝ်းၼၼ်ႉလႄႈလူမ်ႉဢေႃႈ။
လွင်ႈတၢင်းၸိူဝ်းၼၼ်ႉပဵၼ်ၵွပ်ႈပိူဝ်ႈဢမုမေႇထုင်ႇဢၼ်ဢမ်ႇတြႃးဢၼ်မႄႈမွၵ်ႇယႃႈ ဢဝ်တင်းႁၢင်ႈၽၢင်ၶဝ်သေလႄႈၸၢင်ႈၸူဝ်းဢဝ်ပႅတ်ႉဢဝ်၊တၢင်းဢၼ်ဢဝ်တင်းမေႇထုင်ႇဢၼ်ဢမ်ႇတြႃးတင်းလၢႆၼၼ်ႉသေလႄႈ ၵႃႉၶၢႆၵူၼ်းၵူႈၶိူဝ်းၶိူဝ်းတင်းလၢႆ၊ဢၼ်ဢဝ် တင်းတၢင်းဢၼ်ၸၢင်ႈပႅတ်ႉလႅၼ် ၸူဝ်းဢဝ်တင်းလၢႆ ၵႃႉၶၢႆမဵဝ်းၵူၼ်းၵူႈၶိူဝ်းၶိူဝ်းတင်းလၢႆႁဵတ်းမႃး ၼမ်ၼႃႇၼၼ်ႉဢေႃႈ။
ၸဝ်ႈဢၼၼ်ႇတႃႉတၼ်းၶူဝ်း၊ထႃႇဝရႃႉၽြႃး၊ မီးဢမိင်ႉၸမ်ႉ၊ၵဝ်ၶတ်းၶႅင်ႁႅင်းတႃႉၵၼ်တင်းမႂ်းဢေႃႈ။ ၵဝ်တၵ်းဝူတ်ႈပိၼ်ႈၶူဝ်းၼုင်ႈမႂ်းၶိုၼ်ႈထိုင်တီႈ ၼႃႈမႂ်းလႄႈၼႄပျႃးတၢင်းဢၼ်မႂ်းယူႇ တူဝ်ပူၺ်ၼၼ်ႉ၊ တီႈၽၢႆႇၼႃႈၵူၼ်းၵူႈၶိူဝ်းၶိူဝ်းလႄႈႁႂ်ႈတၢင်ႇသိုင်ႇတၢင်ႇမိူင်းလႆႈႁၼ်တၢင်းဢၼ်မႂ်းလႆႈဢူၵ်း လႆႈဢၢႆၼၼ်ႉဢေႃႈ။
ၵဝ်တၵ်းဢဝ်ဢၼ်ဝူၺ်ႇဢၼ်ႁင်ႈထိမ်ႈသႂ်ႇမႂ်းလႄႈႁႂ်ႈမႂ်းလႆႈၵူဝ်ႈၵိူၵ်ႇသေလႄႈ ဢဝ်မႂ်းဝႆႉတီႈဢၼ်ပိူၼ်ႈတၵ်းလူတၵ်းတူၺ်းၼၼ်ႉဢေႃႈ။
ၶဝ်ၵႃႈဢၼ်ႁၼ်မႂ်းၼၼ်ႉတၵ်းဢွၼ်ၵၼ်ဢွၵ်ႇပၢႆႈသေၵႃႈတီႈမႂ်းလႄႈလၢတ်ႈလႄႈဝႃႈ၊ “ဝဵင်း ၼိၼေႇဝူၺ်ႇ၊ လုလႅဝ်ယဝ်ႉ။ ၽူႈလႂ် တၵ်းၶၢင်းၶီၶၢင်းၽၢၼ်ၵွပ်ႈပိူဝ်ႈမၼ်းၼၼ်ႉ၊” ဝႃႈၼင်ႇၼႆဢေႃႈ။ ၵဝ်တၵ်းႁႃဢဝ်ၶဝ်ၸိူဝ်းဢၼ်ႁဵတ်းႁႂ်ႈမႂ်းပျေႃႇၸႂ်ၼၼ်ႉလႆႈၵႃႈတီႈလႂ်။
ဝဵင်း ၼိၼေႇဝူၺ်ႇ၊ ႟။ မႂ်းၼႆႉယဵင်ႈၶႅၼ်းယႂ်ႇမျၢတ်ႈၼႃႇသေဝဵင်း ထေႇပဵတ်ႉ၊ ဢၼ်ပဵၼ်ဝဵင်းလူင်မိူင်း ဢေးၵျိပ်ႉ၊ ၼၼ်ႉႁိုဝ်း။ ဝဵင်းၼၼ်ႉတႄႇယူႇၵႃႈၼႂ်းၵႄႈဝူင်းၵၢင်ၼမ်ႉႁွင်ႈၼမ်ႉၵႄးတင်းလၢႆဢၼ်ပဵၼ်ၸိူဝ်ႉၼင်ႇလမ်းဝဵင်းဢၼ်ႁႄႉဢၼ်ၵင်ႈၼၼ်ႉလႄႈမႄႈၼမ်ႉ ၼၢႆးလ်၊ ပဵၼ်ၸိူဝ်ႉၼင်ႇတိူၵ်ႈတီႈဢၼ်မၼ်ႈၶိူင်ႈမၼ်းဢေႃႈ။-
မိူင်း ဢေႇတီႇဢူဝ်းပီးယႃး၊ တင်းမိူင်း ဢေးၵျိပ်ႉ၊ ၼၼ်ႉပဵၼ်ဢဵၼ်ႁႅင်းမၼ်းဢေႃႈ။ ဢဵၼ်ႁႅင်းမၼ်းၼၼ်ႉၼပ်ႉဢၢၼ်ႇတူၺ်းလႄႈဢမ်ႇသဵင်ႈဢမ်ႇမူတ်းလႆႈ။ မိူင်း လိပ်ႉပီးယႃး၊ ၵေႃႈ၊ပဵၼ်ၶဝ်ၸိူဝ်းဢၼ်ၸွႆႈၵမ်ႉၸွႆႈထႅမ်မၼ်းဢေႃႈ။-
ၵူၺ်းၵႃႈ၊ဝဵင်းၼၼ်ႉလႆႈၶၢမ်ႇတၢင်းဢၼ်ၶၢႆႉတီႈၵႂႃႇလႄႈပိူၼ်ႈသိမ်းဢဝ်ၵႂႃႇယဝ်ႉယဝ်ႉ။ လုၵ်ႈၶဝ်လၢင်းၶဝ်ၼၼ်ႉလႆႈၶၢမ်ႇတၢင်းဢၼ်ဢဝ်ႁၵ်းႁိၵ်းသိၵ်ႇလႅဝ်ပႅတ်ႈၵႃႈတီႈႁူဝ်တၢင်းၵႃႈမီးယဝ်ႉယဝ်ႉ။ ၵူၼ်းဝဵင်းဢၼ်မီးၵုင်ႇသရေႇၸိူဝ်းၼၼ်ႉလႆႈၶၢမ်ႇတၢင်းဢၼ်တူၵ်းၸႃႇၵွၵ်ႈလႄႈၵူၼ်းဝဵင်းဢၼ်ႁႅင်းယႂ်ႇၵႃႈမီးၼၼ်ႉလႆႈၶၢမ်ႇတၢင်းဢၼ်ဢဝ်ၸိူၵ်ႈလဵၵ်းမတ်ႉၽုၵ်ႇဝႆႉယဝ်ႉယဝ်ႉ။
မႂ်းၵေႃႈတၵ်းလႆႈမဝ်းလဝ်ႈမဝ်းၵမ်သေလႄႈတဵတ်ႇမႅပ်းယူႇဢေႃႈ။ မႂ်းတၵ်းလႆႈႁႃတီႈဢၼ်မၼ်ႈဢၼ်ၶိူင်ႇၼၼ်ႉႁႂ်ႈၵၢင်းလွတ်ႈသေၵႃႈၼႂ်းမိုဝ်းရၢၼ်ႇသူႇဢေႃႈ။-
တိူၵ်ႈတီႈတိုၵ်းသိုၵ်းမႂ်းၵႃႈမီးၼၼ်ႉတၵ်းလႆႈပဵၼ်မိူၼ်ၸိူဝ်ႉၼင်ႇတူၼ်ႈမၢၵ်ႇလိူဝ်ႇဢၼ်ဢွၵ်ႇမၢၵ်ႇဢၼ်သုၵ်းဢွၼ်တၢင်းပိူၼ်ႈၼၼ်ႉလႄႈပေႃးသၼ်ႇၶွၼ်းၸိုင်၊တၵ်းတူၵ်းသႂ်ႇၵႃႈၼႂ်းသူပ်းၵေႃႉဢၼ်ၶႂ်ႈၵိၼ်ၼၼ်ႉဢေႃႈ။
တူၺ်းလူး။ ၵူၼ်းသိုၵ်းမႂ်းၸိူဝ်းၼၼ်ႉ၊ပဵၼ်ၸိူဝ်ႉၼင်ႇမႄႈယိင်းဢၼ်ယူႇၵႃႈၼႂ်းၵႄႈဝူင်ႈၵၢင်မႂ်းဢေႃႈ။ ၽၵ်းတူမိူင်းမႂ်းၸိူဝ်းၼၼ်ႉမီးတၢင်းဢၼ်ၽုၺ်ႇပိုတ်ႇပၼ်ၵႂၢင်ႈၵႂၢင်ႈတီႈရၢၼ်ႇသူႇမႂ်းသေလႄႈၽႆးလႆႈမႆႈၵိူၼ်ႇၽၵ်းတူမႂ်းၸိူဝ်းၼၼ်ႉယဝ်ႉယဝ်ႉ။-
တဵၵ်းၼမ်ႉဝႆႉပုၼ်ႈၶိင်ႇမိူဝ်ႈဢၼ်ရၢၼ်ႇသူႇမႂ်းတင်းလၢႆလွမ်ႉလဵပ်ႈႁွပ်ႈမႂ်းယူႇၼၼ်ႉတႃႉ။ ႁႂ်ႈတိူၵ်ႈတီႈတိုၵ်းသိုၵ်းတင်းလၢႆမၼ်ႈၶိူင်ႇတႃႉ။ ၶဝ်ႈၵႃႈၼႂ်းၵူမ်ႇလႄႈယဵပ်ႇၼူတ်ႈလိၼ်ပုၼ်ႈမၢၵ်ႇဢုတ်ႇလႄႈမႄးႁႅၼ်းပိူင်ပုၼ်ႈတၵ်းထွတ်ႇမၢၵ်ႇဢုတ်ႇတႃႉ။-
ၽႆးတၵ်းမႆႈမႂ်းၵႃႈတီႈၼၼ်ႈလႄႈလၢပ်ႇလႅဝ်းတၵ်းတႅပ်းၽၼ်းမႂ်းပႅတ်ႈဢေႃႈ။ ဢၼ်ၸိူဝ်းၼၼ်ႉၶူပ်းၵိၼ်မႂ်းမိူၼ်ၸိူဝ်ႉၼင်ႇမႅင်းၸၵ်းတႅၼ်ၶူပ်းၵိၼ်မၢၵ်ႇၶဝ်ႈႁူင်းၶဝ်ႈၼၼ်ႉဢေႃႈ။ ၶတ်းၸႂ်ၵျူဝ်းၸႃးႁဵတ်းႁႂ်ႈၵူၼ်းမႂ်းၼမ်ၵိုၼ်းၼႃႇမိူၼ်ၸိူဝ်ႉၼင်ႇဢၼ်ၸၵ်းတႅၼ်ၼၼ်ႉလႄႈႁႂ်ႈၼမ်ၵိုၼ်းမိူၼ်ၸိူဝ်ႉၼင်ႇမႅင်းၵႅင်းၼၼ်ႉဢေႃႈ။-
မႂ်းႁႂ်ႈၸဝ်ႈၵုၼ်ႇၸဝ်ႈသိၼ်မႂ်းၼမ်ၼႃႇသေလၢဝ်ၵၢင်ႁၢဝ်ၸိူဝ်းၼၼ်ႉဢေႃႈ။ ၵူၺ်းၵႃႈ၊ၶဝ်ဢွၼ်ၵၼ်ပၢႆႈႁၢႆၵႂႃႇသဵင်ႈမိူၼ်ၸိူဝ်ႉၼင်ႇၸၵ်းတႅၼ်ၼမ်ၼႃႇၵီႈပိၵ်ႇၶဝ်လႄႈမိၼ်ၵႂႃႇတီႈဢၼ်ၵႆၼၼ်ႉယဝ်ႉ။-
ၸဝ်ႈၶုၼ်မႂ်းၸိူဝ်းၼၼ်ႉပဵၼ်ၸိူဝ်ႉၼင်ႇၸၵ်းတႅၼ်၊ၶုၼ်သိုၵ်းမႂ်းၸိူဝ်းၼၼ်ႉပဵၼ်ၸိူဝ်ႉၼင်ႇမႅင်းၵႅင်းဢၼ်ၸၢင်ႈဢွၼ်ၵၼ်မူပ်ႇယူႇၵႃႈတီႈႁိမ်းႁူဝ်ႉႁိမ်းႁိူၵ်ႈၼႂ်းမိုဝ်ႉဝၼ်းဢၼ်ၵတ်းၼၼ်ႉဢေႃႈ။ မိူဝ်ႈဢၼ်လႅတ်ႇဢွၵ်ႇၼၼ်ႉၸိုင်၊ၶဝ်မိၼ်ၵႂႃႇလႄႈဢမ်ႇမီးၽူႈလႂ်ႁုလွင်ႈဢၼ်ၶဝ်ႁွတ်ႈထိုင်ၵႃႈတီႈလႂ်ၼၼ်ႉ။
ၶုၼ်ႁေႃၶမ်း ဢႃႇသီးရီးယႃး၊ ႟။ ၵူၼ်းဢၼ်လဵင်ႉသူဝ်းထိင်းသူဝ်းမႂ်းၸိူဝ်းၼၼ်ႉၼွၼ်းလပ်းယူႇ။ မူးမၢတ်ႈၽွင်းမိူင်းမႂ်းၸိူဝ်းၼၼ်ႉၼွၼ်းလပ်းလိုမ်းတူဝ်ယူႇ။ ၵူၼ်းမႂ်းတင်းလၢႆၸိူဝ်းၼၼ်ႉၽၢတ်ႇၽႄၵၼ်ယူႇၵႃႈၼိူဝ်သၼ်လွႆၵူႈတီႈၵူႈလႅၼ်လႄႈဢမ်ႇမီးၽူႈလႂ်ႁႂ်ႈၶဝ်ၸုၵၼ်တုမ်ၵၼ်။-
တၢင်းၸဵပ်းမႂ်းဢမ်ႇႁၢႆလႆႈ။ တၢင်းဢၼ်တိူဝ်ႉဢၼ်မၢတ်ႇမႂ်းႁႅင်းယႂ်ႇၼႃႇလူင်လၢင်ဢေႃႈ။ ၶဝ်ၵႃႈဢၼ်ငိၼ်းသတၢင်းသဵင်ၶၢဝ်ႇမႂ်းၼၼ်ႉတၵ်းဢွၼ်ၵၼ်တူပ်းမိုဝ်းသႄႉသွမ်းဢေႃႈ။ လွင်ႈမၼ်းၸမ်ႉ၊မီးၽူႈလႂ်ဢၼ်လႆႈၵၢင်းလွတ်ႈသေတၢင်းႁဵတ်းဢၼ်ႁၢႆႉမိူၵ်ႈမႂ်းၼၼ်ႉ၊ဝႃႈၼင်ႇၼႆဢေႃႈ။ ၵျၢမ်းပရေႃးၽႅတ်ႈၼႃႇႁုမ်ႇယဝ်ႉယဝ်ႉဢေႃႈ။
ၼႆႉၸမ်ႉ၊ပဵၼ်ပျႃႇတိၵ်ႈၸဝ်ႈဢၼ်ပရေႃးၽႅတ်ႈ ႁပၵ်ႉၵုၵ်ႉ၊ လႆႈၶၢမ်ႇဢဝ်ၼၼ်ႉဢေႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းယင်းဢမ်ႇငိၼ်းလႄႈၶႃႈၸဝ်ႈႁဝ်းတၵ်းလႆႈႁွင်ႉသႅၼ်ႇယူႇႁိုင်ၵႃႈႁိုဝ်တီႈၶႃႈ။ ၸဝ်ႈႁဝ်းယင်းဢမ်ႇၵႄႇသႄႇၶျွတ်ႈဢဝ်လႄႈၶႃႈၸဝ်ႈတၵ်းလႆႈသႅၼ်ႇႁွင်ႉလူၺ်ႈလွင်ႈဢမုဢထမ်ႇမႃႉယူႇၵႃႈတီႈၽၢႆႇၼႃႈၸဝ်ႈႁဝ်းႁိုင်ၵႃႈႁိုဝ်တီႈၶႃႈ။-
ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းဢဝ်လွင်ႈတၢင်းဢၼ်ဢမ်ႇတြႃးၼႄပျႃးတီႈၶႃႈၸဝ်ႈလႄႈႁႂ်ႈၶႃႈၸဝ်ႈႁၼ်ဢမုဢထမ်ႇမႃႉယူႇၸိူဝ်ႉၼင်ႇႁိုဝ်တီႈၶႃႈ။ လွင်ႈတၢင်းဢၼ်ႁိမ်ဢဝ် ဢိၵ်ႇတင်းလွင်ႈတၢင်းဢၼ်ႁဵတ်းပႄႉႁဵတ်းၼႅင်ႇၼၼ်ႉမီးယူႇသိုဝ်ႈၼႃႈတႂ်ႈတႃၶႃႈၸဝ်ႈတီႈၶႃႈဢေႃႈ။ တၢင်းဢၼ်တိုၵ်းတေႃးၵၼ်လႄႈၽိတ်းၵၼ်ထဵင်ၵၼ်ၼၼ်ႉၵေႃႈမီးယူႇၵူႈတီႈၵူႈလႅၼ်တီႈၶႃႈဢေႃႈ။-
ပိူဝ်ႈၼႆလႄႈဢုပတေႇတြႃးၼၼ်ႉႁႅင်းၵေႇသုတ်ႈယွမ်းၵႂႃႇလႄႈတၢင်းဢၼ်ၸီႇယၢင်ႇတႅပ်းတတ်းၸွမ်းၼင်ႇတြႃးၼၼ်ႉဢမ်ႇမီးလႃးလႃးတီႈၶႃႈ။ ၵွပ်ႈပိူဝ်ႈၶဝ်ၸိူဝ်းဢၼ်ဢမ်ႇတြႃးၼၼ်ႉလွမ်ႉလဵပ်ႈႁွပ်ႈၶဝ်ၸိူဝ်းဢၼ်သိုဝ်ႈတေႃႇၼၼ်ႉဝႆႉလႄႈတၢင်းဢၼ်ၸီႇယၢင်ႇတႅပ်းတတ်းတြႃးၼၼ်ႉပေႃႇဢွၵ်ႇပဵၼ်ဢၼ်ပိူင်ႈဢၼ်ၽိတ်းၵူၺ်းတီႈၶႃႈဢေႃႈ။
“ဢွၼ်ၵၼ်တူၺ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆတႃႉ။ သူတၵ်းမီးတၢင်းဢၼ်ဢၢမ်းဢေႃးၼႃႇလူင်လၢင်ဢၼ်သူလႆႈႁၼ်ၼၼ်ႉဢေႃႈ။ လွင်ႈမၼ်းၸမ်ႉ၊မဵဝ်းဢၼ်ၵဝ်တၵ်းႁဵတ်းၵႃႈၼႂ်းၸူဝ်ႈပၢၼ်သူၼၼ်ႉပိၵ်ႉသမ်ႉမွၵ်ႇလၢတ်ႈၼႄပျႃးတီႈသူသေၵေႃႈသူဢမ်ႇယုမ်ႇၼၼ်ႉဢေႃႈ။-
ၵဝ်တၵ်းတိုၵ်းယူင်းမဵဝ်းၵူၼ်း ပႃႇပုလုၼ်ႇ၊ ဢၼ်ႁၢဝ်ႈၵျၢမ်းၶၼ်ၽႂ်းၼႃႇလႄႈဢွၼ်ၵၼ်ၶီႇသိုၵ်းၵႂႃႇၵႃႈၼိူဝ်ၼႃႈလိၼ်တင်းသဵင်ႈတင်းမူတ်းႁႂ်ႈလႆႈသိမ်းဢဝ်တီႈယူႇဢၼ်ၶဝ်ဢမ်ႇပိူင်ႇၼၼ်ႉၸိူဝ်းၼၼ်ႉဢေႃႈ။-
ၶဝ်ၼၼ်ႉပဵၼ်ဢၼ်လီၵူဝ်လီႁႄ၊လီတူၵ်းၸႂ်လႂ်တိုၼ်ႇဝႆႉလႄႈတၢင်းဢၼ်ၶဝ်ၸီႇယၢင်ႇတႅပ်းတတ်းတြႃး၊ဢိၵ်ႇတင်းၵုင်ႇသရေႇၶဝ်ၼၼ်ႉမီးမႃးၵႃႈၼႂ်းၶဝ်ၵူၺ်းဢေႃႈ။
“မႃႉၶဝ်ၼၼ်ႉၶၼ်ၽႂ်းလိူဝ်တွၼ်းၼႃႇသေသိူဝ်ၸုမ်ႈလႄႈႁၢဝ်ႈၵျၢမ်းၼႃႇသေမႃထိူၼ်ႇဢၼ်လႄႇၶိင်ႇၵၢင်ၶိုၼ်းၼၼ်ႉဢေႃႈ။ ၵူၼ်းသိုၵ်းၶီႇမႃႉၶဝ်ၸိူဝ်းၼၼ်ႉၵႂႃႇတၢင်းၼႃႈၶဝ်ၶၼ်ၽႂ်း၊ၶဝ်ဢွၼ်ၵၼ်လုၵ်ႉသေၵႃႈတီႈဢၼ်ၵႆမႃးလႄႈမိၼ်မႃးမိူၼ်ၸိူဝ်ႉၼင်ႇၼူၵ်ႉၶၢင်ႇလေႃႉဢၼ်ႁိပ်ႈၼႅတ်ႈႁႂ်ႈလႆႈသိၵ်ႇၵိၼ်တူဝ်ၼိူဝ်ႉၼၼ်ႉဢေႃႈ။
“ၶဝ်တင်းသဵင်ႈတင်းလူင်ၼၼ်ႉဢွၼ်ၵၼ်မႃးႁႂ်ႈလႆႈၼိၵ်ႈၸၢၵ်ႈငႅၼ်းသႄးဢေႃႈ။ ၶဝ်ၼၼ်ႉမုင်ႈၼႃႈၵႂႃႇတၢင်းၼႃႈလႄႈဢဝ်ၶဝ်ၸိူဝ်းဢၼ်တိလႆႈမႃးၼၼ်ႉၸုၵၼ်တုမ်ၵၼ်ဝႆႉမိူၼ်ၸိူဝ်ႉၼင်ႇမဵတ်ႉႁိၼ်မဵတ်းသၢႆးဢေႃႈ။-
ၶဝ်တၵ်းဢွၼ်ၵၼ်ႁဵတ်းတၢင်းဢၼ်လူလၢႆတီႈၶုၼ်ႁေႃၶမ်းတင်းလၢႆလႄႈႁဵတ်းပျၢၵ်ႈၶူဝ်ၶုၼ်တင်းလၢႆဢေႃႈ။ ၶဝ်တၵ်းဢွၼ်ၵၼ်ႁဵတ်းပျၢၵ်ႈၶူဝ်တိူၵ်ႈတီႈတိုၵ်းသိုၵ်းၵႃႈမီးလႄႈဢဝ်လိၼ်ၵေႃႇၵွင်ၶိုၼ်ႈသေလႄႈတိုၵ်းသိမ်းဢဝ်ဢေႃႈ။-
လိုၼ်းၼၼ်ႉ၊ၶဝ်ၼၼ်ႉတၵ်းပတ်ႉထူဝ်းမိူၼ်ၸိူဝ်ႉၼင်ႇလူမ်းလႄႈပူၼ်ႉၵႂႃႇသေယဝ်ႉ၊ၶဝ်မီးဢပျတ်ႈၵွပ်ႈပိူဝ်ႈၶဝ်ယုမ်ႇဝႃႈ၊တၼ်းၶူဝ်းၶဝ်ၼၼ်ႉပဵၼ်ၽြႃးၶဝ်ယဝ်ႉလူင်ပႄႇ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၽြႃးပဵၼ်ၸဝ်ႈၵဝ်ၶႃႈ၊ၽြႃးဢၼ်မူတ်းၸၢင်ႇၵဝ်ၶႃႈတီႈၶႃႈ။ ၸဝ်ႈႁဝ်းတႄႇယူႇၼိၵ်ႈၸႃႉထႃႇဝရႃႉဢမ်ႇၸႂ်ႈတီႈၶႃႈႁိုဝ်း။ ပေႃးၸႂ်ႈၸိူဝ်ႉၼင်ႇၼၼ်ၸိုင်၊ၶႃႈၸဝ်ႈႁဝ်းၶဝ်တၵ်းဢမ်ႇလႆႈတၢႆတီႈၶႃႈၵူၺ်း။ ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းၶၢၼ်းၶဝ်ဝႆႉ ႁႂ်ႈလႆႈတႅပ်းတတ်းတြႃးတီႈၶႃႈယဝ်ႉ။ မၢၵ်ႇႁိၼ်မၢၵ်ႇၽႃတီႈၶႃႈ။ ၸဝ်ႈႁဝ်းၶျႃးတီႈယူႇပၼ်ၶဝ်ပုၼ်ႈတၵ်းပၼ်တၢမ်ႇဢပျတ်ႈတီႈၶႃႈယဝ်ႉ။-
ၸဝ်ႈႁဝ်းမီးတႃဢၼ်မူတ်းသႂ်ထၢၼ်ႈပေႃးဢမ်ႇလူဢမ်ႇတူၺ်းတုၸရိူၵ်ႈလႆႈတီႈၶႃႈဢေႃႈ။ ၸဝ်ႈႁဝ်းဢမ်ႇၸၢင်ႈလူၸၢင်ႈတူၺ်းဢမုဢထမ်ႇမႃႉၼၼ်ႉတီႈၶႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းလူတူၺ်းၶဝ်ၸိူဝ်းဢၼ်သဵတ်ႈၸႃႇလုၼၼ်ႉသေယဝ်ႉ၊တဵတ်ႇယဵၼ်ယူႇၼႂ်းမိူဝ်ႈဢၼ်ၵေႃႉဢၼ်ႁၢႆႉဢၼ်မိူၵ်ႈၼၼ်ႉယႃႉၽဵဝ်ႈၵေႃႉဢၼ်သိုဝ်ႈတေႃႇၼႃႇသေမၼ်းၼၼ်ႉတီႈၶႃႈ။-
ၸဝ်ႈႁဝ်းႁဵတ်းႁႂ်ႈၵူၼ်းတင်းလၢႆပဵၼ်ၸိူဝ်ႉၼင်ႇပႃပၢင်ႇလၢႆႇဢိၵ်ႇတင်းၸိူဝ်ႉၼင်ႇတူဝ်မူင်ႈတူဝ်မႅင်းဢၼ်ဢမ်ႇမီးၶုၼ်ၼၼ်ႉတီႈၶႃႈဢေႃႈ။-
ရၢၼ်ႇသူႇၼၼ်ႉဢဝ်ၶေႃဝိတ်းသေဝိတ်းဢဝ်ၶဝ်ၵႃႈမီးၼၼ်ႉယူႇဢေႃႈ။ ဢဝ်ၶႄႁူမ်ႇသုမ်ႇဝႆႉယူႇ၊ဢဝ်ၶႄၶင်ၶဝ်ဝႆႉသေလႄႈၸူမ်းသိူဝ်းသႂၢင်ႇၸႂ်ယူႇတီႈၶႃႈဢေႃႈ။-
ပိူဝ်ႈၼႆလႄႈမၼ်းသၢၵ်ႈလူႇတၢင်းလူႇတီႈၶႄမၼ်းလႄႈဢဝ်ၼၢမ်ႇသႃႇတုတ်ႇၽႆးတီႈၶႄမၼ်းတီႈၶႃႈဢေႃႈ။ လွင်ႈမၼ်းၸမ်ႉ၊ၵွပ်ႈပိူဝ်ႈၶိူင်ႈပိူင်ၸိူဝ်းၼၼ်ႉပၼ်ၵႃႈဢၼ်လီၵႃႈမီးတင်းသဵင်ႈတင်းလူင်တီႈမၼ်းၼၼ်ႉဢေႃႈ။
ပိူဝ်ႈဢၼ်ပဵၼ်ၼင်ႇၼႆလႄႈမၼ်းတၵ်းလႆႈဢဝ်ပႃၵႃႈၼႂ်းၶႄမၼ်းၼၼ်ႉဢွၵ်ႇပႅတ်ႈယူႇတႃႇသေႇတီႈၶႃႈႁိုဝ်း။ မၼ်းယင်းဢမ်ႇႁၵ်ႉဢဵတ်းလူၵူၼ်းၵူႈၸိူဝ်ႉၵူႈမဵဝ်းၼၼ်ႉလႄႈတၵ်းလႆႈယႃႉၽဵဝ်ႈပႅတ်ႈယူႇတႃႇသေႇတီႈၶႃႈႁိူဝ်း။
ၵဝ်တၵ်းၸုၵ်းယူႇၵႃႈၼိူဝ်ထဵင်လၢင်းၵဝ်လႄႈမီးယူႇၵႃႈတီႈတိူၵ်ႈတီႈတိုၵ်းသိုၵ်းသေယဝ်ႉ၊ပႂ်ႉထႃႈလွင်ႈဢၼ်မၼ်းၸဝ်ႈတၵ်းမီးဢမိင်ႉတီႈၵဝ်ၸိူဝ်ႉၼင်ႇႁိုဝ်၊ဢိၵ်ႇတင်းလွင်ႈဢၼ်မၼ်းၸဝ်ႈ တၵ်းလႆႈၶိုၼ်းတွပ်ႇလူၺ်ႈလွင်ႈတၢင်းဢၼ်ၵဝ်တိူင်ႇၼၼ်ႉဢေႃႈ။
ထႃႇဝရႃႉၽြႃး၊ ၶိုၼ်းတွပ်ႇတီႈၵဝ်လႄႈဝႃႈ၊ “မႂ်းတႅမ်ႈပျႃႇတိၵ်ႈရူႇပႃႇရူင်ႇဝႆႉတႃႉ။ တႅမ်ႈမၢႆဝႆႉၵႃႈၼိူဝ်ၶႅပ်းၽႅၼ်ႇဢၼ်ယႂ်ႇႁႂ်ႈထၢင်ႇထၢင်ႇသႃးသႃးထၢၼ်ႈပေႃးၵေႃႉဢၼ်ၶုၼ်ႇလႅၼ်ႈယူႇၼၼ်ႉၽတ်းဢၢၼ်ႇလႆႈၼၼ်ႉတႃႉ။-
ရူႇပႃႇရူင်ႇၼၼ်ႉၸၢပ်ႈသႅင်ႇၵၼ်တင်းၶိင်ႇမိူဝ်ႈဢၼ်မၵ်းၶဵၼ်းဝႆႉၼၼ်ႉဢေႃႈ။ မၼ်းတၵ်းလၢတ်ႈလွင်ႈၶိင်ႇမိူဝ်ႈဢၼ်ပဵၼ်တီႈသုတ်းတီႈၵွႆမၼ်းလႄႈၵၢင်းလွတ်ႈတင်းမုသႃႇဢေႃႈ။ ပိၵ်ႉသမ်ႉမၼ်းၵိုတ်းသဝ်းယူႇသေၵေႃႈ မုင်ႈထႃႈမွင်းထႃႈယူႇတႃႉ။ မၼ်းယင်းဢမ်ႇတူၵ်းလိုၼ်းလႄႈတၵ်းႁွတ်ႈထိုင်ဢမၢၼ်ႇၶၼ်ပဵၼ်ဢေႃႈ။-
လူတူၺ်းၵႃႈတီႈၵေႃႉဢၼ်ႁူဝ်ၸႂ်ၽႅၼ်သုင်ၼၼ်ႉတႃႉ။ ႁူဝ်ၸႂ်မၼ်းဢမ်ႇမီးတၢင်းဢၼ်သိုဝ်ႈလီယူဝ်းလီၵႃႈၼႂ်းမၼ်း။ ၵေႃႉဢၼ်သိုဝ်ႈတေႃႇၼၼ်ႉၸမ်ႉ၊ဢသၢၵ်ႈတၵ်းလိပ်းၵွပ်ႈပိူဝ်ႈတၢင်းဢၼ်မၼ်းယုမ်ႇမၢတ်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
တီႈတႄႉမၼ်းၼၼ်ႉတၢင်းဢၼ်မၢၵ်ႈမီးလီပဵၼ် ၸိုင်၊ၸၢင်ႈပႅတ်ႉၸၢင်ႈလႅၼ်ဢေႃႈ။ ၵေႃႉဢၼ်မႃႇၼႃႉပူၵ်းပႅၼ်ၼၼ်ႉယင်းဢမ်ႇယူႇၵႃႈတီႈဢၼ်မၼ်းယူႇၼၼ်ႉလႆႈလႄႈႁႂ်ႈလေႃးၽႃႉမၼ်းပဵၼ်ဢၼ်ၵႂၢင်ႈယႂ်ႇၸိူဝ်ႉၼင်ႇမိူင်းမရၼႃႉၼၼ်ႉဢေႃႈ။ မၼ်းမီးၸႂ်ၸိူဝ်ႉၼင်ႇၶုၼ်တၢႆဢၼ်ဢမ်ႇပျေႇလႆႈၼၼ်ႉလႄႈၸုသိမ်းဢဝ်ၵူၼ်းၵူႈၸိူဝ်ႉၵူႈမဵဝ်းဝႆႉပုၼ်ႈမၼ်းဢေႃႈ။ ဢဝ်ၵူၼ်းတင်းသဵင်ႈတင်းလူင်မႃးၸုၵၼ်ၵွင်ၵၼ်ဝႆႉႁႂ်ႈပဵၼ်ၵူၼ်းမၼ်းဢေႃႈ။-
ၶဝ်တင်းသဵင်ႈတင်းလူင်ၼၼ်ႉတၵ်းဢွၼ်ၵၼ်ဢဝ်ၵႂၢမ်းဢပုမ်ႇ၊ဢိၵ်ႇတင်းၵႂၢမ်းထုင်းဢၼ်သႄႉသွမ်းၼၼ်ႉၶတ်းၵၼ်တင်းမၼ်းသေလႄႈဢွၵ်ႇသူပ်းလၢတ်ႈလႄႈဝႃႈ၊ “သူၸိူဝ်းဢၼ်ၵဵပ်းႁွမ်သိမ်းပႅင်းဝႆႉဢုၵ်ႉၸႃႇဢၼ်တူဝ်ၸဝ်ႈၵဝ်ႇဢမ်ႇပိူင်ႇၼၼ်ႉမီးဢႃႉမၢင်ႇၵလႃႇဢေႃႈ။ သူတၵ်းသိမ်းဢဝ်ၶူဝ်းၶွင်ဢၼ်ပိူၼ်ႈပွင်ႇပိူၼ်ႈတၢင်ဝႆႉၼၼ်ႉႁိုင်ၵႃႈႁိုဝ်၊” ဝႃႈၼင်ႇၼႆဢေႃႈ။
ၶဝ်ၸိူဝ်းဢၼ်ပဵၼ်ၸဝ်ႈၼီႈမႂ်းၼၼ်ႉတၵ်းဢွၼ်ၵၼ်ၽုတ်းၽၢတ်းပေႃႇမႃးၵမ်းလဵဝ်ဢမ်ႇၸႂ်ႈႁိုဝ်း။ ၶဝ်ၸိူဝ်းဢၼ်ႁဵတ်းႁႂ်ႈမႂ်းသၼ်ႇဝႆၼၼ်ႉတၵ်းဢွၼ်ၵၼ်တိုၼ်ႇမႃးၵမ်းလဵဝ်ဢမ်ႇၸႂ်ႈႁိုဝ်း။ မႂ်းတၵ်းပဵၼ်တီႈဢၼ်ၶဝ်ႁိမ်ဢဝ်ႁူင်ႇဢဝ်ဢေႃႈ။-
ၵွပ်ႈပိူဝ်ႈမႂ်းႁိမ်ဢဝ်မဵဝ်းၵူၼ်းၼမ်ၼႃႇၼၼ်ႉလႄႈမဵဝ်းၵူၼ်းဢၼ်ၵိုတ်းဢၼ်ၵျၢၼ်ႇၵႃႈမီးၼၼ်ႉတၵ်းဢွၼ်ၵၼ်ႁိမ်ဢဝ်ႁူင်ႇဢဝ်မႂ်းဢေႃႈ။ တၵ်းဢွၼ်ၵၼ်ႁဵတ်းၵွပ်ႈပိူဝ်ႈဢပျတ်ႈလိူတ်ႈၵူၼ်းတင်းလၢႆ၊ဢိၵ်ႇတင်းဢပျတ်ႈဢၼ်ၼိၵ်ႈၸၢၵ်ႈငႅၼ်းသႄးလိၼ်မိူင်း၊ဢိၵ်ႇတင်းဝဵင်းလႄႈၵူၼ်းၵႃႈဢၼ်ယူႇၵႃႈၼႂ်းမၼ်းၸိူဝ်းၼၼ်ႉဢေႃႈ။
ၵေႃႉဢၼ်ႁႃဢဝ်တၢင်းဢၼ်မၢၵ်ႈမီးလူၺ်ႈဢထမ်ႇမႃႉပုၼ်ႈမဵဝ်းၸိူဝ်ႉၶိူဝ်းမၼ်းႁႂ်ႈလႆႈဢဝ်ႁိူၼ်းမၼ်းႁၢင်းမၼ်းတၢင်ႇသႂ်ႇဝႆႉၵႃႈၼိူဝ်တီႈဢၼ်သုင်လႄႈႁႂ်ႈတူဝ်မၼ်းၵၢင်းလွတ်ႈသေၵႃႈၼႂ်းမိုဝ်းၽေးတၢမ်ႇၼၼ်ႉမီးဢႃႉမၢင်ႇၵလႃႇဢေႃႈ။-
မႂ်းၵျၢမ်ႇပွင်ႁႂ်ႈၵုင်ႇသရေႇမဵဝ်းၸိူဝ်ႉၶိူဝ်းမႂ်းလုၵွပ်ႈပိူဝ်ႈဢၼ်မႂ်းပႄႇၽဵဝ်ႈမဵဝ်းၵူၼ်းၼမ်ၼႃႇပႅတ်ႈၼၼ်ႉလႄႈဢသၢၵ်ႈမႂ်းတၵ်းလုသုမ်းယဝ်ႉ။-
မၢၵ်ႇႁိၼ်ၵႃႈၼႂ်းၽႃမၢၵ်ႇႁိၼ်ႁွင်ႉသႅၼ်ႇလႄႈမႆႉၶိုဝ်ႇၵေႃႈယူႇၼႂ်းၵွင်မႆႉသေလႄႈတွပ်ႇလၢတ်ႈတီႈမႂ်းဢေႃႈ။
ၵေႃႉဢၼ်ဢဝ်လိူတ်ႈၵူၼ်းသေလႄႈတႄႇသၢင်ႈႁဵတ်းမိူင်းသေယဝ်ႉ၊သမ်ႉဢဝ်လွင်ႈတၢင်းဢၼ်ဢမ်ႇတြႃးလႄႈႁႂ်ႈဝဵင်းမၼ်ႈၶိူင်ႇၼၼ်ႉမီးဢႃႉမၢင်ႇၵလႃႇဢေႃႈ။-
တူၺ်းလူး။ တၢင်းဢၼ်မဵဝ်းၵူၼ်းတင်းလၢႆသၢင်ႈႁဵတ်းဝႆႉၼၼ်ႉပဵၼ်ပုၼ်ႈၽႆးမႆႈ၊တၢင်းဢၼ်ၵူၼ်းၵူႈၸိူဝ်ႉၵူႈမဵဝ်းႁဵတ်းယၢပ်ႇၸႂ်ၶၢၼ်ၸႂ်ဝႆႉၼၼ်ႉပဵၼ်ဢၼ်လၢႆလၢႆဢမ်ႇပွင်ႇလွင်ႈၵႃႈသင်ၸိူဝ်းၼၼ်ႉပဵၼ်မႃးၸွမ်းဢလူဝ်ႇ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ဢမ်ႇၸႂ်ႈႁိုဝ်း။-
လွင်ႈမၼ်းၸမ်ႉ၊လိၼ်မိူင်းတၵ်းပျေႉၸုမ်ႇတဵမ်ဝႆႉတင်းပိင်ႇၺႃႇဢၼ်ႁုၸၵ်းမုၼ်ၽုင်း ထႃႇဝရႃႉၽြႃး၊ မိူၼ်ၸိူဝ်ႉၼင်ႇဢၼ်ၼမ်ႉပၢင်ႇလၢႆႇထူမ်ႈႁူမ်ႇတီႈဢၼ်မၼ်းယူႇၼၼ်ႉဝႆႉၼၼ်ႉဢေႃႈ။
လွင်ႈၼင်ႇႁိုဝ်တၵ်းလႆႈတူၺ်းႁၼ်တၢင်းဢၼ်ၵူၼ်းႁိူၼ်းဢၼ်ၸမ်ၵၼ်တင်းမႂ်းၼၼ်ႉယူႇတူဝ်ပူၺ်ၸိုင်၊မႂ်းၵေႃႉဢၼ်ဢဝ်ၼမ်ႉလဝ်ႈၼမ်ႉၵမ်ထွၵ်ႇႁိုဝ်ႈႁႂ်ႈၶဝ်ၵိၼ်လႄႈဢဝ်ဢၢႆႁႅင်းတေႃးသႃႉမႂ်းထၢပ်ႈထႅင်ႈသေလႄႈႁႂ်ႈၶဝ်လႆႈမဝ်းလဝ်ႈမဝ်းၵမ်ၼၼ်ႉမီးဢႃႉမၢင်ႇၵလႃႇဢေႃႈ။-
မႂ်းတၵ်းဢိမ်ႇတဵမ်ဝႆႉတင်းတၢင်းဢၼ်ဢူၵ်းဢၼ်ဢၢႆၼၼ်ႉပုၼ်ႈတၢင်တူဝ်မုၼ်ၽုင်းဢေႃႈ။ မႂ်းၵိၼ်လႄႈပဵၼ်ၸိူဝ်ႉၼင်ႇၵေႃႉဢၼ်မဝ်းလဝ်ႈဝၢင်ႇဝီႈဝၢင်ႇဝိူဝ်ႈ ၼၼ်ႉဢေႃႈ။ ၵွၵ်းဢၼ်မီးၵႃႈၼႂ်းမိုဝ်းၶွၼ်ၶႂႃ ထႃႇဝရႃႉၽြႃး၊ ၼၼ်ႉတၵ်းႁွတ်ႈထိုင်ၵႃႈတီႈမႂ်းလႄႈတၢင်းဢၼ်လီဢူၵ်းလီဢၢႆၼၼ်ႉတၵ်းႁူမ်ႇသုမ်ႇမုၼ်ၽုင်းသရေႇမႂ်းဝႆႉဢေႃႈ။-
ဢပျတ်ႈဢၼ်မႂ်းႁဵတ်းပႄႉႁဵတ်းၼႅင်ႇလွႆ လေႇပၼုၼ်ႇ၊ ၼၼ်ႉတၵ်းႁူမ်ႇသုမ်ႇမႂ်းလႄႈတၢင်းဢၼ်မႂ်းယႃႉၽဵဝ်ႈပႅတ်ႈတရိၵ်ႈသၢၼ်ႇၼၼ်ႉတၵ်းႁႂ်ႈမႂ်းၵူဝ်ႁႄ ၵွပ်ႈပိူဝ်ႈဢပျတ်ႈလိူတ်ႈၵူၼ်းတင်းလၢႆ၊ဢိၵ်ႇတင်းဢပျတ်ႈဢၼ်ၼိၵ်ႈၸၢၵ်ႈငႅၼ်းသႄးလိၼ်မိူင်း၊ဢိၵ်ႇတင်းဝဵင်းလႄႈၵူၼ်းၵႃႈဢၼ်ယူႇၵႃႈၼႂ်းမၼ်းၸိူဝ်းၼၼ်ႉဢေႃႈ။
ႁုၼ်ႇႁၢင်ႈသၢင်းထုဢၼ်တွင်ႈႁဵတ်းၶွၵ်းႁဵတ်းၼၼ်ႉၸၢင်ႈပၼ်ဢၵျူဝ်းၸိူဝ်ႉၼင်ႇႁိုဝ်လႄႈထၢၼ်ႈပေႃးႁႂ်ႈၸၢင်ႈမႆႉၶဝ်လႆႈတွင်ႈႁဵတ်းၶွၵ်းႁဵတ်းမၼ်းဝႆႉ။ ႁုၼ်ႇႁၢင်ႈသၢင်းထုဢၼ်သွၼ်းႁဵတ်းလေႃႇႁဵတ်းဢၼ်ပဵၼ်မိူၼ်သြႃႇမိၵ်ႉသႃႇၼၼ်ႉပၼ်ဢၵျူဝ်းၸိူဝ်ႉၼင်ႇႁိုဝ်။ ၵေႃႉဢၼ်ႁဵတ်းၼၼ်ႉပိၵ်ႉသမ်ႉႁုၼ်ႇႁၢင်ႈသၢင်းထုၼၼ်ႉဢမ်ႇၸၢင်ႈလၢတ်ႈၵႂၢမ်းလႆႈသေၵေႃႈ မၼ်းဢိင်ပိုင်ႈၶိူင်ႈပိူင်ဢၼ်မၼ်းႁဵတ်းၼၼ်ႉဢေႃႈ။-
ၵေႃႉဢၼ်လၢတ်ႈၵႃႈတီႈမႆႉလႄႈဝႃႈ၊ “တိုၼ်ႇမႃးသေၵမ်းတီႈၶႃႈ၊” ဝႃႈၼင်ႇၼႆလႄႈလၢတ်ႈတီႈမၢၵ်ႇႁိၼ်ဢၼ်ဢမ်ႇလၢတ်ႈၵႂၢမ်းလႆႈၼၼ်ႉလႄႈဝႃႈ၊ “လုၵ်ႉမႃးသေၵမ်းတီႈၶႃႈ၊” ဝႃႈၼင်ႇၼႆၼၼ်ႉမီးဢႃႉမၢင်ႇၵလႃႇဢေႃႈ။ ၶိူင်ႈပိူင်ၼၼ်ႉတၵ်းသင်ႇပၼ်သွၼ်ပၼ်ႁိုဝ်း။ တူၺ်းလူး။ မီးတၢင်းဢၼ်ဢဝ်ငိုၼ်းဢဝ်ၶမ်းဢုမ်ႇႁေႃႇတဵၵ်းတႃးႁၢင်ႈၶိူင်ႈဝႆႉဢေႃႈ။ ၵႃႈတီႈၼႂ်းမၼ်းဢမ်ႇမီးၸႂ်လႃးလႃးလူင်ပႄႇ။
ထႃႇဝရႃႉၽြႃး၊ ၸမ်ႉ၊မီးယူႇၵႃႈၼႂ်းၵျွင်းပိၵ်ႈမၢၼ်ႇဢၼ်မူတ်းၸၢင်ႇမၼ်းၸဝ်ႈၼၼ်ႉဢေႃႈ။ ၵူၼ်းလိၼ်မိူင်းတင်းသဵင်ႈတင်းလူင်ၶဝ်႟။ ဢွၼ်ၵၼ်ယူႇတဵတ်ႇတဵတ်ႇယဵၼ်ယဵၼ်ယူႇၵႃႈတီႈၽၢႆႇၼႃႈမၼ်းၸဝ်ႈတႃႉ။
ၵႂၢမ်းသူးတွင်းပရေႃးၽႅတ်ႈ ႁပၵ်ႉၵုၵ်ႉ၊ ဢၼ်ဢိင်ၸွမ်းသဵင်ၶိုၼ်ႈသဵင်လူင်း၊ သိၵျေႃးၼူတ်ႈ၊ ၼၼ်ႉၸမ်ႉ။
ထႃႇဝရႃႉၽြႃး၊ တီႈၶႃႈ။ ၶႃႈၸဝ်ႈလႆႈငိၼ်းလွင်ႈဢၼ်ၸဝ်ႈႁဝ်းႁဵတ်းမႃးယဝ်ႉၵႃႈမီးၼၼ်ႉလႄႈၵူဝ်ယမ်တီႈၶႃႈယဝ်ႉ။ ၵႃႈၼႂ်းၸူဝ်ႈပၢၼ်ႁဝ်းၶႃႈၼႆႉၵေႃႈၶႅၼ်းတေႃႈမႄးၵုမ်းမႄးႁဵတ်းဢမုၸဝ်ႈႁဝ်းသေၵမ်းတီႈၶႃႈ။ ၵႃႈၼႂ်းၸူဝ်ႈပၢၼ်ႁဝ်းၶႃႈၼႆႉၵေႃႈ ႁႂ်ႈႁဝ်းၶႃႈလႆႈႁုလႆႈႁၼ်ဢမုၸဝ်ႈႁဝ်းၼၼ်ႉသေၵမ်းတီႈၶႃႈ။ ပိၵ်ႉသမ်ႉတၢင်းၸႂ်မႆႈၶႂ်ႈၸႃႉၸဝ်ႈႁဝ်းဢွၵ်ႇသေၵေႃႈ၊ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းၵရုၼႃႇၸဝ်ႈႁဝ်းသေၵမ်းတီႈၶႃႈ။
ၽြႃးပဵၼ်ၸဝ်ႈလုၵ်ႉသေၵႃႈတီႈဝဵင်း တေႇမၼ်ႇ၊ ၽြႃးဢၼ်မူတ်းၸၢင်ႇၼၼ်ႉလုၵ်ႉသေၵႃႈတီႈလွႆ ပႃႇရၼ်ႇ၊ မႃးဢေႃႈ။ မုၼ်ၽုင်းမၼ်းၸဝ်ႈႁူမ်ႇသုမ်ႇၽႃႉၵၢင်ႁၢဝ်လႄႈလိၼ်မိူင်းပျေႉၸုမ်ႇတဵမ်ဝႆႉတင်းတၢင်းဢၼ်ယွင်ႈယေႃးမၼ်းၸဝ်ႈဢေႃႈ။
ႁၢင်ႈၽၢင်ငဝ်းဢရွင်ႇမၼ်းၸဝ်ႈမိူၼ်ၸိူဝ်ႉၼင်ႇသၢႆလႅင်းၵၢင်ဝၼ်းလႄႈသၢႆဢရွင်ႇဢွၵ်ႇသေၵႃႈတီႈမိုဝ်းမၼ်းၸဝ်ႈ၊ ၵႃႈတီႈဢၼ်မုၼ်ၽုင်းဢႃႇၼုၽေႃႇမၼ်းၸဝ်ႈတဵတ်ႇမႅပ်းယူႇဢေႃႈ။
ၽေးၵႃႇလႃႉႁႃႈလႅင်မိူင်းၵႂႃႇဢွၼ်တၢင်းမၼ်းၸဝ်ႈလႄႈၽေးဢၼ်မႆႈဢၼ်ႁွၼ်ႉၼၼ်ႉၸွမ်းတၢင်းလင်မၼ်းၸဝ်ႈယူႇဢေႃႈ။
မၼ်းၸဝ်ႈၵိုတ်းလႄႈႁႂ်ႈလိၼ်မိူင်းတူင်ႉၼိုင်ယူႇဢေႃႈ။ မၼ်းၸဝ်ႈလူတူၺ်းလႄႈ ႁႂ်ႈၵူၼ်းၵူႈၸိူဝ်ႉၵူႈမဵဝ်းသၼ်ႇသၼ်ႇသၢႆသၢႆယူႇဢေႃႈ။ လွႆဢၼ်တႄႇယူႇတႃႇသေႇမၼ်ႈၶိူင်ႇၸိူဝ်းၼၼ်ႉႁၵ်းႁိၵ်းတႅၵ်ႇလႅဝ်ၵႂႃႇလႄႈ သၼ်ၵုင်းလွႆထႃႇဝရႃႉၸိူဝ်းၼၼ်ႉဢွၼ်ၵၼ်ၼူပ်ႈတူၵ်းၵွမ်ႈတူၵ်းဢေႃႈ။ သဵၼ်ႈတၢင်းဢၼ်မၼ်းၸဝ်ႈၵႂႃႇၼၼ်ႉမီးဝႆႉၸဵမ်မိူဝ်ႈမိုၼ်ႉမိူဝ်ႈၵွၼ်ႇၼၼ်ႉဢေႃႈ။
ၵဝ်လႆႈႁၼ်တၢင်းဢၼ်သုမ်ႉမူဝ်းၵႃႇၵႃႈၼႂ်းမိူင်း ၵုသၢၼ်ႇ၊ ၸိူဝ်းၼၼ်ႉၶၢမ်ႇတုၵ်ႉၶႃႉတၢင်းၽၢၼ်လႄႈ ၽႃႈၵင်ႈၵႃႈၼႂ်းမိူင်း မိတျၼ်ႇ၊ ၸိူဝ်းၼၼ်ႉသၼ်ႇသၼ်ႇသၢႆသၢႆယူႇၼၼ်ႉဢေႃႈ။
ထႃႇဝရႃႉၽြႃး၊ တီႈၶႃႈ။ ၸဝ်ႈႁဝ်းၸႂ်မႆႈၶႂ်ႈၸႃႉတေႃႇမႄႈၼမ်ႉတင်းလၢႆၶႃႈႁိုဝ်း။ တၢင်းၸႂ်မႆႈတေႃးသႃႉၸဝ်ႈႁဝ်းႁုပ်ႈမႆႈပၢင်ႇလၢႆႇၶႃႈႁိုဝ်း၊ ၸဝ်ႈႁဝ်းလႆႈၶီႇမႃႉ၊ၶီႇလေႃႉမႃႉသိုၵ်းၸဝ်ႈႁဝ်းဢွၵ်ႇၵႂႃႇႁႂ်ႈလႆႈပႄႉၼႅင်ႇဢေႃႈ။
လၢၵ်ႈၼၢၵ်ႈၵၢင်ႇၸဝ်ႈႁဝ်းၼၼ်ႉလႆႈၶၢမ်ႇတၢင်းဢၼ်ဢဝ်ဢွၵ်ႇၼႄပျႃးလႄႈ ဢဝ်ပိုၼ်ၵၢင်ႇသေယဝ်ႉ၊တၼ်းဝႆႉပုၼ်ႈတႃႇတေယိုဝ်းဢေႃႈ။ ၸဝ်ႈႁဝ်းဢဝ်တင်းမႄႈၼမ်ႉၵႄးၼမ်ႉလႂ်ၽႃႇမႅင်ႇလိၼ်မိူင်းဢေႃႈ။
လွႆတင်းလၢႆႁၼ်ၸဝ်ႈႁဝ်းလႄႈဢွၼ်ၵၼ်သၼ်ႇဝႆၶွၼ်းဝႆယူႇတီႈၶႃႈဢေႃႈ။ ၼမ်ႉဢၼ်မီးၵႃႈၼိူဝ်ၵၢင်ႁၢဝ်ၵေႃႈလႆလူင်းမႃးလႄႈ ၼမ်ႉဢၼ်မီးၵႃႈၼိူဝ်လိၼ်မိူင်းၵေႃႈႁွင်ႉမေႃးသဵင်လင်သေယဝ်ႉ၊ ပိူပ်ႈၼမ်ႉလႅင်းၼမ်ႉၵေႃႈလုၵ်ႉၶိုၼ်ႈထိပ်ႇၶိုၼ်ႈသုင်ၼႃႇဢေႃႈ။
ၵၢင်ဝၼ်းဢိၵ်ႇတင်းလိူၼ်ၵိုတ်းသဝ်းယူႇၵႃႈၼႂ်းတီႈဢၼ်ၶဝ်ယူႇၼၼ်ႉ၊ ၵွပ်ႈပိူဝ်ႈဢၼ်လႅင်းပိုၼ်ၵၢင်ႇၸဝ်ႈႁဝ်းၽၢတ်ႈၵႂႃႇဝႆးၼႃႇၼၼ်ႉ၊ ဢိၵ်ႇတင်းၵွပ်ႈပိူဝ်ႈသၢႆဢရွင်ႇႁွၵ်ႇၸဝ်ႈႁဝ်းဢၼ်မၢပ်ႈမႅပ်ႈၼၼ်ႉတီႈၶႃႈဢေႃႈ။
ၸဝ်ႈႁဝ်းပႃးတင်းတၢင်းၸႂ်မႆႈၶႂ်ႈၸႃႉသေလႄႈၶီႇၵႂႃႇၵႃႈၼိူဝ်ၼႃႈလိၼ်မိူင်းတၢင်းၼႃႈသေယဝ်ႉ၊ ပႃးတင်းၸႂ်တေႃးသႃႉယဵပ်ႇၼူတ်ႈၵူၼ်းတၢင်ႇၸိူဝ်ႉတၢင်ႇၶိူဝ်းၵူႈမဵဝ်းမဵဝ်းတီႈၶႃႈဢေႃႈ။
ၸဝ်ႈႁဝ်းဢွၵ်ႇၵႂႃႇႁႂ်ႈလႆႈၵႄႇသႄႇၶျွတ်ႈဢဝ်ၵူၼ်းၸဝ်ႈႁဝ်းတင်းလၢႆ၊ ဢိၵ်ႇတင်းႁႂ်ႈလႆႈၵႄႇသႄႇၶျွတ်ႈဢဝ်ၶဝ်ၸိူဝ်းဢၼ်လႆႈၶၢမ်ႇဢဝ်ၽိၵ်ႈသိၵ်ႈတီႈၸဝ်ႈႁဝ်းၼၼ်ႉတီႈၶႃႈဢေႃႈ။ ၸဝ်ႈႁဝ်းၶိုတ်ႈၼူတ်ႈၵေႃႉဢၼ်ဢွၼ်ႁူဝ်ၵႃႈၼႂ်းႁိူၼ်းၵူၼ်းႁၢႆႉၵူၼ်းယုတ်ႈလႄႈပႄႇၽဵဝ်ႈငဝ်ႈႁၢၵ်ႈမၼ်းပႅတ်ႈတေႃႇထိုင်ႁွတ်ႈပၢႆၸိၵ်းၸွမ်မၼ်းတီႈၶႃႈဢေႃႈ။
ၸဝ်ႈႁဝ်းသမ်ႉဢဝ်ႁွၵ်ႇမၼ်းၸိူဝ်းၼၼ်ႉတႅင်းသႂ်ႇၵွၵ်းႁူဝ်ၶုၼ်ၵွၼ်းတပ်ႉသိုၵ်းမၼ်းတင်းလၢႆပွင်ႇပိဝ်ၵႂႃႇတီႈၶႃႈဢေႃႈ။ ၶဝ်ၼၼ်ႉဢွၼ်ၵၼ်ပတ်ႉထူဝ်းမႃးမိူၼ်ၸိူဝ်ႉၼင်ႇၽူၼ်လူင်လူမ်းလူင်ၼၼ်ႉလႄႈႁႂ်ႈၶႃႈၸဝ်ႈႁဝ်းၶဝ်ၽူင်ႉၵႂႃႇပိဝ်ၵႂႃႇတီႈၶႃႈဢေႃႈ။ ၶဝ်ၸူမ်းသိူဝ်းမိူၼ်ႁၢင်ႈၶဝ်မီးတၢင်းၵျၢမ်ႇတၢင်းပွင်ဢၼ်တၵ်းတဵတ်ႇတဵတ်ႇၶူပ်းၵိၼ်ၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉတီႈၶႃႈဢေႃႈ။
ၸဝ်ႈႁဝ်းၶီႇမႃႉၸဝ်ႈႁဝ်းၸိူဝ်းၼၼ်ႉသေလႄႈၵႂႃႇၵႃႈၼႂ်း၊ ၵၢင်ၼမ်ႉပၢင်ႇလၢႆႇတီႈဢၼ်မေႃးလင်ယူႇႁိုင်းႁိုင်းၼၼ်ႉတီႇၶႃႈဢေႃႈ။
ၶႃႈၸဝ်ႈလႆႈငိၼ်းၵႃႈမီးတင်းသဵင်ႈတင်းလူင်ၼၼ်ႉလႄႈၶႃႈၸဝ်ႈမီးတၢင်းဢၼ်သၼ်ႇဝႆယူႇ၊သီႇသူပ်းၶႃႈၸဝ်ႈတူင်ႉယွပ်ႈယူႇ၊ တၢင်းဢၼ်လုဢၼ်လႅဝ်ၶဝ်ႈၵႃႈၼႂ်းလုပ်ႇၶႃႈၸဝ်ႈယူႇ၊ၶႃႈၸဝ်ႈမီးတၢင်းဢၼ်သၼ်ႇသၼ်ႇသၢႆသၢႆယူႇ တင်းတူဝ်တင်းၶိင်းယူႇတီႈၶႃႈဢေႃႈ။ လွင်ႈမၼ်းၸမ်ႉ၊ၶႃႈၸဝ်ႈတၵ်းပႂ်ႉထႃႈယူႇၼိမ်ၼိမ်လီလီပုၼ်ႈၶိင်ႇမိုဝ်ႉဝၼ်းဢၼ်ၽေးတၵ်းႁွတ်ႈထိုင်တီႈၵူၼ်းတင်းလၢႆဢၼ်တိုၵ်းတေႃးႁဝ်းၶႃႈၼၼ်ႉဢေႃႈ။
ပိၵ်ႉသမ်ႉ တူၼ်ႈမၢၵ်ႇလိူဝ်ႇဢမ်ႇလႆႈမွၵ်ႇလႆႈၵီႈ၊တူၼ်ႈၶိူဝ်းမၢၵ်ႇၸပိတ်ႉဢမ်ႇလႆႈမီးမွၵ်ႇမီးမၢၵ်ႇ၊ ပိၵ်ႉသမ်ႉမၢၵ်ႇတူၼ်ႈသၢၼ်ႇလုၼ်ႇထၢတ်ႇၵႂႃႇဝၢႆးၵႂႃႇ၊ တူင်ႈၼႃးတင်းလၢႆ ဢမ်ႇလႆႈပၼ်မၢၵ်ႇမၼ်းႁူင်းမၼ်း၊ပိၵ်ႉသမ်ႉၽုင်သူဝ်းသဵင်ႈသေၵႃႈတီႈၶွၵ်ႈသူဝ်းလႄႈ ၽုင်ဝူဝ်းဢမ်ႇလႆႈမီးၵႃႈၼႂ်းသိုင်ႇဝူဝ်းသေၵေႃႈ။
ၵဝ်တၵ်းၸူမ်းသိူဝ်းယူႇၵႃႈၼႂ်း ထႃႇဝရႃႉၽြႃး၊ လႄႈသႂၢင်ႇသိူဝ်းယူႇၵႃႈၼႂ်းၽြႃးပဵၼ်ၸဝ်ႈဢၼ်ၵႄႇသႄႇၶျွတ်ႈဢဝ်ၵဝ်ၼၼ်ႉဢေႃႈ။
ၸဝ်ႈပူဝ်ႇပႃႇၵၢင်ႁၢဝ်၊ထႃႇဝရႃႉၽြႃး ပဵၼ်ဢဵၼ်ႁႅင်းၵဝ်လႄႈ မၼ်းၸဝ်ႈႁႂ်ႈတိၼ်ၵဝ်ပဵၼ်ၸိူဝ်ႉၼင်ႇတိၼ်ၵႂၢင်တိၼ်ယီးၼၼ်ႉသေလႄႈ ႁႂ်ႈၵဝ်ၵႂႃႇမႃးယူႇၵႃႈၼိူဝ်ထႃႇၼႃႉတီႈသုင်တင်းလၢႆဢေႃႈ။ ၵျၢမ်းပရေႃးၽႅတ်ႈႁပၵ်ႉၵုၵ်ႉယဝ်ႉယဝ်ႉဢေႃႈ။
ၼႆႉၸမ်ႉ၊ပဵၼ်ၼုၵ်ႈၵပၢတ်ႈ ထႃႇဝရႃႉၽြႃး၊ ဢၼ်ႁွတ်ႈမႃးတီႈ ၸေႇၽၼိ၊ လုၵ်ႈၸၢႆး ၵုသိ၊ ဢၼ်ပဵၼ်လုၵ်ႈၸၢႆး ၵေႇတလိ၊ ဢၼ်ပဵၼ်လုၵ်ႈၸၢႆး ဢႃႇမရိ၊ ဢၼ်ပဵၼ်လုၵ်ႈၸၢႆး ႁိၸၵိ၊ ၼႂ်းၸူဝ်ႈပၢၼ်ၶုၼ် ယူဝ်းသိယႃႉ၊ လုၵ်ႈၸၢႆး ဢႃႇမုၼ်ႇ၊ ၶုၼ်ႁေႃၶမ်း ယုတႃႉ၊ ၼၼ်ႉဢေႃႈ။-
ၵဝ်တၵ်းပႄႇၽဵဝ်ႈလွင်ႈတၢင်းၵႃႈမီးပႅတ်ႈသေၵႃႈၼိူဝ်ၼႃႈလိၼ်မိူင်းမူတ်းမူတ်းသဵင်ႈသဵင်ႈဢေႃႈ။ ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။-
ၵဝ်တၵ်းပႄႇၽဵဝ်ႈၵူၼ်း၊ဢိၵ်ႇတင်းတရိၵ်ႈသၢၼ်ႇတင်းလၢႆပႅတ်ႈလႄႈပႄႇၽဵဝ်ႈၼူၵ်ႉၵၢင်ႁၢဝ်ဢိၵ်ႇတင်းပႃပၢင်ႇလၢႆႇတင်းလၢႆပႅတ်ႈဢေႃႈ။ ၵဝ်တၵ်းႁဵတ်းႁႂ်ႈၶဝ်ၸိူဝ်းဢၼ်ႁၢႆႉဢၼ်ယုတ်ႈၼၼ်ႉၶီႈလိုတ်းလႄႈလူမ်ႉဢေႃႈ။ ၵူၼ်းသတ်ႉတဝႃႇၵေႃႈ ၵဝ်တၵ်းပႄႇတႅပ်းပႅတ်ႈသေၵႃႈၼိူဝ်ၼႃႈလိၼ်ဢေႃႈ၊ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။-
ၵဝ်တၵ်းဢဝ်မိုဝ်းၵဝ်ယဵတ်ႇယိုၼ်းလႄႈၶတ်းတႃႉၵၼ်တင်းမိူင်း ယုတႃႉ၊ ဢိၵ်ႇတင်းၵူၼ်းဝဵင်း ယေႇရုသလႅမ်ႇ၊ တင်းသဵင်ႈတင်းလူင်ဢေႃႈ။ ၵဝ်တၵ်းပႄႇၽဵဝ်ႈပႅတ်ႈတပႄးတပၢၼ်း ၽြႃးပႃႇလႃႉ၊ ဢၼ်ၵိုတ်းဢၼ်ၵျၢၼ်ႇတင်းလၢႆလႄႈ၊ၼႃႇမႃႉၸိုဝ်ႈသဵင်ယဵၸ်ႈပရေႃးႁဵၵ်ႈဢၼ်ၵူဝ်းၵႂၢႆႇႁုၼ်ႇႁၢင်ႈသၢင်းထုတင်းလၢႆ၊ဢိၵ်ႇလူၺ်ႈၵၼ်တင်းယဵၸ်ႈပရေႃးႁဵၵ်ႈတၢင်ႇၵေႃႉတၢင်ႇၵူၼ်းတင်းလၢႆဢေႃႈ။-
ၵဝ်တၵ်းပႄႇၽဵဝ်ႈပဵတ်ႈၶဝ်ၸိူဝ်းဢၼ်ၵူဝ်းၵႂၢႆႇၶိူင်ႈပိူင်ၵၢင်ႁၢဝ်တင်းလၢႆၵႃႈၼိူဝ်ၸွမ်ႁိူၼ်းလႄႈၶဝ်ၸိူဝ်းဢၼ်ဢဝ် ထႃႇဝရႃႉၽြႃး၊ ဢိၵ်ႇတင်း ၽြႃးမႃႇလၶၢမ်ႇ၊ တိူင်ႇဝႃႈၵိၼ်ႇဝႃႈသေလႄႈၵူဝ်းၵႂၢႆႇၼၼ်ႉဢေႃႈ။-
ၵဝ်တၵ်းပႄႇၽဵဝ်ႈပႅတ်ႈၶဝ်ၸိူဝ်းဢၼ်သုတ်ႉၶိုၼ်းယိုတ်းၶိုၼ်းသေၵႃႈတီႈတၢင်းဢၼ်ၸွမ်းလင် ထႃႇဝရႃႉၽြႃး၊ ၼၼ်ႉဢိၵ်ႇတင်းၶဝ်ၸိူဝ်းဢၼ်ဢမ်ႇသွၵ်ႈႁႃ ထႃႇဝရႃႉၽြႃး၊ လႄႈဢမ်ႇတွင်ႈထၢမ်ႁႃဢဝ်မၼ်းၸဝ်ႈၼၼ်ႉသေၵႃႈတီႈၼႆႈဢေႃႈ။
ဢွၼ်ၵၼ်ယူႇတဵတ်ႇတဵတ်ႇၵႃႈတီႈၽၢႆႇၼႃႈ ထႃႇဝရႃႉၽြႃး၊ ၽြႃးပဵၼ်ၸဝ်ႈတႃႉ။ မိုဝ်ႉဝၼ်း ထႃႇဝရႃႉၽြႃး၊ ၸမ်မႃးယဝ်ႉ။ ထႃႇဝရႃႉၽြႃး၊ မႄႈႁႅၼ်းပွႆးၶိူင်ႈတၢင်းလူႇဝႆႉလႄႈမၼ်းၸဝ်ႈဢဝ်ၶႅၵ်ႇမၼ်းၸဝ်ႈၸိူဝ်းၼၼ်ႉႁႂ်ႈမူတ်းသႂ်ယဝ်ႉ။-
ၼႂ်းမိုဝ်ႉဝၼ်းဢၼ် ထႃႇဝရႃႉၽြႃး၊ ၶၢမ်ႇပွႆးၼၼ်ႉၵဝ်တၵ်းပၼ်တၢမ်ႇတီႈၶုၼ်တီႈၵွၼ်း၊တီႈလုၵ်ႈလၢင်းၶုၼ်ႁေႃၶမ်းဢိၵ်ႇတင်းၶဝ်ၸိူဝ်းဢၼ်ၼုင်ႈၶူဝ်းၼုင်ႈဢၼ်ၵူၼ်းတၢင်ႇဝၢၼ်ႈတၢင်ႇမိူင်းၶဝ်ၼုင်ႈၼၼ်ႉၸိူဝ်းၼၼ်ႉဢေႃႈ။-
ၼႂ်းမိုဝ်ႉဝၼ်းၼၼ်ႉၶဝ်ၸိူဝ်းဢၼ်ၶၢမ်ႈၶူင်ႇၽၵ်းတူပိူၼ်ႈ၊ၶဝ်ၸိူဝ်းဢၼ်ႁႂ်ႈႁိူၼ်းၸဝ်ႈၶဝ် ပျေႉၸုမ်ႇတဵမ်ဝႆႉတင်းတၢင်းဢၼ်ႁဵတ်းပႄႉႁဵတ်းၼႅင်ႇ၊တၢင်းဢၼ်ပႅတ်ႉဢၼ်လႅၼ်ၸိူဝ်းၼၼ်ႉၵေႃႈ ၵဝ်တၵ်းပၼ်တၢမ်ႇဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ၼႂ်းမိုဝ်ႉဝၼ်းၼၼ်ႉ၊တၵ်းလႆႈမီးသဵင်ဢၼ်ႁွင်ႉႁႆႈဢွၵ်ႇသေၵႃႈတီႈ ၽၵ်းတူပႃ၊ ပွင်ႉၶၢင်းဢွၵ်ႇသေၵႃႈၼႂ်းပွၵ်ႈၼႂ်းဝဵင်း၊သဵင်ဢၼ်ႁၵ်းႁိၵ်းယႃႉပႅတ်ႈဢၼ်ႁႅင်းယႂ်ႇၼႃႇဢွၵ်ႇသေၵႃႈတီႈၼႂ်းသၼ်လွႆၼၼ်ႉဢေႃႈ။-
ၵူၼ်းဝဵင်းဢၼ်ယူႇပွၵ်ႈတီႈဢၼ်တႅမ်ႇၶဝ်႟။ ဢွၼ်ၵၼ်ႁွင်ႉႁႆႈပွင်ႉၶၢင်းတႃႉ။ လွင်ႈမၼ်းၸမ်ႉ၊ၵူၼ်းၵႃႉၵူၼ်းၶၢႆတင်းလၢႆတၢႆသဵင်ႈယဝ်ႉ။ ၶဝ်ၸိူဝ်းဢၼ်ႁိဝ်ႈဢၼ်ၸင်ႈငိုၼ်းတင်းသဵင်ႈတင်းလူင်ၼၼ်ႉဢွၼ်ၵၼ်သုမ်းၸွမ်းပႅတ်ႈယဝ်ႉ။-
ၼႂ်းၶိင်ႇမိူဝ်ႈၼၼ်ႉ၊ၵဝ်တၵ်းယိပ်းၵမ်ဝၢၼ်ႇၽႆးတဵၼ်းသေလႄႈၸႅတ်ႈထၢမ်ၸႅတ်ႈတူၺ်းဝဵင်း ယေႇရုသလႅမ်ႇ၊ ဢေႃႈ။ ၵဝ်တၵ်းပၼ်တၢမ်ႇတီႈၶဝ်ၸိူဝ်းဢၼ်ဢိမ်ႇၸႂ်တဵမ်ၸႂ်လႄႈၶျႃးၸႂ်ၼႂ်းတူဝ်ၸဝ်ႈၵဝ်ႇသေယဝ်ႉ၊လၢတ်ႈၼႂ်းၸႂ်လႄႈဝႃႈ၊ “ ထႃႇဝရႃႉၽြႃး၊ တေဢမ်ႇႁဵတ်းၵျေးၸူးလႄႈတၢမ်ႇၵေႃႈတေဢမ်ႇပၼ်၊” ဝႃႈၼင်ႇၼႆၼၼ်ႉဢေႃႈ။-
ၸေးၸိမ်ႇဢုၵ်ႉၸႃႇၶဝ်ၼၼ်ႉတၵ်းလႆႈပဵၼ်တီႈဢၼ်ပိူၼ်ႈႁိမ်ဢဝ်ႁူင်ႇဢဝ်လႄႈႁိူၼ်းတီႈယူႇၶဝ်ၸိူဝ်းၼၼ်ႉတၵ်းလႆႈမီးတၢင်းဢၼ်သဵတ်ႇၵူၼ်းယဵၼ်ၵူၼ်းယူႇဢေႃႈ။ ပိၵ်ႉသမ်ႉၶဝ်ဢွၼ်ၵၼ်ႁဵတ်းႁိူၼ်းသေၵေႃႈၶဝ်တေဢမ်ႇလႆႈယူႇလႆႈသဝ်းၵႃႈၼႂ်းမၼ်းလႄႈပိၵ်ႉသမ်ႉၶဝ်ဢွၼ်ၵၼ်ၽုၵ်ႇသူၼ်မၢၵ်ႇၸပိတ်ႉသေၵေႃႈၶဝ်တေဢမ်ႇလႆႈသူတ်ႉလႆႈၵိၼ်ၼမ်ႉမၢၵ်ႇၸပိတ်ႉမၼ်း။-
ဝၼ်းယႂ်ႇဝၼ်းလူင် ထႃႇဝရႃႉၽြႃး၊ ၸမ်မႃးယဝ်ႉ။ ၸမ်မႃးယဝ်ႉ။ ႁိပ်ႈၼႅတ်ႈမႃးယူႇဢေႃႈ။ မိုဝ်ႉဝၼ်း ထႃႇဝရႃႉၽြႃး၊ ၼၼ်ႉႁဵတ်းႁႂ်ႈၸႂ်ၶူမ်ၼႃႇလူင်လၢင်လႄႈၵေႃႉဢၼ်ႁႅင်းယႂ်ႇၼႃႇၼၼ်ႉတၵ်းႁွင်ႉသႅၼ်ႇလူၺ်ႈသဵင်ဢၼ်ယႂ်ႇၼႃႇၵႃႈတီႈၼၼ်ႈဢေႃႈ။-
မိုဝ်ႉဝၼ်းၼၼ်ႉတၵ်းပဵၼ်ဝၼ်းဢၼ်တၢင်းၸႂ်မႆႈၶႂ်ႈၸႃႉဢွၵ်ႇ၊ဝၼ်းဢၼ်လႆႈၶၢမ်ႇတုၵ်ႉၶႃႉတၢင်းၽၢၼ်၊ဝၼ်းတၢင်းဢၼ်တီႇၽဵဝ်ႈလႄႈယႃႉပႅတ်ႈမူတ်းမူတ်းသဵင်ႈသဵင်ႈ၊ဝၼ်းဢၼ်လပ်းသိင်ႇလႄႈဢၼ်လႅင်းလပ်ႉႁၢႆၵႂႃႇ၊ဝၼ်းဢၼ်ၽႃႉမိုတ်ႈၽႃႉၵုမ်ႈလႄႈလပ်းသိင်ႇၼႃတၼ်ၼႃႇ။-
ဝၼ်းဢၼ်ပဝ်ႇၼႄးၶရႃႇလႄႈႁွင်ႉပၢဝ်ႇႁွင်ႉသေႃႇတေႃႇဝဵင်းဢၼ်မၼ်ႈၶိူင်ႇတင်းလၢႆယူႇ၊ဢိၵ်ႇတင်းတိူၵ်ႈတီႈတိုၵ်းသိုၵ်းဢၼ်သုင်ၼႃႇၸိူဝ်းၼၼ်ႉဢေႃႈ။-
ၵဝ်တၵ်းၼိၵ်ႈၸၢၵ်ႈငႅၼ်းသႄးၵူၼ်းတင်းလၢႆထၢၼ်ႈပေႃးႁႂ်ႈၶဝ်လႆႈၵႂႃႇမိူၼ်ၸိူဝ်ႉၼင်ႇၵေႃႉဢၼ်တႃမွတ်ႇတႃတၼ်ၼၼ်ႉဢေႃႈ။ ၵွပ်ႈပိူဝ်ႈဢၼ်ၶဝ်ၽိတ်းပိူင်ႈ ထႃႇဝရႃႉၽြႃး၊ ၼၼ်ႉလႄႈလိူတ်ႈၶဝ်တၵ်းလႆႈၶၢမ်ႇတၢင်းဢၼ်ထွၵ်ႇႁိုဝ်ႈပႅတ်ႈမိူၼ်ၸိူဝ်ႉၼင်ႇမုၼ်ႈလိၼ်ၼၼ်ႉလႄႈၼိူဝ်ႉၶဝ်ၼင်ၶဝ်ၼၼ်ႉမိူၼ်ၸိူဝ်ႉၼင်ႇၶီႈၼင်ႇဢႃႇၼၼ်ႉဢေႃႈ။-
ၼႂ်းမိုဝ်ႉဝၼ်းဢၼ် ထႃႇဝရႃႉၽြႃး၊ ၸႂ်မႆႈၶႂ်ႈၸႃႉၼၼ်ႉ၊ငိုၼ်းၶမ်းၶဝ်ဢမ်ႇၵႄႇသႄႇၶျွတ်ႈဢဝ်ၶဝ်လႆႈ၊ၽႆးတေႃးသႃႉတၢင်းၸႂ်မႆႈၶႂ်ႈၸႃႉမၼ်းၸဝ်ႈတၵ်းမႆႈပႅတ်ႈတင်းမိူင်းဢေႃႈ။ မၼ်းၸဝ်ႈတၵ်းၸီႇယၢင်ႇၵူၼ်းဝၢၼ်ႈၵူၼ်းမိူင်းၵႃႈမီးႁႂ်ႈၸဵဝ်းယဝ်ႉၸဵဝ်းတူဝ်ႈဢေႃႈ။
မဵဝ်းၵူၼ်းဢၼ်ဢမ်ႇမီးတၢင်းဢၼ်ဢူၵ်းဢၼ်ဢၢႆၶဝ်႟။- ဢွၼ်ၵၼ်ၸႅတ်ႈထၢမ်ၸႅတ်ႈတူၺ်းတူဝ်သူတႃႉ။
ဢွၼ်ၵၼ်ၸႅတ်ႈထၢမ်ၸႅတ်ႈတူၺ်းၸူဝ်ႈဢၼ်ဢမ်ႇပႆႇၶၢမ်ႇတၢင်းဢၼ်ၸီႇယၢင်ႇၸွမ်းၼင်ႇဢမိင်ႉၸဝ်ႈ၊ၸူဝ်ႈဢၼ်သူဢမ်ႇပႆႇၶၢမ်ႇတၢင်းဢၼ်ႁေႃႈပႅတ်ႈမိူၼ်ၸိူဝ်ႉၼင်ႇၵႅပ်ႇဢၼ်ပဵဝ်ၵႂႃႇ၊ၸူဝ်ႈဢၼ်တၢင်းၸႂ်မႆႈၶႂ်ႈၸႃႉ၊ ထႃႇဝရႃႉၽြႃး၊ ဢၼ်ႁႅင်းယႂ်ႇၼႃႇၼၼ်ႉဢမ်ႇပႆႇႁွတ်ႈထိုင်ၵႃႈၼိူဝ်သူ၊ၸူဝ်ႈဢၼ်မိုဝ်ႉဝၼ်းဢၼ်တၢင်းတေႃးသႃႉ ထႃႇဝရႃႉၽြႃး၊ ၼၼ်ႉဢမ်ႇပႆႇႁွတ်ႈထိုင်ၵႃႈၼိူဝ်သူၼၼ်ႉတႃႉ။-
ၵူၼ်းဝၢၼ်ႈၵူၼ်းမိူင်းဢၼ်ႁူဝ်ၸႂ်ၶျႃးတႅမ်ႇလႄႈၵမ်ၵျၢင်ႉၸွမ်းၼင်ႇတြႃးတင်းသဵင်ႈတင်းလူင်ၶဝ်႟။ ဢွၼ်ၵၼ်သွၵ်ႈႁႃ ထႃႇဝရႃႉၽြႃး၊ တႃႉ။ ဢွၼ်ၵၼ်သွၵ်ႈႁႃတၢင်းဢၼ်သိုဝ်ႈတေႃႇတႃႉ။ တၢင်းဢၼ်ႁူဝ်ၸႂ်ၶျႃးတႅမ်ႇၵေႃႈ ဢွၼ်ၵၼ်သွၵ်ႈႁႃဢဝ်တႃႉ။ သူၸၢင်ႈၶႄးတၵ်းလႆႈတဵတ်ႇမႅပ်းယူႇၼႂ်းမိုဝ်ႉဝၼ်းဢၼ် ထႃႇဝရႃႉၽြႃး၊ ၸႂ်မႆႈၶႂ်ႈၸႃႉၼၼ်ႉဢေႃႈ။
ဝဵင်း ၵႃႇၸႃႉ၊ တၵ်းပဵၼ်တီႈဢၼ်ၸုၼ်ႉပႅတ်ႈလႄႈဝဵင်း ဢႃႇသၵေႇလုၼ်ႇ၊ တၵ်းပဵၼ်တီႈဢၼ်ပႄႇၽဵဝ်ႈပႅတ်ႈဢေႃႈ။ ၵူၼ်းဝဵင်း ဢႃႇၸုတ်ႉ၊ တင်းလၢႆတၵ်းလႆႈၶၢမ်ႇတၢင်းဢၼ်ႁေႃႈဢွၵ်ႇပႅတ်ႈၶိင်ႇၵၢင်ဝၼ်းတဵင်ႈလႄႈဝဵင်း ဢေႇၵရုၼ်ႇ၊ ၵေႃႈတၵ်းလႆႈၶၢမ်ႇတၢင်းဢၼ်ၵိူၼ်ႇယႃႉပႅတ်ႈဢေႃႈ။-
ၵူၼ်းမဵဝ်း ၶေးရသိ၊ ဢၼ်ယူႇၵႃႈတီႈႁိမ်းၽင်ႇပၢင်ႇလၢႆႇၶဝ်႟။ ၼုၵ်ႈၵပၢတ်ႈ ထႃႇဝရႃႉၽြႃး၊ ၶတ်းၶႂၢင်သူယူႇဢေႃႈ။ မိူင်း ၶႃႇၼၼ်ႇ၊ တီႈယူႇၵူၼ်း ၽိလိတ်ႉတိ၊ ႟။ ၵဝ်တၵ်းယႃႉၽဵဝ်ႈမႂ်းပႅတ်ႈ ႁႂ်ႈထၢၼ်ႈပေႃးဢမ်ႇမီးၵေႃႉဢၼ်ယူႇသဝ်းၵႃႈၼႂ်းမႂ်းဢေႃႈ။-
ၵႃႈတီႈႁိမ်းၽင်ႇပၢင်ႇလၢႆႇၼၼ်ႉတၵ်းပဵၼ်ပၢင်ႇယိူဝ်ႈယူႇသေႇသေႇလႄႈတီႈယူႇပုၼ်ႈၶဝ်ၸိူဝ်းဢၼ်လဵင်ႉသူဝ်းထိင်းသူဝ်း၊တီႈဢၼ်တၵ်းႁဵတ်းၶွၵ်ႈသူဝ်းတင်းလၢႆဢေႃႈ။-
ၽင်ႇပၢင်ႇလၢႆႇၼၼ်ႉၵေႃႈ တၵ်းပဵၼ်ပုၼ်ႈၵူၼ်းမဵဝ်း ယုတႃႉ၊ ဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉလႄႈၶဝ်ၼၼ်ႉတၵ်းဢွၼ်ၵၼ်ၵိၼ်ယူႇၵႃႈတီႈၼၼ်ႈဢေႃႈ။ ၶိင်ႇၵၢင်ၶမ်ႈၵေႃႈ ၶဝ်တၵ်းဢွၼ်ၵၼ်ၼွၼ်းယူႇၵႃႈတီႈႁိူၼ်းၵႃႈၼႂ်းဝဵင်း ဢႃႇသၵေႇလုၼ်ႇ၊ ၸိူဝ်းၼၼ်ႉဢေႃႈ။ ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်တၵ်းမႃးလူမႃးတူၺ်းၶဝ်လႄႈႁႂ်ႈၶဝ်ၶိုၼ်းလႆႈပဵၼ်မိူၼ်ပၵ်းၵဝ်ႇပိူင်ၵဝ်ႇဢေႃႈ။
ၵဝ်လႆႈငိၼ်းၵႂၢမ်းဢၼ်ၵူၼ်းမဵဝ်း မေႃႇၽႃႉ၊ တင်းလၢႆတၢင်ႇဢပျတ်ႈ၊ဢိၵ်ႇတင်းၵႂၢမ်းဢၼ်ၵူၼ်းမဵဝ်း ဢမ်ႇမုၼ်ႇ၊ သႄႉသွမ်းၵူၼ်းမဵဝ်းၵဝ်တင်းလၢႆသေလႄႈဢုပ်ႇဝၢဝ်းလူၺ်ႈၶွပ်ႇၼမ်ႉလႅၼ်လိၼ်ၶဝ်ၼၼ်ႉယဝ်ႉ။-
ပိူဝ်ႈၼႆလႄႈၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ၵႃႈၼင်ႇဢၼ်ၵဝ်ဢသၢၵ်ႈလိပ်းယူႇၼၼ်ႉ၊မိူင်း မေႃႇၽႃႉ၊ တၵ်းလႆႈပဵၼ်ၸိူဝ်ႉၼင်ႇဝဵင်း သေႃးတုမ်ႇ၊ မိူင်း ဢမ်ႇမုၼ်ႇ၊ တၵ်းလႆႈပဵၼ်ၸိူဝ်ႉၼင်ႇဝဵင်း ၵေႃးမေႃးရႃႉ၊ တီႈဢၼ်တူၼ်ႈၼၢမ်ဢွၵ်ႇ၊တီႈဢၼ်ပဵၼ်မေႃႇၵိူဝ်၊တီႈဢၼ်လုလႅဝ်ယူႇသေႇသေႇၼၼ်ႉဢေႃႈ။ ၵူၼ်းၵဝ်ဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉတၵ်းႁိမ်ႁူင်ႇဢဝ်ဢုၵ်ႉၸႃႇၶဝ်လႄႈၵူၼ်းမဵဝ်းၵဝ်ဢၼ်ယင်းဢသၢၵ်ႈလိပ်းၸိူဝ်းၼၼ်ႉတၵ်းသိမ်းဢဝ်ၶွပ်ႇၼမ်ႉလႅၼ်လိၼ်ၶဝ်ဢေႃႈ။-
ၶဝ်တၵ်းလႆႈၶၢမ်ႇတၢမ်ႇၵွပ်ႈပိူဝ်ႈတၢင်းဢၼ်မႃႇၼႃႉၶဝ်ယႂ်ႇၼၼ်ႉဢေႃႈ။ လွင်ႈမၼ်းၸမ်ႉ၊ၶဝ်သႄႉသွမ်းလႄႈဢုပ်ႇဝၢဝ်းၵႃႈၼိူဝ်ၵူၼ်း ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၼၼ်ႉဢေႃႈ။-
ထႃႇဝရႃႉၽြႃး၊ တၵ်းပဵၼ်တီႈဢၼ်လီၵူဝ်လီႁႄပုၼ်ႈၶဝ်လႄႈမၼ်းၸဝ်ႈတၵ်းဢဝ်ၽြႃးလေႃးၵီႇၵႃႈမီးႁႂ်ႈပဵၼ်ဢၼ်လဵၵ်ႉဢၼ်ဢွၼ်ႇဢေႃႈ။ ၵူၼ်းၵူႈၸိူဝ်ႉၵူႈမဵဝ်းၵႃႈမီးတင်းသဵင်ႈတင်းလူင်ၸိူဝ်းၼၼ်ႉတၵ်းဢွၼ်ၵၼ်ယူႇၵႃႈၼႂ်းတီႈယူႇၶဝ်ႁင်းၽႂ်ႁင်းမၼ်းၼၼ်ႉသေလႄႈဝႆႈသႃမၼ်းၸဝ်ႈဢေႃႈ။
ၵူၼ်းမိူင်း ဢေႇတီႇဢူဝ်းပီးယႃး၊ ၶဝ်႟။ သူၵေႃႈတၵ်းလႆႈၶၢမ်ႇတၢႆလူၺ်ႈလၢပ်ႇၵဝ်လႅဝ်းၵဝ်ဢေႃႈ။-
မၼ်းၸဝ်ႈတၵ်းယဵတ်ႇမိုဝ်းမၼ်းၸဝ်ႈၵႃႈၼိူဝ်ၼႃႈတၢင်းႁွင်ႇလႄႈယႃႉၽဵဝ်ႈမိူင်း ဢႃႇသီးရီးယႃး၊ ပႅတ်ႈဢေႃႈ။ မၼ်းၸဝ်ႈတၵ်းႁႂ်ႈဝဵင်း ၼိၼေႇဝူၺ်ႇ၊ ပဵၼ်တီႈဢၼ်သဵတ်ႇၵူၼ်းယဵၼ်ၵူၼ်း၊တီႈဢၼ်ႁႅင်ႈႁွင်မိူၼ်ၸိူဝ်ႉၼင်ႇထိူၼ်ႇလႅင်ႉၼၼ်ႉဢေႃႈ။-
ၽုင်သူဝ်းဢိၵ်ႇတင်းဝူဝ်းလႂ်၊တူဝ်ထိူၼ်ႇႁၢႆႉၵႃႈမီးလႂ်၊တၵ်းဢွၼ်ၵၼ်ၼွၼ်းၵႃႈတီႈၼႂ်းၵၢင်ဝဵင်းၼၼ်ႉလႄႈၼူၵ်ႉၵွၼ်ႉႁွႆ၊ဢိၵ်ႇတင်းၼူၵ်ႉတီးတုတ်ႈတင်းလၢႆတၵ်းယူႇသဝ်းၵႃႈၼိူဝ်ၶိုဝ်ႇၽၵ်းတူမၼ်းၸိူဝ်းၼၼ်ႉဢေႃႈ။ သဵင်ၶဝ်တၵ်းႁူၼ်ႈမေႃးယူႇၵႃႈၼႂ်းႁူးလၢင်းတဵၼ်တင်းလၢႆလႄႈၵႃလမ်တၵ်းႁွင်ႉၵႃႈတီႈၶူင်ႇၽၵ်းတူတင်းလၢႆၵွပ်ႈပိူဝ်ႈဢၼ်မၼ်းၸဝ်ႈႁႂ်ႈလၢႆႈမွၵ်ႇလၢႆႈမႂ်ၼိူဝ်မႆႉပႅၼ်ႈဢႃႇရိတ်ႉၸိူဝ်းၼၼ်ႉႁၢႆပႅတ်ႈဢေႃႈ။-
ဝဵင်းၼၼ်ႉပဵၼ်ဝဵင်းတၢင်းဢၼ်ယၢမ်ႈမီးတၢင်းဢၼ်ၸူမ်းဢၼ်သိူဝ်းယူႇ၊ဢၼ်ၵၢင်းလွတ်ႈတင်းတၢင်းဢၼ်မႆႈၸႂ်ၶီၸႂ်ယူႇသေလႄႈလၢတ်ႈၼႂ်းၸႂ်လႄႈဝႃႈ၊ “မီးၵဝ်ၵူၺ်းဢေႃႈ၊ၼွၵ်ႈသေၵဝ်ၼႆႉဢမ်ႇမီးၽူႈလႂ်၊” ဝႃႈၼင်ႇၼႆယူႇလူင်ပႄႇ။ တေႃႈလဵဝ်ၼႆႉမၼ်းပဵၼ်တီႈဢၼ်ပႄႇၽဵဝ်ႈပႅတ်ႈ၊တီႈဢၼ်တူဝ်ထိူၼ်ႇႁၢႆႉၼွၼ်းယူႇယဝ်ႉလူင်ပႄႇ။ ၶဝ်ၸိူဝ်းဢၼ်ၵႂႃႇတၢင်းပႆတၢင်းၵၢႆၵႂႃႇၵႃႈတီႈႁိမ်းမၼ်းၼၼ်ႉတၵ်းဢွၼ်ၵၼ်ႁဵတ်းသဵင်သႄႉသွမ်းလႄႈသၼ်ႇမိုဝ်းၽႅတ်းမိုဝ်းၶဝ်ဢေႃႈ။
ဝဵင်းဢၼ်လုၵ်ႉၽိုၼ်ႉလႄႈမီးတၢင်းဢၼ်ၵူဝ်ႈၵိူၵ်ႇယူႇသေယဝ်ႉ၊ၸၢင်ႈၼိၵ်ႈၸၢၵ်ႈငႅၼ်းသႄးၵူၼ်းတူဝ်ၸဝ်ႈၵဝ်ႇၼၼ်ႉမီးဢႃႉမၢင်ႇၵလႃႇဢေႃႈ။-
မၼ်းဢမ်ႇထွမ်ႇဢဝ်ၼုၵ်ႈၵပၢတ်ႈၸဝ်ႈ။ ဢမ်ႇၶၢမ်ႇဢဝ်တၢင်းဢၼ်သင်ႇသွၼ်သုင်းမႃႉၸဝ်ႈ။ ဢမ်ႇသွၼ်ႈပိုင်ႈ ထႃႇဝရႃႉၽြႃး၊ ဢမ်ႇသုတ်ႉၸပ်းသုတ်ႉၸူးၵႃႈတီႈၽြႃးပဵၼ်ၸဝ်ႈမၼ်းလႃးလႃး။-
ၶုၼ်ဢၼ်ယူႇၵႃႈၼႂ်းဝဵင်းၸိူဝ်းၼၼ်ႉမိူၼ်သၢင်ႇသီႈဢၼ်ႁွင်ႉသဵင်လင်ယူႇလႄႈၵူၼ်းဢၼ်ၸီႇယၢင်ႇတြႃးဢၼ်ယူႇၵႃႈၼႂ်းဝဵင်းၸိူဝ်းၼၼ်ႉၵေႃႈပဵၼ်မိူၼ်မႃထိူၼ်ႇဢၼ်လႄႇယူႇၼႂ်းၶိင်ႇၵၢင်ၶိုၼ်းဢေႃႈ။ ၶဝ်ဢွၼ်ၵၼ်ၶူပ်းၵိၼ်လုပ်ႇၵိၼ်လဝ်းလႄႈဢမ်ႇဝႆႉၵိုတ်းဝႆႉၵျၢၼ်ႇတေႃႇထိုင်ႁွတ်ႈၶိင်ႇၵၢင်ၼႂ်။-
ပရေႃးၽႅတ်ႈမၼ်းၸိူဝ်းၼၼ်ႉပဵၼ်ၵေႃႉဢၼ်မဝ်မၢင်၊ၵေႃႉဢၼ်သဵတ်ႈၸႃႇလုဢေႃႈ။ ယဵၸ်ႈပရေႃးႁဵၵ်ႈမၼ်းၸိူဝ်းၼၼ်ႉၵေႃႈႁဵတ်းႁႂ်ႈထႃႇၼႃႉတီႈမူတ်းၸၢင်ႇၸဝ်ႈၵူဝ်ႈၵိူၵ်ႇလႄႈႁဵတ်းတၢင်းဢၼ်ၶျႃးတြႃးၸဝ်ႈႁႂ်ႈတူၵ်းတီႈတႅမ်ႇဢေႃႈ။-
ၵူၺ်းၵႃႈ၊ ထႃႇဝရႃႉၽြႃး၊ ဢၼ်ယူႇၵႃႈၼႂ်းဝဵင်းၼၼ်ႉမၼ်းၸဝ်ႈသိုဝ်ႈတေႃႇလႄႈမၼ်းၸဝ်ႈဢမ်ႇႁဵတ်းလွင်ႈတၢင်းဢၼ်ဢမ်ႇတြႃးသေပွၵ်ႈ။ ၼႂ်ၼိုင်ႈယဝ်ႉၼႂ်ၼိုင်ႈမၼ်းၸဝ်ႈၽုၺ်ႇဢွၵ်ႇၼႄပျႃးလွင်ႈတၢင်းဢၼ်မၼ်းၸဝ်ႈၸီႇယၢင်ႇၸွမ်းတြႃးလႄႈဢမ်ႇပိူင်ႈၵႂႃႇလွႆးၵႂႃႇလႃးလႃး။ ၼႂ်းဝႃႈၼၼ်သေၵေႃႈၶဝ်ၸိူဝ်းဢၼ်ဢမ်ႇသိုဝ်ႈတေႃႇၼၼ်ႉဢမ်ႇမီးတၢင်းဢၼ်ဢူၵ်းဢၼ်ဢၢႆ။-
ၵဝ်ပႄႇတႅပ်းၵူၼ်းၵူႈၸိူဝ်ႉၵူႈမဵဝ်းပႅတ်ႈလႄႈတိူၵ်ႈတီႈတိုၵ်းသိုၵ်းၶဝ်ပဵၼ်တီႈဢၼ်သဵတ်ႇၵူၼ်းယဵၼ်ၵူၼ်းၵႂႃႇယဝ်ႉယဝ်ႉ။ ၵဝ်ႁႂ်ႈသဵၼ်ႈတၢင်းၶဝ်ပဵၼ်ဢၼ်ပဝ်ႇဢၼ်လၢပ်ႈၵႂႃႇ ႁႂ်ႈၽူႈလႂ်ထၢၼ်ႈပေႃးဢမ်ႇၵႂႃႇဢမ်ႇမႃးယဝ်ႉယဝ်ႉ။ ဝဵင်းၶဝ်ၸိူဝ်းၼၼ်ႉလုလႅဝ်ၵႂႃႇထၢၼ်ႈပေႃးဢမ်ႇမီးၵူၼ်းသေၵေႃႉသေၵူၼ်း၊ဢမ်ႇမီးၵေႃႉဢၼ်ယူႇသဝ်းလႃးလႃးယဝ်ႉ။-
မိူဝ်ႈၼၼ်ႉၵဝ်လၢတ်ႈလႄႈဝႃႈ၊ “ဝဵင်းၼၼ်ႉတၵ်းၵူဝ်ႁႄၵဝ်ဢမၢၼ်ႇၶၼ်ပဵၼ်လႄႈၶၢမ်ႇဢဝ်ၼႄးတၢင်းဢၼ်သင်ႇသွၼ်သုင်းမႃႉၼၼ်ႉထၢၼ်ႈပေႃးတီႈဢၼ်မၼ်းယူႇမၼ်းသဝ်းတၵ်းဢမ်ႇလႆႈၶၢမ်ႇတၢင်းဢၼ်ပႄႇၽဵဝ်ႈပႅတ်ႈၸွမ်းၵႃႈၼင်ႇဢၼ်ၵဝ်ၸီႇယၢင်ႇၶၢၼ်းဝႆႉလူၺ်ႈလွင်ႈမၼ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။ ပိၵ်ႉသမ်ႉဝႃႈၼင်ႇၼႆသေၵေႃႈ ၶဝ်ၼၼ်ႉဢွၼ်ၵၼ်ယဵင်ႈၶႅၼ်းၶတ်းၸႂ်သေလႄႈၵမ်ၵျၢင်ႉတၢင်းၵမ်တၢင်းၵျၢင်ႉဢၼ်ၽိတ်းဢၼ်ပိူင်ႈၵူၺ်းဢေႃႈ။
ၵွပ်ႈပိူဝ်ႈၸိူဝ်ႉၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉၸမ်ႉ၊ဢွၼ်ၵၼ်ပႂ်ႉထႃႈၵဝ်ယူႇတေႃႇထိုင်ႁွတ်ႈမိုဝ်ႉဝၼ်းဢၼ်ၵဝ်လုၵ်ႉႁႂ်ႈလႆႈၶၢမ်ႇသၢၵ်ႈသေႇၼၼ်ႉတႃႉ။ ၵဝ်ဝႆႉၸႂ်တမ်းၸႂ်တၵ်းႁႂ်ႈၵူၼ်းၵူႈၸိူဝ်ႉၵူႈမဵဝ်းၸုၵၼ်တုမ်ၵၼ်လႄႈႁႂ်ႈၵူၼ်းၵူႈသိုင်ႇၵူႈမိူင်းၸုၵၼ်ၶွၼ်ႈၵၼ်လႄႈႁႂ်ႈလႆႈဢဝ်တေႃးသႃႉၵဝ်၊ဢၢႆႁႅင်းတၢင်းၸႂ်မႆႈၶႂ်ႈၸႃႉၵဝ်တင်းသဵင်ႈတင်းမူတ်းသွၼ်းလေႃႇထွၵ်ႇသႂ်ႇၵႃႈၼိူဝ်ၶဝ်ဢေႃႈ။ ၼႃႈလိၼ်မိူင်းတင်းမူတ်းတၵ်းလႆႈၶၢမ်ႇတၢင်းဢၼ်ၽႆးတေႃးသႃႉၵဝ်မႆႈပႅတ်ႈဢေႃႈ။-
မိူဝ်ႈၼၼ်ႉၵဝ်တၵ်းၶိုၼ်းမႄးပၼ်ၵႂၢမ်းၽႃႇသႃႇၵူၼ်းမဵဝ်းတင်းလၢႆႁႂ်ႈပဵၼ်ၵႂၢမ်းဢၼ်မူတ်းလီသႂ်လီႁႂ်ႈၶဝ်တင်းသဵင်ႈတင်းလူင်မီးဢၶႂၢင်ႉဢၼ်လႆႈႁဵတ်းပထၼႃႇတီႈၼႃႇမႃႉၸိုဝ်ႈသဵင် ထႃႇဝရႃႉၽြႃး၊ လႄႈၽွမ်ႉၵၼ်ပွင်ႁဵတ်းၵၢၼ်ဢမုမၼ်းၸဝ်ႈဢေႃႈ။-
ၶဝ်ၸိူဝ်းဢၼ်တွင်းပၢၼ်ႇၵဝ်၊ၵူၼ်းမဵဝ်းၵဝ်ဢၼ်ၽၢတ်ႇၽႄၵၼ်ၵႂႃႇယူႇၵူႈတီႈၵူႈလႅၼ်ၼၼ်ႉတၵ်းဢွၼ်ၵၼ်လုၵ်ႉသေၵႃႈတီႈၽၢႆႇပုၼ်ႉမႄႈၼမ်ႉမိူင်း ဢေႇတီႇဢူဝ်းပီးယႃး၊ ၸိူဝ်းၼၼ်ႉသေလႄႈပႃးဢဝ်ၶိူင်ႈတၢင်းလူႇပုၼ်ႈၵဝ်မႃးဢေႃႈ။
ၼႂ်းဝၼ်းၼၼ်ႉမႂ်းတေဢမ်ႇမီးတၢင်းဢၼ်ဢူၵ်းဢၼ်ဢၢႆၵွပ်ႈပိူဝ်ႈဢပျတ်ႈလူၺ်ႈလွင်ႈၵႃႈဢၼ်မႂ်းၽိတ်းပိူင်ႈၵဝ်ၼၼ်ႉ။ ၵဝ်တၵ်းပႄႇဢဝ်ၶဝ်ၸိူဝ်းဢၼ်ဢုပ်ႇဝၢဝ်းၼၼ်ႉဢွၵ်ႇပႅတ်ႈသေၵႃႈတီႈၼႂ်းၵၢင်မႂ်းဢေႃႈ။ မႂ်းၵေႃႈၵမ်းလိုၼ်းတေဢမ်ႇလႆႈႁဵတ်းတၢင်းဢၼ်မႃႇၼႃႉပူၵ်းပႅၼ်ယူႇၵႃႈတီႈလွႆဢၼ်မူတ်းၸၢင်ႇၵဝ်ၼၼ်ႉ။-
ၵဝ်တၵ်းဢဝ်မဵဝ်းၵူၼ်းဢၼ်ၸႂ်ၶျႃးတႅမ်ႇလႄႈယၢၵ်ႈၽၢၼ်ၼၼ်ႉဝႆႉၵိုတ်းဝႆႉၵျၢၼ်ႇၼႂ်းၵၢင်မႂ်းလႄႈၶဝ်ၼၼ်ႉတၵ်းဢွၼ်ၵၼ်သွၼ်ႈပိုင်ႈၼႃႇမႃႉၸိုဝ်ႈသဵင် ထႃႇဝရႃႉၽြႃး၊ ဢေႃႈ။-
ၵူၼ်းမဵဝ်း ဢိသရေး၊ ဢၼ်ယင်းၵိုတ်းယင်းၵျၢၼ်ႇၸိူဝ်းၼၼ်ႉတေဢမ်ႇလႆႈႁဵတ်းလွင်ႈတၢင်းဢၼ်ဢမ်ႇတြႃး။ တေဢမ်ႇလႆႈလၢတ်ႈၵႂၢမ်းမုသႃႇ။ တေဢမ်ႇလႆႈလၢတ်ႈၵႂၢမ်းဢၼ်ပႅတ်ႉဢၼ်လႅၼ်။ ၶဝ်ၼၼ်ႉတၵ်းလႆႈဢွၼ်ၵၼ်ၵိၼ်ၶူပ်းယူႇ၊ၼွၼ်းယူႇလႄႈၽူႈလႂ်ၵေႃႈဢမ်ႇၸၢင်ႈႁဵတ်းႁႂ်ႈၶဝ်လႆႈၵူဝ်လႆႈႁႄလႃးလႃး။
လုၵ်ႈယိင်း ၸိဢုၼ်ႇ၊ ႟။ ႁဵတ်းၵႂၢမ်းတႃႉ။ ၵူၼ်းမဵဝ်း ဢိသရေး၊ ႟။ ႁွင်ႉပၢဝ်ႇႁွင်ႉလၢတ်ႈတႃႉ။ လုၵ်ႈယိင်းဝဵင်း ယေႇရုသလႅမ်ႇ၊ ႟။ ပႃးတင်းႁူဝ်ၸႂ်သဵင်ႈသဵင်ႈသေလႄႈသိူဝ်းသႂၢင်ႇၸူမ်းသိူဝ်းတႃႉ။-
ထႃႇဝရႃႉၽြႃး၊ ၼၼ်ႉႁႂ်ႈဢပျတ်ႈတၢမ်ႇမႂ်းထၢတ်ႇယဵၼ်ႁၢႆလၢႆလႄႈပႄႇရၢၼ်ႇသူႇမႂ်းတင်းလၢႆပႅတ်ႈယဝ်ႉ။ ၶုၼ်ႁေႃၶမ်းၵူၼ်းမဵဝ်း ဢိသရေး၊ ဢၼ်ဝႃႈ၊ ထႃႇဝရႃႉၽြႃး၊ ၼၼ်ႉမီးယူႇၵႃႈၼႂ်းၵၢင်မႂ်းလႄႈၵမ်းလိုၼ်းမႂ်းတေဢမ်ႇလႆႈႁူပ်ႉလႆႈထူပ်းၽေးဢုပၢတ်ႈ။
ၼႂ်းဝၼ်းၼၼ်ႉတၵ်းလၢတ်ႈတီႈဝဵင်း ယေႇရုသလႅမ်ႇ၊ လႄႈဝႃႈ၊ “ယႃႇပေၵူဝ်ပေႁႄ၊” ဝႃႈၼင်ႇၼႆလႄႈလၢတ်ႈတီႈလွႆ ၸိဢုၼ်ႇ၊ လႄႈဝႃႈ၊ “ယႃႇပေႁႂ်ႈႁႅင်းမိုဝ်းမႂ်းလႆႈဢူၼ်ႈလႃးလႃး၊” ဝႃႈၼင်ႇၼႆဢေႃႈ။-
ထႃႇဝရႃႉၽြႃး၊ ၽြႃးပဵၼ်ၸဝ်ႈမႂ်းမီးယူႇၵႃႈၼႂ်းၵၢင်မႂ်းလႄႈၽြႃးဢၼ်မီးတၼ်းၶူဝ်းၼၼ်ႉတၵ်းၵႄႇသႄႇၶျွတ်ႈဢဝ်မႂ်းဢေႃႈ။ မၼ်းၸဝ်ႈတၵ်းၶိုတ်းၸႂ်ပဵင်းၸႂ်သေလႄႈၸူမ်းသိူဝ်းလူၺ်ႈလွင်ႈမႂ်းဢေႃႈ။ မၼ်းၸဝ်ႈတၵ်းႁႂ်ႈမႂ်းမီးဢသၢၵ်ႈမႂ်ႇလူၺ်ႈတၢင်းႁၵ်ႉမႅတ်ႈတႃႇမၼ်းၸဝ်ႈလႄႈ ပႃးတၢင်းဢၼ်ႁဵတ်းၵႂၢမ်းသဵင်ယႂ်ႇၼႃႇၵႃႈၼႂ်းမိုဝ်ႉဝၼ်းဢၼ်ၶၢမ်ႇပွႆးၼၼ်ႉဢေႃႈ။-
ၵဝ်တၵ်းႁႂ်ႈၽေးဢုပၢတ်ႈဝႄႈပိူင်ႈသေၵႃႈတီႈမႂ်းလွင်ႈၼင်ႇႁိုဝ်မႂ်းတေလွတ်ႈသေတၢင်းဢၼ်ၶၢမ်ႇတၢင်းဢၼ်သႄႉသွမ်းတၢင်ႇဢပျတ်ႈၼၼ်ႉဢေႃႈ။-
တူၺ်းလူး။ ၶိင်ႇမိူဝ်ႈၼၼ်ႉၵဝ်တၵ်းၸီႇယၢင်ႇပၼ်တၢမ်ႇတီႈၶဝ်ၸိူဝ်းဢၼ်ၼိၵ်ႈၸၢၵ်ႈငႅၼ်းသႄးမႂ်းၼၼ်ႉဢေႃႈ။ ၵဝ်တၵ်းပၼ်ၵတ်းယဵၼ်ၶျၢမ်းသႃႇတီႈၶဝ်ၸိူဝ်းဢၼ်မီးတၢင်းၶႆႈတၢင်းပဵၼ်ၼၼ်ႉလႄႈႁႂ်ႈၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ႁေႃႈဢွၵ်ႇပႅတ်ႈၼၼ်ႉၸုၵၼ်တုမ်ၵၼ်ဢေႃႈ။ ၵဝ်တၵ်းပၼ်မုၼ်သရေႇတၢင်းဢၼ်ယွင်ႈယေႃး၊ဢိၵ်ႇတင်းၼႃႇမႃႉၸိုဝ်ႈသဵင်တီႈၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ဢူၵ်းဢၼ်ဢၢႆၼၼ်ႉၵႃႈၼိူဝ်လိၼ်မိူင်းတင်းသဵင်ႈတင်းမူတ်းဢေႃႈ။-
ၼႂ်းၶိင်ႇမိူဝ်ႈၼၼ်ႉၵဝ်တၵ်းသမ်ႉၶိုၼ်းဢဝ်မႂ်းမႃးလႄႈႁႂ်ႈမႂ်းၸုၵၼ်တုမ်ၵၼ်သေယဝ်ႉ၊မိူဝ်ႈဢၼ်ၵဝ်သမ်ႉၶိုၼ်းဢဝ်ၵူၼ်းမႂ်းၸိူဝ်းဢၼ်လႆႈၶၢမ်ႇတၢင်းဢၼ်ပိူၼ်ႈတိဢဝ်ၵႂႃႇၼၼ်ႉ ၶိုၼ်းမႃးသိုဝ်ႈၼႃႈတႂ်ႈတႃမႂ်းၼၼ်ႉၸိုင်၊ၵဝ်တၵ်းပၼ်ႁႂ်ႈမႂ်းမီးမုၼ်သရေႇတၢင်းဢၼ်ယွင်ႈယေႃးၵႃႈၼႂ်းၵႄႈၵၢင်ၵူၼ်းၵႃႈၼိူဝ်လိၼ်မိူင်းၵူႈၸိူဝ်ႉၵူႈမဵဝ်းၼၼ်ႉဢေႃႈ၊ ထႃႇဝရႃႉၽြႃး၊ လၢတ်ႈဝႃႈၸိူဝ်ႉၼင်ႇၼႆဢေႃႈ။ ၵျၢမ်းပရေႃးၽႅတ်ႈၸေႇၽၼိယဝ်ႉယဝ်ႉဢေႃႈ။
ၼႂ်းၶူပ်ႇပီဢၼ်ၶုၼ်လူင် တႃႇရိ၊ ၸၢမ်ႇႁၢင်ႈၸၢမ်ႇႁေႃသွင်ပီ၊လိူၼ်တီႈႁူၵ်းဝၼ်းတီႈၼိုင်ႈၼၼ်ႉ၊ၼုၵ်ႈၵပၢတ်ႈ ထႃႇဝရႃႉၽြႃး၊ ဢၼ်ဢဝ်တင်းပရေႃးၽႅတ်ႈ ႁၵ်ႉၵႄး၊ သေလႄႈႁေႃးလၢတ်ႈၼၼ်ႉႁွတ်ႈမႃးတီႈ ၸေႇရုပႃႉပေႇလႃႉ၊ ၶုၼ်ဢၼ်ဢုပ်ႉပိူင်ႇမိူင်း ယုတႃႉ၊ ဢၼ်ပဵၼ်လုၵ်ႈၸၢႆး သႃႇလထိဢေးလႃႉ၊ ဢိၵ်ႇတင်းၶုၼ်ယဵၸ်ႈပရေႃးႁဵၵ်ႈ ယေႃးသု၊ လုၵ်ႈၸၢႆး ယေႃးၸတၵ်ႉ၊ ၼၼ်ႉဢေႃႈ။-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ၵူၼ်းတင်းလၢႆၸိူဝ်းၼႆႉလၢတ်ႈလႄႈဝႃႈ၊ “ၶိင်ႇမၼ်းၶႃႇမၼ်းဢၼ်တၵ်းလႆႈတႄႇႁဵတ်းၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ၼၼ်ႉဢမ်ႇပႆႇႁွတ်ႈပႆႇထိုင်၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၼုၵ်ႈၵပၢတ်ႈ ထႃႇဝရႃႉၽြႃး၊ ဢၼ်ႁေႃးလၢတ်ႈလူၺ်ႈပရေႃးၽႅတ်ႈ ႁၵ်ႉၵႄး၊ လႄႈႁွတ်ႈမႃးၼၼ်ႉၸမ်ႉ၊-
“ၵူၼ်းၵဝ်တင်းလၢႆ႟။ ပဵၼ်ၶိင်ႇဢၼ်သူလီယူႇၵႃႈၼႂ်းႁိူၼ်းဢၼ်ႁၢင်ႈလီႁၢင်ႈငၢမ်းလႄႈႁိူၼ်းၸဝ်ႈၸမ်ႉ၊လႆႈမီးတၢင်းဢၼ်လုလႅဝ်ယူႇႁိုဝ်း။-
ပိူဝ်ႈၼႆလႄႈတေႃႈလဵဝ်ၼႆႉ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ဢွၼ်ၵၼ်ၶႆႈၸႂ်ဝူၼ်ႉၸႂ်လူၺ်ႈလွင်ႈသူပဵၼ်ယူႇမီးယူႇၸိူဝ်ႉၼင်ႇႁိုဝ်ၼၼ်ႉတႃႉ။-
သူဝၢၼ်ႇပိုၼ်ၸိူဝ်ႉၽၼ်းၼမ်ၼႃႇယဝ်ႉ။ ၵူၺ်းၵႃႈ၊လႆႈမၢၵ်ႇမၼ်းႁူင်းမၼ်းၵႄႇၼႃႇဢေႃႈ။ သူလႆႈၵိၼ်သေၵေႃႈဢမ်ႇဢိမ်ႇလီတဵမ်လီ။ သူလႆႈသူတ်ႉလႆႈဢိုၵ်ႉသေၵေႃႈ ဢမ်ႇလႆႈသူတ်ႉဢိုၵ်ႉဢိမ်ႇလီတဵမ်လီ။ သူလႆႈၼုင်ႈၶူဝ်းၼုင်ႈသေၵေႃႈဢမ်ႇလႆႈၼုင်ႈဢုၼ်ႇလီ။ ၵေႃႉဢၼ်လႆႈၶၢမ်ႇဢဝ်ၵႃႈမၼ်းၶၼ်မၼ်းၼၼ်ႉၵေႃႈ သိမ်းသႂ်ႇဝႆႉၼႂ်းထူင်ဢၼ်ပွင်ႇဢၼ်ႁူဝ်ႈဢေႃႈ။-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ဢွၼ်ၵၼ်ၶႆႈၸႂ်ဝူၼ်ႉၸႂ်လွင်ႈသူပဵၼ်ယူႇမီးယူႇၸိူဝ်ႉၼင်ႇႁိုဝ်ၼၼ်ႉတႃႉ။-
ဢွၼ်ၵၼ်ၶိုၼ်ႈၵႂႃႇဢဝ်မႆႉၸိင်ၵႃႈၼိူဝ်လွႆမႃးသေယဝ်ႉ၊တႄႇႁဵတ်းၵျွင်းပိၵ်ႈမၢၼ်ႇၸဝ်ႈတႃႉ။ ၵဝ်ၵေႃႈတၵ်းထုၵ်ႇၸႂ်ၵျိူၵ်ႈၸႂ်လႄႈမုၼ်ၽုင်းၵဝ်တၵ်းထၢင်ႇသႃးမႃးဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
“ပိၵ်ႉသမ်ႉသူမုင်ႈမွင်းလွင်ႈတၢင်းဢၼ်တၵ်းလႆႈၼမ်ၼႃႇၼၼ်ႉသေၵေႃႈ၊ဢုၵ်ႉၸႃႇဢၼ်လႆႈၼၼ်ႉပဵၼ်ဢၼ်ၵေႇၼႃႇဢေႃႈ။ မိူဝ်ႈဢၼ်သူဢဝ်မႃးႁွတ်ႈထိုင်ၵႃႈတီႈႁိူၼ်းယဝ်ႉၼၼ်ႉၸိုင်၊ၵဝ်ပဝ်ႇပႅတ်ႈဢေႃႈ။ ပဵၼ်ၵွပ်ႈပိူဝ်ႈၸိူဝ်ႉၼင်ႇႁိုဝ်၊” ဝႃႈၼင်ႇၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ထၢမ်ဢေႃႈ။ “ပဵၼ်ၵွပ်ႈပိူဝ်ႈႁိူၼ်းၵဝ်လုလႅဝ်ယူႇလႄႈသူႁိပ်ႈၼႅတ်ႈၵႂႃႇၸူးတီႈႁိူၼ်းသူႁင်းၽႂ်ႁင်းမၼ်းၵူၺ်းၼၼ်ႉဢေႃႈ။-
ပိူဝ်ႈၼႆလႄႈၽႃႉၵၢင်ႁၢဝ်ဢမ်ႇပၼ်ၼမ်ႉပၼ်ၼၢႆး။ လိၼ်ၵေႃႈဢမ်ႇလႆႈပၼ်မၢၵ်ႇမၼ်းႁူင်းမၼ်းယဝ်ႉ။-
ၵဝ်သင်ႇလၢတ်ႈၽေးဢၼ်ႁႅင်ႈဢၼ်ႁွင်ၼၼ်ႉမႃးၵႃႈၼိူဝ်ၼႃႈလိၼ်၊ၵႃႈၼိူဝ်လွႆ၊ၵႃႈၼိူဝ်ၶဝ်ႈပိူၵ်ႇၶဝ်ႈသၢၼ်၊ၵႃႈၼိူဝ်ၼမ်ႉမၢၵ်ႇၸပိတ်ႉဢၼ်မႂ်ႇ၊ၵႃႈၼိူဝ်ၼမ်ႉမၼ်း၊ၵႃႈၼိူဝ်ၵႃႈဢၼ်ဢွၵ်ႇမႃးၵႃႈၼႂ်းလိၼ်၊ၵႃႈၼိူဝ်ၵူၼ်းသတ်ႉတဝႃႇ၊ၵႃႈၼိူဝ်တရိၵ်ႈသၢၼ်ႇ၊ၵႃႈၼိူဝ်ၵႃႈဢၼ်ဢဝ်မိုဝ်းသၢင်ႈႁဵတ်းၸိူဝ်းၼၼ်ႉယဝ်ႉယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ၸေႇရုပႃႉပေႇလႃႉ၊ လုၵ်ႈၸၢႆး သႃႇလထိဢေးလႃႉ၊ ဢိၵ်ႇတင်းၶုၼ်ယဵၸ်ႈပရေႃးႁဵၵ်ႈ ယေႃးသု၊ လုၵ်ႈၸၢႆး ယေႃးၸတၵ်ႉ၊ တင်းၶဝ်ၵႃႈဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉထွမ်ႇဢဝ်ဢမိင်ႉ ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်၊ဢိၵ်ႇတင်းၵႂၢမ်းပရေႃးၽႅတ်ႈ ႁၵ်ႉၵႄး၊ ဢၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်ပွႆႇၸႂ်ႉမႃးၼၼ်ႉလႄႈၵူၼ်းတင်းလၢႆဢွၼ်ၵၼ်ၵူဝ်ႁႄ ထႃႇဝရႃႉၽြႃး၊ ဢေႃႈ။-
မိူဝ်ႈၼၼ်ႉသၢၼ်ႇတမၢၼ်ႇ ထႃႇဝရႃႉၽြႃး၊ႁၵ်ႉၵႄး၊ မွၵ်ႇလၢတ်ႈၸွမ်းၵႃႈၼင်ႇဢၼ် ထႃႇဝရႃႉၽြႃး၊ သင်ႇလၢတ်ႈဝႆႉတီႈၵူၼ်းတင်းလၢႆၼၼ်ႉလႄႈဝႃႈ၊ ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵဝ်မီးယူႇလူၺ်ႈၵၼ်တင်းသူဢေႃႈ၊” ဝႃႈၼင်ႇၼႆဢေႃႈ။-
ထႃႇဝရႃႉၽြႃး၊ တိုၵ်းယူင်းၸႂ် ၸေႇရုပႃႉပေႇလႃႉ၊ ၶုၼ်ဢၼ်ဢုပ်ႉပိူင်ႇမိူင်း ယုတႃႉ၊ ဢၼ်ပဵၼ်လုၵ်ႈၸၢႆး သႃႇလထိဢေးလႃႉ၊ ဢိၵ်ႇတင်းၶုၼ်ယဵၸ်ႈပရေႃးႁဵၵ်ႈ ယေႃးသု၊ လုၵ်ႈၸၢႆး ယေႃးၸတၵ်ႉ၊ တင်းၶဝ်ၵႃႈဢၼ်ၵိုတ်းဢၼ်ၵျၢၼ်ႇၼၼ်ႉလႄႈၶဝ်ၼၼ်ႉဢွၼ်ၵၼ်မႃးသေယဝ်ႉ၊ႁဵတ်းၵျွင်းပိၵ်ႈမၢၼ်ႇ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၽြႃးပဵၼ်ၸဝ်ႈၶဝ်၊-
ၼႂ်းၶူပ်ႇပီဢၼ်ၶုၼ်လူင် တႃႇရိ၊ ၸၢမ်ႇႁၢင်ႈၸၢမ်ႇႁေႃလႆႈသွင်ပီ၊လိူၼ်တီႈႁူၵ်း၊ဝၼ်းတီႈသၢဝ်းသီႇၼၼ်ႉဢေႃႈ။
ၼႂ်းလိူၼ်တီႈၸဵတ်းဝၼ်းတီႈသၢဝ်းဢဵတ်းၼႂ်းပီလဵဝ်ၵၼ်ၼၼ်ႉ၊ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈပရေႃးၽႅတ်ႈ ႁၵ်ႉၵႄး၊ လႄႈဝႃႈၸမ်ႉ၊-
“မႂ်းလၢတ်ႈတီႈ ၸေႇရုပႃႉပေႇလႃႉ၊ လုၵ်ႈၸၢႆး သႃႇလထိဢေးလႃႉ၊ ၵေႃႉဢၼ်ဢုပ်ႉပိူင်ႇမိူင်း ယုတႃႉ၊ ဢိၵ်ႇတင်း ယေႃးသု၊ လုၵ်ႈၸၢႆး ယေႃးၸတၵ်ႉ၊ ဢၼ်ပဵၼ်ၶုၼ်ယဵၸ်ႈပရေႃးႁဵၵ်ႈ၊ဢိၵ်ႇတင်းၵူၼ်းမိူင်းတင်းလၢႆဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉလႄႈဝႃႈ၊-
‘ၵေႃႉဢၼ်ၵိုတ်းၵျၢၼ်ႇဝႆႉၵႃႈၼႂ်းသူလႄႈယၢမ်ႈႁၼ်ႁိူၼ်းၸဝ်ႈၼႆႉပျေႉၸုမ်ႇဝႆႉတင်းမုၼ်ၽုင်းမိူဝ်ႈဢွၼ်တၢင်းၼႆႉၸမ်ႉ၊ပဵၼ်ၽူႈလႂ်။ မိူဝ်ႈလဵဝ်ၼႆႉႁၼ်ပဵၼ်ၸိူဝ်ႉၼင်ႇႁိုဝ်ဝႆႉ။ ပဵၼ်ၸိူဝ်ႉၼင်ႇဢၼ်ဢမ်ႇၸႂ်ႈၵႃႈသင်လႃးလႃးၼၼ်ႉသိုဝ်ႈၼႃႈတႂ်ႈတႃသူဢမ်ႇၸႂ်ႈႁိုဝ်း။-
ၼႂ်းဝႃႈၼၼ်သေၵေႃႈ၊ ၸေႇရုပႃႉပေႇလႃႉ၊ ႟။ မီးၸႂ်ႁတ်းႁၢၼ်တႃႉ၊ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။ ယေႃးသု၊ လုၵ်ႈၸၢႆး ယေႃးၸတႅၵ်ႉ၊ ၶုၼ်ယဵၸ်ႈပရေႃးႁဵၵ်ႈ႟။ မီးၸႂ်ႁတ်းႁၢၼ်တႃႉ။ ၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင်ၶဝ်႟။ မီးၸႂ်ႁတ်းႁၢၼ်လႄႈႁဵတ်းတႃႉ၊ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။-
ၵဝ်မီးယူႇလူၺ်ႈၵၼ်တင်းသူမႅၼ်ႈၸွမ်းၼင်ႇၵႂၢမ်းပတိၺိၺ်ႇၵတိဢၼ်ၵဝ်ဝႆႉလူၺ်ႈၵၼ်တင်းသူ ၼႂ်းမိူဝ်ႈဢၼ်သူဢွၵ်ႇသေၵႃႈၼႂ်းမိူင်း ဢေးၵျိပ်ႉ၊ မႃးလႄႈဝိၺိၺ်ႇၵဝ်မီးယူႇၵႃႈၼႂ်းဝူင်ႈၵၢင်သူၼၼ်ႉဢေႃႈ။ ယႃႇပေမႆႈၸႂ်ၶီၸႂ်၊’ ” ဝႃႈၼင်ႇၼႆလႄႈ၊-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ “ထႅင်ႈၵမ်းဢွၼ်ႇၼိုင်ႈ၊ၸူဝ်ႈဢၼ်ဢမ်ႇႁိုင်ပႆႇၼၢၼ်းၼၼ်ႉ၊ၵဝ်တၵ်းသၼ်ႇၶွၼ်းၽႃႉၵၢင်ႁၢဝ်၊လိၼ်မိူင်း၊ပၢင်ႇလၢႆႇ၊ဢိၵ်ႇတင်းၵုင်းတင်းလၢႆဢေႃႈ။-
ၵဝ်တၵ်းသၼ်ႇၶွၼ်းၵူၼ်းၵူႈၸိူဝ်ႉၵူႈမဵဝ်းလႄႈဢုၵ်ႉၸႃႇငိုၼ်းၶမ်းၵူၼ်းၵူႈၸိူဝ်ႉၵူႈမဵဝ်းၼၼ်ႉ၊တၵ်းႁွတ်ႈမႃးသေယဝ်ႉ၊ၵဝ်တၵ်းႁႂ်ႈၵျွင်းပိၵ်ႈမၢၼ်ႇၼႆႉပျေႉၸုမ်ႇဝႆႉတင်းမုၼ်ၽုင်းဢေႃႈ။-
ငိုၼ်းၵႃႈမီးပဵၼ်ၶွင်ၵဝ်ဢေႃႈ၊ၶမ်းၵႃႈမီးပဵၼ်ၶွင်ၵဝ်ဢေႃႈ။-
မုၼ်ၽုင်းၵျွင်းပိၵ်ႈမၢၼ်ႇၸဝ်ႈဢၼ်တႄႇႁဵတ်းၵမ်းလိုၼ်းၼႆႉတၵ်းယဵင်ႈၶႅၼ်းယႂ်ႇၼႃႇသေၵျွင်းပိၵ်ႈမၢၼ်ႇၸဝ်ႈၵမ်းဢွၼ်တၢင်းၼၼ်ႉဢေႃႈ။ ၵႃႈၼႂ်းတီႈၼႆႈၵေႃႈၵဝ်တၵ်းပၼ်တၢင်းဢၼ်မၢၵ်ႈမီးလီပဵၼ်ဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ။
ၼႂ်းၶူပ်ႇပီဢၼ်ၶုၼ်လူင် တႃႇရိ၊ ၸၢမ်ႇႁၢင်ႈၸၢမ်ႇႁေႃလႆႈသွင်ပီ၊လိူၼ်တီႈၵဝ်ႈ၊ဝၼ်းတီႈသၢဝ်းသီႇၼၼ်ႉ၊ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈပရေႃးၽႅတ်ႈ ႁၵ်ႉၵႄး၊ လႄႈဝႃႈ၊-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ “တွင်ႈထၢမ်လွင်ႈတြႃးတီႈယဵၸ်ႈပရေႃးႁဵၵ်ႈတင်းလၢႆလႄႈဝႃႈ၊-
‘ပေႃးသေၵေႃႉသေၵူၼ်းဢဝ်ၼိူဝ်ႉတူဝ်သတ်းဢၼ်မူတ်းၸၢင်ႇၼၼ်ႉပူၵ်ႉႁေႃႇၵႃႈတီႈၶူဝ်းၼုင်ႈမၼ်းသေလႄႈဢဝ်ၶူဝ်းၼုင်ႈၼၼ်ႉတိူဝ်ႉထုၵ်ႇသႂ်ႇၶဝ်ႈမုၼ်း၊ၽၵ်း၊ၼမ်ႉမၢၵ်ႇၸပိတ်ႉ၊ၼမ်ႉမၼ်း၊တၢင်းၵိၼ်တၢင်းၶူပ်းသေၸိူဝ်ႉသေပိူင်ၸိုင်၊တၢင်းၵိၼ်တၢင်းၶူပ်းၼၼ်ႉတၵ်းမူတ်းၸၢင်ႇႁိုဝ်း၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။ မိူဝ်ႈၼၼ်ႉယဵၸ်ႈပရေႃးႁဵၵ်ႈတင်းလၢႆၶိုၼ်းလၢတ်ႈလႄႈဝႃႈ၊ “ဢမ်ႇမူတ်းၸၢင်ႇၵူၺ်း၊” ဝႃႈၼင်ႇၼႆဢေႃႈ။
ႁၵ်ႉၵႄး၊ ၵေႃႈၶိုၼ်းတွင်ႈထၢမ်လႄႈဝႃႈ၊ “ပေႃးၵေႃႉဢၼ်ဢမ်ႇမူတ်းၸၢင်ႇၵွပ်ႈပိူဝ်ႈတူဝ်တၢႆၼၼ်ႉတိူဝ်ႉထုၵ်ႇတၢင်းၵိၼ်ၸိူဝ်းၼၼ်ႉသေၸိူဝ်ႉသေပိူင်ၸိုင်၊တၵ်းမီးတၢင်းဢၼ်ၵူဝ်ႈၵိူၵ်ႇႁိုဝ်း၊” ဝႃႈၼင်ႇၼႆသေယဝ်ႉ။ ယဵၸ်ႈပရေႃးႁဵၵ်ႈၸိူဝ်းၼၼ်ႉၶိုၼ်းလၢတ်ႈလႄႈဝႃႈ၊ “ပဵၼ်ဢၼ်ၵူဝ်ႈဢၼ်ၵိူၵ်ႇဢေႃႈ၊” ဝႃႈၼင်ႇၼႆဢေႃႈ။
ႁၵ်ႉၵႄး၊ ၵေႃႈသမ်ႉၶိုၼ်းလၢတ်ႈထႅင်ႈလႄႈဝႃႈ၊ “မဵဝ်းၵူၼ်းၼႆႉ၊ပဵၼ်ၸိူဝ်ႉၼင်ႇၼၼ်ၵႃႈတီႈၽၢႆႇၼႃႈၵဝ်ဢေႃႈ။ ၵူၼ်းမိူင်းၸိူဝ်းၼႆႉၵေႃႈ၊ပဵၼ်မိူၼ်ၸိူဝ်ႉၼင်ႇၼၼ်ဢေႃႈ။ ၵႃႈဢၼ်ၶဝ်ဢဝ်မိုဝ်းၶဝ်သၢင်ႈႁဵတ်းၼၼ်ႉၵေႃႈပဵၼ်မိူၼ်ၸိူဝ်ႉၼင်ႇၼၼ်ဢေႃႈ။ ၶိူင်ႈပိူင်ဢၼ်ၶဝ်သၢၵ်ႈလူႇတီႈၵဝ်ၵေႃႈ ပဵၼ်ဢၼ်ၵူဝ်ႈၵိူၵ်ႇဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
“မိူဝ်ႈလဵဝ်ၼႆႉသူဢွၼ်ၵၼ်ၶႆႈၸႂ်ဝူၼ်ႉၸႂ်လွင်ႈတၢင်းၸႃႉဢၼ်ပဵၼ်ပူၼ်ႉမႃးတင်းလင်ၸူဝ်ႈဢၼ်ဢမ်ႇပႆႇဢဝ်မၢၵ်ႇႁိၼ်လုၵ်ႈၼိုင်ႈတၢင်ႇသႂ်ႇၵႃႈၼိူဝ်မၢၵ်ႇႁိၼ်လုၵ်ႈၼိုင်ႈတီႈၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ၼၼ်ႉသေၵမ်း။-
ၶိင်ႇမိုဝ်ႉဝၼ်းၼၼ်ႉယၢမ်းမိူဝ်ႈဢၼ်ၵူၼ်းမႃးၸူးၵႃႈတီႈၵွင်ၶဝ်ႈပိူၵ်ႇၼၼ်ႉထၢင်ႇဝႃႈ၊တေလႆႈသၢဝ်းတၢင်၊သမ်ႉလႆႈသိပ်းတၢင်ၵူၺ်းဢေႃႈ။ ယၢမ်းမိူဝ်ႈဢၼ်မႃးၸူးၵႃႈတီႈႁၢင်းၼူတ်ႈမၢၵ်ႇၸပိတ်ႉႁႂ်ႈတဵမ်မေႃႈၼမ်ႉမၢၵ်ႇၸပိတ်ႉႁႃႈသိပ်းလုၵ်ႈၼၼ်ႉၸိုင်၊လႆႈသၢဝ်းလုၵ်ႈၵူၺ်းဢေႃႈ။-
ၵဝ်ဢဝ်ၽေးတၢင်းဢၼ်လူမ်းလူင်ထူဝ်းပတ်ႉ၊ၽေးတၢင်းဢၼ်သႃးမွင်၊ၽေးမၢၵ်ႇႁဵပ်းပၼ်တၢမ်ႇတီႈၵႃႈဢၼ်သူဢဝ်မိုဝ်းသူသၢင်ႈႁဵတ်းၽုၵ်ႇသွမ်ႈၼၼ်ႉမႃးယဝ်ႉ၊ၵူၺ်းၵႃႈ၊သူဢမ်ႇဢွၼ်ၵၼ်ၶိုၼ်းမႃးၸူးၵႃႈတီႈၵဝ်၊ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။-
သူဢွၼ်ၵၼ်ၶႆႈၸႂ်ဝူၼ်ႉၸႂ်လွင်ႈတၢင်းၸႃႉၸဵမ်ဝၼ်းမိူဝ်ႈၼႆႉၵႂႃႇဢၼ်ပဵၼ်လိူၼ်တီႈၵဝ်ႈ၊ဝၼ်းတီႈသၢဝ်းသီႇ၊ဝၼ်းဢၼ်ၶျႃးငဝ်ႈႁၢၵ်ႈတိူၵ်ႈၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ၼၼ်ႉသေၵမ်း။ လွင်ႈတၢင်းဢၼ်တၵ်းလႆႈၶႆႈၸႂ်ဝူၼ်ႉၸႂ်ၸမ်ႉ၊-
ၵႃႈၼႂ်းယွင်ၶဝ်ႈယေးၶဝ်ႈယင်းမီးၶဝ်ႈပိူၵ်ႇယူႇႁိုဝ်း။ ၶိူဝ်းတူၼ်ႈမၢၵ်ႇၸပိတ်ႉ၊တူၼ်ႈမၢၵ်ႇလိူဝ်ႇ၊တူၼ်ႈမၢၵ်ႇၸင်ႈ၊တူၼ်ႈသၢၼ်ႇလုၼ်ႇၸိူဝ်းၼၼ်ႉယင်းဢမ်ႇပႆႇမွၵ်ႇပႆႇမၢၵ်ႇႁိုဝ်း။ ဢဝ်ၸႃႉၸဵမ်မိူဝ်ႈဝၼ်းၼႆႉၵႂႃႇလႄႈၵဝ်တၵ်းပၼ်တၢင်းလီတီႈသူဢေႃႈ၊” ဝႃႈၼင်ႇၼႆဢေႃႈ။
ၼႂ်းလိူၼ်ၼၼ်ႉဝၼ်းတီႈသၢဝ်းသီႇၼၼ်ႉၸိုင်၊ၼုၵ်ႈၵပၢတ်ႈ ထႃႇဝရႃႉၽြႃး၊ သမ်ႉႁွတ်ႈမႃးတီႈ ႁၵ်ႉၵႄး၊ လႄႈဝႃႈၸမ်ႉ၊-
မႂ်းလၢတ်ႈတီႈ ၸေႇရုပႃႉပေႇလႃႉ၊ ၶုၼ်ဢၼ်ဢုပ်ႉပိူင်ႇမိူင်း ယုတႃႉ၊ ၼၼ်ႉလႄႈဝႃႈ၊ “ၵဝ်တၵ်းသၼ်ႇၶွၼ်းၽႃႉၵၢင်ႁၢဝ်၊ဢိၵ်ႇတင်းလိၼ်မိူင်းဢေႃႈ။-
ၵဝ်တၵ်းၶွမ်ႈပိၼ်ႈရႃႇၸႃႉပလၢင်ႇသိုင်ႇၸိုင်ႈဝၢၼ်ႈမိူင်းတင်းလၢႆပႅတ်ႈလႄႈယႃႉၽဵဝ်ႈတၼ်းၶူဝ်းသိုင်ႇၸိုင်ႈဝၢၼ်ႈမိူင်းၵူၼ်းၵူႈၸိူဝ်ႉၵူႈမဵဝ်းပႅတ်ႈဢေႃႈ။ လေႃႉမႃႉသိုၵ်းတင်းလၢႆ၊ဢိၵ်ႇတင်းၶဝ်ၸိူဝ်းဢၼ်ၶီႇလေႃႉမႃႉသိုၵ်းၸိူဝ်းၼၼ်ႉၵေႃႈတၵ်းလႆႈၶၢမ်ႇတၢင်းဢၼ်ၶွမ်ႈပိၼ်ႈပႅတ်ႈလႄႈမႃႉတင်းၵူၼ်းသိုၵ်းၶီႇမႃႉၸိူဝ်းၼၼ်ႉၼင်ႇၵၼ်ၵၼ်ၵေႃႉၼိုင်ႈလႄႈၵေႃႉၼိုင်ႈတၵ်းဢဝ်လၢပ်ႇၶႃႈၵၼ်ၽၼ်းၵၼ်လႄႈလူမ်ႉတၢႆဢေႃႈ။-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ၶႃႈၵဝ် ၸေႇရုပႃႉပေႇလႃႉ၊ လုၵ်ႈၸၢႆး သႃႇလထိဢေးလႃႉ၊ ႟။ ၼႂ်းမိူဝ်ႈဝၼ်းၼၼ်ႉၵဝ်တၵ်းဢဝ်မႂ်းၶၢၼ်းဝႆႉမိူၼ်ၸိူဝ်ႉၼင်ႇမွင်းၵူၺ်းတၼ်းသိၵ်ႈၼၼ်ႉၵွပ်ႈပိူဝ်ႈၵဝ်လႆႈလိူၵ်ႈဢဝ်မႂ်းဝႆႉယဝ်ႉဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။ ၵျၢမ်းပရေႃးၽႅတ်ႈႁၵ်ႉၵႄးယဝ်ႉယဝ်ႉဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈပရေႃးၽႅတ်ႈ ၸႃႇၶရိ၊ လုၵ်ႈၸၢႆး ပေႇရၶိ၊ ၵေႃႉပဵၼ်လုၵ်ႈၸၢႆး ဢိတ်ႉတေႃႇ၊ ၼႂ်းၶူပ်ႇပီဢၼ်ၶုၼ်လူင် တႃႇရိ၊ ၸၢမ်ႇႁၢင်ႈၸၢမ်ႇႁေႃလႆႈသွင်ပီ၊ၼႂ်းလိူၼ်တီႈပႅတ်ႇၼၼ်ႉလႄႈဝႃႈၸမ်ႉ၊-
ထႃႇဝရႃႉၽြႃး၊ ၸႂ်မႆႈၶႂ်ႈၸႃႉတေႃႇပူႇမႂ်းမွၼ်ႇမႂ်းၼႃႇလူင်လၢင်ယဝ်ႉ။-
ၼႂ်းဝႃႈၼၼ်သေၵေႃႈမႂ်းလၢတ်ႈတီႈၶဝ်လႄႈဝႃႈ၊ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ဢွၼ်ၵၼ်ၶိုၼ်းမႃးၸူးၵႃႈတီႈၵဝ်တႃႉ၊ၵဝ်ၵေႃႈတၵ်းၶိုၼ်းမႃးၸူးၵႃႈတီႈသူဢေႃႈ၊ဝႃႈၼင်ႇၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ။-
ယႃႇပေဢွၼ်ၵၼ်ႁဵတ်းၸိူဝ်ႉၼင်ႇပူႇသူမွၼ်ႇသူ၊ဢၼ်ပရေႃးၽႅတ်ႈမိူဝ်ႈၵွၼ်ႇဢွၼ်ၼႆႉၸိူဝ်းၼၼ်ႉဢွၼ်ၵၼ်ႁွင်ႉမွၵ်ႇႁွင်ႉလၢတ်ႈတီႈၶဝ်လႄႈဝႃႈ၊ “ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊မိူဝ်ႈလဵဝ်ၼႆႉဢွၼ်ၵၼ်ပႄႇပႅတ်ႈသဵၼ်ႈတၢင်းဢၼ်ဢမ်ႇလီ၊ဢိၵ်ႇတင်းတၢင်းၵမ်တၢင်းၵျၢင်ႉဢၼ်ဢမ်ႇလီသူၸိူဝ်းၼၼ်ႉတႃႉ၊” ဝႃႈၼင်ႇၼႆသေၵေႃႈၶဝ်ဢမ်ႇငိၼ်း၊ၶဝ်ဢမ်ႇထွမ်ႇဢဝ်ၵႂၢမ်းၵဝ်ၸိူဝ်းၼၼ်ႉ၊ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။-
ပူႇသူမွၼ်ႇသူၼၼ်ႉမီးၵႃႈလႂ်၊ပရေႃးၽႅတ်ႈၸိူဝ်းၼၼ်ႉၸၢင်ႈဢသၢၵ်ႈလိပ်းယူႇတႃႇသေႇႁိုဝ်း။-
ၵႂၢမ်းၵဝ်တင်းလၢႆ ဢိၵ်ႇတင်းပိင်းၺၢပ်ႈၵဝ်ဢၼ်ၵဝ်သင်ႇလၢတ်ႈဝႆႉတီႈၶႃႈၵဝ်၊ပရေႃးၽႅတ်ႈၸိူဝ်းၼၼ်ႉ၊ၶိုတ်းထိုင်ပူႇသူမွၼ်ႇသူၸိူဝ်းၼၼ်ႉယဝ်ႉဢမ်ႇၸႂ်ႈႁိုဝ်း။ ၶဝ်ၼၼ်ႉၶုၵ်းၸႂ်လႆႈၶႆႈၸႂ်ထူပ်းလႄႈလၢတ်ႈဝႃႈ၊ “မိူၼ်ၸိူဝ်ႉၼင်ႇဢၼ် ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးတၢင်းၵျၢမ်ႇတၢင်းပွင်တၵ်းႁဵတ်းတီႈႁဝ်းၸွမ်းၵႃႈၼင်ႇသဵၼ်ႈတၢင်းဢၼ်ႁဝ်းၵႂႃႇ၊ဢိၵ်ႇတင်းတၢင်းၵမ်တၢင်းၵျၢင်ႉႁဝ်းၸိူဝ်းၼၼ်ႉၼၼ်ႉမၼ်းၸဝ်ႈႁဵတ်းတီႈႁဝ်းယဝ်ႉ၊” ဝႃႈၼႆ၊မၼ်းၸဝ်ႈလၢတ်ႈဝႃႈၸိူဝ်ႉၼင်ႇၼႆဢေႃႈ။
ၼႂ်းၶူပ်ႇပီဢၼ်ၶုၼ်လူင် တႃႇရိ၊ ၸၢမ်ႇႁၢင်ႈၸၢမ်ႇႁေႃလႆႈသွင်ပီ၊လိူၼ်တီႈသိပ်းဢဵတ်းဢၼ်ဝႃႈ၊လိူၼ် သေးပတ်ႉ၊ ဝၼ်းတီႈသၢဝ်းသီႇၼၼ်ႉ၊ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈပရေႃးၽႅတ်ႈ ၸႃႇၶရိ၊ လုၵ်ႈၸၢႆး ပႃႇရၶိ၊ ဢၼ်ပဵၼ်လုၵ်ႈၸၢႆး ဢိတ်ႉတေႃႇ၊ ၼၼ်ႉ၊ ၸႃႇၶရိ၊ လၢတ်ႈလႄႈဝႃႈ၊-
ရူႇပႃႇရူင်ႇဢၼ်ၵဝ်လႆႈႁၼ်ၶိင်ႇၵၢင်ၶိုၼ်းၼၼ်ႉၸမ်ႉ၊ၵူၼ်းၵေႃႉၼိုင်ႈဢၼ်ၶီႇမႃႉလႅင်ၼၼ်ႉပေႃႇမႃးလႄႈၸုၵ်းယူႇၵႃႈၼႂ်းၵၢင်တူၼ်ႈမုရတုဢၼ်မီးၵႃႈၼႂ်းၶူင်ႈႁူၺ်ႈၼၼ်ႉၸိူဝ်းၼၼ်ႉဢေႃႈ။ ၵႃႈတီႈၽၢႆႇလင်မၼ်းၼၼ်ႉမီးမႃႉလႅင်၊မႃႉၵမ်ႇ၊မႃႉၽိူၵ်ႇဢေႃႈ။-
မိူဝ်ႈၼၼ်ႉၵဝ်ထၢမ်လႄႈဝႃႈ၊ “ၸဝ်ႈၵဝ်ၶႃႈ႟။ လွင်ႈၸိူဝ်းၼႆႉပဵၼ်လွင်ႈဢီႈသင်။” မိူဝ်ႈဢၼ်ဝႃႈၼင်ႇၼႆၸိုင်။ တမၢၼ်ႇၵၢင်ႁၢဝ်ဢၼ်လၢတ်ႈၵႂၢမ်းတေႃႇၵၼ်တင်းၵဝ်ၼၼ်ႉၶိုၼ်းလၢတ်ႈလႄႈဝႃႈ၊ “ၵဝ်တၵ်းၼႄပျႃးလွင်ႈဢၼ်တူဝ်ၸိူဝ်းၼၼ်ႉၶႂ်ႈဝႃႈလွင်ႈဢီႈသင်ၼၼ်ႉဢေႃႈ၊” ဝႃႈၼင်ႇၼႆသေယဝ်ႉ၊-
ၵေႃႉဢၼ်ၸုၵ်းယူႇၵႃႈၼႂ်းၵၢင်တူၼ်ႈမုရတုၸိူဝ်းၼၼ်ႉၶိုၼ်းလၢတ်ႈလႄႈဝႃႈ၊ “ၶဝ်ၼႆႉပဵၼ်ၵေႃႉဢၼ် ထႃႇဝရႃႉၽြႃး၊ ပွႆႇၸႂ်ႉႁႂ်ႈလႆႈလႄႇၵႂႃႇၸႅတ်ႈတူၺ်းၵႃႈၼိူဝ်လိၼ်မိူင်းၵူႈတီႈၵူႈလႅၼ်ဢေႃႈ၊” ဝႃႈၼင်ႇၼႆဢေႃႈ။
ၶဝ်ၼၼ်ႉၵေႃႈ ၶိုၼ်းလဝ်ႈလၢတ်ႈတီႈတမၢၼ်ႇၵၢင်ႁၢဝ် ထႃႇဝရႃႉၽြႃး၊ ဢၼ်ၸုၵ်းယူႇၵႃႈၼႂ်းၵၢင်တူၼ်ႈမုရတုၸိူဝ်းၼၼ်ႉလႄႈဝႃႈ၊ “ႁဝ်းၶႃႈလႄႇၵႂႃႇၵႃႈၼိူဝ်လိၼ်မိူင်းၵူႈတီႈၵူႈလႅၼ်ယဝ်ႉၶႃႈယဝ်ႉ။ တူၺ်းၶႃႈလူး။ လိၼ်မိူင်းတင်းသဵင်ႈတင်းမူတ်းတႄႇၼိမ်ယူႇ၊မီးတၢင်းဢၼ်တဵတ်ႇလီၼိမ်လီယူႇၶႃႈဢေႃႈ၊” ဝႃႈၼင်ႇၼႆဢေႃႈ။
ၵမ်းၼၼ်ႉ တမၢၼ်ႇၵၢင်ႁၢဝ် ထႃႇဝရႃႉၽြႃး၊ လဝ်ႈထၢမ်လႄႈဝႃႈ၊ “ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ တီႈၶႃႈ။ ၸဝ်ႈႁဝ်းယင်းဢမ်ႇဢဵတ်းလူဝဵင်း ယေႇရုသလႅမ်ႇ၊ ဢိၵ်ႇတင်းဢမ်ႇဢဵတ်းလူဝဵင်း ယုတႃႉ၊ တင်းလၢႆဢၼ်ၸဝ်ႈႁဝ်းၸႂ်မႆႈၶႂ်ႈၸႃႉတီႈၶဝ်ၸဵတ်းသိပ်းပီတဵမ်တဵမ်ၼၼ်ႉလႄႈတၵ်းယူႇၶိင်ႇၵႃႇလႃႉႁိုင်ၵႃႈႁိုဝ်တီႈၶႃႈ၊” မိူဝ်ႈဢၼ်ဝႃႈၼင်ႇၼႆၸိုင်။
ထႃႇဝရႃႉၽြႃး၊ ဢဝ်တင်းၵႂၢမ်းဢၼ်လီ၊ၵႂၢမ်းဢၼ်ႁႂ်ႈထုၵ်ႇၸႂ်ၵျိူၵ်ႈၸႂ်ၼၼ်ႉၶိုၼ်းလၢတ်ႈတီႈတမၢၼ်ႇၵၢင်ႁၢဝ်ဢၼ်လၢတ်ႈတေႃႇၵၼ်တင်းၵဝ်ၼၼ်ႉဢေႃႈ။-
တမၢၼ်ႇၵၢင်ႁၢဝ်ဢၼ်လၢတ်ႈတေႃႇၵၼ်တင်းၵဝ်ၼၼ်ႉၵေႃႈလၢတ်ႈတီႈၵဝ်လႄႈဝႃႈ၊မႂ်းႁွင်ႉမွၵ်ႇႁွင်ႉလၢတ်ႈလႄႈဝႃႈ၊ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ “ၵဝ်မီးၸႂ်ဢၼ်ႁၵ်ႉပႅင်းလႄႈၶႅၼ်ဝႆႉႁႅင်းယႂ်ႇၼႃႇလူင်လၢင်ပုၼ်ႈဝဵင်း ယေႇရုသလႅမ်ႇ၊ ဢိၵ်ႇတင်းလွႆ ၸိဢုၼ်ႇ၊ ဢေႃႈ။-
ၵဝ်ၸႂ်မႆႈၶႂ်ႈၸႃႉတေႃႇၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ယူႇၼိမ်ၼိမ်လီလီၸိူဝ်းၼၼ်ႉၼႃႇလူင်လၢင်ဢေႃႈ။ လွင်ႈမၼ်းၸမ်ႉ၊မိူဝ်ႈဢၼ်ၵဝ်ၸႂ်မႆႈၶႂ်ႈၸႃႉတေႃႇၵူၼ်းၵဝ်တင်းလၢႆဢိတ်းၼိုင်ႈၼၼ်ႉၸိုင်၊ၶဝ်ၽွမ်ႉၵၼ်ႁဵတ်းႁႂ်ႈတၢင်းတုၵ်ႉၶႃႉၵူၼ်းၵဝ်ယဵင်ႈၶႅၼ်းႁႅင်းယႂ်ႇယဝ်ႉ။-
ပိူဝ်ႈၼႆလႄႈ ထႃႇဝရႃႉၽြႃး၊ မီးဢမိင်ႉၸမ်ႉ၊ၵဝ်မီးတင်းၸႂ်ဢၼ်ၶႂ်ႈႁဵတ်းၵျေးၸူးသေလႄႈၶိုၼ်းမႃးၸူးၵႃႈတီႈဝဵင်း ယေႇရုသလႅမ်ႇ၊ ယဝ်ႉ။ တၵ်းလႆႈတႄႇႁဵတ်းႁိူၼ်းၵဝ်ၵႃႈၼႂ်းဝဵင်းၼႆႉလႄႈတၵ်းလႆႈဢဝ်ၸိူၵ်ႈတႅၵ်ႈၶိုပ်ႈၵႃႈၼိူဝ်ဝဵင်း ယေႇရုသလႅမ်ႇ၊ ဢေႃႈ၊ဝႃႈၼင်ႇၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ၊” ဝႃႈၼင်ႇၼႆတႃႉ။
ၵွပ်ႈၼႆလႄႈမႂ်းႁွင်ႉမွၵ်ႇႁွင်ႉလၢတ်ႈလႄႈဝႃႈ၊ “ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ဝၢၼ်ႈဝဵင်းၵဝ်ၸိူဝ်းၼၼ်ႉတၵ်းသတ်ႉတၵ်းတဵမ်ဝႆႉတင်းတၢင်းဢၼ်လႆႈလီလႆႈပဵၼ်ဢေႃႈ။ ထႃႇဝရႃႉၽြႃး၊ တၵ်းႁႂ်ႈလွႆ ၸိဢုၼ်ႇ၊ ၼၼ်ႉမီးတၢင်းဢၼ်ပျေႇၸႂ်ၼိမ်ၸႂ်လႄႈမၼ်းၸဝ်ႈတၵ်းလိူၵ်ႈၵဵပ်းဢဝ်လႄႈလုမ်းလႃးဝဵင်း ယေႇရုသလႅမ်ႇ၊ ထႅင်ႈလူးၵွၼ်ႇဢေႃႈ၊ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ၵဝ်ႁႅၼ်တူၺ်းလႄႈႁၼ်ၶဝ်လႅမ်သီႇလႅမ်ႈဢေႃႈ။-
ၵဝ်တွင်ႈထၢမ်တီႈတမၢၼ်ႇၵၢင်ႁၢဝ်ဢၼ်လၢတ်ႈတေႃႇၵၼ်တင်းၵဝ်ၼၼ်ႉလႄႈဝႃႈ၊ “ဢၼ်ၸိူဝ်းၼႆႉၸမ်ႉ၊ပဵၼ်ၵႃႈသင်၊” မိူဝ်ႈဢၼ်ဝႃႈၼင်ႇၼႆၸိုင်။ မၼ်းၶိုၼ်းလၢတ်ႈလႄႈဝႃႈ၊ “ဢၼ်ၸိူဝ်းၼႆႉပဵၼ်ၶဝ်လႅမ်ဢၼ်ႁႂ်ႈၵူၼ်းမိူင်း ယုတႃႉ၊ မိူင်း ဢိသရေး၊ ဝဵင်း ယေႇရုသလႅမ်ႇ၊ ၸိူဝ်းၼၼ်ႉၽၢတ်ႇၽႄၵၼ်ၵႂႃႇၵူႈတီႈၵူႈလႅၼ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ ၵေႃႈၼႄပျႃးၸၢင်ႈလဵၵ်းတီႈၵဝ်သီႇၵေႃႉဢေႃႈ။-
ၵဝ်ၵေႃႈလဝ်ႈထၢမ်လႄႈဝႃႈ၊ “ၶဝ်ၼႆႉမႃးႁႂ်ႈလႆႈႁဵတ်းၵႃႈသင်ၶႃႈ၊” မိူဝ်ႈဢၼ်ဝႃႈၼင်ႇၼႆၸိုင်၊မၼ်းၸဝ်ႈလၢတ်ႈလႄႈဝႃႈ၊ “ၶဝ်လႅမ်ၸိူဝ်းၼၼ်ႉပဵၼ်ၶဝ်လႅမ်ဢၼ်ႁႂ်ႈၵူၼ်းမိူင်း ယုတႃႉ၊ တင်းလၢႆၽၢတ်ႇၽႄၵၼ်ၵႂႃႇထၢၼ်ႈပေႃးၽူႈလႂ်ဢမ်ႇႁတ်းငွၵ်ႈႁူဝ်ႁႅၼ်ႁူဝ်တူၺ်းဢေႃႈ။ “ၵူၼ်းၸိူဝ်းၼႆႉၸမ်ႉ၊ပဵၼ်ၵေႃႉဢၼ်မႃးႁႂ်ႈလႆႈလွၵ်ႇငိုတ်ႈၶဝ်ၼၼ်ႉလႄႈၶျႃးၶဝ်လႅမ်ၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်တိုၵ်းတေႃးမိူင်း ယုတႃႉ၊ ႁႂ်ႈၽၢတ်ႇၽႄၵၼ်ၵႂႃႇၸိူဝ်းၼၼ်ႉတူၵ်းတီႈတႅမ်ႇပႅတ်ႈဢေႃႈ၊” ဝႃႈၼင်ႇၼႆဢေႃႈ။
ၵဝ်ႁႅၼ်တူၺ်းလႄႈႁၼ်ၵူၼ်းၵေႃႉၼိုင်ႈဢၼ်ယိပ်းၵမ်ၸိူၵ်ႈဝႆႉပုၼ်ႈဢၼ်တၵ်းတႅၵ်ႈတၵ်းၶိုပ်ႈၼၼ်ႉလႄႈ၊-
ၵဝ်တွင်ႈထၢမ်တီႈၵေႃႉၼၼ်ႉလႄႈဝႃႈ၊ “တၵ်းၵႂႃႇၵႃႈတီႈလႂ်၊” ဝႃႈၼင်ႇၼႆသေယဝ်ႉ၊မၼ်းလၢတ်ႈတီႈၵဝ်လႄႈဝႃႈ၊ “တၵ်းၵႂႃႇႁႂ်ႈလႆႈတႅၵ်ႈတူၺ်းၶိုပ်ႈတူၺ်းဝဵင်း ယေႇရုသလႅမ်ႇ၊ ႁႂ်ႈလႆႈႁုၼႃႈယၢဝ်းၼႃႈပွတ်းမၼ်းဢေႃႈ၊” ဝႃႈၼင်ႇၼႆဢေႃႈ။
တမၢၼ်ႇၵၢင်ႁၢဝ်ဢၼ်လၢတ်ႈတေႃႇၵၼ်တင်းၵဝ်ၼၼ်ႉယၢင်ႈဢွၵ်ႇၵႂႃႇလႄႈတမၢၼ်ႇၵၢင်ႁၢဝ်တၢင်ႇပႃးႁႄႉႁပ်ႉႁူဝ်တၢင်းမၼ်းသေယဝ်ႉ၊လၢတ်ႈလႄႈဝႃႈ၊-
“ၶုၼ်ႇလႅၼ်ႈၵႂႃႇသေလႄႈလၢတ်ႈတီႈၵူၼ်းဢွၼ်ႇၼၼ်ႉလႄႈဝႃႈ၊ဝဵင်း ယေႇရုသလႅမ်ႇ၊ တၵ်းမီးၽူႈမီးၵူၼ်းမိူၼ်ၸိူဝ်ႉၼင်ႇဝၢၼ်ႈဢၼ်ဢမ်ႇမီးလမ်းတပ်ႉလမ်းႁူဝ်ႉၸိူဝ်းၼၼ်ႉၵွပ်ႈပိူဝ်ႈဢၼ်ၵူၼ်းသတ်ႉတဝႃႇ၊ဢိၵ်ႇတင်းတရိၵ်ႈသၢၼ်ႇပဵၼ်ဢၼ်ၼမ်ၼႃႇလူင်လၢင်ၵႃႈၼႂ်းမၼ်းၼၼ်ႉဢေႃႈ။-
ထႃႇဝရႃႉၽြႃး၊ လၢတ်ႈဝႃႈၸမ်ႉ၊ၵဝ်တၵ်းပဵၼ်လမ်းဝဵင်းၽႆးလွမ်ႉလဵပ်ႈႁွပ်ႈမၼ်းယူႇလႄႈပဵၼ်မုၼ်သရေႇယူႇၵႃႈၼႂ်းၶိူင်ႈၵၢင်မၼ်းဢေႃႈ၊” ဝႃႈၼင်ႇၼႆဢေႃႈ။
႟။ ႟။ ဢွၼ်ၵၼ်ဢွၵ်ႇပၢႆႈသေၵႃႈတီႈမိူင်းၼႃႈၽၢႆႇတၢင်းႁွင်ႇမႃးတႃႉ၊ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။ ၵဝ်ႁႂ်ႈသူၽၢတ်ႇၽႄၵၼ်ၵႂႃႇမိူၼ်ၸိူဝ်ႉၼင်ႇလူမ်းဢၼ်မီးၵႃႈတီႈသီႇၼႃႈတႂ်ႈၽႃႉၵၢင်ႁၢဝ်ၼၼ်ႉယဝ်ႉ၊ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။-
သူၸိူဝ်းဢၼ်ယူႇၵႃႈၼႂ်းမိူင်း ပႃႇပုလုၼ်ႇ၊ ႟။ ဢွၵ်ႇပၢႆႈသေလႄႈၶိုၼ်းမႃးယူႇတီႈဝဵင်း ယေႇရုသလႅမ်ႇ၊ တႃႉ။-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ဢၼ်မီးမုၼ်ၽုင်းယႂ်ႇၼႃႇၼၼ်ႉၸႂ်ႉၵဝ်လၢတ်ႈတီႈမဵဝ်းၵူၼ်းၵူႈၸိူဝ်ႉၵူႈၶိူဝ်းဢၼ်ႁိမ်ႁူင်ႇဢဝ်ဢုၵ်ႉၸႃႇသူလႄႈဝႃႈ၊ “ၵေႃႉဢၼ်တိူဝ်ႉထုၵ်ႇသူၼၼ်ႉပဵၼ်ၵေႃႉဢၼ်တိူဝ်ႉထုၵ်ႇလုၵ်ႈဝၵ်ႉမၢၵ်ႇတႃၵဝ်ဢေႃႈ၊” မၼ်းၸဝ်ႈဝႃႈၸိူဝ်ႉၼင်ႇၼႆဢေႃႈ။-
မၼ်းၸဝ်ႈသိုပ်ႇလၢတ်ႈလႄႈဝႃႈ၊ “တူၺ်းလူး။ ၵဝ်တၵ်းဢဝ်တႃမိုဝ်းၵဝ်ငႃသႂ်ႇၶဝ်လႄႈၶဝ်ၼၼ်ႉတၵ်းလႆႈၶၢမ်ႇတၢင်းဢၼ်ၶႃႈၶဝ်ႁိမ်ႁူင်ႇၸူၼ်ဢဝ်ဢုၵ်ႉၸႃႇၶဝ်ဢေႃႈ၊” ဝႃႈၼင်ႇၼႆဢေႃႈ။ သူတၵ်းလႆႈႁုလွင်ႈဢၼ် ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ပွႆႇၸႂ်ႉၵဝ်ၼၼ်ႉဢေႃႈ။
“ၵူၼ်းဝဵင်း ယေႇရုသလႅမ်ႇ၊ ႟။ ႁဵတ်းၵႂၢမ်းလႄႈသႂၢင်ႇသိူဝ်းတႃႉ။ ၵဝ်တၵ်းမႃးလႄႈယူႇၵႃႈၼႂ်းဝူင်ႈၵၢင်မႂ်းဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ၼႂ်းမိုဝ်ႉဝၼ်းၼၼ်ႉမဵဝ်းၵူၼ်းၼမ်ၼႃႇတၵ်းဢွၼ်ၵၼ်ၶဝ်ႈယူႇၽၢႆႇ ထႃႇဝရႃႉၽြႃး၊ လႄႈပဵၼ်ၵူၼ်းမၼ်းၸဝ်ႈဢေႃႈ။ ၵဝ်တၵ်းၶဝ်ႈယူႇၵႃႈၼႂ်းၵၢင်သူလႄႈသူတၵ်းလႆႈႁုလွင်ႈဢၼ် ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ပွႆႇၸႂ်ႉၵဝ်မႃးၸူးတီႈသူၼၼ်ႉဢေႃႈ။-
ထႃႇဝရႃႉၽြႃး၊ တၵ်းလႆႈပိူင်ႇဢဝ်မိူင်း ယုတႃႉ၊ ႁႂ်ႈပဵၼ်ဢမူၺ်ႇမၼ်းၸဝ်ႈဝႆႉၵႃႈၼႂ်းမိူင်းဢၼ်မူတ်းၸၢင်ႇၼၼ်ႉလႄႈတၵ်းသမ်ႉၶိုၼ်းလိူၵ်ႈၵဵပ်းဢဝ်ဝဵင်း ယေႇရုသလႅမ်ႇ၊ ဢေႃႈ။
ၵူၼ်းၵႃႈမီးတင်းသဵင်ႈတင်းလူင်ၶဝ်႟။ ဢွၼ်ၵၼ်ယူႇတဵတ်ႇတဵတ်ႇၼိမ်ၼိမ်ၵႃႈတီႈၽၢႆႇၼႃႈ ထႃႇဝရႃႉၽြႃး၊ တႃႉ။ မၼ်းၸဝ်ႈလုၵ်ႉသေၵႃႈတီႈထႃႇၼႃႉဢၼ်မၼ်းၸဝ်ႈၵိင်းဝၢပ်ႈတီႈဢၼ်မူတ်းၸၢင်ႇၼၼ်ႉယဝ်ႉ၊ဝႃႈၼင်ႇၼႆဢေႃႈ။
မၼ်းၸဝ်ႈၼႄပျႃးႁႂ်ႈၵဝ်ႁၼ်ၶုၼ်ယဵၸ်ႈပရေႃးႁဵၵ်ႈ ယေႃးသု၊ ၸုၵ်းယူႇၵႃႈတီႈၽၢႆႇၼႃႈတမၢၼ်ႇၵၢင်ႁၢဝ် ထႃႇဝရႃႉၽြႃး၊ လႄႈ ၸႃႇတၢၼ်ႇ၊ ၸုၵ်းယူႇၵႃႈတီႈၽၢႆႇၶႂႃမၼ်းႁႂ်ႈလႆႈတၢင်ႇဢပျတ်ႈမၼ်းဢေႃႈ။-
တမၢၼ်ႇၵၢင်ႁၢဝ် ထႃႇဝရႃႉၽြႃး၊ လၢတ်ႈတီႈ ၸႃႇတၢၼ်ႇ၊ ၼၼ်ႉလႄႈဝႃႈ၊ “ ၸႃႇတၢၼ်ႇ၊ ႟။ ထႃႇဝရႃႉၽြႃး၊ တၵ်းသင်ႇသွၼ်သုင်းမႃႉမႂ်းဢေႃႈ။ ႁႂ်ႈ ထႃႇဝရႃႉၽြႃး၊ ဢၼ်လိူၵ်ႈၵဵပ်းဢဝ်ဝဵင်း ယေႇရုသလႅမ်ႇ၊ ယဝ်ႉၼၼ်ႉသင်ႇသွၼ်သုင်းမႃႉမႂ်းသေၵမ်း။ ၵေႃႉၼႆႉပဵၼ်လိုၼ်ႈၽႆးဢၼ်ၼုၵ်ႈထွၼ်ဢဝ်ဢွၵ်ႇသေၵႃႈၼႂ်းၽႆးဢမ်ႇၸႂ်ႈႁိုဝ်း၊” ဝႃႈၼင်ႇၼႆဢေႃႈ။
ယေႃးသု၊ ၼၼ်ႉၼုင်ႈၶူဝ်းၼုင်ႈဢၼ်ၵူဝ်ႈၵိူၵ်ႇယူႇသေလႄႈၸုၵ်းယူႇၵႃႈတီႈၽၢႆႇၼႃႈတမၢၼ်ႇၵၢင်ႁၢဝ်ၼၼ်ႉဢေႃႈ။-
တမၢၼ်ႇၵၢင်ႁၢဝ်ၼၼ်ႉလၢတ်ႈတီႈၶဝ်ၸိူဝ်းဢၼ်ၸုၵ်းယူႇၵႃႈတီႈၽၢႆႇၼႃႈမၼ်းၼၼ်ႉလႄႈဝႃႈ၊ “ဢွၼ်ၵၼ်ထွတ်ႇၶူဝ်းၼုင်ႈမၼ်းဢၼ်ၵူဝ်ႈၵိူၵ်ႇၼၼ်ႉပႅတ်ႈသေတႃႉ၊” ဝႃႈၼင်ႇၼႆဢေႃႈ။ တီႈ ယေႃးသု၊ ၵေႃႈလၢတ်ႈလႄႈဝႃႈ၊ “တူၺ်းလူး။ ၵဝ်ၽေႇဢပျတ်ႈမႂ်းပႅတ်ႈယဝ်ႉ။ ၵဝ်တၵ်းႁႂ်ႈမႂ်းၼုင်ႈၶူဝ်းဢၼ်ႁၢင်ႈလီႁၢင်ႈငၢမ်းဢေႃႈ၊” ဝႃႈၼင်ႇၼႆဢေႃႈ။
ၵဝ်ၵေႃႈလၢတ်ႈလႄႈဝႃႈ၊ “ႁႂ်ႈဢွၼ်ၵၼ်ဢဝ်ၶဵၼ်းႁူဝ်ဢၼ်မူတ်းသႂ်ၼၼ်ႉၶဵၼ်းပၼ်ႁူဝ်မၼ်းတႃႉ၊” ဝႃႈၼင်ႇၼႆလႄႈၶဝ်ဢွၼ်ၵၼ်ဢဝ်ၶဵၼ်းႁူဝ်ဢၼ်မူတ်းသႂ်ၼၼ်ႉၶဵၼ်းပၼ်ႁူဝ်မၼ်းၸွမ်းၵႃႈၼင်ႇဢၼ်ဝႃႈၼၼ်ႉလႄႈဢဝ်ၶူဝ်းၼုင်ႈၼၼ်ႉၼုင်ႈပၼ်မၼ်းဢေႃႈ။ တမၢၼ်ႇၵၢင်ႁၢဝ် ထႃႇဝရႃႉၽြႃး၊ ၵေႃႈၸုၵ်းယူႇၵႃႈတီႈႁိမ်းၼၼ်ႉဢေႃႈ။
တမၢၼ်ႇၵၢင်ႁၢဝ် ထႃႇဝရႃႉၽြႃး၊ ၼၼ်ႉပိင်းၺၢပ်ႈဝႆႉတီႈ ယေႃးသု၊ လႄႈဝႃႈ၊ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း မီးဢမိင်ႉၸမ်ႉ၊-
“ပေႃးမႂ်းတၵ်းၸွမ်းသဵၼ်ႈတၢင်းၵဝ်တင်းလၢႆလႄႈပႂ်ႉၵမ်ပႂ်ႉၵျၢင်ႉပိင်းၺၢပ်ႈတြႃးၵဝ်ၸိုင်၊မႂ်းတၵ်းမီးဢၶႂၢင်ႉဢၼ်လႆႈဢုပ်ႉထိင်းႁိူၼ်းၵဝ်၊ဢၶႂၢင်ႉဢၼ်လႆႈပႂ်ႉပၢင်ႇဝၢင်းလုမ်းၵဝ်ၸိူဝ်းၼၼ်ႉလႄႈၵဝ်တၵ်းႁႂ်ႈမႂ်းၶဝ်ႈၵႂႃႇၵႃႈၼႂ်းၶဝ်ၸိူဝ်းဢၼ်ၸုၵ်းယူႇၵႃႈတီႈၽၢႆႇၼႃႈၸဝ်ႈၼၼ်ႉဢေႃႈ။-
ၶုၼ်ယဵၸ်ႈပရေႃးႁဵၵ်ႈ ယေႃးသု၊ ႟။ မႂ်းဢိၵ်ႇလူၺ်ႈၵၼ်တင်းၵေႃႉသႄႈမႂ်းဢၼ်ၼင်ႈယူႇၵႃႈတီႈၽၢႆႇၼႃႈမႂ်းၸိူဝ်းၼႆႉၶဝ်႟။ ဢွၼ်ၵၼ်ထွမ်ႇငိၼ်းတႃႉ။ သူပဵၼ်ၼိမိၵ်ႈလၢၵ်ႈၶၼႃႇလွင်ႈတၢင်းဢၼ်ပဵၼ်မႃးၼၼ်ႉဢေႃႈ။ တူၺ်းလူး။ ၵဝ်တၵ်းႁႂ်ႈၵိင်ႇၶႃႈဢၼ်ဝႃႈ၊ၶႃႈၵဝ်ၼၼ်ႉပေႃႇပဵၼ်မႃးဢေႃႈ။-
လူတူၺ်းမၢၵ်ႇႁိၼ်ဢၼ်ၵဝ်ဢဝ်ဝၢင်းဝႆႉၵႃႈတီႈၽၢႆႇၼႃႈ ယေႃးသု၊ ၼၼ်ႉတႃႉ။ ၵႃႈတီႈမၢၵ်ႇႁိၼ်လုၵ်ႈလဵဝ်ၵၼ်ၼၼ်ႉမီးၸဵတ်းၼႃႈဢေႃႈ။ တူၺ်းလူး။ ၵဝ်တၵ်းတွင်ႈႁဵတ်းဢႅၵ်ႉၶရႃႇတီႈမၢၵ်ႇႁိၼ်ၼၼ်ႉလႄႈၼႂ်းဝၼ်းၼိုင်ႈၵူၺ်းၵဝ်တၵ်းပႄႇၽဵဝ်ႈဢပျတ်ႈမိူင်းၼႆႉပႅတ်ႈဢေႃႈ၊ဝႃႈၼင်ႇၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ။-
ၼႂ်းမိုဝ်ႉဝၼ်းၼၼ်ႉသူၵေႃႉၼိုင်ႈလႄႈၵေႃႉၼိုင်ႈတၵ်းၽိတ်ႈပၢင်းၵၼ်၊ၵႂႃႇမႃးၸူးၵၼ်ၵႃႈတီႈတႂ်ႈတူၼ်ႈမၢၵ်ႇၸပိတ်ႉ၊တႂ်ႈတူၼ်ႈမၢၵ်ႇလိူဝ်ႇလႂ်ဢေႃႈ၊ဝႃႈၼင်ႇၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ၊” ဝႃႈၼင်ႇၼႆဢေႃႈ။
တမၢၼ်ႇၵၢင်ႁၢဝ်ဢၼ်လၢတ်ႈၵႂၢမ်းတေႃႇၵၼ်တင်းၵဝ်ၼၼ်ႉၶိုၼ်းမႃးလႄႈပူၵ်းၵဝ်မိူၼ်ၸိူဝ်ႉၼင်ႇဢၼ်ပူၵ်းၵေႃႉဢၼ်ၼွၼ်းလပ်းၼၼ်ႉဢေႃႈ။-
မၼ်းထၢမ်တီႈၵဝ်လႄႈဝႃႈ၊ “မႂ်းႁၼ်ၵႃႈသင်၊” မိူဝ်ႈဢၼ်ဝႃႈၼင်ႇၼႆၸိုင်၊ၵဝ်လၢတ်ႈလႄႈဝႃႈ၊ “ၵဝ်ၶႃႈလူတူၺ်းလႄႈႁၼ်ၶဵင်ႇတီႈတႆႈၽႆးဢၼ်ပဵၼ်ၶမ်းလွၼ်ႉလွၼ်ႉၶႃႈဢေႃႈ။ ၵႃႈတီႈပၢႆၶဵင်ႇတီႈတႆႈၽႆးၼၼ်ႉမီးမေႃႈၼမ်ႉမၼ်းမေႃႈၼိုင်ႈ၊ဢိၵ်ႇတင်းဝၢၼ်ႇတႆႈၽႆးၸဵတ်းဢၼ်မီးလွတ်ႇၸဵတ်းလွတ်ႇဢၼ်သိုပ်ႇၸပ်းမေႃႈၼမ်ႉမၼ်းတင်းဝၢၼ်ႇတႆႈၽႆးၸဵတ်းဢၼ်ၼၼ်ႉၶႃႈဢေႃႈ။-
ၵႃႈႁိမ်းမၼ်းမီးတူၼ်ႈသၢၼ်ႇလုၼ်ႇသွင်တူၼ်ႈ၊ၵႃႈတီႈၽၢႆႇတၢင်းၶႂႃမေႃႈၼမ်ႉမၼ်းၼၼ်ႉတူၼ်ႈၼိုင်ႈ၊ၵႃႈတီႈၽၢႆႇတၢင်း သၢႆႉမၼ်းၼၼ်ႉတူၼ်ႈၼိုင်ႈၶႃႈဢေႃႈ၊” ဝႃႈၼင်ႇၼႆဢေႃႈ။-
ၵဝ်သမ်ႉထၢမ်တီႈတမၢၼ်ႇၵၢင်ႁၢဝ်ဢၼ်လၢတ်ႈတေႃႇၵၼ်တင်းၵဝ်ၼၼ်ႉလႄႈဝႃႈ၊ “ၸဝ်ႈၵဝ်ၶႃႈ႟။ ဢၼ်ၸိူဝ်းၼႆႉၸမ်ႉ၊ပဵၼ်ၵႃႈသင်ၶႃႈ၊” မိူဝ်ႈဢၼ်ဝႃႈၼင်ႇၼႆၸိုင်။
တမၢၼ်ႇၵၢင်ႁၢဝ်ဢၼ်လၢတ်ႈတေႃႇၵၼ်တင်းၵဝ်ၼၼ်ႉထၢမ်ၵဝ်လႄႈဝႃႈ၊ “မႂ်းဢမ်ႇႁုလွင်ႈဢၼ်ၸိူဝ်းၼႆႉပဵၼ်ၵႃႈသင်ၼၼ်ႉႁိုဝ်း၊” ဝႃႈၼင်ႇၼႆသေယဝ်ႉ။ ၵဝ်သမ်ႉလဝ်ႈလၢတ်ႈလႄႈဝႃႈ၊ “ဢမ်ႇႁုၶႃႈၸဝ်ႈ၊” ဝႃႈၼင်ႇၼႆဢေႃႈ။
မၼ်းၼၼ်ႉၵေႃႈ ၶိုၼ်းလၢတ်ႈတီႈၵဝ်လႄႈဝႃႈ၊ “ဢၼ်ၼႆႉပဵၼ်ၼုၵ်ႈၵပၢတ်ႈ ထႃႇဝရႃႉၽြႃး၊ ဢၼ်ႁွတ်ႈမႃးတီႈ ၸေႇရုပႃႉပေႇလႃႉ၊ ၸမ်ႉ၊လွင်ႈတၢင်းၼႆႉတၵ်းပဵၼ်ၵွပ်ႈပိူဝ်ႈဢဵၼ်ႁႅင်းဢမ်ႇၸႂ်ႈ၊တၵ်းပဵၼ်ၵွပ်ႈပိူဝ်ႈႁႅင်းတၼ်းၶူဝ်းဢမ်ႇၸႂ်ႈ၊တၵ်းပဵၼ်ၵွပ်ႈပိူဝ်ႈဝိၺိၺ်ႇၵဝ်ဢေႃႈ၊ဝႃႈၼင်ႇၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ။-
လွႆလူင်႟။ မႂ်းပဵၼ်ၵႃႈသင်။ မႂ်းတၵ်းလႆႈပဵၼ်တီႈဢၼ်ပၢင်ႇလီပဵင်းလီၵႃႈတီႈၽၢႆႇၼႃႈ ၸေႇရုပႃႉပေႇလႃႉ၊ ဢေႃႈ။ မၼ်းတၵ်းလႆႈဢဝ်မၢၵ်ႇႁိၼ်ဢၼ်ယူႇၼိူဝ်ယွတ်ႈၼၼ်ႉဢွၵ်ႇမႃးလူၺ်ႈတင်းသဵင်ဢၼ်ၶဝ်ႁွင်ႉပၢဝ်ႇၼၼ်ႉလႄႈဝႃႈ၊ ‘ႁႂ်ႈၵျေးၸူးၸဝ်ႈမီးတီႈမၼ်းသေၵမ်းလူၺ်ႈ။ ႁႂ်ႈၵျေးၸူးၸဝ်ႈမီးတီႈမၼ်းသေၵမ်းလူၺ်ႈ၊’ ” ဝႃႈၼင်ႇၼႆဢေႃႈ။-
ၵမ်းၼၼ်ႉ၊ၼုၵ်ႈၵပၢတ်ႈ ထႃႇဝရႃႉၽြႃး၊ တၢင်ႇဢၼ်သမ်ႉႁွတ်ႈမႃးတီႈၵဝ်လႄႈဝႃႈၸမ်ႉ၊-
“မိုဝ်း ၸေႇရုပႃႉပေႇလႃႉ၊ ၼၼ်ႉၶျႃးငဝ်ႈႁၢၵ်ႈတိူၵ်ႈႁိူၼ်းၸဝ်ႈၼႆႉဝႆႉယဝ်ႉ။ မိုဝ်းမၼ်းၼၼ်ႉတၵ်းလႆႈၵွႆႁဵတ်းႁႂ်ႈယဝ်ႉႁႂ်ႈတူဝ်ႈဢေႃႈ။ မႂ်းတၵ်းလႆႈႁုလွင်ႈဢၼ် ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ပွႆႇၸႂ်ႉၵဝ်မႃးၸူးတီႈမႂ်းၼၼ်ႉဢေႃႈ။-
ၽူႈလႂ်လႆႈႁဵတ်းတၢင်းဢၼ်လူလၢႆတီႈမိုဝ်ႉဝၼ်းဢၼ်ႁဵတ်းလွင်ႈတၢင်းဢၼ်လဵၵ်ႉဢၼ်ၼွႆႉၸိူဝ်းၼၼ်ႉ၊တၵ်းလႆႈၸူမ်းသိူဝ်းလႄႈတၵ်းလႆႈႁၼ်ၸိူၵ်ႈဢၼ်ၶပ်ႉဢၼ်တႅၵ်ႈယူႇၵႃႈၼႂ်းမိုဝ်း ၸေႇရုပႃႉပေႇလႃႉ၊ ဢေႃႈ။ ၶဵင်ႇတီႈတႆႈၽႆးတင်းၸဵတ်းဢၼ်ၼၼ်ႉပဵၼ်မၢၵ်ႇတႃ ထႃႇဝရႃႉၽြႃး၊ ဢၼ်တူၺ်းႁၼ်ၵႃႈၼိူဝ်ၼႃႈလိၼ်ၵူႈတီႈၵူႈလႅၼ်ဢေႃႈ၊” ဝႃႈၼင်ႇၼႆဢေႃႈ။
ၵဝ်ၵေႃႈလဝ်ႈထၢမ်လႄႈဝႃႈ၊ “တူၼ်ႈသၢၼ်ႇလုၼ်ႇသွင်တူၼ်ႈဢၼ်မီးၵႃႈတီႈၽၢႆႇၶႂႃၽၢႆႇသၢႆႉၶူင်ႇတီႈတႆႈၽႆးၼၼ်ႉၸမ်ႉ၊ပဵၼ်ၵႃႈသင်ၶႃႈ၊” ဝႃႈၼင်ႇၼႆဢေႃႈ။-
ၵဝ်သမ်ႉလဝ်ႈထၢမ်ပွၵ်ႈထူၼ်ႈသွင်လႄႈဝႃႈ၊ “ၵိင်ႇသၢၼ်ႇလုၼ်ႇသွင်ၵိင်ႇဢၼ်ဢဝ်တင်းလွတ်ႇၶမ်းသွင်လွတ်ႇသွၼ်းလေႃႇၼမ်ႉမၼ်းယူႇၼၼ်ႉၸမ်ႉ၊ပဵၼ်ၵႃႈသင်ၶႃႈ၊” မိူဝ်ႈဢၼ်ဝႃႈၼင်ႇၼႆၸိုင်။
မၼ်းၼၼ်ႉထၢမ်တီႈၵဝ်လႄႈဝႃႈ၊ “မႂ်းဢမ်ႇႁုလွင်ႈဢၼ်ၵိင်ႇၸိူဝ်းၼၼ်ႉပဵၼ်ၵႃႈသင်ၼၼ်ႉႁိုဝ်း၊” ဝႃႈၼင်ႇၼႆဢေႃႈ။ ၵဝ်လဝ်ႈလၢတ်ႈလႄႈဝႃႈ၊ “ဢမ်ႇႁုၶႃႈၸဝ်ႈ၊” ဝႃႈၼင်ႇၼႆဢေႃႈ။
မၼ်းၼၼ်ႉလၢတ်ႈလႄႈဝႃႈ၊ “ၵိင်ႇၸိူဝ်းၼႆႉပဵၼ်ၵေႃႉဢၼ်ၶၢမ်ႇၽိၵ်ႈသိၵ်ႈသွင်ပႃးဢၼ်ၸုၵ်းယူႇၵႃႈတီႈၽၢႆႇၼႃႈၽြႃးပဵၼ်ၸဝ်ႈဢၼ်ဢုပ်ႉပိူင်ႇလိၼ်မိူင်းတင်းသဵင်ႈတင်းမူတ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၵဝ်ႁႅၼ်တူၺ်းလႄႈႁၼ်ၵဵၼ်လိၵ်ႈဢၼ်မိၼ်ယူႇၼၼ်ႉဢေႃႈ။-
တမၢၼ်ႇၵၢင်ႁၢဝ်ၼၼ်ႉထၢမ်ၵဝ်လႄႈဝႃႈ၊ “မႂ်းႁၼ်ၵႃႈသင်၊” မိူဝ်ႈဢၼ်ဝႃႈၼင်ႇၼႆၸိုင်၊ၵဝ်လဝ်ႈလၢတ်ႈလႄႈဝႃႈ၊ “ၵဝ်ၶႃႈႁၼ်ၵဵၼ်လိၵ်ႈဢၼ်မိၼ်ယူႇၶႃႈဢေႃႈ။ ၼႃႈယၢဝ်းမၼ်းမီးသၢဝ်းသွၵ်ႇ၊ၼႃႈပွတ်းမၼ်းမီးသိပ်းသွၵ်ႇၶႃႈဢေႃႈ၊” ဝႃႈၼင်ႇၼႆဢေႃႈ။
မၼ်းၼၼ်ႉၵေႃႈလၢတ်ႈတီႈၵဝ်လႄႈဝႃႈ၊ “ဢၼ်ၼၼ်ႉပဵၼ်တၢင်းဢၼ်ၵိၼ်ႇဝႃႈ၊ဢၼ်ၸွတ်ႇတူဝ်ႈၵႂႃႇၵႃႈၼႂ်းမိူင်းတင်းမိူင်းဢေႃႈ။ ၶဝ်ၸိူဝ်းဢၼ်ၸၢင်ႈလၵ်ႉၸၢင်ႈလိူတ်ႇၵႃႈမီးၼၼ်ႉတၵ်းလႆႈၶၢမ်ႇတၢင်းဢၼ်ပႄႇၽဵဝ်ႈပႅတ်ႈၸွမ်းၵႃႈၼင်ႇဢၼ်ပႃးၵႃႈၼႂ်းၵဵၼ်လိၵ်ႈၼၼ်ႉၽၢႆႇၼိုင်ႈၼၼ်ႉဢေႃႈ။ ၶဝ်ၸိူဝ်းဢၼ်ႁဵတ်းတၢင်းဢၼ်တိူင်ႇဝႃႈလွင်ႈဢၼ်ဢမ်ႇၸိုဝ်ႈဢမ်ႇၸႂ်ႈတင်းသဵင်ႈၼၼ်ႉတၵ်းလႆႈၶၢမ်ႇတၢင်းဢၼ်ပႄႇၽဵဝ်ႈပႅတ်ႈၸွမ်းၵႃႈၼင်ႇဢၼ်ပႃးၵႃႈၼႂ်းၵဵၼ်လိၵ်ႈထႅင်ႈၽၢႆႇၼိုင်ႈၼၼ်ႉဢေႃႈ။-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ၵဝ်တၵ်းသူင်ႇၵဵၼ်လိၵ်ႈၼၼ်ႉဢွၵ်ႇလႄႈ၊မၼ်းတၵ်းၶဝ်ႈၵႂႃႇၵႃႈၼႂ်းႁိူၼ်းၵေႃႉဢၼ်ၸၢင်ႈလၵ်ႉၸၢင်ႈလိူတ်ႇၼၼ်ႉ၊ဢိၵ်ႇတင်းၵႃႈၼႂ်းႁိူၼ်းၵေႃႉဢၼ်ဢဝ်ၼႃႇမႃႉၸိုဝ်ႈသဵင်ၵဝ်ႁဵတ်းတၢင်းဢၼ်တိူင်ႇဝႃႈ၊ဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉသေယဝ်ႉ၊ယူႇၼႂ်းႁိူၼ်းၼၼ်ႉတေႃႇထိုင်ႁိူၼ်းၼၼ်ႉလုလႅဝ်ပႃးတင်းမႆႉၸိင်မၼ်းတင်းမၢၵ်ႇႁိၼ်မၼ်းၸိူဝ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵမ်းၼၼ်ႉ၊တမၢၼ်ႇၵၢင်ႁၢဝ်ဢၼ်လၢတ်ႈတေႃႇၵၼ်တင်းၵဝ်ၼၼ်ႉဢွၵ်ႇမႃးတီႈတၢင်းၼႃႈသေလႄႈလၢတ်ႈတီႈၵဝ်လႄႈဝႃႈ၊ “မိူဝ်ႈလဵဝ်ၼႆႉမႂ်းႁႅၼ်တူၺ်းမဵဝ်းဢၼ်တၵ်းပေႃႇဢွၵ်ႇမႃးၼႆႉတႃႉ၊” ဝႃႈၼင်ႇၼႆဢေႃႈ။
ၵဝ်ထၢမ်လႄႈဝႃႈ၊ “ဢၼ်ၼၼ်ႉၸမ်ႉ၊ပဵၼ်ၵႃႈသင်ၶႃႈ၊” မိူဝ်ႈဢၼ်ဝႃႈၼင်ႇၼႆၸိုင်၊မၼ်းၼၼ်ႉလၢတ်ႈလႄႈဝႃႈ၊ “ဢၼ်ၼၼ်ႉပဵၼ်ႁိပ်ႇဢေးၽႃႇဢၼ်ပေႃႇဢွၵ်ႇမႃးၼၼ်ႉဢေႃႈ၊” ဝႃႈၼင်ႇၼႆဢေႃႈ။ မၼ်းသမ်ႉလၢတ်ႈထႅင်ႈလႄႈဝႃႈ၊ “ဢၼ်ၼႆႉပဵၼ်တုၸရိူၵ်ႈဢပျတ်ႈၵႃႈၼႂ်းမိူင်းတင်းမိူင်းဢေႃႈ၊” ဝႃႈၼင်ႇၼႆဢေႃႈ။
ႁိပ်ႇဢေးၽႃႇၼၼ်ႉမီးၽႃႁူမ်ႇဢၼ်ဢဝ်တင်းၸိုၼ်းႁဵတ်းဝႆႉဢေႃႈ။ မိူဝ်ႈဢၼ်ၵဝ်တူၺ်းယူႇၼၼ်ႉၽႃႁူမ်ႇၽုၺ်ႇပိုတ်ႇလႄႈမႄႈယိင်းၵေႃႉၼိုင်ႈၼင်ႈယူႇၵႃႈၼႂ်းႁိပ်ႇဢေးၽႃႇၼၼ်ႉဢေႃႈ။
မၼ်းလၢတ်ႈလႄႈဝႃႈ၊ “မႄႈယိင်းၼႆႉပဵၼ်တုၸရိူၵ်ႈဢပျတ်ႈဢေႃႈ၊” ဝႃႈၼင်ႇၼႆသေလႄႈတဵၵ်းမၼ်းသႂ်ႇဝႆႉၵႃႈၼႂ်းႁိပ်ႇဢေးၽႃႇသေ၊ဢဝ်ၽႃႁူမ်ႇၶႅပ်းၸိုၼ်းတၢင်ႇႁူမ်ႇသႂ်ႇဝႆႉၵႃႈၼိူဝ်ပၢၵ်ႇႁိပ်ႇဢေးၽႃႇၼၼ်ႉဢေႃႈ။-
ၵဝ်သမ်ႉႁႅၼ်တူၺ်းလႄႈႁၼ်မႄႈယိင်းသွင်ၵေႃႉဢွၵ်ႇမႃးၵႃႈတီႈတၢင်းၼႃႈဢေႃႈ။ လူမ်းမီးၵႃႈၼႂ်းပိၵ်ႇၶဝ်ယူႇသေလႄႈပိၵ်ႇၶဝ်ၼၼ်ႉမိူၼ်ၸိူဝ်ႉၼင်ႇပိၵ်ႇၼူၵ်ႉၵွၼ်ႇၼၼ်ႉဢေႃႈ။ ၶဝ်သွင်ၵေႃႉၼၼ်ႉဢွၼ်ၵၼ်ဢုမ်ႈႁွပ်ႇဢဝ်ႁိပ်ႇဢေးၽႃႇၼၼ်ႉၶိုၼ်ႈၵႂႃႇၵႃႈၼႂ်းၵႄႈဝူင်ႈၵၢင်လိၼ်မိူင်းတင်းၽႃႉၵၢင်ႁၢဝ်ဢေႃႈ။
ၵဝ်ထၢမ်တီႈတမၢၼ်ႇၵၢင်ႁၢဝ်ဢၼ်လၢတ်ႈတေႃႇၵၼ်တင်းၵဝ်ၼၼ်ႉလႄႈဝႃႈ၊ “ၶဝ်သွင်ၵေႃႉၼၼ်ႉဢွၼ်ၵၼ်ဢုမ်ႈႁွပ်ႇဢဝ်ႁိပ်ႇဢေးၽႃႇၼၼ်ႉၵႂႃႇၵႃႈတီႈလႂ်ၶႃႈ၊” မိူဝ်ႈဢၼ်ဝႃႈၼင်ႇၼႆၸိုင်။
မၼ်းၵေႃႈၶိုၼ်းလၢတ်ႈတီႈၵဝ်လႄႈဝႃႈ၊ “ၶဝ်သွင်ၵေႃႉၼၼ်ႉဢွၼ်ၵၼ်ဢုမ်ႈႁွပ်ႇဢဝ်ႁိပ်ႇၵႂႃႇႁႂ်ႈလႆႈႁဵတ်းႁိူၼ်းပုၼ်ႈမၼ်းၵႃႈၼႂ်းမိူင်း သိၼႃႇ၊ ပုၼ်ႉဢေႃႈ။ မိူဝ်ႈဢၼ်တႄႇႁဵတ်းႁိူၼ်းယဝ်ႉၼၼ်ႉၸိုင်၊ၶဝ်သွင်ၵေႃႉၼၼ်ႉတၵ်းလႆႈဢဝ်ႁိပ်ႇဢေးၽႃႇဝၢင်းဝႆႉၵႃႈၼိူဝ်ဢၼ်ႁွင်းတိၼ်မၼ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵဝ်သမ်ႉႁႅၼ်တူၺ်းလႄႈႁၼ်လေႃႉမႃႉသိုၵ်းသီႇလမ်းဢွၵ်ႇသေၵႃႈၼႂ်းၵႄႈလွႆသွင်လုၵ်ႈမႃးလႄႈလွႆၸိူဝ်းၼၼ်ႉပဵၼ်လွႆတွင်းလိူင်ဢေႃႈ။-
တီႈလေႃႉမႃႉသိုၵ်းလမ်းတီႈၼိုင်ႈမီးမႃႉလႅင်၊တီႈလေႃႉမႃႉသိုၵ်းလမ်းတီႈသွင်မီးမႃႉလမ်၊-
တီႈလေႃႉမႃႉသိုၵ်းလမ်းတီႈသၢမ်မီးမႃႉၽိူၵ်ႇ၊တီႈလေႃႉမႃႉသိုၵ်းလမ်းတီႈသီႇမီးမႃႉလၢႆးၸိူဝ်းၼၼ်ႉဢေႃႈ။-
ၵဝ်ထၢမ်တီႈတမၢၼ်ႇၵၢင်ႁၢဝ်ဢၼ်လၢတ်ႈတေႃႇၵၼ်တင်းၵဝ်ၼၼ်ႉလႄႈဝႃႈ၊ “ၸဝ်ႈၵဝ်ၶႃႈ႟။ ဢၼ်ၸိူဝ်းၼႆႉၸမ်ႉ၊ပဵၼ်ၵႃႈသင်ၶႃႈ၊” မိူဝ်ႈဢၼ်ဝႃႈၼင်ႇၼႆၸိုင်။
တမၢၼ်ႇၵၢင်ႁၢဝ်ၼၼ်ႉၶိုၼ်းလၢတ်ႈလႄႈဝႃႈ၊ “ဢၼ်ၸိူဝ်းၼႆႉပဵၼ်လူမ်းၵၢင်ႁၢဝ်သီႇပႃးဢၼ်ဢွၵ်ႇသေၵႃႈတီႈၽၢႆႇၼႃႈၽြႃးပဵၼ်ၸဝ်ႈဢၼ်ဢုပ်ႉပိူင်ႇၼႃႈလိၼ်မိူင်းတင်းမူတ်းၼၼ်ႉမႃးဢေႃႈ။
“လေႃႉမႃႉသိုၵ်းဢၼ်ႁၢင်ႈမႃႉလမ်သႂ်ႇဝႆႉၸိူဝ်းၼၼ်ႉဢွၼ်ၵၼ်ဢွၵ်ႇၸူးၵႃႈတီႈမိူင်းၽၢႆႇတၢင်းႁွင်ႇလႄႈ၊မႃႉၽိူၵ်ႇၸိူဝ်းၼၼ်ႉဢွၼ်ၵၼ်ၸွမ်းလင်မႃႉလမ်ၸိူဝ်းၼၼ်ႉဢေႃႈ။ မႃႉလၢႆးၸိူဝ်းၼၼ်ႉဢွၼ်ၵၼ်ဢွၵ်ႇၸူးၵႃႈတီႈမိူင်းၽၢႆႇတၢင်းၸၢၼ်းဢေႃႈ၊” ဝႃႈၼင်ႇၼႆဢေႃႈ။-
မႃႉၸိူဝ်းၼၼ်ႉမီးၸႂ်ႁႅင်းယႂ်ႇၶႂ်ႈဢွၵ်ႇလႄႈလႄႇၵႂႃႇလႄႇမႃးၸႅတ်ႈသေးတူၺ်းၵႃႈၼိူဝ်လိၼ်မိူင်းၵူႈတီႈၵူႈလႅၼ်ဢေႃႈ။ တမၢၼ်ႇၵၢင်ႁၢဝ်ၼၼ်ႉသင်ႇလၢတ်ႈလႄႈဝႃႈ၊ “လႄႇၵႂႃႇလႄႇမႃးၵႃႈၼိူဝ်လိၼ်မိူင်းတႃႉ၊” ဝႃႈၼင်ႇၼႆဢေႃႈ။ ပိူဝ်ႈၼႆလႄႈၶဝ်လႄႇၵႂႃႇလႄႈမႃးၸႅတ်ႈသေးတူၺ်းၵႃႈၼိူဝ်လိၼ်မိူင်းၵူႈတီႈၵူႈလႅၼ်ၸွမ်းၵႃႈၼင်ႇဢၼ်သင်ႇလၢတ်ႈၼၼ်ႉဢေႃႈ။-
တမၢၼ်ႇၵၢင်ႁၢဝ်ၼၼ်ႉႁွင်ႉဢဝ်ၵဝ်လႄႈလၢတ်ႈလႄႈဝႃႈ၊ “တူၺ်းလူး။ မႃႉဢၼ်ၵႂႃႇၵႃႈတီႈမိူင်းၽၢႆႇတၢင်းႁွင်ႇၸိူဝ်းၼၼ်ႉႁႂ်ႈဝိၺိၺ်ႇၵဝ်တႄႇယူႇၵႃႈတီႈမိူင်းၽၢႆႇတၢင်းႁွင်ႇၼၼ်ႉယဝ်ႉ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈၵဝ်လႄႈဝႃႈၸမ်ႉ၊-
“မႂ်းဢဝ်ငိုၼ်းတင်းၶမ်းၵႃႈတီႈ ႁေႇလတႄး၊ တေႃႇၽိယႃႉ၊ ယေႇတႃႇယႃႉ၊ ဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇလႄႈမိူဝ်ႈလဵဝ်ၼႆႉလုၵ်ႉသေၵႃႈတီႈမိူင်း ပႃႇပုလုၼ်ႇ၊ ၶိုၼ်းမႃးၼၼ်ႉသေယဝ်ႉ၊ၼႂ်းဝၼ်းလဵဝ်ၵၼ်ၼၼ်ႉၵႂႃႇၵႃႈၼႂ်းႁိူၼ်း ယူဝ်းသိယႃႉ၊ လုၵ်ႈၸၢႆး ၸေႇၽၼိ၊ ၼၼ်ႉတႃႉ၊-
ဢဝ်ငိုၼ်းၶမ်းၼၼ်ႉလႄႈႁဵတ်းသရၽူႇသေယဝ်ႉ၊ဢဝ်တိုဝ်းသႂ်ႇပၼ်ၵႃႈၼိူဝ်ႁူဝ်ၶုၼ်ယဵၸ်ႈပရေႃးႁဵၵ်ႈ ယေႃးသု၊ လုၵ်ႈၸၢႆး ယေႃးသတိၵ်ႉ၊ ၼၼ်ႉတႃႉ။-
လၢတ်ႈတီႈမၼ်းလႄႈဝႃႈ၊ၸဝ်ႈဢၼၼ်ႇတႃႉတၼ်းၶူဝ်း၊ ၸဝ်ႈထႃႇဝရႃႉၽြႃး၊ မီးဢမိင်ႉၸမ်ႉ၊လူတူၺ်းၵေႃႉဢၼ်လႆႈၸိုဝ်ႈၵိင်ႇၶႃႈ ၼၼ်ႉတႃႉ။ မၼ်းတၵ်းယႂ်ႇမႃးၵႃႈၼႂ်းထႃႇၼႃႉတီႈမၼ်းလႄႈတႄႇႁဵတ်းၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ဢေႃႈ။-
မၼ်းၼၼ်ႉတၵ်းတႄႇႁဵတ်းၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ဢေႃႈ။ မုၼ်ၽုင်းမၼ်းယႂ်ႇလႄႈၼင်ႈၵႃႈၼိူဝ်ရႃႇၸႃႉပလၢင်ႇမၼ်းယူႇသေယဝ်ႉ၊ဢုပ်ႉပိူင်ႇၸၢမ်ႇၸႃးဢေႃႈ။ တၵ်းမီးယဵၸ်ႈပရေႃးႁဵၵ်ႈပႃးၼိုင်ႈယူႇႁိမ်းရႃႇၸႃႉပလၢင်ႇၸဝ်ႈလႄႈတင်းသွင်ပႃးတၵ်းႁဵတ်းပတိၺိၺ်ႇမိၵ်ႈသႁႃႇယႃႉလူၺ်ႈၵၼ်ဢေႃႈ။-
သရၽူႇၼၼ်ႉတၵ်းလႆႈမီးၼႂ်းၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ပုၼ်ႈဢၼ်တေၶုၵ်းၸႂ်လႆႈ ႁေႇလတႄး၊တေႃႇၽိယႃႉ၊ယေႇတႃႇယႃႉ၊ ဢိၵ်ႇတင်း ယူဝ်းသိယႃႉ၊ လုၵ်ႈၸၢႆး ၸေႇၽၼိ၊ ၸိူဝ်းၼၼ်ႉဢေႃႈ။
“ၶဝ်ၸိူဝ်းဢၼ်မီးတီႈၵႆၸိူဝ်းၼၼ်ႉၵေႃႈ တၵ်းဢွၼ်ၵၼ်မႃးလႄႈၸွႆႈထႅမ်တႄႇႁဵတ်းၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ဢေႃႈ။ ၼင်ႇၼၼ်လႄႈသူတၵ်းလႆႈႁုလွင်ႈဢၼ် ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ပွႆႇၸႂ်ႉၵဝ်မႃးၸူးတီႈသူၼၼ်ႉဢေႃႈ။ ပေႃးသူထွမ်ႇဢဝ်ဢမိင်ႉ ထႃႇဝရႃႉၽြႃး၊ ၽြႃးပဵၼ်ၸဝ်ႈသူၸေးၸေးၸွတ်ႇၸွတ်ႇၸိုင်၊တၵ်းပဵၼ်ၸိူဝ်ႉၼင်ႇၼႆဢေႃႈ၊” ဝႃႈၼင်ႇၼႆဢေႃႈ။
ၼႂ်းၶူပ်ႇပီဢၼ်ၶုၼ်လူင် တႃႇရိ၊ ၼင်ႈႁၢင်ႈၼင်ႈႁေႃလႆႈသီႇပီ၊လိူၼ်တီႈၵဝ်ႈဢၼ်လႆႈၸိုဝ်ႈ ၶိသလု၊ ဝၼ်းတီႈသီႇၼၼ်ႉ၊ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈ ၸႃႇၶရိ၊ ဢေႃႈ။
မိူဝ်ႈၼၼ်ႉ၊ၶဝ်ၸိူဝ်းဢၼ်ယူႇၵႃႈတီႈဝဵင်း ပေႇသလႃႉ၊ ၼၼ်ႉပွႆႇၸႂ်ႉ သရေႇၸႃႇ၊ ဢိၵ်ႇတင်း ရေႇၵိမ်ႇမေႇလိၵ်ႉ၊ တင်းၵူၼ်းၶဝ်တင်းလၢႆၵႂႃႇႁႂ်ႈလႆႈႁဵတ်းတၢင်းဢၼ်သူးတွင်းယွၼ်းတၢင်းလီၵႃႈတီႈၽၢႆႇၼႃႈ ထႃႇဝရႃႉၽြႃး၊-
ဢိၵ်ႇတင်းႁႂ်ႈလႆႈလဝ်ႈထၢမ်တီႈယဵၸ်ႈပရေႃးႁဵၵ်ႈႁိူၼ်း ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ တင်းလႆႈ၊ဢိၵ်ႇတင်းပရေႃးၽႅတ်ႈၸိူဝ်းၼၼ်ႉလႄႈဝႃႈ၊ “ၼႂ်းလိူၼ်တီႈႁႃႈၼၼ်ႉၵဝ်ၶႃႈတၵ်းလႆႈႁႆႈႁွင်ႉသေလႄႈၵမ်ၵျၢင်ႉၵႅၼ်ႇၵႅၼ်ႇၶႅင်ၶႅင်မိူၼ်ၸိူဝ်ႉၼင်ႇဢၼ်ႁဵတ်းမႃးပီမိူင်းၼမ်ၼႃႇၼၼ်ႉၶႃႈႁိုဝ်း၊” ဝႃႈၼင်ႇၼႆၼၼ်ႉဢေႃႈ။
မိူဝ်ႈၼၼ်ႉၼုၵ်ႈၵပၢတ်ႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ႁွတ်ႈမႃးတီႈၵဝ်လႄႈဝႃႈၸမ်ႉ၊-
“မႂ်းလၢတ်ႈတီႈယဵၸ်ႈပရေႃးႁဵၵ်ႈတင်းလၢႆ၊ဢိၵ်ႇတင်းၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင်လႄႈဝႃႈ၊ ‘ယၢမ်းမိူဝ်ႈဢၼ်သူၵမ်တၢင်းၵိၼ်လႄႈႁွင်ႉႁႆႈပွင်ႉၶၢင်းယူႇၼႂ်းလိူၼ်တီႈႁႃႈတင်းၼႂ်းလိူၼ်တီႈၸဵတ်း၊ၸဵတ်းသိပ်းပီတဵမ်တဵမ်ၼၼ်ႉၸိုင်၊တၢင်းဢၼ်သူၵမ်တၢင်းၵိၼ်ၼၼ်ႉ၊ပဵၼ်ပုၼ်ႈၵဝ်ဢမၢၼ်ႇၶၼ်ပဵၼ်ႁိုဝ်း။-
ယၢမ်းမိူဝ်ႈဢၼ်သူၵိၼ်ၶူပ်းလႄႈသူတ်ႉဢိုၵ်ႉၼၼ်ႉ၊သူဢွၼ်ၵၼ်ၵိၼ်ၶူပ်းၸွမ်းၼင်ႇဢလူဝ်ႇသူဢမ်ႇၸႂ်ႈႁိုဝ်း။
“‘ၼႆႉပဵၼ်ဢမိင်ႉဢၼ် ထႃႇဝရႃႉၽြႃး၊ ဢဝ်တင်းပရေႃးၽႅတ်ႈမိူဝ်ႈၵွၼ်ႇဢွၼ်ၼႆႉၸိူဝ်းၼၼ်ႉသေလႄႈမွၵ်ႇလၢတ်ႈဝႆႉၼႂ်းမိူဝ်ႈဢၼ်ဝဵင်း ယေႇရုသလႅမ်ႇ၊ ယင်းမီးၽူႈမီးၵူၼ်းၼမ်ၼႃႇၵိုၼ်းၼႃႇလႆႈလီလႆႈပဵၼ်လႄႈဝဵင်းဢၼ်မီးၵႃႈတီႈလဵပ်ႈႁွပ်ႈမၼ်းတင်းလၢႆ၊ဢိၵ်ႇတင်းမိူင်းပွတ်းတၢင်းၸၢၼ်းတင်းၵႃႈတီႈတႂ်ႈ၊တီႈပၢင်ႇ၊တီႈပဵင်း၊မီးၽူႈမီးၵူၼ်းၼမ်ၵိုၼ်းၼႃႇၼၼ်ႉၸိူဝ်းၼၼ်ႉဢမ်ႇၸႂ်ႈႁိုဝ်း၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ ႁွတ်ႈမႃးတီႈ ၸႃႇၶရိ၊ လႄႈဝႃႈၸမ်ႉ၊-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉလႄႈဝႃႈ၊ “ဢွၼ်ၵၼ်ၸီႇယၢင်ႇတြႃးမႅၼ်ႈၸွမ်းၼင်ႇတြႃးတႃႉ။ ဢွၼ်ၵၼ်မီးၸႂ်ၵရုၼႃႇတၢင်းဢၼ်ဢဵတ်းလူႁၵ်ႉပႅင်းသေယဝ်ႉ၊ၵေႃႉၼိုင်ႈလႄႈၵေႃႉၼိုင်ႈႁဵတ်းၵျေးၸူးတီႈၵၼ်တႃႉ။-
ယႃႇပေၼိၵ်ႈၸၢၵ်ႈငႅၼ်းသႄးမႄႈမူၵ်းမႄႈမၢႆႈ၊ၵေႃႉဢၼ်ၽၢၼ်ပေႃႈၽၢၼ်မႄႈ၊ၵူၼ်းတၢင်ႇဝၢၼ်ႈတၢင်ႇမိူင်း၊ၵေႃႉဢၼ်ယၢၵ်ႈဢၼ်ၽၢၼ်ၸိူဝ်းၼၼ်ႉ၊ၵေႃႉၼိုင်ႈလႄႈၵေႃႉၼိုင်ႈယႃႇပေၵျၢမ်ႇပွင်တၢင်းၵျၢမ်ႇတၢင်းပွင်ဢၼ်ဢမ်ႇလီတီႈၵၼ်၊” ဝႃႈၼင်ႇၼႆသေၵေႃႈ။
ၶဝ်ယင်းဢမ်ႇမီးဢလူဝ်ႇၶႂ်ႈထွမ်ႇဢဝ်လႄႈဢွၼ်ၵၼ်ဝၢႆႇလင်ၵွင်လင်ႁဵတ်းၶတ်းႁဵတ်းတႃႉယူႇဢေႃႈ။ ဢွၼ်ၵၼ်ဢိုတ်းႁူၶဝ်ဝႆႉႁႂ်ႈၶဝ်ဢမ်ႇငိၼ်းဢေႃႈ။-
ၶဝ်ဢွၼ်ၵၼ်ႁႂ်ႈႁူဝ်ၸႂ်ၶဝ်ၵႅၼ်ႇၶႅင်မိူၼ်ၸိူဝ်ႉၼင်ႇသႅင်ၸိင်ႇၼၼ်ႉဢမ်ႇႁႂ်ႈလႆႈငိၼ်းၵႂၢမ်းတြႃး၊ဢိၵ်ႇတင်းၵႂၢမ်းဢၼ်ဝိၺိၺ်ႇ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ဢဝ်တင်းပရေႃးၽႅတ်ႈမိူဝ်ႈၵွၼ်ႇဢွၼ်ၸိူဝ်းၼၼ်ႉလၢတ်ႈဝႆႉၼၼ်ႉဢေႃႈ။ ပိူဝ်ႈၼႆလႄႈတၢင်းၸႂ်မႆႈၶႂ်ႈၸႃႉဢၼ်ႁႅင်းယႂ်ႇၼႃႇလူင်လၢင်ဢွၵ်ႇသေၵႃႈတီႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မႃးဢေႃႈ။-
“မိူၼ်ၸိူဝ်ႉၼင်ႇဢၼ်ၵဝ်ႁွင်ႉသႅၼ်ႇလႄႈၶဝ်ဢမ်ႇထွမ်ႇဢဝ်ၼၼ်ႉ၊ၶဝ်တၵ်းႁွင်ႉသႅၼ်ႇလႄႈၵဝ်ၵေႃႈတၵ်းဢမ်ႇထွမ်ႇဢမ်ႇဢဝ်လႄႈယူႇဢေႃႈ၊ဝႃႈၼင်ႇၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ။-
ၵဝ်တၵ်းဢဝ်လူမ်းၽိဝ်ႁုင်ပတ်ႉထူဝ်းဢဝ်ၶဝ်ၸၢတ်ႇပိုၼ်ပႅတ်ႈၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းဢၼ်ၶဝ်ဢမ်ႇႁုၸၵ်းၸိူဝ်းၼၼ်ႉဢေႃႈ။ ပိူဝ်ႈၼႆလႄႈမိူင်းၶဝ်ၼၼ်ႉမီးတၢင်းဢၼ်သဵတ်ႇၵူၼ်းယဵၼ်ၵူၼ်းယူႇသေလႄႈၽူႈလႂ်ဢမ်ႇၵႂႃႇဢမ်ႇမႃးၵႃႈၼႂ်းမၼ်းသေၵေႃႉသေၵူၼ်း။ ၶဝ်ႁႂ်ႈမိူင်းဢၼ်သႃႇယႃႇလီငၢမ်းၼၼ်ႉပဵၼ်တီႈဢၼ်ပဝ်ႇလၢပ်ႈႁၢမ်းဝႆႉယဝ်ႉလူင်ပႄႇ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ႁွတ်ႈမႃးတီႈၵဝ်လႄႈဝႃႈ၊-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ “ၵဝ်မီးၸႂ်ဢၼ်ႁၵ်ႉပႅင်းၶႅၼ်ဝႆႉလွႆ ၸိဢုၼ်ႇ၊ လူၺ်ႈၸႂ်ဢၼ်ႁၵ်ႉပႅင်းၶႅၼ်ဝႆႉႁႅင်းယႂ်ႇၼႃႇလူင်လၢင်ယဝ်ႉ။ ၵဝ်မီးတေႃးသႃႉတၢင်းၸႂ်မႆႈၶႂ်ႈၸႃႉႁႅင်းယႂ်ႇၼႃႇလူင်လၢင်သေလႄႈႁၵ်ႉပႅင်းၶႅၼ်မၼ်းဝႆႉယဝ်ႉ။-
ထႃႇဝရႃႉၽြႃး၊ မီးဢမိင်ႉၸမ်ႉ၊ၵဝ်ၶိုၼ်းမႃးၵႃႈတီႈလွႆ ၸိဢုၼ်ႇ၊ လႄႈၵဝ်တၵ်းယူႇၵႃႈၼႂ်းၵၢင်ဝဵင်း ယေႇရုသလႅမ်ႇ၊ ဢေႃႈ။ ဝဵင်း ယေႇရုသလႅမ်ႇ၊ တၵ်းလႆႈၶၢမ်ႇတၢင်းဢၼ်ႁွင်ႉႁဵၵ်ႈၸိုဝ်ႈဝဵင်းဢၼ်မီးသဵတ်ႈၸႃႇလႄႈ၊လွႆ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၼၼ်ႉတၵ်းလႆႈၶၢမ်ႇတၢင်းဢၼ်ႁွင်ႉၸိုဝ်ႈဝႃႈ၊လွႆဢၼ်မူတ်းၸၢင်ႇဢေႃႈ။-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ၵူၼ်းထဝ်ႈယိင်း၊ၵူၼ်းထဝ်ႈၸၢႆး၊ၶဝ်ၸိူဝ်းဢၼ်ဢသၢၵ်ႈယႂ်ႇၼႃႇလႄႈယိပ်းၵမ်ၶွၼ်ႉတဝ်ႉႁင်းၽႂ်ႁင်းမၼ်းၼၼ်ႉတၵ်းလႆႈၼင်ႈယူႇၸွမ်းသဵၼ်ႈတၢင်းဝဵင်း ယေႇရုသလႅမ်ႇ၊ ၸိူဝ်းၼၼ်ႉထႅင်ႈလူးၵွၼ်ႇဢေႃႈ။-
သဵၼ်ႈတၢင်းဝဵင်းၸိူဝ်းၼၼ်ႉၵေႃႈတၵ်းမီးတဵမ်ဝႆႉတင်းလုၵ်ႈဢွၼ်ႇၸၢႆး၊လုၵ်ႈဢွၼ်ႇယိင်း၊ဢၼ်လဵၼ်ႈၵၼ်ယဝ်ႈၵၼ်ယူႇၵႃႈၼႂ်းသဵၼ်ႈတၢင်းၸိူဝ်းၼၼ်ႉဢေႃႈ။
“ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ပိၵ်ႉသမ်ႉလွင်ႈတၢင်းၼၼ်ႉပဵၼ်ဢၼ်လီဢၢမ်းသိုဝ်ႈၼႃႈတႂ်ႈတႃၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇယူႇၵႃႈၼႂ်းၵူၼ်းမဵဝ်းၼႆႉၼႂ်းၶိင်ႇမိူဝ်ႈလဵဝ်ၼႆႉသေၵေႃႈ၊တၵ်းလႆႈပဵၼ်တီႈဢၼ်လီဢၢမ်းသိုဝ်ႈၼႃႈတႂ်ႈတႃၵဝ်ႁိုဝ်း။-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉထႅင်ႈၸမ်ႉ၊တူၺ်းလူး။ ၵဝ်တၵ်းၵႄႇသႄႇၶျွတ်ႈဢဝ်ၵူၼ်းၵဝ်တင်းလၢႆဢွၵ်ႇသေၵႃႈၼႂ်းမိူင်းၽၢႆႇဝၼ်းဢွၵ်ႇ၊ဢိၵ်ႇတင်းၵႃႈၼႂ်းမိူင်းၽၢႆႇဝၼ်းတူၵ်းၸိူဝ်းၼၼ်ႉမႃးလႄႈ၊-
တၵ်းဢဝ်ၶဝ်မႃးယူႇၵႃႈၼႂ်းၵၢင်ဝဵင်း ယေႇရုသလႅမ်ႇ၊ ဢေႃႈ။ ၶဝ်ၼၼ်ႉတၵ်းပဵၼ်ၵူၼ်းၵဝ်လႄႈၵဝ်ၵေႃႈတၵ်းပဵၼ်ၽြႃးပဵၼ်ၸဝ်ႈၶဝ်ၸွမ်းလူၺ်ႈတြႃးသဵတ်ႈၸႃႇ ဢိၵ်ႇတင်းတြႃးတၢင်းဢၼ်သိုဝ်ႈတေႃႇဢေႃႈ။”
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ “မိူဝ်ႈလဵဝ်ၼႆႉသူၸိူဝ်းဢၼ်ငိၼ်းၵႂၢမ်းၼႆႉ ဢၼ်ပဵၼ်ၵႂၢမ်းပရေႃးၽႅတ်ႈတင်းလၢႆဢၼ်မီးၼႂ်းၶိင်ႇမိူဝ်ႈဢၼ်ၶျႃးငဝ်ႈႁၢၵ်ႈတိူၵ်ႈႁိူၼ်း ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ႁႂ်ႈလႆႈတႄႇႁဵတ်းၵျွင်းပိၵ်ႈမၢၼ်ႇၸဝ်ႈၼၼ်ႉဢွၼ်ၵၼ်ႁႂ်ႈမိုဝ်းသူႁႅင်းယႂ်ႇတႃႉ။-
မိူဝ်ႈဢွၼ်တၢင်းဢမ်ႇမီးၵႃႈၸၢင်ႈဢၼ်ၵူၼ်းလႆႈၶၢမ်ႇဢဝ်။ ဢမ်ႇမီးၵႃႈၸၢင်ႈပုၼ်ႈတႃႇတရိၵ်ႈသၢၼ်ႇ။ ၶဝ်ၸိူဝ်းဢၼ်ၶဝ်ႈၶဝ်ႈဢွၵ်ႇဢွၵ်ႇၼၼ်ႉ၊ဢမ်ႇလႆႈၵတ်းယဵၼ်ၶျၢမ်းသႃႇၵွပ်ႈပိူဝ်ႈမီးရၢၼ်ႇသူႇၼၼ်ႉယဝ်ႉ။ ၵဝ်ၼႆႉႁႂ်ႈၵူၼ်းတင်းသဵင်ႈတင်းလူင်ၵေႃႉၼိုင်ႈလႄႈၵေႃႉၼိုင်ႈၽိတ်းၵၼ်ပဵၼ်ရၢၼ်ႇသူႇၵၼ်ဢေႃႈ။-
တေႃႇလဵဝ်ၼႆႉၸမ်ႉ၊ၵဝ်တၵ်းဢမ်ႇႁဵတ်းတီႈၵူၼ်းဢၼ်ယင်းၵိုတ်းယင်းၵျၢၼ်ႇၸိူဝ်းၼႆႉမိူၼ်ၸိူဝ်ႉၼင်ႇၵမ်းဢွၼ်တၢင်းၼၼ်ႉယဝ်ႉ။ ဝႃႈၼင်ႇၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ။-
ၶဝ်တၵ်းလႆႈဝၢၼ်ႇၸိူဝ်ႉဝၢၼ်ႇၽၼ်းၼိမ်ၼိမ်လီလီလႄႈတူၼ်ႈၶိူဝ်းမၢၵ်ႇၸပိတ်ႉတၵ်းလႆႈပၼ်မွၵ်ႇမၼ်းမၢၵ်ႇမၼ်းဢေႃႈ။ လိၼ်တၵ်းလႆႈပၼ်မၢၵ်ႇမၼ်းႁူင်းမၼ်းလႄႈၽႃႉၵၢင်ႁၢဝ်တၵ်းလႆႈပၼ်ၼမ်ႉၼၢႆးမၼ်းဢေႃႈ။ ၵဝ်တၵ်းႁဵတ်းႁႂ်ႈၵူၼ်းမဵဝ်းၼႆႉဢၼ်ယင်းၵိုတ်းယင်းၵျၢၼ်ႇဝႆႉၸိူဝ်းၼႆႉလႆႈၶၢမ်ႇဢမူၺ်ႇလွင်ႈတၢင်းၸိူဝ်းၼႆႉဢေႃႈ။-
ၸိူဝ်ႉၶိူဝ်း ယုတႃႉ၊ ဢိၵ်ႇတင်းၸိူဝ်ႉၶိူဝ်း ဢိသရေး၊ ၶဝ်႟။ မိူၼ်ၸိူဝ်ႉၼင်ႇဢၼ်သူလႆႈၶၢမ်ႇတၢင်းဢၼ်ၵိၼ်ႇလႃႇၵႃႈၼႂ်းၵူၼ်းတၢင်ႇၸိူဝ်ႉတၢင်ႇမဵဝ်းတင်းလၢႆၼၼ်ႉ၊ၵဝ်တၵ်းၵႄႇသႄႇၶျွတ်ႈဢဝ်သူလႄႈသူတၵ်းလႆႈပဵၼ်တူဝ်မၢင်ႇၵလႃႇတၢင်းလီဢေႃႈ။ ယင်းဢမ်ႇမီးတၢင်းဢၼ်ၵူဝ်ႁႄလႄႈဢွၼ်ၵၼ်မီးတၢင်းဢၼ်ႁႅင်းမိုဝ်းယႂ်ႇတႃႉ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ “မိူၼ်ၸိူဝ်ႉၼင်ႇဢၼ်ၵဝ်ၵျၢမ်ႇပွင်တၵ်းပၼ်တၢမ်ႇတီႈသူၼႂ်းမိူဝ်ႈဢၼ်ပူႇသူမွၼ်ႇသူတိုၵ်းယူင်းတၢင်းၸႂ်မႆႈၶႂ်ႈၸႃႉၵဝ်ၼၼ်ႉ၊ၵဝ်ဢမ်ႇလႆႈလႅၵ်ႈလၢႆႈတၢင်းၵျၢမ်ႇတၢင်းပွင်ၵဝ်ၼၼ်ႉ၊-
ၼႂ်းၶိင်ႇမိူဝ်ႈလဵဝ်ၼႆႉၵဝ်သမ်ႉၶိုၼ်းၵျၢမ်ႇပွင်တၵ်းႁဵတ်းၵျေးၸူးတီႈဝဵင်း ယေႇရုသလႅမ်ႇ၊ ဢိၵ်ႇတင်းၸိူဝ်ႉၶိူဝ်း ယုတႃႉ၊ ဢေႃႈ။ ယႃႇပေမီးတၢင်းဢၼ်ၵူဝ်ႁႄဝႃႈၼင်ႇၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ။-
တၢင်းၵမ်တၢင်းၵျၢင်ႉဢၼ်သူတၵ်းလႆႈၵမ်ၵျၢင်ႉၸမ်ႉ၊သူၵႃႈမီးၵေႃႉၼိုင်ႈလႄႈၵေႃႉၼိုင်ႈ လၢတ်ႈၵႂၢမ်းဢၼ်ၸိုဝ်ႈဢၼ်ၸႂ်ႈတေႃႇၵၼ်တႃႉ၊ဢွၼ်ၵၼ်ႁဵတ်းတၢင်းဢၼ်ၸီႇယၢင်ႇသိုဝ်ႈသိုဝ်ႈတေႃႇတေႃႇၼႂ်းတၢင်းဢၼ်မီးဢမုတီႈၵၼ်ၵႃႈတီႈလုမ်းၽၵ်းတူဝဵင်းသူတင်းလၢႆတႃႉ။-
ၵေႃႉၼိုင်ႈလႄႈၵေႃႉၼိုင်ႈ ယႃႇပေၵျၢမ်ႇပွင်တၢင်းၵျၢမ်ႇတၢင်းပွင်ဢၼ်ဢမ်ႇလီတီႈၵၼ်။ ယႃႇပေဢွၼ်ၵၼ်ထုၵ်ႇၸႂ်ၵျိူၵ်ႈၸႂ်တၢင်းဢၼ်တိူင်ႇဝႃႈၵတိဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉ။ ၵဝ်ၸင်းလွင်ႈတၢင်းၵႃႈဢၼ်မီးၸိူဝ်ႉၼင်ႇၼၼ်၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ၼုၵ်ႈၵပၢတ်ႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ႁွတ်ႈမႃးတီႈၵဝ်လႄႈဝႃႈ၊-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ “တၢင်းဢၼ်ၵမ်တၢင်းၵိၼ်ၼႂ်းလိူၼ်တီႈသီႇ၊တၢင်းဢၼ်ၵမ်တၢင်းၵိၼ်ၼႂ်းလိူၼ်တီႈႁႃႈ၊တၢင်းဢၼ်ၵမ်တၢင်းၵိၼ်ၼႂ်းလိူၼ်တီႈၸဵတ်းတၢင်းဢၼ်ၵမ်တၢင်းၵိၼ်ၼႂ်းလိူၼ်တီႈသိပ်းၸိူဝ်းၼၼ်ႉတၵ်းပဵၼ်ၶိင်ႇမိူဝ်ႈဢၼ်ၸိူဝ်ႉၶိူဝ်း ယုတႃႉ၊ ၸူမ်းသိူဝ်းသႂၢင်ႇၸႂ်လႄႈႁဵတ်းပွႆးဢၼ်မူၼ်ႈပျေႃႇဢေႃႈ။ ပိူဝ်ႈၼႆလႄႈဢွၼ်ၵၼ်ထုၵ်ႇၸႂ်ၵျိူၵ်ႈၸႂ်တၢင်းဢၼ်သိုဝ်ႈတေႃႇ၊တၢင်းဢၼ်တဵတ်ႇလီၼိမ်လီတႃႉ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉထႅင်ႈၸမ်ႉ၊ “မဵဝ်းၵူၼ်းတင်းလၢႆ၊ဢိၵ်ႇတင်းၵူၼ်းၵႃႈၼႂ်းဝဵင်းၼမ်ၼႃႇတၵ်းဢွၼ်ၵၼ်မႃးဢေႃႈ။-
ၵူၼ်းဢၼ်ယူႇၵႃႈၼႂ်းဝဵင်း၊ဝဵင်းၼိုင်ႈတၵ်းဢွၵ်ႇၵႂႃႇၸူးၵႃႈတီႈၶဝ်ၸိူဝ်းဢၼ်ယူႇၵႃႈၼႂ်းဝဵင်းတၢင်ႇတီႈတၢင်ႇဝဵင်းလႄႈႁွင်ႉၸူဝ်းၵၼ်လႄႈဝႃႈ၊ ‘ဢွၼ်ၵၼ်ၼႅတ်ႈၵႂႃႇႁႂ်ႈလႆႈႁႃဢဝ် ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ လႄႈယွၼ်းႁႂ်ႈမၼ်းၸဝ်ႈပၼ်တၢင်းလီတႃႉႁဝ်း။ ၵဝ်ၵေႃႈတၵ်းၵႂႃႇဢေႃႈ၊’ ဝႃႈၼင်ႇၼႆဢေႃႈ။-
မဵဝ်းၵူၼ်းၼမ်ၼႃႇ၊ဢိၵ်ႇတင်းၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ႁႅင်းယႂ်ႇၼႃႇၸိူဝ်းၼၼ်ႉတၵ်းဢွၼ်ၵၼ်မႃးႁႂ်ႈလႆႈႁႃဢဝ် ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၵႃႈၼႂ်းဝဵင်း ယေႇရုသလႅမ်ႇ၊ လႄႈသူးတွင်းယွၼ်းၶၢမ်ႇဢဝ်ၵျေးၸူးတီႈ ထႃႇဝရႃႉၽြႃး၊ ဢေႃႈ။-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ၼႂ်းမိုဝ်ႉဝၼ်းၼၼ်ႉၵူၼ်းသိပ်းၵေႃႉၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းဢၼ်ၸၢင်ႈလၢတ်ႈၵႂၢမ်းၽႃႇသႃႇႁင်းၽႂ်ႁင်းမၼ်းၸိူဝ်းၼၼ်ႉတၵ်းဢွၼ်ၵၼ်ယိပ်းၵမ်ၸဵင်ႇၶူဝ်းၼုင်ႈၵေႃႉဢၼ်ပဵၼ်ၵူၼ်း ယုတႃႉ၊ ၼၼ်ႉယူႇသေလႄႈလၢတ်ႈဝႃႈ၊ ‘ၵွပ်ႈပိူဝ်ႈႁဝ်းၶႃႈလႆႈႁုလႆႈငိၼ်းလွင်ႈဢၼ်ၽြႃးပဵၼ်ၸဝ်ႈမီးယူႇလူၺ်ႈၵၼ်တင်းသူၸဝ်ႈလႄႈႁဝ်းၶႃႈယွၼ်းၸွမ်းလူၺ်ႈၵၼ်တင်းသူၸဝ်ႈၶႃႈဢေႃႈ၊’ ဝႃႈၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈပျႃႇတိၵ်ႈ ထႃႇဝရႃႉၽြႃး၊ ဢၼ်မီးတၢင်းၸီႇယၢင်ႇတူၵ်းႁွတ်ႈၵႃႈၼိူဝ်မိူင်း ႁႃႇတရၵ်ႉ၊ လႄႈတၵ်းတႄႇသဝ်းၵႃႈၼိူဝ်ဝဵင်း တမ်ႇမတ်ႉသၵတ်ႉ၊ ဢေႃႈ။ လွင်ႈမၼ်းၸမ်ႉ၊ ထႃႇဝရႃႉၽြႃး၊ ပိူင်ႇဝဵင်းလူင် ဢႃႇရမ်ႇ၊ ဢိၵ်ႇတင်းၸိူဝ်ႉၶိူဝ်း ဢိသရေး၊ ၵူႈၸိူဝ်ႉၶိူဝ်းဢေႃႈ။-
မိူင်း ႁႃႇမတ်ႉ၊ ဢၼ်ၸပ်းၵၼ်ၸမ်ၵၼ်တင်းမိူင်း ႁႃႇတရတ်ႉ၊ ၼၼ်ႉဢိၵ်ႇတင်းဝဵင်း တုရု၊ တင်းဝဵင်း ၸိတုမ်ႇ၊ ဢၼ်လၵ်းလႅမ်ၼႃႇၼၼ်ႉၵေႃႈမၼ်းၸဝ်ႈပိူင်ႇဢေႃႈ။-
ပိၵ်ႉသမ်ႉဝဵင်း တုရု၊ ၼၼ်ႉတႄႇႁဵတ်းတိူၵ်ႈတီႈတိုၵ်းသိုၵ်းဝႆႉပုၼ်ႈမၼ်းလႄႈဢဝ်ငိုၼ်းၵွင်ဝႆႉမိူၼ်ၸိူဝ်ႉၼင်ႇမုၼ်ႈလိၼ်လႄႈဢဝ်ၶမ်းလွတ်ႈငၢၼ်ႇၵွင်ဝႆႉမိူၼ်ၸိူဝ်ႉၼင်ႇၵူမ်ႇဢၼ်မီးၵႃႈၼႂ်းသဵၼ်ႈတၢင်းၼၼ်ႉသေၵေႃႈ၊-
ထႃႇဝရႃႉၽြႃး၊ တၵ်းဢဝ်ၵႃႈဢၼ်မၼ်းပိူင်ႇၼၼ်ႉၵႂႃႇပႅတ်ႈသေလႄႈတၵ်းဢဝ်တၢင်းဢၼ်မၢၵ်ႈမီးလီပဵၼ်မၼ်းၼၼ်ႉၶျႃးတူၵ်းပႅတ်ႈၵႃႈၼႂ်းပၢင်ႇလၢႆႇသေယဝ်ႉ၊ဝဵင်းၼႆႉၽႆးတၵ်းမႆႈပႅတ်ႈမူတ်းဢေႃႈ။
ဝဵင်း ဢႃႇသၵေႇလုၼ်ႇ၊ တၵ်းႁၼ်လွင်ႈတၢင်းၼၼ်ႉလႄႈၵူဝ်ႁႄဢေႃႈ။ ဝဵင်း ၵႃႇၸႃႉ၊ တၵ်းႁၼ်လႄႈသၼ်ႇသၢႆၼႃႇလူင်လၢင်ဢေႃႈ။ ဝဵင်း ဢေႇၵရုၼ်ႇ၊ ၵေႃႈတၵ်းပဵၼ်မိူၼ်ၸိူဝ်ႉၼင်ႇၼၼ်ၵွပ်ႈပိူဝ်ႈဢၼ်တၢင်းဢၼ်မၼ်းမုင်ႈမွင်းၼၼ်ႉပဵၼ်တၢင်းဢၼ်ဢူၵ်းဢၢႆၵႂႃႇၼၼ်ႉဢေႃႈ။ ၶုၼ်လူင်တၵ်းလုသုမ်းၵႃႈတီႈဝဵင်း ၵႃႇၸႃႉ၊ လႄႈဝဵင်း ဢႃႇသၵေႇလုၼ်ႇ၊ ၵေႃႈတၵ်းပဵၼ်တီႈဢၼ်သဵတ်ႇၵူၼ်းယဵၼ်ၵူၼ်းဢေႃႈ။-
ၵူၼ်းတၢင်ႇဝၢၼ်ႈတၢင်ႇမိူင်းတၵ်းဢွၼ်ၵၼ်ယူႇၵႃႈၼႂ်းဝဵင်း ဢႃႇၸုတ်ႉ၊ လႄႈၵဝ်တၵ်းပႄႇၽဵဝ်ႈမႃႇၼႃႉၸႂ်သုင်ၵူၼ်းမဵဝ်း ၽိလိတ်ႉတိ၊ ပႅတ်ႈဢေႃႈ။-
ၵဝ်တၵ်းၼုၵ်ႈဢဝ်လိူတ်ႈဢၼ်ၶဝ်ၵိၼ်ၼၼ်ႉဢွၵ်ႇသေၵႃႈၼႂ်းသူပ်းၶဝ်၊ဢိၵ်ႇတင်းလွင်ႈတၢင်းဢၼ်လီႁင်ႈဢဵတ်ႇသဵတ်ႇဢၼ်ၶဝ်ၶူပ်းၵိၼ်ၼၼ်ႉဢွၵ်ႇသေၵႃႈၼႂ်းၵႄႈၶဵဝ်ႈၶဝ်ပႅတ်ႈဢေႃႈ။ ၵေႃႉဢၼ်ၵိုတ်းဢၼ်ၵျၢၼ်ႇၵေႃႈ၊တၵ်းၵိုတ်းၵျၢၼ်ႇပုၼ်ႈၽြႃးပဵၼ်ၸဝ်ႈႁဝ်းလႄႈယူႇမိူၼ်ၸိူဝ်ႉၼင်ႇၶိူဝ်းႁိူၼ်းၼိုင်ႈၵႃႈၼႂ်းမိူင်း ယုတႃႉ၊ ၼၼ်ႉဢေႃႈ။ ၵူၼ်းဝဵင်း ဢေႇၵရုၼ်ႇ၊ ၵေႃႈတၵ်းပဵၼ်ၸိူဝ်ႉၼင်ႇၵူၼ်းမဵဝ်း ယေႇပုသိ၊ ဢေႃႈ။-
ၵဝ်တၵ်းၶျႃးတပ်ႉယူႇၵႃႈတီႈလဵပ်ႈႁွပ်ႈႁိူၼ်းၵဝ်ယူႇၽၢႆႇၼိုင်ႈတင်းတပ်ႉရၢၼ်ႇသူႇ ႁႂ်ႈၽူႈလႂ်ထၢၼ်ႈပေႃးဢမ်ႇလႆႈၶဝ်ႈလႆႈဢွၵ်ႇဢေႃႈ။ ၵေႃႉဢၼ်ၼိၵ်ႈၸၢၵ်ႈငႅၼ်းသႄးၼၼ်ႉၵမ်းလိုၼ်းဢမ်ႇလႆႈလႄႇၵႂႃႇလႄႇမႃးၵႃႈၼႂ်းၶဝ်ၼၼ်ႉ။ လွင်ႈမၼ်းၸမ်ႉ၊မိူဝ်ႈလဵဝ်ၼႆႉၵဝ်ပႂ်ႉတူၺ်းၶဝ်ယူႇဢေႃႈ။
လုၵ်ႈယိင်း ၸိဢုၼ်ႇ၊ ႟။ မီးတၢင်းဢၼ်ၸူမ်းသိူဝ်းၼႃႇလူင်လၢင်တႃႉ။ လုၵ်ႈယိင်းဝဵင်း ယေႇရုသလႅမ်ႇ၊ ႟။ ႁွင်ႉပၢဝ်ႇႁွင်ႉသေႃႇတႃႉ။ တူၺ်းလူး။ ၶုၼ်ႁေႃၶမ်းမႂ်းဢၼ်ဝႃႈ၊ၸဝ်ႈဢၼ်ပႄႉၼႅင်ႇဢၼ်ဢွင်ႇမႅင်ႇၼၼ်ႉ၊ မီးတင်းၸႂ်ဢၼ်ဢူၼ်ႈဢၼ်ဢွၼ်ႇၶီႇမႃႉလီႈတင်းမႃႉလီႈဢွၼ်ႇသေလႄႈမႃးၸူးၵႃႈတီႈမႂ်းဢေႃႈ။
ၵဝ်တၵ်းပႄႇၽဵဝ်ႈလေႃႉမႃႉသိုၵ်းပႅတ်ႈသေၵႃႈၼႂ်းမိူင်း ဢေႇၽရိမ်ႇ၊ ဢိၵ်ႇတင်းမႃႉပႅတ်ႈသေၵႃႈၼႂ်းဝဵင်း ယေႇရုသလႅမ်ႇ၊ ဢေႃႈ။ ၵၢင်ႇတိုၵ်းသိုၵ်းၵေႃႈတၵ်းလႆႈၶၢမ်ႇတၢင်းဢၼ်ပႄႇၽဵဝ်ႈပႅတ်ႈဢေႃႈ။ ၸဝ်ႈၼၼ်ႉတၵ်းမီးဢမိင်ႉႁႂ်ႈၵူၼ်းတၢင်ႇၸိူဝ်ႉတၢင်ႇမဵဝ်းတင်းလၢႆလႆႈထၢတ်ႇသိုၵ်းယဵၼ်သိုၵ်းဢေႃႈ။ ဢႃႇၼႃႇၸဝ်ႈတၵ်းတႄႇယူႇၸႃႉဢဝ်ၵႃႈတီႈပၢင်ႇလၢႆႇမႄႈၼိုင်ႈတေႃႇထိုင်ႁွတ်ႈပၢင်ႇလၢႆႇမႄႈၼိုင်ႈ၊ ဢိၵ်ႇတင်းဢဝ်ၵႃႈတီႈၼမ်ႉမႄႈလူင်တေႃႇထိုင်ႁွတ်ႈႁိမ်းလႅၼ်သုတ်းလိၼ်မိူင်းဢေႃႈ။
ပုၼ်ႈတႃႇမႂ်းၸမ်ႉ၊ၵဝ်တၵ်းဢဝ်ၵူၼ်းမႂ်းဢၼ်လႆႈၶၢမ်ႇတၢင်းဢၼ်ၶျုၵ်ႈဝႆႉယူႇၸိူဝ်းၼၼ်ႉ၊ ပွႆႇဢွၵ်ႇသေၵႃႈၼႂ်းႁူးလိၼ်တီႈဢၼ်ဢမ်ႇမီးၼမ်ႉၼၼ်ႉၵႂႃႇၵွပ်ႈပိူဝ်ႈလိူတ်ႈပတိၺိၺ်ႇဢၼ်ၵဝ်ႁဵတ်းလူၺ်ႈၵၼ်တင်းမႂ်းၼၼ်ႉဢေႃႈ။
သူၸိူဝ်းဢၼ်လႆႈၶၢမ်ႇတၢင်းဢၼ်ၶျုၵ်ႈဝႆႉလႄႈမီးတၢင်းမုင်ႈမွင်းၶဝ်႟။ ဢွၼ်ၵၼ်ၶိုၼ်းမႃးၸူးၵႃႈတီႈတိူၵ်ႈတီႈတိုၵ်းသိုၵ်းတႃႉ။ ၵဝ်လၢတ်ႈၸႃႉၸဵမ်ဝၼ်းမိူဝ်ႈၼႆႉဝႆႉလႄႈဝႃႈ၊ၵဝ်တၵ်းႁဵတ်းၵျေးၸူးသွင်ပုၼ်ႈတီႈမႂ်းလူးၵွၼ်ႇဢေႃႈ၊ဝႃႈၼင်ႇၼႆဢေႃႈ။
ၵဝ်တၵ်းသုင်းတိုဝ်းမိူင်း ယုတႃႉ၊ မိူၼ်ၸိူဝ်ႉၼင်ႇၵၢင်ႇလႄႈ တၵ်းႁႂ်ႈမိူင်း ဢေႇၽရိမ်ႇ၊ ပဵၼ်ၸိူဝ်ႉၼင်ႇပိုၼ်ၵၢင်ႇဢေႃႈ။ ၸိဢုၼ်ႇ၊ ႟။ ၵဝ်တၵ်းတိုၵ်းယူင်းၵူၼ်းမႂ်းတင်းလၢႆယူႇၽၢႆႇၼိုင်ႈတင်းၵူၼ်း ၵရိၵ်ႉ၊ တင်းလၢႆလႄႈ ႁႂ်ႈမႂ်းပဵၼ်ၸိူဝ်ႉၼင်ႇလၢပ်ႇလႅဝ်းၵူၼ်းသိုၵ်းဢၼ်ႁႅင်းယႂ်ႇၼႃႇၼၼ်ႉဢေႃႈ။
ထႃႇဝရႃႉၽြႃး၊ တၵ်းထၢင်ႇသႃးပေႃႇမႃးၵႃႈၼိူဝ်ၶဝ်လႄႈ ပိုၼ်မၼ်းၸဝ်ႈၸိူဝ်းၼၼ်ႉပုင်ႈဢွၵ်ႇၵႂႃႇမိူၼ်ၸိူဝ်ႉၼင်ႇၽႃႉမႅပ်ႈၼၼ်ႉဢေႃႈ။ ၸဝ်ႈပူဝ်ႇပႃႇၵၢင်ႁၢဝ်၊ၸဝ်ႈထႃႇဝရႃႉၽြႃး၊ ၼၼ်ႉတၵ်းပဝ်ႇၼႄးၶရႃႇလႄႈၵျွဢွၵ်ႇၵႂႃႇလူၺ်ႈၵၼ်တင်းလူမ်းၽိဝ်ႁုင်ၽၢႆႇတၢင်းၸၢၼ်းဢေႃႈ။
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ တၵ်းၵႅတ်ႇၶႄႁႄႉၵင်ႈၶဝ်ဝႆႉလႄႈ ၶဝ်ၼၼ်ႉတၵ်းဢွၼ်ၵၼ်ပႄႉၼႅင်ႇသေယဝ်ႉ၊ယဵပ်ႇယမ်ႈမၢၵ်ႇႁိၼ်ဢၼ်ပိူၼ်ႈထိမ်ႈပိူၼ်ႈသိုင်းၸိူဝ်းၼၼ်ႉဢေႃႈ။ ၶဝ်ၼၼ်ႉတၵ်းဢွၼ်ၵၼ်သူတ်ႉၵိၼ်လိူတ်ႈမိူၼ်ၸိူဝ်ႉၼင်ႇသူတ်ႉၵိၼ်ၼမ်ႉမၢၵ်ႇၸပိတ်ႉလႄႈ တၵ်းမီးတၢင်းဢၼ်ဢိမ်ႇတဵမ်ဝႆႉမိူၼ်ၸိူဝ်ႉၼင်ႇမေႃႈလူင်၊ဢိၵ်ႇတင်းယမ်းၸိူဝ်ႉၼင်ႇၸဵင်ႇၶဵင်ႇတၢင်းလူႇၼၼ်ႉဢေႃႈ။
ၼႂ်းမိုဝ်ႉဝၼ်းၼၼ်ႉ၊ ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်တၵ်းၵႄႇသႄႇၶျွတ်ႈဢဝ်ၶဝ်ၼၼ်ႉ၊ မိူၼ်ၸိူဝ်ႉၼင်ႇၽုင်သူဝ်းဢၼ်ဝႃႈ၊ၵူၼ်းမၼ်းၸဝ်ႈတင်းလၢႆၼၼ်ႉဢေႃႈ။ ၶဝ်ၼၼ်ႉတၵ်းပဵၼ်ၸိူဝ်ႉၼင်ႇသႅင်လီသႅင်မျၢတ်ႈၵႃႈတီႈသရၽူႇဢၼ်ထၢင်ႇသႃးႁူင်ႁၢင်းၵႃႈၼႂ်းဝၢၼ်ႈမိူင်းၸဝ်ႈဢေႃႈ။
ၵျေးၸူးမၼ်းၸဝ်ႈၼၼ်ႉဢိၵ်ႇတင်းမုၼ်သရေႇမၼ်းၸဝ်ႈၼၼ်ႉယႂ်ႇၼႃႇလူင်လၢင်လူင်ပႄႇ။ ၶဝ်ႈပိူၵ်ႇၶဝ်ႈသၢၼ်တၵ်းႁဵတ်းႁႂ်ႈၵူၼ်းၼုမ်ႇၵူၼ်းၵမ်ယႂ်ႇမႃးသုင်မႃးလႄႈ ၼမ်ႉမၢၵ်ႇၸပိတ်ႉဢၼ်မႂ်ႇတၵ်းႁဵတ်းႁႂ်ႈမႄႈယိင်းသၢဝ်ၶိုၼ်ႈယႂ်ႇႁၢင်ႈလီဢေႃႈ။
ဢွၼ်ၵၼ်သူးတွင်းယွၼ်းဢဝ်တီႈ ထႃႇဝရႃႉၽြႃး၊ ႁႂ်ႈၽူၼ်တူၵ်းၼႂ်းၶိင်ႇဢၼ်ၽူၼ်ႁၢင်ပီတူၵ်းၼၼ်ႉတႃႉ။ ထႃႇဝရႃႉၽြႃး၊ ပွင်မႄးပွင်ႁဵတ်းၽႃႉၽူၼ်လႄႈႁႂ်ႈႁႃႇၽူၼ်တူၵ်းသေယဝ်ႉ၊ႁႂ်ႈတူၼ်ႈယိူဝ်ႈတူၼ်ႈယႃႈဢွၵ်ႇမႃးၵႃႈတီႈပၢင်ႇတူင်ႈၼႃးပုၼ်ႈၵူၼ်းတင်းသဵင်ႈတင်းလူင်ဢေႃႈ။-
ႁုၼ်ႇႁၢင်ႈသၢင်းထု တေႇရၽိမ်း၊ ၸိူဝ်းၼၼ်ႉလၢတ်ႈၵႂၢမ်းဢၼ်ဢမ်ႇပွင်ႇလွင်ႈၵႃႈသင်လႄႈၶဝ်ၸိူဝ်းဢၼ်ႁဵတ်းသြႃႇပေႇတၢင်ႇၼၼ်ႉႁၼ်လွင်ႈတၢင်းဢၼ်ပႅတ်ႉလႅၼ်ဢေႃႈ။ ၶဝ်ၸိူဝ်းဢၼ်ၼွၼ်းၽၼ်ႁၼ်ၼၼ်ႉၼွၼ်းၽၼ်ႁၼ်ဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉဢေႃႈ။ ၶဝ်ဢဝ်တင်းၵႂၢမ်းဢၼ်ပဵၼ်လူမ်းပဵၼ်လႅင်ႉၼၼ်ႉပၼ်ႁႅင်းၸႂ်ၵူၺ်းဢေႃႈ။ ပိူဝ်ႈၼႆလႄႈၵူၼ်းတင်းလၢႆၵႂႃႇမႃးမိူၼ်ၸိူဝ်ႉၼင်ႇမုၵ်ႉသူဝ်းၽုင်သူဝ်းၼၼ်ႉလႄႈၶၢမ်ႇတုၵ်ႉၶႃႉတၢင်းၽၢၼ်ၵွပ်ႈပိူဝ်ႈဢၼ်ဢမ်ႇမီးၵေႃႉဢၼ်လဵင်ႉသူဝ်းထိင်းသူဝ်းၼၼ်ႉဢေႃႈ။
ၵဝ်တၵ်းၸႂ်မႆႈၶႂ်ႈၸႃႉတေႃႇၶဝ်ၸိူဝ်းဢၼ်လဵင်ႉသူဝ်းထိင်းသူဝ်းၼၼ်ႉလႄႈပၼ်တၢမ်ႇတီႈၵူၼ်းဢွၼ်ႁူဝ် ၶဝ်တင်းလၢႆဢေႃႈ။ လွင်ႈမၼ်းၸမ်ႉ၊ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မႃးလူမႃးတူၺ်းၽုင်သူဝ်းမၼ်းၸဝ်ႈၸိူဝ်ႉၶိူဝ်း ယုတႃႉ၊ ၼၼ်ႉလႄႈႁႂ်ႈၶဝ်ပဵၼ်ၸိူဝ်ႉၼင်ႇမႃႉတိုၵ်းသိုၵ်းဢၼ်ပႃးဢဝ်မုၼ်ၽုင်းၸဝ်ႈၼၼ်ႉဢေႃႈ။-
ၵႃႈၼႂ်းၸိူဝ်ႉၶိူဝ်းၶဝ်ၼၼ်ႉ၊ၵူၼ်းဢၼ်ဢုပ်ႉပိူင်ႇ၊ၵူၼ်းဢၼ်ဢွၼ်ႁူဝ်ဢွၼ်ၼႃႈ၊ၵူၼ်းဢၼ်ပဵၼ်ၶုၼ်ပဵၼ်ၵွၼ်း၊ၵႃႈမီးတၵ်းပေႃႇဢွၵ်ႇမႃးဢေႃႈ ။-
ၶဝ်ၼၼ်ႉ၊တၵ်းပဵၼ်ၸိူဝ်ႉၼင်ႇၵူၼ်းသိုၵ်းဢၼ်ႁႅင်းယႂ်ႇၼႃႇဢၼ်ယဵပ်ႇယမ်ႈရၢၼ်ႇသူႇၵႃႈၼႂ်းၵူမ်ႇၵႃႈတီႈသဵၼ်ႈတၢင်းတီႈဢၼ်တိုၵ်းသိုၵ်းၼၼ်ႉဢေႃႈ။ ၶဝ်တၵ်းတိုၵ်းသိုၵ်းတိုၵ်းသိူဝ်ၵွပ်ႈပိူဝ်ႈဢၼ် ထႃႇဝရႃႉၽြႃး၊ မီးယူႇလူၺ်ႈၵၼ်တင်းၶဝ်ၼၼ်ႉလႄႈႁႂ်ႈၵူၼ်းသိုၵ်းၶီႇမႃႉရၢၼ်ႇသူႇၶဝ်တင်းလၢႆဢူၵ်းဢၢႆဢေႃႈ။
ၵဝ်တၵ်းႁႂ်ႈၵူၼ်းၸိူဝ်ႉၶိူဝ်း ယုတႃႉ၊ မၼ်ႈၶိူင်ႇလႄႈၵႄႇသႄႇၶျွတ်ႈဢဝ်ၵူၼ်းၸိူဝ်ႉၶိူဝ်း ယူဝ်းသႅပ်ႈ၊ ဢေႃႈ။ ၵွပ်ႈပိူဝ်ႈဢၼ်ၵဝ်ဢဵတ်းလူႁၵ်ႉပႅင်းၶဝ်လႄႈၵဝ်တၵ်းဢဝ်ၶဝ်ၶိုၼ်းပွၵ်ႈမႃးဢေႃႈ။ ၶဝ်ၼၼ်ႉတၵ်းပဵၼ်ၸိူဝ်ႉၼင်ႇဢၼ်ၵဝ်ဢမ်ႇတွၼ်ႉႁေႃႈၶဝ်ဢွၵ်ႇပႅတ်ႈၼၼ်ႉဢေႃႈ။ ၵဝ်ပဵၼ် ထႃႇဝရႃႉၽြႃး၊ ၽြႃးပဵၼ်ၸဝ်ႈၶဝ်လႄႈထွမ်ႇဢဝ်ၵႂၢမ်းၶဝ်ဢေႃႈ။
ၵူၼ်းမဵဝ်း ဢေႇၽရိမ်ႇ၊ ၸိူဝ်းၼၼ်ႉတၵ်းပဵၼ်ၸိူဝ်ႉၼင်ႇၵူၼ်းသိုၵ်းဢၼ်ႁႅင်းယႂ်ႇၼႃႇလႄႈ ႁူဝ်ၸႂ်ၶဝ်တၵ်းၸူမ်းသိူဝ်းမိူၼ်ၸိူဝ်ႉၼင်ႇၵေႃႉဢၼ်ဢိမ်ႇတဵမ်ဝႆႉတင်းၼမ်ႉမၢၵ်ႇၸပိတ်ႉၼၼ်ႉဢေႃႈ။ လုၵ်ႈၶဝ်လၢၼ်ၶဝ်ၼၼ်ႉတၵ်းႁၼ်သေယဝ်ႉ၊မူၼ်ႈပျေႃႇလႄႈ ႁူဝ်ၸႂ်ၶဝ်သိူဝ်းသႂၢင်ႇယူႇၼႂ်း ထႃႇဝရႃႉၽြႃး၊ ဢေႃႈ။
ၵဝ်တၵ်းၵဵဝ်ႈသဵင်ၵဝ်ၵႂႃႇၸူးတီႈၶဝ်လႄႈႁႂ်ႈၶဝ်ၸုၵၼ်တုမ်ၵၼ်ဢေႃႈ။ ၵွပ်ႈပိူဝ်ႈဢၼ်ၵဝ်ထုတ်ႇၼုၵ်ႈဢဝ်ၶဝ်ယဝ်ႉလႄႈၶဝ်ၼၼ်ႉတၵ်းၼမ်ၵိုၼ်းမိူၼ်မိူဝ်ႈၵွၼ်ႇဢၼ်ယၢမ်ႈၼမ်ၵိုၼ်းမႃးၼၼ်ႉဢေႃႈ။
ပိၵ်ႉသမ်ႉၵဝ်ဢဝ်ၶဝ်ဝၢၼ်ႇပိုၼ်ၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆသေၵေႃႈ၊ ၶဝ်တၵ်းယူႇၵႃႈတီႈမိူင်းဢၼ်ၵႆၼၼ်ႉၶုၵ်းၸႂ်လႆႈၶႆႈၸႂ်ထူပ်းၵဝ်လႄႈ ဢသၢၵ်ႈလိပ်းယူႇလူၺ်ႈၵၼ်တင်းလုၵ်ႈၶဝ်လၢၼ်ၶဝ်သေလႄႈၶိုၼ်းမႃးဢေႃႈ။
ၵဝ်တၵ်းသမ်ႉဢဝ်ၶဝ်ဢွၵ်ႇသေၵႃႈၼႂ်းမိူင်း ဢေးၵျိပ်ႉ၊ ဢိၵ်ႇတင်း ႁွင်ႉဢဝ်ၶဝ်ဢွၵ်ႇသေၵႃႈၼႂ်းမိူင်း ဢႃႇသီးရီးယႃး၊ သေလႄႈႁႂ်ႈၸုၵၼ်တုမ်ၵၼ်ဢေႃႈ။ ၵဝ်တၵ်းဢဝ်ၶဝ်မႃးၵႃႈတီႈမိူင်း ၵိလတ်ႉ၊ ဢိၵ်ႇတင်းမိူင်း လေႇပၼုၼ်ႇ၊ လႄႈ လိၼ်တၵ်းဢမ်ႇၵုမ်ႇဢမ်ႇပေႃးပုၼ်ႈဢၼ်ၶဝ်တၵ်းယူႇတၵ်းသဝ်းၼၼ်ႉလႆႈ။
မၼ်းၸဝ်ႈ တၵ်းပႆလတ်းၵႂႃႇၵႃႈၼႂ်းၵၢင်ပၢင်ႇလၢႆႇတုၵ်ႉၶႃႉတၢင်းၽၢၼ်လႄႈ ပေႃႉၽတ်ႉလႅင်းၼမ်ႉပိူပ်ႈၼမ်ႉပၢင်ႇလၢႆႇဢေႃႈ။ တီႈဢၼ်လိုၵ်ႉဢၼ်လမ်ႇမႄႈၼမ်ႉ ၼၢႆးလ်၊ ၵႃႈမီးၼၼ်ႉ၊ တၵ်းယူတ်းႁႅင်ႈၵႂႃႇဢေႃႈ။ မႃႇၼႃႉၸႂ်သုင်မိူင်း ဢႃႇသီးရီးယႃး၊ တၵ်းလႆႈၶၢမ်ႇတၢင်းဢၼ်ၶျႃးတူၵ်းတီႈတႅမ်ႇလႄႈ ၵၼ်းႁွၵ်ႇရႃႇၸႃႉမိူင်း ဢေးၵျိပ်ႉ၊ ၼၼ်ႉၵေႃႈတၵ်းလပ်ႉႁၢႆၵႂႃႇဢေႃႈ။
ၵဝ်တၵ်းႁဵတ်းႁႂ်ႈၶဝ်ႁႅင်းယႂ်ႇလႄႈၶဝ်တၵ်းဢိင်ပိုင်ႈၼႃႇမႃႉၸိုဝ်ႈသဵင်ၵဝ်သေယဝ်ႉ၊ ဢွၼ်ၵၼ်ထွမ်ႇဢဝ်ၵႂၢမ်းၵဝ်ဢေႃႈ၊ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
လွႆ လေႇပၼုၼ်ႇ၊ ႟။ ၽုၺ်ႇပိုတ်ႇၽၵ်းတူမႂ်းတင်းလၢႆႁႂ်ႈၽႆးလႆႈမႆႈတူၼ်ႈဢႃႇရိတ်ႉမႂ်းၸိူဝ်းၼၼ်ႉတႃႉ။
တူၼ်ႈမႆႉပႅၵ်ႇၶဝ်႟။ ပွင်ႉၶၢင်းပွင်ႉမိုၼ်ႇၵွပ်ႈပိူဝ်ႈဢၼ်တူၼ်ႈဢႃႇရိတ်ႉလူမ်ႉတူၵ်းၼၼ်ႉတႃႉ။ တူၼ်ႈဢၼ်မျၢတ်ႈၸိူဝ်းၼၼ်ႉလုၵႂႃႇလႅဝ်ၵႂႃႇယဝ်ႉ။ တူၼ်ႈမႆႉၼိမ်မိူင်း ပႃႇသၢၼ်ႇ၊ ၶဝ်႟။ ဢွၼ်ၵၼ်ပွင်ႉၶၢင်းပွင်ႉမိုၼ်ႇၵွပ်ႈပိူဝ်ႈဢၼ်ပႃႇမႆႉပႃႇတွၵ်ႇဢၼ်တၼ်ၼႃႇၼၼ်ႉလႆႈၶၢမ်ႇတၢင်းဢၼ်ပွမ်ႈလူမ်ႉပႅတ်ႈၼၼ်ႉတႃႉ။
ထွမ်ႇငိၼ်းသဵင်ၶဝ်ၸိူဝ်းဢၼ်လဵင်ႉသူဝ်းထိင်းသူဝ်းၼၼ်ႉပွင်ႉၶၢင်းပွင်ႉမိုၼ်ႇၵွပ်ႈပိူဝ်ႈဢၼ်သရေႇၶဝ်လုၼၼ်ႉတႃႉ။ ထွမ်ႇငိၼ်းသဵင်သင်ႇသီႈတူဝ်ၼုမ်ႇတူဝ်ႁၢတ်ႈတင်းလၢႆႁွင်ႉၶၢင်း ၵွပ်ႈပိူဝ်ႈဢၼ်ၽိူဝ်မႆႉယုမ်းမႆႉၼမ်ႉ ယေႃးတၢၼ်ႇ၊ လုၵႂႃႇၼၼ်ႉတႃႉ။
ထႃႇဝရႃႉၽြႃး၊ ၽြႃးပဵၼ်ၸဝ်ႈၵဝ်မီးဢမိင်ႉၸမ်ႉ၊လဵင်ႉလူမုၵ်ႉသူဝ်းၽုင်သူဝ်းဢၼ်ဝႆႉပုၼ်ႈဢၼ်တၵ်းဢဝ်တၢႆၼႆႉတႃႉ။-
ၶဝ်ၸိူဝ်းဢၼ်သိုဝ်ႉဢဝ်ၶဝ်လႄႈဢဝ်ၶဝ်တၢႆၼၼ်ႉဢမ်ႇမၢတ်ႈတူဝ်ၸဝ်ႈၵဝ်ႇမီးဢပျတ်ႈ။ ၶဝ်ၸိူဝ်းဢၼ်ဢဝ်ၶဝ်ၶၢႆၵိၼ်ၼၼ်ႉၵေႃႈလၢတ်ႈလႄႈဝႃႈ၊ “ၵွပ်ႈပိူဝ်ႈဢၼ်ၵဝ်မၢၵ်ႈမီးလႄႈၵဝ်ယွင်ႈယေႃး ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။ ၶဝ်ၸိူဝ်းဢၼ်လဵင်ႉသူဝ်းထိင်းသူဝ်းၼၼ်ႉၵေႃႈဢမ်ႇမီးၵရုၼႃႇတၢင်းဢၼ်ဢဵတ်းလူ။
ထႃႇဝရႃႉၽြႃး၊ မီးဢမိင်ႉၸမ်ႉ၊ “ၵမ်းလိုၼ်းၵဝ်ယင်းဢမ်ႇဢဵတ်းလူသေလၢႆၵူၼ်းဝၢၼ်ႈၵူၼ်းမိူင်းလႄႈ၊ၵဝ်တၵ်းဢဝ်ၶဝ်ၵႃႈမီးဢၢပ်ႈပၼ်ၵႃႈၼႂ်းမိုဝ်းၵူၼ်းမိူင်းဢၼ်ၸမ်ၵၼ်တင်းၶဝ်၊ဢိၵ်ႇတင်းၵႃႈၼႂ်းမိုဝ်းၶုၼ်ႁေႃၶမ်းၶဝ်သေလႄႈၶုၼ်ၼၼ်ႉတၵ်းၼိၵ်ႈၸၢၵ်ႈငႅၼ်းသႄးမိူင်းတင်းမိူင်းဢေႃႈ။ ၵဝ်တၵ်းဢမ်ႇပွႆႇၶဝ်လွတ်ႈဢွၵ်ႇသေၵႃႈၼႂ်းမိုဝ်းၶုၼ်ၼၼ်ႉ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈၵဝ်တၢင်တူဝ်ပေႃႈၵႃႉသူဝ်းတင်းလၢႆလႄႈလႆႈလဵင်ႉလူၽုင်သူဝ်းဢၼ်ဝႆႉပုၼ်ႈတၵ်းဢဝ်တၢႆၼၼ်ႉဢေႃႈ။ ၵဝ်ဢဝ်ၶွၼ်ႉၵွမ်ႈဢၼ်လဵင်ႉသူဝ်းထိင်းသူဝ်းသွင်လႅမ်ႈလႄႈႁွင်ႉႁဵၵ်ႈၸိုဝ်ႈလႅမ်ႈၼိုင်ႈဝႃႈ၊ “တၢင်းဢၼ်ႁဵတ်းၵျေးၸူး၊” ဢိၵ်ႇတင်းလႅမ်ႈၼိုင်ႈၸိုဝ်ႈဝႃႈ၊ “တၢင်းဢၼ်ပဵၼ်ၸုမ်းပဵၼ်ၸိူဝ်း၊” သေလႄႈလႆႈလဵင်ႉလူမုၵ်ႉသူဝ်းၽုင်သူဝ်းဢေႃႈ။-
ၵဝ်ဢဝ်ၼုၵ်ႈဢွၵ်ႇပႅတ်ႈၵူၼ်းလဵင်ႉသူဝ်းထိင်းသူဝ်းသၢမ်ၵေႃႉၼၼ်ႉၼႂ်းလိူၼ်ၼိုင်ႈၵူၺ်း၊ၵွပ်ႈပိူဝ်ႈဢၼ်ၵဝ်ဢမ်ႇယိူၼ်ႉၶၢမ်ႇၶဝ်လႆႈလႄႈၶဝ်ၵေႃႈလီႁင်ႈဢဵတ်ႇသဵတ်ႇၵဝ်ၼၼ်ႉဢေႃႈ။-
ၵဝ်လၢတ်ႈလႄႈဝႃႈ၊ “ၵဝ်တၵ်းဢမ်ႇပဵၼ်ၵေႃႉဢၼ်လဵင်ႉထိင်းသူယဝ်ႉ။ ႁႂ်ႈတူဝ်ဢၼ်တၢႆၼၼ်ႉတၢႆသေၵမ်းလူၺ်ႈ။ ႁႂ်ႈတူဝ်ဢၼ်လႆႈၶၢမ်ႇတၢင်းဢၼ်ယႃႉႁႂ်ႈလုလႅဝ်ၼၼ်ႉ၊လႆႈၶၢမ်ႇသေၵမ်းလူၺ်ႈ။ ႁႂ်ႈတူဝ်ဢၼ်ယင်းၵိုတ်းယင်းၵျၢၼ်ႇၸိူဝ်းၼၼ်ႉတူဝ်ၼိုင်ႈလႄႈတူဝ်ႈၼိုင်ႈၶူပ်းၵိၼ်ၵၼ်သေၵမ်းလူၺ်ႈ၊” ဝႃႈၼင်ႇၼႆဢေႃႈ။-
ၵဝ်ဢဝ်ၶွၼ်ႉၵွမ်ႈၵဝ်ဢၼ်လႆႈၸိုဝ်ႈဝႃႈ၊ “တၢင်းဢၼ်ႁဵတ်းၵျေးၸူး၊” ၼၼ်ႉႁၵ်းပႅတ်ႈႁႂ်ႈလႆႈယႃႉပႅတ်ႈပတိၺိၺ်ႇဢၼ်ၵဝ်ႁဵတ်းလူၺ်ႈၵၼ်တင်းၵူၼ်းမဵဝ်းတင်းသဵင်ႈတင်းလူင်မိူဝ်ႈၵွၼ်ႇဢွၼ်ၼႆႉၼၼ်ႉဢေႃႈ။-
ၵွပ်ႈပိူဝ်ႈဢၼ်ပတိၺိၺ်ႇၼၼ်ႉလုၼႂ်းမိုဝ်ႉဝၼ်းၼၼ်ႉလႄႈၵူၼ်းၵႃႉသူဝ်းတင်းလၢႆဢၼ်ယႅၵ်ႉတူၺ်းၵဝ်ယူႇၸိူဝ်းၼၼ်ႉ ႁုၸႅင်ႈလွင်ႈဢၼ်ပဵၼ်ၼုၵ်ႈၵပၢတ်ႈ ထႃႇဝရႃႉၽြႃး၊ ၼၼ်ႉဢေႃႈ။-
ၵဝ်သမ်ႉလၢတ်ႈတီႈၶဝ်လႄႈဝႃႈ၊ “ပေႃးလီပၼ်ၵႃႈၶၼ်ဢၼ်ၵဝ်ထုၵ်ႇလႆႈၼၼ်ႉသိုဝ်ႈၼႃႈတႂ်ႈတႃသူၸိုင်၊ဢွၼ်ၵၼ်ပၼ်တႃႉ။ ပေႃးဢမ်ႇလီပၼ်ၸိုင်၊ယႃႇပေပၼ်၊” မိူဝ်ႈဢၼ်ဝႃႈၼင်ႇၼႆၸိုင်၊ၶဝ်ၼၼ်ႉဢွၼ်ၵၼ်ၸင်ႈႁိဝ်ႈငိုၼ်းသၢမ်သိပ်းၵျၢပ်ႈႁႂ်ႈလႆႈပၼ်ၵႃႈၶၼ်ၵဝ်ဢေႃႈ။
ထႃႇဝရႃႉၽြႃး၊ ၵေႃႈမီးဢမိင်ႉတီႈၵဝ်လႄႈဝႃႈ၊ “ဢဝ်ငိုၼ်းၼၼ်ႉထိမ်ႈတူၵ်းသႂ်ႇဝႆႉၵႃႈၼႂ်းတိူၵ်ႈၽၼ်ႇတႃႇ ၸဝ်ႈတႃႉ။” ဝႃႈၼင်ႇၼႆဢေႃႈ။ ပိူဝ်ႈၼႆလႄႈၵဝ်ၵေႃႈဢဝ်ငိုၼ်းသၢမ်သိပ်းၵျၢပ်ႈဢၼ်ၵႃႈၶၼ်ယႂ်ႇၼႃႇဢၼ်ၶဝ်တႅပ်းတတ်းၵႃႈၶၼ်ၵဝ်ၼၼ်ႉထိမ်ႈတူၵ်းသႂ်ႇဝႆႉၵႃႈၼႂ်းတိူၵ်ႈၽၼ်ႇတႃႇၸဝ်ႈဢၼ်မီးၵႃႈၼႂ်းၵျွင်းပိၵ်ႈမၢၼ်ႇ ထႃႇဝရႃႉၽြႃး၊ ဢေႃႈ။-
မိူဝ်ႈၼၼ်ႉ၊ၵဝ်ဢဝ်ၶွၼ်ႉၵွမ်ႈၵဝ်လႅမ်ႈတီႈသွင်ဢၼ်လႆႈၸိုဝ်ႈဝႃႈ၊ “တၢင်းဢၼ်ပဵၼ်ၸုမ်းပဵၼ်ၸိူဝ်း၊” ၼၼ်ႉသေႁၵ်းယႃႉပႅတ်ႈမိၵ်ႈသႁႃႇယႃႉဢၼ်ၵူၼ်းမဵဝ်း ယုတႃႉ၊ ဢိၵ်ႇတင်းၵူၼ်းမဵဝ်း ဢိသရေး၊ ၶဝ်ႁဵတ်းလူၺ်ႈၵၼ်ၼၼ်ႉဢေႃႈ။
ထႃႇဝရႃႉၽြႃး၊ သမ်ႉမီးဢမိင်ႉတီႈၵဝ်လႄႈဝႃႈ၊ “သမ်ႉၶိုၼ်းယိပ်းဢဝ်ၶိူင်ႈပိူင်ၵေႃႉဢၼ်လဵင်ႉသူဝ်းထိင်းသူဝ်းဢၼ်မိူၵ်ႈၼၼ်ႉထႅင်ႈတႃႉ။-
လွင်ႈမၼ်းၸမ်ႉ၊ၵဝ်တၵ်းႁႂ်ႈၵေႃႉဢၼ်လဵင်ႉသူဝ်းထိင်းသူဝ်းၵေႃႉၼိုင်ႈပေႃႇမႃးၵႃႈၼႂ်းမိူင်းၼႆႉဢေႃႈ။ မၼ်းၼၼ်ႉတၵ်းဢမ်ႇလူဢမ်ႇတူၺ်းတူဝ်ဢၼ်လႆႈထူပ်းၽေးတၢင်းတၢႆၼၼ်ႉ။ တၵ်းဢမ်ႇႁႃတူဝ်ဢၼ်ၽိတ်းတၢင်းပိူင်ႈတၢင်းၵႂႃႇၼၼ်ႉ။ တၵ်းဢမ်ႇႁဵတ်းႁႂ်ႈတၢင်းၸဵပ်းတၢင်းသႅပ်ႇတူဝ်ဢၼ်ၸဵပ်းဢၼ်သႅပ်ႇၼၼ်ႉႁၢႆၼၼ်ႉ။ တၵ်းဢမ်ႇၸွႆႈထႅမ်လဵင်ႉလူတူဝ်ဢၼ်ယူႇလီပီးမၼ်းၼၼ်ႉ၊တၵ်းၵိၼ်တူဝ်ဢၼ်ပီးလီမၼ်းလီၼၼ်ႉလႄႈႁၵ်းႁိၵ်းၵိပ်ႇၶဝ်ပႅတ်ႈဢေႃႈ။-
ႁႂ်ႈၵေႃႉဢၼ်လဵင်ႉသူဝ်းထိင်းသူဝ်းဢၼ်ဢမ်ႇလႆႈလွင်ႈ၊ဢၼ်ၸုၼ်ႉပႅတ်ႈၽုင်သူဝ်းၼၼ်ႉမီးဢႃႉမၢင်ႇၵလႃႇသေၵမ်းလူၺ်ႈ။ ၽေးလၢပ်ႇၽေးလႅဝ်းတၵ်းႁွတ်ႈထိုင်ၵႃႈတီႈၶႅၼ်မိုဝ်းမၼ်း၊ဢိၵ်ႇတင်းမၢၵ်ႇတႃၶွၼ်ၶႂႃမၼ်းဢေႃႈ။ ၶႅၼ်မိုဝ်းမၼ်းၼၼ်ႉတၵ်းႁဵဝ်ႇႁႅင်ႈၵႂႃႇတင်းသဵင်ႈတင်းမူတ်းလႄႈမၢၵ်ႇတႃၶွၼ်ၶႂႃမၼ်းၼၼ်ႉတၵ်းလပ်းသိင်ႇၵႂႃႇလုမ်းလုမ်းဢေႃႈ၊” ဝႃႈၼင်ႇၼႆဢေႃႈ။
ၼုၵ်ႈၵပၢတ်ႈပျႃႇတိၵ်ႈ ထႃႇဝရႃႉၽြႃး၊ ဢၼ်ၸၢပ်ႈသႅင်ႇလူၺ်ႈလွင်ႈၵူၼ်းမဵဝ်း ဢိသရေး၊ ဢၼ်ဝႃႈ၊ဢမိင်ႉဢၼ် ထႃႇဝရႃႉၽြႃး၊ ဢၼ်ဢဝ်ၽႃႉၵၢင်ႁၢဝ်ၶဵင်ႈဝႆႉလႄႈၶျႃးငဝ်ႈႁၢၵ်ႈတိူၵ်ႈလိၼ်မိူင်းဢၼ်ႁဵတ်းပဵၼ်ဝိၺိၺ်ႇၵူၼ်းၵႃႈၼႂ်းၵူၼ်းၼၼ်ႉ၊မီးဝႆႉၸမ်ႉ၊-
ၵဝ်တၵ်းႁႂ်ႈဝဵင်း ယေႇရုသလႅမ်ႇ၊ ပဵၼ်ၵွၵ်းၼမ်ႉမၢၵ်ႇၸပိတ်ႉဢၼ်ႁႂ်ႈမဝ်းပုၼ်ႈမဵဝ်းၵူၼ်းတင်းသဵင်ႈတင်းလူင်ဢၼ်မီးၵႃႈတီႈႁိမ်းႁွမ်းလဵပ်ႈႁွပ်ႈမၼ်းၸိူဝ်းၼၼ်ႉဢေႃႈ။ ၵႃႈတီႈမိူင်း ယုတႃႉ၊ ၵေႃႈၵဝ်တၵ်းႁႂ်ႈၵွၵ်းၼၼ်ႉယူႇၼိူဝ်မၼ်းၼႂ်းမိူဝ်ႈဢၼ်ဝဵင်း ယေႇရုသလႅမ်ႇ၊ လႆႈၶၢမ်ႇတၢင်းဢၼ်လွမ်ႉႁွပ်ႈဝႆႉယူႇၼၼ်ႉဢေႃႈ။-
ၼႂ်းမိုဝ်ႉဝၼ်းၼၼ်ႉၵဝ်တၵ်းႁႂ်ႈဝဵင်း ယေႇရုသလႅမ်ႇ၊ ၼၼ်ႉပဵၼ်မၢၵ်ႇႁိၼ်ဢၼ်ၼၵ်းၼႃႇတီႈမဵဝ်းၵူၼ်းတင်းသဵင်ႈတင်းလူင်လႄႈၶဝ်ၵႃႈဢၼ်ယုၵ်ႉယွင်ႈမၢၵ်ႇႁိၼ်ၼၼ်ႉၸိူဝ်းၼၼ်ႉတၵ်းလႆႈၶၢမ်ႇတၢင်းဢၼ်မၢတ်ႇၸဵပ်းႁႅင်းၼႃႇဢေႃႈ။ ၵူၼ်းလေႃးၵီႇၵူႈၸိူဝ်ႉၵူႈမဵဝ်းၼၼ်ႉ တၵ်းဢွၼ်ၵၼ်ၸုၵၼ်တုမ်ၵၼ်သေလႄႈၶတ်းတႃႉၵၼ်တင်းဝဵင်းၼၼ်ႉဢေႃႈ။-
ထႃႇဝရႃႉၽြႃး၊ မီးဢမိင်ႉၸမ်ႉ၊ၼႂ်းမိုဝ်ႉဝၼ်းၼၼ်ႉၵဝ်တၵ်းပၼ်တၢမ်ႇႁႂ်ႈမႃႉၵႃႈမီးၼၼ်ႉမဝ်းမိင်းၵႂၢင်ၸႂ်ယုင်ႈၸႂ်လႄႈႁႂ်ႈၵူၼ်းသိုၵ်းၶီႇမႃႉတင်းလၢႆပဵၼ်ၵူၼ်းယွင်ႇၵူၼ်းမႃႈၵႂႃႇဢေႃႈ။ ၵဝ်တၵ်းပႂ်ႉလွမ်ပႂ်ႉတူၺ်းၵူၼ်းမဵဝ်း ယုတႃႉ၊ လႄႈပၼ်တၢမ်ႇႁႂ်ႈမႃႉၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၼၼ်ႉတႃမွတ်ႇၵႂႃႇဢေႃႈ။-
ၵူၼ်းဢွၼ်ႁူဝ်ၸိူဝ်ႉၶိူဝ်း ယုတႃႉ၊ တင်းလၢႆတၵ်းဢွၼ်ၵၼ်လၢတ်ႈၼႂ်းၸႂ်လႄႈဝႃႈ၊ “ၵူၼ်းဝဵင်း ယေႇရုသလႅမ်ႇ၊ ၸိူဝ်းၼၼ်ႉမီးဢဵၼ်မီးႁႅင်းၵွပ်ႈပိူဝ်ႈၽြႃးပဵၼ်ၸဝ်ႈၶဝ်၊ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၼႂ်းမိုဝ်ႉဝၼ်းၼၼ်ႉ၊ၵဝ်တၵ်းႁႂ်ႈၵူၼ်းဢွၼ်ႁူဝ်ၸိူဝ်ႉၶိူဝ်း ယုတႃႉ၊ ၸိူဝ်းၼၼ်ႉပဵၼ်ၸိူဝ်ႉၼင်ႇမေႃႈၽႆးၽင်ၽႆးၵႃႈၼႂ်းၵွင်ၽိုၼ်း၊ဢိၵ်ႇတင်းပဵၼ်ၸိူဝ်ႉၼင်ႇၵၢၼ်ႈၽႆးၵႃႈၼႂ်းလိုၼ်ႈၶဝ်ႈၼၼ်ႉလႄႈၶဝ်ၼၼ်ႉတၵ်းမႆႈမဵဝ်းၵူၼ်းတင်းသဵင်ႈတင်းလူင်ဢၼ်မီးၵႃႈတီႈႁိမ်းႁွမ်းလဵပ်ႈႁွပ်ႈၽၢႆႇၶႂႃၽၢႆႇသၢႆႉၶဝ်ၼၼ်ႉဢေႃႈ။ ဝဵင်း ယေႇရုသလႅမ်ႇ၊ ၵေႃႈတၵ်းသမ်ႉၶိုၼ်းမီးတၢင်းဢၼ်တႄႇယူႇသေႇသေႇၵႃႈၼႂ်းတီႈဢၼ်မၼ်းတႄႇယူႇၵဝ်ႇၵဝ်ႇဢၼ်ဝႃႈ၊ဝဵင်း ယေႇရုသလႅမ်ႇ၊ ၼၼ်ႉဢေႃႈ။
ထႃႇဝရႃႉၽြႃး၊ တၵ်းပၼ်တၢင်းဢၼ်ဢွင်ႇမႅင်ႇၵႃႈတီႈၵူၼ်းသိုၵ်း ယုတႃႉ၊ တင်းလၢႆဢွၼ်တၢင်းပိူၼ်ႈႁႂ်ႈမုၼ်ၽုင်းမဵဝ်းၸိူဝ်ႉၶိူဝ်း တႃႇဝိတ်ႈ၊ ဢိၵ်ႇတင်းမုၼ်ၽုင်းၵူၼ်းဝဵင်း ယေႇရုသလႅမ်ႇ၊ ၸိူဝ်းၼၼ်ႉဢမ်ႇလႆႈယႂ်ႇလိူဝ်သေမုၼ်ၽုင်းတၢင်ႇဝၢၼ်ႈတၢင်ႇဝဵင်းၵႃႈၼႂ်းမိူင်း ယုတႃႉ၊ ဢေႃႈ။-
ၼႂ်းမိုဝ်ႉဝၼ်းၼၼ်ႉ၊ ထႃႇဝရႃႉၽြႃး၊ တၵ်းႁႄႉၵင်ႈပႂ်ႉၸွႆႈပႂ်ႉထႅမ်ၵူၼ်းဝဵင်း ယေႇရုသလႅမ်ႇ၊ ၸိူဝ်းၼၼ်ႉဢေႃႈ။ ၵေႃႉဢၼ်ႁႅင်းလဵၵ်ႉႁႅင်းၵေႇၼႂ်းမိုဝ်ႉဝၼ်းၼၼ်ႉတၵ်းပဵၼ်ၸိူဝ်ႉၼင်ႇၶုၼ် တႃႇဝိတ်ႈ၊ လႄႈမဵဝ်းၸိူဝ်ႉၶိူဝ်း တႃႇဝိတ်ႈ၊ ၼၼ်ႉတၵ်းဢွၼ်ႁူဝ်မိူၼ်ၸိူဝ်ႉၼင်ႇၽြႃးပဵၼ်ၸဝ်ႈ၊ဢိၵ်ႇတင်းမိူၼ်ၸိူဝ်ႉၼင်ႇတမၢၼ်ႇၵၢင်ႁၢဝ် ထႃႇဝရႃႉၽြႃး၊ ၼၼ်ႉၵႃႈတီႈၽၢႆႇၼႃႈၶဝ်ၼၼ်ႉဢေႃႈ။-
ၼႂ်းမိုဝ်ႉဝၼ်းၼၼ်ႉ၊ၵဝ်တၵ်းဢဝ်ႁႅင်းဢွၵ်ႇႁႂ်ႈလႆႈယႃႉပႅတ်ႈၵူၼ်းၵူႈၸိူဝ်ႉၵူႈမဵဝ်းဢၼ်မႃးတိုၵ်းဝဵင်း ယေႇရုသလႅမ်ႇ၊ ၸိူဝ်းၼၼ်ႉပႅတ်ႈဢေႃႈ။-
ၵဝ်တၵ်းဢဝ်သၽေႃးတၢင်းဢၼ်ၶၢမ်ႇဢဝ်ၵျေးၸူးၸဝ်ႈ၊သၽေႃးတၢင်းဢၼ်ႁဵတ်းသူးတွင်းပထၼႃႇၼၼ်ႉသွၼ်းလေႃႇသႂ်ႇပၼ်ၵႃႈၼိူဝ်မဵဝ်းၸိူဝ်ႉၶိူဝ်း တႃႇဝိတ်ႈ၊ ဢိၵ်ႇတင်းၵူၼ်းဝဵင်း ယေႇရုသလႅမ်ႇ၊ ၸိူဝ်းၼၼ်ႉလႄႈၶဝ်ၼၼ်ႉတၵ်းလႆႈဢွၼ်ၵၼ်တူၺ်းႁၼ်ၵေႃႉဢၼ်ၶဝ်တႅင်းပွင်ႇၼႆႉဢေႃႈ။ ၶဝ်တၵ်းဢွၼ်ၵၼ်ႁႆႈႁွင်ႉပွင်ႉၶၢင်း ၵွပ်ႈပိူဝ်ႈမၼ်းမိူၼ်ၸိူဝ်ႉၼင်ႇဢၼ်ၽူႈပဵၼ်ပေႃႈႁွင်ႉႁႆႈပွင်ႉၶၢင်းၵွပ်ႈလုၵ်ႈၸၢႆးၵေႃႉလဵဝ်ၵူၺ်းတၢႆၼၼ်ႉလႄႈၶဝ်တၵ်းဢွၼ်ၵၼ်ၸဵပ်းၸႂ်ၶူမ်ၸႂ်ၵွပ်ႈပိူဝ်ႈမၼ်းမိူၼ်ၸိူဝ်ႉၼင်ႇၵေႃႉဢၼ်ၸဵပ်းၸႂ်ၶူမ်ၸႂ်ၵွပ်ႈလုၵ်ႈၸၢႆးတူၼ်ႈမၼ်းတၢႆၼၼ်ႉဢေႃႈ။-
ၼႂ်းမိုဝ်ႉဝၼ်းၼၼ်ႉတၵ်းမီးတၢင်းဢၼ်ႁႆႈႁွင်ႉပွင်ႉၶၢင်းဢၼ်ယႂ်ႇၼႃႇလူင်လၢင်ၵႃႈၼႂ်းဝဵင်း ယေႇရုသလႅမ်ႇ၊ မိူၼ်ၸိူဝ်ႉၼင်ႇဢၼ်ႁွင်ႉႁႆႈပွင်ႉၶၢင်းၵႃႈတီႈဝဵင်း ႁႃႇတတ်ႉရိမ်ႇမုၼ်ႇ၊ ၵႃႈၼႂ်းပၢင်ႇႁူၺ်ႈ မေႇၵိတ်ႉတေႃႇ၊ ၼၼ်ႉဢေႃႈ။-
မိူင်းတင်းမိူင်းတၵ်းႁွင်ႉႁႆႈပွင်ႉၶၢင်းၸွမ်းလူၺ်ႈမဵဝ်းၽႂ်မဵဝ်းမၼ်းယေႈမဵဝ်းယေႈတီႈဢေႃႈ။ ပီႈၼွင်ႉၸိူဝ်ႉၶိူဝ်းၶုၼ် တႃႇဝိတ်ႈ၊ တီႈၼိုင်ႈ၊မေးၶဝ်တီႈၼိုင်ႈ၊ပီႈၼွင်ႉၸိူဝ်ႉၶိူဝ်း ၼႃႇႀၼ်ႇ၊ တီႈၼိုင်ႈ၊ဢိၵ်ႇတင်းမေးၶဝ်တီႈၼိုင်ႈ၊-
ပီႈၼွင်ႉၸိူဝ်ႉၶိူဝ်း လေႇဝိ၊ တီႈၼိုင်ႈ၊မေးၶဝ်တီႈၼိုင်ႈ၊ပီႈၼွင်ႉၸိူဝ်ႉၶိူဝ်း သိမိ၊ တီႈၼိုင်ႈ၊မေးၶဝ်တီႈၼိုင်ႈ၊-
ပီႈၼွင်ႉၸိူဝ်ႉၶိူဝ်းဢၼ်ယင်းၵိုတ်းယင်းၵျၢၼ်ႇၵႃႈမီးၼၼ်ႉယေႈမဵဝ်းယေႈတီႈ၊မေးၶဝ်ယေႈမဵဝ်းယေႈတီႈ၊တၵ်းဢွၼ်ၵၼ်ႁွင်ႉႁႆႈပွင်ႉၶၢင်းႁင်းၽႂ်ႁင်းမၼ်းဢေႃႈ။
ၼႂ်းမိုဝ်ႉဝၼ်းၼၼ်ႉၼမ်ႉဢွၵ်ႇႁူးတၵ်းမီးတၢင်းဢၼ်ၽုၺ်ႇပိုတ်ႇဝႆႉမဵဝ်းၸိူဝ်ႉၶိူဝ်း တႃႇဝိတ်ႈ၊ ဢိၵ်ႇတင်းၵူၼ်းဝဵင်း ယေႇရုသလႅမ်ႇ၊ ၸိူဝ်းၼၼ်ႉပုၼ်ႈတႃႇတေသုၵ်ႈလၢင်ႉတုၸရိူၵ်ႈဢပျတ်ႈ၊ဢိၵ်ႇတင်းတၢင်းဢၼ်ၵူဝ်ႈၵိူၵ်ႇဝူၺ်ႇႁင်ႈၶဝ်ၼၼ်ႉဢေႃႈ။-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ၼႂ်းမိုဝ်ႉဝၼ်းၼၼ်ႉၵဝ်တၵ်းပႄႇၽဵဝ်ႈၼႃႇမႃႉၸိုဝ်ႈသဵင်ႁုၼ်ႇႁၢင်ႈသၢင်းထုတင်းလၢႆပႅတ်ႈသေၵႃႈၼႂ်းမိူင်းၸဝ်ႈႁႂ်ႈထၢၼ်ႈပေႃးၽူႈလႂ်ဢမ်ႇမၢတ်ႈဢမ်ႇတွင်းၼႂ်းၶိင်ႇမိုဝ်ႉဝၼ်းၵမ်းလိုၼ်းၼၼ်ႉဢေႃႈ။ ၵဝ်တၵ်းႁေႃႈၶဝ်ၸိူဝ်းဢၼ်ႁဵတ်းပရေႃးၽႅတ်ႈ၊ဢိၵ်ႇတင်းဝိၺိၺ်ႇဢၼ်ၵူဝ်ႈၵိူၵ်ႇၼၼ်ႉဢွၵ်ႇသေၵႃႈၼႂ်းမိူင်းၸဝ်ႈဢေႃႈ။-
မိူဝ်ႈၼၼ်ႉပေႃးၵူၼ်းသေၵေႃႉသေၵူၼ်းယင်းႁဵတ်းပရေႃးၽႅတ်ႈယူႇၸိုင်၊ပေႃႈမႄႈဢၼ်ၵိူတ်ႇလဵင်ႉမၼ်းမႃးၼၼ်ႉတၵ်းလၢတ်ႈတီႈမၼ်းလႄႈဝႃႈ၊ “မႂ်းၼႆႉတၵ်းလႆႈၶၢမ်ႇတၢႆၵွပ်ႈပိူဝ်ႈဢၼ်မႂ်းဢိင်ၼႃႇမႃႉၸိုဝ်ႈသဵင် ထႃႇဝရႃႉၽြႃး၊ သေလႄႈႁေႃးလၢတ်ႈၵႂၢမ်းမုသႃႇၼၼ်ႉဢေႃႈ၊” ဝႃႈၼင်ႇၼႆသေလႄႈပေႃႈမႄႈမၼ်းဢၼ်ၵိူတ်ႇလဵင်ႉမၼ်းမႃးၼၼ်ႉတၵ်းဢွၼ်ၵၼ်တႅင်းမၼ်းပွင်ႇပိဝ်ၵႂႃႇၼႂ်းမိူဝ်ႈဢၼ်မၼ်းယင်းတိုၵ်ႉႁဵတ်းပရေႃးၽႅတ်ႈယူႇၼၼ်ႉဢေႃႈ။-
ၼႂ်းမိုဝ်ႉဝၼ်းၼၼ်ႉ၊ပရေႃးၽႅတ်ႈတင်းလၢႆတၵ်းဢွၼ်ၵၼ်ဢူၵ်းဢၢႆၵွပ်ႈပိူဝ်ႈရူႇပႃႇရူင်ႇဢၼ်ၶဝ်ႁၼ်ၼႂ်းမိူဝ်ႈဢၼ်ၶဝ်ႁေႃးလၢတ်ႈယူႇၼၼ်ႉႁင်းၽႂ်ႁင်းမၼ်းလႄႈ၊ၶဝ်တၵ်းဢမ်ႇၼုင်ႈဢမ်ႇမႆၶူဝ်းၼုင်ႈဢၼ်ၶူၼ်ယၢဝ်းၼႃႇၼၼ်ႉႁႂ်ႈလႆႈပႅတ်ႉလႆႈလႅၼ်ပိူၼ်ႈ။-
ၶဝ်ၵေႃႉၼိုင်ႈယဝ်ႉၵေႃႉၼိုင်ႈတၵ်းဢွၼ်ၵၼ်လၢတ်ႈလႄႈဝႃႈ၊ “ၵဝ်ၶႃႈၼႆႉဢမ်ႇၸႂ်ႈပရေႃးၽႅတ်ႈၶႃႈၵူၺ်း။ ပဵၼ်ၵေႃႉဢၼ်ႁဵတ်းႁႆႈႁဵတ်းၼႃးဢေႃႈ။ ၵဝ်ၶႃႈပဵၼ်ၵေႃႉဢၼ်ပဵၼ်ၸဝ်ႈႁႆႈၸဝ်ႈၼႃးၸဵမ်မိူဝ်ႈဢၼ်ယင်းလဵၵ်ႉယင်းဢွၼ်ႇၼၼ်ႉၶႃႈယဝ်ႉ၊” ဝႃႈၼင်ႇၼႆဢေႃႈ။-
ပိူၼ်ႈတၵ်းထၢမ်တီႈမၼ်းလႄႈဝႃႈ၊ “ႁွႆးၸဵပ်းၵႃႈတီႈၼႃႈဢူၵ်းမႂ်းၸိူဝ်းၼၼ်ႉၸမ်ႉ၊ပဵၼ်ဢီႈသင်၊” ဝႃႈၼင်ႇၼႆသေယဝ်ႉ၊မၼ်းတၵ်းၶိုၼ်းလၢတ်ႈလႄႈဝႃႈ၊ “ႁွႆးၸဵပ်းၼႆႉၸမ်ႉ၊ပဵၼ်ႁွႆးၸဵပ်းဢၼ်ၵဝ်ၶႃႈလႆႈၶၢမ်ႇၵႃႈၼႂ်းႁိူၼ်းၵေႃႉသႄႈၵဝ်ၶႃႈၸိူဝ်းၼၼ်ႉၶႃႈဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊လၢပ်ႇလႅဝ်း႟။ တိုၼ်ႇမႃးသေလႄႈၶတ်းတႃႉၵၼ်တင်းၵေႃႉဢၼ်လဵင်ႉသူဝ်းထိင်းသူဝ်းၵဝ်၊ၵေႃႉဢၼ်ႁူမ်ႈပွင်းလူၺ်ႈၵၼ်တင်းၵဝ်ၼၼ်ႉတႃႉ။ ပေႃႉယႅၼ်ႉၵေႃႉဢၼ်လဵင်ႉသူဝ်းထိင်းသူဝ်းၼၼ်ႉတၢႆတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊သူဝ်းတင်းလၢႆၼၼ်ႉတၵ်းလႆႈၽၢတ်ႇၽႄၵၼ်မၢၵ်ႇမိူဝ်ၵႂႃႇဢေႃႈ။ ၵႃႈၼိူဝ်သူဝ်းဢွၼ်ႇတင်းလၢႆၵေႃႈၵဝ်တၵ်းဢဝ်မိုဝ်းၵဝ်တဵၵ်းသႂ်ႇလူးၵွၼ်ႇဢေႃႈ။-
ထႃႇဝရႃႉၽြႃး၊ မီးဢမိင်ႉၸမ်ႉ၊ၵႃႈၼႂ်းမိူင်းတင်းမိူင်းၼၼ်ႉသွင်ပုၼ်ႈၼႂ်းသၢမ်ပုၼ်ႈၼၼ်ႉတၵ်းလႆႈၶၢမ်ႇတၢင်းဢၼ်ပႄႇပႅတ်ႈသေလႄႈဢဝ်တၢႆပႅတ်ႈဢေႃႈ။ ပုၼ်ႈၼိုင်ႈၵူၺ်းတၵ်းဢသၢၵ်ႈလိပ်းၵိုတ်းၵျၢၼ်ႇဝႆႉဢေႃႈ။-
ၵဝ်တၵ်းဢဝ်ပုၼ်ႈတီႈသၢမ်ၼၼ်ႉသႂ်ႇၵႃႈၼႂ်းၽႆးလႄႈၵဝ်တၵ်းၶႃႇၶဝ်မိူၼ်ၸိူဝ်ႉၼင်ႇဢၼ်ၶႃႇငိုၼ်းလႄႈၸႅတ်ႈသေးၶဝ်မိူၼ်ၸိူဝ်ႉၼင်ႇဢၼ်ၸႅတ်ႈသေးၶမ်းၼၼ်ႉဢေႃႈ။ ၶဝ်ၼၼ်ႉတၵ်းႁဵတ်းပထၼႃႇတီႈၼႃႇမႃႉၸိုဝ်ႈသဵင်ၵဝ်လႄႈၵဝ်တၵ်းထွမ်ႇဢဝ်ၵႂၢမ်းၶဝ်ဢေႃႈ။ ၵဝ်တၵ်းလၢတ်ႈဝႃႈ၊ၶဝ်ပဵၼ်ၵူၼ်းၵဝ်လႄႈၶဝ်ၵေႃႈတၵ်းလၢတ်ႈဝႃႈ၊ “ ထႃႇဝရႃႉၽြႃး၊ ၼၼ်ႉပဵၼ်ၽြႃးပဵၼ်ၸဝ်ႈႁဝ်းဢေႃႈ၊” ဝႃႈၼင်ႇၼႆဢေႃႈ။
တူၺ်းလူး။ မိုဝ်ႉဝၼ်း ထႃႇဝရႃႉၽြႃး၊ ဢၼ်ဢုၵ်ႉၸႃႇမႂ်းတၵ်းလႆႈၶၢမ်ႇတၢင်းဢၼ်ႁိမ်ႁူင်ႇဢဝ်သေလႄႈၽႄမႅင်ႇၵၼ်ၵႃႈၼႂ်းၵၢင်မႂ်းၼၼ်ႉတၵ်းႁွတ်ႈထိုင်ဢေႃႈ။-
လွင်ႈမၼ်းၸမ်ႉ၊ၵဝ်တၵ်းႁႂ်ႈၵူၼ်းၵူႈၸိူဝ်ႉၵူႈမဵဝ်းၸုၵၼ်တုမ်ၵၼ်သေလႄႈၶတ်းတႃႉၵၼ်တင်းဝဵင်း ယေႇရုသလႅမ်ႇ၊ ႁႂ်ႈလႆႈတိုၵ်းတေႃးဝဵင်းၼၼ်ႉဢေႃႈ။ ဝဵင်းၼၼ်ႉတၵ်းလႆႈၶၢမ်ႇတၢင်းဢၼ်သိမ်းဢဝ်သေယဝ်ႉ၊တၵ်းဢွၼ်ၵၼ်ႁိမ်ႁူင်ႇဢဝ်ၵႃႈၼႂ်းႁိူၼ်းတင်းလၢႆလႄႈႁဵတ်းဢထမ်ႇမႃႉတီႈမႄႈယိင်းတင်းလၢႆဢေႃႈ။ ၵူၼ်းဝဵင်းၶိုင်ႈၼိုင်ႈတၵ်းလႆႈၶၢမ်ႇတၢင်းဢၼ်သိမ်းဢဝ်ၵႂႃႇလႄႈၶိုင်ႈၼိုင်ႈဢၼ်ၵိုတ်းၵျၢၼ်ႇဝႆႉၼၼ်ႉတၵ်းဢမ်ႇလႆႈၶၢမ်ႇတင်းဢၼ်ပႄႇၽဵဝ်ႈပႅတ်ႈသေၵႃႈၼႂ်းဝဵင်းၼၼ်ႉ။-
မိူဝ်ႈၼၼ်ႉ၊ ထႃႇဝရႃႉၽြႃး၊ တၵ်းဢွၵ်ႇလႄႈတိုၵ်းတေႃးၵူၼ်းၵူႈၸိူဝ်ႉၵူႈမဵဝ်းၼၼ်ႉမိူၼ်ၸိူဝ်ႉၼင်ႇဢၼ်မၼ်းၸဝ်ႈတိုၵ်းၼႂ်းမိုဝ်ႉဝၼ်းဢၼ်တိုၵ်းသိုၵ်းၼၼ်ႉဢေႃႈ။-
ၼႂ်းၶိင်ႇဝၼ်းၼၼ်ႉ၊တိၼ်မၼ်းၸဝ်ႈတၵ်းၸုၵ်းယူႇၵႃႈၼိူဝ် လွႆသၢၼ်ႇလုၼ်ႇ၊ ဢၼ်မီးၵႃႈတီႈၽၢႆႇၼႃႈဝဵင်း ယေႇရုသလႅမ်ႇ၊ ၽၢႆႇဝၼ်းဢွၵ်ႇၼၼ်ႉလႄႈ လွႆသၢၼ်ႇလုၼ်ႇ၊ ၼၼ်ႉတၵ်းတႅၵ်ႇဢႃႈၵႃႈတီႈၶိုင်ႈၵၢင်မၼ်းဢဝ်ၵႃႈတီႈၸႃႉၸဵမ်ၽၢႆႇဝၼ်းဢွၵ်ႇတေႃႇထိုင်ႁွတ်ႈၽၢႆႇဝၼ်းတူၵ်းလႄႈပဵၼ်ၶူင်ႈႁူၺ်ႈလူင်ဢၼ်ယႂ်ႇၼႃႇဝႆႉဢေႃႈ။ လွႆၶိုင်ႈၼိုင်ႈၼၼ်ႉတၵ်းလႆႈၶၢႆႉတီႈၵႂႃႇၽၢႆႇတၢင်းႁွင်ႇ၊ၶိုင်ႈၼိုင်ႈၼၼ်ႉတၵ်းလႆႈၶၢႆႉတီႈၵႂႃႇၽၢႆႇတၢင်းၸၢၼ်းဢေႃႈ။-
သူတၵ်းဢွၼ်ၵၼ်ဢွၵ်ႇပၢႆႈၸွမ်းသဵၼ်ႈတၢင်းၶူင်ႈႁူၺ်ႈၵႄႈလွႆၼၼ်ႉၵႂႃႇလႄႈၶူင်ႈႁူၺ်ႈၼၼ်ႉတၵ်းၶိုတ်းထိုင်ၵႃႈတီႈဝဵင်း ဢႃႇၸေးလႃႉ၊ ပုၼ်ႉဢေႃႈ။ သူတၵ်းဢွၼ်ၵၼ်ဢွၵ်ႇပၢႆႈမိူၼ်ၸိူဝ်ႉၼင်ႇဢၼ်သူဢွၵ်ႇပၢႆႈဢိင်ႇသၼ်ႇလူင်ၼႂ်းၸူဝ်ႈပၢၼ်ၶုၼ် ဢူဝ်းၸိယႃႉ၊ ၶုၼ်ႁေႃၶမ်းမိူင်း ယုတႃႉ၊ ၼၼ်ႉဢေႃႈ။ ထႃႇဝရႃႉၽြႃး၊ ၽြႃးပဵၼ်ၸဝ်ႈၵဝ်တၵ်းမႃးလႄႈၵူၼ်းဢၼ်မူတ်းၸၢင်ႇမၼ်းၸဝ်ႈတင်းသဵင်ႈတင်းလူင်တၵ်းဢွၼ်ၵၼ်မႃးၸွမ်းမၼ်းၸဝ်ႈဢေႃႈ။-
ၼႂ်းမိုဝ်ႉဝၼ်းၼၼ်ႉတၵ်းဢမ်ႇၵတ်းဢမ်ႇယဵၼ်လႄႈဢမ်ႇမီးမူၺ်မီးၼၢႆးဢေႃႈ။-
တၵ်းပဵၼ်ၵၢင်ဝၼ်းတႃႇသေႇ၊ဢမ်ႇမီးဢၼ်လပ်းသိင်ႇ (ပဵၼ်ဝၼ်းဢၼ် ထႃႇဝရႃႉၽြႃး၊ ႁု) ၼၼ်ႉလႄႈႁွတ်ႈထိုင်ၶိင်ႇႁူဝ်ၶမ်ႈတၵ်းမီးဢၼ်လႅင်းဢေႃႈ။
ၼႂ်းမိုဝ်ႉဝၼ်းၼၼ်ႉၼမ်ႉဢသၢၵ်ႈတၵ်းလႆဢွၵ်ႇသေၵႃႈၼႂ်းဝဵင်း ယေႇရုသလႅမ်ႇ၊ လႄႈပဵၼ်ၶိင်ႇမႆႈသေဢမ်ႇဝႃႈ၊ပဵၼ်ပဵၼ်ၶိင်ႇၵတ်းသေဢမ်ႇဝႃႈ၊ၶိုင်ႈၼိုင်ႈတၵ်းလႆၵႂႃႇၸူးတီႈပၢင်ႇလၢႆႇဢၼ်ယူႇၽၢႆႇတၢင်းဝၼ်းဢွၵ်ႇလႄႈၶိုင်ႈၼိုင်ႈတၵ်းလႆၵႂႃႇၸူးပၢင်ႇလၢႆႇဢၼ်ယူႇၽၢႆႇတၢင်းဝၼ်းတူၵ်းဢေႃႈ။-
ထႃႇဝရႃႉၽြႃး၊ တၵ်းပဵၼ်ၶုၼ်ႁေႃၶမ်းၵႃႈၼိူဝ်တင်းသဵင်ႈတင်းမူတ်းဢေႃႈ။ ၼႂ်းမိုဝ်ႉဝၼ်းၼၼ်ႉၵူႈၵေႃႉတၵ်းၵူဝ်းၵႂၢႆႇ ထႃႇဝရႃႉၽြႃး၊ ပႃးလဵဝ်ၵူၺ်းလႄႈႁုၸၵ်းၼႃႇမႃႉၸိုဝ်ႈသဵင်မၼ်းၸဝ်ႈပႃးလဵဝ်ၵူၺ်းဢေႃႈ။
မိူင်းၸဝ်ႈတင်းမိူင်းတၵ်းလႆႈပဵၼ်ဢၼ်ၽဵင်ႇလီပဵင်းလီ၊ဢဝ်ၵႃႈတီႈၸႃႉၸဵမ်ဝဵင်း ၵေးပႃႉ၊ တေႃႇထိုင်ႁွတ်ႈဝဵင်း ရေႇမုၼ်ႇ၊ ၽၢႆႇတၢင်းၸၢၼ်းဝဵင်း ယေႇရုသလႅမ်ႇ၊ ၼၼ်ႉဢေႃႈ။ ဝဵင်း ယေႇရုသလႅမ်ႇ၊ ၵေႃႈတၵ်းလႆႈၶၢမ်ႇတၢင်းဢၼ်တင်ႈယူႇတီႈဢၼ်သုင်လႄႈၶိုၼ်းတႄႇပဵၼ်တီႈဝဵင်းၵဝ်ႇၵဝ်ႇၼၼ်ႉဢဝ်ၵႃႈတီႈၸႃႉၸဵမ် ၽၵ်းတူပိၼ်ႇယႃႇမိၼ်ႇ၊ တေႃႇထိုင်ႁွတ်ႈၽၵ်းတူမိူဝ်ႈဢွၼ်တၢင်းၼၼ်ႉ၊ဢိၵ်ႇတင်း ၽၵ်းတူၸဵင်ဝဵင်း၊ ၼၼ်ႉဢိၵ်ႇတင်းၸႃႉၸဵမ်ၵႃႈတီႈတိူၵ်ႈပုၼ်ႈဢၼ်တိုၵ်းသိုၵ်း ႁႃႇၼၼေႇလႃႉ၊ တေႃႇထိုင်ႁွတ်ႈၶိူင်ႈၼူတ်ႈမၢၵ်ႇၸပိတ်ႉၶုၼ်ႁေႃၶမ်းၼၼ်ႉၸိူဝ်းၼၼ်ႉဢေႃႈ။-
ၵမ်းလိုၼ်းၵူၼ်းတၵ်းယူႇတၵ်းသဝ်းၵႃႈၼႂ်းဝဵင်း ယေႇရုသလႅမ်ႇ၊ လႄႈမၼ်းယင်းဢမ်ႇလႆႈၶၢမ်ႇၽေးတၢင်းဢၼ်ၵိၼ်ႇဢၼ်ဝႃႈလႄႈဝဵင်း ယေႇရုသလႅမ်ႇ၊ တၵ်းလႆႈယူႇလူင်ႈလီလွတ်ႈလီဢေႃႈ။
ၽေးတၢမ်ႇဢၼ် ထႃႇဝရႃႉၽြႃး၊ ပၼ်တီႈၵူၼ်းမဵဝ်းတင်းသဵင်ႈတင်းလူင်ဢၼ်မႃးတိုၵ်းတေႃးဝဵင်း ယေႇရုသလႅမ်ႇ၊ ၸိူဝ်းၼၼ်ႉၸမ်ႉ၊ၼိူဝ်ႉၶဝ်ၼင်ၶဝ်တၵ်းတူႇၼဝ်ႈၵႂႃႇၼႂ်းမိူဝ်ႈဢၼ်ၶဝ်ယင်းၸုၵ်းယူႇၼၼ်ႉဢေႃႈ။ မၢၵ်ႇတႃၶဝ်တၵ်းတူႇၼဝ်ႈၵႂႃႇၵႃႈၼႂ်းလွၵ်းတႃၶဝ်လႄႈလိၼ်ႉၶဝ်ၵေႃႈတၵ်းတူႇၼဝ်ႈၵႂႃႇၵႃႈၼႂ်းသူပ်းၶဝ်ဢေႃႈ။
ၼႂ်းမိုဝ်ႉဝၼ်းၼၼ်ႉ ထႃႇဝရႃႉၽြႃး၊ တၵ်းႁႂ်ႈၶဝ်ႁဵတ်းတၢင်းဢၼ်ႁူၼ်ႈႁၢၼ်ႈဢူၼ်ဢဵၼ်မေႃးမႄးလႄႈၶဝ်ၵေႃႉၼိုင်ႈလႄႈၵေႃႉၼိုင်ႈ၊ၵူၼ်းႁိူၼ်းၸမ်ၵၼ်ၼင်ႇၵၼ်ၵၼ်တၵ်းယိုၼ်းမိုဝ်းသေလႄႈတိၺွပ်းၵၼ်၊တိုၵ်းတေႃးၵၼ်ဢေႃႈ။-
ၵူၼ်းမိူင်း ယုတႃႉ၊ ၵေႃႈ တၵ်းတိုၵ်းတေႃးဝဵင်း ယေႇရုသလႅမ်ႇ၊ လႄႈဢုၵ်ႉၸႃႇၸေးၸိမ်ႇၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ယူႇၵႃႈတီႈႁိမ်းႁွမ်းလဵပ်ႈႁွပ်ႈၸိူဝ်းၼၼ်ႉဢၼ်ဝႃႈ၊ငိုၼ်း၊ၶမ်း၊ၶူဝ်းၼုင်ႈၶူဝ်းမႆတၵ်းမီးတၢင်းဢၼ်ဢဝ်ၵွင်ဝႆႉၼမ်ၼႃႇဢေႃႈ။
ၽေးတၢမ်ႇဢၼ်ပၼ်တီႈမႃႉ၊တီႈလေႃႈလႃး၊တီႈၵလႃႇဢုၵ်ႈ၊တီႈမႃႉလီႈ၊တင်းတီႈတရိၵ်ႈသၢၼ်ႇၵႃႈဢၼ်မီးၵႃႈၼႂ်းတပ်ႉရၢၼ်ႇသူႇၸိူဝ်းၼၼ်ႉၵေႃႈ တၵ်းမိူၼ်ၸိူဝ်ႉၼင်ႇၽေးတၢမ်ႇဢၼ်ဝႃႈမႃးယဝ်ႉၼၼ်ႉဢေႃႈ။
ၶဝ်ၵႃႈဢၼ်ၵိုတ်းဢၼ်ၵျၢၼ်ႇၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းဢၼ်မႃးတိုၵ်းတေႃးဝဵင်း ယေႇရုသလႅမ်ႇ၊ ၸိူဝ်းၼၼ်ႉတၵ်းဢွၼ်ၵၼ်ၶိုၼ်ႈၸူးၵႃႈတီႈဝဵင်းၸဝ်ႈၵူႈပီတႃႇသေႇဢမ်ႇထၢတ်ႇႁႂ်ႈလႆႈၵူဝ်းၵႂၢႆႇၶုၼ်ႁေႃၶမ်းဢၼ်ဝႃႈ၊ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၼၼ်ႉလႄႈၶၢမ်ႇပွႆးသုမ်ႉထဵင်ၼၼ်ႉဢေႃႈ။-
ၵႃႈၼိူဝ်မဵဝ်းၸိူဝ်ႉၶိူဝ်းၵူၼ်းလိၼ်မိူင်းၵႃႈမီးဢၼ်ဢမ်ႇၶိုၼ်ႈၸူးၵႃႈတီႈဝဵင်း ယေႇရုသလႅမ်ႇ၊ ႁႂ်ႈလႆႈၵူဝ်းၵႂၢႆႇၶုၼ်ႁေႃၶမ်းဢၼ်ဝႃႈ၊ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၼၼ်ႉၽူၼ်တၵ်းဢမ်ႇတူၵ်းသႂ်ႇၵႃႈၼိူဝ်လိၼ်မိူင်းၶဝ်ၼၼ်ႉ။-
ပေႃးၵူၼ်းၸိူဝ်ႉၶိူဝ်းမိူင်း ဢေးၵျိပ်ႉ၊ ၼၼ်ႉဢမ်ႇၶိုၼ်းမႃးၸူးလႄႈၼႄပျႃးတူဝ်ၶဝ်ၸိုင်၊ၶဝ်တၵ်းလႆႈၶၢမ်ႇၽေးတၢမ်ႇဢၼ် ထႃႇဝရႃႉၽြႃး၊ ပၼ်တီႈၵူၼ်းၵူႈၸိူဝ်ႉၵူႈမဵဝ်းဢၼ်ဢမ်ႇၶိုၼ်းမႃးၸူးလႄႈႁႂ်ႈလႆႈၶၢမ်ႇပွႆးသုမ်ႉထဵင်ၼၼ်ႉဢေႃႈ။-
ဢၼ်ၼႆႉၸမ်ႉ၊ပဵၼ်တၢမ်ႇဢပျတ်ႈဢၼ်ၵူၼ်းမိူင်း ဢေးၵျိပ်ႉ၊ တၵ်းလႆႈၶၢမ်ႇ၊ဢိၵ်ႇတင်းတၢမ်ႇဢပျတ်ႈဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ဢမ်ႇၶိုၼ်းမႃးၸူးလႄႈႁႂ်ႈလႆႈၶၢမ်ႇပွႆးသုမ်ႉထဵင်ၸိူဝ်းၼၼ်ႉတၵ်းလႆႈၶၢမ်ႇဢေႃႈ။
ၼႂ်းမိုဝ်ႉဝၼ်းၼၼ်ႉတၵ်းလႆႈဢဝ်တူဝ်လိၵ်ႈဢႅၵ်ႉၶရႃႇတႅမ်ႈတၢင်ႇသႂ်ႇဝႆႉၵႃႈၼိူဝ်ႁိင်ႇဢၼ်ႁွႆႈၵႃႈတီႈမႃႉတင်းလၢႆၼၼ်ႉလႄႈဝႃႈ၊ “ဢၼ်မူတ်းၸၢင်ႇပုၼ်ႈ ထႃႇဝရႃႉၽြႃး၊ ဢေႃႈ၊” ဝႃႈၼင်ႇၼႆဢေႃႈ။ မေႃႈဢၼ်မီးၵႃႈၼႂ်းႁိူၼ်း ထႃႇဝရႃႉၽြႃး၊ ၸိူဝ်းၼၼ်ႉတၵ်းမူတ်းၸၢင်ႇမိူၼ်ၸိူဝ်ႉၼင်ႇ ဝၢၼ်ႇဢၼ်မီးၵႃႈတီႈၽၢႆႇၼႃႈၶဵင်ႇတၢင်းလူႇၸိူဝ်းၼၼ်ႉဢေႃႈ။-
လိူဝ်သေၼၼ်ႉဢမ်ႇၵႃး၊မေႃႈၵႃႈဢၼ်မီးၵႃႈၼႂ်းဝဵင်း ယေႇရုသလႅမ်ႇ၊ ဢိၵ်ႇတင်းၵႃႈၼႂ်းမိူင်း ယုတႃႉ၊ ၸိူဝ်းၼၼ်ႉတၵ်းမူတ်းၸၢင်ႇပုၼ်ႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၼၼ်ႉဢေႃႈ။ ၶဝ်ၵႃႈဢၼ်သၢၵ်ႈလူႇတူဝ်တၢင်းလူႇၸိူဝ်းၼၼ်ႉတၵ်းမႃးလႄႈဢဝ်မေႃႈၸိူဝ်းၼၼ်ႉသေယဝ်ႉ၊ဢွၼ်ၵၼ်တူမ်ႈႁုင်ဢေႃႈ။ ဢဝ်ၸႃႉၸဵမ်မိုဝ်ႉဝၼ်းၼၼ်ႉၵႂႃႇလႄႈၵူၼ်းၵႃႉၵူၼ်းၶၢႆဢမ်ႇလႆႈမီးၵႃႈၼႂ်းႁိူၼ်း ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၼၼ်ႉဢေႃႈ။ ၵျၢမ်းပရေႃးၽႅတ်ႈၸႃႇၶရိယဝ်ႉယဝ်ႉဢေႃႈ။
ၼႆႉၸမ်ႉ၊ပဵၼ်ၼုၵ်ႈၵပၢတ်ႈပျႃႇတိၵ်ႈဢၼ် ထႃႇဝရႃႉၽြႃး၊ ပၼ်တီႈၵူၼ်းမဵဝ်း ဢိသရေး၊ လူၺ်ႈ မႃႇလၶိ၊ ၼၼ်ႉဢေႃႈ။
ထႃႇဝရႃႉၽြႃး၊ မီးဢမိင်ႉၸမ်ႉ၊ၵဝ်လႆႈႁၵ်ႉသူတင်းလၢႆမႃးယဝ်ႉ။ ၵူၺ်းၵႃႈ၊သူလၢတ်ႈလႄႈဝႃႈ၊ “ၸဝ်ႈႁဝ်းႁၵ်ႉၶႃႈၸဝ်ႈႁဝ်းၶဝ်ၸိူဝ်ႉၼင်ႇႁိုဝ်တီႈၶႃႈ၊” ဝႃႈၼင်ႇၼႆဢေႃႈ။ ထႃႇဝရႃႉၽြႃး၊ ၶိုၼ်းတွပ်ႇလႄႈလၢတ်ႈဝႃႈ၊ “ ဢေးသေႃး၊ ၼၼ်ႉပဵၼ်ပီႈၸၢႆး ယႃႇၵုပ်ႈ၊ ဢမ်ႇၸႂ်ႈႁိုဝ်း။ ၼႂ်းဝႃႈၼၼ်သေၵေႃႈ ၵဝ်ႁၵ်ႉ ယႃႇၵုပ်ႈ၊ ဢေႃႈ။-
ၵဝ်ၸင်း ဢေးသေႃး၊ လႄႈ ႁႂ်ႈလွႆတီႈယူႇမၼ်းၸိူဝ်းၼၼ်ႉပဵၼ်တီႈဢၼ်လုလႅဝ်ပႅတ်ႈယဝ်ႉ။ ၵဝ်ဢဝ်လိၼ်တီႈဢၼ်မၼ်းၶၢမ်ႇဢမူၺ်ႇၼၼ်ႉဢၢပ်ႈပၼ်တီႈမႃလိၼ်ၵႃႈၼႂ်းထိူၼ်ႇတင်းလၢႆယဝ်ႉ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။
ပိၵ်ႉသမ်ႉၵူၼ်းမဵဝ်း ဢေႇတုမ်ႇ၊ တင်းလၢႆလၢတ်ႈလႄႈဝႃႈ၊ “ႁဝ်းလႆႈလုလႅဝ်ယဝ်ႉ။ ၵူၺ်းၵႃႈ၊ႁဝ်းသမ်ႉတၵ်းၶိုၼ်းတႄႇႁဵတ်းတီႈဢၼ်လုလႅဝ်ၸိူဝ်းၼၼ်ႉထႅင်ႈလူးၵွၼ်ႇဢေႃႈ၊” ဝႃႈၼင်ႇၼႆသေၵေႃႈ၊ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ “ပိၵ်ႉသမ်ႉၶဝ်တႄႇႁဵတ်းသေၵေႃႈၵဝ်တၵ်းၵိူၼ်ႇယႃႉပႅတ်ႈဢေႃႈ။ ၵူၼ်းတၵ်းဢွၼ်ၵၼ်ႁွင်ႉႁဵၵ်ႈၶဝ်ၼၼ်ႉလႄႈဝႃႈ၊ ‘ၶွပ်ႇၼမ်ႉလႅၼ်လိၼ်မိူင်းတုၸရိူၵ်ႈ၊ဢိၵ်ႇတင်းမဵဝ်းၵူၼ်းဢၼ် ထႃႇဝရႃႉၽြႃး၊ ၸႂ်မႆႈၶႂ်ႈၸႃႉယူႇသေႇသေႇဢေႃႈ၊’ ” ဝႃႈၼင်ႇၼႆဢေႃႈ။
မၢၵ်ႇတႃသူတၵ်းႁၼ်လွင်ႈတၢင်းၼၼ်ႉလႄႈသူတၵ်းလၢတ်ႈလႄႈဝႃႈ၊ “ႁႂ်ႈ ထႃႇဝရႃႉၽြႃး၊ မီးမုၼ်ၽုင်းတၼ်းၶူဝ်းယႂ်ႇၼႃႇ၊ဢမ်ႇဝႃႈၵႃႈၼွၵ်ႈၶွပ်ႇၼမ်ႉလိၼ်လႅၼ်မိူင်း ဢိသရေး၊ ၵေႃႈယႂ်ႇၼႃႇဢေႃႈ၊” ဝႃႈၼင်ႇၼႆဢေႃႈ။
“‘လုၵ်ႈၸၢႆးၸၢင်ႈရူဝ်ႇသေႇၵူဝ်ယမ်ပေႃႈမႄႈမၼ်းဢေႃႈ။ ၶႃႈၸၢင်ႈရူဝ်ႇသေႇၵူဝ်ယမ်ၸဝ်ႈမၼ်းဢေႃႈ။ ပေႃးၵဝ်ၼႆႉပဵၼ်ပေႃႈၸဝ်ႈၸိုင်၊မုၼ်သရေႇၵဝ်မီးတီႈလႂ်၊ပေႃးၵဝ်ပဵၼ်ၸဝ်ႈသူၸိုင်၊ၵွပ်ႈသင်လႄႈသူဢမ်ႇရူဝ်ႇသေႇၵူဝ်ယမ်ၵဝ်။’ ဝႃႈၼင်ႇၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ထၢမ်တီႈသူဢၼ်ပဵၼ်ယဵၸ်ႈပရေႃးႁဵၵ်ႈဢၼ်ႁဵတ်းဢမ်ႇပေႃးၼင်ႇႁိုဝ်တီႈၼႃႇမႃႉၸိုဝ်ႈသဵင်မၼ်းၸဝ်ႈၼၼ်ႉဢေႃႈ။ ၵူၺ်းၵႃႈ၊သူထၢမ်လႄႈဝႃႈ၊ ‘ၶႃႈၸဝ်ႈႁဝ်းၶဝ်ႁဵတ်းဢမ်ႇပေႃးၼင်ႇႁိုဝ်တီႈၼႃႇမႃႉၸိုဝ်ႈသဵင်ၸဝ်ႈႁဝ်းၸိူဝ်ႉၼင်ႇႁိုဝ်တီႈၶႃႈယဝ်ႉ၊’ ဝႃႈၼင်ႇၼႆဢေႃႈ။-
သူဢွၼ်ၵၼ်ဢဝ်တၢင်းၵိၼ်ဢၼ်ၵူဝ်ႈၵိူၵ်ႇၼၼ်ႉသၢၵ်ႈလူႇၵႃႈၼိူဝ်ၶဵင်ႇတၢင်းလူႇၵဝ်ယဝ်ႉလူင်ပႄႇ။ သူထၢမ်လႄႈဝႃႈ၊ ‘ၶႃႈၸဝ်ႈႁဝ်းၶဝ်ႁဵတ်းႁႂ်ႈၸဝ်ႈႁဝ်းၵူဝ်ႈၵိူၵ်ႇၸိူဝ်ႉၼင်ႇႁိုဝ်တီႈၶႃႈယဝ်ႉ၊’ ဝႃႈၼင်ႇၼႆလႄႈၸင်ႇပဵၼ်ၵွပ်ႈပိူဝ်ႈဢၼ်သူထၢင်ႇဝႃႈ၊ၽိူၼ်တီႈၵိၼ် ထႃႇဝရႃႉၽြႃး၊ ၼၼ်ႉလႆႈၶၢမ်ႇတၢင်းလူလၢႆသႄႉသွမ်းဢေႃႈ။-
ပေႃးသူဢဝ်တူဝ်သတ်းဢၼ်တႃမွတ်ႇၼၼ်ႉသၢၵ်ႈလူႇၸိုင်၊မီးဢပျတ်ႈဢမ်ႇၸႂ်ႈႁိုဝ်း။ ပေႃးသူဢဝ်တူဝ်ဢၼ်တိၼ်ၵႅင်ႉဢိၵ်ႇတင်းတူဝ်ဢၼ်မီးတၢင်းၶႆႈတၢင်းပဵၼ်ၼၼ်ႉသၢၵ်ႈလူႇၸိုင်၊မီးဢပျတ်ႈဢမ်ႇၸႂ်ႈႁိုဝ်း။ ၸၢမ်းဢဝ်ၵႂႃႇသၢၵ်ႈပၼ်တီႈၶုၼ်ဢုပ်ႉမိူင်းတူၺ်းသေၵမ်း။ မၼ်းတၵ်းထုၵ်ႇၸႂ်ၵျိူၵ်ႈၸႂ်တီႈသူႁိုဝ်း။ တၵ်းထွၵ်ႈလူၺ်ႈၼႃႈသူႁိုဝ်း၊” ဝႃႈၼင်ႇၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ။
မိူဝ်ႈလဵဝ်ၼႆႉသူဢွၼ်ၵၼ်သူးတွင်းၵႃႈတီႈၽၢႆႇၼႃႈ ထႃႇဝရႃႉၽြႃး၊ ႁႂ်ႈမၼ်းၸဝ်ႈမီးတၢင်းဢၼ်ဢဵတ်းလူႁဝ်းသေၵမ်း။ လွင်ႈတၢင်းၼႆႉပဵၼ်မႃးၵွပ်ႈပိူဝ်ႈသူဢေႃႈ။ မၼ်းၸဝ်ႈတၵ်းထွၵ်ႈလူၺ်ႈၼႃႈသူသေၵေႃႉသေၵူၼ်းႁိုဝ်း။-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉၸမ်ႉ၊ “ၵဝ်ၶႂ်ႈႁႂ်ႈၵေႃႉၼိုင်ႈၼႂ်းသူၼႆႉဢိုတ်းၽၵ်းတူၵျွင်းပိၵ်ႈမၢၼ်ႇၸိူဝ်းၼၼ်ႉၼင်ႇႁိုဝ်သူဢမ်ႇလႆႈသႂ်ႇၽႆးၵႃႈၼိူဝ်ၶဵင်ႇတၢင်းလူႇၵဝ်လၢႆလၢႆလွၵ်ႇလွၵ်ႇ။ ၵဝ်ဢမ်ႇထုၵ်ႇၸႂ်ၵျိူၵ်ႈၸႂ်တီႈသူ။ ၵဝ်ဢမ်ႇႁပ်ႉတုင်းဢဝ်ၶိူင်ႈတၢင်းလူႇၵႃႈတီႈမိုဝ်းသူၼၼ်ႉ၊ဝႃႈၼင်ႇၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ။-
ၼႃႇမႃႉၸိုဝ်ႈသဵင်ၵဝ်တၵ်းလႆႈယႂ်ႇမျၢတ်ႈၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ၊ဢဝ်ၵႃႈတီႈၸႃႉၸဵမ်တီႈဢၼ်ၵၢင်ဝၼ်းဢွၵ်ႇတေႃႇထိုင်ႁွတ်ႈတီႈဢၼ်ၵၢင်းဝၼ်းတူၵ်းၼၼ်ႉဢေႃႈ။ တၵ်းလႆႈမီးတၢင်းဢၼ်ဢဝ်ၼၢမ်ႇသႃႇတုတ်ႇၽႆးတီႈၼႃႇမႃႉၸိုဝ်ႈသဵင်ၵဝ်၊ဢိၵ်ႇတင်းတၢင်းဢၼ်သၢၵ်ႈၵၢပ်ႈၶိူင်ႈတၢင်းလူႇဢၼ်မူတ်းသႂ်ၼၼ်ႉၵူႈတီႈၵူႈလႅၼ်ဢေႃႈ။ ၼႃႇမႃႉၸိုဝ်ႈသဵင်ၵဝ်တၵ်းလႆႈယႂ်ႇမျၢတ်ႈၼႃႇၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆဢေႃႈ၊ဝႃႈၼင်ႇၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ။-
ၵူၺ်းၵႃႈ၊သူၶျႃးၽိူၼ်တီႈၵိၼ်မၼ်းၸဝ်ႈတူၵ်းတီႈတႅမ်ႇယဝ်ႉ။ ၵွပ်ႈပိူဝ်ႈဢၼ်သူလၢတ်ႈလႄႈဝႃႈ၊ၽိူၼ်တီႈၵိၼ် ထႃႇဝရႃႉၽြႃး၊ ၼၼ်ႉပဵၼ်ဢၼ်ၵူဝ်ႈဢၼ်ၵိူၵ်ႇလႄႈမၢၵ်ႇမၼ်းႁူင်းမၼ်းဢၼ်ဝႃႈ၊တၢင်းၵိၼ်မၼ်းၸဝ်ႈၼၼ်ႉၶၢမ်ႇတၢင်းလူလၢႆသႄႉသွမ်းယဝ်ႉဢေႃႈ၊ဝႃႈၼင်ႇၼႆၼၼ်ႉဢေႃႈ။-
သူသမ်ႉလၢတ်ႈလႄႈဝႃႈ၊ ‘လွင်ႈတၢင်းၼႆႉပဵၼ်ဢၼ်ယၢပ်ႇၸႂ်ၽိုတ်ႇၸႂ်ၼႃႇလူင်လၢင်လူင်ပႄႇ၊’ ဝႃႈၼင်ႇၼႆသေလႄႈၸင်ႇဢွၼ်ၵၼ်လူလၢႆသႄႉသွမ်းဢေႃႈ။” ဝႃႈၼင်ႇၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ။ “သူဢွၼ်ၵၼ်ဢဝ်တူဝ်ဢၼ်ႁိမ်ဢဝ်ႁူင်ႇဢဝ်လႆႈမႃးၼၼ်ႉ၊တူဝ်ဢၼ်တိၼ်ၵႅင်ႉ၊တူဝ်ဢၼ်မီးတၢင်းၶႆႈတၢင်းပဵၼ်ၸိူဝ်းၼၼ်ႉသေလႄႈဢဝ်သၢၵ်ႈလူႇတီႈၵဝ်ယဝ်ႉလူင်ပႄႇ။ ၵဝ်တၵ်းလႆႈႁပ်ႉၶၢမ်ႇဢဝ်ဢၼ်ၸိူဝ်းၼၼ်ႉသေၵႃႈတီႈမိုဝ်းသူႁိုဝ်း။ ဝႃႈၼင်ႇၼႆလႄႈ ထႃႇဝရႃႉၽြႃး၊ ထၢမ်ဢေႃႈ။-
ၵေႃႉဢၼ်မီးသူဝ်းပေႃႈဢၼ်ဢမ်ႇမီးတီႈၸိတီႈၼႄးၵႃႈၼႂ်းၽုင်သူဝ်းမၼ်းလႄႈဝႆႉၵတိသဵတ်ႈၸႃႇလႄႈဝႃႈ၊မၼ်းတေသၢၵ်ႈလူႇ၊ၵူၺ်းၵႃႈ၊မၼ်းယင်းဢမ်ႇႁဵတ်းၸွမ်းၵတိမၼ်းလႄႈဢဝ်တူဝ်ဢၼ်ဢၢင်ႇၵႃႇလုၼၼ်ႉသၢၵ်ႈလူႇတီႈ ထႃႇဝရႃႉၽြႃး၊ ၼၼ်ႉမီးဢႃႉမၢင်ႇၵလႃႇဢေႃႈ။ ၵဝ်ၼႆႉပဵၼ်ၶုၼ်ႁေႃၶမ်းဢၼ်ယႂ်ႇမျၢတ်ႈၼႃႇဢေႃႈ။ ၼႃႇမႃႉၸိုဝ်ႈသဵင်ၵဝ်ၼႆႉပဵၼ်တီႈဢၼ်လီၵူဝ်လီႁႄၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းဢေႃႈ၊” ဝႃႈၼင်ႇၼႆဢေႃႈ။
ယဵၸ်ႈပရေႃးႁဵၵ်ႈၶဝ်႟။ ၵႂၢမ်းပိင်းၺၢပ်ႈၼႆႉပဵၼ်ပုၼ်ႈသူဢေႃႈ။-
ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း မီးဢမိင်ႉၸမ်ႉ၊ “ပေႃးသူယင်းဢမ်ႇထွမ်ႇဢမ်ႇဢဝ်၊ယင်းဢမ်ႇဢဝ်သႂၢင်းသႂ်ႇဝႆႉၵႃႈၼႂ်းၸႂ်ႁႂ်ႈလႆႈယွင်ႈယေႃးၼႃႇမႃႉၸိုဝ်ႈသဵင်ၵဝ်လႄႈယူႇၸိုင်၊ၵဝ်တၵ်းပွႆႇၽေးတၢင်းဢၼ်ၵိၼ်ႇဝႃႈတူၵ်းႁွတ်ႈၵႃႈၼိူဝ်သူလႄႈႁႂ်ႈမၢင်ႇၵလႃႇသူၸိူဝ်းၼၼ်ႉပဵၼ်ဢႃႉမၢင်ႇၵလႃႇၵႂႃႇဢေႃႈ။ ဢၼ်တႄႉမၼ်းၵွပ်ႈပိူဝ်ႈဢၼ်သူယင်းဢမ်ႇဢဝ်သႂၢင်းသႂ်ႇဝႆႉၵႃႈၼႂ်းၸႂ်သူၼၼ်ႉလႄႈၵဝ်ႁႂ်ႈပဵၼ်ဢႃႉမၢင်ႇၵလႃႇၵႂႃႇယဝ်ႉယဝ်ႉ။-
တူၺ်းလူး။ ၵဝ်တၵ်းၼႄးဝႃႈတီႈလုၵ်ႈလၢင်းသူလႄႈဢဝ်ၶီႈဢဝ်ဢႃႇဢၼ်ပဵၼ်ၶီႈဢႃႇတရိၵ်ႈသၢၼ်ႇတူဝ်တၢင်းလူႇသူၸိူဝ်းၼၼ်ႉတႃးသႂ်ႇၼႃႈသႂ်ႇတႃသူဢေႃႈ။ သူတၵ်းလႆႈၶၢမ်ႇတၢင်းဢၼ်ႁေႃႈဢွၵ်ႇသေၵႃႈတီႈၽၢႆႇၼႃႈၵဝ်ဢေႃႈ။-
သူတၵ်းလႆႈႁုလွင်ႈဢၼ်ၵဝ်ဢဝ်ၵႂၢမ်းပိင်းၺၢပ်ႈၼႆႉပၼ်မႃးတီႈသူႁႂ်ႈပတိၺိၺ်ႇၵဝ်လႆႈတႄႇယူႇတီႈၵူၼ်းမဵဝ်း လေႇဝိ၊ ဢေႃႈ၊ဝႃႈၼင်ႇၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ။
“ပတိၺိၺ်ႇဢၼ်ၵဝ်ႁဵတ်းဝႆႉတီႈၵူၼ်းမဵဝ်း လေႇဝိ၊ ၼၼ်ႉပဵၼ်ဢသၢၵ်ႈ၊ဢိၵ်ႇတင်းတၢင်းဢၼ်ၼိမ်ဢၼ်လီဢေႃႈ။ ၵဝ်ႁဵတ်းဝႆႉတီႈၶဝ်ၼၼ်ႉႁႂ်ႈၶဝ်လႆႈမီးတၢင်းဢၼ်ၵူဝ်ယမ်လႄႈၶဝ်ၼၼ်ႉၵူဝ်ယမ်ယူႇသေလႄႈရူဝ်ႇသေႇၵူဝ်ယမ်ၵွပ်ႈပိူဝ်ႈၼႃႇမႃႉၸိုဝ်ႈသဵင်ၵဝ်ၼၼ်ႉဢေႃႈ။-
သဵတ်ႈၸႃႇတြႃးတႄႇယူႇၵႃႈၼႂ်းသူပ်းၶဝ်လႄႈဢမ်ႇထူပ်းဢမ်ႇႁၼ်ဢပျတ်ႈၵႃႈၼႂ်းသီႇသူပ်းၶဝ်ၼၼ်ႉ။ ၶဝ်ၵႂႃႇမႃးလူၺ်ႈၵၼ်တင်းၵဝ်ၸွမ်းၼင်ႇတြႃးတၢင်းဢၼ်ၼိမ်ဢၼ်လီ၊တြႃးတၢင်းဢၼ်သိုဝ်ႈတေႃႇမီးၼၼ်ႉလႄႈၸၢင်ႈႁႂ်ႈၵူၼ်းၼမ်ၼႃႇဝႄႈပိူင်ႈသေဢပျတ်ႈတုၸရိူၵ်ႈဢေႃႈ။-
သီႇသူပ်းယဵၸ်ႈပရေႃးႁဵၵ်ႈၼၼ်ႉထုၵ်ႇလီလႆႈပႂ်ႉပိင်ႇၺႃႇလႄႈၵူၼ်းတင်းလၢႆတၵ်းလႆႈဢွၼ်ၵၼ်ႁႃဢဝ်တြႃးၸဝ်ႈတီႈသူပ်းမၼ်းၼၼ်ႉဢေႃႈ။ လွင်ႈမၼ်းၸမ်ႉ၊မၼ်းၼၼ်ႉပဵၼ်တမၢၼ်ႇဢၼ် ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ပွႆႇၸႂ်ႉမႃးဢေႃႈ။
“ၵူၺ်းၵႃႈ၊သူၸမ်ႉ၊ဢွၼ်ၵၼ်ၽိတ်းပိူင်ႈတၢင်းယဝ်ႉ။ သူဢွၼ်ၵၼ်ႁဵတ်းႁႂ်ႈၵူၼ်းၼမ်ၼႃႇတိူဝ်ႉမႅၼ်ႈၵႂၢမ်းဢၼ်သူသင်ႇသွၼ်သေလႄႈလူမ်ႉယဝ်ႉ။ သူဢွၼ်ၵၼ်ယႃႉပတိၺိၺ်ႇဢၼ်ၵဝ်ႁဵတ်းဝႆႉလူၺ်ႈၵၼ်တင်းၵူၼ်းမဵဝ်း လေႇဝိ၊ ၼၼ်ႉပႅတ်ႈယဝ်ႉ၊ဝႃႈၼင်ႇၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ။-
ပိူဝ်ႈၼႆၸင်ႇ၊ၵွပ်ႈပိူဝ်ႈဢၼ်သူဢမ်ႇၸွမ်းသဵၼ်ႈတၢင်းၵဝ်တင်းလၢႆလႄႈတူၺ်းၼႃႈလဵၵ်ႉၼႃႈယႂ်ႇၵူၺ်းၼႂ်းမိူဝ်ႈဢၼ်သူသင်ႇသွၼ်ပိူၼ်ႈၼၼ်ႉလႄႈၵဝ်ၸီႇယၢင်ႇႁႂ်ႈသူပဵၼ်တီႈဢၼ်ပိူၼ်ႈလူလႆႈသႄႉသွၼ်းသူ၊ဢိၵ်ႇတင်းႁႂ်ႈပဵၼ်ၶဝ်ၸိူဝ်းဢၼ်ပိူၼ်ႈဢဝ်ၶျႃးတူၵ်းတီႈတႅမ်ႇယဝ်ႉ၊” ဝႃႈၼင်ႇၼႆဢေႃႈ။
ႁဝ်းတင်းသဵင်ႈတင်းလူင်ၼႆႉမီးပေႃႈသူႇလဵဝ်ပႃးလဵဝ်ၵူၺ်းဢမ်ႇၸႂ်ႈႁိုဝ်း။ ၽြႃးပဵၼ်ၸဝ်ႈသူႇလဵဝ်ပႃးလဵဝ်ၵူၺ်းၼၼ်ႉၽၢၼ်ႇသၢင်းႁဵတ်းပဵၼ်ႁဝ်းဢမ်ႇၸႂ်ႈႁိုဝ်း။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈႁဝ်းဢွၼ်ၵၼ်ၶျႃးပတိၺိၺ်ႇဢၼ်မၼ်းၸဝ်ႈႁဵတ်းဝႆႉလူၺ်ႈၵၼ်တင်းပူႇႁဝ်းမွၼ်ႇႁဝ်းၸိူဝ်းၼၼ်ႉတူၵ်းတီႈတႅမ်ႇလႄႈၵေႃႉၼိုင်ႈလႄႈၵေႃႉၼိုင်ႈယႃႉသဵတ်ႈၸႃႇၵၼ်ၸိူဝ်ႉၼင်ႇႁိုဝ်။-
ၵူၼ်းမဵဝ်း ယုတႃႉ၊ ၼၼ်ႉသဵတ်ႈၸႃႇလုလႄႈၵူၼ်းမဵဝ်း ဢိသရေး၊ ဢိၵ်ႇတင်းၵူၼ်းဝဵင်း ယေႇရုသလႅမ်ႇ၊ ၼၼ်ႉ ႁဵတ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇယဝ်ႉ။ ၵူၼ်းမဵဝ်း ယုတႃႉ၊ ၼၼ်ႉႁဵတ်းႁႂ်ႈၵျွင်းပိၵ်ႈမၢၼ်ႇဢၼ် ထႃႇဝရႃႉၽြႃး၊ ႁၵ်ႉၼၼ်ႉလႆႈၵူဝ်ႈၵိူၵ်ႇလႄႈသွင်ႇမၢင်ႇၵလႃႇဢဝ်ၵၼ်တင်းမႄႈယိင်းဢၼ်ဝႆႈသႃၽြႃးၵူၼ်းတၢင်ႇၸိူဝ်ႉတၢင်ႇၶိူဝ်းၼၼ်ႉလူင်ပႄႇ။-
ထႃႇဝရႃႉၽြႃး၊ တၵ်းတႅပ်းပႅတ်ႈၵေႃႉဢၼ်ႁဵတ်းၸိူဝ်ႉၼင်ႇၼၼ်ဢွၵ်ႇသေၵႃႈၼႂ်းၵူၼ်းမဵဝ်း ဢိသရေး၊ လႄႈဢမ်ႇပၼ်မၼ်းဢဝ်ၶိူင်ႈတၢင်းလူႇမႃးၸွမ်းၵူၼ်းမိူင်းႁဝ်းသေယဝ်ႉ၊ၵႂႃႇၸူးတီႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ဢေႃႈ။
လွင်ႈတၢင်းဢၼ်မႂ်းသမ်ႉလႆႈႁဵတ်းထႅင်ႈၸမ်ႉ၊မႂ်းဢဝ်တၢင်းဢၼ်ၼမ်ႉတႃတူၵ်း၊တၢင်းဢၼ်ႁႆႈႁွင်ႉပွင်ႉၶၢင်းၼၼ်ႉသေလႄႈႁူမ်ႇသုမ်ႇၶဵင်ႇတၢင်းလူႇ ထႃႇဝရႃႉၽြႃး၊ ၵွပ်ႈပိူဝ်ႈမၼ်းၸဝ်ႈဢမ်ႇႁပ်ႉၶၢမ်ႇၶိူင်ႈတၢင်းလူႇမႂ်းလႄႈဢမ်ႇမီးတၢင်းဢၼ်ထုၵ်ႇၸႂ်ၵျိူၵ်ႈၸႂ်သေလႄႈႁပ်ႉၶၢမ်ႇဢဝ်သေၵႃႈတီႈမိုဝ်းမႂ်းၼၼ်ႉ။-
ၵူၺ်းၵႃႈ၊မႂ်းထၢမ်လႄႈဝႃႈ၊ “ပဵၼ်ၵွပ်ႈပိူဝ်ႈၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။ ပဵၼ်ၵွပ်ႈပိူဝ်ႈဢၼ် ထႃႇဝရႃႉၽြႃး၊ ပဵၼ်သၢၵ်ႈသေႇယူႇၵႄႈဝူင်ႈၵၢင်မႂ်းတင်းမေးမႂ်း၊ဢၼ်မႂ်းသွင်ႇမၢင်ႇၵလႃႇဢဝ်ၵၼ်ယၢမ်းမိူဝ်ႈဢၼ်မႂ်းယင်းလဵၵ်ႉယင်းၼုမ်ႇၼၼ်ႉလႄႈပိၵ်ႉသမ်ႉမၼ်းပဵၼ်ၵေႃႉသႄႈမႂ်း၊မေးမႂ်းဢၼ်ၸၢပ်ႈသႅင်ႇၵၼ်တင်းပတိၺိၺ်ႇဢၼ်မႂ်းႁဵတ်းဝႆႉၼၼ်ႉသေၵေႃႈမႂ်းယင်းဢမ်ႇပႂ်ႉသဵတ်ႈၸႃႇလႄႈၽိတ်းပိူင်ႈၼၼ်ႉဢေႃႈ။-
မၼ်းၸဝ်ႈၽၢၼ်ႇသၢင်းႁဵတ်းပဵၼ်သွင်ၵေႃႉၼၼ်ႉပဵၼ်ၵေႃႉလဵဝ်ၵူၺ်းဢမ်ႇၸႂ်ႈႁိုဝ်း။ တူဝ်တင်းဝိၺိၺ်ႇၵေႃႈပဵၼ်ဢၼ်မၼ်းၸဝ်ႈပိူင်ႇဢေႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၽၢၼ်ႇသၢင်းႁဵတ်းပဵၼ်ၵေႃႉလဵဝ်ဝႃႈၼႆၸမ်ႉ၊မၼ်းၸဝ်ႈၶႂ်ႈႁႂ်ႈသူၵိူတ်ႇလုၵ်ႈလၢင်းဢၼ်တေရူဝ်ႇသေႇၵူဝ်ယမ်ၽြႃးပဵၼ်ၸဝ်ႈဢေႃႈ။ ပိူဝ်ႈၼႆလႄႈဢွၼ်ၵၼ်ၶျုၵ်ႈထိင်းၸႂ်သၽေႃးသူဝႆႉတႃႉ။ ယႃႇပေယႃႉသဵတ်ႈၸႃႇတီႈမေးဢၼ်မႂ်းသွင်ႇမၢင်ႇၵလႃႇယၢမ်းမိူဝ်ႈဢၼ်မႂ်းယင်းလဵၵ်ႉယင်းၼုမ်ႇၼၼ်ႉသေလႄႈၽိတ်းပိူင်ႈ။-
“ၵဝ်ၸင်းဢမုတၢင်းဢၼ်ပႅတ်ႈမေးဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ မီးဢမိင်ႉ ဢေႃႈ။ “ၵဝ်ၸင်းၵေႃႉဢၼ်ႁဵတ်းဢထမ်ႇမႃႉတီႈမေးမၼ်းၼၼ်ႉဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ။ ပိူဝ်ႈၼႆလႄႈဢွၼ်ၵၼ်ၶျုၵ်ႈထိင်းၸႂ်သၽေႃးသူဝႆႉတႃႉ။ ယႃႇပေဢွၼ်ၵၼ်ယႃႉသဵတ်ႈၸႃႇ။
သူၼႆႉဢွၼ်ၵၼ်သူပ်းၼမ်ၵႂၢမ်းၼမ်တေႃႇထိုင်ႁွတ်ႈထၢၼ်ႈပေႃးႁူမၼ်းၸဝ်ႈႁိူဝ်ႉၼုၼ်းယဝ်ႉ၊သူသမ်ႉထၢမ်လႄႈဝႃႈ၊ “ႁဝ်းလႆႈႁဵတ်းႁႂ်ႈႁူမၼ်းၸဝ်ႈႁိူဝ်ႉၼုၼ်းၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။ ပဵၼ်လွင်ႈတၢင်းဢၼ်သူၸၢင်ႈဢွၼ်ၵၼ်လၢတ်ႈလႄႈဝႃႈ၊ “ၵူၼ်းၵႃႈဢၼ်ႁဵတ်းတုၸရိူၵ်ႈၼၼ်ႉပဵၼ်ဢၼ်လီဢၼ်ငၢမ်းၵႃႈတီႈၽၢႆႇၼႃႈ ထႃႇဝရႃႉၽြႃး၊ လႄႈ၊မၼ်းၸဝ်ႈထုၵ်ႇၸႂ်ၵျိူၵ်ႈၸႂ်ၵူၼ်းၸိူဝ်ႉၼင်ႇၼၼ်ယဝ်ႉ၊” ဝႃႈၼင်ႇၼႆဢေႃႈ။ သူသမ်ႉထၢမ်လႄႈဝႃႈ၊ “ၽြႃးပဵၼ်ၸဝ်ႈဢၼ်ၸီႇယၢင်ႇၸႅတ်ႈထၢမ်ၼၼ်ႉၸမ်ႉ၊မီးၵႃႈတီႈလႂ်၊” ဝႃႈၼင်ႇၼႆယဝ်ႉလူင်ပႄႇ။
“တူၺ်းလူး။ ၵဝ်တၵ်းပွႆႇၸႂ်ႉတမၢၼ်ႇၵဝ်ဢၼ်တၵ်းမႄးသဵၼ်ႈတၢင်းဢၼ်ၵဝ်ၵႂႃႇၼၼ်ႉၵႃႈတီႈၽၢႆႇၼႃႈၵဝ်ဢေႃႈ။ ၸဝ်ႈဢၼ်သူႁႃၼၼ်ႉတၵ်းၵိုင်ႉၵၢင်ႉၽုတ်းပေႃႇမႃးၵႃႈတီႈပိၵ်ႈမၢၼ်ႇၸဝ်ႈၵမ်းလဵဝ်ဢေႃႈ။ တူၺ်းလူး။ တမၢၼ်ႇဢၼ်ပႃးပတိၺိၺ်ႇၸဝ်ႈဢၼ်သူထုၵ်ႇၸႂ်ၵျိူၵ်ႈၸႂ်ၼၼ်ႉတိုၵ်ႉမႃးယူႇဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ။
ၽူႈလႂ်တၵ်းယိူၼ်ႉၶၢမ်ႇယူႇထိုင်မိူဝ်ႈဝၼ်းဢၼ်မၼ်းၸဝ်ႈတၵ်းႁွတ်ႈမႃးၼၼ်ႉလႆႈ။ ၽူႈလႂ်၊တၵ်းၸုၵ်းၶၢမ်ႇၼႂ်းမိူဝ်ႈဢၼ်မၼ်းၸဝ်ႈပေႃႇပဵၼ်မႃးၼၼ်ႉလႆႈ။ ၸဝ်ႈၼၼ်ႉတၵ်းပဵၼ်မိူၼ်ၸိူဝ်ႉၼင်ႇၽႆးဢၼ်ၶႃႇငိုၼ်း၊ၽွင်သၵ်ႉၶူဝ်းၵူၼ်းၵေႃႉဢၼ်သၵ်ႉၶူဝ်းၸႂ်ႉၼၼ်ႉဢေႃႈ။-
မၼ်းၸဝ်ႈတၵ်းၼင်ႈယူႇမိူၼ်ၸိူဝ်ႉၼင်ႇၵေႃႉဢၼ်ၶႃႇငိုၼ်းႁႂ်ႈမူတ်းသႂ်ၼၼ်ႉသေလႄႈၶႃႇၵူၼ်းမဵဝ်း လေႇဝိ၊ တင်းလၢႆ၊မိူၼ်ၸိူဝ်ႉၼင်ႇဢၼ်ၶႃႇငိုၼ်းၶႃႇၶမ်းႁႂ်ႈမူတ်းသႂ်ၼၼ်ႉသေလႄႈၶဝ်ၼၼ်ႉတၵ်းသၢၵ်ႈလူႇၶိူင်ႈတၢင်းလူႇၸွမ်းလူၺ်ႈတၢင်းဢၼ်သိုဝ်ႈတေႃႇၼၼ်ႉတီႈ ထႃႇဝရႃႉၽြႃး၊ ဢေႃႈ။-
မိူဝ်ႈၼၼ်ႉၶိူင်ႈတၢင်းလူႇၵူၼ်းမဵဝ်း ယုတႃႉ၊ တင်းၵူၼ်းဝဵင်း ယေႇရုသလႅမ်ႇ၊ ၸိူဝ်းၼၼ်ႉတၵ်းပဵၼ်ဢၼ်လီထုၵ်ႇၸႂ်ၵျိူၵ်ႈၸႂ် ထႃႇဝရႃႉၽြႃး၊ မိူၼ်ၸိူဝ်ႉၼင်ႇဢၼ်ပဵၼ်ၼႂ်းၶိင်ႇမိူဝ်ႈၵွၼ်ႇဢွၼ်ၼႆႉၼၼ်ႉဢေႃႈ။
“ၵဝ်တၵ်းသုတ်ႉၸပ်းသုတ်ႉၸူးတီႈသူႁႂ်ႈလႆႈၸႅတ်ႈထၢမ်ၸီႇယၢင်ႇသူဢေႃႈ။ ၵဝ်တၵ်းပဵၼ်သၢၵ်ႈသေႇဢၼ်ၶၼ်ဢၼ်ၽႂ်းလႄႈၶတ်းတႃႉၵၼ်တင်းၵေႃႉဢၼ်ႁဵတ်းဢတၢတ်ႈမေႃၽီ၊ၵေႃႉဢၼ်ၽိတ်းပိူင်ႈမေးပိူၼ်ႈ၊ၵေႃႉဢၼ်ႁဵတ်းတၢင်းဢၼ်ၵိၼ်ႇဢၼ်လႃႇဢၼ်ဢမ်ႇၸိုဝ်ႈဢမ်ႇၸႂ်ႈ၊ၵေႃႉဢၼ်ယင်းဢမ်ႇပၼ်ၵႃႈၸၢင်ႈၶၼ်ငႃတီႈၵူၼ်းဢၼ်ၵိၼ်ၸၢင်ႈၵိၼ်ငႃသေလႄႈၼိၵ်ႈၸၢၵ်ႈငႅၼ်းသႄး၊ၵေႃႉဢၼ်ၼိၵ်ႈၸၢၵ်ႈငႅၼ်းသႄးမႄႈမူၵ်းမႄႈမၢႆႈ၊ဢိၵ်ႇတင်းလုၵ်ႈဢွၼ်ႇဢၼ်ၽၢၼ်ပေႃႈၽၢၼ်မႄႈ၊ၵေႃႉဢၼ်ၸီႇယၢင်ႇတီႈၶႅၵ်ႇဢႃႇၵၼ်ႇတုဢၼ်ဢမ်ႇၸွမ်းတြႃးဢၼ်မၢၼ်ႇ၊ၵေႃႉဢၼ်ဢမ်ႇၵူဝ်ဢမ်ႇႁႄၵဝ်ၸိူဝ်းၼၼ်ႉဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ။
“ၵဝ်ၼႆႉပဵၼ် ထႃႇဝရႃႉၽြႃး၊ လႄႈဢမ်ႇမီးတၢင်းဢၼ်ၶၢႆႉဢၼ်ပုတ်ႈ။ ပိူဝ်ႈၼႆလႄႈၵူၼ်းမဵဝ်း ယႃႇၵုပ်ႈ၊ တင်းလၢႆၶဝ်႟။ သူဢမ်ႇလႆႈႁွတ်ႈထိုင်တၢင်းဢၼ်လုဢၼ်သုမ်း။-
ဢဝ်ၵႃႈတီႈၸႃႉၸဵမ်ၸူဝ်ႈပၢၼ်ပူႇသူမွၼ်ႇသူၼၼ်ႉလႄႈသူဢွၼ်ၵၼ်ဝႄႈပႅတ်ႈထုင်းၽိင်ႈတြႃးဢၼ်ၵဝ်ၸီႇယၢင်ႇဝႆႉၸိူဝ်းၼၼ်ႉလႄႈဢမ်ႇပႂ်ႉၵမ်ပႂ်ႉၸွမ်း၊ဢွၼ်ၵၼ်ၶိုၼ်းမႃးၸူးတီႈၵဝ်တႃႉ။ ၵဝ်ၵေႃႈတၵ်းၶိုၼ်းမႃးၸူးတီႈသူဢေႃႈ၊ဝႃႈၼင်ႇၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ။ ၵူၺ်းၵႃႈ၊သူဢွၼ်ၵၼ်ထၢမ်လႄႈဝႃႈ၊ ‘ၶႃႈၸဝ်ႈႁဝ်းၶဝ်တၵ်းလႆႈႁဵတ်းၸိူဝ်ႉၼင်ႇႁိုဝ်ၶိုၼ်းမႃးၸူးတီႈၶႃႈ၊’ ဝႃႈၼင်ႇၼႆဢေႃႈ။-
ၵူၼ်းၸိုင်၊တၵ်းလႆႈႁိမ်ႁူင်ႇဢဝ်ဢုၵ်ႉၸႃႇၽြႃးပဵၼ်ၸဝ်ႈႁိုဝ်း။ ၵူၺ်းၵႃႈ၊သူဢွၼ်ၵၼ်ႁိမ်ႁူင်ႇဢဝ်ဢုၵ်ႉၸႃႇၵဝ်ယဝ်ႉ။ ၼႂ်းဝႃႈၼၼ်သေၵေႃႈ သူဢွၼ်ၵၼ်ထၢမ်လႄႈဝႃႈ၊ ‘ၶႃႈၸဝ်ႈႁဝ်းၶဝ်ႁဵတ်းၸိူဝ်ႉၼင်ႇႁိုဝ်ႁိမ်ႁူင်ႇဢဝ်တီႈၶႃႈ၊’ ဝႃႈၼင်ႇၼႆဢေႃႈ။ သူဢွၼ်ၵၼ်ႁိမ်ႁူင်ႇဢဝ်သိပ်းပုၼ်ႈပုၼ်ႈၼိုင်ႈၸိူဝ်းၼၼ်ႉ၊ဢိၵ်ႇတင်းၶိူင်ႈတၢင်းလူႇၸိူဝ်းၼၼ်ႉယဝ်ႉ။-
သူတင်းသဵင်ႈလႆႈၶၢမ်ႇဢႃႉမၢင်ႇၵလႃႇတၢင်းဢၼ်ၵိၼ်ႇဢၼ်ဝႃႈယဝ်ႉ။ လွင်ႈမၼ်းၸမ်ႉ၊သူၵႃႈပဵၼ်ၵူၼ်းဝၢၼ်ႈၵူၼ်းမိူင်းၼႆႉဢွၼ်ၵၼ်ႁိမ်ႁူင်ႇဢဝ်ဢုၵ်ႉၸႃႇၵဝ်ယဝ်ႉ။-
ဢွၼ်ၵၼ်ဢဝ်သိပ်းပုၼ်ႈပုၼ်ႈၼိုင်ႈၵႃႈမီးၼၼ်ႉသႂၢင်းၶဝ်ႈၵႃႈၼႂ်းတိူၵ်ႈၽၢၼ်ႇတႃႇ ႁႂ်ႈတၢင်းၵိၼ်တၢင်းၶူပ်းလႆႈမီးၵႃႈၼႂ်းႁိူၼ်းၵဝ်တႃႉ။ ဢွၼ်ၵၼ်ၸၢမ်းတူၺ်းၸိူဝ်ႉၼင်ႇၼၼ်ႁႂ်ႈလႆႈႁုလွင်ႈဢၼ်ၵဝ်တၵ်းၽုၺ်ႇႁူးလၢင်းတဵၼ်ၽႃႉၵၢင်ႁၢဝ်တင်းလၢႆသေလႄႈဢဝ်တၢင်းလီမၢင်ႇၵလႃႇသွၼ်းလေႃႇထၢၼ်ႈပေႃးလူၼ်ႉပေႃးလိူဝ်ႁိုဝ်း၊တၵ်းဢမ်ႇၽုၺ်ႇႁိုဝ်းၼၼ်ႉတႃႉ၊ဝႃႈၼင်ႇၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ။-
ၵဝ်တၵ်းသင်ႇသွၼ်သုင်းမႃႉတီႈတူဝ်ဢၼ်ၸၢင်ႈၶူပ်းၵိၼ်ၼၼ်ႉပုၼ်ႈသူလႄႈမၼ်းၼၼ်ႉဢမ်ႇလႆႈယႃႉမၢၵ်ႇလိၼ်ႁူင်းလိၼ်သူပႅတ်ႈ။ တိၼ်ႇမၢၵ်ႇတူၼ်ႈၶိူဝ်းမၢၵ်ႇၸပိတ်ႉသူၵေႃႈၸူဝ်ႈဢၼ်ယင်းဢမ်ႇပႆႇၵႄႇပႆႇသုၵ်းၼၼ်ႉတၵ်းဢမ်ႇလူၼ်ႇတူၵ်းႁူင်ႈတူၵ်းၵႃႈၼႂ်းသူၼ်မၢၵ်ႇၸပိတ်ႉသူ၊ဝႃႈၼင်ႇၼႆလႄႈ ၸဝ်ႈထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ။-
ၵူၼ်းၵူႈၸိူဝ်ႉၵူႈမဵဝ်းတၵ်းဢွၼ်ၵၼ်ႁွင်ႉႁဵၵ်ႈသူဝႃႈ၊ၵေႃႉဢၼ်မီးမၢင်ႇၵလႃႇ၊မိူင်းသူၵေႃႈတၵ်းပဵၼ်မိူင်းဢၼ်လီငၢမ်းလႄႈထုၵ်ႇၸႂ်ၵျိူၵ်ႈၸႂ်ဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ။
“သူဢွၼ်ၵၼ်လၢတ်ႈၵႂၢမ်းႁတ်းႁတ်းႁၢၼ်ႁၢၼ်ၼႃႇလူင်လၢင်ယူႇသေလႄႈၶတ်းတႃႉၵၼ်တင်းၵဝ်ယဝ်ႉ၊ဝႃႈၼင်ႇၼႆလႄႈ ထႃႇဝရႃႉၽြႃး၊ မီးဢမိင်ႉဢေႃႈ။ ၵူၺ်းၵႃႈ၊သူထၢမ်လႄႈဝႃႈ၊ ‘ႁဝ်းၶႃႈဢွၼ်ၵၼ်လၢတ်ႈၸိူဝ်ႉၼင်ႇႁိုဝ်လႄႈၶတ်းတႃႉၵၼ်တင်းၸဝ်ႈႁဝ်းမႅၼ်ႈတီႈၶႃႈ၊’ ဝႃႈၼင်ႇၼႆလူင်ပႄႇ။-
သူဢွၼ်ၵၼ်လၢတ်ႈလႄႈဝႃႈ၊ ‘တၢင်းဢၼ်ၵိုတ်ႉႁၢပ်ႇႁဵတ်းဝၢတ်ႈတီႈ ထႃႇဝရႃႉၽြႃး၊ ၼၼ်ႉဢမ်ႇမီးဢၵျူဝ်း။ တၢင်းဢၼ်ႁဝ်းပႂ်ႉၵမ်ပႂ်ႉၸွမ်းလွင်ႈတၢင်းဢၼ်မၼ်းၸဝ်ႈပိင်းၺၢပ်ႈဝႆႉၼၼ်ႉသေယဝ်ႉ၊ၵႂႃႇမႃးလူၺ်ႈတင်းဢၼ်ၸႂ်ဢမ်ႇပျေႃႇဢမ်ႇသိူဝ်းလႄႈယူႇၵႃႈတီႈၽၢႆႇၼႃႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ ၼၼ်ႉမီးဢၵျူဝ်းၵႃႈသင်။-
မိူဝ်ႈလဵဝ်ၼႆႉႁဝ်းဢွၼ်ၵၼ်ႁွင်ႉႁဵၵ်ႈၵေႃႉဢၼ်မႃႇၼႃႉပူၵ်းပႅၼ်ၼၼ်ႉပဵၼ်ၵေႃႉဢၼ်လႆႈႁပ်ႉဢဝ်မၢင်ႇၵလႃႇဢေႃႈ။ ၶဝ်ၸိူဝ်းဢၼ်ႁဵတ်းတုၸရိူၵ်ႈၼၼ်ႉၸၢင်ႈႁဵတ်းလႆႈပဵၼ်လႆႈဢမၢၼ်ႇၶၼ်ပဵၼ်ဢေႃႈ။ ပိၵ်ႉသမ်ႉ၊ၶဝ်ႁဵတ်းတၢင်းဢၼ်ၸၢမ်းတူၺ်းၽြႃးပဵၼ်ၸဝ်ႈယူႇသေၵေႃႈၶဝ်ၸၢင်ႈလႆႈၵတ်းယဵၼ်ၶျၢမ်းသႃႇယူႇဢမၢၼ်ႇၶၼ်ပဵၼ်ဢေႃႈ၊’ ဝႃႈၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၶဝ်ၸိူဝ်းဢၼ်ၵူဝ်ႁႄ ထႃႇဝရႃႉၽြႃး၊ ၼၼ်ႉၵေႃႉၼိုင်ႈလႄႈၵေႃႉၼိုင်ႈလၢတ်ႈၵၼ်ၸႃၵၼ်ဢေႃႈ။ ထႃႇဝရႃႉၽြႃး၊ ထွမ်ႇငိၼ်းဢေႃႈ။ လိၵ်ႈပုၼ်ႈတႃႇမၢတ်ႈဝႆႉတွင်းဝႆႉၼၼ်ႉမီးတၢင်းဢၼ်တႅမ်ႈမၢႆဝႆႉယူႇၵႃႈတီႈၽၢႆႇၼႃႈမၼ်းၸဝ်ႈလွင်ႈၶဝ်ၸိူဝ်းဢၼ်ၵူဝ်ႁႄ ထႃႇဝရႃႉၽြႃး၊ လႄႈၶုၵ်းၸႂ်လႆႈၶႂ်ႈၸႂ်ထူပ်းၼႃႇမႃႉၸိုဝ်ႈသဵင်မၼ်းၸဝ်ႈၼၼ်ႉဢေႃႈ။-
“ၶဝ်ၼၼ်ႉတၵ်းပဵၼ်ၵူၼ်းၵဝ်လႄႈပဵၼ်ဢုၵ်ႉၸႃႇၽၼ်ႇတႃႇဢၼ်ၵဝ်ထိူၵ်ႈပိူင်ႇၼႂ်းဝၼ်းဢၼ်ၵဝ်ၸီႇယၢင်ႇၼၼ်ႉဢေႃႈ၊ၵဝ်တၵ်းႁၵ်ႉဢဵတ်းလူၶဝ်ၼၼ်ႉမိူၼ်ၸိူဝ်ႉၼင်ႇဢၼ်ပေႃႈႁၵ်ႉဢဵတ်းလူလုၵ်ႈၸၢႆးဢၼ်ႁဵတ်းဝၢတ်ႈတီႈပေႃႈယူႇၼၼ်ႉဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ။-
မိူဝ်ႈၼၼ်ႉသူတၵ်းသမ်ႉဢွၼ်ၵၼ်ၸၵ်ႉၽႄလႄႈႁုၵေႃႉဢၼ်သိုဝ်ႈတေႃႇ၊ၵေႃႉဢၼ်ဢမ်ႇသိုဝ်ႈတေႃႇ၊ၵေႃႉဢၼ်ႁဵတ်းဝၢတ်ႈတီႈၽြႃးပဵၼ်ၸဝ်ႈ၊ၵေႃႉဢၼ်ဢမ်ႇႁဵတ်းဝၢတ်ႈတီႈၽြႃးပဵၼ်ၸဝ်ႈၼၼ်ႉဢေႃႈ။
“တူၺ်းလူး။ မိုဝ်ႉဝၼ်းဢၼ်မႆႈမိူၼ်ၸိူဝ်ႉၼင်ႇဢၼ်ၽႆးမႆႈၵႃႈၼႂ်းၽီးၽႆးၼၼ်ႉတၵ်းႁွတ်ႈထိုင်မႃးဢေႃႈ၊ၶဝ်ၵႃႈဢၼ်မႃႇၼႃႉယႂ်ႇသုင်၊ဢိၵ်ႇတင်းၶဝ်ၵႃႈဢၼ်ႁဵတ်းတုၸရိူၵ်ႈၼၼ်ႉတၵ်းပဵၼ်ယိူဝ်ႈယႃႈယိူဝ်ႈယုၵ်းဢၼ်ႁႅင်ႈဢၼ်ႁွင်လႄႈမိုဝ်ႉဝၼ်းဢၼ်တၵ်းႁွတ်ႈထိုင်ၼၼ်ႉတၵ်းမႆႈၶဝ်ပႅတ်ႈထၢၼ်ႈပေႃးႁႂ်ႈငဝ်ႈၶဝ်ပၢႆၶဝ်ဢမ်ႇလႆႈၵိုတ်းလႆႈၵျၢၼ်ႇၼၼ်ႉဢေႃႈ၊” ဝႃႈၼင်ႇၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ။-
“တီႈသူၸိူဝ်းဢၼ်ၵူဝ်ႁႄၼႃႇမႃႉၸိုဝ်ႈသဵင်ၵဝ်ၼၼ်ႉၸမ်ႉ၊ၶုၼ်ၵႃႈဝၼ်းဢၼ်မီးတြႃးတၢင်းဢၼ်သိုဝ်ႈတေႃႇၼၼ်ႉဢၼ်မီးပိၵ်ႇလႄႈႁဵတ်းႁႂ်ႈတၢင်းၶႆႈတၢင်းပဵၼ်ႁၢႆၼၼ်ႉတေပေႃႇမႃးဢေႃႈ။ သူတၵ်းမိူၼ်ၸိူဝ်ႉၼင်ႇဝူဝ်းဢွၼ်ႇဢၼ်ဢွၼ်ၵၼ်ၵျွၵ်းဝႅၼ်သေလႄႈဢွၵ်ႇသေၵႃႈၼႂ်းသိုင်ႇၼႂ်းၶွၵ်ႈၵႂႃႇၼၼ်ႉဢေႃႈ။-
သူတၵ်းဢွၼ်ၵၼ်ယဵပ်ႇယမ်ႈၶဝ်ၸိူဝ်းဢၼ်ဢမ်ႇတြႃးၼၼ်ႉဢေႃႈ။ ၼင်ႇၼၼ်လႄႈၶဝ်တၵ်းပဵၼ်ၸိူဝ်ႉၼင်ႇမုၼ်ႈလိၼ်ၵႃႈတႂ်ႈၽႃႇတိၼ်သူၼႂ်းမိုဝ်ႉဝၼ်းဢၼ်ၵဝ်ၸီႇယၢင်ႇၼၼ်ႉဢေႃႈ၊ဝႃႈၼင်ႇၼႆလႄႈ ထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်း၊ မီးဢမိင်ႉဢေႃႈ။
“သူဢွၼ်ၵၼ်ၶုၵ်းၸႂ်လႆႈၶႆႈၸႂ်ထူပ်းထုင်းၽိင်ႈတြႃးတင်းလၢႆ၊ဢိၵ်ႇတင်းလွင်ႈတၢင်းဢၼ်ၵဝ်ၸီႇယၢင်ႇဝႆႉၸိူဝ်းၼၼ်ႉဢၼ်ဝႃႈ၊တြႃးၶႃႈၵဝ် မူဝ်းသေႇ၊ ဢၼ်ၵဝ်သင်ႇလၢတ်ႈဝႆႉတီႈမၼ်းၵႃႈၼႂ်းလွႆ သိၼႃႉ၊ ပုၼ်ႈၵူၼ်းမဵဝ်း ဢိသရေး၊ တင်းသဵင်ႈတင်းလူင်ၼၼ်ႉတႃႉ။
“တူၺ်းလူး။ ၸူဝ်ႈဢၼ်မိုဝ်ႉဝၼ်းယႂ်ႇဝၼ်းလူင် ထႃႇဝရႃႉၽြႃး၊ ဢၼ်လီၵူဝ်လီႁႄၼၼ်ႉဢမ်ႇပႆႇႁွတ်ႈပႆႇထိုင်ၸိုင်၊ၵဝ်တၵ်းပွႆႇၸႂ်ႉပရေႃးၽႅတ်ႈ ဢေးလိယႃႉ၊ မႃးၸူးတီႈသူဢေႃႈ။-
လွင်ႈၼင်ႇႁိုဝ်ၵဝ်တၵ်းဢမ်ႇမႃးလႄႈဢဝ်ၽေးတၢင်းဢၼ်ၵိၼ်ႇဢၼ်ဝႃႈသေလႄႈပၼ်တၢမ်ႇတီႈမိူင်းသူၸိုင်၊မၼ်းၼၼ်ႉတၵ်းႁႂ်ႈပေႃႈမႄႈ၊ဢိၵ်ႇတင်းလုၵ်ႈလၢင်း၊လုၵ်ႈလၢင်းဢိၵ်ႇတင်းပေႃႈမႄႈႁႂ်ႈထုၵ်ႇမေႃပေႃးၵႂၢမ်းၵၼ်ဢေႃႈ၊” ဝႃႈၼင်ႇၼႆဢေႃႈ။ ၵျၢမ်းပရေႃးၽႅတ်ႈမႃႇလၶိယဝ်ႉယဝ်ႉဢေႃႈ။
ၸရၢင်းၸိူဝ်ႉၶိူဝ်းပူႇပေႃႈ ၸဝ်ႈယေႇသုၶရိၸ်ႈ၊ ဢၼ်သိုပ်ႇလူင်းမႃးၵႃႈတီႈၶုၼ်လူင် တႃႇဝိတ်ႈ၊ ဢၼ်ပဵၼ်ၸိူဝ်ႉၶိူဝ်း ဢႃႇပြႃႇႁၢမ်ႇ၊ ၼၼ်ႉၸမ်ႉ။
ၶုၼ်လူင် တႃႇဝိတ်ႈ၊ တင်းမေးမၼ်းဢၼ်ဢွၼ်တၢင်းယၢမ်ႈပဵၼ်မေး ဢုရိယႃး၊ မႃးၼၼ်ႉမီးလုၵ်ႈၸၢႆး သေႃးလမုၼ်ႇ၊-
သေႃးလမုၼ်ႇ၊ မီးလုၵ်ႈၸၢႆး ရူဝ်းပုမ်ႇ၊ ရူဝ်းပုမ်ႇ၊ မီးလုၵ်ႈၸၢႆး ဢပိယႃႉ၊ ဢပိယႃႉ၊ မီးလုၵ်ႈၸၢႆး ဢႃႇသႃႉ၊-
ဢႃႇသႃႉ၊ မီးလုၵ်ႈၸၢႆး ယူဝ်းသၽတ်ႉ၊ ယူဝ်းသၽတ်ႉ၊ မီးလုၵ်ႈၸၢႆး ယူဝ်းရမ်ႇ၊ ယူဝ်းရမ်ႇ၊ မီးလုၵ်ႈၸၢႆး ဢူဝ်းၸိယႃႉ၊-
ဢူဝ်းၸိယႃႉ၊ မီးလုၵ်ႈၸၢႆး ယူဝ်းထမ်ႇ၊ ယူဝ်းထမ်ႇ၊ မီးလုၵ်ႈၸၢႆး ဢႃႇၶတ်ႉ၊ ဢႃႇၶတ်ႉ၊ မီးလုၵ်ႈၸၢႆး ႁေႇၸၵိ၊-
ႁေႇၸၵိ၊ မီးလုၵ်ႈၸၢႆး မၼႃႇသေႇ၊ မၼႃႇသေႇ၊ မီးလုၵ်ႈၸၢႆး ဢႃႇမုၼ်ႇ၊ ဢႃႇမုၼ်ႇ၊ မီးလုၵ်ႈၸၢႆး ယူဝ်းသိယႃႉ၊ သေယဝ်ႉ၊-
မိူဝ်ႈဢၼ်ၵူၼ်းမဵဝ်း ဢိသရေး၊ ဢမ်ႇပႆႇလႆႈၶၢမ်ႇတိဢဝ်သိမ်းဢဝ်ၵႂႃႇတီႈမိူင်း ပႃႇပုလုၼ်ႇ၊ ပုၼ်ႉၸိုင်၊ ယူဝ်းသိယႃႉ၊ မီးလုၵ်ႈၸၢႆး ယေႇၶေႃးၼိ၊ တင်းၼွင်ႉၸၢႆးမၼ်းလႂ်ဢေႃႈ။
ဝၢႆးသေဢၼ်လႆႈၶၢမ်ႇတၢင်းဢၼ်တိဢဝ်ၵႂႃႇမိူင်း ပႃႇပုလုၼ်ႇ၊ ယဝ်ႉၼၼ်ႉ၊ ယေႇၶေႃးၼိ၊ မီးလုၵ်ႈၸၢႆး သႃႇလထိဢေးလႃႉ၊ သႃႇလထိဢေးလႃႉ၊ မီးလုၵ်ႈၸၢႆး ၸေႇရုပႃႉပေႇလႃႉ၊-
ၸေႇရုပႃႉပေႇလႃႉ၊ မီးလုၵ်ႈၸၢႆး ဢပျုတ်ႉ၊ ဢပျုတ်ႉ၊ မီးလုၵ်ႈၸၢႆး ဢေးလျႃႇၵိမ်း၊ ဢေးလျႃႇၵိမ်း၊ မီးလုၵ်ႈၸၢႆး ဢႃႇၸေႃႇ၊-
ဢႃႇၸေႃႇ၊ မီးလုၵ်ႈၸၢႆး ၸႃႇတုၵ်ႉ၊ ၸႃႇတုၵ်ႉ၊ မီးလုၵ်ႈၸၢႆး ဢၶိမ်ႇ၊ ဢၶိမ်ႇ၊ မီးလုၵ်ႈၸၢႆး ဢေးလျုတ်ႉ၊-
ဢေးလျုတ်ႉ၊ မီးလုၵ်ႈၸၢႆး ဢေးလႃႇၸႃႇ၊ ဢေးလႃႇၸႃႇ၊ မီးလုၵ်ႈၸၢႆး မတ်ႉထၼ်ႇ၊မတ်ႉထၼ်ႇ၊ မီးလုၵ်ႈၸၢႆး ယႃႇၵုပ်ႈ၊-
ယႃႇၵုပ်ႈ၊ မီးလုၵ်ႈၸၢႆး ယူဝ်းသႅပ်ႈ၊ ၽူဝ်ၼၢင်း မႃႇရိ၊ လႄႈ၊ၵႃႈတီႈၼၢင်း မႃႇရိ၊ ၼၼ်ႉၵိူတ်ႇလဵင်ႉမႃး ၸဝ်ႈယေႇသု၊ ဢၼ်လႆႈႁွင်ႉႁဵၵ်ႈဝႃႈ၊ ၸဝ်ႈၶရိၸ်ႈ၊ ၼၼ်ႉဢေႃႈ။
ပိူဝ်ႈၼႆလႄႈၸိူဝ်ႉၶိူဝ်း ဢႃႇပြႃႇႁၢမ်ႇ၊ သိုပ်ႇလူင်းတေႃႇထိုင်ၶုၼ်လူင် တႃႇဝိတ်ႈ၊ မီးသိပ်းသီႇသိုပ်ႇ။ လုၵ်ႉတီႈၶုၼ်လူင် တႃႇဝိတ်ႈ၊ တေႃႇထိုင်ၶိင်ႇဢၼ်လႆႈၶၢမ်ႇတိဢဝ်ၵႂႃႇမိူင်း ပႃႇပုလုၼ်ႇ၊ မီးသိပ်းသီႇသိုပ်ႇ။ ၸႃႉၸဵမ်ၶၢမ်ႇတိၵႂႃႇတီႈမိူင်း ပႃႇပုလုၼ်ႇ၊ တေႃႇထိုင် ၸဝ်ႈယေႇသုၶရိၸ်ႈ၊ မီးသိပ်းသီႇသိုပ်ႇဢေႃႈ။
လွင်ႈတၢင်းဢၼ် ၸဝ်ႈယေႇသု၊ ၵိူတ်ႇလဵင်ႉမႃးၸမ်ႉ၊ မႄႈၸဝ်ႈ မႃႇရိ၊ ၼၼ်ႉ၊မႆမၼ်ႈၵၼ်ဝႆႉတင်း ယူဝ်းသႅပ်ႈ၊ ဢေႃႈ။ ၵူၺ်းၵႃႈ၊မိူဝ်ႈဢၼ်ၶဝ်သွင်ၵေႃႉယင်းဢမ်ႇပႆႇလႆႈတိူဝ်ႉလႆႈထုၵ်ႇၵၼ်ၼၼ်ႉ၊ မႃႇရိ၊ ပႃးပတိၵ်ႈသၼ်ႇထေႇမႃးၵွပ်ႈပိူဝ်ႈဝိၺိၺ်ႇမူတ်းၸၢင်ႇၸဝ်ႈဢေႃႈ။-
ယူဝ်းသႅပ်ႈ၊ ဢၼ်ပဵၼ်ၽူႈမၢႆမၼ်းၼၼ်ႉ၊ပဵၼ်ၵူၼ်းလီၵူၼ်းငၢမ်းလႄႈ၊ဢမ်ႇၶႂ်ႈႁႂ်ႈသရေႇ မႃႇရိ၊ လႆႈလုၽၢႆႇၼႃႈၵူၼ်းၼၼ်ႉၸင်ႇ၊ၵျၢမ်ႇဢၢင်ႈလွမ်ယႃႉသဵတ်ႈၸႃႇၶဝ်သွင်ၵေႃႉပႅတ်ႈတဵတ်ႇတဵတ်ႇဢေႃႈ။-
ယၢမ်းမိူဝ်ႈဢၼ်မၼ်းယင်းၵျၢမ်ႇဢၢင်ႈၶႂ်ႈႁဵတ်းၸိူဝ်ႉၼင်ႇၼၼ်ၼၼ်ႉတမၢၼ်ႇၵၢင်ႁၢဝ်ထႃႇဝရႃႉၽြႃးပေႃႇမႃးတီႈမၼ်းၼႂ်းတၢင်းၼွၼ်းၽၼ်လႄႈလၢတ်ႈဝႃႈ၊ “ ယူဝ်းသႅပ်ႈ၊ ၸိူဝ်ႉၶိူဝ်း တႃႇဝိတ်ႈ၊ ႟၊ယႃႇပေၵူဝ်ႁႄပုၼ်ႈဢၼ်တၵ်းသိမ်းဢဝ် မႃႇရိ၊ ႁႂ်ႈလႆႈပဵၼ်မေးမႂ်း။ ပတိၵ်ႈသၼ်ႇထေႇဢၼ်တႄႇပဵၼ်ၼႂ်းမၼ်းၼၼ်ႉ၊ပဵၼ်ၵွပ်ႈပိူဝ်ႈဝိၺိၺ်ႇဢၼ်မူတ်းၸၢင်ႇၸဝ်ႈဢေႃႈ။-
မၼ်းတၵ်းၵိူတ်ႇလဵင်ႉလုၵ်ႈၸၢႆးမႃးလႄႈ၊မႂ်းတၵ်းလႆႈႁွင်ႉႁဵၵ်ႈၸိုဝ်ႈ ယေႇသု၊ ဝႃႈၼႆ၊ၵွပ်ႈပိူဝ်ႈမၼ်းၼၼ်ႉတၵ်းၵႄႇၶျွတ်ႈဢဝ်ၵူၼ်းမဵဝ်းမၼ်းဢွၵ်ႇသေၵႃႈၼႂ်းဢပျတ်ႈဢေႃႈ၊” ဝႃႈၼင်ႇၼႆဢေႃႈ။
လွင်ႈတၢင်းၸိူဝ်းၼႆႉ၊ၼင်ႇႁိုဝ်ပျႃႇတိၵ်ႈတေႃႇထႃႇဝရႃႉၽြႃးဢၼ်ဢဝ်တင်းပရေႃးၽႅတ်ႈ ႁေႃးလၢတ်ႈဝႆႉဝႃႈ၊-
“တူၺ်းလူး၊သၢဝ်ၵၼ်ႇၺႃႇတၵ်းပႃးပတိၵ်ႈသၼ်ႇထေႇလႄႈ၊ ၵိူတ်ႇလဵင်ႉလုၵ်ႈၸၢႆးမႃးဢေႃႈ။ လုၵ်ႈၸၢႆးၼၼ်ႉတၵ်းလႆႈႁွင်ႉႁဵၵ်ႈၸိုဝ်ႈ ဢေႇမႃႇၼူၺ်ႇလႃႉ၊ ဢေႃႈ၊” ဝႃႈၼႆမီးမႃးၼၼ်ႉ၊တၵ်းပျေႉၸုမ်ႇၸိုင်၊ၸင်ႇပဵၼ်ဢေႃႈ။ ဢေႇမႃႇၼူၺ်ႇလႃႉ၊ ၼႆႉ၊ၶႂ်ႈဝႃႈ၊ “ၽြႃးပဵၼ်ၸဝ်ႈမီးယူႇလူၺ်ႈၵၼ်တင်းႁဝ်း၊” ဝႃႈၼႆဢေႃႈ။
မိူဝ်ႈဢၼ် ယူဝ်းသႅပ်ႈ၊ တိုၼ်ႇမႃးၼၼ်ႉ၊မၼ်းႁဵတ်းၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉၼၼ်ႉလႄႈၸင်ႇသွင်ႇမၢင်ႇၵလႃႇသိမ်းဢဝ် မႃႇရိ၊ ႁႂ်ႈလႆႈပဵၼ်မေးမၼ်းဢေႃႈ။-
ၵူၺ်းၵႃႈ၊ၸူဝ်ႈဢၼ်ဢမ်ႇပႆႇၵိူတ်ႇလဵင်ႉမႃးလုၵ်ႈႁူဝ်သၢဝ်ၼၼ်ႉၸိုင်၊ ယူဝ်းသႅပ်ႈ၊ ယင်းဢမ်ႇႁဵတ်းမေႇထုင်ႇဢၼ်သိူၵ်ႈသမ်ႇၵၼ်တင်း မႃႇရိ၊ လႃးလႃးလႄႈယူႇဢေႃႈ။ ယူဝ်းသႅပ်ႈ၊ ၵေႃႈ၊ပၼ်ၸိုဝ်ႈပၼ်သဵင်လုၵ်ႈၸၢႆးၼၼ်ႉလႄႈဝႃႈ၊ “ ယေႇသု၊ ” ဢေႃႈ။
ၸဝ်ႈယေႇသု၊ ၵိူတ်ႇလဵင်ႉမႃးၵႃႈၼႂ်းဝဵင်း ပႅတ်ႉလႁႅမ်ႇ၊ မိူင်း ယုတႃႉ၊ ၼႂ်းၸူဝ်ႈပၢၼ်ၶုၼ် ႁေႇရူတ်ႈ၊ ပဵၼ်ၸဝ်ႈၽႃႉၼၼ်ႉဢေႃႈ။ ၼႂ်းၶိင်ႇၵႃႇလႃႉၼၼ်ႉၵူၼ်းဢၼ်မီးပိင်ႇၺႃႇၸိူဝ်းဢၼ်မေႃတူၺ်းၼၢၵ်ႈၶၢတ်ႈလိူၼ်လၢဝ်ၼၼ်ႉ၊လုၵ်ႉသေမိူင်းၽၢႆႇတၢင်းဝၼ်းဢွၵ်ႇႁွတ်ႈမႃးၵႃႈတီႈဝဵင်း ယေႇရုသလႅမ်ႇ၊ လႄႈ၊-
တွင်ႈထၢမ်လႄႈဝႃႈ၊ “ၸဝ်ႈလုၵ်ႈဢွၼ်ႇဢၼ်တၵ်းပဵၼ်ၶုၼ်ႁေႃၶမ်းၵူၼ်းမဵဝ်း ၵျူး၊ ၼၼ်ႉ၊ၵိူတ်ႇလဵင်ႉမႃးၵႃႈတီႈလႂ်ၶႃႈ။ ႁဝ်းၶႃႈလႆႈႁၼ်လၢဝ်မၼ်းၸဝ်ႈပေႃႇ ဢွၵ်ႇမႃးၽၢႆႇတၢင်းမိူင်းဝၼ်းဢွၵ်ႇပုၼ်ႉလႄႈ၊ႁဝ်းၶႃႈၸွမ်းႁွတ်ႈၽႅဝ်မႃးၼႆႉႁႂ်ႈလႆႈၶုပ်ႉဝႆႈမၼ်းၸဝ်ႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၶုၼ် ႁေႇရူတ်ႈ၊ လႆႈငိၼ်းလွင်ႈတၢင်းၼၼ်ႉၸိုင်၊မီးၸႂ်ဢၼ်ယုင်ႈယၢင်ႈၵူဝ်ႁႄၼႃႇဢေႃႈ။ ၵူၼ်း ဝဵင်း ယေႇရုသလႅမ်ႇ၊ ၸိူဝ်းဢၼ်လႆႈငိၼ်းၵေႃႈတူၵ်းၸႂ်ၵႂၢင်ၸႂ်ၼႃႇဢေႃႈ။-
ၶုၼ်လူင်ၸင်ႇႁွင်ႉဢဝ်ၵႃႈပဵၼ်ယဵၸ်ႈပရေႃးႁဵၵ်ႈ လူင်၊ဢိၵ်ႇတင်းသြႃႇမေႃၵျၢမ်းထမ်ႇမႃႉတင်းလၢႆမႃးၸုတုမ်တွင်ႈထၢမ်ၶဝ်လႄႈဝႃႈ၊ “ ၸဝ်ႈၶရိၸ်ႈ၊ တၵ်းတေၵိူတ်ႇလဵင်ႉမႃးၵႃႈတီႈလႂ်၊” ဝႃႈၼင်ႇၼႆဢေႃႈ။
ၶဝ်ၸိူဝ်းၼၼ်ႉၵေႃႈၶိုၼ်းလဝ်ႈလၢတ်ႈလႄႈဝႃႈ၊ “တၵ်းၵိူတ်ႇလဵင်ႉမႃးၼႂ်းဝဵင်း ပႅတ်ႉလႁႅမ်ႇ၊ မိူင်း ယုတႃႉ၊ ဢေႃႈ။ ဢၼ်ပရေႃးၽႅတ်ႈတႅမ်ႈဝႆႉၸမ်ႉ၊-
“‘ဝဵင်း ပႅတ်ႉလႁႅမ်ႇ၊ ဢၼ်မီးၼႂ်းမိူင်း ယုတႃႉ၊ ၼႆႉ႟။ မႂ်းၼႆႉပဵၼ်ဝဵင်းလဵၵ်ႉဝဵင်းၼွႆႉၵႃႈၼႂ်းမိူင်း ယုတႃႉ၊ ၼႆႉဢမ်ႇၸႂ်ႈ၊ လွင်ႈမၼ်းၸမ်ႉ၊ၶုၼ်ဢၼ်လႆႈဢုပ်ႉပိူင်ႇတၵ်းပေႃႇဢွၵ်ႇမႃးၵႃႈၼႂ်းမႂ်း၊ ႁႂ်ႈလႆႈဢွၼ်ႁူဝ်မုၵ်ႉၵူၼ်းၸိူဝ်းၵူၼ်းၵဝ်မဵဝ်း ဢိသရေး၊ ၼႆႉဢေႃႈ။’ ဝႃႈၼႆမီးမႃးယဝ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၶုၼ် ႁေႇရူတ်ႈ၊ ၸင်ႇႁွင်ႉဢဝ်ၶႅၵ်ႇဢၼ်မီးပိင်ႇၺႃႇဢၼ်လုၵ်ႉတီႈမိူင်းၽၢႆႇတၢင်းဝၼ်းဢွၵ်ႇမႃးၸိူဝ်းၼၼ်ႉတဵတ်ႇတဵတ်ႇသေယဝ်ႉထၢမ်တူၺ်းလွင်ႈၶိင်ႇၶႃႇၽွင်းယၢမ်းဢၼ်လၢဝ်ပေႃႇမႃးၼၼ်ႉႁႂ်ႈလႆႈႁုထၢင်ႇသႃးလီငၢမ်းယဝ်ႉၸင်ႇ၊-
ပွႆႇၸႂ်ႉၶဝ်ၵႂႃႇၸူးတီႈဝဵင်း ပႅတ်ႉလႁႅမ်ႇ၊ လႄႈသင်ႇ လၢတ်ႈဝႃႈ၊ “ၵႂႃႇလႄႈၶတ်းၸႂ်ႁႃလုၵ်ႈဢွၼ်ႇၼၼ်ႉတႃႉ။ ပေႃးထူပ်းႁၼ်ယဝ်ႉၸိုင်၊ၶိုၼ်းမႃးလၢတ်ႈပၼ်ၵဝ်ႁႂ်ႈၵဝ်ၵေႃႈလႆႈၵႂႃႇၶုပ်ႉဝႆႈမၼ်းၸဝ်ႈသေၵမ်း၊” ဝႃႈၼင်ႇၼႆဢေႃႈ။
ၸွမ်းၼင်ႇၵႂၢမ်းၶုၼ်လူင်ၼၼ်ႉၶဝ်ဢွၵ်ႇၵႂႃႇလႄႈလႆႈႁၼ်လၢဝ်ဢၼ်ၶဝ်လႆႈႁၼ်ၼႂ်းမိူင်းဝၼ်းဢွၵ်ႇၼၼ်ႉထႅင်ႈလႄႈၸူမ်းသိူဝ်းၼႃႇလူင်လၢင်ဢေႃႈ။-
လၢဝ်ၼၼ်ႉဢွၼ်ႁူဝ်ၶဝ်ၵႂႃႇလႄႈၵိုတ်းၼိမ်သဝ်းယူႇၼိူဝ်ၵႃႈတီႈၸဝ်ႈလုၵ်ႈဢွၼ်ႇမီးၼၼ်ႉဢေႃႈ။-
ၶဝ်ၸင်ႇၶဝ်ႈၵႂႃႇၵႃႈၼႂ်းႁိူၼ်းသေယဝ်ႉ၊ထူပ်းႁၼ်ၸဝ်ႈလုၵ်ႈဢွၼ်ႇမီးယူႇလူၺ်ႈၵၼ်တင်းမႄႈၸဝ်ႈ မႃႇရိ၊ ၼၼ်ႉလႄႈၶဝ်ၶုပ်ႉဝႆႈမၼ်းၸဝ်ႈဢေႃႈ။ ၶဝ်ဢဝ်တင်းၽၢၼ်ႇတႃႇရတၼႃႇဢၼ်ပႃးမႃးၼၼ်ႉဢွၵ်ႇယဝ်ႉၸင်ႇ၊ဢဝ်ၶမ်းဢိၵ်ႇတင်းလေႃႇပၢၼ်ႇ၊တင်းမုရၼ်ႇဢၼ်ပဵၼ်ၼၢမ်ႇသႃႇႁွမ်ၸိူဝ်းၼၼ်ႉသၢၵ်ႈလူႇဢေႃႈ။
လိုၼ်းၼၼ်ႉၼင်ႇႁိုဝ်ၶဝ်တၵ်းဢမ်ႇၶိုၼ်းၵႂႃႇၵႃႈတီႈ ၶုၼ်ႁေႇရူတ်ႈ၊ ၸိုင်၊ထႃႇဝရႃႉၽြႃးပၼ်ပျႃႇတိၵ်ႈတီႈၶဝ်ၼႂ်းတၢင်းၼွၼ်းၽၼ်လႄႈ၊ၶဝ်ၵေႃႈဢွၵ်ႇမိူဝ်းၵႂႃႇၸွမ်းတၢင်းတၢင်ႇသဵၼ်ႈသေဢေႃႈ။
ဝၢႆးသေၵူၼ်းဢၼ်မီးပိင်ႇၺႃႇၸိူဝ်းၼၼ်ႉမိူဝ်းၵႂႃႇယဝ်ႉၸိုင်၊တမၢၼ်ႇၵၢင်ႁၢဝ်ထႃႇဝရႃႉၽြႃးပေႃႇမႃးၵႃႈတီႈ ယူဝ်းသႅပ်ႈ၊ ၼႂ်းတၢင်းၼွၼ်းၽၼ်လႄႈဝႃႈ၊ “ဢဝ်ၸဝ်ႈလုၵ်ႈဢွၼ်ႇတင်းမႄႈၸဝ်ႈသေလႄႈ၊ၶၢႆႉၵႂႃႇၵႃႈတီႈမိူင်း ဢေးၵျိပ်ႉ၊ ပုၼ်ႉလႄႈယူႇသဝ်းၵႃႈတီႈၼၼ်ႈတေႃႇထိုင်ႁွတ်ႈၵဝ်လၢတ်ႈၵႃႈတီႈမႂ်းႁႂ်ႈၶိုၼ်းဢွၵ်ႇမႃးၼၼ်ႉတႃႉ။ လွင်ႈမၼ်းၸမ်ႉ၊ၶုၼ် ႁေႇရူတ်ႈ၊ တၵ်းသွၵ်ႈႁႃလႄႈဢဝ်တၢႆၸဝ်ႈလုၵ်ႈဢွၼ်ႇၼႆႉဢေႃႈ၊” ဝႃႈၼင်ႇၼႆဢေႃႈ။
ၼႂ်းၶိုၼ်းၼၼ်ႉၵမ်းလဵဝ် ယူဝ်းသႅပ်ႈ၊ လုၵ်ႉလႄႈဢဝ်ၸဝ်ႈလုၵ်ႈဢွၼ်ႇ၊ဢိၵ်ႇတင်းမႄႈၸဝ်ႈသေဢွၵ်ႇပၢႆႈ ၵႂႃႇၵႃႈတီႈမိူင်း ဢေးၵျိပ်ႉ၊ ပုၼ်ႉသေယဝ်ႉ၊-
ယူႇသဝ်းၵႃႈတီႈၼၼ်ႈတေႃႇထိုင်ႁွတ်ႈ ၶုၼ်ႁေႇရူတ်ႈ၊ တၢႆဢေႃႈ။ လွင်ႈတၢင်းၼႆႉပဵၼ်ၸွမ်းၵႃႈၼင်ႇဢၼ်ထႃႇဝရႃႉၽြႃးမီးပျႃႇတိၵ်ႈဢၼ်ပရေႃးၽႅတ်ႈ တႅမ်ႈဝႆႉလႄႈဝႃႈ၊ “ၵဝ်ႁွင်ႉဢဝ်လုၵ်ႈၸၢႆးၵဝ်ဢွၵ်ႇသေမိူင်း ဢေးၵျိပ်ႉ၊ မႃးယဝ်ႉ၊” ဝႃႈၼင်ႇၼႆၼၼ်ႉပျေႉၸုမ်ႇမႃးဢေႃႈ။
မိူဝ်ႈဢၼ်ၶုၼ် ႁေႇရူတ်ႈ၊ ႁုလွင်ႈၶႅၵ်ႇၸိူဝ်းဢၼ်မီးပိင်ႇၺႃႇမိူင်းၽၢႆႇဝၼ်းဢွၵ်ႇၶဝ်ပႅတ်ႉလႅၼ်ယဝ်ႉၼၼ်ႉၸိုင်၊ၸႂ်လမ်ၶႂ်ႈၸႃႉလူင်လၢင်လႄႈပူင်ဢမိင်ႉႁႂ်ႈဢဝ်တၢႆလုၵ်ႈဢွၼ်ႇ ၸၢႆးဢၼ်ဢသၢၵ်ႈလႆႈသွင်ပီလူင်းတႂ်ႈၵႃႈၼႂ်းဝဵင်း ပႅတ်ႉလႁႅမ်ႇ၊ ဢိၵ်ႇတင်းဝၢၼ်ႈၼွၵ်ႈႁိမ်းႁွမ်းထွၵ်ႈလူၺ်ႈၶိင်ႇၶႃႇဢၼ်ၵူၼ်းဢၼ်မီးပိင်ႇၺႃႇၶဝ်မွၵ်ႇလၢတ်ႈၼႄလွင်ႈလၢဝ်လုၵ်ႈၼၼ်ႉပေႃႇမႃးမိူဝ်ႈလႂ်ၼၼ်ႉဢေႃႈ။-
လွင်ႈတၢင်းၼႆႉၵေႃႈပဵၼ်ၸွမ်းၵႃႈၼင်ႇဢၼ်ပရေႃးၽႅတ်ႈ ယေႇရမိ၊ ႁေႃးဝႆႉလႄႈဝႃႈ။
“သဵင်ငိၼ်းမႃးၵႃႈတီႈ ရႃႇမႃႉ၊ ဢေႃႈ။ ပဵၼ်သဵင်ဢၼ်ႁွင်ႉႁႆႈပွင်ႉၶၢင်း၊ဢၼ်လီငိၼ်းၽၢၼ်ၼႃႇဢေႃႈ။ ရႃႇၶေႇလႃႉ၊ ႁွင်ႉႁႆႈၵွပ်ႈပိူဝ်ႈလုၵ်ႈလၢင်းမၼ်းသဵင်ႈႁၢႆတၢႆမူတ်းယဝ်ႉၼၼ်ႉလႄႈ ႁႆႈယူႇဢမ်ႇပျေႇၸႂ်လႆႈ၊” ဝႃႈၼင်ႇၼႆၼၼ်ႉပျေႉၸုမ်ႇမႃးဢေႃႈ။
ဝၢႆးသေ ၶုၼ်ႁေႇရူတ်ႈ၊ တၢႆယဝ်ႉၼၼ်ႉ၊တမၢၼ်ႇၵၢင်ႁၢဝ်ထႃႇဝရႃႉၽြႃးပေႃႇမႃးၼႂ်းတၢင်းၼွၼ်းၽၼ်တီႈ ယူဝ်းသႅပ်ႈ၊ ၵႃႈတီႈမိူင်း ဢေးၵျိပ်ႉ၊ လႄႈ။-
မီးဢမိင်ႉလႄႈဝႃႈ၊ “လုၵ်ႉတႃႉ။ ဢဝ်ၸဝ်ႈလုၵ်ႈဢွၼ်ႇ၊ ဢိၵ်ႇတင်းမႄႈၸဝ်ႈလႄႈပွၵ်ႈၶိုၼ်းမိူဝ်းၵႂႃႇတီႈမိူင်း ဢိသရေး၊ ပုၼ်ႉတႃႉ။ ၶုၼ်ၸိူဝ်းဢၼ်ၵျၢမ်ႇ ႁႃဢဝ်တၢႆၸဝ်ႈလုၵ်ႈဢွၼ်ႇၼၼ်ႉတၢႆသဵင်ႈယဝ်ႉ၊” ဝႃႈၼင်ႇၼႆဢေႃႈ။-
ယူဝ်းသႅပ်ႈ၊ ၵေႃႈလုၵ်ႉလႄႈဢဝ်ၸဝ်ႈလုၵ်ႈဢွၼ်ႇတင်းမႄႈၸဝ်ႈသေယဝ်ႉ၊ပွၵ်ႈၶိုၼ်းမိူဝ်းၵႂႃႇတီႈမိူင်း ဢိသရေး၊ သေဢေႃႈ။
ၵူၺ်းၵႃႈ၊မိူဝ်ႈဢၼ်လႆႈငိၼ်းဝႃႈ၊ၶုၼ် ဢႃႇၶေႇလႃႉ၊ ပုင်ႇႁၢင်ႈၼင်ႈႁေႃၼႂ်းဢရႃႇပေႃႈမၼ်းၶုၼ် ႁေႇရူတ်ႈ၊ ၵႃႈတီႈဢိူင်ႇ ယုတႃႉ၊ ၼၼ်ႉၸိုင်၊ ယူဝ်းသႅပ်ႈ၊ ၵူဝ်လႄႈဢမ်ႇႁတ်းၵႂႃႇယူႇၵႃႈတီႈၼၼ်ႈ။ သမ်ႉလႆႈပျႃႇတိၵ်ႈတၢင်းၼွၼ်းၽၼ်ထႅင်ႈလႄႈၵႂႃႇၸူးတီႈဢိူင်ႇ ၵႃႇလိလႄး၊ ပုၼ်ႉသေယဝ်ႉ၊-
တႄႇတင်ႈႁဵတ်းႁိူၼ်းၼႂ်းဝဵင်း ၼႃႇၸရႅတ်ႈ၊ ဢေႃႈ။ လွင်ႈတၢင်းၼႆႉပဵၼ်ၸွမ်းၵႃႈၼင်ႇဢၼ်ပရေႃးၽႅတ်ႈတင်းလၢႆႁေႃးဝႆႉလႄႈဝႃႈ၊ “ ၸဝ်ႈၶရိၸ်ႈ၊ ၼၼ်ႉတၵ်းလႆႈႁွင်ႉႁဵၵ်ႈဝႃႈ၊ၵူၼ်းဝဵင်း ၼႃႇၸရႅတ်ႈ၊ ” ဝႃႈၼင်ႇၼႆၼၼ်ႉပျေႉၸုမ်ႇမႃးဢေႃႈ။
ၽွင်းယၢမ်းၼၼ်ႉ၊သြႃႇ ယူဝ်းႁၢၼ်ႇ၊ ဢၼ်ပၼ်မၢင်ႇၵလႃႇပပ်ႉတိၸမ်ႇ ၼၼ်ႉပေႃႇမႃးၵႃႈၼႂ်းထိူၼ်ႇလႅင်ႉဢိူင်ႇ ယုတႃႉ၊ သေလႄႈႁေႃးတြႃးလႄႈဝႃႈ၊-
“မိူင်းၵၢင်ႁၢဝ်ၸဝ်ႈၸမ်တၵ်းတႄႇပဵၼ်မႃးယဝ်ႉ။ ၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်သူတႃႉ၊” ဝႃႈၼင်ႇၼႆဢေႃႈ။-
လွင်ႈဢၼ်ပရေႃးၽႅတ်ႈ ဢိသႃႇယႃႉ၊ ႁေႃးလၢတ်ႈဝႆႉလွင်ႈၵူၼ်းၵေႃႉၼိုင်ႈလႄႈဝႃႈ၊ “သဵင်ၸဝ်ႈဢၼ်ပၢဝ်ႇသႅၼ်ႇ ၵႃႈၼႂ်းထိူၼ်ႇလႅင်ႉၼၼ်ႉဝႃႈ၊ ‘မႄးႁႅၼ်းသဵၼ်ႈတၢင်းပုၼ်ႈထႃႇဝရႃႉၽြႃးတႃႉ။ ႁႂ်ႈသဵၼ်ႈတၢင်းသိုဝ်ႈလီပုၼ်ႈမၼ်းၸဝ်ႈတၵ်းပႆတႃႉ။’ ” ဝႃႈၼင်ႇၼႆၼၼ်ႉၶႂ်ႈဝႃႈ၊ သြႃႇ ယူဝ်းႁၢၼ်ႇ၊ ၼႆႉယဝ်ႉ။
သြႃႇ ယူဝ်းႁၢၼ်ႇ၊ ၼႆႉၼုင်ႈၶူဝ်းၶူၼ်ၵလႃႇဢုၵ်ႈလႄႈဢဝ်သၢႆၼင်ႁတ်ႉဢႅဝ်မၼ်းဝႆႉလႄႈၵိၼ်မႅင်းၸၵ်းတႅၼ်ၵပ်းၼမ်ႉၽိုင်ႈထိူၼ်ႇၵူၺ်းဢေႃႈ။-
ၵူၼ်းဝဵင်း ယေႇရုသလႅမ်ႇ၊ ၵူၼ်းဢိူင်ႇ ယုတႃႉ၊ တင်းၵူၼ်းဝၢၼ်ႈၵႃႈတီႈႁိမ်းႁွမ်းၼမ်ႉ ယေႃးတၢၼ်ႇ၊ တင်းသဵင်ႈတင်းလူင်ဢွၼ်ၵၼ်မႃးၸူးတီႈမၼ်းသေယဝ်ႉ၊-
ၽုၺ်ႇၼႄဢပျတ်ႈၶဝ်သေလႄႈ၊မၼ်းၵေႃႈပၼ်မၢင်ႇၵလႃႇပပ်ႉတိၸမ်ႇတီႈၶဝ်ၸိူဝ်းၼၼ်ႉၵႃႈၼႂ်းၼမ်ႉ ယေႃးတၢၼ်ႇ၊ ဢေႃႈ။
မိူဝ်ႈဢၼ်သြႃႇ ယူဝ်းႁၢၼ်ႇ၊ ႁၼ်ၵူၼ်းၵိူင်း ၽႃႇရိသေး၊ ဢိၵ်ႇတင်းၵိူင်း ၸတ်ႉတုၵႄး၊ တင်းလၢႆၵေႃႈမႃးၸူးႁႂ်ႈလႆႈၶၢမ်ႇဢဝ်မၢင်ႇၵလႃႇပပ်ႉတိၸမ်ႇၸွမ်းပိူၼ်ႈၼၼ်ႉၸိုင်၊လၢတ်ႈတီႈၶဝ်လႄႈဝႃႈ၊ “သူၶိူဝ်းငူးႁဝ်ႇၶဝ်႟၊ၽူႈလႂ်ပၼ်သတိတီႈသူႁႂ်ႈသူလႅၼ်ႈပၢႆႈပူၼ်ႉလွတ်ႈၽေးတၢမ်ႇၸဝ်ႈၽြႃးဢၼ်တၵ်းၸီႇယၢင်ႇၼၼ်ႉ။-
ႁႂ်ႈမၢၵ်ႇဢၼ်ၵိုင်ႇၵၼ်တင်းတၢင်းဢၼ်ပိၼ်ႇၸႂ်ၼၼ်ႉမၢၵ်ႇမႃးတႃႉ။-
ယႃႇပေထၢင်ႇဝႃႈ၊တၢင်းဢၼ်ပဵၼ်ၸိူဝ်ႉၶိူဝ်းလုၵ်ႈလၢၼ် ဢႃႇပြႃႇႁၢမ်ႇ၊ တေလႆႈလွတ်ႈၽေးတၢမ်ႇၼၼ်ႉ။ ၵဝ်လၢတ်ႈတီႈသူၸမ်ႉ၊လုၵ်ႈလၢၼ် ဢႃႇပြႃႇႁၢမ်ႇ၊ ဢၼ်ဝႃႈၼၼ်ႉၽြႃးပဵၼ်ၸဝ်ႈမီးတၼ်းၶူဝ်းဢၼ်ဢဝ်မၢၵ်ႇႁိၼ်ၸိူဝ်းၼႆႉလႄႈႁဵတ်းပဵၼ်လႆႈဢေႃႈ။-
တေႃႈလဵဝ်ၼႆႉ၊တႃမၢတ်ႇငႃၵႃႈတီႈႁၢၵ်ႈတူၼ်ႈမႆႉဝႆႉယဝ်ႉ။ တူၼ်ႈဢၼ်ဢမ်ႇမၢၵ်ႇမၢၵ်ႇဢၼ်လီၵူႈတူၼ်ႈၼၼ်ႉ၊တၵ်းလႆႈၶၢမ်ႈတၢင်းဢၼ်ပွမ်ႈပႅတ်ႈၸဵမ်ငဝ်ႈၸဵမ်ႁၢၵ်ႈလႄႈတုတ်ႇၽႆးပႅတ်ႈၵူၺ်းဢေႃႈ။-
ၵဝ်ပၼ်မၢင်ႇၵလႃႇပပ်ႉတိၸမ်ႇတီႈသူလူၺ်ႈၼမ်ႉ၊ပုၼ်ႈလွင်ႈႁႂ်ႈလႆႈၼႄပျႃးလွင်ႈတၢင်းဢၼ်ၶုၵ်းၸႂ်လႆႈမႆႈၸႂ်ဢပျတ်ႈၼၼ်ႉလႄႈ၊ၸဝ်ႈဢၼ်ၵျွမႃးပႃႈလိုၼ်းၵဝ်ၼၼ်ႉတၵ်းပၼ်မၢင်ႇၵလႃႇပပ်ႉတိၸမ်ႇလူၺ်ႈဝိၺိၺ်ႇဢၼ်မူတ်းၸၢင်ႇၸဝ်ႈ၊ဢိၵ်ႇတင်းလူၺ်ႈၽႆးတီႈသူဢေႃႈ။ ၸဝ်ႈၼၼ်ႉထွတ်ႈမျၢတ်ႈၼႃႇသေၵဝ်လူင်လၢင်ထၢၼ်ႈပေႃးၵဝ်ယင်းဢမ်ႇထိူၵ်ႈယိပ်းၶႅပ်းတိၼ်မၼ်းၸဝ်ႈလႃးလႃး။-
ၼႂ်းမိုဝ်းမၼ်းၸဝ်ႈၼၼ်ႉမီးတႅပ်းဝီးဝႆႉလႄႈတၵ်းလၢင်ၶဝ်ႈပိူၵ်ႇႁႂ်ႈၵဵင်ႈလီသႂ်လီသေယဝ်ႉ၊ဢဝ်သိမ်းသႂ်ႇဝႆႉၵႃႈၼႂ်းယွင်ၼႂ်းယေးဢေႃႈ။ တၵ်းဢဝ်မဵတ်ႉၶဝ်ႈႁၢပ်ႇတင်းသဵင်ႈထိမ်ႈသႂ်ႇၵႃႈၼႂ်းၽႆးဢၼ်ဢမ်ႇမွတ်ႇလႆႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ ၸဝ်ႈယေႇသု၊ လုၵ်ႉသေဢိူင်ႇ ၵႃႇလိလႄး၊ လူင်းမႃးၸူးသြႃႇ ယူဝ်းႁၢၼ်ႇ၊ ႁိမ်းၼမ်ႉ ယေႃးတၢၼ်ႇ၊ ႁႂ်ႈလႆႈၶၢမ်ႇဢဝ်မၢင်ႇၵလႃႇပပ်ႉတိၸမ်ႇဢေႃႈ။-
ၵူၺ်းၵႃႈ၊သြႃႇ ယူဝ်းႁၢၼ်ႇ၊ ႁၢမ်ႈတၢပ်ႈလႄႈတွင်းပၢၼ်ႇတီႈ ၸဝ်ႈယေႇသု၊ လႄႈဝႃႈ၊ “ၶႃႈၸဝ်ႈယင်းလူဝ်ႇၶၢမ်ႇဢဝ်မၢင်ႇၵလႃႇပပ်ႉတိၸမ်ႇၵႃႈတီႈၸဝ်ႈႁဝ်းတီႈၶႃႈဢေႃႈ။ ႁဵတ်းသင်လႄႈၸဝ်ႈႁဝ်းမႃးယွၼ်းၶၢမ်ႇဢဝ်ၵႃႈတီႈၶႃႈၸဝ်ႈၸိူဝ်ႉၼင်ႇၼႆၶႃႈ၊” မိူဝ်ႈဢၼ်ဝႃႈၼင်ႇၼႆၸိုင်။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ပိူဝ်ႈဢၼ်ထုၵ်ႇလီႁဵတ်းၸွမ်းတြႃးၸဝ်ႈၽြႃးၵႃႈမီးၼၼ်ႉလႄႈ၊တေႃႈလဵဝ်ပၼ်ဢၶႂၢင်ႉလူးၵွၼ်ႇတႃႉ၊” ဝႃႈၼင်ႇၼႆလႄႈသြႃႇ ယူဝ်းႁၢၼ်ႇ၊ ၵေႃႈႁပ်ႉတုင်းဢဝ်သေဢေႃႈ။
ၸဝ်ႈယေႇသု၊ ၶၢမ်ႇဢဝ်မၢင်ႇၵလႃႇပပ်ႉတိၸမ်ႇသေယဝ်ႉ၊ၼႂ်းမိူဝ်ႈဢၼ်မၼ်းၸဝ်ႈဢွၵ်ႇသေၵႃႈၼႂ်းၼမ်ႉမႃးၵမ်းလဵဝ်ယူႇၼၼ်ႉ၊ၵၢင်ႁၢဝ်ၽုၺ်ႇပိုတ်ႇပုၼ်ႈမၼ်းၸဝ်ႈသေလႄႈမၼ်းၸဝ်ႈလႆႈႁၼ်ဝိၺိၺ်ႇၽြႃးပဵၼ်ၸဝ်ႈဢၼ်မီးႁၢင်ႈၽၢင်ၼူၵ်ႉတူႈၼၼ်ႉလူင်းမႃးၸပ်းယူႇၵႃႈၼိူဝ်မၼ်းၸဝ်ႈဢေႃႈ။-
သဵင်ၸဝ်ႈပဵၼ်မႃးၵႃႈၼိူဝ်ၵၢင်ႁၢဝ်လႄႈဝႃႈ၊ “ၵေႃႉၼႆႉၸမ်ႉ၊ပဵၼ်လုၵ်ႈၵဝ်ဢၼ်ၵဝ်ႁၵ်ႉၼႃႇ၊ၵေႃႉဢၼ်ၵဝ်ထုၵ်ႇၸႂ်ၵျိူၵ်ႈၸႂ်ၼႃႇဢေႃႈ၊” ဝႃႈၼင်ႇၼႆဢေႃႈ။
လိုၼ်းၼၼ်ႉ၊ဝိၺိၺ်ႇၸဝ်ႈၸူဝ်းဢဝ် ၸဝ်ႈယေႇသု၊ ၶဝ်ႈၵႂႃႇၵႃႈၼႂ်းထိူၼ်ႇလူင်ဢၼ်ႁႅင်ႈႁွင်ၼႃႇ၊ႁႂ်ႈမၼ်းၸဝ်ႈလႆႈၶၢမ်ႇဢဝ်တၢင်းဢၼ်မႃႇၼၢတ်ႈၸၢမ်းတူၺ်းယႃႉၵဝ်းဢေႃႈ။-
မိူဝ်ႈဢၼ်ဢမ်ႇၵိၼ်ဢမ်ႇၶူပ်းသေၸိူဝ်ႉသေမဵဝ်းႁိုင်သီႇသိပ်းဝၼ်းသီႇသိပ်းၶိုၼ်းယဝ်ႉၼၼ်ႉၸိုင်၊မၼ်းၸဝ်ႈတွင်ႉမႆႈမႃးလႄႈ၊-
မိူဝ်ႈၼၼ်ႉၵေႃႉဢၼ်ၸၢမ်းတူၺ်းၸူဝ်းဢဝ်ၼၼ်ႉ၊ပေႃႇမႃးတီႈမၼ်းၸဝ်ႈလႄႈလၢတ်ႈဝႃႈ၊ “ပေႃးမႂ်းၸႂ်ႈလုၵ်ႈၽြႃးပဵၼ်ၸဝ်ႈတႄႉၸိုင်၊ပူင်ဢမိင်ႉႁႂ်ႈမၢၵ်ႇႁိၼ်ၸိူဝ်းၼႆႉပဵၼ်ၶဝ်ႈမုၼ်းမႃးသေလႄႈၵိၼ်တႃႉ၊” ဝႃႈၼင်ႇၼႆတိုၵ်းယူင်းဢေႃႈ။
ၸဝ်ႈယေႇသု၊ ၶိုၼ်းတွပ်ႇလႄႈလၢတ်ႈဝႃႈ၊ “ၵႃႈၼႂ်းၵျၢမ်းလိၵ်ႈမီးဝႆႉဝႃႈ၊ ‘ၵူၼ်းတေလႆႈဢဝ်တင်းၶဝ်ႈမုၼ်းၵူၺ်းလဵင်ႉၸႂ်ဢမ်ႇၸႂ်ႈ။ တၵ်းလႆႈဢဝ်တင်းၼုၵ်ႈၵပၢတ်ႈတြႃးၽြႃးပဵၼ်ၸဝ်ႈၵူႈၶေႃႈၵူႈၵမ်းၼၼ်ႉ လဵင်ႉလူဢေႃႈ၊’ မီးၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။
ဝၢႆးၼၼ်ႉမႃႇၼၢတ်ႈၸူဝ်းဢဝ် ၸဝ်ႈယေႇသု၊ ၵႂႃႇၵႃႈတီႈဝဵင်းဢၼ်မူတ်းၸၢင်ႇလႄႈဢဝ်မၼ်းၸဝ်ႈဝႆႉၵႃႈၼိူဝ်ၸိၵ်းၸွမ်ၵျွင်းပိၵ်ႈမၢၼ်ႇၸဝ်ႈယဝ်ႉၸင်ႇ၊-
လၢတ်ႈဝႃႈ၊ “ပေႃးမႂ်းၸႂ်ႈလုၵ်ႈၽြႃးပဵၼ်ၸဝ်ႈတႄႉၸိုင်၊ဢဝ်တူဝ်မႂ်းပႅတ်ႈတူၵ်းၵႂႃႇတႃႉ။ ၵႃႈၼႂ်းၵျၢမ်းလိၵ်ႈမီးဝႆႉဝႃႈ၊ “‘ၽြႃးပဵၼ်ၸဝ်ႈတၵ်းပွႆႇၸႂ်ႉတမၢၼ်ႇၵၢင်ႁၢဝ်တင်းလၢႆမႃးႁပ်ႉႁွပ်ႇဢဝ်မႂ်းလႄႈ တၵ်းဢမ်ႇႁႂ်ႈၽႃႇတိၼ်မႂ်းလႆႈတိူဝ်ႉထုၵ်ႇမၢၵ်ႇႁိၼ်လႃးလႃး၊’ မီးၼင်ႇၼႆဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းတွပ်ႇလႄႈလၢတ်ႈဝႃႈ၊ “ၵျၢမ်းလိၵ်ႈယင်းတႅမ်ႈဝႆႉမီးယူႇထႅင်ႈလႄႈဝႃႈၸမ်ႉ၊ ‘မႂ်းတေဢမ်ႇလႆႈၸၢမ်းတူၺ်းၽြႃးပဵၼ်ၸဝ်ႈမႂ်းထႃႇဝရႃႉၽြႃး၊’ မီးမႃးၼင်ႇၼႆႉယဝ်ႉ၊” ဝႃႈၼင်ႇၼႆဢေႃႈ။
ၵမ်းၼၼ်ႉ မႃႇၼၢတ်ႈသမ်ႉဢဝ် ၸဝ်ႈယေႇသု၊ ၶိုၼ်ႈၵႂႃႇၵႃႈၼိူဝ်လွႆဢၼ်သုင်ၼႃႇလႄႈၼႄပျႃးမိူင်းလေႃးၵႃႉတင်းသဵင်ႈတင်းလူင်၊ဢိၵ်ႇတင်းမုၼ်သရေႇမၼ်းဢၼ်ယႂ်ႇၼႃႇၵႃႈမီးလႄႈ၊-
လၢတ်ႈဝႃႈ၊ “ပေႃးမႂ်းၶုပ်ႉမူပ်ႇဝႆႈၵဝ်ၸိုင်၊ၵဝ်တၵ်းဢဝ်ၸိူဝ်းၼႆႉတင်းသဵင်ႈတင်းမူတ်းပၼ်တီႈမႂ်းဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “ၵႂႃႇတႃႉ။ မႃႇၼၢတ်ႈ႟။ ၵႃႈၼႂ်းၵျၢမ်းလိၵ်ႈတႅမ်ႈဝႆႉၸမ်ႉ၊ ‘မႂ်းတၵ်းလႆႈၶုပ်ႉဝႆႈၽြႃးပဵၼ်ၸဝ်ႈမႂ်းထႃႇဝရႃႉၽြႃးလႄႈႁဵတ်းဝၢတ်ႈတီႈမၼ်းၸဝ်ႈသူႇလဵဝ်ၵူၺ်း၊’ မီးဝႆႉၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။
မႃႇၼၢတ်ႈၵေႃႈဢွၵ်ႇပၢႆႈၵႂႃႇလႄႈ၊တမၢၼ်ႇၵၢင်ႁၢဝ်တင်းလၢႆပေႃႇမႃးလုမ်းလႃးလဵင်ႉလူမၼ်းၸဝ်ႈဢေႃႈ။
မိူဝ်ႈဢၼ် ၸဝ်ႈယေႇသု၊ လႆႈငိၼ်းလွင်ႈဢၼ်သြႃႇ ယူဝ်းႁၢၼ်ႇ၊ လႆႈၶၢမ်ႇတၢင်းဢၼ်တိဢဝ်လႄႈဢဝ်သႂ်ႇထွင်ႇဝႆႉၼၼ်ႉၸိုင်၊မၼ်းၸဝ်ႈၵေႃႈဢွၵ်ႇၵႂႃႇၸူးၵႃႈတီႈဢိူင်ႇ ၵႃႇလိလႄး၊ ပုၼ်ႉသေဢေႃႈ။-
မၼ်းၸဝ်ႈဢမ်ႇယူႇၵႃႈတီႈဝဵင်း ၼႃႇၸရႅတ်ႈ၊ ယဝ်ႉလႄႈ၊ၵႂႃႇယူႇသဝ်းၵႃႈတီႈဝဵင်း ၵပိူဝ်ႇၼေႇဢုမ်ႇ၊ ဢၼ်မီးႁိမ်းၽင်ႇၼွင် ၵႃႇလိလႄး၊ ၼႂ်းဢိူင်ႇ ၸေႇပုလုၼ်ႇ၊ တင်းဢိူင်ႇ ၼပ်ႉထလိ၊ ဢေႃႈ။-
လွင်ႈတၢင်းၼႆႉ၊ပဵၼ်ၸွမ်းၵႃႈၼင်ႇဢၼ်ပရေႃးၽႅတ်ႈ ဢိသႃႇယႃႉ၊ ႁေႃးဝႆႉလႄႈဝႃႈ။
“ဢိူင်ႇ ၸေႇပုလုၼ်ႇ၊ တင်းဢိူင်ႇ ၼပ်ႉထလိ၊ ဢၼ်တႄႇတင်ႈဝႆႉၵႃႈၼိူဝ်သဵၼ်ႈတၢင်းဢၼ်တႆႇၸွမ်းၽင်ႇၼွင်ၽၢႆႇပုၼ်ႉၼမ်ႉ ယေႃးတၢၼ်ႇ၊ ၼႂ်းဢိူင်ႇ ၵႃႇလိလႄး၊ တီႈဢၼ်ၵူၼ်း၊ တၢင်ႇၸိူဝ်ႉတၢင်ႇၶိူဝ်းယူႇသဝ်းၼၼ်ႉ။
ၵူၼ်းဢၼ်ယူႇၼႂ်းလပ်းသိင်ႇတင်းလၢႆ၊ လႆႈႁၼ်ဢၼ်လႅင်းဢၼ်ယႂ်ႇၼႃႇ လူင်လၢင်လႄႈ ဢၼ်လႅင်းပေႃႇမႃးထွင်ႇႁိူဝ်ႈၵႃႈၼိူဝ် ၶဝ်ၸိူဝ်းဢၼ်ယူႇၼႂ်းလပ်းသိင်ႇႁူမ်ႈ တၢင်းတၢႆၼၼ်ႉယဝ်ႉ၊” ဝႃႈၼင်ႇၼႆမီးၼၼ်ႉ၊ပျေႉၸုမ်ႇမႃးဢေႃႈ။
တႄႇဢဝ်ၶိင်ႇမိူဝ်ႈဝၼ်းၼၼ်ႉ ၸဝ်ႈယေႇသု၊ ႁေႃးလၢတ်ႈတြႃးတေႃႇၸဝ်ႈလႄႈဝႃႈ၊ “ၵွပ်ႈပိူဝ်ႈမိူင်းၵၢင်ႁၢဝ်ၸဝ်ႈၸမ်တၵ်းတႄႇပဵၼ်ယဝ်ႉလႄႈၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်သူတႃႉ၊” ဝႃႈၼင်ႇၼႆဢေႃႈ။
ၼႂ်းမိူဝ်ႈဢၼ် ၸဝ်ႈယေႇသု၊ ပႆၸွမ်းႁိမ်းၽင်ႇၼွင် ၵႃႇလိလႄး၊ ၵႂႃႇယူႇၼၼ်ႉထူပ်းႁၼ်ၵူၼ်းလႃႈၼမ်ႉ သွင်ပီႈၼွင်ႉဢၼ်ပဵၼ် သိမုၼ်ႇ၊ ဢၼ်ႁွင်ႉဝႃႈ၊ ပေႇတရု၊ တင်းၼွင်ႉၸၢႆးမၼ်း ဢၼ်ႇတရေႇ၊ ဝၢၼ်ႇၶႄတူၵ်းၼႂ်းၼွင်ယူႇဢေႃႈ။-
မၼ်းၸဝ်ႈႁွင်ႉလၢတ်ႈလႄႈဝႃႈ၊ “မႃးၸွမ်းၵဝ်တႃႉ၊ၵဝ်တၵ်းႁႂ်ႈသူပဵၼ်ၵေႃႉဢၼ်ႁႃၵူၼ်းဢေႃႈ၊” ဝႃႈၼင်ႇၼႆဢေႃႈ။-
ၶဝ်ၵေႃႈတမ်းပႅတ်ႈၶႄၶဝ်ၵမ်းလဵဝ်လႄႈၵႂႃႇၸွမ်းမၼ်းၸဝ်ႈဢေႃႈ။
မၼ်းၸဝ်ႈသိုပ်ႇပႆၵႂႃႇပႃႈၼႃႈလႄႈထူပ်းႁၼ်ၵူၼ်းလႃႈၼမ်ႉတၢင်ႇၵေႃႉသွင်ပီႈၼွင်ႉထႅင်ႈဢၼ်ပဵၼ် ယႃႇၵုပ်ႈ၊ တင်းၼွင်ႉၸၢႆးမၼ်း ယူဝ်းႁၢၼ်ႇ၊ ဢေႃႈ။ ၶဝ်သွင်ၵေႃႉပဵၼ်လုၵ်ႈၸၢႆး ၸေႇပေႇတႄး၊ လႄႈၶဝ်သၢမ် ၵေႃႉပေႃႈလုၵ်ႈၽုင်ၶႄၶဝ်ယူႇၵႃႈၼႂ်းႁိူဝ်းဢေႃႈ။-
မၼ်းၸဝ်ႈႁွင်ႉၶဝ်ပီႈၼွင်ႉလႄႈၶဝ်ၵေႃႈပႅတ်ႈဝႆႉပေႃႈၶဝ်တင်းႁိူဝ်းၶဝ်ၵမ်းလဵဝ်သေလႄႈၸွမ်းမၼ်းၸဝ်ႈၵႂႃႇဢေႃႈ။
ၸဝ်ႈယေႇသု၊ ၵႂႃႇလႄႇလဵပ်ႈၼႂ်းဢိူင်ႇ ၵႃႇလိလႄး၊ ၵူႈတီႈၵူႈလႅၼ်လႄႈသင်ႇသွၼ်ပၼ်ၵႃႈၼႂ်းၸရွပ်ႈႁေႃးတြႃးလႂ်၊ႁေႃးလၢတ်ႈၶၢဝ်ႇတြႃးသိူဝ်းပျေႃႇလွင်ႈမိူင်းၵၢင်ႁၢဝ်ၸဝ်ႈယူႇသေလႄႈ၊ႁႂ်ႈယေႃးၵႃႇတၢင်းၶႆႈတၢင်းပဵၼ်ၵူႈၸိူဝ်ႉၵူႈပိူင်ၸိုၼ်ႈႁၢႆဢေႃႈ။-
သဵင်ၶၢဝ်ႇလွင်ႈမၼ်းၸဝ်ႈသႃႇႁူင်ၸွတ်ႇတူဝ်ႈၵႂႃႇထိုင်မိူင်း သုရိ၊ တင်းမိူင်းလႄႈ၊ပိူၼ်ႈဢွၼ်ၵၼ်ဢဝ်ၵူၼ်းဢၼ်ဢမ်ႇယူႇလီ၊ၵူၼ်းဢၼ်ပဵၼ်ၶႆႈပဵၼ်ၼၢဝ်ၵူႈမဵဝ်းမဵဝ်း၊ၵူၼ်းဢၼ်ၽီၶဝ်ႈၽိူဝ်ႉၶဝ်ႈ၊ၵူၼ်းပဵၼ်မႃႈမူ၊ၵူၼ်းဢၼ်တိၼ်တၢႆမိုဝ်းတၢႆ၊ဢိၵ်ႇတင်းၵူၼ်းတၢႆၽၢၵ်ႇတၢႆပွတ်းတင်းလၢႆၸိူဝ်းၼၼ်ႉမႃးၸူးတီႈမၼ်းၸဝ်ႈလႄႈမၼ်းၸဝ်ႈၵေႃႈႁႂ်ႈယေႃးၵႃႇၶဝ်လႆႈၸိုၼ်ႈႁၢႆၵႂႃႇၵူႈၵေႃႉဢေႃႈ။-
ႁဵတ်းၸိူဝ်ႉၼင်ႇၼၼ်လႄႈၵူၼ်းဢိူင်ႇ ၵႃႇလိလႄး၊ ၵူၼ်းမိူင်း တေႇၵႃႇပေႃးလိ၊ ၵူၼ်းဝဵင်း ယေႇရုသလႅမ်ႇ၊ ၵူၼ်းဢိူင်ႇ ယုတႃႉ၊ ဢိၵ်ႇတင်းၵူၼ်းဢၼ်ယူႇၽၢႆႇပုၼ်ႉၼမ်ႉ ယေႃးတၢၼ်ႇ၊ ၶဝ်ပဵၼ်မူႇပဵၼ်ၽုင်ယႂ်ႇၼႃႇၸွမ်းမၼ်းၸဝ်ႈၵႂႃႇဢေႃႈ။
မိူဝ်ႈဢၼ် ၸဝ်ႈယေႇသု၊ ႁၼ်ၵူၼ်းၼမ်ၼႃႇလူင်လၢင်ၼၼ်ႉ၊မၼ်းၸဝ်ႈၶိုၼ်ႈၵႃႈၼိူဝ်လွႆၵႂႃႇဢေႃႈ။ တီႈၼၼ်ႈမိူဝ်ႈဢၼ်တပႄးၸဝ်ႈတင်းလၢႆလွမ်ႉႁွပ်ႈမၼ်းၸဝ်ႈမႃးၼၼ်ႉမၼ်းၸဝ်ႈၼင်ႈလႄႈ၊-
တႄႇၸႃႉပိုတ်ႇပၢၵ်ႇႁေႃးလၢတ်ႈတြႃးတီႈၶဝ်ဢေႃႈ။
“ၶဝ်ၸိူဝ်းဢၼ်ႁူဝ်ၸႂ်ၶျႃးတႅမ်ႇၼၼ်ႉမီးမၢင်ႇၵလႃႇဢေႃႈ။ မိူင်းၵၢင်ႁၢဝ်ၸဝ်ႈပဵၼ်မိူင်းၶဝ်ၼၼ်ႉယဝ်ႉ။
ၶဝ်ၸိူဝ်းဢၼ်ၶူမ်ၸႂ်ၶူမ်ၶေႃးၼၼ်ႉမီးမၢင်ႇၵလႃႇဢေႃႈ။ တီႈၶဝ်ၼၼ်ႉၽြႃးပဵၼ်ၸဝ်ႈတၵ်းႁႂ်ႈသႃႇၸႂ်ဢေႃႈ။
ၶဝ်ၸိူဝ်းဢၼ်ႁူဝ်ၸႂ်ၼိမ်သိမ်ႇဢူၼ်ႈဢွၼ်ႇၼၼ်ႉမီးမၢင်ႇၵလႃႇဢေႃႈ။ ၶဝ်ၼၼ်ႉတၵ်းလႆႈၶၢမ်ႇဢမူၺ်ႇၸွမ်းၼင်ႇၵတိၽြႃးပဵၼ်ၸဝ်ႈဢေႃႈ။
ၶဝ်ၸိူဝ်းဢၼ်မီးႁူဝ်ၸႂ်ဢၼ်ဢိုပ်းယၢၵ်ႈ တွင်ႉမႆႈပႃႇရမီႇတၢင်းသိုဝ်ႈတေႃႇၼၼ်ႉမီးမၢင်ႇၵလႃႇဢေႃႈ။ တီႈၶဝ်ၼၼ်ႉၽြႃးပဵၼ်ၸဝ်ႈတၵ်းႁႂ်ႈႁွတ်ႈတၢင်းဢၼ်လိူင်ႇၸႂ်ဢေႃႈ။
ၶဝ်ၸိူဝ်းဢၼ်ႁူဝ်ၸႂ်ၸၢင်ႈႁၵ်ႉဢဵတ်းလူၼၼ်ႉမီးမၢင်ႇၵလႃႇဢေႃႈ။ တီႈၶဝ်ၼၼ်ႉၽြႃးပဵၼ်ၸဝ်ႈတၵ်းႁၵ်ႉဢဵတ်းလူဢေႃႈ။
ၶဝ်ၸိူဝ်းဢၼ်ႁူဝ်ၸႂ်ၶၢဝ်ၸၢင်ႇၼၼ်ႉမီးမၢင်ႇၵလႃႇဢေႃႈ။ ၶဝ်ၼၼ်ႉတၵ်းလႆႈႁၼ်ၽြႃးပဵၼ်ၸဝ်ႈဢေႃႈ။
ၶဝ်ၸိူဝ်းဢၼ်ႁႂ်ႈတၢင်းဢၼ်ပိူၼ်ႈၽိတ်းၵၼ်ထၢတ်ႇယဵၼ်ၼၼ်ႉမီးမၢင်ႇၵလႃႇဢေႃႈ။ ၶဝ်ၼၼ်ႉတၵ်းလႆႈၶၢမ်ႇႁွင်ႉဝႃႈ၊ ပဵၼ်လုၵ်ႈၽြႃးပဵၼ်ၸဝ်ႈဢေႃႈ။
ၶဝ်ၸိူဝ်းဢၼ်လႆႈၶၢမ်ႇၼိၵ်ႈၸၢၵ်ႈငႅၼ်းသႄးၵွပ်ႈပိူဝ်ႈဢၼ်ၸွမ်းတြႃးတၢင်းဢၼ်၊ သိုဝ်ႈတေႃႇၼၼ်ႉမီးမၢင်ႇၵလႃႇဢေႃႈ။ မိူင်းၵၢင်ႁၢဝ်ၸဝ်ႈပဵၼ်မိူင်းၶဝ်ဢေႃႈ။
“မိူဝ်ႈဢၼ်ပိူၼ်ႈသႄႉသွမ်းတၢင်ႇဢပျတ်ႈဢၼ်ဢမ်ႇ ၸိုဝ်ႈဢမ်ႇၸႂ်ႈၵူႈၸိူဝ်ႉၵူႈပိူင်တီႈသူလႄႈၼိၵ်ႈၸၢၵ်ႈငႅၼ်းသႄးသူၵွပ်ႈပိူဝ်ႈသူပဵၼ်တပႄးၵဝ်ၼၼ်ႉသူမီးမၢင်ႇၵလႃႇဢေႃႈ။-
ၸူမ်းသိူဝ်းမူၼ်ႈပျေႃႇတႃႉ။ သူးလၢပ်ႈဢၵျူဝ်းဢၼ်ယႂ်ႇၼႃႇၼၼ်ႉမႄးႁႅၼ်းဝႆႉပုၼ်ႈသူၵႃႈၼႂ်းမိူင်းၵၢင်ႁၢဝ်ၸဝ်ႈၼၼ်ႉယဝ်ႉ။ ပရေႃးၽႅတ်ႈဢၼ်ပေႃႇမႃးဢွၼ်တၢင်းသူတင်းလၢႆၸိူဝ်းၼၼ်ႉၵေႃႈလႆႈၶၢမ်ႇၸိူဝ်ႉၼင်ႇၼႆပူၼ်ႉမႃးယဝ်ႉ။
“သူပဵၼ်မိူၼ်ၸိူဝ်ႉၼင်ႇၵိူဝ်ပုၼ်ႈၵူၼ်းၼႂ်းလေႃးၵႃႉၼႆႉဢေႃႈ။ ၵိူဝ်ၼႆႉပေႃးဢၼ်ၸဵမ်းမၼ်းႁၢႆၵႂႃႇၸိုင်၊ဢမ်ႇၸၢင်ႈၶိုၼ်းလႆႈဢၼ်ၸဵမ်းမၼ်းၼၼ်ႉထႅင်ႈယဝ်ႉ။ ဢမ်ႇပွင်ႇလွင်ႈၵႃႈသင်ယဝ်ႉလႄႈ၊ဢဝ်ထိမ်ႈပႅတ်ႈပႃႈၼွၵ်ႈႁႂ်ႈၵူၼ်းယဵပ်ႇၵူၼ်းၶၢမ်ႈၵူၺ်းယဝ်ႉဢေႃႈ။
“သူပဵၼ်မိူၼ်ၸိူဝ်ႉၼင်ႇဢၼ်လႅင်းပုၼ်ႈလေႃးၵႃႉၼႆႉဢေႃႈ။ ဝဵင်းဢၼ်တႄႇဝႆႉၵႃႈၼိူဝ်ပၢႆၸိၵ်းလွႆၸိုင်၊ဢမ်ႇသိူင်ႇဢမ်ႇလပ်ႉဝႆႉလႆႈ။-
ဢမ်ႇမီးၽူႈလႂ်တႆႈၵွၵ်းၽႆးသေလႄႈဢဝ်ပဵတ်ႈႁူမ်ႇသုမ်ႇဝႆႉ၊ ၸၢင်ႈဢဝ်တၢင်ႇဝႆႉၵႃႈၼိူဝ်ၶဵင်ႇတီႈတႆႈၽႆးဢၼ်သုင်၊ပုၼ်ႈလွင်ႈၼင်ႇႁိုဝ်တၵ်းပၼ်ဢၼ်လႅင်းၵႃႈတီႈၵူၼ်းႁိူၼ်းၵူႈၵေႃႉၵူႈၵူၼ်းၼၼ်ႉဢေႃႈ။
“ပိူင်လဵဝ်ၵၼ်ၼႂ်းသူၼႆႉမိူၼ်ၸိူဝ်ႉၼင်ႇၵွၵ်းၽႆးၼၼ်ႉ၊ႁႂ်ႈဢၼ်လႅင်းသူထွင်ႇႁိူဝ်ႈပႃႈၼႃႈပိူၼ်ႈတႃႉ။ လွင်ႈမၼ်းၸမ်ႉ၊ပိူၼ်ႈတၵ်းႁၼ်တၢင်းၵမ်တၢင်းၵျၢင်ႉဢၼ်လီသူၼၼ်ႉလႄႈယွင်ႈယေႃးပေႃႈၸဝ်ႈသူဢၼ်မီးယူႇၵႃႈၼိူဝ်မိူင်းၵၢင်ႁၢဝ်ပုၼ်ႉၼၼ်ႉဢေႃႈ။
“ၵဝ်မႃးႁႂ်ႈလႆႈယႃႉၵျၢမ်းပိင်းၺၢပ်ႈတြႃးတင်းၵျၢမ်းဢၼႃႇၵတ်ႉတိၸိူဝ်းၼၼ်ႉဝႃႈၼႆ၊ယႃႇပေထၢင်ႇၽိတ်း။ ၵဝ်မႃးပုၼ်ႈတၵ်းႁႂ်ႈလႆႈမႃးယႃႉဢမ်ႇၸႂ်ႈ။ မႃးပုၼ်ႈတၵ်းႁႂ်ႈလႆႈပျေႉၸုမ်ႇဢေႃႈ။-
ၵဝ်ဝႃႈတီႈၸိုဝ်ႈတီႈၸႂ်ႈမၼ်းၸမ်ႉ၊တေႃႇထိုင်ႁွတ်ႈၽႃႉၵၢင်ႁၢဝ်တင်းလိၼ်မိူင်းဢမ်ႇပႆႇသုတ်းသဵင်ႈႁၢႆဝၢႆးၵႂႃႇၼၼ်ႉ၊တူဝ်မႄႈလိၵ်ႈၸမ်ႈၼိုင်ႈမဵတ်ႉၼိုင်ႈလႄႈသင်၊ၸူဝ်ႈဢၼ်ဢမ်ႇပႆႇပဵၼ်ၸွမ်းပျေႉၸုမ်ႇၼၼ်ႉတေဢမ်ႇလႆႈလုလႆႈႁၢႆသေၵႃႈၼႂ်းၵျၢမ်းပိင်းၺၢပ်ႈတြႃးၼႆႉ။-
ပိူဝ်ႈၼႆလႄႈ၊ၵေႃႉဢၼ်ၽိတ်းပိူင်ႈသဵၼ်ႈတြႃးဢၼ်လဵၵ်ႉသေပိူၼ်ႈၼၼ်ႉလႄႈသင်၊သမ်ႉသွၼ်ပၼ်ပိူၼ်ႈႁႂ်ႈႁဵတ်းၽိတ်းၸွမ်းၸိူဝ်ႉၼင်ႇၼၼ်ႉလႄႈသင်၊ၵေႃႉၼၼ်ႉတၵ်းလႆႈၶၢမ်ႇတၢင်းႁွင်ႉၵေႃႉဢၼ်လဵၵ်ႉသေပိူၼ်ႈၵႃႈၼႂ်းမိူင်းၵၢင်ႁၢဝ်ၸဝ်ႈပုၼ်ႉဢေႃႈ။ ပိူင်လဵဝ်ၵၼ်ၵေႃႉဢၼ်ၵမ်ၵျၢင်ႉၸွမ်းတြႃးပိင်းၺၢပ်ႈဢၼ်လဵၵ်ႉသေပိူၼ်ႈၼၼ်ႉလႄႈသင်၊သမ်ႉသွၼ်ပၼ်ပိူၼ်ႈႁႂ်ႈႁဵတ်းၸွမ်းၸိူဝ်ႉၼင်ႇၼၼ်လႄႈသင်၊ၵေႃႉၼၼ်ႉတၵ်းလႆႈၶၢမ်ႇတၢင်းႁွင်ႉၵေႃႉဢၼ်ယႂ်ႇသေပိူၼ်ႈၵႃႈၼႂ်းမိူင်းၵၢင်ႁၢဝ်ၸဝ်ႈပုၼ်ႉဢေႃႈ။-
ၵဝ်ႁေႃးလၢတ်ႈပၼ်သတိတီႈသူလႄႈဝႃႈၸမ်ႉ၊ပေႃးတၢင်းၵမ်တၢင်းၵျၢင်ႉသူယင်းဢမ်ႇလီလိူဝ်တွၼ်းၼႃႇသေတၢင်းၵမ်တၢင်းၵျၢင်ႉၵူၼ်းၵိူင်း ၽႃႇရိသႄး၊ ၶဝ်၊ဢိၵ်ႇတင်းသြႃႇမေႃၵျၢမ်းထမ်ႇမႃႉၶဝ်ၸိူဝ်းၼၼ်ႉၸိုင်၊သူဢမ်ႇလႆႈၶဝ်ႈၵႃႈၼႂ်းမိူင်းၵၢင်ႁၢဝ်ၸဝ်ႈပုၼ်ႉ။
“သူလႆႈငိၼ်းပိင်းၺၢပ်ႈတြႃးဝႆႉပုၼ်ႈၵူၼ်းမိူဝ်ႈၵွၼ်ႇလႄႈဝႃႈ၊ ‘ယႃႇပေဢဝ်ဢသၢၵ်ႈၵူၼ်းတၢႆ။ ၵေႃႉဢၼ်ဢဝ်ဢသၢၵ်ႈၵူၼ်းတၢႆၼၼ်ႉတၵ်းလႆႈၶၢမ်ႇတၢင်းဢၼ်ၸီႇယၢင်ႇဢေႃႈ၊’ ဝႃႈၼင်ႇၼႆယဝ်ႉ။-
တြႃးဢၼ်ၵဝ်ႁေႃးၸမ်ႉ၊ၽူႈလႂ်သေဢမ်ႇဝႃႈ၊ၵေႃႉဢၼ်ၸႂ်လမ်သႆႈၵမ်ႇတေႃႇပီႈၼွင်ႉမၼ်းၼၼ်ႉတၵ်းလႆႈၶၢမ်ႇတၢင်းဢၼ်ၸီႇယၢင်ႇဢပျတ်ႈဢေႃႈ။ ၵေႃႉဢၼ်လၢတ်ႈတီႈပီႈၼွင်ႉမၼ်းလႄႈဝႃႈ၊ ‘ၵူၼ်းငိူဝ်ႈငႃႉ’ ဝႃႈၼႆၼၼ်ႉ၊လႆႈထိူၵ်ႈၶၢမ်ႇတၢင်းဢၼ်ၸီႇယၢင်ႇၽၢႆႇၼႃႈၶုၼ်လုမ်းဢေႃႈ။ ၵေႃႉဢၼ်လၢတ်ႈတီႈပီႈၼွင်ႉမၼ်းလႄႈဝႃႈ၊ ‘မႂ်းမိူၵ်ႈ’ ဝႃႈၼႆၼၼ်ႉတၵ်းလႆႈထိူၵ်ႈၶၢမ်ႇၽႆးငရၢႆးဢေႃႈ။-
ပိူဝ်ႈၼႆလႄႈမိူဝ်ႈဢၼ်မႂ်းဢၢင်ႈတေလူႇၵႃႈတီႈၽြႃးပဵၼ်ၸဝ်ႈ၊ၽၢႆႇၼႃႈၶဵင်ႇတၢင်းလူႇယူႇလႄႈၶုၵ်းၸႂ်လႆႈလွင်ႈဢၼ်ပီႈၼွင်ႉမႂ်းမီးတီႈတၵ်းတၢင်ႇဢပျတ်ႈမႂ်းဝႆႉၼၼ်ႉ၊-
ဢဝ်ၶိူင်ႈတၢင်းလူႇမႂ်းၼၼ်ႉတမ်းဝႆႉႁိမ်းၶဵင်ႇတၢင်းလူႇသေလႄႈပွၵ်ႈၵႂႃႇတွင်းပၢၼ်ႇၵႄႈလိတ်ႈတၢင်းၽိတ်းမႂ်းၼၼ်ႉႁႂ်ႈယဝ်ႉၵွၼ်ႇ၊ၸင်ႇၶိုၼ်းမႃးလူႇတၢင်းလူႇမႂ်းၵႃႈတီႈၽြႃးပဵၼ်ၸဝ်ႈတႃႉ။ မီးၼင်ႇၼႆဢေႃႈ။
“ပေႃးသေၵေႃႉသေၵူၼ်းႁဵတ်းဢမုၸွႆးတြႃးသႂ်ႇမႂ်းလႄႈဢွၼ်ၵႂႃႇတီႈလုမ်းၼၼ်ႉၸိုင်၊ၶျေႃးဝွၼ်းတွင်းပၢၼ်ႇႁႂ်ႈမၼ်းပျေႇၸႂ်မိူဝ်ႈဢၼ်ယင်းမီးဢၶိင်ႇယင်းပႆတၢင်းၵႂႃႇယူႇၼၼ်ႉတႃႉ။ ပေႃးဢမ်ႇၼၼ်မၼ်းတၵ်းဢဝ်မႂ်းဢၢပ်ႈတီႈၶုၼ်လုမ်းလႄႈၶုၼ်လုမ်းၼၼ်ႉတၵ်းဢၢပ်ႈပၼ်ၵႃႈၼႂ်းမိုဝ်းၵႄႇႁၢၼ်သေယဝ်ႉ၊ၶင်မႂ်းဝႆႉၼႂ်းထွင်ႇဢေႃႈ။-
ၵဝ်ဝႃႈတီႈၸိုဝ်ႈၸႂ်ႈမၼ်းၸမ်ႉ၊ပေႃးလႆႈပဵၼ်ၵႂႃႇၸိူဝ်ႉၼင်ႇၼၼ်ယဝ်ႉၸိုင်၊ၸူဝ်ႈဢၼ်မႂ်းဢမ်ႇပႆႇတႅၼ်းငိုၼ်းၵုမ်ႇၵုမ်ႇၼၼ်ႉဢမ်ႇလႆႈဢွၵ်ႇထွင်ႇ။
“သူလႆႈငိၼ်းတြႃးပိင်းၺၢပ်ႈဝႆႉလႄႈဝႃႈ၊ ‘ယႃႇပေၵူတ်ႉမေးပိူၼ်ႈ’ ဝႃႈၼႆမီးဝႆႉၼၼ်ႉယဝ်ႉ၊-
တြႃးဢၼ်ၵဝ်ႁေႃးၸမ်ႉ၊ ‘ပေႃးၵူၼ်းၸၢႆးဢဝ်တင်းတႃၵိလေႇသႃႇလႄႈတူၺ်းမေးပိူၼ်ႈၸိုင်၊တၢင်းၼႂ်းၸႂ်မၼ်းၽိတ်းပိူင်ႈမေႇထုင်ႇဢၼ်ဢမ်ႇတြႃးတီႈမႄႈယိင်းၼၼ်ႉယဝ်ႉ၊’ မီးၼင်ႇၼႆဢေႃႈ။-
ပေႃးမၢၵ်ႇတႃၶွၼ်ၶႂႃမႂ်းႁဵတ်းႁႂ်ႈမႂ်းၽိတ်းပိူင်ႈဢပျတ်ႈၸိုင်၊ၶွၵ်းဢွၵ်ႇပႅတ်ႈတႃႉ။ တၢင်းဢၼ်ဢၢင်ႇၵႃႇမႂ်းဢၼ်ၼိုင်ႈလုၼၼ်ႉယိင်းၶႅၼ်းတေလီသေတၢင်းဢၼ်တူၵ်းငရၢႆးတင်းတူဝ်ဢေႃႈ။-
မိူၼ်ၼင်ၼၼ်ႉ၊ပေႃးမိုဝ်းၶွၼ်ၶႂႃမႂ်းၼၼ်ႉႁဵတ်းႁႂ်ႈမႂ်းၽိတ်းပိူင်ႈဢပျတ်ႈၸိုင်၊တႅပ်းပႅတ်ႈတႃႉ။ တၢင်းဢၼ်ဢၢင်ႇၵႃႇဢၼ်ၼိုင်ႈလုၼၼ်ႉယဵင်ႈၶႅၼ်းတေလီသေတူၵ်းငရၢႆးတင်းတူဝ်ဢေႃႈ။
“သမ်ႉမီးတြႃးပိင်းၺၢပ်ႈဝႆႉလႄႈဝႃႈ၊ ‘ပေႃးၵူၼ်းၸၢႆးၶႂ်ႈပႅတ်ႈမေးမၼ်းၸိုင်၊ႁႂ်ႈမၼ်းတႅမ်ႈလိၵ်ႈဢၼ်ပႅတ်ႈၵၼ်ၶၢတ်ႇၵၼ်ၼၼ်ႉပၼ်မေးမၼ်းတႃႉ၊’ ဝႃႈၼႆဝႆႉယဝ်ႉ။-
တြႃးဢၼ်ၵဝ်ႁေႃးၸမ်ႉ၊ ‘လိူဝ်သေတၢင်းဢၼ်မေးမၼ်းလဵၼ်ႈၽူဝ်ၼွႆႉလႄႈပေႃးၵူၼ်းၸၢႆးပႅတ်ႈမေးမၼ်းၵွပ်ႈပိူဝ်ႈလွင်ႈတၢင်းသေၸိူဝ်ႉသေပိူင်ၸိုင်၊မၼ်းႁဵတ်းႁႂ်ႈမေးမၼ်းၽိတ်းပိူင်ႈဢမ်ႇၵႃး၊ၵေႃႉဢၼ်ဢဝ်မႄႈယိင်းၼၼ်ႉၵေႃႈၽိတ်းပိူင်ႈမေးပိူၼ်ႈဢေႃႈ၊’ မီးၼင်ႇၼႆဢေႃႈ။
“ထႅင်ႈလွင်ႈၼိုင်ႈသူလႆႈငိၼ်းတြႃးပိင်းၺၢပ်ႈဝႆႉပုၼ်ႈၵူၼ်းမိူဝ်ႈၵွၼ်ႇလႄႈဝႃႈ၊ ‘ယႃႇပေတိူင်ႇၵၢဝ်ႇၵႂၢမ်းသဵတ်ႈၸႃႇလၢႆလၢႆလွၵ်ႇလွၵ်ႇ။ တၢင်းဢၼ်တိူင်ႇၵၢဝ်ႇၵႂၢမ်းသဵတ်ႈၸႃႇတီႈၽြႃးပဵၼ်ၸဝ်ႈၼၼ်ႉတေလႆႈပႂ်ႉထိင်းႁႂ်ႈမၼ်ႈၵိုမ်းဢေႃႈ၊’ ဝႃႈၼင်ႇၼႆၼၼ်ႉယဝ်ႉ။-
တြႃးဢၼ်ၵဝ်ႁေႃးၸမ်ႉ၊ယႃႇပေတိူင်ႇၵၢဝ်ႇၵႂၢမ်းသဵတ်ႈၸႃႇလႃးလႃး။ ယႃႇပေတိူင်ႇၵၢဝ်ႇၵႂၢမ်းသဵတ်ႈၸႃႇတေႃႇၽႃႉၵၢင်ႁၢဝ်။ လွင်ႈမၼ်းၸမ်ႉ၊ၽႃႉၵၢင်ႁၢဝ်ပဵၼ်ပလၢင်ႇၽြႃးပဵၼ်ၸဝ်ႈဢေႃႈ။-
ၵႃႈတီႈလိၼ်မိူင်းၵေႃႈယႃႇပေတိူင်ႇၵၢဝ်ႇၵႂၢမ်းသဵတ်ႈၸႃႇ။ လိၼ်မိူင်းပဵၼ်တီႈတမ်းတိၼ်ၽြႃးပဵၼ်ၸဝ်ႈဢေႃႈ။ ၵႃႈတီႈဝဵင်း ယေႇရုသလႅမ်ႇ၊ ၵေႃႈယႃႇတိူင်ႇၵၢဝ်ႇၵႂၢမ်းသဵတ်ႈၸႃႇ။ ပဵၼ်ဝဵင်းမႁႃႇၶုၼ်လူင်ဢေႃႈ။-
ယႃႇပေဢဝ်ႁူဝ်သူတိူင်ႇၵၢဝ်ႇၵႂၢမ်းသဵတ်ႈၸႃႇ။ ၶူၼ်ႁူဝ်သူသဵၼ်ႈၼိုင်ႈၵူၺ်းၵေႃႈသူဢမ်ႇၸၢင်ႈႁဵတ်းႁႂ်ႈၽိူၵ်ႇမႃးလမ်မႃးလႆႈ။-
ၵႂၢမ်းဢၼ်သူတၵ်းလၢတ်ႈၼၼ်ႉ၊လၢတ်ႈသိုဝ်ႈသိုဝ်ႈဝႃႈ၊ ‘ၸႂ်ႈၶႃႈယဝ်ႉ။’ ဢမ်ႇၼၼ်ၵေႃႈလၢတ်ႈဝႃႈ၊ ‘ဢမ်ႇၸႂ်ႈၶႃႈ။’ ဝႃႈၼႆၵူၺ်းတႃႉ။ ၵႂၢမ်းဢၼ်ပူၼ်ႉပႅၼ်သေၶေႃႈၵႂၢမ်းၸိူဝ်းၼႆႉၸမ်ႉ၊ပဵၼ်မႃးၵႃႈတီႈၶုၼ်ဢႃႉမၢင်ႇၵလႃႇၵူၺ်းဢေႃႈ။ မီးၼင်ႇၼႆဢေႃႈ။
“သူလႆႈငိၼ်းပိင်းၺၢပ်ႈတြႃးဝႆႉလႄႈဝႃႈ၊ ‘မၢၵ်ႇတႃၶွၼ်ၼိုင်ႈတၵ်းလႆႈသေပုၼ်ႈမၢၵ်ႇတႃၶွၼ်ၼိုင်ႈ၊ၶဵဝ်ႈသိၵ်ႈၼိုင်ႈတၵ်းလႆႈသေပုၼ်ႈၶဵဝ်ႈသိၵ်ႈၼိုင်ႈဢေႃႈ၊’ ဝႃႈၼႆၼၼ်ႉယဝ်ႉ။-
တြႃးဢၼ်ၵဝ်ႁေႃးၸမ်ႉ၊ ‘ယႃႇပေၶိုၼ်းတွပ်ႇတီႈၵေႃႉဢၼ်ၽိတ်းမႂ်းၼၼ်ႉ။ ပေႃးပိူၼ်ႈတူပ်းၵႅမ်ႈမႂ်းၽၢႆႇၶႂႃၸိုင်၊ဝၢႆႇပၼ်ၵႅမ်ႈမႂ်းၽၢႆႇသၢႆႉထႅင်ႈလူးၵွၼ်ႇတႃႉ။-
ပေႃးပိူၼ်ႈၸုင်မႂ်းၶိုၼ်ႈလုမ်းလႄႈမႂ်ဢဝ်သိူဝ်ႈမႂ်းၸိုင်၊ပၼ်ၽႃႈဝႆမႂ်းၸွမ်းတႃႉ။-
ပေႃးၵေႃႉဢၼ်မီးဢႃႇၼႃႇလႄႈၸႂ်ႉမႂ်းႁၢပ်ႇၶူဝ်းမၼ်းၵႂႃႇၶၢဝ်းတၢင်းလၵ်းၼိုင်ႈၸိုင်၊သူင်ႇပၼ်မၼ်းၵႂႃႇထိုင်သွင် လၵ်းလူးၵွၼ်ႇတႃႉ။-
တီႈၵေႃႉဢၼ်ယွၼ်းမႂ်းၼၼ်ႉပၼ်တႃႉ။ တီႈၵေႃႉဢၼ်ယွၼ်းယိမ်တီႈမႂ်းၼၼ်ႉၵေႃႈၵူႈယိမ်ပၼ်တႃႉ၊’ မီးၼင်ႇၼႆဢေႃႈ။
“သူလႆႈငိၼ်းတြႃးပိင်းၺၢပ်ႈဝႆႉလႄႈဝႃႈ၊ ‘ႁၵ်ႉၵေႃႉဢၼ်ၸၢပ်ႈသႅင်ႇၵၼ်တင်းမႂ်းတႃႉ။ ၸင်းရၢၼ်ႇသူႇမႂ်းတႃႉ၊’ ဝႃႈၼႆၼၼ်ႉယဝ်ႉ။-
တြႃးဢၼ်ၵဝ်ႁေႃးၸမ်ႉ၊ ‘ႁၵ်ႉရၢၼ်ႇသူႇသူတႃႉ။ သူးတွင်းပုၼ်ႈၶဝ်ၸိူဝ်းဢၼ်ၼိၵ်ႈၸၢၵ်ႈငႅၼ်းသႄးသူၼၼ်ႉတႃႉ၊’ မီးၼင်ႇၼႆဢေႃႈ။-
ပေႃးသူႁဵတ်းၸိူဝ်ႉၼင်ႇၼၼ်ၸိုင်၊သူတၵ်းလႆႈဢၶႂၢင်ႉဢၼ်ပဵၼ်လုၵ်ႈပေႃႈၸဝ်ႈသူဢၼ်မီးယူႇၵႃႈၼိူဝ်မိူင်းၵၢင်ႁၢဝ်ပုၼ်ႉဢေႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈဝႃႈၸမ်ႉ၊ပေႃႈၸဝ်ႈသူၼၼ်ႉႁႂ်ႈၵၢင်ဝၼ်းႁိူဝ်ႈလႅင်းၵႃႈၼိူဝ်ၵူၼ်းလီၵူၼ်းၸႃႉမိူၼ်မိူၼ်ၵၼ်ဢေႃႈ။ မိူၼ်ၸိူဝ်ႉၼင်ႇၼၼ်မၼ်းၸဝ်ႈႁႂ်ႈၽူၼ်တူၵ်းၵႃႈၼိူဝ်ၵူၼ်းသိုဝ်ႈတေႃႇ၊ၵူၼ်းဢၼ်ဢမ်ႇသိုဝ်ႈတေႃႇတင်းလၢႆၽဵင်ႇၽဵင်ႇၵၼ်ဢေႃႈ။-
ပေႃးမႂ်းႁၵ်ႉၶဝ်ၸိူဝ်းဢၼ်ႁၵ်ႉမႂ်းၼၼ်ႉၵူၺ်းၸိုင်၊တၵ်းလႆႈဢၵျူဝ်းတီႈၽြႃးပဵၼ်ၸဝ်ႈၵႃႈသင်။ ၵူၼ်းဢၼ်ၵဵပ်းၶွၼ်ႇၶဝ်တေႃႈယင်းႁဵတ်းထၢၼ်ႇၼႆႉယူႇ။-
ပေႃးမႂ်းတူင်ႉတၵ်ႉပီႈၼွင်ႉမႂ်းၵူၺ်းၸိုင်၊တၵ်းမျၢတ်ႈတွၼ်းလိူဝ်ၵႃႈသင်။ ၶဝ်ၸိူဝ်းဢၼ်ဢမ်ႇယုမ်ႇမၢတ်ႈၸဝ်ႈၽြႃးတင်းလၢႆၵေႃႈယင်းႁဵတ်းထၢၼ်ႇၼႆႉယူႇ။-
ၵွပ်ႈလွင်ႈၸိူဝ်ႉၼႆလႄႈၸိူဝ်ႉၼင်ႇဢၼ်ပေႃႈၸဝ်ႈသူဢၼ်မီးယူႇၵႃႈၼိူဝ်မိူင်းၵၢင်ႁၢဝ်လႄႈပျေႉၸုမ်ႇလီငၢမ်းၼၼ်ႉ၊ သူၵေႃႈဢွၼ်ၵၼ်ပျေႉၸုမ်ႇလီငၢမ်းတႃႉ။ မီးၼင်ႇၼႆဢေႃႈ။
“မိူဝ်ႈဢၼ်သူၵမ်ၵျၢင်ႉသီႇလႃႉတၢင်းသိုဝ်ႈတေႃႇၼၼ်ႉ၊ၼင်ႇႁိုဝ်ဢမ်ႇႁႂ်ႈမီးတၢင်းဢၼ်ႁူဝ်ၸႂ်ၽႅၼ်သုင်ၵႃႈတီႈၽၢႆႇၼႃႈပိူၼ်ႈၼၼ်ႉၸိုင်၊ႁဵတ်းသတိတႃႉ။ ပေႃးဢမ်ႇၼၼ်၊သူတေဢမ်ႇလႆႈဢၵျူဝ်းၵႃႈတီႈပေႃႈၸဝ်ႈသူဢၼ်မီးယူႇၵႃႈၼိူဝ် မိူင်းၵၢင်ႁၢဝ်ပုၼ်ႉၼၼ်ႉဢေႃႈ။
“ပိူဝ်ႈၼႆလႄႈမိူဝ်ႈဢၼ်မႂ်းၽေးၸွၼ်းယိုၼ်ႈမႅင်ႇတီႈၵေႃႉဢၼ်ၸုတ်ႈဢၼ်လုတ်ႈၼၼ်ႉ၊ယႃႇပေႁႆႇၵွင်ႁႆႇမွင်းသေလႄႈလူႇတၢၼ်းမိူၼ်ၸိူဝ်ႉၼင်ႇၵူၼ်းဢၼ်ၼႃႈသိုဝ်ႈၸႂ်ၵူတ်ႉၶဝ်ၽေးၸွၼ်းယိုၼ်ႈမႅင်ႇၵႃႈၼႂ်းၸရွပ်ႈႁေႃးတြႃးလႂ်၊ဢိၵ်ႇတင်းတီႈတၢင်းၸုတၢင်းႁွမ်းလႂ်၊ႁႂ်ႈပိူၼ်ႈလႆႈယွင်ႈယေႃးၶဝ်ၼၼ်ႉ။ ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ၶဝ်ၼၼ်ႉလႆႈၶၢမ်ႇဢဝ်ဢၵျူဝ်းၶဝ်ယဝ်ႉ။-
သူၸမ်ႉ၊မိူဝ်ႈဢၼ်ၽေးၸွၼ်းယိုၼ်ႈမႅင်ႇၼၼ်ႉ၊လွင်ႈဢၼ်မိုဝ်းၶွၼ်ၶႂႃသူႁဵတ်းၼၼ်ႉယႃႇႁႂ်ႈမိုဝ်းၶွၼ်သၢႆႉလႆႈႁု။-
တၢင်းႁဵတ်းသူၼၼ်ႉပဵၼ်ဢၼ်လပ်ႉၼႃႈလပ်ႉတႃလႄႈပေႃႈၸဝ်ႈသူဢၼ်ႁၼ်တၢင်းဢၼ်လပ်ႉၼၼ်ႉတၵ်းပၼ်ဢၵျူဝ်းတီႈသူဢေႃႈ။
“မိူဝ်ႈဢၼ်သူသူးတွင်းၼၼ်ႉယႃႇပေႁဵတ်းမိူၼ်ၸိူဝ်ႉၼင်ႇၵူၼ်းၼႃႈသိုဝ်ႈၸႂ်ၵူတ်ႉၶဝ်ၼၼ်ႉ။ ၶဝ်ၵျိူၵ်ႈၸုၵ်းယူႇၵႃႈၼႂ်းၸရွပ်ႈႁေႃးတြႃးလႂ်၊ၸုၵ်းယူႇၵႃႈတီႈတၢင်းၸုတၢင်းႁွမ်းလႂ်လႄႈသူးတွင်းႁႂ်ႈပိူၼ်ႈႁၼ်ဢေႃႈ။ ၵဝ်ဝႃႈတီႈသူၸမ်ႉ၊ၶဝ်ၼၼ်ႉလႆႈၶၢမ်ႇဢဝ်ဢၵျူဝ်းၶဝ်ယဝ်ႉ။-
သူၸမ်ႉ၊မိူဝ်ႈဢၼ်သူးတွင်းၸိုင်၊ၶဝ်ႈၵႃႈၼႂ်းလုၵ်းတၢင်းၼႂ်းလႄႈဢုတ်းၽၵ်းတူသေယဝ်ႉ၊သူးတွင်းၵေႃႉလဵဝ်တီႈပေႃႈၸဝ်ႈသူဢၼ်မီးယူႇၵႃႈတီႈထႃႇၼႃႉဢၼ်သိုင်ႇဢၼ်လပ်ႉၼၼ်ႉတႃႉ။ ပေႃႈၸဝ်ႈသူဢၼ်ႁၼ်တၢင်းဢၼ်လပ်ႉဝႆႉၼၼ်ႉတၵ်းပၼ်ဢၵျူဝ်းတီႈသူဢေႃႈ။
“ၼႂ်းတၢင်းဢၼ်သူသူးတွင်းၼၼ်ႉယႃႇပေဢဝ်ၵႂၢမ်းလၢႆလၢႆသမ်ႉၵႂႃႇသမ်ႉၶိုၼ်းမိူၼ်ၸိူဝ်ႉၼင်ႇၶဝ်ၸိူဝ်းဢၼ်ဢမ်ႇယုမ်ႇမၢတ်ႈထႃႇဝရႃႉၽြႃးၼၼ်ႉ။ ၶဝ်ၸိူဝ်းၼၼ်ႉထၢင်ႇဝႃႈ၊ လူၺ်ႈၶေႃႈၵႂၢမ်းၼမ်ၼႃႇၸင်ႇသူးတွင်းပျေႉၸုမ်ႇဢေႃႈ။-
ယႃႇပေႁဵတ်းၸိူဝ်ႉၼင်ႇၶဝ်ၼၼ်ႉ။ လွင်ႈမၼ်းၸမ်ႉ၊ၸူဝ်ႈဢၼ်သူဢမ်ႇပႆႇသူးတွင်းၼၼ်ႉပေႃႈၸဝ်ႈသူႁုလွင်ႈဢၼ်သူလူဝ်ႇၵႃႈမီးတင်းသဵင်ႈတင်းလူင်ယူႇဢေႃႈ။-
ပိူဝ်ႈၼႆလႄႈသူးတွင်းၸိူဝ်ႉၼင်ႇၼႆတႃႉ။ “‘ပေႃႈၸဝ်ႈႁဝ်းၶႃႈဢၼ်မီးယူႇၵႃႈၼိူဝ် မိူင်းၵၢင်ႁၢဝ်ပုၼ်ႉတီႈၶႃႈ၊ ႁႂ်ႈၼႃႇမႃႉၸိုဝ်ႈသဵင်ၸဝ်ႈႁဝ်းမီးတၢင်းဢၼ် ရူဝ်ႇသေႇၵူဝ်ယမ်သေၵမ်းလူၺ်ႈတီႈၶႃႈ။
ႁႂ်ႈမိူင်းၸဝ်ႈႁဝ်းတႄႇပဵၼ်သေၵမ်းလူၺ်ႈတီႈၶႃႈ၊ ၸိူဝ်ႉၼင်ႇဢလူဝ်ႇၸဝ်ႈႁဝ်းပျေႉၸုမ်ႇဝႆႉၵႃႈၼိူဝ် မိူင်းၵၢင်ႁၢဝ်ပုၼ်ႉၼၼ်ႉ၊ ၵႃႈၼိူဝ်လိၼ်မိူင်းၼႆႉၵေႃႈႁႂ်ႈပျေႉၸုမ်ႇ သေၵမ်းလူၺ်ႈတီႈၶႃႈ။
ၶႅၼ်းတေႃႈပၼ်တၢင်းၵိၼ်ဢၼ်ပေႃးၵုမ်ႇ လဵင်ႉၸႂ်ဝၼ်းၼိုင်ႈၼၼ်ႉတီႈႁဝ်းၶႃႈ၊ ဝၼ်းမိူဝ်ႈၼႆႉသေၵမ်းတီႈၶႃႈ။
ၸိူဝ်ႉၼင်ႇဢၼ်ႁဝ်းၶႃႈပွႆႇလွတ်ႈဢပျတ်ႈ ဢၼ်ပိူၼ်ႈတၢင်ႇၵေႃႉၽိတ်းပိူင်ႈ ႁဝ်းၶႃႈၼၼ်ႉ၊ ၶႅၼ်းတေႃႈပွႆႇလွတ်ႈဢပျတ်ႈႁဝ်းၶႃႈ သေၵမ်းတီႈၶႃႈ။
ယင်းဢမ်ႇႁႂ်ႈလႆႈၸွမ်းၵႂႃႇၵႃႈတီႈဢပျတ်ႈ တၢင်းဢၼ်ၸူဝ်းၵႂႃႇၸူဝ်းပႆၼၼ်ႉ၊ ၶႅၼ်းတေႃႈၵႄႇသႄႇထွတ်ႇထွၼ်ဢဝ် သေၵႃႈၼႂ်း၊ လွင်ႈတၢင်းဢၼ်ဢမ်ႇလီဢမ်ႇငၢမ်းၼၼ်ႉ သေၵမ်းတီႈၶႃႈ။ [ႁႂ်ႈဢႃႇၼႃႇၸၢၵ်ႈၽုင်းတၼ်းၶူဝ်းလႄႈ မုၼ်သရေႇမီးတီႈ ၸဝ်ႈႁဝ်းတႃႇသေႇဢမ်ႇထၢတ်ႇ သေၵမ်းလူၺ်ႈ။ ဢႃမိၼ်ႈ။’] ဝႃႈၼင်ႇၼႆသူးတွင်းတႃႉ။
“ပိူဝ်ႈၼႆလႄႈ၊ပေႃးသူပွႆႇလွတ်ႈဢပျတ်ႈဢၼ်ပိူၼ်ႈတၢင်ႇၵေႃႉၽိတ်းပိူင်ႈသူၼၼ်ႉၸိုင်၊ပေႃႈၸဝ်ႈသူဢၼ်မီးယူႇၵႃႈၼိူဝ်မိူင်းၵၢင်ႁၢဝ်ပုၼ်ႉၼၼ်ႉၵေႃႈ၊တၵ်းပွႆႇလွတ်ႈဢပျတ်ႈသူဢေႃႈ။-
ၵူၺ်းၵႃႈ၊ပေႃးသူဢမ်ႇပွႆႇလွတ်ႈဢပျတ်ႈပိူၼ်ႈၸိုင်၊ပေႃႈၸဝ်ႈသူၵေႃႈတၵ်းဢမ်ႇပွႆႇလွတ်ႈဢပျတ်ႈသူ။
“မိူဝ်ႈဢၼ်သူၵမ်သိၼ်ဢမ်ႇၵိၼ်တၢင်းၵိၼ်ၼၼ်ႉ၊ယႃႇပေႁဵတ်းၼႃႈဢူၼ်ႈၼႃႈငဝ်မိူၼ်ၸိူဝ်ႉၼင်ႇၵူၼ်းၼႃႈသိုဝ်ႈၸႂ်ၵူတ်ႉၶဝ်ႁဵတ်းၼၼ်ႉ။ ၶဝ်ၼၼ်ႉၼင်ႇႁိုဝ်ပိူၼ်ႈတၵ်းႁၼ်ၼႃႈၶဝ်လႄႈႁုလွင်ႈဢၼ်ၶဝ်ၵမ်သိၼ်ဢမ်ႇၵိၼ်တၢင်းၵိၼ်ၸိုင်၊ၶဝ်ၸၢင်ႈႁဵတ်းၼႃႈဢူၼ်ႈၼႃႈငဝ်ဝႆႉဢေႃႈ။ ၵဝ်ဝႃႈတီႈသူၸမ်ႉ၊ၶဝ်ၼၼ်ႉလႆႈၶၢမ်ႇဢၵျူဝ်းၶဝ်ယဝ်ႉ။-
သူၸမ်ႉ၊မိူဝ်ႈဢၼ်သူၵမ်သိၼ်ဢမ်ႇၵိၼ်တၢင်းၵိၼ်ၸိုင်၊ၼင်ႇႁိုဝ်ပိူၼ်ႈတၵ်းဢမ်ႇႁုလွင်ႈဢၼ်သူၵမ်သိၼ်ဢမ်ႇၵိၼ်တၢင်းၵိၼ်လႄႈပေႃႈၸဝ်ႈသူဢၼ်မီးၵႃႈတီႈဢၼ်သိူင်ႇဢၼ်လပ်ႉၼၼ်ႉၵူၺ်းတၵ်းႁၼ်ၸိုင်၊သုၵ်ႈၼႃႈလႄႈဝီႁူဝ်ႁၢင်ႈၶိူင်ႈဝႆႉတႃႉ။-
ပေႃးႁဵတ်းၸိူဝ်ႉၼင်ႇၼၼ်ၸိုင်၊ပေႃႈၸဝ်ႈသူဢၼ်တႃႁၼ်တၢင်းဢၼ်လပ်ႉဝႆႉၼၼ်ႉတၵ်းပၼ်ဢၵျူဝ်းတီႈသူဢေႃႈ။
“ယႃႇပေသိမ်းပႅင်းၽၼ်ႇတႃႇဢုၵ်ႉၸႃႇပုၼ်ႈတူဝ်ၸဝ်ႈၵဝ်ႇၵႃႈတီႈမိူင်းၵူၼ်း၊ဢၼ်ႁေႃတင်းမႅင်းၸၢင်ႈၵိၼ်၊ဢၼ်ၽူႈလၵ်ႉၸၢင်ႈမူင်ႇယႃႉလႄႈလၵ်ႉဢဝ်လႆႈၼၼ်ႉ။-
သိမ်းပႅင်းၽၼ်ႇတႃႇဢုၵ်ႉၸႃႇၵႃႈၼိူဝ်မိူင်းၵၢင်ႁၢဝ်ၸဝ်ႈတီႈဢၼ်ႁေႃတင်းမႅင်းဢမ်ႇၸၢင်ႈၵိၼ်၊ၽူႈလၵ်ႉဢမ်ႇၸၢင်ႈမူင်ႇယႃႉလႄႈလၵ်ႉဢဝ်လႆႈၼၼ်ႉတႃႉ။-
လွင်ႈမၼ်းၸမ်ႉ၊ႁူဝ်ၸႂ်သူၸၢင်ႈၸပ်းၸွႆးတီႈဢၼ်ၽၼ်ႇတႃႇဢုၵ်ႉၸႃႇသူမီးၼၼ်ႉၵူၺ်းဢေႃႈ။
“မၢၵ်ႇတႃပဵၼ်ၸိူဝ်ႉၼင်ႇၵွၵ်းၽႆးတီႈတူဝ်ၵႃႇယႃႉဢေႃႈ။ ပေႃးမၢၵ်ႇတႃသူသႂ်လႅင်းလီၸိုင်၊တၵ်းလႅင်းတင်းတူဝ်ဢေႃႈ။-
ပေႃးမၢၵ်ႇတႃဢမ်ႇလႅင်းလီၸိုင်၊တၵ်းလပ်းသိင်ႇတင်းတူဝ်ဢေႃႈ။ သင်ဝႃႈဢၼ်လႅင်းသူလပ်းမွတ်ႇၵႂႃႇၸိုင်၊တၵ်းယဵင်ႈၶႅၼ်းလပ်းသိင်ႇၼႃႇယဝ်ႉဢေႃႈ။
“ၽူႈလႂ်သေၵေႃႉသေၵူၼ်းဢမ်ႇၶၢမ်ႇႁဵတ်းၶႃႈတီႈၸဝ်ႈသွင်ၵေႃႉလႆႈ။ မၼ်းၸၢင်ႈၸင်းၸဝ်ႈၵေႃႉၼိုင်ႈလႄႈႁၵ်ႉၸဝ်ႈတၢင်ႇၵေႃႉၼၼ်ႉဢေႃႈ။ တၵ်းပႂ်ႉသဵတ်ႈၸႃႇၸဝ်ႈၵေႃႉၼိုင်ႈလႄႈႁဵတ်းဢမ်ႇၼပ်ႉဢမ်ႇၶၢၼ်းတီႈၸဝ်ႈတၢင်ႇၵေႃႉၼၼ်ႉဢေႃႈ။ မိူၼ်ၼင်ႇၼၼ်ၼႂ်းၶိင်ႇလဵဝ်ၵၼ်သူဢမ်ႇၸၢင်ႈႁဵတ်းၵူၼ်းၸႂ်ႉၽြႃးပဵၼ်ၸဝ်ႈ၊ဢိၵ်ႇတင်းၵူၼ်းၸႂ်ႉၸေးၸိမ်ႇလေႃးၵႃႉၼႆႉလႆႈ။
“ၵွပ်ႈၼႆလႄႈ၊ၵဝ်လၢတ်ႈတီႈသူၸမ်ႉ၊တၵ်းလႆႈၵိၼ်ဢီႈသင်ပုၼ်ႈဢသၢၵ်ႈ၊တၵ်းလႆႈၼုင်ႈၶူဝ်းဢီႈသင်ပုၼ်ႈတူဝ်ၵႃႇယႃႉဝႃႈၼႆယႃႇပေမႆႈၸႂ်။ ဢသၢၵ်ႈမျၢတ်ႈသေတၢင်းၵိၼ်လႄႈတူဝ်ၵႃႇယႃႉၵေႃႈမျၢတ်ႈသေၶူဝ်းၼုင်ႈဢေႃႈ။-
တူၺ်းၼူၵ်ႉဢၼ်မိၼ်ယူႇၵႃႈၼိူဝ်တွင်ႉၽႃႉၼၼ်ႉလူး။ ၶဝ်ဢမ်ႇဝၢၼ်ႇၸိူဝ်ႉဝၢၼ်ႇၽၼ်း၊ဢမ်ႇၽုၵ်ႇဢမ်ႇသွမ်ႈ၊ဢမ်ႇပၢတ်ႇဢမ်ႇထိူဝ်၊ဢမ်ႇၵဵပ်းဢမ်ႇသိမ်းဝႆႉၼႂ်းယွင်ၼႂ်းယေး။ ၼႂ်းဝႃႈၼၼ်သေၵေႃႈ၊ပေႃႈၸဝ်ႈသူဢၼ်မီးယူႇၵႃႈၼိူဝ်မိူင်းၵၢင်ႁၢဝ်ၼၼ်ႉလဵင်ႉလူၶဝ်ယူႇဢေႃႈ။ သူမျၢတ်ႈသေၼူၵ်ႉၸိူဝ်းၼၼ်ႉဢမ်ႇၸႂ်ႈႁိုဝ်း။-
ၼႂ်းသူၼႆႉၵွပ်ႈပိူဝ်ႈမႆႈၸႂ်လႄႈမီးၽူႈလႂ်ၸၢင်ႈႁဵတ်းႁႂ်ႈဢသၢၵ်ႈတူဝ်ၸဝ်ႈၵဝ်ႇယိုၼ်းယၢဝ်းမႃးထႅင်ႈသွၵ်ႈ ၼိုင်ႈလႆႈ။
“ႁဵတ်းသင်လႄႈမႆႈၸႂ်ပုၼ်ႈၶူဝ်းၼုင်ႈသူၸိူဝ်ႉၼင်ႇႁိုဝ်။ ဝူၼ်ႉတူၺ်းတူၼ်ႈမွၵ်ႇထိူၼ်ႇၸိူဝ်းဢၼ်ယႂ်ႇမႃးႁင်းၽႂ်ႁင်းမၼ်းၼၼ်ႉတႃႉ။ ၶဝ်ယင်းဢမ်ႇႁဵတ်းၵၢၼ်၊ဢမ်ႇပၼ်ႇဢမ်ႇတေႃး။-
ၼႂ်းဝႃႈၼၼ်သေၵေႃႈ၊ၵဝ်ဝႃႈတီႈသူၸမ်ႉ၊ၶူဝ်းၼုင်ႈၶုၼ်ႁေႃၶမ်း သေႃးလမုၼ်ႇ၊ ဢၼ်မီးမုၼ်ၼၼ်ႉ၊ယင်းဢမ်ႇႁၢင်လီႁၢင်ႈငၢမ်းတၢၼ်ႇမွၵ်ႇၸိူဝ်းၼၼ်ႉသေလူင်ႇ။-
ဢူဝ်း၊ၵူၼ်းဢၼ်တၢင်းယုမ်ႇမၢတ်ႈၵေႇၶဝ်႟၊ပေႃးၽြႃးပဵၼ်ၸဝ်ႈယင်းႁၢင်ႈၶိူင်ႈပၼ်တူၼ်ႈယိူဝ်ႈယႃႈထိူၼ်ႇဢၼ်ၶဵဝ်ယူႇၸိဝ်းငိဝ်းၼႂ်းဝၼ်းမိူဝ်ႈၼႆႉလႄႈသမ်ႉလႆႈၶၢမ်ႇတၢင်းဢၼ်ထိမ်ႈသႂ်ႇၼႂ်းၽႆးၼႂ်းဝၼ်းမိူဝ်ႈၽုၵ်ႈၼၼ်ႉၸိုင်၊မၼ်းၸဝ်ႈယဵင်ႈၶႅၼ်းတၵ်းႁၢင်ႈၶိူင်ႈပၼ်သူလိူဝ်တွၼ်းၼႃႇသေၼၼ်ႉဢမ်ႇၸႂ်ႈႁိုဝ်း။
“ပိူဝ်ႈၼႆလႄႈယႃႇပေမႆႈၸႂ်လႄႈလၢတ်ႈဝႃႈ၊ ‘ၵဝ်တၵ်းလႆႈၵိၼ်ဢီႈသင်။ တၵ်းလႆႈၼုင်ႈၶူဝ်းဢီႈသင်။’ ဝႃႈၼႆယူႇ။-
လွင်ႈတၢင်းၸိူဝ်းၼႆႉၵူၼ်းဢၼ်ဢမ်ႇယုမ်ႇမၢတ်ႈထႃႇဝရႃႉၽြႃးၶဝ်ၵူၺ်းမႆႈၸႂ်လူၺ်ႈလွင်ႈၼႆႉဢေႃႈ။ ပေႃႈၸဝ်ႈသူဢၼ်မီးယူႇၵႃႈၼိူဝ်မိူင်းၵၢင်ႁၢဝ်ၼၼ်ႉႁုလွင်ႈဢၼ်သူလူဝ်ႇလွင်ႈတၢင်းၵႃႈမီးတင်းသဵင်ႈတင်းလူင်ယူႇဢေႃႈ။-
ႁႃမိူင်းၽြႃးပဵၼ်ၸဝ်ႈတင်းတြႃးတၢင်းဢၼ်သိုဝ်ႈတေႃႇဢွၼ်တၢင်းတႃႉ။ လိုၼ်းၼၼ်ႉၸင်ႇမၼ်းၸဝ်ႈတၵ်းပၼ်လွင်ႈတၢင်းၸိူဝ်းၼၼ်ႉၵႃႈမီးတင်းသဵင်ႈတင်းလူင်ထႅင်ႈဢေႃႈ။-
ပိူဝ်ႈၼႆလႄႈယႃႇပေမႆႈၸႂ်ပုၼ်ႈဝၼ်းမိူဝ်ႈၽုၵ်ႈ။ ဝၼ်းမိူဝ်ႈၽုၵ်ႈၼၼ်ႉတၵ်းမႆႈၸႂ်ပုၼ်ႈတူဝ်ၸဝ်ႈၵဝ်ႇဢေႃႈ။ ႁႂ်ႈတုၵ်ႉၶႃႉၶၢၼ်ၸႂ်ပေႃးၵုမ်ႇပုၼ်ႈဝၼ်းလႂ်ဝၼ်းၼၼ်ႉတႃႉ။
“ၼင်ႇႁိုဝ်တၵ်းၵၢင်းလွတ်ႈတင်းတၢင်းဢၼ်ၸီႇယၢင်ႇၸိုင်၊သူယႃႇပေၸီႇယၢင်ႇတႅပ်းတတ်းတီႈပိူၼ်ႈ။-
ၸိူဝ်ႉၼင်ႇသူၸီႇယၢင်ႇတႅပ်းတတ်းၼၼ်ႉတၵ်းၶိုၼ်းလႆႈၶၢမ်ႇတၢင်းဢၼ်ၸီႇယၢင်ႇတႅပ်းတတ်းဢေႃႈ။ ၸိူဝ်ႉၼင်ႇဢၼ်သူတူင်ပၼ်ပိူၼ်ႈၼၼ်ႉသူၵေႃႈတၵ်းလႆႈၶၢမ်ႇတၢင်းဢၼ်တူင်ပၼ်ၶိုၼ်းဢေႃႈ။-
ႁဵတ်းသင်လႄႈယင်းဢမ်ႇၶုၵ်းၸႂ်လႆႈသဵၼ်ႈမႆႉဢၼ်မီးၼႂ်းမၢၵ်ႇတႃမႂ်းလႄႈယွၼ်းတူၺ်းမုၼ်ႈၽွင်ဢွၼ်ႇဢၼ်မီးၼႂ်းမၢၵ်ႇတႃပီႈၼွင်ႉမႂ်းၼၼ်ႉၸိူဝ်ႉၼင်ႇႁိုဝ်။-
သဵၼ်ႈမႆႉယင်းမီးဝႆႉၼႂ်းမၢၵ်ႇတႃမႂ်းယူႇလႄႈသမ်ႉလၢတ်ႈဝႃႈ၊ ‘ႁႂ်ႈၵဝ်လႆႈဢဝ်မုၼ်ႈၽွင်ဢွၼ်ႇဢၼ်မီးၼႂ်းမၢၵ်ႇတႃမႂ်းဢွၵ်ႇသေၵမ်း၊’ ဝႃႈၼႆတၵ်းလၢတ်ႈတီႈပီႈၼွင်ႉမႂ်းလႆႈၸိူဝ်ႉၼင်ႇႁိုဝ်။-
ၵူၼ်းဢၼ်ၼႃႈသိုဝ်ႈၸႂ်ၵူတ်ႉၼႆႉ႟၊ဢဝ်သဵၼ်ႈမႆႉဢၼ်မီးၵႃႈၼႂ်းမၢၵ်ႇတႃမႂ်းဢွၵ်ႇဢွၼ်တၢင်းတႃႉ။ ဝၢႆးၼၼ်ႉၸင်ႇမၢၵ်ႇတႃမႂ်းတၵ်းႁၼ်လႅင်းလီလီလႄႈတေၸၢင်ႈဢဝ်ဢွၵ်ႇမုၼ်ႈၽွင်ဢၼ်မီးၼႂ်းမၢၵ်ႇတႃပီႈၼွင်ႉမႂ်းၼၼ်ႉပႅတ်ႈလႆႈဢေႃႈ။
“ယႃႇပေဢဝ်ၶိူင်ႈပိူင်ဢၼ်မူတ်းၸၢင်ႇပၼ်တီႈမႃလႄႈယႃႇပေဢဝ်သႅင်ပူးလႄးရတၼႃႇတမ်းဝၢင်းပၼ်ၵႃႈတီႈၽၢႆႇၼႃႈမူ၊ၶဝ်တၵ်းယဵပ်ႇပႅတ်ႈလႄႈသမ်ႉတၵ်းဝၢႆႇၶိုၼ်းမႃးၶူပ်းမႂ်းဢေႃႈ။
“ယွၼ်းတႃႉ။ သူတၵ်းလႆႈဢေႃႈ။ ႁႃတႃႉ။ သူတၵ်းထူပ်းႁၼ်ဢေႃႈ။ တွႆႇတႃႉ။ ၽၵ်းတူတၵ်းၽုၺ်ႇပၼ်ဢေႃႈ။-
ၵူႈၵေႃႉဢၼ်ယွၼ်းၼၼ်ႉလႆႈဢေႃႈ။ ၵေႃႉဢၼ်ႁႃၵေႃႈထူပ်းဢေႃႈ။ ၵေႃႉဢၼ်တွႆႇၽၵ်းတူၵေႃႈၽုၺ်ႇပၼ်ဢေႃႈ။-
ၼႂ်းသူၼႆႉ၊မီးၽူႈလႂ်မိူဝ်ႈဢၼ်လုၵ်ႈလၢင်းသူယွၼ်းၶဝ်ႈမုၼ်းၼၼ်ႉသမ်ႉဢဝ်မၢၵ်ႇႁိၼ်ပၼ်တီႈၶဝ်လႄႈ၊-
မိူဝ်ႈဢၼ်လုၵ်ႈလၢင်းသူယွၼ်းပႃၸိုင်၊သမ်ႉတၵ်းဢဝ်ငူးပၼ်တီႈၶဝ်ၼၼ်ႉၸွင်ႇမီးႁိုဝ်း။-
သင်ဝႃႈ၊ၵူၼ်းဢၼ်ႁၢႆႉမိူၵ်ႈတၢၼ်ႇသူၼႆႉတေႃႈယင်းၸၢင်ႈမေႃဢဝ်ဢၼ်လီဢၼ်ငၢမ်းပၼ်တီႈလုၵ်ႈလၢင်းသူယူႇၸိုင်၊ပေႃႈၸဝ်ႈသူဢၼ်မီးၵႃႈၼိူဝ်မိူင်းၵၢင်ႁၢဝ်ၼၼ်ႉယဵင်ႈၶႅၼ်းတၵ်းပၼ်ၶိူင်ႈပိူင်ဢၼ်လီဢၼ်ငၢမ်းတီႈၶဝ်ၸိူဝ်းဢၼ်သူးတွင်းလဝ်ႈယွၼ်းတီႈမၼ်းၸဝ်ႈၼၼ်ႉဢေႃႈ။
“ၸိူဝ်ႉၼင်ႇဢၼ်သူၶႂ်ႈႁႂ်ႈပိူၼ်ႈႁဵတ်းတီႈသူၼၼ်ႉ၊သူၵေႃႈႁဵတ်းတီႈပိူၼ်ႈၸိူဝ်ႉၼင်ႇၼၼ်တႃႉ။ ဢၼ်ၼႆႉၸမ်ႉ၊ပဵၼ်ငဝ်ႈၵျၢမ်းပိင်းၺၢပ်ႈတြႃး၊ဢိၵ်ႇတင်းၵျၢမ်းဢၼႃႇၵတ်ႉတိဢေႃႈ။
“ၶဝ်ႈၽၵ်းတူႁူးၵႅပ်ႈၼၼ်ႉတႃႉ။ လွင်ႈမၼ်းၸမ်ႉ၊တၢင်းဢၼ်ႁွတ်ႈၽႅဝ်တီႈဢၼ်လုလႅဝ်ၼၼ်ႉမီးၽၵ်းတူဢၼ်ႁူးၵႂၢင်ႈသေလႄႈသဵၼ်ႈတၢင်းမၼ်းပႆငၢႆႈၼၼ်ႉၵူၼ်းၶဝ်ႈၸွမ်းပႆၸွမ်းၼၼ်ႉၼမ်ၵိုၼ်းၼႃႇဢေႃႈ။-
ၽၵ်းတူဢိၵ်ႇတင်းသဵၼ်ႈတၢင်းဢၼ်ၵႂႃႇထိုင်တၢင်းဢၼ်ဢသၢၵ်ႈလိပ်းၼၼ်ႉမီးႁူးဢၼ်ၵႅပ်ႈၼႃႇလႄႈၶဝ်ၸိူဝ်းဢၼ်ႁႃၺႃးၽၵ်းတူၼၼ်ႉမီးၵေႇၼႃႇဢေႃႈ။
“တီႈမိၵ်ႉသႃႇပရေႃးၽႅတ်ႈ ၼၼ်ႉႁဵတ်းသတိလႄႈဝႄႈပႅတ်ႈတႃႉ။ ၼႂ်းၸႂ်ၶဝ်ပဵၼ်မႃၼႆးဢၼ်လိူင်းၵျၢမ်းၼႃႇဢေႃႈ။ ၵူၺ်းၵႃႈ၊ၶဝ်ၸၢင်ႈႁဵတ်းႁၢင်ႈပဵၼ်တူဝ်သူဝ်းသေလႄႈမႃးတီႈသူဢေႃႈ။-
ဢၼ်တၵ်းႁုၸၵ်းၶဝ်ၸမ်ႉ၊ၸိူဝ်ႉၼင်ႇဢၼ်တူၼ်ႈၶိူဝ်းၼၢမ်ဢမ်ႇၸၢင်ႈမၢၵ်ႇမၢၵ်ႇၸပိတ်ႉလႆႈ၊တူၼ်ႈၼၢမ်ဢမ်ႇၸၢင်ႈမၢၵ်ႇမၢၵ်ႇလိူဝ်ႇလႆႈၼၼ်ႉတူၺ်းတၢင်းႁဵတ်းၶဝ်လႄႈႁုသၽေႃးၶဝ်ၼၼ်ႉလႆႈယူႇဢေႃႈ။-
တူၺ်းမၢၵ်ႇလႄႈႁုသၽေႃးတူၼ်ႈမၼ်းလႆႈဢေႃႈ။ တူၼ်ႈဢၼ်လီၼၼ်ႉၸၢင်ႈမၢၵ်ႇမၢၵ်ႇဢၼ်လီဢေႃႈ။ တူၼ်ႈဢၼ်ဢမ်ႇလီၼၼ်ႉၸၢင်ႈမၢၵ်ႇမၢၵ်ႇဢၼ်ဢမ်ႇလီဢေႃႈ။-
ၼႄးၼိုင်ႈၸမ်ႉ၊တူၼ်ႈဢၼ်လီဢမ်ႇၸၢင်ႈမၢၵ်ႇမၢၵ်ႇဢၼ်ဢမ်ႇလီ။ တူၼ်ႈဢၼ်ဢမ်ႇလီၵေႃႈဢမ်ႇၸၢင်ႈမၢၵ်ႇမၢၵ်ႇဢၼ်လီလႆႈ။-
တူၼ်ႈဢၼ်မၢၵ်ႇမၢၵ်ႇဢၼ်ဢမ်ႇလီၸိူဝ်းၼၼ်ႉၸိုင်၊ၸၢင်ႈလႆႈၶၢမ်ႇတၢင်းဢၼ်ပွမ်ႈပႅတ်ႈလႄႈထိမ်ႈသႂ်ႇၵႃႈၼႂ်းၽႆးၵူၺ်းဢေႃႈ။-
ပိူဝ်ႈဢၼ်ပဵၼ်ၸိူဝ်ႉၼင်ႇၼႆလႄႈသူတၵ်းႁုၸၵ်းမိၵ်ႉသႃႇပရေႃးၽႅတ်ႈၸိူဝ်းၼၼ်ႉၼႂ်းတၢင်းဢၼ်ၶဝ်ႁဵတ်းၼၼ်ႉဢေႃႈ။
“ၶဝ်ၸိူဝ်းဢၼ်ႁွင်ႉၵဝ်လႄႈဝႃႈ၊ ‘ၸဝ်ႈႁဝ်း၊ၸဝ်ႈႁဝ်း၊’ ဝႃႈၼင်ႇၼႆၼၼ်ႉတေလႆႈၶဝ်ႈမိူင်းၵၢင်ႁၢဝ်ၸဝ်ႈၵူႈၵေႃႉဢမ်ႇၸႂ်ႈ။ ၵေႃႉဢၼ်ၵမ်ၵျၢင်ႉၸွမ်းၼင်ႇဢလူဝ်ႇပေႃႈၸဝ်ႈၵဝ်ဢၼ်မီးယူႇၵႃႈၼိူဝ်မိူင်းၵၢင်ႁၢဝ်ၼၼ်ႉၵူၺ်းတၵ်းလႆႈၶဝ်ႈဢေႃႈ။-
ၼႂ်းဝၼ်းၼၼ်ႉၵူၼ်းၼမ်ၼႃႇတၵ်းဢွၼ်ၵၼ်လဝ်ႈလၢတ်ႈတီႈၵဝ်လႄႈဝႃႈ၊ ‘ၸဝ်ႈႁဝ်း၊ၸဝ်ႈႁဝ်း၊ႁဝ်းၶႃႈၼႆႉႁေႃးမွၵ်ႇလၢတ်ႈတြႃးၸဝ်ႈႁဝ်းၼႂ်းၼႃႇမႃႉၸိုဝ်ႈသဵင်ၸဝ်ႈႁဝ်းယဝ်ႉၶႃႈဢေႃႈ။ ႁဝ်းၶႃႈၼႆႉဢိင်ပိုင်ႈၸိုဝ်ႈသဵင်ၸဝ်ႈႁဝ်းသေလႄႈႁေႃႈၽီႁၢႆႉဢွၵ်ႇ၊ဢိၵ်ႇတင်းၼႄပျႃးၼိမိၵ်ႈလၢၵ်ႈၶၼႃႇဢၼ်လၢၵ်ႇဢၼ်လၢႆးၼမ်ၼႃႇယဝ်ႉၶႃႈဢေႃႈ၊’ ဝႃႈၼင်ႇၼႆဢေႃႈ။-
ၵဝ်တၵ်းၶိုၼ်းလၢတ်ႈၵႃႈတီႈၶဝ်လႅင်းလႅင်းလႄႈဝႃႈ၊ ‘ၵဝ်ဢမ်ႇတွၼ်ႉႁုၸၵ်းသူ။ ဢွၵ်ႇသေၵႃႈတီႈၵဝ်ၵႂႃႇတႃႉ။ သူၸိူဝ်းဢၼ်ႁၢႆႉမိူၵ်ႈၶဝ်႟၊’ ဝႃႈၼင်ႇၼႆဢေႃႈ။
“ၵွပ်ႈလွင်ႈတၢင်းၼႆႉလႄႈၽူႈလႂ်သေဢမ်ႇဝႃႈ၊ၵေႃႉဢၼ်ငိၼ်းၵႂၢမ်းၵဝ်သေလႄႈပႂ်ႉၵမ်ပႂ်ႉၸွမ်းတြႃးၵဝ်ၸိူဝ်းၼၼ်ႉတၵ်းမိူၼ်ၵူၼ်းဢၼ်မီးပိင်ႇၺႃႇသတိသေလႄႈႁဵတ်းႁိူၼ်းၵႃႈၼိူဝ်မၢၵ်ႇႁိၼ်လူင်ၼၼ်ႉဢေႃႈ။-
ပိၵ်ႉသမ်ႉၽူၼ်တူၵ်း၊လူမ်းထူဝ်းလႄႈၼမ်ႉၼွင်းမႃးထိပ်ႇၽင်ႈသေၵေႃႈပိူဝ်ႈဢၼ်တႄႇတင်ႈယူႇၵႃႈၼိူဝ်မၢၵ်ႇႁိၼ်ဝႆႉၼၼ်ႉလႄႈတေဢမ်ႇလူမ်ႉဢမ်ႇပင်းလႆႈဢေႃႈ။
“ၵူၺ်းၵႃႈ၊ၵေႃႉဢၼ်ငိၼ်းၵႂၢမ်းၵဝ်သေလႄႈဢမ်ႇပႂ်ႉဢမ်ႇၸွမ်းတြႃးၵဝ်ၸိူဝ်းၼႆႉၼၼ်ႉၸမ်ႉ၊တၵ်းမိူၼ်ၵူၼ်းငိူဝ်ႈဢၼ်ႁဵတ်းႁိူၼ်းၵႃႈၼိူဝ်သၢႆးၼၼ်ႉဢေႃႈ။-
မိူဝ်ႈဢၼ်ၽူၼ်တူၵ်း၊လူမ်းထူဝ်းလႄႈၼမ်ႉၼွင်းမႃးထိပ်ႇၽင်ႈၼၼ်ႉ၊သၢႆးၶူင်လႄႈႁိူၼ်းၼၼ်ႉလူမ်ႉပင်းၵႂႃႇဢေႃႈ။ တၢင်းဢၼ်လူမ်ႉပင်းၼၼ်ႉယႂ်ႇၼႃႇဢေႃႈ၊” ဝႃႈၼင်ႇၼႆ ၸဝ်ႈယေႇသု၊ ႁေႃးလၢတ်ႈဢေႃႈ။
မိူဝ်ႈဢၼ် ၸဝ်ႈယေႇသု၊ ႁေႃးလၢတ်ႈတြႃးတေႇသၼႃႇၸဝ်ႈသုတ်းၵႂႃႇယဝ်ႉၼၼ်ႉမူႇၵူၼ်းတင်းလၢႆဢွၼ်ၵၼ်ဢၢမ်းတၢင်းဢၼ်မၼ်းၸဝ်ႈႁေႃးလၢတ်ႈသင်ႇသွၼ်ၸိူဝ်းၼၼ်ႉၼႃႇလူင်လၢင်ဢေႃႈ။-
ၵွပ်ႈပိူဝ်ႈတၢင်းဢၼ်မၼ်းၸဝ်ႈႁေႃးလၢတ်ႈၼၼ်ႉပႃးဢႃႇၼႃႇတၼ်းၶူဝ်းလႄႈပႅၵ်ႇပိူင်ႈၵၼ်တင်းသြႃႇမေႃၵျၢမ်းထမ်ႇမႃႉတင်းလၢႆဢေႃႈ။
မိူဝ်ႈဢၼ် ၸဝ်ႈယေႇသု၊ လူင်းလွႆမႃးၼၼ်ႉၵူၼ်းပဵၼ်မူႇပဵၼ်ၽုင်ၼမ်ၼႃႇၸွမ်းလင်မၼ်းၸဝ်ႈယူႇဢေႃႈ။-
မိူဝ်ႈၼၼ်ႉၵူၼ်းတုတ်ႈ ၵေႃႉၼိုင်ႈမႃးၸူးမၼ်းၸဝ်ႈလႄႈၶုပ်ႉမူပ်ႇၽၢႆႇၼႃႈမၼ်းၸဝ်ႈလႄႈလဝ်ႈလၢတ်ႈဝႃႈ၊ “ပေႃးၸဝ်ႈႁဝ်းမီးဢလူဝ်ႇၸိုင်၊ႁႂ်ႈၵဝ်ၶႃႈမူတ်းသႂ်မႃးလႆႈယူႇၶႃႈဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၵေႃႈယိုၼ်းမိုဝ်းသေတိူဝ်ႉသႂ်ႇၵေႃႉၼၼ်ႉလႄႈလၢတ်ႈဝႃႈ၊ “ၵဝ်မီးဢလူဝ်ႇဢေႃႈ။ ႁႂ်ႈမူတ်းသႂ်တႃႉ၊” ဝႃႈၼႆလႄႈယေႃးၵႃႇတုတ်ႈမၼ်းမူတ်းသႂ်ၵႂႃႇၵမ်းလဵဝ်ဢေႃႈ။-
မၼ်းၸဝ်ႈသမ်ႉလၢတ်ႈတီႈမၼ်းထႅင်ႈလႄႈဝႃႈ၊ “ထွမ်ႇလူး။ ယႃႇပေမွၵ်ႇလၢတ်ႈပိူၼ်ႈလူးၵွၼ်ႇ။ ၵႂႃႇၼႄပျႃးတူဝ်မႂ်းတီႈယဵၸ်ႈပရေႃးႁဵၵ်ႈ ၵမ်းလဵဝ်ပုၼ်ႈလွင်ႈၼင်ႇႁိုဝ်တၵ်းႁဵတ်းတၢင်းလူႇဢၼ်ၸွမ်းၼင်ႇတြႃးပိင်းၺၢပ်ႈ မူဝ်းသေႇ၊ မီးဝႆႉၼၼ်ႉတႃႉ။ ပေႃးမႂ်းႁဵတ်းၸိူဝ်ႉၼင်ႇၼၼ်ၸင်ႇတေပဵၼ်သၢၵ်ႈသေႇတၢင်းဢၼ်မႂ်းမူတ်းသႂ်ယဝ်ႉၼၼ်ႉဢေႃႈ၊” ဝႃႈၼင်ႇၼႆဢေႃႈ။
ယၢမ်းမိူဝ်ႈဢၼ် ၸဝ်ႈယေႇသု၊ ၶဝ်ႈဝဵင်း ၵပိူဝ်ႇၼေႇဢုမ်ႇ၊ ၵႂႃႇၼၼ်ႉၶုၼ်သိုၵ်း ရူဝ်းမႃႉ၊ ၶဝ်ၵေႃႉၼိုင်ႈမႃးႁပ်ႉႁူဝ်တၢင်းမၼ်းၸဝ်ႈႁႂ်ႈလႆႈယွၼ်းတၢင်းဢၼ်ၸွႆႈထႅမ်တီႈမၼ်းၸဝ်ႈလႄႈလဝ်ႈလၢတ်ႈဝႃႈ၊-
“ၸဝ်ႈႁဝ်း။ ၶႃႈၵူၼ်းၸႂ်ႉၵဝ်ၶႃႈၵေႃႉၼိုင်ႈပဵၼ်တၢႆၽၢၵ်ႇလႄႈၼွၼ်းယူႇလႆႈၶၢမ်ႇတုၵ်ႉၶႃႉၼႃႇၶႃႈဢေႃႈ၊” ဝႃႈၼင်ႇၼႆလႄႈ။
မၼ်းၸဝ်ႈၵေႃႈလၢတ်ႈလႄႈဝႃႈ၊ “ၵဝ်တၵ်းၸွမ်းၵႂႃႇႁဵတ်းႁႂ်ႈယေႃးၵႃႇမၼ်းၸိုၼ်ႈႁၢႆဢေႃႈ၊” ဝႃႈၼင်ႇၼႆဢေႃႈ။
ၶုၼ်သိုၵ်းၼၼ်ႉၶိုၼ်းလဝ်ႈလၢတ်ႈလႄႈဝႃႈ၊ “ဢူဝ်း။ ဢမ်ႇၸႂ်ႈတီႈၶႃႈ။ ၵဝ်ၶႃႈဢမ်ႇၵိုင်ႇဢမ်ႇတၢၼ်ႇတၢင်းဢၼ်ၸဝ်ႈႁဝ်းတေၶဝ်ႈမႃးၵႃႈၼႂ်းႁူမ်ႈၽူၺ်းႁိူၼ်းၵဝ်ၶႃႈဢေႃႈ။ ပေႃးၸဝ်ႈႁဝ်းပူင်ဢမိင်ႉၶေႃႈၼိုင်ႈၵူၺ်းၵေႃႈယေႃးၵႃႇၶႃႈၵူၼ်းၸႂ်ႉၵဝ်ၶႃႈတၵ်းၸိုၼ်ႈႁၢႆၵႂႃႇၵမ်းလဵဝ်ၶႃႈဢေႃႈ။-
ၵဝ်ၶႃႈၼႆႉပဵၼ်ၵူၼ်းယူႇၵႃႈတႂ်ႈဢႃႇၼႃႇၶုၼ်လူင်ဢေႃႈ။ ၼႂ်းဝႃႈၼၼ်သေၵေႃႈလုၵ်ႈသိုၵ်းၼမ်ၼႃႇမီးၵႃႈတႂ်ႈၵဝ်ၶႃႈလႄႈပေႃးပၼ်ဢမိင်ႉတီႈၵေႃႉၼိုင်ႈလႄႈဝႃႈ၊ ‘ၵႂႃႇတႃႉ၊’ ဝႃႈၼႆၸိုင်၊ၵေႃႉၼၼ်ႉၵႂႃႇဢေႃႈ။ သမ်ႉလၢတ်ႈတီႈၵေႃႉၼိုင်ႈလႄႈဝႃႈ၊ ‘မႃးတႃႉ၊’ ဝႃႈၼႆၸိုင်၊ၵေႃႉၼၼ်ႉၵေႃႈမႃးဢေႃႈ။ တီႈၵူၼ်းၸႂ်ႉၵဝ်ၶႃႈၵေႃႈပေႃးပၼ်ဢမိင်ႉဝႃႈ၊ ‘ႁဵတ်းဢၼ်ၼႆႉတႃႉ၊’ ဝႃႈၼႆၸိုင်၊မၼ်းႁဵတ်းၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ် ၸဝ်ႈယေႇသု၊ ငိၼ်းၵႂၢမ်းၼၼ်ႉၸိုင်၊ဢၢမ်းတၢင်းယုမ်ႇမၢတ်ႈမၼ်းၼၼ်ႉလႄႈလၢတ်ႈတီႈၶဝ်ၸိူဝ်းဢၼ်ၵႂႃႇၸွမ်းမၼ်းၸဝ်ႈၼၼ်ႉလႄႈဝႃႈ၊ “ၵဝ်ဝႃႈတီႈသူၸမ်ႉ၊တၢင်းယုမ်ႇမၢတ်ႈထၼ်ႇၼႆႉၸိုင်၊ၵႃႈၼႂ်းၵူၼ်းမဵဝ်း ဢိသရေး၊ ၼႆႉၵဝ်ဢမ်ႇပႆႇတွၼ်ႉထူပ်းသေပွၵ်ႈ။-
ၵဝ်သမ်ႉဝႃႈထႅင်ႈၸမ်ႉ၊ၵူၼ်းၼမ်ၼႃႇတၵ်းလုၵ်ႉသေတၢင်းဢွၵ်ႇတၢင်းတူၵ်းမႃးလႄႈဢိင်ယူႇလူၺ်ႈၵၼ်တင်း ဢႃႇပြႃႇႁၢမ်ႇ၊ဢိၸၢၵ်ႈ၊ယႃႇၵုပ်ႈ၊ ၶဝ်ၵႃႈၼႂ်းပၢင်ပွႆးမိူင်းၵၢင်ႁၢဝ်ၸဝ်ႈၼၼ်ႉဢေႃႈ။-
ၵူၺ်းၵႃႈ၊ၵူၼ်းမိူင်းၵၢင်ႁၢဝ်ၸဝ်ႈတင်းလၢႆ၊သမ်ႉတေလႆႈၶၢမ်ႇတၢင်းဢၼ်ႁေႃႈဢွၵ်ႇၸူးတီႈဢၼ်လပ်းသိင်ႇလႄႈလႆႈႁႆႈလႆႈႁွင်ႉ၊တီႈဢၼ်ၵတ်းၶဵဝ်ႈၵတ်းၽၼ်းၼၼ်ႉဢေႃႈ၊” ဝႃႈၼင်ႇၼႆယဝ်ႉၸင်ႇ၊-
သမ်ႉလၢတ်ႈတီႈၶုၼ်သိုၵ်းၼၼ်ႉလႄႈဝႃႈ၊ “မိူဝ်းၵႂႃႇတႃႉ။ တၢင်းယုမ်ႇမၢတ်ႈမႂ်းႁႂ်ႈဢလူဝ်ႇမႂ်းပျေႉၸုမ်ႇယဝ်ႉ၊” ဝႃႈၼင်ႇၼႆလႄႈ၊ ယေႃးၵႃႇၶႃႈၵူၼ်းၸႂ်ႉၶုၼ်သိုၵ်း ရူဝ်းမႃႉ၊ ၼၼ်ႉၵေႃႈၸိုၼ်ႈႁၢႆၵႂႃႇၼႂ်းၶိင်ႇၼၼ်ႉၵမ်းလဵဝ်ဢေႃႈ။
လိုၼ်းၼၼ်ႉ၊ ၸဝ်ႈယေႇသု၊ ၵႂႃႇၶဝ်ႈၵႃႈၼႂ်းႁိူၼ်း ပေႇတရု၊ လႄႈလႆႈထူပ်းႁၼ်မႄႈဢွၵ်ႇၼၢႆး ပေႇတရု၊ ၼၢဝ်လႄႈၼွၼ်းယူႇဢေႃႈ။-
မၼ်းၸဝ်ႈယိပ်းၵမ်မိုဝ်းမႄႈယိင်းၼၼ်ႉလႄႈတၢင်းၼၢဝ်မၼ်းၸိုၼ်ႈႁၢႆၵႂႃႇၵမ်းလဵဝ်သေယဝ်ႉ၊လုၵ်ႉၶၢမ်ႇၶႅၵ်ႇတီႈမၼ်းၸဝ်ႈဢေႃႈ။
မိူဝ်ႈဢၼ်ထိုင်ၶိင်ႇႁူဝ်ၶမ်ႈၸိုင်၊ပိူၼ်ႈဢဝ်ၵူၼ်းဢၼ်ၽီၶဝ်ႈၽိူဝ်ႉၶဝ်ႈတင်းလၢႆမႃးၼမ်ၼႃႇလႄႈမၼ်းၸဝ်ႈဢဝ်တင်းၵႂၢမ်းၶေႃႈလဵဝ်ၵူၺ်းႁေႃႈၽီဢွၵ်ႇပႅတ်ႈဢေႃႈ။ ၵူၼ်းၶႆႈၵူၼ်းပဵၼ်ၼမ်ၼႃႇၵေႃႈမၼ်းၸဝ်ႈႁႂ်ႈၸိုၼ်ႈႁၢႆဢေႃႈ။-
ဢၼ်မၼ်းၸဝ်ႈႁဵတ်းၸိူဝ်ႉၼင်ႇၼႆၼႆႉ၊ၵႂၢမ်းပရေႃးၽႅတ်ႈ ဢိသႃႇယႃႉ၊ ႁေႃးဝႆႉဝႃႈ၊ “မၼ်းၸဝ်ႈဢဝ်တၢင်းၶႆႈတၢင်းပဵၼ်ႁဝ်းဢိၵ်ႇတင်းယေႃးၵႃႇႁဝ်းၵႃႈမီးၵႂႃႇယဝ်ႉ၊” ဢၼ်ဝႃႈၼၼ်ႉပျေႉၸုမ်ႇဢေႃႈ။
မိူဝ်ႈဢၼ် ၸဝ်ႈယေႇသု၊ ႁၼ်ၵူၼ်းၼမ်ၼႃႇလွမ်ႉႁွပ်ႈမၼ်းၸဝ်ႈယူႇၼၼ်ႉမၼ်းၸဝ်ႈသင်ႇလၢတ်ႈႁႂ်ႈတပႄးၸဝ်ႈတင်းလၢႆၶၢမ်ႈၵႂႃႇၽၢႆႇပုၼ်ႉၽင်ႇၼွင်ဢေႃႈ။-
ယၢမ်းမိူဝ်ႈၼၼ်ႉ၊သြႃႇမေႃၵျၢမ်းထမ်ႇမႃႉၵေႃႉၼိုင်ႈမႃးၸူးတီႈမၼ်းၸဝ်ႈလႄႈလၢတ်ႈဝႃႈ၊ “သြႃႇၸဝ်ႈ။ ၵဝ်ၶႃႈတၵ်းၸွမ်းၸဝ်ႈႁဝ်းၵႂႃႇၵႃႈတီႈၵႃႈဢၼ်ၸဝ်ႈႁဝ်းၵႂႃႇၵူႈတီႈၵူႈလႅၼ်ၼၼ်ႉၶႃႈဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၵေႃႈၶိုၼ်းလၢတ်ႈတီႈမၼ်းၼၼ်ႉလႄႈဝႃႈ၊ “မႃလိၼ်တင်းလၢႆယင်းမီးႁူး။ ၼူၵ်ႉတင်းလၢႆယင်းမီးႁင်းပုၼ်ႈၶဝ်တၵ်းယူႇတၵ်းသွၼ်ႈဢေႃႈ။ လုၵ်ႈၵူၼ်း၊ ၸမ်ႉ၊ယင်းဢမ်ႇမီးတီႈတၵ်းဝၢင်းႁူဝ်၊” ဝႃႈၼင်ႇၼႆဢေႃႈ။
ၵူၼ်းတၢင်ႇၵေႃႉဢၼ်ပဵၼ်တပႄးၸဝ်ႈၼၼ်ႉၵေႃႉၼိုင်ႈသမ်ႉဝႃႈ၊ “ၸဝ်ႈႁဝ်းႁႂ်ႈၵဝ်ၶႃႈလႆႈၵႂႃႇသၢင်းၵျူဝ်ႇပေႃႈၵဝ်ၶႃႈဢွၼ်တၢင်းလူးၵွၼ်ႇၶႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၶိုၼ်းလၢတ်ႈလႄႈဝႃႈ၊ “ၸွမ်းပႃႈလင်ၵဝ်တႃႉ။ ႁႂ်ႈၵူၼ်းတၢႆတင်းလၢႆသၢင်းၵျူဝ်ႇၵူၼ်းတၢႆၶဝ်တႃႉ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶဝ်ႈၵႃႈၼႂ်းႁိူဝ်းၵႂႃႇလႄႈတပႄးၸဝ်ႈတင်းလၢႆၵေႃႈၶဝ်ႈၸွမ်းဢေႃႈ။-
ယၢမ်းၼၼ်ႉၵႃႈၼႂ်းၼွင်ၼၼ်ႉၽူၼ်လူင်လူမ်းလူင်ထူဝ်းပတ်ႉမႃးႁႅင်းယႂ်ႇၼႃႇထၢၼ်ႈပေႃးလႅင်းၼမ်ႉပိူပ်ႈၼမ်ႉလုၵ်ႉၶိုၼ်ႈထိပ်ႇၽင်ႈၶဝ်ႈႁိူဝ်းမႃးဢေႃႈ။ ၽွင်းယၢမ်းၼၼ်ႉ ၸဝ်ႈယေႇသု၊ ၼွၼ်းလပ်းယူႇဢေႃႈ။-
တပႄးၸဝ်ႈၸိူဝ်းၼၼ်ႉဢွၼ်ၵၼ်ပူၵ်းမၼ်းၸဝ်ႈလႄႈတွင်းပၢၼ်ႇဝႃႈ၊ “ၸဝ်ႈႁဝ်း။ လုၵ်ႉလႄႈၵႄႇသႄႇဢဝ်ႁဝ်းၶႃႈသေၵမ်းၶႃႈ။ ႁဝ်းၶႃႈတေႁွတ်ႈတၢင်းလုတၢင်းလႅဝ်ၶႃႈယဝ်ႉ၊” ဝႃႈၼင်ႇၼႆဢေႃႈ။
မၼ်းၸဝ်ႈၵေႃႈလၢတ်ႈလႄႈဝႃႈ၊ “သူၸိူဝ်းဢၼ်တၢင်းယုမ်ႇမၢတ်ႈၵေႇၼႆႉ႟၊ႁဵတ်းသင်လႄႈသူၵူဝ်ထၼ်ႇၼႆႉ၊” ဝႃႈၼင်ႇၼႆယဝ်ႉၸင်ႇ၊လုၵ်ႉလႄႈပူင်ဢမိင်ႉတီႈၽူၼ်လူမ်းတင်းလႅင်းၼမ်ႉလႄႈၽိဝ်ၼမ်ႉၵေႃႈထၢတ်ႇယဵၼ်ၼိမ်ၵႂႃႇၵမ်းလဵဝ်ဢေႃႈ။
ၶဝ်ၵူႈၵေႃႉဢၢမ်းလွင်ႈတၢင်းဢၼ်ပဵၼ်မႃးၼၼ်ႉလၢတ်ႈလႄႈဝႃႈ၊ “ၵေႃႉၼႆႉပဵၼ်ၵူၼ်းၸိူဝ်ႉၼင်ႇႁိုဝ်ၼေႃ၊လူမ်းတင်းလႅင်းၼမ်ႉလႆႈထွမ်ႇဢဝ်ဢမိင်ႉမၼ်းတႄႉယဝ်ႉ။” ဝႃႈၼင်ႇၼႆဢေႃႈ။
မိူဝ်ႈဢၼ် ၸဝ်ႈယေႇသု၊ ႁွတ်ႈထိုင်ဢိူင်ႇ ၵႃႇတရႃႉ၊ ၽၢႆႇပုၼ်ႉၽင်ႇၼွင်ယဝ်ႉၼၼ်ႉ၊ မီးၵူၼ်းသွင်ၵေႃႉဢၼ်ၽီႁၢႆႉၶဝ်ႈလႄႈႁၢႆႉၵျၢမ်းၼႃႇထၢၼ်ႈပေႃးၽူႈလႂ်ဢမ်ႇႁတ်းပႆတၢင်းသဵၼ်ႈၼၼ်ႉ၊ ၶဝ်သွင်ၵေႃႉဢွၵ်ႇသေၵႃႈတီႈပႃႇႁဵဝ်ႈမႃးႁူပ်ႉမၼ်းၸဝ်ႈလႄႈ၊-
ႁွင်ႉပၢဝ်ႇတီႈ ၸဝ်ႈယေႇသု၊ လႄႈလၢတ်ႈဝႃႈ၊ “ဢူဝ်း ယေႇသု၊ လုၵ်ႈၽြႃးပဵၼ်ၸဝ်ႈၼႆႉ႟၊ၸဝ်ႈႁဝ်းလူဝ်ႇၵႃႈသင်တင်းႁဝ်းၶႃႈ။ ၸဝ်ႈႁဝ်းမႃးပၼ်တုၵ်ႉၶႃႉဝူၺ်ႇတၼႃႇတီႈႁဝ်းၶႃႈၸူဝ်ႈဢၼ်ဢၶိင်ႇမၼ်းယင်းဢမ်ႇပႆႇႁွတ်ႈထိုင်ၼၼ်ႉၶႃႈႁိုဝ်း၊” ဝႃႈၼင်ႇၼႆဢေႃႈ။
တီႈဢၼ်ၵႆၵၼ်တင်းၶဝ်တၢၼ်ႇတၢၼ်ႇၼၼ်ႉမီးၽုင်မူၽုင်ၼိုင်ႈၵိၼ်ယူႇဢေႃႈ။-
ၽီႁၢႆႉၸိူဝ်းၼၼ်ႉတွင်းပၢၼ်ႇ ၸဝ်ႈယေႇသု၊ လႄႈဝႃႈ၊ “ပေႃးၸဝ်ႈႁဝ်းၶႃႈႁေႃႈႁဝ်းၶႃႈဢွၵ်ႇပႅတ်ႈၸိုင်၊ပၼ်ဢၶႂၢင်ႉႁႂ်ႈႁဝ်းၶႃႈလႆႈၵႂႃႇၶဝ်ႈၵႃႈတီႈၽုင်မူၼၼ်ႉသေၵမ်းၶႃႈ၊” ဝႃႈၼင်ႇၼႆလႄႈ။
မၼ်းၸဝ်ႈၵေႃႈလၢတ်ႈလႄႈဝႃႈ၊ “ၵႂႃႇတႃႉ၊” ဝႃႈၼင်ႇၼႆဢေႃႈ။ ၵမ်းၼၼ်ႉ ၽီႁၢႆႉၸိူဝ်းၼၼ်ႉဢွၵ်ႇသေၵူၼ်းသွင်ၵေႃႉၼၼ်ႉလႄႈ၊ၵႂႃႇၶဝ်ႈၵႃႈၼႂ်းၽုင်မူသေယဝ်ႉ၊မူတင်းၽုင်ၶုၼ်ႇလႅၼ်ႈလူင်းႁိုၵ်းၸၼ်းၸူးၵႃႈၼႂ်းၼမ်ႉၼွင်လႄႈၵႅၼ်ႉၼမ်ႉတၢႆဢေႃႈ။
ၵူၼ်းလဵင်ႉၽုင်မူၶဝ်ၸိူဝ်းၼၼ်ႉၶုၼ်ႇလႅၼ်ႈၶဝ်ႈၵႂႃႇၵႃႈၼႂ်းဝဵင်းလႄႈမွၵ်ႇလၢတ်ႈလွင်ႈတၢင်းၵူႈၸိူဝ်ႉၵူႈပိူင်ၸိူဝ်းၼၼ်ႉ၊ ဢိၵ်ႇတင်းလွင်ႈဢၼ်ပဵၼ်မႃးၵႃႈတီႈၵူၼ်းဢၼ်ၽီႁၢႆႉၶဝ်ႈၸိူဝ်းၼၼ်ႉဢေႃႈ။-
ႁဵတ်းၼၼ်လႄႈၵူၼ်းတင်းဝဵင်းဢွၼ်ၵၼ်ဢွၵ်ႇမႃးႁႂ်ႈလႆႈထူပ်းႁၼ် ၸဝ်ႈယေႇသု၊ ယဝ်ႉၸင်ႇ၊ ၶဝ်တွင်းပၢၼ်ႇလဝ်ႈလၢတ်ႈႁႂ်ႈမၼ်းၸဝ်ႈဢွၵ်ႇသေဢိူင်ႇၶဝ်ၵႂႃႇဢေႃႈ။
ၸဝ်ႈယေႇသု၊ ၵေႃႈၶီႇႁိူဝ်းသေလႄႈၶၢမ်ႈပွၵ်ႈၶိုၼ်းမိူဝ်းၵႂႃႇၵႃႈတီႈဝဵင်းတူဝ်ၸဝ်ႈၵဝ်ႇသေဢေႃႈ။-
မိူဝ်ႈၼၼ်ႉ၊ၵူၼ်းၵမ်ႈၽွင်ႈႁၢမ်ၵူၼ်းတၢႆၽၢၵ်ႇဢၼ်ၼွၼ်းယူႇၵႃႈၼိူဝ်သၢတ်ႇၼၼ်ႉၵေႃႉၼိုင်ႈမႃးသူင်ႇတီႈမၼ်းၸဝ်ႈဢေႃႈ။ မၼ်းၸဝ်ႈႁုႁၼ်တၢင်းယုမ်ႇမၢတ်ႈၶဝ်ယႂ်ႇထၢၼ်ႇႁိုဝ်ၼၼ်ႉလႄႈလၢတ်ႈတီႈၵူၼ်းတၢႆၽၢၵ်ႇၼၼ်ႉလႄႈဝႃႈ၊ “လုၵ်ႈၸၢႆးၵဝ်႟၊ဝႆႉၸႂ်ႁတ်းႁၢၼ်တႃႉ။ ဢပျတ်ႈမႂ်းၸိုင်၊လႆႈၶၢမ်ႇတၢင်းဢၼ်ပွႆႇလွတ်ႈယဝ်ႉ၊” ဝႃႈၼင်ႇၼႆဢေႃႈ။
ၵမ်းၼၼ်ႉ၊သြႃႇမေႃၵျၢမ်းထမ်ႇမႃႉၵမ်ႈၽွင်ႈလၢတ်ႈၼႂ်းၸႂ်ၶဝ်လႄႈဝႃႈ၊ “ၵေႃႉၼႆႉလၢတ်ႈၵႂၢမ်းလူလၢႆပူၼ်ႉလိူဝ်ၽြႃးပဵၼ်ၸဝ်ႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ႁုႁၼ်တၢင်းၵျၢမ်ႇတၢင်းပွင်ၼႂ်းႁူဝ်ၸႂ်ၶဝ်လႄႈလၢတ်ႈဝႃႈ၊ “ႁဵတ်းသင်လႄႈသူၶႆႈၸႂ်လွင်ႈဢၼ်ဢမ်ႇလီၼႂ်းႁူဝ်ၸႂ်သူ။-
ၵႂၢမ်းၶေႃႈလႂ်လၢတ်ႈငၢႆႈသေၶေႃႈလႂ်၊ ‘ဢပျတ်ႈမႂ်းၸိုင်၊ပွႆႇလွတ်ႈယဝ်ႉ၊’ ဝႃႈၼင်ႇၼႆၼၼ်ႉလၢတ်ႈငၢႆႈႁိုဝ်း။ ‘လုၵ်ႉလႄႈပႆတၢင်းၵႂႃႇတႃႉ၊’ ဝႃႈၼင်ႇၼႆၼၼ်ႉလၢတ်ႈငၢႆႈႁိုဝ်း။-
ပေႃးပဵၼ်ၸိူဝ်ႉၼင်ႇၼႆၸိုင်၊ၵဝ်တၵ်းၼႄပျႃးတီႈသူလွင်ႈဢၼ် လုၵ်ႈၵူၼ်း၊ မီးဢႃႇၼႃႇတၼ်းၶူဝ်းၼႂ်းလေႃးၵႃႉၼႆႉ၊ ပုၼ်ႈဢၼ်ပွႆႇလွတ်ႈဢပျတ်ႈလႆႈၼၼ်ႉဢေႃႈ၊” ဝႃႈၼင်ႇၼႆယဝ်ႉၸင်ႇ။
လၢတ်ႈတီႈၵူၼ်းတၢႆၽၢၵ်ႇၼၼ်ႉလႄႈဝႃႈ၊ “လုၵ်ႉတႃႉ။ ဢဝ်သၢတ်ႇတီႈၼွၼ်းမႂ်းလႄႈပွၵ်ႈမိူဝ်းႁိူၼ်းမႂ်းတႃႉ၊” ဝႃႈၼင်ႇၼႆဢေႃႈ။ ၵေႃႉၼၼ်ႉၵေႃႈလုၵ်ႉလႄႈမိူဝ်းၵႂႃႇသေဢေႃႈ။-
မိူဝ်ႈဢၼ်ၵူၼ်းတင်းလၢႆလႆႈႁၼ်ၼၼ်ႉၶဝ်ဢၢမ်းၼႃႇလႄႈဢွၼ်ၵၼ်ယွင်ႈယေႃးၽြႃးပဵၼ်ၸဝ်ႈဢၼ်ဢဝ်တၼ်းၶူဝ်းၸိူဝ်ႉၼင်ႇၼၼ်ဢၢပ်ႈပၼ်တီႈၵူၼ်းၼၼ်ႉဢေႃႈ။
ၸဝ်ႈယေႇသု၊ ဢွၵ်ႇသေတီႈၼၼ်ႈၵႂႃႇလႄႈမိူဝ်ႈဢၼ်ပႆၸွမ်းတၢင်းၵႂႃႇယူႇၼၼ်ႉထူပ်းႁၼ်ၵူၼ်းၵဵပ်းၶွၼ်ႇၵေႃႉၼိုင်ႈဢၼ်ႁွင်ႉႁဵၵ်ႈၸိုဝ်ႈ မတ်ႈထႄႇ၊ ဢၼ်ၼင်ႈယူႇၵႃႈၼႂ်းလုမ်းၵဵပ်းၶွၼ်ႇယူႇၼၼ်ႉဢေႃႈ။ မၼ်းၸဝ်ႈႁွင်ႉ မတ်ႈထႄႇ၊ လႄႈဝႃႈ၊ “မႃးၸွမ်းၵဝ်တႃႉ၊” ဝႃႈၼင်ႇၼႆလႄႈ။ မတ်ႈထႄႇ၊ လုၵ်ႉၸွမ်းမၼ်းၸဝ်ႈၵႂႃႇဢေႃႈ။
ၼႂ်းမိူဝ်ႈဢၼ် ၸဝ်ႈယေႇသု၊ ၼင်ႈၵိၼ်ၶဝ်ႈယူႇၵႃႈၼႂ်းႁိူၼ်းမၼ်းၼၼ်ႉၵူၼ်းၵဵပ်းၶွၼ်ႇလႂ်တင်းၵူၼ်းႁၢႆႉၼမ်ၼႃႇဢွၼ်ၵၼ်မႃးၵိၼ်လူၺ်ႈၵၼ်တင်းမၼ်းၸဝ်ႈ၊ဢိၵ်ႇတင်းတပႄးၸဝ်ႈတင်းလၢႆဢေႃႈ။-
ၵူၼ်းၵိူင်း ၽႃႇရိသႄး၊ ၶဝ်ႁၼ်လွင်ႈတၢင်းၼၼ်ႉလႄႈတွင်ႈထၢမ်တီႈတပႄးၸဝ်ႈတင်းလၢႆလႄႈဝႃႈ၊ “ႁဵတ်းသင်လႄႈသြႃႇၸဝ်ႈသူၼၼ်ႉၵိၼ်ၵုမ်ႇလူၺ်ႈၵၼ်တင်းၵူၼ်းၵဵပ်းၶွၼ်ႇလႂ်၊ဢိၵ်ႇတင်းၵူၼ်းႁၢႆႉၸိူဝ်းၼၼ်ႉၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ လႆႈငိၼ်းလႄႈၶိုၼ်းလၢတ်ႈလႄႈဝႃႈ၊ “ၵူၼ်းယူႇလီဢမ်ႇလူဝ်ႇသြႃႇမေႃယႃ။ ၵူၼ်းၶႆႈၵူၼ်းပဵၼ်ၵူၺ်းလူဝ်ႇသြႃႇမေႃယႃဢေႃႈ။-
ၵႂၢမ်းၵျၢမ်းလိၵ်ႈဢၼ်ဝႃႈ၊ ‘ၵဝ်ၵျိူၵ်ႈတၢင်းႁၵ်ႉၵရုၼႃႇလိူဝ်တွၼ်းၼႃႇသေတၢင်းလူႇတၢင်းတၢၼ်းဢေႃႈ၊’ ဝႃႈၼင်ႇၼႆၼၼ်ႉၶႂ်ႈဝႃႈဢီႈသင်ၸိုင်၊ၵႂႃႇသွၼ်ဢဝ်လူးၵွၼ်ႇတႃႉ။ ၵွပ်ႈသင်လႄႈဝႃႈၼႆၸမ်ႉ၊ၵဝ်မႃးႁႂ်ႈလႆႈႁွင်ႉဢဝ်ၵူၼ်းသိုဝ်ႈတေႃႇတင်းလၢႆဢမ်ႇၸႂ်ႈ။ မႃးပုၼ်ႈတႃႇႁႂ်ႈလႆႈႁွင်ႉဢဝ်ၵူၼ်းၸိူဝ်းဢၼ်မီးဢပျတ်ႈတင်းလၢႆၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊တပႄးသြႃႇယူဝ်းႁၢၼ်ႇၸိူဝ်းၼၼ်ႉမႃးတီႈ ၸဝ်ႈယေႇသု၊ လႄႈတွင်ႈထၢမ်လဝ်ႈလၢတ်ႈဝႃႈ၊ “ႁဝ်းၶႃႈတင်းၵူၼ်းၵိူင်း ၽႃႇရိသႄး၊ ၶဝ်ၸိုင်၊ဢွၼ်ၵၼ်ဢမ်ႇၵိၼ်တၢင်းၵိၼ်လႄႈၵမ်သိၼ်ယူႇၶိူဝ်းၶိူဝ်းယႂ်းယႂ်းၶႃႈဢေႃႈ။ ႁဵတ်းသင်လႄႈတပႄးၸဝ်ႈႁဝ်းၸိူဝ်းၼႆႉယင်းဢမ်ႇၵမ်သိၼ်ဢမ်ႇၵိၼ်တၢင်းၵိၼ်ၸိူဝ်ႉၼင်ႇႁိုဝ်ၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “သူၸွင်ႇတွၼ်ႉႁၼ်ၵူၼ်းဢၼ်ၶဝ်ႈပွႆးသွင်ႇမၢင်ႇၵလႃႇတင်းလၢႆမႆႈၸႂ်ၶီၸႂ်ပွင်ႉၶၢင်းယၢမ်းမိူဝ်ႈဢၼ်လုၵ်ႈၶူၺ်မႂ်ႇမီးယူႇလူၺ်ႈၵၼ်တင်းၶဝ်ယူႇၼၼ်ႉႁိုဝ်း။ ဢမ်ႇပဵၼ်ၸိူဝ်ႉၼင်ႇၼၼ်။ ၵူၺ်းၵႃႈ၊မိူဝ်ႈဢၼ်ၶိင်ႇၶႃႇမၼ်းႁွတ်ႈထိုင်မႃးလႄႈဢဝ်လုၵ်ႈၶူၺ်မႂ်ႇၽၢတ်ႇသေၶဝ်ၵႂႃႇၼၼ်ႉၶဝ်ၸင်ႇတၵ်းၵမ်သိၼ်ဢမ်ႇၵိၼ်တၢင်းၵိၼ်ဢေႃႈ။
“ၽူႈလႂ်ဢမ်ႇဢဝ်ၽႃႈၽႅၼ်ႇဢၼ်မႂ်ႇၽုင်ၵုပ်းၶူဝ်းၵဝ်ႇ။ ပေႃးၽုင်ၵုပ်းၸိုင်၊ၽႃႈၽႅၼ်ႇမႂ်ႇၼၼ်ႉတၵ်းႁုတ်ႉၸၼ်လႄႈႁဵတ်းႁႂ်ႈၶူဝ်းၵဝ်ႇၼၼ်ႉႁူးမၼ်းယဵင်ႈၶႅၼ်းတၵ်းယႂ်ႇၵႂၢင်ႈမႃးဢေႃႈ။-
မိူၼ်ၼင်ႇၼၼ်ၽူႈလႂ်ဢမ်ႇဢဝ်ၼမ်ႉမၢၵ်ႇၸပိတ်ႉဢၼ်မႂ်ႇသႂ်ႇၼႂ်းထူင်ၼင်ဢၼ်ၵဝ်ႇ။ ပေႃးသႂ်ႇၸိုင်၊ထူင်ၼင်ၼၼ်ႉတၵ်းတႅၵ်ႇလႄႈၼမ်ႉမၢၵ်ႇၸပိတ်ႉၼၼ်ႉတၵ်းႁူဝ်ႈတၵ်းလႆၵူၺ်းဢမ်ႇၵႃး၊ထူင်ၼင်ၼၼ်ႉတၵ်းလုပႅတ်ႈလၢႆလၢႆဢေႃႈ။ ပိူဝ်ႈၼႆလႄႈၼမ်ႉမၢၵ်ႇၸပိတ်ႉဢၼ်မႂ်ႇၸိုင်၊ၸၢင်ႈသႂ်ႇၼႂ်းထူင်ၼင်ဢၼ်မႂ်ႇဢေႃႈ။ ပေႃးသႂ်ႇၸိုင်၊တင်းသွင်မဵဝ်းၸင်ႇတၵ်းဢမ်ႇလုဢမ်ႇသုမ်းဢေႃႈ၊” ဝႃႈၼင်ႇၼႆဢေႃႈ။
ယၢမ်းမိူဝ်ႈဢၼ် ၸဝ်ႈယေႇသု၊ ယင်းႁေႃးလၢတ်ႈၸိူဝ်ႉၼင်ႇၼႆယူႇၼၼ်ႉၽွင်းမိူင်းၵူၼ်းမဵဝ်း ၵျူး၊ ၶဝ်ၵေႃႉၼိုင်ႈ၊မႃးၶုပ်ႉမူပ်ႇၵႃႈတီႈၽၢႆႇၼႃႈမၼ်းၸဝ်ႈလႄႈလဝ်ႈလၢတ်ႈဝႃႈ၊ “လုၵ်ႈယိင်းၵဝ်ၶႃႈတၢႆၵႂႃႇတေႃႈလဵဝ်ၼႆႉၵူၺ်းၶႃႈဢေႃႈ။ ၼႂ်းဝႃႈၼၼ်သေၵေႃႈ၊ၶႅၼ်းတေႃႈမႃးလႄႈဢဝ်မိုဝ်းတၢင်ႇပၼ်ၵႃႈၼိူဝ်မၼ်းသေၵမ်းၶႃႈ။ ဢသၢၵ်ႈမၼ်းတၵ်းၶိုၼ်းလိပ်းမႃးၶႃႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ လုၵ်ႉလႄႈၸွမ်းၵေႃႉၼၼ်ႉၵႂႃႇဢေႃႈ။ တပႄးၸဝ်ႈၵေႃႈၵႂႃႇၸွမ်းဢေႃႈ။
မိူဝ်ႈဢၼ် ၸဝ်ႈယေႇသု၊ ဢွၵ်ႇႁိူၼ်းမႃးၼၼ်ႉ၊ မႄႈယိင်းၵေႃႉၼိုင်ႈဢၼ်ၸပ်းတၢင်းပဵၼ်လိူတ်ႈတူၵ်းဢမ်ႇထၢတ်ႇလႆႈသိပ်းသွင်ပီယဝ်ႉၼၼ်ႉၵႂႃႇၽၢႆႇတၢင်းလင်မၼ်းၸဝ်ႈလႄႈယိပ်းတိူဝ်ႉပိၵ်ႇသိူဝ်ႈမၼ်းၸဝ်ႈဢေႃႈ။-
မၼ်းထၢင်ႇၵႃႈၼႂ်းၸႂ်ဝႃႈ၊ “ပေႃးၵဝ်လႆႈတိူဝ်ႉလႆႈယိပ်းသိူဝ်ႈၶူဝ်းမၼ်းၸဝ်ႈၵူၺ်းၵေႃႈၵဝ်တၵ်းၸိုၼ်ႈႁၢႆဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈဝၢႆႇတူၺ်းလႄႈႁၼ်မၼ်းသေယဝ်ႉလၢတ်ႈဝႃႈ၊ “လုၵ်ႈယိင်းၵဝ်႟၊ဝႆႉၸႂ်ႁတ်းႁၢၼ်တႃႉ။ တၢင်းယုမ်ႇမၢတ်ႈမႂ်းၼၼ်ႉႁဵတ်းႁႂ်ႈယေႃးၵႃႇမႂ်းၸိုၼ်ႈႁၢႆယဝ်ႉ၊” ဝႃႈၼင်ႇၼႆလႄႈၼႂ်းၶိင်ႇၼၼ်ႉၵမ်းလဵဝ်မႄႈယိင်းၼၼ်ႉယေႃးၵႃႇမၼ်းႁၢႆၵႂႃႇဢေႃႈ။
ၵမ်းၼၼ်ႉ၊ ၸဝ်ႈယေႇသု၊ ႁွတ်ႈထိုင်ႁိူၼ်းၽွင်းမိူင်းၼၼ်ႉၵႂႃႇလႄႈမိူဝ်ႈဢၼ်ၶဝ်ႈႁိူၼ်းၵႂႃႇၼၼ်ႉမၼ်းၸဝ်ႈႁၼ်ၵူၼ်းပဝ်ႇပီႇပဝ်ႇၼႄးၼႂ်းပၢင်မႃႇသႃႇ၊ဢိၵ်ႇတင်းၵူၼ်းၼမ်ၼႃႇဢူၼ်ဢဵၼ်မေႃးမႄးယူႇဢေႃႈ။-
မၼ်းၸဝ်ႈလၢတ်ႈတီႈၵူၼ်းၸိူဝ်းၼၼ်ႉလႄႈဝႃႈ၊ “ဢွၵ်ႇၵႂႃႇၵူႈၵေႃႉၵူႈၵူၼ်းတႃႉ။ လုၵ်ႈယိင်းသၢဝ်ဢွၼ်ႇၼႆႉတၢႆယဝ်ႉဢမ်ႇၸႂ်ႈ။ မၼ်းၼွၼ်းလပ်းယူႇၵူၺ်းဢေႃႈ၊” ဝႃႈၼင်ႇၼႆဢေႃႈ။ မိူဝ်ႈၼၼ်ႉၵူၼ်းၸိူဝ်းၼၼ်ႉႁဵတ်းပျၢၵ်ႈႁဵတ်းၶူဝ်တီႈမၼ်းၸဝ်ႈဢေႃႈ။-
ဝၢႆးသေၵူၼ်းၸိူဝ်းၼၼ်ႉဢွၵ်ႇၵႂႃႇမူတ်းၸိုင်၊မၼ်းၸဝ်ႈၶဝ်ႈႁွင်ႈၼွၼ်းၼၢင်းယိင်းဢွၼ်ႇၼၼ်ႉၵႂႃႇသေယဝ်ႉ၊ယိပ်းဢဝ်မိုဝ်းမၼ်းလႄႈမၼ်းၵေႃႈလုၵ်ႉၶိုၼ်ႈမႃးၵမ်းလဵဝ်ဢေႃႈ။-
ၶၢဝ်ႇငၢဝ်းလွင်ႈတၢင်းၼႆႉဢွၼ်ၵၼ်ဢုပ်ႇလၢတ်ႈၵၼ်ၸွတ်ႇတူဝ်ႈၵႂႃႇတင်းမိူင်းဢေႃႈ။
ၸဝ်ႈယေႇသု၊ ဢွၵ်ႇသေၵႃႈတီႈၼၼ်ႈလႄႈယၢမ်းမိူဝ်ႈဢၼ်ပႆၵႂႃႇယူႇၼၼ်ႉၵူၼ်းတႃမွတ်ႇသွင်ၵေႃႉႁွင်ႉပၢဝ်ႇၸွမ်းလင်မၼ်းၸဝ်ႈလႄႈဝႃႈ၊ “လုၵ်ႈ တႃႇဝိတ်ႈ၊ ၼႆႉ႟၊ဢဵတ်းလူႁဝ်းၶႃႈသေၵမ်းၶႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ် ၸဝ်ႈယေႇသု၊ ၶဝ်ႈႁိူၼ်းၵႂႃႇယဝ်ႉၼၼ်ႉၶဝ်သွင်ၵေႃႉၵေႃႈၶဝ်ႈၸွမ်းၵႂႃႇဢေႃႈ။ မၼ်းၸဝ်ႈၸင်ႇထၢမ်လႄႈဝႃႈ၊ “ၵဝ်ၸွႆႈသူလႆႈယူႇဝႃႈၼႆ၊ၸွင်ႇသူသွင် ၵေႃႉယုမ်ႇႁိုဝ်း၊” ဝႃႈၼင်ႇၼႆလႄႈ၊ ၶဝ်သွင်ၵေႃႉၵေႃႈလဝ်ႈလၢတ်ႈလႄႈဝႃႈ၊ “ႁဝ်းၶႃႈယုမ်ႇၶႃႈဢေႃႈ၊” ဝႃႈၼင်ႇၼႆဢေႃႈ။
ၵမ်းၼၼ်ႉ၊မၼ်းၸဝ်ႈတိူဝ်ႉမၢၵ်ႇတႃၶဝ်သွင်ၵေႃႉလႄႈလၢတ်ႈဝႃႈ၊ “ႁႂ်ႈပဵၼ်ၸွမ်းၼင်ႇတၢင်းယုမ်ႇမၢတ်ႈသူၼၼ်ႉတႃႉ၊” ဝႃႈၼင်ႇၼႆလႄႈ၊-
မၢၵ်ႇတႃၶဝ်သွင်ၵေႃႉသႂ်လႅင်းမႃးၵမ်းလဵဝ်ဢေႃႈ။ ၸဝ်ႈယေႇသု၊ သမ်ႉႁၢမ်ႈတၢပ်ႈၶဝ်လႄႈဝႃႈ၊ “သူယႃႇပေလၢတ်ႈလွင်ႈၼႆႉႁႂ်ႈပိူၼ်ႈႁု၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ၶဝ်သွင်ၵေႃႉၵႂႃႇလႄႈမွၵ်ႇလၢတ်ႈၶၢဝ်ႇငၢဝ်းလွင်ႈမၼ်းၸဝ်ႈႁႂ်ႈသႃႇႁူင်ၸွတ်ႇတူဝ်ႈၵႂႃႇတင်းဝၢၼ်ႈတင်းမိူင်းဢေႃႈ။
ဝၢႆးသေၶဝ်သွင်ၵေႃႉဢွၵ်ႇၵႂႃႇယဝ်ႉၼၼ်ႉပိူၼ်ႈၸုင်ဢဝ်ၵူၼ်းဢၼ်ၽီႁၢႆႉၶဝ်ႈလႄႈဢမ်ႇလၢတ်ႈၵႂၢမ်းလႆႈၼၼ်ႉၵေႃႉၼိုင်ႈမႃးၸူးတီႈ ၸဝ်ႈယေႇသု၊ ဢေႃႈ။-
မိူဝ်ႈဢၼ်ၽီႁၢႆႉလႆႈၶၢမ်ႇတၢင်းဢၼ်ႁေႃႈဢွၵ်ႇပႅတ်ႈယဝ်ႉၼၼ်ႉ၊ၵူၼ်းဢႃႉၼၼ်ႉလၢတ်ႈၵႂၢမ်းလႆႈမႃးဢေႃႈ။ ၵူၼ်းၵူႈၵေႃႉၵူႈၵူၼ်းဢၢမ်းၼႃႇလႄႈလၢတ်ႈဝႃႈ၊ “လွင်ႈၸိူဝ်ႉၼင်ႇၼႆၵႃႈၼႂ်းၸိူဝ်ႉၶိူဝ်း ဢိသရေး၊ ဢမ်ႇတွၼ်ႉလႆႈႁၼ်သေပွၵ်ႈ၊” ဝႃႈၼင်ႈၼႆဢေႃႈ။
ၵူၺ်းၵႃႈ၊ၵူၼ်းၵိူင်း ၽႃႇရိသႄး၊ ၶဝ်လၢတ်ႈလႄႈဝႃႈ၊ “ၵွပ်ႈပိူဝ်ႈၶုၼ်ၽီႁၢႆႉလူင်ပၼ်တၼ်းၶူဝ်းတီႈမၼ်းလႄႈမၼ်းႁေႃႈၽီႁၢႆႉတင်းလၢႆဢွၵ်ႇလႆႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ လႄႇလဵပ်ႈၵႂႃႇထိုင်ၵူႈဝၢၼ်ႈၵူႈဝဵင်း၊ ၵႃႈမီးတင်းသဵင်ႈတင်းလူင်လႄႈသင်ႇသွၼ်ပၼ်ၵႃႈၼႂ်းၸရွပ်ႈႁေႃးတြႃးလႂ်၊ႁေႃးလွင်ႈၶၢဝ်ႇငၢဝ်းသတၢင်းသိူဝ်းပျေႃႇလွင်ႈဝၢၼ်ႈမိူင်းၸဝ်ႈလႂ်၊ဢိၵ်ႇတင်းႁဵတ်းႁႂ်ႈတၢင်းၶႆႈတၢင်းပဵၼ်ၵူႈၸိူဝ်ႉၵူႈပိူင်ႁၢႆဢေႃႈ။-
မိူဝ်ႈဢၼ်မၼ်းၸဝ်ႈႁၼ်ၵူၼ်းၸုၵူၼ်းတုမ်ၼမ်ၼႃႇၼၼ်ႉၸိုင်၊မၼ်းၸဝ်ႈဢဵတ်းလူၶဝ်ၵွပ်ႈပိူဝ်ႈၶဝ်ၸိူဝ်းၼၼ်ႉယၢပ်ႇၸႂ်ၶၢၼ်ၸႂ်လႄႈၶၢမ်ႇတၢင်းဢၼ်ပႅတ်ႈဝႆႉမိူၼ်ၸိူဝ်ႉၼင်ႇၽုင်သူဝ်းဢၼ်ဢမ်ႇမီးၵူၼ်းလဵင်ႉလူၼၼ်ႉဢေႃႈ။-
မၼ်းၸဝ်ႈၸင်ႇလၢတ်ႈတီႈတပႄးၸဝ်ႈတင်းလၢႆလႄႈဝႃႈ၊ “ၶဝ်ႈဢၼ်လီပၢတ်ႇမီးၼမ်ၼႃႇဢေႃႈ။ ၵူၺ်းၵႃႈ၊ၵေႃႉဢၼ်ပၢတ်ႇမၼ်းၼၼ်ႉမီးၵေႇၼႃႇဢေႃႈ။-
ပိူဝ်ႈၼႆလႄႈလဝ်ႈယွၼ်းတီႈၸဝ်ႈၼႃးႁႂ်ႈမၼ်းပွႆႇၸႂ်ႉၵူၼ်းႁဵတ်းၵၢၼ်မႃးၼမ်ၼမ်၊ပုၼ်ႈဢၼ်တၵ်းပၢတ်ႇၶဝ်ႈၸိူဝ်းၼႆႉတႃႉ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ႁွင်ႉဢဝ်တပႄးၸဝ်ႈသိပ်းသွင်ပႃးၼၼ်ႉသေယဝ်ႉ၊ဢၢပ်ႈပၼ်တၼ်းၶူဝ်းဢၼ်ပႄႉၼႅင်ႇလႄႈႁေႃႈၽိူဝ်ႉႁေႃႈၽီတင်းလၢႆဢွၵ်ႇပႅတ်ႈလႆႈ၊ဢိၵ်ႇတင်းဢၢပ်ႈပၼ်တၼ်းၶူဝ်းဢၼ်ႁဵတ်းႁႂ်ႈတၢင်းၶႆႈတၢင်းပဵၼ်ၵူႈၸိူဝ်ႉၵူႈပိူင်ၸိုၼ်ႈႁၢႆလႆႈၼၼ်ႉဢေႃႈ။-
ၸိုဝ်ႈသဵင်တမၢၼ်ႇၸဝ်ႈသိပ်းသွင်ပႃးၼၼ်ႉၸမ်ႉ၊ၵေႃႉတီႈၼိုင်ႈပဵၼ် သိမုၼ်ႇ၊ ဢၼ်လႆႈၸိုဝ်ႈ ပေႇတရု၊ တင်းၼွင်ႉၸၢႆးမၼ်း ဢၢၼ်ႇတရေႇ၊ယႃႇၵုပ်ႈ၊ တင်းၼွင်ႉၸၢႆးမၼ်း ယူဝ်းႁၢၼ်ႇ၊ ဢၼ်ပဵၼ်လုၵ်ႈၸၢႆး ၸေႇပေႇတႄး။-
ၽိလိပ်ႉပု၊ တင်း ပႃႇထေႃးလမႄး၊ထူဝ်းမႃႉ၊ တင်း မတ်ႈထႄႇ၊ ဢၼ်ပဵၼ်ၵူၼ်းၵဵပ်းၶွၼ်ႇ ယႃႇၵုပ်ႈ၊ လုၵ်ႈၸၢႆး ဢႃႇလၽေး၊ တင်း လေႇပေႇ၊ ဢၼ်လႆႈၸိုဝ်ႈမႂ်ႇ ထတ်ႉတေႇ။-
သိမုၼ်ႇ၊ ၵူၼ်းမဵဝ်း ၵႃႇၼၼိတ်ႉ၊ တင်း ယုတႃႉဢိသၵႃႇရေႇဢုတ်ႈ၊ ၵေႃႉဢၼ်ဢဝ် ၸဝ်ႈယေႇသု၊ ဢၢပ်ႈပၼ်တီႈရၢၼ်ႇသူႇၼၼ်ႉဢေႃႈ။
ၸဝ်ႈယေႇသု၊ ပွႆႇၸႂ်ႉတမၢၼ်ႇၸဝ်ႈသိပ်းသွင်ပႃးၼႆႉသေယဝ်ႉ၊သမ်ႉသင်ႇလၢတ်ႈတီႈၶဝ်လႄႈဝႃႈၸမ်ႉ၊ သူယႃႇပေၵႂႃႇၶဝ်ႈၵႂႃႇၵႃႈၼႂ်းဢိူင်ႇၵူၼ်းတၢင်ႇၸိူဝ်ႉတၢင်ႇၶိူဝ်းၶဝ်၊တင်းဝဵင်းၵူၼ်းမဵဝ်း သမႃႇရိ၊ ၶဝ်။-
ၵႂႃႇၵႃႈတီႈၵူၼ်းမဵဝ်း ဢိသရေး၊ ဢၼ်ပဵၼ်မိူၼ်ၸိူဝ်ႉၼင်ႇသူဝ်းဢၼ်ၽိတ်းတၢင်းလႄႈႁၢႆၵႂႃႇၸိူဝ်းၼၼ်ႉၵူၺ်းတႃႉ။-
ၵႂႃႇႁေႃးလၢတ်ႈတြႃးၸဝ်ႈလွင်ႈမိူင်းၵၢင်ႁၢဝ်ၸဝ်ႈတၵ်းတႄႇပဵၼ်ယဝ်ႉၼၼ်ႉတႃႉ။-
ႁဵတ်းႁႂ်ႈၵူၼ်းၶႆႈၵူၼ်းပဵၼ်တင်းလၢႆၸိုၼ်ႈႁၢႆ၊ႁႂ်ႈၵူၼ်းတၢႆလႂ်ဢသၢၵ်ႈၶိုၼ်းလိပ်းမႃး၊ႁႂ်ႈၵူၼ်းဢၼ်ပဵၼ်တုတ်ႈ လႂ်မူတ်းသႂ်လႄႈႁေႃႈၽီၽိူဝ်ႉတင်းလၢႆဢွၵ်ႇပႅတ်ႈတႃႉ။ ၸိူဝ်ႉၼင်ႇဢၼ်လႆႈႁပ်ႉဢဝ်ၵျေးၸူးလၢႆလၢႆၼၼ်ႉသူၵေႃႈႁဵတ်းပၼ်ၵျေးၸူးလၢႆလၢႆတႃႉ။-
ယႃႇပေဢဝ်ၶမ်း၊ငိုၼ်းတွင်းသႂ်ႇပႃးၵႃႈၼႂ်းထူင်သၢႆဢႅဝ်သူသေဢိတ်း။-
ယႃႇပေပႃးထူင်၊ဢမ်ႇၼၼ်ၶူဝ်းၼုင်ႈဢၼ်လိူဝ်၊ဢမ်ႇၼၼ်ဢမ်ႇလူဝ်ႇသႂ်ႇသွၵ်းတိၼ်၊ဢမ်ႇလူဝ်ႇဢဝ်ၶွၼ်ႉတဝ်ႉလႂ်ၵႂႃႇၸွမ်း။ ၵေႃႉဢၼ်ႁဵတ်းၵၢၼ်ၼၼ်ႉထိူၵ်ႈၶၢမ်ႇဢဝ်တၢင်းဢၼ်လဵင်ႉလူတၢင်းၵိၼ်ဢေႃႈ။
“ၼႂ်းမိူဝ်ႈဢၼ်သူၶဝ်ႈဝၢၼ်ႈပိူၼ်ႈဝဵင်းပိူၼ်ႈၵႂႃႇၼၼ်ႉ၊ ႁႃတူၺ်းၵေႃႉဢၼ်မီးၸႂ်ၸေႇတၼႃႇဢၼ်ၶႂ်ႈႁပ်ႉႁွင်းဢဝ်သူၼၼ်ႉလႄႈၶဝ်ႈယူႇလူၺ်ႈၵၼ်တင်းမၼ်းတေႃႇႁွတ်ႈႁွတ်ႈသူဢွၵ်ႇဝၢၼ်ႈဢွၵ်ႇဝဵင်းၵႂႃႇၼၼ်ႉတႃႉ။-
မိူဝ်ႈဢၼ်ၶဝ်ႈႁိူၼ်းၵႂႃႇၼၼ်ႉၸိုင်၊ဢဝ်တင်းၵႂၢမ်းမၢင်ႇၵလႃႇလႄႈတၵ်ႉလၢတ်ႈတႃ။-
ပေႃးၸဝ်ႈႁိူၼ်းၼၼ်ႉႁပ်ႉႁွင်းသူၸိုင်၊မၢင်ႇၵလႃႇတၢင်းၼိမ်ဢၼ်သူတၵ်ႉလၢတ်ႈၼၼ်၊တၵ်းတႄႇယူႇၵႃႈၼႂ်းႁိူၼ်းၼၼ်ႉလႄႈတီႈၸဝ်ႈႁိူၼ်းဢၼ်ဢမ်ႇႁပ်ႉတုင်းဢဝ်သူၼၼ်ႉၸိုင်၊ႁႂ်ႈမၢင်ႇၵလႃႇတၢင်းၼိမ်ၼၼ်ႉၶိုၼ်းမႃးၵႃႈတီႈသူတႃႉ။-
ပေႃးဢမ်ႇမီးၽူႈလႂ်ႁပ်ႉတုင်းဢဝ်သူ၊ဢမ်ႇထွမ်ႇဢဝ်ၵႂၢမ်းသူၸိုင်၊မိူဝ်ႈဢၼ်သူဢွၵ်ႇၵႃႈတီႈႁိူၼ်းၼၼ်ႉ၊ဝဵင်းၼၼ်ႉၵႂႃႇၸိုင်၊သၼ်ႇၽႅတ်းမုၼ်ႈလိၼ်ဢၼ်ၸပ်းတီႈတိၼ်သူၼၼ်ႉပႅတ်ႈၵႃႈတီႈၼၼ်ႈတႃႉ။-
ၵဝ်လၢတ်ႈတီႈၸိုဝ်ႈၸႂ်ႈမၼ်းတီႈသူၸမ်ႉ၊ၼႂ်းဝၼ်းဢၼ်ၸီႇယၢင်ႇတြႃးၼၼ်ႉ၊ဝဵင်းၼၼ်ႉတၵ်းလႆႈၶၢမ်ႇၼႃႇသေဝဵင်း သေႃးတုမ်ႇ၊ တင်းဝဵင်း ၵေႃးမေႃးရႃႉ၊ ဢေႃႈ။
“ၵဝ်ပွႆႇၸႂ်ႉသူၵႂႃႇမိူၼ်ၸိူဝ်ႉၼင်ႇဢၼ်ပွႆႇၸႂ်ႉသူဝ်းၶဝ်ႈၵႂႃႇၵႃႈၼႂ်းၽုင်မႃၼႆးဢေႃႈ။ ပိူဝ်ႈၼႆလႄႈႁႂ်ႈလၵ်းလႅမ်မိူၼ်ငူးလႄႈ၊ ႁႂ်ႈဢူၼ်ႈဢွၼ်ႇမိူၼ်ၸိူဝ်ႉၼင်ႇၼူၵ်ႉတူႈတႃႉ။-
ဝႆႉသတိတႃႉ။ တၵ်းတေမီးၵူၼ်းၸိူဝ်းဢၼ်တိဢဝ်သူလႄႈဢၢပ်ႈၵႃႈတီႈၶုၼ်လုမ်းလူင်ႁႂ်ႈလႆႈပေႃႉယႅၼ်ႉသူၽၢႆႇၼႃႈၵူၼ်းဢၼ်ၸုဢၼ်တုမ်ၵႃႈၼႂ်းၸရွပ်ႈႁေႃးတြႃးတင်းလၢႆဢေႃႈ။-
ၵွပ်ႈပိူဝ်ႈၵဝ်လႄႈသူတၵ်းလႆႈၶၢမ်ႇတၢင်းဢၼ်တိုတ်ႉၸၼ်လၢၵ်ႈဢဝ်ၵႂႃႇၸူးၵႃႈတီႈၶုၼ်လူင်လႂ်၊ၵႃႈတီႈၶုၼ်ႁေႃၶမ်းလႂ်၊ႁႂ်ႈလႆႈၶၢမ်ႇသၢၵ်ႈသေႇၶၢဝ်ႇငၢဝ်းတြႃးသိူဝ်ပျေႃႇတီႈၶဝ်၊ဢိၵ်ႇတင်းၵူၼ်းတၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉဢေႃႈ။-
မိူဝ်ႈဢၼ်ၶဝ်ၸႅတ်ႈသေးသူၼၼ်ႉတၵ်းလႆႈလၢတ်ႈၵႃႈသင်တၵ်းလႆႈၶိုၼ်းတွပ်ႇၵႂၢမ်းၸိူဝ်ႉၼင်ႇႁိုဝ်ဝႃႈၼႆယႃႇပေမႆႈၸႂ်။ ၼႂ်းၶိင်ႇၼႃႇရီႇၼၼ်ႉၵမ်းလဵဝ်၊ၽြႃးပဵၼ်ၸဝ်ႈတၵ်းပၼ်ၶေႃႈၵႂၢမ်းဢၼ်သၢင်ႇထုၵ်ႇၵႃႈၼႂ်းသူပ်းသူဢေႃႈ။-
ၶေႃႈၵႂၢမ်းဢၼ်တၵ်းလၢတ်ႈၼၼ်ႉယင်းဢမ်ႇၸႂ်ႈၶေႃႈၵႂၢမ်းသူလႄႈပဵၼ်ၶေႃႈၵႂၢမ်းဝိၺိၺ်ႇပေႃႈၸဝ်ႈသူဢၼ်လၢတ်ႈၵႃႈၼႂ်းသူဢေႃႈ။
“မိူဝ်ႈၼၼ်ႉပီႈၼွင်ႉၼင်ႇၵၼ်ၵၼ်ၵေႃႉၼိုင်ႈလႄႈၵေႃႉၼိုင်ႈဢဝ်ၵၼ်ဢၢပ်ႈႁႂ်ႈလႆႈဢဝ်တၢႆဢေႃႈ။ ပေႃႈၵေႃႈတၵ်းႁဵတ်းၸိူဝ်ႉၼင်ႇၼၼ်ဢဝ်လုၵ်ႈၶဝ်တၢႆဢေႃႈ။ လုၵ်ႈလၢင်းလႂ်ၵေႃႈတၵ်းလုၵ်ႉၽိုၼ်ႉပေႃႈမႄႈၶဝ်လႄႈဢဝ်ဢၢပ်ႈႁႂ်ႈလႆႈၶၢမ်ႇတၢင်းဢၼ်ဢဝ်တၢႆဢေႃႈ။-
ပိူၼ်ႈၵူႈၵေႃႉတၵ်းၸင်းသူၵွပ်ႈပိူဝ်ႈၵဝ်ဢေႃႈ။ ၼႂ်းဝႃႈၼၼ်သေၵေႃႈ၊ၵေႃႉဢၼ်မၼ်ႈၶိူင်ႇတေႃႇထိုင်ႁွတ်ႈတီႈသုတ်းၼၼ်ႉတၵ်းလႆႈၶၢမ်ႇဢဝ်တၢင်းဢၼ်ၵႄႇၶျွတ်ႈဢဝ်ဢေႃႈ။-
ပေႃးၵူၼ်းဝဵင်းၼိုင်ႈၼိၵ်ႈၸၢၵ်ႈသူၸိုင်၊ဝႄႈပၢႆႈၵႂႃႇၸူးတၢင်ႇဝဵင်းတႃႉ။ ၵဝ်ဝႃႈတီႈၸိုဝ်ႈၸႂ်ႈမၼ်းတီႈသူၸမ်ႉၸူဝ်ႈဢၼ်သူယင်းဝႄႈပၢႆႈၵႂႃႇၸူးၵႃႈၼႂ်းဝၢၼ်ႈၼႂ်းဝဵင်း ဢိသရေး၊ ၵႃႈမီးတင်းသဵင်ႈတင်းလူင်ၼႆႉဢမ်ႇပႆႇတၼ်းၸွတ်ႇၸိုင်၊ လုၵ်ႈၵူၼ်း၊ တၵ်းၵျွမႃးဢေႃႈ။
“တပႄးဢမ်ႇယႂ်ႇလိူဝ်သေသြႃႇ။ ၶႃႈဢမ်ႇယႂ်ႇလိူဝ် သေၸဝ်ႈ။-
ပေႃးတပႄးၶိုတ်းထိုင်သြႃႇ၊ၶႃႈၶိုတ်းထိုင်ၸဝ်ႈမၼ်းၸိုင်၊ထုၵ်ႇလီပျေႇၸႂ်ယဝ်ႉ။ ပေႃးပိူၼ်ႈလႃႇၸဝ်ႈႁိူၼ်းလႄႈႁွင်ႉဝႃႈ၊ ‘ ပေႇလႃႉၸေႇပုလႃႉ၊ ’ ဝႃႈၼႆၸိုင်၊ၶဝ်တေဢမ်ႇယဵင်ႈၶႅၼ်းလႃႇၵူၼ်းႁိူၼ်းတင်းလၢႆလႆႈႁိုဝ်း။
“ပိူဝ်ႈၼႆလႄႈယႃႇပေၵူဝ်ၶဝ်။ လွင်ႈတၢင်းဢၼ်ႁူမ်ႇငမ်းဝႆႉတင်းသဵင်ႈတင်းလူင်တၵ်းဢမ်ႇပိုတ်ႇဢွၵ်ႇမႃးၼၼ်ႉဢမ်ႇမီး၊လွင်ႈတၢင်းဢၼ်လွမ်ႁဵတ်းတဵတ်ႇတဵတ်ႇတင်းလၢႆၼၼ်ႉၵေႃႈ၊တၵ်းဢမ်ႇလႆႈႁုလႆႈႁၼ်ၵေႃႈဢမ်ႇမီးသေၸိူဝ်ႉသေပိူင်၊-
မဵဝ်းဢၼ်ၵဝ်လၢတ်ႈသူၵႃႈၼႂ်းလပ်းသိင်ႇၼၼ်ႉၶိုၼ်းလၢတ်ႈဢွၵ်ႇၼႂ်းဢၼ်လႅင်းတႃႉ။ သဵင်သွပ်ႉသႅပ်ႉဢၼ်သူလႆႈငိၼ်းၼၼ်ႉ၊ယူႇၵႃႈၼိူဝ်ၸွမ်းႁိူၼ်းလႄႈပၢဝ်ႇသေႃႇတႃႉ။-
ယႃႇပေၵူဝ်ၵူၼ်းၸိူဝ်းဢၼ်ဢဝ်တူဝ်ၵႃႇယႃႉတၢႆလႆႈၵူၺ်းလႄႈဢမ်ႇၸၢင်ႈဢဝ်ၸႂ်ဝိၺိၺ်ႇတၢႆလႆႈၼၼ်ႉ။ ပိူဝ်ႈၼႆလႄႈၵူဝ်ၸဝ်ႈဢၼ်ၸၢင်ႈဢဝ်ၸႂ်ဝိၺိၺ်ႇပႃးတင်းတူဝ်ၶၼ်ႇထႃႇတၢႆလႆႈၵႃႈၼႂ်းငရၢႆးၼၼ်ႉတႃႉ။-
ငိုၼ်းဢႃႇသရိ ၶႅပ်းၼိုင်ႈသိုဝ်ႉလႆႈၼူၵ်ႉဢႅၼ်ႇၽႃႉသွင်တူဝ်ဢေႃႈ။ ၵူၺ်းၵႃႈ၊ပေႃးဝႃႈပေႃႈၸဝ်ႈသူယင်းဢမ်ႇပၼ်ဢၶႂၢင်ႉၸိုင်၊ဢမ်ႇလႆႈတူၵ်းၵႃႈၼိူဝ်လိၼ်သေတူဝ်။-
ပုၼ်ႈသူၸမ်ႉ၊ၶူၼ်ႁူဝ်သူၵူႈသဵၼ်ႈၶၢမ်ႇတၢင်းဢၼ်ၼပ်ႉဢၢၼ်ႇဝႆႉယဝ်ႉ။-
ပိူဝ်ႈၼႆလႄႈယႃႇပေၵူဝ်။ သူယဵင်ႈၶႅၼ်းမျၢတ်ႈၼမ်ၼႃႇသေၼူၵ်ႉဢႅၼ်ႇၽႃႉၸိူဝ်းၼၼ်ႉဢေႃႈ။
“ၽူႈလႂ်သေဢမ်ႇဝႃႈ၊ၵေႃႉဢၼ်ႁပ်ႉတုင်းဢဝ်ၵဝ်ၵႃႈတီႈၽၢႆႇၼႃႈၵူၼ်းတင်းလၢႆၼၼ်ႉ၊ၵဝ်တၵ်းႁပ်ႉတုင်းဢဝ်မၼ်းၵႃႈတီႈၽၢႆႇၼႃႈပေႃႈၸဝ်ႈၵဝ်ဢၼ်မီးယူႇၵႃႈၼိူဝ်မိူင်းၵၢင်ႁၢဝ်ပုၼ်ႉဢေႃႈ။-
တီႈၵေႃႉဢၼ်ထဵင်ပႅတ်ႈၵဝ်ၵႃႈတီႈၽၢႆႇၼႃႈၵူၼ်းတင်းလၢႆၼၼ်ႉၸမ်ႉ၊ၵဝ်တၵ်းထဵင်ပႅတ်ႈမၼ်းၵႃႈတီႈၽၢႆႇၼႃႈပေႃႈၸဝ်ႈၵဝ်ဢၼ်မီးယူႇၵႃႈၼိူဝ်မိူင်းၵၢင်ႁၢဝ်ပုၼ်ႉဢေႃႈ။
“ၵဝ်မႃးႁႂ်ႈလႆႈပၼ်တၢင်းၼိမ်တီႈလေႃးၵႃႉၼႆႉဝႃႈၼႆယႃႇပေထၢင်။ ၵဝ်မႃးႁႂ်ႈလႆႈပၼ်တၢင်းၼိမ်ဢမ်ႇၸႂ်ႈ။ မႃးပၼ်တုၵ်ႉၶႃႉၶၢၼ်ၸႂ်ဢေႃႈ။-
ၵဝ်မႃးႁႂ်ႈလုၵ်ႈလၢင်းလႆႈၽိတ်းၵၼ်တင်းပေႃႈ၊လုၵ်ႈယိင်းႁႂ်ႈလႆႈၽိတ်းၵၼ်တင်းမႄႈလႄႈလုၵ်ႈပႂ်ႉႁႂ်ႈလႆႈၽိတ်းၵၼ်တင်းမႄႈဢွၵ်ႇၼၢႆးဢေႃႈ။-
ရၢၼ်ႇသူႇတူဝ်ၸဝ်ႈၵဝ်ႇတၵ်းပေႃႇဢွၵ်ႇပဵၼ်မႃးၵႃႈၼႂ်းၵူၼ်းႁိူၼ်းၵူၼ်းယေးတူဝ်ၸဝ်ႈၵဝ်ႇၵူၺ်းဢေႃႈ။
“ၵေႃႉဢၼ်ႁၵ်ႉပေႃႈမႄႈမၼ်းၼႃႇသေၵဝ်ၼၼ်ႉဢမ်ႇထိူၵ်ႈပဵၼ်တပႄးၵဝ်။ ၵေႃႉဢၼ်ႁၵ်ႉလုၵ်ႈယိင်းလုၵ်ႈၸၢႆးၼႃႇသေၵဝ်ၼၼ်ႉၵေႃႈ၊ဢမ်ႇထိူၵ်ႈပဵၼ်တပႄးၵဝ်။-
ၵေႃႉဢၼ်ဢမ်ႇမႅၵ်ႇသဝ်မႆႉဝႃးမိုဝ်းတူဝ်ၸဝ်ႈၵဝ်ႇလႄႈၸွမ်းပႃႈလင်ၵဝ်ၼၼ်ႉၵေႃႈ၊ဢမ်ႇထိူၵ်ႈပဵၼ်တပႄးၵဝ်။-
ၵေႃႉဢၼ်ၶတ်းၸႂ်ႁႂ်ႈလႆႈဢသၢၵ်ႈမၼ်းလွတ်ႈၼၼ်ႉတၵ်းလႆႈသုမ်းဢသၢၵ်ႈဢေႃႈ။ ၵေႃႉဢၼ်ၶၢမ်ႇသုမ်းဢသၢၵ်ႈတူဝ်ၸဝ်ႈၵဝ်ႇပုၼ်ႈၵဝ်ၼၼ်ႉၸမ်ႉ၊တၵ်းလႆႈဢသၢၵ်ႈဢေႃႈ။
“ၽူႈလႂ်သေဢမ်ႇဝႃႈ၊ၵေႃႉဢၼ်ႁပ်ႉတုင်းဢဝ်သူၼၼ်ႉ၊ႁပ်ႉတုင်းဢဝ်ၵဝ်ဢေႃႈ။ ၵေႃႉဢၼ်ႁပ်ႉတုင်းဢဝ်ၵဝ်ၼၼ်ႉ၊ႁပ်ႉတုင်းဢဝ်ၽူႈဢၼ်ပွႆႇၸႂ်ႉၵဝ်မႃးၼၼ်ႉဢေႃႈ။-
ၽူႈလႂ်သေဢမ်ႇဝႃႈ၊ၵေႃႉဢၼ်ႁပ်ႉတုင်းဢဝ်ပရေႃးၽႅတ်ႈ ၸွမ်းလူၺ်ႈမၼ်းပဵၼ်ပရေႃးၽႅတ်ႈၼၼ်ႉၸိုင်၊ထိူၵ်ႈၶၢမ်ႇဢဝ်ဢၵျူဝ်းဢၼ်ၵိုင်ႇၵၼ်တင်းပရေႃးၽႅတ်ႈဢေႃႈ။ ၵေႃႉဢၼ်ႁပ်ႉတုင်းဢဝ်ၵူၼ်းသိုဝ်ႈတေႃႇၼၼ်ႉ၊ၸွမ်းလူၺ်ႈမၼ်းပဵၼ်ၵူၼ်းဢၼ်သိုဝ်ႈတေႃႇလႄႈထိူၵ်ႈၶၢမ်ႇလႆႈဢၵျူဝ်းဢၼ်ၵိုင်ႇၵၼ်တင်းၵူၼ်းသိုဝ်ႈတေႃႇဢေႃႈ။-
ၽူႈလႂ်သေဢမ်ႇဝႃႈ၊ၵေႃႉဢၼ်ပၼ်ၵိၼ်ၼမ်ႉၵတ်းၵွၵ်းၼိုင်ႈၵူၺ်းတီႈတပႄးၵဝ်ၵေႃႉဢၼ်လဵၵ်ႉသေပိူၼ်ႈၼႆႉၼၼ်ႉ၊ပိူဝ်ႈဢၼ်မၼ်းပဵၼ်တပႄးၵဝ်လႄႈၵဝ်လၢတ်ႈၵႂၢမ်းသဵတ်ႈၸႃႇတီႈသူၸမ်ႉ၊ၵေႃႉၼၼ်ႉတေလႆႈၶၢမ်ႇဢဝ်ဢၵျူဝ်းမၼ်းတႄႉဢေႃႈ၊” ဝႃႈၼင်ႇၼႆဢေႃႈ။
ဝၢႆးသေ ၸဝ်ႈယေႇသု၊ သင်ႇလၢတ်ႈတီႈတမၢၼ်ႇၸဝ်ႈသိပ်းသွင်ပႃးယဝ်ႉတူဝ်ႈလီငၢမ်းယဝ်ႉၼၼ်ႉ၊မၼ်းၸဝ်ႈဢွၵ်ႇၵႂႃႇႁႂ်ႈလႆႈသင်ႇသွၼ်ပၼ်၊ဢိၵ်ႇတင်းႁႂ်ႈလႆႈႁေႃးတြႃးၸဝ်ႈၵႃႈတီႈဝဵင်းဢၼ်မီးႁိမ်းႁွမ်းၸိူဝ်းၼၼ်ႉဢေႃႈ။
မိူဝ်ႈၼၼ်ႉသြႃႇ ယူဝ်းႁၢၼ်ႇ၊ မီးယူႇၵႃႈၼႂ်းထွင်ႇလႄႈလႆႈငိၼ်းၶၢဝ်ႇလွင်ႈ ၸဝ်ႈၶရိၸ်ႈ၊ ႁဵတ်းသၢင်ႈၸိူဝ်းၼၼ်ႉသေလႄႈပွႆႇၸႂ်ႉတပႄးမၼ်းတင်းလၢႆၵႂႃႇတွင်ႈထၢမ်တီႈ ၸဝ်ႈယေႇသု၊ လႄႈဝႃႈ၊-
“ၸဝ်ႈႁဝ်းပဵၼ်ၸဝ်ႈဢၼ်တၵ်းၵျွမႃးၼၼ်ႉၶႃႈႁိုဝ်း။ ဢမ်ႇၼၼ်ၵေႃႈႁဝ်းၶႃႈတၵ်းလႆႈမုင်ႈမွင်းတၢင်ႇသူႇတၢင်ႇပႃးလူးၵွၼ်ႇၶႃႈႁိုဝ်း၊ၶႅၼ်းတေႃႈမွၵ်ႇလၢတ်ႈပၼ်ႁဝ်းၶႃႈသေၵမ်းၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ၶိုၼ်းၵႂႃႇမွၵ်ႇလၢတ်ႈပၼ်သြႃႇ ယူဝ်းႁၢၼ်ႇ၊ ၵႃႈဢၼ်သူလႆႈငိၼ်းလႆႈႁၼ်မႃးတင်းသဵင်ႈတင်းလူင်ၼၼ်ႉတႃႉ။-
ၵူၼ်းတႃမွတ်ႇတင်းလၢႆႁၼ်လႆႈမႃး၊ၵူၼ်းၶႃႁၵ်းၶႃၶႄႉတင်းလၢႆပႆလႆႈမႃး၊ၵူၼ်းပဵၼ်တုတ်ႈ တင်းလၢႆမူတ်းသႂ်မႃး၊ၵူၼ်းႁူၼူၵ်ႇတင်းလၢႆငိၼ်းလႆႈမႃးယဝ်ႉ။ ၶဝ်ၸိူဝ်းဢၼ်တၢႆယဝ်ႉၸိူဝ်းၼၼ်ႉၵေႃႈ၊လႆႈလုၵ်ႉၶိုၼ်းလိပ်းမႃးဢေႃႈ။ ၵူၼ်းၽၢၼ်တင်းလၢႆၵေႃႈလႆႈထွမ်ႇလႆႈငိၼ်းၶၢဝ်ႇတြႃးဢၼ်သိူဝ်းပျေႃႇယဝ်ႉယဝ်ႉ။-
ပိူဝ်ႈၼႆလႄႈၵေႃႉဢၼ်ဢမ်ႇထၢင်ထိူမ်ၵႃႈၼိူဝ်ၵဝ်ၼၼ်ႉမီးမၢင်ႇၵလႃႇဢေႃႈ၊” ဝႃႈၼင်ႇၼႆဢေႃႈ။
ဝၢႆးလင်တပႄးသြႃႇ ယူဝ်းႁၢၼ်ႇ၊ ၸိူဝ်းၼၼ်ႉဢွၵ်ႇၵႂႃႇသေယဝ်ႉ၊ ၸဝ်ႈယေႇသု၊ လၢတ်ႈလွင်ႈသြႃႇ ယူဝ်းႁၢၼ်ႇ၊ တီႈၵူၼ်းဢၼ်ၸုဢၼ်တုမ်ၵၼ်ၸိူဝ်းၼၼ်ႉလႄႈဝႃႈ၊ “လွင်ႈဢၼ်သူၵႂႃႇၸူးတီႈသြႃႇ ယူဝ်းႁၢၼ်ႇ၊ ၵႃႈတီႈၼႂ်းထိူၼ်ႇလႅင်ႉၼၼ်ႉ၊သူၵႂႃႇတူၺ်းၵႃႈသင်။ ၵႂႃႇတူၺ်းမႆႉဢေႃႈဢၼ်လူမ်းထူဝ်းလႄႈၵွမ်းၵႂႃႇၵွမ်းမႃးယူႇၼၼ်ႉႁိုဝ်း။-
သူဢွၵ်ႇၵႂႃႇႁႂ်ႈလႆႈတူၺ်းသင်။ ႁႂ်ႈလႆႈတူၺ်းၵူၼ်းဢၼ်ၼုင်ႈၶူဝ်းလီၶူဝ်းငၢမ်းမဵဝ်းၼၼ်ႉႁိုဝ်း။ ၵူၼ်းၸိူဝ်းဢၼ်ၼုင်ႈၶူဝ်းလီၶူဝ်းငၢမ်းၼၼ်ႉၸၢင်ႈယူႇၼႂ်းႁၢင်ႈၼႂ်းႁေႃၵူၺ်းဢေႃႈ။-
ပေႃးဢမ်ႇၸႂ်ႈၸိူဝ်ႉၼင်ႇၼၼ်ၸိုင်၊သူဢၢင်ႈဢၢၼ်းၶႂ်ႈႁၼ်ဢီႈသင်။ ပရေႃးၽႅတ်ႈ ႁိုဝ်း။ ၸႂ်ႈတႄႉ။ ၵဝ်ဝႃႈၸမ်ႉ၊ၵေႃႉဢၼ်သူလႆႈႁၼ်ၼၼ်ႉယႂ်ႇမျၢတ်ႈၼႃႇသေပရေႃးၽႅတ်ႈလူးၵွၼ်ႇဢေႃႈ။-
လွင်ႈမၼ်းၸမ်ႉ၊သြႃႇ ယူဝ်းႁၢၼ်ႇ၊ ၼႆႉ၊ပဵၼ်ၵေႃႉဢၼ်ၵျၢမ်းလိၵ်ႈတႅမ်ႈဝႆႉလွင်ႈမၼ်းလႄႈဝႃႈ၊ ‘တူၺ်းလူး။ ၵဝ်ပွႆႇၸႂ်ႉတမၢၼ်ႇၵဝ်ၵႂႃႇပႃႈၼႃႈမႂ်း၊ႁႂ်ႈမႄးသဵၼ်ႈတၢင်းဝႆႉပုၼ်ႈမႂ်းဢေႃႈ၊’ ဝႃႈၼင်ႇၼႆၼၼ်ႉယဝ်ႉ။-
ၵဝ်ဝႃႈတီႈၸိုဝ်ႈၸႂ်ႈမၼ်းၸမ်ႉ၊ၵူၼ်းဢၼ်ၵိူတ်ႇလဵင်ႉမႃးတီႈမႄႈယိင်းလႄႈယႂ်ႇမျၢတ်ႈၼႃႇသေသြႃႇ ယူဝ်းႁၢၼ်ႇ၊ ဢၼ်ပၼ်မၢင်ႇၵလႃႇပပ်ႉတိၸမ်ႇ ၼႆႉဢမ်ႇပႆႇတွၼ်ႉမီးသေၵေႃႉသေၵူၼ်း။ ၼႂ်းဝႃႈၼၼ်သေၵေႃႈ၊ၵေႃႉဢၼ်လဵၵ်ႉသေပိူၼ်ႈၼႂ်းမိူင်းၵၢင်ႁၢဝ်ၸဝ်ႈၼၼ်ႉ၊သမ်ႉယင်းယႂ်ႇမျၢတ်ႈၼႃႇသေသြႃႇ ယူဝ်းႁၢၼ်ႇ၊ လူးၵွၼ်ႇဢေႃႈ။-
ၸႃႉၸဵမ်မိူဝ်ႈဢၼ်သြႃႇ ယူဝ်းႁၢၼ်ႇ၊ တႄႇၸႃႉႁေႃးတြႃးမႃးတေႃႇထိုင်ႁွတ်ႈဝၼ်းမိူဝ်ႈၼႆႉ၊မိူင်းၵၢင်ႁၢဝ်ၸဝ်ႈလႆႈၶၢမ်ႇတၢင်းဢၼ်ႁိမ်ႁူင်ႇဢဝ်ဢေႃႈ။ ၶဝ်ၸိူဝ်းဢၼ်ႁဵတ်းဢထမ်ႇမႃႉၼၼ်ႉၶတ်းၸႂ်ႁႂ်ႈလႆႈႁိမ်ႁူင်ႇဢဝ်ဢေႃႈ။-
လွင်ႈမိူင်းၵၢင်ႁၢဝ်ၸဝ်ႈၼၼ်ႉၸိုင်၊ၵႃႈပဵၼ်ၵျၢမ်းဢၼႃႇၵတ်ႉတိတင်းၵျၢမ်းပိင်းၺၢပ်ႈတြႃးတင်းလၢႆႁေႃးဝႆႉထႃႈတေႃႇထိုင်သြႃႇ ယူဝ်းႁၢၼ်ႇ၊ မႃးၼၼ်ႉဢေႃႈ။-
သင်ဝႃႈသူယုမ်ႇၵႂၢမ်းၵဝ်ၼႆႉၸိုင်၊တေလႆႈယုမ်ႇၵႂၢမ်းဢၼ်ဝႃႈ၊သြႃႇ ယူဝ်းႁၢၼ်ႇ၊ ပဵၼ်သြႃႇ ဢေးလိယႃႉ၊ ဢၼ်တၵ်းပေႃႇမႃးၼၼ်ႉဢေႃႈ။-
ပေႃးသူမီးႁူၸိုင်၊ထွမ်ႇငိၼ်းတႃႉ။
“ၵဝ်တၵ်းလႆႈတႅၵ်ႈၼိူင်းၵၼ်တင်းၵူၼ်းၵၢပ်ႈၼႆႉၸိူဝ်ႉၼင်ႇႁိုဝ်။ ၶဝ်မိူၼ်လုၵ်ႈဢွၼ်ႇၸိူဝ်းဢၼ်ၼင်ႈယူႇႁိမ်းၵၢတ်ႇလႄႈၸုမ်းၼိုင်ႈႁွင်ႉပၢဝ်ႇတီႈၵေႃႉသႄႈၶဝ်လႄႈဝႃႈ၊-
‘ႁဝ်းပဝ်ႇပီႇပဝ်ႇၼႄးသေၵေႃႈ၊သူဢမ်ႇၵႃႈဢမ်ႇဝႅၼ်။ ႁဝ်းႁွင်ႉႁႆႈသေၵေႃႈ၊သူဢမ်ႇၶၢင်းဢမ်ႇၶီ၊’ ဝႃႈၼင်ႇၼႆၼၼ်ႉဢေႃႈ။-
မိူဝ်ႈသြႃႇ ယူဝ်းႁၢၼ်ႇ၊ မႃးၵေႃႈမၼ်းၵမ်သိၼ်ဢမ်ႇၵိၼ်ဢမ်ႇသူတ်ႉလႄႈယူႇၼၼ်ႉပိူၼ်ႈသမ်ႉဝႃႈ၊ ‘ၽိူဝ်ႉၽီၶဝ်ႈၵႃႈၼႂ်းမၼ်းလူင်ပႄႇ၊’ ဝႃႈၼင်ႇၼႆဢေႃႈ။-
မိူဝ်ႈ လုၵ်ႈၵူၼ်း၊ မႃးလႄႈၵိၼ်ၼၼ်ႉၶဝ်သမ်ႉဝႃႈ၊ ‘တူၺ်းလူး။ ၵေႃႉၼႆႉပဵၼ်ၵူၼ်းၵိၼ်လူင်၊ၵူၼ်းမဝ်းလဝ်ႈ၊ ၵူၼ်းဢၼ်ႁဵတ်းၵေႃႉႁဵတ်းသႄႈလူၺ်ႈၵၼ်တင်းၵူၼ်းဢၼ်ၵဵပ်းၶွၼ်ႇ၊ဢိၵ်ႇတင်းၵူၼ်းႁၢႆႉလူင်ပႄႇ၊’ ဝႃႈၼင်ႇၼႆဢေႃႈ။ ၼႂ်းဝႃႈၼၼ်သေၵေႃႈ၊ပိင်ႇၺႃႇၽြႃးပဵၼ်ၸဝ်ႈလႆႈႁုဢၼ်မၢၼ်ႇမႅၼ်ႈလူၺ်ႈတၢင်းႁဵတ်းမၼ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈဢၼ်ၵူၼ်းဝဵင်းၸိူဝ်းဢၼ် ၸဝ်ႈယေႇသု၊ ႁဵတ်းၼႄၶဝ်တၼ်းၶူဝ်းၼမ်ၼႃႇၼၼ်ႉ၊ယင်းဢမ်ႇၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်ၶဝ်ၼၼ်ႉယူႇၸိုင်၊မၼ်းၸဝ်ႈၸိၼႄးတၢင်ႇဢပျတ်ႈၶဝ်လႄႈဝႃႈ၊-
“ဝဵင်း ၶေႃးရၸႅၼ်ႇ၊ ႟။ မႂ်းမီးဢႃႉမၢင်ႇၵလႃႇဢေႃႈ။ ဝဵင်း ပႅတ်ႉၸေးတႃႉ၊ ႟။ မႂ်းၵေႃႈမီးဢႃႉမၢင်ႇၵလႃႇဢေႃႈ။ တၼ်းၶူဝ်းမဵဝ်းဢၼ်လၢၵ်ႇလၢႆးဢၼ်ၵဝ်လႆႈႁဵတ်းၼႄၼမ်ၼႃႇတီႈသူၼႆႉသင်ၵဝ်လႆႈႁဵတ်းၼႄတီႈဝဵင်း တုရု၊ တင်းတီႈဝဵင်း ၸိတုၼ်ႇ၊ ၸိုင်၊ၵူၼ်းတင်းသွင်ဝဵင်းၼၼ်ႉၸၢင်ႈတေၶုၵ်းၸႂ်လႆႈမႆႈၸႂ်လႄႈၼုင်ႈၼင်ပေႃသေ၊ဢိင်ဢိူၵ်ႇယူႇၼႂ်းၽုၼ်ႇတဝ်ႈၸဵမ်မိူဝ်ႈဝၼ်းၵွၼ်ႇႁိုင်ၼႃႇၼၼ်ႉယဝ်ႉ။-
ၵဝ်လၢတ်ႈတီႈသူၸမ်ႉ၊ၼႂ်းဝၼ်းဢၼ်ၸီႇယၢင်ႇတြႃးၼၼ်ႉၵူၼ်းဝဵင်း တုရု၊ တင်းၵူၼ်းဝဵင်း ၸိတုၼ်ႇ၊ တင်းလၢႆတၵ်းလႆႈၶၢမ်ႇဢဝ်ၵရုၼႃႇၸဝ်ႈၽြႃးၼမ်ၼႃႇသေသူဢေႃႈ။-
ဝဵင်း ၵပိူဝ်ႇၼေႇဢုမ်ႇ၊ ႟။ မႂ်းဢၢင်ႈၶႂ်ႈယူၵ်ႉတူဝ်ၸဝ်ႈၵဝ်ႇသုင်ပဵင်းၽႃႉပဵင်းမွၵ်ႇဢေႃႈ။ ၵူၺ်းၵႃႈ၊မႂ်းတၵ်းလႆႈၶၢမ်ႇတၢင်းဢၼ်ၶျႃးတူၵ်းထိုင်မိူင်းငရၢႆးဢေႃႈ။ တၼ်းၶူဝ်းဢၼ်ၵဝ်လႆႈႁဵတ်းၼႄတီႈမႂ်းယဝ်ႉၸိူဝ်းၼၼ်ႉ၊ သင်ၵဝ်လႆႈႁဵတ်းၼႄတီႈဝဵင်း သေႃးတုမ်ႇ၊ ၸိုင်၊ဝဵင်းၼၼ်ႉတၵ်းတႄႇတင်ႈယူႇထိုင်ဝၼ်းမိူဝ်ႈၼႆႉဢေႃႈ။-
ၵဝ်ဝႃႈၸမ်ႉ၊ၸဝ်ႈၽြႃးတၵ်းယဵင်ႈၶႅၼ်းဢဵတ်းလူၵူၼ်းဝဵင်း သေႃးတုမ်ႇ၊ ၼႃႇသေသူၼႂ်းဝၼ်းဢၼ်ၸီႇယၢင်ႇတြႃးၼၼ်ႉ၊” ဝႃႈၼင်ႇၼႆဢေႃႈ။
မိူဝ်ႈၶိင်ႇၼၼ်ႉ ၸဝ်ႈယေႇသု၊ လၢတ်ႈလႄႈဝႃႈ၊ “ဢူဝ်းပေႃႈၸဝ်ႈ။ ၸဝ်ႈၵၢင်ႁၢဝ်တင်းလိၼ်မိူင်းတီႈၶႃႈ။ ၵဝ်ၶႃႈယွင်ႈယေႃးတၢင်ႇၵျေးၸူးၵွပ်ႈပိူဝ်ႈၸဝ်ႈႁဝ်းဢဝ်လွင်ႈတၢင်းဢၼ်သိူင်ႇဝႆႉလပ်ႉဝႆႉတီႈၵူၼ်းႁုၵူၼ်းႁၼ်၊ဢိၵ်ႇတင်းၵူၼ်းလၵ်းၵူၼ်းလႅမ်ၸိူဝ်းၼၼ်ႉၽုၺ်ႇၼႄပၼ်လုၵ်ႈဢွၼ်ႇလဵၵ်ႉလႆႈႁၼ်ၼၼ်ႉဢေႃႈ။-
ပေႃႈၸဝ်ႈတီႈၶႃႈ။ ပိူဝ်ႈဢၼ်ၸဝ်ႈႁဝ်းမီးဢလူဝ်ႇၸိူဝ်ႉၼင်ႇၼၼ်လႄႈၸႂ်ႈတီႈၶႃႈယဝ်ႉဢေႃႈ။
“ၵႃႈမီးတင်းသဵင်ႈတင်းလူင်ၸိုင်၊ပေႃႈၸဝ်ႈၵဝ်ၼၼ်ႉဢၢပ်ႈပၼ်တီႈၵဝ်ယဝ်ႉ။ လိူဝ်သေပေႃႈၸဝ်ႈၼၼ်ႉ၊ၽူႈလႂ်ဢမ်ႇႁုၸၵ်းလုၵ်ႈၸဝ်ႈ။ လိူဝ်သေလုၵ်ႈၸဝ်ႈဢိၵ်ႇတင်းၵေႃႉဢၼ်လုၵ်ႈၸဝ်ႈၽုၺ်ႇဢွၵ်ႇၼႄပျႃးပၼ်ၼၼ်ႉ၊ၽူႈလႂ်ဢမ်ႇႁုၸၵ်းပေႃႈၸဝ်ႈ။
“သူၸိူဝ်းဢၼ်ယၢပ်ႇၸႂ်လႄႈႁၢပ်ႇၶူဝ်းၼၵ်းၼႃႇတင်းသဵင်ႈတင်းလူင်ၶဝ်႟။ မႃးတီႈၵဝ်တႃႉ။ ၵဝ်တၵ်းႁႂ်ႈသူလႆႈလိုဝ်ႈသဝ်းလႄႈၵတ်းယဵၼ်ၸႂ်ဢေႃႈ။-
ဢဝ်ၵၢၼ်းၵဝ်တၢင်ႇလႄႈႁၢပ်ႇတႃႉ။ သွၼ်ဢဝ်ၼႄးတီႈၵဝ်တႃႉ။ ပိူဝ်ႈဢၼ်ၵဝ်မီးၸႂ်ဢၼ်ၼိမ်သိမ်ႇၶျႃးတႅမ်ႇလႄႈၸႂ်ဝိၺိၺ်ႇသူတေလႆႈယဵၼ်ၸႂ်ၶျၢမ်းသႃႇဢေႃႈ။-
လွင်ႈမၼ်းၸမ်ႉ၊ၵၢၼ်းႁၢပ်ႇၵဝ်ၼႆႉႁၢပ်ႇငၢႆႈဢေႃႈ။ ၶူဝ်းၵဝ်ၼႆႉၵေႃႈမဝ်ဢေႃႈ၊” ဝႃႈၼင်ႇၼႆဢေႃႈ။
လိုၼ်းၼၼ်ႉ၊မိူဝ်ႈဢၼ် ၸဝ်ႈယေႇသု၊ ပႆတၢင်းၽႃႇလတ်းၵႂႃႇၵႃႈၼႂ်းႁႆႈၶဝ်ႈၵျုင်ႇၼႂ်းဝၼ်းၵမ်သိၼ်ၼၼ်ႉ၊ တပႄးၸဝ်ႈတင်းလၢႆတွင်ႉမႆႈၼႃႇလႄႈယၵ်းႁူင်းၶဝ်ႈၵျုင်ႇသေလႄႈၵိၼ်ဢေႃႈ။-
ၵူၼ်းၵိူင်း ၽႃႇရိသႄး၊ ၶဝ်ႁၼ်လႄႈလၢတ်ႈတီႈ ၸဝ်ႈယေႇသု၊ လႄႈဝႃႈ၊ “တူၺ်းလူး။ တပႄးသြႃႇႁဝ်းႁဵတ်းၸိူဝ်ႉၼင်ႇၼႆၼႂ်းဝၼ်းၵမ်သိၼ်ၼႆႉၶတ်းၵၼ်တင်းပိင်းၺၢပ်ႈတြႃးၶႃႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “လွင်ႈဢၼ်ၶုၼ်ႁေႃၶမ်း တႃႇဝိတ်ႈ၊ တင်းၵူၼ်းဢွၼ်ႇမၼ်းတင်းလၢႆတွင်ႉမႆႈၼႃႇလူင်လၢင်လႄႈၶဝ်ႁဵတ်းၸိူဝ်ႉႁိုဝ်ၼၼ်ႉသူဢမ်ႇတွၼ်ႉၽတ်းဢၢၼ်ႇမႅၼ်ႈႁိုဝ်း။-
မၼ်းဢိၵ်ႇတင်းၵူၼ်းဢွၼ်ႇမၼ်းၸိူဝ်းၼၼ်ႉၶဝ်ႈၵႃႈၼႂ်းႁိူၼ်းၽြႃးပဵၼ်ၸဝ်ႈလႄႈ၊ပိၵ်ႉသမ်ႉႁုလွင်ႈဢၼ်ၶဝ်ႈမုၼ်းဢၼ်သၢၵ်ႈလူႇၵႃႈတီႈၽၢႆႇၼႃႈၽြႃးပဵၼ်ၸဝ်ႈယဝ်ႉၸိူဝ်းၼၼ်ႉလိူဝ်သေယဵၸ်ႈပရေႃးႁဵၵ်ႈ ၵူၺ်း၊ၽူႈလႂ်ဢမ်ႇလႆႈၵိၼ်ဝႃႈၼႆသေၵေႃႈ၊ၶဝ်ၼၼ်ႉဢွၼ်ၵၼ်ဢဝ်ၵိၼ်ဢေႃႈ။-
လွင်ႈဢၼ်ယဵၸ်ႈပရေႃးႁဵၵ်ႈတင်းလၢႆ၊ပိၵ်ႉသမ်ႉသိၼ်လုၼႂ်းၵျွင်းပိၵ်ႈမၢၼ်ႇၸဝ်ႈၼႂ်းဝၼ်းၵမ်သိၼ်သေၵေႃႈ၊ဢမ်ႇၽိတ်းပိူင်ႈဢပျတ်ႈၼၼ်ႉၸိုင်၊သူဢမ်ႇယၢမ်ႈလႆႈၽတ်းဢၢၼ်ႇၵႃႈၼႂ်းတြႃး မူဝ်းသေႇ၊ ၼၼ်ႉႁိုဝ်း။-
ၵဝ်ဝႃႈတီႈသူၸမ်ႉ၊ဢၼ်ယႂ်ႇမျၢတ်ႈၼႃႇသေၵျွင်းပိၵ်ႈမၢၼ်ႇၸဝ်ႈၼၼ်ႉမီးၵႃႈတီႈၼႆႈဢေႃႈ။-
ပေႃးသူႁုၵႂၢမ်းတြႃးၸဝ်ႈဢၼ်ဝႃႈ၊ ‘ၵဝ်ထုၵ်ႇၸႂ်တၢင်းႁၵ်ႉၵရုၼႃႇလႄႈဢမ်ႇၶႂ်ႈလႆႈၶိူင်ႈတၢင်းလူႇ၊’ ဝႃႈၼႆၸိုင်၊သူတၵ်းဢမ်ႇၸီႇယၢင်ႇတီႈၶဝ်ၸိူဝ်းဢၼ်ဢမ်ႇမီးဢပျတ်ႈၼၼ်ႉယဝ်ႉ။-
ၵွပ်ႈၸိူဝ်ႉၼင်ႇႁိုဝ်ဝႃႈၼႆၸမ်ႉ၊ လုၵ်ႈၵူၼ်း၊ ပဵၼ်ၸဝ်ႈဝၼ်းၵမ်သိၼ်ဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ လုၵ်ႉသေၵႃႈတီႈၼၼ်ႈသိုပ်ႇၵႂႃႇလႄႈၶဝ်ႈၵႂႃႇၵႃႈၼႂ်းၸရွပ်ႈႁေႃးတြႃးတီႈၼိုင်ႈဢေႃႈ။-
တီႈၼၼ်ႈ၊မီးၵူၼ်းဢၼ်မိုဝ်းႁဵဝ်ႇၵေႃႉၼိုင်ႈဢေႃႈ။ ၶဝ်ၸိူဝ်းဢၼ်ၵျၢမ်ႇႁႃတီႈတၵ်းတၢင်ႇဢပျတ်ႈတီႈမၼ်းၸဝ်ႈၵေႃႈ၊မီးဝႆႉတီႈၼၼ်ႈလႄႈလဝ်ႈထၢမ်လႄႈဝႃႈ၊ “ၸွင်ႇထုၵ်ႇလီယူတ်းယႃၵႃႈၼႂ်းဝၼ်းၵမ်သိၼ်ၶႃႈႁိုဝ်း၊” ဝႃႈၼင်ႇၼႆဢေႃႈ။
မၼ်းၸဝ်ႈၶိုၼ်းလၢတ်ႈလႄႈဝႃႈ၊ “ပေႃးဝႃႈၼႂ်းသူၼႆႉၵေႃႉၼိုင်ႈမၼ်းမီးသူဝ်းဢွၼ်ႇတူဝ်ၼိုင်ႈလႄႈသူဝ်းဢွၼ်ႇၼၼ်ႉတူၵ်းထၢင်ယူႇၼႂ်းဝၼ်းၵမ်သိၼ်ၸိုင်၊ယင်းဢမ်ႇယိပ်းၵမ်၊ဢမ်ႇၸၼ်ဢွၵ်ႇလႄႈၼႂ်းသူၼႆႉတၵ်းယူႇလႆႈသေၵေႃႉသေၵူၼ်းႁိုဝ်း။-
ၵူၼ်းယဵင်ႈၶႅၼ်းထိူၵ်ႈၵႃႈၼႃႇသေသူဝ်းဢေႃႈ။ ပိူဝ်ႈၼႆလႄႈႁဝ်းမီးဢၶႂၢင်ႉဢၼ်ႁဵတ်းလွင်ႈတၢင်းလီၼႂ်းဝၼ်းၵမ်သိၼ်ဢေႃႈ၊” ဝႃႈၼင်ႇၼႆသေယဝ်ႉ၊-
လၢတ်ႈတီႈၵေႃႉၼၼ်ႉလႄႈဝႃႈ၊ “ယဵတ်ႇမိုဝ်းမႂ်းတႃႉ၊” ဝႃႈၼင်ႇၼႆလႄႈ၊ ၵေႃႉၼၼ်ႉၵေႃႈယဵတ်ႇမိုဝ်းမၼ်းလႄႈမိုဝ်းမၼ်းၵေႃႈလီမႃးမိူၼ်ၸိူဝ်ႉၼင်ႇတၢင်ႇၶွၼ်ၼၼ်ႉဢေႃႈ။-
ႁဵတ်းၼၼ်လႄႈၵူၼ်းၵိူင်း ၽႃႇရိသႄး၊ ၶဝ်ဢွၵ်ႇၵႂႃႇတိူင်ႇပၢင်ႇၶိုင်ႁႃလၢႆးဢၼ်တၵ်းလႆႈႁဵတ်းၸိူဝ်ႉၼင်ႇႁိုဝ်ႁႂ်ႈလႆႈဢဝ်မၼ်းၸဝ်ႈတၢႆၼၼ်ႉဢေႃႈ။
ၸဝ်ႈယေႇသု၊ လႆႈႁုလွင်ႈတၢင်းၼၼ်ႉလႄႈဝႄႈၵႂႃႇတၢင်ႇတီႈသေဢေႃႈ။ ၵူၼ်းၼမ်ၼႃႇၵႂႃႇၸွမ်းမၼ်းၸဝ်ႈလႄႈမၼ်းၸဝ်ႈႁႂ်ႈတၢင်းၶႆႈတၢင်းပဵၼ်ၶဝ်ၸိုၼ်ႈႁၢႆဢေႃႈ။-
ၼင်ႇႁိုဝ်ၶဝ်တၵ်းဢမ်ႇလၢတ်ႈလွင်ႈမၼ်းၸဝ်ႈတီႈပိူၼ်ႈၸိုင်၊မၼ်းၸဝ်ႈႁၢမ်ႈၶဝ်ၼႃႇလူင်လၢင်ဢေႃႈ။-
ဢၼ်ပဵၼ်မႃးၸိူဝ်ႉၼင်ႇၼႆၼႆႉ၊မႅၼ်ႈၸွမ်းၵႃႈၼင်ႇဢၼ်တႅမ်ႈဝႆႉၵႃႈၼႂ်းၵျၢမ်းဢၼႃႇၵၢတ်ႈ ဢိသႃႇယႃႉ၊ လႄႈဝႃႈ၊-
“တူၺ်းၵူၼ်းၸႂ်ႉၵူၼ်းသွႆၵဝ်ဢၼ်ၵဝ်လိူၵ်ႈၵဵပ်းဝႆႉၼႆႉတႃႉ။ မၼ်းပဵၼ်ၵေႃႉဢၼ်ၵဝ်ႁၵ်ႉၼႃႇလႄႈထုၵ်ႇၸႂ်ၼႃႇဢေႃႈ။ ၵဝ်တၵ်းႁႂ်ႈဝိၺိၺ်ႇၵဝ်တူၵ်းႁွတ်ႈၵႃႈၼိူဝ်မၼ်းလႄႈ၊ မၼ်းတၵ်းပိုၼ်ၽၢဝ်ႇတြႃးသိုဝ်ႈတေႃႇ၊ ၵႃႈတီႈၵူၼ်းၵူႈၸိူဝ်ႉၵူႈမဵဝ်းၼၼ်ႉဢေႃႈ။
မၼ်းတၵ်းဢမ်ႇတွပ်ႇဢမ်ႇထဵင်၊ဢမ်ႇႁွင်ႉဢမ်ႇမေႃး၊ တၵ်းဢမ်ႇႁဵတ်းသဵင်ယႂ်ႇလႄႈႁေႃးတြႃးၸွမ်းသဵၼ်ႈတႃသၢႆတၢင်း။
မၼ်းတၵ်းဢမ်ႇႁၵ်းမႆႉဢေႃႈဢၼ်ၶၢမ်ႇတၢင်းဢၼ်ယဵပ်ႇတူပ်ႉၼၼ်ႉ၊ တၵ်းဢမ်ႇပဝ်ႇမွတ်ႇသႆႈၵွၵ်းၽႆးဢၼ်ယင်းတိုၵ်ႉၵႂၢၼ်းယူႇၼၼ်ႉ။ မၼ်းတၵ်းယိူၼ်ႉၶၢမ်ႇယူႇတေႃႇထိုင်ႁွတ်ႈ မၼ်းႁဵတ်းႁႂ်ႈတြႃးဢၼ်သိုဝ်ႈတေႃႇလႆႈပႄႉလႆႈၼႅင်ႇလႄႈ။
ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလူင်၊ တၵ်းဢွၼ်ၵၼ်ဢိင်ပိုင်ႈၸိုဝ်ႈသဵင်မၼ်းဢေႃႈ၊” ဝႃႈၼင်ႇၼႆၼၼ်ႉဢေႃႈ။
ယၢမ်းၼၼ်ႉ၊ပိူၼ်ႈဢဝ်ၵူၼ်းဢၼ်ၽီႁၢႆႉၶဝ်ႈလႄႈတႃမွတ်ႇဢႃႉယူႇၼၼ်ႉၵေႃႉၼိုင်ႈ၊မႃးၸူးတီႈ ၸဝ်ႈယေႇသု၊ ဢေႃႈ။ မၼ်းၸဝ်ႈပၼ်ၶျၢမ်းသႃႇတီႈၵေႃႉၼၼ်ႉလႄႈတႃမၼ်းၶိုၼ်းႁၼ်မႃး၊လၢတ်ႈၵႂၢမ်းလႆႈမႃးဢေႃႈ။-
ၵူၼ်းဢၼ်ၸုဢၼ်တုမ်ၸိူဝ်းၼၼ်ႉဢၢမ်းၼႃႇလူင်လၢင်လႄႈလၢတ်ႈဝႃႈ၊ “ၵေႃႉၼႆႉပဵၼ်လုၵ်ႈ တႃႇဝိတ်ႈ၊ ႁိုဝ်း၊” ဝႃႈၼင်ႇၼႆဢေႃႈ။
ၽႃႇရိသႄး၊ ၶဝ်လႆႈငိၼ်းလႄႈလၢတ်ႈဝႃႈ၊ “မၼ်းႁေႃႈၽီႁၢႆႉဢွၵ်ႇလႆႈၵွပ်ႈပိူဝ်ႈၶုၼ်ၽီႁၢႆႉ ပေႇလႃႉၸေႇပုလႃႉ၊ ပၼ်တၼ်းၶူဝ်းတီႈမၼ်းဢိူဝ်း၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ႁုၸႅင်ႈလွင်ႈတၢင်းဢၼ်ၶဝ်ၵျၢမ်ႇပွင်ၼၼ်ႉသေလႄႈလၢတ်ႈဝႃႈ၊ “ပေႃးမိူင်းၼိုင်ႈၽႄမႅင်ႇပဵၼ်လၢႆမူႇလၢႆၸုမ်းလႄႈၼင်ႇၵၼ်ၵၼ်တိုၵ်းတေႃးၵၼ်ၸိုင်၊မိူင်းၼၼ်ႉတၵ်းၸဵဝ်းလုဢေႃႈ။ ပေႃးဝဵင်းၼိုင်ႈဢမ်ႇၼၼ်ႁိူၼ်းၼိုင်ႈၽႄပဵၼ်လၢႆမူႇလၢႆၸုမ်းလႄႈၽိတ်းၵၼ်မေႃးၵၼ်ၸိုင်၊တၵ်းဢမ်ႇတႄႇဢမ်ႇမၼ်ႈလႆႈ။-
ပိူင်လဵဝ်ၵၼ်၊ပေႃးမႃႇၼၢတ်ႈၶုၼ်သူင်ယူႇၽၢႆႇၼိုင်ႈလိုပ်ႈႁေႃႈမႃႇၼၢတ်ႈတၢင်ႇၽုင်ၸိုင်၊ၶဝ်တၵ်းၽၢတ်ႇၽႄၵၼ်လႄႈမိူင်းၶဝ်တၵ်းလုဢေႃႈ။-
သူဝႃႈၵဝ်ဢိင်တၼ်းၶူဝ်း ပေႇလႃႉၸေႇပုလႃႉ၊ လႄႈႁေႃႈၽီႁၢႆႉပႅတ်ႈဝႃႈၼႆယဝ်ႉ။ ပေႃးပဵၼ်ၼၼ်တပႄးတပၢၼ်းသူဢိင်ၽူႈလႂ်လႄႈႁေႃႈၽီႁၢႆႉဢွၵ်ႇပႅတ်ႈ။ ပေႃးပဵၼ်ၼႆၶဝ်ၼၼ်ႉတၵ်းပဵၼ်ၵေႃႉဢၼ်ၸီႇယၢင်ႇတြႃးတီႈသူဢေႃႈ။-
ၵဝ်ဢိင် ပေႇလႃႉၸေႇပုလႃႉ၊ ဢမ်ႇၸႂ်ႈ။ ဝိၺိၺ်ႇၽြႃးပဵၼ်ၸဝ်ႈပၼ်တၼ်းၶူဝ်းဢၼ်လိုပ်ႈႁေႃႈၽီႁၢႆႉဢွၵ်ႇလႄႈလွင်ႈတၢင်းၼႆႉပဵၼ်သၢၵ်ႈသေႇတီႈတၢင်းဢၼ်မိူင်းၽြႃးပဵၼ်ၸဝ်ႈႁွတ်ႈမႃးတီႈသူဢမၢၼ်ႇၶၼ်ပဵၼ်ယဝ်ႉ။
“ၼႄးၼိုင်ႈၸမ်ႉ၊ပေႃးယင်းဢမ်ႇမတ်ႉၽုၵ်ႇၵူၼ်းႁႅင်းလူင်ဢွၼ်တၢင်းၸိုင်၊ၽူႈလႂ်တၵ်းၶဝ်ႈၵႃႈၼႂ်းႁိူၼ်းမၼ်းလႄႈႁိမ်ႁူင်ႇဢဝ်ၶူဝ်းမၼ်းလႆႈ။ မတ်ႉၽုၵ်ႇမၼ်းဝႆႉလီလီငၢမ်းငၢမ်းယဝ်ႉၸင်ႇ၊ႁိမ်ဢဝ်ၶူဝ်းလဵင်းမၼ်းလႆႈဢေႃႈ။
“ၶဝ်ၸိူဝ်းဢၼ်ဢမ်ႇယူႇၽၢႆႇၵဝ်ၼၼ်ႉ၊ပဵၼ်ရၢၼ်ႇသူႇၵဝ်ဢေႃႈ။ ၶဝ်ၸိူဝ်းဢၼ်ဢမ်ႇၸွႆႈၵဝ်ႁဵတ်းႁႂ်ႈပဵၼ်မူႇပဵၼ်ၸုမ်းၼၼ်ႉ၊ပဵၼ်ၵေႃႉဢၼ်ႁဵတ်းႁႂ်ႈတႅၵ်ႇၽႄမၢၵ်ႇမိူဝ်ၵႂႃႇဢေႃႈ။-
ၵဝ်လၢတ်ႈတီႈသူၸမ်ႉ၊ၵူၼ်းၸိုင်၊ႁွတ်ႈထိုင်တၢင်းဢၼ်ပွႆႇလွတ်ႈဢပျတ်ႈဢၼ်သႄႉသွမ်းၽြႃးပဵၼ်ၸဝ်ႈၵူႈၸိူဝ်ႉၵူႈပိူင်ၼၼ်ႉလႆႈယူႇဢေႃႈ။ ၵေႃႉဢၼ်သႄႉသွမ်းဝိၺိၺ်ႇၸဝ်ႈၸမ်ႉ၊ တၵ်းဢမ်ႇႁွတ်ႈထိုင်တၢင်းဢၼ်ပွႆႇလွတ်ႈဢပျတ်ႈလႆႈ။-
ၽူႈလႂ်သေဢမ်ႇဝႃႈ၊ပေႃးၽိတ်းသူပ်းၽိတ်းၵႂၢမ်းတီႈ လုၵ်ႈၵူၼ်း၊ ၸိုင်၊ဢပျတ်ႈမၼ်းပွႆႇလွတ်ႈလႆႈယူႇဢေႃႈ။ ၵူၺ်းၵႃႈ၊တၢင်းဢၼ်ၽိတ်းသူပ်းၽိတ်းၵႂၢမ်းတီႈဝိၺိၺ်ႇဢၼ်မူတ်းၸၢင်ႇၸဝ်ႈၼၼ်ႉၸမ်ႉ၊ဢပျတ်ႈၼၼ်ႉၸၢတ်ႈၼႆႉၸၢတ်ႈၼႃႈၵေႃႈဢမ်ႇပွႆႇလွတ်ႈလႆႈ။
“ၼင်ႇႁိုဝ်တၵ်းလႆႈမၢၵ်ႇဢၼ်လီၸိုင်၊ႁႂ်ႈတူၼ်ႈမၼ်းမီးႁႅင်းတႃႉ။ ပေႃးတူၼ်ႈဢမ်ႇလီၸိုင်၊ဢမ်ႇၸၢင်ႈလႆႈမၢၵ်ႇဢၼ်လီ။ လွင်ႈမၼ်းၸမ်ႉ၊တူၺ်းမၢၵ်ႇမၼ်းလႄႈႁုလွင်ႈတူၼ်ႈမၼ်းဢေႃႈ။-
ၵူၼ်းမိူၵ်ႈဢၼ်မိူၼ်ငူးႁၢႆႉၼႆႉ႟။ သူႁၢႆႉမိူၵ်ႈထၢၼ်ႇၼႆႉလႄႈၵႂၢမ်းဢၼ်လီဢွၵ်ႇသူပ်းသူလႆႈႁိုဝ်း။ သူပ်းၸၢင်ႈလၢတ်ႈၸွမ်းၵႃႈၼင်ႇဢၼ်မီးတဵမ်ဝႆႉၵႃႈၼႂ်းႁူဝ်ၸႂ်ၼၼ်ႉဢေႃႈ။-
ၵူၼ်းလီၸိုင်၊ၸၢင်ႈဢဝ်လွင်ႈဢၼ်လီၵႃႈၼႂ်းၽၼ်ႇတႃႇႁူဝ်ၸႂ်ဢၼ်လီမၼ်းၼၼ်ႉဢွၵ်ႇလႄႈၼႄပျႃးဢေႃႈ။ ၵူၼ်းမိူၵ်ႈၸမ်ႉ၊ၸၢင်ႈဢဝ်လွင်ႈမိူၵ်ႈၵႃႈၼႂ်းၽၼ်ႇတႃႇႁူဝ်ၸႂ်ဢၼ်မိူၵ်ႈမၼ်းၼၼ်ႉ၊ဢွၵ်ႇလႄႈၼႄပျႃးဢေႃႈ။
“ၵဝ်ဝႃႈတီႈသူၸမ်ႉ၊ၵႂၢမ်းမဝ်မၢင်ဢၼ်ဢမ်ႇပွင်လွင်ႈၵႃႈသင်၊ဢၼ်ၵူၼ်းတင်းလၢႆလၢတ်ႈၵူႈၶေႃႈၵူႈၵမ်းၼၼ်ႉ၊ၵူၼ်းတင်းလၢႆတၵ်းလႆႈၶၢမ်ႇဢဝ်ဢၵျူဝ်းဢပျတ်ႈၼႂ်းဝၼ်းဢၼ်ၸီႇယၢင်ႇတြႃးၼၼ်ႉဢေႃႈ။-
လွင်ႈမၼ်းၸမ်ႉ၊တၵ်းလႆႈၶၢမ်ႇတၢင်းဢၼ်ၸီႇယၢင်ႇဢပျတ်ႈႁိုဝ်း၊တၵ်းလႆႈၶၢမ်ႇတၢင်းဢၼ်ပွႆႇလွတ်ႈဢပျတ်ႈႁိုဝ်း၊မၼ်းယူႇတီႈၶေႃႈၵႂၢမ်းမႂ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊သြႃႇမေႃၵျၢမ်းထမ်ႇမႃႉတင်းလၢႆတင်းၵူၼ်းၵိူင်း ၽႃႇရိသႄး၊ ၶဝ်ၵမ်ႈၽွင်ႈသုတ်ႉၸူးတီႈ ၸဝ်ႈယေႇသု၊ လႄႈ၊ယွၼ်းႁႂ်ႈမၼ်းၸဝ်ႈၼႄပျႃးၼိမိၵ်ႈလၢၵ်ႈၶၼႃႇဢၼ်လၢၵ်ႇဢၼ်လၢႆးသေၸိူဝ်ႉသေပိူင်ဢေႃႈ။
မၼ်းၸဝ်ႈၵေႃႈလၢတ်ႈလႄႈဝႃႈ၊ “ၵူၼ်းမဵဝ်းဢၼ်ႁၢႆႉမိူၵ်ႈလႄႈဢမ်ႇမီးသိၼ်ၼႆႉ၊ယင်းၸၢင်ႈယွၼ်းႁႂ်ႈလႆႈႁၼ်ၼိမိၵ်ႈလၢၵ်ႈၶၼႃႇၼေႃ။ လိူဝ်သေၼိမိၵ်ႈလၢၵ်ႈၶၼႃႇပရေႃးၽႅတ်ႈ ယူဝ်းၼႃႉ၊ ၵူၺ်းလႄႈ၊တၵ်းဢမ်ႇလႆႈႁဵတ်းၼႄလၢၵ်ႈၶၼႃႇဢၼ်လႂ်ယဝ်ႉ။-
ၸိူဝ်ႉၼင်ႇဢၼ်သြႃႇ ယူဝ်းၼႃႉ၊ ယူႇၼႂ်းတွင်ႉပႃသၢမ်ဝၼ်းသၢမ်ၶိုၼ်းၼၼ်ႉ လုၵ်ႈၵူၼ်း၊ တၵ်းယူႇၼႂ်းတွင်ႉလိၼ်မိူင်းသၢမ်ဝၼ်းသၢမ်ၶိုၼ်းဢေႃႈ။-
ၼႂ်းဝၼ်းဢၼ်ၸီႇယၢင်ႇတြႃးၼၼ်ႉ၊ၵူၼ်းဝဵင်း ၼိၼေႇဝူၺ်ႇ၊ ၶဝ်၊ၵွပ်ႈပိူဝ်ႈၶုၵ်းၸႂ်လႆႈမႆႈၸႂ်လႄႈပိၼ်ႇၸႂ်ၵွပ်ႈတြႃးဢၼ်သြႃႇ ယူဝ်းၼႃႉ၊ ႁေႃးၼၼ်ႉလႄႈ၊ၶဝ်တၵ်းၶတ်းတႃႉၵၼ်တင်းသူသေယဝ်ႉ၊ၸွႆးတြႃးၸီႇယၢင်ႇသူတီႈဢေႃႈ။ ၵဝ်ဝႃႈၸမ်ႉ၊ၵႃႈတီႈၼႆႈမီးၵေႃႉဢၼ်ယႂ်ႇမျၢတ်ႈသေသြႃႇ ယူဝ်းၼႃႉ၊ ဢေႃႈ။-
ၼႂ်းဝၼ်းဢၼ်ၸီႇယၢင်ႇတြႃးၼၼ်ႉ၊ၼၢင်းႁေႃၶမ်းဢၼ်ဢုပ်ႉပိူင်ႇမိူင်း သေႇၽႃႉ၊ ၽၢႆႇတၢင်းၸၢၼ်းၼၼ်ႉ၊ တၵ်းလုၵ်ႉယူႇၽၢႆႇၼိုင်ႈသေယဝ်ႉ၊တၢင်ႇဢပျတ်ႈသူၵွပ်ႈပိူဝ်ႈမၼ်းၼၢင်းၼၼ်ႉလုၵ်ႉသေၵႃႈတီႈမိူင်းမၼ်းၼၢင်းမႃးၶၢဝ်းတၢင်းယၢဝ်းၼႃႇ၊ႁႂ်ႈလႆႈထွမ်ႇငိၼ်းၵႂၢမ်းပိင်ႇၺႃႇၶုၼ်လူင် သေႃးလမုၼ်ႇ၊ ဢေႃႈ။ ၵဝ်သမ်ႉဝႃႈထႅင်ႈၸမ်ႉ၊ၵႃႈတီႈၼႆႈမီးၵေႃႉဢၼ်ယႂ်ႇမျၢတ်ႈသေၶုၼ်လူင် သေႃးလမုၼ်ႇ၊ ဢေႃႈ။
“မိူဝ်ႈဢၼ်ၽီႁၢႆႉဢွၵ်ႇသေၵႃႈတီႈၵူၼ်းသေၵေႃႉၵေႃႉၵႂႃႇၸိုင်၊ၽီႁၢႆႉၼၼ်ႉလႄႇၵႂႃႇႁွတ်ႈၽႅဝ်တီႈဢၼ်ႁႅင်ႈဢၼ်ႁွင်ႁႂ်ႈလႆႈသွၵ်ႈႁႃတီႈလိုဝ်ႈသဝ်းသေၵေႃႈ၊ပေႃးမၼ်းဢမ်ႇထူပ်းတီႈလိုဝ်ႈသဝ်းၸိုင်၊-
မၼ်းလၢတ်ႈတီႈတူဝ်ၸဝ်ႈၵဝ်ႇလႄႈဝႃႈ၊ ‘ၵဝ်တၵ်းၶိုၼ်းၵႂႃႇၵႃႈတီႈႁိူၼ်းၵဝ်ႇၵဝ်ၼၼ်ႉလူးၵွၼ်ႇ၊’ ဝႃႈၼင်ႇၼႆသေယဝ်ႉ၊ ၶိုၼ်းပွၵ်ႈမႃးထူပ်းႁၼ်ႁိူၼ်းၼၼ်ႉပဝ်ႇလၢပ်ႈဝႆႉလႄႈပတ်းၽဵဝ်ႈႁၢင်ႈၶိူင်ႈဝႆႉလီလီယဝ်ႉဢေႃႈ။-
ၵမ်းၼၼ်ႉ၊မၼ်းၶိုၼ်းပွၵ်ႈၵႂႃႇႁွင်ႉၽီဢၼ်ႁၢႆႉသေမၼ်းၸဵတ်းတူဝ်မႃးၶဝ်ႈၵႃႈၼႂ်းၵူၼ်းၵေႃႉၼၼ်ႉသေလႄႈယူႇဢေႃႈ။ ၵူၼ်းၵေႃႉၼၼ်ႉယဵင်ႈၶႅၼ်းယူႇယၢပ်ႇၽိုတ်ႇၼႃႇသေဢၼ်ပဵၼ်မႃးၵမ်းဢွၼ်တၢင်းၼၼ်ႉဢေႃႈ။ ပိူင်လဵဝ်ၵၼ်၊တီႈၵူၼ်းမဵဝ်းဢၼ်ႁၢႆႉမိူၵ်ႈၼႆႉတၵ်းပဵၼ်ၸိူဝ်ႉၼင်ႇၼၼ်ဢေႃႈ၊” ဝႃႈၼင်ႇၼႆဢေႃႈ။
ၼႂ်းမိူဝ်ႈဢၼ် ၸဝ်ႈယေႇသု၊ ယင်းတိုၵ်ႉႁေႃးလၢတ်ႈတီႈမူႇၵူၼ်းတင်းလၢႆၸိူဝ်ႉၼင်ႇၼႆယူႇၼၼ်ႉ၊မႄႈၸဝ်ႈတင်းၼွင်ႉၸၢႆးၸဝ်ႈၸိူဝ်းၼၼ်ႉႁွတ်ႈမႃးဢေႃႈ။ ၶဝ်ၸုၵ်းယူႇပႃႈၼွၵ်ႈၽၵ်းတူလႄႈယွၼ်းႁႂ်ႈလႆႈလၢတ်ႈတေႃႇမၼ်းၸဝ်ႈဢေႃႈ။-
ၼႂ်းမူႇၵူၼ်းၼၼ်ႉၵေႃႉၼိုင်ႈၸင်ႇလၢတ်ႈထိုင်တီႈမၼ်းၸဝ်ႈလႄႈဝႃႈ၊ “တူၺ်းၶႃႈလူး၊မႄႈၸဝ်ႈတင်းၼွင်ႉၸၢႆးၸဝ်ႈတင်းလၢႆၸုၵ်းပႂ်ႉယူႇပႃႈၼွၵ်ႈလႄႈယွၼ်းႁႂ်ႈလႆႈလၢတ်ႈတေႃႇၸဝ်ႈႁဝ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၶိုၼ်းလၢတ်ႈလႄႈဝႃႈ၊ “မႄႈၵဝ်ဢၼ်ဝႃႈၼၼ်ႉပဵၼ်ၽူႈလႂ်၊ၼွင်ႉၵဝ်တင်းလၢႆဢၼ်ဝႃႈၼၼ်ႉပဵၼ်ၽူႈလႂ်၊” ဝႃႈၼင်ႇၼႆယဝ်ႉၸင်ႇ၊-
ဢဝ်မိုဝ်းၸိၼႄတီႈတပႄးၸဝ်ႈတင်းလၢႆသေယဝ်ႉ၊လၢတ်ႈလႄႈဝႃႈ၊ “တူၺ်းတႃႉ။ ၸိူဝ်းၼႆႉယဝ်ႉ၊ပဵၼ်မႄႈၵဝ်၊ပဵၼ်ၼွင်ႉၸၢႆးၵဝ်တင်းလၢႆဢေႃႈ။-
ႁဵတ်းႁိုဝ်လႄႈဝႃႈၼင်ႇၼႆ၊ၽူႈလႂ်သေဢမ်ႇဝႃႈ၊ၵေႃႉဢၼ်ၵမ်ၵျၢင်ႉၸွမ်းၼင်ႇဢလူဝ်ႇပေႃႈၸဝ်ႈၵဝ်၊ဢၼ်မီးယူႇၵႃႈၼိူဝ်ၽုင်ႇၵၢင်ႁၢဝ်ပုၼ်ႉၼၼ်ႉ၊ၵေႃႉၼၼ်ႉပဵၼ်ၼွင်ႉယိင်းၵဝ်ၼွင်ႉၸၢႆးၵဝ်ပဵၼ်၊မႄႈၵဝ်ဢေႃႈ၊” ဝႃႈၼင်ႇၼႆဢေႃႈ။
ဝၼ်းၼၼ်ႉ၊ ၸဝ်ႈယေႇသု၊ ဢွၵ်ႇသေၵႃႈတီႈႁိူၼ်းၼၼ်ႉသေလႄႈၵႂႃႇၸူးၵႃႈတီႈၼမ်ႉၼွင်သေယဝ်ႉ၊ၼင်ႈယူႇတီႈႁိမ်းၽင်ႇၼွင်ဢေႃႈ။-
ၵူၼ်းပဵၼ်မူႇပဵၼ်ၽုင်ၸွမ်းမၼ်းၸဝ်ႈၵႂႃႇလႄႈလွမ်ႉႁွပ်ႈမၼ်းၸဝ်ႈယူႇတေႃႇထိုင်ႁွတ်ႈမၼ်းၸဝ်ႈလႆႈၶဝ်ႈမႃးၼင်ႈၵႃႈၼႂ်းႁိူဝ်းသေလႄႈၵူၼ်းဢၼ်ၸုဢၼ်တုမ်ၸိူဝ်းၼၼ်ႉဢွၼ်ၵၼ်ၸုၵ်းယူႇတီႈႁိမ်းၽင်ႇၼွင်ဢေႃႈ။-
မိူဝ်ႈၼၼ်ႉ၊မၼ်းၸဝ်ႈဢဝ်ၵႂၢမ်းဢုပမႃႇၼမ်ၼႃႇႁေႃးလၢတ်ႈတီႈၶဝ်ဢေႃႈ။
ၸဝ်ႈယေႇသု၊ ႁေႃးလၢတ်ႈၵႂၢမ်းဢုပမႃႇလႄႈဝႃႈ၊ “မီးၵူၼ်းၵေႃႉၼိုင်ႈဢွၵ်ႇၵႂႃႇဝၢၼ်ႇၸိူဝ်ႉဝၢၼ်ႇၽၼ်းဢေႃႈ။ မဵတ်ႉၽၼ်းဢၼ်မၼ်းဝၢၼ်ႇၵႂႃႇၸိူဝ်းၼၼ်ႉၵမ်ႈၽွင်ႈတူၵ်းၵႃႈၼိူဝ်ၵၢင်တၢင်းလႄႈၼူၵ်ႉလႂ်မႃးၵဵပ်းၵိၼ်မူတ်းသေဢေႃႈ။-
မဵတ်ႉၽၼ်းၵမ်ႈၽွင်ႈတူၵ်းၵႃႈတီႈလိၼ်ဢၼ်မီးမၢၵ်ႇႁိၼ်ၼမ်ၼၼ်ႉလႄႈတႅၵ်ႇငွၵ်ႈဢွၵ်ႇငူင်းမႃးၵမ်းလဵဝ်သေၵေႃႈ၊ပိူဝ်ႈဢၼ်ဢမ်ႇမီးလိၼ်ဢၼ်လိုၵ်ႉၼၼ်ႉ၊-
မိူဝ်ႈဢၼ်လႅတ်ႇမႆႈမႃးၸိုင်၊ၶိုၼ်းႁဵဝ်ႇၸွပ်ႈလႄႈတၢႆၵႂႃႇၵွပ်ႈပိူဝ်ႈႁၢၵ်ႈမၼ်းဢမ်ႇပေႃးမီးၼၼ်ႉဢေႃႈ။-
မဵတ်ႉၽၼ်းၵမ်ႈၽွင်ႈတူၵ်းၵႃႈၼႂ်းယုမ်းၼၢမ်လႄႈမိူဝ်ႈဢၼ်ပဵၼ်တူၼ်ႈမႃးၼၼ်ႉယုမ်းၼၢမ်ယႂ်ႇမႃးႁတ်ႉပႅတ်ႈတူၼ်ႈၶဝ်ႈလႄႈဢမ်ႇယႂ်ႇလႆႈ။-
ၵူၺ်းၵႃႈ၊မဵတ်ႉၽၼ်းၵမ်ႈၽွင်ႈတူၵ်းၵႃႈၼိူဝ်လိၼ်လီလႄႈမၢၵ်ႇႁူင်းမၼ်းၼမ်ၵိုၼ်းမႃးတီႈမၢင်တူၼ်ႈပၢၵ်ႇပုၼ်ႈ၊ မၢင်တူၼ်ႈႁူၵ်းသိပ်းပုၼ်ႈ၊တီႈမၢင်တူၼ်ႈသၢမ်သိပ်းပုၼ်ႈဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈသိုပ်ႇလၢတ်ႈလႄႈဝႃႈ၊ “ၵေႃႉဢၼ်မီးႁူၼၼ်ႉႁႂ်ႈငိၼ်းတႃႉ၊” ဝႃႈၼင်ႇၼႆဢေႃႈ။
တပႄးၸဝ်ႈတင်းလၢႆသုတ်ႉမႃးၸူးတီႈ ၸဝ်ႈယေႇသု၊ လႄႈလဝ်ႈထၢမ်ဝႃႈ၊ “ႁဵတ်းသင်လႄႈၸဝ်ႈႁဝ်းဢဝ်တင်းၵႂၢမ်းဢုပမႃႇၸိူဝ်ႉၼင်ႇၼႆႁေႃးလၢတ်ႈတီႈၵူၼ်းတင်းလၢႆ တီႈၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ မွၵ်ႇလၢတ်ႈတီႈၶဝ်လႄႈဝႃႈ၊ “ပိင်ႇၺႃႇဢၼ်ႁုၸႅင်ႈလွင်ႈမိူင်းၵၢင်ႁၢဝ်ၸဝ်ႈလိုၵ်ႉလိုၵ်ႉလမ်ႇလမ်ႇၼၼ်ႉ၊ၵဝ်ပၼ်တီႈသူဢေႃႈ။ တီႈၶဝ်ၸိူဝ်းၼၼ်ႉၸမ်ႉ၊ၵဝ်ဢမ်ႇပၼ်။-
လွင်ႈမၼ်းၸမ်ႉ၊တီႈၵေႃႉဢၼ်မီးယဝ်ႉၼၼ်ႉ၊တၵ်းယဵင်ႈၶႅၼ်းပၼ်ထႅင်ႈႁႂ်ႈမၼ်းပေႃးၵုမ်ႇပေႃးလိူဝ်လႄႈတီႈၵေႃႉဢၼ်ဢမ်ႇမီးၵႃႈသင်ၼၼ်ႉတၵ်းၼုၵ်ႈဢဝ်သေၵႃႈၼႂ်းဢၼ်မၼ်းမီးယူႇဢိတ်းဢီႈၼိုင်ႈၼၼ်ႉလူးၵွၼ်ႇဢေႃႈ။-
ၶဝ်ၸိူဝ်းၼၼ်ႉ၊တူၺ်းယူႇၵေႃႈဢမ်ႇၸၢင်ႈႁၼ်၊ထွမ်ႇယူႇၵေႃႈဢမ်ႇၸၢင်ႈငိၼ်းလႄႈပွင်ႇလႅင်းမႃးလႆႈ။ ၵွပ်ႈၼႆႉလႄႈၵဝ်ၸင်ႇလႆႈဢဝ်တင်းၵႂၢမ်းဢုပမႃႇၸိူဝ်ႉၼင်ႇၼႆႁေႃးလၢတ်ႈတီႈၶဝ်ဢေႃႈ။-
ၶဝ်ၼၼ်ႉၸွမ်းၼင်ႇၵႂၢမ်းဢၼ်ပရေႃးၽႅတ်ႈ ဢိသႃႇယႃႉ၊ ႁေႃးဝႆႉလႄႈဝႃႈ၊ “‘ၵူၼ်းၸိူဝ်းၼႆႉတၵ်းငိၼ်းယူႇၶိူဝ်းၶိူဝ်းသေၵေႃႈဢမ်ႇၸၢင်ႈပွင်ႇၸၢင်ႈလႅင်း၊ ၶဝ်တၵ်းႁၼ်ယူႇၶိူဝ်းၶိူဝ်းသေၵေႃႈဢမ်ႇၸၢင်ႈမၢတ်ႈၸၢင်ႈတွင်း။
လွင်ႈမၼ်းၸမ်ႉ၊ႁူဝ်ၸႂ်ၶဝ်ၼူၵ်ႇတိုဝ်ၼႃႇလႄႈဢုတ်းႁူလပ်းတႃဝႆႉဢေႃႈ။ ၶဝ်ၵူဝ်မၢၵ်ႇတႃၶဝ်တၵ်းႁၼ်၊ႁူၶဝ်တၵ်းငိၼ်း၊ ႁူဝ်ၸႂ်ၶဝ်တၵ်းပွင်ႇလႅင်း၊ ၶဝ်ၵူဝ်တၵ်းၶၢႆႉပုတ်ႈဝၢႆႇၸူးၵဝ်လႄႈ၊ၵူဝ်ၵဝ်တၵ်းႁႂ်ႈတၢင်းၶႆႈတၢင်းပဵၼ်ၶဝ်ၸိုၼ်ႈႁၢႆၼၼ်ႉဢေႃႈ၊’ ဝႃႈၼင်ႇၼႆၼၼ်ႉပဵၼ်ၶဝ်ၸိူဝ်းၼႆႉယဝ်ႉ။
“သူၸိူဝ်းၼႆႉၸမ်ႉ၊မၢၵ်ႇတႃသူၸၢင်ႈႁၼ်၊ႁူသူၸၢင်ႈငိၼ်းလႄႈမီးမၢင်ႇၵလႃႇဢေႃႈ။-
ၵဝ်ဝႃႈတီႈၸိုဝ်ႈၸႂ်ႈမၼ်းတီႈသူၸမ်ႉ၊ပရေႃးၽႅတ်ႈတင်းလၢႆတင်းၵူၼ်းမူတ်းၸၢင်ႇၼမ်ၼႃႇမုင်ႈမွင်းၶႂ်ႈႁၼ်ဢၼ်သူႁၼ်ၼႆႉသေၵေႃႈဢမ်ႇလႆႈႁၼ်။ ၶႂ်ႈငိၼ်းမဵဝ်းဢၼ်သူငိၼ်းၼႆႉသေၵေႃႈဢမ်ႇလႆႈငိၼ်း။
“ၵႂၢမ်းဢုပမႃႇလွင်ႈၵူၼ်းဝၢၼ်ႇၸိူဝ်ႉၽၼ်းၼႆႉၶႂ်ႈဝႃႈၵႃႈသင်ၸိုင်၊ထွမ်ႇတႃႉ။-
ၶဝ်ၸိူဝ်းဢၼ်လႆႈငိၼ်းတြႃးမိူင်းၸဝ်ႈလႄႈဢမ်ႇလူင်ႉဢမ်ႇလႅင်းၼၼ်ႉ၊မိူၼ်မဵတ်ႉၽၼ်းဢၼ်တူၵ်းၵႃႈၼိူဝ်ၵၢင်တၢင်းၼၼ်ႉဢေႃႈ။ မႃႇၼၢတ်ႈမႃးယႃႉပႅတ်ႈမဵတ်ႉၽၼ်းတြႃးဢၼ်တူၵ်းဝႆႉၵႃႈၼႂ်းႁူဝ်ၸႂ်ၶဝ်ၼၼ်ႉဢေႃႈ။-
မဵတ်ႉၽၼ်းဢၼ်တူၵ်းၵႃႈတီႈလိၼ်ဢၼ်မီးမၢၵ်ႇႁိၼ်ၼမ်ၼၼ်ႉၸမ်ႉ၊မိူၼ်ၶဝ်ၸိူဝ်းဢၼ်လႆႈငိၼ်းလႄႈၸူမ်းသိူဝ်းႁပ်ႉတုင်းဢဝ်တြႃးၸဝ်ႈၵမ်းလဵဝ်ၼၼ်ႉဢေႃႈ။-
ၵွပ်ႈပိူဝ်ႈႁၢၵ်ႈတြႃးဢမ်ႇယင်ႇလိုၵ်ႉလူင်းၼႂ်းႁူဝ်ၸႂ်ၶဝ်လႄႈဢမ်ႇၸုၵ်းဢမ်ႇၶၢမ်ႇလႆႈတုၵ်ႉၶႃႉတၢင်းဢၼ်ယႃႉယုၵ်ႉၵွပ်ႈတြႃးၸဝ်ႈလႄႈၶဝ်ၸႂ်လုၵႂႃႇၵမ်းလဵဝ်ၼၼ်ႉဢေႃႈ။-
မဵတ်ႉၽၼ်းဢၼ်တူၵ်းၼႂ်းယုမ်းၼၢမ်ၼၼ်ႉသမ်ႉမိူၼ်ၶဝ်ၸိူဝ်းဢၼ်လႆႈငိၼ်းတြႃးၸဝ်ႈလႄႈၵွပ်ႈပိူဝ်ႈတၢင်းဢၼ်မႆႈၸႂ်လူၺ်ႈလွင်ႈလေႃးၵီႇ၊ဢိၵ်ႇတင်းတၢင်းဢၼ်ၸပ်းၸွႆးလူၺ်ႈလွင်ႈမၢၵ်ႈမီးၼၼ်ႉႁူမ်ႇသုမ်ႇႁတ်ႉဝႆႉႁူဝ်ၸႂ်တၢင်းဢၼ်ယုမ်ႇမၢတ်ႈၶဝ်လႄႈဢမ်ႇမၢၵ်ႇမၢၵ်ႇမႃးလႆႈ။-
မဵတ်ႉၽၼ်းဢၼ်တူၵ်းၵႃႈတီႈလိၼ်လီၼၼ်ႉၸိုင်၊မိူၼ်ၶဝ်ၸိူဝ်းဢၼ်လႆႈငိၼ်းတြႃးၸဝ်ႈလႄႈလူင်ႉလႅင်းပွင်ႇၸႂ်သေယဝ်ႉ၊မၢၵ်ႇမႃးမၢၵ်ႇမၼ်းၵမ်ႈၽွင်ႈပၢၵ်ႇပုၼ်ႈ၊ၵမ်ႈၽွင်ႈႁူၵ်းသိပ်းပုၼ်ႈ၊ ၵမ်ႈၽွင်ႈသၢမ်သိပ်းပုၼ်ႈဢေႃႈ၊” ဝႃႈၼင်ႇၼႆမၼ်းၸဝ်ႈႁေႃးလၢတ်ႈဢေႃႈ။
ၸဝ်ႈယေႇသု၊ သမ်ႉႁေႃးလၢတ်ႈၵႂၢမ်းဢုပမႃႇထႅင်ႈလႄႈဝႃႈ၊ “မိူင်းၵၢင်ႁၢဝ်ၸဝ်ႈပဵၼ်မိူၼ်ၵူၼ်းၵေႃႉၼိုင်ႈဢၼ်ဝၢၼ်ႇမဵတ်ႉၽၼ်းဢၼ်လီၵႃႈၼႂ်းႁႆႈဢေႃႈ။-
ယၢမ်းမိူဝ်ႈဢၼ်ၵူၼ်းတိုၵ်ႉၼွၼ်းယဵၼ်ယူႇၼၼ်ႉ၊ရၢၼ်ႇသူႇမႃးဝၢၼ်ႇမဵတ်ႉဝင်ၼႂ်းၵႄႈၶဝ်ႈၵျုင်ႇမၼ်းလႄႈဢွၵ်ႇၵႂႃႇဢေႃႈ။-
မိူဝ်ႈဢၼ်တူၼ်ႈၶဝ်ႈၵျုင်ႇယႂ်ႇလႄႈဢွၵ်ႇႁူင်းမႃးၼၼ်ႉ၊ တူၼ်ႈဝင်ၵေႃႈပေႃႇဢွၵ်ႇမႃးၸွမ်းဢေႃႈ။-
လုၵ်ႈၸၢင်ႈၸိူဝ်းၼၼ်ႉ၊မႃးလၢတ်ႈတီႈမၼ်းလႄႈဝႃႈ၊ ‘ၸဝ်ႈႁဝ်းဝၢၼ်ႇမဵတ်ႉၽၼ်းဢၼ်လီၵူၺ်းၵူၺ်းဢမ်ႇၸႂ်ႈၶႃႈႁိုဝ်း။ ၵႃႈၼႂ်းႁႆႈၼၼ်ႉတူၼ်ႈဝင်လုၵ်ႉၵႃႈတီႈလႂ်မႃးၶႃႈ၊’ ဝႃႈၼင်ႇၼႆလႄႈ၊-
မၼ်းၶိုၼ်းလၢတ်ႈလႄႈဝႃႈ၊ ‘ရၢၼ်ႇသူႇမႃးဝၢၼ်ႇသႂ်ႇဢိူဝ်း၊’ ဝႃႈၼင်ႇၼႆဢေႃႈ။ လုၵ်ႈၸၢင်ႈၸိူဝ်းၼၼ်ႉၶိုၼ်းလၢတ်ႈလႄႈဝႃႈ၊ ‘ၸဝ်ႈႁဝ်းၸွင်ႇၶႂ်ႈႁႂ်ႈႁဝ်းၶႃႈလိူၵ်ႈထူၺ်ႈပႅတ်ႈၶႃႈႁိုဝ်း၊’ ဝႃႈၼင်ႇၼႆဢေႃႈ။-
မၼ်းၸင်ႇလၢတ်ႈဝႃႈ၊ ‘ယႃႇမၼ်းလူးၵွၼ်ႇတႃႉ။ မိူဝ်ႈဢၼ် သူထူၺ်ႈတူၼ်ႈဝင်ၼၼ်ႉ၊တူၼ်ႈၶဝ်ႈၵျုင်ႇၵေႃႈၸၢင်ႈပႃးၸွမ်းဢေႃႈ။-
ပွႆႇႁႂ်ႈတူၼ်ႈတင်းသွင်မဵဝ်းၼႆႉယႂ်ႇမႃးၸွမ်းၵၼ်တေႃႇထိုင်ၶိင်ႇဢၼ်ပၢတ်ႇဢဝ်ၼၼ်ႉတႃႉ။ ၵဝ်တၵ်းၸႂ်ႉၵူၼ်းပၢတ်ႇၶဝ်ႈၼၼ်ႉလိူၵ်ႈထူၺ်ႈပႅတ်ႈတူၼ်ႈဝင်ဢွၼ်တၢင်းယဝ်ႉၸင်ႇ၊မတ်ႉသေလႄႈတုတ်ႇၽႆးပႅတ်ႈဢေႃႈ။ ၶဝ်ႈၵျုင်ႇၸမ်ႉ၊တၵ်းႁႂ်ႈၶဝ်ဢဝ်သိမ်းဝႆႉၵႃႈၼႂ်းယွင်ၼႂ်းယေးဢေႃႈ၊’ ဝႃႈၼင်ႇၼႆဢေႃႈ” မၼ်းၸဝ်ႈႁေႃးလၢတ်ႈၸိူဝ်ႉၼင်ႇၼႆဢေႃႈ။
ၸဝ်ႈယေႇသု၊ သမ်ႉႁေႃးလၢတ်ႈၵႂၢမ်းဢုပမႃႇထႅင်ႈလႄႈဝႃႈ၊ “မိူင်းၵၢင်ႁၢဝ်ၸဝ်ႈပဵၼ်မိူၼ်ၽၼ်းၽၵ်းၵၢတ်ႇမဵတ်ႉၼိုင်ႈဢၼ်လဵၵ်ႉသေမဵတ်ႉတင်းလၢႆဢေႃႈ။-
မိူဝ်ႈဢၼ်ၵူၼ်းဢဝ်ၽုၵ်ႇၵႃႈၼႂ်းသူၼ်လႄႈတူၼ်ႈမၼ်းယႂ်ႇမႃးၼၼ်ႉ၊ၸၢင်ႈယႂ်ႇသေတူၼ်ႈၽၵ်းတင်းလၢႆတေႃႇထိုင်ႁွတ်ႈပဵၼ်တူၼ်ႈပဵၼ်လမ်းဢၼ်ၼူၵ်ႉတင်းလၢႆ မႃးလိုဝ်ႈသဝ်းယူႇၵႃႈတီႈၵိင်ႇၵၢၼ်ႈမၼ်းတင်းလၢႆဢေႃႈ၊” ဝႃႈၼင်ႇၼႆမၼ်းၸဝ်ႈႁေႃးလၢတ်ႈဢေႃႈ။
ၸဝ်ႈယေႇသု၊ သမ်ႉႁေႃးလၢတ်ႈၵႂၢမ်းဢုပမႃႇထႅင်ႈလႄႈဝႃႈ၊ “မိူင်းၵၢင်ႁၢဝ်ၸဝ်ႈပဵၼ်မိူၼ်ၸိူဝ်ႉၶဝ်ႈပႅင်ႈဢၼ်မႄႈယိင်းၵေႃႉၼိုင်ႈဢဝ်သႂ်ႇၵႃႈၼႂ်းၽွင်ၶဝ်ႈၵျုင်ႇၼိုင်ႈတၢင်ၶၢႆးလႄႈတေႃႇထိုင်ႁွတ်ႈၸိူဝ်ႉပႅင်ႈၼၼ်ႉႁႂ်ႈၶဝ်ႈၵျုင်ႇတင်းသဵင်ႈတင်းလူင်ပွင်းၶိုၼ်ႈမႃးၼၼ်ႉဢေႃႈ၊” ဝႃႈၼင်ႇၼႆမၼ်းၸဝ်ႈႁေႃးလၢတ်ႈဢေႃႈ။
ၵႂၢမ်းၸိူဝ်းၼႆႉတင်းသဵင်ႈတင်းလူင် ၸဝ်ႈယေႇသု၊ ဢဝ်တင်းၵႂၢမ်းဢုပမႃႇႁေႃးလၢတ်ႈတီႈမူႇၵူၼ်းဢေႃႈ။ ယင်းဢမ်ႇပႃးၵႂၢမ်းဢုပမႃႇလႄႈဢမ်ႇႁေႃးဢမ်ႇလၢတ်ႈသေၸိူဝ်ႉသေပိူင်။-
လွင်ႈတၢင်းဢၼ်ပဵၼ်ၸိူဝ်ႉၼင်ႇၼႆၸိုင်၊ပဵၼ်ၸွမ်းၵႃႈၼင်ႇဢၼ်ပရေႃးၽႅတ်ႈႁေႃးဝႆႉဝႃႈ၊ “ၵဝ်တၵ်းဢဝ်ၵႂၢမ်းဢုပမႃႇလႄႈႁေႃးလၢတ်ႈတေႃႇၶဝ်ဢေႃႈ။ ၵဝ်တၵ်းႁေႃးမွၵ်ႇလၢတ်ႈလွင်ႈတၢင်းဢၼ်သိူင်ႇဝႆႉလပ်ႉဝႆႉ၊ ၸဵမ်မိူဝ်ႈငဝ်ႈပိုၼ်ႉၵမ်ႇၽႃႇၼၼ်ႉၼၼ်ႉဢေႃႈ၊” ဝႃႈၼင်ႇၼႆၼၼ်ႉဢေႃႈ။
ဝၢႆးသေ ၸဝ်ႈယေႇသု၊ ပွႆႇၵူၼ်းဢၼ်ၸုတုမ်ၸိူဝ်းၼၼ်ႉၵႂႃႇသေယဝ်ႉ၊မၼ်းၸဝ်ႈၶဝ်ႈၵႂႃႇၵႃႈၼႂ်းႁိူၼ်းလႄႈတပႄးၸဝ်ႈတင်းလၢႆသုတ်ႉၸူးမႃးတီႈမၼ်းၸဝ်ႈလႄႈလဝ်ႈလၢတ်ႈဝႃႈ၊ “ၶႆႈၼႄဢထိၵ်ႈပႄႇၵႂၢမ်းဢုပမႃႇလွင်ႈၽၼ်းဝင်ၼၼ်ႉသေၵမ်းၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈၶႆႈၼႄလႄႈဝႃႈ၊ “ၵေႃႉဢၼ်ဝၢၼ်ႇၸိူဝ်ႉၽၼ်းဢၼ်လီၼၼ်ႉပဵၼ် လုၵ်ႈၵူၼ်း၊ ဢေႃႈ။-
ႁႆႈၼၼ်ႉၸမ်ႉ၊ပဵၼ်မိူင်းလေႃးၵႃႉဢေႃႈ။ မဵတ်ႉၽၼ်းဢၼ်လီၼၼ်ႉပဵၼ်လုၵ်ႈလၢင်းမိူင်းၸဝ်ႈလႄႈမဵတ်ႉဝင်ၼၼ်ႉပဵၼ်လုၵ်ႈလၢင်းမိူင်းမရၼႃႉဢေႃႈ။-
ရၢၼ်ႇသူႇဢၼ်ဝၢၼ်ႇမဵတ်ႉဝင်ၼၼ်ႉ၊ပဵၼ်တူဝ်မႃႇၼၢတ်ႈဢေႃႈ။ ၶိင်ႇပၢတ်ႇၽဵဝ်ႈၼၼ်ႉပဵၼ်ၶိင်ႇယၢမ်းဢၼ်မိူင်းလေႃးၵႃႉသုတ်းသဵင်ႈၼၼ်ႉလႄႈၵူၼ်းပၢတ်ႇၶဝ်ႈတင်းလၢႆၼၼ်ႉ၊ပဵၼ်တမၢၼ်ႇၵၢင်ႁၢဝ်တင်းလၢႆဢေႃႈ။-
တၢင်းဢၼ်တေလိူၵ်ႈထူၺ်ႈဢဝ်တူၼ်ႈဝင်သေလႄႈတုတ်ႇၽႆးၼၼ်ႉ၊တၵ်းပဵၼ်ၼႂ်းၶိင်ႇယၢမ်းဢၼ်မိူင်းလေႃးၵႃႉသုတ်းသဵင်ႈၼၼ်ႉဢေႃႈ။-
လုၵ်ႈၵူၼ်း၊ တၵ်းပွႆႇၸႂ်ႉတမၢၼ်ႇၵၢင်ႁၢဝ်မၼ်းၸဝ်ႈတင်းလၢႆ၊မႃးလိူၵ်ႈဢဝ်ပႅတ်ႈၵႃႈဢၼ်ႁဵတ်းႁႂ်ႈပိူၼ်ႈထုၵ်ႇဢပျတ်ႈ၊ ဢိၵ်ႇတင်းၵူၼ်းဢၼ်ႁဵတ်းဢမ်ႇတြႃးၵႃႈမီးတင်းသဵင်ႈတင်းလူင်သေၵႃႈၼႂ်းမိူင်းၸဝ်ႈသေလႄႈ၊-
ထိမ်ႈသႂ်ႇၵႃႈၼႂ်းမုၵ်ႉၽႆးဢၼ်ဢမ်ႇတွၼ်ႉမွတ်ႇတီႈဢၼ်လႆႈႁွင်ႉလႆႈႁႆႈလႄႈတီႈၼၼ်ႈၶဝ်တၵ်းလႆႈၵတ်းၶဵဝ်ႈၵတ်းၽၼ်းဢေႃႈ။-
မိူဝ်ႈၼၼ်ႉ၊ၵူၼ်းသိုဝ်ႈတေႃႇၸဝ်ႈၽြႃးတင်းသဵင်ႈတင်းလူင်တၵ်းႁိူဝ်ႈလႅင်းၼင်ႇၵၢင်ဝၼ်းၼႂ်းမိူင်းပေႃႈၸဝ်ႈၶဝ်ဢေႃႈ။ ပိူဝ်ႈၼႆလႄႈၵေႃႉဢၼ်မီးႁူၼၼ်ႉႁႂ်ႈငိၼ်းတႃႉ။
“မိူင်းၵၢင်ႁၢဝ်ၸဝ်ႈမိူၼ်ၵူၼ်းၵေႃႉၼိုင်ႈ၊ၶုတ်းၺႃးၽၼ်ႇတႃႇဢၼ်ၽင်ဝႆႉၵႃႈၼႂ်းသူၼ်ဢေႃႈ။ မၼ်းၶိုၼ်းဢဝ်ၵူမ်လိၼ်ဝႆႉသေယဝ်ႉ၊ၸူမ်းၸူမ်းသိူဝ်းသိူဝ်းၵႂႃႇၶၢႆပႅတ်ႈၵႃႈဢၼ်မၼ်းမီးတင်းသဵင်ႈတင်းလူင်၊ႁႂ်ႈလႆႈငိုၼ်းၵုမ်ႇၵႃႈၶၼ်မၼ်းလႄႈၶိုၼ်းၵႂႃႇသိုဝ်ႉဢဝ်သူၼ်ၼၼ်ႉဢေႃႈ။
“ၼႄးၼိုင်ႈၸမ်ႉ၊မိူင်းၵၢင်ႁၢဝ်ၸဝ်ႈမိူၼ်ၵူၼ်းၵႃႉၵေႃႉၼိုင်ႈ၊ သွၵ်ႈႁႃသႅင်ပူးလႄးဢၼ်မျၢတ်ႈၼႃႇၼၼ်ႉဢေႃႈ။-
မိူဝ်ႈဢၼ်မၼ်းထူပ်းႁၼ်ပူးလႄးဢၼ်လီတွၼ်းထိူၵ်ႈၵႃႈယႂ်ႇၼႃႇလုၵ်ႈၼိုင်ႈယဝ်ႉၸိုင်၊မၼ်းၶိုၼ်းမိူဝ်းၵႂႃႇၶၢႆပႅတ်ႈၵႃႈဢၼ်မၼ်းမီးတင်းသဵင်ႈတင်းလူင်ႁႂ်ႈလႆႈငိုၼ်းၵုမ်ႇၵႃႈၶၼ်မၼ်းလႄႈၶိုၼ်းၵႂႃႇသိုဝ်ႉဢဝ်သႅင်ပူးလႄးၼၼ်ႉဢေႃႈ။
“ၼႄးၼိုင်ႈၸမ်ႉ၊မိူင်းၵၢင်ႁၢဝ်မိူၼ်ၶႄဢၼ်ဝၢၼ်ႇၵႃႈၼႂ်းၼမ်ႉၼွင်ႁႂ်ႈလႆႈသုမ်ႇဢဝ်ပႃၵူႈၸိူဝ်ႉၵူႈပိူင်ဢေႃႈ။-
မိူဝ်ႈဢၼ်ၵႃႈၼႂ်းၶႄတဵမ်ယဝ်ႉၼၼ်ႉ၊ၶဝ်တိုတ်ႉတၢင်ႇၵွင်းလႄႈၼင်ႈသေယဝ်ႉ၊လိူၵ်ႈဢဝ်ပႃဢၼ်လီတင်းလၢႆသႂ်ႇၵႃႈၼႂ်းပဵတ်ႈလႄႈဢဝ်ပႅတ်ႈပႃဢၼ်ဢမ်ႇလီဢမ်ႇငၢမ်းၸိူဝ်းၼၼ်ႉဢေႃႈ။-
ၼႂ်းၶိင်ႇၵႃႇလႃႉလိုၼ်းသုတ်းလေႃးၵႃႉၼႆႉတၵ်းပဵၼ်ၸိူဝ်ႉၼင်ႇၼၼ်ဢေႃႈ။ တမၢၼ်ႇၵၢင်ႁၢဝ်တင်းလၢႆတၵ်းလူင်းမႃးလႄႈလိူၵ်ႈၽႄမႅင်ႇၵူၼ်းႁၢႆႉမိူၵ်ႈဢွၵ်ႇသေၵႃႈၼႂ်းၵူၼ်းသိုဝ်ႈတေႃႇသေယဝ်ႉ၊-
ၶျႃးၶဝ်တူၵ်းၵႃႈၼႂ်းၽႆးဢၼ်ဢမ်ႇတွၼ်ႉမွတ်ႇ၊တီႈဢၼ်လႆႈႁႆႈလႆႈႁွင်ႉလႄႈတီႈၼၼ်ႈၶဝ်တၵ်းလႆႈၵတ်းၶဵဝ်ႈၵတ်းၽၼ်းဢေႃႈ။
“လွင်ႈတၢင်းဢၼ်ၵဝ်ႁေႃးလၢတ်ႈၸိူဝ်းၼႆႉႁုထွမ်ႇပွင်ႇလႅင်းယဝ်ႉႁိုဝ်း၊” ဝႃႈၼႆ ၸဝ်ႈယေႇသု၊ ထၢမ်ၶဝ်လႄႈၶဝ်လဝ်ႈလၢတ်ႈလႄႈဝႃႈ၊ “ႁုပွင်ႇၶႃႈဢေႃႈ၊ၸဝ်ႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၸင်ႇလၢတ်ႈလႄႈဝႃႈ၊ “ပိူဝ်ႈၼႆလႄႈမိူၼ်ၵၼ်တင်းမိူဝ်ႈဢၼ်သြႃႇမေႃၵျၢမ်းထမ်ႇမႃႉသေၵေႃႉၵေႃႉ၊ပေႃးလႆႈၶဝ်ႈပဵၼ်တပႄးမိူင်းၵၢင်ႁၢဝ်ၸဝ်ႈၸိုင်၊မၼ်းမိူၼ်ၸဝ်ႈႁိူၼ်းဢၼ်ဢဝ်ဢၼ်ၵဝ်ႇဢၼ်မႂ်ႇတင်းလၢႆဢွၵ်ႇသေၵႃႈၼႂ်းၽၼ်ႇတႃႇဢုၵ်ႉၸႃႇမၼ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ဝၢႆးသေ ၸဝ်ႈယေႇသု၊ ႁေႃးလၢတ်ႈၵႂၢမ်းဢုပမႃႇၸိူဝ်းၼႆႉယဝ်ႉၸိုင်၊မၼ်းၸဝ်ႈဢွၵ်ႇၵႃႈတီႈၼၼ်ႈသေယဝ်ႉ၊-
ၶိုၼ်းမိူဝ်းၸူးတီႈဝၢၼ်ႈၵဝ်ႇမိူင်းလင်တူဝ်ၸဝ်ႈၵဝ်ႇဢေႃႈ။ မၼ်းၸဝ်ႈၶဝ်ႈၵႃႈၼႂ်းၸရွပ်ႈႁေႃးတြႃးလႄႈသင်ႇသွၼ်ပၼ်ထၢၼ်ႈပေႃးႁႂ်ႈၶဝ်ၸိူဝ်းဢၼ်လႆႈငိၼ်းၼၼ်ႉ၊ဢၢမ်းၼႃႇလူင်လၢင်လႄႈလၢတ်ႈဝႃႈ၊ “ၵေႃႉၼႆႉလႆႈပိင်ႇၺႃႇဢိၵ်ႇတင်းတၼ်းၶူဝ်းၸိူဝ်ႉၼင်ႇၼႆၵႃႈတီႈလႂ်မႃး။-
မၼ်းပဵၼ်လုၵ်ႈၸၢႆးၸၢင်ႈမႆႉဢမ်ႇၸႂ်ႈႁိုဝ်း။ မႄႈမၼ်းပဵၼ် မႃႇရိ၊ လႄႈ ယႃႇၵုပ်ႈ၊ယူဝ်းသႅပ်ႈ၊သိမုၼ်ႇ၊ ဢိၵ်ႇတင်း ယုတႃႉ၊ ပဵၼ်ၼွင်ႉၸၢႆးမၼ်းဢမ်ႇၸႂ်ႈႁိုဝ်း။-
ၼွင်ႉယိင်းမၼ်းတင်းလၢႆၵေႃႈ၊ယူႇႁိမ်းႁွမ်းႁဝ်းၵူၺ်းဢမ်ႇၸႂ်ႈႁိုဝ်း။ လွင်ႈတၢင်းၸိူဝ်းၼႆႉမၼ်းလႆႈၵႃႈတီႈလႂ်မႃး၊” ဝႃႈၼင်ႇၼႆယူႇလႄႈၸႂ်လုဢေႃႈ။
မၼ်းၸဝ်ႈၵေႃႈလၢတ်ႈလႄႈဝႃႈ၊ “ပရေႃးၽႅတ်ႈၸိုင်၊လိူဝ်သေၵႃႈတီႈဝဵင်းတူဝ်ၸဝ်ႈၵဝ်ႇ၊ၵႃႈတီႈႁိူၼ်းတူဝ်ၸဝ်ႈၵဝ်ႇၼၼ်ႉ၊မီးသရေႇၵူႈတီႈၵူႈလႅၼ်ဢေႃႈ၊” ဝႃႈၼင်ႇၼႆဢေႃႈ။-
ၵွပ်ႈပိူဝ်ႈၵူၼ်းဝဵင်း ၼႃႇၸရႅတ်ႈ၊ ဢမ်ႇယုမ်ႇမၢတ်ႈလႄႈမၼ်းၸဝ်ႈဢမ်ႇပေႃးၼႄပျႃးတၼ်းၶူဝ်းၵႃႈႁိုဝ်ၵႃႈတီႈၼၼ်ႈဢေႃႈ။
မိူဝ်ႈယၢမ်းၼၼ်ႉ၊ၸဝ်ႈၽႃႉ ႁေႇရူတ်ႈ၊ လႆႈငိၼ်းၶၢဝ်ႇ ၸဝ်ႈယေႇသု၊ လႄႈလၢတ်ႈတီႈၵူၼ်းဢွၼ်ႇမၼ်းတင်းလၢႆလႄႈဝႃႈ၊-
“ၵေႃႉၼႆႉပဵၼ်သြႃႇ ယူဝ်းႁၢၼ်ႇ၊ ဢၼ်ပၼ်မၢင်ႇၵလႃႇပပ်ႉတိၸမ်ႇ ၼၼ်ႉဢမၢၼ်ႇၶၼ်ပဵၼ်လႄႈမၼ်းလုၵ်ႉၶိုၼ်းလိပ်းမႃးသေယဝ်ႉၸင်ႇ၊မီးတၼ်းၶူဝ်းႁဵတ်းတၢင်းဢၼ်လၢၵ်ႇဢၼ်လၢႆးထၼ်ႇၼႆႉယဝ်ႉ၊” ဝႃႈၼင်ႇၼႆဢေႃႈ။
ၵွပ်ႈသင်လႄႈဝႃႈၼႆၸမ်ႉ၊မိူဝ်ႈဢွၼ်တၢင်းၼၼ်ႉၶုၼ် ႁေႇရူတ်ႈ၊ ၼၼ်ႉ၊လႆႈတိမတ်ႉဢဝ်သြႃႇ ယူဝ်းႁၢၼ်ႇ၊ လႄႈသႂ်ႇထွင်ႇဝႆႉ၊ၵွပ်ႈပိူဝ်ႈၼၢင်း ႁေႇရူဝ်းတိ၊ ဢၼ်ပဵၼ်မေးၼွင်ႉၸၢႆးမၼ်း ၽိလိပ်ႉပု၊ ၼၼ်ႉဢေႃႈ။-
ၵွပ်ႈလူၺ်ႈလွင်ႈၼႆႉ၊သြႃႇ ယူဝ်းႁၢၼ်ႇ၊ လႆႈလၢတ်ႈတီႈၶုၼ် ႁေႇရူတ်ႈ၊ လႄႈဝႃႈ၊ “ၸဝ်ႈႁဝ်းဢမ်ႇထုၵ်ႇလီသိမ်းဢဝ်ၼၢင်း ႁေႇရူဝ်းတိ၊ ႁႂ်ႈလႆႈပဵၼ်မေးၸဝ်ႈ၊” ဝႃႈၼင်ႇၼႆၼၼ်ႉယဝ်ႉ။-
ၶုၼ် ႁေႇရူတ်ႈ၊ ၶႂ်ႈဢဝ်သြႃႇ ယူဝ်းႁၢၼ်ႇ၊ တၢႆသေၵေႃႈၵွပ်ႈပိူဝ်ႈၵူၼ်းမဵဝ်း ၵျူး၊ ၶဝ်ထၢင်ႇသြႃႇ ယူဝ်းႁၢၼ်ႇ၊ ပဵၼ်ပရေႃးၽႅတ်ႈ ပႃးၼိုင်ႈၼၼ်ႉ၊ၶုၼ် ႁေႇရူတ်ႈ၊ ၵူဝ်လႄႈယိူၼ်ႉဝႆႉဢေႃႈ။
ၼႂ်းဝၼ်းၶၢမ်ႇပွႆးဝၼ်းဢၼ်ၶုၼ် ႁေႇရူတ်ႈ၊ ၵိူတ်ႇလဵင်ႉၼၼ်ႉ၊လုၵ်ႈယိင်းၼၢင်း ႁေႇရူဝ်းတိ၊ ၵႃႈဝႅၼ်ၼႂ်းပၢင်ပွႆးလႄႈထုၵ်ႇမႅၼ်ႈၸႂ်ၶုၼ် ႁေႇရူတ်ႈ၊ ၼႃႇလူင်လၢင်၊-
ထၢၼ်ႈပေႃးတိူင်ႇၵၢဝ်ႇဝႆႉၵတိသဵတ်ႈၸႃႇလႄႈဝႃႈ၊ “ၵႃႈဢၼ်မႂ်းယွၼ်းၼၼ်ႉၵဝ်တၵ်းပၼ်ဢေႃႈ၊” ဝႃႈၼင်ႇၼႆဢေႃႈ။
ၸွမ်းၼင်ႇဢၼ်မႄႈမၼ်းၸႂ်ႉယွၼ်းၼၼ်ႉ၊မၼ်းၵေႃႈလဝ်ႈယွၼ်းလႄႈဝႃႈ၊ “ဢဝ်ၵွၵ်းႁူဝ်သြႃႇ ယူဝ်းႁၢၼ်ႇ၊ ဢၼ်ပၼ်မၢင်ႇၵလႃႇပပ်ႉတိၸမ်ႇၼၼ်ႉ၊သႂ်ႇၵႃႈၼႂ်းပၢၼ်ႉသေလႄႈပၼ်ၵဝ်ၶႃႈတီႈၼႆႈၵမ်းလဵဝ်သေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ၶုၼ် ႁေႇရူတ်ႈ၊ တူၵ်းၸႂ်ၼႃႇလူင်လၢင်ဢေႃႈ။ ၵူၺ်းၵႃႈ၊ပိူဝ်ႈဢၼ်မၼ်းလႆႈတိူင်ႇၵၢဝ်ႇဝႆႉၵတိသဵတ်ႈၸႃႇၽၢႆႇၼႃႈၶႅၵ်ႇပွႆးတင်းလၢႆယဝ်ႉၼၼ်ႉ၊ဢမ်ႇၸၢင်ႈႁဵတ်းၸိူဝ်ႉႁိုဝ်ယဝ်ႉလႄႈပူင်ဢမိင်ႉႁႂ်ႈဢဝ်ပၼ်ဢေႃႈ။-
ပိူဝ်ႈၼႆလႄႈသြႃႇ ယူဝ်းႁၢၼ်ႇ၊ လႆႈၶၢမ်ႇတၢင်းဢၼ်တႅပ်းႁူဝ်ၵႃႈၼႂ်းထွင်ႇဢေႃႈ။-
ၵွၵ်းႁူဝ်ၼၼ်ႉၵေႃႈ၊သႂ်ႇၵႃႈၼႂ်းပၢၼ်ႉသေလႄႈဢဝ်ပၼ်တီႈၼၢင်းယိင်းဢွၼ်ႇၼၼ်ႉသေယဝ်ႉ၊ၼၢင်းယိင်းဢွၼ်ႇၼၼ်ႉၵေႃႈ၊ ဢဝ်ပၼ်တီႈမႄႈမၼ်းသေဢေႃႈ။-
တပႄးသြႃႇ ယူဝ်းႁၢၼ်ႇ၊ တင်းလၢႆ၊မႃးဢဝ်တူဝ်တၢႆၼၼ်ႉသၢင်းၵျူဝ်ႇယဝ်ႉၸင်ႇ၊ဢွၼ်ၵၼ်ၵႂႃႇမွၵ်ႇလၢတ်ႈတီႈ ၸဝ်ႈယေႇသု၊ ဢေႃႈ။
မိူဝ်ႈဢၼ် ၸဝ်ႈယေႇသု၊ လႆႈငိၼ်းၶၢဝ်ႇသြႃႇ ယူဝ်းႁၢၼ်ႇ၊ ယဝ်ႉၼၼ်ႉၸိုင်၊ဢွၵ်ႇသေၵႃႈတီႈၼၼ်ႈလႄႈၶီႇႁိူဝ်းၵႂႃႇၵႃႈတီႈဢၼ်သဵတ်ႇၵူၼ်းယဵၼ်ၵူၼ်းဢေႃႈ။ ၵူၺ်းၵႃႈ၊ ၵူၼ်းၼမ်ၼႃႇလႆႈငိၼ်းလႄႈဢွၼ်ၵၼ်ဢွၵ်ႇဝၢၼ်ႈဢွၵ်ႇဝဵင်းၶဝ်ပႆတိၼ်ၵႂႃႇၸူးမၼ်းၸဝ်ႈဢေႃႈ။-
မိူဝ်ႈဢၼ်မၼ်းၸဝ်ႈဢွၵ်ႇႁိူဝ်းၶိုၼ်ႈၵွင်းမႃးသေယဝ်ႉ၊ႁၼ်ၵူၼ်းပဵၼ်မူႇပဵၼ်ၽုင်ၼမ်ၼႃႇၼၼ်ႉၸိုင်၊မၼ်းၸဝ်ႈမီးၸႂ်ဢၼ်ဢဵတ်းလူၼႃႇလႄႈႁႂ်ႈတၢင်းၶႆႈတၢင်းပဵၼ်ၶဝ်ၵႃႈမီးတင်းသဵင်ႈတင်းလူင်ၸိုၼ်ႈႁၢႆဢေႃႈ။
မိူဝ်ႈဢၼ်ထိုင်ၶိင်ႇႁူဝ်ၶမ်ႈၸိုင်၊တပႄးၸဝ်ႈတင်းလၢႆသုတ်ႉၸူးတီႈမၼ်းၸဝ်ႈလႄႈလဝ်ႈလၢတ်ႈဝႃႈ၊ “ၶိင်ႇၶဝ်ႈၶမ်ႈပူၼ်ႉၶႃႈယဝ်ႉ။ တီႈၼႆႈပဵၼ်ဢၼ်သဵတ်ႇၵူၼ်းယဵၼ်ၵူၼ်းလႄႈထုၵ်ႇလီပွႆႇၵူၼ်းၸိူဝ်းၼႆႉမိူဝ်းၵႂႃႇၵႃႈတီႈဝၢၼ်ႇႁိမ်းႁွမ်းႁႂ်ႈၶဝ်လႆႈသိုဝ်ႉ ၵိၼ်ဢိမ်ႇတွင်ႉၶဝ်ၶႃႈဢေႃႈ၊” မိူဝ်ႈဢၼ်ဝႃႈၼင်ႇၼႆၸိုင်။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ၶဝ်ဢမ်ႇလူဝ်ႇၵႂႃႇယဝ်ႉ။ ၵႃႈဢၼ်သူမီးၼၼ်ႉဢဝ်လဵင်ႉပၼ်ၶဝ်တႃႉ၊” ဝႃႈၼင်ႇၼႆဢေႃႈ။
တပႄးၸဝ်ႈၸိူဝ်းၼၼ်ႉၵေႃႈလၢတ်ႈလႄႈဝႃႈ၊ “ႁဝ်းၶႃႈမီးၶဝ်ႈမုၼ်းႁႃႈႁူၺ်ႇဢိၵ်ႇတင်းပႃသွင်တူဝ်ၵူၺ်းၶႃႈဢေႃႈ။” ဝႃႈၼင်ႇၼႆလႄႈ။
ၸဝ်ႈယေႇသု၊ ၵေႃႈဝႃႈ၊ “ဢဝ်မႃးပၼ်ၵဝ်တႃႉ၊” ဝႃႈၼင်ႇၼႆဢေႃႈ။-
မၼ်းၸဝ်ႈၸင်ႇပၼ်ဢမိင်ႉႁႂ်ႈၵူၼ်းဢၼ်ၸုဢၼ်တုမ်ၸိူဝ်းၼၼ်ႉ၊ ၼင်ႈၵႃႈၼိူဝ်ပၢင်ႇယိူဝ်ႈၶဵဝ်သေယဝ်ႉ၊ဢဝ်ၶဝ်ႈမုၼ်းႁႃႈႁူၺ်ႇဢိၵ်ႇတင်းပႃသွင်တူဝ်ၼၼ်ႉသေလႄႈ၊ႁႅၼ်ၶိုၼ်ႈၵႃႈၼိူဝ်ၽႃႉၵၢင်ႁၢဝ်လႄႈယွင်ႈယေႃးတၢင်ႇၵျေးၸူးပုၼ်ႈတၢင်းၵိၼ်ၼၼ်ႉဢေႃႈ။ ဝၢႆးၼၼ်ႉ၊မၼ်းၸဝ်ႈၵေႃႈဝိတ်းၶဝ်ႈမုၼ်းၼၼ်ႉပၼ်တီႈတပႄးၸဝ်ႈၸိူဝ်းၼၼ်ႉ၊ႁႂ်ႈၵႂႃႇမႅင်ႇပၼ်တီႈမူႇၵူၼ်းတင်းလၢႆဢေႃႈ။-
မိူဝ်ႈၼၼ်ႉ၊ၵူၼ်းၵူႈၵေႃႉလႆႈၵိၼ်ဢိမ်ႇတွင်ႉယဝ်ႉလႄႈတပႄးၸဝ်ႈၸိူဝ်းၼၼ်ႉၶိုၼ်းၵဵပ်းၸုၵဵပ်းသိမ်းၶဝ်ႈမုၼ်းဢၼ်လိူဝ်ၼၼ်ႉလႆႈသိပ်းသွင်ပဵတ်ႈဢေႃႈ။-
ၵူၼ်းဢၼ်ၵိၼ်ၸိူဝ်းၼၼ်ႉဢမ်ႇၼပ်ႉဢၢၼ်ႇပႃးမႄႈယိင်းတင်းလုၵ်ႈဢွၼ်ႇလႂ်၊ၵူၼ်းၸၢႆးလူင်ၵူၺ်းၵူၺ်းမီးႁႃႈႁဵင်ၵေႃႉၸမ်ၸမ်ဢေႃႈ။
လိုၼ်းၼၼ်ႉ၊ယၢမ်းမိူဝ်ႈဢၼ် ၸဝ်ႈယေႇသု၊ ပွႆႇၵူၼ်းဢၼ်ၸုဢၼ်တုမ်တင်းလၢႆမိူဝ်းၵႂႃႇယူႇၼၼ်ႉမၼ်းၸဝ်ႈသင်ႇလၢတ်ႈႁႂ်ႈတပႄးၸဝ်ႈတင်းလၢႆ၊ၶီႇႁိူဝ်းၶၢမ်ႈၵႂႃႇၽၢႆႇပုၼ်ႉၼမ်ႉၼွင်ဢွၼ်တၢင်းမၼ်းၸဝ်ႈၵမ်းလဵဝ်ဢေႃႈ။-
ဝၢႆးသေၵူၼ်းၸိူဝ်းၼၼ်ႉဢွၵ်ႇပူၼ်ႉၵႂႃႇယဝ်ႉၸင်ႇ၊မၼ်းၸဝ်ႈပႃးလဵဝ်ၵူၺ်းၶိုၼ်ႈၵႂႃႇၵႃႈၼိူဝ်လွႆႁႂ်ႈလႆႈသူးတွင်းလႄႈ၊ ၶမ်ႈၼၼ်ႉ ၸဝ်ႈယေႇသု၊ မီးယူႇတီႈၼၼ်ႈပႃးလဵဝ်ၵူၺ်းဢေႃႈ။-
ၽွင်းယၢမ်းၼၼ်ႉ၊ႁိူဝ်းဢွၵ်ႇၵႂႃႇမီးယူႇၼႂ်းၵၢင်ၼွင်ယဝ်ႉလႄႈၵွပ်ႈပိူဝ်ႈလူမ်းဢမ်ႇထုၵ်ႇၼၼ်ႉလႆႈၶၢမ်ႇတၢင်းဢၼ်လႅင်းၼမ်ႉၶွၼ်းၶႅၼ်းထိပ်ႇၽင်ႈႁႅင်းၼႃႇလူင်လၢင်ဢေႃႈ။
ၶိင်ႇတဵင်ႈၶိုၼ်းၸၢႆႉဢၼ်ႁႆႇသၢမ်မွင်းလိူဝ်ၼၼ်ႉမၼ်းၸဝ်ႈပႆၵႃႈၼိူဝ်ၽိဝ်ၼမ်ႉၵႂႃႇၸူးၶဝ်ဢေႃႈ။-
မိူဝ်ႈဢၼ်ၶဝ်ႁၼ်မၼ်းၸဝ်ႈပႆၵႃႈၼိူဝ်ၽိဝ်ၼမ်ႉမႃးယူႇၸိူဝ်ႉၼင်ႇၼၼ်ၼၼ်ႉၸိုင်၊ၶဝ်ထၢင်ႇပဵၼ်ၽဵတ်ႇလႄႈတူၵ်းၸႂ်ၵူဝ်ႁႄၼႃႇလႄႈပၢဝ်ႇသႅၼ်ႇဢေႃႈ။
ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “ဝႆႉၸႂ်ႁတ်းႁၢၼ်တႃႉ၊ပဵၼ်ၵဝ်ဢိူဝ်း၊ယႃႇပေၵူဝ်၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ပေႇတရု၊ ၵေႃႈလၢတ်ႈလႄႈဝႃႈ၊ “ၸဝ်ႈႁဝ်းပေႃးပဵၼ်ၸဝ်ႈႁဝ်းတႄႉၸိုင်၊ပၼ်ဢၶႂၢင်ႉႁႂ်ႈၵဝ်ၶႃႈပႆၵႃႈၼိူဝ်ၽိဝ်ၼမ်ႉၵႂႃႇၸူးၸဝ်ႈႁဝ်းသေၵမ်းၶႃႈ၊” ဝႃႈၼႆလႄႈ။
မၼ်းၸဝ်ႈၵေႃႈဝႃႈ၊ “မႃးတႃႉ” ဝႃႈၼင်ႇၼႆဢေႃႈ။ ပေႇတရု၊ ဝႅၼ်လူင်းႁိူဝ်းၵမ်းလဵဝ်လႄႈပႆၵႃႈၼိူဝ်ၽိဝ်ၼမ်ႉၵႂႃႇၸူးမၼ်းၸဝ်ႈဢေႃႈ။-
ယၢမ်းမိူဝ်ႈဢၼ်မၼ်းၶုၵ်းၸႂ်လႆႈလူမ်းႁႅင်းၼႃႇၼၼ်ႉၸိုင်၊မီးၸႂ်ၵူဝ်လႄႈဢၢင်ႈတၵ်းၸူမ်ၼမ်ႉၵႂႃႇဢေႃႈ။ မၼ်းၸင်ႇႁွင်ႉပၢဝ်ႇလႄႈဝႃႈ၊ “ၵႄႇသႄႇသေၵမ်းၶႃႈ။ ၸဝ်ႈ၊” ဝႃႈၼင်ႇၼႆလႄႈ။
ၸဝ်ႈယေႇသု၊ ယိုၼ်းမိုဝ်းယိပ်းဢဝ်ၵမ်းလဵဝ်လႄႈလၢတ်ႈဝႃႈ၊ “ၵေႃႉဢၼ်တၢင်းယုမ်ႇမၢတ်ႈၵေႇၼႆႉ႟။ ႁဵတ်းသင်လႄႈမႂ်းယုမ်ႇၶိုင်ႈၼိုင်ႈဢမ်ႇယုမ်ႇၶိုင်ႈၼိုင်ႈၼင်ႇႁိုဝ်၊” ဝႃႈၼင်ႇၼႆဢေႃႈ။
မိူဝ်ႈဢၼ်ၶဝ်သွင်ၵေႃႉၶဝ်ႈၵႃႈၼႂ်းႁိူဝ်းယဝ်ႉၼၼ်ႉ၊လူမ်းၵေႃႈထၢတ်ႇယဵၼ်ၵႂႃႇၵမ်းလဵဝ်ဢေႃႈ။-
တပႄးၸဝ်ႈဢၼ်မီးၼႂ်းႁိူဝ်းၸိူဝ်းၼၼ်ႉဢွၼ်ၵၼ်ၶုပ်ႉမူပ်ႇဝႆႈမၼ်းၸဝ်ႈလႄႈလၢတ်ႈဝႃႈ၊ “ၸဝ်ႈႁဝ်းပဵၼ်လုၵ်ႈၽြႃးပဵၼ်ၸဝ်ႈဢမၢၼ်ႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၶဝ်ၶၢမ်ႈၵႂႃႇၽၢႆႇပုၼ်ႉၽင်ႇၼမ်ႉၼွင်လႄႈႁွတ်ႈထိုင်ၵႃႈတီႈမိူင်း ၵိၼ်ႇၼီႇၸရိတ်ႈ၊ ဢေႃႈ။-
ၵူၼ်းမိူင်းၼၼ်ႉ၊ႁုၸၵ်း ၸဝ်ႈယေႇသု၊ လႄႈၶဝ်ပၼ်ၶၢဝ်ႇငၢဝ်းၵႂႃႇၵႃႈတီႈဝၢၼ်ႈဝဵင်းဢၼ်မီးႁိမ်းႁွမ်းၵူႈတီႈၵူႈလႅၼ်သေလႄႈပိူၼ်ႈဢွၼ်ၵၼ်ဢဝ်ၵူၼ်းၶႆႈၵူၼ်းပဵၼ်ၼမ်ၼႃႇ၊မႃးၸူးတီႈမၼ်းၸဝ်ႈဢေႃႈ။-
ၶဝ်ဢွၼ်ၵၼ်ယွၼ်းႁႂ်ႈဢဝ်ၵူၼ်းၶႆႈၵူၼ်းပဵၼ်ၸိူဝ်းၼၼ်ႉ၊ လႆႈတိူဝ်ႉယိပ်းပိၵ်ႇသိူဝ်ႈမၼ်းၸဝ်ႈၵူၺ်းဢေႃႈ။ ၵေႃႉဢၼ်လႆႈတိူဝ်ႉလႆႈယိပ်းၵေႃႈၸိုၼ်ႈႁၢႆၵႂႃႇၵူႈၵေႃႉဢေႃႈ။
မိူဝ်ႈၼၼ်ႉ၊ၵူၼ်းၵိူင်း ၽႃႇရိသႄး၊ ၶဝ်၊ဢိၵ်ႇတင်းသြႃႇမေႃၵျၢမ်းထမ်ႇမႃႉၶဝ်ၵမ်ႈၽွင်ႈ၊လုၵ်ႉသေဝဵင်း ယေႇရုသလႅမ်ႇ၊ မႃးတီႈ ၸဝ်ႈယေႇသု၊ လႄႈ၊-
လဝ်ႈထၢမ်လႄႈဝႃႈ၊ “ႁဵတ်းသင်တပႄးသြႃႇႁဝ်းတင်းလၢႆပူၼ်ႉလိူဝ်ထုင်းၽိင်ႈတြႃးၵူၼ်းမိူဝ်ႈၵွၼ်ႇၼၼ်ႉၸိူဝ်ႉၼင်ႇႁိုဝ်။ ဢွၼ်တၢင်းတေၵိၼ်တၢင်းၵိၼ်ၼၼ်ႉၶဝ်ယင်းဢမ်ႇသုၵ်ႈမိုဝ်းလႄႈၵိၼ်တၢင်းၵိၼ်လူင်ပႄႇ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ႁဵတ်းသင်လႄႈသူပူၼ်ႉလိူဝ်ပိင်းၺၢပ်ႈတြႃးၸဝ်ႈ၊ လူၺ်ႈတၢင်းဢၼ်ႁႂ်ႈၸွမ်းထုင်းၽိင်ႈတြႃးၵူၼ်းမိူဝ်ႈၵွၼ်ႇၼၼ်ႉၸိူဝ်ႉၼင်ႇႁိုဝ်။-
ၽြႃးပဵၼ်ၸဝ်ႈပိင်းၺၢပ်ႈဝႆႉလႄႈဝႃႈ၊ ‘ရူဝ်ႇသေႇၵူဝ်ယမ်ပေႃႈမႄႈသူတႃႉ၊’ ဝႃႈၼႆ၊ဢိၵ်ႇတင်းဢၼ်ဝႃႈ၊ ‘ၵေႃႉဢၼ်ၵိၼ်ႇလႃႇပေႃႈမႄႈမၼ်းၼၼ်ႉ၊ႁႂ်ႈမၼ်းလႆႈၶၢမ်ႇတၢမ်ႇတၢႆတႃႉ၊’ ဝႃႈၼႆမီးဝႆႉဢေႃႈ။-
ၵူၺ်းၵႃႈ၊သူသမ်ႉသင်ႇသွၼ်လႄႈဝႃႈ၊ပေႃးသေၵေႃႉသေၵူၼ်းလၢတ်ႈတီႈပေႃႈတီႈမႄႈမၼ်းလႄႈဝႃႈ၊ ‘ၶူဝ်းၶွင်ၵဝ်ၶႃႈတင်းသဵင်ႈတင်းလူင်၊ဢၼ်သူၶႂ်ႈဢဝ်သုင်းဢဝ်တိုဝ်းၼၼ်ႉ၊ ပေႃးလႆႈသၢၵ်ႈလူႇတီႈၸဝ်ႈၽြႃးယဝ်ႉဢေႃႈ၊’ ဝႃႈၼင်ႇၼႆယဝ်ႉၸိုင်၊-
‘ၵေႃႉၼၼ်ႉဢမ်ႇလူဝ်ႇရူဝ်ႇသေႇပေႃႈမႄႈမၼ်းယဝ်ႉ၊’ ဝႃႈၼႆ၊သင်ႇသွၼ်ၸိူဝ်ႉၼင်ႇၼႆဢေႃႈ။ ၵွပ်ႈပိူဝ်ႈထုင်းၽိင်ႈသူၼၼ်ႉလႄႈသူပူၼ်ႉလိူဝ်ပိင်းၺၢပ်ႈတြႃးၸဝ်ႈဢေႃႈ။-
သူဢၼ်ႁဵတ်းၼႃႈသိုဝ်ႈၸႂ်ၵူတ်ႉၶဝ်႟။ ဢၼ်ပရေႃးၽႅတ်ႈ ဢိသႃႇယႃႉ၊ ႁေႃးဝႆႉဝႃႈ။
“‘ၵူၼ်းၸိူဝ်းၼႆႉဢဝ်တင်းသူပ်းၵူဝ်းၵႂၢႆႇၵဝ်ၵူၺ်းလႄႈ၊ ႁူဝ်ၸႂ်ၶဝ်ယၢၼ်ၵႆၵၼ်တင်းၵဝ်ဢေႃႈ။
ၶဝ်ဢဝ်ထုင်းတြႃးဢၼ်ၵူၼ်းႁဵတ်းဝႆႉၸိူဝ်းၼၼ်ႉ၊ သင်ႇသွၼ်ပၼ်ၸိူဝ်ႉၼင်ႇပိင်းၺၢပ်ႈတြႃးၸဝ်ႈလႄႈ ႁဵတ်းတၢင်းဢၼ်ၵူဝ်းၵႂၢႆႇၵဝ်လၢႆလၢႆလွၵ်ႇလွၵ်ႇၵူၺ်းဢေႃႈ၊’ ဝႃႈၼင်ႇၼႆၼၼ်ႉ၊ ပဵၼ်သူၸိူဝ်းၼႆႉယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ၸဝ်ႈယေႇသု၊ ႁွင်ႉဢဝ်မူႇၵူၼ်းတင်းလၢႆမႃးတီႈမၼ်းၸဝ်ႈလႄႈႁေႃးလၢတ်ႈဝႃႈ၊ “ၵႃႈဢၼ်ၵဝ်ႁေႃးလၢတ်ႈၵႂႃႇယဝ်ႉၼႆႉထွမ်ႇဢဝ်လႄႈၶႆႈၸႂ်ဝူၼ်ႉၸႂ်တူၺ်းလီလီတႃႉ။-
ၶိူင်ႈပိူင်ဢၼ်ၶဝ်ႈသူပ်းၼၼ်ႉႁႂ်ႈၵူၼ်းၵူဝ်ႈၵိူၵ်ႇဢမ်ႇၸႂ်ႈ။ ဢၼ်ဢွၵ်ႇသူပ်းၼၼ်ႉၵူၺ်းႁႂ်ႈၵူၼ်းၵူဝ်ႈၵိူၵ်ႇဢေႃႈ၊” ဝႃႈၼင်ႇၼႆဢေႃႈ။
ၵမ်းၼၼ်ႉ၊တပႄးၸဝ်ႈတင်းလၢႆသုတ်ႉၸူးလႄႈလဝ်ႈလၢတ်ႈဝႃႈ၊ “ၵွပ်ႈပိူဝ်ႈၸဝ်ႈႁဝ်းႁေႃးလၢတ်ႈၸိူဝ်ႉၼင်ႇၼႆလႄႈၵူၼ်းၵိူင်း ၽႃႇရိသႄး၊ ၶဝ်ၽိတ်းၸႂ်တေႃႇၸဝ်ႈႁဝ်းယူႇၼၼ်ႉ၊ ၸဝ်ႈႁဝ်းႁုၶႃႈႁိုဝ်း၊” ဝႃႈၼင်ႇၼႆဢေႃႈ။
မၼ်းၸဝ်ႈၶိုၼ်းလၢတ်ႈလႄႈဝႃႈ၊ “တူၼ်ႈၵႃႈဢၼ်ပေႃႈၸဝ်ႈၵဝ်ဢၼ်မီးၵႃႈၼိူဝ်ၽုင်ႇၵၢင်ႁၢဝ်ဢမ်ႇၽုၵ်ႇၼၼ်ႉတၵ်းလႆႈၶၢမ်ႇတၢင်းဢၼ်ထူၺ်ႈပႅတ်ႈၸဵမ်ငဝ်ႈၸဵမ်ႁၢၵ်ႈတင်းသဵင်ႈတင်းမူတ်းဢေႃႈ။-
ၵေႃႈယႃႇၶဝ်တႃႉ။ ၶဝ်ပဵၼ်ၵူၼ်းတႃမွတ်ႇဢၼ်ဢွၼ်ၼႄတၢင်းတီႈၵူၼ်းတႃမွတ်ႇၼၼ်ႉဢေႃႈ။ ပေႃးၵူၼ်းတႃမွတ်ႇၼင်ႇၵၼ်ဢွၼ်ၼႄတၢင်းၵၼ်ၸိုင်၊တင်းသွင်ၵေႃႉတၵ်းတူၵ်းလုၵ်းတူၵ်းၶုမ်ဢေႃႈ၊” ဝႃႈၼင်ႇၼႆဢေႃႈ။
ပေႇတရု၊ ဢမ်ႇပႆႇႁုထွမ်ႇလႄႈလဝ်ႈထၢမ်ဝႃႈ၊ “ၵႂၢမ်းဢုပမႃႇဢၼ်ၸဝ်ႈႁဝ်းႁေႃးလၢတ်ႈၼႆႉၶႂ်ႈဝႃႈသင်ၶႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၶိုၼ်းလၢတ်ႈလႄႈဝႃႈ၊ “မႂ်းယင်းဢမ်ႇႁုပွင်ႇယူႇမိူၼ်ပိူၼ်ႈႁိုဝ်း။-
ၵႃႈဢၼ်ၶဝ်ႈသူပ်းၼၼ်ႉ၊တူၵ်းၶဝ်ႈတွင်ႉသေလႄႈသမ်ႉၽၢႆႈပႅတ်ႈၵႃႈၼႂ်းထၢင်ဢွၵ်ႇၼွၵ်ႈၸိုင်၊မႂ်းဢမ်ႇပႆႇႁုလူးၵွၼ်ႇႁိုဝ်း။-
ၵူၺ်းၵႃႈ၊ၵႃႈဢၼ်ဢွၵ်ႇသူပ်းၼၼ်ႉ၊လုၵ်ႉသေၵႃႈၼႂ်းႁူဝ်ၸႂ် ဢွၵ်ႇမႃးလႄႈဢၼ်ၼၼ်ႉႁဵတ်းႁႂ်ႈၵူၼ်းၵူဝ်ႈၵိူၵ်ႇဢေႃႈ။-
ဢၼ်ဢွၵ်ႇၵႃႈၼႂ်းႁူဝ်ၸႂ်မႃးၼၼ်ႉပဵၼ်တၢင်းၵျၢမ်ႇဢၼ်ႁၢႆမိူၵ်ႈလႄႈပဵၼ်တၢင်းဢၼ်ဢဝ်ဢသၢၵ်ႈၵူၼ်းတၢႆ၊တၢင်းဢၼ်ၵူတ်ႉမေးပိူၼ်ႈ၊တၢင်းဢၼ်ၽိတ်းပိူင်ႈၵႃႇမေႇသု၊တၢင်းဢၼ်လၵ်ႉပိူၼ်ႈၸူၼ်ပိူၼ်ႈ၊တၢင်းဢၼ်ၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈ၊တၢင်းဢၼ်သႄႉသွမ်းပိူၼ်ႈတၢင်ႇၵေႃႉၸိူဝ်းၼႆႉ၊-
ႁဵတ်းႁႂ်ႈၵူၼ်းၵူဝ်ႈၵိူၵ်ႇဢေႃႈ။ လွင်ႈတၢင်းဢၼ်ဢမ်ႇသုၵ်ႈမိုဝ်းလႄႈၵိၼ်ၼၼ်ႉ၊ႁဵတ်းႁႂ်ႈၵူၼ်းၵူဝ်ႈၵိူၵ်ႇဢမ်ႇၸႂ်ႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ဢွၵ်ႇသေၵႃႈတီႈၼၼ်ႈလႄႈၵႂႃႇၵႃႈတီႈဝၢၼ်ႈၼွၵ်ႈၼႃးပၢင်ႇႁိမ်းဝဵင်း တုရု၊ ဢိၵ်ႇတင်းဝဵင်း ၸိတုၼ်ႇ၊ ပုၼ်ႉဢေႃႈ။-
မိူဝ်ႈၼၼ်ႉ၊မႄႈယိင်းမဵဝ်း ၶႃႇၼၼိ၊ ၵူၼ်းမိူင်းၼၼ်ႉၵေႃႉၼိုင်ႈ၊မႃးၸူးမၼ်းၸဝ်ႈလႄႈႁွင်ႉပၢဝ်ႇလႄႈဝႃႈ၊ “ၸဝ်ႈႁဝ်း၊ လုၵ်ႈ တႃႇဝိတ်ႈ၊ ၼႆႉ႟။ ဢဵတ်းလူၵဝ်ၶႃႈသေၵမ်း။ ၽိူဝ်ႉၶဝ်ႈလုၵ်ႈယိင်းၵဝ်ၶႃႈလႄႈၵိၼ်းၸႂ်ၼႃႇလူင်လၢင်ၶႃႈဢေႃႈ၊” ဝႃႈၼင်ႇၼႆသေၵေႃႈ။
မၼ်းၸဝ်ႈယင်းဢမ်ႇၶိုၼ်းလၢတ်ႈတေႃႇသေၶေႃႈသေၵမ်းလႄႈယူႇယူႇဢေႃႈ။ တပႄးၸဝ်ႈတင်းလၢႆမႃးတွင်းပၢၼ်ႇမၼ်းၸဝ်ႈလႄႈဝႃႈ၊ “ႁေႃႈမႄႈယိင်းၼၼ်ႉၵႂႃႇၵႆၵႆသေၵမ်းၶႃႈ။ မၼ်းႁွင်ႉပၢဝ်ႇႁွင်ႉသႅၼ်ႇၸွမ်းလင်ႁဝ်းၶႃႈယူႇဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊မၼ်းၸဝ်ႈၶိုၼ်းလၢတ်ႈလႄႈဝႃႈ၊ “ၵဝ်လႆႈၶၢမ်ႇတၢင်းဢၼ်ပွႆႇၸႂ်ႉမႃးပုၼ်ႈသူဝ်းဢၼ်ႁၢႆၵႂႃႇဢၼ်ဝႃႈ၊ၸိူဝ်ႉၶိူဝ်းမဵဝ်း ဢိသရေး၊ ၼႆႉၵူၺ်းဢေႃႈ၊” ဝႃႈၼင်ႇၼႆဢေႃႈ။
ၵမ်းၼၼ်ႉ မႄႈယိင်းၼၼ်ႉၶုပ်ႉၶဝ်ႇတီႈႁိမ်းတိၼ်ၸဝ်ႈလႄႈလဝ်ႈလၢတ်ႈဝႃႈ၊ “ဢဵတ်းလူၸွႆႈထႅမ်ၵဝ်ၶႃႈသေၵမ်းၶႃႈၸဝ်ႈ၊” ဝႃႈၼင်ႇၼႆယဝ်ႉၸင်ႇ။
မၼ်းၸဝ်ႈလၢတ်ႈတီႈမႄႈယိင်းၼၼ်ႉလႄႈဝႃႈ၊ “တၢင်းၵိၼ်လုၵ်ႈလၢင်းဢမ်ႇထုၵ်ႇလီပႅတ်ႈဢွႆႇမႃၵူၺ်း၊” ဝႃႈၼင်ႇၼႆဢေႃႈ။
မႄႈယိင်းၼၼ်ႉၵေႃႈ၊တွင်းပၢၼ်ႇလႄႈလဝ်ႈလၢတ်ႈဝႃႈ၊ “ၸႂ်ႈတႄႉၶႃႈယဝ်ႉၸဝ်ႈ။ ၵူၺ်းၵႃႈ၊မႃယင်းလႆႈၵဵပ်းၵိၼ်ဢၼ်ယွႆႈဢၼ်ယႅမ်းဢၼ်တူၵ်းၵႃႈတႂ်ႈၽိူၼ်ၸဝ်ႈမၼ်းၼၼ်ႉယူႇၶႃႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “မႂ်းပဵၼ်မႄႈယိင်းဢၼ်တၢင်းယုမ်ႇမၢတ်ႈယႂ်ႇၼႃႇဢေႃႈ။ ၵႃႈၼင်ႇဢၼ်မႂ်းမီးဢလူဝ်ႇၼၼ်ႉႁႂ်ႈပဵၼ်တီႈမႂ်းတႃႉ၊” ဝႃႈၼင်ႇၼႆလႄႈၼႂ်းၶိင်ႇၼၼ်ႉၵမ်းလဵဝ်လုၵ်ႈယိင်းမၼ်းလႆႈႁွတ်ႈထိုင်တၢင်းဢၼ်ၸိုၼ်ႈႁၢႆဢေႃႈ။
ၸဝ်ႈယေႇသု၊ ဢွၵ်ႇသေၵႃႈတီႈၼၼ်ႈလႄႈၵႂႃႇလႄႇလဵပ်ႈႁိမ်းၽင်ႇၼမ်ႉၼွင် ၵႃႇလိလႄး၊ သေယဝ်ႉ၊ ၶိုၼ်ႈၵႂႃႇၼင်ႈၵႃႈၼိူဝ်ၵွင်းလွႆဢေႃႈ။-
ၵူၼ်းပဵၼ်မူႇပဵၼ်ၽုင်ၼမ်ၼႃႇ၊ပႃးဢဝ်ၵူၼ်းၶႃႁၵ်းၶႃၵႅင်ႉလႂ်၊ၵူၼ်းတႃမွတ်ႇလႂ်၊ၵူၼ်းဢႃႉလႂ်၊ၵူၼ်းဢၢင်ႇၵႃႇလုလႂ်၊ဢိၵ်ႇတင်းၵူၼ်းၶႆႈၵူၼ်းပဵၼ်တၢင်ႇၸိူဝ်ႉတၢင်ႇမဵဝ်းလႂ်၊မႃးၶျႃးဝၢင်းဝႆႉႁိမ်းတိၼ်မၼ်းၸဝ်ႈလႄႈမၼ်းၸဝ်ႈၵေႃႈႁႂ်ႈၶဝ်ၸိုၼ်ႈႁၢႆဢေႃႈ။-
ၵူၼ်းဢၼ်ၸုဢၼ်တုမ်ၵၼ်ၸိူဝ်းၼၼ်ႉ၊မိူဝ်ႈဢၼ်ႁၼ်ၵူၼ်းဢႃႉလၢတ်ႈၵႂၢမ်းလႆႈမႃး၊ၵူၼ်းဢၢင်ႇၵႃႇလုၵေႃႈလီမႃး၊ၵူၼ်းၶႃႁၵ်းၶႃၵႅင်ႉပႆလႆႈမႃး၊ၵူၼ်းတႃမွတ်ႇႁၼ်လႆႈမႃးၼၼ်ႉၸိုင်၊ဢၢမ်းၼႃႇလူင်လၢင်လႄႈယွင်ႈယေႃးမုၼ်ၽုင်းၽြႃးပဵၼ်ၸဝ်ႈၸိူဝ်ႉၶိူဝ်း ဢိသရေး၊ ဢေႃႈ။
ၸဝ်ႈယေႇသု၊ ႁွင်ႉဢဝ်တပႄးၸဝ်ႈတင်းလၢႆ၊မႃးၸုတုမ်ၵၼ်တီႈမၼ်းၸဝ်ႈသေလႄႈလၢတ်ႈဝႃႈ၊ “ၵဝ်ဢဵတ်းလူၵူၼ်းၸိူဝ်းၼႆႉဢေႃႈ။ ၶဝ်မီးယူႇလူၺ်ႈၵၼ်တင်းၵဝ်ပေႃးလႆႈသၢမ်ဝၼ်းတဵမ်တဵမ်ယဝ်ႉသေၵေႃႈ၊ယင်းဢမ်ႇပႆႇလႆႈၵိၼ်ၵႃႈသင်လူးၵွၼ်ႇ။ ယင်းဢမ်ႇလဵင်ႉလူၶဝ်လႄႈၵဝ်ဢမ်ႇၸၢင်ႈပွႆႇၶဝ်မိူဝ်းၵႂႃႇ။ ၵူဝ်ၶဝ်ႁိူဝ်ႉၼူၼ်းလႄႈႁႅင်းဢူၼ်ႈၵၢင်တၢင်းဢေႃႈ၊” မိူဝ်ႈဢၼ်ဝႃႈၼင်ႇၼႆၸိုင်။
တပႄးၸဝ်ႈၸိူဝ်းၼၼ်ႉၶိုၼ်းလဝ်ႈလၢတ်ႈလႄႈဝႃႈ၊ “ၵႃႈတီႈၼႂ်းထိူၼ်ႇၸိူဝ်ႉၼင်ႇၼႆတၵ်းလႆႈတၢင်းၵိၼ်တီႈလႂ်မႃးႁႂ်ႈၶဝ်ပေႃးၵုမ်ႇၵိၼ်ၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈထၢမ်လႄႈဝႃႈ၊ “သူမီးၶဝ်ႈမုၼ်းလၢႆႁူၺ်ႇ၊” မိူဝ်ႈဢၼ်ဝႃႈၼင်ႇၼႆၸိုင်၊ၶဝ်ၶိုၼ်းလၢတ်ႈလႄႈဝႃႈ၊ “မီးၶဝ်ႈမုၼ်းၸဵတ်းႁူၺ်ႇတင်းပႃဢွၼ်ႇဢိတ်းၼိုင်ႈၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊မၼ်းၸဝ်ႈပူင်ဢမိင်ႉႁႂ်ႈမူႇၵူၼ်းတင်းလၢႆၼင်ႈၵႃႈၼိူဝ်လိၼ်သေယဝ်ႉ၊-
ဢဝ်ၶဝ်ႈမုၼ်းၸဵတ်းႁူၺ်ႇတင်းပႃဢွၼ်ႇဢိတ်းၼိုင်ႈၼၼ်ႉသေယဝ်ႉ၊ယွင်ႈယေႃးတၢင်ႇၵျေးၸူးၽြႃးပဵၼ်ၸဝ်ႈယဝ်ႉၸင်ႇ၊ဝိတ်းပၼ်တပႄးၸဝ်ႈတင်းလၢႆႁႂ်ႈဢဝ်ၵႂႃႇၽႄမႅင်ႇပၼ်ၵူၼ်းဢၼ်ၸုဢၼ်တုမ်ၸိူဝ်းၼၼ်ႉဢေႃႈ။-
ၵူၼ်းၸိူဝ်းၼၼ်ႉလႆႈၵိၼ်ဢိမ်ႇတွင်ႉၵူႈၵေႃႉသေလႄႈတပႄးၸဝ်ႈၸိူဝ်းၼၼ်ႉၵေႃႈၵဵပ်းၸုၵဵပ်းသိမ်းဢၼ် ၵိုတ်းဢၼ်လိူဝ်တင်းမူတ်းလႆႈၸဵတ်းပဵတ်ႈတဵမ်တဵမ်ဢေႃႈ။-
ၵူၼ်းဢၼ်လႆႈၵိၼ်ၼႂ်းဝၼ်းၼၼ်ႉဢမ်ႇၼပ်ႉဢၢၼ်ႇပႃးမႄႈယိင်းတင်းလုၵ်ႈဢွၼ်ႇလႂ်၊ၼပ်ႉဢၢၼ်ႇၵူၼ်းၸၢႆးၵူၺ်းၵူၺ်းမီးသီႇႁဵင်ၵေႃႉဢေႃႈ။
ဝၢႆးသေမၼ်းၸဝ်ႈပွႆႇၵူၼ်းၸိူဝ်းၼၼ်ႉၵႂႃႇယဝ်ႉၸင်ႇ၊ၶီႇႁိူဝ်းၵႂႃႇႁွတ်ႈထိုင်တီႈဝၢၼ်ႈၼွၵ်ႈၼႃးပၢင်ႇမိူင်း မႃႇၵတလႃႉ၊ ပုၼ်ႉဢေႃႈ။
မိူဝ်ႈၼၼ်ႉ၊ၵူၼ်းၵိူင်း ၽႃႇရိသႄး၊ ၶဝ်၊ဢိၵ်ႇတင်းၵိူင်း ၸတ်ႉတုၵႄး၊ ၵမ်ႈၽွင်ႈမႃးတီႈ ၸဝ်ႈယေႇသု၊ ႁႂ်ႈလႆႈၸၢမ်းတူၺ်းယႃႉယုၵ်ႉမၼ်းၸဝ်ႈလႄႈယွၼ်းႁႂ်ႈမၼ်းၸဝ်ႈႁဵတ်းၼႄၼိမိၵ်ႈလၢၵ်ႈၶၼႃႇၵၢင်ႁၢဝ်၊လွင်ႈဢၼ်မၼ်းၸဝ်ႈပဵၼ်ၸဝ်ႈဢၼ်ၽြႃးပဵၼ်ၸဝ်ႈပွႆႇၸႂ်ႉမႃးၼၼ်ႉဢေႃႈ။-
ၵူၺ်းၵႃႈ၊ ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ၶိင်ႇႁူဝ်ၶမ်ႈၼၼ်ႉသူၸၢင်ႈတူၺ်းၼႃႈၽႃႉၵၢင်ႁၢဝ်လႄႈဝႃႈ၊ ‘ပိူဝ်ႈဢၼ်ၼႃႈၽႃႉၵၢင်ႁၢဝ်လႅင်ၶွင်ဝႆႉလႄႈၽႃႉတၵ်းပၢင်ႇလႅင်းသႂ်ဢေႃႈ၊’ ဝႃႈၼင်ႇၼႆဢေႃႈ။-
ၶိင်ႇႁူဝ်ၼႂ်ၸမ်ႉ၊ ‘ပိူဝ်ႈဢၼ်ၼႃႈၽႃႉၵၢင်ႁၢဝ်လႅင်ၵမ်ႇဝႆႉလႄႈၽူၼ်လူင်လူမ်းလူင်တၵ်းမႃးဢေႃႈ၊’ ဝႃႈၼႆသူၸၢင်ႈတူၺ်းၼႃႈၽႃႉၵၢင်ႁၢဝ်လႄႈႁုဢေႃႈ။ ၵူၺ်းၵႃႈ၊ဢတိၵ်ႈၼိမိၵ်ႈၼၼ်ႉသူတိုၼ်းဢမ်ႇၸၢင်ႈတူၺ်းလႄႈႁုလႆႈ။-
ၵူၼ်းၸူဝ်ႈပၢၼ်ၼႆႉၸိူဝ်းဢၼ်ႁၢႆႉမိူၵ်ႈလႄႈဢမ်ႇမီးသိၼ်ထမ်းၸိူဝ်ႉၼင်ႇသူၼႆႉ၊ယွၼ်းတူၺ်းၼိမိၵ်ႈလၢၵ်ႈၶၼႃႇဝႃႈၼႆ၊လိူဝ်သေၼိမိၵ်ႈလၢၵ်ႈၶၼႃႇသြႃႇ ယူဝ်းၼႃႉ၊ ၼၼ်ႉ၊ တၵ်းဢမ်ႇႁဵတ်းၼႄလၢၵ်ႈၶၼႃႇတၢင်ႇၸိူဝ်ႉတၢင်ႇမဵဝ်းၵူၺ်း၊” ဝႃႈၼင်ႇၼႆသေယဝ်ႉ၊မၼ်းၸဝ်ႈၽၢတ်ႇဢွၵ်ႇၶဝ်လႄႈၵႂႃႇတၢင်ႇတီႈတၢင်ႇလႅၼ်သေဢေႃႈ။
မိူဝ်ႈဢၼ်တပႄးၸဝ်ႈၸိူဝ်းၼၼ်ႉၶၢမ်ႈႁွတ်ႈၽင်ႇၽၢႆႇပုၼ်ႉၼွင်ၸိုင်၊ၶဝ်လိုမ်းပႃးၶဝ်ႈမုၼ်းၵႂႃႇဢေႃႈ။-
ၸဝ်ႈယေႇသု၊ လၢတ်ႈတီႈၶဝ်လႄႈဝႃႈ၊ “ႁဵတ်းသတိလႄႈဝႄႈပႅတ်ႈၸိူဝ်ႉပႅင်ႈၵိူင်း ၽႃႇရိသႄး၊ ၶဝ်ဢိၵ်ႇတင်းၵိူင်း ၸတ်ႉတုၵႄး၊ တင်းလၢႆတႃႉ၊” ဝႃႈၼင်ႇၼႆဢေႃႈ။
ၶဝ်ၵေႃႈ၊ၵေႃႉၼိုင်ႈလႄႈၵေႃႉၼိုင်ႈတွင်ႈထၢမ်ၵၼ်လႄႈဝႃႈ၊ “ႁဝ်းလိုမ်းပႃးၶဝ်ႈမုၼ်းမႃးလႄႈမၼ်းၸဝ်ႈၸင်ႇဝႃႈၸိူဝ်ႉၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ႁုလွင်ႈဢၼ်ၶဝ်လၢတ်ႈၸႃၵၼ်ၼၼ်ႉလႄႈလၢတ်ႈဝႃႈ၊ “သူၸိူဝ်းဢၼ်တၢင်းယုမ်ႇမၢတ်ႈၵေႇၼႆႉ႟။ ႁဵတ်းသင်လႄႈသူၼင်ႇၵၼ်ၵၼ်တွပ်ႇထဵင်ၵၼ်လွင်ႈလိုမ်းပႃးၶဝ်ႈမုၼ်းမႃးၼၼ်ႉၸိူဝ်ႉၼင်ႇႁိုဝ်။-
သူယင်းဢမ်ႇပႆႇႁုထွမ်ႇပွင်ႇလႅင်းၵွၼ်ႇႁိုဝ်း။ ၶဝ်ႈမုၼ်းႁႃႈႁူၺ်ႇဝိတ်းလဵင်ႉၵူၼ်းႁႃႈႁဵင်ၵေႃႉယဝ်ႉ၊ဢမ်ႇၶုၵ်းၸႂ်လႆႈႁိုဝ်း။ ဢၼ်ၵိၼ်ၵိုတ်းၵိၼ်လိူဝ်လႆႈလၢႆပဵတ်ႈၼၼ်ႉ။-
သမ်ႉဢဝ်ၶဝ်ႈမုၼ်းၸဵတ်းႁူၺ်ႇလဵင်ႉလူၵူၼ်းသီႇႁဵင်သေယဝ်ႉ၊ သမ်ႉၵိုတ်းလိူဝ်ထႅင်ႈလၢႆပဵတ်ႈၼၼ်ႉဢမ်ႇတွင်းႁိုဝ်း။-
ႁဵတ်းသင်လႄႈသူဢမ်ႇႁုပွင်ႇလွင်ႈဢၼ်ၵဝ်လၢတ်ႈၼႆႉ၊ဢမ်ႇၸႂ်ႈလၢတ်ႈလွင်ႈၶဝ်ႈမုၼ်းၼၼ်ႉၵူၺ်း။ လၢတ်ႈလွင်ႈႁႂ်ႈဝႄႈပႅတ်ႈၸိူဝ်ႉပႅင်ႈၵူၼ်းၵိူင်း ၽႃႇရိသႄး၊ ၶဝ်၊ဢိၵ်ႇတင်းၵိူင်း ၸတ်ႉတုၵႄး၊ တင်းလၢႆၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊တပႄးၸဝ်ႈတင်းလၢႆၸင်ႇႁုထွမ်ႇလွင်ႈဢၼ်မၼ်းၸဝ်ႈလၢတ်ႈၼႆႉ၊ဢမ်ႇၸႂ်ႈလွင်ႈၸိူဝ်ႉပႅင်ႈဢၼ်သႂ်ႇၶဝ်ႈမုၼ်းၼၼ်ႉလႄႈ၊ ၶႂ်ႈဝႃႈႁႂ်ႈၶဝ်ဝႄႈပႅတ်ႈတၢင်းဢၼ်ၵူၼ်းၵိူင်း ၽႃႇရိသႄး၊ ၶဝ်ဢိၵ်ႇတင်းၵိူင်း ၸတ်ႉတုၵႄး၊ ၶဝ်သင်ႇသွၼ်ၼၼ်ႉဢေႃႈ။
ၸဝ်ႈယေႇသု၊ ႁွတ်ႈၽႅဝ်ၵႂႃႇၵႃႈတီႈဝၢၼ်ႈၼွၵ်ႈၼႃးပၢင်ႇဝဵင်း ၵေႇသရိၽိလိပ်ႉပိ၊ ပုၼ်ႉလႄႈ၊တီႈၼၼ်ႈမၼ်းၸဝ်ႈထၢမ်တပႄးၸဝ်ႈၸိူဝ်းၼၼ်ႉလႄႈဝႃႈ၊ “ပိူၼ်ႈဝႃႈ၊ လုၵ်ႈၵူၼ်း၊ ပဵၼ်ၽူႈလႂ်၊” ဝႃႈၼင်ႇၼႆဢေႃႈ။
ၶဝ်ၶိုၼ်းလၢတ်ႈလႄႈဝႃႈ၊ “ၵမ်ႈၽွင်ႈဝႃႈ၊ပဵၼ်သြႃႇ ယူဝ်းႁၢၼ်ႇ၊ ဢၼ်ပၼ်မၢင်ႇၵလႃႇပပ်ႉတိၸမ်ႇ ဢေႃႈ။ ၵမ်ႈၽွင်ႈဝႃႈ၊ပဵၼ် ဢေးလိယႃႉ၊ ၵမ်ႈၽွင်ႈဝႃႈ၊ ပဵၼ် ယေႇရမိ၊ ဢမ်ႇၼၼ်ပဵၼ်ပရေႃးၽႅတ်ႈ သေပႃးပႃးဢေႃႈ၊ဝႃႈၼင်ႇၼႆၶႃႈဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈသမ်ႉထၢမ်ၶဝ်လႄႈဝႃႈ၊ “သူၸမ်ႉ၊လၢတ်ႈလူး၊ ၵဝ်ပဵၼ်ၽူႈလႂ်၊” ဝႃႈၼင်ႇၼႆလႄႈ။
သိမုၼ်ႇပေႇတရု၊ ၶိုၼ်းလၢတ်ႈလႄႈဝႃႈ၊ “ၸဝ်ႈႁဝ်းပဵၼ် ၸဝ်ႈၶရိၸ်ႈ၊ လုၵ်ႈၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “ သိမုၼ်ႇ၊ လုၵ်ႈၸၢႆး ယူဝ်းၼႃႉ၊ ႟။ မႂ်းမီးမၢင်ႇၵလႃႇဢေႃႈ။ လွင်ႈတၢင်းၼႆႉၵူၼ်းၽုၺ်ႇၼႄပၼ်မႂ်းဢမ်ႇၸႂ်ႈ။ ပေႃႈၸဝ်ႈၵဝ်ဢၼ်ယူႇၵႃႈၼိူဝ် ၽုင်ႇၵၢင်ႁၢဝ်ၼၼ်ႉၽုၺ်ႇၼႄဢေႃႈ။-
ၵဝ်သမ်ႉဝႃႈတီႈမႂ်းထႅင်ႈၸမ်ႉ၊မႂ်းပဵၼ် ပေႇတရု၊ ဢၼ်ပွင်ႇဝႃႈမၢၵ်ႇႁိၼ်ဢေႃႈ။ ၵႃႈၼိူဝ်မၢၵ်ႇႁိၼ်ၼႆႉၵဝ်တၵ်းတႄႇတင်ႈၸိူဝ်းၸဝ်ႈၵဝ်၊ဢၼ်တၼ်းၶူဝ်းၶုၼ်တၢႆဢမ်ႇပႄႉဢမ်ႇၼႅင်ႇလႆႈၼၼ်ႉဢေႃႈ။-
ၵဝ်တၵ်းပၼ်သေႃးမိူင်းၵၢင်ႁၢဝ်ၼၼ်ႉၵႃႈတီႈမႂ်းဢေႃႈ။ ၵႃႈဢၼ်မႂ်းမတ်ႉၽုၵ်ႇဝႆႉၵႃႈၼိူဝ်လိၼ်မိူင်းၼႆႉၼၼ်ႉ၊တၵ်းလႆႈၶၢမ်ႇတၢင်းဢၼ်မတ်ႉၽုၵ်ႇဝႆႉၵႃႈၼိူဝ်မိူင်းၵၢင်ႁၢဝ်ၸဝ်ႈပုၼ်ႉဢေႃႈ။ ၵႃႈဢၼ်မႂ်းပွႆႇလွတ်ႈၵႃႈၼိူဝ်လိၼ်မိူင်းၼႆႉၼၼ်ႉ၊တၵ်းလႆႈပွႆႇလွတ်ႈၵႃႈၼိူဝ်မိူင်းၵၢင်ႁၢဝ်ၸဝ်ႈပုၼ်ႉဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈပိင်းၺၢပ်ႈတီႈတပႄးၸဝ်ႈတင်းလၢႆၼင်ႇႁိုဝ်ၶဝ်တၵ်းတေဢမ်ႇမွၵ်ႇလၢတ်ႈတီႈၽူႈလႂ်၊လွင်ႈဢၼ်မၼ်းၸဝ်ႈပဵၼ် ၸဝ်ႈၶရိၸ်ႈ၊ ၼၼ်ႉဢေႃႈ။
ၸႃႉၸဵမ်မိူဝ်ႈၼၼ်ႉလႄႈ ၸဝ်ႈယေႇသု၊ ႁေႃးလၢတ်ႈလႅင်းလႅင်းတီႈတပႄးၸဝ်ႈတင်းလၢႆလႄႈဝႃႈ၊ “ၵဝ်တၵ်းလႆႈၵႂႃႇၵႃႈတီႈဝဵင်း ယေႇရုသလႅမ်ႇ၊ လႄႈ၊တၵ်းလႆႈၶၢမ်ႇတၢင်းဢၼ်ၵူၼ်းဢၼ်ပဵၼ်ၵႄႇပဵၼ်ႁူဝ်ၶဝ်၊ယဵၸ်ႈပရေႃးႁဵၵ်ႈ လူင်ၶဝ်၊ဢိၵ်ႇတင်းသြႃႇမေႃၵျၢမ်းထမ်ႇမႃႉၶဝ်တင်းလၢႆ၊ၼိၵ်ႈၸၢၵ်ႈငႅၼ်းသႄးၵူၺ်းဢမ်ႇၵႃး၊ တၵ်းလႆႈၶၢမ်ႇတၢင်းဢၼ်ၶဝ်ဢဝ်တၢႆလႄႈ၊ၼႂ်းမိူဝ်ႈဢၼ်ထူၼ်ႈထိုင်သၢမ်ဝၼ်းတၵ်းလႆႈလုၵ်ႉၶိုၼ်းလိပ်းမႃးဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ပေႇတရု၊ ႁွင်ႉဢဝ် ၸဝ်ႈယေႇသု၊ ဢွၵ်ႇပၢင်ၶဝ်ၵႂႃႇသေယဝ်ႉ၊လဝ်ႈလၢတ်ႈၵႂၢမ်းၼၵ်းၼၵ်းလႄႈဝႃႈ၊ “ၸဝ်ႈႁဝ်း။ ႁႂ်ႈၽြႃးပဵၼ်ၸဝ်ႈႁႄၵင်ႈသေၵမ်း။ လွင်ႈတၢင်းဢၼ်ၸဝ်ႈႁဝ်းလၢတ်ႈမႃးၼႆႉယႃႇပေႁႂ်ႈပဵၼ်မႃးတီႈၸဝ်ႈႁဝ်းသေၵမ်း၊” ဝႃႈၼင်ႇၼႆဢေႃႈ။
မၼ်းၸဝ်ႈၵေႃႈဝၢႆႇၼႃႈၸူးသေလႄႈလၢတ်ႈဝႃႈ၊ “မႃႇၼၢတ်ႈ႟၊ဢွၵ်ႇသေၵႃႈတီႈၵဝ်ၼႆႉၵႂႃႇတႃႉ။ မႂ်းပဵၼ်တၢင်းဢၼ်ႁႂ်ႈၵဝ်ၶီႈလိုတ်းလႄႈလူမ်ႉဢေႃႈ။ ဢၼ်မႂ်းၶႆႈၸႂ်ဝူၼ်ႉၸႂ်ၼႆႉပဵၼ်ၺၢၼ်ႇၵူၼ်းၵူၺ်းလႄႈဢမ်ႇၸႂ်ႈၺၢၼ်ႇၽြႃးပဵၼ်ၸဝ်ႈ၊” ဝႃႈၼင်ႇၼႆဢေႃႈ။
မၼ်းၸဝ်ႈသမ်ႉလၢတ်ႈတီႈတပႄးၸဝ်ႈတင်းလၢႆလႄႈဝႃႈ၊ “ၽူႈလႂ်သေဢမ်ႇဝႃႈ၊ပေႃးၵေႃႉၼၼ်ႉၶႂ်ႈၸွမ်းပႃႈလင်ၵဝ်ၸိုင်၊မၼ်းတၵ်းလႆႈပႄႇပႅတ်ႈတူဝ်ၸဝ်ႈၵဝ်ႇသေယဝ်ႉ၊မႅၵ်ႇသဝ်မႆႉဝႃးမိုဝ်းတူဝ်ၸဝ်ႈၵဝ်ႇလႄႈၸွမ်းပႃႈလင်ၵဝ်ဢေႃႈ။-
လွင်ႈမၼ်းၸမ်ႉ၊ၽူႈလႂ်သေဢမ်ႇဝႃႈ၊ၵေႃႉဢၼ်ၶႂ်ႈၵႄႇသႄႇဢဝ်ဢသၢၵ်ႈတူဝ်ၸဝ်ႈၵဝ်ႇၼၼ်ႉတၵ်းသုမ်းဢသၢၵ်ႈလႄႈ၊ ၵေႃႉဢၼ်ၶၢမ်ႇသုမ်းဢသၢၵ်ႈတူဝ်ၸဝ်ႈၵဝ်ႇပုၼ်ႈၵဝ်ၼၼ်ႉ၊ ၵေႃႉၼၼ်ႉတၵ်းလႆႈထူပ်းဢသၢၵ်ႈဢေႃႈ။-
သင်ဝႃႈ၊သေၵေႃႉသေၵူၼ်းလႆႈပိူင်ႇလေႃးၵႃႉတင်းမူတ်းလႄႈသမ်ႉလႆႈသုမ်းၸႂ်ဝိၺိၺ်ႇတူဝ်ၸဝ်ႈၵဝ်ႇၸိုင်၊တၵ်းမီးဢၵျူဝ်းၵႃႈသင်။ တၵ်းဢဝ်ဢုၵ်ႉၸႃႇဢၼ်လႂ်ၶိုၼ်းလႅၵ်ႈဢဝ်ၸႂ်ဝိၺိၺ်ႇတူဝ်ၸဝ်ႈၵဝ်ႇၼၼ်ႉလႆႈ။-
လုၵ်ႈၵူၼ်း၊ တၵ်းပႃးတင်းၽုင်းဢႃႇၼုၽေႃႇပေႃႈၸဝ်ႈသေယဝ်ႉ၊ႁွတ်ႈမႃးလူၺ်ႈၵၼ်တင်းတမၢၼ်ႇၵၢင်ႁၢဝ်ၸဝ်ႈတင်းလၢႆ၊တႅၼ်းပၼ်ၵႃႈတီႈၵူႈၵေႃႉၵူႈၵူၼ်းႁင်းၽႂ်ႁင်းမၼ်းၸွမ်းၼင်ႇတၢင်းႁဵတ်းတၢင်းသၢင်ႈႁင်းၽႂ်ႁင်းမၼ်းၼၼ်ႉဢေႃႈ။-
ၵဝ်ဝႃႈတီႈၸိုဝ်ႈၸႂ်ႈမၼ်းတီႈသူၸမ်ႉ၊သူၸိူဝ်းဢၼ်ၸုၵ်းယူႇၵႃႈတီႈၼႆႈၵမ်ႈၽွင်ႈ၊ၸူဝ်ႈဢၼ်ယင်းဢမ်ႇပႆႇလႆႈႁၼ် ၸဝ်ႈလုၵ်ႈၵူၼ်း၊ ပႃးတင်းတၼ်းၶူဝ်းဢႃႇၼုၽေႃႇသေလႄႈမႃးၼၼ်ႉၸိုင်၊တၵ်းတေဢမ်ႇပႆႇတၢႆ၊” ဝႃႈၼင်ႇၼႆဢေႃႈ။
ဝၢႆးၼၼ်ႉႁူၵ်းဝၼ်း၊ ၸဝ်ႈယေႇသု၊ ႁွင်ႉဢဝ် ပေႇတရု၊ယႃႇၵုပ်ႈ၊ ဢိၵ်ႇတင်း ယူဝ်းႁၢၼ်ႇ၊ ဢၼ်ပဵၼ်ၼွင်ႉၸၢႆး ယႃႇၵုပ်ႈ၊ သေလႄႈ၊ၶိုၼ်ႈၵႂႃႇၵႃႈၼိူဝ်လွႆသုင်ပုၼ်ႉႁင်းၵူၺ်းၶဝ်ဢေႃႈ။-
မိူဝ်ႈၼၼ်ႉ၊သိုဝ်ႈၼႃႈတႂ်ႈတႃၶဝ်ႁၢင်ႈၽၢင်မၼ်းၸဝ်ႈလၢၵ်ႇလၢႆးမႃးလႄႈၼႃႈမၼ်းၸဝ်ႈႁိူဝ်ႈမၢပ်ႈၸိူဝ်ႉၼင်ႇၵၢင်ဝၼ်း၊ၶူဝ်းၼုင်ႈမၼ်းၸဝ်ႈၽိူၵ်ႇၶၢဝ်ၸိူဝ်ႉၼင်ႇသၢႆလႅင်းဢေႃႈ။-
ၵမ်းၼၼ်ႉ၊ မူဝ်းသေႇ၊ တင်း ဢေးလိယႃႉ၊ ပေႃႇမႃးလၢတ်ႈၵႂၢမ်းတေႃႇၵၼ်တင်းမၼ်းၸဝ်ႈယူႇဢေႃႈ။-
ပေႇတရု၊ ပိုတ်ႇပၢၵ်ႇလၢတ်ႈတီႈ ၸဝ်ႈယေႇသု၊ လႄႈဝႃႈ၊ “ၸဝ်ႈႁဝ်း။ ဢၼ်ႁဝ်းၶႃႈလႆႈမႃးယူႇတီႈၼႆႈၸိုင်၊လီၼႃႇၶႃႈဢေႃႈ။ သင်ၸဝ်ႈႁဝ်းမီးဢလူဝ်ႇၸိုင်၊ၵဝ်ၶႃႈတၵ်းႁဵတ်းသုမ်ႉသၢမ်လင်ၵႃႈတီႈၼႆႈ၊လင်ၼိုင်ႈပုၼ်ႈၸဝ်ႈႁဝ်း၊ လင်ၼိုင်ႈပုၼ်ႈ မူဝ်းသေႇ၊ လႄႈ၊လင်ၼိုင်ႈပုၼ်ႈ ဢေးလိယႃႉ၊ ၶႃႈဢေႃႈ။”
မိူဝ်ႈဢၼ်ယင်းတိုၵ်ႉလဝ်ႈလၢတ်ႈယူႇလႄႈၵႂၢမ်းဢမ်ႇပႆႇသုတ်းၼၼ်ႉ၊ မွၵ်ႇၵုမ်ႈဢၼ်ႁိူဝ်ႈလႅင်းၼႃႇမုင်းႁူမ်ႇဝႆႉၵႃႈၼိူဝ်ၶဝ်လႄႈ၊သဵင်ပဵၼ်မႃးၵႃႈၼႂ်းမွၵ်ႇၵုမ်ႈၼၼ်ႉလႄႈဝႃႈ၊ “ၵေႃႉၼႆႉပဵၼ်လုၵ်ႈဢၼ်ၵဝ်ႁၵ်ႉၼႃႇလႄႈထုၵ်ႇၸႂ်ၵျိူၵ်ႈၸႂ်ၵဝ်ၼႃႇဢေႃႈ။ ထွမ်ႇဢဝ်ၵႂၢမ်းမၼ်းတႃႉ၊” ဝႃႈၼင်ႇၼႆဢေႃႈ။
မိူဝ်ႈဢၼ်တပႄးၸဝ်ႈၸိူဝ်းၼၼ်ႉလႆႈငိၼ်းၸိုင်၊ၵူဝ်ႁႄၼႃႇလႄႈဢူပ်ႇပူပ်ႇဢဝ်ၼႃႈၶဝ်ငူပ်ႉဝႆႉၵႃႈၼိူဝ်လိၼ်ဢေႃႈ။-
ၸဝ်ႈယေႇသု၊ ၸင်ႇမႃးၸူးတီႈၶဝ်လႄႈဢဝ်မိုဝ်းတိူဝ်ႉၶဝ်သေယဝ်ႉလၢတ်ႈဝႃႈ၊ “လုၵ်ႉတႃႉ။ ယႃႇပေၵူဝ်ပေႁႄ” ဝႃႈၼင်ႇၼႆဢေႃႈ။-
ၶဝ်ၵေႃႈငွၵ်ႈႁူဝ်ႁႅၼ်တူၺ်းလႄႈ၊လိူဝ်သေ ၸဝ်ႈယေႇသု၊ ပႃးလဵဝ်ၵူၺ်းဢမ်ႇႁၼ်ၽူႈလႂ်သေၵေႃႉယဝ်ႉ။
ၼႂ်းမိူဝ်ႈဢၼ်ၶဝ်လူင်းလွႆမႃးယူႇၼၼ်ႉ၊ ၸဝ်ႈယေႇသု၊ ပိင်းၺၢပ်ႈၶဝ်ဝႆႉလႄႈဝႃႈ၊ “ရူႇပႃႇရူင်ႇဢၼ်သူလႆႈႁၼ်ၼႆႉၸူဝ်ႈဢၼ် ၸဝ်ႈလုၵ်ႈၵူၼ်း၊ ယင်းဢမ်ႇပႆႇလုၵ်ႉၵႃႈတၢင်းတၢႆၶိုၼ်းလိပ်းၸိုင်၊ယႃႇပေလၢတ်ႈၼႄတီႈၽူႈလႂ်လူးၵွၼ်ႇ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉတပႄးၸဝ်ႈၸိူဝ်းၼၼ်ႉတွင်ႈထၢမ်လႄႈဝႃႈ၊ “ႁဵတ်းသင်လႄႈသြႃႇမေႃၵျၢမ်းထမ်ႇမႃႉတင်းလၢႆဝႃႈ၊ ‘ ဢေးလိယႃႉ၊ တၵ်းလႆႈမႃးဢွၼ်တၢင်း၊’ ဝႃႈၼင်ႇၼႆၸိူဝ်ႉၼင်ႇႁိုဝ်ၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ၸႂ်ႈယဝ်ႉ။ ဢေးလိယႃႉ၊ တၵ်းႁွတ်ႈမႃးဢွၼ်တၢင်းတႄႉယဝ်ႉလႄႈ၊ တၵ်းႁဵတ်းႁႂ်ႈတင်းသဵင်ႈတင်းလူင်ၶိုၼ်းပဵၼ်မိူၼ်ၵဝ်ႇဢေႃႈ။-
ၵဝ်ဝႃႈတီႈသူၸမ်ႉ၊ ဢေးလိယႃႉ၊ ႁွတ်ႈမႃးယဝ်ႉယဝ်ႉ။ ၵူၺ်းၵႃႈ၊ပိူၼ်ႈဢမ်ႇႁုၸၵ်းမၼ်းလႄႈ၊ႁဵတ်းတီႈမၼ်းၵႃႈၼင်ႇဢၼ်ၶဝ်ၶႂ်ႈႁဵတ်းၼၼ်ႉယဝ်ႉ။ ပိူင်လဵဝ်ၵၼ် ၸဝ်ႈလုၵ်ႈၵူၼ်း၊ တၵ်းလႆႈၶၢမ်ႇတၢင်းဢၼ်ၼိၵ်ႈၸၢၵ်ႈၼႂ်းမိုဝ်းၵူၼ်းၸိူဝ်းၼၼ်ႉလူးၵွၼ်ႇဢေႃႈ၊” ဝႃႈၼင်ႇၼႆဢေႃႈ။
ၵမ်းၼၼ်ႉ၊တပႄးၸဝ်ႈၸိူဝ်းၼၼ်ႉႁုထွမ်ႇလွင်ႈဢၼ်မၼ်းၸဝ်ႈလၢတ်ႈလွင်ႈသြႃႇ ယူဝ်းႁၢၼ်ႇ၊ ဢၼ်ပၼ်မၢင်ႇၵလႃႇပပ်ႉတိၸမ်ႇၼၼ်ႉဢေႃႈ။
မိူဝ်ႈဢၼ်ၶဝ်ႁွတ်ႈၵႂႃႇၵႃႈတီႈၵူၼ်းဢၼ်ၸုဢၼ်တုမ်မီးယူႇၼၼ်ႉၸိုင်၊ၵူၼ်းၵေႃႉၼိုင်ႈမႃးၸူး ၸဝ်ႈယေႇသု၊ သေယဝ်ႉ၊-
ၶုပ်ႉၶဝ်ႇလႄႈလဝ်ႈလၢတ်ႈဝႃႈ၊ “ၸဝ်ႈႁဝ်း။ ဢဵတ်းလူလုၵ်ႈၸၢႆးၵဝ်ၶႃႈသေၵမ်းၶႃႈ။ ပဵၼ်ၽီမႃႈမူဝႆႉ၊လႆႈၶၢမ်ႇၼႃႇလူင်လၢင်လႄႈ၊မၼ်းၸၢင်ႈတူၵ်းၼႂ်းၽႆးလႂ်၊တူၵ်းၼႂ်းၼမ်ႉလႂ်ၶိူဝ်းၶိူဝ်းၶႃႈဢေႃႈ။-
ၵဝ်ၶႃႈဢဝ်မႃးၸူးတီႈတပႄးၸဝ်ႈႁဝ်းၸိူဝ်းၼၼ်ႉသေၵေႃႈ၊ ၶဝ်ဢမ်ႇႁဵတ်းႁႂ်ႈမၼ်းၸိုၼ်ႈႁၢႆလႆႈၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “ၵူၼ်းမဵဝ်းဢၼ်ဢမ်ႇမီးတၢင်းယုမ်ႇမၢတ်ႈလႄႈသဵတ်ႈၸႃႇလုၶဝ်႟။ ၵဝ်တၵ်းလႆႈယူႇလူၺ်ႈၵၼ်တင်းသူႁိုင်ထၼ်ႇႁိုဝ်။ ၵဝ်တၵ်းလႆႈယိူၼ်ႉၶၢမ်ႇသူႁိုင်ထၼ်ႇႁိုဝ်။ ဢဝ်လုၵ်ႈဢွၼ်ႇၸၢႆးၼၼ်ႉမႃးတီႈၵဝ်တႃႉ၊” ဝႃႈၼင်ႇၼႆယဝ်ႉၸင်ႇ၊-
ပူင်ဢမိင်ႉတီႈၽီၼၼ်ႉလႄႈ၊ၽီၼၼ်ႉၵေႃႈဢွၵ်ႇသေၵႃႈတီႈလုၵ်ႈဢွၼ်ႇၸၢႆးၼၼ်ႉၵႂႃႇဢေႃႈ။ ၸႃႉၸဵမ်ၶိင်ႇၼႃႇရီႇၼၼ်ႉလုၵ်ႈဢွၼ်ႇၸၢႆးၼၼ်ႉၵေႃႈ၊ၸိုၼ်ႈႁၢႆမႃးၵမ်းလဵဝ်ဢေႃႈ။
ဝၢႆးၼၼ်ႉ၊တပႄးၸဝ်ႈတင်းလၢႆဢွၼ်ၵၼ်မႃးၸူး ၸဝ်ႈယေႇသု၊ တဵတ်ႇတဵတ်ႇလႄႈ၊ လဝ်ႈထၢမ်ဝႃႈ၊ “ၵွပ်ႈသင်လႄႈႁဝ်းၶႃႈဢမ်ႇႁေႃႈၽီၼၼ်ႉဢွၵ်ႇပႅတ်ႈလႆႈၶႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၶိုၼ်းလၢတ်ႈလႄႈဝႃႈ၊ “သူဢမ်ႇႁေႃႈၽီဢွၵ်ႇလႆႈၵွပ်ႈပိူဝ်ႈတၢင်ယုမ်ႇမၢတ်ႈသူၵေႇၼၼ်ႉဢေႃႈ။ ၵဝ်ဝႃႈတီႈၸိုဝ်ႈၸႂ်ႈတီႈသူၸမ်ႉ၊ပေႃးတၢင်းယုမ်ႇမၢတ်ႈသူမီးထၼ်ႇမဵတ်ႉၽၼ်းၽၵ်းၵၢတ်ႇမဵတ်ႉဢွၼ်ႇၼိုင်ႈၸိုင်၊မိူဝ်ႈဢၼ်သူလၢတ်ႈတီႈလွႆၼႆႉလႄႈဝႃႈ၊ ‘ၶၢႆႉတီႈၼႆႈၵႂႃႇတီႈပုၼ်ႉတႃႉ၊’ ဝႃႈၼင်ႇၼႆၸိုင်လွႆၼၼ်ႉတၵ်းၶၢႆႉဢေႃႈ။ ဢၼ်သူဢမ်ႇႁဵတ်းလႆႈၼၼ်ႉဢမ်ႇမီးသေၸိူဝ်ႉသေပိူင်။-
ၵူၺ်းၵႃႈ၊ၵႃႈဢၼ်ဢမ်ႇလႆႈႁဵတ်းပထၼႃႇသူးတွင်းလႄႈၵမ်တၢင်းၵိၼ်ၸိုင်၊မဵဝ်းၼႆႉဢမ်ႇဢွၵ်ႇလႃးလႃး၊” ဝႃႈၼင်ႇၼႆဢေႃႈ။
မိူဝ်ႈဢၼ်တပႄးၸဝ်ႈတင်းသဵင်ႈတင်းလူင်ႁွတ်ႈထိုင်ၵႃႈတီႈဢိူင်ႇ ၵႃႇလိလႄး၊ ၼၼ်ႉ၊ ၸဝ်ႈယေႇသု၊ လၢတ်ႈတေႃႇၶဝ်လႄႈဝႃႈ၊ “ ၸဝ်ႈလုၵ်ႈၵူၼ်း၊ တၵ်းလႆႈၶၢမ်ႇတၢင်းဢၼ်ဢၢပ်ႈၵႃႈၼႂ်းမိုဝ်းၵူၼ်းတင်းလၢႆလႄႈ၊-
ၶဝ်တၵ်းဢဝ်မၼ်းၸဝ်ႈတၢႆဢေႃႈ။ ၵူၺ်းၵႃႈ၊မိူဝ်ႈဢၼ်ထူၼ်ႈထိုင်သၢမ်ဝၼ်းၼၼ်ႉတၵ်းလုၵ်ႉၶိုၼ်းလိပ်းမႃးဢေႃႈ၊” ဝႃႈၼင်ႇၼႆဢေႃႈ။ တပႄးၸဝ်ႈၸိူဝ်းၼၼ်ႉၸႂ်လဵၵ်ႉလႄႈဢွၼ်ၵၼ်ၶီငဝ်ၵႂႃႇဢေႃႈ။
မိူဝ်ႈဢၼ် ၸဝ်ႈယေႇသု၊ တင်းတပႄးၸဝ်ႈတင်းလၢႆ၊ႁွတ်ႈထိုင်ၵႂႃႇတီႈဝဵင်း ၵပိူဝ်ႇၼေႇဢုမ်ႇ၊ ၸိုင်၊ၵူၼ်းၵဵပ်းၶွၼ်ႇၵျွင်းပိၵ်ႈမၢၼ်ႇၸဝ်ႈၶဝ်မႃးထၢမ် ပေႇတရု၊ လႄႈဝႃႈ၊ “သြႃႇမႂ်းၸွင်ႇထၢမ်းၶွၼ်ႇၵျွင်းပိၵ်ႈမၢၼ်ႇၸဝ်ႈယူႇႁိုဝ်း” ဝႃႈၼႆဢေႃႈ။
ပေႇတရု၊ ၵေႃႈၶိုၼ်းလၢတ်ႈဝႃႈ၊ “ထၢမ်းၶႃႈဢေႃႈ၊” ဝႃႈၼင်ႇၼႆသေယဝ်ႉ၊ၶဝ်ႈၵႂႃႇၵႃႈၼႂ်းႁိူၼ်းႁႂ်ႈလႆႈမွၵ်ႇထိုင် ၸဝ်ႈယေႇသု၊ ဢေႃႈ။ ၵူၺ်းၵႃႈ၊ၸူဝ်ႈဢၼ်မၼ်းယင်းဢမ်ႇပႆႇလႆႈမွၵ်ႇၼၼ်ႉမၼ်းၸဝ်ႈႁႄႉလၢတ်ႈလႄႈဝႃႈ၊ “ သိမုၼ်ႇ၊ ႟၊မႂ်းထၢင်ႇၸိူဝ်ႉၼင်ႇႁိုဝ်။ ၽူႈလႂ်လႆႈထၢမ်းၶွၼ်ႇတီႈၶုၼ်မိူင်း။ ၶႃႈဝၢၼ်ႈၵူၼ်းမိူင်းႁိုဝ်း၊ဢမ်ႇၼၼ်ၵူၼ်းမိူင်းၼွၵ်ႈဢၼ်ယူႇသဝ်းၵႃႈၼႂ်းမိူင်းလႆႈထၢမ်းၶွၼ်ႇႁိုဝ်း၊” ဝႃႈၼင်ႇၼႆဢေႃႈ။
ပေႇတရု၊ ၵေႃႈၶိုၼ်းလဝ်ႈလၢတ်ႈလႄႈဝႃႈ၊ “ၵူၼ်းမိူင်းၼွၵ်ႈလႆႈထၢမ်းၶွၼ်ႇၶႃႈဢေႃႈ၊” ဝႃႈၼင်ႇၼႆဢေႃႈ။ ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “ပေႃးပဵၼ်ၼႆၸိုင်၊ၶႃႈဝၢၼ်ႈၵူၼ်းမိူင်းလႆႈလွတ်ႈထၢမ်းဢၶွၼ်ႇဢေႃႈ။-
ၼႂ်းဝႃႈၼၼ်သေၵေႃႈ၊ႁဝ်းဢမ်ႇၶႂ်ႈသုၵ်ႉသၢၵ်ႉၶဝ်။ မႂ်းလူင်းၵႂႃႇမဵတ်းပႃၵႃႈတီႈၼွင်တႃႉ။ ပႃတူဝ်ဢၼ်မဵတ်းလႆႈဢွၼ်တၢင်းၼၼ်ႉ၊ ပေႃးငၢင်ႉသူပ်းမၼ်းၸိုင်၊တၵ်းႁၼ်ၶႅပ်းငိုၼ်းၶႅပ်းၼိုင်ႈဢေႃႈ။ ငိုၼ်းၶႅပ်းၼၼ်ႉတၵ်းပေႃးၵုမ်ႇပုၼ်ႈမႂ်းတင်းၵဝ်ဢေႃႈ။ ဢဝ်ၵႂႃႇထၢမ်းၶွၼ်ႇပုၼ်ႈႁဝ်းသွင်ၵေႃႉတႃႉ၊” ဝႃႈၼင်ႇၼႆဢေႃႈ။
မိူဝ်ႈယၢမ်းၼၼ်ႉတပႄးၸဝ်ႈတင်းလၢႆ၊မႃးၸူး ၸဝ်ႈယေႇသု၊ သေလႄႈလဝ်ႈထၢမ်လွင်ႈဢၼ်ၽူႈလႂ်တၵ်းယဵင်ႈၶႅၼ်းယႂ်ႇမျၢတ်ႈသေပိူၼ်ႈ၊ၵႃႈၼႂ်းမိူင်းၵၢင်ႁၢဝ်ၸဝ်ႈပုၼ်ႉၼၼ်ႉဢေႃႈ။
ၵမ်းၼၼ်ႉ၊မၼ်းၸဝ်ႈႁွင်ႉဢဝ်လုၵ်ႈဢွၼ်ႇၵေႃႉၼိုင်ႈမႃးၸုၵ်းၵႃႈၼႂ်းဝူင်ႈၵၢင်ၶဝ်ယဝ်ႉၸင်ႇ၊-
လၢတ်ႈလႄႈဝႃႈ၊ “ၵဝ်ဝႃႈတီႈၸိုဝ်ႈတီႈၸႂ်ႈမၼ်းၸမ်ႉ၊ပေႃးသူယင်းဢမ်ႇပိၼ်ႇၸႂ်သူမႃးပဵၼ်ၸိူဝ်ႉၼင်ႇလုၵ်ႈဢွၼ်ႇၸိုင်၊သူဢမ်ႇလႆႈၶဝ်ႈၵႃႈၼႂ်းမိူင်းၵၢင်ႁၢဝ်ၸဝ်ႈၼၼ်ႉဢေႃႈ။-
ၽူႈလႂ်သေဢမ်ႇဝႃႈ၊ၵေႃႉဢၼ်ၶျႃးတႅမ်ႇႁူဝ်ၸႂ်တူဝ်ၸဝ်ႈၵဝ်ႇမိူၼ်ၸိူဝ်ႉၼင်ႇလုၵ်ႈဢွၼ်ႇၼႆႉၼၼ်ႉ၊ၵေႃႉၼၼ်ႉပဵၼ်ၵေႃႉဢၼ်ယႂ်ႇမျၢတ်ႈသေပိူၼ်ႈၵႃႈၼႂ်းမိူင်းၵၢင်ႁၢဝ်ၸဝ်ႈပုၼ်ႉဢေႃႈ။-
ပိူင်လဵဝ်ၵၼ်၊ၽူႈလႂ်သေဢမ်ႇဝႃႈ၊ၵေႃႉဢၼ်ႁပ်ႉတုင်းဢဝ်လုၵ်ႈဢွၼ်ႇၸိူဝ်ႉၼင်ႇၼႆၵႃႈၼႂ်းၼႃႇမႃႉၸိုဝ်ႈသဵင်ၵဝ်ၼၼ်ႉ၊ ၵေႃႉၼၼ်ႉႁပ်ႉတုင်းဢဝ်ၵဝ်ဢေႃႈ။
“ၽူႈလႂ်သေဢမ်ႇဝႃႈ၊ၵေႃႉဢၼ်ႁဵတ်းႁႂ်ႈလုၵ်းဢွၼ်ႇဢၼ်ယုမ်ႇမၢတ်ႈၵဝ်ၸိူဝ်းၼၼ်ႉလႆႈၽိတ်းပိူင်ႈတြႃးလႄႈပဵၼ်ဢပျတ်ႈၸိုင်၊တီႈၵေႃႉၼၼ်ႉထုၵ်ႇလီဢဝ်မၢၵ်ႇႁိၼ်လူၺ်ႁွႆႈၶေႃးမၼ်းသေလႄႈပွႆႇၸူမ်လူင်းၼႂ်းၼမ်ႉပၢင်ႇလၢႆႇဢၼ်လိုၵ်ႉၼၼ်ႉယဵင်ႈၶႅၼ်းတေလီဢေႃႈ။-
ၵွပ်ႈပိူဝ်ႈမီးလွင်ႈတၢင်းဢၼ်ၶီႈလိုတ်းလႄႈလူမ်ႉၼၼ်ႉမီးၼမ်ၼႃႇလႄႈလေႃးၵႃႉၼႆႉမီးဢႃႉမၢင်ႇၵလႃႇဢေႃႈ။ လွင်ႈတၢင်းဢၼ်ၶီႈလိုတ်းလႄႈလူမ်ႉၼမ်ၼႃႇၼၼ်ႉတၵ်းလႆႈမီးဢေႃႈ။ ၼႂ်းဝႃႈၼၼ်သေၵေႃႈ၊ၵေႃႉဢၼ်ႁႂ်ႈမီးလွင်ႈတၢင်းဢၼ်ၶီႈလိုတ်းလႄႈလူမ်ႉၼၼ်ႉမီးဢႃႉမၢင်ႇၵလႃႇဢေႃႈ။
“ပေႃးတိၼ်မႂ်း၊ဢမ်ႇၼၼ်မိုဝ်းမႂ်းၼၼ်ႉႁဵတ်းႁႂ်ႈမႂ်းၶီႈလိုတ်းလႄႈလူမ်ႉၽိတ်းပိူင်ႈၸိုင်၊တႅပ်းပႅတ်ႈတႃႉ။ ၵွပ်ႈပိူဝ်ႈၼင်ႇႁိုဝ်လႄႈဝႃႈၸမ်ႉ၊တၢင်းဢၼ်မီးတိၼ်ၶွၼ်လဵဝ်၊မိုဝ်းၶွၼ်လဵဝ်လႄႈၶဝ်ႈၵႃႈၼႂ်းမိူင်းၵၢင်ႁၢဝ်ၼၼ်ႉယဵင်ႈၶႅၼ်းမျၢတ်ႈလီၼႃႇသေမႂ်းမီးတိၼ်သွင်ၶွၼ်မိုဝ်းသွင်ၶွၼ်သေယဝ်ႉ၊တူၵ်းႁွတ်ႈၵႃႈၼႂ်းမိူင်းငရၢႆးၼၼ်ႉဢေႃႈ။-
ပေႃးမၢၵ်ႇတႃမႂ်းၼၼ်ႉႁဵတ်းႁႂ်ႈမႂ်းၶီႈလိုတ်းလႄႈၽိတ်းပိူင်ႈၸိုင်၊ၶွၵ်းပႅတ်ႈတႃႉ။ တၢင်းဢၼ်မီးတႃႁူၺ်ႇလဵဝ်လႄႈၶဝ်ႈၵႃႈၼႂ်းမိူင်းဢသၢၵ်ႈၼၼ်ႉ၊ယဵင်ႈၶႅၼ်းမျၢတ်ႈလီၼႃႇသေတၢင်းဢၼ်မီးမၢၵ်ႇတႃသွင်ႁူၺ်ႇလႄႈတူၵ်းႁွတ်ႈၵႃႈၼႂ်းမိူင်းငရၢႆးၼၼ်ႉဢေႃႈ။
“လွင်ႈၼင်ႇႁိုဝ်တူဝ်သူတၵ်းဢမ်ႇသႄႉသွမ်းတီႈလုၵ်ႈဢွၼ်ႇၸိူဝ်ႉၼင်ႇၼႆၸိုင်၊ဝႆႉသတိတႃႉ။ ၵဝ်ဝႃႈတီႈသူၸမ်ႉ၊ၶဝ်မီးတမၢၼ်ႇၵၢင်ႁၢဝ်ၶဝ်ဢၼ်ၶႃးၸႃးၽၢႆႇၼႃႈပေႃႈၸဝ်ႈၵဝ်၊ဢၼ်မီးၵႃႈၼိူဝ်ၽုင်ႇၵၢင်ႁၢဝ်ပုၼ်ႉၼၼ်ႉယူႇတႃႇသေႇဢေႃႈ။-
[လွင်ႈမၼ်းၸမ်ႉ၊ လုၵ်ႈၵူၼ်း၊ မႃးႁႂ်ႈလႆႈၵႄႇၶျွတ်ႈဢဝ်ၶဝ်ၸိူဝ်းဢၼ်ႁၢႆၵႂႃႇၼၼ်ႉဢေႃႈ။]
“တီႈၵူၼ်းၵေႃႉၼိုင်ႈမီးသူဝ်းပၢၵ်ႇတူဝ်လႄႈပေႃးသူဝ်းတူဝ်ၼိုင်ႈႁၢႆၵႂႃႇၸိုင်၊သူထၢင်ႇမၼ်းတေႁဵတ်းၸိူဝ်ႉၼင်ႇႁိုဝ်။ မၼ်းၸၢင်ႈပွႆႇသူဝ်းၵဝ်ႈသိပ်းပၢႆၵဝ်ႈတူဝ်ဝႆႉၵႃႈတီႈတၢပ်ႈလွႆသေယဝ်ႉ၊ၵႂႃႇသွၵ်ႈႁႃသူဝ်းတူဝ်ဢၼ်ႁၢႆၵႂႃႇၼၼ်ႉဢေႃႈ။-
ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊မိူဝ်ႈဢၼ်ၶိုၼ်းႁၼ်ၸိုင်၊မၼ်းယဵင်ႈၶႅၼ်းၸူမ်းသိူဝ်းလူၺ်ႈလွင်ႈတူဝ်ၼၼ်ႉ၊ၼႃႇသေသူဝ်းဢၼ်ၵိုတ်းယူႇၵဝ်ႈသိပ်းပၢႆၵဝ်ႈတူဝ်ဢၼ်ဢမ်ႇၽိတ်းတၢင်းလႄႈဢမ်ႇႁၢႆၵႂႃႇၼၼ်ႉဢမ်ႇၸႂ်ႈႁိုဝ်း။-
ပိူင်လဵဝ်ၵၼ်၊ပေႃႈသူဢၼ်မီးယူႇၵႃႈၼိူဝ်မိူင်းၵၢင်ႁၢဝ်ၸဝ်ႈပုၼ်ႉၼၼ်ႉ၊ဢမ်ႇၶႂ်ႈႁႂ်ႈလုၵ်ႈဢွၼ်ႇၸိူဝ်ႉၼင်ႇၼႆလႆႈလုလႅဝ်သေၵေႃႉသေၵူၼ်း။
“ပေႃးပီႈၼွင်ႉမႂ်းၽိတ်းပိူင်ႈမႂ်းၸိုင်၊ၵႂႃႇၵႃႈတီႈမၼ်းၽုၺ်ႇဢွၵ်ႇၼႄပျႃးဢပျတ်ႈမၼ်းလႄႈၵႄႈလိတ်ႈတၢင်းၽိတ်းတီႈၵၼ်မႂ်းတင်းမၼ်းတဵတ်ႇတဵတ်ႇတႃႉ။ ပေႃးမၼ်းထွမ်ႇဢဝ်ၵႂၢမ်းမႂ်းၸိုင်၊မႂ်းလႆႈပီႈၼွင်ႉမႂ်းၶိုၼ်းမႃးယဝ်ႉ။-
ၵူၺ်းၵႃႈ၊ပေႃးမၼ်းဢမ်ႇထွမ်ႇမႂ်းၸိုင်၊ႁွင်ႉဢဝ်ၵူၼ်းသွင်သၢမ်ၵေႃႉၵႂႃႇၸွမ်းမႂ်းလႄႈႁဵတ်းၸွမ်းၼႂ်းၵႂၢမ်းၵျၢမ်းလိၵ်ႈဢၼ်ဝႃႈ၊ ‘ႁႂ်ႈၵႂၢမ်းဢၼ်မႂ်းလၢတ်ႈၵူႈၶေႃႈၵူႈၵမ်းၼၼ်ႉ၊ ႁႂ်ႈၵူၼ်းသွင်သၢမ်ၵေႃႉပဵၼ်သၢၵ်ႈသေႇမၼ်းတႃႉ၊’ ဝႃႈၼႆၼၼ်ႉႁဵတ်းၸိူဝ်ႉၼင်ႇၼႆတႃႉ။-
ပေႃးမၼ်းယင်းဢမ်ႇပႆႇထွမ်ႇၶဝ်ၸိုင်၊ဢဝ်တၢင်းၽိတ်းမၼ်းၼၼ်ႉလၢတ်ႈထိုင်တီႈၸိူဝ်းၸဝ်ႈတႃႉ။ တီႈသုတ်းမၼ်း၊ ပေႃးမၼ်းယင်းဢမ်ႇထွမ်ႇၸိူဝ်းၸဝ်ႈၸိုင်၊မၢတ်ႈမၼ်းပဵၼ်မိူၼ်ၵူၼ်းၸိူဝ်းဢၼ်ဢမ်ႇယုမ်ႇမၢတ်ႈထႃႇဝရႃႉၽြႃး၊ ဢမ်ႇၼၼ်ၵူၼ်းၵဵပ်းၶွၼ်ႇၼၼ်ႉတႃႉ။
“ၵဝ်ဝႃႈတီႈၸိုဝ်ႈၸႂ်ႈမၼ်းၸမ်ႉ၊ၵႃႈဢၼ်သူမတ်ႉၽုၵ်ႇဝႆႉၵႃႈၼိူဝ်လိၼ်မိူင်းၼႆႉၼၼ်ႉ၊ၵႃႈၼိူဝ်မိူင်းၵၢင်ႁၢဝ်ၸဝ်ႈပုၼ်ႉၵေႃႈ၊ တၵ်းမတ်ႉၽုၵ်ႇဝႆႉဢေႃႈ။ ၵႃႈဢၼ်သူပွႆႇပၼ်ၵႃႈၼိူဝ်လိၼ်မိူင်းၼႆႉၼၼ်ႉ၊ၵႃႈၼိူဝ်မိူင်းၵၢင်ႁၢဝ်ၸဝ်ႈပုၼ်ႉၵေႃႈတၵ်းပွႆႇပၼ်ဢေႃႈ။
“ၵဝ်သမ်ႉဝႃႈထႅင်ႈၸမ်ႉ၊ပေႃးသူသွင်ၵေႃႉယူႇၵႃႈၼိူဝ်လိၼ်မိူင်းၼႆႉၽွမ်ႉၸႂ်ၵၼ်သူးတွင်းလဝ်ႈယွၼ်းသေၸိူဝ်ႉသေပိူင်ၸိုင်၊ပေႃႈၸဝ်ႈၵဝ်ဢၼ်မီးယူႇၵႃႈၼိူဝ်မိူင်းၵၢင်ႁၢဝ်ၸဝ်ႈပုၼ်ႉၼၼ်ႉတၵ်းပၼ်တီႈသူဢေႃႈ။-
ၵွပ်ႈလွင်ႈၼင်ႇႁိုဝ်လႄႈဝႃႈၸမ်ႉ၊တီႈလႂ်တၼ်းလႂ်သေဢမ်ႇဝႃႈ၊ ပေႃးၵူၼ်းသွင်သၢမ်ၵေႃႉၸုတုမ်ၵၼ်ၼႂ်းၼႃႇမႃႉၸိုဝ်ႈသဵင်ၵဝ်ၸိုင်၊ၵဝ်တၵ်းမီးယူႇၵႃႈၼႂ်းဝူင်ႈၵၢင်ၶဝ်ဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ပေႇတရု၊ မႃးၸူးတီႈ ၸဝ်ႈယေႇသု၊ သေလႄႈလဝ်ႈထၢမ်ဝႃႈ၊ “ၸဝ်ႈႁဝ်း။ ပေႃးပီႈၼွင်ႉၵဝ်ၶႃႈၽိတ်းပိူင်ႈၵဝ်ၶႃႈယူႇၶိူဝ်းၶိူဝ်းၸိုင်၊ၵဝ်ၶႃႈထုၵ်ႇလီပွႆႇလွတ်ႈဢပျတ်ႈမၼ်းထူၼ်ႈထိုင်လၢႆပွၵ်ႈၶႃႈ။ ထူၼ်ႈထိုင်ၸဵတ်းပွၵ်ႈၶႃႈႁိုဝ်း၊” ဝႃႈၼင်ႇၼႆလႄႈ။
မၼ်းၸဝ်ႈၶိုၼ်းလၢတ်ႈလႄႈဝႃႈ၊ “ၵဝ်ဢမ်ႇဝႃႈႁႂ်ႈထူၼ်ႈထိုင်ၸဵတ်းပွၵ်ႈၵူၺ်း။ တၵ်းလႆႈပွႆႇလွတ်ႈထူၼ်ႈထိုင်၊ၼပ်ႉဢၢၼ်ႇထိုင်ၸဵတ်းသိပ်းႁႂ်ႈထူၼ်ႈၸဵတ်းပွၵ်ႈဢေႃႈ။-
ပိူဝ်ႈၼႆလႄႈ၊မိူင်းၵၢင်ႁၢဝ်ၸဝ်ႈပဵၼ်မိူၼ်ၸိူဝ်ႉၼင်ႇၶုၼ်လူင် ပႃးၼိုင်ႈ၊ၶႂ်ႈတႂၢၵ်ႈၸရၢင်းငိုၼ်းတီႈၵူၼ်းဢွၼ်ႇၸဝ်ႈတင်းလၢႆၼၼ်ႉဢေႃႈ။-
မိူဝ်ႈဢၼ်တႄႇၸႃႉၵဵပ်းၸရၢင်းယူႇၼၼ်ႉ၊ထူပ်းႁၼ်ၵူၼ်းဢွၼ်ႇၸဝ်ႈၵေႃႉၼိုင်ႈ၊ထုၵ်ႇၼီႈတီႈၸဝ်ႈမၼ်းဝႆႉငိုၼ်းတလၢၼ်ႇတၢၼ်ႇသႅၼ်ၼိုင်ႈ လႄႈ၊-
ပိူဝ်ႈဢၼ်ၵူၼ်းဢွၼ်ႇၼၼ်ႉဢမ်ႇတႅၼ်းၼီႈၸိူဝ်းၼၼ်ႉလႆႈလႄႈ၊ ၶုၼ်လူင်ၸင်ႇပူင်ဢမိင်ႉႁႂ်ႈၶၢႆတူဝ်မၼ်းႁႂ်ႈလႆႈပဵၼ်ၶႃႈပႃးၸဵမ်လုၵ်ႈလၢင်းမၼ်း၊မေးမၼ်းဢိၵ်ႇတင်းဢုၵ်ႉၸႃႇၶူဝ်းလဵင်းမၼ်းၵႃႈမီးတင်းသဵင်ႈတင်းလူင်ပုၼ်ႈတႃႇတေတႅၼ်းၼီႈၼၼ်ႉဢေႃႈ။-
ၵူၼ်းဢွၼ်ႇၵေႃႉၼၼ်ႉၶုပ်ႉမူပ်ႇၵူမ်ႈၵွမ်းယူႇသေလႄႈတွင်းပၢၼ်ႇလႄႈဝႃႈ၊ ‘ဢဵတ်းလူယိူၼ်ႉၶၢမ်ႇၵဝ်ၶႃႈသေၵမ်းတီႈၶႃႈ။ ၼီႈၵႃႈဢၼ်မီးၸိုင်၊ၵဝ်ၶႃႈတၵ်းတႅၼ်းယူႇၶႃႈဢေႃႈ၊’ မိူဝ်ႈဢၼ်ဝႃႈၼင်ႇၼႆၸိုင်၊-
ၶုၼ်လူင်ၼၼ်ႉမီးၸႂ်ဢဵတ်းလူၵူၼ်းဢွၼ်ႇၸဝ်ႈၼၼ်ႉသေယဝ်ႉ၊ ပွႆႇၶႂၢင်းပၼ်ၼီႈၵႃႈဢၼ်မၼ်းမီးၼၼ်ႉသေဢေႃႈ။
“ၵူၼ်းဢွၼ်ႇၸဝ်ႈၼၼ်ႉဢွၵ်ႇၵႂႃႇလႄႈထူပ်းႁၼ်ၵေႃႉသႄႈမၼ်းပဵၼ်ၵူၼ်းဢွၼ်ႇၸဝ်ႈၼင်ႇၵၼ်ဢၼ်ထုၵ်ႇၼီႈတီႈမၼ်း၊ ငိုၼ်းတေႇၼႃႇရီႇပၢၵ်ႇၼိုင်ႈ ၼၼ်ႉသေလႄႈ၊ တဵၵ်းငႅၼ်းၶေႃးမၼ်းလႄႈလၢတ်ႈဝႃႈ၊ ‘ၼီႈဢၼ်မႂ်းထုၵ်ႇတီႈၵဝ်ၼၼ်ႉတႅၼ်းၶိုၼ်းမိူဝ်ႈလဵဝ်တႃႉ၊’ ဝႃႈၼင်ႇၼႆဢေႃႈ။-
ၵေႃႉသႄႈမၼ်းၵူၼ်းဢွၼ်ႇၸဝ်ႈၼင်ႇၵၼ်ၼၼ်ႉၵေႃႈႁွမ်းမိုဝ်းဝႆႈမၼ်းသေယဝ်ႉ၊တွင်းပၢၼ်ႇလႄႈဝႃႈ၊ ‘ဢဵတ်းလူယိူၼ်ႉၶၢမ်ႇၵဝ်ၶႃႈသေၵမ်းတီႈၶႃႈ။ ၼီႈၵႃႈမီးၸိုင်၊ၵဝ်ၶႃႈတၵ်းတႅၼ်းယူႇၶႃႈဢေႃႈ၊’ ဝႃႈၼင်ႇၼႆသေၵေႃႈ၊-
မၼ်းယင်းဢမ်ႇထွမ်ႇလႄႈတိမတ်ႉဢဝ်ၵေႃႉၼၼ်ႉၶင်ထွင်ႇဝႆႉ၊ တေႃႇႁွတ်ႈၼီႈၸိူဝ်းၼၼ်ႉပျေႇဢေႃႈ။-
မိူဝ်ႈဢၼ်ၵူၼ်းဢွၼ်ႇၸဝ်ႈၼင်ႇၵၼ်တၢင်ႇၵေႃႉတၢင်ႇၵူၼ်းႁၼ်ၸိုင်၊ၶဝ်ၸဵပ်းၸႂ်ၼႃႇလႄႈၵႂႃႇလဝ်ႈလၢတ်ႈလွင်ႈတၢင်းၼၼ်ႉထိုင်တီႈၶုၼ်လူင်ဢေႃႈ။-
ၶုၼ်လူင်ၸင်ႇႁွင်ႉဢဝ်ၵူၼ်းဢွၼ်ႇၸဝ်ႈၵေႃႉၼၼ်ႉမႃးလႄႈလၢတ်ႈဝႃႈ၊ ‘ၶႃႈဢၼ်ႁၢႆႉမိူၵ်ႈၼႆႉ႟။ မႂ်းတွင်းပၢၼ်ႇၵဝ်လႄႈၵဝ်ပွႆႇၶႂၢင်းပၼ်ၼီႈမႂ်းတင်းသဵင်ႈတင်းလူင်ယဝ်ႉ။-
ၸိူဝ်ႉၼင်ႇဢၼ်ၵဝ်ဢဵတ်းလူမႂ်းၼၼ်ႉ၊မႂ်းထုၵ်ႇလီဢဵတ်းလူၵေႃႉသႄႈမႂ်းၵူၼ်းဢွၼ်ႇၸဝ်ႈၼင်ႇၵၼ်ၼၼ်ႉဢမ်ႇၸႂ်ႈႁိုဝ်း၊’ ဝႃႈၼင်ႇၼႆသေယဝ်ႉ၊-
ၸႂ်မႆႈၶႂ်ႈၸႃႉၼႃႇလႄႈပူင်ဢမိင်ႉႁႂ်ႈဢဝ်ၵူၼ်းဢွၼ်ႇၸဝ်ႈၼၼ်ႉသႂ်ႇထွင်ႇဝႆႉ၊တေႃႇထိုင်ႁွတ်ႈမၼ်းတႅၼ်းၶိုၼ်းၼီႈတင်းသဵင်ႈတင်းမူတ်းယဝ်ႉၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ သိုပ်ႇလၢတ်ႈလႄႈဝႃႈ၊ “မိူၼ်ၼင်ႇၼၼ်၊ပေႃးသူပီႈၼွင်ႉၼင်ႇၵၼ်ၵၼ်ယင်းဢမ်ႇမီးတင်းၸႂ်ၵႂၢင်ႈလႄႈပွႆႇလွတ်ႈဢပျတ်ႈတီႈၵၼ်ၸိုင်၊ပေႃႈၸဝ်ႈၵဝ်ဢၼ်ယူႇၵႃႈၼိူဝ်ၽုင်ႇၵၢင်ႁၢဝ်ပုၼ်ႉၼၼ်ႉ၊တၵ်းၸီႇယၢင်ႇသူၸိူဝ်ႉၼင်ႇၼၼ်ႉဢေႃႈ။”
ဝၢႆးသေ ၸဝ်ႈယေႇသု၊ ႁေႃးလၢတ်ႈတြႃးတေႇသၼႃႇၼၼ်ႉသုတ်းသဵင်ႈယဝ်ႉၸိုင်၊မၼ်းၸဝ်ႈဢွၵ်ႇသေၵႃႈတီႈဢိူင်ႇ ၵႃႇလိလႄး၊ သေယဝ်ႉ၊ ၶၢမ်ႈၵႂႃႇၽၢႆႇပုၼ်ႉၼမ်ႉ ယေႃးတၢၼ်ႇ၊ ၵႃႈတီႈဝၢၼ်ႈၼွၵ်ႈၼႃးပၢင်ႇဢိူင်ႇ ယုတႃႉ၊ ဢေႃႈ။-
မိူဝ်ႈၼၼ်ႉ၊ၵူၼ်းပဵၼ်မူႇပဵၼ်ၽုင်ၸွမ်းလင်မၼ်းၸဝ်ႈၵႂႃႇလႄႈမၼ်းၸဝ်ႈၵေႃႈႁႂ်ႈတၢင်းၶႆႈတၢင်းပဵၼ်ၶဝ်ၸိုၼ်ႈႁၢႆဢေႃႈ။
မိူဝ်ႈၼၼ်ႉ၊ၵူၼ်းၵိူင်း ၽႃႇရိသႄး၊ ၵမ်ႈၽွင်ႈမႃးၸူးတီႈ ၸဝ်ႈယေႇသု၊ ႁႂ်ႈလႆႈၸၢမ်းတူၺ်းယႃႉယုၵ်ႉမၼ်းၸဝ်ႈလႄႈလဝ်ႈထၢမ်ဝႃႈ၊ “ၵူၼ်းၸၢႆးၼႆႉမေးမၼ်းၽိတ်းပိူင်ႈၵႃႈသင်သေဢမ်ႇဝႃႈ၊ပေႃးမၼ်းၶႂ်ႈပႅတ်ႈၸိုင်၊ၸွင်ႇပိင်းၺၢပ်ႈတြႃးပၼ်ဢၶႂၢင်ႉႁႂ်ႈမၼ်းပႅတ်ႈမေးမၼ်းလႆႈၶႃႈႁိုဝ်း၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “သူဢမ်ႇတွၼ်ႉလႆႈၽတ်းဢၢၼ်ႇမႅၼ်ႈၼႂ်းၵျၢမ်းလိၵ်ႈဢၼ်ဝႃႈ၊မိူဝ်ႈၵေႃႇၸႃႉႁူဝ်ပိုင်းၼၼ်ႉၸဝ်ႈဢၼ်ၽၢၼ်ႇသၢင်းႁဵတ်းပဵၼ်ၼၼ်ႉၽၢၼ်ႇသၢင်းပဵၼ်ၵူၼ်းၸၢႆးၵူၼ်းယိင်းၼၼ်ႉႁိုဝ်း။-
ၽြႃးပဵၼ်ၸဝ်ႈမီးဢမိင်ႉလႄႈဝႃႈ၊ ‘ၵွပ်ႈပိူဝ်ႈလွင်ႈတၢင်းၼၼ်ႉလႄႈၵူၼ်းၸၢႆးတၵ်းလႆႈၽၢတ်ႇဢွၵ်ႇသေပေႃႈမႄႈမၼ်းသေယဝ်ႉ၊ႁူမ်ႈပွင်းလူၺ်ႈမေးတူဝ်ၸဝ်ႈၵဝ်ႇလႄႈၶဝ်သွင်ၵေႃႉၼၼ်ႉပဵၼ်မႃးၼိူဝ်ႉလိူတ်ႈလဵဝ်ၵၼ်ဢေႃႈ၊’ ဝႃႈၼင်ႇၼႆလႄႈ၊-
ၶဝ်ၼၼ်ႉ၊ပဵၼ်သွင်ၵေႃႉဢမ်ႇၸႂ်ႈ။ ပဵၼ်ၵေႃႉလဵဝ်ၵၼ်ယဝ်ႉဢေႃႈ။ ပိူဝ်ႈၼႆလႄႈဢၼ်ၽြႃးပဵၼ်ၸဝ်ႈဢဝ်ၽၢၵ်ႈဢဝ်ႁွမ်းၵၼ်ၼၼ်ႉ၊ ယႃႇပေႁႂ်ႈၵူၼ်းဢဝ်ၽၢတ်ႇဢဝ်ယၢၼ်ၵၼ်၊” ဝႃႈၼင်ႇၼႆဢေႃႈ။
ၵူၼ်းၵိူင်း ၽႃႇရိသႄး၊ ၶဝ်သမ်ႉလဝ်ႈထၢမ်ထႅင်ႈလႄႈဝႃႈ၊ “ပေႃးပဵၼ်ၼႆႁဵတ်းသင်လႄႈ မူဝ်းသေႇ၊ သမ်ႉပိင်းၺၢပ်ႈဝႆႉႁႂ်ႈၵူၼ်းၸၢႆးပၼ်လိၵ်ႈပုတ်းလိၵ်ႈၶၢတ်ႇလႄႈပႅတ်ႈမေးမၼ်းၸိူဝ်ႉၼင်ႇႁိုဝ်ၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “ပိူဝ်ႈဢၼ်ႁူဝ်ၸႂ်သူဝႃႈယၢပ်ႇသွၼ်ၶႅင်ၼႃႇၽႅဝ်လႄႈ မူဝ်းသေႇ၊ ၸင်ႇလႆႈပိင်းၺၢပ်ႈႁႂ်ႈသူပႅတ်ႈမေးယဝ်ႉ။ ၼႂ်းဝႃႈၼၼ်သေၵေႃႈ၊မိူဝ်ႈၵေႃႇၸႃႉၽၢၼ်ႇသၢင်းၼၼ်ႉဢမ်ႇပဵၼ်ၸိူဝ်ႉၼင်ႇၼၼ်။-
ၵဝ်ပိင်းၺၢပ်ႈၸမ်ႉ၊လိူဝ်သေတၢင်းဢၼ်မေးမၼ်းလဵၼ်ႈၽူဝ်ၼွႆႉၼၼ်ႉ၊ပေႃးၵူၼ်းၸၢႆးပႅတ်ႈမေးမၼ်းလႄႈၶိုၼ်းဢဝ်မႄႈယိင်းတၢင်ႇၵေႃႉၸိုင်၊ၵေႃႉၼၼ်ႉၽိတ်းပိူင်ႈမေးတူဝ်ၸဝ်ႈၵဝ်ႇဢေႃႈ။ [ၵေႃႉဢၼ်မႃးဢဝ်မေးဢၼ်မၼ်းပႅတ်ႈၼၼ်ႉၵေႃႈ၊ၵေႃႉၼၼ်ႉၽိတ်းပိူင်ႈမေးပိူၼ်ႈယဝ်ႉ၊”] ဝႃႈၼင်ႇၼႆဢေႃႈ။
တပႄးၸဝ်ႈတင်းလၢႆသုတ်ႉၸမ်မၼ်းၸဝ်ႈလႄႈလဝ်ႈလၢတ်ႈဝႃႈ၊ “လူၺ်ႈလွင်ႈၽူဝ်လွင်ႈမေးၼႆႉပေႃးပဵၼ်ထၼ်ႇၼႆႉၸိုင်၊ဢမ်ႇလီဢဝ်ၵၼ်ယဝ်ႉ၊” ဝႃႈၼင်ႇၼႆဢေႃႈ။
မၼ်းၸဝ်ႈၵေႃႈလၢတ်ႈတီႈၶဝ်လႄႈဝႃႈ၊ “လွင်ႈတၢင်းၼႆႉၸိုင်၊ပဵၼ်လႆႈၵူႈၵေႃႉဢမ်ႇၸႂ်ႈ။ ၵေႃႉဢၼ်ၽြႃးပဵၼ်ၸဝ်ႈၶိုင်ပွင်ပၼ်ၼၼ်ႉ၊ၸိူဝ်းၼၼ်ႉၵူၺ်းၸင်ႇပဵၼ်လႆႈဢေႃႈ။-
တၢင်းဢၼ်ဢမ်ႇတႄႇၼႃႈႁိူၼ်းၼၼ်ႉမီးလၢႆၸိူဝ်ႉလၢႆပိူင်ဢေႃႈ။ မၢင်ၵေႃႉဢမ်ႇမီးႁႅင်းတူဝ်ၵႃႇယႃႉတႃႇတေတႄႇၼႃႈႁိူၼ်းၼၼ်ႉ၊ ပဵၼ်မႃးၵႃႈၼႂ်းတွင်ႉမႄႈမၼ်းဢေႃႈ။ မၢင်ၵေႃႉၵေႃႈယႃႉပႅတ်ႈႁႅင်းတူဝ်ၵႃႇယႃႉတူဝ်ၸဝ်ႈၵဝ်ႇလႄႈဢမ်ႇတႄႇၼႃႈႁိူၼ်း။ ၵူၺ်းၵႃႈ၊မီးၵူၼ်းၵမ်ႈၽွင်ႈဢၼ်ၶျုၵ်ႈၵၼ်ႈႁႅင်းတူဝ်ၵႃႇယႃႉတူဝ်ၸဝ်ႈၵဝ်ႇပုၼ်ႈဢၵျူဝ်းမိူင်းၵၢင်ႁၢဝ်ဢေႃႈ။ ႁႂ်ႈၵေႃႉဢၼ်ပဵၼ်ၸိူဝ်ႉၼင်ႇၼႆလႆႈၼၼ်ႉၵူၺ်း၊ႁပ်ႉတုင်းဢဝ်ၵႂၢမ်းၼႆႉသေၵမ်းလူၺ်ႈ၊” ဝႃႈၼင်ႇၼႆဢေႃႈ။
ၵူၼ်းၵမ်ႈၽွင်ႈဢွၼ်ၵၼ်ဢဝ်လုၵ်ႈဢွၼ်ႇၶဝ်မႃးၸူးတီႈ ၸဝ်ႈယေႇသု၊ ပုၼ်ႈလွင်ႈၼင်ႇႁိုဝ်မၼ်းၸဝ်ႈတၵ်းဢဝ်မိုဝ်းတၢင်ႇလႄႈပၼ်တၢင်းလီဢေႃႈ။ ၵူၺ်းၵႃႈ၊ တပႄးၸဝ်ႈတင်းလၢႆတၢင်ႇဢပျတ်ႈတီႈၶဝ်ဢေႃႈ။-
ၸဝ်ႈယေႇသု၊ ၸင်ႇလၢတ်ႈလႄႈဝႃႈ၊ “ႁႂ်ႈလုၵ်ႈဢွၼ်ႇၸိူဝ်းၼၼ်ႉမႃးၵႃႈတီႈၵဝ်တႃႉ။ ယႃႇပေႁႄႉတၢင်းၶဝ်။ ၵွပ်ႈၸိူဝ်ႉႁိုဝ် လႄႈဝႃႈၸမ်ႉ၊မိူင်းၵၢင်ႁၢဝ်ၸဝ်ႈပဵၼ်မိူင်းၶဝ်ၸိူဝ်ႉၼင်ႇၼႆၼၼ်ႉဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈယိုၼ်းမိုဝ်းတၢင်ႇၵႃႈၼိူဝ်ၶဝ်သေလႄႈပၼ်တၢင်းလီၵႃႈၼိူဝ်ၶဝ်ယဝ်ႉၸင်ႇ၊ဢွၵ်ႇသေၵႃႈတီႈၼၼ်ႈၵႂႃႇဢေႃႈ။
မီးဝၼ်းၼိုင်ႈ၊ၵူၼ်းၵေႃႉၼိုင်ႈမႃးၸူးတီႈ ၸဝ်ႈယေႇသု၊ လႄႈလဝ်ႈထၢမ်ဝႃႈ၊ “သြႃႇၸဝ်ႈမျၢတ်ႈလီတီႈၶႃႈ၊ၼင်ႇႁိုဝ်ၵဝ်ၶႃႈတေလႆႈဢသၢၵ်ႈထႃႇဝရႃႉၸိုင်၊ထုၵ်ႇလီႁဵတ်းတၢင်းလီဢၼ်လႂ်ၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ လၢတ်ႈလႄႈဝႃႈ၊ “ႁဵတ်းသင်လႄႈမႂ်းႁွင်ႉၵဝ်ဝႃႈ၊မျၢတ်ႈလီၸိူဝ်ႉၼင်ႇႁိုဝ်။ ဢၼ်မျၢတ်ႈလီၼၼ်ႉမီးသူႇလဵဝ်ၵူၺ်းဢေႃႈ။ ပေႃးမႂ်းၶႂ်ႈၶဝ်ႈၼႂ်းတၢင်းဢၼ်ဢသၢၵ်ႈလိပ်းၸိုင်၊ၵမ်ၵျၢင်ႉပိင်းၺၢပ်ႈတြႃးၸဝ်ႈတင်းလၢႆတႃႉ၊” ဝႃႈၼင်ႇၼႆဢေႃႈ။
မၼ်းသမ်ႉလဝ်ႈထၢမ်လႄႈဝႃႈ၊ “ပိင်းၺၢပ်ႈတြႃးဢၼ်လႂ်ၶႃႈ၊” ဝႃႈၼင်ႇၼႆလႄႈမၼ်းၸဝ်ႈၶိုၼ်းလၢတ်ႈလႄႈဝႃႈ၊ “ယႃႇပေဢဝ်ဢသၢၵ်ႈၵူၼ်းတၢႆ။ ယႃႇပေၵူတ်ႉမေးပိူၼ်ႈ။ ယႃႇပေလၵ်ႉပိူၼ်ႈ။ ယႃႇပေၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉ။-
ရူဝ်ႇသေႇၵူဝ်ယမ်ပေႃႈမႄးမႂ်းတႃႉ။ ႁၵ်ႉၵူၼ်းဢၼ်ၸၢပ်ႈသႅင်ႇၵၼ်တင်းမႂ်းမိူၼ်ၸိူဝ်ႉၼင်ႇမႂ်းႁၵ်ႉတူဝ်ၸဝ်ႈၵဝ်ႇတႃႉ၊” ဝႃႈၼင်ႇၼႆဢေႃႈ။
ၵူၼ်းၼုမ်ႇၼၼ်ႉၶိုၼ်းလၢတ်ႈလႄႈဝႃႈ၊ “ပိင်းၺၢပ်ႈတြႃးၸိူဝ်းၼႆႉ၊ၵဝ်ၶႃႈၵမ်ၵျၢင်ႉၸွမ်းၵူႈသဵၼ်ႈယဝ်ႉၶႃႈဢေႃႈ။ လူဝ်ႇႁဵတ်းဢၼ်လႂ်ထႅင်ႈလူးၵွၼ်ႇၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈၶိုၼ်းလၢတ်ႈဝႃႈ၊ “ပေႃးမႂ်းၶႂ်ႈပဵၼ်ဢၼ်ၸေးၸုမ်ႇၸိုင်၊ၵႂႃႇလႄႈၶၢႆဢုၵ်ႉၸႃႇၶူဝ်းလဵင်းမႂ်းၵႃႈမီးတင်းသဵင်ႈတင်းလူင်သေလႄႈဢဝ်ငိုၼ်းဢၼ်မႂ်းလႆႈၸိူဝ်းၼၼ်ႉ၊ၸႃႇၵႃႉၽေးၸွၼ်းပၼ်ၵူၼ်းၽၢၼ်တင်းလၢႆတႃႉ။ ပေႃးမႂ်းႁဵတ်းၸိူဝ်ႉၼင်ႇၼၼ်ၸိုင်၊မႂ်းတၵ်းလႆႈၽၼ်ႇတႃႇၵႃႈၼိူဝ်မိူင်းၵၢင်ႁၢဝ်ၸဝ်ႈပုၼ်ႉဢေႃႈ။ ႁဵတ်းၼၼ်ယဝ်ႉၸင်ႇမႃးၸွမ်း ပႃႈလင်ၵဝ်တႃႉ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၵူၼ်းၼုမ်ႇၼၼ်ႉလႆႈငိၼ်းၵႂၢမ်းၸိူဝ်ႉၼင်ႇၼၼ်ၸိုင်၊မီးႁူဝ်ၸႂ်ဢၼ်ငိူဝ်ႈငဝ်သေလႄႈဢွၵ်ႇၵႂႃႇ၊ၵွပ်ႈပိူဝ်ႈမၼ်းပဵၼ်ၵေႃႉဢၼ်မၢၵ်ႈမီးငိုၼ်းၶမ်းၼမ်ၼႃႇၼၼ်ႉဢေႃႈ။
မိူဝ်ႈၼၼ်ႉ၊ ၸဝ်ႈယေႇသု၊ သင်ႇလၢတ်ႈတီႈတပႄးၸဝ်ႈတင်းလၢႆလႄႈဝႃႈ၊ “ၵဝ်ဝႃႈတီႈၸိုဝ်ႈၸႂ်ႈမၼ်းတီႈသူၸမ်ႉ၊ ၵူၼ်းမၢၵ်ႈၵူၼ်းမီးတေၶဝ်ႈၵႃႈၼႂ်းမိူင်းၵၢင်ႁၢဝ်ၸဝ်ႈယၢပ်ႇၼႃႇလူင်လၢင်ဢေႃႈ။-
ၵဝ်သမ်ႉဝႃႈထႅင်ႈၸမ်ႉ၊ၵူၼ်းမၢၵ်ႈၵူၼ်းမီးတေၶဝ်ႈၵႃႈၼႂ်းမိူင်းၵၢင်ႁၢဝ်ၸဝ်ႈယၢပ်ႇၼႃႇသေၵလႃႇဢုၵ်ႈလၼ်ႈႁူးၶဵမ်လူးၵွၼ်ႇဢေႃႈ၊” ဝႃႈၼင်ႇၼႆဢေႃႈ။
တပႄးၸဝ်ႈတင်းလၢႆလႆႈငိၼ်းၵႂၢမ်းၼၼ်ႉလႄႈၵႂၢင်ၸႂ်ယုင်ႈၸႂ်ၼႃႇလူင်လၢင်လႄႈလၢတ်ႈဝႃႈ၊ “ပေႃးပဵၼ်ၼႆၽူႈလႂ်တၵ်းႁွတ်ႈထိုင်တၢင်းဢၼ်ၵႄႇၶျွတ်ႈဢဝ်လႆႈၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ယႅၵ်ႉတူၺ်းၶဝ်သေလႄႈလၢတ်ႈဝႃႈ၊ “လွင်ႈတၢင်းၼႆႉၸိုင်၊ၵူၼ်းဢမ်ႇတၢတ်ႈၼိူင်ႇလႆႈ။ ၼႂ်းဝႃႈၼၼ်သေၵေႃႈပုၼ်ႈၽြႃးပဵၼ်ၸဝ်ႈၸိုင်၊မၼ်းၸဝ်ႈတၢတ်ႈၼိူင်ႇလႆႈၵူႈၸိူဝ်ႉၵူႈပိူင်ဢေႃႈ၊” ဝႃႈၼင်ႇၼႆဢေႃႈ။
မိူဝ်းၼၼ်ႉ၊ ပေႇတရု၊ လဝ်ႈလၢတ်ႈလႄႈဝႃႈ၊ “တူၺ်းၶႃႈလူးၸဝ်ႈ။ ႁဝ်းၶႃႈၸုၼ်ႉပႅတ်ႈၵႃႈမီးတင်းသဵင်ႈတင်းလူင်လႄႈၸွမ်းလင်ၸဝ်ႈႁဝ်းယူႇၶႃႈယဝ်ႉ။ ႁဝ်းၶႃႈတၵ်းလႆႈၶၢမ်ႇဢဝ်ဢၵျူဝ်းဢီႈသင်ၶႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၶိုၼ်းလၢတ်ႈလႄႈဝႃႈ၊ “ၵဝ်လၢတ်ႈဢၼ်ၸိုဝ်ႈၸႂ်ႈမၼ်းတီႈသူဢေႃႈ။ မိူဝ်ႈဢၼ် လုၵ်ႈၵူၼ်း၊ လႆႈၼင်ႈပလၢင်ႇဢၼ်မီးမုၼ်ၽုင်းယႂ်ႇၼႃႇၼႂ်းၸူဝ်ႈၸၢတ်ႈဢၼ်မႂ်ႇၼၼ်ႉ၊ သူတင်းသိပ်းသွင်ၵေႃႉဢၼ်ပဵၼ်တပႄးၵဝ်ၸိူဝ်းၼႆႉတၵ်းလႆႈၼင်ႈလူၺ်ႈၵဝ်ၵႃႈၼိူဝ်ပလၢင်ႇၽႂ်မၼ်းလႄႈၸီႇယၢင်ႇတြႃးၵႃႈၼိူဝ်ၸိူဝ်ႉၶိူဝ်း ဢိသရေး၊ သိပ်းသွင်ၶိူဝ်းၼၼ်ႉဢေႃႈ။-
မိူၼ်ၸိူဝ်ႉၼင်ႇၼၼ်ၽူႈလႂ်သေဢမ်ႇဝႃႈ၊ၵေႃႉဢၼ်ၸုၼ်ႉပႅတ်ႈၸႃႉၸဵမ်ႁိူၼ်းယေး၊ပီႈၼွင်ႉၸဵမ်ယိင်းၸဵမ်ၸၢႆး၊ပေႃႈမႄႈ၊ လုၵ်ႈလၢင်း၊ဢိၵ်ႇတင်းသူၼ်ႁႆႈလွၵ်းၼႃးတင်းလၢႆ၊ပုၼ်ႈၼႃႇမႃႉၸိုဝ်ႈသဵင်ၵဝ်ၼၼ်ႉ၊ၵေႃႉၼၼ်ႉတၵ်းလႆႈၶၢမ်ႇဢဝ်ဢၵျူဝ်းပၢၵ်ႇပုၼ်ႈဢမ်ႇၵႃး၊တၵ်းလႆႈၶၢမ်ႇဢဝ်ဢမူၺ်ႇဢသၢၵ်ႈထႃႇဝရႃႉဢေႃႈ။-
ၵူၺ်းၵႃႈ၊တေမီးၵူၼ်းၼမ်ၼႃႇဢၼ်တူၵ်းဢွၼ်တၢင်းၼၼ်ႉတၵ်းတူၵ်းလိုၼ်းလႄႈ၊ၶဝ်ၸိူဝ်းဢၼ်တူၵ်းလိုၼ်းၼၼ်ႉတၵ်းတူၵ်းဢွၼ်တၢင်းဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ဢဝ်တင်းၵႂၢမ်းဢုပမႃႇလႄႈႁေႃးလၢတ်ႈဝႃႈ၊ “မိူင်းၵၢင်ႁၢဝ်ၸဝ်ႈမိူၼ်ၸိူဝ်ႉၼင်ႇၵူၼ်းၵေႃႉၼိုင်ႈၸၢင်ႈပိူၼ်ႈႁဵတ်းၵၢၼ်ၼႂ်းသူၼ်မၢၵ်ႇၸပိတ်ႉဢေႃႈ။ ၸဝ်ႈသူၼ်ၼၼ်ႉ၊ၶိင်ႇၵၢင်ၼႂ်ၸဝ်ႉၸဝ်ႉဢွၵ်ႇၵႂႃႇႁႃၸၢင်ႈၵူၼ်းၵမ်ႈၽွင်ႈမႃးလႄႈ၊-
ဝႆႉၵတိတၵ်းပၼ်ငိုၼ်းၵႃႈႁႅင်းဝၼ်း၊တေႇၼႃႇရီႇ ၶႅပ်းၼိုင်ႈသေယဝ်ႉ၊ပွႆႇၸႂ်ႉၶဝ်ၵႂႃႇၵႃႈၼႂ်းသူၼ်မၼ်းဢေႃႈ။-
မၼ်းၼၼ်ႉ၊ဢၶိင်ႇၵဝ်ႈမွင်းၸမ်ၸမ်သမ်ႉၵႂႃႇၵႃႈတီႈၵၢင်ၵၢတ်ႇလႄႈထူပ်းႁၼ်ၵူၼ်းၵမ်ႈၽွင်ႈဢၼ်ဢမ်ႇမီးၵၢၼ်လႄႈၸုၵ်းယူႇၼၼ်ႉဢေႃႈ။-
မၼ်းလၢတ်ႈတီႈၶဝ်လႄႈဝႃႈ၊ ‘သူၸိူဝ်းၼႆႉၵႂႃႇႁဵတ်းၵၢၼ်ၵႃႈၼႂ်းသူၼ်မၢၵ်ႇၸပိတ်ႉၵဝ်ပုၼ်ႉတႃႉ။ ၵႃႈႁႅင်းဝၼ်းၸိုင်၊ၵဝ်တၵ်းပၼ်ၵႃႈဢၼ်ထိူၵ်ႈတၢၼ်ႇၼၼ်ႉဢေႃႈ၊’ ဝႃႈၼင်ႇၼႆလႄႈၶဝ်ၵေႃႈၵႂႃႇဢေႃႈ။-
ၶိင်ႇၵၢင်ဝၼ်းတဵင်ႈၼၼ်ႉပွၵ်ႈၼိုင်ႈ၊ဝၢႆးဝၼ်းသၢမ်မွင်းၸမ်ၸမ်ၼၼ်ႉပွၵ်ႈၼိုင်ႈ၊မၼ်းသမ်ႉၵႂႃႇႁွင်ႉၵူၼ်းမႃးထႅင်ႈၸိူဝ်ႉၼင်ႇၼၼ်ဢေႃႈ။-
မိူဝ်ႈၸမ်ၶိင်ႇဢၼ်သိမ်းၵၢၼ်၊ၵူၺ်းလူဝ်ႇထႅင်ႈၸူဝ်ႈမွင်းၼိုင်ႈလိူဝ်လိူဝ်ၼၼ်ႉ၊ၸဝ်ႈသူၼ်သမ်ႉၵႂႃႇၵႃႈတီႈၵၢင်ၵၢတ်ႇလႄႈထူပ်းႁၼ်ထႅင်ႈၵူၼ်းတၢင်ႇၵေႃႉၸိူဝ်းဢၼ်ဢမ်ႇမီးၵၢၼ်လႄႈၸုၵ်းယူႇၼၼ်ႉ၊မၼ်းလၢတ်ႈတီႈၶဝ်လႄႈဝႃႈ၊ ‘သူယင်းဢမ်ႇႁဵတ်းၵၢၼ်လႄႈၸုၵ်းယူႇတီႈၼႆႈတင်းဝၼ်းႁဵတ်းသင်၊’ ဝႃႈၼင်ႇၼႆလႄႈ၊-
ၶဝ်ၶိုၼ်းလၢတ်ႈလႄႈဝႃႈ၊ ‘ၽူႈလႂ်ၵေႃႈဢမ်ႇၸၢင်ႈဢမ်ႇငႃႁဝ်းၶႃႈၵူၺ်း၊’ ဝႃႈၼင်ႇၼႆလႄႈၸဝ်ႈသူၼ်ၼၼ်ႉၸင်ႇလၢတ်ႈလႄႈဝႃႈ၊ ‘ပေႃးပဵၼ်ၼႆၸိုင်၊သူၵႂႃႇႁဵတ်းၵၢၼ်ၵႃႈၼႂ်းသူၼ်မၢၵ်ႇၸပိတ်ႉၵဝ်တႃႉ၊’ ဝႃႈၼင်ႇၼႆဢေႃႈ။
“မိူဝ်ႈဢၼ်ထိုင်ၶိင်ႇႁူဝ်ၶမ်ႈဢၼ်သိမ်းၵၢၼ်သူၼ်ၼၼ်ႉၸိုင်၊ၸဝ်ႈသူၼ်သင်ႇလၢတ်ႈတီႈၽူႈမၢႆမၼ်းလႄႈဝႃႈ၊ ‘ႁွင်ႉလုၵ်ႈၸၢင်ႈၸိူဝ်းၼၼ်ႉမႃးလႄႈပၼ်ၵႃႈႁႅင်းၶဝ်ၸႃႉၸဵမ်ၵေႃႉဢၼ်ႁဵတ်းလိုၼ်းလင်တေႃႇထိုင်ၵေႃႉဢၼ်ႁဵတ်းဢွၼ်တၢင်းၸိူဝ်းၼၼ်ႉတႃႉ၊’ ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၶဝ်ၸိူဝ်းဢၼ်ၶဝ်ႈႁဵတ်းၵၢၼ်ၼိုင်ႈမွင်းပၢႆပၢႆၼၼ်ႉ၊လႆႈႁပ်ႉဢဝ်ယေႈၵေႃႉၵႃႈႁႅင်းဝၼ်းငိုၼ်း တေႇၼႃႇရီႇယေႈၶႅပ်းဢေႃႈ။-
မိူဝ်ႈဢၼ်လုၵ်ႈၸၢင်ႈၸိူဝ်းဢၼ်ၶဝ်ႈႁဵတ်းၵၢၼ်ဢွၼ်တၢင်းၸိူဝ်းၼၼ်ႉႁၼ်လႄႈထၢင်ႇဝႃႈ၊ၶဝ်တေလႆႈၼမ်သေၵေႃႈလႆႈႁပ်ႉဢဝ်ယေႈၵေႃႉငိုၼ်းတေႇၼႃႇရီႇယေႈၶႅပ်းၵူၺ်းၼင်ႇၵဝ်ႇဢေႃႈ။-
မိူဝ်ႈဢၼ်ၶဝ်လႆႈႁပ်ႉဢဝ်ၸိူဝ်ႉၼင်ႇၼၼ်ၸိုင်၊ၶဝ်သႄႉသွမ်းတၢင်ႇဢပျတ်ႈတီႈၸဝ်ႈသူၼ်လႄႈ၊-
လၢတ်ႈဝႃႈ၊ ‘ၶဝ်ၸိူဝ်းၼႆႉ၊ၶဝ်ႈႁဵတ်းၵၢၼ်လိုၼ်းလင်ႁဝ်းသေယဝ်ႉ၊သမ်ႉႁဵတ်းၵၢၼ်ႁိုင်ၼိုင်ႈမွင်းၵူၺ်း၊ႁဵတ်းသင်လႄႈၸဝ်ႈႁဝ်းပၼ်ၵႃႈႁႅင်းမိူၼ်မိူၼ်ၵၼ်တင်းႁဝ်းၶႃႈၸိူဝ်းဢၼ်ၶဝ်ႈႁဵတ်းၵၢၼ်ဢွၼ်တၢင်း၊ႁဵတ်းၵၢၼ်ၼၵ်းတၢၵ်ႇလႅတ်ႇတင်းဝၼ်းၼၼ်ႉၸိူဝ်ႉၼင်ႇႁိုဝ်၊’ ဝႃႈၼင်ႇၼႆဢေႃႈ။-
ၸဝ်ႈသူၼ်ၶိုၼ်းလၢတ်ႈတီႈၶဝ်ၵေႃႉၼိုင်ႈလႄႈဝႃႈ၊ ‘ၵေႃႉသႄႈ႟။ ၵဝ်ဢမ်ႇလႅၼ်ၵိၼ်မႂ်း။ ၵႃႈၼင်ႇဢၼ်ၵဝ်ဝႆႉၵတိတၵ်းပၼ်ၵႃႈႁႅင်းဝၼ်းငိုၼ်းတေႇၼႃႇရီႇၶႅပ်းၼိုင်ႈၼၼ်ႉမႂ်းလႆႈႁပ်ႉၶၢမ်ႇဢဝ်ယဝ်ႉ။-
ဢဝ်ၵႃႈႁႅင်းမႂ်းလႄႈမိူဝ်းၵႂႃႇတႃႉ။ ၵဝ်ၶႂ်ႈပၼ်တီႈၶဝ်ၸိူဝ်းဢၼ်ႁဵတ်းၵၢၼ်လိုၼ်းလင်ၼၼ်ႉမိူၼ်ၵၼ်တင်းမႂ်းဢေႃႈ။-
ၵႃႈၼင်ႇဢၼ်ၵဝ်ၶႂ်ႈဢဝ်ငိုၼ်းတူဝ်ၸဝ်ႈၵဝ်ႇပၼ်ၼၼ်ႉ၊ၵဝ်ဢမ်ႇမီးဢၶႂၢင်ႉဢယေးႁိုဝ်း။ ဢမ်ႇၼၼ်တၢင်းဢၼ်ၵဝ်လီၼၼ်ႉဢမ်ႇထုၵ်ႇၸႂ်မႂ်းႁိုဝ်း၊’ ဝႃႈၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ သိုပ်ႇလၢတ်ႈလႄႈဝႃႈ၊ “မိူၼ်ၼင်ႇၼၼ်ၶဝ်ၸိူဝ်းဢၼ်တူၵ်းလိုၼ်းၼၼ်ႉတၵ်းတူၵ်းဢွၼ်တၢင်းလႄႈၶဝ်ၸိူဝ်းဢၼ်တူၵ်းဢွၼ်တၢင်းၼၼ်ႉတၵ်းတူၵ်းလိုၼ်းဢေႃႈ။ [ၶဝ်ၸိူဝ်းဢၼ်လႆႈၶၢမ်ႇတၢင်းႁွင်ႉဢဝ်ၼၼ်ႉၼမ်ၼႃႇသေၵေႃႈ၊ ၶဝ်ၸိူဝ်းဢၼ်လႆႈၶၢမ်ႇတၢင်းလိူၵ်ႈၵဵပ်းဢဝ်ၼၼ်ႉၵေႇၼႃႇဢေႃႈ၊]” ဝႃႈၼင်ႇၼႆဢေႃႈ။
ၼႂ်းမိူဝ်ႈဢၼ် ၸဝ်ႈယေႇသု၊ ၶိုၼ်ႈၵႂႃႇၸူးဝဵင်း ယေႇရုသလႅမ်ႇ၊ ယူႇၼၼ်ႉ၊ၵႃႈတီႈၵၢင်တၢင်းမၼ်းၸဝ်ႈႁွင်ႉဢဝ်တပႄးၸဝ်ႈသိပ်းသွင်ပႃးၽၢတ်ႇဢွၵ်ႇၽုင်ၵူၼ်းၵႂႃႇတီႈဢၼ်တဵတ်ႇယဵၼ်သေယဝ်ႉ၊သင်ႇလၢတ်ႈတီႈၶဝ်လႄႈဝႃႈ၊-
“တူၺ်းလူး။ ႁဝ်းဢွၼ်ၵၼ်ၶိုၼ်ႈၵႂႃႇၸူးဝဵင်း ယေႇရုသလႅမ်ႇ၊ ယူႇဢေႃႈ။ ၵႃႈတီႈၼၼ်ႈ ၸဝ်ႈလုၵ်ႈၵူၼ်း၊ တၵ်းလႆႈၶၢမ်ႇတၢင်းဢၼ်ဢၢပ်ႈၵႃႈၼႂ်းမိုဝ်းယဵၸ်ႈပရေႃးႁဵၵ်ႈ လူင်ၶဝ်တင်းသြႃႇမေႃၵျၢမ်းထမ်ႇမႃႉတင်းလၢႆဢေႃႈ။ ၶဝ်တၵ်းၸီႇယၢင်ႇႁႂ်ႈဢဝ်တၢႆဢေႃႈ။-
ၶဝ်တၵ်းဢဝ်မၼ်းၸဝ်ႈဢၢပ်ႈတီႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ၊ႁႂ်ႈလႆႈႁဵတ်းပျၢၵ်ႈပေႃႉယႅၼ်ႉသေယဝ်ႉ၊တွၵ်ႇဝႆႉၵႃႈၼိူဝ်သဝ်မႆႉဝႃးမိုဝ်းဢေႃႈ။ ၼႂ်းဝႃႈၼၼ်သေၵေႃႈ၊ ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉ၊မၼ်းၸဝ်ႈတၵ်းလုၵ်ႉၶိုၼ်းလိပ်းဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊မေး ၸေႇပေႇတႄး၊ ႁွင်ႉပႃးလုၵ်ႈၸၢႆးမၼ်းသွင်ၵေႃႉၼၼ်ႉၶဝ်ႈၸူးတီႈ ၸဝ်ႈယေႇသု၊ လႄႈ၊ၶုပ်ႉၶဝ်ႇယူႇၽၢႆႇၼႃႈမၼ်းၸဝ်ႈႁႂ်ႈလႆႈလဝ်ႈယွၼ်းသေၸိူဝ်ႉသေပိူင်ဢေႃႈ။
မၼ်းၸဝ်ႈၵေႃႈထၢမ်လႄႈ၊ဝႃႈ၊ “သူမီးဢလူဝ်ႇၵႃႈသင်၊” ဝႃႈၼင်ႇၼႆလႄႈမႄႈ၊ယိင်းၼၼ်ႉၵေႃႈ၊လဝ်ႈယွၼ်းလႄႈဝႃႈ၊ “ၶႅၼ်းတေႃႈပၼ်ဢၶႂၢင်ႉႁႂ်ႈလုၵ်ႈၸၢႆးၵဝ်ၶႃႈသွင်ၵေႃႉၼႆႉလႆႈၼင်ႈၵႃႈၼိူဝ်ပလၢင်ႇႁိမ်းၸဝ်ႈႁဝ်းၽၢႆႇၶႂႃၵေႃႉၼိုင်ႈ၊ ၽၢႆႇသၢႆႉၵေႃႉၼိုင်ႈၵႃႈၼႂ်းမိူင်းၸဝ်ႈႁဝ်းသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
“သူဢမ်ႇႁုလွင်ႈတၢင်းဢၼ်သူယွၼ်းၼၼ်ႉ၊” ဝႃႈၼႆ၊ ၸဝ်ႈယေႇသု၊ လၢတ်ႈတီႈသွင်ပီႈၼွင်ႉၼၼ်ႉဝႃႈ၊ “ၵွၵ်းဢၼ်ၵဝ်ၸမ်တၵ်းလႆႈၵိၼ်ၼၼ်ႉၸွင်ႇသူတၵ်းၵိၼ်လႆႈႁိုဝ်း၊” ဝႃႈၼင်ႇၼႆဢေႃႈ။ ၶဝ်ၵေႃႈၶိုၼ်းလၢတ်ႈဝႃႈ၊ “ၵိၼ်လႆႈၶႃႈဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၵေႃႈလၢတ်ႈတီႈၶဝ်လႄႈဝႃႈ၊ “ၸႂ်ႈယဝ်ႉ၊ၵွၵ်းၵဝ်ၼႆႉသူတေၵိၼ်လႆႈယူႇသေၵေႃႈ၊ၵဝ်ဢမ်ႇမီးဢၶႂၢင်ႉတၵ်းပၼ်ၽူႈလႂ်တၵ်းၼင်ႈၽၢႆႇၶႂႃၵဝ်၊ဢိၵ်ႇတင်းတၵ်းၼင်ႈၽၢႆႇသၢႆႉၵဝ်ၼၼ်ႉ။ တီႈၼင်ႈၸိူဝ်းၼၼ်ႉ၊ပေႃႈၸဝ်ႈၵဝ်မႄးႁႅၼ်းဝႆႉ၊ပုၼ်ႈၶဝ်ၸိူဝ်းဢၼ်မၼ်းၸဝ်ႈတၵ်းပၼ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈတပႄးၸဝ်ႈသိပ်းသွင်ပႃးလႆႈငိၼ်းၼၼ်ႉၶဝ်ၶႂ်ႈၸႃႉသွင်ပီႈၼွင်ႉၼၼ်ႉဢေႃႈ။-
ၸဝ်ႈယေႇသု၊ ၸင်ႇႁွင်ႉဢဝ်ၶဝ်ၸုတုမ်ၵၼ်သေယဝ်ႉ၊ လၢတ်ႈလႄႈဝႃႈ၊ “ၶုၼ်ၵူၼ်းဢၼ်ဢမ်ႇၵမ်တြႃးၸဝ်ႈၸၢင်ႈဢုပ်ႉပိူင်ႇၵႃႈၼိူဝ်ၵူၼ်းၶဝ်လႄႈၵႄႇၵၢင်ႉၽွင်းမိူင်းတင်းလၢႆၵေႃႈ၊ၸႂ်ႉဢႃႇၼႃႇၵႃႈၼိူဝ်ၶဝ်ၼၼ်ႉၸိုင်၊သူႁုယူႇဢေႃႈ။-
ၵူၺ်းၵႃႈ၊ၵႃႈၼႂ်းသူၼႆႉၸမ်ႉ၊ဢမ်ႇလႆႈပဵၼ်ၸိူဝ်ႉၼင်ႇၼၼ်။ ၼႂ်းသူၼႆႉၵေႃႉဢၼ်ၶႂ်ႈပဵၼ်ၵူၼ်းလူင်ၼၼ်ႉႁႂ်ႈမၼ်းၶၢမ်ႇပဵၼ်ၵူၼ်းၸႂ်ႉသူတႃႉ။-
ၼႂ်းသူၼႆႉၵေႃႉဢၼ်ၶႂ်ႈပဵၼ်ႁူဝ်ပဵၼ်ၵၼ်းၼၼ်ႉၵေႃႈ၊ႁႂ်ႈမၼ်းၶၢမ်ႇပဵၼ်ၶႃႈသူတႃႉ။-
ပိူင်လဵဝ်ၵၼ် ၸဝ်ႈလုၵ်ႈၵူၼ်း၊ မႃးႁႂ်ႈလႆႈၸႂ်ႉၵိၼ်ပိူၼ်ႈဢမ်ႇၸႂ်ႈ။ မႃးႁႂ်ႈလႆႈၶၢမ်ႇတၢင်းဢၼ်ပိူၼ်ႈၸႂ်ႉသွႆဢိၵ်ႇတင်းႁႂ်ႈလႆႈၸုၼ်ႉဢသၢၵ်ႈတူဝ်ၸဝ်ႈၵဝ်ႇ၊ပုၼ်ႈလွင်ႈၼင်ႇႁိုဝ်တၵ်းလႆႈထုတ်ႇၼုၵ်ႈဢဝ်ၵူၼ်းၼမ်ၼႃႇဢေႃႈ၊” ဝႃႈၼင်ႇၼႆဢေႃႈ။
ၼႂ်းမိူဝ်ႈဢၼ် ၸဝ်ႈယေႇသု၊ တင်းတပႄးၸဝ်ႈတင်းလၢႆ၊ဢွၵ်ႇသေဝဵင်း ယေႇရိၶူဝ်း၊ ၵႂႃႇယူႇၼၼ်ႉမူႇၵူၼ်းၼမ်ၼႃႇဢွၼ်ၵၼ်ၵႂႃႇၸွမ်းယူႇဢေႃႈ။-
ၵူၼ်းတႃမွတ်ႇသွင်ၵေႃႉၼင်ႇယူႇႁိမ်းတၢင်းလႄႈလႆႈငိၼ်းလွင်ႈဢၼ် ၸဝ်ႈယေႇသု၊ မႃးယူႇၼၼ်ႉသေယဝ်ႉ၊ ႁွင်ႉပၢဝ်ႇလႄႈဝႃႈ၊ “ၸဝ်ႈႁဝ်း၊လုၵ်ႈ တႃႇဝိတ်ႈ၊ ၼႆႉ႟။ ဢဵတ်းလူႁဝ်းၶႃႈသေၵမ်းၶႃႈ၊” ဝႃႈၼင်ႇၼႆဢေႃႈ။
ၵူၼ်းဢၼ်ၸုဢၼ်တုမ်ၸိူဝ်းၼၼ်ႉႁိုတ်းႁၢတ်ႇႁႂ်ႈၶဝ်ယူႇတဵတ်ႇတဵတ်ႇဢေႃႈ။ ၵူၺ်းၵႃႈ၊ၶဝ်ယဵင်ႈၶႅၼ်းႁွင်ႉပၢဝ်ႇလႄႈဝႃႈ၊ “ၸဝ်ႈႁဝ်း၊လုၵ်ႈ တႃႇဝိတ်ႈ၊ တီႈၶႃႈ႟။ ဢဵတ်းလူႁဝ်းၶႃႈသေၵမ်းၶႃႈ၊” ဝႃႈၼင်ႇၼႆယူႇဢေႃႈ။
ၸဝ်ႈယေႇသု၊ ၸင်ႇၵိုတ်းသဝ်းသေယဝ်ႉ၊ႁွင်ႉၶဝ်လႄႈထၢမ်ဝႃႈ၊ “သူၶႂ်ႈႁႂ်ႈၵဝ်ႁဵတ်းၵႃႈသင်ပုၼ်ႈသူ၊” ဝႃႈၼင်ႇၼႆလႄႈ။
ၶဝ်ၵေႃႈလဝ်ႈလၢတ်ႈလႄႈဝႃႈ၊ “ၸဝ်ႈႁဝ်းၶႅၼ်းတေႃႈႁဵတ်းႁႂ်ႈမၢၵ်ႇတႃႁဝ်းၶႃႈႁၼ်မႃးသေၵမ်းၶႃႈ၊” မိူဝ်ႈဢၼ်ဝႃႈၼင်ႇၼႆၸိုင်။
မၼ်းၸဝ်ႈမီးၸႂ်ဢဵတ်းလူၼႃႇသေယဝ်ႉၸင်ႇ၊ဢဝ်မိုဝ်းလုပ်ႈၵမ်မၢၵ်ႇတႃၶဝ်ၼၼ်ႉဢေႃႈ။ ၶဝ်ၼၼ်ႉၵေႃႈ၊မၢၵ်ႇတႃၶဝ်ႁၼ်လႆႈမႃးၵမ်းလဵဝ်လႄႈၵႂႃႇၸွမ်းမၼ်းၸဝ်ႈသေဢေႃႈ။
မိူဝ်ႈဢၼ် ၸဝ်ႈယေႇသု တင်းတပႄးၸဝ်ႈတင်းလၢႆ၊ႁွတ်ႈၸမ်ဝဵင်း ယေႇရုသလႅမ်ႇ၊ ၵႃႈတီႈဝၢၼ်ႈ ပိတ်ႉၽႃႇၵေး၊ ၵႃႈတီႈလွႆ သၢၼ်ႇလုၼ်ႇ၊ ၼၼ်ႉၸိုင်၊ ၸဝ်ႈယေႇသု၊ ပွႆႇၸႂ်ႉတပႄးၸဝ်ႈသွင်ၵေႃႉၵႂႃႇဢွၼ်တၢင်းလႄႈသင်ႇလၢတ်ႈၶဝ်ဝႃႈ၊-
“သူၵႂႃႇၵႃႈတီႈဝၢၼ်ႈဢၼ်မီးပႃႈၼႃႈပုၼ်ႉတႃႉ။ သူတၵ်းထူပ်းႁၼ်မႃႉလီႈမႄႈဢွၼ်ႇတူဝ်ၼိုင်ႈမတ်ႉဝႆႉ၊ဢိၵ်ႇတင်းလုၵ်ႈမႃႉလီႈဢွၼ်ႇဢၼ်မီးယူႇလူၺ်ႈၵၼ်တင်းမၼ်းၼၼ်ႉၵမ်းလဵဝ်ဢေႃႈ။ ၵႄႈသေလႄႈၸုင်ဢဝ်မႃးၸူးၵဝ်တႃႉ။-
ပေႃးပိူၼ်ႈထၢမ်သေၸိူဝ်ႉသေပိူင်ၸိုင်၊လၢတ်ႈဝႃႈ၊ ‘ၸဝ်ႈမီးဢလူဝ်ႇ၊’ ဝႃႈၼႆၵူၺ်းတႃႉ။ ၵေႃႉၼၼ်ႉတၵ်းပၼ်မႃးၵမ်းလဵဝ်ဢေႃႈ၊” ဝႃႈၼင်ႇၼႆဢေႃႈ။
လွင်ႈတၢင်းၼႆႉ၊ပဵၼ်မႃးႁႂ်ႈၵႂၢမ်းဢွၵ်ႇသူပ်းပရေႃးၽႅတ်ႈ လႆႈပျေႉၸုမ်ႇၸွမ်းၵႃႈၼင်ႇဢၼ်ဝႃႈ။-
“မွၵ်ႇလၢတ်ႈတီႈလုၵ်ႈယိင်းဝဵင်း ၸိဢုၼ်ႇ၊ လႄႈဝႃႈ၊ ‘တူၺ်းလူး။ ၶုၼ်ႁေႃၶမ်းမႂ်းပႃးၸႂ် ဢၼ်ဢူၼ်ႈဢၼ်ဢွၼ်ႇလႄႈ ၶီႇမႃႉလီႈမႄႈတင်းလုၵ်ႈမႃႉလီႈဢွၼ်ႇ၊ မႃးၸူးမႂ်းဢေႃႈ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆၼၼ်ႉဢေႃႈ။
တပႄးၸဝ်ႈသွင်ၵေႃႉၼၼ်ႉၵေႃႈၵႂႃႇလႄႈႁဵတ်းၸွမ်းၵႃႈၼင်ႇဢၼ်မၼ်းၸဝ်ႈသင်ႇလၢတ်ႈၼၼ်ႉသေယဝ်ႉ၊-
ၵႄႈဢဝ်မႃႉလီႈမႄႈတင်းလုၵ်ႈမႃႉလီႈဢွၼ်ႇၼၼ်ႉမႃးလႄႈဢဝ်သိူဝ်ႈယၢဝ်းၶဝ်ပၢတ်ႈတၢင်ႇလင်မႃႉလီႈမႄႈယဝ်ႉၸင်ႇမၼ်းၸဝ်ႈၶိုၼ်ႈၶီႇၵႂႃႇဢေႃႈ။
မူႇၵူၼ်းၼမ်ၼႃႇမႃးလႄႈဢဝ်သိူဝ်ႈယၢဝ်းၶဝ်သိူဝ်ႇပၼ်ပူပၼ်ၵႃႈၼိူဝ်ၶူၼ်တၢင်းဢေႃႈ။ ၵမ်ႈၽွင်ႈၽၼ်းဢဝ်ၵိင်ႇမႆႉၶႃႈမႆႉသေလႄႈသိူဝ်ႇပၼ်ၵႃႈၼိူဝ်ၶူၼ်တၢင်းဢေႃႈ။-
မူႇၵူၼ်းၸိူဝ်းဢၼ်ၵႂႃႇပႃႈၼႃႈဢိၵ်ႇတင်းၸိူဝ်းဢၼ်ၸွမ်းပႃႈလင်ၼၼ်ႉ၊ဢွၼ်ၵၼ်ပၢဝ်ႇသႅၼ်ႇလႄႈဝႃႈ၊ “ႁႂ်ႈပဵၼ်ႁူဝ်းသၼ်ႇၼႃႉ တီႈလုၵ်ႈ တႃႇဝိတ်ႈ၊ ၼႆႉသေၵမ်းလူၺ်ႈ။ ႁႂ်ႈၸဝ်ႈဢၼ်ပႃးတင်းၼႃႇမႃႉၸိုဝ်ႈသဵင်ၽြႃးပဵၼ်ၸဝ်ႈမႃးၼႆႉမီးမၢင်ႇၵလႃႇသေၵမ်းလူၺ်ႈ။ ႁႂ်ႈပဵၼ်ႁူဝ်းသၼ်ႇၼႃႉၵႃႈၼိူဝ်ပၢႆၸိၵ်းၸွမ်ၵၢင်ႁၢဝ်ပုၼ်ႉသေၵမ်းလူၺ်ႈ၊” ဝႃႈၼင်ႇၼႆဢေႃႈ။
မိူဝ်ႈဢၼ် ၸဝ်ႈယေႇသု၊ ၶဝ်ႈဝဵင်း ယေႇရုသလႅမ်ႇ၊ ၵႂႃႇယူႇၼၼ်ႉၸိုင်၊တင်းဝဵင်းၵႂၢင်ၸႂ်ယုင်ႈၸႂ်တွင်ႈထၢမ်ၵၼ်ဢူၼ်ဢဵၼ်မေႃးမႄးဝႆႉလႄႈဝႃႈ၊ “ၵေႃႉၼႆႉပဵၼ်ၽူႈလႂ်၊” ဝႃႈၼင်ႇၼႆဢေႃႈ။
မူႇၵူၼ်းၸိူဝ်းၼၼ်ႉၵေႃႈၶိုၼ်းလၢတ်ႈလႄႈဝႃႈ၊ “ၵေႃႉၼႆႉပဵၼ်ပရေႃးၽႅတ်ႈ ယေႇသု၊ ၵူၼ်းဝဵင်း ၼႃႇၸရႅတ်ႈ၊ မိူင်း ၵႃႇလိလႄး၊ ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶဝ်ႈၵႂႃႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈသေယဝ်ႉ၊လိုပ်ႈႁေႃႈၶဝ်ၸိူဝ်းဢၼ်ၵႃႉၶၢႆယူႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉတင်းသဵင်ႈတင်းလူင်ဢွၵ်ႇပႅတ်ႈလႄႈပိၼ်ႈၶွမ်ႈပႅတ်ႈၽိူၼ်ၶဝ်ၸိူဝ်းဢၼ်လႅၵ်ႈငိုၼ်းဢိၵ်ႇတင်းတင်ႇၼင်ႈၶဝ်ၸိူဝ်းဢၼ်ၶၢႆၼူၵ်ႉတူႈၸိူဝ်းၼၼ်ႉသေယဝ်ႉ၊-
လၢတ်ႈတီႈၶဝ်ၸိူဝ်းၼၼ်ႉလႄႈဝႃႈ၊ “ၵျၢမ်းလိၵ်ႈတႅမ်ႈဝႆႉၵႂၢမ်းၽြႃးပဵၼ်ၸဝ်ႈဢၼ်ဝႃႈ၊ ‘ႁိူၼ်းၵဝ်ၼႆႉတၵ်းလႆႈၶၢမ်ႇတၢင်းဢၼ်ႁွင်ႉႁဵၵ်ႈပဵၼ်ႁိူၼ်းတီႈဢၼ်သူးတွင်းဢေႃႈ၊’ ဝႃႈၼင်ႇၼႆၼၼ်ႉသူဢွၼ်ၵၼ်ႁဵတ်းႁႂ်ႈပဵၼ်ထမ်ႈၸူၼ်ယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၵူၼ်းတႃမွတ်ႇလႂ်တင်းၵူၼ်းၶႃၶႄႉတင်းလၢႆမႃးၸူး ၸဝ်ႈယေႇသု၊ ၵႃႈၼႂ်းၵျွင်းပိၵ်ႈမၢၼ်ႇၸဝ်ႈလႄႈမၼ်းၸဝ်ႈႁဵတ်းႁႂ်ႈၶဝ်ၸိုၼ်ႈႁၢႆဢေႃႈ။-
မိူဝ်ႈဢၼ်ယဵၸ်ႈပရေႃးႁဵၵ်ႈလူင်ၶဝ်ဢိၵ်ႇတင်းသြႃႇမေႃၵျၢမ်းထမ်ႇမႃႉတင်းလၢႆ၊ႁၼ်လွင်ႈတၢင်းဢၼ်မၼ်းၸဝ်ႈႁဵတ်းတၢင်းဢၼ်လီဢၢမ်းၸိူဝ်းၼၼ်ႉ၊ဢိၵ်ႇတင်းလွင်ႈဢၼ်လုၵ်ႈဢွၼ်ႇတင်းလၢႆ၊ပၢဝ်ႇသႅၼ်ႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈလႄႈဝႃႈ၊ “ႁႂ်ႈပဵၼ်ႁူဝ်းသၼ်ႇၼႃႉတီႈလုၵ်ႈ တႃႇဝိတ်ႈ၊ သေၵမ်းလူၺ်ႈ၊” ဝႃႈၼင်ႇၼႆၼၼ်ႉၸိုင်၊ၶဝ်ၸႂ်လမ်ၶႂ်ႈၸႃႉၼႃႇလႄႈ၊-
လၢတ်ႈတီႈမၼ်းၸဝ်ႈလႄႈဝႃႈ၊ “ဢၼ်ၶဝ်လၢတ်ႈယူႇၼႆႉၸွင်ႇလႆႈငိၼ်းႁိုဝ်း၊” ဝႃႈၼင်ႇၼႆဢေႃႈ။ မၼ်းၸဝ်ႈၶိုၼ်းလၢတ်ႈလႄႈဝႃႈ၊ “ၸႂ်ႈယဝ်ႉ၊လႆႈငိၼ်းဢေႃႈ။ ဢၼ်ၵျၢမ်းလိၵ်ႈတႅမ်ႈဝႆႉလႄႈဝႃႈ၊ ‘ၸဝ်ႈႁဝ်းႁဵတ်းဝႆႉႁႂ်ႈသူပ်းလုၵ်ႈဢွၼ်ႇဢိၵ်ႇတင်းသူပ်းၸႃႉဢၼ်ဢမ်ႇပႆႇၽၢတ်ႇၼူမ်းတင်းလၢႆ၊လႆႈယွင်ႈယေႃးထေႃးပၼႃႇပျေႉၸုမ်ႇလီငၢမ်းဢေႃႈ၊’ ဢၼ်ဝႃႈၼၼ်ႉ၊သူဢမ်ႇယၢမ်ႈၽတ်းဢၢၼ်ႇမႅၼ်ႈႁိုဝ်း၊” ဝႃႈၼင်ႇၼႆဢေႃႈ။
ဝၢႆးၼၼ်ႉ၊ ၸဝ်ႈယေႇသု၊ ၽၢတ်ႇဢွၵ်ႇသေၵႃႈတီႈၶဝ်ၸိူဝ်းၼၼ်ႉသေလႄႈဢွၵ်ႇဝဵင်းၵႂႃႇၸူးဝၢၼ်ႈ ပေႇထၼိ၊ ပုၼ်ႉလႄႈၵိုတ်းသဝ်းၼွၼ်းတီႈၼၼ်ႈၶိုၼ်းၼိုင်ႈဢေႃႈ။
မိူဝ်ႈဢၼ် ၸဝ်ႈယေႇသု၊ ယင်းတိုၵ်ႉၶိုၼ်းမိူဝ်းၵႂႃႇၵႃႈတီႈဝဵင်းၶိင်ႇၵၢင်ၼႂ်ထႅင်ႈဝၼ်းၼိုင်ႈၼၼ်ႉ၊မၼ်းၸဝ်ႈတွင်ႉမႆႈဢေႃႈ။-
မၼ်းၸဝ်ႈႁၼ်တူၼ်ႈမၢၵ်ႇလိူဝ်ႇႁိမ်းတၢင်းၼၼ်ႉတူၼ်ႈၼိုင်ႈသေယဝ်ႉ၊ၵႂႃႇၸူးလႄႈဢမ်ႇထူပ်းႁၼ်မၢၵ်ႇသေႁူၺ်ႇ၊ပဵၼ်မႂ်မၼ်းၵူၺ်းၵူၺ်းဢေႃႈ။ မၼ်းၸဝ်ႈၸင်ႇလၢတ်ႈတီႈတူၼ်ႈၼၼ်ႉလႄႈဝႃႈ၊ “မႂ်းတၵ်းဢမ်ႇလႆႈမၢၵ်ႇထႅင်ႈသေပွၵ်ႈ၊” ဝႃႈၼင်ႇၼႆလႄႈတူၼ်ႈၼၼ်ႉႁဵဝ်ႇႁႅင်ႈၵႂႃႇၵမ်းလဵဝ်ဢေႃႈ။
တပႄးၸဝ်ႈတင်းလၢႆႁၼ်သေယဝ်ႉ၊ဢွၼ်ၵၼ်ဢၢမ်းၼႃႇလႄႈလဝ်ႈထၢမ်ဝႃႈ၊ “ႁဵတ်းသင်လႄႈတူၼ်မၢၵ်ႇလိူဝ်ႇၼႆႉႁဵဝ်ႇႁႅင်ႈၵႂႃႇၽႂ်းထၼ်ႇၼႆႉၼင်ႇႁိုဝ်ၶႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၶိုၼ်းလၢတ်ႈလႄႈဝႃႈ၊ “ၵဝ်လၢတ်ႈတီႈၸိုဝ်ႈၸႂ်ႈမၼ်းတီႈသူၸမ်ႉ၊ပေႃးသူယုမ်ႇမၢတ်ႈလႄႈၵၢင်းလွတ်ႈတင်းၸႂ်ဢၼ်ယုမ်ႇၶိုင်ႈၼိုင်ႈဢမ်ႇယုမ်ႇၶိုင်ႈၼိုင်ႈၸိုင်၊သူတၵ်းတၢတ်ႈၼိူင်ႇလႆႈၸိူဝ်ႉၼင်ႇဢၼ်ၵဝ်ႁဵတ်းတီႈတူၼ်ႈမၢၵ်ႇလိူဝ်ႇၼႆႉဢမ်ႇၵႃး၊ပေႃးလၢတ်ႈတီႈလွႆၼႆႉလႄႈဝႃႈ၊ ‘ၶၢႆႉတီႈမႂ်းၵႂႃႇတူၵ်းၵႃႈၼႂ်းၼမ်ႉပၢင်ႇလၢႆႇတႃႉ၊’ ဝႃႈၼင်ႇၼႆၵေႃႈတၵ်းပဵၼ်ၸွမ်းဢေႃႈ။-
ပေႃးသူယုမ်ႇမၢတ်ႈၸိုင်၊ၵႃႈဢၼ်သူသူးတွင်းလဝ်ႈယွၼ်းတင်းသဵင်ႈတင်းလူင်ၼၼ်ႉတၵ်းလႆႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ် ၸဝ်ႈယေႇသု ၶိုၼ်းၶဝ်ႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈလႄႈသင်ႇသွၼ်ပၼ်ယူႇၼၼ်ႉၸိုင်၊ယဵၸ်ႈပရေႃးႁဵၵ်ႈ ၶဝ်တင်းၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်း ၵျူး၊ တင်းလၢႆ၊ၶဝ်ႈၸူးတီႈမၼ်းၸဝ်ႈလႄႈတွင်ႈထၢမ်ဝႃႈ၊ “မႂ်းဢဝ်ဢၶႂၢင်ႉဢႃႇၼႃႇတီႈလႂ်မႃးလႄႈႁဵတ်းလွင်ႈတၢင်းၸိူဝ်းၼႆႉ။ ၽူႈလႂ်ပၼ်ဢၶႂၢင်ႉမႂ်း၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ၵဝ်တၵ်းထၢမ်သူၵႂၢမ်းၶေႃႈၼိုင်ႈဢေႃႈ။ ပေႃးသူၶိုၼ်းတွပ်ႇၵႂၢမ်းထၢမ်ၼႆႉၸိုင်၊ၵဝ်တၵ်းမွၵ်ႇလၢတ်ႈသူလွင်ႈဢၼ်ၵဝ်လႆႈဢၶႂၢင်ႉဢႃႇၼႃႇတီႈလႂ်မႃးလႄႈႁဵတ်းလွင်ႈတၢင်းၸိူဝ်းၼႆႉဢေႃႈ။-
တၢင်းဢၼ်သြႃႇ ယူဝ်းႁၢၼ်ႇ၊ ပၼ်မၢင်ႇၵလႃႇပပ်ႉတိၸမ်ႇ ၼၼ်ႉမၼ်းလႆႈဢၶႂၢင်ႉတီႈလႂ်မႃး။ လႆႈဢၶႂၢင်ႉတီႈၽြႃးပဵၼ်ၸဝ်ႈႁိုဝ်း။ လႆႈတီႈၵူၼ်းႁိုဝ်း၊” ဝႃႈၼင်ႇၼႆဢေႃႈ။ မိူဝ်ႈၼၼ်ႉ၊ၶဝ်ၼင်ႇၵၼ်ၵၼ်ဢုပ်ႇၵုမ်ၵၼ်လႄႈဝႃႈ၊ “ပေႃးႁဝ်းဝႃႈ၊ ‘လႆႈဢၶႂၢင်ႉတီႈၽြႃးပဵၼ်ၸဝ်ႈဢေႃႈ၊’ ဝႃႈၼင်ႇၼႆၸိုင်မၼ်းတၵ်းဝႃႈ၊ ‘ႁဵတ်းသင်လႄႈသူဢမ်ႇယုမ်ႇမၢတ်ႈမၼ်း၊’ ဝႃႈၼင်ႇၼႆယဝ်ႉ။-
ပေႃးႁဝ်းဝႃႈ၊ ‘လႆႈဢၶႂၢင်ႉတီႈၵူၼ်းဢေႃႈ၊’ ဝႃႈၼင်ႇၼႆၸိုင်၊ၵွပ်ႈပိူဝ်ႈၵူၼ်းတင်းသဵင်ႈတင်းလူင်ယုမ်ႇမၢတ်ႈဝႃႈ၊ ‘သြႃႇ ယူဝ်းႁၢၼ်ႇ၊ ၼႆႉပဵၼ်ပရေႃးၽႅတ်ႈ၊’ ၼၼ်ႉလႄႈႁဝ်းၵူဝ်ၵူၼ်းၸိူဝ်းၼၼ်ႉဢေႃႈ၊” ဝႃႈၼင်ႇၼႆယဝ်ႉၸင်ႇ၊-
ၶဝ်ၶိုၼ်းလၢတ်ႈတီႈ ၸဝ်ႈယေႇသု၊ လႄႈဝႃႈ၊ “ႁဝ်းဢမ်ႇႁု၊” ဝႃႈၼင်ႇၼႆဢေႃႈ။ မၼ်းၸဝ်ႈၵေႃႈလၢတ်ႈလႄႈဝႃႈ၊ “ပေႃးပဵၼ်ၼႆ၊ၵဝ်လႆႈဢၶႂၢင်ႉတီႈလႂ်လႄႈႁဵတ်းလွင်ႈတၢင်းၸိူဝ်းၼႆႉၼၼ်ႉ၊ၵဝ်ဢမ်ႇလၢတ်ႈသူၵူၺ်း။
“သူထၢင်ႇၸိူဝ်ႉၼင်ႇႁိုဝ်။ မိူဝ်ႈၼၼ်ႉတီႈၵူၼ်းၵေႃႉၼိုင်ႈမီးလုၵ်ႈၸၢႆးသွင်ၵေႃႉဢေႃႈ။ မၼ်းၵႂႃႇၵႃႈတီႈလုၵ်ႈတူၼ်ႈမၼ်းသေလႄႈလၢတ်ႈဝႃႈ၊ ‘လုၵ်ႈၸၢႆးၵဝ်႟။ မိူဝ်ႈၼႆႉမႂ်းၵႂႃႇႁဵတ်းၵၢၼ်တီႈၼႂ်းသူၼ်မၢၵ်ႇၸပိတ်ႉပုၼ်ႉတႃႉ၊’ ဝႃႈၼင်ႇၼႆၼၼ်ႉဢေႃႈ။-
လုၵ်ႈတူၼ်ႈၼၼ်ႉၶိုၼ်းလၢတ်ႈလႄႈဝႃႈ၊ ‘ၵဝ်ၶႃႈဢမ်ႇၵႂႃႇၶႃႈ၊’ ဝႃႈၼင်ႇၼႆသေၵေႃႈလိုၼ်းၼၼ်ႉမၼ်းပိၼ်ႇၸႂ်မႃးလႄႈၵႂႃႇဢေႃႈ။-
ပေႃႈၼၼ်ႉသမ်ႉၵႂႃႇတီႈလုၵ်ႈၸၢႆးဢွၼ်ႇမၼ်းလႄႈလၢတ်ႈၸိူဝ်ႉၼင်ႇၵမ်းဢွၼ်တၢင်းၼၼ်ႉဢေႃႈ။ လုၵ်ႈၸၢႆးဢွၼ်ႇၼၼ်ႉၶိုၼ်းလၢတ်ႈလႄႈဝႃႈ၊ ‘ၶႃႈတေၵႂႃႇၶႃႈဢေႃႈ၊’ ဝႃႈၼင်ႇၼႆသေၵေႃႈ၊ယင်းဢမ်ႇၵႂႃႇလႄႈယူႇဢေႃႈ။-
ၼႂ်းလုၵ်ႈၸၢႆးသွင်ၵေႃႉၼႆႉ၊ၵေႃႉလႂ်ႁဵတ်းၸွမ်းဢလူဝ်ႇပေႃႈၶဝ်၊” ဝႃႈၼင်ႇၼႆဢေႃႈ။ ၶဝ်ၸိူဝ်းၼၼ်ႉၶိုၼ်းလၢတ်ႈလႄႈဝႃႈ၊ “လုၵ်ႈတူၼ်ႈႁဵတ်းၸွမ်းၶႃႈဢေႃႈ၊” ဝႃႈၼင်ႇၼႆဢေႃႈ။ ၸဝ်ႈယေႇသု၊ ၸင်ႇလၢတ်ႈတီႈၶဝ်ၸိူဝ်းၼၼ်ႉလႄႈဝႃႈ၊ “ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ၵူၼ်းၵဵပ်းၶွၼ်ႇလႂ်၊ဢိၵ်ႇတင်းမႄႈမွၵ်ႇယႃႈလႂ်၊ၸၢင်ႈလႆႈၶဝ်ႈၵႃႈၼႂ်းမိူင်းၽြႃးပဵၼ်ၸဝ်ႈဢွၼ်တၢင်းသူဢေႃႈ။-
ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈဝႃႈၸမ်ႉ၊သြႃႇ ယူဝ်းႁၢၼ်ႇ၊ မႃးလႄႈၼႄတၢင်းသိုဝ်ႈတေႃႇတီႈသူသေၵေႃႈသူဢမ်ႇယုမ်ႇမၢတ်ႈမၼ်း။ ၵူၺ်းၵႃႈ၊ၵူၼ်းၵဵပ်းၶွၼ်ႇလႂ်၊ဢိၵ်ႇတင်းမႄႈမွၵ်ႇယႃႈလႂ်ယုမ်ႇမၢတ်ႈဢေႃႈ။ သူလႆႈႁၼ်ၸိူဝ်ႉၼင်ႇၼႆသေယဝ်ႉ၊သူယင်းဢမ်ႇၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်မႃးႁႂ်ႈလႆႈယုမ်ႇမၢတ်ႈမၼ်းဢေႃႈ။
“ထွမ်ႇၵႂၢမ်းဢုပမႃႇတၢင်ႇဢၼ်တႃႉ။ မီးၸဝ်ႈသူၼ်ၵေႃႉၼိုင်ႈ၊ သူၼ်မၼ်းၽုၵ်ႇမၢၵ်ႇၸပိတ်ႉလႄႈလွမ်ႉႁူဝ်ႉဝႆႉ၊ၶုတ်းလုၵ်းဢၼ်တၵ်းယဵပ်ႇမၢၵ်ႇၸပိတ်ႉလႄႈပူၵ်းထဵင်လၢင်းဝႆႉယဝ်ႉၸင်ႇ၊ ၶၢတ်ႈပၼ်တီႈၵူၼ်းႁဵတ်းသူၼ်ၶဝ်သေယဝ်ႉ၊ဢွၵ်ႇတၢင်းၵႂႃႇဢေႃႈ။
မိူဝ်ႈၸမ်ၶိင်ႇဢၼ်တၵ်းဝိတ်းဢဝ်မၢၵ်ႇၸပိတ်ႉထိုင်မႃးၼၼ်ႉ၊ မၼ်းပွႆႇၸႂ်ႉလုၵ်ႈၸၢင်ႈမၼ်းတင်းလၢႆၵႂႃႇယွၼ်းဢဝ်ၵႃႈၶၢတ်ႈသူၼ်ၵႃႈတီႈၵူၼ်းၶၢတ်ႈႁဵတ်းသူၼ်ၸိူဝ်းၼၼ်ႉဢေႃႈ။-
ၵူၼ်းၶၢတ်ႈႁဵတ်းသူၼ်ၸိူဝ်းၼၼ်ႉ၊တိဢဝ်လုၵ်ႈၸၢင်ႈၸိူဝ်းၼၼ်ႉလႄႈပေႃႉယႅၼ်ႉတီႈၵေႃႉၼိုင်ႈ၊သမ်ႉဢဝ်တၢႆပႅတ်ႈၵေႃႉၼိုင်ႈ၊ဢဝ်မၢၵ်ႇႁိၼ်ပိုဝ်ႈသႂ်ႇၵေႃႉၼိုင်ႈဢေႃႈ။-
ၸဝ်ႈသူၼ်ၼၼ်ႉ၊သမ်ႉပွႆႇၸႂ်ႉလုၵ်ႈၸၢင်ႈတၢင်ႇၵေႃႉၼမ်သေဢွၼ်တၢင်းၵႂႃႇသေၵေႃႈ၊ၵူၼ်းၶၢတ်ႈႁဵတ်းသူၼ်ၸိူဝ်းၼၼ်ႉ၊ ႁဵတ်းၸိူဝ်ႉၼင်ႇၵမ်းဢွၼ်တၢင်းၼၼ်ႉဢေႃႈ။-
ပွၵ်ႈလိုၼ်းလင်သုတ်းၼၼ်ႉမၼ်းဝႃႈ၊ ‘ၸၢင်ႈၶႄးၶဝ်တၵ်းဢႃးၼႃႇလုၵ်ႈၸၢႆးၵဝ်ဢေႃႈ၊’ ဝႃႈၼင်ႇၼႆလႄႈၸင်ႇပွႆႇၸႂ်ႉလုၵ်ႈၸၢႆးတူဝ်ၸဝ်ႈၵဝ်ႇၵႂႃႇဢေႃႈ။-
ၵူၺ်းၵႃႈ၊မိူဝ်းဢၼ်ၵူၼ်းၶၢတ်ႈႁဵတ်းသူၼ်ၸိူဝ်းၼၼ်ႉ၊ႁၼ်လုၵ်ႈၸၢႆးၸဝ်ႈသူၼ်မႃးၸိုင်၊ၶဝ်ၼင်ႇၵၼ်လၢတ်ႈၸႃၵၼ်လႄႈဝႃႈ၊ ‘ၵေႃႉၼႆႉပဵၼ်လုၵ်ႈၸၢႆးဢၼ်ၶၢမ်ႇဢမူၺ်ႇဢေႃႈ။ မႃးတႃႉ။ ႁဝ်းဢွၼ်ၵၼ်ဢဝ်မၼ်းတၢႆလႄႈဢဝ်ဢမူၺ်ႇမၼ်းတႃႉႁဝ်း၊’ ဝႃႈၼင်ႇၼႆလႄႈ၊-
တိဢဝ်မၼ်းယဝ်ႉၸင်ႇ၊တိုတ်ႉလၢၵ်ႈဢွၵ်ႇသူၼ်လႄႈဢဝ်တၢႆပႅတ်ႈသေဢေႃႈ။
“ၵမ်းၼႆႉ၊ပေႃးၸဝ်ႈသူၼ်မႃးၸိုင်၊သူထၢင်ႇမၼ်းတၵ်းႁဵတ်းၸိူဝ်ႉၼင်ႇႁိုဝ်တီႈၵူၼ်းၶၢတ်ႈႁဵတ်းသူၼ်ၸိူဝ်းၼၼ်ႉ၊” ဝႃႈၼင်ႇၼႆ ၸဝ်ႈယေႇသု၊ ထၢမ်ဢေႃႈ။
ၶဝ်တင်းလၢႆၶိုၼ်းလၢတ်ႈလႄႈဝႃႈ၊ “မၼ်းတၵ်းဢဝ်တၢႆၵူၼ်းၶၢတ်ႈႁဵတ်းသူၼ်ဢၼ်ဢမ်ႇလီၸိူဝ်းၼၼ်ႉပႅတ်ႈလႄႈသမ်ႉဢဝ်သူၼ်ၼၼ်ႉၶၢတ်ႈပၼ်တီႈၵူၼ်းႁဵတ်းသူၼ်တၢင်ႇၸုမ်းဢၼ်ၸၢင်ႈပၼ်ၵႃႈၶၢတ်ႈသူၼ်မၢၼ်ႇမၢၼ်ႇၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “သူဢမ်ႇတွၼ်ႉၽတ်းဢၢၼ်ႇမႅၼ်ႈၼႂ်းၵျၢမ်းလိၵ်ႈဢၼ်ဝႃႈ၊ “‘မၢၵ်ႇႁိၼ်ဢၼ်ၵူၼ်းႁဵတ်းႁိူၼ်းတိူၵ်ႈပႄႇပႅတ်ႈဝႆႉၼၼ်ႉ၊ ၵမ်းလိုၼ်လႆႈပဵၼ်ႁိၼ်ႁူဝ်ၸဵင်ႇတိူၵ်ႈဢၼ်ဢယေးယႂ်ႇၼႃႇဢေႃႈ။ လွင်ႈတၢင်းၼႆႉပဵၼ်ဢၼ်ၸဝ်ႈၽြႃးႁဵတ်းဝႆႉလႄႈ ပဵၼ်ဢၼ်လီဢၢမ်းသိုဝ်ႈၼႃႈ တႂ်ႈတႃႁဝ်းဢေႃႈ၊’ ဝႃႈၼင်ႇၼႆၼၼ်ႉႁိုဝ်း။
“ပိူဝ်ႈၼႆလႄႈၵဝ်ဝႃႈတီႈသူၸမ်ႉ၊မိူင်းၽြႃးပဵၼ်ၸဝ်ႈတၵ်းလႆႈၼုၵ်ႈဢဝ်သေၵႃႈတီႈသူလႄႈဢၢပ်ႈပၼ်တီႈမဵဝ်းၵူၼ်းဢၼ်တၵ်းမၢၵ်ႇမၢၵ်ႇမိူင်းၸဝ်ႈၼၼ်ႉဢေႃႈ။-
[ၽူႈလႂ်သေဢမ်ႇဝႃႈ၊ၵေႃႉဢၼ်တူၵ်းသႂ်ႇမၢၵ်ႇႁိၼ်ႁူၺ်ႇၼႆႉၼၼ်ႉၵေႃႉၼၼ်ႉတၵ်းႁၵ်းဢေႃႈ။ ပေႃးမၢၵ်ႇႁိၼ်ႁူၺ်ႇၼႆႉတူၵ်းသႂ်ႇၼိူဝ်ၽူႈလႂ်သေဢမ်ႇဝႃႈ၊ၵေႃႉၼၼ်ႉတၵ်းတႅၵ်ႇပဵၼ်ၽွင်ၵႂႃႇဢေႃႈ၊”] ဝႃႈၼင်ႇၼႆဢေႃႈ။
မိူဝ်ႈဢၼ်ယဵၸ်ႈပရေႃးႁဵၵ်ႈ လူင်ၶဝ်ဢိၵ်ႇတင်းၵူၼ်းၵိူင်း ၽႃႇရိသႄး၊ တင်းလၢႆလႆႈငိၼ်းၵႂၢမ်းဢုပမႃႇ ၸဝ်ႈယေႇသု၊ ႁေႃးလၢတ်ႈၼၼ်ႉၸိုင်၊ၶဝ်ႁုႁၼ်လွင်ႈဢၼ်မၼ်းၸဝ်ႈၶႂ်ႈလၢတ်ႈဝႃႈတီႈၶဝ်သေလႄႈ၊-
ၵျၢမ်ႇဢၢင်ႈၶႂ်ႈတိဢဝ်မၼ်းၸဝ်ႈဢေႃႈ။ ၵူၺ်းၵႃႈ၊ၶဝ်ၵူဝ်ၵွပ်ႈပိူဝ်ႈၵူၼ်းတင်းလၢႆ၊မၢတ်ႈမၼ်းၸဝ်ႈပဵၼ်ပရေႃးၽႅတ်ႈ ၼၼ်ႉဢေႃႈ။
ၵမ်းၼၼ်ႉ၊ ၸဝ်ႈယေႇသု၊ သမ်ႉဢဝ်တင်းၵႂၢမ်းဢုပမႃႇသေလႄႈႁေႃးလၢတ်ႈတီႈမူႇၵူၼ်းတင်းလၢႆထႅင်ႈလႄႈဝႃႈ၊-
“မိူင်းၵၢင်ႁၢဝ်ၸဝ်ႈပဵၼ်မိူၼ်ၸိူဝ်ႉၼင်ႇၶုၼ်လူင်ပႃးၼိုင်ႈ၊ ႁဵတ်းပွႆးသွင်ႇမၢင်ႇၵလႃႇပၼ်လုၵ်ႈၸၢႆးမၼ်းၼၼ်ႉဢေႃႈ။-
ၶုၼ်လူင်ၼၼ်ႉ၊ပွႆႇၸႂ်ႉၵူၼ်းၸႂ်ႉၵူၼ်းသွႆမၼ်းတင်းလၢႆၵႂႃႇႁႂ်ႈလႆႈႁွင်ႉပၢင်းပီႈၼွင်ႉၶႅၵ်ႇဢၼ်လႆႈၽိတ်ႈပၢင်းဝႆႉယဝ်ႉၸိူဝ်းၼၼ်ႉဢေႃႈ။ ၵူၺ်းၵႃႈ၊ၶဝ်ဢမ်ႇၶႂ်ႈမႃးသေၵေႃႉသေၵူၼ်း။-
ၶုၼ်လူင်ၼၼ်ႉ၊သမ်ႉပွႆႇၸႂ်ႉၵူၼ်းၸႂ်ႉၵူၼ်းသွႆမၼ်းတၢင်ႇၵေႃႉတင်းလၢႆ ထႅင်ႈလႄႈသင်ႇလၢတ်ႈဝႃႈ၊ ‘ပွႆးသွင်ႇမၢင်ႇၵလႃႇၵဝ်ၼႆႉမႄးႁႅၼ်းဝႆႉယဝ်ႉ။ ၸႃႉၸဵမ်ဝူဝ်းလႂ်၊တူဝ်ဢၼ်လဵင်ႉဝႆႉပီးလီမၼ်လီလႂ်ၵေႃႈႁႅမ်ဝႆႉယဝ်ႉ။ ၵူႈၸိူဝ်ႉၵူႈပိူင်တၼ်းယဝ်ႉ။ ဢွၼ်ၵၼ်မႃးၶဝ်ႈပွႆး သွင်ႇမၢင်ႇၵလႃႇသေၵမ်း၊ဝႃႈၼင်ႇၼႆတႃႉ၊’ ဝႃႈၼင်ႇၼႆသင်ႇလၢတ်ႈၵႂႃႇဢေႃႈ။-
ၵူၺ်းၵႃႈ၊ပီႈၼွင်ႉၶႅၵ်ႇဢၼ်လႆႈၵႂႃႇၽိတ်ႈပၢင်းဝႆႉၸိူဝ်းၼၼ်ႉယင်းဢမ်ႇပႃးၸႂ်လႄႈယူႇဢေႃႈ။ ၵေႃႉၼိုင်ႈဢွၵ်ႇၵႂႃႇတီႈတူင်ႈၼႃးပႅတ်ႈ၊ၵေႃႉၼိုင်ႈဢွၵ်ႇၵႂႃႇႁဵတ်းတၢင်းၵႃႉတၢင်းၶၢႆပႅတ်ႈလႄႈ၊-
ၵမ်ႈၽွင်ႈတိဢဝ်ၵူၼ်းၸႂ်ႉၵူၼ်းသွႆၸိူဝ်းၼၼ်ႉသေယဝ်ႉ၊ ပေႃႉထုပ်ႉလႄႈဢဝ်တၢႆပႅတ်ႈဢေႃႈ။-
ၶုၼ်လူင်ၼၼ်ႉ၊ၸႂ်မႆႈၶႂ်ႈၸႃႉၼႃႇလႄႈၶီႇသိုၵ်းၵႂႃႇယႃႉၽဵဝ်ႈပႅတ်ႈၶဝ်ၸိူဝ်းဢၼ်ဢဝ်ဢသၢၵ်ႈၵူၼ်းတၢႆၸိူဝ်းၼၼ်ႉသေလႄႈဢဝ်ၽႆးတုတ်ႇဝဵင်းၶဝ်ပႅတ်ႈဢေႃႈ။-
ဝၢႆးၼၼ်ႉ၊ၶုၼ်လူင်ၸင်ႇႁွင်ႉဢဝ်ၵူၼ်းၸႂ်ႉၵူၼ်းသွႆမၼ်းတင်းလၢႆမႃးလႄႈလၢတ်ႈဝႃႈ၊ ‘ပွႆးသွင်ႇမၢင်ႇၵလႃႇတၼ်းဝႆႉယဝ်ႉ။ ပိူဝ်ႈဢၼ်ပီႈၼွင်ႉၶႅၵ်ႇဢၼ်ၵဝ်ၽိတ်ႈပၢင်းဝႆႉၸိူဝ်းၼၼ်ႉဢမ်ႇထိူၵ်ႈတၢၼ်ႇလႄႈ၊-
မိူဝ်ႈလဵဝ်ၵႂႃႇၵႃႈတီႈၵူႈၵိဝ်ႇတၢင်းသေယဝ်ႉ၊ႁွင်ႉပႃးၵူၼ်းၵႃႈဢၼ်သူထူပ်းႁၼ်ၼၼ်ႉမႃးၶဝ်ႈပွႆးၼႆႉၼမ်ၼမ်တႃႉ၊’ ဝႃႈၼႆ၊-
ၵႃႈၼင်ႇဢၼ်သင်ႇလၢတ်ႈၼၼ်ႉၵူၼ်းၸႂ်ႉၵူၼ်းသွႆၶဝ်ၵႂႃႇၵႃႈတီႈၵူႈၵိဝ်ႇတၢင်းသေယဝ်ႉ၊ႁွင်ႉပႃးဢဝ်ၵူၼ်းလီၵူၼ်းၸႃႉၵႃႈဢၼ်ၶဝ်ထူပ်းႁၼ်ၼၼ်ႉလႄႈပွႆးၼၼ်ႉတဵမ်ဝႆႉတင်းပီႈၼွင်ႉၶႅၵ်ႇဢေႃႈ။
“ၵမ်းၼၼ်ႉ၊မိူဝ်ႈဢၼ်ၶုၼ်လူင်မႃးတၵ်ႉလၢတ်ႈၶႅၵ်ႇၸိူဝ်းဢၼ်ၼင်ႈယူႇၵႃႈၼႂ်းပွႆးၼၼ်ႉၸိုင်၊မၼ်းထူပ်းႁၼ်ၵူၼ်းၵေႃႉၼိုင်ႈယင်းဢမ်ႇၼုင်ႈၶူဝ်းပုၼ်ႈပွႆးသွင်ႇမၢင်ႇၵလႃႇလႄႈ၊-
ထၢမ်တီႈမၼ်းလႄႈဝႃႈ၊ ‘ၵေႃႉ႟။ ယင်းဢမ်ႇၼုင်ႈၶူဝ်းပုၼ်ႈပွႆးသွင်ႇမၢင်ႇၵလႃႇလႄႈၶဝ်ႈၼင်ႈၵႃႈၼႂ်းပွႆးၼႆႉႁဵတ်းသင်၊’ မိူဝ်ႈဢၼ်ဝႃႈၼင်ႇၼႆၸိုင်၊ၵေႃႉၼၼ်ႉဢမ်ႇၸၢင်ႈတွပ်ႇသေၶေႃႈသေၵမ်းလႄႈယူႇဢေႃႈ။-
မိူဝ်ႈၼၼ်ႉ၊ၶုၼ်လူင်မီးဢမိင်ႉတီႈၵူၼ်းဢွၼ်ႇတင်းလၢႆလႄႈဝႃႈ၊ ‘မတ်ႉတိၼ်မတ်ႉမိုဝ်းမၼ်းသေယဝ်ႉ၊ဢဝ်ပႅတ်ႈၼႂ်းလပ်းသိင်ႇလႄႈႁႂ်ႈလႆႈႁွင်ႉႁႆႈၵတ်းၶဵဝ်ႈၵတ်းၽၼ်းပုၼ်ႉတႃႉ၊’ ဝႃႈၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ သိုပ်ႇလၢတ်ႈလႄႈဝႃႈ၊ “ပိၵ်ႉသမ်ႉၶဝ် ၸိူဝ်းဢၼ်လႆႈၶၢမ်ႇတၢင်းဢၼ်ႁွင်ႉပၢင်းၼၼ်ႉၼမ်ၼႃႇသေၵေႃႈ၊ ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်လိူၵ်ႈၵဵပ်းဢဝ်ၼၼ်ႉၵေႇၼႃႇဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၵူၼ်းၵိူင်း ၽႃႇရိသႄး၊ ၶဝ်ဢွၵ်ႇၵႂႃႇတိူင်ႇပၢင်ႇၵၼ်၊ၼင်ႇႁိုဝ်တၵ်းလႆႈဢဝ်တင်းၵႂၢမ်းထၢမ်သေၸိူဝ်ႉသေပိူင်လႄႈၵၢင်ဢဝ်ၵႂၢမ်း ၸဝ်ႈယေႇသု၊ ၼၼ်ႉ၊-
ပွႆႇၸႂ်ႉတပႄးၶဝ်ဢိၵ်ႇတင်းတပႄးၸဝ်ႈၽႃႉ ႁေႇရူတ်ႈ၊ ၵမ်ႈၽွင်ႈၵႂႃႇၸူးမၼ်းၸဝ်ႈလႄႈလဝ်ႈထၢမ်ဝႃႈ၊ “သြႃႇၸဝ်ႈ။ ႁဝ်းၶႃႈႁုလွင်ႈဢၼ်ၸဝ်ႈႁဝ်းသိုဝ်ႈတေႃႇလႄႈသင်ႇသွၼ်ပၼ်သဵၼ်ႈတၢင်တြႃးၽြႃးပဵၼ်ၸဝ်ႈၸိုဝ်ႈၸိုဝ်ႈၸႂ်ႈၸႂ်ႈဢမ်ႇၵႃး၊ ၸဝ်ႈႁဝ်းမီးသဵတ်ႈၸႃႇလႄႈဢမ်ႇထွၵ်ႈလူၺ်ႈၼႃႈၵူၼ်းၵူၺ်းဢမ်ႇၵႃး၊ယင်းဢမ်ႇၵူဝ်ၽူႈလႂ်သေၵေႃႉသေၵူၼ်းၼၼ်ႉၶႃႈဢေႃႈ။-
ပိူဝ်ႈၼႆလႄႈၸဝ်ႈႁဝ်းထၢင်ႇၸိူဝ်ႉႁိုဝ်ၶႃႈ။ လွင်ႈဢၼ်ထၢမ်းၶွၼ်ႇတီႈၶုၼ်ႁေႃၶမ်း ၵေႇသႃႇ၊ ၼႆႉ၊ထုၵ်ႇမႅၼ်ႈတြႃးဢုပတေႇႁဝ်းၶႃႈယူႇႁိုဝ်း၊ဢမ်ႇထုၵ်ႇမႅၼ်ႈၶႃႈႁိုဝ်းဝႃႈၼႆလၢတ်ႈပၼ်ႁဝ်းၶႃႈသေၵမ်းၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ႁၼ်လွင်ႈဢၼ်ၶဝ်ၵျၢမ်ႇဢၢင်ႈဢၼ်ႁၢႆႉဢၼ်မိူၵ်ႈၼၼ်ႉလႄႈၶိုၼ်းလၢတ်ႈလႄႈဝႃႈ၊ “သူဢၼ်ပဵၼ်ၵူၼ်းၼႃႈသိုဝ်ႈၸႂ်ၵူတ်ႉၼႆႉ႟။ ႁဵတ်းသင်လႄႈသူၵျၢမ်ႇဢၢင်ႈၵၢင်ဢဝ်ၵႂၢမ်းၵဝ်ၼင်ႇႁိုဝ်။-
ဢဝ်ၶႅပ်းငိုၼ်းဢၼ်ထၢမ်းၶွၼ်ႇၼၼ်ႉၼႄၵဝ်လူး၊” ဝႃႈၼင်ႇၼႆလႄႈ။ ၶဝ်ၵေႃႈဢဝ်ငိုၼ်းၶႅပ်းၼိုင်ႈပၼ်တီႈမၼ်းၸဝ်ႈဢေႃႈ။-
ၸဝ်ႈယေႇသု၊ ၵေႃႈထၢမ်ၶဝ်လႄႈဝႃႈ၊ “ဢၼ်ၼႆႉပဵၼ်ပုင်ႇႁၢင်ႈၽူႈလႂ်။ တႅမ်ႈၸိုဝ်ႈၽူႈလႂ်ဝႆႉ၊” ဝႃႈၼင်ႇၼႆလႄႈ၊ ၶဝ်ၵေႃႈၶိုၼ်းလဝ်ႈလၢတ်ႈလႄႈဝႃႈ၊ “ပဵၼ်ပုင်ႇႁၢင်ႈဢိၵ်ႇတင်းပဵၼ်ၸိုဝ်ႈၶုၼ်ႁေႃၶမ်း ၵေႇသႃႇ၊ ဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “လီယဝ်ႉ။ ပေႃးပဵၼ်ၼႆၸိုင်၊ဢဝ်ၶွင်ၶုၼ်ႁေႃၶမ်း ၵေႇသႃႇ၊ ပၼ်ၶိုၼ်းတီႈၶုၼ်ႁေႃၶမ်း ၵေႇသႃႇ၊ တႃႉ။ ဢဝ်ၶွင်ၽြႃးပဵၼ်ၸဝ်ႈပၼ်ၶိုၼ်းတီႈၽြႃးပဵၼ်ၸဝ်ႈတႃႉ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၶဝ်လႆႈငိၼ်းၵႂၢမ်း ၸဝ်ႈယေႇသု၊ လၢတ်ႈၸိူဝ်ႉၼင်ႇၼၼ်ၸိုင်၊ၶဝ်ဢၢမ်းၼႃႇလူင်လၢင်ယဝ်ႉၸင်ႇ၊ၽၢတ်ႇဢွၵ်ႇသေမၼ်းၸဝ်ႈၵႂႃႇဢေႃႈ။
ၼႂ်းဝၼ်းၼၼ်ႉ၊ ၸတ်ႉတုၵႄး၊ ၵိူင်းဢၼ်ဢမ်ႇယုမ်ႇလွင်ႈတၢင်းဢၼ်ၵူၼ်းတၢႆလုၵ်ႉၶိုၼ်းလိပ်းၸိူဝ်းၼၼ်ႉမႃးၸူးတီႈ ၸဝ်ႈယေႇသု၊ လႄႈလဝ်ႈထၢမ်ဝႃႈ၊-
“သြႃႇၸဝ်ႈ၊တြႃး မူဝ်းသေႇ၊ သွၼ်ဝႆႉလႄႈဝႃႈ၊ ‘ပေႃးသေၵေႃႉသေၵူၼ်းယင်းဢမ်ႇမီးလုၵ်ႈမီးလၢင်းလႄႈတၢႆၵႂႃႇၸိုင်၊ၼွင်ႉၸၢႆးမၼ်းတၵ်းလႆႈသိုပ်ႇဢဝ်မႄႈမၢႆႈၼၼ်ႉ၊ ႁႂ်ႈၸိူဝ်ႉၶိူဝ်းပီႈဢၢႆႈမၼ်းသိုပ်ႇၵႂႃႇဢမ်ႇၶၢတ်ႇ၊’ ဝႃႈၼႆမီးဝႆႉဢေႃႈ။-
မိူဝ်ႈလဵဝ်ၵႃႈတီႈႁဝ်းၶႃႈၼႆႉမီးၶဝ်ပီႈၼွင်ႉၸဵတ်းၵေႃႉၶႃႈဢေႃႈ။ ပီႈဢၢႆႈလူင်ၶဝ်ဢဝ်မေးသေယဝ်ႉ၊သမ်ႉတၢႆၵႂႃႇၶႃႈဢေႃႈ။ ယင်းဢမ်ႇမီးလုၵ်ႈမီးလၢင်းလႄႈမေးမၼ်းၵိုတ်းဝႆႉပုၼ်ႈၼွင်ႉၸၢႆးမၼ်းယဝ်ႉဢေႃႈ။-
မိူၼ်ၼင်ႇၼၼ်ၸႃႉၸဵမ်ၼွင်ႉၸၢႆးၵေႃႉတၢမ်းသွင်ၵေႃႉတၢမ်းသၢမ်၊ၵေႃႉၼိုင်ႈယဝ်ႉၵေႃႉၼိုင်ႈသိုပ်ႇဢဝ်မႄႈယိင်းၼၼ်ႉသေၵေႃႈ၊ယင်းဢမ်ႇမီးလုၵ်ႈမီးလၢင်းလႄႈတၢႆၵႂႃႇတင်းၸဵတ်းၵေႃႉပီႈၼွင်ႉဢေႃႈ။-
တီႈသုတ်းတီႈၵွႆမႄႈယိင်းၼၼ်ႉၵေႃႈတၢႆၵႂႃႇဢေႃႈ။-
ပိူဝ်ႈၼႆလႄႈၼႂ်းဝၼ်းဢၼ်ၵူၼ်းတၢႆလုၵ်ႉၶိုၼ်းလိပ်းၼၼ်ႉ၊မႄႈယိင်းၵေႃႉၼၼ်ႉတၵ်းလႆႈပဵၼ်မေးၵေႃႉလႂ်။ ၶဝ်ပီႈၼွင်ႉတင်းၸဵတ်းၵေႃႉလႆႈဢဝ်မႄႈယိင်းၼၼ်ႉယဝ်ႉၶႃႈဢေႃႈ။” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ပိူဝ်ႈဢၼ်သူဢမ်ႇႁုၵျၢမ်းလိၵ်ႈဢိၵ်ႇတင်းတၼ်းၶူဝ်းၽြႃးပဵၼ်ၸဝ်ႈလႄႈသူၽိတ်းပိူင်ႈတႄႉတႄႉဢေႃႈ။-
ၵွပ်ႈၸိူဝ်ႉၼင်ႇႁိုဝ်လႄႈဝႃႈၸမ်ႉ၊မိူဝ်ႈဢၼ်ၵူၼ်းတၢႆလုၵ်ႉၶိုၼ်းလိပ်းၼၼ်ႉ၊ဢမ်ႇမီးတၢင်းဢၼ်ဢဝ်ၽူဝ်ဢဝ်မေး။ ၶဝ်ၼၼ်ႉပဵၼ်မိူၼ်ၸိူဝ်ႉၼင်ႇတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈဢေႃႈ။-
ပိူဝ်ႈၼႆလႄႈလွင်ႈတၢင်းဢၼ်ၵူၼ်းတၢႆလုၵ်ႉၶိုၼ်းလိပ်းၼၼ်ႉ၊ သူဢမ်ႇယၢမ်ႈၽတ်းဢၢၼ်ႇမႅၼ်ႈၵႂၢမ်းဢၼ်ၽြႃးပဵၼ်ၸဝ်ႈပူင်ဢမိင်ႉဝႆႉပၼ်သူၼၼ်ႉႁိုဝ်း။-
မၼ်းၸဝ်ႈႁေႃးဝႆႉၸမ်ႉ၊ ‘ၵဝ်ပဵၼ်ၽြႃး ဢႃႇပြႃႇႁၢမ်ႇ၊ ၽြႃး ဢိၸၢၵ်ႈ၊ ၽြႃး ယႃႇၵုပ်ႈ၊ ဢေႃႈ၊’ ဢၼ်ဝႃႈၼၼ်ႉ၊ၶႂ်ႈဝႃႈၽြႃးပဵၼ်ၸဝ်ႈပဵၼ်ၽြႃးၶဝ်ၸိူဝ်းဢၼ်တၢႆယဝ်ႉၼၼ်ႉဢမ်ႇၸႂ်ႈ။ ပဵၼ်ၽြႃးၶဝ်ၸိူဝ်းဢၼ်ဢသၢၵ်ႈလိပ်းယူႇဢေႃႈ၊” မၼ်းၸဝ်ႈဝႃႈၼင်ႇၼႆဢေႃႈ။
မိူဝ်ႈဢၼ်မူႇၵူၼ်းတင်းလၢႆလႆႈငိၼ်းတြႃးၸဝ်ႈၼၼ်ႉၸိုင်၊ၶဝ်ဢွၼ်ၵၼ်ဢၢမ်းၼႃႇလူင်လၢင်ဢေႃႈ။
မိူဝ်ႈဢၼ်ၵူၼ်းၵိူင်း ၽႃႇရိသႄး၊ ၶဝ်လႆႈငိၼ်းဝႃႈ၊ ၸဝ်ႈယေႇသု၊ တွပ်ႇၵူၼ်းၵိူင်း ၸတ်ႉတုၵႄး၊ ၶဝ်သမ်ႉပေႃးႁႂ်ႈၵႂၢမ်းၶဝ်ထၢတ်ႇယဵၼ်ၵႂႃႇၼၼ်ႉၶဝ်ၸုတုမ်ၵၼ်မႃးၸူးတီႈမၼ်းၸဝ်ႈႁႂ်ႈလႆႈဢဝ်တင်းၵႂၢမ်းထၢမ်သေလႄႈ၊ ၵၢင်ဢဝ်ၵႂၢမ်းမၼ်းၸဝ်ႈဢေႃႈ။-
ၼႂ်းၶဝ်ၼၼ်ႉ၊သြႃႇမေႃၵျၢမ်းထမ်ႇမႃႉၵေႃႉၼိုင်ႈလဝ်ႈထၢမ်လႄႈဝႃႈ၊-
“သြႃႇၸဝ်ႈ။ ၼႂ်းတြႃးတင်းလူင်ၼႆႉ၊ပိင်းၺၢပ်ႈတြႃးဢၼ်လႂ်ယႂ်ႇမျၢတ်ႈသေပိူၼ်ႈၶႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၶိုၼ်းလၢတ်ႈလႄႈဝႃႈ၊ “ၽြႃးပဵၼ်ၸဝ်ႈမႂ်းထႃႇဝရႃႉၽြႃးၸိုင်၊မႂ်းတၵ်းလႆႈပႃးတင်းႁူဝ်ၸႂ်မႂ်းသဵင်ႈသဵင်ႈ၊ တင်းၸႂ်ဝိၺိၺ်ႇမႂ်းသဵင်ႈသဵင်ႈ၊တင်းၵတ်ႉၶၼ်မႂ်းလႄႈၺၢၼ်ႇမႂ်းတင်းသဵင်ႈတင်းလူင်သေလႄႈႁၵ်ႉဢေႃႈ။-
ပိင်းၺၢပ်ႈၶေႃႈၼႆႉ၊ပဵၼ်ဢၼ်ယႂ်ႇမျၢတ်ႈသေပိူၼ်ႈလႄႈပဵၼ်ပိင်းၺၢပ်ႈဢၼ်တီႈၼိုင်ႈဢေႃႈ။-
ပိူင်လဵဝ်ၵၼ်ပိင်းၺၢပ်ႈဢၼ်တီႈသွင်ၸမ်ႉ၊ ‘ၵူၼ်းဢၼ်ၸၢပ်ႈသႅင်ႇၵၼ်တင်းမႂ်းၼၼ်ႉၸိုင်၊မႂ်းတၵ်းလႆႈႁၵ်ႉမိူၼ်ၸိူဝ်ႉၼင်ႇတူဝ်ၸဝ်ႈၵဝ်ႇဢေႃႈ။-’
ၵျၢမ်းပိင်းၺၢပ်ႈတြႃး မူဝ်းသေႇ၊ ဢိၵ်ႇတင်းၵျၢမ်း ဢၼႃႇၵတ်ႉတိပရေႃးၽႅတ်ႈ ၵႃႈမီးတင်းသဵင်ႈတင်းလူင်ဢိင်တြႃးသွင်ပိူင်ၼႆႉသေလႄႈတႅမ်ႈဝႆႉဢေႃႈ၊” ဝႃႈၼင်ႇၼႆဢေႃႈ။
ယၢမ်းမိူဝ်ႈဢၼ်ၵူၼ်းၵိူင်း ၽႃႇရိသႄး၊ ၶဝ်ယင်းတိုၵ်ႉၸုတုမ်ၵၼ်ယူႇၼၼ်ႉ၊ ၸဝ်ႈယေႇသု၊ ထၢမ်ၶဝ်လႄႈဝႃႈ၊-
“သူထၢင်ႇ ၸဝ်ႈၶရိၸ်ႈ၊ ပဵၼ်ၸဝ်ႈၸိူဝ်ႉၼင်ႇႁိုဝ်။ ပဵၼ်လုၵ်ႈၽူႈလႂ်၊” မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်ၶိုၼ်းလၢတ်ႈလႄႈဝႃႈ၊ “ပဵၼ်လုၵ်ႈ တႃႇဝိတ်ႈ၊ ဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၵေႃႈလၢတ်ႈလႄႈဝႃႈ၊ “ပေႃးပဵၼ်ၸိူဝ်ႉၼင်ႇၼႆၸိုင်၊ႁဵတ်းသင်ဝိၺိၺ်ႇၸဝ်ႈတိုၵ်းသူၼ်း တႃႇဝိတ်ႈ၊ ႁႂ်ႈႁွင်ႉ ၸဝ်ႈၶရိၸ်ႈ၊ လႄႈဝႃႈ၊ ‘ၸဝ်ႈၵဝ်ၶႃႈ၊’ ဝႃႈၼင်ႇၼႆၸိူဝ်ႉၼင်ႇႁိုဝ်။ ၵႂၢမ်းဢၼ် တႃႇဝိတ်ႈ၊ ဝႃႈၸမ်ႉ။
“‘ၸဝ်ႈထႃႇဝရႃႉၽြႃးလၢတ်ႈတီႈၸဝ်ႈ ၵဝ်ၶႃႈလႄႈဝႃႈ၊ ၼင်ႈယူႇၵႃႈတီႈၽၢႆႇၶႂႃၵဝ်တေႃႇႁွတ်ႈ ၵဝ်ဢဝ်ရၢၼ်ႇသူႇမႂ်းၶျႃးဝႆႉၵႃႈတီႈတႂ်ႈတိၼ်မႂ်းၼၼ်ႉတႃႉ၊’ ဝႃႈၼင်ႇၼႆဢေႃႈ။
“ပိူဝ်ႈဢၼ်ဝႃႈၼင်ႇၼႆလႄႈပေႃး တႃႇဝိတ်ႈ၊ ယင်းႁွင်ႉဝႃႈ၊ ‘ၸဝ်ႈၵဝ်ၶႃႈ၊’ ဝႃႈၼႆယူႇၸိုင်၊ ၸဝ်ႈၶရိၸ်ႈ၊ ၼၼ်ႉ၊ ပဵၼ်လုၵ်ႈ တႃႇဝိတ်ႈ၊ လႆႈၸိူဝ်ႉၼင်ႇႁိုဝ်၊” မိူဝ်ႈဢၼ် ၸဝ်ႈယေႇသု၊ ထၢမ်ၸိူဝ်ႉၼင်ႇၼႆၸိုင်။
ၽူႈလႂ်သေၵေႃႉသေၵူၼ်းဢမ်ႇၶိုၼ်းလဝ်ႈလၢတ်ႈၵႂၢမ်းသေၶေႃႈလႆႈ။ ၸႃႉၸဵမ်မိူဝ်ႈဝၼ်းၼၼ်ႉလႄႈၽူႈလႂ်သေၵေႃႉသေၵူၼ်းဢမ်ႇႁတ်းလဝ်ႈႁတ်းထၢမ်ၵႂၢမ်းသေၸိူဝ်ႉသေမဵဝ်းတီႈမၼ်းၸဝ်ႈထႅင်ႈယဝ်ႉဢေႃႈ။
မိူဝ်ႈၼၼ်ႉ၊ ၸဝ်ႈယေႇသု၊ ႁေႃးလၢတ်ႈတီႈမူႇၵူၼ်းတင်းလၢႆ၊ဢိၵ်ႇတင်းတပႄးၸဝ်ႈတင်းလၢႆလႄႈဝႃႈ၊-
“သြႃႇမေႃၵျၢမ်းထမ်ႇမႃႉၶဝ်ဢိၵ်ႇတင်းၵူၼ်းၵိူင်း ၽႃႇရိသႄး၊ တင်းလၢႆ၊ပဵၼ်ၶဝ်ၸိူဝ်းဢၼ်လႆႈဢၶႂၢင်ႉဢရႃႇဢၼ်မွၵ်ႇလၢတ်ႈၼႄတြႃး မူဝ်းသေႇ၊ ဢေႃႈ။-
ပိူဝ်ႈၼႆလႄႈသူတၵ်းလႆႈထွမ်ႇဢဝ်ၵႃႈဢၼ်ၶဝ်သင်ႇသွၼ်ပၼ်ၼၼ်ႉလႄႈႁဵတ်းၸွမ်းဢေႃႈ။ ၵူၺ်းၵႃႈ၊ၸိူဝ်ႉၼင်ႇဢၼ်ၶဝ်ႁေႃးၼၼ်ႉၶဝ်ယင်းဢမ်ႇႁဵတ်းၸွမ်းလႄႈသူယႃႇပေယိူင်ႈၸွမ်းတၢင်းႁဵတ်းၶဝ်။-
ၶဝ်ၸၢင်ႈပူၵ်ႉႁေႃႇၶူဝ်းဢၼ်ၼၵ်းလႄႈတၢင်ႇသႂ်ႇၵႃႈၼိူဝ်ႁူဝ်မႃႇပိူၼ်ႈဢေႃႈ။ တူဝ်ၶဝ်ၸမ်ႉ၊ယင်းဢမ်ႇၶႂ်ႈဢဝ်ၼိဝ်ႉမိုဝ်းၸွႆႈယွင်ႈတၢင်ႇမႃႇပၼ်သေဢိတ်း။-
တၢင်းဢၼ်ၶဝ်ႁဵတ်းၶဝ်သၢင်ႈတင်းသဵင်ႈတင်းမူတ်းၸိုင်၊ပဵၼ်ဢၼ်ၶႂ်ႈႁႂ်ႈပိူၼ်ႈႁၼ်ၵူၺ်းဢေႃႈ။ တူၺ်းလူး၊ထူင်ၼင်ဢွၼ်ႇဢၼ်ၶဝ်ႁမ်းလိၵ်ႈတြႃးသႂ်ႇဝႆႉလႄႈမတ်ႉၸပ်းၼႃႈၽၢၵ်ႇၶဝ်၊ဢိၵ်ႇတင်းႁူဝ်ၶႅၼ်ၶဝ်ၼၼ်ႉယႂ်ႇၼႃႇထၼ်ႇႁိုဝ်။ သွႆႈသိူဝ်ႈၸၢမ်းသိူဝ်ႈၶဝ်ၼၼ်ႉၵေႃႈယၢဝ်းၼႃႇဢေႃႈ။-
ၶဝ်ၸၢင်ႈၵျိူၵ်ႈၸႂ်ထုၵ်ႇၸႂ်တီႈၼင်ႈဢၼ်လီဢၼ်မျၢတ်ႈသေပိူၼ်ႈၵႃႈၼႂ်းပၢင်ပွႆး၊တီႈၼင်ႈဢၼ်သုင်သေပိူၼ်ႈၵႃႈၼႂ်းၸရွပ်ႈႁေႃးတြႃးလႂ်လႄႈ၊-
ၶႂ်ႈႁႂ်ႈပိူၼ်ႈႁဵတ်းရူဝ်ႇသေႇလႄႈတၵ်ႉလၢတ်ႈတေႃႇၶဝ်ၵႃႈၼႂ်းၵၢင်ၵၢတ်ႇလႄႈၶႂ်ႈႁႂ်ႈပိူၼ်ႈႁွင်ႉၶဝ်ဝႃႈ၊ ‘သြႃႇၸဝ်ႈ’ ဢေႃႈ။-
သူၸိူဝ်းၼႆႉၸမ်ႉ၊ပဵၼ်ပီႈၼွင်ႉၵၼ်ၵူၺ်းလႄႈယႃႇပေၶၢမ်ႇတၢင်းဢၼ်ပိူၼ်ႈႁွင်ႉဝႃႈ၊ ‘သြႃႇႁဝ်း’။ သြႃႇသူမီးပႃးလဵဝ်ၵူၺ်းဢေႃႈ။-
ပိူင်လဵဝ်ၵၼ်ယႃႇပေႁွင်ႉသေၵေႃႉသေၵူၼ်းၵႃႈၼိူဝ်လိၼ်မိူင်းၼႆႉဝႃႈ၊ ‘ပေႃႈႁဝ်း၊’ လွင်ႈမၼ်းၸမ်ႉ၊သူမီးပေႃႈသူႇလဵဝ်ပႃးလဵဝ်ၵႃႈၼိူဝ်ၽုင်ႇၵၢင်ႁၢဝ်ၼၼ်ႉၵူၺ်းဢေႃႈ။-
သူယႃႇပေၶၢမ်ႇတၢင်းဢၼ်ပိူၼ်ႈႁွင်ႉဝႃႈ၊ ‘ၸဝ်ႈႁဝ်း’။ ၸဝ်ႈသူမီးပႃးလဵဝ်ၵူၺ်းဢၼ်ဝႃႈ၊ ၸဝ်ႈၶရိၸ်ႈ၊ ၼၼ်ႉဢေႃႈ။-
ၵေႃႉဢၼ်ယႂ်ႇသေပိူၼ်ႈၵႃႈၼႂ်းသူၼႆႉတၵ်းလႆႈပဵၼ်ၵူၼ်းၸႂ်ႉၵူၼ်းသွႆသူဢေႃႈ။-
ၽူႈလႂ်သေဢမ်ႇဝႃႈ၊ၵေႃႉဢၼ်ၶႂ်ႈယုၵ်ႉယွင်ႈတူဝ်ၸဝ်ႈၵဝ်ႇၼၼ်ႉ၊ ၵေႃႉၼၼ်ႉတၵ်းလႆႈၶၢမ်ႇတၢင်းဢၼ်ၶျႃးတူၵ်းတီႈတႅမ်ႇဢေႃႈ။ ၵေႃႉဢၼ်ဢဝ်ၸဝ်ႈၵဝ်ႇၶျႃးတႅမ်ႇၸမ်ႉ၊တၵ်းလႆႈၶၢမ်ႇတၢင်းဢၼ်ယုၵ်ႉယွင်ႈဢေႃႈ။
“သြႃႇမေႃၵျၢမ်းထမ်ႇမႃႉၶဝ်ဢိၵ်ႇတင်းၵူၼ်းၵိူင်း ၽႃႇရိသႄး၊ ၶဝ်႟။ သူၼႆႉပဵၼ်ၵူၼ်းၼႃႈသိုဝ်ႈၸႂ်ၵူတ်ႉဢေႃႈ။ သူမီးဢႃႉမၢင်ႇၵလႃႇၵွပ်ႈပိူဝ်ႈသူဝႆႉၽၵ်းတူမိူင်းၵၢင်ႁၢဝ်ၸဝ်ႈသိုဝ်ႈၼႃႈတႂ်ႈတႃၵူၼ်းတင်းလၢႆသေလႄႈတူဝ်သူယင်းဢမ်ႇၶဝ်ႈ။ တီႈၶဝ်ၸိူဝ်းဢၼ်ၶႂ်ႈၶဝ်ႈၼၼ်ႉၵေႃႈသူႁႄႉၶႅၼ်ဝႆႉဢေႃႈ။-
[သြႃႇမေႃၵျၢမ်းထမ်ႇမႃႉၶဝ်ဢိၵ်ႇတင်းၵူၼ်းၵိူင်း ၽႃႇရိသႄး၊ ၶဝ်႟။ သူၼႆႉပဵၼ်ၵူၼ်းၼႃႈသိုဝ်ႈၸႂ်ၵူတ်ႉဢေႃႈ။ သူမီးဢႃႉမၢင်ႇၵလႃႇၵွပ်ႈပိူဝ်ႈသူႁဵတ်းပႄႉႁဵတ်းၼႅင်ႇတီႈမႄႈမူၵ်းမႄႈမၢႆႈတင်းလၢႆလႄႈႁိမ်ႁူင်ႇ ၸူၼ်ဢဝ်ၶဝ်ဢေႃႈ။ သူယင်းႁဵတ်းႁၢင်ႈလၢတ်ႈၵႂၢမ်းသူးတွင်းယၢဝ်းၼႃႇဢေႃႈ။ ၵွပ်ႈလွင်ႈတၢင်းၸိူဝ်းၼႆႉလႄႈသူတၵ်းလႆႈၶၢမ်ႇတၢင်းဢၼ်ၸီႇယၢင်ႇဢၼ်ၵျၢမ်းထၢမ်းၼႃႇၼၼ်ႉဢေႃႈ။]
“သြႃႇမေႃၵျၢမ်းထမ်ႇမႃႉၶဝ်ဢိၵ်ႇတင်းၵူၼ်းၵိူင်း ၽႃႇရိသႄး၊ ၶဝ်႟။ သူၼႆႉ၊ပဵၼ်ၵူၼ်းၼႃႈသိုဝ်ႈၸႂ်ၵူတ်ႉဢေႃႈ။ သူမီးဢႃႉမၢင်ႇၵလႃႇၵွပ်ႈပိူဝ်ႈသူၸၢင်ႈလႄႇၶၢမ်ႈဝၢၼ်ႈၶၢမ်ႈမိူင်းၵႂႃႇမိူင်းတႂ်ႈမိူင်းၼိူဝ်၊ႁႂ်ႈၵူၼ်းၵေႃႉၼိုင်ႈၶၢႆႉမႃးၶဝ်ႈၽႃႇသႃႇသူ၊မၼ်းၵေႃႈၶဝ်ႈသေယဝ်ႉ၊သူႁဵတ်းႁႂ်ႈမၼ်းၼၼ်ႉပဵၼ်ၵူၼ်းမိူင်းငရၢႆးၼႃႇသေသူသွင်ပုၼ်ႈလူးၵွၼ်ႇဢေႃႈ။
“ၵူၼ်းတႃမွတ်ႇဢၼ်ၼႄတၢင်းၶဝ်႟။ သူမီးဢႃႉမၢင်ႇၵလႃႇဢေႃႈ။ သူဝႃႈ၊ ‘ပေႃးသေၵေႃႉသေၵူၼ်းတိူင်ႇၵၢဝ်ႇၵႂၢမ်းသဵတ်ႈၸႃႇတီႈၵျွင်းပိၵ်ႈမၢၼ်ႇၸဝ်ႈၸိုင်၊ၵတိမၼ်းဢမ်ႇတႄႇ။ ၵူၺ်းၵႃႈ၊ပေႃးမၼ်းဢဝ်ၶမ်းၼႂ်းၵျွင်းပိၵ်ႈမၢၼ်ႇၸဝ်ႈလႄႈတိူင်ႇၵၢဝ်ႇၵႂၢမ်းသဵတ်ႈၸႃႇၸိုင်၊ၵတိမၼ်းတႄႇဢေႃႈ၊’ ဝႃႈၼင်ႇၼႆယဝ်ႉ။-
ၵူၼ်းတႃမွတ်ႇဢၼ်မိူၵ်ႈတင်းလၢႆၶဝ်႟။ ၶိူင်ႈပိူင်ဢၼ်လႂ်ယဵင်ႈၶႅၼ်းမျၢတ်ႈၼႃႇ။ ၶမ်းၼၼ်ႉမျၢတ်ႈႁိုဝ်း။ ဢမ်ႇၼၼ်၊ၵျွင်းပိၵ်ႈမၢၼ်ႇၸဝ်ႈဢၼ်ႁႂ်ႈၶမ်းမူတ်းၸၢင်ႇၼၼ်ႉမျၢတ်ႈႁိုဝ်း။-
ထႅင်ႈပိူင်ၼိုင်ႈၸမ်ႉ၊သူဝႃႈ၊ ‘ပေႃးသူသေၵေႃႉသေၵူၼ်းတိူင်ႇၵၢဝ်ႇၵႂၢမ်းသဵတ်ႈၸႃႇၸိုင်၊ၵတိမၼ်းဢမ်ႇတႄႇ။ ၵူၺ်းၵႃႈ၊ပေႃးမၼ်းဢဝ်ၶိူင်ႈတၢင်းလူႇဢၼ်မီးၵႃႈၼိူဝ် ၶဵင်ႇတၢင်းလူႇၼၼ်ႉတိူင်ႇၵၢဝ်ႇၵႂၢမ်းသဵတ်ႈၸႃႇၸိုင်၊ၵတိမၼ်းတႄႇဢေႃႈ၊’ ဝႃႈၼင်ႇၼႆယဝ်ႉ။-
ၵူၼ်းတႃမွတ်ႇၶဝ်႟။ ၶိူင်ႈပိူင်ဢၼ်လႂ်ယဵင်ႈၶႅၼ်းမျၢတ်ႈၼႃႇ။ ၶိူင်ႈတၢင်းလူႇၼၼ်ႉမျၢတ်ႈႁိုဝ်း၊ဢမ်ႇၼၼ်ၶဵင်ႇတၢင်းလူႇဢၼ်ႁႂ်ႈၶိူင်ႈတၢင်းလူႇမူတ်းၸၢင်ႇၼၼ်ႉမျၢတ်ႈႁိုဝ်း။-
ပိူဝ်ႈၼႆၸင်ႇ၊ၵေႃႉဢၼ်တိူင်ႇၵၢဝ်ႇၵႂၢမ်းသဵတ်ႈၸႃႇတီႈၶဵင်ႇတၢင်းလူႇၼၼ်ႉ၊ဢဝ်ၸႃႉၸဵမ်ၶဵင်ႇတၢင်းလူႇဢိၵ်ႇတင်းၶိူင်ႈတၢင်းလူႇၵႃႈမီးၼၼ်ႉ၊တိူင်ႇၵၢဝ်ႇၵႂၢမ်းသဵတ်ႈၸႃႇဢေႃႈ။-
ၵေႃႉဢၼ်တိူင်ႇၵၢဝ်ႇၵႂၢမ်းသဵတ်ႈၸႃႇတီႈၵျွင်းပိၵ်ႈမၢၼ်ႇၸဝ်ႈၼၼ်ႉၵေႃႈ၊ဢဝ်ၸႃႉၸဵမ်ၵျွင်းပိၵ်ႈမၢၼ်ႇၸဝ်ႈဢိၵ်ႇတင်းၸဝ်ႈဢၼ်ၵိင်းဝၢပ်ႈယူႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉတိူင်ႇၵၢဝ်ႇၵႂၢမ်းသဵတ်ႈၸႃႇဢေႃႈ။-
ပိူင်လဵဝ်ၵၼ်၊ၵေႃႉဢၼ်တိူင်ႇၵၢဝ်ႇၵႂၢမ်းသဵတ်ႈၸႃႇမိူင်းၵၢင်ႁၢဝ်ၼၼ်ႉ၊ၵေႃႉၼၼ်ႉဢဝ်ၸႃႉၸဵမ်ပလၢင်ႇ ၽြႃးပဵၼ်ၸဝ်ႈဢိၵ်ႇတင်းၸဝ်ႈဢၼ်ၼင်ႈၵႃႈၼိူဝ်ပလၢင်ႇၼၼ်ႉ၊တိူင်ႇၵၢဝ်ႇၵႂၢမ်းသဵတ်ႈၸႃႇဢေႃႈ။
“သြႃႇမေႃၵျၢမ်းထမ်ႇမႃႉၶဝ် ဢိၵ်ႇတင်းၵူၼ်းၵိူင်း ၽႃႇရိသႄး၊ ဢၼ်ပဵၼ်ၵူၼ်းၼႃသိုဝ်ႈၸႂ်ၵူတ်ႉၶဝ်႟။ သူမီးဢႃႉမၢင်ႇၵလႃႇဢေႃႈ။ ပိၵ်ႉသမ်ႉသူလူႇတၢၼ်းဢိမ်ၶိမ်း၊ မဵတ်ႉၸမုတ်ႈ၊ၸီႇယႃႇ၊သိပ်းပုၼ်ႈပုၼ်ႈၼိုင်ႈသေၵေႃႈ၊ သူဢမ်ႇဝႆႉဢယေးတြႃးပိင်းၺၢပ်ႈၸိူဝ်းဢၼ်ဢယေးယႂ်ႇ၊ဢၼ်ပဵၼ်တြႃးတၢင်းဢၼ်သိုဝ်ႈတေႃႇတၢင်းဢၼ်ဢဵတ်းလူပိူၼ်ႈဢိၵ်ႇတင်းတၢင်းဢၼ်ပႂ်ႉသဵတ်ႈၸႃႇၸိူဝ်းၼႆႉဢေႃႈ။ လွင်ႈတၢင်းၸိူဝ်းၼႆႉ၊သူတၵ်းလႆႈၵမ်ၵျၢင်ႉလႄႈတၢင်းလူႇတၢင်းတၢၼ်းၸိူဝ်းၼၼ်ႉၵေႃႈ၊တၵ်းဢမ်ႇလႆႈလိုမ်းပႅတ်ႈၼင်ႇၵဝ်ႇဢေႃႈ။-
ၵူၼ်းတႃမွတ်ႇဢၼ်ၼႄတၢင်းၶဝ်႟။ သူၸႅတ်ႈမႅင်းလဵတ်းဢွၵ်ႇသေၵႃႈၼႂ်းၼမ်ႉၵိၼ်သူသေလႄႈသမ်ႉၵိၼ်ၵလႃႇဢုၵ်ႈဢေႃႈ။
“သြႃႇမေႃၵျၢမ်းထမ်ႇမႃႉၶဝ်ဢိၵ်ႇတင်းၵူၼ်းၵိူင်း ၽႃႇရိသႄး၊ ဢၼ်ပဵၼ်ၵူၼ်းၼႃႈသိုဝ်ႈၸႂ်ၵူတ်ႉၶဝ်႟။ သူမီးဢႃႉမၢင်ႇၵလႃႇၵွပ်ႈပိူဝ်ႈလၢင်ႉၵွၵ်းတင်းပၢၼ်ႉသူၽၢႆႇတၢင်းၼွၵ်ႈၵူၺ်းလႄႈၽၢႆႇတၢင်းၼႂ်းၸမ်ႉ၊မီးတဵမ်ဝႆႉတင်းတၢင်းဢၼ်မၢပ်ႇၵိၼ်မႂ်ၵိၼ်လႄႈလေႃးၽႃႉပူၼ်ႉလိူဝ်ဢေႃႈ။-
ၵူၼ်းၵိူင်း ၽႃႇရိသႄး၊ ဢၼ်တႃမွတ်ႇၶဝ်႟။ လၢင်ႉၵွၵ်းတင်းပၢၼ်ႉသူၽၢႆႇတၢင်းၼႂ်းဢွၼ်တၢင်းတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ၽၢႆႇတၢင်းၼွၵ်ႈမၼ်းတၵ်းမူတ်းသႂ်ဢေႃႈ။
“သြႃႇမေႃၵျၢမ်းထမ်ႇမႃႉၶဝ်ဢိၵ်ႇတင်းၵူၼ်းၵိူင်း ၽႃႇရိသႄး၊ ၶဝ်႟။ သူၼႆႉပဵၼ်ၵူၼ်းၼႃႈသိုဝ်ႈၸႂ်ၵူတ်ႉဢေႃႈ။ ၵွပ်ႈပိူဝ်ႈသူမိူၼ်ၸိူဝ်ႉၼင်ႇၶုမ်ပႃႇႁဵဝ်ႈဢၼ်တႃးထုၼ်ၽိူၵ်ႇဝႆႉလႄႈၽၢႆႇတၢင်းၼွၵ်ႈမၼ်းတူၺ်းႁၢင်ႈလီဝႆႉဢေႃႈ။ ၵူၺ်းၵႃႈ၊ၽၢႆႇတၢင်းၼႂ်းမၼ်းၸိုင်၊တဵမ်ဝႆႉတင်းလုပ်ႇၵူၼ်းတၢႆဢိၵ်ႇတင်းတူဝ်တၢႆဢၼ်တူႇၼဝ်ႈဝႆႉၼၼ်ႉဢေႃႈ။-
မိူၼ်ၼင်ႇၼၼ်သူမိူၼ်ၼင်ႇႁၢင်ႈသိုဝ်ႈတေႃႇၽၢႆႇတၢင်းၼွၵ်ႈၵႃႈတီႈၽၢႆႇၼႃႈပိူၼ်ႈဢေႃႈ။ ၵူၺ်းၵႃႈ၊ၽၢႆႇတၢင်းၼႂ်းသူၸမ်ႉ၊ တဵမ်ဝႆႉတင်းတၢင်းဢၼ်ၼႃႈသိုဝ်ႈၸႂ်ၵူတ်ႉဢိၵ်ႇတင်းတၢင်းၵမ်တၢင်းၵျၢင်ႉဢၼ်ဢမ်ႇတြႃးဢေႃႈ။
“သြႃႇမေႃၵျၢမ်းထမ်ႇမႃႉၶဝ်ဢိၵ်ႇတင်းၵူၼ်းၵိူင်း ၽႃႇရိသႄး၊ ၶဝ်႟။ သူၼႆႉပဵၼ်ၵူၼ်းဢၼ်ၼႃႈသိုဝ်ႈၸႂ်ၵူတ်ႉဢေႃႈ။ သူမီးဢႃႉမၢင်ႇၵလႃႇၵွပ်ႈပိူဝ်ႈသူမႄးႁဵတ်းမႄးၵုမ်းပႃႇႁဵဝ်ႈပရေႃးၽႅတ်ႈ တင်းလၢႆလႄႈႁၢင်ႈၶိူင်ႈၶုမ်ပႃႇႁဵဝ်ႈၵူၼ်းသိုဝ်ႈတေႃႇၸိူဝ်းၼၼ်ႉဝႆႉသေယဝ်ႉ၊-
လၢတ်ႈလႄႈဝႃႈ၊ ‘သင်ႁဝ်းလႆႈဢသၢၵ်ႈလိပ်းၼႂ်းၸူဝ်ႈပၢၼ် ပူႇမွၼ်ႇႁဝ်းၼၼ်ႉၸိုင်၊ႁဝ်းတၵ်းဢမ်ႇလႆႈၶဝ်ႈပႃးၸွမ်းၶဝ်ၼႂ်းတၢင်းဢၼ်ဢဝ်တၢႆပရေႃးၽႅတ်ႈၸိူဝ်းၼႆႉယဝ်ႉ၊’ ဝႃႈၼင်ႇၼႆယဝ်ႉ။-
ပေႃးပဵၼ်ၸိူဝ်ႉၼင်ႇၼႆၸိုင်၊သူႁပ်ႉၶၢမ်ႇဢဝ်လွင်ႈတၢင်းဢၼ်သူပဵၼ်ၸိူဝ်ႉၶိူဝ်းၶဝ်ၸိူဝ်းဢၼ်ဢဝ်ပရေႃးၽႅတ်ႈတင်းလၢႆတၢႆၼၼ်ႉဢေႃႈ။
ပိူဝ်ႈၼႆလႄႈဢၼ်ပူႇမွၼ်ႇသူတႄႇၸႃႉႁဵတ်းသၢင်ႈမႃးၼၼ်ႉ၊ သိုပ်ႇႁဵတ်းႁႂ်ႈထူၼ်ႈတဵမ်တႃႉ။-
ၵူၼ်းမိူၵ်ႈၸိူဝ်ႉၼင်ႇၸိူဝ်ႉၶိူဝ်းငူးႁၢႆႉၶဝ်႟။ ဢပျတ်ႈတၢမ်ႇဢၼ်တူၵ်းငရၢႆးၼၼ်ႉ၊သူဢၢင်ႈဢၢၼ်းႁႂ်ႈပူၼ်ႉလွတ်ႈလႆႈၸိူဝ်ႉၼင်ႇႁိုဝ်။-
ပိူဝ်ႈဢၼ်မီးၼင်ႇၼႆလႄႈတူၺ်းလူး။ ၵဝ်တၵ်းပွႆႇၸႂ်ႉပရေႃးၽႅတ်ႈ၊ ပိင်ႇၺႃႇသိ၊သြႃႇမေႃၵျၢမ်းထမ်ႇမႃႉ၊တင်းလၢႆလႂ်မႃးတီႈသူသေၵေႃႈ၊ၼႂ်းၶဝ်ၼၼ်ႉသူယင်းတၵ်းဢဝ်တၢႆၵမ်ႈၽွင်ႈ၊တွၵ်ႇႁွႆႈၵႃႈၼိူဝ်သဝ်မႆႉဝႃးမိုဝ်းၵမ်ႈၽွင်ႈ၊ယင်းဢဝ်ၵမ်ႈၽွင်ႈပေႃႉယႅၼ်ႉၵႃႈၼႂ်းၸရွပ်ႈႁေႃးတြႃးသေလႄႈၵႃႈတီႈၵမ်ႈၽွင်ႈၼၼ်ႉသူတၵ်းၼိၵ်ႈၸၢၵ်ႈငႅၼ်းသႄးလႄႈလိုပ်ႈႁေႃႈၶဝ်ဢွၵ်ႇသေၵႃႈတီႈဝဵင်းၼိုင်ႈယဝ်ႉဝဵင်းၼိုင်ႈဢေႃႈ။-
ပိူဝ်ႈၼႆလႄႈဢပျတ်ႈတၢမ်ႇဢၼ်ဢဝ်တၢႆၶဝ်ၸိူဝ်းဢၼ်သိုဝ်ႈတေႃႇလႄႈလိူတ်ႈၶဝ်လႆႈတူၵ်းၵႃႈၼိူဝ်လိၼ်မိူင်းဢၼ်ၸႃႉၸဵမ်လိူတ်ႈ ဢႃႇပေႇလႃႉ၊ ဢၼ်သိုဝ်ႈတေႃႇၼၼ်ႉ၊တေႃႇထိုင်ႁွတ်ႈလိူတ်ႈ ၸႃႇၶရိ၊ လုၵ်ႈၸၢႆး ပႃႇရၵိ၊ ဢၼ်သူဢဝ်တၢႆၼႂ်းၵႄႈဝူင်ႈၵၢင်ႁွင်ႈမူတ်းၸၢင်ႇၵျွင်းပိၵ်ႈမၢၼ်ႇၸဝ်ႈတင်းၶဵင်ႇတၢင်းလူႇၼၼ်ႉ၊တၵ်းႁွတ်ႈၽႅဝ်ၵႃႈၼိူဝ်ႁူဝ်သူဢေႃႈ။-
ၵဝ်ဝႃႈတီႈၸိုဝ်ႈၸႂ်ႈမၼ်းတီႈသူၸမ်ႉ၊ဢပျတ်ႈတၢမ်ႇၸိူဝ်းၼႆႉတင်းသဵင်ႈတင်းလူင်တၵ်းတူၵ်းႁွတ်ႈထိုင်ၵႃႈၼိူဝ်ၵူၼ်းၸူဝ်ႈၵၢပ်ႈပၢၼ်ၼႆႉဢေႃႈ။
“ဢူဝ်း၊ ယေႇရုသလႅမ်ႇ၊ ဝဵင်း ယေႇရုသလႅမ်ႇ၊ ႟။ မႂ်းဢဝ်ပရေႃးၽႅတ်ႈလႂ်တၢႆလႄႈဢဝ်မၢၵ်ႇႁိၼ်ပိုဝ်ႈၶဝ်ၸိူဝ်းဢၼ်ၶၢမ်ႇတၢင်းဢၼ်ပွႆႇၸႂ်ႉမႃးတီႈမႂ်းတင်းလၢႆၼၼ်ႉယဝ်ႉဢေႃႈ။ ၸိူဝ်ႉၼင်ႇဢၼ်ၵႆႇမႄႈတွမ်ဢဝ်လုၵ်ႈမၼ်းငွမ်းဝႆႉတႂ်ႈပိၵ်ႇမၼ်းၼၼ်ႉ၊ၵဝ်မီးဢလူဝ်ႇၶႂ်ႈဢဝ်မိုဝ်းၵဝ်ဢုမ်ႈႁွပ်ႇၵူၼ်းမဵဝ်းမႂ်းတင်းလၢႆလၢႆၽဝ်ႇလၢႆပွၵ်ႈယဝ်ႉ။ ၵူၺ်းၵႃႈ၊ မႂ်းထဵင်ပႅတ်ႈဢေႃႈ။-
တူၺ်းလူး။ ႁိူၼ်းသူတၵ်းႁၢမ်းပႅတ်ႈဝႆႉလႄႈငႅဝ်ၵူၼ်းဢေႃႈ။-
ၵဝ်ဝႃႈတီႈသူၸမ်ႉ၊ၸႃႉၸဵမ်မိူဝ်ႈလဵဝ်ၵႂႃႇတေႃႇထိုင်ႁွတ်ႈၶိင်ႇၵႃႇလႃႉဢၼ်သူတၵ်းလၢတ်ႈလႄႈဝႃႈ၊ ‘ႁႂ်ႈၽြႃးပဵၼ်ၸဝ်ႈပၼ်မၢင်ႇၵလႃႇတီႈၸဝ်ႈဢၼ်မႃးၼႂ်းၼႃႇမႃႉၸိုဝ်ႈသဵင်ၸဝ်ႈထႃႇဝရႃႉၽြႃးၼၼ်ႉသေၵမ်းလူၺ်ႈ၊’ ဝႃႈၼင်ႇၼႆၼၼ်ႉၸိုင်၊သူတၵ်းဢမ်ႇလႆႈႁၼ်ၼႃႈၵဝ်၊” ဝႃႈၼင်ႇၼႆဢေႃႈ။
မိူဝ်ႈဢၼ် ၸဝ်ႈယေႇသု၊ ဢွၵ်ႇသေၵႃႈတီႈၵျွင်းပိၵ်ႈမၢၼ်ႇၸဝ်ႈလႄႈၵႂႃႇယူႇၼၼ်ႉၸိုင်၊တပႄးၸဝ်ႈတင်းလၢႆမႃးၸူးတီႈမၼ်းၸဝ်ႈသေလႄႈၸိၼႄမၢၵ်ႇႁိၼ်တိူၵ်ႈၵျွင်းပိၵ်ႈမၢၼ်ႇၸဝ်ႈၸိူဝ်းၼၼ်ႉဢေႃႈ။-
မၼ်းၸဝ်ႈၵေႃႈႁေႃးလၢတ်ႈတီႈၶဝ်လႄႈဝႃႈ၊ “ၸႂ်ႈယဝ်ႉ။ သူတူၺ်းႁၼ်ၸိူဝ်းၼႆႉယဝ်ႉဢမ်ႇၸႂ်ႈႁိုဝ်း။ ၵဝ်ဝႃႈတီႈသူၸမ်ႉ၊ သၢင်ႉမၢၵ်ႇႁိၼ်ၼႆႉၵမ်းလိုၼ်းတၵ်းၶၢမ်ႇတၢင်းဢၼ်ၵိူၼ်ႇယႃႉပင်းလူင်း၊တေႃႇထိုင်ႁွတ်ႈႁူၺ်ႇၼိုင်ႈတေဢမ်ႇၵေႃႇၵႃႈၼိူဝ်ႁူၺ်ႇၼိုင်ႈၼၼ်ႉယဝ်ႉ၊” ဝႃႈၼင်ႇၼႆဢေႃႈ။
ယၢမ်းမိူဝ်ႈဢၼ် ၸဝ်ႈယေႇသု၊ ၼင်ႈယူႇၵႃႈၼိူဝ်လွႆ သၢၼ်ႇလုၼ်ႇ၊ ၼၼ်ႉ၊တပႄးၸဝ်ႈတင်းလၢႆမႃးႁိမ်းမၼ်းၸဝ်ႈတီႈဢၼ်မီးမူႇၶဝ်ၵူၺ်းၼၼ်ႉသေလႄႈလဝ်ႈထၢမ်လႄႈဝႃႈ၊ “လွင်ႈတၢင်းဢၼ်ၸဝ်ႈႁဝ်းႁေႃးလၢတ်ႈၸိူဝ်းၼႆႉ၊ တၵ်းပဵၼ်မႃးမိူဝ်ႈလႂ်ၶႃႈ။ လွင်ႈတၢင်းဢၼ်ၸဝ်ႈႁဝ်းတၵ်းၵျွလူင်းမႃးဢိၵ်ႇတင်းမိုဝ်ႉဝၼ်းဢၼ်ၵမ်ႇၽႃႇၼႆႉတၵ်းသုတ်းသဵင်ႈၼၼ်ႉၸိုင်၊တေမီးၼိမိၵ်ႈလၢၵ်ႈၶၼႃႇဢၼ်လႂ်ၶႃႈ။ ၶႅၼ်းတေႃႈလၢတ်ႈၼႄႁဝ်းၶႃႈသေၵမ်းၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ႁဵတ်းသတိတႃႉ။ ယႃႇပေႁႂ်ႈပိူၼ်ႈလႆႈပႅတ်ႉလႅၼ်သူ။-
ၵူၼ်းၼမ်ၼႃႇတၵ်းပေႃႇမႃးသေယဝ်ႉ၊ႁိမ်ဢဝ်ၸိုဝ်ႈသဵင်ၵဝ်သေလႄႈလၢတ်ႈဝႃႈ၊ ‘ၵဝ်ၼႆႉပဵၼ် ၸဝ်ႈၶရိၸ်ႈ၊ ယဝ်ႉ၊’ ဝႃႈၼင်ႇၼႆပႅတ်ႉလႅၼ်ၵူၼ်းၼမ်ၼႃႇဢေႃႈ။-
သူတေလႆႈငိၼ်းသဵင်ၶၢဝ်ႇဢၼ်တိုၵ်းသိုၵ်းတီႈၸမ်၊ဢိၵ်ႇတင်းသဵင်ၶၢဝ်ႇတိုၵ်းသိုၵ်းတီႈၵႆၼၼ်ႉဢေႃႈ။ ၵူၺ်းၵႃႈ၊ယႃႇပေမႆႈၸႂ်။ လွင်ႈတၢင်းၸိူဝ်းၼႆႉတၵ်းလႆႈပဵၼ်မႃးဢေႃႈ။ ၼႂ်းဝႃႈၼၼ်သေၵေႃႈဢမ်ႇပႆႇပဵၼ်တီႈသုတ်းတီႈၵွႆ။-
မိူင်းၼိုင်ႈလႄႈမိူင်းၼိုင်ႈ၊တၵ်းတိုၵ်းတေႃးၵၼ်လႄႈၵူၼ်းမဵဝ်းၼိုင်ႈလႄႈမဵဝ်းၼိုင်ႈတၵ်းၶတ်းတႃႉၵၼ်ဢေႃႈ။ တၢင်းဢၼ်ၶဝ်ႈၵႃႈမၢၵ်ႇပႅင်း၊တၢင်းဢၼ်ပဵၼ်ၵႃႇလႃႉႁႃႈလႅင်မိူင်း၊ဢိၵ်ႇတင်းတၢင်းဢၼ်ဢိင်ႇသၼ်ႇၸိူဝ်းၼႆႉတၵ်းပေႃႇပဵၼ်တီႈပဵၼ်တီႈဢေႃႈ။-
လွင်ႈတၢင်းၵႃႈမီးၸိူဝ်းၼႆႉ၊ပဵၼ်မိူၼ်ၸိူဝ်ႉၼင်ႇမိူဝ်ႈၵေႃႇၸႃႉဝူၺ်ႇတၼႃႇဢၼ်တၵ်းၵိူတ်ႇလဵင်ႉလုၵ်ႈၼၼ်ႉဢေႃႈ။
“ၶိင်ႇမိူဝ်ႈၼၼ်ႉ၊ပိူၼ်ႈတၵ်းတိမတ်ႉဢဝ်သူလႄႈဢဝ်သူဢၢပ်ႈၵႃႈတီႈတၢင်းဢၼ်ၸီႇယၢင်ႇပၼ်တၢမ်ႇဢိၵ်ႇတင်းႁႂ်ႈလႆႈဢဝ်သူတၢႆဢေႃႈ။ ၵူၼ်းမဵဝ်းတင်းသဵင်ႈတင်းလူင်တၵ်းၸင်းသူၵွပ်ႈပိူဝ်ႈၼႃႇမႃႉၸိုဝ်ႈသဵင်ၵဝ်ၼၼ်ႉဢေႃႈ။-
ၶိင်ႇမိူဝ်ႈၼၼ်ႉ၊ၵူၼ်းၼမ်ၼႃႇၸႂ်တၵ်းလုလႄႈၵေႃႉၼိုင်ႈလႄႈၵေႃႉၼိုင်ႈတၵ်းၶႃႉၸိုဝ်ႈၶၢႆသဵင်ၵၼ်လႄႈၸင်းၵၼ်ဢေႃႈ။-
ၵမ်းၼၼ်ႉ၊မိၵ်ႉသႃႇပရေႃးၽႅတ်ႈ ၼမ်ၼႃႇတၵ်းပေႃႇမႃးလႄႈပႅတ်ႉလႅၼ်ၵူၼ်းၼမ်ၼႃႇဢေႃႈ။-
လွင်ႈတၢင်းဢၼ်ႁၢႆႉမိူၵ်ႈတေၼမ်ၵိုၼ်းမႃးလႄႈမႅတ်ႈတႃႇတၢင်းႁၵ်ႉတၵ်းလဵၵ်ႉၵေႇဢေႇမၢင်ၵႂႃႇဢေႃႈ။-
ၽူႈလႂ်သေဢမ်ႇဝႃႈ၊ၵေႃႉဢၼ်ယိူၼ်ႉၶၢမ်ႇမၼ်ႈၶိူင်ႇတေႃႇထိုင်တီႈသုတ်းၼၼ်ႉ၊ၵေႃႉၼၼ်ႉတၵ်းလႆႈတၢင်းဢၼ်ၵႄႇၶျွတ်ႈဢဝ်ဢေႃႈ။-
ၶၢဝ်ႇတြႃးသိူဝ်းပျေႃႇလွင်ႈမိူင်းၸဝ်ႈၼႆႉ၊တၵ်းလႆႈႁေႃးလၢတ်ႈၸွတ်ႇၵမ်ႇၽႃႇၵူႈတီႈၵူႈလႅၼ်၊ပုၼ်ႈဢၼ်တၵ်းပဵၼ်သၢၵ်ႈသေႇတီႈၵူၼ်းမဵဝ်းတင်းသဵင်ႈတင်းမူတ်းယဝ်ႉ၊ယဝ်ႉၸင်ႇတၵ်းပဵၼ်တီႈသုတ်းတီႈၵွႆဢေႃႈ။
“သူတၵ်းလႆႈႁၼ်လွင်ႈ၊ ‘တၢင်းဢၼ်ယႃႉလုဢၼ်လီႁင်ႈလီၵူဝ်ၼႃႇ၊’ ပရေႃးၽႅတ်ႈ တၢၼ်ႇယေႇလႃႉ၊ ႁေႃးလၢတ်ႈဝႆႉၼၼ်ႉဢေႃႈ။ လွင်ႈတၢင်းဢၼ်လီႁင်ႈၼၼ်ႉတၵ်းၸုၵ်းယူႇၵႃႈတီႈထႃႇၼႃႉဢၼ်မူတ်းၸၢင်ႇဢေႃႈ။ (ႁႂ်ႈၵေႃႉၽတ်းဢၢၼ်ႇမႅၼ်ႈတြႃးၼႆႉၼၼ်ႉႁုထွမ်ႇတႃႉ။-)
မိူဝ်ႈဢၼ်ႁၼ်ၸိူဝ်ႉၼင်ႇၼၼ်ၸိုင်၊ၶဝ်ၸိူဝ်းဢၼ်ယူႇၼႂ်းမိူင်း ယုတႃႉ၊ တၵ်းလႆႈလႅၼ်ႈပၢႆႈၶိုၼ်ႈၵႂႃႇၵႃႈတီႈၼိူဝ်လွႆပုၼ်ႉဢေႃႈ။-
ၵူၼ်းၵေႃႉဢၼ်မီးယူႇၵႃႈၼိူဝ်လင်ၶႃးႁိူၼ်း မၼ်းၼၼ်ႉတၵ်းဢမ်ႇတၼ်းလူင်းၵႂႃႇၵႃႈၼႂ်းႁိူၼ်းလႄႈဢဝ်ၶူဝ်းမၼ်း။-
ၵူၼ်းၵေႃႉဢၼ်မီးယူႇၵႃႈတီႈတူင်ႈၼႃးတၵ်းဢမ်ႇလႆႈတၼ်းမိူဝ်းဢဝ်ၶူဝ်းၼုင်ႈမၼ်း။-
ဝၼ်းမိူဝ်ႈၼၼ်ႉမႄႈယိင်းဢၼ်ပႃးပတိၵ်ႈသၼ်ႇထေႇလႂ်၊ဢိၵ်ႇတင်းမႄႈယိင်းဢၼ်မီးလုၵ်ႈဢွၼ်ႇလႅင်ဢၼ်ယင်းၵိၼ်ၼူမ်းယူႇလႂ်၊တၵ်းယၢပ်ႇၸႂ်ၵိၼ်းၸႂ်ၼႃႇဢေႃႈ။-
လွင်ႈၼင်ႇႁိုဝ်ဝၼ်းဢၼ်သူလႆႈပၢႆႈၼၼ်ႉ၊တၵ်းဢမ်ႇပဵၼ်ၶိင်ႇႁိူဝ်ႉဢမ်ႇၼၼ်ဢမ်ႇလႆႈပဵၼ်ဝၼ်းၵမ်သိၼ်ၸိုင်၊သူးတွင်းတႃႉ။-
ၵွပ်ႈလွင်ႈၼင်ႇႁိုဝ်လႄႈဝႃႈၸမ်ႉ၊ၽေးဢုပၢတ်ႈဢၼ် ယၢပ်ႇၸိူဝ်ႉၼင်ႇၼၼ်ဢၼ်ဢမ်ႇပႆႇတွၼ်ႉပဵၼ်သေပွၵ်ႈၸဵမ်မိူဝ်ႈၵမ်ႇၽႃႇၸႃႉတႄႇၼၼ်ႉႁၢၼ်ႉတေႃႇမိူဝ်ႈလဵဝ်ၼႆႉလႄႈၵမ်းလိုၼ်းၵေႃႈတၵ်းဢမ်ႇပဵၼ်ထႅင်ႈၼၼ်ႉယဝ်ႉ။-
ၼႂ်းဝႃႈၼၼ်သေၵေႃႈ၊ၽြႃးပဵၼ်ၸဝ်ႈႁဵတ်းႁႂ်ႈမိုဝ်ႉဝၼ်းၸိူဝ်းၼၼ်ႉပွတ်းယူႇဢေႃႈ။ ပေႃးဢမ်ႇၼၼ်ၸိုင်၊ၸိူဝ်ႉၶိူဝ်းၵူၼ်းတေဢမ်ႇလွတ်ႈလႆႈသေၵေႃႉသေၵူၼ်း။ လွင်ႈမၼ်းၸမ်ႉ၊ထွၵ်ႈလူၺ်ႈၶဝ်ၸိူဝ်းဢၼ်လႆႈၶၢမ်ႇတၢင်းလိူၵ်ႈၵဵပ်းဝႆႉယဝ်ႉၸိူဝ်းၼၼ်ႉလႄႈၽြႃးပဵၼ်ၸဝ်ႈႁႂ်ႈၶိင်ႇၵႃႇလႃႉၼၼ်ႉပွတ်းဢေႃႈ။
“ပိူဝ်ႈၼႆလႄႈပေႃးသေၵေႃႉသေၵူၼ်းလၢတ်ႈတီႈသူလႄႈဝႃႈ၊ ‘တူၺ်းလူး။ ၸဝ်ႈၶရိၸ်ႈ၊ မီးၵႃႈတီႈၼႆႈဢေႃႈ၊’ ‘မီးၵႃႈတီႈၼၼ်ႈဢေႃႈ၊’ ဝႃႈၼင်ႇၼႆၸိုင်၊သူယႃႇပေယုမ်ႇ။-
လွင်ႈမၼ်းၸမ်ႉ၊ၵူၼ်းဢၼ်ႁဵတ်းႁၢင်ႈ ၸဝ်ႈၶရိၸ်ႈ၊ ဢိၵ်ႇတင်းမိၵ်ႉသႃႇပရေႃးၽႅတ်ႈတၵ်းပေႃႇမႃးၼမ်ၼႃႇလႄႈၶဝ်တၵ်းႁဵတ်းၼိမိၵ်ႈလၢၵ်ႈၶၼႃႇဢၼ်လၢၵ်ႇဢၼ်လၢႆးဢၼ်လီဢၢမ်းလႂ်၊ႁႂ်ႈလႆႈႁဵတ်းတၢင်းဢၼ်ပႅတ်ႉလႅၼ်ဢၼ်ယႂ်ႇၼႃႇလႄႈ၊သင်ပဵၼ်လႆႈၸိုင်၊ၵူၼ်းၸိူဝ်းဢၼ်ၶၢမ်ႇတၢင်းလိူၵ်ႈၵဵပ်းဝႆႉယဝ်ႉၸိူဝ်းၼၼ်ႉၵေႃႈ၊ယင်းတေပႅတ်ႉလႅၼ်ပႃးလူးၵွၼ်ႇဢေႃႈ။-
လွင်ႈတၢင်းၸိူဝ်းၼႆႉ၊ၵဝ်သင်ႇလၢတ်ႈဝႆႉတီႈသူၸဵမ်မိူဝ်ႈဢွၼ်တၢင်းၼၼ်ႉယဝ်ႉ။ မၢတ်ႈတွင်းဝႆႉတႃႉ။
“ပိူဝ်ႈၼႆလႄႈပေႃးၶဝ်လၢတ်ႈလႄႈဝႃႈ၊ ‘တူၺ်းလူး။ ၸဝ်ႈၼၼ်ႉမီးၼႂ်းထိူၼ်ႇပုၼ်ႉဢေႃႈ၊’ ဝႃႈၼင်ႇၼႆၸိုင်၊ယႃႇပေၵႂႃႇၸူး။ ဢမ်ႇၼၼ်ၶဝ်တၵ်းဝႃႈ၊ ‘တူၺ်းလူး။ ၸဝ်ႈၼၼ်ႉတဵတ်ႇမႅပ်းဝႆႉၼႂ်းလုၵ်းတၢင်းၼႂ်းပုၼ်ႉဢေႃႈ၊’ ဝႃႈၼင်ႇၼႆၵေႃႈယႃႇပေယုမ်ႇ။-
ၵွပ်ႈလွင်ႈၼင်ႇႁိုဝ်လႄႈဝႃႈၸမ်ႉ၊မိူဝ်ႈဢၼ် ၸဝ်ႈလုၵ်ႈၵူၼ်း၊ မႃးၼၼ်ႉၸိုင်၊တၵ်းမိူၼ်ၸိူဝ်ႉၼင်ႇၽႃႉမႅပ်ႈမၢပ်ႈတၢင်းဝၼ်းဢွၵ်ႇလႅင်းႁွတ်ႈထိုင်တၢင်းဝၼ်းတူၵ်းလႄႈၸွတ်ႇၼႃႈၽႃႉၵၢင်ႁၢဝ်ၵႂႃႇၼၼ်ႉဢေႃႈ။
“တီႈဢၼ်မီးတူဝ်တၢႆၼၼ်ႉ၊လၢင်းတႃႉတင်းလၢႆတၵ်းၸုတုမ်ဢေႃႈ။
“ဝၢႆးလင်ၶိင်ႇၵႃႇလႃႉဢၼ်တုၵ်ႉၶႃႉၶၢၼ်ၸႂ်ၸိူဝ်းၼၼ်ႉၵမ်းလဵဝ်၊ၵၢင်ဝၼ်းတၵ်းလပ်းသိင်ႇ၊လိူၼ်တၵ်းဢမ်ႇလႅင်း၊လၢဝ်တင်းလၢႆတၵ်းႁူင်ႈတူၵ်းသေၵႃႈၼိူဝ်ၵၢင်ႁၢဝ်လႄႈတၼ်းၶူဝ်းၵၢင်ႁၢဝ်တင်းလၢႆတၵ်းသၼ်ႇၶွၼ်းဝႆဢေႃႈ။-
မိူဝ်ႈၼၼ်ႉ၊ၼိမိၵ်ႈလၢၵ်ႈၶၼႃႇတၢင်းဢၼ် ၸဝ်ႈလုၵ်ႈၵူၼ်း၊ ႁွတ်ႈမႃးၼၼ်ႉတၵ်းပေႃႇဢွၵ်ႇၵႃႈတီႈၽႃႉၵၢင်ႁၢဝ်သေလႄႈၵူၼ်းလေႃးၵီႇတင်းသဵင်ႈတင်းလူင်တၵ်းလႆႈတူပ်းဢူၵ်းႁွင်ႉႁႆႈလႄႈႁၼ် ၸဝ်ႈလုၵ်ႈၵူၼ်း၊ ပႃးတင်းမုၼ်ၽုင်းတၼ်းၶူဝ်းဢႃႇၼုၽေႃႇမၼ်းၸဝ်ႈလႄႈၶီႇမွၵ်ႇၵုမ်ႈၵၢင်ႁၢဝ်လူင်းမႃးဢေႃႈ။-
သဵင်ၼႄးၶရႃႇတၵ်းႁုၼ်ႈမေႃးၼႃႇလူင်လၢင်လႄႈမၼ်းၸဝ်ႈတၵ်းပွႆႇၸႂ်ႉတမၢၼ်ႇမၼ်းၸဝ်ႈတင်းလၢႆလူင်းမႃးသီႇၸဵင်ႇပႅတ်ႇၼႃႈၵမ်ႇၽႃႇသေယဝ်ႉ၊ၸုသိမ်းႁွင်ႉဢဝ်ၵူၼ်းၸိူဝ်းဢၼ်လႆႈၶၢမ်ႇတၢင်းဢၼ်လိူၵ်ႈၵဵပ်းဝႆႉယဝ်ႉ၊ၸိူဝ်းဢၼ်မီးယူႇၸႃႉၸဵမ်ၵမ်ႇၽႃႇၸဵင်ႇၼိုင်ႈတေႃႇႁွတ်ႈၵႂႃႇထႅင်ႈၵမ်ႇၽႃႇၸဵင်ႇၼိုင်ႈၼၼ်ႉဢေႃႈ။
“ဢဝ်တူၼ်ႈမၢၵ်ႇလိူဝ်ႇႁဵတ်းပုင်ႇတႅၵ်ႈသေလႄႈသွၼ်ဢဝ်တႃႉ။ မိူဝ်ႈဢၼ်ၵိင်ႇမၼ်းၶႃႈမၼ်းႁုၼ်ႈလႄႈပူင်ႇၽိူဝ်ပူင်ႇမႂ်ၶဵဝ်လီၼုမ်ႇလီၼၼ်ႉၸိုင်၊သူႁုလွင်ႈဢၼ်ၶိင်ႇမႆႈၸမ်တၵ်းႁွတ်ႈမႃးၼၼ်ႉယဝ်ႉ။-
မိူၼ်ၼင်ႇၼၼ်၊မိူဝ်ႈဢၼ်သူလႆႈႁၼ်လွင်ႈတၢင်းတင်းသဵင်ႈတင်းလူင်ၸိူဝ်းၼႆႉၼၼ်ႉၸိုင်၊ႁုလွင်ႈ ၸဝ်ႈလုၵ်ႈၵူၼ်း၊ ႁွတ်ႈၸမ်မႃးၵႃႈတီႈႁိမ်းၽၵ်းတူၼၼ်ႉတႃႉ။-
ၵဝ်ဝႃႈတီႈၸိုဝ်ႈၸႂ်ႈမၼ်းၸမ်ႉ၊လွင်ႈတၢင်းတင်းသဵင်ႈတင်းလူင်ၸိူဝ်းၼႆႉ၊တၵ်းပဵၼ်မႃးၸေးၸေးၸူဝ်ႈဢၼ်ၶိူဝ်းၵူၼ်းမဵဝ်းၼႆႉဢမ်ႇပႆႇသုတ်းပႆႇႁၢႆၼၼ်ႉဢေႃႈ။-
ၽႃႉၵၢင်ႁၢဝ်တင်းလိၼ်မိူင်းၼႆႉတၵ်းဝၢႆးႁၢႆၵႂႃႇဢေႃႈ။ ၵႂၢမ်းၵဝ်ၸိူဝ်းၼႆႉၸိုင်၊တၵ်းဢမ်ႇႁူင်ႈဢမ်ႇႁၢႆလႃးလႃး။
“ၽူႈလႂ်ဢမ်ႇႁုၶိင်ႇၼႃႇရီႇဝၼ်းဢၼ်တၵ်းပဵၼ်မႃးၼၼ်ႉ။ တမၢၼ်ႇၵၢင်ႁၢဝ်တင်းလၢႆၵေႃႈဢမ်ႇႁု။ ၸဝ်ႈလုၵ်ႈၵူၼ်း၊ ၵေႃႈတေႃႈယင်းဢမ်ႇႁု။ မီးပေႃႈၸဝ်ႈၵဝ်သူႇလဵဝ်ပႃးလဵဝ်ၵူၺ်းႁုဢေႃႈ။-
တၢင်းဢၼ် ၸဝ်ႈလုၵ်ႈၵူၼ်း၊ မႃးၼၼ်ႉ၊တၵ်းပဵၼ်ၸိူဝ်ႉၼင်ႇဢၼ်ပဵၼ်ၼႂ်းၸူဝ်ႈပၢၼ် ၼူဝ်းဢႃႇ၊ ၼၼ်ႉဢေႃႈ။
ၸူဝ်ႈဝၼ်းဢၼ်ၼမ်ႉထူမ်ႈမိူင်းဢမ်ႇပႆႇပဵၼ်ၼၼ်ႉ၊ၵူၼ်းတင်းလၢႆၵိၼ်ပျေႃႇယူႇ၊ဢဝ်ၽူဝ်ဢဝ်မေးယူႇတေႃႇထိုင်ႁွတ်ႈဝၼ်းဢၼ် ၼူဝ်းဢႃႇ၊ ၶဝ်ႈႁိူဝ်းသၢင်းၽေႃးၼၼ်ႉလႄႈ၊-
ယင်းဢမ်ႇမီးသတိၵႃႈသင်တေႃႇထိုင်ၼမ်ႉထူမ်ႈမိူင်းမႃးဢဝ်ၶဝ်လွင်ႈၵႂႃႇပႅတ်ႈသဵင်ႈမူတ်းဢေႃႈ။ မိူၼ်ၼင်ႇၼၼ်တၵ်းပဵၼ်ၼႂ်းတၢင်းဢၼ် ၸဝ်ႈလုၵ်ႈၵူၼ်း၊ မႃးၼၼ်ႉဢေႃႈ။-
ၽွင်းယၢမ်းၼၼ်ႉ၊ၵူၼ်းသွင်ၵေႃႉတၵ်းထႆၼႃးႁူမ်ႈၵၼ်ယူႇလႄႈၵေႃႉၼိုင်ႈတၵ်းလႆႈၶၢမ်ႇတၢင်းဢၼ်သိမ်းဢဝ်ၵႂႃႇသေယဝ်ႉ၊ ၵေႃႉၼိုင်ႈတၵ်းၵိုတ်းၵျၢၼ်ႇဝႆႉဢေႃႈ။-
မႄႈယိင်းသွင်ၵေႃႉဢၼ်လူၺ်ၶဝ်ႈႁူမ်ႈလူၺ်ႈၵၼ်ယူႇၼၼ်ႉၵေႃႈ၊ ၵေႃႉၼိုင်ႈတၵ်းလႆႈၶၢမ်ႇတၢင်းဢၼ်သိမ်းဢဝ်ၵႂႃႇသေယဝ်ႉ၊ ၵေႃႉၼိုင်ႈတၵ်းၵိုတ်းဝႆႉဢေႃႈ။-
ပိူဝ်ႈၼႆလႄႈၵွပ်ႈပိူဝ်ႈဢၼ်သူဢမ်ႇႁုၶိင်ႇၼႃႇရီႇဝၼ်းဢၼ်ၸဝ်ႈၽြႃးသူတၵ်းႁွတ်ႈမႃးၼၼ်ႉလႄႈဝႆႉသတိပႂ်ႉယူႇတႃႉ။-
ပေႃးၸဝ်ႈႁိူၼ်းႁုၶိင်ႇဢၼ်ၽူႈလၵ်ႉတၵ်းမႃးလၵ်ႉၸိုင်၊မၼ်းတၵ်းဢမ်ႇလပ်းဢမ်ႇၼွၼ်းလႄႈပႂ်ႉယူႇဢမ်ႇႁႂ်ႈလႆႈယႃႉလႆႈမူင်ႇႁိူၼ်းမၼ်းဝႃႈၼႆသူႁုယူႇဢေႃႈ။-
ၵွပ်ႈၸိူဝ်ႉၼင်ႇၼႆလႄႈၵွပ်ႈပိူဝ်ႈဢၼ် ၸဝ်ႈလုၵ်ႈၵူၼ်း၊ တၵ်းႁွတ်ႈမႃးၼႂ်းၶိင်ႇၼႃႇရီႇဝၼ်းဢၼ်ဢမ်ႇထၢင်ႇဢမ်ႇထိူမ်ၼၼ်ႉ၊ႁႂ်ႈသူတၼ်းဝႆႉတႃႉ။
“လုၵ်ႈၸၢင်ႈဢၼ်မီးသဵတ်ႈၸႃႇလႄႈမီးသမ်ႇမႃႇသတိၼၼ်ႉ၊ ပဵၼ်ၵေႃႉၸိူဝ်ႉၼင်ႇႁိုဝ်။ မၼ်းၼၼ်ႉပဵၼ်ၵေႃႉဢၼ်ပေႃႈလဵင်ႉမၼ်းယုၵ်ႉတၢင်ႇႁႂ်ႈဢုပ်ႉပိူင်ႇၵႃႈၼိူဝ်ၵူၼ်းႁိူၼ်းၵူၼ်းယေးတင်းလၢႆလႄႈၸၢင်ႈၽႄမႅင်ႇပၼ်တၢင်းၵိၼ်ၸွမ်းၶိင်ႇမၼ်းမၢၼ်ႇမၢၼ်ႇၼၼ်ႉဢေႃႈ။-
မိူဝ်ႈဢၼ်ပေႃႈလဵင်ႉမၼ်းၶိုၼ်းမႃးလႄႈထူပ်းႁၼ်မၼ်းႁဵတ်းဝႆႉၸိူဝ်ႉၼင်ႇၼႆၼၼ်ႉမၼ်းမီးတၢင်းဢၼ်ၸူမ်းသိူဝ်းဢေႃႈ။-
ၵဝ်ဝႃႈတီႈသူၸမ်ႉ၊ပေႃႈလဵင်ႉမၼ်းတၵ်းယုၵ်ႉတၢင်ႇမၼ်းဝႆႉ၊ ႁႂ်ႈလႆႈတူၺ်းထိင်းၼိူဝ်ဢုၵ်ႉၸႃႇၵႃႈမီးဢေႃႈ။-
ၵူၺ်းၵႃႈ၊ပေႃးမၼ်းပဵၼ်လုၵ်ႈၸၢင်ႈဢၼ်မိူၵ်ႈၸိုင်၊မၼ်းၸၢင်ႈထၢင်ႇၼႂ်းၸႂ်လႄႈဝႃႈ၊ ‘ပေႃႈလဵင်ႉၵဝ်တၵ်းၼၢၼ်းမႃးဢေႃႈ၊’ ဝႃႈၼႆလႄႈ၊-
ယႅၼ်ႉထုပ်ႉလုၵ်ႈၸၢင်ႈၼင်ႇၵၼ်ယူႇ၊ၵိၼ်ႁူမ်ႈၵၼ်တင်းၵူၼ်းမဝ်းလဝ်ႈမဝ်းၵမ်တင်းလၢႆယူႇၸိုင်၊-
ပေႃႈလဵင်ႉမၼ်းတၵ်းႁွတ်ႈမႃးၼႂ်းၶိင်ႇၼႃႇရီႇဝၼ်းဢၼ်မၼ်းဢမ်ႇႁုလႄႈဢမ်ႇထၢင်ႇဢမ်ႇထိူမ်ၼၼ်ႉသေယဝ်ႉ၊-
တႅပ်းမၼ်းႁဵတ်းပဵၼ်ပိတ်းပဵၼ်ပွတ်းလႄႈဢဝ်မၼ်းၶင်ဝႆႉလူၺ်ႈၵၼ်တင်းၵူၼ်းဢၼ်ၼႃႈသိုဝ်ႈၸႂ်ၵူတ်ႉၶဝ်ဢေႃႈ။ တီႈၼၼ်ႈၸိုင်၊တၵ်းလႆႈၶၢင်းၶီၶၢင်းၽၢၼ်လႄႈလႆႈၵတ်းၶဵဝ်ႈၵတ်းၽၼ်းၼၼ်ႉဢေႃႈ။
“ၶိင်ႇၼႃႇရီႇဝၼ်းၼၼ်ႉ၊မိူင်းၵၢင်ႁၢဝ်ၸဝ်ႈတၵ်းပဵၼ်မိူၼ်ၸိူဝ်ႉၼင်ႇလုၵ်ႈယိင်းသၢဝ်သိပ်းၵေႃႉဢၼ်ယိပ်းဢဝ်ၵွၵ်းၽႆးသေလႄႈၵႂႃႇႁပ်ႉႁူဝ်တၢင်းလုၵ်ႈၶူၺ်မႂ်ႇၼၼ်ႉဢေႃႈ။-
ၼႂ်းၶဝ်ၼၼ်ႉ၊ႁႃႈၵေႃႉပဵၼ်ၵူၼ်းငိူဝ်ႈဢမ်ႇမီးပိင်ႇၺႃႇလႄႈႁႃႈၵေႃႉၸမ်ႉ၊မီးပိင်ႇၺႃႇသတိဢေႃႈ။-
ၶဝ်ၸိူဝ်းဢၼ်ငိူဝ်ႈၼၼ်ႉ၊ယိပ်းပႃးဢဝ်ၵွၵ်းၽႆးၵူၺ်းလႄႈဢမ်ႇပႃးၼမ်ႉမၼ်း။-
ၶဝ်ၸိူဝ်းဢၼ်မီးပိင်ႇၺႃႇသတိၸမ်ႉ၊ဢဝ်ၼမ်ႉမၼ်းသႂ်ႇတဝ်ႈတဵမ်တဵမ်ပႃးၸွမ်းဝႆႉပုၼ်ႈၵွၵ်းၽႆးၶဝ်ဢေႃႈ။-
မိူဝ်ႈဢၼ်လုၵ်ႈၶူၺ်မႂ်ႇၼၢၼ်းမႃးၼၼ်ႉၸိုင်၊ၶဝ်တင်းသဵင်ႈငဝ်ၼွၼ်းလႄႈလပ်းၵႂႃႇဢေႃႈ။
“ၼႂ်းၶိင်ႇတဵင်ႈၶိုၼ်းသဵင်ႁွင်ႉသႅၼ်ႇလႄႈဝႃႈ၊ ‘လုၵ်ႈၶူၺ်မႂ်ႇမႃးယဝ်ႉ။ ဢွၵ်ႇၵႂႃႇတွၼ်ႈႁပ်ႉမၼ်းတႃႉႁဝ်း၊’ ဝႃႈၼင်ႇၼႆလႄႈ၊-
လုၵ်ႈယိင်းသၢဝ်သိပ်းၵေႃႉၼၼ်ႉၵေႃႈတိုၼ်ႇမႃးလႄႈတႆႈၵွၵ်းၽႆးၶဝ်ဢေႃႈ။-
မိူဝ်ႈၼၼ်ႉ၊ၶဝ်ၸိူဝ်းဢၼ်ငိူဝ်ႈၼၼ်ႉ၊ယွၼ်းၵႃႈတီႈၶဝ်ၸိူဝ်းဢၼ်မီးပိင်ႇၺႃႇသတိၼၼ်ႉလႄႈဝႃႈ၊ ‘ၵွၵ်းၽႆးႁဝ်းၼမ်ႉမၼ်းႁႅင်ႈယဝ်ႉ။ ဢဝ်ၼမ်ႉမၼ်းမႅင်ႇပၼ်တီႈႁဝ်းဢိတ်းၼိုင်ႈလူး၊’ ဝႃႈၼင်ႇၼႆဢေႃႈ။-
ၶဝ်ၸိူဝ်းဢၼ်မီးပိင်ႇၺႃႇသတိၸိူဝ်းၼၼ်ႉၶိုၼ်းလၢတ်ႈလႄႈဝႃႈ၊ ‘ဢမ်ႇမႅင်ႇပၼ်လႆႈၵူၺ်း။ ၼမ်ႉမၼ်းႁဝ်းဢမ်ႇပေႃးၵုမ်ႇလႆႈပုၼ်ႈသူလႄႈပုၼ်ႈႁဝ်းၵူၺ်း။ ၵႂႃႇသိုဝ်ႉဢဝ်ၵႃႈတီႈဢၼ်ပိူၼ်ႈၶၢႆၼၼ်ႉပုၼ်ႈသူၸိုင်၊ယဵင်ႈၶႅၼ်းတေလီဢေႃႈ၊’ ဝႃႈၼင်ႇၼႆဢေႃႈ။-
ၶဝ်ၸိူဝ်းဢၼ်ငိူဝ်ႈၼၼ်ႉၵေႃႈဢွၵ်ႇၵႂႃႇသိုဝ်ႉၼမ်ႉမၼ်းဢေႃႈ။ ၼႂ်းမိူဝ်ႈဢၼ်ၶဝ်ယင်းၵႂႃႇယူႇၼၼ်ႉလုၵ်ႈၶူၺ်မႂ်ႇႁွတ်ႈမႃးဢေႃႈ။ မိူဝ်ႈၼၼ်ႉလုၵ်ႈယိင်းသၢဝ်ႁႃႈၵေႃႉဢၼ်တၼ်းဝႆႉယဝ်ႉၼၼ်ႉ၊ လႆႈၶဝ်ႈၵႂႃႇၼႂ်းပွႆးသွင်ႇမၢင်ႇၵလႃႇယဝ်ႉဢေႃႈ။ ၽၵ်းတူၵေႃႈဢိုတ်းႁပ်းၵႂႃႇယဝ်ႉဢေႃႈ။
“လိုၼ်းၼၼ်ႉ၊လုၵ်ႈယိင်းသၢဝ်ဢၼ်ၵိုတ်းဝႆႉၸိူဝ်းၼၼ်ႉမႃးလႄႈလဝ်ႈလၢတ်ႈဝႃႈ၊ ‘ၸဝ်ႈႁဝ်း။ ၸဝ်ႈႁဝ်း။ ၽုၺ်ႇၽၵ်းတူပၼ်ႁဝ်းၶႃႈသေၵမ်းၶႃႈ၊’ မိူဝ်ႈဢၼ်ဝႃႈၼင်ႇၼႆၸိုင်၊-
လုၵ်ႈၶူၺ်မႂ်ႇၼၼ်ႉၶိုၼ်းလၢတ်ႈလႄႈဝႃႈ၊ ‘ၵဝ်ဝႃႈတီႈၸိုဝ်ႈၸႂ်ႈမၼ်းၸမ်ႉ၊ၵဝ်ဢမ်ႇႁုၸၵ်းသူ၊’ ဝႃႈၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ သိုပ်ႇလၢတ်ႈလႄႈဝႃႈ၊ “ၵွပ်ႈၼႆလႄႈပိူဝ်ႈဢၼ်သူဢမ်ႇႁုၶိင်ႇၼႃႇရီႇဝၼ်းမၼ်းလႄႈပႃးတင်းသတိလႄႈပႂ်ႉထႃႈယူႇတႃႉ။”
“ၶိင်ႇၼႃႇရီႇဝၼ်းၼၼ်ႉ၊မိူင်းၵၢင်ႁၢဝ်ၸဝ်ႈတၵ်းပဵၼ်မိူၼ်ၸိူဝ်ႉၼင်ႇၵူၼ်းၵေႃႉၼိုင်ႈတၵ်းဢွၵ်ႇတၢင်းၵႂႃႇတၢင်ႇဝၢၼ်ႈတၢင်ႇမိူင်းဝႃႈၼႆ၊ႁွင်ႉဢဝ်ၶႃႈၵူၼ်းၸႂ်ႉမၼ်းတင်းလၢႆမႃးသေလႄႈဢၢပ်ႈပၼ်ဢုၵ်ႉၸႃႇငိုၼ်းၶမ်းမၼ်းဝႆႉၼၼ်ႉဢေႃႈ။-
ၸွမ်းၼင်ႇဢၼ်ၶဝ်မီးပိင်ႇၺႃႇႁင်းၽႂ်ႁင်းမၼ်းၼၼ်ႉ၊မၼ်းဢၢပ်ႈပၼ်ဝႆႉတီႈၵေႃႉၼိုင်ႈငိုၼ်းႁႃႈတလၢၼ်ႇတၢၼ်ႇ တီႈၵေႃႉၼိုင်ႈသွင်တလၢၼ်ႇတၢၼ်ႇ၊ထႅင်ႈတီႈၵေႃႉၼိုင်ႈၼၼ်ႉၸမ်ႉ၊ၼိုင်ႈတလၢၼ်ႇတၢၼ်ႇယဝ်ႉၸင်ႇမၼ်းဢွၵ်ႇတၢင်းၵႂႃႇသေဢေႃႈ။-
ၶႃႈၵေႃႉဢၼ်လႆႈႁပ်ႉဢဝ်ႁႃႈတလၢၼ်ႇတၢၼ်ႇၼၼ်ႉ၊ၵႂႃႇၵမ်းလဵဝ်လႄႈႁဵတ်းၵႃႉႁဵတ်းၶၢႆသေယဝ်ႉ၊လႆႈၼမ်ႉမျၢတ်ႈမႃးငိုၼ်းႁႃႈၶႅပ်းထႅင်ႈဢေႃႈ။-
မိူၼ်ၼင်ႇၼၼ်ၶႃႈၵေႃႉဢၼ်လႆႈႁပ်ႉဢဝ်ငိုၼ်းသွင်တလၢၼ်ႇတၢၼ်ႇၼၼ်ႉၵေႃႈလႆႈၼမ်ႉမျၢတ်ႈမႃးသွင်ၶႅပ်းထႅင်ႈၼင်ႇၵဝ်ႇဢေႃႈ။-
ၵူၺ်းၵႃႈ၊ၶႃႈၵေႃႉဢၼ်လႆႈႁပ်ႉဢဝ်ၼိုင်ႈတလၢၼ်ႇတၢၼ်ႇၼၼ်ႉၸမ်ႉ၊ဢွၵ်ႇၵႂႃႇသေယဝ်ႉ၊ဢဝ်ငိုၼ်းၸဝ်ႈမၼ်းၼၼ်ႉၽင်ဝႆႉၵႃႈၼႂ်းလိၼ်သေဢေႃႈ။
“ၶိင်ႇၵႃႇလႃႉႁိုင်ယဝ်ႉၸင်ႇ၊ၸဝ်ႈၶဝ်ပွၵ်ႈၶိုၼ်းႁွတ်ႈမႃးလႄႈတႂၢၵ်ႈၸရၢင်းငိုၼ်းၶဝ်ဢေႃႈ။-
ၶႃႈၵေႃႉဢၼ်လႆႈႁပ်ႉဢဝ်ႁႃႈတလၢၼ်ႇတၢၼ်ႇၼၼ်ႉ၊ၶဝ်ႈၸူးသေလႄႈဢၢပ်ႈပၼ်ၼမ်ႉမျၢတ်ႈႁႃႈၶႅပ်းထႅင်ႈလႄႈလဝ်ႈလၢတ်ႈဝႃႈ၊ ‘ၸဝ်ႈႁဝ်း။ ၸဝ်ႈႁဝ်းဢၢပ်ႈပၼ်ၵဝ်ၶႃႈငိုၼ်းႁႃႈတလၢၼ်ႇတၢၼ်ႇတီႈၶႃႈဢေႃႈ။ တူၺ်းလူး။ ၵဝ်ၶႃႈလႆႈၼမ်ႉမျၢတ်ႈမႃးထႅင်ႈႁႃႈၶႅပ်းတီႈၶႃႈဢေႃႈ၊’ ဝႃႈၼင်ႇၼႆဢေႃႈ။-
ၸဝ်ႈမၼ်းၶိုၼ်းလၢတ်ႈလႄႈဝႃႈ၊ ‘လီယဝ်ႉ။ ၶႃႈဢၼ်လီလႄႈမီးသဵတ်ႈၸႃႇၼႆႉ႟။ မႂ်းႁဵတ်းသဵတ်ႈၸႃႇၵႃႈၼိူဝ်တၢင်းဢၼ်လဵၵ်ႉဢၼ်ၼွႆႉၼႆႉယဝ်ႉ။ ၵဝ်တၵ်းယုၵ်ႉတၢင်ႇႁႂ်ႈမႂ်းလႆႈဢုပ်ႉထိင်းၵႃႈၼိူဝ်ဢၼ်ယႂ်ႇဢၼ်လူင်ဢေႃႈ။ မႃးတႃႉ၊ၶဝ်ႈလႄႈၸွၼ်ၸူမ်းၸွၼ်သိူဝ်းလူၺ်ႈၵၼ်တင်းၵဝ်တႃႉ၊’ ဝႃႈၼင်ႇၼႆဢေႃႈ။
“မိူဝ်ႈၼၼ်ႉ၊ၶႃႈဢၼ်လႆႈႁပ်ႉဢဝ်ငိုၼ်းသွင်တလၢၼ်ႇတၢၼ်ႇၼၼ်ႉၵေႃႈၶဝ်ႈၸူးသေလႄႈလဝ်ႈလၢတ်ႈဝႃႈ၊ ‘ၸဝ်ႈႁဝ်း။ ၸဝ်ႈႁဝ်းဢၢပ်ႈပၼ်ၵဝ်ၶႃႈငိုၼ်းသွင်တလၢၼ်ႇတၢၼ်ႇတီႈၶႃႈဢေႃႈ။ တူၺ်းၶႃႈလူး။ ၵဝ်ၶႃႈလႆႈၼမ်ႉမျၢတ်ႈမႃးသွင်ၶႅပ်းၶႃႈယဝ်ႉ၊’ ဝႃႈၼင်ႇၼႆဢေႃႈ။-
ၸဝ်ႈမၼ်းၵေႃႈလၢတ်ႈလႄႈဝႃႈ၊ ‘လီယဝ်ႉ။ ၶႃႈဢၼ်လီလႄႈမီးသဵတ်ႈၸႃႇၼႆႉ႟။ မႂ်းႁဵတ်းသဵတ်ႈၸႃႇၵႃႈၼိူဝ်တၢင်းဢၼ်လဵၵ်ႉဢၼ်ၼွႆႉၼႆႉယဝ်ႉ။ ၵဝ်တၵ်းယုၵ်ႉတၢင်ႇႁႂ်ႈမႂ်းဢုပ်ႉထိင်းၵႃႈၼိူဝ်ဢၼ်ယႂ်ႇဢၼ်လူင်ဢေႃႈ။ မႃးတႃႉ၊ၶဝ်ႈလႄႈၸွၼ်ၸူမ်းၸွၼ်သိူဝ်းလူၺ်ႈၵၼ်တင်းၵဝ်တႃႉ၊’ ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၶႃႈဢၼ်လႆႈႁပ်ႉဢဝ်ငိုၼ်းၼိုင်ႈတလၢၼ်ႇတၢၼ်ႇၼၼ်ႉၵေႃႈၶဝ်ႈၸူးသေလႄႈလဝ်ႈလၢတ်ႈဝႃႈ၊ ‘ၸဝ်ႈႁဝ်း။ ၵဝ်ၶႃႈႁုလွင်ႈဢၼ်ၸဝ်ႈႁဝ်းႁဵတ်းယၢပ်ႇႁဵတ်းယဵၼ်းလႄႈၸၢင်ႈပၢတ်ႇဢဝ်တီႈဢၼ်ၸဝ်ႈႁဝ်းဢမ်ႇၽုၵ်ႇဢမ်ႇသွမ်ႈ၊ ၸၢင်ႈၸုသိမ်းဢဝ်တီႈဢၼ်ၸဝ်ႈႁဝ်းဢမ်ႇဝၢၼ်ႇဢမ်ႇပိုၼ်ၼၼ်ႉၶႃႈဢေႃႈ။-
ပိူဝ်ႈဢၼ်ၵဝ်ၶႃႈၵူဝ်လႄႈၵဝ်ၶႃႈဢဝ်ငိုၼ်းၼၼ်ႉၽင်ဝႆႉၵႃႈၼႂ်းလိၼ်ဢေႃႈ။ တူၺ်းလူး။ ဢၼ်ၼႆႉပဵၼ်ငိုၼ်းၸဝ်ႈႁဝ်းၼၼ်ႉၶႃႈဢေႃႈ၊’ ဝႃႈၼင်ႇၼႆယဝ်ႉၸင်ႇ၊-
ၸဝ်ႈမၼ်းၼၼ်ႉၵေႃႈ၊ၶိုၼ်းလၢတ်ႈလႄႈဝႃႈ၊ ‘ၶႃႈဢၼ်မိူၵ်ႈလႄႈၶၢၼ်ႉဢိူၼ်ၼႆႉ႟။ မႂ်းဝႃႈမႂ်းႁုလွင်ႈဢၼ်ၵဝ်ၸၢင်ႈပၢတ်ႇဢဝ်တီႈဢၼ်ၵဝ်ဢမ်ႇၽုၵ်ႇဢမ်ႇသွမ်ႈ၊ၸၢင်ႈၸုသိမ်းဢဝ်တီႈဢၼ်ၵဝ်ဢမ်ႇဝၢၼ်ႇဢမ်ႇပိုၼ်ဝႃႈၼႆယဝ်ႉ။-
ပေႃးဝႃႈၼႆၸိုင်၊မႂ်းလီဢဝ်ငိုၼ်းၵဝ်ၼႆႉၵႂႃႇသႂ်ႇၵႃႈၼႂ်းၿၢၼ်ႇ ဝႆႉလႄႈၵဝ်ယင်းတေလႆႈၶိုၼ်းဢရၢင်းမၼ်းတင်းၶီႈမၼ်းလူးၵွၼ်ႇဢေႃႈ။-
ပိူဝ်ႈၼႆလႄႈ၊ၼုၵ်ႈဢဝ်ၶႅပ်းၶမ်းၼၼ်ႉၵႃႈတီႈမၼ်းသေလႄႈဢၢပ်ႈပၼ်တီႈၵေႃႉဢၼ်မီးငိုၼ်းသိပ်းတလၢၼ်ႇတၢၼ်ႇၼၼ်ႉတႃႉ။-
ၵွပ်ႈလွင်ႈတၢင်းၼႆႉလႄႈတီႈၵူႈၵေႃႉဢၼ်ၸၢင်ႈမီးၼၼ်ႉတၵ်းပၼ် ထႅင်ႈလႄႈမၼ်းတၵ်းမီးပေႃးလူၼ်ႉပေႃးလိူဝ်ဢေႃႈ။ ၵူၺ်းၵႃႈ၊ တီႈၵေႃႉဢၼ်ဢမ်ႇၸၢင်ႈမီးၵႃႈသင်ၼၼ်ႉၸမ်ႉ၊ပိၵ်ႉသမ်ႉမၼ်းမီးဢိတ်းဢွၼ်ႇၼိုင်ႈသေၵေႃႈ၊ယင်းတေၼုၵ်ႈဢဝ်တင်းသဵင်ႈတင်းမူတ်းလူးၵွၼ်ႇဢေႃႈ။-
ဢဝ်ၶႃႈဢၼ်ဢမ်ႇလႆႈလွင်ႈၼႆႉၵႂႃႇထိမ်ႈဢွၵ်ႇပႅတ်ႈၵႃႈတီႈဢၼ် လပ်းသိင်ႇပုၼ်ႉတႃႉ။ တီႈၼၼ်ႈႁႂ်ႈမၼ်းလႆႈႁႆႈလႆႈႁွင်ႉၵတ်းၶဵဝ်ႈၵတ်းၽၼ်းယူႇတႃႉ၊’ ဝႃႈၼင်ႇၼႆဢေႃႈ။
“မိူဝ်ႈဢၼ် ၸဝ်ႈလုၵ်ႈၵူၼ်း၊ ပႃးတင်းမုၼ်ၽုင်းဢႃႇၼုၽေႃႇလႄႈမႃးလူၺ်ႈၵၼ်တင်းတမၢၼ်ႇၵၢင်ႁၢဝ်တင်းလၢႆၼၼ်ႉၸိုင်၊မၼ်းၸဝ်ႈတၵ်းၼင်ႈၵႃႈၼိူဝ်ရႃႇၸႃႉပလၢင်ႇမၼ်းၸဝ်ႈဢၼ်မီးမုၼ်ၽုင်းၼၼ်ႉသေလႄႈ၊-
ၵူၼ်းမဵဝ်းၵူႈၸိူဝ်ႉၵူႈၶိူဝ်းတင်းသဵင်ႈတင်းလူင်တၵ်းလႆႈၸုတုမ်ၵၼ်ၵႃႈတီႈၽၢႆႇၼႃႈမၼ်းၸဝ်ႈဢေႃႈ။ မိူဝ်ႈၼၼ်ႉ၊မၼ်းၸဝ်ႈတၵ်းႁႂ်ႈၶဝ်ၸိူဝ်းၼၼ်ႉၽၢတ်ႇၽႄၵၼ်ပဵၼ်သွင်မူႇႁဵတ်းၸိူဝ်ႉၼင်ႇၵူၼ်းလဵင်ႉသူဝ်းလိူၵ်ႈၽႄဢဝ်သူဝ်းတင်းလၢႆဢွၵ်ႇသေၵႃႈၼႂ်းၽုင်ပႄႉၼၼ်ႉလႄႈ၊-
တၵ်းဢဝ်ၶဝ်ၸိူဝ်းဢၼ်သိုဝ်ႈတေႃႇၼၼ်ႉဝႆႉၽၢႆႇၶႂႃမိုဝ်းၸဝ်ႈသေယဝ်ႉ၊ဢဝ်တၢင်ႇၵေႃႉတၢင်ႇၵူၼ်းၸိူဝ်းၼၼ်ႉဝႆႉၽၢႆႇသၢႆႉမိုဝ်းၸဝ်ႈဢေႃႈ။-
မိူဝ်ႈၼၼ်ႉၶုၼ်ႁေႃၶမ်းၼၼ်ႉတၵ်းလၢတ်ႈတီႈၶဝ်ၸိူဝ်းဢၼ်မီးယူႇၽၢႆႇၶႂႃမိုဝ်းၸဝ်ႈၼၼ်ႉလႄႈဝႃႈ၊ ‘သူၸိူဝ်းဢၼ်လႆႈၶၢမ်ႇဢဝ်တၢင်းလီမၢင်ႇၵလႃႇတီႈပေႃႈၸဝ်ႈၵဝ်ၼႆႉ႟။ မႃးလႄႈၶဝ်ႈၸၢမ်ႇၸႃးဢမူၺ်ႇမိူင်းၸဝ်ႈဢၼ်မႄးႁႅၼ်းဝႆႉပုၼ်ႈသူၸဵမ်မိူဝ်ႈတႄႇၸႃႉၽၢၼ်ႇသၢင်းႁဵတ်းပဵၼ်ၵမ်ႇၽႃႇလိၼ်မိူင်းၼႆႉၼၼ်ႉတႃႉ။-
မိူဝ်ႈဢၼ်ၵဝ်တွင်ႉမႆႈၼၼ်ႉသူလဵင်ႉလူၵဝ်ဢေႃႈ။ ၵဝ်ယၢၵ်ႇၼမ်ႉၵေႃႈ၊သူပၼ်ၼမ်ႉၵိၼ်တီႈၵဝ်ဢေႃႈ။ မိူဝ်ႈဢၼ်ၵဝ်ပဵၼ်ၶႅၵ်ႇၼၼ်ႉ၊ သူတွၼ်ႈႁပ်ႉဢဝ်ၵဝ်ၵႃႈၼႂ်းႁိူၼ်းသူဢေႃႈ။-
မိူဝ်ႈဢၼ်ၵဝ်ယူႇတူဝ်ပူၺ်ၼၼ်ႉသူၼုင်ႈမႆပၼ်ဢေႃႈ။ ၵဝ်ပဵၼ်ၶႆႈဢမ်ႇယူႇလီၵေႃႈသူလုမ်းလႃးလူတူၺ်းၵဝ်လႄႈမိူဝ်ႈဢၼ်ၵဝ်တူၵ်းထွင်ႇၼၼ်ႉသူမႃးသူႇမႃးၸႂ်းၵဝ်ဢေႃႈ၊-’
မိူဝ်ႈဢၼ်ဝႃႈၼင်ႇၼႆၸိုင်၊ၵူၼ်းသိုဝ်ႈတေႃႇၸိူဝ်းၼၼ်ႉၶိုၼ်းလၢတ်ႈလႄႈဝႃႈ၊ ‘ၸဝ်ႈႁဝ်း။ ႁဝ်းၶႃႈထူပ်းႁၼ်ၸဝ်ႈႁဝ်းတွင်ႉမႆႈလႄႈလႆႈလဵင်ႉလႆႈလူပၼ်မိူဝ်ႈလႂ်ၶႃႈ။ ၸဝ်ႈႁဝ်းယၢၵ်ႇၼမ်ႉလႄႈလႆႈပၼ်ၼမ်ႉၵိၼ်မိူဝ်ႈလႂ်ၶႃႈ။-
ႁဝ်းၶႃႈထူပ်းႁၼ်ၸဝ်ႈႁဝ်းပဵၼ်ၶႅၵ်ႇလႄႈလႆႈတွၼ်ႈႁပ်ႉဢဝ်ၵႃႈၼႂ်းႁိူၼ်းႁဝ်းၶႃႈမိူဝ်ႈလႂ်ၶႃႈ။ ၸဝ်ႈႁဝ်းယူႇတူဝ်ပူၺ်လႄႈလႆႈဢဝ်ၶူဝ်းၼုင်ႈမႆပၼ်ၸဝ်ႈႁဝ်းမိူဝ်ႈလႂ်ၶႃႈ။-
ႁဝ်းၶႃႈလႆႈထူပ်းႁၼ်ၸဝ်ႈႁဝ်းပဵၼ်ၶႆႈဢမ်ႇယူႇလီလႂ်၊ယူႇၼႂ်းထွင်ႇလႂ်လႄႈလႆႈလုမ်းလႃးလူတူၺ်းၸဝ်ႈႁဝ်းမိူဝ်ႈလႂ်ၶႃႈ၊’ ထၢမ်ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ၶုၼ်ႁေႃၶမ်းၵေႃႈတၵ်းၶိုၼ်းလၢတ်ႈလႄႈဝႃႈ၊ ‘ၵဝ်ဝႃႈတီႈၸိုဝ်ႈၸႂ်ႈမၼ်းတီႈသူၸမ်ႉ၊မိူဝ်ႈလႂ်သေဢမ်ႇဝႃႈ၊ တၢင်းဢၼ်သူႁဵတ်းၵႃႈတီႈသေၵေႃႉသေၵူၼ်းဢၼ်လဵၵ်ႉသေပိူၼ်ႈ၊ၵႃႈၼႂ်းပီႈၼွင်ႉၵဝ်တင်းလၢႆၼၼ်ႉ၊ပဵၼ်ဢၼ်သူလႆႈႁဵတ်းပၼ်ၵႃႈတီႈၵဝ်ယဝ်ႉ၊’ ဝႃႈၼင်ႇၼႆဢေႃႈ။
“မိူဝ်ႈၼၼ်ႉ၊မၼ်းၸဝ်ႈတၵ်းလၢတ်ႈတီႈၶဝ်ၸိူဝ်းဢၼ်မီးၽၢႆႇသၢႆႉမိုဝ်းၸဝ်ႈၸိူဝ်းၼၼ်ႉလႄႈဝႃႈ၊ ‘သူၸိူဝ်းဢၼ်ၽြႃးပဵၼ်ၸဝ်ႈလႆႈၵိၼ်ႇလႃႇၼႆႉ႟။ ဢွၵ်ႇသေၵႃႈတီႈၵဝ်ၼႆႉၵႂႃႇလႄႈၶဝ်ႈၵႃႈၼႂ်းၽႆးငရၢႆးထႃႇဝရႃႉဢၼ်မႄးဝႆႉပုၼ်ႈ ၸႃႇတၢၼ်ႇ၊ မႃႇၼၢတ်ႈ၊ဢိၵ်ႇတင်းတမၢၼ်ႇမၼ်းတင်းလၢႆၼၼ်ႉတႃႉ။-
သူၼႆႉမိူဝ်ႈဢၼ်ၵဝ်တွင်ႉမႆႈၼၼ်ႉဢမ်ႇႁဵတ်းလဵင်ႉႁဵတ်းလူ။ ၵဝ် ယၢၵ်ႇၼမ်ႉၵေႃႈဢမ်ႇပၼ်ၼမ်ႉၵိၼ်တီႈၵဝ်။-
ၵဝ်ပဵၼ်ၶႅၵ်ႇၵေႃႈဢမ်ႇတွၼ်ႈႁပ်ႉဢဝ်ၵဝ်ၵႃႈၼႂ်းႁိူၼ်းသူ။ ၵဝ်ယူႇတူဝ်ပူၺ်ၵေႃႈဢမ်ႇပၼ်ၶူဝ်းၼုင်ႈၶူဝ်းမႆတီႈၵဝ်။ မိူဝ်ႈဢၼ်ၵဝ်ပဵၼ်ၶႆႈပဵၼ်ၼၢဝ်လႂ်၊ၵဝ်ယူႇၼႂ်းထွင်ႇလႂ်ၼၼ်ႉၵေႃႈ၊ သူဢမ်ႇလုမ်းလႃးဢမ်ႇလူဢမ်ႇတူၺ်းၵဝ်၊-’
မိူဝ်ႈဢၼ်ဝႃႈၼင်ႇၼႆၸိုင်၊ၶဝ်ၼၼ်ႉၵေႃႈတၵ်းၶိုၼ်းလဝ်ႈလၢတ်ႈလႄႈဝႃႈ၊ ‘ၸဝ်ႈႁဝ်း။ ႁဝ်းၶႃႈတွၼ်ႉႁၼ်ၸဝ်ႈႁဝ်းတွင်ႉမႆႈယၢၵ်ႇၼမ်ႉလႂ်၊ပဵၼ်ၶႅၵ်ႇလႂ်၊ယူႇတူဝ်ပူၺ်လႂ်၊ပဵၼ်ၶႆႈပဵၼ်ၼၢဝ်ဢမ်ႇယူႇလီလႂ်၊မီးၼႂ်းထွင်ႇလႂ်ၼၼ်ႉမိူဝ်ႈလႂ်လႄႈဢမ်ႇလႆႈႁဵတ်းဝၢတ်ႈဢၼ်လုမ်းလႃးၸဝ်ႈႁဝ်းၼၼ်ႉၶႃႈ၊’ ဝႃႈၼင်ႇၼႆဢေႃႈ။-
ၶုၼ်ႁေႃၶမ်းၵေႃႈတၵ်းၶိုၼ်းလၢတ်ႈလႄႈဝႃႈ၊ ‘ၵဝ်ဝႃႈတီႈၸိုဝ်ႈၸႂ်ႈမၼ်းတီႈသူၸမ်ႉ၊ၼႂ်းတၢင်းဢၼ်သူဢမ်ႇႁဵတ်းတီႈၵေႃႉဢၼ်လဵၵ်ႉၼွႆႉသေပိူၼ်ႈၵႃႈၼႂ်းၶဝ်ၼၼ်ႉၸိုင်၊သူဢမ်ႇလႆႈႁဵတ်းတီႈၵဝ်ယဝ်ႉ၊’ ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၶဝ်ၼၼ်ႉတၵ်းလႆႈၵႂႃႇလႄႈၶၢမ်ႇတၢမ်ႇဢပျတ်ႈဢၼ်ဢမ်ႇသုတ်းဢမ်ႇသဵင်ႈပုၼ်ႉသေယဝ်ႉ၊ၶဝ်ၸိူဝ်းဢၼ်သိုဝ်ႈတေႃႇတင်းလၢႆၸမ်ႉ၊တၵ်းလႆႈၵႂႃႇၵႃႈတီႈဢၼ်ဢသၢၵ်ႈလိပ်းထႃႇဝရႃႉပုၼ်ႉဢေႃႈ၊” ဝႃႈၼင်ႇၼႆ ၸဝ်ႈယေႇသု၊ ႁေႃးလၢတ်ႈဢေႃႈ။
မိူဝ်ႈဢၼ် ၸဝ်ႈယေႇသု၊ သွၼ်ပၼ်လွင်ႈတၢင်းတင်းသဵင်ႈတင်းလူင်ၸိူဝ်းၼႆႉယဝ်ႉၸိုင်၊လၢတ်ႈတီႈတပႄးၸဝ်ႈၸိူဝ်းၼၼ်ႉလႄႈဝႃႈ၊-
“ၸွမ်းၼင်ႇဢၼ်သူႁုယူႇၼၼ်ႉဢဝ်ၼႆႉၵႂႃႇသွင်ဝၼ်းတၵ်းပဵၼ်ပွႆး ပသၶႃႇ၊ ဢေႃႈ။ မိူဝ်ႈၼၼ်ႉ ၸဝ်ႈလုၵ်ႈၵူၼ်း၊ တၵ်းလႆႈၶၢမ်ႇတၢင်းဢၼ်ဢၢပ်ႈႁႂ်ႈလႆႈတွၵ်ႇဝႆႉၵႃႈၼိူဝ်သဝ်မႆႉဝႃးမိုဝ်းဢေႃႈ၊” ဝႃႈၼင်ႇၼႆဢေႃႈ။
ၽွင်းယၢမ်းၼၼ်ႉ၊ယဵၸ်ႈပရေႃးႁဵၵ်ႈ လူင်ၶဝ်ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၵူၼ်းမဵဝ်း ၵျူး၊ ၶဝ်ဢွၼ်ၵၼ်ၸုတုမ်ၵၼ်ၼႂ်းႁေႃႁိူၼ်း ၵယႃႇၽႃႉ၊ ဢၼ်ပဵၼ်ႁူဝ်ၼႃႈယဵၸ်ႈပရေႃးႁဵၵ်ႈၶဝ်ၼၼ်ႉလႄႈ၊-
တိူင်ႇပၢင်ႇၵၼ်ႁႂ်ႈလႆႈႁဵတ်းတၢင်းပရိယႄႇတိဢဝ် ၸဝ်ႈယေႇသု၊ သေလႄႈဢဝ်တၢႆဢေႃႈ။-
ၶဝ်တင်းသဵင်ႈၽွမ်ႉၵၼ်လႄႈဝႃႈ၊ “ၵူဝ်ၵူၼ်းတင်းလၢႆတၵ်းတူင်ႉတၵ်းတိူၼ်ႇလႄႈၼႂ်းဝၼ်းပွႆး ပသၶႃႇ၊ ၼႆႉၸိုင်၊ယႃႇပေၼႅတ်ႈႁဵတ်းလူးၵွၼ်ႇ၊” ဝႃႈၼင်ႇၼႆဢေႃႈ။
ၼႂ်းဝၼ်းဢၼ် ၸဝ်ႈယေႇသု၊ ယင်းမီးယူႇတီႈဝၢၼ်ႈ ပေႇထၼိ၊ ၼႂ်းႁိူၼ်း သိမုၼ်ႇ၊ ဢၼ်ယၢမ်ႈပဵၼ်တုတ်ႈ ၼၼ်ႉယူႇၸိုင်၊-
မႄႈယိင်းၵေႃႉၼိုင်ႈဢဝ်တဝ်ႈႁိၼ်ၶၢဝ်ဢၼ်တဵမ်ဝႆႉတင်းၼမ်ႉမၼ်းႁွမ်ဢၼ်ၵႃႈယႂ်ႇၼႃႇၼၼ်ႉတဝ်ႈၼိုင်ႈမႃးသေယဝ်ႉ၊သွၼ်းလေႃႇထွၵ်ႇသႂ်ႇတီႈၼိူဝ်ႁူဝ်မၼ်းၸဝ်ႈယၢမ်းမိူဝ်ႈဢၼ်မၼ်းၸဝ်ႈယင်းတိုၵ်ႉၵိၼ်တၢင်းၵိၼ်ယူႇၼၼ်ႉဢေႃႈ။-
တပႄးၸဝ်ႈၸိူဝ်းၼၼ်ႉႁၼ်လႄႈၶႂ်ႈၸႃႉၼႃႇလူင်လၢင်လႄႈလၢတ်ႈဝႃႈ၊ “ႁဵတ်းသင်လႄႈႁႂ်ႈသုမ်းပႅတ်ႈၼမ်ႉမၼ်းႁွမ်လၢႆလၢႆၸိူဝ်ႉၼင်ႇႁိုဝ်။-
ၼမ်ႉမၼ်းႁွမ်ၼႆႉ၊ထုၵ်ႇလီၶၢႆဢဝ်ၵႃႈၶၼ်မၼ်းဢၼ်ယႂ်ႇၼႃႇၼၼ်ႉသေယဝ်ႉ၊ဢဝ်ငိုၼ်းၼၼ်ႉၸႃႇၵႃႉပၼ်တီႈၵူၼ်းယၢၵ်ႈၵူၼ်းၽၢၼ်တင်းလၢႆဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ႁုလွင်ႈတၢင်းဢၼ်ၶဝ်လၢတ်ႈၸႃၵၼ်ၼၼ်ႉလႄႈလၢတ်ႈတီႈၶဝ်လႄႈဝႃႈ၊ “သူယႃႉၸေႇတၼႃႇမႄႈယိင်းၼႆႉႁဵတ်းသင်။ လွင်ႈတၢင်းဢၼ်မၼ်းႁဵတ်းၵႂႃႇၼႆႉ၊ ပဵၼ်ဢၼ်ႁၢင်ႈလီႁၢင်ႈငၢမ်းပုၼ်ႈၵဝ်ဢေႃႈ။-
ၵူၼ်းယၢၵ်ႈၵူၼ်းၽၢၼ်မီးယူႇလူၺ်ႈၵၼ်တင်းသူတႃႇသေႇဢေႃႈ။ ၵဝ်ၸမ်ႉ၊တၵ်းယူႇလူၺ်ႈၵၼ်တင်းသူတႃႇသေႇဢမ်ႇၸႂ်ႈ။-
လွင်ႈဢၼ်မၼ်းထွၵ်ႇၼမ်ႉမၼ်းႁွမ်သႂ်ႇၵႃႈၼိူဝ်တူဝ်ၵဝ်ၼႆႉ၊ ပဵၼ်တၢင်းဢၼ်မႄးႁႅၼ်းပုၼ်ႈဢၼ်တၵ်းသၢင်းၵျူဝ်ႇတူဝ်ၵဝ်ၼၼ်ႉယဝ်ႉ။-
ၵဝ်ဝႃႈတီႈၸိုဝ်ႈၸႂ်ႈမၼ်းၸမ်ႉ၊ၵႃႈတီႈဢၼ်ႁေႃးလၢတ်ႈၶၢဝ်ႇတြႃးသိူဝ်းပျေႃႇၵႃႈၼိူဝ်ၵမ်ႇၽႃႇၵူႈတီႈၵူႈလႅၼ်ၼၼ်ႉ၊ လွင်ႈတၢင်းဢၼ်မၼ်းႁဵတ်းယဝ်ႉၼႆႉတၵ်းလႆႈဢုပ်ႇလႆႈလၢတ်ႈၼႂ်းတၢင်းဢၼ်ၶုၵ်းၸႂ်လႆႈၶႆႈၸႂ်ထူပ်းမၼ်းဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၼႂ်းတပႄးၸဝ်ႈသိပ်းသွင်ၵေႃႉၼၼ်ႉ၊ၵေႃႉၼိုင်ႈဢၼ် လႆႈၸိုဝ်ႈ ယုတႃႉဢိသၵႃႇရေႇဢုတ်ႈ၊ ၼၼ်ႉၵႂႃႇၸူးယဵၸ်ႈပရေႃးႁဵၵ်ႈလူင်ၶဝ်သေလႄႈ၊-
လၢတ်ႈဝႃႈ၊ “ပေႃးၵဝ်ၶႃႈဢဝ် ၸဝ်ႈယေႇသု၊ ၶၢႆပၼ်ၼႂ်းမိုဝ်းသူၸဝ်ႈၸိုင်၊တၵ်းပၼ်ၵဝ်ၶႃႈၵႃႈႁိုဝ်ၶႃႈ၊” ဝႃႈၼင်ႇၼႆသေယဝ်ႉ၊ၶဝ်ၵေႃႈၼပ်ႉဢၢၼ်ႇငိုၼ်းသၢမ်သိပ်းၶႅပ်းသေယဝ်ႉ၊ ပၼ်မၼ်းသေဢေႃႈ။-
တႄႇဢဝ်ဝၼ်းၼၼ်ႉလႄႈမၼ်းႁႃဢၶႂၢင်ႉဢၼ်သၢင်ႇထုၵ်ႇႁႂ်ႈလႆႈဢဝ်မၼ်းၸဝ်ႈဢၢပ်ႈဢေႃႈ။
ဝၼ်းတီႈၼိုင်ႈၼႂ်းပွႆးၵိၼ်ၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈၼၼ်ႉ၊တပႄးၸဝ်ႈတင်းလၢႆမႃးၸူးတီႈ ၸဝ်ႈယေႇသု၊ သေလႄႈလဝ်ႈထၢမ်ဝႃႈ၊ “ၸဝ်ႈႁဝ်းၶႂ်ႈႁႂ်ႈႁဝ်းၶႃႈမႄးႁႅၼ်းပုၼ်ႈဢၼ်ၸဝ်ႈႁဝ်းတေၵိၼ်ပွႆး ပသၶႃႇ၊ ၵႃႈတီႈလႂ်ၶႃႈ၊” မိူဝ်ႈဢၼ်ဝႃႈၼင်ႇၼႆၸိုင်။
မၼ်းၸဝ်ႈၶိုၼ်းလၢတ်ႈလႄႈဝႃႈ၊ “သူၵႂႃႇၸူးၵႃႈတီႈႁိူၼ်းၵေႃႉၼိုင်ႈၵႃႈၼႂ်းဝဵင်းသေလႄႈလၢတ်ႈတီႈမၼ်းလႄႈဝႃႈ၊ ‘သြႃႇၸဝ်ႈသင်ႇလၢတ်ႈလႄႈဝႃႈ၊ၶိင်ႇၼႃႇရီႇၵဝ်ႁွတ်ႈမႃးယဝ်ႉ။ ၵဝ်ဢိၵ်ႇတင်းတပႄးၵဝ်တင်းလၢႆတေၶၢမ်ႇပွႆး ပသၶႃႇ၊ ၵႃႈၼႂ်းႁိူၼ်းမႂ်းဢေႃႈ၊’ ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။
တပႄးၸဝ်ႈၸိူဝ်းၼၼ်ႉၵေႃႈ၊ၵႃႈဢၼ် ၸဝ်ႈယေႇသု၊ သင်ႇလၢတ်ႈၼၼ်ႉမႄးႁႅၼ်းပွႆး ပသၶႃႇ၊ ဝႆႉဢေႃႈ။
မိူဝ်ႈဢၼ်ႁွတ်ႈထိုင်ၶိင်ႇႁူဝ်ၶမ်ႈၸိုင်၊ ၸဝ်ႈယေႇသု၊ ၼင်ႈၵိၼ်ပွႆး ပသၶႃႇ၊ လူၺ်ႈၵၼ်တင်းတပႄးၸဝ်ႈသိပ်းသွင်ပႃးၼၼ်ႉဢေႃႈ။-
ယၢမ်းမိူဝ်ႈဢၼ်ၶဝ်ယင်းတိုၵ်ႉၵိၼ်ယူႇၼၼ်ႉမၼ်းၸဝ်ႈလၢတ်ႈတီႈၶဝ်လႄႈဝႃႈ၊ “ၵဝ်ဝႃႈတီႈသူၸမ်ႉ၊ၼႂ်းသူၼႆႉၵေႃႉၼိုင်ႈတၵ်းဢဝ်ၵဝ်ဢၢပ်ႈဢေႃႈ၊” ဝႃႈၼင်ႇၼႆဢေႃႈ။
ၶဝ်ၸိူဝ်းၼၼ်ႉ၊တူၵ်းၸႂ်ၼႃႇလႄႈၵေႃႉၼိုင်ႈယဝ်ႉၵေႃႉၼိုင်ႈ၊ဢွၼ်ၵၼ်လဝ်ႈထၢမ်လႄႈဝႃႈ၊ “ၸဝ်ႈႁဝ်း။ ပဵၼ်ၵဝ်ၶႃႈၶႃႈႁိုဝ်း၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “ၵေႃႉဢၼ်ဢဝ်ၶဝ်ႈမုၼ်းၸုမ်ႇၼႂ်းဝၢၼ်ႁူမ်ႈလူၺ်ႈၵၼ်တင်းၵဝ်ၼၼ်ႉတၵ်းဢဝ်ၵဝ်ဢၢပ်ႈဢေႃႈ။-
ၸဝ်ႈလုၵ်ႈၵူၼ်း၊ တၵ်းလႆႈၶၢမ်ႇတၢႆၸိူဝ်ႉၼင်ႇဢၼ်တႅမ်ႈဝႆႉၵႃႈၼႂ်းၵျၢမ်းလိၵ်ႈၼၼ်ႉဢေႃႈ။ ၼႂ်းဝႃႈၼၼ်သေၵေႃႈၵေႃႉဢၼ်ဢဝ် ၸဝ်ႈလုၵ်ႈၵူၼ်း၊ ၶၢႆၼၼ်ႉ။ မၼ်းမီးဢႃႉမၢင်ႇၵလႃႇယဝ်ႉဢေႃႈ။ ပေႃးမၼ်းဢမ်ႇၵိူတ်ႇလဵင်ႉမႃးၸိုင်၊ယဵင်ႈၶႅၼ်းတၵ်းလီဢေႃႈ၊” ဝႃႈၼင်ႇၼႆဢေႃႈ။
ယုတႃႉဢိသၵႃႇရေႇဢုတ်ႈ၊ ၵေႃႉဢၼ်တၵ်းဢဝ်မၼ်းၸဝ်ႈၶၢႆၼၼ်ႉၵေႃႈပိုတ်ႇပၢၵ်ႇလဝ်ႈထၢမ်လႄႈဝႃႈ၊ “သြႃႇၸဝ်ႈ။ ၸဝ်ႈႁဝ်းၶႃႈၶႂ်ႈဝႃႈပဵၼ်ၵဝ်ၶႃႈၶႃႈႁိုဝ်း၊” ဝႃႈၼင်ႇၼႆလႄႈ။ မၼ်းၸဝ်ႈၵေႃႈဝႃႈ၊ “မႅၼ်ႈၼင်ႇဢၼ်မႂ်းလၢတ်ႈၼႆႉယဝ်ႉ၊” ဝႃႈၼင်ႇၼႆဢေႃႈ။
ၼႂ်းမိူဝ်ႈဢၼ်ၶဝ်ယင်းတိုၵ်ႉၵိၼ်ယူႇၼၼ်ႉၸိုင်၊ ၸဝ်ႈယေႇသု၊ ဢဝ်ၶဝ်ႈမုၼ်းလႄႈသူးတွင်းယွင်ႈယေႃးၵျေးၸူးၸဝ်ႈယဝ်ႉၸင်ႇ၊ ဝိတ်းၶဝ်ႈမုၼ်းသေယဝ်ႉ၊မႅင်ႇပၼ်တီႈတပႄးၸဝ်ႈတင်းလၢႆလႄႈလၢတ်ႈဝႃႈ၊ “ၶဝ်ႈမုၼ်းၼႆႉပဵၼ်တူဝ်ၵဝ်ဢေႃႈ။ ဢွၼ်ၵၼ်ဢဝ်လႄႈၵိၼ်တႃႉ၊” ဝႃႈၼင်ႇၼႆဢေႃႈ။
ဝၢႆးသေၼၼ်ႉ၊မၼ်းၸဝ်ႈယိပ်းဢဝ်ၵွၵ်းလႄႈယွင်ႈယေႃးၵျေးၸူးၸဝ်ႈယဝ်ႉၸင်ႇပၼ်တီႈၶဝ်လႄႈဝႃႈ၊ “သူၵူႈၵေႃႉၵူႈၵူၼ်းဢွၼ်ၵၼ်ၵိၼ်တႃႉ။-
ၵွၵ်းၼႆႉၸမ်ႉ၊ပဵၼ်လိူတ်ႈၵဝ်ဢၼ်ၸၢပ်ႈသႅင်ႇၵၼ်တင်းပတိၺိၺ်ႇၵတိၽြႃးပဵၼ်ၸဝ်ႈဢၼ်မႂ်ႇ၊လိူတ်ႈၵဝ်ဢၼ်သွၼ်းလေႃႇႁႂ်ႈလႆႈပွႆႇလွတ်ႈဢပျတ်ႈၵူၼ်းၼမ်ၼႃႇဢေႃႈ။-
ၵဝ်ဝႃႈတီႈသူၸမ်ႉ၊ၵဝ်တၵ်းဢမ်ႇၵိၼ်ၼမ်ႉမၢၵ်ႇၸပိတ်ႉၼႆႉထႅင်ႈတေႃႇထိုင်ႁွတ်ႈဝၼ်းဢၼ်ၵဝ်လႆႈၵိၼ်ၼမ်ႉမၢၵ်ႇၸပိတ်ႉဢၼ်မႂ်ႇလူၺ်ႈၵၼ်တင်းသူၼႂ်းမိူင်းပေႃႈၸဝ်ႈၵဝ်ပုၼ်ႉဢေႃႈ၊” ဝႃႈၼင်ႇၼႆဢေႃႈ။
လိုၼ်းၼၼ်ႉ၊ၶဝ်ႁဵတ်းၵႂၢမ်းထမ်ႇမႃႉသေယဝ်ႉ၊ဢွၵ်ႇၵႂႃႇၸူးၵႃႈတီႈလွႆ သၢၼ်ႇလုၼ်ႇ၊ ပုၼ်ႉသေဢေႃႈ။
မိူဝ်ႈၼၼ်ႉ၊ ၸဝ်ႈယေႇသု၊ လၢတ်ႈတီႈၶဝ်လႄႈဝႃႈ၊ “ၼႂ်းၶိုၼ်းၼႆႉၵမ်းလဵဝ်သူၵူႈၵေႃႉတၵ်းပၢႆႈပႅတ်ႈၵဝ်၊ဢၼ်တၵ်းမႅၼ်ႈၸွမ်းၼင်ႇတႅမ်ႈဝႆႉၵႃႈၼႂ်းၵျၢမ်းလိၵ်ႈဝႆႉဝႃႈ၊ ‘ၵဝ်တၵ်းဢဝ်တၢႆၵူၼ်းလဵင်ႉသူဝ်းလႄႈ၊သူဝ်းၵႃႈၼႂ်းၽုင်တၵ်းၽၢတ်ႇၽႄၵၼ်ဢေႃႈ၊’ မီးမႃးၼင်ႇၼႆၼၼ်ႉဢေႃႈ။-
ၼႂ်းဝႃႈၼၼ်သေၵေႃႈမိူဝ်ႈဢၼ်ၵဝ်လုၵ်ႉသေၵႃႈတၢင်တၢႆၶိုၼ်းလိပ်းယဝ်ႉၼၼ်ႉ၊ၵဝ်တၵ်းၵႂႃႇၵႃႈတီႈဢိူင်ႇ ၵႃႇလိလႄး၊ ပုၼ်ႉဢွၼ်တၢင်းသူဢေႃႈ၊” ဝႃႈၼင်ႇၼႆဢေႃႈ။
ပေႇတရု၊ ပိုတ်ႇပၢၵ်ႇလၢတ်ႈတီႈ ၸဝ်ႈယေႇသု၊ လႄႈဝႃႈ၊ “ပိၵ်ႉသမ်ႉၶဝ်ၸိူဝ်းၼႆႉၵူႈၵေႃႉတၵ်းပၢႆႈပႅတ်ႈၸဝ်ႈႁဝ်းသေၵေႃႈ၊ၵဝ်ၶႃႈတၵ်းဢမ်ႇပၢႆႈပႅတ်ႈၸဝ်ႈႁဝ်းလႃးလႃးၶႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ၸဝ်ႈယေႇသု၊ လၢတ်ႈတီႈ ပေႇတရု၊ လႄႈဝႃႈ၊ “ၵဝ်လၢတ်ႈတီႈမႂ်းၸမ်ႉ၊ၼႂ်းၶိုၼ်းၼႆႉၸူဝ်ႈဢၼ်ၵႆႇဢမ်ႇပႆႇၶၼ်ၼၼ်ႉၸိုင်၊မႂ်းတၵ်းဝႃႈမႂ်းဢမ်ႇႁုၸၵ်းၵဝ်ထူၼ်ႈထိုင်သၢမ်ပွၵ်ႈဢေႃႈ၊” ဝႃႈၼင်ႇၼႆဢေႃႈ။
ပေႇတရု၊ ၶိုၼ်းလၢတ်ႈလႄႈဝႃႈ၊ “ပိၵ်ႉသမ်ႉၵဝ်ၶႃႈတၵ်းလႆႈတၢႆလူၺ်ႈၸဝ်ႈႁဝ်းသေၵေႃႈၵဝ်ၶႃႈတၵ်းဢမ်ႇဝႃႈၸိူဝ်ႉၼင်ႇၼၼ်သေပွၵ်ႈၶႃႈ၊” ဝႃႈၼင်ႇၼႆဢေႃႈ။ တပႄးၸဝ်ႈတၢင်ႇၵေႃႉၸိူဝ်းၼၼ်ႉၵေႃႈဢွၼ်ၵၼ်လၢတ်ႈမိူၼ်မိူၼ်ၵၼ်ဢေႃႈ။
ၸဝ်ႈယေႇသု၊ ဢိၵ်ႇတင်းတပႄးၸဝ်ႈၸိူဝ်းၼၼ်ႉ၊ ႁွတ်ႈထိုင်ၵႂႃႇၵႃႈတီႈဢၼ်ႁွင်ႉႁဵၵ်ႈဝႃႈ၊ ၵေႇသႃႉသေႇမၼိ၊ ၼၼ်ႉယဝ်ႉၸင်ႇ၊လၢတ်ႈတီႈၶဝ်လႄႈဝႃႈ၊ “ၸူဝ်ႈဢၼ်ၵဝ်ၵႂႃႇသူးတွင်းၵႃႈတီႈပုၼ်ႉယူႇၼၼ်ႉၸိုင်၊သူဢွၼ်ၵၼ်ၼင်ႈပႂ်ႉထႃႈၵႃႈတီႈၼႆႈတႃႉ၊” ဝႃႈၼင်ႇၼႆသေယဝ်ႉ၊-
ႁွင်ႉဢဝ် ပေႇတရု၊ တင်းလုၵ်ႈၸၢႆး ၸေႇပေႇတႄး၊ သွင်ၵေႃႉၼၼ်ႉပႃးလူၺ်ႈမၼ်းၸဝ်ႈၵႂႃႇဢေႃႈ။ မိူဝ်ႈၼၼ်ႉ၊ တၢင်းဢၼ်မႆႈၸႂ်ၶီၸႂ်လႄႈယၢပ်ႇၸႂ်ၵိၼ်းၸႂ်ၼႃႇၼၼ်ႉ၊ တူၵ်းႁွတ်ႈၵႃႈၼိူဝ်မၼ်းၸဝ်ႈၼႃႇလူင်လၢင်လႄႈ၊-
လၢတ်ႈတီႈၶဝ်လႄႈဝႃႈ၊ “ၸႂ်ၵဝ်ၼႆႉတုၵ်ႉၶႃႉၼႃႇလူင်လၢင် ထၢၼ်ႈပေႃးၸမ်တၵ်းတၢႆဢေႃႈ။ ယူႇၵႃႈတီႈၼႆႈလႄႈပႂ်ႉထႃႈယူႇလူၺ်ႈၵၼ်တင်းၵဝ်တႃႉ၊” ဝႃႈၼင်ႇၼႆဢေႃႈ။
မၼ်းၸဝ်ႈၶိုၼ်ႈၵႂႃႇပႃႈၼႃႈထႅင်ႈဢိတ်းၼိုင်ႈသေယဝ်ႉ၊ ၶုပ်ႉမူပ်ႇလႄႈသူးတွင်းဝႃႈ၊ “ဢူဝ်း၊ပေႃႈၸဝ်ႈၵဝ်တီႈၶႃႈ။ ပေႃးပဵၼ်လႆႈၸိုင်ၶႅၼ်းတေႃႈႁႂ်ႈၵွၵ်းၼႆႉပိူင်ႈသေၵဝ်ၶႃႈသေၵမ်းတီႈၶႃႈ။ ၼႂ်းဝႃႈၼၼ်သေၵေႃႈ၊ယႃႇႁႂ်ႈပဵၼ်ဢလူဝ်ႇၵဝ်ၶႃႈ၊ ႁႂ်ႈပဵၼ်ဢလူဝ်ႇၸဝ်ႈႁဝ်းသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၶိုၼ်းမႃးတီႈတပႄးၸဝ်ႈသၢမ်ၵေႃႉၼၼ်ႉလႄႈထူပ်းႁၼ်ၶဝ်ၼွၼ်းလပ်းယူႇသေယဝ်ႉ၊လၢတ်ႈတီႈ ပေႇတရု၊ လႄႈဝႃႈ၊ “သူသၢမ်ၵေႃႉၼႆႉတႃႇတေပႂ်ႉထႃႈလူၺ်ႈၵဝ်ၶိင်ႇၸူဝ်ႈၼိုင်ႈမွင်းၵူၺ်းၼၼ်ႉၵေႃႈဢမ်ႇတၢတ်ႈၼိူင်ႇလႆႈႁိုဝ်း။-
လွင်ႈၼင်ႇႁိုဝ်တၵ်းဢမ်ႇလႆႈလူင်းၵႂႃႇၵႃႈၼႂ်းတၢင်းဢၼ် ၸၢမ်းတူၺ်းယႃႉၵဝ်းႁႅင်းၼႃႇၼၼ်ႉၸိုင်၊သူးတွင်းလႄႈပႂ်ႉထႃႈယူႇတႃႉ။ ၸႂ်ဝိၺိၺ်ႇႁႅင်းၸေႇတၼႃႇသေၵေႃႈၼိူဝ်ႉလိူတ်ႈၵူၼ်းႁႅင်းလဵၵ်ႉၼႃႇဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈသမ်ႉၵႂႃႇထႅင်ႈၵမ်းၼိုင်ႈလႄႈသူးတွင်းလႄႈဝႃႈ၊ “ဢူဝ်းပေႃႈၸဝ်ႈၵဝ်ၶႃႈ။ ပေႃးၵွၵ်းၼႆႉဢမ်ႇဝႄႈပိူင်ႈသေၵဝ်ၶႃႈလႆႈၸိုင်၊ၵဝ်ၶႃႈတေလႆႈၵိၼ်ၵွၵ်းၼႆႉလႄႈၶႅၼ်းတေႃႈႁႂ်ႈပဵၼ်ၸွမ်းဢလူဝ်ႇၸဝ်ႈႁဝ်းမီးၼၼ်ႉသေၵမ်းတီႈၶႃႈ၊” ဝႃႈၼင်ႇၼႆသူးတွင်းယဝ်ႉၸင်ႇ၊-
ၶိုၼ်းမႃးၸူးတီႈၶဝ်ထႅင်ႈလႄႈထူပ်းႁၼ်ၶဝ်ၼွၼ်းလပ်းယူႇထၢၼ်ႈပေႃးဢမ်ႇမိုၼ်းတႃလႆႈၼၼ်ႉဢေႃႈ။
မၼ်းၸဝ်ႈၸင်ႇပႅတ်ႈၶဝ်ဝႆႉသေယဝ်ႉ၊သမ်ႉၶိုၼ်းၵႂႃႇသူးတွင်းထႅင်ႈပွၵ်ႈတီႈသၢမ်၊သူးတွင်းၸွမ်းၼင်ႇၶေႃႈၵႂၢမ်းၵမ်းဢွၼ်တၢင်းၼၼ်ႉဢေႃႈ။-
လိုၼ်းၼၼ်ႉ၊မၼ်းၸဝ်ႈၶိုၼ်းမႃးၸူးတီႈတပႄးၸဝ်ႈၸိူဝ်းၼၼ်ႉလႄႈလၢတ်ႈဝႃႈ၊ “သူယင်းတိုၵ်ႉလိုဝ်ႈႁိူဝ်ႉၼွၼ်းလပ်းယူႇလူးၵွၼ်ႇႁိုဝ်း။ တူၺ်းလူး။ ၶိင်ႇၼႃႇရီႇဢၼ်တၵ်းဢဝ် ၸဝ်ႈလုၵ်ႈၵူၼ်း၊ ဢၢပ်ႈၼႂ်းမိုဝ်းၵူၼ်းႁၢႆႉတင်းလၢႆၼၼ်ႉမႃးထိုင်ယဝ်ႉ။-
လုၵ်ႉတႃႉ။ ဢွၼ်ၵၼ်ၵႂႃႇတႃႉႁဝ်း။ ႁၼ်ႁိုဝ်း။ ၵေႃႉဢၼ်ဢဝ်ၵဝ် ဢၢပ်ႈၼၼ်ႉႁွတ်ႈမႃးယဝ်ႉ၊” ဝႃႈၼင်ႇၼႆဢေႃႈ။
ၼႂ်းမိူဝ်ႈဢၼ် ၸဝ်ႈယေႇသု၊ လၢတ်ႈၸိူဝ်ႉၼင်ႇၼႆ ယူႇၼၼ်ႉၸိုင်၊ ယုတႃႉဢိသၵႃႇရေႇဢုတ်ႈ၊ ဢၼ်ၶဝ်ႈပႃးၵႃႈၼႂ်းသိပ်းသွင်ပႃးၼၼ်ႉႁွတ်ႈမႃးလူၺ်ႈၵၼ်တင်းၵူၼ်းၼမ်ၼႃႇဢၼ်ပႃးလၢပ်ႇပႃးလႅဝ်းတင်းၶွၼ်ႉပေႃႉတင်းလၢႆ ဢေႃႈ။ ၶဝ်ၸိူဝ်းၼၼ်ႉပဵၼ်ၵူၼ်းဢၼ်ယဵၸ်ႈပရေႃးႁဵၵ်ႈလူင်ၶဝ်တင်းၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၽႃႇသႃႇ ၵျူး၊ ၶဝ်ပွႆႇၸႂ်ႉမႃးဢေႃႈ။-
ၵွပ်ႈပိူဝ်ႈၵေႃႉဢၼ်ဢဝ်မၼ်းၸဝ်ႈၶၢႆၼၼ်ႉ၊သႂ်ႇသူပ်းသႂ်ႇၵႂၢမ်းဝႆႉလႄႈဝႃႈ၊ “ပေႃးၵေႃႉဢၼ်ၵဝ်ၼူမ်လႄႈတၵ်ႉလၢတ်ႈၼၼ်ႉပဵၼ်မၼ်းယဝ်ႉ။ တိဢဝ်တႃႉ၊” ဝႃႈၼင်ႇၼႆဝႆႉယဝ်ႉဢေႃႈ။
မိူဝ်ႈဢၼ် ယုတႃႉ၊ ႁွတ်ႈမႃးၼၼ်ႉမၼ်းၵႂႃႇၸူးတီႈ ၸဝ်ႈယေႇသု၊ ၵမ်းလဵဝ်လႄႈလၢတ်ႈဝႃႈ၊ “သြႃႇၸဝ်ႈ။ ႁႂ်ႈမီးမၢင်ႇၵလႃႇသေၵမ်းၶႃႈ၊” ဝႃႈၼင်ႇၼႆသေလႄႈၼူမ်မၼ်းၸဝ်ႈဢေႃႈ။
ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “ၵေႃႉ႟။ ၵႃႈၼင်ႇဢၼ်မႂ်းမႃးႁႂ်ႈလႆႈႁဵတ်းၼၼ်ႉႁဵတ်းဝႆးဝႆးတႃႉ၊” မိူဝ်ႈဢၼ်ဝႃႈၼင်ႇၼႆၸိုင်၊ၶဝ်ၼၼ်ႉမႃးလႄႈတိမတ်ႉဢဝ်မၼ်းၸဝ်ႈသေဢေႃႈ။-
ၼႂ်းၶဝ်ၸိူဝ်းဢၼ်ပႃးၸွမ်း ၸဝ်ႈယေႇသု၊ ၼၼ်ႉၵေႃႉၼိုင်ႈ၊ ထွတ်ႇလႅဝ်းမၼ်းၽၼ်းမႅၼ်ႈဝၢၼ်ႁူၵူၼ်းၵေႃႉၼိုင်ႈ၊ဢၼ်ပဵၼ်ၶႃႈၶုၼ်ယဵၸ်ႈပရေႃးႁဵၵ်ႈၼၼ်ႉၶၢတ်ႇတူၵ်းၵႂႃႇဢေႃႈ။-
ၸဝ်ႈယေႇသု၊ လၢတ်ႈတီႈၵေႃႉၼၼ်ႉလႄႈဝႃႈ၊ “ဢဝ်လႅဝ်းမႂ်းသႂ်ႇၶိုၼ်းၵႃႈၼႂ်းၵပ်းမၼ်းသေတႃႉ။ ၵေႃႉဢၼ်ယိပ်းလႅဝ်းၼၼ်ႉၸၢင်ႈတၢႆလူၺ်ႈလႅဝ်းၵူႈၵေႃႉၵူႈၵူၼ်းဢေႃႈ။-
မႂ်းထၢင်ႇၵဝ်တၢတ်ႈၼိူင်ႇလႆႈပုၼ်ႈဢၼ်တၵ်းယွၼ်းဢဝ်တၢင်းၸွႆႈတၢင်းထႅမ်ၵႃႈတီႈပေႃႈၸဝ်ႈၵဝ်၊ႁႂ်ႈပွႆႇၸႂ်ႉတပ်ႉတမၢၼ်ႇၵၢင်ႁၢဝ်ဢမ်ႇၵႃးသိပ်းသွင်တပ်ႉမႃးၵႃႈတီႈၵဝ်ၼႆႉၵမ်းလဵဝ်ၼၼ်ႉႁိုဝ်း။-
ပေႃးလွင်ႈတၢင်းၸိူဝ်းၼႆႉဢမ်ႇပဵၼ်မႃးၸိုင်၊လွင်ႈဢၼ်ၵျၢမ်းလိၵ်ႈတႅမ်ႈဝႆႉၼၼ်ႉ၊တၵ်းပျေႉၸုမ်ႇလႆႈၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ၶိင်ႇၼၼ်ႉ၊ ၸဝ်ႈယေႇသု၊ လၢတ်ႈတီႈမူႇၵူၼ်းတင်းလၢႆလႄႈဝႃႈ၊ “သူမၢတ်ႈၵဝ်ပဵၼ်ၸူၼ်ဢၼ်ဢွၵ်ႇပၢႆႈလႄႈသူပႃးဢဝ်လၢပ်ႇလႅဝ်းတင်းၶွၼ်ႉပေႃႉသေယဝ်ႉ၊မႃးတိဢဝ်ၵဝ်လူင်ပႄႇ။ မိူဝ်ႈဢၼ်ၵဝ်ယူႇလူၺ်ႈၵၼ်တင်းသူၵူႈဝၼ်းလႄႈသင်ႇသွၼ်ပၼ်ၵႃႈၼႂ်းၵျွင်းပိၵ်ႈမၢၼ်ႇၸဝ်ႈယူႇၼၼ်ႉသူဢမ်ႇတိဢဝ်ၵဝ်။-
ၼႂ်းဝႃႈၼၼ်သေၵေႃႈ၊ၵႃႈၼင်ႇဢၼ်ပဵၼ်မႃးၸိူဝ်းၼႆႉ၊ လႆႈပျေႉၸုမ်ႇလႄႈပဵၼ်မႃးၸွမ်းၵႃႈၼင်ႇဢၼ်ပရေႃးၽႅတ်ႈ တင်းလၢႆတႅမ်ႈဝႆႉၵႃႈၼႂ်းၵျၢမ်းလိၵ်ႈၼၼ်ႉယဝ်ႉ၊” ဝႃႈၼင်ႇၼႆဢေႃႈ။ မိူဝ်ႈၼၼ်ႉတပႄးၸဝ်ႈတင်းလၢႆပႅတ်ႈဝႆႉမၼ်းၸဝ်ႈသေလႄႈဢွၼ်ၵၼ်လႅၼ်ႈပၢႆႈဢေႃႈ။
ၶဝ်ၸိူဝ်းဢၼ်တိဢဝ် ၸဝ်ႈယေႇသု၊ တင်းလၢႆၼၼ်ႉဢဝ်မၼ်းၸဝ်ႈၵႂႃႇသူင်ႇၵႃႈတီႈၶုၼ်ယဵၸ်ႈပရေႃးႁဵၵ်ႈ ၵယႃႇၽႃႉ၊ ဢေႃႈ။ ၵႃႈတီႈၼၼ်ႈသြႃႇမေႃၵျၢမ်း ထမ်ႇမႃႉၶဝ်ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆၸုတုမ်ၵၼ်ယူႇဝႆႉယဝ်ႉဢေႃႈ။-
ပေႇတရု၊ ယူႇဢမ်ႇၵႆဢမ်ႇၸမ်လႄႈၸွမ်းလင်ၶဝ်ၵႂႃႇထိုင်တီႈၼႂ်းပၢင်ႇဝၢင်းႁေႃၶုၼ်ယဵၸ်ႈပရေႃးႁဵၵ်ႈၼၼ်ႉဢေႃႈ။ ႁႂ်ႈပေႃးလႆႈႁုလွင်ႈဢၼ်တၵ်းပဵၼ်မႃးၸိူဝ်ႉၼင်ႇႁိုဝ်ၼၼ်ႉၸိုင်၊မၼ်းၶဝ်ႈလႄႈၼင်ႈလူၺ်ႈၵၼ်တင်းၵူၼ်းပႂ်ႉယၢမ်းၸိူဝ်းၼၼ်ႉယူႇဢေႃႈ။-
မိူဝ်ႈၼၼ်ႉ၊ယဵၸ်ႈပရေႃးႁဵၵ်ႈလူင်ဢိၵ်ႇတင်းၶုၼ်လုမ်းၸိူဝ်းဢၼ်ၶဝ်ႈပႃးၼႂ်းလုမ်းလူင်ဢၼ်ၸီႇယၢင်ႇတြႃးတင်းသဵင်ႈတင်းလူင်ဢွၼ်ၵၼ်ႁႃသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈၵႃႈၼိူဝ် ၸဝ်ႈယေႇသု၊ ႁႂ်ႈလႆႈဢဝ်မၼ်းၸဝ်ႈတၢႆဢေႃႈ။-
ပိၵ်ႉသမ်ႉၵူၼ်းၼမ်ၼႃႇမႃးၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈၼမ်ၼႃႇထၼ်ႇၼၼ်ႉသေၵေႃႈ၊ဢမ်ႇထူပ်းဢမ်ႇႁၼ်သၢၵ်ႈသေႇသေၸိူဝ်ႉသေပိူင်။ လိုၼ်းၼၼ်ႉ၊ၵူၼ်းသွင်ၵေႃႉသုတ်ႉၶိုၼ်ႈၽၢႆႇၼႃႈလႄႈ၊-
လၢတ်ႈဝႃႈ၊ “ၵူၼ်းၵေႃႉၼႆႉလၢတ်ႈဝႃႈ၊ ‘ၵဝ်တၢတ်ႈၼိူင်ႇၵိူၼ်ႇယႃႉၵျွင်းပိၵ်ႈမၢၼ်ႇၽြႃးပဵၼ်ၸဝ်ႈသေလႄႈၼႂ်းသၢမ်ဝၼ်းၶိုၼ်းပူၵ်းၶိုၼ်းတင်ႈလႆႈဢေႃႈ၊’ ဝႃႈၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၶုၼ်ယဵၸ်ႈပရေႃးႁဵၵ်ႈလုၵ်ႉၸုၵ်းသေလႄႈလၢတ်ႈတီႈ ၸဝ်ႈယေႇသု၊ လႄႈဝႃႈ၊ “တၢင်းဢၼ်ၶဝ်ယူႇၽၢႆႇၼိုင်ႈတင်းမႂ်းလႄႈႁဵတ်းဢမုတေႃႇမႂ်းၼၼ်ႉ၊မႂ်းဢမ်ႇၸၢင်ႈၶိုၼ်းတွပ်ႇၵႃႈသင်ယဝ်ႉႁိုဝ်း၊” ဝႃႈၼင်ႇၼႆထၢမ်သေၵေႃႈ၊-
မၼ်းၸဝ်ႈယူႇတဵတ်ႇတဵတ်ႇဝႆႉယူႇဢေႃႈ။ ၶုၼ်ယဵၸ်ႈပရေႃးႁဵၵ်ႈသမ်ႉထၢမ်ထႅင်ႈလႄႈဝႃႈ၊ “တိူင်ႇၵၢဝ်ႇၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉသေယဝ်ႉ၊ထၢမ်တီႈမႂ်းၸမ်ႉ၊လွင်ႈဢၼ်မႂ်းပဵၼ် ၸဝ်ႈၶရိၸ်ႈ၊ လုၵ်ႈၽြႃးပဵၼ်ၸဝ်ႈဝႃႈၼႆၸႂ်ႈတႄႉယူႇႁိုဝ်း၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈၶိုၼ်းလၢတ်ႈလႄႈဝႃႈ၊ “ပဵၼ်ၵႃႈၼင်ႇဢၼ်မႂ်းဝႃႈၼႆႉယဝ်ႉ။ ၵူၺ်းၵႃႈ၊ၵဝ်သမ်ႉလၢတ်ႈတီႈသူထႅင်ႈၸမ်ႉ၊ မိူဝ်းၼႃႈထႃႈလိုၼ်းသူတၵ်းလႆႈႁၼ် ၸဝ်ႈလုၵ်ႈၵူၼ်း၊ ၼင်ႈယူႇၵႃႈတီႈၽၢႆႇၶႂႃၸဝ်ႈဢၼၼ်ႇတႃႉတၼ်းၶူဝ်းသေလႄႈၶီႇမွၵ်ႇၵုမ်ႈလူင်းသေၵႃႈၼိူဝ်ၵၢင်ႁၢဝ်မႃးၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵွပ်ႈပိူဝ်ႈလႆႈငိၼ်းၵႂၢမ်းၸိူဝ်ႉၼင်ႇၼႆၼၼ်ႉၸိုင်၊ၶုၼ်ယဵၸ်ႈပရေႃးႁဵၵ်ႈၼၼ်ႉ၊ၸၵ်ႉသိၵ်ႇသိူဝ်ႈယၢဝ်းတူဝ်ၸဝ်ႈၵဝ်ႇသေလႄႈလၢတ်ႈဝႃႈ၊ “ၵေႃႉၼႆႉလၢတ်ႈပူၼ်ႉလၢတ်ႈလိူဝ်ၽြႃးပဵၼ်ၸဝ်ႈယဝ်ႉ။ ႁဝ်းလူဝ်ႇသၢၵ်ႈသေႇၸိူဝ်ႉၼင်ႇႁိုဝ်ထႅင်ႈ။-
သူၶႂ်ႈၸီႇယၢင်ႇၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။ ၶဝ်ၸိူဝ်းၼၼ်ႉၵေႃႈလၢတ်ႈလႄႈဝႃႈ၊ “မၼ်းထုၵ်ႇလီၶၢမ်ႇဢပျတ်ႈဢၼ်ထိူၵ်ႈလႆႈတၢႆဢေႃႈ၊” ဝႃႈၼင်ႇၼႆၽွမ်ႉၵၼ်ၸီႇယၢင်ႇဢေႃႈ။
မိူဝ်ႈၼၼ်ႉ၊ၶဝ်ထူမ်ႇၼမ်ႉလၢႆးသႂ်ႇၼႃႈမၼ်းၸဝ်ႈလႄႈဢဝ်တႃမိုဝ်းထုပ်ႉပေႃႉမၼ်းၸဝ်ႈဢေႃႈ။ ၵမ်ႈၽွင်ႈၸိူဝ်းဢၼ်ဢဝ်ၽႃႇမိုဝ်းတူပ်းၼႃႈမၼ်းၸဝ်ႈၼၼ်ႉ၊-
လၢတ်ႈလႄႈဝႃႈ၊ “ ၸဝ်ႈၶရိၸ်ႈ၊ ႟။ ဢဝ်တင်းၺၢၼ်ႇပရေႃးၽႅတ်ႈသေလႄႈႁေႃးလၢတ်ႈပၼ်တီႈႁဝ်းလွင်ႈဢၼ်ၽူႈလႂ်ပေႃႉယႅၼ်ႉၸဝ်ႈႁဝ်းၼၼ်ႉသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ၼႂ်းမိူဝ်ႈဢၼ် ပေႇတရု၊ ယင်းၼင်ႈယူႇၵႃႈၼွၵ်ႈပၢင်ႇဝၢင်းလုမ်းၶုၼ်ယဵၸ်ႈပရေႃးႁဵၵ်ႈယူႇၼၼ်ႉၸိုင်၊ၵူၼ်းၸႂ်ႉမႄႈယိင်းဢွၼ်ႇၵႃႈၼႂ်းႁိူၼ်းၶုၼ်ယဵၸ်ႈပရေႃးႁဵၵ်ႈၵေႃႉၼိုင်ႈ၊မႃးတီႈမၼ်းလႄႈလၢတ်ႈဝႃႈ၊ “မႂ်းၼႆႉၵေႃႈပဵၼ်ၵေႃႉဢၼ်ယူႇလူၺ်ႈၵၼ်တင်း ယေႇသု၊ ၵူၼ်းမိူင်း ၵႃႇလိလႄး၊ ၼၼ်ႉၵေႃႉၼိုင်ႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်ဝႃႈၼင်ႇၼႆၸိုင်၊မၼ်းထဵင်ပႅတ်ႈၽၢႆႇၼႃႈၵူၼ်းတင်းသဵင်ႈတင်းလူင်လႄႈဝႃႈ၊ “ၵဝ်ဢမ်ႇႁုလွင်ႈဢၼ်မႂ်းလၢတ်ႈၼႆႉ၊” ဝႃႈၼင်ႇၼႆယဝ်ႉၸင်ႇ၊-
ယၢင်ႈဢွၵ်ႇၵႂႃႇၵႃႈတီႈၽၵ်းတူဢၼ်ၶဝ်ႈပၢင်ႇဝၢင်းလုမ်းၼၼ်ႉဢေႃႈ။ မႄႈယိင်းဢွၼ်ႇတၢင်ႇၵေႃႉသမ်ႉမႃးႁၼ်မၼ်းလႄႈလၢတ်ႈတီႈၵူၼ်းၸိူဝ်းဢၼ်မီးယူႇၵႃႈတီႈႁိမ်းၼၼ်ႉလႄႈဝႃႈ၊ “မၼ်းပဵၼ်ၵေႃႉဢၼ်ယူႇလူၺ်ႈၵၼ်တင်း ယေႇသု၊ ၵူၼ်းဝဵင်း ၼႃႇၸရႅတ်ႈ၊ ၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ပေႇတရု၊ သမ်ႉထဵင်ပႅတ်ႈထႅင်ႈလႄႈဝႃႈ၊ “ၵဝ်တိူင်ႇၵၢဝ်ႇၵႂၢမ်းသဵတ်ႈၸႃႇဝႃႈ။ ၵဝ်ဢမ်ႇႁုၸၵ်းၵူၼ်းၵေႃႉၼၼ်ႉ၊” ဝႃႈၼင်ႇၼႆဢေႃႈ။
ယူႇထႅင်ႈၵမ်းဢွၼ်ႇၼိုင်ႈၵူၺ်း၊ၵူၼ်းၸိူဝ်းဢၼ်ၸုၵ်းယူႇၵႃႈတီႈႁိမ်းၼၼ်ႉမႃးတီႈ ပေႇတရု၊ လႄႈဝႃႈ၊ “ၸႂ်ႈတႄႉယဝ်ႉ။ မႂ်းပဵၼ်ၵူၼ်းဢၼ်ၶဝ်ႈပႃးၵႃႈၼႂ်းၶဝ်ဢေႃႈ။ ထွၵ်ႈလူၺ်ႈသဵင်ၵႂၢမ်းမႂ်းလႄႈႁုလွင်ႈမႂ်းလႆႈဢေႃႈ၊” ဝႃႈၼင်ႇၼႆဢေႃႈ။
ပေႇတရု၊ ၵေႃႈၶိုၼ်းထဵင်ပႅတ်ႈထႅင်ႈလႄႈဝႃႈ၊ “ၵဝ်တိူင်ႇၵၢဝ်ႇၵႂၢမ်းသဵတ်ႈၸႃႇလႄႈဝႃႈ၊ပေႃးၵဝ်ဢမ်ႇလၢတ်ႈၵႂၢမ်းဢၼ်ၸိုဝ်ႈဢၼ်ၸႂ်ႈၸိုင်၊ႁႂ်ႈၽြႃးပဵၼ်ၸဝ်ႈၸီႇယၢင်ႇၵဝ်တႃႉ။ ၵဝ်ဢမ်ႇႁုၸၵ်းၵူၼ်းၵေႃႉၼၼ်ႉ၊” ဝႃႈၼင်ႇၼႆယဝ်ႉၵေႃႈၵႆႇၶၼ်ၵမ်းလဵဝ်ဢေႃႈ။-
ပေႇတရု၊ ၶုၵ်းၸႂ်လႆႈၵႂၢမ်းဢၼ် ၸဝ်ႈယေႇသု၊ လၢတ်ႈဝႆႉလႄႈဝႃႈ၊ “ၸူဝ်ႈဢၼ်ၵႆႇဢမ်ႇပႆႇၶၼ်ၼၼ်ႉမႂ်းတၵ်းထဵင်ပႅတ်ႈၵဝ်ထူၼ်ႈထိုင်သၢမ်ပွၵ်ႈဢေႃႈ၊” ဝႃႈၼင်ႇၼႆၼၼ်ႉသေယဝ်ႉ၊ဢွၵ်ႇၵႂႃႇၵႃႈၼွၵ်ႈသေႁွင်ႉႁႆႈထိုင်ၸႂ်ထိုင်ၶေႃးၼႃႇလူင်လၢင်ယူႇဢေႃႈ။
မိူဝ်ႈဢၼ်ႁွတ်ႈထိုင်ၶိင်ႇႁူဝ်ၼႂ်ၸဝ်ႉၸဝ်ႉၸိုင်၊ၵႃႈဢၼ်ပဵၼ်ယဵၸ်ႈပရေႃးႁဵၵ်ႈ လူင်ၶဝ်၊ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းသဵင်ႈတင်းလူင်ဢွၼ်ၵၼ်ႁႃလွင်ႈႁႃတၢင်းႁႂ်ႈလႆႈဢဝ် ၸဝ်ႈယေႇသု၊ တၢႆဢေႃႈ။-
ၶဝ်ၸင်ႇမတ်ႉမိုဝ်းမၼ်းၸဝ်ႈသေယဝ်ႉ၊ဢဝ်မၼ်းၸဝ်ႈၵႂႃႇဢၢပ်ႈၵႃႈတီႈၶုၼ် ပွၼ်ႇတိပိလတ်ႉ၊ ဢၼ်ပဵၼ်ၶုၼ် ရူဝ်းမႃႉ၊ ၼၼ်ႉဢေႃႈ။
မိူဝ်ႈဢၼ် ယုတႃႉဢိသၵႃႇရေႇဢုတ်ႈ၊ ၵေႃႉဢၼ်ဢဝ် ၸဝ်ႈယေႇသု၊ ၶၢႆပႅတ်ႈၼၼ်ႉ၊လႆႈႁုလွင်ႈဢၼ်မၼ်းၸဝ်ႈလႆႈၶၢမ်ႇတၢင်းဢၼ်ၸီႇယၢင်ႇဢဝ်တၢႆၼၼ်ႉၸိုင်၊ၶုၵ်းၸႂ်လႆႈတၢင်းၽိတ်းမၼ်းလႄႈဢဝ်ငိုၼ်းသၢမ်သိပ်းၶႅပ်းၼၼ်ႉၵႂႃႇပၼ်ၶိုၼ်းတီႈယဵၸ်ႈပရေႃးႁဵၵ်ႈလူင်ၶဝ်၊ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ် ၵျူး၊ ၶဝ်ၸိူဝ်းၼၼ်ႉသေလႄႈ၊-
လၢတ်ႈဝႃႈ၊ “ၵွပ်ႈပိူဝ်ႈၵဝ်ၶႃႈလႆႈဢဝ်ၵေႃႉဢၼ်ၵၢင်းလွတ်ႈတင်းဢပျတ်ႈၼၼ်ႉဢၢပ်ႈမႅၼ်ႈႁႂ်ႈလႆႈဢဝ်တၢႆၼၼ်ႉၵဝ်ၶႃႈၽိတ်းယဝ်ႉ၊” ဝႃႈၼင်ႇၼႆဢေႃႈ။ ၶဝ်ၵေႃႈလၢတ်ႈလႄႈဝႃႈ၊ “ဢမ်ႇသႅင်ႇၵၼ်တင်းႁဝ်းၵႃႈသင်။ မႂ်းတူၺ်းလႄႈႁဵတ်းၵူၺ်းမႂ်းတႃႉ၊” ဝႃႈၼင်ႇၼႆဢေႃႈ။
ယုတႃႉ၊ ၵေႃႈဢဝ်ငိုၼ်းၼၼ်ႉထိမ်ႈပႅတ်ႈဝႆႉၵႃႈၼႂ်းၵျွင်းပိၵ်ႈမၢၼ်ႇၸဝ်ႈသေယဝ်ႉဢွၵ်ႇၵႂႃႇသေဢေႃႈ။ မိူဝ်ႈဢၼ်ႁွတ်ႈထိုင်ၵႂႃႇတီႈၼိုင်ႈၼၼ်ႉမၼ်းၶႅၼ်ၶေႃးတူဝ်ၸဝ်ႈၵဝ်ႇတၢႆသေဢေႃႈ။
ယဵၸ်ႈပရေႃးႁဵၵ်ႈလူင်ၸိူဝ်းၼၼ်ႉၵဵပ်းဢဝ်ငိုၼ်းၼၼ်ႉသေယဝ်ႉ၊ လၢတ်ႈလႄႈဝႃႈ၊ “ပိူဝ်ႈဢၼ်ငိုၼ်းၼႆႉပဵၼ်ၵႃႈလိူတ်ႈလႄႈဢမ်ႇလီဢဝ်သႂ်ႇၼႂ်းၽၼ်ႇတႃႇၸဝ်ႈ၊” ဝႃႈၼင်ႇၼႆယဝ်ႉၸင်ႇ၊-
ၶဝ်ၶိုင်ပွင်ၵၼ်လွင်ႈၼၼ်ႉသေယဝ်ႉ၊ဢဝ်ငိုၼ်းၼၼ်ႉသိုဝ်ႉၵႂၢၵ်ႈလိၼ်ၸၢင်ႈပၼ်ႈမေႃႈ၊ပုၼ်ႈတႃႇႁႂ်ႈပဵၼ်ပႃႇႁဵဝ်ႈၵူၼ်းတၢင်ႇၸိူဝ်ႉတၢင်ႇၶိူဝ်းတၢင်းလၢႆဢေႃႈ။-
ပိူဝ်ႈၼႆလႄႈပႃႇႁဵဝ်ႈၼၼ်ႉ၊ႁွင်ႉႁဵၵ်ႈၸိုဝ်ႈဝႃႈ၊ “ၵႂၢၵ်ႈလိၼ်လိူတ်ႈ” တေႃႇထိုင်ဝၼ်းမိူဝ်ႈလဵဝ်ဢေႃႈ။
ၵွပ်ႈၸိူဝ်ႉၼႆလႄႈလွင်ႈတၢင်းၼႆႉပျေႉၸုမ်ႇပဵၼ်ၸွမ်းၵႃႈၼင်ႇဢၼ်ပရေႃးၽႅတ်ႈ ယေႇရမိ၊ တႅမ်ႈဝႆႉဝႃႈ၊ “ၶဝ်ဢဝ်ငိုၼ်းသၢမ်သိပ်းၶႅပ်း၊ဢၼ်ၵူၼ်းမဵဝ်း ဢိသရေး၊ ၶဝ်ၽွမ်ႉၵၼ် တႅပ်းၵႃႈတႅပ်းၶၼ်မၼ်းၼၼ်ႉလႄႈ၊-
သိုဝ်ႉဢဝ်ၵႂၢၵ်ႈလိၼ်ၸၢင်ႈပၼ်ႈမေႃႈၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉတီႈၵဝ်ၼႆႉၼၼ်ႉဢေႃႈ၊” ဝႃႈၼင်ႇၼႆၼၼ်ႉဢေႃႈ။
ၸဝ်ႈယေႇသု၊ ၸုၵ်းယူႇၵႃႈတီႈၽၢႆႇၼႃႈၶုၼ် ရူဝ်းမႃႉ၊ ၼၼ်ႉလႄႈၶုၼ်ၼၼ်ႉၵေႃႈထၢမ်လႄႈဝႃႈ၊ “ၸွင်ႇမႂ်းၸႂ်ႈၶုၼ်ႁေႃၶမ်း ၵျူး၊ ႁိုဝ်း၊” ဝႃႈၼင်ႇၼႆဢေႃႈ။ မၼ်းၸဝ်ႈၶိုၼ်းလၢတ်ႈလႄႈဝႃႈ၊ “ပဵၼ်ၵႃႈၼင်ႇဢၼ်မႂ်းဝႃႈၼႆႉယဝ်ႉ၊” ဝႃႈၼင်ႇၼႆဢေႃႈ။-
ၵႃႈတီႈဢၼ်ယဵၸ်ႈပရေႃးႁဵၵ်ႈလူင်ၶဝ်၊ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၶဝ်တၢင်ႇဢပျတ်ႈၼၼ်ႉၸမ်ႉ၊မၼ်းၸဝ်ႈဢမ်ႇၶိုၼ်းတွပ်ႇသေၶေႃႈသေၵမ်းလႄႈယူႇဢေႃႈ။
မိူဝ်ႈၼၼ်ႉၶုၼ် ပိလတ်ႉ၊ ထၢမ်လႄႈဝႃႈ၊ “တၢင်းဢၼ်ၶဝ်ယူႇၽၢႆႇၼိုင်ႈတင်းမႂ်းလႄႈၶၢမ်ႇသၢၵ်ႈသေႇၼမ်ထၼ်ႇၼႆႉၼၼ်ႉမႂ်းဢမ်ႇငိၼ်းႁိုဝ်း၊” ဝႃႈၼင်ႇၼႆသေၵေႃႈ။
မၼ်းၸဝ်ႈယင်းဢမ်ႇၶိုၼ်းတွပ်ႇၶိုၼ်းလၢတ်ႈသေလႄႈယူႇၼၼ်ႉ၊ ၶုၼ် ပိလတ်ႉ၊ ၵေႃႈ၊ဢၢမ်းၼႃႇလူင်လၢင်ဢေႃႈ။
ၼႂ်းပွႆး ပသၶႃႇ၊ ၵူႈပီ၊ၶုၼ် ရူဝ်းမႃႉ၊ မီးထုင်းၸၢမ်ႇဢၼ်ပွႆႇပၼ်ၵူၼ်းထွင်ႇသေၵေႃႉၵေႃႉဢွၵ်ႇထွင်ႇ၊ဢၼ်မူႇၵူၼ်းတင်းလၢႆၽွမ်ႉၵၼ်ယွၼ်းႁႂ်ႈပွႆႇၼၼ်ႉဢေႃႈ။-
မိူဝ်ႈၼၼ်ႉ၊မီးၵူၼ်းထွင်ႇဢၼ်မီးၸိုဝ်ႈမီးသဵင်ဢၼ်လႆႈႁွင်ႉႁဵၵ်ႈၸိုဝ်ႈ ပႃႇရပ်ႉပႃႉ၊ ၼၼ်ႉၵေႃႉၼိုင်ႈဢေႃႈ။-
ပိူဝ်ႈၼႆလႄႈမိူဝ်ႈဢၼ်ၵူၼ်းၸုတုမ်မႃးၼမ်ၼႃႇယူႇၼၼ်ႉၶုၼ် ပိလတ်ႉ၊ ထၢမ်တီႈၶဝ်လႄႈဝႃႈ၊ “သူၶႂ်ႈႁႂ်ႈၵဝ်ပွႆႇၵူၼ်းထွင်ႇၵေႃႉလႂ်လွတ်ႈ။ ပႃႇရပ်ႉပႃႉ၊ ႁိုဝ်း။ ဢမ်ႇၼၼ်လႄႈ ယေႇသု၊ ဢၼ်ဝႃႈ ၶရိၸ်ႈ၊ ၼၼ်ႉႁိုဝ်း၊” ဝႃႈၼင်ႇၼႆဢေႃႈ။-
ၵွပ်ႈသင်လႄႈထၢမ်ၸိူဝ်ႉၼင်ႇၼႆၸမ်ႉ၊ၶုၼ်ၼၼ်ႉႁုလွင်ႈဢၼ်ၶဝ်ဢဝ်မၼ်းၸဝ်ႈဢၢပ်ႈၵွပ်ႈပိူဝ်ႈဢၼ်ၶဝ်သီႈၵေႉႁေႈတႃမၼ်းၸဝ်ႈၼၼ်ႉဢေႃႈ။
လိူဝ်သေၼၼ်ႉ၊ယၢမ်းမိူဝ်ႈဢၼ်ၶုၼ် ပိလတ်ႉ၊ ယင်းၼင်ႈၵႃႈၼိူဝ်ပလၢင်ႇတြႃးယူႇၼၼ်ႉ၊မေးမၼ်းပၼ်ၶၢဝ်ႇငၢဝ်းမႃးတီႈမၼ်းလႄႈဝႃႈ၊ “ယႃႇပေႁဵတ်းၵႃႈသင်တီႈၵေႃႉဢၼ်ၵၢင်းလွတ်ႈဢပျတ်ႈၼၼ်ႉသေၵမ်း။ ၵွပ်ႈပိူဝ်ႈတၢင်းဢၼ်ၼွၼ်းၽၼ်ႁၼ်ၶိုၼ်းၼႆႉလႄႈမိူဝ်ႈၼႆႉၵဝ်ၶႃႈၸႂ်ဢမ်ႇၶျၢမ်းသႃႇၼႃႇလူင်လၢင်လူၺ်ႈလွင်ႈမၼ်းၼၼ်ႉဢေႃႈ၊” ဝႃႈၼင်ႇၼႆသင်ႇလၢတ်ႈဢေႃႈ။
ယဵၸ်ႈပရေႃးႁဵၵ်ႈလူင်ၶဝ်၊ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆ၊တိုၵ်းယူင်းၵူၼ်းဢၼ်ၸုဢၼ်တုမ်ၵၼ်ယူႇၸိူဝ်းၼၼ်ႉယွၼ်းႁႂ်ႈပွႆႇပၼ် ပႃႇရပ်ႉပႃႉ၊ လႄႈႁႂ်ႈဢဝ် ၸဝ်ႈယေႇသု၊ တၢႆဢေႃႈ။-
ႁဵတ်းၼၼ်လႄႈၶုၼ်ၵေႃႈထၢမ်ၶဝ်ထႅင်ႈလႄႈဝႃႈ၊ “ၼႂ်းၶဝ်သွင်ၵေႃႉၼႆႉသူၶႂ်ႈႁႂ်ႈၵဝ်ပွႆႇၵေႃႉလႂ်ပၼ်သူ၊” မိူဝ်ႈဢၼ်ထၢမ်ၸိူဝ်ႉၼင်ႇၼႆၸိုင်၊ၶဝ်ၶိုၼ်းလၢတ်ႈလႄႈဝႃႈ၊ “ ပႃႇရပ်ႉပႃႉ၊ ၶႃႈဢေႃႈ၊” ဝႃႈၼင်ႇၼႆဢေႃႈ။
ၶုၼ်သမ်ႉထၢမ်ထႅင်ႈလႄႈဝႃႈ၊ “ပေႃးပဵၼ်ၸိူဝ်ႉၼင်ႇၼႆၸိုင်၊တီႈ ယေႇသု၊ ဢၼ်လႆႈႁွင်ႉႁဵၵ်ႈၸိုဝ်ႈ ၶရိၸ်ႈ၊ ၼၼ်ႉၵဝ်တၵ်းလႆႈႁဵတ်းၸိူဝ်ႉၼင်ႇႁိုဝ်၊” မိူဝ်ႈဢၼ်ဝႃႈၼင်ႇၼႆၸိုင်၊ၶဝ်ၽွမ်ႉၵၼ်လၢတ်ႈသဵင်လဵဝ်လႄႈဝႃႈ၊ “ဢဝ်မၼ်းတွၵ်ႇၸပ်းၵႃႈၼိူဝ်သဝ်မႆႉဝႃးမိုဝ်းသေၵမ်းၶႃႈ၊” ဝႃႈၼင်ႇၼႆဢေႃႈ။
ၶုၼ်ၶိုၼ်းထၢမ်လႄႈဝႃႈ၊ “ၵွပ်ႈသင်၊မၼ်းလႆႈႁဵတ်းဢပျတ်ႈသင်ယဝ်ႉ၊” ဝႃႈၼင်ႇၼႆသေၵေႃႈၶဝ်ယဵင်ႈၶႅၼ်းၵိဝ်သဵင်ႁွင်ႉသႅၼ်ႇလႄႈဝႃႈ၊ “ဢဝ်မၼ်းတွၵ်ႇၸပ်းၵႃႈၼိူဝ်သဝ်မႆႉဝႃးမိုဝ်းသေၵမ်းၶႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၶုၼ် ပိလတ်ႉ၊ ႁုႁၼ်လွင်ႈတၢင်းဢၼ်မၼ်းဢမ်ႇႁႄႉဢမ်ႇႁၢမ်ႈတၢင်းဢၼ်ယုင်ႈယၢင်ႈဢူၼ်ဢဵၼ်ၼၼ်ႉလႆႈယဝ်ႉၸိုင်၊ဢဝ်ၼမ်ႉသေလႄႈသုၵ်ႈမိုဝ်းတူဝ်ၸဝ်ႈၵဝ်ႇၵႃႈတီႈၽၢႆႇၼႃႈၵူၼ်းဢၼ်ၸုဢၼ်တုမ်ၵၼ်တင်းလၢႆသေယဝ်ႉ၊ လၢတ်ႈဝႃႈ၊ “ၵဝ်ဢမ်ႇၸၢပ်ႈသႅင်ႇၵၼ်တင်းတၢင်းဢၼ်ၵေႃႉၼႆႉလႆႈၶၢမ်ႇတၢႆၼႆႉယဝ်ႉ။ သူတူၺ်းလႄႈႁဵတ်းၵႂႃႇတႃႉ၊” ဝႃႈၼင်ႇၼႆဢေႃႈ။
မူႇၵူၼ်းတင်းလၢႆဢွၼ်ၵၼ်လၢတ်ႈလႄႈဝႃႈ၊ “ႁႂ်ႈၽေးတၢမ်ႇဢပျတ်ႈတၢင်းဢၼ်မၼ်းလႆႈတၢႆၼၼ်ႉတူၵ်းၼိူဝ်ႁူဝ်ႁဝ်းၶႃႈတေႃႇႁွတ်ႈၸူဝ်ႈလုၵ်ႈပၢၼ်လၢၼ်ႁဝ်းၶႃႈသေၵမ်းၶႃႈတႃႉ၊” ဝႃႈၼင်ႇၼႆလႄႈၶုၼ် ပိလတ်ႉ၊ ၵေႃႈပွႆႇလွတ်ႈ ပႃႇရပ်ႉပႃႉ၊ ပၼ်ၶဝ်သေဢေႃႈ။
တီႈ ၸဝ်ႈယေႇသု၊ ၸမ်ႉ၊ပေႃႉယႅၼ်ႉယဝ်ႉၸင်ႇဢၢပ်ႈပၼ်ၵႂႃႇႁႂ်ႈလႆႈတွၵ်ႇၸပ်းၵႃႈၼိူဝ်သဝ်မႆႉဝႃးမိုဝ်းဢေႃႈ။
မိူဝ်ႈၼၼ်ႉ၊ၵူၼ်းသိုၵ်းၶုၼ် ပိလတ်ႉ၊ ၼၼ်ႉ၊ဢဝ် ၸဝ်ႈယေႇသု၊ ၶဝ်ႈၵႂႃႇၵႃႈၼႂ်းႁေႃပၢင်တပ်ႉသေယဝ်ႉ၊ ႁွင်ႉၵူၼ်းသိုၵ်းတင်းတပ်ႉမႃးၸုတုမ်လွမ်ႉႁွပ်ႈၵႃႈတီႈမၼ်းၸဝ်ႈယဝ်ႉၸင်ႇ၊-
ထွတ်ႇၶူဝ်းၼုင်ႈမၼ်းၸဝ်ႈပႅတ်ႈလႄႈဢဝ်သိူဝ်ႈယၢဝ်းလႅင်ၵမ်ႇၽိုၼ်ၼိုင်ႈၼုင်ႈပၼ်ဢေႃႈ။-
ၶဝ်ဢဝ်ၶိူဝ်းၼၢမ်သၢၼ်ႁဵတ်းၶူၺ်ႇသရၽူႇသေလႄႈ၊သုပ်းသႂ်ႇပၼ်ၵႃႈၼိူဝ်ႁူဝ်မၼ်းၸဝ်ႈသေယဝ်ႉ၊ဢဝ်မႆႉဢေႃႈလႅမ်ႈၼိုင်ႈသႂ်ႇၼႂ်းမိုဝ်းၽၢႆႇၶႂႃမၼ်းၸဝ်ႈယဝ်ႉၸင်ႇ၊ၶဝ်ၶုပ်ႉမူပ်ႇၽၢႆႇၼႃႈမၼ်းၸဝ်ႈလႄႈႁဵတ်းပျၢၵ်ႈႁဵတ်းၶူဝ်တီႈမၼ်းၸဝ်ႈလႄႈဝႃႈ၊ “ၶုၼ်ႁေႃၶမ်း ယုတႃႉ၊ ၼႆႉ႟။ ႁႂ်ႈၸဝ်ႈႁဝ်းဢသၢၵ်ႈယိုၼ်းယၢဝ်းသေၵမ်းလူၺ်ႈ၊” ဝႃႈၼင်ႇၼႆသေယဝ်ႉ၊-
ၶဝ်ထူမ်ႇၼမ်ႉလၢႆးသႂ်ႇတီႈမၼ်းၸဝ်ႈလႄႈဢဝ်မႆႉဢေႃႈၼၼ်ႉပေႃႉယႅၼ်ႉႁူဝ်မၼ်းၸဝ်ႈဢေႃႈ။-
လိုၼ်းသေႁဵတ်းပျၢၵ်ႈႁဵတ်းၶူဝ်တီႈမၼ်းၸဝ်ႈယဝ်ႉၸိုင်၊ၶဝ်ထွတ်ႇသိူဝ်ႈယၢဝ်းၼၼ်ႉလႄႈဢဝ်ၶူဝ်းၼုင်ႈမၼ်းၸဝ်ႈၼၼ်ႉၶိုၼ်းၼုင်ႈမႆပၼ်သေယဝ်ႉ၊ဢဝ်ဢွၵ်ႇၵႂႃႇႁႂ်ႈလႆႈတွၵ်ႇတၢႆၵႃႈၼိူဝ်သဝ်မႆႉဝႃးမိုဝ်းဢေႃႈ။
ၼႂ်းမိူဝ်ႈဢၼ်ၶဝ်ဢွၵ်ႇၵႂႃႇယူႇၼၼ်ႉ၊ၶဝ်ႁူပ်ႉထူပ်းၵူၼ်းမိူင်း ၵုရေႇၼေႇ၊ ၵေႃႉၼိုင်ႈ၊ဢၼ်လႆႈၸိုဝ်ႈ သိမုၼ်ႇ၊ လႄႈတဵၵ်းငႅၼ်းႁႂ်ႈမၼ်းမႅၵ်ႇသဝ်မႆႉဝႃးမိုဝ်း ၸဝ်ႈယေႇသု၊ ဢေႃႈ။-
ၶဝ်ႁွတ်ႈထိုင်ၵႃႈတီႈဢၼ်လႆႈႁွင်ႉႁဵၵ်ႈၸိုဝ်ႈ ၵေႃးလႃႉၵေႃးထႃႉ၊ ဢၼ်ပွင်ႇဝႃႈၵွင်းၵွၵ်းႁူဝ်ၼၼ်ႉလႄႈ၊-
ၶဝ်ဢဝ်ၼမ်ႉမၢၵ်ႇၸပိတ်ႉသူမ်ႈလေႃးၵၼ်တင်းၼမ်ႉယႃႈၶူမ်သေယဝ်ႉ၊တိုၵ်းပၼ်ႁႂ်ႈမၼ်းၸဝ်ႈၵိၼ်ဢေႃႈ။ ၵူၺ်းၵႃႈ၊ မၼ်းၸဝ်ႈၸိမ်းတူၺ်းလႄႈဢမ်ႇၵိၼ်ၼမ်ႉၼၼ်ႉလႄႈယူႇဢေႃႈ။
ဝၢႆးသေၼၼ်ႉ၊ၶဝ်ဢဝ် ၸဝ်ႈယေႇသု၊ တွၵ်ႇၸပ်းၵႃႈၼိူဝ်သဝ်မႆႉဝႃးမိုဝ်းသေယဝ်ႉ၊ဢဝ်ၶူဝ်းၼုင်ႈမၼ်းၸဝ်ႈၼၼ်ႉၵေႃႈ၊ၶဝ်တူၵ်းၸႃႇၵွၵ်ႈသေၽႄမႅင်ႇၵၼ်ဢေႃႈ။-
လိုၼ်းၼၼ်ႉ၊ၶဝ်ၼင်ႈၵႃႈတီႈၼၼ်ႈလႄႈပႂ်ႉတူၺ်းမၼ်းၸဝ်ႈယူႇဢေႃႈ။-
ၵႃႈၼိူဝ်ႁူဝ်မၼ်းၸဝ်ႈၼၼ်ႉၵေႃႈ၊ၶဝ်ဢဝ်လိၵ်ႈဢၼ်ၽုၺ်ႇဢပျတ်ႈမၼ်းၸဝ်ႈဢၼ်ဝႃႈ၊ “ၵေႃႉၼႆႉပဵၼ် ယေႇသု၊ ၶုၼ်ႁေႃၶမ်း ၵျူး၊ ဢေႃႈ၊” ဝႃႈၼင်ႇၼႆၼၼ်ႉတွၵ်ႇၸပ်းႁူဝ်သဝ်ဝႆႉဢေႃႈ။-
မိူဝ်ႈၼၼ်ႉ၊ၶဝ်ဢဝ်ၸူၼ်သွင်ၵေႃႉတွၵ်ႇၸပ်းၵႃႈၼိူဝ်သဝ်မႆႉဝႃးမိုဝ်းၶဝ်လူၺ်ႈၵၼ်တင်းမၼ်းၸဝ်ႈ၊ၽၢႆႇၶႂႃၸဝ်ႈၵေႃႉၼိုင်ႈၽၢႆႇသၢႆႉၸဝ်ႈၵေႃႉၼိုင်ႈဢေႃႈ။
ၵူၼ်းၸိူဝ်းဢၼ်ၵႂႃႇဢၼ်မႃးၵႃႈတီႈႁိမ်းမၼ်းၸဝ်ႈၵေႃႈသၼ်ႇႁူဝ်ၽႅတ်းႁူဝ်ၶဝ်လႄႈသႄႉသွမ်းမၼ်းၸဝ်ႈ၊-
လႄႈဝႃႈ၊ “မႂ်းတၵ်းၵိူၼ်ႇယႃႉပႅတ်ႈၵျွင်းပိၵ်ႈမၢၼ်ႇၸဝ်ႈလႄႈၼႂ်းသၢမ်ဝၼ်းတၵ်းၶိုၼ်းပူၵ်းၶိုၼ်းတင်ႈဝႃႈၼႆယဝ်ႉ။ ပေႃးၸႂ်ႈလုၵ်ႈၽြႃးပဵၼ်ၸဝ်ႈၸိုင်၊ၵႄႇၶျွတ်ႈဢဝ်တူဝ်ၸဝ်ႈၵဝ်ႇတႃႉ။ လူင်းသေၵႃႈတီႈသဝ်မႆႉဝႃးမိုဝ်းမႃးတႃႉ၊” ဝႃႈၼင်ႇၼႆဢေႃႈ။
မိူၼ်ၼင်ႇၼၼ်ၸႃႉၸဵမ်ယဵၸ်ႈပရေႃးႁဵၵ်ႈလူင်ၶဝ်၊သြႃႇမေႃၵျၢမ်းထမ်ႇမႃႉၶဝ်၊ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၸိူဝ်းၼၼ်ႉၵေႃႈႁဵတ်းပျၢၵ်ႈႁဵတ်းၶူဝ်တီႈမၼ်းၸဝ်ႈလႄႈဝႃႈ၊-
“ၵေႃႉၼႆႉၸၢင်ႈၵႄႇၶျွတ်ႈပိူၼ်ႈသေၵေႃႈဢမ်ႇၸၢင်ႈၵႄႇၶျွတ်ႈဢဝ်တူဝ်ၸဝ်ႈၵဝ်ႇလႆႈၵူၺ်း။ ပေႃးၸႂ်ႈၶုၼ်ႁေႃၶမ်း ဢိသရေး၊ ၸိုင်၊တေႃႈလဵဝ်ၼႆႉႁႂ်ႈမၼ်းလူင်းသဝ်မႆႉဝႃးမိုဝ်းမႃးတႃႉ။ ပေႃးလူင်းမႃးလႆႈၸိုင်၊ႁဝ်းတၵ်းယုမ်ႇမၢတ်ႈမၼ်းဢေႃႈ။-
မၼ်းဢိင်ပိုင်ႈၽြႃးပဵၼ်ၸဝ်ႈလႄႈယင်းဝႃႈမၼ်းပဵၼ်လုၵ်ႈၽြႃးပဵၼ်ၸဝ်ႈဝႃႈၼႆယူႇ။ ပေႃးၸႂ်ႈတႄႉၸိုင်၊ႁဝ်းၸၢမ်းပႂ်ႉတူၺ်းလူးၵွၼ်ႇတႃႉႁဝ်း။ ၸွင်ႇၽြႃးပဵၼ်ၸဝ်ႈမီးဢလူဝ်ႇၶႂ်ႈၵႄႇၶျွတ်ႈဢဝ်မၼ်းမိူဝ်ႈလဵဝ်ၼႆႉႁိုဝ်း၊” ဝႃႈၼင်ႇၼႆဢေႃႈ။
မိူၼ်ၼင်ႇၼၼ်ၸူၼ်ၸိူဝ်းဢၼ်လႆႈၶၢမ်ႇတၢင်းဢၼ်တွၵ်ႇၸပ်းဝႆႉၵႃႈၼိူဝ်သဝ်မႆႉဝႃးမိုဝ်းလူၺ်ႈၵၼ်တင်းမၼ်းၸဝ်ႈၸိူဝ်းၼၼ်ႉၵေႃႈ၊ သႄႉသွမ်းတၢင်ႇဢပျတ်ႈတီႈမၼ်းၸဝ်ႈဢေႃႈ။
ၸႃႉၸဵမ်ၶိင်ႇၵၢင်ဝၼ်းတဵင်ႈတေႃႇထိုင်ႁွတ်ႈဝၢႆးဝၼ်းသၢမ်မွင်းၸိုင်၊လပ်းသိင်ႇႁူမ်ႇသုမ်ႇလိၼ်မိူင်းၵႂႃႇဢေႃႈ။-
မိူဝ်ႈၶိင်ႇဝၢႆးဝၼ်းသၢမ်မွင်းၸမ်ၸမ်ၼၼ်ႉ၊ ၸဝ်ႈယေႇသု၊ ပၢဝ်ႇသႅၼ်ႇတင်းသဵင်ဢၼ်ယႂ်ႇၼႃႇလႄႈဝႃႈ၊ “ဢေးလိ၊ဢေးလိ၊လႃးမႃး၊သႃႇပၵ်ႉသၼိ၊” ဢၼ်ပွင်ႇဝႃႈ၊ၽြႃးၵဝ်ၶႃႈ၊ၽြႃးၵဝ်ၶႃႈ၊ႁဵတ်းသင်လႄႈၸုၼ်ႉပႅတ်ႈၵဝ်ၶႃႈၸိူဝ်ႉၼင်ႇႁိုဝ်တီႈၶႃႈဝႃႈၼင်ႇၼႆဢေႃႈ။
ၵူၼ်းၵမ်ႈၽွင်ႈၸိူဝ်းဢၼ်ၸုၵ်းယူႇၵႃႈႁိမ်းၼၼ်ႉ၊လႆႈငိၼ်းလႄႈၶဝ်လၢတ်ႈဝႃႈ၊ “မၼ်းႁွင်ႉႁႃ ဢေးလိယႃႉ၊ ဢေႃႈ၊” ဝႃႈၼင်ႇၼႆဢေႃႈ။-
ၼႂ်းၶဝ်ၼၼ်ႉၵေႃႉၼိုင်ႈ၊ႁိပ်ႈၼႅတ်ႈလႅၼ်ႈၵႂႃႇဢဝ်ၵုၺ်ၸုမ်ႇသႂ်ႇၼႂ်းၼမ်ႉမၢၵ်ႇၸပိတ်ႉသူမ်ႈႁႂ်ႈတဵမ်ၼႂ်းၼူၼ်းၵုၺ်ၼၼ်ႉလႄႈသဵပ်ႇသႂ်ႇပၢႆမႆႉဢေႃႈယဝ်ႉၸင်ႇ၊ယိုၼ်ႈပၼ်ႁႂ်ႈမၼ်းၸဝ်ႈၸုပ်ႇၵိၼ်ဢေႃႈ။
ၵူၺ်းၵႃႈ၊တၢင်ႇၵေႃႉတၢင်ႇၵူၼ်းၸိူဝ်းၼၼ်ႉလၢတ်ႈလႄႈဝႃႈ၊ “ၸွင်ႇ ဢေးလိယႃႉ၊ တၵ်းမႃးၵႄႇၶျွတ်ႈဢဝ်မၼ်းႁိုဝ်းတၵ်းဢမ်ႇမႃးႁိုဝ်း၊ပႂ်ႉတူၺ်းလူးၵွၼ်ႇတႃႉႁဝ်း၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ သမ်ႉႁဵတ်းသဵင်ဢၼ်ယႂ်ႇၼႃႇႁွင်ႉသႅၼ်ႇသေယဝ်ႉ၊ထွတ်ႇၸႂ်မၼ်းၸဝ်ႈၵႂႃႇသေဢေႃႈ။
မိူဝ်ႈၶိင်ႇယၢမ်းၼၼ်ႉ၊ၽႃႈၵင်ႈၵျွင်းပိၵ်ႈမၢၼ်ႇၸဝ်ႈသိၵ်ႇၶၢတ်ႇၵႂႃႇၸႃႉၸဵမ်ႁူဝ်တေႃႇႁွတ်ႈတိၼ်လႄႈပဵၼ်သွင်ၽၢၵ်ႇၵႂႃႇဢေႃႈ။ ဢိင်ႇသၼ်ႇၼႃႇလူင်လၢင်လႄႈမၢၵ်ႇႁိၼ်လူင်တင်းလၢႆ တႅၵ်ႇဢႃႈငၢၵ်ႈၵႂႃႇ၊-
ၶုမ်ပႃႇႁဵဝ်ႈတင်းလၢႆၵေႃႈၽုၺ်ႇပိုတ်ႇလႄႈတူဝ်တၢႆၵူၼ်းၽြႃးပဵၼ်ၸဝ်ႈၼမ်ၼႃႇလုၵ်ႉၶိုၼ်းလိပ်းဢေႃႈ။-
ၶဝ်ၸိူဝ်းၼၼ်ႉၵေႃႈဝၢႆးသေ ၸဝ်ႈယေႇသု၊ လုၵ်ႉၵႃႈတီႈတၢင်းတၢႆၶိုၼ်းလိပ်းယဝ်ႉၼၼ်ႉ၊ဢွၵ်ႇသေၵႃႈတီႈပႃႇႁဵဝ်ႈလႄႈၶဝ်ႈၵႃႈၼႂ်းဝဵင်းဢၼ်မူတ်းၸၢင်ႇတီႈဢၼ်ၵူၼ်းၼမ်ၼႃႇလႆႈႁၼ်ၶဝ်ၼၼ်ႉဢေႃႈ။
မိူဝ်ႈဢၼ်ၶုၼ်သိုၵ်းလူင်ဢိၵ်ႇတင်းၵူၼ်းသိုၵ်းၸိူဝ်းဢၼ်ပႂ်ႉတူၺ်း ၸဝ်ႈယေႇသု၊ ၼၼ်ႉ၊လႆႈႁၼ်ဢိင်ႇသၼ်ႇဢိၵ်ႇတင်းလွင်ႈတၢင်းဢၼ်ပဵၼ်မႃးၵူႈၸိူဝ်ႉၵူႈပိူင်ၸိူဝ်းၼၼ်ႉၸိုင်၊တူၵ်းၸႂ်ၼႃႇလူင်လၢင်လႄႈလၢတ်ႈဝႃႈ၊ “ၸႂ်ႈတႄႉယဝ်ႉ။ ၵေႃႉၼႆႉပဵၼ်လုၵ်ႈၽြႃးပဵၼ်ၸဝ်ႈတႄႉယဝ်ႉဢေႃႈ၊” ဝႃႈၼင်ႇၼႆဢေႃႈ။
ၵႃႈတီႈၼၼ်ႈမီးမႄႈယိင်းၼမ်ၼႃႇယူႇၵႃႈတီႈဢၼ်ႁမ်ႉၵႆတၢၼ်ႇတၢၼ်ႇပႂ်ႉလွမ်တူၺ်းယူႇဢေႃႈ။ ၶဝ်ၸိူဝ်းၼၼ်ႉပဵၼ်မႄႈယိင်းဢၼ်လုၵ်ႉသေၵႃႈတီႈဢိူင်ႇ ၵႃႇလိလႄး၊ ၸွမ်းမႃးႁႂ်ႈလႆႈႁဵတ်းဝၢတ်ႈၸွႆႈထႅမ်မၼ်းၸဝ်ႈဢေႃႈ။-
ၼႂ်းၶဝ်ၸိူဝ်းၼၼ်ႉပႃး မႃႇရိမႃႇၵတလႃႉမႃႇရိ၊ ဢၼ်ပဵၼ်မႄႈ ယႃႇၵုပ်ႈ၊ ဢိၵ်ႇတင်း ယူသေႇ၊ ဢိၵ်ႇတင်းမေး ၸေႇပေႇတႄး၊ ၸိူဝ်းၼၼ်ႉဢေႃႈ။
မိူဝ်ႈဢၼ်ပဵၼ်ၶိင်ႇၵၢင်ၶမ်ႈၸိုင်၊သထေးၵေႃႉၼိုင်ႈပဵၼ်ၵူၼ်းဝဵင်း ဢရိမသႄး၊ ဢၼ်လႆႈၸိုဝ်ႈ ယူဝ်းသႅပ်ႈ၊ ၼၼ်ႉႁွတ်ႈမႃးဢေႃႈ။-
ပိူဝ်ႈဢၼ်မၼ်းပဵၼ်တပႄး ၸဝ်ႈယေႇသု၊ ၵေႃႉၼိုင်ႈလႄႈမၼ်းၶဝ်ႈၸူးၵႃႈတီႈၶုၼ် ပိလတ်ႉ၊ သေယဝ်ႉ၊ယွၼ်းဢဝ်တူဝ်တၢႆမၼ်းၸဝ်ႈဢေႃႈ။ ၶုၼ် ပိလတ်ႉ၊ ၵေႃႈ၊ပူင်ဢမိင်ႉႁႂ်ႈပၼ်တူဝ်တၢႆမၼ်းၸဝ်ႈဢေႃႈ။-
ယူဝ်းသႅပ်ႈ၊ ဢဝ်တူဝ်တၢႆမၼ်းၸဝ်ႈပူၵ်ႉႁေႃႇတင်းၽႃႈပၢၼ်ၶျေႃးဢၼ်လီဢၼ်မႂ်ႇယဝ်ႉၸင်ႇ၊-
သႂၢင်းသႂ်ႇၵႃႈၼႂ်းပိုင်ႈပႃႇႁဵဝ်ႈဢၼ်မၼ်းၶုတ်းမူင်ႇဝႆႉၵႃႈတီႈၼႃႈၽႃပုၼ်ႈတႃႇတူဝ်ၸဝ်ႈၵဝ်ႇၼၼ်ႉဢေႃႈ။-
မၼ်းၵိင်ႈမၢၵ်ႇႁိၼ်လူင်လုၵ်ႈၼိုင်ႈဢိုတ်းႁပ်းႁူးပိုင်ႈၼၼ်ႉဝႆႉလီလီငၢမ်းငၢမ်းယဝ်ႉၸင်ႇဢွၵ်ႇၵႂႃႇသေဢေႃႈ။
မိူဝ်ႈဢၼ်ႁွတ်ႈထိုင်ဝၼ်းမိူဝ်ႈၽုၵ်ႈဢၼ်ပဵၼ်ဝၼ်းၽိတ်ႈၼၼ်ႉၸိုင်၊ယဵၸ်ႈပရေႃးႁဵၵ်ႈလူင်ၶဝ်တင်းၵူၼ်းၵိူင်း ၽႃႇရိသႄး၊ တင်းလၢႆဢွၼ်ၵၼ်ၶဝ်ႈၸူးၶုၼ် ပိလတ်ႉ၊ လႄႈ၊-
လၢတ်ႈဝႃႈ၊ “ၸဝ်ႈႁဝ်း။ ႁဝ်းၶႃႈၶုၵ်းၸႂ်လႆႈၵႂၢမ်းၵေႃႉဢၼ်ၸၢင်ႈပႅတ်ႉၸၢင်ႈလႅၼ်ၼၼ်ႉဝႃႈဝႆႉၸူဝ်ႈဢၼ်မၼ်းဢမ်ႇပႆႇတၢႆၼၼ်ႉလႄႈဝႃႈ၊ ‘ၵဝ်ၼႆႉ၊ပေႃးတၢႆလႆႈသၢမ်ဝၼ်းယဝ်ႉၸိုင်၊တၵ်းလုၵ်ႉၶိုၼ်းလိပ်းဢေႃႈ၊’ ဝႃႈၼင်ႇၼႆၼၼ်ႉဢေႃႈ။-
ၵူဝ်တပႄးမၼ်းတင်းလၢႆမႃးလၵ်ႉဢဝ်တူဝ်တၢႆမၼ်းၵႂႃႇၶိင်ႇၵၢင်ၶိုၼ်းလႄႈသမ်ႉလၢတ်ႈတီႈပိူၼ်ႈလႄႈဝႃႈ၊ ‘မၼ်းလုၵ်ႉၶိုၼ်းလိပ်းယဝ်ႉ၊’ ဝႃႈၼင်ႇၼႆၼၼ်ႉဢေႃႈ။ ၵွပ်ႈၸိူဝ်ႉၼႆလႄႈၶႅၼ်းတေႃႈပူင်ဢမိင်ႉႁႂ်ႈၵူၼ်းသိုၵ်းတင်းလၢႆ၊ပႂ်ႉပိုင်ႈပႃႇႁဵဝ်ႈဝႆႉလီလီငၢမ်းငၢမ်းတေႃႇထိုင်သၢမ်ဝၼ်းသေၵမ်းတီႈၶႃႈ။ တၢင်းဢၼ်ပႅတ်ႉလႅၼ်ၵမ်းလိုၼ်းၼၼ်ႉတၵ်းယဵင်ႈၶႅၼ်းႁၢႆႉၼႃႇသေဢၼ်ပႅတ်ႉလႅၼ်ၵမ်းဢွၼ်တၢင်းၼၼ်ႉၶႃႈဢေႃႈ၊” ဝႃႈၼင်ႇၼႆဢေႃႈ။
ၶုၼ်ၵေႃႈၶိုၼ်းလၢတ်ႈတီႈၶဝ်လႄႈဝႃႈ၊ “သူမီးၵူၼ်းသိုၵ်းပႂ်ႉယၢမ်းမူႇၼိုင်ႈယူႇယဝ်ႉ။ ၵူၼ်းသိုၵ်းၸိူဝ်းၼၼ်ႉတၵ်းပေႃးၵုမ်ႇယူႇလႄႈၵႃႈၼင်ႇဢၼ်သူတၢတ်ႈၼိူင်ႇလႆႈၼၼ်ႉ၊ ႁႂ်ႈၶဝ်ၵႂႃႇပႂ်ႉလီလီငၢမ်းငၢမ်းတႃႉ၊” ဝႃႈၼင်ႇၼႆဢေႃႈ။
ႁဵတ်းၼၼ်လႄႈၶဝ်ႁွင်ႉဢဝ်ၵူၼ်းသိုၵ်းမူႇၼိုင်ႈၵႂႃႇလႄႈတွၵ်ႇတၼ်းသိၵ်ႈတီႈမၢၵ်ႇႁိၼ်ၼၼ်ႉသေယဝ်ႉ၊ႁႂ်ႈပႂ်ႉပိုင်ႈပႃႇႁဵဝ်ႈမၼ်းၸဝ်ႈဝႆႉလီလီငၢမ်းငၢမ်းသေဢေႃႈ။
ပူၼ်ႉသေဝၼ်းၵမ်သိၼ်လႄႈထိုင်ၼႂ်းဝၼ်းတၼၢင်းၼူၺ်ႇဢၶိင်ႇႁူဝ်မိူင်းၸမ်တၵ်းလႅင်းမႃးၼၼ်ႉ၊ မႃႇရိမႃႇၵတလႃႉ၊ ဢိၵ်ႇတင်း မႃႇရိ၊ တၢင်ႇၵေႃႉၵႂႃႇႁႂ်ႈလႆႈလူတူၺ်းပိုင်ႈပႃႇႁဵဝ်ႈဢေႃႈ။-
မိူဝ်ႈၼၼ်ႉၵမ်းလဵဝ်ပဵၼ်ဢိင်ႇသၼ်ႇႁႅင်းၼႃႇလူင်လၢင် ၵွပ်ႈပိူဝ်ႈဢၼ်တမၢၼ်ႇၵၢင်ႁၢဝ်ထႃႇဝရႃႉၽြႃးလုၵ်ႉသေၵႃႈတီႈမိူင်းၵၢင်ႁၢဝ်လူင်းမႃးၵိင်ႈပႅတ်ႈမၢၵ်ႇႁိၼ်ၼၼ်ႉသေယဝ်ႉ၊ ၼင်ႈယူႇၵႃႈၼိူဝ်ၼၼ်ႉဢေႃႈ။-
ႁၢင်ႈၽၢင်မၼ်းၵေႃႈႁိူဝ်ႈလႅင်းမိူၼ်ၸိူဝ်ႉၼင်ႇၽႃႉမႅပ်ႈဢိၵ်ႇတင်းၶူဝ်းၼုင်ႈမၼ်းၵေႃႈၽိူၵ်ႇၶၢဝ်ၸိူဝ်ႉၼင်ႇမူၺ်ႁႃႇဢေႃႈ။-
ၵူၼ်းသိုၵ်းၸိူဝ်းၼၼ်ႉမိူဝ်ႈဢၼ်ႁၼ်တမၢၼ်ႇၵၢင်ႁၢဝ်ၼၼ်ႉၸိုင်၊ၵူဝ်ႁႄသၼ်ႇဝႆၼႃႇလူင်လၢင်ထၢၼ်ႈပေႃးပိၼ်ႈလူမ်ႉၵႂႃႇမိူၼ်ၸိူဝ်ႉၼင်ႇတူဝ်တၢႆဢေႃႈ။
တမၢၼ်ႇၵၢင်ႁၢဝ်ၼၼ်ႉလၢတ်ႈတီႈမႄႈယိင်းၸိူဝ်းၼၼ်ႉလႄႈဝႃႈ၊ “ယႃႇပေၵူဝ်ပေႁႄ။ ၵဝ်ႁုလွင်ႈဢၼ်သူမႃးႁႃ ၸဝ်ႈယေႇသု၊ ဢၼ်လႆႈၶၢမ်ႇတၢင်းဢၼ်တွၵ်ႇၸပ်းၵႃႈၼိူဝ်သဝ်မႆႉဝႃးမိုဝ်းၼၼ်ႉယူႇဢေႃႈ။-
မၼ်းၸဝ်ႈဢမ်ႇမီးၵႃႈတီႈၼႆႈယဝ်ႉ။ ၸိူဝ်ႉၼင်ႇဢၼ်မၼ်းၸဝ်ႈလၢတ်ႈဝႆႉၼၼ်ႉမၼ်းၸဝ်ႈလုၵ်ႉၶိုၼ်းလိပ်းယဝ်ႉ။ မႃးတူၺ်းတီႈဢၼ်မၼ်းၸဝ်ႈလႆႈၼွၼ်းၵႂႃႇၼၼ်ႉတႃႉ။-
မိူဝ်ႈလဵဝ်ၵႂႃႇၶၼ်ၶၼ်ၽႂ်းၽႂ်းၵႃႈတီႈတပႄးၸဝ်ႈတင်းလၢႆလႄႈမွၵ်ႇလၢတ်ႈလႄႈဝႃႈ၊ ‘မၼ်းၸဝ်ႈလုၵ်ႉၵႃႈတၢင်းတၢႆ ၶိုၼ်းလိပ်းယဝ်ႉ။ တေႃႈလဵဝ်မၼ်းၸဝ်ႈၵႂႃႇၵႃႈတီႈဢိူင်ႇ ၵႃႇလိလႄး၊ ဢွၼ်တၢင်းသူယဝ်ႉ၊သူတၵ်းထူပ်းႁၼ်မၼ်းၸဝ်ႈၵႃႈတီႈၼၼ်ႈဢေႃႈ၊’ ဝႃႈၼင်ႇၼႆတႃႉ။ ၵႂၢမ်းဢၼ်ၵဝ်သင်ႇလၢတ်ႈသူၼႆႉသူယႃႇပေလိုမ်း၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈမႄႈယိင်းၸိူဝ်းၼၼ်ႉမီးၸႂ်ဢၼ်ၵူဝ်ၼႃႇဢိၵ်ႇတင်းၸႂ်ဢၼ်ၸူမ်းသိူဝ်းၼႃႇလႄႈဢွၵ်ႇသေၵႃႈတီႈပႃႇႁဵဝ်ႈၵႂႃႇၶၼ်ၶၼ်ၽႂ်းၽႂ်းလႅၼ်ႈၵႂႃႇႁႂ်ႈလႆႈမွၵ်ႇလၢတ်ႈပၼ်ၶၢဝ်ႇငၢဝ်းၼၼ်ႉၵႃႈတီႈတပႄးၸဝ်ႈတင်းလၢႆဢေႃႈ။
မိူဝ်ႈၼၼ်ႉ၊ ၸဝ်ႈယေႇသု၊ ႁပ်ႉႁူဝ်တၢင်းၶဝ်လႄႈတၵ်ႉလၢတ်ႈဝႃႈ၊ “ႁႂ်ႈသူၼိမ်ၸႂ်ၼိမ်ၶေႃးတႃႉ၊” မိူဝ်ႈဢၼ်ဝႃႈၼင်ႇၼႆၸိုင်၊ၶဝ်ဢွၼ်ၵၼ်သုတ်ႉၸပ်းသုတ်ႉၸူးၵႃႈတီႈမၼ်းၸဝ်ႈသေယဝ်ႉ၊ၵွတ်ႇတိၼ်မၼ်းၸဝ်ႈလႄႈဝႆႈသႃၵူဝ်းၵႂၢႆႇမၼ်းၸဝ်ႈဢေႃႈ။-
မၼ်းၸဝ်ႈၵေႃႈလၢတ်ႈလႄႈဝႃႈ၊ “ယႃႇပေၵူဝ်ပေႁႄ။ ၵႂႃႇလႄႈမွၵ်ႇလၢတ်ႈၵႃႈတီႈပီႈၼွင်ႉၵဝ်တင်းလၢႆႁႂ်ႈၶဝ်ၵႂႃႇၵႃႈတီႈဢိူင်ႇ ၵႃႇလိလႄး၊ ပုၼ်ႉတႃႉ။ ၵႃႈတီႈၼၼ်ႈၶဝ်တၵ်းထူပ်းႁၼ်ၵဝ်ဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်မႄႈယိင်းၸိူဝ်းၼၼ်ႉလႅၼ်ႈဢွၵ်ႇၵႂႃႇယဝ်ႉၼၼ်ႉၸိုင်၊ၵူၼ်းသိုၵ်းဢၼ်ပႂ်ႉပိုင်ႈပႃႇႁဵဝ်ႈၸိူဝ်းၼၼ်ႉၵမ်ႈၽွင်ႈ၊ၶဝ်ႈၵႂႃႇၵႃႈၼႂ်းဝဵင်းလႄႈမွၵ်ႇလၢတ်ႈလွင်ႈတၢင်းဢၼ်ပဵၼ်မႃးၵူႈၸိူဝ်ႉၵူႈပိူင်ၼၼ်ႉၵႃႈတီႈယဵၸ်ႈပရေႃးႁဵၵ်ႈလူင်ၶဝ်ဢေႃႈ။-
ယဵၸ်ႈပရေႃးႁဵၵ်ႈၸိူဝ်းၼၼ်ႉ၊ႁွင်ႉဢဝ်ၵူၼ်းဢၼ်ပဵၼ်ၵႄႇပဵၼ်ႁူဝ်ၶဝ်မႃးၸုတုမ်ၵၼ်သေလႄႈၶိုင်ပွင်လၢတ်ႈၸႃၵၼ်သေယဝ်ႉ၊ပၼ်ငိုၼ်းၼမ်ၼႃႇတီႈၵူၼ်းသိုၵ်းၸိူဝ်းၼၼ်ႉသေလႄႈ၊-
သင်ႇၶဝ်ဝႃႈ၊ “သူၵႂႃႇလၢတ်ႈဝႃႈ၊တပႄးမၼ်းတင်းလၢႆမႃးလၵ်ႉဢဝ်တူဝ်တၢႆမၼ်းၵႂႃႇၶိင်ႇၵၢင်ၶိုၼ်းမိူဝ်ႈဢၼ်ႁဝ်းငဝ်ၼွၼ်းလပ်းယူႇၼၼ်ႉဢေႃႈ၊ဝႃႈၼင်ႇၼႆတႃႉ၊” ဝႃႈၼင်ႇၼႆဢေႃႈ။-
သမ်ႉဝႆႉၵတိလႄႈဝႃႈ၊ “ပေႃးၶုၼ်လႆႈႁုငိၼ်းလွင်ႈတၢင်းၼႆႉၸိုင်၊ႁဝ်းတၵ်းဢွၼ်ၵၼ်ၸွႆႈလၢတ်ႈပၼ်ႁႂ်ႈသူပူၼ်ႉလွတ်ႈဢပျတ်ႈဢေႃႈ၊” သူဢမ်ႇလူဝ်ႇမႆႈၸႂ်ဝႃႈၼင်ႇၼႆဢေႃႈ။
ၵူၼ်းသိုၵ်းၸိူဝ်းၼၼ်ႉၵေႃႈႁပ်ႉဢဝ်ငိုၼ်းသေယဝ်ႉ၊ၵႂႃႇလၢတ်ႈၸိူဝ်ႉၼင်ႇဢၼ်ပိူၼ်ႈၸႂ်ႉၶဝ်လၢတ်ႈၼၼ်ႉၵူၺ်းဢေႃႈ။ ပိူဝ်ႈၼႆလႄႈၵႂၢမ်းၶဝ်ၼၼ်ႉၸွတ်ႇတူဝ်ႈၵႂႃႇၵႃႈၼႂ်းၵူၼ်းမဵဝ်း ၵျူး၊ ၵူႈတီႈၵူႈလႅၼ်တေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
တပႄးၸဝ်ႈသိပ်းဢဵတ်းပႃးၼၼ်ႉ၊ၶိုၼ်ႈၵႂႃႇၵႃႈၼိူဝ်လွႆ ဢိူင်ႇ ၵႃႇလိလႄး၊ ၵႃႈတီႈဢၼ် ၸဝ်ႈယေႇသု၊ သင်ႇလၢတ်ႈဝႆႉၼၼ်ႉသေလႄႈ၊-
တီႈၼၼ်ႈၶဝ်လႆႈထူပ်းႁၼ်မၼ်းၸဝ်ႈသေယဝ်ႉ၊ၶုပ်ႉမူပ်ႇဝႆႈသႃမၼ်းၸဝ်ႈဢေႃႈ။ ၵူၺ်းၵႃႈ၊ၵမ်ႈၽွင်ႈဢမ်ႇပေႃးယုမ်ႇ။-
ၸဝ်ႈယေႇသု၊ သုတ်ႉၸမ်ၵႃႈတီႈၶဝ်သေယဝ်ႉ၊ ပိုတ်ႇပၢၵ်ႇလၢတ်ႈၵႂၢမ်းတေႃႇၶဝ်လႄႈဝႃႈ၊ “တၼ်းၶူဝ်းဢႃႇၼုၽေႃႇၵႃႈမီးၵႃႈၼိူဝ်ၵၢင်ႁၢဝ်၊ဢိၵ်ႇတင်းၵႃႈတီႈလိၼ်မိူင်းတင်းသဵင်ႈတင်းလူင်ၼႆႉၸိုင်၊ဢၢပ်ႈပၼ်တီႈၵဝ်ယဝ်ႉယဝ်ႉ။-
ပိူဝ်ႈၼႆၸင်ႇသူၵႂႃႇၵႃႈတီႈၵူၼ်းမဵဝ်းၵႃႈမီးတင်းသဵင်ႈတင်းလူင်လႄႈႁဵတ်းႁႂ်ႈၶဝ်ပဵၼ်တပႄးၵဝ်သေယဝ်ႉ၊ပၼ်မၢင်ႇၵလႃႇပပ်ႉတိၸမ်ႇ ၵႃႈၼႂ်းၼႃႇမႃႉၸိုဝ်ႈသဵင်ပေႃႈၸဝ်ႈ၊လုၵ်ႈၸဝ်ႈ၊တင်းဝိၺိၺ်ႇၸဝ်ႈဢၼ်မူတ်းၸၢင်ႇတႃႉ။-
သင်ႇသွၼ်ပၼ်ႁႂ်ႈၶဝ်လႆႈၵမ်လႆႈၵျၢင်ႉၵႃႈဢၼ်ၵဝ်ႁေႃးလၢတ်ႈဝႆႉတီႈသူတင်းသဵင်ႈတင်းလူင်ၼၼ်ႉတႃႉ။ ၵဝ်ၵေႃႈတၵ်းမီးလူၺ်ႈၵၼ်တင်းသူတႃႇသေႇဢမ်ႇထၢတ်ႇတေႃႇထိုင်ႁွတ်ႈၵမ်ႇၽႃႇၼႆႉသုတ်းသဵင်ႈပုၼ်ႉၼၼ်ႉဢေႃႈ၊” ဝႃႈၼင်ႇၼႆဢေႃႈ။ ၶၢဝ်ႇတြႃးသိူဝ်းပျေႃႇဢၼ်သြႃႇမတ်ႈထႄႇတႅမ်ႈယဝ်ႉယဝ်ႉဢေႃႈ။
ၼႆႉၸမ်ႉ၊ပဵၼ်ငဝ်ႈႁၢၵ်ႈတြႃးၶၢဝ်ႇငၢဝ်းသိူဝ်းပျေႃႇ ၸဝ်ႈယေႇသုၶရိၸ်ႈ၊ လုၵ်ႈၽြႃးပဵၼ်ၸဝ်ႈဢေႃႈ။-
တြႃးၸဝ်ႈပဵၼ်ၸွမ်းၵႃႈၼင်ႇၵျၢမ်းဢၼ်ပရေႃးၽႅတ်ႈ ဢိသႃႇယႃႉ၊ တႅမ်ႈဝႆႉလႄႈဝႃႈ၊ “တူၺ်းလူး။ ၵဝ်ပွႆႇၸႂ်ႉၽူႈတၢင်တူဝ်ၵဝ် ၵႂႃႇပႃႈၼႃႈမႂ်း၊ ပုၼ်ႈတၵ်းလႆႈမႄးႁဵတ်းမႄးႁႅၼ်း သဵၼ်ႈတၢင်းမႂ်းဢေႃႈ။
သဵင်ၵႂၢမ်းၵေႃႉဢၼ်ႁွင်ႉသႅၼ်ႇၵႃႈၼႂ်းထိူၼ်ႇလႅင်ႉၼၼ်ႉဝႃႈၸမ်ႉ၊ မႄးသဵၼ်ႈတၢင်းထႃႇဝရႃႉၽြႃးတႃႉ။ ႁႂ်ႈသဵၼ်ႈတၢင်းသိုဝ်ႈလီပုၼ်ႈမၼ်းၸဝ်ႈတၵ်းပႆတႃႉ၊” ဝႃႈၼင်ႇၼႆၼၼ်ႉဢေႃႈ။
သြႃႇ ယူဝ်းႁၢၼ်ႇ၊ ပေႃႇမႃးပၼ်မၢင်ႇၵလႃႇပပ်ႉတိၸမ်ႇ ယူႇဢိၵ်ႇတင်းႁေႃးလၢတ်ႈတြႃးၸဝ်ႈတီႈၵူၼ်းတင်းလၢႆယူႇလႄႈဝႃႈ၊ “ပိၼ်ႇၸႂ်သူလႄႈၶၢမ်ႇဢဝ်မၢင်ႇၵလႃႇပပ်ႉတိၸမ်ႇတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ၽြႃးပဵၼ်ၸဝ်ႈတၵ်းပွႆႇလွတ်ႈဢပျတ်ႈသူဢေႃႈ၊” ဝႃႈၼင်ႇၼႆဢေႃႈ။-
ၵူၼ်းၼမ်ၼႃႇလုၵ်ႉသေၵႃႈတီႈဢိူင်ႇ ယုတႃႉ၊ ၵူႈတီႈၵူႈလႅၼ်ဢိၵ်ႇတင်းၵူၼ်းဝဵင်း ယေႇရုသလႅမ်ႇ၊ ဢွၵ်ႇမႃးၸူးတီႈသြႃႇ ယူဝ်းႁၢၼ်ႇ၊ လႄႈၶဝ်ၽုၺ်ႇၼႄဢပျတ်ႈတူဝ်ၸဝ်ႈၵဝ်ႇသေယဝ်ႉ၊ၶၢမ်ႇဢဝ်မၢင်ႇၵလႃႇပပ်ႉတိၸမ်ႇၼႂ်းၼမ်ႉ ယေႃးတၢၼ်ႇ၊ တီႈသြႃႇ ယူဝ်းႁၢၼ်ႇ၊ ဢေႃႈ။
သြႃႇ ယူဝ်းႁၢၼ်ႇ၊ ၼႆႉ၊ၼုင်ႈၶူဝ်းၶူၼ်ၵလႃႇဢုၵ်ႈလႄႈဢဝ်သၢႆၼင်ႁတ်ႉဢႅဝ်မၼ်းဝႆႉသေယဝ်ႉ၊ၵိၼ်မႅင်းၸၵ်းတႅၼ်ၵပ်းတင်းၼမ်ႉၽိုင်ႈထိူၼ်ႇၵူၺ်းဢေႃႈ။-
ဢၼ်မၼ်းႁေႃးလၢတ်ႈတီႈမူႇၵူၼ်းတင်းလၢႆလႄႈဝႃႈၸမ်ႉ၊ “ၸဝ်ႈဢၼ်မႃးပႃႈလင်ၵဝ်ၼၼ်ႉယႂ်ႇမျၢတ်ႈၼႃႇသေၵဝ်ဢေႃႈ။ ၵဝ်ယင်းဢမ်ႇထိူၵ်ႈၵူမ်ႈ လႄႈၵႄႈသၢႆၶႅပ်းတိၼ်ၸဝ်ႈၼၼ်ႉ။-
ၵဝ်ၼႆႉပၼ်မၢင်ႇၵလႃႇပပ်ႉတိၸမ်ႇတီႈသူၼႂ်းၼမ်ႉၵူၺ်းဢေႃႈ။ ၸဝ်ႈၼၼ်ႉၸမ်ႉ၊တၵ်းပၼ်မၢင်ႇၵလႃႇပပ်ႉတိၸမ်ႇတီႈသူၼႂ်းဝိၺိၺ်ႇဢၼ်မူတ်းၸၢင်ႇၸဝ်ႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ၸဝ်ႈယေႇသု၊ လုၵ်ႉသေၵႃႈတီႈဢိူင်ႇ ၵႃႇလိလႄး၊ ဝဵင်း ၼႃႇၸရႅတ်ႈ၊ မႃးၶၢမ်ႇဢဝ်မၢင်ႇၵလႃႇပပ်ႉတိၸမ်ႇတီႈသြႃႇ ယူဝ်းႁၢၼ်ႇ၊ ၵႃႈၼႂ်းၼမ်ႉ ယေႃးတၢၼ်ႇ၊ ဢေႃႈ။-
ယၢမ်းမိူဝ်ႈဢၼ် ၸဝ်ႈယေႇသု၊ လုၵ်ႉသေၵႃႈၼႂ်းၼမ်ႉဢွၵ်ႇမႃးၵမ်းလဵဝ်ယူႇၼၼ်ႉၸိုင်၊လႆႈႁၼ်ၼႃႈၽႃႉၵၢင်ႁၢဝ်ၽုၺ်ႇပိုတ်ႇၵႂႃႇသေလႄႈဝိၺိၺ်ႇမူတ်းၸၢင်ႇၸဝ်ႈဢၼ်ပဵၼ်မိူၼ်ၸိူဝ်ႉၼင်ႇၼူၵ်ႉတူႈၼၼ်ႉလူင်းမႃးၵႃႈၼိူဝ်မၼ်းၸဝ်ႈဢေႃႈ။-
မိူဝ်ႈၼၼ်ႉ၊မီးသဵင်ဢၼ်လုၵ်ႉၵႃႈတီႈၵၢင်ႁၢဝ်မေႃးမႃးလႄႈဝႃႈ၊ “မႂ်းပဵၼ်လုၵ်ႈၵဝ်ဢၼ်ၵဝ်ႁၵ်ႉၼႃႇ၊ၵေႃႉဢၼ်ၵဝ်ထုၵ်ႇၸႂ်ၵျိူၵ်ႈၸႂ်ၼႃႇဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၵမ်းလဵဝ်ဝိၺိၺ်ႇၸဝ်ႈႁႂ်ႈ ၸဝ်ႈယေႇသု၊ ၵႂႃႇၵႃႈၼႂ်းထိူၼ်ႇလႅင်ႉသေဢေႃႈ။-
မၼ်းၸဝ်ႈယူႇၵႃႈၼႂ်းထိူၼ်ႇလႅင်ႉၼၼ်ႉသီႇသိပ်းဝၼ်းတဵမ်တဵမ်၊လႆႈၶၢမ်ႇတၢင်းဢၼ်ၸႃႇတၢၼ်ႇၸၢမ်းတူၺ်းယႃႉၵဝ်းဢေႃႈ။ ၵႃႈတီႈၼၼ်ႈတူဝ်ထိူၼ်ႇႁၢႆႉလႂ်ၵေႃႈမီးဢေႃႈ။ ၵူၺ်းၵႃႈ၊တမၢၼ်ႇၵၢင်ႁၢဝ်တင်းလၢႆလုမ်းလႃးလူတူၺ်းမၼ်းၸဝ်ႈဢေႃႈ။
ဝၢႆးသေသြႃႇ ယူဝ်းႁၢၼ်ႇ၊ လႆႈၶမ်ထွင်ႇယဝ်ႉၸိုင်၊ ၸဝ်ႈယေႇသု၊ ၶိုၼ်ႈၵႂႃႇၸူးဢိူင်ႇ ၵႃႇလိလႄး၊ သေယဝ်ႉ၊ႁေႃးလၢတ်ႈၶၢဝ်ႇငၢဝ်းတြႃးသိူဝ်းပျေႃႇလွင်ႈၽြႃးပဵၼ်ၸဝ်ႈလႄႈဝႃႈ၊-
“ဢၶိင်ႇမၼ်းထိုင်မႃးယဝ်ႉ။ မိူင်းၽြႃးပဵၼ်ၸဝ်ႈမႃးၸမ်ယူႇယဝ်ႉ။ ၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်သူတႃႉ။ ယုမ်ႇမၢတ်ႈတြႃးသိူဝ်းပျေႃႇၸဝ်ႈတႃႉ၊” ဝႃႈၼင်ႇၼႆဢေႃႈ။
ၼႂ်းမိူဝ်ႈဢၼ် ၸဝ်ႈယေႇသု၊ ပႆလဵပ်ႈၸွမ်းတၢင်းၽင်ႇၼွင် ၵႃႇလိလႄး၊ ၵႂႃႇယူႇၼၼ်ႉ၊မၼ်းၸဝ်ႈထူပ်းႁၼ်ၵူၼ်းလႃႈၼမ်ႉ သွင်ပီႈၼွင်ႉ၊ သိမုၼ်ႇ၊ ဢိၵ်ႇတင်း ဢၼ်ႇတရေႇ၊ ဝၢၼ်ႇၶႄယူႇဢေႃႈ။-
ၸဝ်ႈယေႇသု၊ လၢတ်ႈတီႈၶဝ်လႄႈဝႃႈ၊ “ၸွမ်းၵဝ်မႃးတႃႉ။ ၵဝ်တၵ်းႁႂ်ႈသူပဵၼ်ၵူၼ်းဢၼ်ႁႃၵူၼ်းဢေႃႈ၊” ဝႃႈၼင်ႇၼႆဢေႃႈ။-
ၶဝ်ၵေႃႈဝႆႉပႅတ်ႈၶႄၶဝ်ၵမ်းလဵဝ်သေလႄႈၸွမ်းမၼ်းၸဝ်ႈၵႂႃႇဢေႃႈ။
ၸဝ်ႈယေႇသု၊ ပူၼ်ႉၵႂႃႇထႅင်ႈဢိတ်းၼိုင်ႈယဝ်ႉၸင်ႇ၊ထူပ်းႁၼ်ထႅင်ႈၵူၼ်းလႃႈၼမ်ႉသွင်ၵေႃႉပီႈၼွင်ႉ ယႃႇၵုပ်ႈ၊ ဢိၵ်ႇတင်း ယူဝ်းႁၢၼ်ႇ၊ လုၵ်ႈၸၢႆး ၸေႇပေႇတႄး၊ ဢၼ်တိုၵ်ႉမႄးၽုင်မႄးၵုပ်းၶႄၶဝ်ယူႇၵႃႈၼိူဝ်ႁိူဝ်းၼၼ်ႉဢေႃႈ။-
ၸဝ်ႈယေႇသု၊ ၵေႃႈ၊မိူဝ်ႈဢၼ်ထူပ်းႁၼ်ၶဝ်ၸိုင်၊ႁွင်ႉဢဝ်ၵမ်းလဵဝ်လႄႈ၊ၶဝ်ၵေႃႈဝႆႉပႅတ်ႈပေႃႈၶဝ် ၸေႇပေႇတႄး၊ ၵႃႈၼိူဝ်ႁိူဝ်းႁူမ်ႈလူၺ်ႈၵၼ်တင်းလုၵ်ႈၸၢင်ႈၶဝ်တင်းလၢႆသေယဝ်ႉ၊ၸွမ်းမၼ်းၸဝ်ႈၵႂႃႇဢေႃႈ။
ၸဝ်ႈယေႇသု၊ ဢိၵ်ႇတင်းတပႄးၸဝ်ႈတင်းလၢႆ၊ဢွၼ်ၵၼ်ၶိုၼ်ႈၵႂႃႇၸူးဝဵင်း ၵပိူဝ်ႇၼေႇဢုမ်ႇ၊ သေယဝ်ႉ၊ၼႂ်းဝၼ်းၵမ်သိၼ်ၼၼ်ႉၵမ်းလဵဝ်မၼ်းၸဝ်ႈၶဝ်ႈၵႃႈၼႂ်းၸရွပ်ႈႁေႃးတြႃးသေလႄႈႁေႃးလၢတ်ႈသင်ႇသွၼ်ပၼ်ဢေႃႈ။-
ၶဝ်ၸိူဝ်းဢၼ်လႆႈထွမ်ႇလႆႈငိၼ်းတင်းသဵင်ႈတင်းလူင်ဢွၼ်ၵၼ်ဢၢမ်းလွင်ႈတၢင်းဢၼ်မၼ်းၸဝ်ႈသင်ႇသွၼ်ၼၼ်ႉၼႃႇလူင်လၢင်၊ၵွပ်ႈပိူဝ်ႈမၼ်းၸဝ်ႈသင်ႇသွၼ်ပၼ်ၶဝ်မိူၼ်ၸိူဝ်ႉၼင်ႇသြႃႇမေႃၵျၢမ်းထမ်ႇမႃႉၶဝ်ဢမ်ႇၸႂ်ႈ။ မိူၼ်ၸိူဝ်ႉၼင်ႇၵေႃႉဢၼ်မီးဢႃႇၼႃႇၼၼ်ႉဢေႃႈ။
ယၢမ်းမိူဝ်ႈၼၼ်ႉၵမ်းလဵဝ်၊ၵူၼ်းဢၼ်ၽိူဝ်ႉၶဝ်ႈၵေႃႉၼိုင်ႈၶဝ်ႈမႃးသေလႄႈပၢဝ်ႇသႅၼ်ႇလႄႈဝႃႈ၊-
“ဢူဝ်း ယေႇသု၊ ၵူၼ်းဝဵင်း ၼႃႇၸရႅတ်ႈ၊ ၸဝ်ႈႁဝ်းလူဝ်ႇႁဵတ်းသင်တင်းႁဝ်းၶႃႈ။ ၸဝ်ႈႁဝ်းမႃးႁႂ်ႈလႆႈယႃႉပႅတ်ႈႁဝ်းၶႃႈ၊ၶႃႈႁိုဝ်း။ ၸဝ်ႈႁဝ်းပဵၼ်ၽူႈလႂ်ၼၼ်ႉ၊ၵဝ်ၶႃႈႁုယူႇၶႃႈဢေႃႈ။ ပဵၼ်ၽူႈမူတ်းၸၢင်ႇၽြႃးပဵၼ်ၸဝ်ႈၶႃႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ပူင်ဢမိင်ႉတီႈၽိူဝ်ႉၼၼ်ႉလႄႈဝႃႈ၊ “ယူႇတဵတ်ႇတဵတ်ႇတႃႉ။ ဢွၵ်ႇသေၵႃႈၼႂ်းမၼ်းၵႂႃႇတႃႉ။” မိူဝ်ႈဢၼ်ဝႃႈၼင်ႇၼႆၸိုင်။
ၽိူဝ်ႉၼၼ်ႉ၊ႁဵတ်းႁႂ်ႈၵေႃႉၼၼ်ႉၵႅၼ်ႇၶႅင်ၵႂႃႇယဝ်ႉၸင်ႇ၊ႁွင်ႉသႅၼ်ႇလူၺ်ႈတင်းသဵင်ဢၼ်ယႂ်ႇၼႃႇသေလႄႈဢွၵ်ႇၵႂႃႇသေဢေႃႈ။-
ၵူၼ်းတင်းသဵင်ႈတင်းလူင်ဢၢမ်းၼႃႇလူင်လၢင်၊ထၢၼ်ႈပေႃးၵေႃႉၼိုင်ႈလႄႈၵေႃႉၼိုင်ႈလၢတ်ႈၸႃတီႈၵၼ်လႄႈဝႃႈ၊ “လွင်ႈတၢင်းၼႆႉပဵၼ်ၸိူဝ်ႉၼင်ႇႁိုဝ်။ ပဵၼ်တြႃးဢၼ်မႂ်ႇႁိုဝ်း။ ၸဝ်ႈၼႆႉယင်းပႃးတင်းတၼ်းၶူဝ်းလႄႈႁေႃႈၽိူဝ်ႉႁေႃႈၽီလႆႈ၊ၽိူဝ်ႉၽီၵေႃႈထွမ်ႇၵႂၢမ်းလူင်ပႄႇ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈၶၢဝ်ႇငၢဝ်းလွင်ႈ ၸဝ်ႈယေႇသု၊ ႁူင်ႁၢင်းၸွတ်ႇတူဝ်ႈၵႂႃႇၵႃႈၼႂ်းဢိူင်ႇ ၵႃႇလိလႄး၊ ၵူႈတီႈၵူႈလႅၼ်ၵမ်းလဵဝ်ဢေႃႈ။
ၸဝ်ႈယေႇသု၊ တင်းတပႄးၸဝ်ႈတင်းလၢႆဢၼ်ပႃး ယႃႇၵုပ်ႈ၊ ဢိၵ်ႇတင်း ယူဝ်းႁၢၼ်ႇ၊ ဢွၵ်ႇသေၵႃႈၼႂ်းၸရွပ်ႈႁေႃးတြႃးလႄႈၶဝ်ႈၵႂႃႇၵႃႈၼႂ်းႁိူၼ်း သိမုၼ်ႇ၊ ဢိၵ်ႇတင်း ဢၼ်ႇတရေႇ၊ ၶဝ်ပီႈၼွင်ႉၼၼ်ႉဢေႃႈ။-
မႄႈဢွၵ်ႇၼၢႆး သိမုၼ်ႇ၊ ၼၼ်ႉၼၢဝ်လႄႈၼွၼ်းယူႇဢေႃႈ။ ၶဝ်လဝ်ႈလၢတ်ႈတီႈမၼ်းၸဝ်ႈၵမ်းလဵဝ်ဢေႃႈ။-
မၼ်းၸဝ်ႈၵေႃႈၵႂႃႇယိပ်းဢဝ်မိုဝ်းမၼ်းသေယဝ်ႉ၊တိုတ်ႉလုၵ်ႉဢေႃႈ။ ၼၢဝ်မၼ်းၸိုၼ်ႈႁၢႆၵမ်းလဵဝ်သေလႄႈမၼ်းလုၵ်ႉႁဵတ်းဝၢတ်ႈႁပ်ႉၶၢမ်ႇၶႅၵ်ႇဢေႃႈ။
မိူဝ်ႈဢၼ်ၵၢင်ဝၼ်းတူၵ်းယဝ်ႉလႄႈပဵၼ်ၶိင်ႇႁူဝ်ၶမ်ႈၸိုင်၊ၵူၼ်းၵႃႈတီႈၼၼ်ႈဢဝ်ၵူၼ်းၶႆႈၵူၼ်းပဵၼ်တင်းၵူၼ်းဢၼ်ၽီၶဝ်ႈၽိူဝ်ႉၶဝ်ႈ၊ၵႃႈမီးတင်းသဵင်ႈတင်းလူင်မႃးတီႈမၼ်းၸဝ်ႈလႄႈ၊-
ၵူၼ်းဝဵင်းတင်းဝဵင်းဢွၼ်ၵၼ်ၸုတုမ်ၵၼ်ယူႇၽၢႆႇၼႃႈႁိူၼ်းဢေႃႈ။-
မၼ်းၸဝ်ႈၵေႃႈ၊ႁႂ်ႈတၢင်းၶႆႈတၢင်းပဵၼ်ၵူႈမဵဝ်းမဵဝ်းၸိုၼ်ႈႁၢႆမႃးလီလႄႈ၊ၽိူဝ်ႉၽီၼမ်ၼႃႇၵေႃႈမၼ်းၸဝ်ႈႁေႃႈဢွၵ်ႇပႅတ်ႈဢေႃႈ။ မၼ်းၸဝ်ႈဢမ်ႇပၼ်ဢၶႂၢင်ႉၽိူဝ်ႉၽီၸိူဝ်းၼၼ်ႉလၢတ်ႈၵႂၢမ်းသေၶေႃႈသေၵမ်း၊ပိူဝ်ႈဢၼ်ၶဝ်ႁုၸၵ်းမၼ်းၸဝ်ႈယူႇၼၼ်ႉဢေႃႈ။
ၶိင်ႇၵၢင်ၼႂ်ၸဝ်ႉ၊ၸူဝ်ႈဢၼ်မိူင်းဢမ်ႇပႆႇလႅင်းၼၼ်ႉ၊ ၸဝ်ႈယေႇသု၊ လုၵ်ႉသေလႄႈဢွၵ်ႇႁိူၼ်းၵႂႃႇ၊သမ်ႉပႆဢွၵ်ႇဝဵင်းၵႂႃႇၵႃႈတီႈဢၼ်ဢမ်ႇမီးၵူၼ်းၼၼ်ႉယဝ်ႉၸင်ႇ၊သူးတွင်းၵႃႈတီႈၼၼ်ႈဢေႃႈ။-
သိမုၼ်ႇ၊ ဢိၵ်ႇတင်းၵေႃႉသႄႈမၼ်းတင်းလၢႆၸွမ်းႁႃမၼ်းၸဝ်ႈလႄႈ၊-
မိူဝ်ႈဢၼ်ထူပ်းႁၼ်ၸိုင်၊လဝ်ႈလၢတ်ႈလႄႈဝႃႈ၊ “ၵူၼ်းတင်းသဵင်ႈတင်းလူင်ထၢမ်ႁႃၸဝ်ႈႁဝ်းယူႇၶႃႈဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊မၼ်းၸဝ်ႈၶိုၼ်းလၢတ်ႈလႄႈဝႃႈ၊ “ႁဝ်းဢွၼ်ၵၼ်ၵႂႃႇၼႂ်းဝၢၼ်ႈႁိမ်းႁွမ်းၸိူဝ်းၼႆႉတႃႉႁဝ်း။ တီႈၶဝ်ၸိူဝ်းၼႆႉၵေႃႈၵဝ်လူဝ်ႇၵႂႃႇႁေႃးတြႃးၼင်ႇၵဝ်ႇဢေႃႈ။ ၵဝ်မႃးႁႂ်ႈလႆႈႁဵတ်းၸိူဝ်ႉၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။
ႁဵတ်းၼၼ်လႄႈမၼ်းၸဝ်ႈလႄႇၵႂႃႇၵႃႈၼႂ်းဢိူင်ႇ ၵႃႇလိလႄး၊ ၵူႈတီႈၵူႈလႅၼ်ႁႂ်ႈလႆႈႁေႃးတြႃးၵႃႈၼႂ်းၸရွပ်ႈႁေႃးတြႃးတင်းလၢႆလႂ်၊ဢိၵ်ႇတင်းႁေႃႈၽီႁေႃႈၽိူဝ်ႉတင်းလၢႆဢွၵ်ႇပႅတ်ႈဢေႃႈ။
ၵူၼ်းဢၼ်ပဵၼ်တုတ်ႈ ၵေႃႉၼိုင်ႈ၊မႃးတီႈ ၸဝ်ႈယေႇသု၊ လႄႈၶုပ်ႉမူပ်ႇသေယဝ်ႉ၊တွင်းပၢၼ်ႇလႄႈလဝ်ႈလၢတ်ႈဝႃႈ၊ “ပေႃးၸဝ်ႈႁဝ်းမီးဢလူဝ်ႇၸိုင်၊ႁႂ်ႈၵဝ်ၶႃႈမူတ်းသႂ်လႆႈယူႇၶႃႈဢေႃႈ၊” မိူဝ်ႈဢၼ်ဝႃႈၼင်ႇၼႆၸိုင်။
မီးၸႂ်ဢဵတ်းလူၼႃႇလႄႈ ၸဝ်ႈယေႇသု၊ ယိုၼ်းမိုဝ်းတၢင်ႇၵႃႈၼိူဝ်ၵေႃႉၼၼ်ႉသေယဝ်ႉလၢတ်ႈဝႃႈ၊ “ၵဝ်မီးဢလူဝ်ႇဢေႃႈ။ ႁႂ်ႈမူတ်းသႂ်တႃႉ၊” ဝႃႈၼင်ႇၼႆဢေႃႈ။-
ယေႃးၵႃႇမၼ်းၵေႃႈႁၢႆၵမ်းလဵဝ်လႄႈႁွတ်ႈထိုင်တၢင်းဢၼ်မူတ်းသႂ်မႃးဢေႃႈ။-
မၼ်းၸဝ်ႈၵေႃႈႁၢမ်ႈတၢပ်ႈမၼ်းတႄႉတႄႉဝႃႈဝႃႈသေယဝ်ႉ၊ပွႆႇႁႂ်ႈမၼ်းဢွၵ်ႇၵႂႃႇလူၺ်ႈၵႂၢမ်းသင်ႇလၢတ်ႈလႄႈဝႃႈ၊-
“ထွမ်ႇလူး။ လွင်ႈၼႆႉယႃႇပေလၢတ်ႈၼႄတီႈၽူႈလႂ်သေဢိတ်း။ ၵူၺ်းၵႃႈ၊ၵႂႃႇတီႈယဵၸ်ႈပရေႃးႁဵၵ်ႈ လႄႈၼႄပျႃးတူဝ်မႂ်းႁႂ်ႈမၼ်းၸၢမ်းတူၺ်းသေယဝ်ႉ၊လွင်ႈဢၼ်မႂ်းမူတ်းသႂ်ယဝ်ႉၼၼ်ႉ၊ၼင်ႇႁိုဝ်တၵ်းပဵၼ်သၢၵ်ႈသေႇတီႈပိူၼ်ႈၸိုင်၊ႁဵတ်းတၢင်းလူႇဢၼ်ၸွမ်းၼင်ႇတြႃး မူဝ်းသေႇ၊ မီးဝႆႉၼၼ်ႉတႃႉ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ၵေႃႉၼၼ်ႉဢွၵ်ႇၵႂႃႇမွၵ်ႇလၢတ်ႈၸွတ်ႇၵႂႃႇၵူႈတီႈၵူႈလႅၼ်ဢေႃႈ။ ပိူဝ်ႈဢၼ်မၼ်းလၢတ်ႈၼမ်ၼႃႇလူင်လၢင်တေႃႇႁွတ်ႈ ၸဝ်ႈယေႇသု၊ ဢမ်ႇၸၢင်ႈၶဝ်ႈၵႃႈၼႂ်းဝဵင်းၵႂႃႇထၢင်ႇထၢင်ႇသႃးသႃးယဝ်ႉလႄႈ၊လႆႈယူႇၵႃႈတီႈဝၢၼ်ႈၼွၵ်ႈၵူၺ်းဢေႃႈ။ ပိူၼ်ႈဢွၼ်ၵၼ်လုၵ်ႉသေၵူႈတီႈၵူႈလႅၼ်မႃးၸူးတီႈမၼ်းၸဝ်ႈဢေႃႈ။
ဝၢႆးသေၼၼ်ႉ၊မီးဝၼ်းၼိုင်ႈ ၸဝ်ႈယေႇသု၊ ၶိုၼ်းၶဝ်ႈဝဵင်း ၵပိူဝ်ႇၼေႇဢုမ်ႇ၊ မႃးလႄႈၶၢဝ်ႇငၢဝ်းဢၼ်မၼ်းၸဝ်ႈၽႅဝ်ထိုင်ႁိူၼ်းမၼ်းၸဝ်ႈယဝ်ႉၼၼ်ႉၸွတ်ႇတူဝ်ႈၵႂႃႇဢေႃႈ။-
ပိူဝ်ႈၼႆလႄႈၵူၼ်းၼမ်ၼႃႇၸုတုမ်ၵၼ်မႃးတေႃႇထိုင်ႁွတ်ႈထၢၼ်ႈပေႃးဢမ်ႇမီးတီႈယူႇတီႈၼင်ႈဢမ်ႇၵႃး၊ၽၢႆႇၼႃႈႁိူၼ်းၵေႃႈၵူၼ်းတဵမ်ၵႂႃႇမူတ်းဢေႃႈ။ ၸဝ်ႈယေႇသု၊ ႁေႃးတြႃးပၼ်ၶဝ်ယူႇၼၼ်ႉ၊-
ၵူၼ်းသီႇၵေႃႉႁၢမ်ဢဝ်ၵူၼ်းတၢႆၽၢၵ်ႇၵေႃႉၼိုင်ႈႁွတ်ႈထိုင်မႃးတီႈမၼ်းၸဝ်ႈဢေႃႈ။-
ပိူဝ်ႈဢၼ်ၵူၼ်းၼမ်ၼႃႇၽႅဝ်လႄႈၶဝ်ဢမ်ႇၸၢင်ႈဢဝ်ၵူၼ်းပဵၼ်ၼၼ်ႉၶဝ်ႈၸူးမၼ်းၸဝ်ႈ။ ၶဝ်ၸင်ႇၶုတ်းယႃႉ လင်ၶႃးႁိူၼ်း ၵႃႈၼိူဝ်မၼ်းၸဝ်ႈသိုဝ်ႈသိုဝ်ႈသေယဝ်ႉ၊ဢဝ်ၵူၼ်းပဵၼ်ဢၼ်ၼွၼ်းယူႇၼိူဝ်သၢတ်ႇၼၼ်ႉယွၼ်ႇလူင်းဢေႃႈ။-
ၸဝ်ႈယေႇသု၊ ႁၼ်တၢင်းယုမ်ႇမၢတ်ႈၶဝ်ယႂ်ႇထၢၼ်ႇႁိုဝ်ၼၼ်ႉလႄႈလၢတ်ႈတီႈၵူၼ်းတၢႆၽၢၵ်ႇၼၼ်ႉလႄႈဝႃႈ၊ “လုၵ်ႈၸၢႆးၵဝ်႟။ ဢပျတ်ႈမႂ်းၸိုင်၊ၶၢမ်ႇတၢင်းဢၼ်ပွႆႇလွတ်ႈယဝ်ႉ၊” ဝႃႈၼင်ႇၼႆဢေႃႈ။
သြႃႇမေႃၵျၢမ်းထမ်ႇမႃႉၵမ်ႈၽွင်ႈဢၼ်ၼင်ႈယူႇၵႃႈတီႈၼၼ်ႈၸိူဝ်းၼၼ်ႉထၢင်ႇၼႂ်းၸႂ်လႄႈဝႃႈ၊-
“ႁဵတ်းသင်လႄႈၵေႃႉၼႆႉႁတ်းလၢတ်ႈၵႂၢမ်းၸိူဝ်ႉၼင်ႇၼႆၼင်ႇႁိုဝ်။ ဢၼ်ၼႆႉၸိုင်၊ပဵၼ်တၢင်းဢၼ်လၢတ်ႈၽိတ်းပိူင်ႈၽြႃးပဵၼ်ၸဝ်ႈဢေႃႈ။ လိူဝ်သေၽြႃးပဵၼ်ၸဝ်ႈသူႇလဵဝ်ပႃးလဵဝ်ၵူၺ်း၊ၽူႈလႂ်ပွႆႇလွတ်ႈဢပျတ်ႈလႆႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ႁုႁၼ်လွင်ႈတၢင်းဢၼ်ၶဝ်ထၢင်ႇၼႂ်းၸႂ်ၼၼ်ႉလႄႈလၢတ်ႈတီႈၶဝ်လႄႈဝႃႈ၊ “ႁဵတ်းသင်ၼႂ်းၸႂ်သူထၢင်ႇဝႃႈၸိူဝ်ႉၼင်ႇၼႆ။-
ၵႂၢမ်းၶေႃႈလႂ်ယဵင်ႈၶႅၼ်းလၢတ်ႈငၢႆႈတီႈၵူၼ်းတၢႆၽၢၵ်ႇၼႆႉ။ ‘ဢပျတ်ႈမႂ်းၸိုင်၊ၶၢမ်ႇတၢင်းဢၼ်ပွႆႇလွတ်ႈယဝ်ႉ၊’ ဝႃႈၼႆၼၼ်ႉလၢတ်ႈငၢႆႈႁိုဝ်း။ ဢမ်ႇၼၼ်၊ ‘လုၵ်ႉလႄႈဢဝ်တီႈၼွၼ်းမႂ်းသေပႆၵႂႃႇတႃႉ၊’ ဝႃႈၼႆၼၼ်ႉလၢတ်ႈငၢႆႈႁိုဝ်း။-
ၼင်ႇႁိုဝ်သူတၵ်းႁုတၼ်းၶူဝ်း ၸဝ်ႈလုၵ်ႈၵူၼ်း၊ ဢၼ်ပွႆႇလွတ်ႈဢပျတ်ႈလႆႈၼၼ်ႉၸိုင်၊ၵဝ်တၵ်းႁဵတ်းၼႄသၢၵ်ႈသေႇမၼ်းဢေႃႈ၊” ဝႃႈၼင်ႇၼႆသေယဝ်ႉ၊-
သမ်ႉလၢတ်ႈတီႈၵူၼ်းတၢႆၽၢၵ်ႇၼၼ်ႉလႄႈဝႃႈ၊ “ၵဝ်ဝႃႈတီႈမႂ်း။ လုၵ်ႉဢဝ်တီႈၼွၼ်းမႂ်းလႄႈမိူဝ်းႁိူၼ်းမႂ်းတႃႉ၊” ဝႃႈၼင်ႇၼႆဢေႃႈ။
ယၢမ်းမိူဝ်ႈဢၼ်ပိူၼ်ႈယင်းတိုၵ်ႉပႂ်ႉတူၺ်းယူႇၼၼ်ႉ၊ၵူၼ်းတၢႆၽၢၵ်ႇၼၼ်ႉလုၵ်ႉလႄႈၵဵပ်းသိမ်းဢဝ်သၢတ်ႇမၼ်းသေယဝ်ႉဢွၵ်ႇၵႂႃႇဢေႃႈ။ ၶဝ်ၸိူဝ်းၼၼ်ႉဢွၼ်ၵၼ်ဢၢမ်းၼႃႇလူင်လၢင်လႄႈယွင်ႈယေႃးၽြႃးပဵၼ်ၸဝ်ႈလႄႈဝႃႈ၊ “ဢမ်ႇတွၼ်ႉႁၼ်ၸိူဝ်ႉၼင်ႇၼႆသေပွၵ်ႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ သမ်ႉလူင်းၵႂႃႇၵႃႈတီႈၽင်ႇၼွင် ၵႃႇလိလႄး၊ ထႅင်ႈလႄႈမူႇၵူၼ်းၼမ်ၼႃႇၸုတုမ်ၵႃႈတီႈမၼ်းၸဝ်ႈဢေႃႈ။ မၼ်းၸဝ်ႈၵေႃႈသင်ႇသွၼ်ပၼ်ၶဝ်ဢေႃႈ။-
ၼႂ်းမိူဝ်ႈဢၼ်မၼ်းၸဝ်ႈပႆၸွမ်းတၢင်းၵႂႃႇယူႇၼၼ်ႉ၊ထူပ်းႁၼ် လေႇဝိ၊ လုၵ်ႈၸၢႆး ဢႃႇလၽေး၊ ၼင်ႈယူႇၵႃႈၼႂ်းသုမ်ႉၵဵပ်းၶွၼ်ႇၼၼ်ႉလႄႈ၊မၼ်းၸဝ်ႈႁွင်ႉမၼ်းလႄႈဝႃႈ၊ “ၸွမ်းၵဝ်မႃးတႃႉ၊” ဝႃႈၼင်ႇၼႆဢေႃႈ။ လေႇဝိ၊ ၵေႃႈလုၵ်ႉၸွမ်းမၼ်းၸဝ်ႈၵႂႃႇဢေႃႈ။
လိုၼ်းၼၼ်ႉ၊ ၸဝ်ႈယေႇသု၊ ၵိၼ်ၶဝ်ႈၶမ်ႈၵႃႈၼႂ်းႁိူၼ်း လေႇဝိ၊ ဢေႃႈ။ ၵူၼ်းၵဵပ်းၵိၼ်ၶွၼ်ႇတင်းလၢႆ၊ဢိၵ်ႇတင်းၵူၼ်းဢၼ်ဢမ်ႇလီၸိူဝ်းၼၼ်ႉၼမ်ၼႃႇဢွၼ်ၵၼ်ၸွမ်းမၼ်းၸဝ်ႈၵႂႃႇလႄႈၼႂ်းၶဝ်ၼၼ်ႉၼမ်ၼႃႇၵေႃႈ၊ၵိၼ်ၶဝ်ႈလူၺ်ႈၵၼ်တင်းတပႄးၸဝ်ႈၸိူဝ်းၼၼ်ႉဢေႃႈ။-
သြႃႇမေႃၵျၢမ်းထမ်ႇမႃႉဢၼ်ပဵၼ်ၵူၼ်းၵိူင်း ၽႃႇရိသႄး၊ ၸိူဝ်းၼၼ်ႉမိူဝ်ႈဢၼ်ႁၼ် ၸဝ်ႈယေႇသု၊ ၵိၼ်ၶဝ်ႈလူၺ်ႈၵၼ်တင်းၵူၼ်းဢၼ်ဢမ်ႇလီလႂ်တင်းၵူၼ်းၵဵပ်းၵိၼ်ၶွၼ်ႇလႂ်ယူႇၼၼ်ႉၸိုင်၊ထၢမ်တီႈတပႄးၸဝ်ႈၸိူဝ်းၼၼ်ႉလႄႈဝႃႈ၊ “ႁဵတ်းသင်လႄႈမၼ်းၵိၼ်ၶဝ်ႈလူၺ်ႈၵၼ်တင်းၵူၼ်းၵဵပ်းၵိၼ်ၶွၼ်ႇဢိၵ်ႇတင်းၵူၼ်းဢၼ်ဢမ်ႇလီၸိူဝ်းၼၼ်ႉၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ငိၼ်းလႄႈလၢတ်ႈတီႈၶဝ်လႄႈဝႃႈ၊ “ၵူၼ်းယူႇလီဢမ်ႇလူဝ်ႇသြႃႇမေႃယႃ။ ၵူၼ်းၶႆႈၵူၼ်းပဵၼ်ၵူၺ်းလူဝ်ႇသြႃႇမေႃယႃဢေႃႈ။ ၵဝ်မႃးႁႂ်ႈလႆႈႁွင်ႉဢဝ်ၵူၼ်းသိုဝ်ႈတေႃႇဢမ်ႇၸႂ်ႈ။ မႃးႁႂ်ႈလႆႈႁွင်ႉဢဝ်ၵူၼ်းဢၼ်ပိူင်ႈတြႃးၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၽဝ်ႇၼိုင်ႈ၊မိူဝ်ႈဢၼ်တပႄးသြႃႇ ယူဝ်းႁၢၼ်ႇ၊ တင်းၵူၼ်းၵိူင်း ၽႃႇရိသႄး၊ တင်းလၢႆယင်းတိုၵ်ႉၵမ်သိၼ်ဢမ်ႇၵိၼ်တၢင်းၵိၼ်ယူႇၼၼ်ႉၸိုင်၊ၵူၼ်းၵမ်ႈၽွင်ႈၶဝ်ႈၸူးၵႃႈတီႈ ၸဝ်ႈယေႇသု၊ လႄႈလဝ်ႈထၢမ်ဝႃႈ၊ “ႁဵတ်းသင်လႄႈတပႄးသြႃႇ ယူဝ်းႁၢၼ်ႇ၊ ဢိၵ်ႇတင်းတပႄး ၽႃႇရိသႄး၊ ၶဝ်ၵမ်တၢင်းၵိၼ်ယူႇသေၵေႃႈ၊တပႄးၸဝ်ႈႁဝ်းၸိူဝ်းၼႆႉသမ်ႉဢမ်ႇၵမ်တၢင်းၵိၼ်ၵၼ်ၸိူဝ်ႉၼင်ႇႁိုဝ်ၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “သူထၢင်ႇပီႈၼွင်ႉၶႅၵ်ႇဢၼ်မီးၼႂ်းပၢင်ပွႆးသွင်ႇမၢင်ႇၵလႃႇၼၼ်ႉ၊ၸၢင်ႈၵမ်တၢင်းၵိၼ်ၽွင်းမိူဝ်ႈဢၼ်လုၵ်ႈၶူၺ်မႂ်ႇမီးယူႇလူၺ်ႈၶဝ်ၼၼ်ႉႁိုဝ်း။ ၸူဝ်ႈဢၼ်လုၵ်ႈၶူၺ်မႂ်ႇယင်းမီးယူႇလူၺ်ႈၵၼ်တင်းၶဝ်ၸိုင်၊ၶဝ်ဢမ်ႇၸၢင်ႈၵမ်တၢင်းၵိၼ်။-
ၵူၺ်းၵႃႈ၊ၶိင်ႇၵႃႇလႃႉဢၼ်တၵ်းလႆႈဢဝ်လုၵ်ႈၶူၺ်မႂ်ႇၽၢတ်ႇၵၼ်တင်းၵေႃႉသႄႈမၼ်းတင်းလၢႆၸိုင်၊တၵ်းႁွတ်ႈမႃးဢေႃႈ။ ၶိင်ႇမိူဝ်ႈၼၼ်ႉၶဝ်တၵ်းၵမ်တၢင်းၵိၼ်ဢေႃႈ။
“ၽူႈလႂ်ဢမ်ႇဢဝ်ၽႃႈၽႅၼ်ႇဢၼ်မႂ်ႇၽုင်ၵုပ်းၶူဝ်းၵဝ်ႇ။ ပေႃးၽုင်ၸိုင်၊ၽႃႈၽႅၼ်ႇမႂ်ႇၼၼ်ႉတၵ်းႁုတ်ႉၸၼ်ၶူဝ်းၵဝ်ႇၼၼ်ႉလႄႈႁူးမၼ်းတၵ်းယဵင်ႈၶႅၼ်းယႂ်ႇမႃးဢေႃႈ။-
ပိူင်လဵဝ်ၵၼ်၊ၽူႈလႂ်ဢမ်ႇဢဝ်ၼမ်ႉမၢၵ်ႇၸပိတ်ႉဢၼ်မႂ်ႇသႂ်ႇၼႂ်းထူင်ၼင်ဢၼ်ၵဝ်ႇ။ ပေႃးသႂ်ႇၸိုင်၊ၼမ်ႉမၢၵ်ႇၸပိတ်ႉဢၼ်မႂ်ႇၼၼ်ႉတၵ်းႁႂ်ႈထူင်ၼင်တႅၵ်ႇလႄႈၼမ်ႉမၢၵ်ႇၸပိတ်ႉဢိၵ်ႇတင်းထူင်ၼင်ၼၼ်ႉတၵ်းလုလႅဝ်ဢေႃႈ။ ၼမ်ႉမၢၵ်ႇၸပိတ်ႉဢၼ်မႂ်ႇတၵ်းလႆႈသႂ်ႇၼႂ်းထူင်ၼင်မႂ်ႇဢေႃႈ၊” ဝႃႈၼင်ႇၼႆဢေႃႈ။
ၼႂ်းဝၼ်းၵမ်သိၼ်ဝၼ်းၼိုင်ႈ ၸဝ်ႈယေႇသု၊ ပႆၽႃႇလတ်းႁႆႈၶဝ်ႈၵျုင်ႇၵႂႃႇဢေႃႈ။ ၼႂ်းမိူဝ်ႈဢၼ်တပႄးၸဝ်ႈတင်းလၢႆပႆၸွမ်းမၼ်းၸဝ်ႈၵႂႃႇယူႇၼၼ်ႉ၊ၶဝ်ယၵ်းဢဝ်ႁူင်းၶဝ်ႈၵျုင်ႇဢေႃႈ။-
ၵူၼ်းၵိူင်း ၽႃႇရိသႄး၊ ၶဝ်လၢတ်ႈတီႈမၼ်းၸဝ်ႈလႄႈဝႃႈ၊ “တူၺ်းလူး။ တၢင်းဢၼ်ၶဝ်ႁဵတ်းၼႆႉၶတ်းၵၼ်တင်းတြႃးဝၼ်းၵမ်သိၼ်ႁဝ်းဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၶိုၼ်းလၢတ်ႈလႄႈဝႃႈ၊ “ၸွင်ႇသူဢမ်ႇယၢမ်ႈၽတ်းဢၢၼ်ႇမႅၼ်ႈလွင်ႈ တႃႇဝိတ်ႈ၊ ႁဵတ်းၵႃႈသင်ၼႂ်းမိူဝ်ႈဢၼ်မၼ်းဢိုပ်းတၢင်းၵိၼ်လႄႈဢမ်ႇယူႇလႆႈယဝ်ႉၼၼ်ႉယဝ်ႉႁိုဝ်း။ မၼ်းဢိၵ်ႇတင်းၵူၼ်းမၼ်းတင်းလၢႆတွင်ႉမႆႈလႄႈ၊-
မၼ်းၶဝ်ႈၵႂႃႇၵႃႈၼႂ်းႁိူၼ်းၽြႃးပဵၼ်ၸဝ်ႈသေယဝ်ႉ၊ၵိၼ်ၶဝ်ႈမုၼ်းဢၼ်သၢၵ်ႈလူႇဝႆႉၽၢႆႇၼႃႈၽြႃးပဵၼ်ၸဝ်ႈၼၼ်ႉဢမ်ႇၸႂ်ႈႁိုဝ်း။ လွင်ႈတၢင်းၼၼ်ႉပဵၼ်ၼႂ်းၸူဝ်ႈပၢၼ် ဢႃႇပျႃႇထႃႇ၊ ႁဵတ်းယဵၸ်ႈပရေႃးႁဵၵ်ႈ လူင်ၼၼ်ႉယဝ်ႉ။ ၸွမ်းၼင်ႇတြႃးႁဝ်းၸိုင်၊ယဵၸ်ႈပရေႃးႁဵၵ်ႈၶဝ်ၵူၺ်းထုၵ်ႇလီၵိၼ်သေၵေႃႈ၊ တႃႇဝိတ်ႈ၊ ဢဝ်ၵိၼ်လႄႈသမ်ႉဢဝ်ပၼ်တီႈၵူၼ်းမၼ်းလူးၵွၼ်ႇဢေႃႈ၊” ဝႃႈၼင်ႇၼႆဢေႃႈ။
လိူဝ်သေၼၼ်ႉမၼ်းၸဝ်ႈသမ်ႉလၢတ်ႈလႄႈဝႃႈ၊ “ဝၼ်းၵမ်သိၼ်ၸိုင်၊ႁႂ်ႈပဵၼ်တၢင်းလီပုၼ်ႈၵူၼ်းဢေႃႈ။ ၵူၼ်းႁႂ်ႈပဵၼ်ပုၼ်ႈဝၼ်းၵမ်သိၼ်ဢမ်ႇၸႂ်ႈ။-
ပိူဝ်ႈၼႆလႄႈ လုၵ်ႈၵူၼ်း၊ ပဵၼ်ၸဝ်ႈဝၼ်းၵမ်သိၼ်ဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ သမ်ႉၶဝ်ႈၵႂႃႇၵႃႈၼႂ်းၸရွပ်ႈႁေႃးတြႃးထႅင်ႈလႄႈၵႃႈတီႈၼၼ်ႈမီးၵူၼ်းၵေႃႉၼိုင်ႈ၊ဢၼ်မိုဝ်းမၼ်းႁဵဝ်ႇဝႆႉၶွၼ်ၼိုင်ႈၼၼ်ႉဢေႃႈ။-
ၵူၼ်းၸိူဝ်းဢၼ်မီးယူႇၵႃႈတီႈၼၼ်ႈပႂ်ႉထႃႈတူၺ်းမၼ်းၸဝ်ႈတေႁဵတ်းႁႂ်ႈၵူၼ်းပဵၼ်ၸိုၼ်ႈႁၢႆၼႂ်းဝၼ်းၵမ်သိၼ်ႁိုဝ်း၊ဢမ်ႇႁႂ်ႈၸိုၼ်ႈႁၢႆႁိုဝ်းၼၼ်ႉဢေႃႈ။ ၵွပ်ႈပိူဝ်ႈၶဝ်ၶႂ်ႈၵျၢမ်ႇႁႃတီႈတၵ်းတၢင်ႇဢပျတ်ႈတီႈမၼ်းၸဝ်ႈဢေႃႈ။-
ၸဝ်ႈယေႇသု၊ လၢတ်ႈတီႈၵေႃႉၼၼ်ႉလႄႈဝႃႈ၊ “ၶိုၼ်ႈမႃးၵႃႈတီႈၽၢႆႇၼႃႈၼႆႉတႃႉ၊” ဝႃႈၼင်ႇၼႆယဝ်ႉၸင်ႇ၊-
ထၢမ်ၵူၼ်းတင်းလၢႆၸိူဝ်းၼၼ်ႉလႄႈဝႃႈ၊ “ပုၼ်ႈဝၼ်းၵမ်သိၼ်ၸိုင်၊တြႃးႁဝ်းႁဵတ်းၸိူဝ်ႉႁိုဝ်လၢတ်ႈဝႆႉ။ ႁႂ်ႈၸွႆႈထႅမ်ပိူၼ်ႈႁိုဝ်း။ ႁႂ်ႈယႃႉတၢင်းလီပိူၼ်ႈႁိုဝ်း။ ႁႂ်ႈၵႄႇသႄႇဢသၢၵ်ႈပိူၼ်ႈႁိုဝ်း။ ႁႂ်ႈၶႃႈၸႂ်ပိူၼ်ႈႁိုဝ်း၊” ဝႃႈၼင်ႇၼႆသေၵေႃႈ၊ၽူႈလႂ်ၵေႃႈဢမ်ႇၶိုၼ်းတွပ်ႇသေၵေႃႉသေၵူၼ်း။
မိူဝ်ႈၼၼ်ႉ၊ ၸဝ်ႈယေႇသု၊ ၶႂ်ႈၸႃႉလႄႈယႅၵ်ႉတူၺ်းၶဝ်ၵူႈၽၢႆႇယူႇ၊ၶေႃးၶူမ်လူၺ်ႈလွင်ႈႁူဝ်ၸႂ်ၶဝ်တၼ်ၼႃႇလူင်လၢင်ၼၼ်ႉဢေႃႈ။ မၼ်းၸဝ်ႈၸင်ႇလၢတ်ႈတီႈၵေႃႉၼၼ်ႉလႄႈဝႃႈ၊ “ယဵတ်ႇမိုဝ်းမႂ်းတႃႉ၊” ဝႃႈၼင်ႇၼႆလႄႈမၼ်းၵေႃႈယဵတ်ႇမိုဝ်းမၼ်းလႄႈမိုဝ်းမၼ်းၵေႃႈလီမႃးဢေႃႈ။-
မိူဝ်ႈၼၼ်ႉ၊ၵူၼ်းၵိူင်း ၽႃႇရိသႄး၊ ၶဝ်ဢွၵ်ႇၸရွပ်ႈၵႂႃႇၵမ်းလဵဝ်ၶဝ်ႁဵတ်းပၢင်ၵုမ်၊တိူင်ႇပၢင်ႇလၢတ်ႈၸႃၵၼ်ႁႃၼႄးလၢႆးဢၼ်တၵ်းလႆႈယႃႉၵဝ်းမၼ်းၸဝ်ႈၸိူဝ်ႉၼင်ႇႁိုဝ်ၼၼ်ႉႁူမ်ႈလူၺ်ႈၵၼ်တင်းၵူၼ်းၸဝ်ႈၽႃႉ ႁေႇရူတ်ႈ၊ ၸိူဝ်းၼၼ်ႉဢေႃႈ။
ၸဝ်ႈယေႇသု၊ ဢိၵ်ႇတင်းတပႄးၸဝ်ႈတင်းလၢႆ၊ၶၢႆႉၵႂႃႇၵႃႈတီႈႁိမ်းၼွင် ၵႃႇလိလႄး၊ ပုၼ်ႉလႄႈၵူၼ်းၼမ်ၼႃႇၸွမ်းမၼ်းၸဝ်ႈၵႂႃႇဢေႃႈ။-
ၶဝ်ၸိူဝ်းၼၼ်ႉ၊ပဵၼ်ၵူၼ်းမိူင်း ၵႃႇလိလႄး၊ ၵူၼ်းမိူင်း ယုတႃႉ၊ တင်းၵူၼ်းဝဵင်း ယေႇရုသလႅမ်ႇ၊ ၵူၼ်းမိူင်း ဢိတုမေႇ၊ တင်းၵူၼ်းမိူင်းၽၢႆႇပုၼ်ႉၼမ်ႉ ယေႃးတၢၼ်ႇ၊ ပႃးၸဵမ်ၵူၼ်းမိူင်းဢၼ်ယူႇႁိမ်းႁွမ်းဝဵင်း တုရု၊ ဢိၵ်ႇတင်းဝဵင်း ၸိတုၼ်ႇ၊ တင်းလၢႆဢေႃႈ။ ၵူၼ်းၼမ်ၼႃႇၸိူဝ်းၼႆႉၸွမ်းမႃးၵွပ်ႈပိူဝ်ႈၶဝ်လႆႈငိၼ်းလွင်ႈဢၼ်မၼ်းၸဝ်ႈႁဵတ်းၵႃႈမီးတင်းသဵင်ႈတင်းလူင်ၸိူဝ်းၼၼ်ႉဢေႃႈ။-
ၵွပ်ႈပိူဝ်ႈၵူၼ်းၼမ်ၼႃႇလႄႈ ၸဝ်ႈယေႇသု၊ သင်ႇလၢတ်ႈတီႈတပႄးၸဝ်ႈၸိူဝ်းၼၼ်ႉႁႂ်ႈၶဝ်ႁႅၼ်းႁိူဝ်းဢွၼ်ႇလမ်းၼိုင်ႈ၊ပႂ်ႉယူႇႁိမ်းမၼ်းၸဝ်ႈၼင်ႇႁိုဝ်ၶဝ်တၵ်းဢမ်ႇလႆႈၽိုတ်ႉဢီးမၼ်းၸဝ်ႈဢေႃႈ။-
မိူဝ်ႈယၢမ်းၼၼ်ႉ၊ပိူဝ်ႈဢၼ်မၼ်းၸဝ်ႈႁဵတ်းႁႂ်ႈတၢင်းၶႆႈတၢင်းပဵၼ်ၵူႈမဵဝ်းမဵဝ်းၸိုၼ်ႈႁၢႆယူႇလႄႈ၊ၵူၼ်းပဵၼ်တင်းလၢႆဢွၼ်ၵၼ်ၽိုတ်ႉဢီးၸူးတီႈမၼ်းၸဝ်ႈႁႂ်ႈလႆႈတိူဝ်ႉထုၵ်ႇမၼ်းၸဝ်ႈဢေႃႈ။-
မိူဝ်ႈလႂ်သေဢမ်ႇဝႃႈ၊ပေႃးၽီလႂ်ၽိူဝ်ႉလႂ်ႁၼ်မၼ်းၸဝ်ႈၸိုင်၊ၶုပ်ႉမူပ်ႇသေလႄႈႁွင်ႉသႅၼ်ႇလႄႈဝႃႈ၊ “ၸဝ်ႈႁဝ်းပဵၼ်လုၵ်ႈၽြႃးပဵၼ်ၸဝ်ႈၶႃႈဢေႃႈ၊” ဝႃႈၼင်ႇၼႆတႃႇသေႇဢေႃႈ။
လွင်ႈၼင်ႇႁိုဝ်ၸိုဝ်ႈသဵင်ၶၢဝ်ႇမၼ်းၸဝ်ႈတၵ်းဢမ်ႇလႆႈၽႄႈဢွၵ်ႇၸိုင်၊မၼ်းၸဝ်ႈႁၢမ်ႈၽီၸိူဝ်းၼၼ်ႉၼႃႇလူင်လၢင်ဢေႃႈ။
မိူဝ်ႈၼၼ်ႉ၊ ၸဝ်ႈယေႇသု၊ ၶိုၼ်ႈၵႂႃႇၵႃႈၼိူဝ်လွႆပုၼ်ႉဢေႃႈ။ မၼ်းၸဝ်ႈႁွင်ႉဢဝ်ၵူၼ်းၸိူဝ်းဢၼ်မၼ်းၸဝ်ႈၶႂ်ႈႁွင်ႉၼၼ်ႉလႄႈၶဝ်ၵေႃႈမႃးၸူးတီႈမၼ်းၸဝ်ႈယဝ်ႉၸင်ႇ၊-
မၼ်းၸဝ်ႈၵေႃႈ၊လိူၵ်ႈဢဝ်သိပ်းသွင်ၵေႃႉ၊ယုၵ်ႉတၢင်ႇဝႆႉၼႂ်းဢရႃႇတမၢၼ်ႇၸဝ်ႈႁႂ်ႈလႆႈမီးယူႇလူၺ်ႈၵၼ်တင်းမၼ်းၸဝ်ႈဢိၵ်ႇတင်းႁႂ်ႈလႆႈပွႆႇၸႂ်ႉၶဝ်ၵႂႃႇႁေႃးတြႃးလႄႈ၊-
ႁႂ်ႈမီးတၼ်းၶူဝ်းဢၼ်ႁဵတ်းႁႂ်ႈတၢင်းၶႆႈတၢင်းပဵၼ်ၸိုၼ်ႈႁၢႆ၊ဢိၵ်ႇတင်းႁေႃႈၽီႁၢႆႉဢွၵ်ႇပႅတ်ႈလႆႈၼၼ်ႉဢေႃႈ။
ၶဝ်သိပ်းသွင်ပႃးၼၼ်ႉၸမ်ႉ၊ပဵၼ် သိမုၼ်ႇ၊ (ဢၼ် ၸဝ်ႈယေႇသု၊ ပၼ်ၸိုဝ်ႈမႂ်ႇႁွင်ႉဝႃႈ၊ ပေႇတရု )၊-
ယႃႇၵုပ်ႈ၊ တင်း ယူဝ်းႁၢၼ်ႇ၊ ဢၼ်ပဵၼ်လုၵ်ႈၸၢႆး ၸေႇပေႇတႄး၊ (ဢၼ် ၸဝ်ႈယေႇသု၊ ပၼ်ၸိုဝ်ႈမႂ်ႇႁွင်ႉဝႃႈ၊ ၽူဝ်ႇဢၢၼ်ၼိူဝ်ႇၵိတ်ႉ၊ ဢၼ်ပွင်ႇဝႃႈ လုၵ်ႈၽႃႉလင် )၊-
ဢိၵ်ႇတင်း ဢၼ်ႇတရေႇ၊ၽိလိပ်ႉပု၊ပႃႇထေႃးလမႄး၊မတ်ႈထႄႇ၊ထေႃးမႃႉ၊ယႃႇၵုပ်ႈ၊ လုၵ်ႈၸၢႆး ဢႃႇလၽေး၊ထတ်ႉတေႇ၊သိမုၼ်ႇ၊ ၵူၼ်း ၵႃႇၼၼိတ်ႉ၊-
ဢိၵ်ႇတင်း ယုတႃႉဢိသၵႃႇရေႇဢုတ်ႈ၊ ဢၼ်ဢဝ်မၼ်းၸဝ်ႈဢၢပ်ႈၼၼ်ႉဢေႃႈ။
ၶဝ်ၶိုၼ်းပွၵ်ႈမိူဝ်းၵႂႃႇလႄႈၵူၼ်းၼမ်ၼႃႇသမ်ႉၸုတုမ်မႃးၵႃႈတီႈ ၸဝ်ႈယေႇသု၊ တေႃႇထိုင်ႁွတ်ႈၶဝ်ထၢၼ်ႈပေႃးဢမ်ႇတၼ်းလႆႈၵိၼ်တၢင်းၵိၼ်ဢေႃႈ။-
မိူဝ်ႈဢၼ်ပီႈၼွင်ႉမၼ်းၸဝ်ႈငိၼ်းၸိုင်၊ၶဝ်ၶႂ်ႈၸွမ်းၵႂႃႇႁႂ်ႈလႆႈတိဢဝ်မၼ်းၸဝ်ႈမႃး၊ၵွပ်ႈပိူဝ်ႈၶဝ်လႆႈငိၼ်းၶၢဝ်ႇပိူၼ်ႈဝႃႈ၊ “မၼ်းယွင်ႇၵႂႃႇယဝ်ႉ၊” ဝႃႈၼင်ႇၼႆၼၼ်ႉဢေႃႈ။
သြႃႇမေႃၵျၢမ်းထမ်ႇမႃႉဢၼ်လုၵ်ႉသေၵႃႈတီႈဝဵင်း ယေႇရုသလႅမ်ႇ၊ မႃးၸိူဝ်းၼၼ်ႉၵေႃႈဝႃႈ၊ “ၽီႁၢႆႉ ပေႇလႃႉၸေႇပုလႃႉ၊ ၶဝ်ႈၵႃႈၼႂ်းမၼ်းဢေႃႈ။ ၶုၼ်ၽီႁၢႆႉပၼ်တၼ်းၶူဝ်းတီႈမၼ်းလႄႈမၼ်းႁေႃႈၽီႁၢႆႉတင်းလၢႆဢွၵ်ႇပႅတ်ႈလႆႈဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈႁွင်ႉၶဝ်မႃးသေယဝ်ႉ၊ဢဝ်တင်းၵႂၢမ်းဢုပမႃႇလၢတ်ႈတီႈၶဝ်လႄႈဝႃႈ၊ “ ၸႃႇတၢၼ်ႇ၊ ႁေႃႈ ၸႃႇတၢၼ်ႇ၊ ပႅတ်ႈလႆႈၸိူဝ်ႉၼင်ႇႁိုဝ်။-
ပေႃးမိူင်းၼိုင်ႈၽႄမႅင်ႇပဵၼ်လၢႆမူႇလၢႆၸိူဝ်းလႄႈတိုၵ်းတေႃးၵၼ်ၸိုင်၊မိူင်းၼၼ်ႉတၵ်းတူၵ်းလုတူၵ်းသုမ်းဢေႃႈ။-
ပေႃးႁိူၼ်းၼိုင်ႈၽႄမႅင်ႇပဵၼ်လၢႆမူႇလၢႆၸိူဝ်းလႄႈဢမ်ႇထုၵ်ႇဢမ်ႇမႅၼ်ႈၵၼ်ၸိုင်၊ႁိူၼ်းၼၼ်ႉတၵ်းတူၵ်းလုတူၵ်းသုမ်းဢေႃႈ။-
ပိူင်လဵဝ်ၵၼ်၊ပေႃးဝၢၼ်ႈမိူင်း ၸႃႇတၢၼ်ႇ၊ ၽႄမႅင်ႇပဵၼ်လၢႆမူႇလၢႆၸိူဝ်းၸိုင်၊မၼ်းဢမ်ႇတႄႇဢမ်ႇမၼ်ႈလႆႈ၊တၵ်းလုသုမ်းလႄႈႁၢႆဝၢႆးၵႂႃႇဢေႃႈ။
“ၽူႈလႂ်တေၶဝ်ႈၵႂႃႇၵႃႈၼႂ်းႁိူၼ်းၵူၼ်းႁႅင်းလူင်လႄႈႁိမ်ဢဝ်ၶူဝ်းလဵင်းမၼ်းလႆႈ။ မိူဝ်ႈလႂ်ပေႃးလႆႈမတ်ႉၽုၵ်ႇၵူၼ်းႁႅင်းလူင်ၼၼ်ႉဝႆႉယဝ်ႉၸင်ႇ၊ၸၢင်ႈႁိမ်ဢဝ်ၵႃႈၼႂ်းႁိူၼ်းမၼ်းလႆႈဢေႃႈ။
“ၵဝ်ဝႃႈတီႈၸိုဝ်ႈၸႂ်ႈမၼ်းၸမ်ႉ၊ဢပျတ်ႈဢၼ်ၵူၼ်းတင်းလၢႆႁဵတ်းၶတ်း၊လၢတ်ႈၶတ်းၵၼ်တင်းၽြႃးပဵၼ်ၸဝ်ႈၵႃႈမီးတင်းသဵင်ႈတင်းလူင်ၸိုင်၊ပွႆႇလွတ်ႈပၼ်လႆႈယူႇဢေႃႈ။-
ၵူၺ်းၵႃႈ၊ၽူႈလႂ်သေဢမ်ႇဝႃႈ၊ၵေႃႉဢၼ်သႄႉသွမ်းဝိၺိၺ်ႇဢၼ်မူတ်းၸၢင်ႇၸဝ်ႈၼၼ်ႉဢပျတ်ႈမၼ်းၸိုင်၊တိုၼ်းဢမ်ႇပွႆႇလွတ်ႈပၼ်လႆႈ။ ပဵၼ်ၵေႃႉဢၼ်ႁဵတ်းမႅၼ်ႈဢပျတ်ႈထႃႇဝရႃႉယဝ်ႉ၊” ဝႃႈၼင်ႇၼႆဢေႃႈ။-
မၼ်းၸဝ်ႈဝႃႈၸိူဝ်ႉၼင်ႇၼႆ၊ၵွပ်ႈပိူဝ်ႈဢၼ်ၵူၼ်းၵမ်ႈၽွင်ႈဝႃႈ၊ “မၼ်းပဵၼ်ၵေႃႉဢၼ်ၽီႁၢႆႉၶဝ်ႈဝႆႉဢေႃႈ၊” ဝႃႈၼင်ႇၼႆၼၼ်ႉဢေႃႈ။
မိူဝ်ႈၼၼ်ႉ၊မႄႈၸဝ်ႈတင်းၼွင်ႉၸၢႆးၸဝ်ႈတင်းလၢႆႁွတ်ႈမႃးၸုၵ်းယူႇၵႃႈၼွၵ်ႈသေယဝ်ႉ၊ၸႂ်ႉၵူၼ်းၵႂႃႇႁွင်ႉမၼ်းၸဝ်ႈဢေႃႈ။-
ၵူၼ်းတင်းလၢႆၼင်ႈလွမ်ႉႁွပ်ႈမၼ်းၸဝ်ႈယူႇလႄႈမွၵ်ႇလၢတ်ႈတီႈမၼ်းၸဝ်ႈလႄႈဝႃႈ၊ “တူၺ်းၶႃႈလူး။ မႄႈၸဝ်ႈႁဝ်းဢိၵ်ႇတင်းၼွင်ႉၸဝ်ႈႁဝ်းၶဝ်မႃးမီးယူႇၵႃႈၼွၵ်ႈလႄႈၶႂ်ႈထူပ်းၸဝ်ႈႁဝ်းၶႃႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “မႄႈၵဝ်၊ၼွင်ႉၵဝ်ၸမ်ႉ၊ပဵၼ်ၽူႈလႂ်၊” ဝႃႈၼင်ႇၼႆသေလႄႈ၊-
ဝၢႆႇတူၺ်းၶဝ်ၸိူဝ်းဢၼ်ၼင်ႈလွမ်ႉႁွပ်ႈမၼ်းၸဝ်ႈယူႇၼၼ်ႉလႄႈသမ်ႉလၢတ်ႈထႅင်ႈလႄႈဝႃႈ၊ “တူၺ်းလူး။ ၶဝ်ၸိူဝ်းၼႆႉပဵၼ်မႄႈၵဝ်၊ၼွင်ႉၵဝ်တင်းလၢႆယဝ်ႉ။-
ၽူႈလႂ်သေဢမ်ႇဝႃႈ၊ၵေႃႉဢၼ်ႁဵတ်းၸွမ်းဢလူဝ်ႇၽြႃးပဵၼ်ၸဝ်ႈၼၼ်ႉ၊ၵေႃႉၼၼ်ႉပဵၼ်ၼွင်ႉယိင်းၼွင်ႉၸၢႆးၵဝ်မႄႈၵဝ်ဢေႃႈ၊” ဝႃႈၼင်ႇၼႆဢေႃႈ။
ဝၢႆးၼၼ်ႉ၊ ၸဝ်ႈယေႇသု၊ သမ်ႉသင်ႇသွၼ်ပၼ်ၵႃႈတီႈႁိမ်းၽင်ႇၼွင် ၵႃႇလိလႄး၊ ဢေႃႈ။ ၵူၼ်းၼမ်ၼႃႇၸုတုမ်ၵၼ်မႃးတီႈမၼ်းၸဝ်ႈထၢၼ်ႈပေႃးမၼ်းၸဝ်ႈလႆႈၶဝ်ႈၼင်ႈၵႃႈၼႂ်းႁိူဝ်းလႄႈဢဝ်ႁိူဝ်းၽၢၵ်ႈယၢၼ်ၽင်ႇၵႂႃႇသေယဝ်ႉ၊ၵူၼ်းတင်းလၢႆယူႇၼိူဝ်ၵုင်းၸွမ်းၽင်ႇၼွင်ဢေႃႈ။-
မိူဝ်ႈၼၼ်ႉ၊မၼ်းၸဝ်ႈသင်ႇသွၼ်ပၼ်ၶဝ်ၼမ်ၼႃႇလူၺ်ႈတင်းၵႂၢမ်းဢုပမႃႇလႄႈဝႃႈ။
“ထွမ်ႇသေၵမ်း။ မိူဝ်ႈၼၼ်ႉ၊မီးၵူၼ်းၵေႃႉၼိုင်ႈဢွၵ်ႇၵႂႃႇဝၢၼ်ႇၸိူဝ်ႉၽၼ်းဢေႃႈ။-
မိူဝ်ႈဢၼ်မၼ်းဝၢၼ်ႇမဵတ်ႉၽၼ်းၵႂႃႇၼၼ်ႉၸိုင်၊မဵတ်ႉၵမ်ႈၽွင်ႈတူၵ်းမႅၼ်ႈၵႃႈတီႈၵၢင်တၢင်းလႄႈၼူၵ်ႉတင်းလၢႆမႃးၵိၼ်ပႅတ်ႈဢေႃႈ။-
မဵတ်ႉၵမ်ႈၽွင်ႈတူၵ်းမႅၼ်ႈၵႃႈတီႈလိၼ်လေႃးႁိၼ်၊ဢၼ်ဢမ်ႇမီးၽုၼ်ႇၼၼ်ႉလႄႈ၊ၸဵဝ်းတႅၵ်ႇငွၵ်ႈမႃးသေၵေႃႈ၊-
မိူဝ်ႈဢၼ်ၵၢင်ဝၼ်းဢွၵ်ႇမႃးၸိုင်၊လႅတ်ႇမႆႈၼႃႇလႄႈၸွမ်းၼင်ႇႁၢၵ်ႈမၼ်းဢမ်ႇလိုၵ်ႉၼၼ်ႉႁဵဝ်ႇႁႅင်ႈပႅတ်ႈၵႂႃႇသေဢေႃႈ။-
မဵတ်ႉၵမ်ႈၽွင်ႈတူၵ်းမႅၼ်ႈၵႃႈၼႂ်းယုမ်းၼၢမ်ၸိူဝ်းဢၼ်ယႂ်ႇမႃး၊ႁတ်ႉတူၼ်ႈၶဝ်ႈသမ်ႉပေႃးဢမ်ႇၸၢင်ႈပဵၼ်ႁူင်းပဵၼ်မၢၵ်ႇမႃးလႆႈ။-
မဵတ်ႉၵမ်ႈၽွင်ႈတူၵ်းမႅၼ်ႈၵႃႈတီႈလိၼ်လီလႄႈ၊ဢွၵ်ႇတူၼ်ႈသေယဝ်ႉ၊ယႂ်ႇမႃးသေလႄႈမၢၵ်ႇမႃးတီႈမၢင်တူၼ်ႈသၢမ်သိပ်းပုၼ်ႈ၊မၢင်တူၼ်ႈႁူၵ်းသိပ်းပုၼ်ႈ၊မၢင်တူၼ်ႈပၢၵ်ႇပုၼ်ႈဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈသမ်ႉလၢတ်ႈလႄႈဝႃႈ၊ “ၵေႃႉဢၼ်မီးႁူဢၼ်ၸၢင်ႈငိၼ်းၼၼ်ႉႁႂ်ႈငိၼ်းသေၵမ်းတႃႉ၊” ဝႃႈၼင်ႇၼႆဢေႃႈ။
မိူဝ်ႈဢၼ် ၸဝ်ႈယေႇသု၊ မီးယူႇၶေႃၶေႃမၼ်းၸဝ်ႈၼၼ်ၸိုင်၊ၶဝ်ၸိူဝ်းဢၼ်မီးယူႇႁိမ်းမၼ်းၸဝ်ႈဢိၵ်ႇတင်းၶဝ်သိပ်းသွင်ပႃးၼၼ်ႉ၊လဝ်ႈထၢမ်လွင်ႈၵႂၢမ်းဢုပမႃႇၼၼ်ႉဢေႃႈ။-
မၼ်းၸဝ်ႈၵေႃႈလၢတ်ႈလႄႈဝႃႈ၊ “သူလႆႈဢၶႂၢင်ႉဢၼ်ႁုပွင်ႇလွင်ႈတၢင်းဢၼ်လိုၵ်ႉဢၼ်လမ်ႇမိူင်းၽြႃးပဵၼ်ၸဝ်ႈဢေႃႈ။ ၶဝ်ၸိူဝ်းဢၼ်မီးတၢင်းၼွၵ်ႈၸမ်ႉ၊ၵဝ်လႆႈဢဝ်တင်းၵႂၢမ်းဢုပမႃႇႁေႃးလၢတ်ႈဢေႃႈ။-
ၵွပ်ႈလွင်ႈၸိူဝ်ႉၼင်ႇႁိုဝ်လႄႈဝႃႈၸမ်ႉ၊ ‘ၶဝ်တူၺ်းယဝ်ႉ၊တူၺ်းထႅင်ႈသေၵေႃႈ၊ဢမ်ႇၸၢင်ႈႁၼ်။ “‘ၶဝ်ထွမ်ႇယဝ်ႉ၊ထွမ်ႇထႅင်ႈသေၵေႃႈ၊ဢမ်ႇႁုတီႈပွင်ႇ၊ ပေႃးဢမ်ႇၼၼ်၊ၶဝ်တေပိၼ်ႇၸႂ်ၸူးၽြႃးပဵၼ်ၸဝ်ႈသေလႄႈ၊ မၼ်းၸဝ်ႈတၵ်းပွႆႇၶႂၢင်းဢပျတ်ႈၶဝ်ဢေႃႈ၊’ ဝႃႈၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ သိုပ်ႇလၢတ်ႈလႄႈဝႃႈ၊ “သူယင်းဢမ်ႇႁုပွင်ႇဢုပမႃႇၼႆႉႁိုဝ်း။ ပေႃးသူဢမ်ႇႁုထွမ်ႇဢုပမႃႇၼႆႉၸိုင်၊ၵႂၢမ်းဢုပမႃႇတၢင်ႇၸိူဝ်ႉတၢင်ႇဢၼ်ၼၼ်ႉ၊တေႁဵတ်းၸိူဝ်ႉၼင်ႇႁိုဝ်ႁုထွမ်ႇလႆႈ။-
ၵူၼ်းဢၼ်ဝၢၼ်ႇၸိူဝ်ႉၽၼ်းၼၼ်ႉ၊ဝၢၼ်ႇၵႂၢမ်းတြႃးၸဝ်ႈဢေႃႈ။-
ၵူၼ်းၵမ်ႈၽွင်ႈမိူၼ်ၸိူဝ်ႉၼင်ႇမဵတ်ႉဢၼ်တူၵ်းၵႃႈတီႈၵၢင်တၢင်းၸိူဝ်းၼၼ်ႉၸမ်ႉ၊မိူဝ်ႈဢၼ်လႆႈငိၼ်းၵႂၢမ်းတြႃးၸဝ်ႈယဝ်ႉၼၼ်ႉ၊ ၸႃႇတၢၼ်ႇ၊ မႃးထူၺ်ႈဢွၵ်ႇၵႂၢမ်းတြႃးၸဝ်ႈၼၼ်ႉပႅတ်ႈသေၵႃႈတီႈၶဝ်ဢေႃႈ။ ၶႂ်ႈဝႃႈၼင်ႇၼႆဢေႃႈ။-
ၵူၼ်းၵမ်ႈၽွင်ႈသမ်ႉမိူၼ်ၸိူဝ်ႉၼင်ႇမဵတ်ႉဢၼ်တူၵ်းၵႃႈတီႈလိၼ်လေႃးႁိၼ်ၸိူဝ်းၼၼ်ႉၸမ်ႉ၊မိူဝ်ႈဢၼ်ၶဝ်လႆႈငိၼ်းၵႂၢမ်းတြႃးၸဝ်ႈယဝ်ႉၼၼ်ႉ၊ၶဝ်ႁပ်ႉတုင်းဢဝ်ၸူမ်းၸူမ်းသိူဝ်းသိူဝ်းဢေႃႈ။-
ၵူၺ်းၵႃႈ၊ႁၢၵ်ႈတြႃးၸဝ်ႈဢမ်ႇယင်ႇလိုၵ်ႉၵႃႈၼႂ်းႁူဝ်ၸႂ်ၶဝ်လႄႈတႄႇယူႇၵမ်းၼိုင်ႈၵူၺ်းသေယဝ်ႉ၊မိူဝ်ႈဢၼ်လႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသႄးၵွပ်ႈပိူဝ်ႈတြႃးၸဝ်ႈၼၼ်ႉၸိုင်၊ၸႂ်လုၵႂႃႇၵမ်းလဵဝ်ဢေႃႈ။ ၶႂ်ႈဝႃႈၼင်ႇၼႆဢေႃႈ။-
ၵူၼ်းၵမ်ႈၽွင်ႈသမ်ႉမိူၼ်ၸိူဝ်ႉၼင်ႇမဵတ်ႉဢၼ်တူၵ်းၵႃႈၼႂ်းယုမ်းၼၢမ်ၸိူဝ်းၼၼ်ႉၸမ်ႉ၊ပဵၼ်ၶဝ်ၸိူဝ်းဢၼ်လႆႈငိၼ်းတြႃးၸဝ်ႈသေယဝ်ႉ၊-
တၢင်းဢၼ်မႆႈၸႂ်လူၺ်ႈလွင်ႈလေႃးၵီႇလႂ်၊တၢင်းဢၼ်ၸႂ်ၸပ်းလူၺ်ႈလွင်ႈဢုၵ်ႉၸႃႇၸေးၸိမ်ႇ၊တင်းၸႂ်ဢၼ်ၸပ်းၸွႆးၶႂ်ႈလႆႈလွင်ႈတၢင်းတၢင်ႇၸိူဝ်ႉတၢင်ႇမဵဝ်းတင်းလၢႆၶဝ်ႈၼႂ်းၸႂ်လႄႈႁူမ်ႇသုမ်ႇႁတ်ႉဝႆႉတြႃးၸဝ်ႈယူႇသေလႄႈဢမ်ႇၸၢင်ႈမၢၵ်ႇမၢၵ်ႇမႃးလႆႈ။ ၶႂ်ႈဝႃႈၸိူဝ်ႉၼင်ႇၼႆဢေႃႈ။-
ၵူၼ်းၸိူဝ်းဢၼ်မိူၼ်ၸိူဝ်ႉၼင်ႇမဵတ်ႉဢၼ်တူၵ်းၵႃႈတီႈလိၼ်လီၼၼ်ႉၸမ်ႉ၊ၶဝ်လႆႈငိၼ်းတြႃးၸဝ်ႈသေလႄႈ၊ႁပ်ႉတုင်းဢဝ်သေယဝ်ႉ၊မၢၵ်ႇမႃးၵမ်ႈၽွင်ႈသၢမ်သိပ်းပုၼ်ႈ၊ၵမ်ႈၽွင်ႈႁူၵ်းသိပ်းပုၼ်ႈ၊ၵမ်ႈၽွင်ႈပၢၵ်ႇပုၼ်ႈဢေႃႈ။ ၶႂ်ႈဝႃႈၸိူဝ်ႉၼင်ႇၼႆဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းသိုပ်ႇလၢတ်ႈလႄႈဝႃႈ၊ “ၸွင်ႇၵူၼ်းၸၢင်ႈဢဝ်ၵွၵ်းၽႆးမႃးႁူမ်ႇဝႆႉတႂ်ႈပဵတ်ႈ၊ဢမ်ႇၼၼ်တႂ်ႈၵူႇၼွၼ်းႁိုဝ်း။ မၼ်းၸၢင်ႈဢဝ်မႃးတၢင်ႇဝႆႉၵႃႈၼိူဝ်ၶဵင်ႇတႆႈၽႆးဢမ်ႇၸႂ်ႈႁိုဝ်း။-
လွင်ႈတၢင်းသေၸိူဝ်ႉသေပိူင်ဢၼ်သိူင်ႇဝႆႉလပ်ႉဝႆႉၼၼ်ႉ၊တၵ်းပေႃႇဢွၵ်ႇထၢင်ႇသႃးမႃးလႄႈလွင်ႈတၢင်းသေၸိူဝ်ႉသေပိူင်ဢၼ်ႁူမ်ႇဝႆႉငမ်းဝႆႉၼၼ်ႉၵေႃႈ၊တၵ်းပိုတ်ႇၼႄထၢင်ႇသႃးမႃးဢေႃႈ။-
ပေႃးသေၵေႃႉသေၵူၼ်းမီးႁူဢၼ်ၸၢင်ႈငိၼ်းၸိုင်၊ႁႂ်ႈငိၼ်းသေၵမ်းလူၺ်ႈ၊” ဝႃႈၼင်ႇၼႆဢေႃႈ။
မၼ်းၸဝ်ႈသမ်ႉလၢတ်ႈတီႈၶဝ်ထႅင်ႈလႄႈဝႃႈ၊ “လွင်ႈဢၼ်သူလႆႈငိၼ်းၼႆႉႁဵတ်းသတိတႃႉ။ ၵႃႈၼင်ႇဢၼ်သူတူင်ပၼ်တႅၵ်ႈပၼ်ပိူၼ်ႈတၢင်ႇၵေႃႉၼၼ်ႉ၊ၽြႃးပဵၼ်ၸဝ်ႈတၵ်းတေတူင်ပၼ်တႅၵ်ႈပၼ်သူၸိူဝ်ႉၼင်ႇၼၼ်ဢမ်ႇၵႃး၊မၼ်းၸဝ်ႈတေပၼ်လိူဝ်တွၼ်းသေၼၼ်ႉတီႈသူလူးၵွၼ်ႇဢေႃႈ။-
တီႈၵေႃႉဢၼ်မီးၼၼ်ႉတၵ်းပၼ်ထႅင်ႈလႄႈတီႈၵေႃႉဢၼ်ဢမ်ႇမီးၼၼ်ႉၸမ်ႉ၊တၵ်းၼုၵ်ႈဢဝ်ၵႃႈဢၼ်မၼ်းမီးတင်းသဵင်ႈတင်းမူတ်းဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ လၢတ်ႈထႅင်ႈလႄႈဝႃႈ၊ “မိူင်းၽြႃးပဵၼ်ၸဝ်ႈမိူၼ်ၸိူဝ်ႉၼင်ႇၵူၼ်းၵေႃႉၼိုင်ႈဝၢၼ်ႇၸိူဝ်ႉၽၼ်းဝႆႉၵႃႈၼႂ်းၼႃးဢေႃႈ။-
ၵေႃႉၼၼ်ႉဝၼ်းဝၼ်းၶိုၼ်းၶိုၼ်းတိုၼ်ႇယူႇၼွၼ်းယူႇသေၵေႃႈ၊မဵတ်ႉၸိူဝ်းၼၼ်ႉဢွၵ်ႇတူၼ်ႈလႄႈယႂ်ႇမႃးၸိူဝ်ႉၼင်ႇႁိုဝ်မၼ်းဢမ်ႇႁု။-
တူၼ်ႈၸိူဝ်းဢၼ်ယႂ်ႇမႃးၵႃႈတီႈလိၼ်ၶေႃၶေႃၵူၺ်းမၼ်းလႄႈ၊ဢွၼ်တၢင်းငွၵ်ႈဢွၵ်ႇသေယဝ်ႉ၊လိုၼ်းၼၼ်ႉပဵၼ်ႁူင်းမႃး၊လိုၼ်းသေၼၼ်ႉပဵၼ်မဵတ်ႉပဵၼ်မၢၵ်ႇၵႃႈၼႂ်းႁူင်းမၼ်းဢေႃႈ။-
မိူဝ်ႈဢၼ်မၢၵ်ႇမၼ်းသုၵ်းယဝ်ႉၸိုင်၊ၵေႃႉၼၼ်ႉဢဝ်ၶဵဝ်းပၢတ်ႇၵမ်းလဵဝ်ပိူဝ်ႈဢၼ်ၶိင်ႇပၢတ်ႇၶဝ်ႈထိုင်မႃးၼၼ်ႉဢေႃႈ။
“မိူင်းၽြႃးပဵၼ်ၸဝ်ႈၸိုင်၊တၵ်းလႆႈၼႄပုင်ႇတႅၵ်ႈမၼ်းၸိူဝ်ႉၼင်ႇႁိုဝ်။ တၵ်းလႆႈဢဝ်ဢုပမႃႇဢၼ်လႂ်တႅၵ်ႈဝႃႈၼႆၸမ်ႉ၊မိူၼ်ၸိူဝ်ႉၼင်ႇၽၼ်းၽၵ်းၵၢတ်ႇမဵတ်ႉၼိုင်ႈ၊-
ဢၼ်ၽုၵ်ႇသႂ်ႇၼႂ်းလိၼ်ၼၼ်ႉ၊ပိၵ်ႉသမ်ႉမဵတ်ႉမၼ်းလဵၵ်ႉသေမဵတ်ႉၵူႈမဵဝ်းၵႃႈတီႈလိၼ်သေၵေႃႈ၊-
မိူဝ်ႈၽုၵ်ႇယဝ်ႉၼၼ်ႉမၼ်းငွၵ်ႈဢွၵ်ႇပဵၼ်တူၼ်ႈယႂ်ႇမႃးသေတူၼ်ႈယိူဝ်ႈၵႃႈမီးလႄႈ၊မီးၵိင်ႇၵၢၼ်ႈဢၼ်ယႂ်ႇၼမ်ၼႃႇ၊ၼူၵ်ႉတင်းလၢႆမႃးၸပ်းၵွၼ်းလိုဝ်ႈႁိူဝ်ႉၵႃႈၼႂ်းႁူမ်ႈမၼ်းဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ဢဝ်တင်းၵႂၢမ်းဢုပမႃႇမဵဝ်းၼႆႉၼမ်ၼႃႇ၊ႁေႃးလၢတ်ႈတြႃးၸဝ်ႈတီႈမူႇၵူၼ်းတင်းလၢႆ၊ၸွမ်းၵႃႈၼင်ႇဢၼ်ၶဝ်ထွမ်ႇလႄႈႁုပွင်ႇလႅင်းၸႂ်လႆႈၼၼ်ႉဢေႃႈ။-
ယင်းဢမ်ႇပႃးၵႂၢမ်းဢုပမႃႇလႄႈမၼ်းၸဝ်ႈဢမ်ႇႁေႃးဢမ်ႇလၢတ်ႈ။ ၵူၺ်းၵႃႈ၊မိူဝ်ႈဢၼ်ပိူၼ်ႈတၢင်ႇၵေႃႉဢမ်ႇမီးယဝ်ႉၼၼ်ႉၸိုင်၊မၼ်းၸဝ်ႈၽုၺ်ႇၼႄလွင်ႈတင်းသဵင်ႈတင်းလူင်ၵႃႈတီႈတပႄးၸဝ်ႈတင်းလၢႆဢေႃႈ။
ၼႂ်းဝၼ်းၼၼ်ႉ၊မိူဝ်ႈဢၼ်ဝၼ်းၶမ်ႈမႃးယဝ်ႉၸိုင်၊ ၸဝ်ႈယေႇသု၊ လၢတ်ႈတီႈတပႄးၸဝ်ႈတင်းလၢႆလႄႈဝႃႈ၊ “ဢွၼ်ၵၼ်ၶၢမ်ႈၵႂႃႇၽၢႆႇပုၼ်ႉၽင်ႇၼွင်တႃႉႁဝ်း၊” ဝႃႈၼင်ႇၼႆယဝ်ႉၸင်ႇ၊-
တပႄးၸဝ်ႈၸိူဝ်းၼၼ်ႉဢွၵ်ႇသေၵႃႈတီႈပၢင်ၵူၼ်းတင်းလၢႆလႄႈၶဝ်ႈၵႂႃႇၵႃႈၼႂ်းႁိူဝ်းဢၼ်မၼ်းၸဝ်ႈၼင်ႈယူႇၼၼ်ႉသေယဝ်ႉ၊ပႃးဢဝ်မၼ်းၸဝ်ႈလႄႈဢွၵ်ႇၵႂႃႇဢေႃႈ။ ႁိူဝ်းတၢင်ႇလမ်းတင်းလၢႆၵေႃႈပႃးဢေႃႈ။-
ၵမ်းၼၼ်ႉ၊ပဵၼ်ၽူၼ်လူင်လူမ်းလူင်လႄႈပိူပ်ႈၼမ်ႉၽင်ႈထိပ်ႇသႂ်ႇႁိူဝ်းႁႅင်းၼႃႇလူင်လၢင်ထၢၼ်ႈပေႃးၼမ်ႉတဵမ်ၶိုၼ်ႈၼႂ်းႁိူဝ်းမႃးတိၵ်းတိၵ်းဢေႃႈ။-
မၼ်းၸဝ်ႈၼွၼ်းလပ်းယူႇၼိူဝ်မွၼ်ႁူဝ်ၵႃႈတီႈႁၢင်ႁိူဝ်းဢေႃႈ။ တပႄးၸဝ်ႈၸိူဝ်းၼၼ်ႉပူၵ်းမၼ်းၸဝ်ႈလႄႈလဝ်ႈလၢတ်ႈဝႃႈ၊ “သြႃႇၸဝ်ႈ။ ႁဝ်းၶႃႈတေႁွတ်ႈထိုင်တၢင်းလုတၢင်းလႅဝ်ယဝ်ႉ။ ၸဝ်ႈႁဝ်းယင်းဢမ်ႇမႆႈၸႂ်ၸွမ်းႁဝ်းၶႃႈႁိုဝ်း၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ လုၵ်ႉသေလႄႈ၊ပူင်ဢမိင်ႉတီႈလူမ်းသေယဝ်ႉ၊သမ်ႉသင်ႇလၢတ်ႈတီႈပၢင်ႇလၢႆႇလႄႈဝႃႈ၊ “ထၢတ်ႇယဵၼ်တႃႉ။ ယူႇၼိမ်ၼိမ်တႃႉ၊” ဝႃႈၼင်ႇၼႆလႄႈ၊လူမ်းထၢတ်ႇယဵၼ်ၵႂႃႇသေယဝ်ႉ၊ပၢင်ႇလၢႆႇၵေႃႈၸိုၼ်ႈပၢင်ႇၼိမ်လီမႃးတႄႉတႄႉဝႃႈဝႃႈဢေႃႈ။-
မိူဝ်ႈၼၼ်ႉ၊မၼ်းၸဝ်ႈလၢတ်ႈတီႈၶဝ်လႄႈဝႃႈ၊ “ႁဵတ်းသင်လႄႈသူၵူဝ်ႁႄထၼ်ႇၼႆႉ။ ၸႂ်ဢၼ်ယုမ်ႇမၢတ်ႈသူယင်းဢမ်ႇပႆႇမီးႁိုဝ်း၊” ဝႃႈၼင်ႇၼႆဢေႃႈ။
ၶဝ်ၵေႃႈယဵင်ႈၶႅၼ်းၵူဝ်ႁႄၸႂ်သၼ်ႇၼႃႇလူင်လၢင်လႄႈၵေႃႉၼိုင်ႈလႄႈၵေႃႉၼိုင်ႈလၢတ်ႈတီႈၵၼ်လႄႈဝႃႈ၊ “ၵေႃႉၼႆႉပဵၼ်ၵူၼ်းၸိူဝ်ႉၼင်ႇႁိုဝ်ၼေႃ။ လူမ်းတင်းပၢင်ႇလၢႆႇယင်းထွမ်ႇဢဝ်ၵႂၢမ်းမၼ်းလူင်ပႄႇ၊” ဝႃႈၼင်ႇၼႆဢေႃႈ။
ၶဝ်ႁွတ်ႈထိုင်ၵႂႃႇၽၢႆႇပုၼ်ႉၽင်ႇၼွင် ၵႃႇလိလႄး၊ ၵႃႈတီႈမိူင်း ၵေႇရႃႇသႃႇ၊ ဢေႃႈ။-
မိူဝ်ႈဢၼ် ၸဝ်ႈယေႇသု၊ ဢွၵ်ႇႁိူဝ်းၵႂႃႇၼၼ်ႉ၊ၵူၼ်းဢၼ်ၽီႁၢႆႉၶဝ်ႈၵေႃႉၼိုင်ႈဢွၵ်ႇပႃႇႁဵဝ်ႈမႃးႁူပ်ႉမၼ်းၸဝ်ႈၵမ်းလဵဝ်ဢေႃႈ။-
ၵေႃႉၼၼ်ႉ၊ၸၢင်ႈယူႇၵႃႈတီႈပႃႇႁဵဝ်ႈၵူၺ်းလႄႈၽူႈလႂ်ဢမ်ႇၸၢင်ႈဢဝ်တင်းၸိူၵ်ႈလဵၵ်းမတ်ႉၽုၵ်ႇမၼ်းဝႆႉလႆႈ။-
ပိၵ်ႉသမ်ႉဢဝ်ၶူၺ်ႇတိၼ်တင်းၸိူၵ်ႈလဵၵ်းမတ်ႉၽုၵ်ႇဝႆႉလၢႆပွၵ်ႈသေၵေႃႈ၊မၼ်းယင်းႁၵ်းၶူၺ်ႇတိၼ်လႄႈတိုတ်ႉၸိူၵ်ႈလဵၵ်းၶၢတ်ႇပႅတ်ႈဢေႃႈ။ မၼ်းႁႅင်းၼႃႇလႄႈၽူႈလႂ်ဢမ်ႇၸၢင်ႈထိင်းပႄႉမၼ်းလႆႈ။-
ဝၼ်းဝၼ်းၶိုၼ်းၶိုၼ်းဢမ်ႇထၢတ်ႇမၼ်းၸၢင်ႈလႄႇၵႂႃႇလႄႇမႃးၵႃႈတီႈပႃႇႁဵဝ်ႈလႄႈသင်၊ၵႃႈၼိူဝ်လွႆလႄႈသင်၊မၼ်းၸၢင်ႈပၢဝ်ႇသႅၼ်ႇယူႇလႄႈဢဝ်မၢၵ်ႇႁိၼ်ထိူဝ်ၼိူဝ်ႉထိူဝ်ၼင်မၼ်းယူႇဢေႃႈ။
မိူဝ်ႈဢၼ်မၼ်းႁၼ် ၸဝ်ႈယေႇသု၊ ၵႃႈတီႈဢၼ်ၵႆၼၼ်ႉၸိုင်၊မၼ်းလႅၼ်ႈၵႂႃႇၶုပ်ႉၶဝ်ႇၵႃႈတီႈမၼ်းၸဝ်ႈသေလႄႈ၊-
ႁွင်ႉသႅၼ်ႇတင်းသဵင်ဢၼ်ယႂ်ႇၼႃႇလႄႈဝႃႈ၊ “ ၸဝ်ႈယေႇသု၊ လုၵ်ႈၽြႃးပဵၼ်ၸဝ်ႈဢၼ်သုင်မျၢတ်ႈၼႃႇသေပိူၼ်ႈတီႈၶႃႈ႟။ ၸဝ်ႈႁဝ်းမႃးပၼ်တုၵ်ႉၶႃႉတီႈၵဝ်ၶႃႈၸိူဝ်ႉၼင်ႇႁိုဝ်ၶႃႈ။ ၵဝ်ၶႃႈၶႂ်ႈယွၼ်းတွင်းပၢၼ်ႇႁႂ်ႈၸဝ်ႈႁဝ်းတိူင်ႇၵၢဝ်ႇတီႈၽြႃးပဵၼ်ၸဝ်ႈလႄႈဝႃႈ၊တၵ်းတေဢမ်ႇၼိၵ်ႈၸၢၵ်ႈၵဝ်ၶႃႈၼၼ်ႉဢေႃႈ၊” ဝႃႈၼင်ႇၼႆဢေႃႈ။-
မၼ်းတွင်းပၢၼ်ႇၸိူဝ်ႉၼင်ႇၼႆ၊ၵွပ်ႈပိူဝ်ႈ ၸဝ်ႈယေႇသု၊ လႆႈပူင်ဢမိင်ႉလႄႈဝႃႈ၊ “ၽီႁၢႆႉ႟။ မႂ်းဢွၵ်ႇသေၵႃႈတီႈၵူၼ်းၵေႃႉၼႆႉၵႂႃႇတႃႉ၊” ဝႃႈၼင်ႇၼႆယဝ်ႉၼၼ်ႉဢေႃႈ။
မၼ်းၸဝ်ႈထၢမ်လႄႈဝႃႈ၊ “မႂ်းၸိုဝ်ႈသင်၊” ဝႃႈၼင်ႇၼႆလႄႈၵေႃႉၼၼ်ႉၶိုၼ်းလဝ်ႈလၢတ်ႈဝႃႈ၊ “ၸိုဝ်ႈၽီၽုင်ၶႃႈဢေႃႈ။ ႁဝ်းၶႃႈၼႆႉမီးၼမ်ၼႃႇၶႃႈဢေႃႈ၊” ဝႃႈၼင်ႇၼႆသေယဝ်ႉ၊-
တွင်းပၢၼ်ႇၼႃႇလူင်လၢင်ၼင်ႇႁိုဝ်မၼ်းၸဝ်ႈတၵ်းဢမ်ႇႁေႃႈဢွၵ်ႇမိူင်းၼၼ်ႉၵႂႃႇဢေႃႈ။
ၵႃႈတီႈၼၼ်ႈမီးၽုင်မူယႂ်ႇၽုင်ၼိုင်ႈ၊ၵိၼ်ယူႇၵႃႈတီႈတၢပ်ႈလွႆဢေႃႈ။-
ၽီႁၢႆႉၸိူဝ်းၼၼ်ႉတွင်းပၢၼ်ႇလႄႈဝႃႈ၊ “ပွႆႇႁဝ်းၶႃႈၵႂႃႇႁႂ်ႈလႆႈၶဝ်ႈၵႃႈၼႂ်းမူၸိူဝ်းၼၼ်ႉသေၵမ်းၶႃႈ၊” ဝႃႈၼင်ႇၼႆဢေႃႈ။-
မၼ်းၸဝ်ႈၵေႃႈပၼ်ဢၶႂၢင်ႉဢေႃႈ။ ၽီႁၢႆႉၸိူဝ်းၼၼ်ႉဢွၵ်ႇသေၵႃႈတီႈၵူၼ်းၵေႃႉၼၼ်ႉသေယဝ်ႉ၊ၵႂႃႇၶဝ်ႈၵႃႈၼႂ်းမူၸိူဝ်းဢၼ်မီးမွၵ်ႈသွင်ႁဵင်တူဝ်ၼၼ်ႉသေလႄႈ၊ၽုင်မူၼၼ်ႉၶုၼ်ႇလႅၼ်ႈလူင်းၽင်ႇႁိုၵ်းၼွင်ဢၼ်ၸၼ်းလႄႈၵႅၼ်ႉၼမ်ႉတၢႆမူတ်းဢေႃႈ။
ၵူၼ်းလဵင်ႉမူတင်းလၢႆ၊လႅၼ်ႈၵႂႃႇမွၵ်ႇလၢတ်ႈၼႄလွင်ႈတၢင်းၼၼ်ႉၵႃႈတီႈဝၢၼ်ႈၼွၵ်ႈၼႃးပၢင်ႇဢိၵ်ႇတင်းၵႃႈတီႈၼႂ်းဝဵင်းဢေႃႈ။ ၵူၼ်းၼမ်ၼႃႇဢွၼ်ၵၼ်ဢွၵ်ႇမႃးႁႂ်ႈလႆႈတူၺ်းလႆႈႁၼ်လွင်ႈတၢင်းဢၼ်ပဵၼ်မႃးၼၼ်ႉဢေႃႈ။-
မိူဝ်ႈဢၼ်ၶဝ်ၽႅဝ်မႃးၵႃႈတီႈ ၸဝ်ႈယေႇသု၊ ၼၼ်ႉ၊ၶဝ်လႆႈႁၼ်ၵေႃႉဢၼ်ၽီၽုင်ၶဝ်ႈၼၼ်ႉ၊ပေႃးၼုင်ႈၶူဝ်းၼုင်ႈလဵင်းယဝ်ႉလႄႈမီးၸႂ်လီၸႂ်ငၢမ်းဝႆႉသေယဝ်ႉ၊ၼင်ႈယူႇၼၼ်ႉၸိုင်၊ၶဝ်ၵူဝ်ႁႄၼႃႇဢေႃႈ။-
ၶဝ်ၸိူဝ်းဢၼ်လႆႈႁၼ်သိုဝ်ႈၼႃႈတႂ်ႈတႃၼၼ်ႉ၊မွၵ်ႇလၢတ်ႈၶႆႈၼႄလွင်ႈတၢင်းဢၼ်ပဵၼ်မႃးၵႃႈတီႈၵေႃႉဢၼ်ၽီႁၢႆႉၶဝ်ႈဢိၵ်ႇတင်းလွင်ႈမူၸိူဝ်းၼၼ်ႉတီႈၵူၼ်းၸိူဝ်းဢၼ်မႃးတူၵ်းလိုၼ်းၸိူဝ်းၼၼ်ႉဢေႃႈ။
မိူဝ်ႈၼၼ်ႉ၊ၶဝ်တင်းသဵင်ႈတင်းလူင်တွင်းပၢၼ်ႇႁႂ်ႈမၼ်းၸဝ်ႈဢွၵ်ႇသေၵႃႈတီႈမိူင်းၶဝ်ၵႂႃႇဢေႃႈ။
မိူဝ်ႈဢၼ် ၸဝ်ႈယေႇသု၊ ၶဝ်ႈႁိူဝ်းၵႂႃႇၼၼ်ႉ၊ၵူၼ်းၵေႃႉဢၼ်ၽီႁၢႆႉၶဝ်ႈမၼ်းၼၼ်ႉယွၼ်းဢၶႂၢင်ႉႁႂ်ႈလႆႈၵႂႃႇၸွမ်းမၼ်းၸဝ်ႈဢေႃႈ။
ၵူၺ်းၵႃႈ၊မၼ်းၸဝ်ႈဢမ်ႇပၼ်ဢၶႂၢင်ႉလႄႈမီးဢမိင်ႉလႄႈဝႃႈ၊ “မႂ်းပွၵ်ႈမိူဝ်းၵႂႃႇၵႃႈတီႈႁိူၼ်းမႂ်းလႄႈ၊လၢတ်ႈၼႄပီႈၼွင်ႉၸိူဝ်ႉၶိူဝ်းမႂ်းလွင်ႈဢၼ်ထႃႇဝရႃႉၽြႃးဢဵတ်းလူလႄႈႁဵတ်းၵျေးၸူးတီႈမႂ်းယႂ်ႇၼႃႇထၼ်ႇႁိုဝ်ၼၼ်ႉတႃႉ၊” ဝႃႈၼင်ႇၼႆသေယဝ်ႉ။
ၵေႃႉၼၼ်ႉၵေႃႈဢွၵ်ႇသေၵႃႈတီႈၼၼ်ႈၵႂႃႇသေလႄႈမွၵ်ႇလၢတ်ႈလွင်ႈတၢင်းဢၼ် ၸဝ်ႈယေႇသု၊ ႁဵတ်းၵျေးၸူးတီႈမၼ်းယႂ်ႇၼႃႇၼၼ်ႉၵႃႈတီႈၼႂ်းဢိူင်ႇ တေႇၵႃႇပေႃးလိ၊ လႄႈၵူၼ်းတင်းသဵင်ႈတင်းလူင်ဢွၼ်ၵၼ်ဢၢမ်းၼႃႇဢေႃႈ။
ၸဝ်ႈယေႇသု၊ ၶိုၼ်းၶၢမ်ႈၼွင်မိူဝ်းၵႂႃႇၽၢႆႇပုၼ်ႉလႄႈမိူဝ်ႈဢၼ်ယင်းမီးယူႇႁိမ်းၽင်ႇၼၼ်ႉၸိုင်၊ၵူၼ်းၼမ်ၼႃႇၸုတုမ်ၵၼ်မႃးတီႈမၼ်းၸဝ်ႈဢေႃႈ။-
ယၢမ်းၼၼ်ႉၵႄႇၸရွပ်ႈႁေႃးတြႃးဢၼ်လႆႈၸိုဝ်ႈ ယႃႇဢိရု၊ ၽႅဝ်မႃးလႄႈ၊မိူဝ်ႈဢၼ်ႁၼ် ၸဝ်ႈယေႇသု၊ ၸိုင်၊ၶုပ်ႉၶဝ်ႇၵႃႈတီႈႁိမ်းတိၼ်မၼ်းၸဝ်ႈယူႇသေလႄႈ၊-
လဝ်ႈယွၼ်းတွင်းပၢၼ်ႇၼႃႇလူင်လၢင်လႄႈဝႃႈ၊ “လုၵ်ႈယိင်းဢွၼ်ႇၵဝ်ၶႃႈပဵၼ်ႁႅင်းၼႃႇၸမ်တၵ်းတၢႆၶႃႈယဝ်ႉ။ ၶႅၼ်းတေႃႈမႃးလႄႈဢဝ်မိုဝ်းတၢင်ႇၵႃႈၼိူဝ်မၼ်းႁႂ်ႈမၼ်းၶႅၼ်းမႃးလႄႈမီးဢသၢၵ်ႈလိပ်းယူႇသေၵမ်းၶႃႈ၊” ဝႃႈၼင်ႇၼႆသေယဝ်ႉ။
မၼ်းၸဝ်ႈၵေႃႈၸွမ်းမၼ်းၵႂႃႇဢေႃႈ။ မိူဝ်ႈၼၼ်ႉၵူၼ်းဢၼ်ၸုဢၼ်တုမ်ၼမ်ၼႃႇဢုမ်ႇၸွမ်းၽိုတ်ႉဢီးၸူးတီႈမၼ်းၸဝ်ႈဢေႃႈ။
ယၢမ်းၼၼ်ႉ၊မီးမႄႈယိင်းၵေႃႉၼိုင်ႈဢၼ်ၸပ်းတၢင်းပဵၼ်လိူတ်ႈတူၵ်းလႆႈသိပ်းသွင်ပီယဝ်ႉၼၼ်ႉ၊-
ပိၵ်ႉသမ်ႉၵႂႃႇယႃၵႃႈတီႈမေႃယႃၼမ်ၼႃႇထၢၼ်ႈပေႃးသဵင်ႈဢုၵ်ႉၸႃႇငိုၼ်းၶမ်းၼမ်ၼႃႇသေၵေႃႈ၊ယင်းဢမ်ႇႁၢႆၵူၺ်းဢမ်ႇၵႃး၊ယင်းပဵၼ်ႁႅင်းမႃးထႅင်ႈယူႇၼၼ်ႉဢေႃႈ။-
မိူဝ်ႈဢၼ်မၼ်းငိၼ်းလွင်ႈ ၸဝ်ႈယေႇသု၊ ၸိုင်၊မႃးၽၢႆႇတၢင်းလင်မၼ်းၸဝ်ႈၵႃႈၼႂ်းၵႄႈၵူၼ်းတင်းလၢႆသေယဝ်ႉ၊တိူဝ်ႉယိပ်းသိူဝ်ႈမၼ်းၸဝ်ႈဢေႃႈ။-
လွင်ႈမၼ်းၸမ်ႉ၊မၼ်းယုမ်ႇဝႃႈ၊ “ပေႃးၵဝ်လႆႈတိူဝ်ႉလႆႈယိပ်းသိူဝ်ႈမၼ်းၸဝ်ႈၵူၺ်းၵေႃႈ၊တၢင်းပဵၼ်ၵဝ်တၵ်းႁၢႆဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်တိူဝ်ႉၼၼ်ႉၵမ်းလဵဝ်၊လိူတ်ႈမၼ်းၼၼ်ႉထၢတ်ႇယူတ်းၵႂႃႇလႄႈမၼ်းႁုတူဝ်လွင်ႈဢၼ်တၢင်းပဵၼ်မၼ်းႁၢႆယဝ်ႉၼၼ်ႉဢေႃႈ။-
ၸဝ်ႈယေႇသု၊ ႁုလွင်ႈဢၼ်တၼ်းၶူဝ်းဢွၵ်ႇတူဝ်ၸဝ်ႈၵဝ်ႇၵႂႃႇၼၼ်ႉၵမ်းလဵဝ်သေလႄႈ၊ဝၢႆႇတူၺ်းတၢင်းလင်ၼႂ်းၵႄႈၵူၼ်းတင်းလႆႈလႄႈထၢမ်ဝႃႈ၊ “ၽူႈလႂ်တိူဝ်ႉထုၵ်ႇသိူဝ်ႈၵဝ်၊” ဝႃႈၼင်ႇၼႆဢေႃႈ။
တပႄးၸဝ်ႈၸိူဝ်းၼၼ်ႉၶိုၼ်းလဝ်ႈလၢတ်ႈလႄႈဝႃႈ၊ “ၵူၼ်းၼမ်ထၼ်ႇၼႆႉ၊ၽိုတ်ႉဢီးၸဝ်ႈႁဝ်းယူႇၼၼ်ႉၸဝ်ႈႁဝ်းႁၼ်ယူႇဢေႃႈ။ ႁဵတ်းသင်သမ်ႉထၢမ်ဝႃႈ၊ ‘ၽူႈလႂ်တိူဝ်ႉထုၵ်ႇသိူဝ်ႈၵဝ်၊’ ဝႃႈၼင်ႇၼႆၸိူဝ်ႉၼင်ႇႁိုဝ်ၶႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊မၼ်းၸဝ်ႈယင်းဝၢႆႇတူၺ်းသၢႆႉတူၺ်းၶႂႃႁႂ်ႈလႆႈႁုႁၼ်ၵေႃႉဢၼ်ႁဵတ်းၸိူဝ်ႉၼင်ႇၼၼ်ၼၼ်ႉယူႇဢေႃႈ။-
မႄႈယိင်းၼၼ်ႉ၊ပိူဝ်ႈဢၼ်ႁုလွင်ႈဢၼ်ပဵၼ်မႃးၵႃႈတီႈမၼ်းလႄႈၵူဝ်ႁႄသၼ်ႇဝႆၼႃႇမႃးၸူးတီႈမၼ်းၸဝ်ႈသေယဝ်ႉ၊ၶုပ်ႉမူပ်ႇလဝ်ႈလၢတ်ႈဢၼ်ၸိုဝ်ႈဢၼ်ၸႂ်ႈ၊လွင်ႈဢၼ်ပဵၼ်မႃးၼၼ်ႉၵႃႈမီးတင်းသဵင်ႈတင်းလူင်ဢေႃႈ။-
ပိူဝ်ႈၼႆလႄႈ ၸဝ်ႈယေႇသု၊ လၢတ်ႈတီႈမၼ်းလႄႈဝႃႈ၊ “လုၵ်ႈယိင်းၵဝ်႟။ တၢင်းယုမ်ႇမၢတ်ႈမႂ်းႁႂ်ႈတၢင်းပဵၼ်မႂ်းႁၢႆယဝ်ႉ။ ၵႂႃႇၼိမ်ၼိမ်တႃႉ။ ႁႂ်ႈၵၢင်းလွတ်ႈတင်းတၢင်းၶႆႈတၢင်းပဵၼ်တႃႉ၊” ဝႃႈၼင်ႇၼႆဢေႃႈ။
ၼႂ်းမိူဝ်ႈဢၼ် ၸဝ်ႈယေႇသု၊ လၢတ်ႈၸိူဝ်ႉၼင်ႇၼၼ်ယူႇၼၼ်ႉ၊ၵူၼ်းဢၼ်လုၵ်ႉသေၵႃႈတီႈႁိူၼ်း ယႃႇဢိရု၊ မႃးလႄႈလၢတ်ႈဝႃႈ၊ “လုၵ်ႈယိင်းၸဝ်ႈႁဝ်းတၢႆၶႃႈယဝ်ႉ။ ႁဵတ်းႁိုဝ်လႄႈယင်းယႃႉၵဝ်းၸဝ်ႈသြႃႇယူႇလူးၵွၼ်ႇၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ယင်းဢမ်ႇဝႆႉဢမုတီႈလွင်ႈတၢင်းဢၼ်ၶဝ်လၢတ်ႈၼၼ်ႉလႄႈလၢတ်ႈတီႈ ယႃႇဢိရု၊ လႄႈဝႃႈ၊ “ယႃႇပေမႆႈၸႂ်။ ယုမ်ႇမၢတ်ႈၵူၺ်းတႃႉ၊” ဝႃႈၼင်ႇၼႆဢေႃႈ။-
လိူဝ်သေ ပေႇတရု၊ယႃႇၵုပ်ႈ၊ တင်းၼွင်ႉၸၢႆးမၼ်း ယူဝ်းႁၢၼ်ႇ၊ ၼၼ်ႉ၊မၼ်းၸဝ်ႈဢမ်ႇပၼ်ႁႂ်ႈၽူႈလႂ်ၵႂႃႇၸွမ်းသေၵေႃႉသေၵူၼ်းဢေႃႈ။-
ၶဝ်ႁွတ်ႈထိုင်ၵႂႃႇၵႃႈတီႈႁိူၼ်း ယႃႇဢိရု၊ သေယဝ်ႉ၊မၼ်းၸဝ်ႈလႆႈႁၼ်ၵူၼ်းယုင်ႈယၢင်ႈဢူၼ်ဢဵၼ်ယူႇၼၼ်ႉ၊သမ်ႉငိၼ်းသဵင်ႁႆႈသဵင်ႁွင်ႉယူႇၼၼ်ႉဢေႃႈ။-
မၼ်းၸဝ်ႈၶဝ်ႈႁိူၼ်းၵႂႃႇလႄႈလၢတ်ႈတီႈၶဝ်ၸိူဝ်းၼၼ်ႉလႄႈဝႃႈ၊ “ႁဵတ်းသင်လႄႈသူဢူၼ်ဢဵၼ်မေႃးမႄးႁွင်ႉႁႆႈယူႇၸိူဝ်ႉၼင်ႇႁိုဝ်။ လုၵ်ႈဢွၼ်ႇၼႆႉဢမ်ႇတၢႆၵူၺ်း။ ၼွၼ်းလပ်းယူႇဢေႃႈ၊” ဝႃႈၼင်ႇၼႆဢေႃႈ။
ၶဝ်ၸိူဝ်းၼၼ်ႉ၊ႁဵတ်းပျၢၵ်ႈၶူဝ်မၼ်းၸဝ်ႈဢေႃႈ။ မၼ်းၸဝ်ႈႁႂ်ႈၶဝ်ၵူႈၵေႃႉဢွၵ်ႇၵႂႃႇတၢင်းၼွၵ်ႈသေယဝ်ႉ၊သမ်ႉႁွင်ႉဢဝ်ပေႃႈမႄႈလုၵ်ႈဢွၼ်ႇၼၼ်ႉဢိၵ်ႇတင်းတပႄးၸဝ်ႈသၢမ်ၵေႃႉၼၼ်ႉသေလႄႈၶဝ်ႈၵႃႈၼႂ်းႁွင်ႇဢၼ်လုၵ်ႈဢွၼ်ႇမီးၼၼ်ႉသေယဝ်ႉ၊-
ယိပ်းမိုဝ်းလုၵ်ႈဢွၼ်ႇၼၼ်ႉသေလႄႈလၢတ်ႈဝႃႈ၊ “တလိတႃႉၵုမိ၊” ဢၼ်ပွင်ႇဝႃႈ၊ “ဢႄးယိင်းဢွၼ်ႇ႟။ လုၵ်ႉတႃႉ၊” ဝႃႈၼင်ႇၼႆဢေႃႈ။
ယၢမ်းၼၼ်ႉၵမ်းလဵဝ်၊ဢႄးယိင်းဢွၼ်ႇၼၼ်ႉလုၵ်ႉလႄႈပႆဢေႃႈ။ (မၼ်းၼၼ်ႉဢသၢၵ်ႈမီးသိပ်းသွင်ပီဢေႃႈ။) လွင်ႈဢၼ်ပဵၼ်မႃးၼႆႉၶဝ်ဢၢမ်းၼႃႇလူင်လၢင်ဢေႃႈ။-
မၼ်းၸဝ်ႈပိင်းၺၢပ်ႈဝႆႉတီႈၶဝ်၊ၼင်ႇႁိုဝ်ၶဝ်တၵ်းဢမ်ႇလၢတ်ႈႁႂ်ႈၽူႈလႂ်ႁုလွင်ႈတၢင်းၼၼ်ႉယဝ်ႉၸင်ႇပူင်ဢမိင်ႉတီႈၶဝ်လႄႈဝႃႈ၊ “ပၼ်တၢင်းၵိၼ်တီႈမၼ်းတႃႉ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ဢွၵ်ႇသေၵႃႈတီႈၼၼ်ႈ၊ၶိုၼ်းမိူဝ်းၵႂႃႇၸူးတီႈဝဵင်းတူဝ်ၸဝ်ႈၵဝ်ႇဢေႃႈ။ တပႄးၸဝ်ႈတင်းလၢႆၵေႃႈၵႂႃႇၸွမ်းဢေႃႈ။-
ထိုင်မႃးဝၼ်းၵမ်သိၼ်မၼ်းၸဝ်ႈသင်ႇသွၼ်ပၼ်သုင်းမႃႉၵႃႈၼႂ်းၸရွပ်ႈႁေႃးတြႃးလႄႈ၊မိူဝ်ႈဢၼ်ၵူၼ်းၼမ်ၼႃႇလႆႈငိၼ်းတြႃးမၼ်းၸဝ်ႈၸိုင်၊ၵူႈၵေႃႉၵူႈၵူၼ်းဢၢမ်းၼႃႇလူင်လၢင်လႄႈလၢတ်ႈဝႃႈ၊ “ၵေႃႉၼႆႉလႆႈလွင်ႈတၢင်းၸိူဝ်းၼႆႉၵႃႈတီႈလႂ်မႃး။ ပိင်ႇၺႃႇၸိူဝ်ႉၼင်ႇၼႆပဵၼ်ပိင်ႇၺႃႇမဵဝ်းလႂ်။ တၼ်းၶူဝ်းဢၼ်လၢၵ်ႇဢၼ်လၢႆးၸိူဝ်းၼႆႉပဵၼ်မႃးၼႂ်းမိုဝ်းမၼ်းၸိူဝ်ႉၼင်ႇႁိုဝ်။-
မၼ်းပဵၼ်ၸၢင်ႈမႆႉဢမ်ႇၸႂ်ႈႁိုဝ်း။ ပဵၼ်လုၵ်ႈၸၢႆးၼၢင်း မႃႇရိ၊ ဢမ်ႇၸႂ်ႈႁိုဝ်း။ ပဵၼ်ပီႈၸၢႆး ယႃႇၵုပ်ႈ၊ယူဝ်းသေႇ၊ယုတႃႉ၊သိမုၼ်ႇ၊ ၶဝ်ဢမ်ႇၸႂ်ႈႁိုဝ်း။ ၼွင်ႉယိင်းမၼ်းတင်းလၢႆၵေႃႈ၊မီးယူႇၵႃႈတီႈၼႆႈဢမ်ႇၸႂ်ႈႁိုဝ်း၊” ဝႃႈၼင်ႇၼႆလႄႈၶဝ်ထၢင်ႇၽိတ်းလွင်ႈမၼ်းၸဝ်ႈဢေႃႈ။
ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “ပရေႃးၽႅတ်ႈ ၸိုင်၊လိူဝ်သေၵႃႈတီႈဝဵင်းတူဝ်ၸဝ်ႈၵဝ်ႇၸိူဝ်ႉၶိူဝ်းတူဝ်ၸဝ်ႈၵဝ်ႇၼၼ်ႉ၊လႆႈသရေႇၼႃႈတႃၵူႈတီႈၵူႈလႅၼ်ဢေႃႈ၊” ဝႃႈၼင်ႇၼႆဢေႃႈ။
ၵႃႈတီႈၼၼ်ႈမၼ်းၸဝ်ႈဢမ်ႇလႆႈႁဵတ်းၼႄတၼ်းၶူဝ်းၵႃႈသင်။ ၵူၺ်းလႆႈဢဝ်မိုဝ်းတၢင်ႇၵႃႈၼိူဝ်ၵူၼ်းဢၼ်ဢမ်ႇယူႇလီၵမ်ႈၽွင်ႈလႄႈႁႂ်ႈတၢင်းၶႆႈတၢင်းပဵၼ်ၶဝ်ၸိုၼ်ႈႁၢႆဢေႃႈ။-
မၼ်းၸဝ်ႈမီးၸႂ်ဢၼ်ဢၢမ်းၼႃႇလူင်လၢင်၊တီႈလွင်ႈဢၼ်ၶဝ်ဢမ်ႇမီးၸႂ်ဢၼ်ယုမ်ႇမၢတ်ႈၼၼ်ႉဢေႃႈ။ လိုၼ်းၼၼ်ႉ၊ ၸဝ်ႈယေႇသု၊ လႄႇၵႂႃႇၵႃႈတီႈဝၢၼ်ႈၼွၵ်ႈၼႃးပၢင်ႇဢၼ်မီးႁိမ်းႁွမ်းၸိူဝ်းၼၼ်ႉသေလႄႈသင်ႇသွၼ်ပၼ်ယူႇဢေႃႈ။-
မၼ်းၸဝ်ႈႁွင်ႉဢဝ်တမၢၼ်ႇၸဝ်ႈသိပ်းသွင်ပႃးၼၼ်ႉမႃးတီႈမၼ်းၸဝ်ႈသေယဝ်ႉ၊ပၼ်ဢၶႂၢင်ႉတၼ်းၶူဝ်းဢၼ်ပႄႉၼႅင်ႇၽီလႂ်ၽိူဝ်ႉလႂ်သေလႄႈပွႆႇၸႂ်ႉၶဝ်ၵႂႃႇသွင်ၵေႃႉ၊သွင်ၵေႃႉၸွမ်းၵၼ်ဢေႃႈ။-
မၼ်းၸဝ်ႈသင်ႇလၢတ်ႈလႄႈဝႃႈ၊ “လိူဝ်သေၶွၼ်ႉတဝ်ႉဢၼ်လဵဝ်လႄႈယႃႇပေပႃးဢဝ်ၵႃႈသင်ၵႂႃႇၸွမ်း။ ၸႃႉၸဵမ်ထူင်ပႃး၊ၶဝ်ႈမုၼ်းၵေႃႈယႃႇပေဢဝ်ပႃး။ ငိုၼ်းၸၢႆႇၵေႃႈယႃႇပေသႂ်ႇပႃးၼႂ်းထူင်သၢႆဢႅဝ်ၵႂႃႇ။-
တိုဝ်းၶႅပ်းတိၼ်လႄႈယႃႇပေၼုင်ႈသိူဝ်ႈသွင်ၽိုၼ်၊” ဝႃႈၼင်ႇၼႆဢေႃႈ။-
လိူဝ်သေၼၼ်ႉ၊မၼ်းၸဝ်ႈသမ်ႉသင်ႇလၢတ်ႈထႅင်ႈလႄႈဝႃႈ၊ “မိူဝ်ႈဢၼ်သူၶဝ်ႈၼႂ်းႁိူၼ်းဢၼ်ႁပ်ႉတုင်းဢဝ်သူၼၼ်ႉၸိုင်၊ယူႇသဝ်းၵႃႈတီႈႁိူၼ်းၼၼ်ႉ၊တေႃႇထိုင်ႁွတ်ႈသူဢွၵ်ႇၵႂႃႇတၢင်ႇတီႈၼၼ်ႉတႃႉ။-
တီႈလႂ်သေဢမ်ႇဝႃႈ၊ပေႃးယင်းဢမ်ႇႁပ်ႉတုင်းဢဝ်သူ၊ဢမ်ႇထွမ်ႇဢဝ်သူၸိုင်၊မိူဝ်ႈဢၼ်သူဢွၵ်ႇၵႂႃႇၼၼ်ႉ၊သၼ်ႇၽႅတ်းမုၼ်ႈလိၼ်ဢၼ်ၸပ်းတီႈတိၼ်သူၼၼ်ႉပႅတ်ႈႁႂ်ႈပဵၼ်သၢၵ်ႈသေႇၶဝ်” ဝႃႈၼင်ႇၼႆဢေႃႈ။
ႁဵတ်းၼင်ႇၼၼ်လႄႈၶဝ်ဢွၵ်ႇၵႂႃႇႁေႃးတြႃးလွင်ႈဢၼ်ၵူၼ်းတင်းလၢႆတၵ်းလႆႈၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်ၶဝ်ဢေႃႈ။-
ၶဝ်ႁေႃႈၽီႁၢႆႉဢွၵ်ႇၼမ်ၼႃႇ၊ဢိၵ်ႇတင်းဢဝ်ၼမ်ႉမၼ်းသၢၼ်ႇလုၼ်ႇတႃးပၼ်ၵူၼ်းဢၼ်ဢမ်ႇယူႇလီႁႂ်ႈတၢင်းပဵၼ်ၶဝ်ၸိုၼ်ႈႁၢႆဢေႃႈ။
မိူဝ်ႈၼၼ်ႉ၊ၸဝ်ႈၽႃႉ ႁေႇရူတ်ႈ၊ လႆႈငိၼ်းသဵင်ၶၢဝ်ႇလွင်ႈ ၸဝ်ႈယေႇသု၊ ႁူင်ႁၢင်းသႃႇၸွတ်ႇၵႂႃႇ၊ဢၼ်ၵူၼ်းၵမ်ႈၽွင်ႈဝႃႈ၊ “သြႃႇ ယူဝ်းႁၢၼ်ႇ၊ ၵေႃႉဢၼ်ပၼ်မၢင်ႇၵလႃႇပပ်ႉတိၸမ်ႇ ၼၼ်ႉလုၵ်ႉၵႃႈတၢင်းတၢႆၶိုၼ်းလိပ်းယဝ်ႉ။ ပိူဝ်ႈၼႆၸင်ႇမၼ်းမီးတၼ်းၶူဝ်းဢၼ်ၸၢင်ႈႁဵတ်းဢၼ်လၢၵ်ႇဢၼ်လၢႆးဢေႃႈ၊” ဝႃႈၼင်ႇၼႆၼၼ်ႉဢေႃႈ။
ဢိၵ်ႇတင်းၵမ်ႈၽွင်ႈဝႃႈ၊ “မၼ်းပဵၼ် ဢေးလိယႃႉ၊ ” ၵမ်ႈၽွင်ႈသမ်ႉဝႃႈ၊ “မၼ်းပဵၼ်ပရေႃးၽႅတ်ႈမိူၼ်ၸိူဝ်ႉၼင်ႇပရေႃးၽႅတ်ႈမိူဝ်ႈၵွၼ်ႇဢွၼ်ၼၼ်ႉၸိူဝ်းၼၼ်ႉသေပႃးပႃးဢေႃႈ၊” ဝႃႈၼင်ႇၼႆဢေႃႈ။
ၸဝ်ႈၽႃႉ ႁေႇရူတ်ႈ၊ ၸမ်ႉ၊မိူဝ်ႈဢၼ်ငိၼ်းလွင်ႈတၢင်းၸိူဝ်းၼၼ်ႉၸိုင်၊လၢတ်ႈလႄႈဝႃႈ၊ “ ယူဝ်းႁၢၼ်ႇ၊ ဢၼ်ၵဝ်တႅပ်းႁူဝ်မၼ်းၼၼ်ႉ၊လုၵ်ႉၵႃႈတၢင်းတၢႆၶိုၼ်းလိပ်းယဝ်ႉ၊” ဝႃႈၼင်ႇၼႆဢေႃႈ။-
လွင်ႈမၼ်းၸမ်ႉ၊ၸဝ်ႈၽႃႉ ႁေႇရူတ်ႈ၊ လႆႈသိမ်းဢဝ်ၼၢင်း ႁေႇရူဝ်းတိ၊ မေးၼွင်ႉၸၢႆးမၼ်း ၽိလိပ်ႉပု၊ ၼၼ်ႉသေယဝ်ႉ၊ၵွပ်ႈပိူဝ်ႈမႄႈယိင်းၼၼ်ႉၸင်ႇၶုၼ်ၼၼ်ႉလႆႈမီးဢမိင်ႉႁႂ်ႈတိဢဝ်သြႃႇ ယူဝ်းႁၢၼ်ႇ၊ လႄႈၶင်သႂ်ႇထွင်ႇဝႆႉဢေႃႈ။-
လွင်ႈမၼ်းၸမ်ႉ၊သြႃႇ ယူဝ်းႁၢၼ်ႇ၊ လႆႈလၢတ်ႈတီႈၸဝ်ႈၽႃႉ ႁေႇရူတ်ႈ၊ လႄႈဝႃႈ၊ “ၸဝ်ႈႁဝ်းဢမ်ႇထုၵ်ႇလီသိမ်းဢဝ်မေးၼွင်ႉၸၢႆးတူဝ်ၸဝ်ႈၵဝ်ႇ၊” ဝႃႈၼင်ႇၼႆၼၼ်ႉဢေႃႈ။
ၼၢင်း ႁေႇရူဝ်းတိ၊ ဝႆႉၸႂ်ဢၼ်ၸင်းသြႃႇ ယူဝ်းႁၢၼ်ႇ၊ လႄႈၶႂ်ႈဢဝ်တၢႆသေၵေႃႈဢမ်ႇပဵၼ်လႆႈ။-
ၵွပ်ႈပိူဝ်ႈၸဝ်ႈၽႃႉ ႁေႇရူတ်ႈ၊ ႁုလွင်ႈဢၼ်သြႃႇ ယူဝ်းႁၢၼ်ႇ၊ ပဵၼ်ၵူၼ်းလီၵူၼ်းမူတ်းၸၢင်ႇလႄႈၵူဝ်ယမ်မၼ်းလႄႈၸင်ႇပႂ်ႉတူၺ်းမၼ်းဝႆႉလီလီဢေႃႈ။ ၸဝ်ႈၽႃႉၼၼ်ႉၵျိူၵ်ႈထွမ်ႇငိၼ်းၵႂၢမ်းမၼ်းလႄႈပေႃးလႆႈငိၼ်းၸိုင်၊ဢၢမ်းၼႃႇလူင်လၢင်သေယဝ်ႉ၊ၸၢင်ႈမီးႁူဝ်ၸႂ်ဢၼ်ၸူမ်းၸူမ်းၼႃႇလႄႈထွမ်ႇငိၼ်းၵႂၢမ်းမၼ်းဢေႃႈ။
ၵမ်းၼၼ်ႉ၊ၶိင်ႇမၼ်းသၢင်ႇထုၵ်ႇပုၼ်ႈၼၢင်း ႁေႇရူဝ်းတိ၊ လႄႈ၊မိူဝ်ႈဢၼ်ပဵၼ်ဝၼ်းၵိူတ်ႇလဵင်ႉၸဝ်ႈၽႃႉ ႁေႇရူတ်ႈ၊ ၸိုင်၊မၼ်းၶၢမ်ႇပွႆးသေယဝ်ႉ၊ၽိတ်ႈပၢင်းမူးမၢတ်ႈၽွင်းမိူင်းတင်းလၢႆ၊ဢိၵ်ႇတင်းၶုၼ်သိုၵ်းလႂ်တင်းၵူၼ်းၵႄႇၵူၼ်းႁူဝ်ၵႃႈၼႂ်းဢိူင်ႇ ၵႃႇလိလႄး၊ တင်းလၢႆသေလႄႈႁဵတ်းပွႆးလဵင်ႉလူဢေႃႈ။-
မိူဝ်ႈၼၼ်ႉ၊လုၵ်ႈယိင်းၼၢင်း ႁေႇရူဝ်းတိ၊ ၶဝ်ႈလႄႈၵႃႈဝႅၼ်ဢေႃႈ။ ၸႃႉၸဵမ်ၸဝ်ႈၽႃႉ ႁေႇရူတ်ႈ၊ ဢိၵ်ႇတင်းပီႈၼွင်ႉၶႅၵ်ႇမၼ်းတင်းလၢႆ၊ထုၵ်ႇၸႂ်ၵျိူၵ်ႈၸႂ်ၼႃႇလူင်လၢင်လႄႈၸဝ်ႈၽႃႉ ႁေႇရူတ်ႈ၊ လၢတ်ႈတီႈၼၢင်းယိင်းဢွၼ်ႇၼၼ်ႉလႄႈဝႃႈ၊ “မႂ်းၶႂ်ႈလႆႈၵႃႈသင်ၵေႃႈယွၼ်းတႃႉ။ ၵဝ်တၵ်းပၼ်ဢေႃႈ၊” ဝႃႈၼင်ႇၼႆဢေႃႈ။-
ၸဝ်ႈၽႃႉၼၼ်ႉဝႆႉၵတိသေလႄႈလၢတ်ႈဝႃႈ၊ “ၵဝ်တိူင်ႇၵၢဝ်ႇၵႂၢမ်းၵတိလႄႈဝႃႈ၊ၵဝ်တၵ်းပၼ်တီႈမႂ်းၵႃႈဢၼ်မႂ်းယွၼ်းၼၼ်ႉ၊တေႃႇထိုင်ႁွတ်ႈမိူင်းၵဝ်ၽၢၵ်ႇၼိုင်ႈဢေႃႈ၊” ဝႃႈၼင်ႇၼႆဢေႃႈ။
ၼၢင်းယိင်းၼၼ်ႉ၊ဢွၵ်ႇၵႂႃႇထၢမ်တီႈမႄႈမၼ်းလႄႈဝႃႈ၊ “တၵ်းလႆႈယွၼ်းဢဝ်ၵႃႈသင်ၶႃႈ၊” ဝႃႈၼႆလႄႈမႄႈမၼ်းၶိုၼ်းလၢတ်ႈလႄႈဝႃႈ၊ “ယွၼ်းဢဝ်ႁူဝ်သြႃႇ ယူဝ်းႁၢၼ်ႇ၊ ဢၼ်ပၼ်မၢင်ႇၵလႃႇပပ်ႉတိၸမ်ႇၼၼ်ႉတႃႉ၊” ဝႃႈၼင်ႇၼႆဢေႃႈ။
ၼၢင်းယိင်းဢွၼ်ႇၼၼ်ႉ၊ၶဝ်ႈၵႂႃႇၵႃႈတီႈၸဝ်ႈၽႃႉၼၼ်ႉၶၼ်ၶၼ်ၽႂ်းၽႂ်းၵမ်းလဵဝ်သေလႄႈလဝ်ႈယွၼ်းဝႃႈ၊ “ၵဝ်ၶႃႈၶႂ်ႈႁႂ်ႈဢဝ်ႁူဝ်သြႃႇ ယူဝ်းႁၢၼ်ႇ၊ ဢၼ်ပၼ်မၢင်ႇၵလႃႇပပ်ႉတိၸမ်ႇၼၼ်ႉ၊သႂ်ႇပၢၼ်ႉမႃးပၼ်ၵဝ်ၶႃႈၵႃႈတီႈၼႆႈမိူဝ်ႈလဵဝ်ၼႆႉၶႃႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈၽႃႉၼၼ်ႉၸႂ်လဵၵ်ႉၼႃႇဢေႃႈ။ ၵူၺ်းၵႃႈ၊ၵွပ်ႈပိူဝ်ႈဢၼ်လႆႈပၼ်ၵႂၢမ်းၵတိၽၢႆႇၼႃႈၶႅၵ်ႇၵူၼ်းလူင်တင်းလၢႆယဝ်ႉၼၼ်ႉလႄႈဢမ်ႇၸၢင်ႈထဵင်ပႅတ်ႈၼၢင်းယိင်းဢွၼ်ႇၼၼ်ႉယဝ်ႉလႄႈ၊-
ၸင်ႇပွႆႇၸႂ်ႉၵူၼ်းသိုၵ်းႁၢၼ်ဢွၼ်ႇၵေႃႉၼိုင်ႈၵႂႃႇၵမ်းလဵဝ်သေလႄႈ မီးဢမိင်ႉဝႃႈ၊ “ဢဝ်ႁူဝ်မၼ်းမႃးတႃႉ၊” ဝႃႈၼင်ႇၼႆဢေႃႈ။-
ၵူၼ်းသိုၵ်းႁၢၼ်ဢွၼ်ႇၼၼ်ႉ၊ၵႂႃႇတႅပ်းဢဝ်ႁူဝ်သြႃႇ ယူဝ်းႁၢၼ်ႇ၊ ၵႃႈၼႂ်းထွင်ႇ၊သႂ်ႇပၢၼ်ႉမႃးပၼ်တီႈၼၢင်းယိင်းဢွၼ်ႇၼၼ်ႉယဝ်ႉၸင်ႇ၊မၼ်းၵေႃႈပၼ်မႄႈမၼ်းသေဢေႃႈ။-
တပႄးသြႃႇ ယူဝ်းႁၢၼ်ႇ၊ တင်းလၢႆၵေႃႈလႆႈငိၼ်းလႄႈဢွၼ်ၵၼ်မႃးဢဝ်တူဝ်တၢႆမၼ်းၵႂႃႇသၢင်းၵျူဝ်ႇသေဢေႃႈ။
တမၢၼ်ႇၸဝ်ႈၸိူဝ်းၼၼ်ႉ၊ၶိုၼ်းပွၵ်ႈမႃးၸုတုမ်ၵႃႈတီႈ ၸဝ်ႈယေႇသု၊ သေလႄႈမွၵ်ႇလၢတ်ႈၶႆႈၼႄလွင်ႈတၢင်းၵႃႈဢၼ်ၶဝ်ႁဵတ်းၶဝ်သင်ႇသွၼ်မႃးၸိူဝ်းၼၼ်ႉတီႈမၼ်းၸဝ်ႈဢေႃႈ။-
ၵႃႈတီႈၼၼ်ႈၵူၼ်းၼမ်ၼႃႇၶဝ်ႈၶဝ်ႈဢွၵ်ႇဢွၵ်ႇယူႇတေႃႇထိုင်ႁွတ်ႈတပႄးၸဝ်ႈတင်းလၢႆထၢၼ်ႈပေႃးဢမ်ႇတၼ်းလႆႈၵိၼ်တၢင်းၵိၼ်လႄႈမၼ်းၸဝ်ႈလၢတ်ႈတီႈၶဝ်လႄႈဝႃႈ၊ “သူဢွၼ်ၵၼ်ၵႂႃႇတီႈဢၼ်ၵူၼ်းဢမ်ႇမီးၼၼ်ႉသေလႄႈလိုဝ်ႈႁိူဝ်ႉၵမ်းဢွၼ်ႇၼိုင်ႈလူးၵွၼ်ႇတႃႉ၊” ဝႃႈၼင်ႇၼႆဢေႃႈ။-
ၶဝ်တင်း ၸဝ်ႈယေႇသု၊ ၵေႃႈၶီႇႁိူဝ်းႁင်းၵူၺ်းၶေႃၶဝ်လႄႈၵႂႃႇတီႈဢၼ်ပိူၼ်ႈဢမ်ႇမီးၼၼ်ႉသေဢေႃႈ။
ၼႂ်းဝႃႈၼၼ်သေၵေႃႈၵူၼ်းၼမ်ၼႃႇႁၼ်ၶဝ်ၵႂႃႇလႄႈႁုလွင်ႈဢၼ်ပဵၼ်ၶဝ်ၸိုင်၊ဢွၼ်ၵၼ်ဢွၵ်ႇသေၵူႈဝၢၼ်ႈၵူႈဝဵင်းတင်းသဵင်ႈတင်းလူင်ပႆတိၼ်လႅၼ်ႈၵႂႃႇတၢင်းၵွင်းလႄႈႁွတ်ႈထိုင်ၵႂႃႇၵႃႈတီႈၼၼ်ႈဢွၼ်တၢင်းၶဝ်ၼၼ်ႉဢေႃႈ။-
မိူဝ်ႈဢၼ် ၸဝ်ႈယေႇသု၊ ဢွၵ်ႇႁိူဝ်းၵႂႃႇလႄႈႁၼ်ၵူၼ်းဢၼ်ၼမ်ၼႃႇထၼ်ႇၼၼ်ႉၸိုင်၊တိူဝ်ႉၸႂ်လႄႈဢဵတ်းလူၶဝ်ၵွပ်ႈပိူဝ်ႈၶဝ်ၸိူဝ်းၼၼ်ႉပဵၼ်ၸိူဝ်ႉၼင်ႇသူဝ်းတင်းလၢႆဢၼ်ဢမ်ႇမီးၵေႃႉလဵင်ႉၵေႃႉထိင်းၼၼ်ႉဢေႃႈ။ ပိူဝ်ႈၼႆလႄႈမၼ်းၸဝ်ႈသင်ႇသွၼ်သုင်းမႃႉပၼ်လွင်ႈတၢင်းၼမ်ၼႃႇတီႈၶဝ်ဢေႃႈ။-
မိူဝ်ႈဢၼ်ႁွတ်ႈထိုင်ၶိင်ႇႁူဝ်ၶမ်ႈၸိုင်၊တမၢၼ်ႇၸဝ်ႈတင်းလၢႆသုတ်ႉၸပ်းသုတ်ႉၸူးတီႈ ၸဝ်ႈယေႇသု၊ လႄႈလဝ်ႈလၢတ်ႈဝႃႈ၊ “ၵၢင်ဝၼ်းတေၶမ်ႈၶႃႈယဝ်ႉ။ တီႈၼႆႈပဵၼ်တီႈဢၼ်ငႅဝ်ၵူၼ်းဢမ်ႇမီးတၢင်းၵိၼ်ၵႃႈသင်ၶႃႈ။-
ၸဝ်ႈႁဝ်းလီပွႆႇၵူၼ်းၸိူဝ်းၼႆႉၵႂႃႇၵႃႈတီႈဝၢၼ်ႈႁိမ်းႁွမ်းၸိူဝ်းၼၼ်ႉႁႂ်ႈၶဝ်လႆႈသိုဝ်ႉၵိၼ်တၢင်းၵိၼ်ၶႃႈဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၵေႃႈလၢတ်ႈတီႈၶဝ်လႄႈဝႃႈ၊ “သူပၼ်ပုၼ်ႈဢၼ်ၶဝ်တၵ်းၵိၼ်တႃႉ၊” ဝႃႈၼင်ႇၼႆလႄႈ၊ ၶဝ်ၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈႁဝ်းၶႂ်ႈႁႂ်ႈႁဝ်းၶႃႈၵႂႃႇသိုဝ်ႉၶဝ်ႈမုၼ်းဢၼ်တၢၼ်ႇငိုၼ်းတေႇၼႃႇရီႇ သွင်ပၢၵ်ႇၶႅပ်းလႄႈမႃးလဵင်ႉၶဝ်ၶႃႈႁိုဝ်း၊” ဝႃႈၼင်ႇၼႆဢေႃႈ။
မၼ်းၸဝ်ႈၵေႃႈထၢမ်ၶဝ်လႄႈဝႃႈ၊ “ၵႃႈတီႈသူၼႆႉမီးၶဝ်ႈမုၼ်းလၢႆႁူၺ်ႇ။ ၵႂႃႇသွၵ်ႈႁႃတူၺ်းလူး၊” ဝႃႈၼႆ၊ၵႃႈၼင်ႇဢၼ်မၼ်းၸဝ်ႈဝႃႈၼၼ်ႉ၊ၶဝ်လႆႈမႃးယဝ်ႉၸင်ႇ။ လဝ်ႈလၢတ်ႈထိုင်လႄႈဝႃႈ၊ “မီးၶဝ်ႈမုၼ်းႁႃႈႁူၺ်ႇတင်းပႃသွင်တူဝ်ၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉမၼ်းၸဝ်ႈမီးဢမိင်ႉတီႈတမၢၼ်ႇၸဝ်ႈတင်းလၢႆ၊ႁႂ်ႈၶဝ်ၵႂႃႇၽႄၵူၼ်းဢၼ်ၸုဢၼ်တုမ်တင်းလၢႆၼင်ႈယူႇပဵၼ်မုၵ်ႉပဵၼ်မုၵ်ႉၵႃႈၼိူဝ်ပၢင်ႇယိူဝ်ႈၶဵဝ်ဢေႃႈ။-
ပိူဝ်ႈၼႆလႄႈၵူၼ်းတင်းလၢႆဢွၼ်ၵၼ်ၼင်ႈယူႇယေႈမုၵ်ႉယေႈပၢၵ်ႇယေႈမုၵ်ႉႁႃႈသိပ်းပဵၼ်မုၵ်ႉပဵၼ်မုၵ်ႉဝႆႉဢေႃႈ။-
မၼ်းၸဝ်ႈၸင်ႇဢဝ်ၶဝ်ႈမုၼ်းႁႃႈႁူၺ်ႇတင်းပႃသွင်တူဝ်ၼၼ်ႉသေလႄႈႁႅၼ်ၶိုၼ်ႈၵႃႈၼိူဝ်ၵၢင်ႁၢဝ်လႄႈယွင်ႈယေႃးၵျေးၸူးၸဝ်ႈယဝ်ႉၸင်ႇ၊ဝိတ်းၶဝ်ႈမုၼ်းပၼ်တီႈတမၢၼ်ႇၸဝ်ႈတင်းလၢႆႁႂ်ႈၽႄမႅင်ႇပၼ်ၵူၼ်းတင်းလၢႆၵိၼ်ဢေႃႈ။ ပႃသွင်တူဝ်ၵေႃႈမၼ်းၸဝ်ႈမႅင်ႇပၼ်ၶဝ်တင်းသဵင်ႈတင်းလူင်ၵိၼ်ဢေႃႈ။-
ၵူၼ်းၵႃႈမီးတင်းသဵင်ႈတင်းလူင်ၵိၼ်ဢိမ်ႇၵိၼ်တဵမ်ယဝ်ႉၸင်ႇ၊-
ၶိုၼ်းၵဵပ်းသိမ်းဢဝ်ၶဝ်ႈမုၼ်းတင်းပႃဢၼ်ႁၵ်းဢၼ်ႁိၵ်းမၼ်းလႄႈလႆႈသိပ်းသွင်ပဵတ်ႈတဵမ်တဵမ်ဢေႃႈ။-
ၵူၼ်းဢၼ်လႆႈၵိၼ်ၸိူဝ်းၼၼ်ႉၵူၼ်းၸၢႆးလူင်ၵူၺ်းၵူၺ်းမီးသေႁႃႈႁဵင်ၼိုင်ႈဢေႃႈ။
မိူဝ်ႈဢၼ် ၸဝ်ႈယေႇသု၊ ပွႆႇၵူၼ်းဢၼ်ၸုဢၼ်တုမ်ၸိူဝ်းၼၼ်ႉမိူဝ်းၵႂႃႇယူႇၼၼ်ႉ၊တိုၵ်းယူင်းတပႄးၸဝ်ႈတင်းလၢႆၶဝ်ႈႁိူဝ်းၵမ်းလဵဝ်လႄႈပွႆႇႁႂ်ႈၶဝ်ၶၢမ်ႈၵႂႃႇၽၢႆႇပုၼ်ႉၼွင်ၸူးတီႈဝဵင်း ပႅတ်ႉၸေးတႃႉ၊ ဢွၼ်တၢင်းမၼ်းၸဝ်ႈဢေႃႈ။-
ဝၢႆးသေၵူၼ်းတင်းလၢႆပူၼ်ႉၵႂႃႇယဝ်ႉၸိုင်၊မၼ်းၸဝ်ႈၶိုၼ်ႈလွႆၵႂႃႇႁႂ်ႈလႆႈသူးတွင်းဢေႃႈ။-
မိူဝ်ႈဢၼ်ထိုင်ၶိင်ႇၵၢင်ၶိုၼ်းၸိုင်၊ႁိူဝ်းၼၼ်ႉမီးယူႇၼႂ်းၵၢင်ၼွင်လႄႈတူဝ်မၼ်းၸဝ်ႈၸမ်ႉ၊မီးယူႇၼိူဝ်လွႆပႃးလဵဝ်ၵူၺ်းဢေႃႈ။-
မၼ်းၸဝ်ႈႁၼ်ၶဝ်ၽၢႆးႁိူဝ်းယၢပ်ႇၼႃႇၵွပ်ႈပိူဝ်ႈဢၼ်လႆႈၶတ်းၵၼ်တင်းႁႅင်းလူမ်းၵႂႃႇၼၼ်ႉသေယဝ်ႉ၊-
ၶိင်ႇၵၢင်ၼႂ်ၸဝ်ႉၼႂ်းၵႄႈဝူင်ႈၵၢင်ၶၢဝ်းသၢမ်မွင်းတင်းႁူၵ်းမွင်းၼၼ်ႉမၼ်းၸဝ်ႈပႆၼိူဝ်ၽိဝ်ၼမ်ႉၵႂႃႇၸူးၶဝ်ႁဵတ်းမိူၼ်ၼင်ႇႁၢင်ႈတၵ်းပူၼ်ႉၶဝ်ၵႂႃႇဢေႃႈ။-
မိူဝ်ႈဢၼ်ၶဝ်ႁၼ်မၼ်းၸဝ်ႈပႆၼိူဝ်ၽိဝ်ၼမ်ႉၵႂႃႇၸိူဝ်ႉၼင်ႇၼၼ်ၼၼ်ႉၸိုင်၊ထၢင်ႇဝႃႈပဵၼ်ၽဵတ်ႇလႄႈတူၵ်းၸႂ်ဢေႃႈ။ မၼ်းၸဝ်ႈၸင်ႇတၵ်ႉလၢတ်ႈတေႃႇၶဝ်ၵမ်းလဵဝ်လႄႈဝႃႈ၊ “ဝႆႉၸႂ်ၼိမ်ၼိမ်တႃႉ။ ပဵၼ်ၵဝ်ဢိူဝ်း။ ယႃႇပေၵူဝ်၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉမၼ်းၸဝ်ႈၶဝ်ႈၵႃႈၼႂ်းႁိူဝ်းၸူးၶဝ်လႄႈလူမ်းၵေႃႈယဵၼ်ၵႂႃႇဢေႃႈ။ ၶဝ်ၸိူဝ်းၼၼ်ႉဢၢမ်းၼႃႇလူင်လၢင်ထၢၼ်ႈပေႃးၵႂင်ၸႂ်ယုင်ႈၸႂ်ယူႇ၊-
ပိူဝ်ႈဢၼ်ႁူဝ်ၸႂ်ၶဝ်ယင်းတၼ်ယူႇလႄႈဢမ်ႇပွင်ႇဢမ်ႇလႅင်းလွင်ႈၶဝ်ႈမုၼ်းၼၼ်ႉၼၼ်ႉဢေႃႈ။
ၶဝ်ၶၢမ်ႈၼွင်ၵႂႃႇႁွတ်ႈထိုင်ၵႃႈတီႈမိူင်း ၵိၼ်ႇၼီႇၸရိတ်ႈ၊ လႄႈသိူၵ်ႈႁိူဝ်းၶဝ်ဢေႃႈ။-
မိူဝ်ႈဢၼ်ၶဝ်လူင်းႁိူဝ်းၵႂႃႇၼၼ်ႉၸိုင်၊ၵူၼ်းတင်းလၢႆႁုပဵၼ် ၸဝ်ႈယေႇသု၊ ၵမ်းလဵဝ်သေယဝ်ႉ၊-
လႅၼ်ႈၵႂႃႇၵႃႈတီႈႁိမ်းႁွမ်းၼၼ်ႉၵူႈတီႈၵူႈလႅၼ်လႄႈပေႃးၶဝ်ငိၼ်းလွင်ႈဢၼ်မၼ်းၸဝ်ႈမီးၵႃႈတီႈလႂ်သေဢမ်ႇဝႃႈ၊ၶဝ်ဢဝ်ၵူၼ်းၶႆႈၵူၼ်းပဵၼ်ၶဝ်တင်းလၢႆသႂ်ႇၵႃႈၼိူဝ်တီႈၼွၼ်းၵႂႃႇၸူးၵႃႈတီႈၼၼ်ႈဢေႃႈ။-
မိူဝ်ႈဢၼ်မၼ်းၸဝ်ႈၶဝ်ႈၵႂႃႇၵႃႈၼႂ်းဝဵင်း၊ၵႃႈၼႂ်းဝၢၼ်ႈၼွၵ်ႈၼႃးပၢင်ႇၵႃႈတီႈလႂ်သေဢမ်ႇဝႃႈ၊ၵႃႈတီႈၼၼ်ႈပိူၼ်ႈဢဝ်ၵူၼ်းၶႆႈၵူၼ်းပဵၼ်တင်းလၢႆမႃးဝၢင်းၵႃႈတီႈၵၢင်ၵၢတ်ႇလႄႈဢွၼ်ၵၼ်ယွၼ်းဢၶႂၢင်ႉႁႂ်ႈလႆႈတိူဝ်ႉယိပ်းပိၵ်ႇသိူဝ်ႈၸဝ်ႈၵူၺ်းဢေႃႈ။ ၵူၼ်းဢၼ်လႆႈတိူဝ်ႉလႆႈယိပ်းတင်းသဵင်ႈတင်းလူင်ၸိူဝ်းၼၼ်ႉၵေႃႈလႆႈၸိုၼ်ႈႁၢႆၵႂႃႇတႄႉဢေႃႈ။
မိူဝ်ႈၼၼ်ႉ၊ၵူၼ်းၵိူင်း ၽႃႇရိသႄး၊ တင်းလၢႆပႃးတင်းသြႃႇမေႃၵျၢမ်းထမ်ႇမႃႉၵမ်ႈၽွင်ႈလုၵ်ႉၵႃႈတီႈဝဵင်း ယေႇရုသလႅမ်ႇ၊ မႃးၸုတုမ်ၵၼ်လွမ်ႉႁွပ်ႈ ၸဝ်ႈယေႇသု၊ ဝႆႉဢေႃႈ။-
ၶဝ်လႆႈႁၼ်တပႄးၸဝ်ႈၵမ်ႈၽွင်ႈဢဝ်တင်းမိုဝ်းဢၼ်ဢမ်ႇမူတ်းသႂ်ဢၼ်ဝႃႈ၊ဢမ်ႇသုၵ်ႈၼမ်ႉၸွမ်းထုင်းတြႃးၼၼ်ႉၵိၼ်တၢင်းၵိၼ်ယူႇၸိုင်၊ၶဝ်တၢင်ႇဢပျတ်ႈဢေႃႈ။
(လွင်ႈမၼ်းၸမ်ႉ၊ၵူၼ်းမဵဝ်း ၵျူး၊ ၶဝ်တင်းသဵင်ႈတင်းလူင်လိူဝ်တွၼ်းၼႃႇသေပိူၼ်ႈၵူၼ်းၵိူင်း ၽႃႇရိသႄး၊ ၶဝ်ၵမ်ၵျၢင်ႉၸွမ်းထုင်းတြႃးမိူဝ်ႈၵွၼ်ႇဢၼ်ဝႃႈ၊ပေႃးယင်းဢမ်ႇသုၵ်ႈမိုဝ်းၸွမ်းၼင်ႇလၢႆးမၼ်းၸိုင်၊ဢမ်ႇမီးထုင်းၸၢမ်ႇတႃႇၵိၼ်တၢင်းၵိၼ်။-
မဵဝ်းဢၼ်ဢဝ်ၵႃႈတီႈၵၢတ်ႇမႃးၼၼ်ႉၵႃႈသင်သေဢမ်ႇဝႃႈ၊ပေႃးယင်းဢမ်ႇသုၵ်ႈၼမ်ႉၸိုင်၊ဢမ်ႇမီးထုင်းၸၢမ်ႇဢၼ်ၵိၼ်သေၸိူဝ်ႉသေပိူင်။ ယင်းမီးထႅင်ႈထုင်းတြႃးတၢင်ႇၸိူဝ်ႉတၢင်ႇဢၼ်ၼမ်ၼႃႇ၊ဢၼ်ၶဝ်ၵမ်ၵျၢင်ႉၸွမ်းဢၼ်ဝႃႈ၊တၢင်းဢၼ်လၢင်ႉၵွၵ်းလႂ်၊မေႃႈလႂ်၊ငွႆးတွင်းလိူင်လႂ်၊ၵူႇၼွၼ်းလႂ်ၸိူဝ်းၼၼ်ႉဢေႃႈ။)
ပိူဝ်ႈၼႆလႄႈၵူၼ်းၵိူင်း ၽႃႇရိသႄး၊ ၶဝ်တင်းသြႃႇမေႃၵျၢမ်းထမ်ႇမႃႉၸိူဝ်းၼၼ်ႉ၊ၸင်ႇလဝ်ႈထၢမ် ၸဝ်ႈယေႇသု၊ လႄႈဝႃႈ၊ “ႁဵတ်းသင်လႄႈတပႄးၸဝ်ႈႁဝ်းတင်းလၢႆယင်းဢမ်ႇၵမ်ၵျၢင်ႉၸွမ်းထုင်းတြႃးမိူဝ်ႈၵွၼ်ႇတင်းလၢႆလႄႈသမ်ႉဢဝ်မိုဝ်းဢၼ်ဢမ်ႇမူတ်းသႂ်ၼၼ်ႉၵိၼ်တၢင်းၵိၼ်ၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
မၼ်းၸဝ်ႈၶိုၼ်းလၢတ်ႈတီႈၶဝ်လႄႈဝႃႈ၊ “ဢၼ်ပရေႃးၽႅတ်ႈ ဢိသႃႇယႃႉ၊ ႁေႃးဝႆႉလွင်ႈသူၸိူဝ်းဢၼ်ႁဵတ်းၼႃႈသိူဝ်ႈၸႂ်ၵူတ်ႉၼႆႉၸႂ်ႈတႄႉယဝ်ႉ။ မၼ်းတႅမ်ႈဝႆႉလႄႈဝႃႈ၊ “‘ၽြႃးပဵၼ်ၸဝ်ႈမီးဢမိင်ႉလႄႈဝႃႈ၊ၵူၼ်းၸိူဝ်းၼႆႉ၊ ဢဝ်တင်းသူပ်းၵူၺ်းရူဝ်ႇသေႇၵူဝ်ယမ်ၵဝ်ဢေႃႈ။ ၵူၺ်းၵႃႈႁူဝ်ၸႂ်ၶဝ်ၵႆၵၼ်တင်းၵဝ်ဢေႃႈ။
ၵွပ်ႈပိူဝ်ႈၶဝ်ဢဝ်ထုင်းတြႃးၵူၼ်းၼၼ်ႉ၊ သင်ႇသွၼ်သုင်းမႃႉပၼ်ၸိူဝ်ႉၼင်ႇတြႃး ၽြႃးပဵၼ်ၸဝ်ႈလႄႈ တၢင်းဢၼ်ၶဝ်ၵူဝ်းၵႂၢႆႇၵဝ်ၼႆႉ၊ပဵၼ်ဢၼ် လၢႆလၢႆဢမ်ႇပွင်ႇလွင်ႈၵႃႈသင်ယဝ်ႉ၊’ ဝႃႈၼင်ႇၼႆမီးဝႆႉဢေႃႈ။
“လွင်ႈမၼ်းၸမ်ႉ၊သူပႄႇပႅတ်ႈတြႃးၽြႃးပဵၼ်ၸဝ်ႈသေလႄႈၵမ်ၵျၢင်ႉၸွမ်းထုင်းတြႃးၵူၼ်း [ဢၼ်ဝႃႈ၊တၢင်းဢၼ်ဢဝ်ၵွၵ်းလႂ်ဢၢင်ႇလႂ်ၸုမ်ႇၼမ်ႉၼၼ်ႉ၊ဢိၵ်ႇတင်းထုင်းၸၢမ်ႇတၢင်ႇဢၼ်မဵဝ်းၼၼ်ႉၼမ်ၼႃႇဢေႃႈ။]
“သူၸၢင်ႈလၵ်းလႅမ်ၼႃႇပႄႇပႅတ်ႈတြႃးၽြႃးပဵၼ်ၸဝ်ႈသေလႄႈမေႃၵမ်ၵျၢင်ႉၸွမ်းထုင်းတြႃးမိူဝ်ႈၵွၼ်ႇသူၼၼ်ႉၼႃႇလူင်လၢင်ဢေႃႈ။-
မူဝ်းသေႇ၊ ပိင်းၺၢပ်ႈဝႆႉလႄႈဝႃႈ၊ ‘ႁဵတ်းရူဝ်ႇသေႇၵူဝ်ယမ်ပေႃႈမႄႈမႂ်းတႃႉ၊’ သမ်ႉဝႃႈ၊ ‘ၽူႈလႂ်သေဢမ်ႇဝႃႈ၊ၵေႃႉဢၼ်ၵိၼ်ႇလႃႇပေႃႈမႄႈမၼ်းၼၼ်ႉ၊ၵေႃႉၼၼ်ႉတၵ်းလႆႈၶၢမ်ႇတၢင်းဢၼ်ဢဝ်တၢႆဢေႃႈ၊’ ဝႃႈၼင်ႇၼႆမီးယူႇသေၵေႃႈ၊-
သူသမ်ႉသွၼ်ပၼ်လႄႈဝႃႈ၊ ‘ပေႃးသေၵေႃႉသေၵူၼ်းလၢတ်ႈတီႈပေႃႈမႄႈမၼ်းလႄႈဝႃႈ၊ဢုၵ်ႉၸႃႇၵႃႈဢၼ်သူၶႂ်ႈသုင်းသွင်ႇၸိူဝ်းၼၼ်ႉ၊ပဵၼ် ၵေႃႇပၢၼ်ႇ၊ ယဝ်ႉ၊ဝႃႈၼင်ႇၼႆၸိုင်၊လၢတ်ႈၶေႃႈၼႆႉၵူၺ်းလႄႈဝၢတ်ႈပေႃႈဝၢတ်ႈမႄႈတၵ်းၽႄႇယဝ်ႉ၊’ ဝႃႈၼင်ႇၼႆဢေႃႈ။ ( ၵေႃႇပၢၼ်ႇ၊ ဢၼ်ဝႃႈၼၼ်ႉၶႂ်ႈဝႃႈၶိူင်ႈဢၼ်သၢၵ်ႈလူႇၽြႃးပဵၼ်ၸဝ်ႈဢေႃႈ။-)
တီႈမၼ်းၼၼ်ႉသူႁႄႉၶႅၼ်လႄႈဝႃႈ၊ ‘မၼ်းဢမ်ႇလူဝ်ႇႁဵတ်းဝၢတ်ႈတီႈပေႃႈမႄးမၼ်းသေဢိတ်းယဝ်ႉ၊’ ဝႃႈၼင်ႇၼႆလႄႈ၊-
ပႄႇပႅတ်ႈၼုၵ်ႈၵပၢတ်ႈတြႃးၽြႃးပဵၼ်ၸဝ်ႈၵွပ်ႈပိူဝ်ႈထုင်းတြႃးမိူဝ်ႈၵွၼ်ႇၼၼ်ႉဢေႃႈ။ သူၵမ်ၵျၢင်ႉၸွမ်းထုင်းၸၢမ်ႇၸိူဝ်ႉၼင်ႇၼၼ်ၼမ်ၼႃႇဢေႃႈ၊” ဝႃႈၼင်ႈၼႆဢေႃႈ။
မိူဝ်ႈၼၼ်ႉ၊ ၸဝ်ႈယေႇသု၊ သမ်ႉၶိုၼ်းႁွင်ႉဢဝ်ၵူၼ်းတင်းလၢႆ၊မႃးၵႃႈတီႈမၼ်းၸဝ်ႈသေလႄႈလၢတ်ႈဝႃႈ၊ “သူၵႃႈမီးတင်းသဵင်ႈတင်းလူင်ထွမ်ႇဢဝ်လႄႈႁုပွင်ႇၸႂ် တႃႉ။-
ဢၼ်လုၵ်ႉသေၽၢႆႇတၢင်းၼွၵ်ႈၶဝ်ႈၵႂႃႇၵႃႈၼႂ်းၵူၼ်းလႄႈ၊ႁဵတ်းႁႂ်ႈၵူၼ်းၵူဝ်ႈၵိူၵ်ႇလႆႈၼၼ်ႉဢမ်ႇမီးသေၸိူဝ်ႉသေပိူင်။ ဢၼ်ဢွၵ်ႇၵႃႈၼႂ်းၵူၼ်းမႃးၼၼ်ႉၵူၺ်း၊ပဵၼ်ဢၼ်ႁႂ်ႈၵူၼ်းၵူဝ်ႈၵိူၵ်ႇဢေႃႈ။-
ပေႃးသေၵေႃႉသေၵူၼ်းမီးႁူဢၼ်ၸၢင်ႈငိၼ်းၸိုင်၊ႁႂ်ႈငိၼ်းသေၵမ်းလူၺ်ႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်မၼ်းၸဝ်ႈဢွၵ်ႇသေၵႃႈတီႈၵူၼ်းတင်းလၢႆၸိူဝ်းၼၼ်ႉလႄႈၶဝ်ႈႁိူၼ်းၵႂႃႇယဝ်ႉၸိုင်၊တပႄးၸဝ်ႈတင်းလၢႆ၊လဝ်ႈထၢမ်လွင်ႈၵႂၢမ်းဢုပမႃႇၼၼ်ႉဢေႃႈ။-
မၼ်းၸဝ်ႈၵေႃႈၶႆႈၼႄၶဝ်လႄႈဝႃႈ၊ “သူၵေႃႈဢမ်ႇပႆႇပွင်ႇၸႂ် လူးၵွၼ်ႇႁိုဝ်း။ ဢၼ်လုၵ်ႉသေၽၢႆႇတၢင်းၼွၵ်ႈၶဝ်ႈၵႂႃႇၵႃႈၼႂ်းၵူၼ်းမဵဝ်းလႂ်သေဢမ်ႇဝႃႈ၊ဢမ်ႇၸၢင်ႈႁႂ်ႈၵူၼ်းလႆႈၵူဝ်ႈၵိူၵ်ႇသေၸိူဝ်ႉသေပိူင်။-
ၵွပ်ႈပိူဝ်ႈဝႃႈ၊ဢၼ်ၼၼ်ႉဢမ်ႇၶဝ်ႈၵႃႈၼႂ်းႁူဝ်ၸႂ်၊ၶဝ်ႈၵႃႈၼႂ်းတွင်ႉၵူၺ်းသေလႄႈသမ်ႉလူင်းပူၼ်ႉသႆႈလူင်ဢွၵ်ႇၵႂႃႇၵူၺ်းဢေႃႈ၊” ဝႃႈၼင်ႇၼႆဢေႃႈ။ (ဢၼ်ဝႃႈၸိူဝ်ႉၼင်ႇၼႆၸိုင်၊မၼ်းၸဝ်ႈလၢတ်ႈၼႄလွင်ႈဢၼ်တၢင်းၵိၼ်ၵူႈမဵဝ်းၵိၼ်လႆႈယူႇၼၼ်ႉဢေႃႈ။)
မၼ်းၸဝ်ႈသိုပ်ႇလၢတ်ႈလႄႈဝႃႈ၊ “ဢၼ်ဢွၵ်ႇၵႃႈၼႂ်းၵူၼ်းမႃးၼၼ်ႉယဝ်ႉၸၢင်ႈႁဵတ်းႁႂ်ႈၵူၼ်းလႆႈၵူဝ်ႈၵိူၵ်ႇဢေႃႈ။-
ၵွပ်ႈပိူဝ်ႈၸိူဝ်ႉႁိုဝ်လႄႈဝႃႈၼႆ၊ဢၼ်ဢွၵ်ႇသေၵႃႈတၢင်းၼႂ်းမႃးၼၼ်ႉ၊ပဵၼ်ဢၼ်ဢွၵ်ႇမႃးၵႃႈတီႈႁူဝ်ၸႂ်ဢၼ်ၸၢင်ႈၵျၢမ်ႇပွင်ဢၼ်ၵူဝ်ႈဢၼ်ၵိူၵ်ႇ၊တၢင်းဢၼ်ၵူတ်ႉမေးပိူၼ်ႈလႂ်၊တၢင်းဢၼ်ၽိတ်းပိူင်ႈမႄႈယိင်းဢၼ်လွတ်ႈဢၼ်လႅဝ်းလႂ်၊တၢင်းဢၼ်လၵ်ႉပိူၼ်ႈၸူၼ်ပိူၼ်ႈလႂ်၊တၢင်းဢၼ်ဢဝ်ဢသၢၵ်ႈၵူၼ်းတၢႆလႂ်၊-
တၢင်းဢၼ်ၸႂ်လေႃးၽႃႉပူၼ်ႉလိူဝ်လႂ်၊တၢင်းဢၼ်ၸႂ်ႁၢႆႉၸႂ်မိူၵ်ႈလႂ်၊တၢင်းဢၼ်ပႅတ်ႉလႅၼ်ပိူၼ်ႈလႂ်၊တၢင်းၵူဝ်ႈၵိူၵ်ႇဢၼ်လီႁင်ႈဢဵတ်ႇသဵတ်ႇလႂ်၊တၢင်းဢၼ်သီႈၵေႉႁေႈတႃလႂ်၊တၢင်းဢၼ်ယႃႉသရေႇပိူၼ်ႈလႂ်၊တၢင်းဢၼ်ႁူဝ်ၸႂ်ၽႅၼ်သုင်လႂ်၊ဢိၵ်ႇတင်းတၢင်းဢၼ်ႁူဝ်ၸႂ်လိူင်းၵျၢမ်းလႂ်ၼၼ်ႉဢေႃႈ။-
လွင်ႈတၢင်းဢၼ်ႁၢႆႉမိူၵ်ႈၸိူဝ်းၼႆႉ၊ဢွၵ်ႇသေတၢင်းၼႂ်းမႃးလႄႈႁႂ်ႈၵူၼ်းလႆႈၵူဝ်ႈၵိူၵ်ႇဢေႃႈ၊” ဝႃႈၼင်ႇၼႆဢေႃႈ။
လိုၼ်းၼၼ်ႉ၊ ၸဝ်ႈယေႇသု၊ ဢွၵ်ႇသေၵႃႈတီႈၼၼ်ႈသေလႄႈၶဝ်ႈၸူးၵႃႈၼႂ်းဢိူင်ႇၼႂ်းၸႄႈဝဵင်း တုရု၊ တင်းဝဵင်း ၸိတုမ်ႇ၊ သေယဝ်ႉ၊ၶဝ်ႈၵႃႈၼႂ်းႁိူၼ်းႁိူၼ်းၼိုင်ႈလႄႈ၊ဢမ်ႇၶႂ်ႈႁႂ်ႈပိူၼ်ႈႁုလွင်ႈဢၼ်မၼ်းၸဝ်ႈမီးယူႇၵႃႈတီႈၼၼ်ႈၼၼ်ႉ။ ၵူၺ်းၵႃႈ၊မၼ်းၸဝ်ႈဢမ်ႇတဵတ်ႇဢမ်ႇမႅပ်းယူႇလႆႈ။-
မိူဝ်ႈၼၼ်ႉၵမ်းလဵဝ်မႄႈယိင်းၵေႃႉၼိုင်ႈ၊ဢၼ်ၽီႁၢႆႉၶဝ်ႈၵႃႈၼႂ်းလုၵ်ႈယိင်းဢွၼ်ႇမၼ်းၼၼ်ႉ၊လႆႈငိၼ်းၶၢဝ်ႇ ၸဝ်ႈယေႇသု၊ သေယဝ်ႉ၊မႃးၶုပ်ႉၶဝ်ႇၵႃႈတီႈမၼ်းၸဝ်ႈသေလႄႈ၊-
တွင်းပၢၼ်ႇႁႂ်ႈမၼ်းၸဝ်ႈႁေႃႈၽီဢွၵ်ႇၵႃႈၼႂ်းလုၵ်ႈယိင်းမၼ်းၼၼ်ႉဢေႃႈ။ မႄႈယိင်းၼၼ်ႉပဵၼ်ၵူၼ်းမဵဝ်း ၵရိၵ်ႉ၊ ၸႃႇတိမိူင်း သုရိၽိၼိတ်ႉ၊ ဢေႃႈ။-
မၼ်းၸဝ်ႈၵေႃႈလၢတ်ႈလႄႈဝႃႈ၊ “ႁႂ်ႈလုၵ်ႈလၢင်းတင်းလၢႆလႆႈၵိၼ်ဢိမ်ႇဢွၼ်တၢင်းတႃႉ။ ဢမ်ႇထုၵ်ႇလီဢဝ်ၶဝ်ႈမုၼ်းလုၵ်ႈလၢင်းပႅတ်ႈဢွႆႇမႃ၊” ဝႃႈၼင်ႇၼႆဢေႃႈ။
မႄႈယိင်းၼၼ်ႉ၊ၶိုၼ်းလဝ်ႈလၢတ်ႈလႄႈဝႃႈ၊ “ၸႂ်ႈၶႃႈယဝ်ႉၸဝ်ႈ။ မႃဢၼ်မီးၵႃႈတႂ်ႈၽိူၼ်ၼၼ်ႉ၊ယင်းလႆႈၵဵပ်းၵိၼ်ၶဝ်ႈမုၼ်းလုၵ်ႈလၢင်းဢၼ်တူၵ်းဢၼ်ႁူင်ႈၼၼ်ႉၶႃႈဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၵေႃႈလၢတ်ႈလႄႈဝႃႈ၊ “ၵွပ်ႈပိူဝ်ႈၶေႃႈၵႂၢမ်းမႂ်းတွပ်ႇၼႆႉလႄႈပွၵ်ႈမိူဝ်းၵႂႃႇတႃႉ။ ၽီႁၢႆႉဢွၵ်ႇတီႈလုၵ်ႈယိင်းမႂ်းၵႂႃႇယဝ်ႉ၊” ဝႃႈၼင်ႇၼႆဢေႃႈ။
မႄႈယိင်းၼၼ်ႉၶိုၼ်းမိူဝ်ႈႁိူၼ်းလႄႈထူပ်းႁၼ်လုၵ်ႈယိင်းဢွၼ်ႇမၼ်းၼွၼ်းယူႇၵႃႈၼိူဝ်ၵူႇလႄႈၽီႁၢႆႉသမ်ႉပေႃးဢွၵ်ႇၵႃႈၼႂ်းမၼ်းၵႂႃႇယဝ်ႉဢေႃႈ။
ဝၢႆးၼၼ်ႉ၊ ၸဝ်ႈယေႇသု၊ ပွၵ်ႈမိူဝ်းသေၵႃႈတီႈမိူင်း တုရု၊ ၸွမ်းတၢင်းဢၼ်ၽႃႇလတ်းၶဝ်ႈမိူင်း ၸိတုၼ်ႇ၊ ၵႂႃႇပွင်ႇၵႃႈတီႈမိူင်း တေႇၵႃႇပေႃးလိ၊ သေယဝ်ႉ၊ႁွတ်ႈထိုင်ၵႂႃႇၵႃႈတီႈၼွင် ၵႃႇလိလႄး၊ ဢေႃႈ။-
ၵမ်းၼၼ်ႉ၊ပိူၼ်ႈဢဝ်ၵူၼ်းႁူၼူၵ်ႇလႄႈလၢတ်ႈၵႂၢမ်းၵၵ်ႉၼၼ်ႉၵေႃႉၼိုင်ႈ၊မႃးတီႈမၼ်းၸဝ်ႈလႄႈတွင်းပၢၼ်ႇႁႂ်ႈမၼ်းၸဝ်ႈဢဝ်မိုဝ်းတၢင်ႇၵႃႈၼိူဝ်မၼ်းၼၼ်ႉဢေႃႈ။-
မၼ်းၸဝ်ႈၵေႃႈၸုင်ဢဝ်ၵေႃႉၼၼ်ႉဢွၵ်ႇပၢင်ၵူၼ်းတင်းလၢႆၵႂႃႇသေယဝ်ႉ၊ဢဝ်ၼိဝ်ႉမိုဝ်းသႄႇႁူးႁူၵေႃႉၼၼ်ႉလႄႈဢဝ်ၼမ်ႉလၢႆးၸမ်ႈသႂ်ႇတီႈလိၼ်ႉမၼ်းဢေႃႈ။-
ႁဵတ်းၼၼ်လႄႈႁႅၼ်တူၺ်းၵႃႈၼိူဝ်ၽႃႉၵၢင်ႁၢဝ်သေယဝ်ႉ၊ထူၺ်ႈၸႂ်လူင်ယဝ်ႉၸင်ႇလၢတ်ႈတီႈမၼ်းလႄႈဝႃႈ၊ “ဢေးၽထႃႉ၊” ဝႃႈၼင်ႇၼႆဢေႃႈ။ ၵႂၢမ်းၼၼ်ႉၶႂ်ႈဝႃႈ၊ “ၽုၺ်ႇပိုတ်ႇတႃႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၵမ်းလဵဝ်ႁူမၼ်းပိုတ်ႇပၢင်ႇမႃးလႄႈဢဵၼ်လိၼ်ႉမၼ်းဢူၼ်ႈမႃးသေယဝ်ႉ၊လၢတ်ႈၵႂၢမ်းလႆႈပီႇလီမႃးဢေႃႈ။-
မၼ်းၸဝ်ႈပိင်းၺၢပ်ႈဝႆႉတီႈၶဝ်၊ၼင်ႇႁိုဝ်ၶဝ်တၵ်းဢမ်ႇလၢတ်ႈဢွၵ်ႇလွင်ႈတၢင်းၼၼ်ႉတီႈၽူႈလႂ်သေၵေႃႉသေၵူၼ်းဢေႃႈ။ ပိၵ်ႉသမ်ႉဝႃႈၼၼ်သေၵေႃႈ၊ၶဝ်ယဵင်ႈၶႅၼ်းပွႆႇသဵင်ၶၢဝ်ႇၼမ်ၼႃႇဢေႃႈ။-
ၶဝ်ၸိူဝ်းဢၼ်လႆႈငိၼ်းၵႃႈမီးတင်းသဵင်ႈတင်းလူင်ဢၢမ်းၼႃႇထၢၼ်ႈပေႃးဢမ်ႇၸၢင်ႈတႅၵ်ႈၸၢင်ႈတိူင်းလႆႈလႄႈလၢတ်ႈဝႃႈ၊ “မၼ်းႁဵတ်းလွင်ႈတၢင်းၵႃႈမီးတင်းသဵင်ႈတင်းလူင်လီလီငၢမ်းငၢမ်းယဝ်ႉ။ မၼ်းယင်းႁဵတ်းႁႂ်ႈၵူၼ်းႁူၼူၵ်ႇလႆႈငိၼ်းယဝ်ႉ။ ၵူၼ်းဢႃႉၵေႃႈလၢတ်ႈၵႂၢမ်းလႆႈယဝ်ႉ၊” ဝႃႈၼင်ႇၼႆဢေႃႈ။
ဝၢႆးသေၼၼ်ႉဢမ်ႇႁိုင်ဢမ်ႇၼၢၼ်း၊ၵူၼ်းၼမ်ၼႃႇသမ်ႉဢွၼ်ၵၼ်ၸုတုမ်မႃးတီႈ ၸဝ်ႈယေႇသု၊ ထႅင်ႈလႄႈၼႂ်းမိူဝ်ႈဢၼ်ၵူၼ်းတင်းလၢႆဢမ်ႇမီးတၢင်းၵိၼ်သေဢိတ်းယဝ်ႉၼၼ်ႉၸိုင်၊မၼ်းၸဝ်ႈႁွင်ႉဢဝ်တပႄးၸဝ်ႈတင်းလၢႆမႃးလႄႈလၢတ်ႈဝႃႈ၊-
“ၵဝ်ဢဵတ်းလူၵူၼ်းဢၼ်ၸုဢၼ်တုမ်ၵၼ်ၸိူဝ်းၼႆႉဢေႃႈ။ ၶဝ်မီးယူႇလူၺ်ႈၵၼ်တင်းၵဝ်လႆႈသၢမ်ဝၼ်းတဵမ်တဵမ်ယဝ်ႉ။ တေႃႈလဵဝ်ၼႆႉဢမ်ႇမီးတၢင်းၵိၼ်ၵႃႈသင်သေဢိတ်းယဝ်ႉ။-
ပေႃးၵဝ်ယင်းဢမ်ႇလဵင်ႉလူၵႃႈသင်လႄႈပွႆႇၶဝ်မိူဝ်းၵႂႃႇၸိုင်၊ၵူဝ်ၶဝ်ႁိူဝ်ႉဢူၼ်ႈၵႂႃႇၸွမ်းတၢင်း၊ၵွပ်ႈပိူဝ်ႈၵမ်ႈၽွင်ႈလုၵ်ႉတီႈၶၢဝ်းတၢင်းဢၼ်ၵႆၼႃႇမႃးၼၼ်ႉဢေႃႈ၊” ဝႃႈၼင်ႇၼႆဢေႃႈ။
တပႄးၸဝ်ႈၸိူဝ်းၼၼ်ႉၶိုၼ်းလဝ်ႈလၢတ်ႈလႄႈဝႃႈ၊ “ၵႃႈတီႈထိူၼ်ႇလႅင်ႉၼႆႉ၊ၵေႃႉလႂ်တေၸၢင်ႈဢဝ်တၢင်းၵိၼ်ဢၼ်ပေႃးၵုမ်ႇလဵင်ႉလူၵူၼ်းဢၼ်ၼမ်ၼႃႇထၼ်ႇၼႆႉၵႃႈတီႈလႂ်မႃးလႆႈၶႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၸင်ႇထၢမ်လႄႈဝႃႈ၊ “သူမီးၶဝ်ႈမုၼ်းလၢႆႁူၺ်ႇ၊” ဝႃႈၼင်ႇၼႆဢေႃႈ။ ၶဝ်ၶိုၼ်းလဝ်ႈလၢတ်ႈဝႃႈ၊ “မီးၸဵတ်းႁူၺ်ႇၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉမၼ်းၸဝ်ႈသင်ႇလၢတ်ႈႁႂ်ႈၵူၼ်းတင်းလၢႆၼင်ႈၵႃႈၼိူဝ်လိၼ်ဢေႃႈ။ မၼ်းၸဝ်ႈဢဝ်ၶဝ်ႈမုၼ်းၸဵတ်းႁူၺ်ႇၼၼ်ႉယွင်ႈယေႃးၵျေးၸူးၸဝ်ႈယဝ်ႉၸင်ႇ၊ဝိတ်းပၼ်တီႈတပႄးၸဝ်ႈတင်းလၢႆႁႂ်ႈၶဝ်တမ်းပၼ်ၵူၼ်းၸိူဝ်းၼၼ်ႉဢေႃႈ။ တပႄးၸဝ်ႈၸိူဝ်းၼၼ်ႉၵေႃႈဢဝ်တမ်းပၼ်ဢေႃႈ။-
ၵႃႈတီႈၶဝ်မီးပႃဢွၼ်ႇဢိတ်းၼိုင်ႈၼၼ်ႉၵေႃႈ၊မၼ်းၸဝ်ႈဢဝ်လႄႈယွင်ႈယေႃးၵျေးၸူးၸဝ်ႈယဝ်ႉၸင်ႇ၊ႁႂ်ႈတပႄးၸဝ်ႈၸိူဝ်းၼၼ်ႉဢဝ်တမ်းပၼ်ၵူၼ်းတင်းလၢႆဢေႃႈ။-
ၶဝ်ဢွၼ်ၵၼ်ၵိၼ်ဢိမ်ႇယဝ်ႉလႄႈၵဵပ်းသိမ်းဢဝ်ဢၼ်ၵိုတ်းဢၼ်ယွႆႈဢၼ်ယႅမ်းလႆႈၸဵတ်းပဵတ်ႈတဵမ်တဵမ်ဢေႃႈ။-
ၵူၼ်းၸိူဝ်းဢၼ်ၵိၼ်ၼၼ်ႉမီးသီႇႁဵင်ၸမ်ၸမ်ဢေႃႈ။-
မၼ်းၸဝ်ႈပွႆႇၵူၼ်းတင်းလၢႆၸိူဝ်းၼၼ်ႉၵႂႃႇယဝ်ႉၸင်ႇ၊ၶဝ်ႈၵႃႈၼႂ်းႁိူဝ်းၵမ်းလဵဝ်လူၺ်ႈၵၼ်တင်းတပႄးၸဝ်ႈတင်းလၢႆသေလႄႈၵႂႃႇၵႃႈတီႈဝၢၼ်ႈၼွၵ်ႈၼႃးပၢင်ႇၼႂ်းမိူင်း တႃႇလမႃႉၼုထႃႉ၊ ပုၼ်ႉသေဢေႃႈ။
မိူဝ်ႈၼၼ်ႉ၊ၵူၼ်းၵိူင်း ၽႃႇရိသႄး၊ ၶဝ်မႃးတီႈ ၸဝ်ႈယေႇသု၊ သေလႄႈထဵင်ၵၼ်တင်းမၼ်းၸဝ်ႈဢေႃႈ။ ႁႂ်ႈလႆႈၸၢမ်းတူၺ်းယႃႉယုၵ်ႉမၼ်းၸဝ်ႈၸိုင်၊ၶဝ်ယွၼ်းႁႂ်ႈမၼ်းၸဝ်ႈပျႃးၼႄတၼ်းၶူဝ်းၵၢင်ႁၢဝ်ဢၼ်လၢၵ်ႇဢၼ်လၢႆးဢၼ်တၵ်းပဵၼ်သၢၵ်ႈသေႇပုၼ်ႈမၼ်းၸဝ်ႈၼၼ်ႉဢေႃႈ။-
ၵူၺ်းၵႃႈ၊မၼ်းၸဝ်ႈထူၺ်ႈၸႂ်လူင်ၼႂ်းႁူဝ်ၸႂ်ၼႃႇလူင်လၢင်သေလႄႈလၢတ်ႈဝႃႈ၊ “ႁဵတ်းသင်လႄႈၸိူဝ်ႉၵူၼ်းမဵဝ်းၼႆႉယွၼ်းၼိမိၵ်ႈတၼ်းၶူဝ်းဢၼ်လၢၵ်ႇဢၼ်လၢႆးၸိူဝ်ႉၼင်ႇႁိုဝ်။ ၵဝ်ဝႃႈတီႈၸိုဝ်ႈတီႈၸႂ်ႈမၼ်းၸမ်ႉ၊ၼိမိၵ်ႈတၼ်းၶူဝ်းဢၼ်လၢၵ်ႇဢၼ်လၢႆးဢမ်ႇလႆႈႁဵတ်းၼႄတီႈၸိူဝ်ႉၵူၼ်းမဵဝ်းၼႆႉ၊” ဝႃႈၼင်ႇၼႆသေယဝ်ႉ။
ဢွၵ်ႇသေၵႃႈတီႈၶဝ်မီးၼၼ်ႉၵႂႃႇလႄႈၶဝ်ႈႁိုဝ်းယဝ်ႉၸင်ႇၶိုၼ်းမိူဝ်းၵႂႃႇၽၢႆႇပုၼ်ႉၼွင်သေဢေႃႈ။
တပႄးၸဝ်ႈၸိူဝ်းၼၼ်ႉ၊လိုမ်းပႃးဢဝ်ၶဝ်ႈမုၼ်းမႃးလႄႈၵႃႈၼႂ်းႁိူဝ်းၼၼ်ႉမီးၶဝ်ႈမုၼ်းႁူၺ်ႇလဵဝ်ၵူၺ်းယဝ်ႉဢေႃႈ။-
မိူဝ်ႈၼၼ်ႉ၊ ၸဝ်ႈယေႇသု၊ ပၼ်သတိတီႈၶဝ်လႄႈဝႃႈ၊ “ဝႆႉသတိဝႄႈပႅတ်ႈၸိူဝ်ႉပႅင်ႈၵူၼ်းၵိူင်း ၽႃႇရိသႄး၊ ၶဝ်တင်းၸိူဝ်ႉပႅင်ႈၸဝ်ႈၽႃႉ ႁေႇရူတ်ႈ၊ ၼၼ်ႉတႃႉ၊” ဝႃႈၼင်ႇၼႆဢေႃႈ။
ၶဝ်ၵေႃႈ၊ၵေႃႉၼိုင်ႈလႄႈၵေႃႉၼိုင်ႈတွင်ႈထၢမ်ၵၼ်လႄႈဝႃႈ၊ “ၶဝ်ႈမုၼ်းႁဝ်းမူတ်းယဝ်ႉလႄႈမၼ်းၸဝ်ႈၸင်ႇဝႃႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ႁုလႄႈလၢတ်ႈတီႈၶဝ်လႄႈဝႃႈ၊ “သူလၢတ်ႈၸႃတီႈၵၼ်လူၺ်ႈလွင်ႈၶဝ်ႈမုၼ်းမူတ်းယဝ်ႉၼၼ်ႉႁဵတ်းသင်။ တေႃႇထိုင်ႁွတ်ႈမိူဝ်ႈလဵဝ်သူယင်းဢမ်ႇပႆႇၶဝ်ႈၸႂ်လႄႈႁုလူးၵွၼ်ႇႁိုဝ်း။ ႁူဝ်ၸႂ်သူယင်းတိုမ်ယူႇထၼ်ႇၼႆႉႁိုဝ်း။-
မီးတႃၵေႃႈဢမ်ႇႁၼ်၊မီးႁူၵေႃႈဢမ်ႇငိၼ်းႁိုဝ်း။ ယင်းဢမ်ႇၶႆႈၸႂ်ထူပ်း၊-
မိူဝ်ႈဢၼ်ၵဝ်ဝိတ်းၶဝ်ႈမုၼ်းႁႃႈႁူၺ်ႇမႅင်ႇပၼ်ၵူၼ်းႁႃႈႁဵင်ၵိၼ်ၼၼ်ႉလူးၵွၼ်ႇႁိုဝ်း။ သူလႆႈၵဵပ်းသိမ်းဢဝ်ဢၼ်ၵိုတ်းဢၼ်လိူဝ်လႆႈလၢႆပဵတ်ႈယဝ်ႉ၊” ဝႃႈၼင်ႇၼႆဢေႃႈ။ ၶဝ်ၶိုၼ်းလဝ်ႈလၢတ်ႈလႄႈဝႃႈ၊ “သိပ်းသွင်ပဵတ်ႈၶႃႈဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈသမ်ႉထၢမ်ထႅင်ႈလႄႈဝႃႈ၊ “မိူဝ်ႈဢၼ်ၵဝ်ဝိတ်းၶဝ်ႈမုၼ်းၸဵတ်းႁူၺ်ႇမႅင်ႇပၼ်ၵူၼ်းသီႇႁဵင်ၵိၼ်ၼၼ်ႉ၊သူလႆႈၵဵပ်းသိမ်းဢဝ်ဢၼ်ၵိုတ်းဢၼ်လိူဝ်လႆႈလၢႆပဵတ်ႈ၊” ဝႃႈၼင်ႇၼႆဢေႃႈ။ ၶဝ်ၶိုၼ်းလဝ်ႈလၢတ်ႈဝႃႈ၊ “ၵဵပ်းလႆႈၸဵတ်းပဵတ်ႈၶႃႈဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊ “ပေႃးပဵၼ်ၸိူဝ်ႉၼင်ႇၼႆၸိုင်၊သူယင်းတိုၵ်ႉဢမ်ႇပႆႇပွင်ႇပႆႇလႅင်းလူးၵွၼ်ႇႁိုဝ်း၊” ဝႃႈၼင်ႇၼႆဢေႃႈ။
ၶဝ်ႁွတ်ႈထိုင်ဝၢၼ်ႈ ပႅတ်ႉၸေးတႃႉ၊ ပုၼ်ႉသေယဝ်ႉ၊ပိူၼ်ႈဢဝ်ၵူၼ်းတႃမွတ်ႇၵေႃႉၼိုင်ႈမႃးၸူးတီႈ ၸဝ်ႈယေႇသု၊ လႄႈတွင်းပၢၼ်ႇႁႂ်ႈမၼ်းၸဝ်ႈတိူဝ်ႉထုၵ်ႇၵေႃႉၼၼ်ႉဢေႃႈ။-
မၼ်းၸဝ်ႈၵေႃႈ၊ၸုင်ဢဝ်မိုဝ်းၵေႃႉၼၼ်ႉဢွၵ်ႇဝၢၼ်ႈၵႂႃႇလႄႈထူမ်ႇၼမ်ႉလၢႆးသႂ်ႇတီႈမၢၵ်ႇတႃမၼ်းလႄႈဢဝ်မိုဝ်းမၼ်းၸဝ်ႈတၢင်ႇၵႃႈၼိူဝ်မၼ်းယဝ်ႉၸင်ႇထၢမ်မၼ်းလႄႈဝႃႈ၊ “မႂ်းႁၼ်သေၸိူဝ်ႉသေပိူင်ႁိုဝ်း၊” ဝႃႈၼင်ႇၼႆဢေႃႈ။
ၵေႃႉၼၼ်ႉမုင်ႈတူၺ်းသေလႄႈလဝ်ႈလၢတ်ႈဝႃႈ၊ “ၵဝ်ၶႃႈႁၼ်ၵူၼ်းတင်းလၢႆတီႈၶႃႈဢေႃႈ။ ၵဝ်ၶႃႈႁၼ်ၵူၼ်းၸိူဝ်းၼၼ်ႉ၊ပဵၼ်မိူၼ်ၸိူဝ်ႉၼင်ႇတူၼ်ႈမႆႉလႄႈပႆယူႇၼၼ်ႉဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈသမ်ႉဢဝ်မိုဝ်းမၼ်းၸဝ်ႈတၢင်ႇၵႃႈၼိူဝ်မၢၵ်ႇတႃၵေႃႉၼၼ်ႉထႅင်ႈလႄႈ၊ၵမ်းၼၼ်ႉ မၼ်းလႆႈႁၼ်ၸႅင်ႈၸႅင်ႈလႅင်းလႅင်းလႄႈပဵၼ်ၸိူဝ်ႉၼင်ႇပၵ်းၵဝ်ႇပိူင်ၵဝ်ႇသေယဝ်ႉ၊လႆႈႁၼ်တင်းသဵင်ႈတင်းလူင်လီလီငၢမ်းငၢမ်းဢေႃႈ။-
ဝၢႆးၼၼ်ႉ၊မၼ်းၸဝ်ႈပွႆႇႁႂ်ႈမၼ်းၶိုၼ်းမိူဝ်းႁိူၼ်းမၼ်းသေလႄႈသင်ႇလၢတ်ႈလႄႈဝႃႈ၊ “ယႃႇပေၶဝ်ႈၵႃႈၼႂ်းဝၢၼ်ႈၼၼ်ႉ၊” ဝႃႈၼင်ႇၼႆဢေႃႈ။
ဝၢႆးၼၼ်ႉ၊ ၸဝ်ႈယေႇသု၊ ဢိၵ်ႇတင်းတပႄးၸဝ်ႈတင်းလၢႆ၊ၵႂႃႇၵႃႈတီႈဝၢၼ်ႈၼွၵ်ႈၼႃးပၢင်ႇႁိမ်းဝဵင်း ၵေႇသရိၽိလိပ်ႉပိ၊ ပုၼ်ႉဢေႃႈ။ ၵႃႈတီႈၵၢင်တၢင်းၼၼ်ႉမၼ်းၸဝ်ႈထၢမ်ၶဝ်လႄႈဝႃႈ၊ “ၵူၼ်းတင်းလၢႆဝႃႈ၊ၵဝ်ပဵၼ်ၽူႈလႂ်။ လၢတ်ႈၼႄၵဝ်လူး၊” ဝႃႈၼင်ႇၼႆဢေႃႈ။
ၶဝ်ဢွၼ်ၵၼ်ၶိုၼ်းလဝ်ႈလၢတ်ႈလႄႈဝႃႈ၊ “ၵူၼ်းၵမ်ႈၽွင်ႈဝႃႈ၊ၸဝ်ႈႁဝ်းပဵၼ်သြႃႇ ယူဝ်းႁၢၼ်ႇ၊ ၵေႃႉဢၼ်ပၼ်မၢင်ႇၵလႃႇပပ်ႉတိၸမ်ႇ ၼၼ်ႉဝႃႈၼႆၶႃႈဢေႃႈ။ ၵမ်ႈၽွင်ႈၵေႃႈဝႃႈ၊ၸဝ်ႈႁဝ်းပဵၼ်သြႃႇ ဢေးလိယႃႉ၊ ၵမ်ႈၽွင်ႈသမ်ႉဝႃႈ၊ပဵၼ်ပရေႃးၽႅတ်ႈ သေပႃးပႃးဢေႃႈ၊ဝႃႈၼင်ႇၼႆၶႃႈဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈသမ်ႉထၢမ်ထႅင်ႈလႄႈဝႃႈ၊ “သူၸိူဝ်းၼႆႉၸမ်ႉ၊ဝႃႈၵဝ်ပဵၼ်ၽူႈလႂ်၊” မိူဝ်ႈဢၼ်ဝႃႈၼင်ႇၼႆၸိုင်။ ပေႇတရု၊ လဝ်ႈလၢတ်ႈလႄႈဝႃႈ၊ “ၸဝ်ႈႁဝ်းပဵၼ် ၸဝ်ႈၶရိၸ်ႈ၊ ၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ၸဝ်ႈယေႇသု၊ ပိင်းၺၢပ်ႈတီႈၶဝ်လႄႈဝႃႈ၊ “သူယႃႇပေလၢတ်ႈၼႄလွင်ႈၵဝ်ၵႃႈတီႈၽူႈလႂ်သေၵေႃႉသေၵူၼ်း၊” ဝႃႈၼင်ႇၼႆဢေႃႈ။
ၵမ်းၼၼ်ႉ၊မၼ်းၸဝ်ႈတႄႇၸႃႉသင်ႇသွၼ်ပၼ်တီႈတပႄးၸဝ်ႈတင်းလၢႆလႄႈဝႃႈ၊ “ လုၵ်ႈၵူၼ်း၊ တၵ်းလႆႈၶၢမ်ႇဝူၺ်ႇတၼႃႇၼမ်ၼႃႇလႄႈတၵ်းလႆႈၶၢမ်ႇပႄႇပႅတ်ႈသေၵႃႈၼႂ်းၵူၼ်းဢၼ်ပဵၼ်ၵႄႇပဵၼ်ႁူဝ်လႂ်၊ယဵၸ်ႈပရေႃးႁဵၵ်ႈ လူင်လႂ်၊တင်းသြႃႇမေႃၵျၢမ်းထမ်ႇမႃႉလႂ်ဢေႃႈ။ မၼ်းၸဝ်ႈတၵ်းလႆႈၶၢမ်ႇတၢင်းဢၼ်ဢဝ်တၢႆဢေႃႈ။ ၵူၺ်းၵႃႈ၊ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉတၵ်းလုၵ်ႉၶိုၼ်းလိပ်းဢေႃႈ၊” ဝႃႈၼင်ႇၼႆဢေႃႈ။-
မၼ်းၸဝ်ႈလၢတ်ႈၵႂၢမ်းၼၼ်ႉလႅင်းလႅင်းဢေႃႈ။ ပိူဝ်ႈၼႆလႄႈ ပေႇတရု၊ ႁွင်ႉဢဝ်မၼ်းၸဝ်ႈၵႂႃႇႁူမ်ႈၵၼ်တင်းမၼ်းလႄႈလၢတ်ႈၵႂၢမ်းတၢင်ႇဢပျတ်ႈတီႈမၼ်းၸဝ်ႈဢေႃႈ။-
ၵူၺ်းၵႃႈ၊မၼ်းၸဝ်ႈဝၢႆႇတူၺ်းတပႄးၸဝ်ႈတင်းလၢႆသေယဝ်ႉ၊တၢင်ႇဢပျတ်ႈတီႈ ပေႇတရု၊ လႄႈဝႃႈ၊ “ မႃႇၼၢတ်ႈ၊ ႟။ ဢွၵ်ႇသေၵႃႈတီႈၵဝ်ၵႂႃႇတႃႉ။ တၢင်းၵျၢမ်ႇတၢင်းပွင်မႂ်းၼႆႉ၊လုၵ်ႉတီႈၽြႃးပဵၼ်ၸဝ်ႈပဵၼ်မႃးဢမ်ႇၸႂ်ႈ။ ပဵၼ်မႃးၵႃႈတီႈၵူၼ်းၵူၺ်းဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ၸဝ်ႈယေႇသု၊ ႁွင်ႉဢဝ်ၵူၼ်းတင်းလၢႆ၊တင်းတပႄးၸဝ်ႈတင်းလၢႆမႃးလႄႈလၢတ်ႈတီႈၶဝ်လႄႈဝႃႈ၊ “ၽူႈလႂ်သေဢမ်ႇဝႃႈ၊ၵေႃႉဢၼ်ၶႂ်ႈၸပ်းၸွမ်းပႃႈလင်ၵဝ်ၼၼ်ႉ၊ႁႂ်ႈၵေႃႉၼၼ်ႉပႄႇပႅတ်ႈတူဝ်ၸဝ်ႈၵဝ်ႇသေယဝ်ႉ၊မႅၵ်ႇသဝ်မႆႉဝႃးမိုဝ်းတူဝ်ၸဝ်ႈၵဝ်ႇလႄႈၸွမ်းပႃႈလင်ၵဝ်တႃႉ။-
ၵွပ်ႈပိူဝ်ႈလွင်ႈၼင်ႇႁိုဝ်လႄႈဝႃႈၼႆ၊ၽူႈလႂ်သေဢမ်ႇဝႃႈ၊ၵေႃႉဢၼ်ၶႂ်ႈၵႄႇသႄႇဢဝ်တူဝ်ၸဝ်ႈၵဝ်ႇၼၼ်ႉတၵ်းသုမ်းဢသၢၵ်ႈဢေႃႈ။ ၽူႈလႂ်သေဢမ်ႇဝႃႈ၊ၵေႃႉဢၼ်သုမ်းဢသၢၵ်ႈပုၼ်ႈၵဝ်၊ဢိၵ်ႇတင်းပုၼ်ႈၶၢဝ်ႇတြႃးသိူဝ်းပျေႃႇၼၼ်ႉ၊ၵေႃႉၼၼ်ႉတၵ်းၵႄႇသႄႇဢသၢၵ်ႈတူဝ်ၸဝ်ႈၵဝ်ႇဢေႃႈ။-
ပေႃးသေၵေႃႉသေၵူၼ်းလႆႈဢုပ်ႉပိူင်ႇလေႃးၵႃႉၼႆႉ၊တင်းသဵင်ႈတင်းလူင်လႄႈဝိၺိၺ်ႇတူဝ်ၸဝ်ႈၵဝ်ႇသုမ်းၸိုင်၊တၵ်းမီးဢၵျူဝ်းၵျေးၸူးၵႃႈသင်။-
ၵေႃႉၼၼ်ႉတေၸၢင်ႈဢဝ်ၶိူင်ႈပိူင်ၵႃႈသင်သေလႄႈလႅၵ်ႈဢဝ်ဝိၺိၺ်ႇတူဝ်ၸဝ်ႈၵဝ်ႇၶိုၼ်းမႃးလႆႈ။-
ၽူႈလႂ်သေဢမ်ႇဝႃႈ၊ၵေႃႉဢၼ်ဢူၵ်းဢၢႆၵွပ်ႈပိူဝ်ႈၵဝ်၊ဢိၵ်ႇတင်းၵႂၢမ်းၵဝ်ၵႃႈၼႂ်းၵၢပ်ႈပၢၼ်ၵူၼ်းမဵဝ်းဢၼ်ဢမ်ႇမီးသိၼ်ထမ်းလႄႈႁၢႆႉမိူၵ်ႈၼႆႉ၊ၵေႃႉၼၼ်ႉၸိုင်၊ ၸဝ်ႈလုၵ်ႈၵူၼ်း၊ ၵေႃႈတၵ်းဢူၵ်းဢၢႆၵွပ်ႈပိူဝ်ႈၵေႃႉၼၼ်ႉၼႂ်းမိူဝ်ႈဢၼ်မၼ်းၸဝ်ႈပႃးတင်းမုၼ်ၽုင်းဢႃႇၼုၽေႃႇပေႃႈၸဝ်ႈဢိၵ်ႇတင်းတမၢၼ်ႇၵၢင်ႁၢဝ်ဢၼ်မူတ်းၸၢင်ႇတင်းလၢႆလႄႈၵျွမႃးၼၼ်ႉဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈသိုပ်ႇလၢတ်ႈထႅင်ႈလႄႈဝႃႈ၊ “ၵဝ်ဝႃႈတီႈၸိုဝ်ႈၸႂ်ႈမၼ်းတီႈသူၸမ်ႉ၊ၵူၼ်းၵမ်ႈၽွင်ႈဢၼ်ၸုၵ်းယူႇၵႃႈတီႈၼႆႈၼႆႉ၊ၸူဝ်ႈဢၼ်ၶဝ်ဢမ်ႇပႆႇလႆႈႁၼ်မိူင်းၽြႃးပဵၼ်ၸဝ်ႈဢၼ်မႃးလူၺ်ႈတၼ်းၶူဝ်းဢႃႇၼုၽေႃႇၼၼ်ႉၸိုင်၊ၶဝ်တၵ်းဢမ်ႇပႆႇလႆႈတၢႆ၊” ဝႃႈၼင်ႇၼႆဢေႃႈ။
ဝၢႆးသေၼၼ်ႉ၊ႁူၵ်းဝၼ်းယဝ်ႉၸင်ႇ ၸဝ်ႈယေႇသု၊ ႁွင်ႉဢဝ် ပေႇတရု၊ယႃႇၵုပ်ႈ၊ ဢိၵ်ႇတင်း ယူဝ်းႁၢၼ်ႇ၊ လႄႈဢွၼ်ၶဝ်ၶိုၼ်ႈလွႆဢၼ်သုင်လႄႈၵႂႃႇမီးယူႇၵူၺ်းၶေႃၶဝ်ဢေႃႈ။ ၵႃႈတီႈၽၢႆႇၼႃႈၶဝ်ၼၼ်ႉ၊မီးႁၢင်ႈၽၢင်ဢၼ်လၢၵ်ႇလၢႆးမႃးလႄႈ၊-
သိူဝ်ႈၶူဝ်းမၼ်းၸဝ်ႈၵေႃႈ၊ႁိူဝ်ႈႁိူင်းၽိူၵ်ႇၶၢဝ်ၼႃႇတေႃႇထိုင်ႁွတ်ႈၵူၼ်းသၵ်ႉၶူဝ်းၵႃႈၼိူဝ်လိၼ်မိူင်းၼႆႉသေၵေႃႉသေၵူၼ်းထၢၼ်ႈပေႃးဢမ်ႇၸၢင်ႈသၵ်ႉႁႂ်ႈၽိူၵ်ႇၶၢဝ်လႆႈမိူၼ်ၸိူဝ်ႉၼင်ႇၼၼ်ၼၼ်ႉဢေႃႈ။-
မိူဝ်ႈၼၼ်ႉ၊တပႄးၸဝ်ႈသၢမ်ၵေႃႉၼၼ်ႉလႆႈႁၼ် ဢေးလိယႃႉ၊ ဢိၵ်ႇတင်း မူဝ်းသေႇ၊ ပေႃႇမႃးလၢတ်ႈၵႂၢမ်းတေႃႇၵၼ်တင်း ၸဝ်ႈယေႇသု၊ ယူႇဢေႃႈ။-
ပေႇတရု၊ လဝ်ႈလၢတ်ႈတီႈမၼ်းၸဝ်ႈလႄႈဝႃႈ၊ “ၸဝ်ႈႁဝ်း။ ဢၼ်ႁဝ်းၶႃႈလႆႈမီးယူႇၵႃႈတီႈၼႆႈၸိုင်၊ပဵၼ်ဢၼ်လီၼႃႇဢေႃႈ။ ႁႂ်ႈႁဝ်းၶႃႈလႆႈႁဵတ်းသုမ်ႉသၢမ်လင်၊လင်ၼိုင်ႈပုၼ်ႈၸဝ်ႈႁဝ်း၊လင်ၼိုင်ႈပုၼ်ႈ မူဝ်းသေႇ၊ ဢိၵ်ႇတင်းပုၼ်ႈ ဢေးလိယႃႉ၊ လင်ၼိုင်ႈသေၵမ်းတီႈၶႃႈ၊” ဝႃႈၼင်ႇၼႆဢေႃႈ။-
ပိူဝ်ႈဢၼ်မၼ်းၵူဝ်ၼႃႇၵႂင်ၵႂႃႇလႄႈမၼ်းၸင်ႇလဝ်ႈလၢတ်ႈၸိူဝ်ႉၼင်ႇၼၼ်ဢေႃႈ။
မိူဝ်ႈၼၼ်ႉ၊မွၵ်ႇၵုမ်ႈမုင်းႁူမ်ႇမႃးၵႃႈၼိူဝ်ၶဝ်လႄႈသဵင်ပဵၼ်မႃးၵႃႈၼႂ်းမွၵ်ႇၵုမ်ႈၼၼ်ႉလႄႈဝႃႈ၊ “ၵေႃႉၼႆႉပဵၼ်လုၵ်ႈၵဝ်ဢၼ်ၵဝ်ႁၵ်ႉၼႃႇဢေႃႈ။ ထွမ်ႇဢဝ်ၵႂၢမ်းမၼ်းတႃႉ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉၵမ်းလဵဝ်၊ၶဝ်ဝၢႆႇတူၺ်းၽၢႆႇတၢင်းလႂ်သေၵေႃႈဢမ်ႇႁၼ်ၽူႈလႂ်။ ၸဝ်ႈယေႇသု၊ ပႃးလဵဝ်ၵူၺ်းမီးယူႇႁိမ်းၶဝ်ဢေႃႈ။
ၼႂ်းမိူဝ်ႈဢၼ်ၶဝ်ယင်းတိုၵ်ႉလူင်းလွႆမႃးယူႇၼၼ်ႉ၊မၼ်းၸဝ်ႈပိင်းၺၢပ်ႈတီႈၶဝ်လႄႈဝႃႈ၊ “လွင်ႈတၢင်းဢၼ်သူလႆႈႁၼ်ၼႆႉၸိုင်၊ၸူဝ်ႈဢၼ် ၸဝ်ႈလုၵ်ႈၵူၼ်း၊ ဢမ်ႇပႆႇလုၵ်ႉၵႃႈတၢင်းတၢႆၶိုၼ်းလိပ်းၼၼ်ႉ၊ယႃႇပေမွၵ်ႇလၢတ်ႈတီႈၽူႈလႂ်သေၵေႃႉသေၵူၼ်း၊” ဝႃႈၼင်ႇၼႆဢေႃႈ။
ၶဝ်ႁပ်ႉထွမ်ႇဢဝ်ၵႂၢမ်းပိင်းၺၢပ်ႈမၼ်းၸဝ်ႈၼၼ်ႉဢေႃႈ။ ၵူၺ်းၵႃႈ၊ၶဝ်ၼင်ႇၵၼ်ၵၼ်လၢတ်ႈၸႃၵၼ်လႄႈဝႃႈ၊ “တၢင်းဢၼ်လုၵ်ႉၵႃႈတၢင်းတၢႆၶိုၼ်းလိပ်းၼၼ်ႉ၊ၶႂ်ႈဝႃႈၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။-
ၶဝ်ၸင်ႇလဝ်ႈထၢမ်တီႈမၼ်းၸဝ်ႈလႄႈဝႃႈ၊ “ႁဵတ်းသင်လႄႈသြႃႇမေႃၵျၢမ်းထမ်ႇမႃႉတင်းလၢႆဝႃႈ၊ ‘ ဢေးလိယႃႉ၊ တၵ်းမႃးဢွၼ်တၢင်း၊’ ဝႃႈၼင်ႇၼႆၸိူဝ်ႉၼင်ႇႁိုဝ်ၶႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၶိုၼ်းလၢတ်ႈလႄႈဝႃႈ၊ “ ဢေးလိယႃႉ၊ တၵ်းမႃးဢွၼ်တၢင်းလႄႈမႄးႁႅၼ်းၵႃႈမီးတင်းသဵင်ႈတင်းလူင်ဝႆႉထႃႈယဝ်ႉ။ ၼႂ်းဝႃႈၼၼ်သေၵေႃႈ၊ၵႃႈၼႂ်းၵျၢမ်းလိၵ်ႈတႅမ်ႈဝႆႉလႄႈဝႃႈ၊ ၸဝ်ႈလုၵ်ႈၵူၼ်း၊ တၵ်းလႆႈၶၢမ်ႇဝူၺ်ႇတၼႃႇ၊ဢိၵ်ႇတင်းတၢင်းဢၼ်ပိူၼ်ႈသႄႉသွမ်းပႄႇပႅတ်ႈဢေႃႈ၊ဢၼ်ဝႃႈၼၼ်ႉၶႂ်ႈဝႃႈၵႃႈသင်ဝႃႈၼင်ႇၼႆၸမ်ႉ၊-
ၵဝ်ဝႃႈတီႈၸိုဝ်ႈၸႂ်ႈမၼ်းတီႈသူၸမ်ႉ၊ ဢေးလိယႃႉ၊ ႁွတ်ႈမႃးယဝ်ႉ။ ၵူၼ်းတင်းလၢႆႁဵတ်းတီႈမၼ်းၵႃႈဢၼ်ၶဝ်ၶႂ်ႈႁဵတ်းၼၼ်ႉ၊မႅၼ်ႈၸွမ်းၼင်ႇၵႃႈၼႂ်းၵျၢမ်းလိၵ်ႈတႅမ်ႈဝႆႉလွင်ႈမၼ်းၼၼ်ႉယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၶဝ်ႁူပ်ႉထူပ်းၵၼ်တင်းတပႄးၸဝ်ႈဢၼ်ၵိုတ်းယူႇၸိူဝ်းၼၼ်ႉၸိုင်၊ၶဝ်လႆႈႁၼ်ၵူၼ်းၼမ်ၼႃႇလွမ်ႉႁွပ်ႈတမၢၼ်ႇၸဝ်ႈၸိူဝ်းၼၼ်ႉယူႇသေလႄႈသြႃႇမေႃၵျၢမ်းထမ်ႇမႃႉၶဝ်ထဵင်ၵၼ်တင်းၶဝ်ယူႇၼၼ်ႉဢေႃႈ။-
ၵူၼ်းဢၼ်ၸုဢၼ်တုမ်ၵၼ်ၸိူဝ်းၼၼ်ႉ၊မိူဝ်ႈဢၼ်ႁၼ်မၼ်းၸဝ်ႈၸိုင်၊ဢၢမ်းၼႃႇလူင်လၢင်လႄႈလႅၼ်ႈမႃးၸူးတီႈမၼ်းၸဝ်ႈသေလႄႈတၵ်ႉလၢတ်ႈဢေႃႈ။-
မၼ်းၸဝ်ႈၵေႃႈထၢမ်တမၢၼ်ႇၸဝ်ႈၸိူဝ်းၼၼ်ႉလႄႈဝႃႈ၊ “သူထဵင်ၵၼ်တင်းၶဝ်လွင်ႈၵႃႈသင်၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၵူၼ်းၵေႃႉၼိုင်ႈဢၼ်မီးၵႃႈၼႂ်းမူႇၵူၼ်းၼၼ်ႉလဝ်ႈလၢတ်ႈလႄႈဝႃႈ၊ “သြႃႇၸဝ်ႈ။ ၵဝ်ၶႃႈဢဝ်လုၵ်ႈၸၢႆးၵဝ်ၶႃႈဢၼ်ၽီဢႃႉၶဝ်ႈၼၼ်ႉ၊မႃးၸူးတီႈၸဝ်ႈႁဝ်းတီႈၶႃႈဢေႃႈ။-
ၽီၼၼ်ႉၶဝ်ႈၵႃႈၼႂ်းမၼ်းတီႈလႂ်တၼ်းလႂ်သေဢမ်ႇဝႃႈ၊မိူဝ်ႈဢၼ်တဵၵ်းႁႂ်ႈမၼ်းလူမ်ႉၵႃႈၼိူဝ်လိၼ်ၼၼ်ႉ၊ပူၵ်ႇၼမ်ႉလၢႆးဢွၵ်ႇၵႃႈၼႂ်းသူပ်းမၼ်းယူႇ၊ၵတ်းၶဵဝ်ႈၵတ်းၽၼ်းယူႇသေလႄႈတူဝ်ၶႅင်ၵႂႃႇဢေႃႈ။ ၵဝ်ၶႃႈယွၼ်းႁႂ်ႈတပႄးၸဝ်ႈႁဝ်းၸိူဝ်းၼၼ်ႉ၊ႁေႃႈၽီၼၼ်ႉဢွၵ်ႇပႅတ်ႈသေၵေႃႈၶဝ်ဢမ်ႇပႄႉလႆႈၶႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၵေႃႈလၢတ်ႈတီႈၶဝ်လႄႈဝႃႈ၊ “ၵူၼ်းမဵဝ်းဢၼ်တၢင်းယုမ်ႇမၢတ်ႈၵေႇၼႆႉ႟။ ၵဝ်တၵ်းယူႇလူၺ်ႈၵၼ်တင်းသူႁိုင်ထၼ်ႇႁိုဝ်။ ၵဝ်တၵ်းလႆႈယိူၼ်ႉသူႁိုင်ထၼ်ႇႁိုဝ်။ ဢဝ်လုၵ်ႈဢွၼ်ႇၼၼ်ႉမႃးတီႈၵဝ်တႃႉ၊” ဝႃႈၼင်ႇၼႆလႄႈ၊-
ၶဝ်ဢဝ်လုၵ်ႈဢွၼ်ႇၼၼ်ႉမႃးတီႈမၼ်းၸဝ်ႈဢေႃႈ။ ၽီၼၼ်ႉ၊မိူဝ်ႈဢၼ်ႁၼ် ၸဝ်ႈယေႇသု၊ ၸိုင်၊ႁႂ်ႈလုၵ်ႈဢွၼ်ႇၼၼ်ႉတူဝ်ၶႅင်ၵႂႃႇၵမ်းလဵဝ်လႄႈလုၵ်ႈဢွၼ်ႇၼၼ်ႉလူမ်ႉၵႃႈၼိူဝ်လိၼ်ၵႂႃႇၵိင်ႈၵႂႃႇၵိင်ႈမႃးယူႇလႄႈပူၵ်ႇၼမ်ႉလၢႆးဢွၵ်ႇသူပ်းမၼ်းယူႇဢေႃႈ။-
မၼ်းၸဝ်ႈၸင်ႇထၢမ်တီႈပေႃႈလုၵ်ႈဢွၼ်ႇၼၼ်ႉလႄႈဝႃႈ၊ “လုၵ်ႈဢွၼ်ႇၼႆႉပဵၼ်ၸိူဝ်ႉၼင်ၼႆႁိုင်ၵႃႈႁိုဝ်ယဝ်ႉ၊” ဝႃႈၼင်ႇၼႆဢေႃႈ။ ပေႃႈမၼ်းၶိုၼ်းလဝ်ႈလၢတ်ႈလႄႈဝႃႈ၊ “ပဵၼ်မႃးၸဵမ်မိူဝ်ႈမၼ်းလဵၵ်ႉဢေႃႈ။-
ၼင်ႇႁိုဝ်တၵ်းႁႂ်ႈလုၵ်ႈဢွၼ်ႇၼႆႉႁွတ်ႈထိုင်တၢင်းတၢႆၸိုင်၊ၽီႁၢႆႉၼႆႉႁႂ်ႈမၼ်းလူမ်ႉတူၵ်းၼႂ်းၽႆးလႂ်၊ၵႃႈၼႂ်းၼမ်ႉလႂ်၊ဢမ်ႇႁုလၢႆပွၵ်ႈယဝ်ႉၶႃႈဢေႃႈ။ ၼႂ်းဝႃႈၼၼ်သေၵေႃႈ၊ပေႃးၸဝ်ႈႁဝ်းတၢတ်ႈၼိူင်ႇလႆႈသေဢိတ်းသေဢီႈၸိုင်၊ဢဵတ်းလူႁဝ်းၶႃႈလႄႈၸွႆႈထႅမ်သေၵမ်းၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “မႂ်းယင်းဝႃႈပေႃးတၢတ်ႈၼိူင်ႇလႆႈ၊ဝႃႈၸိူဝ်ႉၼႆၵွၼ်ႇႁိုဝ်း။ တီႈၵေႃႉဢၼ်ယုမ်ႇမၢတ်ႈၼၼ်ႉ၊တၢတ်ႈၼိူင်ႇလႆႈၵူႈၸိူဝ်ႉၵူႈပိူင်ဢေႃႈ၊” ဝႃႈၼင်ႇၼႆဢေႃႈ။
ပေႃႈမၼ်းၼၼ်ႉ၊ႁွင်ႉတင်းသဵင်လင်လႄႈလၢတ်ႈၵမ်းလဵဝ်ဝႃႈ၊ “ၵဝ်ၶႃႈယုမ်ႇမၢတ်ႈၶႃႈဢေႃႈ။ ၸွႆႈထႅမ်ပၼ်တီႈတၢင်းဢၼ်ၵဝ်ၶႃႈဢမ်ႇယုမ်ႇမၢတ်ႈၼႆႉသေၵမ်းၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ႁၼ်ၵူၼ်းဢၼ်ယဵင်ႈၶႅၼ်းၼမ်ၼႃႇ၊လႅၼ်ႈမႃးၸုတုမ်ၵၼ်ၵႃႈတီႈၶဝ်ၼၼ်ႉလႄႈမၼ်းၸဝ်ႈပူင်ဢမိင်ႉတီႈၽီႁၢႆႉၼၼ်ႉလႄႈဝႃႈ၊ “ၽီဢႃႉလႄႈႁူၼူၵ်ႇၼႆႉ႟။ ၵဝ်မီးဢမိင်ႉၸမ်ႉ၊ဢွၵ်ႇသေၵႃႈၼႂ်းလုၵ်ႈဢွၼ်ႇၼႆႉၵႂႃႇတႃႉ။ ယႃႇပေမႃးၶဝ်ႈၼႂ်းမၼ်းထႅင်ႈသေပွၵ်ႈ၊” ဝႃႈၼင်ႇၼႆဢေႃႈ။
ၽီၼၼ်ႉၵေႃႈႁွင်ႉသႅၼ်ႇလႄႈယဵင်ႈၶႅၼ်းႁဵတ်းႁႂ်ႈလုၵ်ႈဢွၼ်ႇၼၼ်ႉ၊တူဝ်ၶႅင်ၵႂႃႇၼႃႇလူင်လၢင်ယဝ်ႉၸင်ႇဢွၵ်ႇၵႂႃႇဢေႃႈ။ လုၵ်ႈဢွၼ်ႇၼၼ်ႉၵေႃႈ၊ပဵၼ်ၸိူဝ်ႉၼင်ႇတူဝ်တၢႆဝႆႉတေႃႇထိုင်ႁွတ်ႈၵူၼ်းၵမ်ႈၼမ်လၢတ်ႈဝႃႈ၊ “မၼ်းတၢႆယဝ်ႉ၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊ ၸဝ်ႈယေႇသု၊ ယိပ်းၵမ်ဢဝ်မိုဝ်းမၼ်းတိုတ်ႉၸၼ်လႄႈမၼ်းၵေႃႈလုၵ်ႉမႃးဢေႃႈ။
ဝၢႆးသေ ၸဝ်ႈယေႇသု၊ ၶဝ်ႈၵႃႈၼႂ်းႁိုၼ်းယဝ်ႉၸင်ႇ၊တပႄးၸဝ်ႈၸိူဝ်းၼၼ်ႉလဝ်ႈထၢမ်တီႈမၼ်းၸဝ်ႈတဵတ်ႇတဵတ်ႇလႄႈဝႃႈ၊ “ႁဵတ်းသင်လႄႈႁဝ်းၶႃႈဢမ်ႇႁေႃႈၽီႁၢႆႉၼၼ်ႉဢွၵ်ႇပႅတ်ႈလႆႈၶႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၶိုၼ်းလၢတ်ႈလႄႈဝႃႈ၊ “မဵဝ်းၼႆႉၸိုင်၊ၵွပ်ႈပိူဝ်ႈတၢင်းဢၼ်သူးတွင်းလႄႈၵမ်တၢင်းၵိၼ် ၵူၺ်းၸင်ႇႁေႃႈဢွၵ်ႇလႆႈလႄႈလူၺ်ႈလွင်ႈတၢင်းတၢင်ႇၸိူဝ်ႉတၢင်ႇဢၼ်ၸမ်ႉ၊ဢမ်ႇတၢတ်ႈၼိူင်ႇလႆႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ဢိၵ်ႇတင်းတပႄးၸဝ်ႈတင်းလၢႆ၊ဢွၵ်ႇသေၵႃႈတီႈၼၼ်ႈလႄႈၸွမ်းတၢင်းၽႃႇလတ်းဢိူင်ႇ ၵႃႇလိလႄး၊ ၵႂႃႇဢေႃႈ။ မၼ်းၸဝ်ႈဢမ်ႇၶႂ်ႈႁႂ်ႈၽူႈလႂ်သေၵေႃႉသေၵူၼ်းလႆႈႁုတီႈဢၼ်မၼ်းၸဝ်ႈမီးၼၼ်ႉ။-
ၵွပ်ႈပိူဝ်ႈမၼ်းၸဝ်ႈသင်ႇသွၼ်ပၼ်တီႈတပႄးၸဝ်ႈတင်းလၢႆလႄႈဝႃႈ၊ “ လုၵ်ႈၵူၼ်း၊ တၵ်းလႆႈၶၢမ်ႇတၢင်းဢၼ်ဢၢပ်ႈၵႃႈၼႂ်းမိုဝ်းၵူၼ်းၸိူဝ်းဢၼ်တၵ်းဢဝ်မၼ်းၸဝ်ႈတၢႆၼၼ်ႉဢေႃႈ။ ၼႂ်းဝႃႈၼၼ်သေၵေႃႈ၊မိူဝ်ႈတၢႆယဝ်ႉ၊ထူၼ်ႈထိုင်သၢမ်ဝၼ်းၸိုင်၊တၵ်းလုၵ်ႉၶိုၼ်းလိပ်းဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ၶဝ်ယင်းဢမ်ႇပႆႇႁုထွမ်ႇဢထိၵ်ႈပႄႇၵႂၢမ်းၼၼ်ႉ။ ၶဝ်ၵေႃႈဢမ်ႇႁတ်းလဝ်ႈႁတ်းထၢမ်တီႈမၼ်းၸဝ်ႈလႄႈယူႇဢေႃႈ။
ၶဝ်ႁွတ်ႈထိုင်ဝဵင်း ၵပိူဝ်ႇၼေႇဢုမ်ႇ၊ ၵႂႃႇသေယဝ်ႉ၊မိူဝ်ႈဢၼ်ၶဝ်ႈၵႃႈၼႂ်းႁိူၼ်းၸိုင်၊ ၸဝ်ႈယေႇသု၊ ထၢမ်ၶဝ်လႄႈဝႃႈ၊ “ၵႃႈတီႈၵၢင်တၢင်းၼၼ်ႉသူၼင်ႇၵၼ်ထဵင်ၵၼ်လွင်ႈၵႃႈသင်၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ၶဝ်ဢမ်ႇတၵ်ႉသဵင်၊ၵွပ်ႈပိူဝ်ႈၶဝ်ၵေႃႉၼိုင်ႈလႄႈၵေႃႉၼိုင်ႈ၊လၢတ်ႈၸႃထဵင်ၵၼ်လူၺ်ႈလွင်ႈဢၼ်ၽူႈလႂ်တၵ်းပဵၼ်ၵေႃႉဢၼ်ယႂ်ႇမျၢတ်ႈၼႃႇသေပိူၼ်ႈၼၼ်ႉ၊မႃးၸွမ်းတၢင်းဢေႃႈ။-
ၸဝ်ႈယေႇသု၊ ၼင်ႈသေယဝ်ႉ၊ႁွင်ႉတပႄးၸဝ်ႈသိပ်းသွင်ပႃးၼၼ်ႉမႃးလႄႈလၢတ်ႈဝႃႈ၊ “ၽူႈလႂ်သေဢမ်ႇဝႃႈ၊ပေႃးမၼ်းၶႂ်ႈပဵၼ်ႁူဝ်ပိူၼ်ႈၸိုင်၊မၼ်းတၵ်းလႆႈဝႆႉတူဝ်မၼ်းပဵၼ်ႁၢင်သုတ်းပိူၼ်ႈသေလႄႈ၊တၵ်းလႆႈပဵၼ်ၵူၼ်းၸႂ်ႉၵူၼ်းသွႆပိူၼ်ႈတင်းလၢႆဢေႃႈ၊” ဝႃႈၼင်ႇၼႆဢေႃႈ။-
မၼ်းၸဝ်ႈသမ်ႉဢဝ်လုၵ်ႈဢွၼ်ႇၵေႃႉၼိုင်ႈဝႆႉၵႃႈၼႂ်းဝူင်ႈၵၢင်ၶဝ်သေယဝ်ႉ၊ဢဝ်မိုဝ်းမၼ်းၸဝ်ႈၵွတ်ႇသေလႄႈလၢတ်ႈဝႃႈ၊-
“ၽူႈလႂ်သေဢမ်ႇဝႃႈ၊ပေႃးမၼ်းဢိင်ပိုင်ႈၸိုဝ်ႈသဵင်ၵဝ်သေလႄႈႁပ်ႉတုင်းဢဝ်လုၵ်ႈဢွၼ်ႇၸိူဝ်ႉၼင်ႇၼႆၸိုင်၊ၵေႃႉၼၼ်ႉႁပ်ႉတုင်းဢဝ်ၵဝ်ယဝ်ႉဢေႃႈ။ ၽူႈလႂ်သေဢမ်ႇဝႃႈ၊ၵေႃႉဢၼ်ႁပ်ႉတုင်းဢဝ်ၵဝ်ၼၼ်ႉ၊ၵေႃႉၼၼ်ႉႁပ်ႉတုင်းဢဝ်ၵဝ်ဢမ်ႇၵႃး၊ႁပ်ႉတုင်းဢဝ်ၸႃႉၸဵမ်ၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉဢေႃႈ၊” ဝႃႈၼင်ႇၼႆဢေႃႈ။
ယူဝ်းႁၢၼ်ႇ၊ လဝ်ႈလၢတ်ႈတီႈ ၸဝ်ႈယေႇသု၊ လႄႈဝႃႈ၊ “သြႃႇၸဝ်ႈ။ ႁဝ်းၶႃႈထူပ်းႁၼ်ၵူၼ်းၵေႃႉၼိုင်ႈ၊ဢိင်ပိုင်ႈၼႃႇမႃႉၸိုဝ်ႈသဵင်ၸဝ်ႈႁဝ်းသေလႄႈႁေႃႈၽီႁၢႆႉဢွၵ်ႇယူႇၶႃႈဢေႃႈ။ ၵွပ်ႈပိူဝ်ႈမၼ်းဢမ်ႇၸႂ်ႈၵူၼ်းႁဝ်းၼၼ်ႉလႄႈႁဝ်းၶႃႈႁၢမ်ႈတၢပ်ႈမၼ်းယႃႇႁႂ်ႈမၼ်းႁဵတ်းၸိူဝ်ႉၼင်ႇၼၼ်ဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈလၢတ်ႈတီႈၶဝ်လႄႈဝႃႈ၊ “ယႃႇပေႁၢမ်ႈတၢပ်ႈမၼ်း။ ၵူၼ်းဢၼ်ဢိင်ပိုင်ႈၸိုဝ်ႈသဵင်ၵဝ်လႄႈၼႄပျႃးတၼ်းၶူဝ်းဢၼ်လၢၵ်ႇဢၼ်လၢႆးယူႇၼၼ်ႉၸိုင်၊တေၶိုၼ်းသႄႉသွမ်းၵဝ်ငၢႆႈငၢႆႈၼၼ်ႉဢမ်ႇမီးသေၵေႃႉသေၵူၼ်း။-
ၵေႃႉဢၼ်ဢမ်ႇၶတ်းၵၼ်တင်းႁဝ်းၼၼ်ႉပဵၼ်ၵူၼ်းႁဝ်းယဝ်ႉ။-
ၽူႈလႂ်သေဢမ်ႇဝႃႈ၊ၵဝ်ဝႃႈတီႈၸိုဝ်ႈၸႂ်ႈမၼ်းၸမ်ႉ၊ၵေႃႉဢၼ်ဢိင်ပိုင်ႈၼႃႇမႃႉၸိုဝ်ႈသဵင်ၵဝ်လႄႈပၼ်ၼမ်ႉၵိၼ်ၵွၵ်းၼိုင်ႈတီႈသူ၊ၵွပ်ႈပိူဝ်ႈထွၵ်ႈလူၺ်ႈသူပဵၼ်ၵူၼ်းၵဝ်ယူႇၼၼ်ႉၸိုင်၊ၵေႃႉၼၼ်ႉတၵ်းလႆႈၶၢမ်ႇဢဝ်ဢၵျူဝ်းၵျေးၸူးဢမၢၼ်ႇၶၼ်ပဵၼ်ဢေႃႈ။
“ၽူႈလႂ်သေဢမ်ႇဝႃႈ၊ပေႃးမၼ်းႁႂ်ႈလုၵ်ႈဢွၼ်ႇၸိူဝ်ႉၼင်ႇၼႆ၊ဢၼ်ယုမ်ႇမၢတ်ႈၵဝ်ၼႆႉသေၵေႃႉၵေႃႉလႆႈႁဵတ်းမႅၼ်ႈဢပျတ်ႈၵႂႃႇၸိုင်၊တီႈၵေႃႉၼၼ်ႉပေႃးဢဝ်မၢၵ်ႇႁိၼ်လူၺ်ႁွႆႈၶေႃးမၼ်းလႄႈပႅတ်ႈတူၵ်းၵႃႈၼႂ်းၼမ်ႉပၢင်ႇလၢႆႇၸိုင်၊ယဵင်ႈၶႅၼ်းတေလီဢေႃႈ။-
ပိူင်လဵဝ်ၵၼ်၊ပေႃးမိုဝ်းမႂ်းႁဵတ်းႁႂ်ႈမႂ်းထုၵ်ႇမႅၼ်ႈဢပျတ်ႈၸိုင်၊တႅပ်းပႅတ်ႈတႃႉ။ ဢၼ်မီးမိုဝ်းၶွၼ်လဵဝ်ၶဝ်ႈၼႂ်းတၢင်းဢၼ်ဢသၢၵ်ႈလိပ်းၼၼ်ႉယဵင်ႈၶႅၼ်းတေလီသေဢၼ်မီးမိုဝ်းသွင်ၶွၼ်လႄႈတူၵ်းငရၢႆးၵႃႈၼႂ်းၽႆးဢၼ်ဢမ်ႇထၢတ်ႇဢမ်ႇယဵၼ်၊-
ၼွၼ်ဢၼ်သႆႉၵိၼ်ၶဝ်ၼၼ်ႉဢမ်ႇတၢႆ၊ၽႆးဢၼ်မႆႈၶဝ်ၼၼ်ႉ၊ဢမ်ႇမွတ်ႇဢမ်ႇဝၢႆးလႆႈသေပွၵ်ႈၼၼ်ႉဢေႃႈ။-
ပေႃးတိၼ်မႂ်းႁဵတ်းႁႂ်ႈမႂ်းထုၵ်ႇမႅၼ်ႈဢပျတ်ႈၸိုင်၊တႅပ်းပႅတ်ႈတႃႉ။ ဢၼ်မီးတိၼ်ၶွၼ်လဵဝ်လႄႈလႆႈၶဝ်ႈၼႂ်းတၢင်းဢၼ်ဢသၢၵ်ႈလိပ်းၼၼ်ႉ၊ယဵင်ႈၶႅၼ်းတေလီသေတၢင်းဢၼ်မီးတိၼ်သွင်ၶွၼ်လႄႈတူၵ်းငရၢႆးၵႃႈၼႂ်းၽႆးဢၼ်ဢမ်ႇထၢတ်ႇဢမ်ႇယဵၼ်၊-
ၼွၼ်ဢၼ်သႆႉၵိၼ်ၶဝ်ၼၼ်ႉဢမ်ႇတၢႆ၊ၽႆးဢၼ်မႆႈၶဝ်ၼၼ်ႉဢမ်ႇမွတ်ႇဢမ်ႇဝၢႆးလႆႈသေပွၵ်ႈၼၼ်ႉဢေႃႈ။-
ပေႃးမၢၵ်ႇတႃမႂ်းႁဵတ်းႁႂ်ႈမႂ်းထုၵ်ႇမႅၼ်ႈဢပျတ်ႈၸိုင်၊ၶွၵ်းဢွၵ်ႇပႅတ်ႈတႃႉ။ ဢၼ်မီးမၢၵ်ႇတႃႁူၺ်ႇလဵဝ်လႄႈလႆႈၶဝ်ႈၼႂ်းမိူင်းၽြႃးပဵၼ်ၸဝ်ႈၼၼ်ႉ၊ယဵင်ႈၶႅၼ်းတေလီသေတၢင်းဢၼ်မီးမၢၵ်ႇတႃသွင်ႁူၺ်ႇလႄႈတူၵ်းငရၢႆးၵႃႈၼႂ်းၽႆးဢၼ်ဢမ်ႇထၢတ်ႇဢမ်ႇယဵၼ်၊-
ၼွၼ်ဢၼ်သႆႉၵိၼ်ၶဝ်ၼၼ်ႉဢမ်ႇတၢႆ၊ၽႆးဢၼ်မႆႈၶဝ်ၼၼ်ႉဢမ်ႇမွတ်ႇဢမ်ႇဝၢႆးလႆႈသေပွၵ်ႈၼၼ်ႉဢေႃႈ။
“ၵူၼ်းတင်းသဵင်ႈတင်းလူင်တၵ်းလႆႈမူတ်းၸၢင်ႇလူၺ်ႈၽႆး၊မိူၼ်ၸိူဝ်ႉၼင်ႇတူဝ်တၢင်းလူႇတင်းသဵင်ႈတင်းလူင်လႆႈၶၢမ်ႇႁဵတ်းႁႂ်ႈမူတ်းၸၢင်ႇလူၺ်ႈၵိူဝ်ၼၼ်ႉဢေႃႈ။-
“ၵိူဝ်ၸမ်ႉ၊လီဢေႃႈ။ ၵူၺ်းၵႃႈ၊ပေႃးဢၼ်ၸဵမ်းမၼ်းႁၢႆၵႂႃႇယဝ်ႉၸိုင်၊သူတေၶိုၼ်းႁႂ်ႈမၼ်းၸဵမ်းမႃးလႆႈၸိူဝ်ႉၼင်ႇႁိုဝ်။ “ၵႃႈၼႂ်းသူႁႂ်ႈမီးၵိူဝ်လႄႈ၊ၵေႃႉၼိုင်ႈလႄႈၵေႃႉၼိုင်ႈယူႇထုၵ်ႇမေႃပေႃးၵႂၢမ်းၵၼ်တႃႉ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ လုၵ်ႉသေၵႃႈတီႈၼၼ်ႈလႄႈၵႂႃႇၵႃႈတီႈလႅၼ်လိၼ်ဢိူင်ႇ ယုတႃႉ၊ ဢိၵ်ႇတင်းၵႃႈတီႈၽၢၵ်ႇပုၼ်ႉၼမ်ႉ ယေႃးတၢၼ်ႇ၊ ဢေႃႈ။ ၵူၼ်းၼမ်ၼႃႇသမ်ႉၸုတုမ်ၵၼ်ထႅင်ႈၵႃႈတီႈမၼ်းၸဝ်ႈလႄႈမၼ်းၸဝ်ႈၵေႃႈၵႂႃႇသွၼ်ပၼ်ၶဝ်ၸွမ်းၼင်ႇဢၼ်မၼ်းၸဝ်ႈၵႆႉႁဵတ်းတႃႇသေႇၼၼ်ႉဢေႃႈ။
ၵူၼ်းၵိူင်း ၽႃႇရိသႄး၊ ၶဝ်ၵမ်ႈၽွင်ႈမႃးတီႈမၼ်းၸဝ်ႈလႄႈ၊ႁႃလွင်ႈႁႃတၢင်းႁႂ်ႈလႆႈယႃႉယုၵ်ႉတၢင်ႇဢပျတ်ႈတီႈမၼ်းၸဝ်ႈသေလႄႈလဝ်ႈထၢမ်ဝႃႈ၊ “ၸွင်ႇပိင်းၺၢပ်ႈတြႃးပၼ်ဢၶႂၢင်ႉႁႂ်ႈၵူၼ်းၸၢႆးပႅတ်ႈမေးမၼ်းၶႃႈႁိုဝ်း၊” ဝႃႈၼင်ႇၼႆဢေႃႈ။
မၼ်းၸဝ်ႈၵေႃႈဢဝ်တင်းၵႂၢမ်းထၢမ်ၶိုၼ်းတွပ်ႇလႄႈဝႃႈ၊ “တြႃး မူဝ်းသေႇ၊ သွၼ်ပၼ်ဝႆႉတီႈသူၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ၶဝ်ၶိုၼ်းလဝ်ႈလၢတ်ႈလႄႈဝႃႈ၊ “ မူဝ်းသေႇ၊ ပၼ်ဢၶႂၢင်ႉဝႆႉ၊ႁႂ်ႈၵူၼ်းၸၢႆးလႆႈတႅမ်ႈလိၵ်ႈဢၼ်ပုတ်းဢၼ်ၶၢတ်ႇပၼ်သေလႄႈပႅတ်ႈမေးၶႃႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈတီႈၶဝ်လႄႈဝႃႈ၊ “ၵွပ်ႈပိူဝ်ႈႁူဝ်ၸႂ်သူၵႅၼ်ႇၶႅင်ၼႃႇလႄႈ မူဝ်းသေႇ၊ ၸင်ႇတႅမ်ႈပိင်းၺၢပ်ႈၼၼ်ႉဝႆႉဢေႃႈ။-
ၵူၺ်းၵႃႈ၊မိူဝ်ႈၵေႃႇၸႃႉႁူဝ်ပိုင်းၽၢၼ်ႇသၢင်းႁဵတ်းပဵၼ်ၼၼ်ႉ၊ ‘ၽြႃးပဵၼ်ၸဝ်ႈၽၢၼ်ႇသၢင်းပဵၼ်ၵူၼ်းၸၢႆးၵူၼ်းယိင်းဢေႃႈ၊’ ဝႃႈၼႆၵျၢမ်းလိၵ်ႈမီးဝႆႉဢေႃႈ။-
သမ်ႉမီးထႅင်ႈလႄႈဝႃႈ၊ ‘ၵွပ်ႈလွင်ႈတၢင်းၼၼ်ႉလႄႈၵူၼ်းၸၢႆးတၵ်းလႆႈၽၢတ်ႇယၢၼ်ၵၼ်တင်းပေႃႈမႄႈမၼ်းသေယဝ်ႉ၊ၽၵ်းႁွမ်းလူၺ်ႈၵၼ်တင်းမေးမၼ်းဢေႃႈ။-
ၶဝ်သွင်ၵေႃႉပဵၼ်ၼိူဝ်ႉလိူတ်ႈဢၼ်လဵဝ်ၵၼ်မႃးဢေႃႈ၊’ မီးဝႆႉယဝ်ႉလႄႈ၊ၽူဝ်တင်းမေးပဵၼ်သွင်ၵေႃႉဢမ်ႇၸႂ်ႈယဝ်ႉ၊ပဵၼ်မႃးၵေႃႉလဵဝ်ၵၼ်ဢေႃႈ။-
ၵွပ်ႈလွင်ႈၸိူဝ်ႉၼင်ႇၼႆလႄႈလွင်ႈတၢင်းဢၼ်ၽြႃးပဵၼ်ၸဝ်ႈဢဝ်ၽၵ်းဢဝ်ႁွမ်းၵၼ်ၼၼ်ႉ၊ယႃႇႁႂ်ႈၵူၼ်းမႃးဢဝ်ၽၢတ်ႇၵၼ်ယၢၼ်ၵၼ်၊” ဝႃႈၼင်ႇၼႆဢေႃႈ။
ၼႂ်းမိူဝ်ႈဢၼ်ၶဝ်ၶဝ်ႈႁိူၼ်းၵႂႃႇယဝ်ႉၼၼ်ႉ၊တပႄးၸဝ်ႈတင်းလၢႆဢွၼ်ၵၼ်လဝ်ႈထၢမ်လွင်ႈတၢင်းၼႆႉထႅင်ႈဢေႃႈ။-
မၼ်းၸဝ်ႈၵေႃႈလၢတ်ႈၼႄၶဝ်လႄႈဝႃႈ၊ “ၵေႃႉဢၼ်ပႅတ်ႈမေးမၼ်းသေလႄႈသမ်ႉဢဝ်ထႅင်ႈတၢင်ႇၵေႃႉၼၼ်ႉ၊ၽိတ်းပိူင်ႈမေးမၼ်းယဝ်ႉဢေႃႈ။-
ပိူင်လဵဝ်ၵၼ်ၽူႈယိင်းၵေႃႈ၊ပေႃးပႅတ်ႈၽူဝ်မၼ်းသေလႄႈသမ်ႉဢဝ်တၢင်ႇၵေႃႉထႅင်ႈၸိုင်၊ႁွတ်ႈထိုင်တၢင်းဢၼ်ၽိတ်းၵႃႇမေႇသုဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ပိူၼ်ႈဢဝ်လုၵ်ႈဢွၼ်ႇလႂ်မႃးၸူးတီႈ ၸဝ်ႈယေႇသု၊ ႁႂ်ႈမၼ်းၸဝ်ႈဢဝ်မိုဝ်းတၢင်ႇၵႃႈၼိူဝ်ၶဝ်ဢေႃႈ။ ၵူၺ်းၵႃႈ၊တပႄးၸဝ်ႈတင်းလၢႆတၢင်ႇဢပျတ်ႈတီႈၵူၼ်းၸိူဝ်းၼၼ်ႉဢေႃႈ။-
မၼ်းၸဝ်ႈႁၼ်သေယဝ်ႉ၊ၸႂ်မႆႈလႄႈလၢတ်ႈတီႈတပႄးၸဝ်ႈၸိူဝ်းၼၼ်ႉလႄႈဝႃႈ၊ “ပၼ်လုၵ်ႈဢွၼ်ႇၸိူဝ်းၼၼ်ႉမႃးတီႈၵဝ်တႃႉ။ ယႃႇပေႁၢမ်ႈတၢပ်ႈၶဝ်။ မိူင်းၽြႃးပဵၼ်ၸဝ်ႈပဵၼ်မိူင်းၶဝ်ၸိူဝ်ႉၼင်ႇၼၼ်ဢေႃႈ။-
ၵဝ်ဝႃႈတီႈၸိုဝ်ႈၸႂ်ႈမၼ်းၸမ်ႉ၊ၽူႈလႂ်သေဢမ်ႇဝႃႈ၊ၵေႃႉဢၼ်ဢမ်ႇၶၢမ်ႇဢဝ်မိူင်းၽြႃးပဵၼ်ၸဝ်ႈမိူၼ်ၸိူဝ်ႉၼင်ႇလုၵ်ႈဢွၼ်ႇၼႆႉၼၼ်ႉ၊ၵေႃႉၼၼ်ႉဢမ်ႇလႆႈၶဝ်ႈမိူင်းၸဝ်ႈ၊” ဝႃႈၼင်ႇၼႆယဝ်ႉၸင်ႇ၊-
ဢုမ်ႈႁွပ်ႇဢဝ်လုၵ်ႈဢွၼ်ႇၸိူဝ်းၼၼ်ႉသေလႄႈဢဝ်မိုဝ်းမၼ်းၸဝ်ႈတၢင်ႇၵႃႈၼိူဝ်ၶဝ်သေယဝ်ႉ၊ပၼ်တၢင်းလီဢေႃႈ။
ၼႂ်းမိူဝ်ႈဢၼ် ၸဝ်ႈယေႇသု၊ တႄႇၸႃႉဢွၵ်ႇတၢင်းၵႂႃႇထႅင်ႈယူႇၼၼ်ႉ၊ၵူၼ်းၵေႃႉၼိုင်ႈလႅၼ်ႈမႃးၸူးမၼ်းၸဝ်ႈလႄႈၶုပ်ႉမူပ်ႇသေယဝ်ႉ၊လဝ်ႈထၢမ်ဝႃႈ၊ “သြႃႇဢၼ်မျၢတ်ႈလီၶႃႈ႟။ ၼင်ႇႁိုဝ်တၵ်းလႆႈၶၢမ်ႇဢဝ်ဢမူၺ်ႇဢသၢၵ်ႈထႃႇဝရႃႉၸိုင်၊ၵဝ်ၶႃႈတၵ်းလႆႈႁဵတ်းၸိူဝ်ႉၼင်ႇႁိုဝ်ၶႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၵေႃႈလၢတ်ႈလႄႈဝႃႈ၊ “ႁဵတ်းသင်လႄႈမႂ်းႁွင်ႉၵဝ်ဝႃႈ၊သြႃႇဢၼ်မျၢတ်ႈလီၼင်ႇႁိုဝ်။ လိူဝ်သေၽြႃးပဵၼ်ၸဝ်ႈသူႇလဵဝ်ၵူၺ်းၽူႈလႂ်ဢမ်ႇမျၢတ်ႈလီသေၵေႃႉသေၵူၼ်း။-
မႂ်းႁုပိင်းၺၢပ်ႈတြႃးၸဝ်ႈတင်းလၢႆယူႇဢမ်ႇၸႂ်ႈႁိုဝ်း။ ‘ယႃႇပေဢဝ်ဢသၢၵ်ႈၵူၼ်းတၢႆ။ ယႃႇပေၽိတ်းပိူင်ႈမေးပိူၼ်ႈ။ ယႃႇပေလၵ်ႉပေလွမ်။ ယႃႇပေၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈ။ ယႃႇပေၵူတ်ႉၵိၼ်ပိူၼ်ႈ။ ႁဵတ်းရူဝ်ႇသေႇၵူဝ်ယမ်ပေႃႈမႄႈမႂ်းတႃႉ၊’ ဝႃႈၼႆမီးဝႆႉယဝ်ႉ၊” ဝႃႈၼင်ႇၼႆဢေႃႈ။
ၵေႃႉၼၼ်ႉၶိုၼ်းလဝ်ႈလၢတ်ႈလႄႈဝႃႈ၊ “သြႃႇၸဝ်ႈ။ ပိင်းၺၢပ်ႈတြႃးၸဝ်ႈၵႃႈမီးတင်းသဵင်ႈတင်းလူင်ၸိူဝ်းၼႆႉ၊ၵဝ်ၶႃႈၵမ်ၵျၢင်ႉၸွမ်းၸဵမ်မိူဝ်ႈယင်းလဵၵ်ႉၼၼ်ႉမႃးၶႃႈယဝ်ႉ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ယႅၵ်ႉတူၺ်းၵေႃႉၼၼ်ႉလူၺ်ႈတင်းၸႂ်ဢၼ်ႁၵ်ႉဢဵတ်းလူလႄႈဝႃႈ၊ “မႂ်းလူဝ်ႇထႅင်ႈဢၼ်ၼိုင်ႈဢေႃႈ။ ၵႂႃႇၶၢႆဢုၵ်ႉၸႃႇၶူဝ်းလဵင်းၵႃႈဢၼ်မႂ်းမီးတင်းသဵင်ႈတင်းလူင်သေယဝ်ႉ၊ဢဝ်ငိုၼ်းၼၼ်ႉပၼ်တီႈၵူၼ်းယၢၵ်ႈၵူၼ်းၽၢၼ်တင်းလၢႆတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊မႂ်းတၵ်းလႆႈတၢင်းဢၼ်မၢၵ်ႈမီးၵႃႈၼႂ်းမိူင်းၵၢင်ႁၢဝ်ပုၼ်ႉဢေႃႈ။ ႁဵတ်းၸိူဝ်ႉၼင်ႇၼၼ်ယဝ်ႉၸင်ႇ၊မႅၵ်ႇသဝ်မႆႉဝႃးမိုဝ်းသေလႄႈမႃးၸွမ်းၵဝ်တႃႉ၊” ဝႃႈၼင်ႇၼႆဢေႃႈ။-
ၵေႃႉၼၼ်ႉငိၼ်းၵႂၢမ်းၼၼ်ႉၸိုင်၊ၼႃႈမၼ်းငိူဝ်ႈငဝ်ၵႂႃႇသေယဝ်ႉ၊ၸႂ်လုလႄႈဢွၵ်ႇၵႂႃႇသေဢေႃႈ။ ၵွပ်ႈပိူဝ်ႈဝႃႈမၼ်းပဵၼ်ၵေႃႉဢၼ်မီးဢုၵ်ႉၸႃႇငိုၼ်းၶမ်ႉၼမ်ၼႃႇၼၼ်ႉဢေႃႈ။
ၸဝ်ႈယေႇသု၊ လဵဝ်တူၺ်းတပႄးၸဝ်ႈတင်းလၢႆသေယဝ်ႉလၢတ်ႈလႄႈဝႃႈ၊ “ၶဝ်ၸိူဝ်းဢၼ်မၢၵ်ႈမီးၼၼ်ႉ၊ၶဝ်ႈမိူင်းၽြႃးပဵၼ်ၸဝ်ႈယၢပ်ႇၼႃႇဢေႃႈ၊” ဝႃႈၼင်ႇၼႆဢေႃႈ။
တပႄးၸဝ်ႈၸိူဝ်းၼၼ်ႉၵႂင်ၸႂ်ယုင်ႈၸႂ်ၼႃႇဢေႃႈ။ ၵူၺ်းၵႃႈ၊မၼ်းၸဝ်ႈသိုပ်ႇလၢတ်ႈထႅင်ႈလႄႈဝႃႈ၊ “လုၵ်ႈၵဝ်တင်းလၢႆၶဝ်႟။ [ၶဝ်ၸိူဝ်းဢၼ်ဢိင်ပိုင်ႈဢုၵ်ႉၸႃႇၸေးၸိမ်ႇၼၼ်ႉ] ၶဝ်ႈမိူင်းၽြႃးပဵၼ်ၸဝ်ႈယၢပ်ႇၼႃႇလူင်လၢင်ဢေႃႈ။-
ၵလႃႇဢုၵ်ႈလၼ်ႈႁူးၶဵမ်ငၢႆႈသေၵူၼ်းမၢၵ်ႈမီးၶဝ်ႈၼႂ်းမိူင်းၽြႃးပဵၼ်ၸဝ်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
လွင်ႈၼႆႉ၊တပႄးၸဝ်ႈတင်းလၢႆဢၢမ်းၼႃႇထၢၼ်ႈပေႃးၵႂၢင်ၸႂ်ယုင်ႈၸႂ်သေလႄႈ၊ၵေႃႉၼိုင်ႈလႄႈၵေႃႉၼိုင်ႈလၢတ်ႈတီႈၵၼ်လႄႈဝႃႈ၊ “ပေႃးပဵၼ်ၼႆၸိုင်၊ၽူႈလႂ်ၵူၼ်းလႂ်တေႁွတ်ႈထိုင်တၢင်းဢၼ်ၵႄႇၶျွတ်ႈဢဝ်လႆႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ယႅၵ်ႉတူၺ်းၶဝ်လႄႈလၢတ်ႈဝႃႈ၊ “လွင်ႈတၢင်းၼႆႉၸိုင်၊ၵူၼ်းဢမ်ႇတၢတ်ႈၼိူင်ႇလႆႈ။ ၼႂ်းဝႃႈၼၼ်သေၵေႃႈ၊ၽြႃးပဵၼ်ၸဝ်ႈဢမ်ႇတၢတ်ႈၼိူင်ႇလႆႈဢမ်ႇၸႂ်ႈ။ ၽြႃးပဵၼ်ၸဝ်ႈတၢတ်ႈၼိူင်ႇလႆႈလွင်ႈတၢင်းၵူႈၸိူဝ်ႉၵူႈပိူင်ယူႇဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ပေႇတရု၊ လဝ်ႈလၢတ်ႈလႄႈဝႃႈ၊ “ပေႃးပဵၼ်ၼႆ။ ႁဝ်းၶႃႈၸုၼ်ႉပဵတ်ႈၵႃႈဢၼ်မီးတင်းသဵင်ႈတင်းလူင်သေလႄႈၸွမ်းလင်ၸဝ်ႈႁဝ်းယဝ်ႉၶႃႈဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၶိုၼ်းလၢတ်ႈလႄႈဝႃႈ၊ “ၸႂ်ႈယဝ်ႉ။ ၵဝ်ဝႃႈတီႈသူၸမ်ႉ၊ၽူႈလႂ်သေဢမ်ႇဝႃႈ၊ၵေႃႉဢၼ်ၸုၼ်ႉပႅတ်ႈႁိူၼ်းယေး၊ပီႈၼွင်ႉၸဵမ်ယိင်းၸဵမ်ၸၢႆး၊ပေႃႈမႄႈ၊လုၵ်ႈလၢင်း၊ႁႆႈၼႃးတင်းလၢႆၵွပ်ႈပိူဝ်ႈၵဝ်၊ဢိၵ်ႇတင်းၵွပ်ႈပိူဝ်ႈၶၢဝ်ႇတြႃးသိူဝ်းပျေႃႇၸဝ်ႈၼၼ်ႉၸမ်ႉ၊-
ၵေႃႉၼၼ်ႉ၊တၵ်းလႆႈၶၢမ်ႇဢဝ်ဢၵျူဝ်းၼႂ်းၸူဝ်ႈပၢၼ်ၼႆႉပၢၵ်ႇပုၼ်ႈ၊ဢၼ်ဝႃႈႁိူၼ်းယေးပီႈၼွင်ႉၸဵမ်ယိင်းၸဵမ်ၸၢႆး၊ပေႃႈမႄႈ၊လုၵ်ႈလၢင်း၊ႁႆႈၼႃးဢိၵ်ႇတင်းတၢင်းဢၼ်ၼိၵ်ႈၸၢၵ်ႈငႅၼ်းသႄးလႂ်ဢေႃႈ။ ၼႂ်းၸၢတ်ႈၼႃႈၵေႃႈ၊တၵ်းလႆႈၶၢမ်ႇဢဝ်ဢသၢၵ်ႈထႃႇဝရႃႉဢေႃႈ။-
ၼႂ်းဝႃႈၼၼ်သေၵေႃႈ၊ၵူၼ်းၼမ်ၼႃႇၸိူဝ်းဢၼ်တူၵ်းဢွၼ်တၢင်းၼၼ်ႉတၵ်းတူၵ်းလိုၼ်းဢေႃႈ။ ၶဝ်ၼမ်ၼႃႇၸိူဝ်းဢၼ်တူၵ်းလိုၼ်းၼၼ်ႉတၵ်းႁွတ်ႈဢွၼ်တၢင်းဢေႃႈ၊” ဝႃႈၼင်ႇၼႆဢေႃႈ။
ဝၢႆးၼၼ်ႉ၊ၶဝ်ဢွၼ်ၵၼ်ၸွမ်းတၢင်းၵႂႃႇၸူးဝဵင်း ယေႇရုသလႅမ်ႇ၊ ဢေႃႈ။ ၼႂ်းၶၢဝ်းတၢင်းၼၼ်ႉ ၸဝ်ႈယေႇသု၊ ဢွၼ်ႁူဝ်တပႄးၸဝ်ႈတင်းလၢႆ၊ၵႂႃႇဢွၼ်တၢင်းလႄႈၶဝ်ၵႂင်ၸႂ်ယုင်ႈၸႂ်ယူႇဢေႃႈ။ ၶဝ်ၸိူဝ်းဢၼ်ၸွမ်းၵႂႃႇၼၼ်ႉ၊သမ်ႉမီးၸႂ်ၵူဝ်လႄႈပႆၸွမ်းၵႂႃႇယူႇဢေႃႈ။ မိူဝ်ႈၼၼ်ႉ၊မၼ်းၸဝ်ႈသမ်ႉၶိုၼ်းႁွင်ႉဢဝ်တမၢၼ်ႇၸဝ်ႈသိပ်းသွင်ပႃးၼၼ်ႉပႆၽႃႇၶၢင်ႈၸွမ်းသေယဝ်ႉ၊လၢတ်ႈၼႄလွင်ႈတၢင်းဢၼ်တၵ်းလႆႈပဵၼ်မႃးတီႈမၼ်းၸဝ်ႈၼၼ်ႉလႄႈဝႃႈ၊-
“ထွမ်ႇလူး။ တေႃႈလဵဝ်ၼႆႉႁဝ်းၶိုၼ်ႈၵႂႃႇၵႃႈတီႈဝဵင်း ယေႇရုသလႅမ်ႇ၊ ယူႇယဝ်ႉ။ ၵႃႈတီႈၼၼ်ႈ ၸဝ်ႈလုၵ်ႈၵူၼ်း၊ တၵ်းလႆႈၶၢမ်ႇတၢင်းဢၼ်ဢၢပ်ႈၼႂ်းမိုဝ်းယဵၸ်ႈပရေႃးႁဵၵ်ႈ လူင်ၶဝ်ဢိၵ်ႇတင်းသြႃႇမေႃၵျၢမ်းထမ်ႇမႃႉၶဝ်ဢေႃႈ။ ၶဝ်ၸိူဝ်းၼၼ်ႉတၵ်းၸီႇယၢင်ႇဢဝ်မၼ်းၸဝ်ႈတၢႆလႄႈတၵ်းဢၢပ်ႈပၼ်ၵူၼ်းတၢင်ႇၸိူဝ်ႉတၢင်ႇၶိူဝ်းၼၼ်ႉဢေႃႈ။-
ၵူၼ်းၸိူဝ်းၼၼ်ႉၵေႃႈတၵ်းႁဵတ်းပျၢၵ်ႈႁဵတ်းၶူဝ်တီႈမၼ်းၸဝ်ႈ၊တၵ်းထူမ်ႇၼမ်ႉလၢႆးသႂ်ႇမၼ်းၸဝ်ႈ၊တၵ်းပေႃႉယႅၼ်ႉမၼ်းၸဝ်ႈလႄႈတၵ်းဢဝ်မၼ်းၸဝ်ႈတၢႆဢေႃႈ။ ၵူၺ်းၵႃႈ၊ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉ၊မၼ်းၸဝ်ႈတၵ်းလုၵ်ႉၶိုၼ်းလိပ်းဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ယႃႇၵုပ်ႈ၊ ဢိၵ်ႇတင်း ယူဝ်းႁၢၼ်ႇ၊ လုၵ်ႈၸၢႆး ၸေႇပေႇတႄး၊ သုတ်ႉၸူးတီႈမၼ်းၸဝ်ႈလႄႈလဝ်ႈလၢတ်ႈဝႃႈ၊ “သြႃႇၸဝ်ႈ။ ႁဝ်းၶႃႈၶႂ်ႈႁႂ်ႈၸဝ်ႈႁဝ်းႁဵတ်းပၼ်သေမဵဝ်းမဵဝ်းပုၼ်ႈႁဝ်းၶႃႈၶႃႈဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၵေႃႈထၢမ်ၶဝ်လႄႈဝႃႈ၊ “ၶႂ်ႈႁႂ်ႈၵဝ်ႁဵတ်းဢီႈသင်ပၼ်သူ၊” ဝႃႈၼင်ႇၼႆဢေႃႈ။
ၶဝ်ၶိုၼ်းလဝ်ႈလၢတ်ႈလႄႈဝႃႈ၊ “ၼႂ်းမိူဝ်ႈဢၼ်ၸဝ်ႈႁဝ်းလႆႈၼင်ႈပလၢင်ႇၵႃႈၼႂ်းမိူင်းၸဝ်ႈႁဝ်းၼၼ်ႉၸိုင်၊ၶႅၼ်းတေႃႈပၼ်ဢၶႂၢင်ႉႁႂ်ႈႁဝ်းၶႃႈလႆႈၼင်ႈၽၢႆႇၶႂႃၸဝ်ႈၵေႃႉၼိုင်ႈ၊ၽၢႆႇသၢႆႉၸဝ်ႈၵေႃႉၼိုင်ႈၵႃႈၼႂ်းမုၼ်ၽုင်းၸဝ်ႈႁဝ်းသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈတီႈၶဝ်သွင်ၵေႃႉလႄႈဝႃႈ၊ “သူဢမ်ႇႁုလွင်ႈတၢင်းဢၼ်သူလဝ်ႈယွၼ်းၼၼ်ႉ။ ၸွင်ႇသူႁတ်း 33 ၵိၼ်ၵွၵ်းဢၼ်ၵဝ်တၵ်းလႆႈၵိၼ်ၼၼ်ႉႁိုဝ်း။ ၸွင်ႇသူႁတ်းၶၢမ်ႇဢဝ်မၢင်ႇၵလႃႇပပ်ႉတိၸမ်ႇမဵဝ်းဢၼ်ၵဝ်တၵ်းလႆႈၶၢမ်ႇၼၼ်ႉလႆႈႁိုဝ်း၊” မိူဝ်ႈဢၼ်ဝႃႈၼင်ႇၼႆၸိုင်။
ၶဝ်သွင်ၵေႃႉၶိုၼ်းလဝ်ႈလၢတ်ႈလႄႈဝႃႈ၊ “လႆႈယူႇၶႃႈဢေႃႈ၊” ဝႃႈၼင်ႇၼႆဢေႃႈ။ ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “ၵွၵ်းဢၼ်ၵဝ်ၵိၼ်ၼၼ်ႉသူတၵ်းလႆႈၵိၼ်လႄႈမၢင်ႇၵလႃႇပပ်ႉတိၸမ်ႇဢၼ်ၵဝ်ၶၢမ်ႇၼၼ်ႉၵေႃႈသူတၵ်းလႆႈၶၢမ်ႇဢဝ်ဢမၢၼ်ႇၶၼ်ပဵၼ်ဢေႃႈ။-
ၼႂ်းဝႃႈၼၼ်သေၵေႃႈ၊ၵေႃႉလႂ်တၵ်းလႆႈၼင်ႈၽၢႆႇၶႂႃၵဝ်လႄႈ၊ၵေႃႉလႂ်တၵ်းလႆႈၼင်ႈၽၢႆႇသၢႆႉၵဝ်ၼၼ်ႉၵဝ်ဢမ်ႇပိူင်ႇပၼ်ဢၶႂၢင်ႉၼၼ်ႉ။ ၵူၺ်းၵႃႈ၊ၽြႃးပဵၼ်ၸဝ်ႈတၵ်းပၼ်ၵႃႈတီႈၵေႃႉဢၼ်မၼ်းၸဝ်ႈမႄးဝႆႉယဝ်ႉ၊ပုၼ်ႈႁင်းၽႂ်ႁင်းမၼ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်တမၢၼ်ႇၸဝ်ႈသိပ်းပႃးၼၼ်ႉလႆႈငိၼ်းၸိုင်၊ၶဝ်ၶႂ်ႈၸႃႉ ယႃႇၵုပ်ႈ၊ ဢိၵ်ႇတင်း ယူဝ်းႁၢၼ်ႇ၊ ဢေႃႈ။-
ပိူဝ်ႈၼႆၸင်ႇ ၸဝ်ႈယေႇသု၊ ႁွင်ႉဢဝ်ၶဝ်မႃးၸုတုမ်ၵၼ်တီႈမၼ်းၸဝ်ႈလႄႈလၢတ်ႈဝႃႈ၊ “ၶဝ်ၸိူဝ်းဢၼ်ပဵၼ်ၶုၼ်ၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၼၼ်ႉၸၢင်ႈဢုပ်ႉပိူင်ႇဢေႃႈ။ ၶဝ်ၸိူဝ်းဢၼ်ပဵၼ်ၵူၼ်းယႂ်ႇၵူၼ်းလူင်တင်းလၢႆၵေႃႈ၊မီးဢႃႇၼႃႇဝႃႈၼႆသူႁုယူႇဢေႃႈ။-
ၼႂ်းသူၸမ်ႉ၊ဢမ်ႇလႆႈပဵၼ်ၸိူဝ်ႉၼင်ႇၼၼ်။ ပေႃးၼႂ်းသူသေၵေႃႉၵေႃႉၶႂ်ႈပဵၼ်ၵူၼ်းလူင်သူၸိုင်၊ၵေႃႉၼၼ်ႉတၵ်းလႆႈပဵၼ်ၵူၼ်းၸႂ်ႉၵူၼ်းသွႆသူဢေႃႈ။-
သေၵေႃႉၵေႃႉၶႂ်ႈပဵၼ်ၵူၼ်းႁူဝ်သူၸိုင်၊ၵေႃႉၼၼ်ႉတၵ်းလႆႈပဵၼ်ၶႃႈသူတင်းလၢႆဢေႃႈ။-
လွင်ႈမၼ်းၸမ်ႉ၊ ၸဝ်ႈလုၵ်ႈၵူၼ်း၊ မႃးႁႂ်ႈလႆႈၸႂ်ႉၵိၼ်ပိူၼ်ႈဢမ်ႇၸႂ်ႈ။ မႃးႁႂ်ႈလႆႈၶၢမ်ႇတၢင်းဢၼ်ပိူၼ်ႈၸႂ်ႉဢိၵ်ႇတင်းႁႂ်ႈလႆႈၸုၼ်ႉဢသၢၵ်ႈတူဝ်ၸဝ်ႈၵဝ်ႇပုၼ်ႈလွင်ႈၼင်ႇႁိုဝ်တၵ်းထုတ်ႇဢဝ်ၵူၼ်းၼမ်ၼႃႇဢေႃႈ၊” ဝႃႈၼင်ႇၼႆဢေႃႈ။
ၶဝ်ႁွတ်ႈထိုင်ၵႃႈတီႈဝဵင်း ယေႇရိၶူဝ်း၊ သေယဝ်ႉ၊ၼႂ်းမိူဝ်ႈဢၼ် ၸဝ်ႈယေႇသု၊ ဢိၵ်ႇတင်းတပႄးၸဝ်ႈတင်းလၢႆ၊ဢိၵ်ႇတင်းမူႇၵူၼ်းၸိူဝ်းၼၼ်ႉၶိုၼ်းဢွၵ်ႇဝဵင်းၵႂႃႇယူႇၼၼ်ႉၸိုင်၊ၵူၼ်းယွၼ်းဢၼ်တႃႇမွတ်ႇၵေႃႉၼိုင်ႈဢၼ်လႆႈၸိုဝ်ႈ ပႃႇတိမေး၊ လုၵ်ႈၸၢႆး တိမေး၊ ၼၼ်ႉၼင်ႈယူႇႁိမ်းတၢင်းဢေႃႈ။-
မိူဝ်ႈဢၼ်မၼ်းငိၼ်းဝႃႈ၊ပဵၼ် ၸဝ်ႈယေႇသု၊ ၵူၼ်းဝဵင်း ၼႃႇၸရႅတ်ႈ၊ ၼၼ်ႉၸိုင်၊ႁွင်ႉပၢဝ်ႇလႄႈဝႃႈ၊ “ ၸဝ်ႈယေႇသု၊ လုၵ်ႈ တႃႇဝိတ်ႈ၊ တီႈၶႃႈ။ ဢဵတ်းလူၵဝ်ၶႃႈသေၵမ်း၊” ဝႃႈၼင်ႇၼႆယူႇဢေႃႈ။
မူႇၵူၼ်းတင်းလၢႆႁိုတ်းလၢတ်ႈဝႃႈ၊ႁႂ်ႈၵေႃႉၼၼ်ႉယူႇတဵတ်ႇတဵတ်ႇသေၵမ်းဝႃႈၼႆသေၵေႃႈ၊မၼ်းယဵင်ႈၶႅၼ်းႁွင်ႉပၢဝ်ႇလူၺ်ႈတင်းသဵင်ဢၼ်ယႂ်ႇၼႃႇထႅင်ႈလႄႈဝႃႈ၊ “လုၵ်ႈ တႃႇဝိတ်ႈ၊ တီႈၶႃႈ။ ဢဵတ်းလူၵဝ်ၶႃႈသေၵမ်း၊” ဝႃႈၼင်ႇၼႆယူႇဢေႃႈ။
ၸဝ်ႈယေႇသု၊ ၸင်ႇၸုၵ်းၵိုတ်းယူႇသေလႄႈမီးဢမိင်ႉဝႃႈ၊ “ႁွင်ႉမၼ်းမႃးလူး၊” ၵႃႈၼင်ႇဢၼ်မၼ်းၸဝ်ႈသင်ႇၼၼ်ႉ။ ၶဝ်ၵေႃႈႁွင်ႉဢဝ်ၵေႃႉၼၼ်ႉလႄႈဝႃႈ၊ “ၸူမ်းၸႂ်လႄႈလုၵ်ႉတႃႉ။ မၼ်းၸဝ်ႈႁွင်ႉမႂ်းယဝ်ႉ။” ဝႃႈၼင်ႇၼႆဢေႃႈ။
ၵေႃႉၼၼ်ႉၵေႃႈ၊လွၼ်ႈပႅတ်ႈၽႃႈဝႆမၼ်းလႄႈၽုတ်းလုၵ်ႉၸုၵ်းသေယဝ်ႉ၊မႃးၸူးတီႈမၼ်းၸဝ်ႈဢေႃႈ။
မၼ်းၸဝ်ႈၵေႃႈထၢမ်မၼ်းလႄႈဝႃႈ၊ “မႂ်းၶႂ်ႈႁႂ်ႈၵဝ်ႁဵတ်းၵႃႈသင်ပုၼ်ႈမႂ်း၊” ဝႃႈၼင်ႇၼႆလႄႈ၊ၵူၼ်းတႃမွတ်ႇၼၼ်ႉၶိုၼ်းလဝ်ႈလၢတ်ႈလႄႈဝႃႈ။ “သြႃႇၸဝ်ႈ။ ႁဵတ်းႁႂ်ႈမၢၵ်ႇတႃၵဝ်ၶႃႈႁၼ်လႆႈမႃးသေၵမ်းၶႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၵေႃႈလၢတ်ႈတီႈမၼ်းလႄႈဝႃႈ၊ “ၵႂႃႇတႃႉ။ တၢင်းယုမ်ႇမၢတ်ႈမႂ်းႁႂ်ႈမႂ်းလႆႈၶျၢမ်းသႃႇယဝ်ႉ၊” ဝႃႈၼင်ႇၼႆဢေႃႈ။ မိူဝ်ႈၼၼ်ႉၵမ်းလဵဝ်၊မၢၵ်ႇတႃၵေႃႉၼၼ်ႉႁၼ်လႆႈမႃးလႄႈမၼ်းၵႂႃႇၸွမ်း ၸဝ်ႈယေႇသု၊ ၵႃႈၼႂ်းသဵၼ်ႈတၢင်းၼၼ်ႉဢေႃႈ။
မိူဝ်ႈၼၼ်ႉ၊ၶဝ်ႁွတ်ႈၸမ်ဝဵင်း ယေႇရုသလႅမ်ႇ၊ တီႈဝၢၼ်ႈ ပိတ်ႉၽႃႇၵေး၊ တင်းဝၢၼ်ႈ ပေႇထၼိ၊ ၵႃႈတီႈပဵမ်ႉလွႆ သၢၼ်ႇလုၼ်ႇ၊ သေယဝ်ႉ၊မၼ်းၸဝ်ႈပွႆႇၸႂ်ႉတပႄးၸဝ်ႈသွင်ၵေႃႉၵႂႃႇလႄႈ၊-
သင်ႇလၢတ်ႈဝႃႈ၊ “သူၵႂႃႇၵႃႈတီႈဝၢၼ်ႈဢၼ်မီးတေႃႇၼႃႈသူပုၼ်ႉတႃႉ။ မိူဝ်ႈဢၼ်သူၶဝ်ႈဝၢၼ်ႈၵႂႃႇၵမ်းလဵဝ်ၼၼ်ႉ၊တၵ်းထူပ်းႁၼ်မႃႉလီႈဢွၼ်ႇတူဝ်ၼိုင်ႈဢၼ်ၽူႈလႂ်ဢမ်ႇပႆႇတွၼ်ႉၽိုၵ်းၶီႇသေပွၵ်ႈၼၼ်ႉမတ်ႉဝႆႉဢေႃႈ။ ၵႄႈလႄႈၸုင်ဢဝ်မႃးတႃႉ။-
ပေႃးပိူၼ်ႈထၢမ်သူလႄႈဝႃႈ၊ ‘ႁဵတ်းသင်လႄႈႁဵတ်းၸိူဝ်ႉၼင်ႇၼၼ်၊’ ဝႃႈၼႆၸိုင်၊ၶိုၼ်းလၢတ်ႈလႄႈဝႃႈ၊ ‘ၸဝ်ႈမီးဢလူဝ်ႇဢေႃႈ၊’ ဝႃႈၼႆၵူၺ်းတႃႉ။ ၵေႃႉၼၼ်ႉတၵ်းပၼ်ဢဝ်မႃးၵမ်းလဵဝ်ဢေႃႈ၊” ဝႃႈၼင်ႇၼႆဢေႃႈ။
ၶဝ်သွင်ၵေႃႉၼၼ်ႉၵႂႃႇလႄႈထူပ်းႁၼ်မႃႉလီႈဢွၼ်ႇတူဝ်ၼိုင်ႈမီးယူႇၵႃႈႁိမ်းတၢင်းမတ်ႉဝႆႉၵႃႈတီႈၽၵ်းတူၼၼ်ႉသေယဝ်ႉ၊ၶဝ်ၵႄႈဢဝ်မႃႉလီႈဢွၼ်ႇၼၼ်ႉဢေႃႈ။-
ၵူၼ်းၸိူဝ်းဢၼ်ၸုၵ်းယူႇႁိမ်းၼၼ်ႉၵမ်ႈၽွင်ႈထၢမ်လႄႈဝႃႈ၊ “ႁဵတ်းသင်လႄႈၵႄႈဢဝ်မႃႉလီႈဢွၼ်ႇၼႆႉၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
တပႄးၸဝ်ႈၸိူဝ်းၼၼ်ႉ၊ၶိုၼ်းလၢတ်ႈၸိူဝ်ႉၼင်ႇဢၼ် ၸဝ်ႈယေႇသု၊ သင်ႇလၢတ်ႈဝႆႉယဝ်ႉၸင်ႇၵူၼ်းၸိူဝ်းၼၼ်ႉၵေႃႈပၼ်ဢၶႂၢင်ႉၶဝ်ဢေႃႈ။-
ၶဝ်ၸင်ႇၸုင်ဢဝ်မႃႉလီႈဢွၼ်ႇၼၼ်ႉမႃးတီႈမၼ်းၸဝ်ႈလႄႈဢဝ်သိူဝ်ႈယၢဝ်းၶဝ်သိူဝ်ႇၵႃႈၼိူဝ်လင်မၼ်းယဝ်ႉၸင်ႇမၼ်းၸဝ်ႈၶိုၼ်ႈၶီႇဢေႃႈ။-
ၵူၼ်းၼမ်ၼႃႇဢဝ်သိူဝ်ႈယၢဝ်းၶဝ်သိူဝ်ႇပၼ်ပူပၼ်ၵႃႈၼိူဝ်သဵၼ်ႈတၢင်းဢေႃႈ။ ၵမ်ႈၽွင်ႈၽၼ်းဢဝ်ၵိင်ႇမႆႉၶႃႈမႆႉႁိမ်းၼွၵ်ႈတၢင်းလႄႈသိူဝ်ႇပၼ်ပူပၼ်ၵႃႈၼိူဝ်သဵၼ်ႈတၢင်းဢေႃႈ။-
ၵူၼ်းဢၼ်ၵႂႃႇပႃႈၼႃႈဢၼ်ၸွမ်းပႃႈလင်ၸိူဝ်းၼၼ်ႉ၊ဢွၼ်ၵၼ်ႁွင်ႉသႅၼ်ႇလႄႈဝႃႈ၊ “ႁူဝ်းသၼ်ႇၼႃႉ၊ ႁႂ်ႈၸဝ်ႈဢၼ်ပႃးတင်းၸိုဝ်ႈသဵင်ထႃႇဝရႃႉၽြႃးမႃးၼႆႉမီးမၢင်ႇၵလႃႇသေၵမ်းလူၺ်ႈ။-
ႁႂ်ႈမိူင်းပေႃႈႁဝ်း တႃႇဝိတ်ႈ၊ ဢၼ်တႄႇပဵၼ်မႃးယူႇၼႆႉမီးမၢင်ႇၵလႃႇသေၵမ်းလူၺ်ႈ။ ႁႂ်ႈပဵၼ်ႁူဝ်းသၼ်ႇၼႃႉၵႃႈၼိူဝ်ၸိၵ်းၸွမ်ၵၢင်ႁၢဝ်ပုၼ်ႉ၊သေၵမ်းလူၺ်ႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶဝ်ႈဝဵင်း ယေႇရုသလႅမ်ႇ၊ လႄႈၵႂႃႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈသေယဝ်ႉ၊လူတူၺ်းၵူႈၸိူဝ်ႉၵူႈပိူင်ယဝ်ႉၸင်ႇ၊ပိူဝ်ႈဢၼ်ၵၢင်ဝၼ်းတူၵ်းယဝ်ႉလႄႈ၊မၼ်းၸဝ်ႈဢွၵ်ႇၵႂႃႇၵႃႈတီႈဝၢၼ်ႈ ပေႇထၼိ၊ လူၺ်ႈၵၼ်တင်းတပႄးၸဝ်ႈသိပ်းသွင်ၵေႃႉဢေႃႈ။
ဝၼ်းမိူဝ်ႈၽုၵ်ႈမိူဝ်ႈဢၼ်ၶဝ်ၶိုၼ်းပွၵ်ႈဝၢၼ်ႈ ပေႇထၼိ၊ မႃးယူႇၼၼ်ႉမၼ်းၸဝ်ႈတွင်ႉမႆႈဢေႃႈ။-
မၼ်းၸဝ်ႈမုင်ႈႁၼ်တူၼ်ႈမၢၵ်ႇလိူဝ်ႇတီႈဢၼ်ၵႆၼၼ်ႉတူၼ်ႈၼိုင်ႈ၊ဢၼ်မႂ်မၼ်းသတ်ႉတဵမ်ဝႆႉယူႇၼၼ်ႉသေယဝ်ႉ၊ၸၢင်ႈၶႄးတၵ်းမီးမၢၵ်ႇမၼ်းသေႁူၺ်ႇလႄႈၵႂႃႇၸူးၵႃႈတီႈတူၼ်ႈၼၼ်ႉဢေႃႈ။ ၵူၺ်းၵႃႈ၊ၵွပ်ႈပိူဝ်ႈၶိင်ႇဢၼ်မၢၵ်ႇမၼ်းဢမ်ႇပႆႇထိုင်လႄႈလႆႈထူပ်းႁၼ်မႂ်မၼ်းၵူၺ်းၵူၺ်းသေယဝ်ႉ၊-
လၢတ်ႈတီႈတူၼ်ႈၼၼ်ႉလႄႈဝႃႈ၊ “တႄႇဢဝ်မိူဝ်ႈလဵဝ်ၼႆႉၵႂႃႇတႃႇသေႇဢမ်ႇထၢတ်ႇ၊ယႃႇပေႁႂ်ႈၽူႈလႂ်သေၵေႃႉသေၵူၼ်းလႆႈၵိၼ်မၢၵ်ႇမႂ်း၊” ဝႃႈၼင်ႇၼႆဢေႃႈ။ တပႄးၸဝ်ႈၸိူဝ်းၼၼ်ႉၵေႃႈငိၼ်းဢေႃႈ။
မိူဝ်ႈဢၼ်ၶဝ်ႁွတ်ႈထိုင်ၵႃႈတီႈဝဵင်း ယေႇရုသလႅမ်ႇ၊ ၸိုင်၊မၼ်းၸဝ်ႈၶဝ်ႈၵႂႃႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈသေယဝ်ႉ၊လိုပ်ႈႁေႃႈၵူၼ်းၸိူဝ်းဢၼ်ႁဵတ်းၵၢၼ်သိုဝ်ႉၵၢၼ်ၶၢႆၵႃႈတီႈၼၼ်ႈဢွၵ်ႇပႅတ်ႈ၊ဢီးလူမ်ႉၽိူၼ်ၶဝ်ၸိူဝ်းဢၼ်လႅၵ်ႈငိုၼ်းဢိၵ်ႇတင်းတင်ႇၶဝ်ၸိူဝ်းဢၼ်ၶၢႆၼူၵ်ႉတူႈၸိူဝ်းၼၼ်ႉပႅတ်ႈသေလႄႈ၊-
ဢမ်ႇပၼ်ဢၶႂၢင်ႉတီႈၽူႈလႂ်သေၵေႃႉသေၵူၼ်းတေႃႉဢဝ်သေၸိူဝ်ႉသေပိူင်ပႆၽႃႇလတ်းၵႂႃႇၵႃႈၼႂ်းပၢင်ႇဝၢင်းၵျွင်းပိၵ်ႈမၢၼ်ႇၸဝ်ႈ။-
မိူဝ်ႈၼၼ်ႉမၼ်းၸဝ်ႈသင်ႇသွၼ်သုင်းမႃႉလႄႈဝႃႈ၊ “ၵႃႈၼႂ်းၵျၢမ်းလိၵ်ႈတႅမ်ႈဝႆႉလႄႈဝႃႈ၊ ‘ႁိူၼ်းၵဝ်ၼႆႉတၵ်းလႆႈၶၢမ်ႇတၢင်းဢၼ်ႁွင်ႉႁဵၵ်ႈႁိူၼ်းတီႈဢၼ်ၵူၼ်းၵူႈၸိူဝ်ႉၵူႈမဵဝ်းသူးတွင်းဢေႃႈ၊’ ဝႃႈၼႆသေၵေႃႈ၊သူႁဵတ်းႁႂ်ႈမၼ်းပဵၼ်ထမ်ႈၸူၼ်ယဝ်ႉလူင်ပႄႇ၊” ဝႃႈၼင်ႇၼႆဢေႃႈ။
ယဵၸ်ႈပရေႃးႁဵၵ်ႈလူင်ၶဝ်တင်းသြႃႇမေႃၵျၢမ်းထမ်ႇမႃႉလႂ်လႆႈငိၼ်းလႄႈၵျၢမ်ႇႁႃႁႂ်ႈလႆႈဢဝ်မၼ်းၸဝ်ႈတၢႆဢေႃႈ။ ၶဝ်ဢမ်ႇႁတ်းႁဵတ်းတီႈမၼ်းၸဝ်ႈၵွပ်ႈပိူဝ်ႈၵူၼ်းတင်းလၢႆဢွၼ်ၵၼ်ဢၢမ်းဢေႃးလူၺ်ႈလွင်ႈတြႃးဢၼ်မၼ်းၸဝ်ႈသင်ႇသွၼ်သုင်းမႃႉပၼ်ယူႇၼၼ်ႉဢေႃႈ။
မိူဝ်ႈဢၼ်ၵၢင်ဝၼ်းတူၵ်းယဝ်ႉၸိုင်၊ၶဝ်ဢွၵ်ႇဝဵင်းၵႂႃႇဢေႃႈ။
ၼႂ်းဝၼ်းမိူဝ်ႈၽုၵ်ႈၶိင်ႇၵၢင်ၼႂ်ယၢမ်းမိူဝ်ႈဢၼ်ၶဝ်ၸွမ်းတၢင်းၵႂႃႇယူႇၼၼ်ႉ၊ၶဝ်ႁၼ်တူၼ်ႈမၢၵ်ႇလိူဝ်ႇတူၼ်ႈၼၼ်ႉႁႅင်ႈတၢႆၵႂႃႇထိုင်ၸဵမ်ႁၢၵ်ႈမၼ်းၼၼ်ႉဢေႃႈ။-
ပေႇတရု၊ ၶုၵ်းၸႂ်လႆႈလွင်ႈဢၼ်ပဵၼ်မႃးၼၼ်ႉလႄႈလဝ်ႈလၢတ်ႈဝႃႈ၊ “တူၺ်းၶႃႈလူး၊ၸဝ်ႈ။ တူၼ်ႈမၢၵ်ႇလိူဝ်ႇဢၼ်ၸဝ်ႈႁဝ်းၵိၼ်ႇဝႃႈၼၼ်ႉႁႅင်ႈတၢႆၵႂႃႇၶႃႈယဝ်ႉ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “သူမီးတၢင်းဢၼ်ယုမ်ႇမၢတ်ႈၼႂ်းၽြႃးပဵၼ်ၸဝ်ႈတႃႉ။-
ၵဝ်ဝႃႈတီႈၸိုဝ်ႈၸႂ်ႈမၼ်းတီႈသူၸမ်ႉ၊ၵေႃႉဢၼ်ၵၢင်းလွတ်ႈတင်းၸႂ်ယုမ်ႇၶိုင်ႈၼိုင်ႈဢမ်ႇယုမ်ႇၶိုင်ႈၼိုင်ႈသေလႄႈမီးတၢင်းယုမ်ႇမၢတ်ႈလွင်ႈဢၼ်တၵ်းပဵၼ်ၸွမ်းၼင်ႇဢၼ်မၼ်းယွၼ်းၼၼ်ႉလႄႈလၢတ်ႈတီႈလွႆလႄႈဝႃႈ၊ ‘ၶၢႆႉတီႈမႂ်းၵႂႃႇတူၵ်းၵႃႈၼႂ်းၼမ်ႉပၢင်ႇလၢႆႇတႃႉ၊’ ဝႃႈၼႆၸိုင်၊တၵ်းပဵၼ်ၸွမ်းဢမၢၼ်ႇၶၼ်ပဵၼ်ဢေႃႈ။-
ပိူဝ်ႈၼႆလႄႈၵဝ်ဝႃႈၸမ်ႉ၊ၵႃႈၼင်ႇဢၼ်သူလဝ်ႈယွၼ်းၵႃႈမီးတင်းသဵင်ႈၼၼ်ႉ၊ပေႃးယုမ်ႇမၢတ်ႈလႄႈဝႃႈတၵ်းလႆႈဢေႃႈဝႃႈၼႆၸိုင်၊သူတၵ်းလႆႈဢေႃႈ။-
ပိူဝ်ႈၼႆလႄႈမိူဝ်ႈဢၼ်သူၸုၵ်းသူးတွင်းယူႇၼၼ်ႉၸိုင်၊ပေႃးသူမီးတီႈဢၼ်တၵ်းတၢင်ႇဢပျတ်ႈပိူၼ်ႈၸိုင်၊ပွႆႇလွတ်ႈဢပျတ်ႈၶဝ်သေလႄႈသူးတွင်းတႃႉ။ ပေႃးသူပွႆႇလွတ်ႈဢပျတ်ႈၸိုင်၊ပေႃႈၸဝ်ႈသူဢၼ်မီးၵႃႈၼိူဝ်မိူင်းၵၢင်ႁၢဝ်ပုၼ်ႉတၵ်းပွႆႇလွတ်ႈဢပျတ်ႈသူဢေႃႈ။-
[ပေႃးသူဢမ်ႇပွႆႇလွတ်ႈဢပျတ်ႈပိူၼ်ႈၸိုင်၊ပေႃႈသူဢၼ်မီးယူႇၵႃႈၼိူဝ်မိူင်းၵၢင်ႁၢဝ်ပုၼ်ႉတၵ်းဢမ်ႇပွႆႇလွတ်ႈဢပျတ်ႈသူဢေႃႈ၊” ဝႃႈၼင်ႇၼႆဢေႃႈ။]
ၶဝ်သမ်ႉၶိုၼ်းႁွတ်ႈထိုင်ၵႃႈတီႈဝဵင်း ယေႇရုသလႅမ်ႇ၊ ထႅင်ႈယဝ်ႉၸင်ႇ၊မိူဝ်ႈဢၼ် ၸဝ်ႈယေႇသု၊ ပႆၵႂႃႇပႆမႃးယူႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉယဵၸ်ႈပရေႃးႁဵၵ်ႈ လူင်ၶဝ်တင်းၵူၼ်းမေႃၵျၢမ်းထမ်ႇမႃႉၵမ်ႈၽွင်ႈဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆမႃးၸူးမၼ်းၸဝ်ႈလႄႈ၊-
လၢတ်ႈဝႃႈ၊ “မႂ်းလႆႈဢၶႂၢင်ႉဢႃႇၼႃႇတီႈလႂ်မႃးလႄႈႁဵတ်းလွင်ႈတၢင်းၸိူဝ်းၼႆႉ။ ၽူႈလႂ်ပၼ်ဢၶႂၢင်ႉႁႂ်ႈလႆႈႁဵတ်းၸိူဝ်ႉၼင်ႇၼႆ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “ၵဝ်တၵ်းထၢမ်သူၵႂၢမ်းၶေႃႈၼိုင်ႈဢေႃႈ။ ပေႃးသူတွပ်ႇၵႂၢမ်းၵဝ်ၸိုင်၊ၵဝ်တၵ်းလၢတ်ႈလွင်ႈဢၼ်ၵဝ်လႆႈဢၶႂၢင်ႉဢႃႇၼႃႇတီႈလႂ်မႃးလႄႈႁဵတ်းလွင်ႈတၢင်းၸိူဝ်းၼႆႉတီႈသူဢေႃႈ။-
သြႃႇ ယူဝ်းႁၢၼ်ႇ၊ လႆႈဢၶႂၢင်ႉဢၼ်ပၼ်မၢင်ႇၵလႃႇပပ်ႉတိၸမ်ႇ ၼၼ်ႉၵႃႈတီႈလႂ်မႃး။ လႆႈဢၶႂၢင်ႉတီႈၽြႃးပဵၼ်ၸဝ်ႈမႃးႁိုဝ်း။ လႆႈတီႈၵူၼ်းႁိုဝ်း။ တွပ်ႇၵဝ်လူး၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၶဝ်ၼင်ႇၵၼ်ၵၼ်ၵေႃႉၼိုင်ႈလႄႈၵေႃႉၼိုင်ႈတိူင်ႇပၢင်ႇလၢတ်ႈၸႃၵၼ်လႄႈဝႃႈ၊ “ႁဝ်းတေလႆႈၶိုၼ်းတွပ်ႇဝႃႈၸိူဝ်ႉၼင်ႇႁိုဝ်။ ပေႃးႁဝ်းဝႃႈ၊ ‘လႆႈဢၶႂၢင်ႉတီႈၽြႃးပဵၼ်ၸဝ်ႈမႃး၊’ ဝႃႈၼႆၸိုင်၊မၼ်းတေၶိုၼ်းဝႃႈ၊ ‘ပေႃးၼႆၸိုင်၊ႁဵတ်းသင်လႄႈသူဢမ်ႇယုမ်ႇမၢတ်ႈ၊’ ဝႃႈၼႆယဝ်ႉ။-
ပေႃးႁဝ်းဝႃႈ၊ ‘လႆႈဢၶႂၢင်ႉတီႈၵူၼ်းမႃး၊’ ဝႃႈၼႆႁဝ်းတၵ်းဝႃႈလႆႈႁိုဝ်း၊” ၶဝ်ဝႃႈၼင်ႇၼႆ၊ၵွပ်ႈပိူဝ်ႈၵူဝ်ၵူၼ်းတင်းသဵင်ႈတင်းလူင်ဢၼ်ယုမ်ႇမၢတ်ႈဝႃႈ၊သြႃႇ ယူဝ်းႁၢၼ်ႇ၊ ပဵၼ်ပရေႃးၽႅတ်ႈ ဢေႃႈ။-
ပိူဝ်ႈၼႆလႄႈၶဝ်ၶိုၼ်းလၢတ်ႈတီႈမၼ်းၸဝ်ႈလႄႈဝႃႈ၊ “ႁဝ်းဢမ်ႇႁု၊” ဝႃႈၼင်ႇၼႆဢေႃႈ။ မၼ်းၸဝ်ႈၵေႃႈလၢတ်ႈလႄႈဝႃႈ၊ “ၵဝ်ၵေႃႈဢမ်ႇလၢတ်ႈပၼ်တီႈသူလွင်ႈတၢင်းဢၼ်ၵဝ်လႆႈဢၶႂၢင်ႉတၼ်းၶူဝ်းတီႈလႂ်မႃးလႄႈႁဵတ်းလွင်ႈတၢင်းၸိူဝ်းၼႆႉၼၼ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ၸဝ်ႈယေႇသု၊ လၢတ်ႈၵႂၢမ်းဢုပမႃႇတီႈၶဝ်လႄႈဝႃႈ၊ “မီးၵူၼ်းၵေႃႉၼိုင်ႈၽုၵ်ႇသူၼ်မၢၵ်ႇၸပိတ်ႉလႄႈလွမ်ႉႁူဝ်ႉဝႆႉ၊ၶုတ်းလုၵ်းဢၼ်ယဵပ်ႇမၢၵ်ႇၸပိတ်ႉဝႆႉ၊တႄႇတင်ႈထဵင်လၢင်းဝႆႉယဝ်ႉၸင်ႇ၊ပၼ်ပိူၼ်ႈၶၢတ်ႈႁဵတ်းသူၼ်ၼၼ်ႉသေယဝ်ႉ၊ၵႂႃႇတၢင်ႇဝၢၼ်ႈတၢင်ႇမိူင်းသေဢေႃႈ။-
မိူဝ်ႈဢၼ်ၶိင်ႇမၢၵ်ႇၸပိတ်ႉသုၵ်းယဝ်ႉၼၼ်ႉၸိုင်၊မၼ်းပွႆႇၸႂ်ႉၵူၼ်းဢွၼ်ႇမၼ်းၵႂႃႇၵႃႈတီႈၵူၼ်းႁဵတ်းသူၼ်ၸိူဝ်းၼၼ်ႉႁႂ်ႈလႆႈၵဵပ်းဢဝ်ၵႃႈၶၢတ်ႈသူၼ်မၢၵ်ႇၸပိတ်ႉၼၼ်ႉဢေႃႈ။-
ၶဝ်ၼၼ်ႉတိဢဝ်ၵူၼ်းဢွၼ်ႇၼၼ်ႉလႄႈပေႃႉယႅၼ်ႉယဝ်ႉၸင်ႇပွႆႇပႅတ်ႈတိၼ်လၢႆမိုဝ်းပဝ်ႇၵႂႃႇဢေႃႈ။-
လိုၼ်းၼၼ်ႉမၼ်းသမ်ႉပွႆႇၸႂ်ႉၵူၼ်းဢွၼ်ႇမၼ်းတၢင်ႇၵေႃႉၵႂႃႇထႅင်ႈသေယဝ်ႉ၊ၵူၼ်းႁဵတ်းသူၼ်ၸိူဝ်းၼၼ်ႉပေႃႉယႅၼ်ႉႁူဝ်မၼ်းလႄႈယႃႉသရေႇမၼ်းသေပွႆႇပႅတ်ႈၵႂႃႇဢေႃႈ။-
ၸဝ်ႈသူၼ်ၼၼ်ႉ၊သမ်ႉပွႆႇၸႂ်ႉၵူၼ်းဢွၼ်ႇမၼ်းတၢင်ႇၵေႃႉၵႂႃႇထႅင်ႈလႄႈၶဝ်ဢဝ်မၼ်းတၢႆဢေႃႈ။ တီႈၵူၼ်းဢွၼ်ႇတၢင်ႇၵေႃႉတၢင်ႇၵူၼ်းၼမ်ၼႃႇၵေႃႈ၊ၶဝ်ပေႃႉယႅၼ်ႉၵမ်ႈၽွင်ႈလႄႈဢဝ်တၢႆၵမ်ႈၽွင်ႈဢေႃႈ။-
ဢၼ်တေပွႆႇၸႂ်ႉၵႂႃႇထႅင်ႈၼၼ်ႉ၊ၵိုတ်းၵျၢၼ်ႇဝႆႉလုၵ်ႈၸၢႆးလဵဝ်ဢၼ်ႁၵ်ႉၼႃႇၼၼ်ႉၵူၺ်းယဝ်ႉလႄႈ၊မၼ်းပွႆႇၸႂ်ႉလုၵ်ႈၸၢႆးတူဝ်ၸဝ်ႈၵဝ်ႇၵႂႃႇပွၵ်ႈလိုၼ်းလင်သုတ်းလႄႈဝႃႈ၊ ‘ၶဝ်တၵ်းၵူဝ်ယမ်လုၵ်ႈၸၢႆးၵဝ်ဢေႃႈ၊’ ဝႃႈၼင်ႇၼႆဢေႃႈ။-
ၵူၺ်းၵႃႈ၊ၵူၼ်းႁဵတ်းသူၼ်ၸိူဝ်းၼၼ်ႉၵေႃႉၼိုင်ႈလႄႈၵေႃႉၼိုင်ႈတိူင်ႇပၢင်ႇၵၼ်လႄႈဝႃႈ၊ ‘ၵေႃႉၼႆႉပဵၼ်ၵေႃႉဢၼ်လႆႈႁပ်ႉဢမူၺ်ႇဢေႃႈ။ မႃးလႄႈႁဝ်းဢဝ်မၼ်းတၢႆတႃႉ။ ႁဝ်းတၵ်းလႆႈဢမူၺ်ႇမၼ်းဢေႃႈ၊’ ဝႃႈၼင်ႇၼႆသေလႄႈ၊-
တိဢဝ်မၼ်းသေယဝ်ႉ၊ဢဝ်တၢႆလႄႈထိမ်ႈဢွၵ်ႇၼွၵ်ႈသူၼ်သေဢေႃႈ။
“ပေႃးပဵၼ်ၸိူဝ်ႉၼင်ႇၼႆၸိုင်၊ၸဝ်ႈသူၼ်မၢၵ်ႇၸပိတ်ႉၼၼ်ႉတၵ်းႁဵတ်းၸိူဝ်ႉၼင်ႇႁိုဝ်။ မၼ်းတၵ်းမႃးယႃႉၽဵဝ်ႈပႅတ်ႈၶဝ်ၸိူဝ်းၼၼ်ႉသေယဝ်ႉ၊တၵ်းဢဝ်သူၼ်ၼၼ်ႉၶၢတ်ႈပၼ်တီႈပိူၼ်ႈတၢင်ႇၵေႃႉဢေႃႈ။-
သူယၢမ်ႈလႆႈၽတ်းဢၢၼ်ႇၼႂ်းၵျၢမ်းလိၵ်ႈဢၼ်ဝႃႈ၊ “‘မၢၵ်ႇႁိၼ်ဢၼ်ၵူၼ်းႁဵတ်းႁိူၼ်းတိူၵ်ႈပႄႇပႅတ်ႈဝႆႉဢမ်ႇမီးဢၵျူဝ်းၵႃႈသင်ၼၼ်ႉ၊ ၵမ်းလိုၼ်းၸိုင်၊တၵ်းပဵၼ်မၢၵ်ႇႁိၼ် ႁူဝ်ၸဵင်ႇတိူၵ်ႈမႃးဢေႃႈ။
လွင်ႈတၢင်းၼႆႉပဵၼ်ဢၼ်ထႃႇဝရႃႉၽြႃး ႁဵတ်းဝႆႉလႄႈ ပဵၼ်ဢၼ်လီဢၢမ်းသိုဝ်ႈၼႃႈတႂ်ႈတႃႁဝ်းဢေႃႈ၊’ ဝႃႈၼင်ႇၼႆၼၼ်ႉႁိုဝ်း၊” ဝႃႈၼင်ႇၼႆဢေႃႈ။
ၵူၼ်းၵႄႇၵူၼ်းႁူဝ် ၵျူး၊ ၶဝ်ၸိူဝ်းၼၼ်ႉႁုလွင်ႈဢၼ်မၼ်းၸဝ်ႈႁေႃးၵႂၢမ်းဢုပမႃႇၼႆႉၶတ်းၵၼ်တင်းၶဝ်ၼၼ်ႉသေလႄႈၵျၢမ်ႇႁႃႁႂ်ႈလႆႈတိဢဝ်မၼ်းၸဝ်ႈဢေႃႈ။ ၼႂ်းဝႃႈၼၼ်သေၵေႃႈ၊ပိူဝ်ႈဢၼ်ၶဝ်ၵူဝ်ၵူၼ်းဢၼ်ၸုဢၼ်တုမ်တင်းလၢႆလႄႈဢွၵ်ႇသေၵႃႈတီႈမၼ်းၸဝ်ႈၵႂႃႇသေဢေႃႈ။
မိူဝ်ႈၼၼ်ႉ၊ၶဝ်ပွႆႇၸႂ်ႉၵူၼ်းၵိူင်း ၽႃႇရိသႄး၊ ၶဝ်၊ဢိၵ်ႇတင်းတပႄးတပၢၼ်းၸဝ်ႈၽႃႉ ႁေႇရူတ်ႈ၊ ၵမ်ႈၽွင်ႈၵႂႃႇႁႂ်ႈလႆႈဢဝ်တင်းၵႂၢမ်းထၢမ်သေၸိူဝ်ႉသေပိူင်လႄႈၵၢင်ဢဝ်ၵႂၢမ်း ၸဝ်ႈယေႇသု၊ ဢေႃႈ။-
ၶဝ်ၸိူဝ်းၼၼ်ႉမႃးလႄႈလဝ်ႈထၢမ်ဝႃႈ၊ “သြႃႇၸဝ်ႈ။ ႁဝ်းၶႃႈႁုလွင်ႈဢၼ်ၸဝ်ႈႁဝ်းမီးသဵတ်ႈၸႃႇယူႇဢမ်ႇၵူဝ်ၽူႈလႂ်၊ဢမ်ႇထွၵ်ႈလူၺ်ႈၼႃႈၵူၼ်းလႄႈၼႄပျႃးတြႃးၽြႃးပဵၼ်ၸဝ်ႈၸိုဝ်ႈၸိုဝ်ႈၸႂ်ႈၸႂ်ႈယူႇၼၼ်ႉၶႃႈဢေႃႈ။ ၸွင်ႇတၢင်းဢၼ်ထၢမ်းၶွၼ်ႇတီႈၸဝ်ႈမုၼ်ယႂ်ႇၶုၼ်ႁေႃၶမ်း ၵေႇသႃႇ၊ ၼႆႉ၊မႅၼ်ႈၸွမ်းၼႄးဢုပတေႇတြႃးႁဝ်းၶႃႈယူႇႁိုဝ်း။ ထုၵ်ႇလီထၢမ်းၶွၼ်ႇၶႃႈႁိုဝ်း။ ဢမ်ႇထုၵ်ႇၶႃႈႁိုဝ်း။ တၵ်းလႆႈထၢမ်းၶႃႈႁိုဝ်း၊” ဝႃႈၼင်ႇၼႆဢေႃႈ။
မၼ်းၸဝ်ႈႁုႁၼ်တၢင်းၵျၢမ်ႇပွင်ပရိယႄႇၶဝ်ၼၼ်ႉလႄႈၶိုၼ်းလၢတ်ႈဝႃႈ၊ “ႁဵတ်းသင်လႄႈသူၵျၢမ်ႇဢၢင်ႈၵၢင်ဢဝ်ၵႂၢမ်းၵဝ်ၸိူဝ်ႉၼင်ႇႁိုဝ်။ ပၼ်ၶႅပ်းငိုၼ်းၶႅပ်းၼိုင်ႈႁႂ်ႈၵဝ်လႆႈတူၺ်းလူး၊” ဝႃႈၼင်ႇၼႆဢေႃႈ။
ၶဝ်ၵေႃႈဢဝ်ငိုၼ်းတေႇၼႃႇရီႇၶႅပ်းၼိုင်ႈပၼ်ဢေႃႈ။ မၼ်းၸဝ်ႈထၢမ်ၶဝ်လႄႈဝႃႈ၊ “ပုင်ႇႁၢင်ႈၼႆႉပဵၼ်ပုင်ႇႁၢင်ႈၽူႈလႂ်။ တႅမ်ႈဝႆႉၸိုဝ်ႈၽူႈလႂ်၊” ဝႃႈၼင်ႇၼႆဢေႃႈ။ ၶဝ်ၶိုၼ်းလဝ်ႈလၢတ်ႈလႄႈဝႃႈ၊ “ပဵၼ်ပုင်ႇႁၢင်ႈလႄႈပဵၼ်ၸိုဝ်ႈၸဝ်ႈမုၼ်ယႂ်ႇၶုၼ်ႁေႃၶမ်း ၵေႇသႃႇ၊ ၶႃႈဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၵေႃႈလၢတ်ႈလႄႈဝႃႈ၊ “ၸႂ်ႈယဝ်ႉ၊ပေႃးပဵၼ်ၼႆ။ ဢဝ်ၶွင်ၸဝ်ႈမုၼ်ယႂ်ႇၶုၼ်ႁေႃၶမ်း ၵေႇသႃႇ၊ ပၼ်ၶိုၼ်းတီႈၶုၼ်ႁေႃၶမ်း ၵေႇသႃႇ၊ တႃႉ။ ဢဝ်ၶွင်ၽြႃးပဵၼ်ၸဝ်ႈပၼ်ၶိုၼ်းတီႈၽြႃးပဵၼ်ၸဝ်ႈတႃႉ၊” ဝႃႈၼင်ႇၼႆဢေႃႈ။ ၶဝ်ဢွၼ်ၵၼ်ဢၢမ်းမၼ်းၸဝ်ႈၼႃႇလူင်လၢင်ဢေႃႈ။
မိူဝ်ႈၼၼ်ႉၵူၼ်း ၸတ်ႉတုၵႄး၊ ၵိူင်းဢၼ်ဢမ်ႇယုမ်ႇတၢင်းဢၼ်လုၵ်ႉၶိုၼ်းလိပ်းၼၼ်ႉၸိူဝ်းၼၼ်ႉ၊မႃးၸူးတီႈ ၸဝ်ႈယေႇသု၊ သေလႄႈလဝ်ႈထၢမ်လႄႈဝႃႈ၊-
“သြႃႇၸဝ်ႈတီႈၶႃႈ။ မူဝ်းသေႇ၊ ပိင်းၺၢပ်ႈဝႆႉတီႈႁဝ်းၶႃႈလႄႈဝႃႈ၊ပေႃးၵူၼ်းၸၢႆးမီးမေးလႄႈသမ်ႉဢမ်ႇမီးလုၵ်ႈလႄႈတၢႆၵႂႃႇ၊မေးမၼ်းၵိုတ်းဝႆႉၸိုင်၊ၵေႃႉဢၼ်ပဵၼ်ၼွင်ႉၸၢႆးၼၼ်ႉတၵ်းလႆႈသိုပ်ႇဢဝ်ပီႈပႂ်ႉမၼ်းၼၼ်ႉသေလႄႈႁႂ်ႈၸိူဝ်ႉၶိူဝ်းပီႈဢၢႆႈမၼ်းသိုပ်ႇၵႂႃႇဢမ်ႇႁႂ်ႈၶၢတ်ႇဝႃႈၼင်ႇၼႆၶႃႈဢေႃႈ။-
မိူဝ်ႈၼၼ်ႉ၊မီးၶဝ်ပီႈၼွင်ႉၸဵတ်းၵေႃႉၶႃႈဢေႃႈ။ ပီႈဢၢႆႈလူင်ၶဝ်ဢဝ်မေးသေၵေႃႈ၊ယင်းဢမ်ႇမီးလုၵ်ႈမီးလၢင်းလႄႈတၢႆၵႂႃႇၶႃႈဢေႃႈ။-
ၼွင်ႉၸၢႆးၵေႃႉတၢမ်းမၼ်းသိုပ်ႇဢဝ်မေးမၼ်းၼၼ်ႉလႄႈယင်းဢမ်ႇမီးလုၵ်ႈမီးလၢင်းတၢႆၵႂႃႇၼင်ႇၵဝ်ႇၶႃႈဢေႃႈ။ ႁဵတ်းၼင်ႇၼၼ်ၸႃႉၸဵမ်ၼွင်ႉၸၢႆးၵေႃႉထူၼ်ႈသၢမ်သိုပ်ႇၵႂႃႇ၊-
ၵေႃႉၼိုင်ႈယဝ်ႉၵေႃႉၼိုင်ႈတင်းၸဵတ်းၵေႃႉပီႈၼွင်ႉဢဝ်မႄႈယိင်းၼၼ်ႉလႄႈယင်းဢမ်ႇမီးလုၵ်ႈမီးလၢင်းသေလႄႈတၢႆၵႂႃႇၵူႈၵေႃႉၶႃႈယဝ်ႉ။ လိုၼ်းၼၼ်ႉမႄႈယိင်းၼၼ်ႉၵေႃႈတၢႆၵႂႃႇၶႃႈဢေႃႈ။-
ပိူဝ်ႈၼႆလႄႈၼႂ်းဝၼ်းဢၼ်လုၵ်ႉၶိုၼ်းလိပ်းၼၼ်ႉ၊မိူဝ်ႈဢၼ်ၶဝ်ၸိူဝ်းဢၼ်တၢႆၵႂႃႇယဝ်ႉၵူႈၵေႃႉၵူႈၵူၼ်းလုၵ်ႉၶိုၼ်းလိပ်းမႃးၸိုင်၊မႄႈယိင်းၼၼ်ႉတၵ်းလႆႈပဵၼ်မေးၵေႃႉလႂ်ၶႃႈ။ ၶဝ်တင်းၸဵတ်းၵေႃႉပီႈၼွင်ႉလႆႈဢဝ်မႄႈယိင်းၼၼ်ႉၼင်ႇၵၼ်ယဝ်ႉၶႃႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈတီႈၶဝ်လႄႈဝႃႈ၊ “သူၽိတ်းယဝ်ႉ။ ၵွပ်ႈလွင်ႈၸိူဝ်ႉၼင်ႇႁိုဝ်လႄႈဝႃႈၸမ်ႉ၊သူဢမ်ႇႁုၵျၢမ်းလိၵ်ႈၽြႃးပဵၼ်ၸဝ်ႈဢိၵ်ႇတင်းတၼ်းၶူဝ်းၽြႃးပဵၼ်ၸဝ်ႈလူင်ပႄႇ။-
ၼႂ်းမိူဝ်ႈဢၼ်လုၵ်ႉၵႃႈတၢင်းတၢႆၶိုၼ်းလိပ်းၼၼ်ႉၸိုင်၊ၶဝ်တၵ်းပဵၼ်ၸိူဝ်ႉၼင်ႇတမၢၼ်ႇၵၢင်ႁၢဝ်လႄႈဢမ်ႇမီးတၢင်းဢၼ်ဢဝ်ၽူဝ်ဢဝ်မေး။-
သူဢမ်ႇယၢမ်ႈလႆႈၽတ်းဢၢၼ်ႇၼႂ်းၵျၢမ်း မူဝ်းသေႇ၊ တွၼ်ႈဢၼ်လၢတ်ႈလူၺ်ႈယုမ်းၽႆးမႆႈဢၼ်ၽြႃးပဵၼ်ၸဝ်ႈမီးဢမိင်ႉတီႈမၼ်းလႄႈဝႃႈ၊ ‘ၵဝ်ပဵၼ်ၽြႃး ဢႃႇပြႃႇႁၢမ်ႇ၊ ၽြႃး ဢိၸၢၵ်ႈ၊ ၽြႃး ယႃႇၵုပ်ႈ၊ ဢေႃႈ၊’ ဝႃႈၼင်ႇၼႆၼၼ်ႉႁိုဝ်း။-
ၽြႃးပဵၼ်ၸဝ်ႈပဵၼ်ၽြႃးၶဝ်ၸိူဝ်းဢၼ်တၢႆယဝ်ႉဢမ်ႇၸႂ်ႈ။ ပဵၼ်ၽြႃးၶဝ်ၸိူဝ်းဢၼ်ဢသၢၵ်ႈလိပ်းယူႇဢေႃႈ။ ပိူဝ်ႈၼႆလႄႈသူၽိတ်းၼႃႇလူင်လၢင်ဢေႃႈ၊” ဝႃႈၼင်ႇၼႆဢေႃႈ။
သြႃႇမေႃၵျၢမ်းထမ်ႇမႃႉၵေႃႉၼိုင်ႈလႆႈငိၼ်းၶဝ်လၢတ်ႈၸႃထႅင်ႈၵၼ်ၼၼ်ႉလႄႈႁုႁၼ်လွင်ႈဢၼ် ၸဝ်ႈယေႇသု၊ ၶိုၼ်းတွပ်ႇၵူၼ်းၵိူင်း ၸတ်ႉတုၵႄး၊ ၶဝ်တီႈမႅၼ်ႈမၼ်းၼၼ်ႉသေလႄႈသုတ်ႉၸူးတီႈမၼ်းၸဝ်ႈသေလႄႈလဝ်ႈထၢမ်ဝႃႈ၊ “ၼႂ်းပိင်းၺၢပ်ႈတြႃးတင်းသဵင်ႈတင်းလူင်ၼႆႉပိင်းၺၢပ်ႈတြႃးဢၼ်လႂ်ယဵင်ႈၶႅၼ်းမျၢတ်ႈၼႃႇသေပိူၼ်ႈၶႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၶိုၼ်းလၢတ်ႈလႄႈဝႃႈ၊ “ၼႂ်းပိင်းၺၢပ်ႈတြႃးတင်းလၢႆပိင်းၺၢပ်ႈဢၼ်ယႂ်ႇမျၢတ်ႈၼႃႇသေပိူၼ်ႈၸမ်ႉ၊ ‘ဢူဝ်း၊မဵဝ်း ဢိသရေး၊ ႟။ ထွမ်ႇတႃႉ။ ထႃႇဝရႃႉၽြႃးပဵၼ်ၸဝ်ႈႁဝ်းပဵၼ်ထႃႇဝရႃႉၽြႃးသူႇလဵဝ်ၵူၺ်းဢေႃႈ။-
ၽြႃးပဵၼ်ၸဝ်ႈမႂ်းထႃႇဝရႃႉၽြႃးၸိုင်၊မႂ်းတၵ်းလႆႈပႃးတင်းႁူဝ်ၸႂ်မႂ်းသဵင်ႈသဵင်ႈ၊တင်းၸႂ်ဝိၺိၺ်ႇမႂ်းသဵင်ႈသဵင်ႈ၊တင်းဢဵၼ်ႁႅင်းမႂ်းသဵင်ႈသဵင်ႈ၊တင်းၵတ်ႉၶၼ်မႂ်းဢိၵ်ႇတင်းၺၢၼ်ႇမႂ်းတင်းသဵင်ႈတင်းလူင်သေလႄႈႁၵ်ႉဢေႃႈ၊’ ဝႃႈၼင်ႇၼႆပဵၼ်ပိင်းၺၢပ်ႈၶေႃႈတီႈၼိုင်ႈဢေႃႈ။-
လိူဝ်သေၼၼ်ႉပိင်းၺၢပ်ႈၶေႃႈတီႈသွင်ၸမ်ႉ၊ ‘ၵူၼ်းဢၼ်ၸၢပ်ႈသႅင်ႇၵၼ်တင်းမႂ်းၼၼ်ႉၸိုင်၊မႂ်းတၵ်းလႆႈႁၵ်ႉမိူၼ်ၸိူဝ်ႉၼင်ႇႁၵ်ႉတူဝ်ၸဝ်ႈၵဝ်ႇဢေႃႈ၊’ ဝႃႈၼင်ႇၼႆမီးဝႆႉယဝ်ႉ။ ပိင်းၺၢပ်ႈဢၼ်ယႂ်ႇမျၢတ်ႈၼႃႇသေပိင်းၺၢပ်ႈသွင်ပိူင်ၼႆႉဢမ်ႇမီးယဝ်ႉ၊” ဝႃႈၼင်ႇၼႆဢေႃႈ။
သြႃႇမေႃၵျၢမ်းထမ်ႇမႃႉၼၼ်ႉၵေႃႈလၢတ်ႈလႄႈဝႃႈ၊ “ၸႂ်ႈတႄႉၶႃႈယဝ်ႉ၊သြႃႇၸဝ်ႈ။ ၸဝ်ႈႁဝ်းဝႃႈၽြႃးပဵၼ်ၸဝ်ႈပဵၼ်သူႇလဵဝ်ၽြႃးဢေႃႈ။ လိူဝ်သေမၼ်းၸဝ်ႈၼၼ်ႉ၊ၽြႃးတၢင်ႇသူႇတၢင်ႇပႃးဢမ်ႇမီး၊ၸႂ်ႈတႄႉၶႃႈဢေႃႈ။-
ပိူဝ်ႈၼႆလႄႈၵူၼ်းတၵ်းလႆႈပႃးႁူဝ်ၸႂ်သဵင်ႈသဵင်ႈ၊တင်းၺၢၼ်ႇဢၼ်ၵတ်ႉဢၼ်ၶၼ်ၵႃႈမီးတင်းသဵင်ႈတင်းလူင်တင်းဢဵၼ်ႁႅင်းတင်းသဵင်ႈတင်းလူင်ႁၵ်ႉမၼ်းၸဝ်ႈ၊ဢိၵ်ႇတင်းတၵ်းလႆႈႁၵ်ႉၵူၼ်းဢၼ်ၸၢပ်ႈသႅင်ႇၵၼ်တင်းတူဝ်ၸဝ်ႈၵဝ်ႇၼၼ်ႉမိူၼ်ၸိူဝ်ႉၼင်ႇႁၵ်ႉတူဝ်ၸဝ်ႈၵဝ်ႇဢေႃႈ။ တၢင်းဢၼ်ၵမ်ၵျၢင်ႉၸွမ်းတြႃးသွင်ပိူင်ၼႆႉယဵင်ႈၶႅၼ်းမျၢတ်ႈၼႃႇသေတၢင်းဢၼ်ၽဝ်တူဝ်သတ်းသၢၵ်ႈလူႇ၊ဢိၵ်ႇတင်းတၢင်းလူႇၵူႈၸိူဝ်ႉၵူႇပိူင်ၼၼ်ႉၶႃႈဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈႁုႁၼ်လွင်ႈဢၼ်ၵေႃႉၼၼ်ႉမီးပိင်ႇၺႃႇသေလႄႈၶိုၼ်းလဝ်ႈလၢတ်ႈၸိူဝ်ႉၼင်ႇၼၼ်ႉလႄႈလၢတ်ႈလႄႈဝႃႈ၊ “မႂ်းဢမ်ႇၵႆၵၼ်တင်းမိူင်းၽြႃးပဵၼ်ၸဝ်ႈယဝ်ႉ၊” ဝႃႈၼင်ၼႆဢေႃႈ။ ဝၢႆးၼၼ်ႉ၊ၽူႈလႂ်ဢမ်ႇႁတ်းလဝ်ႈႁတ်းထၢမ်မၼ်းၸဝ်ႈထႅင်ႈသေၵေႃႉသေၵူၼ်း။
ၼႂ်းမိူဝ်ႈဢၼ် ၸဝ်ႈယေႇသု၊ သင်ႇသွၼ်ၵႃႈၼႂ်းၵျွင်းပိၵ်ႈမၢၼ်ႇၸဝ်ႈယူႇၼၼ်ႉ၊မၼ်းၸဝ်ႈလၢတ်ႈလႄႈဝႃႈ၊ “ ၸဝ်ႈၶရိၸ်ႈ၊ ပဵၼ်လုၵ်ႈ တႃႇဝိတ်ႈ၊ ဢေႃႈ၊ဝႃႈၼႆသြႃႇမေႃၵျၢမ်းထမ်ႇမႃႉၶဝ်တၵ်းဝႃႈလႆႈၸိူဝ်ႉၼင်ႇႁိုဝ်။-
တႃႇဝိတ်ႈ၊ ၼၼ်ႉဝိၺိၺ်ႇဢၼ်မူတ်းၸၢင်ႇၸဝ်ႈပဝ်ႇသႂၢင်းသႂ်ႇၵႃႈၼႂ်းမၼ်းလႄႈလၢတ်ႈဝႃႈ၊ “‘ထႃႇဝရႃႉၽြႃးမီးဢမိင်ႉတီႈၸဝ်ႈၵဝ်ၶႃႈ လႄႈဝႃႈၸမ်ႉ၊ၼင်ႈယူႇၽၢႆႇၶႂႃၵဝ်၊ တေႃႇထိုင်ႁွတ်ႈၵဝ်ဢဝ်ရၢၼ်ႇသူႇမႂ်းတင်းလၢႆၶျႃးတူၵ်းၵႃႈတႂ်ႈတိၼ်မႂ်းၼၼ်ႉတႃႉ၊’ ဢၼ်ဝႃႈၼၼ်ႉ။
တူဝ် တႃႇဝိတ်ႈ၊ ၼၼ်ႉယင်းႁွင်ႉ ၸဝ်ႈၶရိၸ်ႈ၊ လႄႈဝႃႈ၊ ‘ၸဝ်ႈၵဝ်ၶႃႈ၊’ ဝႃႈၼင်ႇၼႆယူႇၸိုင်၊ ၸဝ်ႈၶရိၸ်ႈ၊ ပဵၼ်လုၵ်ႈမၼ်းလႆႈၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။ မုၵ်ႉၵူၼ်းၸိူဝ်းၵူၼ်းၼမ်ၼႃႇထွမ်ႇဢဝ်တြႃး ၸဝ်ႈယေႇသု၊ ၸူမ်းၸူမ်းသိူဝ်းသိူဝ်းဢေႃႈ။
ၼႂ်းတြႃးဢၼ်မၼ်းၸဝ်ႈႁေႃးလၢတ်ႈၼၼ်ႉမၼ်းၸဝ်ႈဝႃႈ၊ “ႁဵတ်းသတိတူၺ်းသြႃႇမေႃၵျၢမ်းထမ်ႇမႃႉၶဝ်တႃႉ။ ၶဝ်ၼၼ်ႉၸၢင်ႈၼုင်ႈသိူဝ်ႈယၢဝ်းလူင်သေလႄႇလၢဝ်းယူႇ၊ၸၢင်ႈႁႂ်ႈပိူၼ်ႈတူင်ႉတၵ်ႉၶဝ်၊ႁႂ်ႈပိူၼ်ႈရူဝ်ႇသေႇၵူဝ်ယမ်ၶဝ်ၵႃႈၼႂ်းၵၢင်ၵၢတ်ႇယူႇ၊-
ၸၢင်ႈၼင်ႈတီႈၼင်ႈဢၼ်သုင်ဢၼ်မျၢတ်ႈၵႃႈၼႂ်းၸရွပ်ႈႁေႃးတြႃး၊ၵႃႈၼႂ်းပၢင်ပွႆးၸိူဝ်းၼၼ်ႉယူႇဢေႃႈ။-
ၶဝ်ၼၼ်ႉ၊ၸၢင်ႈပႄႉၵိၼ်လႄႈႁိမ်ႁူင်ႇႁိူၼ်းမႄႈမၢႆႈတင်းလၢႆသေလႄႈ၊ႁဵတ်းႁၢင်ႈပဵၼ်ၵူၼ်းလီၵူၼ်းငၢမ်းလႄႈၸၢင်ႈသူးတွင်းလူၺ်ႈၶေႃႈၵႂၢမ်းဢၼ်ယၢဝ်းၼႃႇလူင်လၢင်ဢေႃႈ။ ၶဝ်ၼၼ်ႉယဵင်ႈၶႅၼ်းတၵ်းလႆႈၶၢမ်ႇတၢမ်ႇဢၼ်ယႂ်ႇၼႃႇဢေႃႈ၊” ဝႃႈၼင်ႇၼႆဢေႃႈ။
ယၢမ်းမိူဝ်ႈဢၼ် ၸဝ်ႈယေႇသု၊ ၼင်ႈယူႇသိုဝ်ႈၼႃႈတိူၵ်ႈငိုၼ်းလူႇၵျွင်းပိၵ်ႈမၢၼ်ႇၸဝ်ႈယူႇၼၼ်ႉၸိုင်၊မၼ်းၸဝ်ႈပႂ်ႉတူၺ်းၵူၼ်းတင်းလၢႆဢၼ်ဢဝ်ငိုၼ်းဢဝ်တွင်းမႃးလူႇၼၼ်ႉဢေႃႈ။ ၵူၼ်းမၢၵ်ႈၵူၼ်းမီးၼမ်ၼႃႇသႂ်ႇငိုၼ်းလူႇၼမ်ၼႃႇဢေႃႈ။-
မိူဝ်ႈၼၼ်ႉ၊မႄႈမၢႆႈၵူၼ်းၽၢၼ်ၵေႃႉၼိုင်ႈမႃးသႂ်ႇငိုၼ်းတွင်းလႅင်သွင်ၶႅပ်းဢၼ်မီးၵႃႈၶၼ်မၼ်းပႅၵ်ႇၼိုင်ႈၸမ်ၸမ်ၼၼ်ႉဢေႃႈ။-
မၼ်းၸဝ်ႈႁွင်ႉဢဝ်တပႄးၸဝ်ႈတင်းလၢႆမႃးၸုတုမ်ၵၼ်လႄႈဝႃႈ၊ “ၵဝ်ဝႃႈတီႈၸိုဝ်ႈၸႂ်ႈမၼ်းၸမ်ႉ၊မႄႈမၢႆႈၵူၼ်းၽၢၼ်ၼႆႉသႂ်ႇငိုၼ်းၵႃႈၼႂ်းတိူၵ်ႈၽၼ်ႇတႃႇၼမ်ၼႃႇသေၶဝ်ၸိူဝ်းဢၼ်သႂ်ႇၼၼ်ႉတင်းသဵင်ႈတင်းမူတ်းဢေႃႈ။-
ၵွပ်ႈလွင်ႈၸိူဝ်ႉၼင်ႇႁိုဝ်လႄႈဝႃႈၸမ်ႉ၊ၶဝ်တင်းသဵင်ႈတင်းလူင်ၼၼ်ႉ၊ၽႄဢဝ်ၵႃႈၼႂ်းၸေးၸိမ်ႇဢၼ်ၶဝ်မီးၼမ်ၼႃႇၼၼ်ႉသႂ်ႇဢေႃႈ။ မႄႈမၢႆႈၼႆႉၸမ်ႉ၊ဢဝ်ၵႃႈၼႂ်းတၢင်းၽၢၼ်မၼ်းဢၼ်မၼ်းလူဝ်ႇလဵင်ႉဢသၢၵ်ႈမၼ်းၵႃႈမီးတင်းသဵင်ႈတင်းမူတ်းၼၼ်ႉသႂ်ႇယဝ်ႉ၊” ဝႃႈၼင်ႇၼႆဢေႃႈ။
ယၢမ်းမိူဝ်ႈဢၼ် ၸဝ်ႈယေႇသု၊ ယင်းတိုၵ်ႉဢွၵ်ႇၵျွင်းပိၵ်ႈမၢၼ်ႇၸဝ်ႈမႃးယူႇၼၼ်ႉ၊ၼႂ်းတပႄးၸဝ်ႈတင်းလၢႆၼၼ်ႉၵေႃႉၼိုင်ႈလဝ်ႈထၢမ်လႄႈဝႃႈ၊ “တူၺ်းၶႃႈလူး၊သြႃႇၸဝ်ႈ။ မၢၵ်ႇႁိၼ်ၸိူဝ်းၼၼ်ႉပဵၼ်မၢၵ်ႇႁိၼ်ယႂ်ႇမၢၵ်ႇႁိၼ်လူင်လႄႈ၊ႁိူၼ်းတိူၵ်ႈတင်းလၢႆၵေႃႈပဵၼ်တိူၵ်ႈယႂ်ႇတိူၵ်ႈလူင်ၶႃႈဢေႃႈ။” ဝႃႈၼင်ႇၼႆဢေႃႈ။
မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊ “မႂ်းႁၼ်တိူၵ်ႈယႂ်ႇတိူၵ်ႈလူင်ၸိူဝ်းၼႆႉယူႇယဝ်ႉဢမ်ႇၸႂ်ႈႁိုဝ်း။ မၢၵ်ႇႁိၼ်ၸိူဝ်းၼႆႉႁူၺ်ႇၼိုင်ႈလႄႈႁူၺ်ႇၼိုင်ႈတေဢမ်ႇလႆႈၵေႃႇၵၼ်ဝႆႉ။ တၵ်းလႆႈလုလႅဝ်ၵၢၼ်ႉတူၵ်းၵူႈႁူၺ်ႇဢေႃႈ၊” ဝႃႈၼင်ႇၼႆဢေႃႈ။
ၼႂ်းမိူဝ်ႈဢၼ် ၸဝ်ႈယေႇသု၊ ၼင်ႇယူႇၵႃႈၼိူဝ်လွႆ သၢၼ်ႇလုၼ်ႇ၊ လႄႈဝၢႆႇၼႃႈတေႃႇၵျွင်းပိၵ်ႈမၢၼ်ႇၸဝ်ႈယူႇၼၼ်ႉ၊ ပေႇတရု၊ယႃႇၵုပ်ႈ၊ယူဝ်းႁၢၼ်ႇ၊ ဢိၵ်ႇတင်း ဢၼ်ႇတရေႇ၊ မႃးလဝ်ႈထၢမ်မၼ်းၸဝ်ႈတဵတ်ႇတဵတ်ႇလႄႈဝႃႈ၊-
“လွင်ႈတၢင်းၸိူဝ်းၼႆႉတေပဵၼ်မႃးမိူဝ်ႈလႂ်ၶႃႈ။ မိူဝ်ႈဢၼ်လွင်ႈတၢင်းၸိူဝ်းၼႆႉတင်းသဵင်ႈတင်းလူင်ၸမ်တၵ်းပဵၼ်မႃးၼၼ်ႉၸိုင်၊တေမီးလၢၵ်ႈၶၼႃႇဢၼ်လႂ်ၶႃႈ။ ၸဝ်ႈႁဝ်းၶႅၼ်းတေႃႈလၢတ်ႈပၼ်တီႈႁဝ်းၶႃႈသေၵမ်းၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈၶိုၼ်းလၢတ်ႈလႄႈဝႃႈ၊ “ႁဵတ်းသတိတႃႉ။ ယႃႇပေႁႂ်ႈပိူၼ်ႈလႆႈပႅတ်ႉလႅၼ်ၸူဝ်းဢဝ်သူ။-
ၵူၼ်းၼမ်ၼႃႇတၵ်းပေႃႇမႃးလႄႈႁိမ်ဢဝ်ၸိုဝ်ႈသဵင်ၵဝ်သေလႄႈလၢတ်ႈဝႃႈ၊ ‘ၵဝ်ၼႆႉပဵၼ်ၸဝ်ႈၼၼ်ႉဢေႃႈ၊’ ဝႃႈၼင်ႇၼႆသေယဝ်ႉ၊ပႅတ်ႉလႅၼ်ၸူဝ်းဢဝ်ၵူၼ်းၼမ်ၼႃႇဢေႃႈ။-
ၼင်ႇၼၼ်လႄႈပေႃးသူလႆႈငိၼ်းသဵင်တိုၵ်းသိုၵ်းတီႈၸမ်လႂ်၊ဢိၵ်ႇတင်းၶၢဝ်ႇငၢဝ်းသိုၵ်းတီႈၵႆလႂ်ၸိုင်၊ယႃႇပေတူၵ်းၸႂ်။ လွင်ႈတၢင်းၸိူဝ်းၼႆႉတၵ်းလႆႈပဵၼ်မႃးဢေႃႈ။ ၼႂ်းဝႃႈၼၼ်သေၵေႃႈဢမ်ႇပႆႇပဵၼ်တီႈသုတ်းတီႈၵွႆ။-
ၵူၼ်းမဵဝ်းၼိုင်ႈလႄႈမဵဝ်းၼိုင်ႈ၊မိူင်းၼိုင်ႈလႄႈမိူင်းၼိုင်ႈတၵ်းလုၵ်ႉၽိုၼ်ႉၶတ်းတႃႉၵၼ်ဢေႃႈ။ တၵ်းပဵၼ်တၢင်းဢၼ်ဢိင်ႇသၼ်ႇၵူႈတီႈၵူႈလႅၼ်၊ဢိၵ်ႇတင်းတၢင်းဢၼ်ဢိုပ်းတၢင်းၵိၼ်လႂ်ဢေႃႈ။ လွင်ႈတၢင်းၸိူဝ်းၼႆႉပဵၼ်တၢင်းဢၼ်တႄႇၸႃႉတုၵ်ႉၶႃႉတၢင်းမႆႈၸႂ်ၶီၸႂ်ဢေႃႈ။
“သူႁဵတ်းသတိတီႈတူဝ်သူတႃႉ။ ၵွပ်ႈပိူဝ်ႈၸိူဝ်ႉႁိုဝ်လႄႈဝႃႈၼႆ၊ပိူၼ်ႈတၵ်းတိဢဝ်သူလႄႈဢၢပ်ႈၵႃႈၼႂ်းလုမ်းလူင်လႂ်၊တၵ်းပေႃႉယႅၼ်ႉသူၵႃႈၼႂ်းၸရွပ်ႈႁေႃးတြႃးလႂ်ဢေႃႈ။ ၵွပ်ႈပိူဝ်ႈၵဝ်လႄႈ၊သူတၵ်းလႆႈၸုၵ်းယူႇၽၢႆႇၼႃႈဢမၢတ်ႈၽွင်းမိူင်းလႂ်၊ဢိၵ်ႇတင်းၶုၼ်ႁေႃၶမ်းလႂ်၊ႁႂ်ႈသူလႆႈၶၢမ်ႇသၢၵ်ႈသေႇၽၢႆႇၼႃႈၶဝ်ၼၼ်ႉဢေႃႈ။-
ၼႂ်းဝႃႈၼၼ်သေၵေႃႈ၊ၸူဝ်ႈဢၼ်ၶိင်ႇယၢမ်းသုတ်းသဵင်ႈဢမ်ႇပႆႇႁွတ်ႈထိုင်ၼႆႉ၊ၶၢဝ်ႇတြႃးသိူဝ်းပျေႃႇတၵ်းလႆႈႁေႃးလၢတ်ႈၸွတ်ႇၵႂႃႇထိုင်တီႈၵူၼ်းမဵဝ်းတင်းသဵင်ႈတင်းလူင်ဢွၼ်တၢင်းဢေႃႈ။-
မိူဝ်ႈဢၼ်သူလႆႈၶၢမ်ႇတၢင်းဢၼ်တိၵႂႃႇဢၢပ်ႈၵႃႈၼႂ်းလုမ်းလူင်ၸိုင်၊ယႃႇပေမႆႈၸႂ်လူၺ်ႈလွင်ႈဢၼ်သူတၵ်းလႆႈလၢတ်ႈၵႂၢမ်းၵႃႈသင်ၼၼ်ႉ။ လၢတ်ႈၵႂၢမ်းဢၼ်သူလႆႈႁပ်ႉဢဝ်မိူဝ်ႈၶိင်ႇၼၼ်ႉၵူၺ်းတႃႉ။ ၵႂၢမ်းၼၼ်ႉပဵၼ်ၵႂၢမ်းဢၼ်သူလၢတ်ႈဢမ်ႇၸႂ်ႈ။ ပဵၼ်ၵႂၢမ်းဢၼ်ဝိၺိၺ်ႇမူတ်းၸၢင်ႇၸဝ်ႈလၢတ်ႈဢေႃႈ။-
ၶိင်ႇမိူဝ်ႈယၢမ်းၼၼ်ႉ၊ပီႈၼွင်ႉၼင်ႇၵၼ်ၵၼ်ၵေႃႉၼိုင်ႈတၵ်းဢဝ်ၵေႃႉၼိုင်ႈဢၢပ်ႈႁႂ်ႈလႆႈဢဝ်တၢႆဢေႃႈ။ ပေႃႈတၵ်းဢဝ်လုၵ်ႈလၢင်းဢၢပ်ႈဢေႃႈ။ လုၵ်ႈလၢင်းၵေႃႈတၵ်းလုၵ်ႉၽိုၼ်ႉတေႃႇပေႃႈမႄႈလႄႈႁဵတ်းႁႂ်ႈတၢႆဢေႃႈ။-
ၵွပ်ႈပိူဝ်ႈၵဝ်လႄႈၵူၼ်းၵူႈၵေႃႉတၵ်းၸင်းသူဢေႃႈ။ ၼႂ်းဝႃႈၼၼ်သေၵေႃႈၵေႃႉလႂ်သေဢမ်ႇဝႃႈ၊ၵေႃႉဢၼ်မၼ်ႈၶိူင်ႇတေႃႇထိုင်ႁွတ်ႈတီႈသုတ်းတီႈၵွႆၼၼ်ႉ၊ၵေႃႉၼၼ်ႉတၵ်းႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ဢေႃႈ။
“သူတၵ်းလႆႈႁၼ်၊ ‘လွင်ႈတၢင်းဢၼ်ယႃႉလုဢၼ်လီႁင်းဢဵတ်ႇသဵတ်ႇ၊’ ၼၼ်ႉၸုၵ်းယူႇၵႃႈၼႂ်းတီႈဢၼ်ဢမ်ႇထုၵ်ႇလီယူႇၼၼ်ႉဢေႃႈ။ (ၵေႃႉဢၼ်ၽတ်းဢၢၼ်ႇတြႃးၼႆႉၼၼ်ႉၸိုင်၊ၶႂ်ႈဝႃႈသင်ၼႆႁႂ်ႈမၼ်းႁုထွမ်ႇတႃႉ။) မိူဝ်ႈဢၼ်လႆႈႁၼ်ၸိူဝ်ႉၼင်ႇၼၼ်ၸိုင်၊ႁႂ်ႈၶဝ်ၸိူဝ်းဢၼ်မီးၼႂ်းမိူင်း ယုတႃႉ၊ ၼႆႉပၢႆႈၶိုၼ်ႈၵႂႃႇၵႃႈတီႈၼိူဝ်လွႆပုၼ်ႉတႃႉ။-
ယႃႇႁႂ်ႈၵေႃႉဢၼ်မီးၵႃႈၼိူဝ်လင်ၶႃးႁိူၼ်း ၼၼ်ႉလူင်းၶဝ်ႈႁိူၼ်းၵႂႃႇဢဝ်သေၸိူဝ်ႉသေပိူင်။-
ယႃႇႁႂ်ႈၵေႃႉဢၼ်မီးၵႃႈတီႈတူင်ႈၼႃးၼၼ်ႉၶိုၼ်းမိူဝ်းၵႃႈတီႈႁိူၼ်းၵႂႃႇဢဝ်ၶူဝ်းၼုင်ႈတၢင်းမႆမၼ်း။-
ၼႂ်းဝၼ်းၼၼ်ႉ၊မႄႈယိင်းဢၼ်ပႃးပတိၵ်ႈသၼ်ႇထေႇတင်းမႄႈယိင်းဢၼ်မီးလုၵ်ႈဢွၼ်ႇလႅင်၊ဢၼ်ဢမ်ႇပႆႇၽၢတ်ႇၼူမ်းတင်းလၢႆ၊တေပဵၼ်ဢၼ်ၵိၼ်းၸႂ်ၼႃႇလူင်လၢင်ဢေႃႈ။-
သူးတွင်းတီႈၽြႃးပဵၼ်ၸဝ်ႈ၊ၼင်ႇႁိုဝ်လွင်ႈတၢင်းၸိူဝ်းၼၼ်ႉတၵ်းဢမ်ႇလႆႈတူၵ်းမိူဝ်ႈၶိင်ႇႁိူဝ်ႉၶိင်ႇၽူၼ်ၼၼ်ႉတႃႉ။-
လွင်ႈမၼ်းၸမ်ႉ၊ၽေးတုၵ်ႉၶႃႉမဵဝ်းၼႆႉ၊ၸႃႉၸဵမ်မိူဝ်ႈတႄႇၸႃႉၵမ်ႇၽႃႇဢၼ်ၽြႃးပဵၼ်ၸဝ်ႈၽၢၼ်ႇသၢင်းႁဵတ်းပဵၼ်ၼၼ်ႉ၊ႁၢၼ်ႉတေႃႇမိူဝ်ႈလဵဝ်ၼႆႉဢမ်ႇတွၼ်ႉပဵၼ်သေပွၵ်ႈလႄႈၵမ်းလိုၼ်းၵေႃႈတၵ်းဢမ်ႇပဵၼ်ဢေႃႈ။-
ၵူၺ်းၵႃႈ၊ၽြႃးပဵၼ်ၸဝ်ႈႁႂ်ႈမိုဝ်ႉဝၼ်းၶိင်ႇၵႃႇလႃႉၸိူဝ်းၼၼ်ႉပွတ်းဢေႃႈ။ ပေႃးမၼ်းၸဝ်ႈယင်းဢမ်ႇႁႂ်ႈၶိင်ႇၵႃႇလႃႉၼၼ်ႉပွတ်းၸိုင်၊ၽူႈလႂ်ဢမ်ႇလွတ်ႈလႆႈသေၵေႃႉသေၵူၼ်း။ ထွၵ်ႈလူၺ်ႈၶဝ်ၸိူဝ်းဢၼ်မၼ်းၸဝ်ႈလိူၵ်ႈၵဵပ်းဢဝ်ဝႆႉၼၼ်ႉလႄႈမၼ်းၸဝ်ႈႁႂ်ႈမိုဝ်ႉဝၼ်းၸိူဝ်းၼၼ်ႉပွတ်းဢေႃႈ။
“မိူဝ်ႈၼၼ်ႉ၊ပေႃးသေၵေႃႉသေၵူၼ်းလၢတ်ႈတီႈသူလႄႈဝႃႈ၊ ‘တူၺ်းလူး။ ၸဝ်ႈၶရိၸ်ႈ၊ မီးတီႈၼႆႈဢေႃႈ။ မီးတီႈၼၼ်ႈဢေႃႈ၊’ ဝႃႈၼင်ႇၼႆၸိုင်၊ယႃႇပေယုမ်ႇၵႂၢမ်းမၼ်း။-
ၵူၼ်းဢၼ်ႁဵတ်းႁၢင်ႈ ၸဝ်ႈၶရိၸ်ႈ၊ ဢိၵ်ႇတင်းသြႃႇႁဵတ်းႁၢင်ႈပရေႃးၽႅတ်ႈတင်းလၢႆတၵ်းပေႃႇမႃးသေလႄႈႁဵတ်းၼႄၼိမိၵ်ႈလၢၵ်ႈၶၼႃႇဢၼ်လၢၵ်ႇဢၼ်လၢႆးဢိၵ်ႇတင်းလွင်ႈတၢင်းဢၼ်လီဢၢမ်းတင်းလၢႆလႄႈပႅတ်ႉလႅၼ်ဢမ်ႇၵႃး၊ပေႃးပဵၼ်လႆႈၸိုင်၊တၵ်းပႅတ်ႉလႅၼ်ၶဝ်ၸိူဝ်းဢၼ်ၽြႃးပဵၼ်ၸဝ်ႈလိူၵ်ႈၵဵပ်းဢဝ်တင်းလၢႆၼၼ်ႉဢေႃႈ။-
ႁဵတ်းသတိတီႈတူဝ်သူတႃႉ။ တူၺ်းလူး။ ၸူဝ်ႈဢၼ်လွင်ႈတၢင်းၸိူဝ်းၼႆႉဢမ်ႇပႆႇပဵၼ်ၸိုင်၊ၵဝ်လၢတ်ႈဝႆႉဢွၼ်တၢင်းယဝ်ႉဢေႃႈ။
“ၼႂ်းၶိင်ႇမိုဝ်ႉဝၼ်းဝၢႆးသေၽေးတုၵ်ႉၶႃႉပူၼ်ႉယဝ်ႉၼၼ်ႉ၊ၵၢင်ဝၼ်းတၵ်းလပ်းသိင်ႇၵႂႃႇ၊လိူၼ်ၵေႃႈတၵ်းဢမ်ႇပၼ်ဢၼ်လႅင်းမၼ်းယဝ်ႉ။-
လၢဝ်တင်းလၢႆတၵ်းႁူင်ႈတၵ်းတူၵ်းသေတွင်ႉၽႃႉလႄႈတၼ်းၶူဝ်းၵၢင်ႁၢဝ်တင်းလၢႆၵေႃႈတၵ်းသၼ်ႇၶွၼ်းဢေႃႈ။-
မိူဝ်ႈၼၼ်ႉ၊ ၸဝ်ႈလုၵ်ႈၵူၼ်း၊ တၵ်းပေႃႇမႃး၊ပႃးတင်းမုၼ်ၽုင်းတၼ်းၶူဝ်းဢႃႇၼုၽေႃႇၸဝ်ႈဢၼ်ယႂ်ႇၼႃႇ၊မႃးၵႃႈၼိူဝ်မွၵ်ႇၵုမ်ႈဢေႃႈ။-
မၼ်းၸဝ်ႈတၵ်းပွႆႇၸႂ်ႉတမၢၼ်ႇၵၢင်ႁၢဝ်မၼ်းၸဝ်ႈတင်းလၢႆ၊ၵႂႃႇၵႃႈတီႈသီႇၸဵင်ႇပႅတ်ႇၼႃႈလေႃးၵႃႉ၊ႁႂ်ႈလႆႈႁွင်ႉဢဝ်ၶဝ်ၸိူဝ်းဢၼ်ၽြႃးပဵၼ်ၸဝ်ႈလိူၵ်ႈၵဵပ်းဢဝ်ဝႆႉၼၼ်ႉ၊လုၵ်ႉသေၵူႈတီႈၵူႈလႅၼ်တႂ်ႈၽႃႉၵၢင်ႁၢဝ်မႃးၸုတုမ်ၵၼ်ဢေႃႈ။
“သွၼ်ဢဝ်တီႈလွင်ႈတၢင်းဢၼ်ပဵၼ်မႃးၵႃႈတီႈတူၼ်ႈမၢၵ်ႇလိူဝ်ႇၵၼ်တႃႉ။ မိူဝ်ႈဢၼ်ၵိင်ႇမၼ်းၶႃႈမၼ်းပူင်ႇၽိူဝ်လႄႈဢွၵ်ႇမႂ်ၼုမ်ႇမႃးယူႇၼၼ်ႉၸိုင်၊သူႁုလွင်ႈဢၼ်ၶိင်ႇႁႅင်ႈၸမ်ႁွတ်ႈမႃးယဝ်ႉၼၼ်ႉဢေႃႈ။-
မိူၼ်ၼင်ႇၼၼ်၊မိူဝ်ႈဢၼ်သူလႆႈႁၼ်လွင်ႈတၢင်းၸိူဝ်းၼႆႉပဵၼ်မႃးယူႇၼၼ်ႉၸိုင်၊ႁုလွင်ႈၶိင်ႇဢၼ် ၸဝ်ႈလုၵ်ႈၵူၼ်း၊ ႁွတ်ႈၸမ်မႃးထိုင်ႁိမ်းႁူးၽၵ်းတူယဝ်ႉၼၼ်ႉတႃႉ။-
ၵဝ်ဝႃႈတီႈၸိုဝ်ႈၸႂ်ႈမၼ်းၸမ်ႉ၊ၸိူဝ်ႉၵူၼ်းၶိူဝ်းၵူၼ်းမဵဝ်းၼႆႉ၊တၵ်းဢမ်ႇလႆႈသုတ်းလႆႈႁၢႆတေႃႇထိုင်လွင်ႈတၢင်းၸိူဝ်းၼႆႉ၊လႆႈပဵၼ်မႃးၸေးမူတ်းယဝ်ႉၼၼ်ႉဢေႃႈ။
ၵၢင်ႁၢဝ်တင်းလိၼ်မိူင်းတၵ်းပူၼ်ႉၵႂႃႇဢေႃႈ။ ၵႂၢမ်းၵဝ်ၼႆႉတၵ်းဢမ်ႇႁၢႆလၢႆ။
“ၶိင်ႇၼႃႇရီႇဝၼ်းဢၼ်တၵ်းမႃးၼၼ်ႉဢမ်ႇမီးၽူႈလႂ်ႁုလႆႈ။ တမၢၼ်ႇၵၢင်ႁၢဝ်တင်းလၢႆဢမ်ႇႁု။ လုၵ်ႈၸဝ်ႈၵေႃႈဢမ်ႇႁု။ ပေႃႈၸဝ်ႈၵူၺ်းႁုဢေႃႈ။-
ပိူဝ်ႈဢၼ်သူဢမ်ႇႁုလွင်ႈဢၼ်ၶိင်ႇမိုဝ်ႉဝၼ်းၼၼ်ႉ၊တၵ်းပဵၼ်မိူဝ်ႈလႂ်ၼၼ်ႉလႄႈတူင်ႉတိုၼ်ႇပႂ်ႉထႃႈယူႇတႃႉ။-
ဢုပမႃႇၸမ်ႉ၊လွင်ႈတၢင်းၼႆႉမိူၼ်ၸိူဝ်ႉၼင်ႇဢၼ်ၵူၼ်းၵေႃႉၼိုင်ႈ၊မၼ်းဢဝ်ဢၶႂၢင်ႉဢႃႇၼႃႇမၼ်းဢၢပ်ႈပၼ်ဝႆႉတီႈၵူၼ်းဢွၼ်ႇမၼ်းတင်းလၢႆ၊ၶၢၼ်းဝႆႉပၼ်ၼႃႈၵၢၼ်ပုၼ်ႈဢၼ်တၵ်းႁဵတ်းႁင်းၽႂ်ႁင်းမၼ်းလႄႈသင်ႇလၢတ်ႈဝႆႉတီႈၵူၼ်းပႂ်ႉၽၵ်းတူႁႂ်ႈပႂ်ႉယူႇလီလီသေယဝ်ႉ၊ဢွၵ်ႇတႃႈဢွၵ်ႇတၢင်းၵႂႃႇၼၼ်ႉဢေႃႈ။-
ပိူဝ်ႈၼႆလႄႈပိူဝ်ႈဢၼ်သူဢမ်ႇႁုၸဝ်ႈႁိူၼ်းတၵ်းမႃးၶိုၼ်းၶိင်ႇလႂ်၊တၵ်းပဵၼ်ၶိင်ႇႁူဝ်ၶမ်ႈႁိုဝ်း၊တၵ်းပဵၼ်ၶိင်ႇတဵင်ႈၶိုၼ်းႁိုဝ်း၊တၵ်းပဵၼ်ၶိင်ႇၵႆႇၶၼ်ႁိုဝ်း၊တၵ်းပဵၼ်ၶိင်ႇႁူဝ်မိူင်းသႂ်ႁိုဝ်းဢမ်ႇႁုၼၼ်ႉလႄႈတူင်ႉတိုၼ်ႇပႂ်ႉထႃႈယူႇတႃႉ။-
ၵူဝ်မၼ်းၽုတ်းၽၢတ်းပေႃႇမႃးလႄႈထူပ်းႁၼ်သူၼွၼ်းလပ်းယူႇၼၼ်ႉဢေႃႈ။-
ဢၼ်ၵဝ်ဝႃႈတီႈသူလႄႈဝႃႈ၊ ‘ပႂ်ႉထႃႈယူႇတႃႉ၊’ ဝႃႈၼႆၼၼ်ႉၵဝ်ဝႃႈတီႈၵူၼ်းတင်းသဵင်ႈတင်းလူင်ဢေႃႈ၊” ဝႃႈၼင်ႇၼႆဢေႃႈ။
ၵမ်းၼႆႉပေႃးပူၼ်ႉသေသွင်ဝၼ်းၸိုင်၊တေမီးပွႆး ပသၶႃႇ၊ ဢိၵ်ႇတင်းပွႆးၵိၼ်ၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈၼၼ်ႉဢေႃႈ။ ယဵၸ်ႈပရေႃးႁဵၵ်ႈ လူင်ၶဝ်၊ဢိၵ်ႇတင်းသြႃႇမေႃၵျၢမ်းထမ်ႇမႃႉၶဝ်တင်းလၢႆ၊ဢွၼ်ၵၼ်ၵျၢမ်ႇႁႃလွင်ႈႁႃတၢင်းဢၼ်တၵ်းလွမ်တိဢဝ် ၸဝ်ႈယေႇသု၊ သေလႄႈဢဝ်တၢႆဢေႃႈ။-
ၼႂ်းဝႃႈၼၼ်သေၵေႃႈၶဝ်ဝႃႈ၊ “ၵူဝ်ၵူၼ်းတင်းလၢႆတၵ်းလုၵ်ႉၽိုၼ်ႉလႄႈၼႂ်းၸူဝ်ႈပွႆးၼႆႉယႃႇပေၼႅတ်ႈႁဵတ်းလူးၵွၼ်ႇ၊” ဝႃႈၼင်ႇၼႆဢေႃႈ။
ၼႂ်းမိူဝ်ႈဢၼ် ၸဝ်ႈယေႇသု၊ မီးယူႇတီႈဝၢၼ်ႈ ပေႇထၼိ၊ ၼႂ်းႁိူၼ်း သိမုၼ်ႇ၊ ဢၼ်ယၢမ်ႈပဵၼ်တုတ်ႈ ၼၼ်ႉ၊မၼ်းၸဝ်ႈၼင်ႈယူႇၵႃႈတီႈၽိူၼ်ၶဝ်ႈယူႇၼၼ်ႉ၊မႄႈယိင်းၵေႃႉၼိုင်ႈဢဝ်တဝ်ႈႁိၼ်ၶၢဝ်ဢၼ်တဵမ်ဝႆႉတင်းၼမ်ႉမၼ်းၼၢမ်ႇသႃႇႁွမ်ၸႅတ်ႈၸႅတ်ႈ၊ဢၼ်ထိူၵ်ႈၵႃႈယႂ်ႇၼႃႇၼၼ်ႉမႃးတီႈမၼ်းၸဝ်ႈသေယဝ်ႉ၊မၼ်းထုပ်ႉတႅၵ်ႇယဝ်ႉၸင်ႇ၊သွၼ်းလေႃႇထွၵ်ႇသႂ်ႇၵႃႈၼိူဝ်ႁူဝ်မၼ်းၸဝ်ႈဢေႃႈ။-
ၵူၺ်းၵႃႈ၊မီးၵူၼ်းၵမ်ႈၽွင်ႈၶႂ်ႈၸႃႉၼႃႇလူင်လၢင်လႄႈလၢတ်ႈၸႃတီႈၵၼ်လႄႈဝႃႈ၊ “ႁဵတ်းၸိူဝ်ႉႁိုဝ်လႄႈႁႂ်ႈၼမ်ႉမၼ်းႁွမ်ၼႆႉသုမ်းပႅတ်ႈလၢႆလၢႆၸိူဝ်ႉၼင်ႇႁိုဝ်။-
ထုၵ်ႇလီဢဝ်ၵႂႃႇၶၢႆလူၺ်ႈၵႃႈၶၼ်ဢၼ်တူၵ်းတေႇၼႃႇရီႇ သၢမ်ပၢၵ်ႇလိူဝ်လိူဝ်သေလႄႈဢဝ်ငိုၼ်းၼၼ်ႉၵႂႃႇၽေးၸွၼ်းတီႈၵူၼ်းၽၢၼ်လႂ်ဢေႃႈ၊” ဝႃႈၼင်ႇၼႆလႄႈတၢင်ႇဢပျတ်ႈတီႈမႄႈယိင်းၼၼ်ႉဢေႃႈ။
ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “ယႃႇမၼ်းတႃႉ။ သူယႃႉယုၵ်ႉမၼ်းႁဵတ်းသင်။ မၼ်းႁဵတ်းလွင်ႈတၢင်းဢၼ်လီငၢမ်းၵႃႈတီႈၵဝ်ယဝ်ႉ။-
ၵူၼ်းၽၢၼ်ၸိုင်၊မီးယူႇလူၺ်ႈၵၼ်တင်းသူသေႇသေႇဢေႃႈ။ မိူဝ်ႈလႂ်သေဢမ်ႇဝႃႈ၊ၵႃႈၼင်ႇဢၼ်သူမီးၸေႇတၼႃႇၼၼ်ႉသူႁဵတ်းၵျေးၸူးတီႈၶဝ်လႆႈယူႇဢေႃႈ။ ၵဝ်ၸမ်ႉ၊မီးယူႇတီႈသူသေႇသေႇဢမ်ႇၸႂ်ႈ။-
မၼ်းလႆႈႁဵတ်းၵႃႈၼင်ႇဢၼ်မၼ်းတၢတ်ႈၼိူင်ႇၼၼ်ႉယဝ်ႉ။ မၼ်းဢဝ်ၼမ်ႉမၼ်းႁွမ်တႃးတူဝ်ၵဝ်ႁႂ်ႈလႆႈမႄးႁႅၼ်းဝႆႉထႃႈပုၼ်ႈဢၼ်တၵ်းသၢင်းၵျူဝ်ႇၵဝ်ဢေႃႈ။-
ၵဝ်ဝႃႈတီႈၸိုဝ်ႈၸႂ်ႈမၼ်းတီႈသူၸမ်ႉ၊ၵႃႈတီႈဢၼ်ႁေႃးလၢတ်ႈၶၢဝ်ႇတြႃးသိူဝ်းပျေႃႇၸဝ်ႈၵႃႈၼိူဝ်လိၼ်မိူင်းၵူႈတီႈၵူႈလႅၼ်ၼၼ်ႉ၊တၵ်းလႆႈမွၵ်ႇလၢတ်ႈလွင်ႈဢၼ်မၼ်းႁဵတ်းၼႆႉပုၼ်ႈတႃႇတေၶုၵ်းၸႂ်လႆႈၶႆႈၸႂ်ထူပ်းမၼ်းဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ယုတႃႉဢိသၵႃႇရေႇဢုတ်ႈ၊ ဢၼ်ၶဝ်ႈပႃးၼႂ်းတမၢၼ်ႇၸဝ်ႈသိပ်းသွင်ပႃးၼၼ်ႉၵႂႃႇၸူးယဵၸ်ႈပရေႃးႁဵၵ်ႈလူင်ၶဝ်၊ႁႂ်ႈလႆႈဢဝ် ၸဝ်ႈယေႇသု၊ ဢၢပ်ႈၼႂ်းမိုဝ်းၶဝ်ဢေႃႈ။-
ၶဝ်ၼၼ်ႉ၊ငိၼ်းၸူမ်းၼႃႇလႄႈဝႆႉၵတိဢၼ်တၵ်းပၼ်ငိုၼ်းတီႈမၼ်းဢေႃႈ။ ပိူဝ်ႈၼႆလႄႈမၼ်းၵျၢမ်ႇႁႃဢဝ်ဢၶႂၢင်ႉဢယေးဢၼ်သၢင်ႇထုၵ်ႇ၊ႁႂ်ႈလႆႈဢဝ်မၼ်းၸဝ်ႈဢၢပ်ႈပၼ်တီႈၶဝ်ၼၼ်ႉယူႇဢေႃႈ။
ဝၼ်းတီႈၼိုင်ႈၼႂ်းၸဵတ်းဝၼ်း၊ပဵၼ်ပွႆးၵိၼ်ၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈ၊ဝၼ်းဢၼ်ႁႅမ်သူဝ်း ပသၶႃႇ၊ ၼၼ်ႉ၊တပႄးၸဝ်ႈၸိူဝ်းၼၼ်ႉလဝ်ႈထၢမ်တီႈ ၸဝ်ႈယေႇသု၊ လႄႈဝႃႈ၊ “ၸဝ်ႈႁဝ်းၶႂ်ႈႁႂ်ႈႁဝ်းၶႃႈၵႂႃႇမႄးႁႅၼ်းဝႆႉပုၼ်ႈဢၼ်ၸဝ်ႈႁဝ်းတၵ်းၵိၼ်ပွႆး ပသၶႃႇ၊ ၼၼ်ႉၵႃႈတီႈလႂ်ၶႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈပွႆႇတပႄးၸဝ်ႈသွင်ၵေႃႉၵႂႃႇလႄႈလၢတ်ႈဝႃႈ၊ “သူသွင်ၵေႃႉၶဝ်ႈၵႂႃႇၵႃႈၼႂ်းဝဵင်းတႃႉ။ ၵူၼ်းဢၼ်တဵင်ႇမေႃႈၼမ်ႉၼၼ်ႉၵေႃႉၼိုင်ႈ၊တၵ်းမႃးထူပ်းၺႃးသူဢေႃႈ။ ၸွမ်းမၼ်းၵႂႃႇ၊-
ၶဝ်ႈႁိူၼ်းဢၼ်မၼ်းၶဝ်ႈၵႂႃႇၼၼ်ႉသေလႄႈလၢတ်ႈတီႈၸဝ်ႈႁိူၼ်းၼၼ်ႉလႄႈဝႃႈ၊ ‘သြႃႇထၢမ်ဝႃႈ၊လုၵ်းၶႅၵ်ႇပုၼ်ႈၵဝ်ဢိၵ်ႇတင်းတပႄးၵဝ်တင်းလၢႆ၊တၵ်းၵိၼ်ပွႆး ပသၶႃႇ၊ ၼၼ်ႉမီးၵႃႈလႂ်၊’ ဝႃႈၼင်ႇၼႆတႃႉ။-
ၵေႃႉၼၼ်ႉ၊တၵ်းၼႄပၼ်လုၵ်းလူင်ႁၢၼ်ႉၼိူဝ်ဢၼ်သိူဝ်ႇဝႆႉႁႅၼ်းဝႆႉယဝ်ႉၼၼ်ႉဢေႃႈ။ သူမႄးႁႅၼ်းဝႆႉၵႃႈတီႈၼၼ်ႈပုၼ်ႈႁဝ်းတႃႉ၊” ဝႃႈၼင်ႇၼႆဢေႃႈ။
တပႄးၸဝ်ႈၸိူဝ်းၼၼ်ႉဢွၵ်ႇၵႂႃႇလႄႈၶဝ်ႈဝဵင်းၵႂႃႇထူပ်းႁၼ်ၸိူဝ်ႉၼင်ႇဢၼ်မၼ်းၸဝ်ႈသင်ႇလၢတ်ႈၼၼ်ႉလႄႈမႄးႁႅၼ်းပွႆး ပသၶႃႇ၊ ဝႆႉဢေႃႈ။
မိူဝ်ႈဢၼ်ႁွတ်ႈထိုင်ၶိင်ႇႁူဝ်ၶမ်ႈၸိုင်၊ ၸဝ်ႈယေႇသု၊ မႃးလူၺ်ႈၵၼ်တင်းတမၢၼ်ႇၸဝ်ႈသိပ်းသွင်ပႃးဢေႃႈ။-
ၼႂ်းမိူဝ်ႈဢၼ်ၶဝ်ၼင်ႈၵႃႈတီႈၽိူၼ်ၶဝ်ႈလႄႈၵိၼ်ယူႇၼၼ်ႉ၊မၼ်းၸဝ်ႈလၢတ်ႈလႄႈဝႃႈ၊ “ၵဝ်ဝႃႈတီႈၸိုဝ်ႈၸႂ်ႈမၼ်းတီႈသူၸမ်ႉ၊ၼႂ်းသူၼႆႉၵေႃႉၼိုင်ႈတၵ်းဢဝ်ၵဝ်ဢၢပ်ႈၵႃႈၼႂ်းမိုဝ်းရၢၼ်ႇသူႇဢေႃႈ။ ပဵၼ်ၵေႃႉဢၼ်ၵိၼ်ယူႇလူၺ်ႈၵၼ်တင်းၵဝ်ၼႆႉယဝ်ႉ၊” ဝႃႈၼင်ႇၼႆဢေႃႈ။-
တမၢၼ်ႇၸဝ်ႈၸိူဝ်းၼၼ်ႉ၊ပႃးတင်းၸႂ်လဵၵ်ႉၸႂ်ဢူၼ်ႈလႄႈၵေႃႉၼိုင်ႈယဝ်ႉၵေႃႉၼိုင်ႈဢွၼ်ၵၼ်လဝ်ႈထၢမ်ဝႃႈ၊ “ပဵၼ်ၵဝ်ၶႃႈၶႃႈႁိုဝ်း၊” ထၢမ်ဝႃႈၼင်ႇၼႆႁင်းၽႂ်ႁင်းမၼ်းဢေႃႈ။
မၼ်းၸဝ်ႈၶိုၼ်းလၢတ်ႈလႄႈဝႃႈ၊ “တၵ်းပဵၼ်ၵေႃႉဢၼ်ၶဝ်ႈပႃးၼႂ်းသိပ်းသွင်ၵေႃႉဢၼ်ဢဝ်ၶဝ်ႈမုၼ်းမၼ်းၸုမ်ႇၵႃႈၼႂ်းဝၢၼ်ႁူမ်ႈၵၼ်တင်းၵဝ်ၼႆႉၼၼ်ႉဢေႃႈ။-
ၸဝ်ႈလုၵ်ႈၵူၼ်း၊ တၵ်းလႆႈပဵၼ်ၸွမ်းၸိူဝ်ႉၼင်ႇၼႂ်းၵျၢမ်းလိၵ်ႈမီးဝႆႉလွင်ႈမၼ်းၸဝ်ႈၼၼ်ႉဢေႃႈ။ ၼႂ်းဝႃႈၼၼ်သေၵေႃႈ၊ၵေႃႉဢၼ်ဢဝ် ၸဝ်ႈလုၵ်ႈၵူၼ်း၊ ဢၢပ်ႈၼၼ်ႉမၼ်းမီးဢႃႉမၢင်ႇၵလႃႇဢေႃႈ။ ပေႃးမၼ်းဢမ်ႇၵိူတ်ႇလဵင်ႉမႃးၸိုင်၊ယဵင်ႈၶႅၼ်းတၵ်းလီဢေႃႈ၊” ဝႃႈၼင်ႇၼႆဢေႃႈ။
ၼႂ်းမိူဝ်ႈဢၼ်ၶဝ်ယင်းၵိၼ်ယူႇၼၼ်ႉၸိုင်၊ ၸဝ်ႈယေႇသု၊ ဢဝ်ၶဝ်ႈမုၼ်းလႄႈယွင်ႈယေႃးၵျေးၸူးၸဝ်ႈယဝ်ႉၸင်ႇ၊ဝိတ်းၶဝ်ႈမုၼ်းပၼ်တီႈၶဝ်လႄႈဝႃႈ၊ “ဢွၼ်ၵၼ်ဢဝ်ၵိၼ်တႃႉ။ ၶဝ်ႈမုၼ်းၼႆႉၸမ်ႉ၊ပဵၼ်တူဝ်ၵဝ်ဢေႃႈ၊” ဝႃႈၼင်ႇၼႆဢေႃႈ။
ၵွၵ်းၵေႃႈမၼ်းၸဝ်ႈဢဝ်လႄႈယွင်ႈယေႃးၵျေးၸူးၸဝ်ႈယဝ်ႉၸင်ႇ၊ယိုၼ်ႈပၼ်တီႈၶဝ်လႄႈ၊ၶဝ်တင်းသဵင်ႈတင်းလူင်ဢွၼ်ၵၼ်ၵိၼ်ဢေႃႈ။-
မၼ်းၸဝ်ႈသမ်ႉလၢတ်ႈလႄႈဝႃႈ၊ “ၵွၵ်းၼႆႉၸမ်ႉ၊ပဵၼ်လိူတ်ႈၵဝ်ဢၼ်ၸၢပ်ႇသႅင်ႇၵၼ်တင်းပတိၺိၺ်ႇတြႃးဢၼ်မႂ်ႇလႄႈသွၼ်းလေႃႇပုၼ်ႈၵူၼ်းၼမ်ၼႃႇဢေႃႈ။-
ၵဝ်ဝႃႈတီႈၸိုဝ်ႈၸႂ်ႈမၼ်းတီႈသူၸမ်ႉ၊ၵဝ်တၵ်းဢမ်ႇၵိၼ်ၼမ်ႉမၢၵ်ႇၸပိတ်ႉထႅင်ႈတေႃႇထိုင်ႁွတ်ႈဝၼ်းဢၼ်ၵဝ်ၵိၼ်မဵဝ်းဢၼ်မႂ်ႇၵႃႈၼႂ်းမိူင်းၽြႃးပဵၼ်ၸဝ်ႈပုၼ်ႉဢေႃႈ၊” ဝႃႈၼင်ႇၼႆဢေႃႈ။
ဝၢႆးၼၼ်ႉ၊ၶဝ်ႁဵတ်းၵႂၢမ်းထမ်ႇမႃႉယဝ်ႉၸင်ႇ၊ဢွၵ်ႇၵႂႃႇၸူးတီႈလွႆ သၢၼ်ႇလုၼ်ႇ၊ ပုၼ်ႉသေဢေႃႈ။
မိူဝ်ႈၼၼ်ႉ၊ ၸဝ်ႈယေႇသု၊ လၢတ်ႈတီႈၶဝ်လႄႈဝႃႈ၊ “သူၵူႈၵေႃႉၸႂ်တၵ်းလုၵႂႃႇၸွမ်းၼင်ႇဢၼ်မီးၼႂ်းၵျၢမ်းလိၵ်ႈလႄႈဝႃႈ၊ ‘ၵဝ်တၵ်းၽၼ်းၵူၼ်းလဵင်ႉသူဝ်းလူမ်ႉတူၵ်းလႄႈၽုင်သူဝ်းတင်းလၢႆတၵ်းတႅၵ်ႇယၢႆႈၵႂႃႇဢေႃႈ၊’ ဝႃႈၼႆၼၼ်ႉတၵ်းမႅၼ်ႈၸွမ်းဢေႃႈ။-
ၼႂ်းဝႃႈၼၼ်သေၵေႃႈ၊ဝၢႆးသေၵဝ်လုၵ်ႉၶိုၼ်းယဝ်ႉၸင်ႇတၵ်းၵႂႃႇၵႃႈတီႈဢိူင်ႇ ၵႃႇလိလႄး၊ ပုၼ်ႉဢွၼ်တၢင်းသူဢေႃႈ၊” ဝႃႈၼင်ႇၼႆဢေႃႈ။
ပေႇတရု၊ လဝ်ႈလၢတ်ႈလႄႈဝႃႈ၊ “ပိၵ်ႉသမ်ႉၶဝ်ၸိူဝ်းၼႆႉတင်းသဵင်ႈတင်းလူင်ၸႂ်လုသေၵေႃႈ၊ၵဝ်ၶႃႈၸႂ်တၵ်းဢမ်ႇလုၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ လၢတ်ႈတီႈ ပေႇတရု၊ လႄႈဝႃႈ၊ “ၵဝ်ဝႃႈတီႈၸိုဝ်ႈၸႂ်ႈမၼ်းတီႈမႂ်းၸမ်ႉ၊ၼႂ်းၶိုၼ်းၼႆႉၸူဝ်ႈဢၼ်ၵႆႇဢမ်ႇပႆႇၶၼ်သွင်ပွၵ်ႈၼၼ်ႉ၊မႂ်းတၵ်းထဵင်ပႅတ်ႈၵဝ်ထူၼ်ႈထိုင်သၢမ်ပွၵ်ႈဢေႃႈ၊” ဝႃႈၼင်ႇၼႆဢေႃႈ။
ပေႇတရု၊ ယဵင်ႈၶႅၼ်းလဝ်ႈလၢတ်ႈလူၺ်ႈတင်းၵႂၢမ်းဢၼ်မၼ်ႈၵႅၼ်ႇလႄႈဝႃႈ၊ “ပိၵ်ႉသမ်ႉၵဝ်ၶႃႈတၵ်းလႆႈတၢႆၸွမ်းၸဝ်ႈႁဝ်းသေၵေႃႈ၊ၵဝ်ၶႃႈတိုၼ်းဢမ်ႇထဵင်ပႅတ်ႈၸဝ်ႈႁဝ်းၵူၺ်း၊” ဝႃႈၼင်ႇၼႆဢေႃႈ။ ၶဝ်ၸိူဝ်းၼၼ်ႉၵေႃႈလဝ်ႈလၢတ်ႈမိူၼ်မိူၼ်ၵၼ်ၵူႈၵေႃႉဢေႃႈ။
ၶဝ်ႁွတ်ႈထိုင်ၵႂႃႇတီႈၼိုင်ႈဢၼ်လႆႈၸိုဝ်ႈ ၵေႇသႃႉသေႇမၼိ၊ ၼၼ်ႉသေယဝ်ႉ၊ ၸဝ်ႈယေႇသု၊ လၢတ်ႈတီႈတမၢၼ်ႇၸဝ်ႈတင်းလၢႆလႄႈဝႃႈ၊ “သူၼင်ႈယူႇၵႃႈတီႈၼႆႈတေႃႇထိုင်ႁွတ်ႈၵဝ်သူးတွင်းယဝ်ႉၼၼ်ႉတႃႉ၊” ဝႃႈၼင်ႇၼႆယဝ်ႉၸင်ႇ၊-
ႁွင်ႉဢဝ် ပေႇတရု၊ယႃႇၵုပ်ႈ၊ ဢိၵ်ႇတင်း ယူဝ်းႁၢၼ်ႇ၊ ၵႂႃႇဢေႃႈ။ တၢင်းဢၼ်ယုင်ႈၸႂ်ၵႂင်ၸႂ်တၢင်းဢၼ်ၸႂ်ၵူဝ်ၸႂ်သၼ်ႇ၊တူၵ်းႁွတ်ႈတူၵ်းထိုင်ၵႃႈတီႈမၼ်းၸဝ်ႈၼႃႇလူင်လၢင်လႄႈ၊-
လၢတ်ႈတီႈၶဝ်လႄႈဝႃႈ၊ “ၸႂ်ၵဝ်ၼႆႉတုၵ်ႉၶႃႉၼႃႇလူင်လၢင်ထၢၼ်ႈပေႃးၸမ်တၵ်းတၢႆဢေႃႈ။ ယူႇၵႃႈတီႈၼႆႈလႄႈပႂ်ႉထႃႈယူႇတႃႉ၊” ဝႃႈၼင်ႇၼႆသေယဝ်ႉ။
မၼ်းၸဝ်ႈပူၼ်ႉၶဝ်ၵႂႃႇဢိတ်းၼိုင်ႈယဝ်ႉၸင်ႇ၊ၶုပ်ႉမူပ်ႇၵႃႈၼိူဝ်လိၼ်လႄႈပေႃးၶိင်ႇၼႃႇရီႇတုၵ်ႉၶႃႉၼၼ်ႉပူၼ်ႉမၼ်းၸဝ်ႈၵႂႃႇလႆႈ၊ၼင်ႇႁိုဝ်တၵ်းပူၼ်ႉၵႂႃႇၸိုင်၊သူးတွင်းလႄႈဝႃႈ၊-
“ပေႃႈ႟။ ပေႃႈၵဝ်ၶႃႈ။ ၸဝ်ႈႁဝ်းတၢတ်ႈၼိူင်ႇလႆႈၵူႈၸိူဝ်ႉၵူႈပိူင်တီႈၶႃႈဢေႃႈ။ ႁႂ်ႈၵွၵ်းၼႆႉပိူင်ႈသေၵႃႈတီႈၵဝ်ၶႃႈသေၵမ်းတီႈၶႃႈ။ ၼႂ်းဝႃႈၼၼ်သေၵေႃႈယႃႇႁႂ်ႈပဵၼ်ဢလူဝ်ႇၵဝ်ၶႃႈ။ ႁႂ်ႈပဵၼ်ၸွမ်းၵႃႈၼင်ႇဢၼ်ဢလူဝ်ႇၸဝ်ႈႁဝ်းမီးၼၼ်ႉသေၵမ်းၶႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၶိုၼ်းမႃးလႄႈထူပ်းႁၼ်ၶဝ်သၢမ်ၵေႃႉၼၼ်ႉၼွၼ်းလပ်းယူႇဢေႃႈ။ မၼ်းၸဝ်ႈၸင်ႇလၢတ်ႈတီႈ ပေႇတရု၊ လႄႈဝႃႈ၊ “ သိမုၼ်ႇ၊ ႟။ မႂ်းၼွၼ်းလပ်းယူႇႁိုဝ်း။ ႁႂ်ႈတိုၼ်ႇဝႆႉၼႂ်းၸူဝ်ႈၼိုင်ႈမွင်းၵူၺ်းမႂ်းဢမ်ႇတၢတ်ႈၼိူင်ႇလႆႈႁိုဝ်း၊” ဝႃႈၼင်ႇၼႆလႄႈ၊-
သမ်ႉလၢတ်ႈတီႈၶဝ်လႄႈဝႃႈ၊ “ၼင်ႇႁိုဝ်သူတၵ်းဢမ်ႇၸွမ်းၵႂႃႇၵႃႈၼႂ်းတၢင်းဢၼ်ၸူဝ်းၵႂႃႇၸူဝ်းပႆၼႂ်းဢပျတ်ႈၸိုင်၊သူးတွင်းလႄႈပႂ်ႉထႃႈယူႇတႃႉ။ ဝိၺိၺ်ႇၸႂ်ၶႅင်သေၵေႃႈ၊ၼိူဝ်ႉလိူတ်ႈႁႅင်းလဵၵ်ႉဢေႃႈ၊” ဝႃႈၼင်ႇၼႆယဝ်ႉၸင်ႇ။
သမ်ႉၵႂႃႇထႅင်ႈလႄႈသူးတွင်းထႅင်ႈၸိူဝ်ႉၼင်ႇၵႂၢမ်းၵမ်းဢွၼ်တၢင်းၼၼ်ႉယူႇဢေႃႈ။-
လိုၼ်းၼၼ်ႉ၊မၼ်းၸဝ်ႈၶိုၼ်းမႃးတီႈၶဝ်ၸိူဝ်းၼၼ်ႉလႄႈထူပ်းႁၼ်ၶဝ်ၼွၼ်းလပ်းယူႇ၊မၢၵ်ႇတႃၶဝ်မွႆႈၼႃႇထၢၼ်ႈပေႃးဢမ်ႇမိုၼ်းတႃလႆႈယဝ်ႉလႄႈ၊တၵ်းလႆႈလဝ်ႈလၢတ်ႈတီႈမၼ်းၸဝ်ႈၸိူဝ်ႉႁိုဝ်ယင်းဢမ်ႇႁုယဝ်ႉဢေႃႈ။
လိုၼ်းၼၼ်ႉ၊မၼ်းၸဝ်ႈၶိုၼ်းမႃးတီႈၶဝ်ထူၼ်ႈပွၵ်ႈတီႈသၢမ်သေလႄႈလၢတ်ႈဝႃႈ၊ “သူယင်းၼွၼ်းလပ်းလႄႈလိုဝ်ႈၼိမ်ၼိမ်ယူႇႁိုဝ်း။ ပေႃးယဝ်ႉ။ ဢၶိင်ႇမၼ်းႁွတ်ႈမႃးယဝ်ႉ။ တူၺ်းလူး။ ၸဝ်ႈလုၵ်ႈၵူၼ်း၊ လႆႈၶၢမ်ႇတၢင်းဢၼ်ဢၢပ်ႈၵႃႈၼႂ်းမိုဝ်းၵူၼ်းႁၢႆႉတင်းလၢႆယဝ်ႉ။-
ဢွၼ်ၵၼ်လုၵ်ႉတႃႉ။ ၵႂႃႇတႃႉႁဝ်း။ ႁၼ်ႁိုဝ်း။ ၵေႃႉဢၼ်ဢဝ်ၵဝ်ဢၢပ်ႈၼၼ်ႉႁွတ်ႈမႃးယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈယၢမ်းဢၼ် ၸဝ်ႈယေႇသု၊ ယင်းလၢတ်ႈယူႇၸိူဝ်ႉၼင်ႇၼၼ်ၼၼ်ႉ၊ ယုတႃႉဢိသၵႃႇရေႇဢုတ်ႈ၊ ဢၼ်ၶဝ်ႈပႃးၼႂ်းတမၢၼ်ႇၸဝ်ႈသိပ်းသွင်ပႃးၼၼ်ႉႁွတ်ႈမႃးၵမ်းလဵဝ်ဢေႃႈ။ ၽၢႆႇလင်မၼ်းၵေႃႈၵူၼ်းဢၼ်ပဵၼ်မုၵ်ႉပဵၼ်ၸိူဝ်းဢၼ်ယဵၸ်ႈပရေႃးႁဵၵ်ႈလူင်ၶဝ်၊သြႃႇမေႃၵျၢမ်းထမ်ႇမႃႉၶဝ်တင်းၵူၼ်းဢၼ်ပဵၼ်ၵႄႇပဵၼ်ႁူဝ်မဵဝ်း ၵျူး၊ ၶဝ်တင်းလၢႆပွႆႇၸႂ်ႉမႃးၼၼ်ႉပႃးၶွၼ်ႉပႃးလႅဝ်းလႄႈၸွမ်းမႃးဢေႃႈ။-
ၵေႃႉဢၼ်ဢဝ်မၼ်းၸဝ်ႈဢၢပ်ႈၼၼ်ႉ၊သႂ်ႇၵႂၢမ်းၵၼ်ဝႆႉတင်းၶဝ်လႄႈဝႃႈ၊ “ၵေႃႉဢၼ်ၵဝ်ၼူမ်ၼၼ်ႉပဵၼ်ၵေႃႉဢၼ်သူမီးဢလူဝ်ႇၼၼ်ႉယဝ်ႉ။ တိဢဝ်မၼ်းႁဵတ်းတင်းသတိလႄႈဢဝ်ၵႂႃႇတႃႉ၊” ဝႃႈၼင်ႇၼႆဢေႃႈ။
ယုတႃႉ၊ ၵေႃႈႁွတ်ႈမႃးၵမ်းလဵဝ်လႄႈၵႂႃႇၸူးမၼ်းၸဝ်ႈသေတၵ်ႉလၢတ်ႈလႄႈဝႃႈ၊ “သြႃႇၸဝ်ႈ၊” ဝႃႈၼႆသေယဝ်ႉ၊ၼူမ်မၼ်းၸဝ်ႈဢေႃႈ။-
ၶဝ်ၸိူဝ်းၼၼ်ႉဢွၼ်ၵၼ်ယိပ်းၵမ်တိဢဝ်မၼ်းၸဝ်ႈဢေႃႈ။-
ၵူၺ်းၵႃႈ၊ၵူၼ်းဢၼ်ၸုၵ်းယူႇၵႃႈတီႈၼၼ်ႈၵေႃႉၼိုင်ႈ၊ထွတ်ႇလႅဝ်းၽၼ်းၺႃးၶႃႈၶုၼ်ယဵၸ်ႈပရေႃးႁဵၵ်ႈၶဝ်ၵေႃႉၼိုင်ႈ၊ဝၢၼ်ႁူမၼ်းၶၢတ်ႇၵႂႃႇဢေႃႈ။-
မိူဝ်ႈၼၼ်ႉ၊ ၸဝ်ႈယေႇသု၊ လၢတ်ႈတီႈၶဝ်လႄႈဝႃႈ၊ “သူပႃးဢဝ်ၶွၼ်ႉဢဝ်လႅဝ်းလႄႈမႃးတိဢဝ်ၵဝ်မိူၼ်ၸိူဝ်ႉၼင်ႇသူတိၵူၼ်းၸူၼ်ၼၼ်ႉလူင်ပႄႇ။-
ၵဝ်မီးယူႇတီႈသူလႄႈသင်ႇသွၼ်ပၼ်ၵႃႈၼႂ်းၸရွပ်ႈႁေႃးတြႃးယူႇၵူႈဝၼ်းၵူႈဝၼ်းသေၵေႃႈသူဢမ်ႇတိဢဝ်ၵဝ်။ ၼႂ်းဝႃႈၼၼ်သေၵေႃႈ၊လွင်ႈၼင်ႇႁိုဝ်ဢၼ်မႃးၼႂ်းၵျၢမ်းလိၵ်ႈတၵ်းပျေႉၸုမ်ႇၸိုင်၊ၸင်ႇပဵၼ်ဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊တမၢၼ်ႇၸဝ်ႈတင်းလၢႆပႅတ်ႈဝႆႉမၼ်းၸဝ်ႈလႄႈဢွၼ်ၵၼ်လႅၼ်ႈပၢႆႈဢေႃႈ။
ၵူၼ်းၼုမ်ႇၵေႃႉၼိုင်ႈဢၼ်ဝႆၽႃႈပၢၼ်ႇၶျေႃးၽိုၼ်လဵဝ်ၵူၺ်းၼၼ်ႉၸွမ်း ၸဝ်ႈယေႇသု၊ ၵႂႃႇလႄႈ၊ၵူၼ်းၸိူဝ်းၼၼ်ႉတိၺွပ်းဢဝ်မၼ်းဢေႃႈ။-
မၼ်းၵေႃႈပႅတ်ႈဝႆႉၽႃႈဝႆမၼ်းသေလႄႈပၢႆႈဢွၵ်ႇလူၺ်ႈတူဝ်ပူၺ်သေၵႃႈၼႂ်းမိုဝ်းၶဝ်ၵႂႃႇဢေႃႈ။
မိူဝ်ႈၼၼ်ႉ၊ၶဝ်ဢဝ် ၸဝ်ႈယေႇသု၊ ၵႂႃႇသူင်ႇတီႈႁိူၼ်းၶုၼ်ယဵၸ်ႈပရေႃးႁဵၵ်ႈဢေႃႈ။ ၵႃႈတီႈၶုၼ်ၼၼ်ႉ၊ၵူၼ်းဢၼ်ပဵၼ်ၵႄႇပဵၼ်ႁူဝ်လႂ်၊တင်းသြႃႇမေႃၵျၢမ်းထမ်ႇမႃႉတင်းလၢႆၸုတုမ်ၵၼ်ယူႇဢေႃႈ။-
ပေႇတရု၊ ၵေႃႈ၊ယူႇႁၢင်ႇႁၢင်ႇသေၸွမ်းမၼ်းၸဝ်ႈၵႂႃႇထိုင်ႁွတ်ႈ၊ၵႃႈတီႈပၢင်ႇဝၢင်းႁိူၼ်းၶုၼ်ယဵၸ်ႈပရေႃးႁဵၵ်ႈယဝ်ႉၸင်ႇ၊ၼင်ႈဢွမ်ႇၽႆးယူႇလူၺ်ႈၵၼ်တင်းၵူၼ်းပႂ်ႉယၢမ်းတင်းလၢႆဢေႃႈ။-
ယဵၸ်ႈပရေႃးႁဵၵ်ႈလူင်ဢိၵ်ႇတင်းၶုၼ်တီႈလုမ်းတင်းလၢႆ၊ႁႃသၢၵ်ႈသေႇႁႂ်ႈလႆႈဢဝ် ၸဝ်ႈယေႇသု၊ တၢႆသေၵေႃႈ၊ဢမ်ႇထူပ်းဢမ်ႇလႆႈသေမဵဝ်း။-
ၵူၼ်းၼမ်ၼႃႇမႃးၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈၽၢႆႇၼိုင်ႈတင်းမၼ်းၸဝ်ႈသေၵေႃႈ၊လွင်ႈတၢင်းဢၼ်ၶဝ်လၢတ်ႈၼၼ်ႉဢမ်ႇမႅၼ်ႈၵၼ်။
ၵူၼ်းၵမ်ႈၽွင်ႈလုၵ်ႉလႄႈၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈယူႇၽၢႆႇၼိုင်ႈတင်းမၼ်းၸဝ်ႈလႄႈလၢတ်ႈဝႃႈ၊-
“ႁဝ်းလႆႈငိၼ်းၵေႃႉၼႆႉလၢတ်ႈဝႃႈ၊ ‘ၵဝ်တၵ်းၵိူၼ်ႇယႃႉၵျွင်းပိၵ်ႈမၢၼ်ႇၸဝ်ႈဢၼ်ဢဝ်တင်းမိုဝ်းၵူၼ်းႁဵတ်းဝႆႉၼႆႉပႅတ်ႈသေယဝ်ႉ၊ဝၢႆးသေၼၼ်ႉသၢမ်ဝၼ်းၵဝ်တၵ်းၶိုၼ်းတႄႇႁဵတ်းၵျွင်းပိၵ်ႈမၢၼ်ႇၸဝ်ႈလင်ၼိုင်ႈဢၼ်ဢမ်ႇလႆႈဢဝ်မိုဝ်းၵူၼ်းႁဵတ်းၼၼ်ႉဢေႃႈ၊’ ဝႃႈၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။-
ဝႃႈၸိူဝ်ႉၼင်ႇႁိုဝ်သေၵေႃႈ၊လွင်ႈတၢင်းဢၼ်ၶဝ်ၶၢမ်ႇသၢၵ်ႈသေႇၼၼ်ႉဢမ်ႇမႅၼ်ႈၵၼ်သေဢိတ်း။
ၶုၼ်ယဵၸ်ႈပရေႃးႁဵၵ်ႈၼၼ်ႉၽုတ်ႇလုၵ်ႉၽၢႆႇၼႃႈၵူၼ်းတင်းလၢႆသေလႄႈထၢမ်တီႈ ၸဝ်ႈယေႇသု၊ လႄႈဝႃႈ၊ “မႂ်းဢမ်ႇမီးလွင်ႈဢၼ်တေၶိုၼ်းတွပ်ႇတၢင်းဢၼ်ၶဝ်တၢင်ႇဢပျတ်ႈတီႈမႂ်းၼႆႉသေၸိူဝ်ႉသေပိူင်ယဝ်ႉႁိုဝ်း၊” ဝႃႈၼင်ႇၼႆသေၵေႃႈ။
မၼ်းၸဝ်ႈယူႇတဵတ်ႇတဵတ်ႇယူႇ၊ယင်းဢမ်ႇၶိုၼ်းတွပ်ႇသေၶေႃႈသေၵမ်း။ ၶုၼ်ယဵၸ်ႈပရေႃးႁဵၵ်ႈသမ်ႉထၢမ်ထႅင်ႈလႄႈဝႃႈ၊ “မႂ်းပဵၼ် ၸဝ်ႈၶရိၸ်ႈ၊ လုၵ်ႈၽြႃးပဵၼ်ၸဝ်ႈ၊ၸဝ်ႈမၢင်ႇၵလႃႇၼၼ်ႉၸႂ်ႈတႄႉႁိုဝ်း၊” ဝႃႈၼင်ႇၼႆဢေႃႈ။
မၼ်းၸဝ်ႈၶိုၼ်းလၢတ်ႈလႄႈဝႃႈ၊ “ၵဝ်ပဵၼ်ဢေႃႈ။ မိူဝ်းၼႃႈထႃႈလိုၼ်းသူတၵ်းလႆႈႁၼ် ၸဝ်ႈလုၵ်ႈၵူၼ်း၊ ၼင်ႈယူႇၽၢႆႇၶႂႃၸဝ်ႈဢၼၼ်ႇတႃႉတၼ်းၶူဝ်းသေလႄႈမႃးၵႃႈၼိူဝ်မွၵ်ႇၵုမ်ႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၶုၼ်ယဵၸ်ႈပရေႃးႁဵၵ်ႈၼၼ်ႉၸၵ်ႉသိၵ်ႇသိူဝ်ႈယၢဝ်းတူဝ်ၸဝ်ႈၵဝ်ႇသေလႄႈ၊လၢတ်ႈထႅင်ႈလႄႈဝႃႈ၊ “ႁဝ်းတၵ်းလူဝ်ႇသၢၵ်ႈသေႇဢၼ်လႂ်ထႅင်ႈလူးၵွၼ်ႇ။-
သူလႆႈငိၼ်းၵႂၢမ်းဢၼ်လၢတ်ႈပူၼ်ႉလိူဝ်ၽြႃးပဵၼ်ၸဝ်ႈယဝ်ႉ။ သူမီးလွင်ႈတၵ်းလၢတ်ႈၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။ “မၼ်းထိူၵ်ႈၶၢမ်ႇတၢင်းတၢႆယဝ်ႉ၊” ဝႃႈၼႆၶဝ်တင်းသဵင်ႈတင်းလူင်ၽွမ်ႉၵၼ်တႅပ်းတတ်းဢေႃႈ။
မိူဝ်ႈၼၼ်ႉ၊ၵမ်ႈၽွင်ႈထူမ်ႇၼမ်ႉလၢႆးသႂ်ႇမၼ်းၸဝ်ႈဢေႃႈ။ ၶဝ်ပူၵ်ႉတႃမၼ်းၸဝ်ႈယဝ်ႉၸင်ႇ၊ဢဝ်တႃမိုဝ်းထုပ်ႉသႂ်ႇမၼ်းၸဝ်ႈသေယဝ်ႉထၢမ်ဝႃႈ၊ “ၽႂ်ပေႃႉထုပ်ႉမႂ်းတၵ်ႉတူၺ်းလူး၊” ဝႃႈၼင်ႇၼႆဢေႃႈ။ ၵူၼ်းဢွၼ်ႇၶုၼ်တင်းလၢႆၵေႃႈ၊ႁပ်ႉဢဝ်မၼ်းၸဝ်ႈလႄႈပေႃႉထုပ်ႉမၼ်းၸဝ်ႈဢေႃႈ။
ၼႂ်းမိူဝ်ႈဢၼ် ပေႇတရု၊ မီးယူႇၵႃႈၼႂ်းပၢင်ႇဝၢင်းႁိူၼ်းၶုၼ်ယဵၸ်ႈပရေႃးႁဵၵ်ႈယူႇၼၼ်ႉၸိုင်၊မႄႈယိင်းဢွၼ်ႇဢၼ်ပဵၼ်ၵူၼ်းၸႂ်ႉႁိူၼ်းၶုၼ်ယဵၸ်ႈပရေႃးႁဵၵ်ႈၼၼ်ႉၵေႃႉၼိုင်ႈမႃးလႄႈ၊-
ႁၼ် ပေႇတရု၊ ဢွမ်ႇၽႆးယူႇၼၼ်ႉသေလႄႈယႅၵ်ႉတူၺ်းၼႃႈမၼ်းၸေးၸေးသေယဝ်ႉလၢတ်ႈဝႃႈ၊ “မႂ်းၼႆႉၵေႃႈလႆႈယူႇလူၺ်ႈၵၼ်တင်း ယေႇသု၊ ၵူၼ်းဝဵင်း ၼႃႇၸရႅတ်ႈ၊ ၼၼ်ႉဢေႃႈ၊” ဝႃႈၼင်ႇၼႆဢေႃႈ။
မၼ်းထဵင်ပႅတ်ႈလႄႈလၢတ်ႈဝႃႈ၊ “ၵဝ်ဢမ်ႇႁုၸၵ်းမၼ်း။ လွင်ႈဢၼ်မႂ်းလၢတ်ႈၼႆႉၵဝ်ဢမ်ႇႁု၊” ဝႃႈၼင်ႇၼႆသေယဝ်ႉ၊မၼ်းပၢႆႈဢွၵ်ႇၵႂႃႇၵႃႈတီႈၼႃႈၽၵ်းတူဝၢင်းႁိူၼ်းၼၼ်ႉလႄႈမိူဝ်ႈၼၼ်ႉၵႆႇၶၼ်ဢေႃႈ။
မိူဝ်ႈၼၼ်ႉ၊မႄႈယိင်းဢွၼ်ႇဢၼ်ပဵၼ်ၵူၼ်းၸႂ်ႉၼၼ်ႉႁၼ်မၼ်းထႅင်ႈသေယဝ်ႉ၊သမ်ႉမွၵ်ႇလၢတ်ႈတီႈၵူၼ်းဢၼ်ၸုၵ်းယူႇႁိမ်းၼၼ်ႉထႅင်ႈလႄႈဝႃႈ၊ “မၼ်းပဵၼ်ၵူၼ်းဢၼ်ၶဝ်ႈပႃးၼႂ်းၶဝ်ၸိူဝ်းၼၼ်ႉၵေႃႉၼိုင်ႈဢေႃႈ၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊ ပေႇတရု၊ ထဵင်ပႅတ်ႈထႅင်ႈဢေႃႈ။ ယူႇထႅင်ႈၵမ်းၼိုင်ႈလႄႈၵူၼ်းဢၼ်ၸုၵ်းယူႇႁိမ်းၼၼ်ႉလၢတ်ႈတီႈမၼ်းလႄႈဝႃႈ၊ “ၸႂ်ႈယဝ်ႉ။ မႂ်းၵေႃႈပဵၼ်ၵူၼ်းၶဝ်ၼၼ်ႉတႄႉယဝ်ႉ။ လွင်ႈမၼ်းၸမ်ႉ၊မႂ်းပဵၼ်ၵူၼ်းမိူင်း ၵႃႇလိလႄး၊ ဢေႃႈ၊” ဝႃႈၼင်ႇၼႆဢေႃႈ။
မၼ်းၵေႃႈတိူင်ႇၵၢဝ်ႇလႄႈၵိၼ်ႇလၢတ်ႈဝႃႈ၊ “ၵဝ်ဢမ်ႇႁုၵေႃႉဢၼ်သူလၢတ်ႈၼႆႉ၊” ဝႃႈၼင်ႇၼႆဢေႃႈ။
ၵႆႇသမ်ႉၶၼ်ထႅင်ႈပွၵ်ႈၼိုင်ႈဢေႃႈ။ ပေႇတရု၊ ၶုၵ်းၸႂ်လႆႈၵႂၢမ်းဢၼ် ၸဝ်ႈယေႇသု၊ လၢတ်ႈဝႆႉတီႈမၼ်းလႄႈဝႃႈ၊ “ၸူဝ်ႈဢၼ်ၵႆႇဢမ်ႇပႆႇၶၼ်သွင်ပွၵ်ႈၼၼ်ႉၸိုင်၊မႂ်းတၵ်းထဵင်ပႅတ်ႈၵဝ်ထူၼ်ႈထိုင်သၢမ်ပွၵ်ႈဢေႃႈ၊” ဝႃႈၼင်ႇၼႆၼၼ်ႉလႄႈမိူဝ်ႈဢၼ်ၶႆႈၸႂ်ဝူၼ်ႉၸႂ်မႅၼ်ႈလူၺ်ႈလွင်ႈၼၼ်ႉၸိုင်၊မၼ်းႁွင်ႉႁႆႈဢေႃႈ။
မိူဝ်ႈဢၼ်ထိုင်ၶိင်ႇႁူဝ်ၼႂ်ၸဝ်ႉၸဝ်ႉၸိုင်၊ယဵၸ်ႈပရေႃးႁဵၵ်ႈ လူင်ၶဝ်ႁိပ်ႈၼႅတ်ႈတိူင်ႇပၢင်ႇဢုပ်ႇၵုမ်လူၺ်ႈၵၼ်တင်းၵူၼ်းဢၼ်ပဵၼ်ၵႄႇပဵၼ်ႁူဝ်လႂ်၊သြႃႇမေႃၵျၢမ်းထမ်ႇမႃႉလႂ်၊ဢိၵ်ႇတင်းၶုၼ်လုမ်းတင်းလၢႆသေယဝ်ႉ၊ၶဝ်မတ်ႉမိုဝ်း ၸဝ်ႈယေႇသု၊ သေလႄႈဢဝ်ၵႂႃႇဢၢပ်ႈပၼ်တီႈၶုၼ် ပိလတ်ႉ၊ ဢေႃႈ။-
ၶုၼ် ပိလတ်ႉ၊ ၵေႃႈထၢမ်မၼ်းၸဝ်ႈလႄႈဝႃႈ၊ “မႂ်းၸႂ်ႈၶုၼ်ႁေႃၶမ်း ၵျူး၊ ႁိုဝ်း၊” ဝႃႈၼင်ႇၼႆလႄႈ၊မၼ်းၸဝ်ႈၶိုၼ်းလၢတ်ႈလႄႈဝႃႈ၊ “မႅၼ်ႈၸွမ်းၵႃႈၼင်ႇဢၼ်ၸဝ်ႈထၢမ်ၼႆႉယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ယဵၸ်ႈပရေႃးႁဵၵ်ႈလူင်ၶဝ်တၢင်ႇဢပျတ်ႈၼမ်ၼႃႇတီႈမၼ်းၸဝ်ႈဢေႃႈ။-
ၶုၼ် ပိလတ်ႉ၊ သမ်ႉထၢမ်မၼ်းၸဝ်ႈထႅင်ႈလႄႈဝႃႈ၊ “မႂ်းဢမ်ႇၶိုၼ်းတွပ်ႇၵႃႈသင်ယဝ်ႉႁိုဝ်း။ တူၺ်းလူး။ ၶဝ်ႁႃဢပျတ်ႈတၢင်ႇသႂ်ႇမႂ်းၼမ်ၼႃႇယဝ်ႉ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊မၼ်းၸဝ်ႈဢမ်ႇၶိုၼ်းတွပ်ႇသေၶေႃႈသေၵမ်းလႄႈၶုၼ် ပိလတ်ႉ၊ သမ်ႉပေႃးဢၢမ်းၼႃႇဢေႃႈ။
ၼႂ်းပွႆး ပသၶႃႇ၊ ၵူႈပွၵ်ႈၼၼ်ႉ၊ၶုၼ် ပိလတ်ႉ၊ ယၢမ်ႈပွႆႇၵူၼ်းထွင်ႇဢွၵ်ႇပၼ်ယေႈၵေႃႉ၊ဢၼ်ၵူၼ်းတင်းလၢႆယွၼ်းဢဝ်ၼၼ်ႉဢေႃႈ။-
မိူဝ်ႈယၢမ်းၼၼ်ႉမီးၵူၼ်းထွင်ႇၵေႃႉၼိုင်ႈ၊ဢၼ်လႆႈၸိုဝ်ႈ ပႃႇရပ်ႉပႃႉ၊ ၼၼ်ႉလုၵ်ႉၽိုၼ်ႉမိူင်းလႄႈလႆႈဢဝ်ဢသၢၵ်ႈပိူၼ်ႈတၢႆၼႂ်းမိူဝ်ႈဢၼ်မၼ်းႁဵတ်းၵၢၼ်လုၵ်ႉၽိုၼ်ႉမိူင်းၼၼ်ႉဢေႃႈ။-
ၵူၼ်းတင်းလၢႆၸုတုမ်ၵၼ်မႃးၼမ်ၼႃႇလႄႈၽွမ်ႉၵၼ်ယွၼ်းတီႈၶုၼ် ပိလတ်ႉ၊ ႁႂ်ႈႁဵတ်းၸွမ်းၵႃႈၼင်ႇဢၼ်ယၢမ်ႈႁဵတ်းမႃးၼၼ်ႉဢေႃႈ။-
ၶုၼ် ပိလတ်ႉ၊ ၵေႃႈထၢမ်ၶဝ်လႄႈဝႃႈ၊ “သူၶႂ်ႈႁႂ်ႈၵဝ်ပွႆႇလွတ်ႈၶုၼ်ႁေႃၶမ်း ၵျူး၊ ၼၼ်ႉႁိုဝ်း၊” ဝႃႈၼင်ႇၼႆၼၼ်ႉ၊-
ပိူဝ်ႈဢၼ်ၶုၼ်ၼၼ်ႉ၊ႁုလွင်ႈဢၼ်ယဵၸ်ႈပရေႃးႁဵၵ်ႈလူင်ၸိူဝ်းၼၼ်ႉ၊ငိၼ်းၸင်းမၼ်းၸဝ်ႈၼႃႇလူင်လၢင်လႄႈၸင်ႇဢဝ်မၼ်းၸဝ်ႈဢၢပ်ႈၸိူဝ်ႉၼင်ႇၼၼ်ၼၼ်ႉဢေႃႈ။
မိူဝ်ႈၼၼ်ႉ၊ယဵၸ်ႈပရေႃးႁဵၵ်ႈလူင်ၸိူဝ်းၼၼ်ႉတိုၵ်းသူၼ်းမူႇၵူၼ်းတင်းလၢႆ၊ႁႂ်ႈယွၼ်းၶုၼ် ပိလတ်ႉ၊ ပွႆႇ ပႃႇရပ်ႉပႃႉ၊ ၵူၺ်းပၼ်တီႈၶဝ်ဢေႃႈ။-
ၶုၼ် ပိလတ်ႉ၊ ၸင်ႇထၢမ်တီႈမူႇၵူၼ်းလႄႈဝႃႈ၊ “ပေႃးပဵၼ်ၼႆၸိုင်၊တီႈၵေႃႉဢၼ်သူႁွင်ႉႁဵၵ်ႈဝႃႈ၊ၶုၼ်ႁေႃၶမ်း ၵျူး၊ ၼႆႉ၊ၵဝ်တၵ်းလႆႈႁဵတ်းၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ၶဝ်ၶိုၼ်းပၢဝ်ႇသႅၼ်ႇလႄႈလၢတ်ႈဝႃႈ၊ “ဢဝ်မၼ်းတွၵ်ႇၸပ်းဝႆႉၵႃႈၼိူဝ်သဝ်မႆႉဝႃးမိုဝ်းသေၵမ်းၶႃႈ၊” ဝႃႈၼင်ႇၼႆဢေႃႈ။
ၶုၼ် ပိလတ်ႉ၊ သမ်ႉထၢမ်ထႅင်ႈလႄႈဝႃႈ၊ “ၵွပ်ႈသင်။ မၼ်းႁဵတ်းမႅၼ်ႈဢပျတ်ႈၵႃႈသင်၊” ဝႃႈၼင်ႇၼႆသေၵေႃႈ၊ၶဝ်ယဵင်ႈၶႅၼ်းပၢဝ်ႇသႅၼ်ႇႁႅင်းၼႃႇလႄႈလၢတ်ႈဝႃႈ၊ “ဢဝ်မၼ်းတွၵ်ႇၸပ်းဝႆႉၵႃႈၼိူဝ်သဝ်မႆႉဝႃးမိုဝ်းသေၵမ်းၶႃႈ၊” ဝႃႈၼင်ႇၼႆဢေႃႈ။
ၶုၼ် ပိလတ်ႉ၊ ၵေႃႈ၊ၼင်ႇႁိုဝ်မူႇၵူၼ်းတင်းလၢႆတၵ်းပျေႇၸႂ်ၸိုင်၊ပွႆႇလွတ်ႈ ပႃႇရပ်ႉပႃႉ၊ ပၼ်ပုၼ်ႈၶဝ်ယဝ်ႉၸင်ႇ၊ပေႃႉယႅၼ်ႉ ၸဝ်ႈယေႇသု၊ သေလႄႈဢဝ်ဢၢပ်ႈပၼ်ႁႂ်ႈၶဝ်လႆႈတွၵ်ႇၸပ်းၵႃႈၼိူဝ်သဝ်မႆႉဝႃးမိုဝ်းၼၼ်ႉသေဢေႃႈ။
မိူဝ်ႈၼၼ်ႉ၊ၵူၼ်းသိုၵ်းၶဝ်ဢဝ် ၸဝ်ႈယေႇသု၊ ၵႂႃႇၵႃႈၼႂ်းတပ်ႉဢၼ်မီးၼႂ်းပၢင်ႇဝၢင်းႁေႃၼၼ်ႉသေယဝ်ႉ၊ႁွင်ႉဢဝ်ၵူၼ်းသိုၵ်းတင်းမူတ်းမႃးၸုတုမ်ၵၼ်ဢေႃႈ။-
ၶဝ်ဢဝ်သိူဝ်ႈယၢဝ်းလႅင်ၵမ်ႇၽိုၼ်ၼိုင်ႈၼုင်ႈမႆပၼ်မၼ်းၸဝ်ႈလႄႈဢဝ်ၶိူဝ်းၼၢမ်သၢၼ်ႁဵတ်းပဵၼ်ၶူၺ်ႇသရၽူႇသေသုပ်းသႂ်ႇတီႈႁူဝ်မၼ်းၸဝ်ႈဢေႃႈ။-
ဝၢႆးၼၼ်ႉ၊ၶဝ်ဢွၼ်ၵၼ်ႁဵတ်းႁၢင်ႈရူဝ်ႇသေႇၵူဝ်ယမ်တီႈမၼ်းၸဝ်ႈလႄႈလၢတ်ႈဝႃႈ၊ “ၶုၼ်ႁေႃၶမ်း ၵျူး၊ တီႈၶႃႈ႟။ ႁႂ်ႈၸဝ်ႈႁဝ်းဢသၢၵ်ႈယိုၼ်းယၢဝ်းသေၵမ်းလူၺ်ႈတီႈၶႃႈ၊” ဝႃႈၼင်ႇၼႆဢေႃႈ။-
ၶဝ်ဢဝ်ၶွၼ်ႉမႆႉဢေႃႈပေႃႉယႅၼ်ႉႁူဝ်မၼ်းၸဝ်ႈ၊ထူမ်ႇၼမ်ႉလၢႆးသႂ်ႇမၼ်းၸဝ်ႈသေယဝ်ႉ၊ၶုပ်ႉၶဝ်ႇလႄႈဢွၼ်ၵၼ်ၵူမ်ႈႁူဝ်ၵွမ်းႁူဝ်ပၼ်တီႈမၼ်းၸဝ်ႈဢေႃႈ။-
လိုၼ်းသေၶဝ်ႁဵတ်းပျၢၵ်ႈၶူဝ်ယဝ်ႉယဝ်ႉၼၼ်ႉ၊ၶဝ်ထွတ်ႇဢဝ်သိူဝ်ႈယၢဝ်းလႅင်ၵမ်ႇၼၼ်ႉသေလႄႈၶိုၼ်းၼုင်ႈပၼ်ၶူဝ်းၼုင်ႈမၼ်းၸဝ်ႈသေယဝ်ႉၸင်ႇ၊ၶဝ်ဢဝ်မၼ်းၸဝ်ႈဢွၵ်ႇၵႂႃႇႁႂ်ႈလႆႈတွၵ်ႇတၢႆၵႃႈၼိူဝ်သဝ်မႆႉဝႃးမိုဝ်းသေဢေႃႈ။
ၼႂ်းၶၢဝ်းတၢင်းၼၼ်ႉ၊ၶဝ်ႁူပ်ႉထူပ်းၵူၼ်းၵေႃႉၼိုင်ႈ၊ၸိုဝ်ႈ သိမုၼ်ႇ၊ ဢၼ်လုၵ်ႉသေၵႃႈတီႈဝၢၼ်ႈၼွၵ်ႈၶဝ်ႈဝဵင်းမႃးယူႇၼၼ်ႉလႄႈ၊ၵူၼ်းသိုၵ်းၶဝ်တဵၵ်းငႅၼ်းႁႂ်ႈမၼ်းမႅၵ်ႇသဝ်မႆႉဝႃးမိုဝ်း ၸဝ်ႈယေႇသု၊ ဢေႃႈ။ ( သိမုၼ်ႇ၊ ၼၼ်ႉပဵၼ်ၵူၼ်းမိူင်း ၵုရေႇၼေႇ၊ လႄႈ၊ပဵၼ်ပေႃႈ ဢလႅၵ်ႉၸၼ်းတႃး၊ ဢိၵ်ႇတင်း ရုၽု၊ ဢေႃႈ။-)
ၶဝ်ဢဝ်မၼ်းၸဝ်ႈၵႂႃႇၵႃႈတီႈလွႆ ၵေႃးလႃႉၵေႃးထႃႉ၊ ဢၼ်ပွင်ႇဝႃႈၵွင်းၵွၵ်းႁူဝ်ၼၼ်ႉယဝ်ႉၸင်ႇ၊-
ၵႃႈတီႈၼၼ်ႈ၊ၶဝ်ဢဝ်ၼမ်ႉမၢၵ်ႇၸပိတ်ႉသူမ်ႈလေႃးၵၼ်တင်းမုရၼ်ႇတိုၵ်းပၼ်မၼ်းၸဝ်ႈၵိၼ်ဢေႃႈ။ ၵူၺ်းၵႃႈ၊မၼ်းၸဝ်ႈဢမ်ႇၵိၼ်။-
ၶဝ်ဢဝ်မၼ်းၸဝ်ႈတွၵ်ႇသႂ်ႇၵႃႈၼိူဝ်သဝ်မႆႉဝႃးမိုဝ်းယဝ်ႉၸင်ႇ၊ဢဝ်ၶူဝ်းၼုင်ႈမၼ်းၸဝ်ႈၼၼ်ႉတူၵ်းၸႃႇၵွၵ်ႈမႅင်ႇၵၼ်၊ၽူႈလႂ်တၵ်းလႆႈၽိုၼ်လႂ်ၼၼ်ႉဢေႃႈ။-
ၶိင်ႇဢၼ်ၶဝ်တွၵ်ႇမၼ်းၸဝ်ႈဝႆႉၵႃႈၼိူဝ်သဝ်မႆႉၼၼ်ႉ၊ပဵၼ်ၶိင်ႇၵၢင်ၼႂ်ၵဝ်ႈမွင်းဢေႃႈ။-
လိၵ်ႈဢၼ်ၽုၺ်ႇၼႄဢပျတ်ႈမၼ်းၸဝ်ႈၼၼ်ႉဝႃႈဝႆႉၸမ်ႉ၊ “ၶုၼ်ႁေႃၶမ်း ၵျူး၊ ” ဝႃႈၼင်ႇၼႆဢေႃႈ။-
ၵူၼ်းၸူၼ်သွင်ၵေႃႉၵေႃႈ၊ၶဝ်ဢဝ်တွၵ်ႇဝႆႉၽၢႆႇၶႂႃၸဝ်ႈၵေႃႉၼိုင်ႈ၊ၽၢႆႇသၢႆႉၸဝ်ႈၵေႃႉၼိုင်ႈလူၺ်ႈၵၼ်တင်းမၼ်းၸဝ်ႈဢေႃႈ။-
ဢၼ်မီးၼႂ်းၵျၢမ်းလိၵ်ႈလႄႈဝႃႈ၊ “မၼ်းလႆႈၶၢမ်ႇတၢင်းဢၼ်ၼပ်ႉဢၢၼ်ႇၶဝ်ႈပႃးၵႃႈၼႂ်းၶဝ်ၸိူဝ်းဢၼ်ဢမ်ႇတြႃးတင်းလၢႆဢေႃႈ၊” ဝႃႈၼင်ႇၼႆၼၼ်ႉပျေႉၸုမ်ႇမိူဝ်ႈၼၼ်ႉယဝ်ႉဢေႃႈ။
ၵူၼ်းၸိူဝ်းဢၼ်ၵႂႃႇမႃးႁိမ်းမၼ်းၸဝ်ႈၸိူဝ်းၼၼ်ႉ၊ဢွၼ်ၵၼ်သႄႉသွမ်းတၢင်ႇဢပျတ်ႈတီႈမၼ်းၸဝ်ႈယူႇ၊သၼ်ႇႁူဝ်ငွၵ်းႁူဝ်ယူႇသေလႄႈလၢတ်ႈဝႃႈ၊ “ႁႄႉ၊ၵေႃႉဢၼ်ၵိူၼ်ႇယႃႉၵျွင်းပိၵ်ႈမၢၼ်ႇၸဝ်ႈသေလႄႈၼႂ်းသၢမ်ဝၼ်းၵူၺ်းတၵ်းၶိုၼ်းတႄႇႁဵတ်းၼႆႉ႟။-
တေႃႈလဵဝ်ၵႄႇသႄႇဢဝ်တူဝ်ၸဝ်ႈၵဝ်ႇသေလႄႈလူင်းသဝ်မႆႉဝႃးမိုဝ်းမႃးတႃႉ၊” ဝႃႈၼင်ႇၼႆဢေႃႈ။
မိူၼ်ၼင်ႇၼၼ်၊ယဵၸ်ႈပရေႃးႁဵၵ်ႈၶဝ်ယွၵ်ႇယဝ်ႈလၢတ်ႈပျၢၵ်ႈၶူဝ်လွင်ႈမၼ်းၸဝ်ႈလူၺ်ႈၵၼ်တင်းသြႃႇမေႃၵျၢမ်းထမ်ႇမႃႉၸိူဝ်းၼၼ်ႉလႄႈဝႃႈ၊ “မၼ်းၶျွတ်ႈဢဝ်ပိူၼ်ႈလႆႈဝႃႈၼႆယဝ်ႉ။ တူဝ်ၸဝ်ႈၵဝ်ႇဢမ်ႇၶျွတ်ႈဢဝ်တူဝ်ၸဝ်ႈၵဝ်ႇလႆႈ။-
ႁႂ်ႈ ၸဝ်ႈၶရိၸ်ႈ၊ ၶုၼ်ႁေႃၶမ်း ၵျူး၊ လူင်းသဝ်မႆႉဝႃးမိုဝ်းမႃးတေႃႈလဵဝ်ၼႆႉတႃႉ။ ႁဝ်းတၵ်းဢွၼ်ၵၼ်ယုမ်ႇမၢတ်ႈမၼ်းဢေႃႈ၊” ဝႃႈၼင်ႇၼႆဢေႃႈ။ ၵူၼ်းသွင်ၵေႃႉဢၼ်လႆႈၶၢမ်ႇတွၵ်ႇဝႆႉၵႃႈၼိူဝ်သဝ်မႆႉဝႃးမိုဝ်းလူၺ်ႈၵၼ်တင်းမၼ်းၸဝ်ႈၼၼ်ႉၵေႃႈသႄႉသွမ်းတၢင်ႇဢပျတ်ႈမၼ်းၸဝ်ႈဢေႃႈ။
မိူဝ်ႈထိုင်ၶိင်ႇၵၢင်ဝၼ်းတဵင်ႈၸိုင်၊ၵၢင်ဝၼ်းလပ်းသိင်ႇၽိတ်းၽိတ်းၵႂႃႇတင်းမိူင်းႁိုင်သၢမ်မွင်းဢေႃႈ။-
မိူဝ်ႈထိုင်ၶိင်ႇသၢမ်မွင်းဝၢႆးဝၼ်းၸိုင်၊ ၸဝ်ႈယေႇသု၊ ႁဵတ်းသဵင်ဢၼ်ယႂ်ႇၼႃႇႁွင်ႉသႅၼ်ႇလႄႈဝႃႈ၊ “ဢေးလိ၊ဢေးလိ၊လႃးမႃး၊သႃႇပၵ်ႉသၼိ၊” ဝႃႈၼင်ႇၼႆဢေႃႈ။ ၵႂၢမ်းဢၼ်မၼ်းၸဝ်ႈဝႃႈၼၼ်ႉပွင်ႇဝႃႈ၊ “ၽြႃးၵဝ်ၶႃႈ၊ၽြႃးၵဝ်ၶႃႈ၊ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸုၼ်ႉပႅတ်ႈၵဝ်ၶႃႈၸိူဝ်ႉၼင်ႇႁိုဝ်တီႈၶႃႈ၊” ဝႃႈၼင်ႇၼႆဢေႃႈ။
ၵူၼ်းဢၼ်ၸုၵ်းယူႇတီႈႁိမ်းၼၼ်ႉၵမ်ႈၽွင်ႈငိၼ်းလႄႈလၢတ်ႈဝႃႈ၊ “ထွမ်ႇလူး။ မၼ်းႁွင်ႉႁႃ ဢေးလိယႃႉ၊ ဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ၵူၼ်းၵေႃႉၼိုင်ႈလႅၼ်ႈၵႂႃႇဢဝ်ၼူၼ်းၵုၺ်သေလႄႈၸုမ်ႇသႂ်ႇၼႂ်းၼမ်ႉမၢၵ်ႇၸပိတ်ႉသူမ်ႈယဝ်ႉၸင်ႇသဵပ်ႇသႂ်ႇပၢႆမႆႉဢေႃႈသေလႄႈယိုၼ်ႈပၼ်ႁႂ်ႈ ၸဝ်ႈယေႇသု၊ ၸုပ်ႇၵိၼ်သေယဝ်ႉလၢတ်ႈလႄႈဝႃႈ၊ “ၸွင်ႇ ဢေးလိယႃႉ၊ တၵ်းမႃးၶျႃးဢဝ်မၼ်းလူင်းႁိုဝ်း၊ဢမ်ႇမႃးဢဝ်ၶျႃးလူင်းႁိုဝ်းပႂ်ႉတူၺ်းတႃႉႁဝ်း၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ သမ်ႉႁဵတ်းသဵင်ဢၼ်ယႂ်ႇၼႃႇႁွင်ႉသႅၼ်ႇလႄႈထွတ်ႇၸႂ်မၼ်းၸဝ်ႈၵႂႃႇသေဢေႃႈ။
မိူဝ်ႈၼၼ်ႉ၊ၽႃႈၵင်ႈတီႈမူတ်းၸၢင်ႇၵျွင်းပိၵ်ႈမၢၼ်ႇၸဝ်ႈသိၵ်ႇၶၢတ်ႇၵႂႃႇတႄႇဢဝ်တီႈႁူဝ်ၵႂႃႇတေႃႇႁွတ်ႈထိုင်တိၼ်ဢေႃႈ။-
ၶုၼ်သိုၵ်းလူင်ဢၼ်ၸုၵ်းယူႇတေႃႇၼႃႈၵၼ်တင်းမၼ်းၸဝ်ႈၼၼ်ႉ၊လႆႈႁၼ်လွင်ႈတၢင်းဢၼ်မၼ်းၸဝ်ႈႁွင်ႉသႅၼ်ႇထွတ်ႇၸႂ်ၸိူဝ်ႉၼင်ႇၼၼ်ၼၼ်ႉၸိုင်၊လၢတ်ႈလႄႈဝႃႈ၊ “ၸႂ်ႈတႄႉယဝ်ႉ။ ၵေႃႉၼႆႉပဵၼ်လုၵ်ႈၽြႃးပဵၼ်ၸဝ်ႈတႄႉဢေႃႈ၊” ဝႃႈၼင်ႇၼႆဢေႃႈ။
ၵႃႈတီႈၼၼ်ႈ၊မီးမႄႈယိင်းၵမ်ႈၽွင်ႈယူႇတီႈဢၼ်ႁၢင်ႇႁၢင်ႇလႄႈလွမ်ပႂ်ႉတူၺ်းယူႇဢေႃႈ။ ၼႂ်းမႄႈယိင်းၸိူဝ်းၼၼ်ႉပႃးၸႃႉၸဵမ် မႃႇရိမႃႇၵတလႃႉ၊မႃႇရိ၊ ၵေႃႉပဵၼ်မႄႈ ယႃႇၵုပ်ႈ၊ တင်း ယူဝ်းသေႇ၊ ဢိၵ်ႇတင်း သႃႇလုမ်း၊ လႄႈ။-
ပဵၼ်ၶဝ်ၸိူဝ်းဢၼ်ၸွမ်းပႃႈလင်မၼ်းၸဝ်ႈလႄႈႁဵတ်းလဵင်ႉႁဵတ်းလူၼႂ်းမိူဝ်ႈဢၼ်မၼ်းၸဝ်ႈမီးယူႇၼႂ်းဢိူင်ႇ ၵႃႇလိလႄး၊ ၼၼ်ႉဢေႃႈ။ မႄႈယိင်းတၢင်ႇၵေႃႉၼမ်ၼႃႇဢၼ်ၸွမ်းမၼ်းၸဝ်ႈသေလႄႈမႃးႁွတ်ႈမႃးထိုင်တီႈဝဵင်း ယေႇရုသလႅမ်ႇ၊ ၸိူဝ်းၼၼ်ႉၵေႃႈပႃးၵႃႈတီႈၼၼ်ႈဢေႃႈ။
မိူဝ်ႈဢၼ်ႁွတ်ႈထိုင်ၶိင်ႇႁူဝ်ၶမ်ႈၼႂ်းဝၼ်းဢၼ်မႄးႁႅၼ်းထႃႈၼၼ်ႉ၊ပဵၼ်ဝၼ်းၽိတ်ႈသိၼ်လူင်ၵူၼ်း ၵျူး၊ ၶဝ်ၼၼ်ႉၸိုင်၊-
ယူဝ်းသႅပ်ႈ၊ ၵူၼ်းဝဵင်း ဢရိမသႄး၊ ၵေႃႉပဵၼ်ၶုၼ်လုမ်းလႄႈမီးသရေႇ၊ပဵၼ်ၵူၼ်းဢၼ်မုင်ႈထႃႈမွင်းထႃႈမိူင်းၽြႃးပဵၼ်ၸဝ်ႈၼၼ်ႉ၊ဝႆႉၸႂ်ႁတ်းႁတ်းႁၢၼ်ႁၢၼ်သေလႄႈၶဝ်ႈၸူးတီႈၶုၼ် ပိလတ်ႉ၊ လႄႈယွၼ်းတူဝ်တၢႆ ၸဝ်ႈယေႇသု၊ ဢေႃႈ။-
ၶုၼ် ပိလတ်ႉ၊ လႆႈငိၼ်းလွင်ႈဢၼ်တေႃႈလဵဝ်ၼႆႉ ၸဝ်ႈယေႇသု၊ တၢႆယဝ်ႉဝႃႈၼႆၼၼ်ႉဢၢမ်းၼႃႈလူင်လၢင်သေယဝ်ႉ၊ႁွင်ႉၶုၼ်သိုၵ်းလူင်ၼၼ်ႉမႃးလႄႈထၢမ်ဝႃႈ၊ “မၼ်းတၢႆႁိုင်ယဝ်ႉႁိုဝ်း၊” ဝႃႈၼင်ႇၼႆဢေႃႈ။-
မိူဝ်ႈဢၼ်မၼ်းလႆႈငိၼ်းၵႂၢမ်းၶုၼ်သိုၵ်းလူင်ဝႃႈ၊မၼ်းၸဝ်ႈတၢႆတႄႉယဝ်ႉၼၼ်ႉၸိုင်၊ဢဝ်တူဝ်တၢႆမၼ်းၸဝ်ႈဢၢပ်ႈပၼ်တီႈ ယူဝ်းသႅပ်ႈ၊ ဢေႃႈ။-
ယူဝ်းသႅပ်ႈ၊ ၵေႃႈသိုဝ်ႉၽႃႈပၢၼ်ႇဢၼ်ၶျေႃးမႃးလႄႈၶျႃးတူဝ်တၢႆမၼ်းၸဝ်ႈလူင်းယဝ်ႉၸင်ႇ၊ဢဝ်ၽႃႈပၢၼ်ႇၼၼ်ႉၶဵၼ်းႁေႃႇသေယဝ်ႉ၊သႂၢင်းသႂ်ႇဝႆႉၵႃႈၼႂ်းပိုင်ႈပႃႇႁဵဝ်ႈဢၼ်ၶုတ်းမူင်ႇဝႆႉၵႃႈၼႂ်းၼႃႈၽႃႁိၼ်ၼၼ်ႉဢေႃႈ။ မၼ်းဢဝ်မၢၵ်ႇႁိၼ်လူင်ၵိင်ႈသႂ်ႇဝႆႉၵႃႈတီႈပၢၵ်ႇႁူးပိုင်ႈပႃႇႁဵဝ်ႈၼၼ်ႉဢေႃႈ။-
မႃႇရိမႃႇၵတလႃႉ၊ တင်း မႃႇရိ၊ မႄႈ ယူဝ်းသေႇ၊ ၶဝ်လႆႈႁၼ်တီႈဢၼ်ဢဝ်တူဝ်တၢႆမၼ်းၸဝ်ႈဝႆႉၼၼ်ႉဢေႃႈ။
မိူဝ်ႈဢၼ်ဝၼ်းၵမ်သိၼ်ပူၼ်ႉယဝ်ႉၸိုင်၊ မႃႇရိမႃႇၵတလႃႉ၊ တင်း မႃႇရိ၊ ၵေႃႉပဵၼ်မႄႈ ယႃႇၵုပ်ႈ၊ ၶဝ်ဢိၵ်ႇတင်း သႃႇလုမ်း၊ ၸိူဝ်းၼၼ်ႉၵႂႃႇသိုဝ်ႉၼမ်ႉမၼ်းၼၢမ်ႇသႃႇပုၼ်ႈတႃႇတၵ်းတႃးတူဝ်တၢႆ ၸဝ်ႈယေႇသု၊ ဢေႃႈ။-
ဝၼ်းဢၼ်ပဵၼ်ဝၼ်းတီႈၼိုင်ႈၼႂ်းၸဵတ်းဝၼ်းၶိင်ႇၵၢင်ၼႂ်ၸဝ်ႉၸဝ်ႉၼၼ်ႉ၊မိူဝ်ႈဢၼ်ၵၢင်ဝၼ်းဢွၵ်ႇမႃးၼၼ်ႉ၊ၶဝ်ဢွၼ်ၵၼ်ၵႂႃႇၸူးၵႃႈတီႈပႃႇႁဵဝ်ႈမၼ်းၸဝ်ႈဢေႃႈ။-
မိူဝ်ႈၼၼ်ႉ၊ၶဝ်ၼင်ႇၵၼ်ၵၼ်လၢတ်ႈတီႈၵၼ်လႄႈဝႃႈ၊ “ၽူႈလႂ်တၵ်းၵိင်ႈမၢၵ်ႇႁိၼ်လူင်ၼၼ်ႉဢွၵ်ႇသေပၢၵ်ႇပိုင်ႈပႃႇႁဵဝ်ႈၼၼ်ႉပၼ်ႁဝ်း၊” ဝႃႈၼင်ႇၼႆဢေႃႈ။-
မိူဝ်ႈဢၼ်မုင်ႈတူၺ်းၼၼ်ႉၸိုင်၊ၶဝ်လႆႈႁၼ်မၢၵ်ႇႁိၼ်လူင်ၼၼ်ႉသမ်ႉပေႃးၵိင်ႈဢွၵ်ႇဝႆႉသေလႄႈမီးယူႇဢေႃႈ။ မၢၵ်ႇႁိၼ်ၼၼ်ႉပဵၼ်မၢၵ်ႇႁိၼ်ဢၼ်ယႂ်ႇၼႃႇဢေႃႈ။-
ၶဝ်ၸင်ႇၶဝ်ႈၵႂႃႇၵႃႈၼႂ်းပိုင်ႈပႃႇႁဵဝ်ႈသေလႄႈထူပ်းႁၼ်ၵူၼ်းၼုမ်ႇၵေႃႉၼိုင်ႈ၊ၼုင်ႈသိူဝ်ႈယၢဝ်းဢၼ်ၽိူၵ်ႇလီၶၢဝ်လီၼၼ်ႉၼင်ႈယူႇၵႃႈတီႈၽၢႆႇၶႂႃယူႇၼၼ်ႉလႄႈၶဝ်တူၵ်းၸႂ်ဢေႃႈ။
ၵူၼ်းၼုမ်ႇၵေႃႉၼၼ်ႉၵေႃႈလၢတ်ႈလႄႈဝႃႈ၊ “ယႃႇပေတူၵ်းၸႂ်။ သူႁႃ ၸဝ်ႈယေႇသု၊ ၵူၼ်းဝဵင်း ၼႃႇၸရႅတ်ႈ၊ ဢၼ်လႆႈၶၢမ်ႇတွၵ်ႇတၢႆၵႃႈၼိူဝ်သဝ်မႆႉဝႃးမိုဝ်းၼၼ်ႉ၊မၼ်းၸဝ်ႈလုၵ်ႉၶိုၼ်းလိပ်းယဝ်ႉ။ ဢမ်ႇမီးၵႃႈတီႈၼႆႈယဝ်ႉ။ တူၺ်းတီႈဢၼ်ဝႆႉတူဝ်တၢႆမၼ်းၸဝ်ႈၼႆႉတႃႉ။-
တေႃႈလဵဝ်ၼႆႉသူၵႂႃႇမွၵ်ႇလၢတ်ႈတီႈ ပေႇတရု၊ တင်းတပႄးၸဝ်ႈတင်းလၢႆလႄႈဝႃႈ၊ ‘မၼ်းၸဝ်ႈၵႂႃႇၵႃႈတီႈဢိူင်ႇ ၵႃႇလိလႄး၊ ထႃႈဢွၼ်တၢင်းဝႆႉယဝ်ႉ၊ဝႃႈၼင်ႇၼႆတႃႉ။ သူတၵ်းထူပ်းႁၼ်မၼ်းၸဝ်ႈၵႃႈတီႈၼၼ်ႈၸွမ်းၵႃႈၼင်ႇဢၼ်မၼ်းၸဝ်ႈလၢတ်ႈဝႆႉၼၼ်ႉဢေႃႈ၊’ ” ဝႃႈၼင်ႇၼႆဢေႃႈ။
ၶဝ်ၼၼ်ႉ၊ၵွပ်ႈပိူဝ်ႈဢၼ်တူၵ်းၸႂ်ၵႂၢင်ၸႂ်ၼႃႇၼၼ်ႉသၼ်ႇဝႆယူႇလႄႈဢွၵ်ႇသေၵႃႈတီႈပႃႇႁဵဝ်ႈလႅၼ်ႈပၢႆႈၵႂႃႇဢေႃႈ။ ၶဝ်ၵူဝ်ႁႄၼႃႇၽႅဝ်လႄႈဢမ်ႇလၢတ်ႈၵႃႈသင်တီႈၽူႈလႂ်သေၵေႃႉသေၵူၼ်းဢေႃႈ။
[ဝၢႆးသေ ၸဝ်ႈယေႇသု၊ လုၵ်ႉၶိုၼ်းလိပ်းယဝ်ႉ၊ၼႂ်းဝၼ်းတၼၢင်းၼူၺ်ႇၶိင်ႇၵၢင်ၼႂ်ၸဝ်ႉၸဝ်ႉၸိုင်၊မၼ်းၸဝ်ႈၼႄပျႃးတူဝ်မၼ်းၸဝ်ႈတီႈ မႃႇရိမႃႇၵတလႃႉ၊ ဢွၼ်တၢင်းသုတ်းပိူၼ်ႈလႄႈပဵၼ်ၵေႃႉဢၼ်မၼ်းၸဝ်ႈလႆႈႁေႃႈၽီႁၢႆႉၸဵတ်းတူဝ်ဢွၵ်ႇပႅတ်ႈၼၼ်ႉဢေႃႈ။-
မၼ်းၵေႃႈၵႂႃႇမွၵ်ႇလၢတ်ႈတီႈၶဝ်ၸိူဝ်းဢၼ်ယၢမ်းယူႇၸွမ်းမၼ်းၸဝ်ႈ၊ယၢမ်းမိူဝ်ႈဢၼ်ၶဝ်ယင်းတိုၵ်ႉမႆႈၸႂ်ၶီၸႂ်လႄႈႁွင်ႉႁႆႈယူႇၼၼ်ႉဢေႃႈ။-
ၵူၺ်းၵႃႈ၊မိူဝ်ႈဢၼ်ၶဝ်ငိၼ်းလွင်ႈဢၼ်မၼ်းၸဝ်ႈဢသၢၵ်ႈလိပ်းယူႇဢိၵ်ႇတင်းလွင်ႈဢၼ်မၼ်းလႆႈႁၼ်မၼ်းၸဝ်ႈၼၼ်ႉ၊ၶဝ်ဢမ်ႇယုမ်ႇၵႂၢမ်းမၼ်းလႄႈယူႇဢေႃႈ။
ဝၢႆးၼၼ်ႉ၊မၼ်းၸဝ်ႈႁဵတ်းႁၢင်ႈၽၢင်ဢၼ်ပႅၵ်ႇပိူင်ႈသေလႄႈၼႄပျႃးတူဝ်မၼ်းၸဝ်ႈတီႈတပႄးၸဝ်ႈသွင်ၵေႃႉ၊ၼႂ်းၶၢဝ်းတၢင်းဢၼ်ၶဝ်ပႆတၢင်းၵႂႃႇၵႃႈတီႈဝၢၼ်ႈၼွၵ်ႈယူႇၼၼ်ႉဢေႃႈ။-
ၶဝ်သွင်ၵေႃႉၼၼ်ႉၵေႃႈ၊ၶိုၼ်းမႃးမွၵ်ႇလၢတ်ႈလွင်ႈတၢင်းၼၼ်ႉတီႈတၢင်ႇၵေႃႉတၢင်ႇၵူၼ်းၸိူဝ်းၼၼ်ႉဢေႃႈ။ ၶဝ်ၸိူဝ်းၼၼ်ႉၵေႃႈဢမ်ႇယုမ်ႇၶဝ်သွင်ၵေႃႉၼၼ်ႉလႄႈယူႇဢေႃႈ။
ဝၢႆးသေၼၼ်ႉ၊မၼ်းၸဝ်ႈၼႄပျႃးတူဝ်မၼ်းၸဝ်ႈၵႃႈတီႈတမၢၼ်ႇၸဝ်ႈသိပ်းဢဵတ်းပႃးၼႂ်းမိူဝ်ႈဢၼ်ၶဝ်ယင်းၵိၼ်တၢင်းၵိၼ်ယူႇၼၼ်ႉဢေႃႈ။ မၼ်းၸဝ်ႈတၢင်ႇဢပျတ်ႈတီႈၶဝ်ၵွပ်ႈပိူဝ်ႈၶဝ်ဢမ်ႇယုမ်ႇမၢတ်ႈ၊ဢိၵ်ႇတင်းႁူဝ်ၸႂ်ၶဝ်တၼ်ၼႃႇလႄႈဢမ်ႇယုမ်ႇၵႂၢမ်းၶဝ်ၸိူဝ်းဢၼ်လႆႈထူပ်းလႆႈႁၼ်မၼ်းၸဝ်ႈဝၢႆးသေမၼ်းၸဝ်ႈလုၵ်ႉၶိုၼ်းလိပ်းမႃးၼၼ်ႉလႄႈယူႇၼၼ်ႉဢေႃႈ။-
မၼ်းၸဝ်ႈၸင်ႇသင်ႇသွၼ်ပၼ်ၶဝ်လႄႈဝႃႈ၊ “သူၵႂႃႇၵႃႈတီႈမိူင်းလေႃးၵီႇၵူႈတီႈၵူႈလႅၼ်ၵႃႈမီးလႄႈႁေႃးလၢတ်ႈၶၢဝ်ႇတြႃးသိူဝ်းပျေႃႇၵႃႈတီႈၵူၼ်းၵူႈမဵဝ်းတင်းသဵင်ႈတင်းလူင်တႃႉ။-
ၽူႈလႂ်သေဢမ်ႇဝႃႈ၊ၵေႃႉဢၼ်ယုမ်ႇမၢတ်ႈလႄႈၶၢမ်ႇဢဝ်မၢင်ႇၵလႃႇပပ်ႉတိၸမ်ႇ ၼၼ်ႉတၵ်းလႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ဢေႃႈ။ ၵေႃႉဢၼ်ဢမ်ႇယုမ်ႇမၢတ်ႈၼၼ်ႉၸမ်ႉ၊တၵ်းလႆႈၶၢမ်ႇတၢင်းဢၼ်ၸီႇယၢင်ႇဢပျတ်ႈဢေႃႈ။-
ၵူၼ်းဢၼ်ယုမ်ႇမၢတ်ႈမီးတီႈလႂ်ၵေႃႈ၊တီႈၼၼ်ႈတၵ်းလႆႈႁၼ်ၼိမိၵ်ႈလၢၵ်ႈၶၼႃႇဢၼ်ဝႃႈ၊ၶဝ်တၵ်းႁေႃႈၽီႁၢႆႉလႂ်ဢွၵ်ႇပႅတ်ႈလူၺ်ႈၼႃႇမႃႉၸိုဝ်ႈသဵင်ၵဝ်လႄႈၶဝ်တၵ်းလၢတ်ႈၵႂၢမ်းၽႃႇသႃႇဢၼ်ပႅၵ်ႇဢၼ်လၢၵ်ႇပိူင်လႂ်ဢေႃႈ။-
ၶဝ်တၵ်းယိပ်းၵမ်ငူးလႆႈဢေႃႈ။ ပေႃးၶဝ်ၵိၼ်ငူၼ်ႉဢၼ်ၸၢင်ႈႁႂ်ႈတၢႆၼၼ်ႉၸိုင်၊ၶဝ်တၵ်းၵၢင်းလွတ်ႈတင်းၽေးဢုပၢတ်ႈဢေႃႈ။ ၶဝ်တၵ်းဢဝ်မိုဝ်းတၢင်ႇၵႃႈၼိူဝ်ၵူၼ်းၶႆႈၵူၼ်းပဵၼ်တင်းလၢႆၼၼ်ႉသေလႄႈႁႂ်ႈတၢင်းၶႆႈတၢင်းပဵၼ်ၸိုၼ်ႈႁၢႆဢေႃႈ၊” ဝႃႈၼင်ႇၼႆဢေႃႈ။
ဝၢႆးသေၸဝ်ႈၽြႃး ယေႇသု၊ လၢတ်ႈတေႃႇၶဝ်ယဝ်ႉၼၼ်ႉ၊မၼ်းၸဝ်ႈလႆႈၶၢမ်ႇတၢင်းဢၼ်ဢဝ်ၶိုၼ်ႈၵႂႃႇၵႃႈၼိူဝ်မိူင်းၵၢင်ႁၢဝ်ပုၼ်ႉလႄႈၼင်ႈယူႇၵႃႈတီႈၽၢႆႇၶႂႃၽြႃးပဵၼ်ၸဝ်ႈဢေႃႈ။-
တပႄးၸဝ်ႈၸိူဝ်းၼၼ်ႉၵေႃႈ၊ဢွၵ်ႇၵႂႃႇႁေႃးလၢတ်ႈတြႃးၸဝ်ႈၵူႈတီႈၵူႈလႅၼ်ဢေႃႈ။ ၸဝ်ႈၽြႃးၵေႃႈၸွႆႈထႅမ်မႃႉၸႃႉၶဝ်၊ဢဝ်တင်းၼိမိၵ်ႈလၢၵ်ႈၶၼႃႇဢၼ်ၶဝ်ႁဵတ်းၵႃႈမီးၸိူဝ်းၼၼ်ႉ၊ပဵၼ်သၢၵ်ႈသေႇတီႈၼုၵ်ႈၵပၢတ်ႈတြႃးၸဝ်ႈဢၼ်ၶဝ်ႁေႃးလၢတ်ႈၼၼ်ႉမၢၼ်ႇမႅၼ်ႈၸိုဝ်ႈၸႂ်ႈၼၼ်ႉဢေႃႈ။ ဢႃမိၼ်ႈ] [မႄႈယိင်းၸိူဝ်းၼၼ်ႉၵႂႃႇၵႃႈတီႈ ပေႇတရု၊ ဢိၵ်ႇတင်းတပႄးၸဝ်ႈတင်းလၢႆသေလႄႈဢဝ်လွင်ႈတၢင်းဢၼ်သင်ႇဝႆႉလၢတ်ႈဝႆႉတီႈၶဝ်ၵူႈၶေႃႈၵူႈၵမ်းၸိူဝ်းၼၼ်ႉမွၵ်ႇလၢတ်ႈပၼ်ပွတ်းပွတ်းသေဢေႃႈ။- လိုၼ်းသေၼၼ်ႉ၊ ၸဝ်ႈယေႇသု၊ ပွႆႇၸႂ်ႉတပႄးၸဝ်ႈတင်းလၢႆတၢင်တူဝ်မၼ်းၸဝ်ႈၵႂႃႇႁေႃးလၢတ်ႈၼုၵ်ႈၵပၢတ်ႈတြႃးၸဝ်ႈဢၼ်မူတ်းၸၢင်ႇလႄႈပဵၼ်တြႃးၶျွတ်ႈၵူႈၸူဝ်ႈၵူႈပၢၼ်ၼၼ်ႉၸႃႉၸဵမ်ၼႃႈဝၼ်းဢွၵ်ႇတေႃႇႁွတ်ႈၼႃႈဝၼ်းတူၵ်းဢေႃႈ။] ၶၢဝ်ႇတြႃးသိူဝ်းပျေႃႇဢၼ်သြႃႇမႃႇၵုတႅမ်ႈယဝ်ႉယဝ်ႉဢေႃႈ။
ၶုၼ်လူင် ထေႃးၽိလု၊ ဢၼ်မျၢတ်ႈၼႃႇတီႈၶႃႈ႟။ ၵူၼ်းၼမ်ၼႃႇလႆႈတႅမ်ႈဝႆႉၽိုၼ်လိၵ်ႈဢၼ်မၢတ်ႈမၢႆဝႆႉလွင်ႈဢၼ်ပဵၼ်မႃးၵႃႈၼႂ်းႁဝ်းၶႃႈၼၼ်ႉယဝ်ႉၶႃႈဢေႃႈ။-
ၶဝ်တႅမ်ႈမၢႆဝႆႉၸွမ်းၵႃႈၼင်ႇၵႂၢမ်းသၢၵ်ႈသေႇၶဝ်ၸိူဝ်းဢၼ်ႁူငိၼ်းတႃႁၼ်သိုဝ်ႈၼႃႈတႂ်ႈတႃၸဵမ်ငဝ်ႈႁူဝ်ပိုင်းမၼ်းလႄႈသမ်ႉပွင်ႁဵတ်းၵၢၼ်ဢၼ်ႁေႃးလၢတ်ႈၼုၵ်ႈၵပၢတ်ႈၸဝ်ႈၸိူဝ်းၼၼ်ႉ၊မွၵ်ႇလၢတ်ႈပၼ်ႁဝ်းၶႃႈၼၼ်ႉၶႃႈဢေႃႈ။-
ပိူဝ်ႈၼႆလႄႈၶုၼ်လူင်ဢၼ်မျၢတ်ႈၼႃႇတီႈၶႃႈ႟။ ပိူဝ်ႈဢၼ်ၵဝ်ၶႃႈလႆႈၸွမ်းႁႃၸႅတ်ႈတူၺ်းၸေးၸေးၸွတ်ႇၸွတ်ႇလွင်ႈတၢင်းၸိူဝ်းၼႆႉၸဵမ်ငဝ်ႈတေႃႇပၢႆယဝ်ႉလႄႈ၊ၵဝ်ၶႃႈထၢင်ႇတေပဵၼ်ဢၼ်သၢင်ႇထုၵ်ႇႁႂ်ႈလႆႈတႅမ်ႈၶပ်ႉတၢမ်းပၼ်ထိုင်တီႈၸဝ်ႈႁဝ်းၶႃႈဢေႃႈ။-
ၵဝ်ၶႃႈတႅမ်ႈၸိူဝ်ႉၼင်ႇၼႆပုၼ်ႈလွင်ႈၼင်ႇႁိုဝ်ၸဝ်ႈႁဝ်းတၵ်းႁုလွင်ႈတၢင်းဢၼ်ၸဝ်ႈႁဝ်းသွၼ်ဢဝ်ယဝ်ႉၸိူဝ်းၼၼ်ႉ၊ပဵၼ်ဢၼ်ၸိုဝ်ႈဢၼ်ၸႂ်ႈၼၼ်ႉၶႃႈဢေႃႈ။
လွင်ႈတၢင်းၸိူဝ်းၼႆႉပဵၼ်မိူဝ်ႈၸူဝ်ႈပၢၼ်ၸဝ်ႈၽႃႉ ႁေႇရူတ်ႈ၊ ႁဵတ်းၶုၼ်ၼႂ်းမိူင်း ယုတႃႉ၊ ၼၼ်ႉဢေႃႈ။ မိူဝ်ႈၼၼ်ႉမီးယဵၸ်ႈပရေႃးႁဵၵ်ႈ ၵေႃႉၼိုင်ႈဢၼ်လႆႈၸိုဝ်ႈ ၸႃႇၶရိ၊ ၵေႃႉဢၼ်ၶဝ်ႈပႃးၼႂ်းမုၵ်ႉၸိူဝ်း ဢၽိယႃႉ၊ ၸုမ်းယဵၸ်ႈပရေႃးႁဵၵ်ႈၶဝ်ၼၼ်ႉဢေႃႈ။ မေးမၼ်းၸိုဝ်ႈ ဢေးလိသၽႅတ်ႈ၊ ၼႂ်းၸိူဝ်ႉၶိူဝ်း ဢႃႇရုၼ်ႇ၊ ဢေႃႈ။-
ၶဝ်ၽူဝ်မေးပဵၼ်ၵူၼ်းသိုဝ်ႈတေႃႇၽၢႆႇၼႃႈၽြႃးပဵၼ်ၸဝ်ႈလႄႈၵမ်ၵျၢင်ႉၸွမ်းပိင်းၺၢပ်ႈဢုပတေႇထႃႇဝရႃႉၽြႃးၵူႈၸိူဝ်ႉၵူႈပိူင်ယဝ်ႉၸင်ႇ၊ပဵၼ်ၵေႃႉဢၼ်ၵၢင်းလွတ်ႈတင်းတီႈတၵ်းတၢင်ႇဢပျတ်ႈဢေႃႈ။-
ဢေးလိသၽႅတ်ႈ၊ ၼၼ်ႉပဵၼ်မႄႈယိင်းမၼ်လႄႈၶဝ်ဢမ်ႇမီးလုၵ်ႈမီးလၢင်း။ ၶဝ်ၽူဝ်မေးၵေႃႈထဝ်ႈၼႃႇယဝ်ႉဢေႃႈ။
ဝၼ်းၼိုင်ႈ၊ၸွမ်းၼင်ႇ ၸႃႇၶရိ၊ ပဵၼ်ယဵၸ်ႈပရေႃးႁဵၵ်ႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈၵေႃႉၼိုင်ႈၼၼ်ႉ၊တႃႇဝုၼ်ႇပုၼ်ႈၽွၼ်းတူၵ်းလႄႉတူၵ်းၵမ်းတီႈမုၵ်ႉၸိူဝ်းၶဝ်လႄႈမိူဝ်ႈဢၼ်မၼ်းပွင်ႁဵတ်းၼႃႈၵၢၼ်တၢင်းလူႇၵႃႈတီႈၽၢႆႇၼႃႈၽြႃးပဵၼ်ၸဝ်ႈယူႇၼၼ်ႉၸိုင်၊-
ၵႃႈၼင်ႇဢၼ်ထုင်းၸၢမ်ႇယဵၸ်ႈပရေႃးႁဵၵ်ႈၶဝ်မီးၼၼ်ႉၸႃႇၵွၵ်ႈတူၵ်းတီႈမၼ်းလႄႈမၼ်းလႆႈၶဝ်ႈၵႃႈၼႂ်းၵျွင်းပိၵ်ႈမၢၼ်ႇထႃႇဝရႃႉၽြႃးႁႂ်ႈလႆႈၽဝ်ၽႆးၼၢမ်ႇသႃႇၵႃႈၼိူဝ်ၶဵင်ႇတၢင်းလူႇဢေႃႈ။-
မိူဝ်ႈယၢမ်းဢၼ်ၽဝ်ၽႆးၼၢမ်ႇသႃႇယူႇၼၼ်ႉ၊ၵူၼ်းတင်းသဵင်ႈတင်းလူင်သူးတွင်းယူႇၵႃႈၼွၵ်ႈဢေႃႈ။-
ၶိင်ႇၼၼ်ႉတမၢၼ်ႇၵၢင်ႁၢဝ်ထႃႇဝရႃႉၽြႃးပေႃႇမႃးၵႃႈတီႈမၼ်းလႄႈၸုၵ်းယူႇၽၢႆႇၶႂႃၶဵင်ႇဢၼ်ၽဝ်ၽႆးၼၢမ်ႇသႃႇၼၼ်ႉဢေႃႈ။-
ၸႃႇၶရိ၊ ႁၼ်တမၢၼ်ႇၵၢင်ႁၢဝ်ၼၼ်ႉလႄႈတူၵ်းၸႂ်ၵူဝ်ႁႄၼႃႇဢေႃႈ။-
ၵူၺ်းၵႃႈ၊တမၢၼ်ႇၵၢင်ႁၢဝ်ၼၼ်ႉလၢတ်ႈတီႈမၼ်းလႄႈဝႃႈ၊ “ ၸႃႇၶရိ၊ ႟။ ယႃႇပေၵူဝ်။ ၽြႃးပဵၼ်ၸဝ်ႈထွမ်ႇဢဝ်ၵႂၢမ်းသူးတွင်းမႂ်းယဝ်ႉလႄႈမေးမႂ်း ဢေးလိသၽႅတ်ႈ၊ တၵ်းၵိူတ်ႇလဵင်ႉလုၵ်ႈၸၢႆးတီႈမႂ်းၵေႃႉၼိုင်ႈဢေႃႈ။ မႂ်းတၵ်းလႆႈတၢင်ႇၸိုဝ်ႈပၼ်သဵင်ဝႃႈ၊ ယူဝ်းႁၢၼ်ႇ၊ ဢေႃႈ။-
မႂ်းတၵ်းလႆႈၸူမ်းသိူဝ်းၼႃႇလူင်လၢင်ၵူၺ်းဢမ်ႇၵႃး၊ပိူၼ်ႈတၢင်ႇၵေႃႉၼမ်ၼႃႇၵေႃႈတၵ်းလႆႈမူၼ်ႈပျေႃႇၵွပ်ႈမၼ်းၵိူတ်ႇလဵင်ႉမႃးၼၼ်ႉဢေႃႈ။-
မၼ်းတၵ်းပဵၼ်ၵေႃႉဢၼ်ယႂ်ႇမျၢတ်ႈၼႃႇၵႃႈတီႈၽၢႆႇၼႃႈထႃႇဝရႃႉၽြႃးလႄႈတၵ်းဢမ်ႇၵိၼ်ၼမ်ႉမၢၵ်ႇၸပိတ်ႉတင်းလဝ်ႈလႄႈယူႇဢေႃႈ။ ၸႃႉၸဵမ်မိူဝ်ႈဢၼ်မၼ်းမီးၼႂ်းတွင်ႉမႄႈမၼ်းၼၼ်ႉမၼ်းတၵ်းပျေႉၸုမ်ႇတင်းဝိၺိၺ်ႇဢၼ်မူတ်းၸၢင်ႇၸဝ်ႈဢေႃႈ။-
မၼ်းတၵ်းဢဝ်ၵူၼ်းမဵဝ်း ဢိသရေး၊ ၼမ်ၼႃႇၶိုၼ်းမႃးၸူးတီႈထႃႇဝရႃႉၽြႃးပဵၼ်ၸဝ်ႈၶဝ်ဢေႃႈ။-
မၼ်းတၵ်းတဵမ်ဝႆႉတင်းဢဵၼ်ႁႅင်းတင်းတၼ်းၶူဝ်းမိူၼ်ၼင်ႇပရေႃးၽႅတ်ႈ ဢေးလိယႃႉ၊ လႄႈၵႂႃႇဢွၼ်တၢင်းၸဝ်ႈၽြႃးသေယဝ်ႉ၊တၵ်းႁႂ်ႈပေႃႈတင်းလုၵ်ႈၶိုၼ်းထုၵ်ႇၵၼ်တၵ်းႁႂ်ႈၶဝ်ၸိူဝ်းဢၼ်ထဵင်ပႅတ်ႈၼၼ်ႉပိၼ်ႇၸႂ်လႄႈၵႂႃႇၸူးၼႂ်းသဵၼ်ႈတၢင်းပိင်ႇၺႃႇၵူၼ်းသိုဝ်ႈတေႃႇ၊ဢိၵ်ႇတင်းတၵ်းႁႂ်ႈပဵၼ်မဵဝ်းၵူၼ်းဢၼ်မႄးႁႅၼ်းဝႆႉပုၼ်ႈထႃႇဝရႃႉၽြႃးဢေႃႈ၊” ဝႃႈၼင်ႇၼႆဢေႃႈ။
ၸႃႇၶရိ၊ ၶိုၼ်းလဝ်ႈလၢတ်ႈတီႈတမၢၼ်ႇၵၢင်ႁၢဝ်လႄႈဝႃႈ၊ “လွင်ႈတၢင်းဢၼ်တၵ်းပဵၼ်မႃးဢမၢၼ်ႇၸိုင်၊ၵဝ်ၶႃႈတၵ်းလႆႈႁၼ်ၸိူဝ်ႉၼင်ႇႁိုဝ်ၶႃႈ။ ႁဝ်းၶႃႈၽူဝ်မေးပေႃးထဝ်ႈၼႃႇယဝ်ႉၶႃႈဢေႃႈ၊” ဝႃႈၼင်ႇၼႆဢေႃႈ။
တမၢၼ်ႇၵၢင်ႁၢဝ်ၵေႃႈလၢတ်ႈလႄႈဝႃႈ၊ “ၵဝ်ပဵၼ် ၵႃႇပရေႇလႃႉ၊ ဢၼ်ၸုၵ်းလႄႈၶႃးၸႃးတီႈၽၢႆႇၼႃႈၽြႃးပဵၼ်ၸဝ်ႈဢေႃႈ။ မၼ်းၸဝ်ႈပွႆႇၸႂ်ႉၵဝ်မႃးႁႂ်ႈလႆႈလၢတ်ႈတေႃႇၵၼ်တင်းမႂ်းလႄႈမွၵ်ႇလၢတ်ႈၶၢဝ်ႇငၢဝ်းဢၼ်လီၸူမ်းၼႆႉတီႈမႂ်းယဝ်ႉ။-
ၵူၺ်းၵႃႈ၊မႂ်းယင်းဢမ်ႇယုမ်ႇၶၢဝ်ႇငၢဝ်းၵဝ်ဢၼ်တၵ်းပဵၼ်ၸွမ်းဢမၢၼ်ႇၶၼ်ပဵၼ်မိူဝ်ႈၶိင်ႇမၼ်းႁွတ်ႈထိုင်မႃးၼၼ်ႉဢေႃႈ။ ပိူဝ်ႈဢၼ်မႂ်းဢမ်ႇယုမ်ႇၼၼ်ႉလႄႈ၊မႂ်းတၵ်းဢႃႉယူႇဢမ်ႇလၢတ်ႈၵႂၢမ်းလႆႈတေႃႇထိုင်ႁွတ်ႈဝၼ်းဢၼ်ပဵၼ်မႃးၸွမ်းၵႂၢမ်းၵဝ်လၢတ်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၽွင်းယၢမ်းၼၼ်ႉၵူၼ်းတင်းလၢႆပႂ်ႉထႃႈ ၸႃႇၶရိ၊ ယူႇလႄႈဢၢမ်းလွင်ႈဢၼ်မၼ်းယူႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈႁိုင်ၼႃႇလူင်လၢင်ၼၼ်ႉဢေႃႈ။-
မိူဝ်ႈဢၼ်မၼ်းဢွၵ်ႇမႃးလႄႈဢမ်ႇၸၢင်ႈလၢတ်ႈၵႂၢမ်းတေႃႇၶဝ်ယဝ်ႉၼၼ်ႉၸိုင်၊ၶဝ်ႁုလွင်ႈဢၼ်မၼ်းလႆႈႁၼ်ရူႇပႃႇရူင်ႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။ ၸႃႇၶရိ၊ ဢမ်ႇၸၢင်ႈလၢတ်ႈၵႂၢမ်းယဝ်ႉလႄႈဢဝ်မိုဝ်းၼႄပၼ်လၢၵ်ႈၶၼႃႇၵူၺ်းဢေႃႈ။
ဝၢႆးသေၸူဝ်ႈၶၢဝ်းၼႃႈၵၢၼ်ဢၼ်မၼ်းလႆႈႁဵတ်းၵႃႈၼႂ်းၵျွင်းပိၵ်ႈမၢၼ်ႇၸဝ်ႈယဝ်ႉတူဝ်ႈယဝ်ႉၼၼ်ႉ၊ ၸႃႇၶရိ၊ ပွၵ်ႈမိူဝ်းႁိူၼ်းၵႂႃႇသေဢေႃႈ။-
ဢမ်ႇႁိုင်ဢမ်ႇၼၢၼ်းမေးမၼ်း ဢေးလိသၽႅတ်ႈ၊ ပႃးပတိၵ်ႈသၼ်ႇထေႇမႃးလႄႈဢမ်ႇဢွၵ်ႇႁိူၼ်းႁႃႈလိူၼ်တဵမ်တဵမ်သေယဝ်ႉ၊-
လၢတ်ႈလႄႈဝႃႈ၊ “တေႃႈလဵဝ်ၼႆႉထႃႇဝရႃႉၽြႃးၸွႆႈထႅမ်မႃႉၸႃႉၵဝ်ယဝ်ႉ။ မၼ်းၸဝ်ႈႁႂ်ႈၵဝ်ၵၢင်းလွတ်ႈသေတၢင်းဢၼ်ပိူၼ်ႈသႄႉသွမ်းၼၼ်ႉယဝ်ႉ၊” ဝႃႈၼင်ႇၼႆဢေႃႈ။
ၼႂ်းမိူဝ်ႈဢၼ် ဢေးလိသၽႅတ်ႈ၊ ပႃးပတိၵ်ႈသၼ်ႇထေႇႁူၵ်းလိူၼ်ယဝ်ႉၼၼ်ႉၸိုင်၊ၽြႃးပဵၼ်ၸဝ်ႈပွႆႇၸႂ်ႉတမၢၼ်ႇၵၢင်ႁၢဝ် ၵႃႇပရေႇလႃႉ၊ ၵႂႃႇၵႃႈတီႈဝဵင်း ၼႃႇၸရႅတ်ႈ၊ ၼႂ်းဢိူင်ႇ ၵႃႇလိလႄး၊ ၸူးၵႃႈတီႈၼၢင်းသၢဝ်ၵၼ်ႇၺႃႇ၊-
ဢၼ်လႆႈမၢႆမၼ်ႈၵၼ်ဝႆႉတင်းၵူၼ်းၸၢႆးၵေႃႉၼိုင်ႈဢၼ်လႆႈၸိုဝ်ႈ ယူဝ်းသႅပ်ႈ၊ ဢၼ်ပဵၼ်ၸိူဝ်ႉၶိူဝ်း တႃႇဝိတ်ႈ၊ ဢေႃႈ။ ၸိုဝ်ႈသဵင်ၼၢင်းယိင်းသၢဝ်ၵၼ်ႇၺႃႇၼၼ်ႉႁွင်ႉႁဵၵ်ႈဝႃႈ၊ မႃႇရိ၊ ဢေႃႈ။-
တမၢၼ်ႇၵၢင်ႁၢဝ်ပေႃႇမႃးၵႃႈတီႈမၼ်းသေယဝ်ႉ၊လၢတ်ႈလႄႈဝႃႈ၊ “ၼၢင်းယိင်းဢၼ်မီးမၢင်ႇၵလႃႇၼႆႉ႟။ ႁႂ်ႈတၢင်းၼိမ်မီးၵႃႈၼိူဝ်မႂ်းသေၵမ်းလူၺ်ႈ။ ထႃႇဝရႃႉၽြႃးမီးယူႇလူၺ်ႈၵၼ်တင်းမႂ်းလႄႈသွၼ်းလေႃႇပၼ်မၢင်ႇၵလႃႇတီႈမႂ်းၼမ်ၼႃႇဢေႃႈ၊” ဝႃႈၼင်ႇၼႆဢေႃႈ။
မႃႇရိ၊ ၵႂၢင်ၸႂ်ယုင်ႈၸႂ်လူၺ်ႈၶၢဝ်ႇငၢဝ်းဢၼ်တမၢၼ်ႇၵၢင်ႁၢဝ်လၢတ်ႈၼၼ်ႉလႄႈဢၢမ်းလွင်ႈၶေႃႈၵႂၢမ်းၼၼ်ႉၶႂ်ႈဝႃႈသင်ၼၼ်ႉယူႇဢေႃႈ။
တမၢၼ်ႇၵၢင်ႁၢဝ်လၢတ်ႈတီႈမၼ်းလႄႈဝႃႈ၊ “ မႃႇရိ၊ ႟။ ယႃႇပေၵူဝ်ပေႁႄ။ ထႃႇဝရႃႉၽြႃးထုၵ်ႇၸႂ်ၵျိူၵ်ႈၸႂ်မႂ်းယဝ်ႉ။-
မႂ်းတၵ်းပႃးပတိၵ်ႈသၼ်ႇထေႇသေယဝ်ႉ၊ၵိူတ်ႇလဵင်ႉလုၵ်ႈၸၢႆးမႃးလႄႈတၵ်းလႆႈႁွင်ႉႁဵၵ်ႈၸိုဝ်ႈမၼ်းဝႃႈ၊ ယေႇသု၊ ဢေႃႈ။-
မၼ်းၼၼ်ႉ၊တၵ်းပဵၼ်ၵေႃႉဢၼ်ယႂ်ႇမျၢတ်ႈၼႃႇလႄႈ၊တၵ်းလႆႈၶၢမ်ႇတၢင်းဢၼ်ႁွင်ႉႁဵၵ်ႈလုၵ်ႈၽြႃးပဵၼ်ၸဝ်ႈၸဝ်ႈဢၼ်သုင်မျၢတ်ႈၼႃႇသေပိူၼ်ႈဢေႃႈ။ ၽြႃးပဵၼ်ၸဝ်ႈထႃႇဝရႃႉၽြႃးတၵ်းႁဵတ်းႁႂ်ႈမၼ်းပဵၼ်ၶုၼ်ႁေႃၶမ်းၸိူဝ်ႉၼင်ႇဢၼ်ပူႇမွၼ်ႇမၼ်း တႃႇဝိတ်ႈ၊ ပဵၼ်ၼၼ်ႉလႄႈ၊-
တၵ်းလႆႈဢုပ်ႉပိူင်ႇၸိူဝ်ႉၶိူဝ်း ယႃႇၵုပ်ႈ၊ ယူႇတႃႇသေႇဢမ်ႇထၢတ်ႇဢေႃႈ။ ဝၢၼ်ႈမိူင်းမၼ်းၵေႃႈတၵ်းဢမ်ႇမီးတီႈသုတ်းတီႈသဵင်ႈ၊” ဝႃႈၼင်ႇၼႆဢေႃႈ။
မႃႇရိ၊ ၵေႃႈလဝ်ႈထၢမ်တီႈတမၢၼ်ႇၵၢင်ႁၢဝ်လႄႈဝႃႈ၊ “ၵဝ်ၶႃႈၼႆႉပဵၼ်သၢဝ်ၵၼ်ႇၺႃႇၸႅတ်ႈဢေႃႈ။ လွင်ႈတၢင်းၼႆႉတၵ်းပဵၼ်မႃးလႆႈၸိူဝ်ႉၼင်ႇႁိုဝ်ၶႃႈ၊” ဝႃႈၼင်ႇၼႆဢေႃႈ။
တမၢၼ်ႇၵၢင်ႁၢဝ်ၶိုၼ်းလၢတ်ႈလႄႈဝႃႈ၊ “ဝိၺိၺ်ႇဢၼ်မူတ်းၸၢင်ႇၸဝ်ႈတၵ်းလူင်းမႃးၵႃႈၼိူဝ်မႂ်းလႄႈမုၼ်တၼ်းၶူဝ်းၽြႃးပဵၼ်ၸဝ်ႈဢၼ်သုင်မျၢတ်ႈၼႃႇသေပိူၼ်ႈၼၼ်ႉတၵ်းႁူမ်ႇသုမ်ႇၵႃႈၼိူဝ်မႂ်းဢေႃႈ။ ၵွပ်ႈပိူဝ်ႈလွင်ႈတီႈႁႅင်းၼႆႉလႄႈလုၵ်ႈၸဝ်ႈဢၼ်မူတ်းၸၢင်ႇၼၼ်ႉတၵ်းလႆႈၶၢမ်ႇတၢင်းဢၼ်ႁွင်ႉႁဵၵ်ႈလုၵ်ႈၽြႃးပဵၼ်ၸဝ်ႈဢေႃႈ။-
တူၺ်းလူး၊ၶုၵ်းၸႂ်လႆႈ ဢေးလိသၽႅတ်ႈ၊ ဢၼ်ပဵၼ်ၸိူဝ်ႉၶိူဝ်းမႂ်းၼၼ်ႉတႃႉ။ ပိူၼ်ႈလၢတ်ႈဝႃႈ၊မၼ်းဢမ်ႇၸၢင်ႈမီးလုၵ်ႈယဝ်ႉဝႃႈၼႆ၊ပိၵ်ႉသမ်ႉတေႃႈလဵဝ်ၼႆႉမၼ်းထဝ်ႈၼႃႇယဝ်ႉသေၵေႃႈမၼ်းယင်းပႃးပတိၵ်ႈသၼ်ႇထေႇလႆႈႁူၵ်းလိူၼ်ယဝ်ႉ။-
ဢၼ်ၽြႃးပဵၼ်ၸဝ်ႈဢမ်ႇတၢတ်ႈၼိူင်ႇလႆႈၼၼ်ႉဢမ်ႇမီးသေၸိူဝ်ႉသေပိူင်၊” ဝႃႈၼင်ႇၼႆဢေႃႈ။
မႃႇရိ၊ ၵေႃႈလၢတ်ႈလႄႈဝႃႈ၊ “ၵဝ်ၶႃႈၼႆႉပဵၼ်ၶႃႈထႃႇဝရႃႉၽြႃးၶႃႈဢေႃႈ။ ၵႃႈၼင်ႇဢၼ်ၸဝ်ႈႁဝ်းလၢတ်ႈၼၼ်ႉႁႂ်ႈပဵၼ်တီႈၵဝ်ၶႃႈသေၵမ်းလူၺ်ႈ၊” ဝႃႈၼင်ႇၼႆယဝ်ႉၸင်ႇ၊တမၢၼ်ႇၵၢင်ႁၢဝ်ၼၼ်ႉဢွၵ်ႇသေၵႃႈတီႈ မႃႇရိ၊ ၵႂႃႇဢေႃႈ။
လိုၼ်းၼၼ်ႉ၊ မႃႇရိ၊ ႁႅၼ်းၶူဝ်းမၼ်းသေယဝ်ႉ၊ဢွၵ်ႇၵႂႃႇၵႃႈတီႈဝဵင်းဝဵင်းၼိုင်ႈဢၼ်မီးယူႇၼိူဝ်လွႆမိူင်း ယုတႃႉ၊ ပုၼ်ႉၶၼ်ၶၼ်ၽႂ်းၽႂ်းဢေႃႈ။-
မၼ်းၶဝ်ႈၵႃႈၼႂ်းႁိူၼ်း ၸႃႇၶရိ၊ ယဝ်ႉၸင်ႇတၵ်ႉလၢတ်ႈတီႈ ဢေးလိသၽႅတ်ႈ၊ လႄႈ၊-
ၼႂ်းမိူဝ်ႈဢၼ် ဢေးလိသၽႅတ်ႈ၊ ငိၼ်းၵႂၢမ်းဢၼ်တူင်ႉတၵ်ႉၼၼ်ႉၸိုင်၊လုၵ်ႈဢွၼ်ႇတူင်ႉၼိုင်ၵႃႈၼႂ်းတွင်ႉမၼ်းႁႅင်းၼႃႇဢေႃႈ။ ဢေးလိသၽႅတ်ႈ၊ ၵေႃႈတဵမ်ဝႆႉတင်းဝိၺိၺ်ႇမူတ်းၸၢင်ႇၸဝ်ႈသေလႄႈ၊-
မၼ်း ဢဝ်တင်းသဵင်ဢၼ်ႁႅင်းၼႃႇလၢတ်ႈလႄႈဝႃႈ၊ “ၼႂ်းမႄႈယိင်းတင်းလၢႆမႂ်းၼႆႉမီးမၢင်ႇၵလႃႇဢၼ်မျၢတ်ႈၼႃႇဢေႃႈ။ လုၵ်ႈဢွၼ်ႇၼႂ်းတွင်ႉမႂ်းၵေႃႈမီးမၢင်ႇၵလႃႇဢၼ်မျၢတ်ႈၼႃႇဢေႃႈ။-
တၢင်း ဢၼ်မႄႈၸဝ်ႈၵဝ်ၶႃႈမႃးလႄႇတီႈၵဝ်ၶႃႈၼႆႉပဵၼ်တၢင်းလီမၢင်ႇၵလႃႇပုၼ်ႈၵဝ်ၶႃႈယဝ်ႉ။-
တူၺ်း လူး။ မိူဝ်ႈဢၼ်ၵဝ်ၶႃႈလႆႈငိၼ်းၵႂၢမ်းတူင်ႉတၵ်ႉမႂ်းၼႆႉၵမ်းလဵဝ်၊လုၵ်ႈဢွၼ်ႇဢၼ်မီးၼႂ်းတွင်ႉၵဝ်ၶႃႈၼႆႉၸူမ်းသိူဝ်းလႄႈတူင်ႉၼိုင်ၼႃႇဢေႃႈ။-
ၵွပ်ႈပိူဝ်ႈမႂ်းယုမ်ႇမၢတ်ႈၵႂၢမ်းဢၼ်ၸဝ်ႈၽြႃးမီးဢမိင်ႉတီႈမႂ်းၼၼ်ႉလႄႈတၵ်းပျေႉၸုမ်ႇပဵၼ်ၸွမ်းဢမၢၼ်ႇၶၼ်ပဵၼ်လႄႈမႂ်းမီးမၢင်ႇၵလႃႇဢေႃႈ၊” ဝႃႈၼင်ႇၼႆဢေႃႈ။
မႃႇရိ၊ လၢတ်ႈလႄႈဝႃႈ၊ “ႁူဝ်ၸႂ်ၵဝ်ဢၢမ်းဢေႃးယွင်ႈယေႃး ၸဝ်ႈမျၢတ်ႈၽြႃး၊
ဢိၵ်ႇပႃးဝိၺိၺ်ႇၵဝ်လႆႈၸူမ်းသိူဝ်းလူၺ်ႈၶိူဝ်းၸဝ်ႈၽြႃးၵႄႇၶျွတ်ႈဢဝ်ၵဝ်ၼၼ်ႉဢေႃႈ။
မၼ်းၸဝ်ႈၶုၵ်းၸႂ်လႆႈၶႆႈၸႂ်ထူပ်းၵဝ်ၶႃႈၼၢင်းယိင်းဢၼ်ၶျႃးတႅမ်ႇဢၼ်ပဵၼ်ၶႃႈမၼ်းၸဝ်ႈ၊ တႄႇၸႃႉဢဝ်ဝၼ်းမိူဝ်ႈလဵဝ်ၼႆႉၵႂႃႇပိူၼ်ႈလႆႈႁွင်ႉၵဝ်ဝႃႈ၊ ‘မၢင်ႇၵလႃႇ’ လူၺ်ႈသဵင်ပၼ်း။
ၸဝ်ႈဢၼၼ်ႇတႃႉတၼ်းၶူဝ်းႁဵတ်းလွင်ႈဢၼ် ယႂ်ႇမျၢတ်ႈၼႃႇပုၼ်ႈၵဝ်ၶႃႈ၊ ၼႃႇမႃႉၸိုဝ်ႈသဵင်ၸဝ်ႈလႅင်းပၢင်ႇ၊မူတ်းၸၢင်ႇတီႈၶႃႈဢေႃႈ။ မူတ်းၸၢင်ႇတီႈၶႃႈၼေႃ။
မၼ်းၸဝ်ႈၼႄပျႃးၸႂ်ၵရုၼႃႇထၢင်ႇသႃးတီႈၶဝ် ၸိူဝ်းဢၼ်ၵူဝ်ယမ်ဢႃးလႃး၊ တၢမ်းသိုပ်ႇၼိုင်ႈလႄႈလၢမ်းသိုပ်ႇၼိုင်ႈထႅင်ႈဢေႃႈ။
မၼ်းၸဝ်ႈယဵတ်ႇယိုၼ်းပႅၼ်ၶႅၼ်မိုဝ်းဢၼ်ပျေႉၸုမ်ႇလူၺ်ႈဢဵၼ်ႁႅင်း၊ တမ် တႅင်းယႃႉၵဝ်း၊ႁႂ်ႈၶဝ်ၸိူဝ်းဢၼ်ဢုပ်ႇဝၢဝ်းလႆႈၽၢတ်ႇသဝ်းယၢၼ်၊လူၺ်ႈၺၢၼ်ႇၶဝ်ၵႃႈမီးယဝ်ႉ။
မၼ်းၸဝ်ႈတိုတ်ႉၸၼ်ၶုၼ်ႁေႃၶမ်းတင်းလၢႆၶျႃးလူင်းတမ်းတႂ်ႈပလၢင်ႇ၊ ယုၵ်ႉယွင်ႈတၢင်ႇၶဝ်ၸိူဝ်းဢၼ်တႅမ်ႇယေႃႈ ၼင်ႇၼၼ်ယဝ်ႉဢေႃႈ။
မၼ်းၸဝ်ႈႁႅၼ်းတႄႇႁႅၼ်းတမ်းလွင်ႈလီလွင်ႈငၢမ်းတီႈၶဝ်ၸိူဝ်းဢၼ်ဢိုပ်းယၢၵ်ႈ၊ တီႈၶဝ်ၸိူဝ်းဢၼ်ၸၢင်ႈမၢၵ်ႈၸၢင်ႈမီး ၸဝ်ႈႁဝ်းၽိုတ်ႉဢီးၶဝ်ပႅတ်ႈၵႂႃႇလူၺ်ႈ တူဝ်လၢႆမိုဝ်းပဝ်ႇဢေႃႈ။
မၼ်းၸဝ်ႈၼပ်ႉဢၢၼ်ႇၵတိဢၼ်ဝႆႉတီႈပူႇမွၼ်ႇမိူဝ်ႈၵွၼ်ႇဢွၼ်ၼၼ်ႉမၼ်းၸဝ်ႈဢဵတ်းလူ၊ ၸွႆႈထႅမ်မႃႉၸႃႉတီႈၵူၼ်းမဵဝ်း ဢိသရေး၊ ၶႃႈမၼ်းၸဝ်ႈၸိူဝ်းၼၼ်ႉဢေႃႈ။
ယင်းၶုၵ်းၸႂ်လႆႈၶႆႈၸႂ်ပႃးႁႂ်ႈလႆႈၼႄပျႃးၵရုၼႃႇတီႈ ဢႃႇပြႃႇႁၢမ်ႇ၊ ပေႃႈၸဝ်ႈၸိူဝ်ႉၶိူဝ်း၊ ဢိၵ်ႇတင်းတင်းၸိူဝ်ႉတင်းၶိူဝ်း၊ဢၼ်သိုပ်ႇလၢမ်းတၢမ်းမႃး ၵူႈၸူဝ်ႈပၢၼ်ယၢမ်းယဝ်ႉဢေႃႈ၊” ဝႃႈၼင်ႇၼႆဢေႃႈ။
မႃႇရိ၊ ယူႇတီႈ ဢေးလိသၽႅတ်ႈ၊ ၼၼ်ႉသၢမ်လိူၼ်ၸမ်ၸမ်ယဝ်ႉၸင်ႇၶိုၼ်းမိူဝ်းႁိူၼ်းတူဝ်ၸဝ်ႈၵဝ်ႇဢေႃႈ။
ဢေးလိသၽႅတ်ႈ၊ ၼၼ်ႉမိူဝ်ႈဢၼ်ပတိၵ်ႈသၼ်ႇထေႇထူၼ်ႈၵႄႇယဝ်ႉၸိုင်၊ၵိူတ်ႇလဵင်ႉလုၵ်ႈၸၢႆးမႃးဢေႃႈ။-
ၵူၼ်းႁိမ်းႁေႃႁိမ်းႁိူၼ်းမၼ်းတင်းပီႈၼွင်ႉၸိူဝ်ႉၶိူဝ်းမၼ်းတင်းလၢႆ၊လႆႈႁုလႆႈငိၼ်းလွင်ႈဢၼ်ၽြႃးပဵၼ်ၸဝ်ႈႁဵတ်းတၢင်းလီဢၼ်လီဢၢမ်းၼႃႇပုၼ်ႈမၼ်းလႄႈဢွၼ်ၵၼ်သိူဝ်းၸူမ်းလူၺ်ႈၵၼ်တင်းမၼ်းဢေႃႈ။
မိူဝ်ႈဢၼ်ဢသၢၵ်ႈလုၵ်ႈဢွၼ်ႇလႆႈမႃးပႅတ်ႇဝၼ်းၸိုင်၊ၶဝ်ဢွၼ်ၵၼ်မႃးႁႂ်ႈလႆႈႁဵတ်းမၢင်ႇၵလႃႇတၢင်းဢၼ်ပၢတ်ႇပၢႆၼင်တီႈလုၵ်ႈဢွၼ်ႇၼၼ်ႉလႄႈဢၢင်ႈတၵ်းပၼ်ၸိုဝ်ႈဝႃႈ၊ ၸႃႇၶရိ၊ ဢၼ်ပဵၼ်ၸိုဝ်ႈပေႃႈမၼ်းၼၼ်ႉဢေႃႈ။-
ၵူၺ်းၵႃႈ၊မႄႈမၼ်းၶိုၼ်းလၢတ်ႈလႄႈဝႃႈ၊ “ဢမ်ႇၸႂ်ႈၵူၺ်း။ တၵ်းလႆႈႁွင်ႉႁဵၵ်ႈၸိုဝ်ႈဝႃႈ၊ ယူဝ်းႁၢၼ်ႇ၊ ဢေႃႈ၊” ဝႃႈၼင်ႇၼႆဢေႃႈ။
ၶဝ်ၼၼ်ႉၶိုၼ်းလၢတ်ႈတီႈမၼ်းလႄႈဝႃႈ၊ “ၼႂ်းၸိူဝ်ႉၶိူဝ်းသူၼႆႉယင်းဢမ်ႇမီးၸိုဝ်ႈၸိူဝ်ႉၼင်ႇၼၼ်ၼၼ်ႉသေၵေႃႉသေၵူၼ်း၊” ဝႃႈၼင်ႇၼႆလႄႈ၊-
ၶဝ်ၸင်ႇၼႄတိၼ်ၼႄမိုဝ်းႁႂ်ႈလႆႈထၢမ်တူၺ်းလွင်ႈဢၼ်ပေႃႈမၼ်းၶႂ်ႈႁႂ်ႈႁွင်ႉႁဵၵ်ႈၸိုဝ်ႈၸိူဝ်ႉၼင်ႇႁိုဝ်ၼၼ်ႉဢေႃႈ။
ၸႃႇၶရိ၊ ၵေႃႈယွၼ်းဢဝ်ၸေႈသေလႄႈတႅမ်ႈဝႃႈ၊ “ၸိုဝ်ႈမၼ်းပဵၼ် ယူဝ်းႁၢၼ်ႇ၊ ဢေႃႈ၊” မိူဝ်ႈဢၼ်ဝႃႈၼင်ႇၼႆၸိုင်၊ၶဝ်ၸိူဝ်းၼၼ်ႉဢၢမ်းၼႃႇဢေႃႈ။-
ၽွင်းယၢမ်းၼၼ်ႉ ၸႃႇၶရိ၊ ၽုၺ်ႇဢႃႈပၢၵ်ႇမၼ်းလႄႈဢဵၼ်လိၼ်ႉမၼ်းလဵတ်းမႃးၵမ်းလဵဝ်သေယဝ်ႉ၊လၢတ်ႈၵႂၢမ်းယွင်ႈယေႃးၵျေးၸူးၽြႃးပဵၼ်ၸဝ်ႈဢေႃႈ။-
ၵူၼ်းႁိမ်းႁေႃႁိမ်းႁိူၼ်းၸိူဝ်းၼၼ်ႉၵူဝ်ႁႄၼႃႇလႄႈၶၢဝ်ႇငၢဝ်းလွင်ႈတၢင်းၼၼ်ႉၸွတ်ႇသႃႇႁူင်ႁၢင်းၵႂႃႇၵႃႈတီႈတူၼ်းလွႆမိူင်း ယုတႃႉ၊ ပုၼ်ႉဢေႃႈ။-
ၶဝ်ၸိူဝ်းဢၼ်ငိၼ်းတင်းသဵင်ႈတင်းလူင်ဢွၼ်ၵၼ်ၶႆႈၸႂ်ဝူၼ်ႉၸႂ်လူၺ်ႈလွင်ႈမၼ်းလႄႈတွင်ႈထၢမ်လၢတ်ႈၸႃတီႈၵၼ်လႄႈဝႃႈ၊ “လုၵ်ႈဢွၼ်ႇၼႆႉတၵ်းပဵၼ်ၸိူဝ်ႉႁိုဝ်မႃးၼေႃ၊” ဝႃႈၼင်ႇၼႆ၊ၵွပ်ႈပိူဝ်ႈဢၼ်ထၢင်ႇသႃးလွင်ႈဢၼ်တၼ်းၶူဝ်းထႃႇဝရႃႉၽြႃးမီးယူႇလူၺ်ႈၵၼ်တင်းမၼ်းၼၼ်ႉဢေႃႈ။
ပေႃႈ ယူဝ်းႁၢၼ်ႇ၊ ဢၼ်ပဵၼ် ၸႃႇၶရိ၊ ၼၼ်ႉတဵမ်ဝႆႉတင်းဝိၺိၺ်ႇဢၼ်မူတ်းၸၢင်ႇၸဝ်ႈယူႇသေလႄႈႁေႃးလၢတ်ႈလွင်ႈဢၼ်တေပဵၼ်မႃးမိူဝ်းၼႃႈလႄႈဝႃႈၸမ်ႉ။
“ဢွၼ်ၵၼ်ယုၵ်ႉယွင်ႈယွင်ႈယေႃးၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ထႃႇဝရႃႉၽြႃးၼၼ်ႉ ၵၼ် တႃႉႁဝ်း။ လွင်ႈ မၼ်းၸမ်ႉ၊မၼ်းၸဝ်ႈၵျွလူင်းမႃးၸွႆႈထႅမ်ၵူၼ်းမၼ်းၸဝ်ႈသေလႄႈ ႁႂ်ႈ ၶဝ်လႆႈလွတ်ႈလႅဝ်းဢေႃႈ။
မၼ်းၸဝ်ႈပၼ်ၸဝ်ႈတၼ်းၶူဝ်းဢၼ်ၵႄႇၶျွတ်ႈဢဝ်ၼၼ်ႉပေႃႇဢွၵ်ႇမႃးသေၵႃႈၼႂ်း၊ ၸိူဝ်ႉၶိူဝ်း တႃႇဝိတ်ႈ၊ ၶႃႈမၼ်းၸဝ်ႈၼၼ်ႉ ပုၼ်ႈ ႁဝ်းဢေႃႈ။
လွင်ႈတၢင်းၸိူဝ်းၼႆႉမၼ်းၸဝ်ႈပၼ်ပျႃႇတိၵ်ႈဝႆႉယဝ်ႉၵႃႈၼႂ်းသူပ်းပရေႃးၽႅတ်ႈ၊ ဢၼ်မူတ်းၸၢင်ႇၸဝ်ႈတင်းလၢႆၸဵမ်မိူဝ်ႈ ၵွၼ်ႇၼၼ်ႉလႄႈ။
မၼ်းၸဝ်ႈဝႆႉၵတိဢၼ်တၵ်းၵႄႇၶျွတ်ႈဢဝ်ႁဝ်းဢွၵ်ႇသေၵႃႈၼႂ်းမိုဝ်းရၢၼ်ႇသူႇႁဝ်းတင်းလၢႆ၊ ဢိၵ်ႇတင်းၵႃႈၼႂ်းတၼ်းၶူဝ်းၶဝ်ၸိူဝ်းဢၼ်ငိၼ်းၸင်းႁဝ်းၼၼ်ႉဢေႃႈ။
မၼ်းၸဝ်ႈလၢတ်ႈဝႃႈ၊မၼ်းၸဝ်ႈတၵ်းၼႄပျႃးၵရုၼႃႇၵႃႈတီႈပူႇမွၼ်ႇႁဝ်းတင်းလၢႆလႄႈ၊ တၵ်းၶုၵ်းၸႂ်လႆႈပတိၺိၺ်ႇတြႃးဢၼ်မူတ်းၸၢင်ႇၸဝ်ႈဢၼ်ႁေႃးဝႆႉၼၼ်ႉဝႃႈၼင်ႇၼႆဢေႃႈ။
မၼ်းၸဝ်ႈဝႆႉၵတိဢၼ်မၢၼ်ႇဢၼ်မႅၼ်ႈၵႃႈတီႈပူႇမွၼ်ႇႁဝ်း ဢႃႇပြႃႇႁၢမ်ႇ၊ လႄႈတိူင်ႇဝႃႈႁႂ်ႈလႆႈ၊ ၵႄႇသႄႇထုတ်ႇၼုၵ်ႈဢဝ်ႁဝ်းဢွၵ်ႇသေၵႃႈတီႈရၢၼ်ႇသူႇႁဝ်းသေယဝ်ႉ။
ပၼ်ဢၶႂၢင်ႉႁႂ်ႈႁဝ်းလႆႈၵၢင်းလွတ်ႈတင်းတၢင်းဢၼ်ၵူဝ်ႁႄလႄႈ၊ လႆႈပွင်ႁဵတ်းဝၢတ်ႈမၼ်းၸဝ်ႈၵူၺ်းဢမ်ႇၵႃး။
ႁႂ်ႈႁဝ်းလႆႈမူတ်းၸၢင်ႇသိုဝ်ႈတေႃႇၵႃႈတီႈၽၢႆႇၼႃႈမၼ်းၸဝ်ႈ၊ ၼႂ်းၸူဝ်ႈတႃႇဢသၢၵ်ႈႁဝ်းၼၼ်ႉဢေႃႈ။
မႂ်းဢၼ်ပဵၼ်လုၵ်ႈၵဝ်ၼႆႉ႟။ မႂ်းတၵ်းလႆႈၶၢမ်ႇႁွင်ႉဝႃႈ၊ပရေႃးၽႅတ်ႈၸဝ်ႈၽြႃး၊ ဢၼ်သုင်ဢၼ်မျၢတ်ႈၼႃႇၼၼ်ႉဢေႃႈ။ မႂ်းတၵ်းလႆႈၵႂႃႇပႃႈၼႃႈထႃႇဝရႃႉၽြႃးႁႂ်ႈလႆႈမႄးႁႅၼ်းသဵၼ်ႈတၢင်းမၼ်းၸဝ်ႈဝႆႉ။
ႁႂ်ႈလႆႈမွၵ်ႇလၢတ်ႈၶႆႈၼႄၵူၼ်းမၼ်းၸဝ်ႈတင်းလၢႆလွင်ႈဢၼ်ၶဝ်တၵ်းလႆႈၶၢမ်ႇဢဝ်၊ တၢင်းဢၼ်ၵႄႇၶျွတ်ႈဢဝ်ၸွမ်းၵႃႈၼင်ႇဢၼ်ဢပျတ်ႈၶဝ်လႆႈၶၢမ်ႇ၊ပွႆႇၶႂၢင်းပၼ်ယဝ်ႉၼၼ်ႉဢေႃႈ။
ပိူဝ်ႈဢၼ်ၽြႃးပဵၼ်ၸဝ်ႈႁဝ်းၼႆႉမီးၸႂ်ၵရုၼႃႇလႄႈၼိမ်သိမ်ႇဢူၼ်ႈဢွၼ်ႇၼၼ်ႉ၊ မၼ်းၸဝ်ႈႁႂ်ႈသၢႆဢရွင်ႇၵၢင်ဝၼ်းဢၼ်ဝႃႈ၊တၢင်းဢၼ်ၵႄႇၶျွတ်ႈဢဝ်ၼၼ်ႉ၊ၶိုၼ်ႈမႃးၵႃႈၼိူဝ်ႁဝ်းသေလႄႈ။
လုၵ်ႉသေၵႃႈတီႈၽႃႉၵၢင်ႁၢဝ်ထွင်ႇႁိူဝ်ႈလႅင်းၵႃႈၼိူဝ်ၶဝ်ၸိူဝ်းဢၼ်ယူႇ၊ ၼႂ်းလပ်းသိင်ႇႁူမ်ႈတၢင်းတၢႆၼၼ်ႉလႄႈၼႄပၼ်သဵၼ်ႈတၢင်းဢၼ်ၵႂႃႇၸူးတၢင်းၼိမ်သိမ်ႇၵႃႈတီႈႁဝ်းယဝ်ႉ၊” ဝႃႈၼင်ႇၼႆဢေႃႈ။
လုၵ်ႈဢွၼ်ႇၼၼ်ႉတူဝ်ၶၼ်ႇထႃႇမၼ်းယႂ်ႇမႃးလႄႈၽၢႆႇၸႂ်ဝိၺိၺ်ႇၵေႃႈၶိုၼ်းယႂ်ႇမႂ်ႇသုင်မႃးသေယဝ်ႉ၊မီးယူႇၵႃႈၼႂ်းထိူၼ်ႇလႅင်ႉတေႃႇထိုင်ႁွတ်ႈၶိင်ႇဢၼ်ၸိုဝ်ႈဢွၵ်ႇသဵင်ဢွၵ်ႇၵႃႈၼႂ်းၵူၼ်းမဵဝ်း ဢိသရေး၊ တင်းလၢႆဢေႃႈ။
ၽွင်းယၢမ်းၼၼ်ႉၸဝ်ႈမုၼ်ယႂ်ႇၶုၼ်ႁေႃၶမ်း ၵေႇသႃႇဢေႃးၵုၵ်ႉတု၊ ပူင်ဢမိင်ႉႁႂ်ႈလႆႈၵဵပ်းဢဝ်ၸရၢင်းၵူၼ်းမိူင်းၵႃႈၼႂ်းသိုင်ႇၸိုင်ႈဝၢၼ်ႈမိူင်း ရူဝ်းမႃႉ၊ ၵူႈတီႈၵူႈလႅၼ်ဢေႃႈ။-
တၢင်းဢၼ်ၵဵပ်းဢဝ်ၸရၢင်းၵူၼ်းမိူင်းၼႆႉပဵၼ်ပွၵ်ႈဢွၼ်တၢင်းသုတ်းၼႂ်းၸူဝ်ႈပၢၼ် ၵုရေႇၼေႇ၊ ပဵၼ်ၶုၼ်တီႈမိူင်း သီးရီးယႃး၊ ၼၼ်ႉဢေႃႈ။-
ပိူဝ်ႈၼႆလႄႈၵူၼ်းၵူႈၵေႃႉၵူႈၵူၼ်းဢွၼ်ၵၼ်ၵႂႃႇၵႃႈတီႈဝၢၼ်ႈၵဝ်ႇမိူင်းလင်တူဝ်ၸဝ်ႈၵဝ်ႇႁႂ်ႈလႆႈသႂ်ႇၸရၢင်းႁင်းၽႂ်ႁင်းမၼ်းဢေႃႈ။
ယူဝ်းသႅပ်ႈ၊ ၵေႃႈပိူဝ်ႈဢၼ်ပဵၼ်ၸိူဝ်ႉၶိူဝ်း တႃႇဝိတ်ႈ၊ လႄႈလုၵ်ႉတီႈဝဵင်း ၼႃႇၸရႅတ်ႈ၊ မိူင်း ၵႃႇလိလႄး၊ ဢွၵ်ႇၵႂႃႇၸူးၵႃႈတီႈဝၢၼ်ႈၵဝ်ႇမိူင်းလင်ၶုၼ်ႁေႃၶမ်း တႃႇဝိတ်ႈ၊ ဢၼ်ပဵၼ်ဝဵင်း ပႅတ်ႉလႁႅမ်ႇ၊ မိူင်း ယုတႃႉ၊ ပုၼ်ႉ၊-
ႁႂ်ႈလႆႈသႂ်ႇပႃးၸရၢင်းလူၺ်ႈၵၼ်တင်းမေးမၢႆမၼ်း မႃႇရိ၊ ဢေႃႈ။ ၶိင်ႇၼၼ်ႉပတိၵ်ႈသၼ်ႇထေႇ မႃႇရိ၊ ပဵၼ်ဢၼ်ၵႄႇထူၼ်ႈဝႆႉယဝ်ႉဢေႃႈ။-
မိူဝ်ႈဢၼ်ၶဝ်ႁွတ်ႈထိုင်ဝဵင်း ပႅတ်ႉလႁႅမ်ႇ၊ ၵႂႃႇၼၼ်ႉၽွင်းယၢမ်းဢၼ် မႃႇရိ၊ တၵ်းၵိူတ်ႇလဵင်ႉလုၵ်ႈၵေႃႈထိုင်ယဝ်ႉလႄႈ၊-
ၵိူတ်ႇလဵင်ႉလုၵ်ႈၸၢႆးတူၼ်ႈမႃးယဝ်ႉၸင်ႇ၊ဢဝ်ၽႃႈဢွမ်ႈပူၵ်ႉႁေႃႇသေယဝ်ႉ၊ၵွပ်ႈပိူဝ်ႈဢမ်ႇမီးတီႈယူႇတီႈသဝ်းၵႃႈၼႂ်းႁိူၼ်းၶႅၵ်ႇလႄႈဢဝ်ၶျႃးဝၢင်းဝႆႉၵႃႈၼႂ်းႁၢင်းဝူဝ်းသေဢေႃႈ။
ၼႂ်းမိူင်းၼၼ်ႉမီးၵူၼ်းလဵင်ႉသူဝ်းၵမ်ႈၽွင်ႈပႂ်ႉထိင်းသူဝ်းၶဝ်ယူႇၵႃႈတီႈပၢင်ႇပဵင်းၶိင်ႇၵၢင်ၶိုၼ်းဢေႃႈ။-
ၵမ်းၼၼ်ႉ၊တမၢၼ်ႇၵၢင်ႁၢဝ်ထႃႇဝရႃႉၽြႃးပႃးၼိုင်ႈပေႃႇမႃးၵႃႈတီႈၶဝ်လႄႈ၊မုၼ်ၽုင်းတၼ်းၶူဝ်းထႃႇဝရႃႉၽြႃးထွင်ႇႁိူဝ်ႈလႅင်းဝႆႉၵႃႈၼိူဝ်ၶဝ်လႄႈၶဝ်ၵူဝ်ႁႄၼႃႇလူင်လၢင်ဢေႃႈ။-
တမၢၼ်ႇၵၢင်ႁၢဝ်ၵေႃႈလၢတ်ႈလႄႈဝႃႈ၊ “ယႃႇပေၵူဝ်ပေႁႄ။ ၵဝ်မႃးမွၵ်ႇလၢတ်ႈၶၢဝ်ႇငၢဝ်းဢၼ်လီဢၼ်တၵ်းႁႂ်ႈၵူၼ်းတင်းသဵင်ႈတင်းလူင်လႆႈၸူမ်းသိူဝ်းမူၼ်ႈပျေႃႇၼႃႇလူင်လၢင်ၼၼ်ႉတီႈသူဢေႃႈ။-
ဝၼ်းမိူဝ်ႈၼႆႉၸဝ်ႈၵႄႇၶျွတ်ႈဢၼ်ဝႃႈ၊ ၸဝ်ႈၶရိၸ်ႈ၊ ၼၼ်ႉၵိူတ်ႇလဵင်ႉမႃးပုၼ်ႈသူၵႃႈၼႂ်းဝဵင်း တႃႇဝိတ်ႈ၊ ၼၼ်ႉယဝ်ႉ။-
ပုၼ်ႈတႃႇတေပဵၼ်သၢၵ်ႈသေႇတီႈသူၸမ်ႉ၊သူတၵ်းထူပ်းႁၼ်ၸဝ်ႈလုၵ်ႈဢွၼ်ႇၼၼ်ႉပူၵ်ႉႁေႃႇတင်းၽႃႈဢွမ်ႈသေလႄႈ၊ၶျႃးဝၢင်းဝႆႉၵႃႈၼႂ်းႁၢင်းဝူဝ်းဢေႃႈ၊” ဝႃႈၼင်ႇၼႆဢေႃႈ။
ၼႂ်းမိူဝ်ႈၼၼ်ႉတပ်ႉတမၢၼ်ႇၵၢင်ႁၢဝ်ၼမ်ၼႃႇၵိုင်ႉၵၢင်ႉၽုတ်းပေႃႇမႃးလူၺ်ႈၵၼ်တင်းတမၢၼ်ႇၵၢင်ႁၢဝ်ပႃးၼၼ်ႉသေလႄႈ၊ႁဵတ်းၵႂၢမ်းယွင်ႈယေႃးၽြႃးပဵၼ်ၸဝ်ႈလႄႈဝႃႈ၊-
“ၵႃႈၼိူဝ်ပၢႆၸိၵ်းၸွမ်ၵၢင်ႁၢဝ်သုင်သုတ်းပုၼ်ႉၼၼ်ႉ၊ႁႂ်ႈမုၼ်ၽုင်းၽြႃးပဵၼ်ၸဝ်ႈယႂ်ႇၼႃႇသေၵမ်းလူၺ်ႈ။ ၵႃႈၼိူဝ်လိၼ်မိူင်းၼႆႉၵေႃႈ၊ႁႂ်ႈတၢင်းၼိမ်မီးၵႃႈၼိူဝ်ၵူၼ်းၸိူဝ်းဢၼ်၊ မၼ်းၸဝ်ႈထုၵ်ႇၸႂ်ၵျိူၵ်ႈၸႂ်ၼၼ်ႉသေၵမ်းလူၺ်ႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်တမၢၼ်ႇၵၢင်ႁၢဝ်တင်းလၢႆၶိုၼ်းမိူဝ်းၵႃႈၼိူဝ်မိူင်းၵၢင်ႁၢဝ်ပုၼ်ႉၼၼ်ႉၸိုင်၊ၵူၼ်းလဵင်ႉသူဝ်းၸိူဝ်းၼၼ်ႉလၢတ်ႈတီႈၵၼ်လႄႈဝႃႈ၊ “ႁဝ်းဢွၼ်ၵၼ်ၵႂႃႇၵႃႈတီႈဝဵင်း ပႅတ်ႉလႁႅမ်ႇ၊ တႃႉႁဝ်း၊တူၺ်းလွင်ႈတၢင်းဢၼ်ပဵၼ်မႃးဢၼ်ၸဝ်ႈၽြႃးမႃးမွၵ်ႇလၢတ်ႈႁဝ်းၼႆႉၵၼ်တႃႉႁဝ်း၊” ဝႃႈၼင်ႇၼႆသေယဝ်ႉ။
ၶဝ်ဢွၼ်ၵၼ်ၵႂႃႇၶၼ်ၶၼ်ၽႂ်းၽႂ်းယဝ်ႉၸင်ႇ၊ထူပ်းႁၼ် မႃႇရိ၊ တင်း ယူဝ်းသႅပ်ႈ၊ လႄႈလႆႈႁၼ်ၸဝ်ႈလုၵ်ႈဢွၼ်ႇလႅင်ၶျႃးဝၢင်းဝႆႉၵႃႈၼႂ်းႁၢင်းဝူဝ်းယူႇဢေႃႈ။-
မိူဝ်ႈဢၼ်ၶဝ်လႆႈႁၼ်ၸဝ်ႈလုၵ်ႈဢွၼ်ႇၼၼ်ႉၸိုင်၊ၶဝ်လၢတ်ႈၼႄၵႃႈဢၼ်တမၢၼ်ႇၵၢင်ႁၢဝ်သင်ႇလၢတ်ႈဝႆႉလွင်ႈၸဝ်ႈလုၵ်ႈဢွၼ်ႇၼၼ်ႉဢေႃႈ။-
ၵူၼ်းၸိူဝ်းဢၼ်လႆႈငိၼ်းၵႂၢမ်းဢၼ်ၵူၼ်းလဵင်ႉသူဝ်းၸိူဝ်းၼၼ်ႉလၢတ်ႈၼႄၶဝ်ၼၼ်ႉၸိုင်၊ဢွၼ်ၵၼ်ဢၢမ်းၵူႈၵေႃႉၵူႈၵူၼ်းဢေႃႈ။-
မႃႇရိ၊ ၵေႃႈမၢတ်ႈတွင်းဝႆႉလွင်ႈတၢင်းၸိူဝ်းၼႆႉတင်းသဵင်ႈတင်းလူင်လႄႈၶႆႈၸႂ်ဝူၼ်ႉၸႂ်ယူႇဢေႃႈ။-
ၵူၼ်းလဵင်ႉသူဝ်းၸိူဝ်းၼၼ်ႉပွၵ်ႈၶိုၼ်းလႄႈဢွၼ်ၵၼ်ယွင်ႈယေႃးဢၢမ်းဢေႃးၵျေးၸူးၽြႃးပဵၼ်ၸဝ်ႈလူၺ်ႈလွင်ႈဢၼ်လႆႈငိၼ်းလႆႈႁၼ်ဢၼ်မႅၼ်ႈၸွမ်းၵႃႈဢၼ်တမၢၼ်ႇၵၢင်ႁၢဝ်မွၵ်ႇလၢတ်ႈတီႈၶဝ်ၼၼ်ႉဢေႃႈ။
မိူဝ်ႈဢၼ်ႁွတ်ႈထိုင်ပႅတ်ႇဝၼ်းပဵၼ်ဝၼ်းဢၼ်တၵ်းလႆႈႁဵတ်းမၢင်ႇၵလႃႇဢၼ်ပၢတ်ႇပၢႆၼင်တီႈၸဝ်ႈလုၵ်ႈဢွၼ်ႇၼၼ်ႉၸိုင်၊ၶဝ်တၢင်ႇၸိုဝ်ႈပၼ်သဵင်ဝႃႈ၊ ယေႇသု၊ ဢၼ်တမၢၼ်ႇၵၢင်ႁၢဝ်သင်ႇလၢတ်ႈဝႆႉၸဵမ်မိူဝ်ႈမၼ်းၸဝ်ႈယင်းဢမ်ႇပႆႇတႄႇပတိၵ်ႈသၼ်ႇထေႇၼၼ်ႉဢေႃႈ။
မိူဝ်ႈထိုင်ၶိင်ႇဢၼ်တၵ်းလႆႈႁဵတ်းဝၢတ်ႈ၊ႁႂ်ႈတူဝ်လႆႈမူတ်းၸၢင်ႇၸွမ်းၼင်ႇပိင်းၺၢပ်ႈတြႃး မူဝ်းသေႇ၊ မီးဝႆႉၼၼ်ႉၸေးယဝ်ႉၸိုင်၊ ယူဝ်းသႅပ်ႈ၊ တင်း မႃႇရိ၊ ဢဝ်ၸဝ်ႈလုၵ်ႈဢွၼ်ႇၵႂႃႇၵႃႈတီႈဝဵင်း ယေႇရုသလႅမ်ႇ၊ ႁႂ်ႈလႆႈသၢၵ်ႈၵၢပ်ႈတီႈထႃႇဝရႃႉၽြႃးဢေႃႈ။-
လွင်ႈတၢင်းၼႆႉတႅမ်ႈဝႆႉၼႂ်းၵျၢမ်းပိင်းၺၢပ်ႈထႃႇဝရႃႉၽြႃးလႄႈဝႃႈ၊ “လုၵ်ႈၸၢႆးတူၼ်ႈၵူႈၵေႃႉတၵ်းလႆႈမူတ်းၸၢင်ႇပုၼ်ႈထႃႇဝရႃႉၽြႃးဢေႃႈ၊” ဝႃႈၼင်ႇၼႆဝႆႉလႄႈ၊-
ၶဝ်ၸင်ႇၵႂႃႇႁႅၼ်းမႃးပုၼ်ႈၶိူင်ႈတၢင်းလူႇဢၼ်ပဵၼ်ၼူၵ်ႉတူႈၵူႈၼိုင်ႈ၊ဢမ်ႇၼၼ်ၵေႃႈ ၵႃၵႄ၊ ၵူႈၼိုင်ႈၸွမ်းၼင်ႇဢၼ်ပိင်းၺၢပ်ႈတြႃးၸဝ်ႈမီးဝႆႉၼၼ်ႉဢေႃႈ။
ၶိင်ႇၼၼ်ႉ၊ၼႂ်းဝဵင်း ယေႇရုသလႅမ်ႇ၊ မီးၵူၼ်းၵေႃႉၼိုင်ႈဢၼ်လႆႈၸိုဝ်ႈ သုမွင်ႇ၊ ဢေႃႈ။ မၼ်းပဵၼ်ၵူၼ်းသိုဝ်ႈတေႃႇၵူၼ်းဢၼ်ၵူဝ်ယမ်ထႃႇဝရႃႉၽြႃးလႄႈမုင်ႈထႃႈမွင်းထႃႈတၢင်းဢၼ်ၵူၼ်းမဵဝ်း ဢိသရေး၊ တၵ်းလႆႈႁွတ်ႈတၢင်းဢၼ်ၵႄႇသႄႇဢဝ်ၼၼ်ႉယူႇဢေႃႈ။ ဝိၺိၺ်ႇဢၼ်မူတ်းၸၢင်ႇၸဝ်ႈမီးယူႇလူၺ်ႈၵၼ်တင်းမၼ်းလႄႈ၊-
မၼ်းလႆႈပျႃႇတိၵ်ႈၵႃႈတီႈဝိၺိၺ်ႇမူတ်းၸၢင်ႇၸဝ်ႈဢၼ်ဝႃႈ၊ “ပေႃးမႂ်းယင်းဢမ်ႇပႆႇလႆႈထူပ်းႁၼ် ၸဝ်ႈၶရိၸ်ႈ၊ ဢၼ်ထႃႇဝရႃႉၽြႃးဝႆႉၵတိၼၼ်ႉမႂ်းဢမ်ႇလႆႈတၢႆ၊” ဝႃႈၼင်ႇၼႆဝႆႉၼၼ်ႉဢေႃႈ။-
ဝိၺိၺ်ႇၸဝ်ႈတိုၵ်းသူၼ်းလႄႈမၼ်းၶဝ်ႈၵႂႃႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈ၊ၺႃးမိူဝ်ႈဢၼ်ပေႃႈမႄႈၸဝ်ႈယင်းတိုၵ်ႉဢဝ်လုၵ်ႈဢွၼ်ႇ ယေႇသု၊ ၶဝ်ႈၵႂႃႇႁႂ်ႈလႆႈႁဵတ်းၸွမ်းၼင်ႇထုင်းၸၢမ်ႇတြႃးယူႇၼၼ်ႉဢေႃႈ။-
သုမွင်ႇ၊ ၵေႃႈႁွပ်ႇဢုမ်ႈဢဝ်ၸဝ်ႈလုၵ်ႈဢွၼ်ႇၵႃႈၼႂ်းဝၢင်ႈႁူဝ်ဢူၵ်းမၼ်းသေယဝ်ႉ၊ယွင်ႈယေႃးတၢင်ႇၵျေးၸူးၽြႃးပဵၼ်ၸဝ်ႈလႄႈဝႃႈ၊-
“ၸဝ်ႈထႃႇဝရႃႉၽြႃးတီႈၶႃႈ။ ပျႃႇတိၵ်ႈတေႃႇၸဝ်ႈႁဝ်းပျေႉၸုမ်ႇတေႃႈလဵဝ်ၼႆႉယဝ်ႉၶႃႈလႄႈ၊ ၸဝ်ႈႁဝ်းပၼ်ဢၶႂၢင်ႉဢၼ်ႁႂ်ႈၶႃႈၸဝ်ႈႁဝ်းတၵ်းလႆႈတၢႆၼိမ်ၼိမ်တီႈၶႃႈဢေႃႈ။
မၢၵ်ႇတႃၶႃႈၸဝ်ႈႁဝ်းလႆႈႁၼ်တၢင်းၵႄႇၶျွတ်ႈၸဝ်ႈႁဝ်း။
ဢၼ်ၸဝ်ႈႁဝ်းမႄးႁႅၼ်းဝႆႉ၊သိုဝ်ႈၼႃႈတႂ်ႈတႃၵူၼ်းမဵဝ်းတင်းသဵင်ႈတင်းလူင်။
ဢၼ်ဝႃႈ၊ဢၼ်လႅင်းဢၼ်ၼႄပျႃးဢလူဝ်ႇၸဝ်ႈႁဝ်းတီႈၵူၼ်းတၢင်ႇၸိူဝ်ႉတၢင်ႇၶိူဝ်း၊ ဢိၵ်ႇတင်းႁႂ်ႈလႆႈပဵၼ်မုၼ်သရေႇပုၼ်ႈၸိူဝ်ႉၶိူဝ်း ဢိသရေး၊ ၵူၼ်းမဵဝ်းၸဝ်ႈႁဝ်းဢေႃႈ၊” ဝႃႈၼင်ႇၼႆဢေႃႈ။
ပေႃႈမႄႈၸဝ်ႈၼၼ်ႉဢၢမ်းလွင်ႈတၢင်းဢၼ် သုမွင်ႇ၊ လၢတ်ႈလွင်ႈမၼ်းၸဝ်ႈၼၼ်ႉဢေႃႈ။-
သုမွင်ႇ၊ ၵေႃႈပၼ်တၢင်းလီတီႈၶဝ်လႄႈလၢတ်ႈတီႈ မႃႇရိ၊ လႄႈဝႃႈ၊ “ၸဝ်ႈလုၵ်ႈဢွၼ်ႇၼႆႉလႆႈၶၢမ်ႇတၢင်းဢၼ်ၶၢၼ်းဝႆႉပုၼ်ႈလွင်ႈၼင်ႇႁိုဝ်ၵူၼ်းမဵဝ်း ဢိသရေး၊ ၼမ်ၼႃႇတၵ်းတူၵ်းသုမ်း၊ဢိၵ်ႇတင်းလွင်ႈၼင်ႇႁိုဝ်ၶဝ်ၼမ်ၼႃႇတၵ်းၶိုၼ်ႈယႂ်ႇမႂ်ႇသုင်ဢေႃႈ။ မၼ်းၸဝ်ႈတၵ်းပဵၼ်ၼိမိၵ်ႈၽြႃးပဵၼ်ၸဝ်ႈဢၼ်ပိူၼ်ႈတၵ်းတွပ်ႇထဵင်လႄႈ၊တၵ်းႁႂ်ႈတၢင်းဢၼ်ပိူၼ်ႈလွမ်ၵျၢမ်ႇလွမ်ပွင်ၼၼ်ႉပေႃႇဢွၵ်ႇထၢင်ႇသႃးဢေႃႈ။-
လိုၼ်းၼၼ်ႉ၊တၢင်းဢၼ်မႆႈၸႂ်ၶီၸႂ်တၵ်းပဵၼ်မိူၼ်လၢပ်ႇမိူၼ်လႅဝ်းတႅင်းႁူဝ်ၸႂ်မႂ်းဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊မီးပရေႃးၽႅတ်ႈမႄႈယိင်းၵေႃႉၼိုင်ႈဢၼ်လႆႈၸိုဝ်ႈ ဢႃႇၼႃႉ၊ လုၵ်ႈယိင်း ၽၼူၺ်ႇလႃႉ၊ ၸိူဝ်ႉၶိူဝ်း ဢႃႇသျႃႇ၊ ၼၼ်ႉဢေႃႈ။ မၼ်းပဵၼ်ၼၢႆးထဝ်ႈဢၼ်ယၢမ်ႈတႄႇၼႃႈႁိူၼ်းလူၺ်ႈၽူဝ်မၼ်းၸဵတ်းပီၵူၺ်းသေယဝ်ႉ၊-
ပဵၼ်မႄႈမၢႆႈယူႇတေႃႇႁွတ်ႈဢသၢၵ်ႈပႅတ်ႇသိပ်းပၢႆသီႇပီၼၼ်ႉဢေႃႈ။ မၼ်းၼၼ်ႉယင်းဢမ်ႇၽၢတ်ႇဢမ်ႇယၢၼ်ၵျွင်းပိၵ်ႈမၢၼ်ႇၸဝ်ႈ၊ၵမ်သိၼ်ဢမ်ႇၵိၼ်တၢင်းၵိၼ်လႄႈသူးတွင်းယူႇ၊ႁဵတ်းဝၢတ်ႈၽြႃးပဵၼ်ၸဝ်ႈယူႇတင်းဝၼ်းတင်းၶိုၼ်းတႃႇသေႇဢမ်ႇထၢတ်ႇဢေႃႈ။-
ၶိင်ႇၼႃႇရီႇၼၼ်ႉၵမ်းလဵဝ်မၼ်းၶဝ်ႈၵႂႃႇလႄႈယွင်ႈယေႃးတၢင်ႇၵျေးၸူးၽြႃးပဵၼ်ၸဝ်ႈသေလႄႈလၢတ်ႈၼႄလွင်ႈၸဝ်ႈလုၵ်ႈဢွၼ်ႇၼၼ်ႉတီႈၶဝ်ၸိူဝ်းဢၼ်မုင်ႈထႃႈမွင်းထႃႈတၢင်းဢၼ်ၽြႃးပဵၼ်ၸဝ်ႈတၵ်းထုတ်ႇၼုၵ်ႈဢဝ်ဝဵင်း ယေႇရုသလႅမ်ႇ၊ ၼၼ်ႉဢေႃႈ။
ဝၢႆးသေ ယူဝ်းသႅပ်ႈ၊ တင်း မႃႇရိ၊ ႁဵတ်းၵႃႈဢၼ်တြႃးၸဝ်ႈပိင်းၺၢပ်ႈဝႆႉၼၼ်ႉယဝ်ႉတူဝ်ႈယဝ်ႉၸိုင်၊ၶဝ်ဢွၼ်ၵၼ်ပွၵ်ႈမိူဝ်းတီႈမိူင်း ၵႃႇလိလႄး၊ ဝဵင်း ၼႃႇၸရႅတ်ႈ၊ ၶဝ်ၼၼ်ႉသေဢေႃႈ။-
ၸဝ်ႈလုၵ်ႈဢွၼ်ႇၵေႃႈယႂ်ႇမႃးလႄႈတၢင်းႁုတၢင်းႁၼ်ၽႄၵႂၢင်ႈၼမ်မႃးယူႇသေလႄႈပျေႉၸုမ်ႇတင်းၺၢၼ်ႇပိင်ႇၺႃႇဢေႃႈ။ ၵျေးၸူးၽြႃးပဵၼ်ၸဝ်ႈၵေႃႈတႄႇယူႇၵႃႈၼိူဝ်မၼ်းဢေႃႈ။
ပေႃႈမႄႈၸဝ်ႈၼၼ်ႉၵႂႃႇၵႃႈတီႈဝဵင်း ယေႇရုသလႅမ်ႇ၊ ႁႂ်ႈလႆႈၶဝ်ႈပွႆး ပသၶႃႇ၊ ၵူႈပီၵူႈပီဢေႃႈ။-
မိူဝ်ႈဢၼ်ဢသၢၵ်ႈ ၸဝ်ႈယေႇသု၊ လႆႈသိပ်းသွင်ပီၼၼ်ႉၶဝ်ၵႂႃႇၶဝ်ႈပွႆးမိူၼ်ၼင်ႇၵူႈပီၼၼ်ႉလႄႈ၊-
မိူဝ်ႈဢၼ်ပွႆးဝၢႆးယဝ်ႉၸိုင်၊ၶဝ်ဢွၼ်ၵၼ်ပွၵ်ႈၶိုၼ်းမိူဝ်းဢေႃႈ။ ၵူၺ်းၵႃႈ၊ၸၢႆးဢွၼ်ႇ ယေႇသု၊ ၼၼ်ႉ၊ၵိုတ်းဝႆႉၵႃႈတီႈဝဵင်း ယေႇရုသလႅမ်ႇ၊ သေၵေႃႈပေႃႈမႄႈၸဝ်ႈယင်းဢမ်ႇႁုလွင်ႈတၢင်းၼၼ်ႉ။-
ၶဝ်ထၢင်ႇၸၢႆးဢွၼ်ႇၼၼ်ႉပႃးၸွမ်းၼႂ်းၽုင်ပီႈၼွင်ႉၵေႃႉသႄႈတင်းလၢႆၵႂႃႇလႄႈမိူဝ်ႈဢၼ်ပႆၵႂႃႇၶၢဝ်းတၢင်းဝၼ်းၼိုင်ႈယဝ်ႉၸင်ႇသွၵ်ႈႁႃမၼ်းၸဝ်ႈၵႃႈၼႂ်းပီႈၼႂ်းၼွင်ႉတင်းၵူၼ်းႁုၸၵ်းတင်းလၢႆသေၵေႃႈ၊-
ၶဝ်ဢမ်ႇထူပ်းဢမ်ႇႁၼ်။ ပိူဝ်ႈၼႆၸင်ႇၶဝ်ပွၵ်ႈၶိုၼ်းၵႂႃႇၵႃႈတီႈဝဵင်း ယေႇရုသလႅမ်ႇ၊ လႄႈသွၵ်ႈႁႃမၼ်းၸဝ်ႈ၊-
လႆႈသၢမ်ဝၼ်းတဵမ်တဵမ်ယဝ်ႉၸင်ႇထူပ်းႁၼ်မၼ်းၸဝ်ႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈ၊ၼင်ႈယူႇလူၺ်ႈၵၼ်တင်းသြႃႇလူင်ၵူၼ်းမဵဝ်း ၵျူး၊ ၶဝ်ဢုပ်ႇၵုမ်တွင်ႈထၢမ်လၢတ်ႈၸႃၵၼ်တင်းၶဝ်ယူႇဢေႃႈ။-
ၶဝ်ၸိူဝ်းဢၼ်လႆႈငိၼ်းၶေႃႈၵႂၢမ်းမၼ်းၸဝ်ႈၸိူဝ်းၼၼ်ႉ၊ဢၢမ်းတၢင်းၵတ်ႉတၢင်းၶၼ်ဢၼ်မၼ်းၸဝ်ႈၵႄႈလိတ်ႈၵူႈၶေႃႈၵူႈၵမ်းၼၼ်ႉ ၼႃႇလူင်လၢင်ဢေႃႈ။-
ပေႃႈမႄႈၸဝ်ႈၵေႃႈမိူဝ်ႈဢၼ်ႁၼ်မၼ်းၸဝ်ႈၼၼ်ႉၸိုင်၊ၶဝ်ဢၢမ်းၼႃႇဢေႃႈ။ မႄႈၸဝ်ႈၵေႃႈလၢတ်ႈတီႈမၼ်းၸဝ်ႈလႄႈဝႃႈ၊ “ၸၢႆးမႄႈ႟။ ႁဵတ်းသင်လႄႈမႂ်းႁဵတ်းၸိူဝ်ႉၼင်ႇၼႆတီႈႁဝ်း။ ပေႃႈတင်းမႄႈထၢၼ်ႈပေႃးမႆႈၸႂ်ၼႃႇလူင်လၢင်လႄႈသွၵ်ႈႁႃမႂ်းဢိူဝ်း၊” ဝႃႈၼင်ႇၼႆဢေႃႈ။
မၼ်းၸဝ်ႈၶိုၼ်းလၢတ်ႈတီႈၶဝ်လႄႈဝႃႈ၊ “ႁဵတ်းသင်လႄႈသွၵ်ႈႁႃၵဝ်ၶႃႈထၢၼ်ႇၼႆႉၶႃႈ။ လွင်ႈဢၼ်ၵဝ်ၶႃႈတၵ်းလႆႈယူႇၼႂ်းႁိူၼ်းပေႃႈၸဝ်ႈၵဝ်ၶႃႈၼၼ်ႉဢမ်ႇႁုၶႃႈႁိုဝ်း၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊ၶဝ်ဢမ်ႇႁုထွမ်ႇၵႂၢမ်းဢၼ်မၼ်းၸဝ်ႈၶိုၼ်းတွပ်ႇၼၼ်ႉလႄႈယူႇဢေႃႈ။
ၵမ်းၼၼ်ႉ၊ ၸဝ်ႈယေႇသု၊ ပွၵ်ႈၶိုၼ်းၵႂႃႇလူၺ်ႈၵၼ်တင်းၶဝ်ၵႃႈတီႈဝဵင်း ၼႃႇၸရႅတ်ႈ၊ သေယဝ်ႉ၊ထွမ်ႇဢဝ်ၵႂၢမ်းပေႃႈၵႂၢမ်းမႄႈလႄႈယူႇဢေႃႈ။ မႄႈၸဝ်ႈၵေႃႈမၢတ်ႈဝႆႉတွင်းဝႆႉလွင်ႈတၢင်းၸိူဝ်းၼႆႉတင်းသဵင်ႈတင်းလူင်ၵႃႈၼႂ်းၸႂ်မၼ်းယူႇဢေႃႈ။-
ၸဝ်ႈယေႇသု၊ ၵေႃႈယႂ်ႇမႃးလႄႈၺၢၼ်ႇပိင်ႇၺႃႇၵေႃႈၼမ်ၵိုၼ်းမႃးသေယဝ်ႉ၊လႆႈၼႃႈလႆႈတႃၵႃႈတီႈၽၢႆႇၼႃႈၽြႃးပဵၼ်ၸဝ်ႈ၊ဢိၵ်ႇတင်းၵႃႈတီႈၽၢႆႇၼႃႈၵူၼ်းတင်းလၢႆဢေႃႈ။
ၼႂ်းၸူဝ်ႈပၢၼ်ၶုၼ်ႁေႃၶမ်း ၵေႇသႃႇတိပေႇရိ၊ ၸၢမ်ႇႁၢင်ႈၸၢမ်ႇႁေႃလႆႈသိပ်းႁႃႈပီၼၼ်ႉ၊ၶုၼ် ပွၼ်ႇတိပိလတ်ႉ၊ လႆႈဢရႃႇၸဝ်ႈၽႃႉမိူင်း ယုတႃႉ၊ ၶုၼ် ႁေႇရူတ်ႈ၊ လႆႈဢရႃႇၸဝ်ႈၽႃႉမိူင်း ၵႃႇလိလႄး၊ ၼွင်ႉၸၢႆးမၼ်းၶုၼ် ၽိလိပ်ႉပု၊ လႆႈဢရႃႇၸဝ်ႈၽႃႉမိူင်း ဢိတုရေႇ၊ တင်းမိူင်း တရႃႇၶေႃးၼိတ်ႈ၊ တင်းၶုၼ် လုသႃႇၼိ၊ သမ်ႉလႆႈဢရႃႇၸဝ်ႈၽႃႉမိူင်း ဢႃႇၽိလိၼိ၊ လႄႈ၊-
ဢႃႇၼတ်ႉ၊ တင်း ၵယႃႇၽႃႉ၊ သမ်ႉလႆႈဢရႃႇၶုၼ်ယဵၸ်ႈပရေႃးႁဵၵ်ႈ ဢေႃႈ။ ၼႂ်းၸူဝ်ႈၼႂ်းပၢၼ်ၶဝ်ၸိူဝ်းၼၼ်ႉၵႂၢမ်းပျႃႇတိၵ်ႈၽြႃးပဵၼ်ၸဝ်ႈႁွတ်ႈထိုင်ၵႃႈတီႈ ယူဝ်းႁၢၼ်ႇ၊ လုၵ်ႈၸၢႆး ၸႃႇၶရိ၊ ၵႃႈၼႂ်းထိူၼ်ႇလႅင်ႉဢေႃႈ။-
ပိူဝ်ႈၼႆၸင်ႇ ယူဝ်းႁၢၼ်ႇ၊ လႄႇလဵပ်ႈႁေႃးတြႃးၵႃႈၼႂ်းထူင်ႉၼမ်ႉ ယေႃးတၢၼ်ႇ၊ ၵူႈတီႈၵူႈလႅၼ်လႄႈဝႃႈ၊ “ၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်သူသေယဝ်ႉ၊ၶၢမ်ႇဢဝ်မၢင်ႇၵလႃႇပပ်ႉတိၸမ်ႇ တႃႉ။ ၽြႃးပဵၼ်ၸဝ်ႈတၵ်းပွႆႇလွတ်ႈဢပျတ်ႈသူၵႃႈမီးဢေႃႈ၊” ဝႃႈၼင်ႇၼႆ၊-
မႅၼ်ႈၸွမ်းၵႃႈၼင်ႇဢၼ်ပရေႃးၽႅတ်ႈ ဢိသႃႇယႃႉ၊ တႅမ်ႈဝႆႉၼႂ်းၵျၢမ်းလိၵ်ႈလႄႈဝႃႈ၊ “သဵင်ၸဝ်ႈဢၼ်ပၢဝ်ႇသႅၼ်ႇၵႃႈၼႂ်းထိူၼ်ႇလႅင်ႉၼၼ်ႉဝႃႈ၊ ‘မႄးသဵၼ်ႈတၢင်းပုၼ်ႈထႃႇဝရႃႉၽြႃးတႃႉ။ ႁႂ်ႈသဵၼ်ႈတၢင်းၼၼ်ႉသိုဝ်ႈလီလႄႈပုၼ်ႈမၼ်းၸဝ်ႈ တၵ်းပႆၼၼ်ႉတႃႉ။
တီႈဢၼ်ပဵၼ်ႁူၺ်ႈပဵၼ်ႁွင်ႈၵႃႈမီးၼၼ်ႉၸိုင်၊ တၵ်းလႆႈထူမ်ဢေႃႈ။ တီႈဢၼ်ပဵၼ်ၵွင်းပဵၼ်လွႆၵႃႈမီးၼၼ်ႉၸိုင်၊တၵ်းလႆႈၵိူၼ်ႇႁႂ်ႈပဵင်းဢေႃႈ။ သဵၼ်ႈတၢင်းဢၼ်ၵူတ်ႉဢၼ်ငွၵ်းၵႃႈမီးၼၼ်ႉၸိုင်၊တၵ်းလႆႈလတ်းႁႂ်ႈသိုဝ်ႈဢေႃႈ။ သဵၼ်ႈတၢင်းဢၼ်ၶုၵ်းဢၼ်ၶၵ်းတင်းလၢႆၵေႃႈတၵ်းလႆႈထူမ်ႁႂ်ႈလိူမ်ႈဢေႃႈ။
ႁဵတ်းၼၼ်လႄႈၵူၼ်းတင်းလၢႆတၵ်းလႆႈႁၼ် ၵျေးၸူးတၢင်းဢၼ်ၽြႃးပဵၼ်ၸဝ်ႈၶျွတ်ႈဢဝ်ဢေႃႈ၊’ ” ဝႃႈၼင်ႇၼႆၼၼ်ႉတၵ်းပျေႉၸုမ်ႇဢေႃႈ။
ၵူၼ်းၼမ်ၼႃႇမႃးၸူးၵႃႈတီႈသြႃႇ ယူဝ်းႁၢၼ်ႇ၊ ႁႂ်ႈလႆႈၶၢမ်ႇဢဝ်မၢင်ႇၵလႃႇပပ်ႉတိၸမ်ႇဢေႃႈ။ မၼ်းၵေႃႈလၢတ်ႈတီႈၶဝ်လႄႈဝႃႈ၊ “သူ၊ၶိူဝ်းငူးႁၢႆႉၶဝ်႟။ ၽူႈလႂ်ပၼ်သတိတီႈသူႁႂ်ႈသူလႅၼ်ႈပၢႆႈသေၵႃႈတီႈၽေးတၢမ်ႇၽြႃးပဵၼ်ၸဝ်ႈဢၼ်တၵ်းႁွတ်ႈမႃးၼၼ်ႉ။-
မၢၵ်ႇတၢင်းၵမ်တၢင်းၵျၢင်ႉဢၼ်ၵိုင်ႇၵၼ်တင်းတၢင်းဢၼ်ၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်ၼၼ်ႉႁႂ်ႈမၢၵ်ႇမႃးတႃႉ။ ၼႂ်းသူၼင်ႇၵၼ်ၵၼ်ၼၼ်ႉ ‘ ဢႃႇပြႃႇႁၢမ်ႇ၊ ပဵၼ်ပူႇပေႃႈႁဝ်းဢေႃႈ’ ဝႃႈၼႆယႃႇပေလၢတ်ႈ။ ၵဝ်ဝႃႈတီႈသူၸမ်ႉ၊ၽြႃးပဵၼ်ၸဝ်ႈဢဝ်မၢၵ်ႇႁိၼ်ၸိူဝ်းၼႆႉၽၢၼ်ႇသၢင်းႁႂ်ႈပဵၼ်လုၵ်ႈလၢၼ် ဢႃႇပြႃႇႁၢမ်ႇ၊ လႆႈယူႇဢေႃႈ။-
တေႃႈလဵဝ်ၼႆႉတႃမၢတ်ႇငႃဝႆႉၵႃႈတီႈႁၢၵ်ႈတူၼ်ႈမႆႉယူႇလႄႈတူၼ်ႈဢၼ်ဢမ်ႇမၢၵ်ႇမၢၵ်ႇဢၼ်လီၵႃႈမီးၸိူဝ်းၼၼ်ႉတေပွမ်ႈပႅတ်ႈလႄႈတုတ်ႇၽႆးပႅတ်ႈဢေႃႈ၊” ဝႃႈၼင်ႇၼႆဢေႃႈ။
ၵူၼ်းဢၼ်ၸုဢၼ်တုမ်ၸိူဝ်းၼၼ်ႉထၢမ်လႄႈဝႃႈ၊ “ပေႃးပဵၼ်ၼႆၸိုင်၊ႁဝ်းၶႃႈတေလႆႈႁဵတ်းသင်ၶႃႈ၊” ဝႃႈၼင်ႇၼႆလႄႈ။
ယူဝ်းႁၢၼ်ႇ၊ ၶိုၼ်းလၢတ်ႈလႄႈဝႃႈ၊ “ၵေႃႉဢၼ်မီးသိူဝ်ႈသွင်ၽိုၼ်ၼၼ်ႉႁႂ်ႈမၼ်းမႅင်ႇပၼ်ၽိုၼ်ၼိုင်ႈတီႈၵေႃႉဢၼ်ဢမ်ႇမီးသိူဝ်ႈသေၽိုၼ်ၼၼ်ႉတႃႉ။ ၵေႃႉဢၼ်မီးတၢင်းၵိၼ်ၵေႃႈႁႂ်ႈမၼ်းမႅင်ႇပၼ်ပိူၼ်ႈၵိၼ်တႃႉ၊” ဝႃႈၼင်ႇၼႆဢေႃႈ။
ၵူၼ်းၵဵပ်းၶွၼ်ႇၵမ်ႈၽွင်ႈမႃးႁႂ်ႈလႆႈၶၢမ်ႇဢဝ်မၢင်ႇၵလႃႇပပ်ႉတိၸမ်ႇလႄႈထၢမ်တီႈမၼ်းလႄႈဝႃႈ၊ “သြႃႇ႟။ ႁဝ်းၶႃႈတၵ်းလႆႈႁဵတ်းၸိူဝ်ႉၼင်ႇႁိုဝ်ၶႃႈ၊” ဝႃႈၼင်ႇၼႆလႄႈ။
မၼ်းၶိုၼ်းလၢတ်ႈလႄႈဝႃႈ၊ “သူယႃႇပေၵဵပ်းဢဝ်ပူၼ်ႉဢဝ်လိူဝ်သေတြႃးဢၼ်ပိင်းၺၢပ်ႈဝႆႉၼၼ်ႉ၊” ဝႃႈၼင်ႇၼႆဢေႃႈ။
ၵူၼ်းသိုၵ်းၵမ်ႈၽွင်ႈၵေႃႈထၢမ်လႄႈဝႃႈ၊ “ႁဝ်းၶႃႈၸိူဝ်းၼႆႉသမ်ႉတေလႆႈႁဵတ်းၸိူဝ်ႉၼင်ႇႁိုဝ်ၶႃႈ၊” ဝႃႈၼင်ႇၼႆလႄႈ၊ မၼ်းၶိုၼ်းလၢတ်ႈလႄႈဝႃႈ၊ “ယႃႇပေႁဵတ်းပႄႉႁဵတ်းၼႅင်ႇလႄႈႁိမ်ႁူင်ႇဢဝ်ငိုၼ်းၶမ်းပိူၼ်ႈ။ ယႃႇပေတဵၵ်းငႅၼ်းၶေႃးမႂ်ၵိၼ်ပိူၼ်ႈ။ မီးၸႂ်ဢၼ်ဢိမ်ႇၸႂ်ပေႃးၸႂ်လူၺ်ႈၵႃႈႁႅင်းဢၼ်သူလႆႈၼၼ်ႉတႃႉ၊” ဝႃႈၼင်ႇၼႆဢေႃႈ။
လွင်ႈတၢင်းၸိူဝ်းၼႆႉႁဵတ်းႁႂ်ႈၵူၼ်းတင်းလၢႆၸႂ်ယႂ်ႇလူၺ်ႈလွင်ႈတၢင်းဢၼ်ၶဝ်မုင်ႈထႃႈမွင်းထႃႈၼၼ်ႉသေလႄႈၵႂၢင်ၸႂ်မုင်ႈၸႂ်ထၢင်ႇဝႃႈ၊သြႃႇ ယူဝ်းႁၢၼ်ႇ၊ ပဵၼ် ၸဝ်ႈၶရိၸ်ႈ၊ ဢေႃႈ။-
ပိူဝ်ႈၼႆၸင်ႇသြႃႇ ယူဝ်းႁၢၼ်ႇ၊ ၶိုၼ်းလၢတ်ႈတီႈၵူၼ်းတင်းသဵင်ႈတင်းလူင်လႄႈဝႃႈ၊ “ၵဝ်ပၼ်မၢင်ႇၵလႃႇပပ်ႉတိၸမ်ႇတီႈသူလူၺ်ႈၼမ်ႉဢေႃႈ။ ၸဝ်ႈဢၼ်ယႂ်ႇမျၢတ်ႈသေၵဝ်ၼၼ်ႉယင်းမႃးယူႇဢေႃႈ။ ၵဝ်ယင်းဢမ်ႇထိူၵ်ႈၵႄႈသၢႆၶႅပ်းတိၼ်ၸဝ်ႈၼၼ်ႉ။ ၸဝ်ႈၼၼ်ႉတၵ်းပၼ်မၢင်ႇၵလႃႇပပ်ႉတိၸမ်ႇလူၺ်ႈၽႆးၼႂ်းဝိၺိၺ်ႇဢၼ်မူတ်းၸၢင်ႇၸဝ်ႈၼၼ်ႉတီႈသူဢေႃႈ။-
ၼႂ်းမိုဝ်းၸဝ်ႈၼၼ်ႉမီးတႅပ်းဝီးလႄႈတၵ်းလၢင်ၶဝ်ႈပိူၵ်ႇႁႂ်ႈၵဵင်ႈလီသႂ်လီသေယဝ်ႉ၊ဢဝ်ၶဝ်ႈပိူၵ်ႇသိမ်းဝႆႉၼႂ်းယွင်ၼႂ်းယေးဢေႃႈ။ မဵတ်ႉၶဝ်ႈလိပ်ႈၸမ်ႉ၊တၵ်းဢဝ်တင်းၽႆးဢၼ်ဢမ်ႇၸၢင်ႈမွတ်ႇၼၼ်ႉတုတ်ႇပႅတ်ႈဢေႃႈ၊” ဝႃႈၼင်ႇၼႆဢေႃႈ။
သြႃႇ ယူဝ်းႁၢၼ်ႇ၊ ဢဝ်တင်းၼႄးလၢႆးၵူႈမဵဝ်းမဵဝ်းႁေႃးလၢတ်ႈၶၢဝ်ႇတြႃးသိူဝ်းပျေႃႇတီႈၵူၼ်းၸိူဝ်းၼၼ်ႉလႄႈတိုၵ်းယူင်းႁႂ်ႈၶဝ်ၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်ဢေႃႈ။-
ၵူၺ်းၵႃႈ၊ပိူဝ်ႈဢၼ်သြႃႇ ယူဝ်းႁၢၼ်ႇ၊ လႆႈၽုၺ်ႇၼႄပၼ်သတိတီႈၸဝ်ႈၽႃႉ ႁေႇရူတ်ႈ၊ လူၺ်ႈလွင်ႈဢၼ်လႆႈသိမ်းဢဝ်ၼၢင်း ႁေႇရူဝ်းတိ၊ မေးၼွင်ႉၸၢႆးမၼ်း၊ဢိၵ်ႇတင်းတုၸရိူၵ်ႈဢပျတ်ႈဢၼ်မၼ်းႁဵတ်းတၢင်ႇၸိူဝ်ႉတၢင်ႇဢၼ်ၼၼ်ႉလႄႈ၊-
ၸဝ်ႈၽႃႉ ႁေႇရူတ်ႈ၊ ႁႃဢပျတ်ႈတၢင်ႇဢၼ်ထၢပ်ႈထႅင်ႈမိူဝ်ႈဢၼ်ဢဝ်သြႃႇ ယူဝ်းႁၢၼ်ႇ၊ ၶင်ဝႆႉၼႂ်းထွင်ႇၼၼ်ႉဢေႃႈ။
မိူဝ်ႈဢၼ်ၵူၼ်းတင်းသဵင်ႈတင်းလူင်ၶၢမ်ႇဢဝ်မၢင်ႇၵလႃႇပပ်ႉတိၸမ်ႇၼၼ်ႉၸိုင်၊ ၸဝ်ႈယေႇသု၊ ၵေႃႈ၊ၶၢမ်ႇဢဝ်မၢင်ႇၵလႃႇပပ်ႉတိၸမ်ႇလႄႈၼႂ်းမိူဝ်ႈဢၼ်မၼ်းၸဝ်ႈသူးတွင်းယူႇၼၼ်ႉၵၢင်ႁၢဝ်ၽုၺ်ႇပိုတ်ႇသေလႄႈ၊-
ဝိၺိၺ်ႇဢၼ်မူတ်းၸၢင်ႇၸဝ်ႈမီးႁၢင်ႈၽၢင်မိူၼ်ၸိူဝ်ႉၼင်ႇၼူၵ်ႉတူႈလူင်းမႃးၵႃႈၼိူဝ်မၼ်းၸဝ်ႈဢေႃႈ။ မီးသဵင်လၢတ်ႈလုၵ်ႉသေၵႃႈတီႈၵၢင်ႁၢဝ်မႃးလႄႈဝႃႈ၊ “မႂ်းၼႆႉ၊ပဵၼ်လုၵ်ႈႁၵ်ႉၵဝ်ဢၼ်ၵဝ်ထုၵ်ႇၸႂ်ၵျိူၵ်ႈၸႂ်ၼႃႇဢေႃႈ၊” ဝႃႈၼင်ႇၼႆဢေႃႈ။
ယၢမ်းမိူဝ်ႈဢၼ် ၸဝ်ႈယေႇသု၊ တႄႇၸႃႉပွင်ၵၢၼ်သႃႇသၼႃႇမၼ်းၸဝ်ႈၼၼ်ႉ၊ဢသၢၵ်ႈလႆႈသၢမ်သိပ်းၸမ်ၸမ်ယဝ်ႉဢေႃႈ။ ၵႃႈၼင်ႇဢၼ်ပိူၼ်ႈထၢင်ႇၼၼ်ႉမၼ်းၸဝ်ႈပဵၼ်လုၵ်ႈ ယူဝ်းသႅပ်ႈ၊ ၵေႃႉပဵၼ်လုၵ်ႈ ဢေးလိ၊-
ဢေးလိ၊ ပဵၼ်လုၵ်ႈ မတ်ႈထတ်ႈ၊မတ်ႈထတ်ႈ၊ ပဵၼ်လုၵ်ႈ လေႇဝိ၊လေႇဝိ၊ ပဵၼ်လုၵ်ႈ မေႇလၶိ၊မေႇလၶိ၊ ပဵၼ်လုၵ်ႈ ယၢၼ်ႇၼႃႉ၊ယၢၼ်ႇၼႃႉ၊ ပဵၼ်လုၵ်ႈ ယူဝ်းသႅပ်ႈ၊-
ယူဝ်းသႅပ်ႈ၊ ပဵၼ်လုၵ်ႈ မတ်ႉတထိ၊မတ်ႉတထိ၊ ပဵၼ်လုၵ်ႈ ဢႃႇမုတ်ႉ၊ဢႃႇမုတ်ႉ၊ ပဵၼ်လုၵ်ႈ ၼႃႇႁုမ်ႇ၊ၼႃႇႁုမ်ႇ၊ ပဵၼ်လုၵ်ႈ ဢေးသလိ၊ဢေးသလိ၊ ပဵၼ်လုၵ်ႈ ၼၵ်ႉၵေႇ၊-
ၼၵ်ႉၵေႇ၊ ပဵၼ်လုၵ်ႈ မႃႇဢတ်ႈ၊မႃႇဢတ်ႈ၊ ပဵၼ်လုၵ်ႈ မတ်ႉတထိ၊မတ်ႉတထိ၊ ပဵၼ်လုၵ်ႈ သိမ်ႇမိ၊သိမ်ႇမိ၊ ပဵၼ်လုၵ်ႈ ယူဝ်းသႅပ်ႈ၊ယူဝ်းသႅပ်ႈ၊ ပဵၼ်လုၵ်ႈ ၸူဝ်းတႃႉ၊-
ၸူဝ်းတႃႉ၊ ပဵၼ်လုၵ်ႈ ယူဝ်းႁၢၼ်ႇၼႃႉ၊ယူဝ်းႁၢၼ်ႇၼႃႉ၊ ပဵၼ်လုၵ်ႈ ရေႇသႃႇ၊ရေႇသႃႇ၊ ပဵၼ်လုၵ်ႈ ၸေႇရုပႃႉပေႇလႃႉ၊ၸေႇရုပႃႉပေႇလႃႉ၊ ပဵၼ်လုၵ်ႈ သႃႇလထိဢေးလႃႉ၊သႃႇလထိဢေးလႃႉ၊ ပဵၼ်လုၵ်ႈ ၼီႇရိ၊-
ၼီႇရိ၊ ပဵၼ်လုၵ်ႈ မေႇလၶိ၊မေႇလၶိ၊ ပဵၼ်လုၵ်ႈ ဢတ်ႉတိ၊ဢတ်ႉတိ၊ ပဵၼ်လုၵ်ႈ ၵူဝ်းသမ်း၊ၵူဝ်းသမ်း၊ ပဵၼ်လုၵ်ႈ ဢေးလမူဝ်းတမ်ႇ၊ဢေးလမူဝ်းတမ်ႇ၊ ပဵၼ်လုၵ်ႈ ဢေးရႃႉ၊-
ဢေးရႃႉ၊ ပဵၼ်လုၵ်ႈ ယူဝ်းသေႇ၊ယူဝ်းသေႇ၊ ပဵၼ်လုၵ်ႈ ဢေးလျႃႇၸႃႇ၊ဢေးလျႃႇၸႃႇ၊ ပဵၼ်လုၵ်ႈ ယူဝ်းရိမ်ႇ၊ယူဝ်းရိမ်ႇ၊ ပဵၼ်လုၵ်ႈ မတ်ႉထတ်ႉ၊မတ်ႉထတ်ႉ၊ ပဵၼ်လုၵ်ႈ လေႇဝိ၊-
လေႇဝိ၊ ပဵၼ်လုၵ်ႈ သုမွင်ႇ၊သုမွင်ႇ၊ ပဵၼ်လုၵ်ႈ ယုတႃႉ၊ယုတႃႉ၊ ပဵၼ်လုၵ်ႈ ယူဝ်းသႅပ်ႈ၊ယူဝ်းသႅပ်ႈ၊ ပဵၼ်လုၵ်ႈ ၸူဝ်းၼမ်ႇ၊ၸူဝ်းၼမ်ႇ၊ ပဵၼ်လုၵ်ႈ ဢေးလျႃႇၵိမ်း၊-
ဢေးလျႃႇၵိမ်း၊ ပဵၼ်လုၵ်ႈ မေႇလေႇ၊မေႇလေႇ၊ ပဵၼ်လုၵ်ႈ မေးၼၼ်ႇ၊မေးၼၼ်ႇ၊ ပဵၼ်လုၵ်ႈ မတ်ႉတထႃႉ၊မတ်ႉတထႃႉ၊ ပဵၼ်လုၵ်ႈ ၼႃႇထၼ်ႇ၊ၼႃႇထၼ်ႇ၊ ပဵၼ်လုၵ်ႈ တႃႇဝိတ်ႈ၊-
တႃႇဝိတ်ႈ၊ ပဵၼ်လုၵ်ႈ ယေႇသႄး၊ယေႇသႄး၊ ပဵၼ်လုၵ်ႈ ဢူဝ်းပိတ်ႉ၊ဢူဝ်းပိတ်ႉ၊ ပဵၼ်လုၵ်ႈ ပေႃႇၸႃႉ၊ပေႃႇၸႃႉ၊ ပဵၼ်လုၵ်ႈ သႃႇလမုၼ်ႇ၊သႃႇလမုၼ်ႇ၊ ပဵၼ်လုၵ်ႈ ၼႃႇသုၼ်ႇ၊-
ၼႃႇသုၼ်ႇ၊ ပဵၼ်လုၵ်ႈ ဢမိလတပ်ႉ၊ဢမိလတပ်ႉ၊ ပဵၼ်လုၵ်ႈ ဢတ်ႉမိၼ်း၊ဢတ်ႉမိၼ်း၊ ပဵၼ်လုၵ်ႈ ဢႃႇၼီႇ၊ဢႃႇၼီႇ၊ ပဵၼ်လုၵ်ႈ ႁေႇၸရုၼ်ႇ၊ႁေႇၸရုၼ်ႇ၊ ပဵၼ်လုၵ်ႈ ၽေးရိတ်ႉ၊ၽေးရိတ်ႉ၊ ပဵၼ်လုၵ်ႈ ယုတႃႉ၊-
ယုတႃႉ၊ ပဵၼ်လုၵ်ႈ ယႃႇၵုပ်ႈ၊ယႃႇၵုပ်ႈ၊ ပဵၼ်လုၵ်ႈ ဢိၸၢၵ်ႈ၊ဢိၸၢၵ်ႈ၊ ပဵၼ်လုၵ်ႈ ဢႃႇပြႃႇႁၢမ်ႇ၊ဢႃႇပြႃႇႁၢမ်ႇ၊ ပဵၼ်လုၵ်ႈ တေႇရႃႉ၊တေႇရႃႉ၊ ပဵၼ်လုၵ်ႈ ၼႃႇၶေႃႇ၊-
ၼႃႇၶေႃႇ၊ ပဵၼ်လုၵ်ႈ ၸေႇရုတ်ႉ၊ၸေႇရုတ်ႉ၊ ပဵၼ်လုၵ်ႈ ရႃႇၵေႃး၊ရႃႇၵေႃး၊ ပဵၼ်လုၵ်ႈ ၽႃႇလိတ်ႉ၊ၽႃႇလိတ်ႉ၊ ပဵၼ်လုၵ်ႈ ႁေႇပႃႇ၊ႁေႇပႃႇ၊ ပဵၼ်လုၵ်ႈ သႃႇလႃႉ၊-
သႃႇလႃႉ၊ ပဵၼ်လုၵ်ႈ ၵႃႇဢိၼႃႉ၊ၵႃႇဢိၼႃႉ၊ ပဵၼ်လုၵ်ႈ ဢႃႇၽၵ်ႉၸတ်ႉ၊ ဢႃႇၽၵ်ႉၸတ်ႉ၊ ပဵၼ်လုၵ်ႈ သေႇမႃႉ၊သေႇမႃႉ၊ ပဵၼ်လုၵ်ႈ ၼူဝ်းဢႃႇ၊ၼူဝ်းဢႃႇ၊ ပဵၼ်လုၵ်ႈ လႃႇမႅၵ်ႈ၊-
လႃႇမႅၵ်ႈ၊ ပဵၼ်လုၵ်ႈ မထုသလႃႉ၊မထုသလႃႉ၊ ပဵၼ်လုၵ်ႈ ဢေးၼွၵ်ႉ၊ဢေးၼွၵ်ႉ၊ ပဵၼ်လုၵ်ႈ ယႃႇရိတ်ႉ၊ယႃႇရိတ်ႉ၊ ပဵၼ်လုၵ်ႈ မႁႃႇလေႇလေႇလႃႉ၊မႁႃႇလေႇလေႇလႃႉ၊ ပဵၼ်လုၵ်ႈ ၵႃႇဢိၼၼ်ႇ၊-
ၵႃႇဢိၼၼ်ႇ၊ ပဵၼ်လုၵ်ႈ ဢေႇၼုတ်ႉ၊ဢေႇၼုတ်ႉ၊ ပဵၼ်လုၵ်ႈ သေႇထႃႉ၊ သေးထႃႉ၊ ပဵၼ်လုၵ်ႈ ဢႃႇတမ်ႇ၊ဢႃႇတမ်ႇ၊ ပဵၼ်လုၵ်ႈၽြႃးပဵၼ်ၸဝ်ႈဢေႃႈ။
ၸဝ်ႈယေႇသု၊ ပျေႉၸုမ်ႇတဵမ်ဝႆႉတင်းဝိၺိၺ်ႇဢၼ်မူတ်းၸၢင်ႇၸဝ်ႈသေလႄႈၼႂ်းမိူဝ်ႈဢၼ်ပွၵ်ႈၶိုၼ်းမႃးသေၵႃႈတီႈၼမ်ႉ ယေႃးတၢၼ်ႇ၊ ယူႇၼၼ်ႉၸိုင်၊လႆႈၶၢမ်ႇတၢင်းဢၼ်ဝိၺိၺ်ႇၸဝ်ႈဢဝ်သူင်ႇၵႂႃႇၵႃႈၼႂ်းထိူၼ်ႇလႅင်ႉဢေႃႈ။-
တီႈၼၼ်ႈမၼ်းၸဝ်ႈလႆႈၶၢမ်ႇတၢင်းဢၼ် မႃႇၼၢတ်ႈ၊ ၸၢမ်းတူၺ်းယႃႉၵဝ်းသီႇသိပ်းဝၼ်းဢေႃႈ။ ၼႂ်းမိူဝ်ႈဝၼ်းၸိူဝ်းၼၼ်ႉမၼ်းၸဝ်ႈဢမ်ႇၵိၼ်တၢင်းၵိၼ်ၵႃႈသင်၊မိူဝ်ႈဢၼ်ပူၼ်ႉၶိင်ႇယၢမ်းမိူဝ်ႈဝၼ်းၸိူဝ်းၼၼ်ႉယဝ်ႉၼၼ်ႉၸိုင်၊မၼ်းၸဝ်ႈတွင်ႉမႆႈဢေႃႈ။
မႃႇၼၢတ်ႈ၊ လၢတ်ႈတီႈမၼ်းၸဝ်ႈလႄႈဝႃႈ၊ “ပေႃးမႂ်းၸႂ်ႈလုၵ်ႈၽြႃးပဵၼ်ၸဝ်ႈၸိုင်၊ပူင်ဢမိင်ႉတီႈမၢၵ်ႇႁိၼ်ၸိူဝ်းၼႆႉႁႂ်ႈပိၼ်ႇပဵၼ်ၶဝ်ႈမုၼ်းလႄႈၵိၼ်တႃႉ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ၼႂ်းၵျၢမ်းလိၵ်ႈမီးဝႆႉလႄႈဝႃႈ၊ ‘ၵူၼ်းတေလႆႈဢဝ်တင်းၶဝ်ႈမုၼ်းၵူၺ်းလဵင်ႉၸႂ်ဢမ်ႇၸႂ်ႈ၊’ မီးမႃးၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။
ဝၢႆးၼၼ်ႉ မႃႇၼၢတ်ႈ၊ သမ်ႉဢဝ်မၼ်းၸဝ်ႈၵႂႃႇၵႃႈတီႈဢၼ်သုင်ၼႃႇယဝ်ႉၸင်ႇၼႄပျႃးမိူင်းလေႃးၵႃႉတင်းသဵင်ႈတင်းလူင်ၸူဝ်ႈၵႅပ်ႈၼိုင်ႈသေလႄႈလၢတ်ႈတီႈမၼ်းၸဝ်ႈလႄႈဝႃႈ၊-
“ၵဝ်တၵ်းဢဝ်ဢႃႇၼႃႇတၼ်းၶူဝ်းၸိူဝ်းၼႆႉ၊ဢိၵ်ႇတင်းမုၼ်ၸေးၸိမ်ႇတင်းသဵင်ႈတင်းလူင်ၼႆႉပၼ်တီႈမႂ်းဢေႃႈ။ ၶိူင်ႈပိူင်ၸိူဝ်းၼႆႉဢၢပ်ႈဝႆႉမီးယူႇၼႂ်းမိုဝ်းၵဝ်ယဝ်ႉလႄႈ၊ၵဝ်ၶႂ်ႈပၼ်ၵေႃႉလႂ်ၵေႃႈပၼ်လႆႈယဝ်ႉ။-
ပိူဝ်ႈၼႆလႄႈ ပေႃးမႂ်းၶုပ်ႉမူပ်ႇဝႆႈၵဝ်ၸိုင်၊ၵႃႈမီးတင်းသဵင်ႈတင်းလူင်ၸိူဝ်းၼႆႉတၵ်းပဵၼ်ၶွင်မႂ်းဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ၵႃႈၼႂ်းၵျၢမ်းလိၵ်ႈမီးဝႆႉလႄႈဝႃႈ၊ ‘မႂ်းတၵ်းလႆႈၶုပ်ႉဝႆႈၽြႃးပဵၼ်ၸဝ်ႈမႂ်းထႃႇဝရႃႉၽြႃးလႄႈႁဵတ်းဝၢတ်ႈတီႈမၼ်းၸဝ်ႈသူႇလဵဝ်ၵူၺ်း၊’ မီးဝႆႉၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။
ၵမ်းၼၼ်ႉ၊မႃႇၼၢတ်ႈသမ်ႉဢွၼ်သူင်ႇ ၸဝ်ႈယေႇသု၊ ၵႂႃႇၵႃႈတီႈဝဵင်း ယေႇရုသလႅမ်ႇ၊ သေလႄႈဢဝ်မၼ်းၸဝ်ႈဝႆႉၵႃႈၼိူဝ်ၸိၵ်းၸွမ်ၵျွင်းပိၵ်ႈမၢၼ်ႇၸဝ်ႈယဝ်ႉၸင်ႇ၊လၢတ်ႈလႄႈဝႃႈ၊ “ပေႃးမႂ်းၸႂ်ႈလုၵ်ႈၽြႃးပဵၼ်ၸဝ်ႈၸိုင်၊ပွႆႇတူဝ်ၸဝ်ႈၵဝ်ႇလႄႈဝႅၼ်တူၵ်းၵႃႈတီႈၼႆႈၵႂႃႇတႃႉ။-
ၼႂ်းၵျၢမ်းလိၵ်ႈမီးဝႆႉလႄႈဝႃႈ၊ ‘ၽြႃးပဵၼ်ၸဝ်ႈတၵ်းပွႆႇၸႂ်ႉတမၢၼ်ႇၵၢင်ႁၢဝ်တင်းလၢႆမႃးပႂ်ႉလူပႂ်ႉတူၺ်းမႂ်းဢေႃႈ၊’ ဝႃႈၼႆၵူၺ်းဢမ်ႇၵႃး၊-
သမ်ႉမီးထႅင်ႈလႄႈဝႃႈ၊ ‘ၶဝ်ၼၼ်ႉတၵ်းဢဝ်တင်းမိုဝ်းဢုမ်ႈႁွပ်ႇဢဝ်မႂ်းဝႆႉၼင်ႇႁိုဝ်ၽႃႇတိၼ်မႂ်းဢမ်ႇလႆႈတိူဝ်ႉမၢၵ်ႇႁိၼ်ၼၼ်ႉဢေႃႈ၊’ ဝႃႈၼႆယဝ်ႉ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ သမ်ႉၶိုၼ်းလၢတ်ႈလႄႈဝႃႈ၊ “ၼႂ်းၵျၢမ်းလိၵ်ႈမီးဝႆႉၸမ်ႉ၊ ‘မႂ်းတေဢမ်ႇလႆႈၸၢမ်းတူၺ်းၽြႃးပဵၼ်ၸဝ်ႈမႂ်းထႃႇဝရႃႉၽြႃး၊’ မီးဝႆႉၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။
လိုၼ်းၼၼ်ႉ၊မိူဝ်ႈဢၼ်မႃႇၼၢတ်ႈၸၢမ်းတူၺ်းယႃႉၵဝ်း ၸဝ်ႈယေႇသု၊ ၵူႈၸိူဝ်ႉၵူႈပိူင်ယဝ်ႉၸိုင်၊ဢွၵ်ႇပၢႆႈသေၵႃႈတီႈမၼ်းၸဝ်ႈၵႂႃႇၸူဝ်ႈၼိုင်ႈၶၢဝ်းၼိုင်ႈသေဢေႃႈ။
ၵမ်းၼၼ်ႉ၊ ၸဝ်ႈယေႇသု၊ ၶိုၼ်းမိူဝ်းၵႂႃႇၵႃႈတီႈမိူင်း ၵႃႇလိလႄး၊ လႄႈမိူဝ်ႈၼၼ်ႉတၼ်းၶူဝ်းဝိၺိၺ်ႇဢၼ်မူတ်းၸၢင်ႇၸဝ်ႈမီးယူႇလူၺ်ႈၵၼ်တင်းမၼ်းၸဝ်ႈဢေႃႈ။ ၶၢဝ်ႇငၢဝ်းလွင်ႈမၼ်းၸဝ်ႈၵေႃႈ၊ၸွတ်ႇတူဝ်ႈၵႂႃႇၵႃႈၼႂ်းမိူင်းၼၼ်ႉၵူႈတီႈၵူႈလႅၼ်ဢေႃႈ။-
မၼ်းၸဝ်ႈသင်ႇသွၼ်ပၼ်ၼႂ်းၸရွပ်ႈႁေႃးတြႃးၶဝ်လႄႈ လႆႈၶၢမ်ႇတၢင်းဢၼ်ၵူၼ်းတင်းသဵင်ႈတင်းလူင်ယွင်ႈယေႃးဢေႃႈ။
မိူဝ်ႈၼၼ်ႉ၊ ၸဝ်ႈယေႇသု၊ ၶိုၼ်းႁွတ်ႈထိုင်ၵႃႈတီႈဝဵင်း ၼႃႇၸရႅတ်ႈ၊ တီႈဢၼ်မၼ်းၸဝ်ႈယႂ်ႇမႃးၼၼ်ႉသေလႄႈ၊ၵႃႈၼင်ႇဢၼ်မၼ်းၸဝ်ႈယၢမ်ႈႁဵတ်းၼၼ်ႉ ၼႂ်းဝၼ်းၵမ်သိၼ်မၼ်းၸဝ်ႈၶဝ်ႈၵႃႈၼႂ်းၸရွပ်ႈႁေႃးတြႃးဢေႃႈ။ မၼ်းၸဝ်ႈလုၵ်ႉၸုၵ်းႁႂ်ႈလႆႈၽတ်းဢၢၼ်ႇၵျၢမ်းလိၵ်ႈလႄႈ၊-
ႁပ်ႉၶၢမ်ႇဢဝ်ပပ်ႉၵျၢမ်းလိၵ်ႈပရေႃးၽႅတ်ႈ ဢိသႃႇယႃႉ၊ ဢေႃႈ။ မၼ်းၸဝ်ႈၽုၺ်ႇလိတ်ႈၵဵၼ်လိၵ်ႈတြႃးလႄႈ၊ထူပ်းၺႃးၵႂၢမ်းဢၼ်တႅမ်ႈဝႆႉဝႃႈ၊-
“ဝိၺိၺ်ႇထႃႇဝရႃႉၽြႃးတႄႇယူႇၵႃႈၼိူဝ်ၵဝ်ဢေႃႈ။ မၼ်းၸဝ်ႈလိူၵ်ႈဢဝ်ၵဝ်ႁႂ်ႈၵဝ်လႆႈႁေႃးတြႃးသဵင်ၶၢဝ်ႇဢၼ်လီတီႈၵူၼ်းၽၢၼ်တင်းလၢႆဢေႃႈ။ မၼ်းၸဝ်ႈပွႆႇၸႂ်ႉၵဝ်ၵႂႃႇႁႂ်ႈလႆႈႁေႃးမွၵ်ႇလၢတ်ႈတြႃးတၢင်းဢၼ်လွတ်ႈလႅဝ်း၊တီႈၶဝ်ၸိူဝ်းဢၼ်ၶင်ဝႆႉတင်းလၢႆ၊ ႁႂ်ႈလႆႈၽုၺ်ႇပိုတ်ႇဢၼ်လႅင်းပၼ်တီႈၶဝ်ၸိူဝ်းဢၼ်တႃမွတ်ႇတင်းလၢႆ၊ ႁႂ်ႈလႆႈၵႄႇသႄႇၶဝ်ၸိူဝ်းဢၼ်လႆႈၶၢမ်ႇ တဵၵ်းငႅၼ်းတင်းလၢႆ။
ဢိၵ်ႇတင်းႁႂ်ႈလႆႈၵျေႃႇၺႃႇမွၵ်ႇလၢတ်ႈလွင်ႈ ၶိင်ႇၵႃႇလႃႉဢၼ်ထႃႇဝရႃႉၽြႃးတၵ်း လႆႈပၼ်မၢင်ႇၵလႃႇဢေႃႈ၊” ဢၼ်ဝႃႈၼင်ႇၼႆၼၼ်ႉဢေႃႈ။
ၸဝ်ႈယေႇသု၊ ၶိုၼ်းႁမ်းၵဵၼ်ၽိုၼ်လိၵ်ႈတြႃးၼၼ်ႉယဝ်ႉၸင်ႇ ဢၢပ်ႈပၼ်တီႈၵူၼ်းပႂ်ႉၸရွပ်ႈႁေႃးတြႃးၼၼ်ႉသေလႄႈၼင်ႈယူႇဢေႃႈ။ ၵူၼ်းၸိူဝ်းဢၼ်မီးယူႇၼႂ်းၸရွပ်ႈႁေႃးတြႃးတင်းသဵင်ႈတင်းလူင်ဢွၼ်ၵၼ်ပၵ်းတႃတူၺ်းမၼ်းၸဝ်ႈယူႇဢေႃႈ။-
မၼ်းၸဝ်ႈၸင်ႇလၢတ်ႈတီႈၶဝ်လႄႈဝႃႈ၊ “ၵႂၢမ်းတြႃးပုၵ်ႈဢၼ်သူလႆႈငိၼ်းၵႃႈၼင်ႇဢၼ်ၽတ်းဢၢၼ်ႇၵႂႃႇၼႆႉပျေႉၸုမ်ႇၼႂ်းဝၼ်းမိူဝ်ႈၼႆႉယဝ်ႉ၊” ဝႃႈၼင်ႇၼႆဢေႃႈ။
ၶဝ်တင်းသဵင်ႈဢွၼ်ၵၼ်ယွင်ႈယေႃးဢၢမ်းဢေႃးၶေႃႈၵႂၢမ်းဢၼ်လီဢၼ်ဝၢၼ်၊ဢၼ်မၼ်းၸဝ်ႈႁေႃးလၢတ်ႈၼၼ်ႉလႄႈလၢတ်ႈဝႃႈ၊ “မၼ်းပဵၼ်လုၵ်ႈၸၢႆး ယူဝ်းသႅပ်ႈ၊ ဢမ်ႇၸႂ်ႈႁိုဝ်း၊” ဝႃႈၼင်ႇၼႆဢေႃႈ။
မၼ်းၸဝ်ႈၵေႃႈလၢတ်ႈလႄႈဝႃႈ၊ “ၵဝ်ႁုသေႇၶျႃႇလွင်ႈဢၼ်သူတၵ်းဢဝ်တင်းထုင်းၵႂၢမ်းဢၼ်ဝႃႈ၊ ‘မေႃယႃ႟၊ယႃတူဝ်ၸဝ်ႈၵဝ်ႇတႃႉ၊’ ဢၼ်ဝႃႈၼၼ်ႉလၢတ်ႈတီႈၵဝ်ဢမ်ႇၵႃး၊သမ်ႉတၵ်းလၢတ်ႈထႅင်ႈလႄႈဝႃႈ၊ ‘ၵႃႈၼင်ႇဢၼ်ႁဝ်းလႆႈငိၼ်းလွင်ႈဢၼ်မႂ်းႁဵတ်းၵႃႈၼႂ်းဝဵင်း ၵပိူဝ်ႇၼေႇဢုမ်ႇ၊ ပုၼ်ႉတင်းသဵင်ႈတင်းလူင်ၼၼ်ႉၸိုင်၊ၵႃႈၼႂ်းဝဵင်းတူဝ်ၸဝ်ႈၵဝ်ႇၼႆႉၵေႃႈႁဵတ်းသေၵမ်းတႃႉ၊’ ဝႃႈၼင်ႇၼႆဢမၢၼ်ႇၶၼ်ပဵၼ်ယဝ်ႉ။-
ၼႂ်းဝႃႈၼၼ်သေၵေႃႈ ၵဝ်ဝႃႈတီႈၸႂ်ႈမၼ်းၸမ်ႉ၊ပရေႃးၽႅတ်ႈပႃးလႂ်သေၵေႃႈ ဢမ်ႇလႆႈၼႃႈလႆႈတႃၵႃႈၼႂ်းဝဵင်းတူဝ်ၸဝ်ႈၵဝ်ႇ။-
ၸၢမ်းထွမ်ႇတူၺ်းၵဝ်သေၵမ်း။ ၼႂ်းၸူဝ်ႈပၢၼ်ပရေႃးၽႅတ်ႈ ဢေးလိယႃႉ၊ ၼၼ်ႉ၊ၼႂ်းမိူင်း ဢိသရေး၊ ၼႆႉ၊မီးမႄႈမၢႆႈၼမ်ၼႃႇဢမၢၼ်ႇၶၼ်ပဵၼ်ဢေႃႈ။ ၼႂ်းဝႃႈၼၼ်သေၵေႃႈ မိူဝ်ႈဢၼ်ၽႃႉလႅင်ႉသၢမ်ပီပၢႆႁူၵ်းလိူၼ်လႄႈၶဝ်ႈၵႃႈမၢၵ်ႇပႅင်းၼႃၵူႈဝၢၼ်ႈၵူႈမိူင်းၼၼ်ႉ၊-
ဢေးလိယႃႉ၊ ယင်းဢမ်ႇလႆႈၶၢမ်ႇတၢင်းဢၼ်ပွႆႇၸႂ်ႉၵႂႃႇၸူးၶဝ်ၼၼ်ႉသေၵေႃႉသေၵူၼ်းလႄႈ ၵူၺ်းလႆႈၶၢမ်ႇတၢင်းဢၼ်ပွႆႇၸႂ်ႉၵႂႃႇၸူးမႄႈမၢႆႈၵေႃႉၼိုင်ႈ ဢၼ်ပဵၼ်ၵူၼ်းဝဵင်း ၸႃႇရိပ်ႉတႃႉ၊ ဢိူင်ႇ ၸိတုၼ်ႇ၊ ပုၼ်ႉဢေႃႈ။-
မိူၼ်ၼင်ႇၼၼ်ၼႂ်းၸူဝ်ႈပၢၼ်ပရေႃးၽႅတ်ႈ ဢေးလိသႄး၊ ၼၼ်ႉၵေႃႈ၊ၼႂ်းမိူင်း ဢိသရေး၊ ၼႆႉမီးၵူၼ်းတုတ်ႈ ၼမ်ၼႃႇသေၵေႃႈၵူၼ်း သုရိ၊ ဢၼ်လႆႈၸိုဝ်ႈ ၼေႇမၼ်ႇ၊ ၵေႃႉလဵဝ်ၵူၺ်းလႆႈႁွတ်ႈတၢင်းဢၼ်မူတ်းသႂ်ဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၵူၼ်းတင်းလၢႆၸိူဝ်းဢၼ်မီးၼႂ်းၸရွပ်ႈႁေႃးတြႃးလႆႈငိၼ်းၸိုင်၊ဢွၵ်ႇတေႃးသႃႉလႄႈ၊-
ဢွၼ်ၵၼ်တိုတ်ႉၸၼ်မၼ်းၸဝ်ႈဢွၵ်ႇၵႂႃႇၵႃႈတီႈၼွၵ်ႈဝဵင်း၊ဢဝ်ၶိုၼ်ႈၵႂႃႇၵႃႈတီႈပၢႆၸိၵ်းလွႆဢၼ်ဝဵင်းၶဝ်တႄႇဝႆႉၼၼ်ႉႁႂ်ႈလႆႈတွၵ်ႈဢီးမၼ်းၸဝ်ႈတူၵ်းႁိုၵ်းဢေႃႈ။-
ၵူၺ်းၵႃႈ၊မၼ်းၸဝ်ႈလတ်းၶဝ်ႈၵႄႈၶဝ်ဢွၵ်ႇၵႂႃႇသေဢေႃႈ။
လိုၼ်းၼၼ်ႉ၊ ၸဝ်ႈယေႇသု၊ ၵႂႃႇႁွတ်ႈထိုင်ဝဵင်း ၵပိူဝ်ႇၼေႇဢုမ်ႇ၊ မိူင်း ၵႃႇလိလႄး၊ သေယဝ်ႉ၊တီႈၼၼ်ႈမၼ်းၸဝ်ႈသင်ႇသွၼ်ပၼ်တီႈၵူၼ်းတင်းလၢႆၼႂ်းဝၼ်းၵမ်သိၼ်ဢေႃႈ။-
ပိူဝ်ႈဢၼ်ၼမ်ႉၵႂၢမ်းမၼ်းၸဝ်ႈပႃးဢႃႇၼႃႇတၼ်းၶူဝ်းလႄႈၵူၼ်းၸိူဝ်းၼၼ်ႉဢၢမ်းၶေႃႈၵႂၢမ်းဢၼ်မၼ်းၸဝ်ႈႁေႃးလၢတ်ႈၼၼ်ႉၼႃႇလူင်လၢင်ဢေႃႈ။-
တီႈၼႂ်းၸရွပ်ႈႁေႃးတြႃးၼၼ်ႉ မီးၵူၼ်းၵေႃႉၼိုင်ႈဢၼ်ၽိူဝ်ႉၶဝ်ႈဝႆႉလႄႈ၊မၼ်းပၢဝ်ႇသႅၼ်ႇသဵင်ႁႅင်းၼႃႇလႄႈဝႃႈ၊-
“ဢူဝ်း၊ ယေႇသု၊ ၵူၼ်း ဝဵင်းၼႃႇၸရႅတ်ႈ၊ ႟။ ၸဝ်ႈၸၢပ်ႈသႅင်ႇၵၼ်တင်းႁဝ်းၵႃႈသင်ၶႃႈ။ ၸဝ်ႈမႃးႁႂ်ႈလႆႈယႃႉၵဝ်းႁဝ်းၶႃႈၶႃႈႁိုဝ်း။ ၸဝ်ႈပဵၼ်ၽူႈလႂ်ၵဝ်ၶႃႈႁုၸၵ်းဢေႃႈ။ ၸဝ်ႈပဵၼ်ၵူၼ်းမူတ်းၸၢင်ႇၽြႃးပဵၼ်ၸဝ်ႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၸင်ႇပူင်ဢမိင်ႉတီႈမၼ်းလႄႈဝႃႈ၊ “တဵတ်ႇတႃႉ။ ဢွၵ်ႇသေၵႃႈၼႂ်းမၼ်းၵႂႃႇတႃႉ၊” ဝႃႈၼင်ႇၼႆလႄႈ၊ၽိူဝ်ႉၼၼ်ႉႁႂ်ႈၵေႃႉၼၼ်ႉလူမ်ႉပႅတ်ႈၽၢႆႇၼႃႈၵူၼ်းတင်းလၢႆသေယဝ်ႉ၊ယင်းဢမ်ႇႁဵတ်းၽေးႁဵတ်းတၢမ်ႇတီႈၵေႃႉၼၼ်ႉၵႃႈသင်လႄႈဢွၵ်ႇၵႂႃႇဢေႃႈ။
ၵူၼ်းတင်းလၢႆၵေႃႈဢၢမ်းၼႃႇလႄႈၶဝ်ၼင်ႇၵၼ်ၵၼ်လၢတ်ႈတီႈၵၼ်လႄႈဝႃႈ၊ “ၵႂၢမ်းၼႆႉပဵၼ်ၵႂၢမ်းၸိူဝ်ႉၼင်ႇႁိုဝ်။ ၵေႃႉၼႆႉပႃးတင်းဢႃႇၼႃႇတၼ်းၶူဝ်းသေယဝ်ႉ၊ပူင်ဢမိင်ႉတီႈၽိူဝ်ႉတီႈၽီတင်းလၢႆလႄႈ၊ၶဝ်ၵေႃႈဢွၵ်ႇၵႂႃႇတႄႉဢေႃႈ၊” ဝႃႈၼင်ႇၼႆဢေႃႈ။-
ၶၢဝ်ႇငၢဝ်းလွင်ႈမၼ်းၸဝ်ႈၼၼ်ႉၸွတ်ႇတူဝ်ႈၵႂႃႇၵႃႈတီႈဢိူင်ႇၼၼ်ႉၵူႈတီႈဢေႃႈ။
ၸဝ်ႈယေႇသု၊ ဢွၵ်ႇသေၸရွပ်ႈႁေႃးတြႃးသေယဝ်ႉ၊ၶဝ်ႈၵႂႃႇၵႃႈၼႂ်းႁိူၼ်း သိမုၼ်ႇ၊ ဢေႃႈ။ မႄႈဢွၵ်ႇၼၢႆး သိမုၼ်ႇ၊ ၼၼ်ႉၼၢဝ်ႁႅင်းၼႃႇလႄႈ၊ၶဝ်မွၵ်ႇလၢတ်ႈလွင်ႈမၼ်းတီႈမၼ်းၸဝ်ႈဢေႃႈ။-
မၼ်းၸဝ်ႈၵႂႃႇၸုၵ်းၵႃႈတီႈႁိမ်းၵူႇမၼ်းလႄႈပူင်ဢမိင်ႉတီႈတၢင်းၼၢဝ်ၼၼ်ႉႁႂ်ႈဢွၵ်ႇသေၵႃႈၼႂ်းတူဝ်မၼ်းၵႂႃႇဢေႃႈ။ တၢင်းၼၢဝ်ၼၼ်ႉဢွၵ်ႇၵႂႃႇလႄႈမၼ်းၵေႃႈလုၵ်ႉၵမ်းလဵဝ်သေႁဵတ်းၵၢၼ်ၶၢမ်ႇၶႅၵ်ႇတီႈၶႅၵ်ႇဢေႃႈ။
ဝၢႆးသေၵၢင်ဝၼ်းတူၵ်းယဝ်ႉၸိုင်၊ၵူၼ်းၼမ်ၼႃႇဢဝ်ၵေႃႉသႄႈၶဝ်ၸိူဝ်းဢၼ်ၼၢဝ်လႄႈ မီးတၢင်းၶႆႈတၢင်းပဵၼ်ၵူႈၸိူဝ်ႉၵူႈမဵဝ်းမႃးၸူးတီႈမၼ်းၸဝ်ႈဢေႃႈ။ မၼ်းၸဝ်ႈၵေႃႈ ဢဝ်မိုဝ်းတၢင်ႇၵႃႈၼိူဝ်ၶဝ်ၵူႈၵေႃႉႁႂ်ႈတၢင်းပဵၼ်ၶဝ်ၸိုၼ်ႈႁၢႆဢေႃႈ။-
ၽီႁၢႆႉတင်းလၢႆၵေႃႈဢွၵ်ႇသေၵႃႈၼႂ်းၵူၼ်းၼမ်ၼႃႇလႄႈႁွင်ႉသႅၼ်ႇဝႃႈ၊ “ၸဝ်ႈႁဝ်းပဵၼ်လုၵ်ႈၽြႃးပဵၼ်ၸဝ်ႈၶႃႈဢေႃႈ၊” ဝႃႈၼင်ႇၼႆဢေႃႈ။ ပိူဝ်ႈဢၼ်ၶဝ်ႁုၸၵ်းမၼ်းၸဝ်ႈပဵၼ် ၸဝ်ႈၶရိၸ်ႈ၊ လႄႈမၼ်းၸဝ်ႈႁၢမ်ႈတၢပ်ႈၶဝ်၊ၼင်ႇႁိုဝ်ၶဝ်တၵ်းဢမ်ႇလႆႈမွၵ်ႇလၢတ်ႈတီႈပိူၼ်ႈၼၼ်ႉဢေႃႈ။
မိူဝ်ႈဢၼ်မိူင်းလႅင်းမႃးၸိုင်၊ ၸဝ်ႈယေႇသု၊ ဢွၵ်ႇဝဵင်းၵႂႃႇၸူးၵႃႈတီႈဢၼ်ဢမ်ႇမီးၵူၼ်းၼၼ်ႉတီႈၼိုင်ႈဢေႃႈ။ ၵူၼ်းတင်းလၢႆၸွမ်းႁႃမၼ်းၸဝ်ႈလႄႈမိူဝ်ႈဢၼ်ထူပ်းႁၼ်ၼၼ်ႉ ၼင်ႇႁိုဝ်မၼ်းၸဝ်ႈတၵ်းဢမ်ႇၽၢတ်ႇယၢၼ်ၶဝ်ၵႂႃႇၸိုင်၊ၶဝ်ဢွၼ်ၵၼ်တွင်းပၢၼ်ႇမၼ်းၸဝ်ႈဢေႃႈ။-
ၵူၺ်းၵႃႈ၊မၼ်းၸဝ်ႈလၢတ်ႈတီႈၶဝ်လႄႈဝႃႈ၊ “ၵဝ်တၵ်းလႆႈႁေႃးလၢတ်ႈၶၢဝ်ႇတြႃးသိူဝ်းပျေႃႇဢၼ်ၸၢပ်ႈသႅင်ႇၵၼ်တင်းမိူင်းၽြႃးပဵၼ်ၸဝ်ႈတီႈၼႂ်းဝၢၼ်ႈၼႂ်းဝဵင်းတၢင်ႇတီႈတၢင်ႇလႅၼ်ၼင်ႇၵဝ်ႇ၊ၸွမ်းၵႃႈၼင်ႇဢၼ်ၽြႃးပဵၼ်ၸဝ်ႈပွႆႇၸႂ်ႉၵဝ်မႃးႁႂ်ႈလႆႈႁဵတ်းၸိူဝ်ႉၼင်ႇၼၼ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈမၼ်းၸဝ်ႈႁေႃးတြႃးၵႃႈၼႂ်းၸရွပ်ႈႁေႃးတြႃးတင်းလၢႆၸွတ်ႇတူဝ်ႈၵႂႃႇၵႃႈၼႂ်းမိူင်း ယုတႃႉ၊ ဢေႃႈ။
မီးဝၼ်းၼိုင်ႈ ၸဝ်ႈယေႇသု၊ ၸုၵ်းယူႇၵႃႈၼိူဝ်ၽင်ႇၼွင် ၵိၼ်ႇၼီႇၸရိတ်ႈ၊ လႄႈ၊ၵူၼ်းၼမ်ၼႃႇၽိုတ်ႉဢီးၸူးတီႈမၼ်းၸဝ်ႈ ႁႂ်ႈလႆႈထွမ်ႇဢဝ်ၼုၵ်ႈၵပၢတ်ႈတြႃးၽြႃးပဵၼ်ၸဝ်ႈဢေႃႈ။-
မၼ်းၸဝ်ႈႁၼ်ႁိူဝ်းသွင်လမ်းသိူၵ်ႈယူႇတီႈၽင်ႇၼွင်ဝႆႉလႄႈၵူၼ်းလႃႈၼမ်ႉ တင်းလၢႆသုၵ်ႈသၢႆႇၶႄၶဝ်ယူႇၵႃႈၼွၵ်ႈႁိူဝ်းဢေႃႈ။-
ၼႂ်းႁိူဝ်းၸိူဝ်းၼၼ်ႉမၼ်းၸဝ်ႈၶဝ်ႈၵႃႈၼႂ်းႁိူဝ်းလမ်းၼိုင်ႈဢၼ်ပဵၼ်ႁိူဝ်း သိမုၼ်ႇ၊ သေယဝ်ႉ၊ယွၼ်းႁႂ်ႈမၼ်းၽၢႆးႁိူဝ်းဢွၵ်ႇၵႂႃႇဢိတ်းဢွၼ်ႇၼိုင်ႈယဝ်ႉၸင်ႇ၊ၼင်ႈၵႃႈၼႂ်းႁိူဝ်းၼၼ်ႉသေလႄႈသင်ႇသွၼ်ပၼ်ဢေႃးဝႃႇတႃႉတီႈၵူၼ်းတင်းလၢႆၸိူဝ်းၼၼ်ႉဢေႃႈ။
ဝၢႆးသေမၼ်းၸဝ်ႈႁေႃးလၢတ်ႈသုတ်းယဝ်ႉၸိုင်၊မၼ်းၸဝ်ႈလၢတ်ႈတီႈ သိမုၼ်ႇ၊ လႄႈဝႃႈ၊ “ၽၢႆးၵႂႃႇၵႃႈတီႈဢၼ်ၼမ်ႉလိုၵ်ႉပုၼ်ႉတႃႉ။ ဢွၼ်ၵၼ်ဝၢၼ်ႇၶႄသူတူၵ်းႁႂ်ႈလႆႈႁူမ်ႇပႃတႃႉ၊” ဝႃႈၼင်ႇၼႆလႄႈ။
သိမုၼ်ႇ၊ ၶိုၼ်းလၢတ်ႈလႄႈဝႃႈ၊ “ၸဝ်ႈ႟။ ႁဝ်းၶႃႈပေႃးလႆႈၶတ်းၸႂ်ၵျူဝ်းၸႃးတင်းၶိုၼ်းယဝ်ႉသေၵေႃႈ၊ဢမ်ႇလႆႈပႃသေတူဝ်ၶႃႈ။ ၼႂ်းဝႃႈၼၼ်သေၵေႃႈ၊ပေႃးၸဝ်ႈႁဝ်းမီးဢမိင်ႉၸိုင်၊ၵဝ်ၶႃႈတၵ်းဝၢၼ်ႇၶႄလူင်းၵႂႃႇၶႃႈဢေႃႈ၊” ဝႃႈၼင်ႇၼႆဢေႃႈ။-
ၶဝ်ၵေႃႈဝၢၼ်ႇတူၵ်းၸိူဝ်ႉၼင်ႇၼၼ်လႄႈႁူမ်ႇမႅၼ်ႈပႃၼမ်ၼႃႇတေႃႇထိုင်ႁွတ်ႈၶႄၶဝ်ထၢၼ်ႈပေႃးၸမ်တေသိၵ်ႇတေၶၢတ်ႇၵႂႃႇဢေႃႈ။-
ပိူဝ်ႈၼႆလႄႈ ၶဝ်ၸင်ႇၵႂၵ်းမိုဝ်းႁွင်ႉဢဝ်ၵေႃႉသႄႈၶဝ်ဢၼ်ယူႇၵႃႈတီႈႁိူဝ်းတၢင်ႇလမ်းၼၼ်ႉ ႁႂ်ႈမႃးၸွႆႈၶဝ်ဢေႃႈ။ ၶဝ်ၵေႃႈမႃးလႄႈလႆႈပႃၼမ်ၼႃႇတဵမ်ႁိူဝ်းတင်းသွင်လမ်းထၢၼ်ႈပေႃးၸမ်တၵ်းၸူမ်ၵႂႃႇဢေႃႈ။-
မိူဝ်ႈဢၼ် သိမုၼ်ႇ၊ ႁၼ်လွင်ႈတၢင်းၼၼ်ႉၸိုင်၊မၼ်းၶုပ်ႉၶဝ်ႇၽၢႆႇၼႃႈ ၸဝ်ႈယေႇသု၊ လႄႈလဝ်ႈလၢတ်ႈဝႃႈ၊ “ၸဝ်ႈႁဝ်းတီႈၶႃႈ။ ပိူဝ်ႈဢၼ်ၵဝ်ၶႃႈပဵၼ်ၵေႃႉဢၼ်မီးဢပျတ်ႈၼမ်ၼႃႇလႄႈၶႅၼ်းတေႃႈဢွၵ်ႇသေၵႃႈတီႈၵဝ်ၶႃႈၵႂႃႇသေၵမ်းၶႃႈ၊” ဝႃႈၼင်ႇၼႆဢေႃႈ။
ႁဵတ်းႁိုဝ်လႄႈလဝ်ႈလၢတ်ႈၸိူဝ်ႉၼင်ႇၼႆၼၼ်ႉၸမ်ႉ၊ပိူဝ်ႈဢၼ်ဝူၼ်ႉတူၺ်းလွင်ႈဢၼ်လႆႈပႃၼမ်ၼႃႇထၼ်ႇၼၼ်ႉလႄႈမၼ်းတင်းၵူၼ်းဢၼ်မီးလူၺ်ႈၵၼ်တင်းမၼ်း၊-
ဢိၵ်ႇတင်း ယႃႇၵုပ်ႈ၊ ဢိၵ်ႇတင်း ယူဝ်းႁၢၼ်ႇ၊ လုၵ်ႈၸၢႆး ၸေႇပေႇတႄး၊ ဢၼ်ပဵၼ်ၵူၼ်းႁူမ်ႈၵၢၼ်ၵၼ်တင်းမၼ်းၸိူဝ်းၼၼ်ႉဢၢမ်းဢေႃးၼႃႇဢေႃႈ။ ၸဝ်ႈယေႇသု၊ ၵေႃႈလၢတ်ႈတီႈ သိမုၼ်ႇ၊ လႄႈဝႃႈ၊ “ယႃႇပေၵူဝ်။ တႄႇဢဝ်မိူဝ်ႈလဵဝ်ၼႆႉၵႂႃႇသူတၵ်းပဵၼ်ၵေႃႉဢၼ်တိဢဝ်ၵူၼ်းဢေႃႈ၊” ဝႃႈၼင်ႇၼႆဢေႃႈ။
ၶဝ်ၵေႃႈဢဝ်ႁိူဝ်းၶဝ်ၸၼ်တၢင်ႇၵွင်းဝႆႉသေယဝ်ႉ၊ဝႆႉပႅတ်ႈတင်းသဵင်ႈတင်းလူင်လႄႈၸွမ်း ၸဝ်ႈယေႇသု၊ ၵႂႃႇသေဢေႃႈ။
ၽဝ်ႇၼိုင်ႈမိူဝ်ႈဢၼ် ၸဝ်ႈယေႇသု၊ မီးယူႇၵႃႈၼႂ်းဝဵင်းဝဵင်းၼိုင်ႈၼၼ်ႉၵူၼ်းၵေႃႉၼိုင်ႈဢၼ်ပဵၼ်တုတ်ႈ တင်းတူဝ်တင်းၶိင်းမႃးလႄႈမိူဝ်ႈဢၼ်ႁၼ်မၼ်းၸဝ်ႈၸိုင်၊ၶုပ်ႉမူပ်ႇတွင်းပၢၼ်ႇလႄႈဝႃႈ၊ “ၸဝ်ႈ႟။ ပေႃးၸဝ်ႈႁဝ်းမီးဢလူဝ်ႇၸိုင်၊ႁႂ်ႈၵဝ်ၶႃႈမူတ်းသႂ်လႆႈယူႇၶႃႈဢေႃႈ၊” ဝႃႈၼင်ႇၼႆလႄႈ၊-
မၼ်းၸဝ်ႈၵေႃႈယိုၼ်းမိုဝ်းတိူဝ်ႉသႂ်ႇတီႈမၼ်းလႄႈလၢတ်ႈဝႃႈ၊ “ၵဝ်မီးဢလူဝ်ႇယူႇ။ ႁႂ်ႈမူတ်းသႂ်တႃႉ၊” ဝႃႈၼင်ႇၼႆဢေႃႈ။ တုတ်ႈမၼ်းၵေႃႈႁၢႆၵမ်းလဵဝ်ဢေႃႈ။-
ၸဝ်ႈယေႇသု၊ ၸင်ႇႁၢမ်ႈမၼ်းလႄႈဝႃႈ၊ “မႂ်းယႃႇပေၵႂႃႇလၢတ်ႈလွင်ႈၼႆႉတီႈၽူႈလႂ်သေၵေႃႉသေၵူၼ်း။ ၵူၺ်းၵႂႃႇ၊ၼႄတူဝ်မႂ်းတီႈယဵၸ်ႈပရေႃးႁဵၵ်ႈ ႁႂ်ႈမၼ်းၸႅတ်ႈသေးတူၺ်းမႂ်းသေယဝ်ႉ၊လွင်ႈဢၼ်မႂ်းမူတ်းသႂ်ၼႆႉၼင်ႇႁိုဝ်တၵ်းပဵၼ်သၢၵ်ႈသေႇတီႈၵူၼ်းတင်းလၢႆၸိုင်၊ႁဵတ်းတၢင်းလူႇၸွမ်းၵႃႈၼင်ႇဢၼ်တြႃး မူဝ်းသေႇ၊ ပိင်းၺၢပ်ႈဝႆႉၼၼ်ႉတႃႉ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ၶၢဝ်ႇငၢဝ်းလွင်ႈမၼ်းၸဝ်ႈယဵင်ႈၶႅၼ်းၸွတ်ႇတူဝ်ႈၵႂႃႇလႄႈ ၵူၼ်းၼမ်ၼႃႇၸုတုမ်မႃးႁႂ်ႈလႆႈထွမ်ႇဢဝ်တြႃးမၼ်းၸဝ်ႈ၊ဢိၵ်ႇတင်းႁႂ်ႈတၢင်းၶႆႈတၢင်းပဵၼ်ၸိုၼ်ႈႁၢႆဢေႃႈ။-
ၼႂ်းဝႃႈၼၼ်သေၵေႃႈ မၼ်းၸဝ်ႈဢွၵ်ႇၵႂႃႇတီႈဢၼ်ဢမ်ႇမီးၵူၼ်းၼၼ်ႉသေလႄႈသူးတွင်းဢေႃႈ။
မီးဝၼ်းၼိုင်ႈ၊မိူဝ်ႈဢၼ် ၸဝ်ႈယေႇသု၊ ယင်းတိုၵ်ႉသင်ႇသွၼ်ပၼ်ယူႇၼၼ်ႉ ၵူၼ်းၵိူင်း ၽႃႇရိသႄး၊ ၶဝ်၊ဢိၵ်ႇတင်းသြႃႇမေႃၵျၢမ်းထမ်ႇမႃႉၵမ်ႈၽွင်ႈဢၼ်လုၵ်ႉသေၵႃႈတီႈဝၢၼ်ႈတီႈဝဵင်းမိူင်း ၵႃႇလိလႄး၊ မိူင်း ယုတႃႉ၊ ဢိၵ်ႇတင်းဝဵင်း ယေႇရုသလႅမ်ႇ၊ ၸိူဝ်းၼၼ်ႉမႃးၼင်ႈယူႇၵႃႈတီႈၼၼ်ႈဢေႃႈ။ မုၼ်ၽုင်းတၼ်းၶူဝ်းၽြႃးပဵၼ်ၸဝ်ႈၵေႃႈတႄႇယူႇၼိူဝ်မၼ်းၸဝ်ႈပုၼ်ႈဢၼ်တၵ်းႁဵတ်းႁႂ်ႈတၢင်းၶႆႈတၢင်းပဵၼ်ၸိုၼ်ႈႁၢႆဢေႃႈ။-
မိူဝ်ႈၼၼ်ႉ၊ပိူၼ်ႈႁၢမ်ၵူၼ်းတၢႆၽၢၵ်ႇၵေႃႉၼိုင်ႈဢၼ်ၼွၼ်းယူႇၵႃႈၼိူဝ်သၢတ်ႇလႄႈၵျၢမ်ႇႁႃတၢင်းႁႂ်ႈလႆႈၽိုတ်ႉဢီးသေလႄႈ ၶဝ်ႈၵႂႃႇၵႃႈၼႂ်းႁိူၼ်းႁႂ်ႈလႆႈၶျႃးဝၢင်းၵႃႈတီႈၽၢႆႇၼႃႈ ၸဝ်ႈယေႇသု၊ ဢေႃႈ။-
ပိူဝ်ႈဢၼ်ၵူၼ်းၼမ်ၼႃႇဢႃးလႃးလႄႈ ၶဝ်ႁဵတ်းၸိူဝ်ႉႁိုဝ်ၵေႃႈဢမ်ႇႁၼ်တၢင်းဢၼ်တေဢဝ်မၼ်းၶဝ်ႈၵႂႃႇလႆႈ။ ၶဝ်ၸင်ႇႁၢမ်ၶိုၼ်ႈၵႂႃႇၼိူဝ်လင်ၶႃးႁိူၼ်းသေယဝ်ႉ၊ယႃႉၶႅပ်းဢုတ်ႇဢၼ်မုင်းဝႆႉၼၼ်ႉသေလႄႈဢဝ်တူဝ်မၼ်းဢၼ်ၼွၼ်းယူႇၵႃႈၼိူဝ်သၢတ်ႇၼၼ်ႉယွၼ်ႇလူင်းၵႂႃႇၵႃႈၼိူဝ်ၵႄႈၵူၼ်းသိုဝ်ႈၽၢႆႇၼႃႈမၼ်းၸဝ်ႈဢေႃႈ။-
မိူဝ်ႈဢၼ်မၼ်းၸဝ်ႈႁုႁၼ်တၢင်းယုမ်ႇမၢတ်ႈၶဝ်ႁႅင်းယႂ်ႇထၢၼ်ႇႁိုဝ်ၼၼ်ႉလႄႈလၢတ်ႈတီႈၵေႃႉၼၼ်ႉလႄႈဝႃႈ၊ “ၵေႃႉ႟။ ဢပျတ်ႈမႂ်းၸိုင်၊လႆႈၶၢမ်ႇတၢင်းဢၼ်ပွႆႇလွတ်ႈယဝ်ႉ၊” ဝႃႈၼင်ႇၼႆဢေႃႈ။
သြႃႇမေႃၵျၢမ်းထမ်ႇမႃႉၶဝ်တင်းၵူၼ်းၵိူင်း ၽႃႇရိသႄး၊ ၸိူဝ်းၼၼ်ႉၵေႃႈထၢင်ႇၼႂ်းၸႂ်ဝႃႈ၊ “ၵူၼ်းဢၼ်လၢတ်ႈပူၼ်ႉလၢတ်ႈလိူဝ်ၽြႃးပဵၼ်ၸဝ်ႈၼႆႉပဵၼ်ၽူႈလႂ်။ လိူဝ်သေၽြႃးပဵၼ်ၸဝ်ႈၵူၺ်းၽူႈလႂ်ၸၢင်ႈပွႆႇလွတ်ႈဢပျတ်ႈလႆႈ၊” ဝႃႈၼင်ႇၼႆဢေႃႈ။-
ၸဝ်ႈယေႇသု၊ ႁုလွင်ႈဢၼ်ၶဝ်ထၢင်ႇထိူမ်ၼႂ်းၸႂ်ၶဝ်ၸိူဝ်ႉၼင်ႇၼၼ်လႄႈ မၼ်းၸဝ်ႈလၢတ်ႈတီႈၶဝ်လႄႈဝႃႈ၊ “သူထၢင်ႇၸိူဝ်ႉၼင်ႇႁိုဝ်။-
ၵႂၢမ်းဢၼ်ဝႃႈ၊ ‘ဢပျတ်ႈမႂ်းၸိုင်လႆႈၶၢမ်ႇတၢင်းဢၼ်ပွႆႇလွတ်ႈယဝ်ႉ၊’ သမ်ႉတင်းၵႂၢမ်းဢၼ်ဝႃႈ၊ ‘လုၵ်ႉလႄႈပႆၵႂႃႇတႃႉ၊’ ဝႃႈၼင်ႇၼႆၼႂ်းသွင်ၶေႃႈၼႆႉ သူထၢင်ႇၶေႃႈလႂ်ယဵင်ႈၶႅၼ်းလၢတ်ႈငၢႆႈ။-
ၵဝ်တၵ်းၼႄပျႃးတီႈသူလွင်ႈဢၼ် လုၵ်ႈၵူၼ်း၊ မီးဢႃႇၼႃႇတၼ်းၶူဝ်းၼႂ်းလေႃးၵႃႉၼႆႉ ပုၼ်ႈဢၼ်ပွႆႇလွတ်ႈဢပျတ်ႈလႆႈၼၼ်ႉဢေႃႈ၊” ဝႃႈၼင်ႇၼႆသေယဝ်ႉ၊လၢတ်ႈတီႈၵူၼ်းတၢႆၽၢၵ်ႇၼၼ်ႉလႄႈဝႃႈ၊ “ၵဝ်ဝႃႈတီႈမႂ်းၸမ်ႉ၊လုၵ်ႉသေလႄႈဢဝ်သၢတ်ႇတီႈၼွၼ်းမႂ်းပွၵ်ႈမိူဝ်းႁိူၼ်းၵႂႃႇတႃႉ၊” ဝႃႈၼင်ႇၼႆဢေႃႈ။-
ၵေႃႉၼၼ်ႉၵေႃႈလုၵ်ႉၵမ်းလဵဝ်သေၵႃႈတီႈၽၢႆႇၼႃႈၶဝ်လႄႈၵဵၼ်သၢတ်ႇတီႈၼွၼ်းမၼ်းယဝ်ႉၸင်ႇ၊ယွင်ႈယေႃးၽြႃးပဵၼ်ၸဝ်ႈယူႇသေလႄႈမိူဝ်းႁိူၼ်းၵႂႃႇသေဢေႃႈ။-
ၶဝ်ၸိူဝ်းၼၼ်ႉတင်းသဵင်ႈတင်းလူင်ဢၢမ်းၼႃႇလူင်လၢင်လႄႈယွင်ႈယေႃးၽြႃးပဵၼ်ၸဝ်ႈသေလႄႈလၢတ်ႈဝႃႈ၊ “ဝၼ်းမိူဝ်ႈၼႆႉႁဝ်းလႆႈႁၼ်တၢင်းဢၼ်လီဢၢမ်းၼႃႇယဝ်ႉ၊” ဝႃႈၼင်ႇၼႆဢေႃႈ။
လိုၼ်းၼၼ်ႉ၊ ၸဝ်ႈယေႇသု၊ ဢွၵ်ႇၵႂႃႇလႄႈႁၼ်ၵူၼ်းၵဵပ်းၶွၼ်ႇၵေႃႉၼိုင်ႈ ဢၼ်လႆႈၸိုဝ်ႈ လေႇဝိ၊ ၼၼ်ႉ၊ၼင်ႈယူႇၵႃႈၼႂ်းလုမ်းမၼ်းဢေႃႈ။ မၼ်းၸဝ်ႈလၢတ်ႈတီႈမၼ်းလႄႈဝႃႈ၊ “ၸွမ်းၵဝ်မႃးတႃႉ၊” ဝႃႈၼင်ႇၼႆလႄႈ၊-
လေႇဝိ၊ ၵေႃႈလုၵ်ႉလႄႈပႅတ်ႈဝႆႉၵႃႈမီးတင်းသဵင်ႈတင်းလူင်သေယဝ်ႉ၊ၸွမ်းမၼ်းၸဝ်ႈၵႂႃႇသေဢေႃႈ။
မိူဝ်ႈၼၼ်ႉ၊ လေႇဝိ၊ ႁႅၼ်းပွႆးၶၢမ်ႇၶႅၵ်ႇဢၼ်ၵိုၼ်းၼႃႇၵႃႈၼႂ်းႁိူၼ်းမၼ်းပုၼ်ႈမၼ်းၸဝ်ႈလႄႈ၊ၵူၼ်းၵဵပ်းၶွၼ်ႇၼမ်ၼႃႇ၊ဢိၵ်ႇတင်းပိူၼ်ႈတၢင်ႇၵေႃႉၸိူဝ်းၼၼ်ႉၵေႃႈပႃးၼႂ်းပၢင်ပွႆးဢေႃႈ။-
ၵူၼ်းၵိူင်း ၽႃႇရိသႄး၊ ၶဝ်တင်းသြႃႇမေႃၵျၢမ်းထမ်ႇမႃႉၸိူဝ်းဢၼ်ပဵၼ်ၵိူင်းလဵဝ်ၵၼ်တင်းၶဝ်ၼၼ်ႉ၊သႄႉသွမ်းတၢင်ႇဢပျတ်ႈတီႈတပႄးၸဝ်ႈတင်းလၢႆလႄႈဝႃႈ၊ “ႁဵတ်းသင်လႄႈသူၵိၼ်လူၺ်ႈၵၼ်တင်းၵူၼ်းၵဵပ်းၶွၼ်ႇတင်းလၢႆ၊ဢိၵ်ႇတင်းၵူၼ်းႁၢႆႉတင်းလၢႆၼၼ်ႉၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။-
ၸဝ်ႈယေႇသု၊ ၶိုၼ်းတွပ်ႇလႄႈလၢတ်ႈဝႃႈ၊ “ၶဝ်ၸိူဝ်းဢၼ်ယူႇလီၼၼ်ႉ ဢမ်ႇလူဝ်ႇသြႃႇမေႃယႃ။ ၵူၼ်းၶႆႈၵူၼ်းပဵၼ်ၵူၺ်းလူဝ်ႇသြႃႇမေႃယႃဢေႃႈ။-
ၵဝ်မႃးႁႂ်ႈလႆႈႁွင်ႉဢဝ်ၵူၼ်းသိုဝ်ႈတေႃႇဢမ်ႇၸႂ်ႈ။ ၵဝ်မႃးႁႂ်ႈလႆႈႁွင်ႉဢဝ်ၵူၼ်းဢၼ်မီးဢပျတ်ႈတင်းလၢႆႁႂ်ႈၶဝ်ၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်ၶဝ်ဢေႃႈ၊” ဝႃႈၼင်ႇၼႆဢေႃႈ။
ၵူၼ်းၵမ်ႈၽွင်ႈလၢတ်ႈတီႈ ၸဝ်ႈယေႇသု၊ လႄႈဝႃႈ၊ “တပႄးသြႃႇ ယူဝ်းႁၢၼ်ႇ၊ ၵႆႉၵမ်သိၼ်ဢမ်ႇၵိၼ်တၢင်းၵိၼ်လႄႈသူးတွင်းဢေႃႈ။ ၵူၼ်းၵိူင်း ၽႃႇရိသႄး၊ ၶဝ်ၵေႃႈ၊ၵႆႉႁဵတ်းမိူၼ်ၸိူဝ်ႉၼင်ႇၼၼ်ဢေႃႈ။ ၵူၺ်းၵႃႈ၊တပႄးၸဝ်ႈႁဝ်းၸိုင်၊ၵိၼ်ယူႇသူတ်ႉယူႇဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၶိုၼ်းတွပ်ႇလႄႈလၢတ်ႈဝႃႈ၊ “ၶႅၵ်ႇၸိူဝ်းဢၼ်မီးယူႇၼႂ်းပွႆးသွင်ႇမၢင်ႇၵလႃႇၼႂ်းမိူဝ်ႈဢၼ်လုၵ်ႈၶူၺ်မႂ်ႇယင်းမီးယူႇလူၺ်ႈၵၼ်တင်းၶဝ်ၼၼ်ႉ၊သူထၢင်ႇဝႃႈ၊တေပွႆႇႁႂ်ႈၶႅၵ်ႇဢိုပ်းဝႆႉလႆႈႁိုဝ်း။-
ၵူၺ်းၵႃႈ၊ၶိင်ႇဢၼ်တေလႆႈဢဝ်လုၵ်ႈၶူၺ်မႂ်ႇၽၢတ်ႇဢွၵ်ႇသေၶဝ်ၵႂႃႇၼၼ်ႉတၵ်းႁွတ်ႈမႃးလႄႈၶိင်ႇမိူဝ်ႈၼၼ်ႉၵူၺ်းၶဝ်တၵ်းဢမ်ႇၵိၼ်တၢင်းၵိၼ်ဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈသမ်ႉလၢတ်ႈၵႂၢမ်းဢုပမႃႇထႅင်ႈလႄႈဝႃႈ၊ “ၽူႈလႂ်သေဢမ်ႇဝႃႈ၊မၼ်းဢမ်ႇၸၢင်ႈသိၵ်ႇဢဝ်ၽႃႈၽႅၼ်ႇဢၼ်မႂ်ႇမႃးၽုင်ၵုပ်းတီႈသိူဝ်ႈၵဝ်ႇ။ ပေႃးမၼ်းႁဵတ်းၸိူဝ်ႉၼင်ႇၼၼ်ၸိုင်၊မၼ်းတၵ်းသိၵ်ႇသိူဝ်ႈမႂ်ႇယွၵ်းၶၢတ်ႇပႅတ်ႈလၢႆလၢႆသေလႄႈ၊ၽႅၼ်ႇမႂ်ႇၼၼ်ႉၵေႃႈတၵ်းဢမ်ႇလႅပ်ႈၵၼ်တင်းသိူဝ်ႈၵဝ်ႇၼၼ်ႉ။-
ပိူင်လဵဝ်ၵၼ်ၽူႈလႂ်ဢမ်ႇဢဝ်ၼမ်ႉမၢၵ်ႇၸပိတ်ႉဢၼ်မႂ်ႇသႂ်ႇၼႂ်းထူင်ၼင်ၵဝ်ႇ။ ပေႃးသႂ်ႇၸိုင်၊ၼမ်ႉမၢၵ်ႇၸပိတ်ႉၼၼ်ႉတၵ်းႁဵတ်းႁႂ်ႈထူင်ၼင်ၵဝ်ႇတႅၵ်ႇသေယဝ်ႉ၊ၼမ်ႉမၢၵ်ႇၸပိတ်ႉတၵ်းႁူဝ်ႈပႅတ်ႈလၢႆလၢႆလႄႈထူင်ၼင်ၵေႃႈတၵ်းတႅၵ်ႇလုလႅဝ်ဢေႃႈ။-
ၼမ်ႉမၢၵ်ႇၸပိတ်ႉဢၼ်မႂ်ႇၸိုင်၊တၵ်းလႆႈသႂ်ႇၼႂ်းထူင်ၼင်ဢၼ်မႂ်ႇဢေႃႈ။-
ပေႃးၵိၼ်ၼမ်ႉမၢၵ်ႇၸပိတ်ႉဢၼ်ၵဝ်ႇယဝ်ႉၸိုင်၊ၽူႈလႂ်ဢမ်ႇၶႂ်ႈၵိၼ်ၼမ်ႉမၢၵ်ႇၸပိတ်ႉဢၼ်မႂ်ႇယဝ်ႉ။ မၼ်းၸၢင်ႈလၢတ်ႈဝႃႈ၊ ‘ၼမ်ႉမၢၵ်ႇၸပိတ်ႉၵဝ်ႇယဵင်ႈၶႅၼ်းဝၢၼ်၊’ ဝႃႈၼင်ႇၼႆဢမ်ႇၸႂ်ႈႁိုဝ်း၊” ဝႃႈၼင်ႇၼႆဢေႃႈ။
ၼႂ်းဝၼ်းၵမ်သိၼ်ဝၼ်းၼိုင်ႈ၊မိူဝ်ႈဢၼ် ၸဝ်ႈယေႇသု၊ ပႆၽႃႇလတ်းႁႆႈၶဝ်ႈၵျုင်ႇၵႂႃႇယူႇၼၼ်ႉ၊တပႄးၸဝ်ႈတင်းလၢႆယၵ်းႁူင်းၶဝ်ႈၵျုင်ႇသေယဝ်ႉ၊ၶိုတ်ႈပွတ်ႈၼႂ်းဢူင်ႈမိုဝ်းၶဝ်လႄႈၵိၼ်သၢၼ်ၶဝ်ႈၵျုင်ႇဢေႃႈ။-
ၵူၼ်းၵိူင်း ၽႃႇရိသႄး၊ ၶဝ်တၵ်ႉလႄႈလၢတ်ႈဝႃႈ၊ “ႁဵတ်းသင်လႄႈသူပူၼ်ႉလိူဝ်တြႃးပိင်းၺၢပ်ႈဝၼ်းၵမ်သိၼ်ၼၼ်ႉ၊” ဝႃႈၼင်ႇၼႆလႄႈ။
ၸဝ်ႈယေႇသု၊ ၶိုၼ်းတွပ်ႇလႄႈလၢတ်ႈဝႃႈ၊ “သူဢမ်ႇယၢမ်ႈလႆႈၽတ်းဢၢၼ်ႇလွင်ႈဢၼ်ၶုၼ်ႁေႃၶမ်း တႃႇဝိတ်ႈ၊ ႁဵတ်းၼႂ်းမိူဝ်ႈဢၼ်မၼ်းတင်းၵူၼ်းဢွၼ်ႇမၼ်းတင်းလၢႆဢိုပ်းတၢင်းၵိၼ်ၼၼ်ႉႁိုဝ်း။-
မၼ်းၶဝ်ႈၵႂႃႇၼႂ်းႁိူၼ်းၽြႃးပဵၼ်ၸဝ်ႈလႄႈ ဢဝ်ၵိၼ်ၶဝ်ႈမုၼ်းဢၼ်တမ်းၵႃႈတီႈၽၢႆႇၼႃႈၸဝ်ႈၽြႃးဢၼ်ယဵၸ်ႈပရေႃးႁဵၵ်ႈ ၶဝ်ၵူၺ်းထုၵ်ႇလီၵိၼ်ၼၼ်သေယဝ်ႉ၊သမ်ႉဢဝ်ပၼ်တီႈၵူၼ်းဢွၼ်ႇမၼ်းၸိူဝ်းၼၼ်ႉၵိၼ်ၼၼ်ႉဢေႃႈ၊” ဝႃႈၼင်ႇၼႆယဝ်ႉၸင်ႇ။
သမ်ႉလၢတ်ႈထႅင်ႈလႄႈဝႃႈ၊ “ လုၵ်ႈၵူၼ်း၊ ပဵၼ်ၸဝ်ႈဝၼ်းၵမ်သိၼ်ဢေႃႈ၊” ဝႃႈၼင်ႇၼႆဢေႃႈ။
ဝၢႆးၼၼ်ႉထႅင်ႈသိၼ်ၼိုင်ႈ၊ ၸဝ်ႈယေႇသု၊ ၶဝ်ႈၵႃႈၼႂ်းၸရွပ်ႈႁေႃးတြႃးလႄႈ သင်ႇသွၼ်ပၼ်ယူႇဢေႃႈ။ ၼႂ်းတီႈၼၼ်ႈမီးၵူၼ်းၵေႃႉၼိုင်ႈဢၼ်မိုဝ်းၶွၼ်ၶႂႃမၼ်းႁဵဝ်ႇဝႆႉၼၼ်ႉဢေႃႈ။-
ၸွင်ႇမၼ်းၸဝ်ႈတေႁဵတ်းႁႂ်ႈတၢင်းပဵၼ်မၼ်းႁၢႆၼႂ်းဝၼ်းၵမ်သိၼ်ႁိုဝ်း၊ဢမ်ႇႁဵတ်းႁိုဝ်းဝႃႈၼႆ၊သြႃႇမေႃၵျၢမ်းထမ်ႇမႃႉၶဝ်တင်းၵူၼ်းၵိူင်း ၽႃႇရိသႄး၊ ၶဝ်တင်းလၢႆ ႁႃလွင်ႈတၢင်းဢၼ်တၵ်းလႆႈတၢင်ႇဢပျတ်ႈတီႈ ၸဝ်ႈယေႇသု၊ လူၺ်ႈတၢင်းဢၼ်ၽိတ်းပိူင်ႈၼၼ်ႉၸိုင်၊လွမ်ပႂ်ႉတူၺ်းယူႇဢေႃႈ။-
ၸဝ်ႈယေႇသု၊ ႁုလွင်ႈတၢင်းဢၼ်ၶဝ်ၵျၢမ်ႇၼႂ်းၸႂ်ၶဝ်ၼၼ်ႉသေလႄႈ လၢတ်ႈတီႈၵူၼ်းမိုဝ်းႁဵဝ်ႇၼၼ်ႉလႄႈဝႃႈ၊ “မႃးတႃႉ။ မႃးၸုၵ်းၵႃႈၼႆႈတႃႉ၊” ဝႃႈၼႆ၊ၵႃႈၼင်ႇဢၼ်မၼ်းၸဝ်ႈမီးဢမိင်ႉၼၼ်ႉၵေႃႉၼၼ်ႉၵႂႃႇၸုၵ်းယူႇၵႃႈတီႈၼၼ်ႈဢေႃႈ။-
မိူဝ်ႈၼၼ်ႉ၊မၼ်းၸဝ်ႈလၢတ်ႈတီႈၶဝ်ၸိူဝ်းၼၼ်ႉလႄႈဝႃႈ၊ “ၵဝ်ထၢမ်သူလူး။ ပုၼ်ႈဢၼ်ထုၵ်ႇလီႁဵတ်းၼႂ်းဝၼ်းၵမ်သိၼ်ၼၼ်ႉ၊တြႃးႁဝ်းပိင်းၺၢပ်ႈဝႆႉၸိူဝ်ႉၼင်ႇႁိုဝ်။ ထုၵ်ႇလီႁဵတ်းၵျေးၸူးႁိုဝ်း။ ထုၵ်ႇလီယႃႉဢၵျူဝ်းပိူၼ်ႈႁိုဝ်း။ ထုၵ်ႇလီၵႄႇသႄႇဢဝ်ဢသၢၵ်ႈႁိုဝ်း။ ထုၵ်ႇလီယႃႉပႅတ်ႈဢသၢၵ်ႈႁိုဝ်း၊” ဝႃႈၼင်ႇၼႆသေယဝ်ႉ၊-
မၼ်းၸဝ်ႈယႅၵ်ႉတူၺ်းလဵပ်ႈႁွပ်ႈၶဝ်တင်းသဵင်ႈတင်းလူင်ယဝ်ႉၸင်ႇ၊လၢတ်ႈတီႈၵေႃႉၼၼ်ႉလႄႈဝႃႈ၊ “ယဵတ်ႇမိုဝ်းမႂ်းတႃႉ၊” ဝႃႈၼင်ႇၼႆလႄႈ၊ၵေႃႉၼၼ်ႉၵေႃႈယဵတ်ႇမိုဝ်းမၼ်းလႄႈမိုဝ်းမၼ်းၵေႃႈလီမႃးဢေႃႈ။
ၶဝ်ၸိူဝ်းၼၼ်ႉဢွၵ်ႇတေႃးသႃႉၶႂ်ႈၸႃႉၼႃႇလႄႈ၊တၵ်းလႆႈႁဵတ်းၸိူဝ်ႉၼင်ႇႁိုဝ်တီႈ ၸဝ်ႈယေႇသု၊ ဝႃႈၼႆၶဝ်ၼင်ႇၵၼ်ၵၼ်တိူင်ႇပၢင်ႇလၢတ်ႈၸႃၵၼ်ဢေႃႈ။
ၼႂ်းမိူဝ်ႈၶိင်ႇၼၼ်ႉ ၸဝ်ႈယေႇသု၊ ၶိုၼ်ႈၵႂႃႇၵႃႈၼိူဝ်လွႆႁႂ်ႈလႆႈႁဵတ်းသူးတွင်းပထၼႃႇလႄႈမၼ်းၸဝ်ႈသူးတွင်းတီႈၽြႃးပဵၼ်ၸဝ်ႈတင်းၶိုၼ်းဢေႃႈ။-
မိူဝ်ႈဢၼ်မိူင်းလႅင်းမႃးၸိုင်၊မၼ်းၸဝ်ႈႁွင်ႉဢဝ်တပႄးၸဝ်ႈတင်းလၢႆမႃးသေယဝ်ႉ၊ၵႃႈၼႂ်းၶဝ်ၼၼ်ႉလိူၵ်ႈၵဵပ်းဢဝ်သိပ်းသွင်ပႃးယဝ်ႉၸင်ႇ၊ႁွင်ႉၶဝ်ဝႃႈတမၢၼ်ႇၸဝ်ႈဢေႃႈ။-
ၶဝ်ၸိူဝ်းၼၼ်ႉပဵၼ် သိမုၼ်ႇ၊ ၵေႃႉဢၼ် ၸဝ်ႈယေႇသု၊ ႁွင်ႉဝႃႈ၊ ပေႇတရု၊ တင်းၼွင်ႉၸၢႆးမၼ်း ဢၼ်ႇတရေႇ၊ယႃႇၵုပ်ႈ၊ ဢိၵ်ႇတင်း ယူဝ်းႁၢၼ်ႇ၊ၽိလိပ်ႉပု၊ ဢိၵ်ႇတင်း ပႃႇထေႃးလမႄး၊-
မတ်ႈထႄႇ၊ ဢိၵ်ႇတင်း ထူဝ်းမႃႉ၊ယႃႇၵုပ်ႈ၊ လုၵ်ႈၸၢႆး ဢႃႇလၽေး၊ ဢိၵ်ႇတင်း သိမုၼ်ႇ၊ ဢၼ်ႁွင်ႉဝႃႈ၊ ၸေႇလုတ်ႉ၊-
ယုတႃႉ၊ လုၵ်ႈၸၢႆး ယႃႇၵုပ်ႈ၊ ဢိၵ်ႇတင်း ယုတႃႉဢိသၵႃႇရေႇဢုတ်ႈ၊ ပဵၼ်ၵေႃႉဢၼ်ဝၢႆးလိုၼ်းမႃးဢဝ်မၼ်းၸဝ်ႈဢၢပ်ႈၵႃႈတီႈရၢၼ်ႇသူႇၼၼ်ႉဢေႃႈ။
မိူဝ်ႈဢၼ် ၸဝ်ႈယေႇသု၊ လူင်းလွႆမႃးၸွမ်းၵၼ်တင်းတမၢၼ်ႇၸဝ်ႈၸိူဝ်းသေလႄႈ မၼ်းၸဝ်ႈၸုၵ်းၵႃႈတီႈပၢင်ႇပဵင်းႁူမ်ႈလူၺ်ႈၵၼ်တင်းတပႄးၸဝ်ႈၼမ်ၼႃႇဢေႃႈ။ မူႇၵူၼ်းဢၼ်ၼမ်ၵိုၼ်းၼႃႇၸိူဝ်းဢၼ်လုၵ်ႉသေၵႃႈတီႈမိူင်း ယုတႃႉ၊ ဝဵင်း ယေႇရုသလႅမ်ႇ၊ တင်းဝဵင်းၸိူဝ်းဢၼ်မီးႁိမ်းသၢပ်ႇပၢင်ႇလၢႆႇဢၼ်ပဵၼ်ဝဵင်း တုရု၊ တင်းဝဵင်း ၸိတုၼ်ႇ၊ ၵူႈတီႈၵူႈလႅၼ်မႃးမီးယူႇၵႃႈတီႈၼၼ်ႈ၊-
ႁႂ်ႈလႆႈၶၢမ်ႇဢဝ်တၢင်းဢၼ်ယုၵ်ႉယႃတၢင်းၶႆႈတၢင်းပဵၼ်ၶဝ်တင်းလၢႆႁႂ်ႈလႆႈၸိုၼ်ႈႁၢႆၼၼ်ႉဢေႃႈ။ ၵူၼ်းဢၼ်ၽီၶဝ်ႈၽိူဝ်ႉၶဝ်ႈတၢင်းလၢႆၵေႃႈမႃးလႄႈလႆႈၵတ်းယဵၼ်ၶျၢမ်းသႃႇဢေႃႈ။-
ပိူဝ်ႈဢၼ်တၼ်းၶူဝ်းဢွၵ်ႇသေၵႃႈၼႂ်းမၼ်းၸဝ်ႈလႄႈႁဵတ်းႁႂ်ႈတၢင်းၶႆႈတၢင်းပဵၼ်ၶဝ်ၵူႈၸိူဝ်ႉၵူႈမဵဝ်းၸိုၼ်ႈႁၢႆၼၼ်ႉလႄႈၵူၼ်းတၢင်းလၢႆၶတ်းၸႂ်ၵျၢမ်ႇဢၢင်ႈယိပ်းတိူဝ်ႉတူဝ်မၼ်းၸဝ်ႈဢေႃႈ။
ၸဝ်ႈယေႇသု၊ ယႅၵ်ႉတူၺ်းတပႄးၸဝ်ႈတင်းလၢႆလႄႈလၢတ်ႈဝႃႈ၊ “သူၸိူဝ်းဢၼ်ယၢၵ်ႈၽၢၼ်ၼၼ်ႉ မီးမၢင်ႇၵလႃႇလႄႈ မိူင်းၽြႃးပဵၼ်ၸဝ်ႈပဵၼ်မိူင်းသူဢေႃႈ။
သူၸိူဝ်းဢၼ်ဢိုပ်းယၢၵ်ႈတေႃႈလဵဝ်ၼႆႉၼၼ်ႉ မီးမၢင်ႇၵလႃႇလႄႈ၊ သူတၵ်းလႆႈႁွတ်ႈထိုင်တၢင်းဢၼ် ဢိမ်ႇတဵမ်ဢေႃႈ။ သူၸိူဝ်းဢၼ်ႁွင်ႉႁႆႈတေႃႈလဵဝ်ၼႆႉၼၼ်ႉ မီးမၢင်ႇၵလႃႇလႄႈသူတၵ်းလႆႈၶူဝ်ဢေႃႈ။
“ၵွပ်ႈပိူဝ်ႈ လုၵ်ႈၵူၼ်း၊ လႄႈမိူဝ်ႈဢၼ်ပိူၼ်ႈၸင်းသူ၊ပႄႇပႅတ်ႈသူ၊ယႃႉယူၵ်ႉသူလႄႈသႄႉသွမ်းယႃႉသရေႇသူၼၼ်ႉၸိုင်၊သူမီးမၢင်ႇၵလႃႇဢေႃႈ။-
ၼႂ်းဝၼ်းၸိူဝ်းၼၼ်ႉၸိုင်၊မီးတၢင်းဢၼ်သိူဝ်းပျေႃႇတႃႉ။ မီးၸႂ်ဢၼ်သိူဝ်းၸူမ်းလႄႈၵႃႈဝႅၼ်တႃႉ။ ၵွပ်ႈလွင်ႈၸိူဝ်ႉၼင်ႇႁိုဝ်လႄႈဝႃႈၸမ်ႉ၊ဢၵျူဝ်းဢၼ်ယႂ်ႇၼႃႇၼၼ်ႉသိမ်းပႅင်းဝႆႉပုၼ်ႈသူၵႃႈတီႈမိူင်းၵၢင်ႁၢဝ်ဢေႃႈ။ ပူႇမွၼ်ႇၶဝ်ၼၼ်ႉႁဵတ်းတီႈပရေႃးၽႅတ်ႈ တင်းလၢႆၸိူဝ်ႉၼင်ႇၼၼ်ယဝ်ႉဢေႃႈ။
“ၵူၺ်းၵႃႈ၊သူၸိူဝ်းဢၼ်ၸၢင်ႈမၢၵ်ႈၸၢင်ႈ မီးတေႃႈလဵဝ်ၼႆႉၼၼ်ႉမီးဢႃႉမၢင်ႇၵလႃႇဢေႃႈ။ လွင်ႈမၼ်းၸမ်ႉ၊သူလႆႈသၢၵ်ႈသႃႇယဝ်ႉယဝ်ႉ။
သူၸိူဝ်းဢၼ်လႆႈၵိၼ်ဢိမ်ႇၵိၼ်တဵမ်တေႃႈလဵဝ်ၼႆႉၼၼ်ႉမီးဢႃႉမၢင်ႇၵလႃႇဢေႃႈ။ လွင်ႈမၼ်းၸမ်ႉ၊သူတၵ်းလႆႈႁွတ်ႈထိုင်တၢင်းဢၼ်ဢိုပ်းယၢၵ်ႈဢေႃႈ။ သူၸိူဝ်းဢၼ်ၶူဝ်တေႃႈလဵဝ်ၼႆႉၼၼ်ႉမီးဢႃႉမၢင်ႇၵလႃႇဢေႃႈ။ လွင်ႈမၼ်းၸမ်ႉ၊သူတၵ်းလႆႈၶၢင်းၶီၶၢင်းၽၢၼ်လႄႈႁွင်ႉႁႆႈဢေႃႈ။
“မိူဝ်ႈဢၼ်ပိူၼ်ႈယွင်ႈယေႃးသူၼၼ်ႉသူမီးဢႃႉမၢင်ႇၵလႃႇဢေႃႈ။ လွင်ႈမၼ်းၸမ်ႉ၊ပူႇမွၼ်ႇၶဝ်ႁဵတ်းတီႈမိၵ်ႉသႃႇပရေႃးၽႅတ်ႈ တင်းလၢႆၸိူဝ်ႉၼင်ႇၼၼ်ယဝ်ႉဢေႃႈ။
“ၵဝ်ဝႃႈတီႈသူၸိူဝ်းဢၼ်ငိၼ်းၵႂၢမ်းၵဝ်ၼႆႉၸမ်ႉ၊ႁၵ်ႉရၢၼ်ႇသူႇသူတႃႉ။ ႁဵတ်းၵျေးၸူးတီႈၶဝ်ၸိူဝ်းဢၼ်ၸင်းသူၼၼ်ႉတႃႉ။-
သူင်ႇမႅတ်ႈတႃႇတီႈၶဝ်ၸိူဝ်းဢၼ်ၵိၼ်ႇလႃႇသူၼၼ်ႉတႃႉ။ သူးတွင်းပုၼ်ႈၶဝ်ၸိူဝ်းဢၼ်ယႃႉၵဝ်းသူၼၼ်ႉတႃႉ။-
ပေႃးသေၵေႃႉၵေႃႉတူပ်းၵႅမ်ႈမႂ်းၽၢႆႇၼိုင်ႈၸိုင်၊ဝၢႆႇပၼ်ထႅင်ႈၵႅမ်ႈၽၢႆႇၼိုင်ႈတီႈမၼ်းတႃႉ။ ပေႃးသေၵေႃႉၵေႃႉႁိမ်ဢဝ်သိူဝ်ႈသွၼ်ႉမႂ်းၸိုင်၊ယင်းဢမ်ႇႁၢမ်ႈဢမ်ႇၶႅၼ်လႄႈထွတ်ႇလွၼ်ႈပၼ်သိူဝ်ႈတၢင်းၼႂ်းမႂ်းထႅင်ႈတႃႉ။-
တီႈၵေႃႉဢၼ်ယွၼ်းသေၸိူဝ်ႉသေပိူင်တီႈမႂ်းၼၼ်ႉပၼ်တႃႉ။ မိူဝ်ႈဢၼ်ပိူၼ်ႈႁိမ်ဢဝ်ဢုၵ်ႉၸႃႇၶူဝ်းလဵင်းမႂ်းၼၼ်ႉယႃႇပေယွၼ်းဢဝ်ၶိုၼ်း။-
မဵဝ်းဢၼ်သူၶႂ်ႈႁႂ်ႈပိူၼ်ႈႁဵတ်းတီႈသူၼၼ်ႉ၊သူၵႂႃႇႁဵတ်းတီႈပိူၼ်ႈၸိူဝ်ႉၼင်ႇၼၼ်တႃႉ။
“ပေႃးသူႁၵ်ႉၵေႃႉဢၼ်ႁၵ်ႉသူၼၼ်ႉၵူၺ်းၸိုင်၊တေမီးဢၵျူဝ်းၵျေးၸူးၵႃႈသင်။ ၵူၼ်းႁၢႆႉၶဝ်ၵေႃႈယင်းၸၢင်ႈႁၵ်ႉၵေႃႉဢၼ်ႁၵ်ႉၶဝ်ၼၼ်ႉယူႇဢေႃႈ။-
ပေႃးသူႁဵတ်းၵျေးၸူးတီႈၵေႃႉဢၼ်ႁဵတ်းၵျေးၸူးပၼ်တီႈသူၼၼ်ႉၵူၺ်းၸိုင်၊တေမီးဢၵျူဝ်းၵျေးၸူးၵႃႈသင်။ ၵူၼ်းႁၢႆႉၶဝ်ၵေႃႈယင်းၸၢင်ႈႁဵတ်းၸိူဝ်ႉၼင်ႇၼၼ်ႉဢေႃႈ။-
ပေႃးသူၵူႈပၼ်ယိမ်ပၼ်တီႈၵေႃႉဢၼ်သူမုင်ႈမွင်းဝႃႈ၊မၼ်းတၵ်းတႅၼ်းၶိုၼ်းလႆႈၼၼ်ႉၵူၺ်းၸိုင်၊တေမီးဢၵျူဝ်းၵျေးၸူးၵႃႈသင်။ ၵူၼ်းႁၢႆႉၶဝ်ၵေႃႈယင်းၸၢင်ႈပၼ်ၵူႈပၼ်ယိမ်တီႈၵူၼ်းႁၢႆႉၶဝ်ၼင်ႇၵၼ်ၵၼ်ၼၼ်ႉႁႂ်ႈလႆႈၶၢမ်ႇဢဝ်ဢၵျူဝ်းၵျေးၸူးတၢင်းဢၼ်တႅၼ်းၶိုၼ်းၼၼ်ႉယူႇဢေႃႈ။-
သူၸမ်ႉ၊ႁၵ်ႉရၢၼ်ႇသူႇသူလႄႈႁဵတ်းၵျေးၸူးတီႈၶဝ်တႃႉ။ ယင်းဢမ်ႇမုင်ႈမွင်းသေၸိူဝ်ႉသေပိူင်လႄႈၵူႈပၼ်ယိမ်ပၼ်တႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊သူတၵ်းလႆႈၵျေးၸူးဢၼ်ယႂ်ႇၼႃႇလႄႈသူတၵ်းလႆႈပဵၼ်လုၵ်ႈၽြႃးပဵၼ်ၸဝ်ႈ၊ၸဝ်ႈဢၼ်သုင်မျၢတ်ႈၼႃႇၼၼ်ႉဢေႃႈ။ လွင်ႈမၼ်းၸမ်ႉ၊မၼ်းၸဝ်ႈႁဵတ်းၵျေးၸူးတီႈၶဝ်ၸိူဝ်းဢၼ်ဢမ်ႇႁုၵျေးၸူးၸဝ်ႈလႄႈမီးသၽေႃးဢၼ်ႁၢႆႉႁုၵ်းၼၼ်ႉဢေႃႈ။-
ပိူဝ်ႈၼႆလႄႈၸိူဝ်ႉၼင်ႇဢၼ်ပေႃႈၸဝ်ႈသူၸၢင်ႈႁၵ်ႉဢဵတ်းလူၼၼ်ႉ၊သူၵေႃႈၸၢင်ႈႁၵ်ႉဢဵတ်းလူတႃႉ။
“ယႃႇပေတႅပ်းတတ်းတြႃးတၢင်းၽိတ်းပိူၼ်ႈ။ သူတေၵၢင်းလွတ်ႈတင်းတၢင်းဢၼ်ၸီႇယၢင်ႇတြႃးဢေႃႈ။ ယႃႇပေတၢင်ႇဢပျတ်ႈတီႈပိူၼ်ႈ။ သူတေၵၢင်းလွတ်ႈတင်းတၢင်းဢၼ်ၸီႇယၢင်ႇဢပျတ်ႈဢေႃႈ။ ပွႆႇလွတ်ႈဢပျတ်ႈပိူၼ်ႈတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ဢပျတ်ႈသူတၵ်းလႆႈၶၢမ်ႇတၢင်းဢၼ်ပွႆႇလွတ်ႈဢေႃႈ။-
ပၼ်တီႈပိူၼ်ႈတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊သူတၵ်းလႆႈၶၢမ်ႇတၢင်းဢၼ်ပိူၼ်ႈပၼ်ဢေႃႈ။ သူတၵ်းလႆႈၶၢမ်ႇဢဝ်တၢင်းဢၼ်တူင်တဵမ်တဵမ်ဢမ်ႇၵႃး၊တၢင်းဢၼ်သတ်ႉဢၼ်တဵၵ်းသႂ်ႇ၊တၢင်းဢၼ်ၶဝ်ႇဢၼ်ၶွၼ်းသႂ်ႇ၊တၢင်းဢၼ်ပၼ်လူၼ်ႉပၼ်သူတ်ႇ၊ၵႃႈၼင်ႇဢၼ်သူႁွပ်ႇဢဝ်လႆႈၼႂ်းဝၢင်ႈႁူဝ်ဢူၵ်းသူၼၼ်ႉဢေႃႈ။ လွင်ႈမၼ်းၸမ်ႉ၊ၸိူဝ်ႉၼင်ႇဢၼ်သူတူင်ပၼ်တီႈပိူၼ်ႈၼၼ်ႉပိူၼ်ႈတၵ်းတူင်ပၼ်တီႈသူၶိုၼ်းဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ သမ်ႉလၢတ်ႈၵႂၢမ်းဢုပမႃႇလႄႈဝႃႈၸမ်ႉ၊ “ၵူၼ်းတႃမွတ်ႇၵေႃႉၼိုင်ႈဢမ်ႇၸၢင်ႈၸုင်သူင်ႇၼႄတၢင်းၵူၼ်းတႃမွတ်ႇတၢင်ႇၵေႃႉၵူၺ်း။ ပေႃးၼႄတၢင်းၵၼ်ၸိုင်၊တင်းသွင်ၵေႃႉတၵ်းတူၵ်းၶုမ်တူၵ်းလုၵ်းဢေႃႈ။-
တပႄးဢမ်ႇၸၢင်ႈပူၼ်ႉပႅၼ်သေသြႃႇလႆႈ။ ၵူၺ်းၵႃႈ၊တပႄးဢၼ်သွၼ်ဢဝ်ၸေးၸေးယဝ်ႉၼၼ်ႉ၊တေပဵၼ်ၸိူဝ်ႉၼင်ႇသြႃႇမၼ်းဢေႃႈ။
“ယင်းဢမ်ႇဝႆႉဢယေးသဵၼ်ႈမႆႉဢၼ်မီးၼႂ်းမၢၵ်ႇတႃမႂ်းလႄႈ၊ႁဵတ်းသင်မႂ်းတူၺ်းႁၼ်မုၼ်ႈၽွင်ဢွၼ်ႇဢၼ်မီးၼႂ်းမၢၵ်ႇတႃပီႈၼွင်ႉမႂ်းၼၼ်ႉၸိူဝ်ႉၼင်ႇႁိုဝ်။-
ယင်းဢမ်ႇၸၢင်ႈႁၼ်သဵၼ်ႈမႆႉၵႃႈၼႂ်းမၢၵ်ႇတႃတူဝ်ၸဝ်ႈၵဝ်ႇလႄႈ၊တၵ်းလၢတ်ႈတီႈပီႈၼွင်ႉမႂ်းလႄႈဝႃႈ၊ ‘ၼွင်ႉ႟။ ႁႂ်ႈၵဝ်လႆႈဢဝ်မုၼ်ႈၽွင်ဢွၼ်ႇဢၼ်မီးၼႂ်းမၢၵ်ႇတႃမႂ်းၼႆႉဢွၵ်ႇသေၵမ်း၊’ ဝႃႈၼင်ႇၼႆၼင်ႇႁိုဝ်။ ၵူၼ်းဢၼ်ၼႃႈသိုဝ်ႈၸႂ်ၵူတ်ႉၼႆႉ႟။ ဢဝ်သဵၼ်ႈမႆႉၼႂ်းမၢၵ်ႇတႃတူဝ်ၸဝ်ႈၵဝ်ႇဢွၵ်ႇဢွၼ်တၢင်းယဝ်ႉၸင်ႇ၊မႂ်းတၵ်းၸၢင်ႈဢဝ်မုၼ်ႈၽွင်ဢၼ်မီးၼႂ်းမၢၵ်ႇတႃပီႈၼွင်ႉမႂ်းၼၼ်ႉဢွၵ်ႇလႆႈဢေႃႈ။
“တူၼ်ႈဢၼ်လီၼၼ်ႉဢမ်ႇၸၢင်ႈမၢၵ်ႇမၢၵ်ႇဢၼ်ဢမ်ႇလီမႃးလႆႈ။ ၼႄးၼိုင်ႈၸမ်ႉ၊တူၼ်ႈဢၼ်ဢမ်ႇလီၼၼ်ႉဢမ်ႇၸၢင်ႈမၢၵ်ႇမၢၵ်ႇဢၼ်လီမႃးလႆႈ။-
တူၼ်ႈလႂ်သေဢမ်ႇဝႃႈ၊ႁၼ်မၢၵ်ႇမၼ်းလႄႈႁုလွင်ႈတူၼ်ႈမၼ်းဢေႃႈ။ ၵႃႈတီႈတူၼ်ႈၼၢမ်ၼၼ်ႉ၊တေဝိတ်းဢဝ်မၢၵ်ႇလိူဝ်ႇလႆႈဢမ်ႇၸႂ်ႈ။ ၵႃႈတီႈၶိူဝ်းၼၢမ်ၵေႃႈတေဝိတ်းဢဝ်မၢၵ်ႇၸပိတ်ႉလႆႈဢမ်ႇၸႂ်ႈ။-
ၵူၼ်းလီၸိုင်၊ၸၢင်ႈဢဝ်ဢၼ်လီဢၼ်မီးၼႂ်းတိူၵ်ႈၽၢၼ်ႇတႃႇႁူဝ်ၸႂ်ဢၼ်လီမၼ်းၼၼ်ႉဢွၵ်ႇၼႄဢေႃႈ။ ၵွပ်ႈသင်လႄႈဝႃႈၸမ်ႉ၊သူပ်းၵူၼ်းၸၢင်ႈလၢတ်ႈဢွၵ်ႇၸွမ်းၵႃႈၼင်ႇဢၼ်မီးတဵမ်ဝႆႉၵႃႈၼႂ်းႁူဝ်ၸႂ်မၼ်းၼၼ်ႉဢေႃႈ။
“ႁဵတ်းသင်လႄႈသူႁွင်ႉၵဝ်ဝႃႈ၊ ‘ၸဝ်ႈႁဝ်း၊ၸဝ်ႈႁဝ်း’ ဝႃႈၼင်ႇၼႆသေယဝ်ႉ၊သမ်ႉဢမ်ႇၵမ်ၵျၢင်ႉၸွမ်းတြႃးၵဝ်ၼင်ႇႁိုဝ်။-
ၵေႃႉဢၼ်မႃးၵႃႈတီႈၵဝ်လႄႈ ငိၼ်းတြႃးၵဝ်သေယဝ်ႉ၊ၵမ်ၵျၢင်ႉၸွမ်းၼၼ်ႉမၼ်းမိူၼ်ၽူႈလႂ်ဝႃႈၼႆၸမ်ႉ၊-
မၼ်းမိူၼ်ၸိူဝ်ႉၼင်ႇၵူၼ်းၵေႃႉၼိုင်ႈယၢမ်းမိူဝ်ႈဢၼ်မၼ်းႁဵတ်းႁိူၼ်းတိူၵ်ႈၼၼ်ႉၸိုင်၊ၶုတ်းလိုၵ်ႉလိုၵ်ႉသေလႄႈၶျႃးငဝ်ႈႁၢၵ်ႈတိူၵ်ႈၵႃႈၼိူဝ်မၢၵ်ႇႁိၼ်ၼၼ်ႉဢေႃႈ။ ၼမ်ႉၼွင်းလႄႈထိပ်ႇၽင်ႈႁိူၼ်းတိူၵ်ႈၼၼ်ႉသေၵေႃႈ၊ပိူဝ်ႈဢၼ်တင်ႈဝႆႉမၼ်ႈၶိူင်ႇၼႃႇၼၼ်ႉလႄႈဢမ်ႇၶွၼ်းဢမ်ႇဝႆလႃးလႃး။-
ၵေႃႉဢၼ်ငိၼ်းတြႃးၵဝ်သေယဝ်ႉ၊ဢမ်ႇၵမ်ဢမ်ႇၵျၢင်ႉၸွမ်းၼၼ်ႉၸမ်ႉ၊မိူၼ်ၸိူဝ်ႉၼင်ႇၵေႃႉဢၼ်ႁဵတ်းႁိူၼ်းတိူၵ်ႈၵႃႈၼိူဝ်လိၼ်ဢၼ်ယင်းဢမ်ႇမီးငဝ်ႈႁၢၵ်ႈၼၼ်ႉဢေႃႈ။ မိူဝ်ႈဢၼ်ၼမ်ႉၼွင်းလႄႈထိပ်ႇၽင်ႈႁိူၼ်းတိူၵ်ႈၼၼ်ႉၸိုင်၊လူမ်ႉပင်းၵႂႃႇၵမ်းလဵဝ်ဢေႃႈ။ တၢင်းဢၼ်လူမ်ႉဢၼ်ပင်းၼၼ်ႉႁႅင်းၼႃႇလူင်လၢင်ဢေႃႈ၊” ဝႃႈၼင်ႇၼႆမၼ်းၸဝ်ႈႁေႃးလၢတ်ႈဢေႃႈ။
ဝၢႆးသေ ၸဝ်ႈယေႇသု၊ ႁေႃးလၢတ်ႈတြႃးၸိူဝ်းၼႆႉတင်းသဵင်ႈတင်းလူင်တီႈၵူၼ်းတင်းလၢႆယဝ်ႉတူဝ်ႈယဝ်ႉၼၼ်ႉ၊မၼ်းၸဝ်ႈၶဝ်ႈၵႂႃႇၼႂ်းဝဵင်း ၵပိူဝ်ႇၼေႇဢုမ်ႇ၊ ဢေႃႈ။-
ၶုၼ်သိုၵ်း ရူဝ်းမႃႉ၊ ၵေႃႉၼိုင်ႈမၼ်းမီးၶႃႈဢၼ်မၼ်းႁၵ်ႉၼႃႇၼၼ်ႉလႄႈ ၶႃႈၼၼ်ႉပဵၼ်ၶႆႈပဵၼ်ၼၢဝ်ႁႅင်းၼႃႇထၢၼ်ႈပေႃးၸမ်တၵ်းတၢႆၼၼ်ႉဢေႃႈ။-
မိူဝ်ႈဢၼ်ၶုၼ်သိုၵ်းၼၼ်ႉလႆႈငိၼ်းလွင်ႈ ၸဝ်ႈယေႇသု၊ ၸိုင်၊မၼ်းပွႆႇၸႂ်ႉၵူၼ်းဢၼ်ပဵၼ်ၵႄႇပဵၼ်ႁူဝ်ၵူၼ်းမဵဝ်း ၵျူး၊ ၶဝ်ၵႂႃႇတွင်းပၢၼ်ႇမၼ်းၸဝ်ႈႁႂ်ႈမၼ်းၸဝ်ႈမႃးႁဵတ်းႁႂ်ႈတၢင်းၶႆႈတၢင်းပဵၼ်ၶႃႈမၼ်းၼၼ်ႉၸိုၼ်ႈႁၢႆဢေႃႈ။-
ၶဝ်ၼၼ်ႉႁွတ်ႈမႃးၵႃႈတီႈမၼ်းၸဝ်ႈသေယဝ်ႉ၊ႁွင်ႉပၢင်းမၼ်းၸဝ်ႈလႄႈဝႃႈ၊ “ၶုၼ်သိုၵ်းၵေႃႉၼႆႉပဵၼ်ၵေႃႉဢၼ်ထိူၵ်ႈၶၢမ်ႇဢဝ်ၵျေးၸူးၸဝ်ႈဢၼ်ၸဝ်ႈႁဝ်းတေႁဵတ်းပၼ်ၼၼ်ႉတႄႉဢေႃႈ။-
မၼ်းႁၵ်ႉၵူၼ်းမဵဝ်းႁဝ်းၶႃႈလႄႈ ႁဵတ်းပၼ်ဝႆႉၸရွပ်ႈႁေႃးတြႃးပုၼ်ႈႁဝ်းၶႃႈၶႃႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈၸွမ်းၶဝ်ၵႂႃႇဢေႃႈ။ မိူဝ်ႈဢၼ်ၸမ်တေႁွတ်ႈၽႅဝ်ႁိူၼ်းၸိုင်၊ၶုၼ်သိုၵ်းၼၼ်ႉပွႆႇၸႂ်ႉၵေႃႉသႄႈမၼ်းမႃးၸူးမၼ်းၸဝ်ႈလႄႈႁႂ်ႈလၢတ်ႈဝႃႈ၊ “ၸဝ်ႈႁဝ်းတီႈၶႃႈ။ ယႃႇပေႁႂ်ႈယၢပ်ႇၸႂ်ၸဝ်ႈႁဝ်းသေၵမ်းၶႃႈ။ ၵဝ်ၶႃႈဢမ်ႇၵိုင်ႇဢမ်ႇတၢၼ်ႇဢၼ်ၸဝ်ႈႁဝ်းတေၶဝ်ႈၵႃႈၼႂ်းႁူမ်ႈၽူၺ်းႁိူၼ်းၵဝ်ၶႃႈလႄႈ၊-
ၵဝ်ၶႃႈထၢင်ႇတူဝ်ၵဝ်ၶႃႈၵေႃႈဢမ်ႇၵိုင်ႇထူပ်းၺႃးၸဝ်ႈႁဝ်းတီႈၶႃႈဢေႃႈ။ ၸဝ်ႈႁဝ်းပူင်ဢမိင်ႉၶေႃႈလဵဝ်ၵူၺ်းၵေႃႈ၊တၢင်းၶႆႈတၢင်းပဵၼ်ၶႃႈၵဝ်ၶႃႈတၵ်းၸိုၼ်ႈႁၢႆတီႈၶႃႈဢေႃႈ။-
ၵဝ်ၶႃႈၼႆႉလႆႈထၢမ်းၵၢၼ်တႂ်ႈၶုၼ်သိုၵ်းလူင်တင်းလၢႆလႄႈ သမ်ႉလႆႈဢုပ်ႉထိင်းလုၵ်ႈသိုၵ်းၼမ်ၼႃႇဢေႃႈ။ ပေႃးၵဝ်ၶႃႈပၼ်ဢမိင်ႉတီႈၵူၼ်းသိုၵ်းၵေႃႉၼိုင်ႈလႄႈဝႃႈ၊ ‘ၵႂႃႇတႃႉ’ ဝႃႈၼင်ႇၼႆၸိုင်၊မၼ်းလႆႈၵႂႃႇဢေႃႈ။ ပေႃးသမ်ႉပၼ်ဢမိင်ႉတီႈၵူၼ်းသိုၵ်းတၢင်ႇၵေႃႉလႄႈဝႃႈ၊ ‘မႃးတႃႉ၊’ ဝႃႈၼင်ႇၼႆၸိုင်၊မၼ်းလႆႈမႃးဢေႃႈ။ ပေႃးၵဝ်ၶႃႈၸႂ်ႉၶႃႈၵဝ်ၶႃႈလႄႈဝႃႈ၊ ‘ႁဵတ်းဢၼ်ၼႆႉတႃႉ၊’ ဝႃႈၼင်ႇၼႆၸိုင်၊မၼ်းလႆႈႁဵတ်းဢေႃႈ၊” ဝႃႈၼင်ႇၼႆၶဝ်ၸိူဝ်းၼၼ်ႉလဝ်ႈလၢတ်ႈထိုင်မၼ်းၸဝ်ႈဢေႃႈ။
ၸဝ်ႈယေႇသု၊ ၵေႃႈမိူဝ်ႈဢၼ်ငိၼ်းၵႂၢမ်းၸိူဝ်ႉၼင်ႇၼႆၸိုင်၊ဢၢမ်းၼႃႇလႄႈဝၢႆႇတူၺ်းၵူၼ်းၸိူဝ်းဢၼ်ၸွမ်းမၼ်းၸဝ်ႈမႃးၸိူဝ်းၼၼ်ႉလႄႈဝႃႈ၊ “ၵဝ်ဝႃႈၸမ်ႉ၊တၢင်းယုမ်ႇမၢတ်ႈဢၼ်ႁႅင်းယႂ်ႇထၢၼ်ႇၼႆႉၵဝ်ဢမ်ႇပႆႇတွၼ်ႉႁၼ်ၵႃႈၼႂ်းၵူၼ်းမဵဝ်း ဢိသရေး၊ ၼႆႉသေပွၵ်ႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၶဝ်ၸိူဝ်းဢၼ်ၶုၼ်သိုၵ်းပွႆႇၸႂ်ႉမႃးၸိူဝ်းၼၼ်ႉ၊ၶိုၼ်းႁွတ်ႈၽႅဝ်ႁိူၼ်းၵႂႃႇၼၼ်ႉၸိုင်၊ၶဝ်လႆႈထူပ်းႁၼ်ၶႃႈၵေႃႉၼၼ်ႉသမ်ႉပေႃးယူႇလီဝႆႉယဝ်ႉဢေႃႈ။
ဝၢႆးၼၼ်ႉထႅင်ႈဝၼ်းၼိုင်ႈ ၸဝ်ႈယေႇသု၊ ၵႂႃႇၵႃႈတီႈဝဵင်းဢၼ်လႆႈၸိုဝ်ႈဝႃႈ၊ ၼႃႇဢိၼႃႉ၊ ပုၼ်ႉလႄႈတပႄးၸဝ်ႈတင်းလၢႆ၊ဢိၵ်ႇတင်းၵူၼ်းၼမ်ၼႃႇၸွမ်းမၼ်းၸဝ်ႈၵႂႃႇဢေႃႈ။-
မိူဝ်ႈဢၼ်မၼ်းၸဝ်ႈယင်းတိုၵ်ႉၽႅဝ်ၵႂႃႇၵႃႈတီႈၽၵ်းတူဝဵင်းယူႇၼၼ်ႉၸိုင်၊ၵူၼ်းဢၼ်သူင်ႇမႃႇသႃႇၽုင်ၼိုင်ႈဢွၵ်ႇဝဵင်းမႃးယူႇဢေႃႈ။ ၵူၼ်းတၢႆၼၼ်ႉပဵၼ်လုၵ်ႈၸၢႆးလဵဝ်တီႈမႄႈမၢႆႈၵေႃႉၼိုင်ႈလႄႈၵူၼ်းၼမ်ၼႃႇၸွမ်းသူင်ႇမႃႇသႃႇလူၺ်ႈၵၼ်တင်းမႄႈမၢႆႈၼၼ်ႉဢေႃႈ။-
မိူဝ်ႈဢၼ်ၸဝ်ႈၽြႃးႁၼ်မႄႈမၢႆႈၼၼ်ႉၸိုင်၊မီးၸႂ်ဢၼ်ဢဵတ်းလူၼႃႇလႄႈလၢတ်ႈတီႈမၼ်းလႄႈဝႃႈ၊ “ယႃႇပေႁွင်ႉႁႆႈယဝ်ႉ၊” ဝႃႈၼင်ႇၼႆသေယဝ်ႉ၊-
ၵႂႃႇလႄႈဢဝ်မိုဝ်းယိပ်းတိူဝ်ႉၵွမ်ႇၸုင်းၼၼ်ႉဢေႃႈ။ ၵူၼ်းႁၢမ်ၸိူဝ်းၼၼ်ႉၵေႃႈၵိုတ်းသဝ်းလႄႈ ၸဝ်ႈယေႇသု၊ လၢတ်ႈလႄႈဝႃႈ၊ “ၸၢႆးၼုမ်ႇဢွၼ်ႇ႟။ ၵဝ်မီးဢမိင်ႉတီႈမႂ်းၸမ်ႉ၊လုၵ်ႉတႃႉ၊” ဝႃႈၼင်ႇၼႆဢေႃႈ။-
ၵူၼ်းတၢႆၼၼ်ႉလုၵ်ႉၼင်ႈလႄႈလၢတ်ႈၵႂၢမ်းမႃးသေယဝ်ႉ၊ ၸဝ်ႈယေႇသု၊ ၸင်ႇဢဝ်ဢၢပ်ႈပၼ်တီႈမႄႈမၼ်းသေဢေႃႈ။
ၵူၼ်းၸိူဝ်းၼၼ်ႉၵူဝ်ႁႄၼႃႇလႄႈဢွၼ်ၵၼ်ယွင်ႈယေႃးၽြႃးပဵၼ်ၸဝ်ႈလႄႈဝႃႈ၊ “ပရေႃးၽႅတ်ႈ ဢၼ်ယႂ်ႇမျၢတ်ႈၼႃႇပေႃႇမႃးၵႃႈၼႂ်းႁဝ်းယဝ်ႉ။ ထႃႇဝရႃႉၽြႃးၵျွမႃးလႄႇမႃးၸႂ်းၵူၼ်းမဵဝ်းမၼ်းၸဝ်ႈယဝ်ႉ၊” ဝႃႈၼင်ႇၼႆဢေႃႈ။
ၶၢဝ်ႇငၢဝ်း ၸဝ်ႈယေႇသု၊ ၵေႃႈႁူင်ႁၢင်းၸွတ်ႇတူဝ်ႈၵႂႃႇၵႃႈတီႈၼႂ်းမိူင်း ယုတႃႉ၊ တင်းမိူင်းဢိၵ်ႇတင်းမိူင်းႁိမ်းႁွမ်းၸိူဝ်းၼၼ်ႉဢေႃႈ။
တပႄးသြႃႇ ယူဝ်းႁၢၼ်ႇ၊ ၸိူဝ်းၼၼ်ႉၵေႃႈလၢတ်ႈၼႄလွင်ႈတၢင်းၸိူဝ်းၼၼ်ႉတီႈသြႃႇၶဝ်ဢေႃႈ။-
သြႃႇ ယူဝ်းႁၢၼ်ႇ၊ ၸင်ႇႁွင်ႉဢဝ်တပႄးမၼ်းသွင်ၵေႃႉသေယဝ်ႉ၊ပွႆႇၸႂ်ႉၵႂႃႇၸူး ၸဝ်ႈယေႇသု၊ ႁႂ်ႈၶဝ်လဝ်ႈထၢမ်ဝႃႈ၊ “ၸဝ်ႈႁဝ်းပဵၼ်ၸဝ်ႈဢၼ်တၵ်းၵျွမႃးၼၼ်ႉၶႃႈႁိုဝ်း။ ဢမ်ႇၼၼ်လႄႈၶႃႈၸဝ်ႈႁဝ်းၶဝ်တၵ်းလႆႈမုင်ႈမွင်းတၢင်ႇၸဝ်ႈတၢင်ႇပႃးၶႃႈႁိုဝ်း၊” ဝႃႈၼင်ႇၼႆဢေႃႈ။
မိူဝ်ႈဢၼ်ၶဝ်ႁွတ်ႈထိုင်ၵႃႈတီႈ ၸဝ်ႈယေႇသု၊ ၸိုင်၊ၶဝ်လဝ်ႈထၢမ်လႄႈဝႃႈ၊ “သြႃႇ ယူဝ်းႁၢၼ်ႇ၊ ဢၼ်ပၼ်မၢင်ႇၵလႃႇပပ်ႉတိၸမ်ႇ ၼၼ်ႉပွႆႇၸႂ်ႉႁဝ်းၶႃႈသွင်ၵေႃႉမႃးတီႈၸဝ်ႈႁဝ်းႁႂ်ႈလဝ်ႈထၢမ်တူၺ်းလႄႈဝႃႈ၊ ‘ၸဝ်ႈႁဝ်းပဵၼ်ၸဝ်ႈဢၼ်တၵ်းၵျွမႃးၼၼ်ႉၶႃႈႁိုဝ်း။ ဢမ်ႇၼၼ်လႄႈ ၶႃႈၸဝ်ႈႁဝ်းၶဝ်တၵ်းလႆႈမုင်ႈမွင်းတၢင်ႇၸဝ်ႈတၢင်ႇပႃးၶႃႈႁိုဝ်း၊’ ဝႃႈၼင်ႇၼႆၶႃႈဢေႃႈ၊” ဝႃႈၼင်ႇၼႆဢေႃႈ။
ၽွင်းယၢမ်းၼၼ်ႉ ၸဝ်ႈယေႇသု၊ ပၼ်ၶျၢမ်းသႃႇတၢင်းဢၼ်ၸိုၼ်ႈႁၢႆတီႈၶဝ်ၸိူဝ်းဢၼ်မီးယေႃးၵႃႇတၢင်းၶႆႈတၢင်းပဵၼ်တင်းလၢႆ တင်းၵူၼ်းဢၼ်ၽိူဝ်ႉၶဝ်ႈၽီၶဝ်ႈတင်းလၢႆယူႇလႄႈ၊ပၼ်ဢၼ်လႅင်းမၢၵ်ႇတႃတီႈၵူၼ်းတႃမွတ်ႇတင်းလၢႆယူႇဢေႃႈ။-
မၼ်းၸဝ်ႈလၢတ်ႈတီႈၶဝ်သွင်ၵေႃႉလႄႈဝႃႈ၊ “ပွၵ်ႈၵႂႃႇၶိုၼ်းလၢတ်ႈတီႈသြႃႇ ယူဝ်းႁၢၼ်ႇ၊ ၵႃႈဢၼ်သူလႆႈငိၼ်းလႆႈႁၼ်တင်းလၢႆ ဢၼ်ၵူၼ်းတႃမွတ်ႇႁၼ်လႆႈမႃးလႂ်၊ဢၼ်ၵူၼ်းၶႃႁၵ်းၶႃၵႅင်ႉပႆတၢင်းလႆႈမႃးလႂ်၊ဢၼ်ၵူၼ်းတုတ်ႈ မူတ်းသႂ်မႃးလႂ်၊ဢၼ်ၵူၼ်းႁူၼူၵ်ႇငိၼ်းလႆႈမႃးလႂ်၊ဢၼ်ၵူၼ်းတၢႆလႆႈလုၵ်ႉၶိုၼ်းလိပ်းမႃးလႂ်၊ဢိၵ်ႇတင်းၶၢဝ်ႇငၢဝ်းတြႃးသိူဝ်းပျေႃႇလႆႈႁေႃးလၢတ်ႈထိုင်တီႈၵူၼ်းယၢၵ်ႈၵူၼ်းၽၢၼ်တင်းလၢႆယဝ်ႉၼၼ်ႉတႃႉ။-
ၵေႃႉဢၼ်ၸႂ်ဢမ်ႇလုၵွပ်ႈပိူဝ်ႈၵဝ်ၼၼ်ႉမီးမၢင်ႇၵလႃႇဢေႃႈ၊” ဝႃႈၼင်ႇၼႆဢေႃႈ။
ဝၢႆးသေတပႄးသြႃႇ ယူဝ်းႁၢၼ်ႇ၊ ၸိူဝ်းၼၼ်ႉ၊ပွၵ်ႈမိူဝ်းၵႂႃႇယဝ်ႉၸင်ႇ၊ ၸဝ်ႈယေႇသု၊ လၢတ်ႈလွင်ႈသြႃႇ ယူဝ်းႁၢၼ်ႇ၊ တီႈၵူၼ်းဢၼ်ၸုဢၼ်တုမ်ၵၼ်ၸိူဝ်းၼၼ်ႉလႄႈဝႃႈ၊ “သူၵႂႃႇၸူးသြႃႇ ယူဝ်းႁၢၼ်ႇ၊ တီႈၼႂ်းထိူၼ်ႇလႅင်ႉပုၼ်ႉႁႂ်ႈလႆႈတူၺ်းၵႃႈသင်။ ၵႂႃႇလူတူၺ်းမႂ်ယိူဝ်ႈယႃႈဢၼ်လူမ်းထူဝ်းလႄႈၸၢႆႉၵႂႃႇၸၢႆႉမႃးၼၼ်ႉႁိုဝ်း။-
ဢမ်ႇၼၼ်ၵေႃႈ သူၵႂႃႇႁႂ်ႈလႆႈတူၺ်းၵႃႈသင်။ ၵႂႃႇလူတူၺ်းၵူၼ်းဢၼ်ၼုင်ႈၶူဝ်းလၢႆႈၶူဝ်းၽႄးႁိုဝ်း။ ၵူၼ်းၸိူဝ်းဢၼ်ၵိၼ်လီၼုင်ႈလီလႄႈမီးၸေးၸိမ်ႇၼၼ်ႉ ၸၢင်ႈယူႇၵႃႈၼႂ်းႁၢင်ႈၼႂ်းႁေႃၵူၺ်းဢေႃႈ။-
ဢမ်ႇၼၼ်ၵေႃႈသူၵႂႃႇႁႂ်ႈလႆႈတူၺ်းၵႃႈသင်။ ၵႂႃႇလူတူၺ်းပရေႃးၽႅတ်ႈႁိုဝ်း။ လၢတ်ႈလူး။ ၸႂ်ႈတႄႉ။ ၵဝ်ဝႃႈၸမ်ႉ၊သူထူပ်းႁၼ်လွင်ႈဢၼ်မၼ်းၼၼ်ႉယဵင်ႈၶႅၼ်းယႂ်ႇမျၢတ်ႈသေပရေႃးၽႅတ်ႈဢေႃႈ။-
လွင်ႈမၼ်းၸမ်ႉ၊သြႃႇ ယူဝ်းႁၢၼ်ႇ၊ ပဵၼ်ၵေႃႉဢၼ်ၵျၢမ်းလိၵ်ႈတႅမ်ႈဝႆႉလႄႈဝႃႈ၊ ‘တူၺ်းလူး။ ၵဝ်ပွႆႇၸႂ်ႉတမၢၼ်ႇၵဝ်ၵႂႃႇပႃႈၼႃႈသူႁႂ်ႈမၼ်းၽုၺ်ႇပၼ်သဵၼ်ႈတၢင်းပုၼ်ႈသူဢေႃႈ၊’ ဝႃႈၼင်ႇၼႆဢေႃႈ။-
ၵဝ်ဝႃႈၸမ်ႉ၊ၼႂ်းၶဝ်ၸိူဝ်းဢၼ်ၵိူတ်ႇပဵၼ်ၵူၼ်းမႃးတင်းသဵင်ႈတင်းလူင်ၼႆႉ ၵေႃႉဢၼ်ယႂ်ႇမျၢတ်ႈသေသြႃႇ ယူဝ်းႁၢၼ်ႇ၊ ၼၼ်ႉဢမ်ႇမီးသေၵေႃႉသေၵူၼ်း။ ၼႂ်းဝႃႈၼၼ်သေၵေႃႈ၊ၵေႃႉဢၼ်လဵၵ်ႉသေပိူၼ်ႈၵႃႈၼႂ်းမိူင်းၽြႃးပဵၼ်ၸဝ်ႈၼၼ်ႉယင်းယႂ်ႇမျၢတ်ႈၼႃႇသေသြႃႇ ယူဝ်းႁၢၼ်ႇ၊ ဢေႃႈ၊” ဝႃႈၼင်ႇၼႆဢေႃႈ။
ၵူၼ်းတင်းသဵင်ႈတင်းလူင်ၸိူဝ်းဢၼ်လႆႈငိၼ်းၵႂၢမ်းၼၼ်ႉ၊ဢိၵ်ႇတင်းၵူၼ်းၵဵပ်းၶွၼ်ႇတင်းလၢႆပိူဝ်ႈဢၼ်ၶၢမ်ႇဢဝ်မၢင်ႇၵလႃႇပပ်ႉတိၸမ်ႇၵႃႈတီႈသြႃႇ ယူဝ်းႁၢၼ်ႇ၊ ယဝ်ႉၼၼ်ႉလႄႈဢွၼ်ၵၼ်ႁပ်ႉဝႃႈၽြႃးပဵၼ်ၸဝ်ႈပဵၼ်ၸဝ်ႈဢၼ်သိုဝ်ႈတေႃႇဢေႃႈ။-
ၵူၺ်းၵႃႈ၊ၵူၼ်းၵိူင်း ၽႃႇရိသႄး၊ ၶဝ်တင်းသြႃႇမေႃၵျၢမ်းထမ်ႇမႃႉၸိူဝ်းဢၼ်ဢမ်ႇၶၢမ်ႇဢဝ်မၢင်ႇၵလႃႇပပ်ႉတိၸမ်ႇၸိူဝ်းၼၼ်ႉၸမ်ႉ၊ဢွၼ်ၵၼ်ပႄႇပႅတ်ႈၵျေးၸူးတြႃးၽြႃးပဵၼ်ၸဝ်ႈဢေႃႈ။
ၸဝ်ႈယေႇသု၊ သိုပ်ႇလၢတ်ႈလႄႈဝႃႈ၊ “တေႃႈလဵဝ်ၵဝ်တေလႆႈဢဝ်ၵူၼ်းၵၢပ်ႈမိူဝ်ႈလဵဝ်ၼႆႉတႅၵ်ႈၼိူင်းၵၼ်တင်းၵႃႈသင်။ ၶဝ်မိူၼ်ၵႃႈသင်ဝႃႈၼႆၸမ်ႉ၊-
ၶဝ်မိူၼ်ၸိူဝ်ႉၼင်ႇလုၵ်ႈဢွၼ်ႇတင်းလၢႆဢၼ်လဵၼ်ႈယူႇၵႃႈတီႈၵၢင်ၵၢတ်ႇ၊ဢၼ်ၸုမ်းၼိုင်ႈႁွင်ႉပၢဝ်ႇတီႈတၢင်ႇၸုမ်းလႄႈဝႃႈ၊ ‘ႁဝ်းပဝ်ႇပီႇပဝ်ႇၼႄးသေၵေႃႈသူဢမ်ႇၵႃႈဢမ်ႇဝႅၼ်။ ႁဝ်းႁွင်ႉႁႆႈသေၵေႃႈသူဢမ်ႇၶၢင်းဢမ်ႇၶီႇ၊’ ဝႃႈၼင်ႇၼႆၼၼ်ႉယဝ်ႉ။-
မိူဝ်ႈဢၼ်သြႃႇ ယူဝ်းႁၢၼ်ႇ၊ ဢၼ်ပၼ်မၢင်ႇၵလႃႇပပ်ႉတိၸမ်ႇၵမ်သိၼ်ဢမ်ႇၵိၼ်ၶဝ်ႈမုၼ်း၊ဢိၵ်ႇတင်းၼမ်ႉမၢၵ်ႇၸပိတ်ႉၼၼ်ႉၸိုင်၊သူဝႃႈ၊ ‘ၵေႃႉၼႆႉပဵၼ်ၵူၼ်းဢၼ်ၽီၶဝ်ႈဢိူဝ်း၊’ ဝႃႈၼင်ႇၼႆဢေႃႈ။-
လုၵ်ႈၵူၼ်း၊ သမ်ႉမႃးၵိၼ်ယူႇ၊သူတ်ႉယူႇၸိုင်၊သူသမ်ႉဝႃႈ၊ ‘တူၺ်းလူး၊ၵေႃႉၼႆႉပဵၼ်ၵူၼ်းၵိၼ်ၼမ်ႉလဝ်ႈမၢၵ်ႇၸပိတ်ႉပူၼ်ႉလိူဝ်ဢေႃႈ။ မၼ်းၸၢင်ႈႁဵတ်းၵေႃႉႁဵတ်းသႄႈလူၺ်ႈၵၼ်တင်းၵူၼ်းၵဵပ်းၶွၼ်ႇတင်းလၢႆ၊ဢိၵ်ႇတင်းၵူၼ်းႁၢႆႉတင်းလၢႆဢေႃႈ၊’ ဝႃႈၼႆဢေႃႈ။-
ၼႂ်းဝႃႈၼၼ်သေၵေႃႈ၊ၶဝ်ၸိူဝ်းဢၼ်ႁပ်ႉဢဝ်ပိင်ႇၺႃႇၽြႃးပဵၼ်ၸဝ်ႈၼၼ်ႉ၊ၸၢင်ႈႁုႁၼ်ဝႃႈပိင်ႇၺႃႇၼၼ်ႉမၢၼ်ႇမႅၼ်ႈဢေႃႈ၊” ဝႃႈၼင်ႇၼႆဢေႃႈ။
ၵူၼ်းၵိူင်း ၽႃႇရိသႄး၊ ၵေႃႉၼိုင်ႈၽိတ်ႈပၢင်း ၸဝ်ႈယေႇသု၊ ႁႂ်ႈမၼ်းၸဝ်ႈမႃးၵိၼ်ၶဝ်ႈၶမ်ႈလူၺ်ႈၵၼ်တင်းမၼ်းဢေႃႈ။ မၼ်းၸဝ်ႈၵေႃႈၵႂႃႇၵႃႈတီႈႁိူၼ်းမၼ်းလႄႈၼင်ႈၵႃႈတီႈၽိူၼ်ၶဝ်ႈဢေႃႈ။-
ၵႃႈၼႂ်းဝဵင်းၼၼ်ႉမီးမႄႈယိင်းၵေႃႉၼိုင်ႈ၊ဢၼ်ယၢမ်ႈပဵၼ်မႄႈယိင်းဢၼ်ဢမ်ႇလီမႃးဢေႃႈ။ မိူဝ်ႈဢၼ်မၼ်းငိၼ်းလွင်ႈဢၼ် ၸဝ်ႈယေႇသု၊ ၵိၼ်ၶဝ်ႈၶမ်ႈယူႇၼႂ်းႁိူၼ်းၵူၼ်းၵိူင်း ၽႃႇရိသႄး၊ ၼၼ်ႉၸိုင်၊ဢဝ်တဝ်ႈႁိၼ်ၶၢဝ်လုၵ်ႈၼိုင်ႈဢၼ်တဵမ်ဝႆႉတင်းၼမ်ႉမၼ်းႁွမ်ၼၼ်ႉမႃးဢေႃႈ။-
မႄႈယိင်းၼၼ်ႉၸုၵ်းယူႇၽၢႆႇလင်ႁိမ်းတိၼ်မၼ်းၸဝ်ႈလႄႈႁွင်ႉႁႆႈယူႇႁႂ်ႈၼမ်ႉတႃယွတ်ႇသႂ်ႇၵႃႈၼိူဝ်တိၼ်မၼ်းၸဝ်ႈသေယဝ်ႉ၊ဢဝ်ၶူၼ်ႁူဝ်မၼ်းၸဵတ်ႉပၼ်တိၼ်မၼ်းၸဝ်ႈသေလႄႈၸုပ်ႇၼူမ်တိၼ်မၼ်းၸဝ်ႈယဝ်ႉၸင်ႇ၊ဢဝ်ၼမ်ႉမၼ်းႁွမ်ၼၼ်ႉလေႃႇသႂ်ႇတႃးပၼ်တိၼ်မၼ်းၸဝ်ႈဢေႃႈ။-
ၵမ်းၼၼ်ႉ၊မိူဝ်ႈဢၼ်ၵူၼ်းၵိူင်း ၽႃႇရိသႄး၊ ၵေႃႉဢၼ်ၽိတ်ႈပၢင်းမၼ်းၸဝ်ႈၼၼ်ႉႁၼ်ၸိုင်၊မၼ်းထၢင်ႇၼႂ်းၸႂ်လႄႈဝႃႈ၊ “ပေႃးၵေႃႉၼႆႉပဵၼ်ပရေႃးၽႅတ်ႈတႄႉၸိုင်၊မၼ်းတၢၼ်ႇလီႁုလွင်ႈမႄႈယိင်းၵေႃႉဢၼ်တိူဝ်ႉတိၼ်မၼ်းၼႆႉပဵၼ်မႄႈယိင်းဢၼ်မီးဢၵျၢင်ႉၸိူဝ်ႉၼင်ႇႁိုဝ်ၼၼ်ႉယူႇ။ မၼ်းၼႆႉပဵၼ်မႄႈယိင်းဢမ်ႇလီဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉမၼ်းၸဝ်ႈတၵ်ႉလၢတ်ႈတီႈမၼ်းလႄႈဝႃႈ၊ “ သိမုၼ်ႇ၊ ႟။ ၵဝ်ၶႂ်ႈလၢတ်ႈမႂ်းမဵဝ်းၼိုင်ႈဢေႃႈ၊” ဝႃႈၼင်ႇၼႆလႄႈ။ သိမုၼ်ႇ၊ ၵေႃႈလၢတ်ႈလႄႈဝႃႈ၊ “ဢေႃႈတီႈၶႃႈ။ ၶႅၼ်းတေႃႈလၢတ်ႈသေၵမ်းၶႃႈ၊” ဝႃႈၼႆလဝ်ႈလၢတ်ႈဢေႃႈ။
မၼ်းၸဝ်ႈလၢတ်ႈလႄႈဝႃႈ၊ “မီးၵူၼ်းသွင်ၵေႃႉၵူႈဢဝ်ငိုၼ်းတီႈၸဝ်ႈငိုၼ်းၵေႃႉၼိုင်ႈဢေႃႈ။ ၵေႃႉၼိုင်ႈၵူႈဢဝ်ငိုၼ်းႁႃႈပၢၵ်ႇၶႅပ်းဢေႃႈ။ ၵေႃႉၼိုင်ႈၸမ်ႉ၊ၵူႈဢဝ်ငိုၼ်းႁႃႈသိပ်းၶႅပ်းဢေႃႈ။-
ၶဝ်သွင်ၵေႃႉၼၼ်ႉ ၵေႃႉလႂ်ၵေႃႈဢမ်ႇၸၢင်ႈၶိုၼ်းတႅၼ်းၼီႈၶဝ်လႆႈ။ ပိူဝ်ႈၼႆလႄႈၸဝ်ႈငိုၼ်းၸင်ႇပွႆႇၶႂၢင်းပၼ်ၼီႈၶဝ်လၢႆလၢႆသေဢေႃႈ။ ပေႃးပဵၼ်ၼႆၸိုင်၊ၼႂ်းၶဝ်ၼၼ်ႉ ၵေႃႉလႂ်တေယဵင်ႈၶႅၼ်းႁၵ်ႉၸဝ်ႈငိုၼ်းၼၼ်ႉ၊” ဝႃႈၼင်ႇၼႆထၢမ်လႄႈ။
“ၵဝ်ၶႃႈထၢင်ႇၵေႃႉဢၼ်လႆႈၶၢမ်ႇပွႆႇၶႂၢင်းပၼ်ၼီႈၼမ်ၼမ်ၼၼ်ႉတေယဵင်ႈၶႅၼ်းႁၵ်ႉၼမ်ၼႃႇၶႃႈဢေႃႈ၊” ဝႃႈၼႆ သိမုၼ်ႇ၊ ၶိုၼ်းလဝ်ႈလၢတ်ႈဢေႃႈ။ ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “ၵႃႈၼင်ႇဢၼ်မႂ်းလၢတ်ႈၼႆႉၸႂ်ႈတႄႉယဝ်ႉ၊” ဝႃႈၼင်ႇၼႆယဝ်ႉၸင်ႇ၊-
ဝၢႆႇတူၺ်းမႄႈယိင်းၼၼ်ႉသေလႄႈလၢတ်ႈတီႈ သိမုၼ်ႇ၊ လႄႈဝႃႈ၊ “ၸွင်ႇမႂ်းႁၼ်မႄႈယိင်းၼႆႉႁိုဝ်း။ ၵဝ်ၶဝ်ႈမႃးၵႃႈၼႂ်းႁိူၼ်းမႂ်းသေၵေႃႈ၊မႂ်းယင်းဢမ်ႇပၼ်ၼမ်ႉပုၼ်ႈတႃႇတေသုၵ်ႈတိၼ်ၵဝ်။ မႄႈယိင်းၼႆႉၸမ်ႉ၊ဢဝ်ၼမ်ႉတႃမၼ်းသုၵ်ႈပၼ်တိၼ်ၵဝ်သေယဝ်ႉ၊ဢဝ်ၶူၼ်ႁူဝ်မၼ်းၸဵတ်ႉပၼ်ယဝ်ႉ၊-
မႂ်းယင်းဢမ်ႇဢဝ်တင်းတၢင်းဢၼ်ၼူမ်လႄႈႁပ်ႉတုင်း တုင်းဢဝ်ၵဝ်။ မႄႈယိင်းၼႆႉၸမ်ႉ၊ၸဵမ်မိူဝ်ႈၵဝ်ၸင်ႇၶဝ်ႈမႃးၼၼ်ႉၸုပ်ႇၼူမ်တိၼ်ၵဝ်ယူႇဢမ်ႇထၢတ်ႇဢေႃႈ။-
မႂ်းယင်းဢမ်ႇဢဝ်ၼမ်ႉမၼ်းသွၼ်းလေႃႇတီႈႁူဝ်ၵဝ်။ မႄႈယိင်းၼႆႉၸမ်ႉ၊ဢဝ်ၼမ်ႉမၼ်းသွၼ်းလေႃႇသႂ်ႇတိၼ်ၵဝ်ယဝ်ႉ။-
ပိူဝ်ႈၼႆလႄႈၵဝ်ဝႃႈၸမ်ႉ၊တၢင်းဢၼ်မႄႈယိင်းၼႆႉလႆႈၶၢမ်ႇတၢင်းဢၼ်ပွႆႇလွတ်ႈဢပျတ်ႈၼမ်ၼႃႇၼၼ်ႉမၼ်းၼႄပျႃးတၢင်းႁၵ်ႉၼမ်ၼႃႇဢေႃႈ။ ၼႂ်းဝႃႈၼၼ်သေၵေႃႈၵေႃႉဢၼ်လႆႈၶၢမ်ႇတၢင်းဢၼ်ပွႆႇလွတ်ႈဢပျတ်ႈဢိတ်းဢွၼ်ႇၼိုင်ႈၼၼ်ႉၸၢင်ႈႁၵ်ႉဢိတ်းဢွၼ်ႇၼိုင်ႈၵူၺ်းဢေႃႈ၊” ဝႃႈၼင်ႇၼႆဢေႃႈ။
တီႈမႄႈယိင်းၼၼ်ႉၵေႃႈ မၼ်းၸဝ်ႈလၢတ်ႈလႄႈဝႃႈ၊ “ဢပျတ်ႈမႂ်းၸိုင်လႆႈၶၢမ်ႇတၢင်းဢၼ်ပွႆႇလွတ်ႈယဝ်ႉ၊” ဝႃႈၼင်ႇၼႆဢေႃႈ။
ၶဝ်ၸိူဝ်းဢၼ်ၼင်ႈယူႇၵႃႈတီႈၽိူၼ်ၶဝ်ႈလူၺ်ႈၵၼ်တင်းမၼ်းၸဝ်ႈၸိူဝ်းၼၼ်ႉထၢင်ႇၼႂ်းၸႂ်ၽႂ်ၼႂ်းၸႂ်မၼ်းလႄႈဝႃႈ၊ “ၵေႃႉဢၼ်ပွႆႇလွတ်ႈဢပျတ်ႈလႆႈၼႆႉပဵၼ်ၽူႈလႂ်၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ လၢတ်ႈတီႈမႄႈယိင်းၼၼ်ႉလႄႈဝႃႈ၊ “တၢင်းယုမ်ႇမၢတ်ႈမႂ်းၼၼ်ႉၵႄႇၶျွတ်ႈဢဝ်မႂ်းယဝ်ႉ။ ၵႂႃႇၼိမ်ၼိမ်တႃႉ၊” ဝႃႈၼင်ႇၼႆဢေႃႈ။
လိုၼ်းၼၼ်ႉဢမ်ႇႁိုင်ဢမ်ႇၼၢၼ်း ၸဝ်ႈယေႇသု၊ လႄႇၵႂႃႇၶဝ်ႈဝဵင်းၼိုင်ႈယဝ်ႉဝဵင်းၼိုင်ႈ၊ဝၢၼ်ႈၼိုင်ႈယဝ်ႉဝၢၼ်ႈၼိုင်ႈ၊ႁေႃးလၢတ်ႈၶၢဝ်ႇတြႃးသိူဝ်းပျေႃႇလွင်ႈမိူင်းၽြႃးပဵၼ်ၸဝ်ႈဢေႃႈ။ တမၢၼ်ႇၸဝ်ႈသိပ်းသွင်ပႃးၵေႃႈၵႂႃႇၸွမ်းမၼ်းၸဝ်ႈဢေႃႈ။-
မႄႈယိင်းၸိူဝ်းဢၼ်မၼ်းၸဝ်ႈပၼ်ႁႂ်ႈလႆႈၶျၢမ်းသႃႇသေတၢင်းဢၼ်ၽီၶဝ်ႈၽိူဝ်ႉၶဝ်ႈ၊ဢိၵ်ႇတင်းယေႃးၵႃႇတၢင်းၶႆႈတၢင်းပဵၼ်ၼၼ်ႉၵမ်ႈၽွင်ႈၵေႃႈၵႂႃႇၸွမ်းဢေႃႈ။ ၶဝ်ၸိူဝ်းၼၼ်ႉပဵၼ် မႃႇရိ၊ (ဢၼ်ႁွင်ႉဝႃႈ၊ မႃႇၵတလႃႉ၊ ) ဢၼ်ၽီႁၢႆႉၸဵတ်းတူဝ်ဢွၵ်ႇယဝ်ႉၼၼ်ႉၵေႃႉၼိုင်ႈ၊-
ယူဝ်းႁၢၼ်ႇၼႃႉ၊ ၵေႃႉပဵၼ်မေး ၶုၸႃႉ၊ ဢၼ်ပဵၼ်ၶုၼ်လုမ်းၼႂ်းလုမ်းၸဝ်ႈၽႃႉ ႁေႇရူတ်ႈ၊ ၼၼ်ႉၵေႃႉၼိုင်ႈတင်း သုသၼ်ႇၼႃႉ၊ ဢိၵ်ႇတင်းမႄႈယိင်းတၢင်ႇၵေႃႉၼမ်ၼႃႇၸိူဝ်းဢၼ်ဢဝ်ဢုၵ်ႉၸႃႇၶဝ်မႃႉၸႃႉၸွႆႈထႅမ်တီႈ ၸဝ်ႈယေႇသု၊ တင်းတမၢၼ်ႇၸဝ်ႈတင်းလၢႆၼၼ်ႉဢေႃႈ။
မိူဝ်ႈဢၼ်ၵူၼ်းၼမ်ၼႃႇလုၵ်ႉသေဝဵင်းၼိုင်ႈယဝ်ႉဝဵင်းၼိုင်ႈမႃးၸူး ၸဝ်ႈယေႇသု၊ လႄႈၸုတုမ်ၵၼ်ယူႇၼၼ်ႉၸိုင်၊မၼ်းၸဝ်ႈႁေႃးလၢတ်ႈလူၺ်ႈၵႂၢမ်းဢုပမႃႇလႄႈဝႃႈ။
“ၵူၼ်းၵေႃႉၼိုင်ႈဢွၵ်ႇၵႂႃႇဝၢၼ်ႇၸိူဝ်ႉဝၢၼ်ႇၽၼ်းဢေႃႈ။ မိူဝ်ႈဢၼ်မၼ်းဝၢၼ်ႇၼၼ်ႉ မဵတ်ႉၵမ်ႈၽွင်ႈတူၵ်းၵႃႈၼိူဝ်ၵၢင်တၢင်းလႄႈလႆႈၶၢမ်ႇတၢင်းဢၼ်ပိူၼ်ႈယဵပ်ႇပိူၼ်ႈၶၢမ်ႈသေယဝ်ႉ၊ၼူၵ်ႉတင်းလၢႆၵဵပ်းၵိၼ်ပႅတ်ႈသေဢေႃႈ။-
မဵတ်ႉၵမ်ႈၽွင်ႈတူၵ်းၵႃႈတီႈလိၼ်ဢၼ်မီးႁိၼ်ၼမ်လႄႈမိူဝ်ႈဢၼ်တႅၵ်ႇငွၵ်ႈဢွၵ်ႇမႃးၸိုင်၊ပိူဝ်ႈဢၼ်လိၼ်ဢမ်ႇယမ်းၼၼ်ႉလႄႈၶိုၼ်းႁဵဝ်ႇႁႅင်ႈၵႂႃႇဢေႃႈ။-
မဵတ်ႉၵမ်ႈၽွင်ႈတူၵ်းၵႃႈၼႂ်းယုမ်းၼၢမ်လႄႈတူၼ်ႈၼၢမ်ယႂ်ႇၸွမ်းၵၼ်မႃးသေယဝ်ႉ၊ႁတ်ႉတူၼ်ႈၼၼ်ႉႁဵဝ်ႇႁႅင်ႈၵႂႃႇဢေႃႈ။-
မဵတ်ႉၵမ်ႈၽွင်ႈတူၵ်းၵႃႈတီႈလိၼ်လီလႄႈမၢၵ်ႇမၼ်းမၢၵ်ႇမႃးပၢၵ်ႇပုၼ်ႈဢေႃႈ။ ပေႃးမီးႁူဢၼ်ၸၢင်ႈငိၼ်းၸိုင်၊ထွမ်ႇငိၼ်းဢဝ်တႃႉ၊” ဝႃႈၼင်ႇၼႆဢေႃႈ။
တပႄးၸဝ်ႈတင်းလၢႆၵေႃႈဢွၼ်ၵၼ်လဝ်ႈလၢတ်ႈတီႈ ၸဝ်ႈယေႇသု၊ လွင်ႈၵႂၢမ်းဢုပမႃႇၼႆႉၶႂ်ႈဝႃႈသင်ၼၼ်ႉဢေႃႈ။-
မၼ်းၸဝ်ႈၵေႃႈၶႆႈၼႄလႄႈဝႃႈ၊ “သူမီးဢၶႂၢင်ႉဢၼ်ႁုလွင်ႈဢၼ်လိုၵ်ႉဢၼ်လမ်ႇမိူင်းၽြႃးပဵၼ်ၸဝ်ႈၼၼ်ႉဢေႃႈ။ ၵူၺ်းၵႃႈ၊ၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇတင်းလၢႆၸမ်ႉ၊တူၺ်းယူႇသေၵေႃႈဢမ်ႇၸၢင်ႈႁၼ်၊ထွမ်ႇယူႇသေၵေႃႈဢမ်ႇၸၢင်ႈငိၼ်း၊ၸင်ႇလႆႈဢဝ်တင်းၵႂၢမ်းဢုပမႃႇႁေႃးလၢတ်ႈတီႈၶဝ်ဢေႃႈ။
“ဢၼၢၵ်ႈဢထိၵ်ႈပႄႇၵႂၢမ်းဢုပမႃႇၼႆႉၸမ်ႉ၊မဵတ်ႉၽၼ်းၼၼ်ႉၶႂ်ႈဝႃႈ၊ၵႂၢမ်းတြႃးၽြႃးပဵၼ်ၸဝ်ႈဢေႃႈ။-
မဵတ်ႉၽၼ်းဢၼ်တူၵ်းၸွမ်းၵၢင်တၢင်းၸမ်ႉ၊ၶႂ်ႈဝႃႈၶဝ်ၸိူဝ်းဢၼ်လႆႈငိၼ်းၵႂၢမ်းတြႃးၽြႃးပဵၼ်ၸဝ်ႈၼၼ်ႉၼင်ႇႁိုဝ်ၶဝ်တေဢမ်ႇယုမ်ႇမၢတ်ႈလႄႈတေဢမ်ႇလႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၸိုင်၊ မႃႇၼၢတ်ႈ၊ မႃးထူၺ်ႈထွၼ်ဢဝ်ၵႂၢမ်းတြႃးၽြႃးပဵၼ်ၸဝ်ႈဢွၵ်ႇပႅတ်ႈၵႃႈၼႂ်းႁူဝ်ၸႂ်ၶဝ်ၼၼ်ႉဢေႃႈ။-
မဵတ်ႉဢၼ်တူၵ်းၵႃႈတီႈလိၼ်ဢၼ်မီးႁိၼ်ၼမ်ၼၼ်ႉၶႂ်ႈဝႃႈ၊ၶဝ်ၸိူဝ်းဢၼ်လႆႈငိၼ်းၵႂၢမ်းတြႃးၽြႃးပဵၼ်ၸဝ်ႈၼၼ်ႉႁပ်ႉတုင်းဢဝ်ၸူမ်းၸူမ်းသိူဝ်းသိူဝ်းၼၼ်ႉဢေႃႈ။ ၵူၺ်းၵႃႈ၊ႁၢၵ်ႈတြႃးဢမ်ႇယင်ႇလိုၵ်ႉၵႃႈၼႂ်းႁူဝ်ၸႂ်ၶဝ်လႄႈယုမ်ႇမၢတ်ႈၸူဝ်ႈၼိုင်ႈၵႅပ်ႈၼိုင်ႈၵူၺ်းသေယဝ်ႉ၊မိူဝ်ႈဢၼ်တၢင်းၸၢမ်းတူၺ်းယႃႉၵဝ်းႁွတ်ႈထိုင်မႃးၸိုင်၊ၶဝ်လူမ်ႉၵႂႃႇပင်းၵႂႃႇဢေႃႈ။-
မဵတ်ႉဢၼ်တူၵ်းၵႃႈၼႂ်းယုမ်းၼၢမ်ၼၼ်ႉၶႂ်ႈဝႃႈ၊ၶဝ်ၸိူဝ်းဢၼ်လႆႈငိၼ်းၵႂၢမ်းတြႃးၽြႃးပဵၼ်ၸဝ်ႈၼၼ်ႉၸူဝ်ႈဢၼ်ၶဝ်ယင်းတိုၵ်ႉၵႂႃႇယူႇၼၼ်ႉ၊ပိူဝ်ႈဢၼ်တၢင်းမႆႈၶီၸႂ်၊တၢင်းဢၼ်လေႃးၽႃႉပူၼ်ႉလိူဝ်၊ဢိၵ်ႇတင်းတၢင်းဢၼ်ၸၢမ်ႇၸႃးၸေးၸိမ်ႇလေႃးၵႃႉၸိူဝ်းၼၼ်ႉႁူမ်ႇသုမ်ႇႁတ်ႉဝႆႉလႄႈမၢၵ်ႇမၼ်းဢမ်ႇသုၵ်းလႆႈၼၼ်ႉဢေႃႈ။-
မဵတ်ႉဢၼ်တူၵ်းၵႃႈတီႈလိၼ်လီၼၼ်ႉၶႂ်ႈဝႃႈ၊ၶဝ်ၸိူဝ်းဢၼ်လႆႈငိၼ်းၵႂၢမ်းတြႃးၽြႃးပဵၼ်ၸဝ်ႈၼၼ်ႉပႃးတင်းၸႂ်လီၸႂ်ဝၢၼ်သေလႄႈသိမ်းပႅင်းဝႆႉၵႃႈၼႂ်းမၢၵ်ႇလၼ်းႁူဝ်ၸႂ်သေယဝ်ႉ၊ၸႂ်ၸပ်းၸႂ်ၸွႆးယူႇတေႃႇထိုင်ႁွတ်ႈမၢၵ်ႇမၼ်းမၢၵ်ႇမႃးၼၼ်ႉဢေႃႈ။
“ၽူႈလႂ်သေဢမ်ႇဝႃႈ၊ပေႃးတႆႈၵွၵ်းၽႆးၸိုင်၊ဢမ်ႇၸၢင်ႈတွၼ်ႉဢဝ်ပဵတ်ႈႁူမ်ႇဝႆႉဢမ်ႇၼၼ်ဢမ်ႇၸၢင်ႈတွၼ်ႉဢဝ်ဝႆႉတႂ်ႈၵူႇ။ ၸၢင်ႈဢဝ်တၢင်ႇဝႆႉၵႃႈၼိူဝ်ၶူင်ႇတီႈတႆႈၽႆးႁႂ်ႈၵူၼ်းၸိူဝ်းဢၼ်ၶဝ်ႈမႃးလႆႈႁၼ်ဢၼ်လႅင်းဢေႃႈ။
“လွင်ႈတၢင်းဢၼ်လပ်ႉဝႆႉသိူင်ႇဝႆႉ၊တေဢမ်ႇပေႃႇဢွၵ်ႇထၢင်ႇသႃးမႃးၼၼ်ႉဢမ်ႇမီးသေၸိူဝ်ႉသေမဵဝ်း၊လွင်ႈတၢင်းဢၼ်သိူင်ႇဝႆႉ၊ဢမ်ဝႆႉတေဢမ်ႇပိုတ်ႇၼႄထၢင်ႇသႃးမႃးၼႂ်းဢၼ်လႅင်းၼၼ်ႉၵေႃႈဢမ်ႇမီးသေၸိူဝ်ႉသေပိူင်။
“ပိူဝ်ႈၼႆလႄႈ သူလႆႈထွမ်ႇလႆႈငိၼ်းၸိူဝ်ႉႁိုဝ်ၸိုင်၊ႁဵတ်းသတိတႃႉ။ လွင်ႈမၼ်းၸမ်ႉ၊ၽူႈလႂ်သေဢမ်ႇဝႃႈ၊တီႈၵေႃႉဢၼ်ၸၢင်ႈမီးၼၼ်ႉတေထၢပ်ႈပၼ်ထႅင်ႈလႄႈတီႈၵေႃႉဢၼ်ဢမ်ႇၸၢင်ႈမီးၼၼ်ႉၸမ်ႉ၊တၵ်းၼုၵ်ႈဢဝ်သေၵႃႈၼႂ်းၵႃႈဢၼ်မၼ်းထၢင်ႇဝႃႈ၊မၼ်းမီးတင်းသဵင်ႈတင်းလူင်ၼၼ်ႉလူးၵွၼ်ႇဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊မႄႈၸဝ်ႈဢိၵ်ႇတင်းၼွင်ႉၸၢႆးၸဝ်ႈတင်းလၢႆမႃးၵႃႈတီႈမၼ်းၸဝ်ႈလႄႈပိူဝ်ႈဢၼ်ၵူၼ်းဢၼ်ၸုဢၼ်တုမ်ၼမ်ၼႃႇၼၼ်ႉ၊ၶဝ်ဢမ်ႇၸၢင်ႈၶဝ်ႈၸူးတီႈမၼ်းၸဝ်ႈလႆႈ။-
ၵူၼ်းၵမ်ႈၽွင်ႈၸင်ႇမွၵ်ႇလၢတ်ႈလႄႈဝႃႈ၊ “မႄႈၸဝ်ႈႁဝ်းဢိၵ်ႇတင်းၼွင်ႉၸၢႆးၸဝ်ႈႁဝ်းၶဝ်ၶႂ်ႈထူပ်းႁၼ်ၸဝ်ႈႁဝ်းလႄႈၸုၵ်းယူႇၵႃႈၼွၵ်ႈပုၼ်ႉဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈလၢတ်ႈတီႈၶဝ်တင်းသဵင်ႈတင်းလူင်လႄႈဝႃႈ၊ “ၶဝ်ၸိူဝ်းဢၼ်ထွမ်ႇဢဝ်ၵႂၢမ်းတြႃးၽြႃးပဵၼ်ၸဝ်ႈသေလႄႈ ၵမ်ၵျၢင်ႉၸွမ်းၼၼ်ႉပဵၼ်မႄႈၵဝ်ပဵၼ်ၼွင်ႉၵဝ်တင်းလၢႆယဝ်ႉ၊” ဝႃႈၼင်ႇၼႆဢေႃႈ။
ဝၼ်းၼိုင်ႈ၊ ၸဝ်ႈယေႇသု၊ ၶဝ်ႈၵႂႃႇၵႃႈၼႂ်းႁိူဝ်းလူၺ်ႈၵၼ်တင်းတပႄးၸဝ်ႈတင်းလၢႆသေလႄႈလၢတ်ႈဝႃႈ၊ “ႁဝ်းဢွၼ်ၵၼ်ၶၢမ်ႈၵႂႃႇၵႃႈတီႈၽင်ႇၼွင်ၽၢႆႇပုၼ်ႉတႃႉႁဝ်း၊” ဝႃႈၼင်ႇၼႆယဝ်ႉၸင်ႇပွႆႇႁိူဝ်းၵႂႃႇဢေႃႈ။-
မိူဝ်ႈဢၼ်ၶဝ်ယင်းတိုၵ်ႉၽၢႆးႁိူဝ်းၵႂႃႇယူႇၼၼ်ႉ၊ ၸဝ်ႈယေႇသု၊ ၼွၼ်းလပ်းယူႇဢေႃႈ။ မိူဝ်ႈယၢမ်းၼၼ်ႉမီးၽူၼ်လူင်လူမ်းလူင်ထူဝ်းပတ်ႉမႃးၵႃႈၼႂ်းၼွင်ၼၼ်ႉလႄႈၼမ်ႉထိပ်ႇၶဝ်ႈမႃးၵႃႈၼႂ်းႁိူဝ်းထၢၼ်ႈပေႃးႁွတ်ႈၽေးယႂ်ႇၼႃႇဢေႃႈ။-
တပႄးၸဝ်ႈၸိူဝ်းၼၼ်ႉၵႂႃႇပူၵ်းမၼ်းၸဝ်ႈသေယဝ်ႉ၊လဝ်ႈလၢတ်ႈလႄႈဝႃႈ၊ “ၸဝ်ႈႁဝ်း၊ၸဝ်ႈႁဝ်း။ ႁဝ်းၶႃႈၸမ်တၵ်းႁွတ်ႈၽေးတၢင်းတၢႆၶႃႈယဝ်ႉ၊” ဝႃႈၼင်ႇၼႆဢေႃႈ။ မၼ်းၸဝ်ႈၸင်ႇလုၵ်ႉလႄႈပူင်ဢမိင်ႉတီႈလူမ်းတင်းလႅင်းၼမ်ႉဢၼ်လုၵ်ႉၶိုၼ်ႈယူႇၼၼ်ႉ ႁႂ်ႈထၢတ်ႇယဵၼ်ၼိမ်လီမႃးဢေႃႈ။-
မိူဝ်ႈၼၼ်ႉ၊မၼ်းၸဝ်ႈလၢတ်ႈတီႈတပႄးၸဝ်ႈတင်းလၢႆလႄႈဝႃႈ၊ “တၢင်းယုမ်ႇမၢတ်ႈသူမီးၵႃႈလႂ်ယဝ်ႉ၊” ဝႃႈၼင်ႇၼႆဢေႃႈ။ ၶဝ်ၸိူဝ်းၼၼ်ႉဢွၼ်ၵၼ်ၵူဝ်ၼႃႇဢၢမ်းၼႃႇလႄႈၵေႃႉၼိုင်ႈလႄႈၵေႃႉၼိုင်ႈလၢတ်ႈတီႈၵၼ်လႄႈဝႃႈ၊ “ၵေႃႉၼႆႉပဵၼ်ၽူႈလႂ်ၼေႃ။ မၼ်းပူင်ဢမိင်ႉတီႈၽူၼ်လူမ်းတင်းလႅင်းၼမ်ႉလႄႈ၊ဢၼ်ၸိူဝ်းၼႆႉၵေႃႈထွမ်ႇဢဝ်ဢမိင်ႉမၼ်းဢေႃႈ၊” ဝႃႈၼင်ႇၼႆဢေႃႈ။
ၶဝ်ၶၢမ်ႈၼမ်ႉႁွတ်ႈၵႂႃႇထိုင်တီႈမိူင်း ၵေႇရႃႇသႃႇ၊ ဢၼ်မီးၽၢႆႇပုၼ်ႉၼွင်တေႃႇၼႃႈမိူင်း ၵႃႇလိလႄး၊ ပုၼ်ႉၼၼ်ႉဢေႃႈ။-
မိူဝ်ႈဢၼ်မၼ်းၸဝ်ႈၶိုၼ်ႈၽင်ႇၵႂႃႇယူႇၸိုင်၊ၵူၼ်းဝဵင်းၵေႃႉၼိုင်ႈဢၼ်ၽီႁၢႆႉၶဝ်ႈၼၼ်ႉမႃးႁူပ်ႉထူပ်းမၼ်းၸဝ်ႈဢေႃႈ။ မၼ်းၼၼ်ႉယင်းဢမ်ႇၼုင်ႈၶူဝ်းၼုင်ႈလဵင်း၊ဢမ်ႇယူႇၼႂ်းႁိူၼ်းၼႂ်းယေး၊ၵူၺ်းယူႇၵႃႈၼႂ်းပႃႇႁဵဝ်ႈဝႆႉႁိုင်ၼႃႇဢေႃႈ။-
မိူဝ်ႈဢၼ်မၼ်းႁူပ်ႉ ၸဝ်ႈယေႇသု၊ ၼၼ်ႉၸိုင်၊ႁွင်ႉႁႆႈလႄႈၶုပ်ႉမူပ်ႇသေယဝ်ႉ၊ဢဝ်တင်းသဵင်ဢၼ်ယႂ်ႇၼႃႇလႄႈလဝ်ႈလၢတ်ႈဝႃႈ၊ “ ယေႇသု၊ လုၵ်ႈၽြႃးပဵၼ်ၸဝ်ႈဢၼ်ယႂ်ႇမျၢတ်ႈၼႃႇတီႈၶႃႈ႟။ ၸဝ်ႈႁဝ်းလူဝ်ႇၵႃႈသင်တီႈၵဝ်ၶႃႈ။ ၵဝ်ၶႃႈတွင်းပၢၼ်ႇၸဝ်ႈႁဝ်းဢေႃႈ။ ယႃႇပေပၼ်တုၵ်ႉၶႃႉတီႈၵဝ်ၶႃႈသေၵမ်း၊” ဝႃႈၼင်ႇၼႆဢေႃႈ။-
မၼ်းလၢတ်ႈၸိူဝ်ႉၼင်ႇၼႆၵွပ်ႈပိူဝ်ႈမၼ်းၸဝ်ႈလႆႈပူင်ဢမိင်ႉႁႂ်ႈၽီႁၢႆႉၼၼ်ႉဢွၵ်ႇသေၵႃႈၼႂ်းၵေႃႉၼၼ်ႉၵႂႃႇဢေႃႈ။ လွင်ႈမၼ်းၸမ်ႉ၊ၽီႁၢႆႉၶဝ်ႈၵႃႈၼႂ်းမၼ်းပွၵ်ႈၼမ်ၼႃႇယဝ်ႉ၊ပိၵ်ႉသမ်ႉဢဝ်ၸိူၵ်ႈလဵၵ်းတင်းၶူၺ်ႇတိၼ်မတ်ႉၽုၵ်ႇဝႆႉသေၵေႃႈ၊မၼ်းၸၢင်ႈတိုတ်ႉၶၢတ်ႇသေယဝ်ႉ၊ၽီႁၢႆႉၼၼ်ႉဢွၼ်မၼ်းၶဝ်ႈထိူၼ်ႇၶဝ်ႈၶိူဝ်းၵႂႃႇယူႇဢေႃႈ။
ၸဝ်ႈယေႇသု၊ ထၢမ်တီႈမၼ်းလႄႈဝႃႈ၊ “ၸိုဝ်ႈမႂ်းၸိုဝ်ႈသင်၊” ဝႃႈၼင်ႇၼႆလႄႈ၊ပိူဝ်ႈဢၼ်ပဵၼ်ၽီၽုင်ၶဝ်ႈၵႃႈၼႂ်းမၼ်းလႄႈ မၼ်းၶိုၼ်းလဝ်ႈလၢတ်ႈလႄႈဝႃႈ၊ “ၸိုဝ်ႈၵဝ်ၶႃႈပဵၼ်ၽီၽုင်ဢေႃႈ၊” ဝႃႈၼင်ႇၼႆဢေႃႈ။-
ၽီၸိူဝ်းၼၼ်ႉၼင်ႇႁိုဝ် ၸဝ်ႈယေႇသု၊ တၵ်းတေဢမ်ႇႁေႃႈၶဝ်ပႅတ်ႈၵႂႃႇၵႃႈၼႂ်းငရၢႆးဢၼ်လိုၵ်ႉဢၼ်လမ်ႇၼႃႇသေပိူၼ်ႈၼၼ်ႉၸိုင်၊တွင်းပၢၼ်ႇတီႈမၼ်းၸဝ်ႈဢေႃႈ။
ၵႃႈတီႈႁိမ်းၼၼ်ႉမီးၽုင်မူၽုင်ၼိုင်ႈဢၼ်မီးမူၼမ်ၼႃႇလဵင်ႉယူႇၵႃႈတီႈတူၼ်းလွႆဢေႃႈ။ ၽီႁၢႆႉၸိူဝ်းၼၼ်ႉယွၼ်းဢၶႂၢင်ႉႁႂ်ႈလႆႈၶဝ်ႈၵႃႈၼႂ်းမူၸိူဝ်းၼၼ်ႉလႄႈ ၸဝ်ႈယေႇသု၊ ၵေႃႈပၼ်ဢၶႂၢင်ႉဢေႃႈ။-
ၽီႁၢႆႉတင်းလၢႆၵေႃႈဢွၵ်ႇသေၵႃႈတီႈၵူၼ်းၵေႃႉၼၼ်ႉသေယဝ်ႉ၊မိူဝ်ႈဢၼ်ၶဝ်ႈၵႃႈၼႂ်းမူၸိူဝ်းၼၼ်ႉၸိုင်၊ၽုင်မူၼၼ်ႉၵေႃႈၶုၼ်ႇလႅၼ်ႈလူင်းၽင်ႇႁိုၵ်းၸၼ်းၵႂႃႇၵႃႈၼႂ်းၼမ်ႉၼွင်လႄႈၵႅၼ်ႉၼမ်ႉတၢႆသဵင်ႈဢေႃႈ။
မိူဝ်ႈဢၼ်ၵူၼ်းလဵင်ႉမူၶဝ်ႁၼ်လွင်ႈတၢင်းဢၼ်ပဵၼ်မႃးၸိူဝ်းၼၼ်ႉၸိုင်၊ဢွၼ်ၵၼ်ၶုၼ်ႇလႅၼ်ႈၵႂႃႇမွၵ်ႇလၢတ်ႈၶၢဝ်ႇငၢဝ်းၵႃႈၼႂ်းဝဵင်းတင်းၵႃႈတီႈတူင်ႈၼႃးၸိူဝ်းၼၼ်ႉဢေႃႈ။-
ၵူၼ်းၼမ်ၼႃႇဢွၵ်ႇမႃးႁႂ်ႈလႆႈတူၺ်းလွင်ႈတၢင်းဢၼ်ပဵၼ်မႃးၼၼ်ႉဢေႃႈ။ မိူဝ်ႈဢၼ်ၶဝ်ႁွတ်ႈထိုင်တီႈ ၸဝ်ႈယေႇသု၊ လႄႈၶဝ်လႆႈႁၼ်ၵူၼ်းဢၼ်ၽီႁၢႆႉဢွၵ်ႇယဝ်ႉၼၼ်ႉသမ်ႉပေႃးၼုင်ႈၶူဝ်းၼုင်ႈလဵင်းဝႆႉယဝ်ႉလႄႈ မီးတင်းၸႂ်ဢၼ်လီဢၼ်ငၢမ်းသေယဝ်ႉ၊ၼင်ႈယူႇႁိမ်းတိၼ် ၸဝ်ႈယေႇသု၊ ဝႆႉၼၼ်ႉၸိုင်၊ၶဝ်ၵူဝ်ႁႄၼႃႇဢေႃႈ။-
ၶဝ်ၸိူဝ်းဢၼ်ဢဝ်တင်းတႃၶဝ်ႁၼ်ၼၼ်ႉၶႆႈၼႄတီႈၵူၼ်းတင်းလၢႆ၊လွင်ႈဢၼ်ၽီႁၢႆႉႁဵတ်းၸိူဝ်ႉၼင်ႇႁိုဝ်လႆႈဢွၵ်ႇသေၵႃႈတီႈၵေႃႉၼၼ်ႉၵႂႃႇလႄႈမၼ်းႁဵတ်းၸိူဝ်ႉၼင်ႇႁိုဝ်လႆႈၶျၢမ်းသႃႇမႃးၼၼ်ႉဢေႃႈ။-
မိူဝ်ႈၼၼ်ႉၵူၼ်းဝၢၼ်ႈၵူၼ်းမိူင်း၊မိူင်း ၵႃႇရႃႉ၊ တင်းသဵင်ႈတင်းလူင်ပိူဝ်ႈဢၼ်ၸႂ်တိုၼ်ႇၸႂ်ၽၢၼ်ႈလႄႈ ၵူဝ်ႁႄယူႇၼၼ်ႉ၊ၶဝ်တွင်းပၢၼ်ႇႁႂ်ႈ ၸဝ်ႈယေႇသု၊ ဢွၵ်ႇသေၵႃႈတီႈမိူင်းၶဝ်ၵႂႃႇဢေႃႈ။ မၼ်းၸဝ်ႈၵေႃႈၶဝ်ႈၵႃႈၼႂ်းႁိူဝ်းလႄႈမိူဝ်းၵႂႃႇသေဢေႃႈ။-
ၵေႃႉဢၼ်ၽီႁၢႆႉဢွၵ်ႇသေၵႃႈၼႂ်းမၼ်းၵႂႃႇယဝ်ႉၼၼ်ႉၵေႃႈလဝ်ႈယွၼ်းလႄႈဝႃႈ၊ “ႁႂ်ႈၵဝ်ၶႃႈလႆႈၵႂႃႇၸွမ်းၸဝ်ႈႁဝ်းသေၵမ်းၶႃႈ၊” ဝႃႈၼင်ႇၼႆသေၵေႃႈ။ ၸဝ်ႈယေႇသု၊ ပွႆႇၸႂ်ႉမၼ်းၵႂႃႇတင်းၶေႃႈၵႂၢမ်းဢၼ်သင်ႇလၢတ်ႈလႄႈဝႃႈ၊-
“ၶိုၼ်းမိူဝ်းႁိူၼ်းမႂ်းလႄႈၶႆႈၼႄလွင်ႈဢၼ်ၽြႃးပဵၼ်ၸဝ်ႈႁဵတ်းၵျေးၸူးတီႈမႂ်းယႂ်ႇၼႃႇထၢၼ်ႇႁိုဝ်ၼၼ်ႉတႃႉ၊” ဝႃႈၼင်ႇၼႆဢေႃႈ။ ၵေႃႉၼၼ်ႉၵေႃႈၵႂႃႇလႄႈမွၵ်ႇလၢတ်ႈၶႆႈၼႄၶၢဝ်ႇငၢဝ်းလွင်ႈဢၼ် ၸဝ်ႈယေႇသု၊ ႁဵတ်းၵျေးၸူးတီႈမၼ်းယႂ်ႇၼႃႇထၢၼ်ႇႁိုဝ်ၼၼ်ႉ ၵႃႈၼႂ်းဝဵင်းတင်းဝဵင်းဢေႃႈ။
မိူဝ်ႈဢၼ် ၸဝ်ႈယေႇသု၊ ၶိုၼ်းၶၢမ်ႈႁွတ်ႈၽႅဝ်မႃးၽၢႆႇၼႆႈၼမ်ႉၼွင်ၼၼ်ႉၸိုင်၊ပိူဝ်ႈဢၼ်ၵူၼ်းၼမ်ၼႃႇပႂ်ႉမွင်းမၼ်းၸဝ်ႈယူႇၼၼ်ႉလႄႈဢွၼ်ၵၼ်ႁပ်ႉတွၼ်ႈဢဝ်မၼ်းၸဝ်ႈၸူမ်းၸူမ်းသိူဝ်းသိူဝ်းဢေႃႈ။-
မိူဝ်ႈၼၼ်ႉ၊ၵူၼ်းၵေႃႉၼိုင်ႈဢၼ်လႆႈၸိုဝ်ႈ ယႃႇဢိရု၊ ဢၼ်ပဵၼ်ၵႄႇၸရွပ်ႈႁေႃးတြႃးၼၼ်ႉ၊မႃးၶုပ်ႉမူပ်ႇႁိမ်းတိၼ်မၼ်းၸဝ်ႈလႄႈၽိတ်ႈပၢင်းႁႂ်ႈမၼ်းၸဝ်ႈၵႂႃႇၵႃႈတီႈႁိူၼ်းမၼ်းဢေႃႈ။-
ၵွပ်ႈပိူဝ်ႈမၼ်းမီးလုၵ်ႈယိင်းၵေႃႉလဵဝ်ၵူၺ်းဢၼ်ဢသၢၵ်ႈလႆႈသိပ်းသွင်ပီၼၼ်ႉပဵၼ်ၶႆႈပဵၼ်ၼၢဝ်ႁႅင်းၼႃႇလူင်လၢင်ထၢၼ်ႈပေႃးၸမ်တၵ်းတၢႆၵႂႃႇဢေႃႈ။ ယၢမ်းမိူဝ်ႈဢၼ်မၼ်းၸဝ်ႈယင်းတိုၵ်ႉပႆၵႂႃႇယူႇၼၼ်ႉ၊ၵူၼ်းၼမ်ၼႃႇၽိုတ်ႉဢီးၸူးတီႈမၼ်းၸဝ်ႈယူႇၵူႈၽၢႆႇၵူႈပႃႈဢေႃႈ။-
ၵမ်းၼၼ်ႉ မီးမႄႈယိင်းၵေႃႉၼိုင်ႈဢၼ်ၸပ်းတၢင်းပဵၼ်လိူတ်ႈတူၵ်းယူႇလႆႈသိပ်းသွင်ပီၼၼ်ႉဢေႃႈ။ ပိၵ်ႉသမ်ႉယူတ်းယႃႇတီႈသြႃႇမေႃယႃၶဝ်၊လူၺ်ႈငိုၼ်းၶမ်းဢုၵ်ႉၸႃႇၵႃႈမီးထၢၼ်ႈပေႃးမူတ်းၵႂႃႇသေၵေႃႈဢမ်ႇၶႅၼ်းဢမ်ႇႁၢႆလႆႈ။-
မၼ်းၸင်ႇၽိုတ်ႉဢီးမူႇၵူၼ်းၸိူဝ်းၼၼ်ႉမႃးၽၢႆႇလင် ၸဝ်ႈယေႇသု၊ လႄႈယိပ်းတိူဝ်ႉပၢႆသိူဝ်ႈမၼ်းၸဝ်ႈဢေႃႈ။ ယေႃးၵႃႇလိူတ်ႈတူၵ်းမၼ်းၼၼ်ႉၵေႃႈထၢတ်ႇယူတ်းႁၢႆၵႂႃႇၵမ်းလဵဝ်ဢေႃႈ။-
ၸဝ်ႈယေႇသု၊ ၵေႃႈထၢမ်လႄႈဝႃႈ၊ “ၽူႈလႂ်ယိပ်းတိူဝ်ႉၵဝ်၊” ဝႃႈၼင်ႇၼႆဢေႃႈ။ ၵူၼ်းတင်းသဵင်ႈတင်းလူင်ၶိုၼ်းတွပ်ႇလၢတ်ႈႁႄႉၵႂၢမ်းမၼ်းၸဝ်ႈဢေႃႈ။ ပေႇတရု၊ ၸင်ႇလၢတ်ႈလႄႈဝႃႈ၊ “ၸဝ်ႈႁဝ်း၊ၵူၼ်းၼမ်ၼႃႇထၢၼ်ႇၼႆႉလွမ်ႉႁွပ်ႈၸဝ်ႈႁဝ်းလႄႈၽိုတ်ႉဢီးတိူဝ်ႉမႅၼ်ႈၸဝ်ႈႁဝ်းဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊မၼ်းၸဝ်ႈလၢတ်ႈလႄႈဝႃႈ၊ “ဢမ်ႇၸႂ်ႈၵူၺ်း။ သေၵေႃႉၵေႃႉယိပ်းတိူဝ်ႉၵဝ်ယဝ်ႉ။ ၵဝ်ႁုလွင်ႈဢၼ်တၼ်းၶူဝ်းဢွၵ်ႇတူဝ်ၵဝ်ၵႂႃႇၼၼ်ႉဢေႃႈ၊” ဝႃႈၼင်ႇၼႆဢေႃႈ။-
မႄႈယိင်းၼၼ်ႉ ႁုလွင်ႈဢၼ်မၼ်းဢမ်ႇသိူင်ႇဝႆႉဢမ်ဝႆႉလႆႈယဝ်ႉၼၼ်ႉ၊မၼ်းၽုၺ်ႇဢွၵ်ႇလၢတ်ႈၼႄၵွပ်ႈသင်လႄႈမၼ်းလႆႈယိပ်းတိူဝ်ႉမၼ်းၸဝ်ႈ၊ဢိၵ်ႇတင်းလွင်ႈဢၼ်တၢင်းပဵၼ်မၼ်းၸိုၼ်ႈႁၢႆၵႂႃႇယဝ်ႉၵမ်းလဵဝ်ၼၼ်ႉ၊ၵႃႈတီႈၽၢႆႇၼႃႈၵူၼ်းတင်းလၢႆဢေႃႈ။
ၸဝ်ႈယေႇသု၊ ၵေႃႈလၢတ်ႈတီႈမၼ်းလႄႈဝႃႈ၊ “လုၵ်ႈယိင်းၵဝ်႟။ တၢင်းယုမ်ႇမၢတ်ႈမႂ်းႁဵတ်းႁႂ်ႈတၢင်းပဵၼ်မႂ်းၸိုၼ်ႈႁၢႆယဝ်ႉ။ ၵႂႃႇၼိမ်ၼိမ်တႃႉ၊” ဝႃႈၼင်ႇၼႆဢေႃႈ။
ယၢမ်းမိူဝ်ႈဢၼ် ၸဝ်ႈယေႇသု၊ ယင်းလၢတ်ႈဝႃႈၸိူဝ်ႉၼင်ႇၼႆယူႇၼၼ်ႉၵူၼ်းၵေႃႉၼိုင်ႈလုၵ်ႉသေၵႃႈတီႈႁိူၼ်းၵူၼ်းဢၼ်ပဵၼ်ၵႄႇပဵၼ်ႁူဝ်ၸရွပ်ႈႁေႃးတြႃးမႃးလၢတ်ႈတီႈ ယႃႇဢိရု၊ လႄႈဝႃႈ၊ “လုၵ်ႈယိင်းၸဝ်ႈႁဝ်းတၢႆယဝ်ႉၶႃႈဢေႃႈ။ ဢမ်ႇလူဝ်ႇပၼ်တုၵ်ႉၶႃႉတီႈၸဝ်ႈသြႃႇၶႃႈယဝ်ႉ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊မၼ်းၸဝ်ႈငိၼ်းလႄႈလၢတ်ႈတီႈ ယႃႇဢိရု၊ လႄႈဝႃႈ၊ “ယႃႇပေမႆႈၸႂ်၊မီးတၢင်းယုမ်ႇမၢတ်ႈၵူၺ်းတႃႉ။ မၼ်းတၵ်းၵၢင်းလွတ်ႈတင်းၽေးတၢင်းတၢႆဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်မၼ်းၸဝ်ႈႁွတ်ႈထိုင်တီႈႁိူၼ်းၵႂႃႇၸိုင်၊လိူဝ်သေ ပေႇတရု၊ယႃႇၵုပ်ႈ၊ တင်း ယူဝ်းႁၢၼ်ႇ၊ ဢိၵ်ႇတင်းပေႃႈမႄႈလုၵ်ႈဢွၼ်ႇၼၼ်ႉမၼ်းၸဝ်ႈဢမ်ႇႁႂ်ႈၽူႈလႂ်ၶဝ်ႈၵႂႃႇၸွမ်းသေၵေႃႉသေၵူၼ်း။-
ၵူၼ်းၸိူဝ်းဢၼ်မီးယူႇၵႃႈတီႈၼၼ်ႈႁွင်ႉႁႆႈမႆႈၸႂ်ၵွပ်ႈလုၵ်ႈယိင်းဢွၼ်ႇၼၼ်ႉယူႇလႄႈ၊ ၸဝ်ႈယေႇသု၊ လၢတ်ႈလႄႈဝႃႈ၊ “ယႃႇပေႁႆႈ။ လုၵ်ႈဢွၼ်ႇၼႆႉတၢႆယဝ်ႉဢမ်ႇၸႂ်ႈ။ မၼ်းၼွၼ်းလပ်းယူႇၵူၺ်းဢေႃႈ၊” ဝႃႈၼင်ႇၼႆဢေႃႈ။
ၶဝ်ၼၼ်ႉပိူဝ်ႈဢၼ်ႁုလွင်ႈဢၼ်လုၵ်ႈဢွၼ်ႇၼႆႉတၢႆယဝ်ႉလႄႈဢွၼ်ၵၼ်ၶႂ်ႈၶူဝ်မၼ်းၸဝ်ႈဢေႃႈ။-
မၼ်းၸဝ်ႈႁႂ်ႈၶဝ်ၵူႈၵေႃႉဢွၵ်ႇၵႂႃႇသေယဝ်ႉ၊ယိပ်းမိုဝ်းလုၵ်ႈဢွၼ်ႇၼၼ်ႉသေလႄႈ ႁွင်ႉလႄႈဝႃႈ၊ “လုၵ်ႈယိင်းဢွၼ်ႇ႟။ လုၵ်ႉတႃႉ၊” ဝႃႈၼင်ႇၼႆဢေႃႈ။-
ၸႂ်ဝိၺိၺ်ႇမၼ်းၶိုၼ်းမႃးသေလႄႈလုၵ်ႉၼင်ႈၵမ်းလဵဝ်ဢေႃႈ။ လိုၼ်းၼၼ်ႉမၼ်းၸဝ်ႈမီးဢမိင်ႉႁႂ်ႈၶဝ်ဢဝ်တၢင်းၵိၼ်ပၼ်မၼ်းၵိၼ်ဢေႃႈ။-
ပေႃႈမႄးလုၵ်ႈဢွၼ်ႇၼၼ်ႉၵေႃႈ ဢၢမ်းဢေႃးၼႃႇလူင်လၢင်လႄႈယူႇဢေႃႈ။ ၸဝ်ႈယေႇသု၊ ၸင်ႇသင်ႇလၢတ်ႈႁၢမ်ႈၶဝ်ၼင်ႇႁိုဝ်ၶဝ်တၵ်းဢမ်ႇလၢတ်ႈလွင်ႈတၢင်းၼႆႉတီႈၽူႈလႂ်သေၵေႃႉသေၵူၼ်းၼၼ်ႉဢေႃႈ။
ၸဝ်ႈယေႇသု၊ ႁွင်ႉဢဝ်တမၢၼ်ႇၸဝ်ႈသိပ်းသွင်ပႃးၼၼ်ႉၸုတုမ်ၵၼ်ယဝ်ႉၸင်ႇ၊ပၼ်ဢႃႇၼႃႇတၼ်းၶူဝ်းဢၼ်ပႄႉၽီပႄႉၽိူဝ်ႉတင်းလၢႆ၊ဢိၵ်ႇတင်းဢၶႂၢင်ႉတၼ်းၶူဝ်းဢၼ်ႁႂ်ႈတၢင်းၶႆႈတၢင်းပဵၼ်တင်းလၢႆၸိုၼ်ႈႁၢႆလႆႈၼၼ်ႉတီႈၶဝ်ဢေႃႈ။-
လိုၼ်းၼၼ်ႉ မၼ်းၸဝ်ႈပွႆႇၶဝ်ဢွၵ်ႇၵႂႃႇႁႂ်ႈလႆႈႁေႃးလၢတ်ႈတြႃးလွင်ႈမိူင်းၽြႃးပဵၼ်ၸဝ်ႈ၊ဢိၵ်ႇတင်းႁႂ်ႈတၢင်းၶႆႈတၢင်းပဵၼ်ပိူၼ်ႈၸိုၼ်ႈႁၢႆဢေႃႈ။-
မၼ်းၸဝ်ႈသင်ႇလၢတ်ႈတီႈၶဝ်လႄႈဝႃႈ၊ “ပုၼ်ႈၶၢဝ်းတၢင်းသူၼၼ်ႉယႃႇပေပႃးၵႃႈသင်သေၸိူဝ်ႉသေမဵဝ်း။ ၸႃႉၸဵမ်ၶွၼ်ႉတဝ်ႉ၊ထူင်ပႃး၊တၢင်းၵိၼ်၊ငိုၼ်းတွင်း၊ဢိၵ်ႇတင်းသိူဝ်ႈ၊တႃႇတေထႆႇတေလၢႆႈၸိူဝ်းၼႆႉယႃႇပေဢဝ်ပႃးၸွမ်း။-
တီႈလႂ်သေဢမ်ႇဝႃႈ၊ပေႃးပိူၼ်ႈႁပ်ႉတွၼ်ႈဢဝ်သူၸိုင်၊ၶဝ်ႈယူႇၵႃႈၼႂ်းႁိူၼ်းၼၼ်ႉႁိူၼ်းလဵဝ်ၵူၺ်းတေႃႇထိုင်ႁွတ်ႈသူဢွၵ်ႇသေၵႃႈတီႈဝဵင်းၼၼ်ႉၵႂႃႇတႃႉ။-
တီႈလႂ်သေဢမ်ႇဝႃႈ၊ပေႃးပိူၼ်ႈဢမ်ႇႁပ်ႉတွၼ်ႈဢဝ်သူၸိုင်၊သၼ်ႇၽႅတ်းပႅတ်ႈမုၼ်ႈလိၼ်ဢၼ်ၸပ်းတိၼ်သူၼၼ်ႉပႅတ်ႈႁႂ်ႈပဵၼ်သၢၵ်ႈသေႇဢၼ်ၶတ်းၵၼ်တင်းၶဝ်ၼၼ်ႉသေလႄႈဢွၵ်ႇၵႂႃႇတႃႉ။”
တမၢၼ်ႇၸဝ်ႈတင်းလၢႆၵေႃႈ ဢွၵ်ႇၵႂႃႇလႄႈလႄႇလဵပ်ႈၵူႈဝၢၼ်ႈၵူႈဝဵင်းလႄႈႁေႃးလၢတ်ႈၶၢဝ်ႇသိူဝ်းပျေႃႇယူႇ၊ႁႂ်ႈတၢင်းၶႆႈတၢင်းပဵၼ်တင်းလၢႆၸိုၼ်ႈႁၢႆယူႇၵူႈတီႈၵူႈလႅၼ်ဢေႃႈ။
မိူဝ်ႈဢၼ်ၸဝ်ႈၽႃႉ ႁေႇရူတ်ႈ၊ ဢၼ်ၽွင်းငမ်းမိူင်း ၵႃႇလိလႄး၊ ၼၼ်ႉလႆႈငိၼ်းလွင်ႈတၢင်းဢၼ်ပဵၼ်မႃးတင်းသဵင်ႈတင်းလူင်ၼၼ်ႉၸိုင်၊မၼ်းၵႂၢင်ၸႂ်ယုင်ႈၸႂ်ၼႃႇၵွပ်ႈပိူဝ်ႈပိူၼ်ႈၵမ်ႈၽွင်ႈလၢတ်ႈလႄႈဝႃႈ၊ “သြႃႇ ယူဝ်းႁၢၼ်ႇ၊ ဢၼ်ပၼ်မၢင်ႇၵလႃႇပပ်ႉတိၸမ်ႇ ၼၼ်ႉလုၵ်ႉၶိုၼ်းလိပ်းယဝ်ႉ၊” ဝႃႈၼင်ႇၼႆၼၼ်ႉလႄႈသင်၊-
ၵမ်ႈၽွင်ႈသမ်ႉဝႃႈ၊ “ ဢေးလိယႃႉ၊ ပေႃႇမႃးယဝ်ႉ၊” ၵမ်ႈၽွင်ႈသမ်ႉယင်းဝႃႈ၊ “ပရေႃးၽႅတ်ႈ မိူဝ်ႈၵွၼ်ႇသေပႃးပႃးလုၵ်ႉၶိုၼ်းလိပ်းယဝ်ႉ၊” ဝႃႈၼင်ႈၼႆၼၼ်ႉဢေႃႈ။-
ၸဝ်ႈၽႃႉ ႁေႇရူတ်ႈ၊ လၢတ်ႈလႄႈဝႃႈ၊ “ၵဝ်လႆႈတႅပ်းႁူဝ်သြႃႇ ယူဝ်းႁၢၼ်ႇ၊ ယဝ်ႉ။ ၵူၺ်းၵႃႈ၊ၵေႃႉဢၼ်ၵဝ်လႆႈငိၼ်းၶၢဝ်ႇလွင်ႈမၼ်းၼႆႉပဵၼ်ၽူႈလႂ်၊” ဝႃႈၼင်ႇၼႆလႄႈ၊သွၵ်ႈႁႃႁႂ်ႈလႆႈထူပ်းၺႃး ၸဝ်ႈယေႇသု၊ ဢေႃႈ။
တမၢၼ်ႇၸဝ်ႈတင်းလၢႆပွၵ်ႈၶိုၼ်းမႃးလႄႈမွၵ်ႇလၢတ်ႈလွင်ႈတၢင်းဢၼ်ၶဝ်လႆႈႁဵတ်းမႃးတင်းသဵင်ႈတင်းလူင်တီႈ ၸဝ်ႈယေႇသု၊ ဢေႃႈ။ မၼ်းၸဝ်ႈပႃးဢဝ်ၶဝ်ၵႂႃႇလူၺ်ႈၵၼ်တင်းမၼ်းၸဝ်ႈၵူၺ်းၶေႃၶဝ်ၸူးၵႃႈတီႈဝဵင်းဢၼ်လႆႈႁွင်ႉဝႃႈ၊ ပႅတ်ႉၸေးတႃႉ၊ ပုၼ်ႉဢေႃႈ။-
မိူဝ်ႈဢၼ်ၵူၼ်းတင်းလၢႆငိၼ်းၸိုင်၊ၶဝ်ၸွမ်းမၼ်းၸဝ်ႈၵႂႃႇဢေႃႈ။ မၼ်းၸဝ်ႈၵေႃႈႁပ်ႉတွၼ်ႈဢဝ်ၶဝ်သေယဝ်ႉ၊ႁေႃးလၢတ်ႈလွင်ႈမိူင်းၽြႃးပဵၼ်ၸဝ်ႈလႄႈႁဵတ်းႁႂ်ႈတၢင်းၶႆႈတၢင်းပဵၼ်ၸိုၼ်ႈႁၢႆဢေႃႈ။
မိူဝ်ႈဢၼ်ၵၢင်ဝၼ်းၸမ်တၵ်းတူၵ်းၸိုင်၊တမၢၼ်ႇၸဝ်ႈသိပ်းသွင်ပႃးၼၼ်ႉသုတ်ႉၸူးတီႈ ၸဝ်ႈယေႇသု၊ လႄႈလဝ်ႈလၢတ်ႈဝႃႈ၊ “ပွႆႇၸႂ်ႉၵူၼ်းၸိူဝ်းၼႆႉၵႂႃႇၵႃႈတီႈဝၢၼ်ႈၼွၵ်ႈႁိမ်းႁွမ်းတင်းၵႃႈတီႈတူင်ႈႁႆႈတူင်ႈၼႃးႁိမ်းႁွမ်းၼႆႉႁႂ်ႈၶဝ်ၵႂႃႇႁႃၵိၼ်ႁႃယႅမ်ႉလႄႈလိုဝ်ႈႁိူဝ်းတႃႉ။ တီႈၼႆႈပဵၼ်ထိူၼ်ႇပဵၼ်ၶိူဝ်းၵူၺ်းၶႃႈဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊မၼ်းၸဝ်ႈလၢတ်ႈတီႈၶဝ်လႄႈဝႃႈ၊ “သူဢဝ်တၢင်းၵိၼ်သေၸိူဝ်ႉသေပိူင်ပၼ်ၶဝ်ၵိၼ်တႃႉ၊” ဝႃႈၼင်ႇၼႆလႄႈ။ ၶဝ်ၶိုၼ်းလဝ်ႈလၢတ်ႈလႄႈဝႃႈ၊ “ၶႃႈၸဝ်ႈႁဝ်းၶဝ်မီးၶဝ်ႈမုၼ်းႁႃႈႁူၺ်ႇတင်းပႃသွင်တူဝ်ၵူၺ်းၶႃႈဢေႃႈ။ ၸွင်ႇၸဝ်ႈႁဝ်းၶႂ်ႈႁႂ်ႈႁဝ်းၶႃႈၵႂႃႇသိုဝ်ႉတၢင်းၵိၼ်ပုၼ်ႈၵူၼ်းဢၼ်ၸုဢၼ်တုမ်ၼႆႉၶႃႈႁိုဝ်း၊” ဝႃႈၼင်ႇၼႆဢေႃႈ။
ၵႃႈတီႈၼၼ်ႈၵူၼ်းၸၢႆးၵူၺ်းၵူၺ်းမီးမွၵ်ႈႁႃႈႁဵင်ၸမ်ၸမ်ဢေႃႈ။ ၸဝ်ႈယေႇသု၊ ၸင်ႇလၢတ်ႈတီႈတပႄးၸဝ်ႈတင်းလၢႆလႄႈဝႃႈ၊ “ႁႂ်ႈၵူၼ်းၸိူဝ်းၼၼ်ႉၼင်ႈယူႇယေႈမူႇမွၵ်ႈႁႃႈသိပ်းၵေႃႉႁင်းၽႂ်ႁင်းမၼ်းတႃႉ၊” ဝႃႈၼင်ႇၼႆဢေႃႈ။
တပႄးၸဝ်ႈတင်းလၢႆၵေႃႈ၊ႁဵတ်းၸွမ်းၵႃႈၼင်ႇဢၼ်ဝႃႈၼၼ်ႉလႄႈႁႂ်ႈၶဝ်ၼင်ႈဢေႃႈ။-
မၼ်းၸဝ်ႈၵေႃႈဢဝ်ၶဝ်ႈမုၼ်းႁႃႈႁူၺ်ႇတင်းပႃသွင်တူဝ်ၼၼ်ႉသေယဝ်ႉ၊ႁႅၼ်ၶိုၼ်းၵႃႈၼိူဝ်ၽႃႉၵၢင်ႁၢဝ်လႄႈ ယွင်ႈယေႃးတၢင်ႇၵျေးၸူးၽြႃးပဵၼ်ၸဝ်ႈယဝ်ႉၸင်ႇ၊ဝိတ်းမႅင်ႇပၼ်တီႈတပႄးၸဝ်ႈၸိူဝ်းၼၼ်ႉႁႂ်ႈၵႂႃႇတမ်းပၼ်တီႈၵူၼ်းဢၼ်ၼင်ႈယူႇၸိူဝ်းၼၼ်ႉဢေႃႈ။-
ၶဝ်ၼၼ်ႉၵိၼ်ဢိမ်ႇၵိၼ်တဵမ်ၵူႈၵေႃႉယဝ်ႉၸင်ႇ၊တပႄးၸဝ်ႈတင်းလၢႆၶိုၼ်းၵဵပ်းတွမ်ၵဵပ်းႁွမ်ဢၼ်ၵိုတ်းဢၼ်ၵျၢၼ်ႇလႆႈသိပ်းသွင်ပဵတ်ႈတဵမ်တဵမ်ဢေႃႈ။
မီးဝၼ်းၼိုင်ႈမိူဝ်ႈဢၼ် ၸဝ်ႈယေႇသု၊ ႁဵတ်းပထၼႃႇတၢင်းဢၼ်သူးတွင်းယူႇၵူၺ်းၶေႃမၼ်းၸဝ်ႈယူႇၼၼ်ႉ၊တပႄးၸဝ်ႈတင်းလၢႆမႃးၸူးႁိမ်းမၼ်းၸဝ်ႈလႄႈမၼ်းၸဝ်ႈထၢမ်တီႈၶဝ်လႄႈဝႃႈ၊ “ၵူၼ်းတင်းလၢႆဝႃႈၵဝ်ပဵၼ်ၽူႈလႂ်၊” ဝႃႈၼင်ႇၼႆဢေႃႈ။-
ၶဝ်ၶိုၼ်းလဝ်ႈလၢတ်ႈလႄႈဝႃႈ၊ “ၵမ်ႈၽွင်ႈဝႃႈၸဝ်ႈႁဝ်းပဵၼ်သြႃႇ ယူဝ်းႁၢၼ်ႇ၊ ဢၼ်ပၼ်မၢင်ႇၵလႃႇပပ်ႉတိၸမ်ႇ ၼၼ်ႉဢေႃႈ။ ၵမ်ႈၽွင်ႈသမ်ႉဝႃႈ၊ပဵၼ် ဢေးလိယႃႉ၊ ဢေႃႈ။ ၵမ်ႈၽွင်ႈသမ်ႉယင်းဝႃႈ၊ပဵၼ်ပရေႃးၽႅတ်ႈမိူဝ်ႈၵွၼ်ႇသေပႃးပႃးလုၵ်ႉၶိုၼ်းလိပ်းမႃးဢေႃႈ၊ဝႃႈၼင်ႇၼႆၶႃႈဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈသမ်ႉထၢမ်ၶဝ်ထႅင်ႈလႄႈဝႃႈ၊ “ၸိူဝ်းသူၼႆႉဝႃႈ၊ၵဝ်ပဵၼ်ၽူႈလႂ်၊” ဝႃႈၼင်ႇၼႆလႄႈ။ ပေႇတရု၊ ၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈႁဝ်းပဵၼ် ၸဝ်ႈၶရိၸ်ႈ၊ လုၵ်ႈၽြႃးပဵၼ်ၸဝ်ႈၶႃႈဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ ၼင်ႇႁိုဝ်ၶဝ်တၵ်းဢမ်ႇလၢတ်ႈလွင်ႈတၢင်းၼၼ်ႉတီႈၽူႈလႂ်သေၵေႃႉသေၵူၼ်းၸိုင်၊မၼ်းၸဝ်ႈႁၢမ်ႈတၢပ်ႈၶဝ်ဝႆႉဢေႃႈ။
ၸဝ်ႈယေႇသု၊ သမ်ႉလၢတ်ႈတီႈၶဝ်ထႅင်ႈလႄႈဝႃႈ၊ “ လုၵ်ႈၵူၼ်း၊ တၵ်းလႆႈၶၢမ်ႇတုၵ်ႉၶႃႉဝူၺ်ႇတၼႃႇၼမ်ၼႃႇ၊တၵ်းလႆႈၶၢမ်ႇတၢင်းဢၼ်ပႄႇပႅတ်ႈသေၵႃႈၼႂ်းၵူၼ်းဢၼ်ပဵၼ်ၵႄႇပဵၼ်ႁူဝ်၊ဢိၵ်ႇတင်းယဵၸ်ႈပရေႃးႁဵၵ်ႈ လူင်တင်းလၢႆ တင်းသြႃႇမေႃၵျၢမ်းထမ်ႇမႃႉတင်းလၢႆဢေႃႈ။ တၵ်းလႆႈၶၢမ်ႇတၢင်းဢၼ်ဢဝ်တၢႆလူးၵွၼ်ႇဢေႃႈ။ ၼႂ်းဝႃႈၼၼ်သေၵေႃႈၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉတၵ်းလုၵ်ႉၶိုၼ်းလိပ်းဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၸင်ႇလၢတ်ႈတီႈၵူၼ်းတင်းလၢႆလႄႈဝႃႈ၊ “ပေႃးသေၵေႃႉသေၵူၼ်းၶႂ်ႈၸွမ်းၵဝ်ၸိုင်၊မၼ်းတၵ်းလႆႈပႄႇပႅတ်ႈဢၵျူဝ်းတူဝ်ၸဝ်ႈၵဝ်ႇသေလႄႈမႅၵ်ႇသဝ်မႆႉဝႃးမိုဝ်းတူဝ်ၸဝ်ႈၵဝ်ႇၵူႈမိူဝ်ႈၵူႈဝၼ်းလႄႈၸွမ်းၵဝ်ဢေႃႈ။-
လွင်ႈမၼ်းၸမ်ႉ၊ၽူႈလႂ်သေဢမ်ႇဝႃႈ၊ၵေႃႉဢၼ်ၶႂ်ႈၵႄႇသႄႇဢဝ်ဢသၢၵ်ႈတူဝ်ၸဝ်ႈၵဝ်ႇၼၼ်ႉၵေႃႉၼၼ်ႉတၵ်းသုမ်းဢသၢၵ်ႈလႄႈ ၽူႈလႂ်သေဢမ်ႇဝႃႈ၊ၵေႃႉဢၼ်သုမ်းဢသၢၵ်ႈတူဝ်ၸဝ်ႈၵဝ်ႇပုၼ်ႈဢၵျူဝ်းၵဝ်ၼၼ်ႉၵေႃႉၼၼ်ႉတၵ်းၵႄႇသႄႇဢဝ်ဢသၢၵ်ႈတူဝ်ၸဝ်ႈၵဝ်ႇဢေႃႈ။-
ၵေႃႉဢၼ်လႆႈဢုပ်ႉပိူင်ႇလေႃးၵႃႉတင်းသဵင်ႈတင်းလူင်လႄႈတူဝ်ၸဝ်ႈၵဝ်ႇသုမ်းၸိုင်၊ၵေႃႉၼၼ်ႉတေမီးဢၵျူဝ်းၵႃႈသင်။-
ပေႃးသေၵေႃႉသေၵူၼ်းလႆႈဢူၵ်းလႆႈဢၢႆၵွပ်ႈပိူဝ်ႈၵဝ်၊ဢိၵ်ႇတင်းၵွပ်ႈပိူဝ်ႈတြႃးၵဝ်ၸိုင်၊ လုၵ်ႈၵူၼ်း၊ တၵ်းဢူၵ်းဢၢႆၵွပ်ႈပိူဝ်ႈၵေႃႉၼၼ်ႉမိူဝ်ႈဢၼ်မၼ်းၸဝ်ႈပႃးတင်းမုၼ်ၽုင်းတူဝ်ၸဝ်ႈၵဝ်ႇ၊တင်းမုၼ်ၽုင်းပေႃႈၸဝ်ႈ၊ဢိၵ်ႇတင်းမုၼ်ၽုင်းတမၢၼ်ႇၵၢင်ႁၢဝ်ဢၼ်မူတ်းၸၢင်ႇတင်းလၢႆၸိူဝ်းၼၼ်ႉမႃးၼၼ်ႉဢေႃႈ။-
ၵဝ်ဝႃႈတီႈၸိုဝ်ႈၸႂ်ႈမၼ်းတီႈသူၸမ်ႉ၊သူၸိူဝ်းဢၼ်ၸုၵ်းယူႇၵႃႈတီႈၼႆႈၵမ်ႈၽွင်ႈၸူဝ်ႈဢၼ်ဢမ်ႇပႆႇလႆႈႁၼ်မိူင်းၽြႃးပဵၼ်ၸဝ်ႈၸိုင်၊တၵ်းဢမ်ႇပႆႇတၢႆ၊” ဝႃႈၼင်ႇၼႆဢေႃႈ။
ဝၢႆးသေ ၸဝ်ႈယေႇသု၊ လၢတ်ႈဝႃႈၸိူဝ်ႉၼင်ႇၼႆယဝ်ႉပႅတ်ႈဝၼ်းၼၼ်ႉၸိုင်၊ ၸဝ်ႈယေႇသု၊ ႁွင်ႉဢဝ် ပေႇတရု၊ယူဝ်းႁၢၼ်ႇ၊ ဢိၵ်ႇတင်း ယႃႇၵုပ်ႈ၊ လႄႈၶိုၼ်ႈၵႂႃႇၵႃႈၼိူဝ်လွႆႁႂ်ႈလႆႈသူးတွင်းဢေႃႈ။-
ၼႂ်းမိူဝ်ႈဢၼ်မၼ်းၸဝ်ႈယင်းတိုၵ်ႉသူးတွင်းယူႇၼၼ်ႉၸိုင်၊ၼႃႈမၼ်းၸဝ်ႈပႅၵ်ႇပိူင်ႈလၢၵ်ႇလၢႆးမႃးၼႃႇလူင်လၢင်လႄႈ ၶူဝ်းၼုင်ႈမၼ်းၸဝ်ႈၵေႃႈၽိူၵ်ႇၶၢဝ်ႁိူဝ်ႈႁိူင်းယူႇဢေႃႈ။-
မိူဝ်ႈၼၼ်ႉၵမ်းလဵဝ်ၵူၼ်းသွင်ၵေႃႉဢၼ်ပဵၼ် မူဝ်းသေႇ၊ ဢိၵ်ႇတင်း ဢေးလိယႃႉ၊ ပေႃႇမႃးလၢတ်ႈတေႃႇၵၼ်တင်းမၼ်းၸဝ်ႈဢေႃႈ။-
ၶဝ်သွင်ၵေႃႉၼၼ်ႉပႃးတင်းမုၼ်သရေႇသေလႄႈလၢတ်ႈၸႃတေႃႇ ၸဝ်ႈယေႇသု၊ လွင်ႈဢၼ်မၼ်းၸဝ်ႈၸမ်တၵ်းလႆႈႁဵတ်းၸွမ်းဢလူဝ်ႇၽြႃးပဵၼ်ၸဝ်ႈ၊ၼႂ်းတၢင်းဢၼ်လႆႈၶၢမ်ႇတၢႆၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉဢေႃႈ။-
ပေႇတရု၊ တင်းၵေႃႉသႄႈမၼ်းၸိူဝ်းၼၼ်ႉၼွၼ်းလပ်းယူႇလႄႈမိူဝ်ႈဢၼ်တိုၼ်ႇမႃးၼၼ်ႉလႆႈႁၼ်မုၼ်သရေႇမၼ်းၸဝ်ႈ၊ဢိၵ်ႇတင်းၵူၼ်းသွင်ၵေႃႉၸုၵ်းယူႇႁိမ်းမၼ်းၸဝ်ႈၼၼ်ႉဢေႃႈ။-
ယၢမ်းမိူဝ်ႈဢၼ်ၶဝ်သွင်ၵေႃႉတိုၵ်ႉတေယၢၼ်ဢွၵ်ႇသေၵႃႈတီႈ ၸဝ်ႈယေႇသု၊ ၵႂႃႇယူႇၼၼ်ႉၸိုင်၊ ပေႇတရု၊ လၢတ်ႈတီႈမၼ်းၸဝ်ႈလႄႈဝႃႈ၊ “ၸဝ်ႈႁဝ်း။ ဢၼ်ႁဝ်းၶႃႈမီးၵႃႈတီႈၼႆႈၼႆႉၸိုင်၊လီၼႃႇၶႃႈဢေႃႈ။ ႁဝ်းၶႃႈဢွၼ်ၵၼ်ႁဵတ်းသုမ်ႉသၢမ်လင်၊ပုၼ်ႈၸဝ်ႈႁဝ်းလင်ၼိုင်ႈ၊ပုၼ်ႈ မူဝ်းသေႇ၊ လင်ၼိုင်ႈ၊ဢိၵ်ႇတင်းပုၼ်ႈ ဢေးလိယႃႉ၊ လင်ၼိုင်ႈၵၼ်တႃႉႁဝ်း၊” ဝႃႈၼင်ႇၼႆယင်းဢမ်ႇပႆႇႁုတူဝ်လႄႈလၢတ်ႈဝႃႈၸိူဝ်ႉၼင်ႇၼႆဢေႃႈ။
ၼႂ်းမိူဝ်ႈဢၼ်မၼ်းယင်းတိုၵ်ႉလၢတ်ႈယူႇၼၼ်ႉ၊မွၵ်ႇၵုမ်ႈပေႃႇမႃးႁူမ်ႇသုမ်ႇၶဝ်ဝႆႉဢေႃႈ။ မိူဝ်ႈဢၼ်ၶဝ်လပ်ႉႁၢႆၵႂႃႇၵႃႈၼႂ်းငဝ်းႁူမ်ႈမွၵ်ႇၵုမ်ႈၼၼ်ႉၸိုင်၊ၶဝ်ဢွၼ်ၵၼ်ၵူဝ်ႁႄဢေႃႈ။-
မိူဝ်ႈၼၼ်ႉသဵင်ပေႃႇမႃးၵႃႈၼႂ်းမွၵ်ႇၵုမ်ႈၼၼ်ႉလႄႈဝႃႈ၊ “ၵေႃႉၼႆႉပဵၼ်လုၵ်ႈၵဝ်ဢၼ်ၵဝ်လိူၵ်ႈၵဵပ်းဢဝ်ဢေႃႈ။ ထွမ်ႇဢဝ်ၵႂၢမ်းမၼ်းတႃႉ၊” ဝႃႈၼင်ႇၼႆဢေႃႈ။
မိူဝ်ႈဢၼ်သဵင်ၼၼ်ႉလၢတ်ႈယဝ်ႉၸိုင်၊ ၸဝ်ႈယေႇသု၊ မီးယူႇပႃးလဵဝ်ၵူၺ်းယဝ်ႉဢေႃႈ။ ၼႂ်းၶိင်ႇမိူဝ်ႈဝၼ်းၸိူဝ်းၼၼ်ႉတပႄးၸဝ်ႈတင်းလၢႆ ယင်းဢမ်ႇလၢတ်ႈလွင်ႈဢၼ်ၶဝ်လႆႈႁၼ်လႆႈငိၼ်းၸိူဝ်းၼၼ်ႉၵႃႈတီႈၽူႈလႂ်သေၵေႃႉသေၵူၼ်းလႄႈယူႇဢေႃႈ။
ၼႂ်းဝၼ်းမိူဝ်ႈၽုၵ်ႈမိူဝ်ႈဢၼ် ၸဝ်ႈယေႇသု၊ တင်းတမၢၼ်ႇၸဝ်ႈသၢမ်ပႃးလူင်းလွႆမႃးၼၼ်ႉၸိုင်၊ၵူၼ်းၼမ်ၼႃႇမႃးႁပ်ႉႁူဝ်တၢင်းမၼ်းၸဝ်ႈဢေႃႈ။-
ၼႂ်းၶဝ်ၸိူဝ်းၼၼ်ႉၵူၼ်းၵေႃႉၼိုင်ႈႁွင်ႉသႅၼ်ႇလႄႈဝႃႈ၊ “သြႃႇၸဝ်ႈ။ ၵဝ်ၶႃႈလဝ်ႈယွၼ်းၸဝ်ႈႁဝ်း၊ၶႅၼ်းတေႃႈမႃးတူၺ်းပၼ်လုၵ်ႈၸၢႆးၵဝ်ၶႃႈ၊ဢၼ်ပဵၼ်လုၵ်ႈၸၢႆးၵေႃႉလဵဝ်ၵဝ်ၶႃႈသေၵမ်းၶႃႈ။-
ၽီႁၢႆႉၽၢမ်းသႂ်ႇမၼ်းသေလႄႈၸၢင်ႈၵိဝ်သႅၼ်ႇၵမ်းလဵဝ်လႄႈ ၸၵ်ႉၵႂႃႇတေႃႇထိုင်ႁွတ်ႈထၢၼ်ႈပေႃးပူၵ်ႇၼမ်ႉလၢႆးဢွၵ်ႇသူပ်းမႃးဢေႃႈ။ ၸၢင်ႈႁဵတ်းႁႂ်ႈလုၵ်ႈဢွၼ်ႇႁိူဝ်ႉဢူၼ်ႈၼႃႇလူင်လၢင်ဢေႃႈ။ ၽီၼၼ်ႉဢွၵ်ႇယၢပ်ႇဢွၵ်ႇယဵၼ်းၼႃႇၶႃႈဢေႃႈ။-
ၵဝ်ၶႃႈလဝ်ႈယွၼ်းႁႂ်ႈတပႄးၸဝ်ႈႁဝ်းၶဝ်လိုပ်ႈႁေႃႈပႅတ်ႈသေၵေႃႈ၊ၶဝ်ဢမ်ႇပွင်ပဵၼ်လႆႈၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ၵူၼ်းမဵဝ်းဢၼ်ဢမ်ႇမီးတၢင်းယုမ်ႇမၢတ်ႈလႄႈၸၢင်ႈမီးၸႂ်ဢၼ်ဢမ်ႇသိုဝ်ႈဢမ်ႇယူဝ်းၶဝ်႟။ ၵဝ်တၵ်းလႆႈယူႇလူၺ်ႈသူႁိုင်ထၼ်ႇႁိုဝ်။ ၵဝ်တၵ်းလႆႈယိူၼ်ႉၶၢမ်ႇသူႁိုင်ထၼ်ႇႁိုဝ်၊” ဝႃႈၼင်ႇၼႆသေယဝ်ႉ၊သမ်ႉလၢတ်ႈတီႈၵေႃႉၼၼ်ႉလႄႈဝႃႈ၊ “ဢဝ်လုၵ်ႈၸၢႆးမႂ်းမႃးၵႃႈတီႈၼႆႈတႃႉ၊” ဝႃႈၼင်ႇၼႆဢေႃႈ။
ၽွင်းယၢမ်းဢၼ်လုၵ်ႈဢွၼ်ႇၼၼ်ႉပႆမႃးယူႇၼၼ်ႉၸိုင်၊ၽီႁၢႆႉၼၼ်ႉႁႂ်ႈမၼ်းလူမ်ႉတူၵ်းၵႃႈၼိူဝ်လိၼ်လႄႈၸၵ်ႉၵႂႃႇဢေႃႈ။ ၸဝ်ႈယေႇသု၊ ပူင်ဢမိင်ႉတီႈၽီႁၢႆႉၼၼ်ႉသေယဝ်ႉ၊ႁႂ်ႈလုၵ်ႈဢွၼ်ႇၼၼ်ႉလီမႃးၶိုၼ်းယဝ်ႉၸင်ႇ၊ဢၢပ်ႈပၼ်တီႈပေႃႈမၼ်းသေဢေႃႈ။-
ၵူၼ်းတင်းသဵင်ႈတင်းလူင်ဢွၼ်ၵၼ်ဢၢမ်းမႁႃႇတၼ်းၶူဝ်းၽြႃးပဵၼ်ၸဝ်ႈၼၼ်ႉဢေႃႈ။ ၼႂ်းမိူဝ်ႈဢၼ်ၵူၼ်းတင်းလၢႆဢုပ်ႇၵုမ်လၢတ်ႈၸႃလူၺ်ႈလွင်ႈတၢင်းဢၼ် ၸဝ်ႈယေႇသု၊ ႁဵတ်းယဝ်ႉၵူႈၸိူဝ်ႉၵူႈပိူင်ယူႇၼၼ်ႉၸိုင်၊မၼ်းၸဝ်ႈသင်ႇသွၼ်တီႈတပႄးၸဝ်ႈၸိူဝ်းၼၼ်ႉလႄႈဝႃႈ၊-
“ယႃႇပေလူင်လိုမ်းၶေႃႈၵႂၢမ်းဢၼ်ၵဝ်တေလၢတ်ႈသူၼႆႉ။ လုၵ်ႈၵူၼ်း၊ တၵ်းလႆႈၶၢမ်ႇတၢင်းဢၼ်ဢၢပ်ႈၵႃႈၼႂ်းမိုဝ်းၵူၼ်းတင်းလၢႆယဝ်ႉ၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊ဢထိၵ်ႈပႄႇမၼ်းသိူင်ႇဝႆႉဢမ်ဝႆႉၼၼ်ႉလႄႈ တပႄးၸဝ်ႈၸိူဝ်းၼၼ်ႉဢမ်ႇႁုထွမ်ႇ။ ၼႂ်းဝႃႈၼၼ်သေၵေႃႈ၊ၶဝ်ယင်းဢမ်ႇႁတ်းလဝ်ႈႁတ်းထၢမ်လွင်ႈတၢင်းၼၼ်ႉလႄႈယူႇဢေႃႈ။
တၢင်းဢၼ်တွပ်ႇထဵင်ၵၼ်လူၺ်ႈလွင်ႈဢၼ်ၽူႈလႂ်ယဵင်ႈၶႅၼ်းယႂ်ႇမျၢတ်ႈၼႃႇသေပိူၼ်ႈၼၼ်ႉ၊ပေႃႇပဵၼ်မႃးၵႃႈၼႂ်းတမၢၼ်ႇၸဝ်ႈတင်းလၢႆဢေႃႈ။-
မိူဝ်ႈဢၼ် ၸဝ်ႈယေႇသု၊ ႁုလွင်ႈတၢင်းဢၼ်ၶဝ်ၵျၢမ်ႇပွင်ယူႇၼၼ်ႉသေယဝ်ႉ၊ဢဝ်လုၵ်ႈဢွၼ်ႇၵေႃႉၼိုင်ႈမႃးၸုၵ်းၽႃၶၢင်ႈမၼ်းၸဝ်ႈသေလႄႈ၊-
လၢတ်ႈတီႈၶဝ်လႄႈဝႃႈ၊ “ၽူႈလႂ်သေဢမ်ႇဝႃႈ၊ၵေႃႉဢၼ်ႁပ်ႉတုင်းဢဝ်လုၵ်ႈဢွၼ်ႇၸိူဝ်ႉၼင်ႇၼႆၼႆႉၵႃႈၼႂ်းၸိုဝ်ႈသဵင်ၵဝ်ၸိုင်၊ပဵၼ်ၵေႃႉဢၼ်ႁပ်ႉတုင်းဢဝ်ၵဝ်ဢေႃႈ။ ၵေႃႉဢၼ်ႁပ်ႉတုင်းဢဝ်ၵဝ်ၼၼ်ႉၵေႃႈ ႁပ်ႉတုင်းဢဝ်ၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉဢေႃႈ။ လွင်ႈမၼ်းၸမ်ႉ၊ၵေႃႉဢၼ်လဵၵ်ႉသေပိူၼ်ႈၵႃႈၼႂ်းသူၼႆႉပဵၼ်ၵေႃႉဢၼ်ယႂ်ႇမျၢတ်ႈသေပိူၼ်ႈဢေႃႈ၊” ဝႃႈၼင်ႇၼႆဢေႃႈ။
ယူဝ်းႁၢၼ်ႇ၊ လဝ်ႈလၢတ်ႈလႄႈဝႃႈ၊ “ၸဝ်ႈႁဝ်း။ ႁဝ်းၶႃႈထူပ်းႁၼ်ၵူၼ်းၵေႃႉၼိုင်ႈဢိင်ပိုင်ႈၸိုဝ်ႈသဵင်ၸဝ်ႈႁဝ်းလႄႈႁေႃႈၽီႁၢႆႉဢွၵ်ႇပႅတ်ႈယူႇၶႃႈဢေႃႈ။ ၵွပ်ႈပိူဝ်ႈမၼ်းဢမ်ႇၸႂ်ႈၵူၼ်းႁဝ်းလႄႈႁဝ်းၶႃႈႁၢမ်ႈတၢပ်ႈမၼ်းယႃႇႁႂ်ႈမၼ်းႁဵတ်းၸိူဝ်ႉၼင်ႇၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈတီႈမၼ်းလႄႈဝႃႈ၊ “ယႃႇမၼ်းတႃႉ။ ၽူႈလႂ်သေဢမ်ႇဝႃႈ၊ၵေႃႉဢၼ်ဢမ်ႇၶတ်းၵၼ်တင်းသူၼၼ်ႉပဵၼ်ၵူၼ်းသူဢေႃႈ၊” ဝႃႈၼင်ႇၼႆဢေႃႈ။
ၸွမ်းၼင်ႇၶိင်ႇဢၼ် ၸဝ်ႈယေႇသု၊ တၵ်းလႆႈၶၢမ်ႇတၢင်းဢၼ်ဢဝ်ၶိုၼ်ႈၵႂႃႇၵႃႈၼိူဝ်မိူင်းၵၢင်ႁၢဝ်ၼၼ်ႉၸမ်ႁွတ်ႈထိုင်မႃးၼၼ်ႉၸိုင်၊မၼ်းၸဝ်ႈတႅပ်းတတ်းၸႂ်တူဝ်ၸဝ်ႈၵဝ်ႇသေလႄႈၵႂႃႇၸွမ်းသဵၼ်ႈတၢင်းဢၼ်ၵႂႃႇၵႃႈတီႈဝဵင်း ယေႇရုသလႅမ်ႇ၊ ဢေႃႈ။-
မၼ်းၸဝ်ႈပွႆႇၸႂ်ႉၵူၼ်းၵႂႃႇဢွၼ်တၢင်းတီႈဝၢၼ်ႈၵူၼ်းမဵဝ်း သမႃႇရိ၊ ၶဝ်ႁႂ်ႈလႆႈမႄးႁႅၼ်းၵူႈၸိူဝ်ႉၵူႈပိူင်ပုၼ်ႈမၼ်းၸဝ်ႈဢေႃႈ။-
ၵူၺ်းၵႃႈ၊ပိူဝ်ႈဢၼ်မၼ်းၸဝ်ႈၵႂႃႇၸွမ်းတၢင်းၸူးဝဵင်း ယေႇရုသလႅမ်ႇ၊ ၼၼ်ႉထၢင်ႇသႃးဝႆႉလႄႈၵူၼ်းဝၢၼ်ႈၸိူဝ်းၼၼ်ႉဢမ်ႇႁပ်ႉၶၢမ်ႇဢဝ်မၼ်းၸဝ်ႈ။-
မိူဝ်ႈဢၼ်တပႄးၸဝ်ႈဢၼ်ပဵၼ် ယႃႇၵုပ်ႈ၊ ဢိၵ်ႇတင်း ယူဝ်းႁၢၼ်ႇ၊ လႆႈႁၼ်လွင်ႈတၢင်းၼႆႉၼၼ်ႉလႄႈလၢတ်ႈဝႃႈ၊ “ၸဝ်ႈႁဝ်း။ ၸွင်ႇၸဝ်ႈႁဝ်းၶႂ်ႈႁႂ်ႈႁဝ်းၶႃႈယွၼ်းႁႂ်ႈၽႆးတူၵ်းသေၵႃႈၼိူဝ်ၵၢင်ႁၢဝ်လူင်းမႃးမႆႈပႅတ်ႈၶဝ် [မိူၼ်ၸိူဝ်ႉၼင်ႇ ဢေးလိယႃႉ၊ ႁဵတ်းၼၼ်ႉ] ၶႃႈႁိုဝ်း၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ဝၢႆႇတူၺ်းၶဝ်သွင်ၵေႃႉၼၼ်ႉသေလႄႈ သင်ႇသွၼ်ပၼ်သေယဝ်ႉ၊ [လႄႈဝႃႈ၊ “သူဢမ်ႇႁုလွင်ႈဢၼ်သူၸၢပ်ႈသႅင်ႇၵၼ်တင်းၸဝ်ႈဝိၺိၺ်ႇပႃးလႂ်ၼၼ်ႉ။ လွင်ႈမၼ်းၸမ်ႉ၊ လုၵ်ႈၵူၼ်း၊ မႃးႁႂ်ႈလႆႈယႃႉဢသၢၵ်ႈၵူၼ်းဢမ်ႇၸႂ်ႈ။ မႃးႁႂ်ႈလႆႈၵႄႇသႄႇၶျွတ်ႈဢဝ်ဢေႃႈ၊” ဝႃႈၼင်ႇၼႆ။]-
ၶဝ်ဢွၼ်ၵၼ်ဢွၵ်ႇၵႂႃႇၸူးတၢင်ႇဝၢၼ်ႈသေဢေႃႈ။
ၼႂ်းမိူဝ်ႈဢၼ်ၶဝ်ယင်းတိုၵ်ႉၵႂႃႇယူႇၼၼ်ႉၵူၼ်းၵေႃႉၼိုင်ႈလဝ်ႈလၢတ်ႈတီႈ ၸဝ်ႈယေႇသု၊ လႄႈဝႃႈ၊ “ၵဝ်ၶႃႈတၵ်းၵႂႃႇၸွမ်းတီႈဢၼ်ၸဝ်ႈႁဝ်းၵႂႃႇၼၼ်ႉၶႃႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈတီႈမၼ်းလႄႈဝႃႈ၊ “မႃလိၼ်တင်းလၢႆယင်းမီးႁူးဢေႃႈ။ ၼူၵ်ႉတင်းလၢႆမီးႁင်းဢေႃႈ။ ၵူၺ်းၵႃႈ၊ လုၵ်ႈၵူၼ်း၊ ဢမ်ႇမီးတီႈတၵ်းဝၢင်းႁူဝ်လႄႈလိုဝ်ႈသဝ်း၊” ဝႃႈၼင်ႇၼႆဢေႃႈ။
မၼ်းၸဝ်ႈလၢတ်ႈတီႈတၢင်ႇၵေႃႉလႄႈဝႃႈ၊ “မႃးၸွမ်းၵဝ်တႃႉ၊” ဝႃႈၼင်ႇၼႆလႄႈၵေႃႉၼၼ်ႉၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈတီႈၶႃႈ။ ႁႂ်ႈၵဝ်ၶႃႈလႆႈမိူဝ်းသၢင်းၵျူဝ်ႇပေႃႈၵဝ်ၶႃႈလူးၵွၼ်ႇၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ပွႆႇႁႂ်ႈၵူၼ်းတၢႆတင်းလၢႆသၢင်းၵျူဝ်ႇၵူၼ်းတၢႆၶဝ်တႃႉ။ မႂ်းၸမ်ႉ၊ၵႂႃႇႁေႃးလၢတ်ႈတြႃးလွင်ႈမိူင်းၽြႃးပဵၼ်ၸဝ်ႈတႃႉ၊” ဝႃႈၼင်ႇၼႆဢေႃႈ။
ၵူၼ်းတၢင်ႇၵေႃႉသမ်ႉလဝ်ႈလၢတ်ႈလႄႈဝႃႈ၊ “ၸဝ်ႈတီႈၶႃႈ။ ၵဝ်ၶႃႈတၵ်းၵႂႃႇၸွမ်းၸဝ်ႈႁဝ်းဢေႃႈ။ ၵူၺ်းၵႃႈ၊ပၼ်ဢၶႂၢင်ႉႁႂ်ႈၵဝ်ၶႃႈလႆႈမိူဝ်းၵႂႃႇသင်ႇလၢတ်ႈၵူၼ်းႁိူၼ်းၵဝ်ၶႃႈဢွၼ်တၢင်းလူးၵွၼ်ႇၶႃႈ၊” ဝႃႈၼင်ႇၼႆလႄႈ။
မၼ်းၸဝ်ႈၶိုၼ်းလၢတ်ႈတီႈၵေႃႉၼၼ်ႉလႄႈဝႃႈ၊ “ၽူႈလႂ်သေဢမ်ႇဝႃႈ၊ၵေႃႉဢၼ်ယိပ်းၵၼ်းထႆယူႇလႄႈဝၢႆႇတူၺ်းၶိုၼ်းတၢင်းလင်ၼၼ်ႉဢမ်ႇထိူၵ်ႈဢမ်ႇတၢၼ်ႇၵၼ်တင်းမိူင်းၽြႃးပဵၼ်ၸဝ်ႈ၊” ဝႃႈၼင်ႇၼႆဢေႃႈ။
လိုၼ်းၼၼ်ႉ၊ ၸဝ်ႈယေႇသု၊ လိူၵ်ႈၵဵပ်းဢဝ်တပႄးၸဝ်ႈတၢင်ႇၵေႃႉထႅင်ႈၸဵတ်းသိပ်းပၢႆသွင်ၵေႃႉ သေယဝ်ႉ၊ပွႆႇၸႂ်ႉၶဝ်ယေႈၸုမ်းသွင်ၵေႃႉသွင်ၵေႃႉ၊ၵႂႃႇဢွၼ်တၢင်းမၼ်းၸဝ်ႈၵႃႈတီႈဝၢၼ်ႈဝဵင်းၸိူဝ်းဢၼ်မၼ်းၸဝ်ႈတေၵႂႃႇၵူႈတီႈၵူႈလႅၼ်ၼၼ်ႉဢေႃႈ။-
မၼ်းၸဝ်ႈသင်ႇလၢတ်ႈတီႈၶဝ်လႄႈဝႃႈၸမ်ႉ၊ “ၶဝ်ႈဢၼ်လီပၢတ်ႇမီးၼမ်ၼႃႇဢေႃႈ။ ၵူၺ်းၵႃႈ၊ၵူၼ်းပၢတ်ႇၶဝ်ႈမီးၵေႇၼႃႇဢေႃႈ။ ပိူဝ်ႈၼႆလႄႈလဝ်ႈယွၼ်းတီႈၸဝ်ႈၶဝ်ႈႁႂ်ႈပွႆႇၸႂ်ႉၵူၼ်းပၢတ်ႈၶဝ်ႈမႃးၼမ်ၼမ်တႃႉ။-
ၵႂႃႇတႃႉ။ ၵဝ်ပွႆႇၸႂ်ႉသူၵႂႃႇမိူၼ်ၸိူဝ်ႉၼင်ႇၽုင်သူဝ်းၶဝ်ႈၵႃႈၼႂ်းၽုင်မႃၼႆးၼၼ်ႉဢေႃႈ။-
ယႃႇပေပႃးထူင်ငိုၼ်း၊ထူင်ပႃး၊ၶႅပ်းတိၼ်သေၸိူဝ်ႉသေမဵဝ်း။ ယႃႇပေၵိုတ်းလႄႈတၵ်ႉလၢတ်ႈတေႃႇၽူႈလႂ်သေၵေႃႉသေၵူၼ်းၸွမ်းတႃႈၸွမ်းတၢင်းသူၼၼ်ႉ။-
မိူဝ်ႈဢၼ်ၶဝ်ႈၵႃႈၼႂ်းႁိူၼ်းလႂ်သေဢမ်ႇဝႃႈ၊ ‘ႁႂ်ႈႁိူၼ်းၼၼ်ႉမီးမၢင်ႇၵလႃႇသေၵမ်းလူၺ်ႈ၊’ ဝႃႈၼႆသူင်ႇပၼ်မႅတ်ႈတႃႇဢွၼ်တၢင်းတႃႉ။-
ပေႃးၵူၼ်းဢၼ်မီးၵႃႈၼႂ်းႁိူၼ်းၼၼ်ႉပဵၼ်ၵေႃႉဢၼ်ပၼ်တၢင်းၼိမ်တၢင်းလီၸိုင်၊မၢင်ႇၵလႃႇဢၼ်သူပၼ်တီႈမၼ်းၼၼ်ႉ၊တၵ်းတႄႇယူႇၼိူဝ်မၼ်းဢေႃႈ။ ပေႃးမၼ်းယင်းဢမ်ႇပဵၼ်ၵူၼ်းၸိူဝ်ႉၼင်ႇၼၼ်ၸိုင်၊မၢင်ႇၵလႃႇၼၼ်ႉတၵ်းၶိုၼ်းမႃးၸူးသူဢေႃႈ။-
ယူႇသဝ်းၵႃႈၼႂ်းႁိူၼ်းဢၼ်ႁပ်ႉတွၼ်ႈဢဝ်သူၼၼ်ႉလႄႈ ၵိၼ်တၢင်းၵိၼ်ဢၼ်ၸဝ်ႈႁိူၼ်းလဵင်ႉလူသူယူႇတႃႉ။ လွင်ႈမၼ်းၸမ်ႉ၊ၵူၼ်းႁဵတ်းၵၢၼ်ၼၼ်ႉထိူၵ်ႈၶၢမ်ႇဢဝ်ၵႃႈႁႅင်းဢၼ်မၼ်းႁဵတ်းၼၼ်ႉဢေႃႈ။ ယႃႇပေလႄႇၵႂႃႇႁိူၼ်းၼိုင်ႈယဝ်ႉႁိူၼ်းၼိုင်ႈ။-
တီႈၼႂ်းဝဵင်းလႂ်သေဢမ်ႇဝႃႈ၊မိူဝ်ႈဢၼ်သူၶဝ်ႈၵႂႃႇလႄႈၶဝ်ႁပ်ႉတွၼ်ႈဢဝ်သူၼၼ်ႉၵိၼ်တၢင်းၵိၼ်ဢၼ်ၶဝ်တမ်းပၼ်တီႈၽၢႆႇၼႃႈသူၼၼ်ႉတႃႉ။-
ႁဵတ်းႁႂ်ႈယေႃးၵႃႇၵူၼ်းၶႆႈၵူၼ်းပဵၼ်ၼႂ်းဝဵင်းၼၼ်ႉၸိုၼ်ႈႁၢႆသေယဝ်ႉ၊ႁေႃးလၢတ်ႈတီႈၵူၼ်းတင်းလၢႆလႄႈဝႃႈ၊ ‘မိူင်းၽြႃးပဵၼ်ၸဝ်ႈႁွတ်ႈမႃးၸမ်ႁိမ်းသူယဝ်ႉ၊’ ဝႃႈၼင်ႇၼႆတႃႉ။-
ၵူၺ်းၵႃႈ၊တီႈၼႂ်းဝဵင်းလႂ်သေဢမ်ႇဝႃႈ၊မိူဝ်ႈဢၼ်သူၶဝ်ႈၵႂႃႇလႄႈၶဝ်ဢမ်ႇတွၼ်ႈႁပ်ႉဢဝ်သူၼၼ်ႉၸိုင်၊သူဢွၵ်ႇၵႂႃႇၵႃႈတီႈၵၢင်တၢင်းဝဵင်းၼၼ်ႉသေယဝ်ႉ၊-
လၢတ်ႈလႄႈဝႃႈ၊ ‘မုၼ်ႈလိၼ်ဝဵင်းသူဢၼ်ၸပ်းတိၼ်ႁဝ်းၼႆႉ တၵ်းသၼ်ႇၽႅတ်းပႅတ်ႈႁႂ်ႈလႆႈပဵၼ်တၢင်းဢၼ်ၶတ်းၵၼ်တင်းသူဢေႃႈ။ ၵူၺ်းၵႃႈ၊မိူင်းၽြႃးပဵၼ်ၸဝ်ႈႁွတ်ႈမႃးၸမ်ႁိမ်းသူယဝ်ႉၼၼ်ႉၶုၵ်းၸႂ်လႆႈတႃႉ၊’ ဝႃႈၼႆလၢတ်ႈတီႈၶဝ်တႃႉ။-
ၵဝ်ဝႃႈတီႈသူၸမ်ႉ၊ၼႂ်းဝၼ်းသုတ်းပုၼ်ႉၼၼ်ႉဝဵင်းၼၼ်ႉယဵင်ႈၶႅၼ်းတၵ်းလႆႈၶၢမ်ႇၼႃႇသေဝဵင်း သေႃးတုမ်ႇ၊ ဢေႃႈ။
“ဝဵင်း ၶေႃးရၸႅၼ်ႇ၊ ႟။ မႂ်းမီးဢႃႉမၢင်ႇၵလႃႇဢေႃႈ။ ဝဵင်း ပႅတ်ႉၸေးတႃႉ၊ ႟။ မႂ်းမီးဢႃႉမၢင်ႇၵလႃႇဢေႃႈ။ တၼ်းၶူဝ်းမဵဝ်းလၢၵ်ႇလၢႆးဢၼ်ၵဝ်လႆႈႁဵတ်းၼႄယဝ်ႉၼမ်ၼႃႇတီႈမႂ်းၼႆႉ၊သင်ၵဝ်လႆႈႁဵတ်းၼႄတီႈဝဵင်း တုရု၊ တင်းဝဵင်း ၸိတုၼ်ႇ၊ ၸိုင်၊ၵူၼ်းတင်းသွင်ဝဵင်းၼၼ်ႉၸၢင်ႈတၵ်းၶုၵ်းၸႂ်လႆႈမႆႈၸႂ်ဢပျတ်ႈသေ၊တေပိၼ်ႇၸႂ်မႃးလႄႈၼုင်ႈႁူမ်ႇၼင်ပေႃသေၼင်ႈယူႇၵႃႈၼိူဝ်ၽုၼ်ႇတဝ်ႈမႃးႁိုင်ၼႃႇၼၼ်ႉယဝ်ႉ။-
ၼႂ်းဝၼ်းၸီႇယၢင်ႇတြႃးၼၼ်ႉသူတေလႆႈၶၢမ်ႇဝူၺ်ႇတၼႃႇ၊ၼႃႇသေဝဵင်း တုရု၊ တင်းဝဵင်း ၸိတုမ်ႇ၊ ဢေႃႈ။-
ဝဵင်း ၵပိူဝ်ႇၼေႇဢုမ်ႇ၊ ႟။ မႂ်းၶႂ်ႈယုၵ်ႉယွင်ႈတူဝ်မႂ်းတေႃႇႁွတ်ႈထိုင်ၽႃႉၵၢင်ႁၢဝ်ပုၼ်ႉႁိုဝ်း။ မႂ်းတၵ်းလႆႈၶၢမ်ႇတၢင်းဢၼ်ထိမ်ႈတူၵ်းတေႃႇထိုင်ႁွတ်ႈမိူင်းမရၼႃႉပုၼ်ႉဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈသမ်ႉလၢတ်ႈတီႈတပႄးၸဝ်ႈၸိူဝ်းၼၼ်ႉလႄႈဝႃႈ၊ “ၽူႈလႂ်သေဢမ်ႇဝႃႈ၊ၵေႃႉဢၼ်ထွမ်ႇဢဝ်ၵႂၢမ်းသူၼၼ်ႉထွမ်ႇဢဝ်ၵႂၢမ်းၵဝ်ဢေႃႈ။ ၵေႃႉဢၼ်ပႄႇပႅတ်ႈသူၼၼ်ႉပႄႇပႅတ်ႈၵဝ်ဢေႃႈ။ ၵေႃႉဢၼ်ပႄႇပႅတ်ႈၵဝ်ၼၼ်ႉပႄႇပႅတ်ႈၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉဢေႃႈ၊” ဝႃႈၼင်ႇၼႆဢေႃႈ။
တပႄးၸဝ်ႈၸဵတ်းသိပ်းသွင်ၵေႃႉၼၼ်ႉဢွၼ်ၵၼ်ပွၵ်ႈၶိုၼ်းမႃးၸူမ်းၸူမ်းသိူဝ်းသိူဝ်းလႄႈလဝ်ႈလၢတ်ႈဝႃႈ၊ “ၸဝ်ႈႁဝ်း၊ၵွပ်ႈပိူဝ်ႈၸိုဝ်ႈသဵင်ၸဝ်ႈႁဝ်းၼၼ်ႉလႄႈၽီႁၢႆႉတင်းလၢႆလႂ်ၵေႃႈယင်းလႆႈထွမ်ႇဢဝ်ဢမိင်ႉႁဝ်းၶႃႈၶႃႈဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၵေႃႈလၢတ်ႈတီႈၶဝ်လႄႈဝႃႈ၊ “ၵဝ်ႁၼ်ၸႃႇတၢၼ်ႇလုၵ်ႉၵႃႈၼိူဝ်ၵၢင်ႁၢဝ်တူၵ်းလူင်းမႃးမိူၼ်ၸိူဝ်ႉၼင်ႇၽႃႉမႅပ်ႈဢေႃႈ။-
ထွမ်ႇတႃႉ။ ၵဝ်ပၼ်ဢၶႂၢင်ႉဢႃႇၼႃႇဢၼ်ပႄႉဢၼ်ၼႅင်ႇငူးႁဝ်ႇ၊ဢိၵ်ႇတင်းမႅင်းငေႃးလႂ်၊ဢိၵ်ႇတင်းဢႃႇၼႃႇဢၼ်ပႄႉၼႅင်ႇရၢၼ်ႇသူႇတင်းလၢႆၼၼ်ႉတီႈသူယဝ်ႉ။ ၽေးဢၼ်လႂ်ၵေႃႈဢမ်ႇလႆႈတိူဝ်ႉလႆႈထုၵ်ႇသူ။-
ၼႂ်းဝႃႈၼၼ်သေၵေႃႈ၊ယႃႇပေမီးတၢင်းသိူဝ်းပျေႃႇ၊ၵွပ်ႈပိူဝ်ႈသူပႄႉၼႅင်ႇၽီႁၢႆႉတင်းလၢႆၼၼ်ႉ။ သိူဝ်းပျေႃႇလူၺ်ႈလွင်ႈဢၼ်ၸိုဝ်ႈသူလႆႈတႅမ်ႈပႃးၼႂ်းၸရၢင်းမိူင်းၵၢင်ႁၢဝ်ၼၼ်ႉတႃႉ၊” ဝႃႈၼင်ႇၼႆဢေႃႈ။
ၽွင်းယၢမ်းၼၼ်ႉ ၸဝ်ႈယေႇသု၊ မီးႁူဝ်ၸႂ်ဢၼ်ၸူမ်းသိူဝ်းၼႂ်းဝိၺိၺ်ႇဢၼ်မူတ်းၸၢင်ႇလႄႈလၢတ်ႈဝႃႈ၊ “ဢူဝ်းပေႃႈ။ ၸဝ်ႈၽုင်ႇၵၢင်ႁၢဝ်တင်းလိၼ်မိူင်းတီႈၶႃႈ။ ၶႃႈၸဝ်ႈတၢင်ႇၵျေးၸူးတီႈၸဝ်ႈႁဝ်း၊ပိူဝ်ႈဢၼ်ၸဝ်ႈႁဝ်းဢဝ်ၶိူင်ႈပိူင်ဢၼ်သိူင်ႇဝႆႉလပ်ႉဝႆႉတီႈၵူၼ်းႁုၵူၼ်းၸႅင်ႈ၊ဢိၵ်ႇတင်းတီႈၵူၼ်းလၵ်းၵူၼ်းလႅမ်ၸိူဝ်းၼၼ်ႉၽုၺ်ႇၼႄႁႂ်ႈၵူၼ်းဢွၼ်ႇလႆႈႁၼ်ၼၼ်ႉဢေႃႈ။ ၸႂ်ႈတႄႉတီႈၶႃႈယဝ်ႉ၊ပေႃႈ။ လွင်ႈတၢင်းၼႆႉ၊ပဵၼ်ၸွမ်းၵႃႈၼင်ႇဢလူဝ်ႇၸဝ်ႈမီးၼၼ်ႉတီႈၶႃႈယဝ်ႉ။
“ပေႃႈၸဝ်ႈၵဝ်ၶႃႈဢဝ်ၵႃႈမီးတင်းသဵင်ႈတင်းလူင်ဢၢပ်ႈပၼ်တီႈၵဝ်ၶႃႈယဝ်ႉ။ လုၵ်ႈၸဝ်ႈပဵၼ်ၽူႈလႂ်ဝႃႈၼႆ၊လိူဝ်သေပေႃႈၸဝ်ႈၵူၺ်းၽူႈလႂ်သေၵေႃႉသေၵူၼ်းဢမ်ႇႁု။ ပေႃႈၸဝ်ႈပဵၼ်ၽူႈလႂ်ဝႃႈၼႆ၊လိူဝ်သေလုၵ်ႈၸဝ်ႈဢိၵ်ႇတင်းၵေႃႉဢၼ်လုၵ်ႈၸဝ်ႈၶႂ်ႈႁႂ်ႈႁုၼၼ်ႉၵူၺ်း၊ၽူႈလႂ်သေၵေႃႉသေၵူၼ်းဢမ်ႇႁု၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊မၼ်းၸဝ်ႈဝၢႆႇတူၺ်းတီႈတပႄးၸဝ်ႈတင်းလၢႆသေလႄႈလွမ်လၢတ်ႈတီႈၶဝ်တဵတ်ႇတဵတ်ႇလႄႈဝႃႈ၊ “ၸိူဝ်းသူဢၼ်လႆႈႁၼ်ၵႃႈဢၼ်သူႁၼ်တင်းသဵင်ႈတင်းလူင်ၼႆႉသူမီးမၢင်ႇၵလႃႇဢေႃႈ။-
ၵဝ်ဝႃႈတီႈသူၸမ်ႉ၊လွင်ႈဢၼ်သူလႆႈႁၼ်ၸိူဝ်းၼႆႉပရေႃးၽႅတ်ႈ ၼမ်ၼႃႇတင်းၶုၼ်ႁေႃၶမ်းတင်းလၢႆၶႂ်ႈႁၼ်သေၵေႃႈဢမ်ႇလႆႈႁၼ်။ လွင်ႈတၢင်းဢၼ်သူလႆႈငိၼ်းၼၼ်ႉၶဝ်ၶႂ်ႈငိၼ်းသေၵေႃႈဢမ်ႇလႆႈငိၼ်း၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊သြႃႇမေႃၵျၢမ်းထမ်ႇမႃႉၵေႃႉၼိုင်ႈ၊ၼင်ႇႁိုဝ်တၵ်းလႆႈၵၢင်ဢဝ်ၵႂၢမ်း ၸဝ်ႈယေႇသု၊ ၸိုင်၊လုၵ်ႉၸုၵ်းလႄႈလဝ်ႈထၢမ်ဝႃႈ၊ “သြႃႇၸဝ်ႈ။ ၼင်ႇႁိုဝ်ၵဝ်ၶႃႈတေလႆႈဢသၢၵ်ႈထႃႇဝရႃႉၸိုင်၊ၵဝ်ၶႃႈတေလႆႈႁဵတ်းၸိူဝ်ႉၼင်ႇႁိုဝ်ၶႃႈ၊” ဝႃႈၼင်ႇၼႆလႄႈ။
မၼ်းၸဝ်ႈၶိုၼ်းထၢမ်လႄႈဝႃႈ၊ “ၼႂ်းၵျၢမ်းလိၵ်ႈဝႃႈဝႆႉၸိူဝ်ႉႁိုဝ်။ မႂ်းၽတ်းဢၢၼ်ႇမႅၼ်ႈၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ၵေႃႉၼၼ်ႉၶိုၼ်းလဝ်ႈလၢတ်ႈလႄႈဝႃႈ၊ “ၼႂ်းၵျၢမ်းလိၵ်ႈဢၼ်ၵဝ်ၶႃႈၽတ်းဢၢၼ်ႇမႅၼ်ႈၼၼ်ႉဝႃႈ၊ ‘ၽြႃးပဵၼ်ၸဝ်ႈမႂ်းၸဝ်ႈထႃႇဝရႃႉၽြႃးၼၼ်ႉ၊မႂ်းတၵ်းလႆႈပႃးတင်းႁူဝ်ၸႂ်မႂ်းသဵင်ႈသဵင်ႈ၊တင်းၸႂ်ဝိၺိၺ်ႇမႂ်းသဵင်ႈသဵင်ႈ၊တင်းဢဵၼ်ႁႅင်းမႂ်းသဵင်ႈသဵင်ႈ၊တင်းၵတ်ႉၶၼ်လႄႈၺၢၼ်ႇမႂ်းသဵင်ႈသဵင်ႈသေလႄႈႁၵ်ႉဢေႃႈ၊’ ဢိၵ်ႇတင်း၊ ‘ၵေႃႉဢၼ်ၸၢပ်ႈသႅင်ႇၵၼ်တင်းမႂ်းၼၼ်ႉၵေႃႈ မႂ်းတၵ်းလႆႈႁၵ်ႉမိူၼ်ၸိူဝ်ႉၼင်ႇတူဝ်ၸဝ်ႈၵဝ်ႇဢေႃႈ၊’ ဝႃႈၼင်ႇၼႆမီးဝႆႉဢေႃႈ၊” ဝႃႈၼင်ႇၼႆဢေႃႈ။
“ဢၼ်မႂ်းလၢတ်ႈၼႆႉၸႂ်ႈယဝ်ႉ။ ၵမ်ၵျၢင်ႉၸွမ်းတႃႉ။ မႂ်းတၵ်းလႆႈဢသၢၵ်ႈဢေႃႈ၊” ဝႃႈၼႆမၼ်းၸဝ်ႈၶိုၼ်းလၢတ်ႈဢေႃႈ။
ၵူၺ်းၵႃႈ၊သြႃႇမေႃၵျၢမ်းထမ်ႇမႃႉၼၼ်ႉမၢတ်ႈၼင်ႇႁၢင်ႈတူဝ်ၸဝ်ႈၵဝ်ႇဢမ်ႇမီးဢပျတ်ႈလႄႈ သမ်ႉလဝ်ႈထၢမ်လႄႈဝႃႈ၊ “ၵူၼ်းဢၼ်ၸၢပ်ႈသႅင်ႇၵၼ်တင်းၵဝ်ၶႃႈၼၼ်ႉပဵၼ်ၽူႈလႂ်ၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “မီးၽဝ်ႇၼိုင်ႈၵူၼ်းၵေႃႉၼိုင်ႈလုၵ်ႉသေၵႃႈတီႈဝဵင်း ယေႇရုသလႅမ်ႇ၊ လူင်းၵႂႃႇၸူးဝဵင်း ယေႇရိၶူဝ်း၊ လႄႈထူပ်းၸူၼ်ဢေႃႈ။ ၸူၼ်ၸိူဝ်းၼၼ်ႉထွတ်ႇလွၼ်ႈဢဝ်ၶူဝ်းၼုင်ႈမၼ်းသေယဝ်ႉ၊ပေႃႉထုပ်ႉမၼ်းထၢၼ်ႈပေႃးတၢႆလိုမ်းၵႂႃႇယဝ်ႉၸင်ႇပႅတ်ႈဝႆႉသေယဝ်ႉ၊မိူဝ်းၵႂႃႇဢေႃႈ။-
ၵမ်းၼၼ်ႉ၊ဢမ်ႇထၢင်ႇဢမ်ႇထိူမ်ယဵၸ်ႈပရေႃးႁဵၵ်ႈ ၵေႃႉၼိုင်ႈပႆၸွမ်းသဵၼ်ႈတၢင်းၼၼ်ႉၵႂႃႇလႄႈလႆႈႁၼ်ၵူၼ်းဢၼ်ထူပ်းၺႃးၸူၼ်ၼၼ်ႉသေၵေႃႈ၊ဝႄႈဢွၵ်ႇပႅတ်ႈၵႂႃႇတၢင်ႇၽၢႆႇသေဢေႃႈ။-
မိူၼ်ၼင်ႇၼၼ်ၵူၼ်းမဵဝ်း လေႇဝိ၊ ၶဝ်ၵေႃႉၼိုင်ႈၵေႃႈၽႅဝ်ၵႂႃႇၵႃႈတီႈၼၼ်ႈလႄႈဝႄႉတူၺ်းသေယဝ်ႉ၊ဝႄႈၵႂႃႇပႅတ်ႈတၢင်ႇၽၢႆႇသေဢေႃႈ။-
မိူဝ်ႈၼၼ်ႉ၊ၵူၼ်းမဵဝ်း သမႃႇရိ၊ ၵေႃႉၼိုင်ႈၵေႃႈပႆၸွမ်းတၢင်းၼၼ်ႉၵႂႃႇလႄႈမိူဝ်ႈဢၼ်ႁၼ်ၵူၼ်းဢၼ်ထူပ်းၺႃးၸူၼ်ၼၼ်ႉၸိုင်၊မၼ်းဢဵတ်းလူၵေႃႉၼၼ်ႉဢေႃႈ။-
မၼ်းၸင်ႇၵႂႃႇၸူးၵေႃႉၼၼ်ႉလႄႈဢဝ်ၼမ်ႉမၼ်းတင်းၼမ်ႉမၢၵ်ႇၸပိတ်ႉလေႃႇသႂ်ႇတႃးပၼ်ႁွႆးၸဵပ်းၸိူဝ်းၼၼ်ႉလႄႈလုမ်းလႃးပူၵ်ႉႁေႃႇပၼ်ယဝ်ႉၸင်ႇဢဝ်တၢင်ႇၵႃႈၼိူဝ်မႃႉလီႈဢွၼ်ႇမၼ်းလႄႈၵႂႃႇသူင်ႇၵႃႈတီႈႁူင်းလိုဝ်ႈသဝ်းၼၼ်ႉသေယဝ်ႉ၊လုမ်းလႃးပၼ်ၵႃႈတီႈၼၼ်ႈဢေႃႈ။-
ၼႂ်းဝၼ်းမိူဝ်ႈၽုၵ်ႈမၼ်းဢဝ်ငိုၼ်းတေႇၼႃႇရီႇ သွင်ၶႅပ်းပၼ်တီႈၸဝ်ႈႁူင်းလိုဝ်ႈသဝ်းၼၼ်ႉသေလႄႈလၢတ်ႈဝႃႈ၊ ‘လုမ်းလႃးၵေႃႉၼႆႉသေၵမ်း။ ၵႃႈဢၼ်သဵင်ႈၼၼ်ႉမိူဝ်ႈဢၼ်ၵဝ်ၶႃႈပွၵ်ႈမႃးၸိုင်၊တေတႅၼ်းပၼ်ဢေႃႈ၊’ ဝႃႈၼင်ႇၼႆလႄႈဢွၵ်ႇၵႂႃႇဢေႃႈ၊” ဝႃႈၼင်ႇၼႆယဝ်ႉၸင်ႇ။
မၼ်းၸဝ်ႈသိုပ်ႇထၢမ်လႄႈဝႃႈ၊ “ၼႂ်းၶဝ်သၢမ်ၵေႃႉၼႆႉမႂ်းထၢင်ႇၵေႃႉလႂ်ယဵင်ႈၶႅၼ်းပဵၼ်ၵေႃႉဢၼ်ၸၢပ်ႈသႅင်ႇၵၼ်တင်းၵူၼ်းဢၼ်ထူပ်းၺႃးၸူၼ်ၼၼ်ႉ၊” ဝႃႈၼင်ႇၼႆဢေႃႈ။
“ပဵၼ်ၵေႃႉဢၼ်ၸၢင်ႈႁၵ်ႉဢဵတ်းလူၼၼ်ႉၶႃႈဢေႃႈ၊” ဝႃႈၼင်ႇၼႆသြႃႇမေႃၵျၢမ်းထမ်ႇမႃႉၼၼ်ႉၶိုၼ်းလဝ်ႈလၢတ်ႈဢေႃႈ။ ၸဝ်ႈယေႇသု၊ ၵေႃႈၶိုၼ်းလၢတ်ႈလႄႈဝႃႈ၊ “ပေႃးပဵၼ်ၼႆၸိုင်၊မႂ်းၵႂႃႇလႄႈႁဵတ်းၸိူဝ်ႉၼင်ႇၼၼ်တႃႉ၊” ဝႃႈၼင်ႇၼႆဢေႃႈ။
မိူဝ်ႈဢၼ် ၸဝ်ႈယေႇသု၊ တင်းတပႄးၸဝ်ႈတင်းလၢႆသိုပ်ႇၶၢဝ်းတၢင်းၶဝ်ႈၵႂႃႇၵႃႈၼႂ်းဝၢၼ်ႈဝၢၼ်ႈၼိုင်ႈၼၼ်ႉၸိုင်၊မႄႈယိင်းၵေႃႉၼိုင်ႈဢၼ်လႆႈၸိုဝ်ႈ မႃႇထႃႉ၊ ၼၼ်ႉႁပ်ႉတွၼ်ႈဢဝ်မၼ်းၸဝ်ႈမႃးပဵၼ်ၶႅၵ်ႇၵႃႈၼႂ်းႁိူၼ်းမၼ်းဢေႃႈ။-
မၼ်းမီးၼွင်ႉယိင်းၵေႃႉၼိုင်ႈဢၼ်လႆႈၸိုဝ်ႈ မႃႇရိ၊ ၼၼ်ႉလႄႈၼင်ႈယူႇၵႃႈတီႈႁိမ်းတိၼ်ၸဝ်ႈသေယဝ်ႉ၊ထွမ်ႇဢဝ်ၵႂၢမ်းသင်ႇၵႂၢမ်းသွၼ်မၼ်းၸဝ်ႈယူႇဢေႃႈ။-
မႃႇထႃႉ၊ ၸမ်ႉ၊ယၢပ်ႇၸႂ်လူၺ်ႈတၢင်းလဵင်ႉတၢင်းလူၼၼ်ႉလႄႈမႃးတီႈမၼ်းၸဝ်ႈသေယဝ်ႉ၊လဝ်ႈလၢတ်ႈလႄႈဝႃႈ၊ “ၸဝ်ႈႁဝ်း။ ၸဝ်ႈႁဝ်းယင်းဢမ်ႇႁၼ်ထိုင်တီႈလွင်ႈဢၼ်ၼွင်ႉယိင်းၵဝ်ၶႃႈပွႆႇပႅတ်ႈ ႁႂ်ႈၵဝ်ၶႃႈႁဵတ်းၵၢၼ်လဵင်ႉလူယူႇၵေႃႉလဵဝ်ၵူၺ်းၼႆႉၶႃႈႁိုဝ်း။ လၢတ်ႈႁႂ်ႈမၼ်းမႃးၸွႆႈထႅမ်ၵဝ်ၶႃႈသေၵမ်းၶႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ ယေႇသု၊ ၸဝ်ႈၽြႃးၶိုၼ်းလၢတ်ႈတီႈမၼ်းလႄႈဝႃႈ၊ “ မႃႇထႃႉ၊ ႟။ မႃႇထႃႉ ။ မႂ်းယၢပ်ႇၸႂ်လူၺ်ႈလွင်ႈတၢင်းၵူႈၸိူဝ်ႉၵူႈပိူင်ၼမ်ၼႃႇလႄႈမႆႈၸႂ်ယူႇဢေႃႈ။-
မႂ်းလူဝ်ႇထႅင်ႈဢၼ်ၼိုင်ႈလူးၵွၼ်ႇဢေႃႈ။ မႃႇရိ၊ ၸိုင်၊လိူၵ်ႈဢဝ်လွင်ႈလီဝႆႉယဝ်ႉ။ လွင်ႈၼၼ်ႉၸမ်ႉ၊ၽူႈလႂ်သေၵေႃႉသေၵူၼ်းဢမ်ႇႁိမ်ဢဝ်တီႈမၼ်းလႆႈ၊” ဝႃႈၼင်ႇၼႆဢေႃႈ။
မီးဝၼ်းၼိုင်ႈ၊မိူဝ်ႈဢၼ် ၸဝ်ႈယေႇသု၊ ယင်းသူးတွင်းယူႇတီႈၼိုင်ႈလႄႈယဝ်ႉတူဝ်ႈၵႂႃႇၸိုင်၊ၼႂ်းတပႄးၸဝ်ႈၸိူဝ်းၼၼ်ႉၵေႃႉၼိုင်ႈလဝ်ႈလၢတ်ႈတီႈမၼ်းၸဝ်ႈလႄႈဝႃႈ၊ “ၸဝ်ႈႁဝ်း။ ၶႅၼ်းတေႃႈသွၼ်ပၼ်ၵႂၢမ်းသူးတွင်းတီႈၶႃႈၸဝ်ႈႁဝ်းၶဝ်မိူၼ်ၸိူဝ်ႉၼင်ႇသြႃႇ ယူဝ်းႁၢၼ်ႇ၊ သွၼ်ပၼ်တီႈတပႄးမၼ်းၼၼ်ႉသေၵမ်းၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈလၢတ်ႈတီႈၶဝ်လႄႈဝႃႈ၊ “မိူဝ်ႈဢၼ်သူသူးတွင်းၼၼ်ႉဝႃႈၸိူဝ်ႉၼင်ႇၼႆတႃႉ။ “‘ပေႃႈၸဝ်ႈတီႈၶႃႈ၊ ႁႂ်ႈၼႃႇမႃႉၸိုဝ်ႈသဵင်ၸဝ်ႈႁဝ်းမီးတၢင်းဢၼ် ရူဝ်ႇသေႇၵူဝ်ယမ်သေၵမ်းလူၺ်ႈ။ ႁႂ်ႈမိူင်းၸဝ်ႈႁဝ်းတႄႇပဵၼ်သေၵမ်းလူၺ်ႈ။
ၶႅၼ်းတေႃႈပၼ်တၢင်းၵိၼ်ဢၼ်ၵုမ်ႇၵိၼ်ဝၼ်းလႂ်ဝၼ်းၼၼ်ႉတီႈႁဝ်းၶႃႈသေၵမ်းတီႈၶႃႈ။
ၸိူဝ်ႉၼင်ႇဢၼ်ႁဝ်းၶႃႈပွႆႇလွတ်ႈဢပျတ်ႈပိူၼ်ႈၵူႈၵေႃႉဢၼ်ၽိတ်းပိူင်ႈႁဝ်းၶႃႈၼၼ်ႉ၊ ၶႅၼ်းတေႃႈပွႆႇလွတ်ႈဢပျတ်ႈႁဝ်းၶႃႈ သေၵမ်းတီႈၶႃႈ။ ယႃႇပေႁႂ်ႈႁဝ်းၶႃႈလႆႈၸွမ်းၵႂႃႇၼႂ်းတၢင်းဢၼ် ၸူဝ်းၵႂႃႇလႄႈယႃႉယုၵ်ႉၼၼ်ႉသေၵမ်းတီႈၶႃႈ၊’ ဝႃႈၼႆသူးတွင်းတႃႉ၊” ဝႃႈၼင်ႇၼႆဢေႃႈ။
မၼ်းၸဝ်ႈသမ်ႉဝႃႈထႅင်ႈၸမ်ႉ၊ “ဢုပမႃႇမၼ်း၊ၼႂ်းသူၵေႃႉၼိုင်ႈၵႂႃႇၵႃႈတီႈႁိူၼ်းၵေႃႉသႄႈမၼ်းၶိင်ႇၵၢင်ၶိုၼ်းလႄႈလၢတ်ႈဝႃႈ၊ ‘ၵေႃႉ႟။ ယွၼ်းၵူႈၶဝ်ႈမုၼ်းသၢမ်ႁူၺ်ႇသေၵမ်း။-
ၵေႃႉသႄႈၵဝ်ၵေႃႉၼိုင်ႈမၼ်းၵႂႃႇတႃႈပႆတၢင်းသေယဝ်ႉ၊ႁွတ်ႈမႃးၵႃႈတီႈႁိူၼ်းၵဝ်လႄႈၵဝ်ဢမ်ႇမီးသေၸိူဝ်ႉသေပိူင်တႃႇတေလဵင်ႉလူမၼ်းဢေႃႈ၊’ ဝႃႈၼင်ႇၼႆဢေႃႈ။-
ဢူၺ်းၵေႃႉမၼ်းဢၼ်ယူႇၵႃႈၼႂ်းႁိူၼ်းၶိုၼ်းတွပ်ႇလႄႈဝႃႈ၊ ‘ယႃႇပေမႃးယႃႉၵဝ်းၵဝ်။ ၽၵ်းတူလႆႈၶတ်းဝႆႉယဝ်ႉ။ လုၵ်ႈလၢင်းၵဝ်တင်းလၢႆၵေႃႈၼွၼ်းယူႇလူၺ်ႈၵဝ်ယဝ်ႉ။ ၵဝ်ဢမ်ႇလုၵ်ႉပၼ်မႂ်းလႆႈ၊’ ဝႃႈၼင်ႇၼႆဢေႃႈ။-
လူၺ်ႈလွင်ႈဢၼ်ၼႆႉ၊ၵဝ်ဝႃႈတီႈသူၸမ်ႉ၊ပိၵ်ႉသမ်ႉပဵၼ်ၵေႃႉသႄႈၵၼ်လႄႈ၊ၸဝ်ႈႁိူၼ်းၼၼ်ႉတၵ်းတေဢမ်ႇလုၵ်ႉပၼ်မၼ်းသေၵေႃႈ၊ၵွပ်ႈပိူဝ်ႈယင်းဢမ်ႇဢူၵ်းဢမ်ႇဢၢႆလႄႈသိုပ်ႇယွၼ်းယူႇၶိူဝ်းၶိူဝ်းၼၼ်ႉ၊မၼ်းတၵ်းတေလုၵ်ႉလႄႈပၼ်ၵႃႈဢၼ်မၼ်းလူဝ်ႇတင်းသဵင်ႈတင်းလူင်ၼၼ်ႉဢေႃႈ။-
ပိူဝ်ႈၼႆလႄႈ ၵဝ်လၢတ်ႈတီႈသူၸမ်ႉ၊ယွၼ်းတႃႉ။ သူတၵ်းလႆႈဢေႃႈ။ ႁႃတႃႉ။ သူတၵ်းထူပ်းႁၼ်ဢေႃႈ။ တွႆႇတႃႉ။ တၵ်းၽုၺ်ႇၽၵ်းတူပၼ်ဢေႃႈ။-
လွင်ႈမၼ်းၸမ်ႉ၊ၵေႃႉဢၼ်ယွၼ်းၼၼ်ႉလႆႈဢေႃႈ။ ၵေႃႉဢၼ်ႁႃၵေႃႈထူပ်းႁၼ်ဢေႃႈ။ တီႈၵေႃႉဢၼ်တွႆႇၽၵ်းတူၵေႃႈတၵ်းၽုၺ်ႇပၼ်ဢေႃႈ။-
သူဢၼ်ပဵၼ်ပေႃႈၼႆႉသင်ဝႃႈလုၵ်ႈသူယွၼ်းပႃၸိုင်၊ၸွင်ႇတေဢဝ်ငူးပၼ်ႁိုဝ်း။-
ဢမ်ႇၼၼ်ၵေႃႈ သင်ဝႃႈယွၼ်းၶႆႇၵႆႇၸိုင်၊တေဢဝ်မႅင်းငေႃးပၼ်ႁိုဝ်း။-
သူၸိူဝ်းဢၼ်ႁၢႆႉမိူၵ်ႈထၢၼ်ႇၼႆႉယင်းၸၢင်ႈဢဝ်မဵဝ်းဢၼ်လီၵူၺ်းပၼ်တီႈလုၵ်ႈလၢင်းသူၸိုင်၊ပေႃႈၸဝ်ႈသူဢၼ်မီးယူႇၵႃႈၼိူဝ်မိူင်းၵၢင်ႁၢဝ်ပုၼ်ႉၼၼ်ႉ၊ယဵင်ႈၶႅၼ်းတၵ်းပၼ်ဝိၺိၺ်ႇဢၼ်မူတ်းၸၢင်ႇၸဝ်ႈတီႈၶဝ်ၸိူဝ်းဢၼ်လဝ်ႈယွၼ်းၼၼ်ႉလူးၵွၼ်ႇဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ၸဝ်ႈယေႇသု၊ ႁေႃႈၽီႁၢႆႉဢၼ်ဢႃႉၼၼ်ႉဢွၵ်ႇသေၵႃႈၼႂ်းၵူၼ်းၵေႃႉၼိုင်ႈလႄႈ မၼ်းၶိုၼ်းလၢတ်ႈၵႂၢမ်းလႆႈမႃးဢေႃႈ။ ၵူၼ်းတင်းလၢႆၵေႃႈဢၢမ်းၼႃႇဢေႃႈ။-
ၵူၺ်းၵႃႈ၊ၵူၼ်းၵမ်ႈၽွင်ႈဝႃႈ၊ “ၶုၼ်ၽီႁၢႆႉ ပေႇလႃႉၸေႇပုလႃႉ၊ ပၼ်တၼ်းၶူဝ်းတီႈမၼ်းၵူၺ်းလႄႈ မၼ်းၸင်ႇႁေႃႈၽီတင်းလၢႆဢွၵ်ႇပႅတ်ႈလႆႈဢေႃႈ၊” ဝႃႈၼင်ႇၼႆဢေႃႈ။
ၵမ်ႈၽွင်ႈသမ်ႉၶႂ်ႈၵၢင်ဢဝ်ၵႂၢမ်းမၼ်းၸဝ်ႈလႄႈလဝ်ႈယွၼ်းႁႂ်ႈမၼ်းၸဝ်ႈႁဵတ်းၼႄဢၼ်လၢၵ်ႇဢၼ်လၢႆးႁႂ်ႈလႆႈပဵၼ်သၢၵ်ႈသေႇလွင်ႈဢၼ်ၽြႃးပဵၼ်ၸဝ်ႈပွႆႇၸႂ်ႉမၼ်းၸဝ်ႈမႃးၼၼ်ႉဢေႃႈ။-
ၸဝ်ႈယေႇသု၊ ႁုၸႅင်ႈတၢင်းဢၼ်ၶဝ်ၵျၢမ်ႇပွင်ယူႇၼၼ်ႉသေလႄႈလၢတ်ႈဝႃႈ၊ “ပေႃးမိူင်းၼိုင်ႈတႅၵ်ႇပဵၼ်လၢႆမူႇလၢႆၸုမ်းလႄႈတိုၵ်းတေႃးၵၼ်ၸိုင်၊မိူင်းၼၼ်ႉတၵ်းဢမ်ႇတႄႇဢမ်ႇမၼ်ႈ။ ၼႃႈႁိူၼ်းဢၼ်ၽၢတ်ႇၵၼ်ၽႄၵၼ်ၼၼ်ႉၵေႃႈတေလုလႅဝ်ဢေႃႈ။-
ပိူင်လဵဝ်ၵၼ်၊ပေႃးဝၢၼ်ႈမိူင်းၸႃႇတၢၼ်ႇၽၢတ်ႇၽႄတိုၵ်းတေႃးၵၼ်ၸိုင်၊မိူင်းၼၼ်ႉတေႁဵတ်းၸိူဝ်ႉၼင်ႇႁိုဝ်မၼ်ႈၶိူင်ႇလႆႈ။ သူဝႃႈၶုၼ်ၽီ ပေႇလႃႉၸေႇပုလႃႉ၊ ပၼ်တၼ်းၶူဝ်းတီႈၵဝ်လႄႈၵဝ်ၸင်ႇႁဵတ်းၸိူဝ်ႉၼင်ႇၼႆလႆႈဝႃႈၼႆယဝ်ႉ။-
ပေႃးပဵၼ်ၼၼ်၊တပႄးတပၢၼ်းသူဢိင်ၽူႈလႂ်သေယဝ်ႉ၊ႁေႃႈၽီႁၢႆႉဢွၵ်ႇပႅတ်ႈလႆႈ။ တပႄးတပၢၼ်းသူၼၼ်ႉပဵၼ်သၢၵ်ႈသေႇလွင်ႈဢၼ်သူၽိတ်းၼၼ်ႉယဝ်ႉ။-
ပေႃးၵဝ်ႁေႃႈၽီႁၢႆႉဢွၵ်ႇပႅတ်ႈလူၺ်ႈၼိဝ်ႉမိုဝ်းၽြႃးပဵၼ်ၸဝ်ႈၸိုင်၊ၼႄပျႃးလွင်ႈဢၼ်မိူင်းၽြႃးပဵၼ်ၸဝ်ႈႁွတ်ႈမႃးတီႈသူၼၼ်ႉယဝ်ႉ။
“ၼႂ်းမိူဝ်ႈဢၼ်ၵူၼ်းႁႅင်းလူင်ဢဝ်တင်းၶိူင်ႈလၢၵ်ႈၼၢၵ်ႈၸေးၸုမ်ႇလႄႈပႂ်ႉၶႄႁိူၼ်းမၼ်းယူႇၼၼ်ႉၸိုင်၊ၶူဝ်းႁိူၼ်းမၼ်းတၵ်းမီးဝႆႉလီလီငၢမ်းငၢမ်းဢေႃႈ။-
ၵူၺ်းၵႃႈ၊မိူဝ်ႈဢၼ်ၵေႃႉဢၼ်ယဵင်ႈၶႅၼ်းႁႅင်းယႂ်ႇသေမၼ်းမႃးတိုၵ်းတေႃးမၼ်းလႄႈပႄႉၼႅင်ႇမၼ်းၸိုင်၊ၵေႃႉၼၼ်ႉတၵ်းသိမ်းဢဝ်လၢၵ်ႈၼၢၵ်ႈဢၼ်မၼ်းဢိင်ပိုင်ႈၼၼ်ႉသေယဝ်ႉ၊ႁိမ်ဢဝ်ၵႃႈဢၼ်မၼ်းၸုသိမ်းဝႆႉၸိူဝ်းၼၼ်ႉၵႂႃႇၽႄမႅင်ႇၵၼ်ဢေႃႈ။
“ၵေႃႉဢၼ်ဢမ်ႇယူႇၽၢႆႇၵဝ်ၼၼ်ႉ၊ပဵၼ်ရၢၼ်ႇသူႇၵဝ်ဢေႃႈ။ ၵေႃႉဢၼ်ဢမ်ႇၸွႆႈၵဝ်ႁုပ်ႈၸုတုမ်ၵၼ်ၼၼ်ႉ ပဵၼ်ၵေႃႉဢၼ်ႁဵတ်းႁႂ်ႈတႅၵ်ႇယၢႆႈမၢၵ်ႇမိူဝ်ၵႂႃႇဢေႃႈ။
“ၽီႁၢႆႉၼၼ်ႉ၊မိူဝ်ႈဢၼ်ဢွၵ်ႇသေၵႃႈၼႂ်းၵူၼ်းၵေႃႉၼိုင်ႈၸိုင်၊လႄႇၵႂႃႇလႄႇမႃးၵႃႈတီႈဢၼ်ႁႅင်ႈဢၼ်ႁွင်တင်းလၢႆ၊ႁႃတီႈလိုဝ်ႈတီႈသဝ်းသေၵေႃႈ၊ပေႃးမၼ်းဢမ်ႇထူပ်းဢမ်ႇႁၼ်သေတီႈသေလႅၼ်ၸိုင်၊မၼ်းလၢတ်ႈတီႈတူဝ်ၸဝ်ႈၵဝ်ႇလႄႈဝႃႈ၊ ‘ၵဝ်တၵ်းၶိုၼ်းမိူဝ်းၵႂႃႇၸူးႁိူၼ်းဢၼ်ၵဝ်ဢွၵ်ႇမႃးၼၼ်ႉလူးၵွၼ်ႇဢေႃႈ၊’ ဝႃႈၼင်ႇၼႆဢေႃႈ။-
မိူဝ်ႈဢၼ်ႁွတ်ႈထိုင်ၼၼ်ႉ မၼ်းႁၼ်ႁိူၼ်းၼၼ်ႉပတ်းၽဵဝ်ႈႁၢင်ႈၶိူင်ႈဝႆႉၶႅမ်ႉၶႅမ်ႉယဝ်ႉဢေႃႈ။-
မၼ်းၶိုၼ်းၵႂႃႇႁွင်ႉဢဝ်ၽီဢၼ်ႁၢႆႉသေမၼ်းၸဵတ်းတူဝ်၊မႃးၶဝ်ႈၵႃႈၼႂ်းၵူၼ်းၼၼ်ႉလႄႈယူႇဢေႃႈ။ ၵေႃႉၼၼ်ႉၵေႃႈၵမ်းလိုၼ်းပဵၼ်ဢၼ်ယဵင်ႈၶႅၼ်းႁၢႆႉၼႃႇသေၵမ်းဢွၼ်တၢင်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၼႂ်းမိူဝ်ႈဢၼ် ၸဝ်ႈယေႇသု၊ လၢတ်ႈၶေႃႈၵႂၢမ်းၼၼ်ႉယဝ်ႉၵႂႃႇၸိုင်၊မႄႈယိင်းၵေႃႉၼိုင်ႈလုၵ်ႉၵႃႈၼႂ်းၵႄႈၵူၼ်းဢၼ်ၸုဢၼ်တုမ်ၵၼ်ၼၼ်ႉသေလႄႈပၢဝ်ႇလၢတ်ႈဝႃႈ၊ “တွင်ႉမႄႈယိင်းဢၼ်ပႃးၸဝ်ႈႁဝ်းသေလႄႈတိုၵ်းၼူမ်းပၼ်ၸဝ်ႈႁဝ်းၵိၼ်ၼၼ်ႉမီးမၢင်ႇၵလႃႇတႄႉၼေႃ၊” ဝႃႈၼင်ႇၼႆဢေႃႈ။
မၼ်းၸဝ်ႈၵေႃႈလၢတ်ႈလႄႈဝႃႈ၊ “ၵေႃႉဢၼ်ထွမ်ႇဢဝ်ၼုၵ်ႈၵပၢတ်ႈတြႃးၸဝ်ႈလႄႈၵမ်ၵျၢင်ႉၸွမ်းၼၼ်ႉယဵင်ႈၶႅၼ်းမီးမၢင်ႇၵလႃႇဢၼ်မျၢတ်ႈၼႃႇဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၵူၼ်းဢၼ်ၸုဢၼ်တုမ်ၵၼ်ယဵင်ႈၶႅၼ်းၼမ်ၵိုၼ်းမႃးယူႇၼၼ်ႉၸိုင်၊ ၸဝ်ႈယေႇသု၊ ႁေႃးလၢတ်ႈလႄႈဝႃႈ၊ “ၵူၼ်းၵၢပ်ႈပၢၼ်တေႃႈလဵဝ်ၼႆႉပဵၼ်ၶဝ်ၸိူဝ်းဢၼ်ႁၢႆႉမိူၵ်ႈၼႃႇဢေႃႈ။ ၶဝ်ယွၼ်းႁႂ်ႈႁဵတ်းၼႄတၼ်းၶူဝ်းၼိမိၵ်ႈလၢၵ်ႈၶၼႃႇဢေႃႈ။ ၵူၺ်းၵႃႈ၊လိူဝ်သေၼိမိၵ်ႈလၢၵ်ႈၶၼႃႇပရေႃးၽႅတ်ႈ ယူဝ်းၼႃႉ၊ ၼၼ်ႉတေဢမ်ႇၼႄပၼ်ၶဝ်ၵႃႈသင်။-
မိူၼ်ၸိူဝ်ႉၼင်ႇဢၼ်ပရေႃးၽႅတ်ႈ ယူဝ်းၼႃႉ၊ လႆႈပဵၼ်ၼိမိၵ်ႈလၢၵ်ႈၶၼႃႇတီႈၵူၼ်းဝဵင်း ၼိၼေႇဝူၺ်ႇ၊ တင်းလၢႆမႃးၼၼ်ႉ လုၵ်ႈၵူၼ်း၊ တၵ်းပဵၼ်တီႈၵူၼ်းၵၢပ်ႈပၢၼ်တေႃႈလဵဝ်ၼႆႉဢေႃႈ။-
ၼႂ်းဝၼ်းဢၼ်ၸီႇယၢင်ႇတြႃးၼၼ်ႉ၊ၼၢင်းႁေႃၶမ်းမိူင်းၽၢႆႇတၢင်းၸၢၼ်းၼၼ်ႉတၵ်းလုၵ်ႉလႄႈတၢင်ႇဢပျတ်ႈၵူၼ်းၵၢပ်ႈမိူဝ်ႈလဵဝ်ၼႆႉ၊ပိူဝ်ႈဢၼ်မၼ်းၼၢင်းၼၼ်ႉလႆႈလုၵ်ႉသေၵႃႈတီႈလႅၼ်လိၼ်ဢၼ်ၵႆ ၶၢမ်ႈဝၢၼ်ႈၶၢမ်ႈမိူင်းမၼ်းၼၢင်းမႃးႁႂ်ႈလႆႈထွမ်ႇဢဝ်ၶေႃႈၵႂၢမ်းပိင်ႇၺႃႇဢၼ်ၶုၼ်ႁေႃၶမ်း သေႃးလမုၼ်ႇ၊ သင်ႇသွၼ်ပၼ်ၼၼ်ႉဢေႃႈ။ ၵဝ်ဝႃႈတီႈသူၸမ်ႉ၊ၵႃႈတီႈၼႆႈၵေႃႉဢၼ်ယႂ်ႇမျၢတ်ႈသေ သေႃးလမုၼ်ႇ၊ ၼၼ်ႉဢမ်ႇမီးသေၵေႃႉသေၵူၼ်း။-
ၼႂ်းဝၼ်းဢၼ်ၸီႇယၢင်ႇတြႃးၼၼ်ႉ၊ၵူၼ်းဝဵင်း ၼိၼေႇဝူၺ်ႇ၊ ၸိူဝ်းၼၼ်ႉတၵ်းလုၵ်ႉလႄႈတၢင်ႇဢပျတ်ႈသူ၊ပိူဝ်ႈဢၼ်ၶဝ်လႆႈငိၼ်းတြႃးဢၼ်ပရေႃးၽႅတ်ႈ ယူဝ်းၼႃႉ၊ ႁေႃးလၢတ်ႈၼၼ်ႉလႄႈ ၶုၵ်းၸႂ်လႆႈမႆႈၸႂ်ဢပျတ်ႈသေလႄႈပိၼ်ႇၸႂ်ၶဝ်ယဝ်ႉၼၼ်ႉဢေႃႈ။ ၵဝ်ဝႃႈတီႈသူၸမ်ႉ၊ၵႃႈတီႈၼႆႈမီးၵေႃႉဢၼ်ယႂ်ႇမျၢတ်ႈသေပရေႃးၽႅတ်ႈ ယူဝ်းၼႃႉ၊ ဢေႃႈ။
“ၵူၼ်းႁဝ်းၼႆႉၽူႈလႂ်သေဢမ်ႇဝႃႈ၊တႆႈၵွၵ်းၽႆးယဝ်ႉလႄႈဢမ်ႇဢဝ်သိူင်ႇဝႆႉလပ်ႉဝႆႉ၊ဢမ်ႇဢဝ်ပဵတ်ႈႁူမ်ႇသုမ်ႇဝႆႉ။ ၼင်ႇႁိုဝ်ၵူၼ်းဢၼ်ၶဝ်ႈမႃးတၵ်းလႆႈဢၼ်လႅင်းၸိုင်၊ၸၢင်ႈဢဝ်တၢင်ႇဝႆႉၵႃႈၼိူဝ်ၶဵင်ႇတီႈတႆႈၽႆးဢေႃႈ။-
မၢၵ်ႇတႃသူပဵၼ်ၸိူဝ်ႉၼင်ႇၵွၵ်းၽႆးပုၼ်ႈတူဝ်ၶၼ်ႇထႃႇသူဢေႃႈ။ ပေႃးမၢၵ်ႇတႃသူလႅင်းၸိုင်၊တၵ်းလႅင်းတင်းတူဝ်ဢေႃႈ။ ၵူၺ်းၵႃႈ၊ပေႃးမၢၵ်ႇတႃသူဢမ်ႇလီၸိုင်၊တၵ်းလပ်းသိင်ႇတင်းတူဝ်ဢေႃႈ။-
ပိူဝ်ႈၼႆလႄႈ ၼင်ႇႁိုဝ်ဢၼ်လႅင်းတၢင်းၼႂ်းသူတၵ်းဢမ်ႇပဵၼ်လပ်းသိင်ႇၸိုင်၊ႁဵတ်းသတိတႃႉ။-
ပေႃးလႅင်းယူႇတင်းတူဝ်၊ယင်းဢမ်ႇမီးဢၢင်ႇၵႃႇဢၼ်လပ်းသိင်ႇသေဢၼ်ၸိုင်၊တၵ်းတေလႅင်းႁိူဝ်ႈတင်းသဵင်ႈတင်းမူတ်းမိူၼ်ၸိူဝ်ႉၼင်ႇၵွၵ်းၽႆးႁိူဝ်ႈလႅင်းၵႃႈၼိူဝ်သူၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၼႂ်းမိူဝ်ႈဢၼ် ၸဝ်ႈယေႇသု၊ ႁေႃးလၢတ်ႈယဝ်ႉၵႂႃႇၼၼ်ႉၸိုင်၊ၵူၼ်းၵိူင်း ၽႃႇရိသႄး၊ ၵေႃႉၼိုင်ႈ၊ၽိတ်ႈပၢင်းႁႂ်ႈမၼ်းၸဝ်ႈၵႂႃႇၵိၼ်ၶဝ်ႈလူၺ်ႈၵၼ်တင်းမၼ်းလႄႈ၊မၼ်းၸဝ်ႈၵေႃႈၶဝ်ႈၵႂႃႇၼင်ႈၵႃႈတီႈၽိူၼ်ၶဝ်ႈဢေႃႈ။-
ၵူၼ်းၵိူင်း ၽႃႇရိသႄး၊ ၼၼ်ႉမိူဝ်ႈဢၼ်ႁၼ်မၼ်းၸဝ်ႈဢမ်ႇသုၵ်ႈမိုဝ်းလႄႈၵိၼ်ၼၼ်ႉၸိုင်၊ဢၢမ်းၼႃႇဢေႃႈ။-
ပိူဝ်ႈၼႆလႄႈၸဝ်ႈၽြႃးလၢတ်ႈတီႈမၼ်းလႄႈဝႃႈ၊ “ၵူၼ်းၵိူင်း ၽႃႇရိသႄး၊ သူၼႆႉလၢင်ႉၵွၵ်းလၢင်ႉဢၢင်ႇသူၽၢႆႇတၢင်းၼွၵ်ႈၵူၺ်းလႄႈၽၢႆႇတၢင်းၼႂ်းသူၸမ်ႉ၊တဵမ်ဝႆႉတင်းတၢင်းဢၼ်မၢပ်ႇၵိၼ်၊ဢိၵ်ႇတင်းတၢင်းဢၼ်ႁၢႆႉမိူၵ်ႈဢေႃႈ။-
ၵူၼ်းငိူဝ်ႈၶဝ်႟။ ၽြႃးပဵၼ်ၸဝ်ႈဢၼ်ၽၢၼ်ႇသၢင်းႁဵတ်းပဵၼ်ၽၢႆႇတၢင်းၼွၵ်ႈၼၼ်ႉၽၢႆႇတၢင်းၼႂ်းၵေႃႈၽၢၼ်ႇသၢင်းႁဵတ်းပဵၼ်ဢမ်ႇၸႂ်ႈႁိုဝ်း။-
လွင်ႈတၢင်းဢၼ်ယဵင်ႈၶႅၼ်းလီၸမ်ႉ၊ဢဝ်ၵႃႈဢၼ်သူမီးၼႂ်းၵွၵ်းၼႂ်းဢၢင်ႇသူၼၼ်ႉၽေးၸွၼ်းယိုၼ်ႈမႅင်ႇပၼ်တီႈၵူၼ်းၽၢၼ်တႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ၵႃႈဢၼ်မီးတင်းသဵင်ႈတင်းလူင်တၵ်းမူတ်းသႂ်ပုၼ်ႈသူဢေႃႈ။
“ ၽႃႇရိသႄး၊ ၶဝ်႟။ သူမီးဢႃႉမၢင်ႇၵလႃႇဢေႃႈ။ သူလူႇတၢၼ်းၸႃႉၸဵမ်ဢိမ်ၶိမ်း၊ၽၵ်းႁၢၼ်ႈ၊ဢိၵ်ႇတင်းယွတ်ႈယႃႈတင်းလၢႆလႂ်သိပ်းပုၼ်ႈပုၼ်ႈၼိုင်ႈသေလႄႈသူဝႆႉၵိုတ်းပႅတ်ႈသဵတ်ႈၸႃႇတင်းမႅတ်ႈတႃႇၽြႃးပဵၼ်ၸဝ်ႈဢေႃႈ။ လွင်ႈတၢင်းၸိူဝ်းၼႆႉသူတၵ်းလႆႈၵမ်ၵျၢင်ႉၸွမ်းလႄႈတၵ်းဢမ်ႇလႆႈဝႄႈပိူင်ႈသေၸိူဝ်ႉသေပိူင်ၵူၺ်း။
“ ၽႃႇရိသႄး၊ ၶဝ်႟။ သူမီးဢႃႉမၢင်ႇၵလႃႇဢေႃႈ။ သူၵျိူၵ်ႈတီႈၼင်ႈဢၼ်သုင်မျၢတ်ႈၵႃႈၼႂ်းၸရွပ်ႈႁေႃးတြႃးလႄႈၶႂ်ႈႁႂ်ႈပိူၼ်ႈၵူဝ်ယမ်သူ၊ဢိၵ်ႇတင်းတၵ်ႉလၢတ်ႈသူၵႃႈၼႂ်းၵၢင်ၵၢတ်ႇဢေႃႈ။-
သူတင်းလၢႆၶဝ်႟။ သူမီးဢႃႉမၢင်ႇၵလႃႇဢေႃႈ။ သူပဵၼ်မိူၼ်ၸိူဝ်ႉၼင်ႇၶုမ်ပႃႇႁဵဝ်ႈတင်းလၢႆ၊ဢၼ်ဢမ်ႇၸၢင်ႈႁုဝႃႈ၊မၼ်းပဵၼ်ၶုမ်ပႃႇႁဵဝ်ႈလႄႈၵူၼ်းတင်းလၢႆယဵပ်ႇၶၢမ်ႈၵႂႃႇ၊ယဵပ်ႇၶၢမ်ႈမႃးၵႃႈၼိူဝ်မၼ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵႃႈၼႂ်းသြႃႇဢၼ်မေႃဢုပတေႇတြႃးၸိူဝ်းၼၼ်ႉၵေႃႉၼိုင်ႈ၊လၢတ်ႈတီႈမၼ်းၸဝ်ႈလႄႈဝႃႈ၊ “သြႃႇ႟၊ပေႃးဝႃႈၸိူဝ်ႉၼင်ႇၼႆၸိုင်၊ပဵၼ်ၸိူဝ်ႉၼင်ႇဢၼ်သြႃႇသႄႉသွမ်းတၢင်ႇဢပျတ်ႈတီႈႁဝ်းယဝ်ႉ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “သြႃႇမေႃဢုပတေႇတြႃးၶဝ်႟။ သူၵေႃႈမီးဢႃႉမၢင်ႇၵလႃႇဢေႃႈ။ သူဢဝ်ၶူဝ်းဢၼ်ၼၵ်းတၢင်ႇသႂ်ႇၵႃႈၼိူဝ်ပိူၼ်ႈလႄႈ သူၸမ်ႉ၊ယင်းဢမ်ႇဢဝ်တင်းၼိဝ်ႉမိုဝ်းသူသေၼိဝ်ႉၸွႆႈယွင်ႈပၼ်ပိူၼ်ႈ။-
သူၸိူဝ်းၼႆႉ႟။ သူမီးဢႃႉမၢင်ႇၵလႃႇဢေႃႈ။ သူတႄႇႁဵတ်းၶုမ်ပႃႇႁဵဝ်ႈပရေႃးၽႅတ်ႈတင်းလၢႆဢၼ်ပူႇမွၼ်ႇသူဢဝ်ၶဝ်တၢႆၼၼ်ႉဢေႃႈ။-
ဢၼ်ႁဵတ်းၸိူဝ်ႉၼင်ႇၼႆၸိုင်၊ပဵၼ်လွင်ႈတၢင်းဢၼ်သူၶၢမ်ႇသၢၵ်ႈသေႇလွင်ႈဢၼ်သူၸူမ်းသိူဝ်းၼႂ်းတၢင်းႁဵတ်းတၢင်းသၢင်ႈပူႇမွၼ်ႇသူယဝ်ႉ။ ပူႇမွၼ်ႇသူဢဝ်ပရေႃးၽႅတ်ႈတင်းလၢႆတၢႆသေလႄႈ သူသမ်ႉတႄႇႁဵတ်းၶုမ်ပႃႇႁဵဝ်ႈပၼ်ဢေႃႈ။-
ၵွပ်ႈၼႆလႄႈၺၢၼ်ႇတေႃႇၽြႃးပဵၼ်ၸဝ်ႈလၢတ်ႈဝႆႉၸမ်ႉ၊ ‘ၵဝ်တၵ်းပွႆႇၸႂ်ႉပရေႃးၽႅတ်ႈ ၵဝ်၊ဢိၵ်ႇတင်းတမၢၼ်ႇၵဝ်တင်းလၢႆၵႂႃႇၵႃႈတီႈဢၼ်ၶဝ်မီးၼၼ်ႉလႄႈၶဝ်ၼၼ်ႉတၵ်းၼိၵ်ႈၸၢၵ်ႈတီႈၵမ်ႈၽွင်ႈဢေႃႈ။ တၵ်းဢဝ်ၵမ်ႈၽွင်ႈတၢႆဢေႃႈ၊’ ဝႃႈၼင်ႇၼႆဝႆႉယဝ်ႉ။-
ပိူဝ်ႈၼႆလႄႈၵူၼ်းၵၢပ်ႈပၢၼ်တေႃႈလဵဝ်ၼႆႉတၵ်းလႆႈၶၢမ်ႇတၢင်းဢၼ်ၸီႇယၢင်ႇဢပျတ်ႈ၊ၵွပ်ႈပိူဝ်ႈတၢင်းဢၼ်ဢဝ်ပရေႃးၽႅတ်ႈတင်းသဵင်ႈတင်းလူင်တၢႆၸႃႉၸဵမ်မိူဝ်ႈၵမ်ႇၽႃႇၸႃႉတႄႇ၊-
ဢၼ်ဝႃႈ၊တႄႇဢဝ် ဢႃႇပေႇလႃႉ၊ တေႃႇထိုင်ႁွတ်ႈ ၸႃႇၶရိ၊ ဢၼ်လႆႈၶၢမ်ႇဢဝ်တၢႆၼႂ်းၵႄႈဝူင်ႈၵၢင်ၶဵင်ႇတၢင်းလူႇတင်းထႃႇၼႃႉတီႈမူတ်းၸၢင်ႇၸိူဝ်းၼၼ်ႉဢေႃႈ။ ၵဝ်ဝႃႈတီႈၸိုဝ်ႈတီႈၸႂ်ႈမၼ်းၸမ်ႉ၊ၵူၼ်းၵၢပ်ႈပၢၼ်တေႃႈလဵဝ်ၼႆႉတၵ်းလႆႈၶၢမ်ႇတၢင်းဢၼ်ပၼ်တၢမ်ႇဢပျတ်ႈပုၼ်ႈလိူတ်ႈၶဝ်ဢေႃႈ။
“သြႃႇမေႃဢုပတေႇတြႃးၶဝ်႟။ သူမီးဢႃႉမၢင်ႇၵလႃႇဢေႃႈ။ သူယိပ်းၵမ်သေႃးႁိူၼ်းပိင်ႇၺႃႇၼၼ်ႉဝႆႉလႄႈ တူဝ်သူၵေႃႈဢမ်ႇၶဝ်ႈ၊တီႈၶဝ်ၸိူဝ်းဢၼ်ၶႂ်ႈၶဝ်ႈၼၼ်ႉၵေႃႈသူႁႄႉၶႅၼ်ဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ် ၸဝ်ႈယေႇသု၊ ဢွၵ်ႇသေၵႃႈတီႈၼၼ်ႈၵႂႃႇၸိုင်၊သြႃႇမေႃၵျၢမ်းထမ်ႇမႃႉတင်းၵူၼ်းၵိူင်း ၽႃႇရိသႄး၊ ၶဝ်ဢုမ်ႇလွမ်ႈၵၼ်မႃးၸူးတီႈမၼ်းၸဝ်ႈသေလႄႈဢဝ်တင်းၵႂၢမ်းထၢမ်ဢၼ်ႁႃတၢင်းၽိတ်းၼမ်ၼႃႇတိုၵ်းတေႃးတွင်ႈထၢမ်လႄႈ၊-
ၵျၢမ်ႇႁႃႁႂ်ႈလႆႈဢဝ်ၵႂၢမ်းဢၼ်မၼ်းၸဝ်ႈတၵ်းလၢတ်ႈၽိတ်းလၢတ်ႈပိူင်ႈၼၼ်ႉဢေႃႈ။
မိူဝ်ႈၼၼ်ႉ၊ၸိူဝ်ႉၼင်ႇဢၼ်ၵူၼ်းဢမ်ႇႁုလႆႈမီးလၢႆႁဵင်ၵေႃႉ၊ၽိုတ်ႉဢီးၸုတုမ်မႃးတီႈႁိမ်း ၸဝ်ႈယေႇသု၊ ထၢၼ်ႈပေႃးယဵပ်ႇၶၢမ်ႈၵၼ်မႃးယူႇၼၼ်ႉ မၼ်းၸဝ်ႈလၢတ်ႈတီႈတပႄးၸဝ်ႈတင်းလၢႆဢွၼ်တၢင်းလႄႈဝႃႈ၊ “ႁဵတ်းသတိလႄႈဝႄႈပႅတ်ႈၸိူဝ်ႉပႅင်ႈၵူၼ်းၵိူင်း ၽႃႇရိသႄး၊ ၶဝ်၊ဢၼ်ဝႃႈ၊ၵူၼ်းၼႃႈသိုဝ်ႈၸႂ်ၵူတ်ႉၼၼ်ႉတႃႉ။-
လွင်ႈသင်သေဢမ်ႇဝႃႈ၊တၢင်းဢၼ်ႁူမ်ႇဝႆႉလႄႈ တၵ်းဢမ်ႇလႆႈပေႃႇဢွၵ်ႇထၢင်ႇသႃးမႃး၊ဢိၵ်ႇတင်းတၢင်းဢၼ်သိူင်ႇဝႆႉလႄႈ တၵ်းဢမ်ႇလႆႈႁုၼၼ်ႉဢမ်ႇမီးသေၸိူဝ်ႉသေမဵဝ်း။-
ပိူဝ်ႈၼႆလႄႈ ၵႃႈဢၼ်သူလွမ်လၢတ်ႈၵႃႈၼႂ်းလပ်းသိင်ႇၼၼ်ႉ၊တၵ်းလႆႈငိၼ်းၼႂ်းတီႈဢၼ်လႅင်းဢေႃႈ။ ၵႃႈဢၼ်သူသွပ်ႉသႅပ်ႉႁင်းၵူၺ်းၶေႃၼၼ်ႉတၵ်းလႆႈပၢဝ်ႇသေႃႇၵႃႈၼိူဝ်လင်ၶႃးႁိူၼ်းဢေႃႈ။
“ၵေႃႉသႄႈၵဝ်ၶဝ်႟။ ၵဝ်ဝႃႈတီႈသူၸမ်ႉ၊ယႃႇပေၵူဝ်ၶဝ်ၸိူဝ်းဢၼ်ဢဝ်တူဝ်ၶၼ်ႇထႃႇသူတၢႆလႄႈ ၵမ်းလိုၼ်းဢမ်ႇၸၢင်ႈႁဵတ်းသင်လႆႈထႅင်ႈၼၼ်ႉ။-
သူတၵ်းလႆႈၵူဝ်ႁႄၽူႈလႂ်ဝႃႈၼႆၵဝ်တၵ်းၼႄပျႃးသူလူးၵွၼ်ႇဢေႃႈ။ ၵူဝ်ႁႄၸဝ်ႈဢၼ်ၸၢင်ႈဢဝ်တၢႆလႆႈသေလႄႈ ယင်းမီးဢႃႇၼႃႇတၼ်းၶူဝ်းဢၼ်ဢဝ်ၶျႃးတူၵ်းၵႃႈၼႂ်းငရၢႆးလႆႈၼၼ်ႉတႃႉ။ ၵဝ်ဝႃႈတီႈၸိုဝ်ႈၸႂ်ႈမၼ်းတီႈသူၸမ်ႉ၊ၵူဝ်ႁႄၸဝ်ႈၼၼ်ႉတႃႉ။
“ၼူၵ်ႉဢႅၼ်ႇၽႃႉႁႃႈတူဝ်၊ၵႃႈမၼ်းတူၵ်းမႅၼ်ႈငိုၼ်းသွင်ၶႅပ်းဢွၼ်ႇၵူၺ်းဢမ်ႇၸႂ်ႈႁိုဝ်း။ ၼႂ်းဝႃႈၼၼ်သေၵေႃႈ၊ၽြႃးပဵၼ်ၸဝ်ႈဢမ်ႇလိုမ်းပႅတ်ႈၶဝ်သေတူဝ်။-
သဵၼ်ႈၶူၼ်ႁူဝ်သူၵေႃႈ လႆႈၶၢမ်ႇတၢင်းဢၼ်ၼပ်ႉဢၢၼ်ႇဝႆႉၵူႈသဵၼ်ႈယဝ်ႉဢေႃႈ။ ပိူဝ်ႈၼႆလႄႈယႃႇပေၵူဝ်။ သူယဵင်ႈၶႅၼ်းထိူၵ်ႈၵႃႈထိူၵ်ႈၶၼ်ယႂ်ႇၼႃႇသေၼူၵ်ႉဢႅၼ်ႇၽႃႉတင်းလၢႆၼၼ်ႉၼမ်ၼႃႇဢေႃႈ။
“ၵဝ်ဝႃႈတီႈသူၸမ်ႉ၊ၽူႈလႂ်သေဢမ်ႇဝႃႈ၊ၵေႃႉဢၼ်ႁပ်ႉတုင်းဢဝ်ၵဝ်ၵႃႈတီႈၽၢႆႇၼႃႈၵူၼ်းတင်းလၢႆၼၼ်ႉ၊ ၸဝ်ႈလုၵ်ႈၵူၼ်း၊ တၵ်းႁပ်ႉတုင်းဢဝ်ၵေႃႉၼၼ်ႉၵႃႈတီႈၽၢႆႇၼႃႈတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈတင်းလၢႆဢေႃႈ။-
ၵူၺ်းၵႃႈ၊ၽူႈလႂ်သေဢမ်ႇဝႃႈ၊ၵေႃႉဢၼ်ထဵင်ပႅတ်ႈၵဝ်ၵႃႈတီႈၽၢႆႇၼႃႈၵူၼ်းတင်းလၢႆၼၼ်ႉ၊ ၸဝ်ႈလုၵ်ႈၵူၼ်း၊ တၵ်းထဵင်ပႅတ်ႈၵေႃႉၼၼ်ႉၵႃႈတီႈၽၢႆႇၼႃႈတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈဢေႃႈ။
“ၽူႈလႂ်သေဢမ်ႇဝႃႈ၊ၵေႃႉဢၼ်ၽိတ်းသူပ်းၽိတ်းၵႂၢမ်းတီႈ ၸဝ်ႈလုၵ်ႈၵူၼ်း၊ ၼၼ်ႉ၊ပျတ်ႈမၼ်းၼၼ်ႉတၵ်းပွႆႇလွတ်ႈပၼ်လႆႈယူႇဢေႃႈ။ ၵူၺ်းၵႃႈ၊ၵေႃႉဢၼ်သႄႉသွမ်းဝိၺိၺ်ႇဢၼ်မူတ်းၸၢင်ႇၸဝ်ႈၸမ်ႉ၊တၵ်းဢမ်ႇလႆႈၶၢမ်ႇတၢင်းဢၼ်ပွႆႇလွတ်ႈဢပျတ်ႈလႆႈ။
“မိူဝ်ႈဢၼ်ၶဝ်ဢဝ်သူၵႂႃႇႁႂ်ႈလႆႈၸႅတ်ႈသေးသူၵႃႈတီႈၸရွပ်ႈႁေႃးတြႃးလႂ်၊ၽၢႆႇၼႃႈပူႇၵႄႇၽွင်းမိူင်းလႂ်၊ဢမ်ႇၼၼ်ၽၢႆႇၼႃႈၶုၼ်လုမ်းလႂ်ၸိုင်၊ယႃႇပေမႆႈၸႂ်လွင်ႈဢၼ်တေလႆႈႁဵတ်းၸိူဝ်ႉႁိုဝ်၊တေလႆႈၶိုၼ်းတွပ်ႇၸိူဝ်ႉႁိုဝ်၊တေလႆႈလၢတ်ႈၵႃႈသင်ၼၼ်ႉ။-
ဝိၺိၺ်ႇဢၼ်မူတ်းၸၢင်ႇၸဝ်ႈၼၼ်ႉ၊တၵ်းသွၼ်ပၼ်ႁႂ်ႈလႆႈလၢတ်ႈၵႃႈသင်ၼႂ်းၶိင်ႇၼႃႇရီႇၼၼ်ႉၵမ်းလဵဝ်ဢေႃႈ၊” ဝႃႈၼင်ႇၼႆဢေႃႈ။
ၵႃႈၼႂ်းမူႇၵူၼ်းၼၼ်ႉၵူၼ်းၵေႃႉၼိုင်ႈလဝ်ႈထၢမ်တီႈ ၸဝ်ႈယေႇသု၊ လႄႈဝႃႈ၊ “သြႃႇၸဝ်ႈ။ ၶႅၼ်းတေႃႈၸွႆႈလၢတ်ႈတီႈပီႈဢၢႆႈၵဝ်ၶႃႈ ႁႂ်ႈမၼ်းၽႄမႅင်ႇပၼ်ဢမူၺ်ႇဢၼ်ပေႃႈႁဝ်းၶႃႈၵိုတ်းပၼ်ဝႆႉၼၼ်ႉတီႈၵဝ်ၶႃႈၼၼ်ႉသေၵမ်းၶႃႈ၊” ဝႃႈၼင်ႇၼႆလႄႈ။
ၸဝ်ႈယေႇသု၊ ၶိုၼ်းလၢတ်ႈတီႈမၼ်းလႄႈဝႃႈ၊ “ၵူၼ်း႟။ ၽူႈလႂ်မၵ်းၶၢၼ်းၵဝ်ဝႆႉႁႂ်ႈလႆႈပဵၼ်ၵေႃႉဢၼ်တႅပ်းတတ်းဢမုဢၼ်ၽႄမႅင်ႇပၼ်ဢမူၺ်ႇသူပီႈၼွင်ႉ၊” ဝႃႈၼင်ႇၼႆသေယဝ်ႉ၊-
သိုပ်ႇလၢတ်ႈတီႈၶဝ်တင်းသဵင်ႈတင်းလူင်လႄႈဝႃႈ၊ “ႁဵတ်းသတိလႄႈဝႄႈပႅတ်ႈၸႂ်လေႃးၽႃႉတႃႉ။ ၵွပ်ႈလွင်ႈၸိူဝ်ႉၼင်ႇႁိုဝ်လႄႈဝႃႈၸမ်ႉ၊ၵူၼ်းႁဝ်းၼႆႉမၢၵ်ႈမီးထၢၼ်ႇႁိုဝ်သေၵေႃႈ၊ဢသၢၵ်ႈမၼ်းဢမ်ႇတႄႇၵႃႈၼိူဝ်ဢုၵ်ႉၸႃႇဢၼ်မၼ်းပိူင်ႇၼၼ်ႉလႆႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၸင်ႇဢဝ်တင်းၵႂၢမ်းဢုပမႃႇလႄႈလၢတ်ႈဝႃႈၸမ်ႉ၊ “တီႈသထေးၵေႃႉၼိုင်ႈမီးၼႃးဢၼ်မၢၵ်ႇၶဝ်ႈႁူင်းၶဝ်ႈလီၼႃႇၼၼ်ႉဢေႃႈ။-
မၼ်းၶႆႈၸႂ်ၼႂ်းၸႂ်မၼ်းလႄႈဝႃႈ၊ ‘ၵဝ်ဢမ်ႇမီးယွင်မီးယေးပုၼ်ႈဢၼ်တၵ်းပေႃးၵုမ်ႇသႂ်ႇၶဝ်ႈပိူၵ်ႇၵဝ်။ တေလႆႈႁဵတ်းၸိူဝ်ႉၼင်ႇႁိုဝ်ၼေႃ။-
ဢၼ်ၵဝ်ၶႆႈၸႂ်မႅၼ်ႈၸမ်ႉ၊ၵဝ်တၵ်းယႃႉပႅတ်ႈယေးၶဝ်ႈဢၼ်ၵဝ်ႇၼႆႉလႄႈၶိုၼ်းႁဵတ်းယေးမႂ်ႇဢၼ်ယႂ်ႇသေၼႆႉ ႁႂ်ႈလႆႈသႂ်ႇၶဝ်ႈပိူၵ်ႇ၊ဢိၵ်ႇတင်းဢုၵ်ႉၸႃႇၵဝ်တၢင်ႇမဵဝ်းတင်းသဵင်ႈတင်းလူင်ဢေႃႈ။-
ၵမ်းၼၼ်ႉ၊ၵဝ်တေလၢတ်ႈတီႈၸႂ်ဝိၺိၺ်ႇၵဝ်လႄႈဝႃႈ၊ “ဝိၺိၺ်ႇၵဝ်႟။ မႂ်းမီးၶဝ်ႈပိူၵ်ႇၶူဝ်းၶွင်လိူင်ႇၼမ်ၼႃႇၸုသိမ်းဝႆႉၵုမ်ႇၵုမ်ႇတႃႇတေလဵင်ႉတူဝ်လဵင်ႉၸႂ်ပီမိူင်းၼမ်ၼႃႇယဝ်ႉ။ ယူႇၼိမ်ၼိမ်တႃႉ။ ယူႇပျေႃႇပျေႃႇတႃႉ။ ၵိၼ်ပျေႃႇပျေႃႇတႃႉ၊”’ ဝႃႈၼင်ႇၼႆဢေႃႈ။-
ၵူၺ်းၵႃႈ၊ၽြႃးပဵၼ်ၸဝ်ႈလၢတ်ႈတီႈမၼ်းလႄႈဝႃႈ၊ ‘ၵူၼ်းငိူဝ်ႈ႟။ ၼႂ်းၶိုၼ်းၼႆႉၵမ်းလဵဝ်ၸႂ်ဝိၺိၺ်ႇမႂ်းတၵ်းလႆႈၶၢမ်ႇတၢင်းဢၼ်သိမ်းဢဝ်ၵႂႃႇယဝ်ႉ။ ၵွပ်ႈပိူဝ်ႈၼႆလႄႈၶိူင်ႈပိူင်ဢၼ်မႂ်းၸုသိမ်းဝႆႉပုၼ်ႈၸေးၸိမ်ႇမႂ်းၼၼ်ႉၸိုင်၊ၽူႈလႂ်တေပိူင်ႇ၊’ ဝႃႈၼင်ႇၼႆဢေႃႈ။
“ပိူင်လဵဝ်ၵၼ်၊ၶဝ်ၸိူဝ်းဢၼ်မၢၵ်ႈမီးလူၺ်ႈလေႃးၽႃႉတူဝ်ၸဝ်ႈၵဝ်ႇၼၼ်ႉ၊တၵ်းပဵၼ်ၵေႃႉဢၼ်ယၢၵ်ႈၽၢၼ်ၵႃႈတီႈၽၢႆႇၼႃႈၽြႃးပဵၼ်ၸဝ်ႈမိူၼ်ၸိူဝ်ႉၼင်ႇသထေးၵေႃႉၼၼ်ႉယဝ်ႉ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ သမ်ႉလၢတ်ႈတီႈတပႄးၸဝ်ႈၸိူဝ်းၼၼ်ႉထႅင်ႈလႄႈဝႃႈ၊ “ပိူဝ်ႈၼႆလႄႈၵဝ်လၢတ်ႈတီႈသူၸမ်ႉ၊တၵ်းလႆႈၵိၼ်ဢီႈသင်ပုၼ်ႈဢသၢၵ်ႈ၊တၵ်းလႆႈၼုင်ႈၶူဝ်းဢီႈသင်ပုၼ်ႈတူဝ်ၶၼ်ႇထႃႇသူ၊ဝႃႈၼႆယႃႇပေမႆႈၸႂ်။-
ဢသၢၵ်ႈမျၢတ်ႈသေတၢင်းၵိၼ်ဢေႃႈ။ တူဝ်ၶၼ်ႇထႃႇၵေႃႈမျၢတ်ႈသေၶူဝ်းၼုင်ႈဢေႃႈ။-
ဝူၼ်ႉတူၺ်းလွင်ႈၵႃလမ်တင်းလၢႆလူး။ ၶဝ်ဢမ်ႇဝၢၼ်ႇဢမ်ႇၽုၵ်ႇသွမ်ႈ၊ဢမ်ႇပၢတ်ႇဢမ်ႇထိူဝ်၊ဢမ်ႇမီးယွင်မီးယေး။ ၼႂ်းဝႃႈၼၼ်သေၵေႃႈ၊ၽြႃးပဵၼ်ၸဝ်ႈလဵင်ႉလူၶဝ်ယူႇဢေႃႈ။ သူမျၢတ်ႈသေၼူၵ်ႉၸိူဝ်းၼၼ်ႉဢမ်ႇၸႂ်ႈႁိုဝ်း။-
ၵွပ်ႈပိူဝ်ႈမႆႈၸႂ်လူၺ်ႈလွင်ႈၸိူဝ်းၼႆႉလႄႈၽူႈလႂ်ၸၢင်ႈသိုပ်ႇႁႂ်ႈဢသၢၵ်ႈတူဝ်ၸဝ်ႈၵဝ်ႇယၢဝ်းဢွၵ်ႇၵႂႃႇထႅင်ႈသွၵ်ႇၼိုင်ႈလႆႈႁိုဝ်း။-
ပေႃးသူယင်းဢမ်ႇတၢတ်ႈၼိူင်ႇလႆႈလွင်ႈတၢင်းဢၼ်လဵၵ်ႉဢၼ်ၼွႆႉၼႆႉၵူၺ်းၸိုင်၊ႁဵတ်းႁိုဝ်လႄႈသူမႆႈၸႂ်လူၺ်ႈလွင်ႈတၢင်ႇၸိူဝ်ႉတၢင်ႇမဵဝ်းၸိူဝ်းၼၼ်ႉၸိူဝ်ႉၼင်ႇႁိုဝ်။-
ဝူၼ်ႉတူၺ်းလွင်ႈမွၵ်ႇႁဵဝ်းငိုၼ်းထိူၼ်ႇၸိူဝ်းဢၼ်ၵီႈမွၵ်ႇမႃးၸိူဝ်ႉၼင်ႇႁိုဝ်ၼၼ်ႉလူး။ ၶဝ်ဢမ်ႇႁဵတ်းၵၢၼ်။ ဢမ်ႇပၼ်ႇဢမ်ႇတေႃး။ ၼႂ်းဝႃႈၼၼ်သေၵေႃႈ ၵဝ်ဝႃႈတီႈသူၸမ်ႉ၊ၶူဝ်းၼုင်ႈၶုၼ်ႁေႃၶမ်း သေႃးလမုၼ်ႇ၊ ဢၼ်မီးမုၼ်ယႂ်ႇၼႃႇၼၼ်ႉ၊ဢမ်ႇႁၢင်ႈလီႁၢင်ႈငၢမ်းတၢၼ်ႇမွၵ်ႇထိူၼ်ႇၸိူဝ်းၼၼ်ႉသေလူင်ႇ။-
ဢူဝ်း၊ၵူၼ်းဢၼ်တၢင်းယုမ်ႇမၢတ်ႈၵေႇၶဝ်႟။ ပေႃးၽြႃးပဵၼ်ၸဝ်ႈယင်းႁၢင်ႈၶိူင်ႈပၼ်တီႈတူၼ်ႈယိူဝ်ႈယႃႈဢၼ်ၶဵဝ်ယူႇၸိဝ်းငိဝ်းဝၼ်းမိူဝ်ႈၼႆႉ၊သမ်ႉလႆႈၶၢမ်ႇတၢင်းဢၼ်ဢဝ်သႂ်ႇၵႃႈၼႂ်းပုင်းတဝ်ႈၽႆးဝၼ်းမိူဝ်ႈၽုၵ်ႈၸိုင်၊မၼ်းၸဝ်ႈတၵ်းယဵင်ႈၶႅၼ်းႁၢင်ႈၶိူင်ႈပၼ်သူလိူဝ်တွၼ်းၼႃႇသေၼၼ်ႉဢမ်ႇၸႂ်ႈႁိုဝ်း။
“ပိူဝ်ႈၼႆလႄႈ ယႃႇပေယၢပ်ႇၸႂ်လႄႈမိုင်ႉႁႃပုၼ်ႈဢၼ်သူတၵ်းၵိၼ်တၵ်းသူတ်ႉၼၼ်ႉသေၵမ်း။-
လွင်ႈတၢင်းၸိူဝ်းၼႆႉၸိုင်၊ၵူၼ်းလေႃးၵီႇၵူႈၸိူဝ်ႉၵူႈမဵဝ်းၵူၺ်းမိုင်ႉႁႃဢေႃႈ။ ပေႃႈၸဝ်ႈသူႁုလွင်ႈတၢင်းဢၼ်သူလူဝ်ႇၼၼ်ႉယူႇဢေႃႈ။-
ပိူဝ်ႈၼႆလႄႈသူၸမ်ႉ၊ႁႃမိူင်းၽြႃးပဵၼ်ၸဝ်ႈၵူၺ်းတႃႉ။ လိုၼ်းၼၼ်ႉမၼ်းၸဝ်ႈတၵ်းပၼ်လွင်ႈတၢင်းၸိူဝ်းၼႆႉတင်းသဵင်ႈတင်းလူင်ထႅင်ႈဢေႃႈ။
“ၽုင်သူဝ်းဢွၼ်ႇၶဝ်႟။ ယႃႇပေၵူဝ်။ ပေႃႈၸဝ်ႈသူမီးဢလူဝ်ႇၶႂ်ႈပၼ်မိူင်းတီႈသူဢေႃႈ။-
ၶၢႆဢုၵ်ႉၸႃႇၶူဝ်းလဵင်းသူၵႃႈမီးသေလႄႈဢဝ်ငိုၼ်းၼၼ်ႉၽေးၸွၼ်းယိုၼ်ႈမႅင်ႇတီႈၵူၼ်းယၢၵ်ႈၵူၼ်းၽၢၼ်ၶဝ်တႃႉ။ သိမ်းပႅင်းထူင်ငိုၼ်းဢၼ်ဢမ်ႇၸၢင်ႈယွၵ်းၸၢင်ႈပွင်ႇတင်းလၢႆဢၼ်ဝႃႈ၊ၽၢၼ်ႇတႃႇၵၢင်ႁၢဝ်မဵဝ်းဢၼ်ဢမ်ႇၸၢင်ႈလု၊တီႈဢၼ်ၽူႈလၵ်ႉဢမ်ႇၸၢင်ႈႁွတ်ႈထိုင်လႆႈလႄႈ ႁေႃဢမ်ႇၸၢင်ႈယႃႉလႆႈၼၼ်ႉတႃႉ။-
ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈဝႃႈၸမ်ႉ၊ႁူဝ်ၸႂ်သူၸၢင်ႈမီးၵႃႈတီႈဢၼ်ၽၼ်ႇတႃႇဢုၵ်ႉၸႃႇသူမီးၼၼ်ႉဢေႃႈ။
“ႁႂ်ႈလႆႈတၼ်းဝႆႉပုၼ်ႈၵႃႈဢၼ်တၵ်းပေႃႇပဵၼ်မႃးၸိူဝ်းၼၼ်ႉၸိုင်၊ဢဝ်ၽႃႈႁတ်ႉဢႅဝ်ယူႇသေလႄႈတႆႈၽႆးဝႆႉတႃႉ။-
ႁဵတ်းမိူၼ်ၸိူဝ်ႉၼင်ႇလုၵ်ႈၸၢင်ႈၸိူဝ်းဢၼ်မီးသတိလႄႈ ပႂ်ႉပေႃႈလဵင်ႉၶဝ်ဢၼ်တၵ်းပွၵ်ႈၶိုၼ်းမႃးသေၵႃႈတီႈပွႆးသွင်ႇမၢင်ႇၵလႃႇၼၼ်ႉ၊ႁႂ်ႈလႆႈၽုၺ်ႇပၼ်ၵမ်းလဵဝ်မိူဝ်ႈဢၼ်မၼ်းမႃးတွႆႇၽၵ်းတူၼၼ်ႉတႃႉ။-
လုၵ်ႈၸၢင်ႈၸိူဝ်းဢၼ်ပေႃႈလဵင်ႉၶဝ်ပွၵ်ႈၶိုၼ်းမႃးထူပ်းႁၼ်လွင်ႈတၢင်းဢၼ်ၶဝ်တူင်ႉတိုၼ်ႇပႂ်ႉယူႇၼၼ်ႉတေမီးမၢင်ႇၵလႃႇဢေႃႈ။ ၵဝ်ဝႃႈတီႈၸိုဝ်ႈၸႂ်ႈမၼ်းတီႈသူၸမ်ႉ၊ပေႃႈလဵင်ႉၶဝ်ၼၼ်ႉတၵ်းႁႂ်ႈၶဝ်ၼင်ႈႁိမ်းၽိူၼ်ၶဝ်ႈသေယဝ်ႉ၊တူဝ်မၼ်းတၵ်းဢဝ်ၽႃႈႁတ်ႉဢႅဝ်သေယဝ်ႉ၊ႁဵတ်းလဵင်ႉႁဵတ်းလူၶဝ်ဢေႃႈ။-
ၶိင်ႇတဵင်ႈၶိုၼ်းသေဢမ်ႇဝႃႈ၊ၶိင်ႇတဵင်ႈၶိုၼ်းၸၢႆႉသေဢမ်ႇဝႃႈ၊မိူဝ်ႈဢၼ်ပေႃႈလဵင်ႉၶဝ်ပွၵ်ႈၶိုၼ်းမႃးလႄႈထူပ်းႁၼ်ၸိူဝ်ႉၼင်ႇၼႆၸိုင်၊လုၵ်ႈၸၢင်ႈၸိူဝ်းၼၼ်ႉတေမီးမၢင်ႇၵလႃႇဢေႃႈ။-
ပေႃးၸဝ်ႈႁိူၼ်းႁုၽွင်းယၢမ်းဢၼ်ၽူႈလၵ်ႉတေမႃးၸိုင်၊မၼ်းတေပႂ်ႉလႄႈႁႄႉၵင်ႈႁိူၼ်းမၼ်းယူႇဢၼ်ဝႃႈၼၼ်ႉ၊သူႁုယူႇဢေႃႈ။-
ပိူဝ်ႈၼႆလႄႈ သူၵေႃႈမႄးႁႅၼ်းဝႆႉလႄႈပႂ်ႉထႃႈယူႇတႃႉ။ ၵွပ်ႈၸိူဝ်ႉၼင်ႇႁိုဝ်လႄႈဝႃႈၸမ်ႉ၊ လုၵ်ႈၵူၼ်း၊ တၵ်းမႃးၼႂ်းၶိင်ႇၼႃႇရီႇဢၼ်သူဢမ်ႇထၢင်ႇဢမ်ႇထိူမ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ပေႇတရု၊ လဝ်ႈထၢမ်တီႈ ၸဝ်ႈယေႇသု၊ လႄႈဝႃႈ၊ “ၸဝ်ႈႁဝ်း။ ဢၼ်ၸဝ်ႈႁဝ်းႁေႃးလၢတ်ႈၵႂၢမ်းဢုပမႃႇၼႆႉပဵၼ်ပုၼ်ႈႁဝ်းၶႃႈၵူၺ်းႁိုဝ်း။ ဢမ်ႇၼၼ်ၵေႃႈပဵၼ်ပုၼ်ႈၵူၼ်းတင်းသဵင်တင်းလူင်ၶႃႈႁိုဝ်း၊” ဝႃႈၼင်ႇၼႆလႄႈ။
ၸဝ်ႈၽြႃးၶိုၼ်းလၢတ်ႈလႄႈဝႃႈ၊ “ၽူႈပႂ်ႉထိင်းဢုၵ်ႉၸႃႇဢၼ်မီးသဵတ်ႈၸႃႇလႄႈမီးပိင်ႇၺႃႇၼၼ်ႉ ပဵၼ်ၵေႃႉၸိူဝ်ႉၼင်ႇႁိုဝ်။ မၼ်းၼၼ်ႉပဵၼ်ၵေႃႉဢၼ်ပေႃႈလဵင်ႉမၼ်းယုမ်ႇယမ်သေယဝ်ႉ၊ယုၵ်ႉတၢင်ႇဝႆႉၼႂ်းဢရႃႇဢၼ်ပႂ်ႉထိင်းၼႃႈႁိူၼ်းလႄႈၸၢင်ႈၽႄမႅင်ႇပၼ်တၢင်းၵိၼ်တီႈလုၵ်ႈၸၢင်ႈၼင်ႇၵၼ်ၵၼ်ၼႂ်းၶိင်ႇဢၼ်သၢင်ႇထုၵ်ႇၼၼ်ႉဢေႃႈ။-
လုၵ်ႈၸၢင်ႈၵေႃႉၼၼ်ႉ မိူဝ်ႈဢၼ်ပေႃႈလဵင်ႉမၼ်းပွၵ်ႈမႃးလႄႈႁုႁၼ်လွင်ႈဢၼ်မၼ်းမီးသဵတ်ႈၸႃႇႁဵတ်းၵၢၼ်ငၢၼ်းယူႇၼၼ်ႉၸိုင်၊တေမီးမၢင်ႇၵလႃႇဢေႃႈ။-
ၵဝ်ဝႃႈတီႈၸိုဝ်ႈၸႂ်ႈမၼ်းၸမ်ႉ၊ပေႃႈလဵင်ႉမၼ်းတၵ်းယုၵ်ႉတၢင်ႇလုၵ်ႈၸၢင်ႈၵေႃႉၼၼ်ႉဝႆႉၼႂ်းဢရႃႇဢၼ်ပႂ်ႉထိင်းၵႃႈၼိူဝ်ဢုၵ်ႉၸႃႇၶူဝ်းလဵင်းမၼ်းၵႃႈမီးတင်းသဵင်ႈတင်းလူင်ဢေႃႈ။-
ၵူၺ်းၵႃႈ၊သင်ဝႃႈလုၵ်ႈၸၢင်ႈၼၼ်ႉလၢတ်ႈတီႈတူဝ်ၸဝ်ႈၵဝ်ႇလႄႈဝႃႈ၊ ‘ပေႃႈလဵင်ႉၵဝ်တေၼၢၼ်းမႃးယူႇ၊’ ဝႃႈၼင်ႇၼႆသေယဝ်ႉ၊လုၵ်ႈၸၢင်ႈၸဵမ်ယိင်းၸဵမ်ၸၢႆးၼင်ႇၵၼ်ၵၼ်ပေႃႉယႅၼ်ႉၵၼ်ယူႇ၊ၵိၼ်ယူႇသူတ်ႉယူႇလႄႈမဝ်းလဝ်ႈယူႇၸိုင်၊-
မိူဝ်ႈဢၼ်ပေႃႈလဵင်ႉမၼ်းပွၵ်ႈမႃးၼႂ်းဝၼ်းဢၼ်မၼ်းဢမ်ႇထၢင်ႇဢမ်ႇထိူမ်၊ၼႂ်းၶိင်ႇၼႃႇရီႇဢၼ်မၼ်းဢမ်ႇႁုၼၼ်ႉလႄႈ တၵ်းတႅပ်းလုၵ်ႈၸၢင်ႈၼၼ်ႉပဵၼ်ပွတ်းပဵၼ်ပိတ်းသေယဝ်ႉ၊ဢဝ်မၼ်းဝႆႉလူၺ်ႈၵၼ်တင်းၶဝ်ၸိူဝ်းဢၼ်ဢမ်ႇမီးသဵတ်ႈၸႃႇၼၼ်ႉဢေႃႈ။
“လုၵ်ႈၸၢင်ႈဢၼ်ႁုဢလူဝ်ႇပေႃႈလဵင်ႉမၼ်းယူႇသေလႄႈယင်းဢမ်ႇမႄးႁႅၼ်းတူဝ်ၸဝ်ႈၵဝ်ႇယဝ်ႉ၊ဢမ်ႇႁဵတ်းၸွမ်းဢလူဝ်ႇပေႃႈလဵင်ႉမၼ်းၼၼ်ႉၸိုင်၊တၵ်းလႆႈၶၢမ်ႇတၢမ်ႇဢၼ်ပေႃႉယႅၼ်ႉႁႅင်းၼႃႇဢေႃႈ။-
ၵူၺ်းၵႃႈ၊လုၵ်ႈၸၢင်ႈဢၼ်ဢမ်ႇႁုဢလူဝ်ႇပေႃႈလဵင်ႉမၼ်းလႄႈႁဵတ်းမႅၼ်ႈဢၼ်ထိူၵ်ႈၶၢမ်ႇတၢမ်ႇၶွၼ်ႉၼၼ်ႉၸမ်ႉ၊တၵ်းလႆႈၶၢမ်ႇတၢမ်ႇဢၼ်ပေႃႉယႅၼ်ႉၵေႇၵေႇဢေႃႈ။ ၽူႈလႂ်သေဢမ်ႇဝႃႈ၊ၵေႃႉဢၼ်လႆႈၶၢမ်ႇဢဝ်ၵျေးၸူးၼမ်ၼမ်ၼၼ်ႉၵေႃႉၼၼ်ႉလူဝ်ႇလႆႈတႅၼ်းၶိုၼ်းၼမ်ၼမ်ဢေႃႈ။ ၽူႈလႂ်သေဢမ်ႇဝႃႈ၊တီႈၵေႃႉဢၼ်လႆႈဢဝ်ဢုၵ်ႉၸႃႇဢၢပ်ႈဝႆႉၼမ်ၼမ်ၼၼ်ႉတေလႆႈယွၼ်းဢဝ်ၶိုၼ်းတီႈၵေႃႉၼၼ်ႉၼမ်ၼမ်ဢေႃႈ။
“ၵဝ်မႃးႁႂ်ႈၽႆးလႆႈမႆႈလေႃးၵႃႉၼႆႉဢေႃႈ။ ၵဝ်ၶႂ်ႈႁႂ်ႈၽႆးလုၵ်ႉၶိုၼ်ႈယဝ်ႉဢေႃႈ။-
ၵဝ်တၵ်းလႆႈၶၢမ်ႇတူၵ်းၸူမ်ၼႂ်းတုၵ်ႉၶႃႉၶၢၼ်ၸႂ်ၸိူဝ်ႉၼင်ႇၵူၼ်းလႆႈၶၢမ်ႇတူၵ်းၸူမ် ၼႂ်းတၢင်းဢၼ်ၶၢမ်ႇဢဝ်မၢင်ႇၵလႃႇပပ်ႉတိၸမ်ႇ ၼၼ်ႉဢေႃႈ။ ၸူဝ်ႈဢၼ်ၵဝ်ဢမ်ႇပႆႇၶၢမ်ႇၼၼ်ႉၵဝ်မီးတၢင်းဢၼ်ၵိၼ်းၸႂ်ၼႃႇဢေႃႈ။-
သူထၢင်ႇၵဝ်မႃးႁႂ်ႈလႆႈပၼ်တၢင်းၼိမ်တီႈလိၼ်မိူင်းၼႆႉႁိုဝ်း။ ၵဝ်ဝႃႈ၊ဢမ်ႇၸႂ်ႈတၢင်းၼိမ်၊ယဵင်ႈၶႅၼ်းတေပဵၼ်လွင်ႈၽၢတ်ႇၽႄၵၼ်ဢေႃႈ။-
ၸႃႉၸဵမ်တေႃႈလဵဝ်ၼႆႉလႄႈ ၼႂ်းၼႃႈႁိူၼ်းဢၼ်မီးၵူၼ်းႁိူၼ်းႁႃႈၵေႃႉၼၼ်ႉ၊တၵ်းၽၢတ်ႇၽႄၵၼ်လႄႈသၢမ်ၵေႃႉတေၶတ်းၵၼ်တင်းသွင်ၵေႃႉ၊သွင်ၵေႃႉတေၶတ်းၵၼ်တင်းသၢမ်ၵေႃႉၼၼ်ႉဢေႃႈ။-
ၶဝ်တၵ်းၽၢတ်ႇၽႄၵၼ်လႄႈ၊ပေႃႈတေႁဵတ်းၶတ်းလုၵ်ႈၸၢႆး၊လုၵ်ႈၸၢႆးတေႁဵတ်းၶတ်းပေႃႈ၊မႄႈတေႁဵတ်းၶတ်းလုၵ်ႈယိင်း၊လုၵ်ႈယိင်းတေႁဵတ်းၶတ်းမႄႈ၊မႄႈဢွၵ်ႇၼၢႆးတေႁဵတ်းၶတ်းလုၵ်ႈပႂ်ႉ၊လုၵ်ႈပႂ်ႉတေႁဵတ်းၶတ်းမႄႈဢွၵ်ႇၼၢႆးဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ သမ်ႉလၢတ်ႈတီႈၵူၼ်းတင်းလၢႆလႄႈဝႃႈ၊ “မိူဝ်ႈဢၼ်သူႁၼ်မွၵ်ႇၵုမ်ႈၵၢမ်ႈမႃးၽၢႆႇတၢင်းၼႃႈဝၼ်းတူၵ်းၸိုင်၊မိူဝ်ႈၼၼ်ႉၵမ်းလဵဝ်သူၸၢင်ႈလၢတ်ႈတီႈၵၼ်လႄႈဝႃႈ၊ ‘ၽူၼ်တေတူၵ်းယဝ်ႉ၊’ ဝႃႈၼႆလႄႈ၊ၵႃႈၼင်ႇဢၼ်သူဝႃႈၼၼ်ႉၽူၼ်တူၵ်းမႃးတႄႉဢေႃႈ။-
မိူဝ်ႈဢၼ်သူႁုလူမ်းတၢင်းၸၢၼ်းၽတ်ႉထူဝ်းမႃးၸိုင်၊သူၸၢင်ႈဝႃႈ၊ ‘လႅတ်ႇတေမႆႈၼႃႇယဝ်ႉ၊’ ဝႃႈၼႆလႄႈၵႃႈဢၼ်သူဝႃႈၼၼ်ႉလႅတ်ႇမႆႈမႃးတႄႉဢေႃႈ။-
ၵူၼ်းၼႃႈသိုဝ်ႈၸႂ်ၵူတ်ႉၸိူဝ်းၼႆႉ႟။ သူၸၢင်ႈတူၺ်းၼႃႈလိၼ်ၼႃႈၽႃႉလႄႈ ၸၢင်ႈႁုလွင်ႈဢၼ်တေပဵၼ်မႃးၸိူဝ်ႉၼင်ႇႁိုဝ်ၼၼ်ႉယဝ်ႉ။ ႁဵတ်းသင်လႄႈသူဢမ်ႇၸၢင်ႈႁုႁၼ်လွင်ႈၵၢပ်ႈၵႃႇလႃႉၶိင်ႇတေႃႈလဵဝ်ၼႆႉၼင်ႇႁိုဝ်။
“ၵွပ်ႈပိူဝ်ႈၸိူဝ်ႉႁိုဝ်လႄႈ သူဢမ်ႇတႅပ်းတတ်းတူဝ်ၸဝ်ႈၵဝ်ႇႁႂ်ႈလႆႈႁဵတ်းဢၼ်သိုဝ်ႈဢၼ်တေႃႇၼင်ႇႁိုဝ်။-
ပေႃးသေၵေႃႉသေၵူၼ်းႁဵတ်းဢမုမႂ်းလႄႈဢွၼ်မႂ်းၵႂႃႇတီႈလုမ်းၸိုင်၊ၵျူဝ်းၸႃးႁဵတ်းႁႂ်ႈဢမုသူသွင်ၵေႃႉၼၼ်ႉပျေႇၵၼ်ၵႃႈတီႈၵၢင်တၢင်းတႃႉ။ ပေႃးဢမ်ႇၼၼ်ၵေႃႉၼၼ်ႉတၵ်းတိုတ်ႉၸၼ်မႂ်းၵႂႃႇၶိုၼ်ႈလုမ်းလႄႈၶုၼ်လုမ်းၼၼ်ႉတၵ်းဢဝ်မႂ်းဢၢပ်ႈပၼ်ၼႂ်းမိုဝ်းၵူၼ်းသိုၵ်းသေလႄႈၵူၼ်းသိုၵ်းႁၢၼ်ၼၼ်ႉ တၵ်းဢဝ်မႂ်းၶင်ဝႆႉၵႃႈၼႂ်းၶွၵ်ႈဢေႃႈ။-
ၵဝ်ဝႃႈတီႈမႂ်းၸမ်ႉ၊ၸူဝ်ႈဢၼ်မႂ်းဢမ်ႇပႆႇတႅၼ်းငိုၼ်းတင်းသဵင်ႈတင်းလူင်မူတ်းၸိုင်၊မႂ်းတၵ်းဢမ်ႇလႆႈဢွၵ်ႇၶွၵ်ႈမႃး၊” ဝႃႈၼင်ႇၼႆဢေႃႈ။
ၼႂ်းၶိင်ႇမိူဝ်ႈၼၼ်ႉ၊ၵူၼ်းၵမ်ႈၽွင်ႈဢၼ်မီးယူႇတီႈၼၼ်ႈမွၵ်ႇလၢတ်ႈတီႈ ၸဝ်ႈယေႇသု၊ လွင်ႈဢၼ်ၶုၼ် ပိလတ်ႉ၊ ဢဝ်လိူတ်ႈၵူၼ်း ၵႃႇလိလႄး၊ ၵမ်ႈၽွင်ႈလေႃးၵၼ်တင်းတူဝ်ယဵၸ်ႈပရေႃးႁဵၵ်ႈဢၼ်ၶဝ်သၢၵ်ႈလူႇၼၼ်ႉဢေႃႈ။-
ၸဝ်ႈယေႇသု၊ ၶိုၼ်းလၢတ်ႈတီႈၶဝ်လႄႈဝႃႈ၊ “ၵွပ်ႈပိူဝ်ႈၵူၼ်းမဵဝ်း ၵႃႇလိလႄး၊ ၸိူဝ်းၼၼ်ႉလႆႈၶၢမ်ႇတၢႆၸိူဝ်ႉၼင်ႇၼၼ်လႄႈသူထၢင်ႇၶဝ်ယဵင်ႈၶႅၼ်းမီးဝူတ်ႈဢပျတ်ႈယႂ်ႇၼႃႇသေၵူၼ်းမဵဝ်း ၵႃႇလိလႄး၊ တၢင်ႇၵေႃႉၸိူဝ်းၼၼ်ႉ၊ဝႃႈၼႆႁိုဝ်း။-
ၵဝ်ဝႃႈတီႈသူၸမ်ႉ၊ဢမ်ႇၸႂ်ႈၸိူဝ်ႉၼင်ႇၼၼ်ၵူၺ်း။ ပေႃးသူယင်းဢမ်ႇၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်သူၸိုင်၊သူတၵ်းလႆႈလုသုမ်းမိူၼ်မိူၼ်ၵၼ်ဢေႃႈ။-
လိူဝ်သေၼၼ်ႉ ၵူၼ်းသိပ်းပႅတ်ႇၵေႃႉဢၼ်သဝ်လၢင်း သီးလွမ်ႇ၊ လူမ်ႉတဵင်တၢႆၸိူဝ်းၼၼ်ႉ၊သူထၢင်ႇၶဝ်ယဵင်ႈၶႅၼ်းမီးဝူတ်ႈဢပျတ်ႈယႂ်ႇၼႃႇသေၵူၼ်းဢၼ်ယူႇၼႂ်းဝဵင်း ယေႇရုသလႅမ်ႇ၊ ၵႃႈမီးတင်းလၢႆဝႃႈၼႆႁိုဝ်း။-
ၵဝ်ဝႃႈတီႈသူၸမ်ႉ၊ဢမ်ႇၸႂ်ႈၸိူဝ်ႉၼင်ႇၼၼ်ၵူၺ်း။ ပေႃးသူယင်းဢမ်ႇၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်သူၸိုင်၊သူတၵ်းလုသုမ်းမိူၼ်မိူၼ်ၵၼ်ဢေႃႈ၊” ဝႃႈၼင်ႇၼႆဢေႃႈ။
လိုၼ်းၼၼ်ႉ၊ ၸဝ်ႈယေႇသု၊ ဢဝ်တင်းၵႂၢမ်းဢုပမႃႇလႄႈလၢတ်ႈဝႃႈ၊ “မီးၵူၼ်းၵေႃႉၼိုင်ႈမၼ်းၽုၵ်ႇဝႆႉတူၼ်ႈမၢၵ်ႇလိူဝ်ႇၵႃႈၼႂ်းသူၼ်မၼ်းဢေႃႈ။ မၼ်းၵႂႃႇၸူးတီႈတူၼ်ႈမၢၵ်ႇလိူဝ်ႇၼၼ်ႉလႄႈ ႁႃတူၺ်းမၢၵ်ႇမၼ်းသေၵေႃႈဢမ်ႇႁၼ်သေႁူၺ်ႇ။-
မၼ်းၸင်ႇၵႂႃႇလၢတ်ႈတီႈၵူၼ်းႁဵတ်းသူၼ်ၼၼ်ႉလႄႈဝႃႈ၊ ‘တူၺ်းလူး။ ၵဝ်မႃးႁႃတူၺ်းမၢၵ်ႇမၼ်းၵႃႈတီႈတူၼ်ႈမၢၵ်ႇလိူဝ်ႇၼႆႉထူၼ်ႈထိုင်သၢမ်ပီယဝ်ႉ။ ၵူၺ်းၵႃႈ၊ဢမ်ႇႁၼ်သေႁူၺ်ႇ။ ပွမ်ႈပႅတ်ႈတႃႉ။ ႁဵတ်းသင်လႄႈ ႁႂ်ႈမၼ်းႁူၵ်ႉလိၼ်ၼႆႉယူႇၸိူဝ်ႉၼင်ႇၼႆၼင်ႇႁိုဝ်၊’ ဝႃႈၼႆ၊မိူဝ်ႈဢၼ်လၢတ်ႈၸိူဝ်ႉၼင်ႇၼႆၸိုင်၊-
ၵူၼ်းႁဵတ်းသူၼ်ၵေႃႈလၢတ်ႈလႄႈဝႃႈ၊ ‘ယိူၼ်ႉထႅင်ႈပီၼိုင်ႈသေၵမ်းၶႃႈၸဝ်ႈ။ ၵဝ်ၶႃႈတေၶုတ်းယူင်းငဝ်ႈမၼ်းလႄႈသႂ်ႇၽုၼ်ႇလူးၵွၼ်ႇၶႃႈဢေႃႈ။-
သင်ဝႃႈပီၼႃႈမၼ်းဢွၵ်ႇမၢၵ်ႇမႃးၸိုင်၊လီယဝ်ႉၶႃႈဢေႃႈ။ ပေႃးမၼ်းယင်းဢမ်ႇဢွၵ်ႇမႃးၸိုင်၊ၸင်ႇၵွႆႈပွမ်ႈပႅတ်ႈသေၵမ်းၶႃႈ၊’ ဝႃႈၼႆမၼ်းၶိုၼ်းလၢတ်ႈဢေႃႈ၊” ဝႃႈၼင်ႇၼႆဢေႃႈ။
ၵမ်းၼၼ်ႉ၊ ၸဝ်ႈယေႇသု၊ သင်ႇသွၼ်သုင်းမႃႉပၼ်ၵႃႈၼႂ်းၸရွပ်ႈႁေႃးတြႃးလင်ၼိုင်ႈၼႂ်းဝၼ်းၵမ်သိၼ်ယူႇဢေႃႈ။-
တီႈၼၼ်ႈမီးမႄႈယိင်းၵေႃႉၼိုင်ႈၽီၶဝ်ႈမၼ်းသိပ်းပႅတ်ႇပီလႄႈၸပ်းတၢင်းပဵၼ်ဢၼ်လင်ၵွင်ႇယူႇ၊ဢမ်ႇယဵတ်ႇတူဝ်မၼ်းလႆႈသေဢိတ်းၼၼ်ႉဢေႃႈ။-
မိူဝ်ႈဢၼ် ၸဝ်ႈယေႇသု၊ ႁၼ်မႄႈယိင်းၼၼ်ႉၸိုင်၊မၼ်းၸဝ်ႈႁွင်ႉမၼ်းမႃးလႄႈ လၢတ်ႈတီႈမၼ်းၼၼ်ႉလႄႈဝႃႈ၊ “မႄႈယိင်း႟။ မႂ်းၵၢင်းလွတ်ႈသေတၢင်းၶႆႈတၢင်းပဵၼ်ယဝ်ႉ၊” ဝႃႈၼႆသေယဝ်ႉ၊-
ယိုၼ်းမိုဝ်းမၼ်းၸဝ်ႈတၢင်ႇၼိူဝ်မႄႈယိင်းၼၼ်ႉလႄႈ ၼႂ်းၶိင်ႇၼၼ်ႉၵမ်းလဵဝ်မႄႈယိင်းၼၼ်ႉယဵတ်ႇတူဝ်မၼ်းလႆႈသေလႄႈယွင်ႈယေႃးၵျေးၸူးၽြႃးပဵၼ်ၸဝ်ႈဢေႃႈ။
မိူဝ်ႈဢၼ် ၸဝ်ႈယေႇသု၊ ႁႂ်ႈတၢင်းၶႆႈတၢင်းပဵၼ်ၸိုၼ်ႈႁၢႆၼႂ်းဝၼ်းၵမ်သိၼ်လႄႈၵူၼ်းဢွၼ်ႁူဝ်ၸရွပ်ႈႁေႃးတြႃးၶႂ်ႈၸႃႉၼႃႇသေယဝ်ႉ၊လၢတ်ႈတီႈမူႇၵူၼ်းၸိူဝ်းၼၼ်ႉလႄႈဝႃႈ၊ “ပုၼ်ႈတႃႇၵူၼ်းတေႁဵတ်းၵၢၼ်ၸိုင်၊မီးႁူၵ်းဝၼ်းဢေႃႈ။ မႃးၶၢမ်ႇဢဝ်တၢင်းဢၼ်ႁႂ်ႈတၢင်းၶႆႈတၢင်းပဵၼ်ၸိုၼ်ႈႁၢႆၼႂ်းဝၼ်းၸိူဝ်းၼၼ်ႉတႃႉ။ ၼႂ်းဝၼ်းၵမ်သိၼ်ၼႆႉယႃႇပေမႃးၶၢမ်ႇဢဝ်လႃးလႃး၊” ဝႃႈၼင်ႇၼႆဢေႃႈ။
ၸဝ်ႈၽြႃးၶိုၼ်းလၢတ်ႈတီႈၵႄႇၸရွပ်ႈႁေႃးတြႃးၼၼ်ႉလႄႈဝႃႈ၊ “ၵူၼ်းၼႃႈသိုဝ်ႈၸႂ်ၵူတ်ႉၼႆႉ႟။ ၼႂ်းဝၼ်းၵမ်သိၼ်သူၸၢင်ႈပွႆႇဝူဝ်းပွႆႇမႃႉလီႈလႂ်ဢွၵ်ႇၶွၵ်ႈလႄႈဢွႆႇၼမ်ႉပၼ်ယူႇဢမ်ႇၸႂ်ႈႁိုဝ်း။-
မိူဝ်ႈလဵဝ်ၵေႃႉဢၼ်ပဵၼ်လုၵ်ႈယိင်း ဢႃႇပြႃႇႁၢမ်ႇ၊ လႆႈၶၢမ်ႇတၢင်းဢၼ် မႃႇၼၢတ်ႈ၊ မတ်ႉဝႆႉသိပ်းပႅတ်ႇပီၼႆႉ၊ၸွင်ႇမၼ်းဢမ်ႇထိူၵ်ႈၶၢမ်ႇဢၼ်ပွႆႇလွတ်ႈပၼ်ၼႂ်းဝၼ်းၵမ်သိၼ်ၼႆႉႁိုဝ်း၊” ဝႃႈၼင်ႇၼႆဢေႃႈ။-
ၶေႃႈၵႂၢမ်းဢၼ်မၼ်းၸဝ်ႈၶိုၼ်းတွပ်ႇၼၼ်ႉႁဵတ်းႁႂ်ႈၵူၼ်းဢၼ်ၶတ်းၵၼ်တင်းမၼ်းၸဝ်ႈတင်းလၢႆ လႆႈဢူၵ်းလႆႈဢၢႆဢေႃႈ။ ၵူၼ်းတင်းသဵင်ႈတင်းလူင်ၸမ်ႉ၊လႆႈသိူဝ်းၸူမ်းမူၼ်ႈပျေႃႇၼႂ်းလွင်ႈတၢင်းဢၼ်လီဢၢမ်း ဢၼ်မၼ်းၸဝ်ႈႁဵတ်းၼမ်ၼႃႇၼၼ်ႉဢေႃႈ။
ပိူဝ်ႈၼႆလႄႈ ၸဝ်ႈယေႇသု၊ သမ်ႉလၢတ်ႈထႅင်ႈၸမ်ႉ၊ “မိူင်းၽြႃးပဵၼ်ၸဝ်ႈမိူၼ်ၵႃႈသင်။ ၵဝ်တၵ်းလႆႈဢဝ်ၵႃႈသင်လႄႈတႅၵ်ႈတိူင်းမိူင်းၸဝ်ႈၼၼ်ႉ။-
မိူင်းၸဝ်ႈၼၼ်ႉ၊မိူၼ်ၸိူဝ်ႉၼင်ႇၽၼ်းၽၵ်းၵၢတ်ႇမဵတ်ႉၼိုင်ႈဢၼ်ၵူၼ်းၵေႃႉၼိုင်ႈဝၢၼ်ႇၼႂ်းသူၼ်မၼ်းၼၼ်ႉဢေႃႈ။ တူၼ်ႈၼုမ်ႇမၼ်းယႂ်ႇမႃးလႄႈပဵၼ်တူၼ်ႈပဵၼ်လမ်းမႃးသေယဝ်ႉ၊ၼူၵ်ႉတင်းလၢႆမႃးလိုဝ်ႈမႃးသဝ်းယူႇၼိူဝ်ၵိင်ႇမၼ်းၶႃႈမၼ်းဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ သမ်ႉၶိုၼ်းလၢတ်ႈထႅင်ႈၸမ်ႉ၊ “ၵဝ်တၵ်းလႆႈဢဝ်ၵႃႈသင်လႄႈတႅၵ်ႈၼိူင်းလူၺ်ႈၵၼ်တင်းမိူင်းၽြႃးပဵၼ်ၸဝ်ႈ။-
မိူင်းၸဝ်ႈၼၼ်ႉ မိူၼ်ၸိူဝ်ႉၼင်ႇၸိူဝ်ႉပႅင်ႈဢၼ်မႄႈယိင်းၵေႃႉၼိုင်ႈဢဝ်သႂ်ႇလႄႈၼူတ်ႈၵႃႈၼႂ်းၽွင်ၶဝ်ႈမုၼ်းသၢမ်ၵွၵ်းပေႇတေႃႇထိုင်ႁွတ်ႈႁႂ်ႈၸိူဝ်ႉပႅင်ႈတင်းသဵင်ႈတင်းလူင်ၼၼ်ႉပွင်းၶိုၼ်ႈမႃးၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵႂႃႇလႄႈသင်ႇသွၼ်ပၼ်ဝဵင်းၼိုင်ႈယဝ်ႉဝဵင်းၼိုင်ႈ၊ဝၢၼ်ႈၼိုင်ႈယဝ်ႉဝၢၼ်ႈၼိုင်ႈ၊ၸွမ်းတၢင်းၵႂႃႇၸူးဝဵင်း ယေႇရုသလႅမ်ႇ၊ ယူႇဢေႃႈ။-
ၵူၼ်းၵေႃႉၼိုင်ႈလဝ်ႈထၢမ်တီႈမၼ်းၸဝ်ႈလႄႈဝႃႈ၊ “ၸဝ်ႈႁဝ်း။ ၶဝ်ၸိူဝ်းဢၼ်လႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၼၼ်ႉတေမီးၵေႇၼႃႇၶႃႈယူဝ်း၊” ဝႃႈၼင်ႇၼႆဢေႃႈ။
မၼ်းၸဝ်ႈၶိုၼ်းလၢတ်ႈလႄႈဝႃႈ၊ “ၶတ်းၸႂ်ၵျူဝ်းၸႃးၶဝ်ႈၵႃႈတီႈၽၵ်းတူၵႅပ်ႈတႃႉ။ ၵဝ်ဝႃႈတီႈသူၸမ်ႉ၊ၵူၼ်းၼမ်ၼႃႇၶတ်းၸႂ်ၵျူဝ်းၸႃးႁႂ်ႈလႆႈၶဝ်ႈသေၵေႃႈၶဝ်ဢမ်ႇၸၢင်ႈၶဝ်ႈလႆႈ။-
မိူဝ်ႈဢၼ်ၸဝ်ႈႁိူၼ်းလုၵ်ႉလႄႈဢိုတ်းၽၵ်းတူယဝ်ႉၼၼ်ႉ၊သူသမ်ႉလႆႈၸုၵ်းယူႇၵႃႈၼွၵ်ႈႁိူၼ်းသေယဝ်ႉ၊တွႆႇၽၵ်းတူလႄႈလၢတ်ႈဝႃႈ၊ ‘ၸဝ်ႈႁဝ်းတီႈၶႃႈ။ ၽုၺ်ႇၽၵ်းတူပၼ်ႁဝ်းၶႃႈသေၵမ်းၶႃႈ၊’ ဝႃႈၼႆသေၵေႃႈမၼ်းၼၼ်ႉတၵ်းၶိုၼ်းလၢတ်ႈလႄႈဝႃႈ၊ ‘သူလုၵ်ႉၵႃႈတီႈလႂ်မႃးၵဝ်ဢမ်ႇႁု၊’ ဝႃႈၼင်ႇၼႆဢေႃႈ။-
သူတေၶိုၼ်းလၢတ်ႈလႄႈဝႃႈ၊ ‘ႁဝ်းၶႃႈလႆႈၵိၼ်လူၺ်ႈၵၼ်တင်းၸဝ်ႈႁဝ်းယဝ်ႉၶႃႈဢေႃႈ။ ၸဝ်ႈႁဝ်းယင်းသင်ႇသွၼ်ပၼ်ၵႃႈတီႈၼႂ်းဝဵင်းႁဝ်းၶႃႈယဝ်ႉဢေႃႈ၊’ ဝႃႈၼႆသေၵေႃႈ၊-
မၼ်းၼၼ်ႉသမ်ႉတေၶိုၼ်းလၢတ်ႈလႄႈဝႃႈ၊ ‘သူလုၵ်ႉၵႃႈတီႈလႂ်မႃးၵဝ်ဢမ်ႇႁု။ သူၸိူဝ်းဢၼ်ႁဵတ်းဢၼ်ႁၢႆႉမိူၵ်ႈတင်းလၢႆၶဝ်႟။ ဝႄႈဢွၵ်ႇသေၵႃႈတီႈၵဝ်ၼႆႉၵႂႃႇတႃႉ၊’ ဝႃႈၼင်ႇၼႆဢေႃႈ။-
ၼႂ်းမိူဝ်ႈဢၼ်သူလႆႈၶၢမ်ႇတၢင်းဢၼ်ႁေႃႈဢွၵ်ႇသေလႄႈ မီးယူႇၵႃႈၼွၵ်ႈမိူင်းၽြႃးပဵၼ်ၸဝ်ႈသေယဝ်ႉ၊မုင်ႈႁၼ် ဢႃႇပြႃႇႁၢမ်ႇ၊ဢိၸၢၵ်ႈ၊ယႃႇၵုပ်ႈ၊ ဢိၵ်ႇတင်းပရေႃးၽႅတ်ႈ တင်းလၢႆၶဝ်ႈၵႃႈၼႂ်းမိူင်းၽြႃးပဵၼ်ၸဝ်ႈၼၼ်ႉၸိုင်၊တၵ်းပဵၼ်တၢင်းဢၼ်လီၶေႃးၶူမ်လႄႈလႆႈႁွင်ႉႁႆႈၵတ်းၶဵဝ်ႈၵတ်းၽၼ်းၼၼ်ႉဢေႃႈ။-
မိူဝ်ႈၼၼ်ႉ၊ၵူၼ်းတင်းလၢႆလုၵ်ႉသေၵႃႈတီႈတၢင်းဝၼ်းဢွၵ်ႇ၊တၢင်းဝၼ်းတူၵ်း၊တၢင်းႁွင်ႇ၊တၢင်းၸၢၼ်း၊တၵ်းမႃးလႄႈၼင်ႈၵိၼ်ၵႃႈတီႈၽိူၼ်ၶဝ်ႈ၊ၼႂ်းပွႆးမိူင်းၽြႃးပဵၼ်ၸဝ်ႈပုၼ်ႉဢေႃႈ။-
တူၺ်းလူး၊ၵူၼ်းၸိူဝ်းဢၼ်မႃးတူၵ်းလိုၼ်းတေႃႈလဵဝ်ၼႆႉတၵ်းတူၵ်းဢွၼ်တၢင်းၵေႃႈမီးလႄႈၵူၼ်းၸိူဝ်းဢၼ်မႃးတူၵ်းဢွၼ်တၢင်းတေႃႈလဵဝ်ၼႆႉတၵ်းတူၵ်းလိုၼ်းၵေႃႈမီးဢေႃႈ၊” ဝႃႈၼင်ႇၼႆဢေႃႈ။
ၶိင်ႇလဵဝ်ၵၼ်ၼၼ်ႉ ၵူၼ်းၵိူင်း ၽႃႇရိသႄး၊ ၶဝ်ၵမ်ႈၽွင်ႈမႃးၸူး ၸဝ်ႈယေႇသု၊ သေယဝ်ႉ၊လဝ်ႈလၢတ်ႈလႄႈဝႃႈ၊ “ၸဝ်ႈႁဝ်းဝႄႈသေၵႃႈတီႈၼႆႈဢွၵ်ႇၵႂႃႇတၢင်ႇတီႈတႃႉ။ ၸဝ်ႈၽႃႉ ႁေႇရူတ်ႈ၊ ၵျၢမ်ႇႁႃဢဝ်ၸဝ်ႈႁဝ်းတၢႆဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၶိုၼ်းလၢတ်ႈတီႈၶဝ်လႄႈဝႃႈ၊ “သူၵႂႃႇလႄႈမွၵ်ႇလၢတ်ႈၵေႃႉဢၼ်ၸၢင်ႈယႃႉမိူၼ်မႃၼႆးၼၼ်ႉလူး။ ‘ၵဝ်ႁေႃႈၽီႁၢႆႉတင်းလၢႆဢွၵ်ႇပႅတ်ႈယူႇ၊ႁဵတ်းႁႂ်ႈယေႃးၵႃႇၸိုၼ်ႈႁၢႆယူႇၼႂ်းဝၼ်းမိူဝ်ႈၼႆႉတင်းဝၼ်းမိူဝ်ႈၽုၵ်ႈဢေႃႈ။ မိူဝ်ႈဢၼ်ထူၼ်ႈထိုင်သၢမ်ဝၼ်းၸိုင်၊ၵၢၼ်ငၢၼ်းၵဝ်တၵ်းယဝ်ႉတူဝ်ႈယဝ်ႉ။-
ၼႂ်းဝႃႈၼၼ်သေၵေႃႈၵဝ်တၵ်းလႆႈသိုပ်ႇၵႂႃႇၶၢဝ်းတၢင်းၵဝ်ၼႂ်းဝၼ်းမိူဝ်ႈၼႆႉမိူဝ်ႈၽုၵ်ႈတင်းမိူဝ်ႈႁိုဝ်းလူးၵွၼ်ႇဢေႃႈ။ လွင်ႈမၼ်းၸမ်ႉ၊ၼွၵ်ႈသေၼႂ်းဝဵင်း ယေႇရုသလႅမ်ႇ၊ လႄႈပရေႃးၽႅတ်ႈတင်းလၢႆတၵ်းဢမ်ႇလႆႈသုမ်းဢသၢၵ်ႈတၢင်ႇတီႈတၢင်ႇလႅၼ်သေၵေႃႉသေၵူၼ်း၊’ ဝႃႈၼႆတႃႉ။
“ဢူဝ်းဝဵင်း ယေႇရုသလႅမ်ႇ၊ဝဵင်းယေႇရုသလႅမ်ႇ၊ ႟။ မႂ်းဢဝ်တၢႆပရေႃးၽႅတ်ႈတင်းလၢႆ၊ဢိၵ်ႇတင်းဢဝ်မၢၵ်ႇႁိၼ်ထိမ်ႈၶဝ်ၸိူဝ်းဢၼ်ပွႆႇၸႂ်ႉမႃးတီႈမႂ်းတင်းလၢႆၼၼ်ႉယဝ်ႉ။ မိူၼ်ၸိူဝ်ႉၼင်ႇဢၼ်ၵႆႇမႄႈဢဝ်လုၵ်ႈမႃးငွမ်းဝႆႉတႂ်ႈပိၵ်ႇမၼ်းၼၼ်ႉၵဝ်ၶႂ်ႈဢဝ်မိုဝ်းၵဝ်ၵွတ်ႇဢုမ်ႈဢဝ်မႂ်းဝႆႉလၢႆၽဝ်ႇလၢႆပွၵ်ႈယဝ်ႉသေၵေႃႈမႂ်းဢမ်ႇပၼ်ဢၶႂၢင်ႉတီႈၵဝ်။-
တူၺ်းလူး။ ၽြႃးပဵၼ်ၸဝ်ႈႁဵတ်းႁႂ်ႈၵျွင်းပိၵ်ႈမၢၼ်ႇသူဝႆႉႁၢမ်းပႅတ်ႈယဝ်ႉ။ ၵဝ်ဝႃႈတီႈသူၸမ်ႉ၊သူတၵ်းဢမ်ႇလႆႈႁၼ်ၼႃႈၵဝ်ထႅင်ႈတေႃႇထိုင်ႁွတ်ႈဝၼ်းဢၼ်သူလၢတ်ႈလႄႈဝႃႈ၊ ‘ထႃႇဝရႃႉၽြႃးပဵၼ်ၸဝ်ႈပၼ်တၢင်းလီမၢင်ႇၵလႃႇၵႃႈတီႈၸဝ်ႈဢၼ်ၵျွမႃးၼႂ်းၸိုဝ်ႈသဵင်မၼ်းၸဝ်ႈၼၼ်ႉတီႈၶႃႈဢေႃႈ၊’ ဝႃႈၼင်ႇၼႆၼၼ်ႉႁွတ်ႈမႃးၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၼႂ်းဝၼ်းၵမ်သိၼ်ဝၼ်းၼိုင်ႈ ၸဝ်ႈယေႇသု၊ ၵႂႃႇၵိၼ်ၶဝ်ႈၶမ်ႈၵႃႈတီႈႁိူၼ်းၵူၼ်းၵႄႇၵူၼ်းႁူဝ်ၵိူင်း ၽႃႇရိသႄး၊ ၶဝ်ၵေႃႉၼိုင်ႈလႄႈၶဝ်ဢွၼ်ၵၼ်ပႂ်ႉလွမ်တူၺ်းမၼ်းၸဝ်ႈယူႇဢေႃႈ။-
မိူဝ်ႈၼၼ်ႉ၊ၵူၼ်းဢၼ်ပဵၼ်ၵႂ်ႈၼၼ်ႉၵေႃႉၼိုင်ႈမႃးၸူးတီႈမၼ်းၸဝ်ႈဢေႃႈ။-
မၼ်းၸဝ်ႈၵေႃႈထၢမ်သြႃႇမေႃၵျၢမ်းထမ်ႇမႃႉၶဝ်တင်းၵူၼ်းၵိူင်း ၽႃႇရိသႄး၊ တင်းလၢႆလႄႈဝႃႈ၊ “ၸွင်ႇၵျၢမ်းပိင်းၺၢပ်ႈတြႃးႁဝ်းပၼ်ဢၶႂၢင်ႉဢၼ်ႁဵတ်းႁႂ်ႈတၢင်းၶႆႈတၢင်းပဵၼ်ႁၢႆၼႂ်းဝၼ်းၵမ်သိၼ်ႁိုဝ်း၊ဢမ်ႇပၼ်ဢၶႂၢင်ႉႁိုဝ်း၊” ဝႃႈၼင်ႇၼႆသေၵေႃႈ။
ၶဝ်ယူႇတဵတ်ႇတဵတ်ႇယူႇဢေႃႈ။ ၸဝ်ႈယေႇသု၊ ဢဝ်ၵေႃႉၼၼ်ႉလႄႈႁဵတ်းႁႂ်ႈယေႃးၵႃႇမၼ်းၸိုၼ်ႈႁၢႆသေယဝ်ႉ၊ပွႆႇမၼ်းၵႂႃႇသေဢေႃႈ။-
ၵမ်းၼၼ်ႉ၊မၼ်းၸဝ်ႈထၢမ်ၶဝ်လႄႈဝႃႈ၊ “ၼႂ်းသူၼႆႉသေၵေႃႉၵေႃႉ၊ပေႃးလုၵ်ႈၸၢႆးမၼ်း၊ဢမ်ႇၼၼ်ဝူဝ်းမၼ်းတူၵ်းၼမ်ႉမေႃႇၼႂ်းဝၼ်းၵမ်သိၼ်ၸိုင်၊မၼ်းတၵ်းဢမ်ႇဢဝ်ဢွၵ်ႇၼႂ်းဝၼ်းၵမ်သိၼ်ၼၼ်ႉၵမ်းလဵဝ်ႁိုဝ်း၊” ဝႃႈၼင်ႇၼႆဢေႃႈ။
ၶဝ်ၸိူဝ်းၼၼ်ႉ၊ဢမ်ႇၶိုၼ်းတွပ်ႇသေၶေႃႈသေၵမ်းလႄႈယူႇယူႇဢေႃႈ။
မိူဝ်ႈဢၼ် ၸဝ်ႈယေႇသု၊ ႁုႁၼ်တၢင်းဢၼ်ပီႈၼွင်ႉၶႅၵ်ႇၵမ်ႈၽွင်ႈလိူၵ်ႈတီႈႁႂ်ႈလႆႈၼင်ႈႁွင်ႈၼိူဝ်ပုၼ်ႉၼၼ်ႉၸိုင်၊မၼ်းၸဝ်ႈဢဝ်တင်းၵႂၢမ်းဢုပမႃႇလၢတ်ႈတီႈၶဝ်လႄႈဝႃႈ၊-
“မိူဝ်ႈဢၼ်ပိူၼ်ႈၽိတ်ႈပၢင်းသူႁႂ်ႈလႆႈၶဝ်ႈႁွတ်ႈထိုင်တီႈပၢင်ပွႆးသွင်ႇမၢင်ႇၵလႃႇၸိုင်၊ယႃႇပေၼင်ႈၵႃႈတီႈတီႈၼင်ႈဢၼ်လီဢၼ်သုင်ၼၼ်ႉ။ ၵွပ်ႈၸိူဝ်ႉၼင်ႇႁိုဝ်လႄႈဝႃႈၸမ်ႉ၊ၸၢင်ႈၶႄးၵူၼ်းဢၼ်မီးသရေႇၼႃႈတႃယႂ်ႇသေသူၼၼ်ႉၵေႃႈလႆႈၶၢမ်ႇတၢင်းဢၼ်ၽိတ်ႈပၢင်းလႄႈ မိူဝ်ႈဢၼ်မၼ်းၽႅဝ်မႃးၸိုင်၊-
ၸဝ်ႈႁိုၼ်းဢၼ်ၽိတ်ႈပၢင်းၸဵမ်သူတင်းမၼ်းၼၼ်ႉတၵ်းမႃးတီႈသူလႄႈလၢတ်ႈဝႃႈ၊ ‘ႁႂ်ႈၵေႃႉၼႆႉၼင်ႈတီႈၼႆႈတႃႉ၊’ ဝႃႈၼႆဢေႃႈ။ မိူဝ်ႈၼၼ်ႉသူတၵ်းလႆႈဢူၵ်းဢၢႆလႄႈၶၢႆႉလူင်းမႃးၵႃႈတီႈတီႈၼင်ႈဢၼ်တႅမ်ႇယေႃႈၼၼ်ႉဢေႃႈ။-
ပိူဝ်ႈၼႆလႄႈ မိူဝ်ႈဢၼ်ပိူၼ်ႈၽိတ်ႈပၢင်းသူၸိုင်၊ၵႂႃႇၼင်ႈၵႃႈတီႈတီႈၼင်ႈဢၼ်တႅမ်ႇယေႃႈပုၼ်ႉတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ၸဝ်ႈႁိူၼ်းၼၼ်ႉတၵ်းမႃးလႄႈလၢတ်ႈဝႃႈ၊ ‘ၵေႃႉ႟။ မႃးၼင်ႈၵႃႈတီႈႁွင်ႈၼိူဝ်ၼႆႉတႃႉ၊’ ဝႃႈၼႆဢေႃႈ။ ႁဵတ်းၼၼ်ၸင်ႇ၊သူတေလႆႈၼႃႈလႆႈတႃၽၢႆႇၼႃႈပီႈၼွင်ႉၶႅၵ်ႇၼမ်ၼႃႇၼၼ်ႉဢေႃႈ။-
ၽူႈလႂ်သေဢမ်ႇဝႃႈ၊ၵေႃႉဢၼ်ယုၵ်ႉယွင်ႈတူဝ်ၸဝ်ႈၵဝ်ႇၼၼ်ႉ၊တၵ်းလႆႈၶၢမ်ႇတၢင်းဢၼ်ၶျႃးတူၵ်းတီႈတႅမ်ႇလႄႈၵေႃႉဢၼ်ၶျႃးတႅမ်ႇတူဝ်ၸဝ်ႈၵဝ်ႇၼၼ်ႉၸမ်ႉ၊တၵ်းလႆႈၶၢမ်ႇတၢင်းဢၼ်ယုၵ်ႉယွင်ႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊မၼ်းၸဝ်ႈသမ်ႉလၢတ်ႈတီႈၸဝ်ႈႁိူၼ်းဢၼ်ၽိတ်ႈပၢင်းမၼ်းၸဝ်ႈၼၼ်ႉလႄႈဝႃႈ၊ “မိူဝ်ႈဢၼ်မႂ်းၸႃႇၵႃႉလဵင်ႉလူၶဝ်ႈဝၼ်း၊ဢမ်ႇၼၼ်ၶဝ်ႈၶမ်ႈၼၼ်ႉၸိုင်၊ယႃႇပေၽိတ်ႈပၢင်းၵေႃႉသႄႈမႂ်း၊ဢမ်ႇၼၼ်ပီႈၼွင်ႉမႂ်း၊ဢမ်ႇၼၼ်ၸိူဝ်ႉၶိူဝ်းမႂ်း၊ဢမ်ႇၼၼ်ၵူၼ်းမၢၵ်ႈၵူၼ်းမီးဢၼ်ၸမ်ၸႂ်မႂ်းၸိူဝ်းၼၼ်ႉၵူၺ်း။ ၶဝ်ၸၢင်ႈၶိုၼ်းၽိတ်ႈပၢင်းမႂ်းသေလႄႈ တွပ်ႇတႅၼ်းၶိုၼ်းၵျေးၸူးမႂ်းဢေႃႈ။-
မိူဝ်ႈဢၼ်မႂ်းၸႃႇၵႃႉလဵင်ႉလူၸိုင်၊ၽိတ်ႈပၢင်းၵူၼ်းယၢၵ်ႈၵူၼ်းၽၢၼ်၊ၵူၼ်းၶႃပုတ်းၶႃၶႄႉ၊ဢိၵ်ႇတင်းၵူၼ်းတႃမွတ်ႇတင်းလၢႆၸိူဝ်းၼၼ်ႉတႃႉ။-
ပေႃးမႂ်းႁဵတ်းၸိူဝ်ႉၼင်ႇၼၼ်ၸိုင်၊မႂ်းတၵ်းမီးမၢင်ႇၵလႃႇၵွပ်ႈပိူဝ်ႈၶဝ်ဢမ်ႇတၢတ်ႈၼိူင်ႇႁႂ်ႈလႆႈတွပ်ႇတႅၼ်းၵျေးၸူးမႂ်းၶိုၼ်းၼၼ်ႉဢေႃႈ။ ၽြႃးပဵၼ်ၸဝ်ႈတေတွပ်ႇတႅၼ်းပၼ်ၼႂ်းၶိင်ႇမိုဝ်ႉဝၼ်းဢၼ်ၵူၼ်းသိုဝ်ႈတေႃႇတင်းလၢႆလုၵ်ႉၶိုၼ်းလိပ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵႃႈၼႂ်းၶဝ်ၸိူဝ်းဢၼ်ၼင်ႈၵိၼ်ယူႇၵႃႈတီႈၽိူၼ်ၶဝ်ႈၼၼ်ႉၵေႃႉၼိုင်ႈလႆႈငိၼ်းလႄႈလဝ်ႈလၢတ်ႈဝႃႈ၊ “ၶဝ်ၸိူဝ်းဢၼ်လႆႈၼင်ႈၵိၼ်တီႈၽိူၼ်ၶဝ်ႈၵႃႈၼႂ်းပွႆးတီႈမိူင်းၽြႃးပဵၼ်ၸဝ်ႈၼၼ်ႉမီးမၢင်ႇၵလႃႇဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈလၢတ်ႈတီႈမၼ်းလႄႈဝႃႈ၊ “မီးၵူၼ်းၵေႃႉၼိုင်ႈႁဵတ်းပွႆးၶၢမ်ႇၶႅၵ်ႇလူင်လႄႈ ၽိတ်ႈပၢင်းပီႈၼွင်ႉၶႅၵ်ႇၼမ်ၼႃႇဢေႃႈ။-
မိူဝ်ႈဢၼ်ထိုင်ၶိင်ႇၶၢမ်ႇပွႆးၼၼ်ႉၸိုင်၊မၼ်းပွႆႇလုၵ်ႈၸၢင်ႈမၼ်းၵႂႃႇႁွင်ႉၶႅၵ်ႇပီႈၼွင်ႉဢၼ်ၽိတ်ႈဝႆႉၼၼ်ႉလႄႈဝႃႈ၊ ‘မႃးသေၵမ်းၶႃႈ။ ႁႅၼ်းဝႆႉၵူႈၸိူဝ်ႉၵူႈပိူင်ယဝ်ႉၶႃႈဢေႃႈ၊’ ဝႃႈၼင်ႇၼႆဢေႃႈ။-
ၵူၺ်းၵႃႈ၊ၶဝ်ၸိူဝ်းၼၼ်ႉၵူႈၵေႃႉတွင်းပၢၼ်ႇႁႂ်ႈၶႂၢင်းလွတ်ႈမိူၼ်မိူၼ်ၵၼ်လႄႈ၊ၵေႃႉၼိုင်ႈဝႃႈ၊ ‘ၵဝ်လႆႈသိုဝ်ႉဝႆႉၼႃးတူင်ႈၼိုင်ႈယဝ်ႉလႄႈလူဝ်ႇၵႂႃႇတူၺ်းလူးၵွၼ်ႇဢေႃႈ။ ၶႂၢင်းလွတ်ႈပၼ်သေၵမ်းၶႃႈတႃႉ၊’ ဝႃႈၼႆတွင်းပၢၼ်ႇတီႈလုၵ်ႈၸၢင်ႈၼၼ်ႉဢေႃႈ။-
တၢင်ႇၵေႃႉသမ်ႉဝႃႈ၊ ‘ၵဝ်လႆႈသိုဝ်ႉဝႆႉဝူဝ်းႁႃႈၵူႈယဝ်ႉလႄႈလူဝ်ႇၵႂႃႇၸၢမ်းတူၺ်းလူးၵွၼ်ႇဢေႃႈ။ ပွႆႇလွတ်ႈပၼ်သေၵမ်းၶႃႈတႃႉ၊’ ဝႃႈၼင်ႇၼႆၼင်ႇၵဝ်ႇဢေႃႈ။-
ၵေႃႉၼိုင်ႈသမ်ႉဝႃႈ၊ ‘ၵဝ်ၸင်ႇဢဝ်မေးယဝ်ႉၵူၺ်းၶႃႈ။ ပိူဝ်ႈၼႆလႄႈ ၵဝ်ၶႃႈဢမ်ႇမႃးလႆႈယဝ်ႉ၊’ ဝႃႈၼႆတွင်းပၢၼ်ႇဢေႃႈ။
“လုၵ်ႈၸၢင်ႈမၼ်းၼၼ်ႉၶိုၼ်းမႃးလႄႈမွၵ်ႇလၢတ်ႈလွင်ႈတၢင်းၸိူဝ်းၼၼ်ႉတီႈပေႃႈလဵင်ႉမၼ်းဢေႃႈ။ ၸဝ်ႈပွႆးၼၼ်ႉၸႂ်မႆႈၶႂ်ႈၸႃႉလႄႈလၢတ်ႈတီႈလုၵ်ႈၸၢင်ႈမၼ်းၼၼ်ႉလႄႈဝႃႈ၊ ‘ၵႂႃႇၵႃႈတီႈသဵၼ်ႈတၢင်းလူင်၊တၢင်းဢွၼ်ႇ၊ၵူႈၵိဝ်ႇၵူႈငႅၵ်ႈၵႃႈၼႂ်းဝဵင်းၶၼ်ၶၼ်ၽႂ်းၽႂ်းလႄႈႁွင်ႉဢဝ်ၵူၼ်းယၢၵ်ႈၵူၼ်းၽၢၼ်၊ၵူၼ်းၶႃပုတ်းၶႃၶႄႉ၊ဢိၵ်ႇတင်းၵူၼ်းတႃမွတ်ႇတင်းလၢႆၸိူဝ်းၼၼ်ႉမႃးတႃႉ၊’ ဝႃႈၼင်ႇၼႆဢေႃႈ။-
ဝၢႆးၼၼ်ႉ၊လုၵ်ႈၸၢင်ႈၼၼ်ႉၶိုၼ်းလဝ်ႈလၢတ်ႈလႄႈဝႃႈ၊ ‘ၸဝ်ႈႁဝ်း၊ၵႃႈၼင်ႇဢၼ်ၸဝ်ႈႁဝ်းၶိုင်ပွင်ၼၼ်ႉႁဵတ်းယဝ်ႉၶႃႈဢေႃႈ။ ၵူၺ်းၵႃႈ၊တီႈၼင်ႈယင်းမီးၼမ်ယူႇလူးၵွၼ်ႇၶႃႈဢေႃႈ၊’ ဝႃႈၼင်ႇၼႆလႄႈ၊-
ၸဝ်ႈပွႆးၼၼ်ႉ၊သမ်ႉလၢတ်ႈတီႈလုၵ်ႈၸၢင်ႈမၼ်းၼၼ်ႉလႄႈဝႃႈ၊ ‘ဢွၵ်ႇၵႂႃႇၸွမ်းတၢင်းၵႂႃႇသူၼ်ၵႂႃႇၼႃးလႄႈတိုၵ်းသူၼ်းႁွင်ႉဢဝ်ၵူၼ်းတၢင်ႇၵေႃႉႁႂ်ႈမႃးထၢၼ်ႈပေႃးတဵမ်ႁိူၼ်းၵဝ်ၵႂႃႇတႃႉ။-
ၵဝ်ဝႃႈတီႈသူၸမ်ႉ၊ၶဝ်ၸိူဝ်းဢၼ်လႆႈၶၢမ်ႇၽိတ်ႈပၢင်းဝႆႉၸိူဝ်းၼၼ်ႉ တၵ်းတေဢမ်ႇလႆႈၸိမ်းတူၺ်းၶဝ်ႈၽၵ်းပွႆးၵဝ်ၼႆႉသေၵေႃႉသေၵူၼ်း၊’ ဝႃႈၼင်ႇၼႆဢေႃႈ၊” ၸဝ်ႈယေႇသု၊ လၢတ်ႈဝႃႈၸိူဝ်ႉၼင်ႇၼႆဢေႃႈ။
ၽဝ်ႇၼိုင်ႈမူႇၵူၼ်းၼမ်ၼႃႇပႆၸွမ်း ၸဝ်ႈယေႇသု၊ ၵႂႃႇယူႇလႄႈမၼ်းၸဝ်ႈဝၢႆႇၼႃႈၸူးၶဝ်သေယဝ်ႉ၊လၢတ်ႈတီႈၶဝ်လႄႈဝႃႈ၊-
“ၽူႈလႂ်သေဢမ်ႇဝႃႈ၊ၵေႃႉဢၼ်မႃးတီႈၵဝ်ၼၼ်ႉပေႃးမၼ်းယင်းဢမ်ႇႁၵ်ႉၵဝ်ၼႃႇသေပေႃႈမႄႈမၼ်း၊လုၵ်ႈမေးမၼ်း၊ပီႈၼွင်ႉမၼ်းၸဵမ်ယိင်းၸဵမ်ၸၢႆး၊ဢိၵ်ႇတင်းဢသၢၵ်ႈမၼ်းၼၼ်ႉၸိုင်၊ၵေႃႉၼၼ်ႉဢမ်ႇပဵၼ်တပႄးၵဝ်လႆႈ။-
ၽူႈလႂ်သေဢမ်ႇဝႃႈ၊ပေႃးမၼ်းဢမ်ႇမႅၵ်ႇသဝ်မႆႉဝႃးမိုဝ်းတူဝ်ၸဝ်ႈၵဝ်ႇလႄႈၸွမ်းၵဝ်ၸိုင်၊ၵေႃႉၼၼ်ႉဢမ်ႇပဵၼ်တပႄးၵဝ်လႆႈ။-
ၼႂ်းသူၼႆႉ ပေႃးသေၵေႃႉသေၵူၼ်းဢၢင်ႈဢၢၼ်းတႄႇတင်ႈႁဵတ်းသဝ်လၢင်းၸိုင်၊ဢွၼ်တၢင်းသေပိူၼ်ႈမၼ်းၸၢင်ႈၼင်ႈသေယဝ်ႉ၊ၼပ်ႉဢၢၼ်ႇငိုၼ်းဢၼ်တၵ်းသဵင်ႈၼၼ်ႉ ႁႂ်ႈလႆႈႁုလွင်ႈဢၼ်ငိုၼ်းမၼ်းတေပေႃးၵုမ်ႇႁိုဝ်၊ဢမ်ႇပေႃးၵုမ်ႇႁိုဝ်ၼၼ်ႉဢေႃႈ။-
ပေႃးဢမ်ႇၼၼ်မၼ်းၶုတ်းငဝ်ႈႁၢၵ်ႈသဝ်လၢင်းသေလႄႈဢမ်ႇႁႂ်ႈယဝ်ႉတူဝ်ႈလႆႈၸိုင်၊ၵူၼ်းဢၼ်ႁုႁၼ်တင်းလၢႆ၊တၵ်းႁဵတ်းပျၢၵ်ႈႁဵတ်းၶူဝ်တီႈမၼ်းလႄႈဝႃႈ၊-
‘ၵေႃႉၼႆႉ၊တႄႇၸႃႉႁဵတ်းၵၢၼ်ၵူၺ်းလႄႈဢမ်ႇၸၢင်ႈႁႂ်ႈၵၢၼ်ငၢၼ်းမၼ်းယဝ်ႉတူဝ်ႈလႆႈ၊’ ဝႃႈၼႆယဝ်ႉ။
“ၼႄးၼိုင်ႈၸမ်ႉ၊ပေႃးၶုၼ်ႁေႃၶမ်းသေပႃးပႃးမီးၵူၼ်းသိုၵ်းမိုၼ်ႇၼိုင်ႈ၊ၶီႇသိုၵ်းၵႂႃႇတိုၵ်းၵၼ်တင်းၶုၼ်ႁေႃၶမ်းတၢင်ႇပႃးဢၼ်မီးၵူၼ်းသိုၵ်းသွင်မိုၼ်ႇၸိုင်၊ၶုၼ်ႁေႃၶမ်းပႃးၼၼ်ႉ ဢွၼ်တၢင်းသေပိူၼ်ႈမၼ်းၸၢင်ႈၼင်ႈလႄႈတႂၢၵ်ႈတူၺ်းသေယဝ်ႉ၊တႅပ်းတတ်းလွင်ႈဢၼ်ႁႅင်းသိုၵ်းမၼ်းတေၶၢမ်ႇလႆႈႁိုဝ်၊ဢမ်ႇၶၢမ်ႇလႆႈႁိုဝ်ၼၼ်ႉဢေႃႈ။-
ပေႃးမၼ်းဢမ်ႇၶၢမ်ႇလႆႈၸိုင်၊ၸူဝ်ႈဢၼ်သိုၵ်းယင်းၵႆၵၼ်ယူႇၼၼ်ႉ၊မၼ်းတေပွႆႇၽူႈတၢင်တူဝ်ၵႂႃႇလႄႈတွင်းပၢၼ်ႇႁႂ်ႈသိုၵ်းထၢတ်ႇယဵၼ်ဢေႃႈ။-
မိူၼ်ၸိူဝ်ႉၼင်ႇၼၼ်ၼႂ်းသူၼႆႉၽူႈလႂ်သေဢမ်ႇဝႃႈ၊ပေႃးဢမ်ႇၸုၼ်ႉပႅတ်ႈၵႃႈဢၼ်မၼ်းမီးၵူႈၸိူဝ်ႉၵူႈပိူင်လႆႈၸိုင်၊ဢမ်ႇပဵၼ်တပႄးၵဝ်လႆႈ။
“ၵိူဝ်ၸမ်ႉ၊လီဢေႃႈ။ ၵူၺ်းၵႃႈ၊ပေႃးဢၼ်ၸဵမ်းမၼ်းႁၢႆယဝ်ႉၸိုင်၊ဢမ်ႇၸၢင်ႈၶိုၼ်းလႆႈဢၼ်ၸဵမ်းမၼ်းထႅင်ႈယဝ်ႉ။-
ဢမ်ႇမီးဢၵျူဝ်းပုၼ်ႈလိၼ်။ ႁဵတ်းၽုၼ်ႇၵေႃႈဢမ်ႇလႆႈယဝ်ႉလႄႈတၵ်းလႆႈထွၵ်ႇပႅတ်ႈၵူၺ်းဢေႃႈ။ ပေႃးမီးႁူဢၼ်လီငိၼ်းၸိုင်၊ႁႂ်ႈငိၼ်းသေၵမ်းလူၺ်ႈ၊” ဝႃႈၼင်ႇၼႆဢေႃႈ။
ဝၼ်းၼိုင်ႈၵူၼ်းၵဵပ်းၶွၼ်ႇလႂ်၊ဢိၵ်ႇတင်းၵူၼ်းႁၢႆႉလႂ်မႃးထွမ်ႇတြႃး ၸဝ်ႈယေႇသု၊ ၼမ်ၼႃႇဢေႃႈ။-
ၵူၼ်းၵိူင်း ၽႃႇရိသႄး၊ ၶဝ်တင်းသြႃႇမေႃၵျၢမ်းထမ်ႇမႃႉတင်းလၢႆ ဢွၼ်ၵၼ်သႄႉသွမ်းတၢင်ႇဢပျတ်ႈတီႈမၼ်းၸဝ်ႈလႄႈဝႃႈ၊ “ၵူၼ်းၵေႃႉၼႆႉႁဵတ်းၵေႃႉႁဵတ်းသႄႈလူၺ်ႈၵၼ်တင်းၵူၼ်းႁၢႆႉတင်းလၢႆၵူၺ်းဢမ်ႇၵႃး၊ယင်းၵိၼ်ၶဝ်ႈလူၺ်ႈၵၼ်တင်းၶဝ်ယူႇလူင်ပႄႇ၊” ဝႃႈၼင်ႇၼႆဢေႃႈ။
ပိူဝ်ႈၼႆၸင်ႇ၊ ၸဝ်ႈယေႇသု၊ ဢဝ်တင်းၵႂၢမ်းဢုပမႃႇလႄႈလၢတ်ႈဝႃႈ၊-
“ၼႂ်းသူၼႆႉၵေႃႉၼိုင်ႈမီးသူဝ်းပၢၵ်ႇတူဝ်လႄႈပေႃးတူဝ်ၼိုင်ႈသမ်ႉႁၢႆၵႂႃႇၸိုင်၊သူထၢင်ႇမၼ်းတေႁဵတ်းၸိူဝ်ႉၼင်ႇႁိုဝ်။ မၼ်းၸၢင်ႈဝႆႉသူဝ်းၵဝ်ႈသိပ်းပၢႆၵဝ်ႈတူဝ်ၼၼ်ႉၵႃႈတီႈပၢင်ႇယိူဝ်ႈသေယဝ်ႉ၊ၵႂႃႇသွၵ်ႈႁႃတူဝ်ဢၼ်ႁၢႆၵႂႃႇၼၼ်ႉတေႃႇထိုင်ႁွတ်ႈ၊ၶိုၼ်းထူပ်းၶိုၼ်းႁၼ်ဢမ်ႇၸႂ်ႈႁိုဝ်း။-
မိူဝ်ႈဢၼ်မၼ်းၶိုၼ်းထူပ်းႁၼ်ၸိုင်၊မၼ်းၸူမ်းသိူဝ်းၼႃႇလူင်လၢင်ဢဝ်တၢင်ႇၵႃႈၼိူဝ်ႁူဝ်မႃႇမၼ်းလႄႈ၊-
မႅၵ်ႇမႃးၶိုၼ်းသေယဝ်ႉ၊မၼ်းၸၢင်ႈႁွင်ႉၵေႃႉသႄႈမၼ်းတင်းၵူၼ်းႁိူၼ်းဢၼ်ၸမ်ၵၼ်တင်းမၼ်းတင်းလၢႆယဝ်ႉၸင်ႇ၊လၢတ်ႈလႄႈဝႃႈ၊ ‘မႃးၸွၼ်ၸူမ်းသိူဝ်းလူၺ်ႈၵၼ်တင်းၵဝ်တႃႉ။ သူဝ်းၵဝ်ဢၼ်ႁၢႆၵႂႃႇၼၼ်ႉၶိုၼ်းထူပ်းႁၼ်ယဝ်ႉ၊’ ဝႃႈၼင်ႇၼႆဢမ်ႇၸႂ်ႈႁိုဝ်း။-
မိူၼ်ၸိူဝ်ႉၼင်ႇၼၼ်ၵဝ်ဝႃႈတီႈသူၸမ်ႉ၊မိူဝ်ႈဢၼ်မီးၵူၼ်းႁၢႆႉၵေႃႉၼိုင်ႈၶုၵ်းၸႂ်လႆႈမႆႈၸႂ်ဢပျတ်ႈတူဝ်ၸဝ်ႈၵဝ်ႇလႄႈပိၼ်ႇၸႂ်မၼ်းမႃးၸိုင်၊ၵႃႈၼႂ်းမိူင်းၵၢင်ႁၢဝ်ၸဝ်ႈပုၼ်ႉၼၼ်ႉ၊တၵ်းယဵင်ႈၶႅၼ်းမီးတၢင်းဢၼ်ၸူမ်းသိူဝ်းၼႃႇသေၵူၼ်းသိုဝ်ႈတေႃႇၵဝ်ႈသိပ်းပၢႆၵဝ်ႈၵေႃႉဢၼ်ဢမ်ႇလူဝ်ႇၶုၵ်းၸႂ်လႆႈမႆႈၸႂ်ဢပျတ်ႈတူဝ်ၸဝ်ႈၵဝ်ႇၼၼ်ႉဢေႃႈ။
“ၼႄးၼိုင်ႈၸမ်ႉ၊တီႈမႄႈယိင်းၵေႃႉၼိုင်ႈမီးငိုၼ်းၶႅပ်းသိပ်းၶႅပ်းလႄႈၶႅပ်းၼိုင်ႈသမ်ႉႁၢႆၵႂႃႇၸိုင်၊သူထၢင်ႇမၼ်းတေႁဵတ်းၸိူဝ်ႉၼင်ႇႁိုဝ်။ မၼ်းၸၢင်ႈတႆႈၵွၵ်းၽႆးလႄႈပတ်းၽဵဝ်ႈႁိူၼ်းတင်းႁိူၼ်းသွၵ်ႈႁႃၵူႈၸွၵ်ႉၵူႈၸဵင်ႇတေႃႇႁွတ်ႈပေႃးၶိုၼ်းထူပ်းႁၼ်ဢမ်ႇၸႂ်ႈႁိုဝ်း။-
မိူဝ်ႈဢၼ်မၼ်းၶိုၼ်းထူပ်းႁၼ်ၸိုင်၊မၼ်းၸၢင်ႈႁွင်ႉဢဝ်ၵေႃႉသႄႈမၼ်းတင်းၵူၼ်းဢၼ်ၸမ်ၵၼ်တင်းမၼ်းတင်းလၢႆမႃးလႄႈလၢတ်ႈဝႃႈ၊ ‘ၵဝ်ၶိုၼ်းထူပ်းႁၼ်ၶႅပ်းငိုၼ်းၵဝ်ယဝ်ႉ။ မႃးၸွၼ်ၸူမ်းသိူဝ်းလူၺ်ႈၵၼ်တင်းၵဝ်တႃႉ၊’ ဝႃႈၼင်ႇၼႆဢမ်ႇၸႂ်ႈႁိုဝ်း။-
မိူၼ်ၸိူဝ်ႉၼင်ႇၼၼ်ၵဝ်ဝႃႈတီႈသူၸမ်ႉ၊တမၢၼ်ႇၵၢင်ႁၢဝ်တင်းလၢႆၸိူဝ်းဢၼ်မီးတီႈၽၢႆႇၼႃႈၽြႃးပဵၼ်ၸဝ်ႈၼၼ်ႉ၊တၵ်းဢွၼ်ၵၼ်ၸူမ်းသိူဝ်းလူၺ်ႈလွင်ႈၵူၼ်းႁၢႆႉဢၼ်ၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်မႃးၵေႃႉၼိုင်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ သိုပ်ႇလၢတ်ႈထႅင်ႈလႄႈဝႃႈ၊ “မိူဝ်ႈၼၼ်ႉတီႈၵူၼ်းၵေႃႉၼိုင်ႈမီးလုၵ်ႈၸၢႆးသွင်ၵေႃႉဢေႃႈ။-
လုၵ်ႈၸၢႆးၵေႃႉလဵၵ်ႉၼၼ်ႉလၢတ်ႈတီႈပေႃႈမၼ်းလႄႈဝႃႈ၊ ‘ပေႃႈ႟။ မႅင်ႇပၼ်ဢမူၺ်ႇဢုၵ်ႉၸႃႇဢၼ်ၸၢပ်ႈသႅင်ႇၵၼ်တင်းၵဝ်ၶႃႈလႄႈထုၵ်ႇလီလႆႈၼၼ်ႉသေၵမ်းၶႃႈ၊’ ဝႃႈၼင်ႇၼႆဢေႃႈ။ ပေႃႈၶဝ်ၵေႃႈၽႄမႅင်ႇပၼ်ဢမူၺ်ႇဢုၵ်ႉၸႃႇၼႂ်းသွင်ၵေႃႉပီႈၼွင်ႉဢၼ်မၼ်းထုၵ်ႇလီလႆႈၼၼ်ႉပၼ်တီႈမၼ်းသေဢေႃႈ။-
လိုၼ်းၼၼ်ႉ၊ဢမ်ႇႁိုင်ဢမ်ႇၼၢၼ်းလုၵ်ႈၸၢႆးၵေႃႉလဵၵ်ႉၼၼ်ႉ၊ၸုသိမ်းဢဝ်ၵႃႈပဵၼ်ၶွင်မၼ်းသေလႄႈဢွၵ်ႇၵႂႃႇတၢင်ႇမိူင်းဢၼ်ၵႆၼႃႇၼၼ်ႉသေယဝ်ႉ၊ၵႃႈတီႈမိူင်းၼၼ်ႉမၼ်းမူၼ်ႈပျေႃႇလူၺ်ႈငိုၼ်းၶမ်းၼၼ်ႉလႄႈၸၢႆႇပႅတ်ႈၸွမ်းဢလူဝ်ႇတူဝ်ၸဝ်ႈၵဝ်ႇၼၼ်ႉတင်းသဵင်ႈတင်းမူတ်းဢေႃႈ။-
မိူဝ်ႈဢၼ်မၼ်းၸၢႆႇငိုၼ်းၶမ်းမူတ်းယဝ်ႉၼၼ်ႉၸိုင်၊ၵႃႈၼႂ်းမိူင်းဢၼ်မၼ်းၵိုတ်းသဝ်းယူႇၼၼ်ႉၽႃႉၽူၼ်လႅင်ႉလႄႈၶဝ်ႈၵႃႈမၢၵ်ႇပႅင်းၼႃႇလူင်လၢင်သေယဝ်ႉ၊မၼ်းတူၵ်းၽၢၼ်ယူႇဢေႃႈ။-
မၼ်းၸင်ႇၵႂႃႇယွၼ်းႁဵတ်းၵၢၼ်တီႈၵူၼ်းမိူင်းၼၼ်ႉၵေႃႉၼိုင်ႈလႄႈၵေႃႉၼၼ်ႉပွႆႇႁႂ်ႈမၼ်းၵႂႃႇႁဵတ်းၵၢၼ်လဵင်ႉမူၵႃႈတီႈႁႆႈမၼ်းဢေႃႈ။-
မၼ်းထၢၼ်ႈပေႃးၶႂ်ႈဢဝ်ၽၵ်းထူဝ်ႇဢၼ်ဢွႆႇမူၼၼ်ႉၵိၼ်ႁႂ်ႈဢိမ်ႇတွင်ႉတူဝ်ၸဝ်ႈၵဝ်ႇ ပိူဝ်ႈဢၼ်ၽူႈလႂ်သေၵေႃႉသေၵူၼ်းဢမ်ႇပၼ်တၢင်းၵိၼ်တၢင်းၶူပ်းတီႈမၼ်းသေဢိတ်းဢေႃႈ။-
မိူဝ်ႈၼၼ်ႉ၊မၼ်းၶုၵ်းၸႂ်လႆႈၶႆႈၸႂ်ထိုင်ႁိူၼ်းပေႃႈမၼ်းယဝ်ႉၸင်ႇ၊လၢတ်ႈလႄႈဝႃႈ၊ ‘လုၵ်ႈၸၢင်ႈတီႈပေႃႈၵဝ်ၸိူဝ်းၼၼ်ႉယင်းလႆႈၵိၼ်ဢိမ်ႇၵိၼ်တဵမ်ယူႇလႄႈၵဝ်ၼႆႉၸမ်ႉ၊တေဢိုပ်းတၢႆယဝ်ႉ။-
ၵဝ်တေလုၵ်ႉလႄႈၶိုၼ်းမိူဝ်းၵႂႃႇၵႃႈတီႈပေႃႈၵဝ်သေယဝ်ႉ၊လၢတ်ႈတီႈမၼ်းလႄႈဝႃႈ၊ပေႃႈ႟။ ၵဝ်ၶႃႈလႆႈၽိတ်းပိူင်ႈၽြႃးပဵၼ်ၸဝ်ႈ၊ဢိၵ်ႇတင်းပေႃႈႁဝ်းယဝ်ႉၶႃႈယဝ်ႉ။-
ၵဝ်ၶႃႈၼႆႉဢမ်ႇထိူၵ်ႈၶၢမ်ႇႁွင်ႉဝႃႈလုၵ်ႈၸၢႆးပေႃႈႁဝ်းၶႃႈယဝ်ႉ။ ၶႅၼ်းတေႃႈႁႂ်ႈၵဝ်ၶႃႈလႆႈႁဵတ်းလုၵ်ႈၸၢင်ႈတီႈပေႃႈႁဝ်းသေၵမ်းၶႃႈ၊ဝႃႈၼႆၵဝ်တေၵႂႃႇတွင်းပၢၼ်ႇလူးၵွၼ်ႇ၊’ ဝႃႈၼင်ႇၼႆဢေႃႈ။-
မၼ်းၵေႃႈလုၵ်ႉလႄႈမိူဝ်းၵႂႃႇၸူးပေႃႈမၼ်းဢေႃႈ။ “မိူဝ်ႈဢၼ်မၼ်းယင်းတိုၵ်ႉမီးယူႇတီႈဢၼ်ၵႆၼၼ်ႉၸိုင်၊ပေႃႈမၼ်းမုင်ႈႁၼ်သေယဝ်ႉ၊မီးၸႂ်ဢၼ်ဢဵတ်းလူလႄႈၶုၼ်ႇလႅၼ်ႈၵႂႃႇႁပ်ႉႁူဝ်တၢင်းမၼ်းယဝ်ႉၸင်ႇၵွတ်ႇၶေႃးၼူမ်ႁွမ်မၼ်းဢေႃႈ။-
လုၵ်ႈၸၢႆးၼၼ်ႉၸင်ႇလၢတ်ႈလႄႈဝႃႈ၊ ‘ပေႃႈ႟။ ၵဝ်ၶႃႈလႆႈၽိတ်းပိူင်ႈၽြႃးပဵၼ်ၸဝ်ႈ၊ဢိၵ်ႇတင်းပေႃႈႁဝ်းယဝ်ႉၶႃႈယဝ်ႉ။ ၵဝ်ၶႃႈၼႆႉဢမ်ႇထိူၵ်ႈၶၢမ်ႇႁွင်ႉဝႃႈ၊လုၵ်ႈၸၢႆးပေႃႈႁဝ်းၶႃႈယဝ်ႉ၊’ ဝႃႈၼင်ႇၼႆဢေႃႈ။-
ၵူၺ်းၵႃႈ၊ပေႃႈၼၼ်ႉလၢတ်ႈတီႈလုၵ်ႈၸၢင်ႈတင်းလၢႆလႄႈဝႃႈ၊ ‘ႁဵတ်းၽႂ်းၽႂ်းတႃႉ။ ၵႂႃႇဢဝ်သိူဝ်ႈၶူဝ်းဢၼ်လီဢၼ်မျၢတ်ႈမႃးၼုင်ႈပၼ်ၽႂ်းၽႂ်းတႃႉ။ တိုဝ်းပၼ်မွင်းၵူၺ်းၵႃႈတီႈၼိဝ်ႉမိုဝ်းမၼ်းတႃႉ။ တိုဝ်းသွၵ်းတိၼ်ပၼ်ၵႃႈတီႈတိၼ်မၼ်းတႃႉ။-
ၵႂႃႇဢဝ်ဝူဝ်းၼုမ်ႇဢွၼ်ႇဢၼ်ပီးလီမၼ်းလီၼၼ်ႉမႃးႁႅမ်တႃႉ။ ဢွၼ်ၵၼ်ႁဵတ်းပွႆးၵိၼ်ပျေႃႇလူၺ်ႈၵၼ်တႃႉႁဝ်း။-
လုၵ်ႈၸၢႆးၵဝ်ၼႆႉမိူဝ်ႈဢွၼ်တၢင်းၼၼ်ႉတၢႆၵႂႃႇဢေႃႈ။ တေႃႈလဵဝ်ၼႆႉၶိုၼ်းလိပ်းမႃးယဝ်ႉဢေႃႈ။ မိူဝ်ႈဢွၼ်တၢင်းၼၼ်ႉႁၢႆၵႂႃႇဢေႃႈ။ တေႃႈလဵဝ်ၼႆႉၶိုၼ်းထူပ်းႁၼ်ယဝ်ႉဢေႃႈ၊’ ဝႃႈၼင်ႇၼႆသေယဝ်ႉ၊ႁဵတ်းပွႆးမူၼ်ႈပျေႃႇယူႇဢေႃႈ။
“ၽွင်းယၢမ်းၼၼ်ႉလုၵ်ႈၸၢႆးလူင်မီးယူႇၵႃႈတီႈႁႆႈဢေႃႈ။ မိူဝ်ႈဢၼ်ပွၵ်ႈႁႆႈမႃးၸမ်တၵ်းထိုင်ႁိူၼ်းၼၼ်ႉ၊လႆႈငိၼ်းသဵင်ဢၼ်ပဝ်ႇဢၼ်ႁႆႇ၊သဵင်ဢၼ်ၵႃႈဢၼ်ဝႅၼ်ယူႇဢေႃႈ။-
မၼ်းၸင်ႇႁွင်ႉဢဝ်လုၵ်ႈၸၢင်ႈၵေႃႉၼိုင်ႈမႃးလႄႈထၢမ်ဝႃႈ၊ ‘ဢွၼ်ၵၼ်ႁဵတ်းၵႃႈသင်ယူႇၼႆႉ၊’ ဝႃႈၼႆလႄႈ၊-
လုၵ်ႈၸၢင်ႈၼၼ်ႉၶိုၼ်းလၢတ်ႈလႄႈဝႃႈ၊ ‘ၼွင်ႉၸၢႆးၸဝ်ႈႁဝ်းပွၵ်ႈၶိုၼ်းႁိူၼ်းမႃးၶႃႈဢေႃႈ။ ပိူဝ်ႈဢၼ်မၼ်းလွတ်ႈၽေးလွတ်ႈရၢၼ်ႇလႄႈႁွတ်ႈထိုင်ႁိူၼ်းမႃးၼၼ်ႉပေႃႈၸဝ်ႈႁဝ်းၶဝ်ႁႅမ်ဝူဝ်းၼုမ်ႇဢၼ်ပီးလီသေယဝ်ႉ၊ႁဵတ်းပွႆးမူၼ်ႈပျေႃႇယူႇၶႃႈဢေႃႈ၊’ ဝႃႈၼင်ႇၼႆဢေႃႈ။-
လုၵ်ႈၸၢႆးလူင်ၼၼ်ႉၶႂ်ႈၸႃႉၸႂ်လမ်ၼႃႇလူင်လၢင်လႄႈ ယင်းဢမ်ႇၶဝ်ႈၵႂႃႇၵႃႈၼႂ်းႁိူၼ်း၊ၸုၵ်းယူႇတၢင်းၼွၵ်ႈႁိူၼ်းဢေႃႈ။ ပေႃႈၶဝ်ၵေႃႈဢွၵ်ႇမႃးၶျေႃးဝွၼ်းမၼ်းဢေႃႈ။-
လုၵ်ႈၸၢႆးလူင်ၼၼ်ႉၵေႃႈလၢတ်ႈလႄႈဝႃႈ၊ ‘တူၺ်းလူး။ ၵဝ်ၶႃႈႁဵတ်းၵၢၼ်ပေႃးတၢၼ်ႇပဵၼ်ၶႃႈၵေႃႉၼိုင်ႈပုၼ်ႈပေႃႈႁဝ်းပီမိူင်းၼမ်ၼႃႇယဝ်ႉၶႃႈယဝ်ႉ။ ၵဝ်ၶႃႈဢမ်ႇပူၼ်ႉပၢၵ်ႇလိူဝ်ၵႂၢမ်းပေႃႈႁဝ်းသေပွၵ်ႈၶႃႈ။ ၼႂ်းဝႃႈၼၼ်သေၵေႃႈပေႃႈႁဝ်းယင်းဢမ်ႇတွၼ်ႉပၼ်ပႄႉဢွၼ်ႇသေတူဝ်တီႈၵဝ်ၶႃႈႁႂ်ႈၵဝ်ၶႃႈလႆႈႁဵတ်းမူၼ်ႈႁဵတ်းပျေႃႇလူၺ်ႈၵၼ်တင်းၵေႃႉသႄႈၵဝ်ၶႃႈတင်းလၢႆၼၼ်ႉသေပွၵ်ႈ။-
တီႈလုၵ်ႈၸၢႆးပေႃႈႁဝ်းၵေႃႉၼၼ်ႉၸမ်ႉ၊မၼ်းပေႃးလႆႈဢွၵ်ႇၵႂႃႇယဝ်ႉလႄႈ ဢဝ်ဢမူၺ်ႇဢုၵ်ႉၸႃႇမၼ်းၸၢႆႇပႅတ်ႈၼႂ်းတၢင်းဢၼ်ပျေႃႇလူၺ်ႈမႄႈမွၵ်ႇယႃႈလႂ်ယဝ်ႉလႄႈပေႃႈႁဝ်းယင်းႁႅမ်ဝူဝ်းဢွၼ်ႇဢၼ်ပီးလီပုၼ်ႈမၼ်းယူႇလူင်ပႄႇ၊’ ဝႃႈၼင်ႇၼႆဢေႃႈ။-
ပေႃႈၶဝ်ၶိုၼ်းလၢတ်ႈလႄႈဝႃႈ၊ ‘လုၵ်ႈပေႃႈ႟။ မႂ်းၼႆႉယူႇတီႈၵဝ်တႃႇသေႇဢေႃႈ။ ဢုၵ်ႉၸႃႇၶူဝ်းလဵင်းၵဝ်ၵႃႈမီးတင်းသဵင်ႈတင်းလူင်ပဵၼ်ဢုၵ်ႉၸႃႇၶူဝ်းလဵင်းမႂ်းဢေႃႈ။-
ၼွင်ႉၸၢႆးမႂ်းၸမ်ႉ၊မိူဝ်ႈဢွၼ်တၢင်းၼၼ်ႉတၢႆၵႂႃႇယဝ်ႉဢေႃႈ။ တေႃႈလဵဝ်ၼႆႉၶိုၼ်းလိပ်းမႃးယဝ်ႉဢေႃႈ။ မိူဝ်ႈဢွၼ်တၢင်းၼၼ်ႉႁၢႆၵႂႃႇယဝ်ႉဢေႃႈ။ တေႃႈလဵဝ်ၼႆႉၶိုၼ်းထူပ်းႁၼ်ယဝ်ႉဢေႃႈ။ ပိူဝ်ႈၼႆလႄႈႁဝ်းထုၵ်ႇလီၶၢမ်ႇပွႆးမူၼ်ႈပွႆးပျေႃႇဢေႃႈ၊’ ပေႃႈမၼ်းဝႃႈၼင်ႇၼႆဢေႃႈ၊” ၸဝ်ႈယေႇသု၊ ဝႃႈၼင်ႇၼႆဢေႃႈ။
ၸဝ်ႈယေႇသု၊ သမ်ႉလၢတ်ႈတီႈတပႄးၸဝ်ႈၸိူဝ်းၼၼ်ႉလႄႈဝႃႈ၊ “မိူဝ်ႈၼၼ်ႉတီႈသထေးၵေႃႉၼိုင်ႈမီးၵူၼ်းလူင်ဢၼ်ပႂ်ႉထိင်းဢုၵ်ႉၸႃႇငိုၼ်းၶမ်းၼၼ်ႉဢေႃႈ။ သထေးၼၼ်ႉလႆႈငိၼ်းလွင်ႈဢၼ်ၵူၼ်းလူင်ၽူႈပႂ်ႉထိင်းဢုၵ်ႉၸႃႇမၼ်းၸၢႆႇဝူၺ်ႇလႄႈၸၢႆႇပႅတ်ႈဢုၵ်ႉၸႃႇငိုၼ်းတွင်းမၼ်းလၢႆလၢႆလွၵ်ႇလွၵ်ႇၼၼ်ႉဢေႃႈ။-
မၼ်းၼၼ်ႉၸင်ႇႁွင်ႉဢဝ်ၽူႈပႂ်ႉထိင်းဢုၵ်ႉၸႃႇၼၼ်ႉမႃးလႄႈလၢတ်ႈဝႃႈ၊ ‘ဢၼ်ၵဝ်လႆႈငိၼ်းလွင်ႈမႂ်းၼႆႉပဵၼ်ၸိူဝ်ႉၼင်ႇႁိုဝ်။ ဢဝ်ၸရၢင်းၽၢၼ်ႇတႃႇၵဝ်ၸိူဝ်းဢၼ်မႂ်းလႆႈယိပ်းလႆႈတိုဝ်းၼၼ်ႉဢၢပ်ႈပၼ်တီႈၵဝ်ၵုမ်ႇၵုမ်ႇတႃႉ။ မႂ်းဢမ်ႇလႆႈႁဵတ်းၽူႈပႂ်ႉထိင်းဢုၵ်ႉၸႃႇၵဝ်ၼႆႉယဝ်ႉ၊’ ဝႃႈၼင်ႇၼႆဢေႃႈ။-
ၵေႃႉၼၼ်ႉၵေႃႈၵျၢမ်ႇပွင်ၼႂ်းၸႂ်လႄႈဝႃႈ၊ ‘ပေႃႈလဵင်ႉၵဝ်ဢဝ်ၵဝ်ဢွၵ်ႇပႅတ်ႈယဝ်ႉ။ ၵဝ်တေလႆႈႁဵတ်းၸိူဝ်ႉၼင်ႇႁိုဝ်။ ၵဝ်ဢမ်ႇမီးႁႅင်းတႃႇတေမႅၵ်ႇလိၼ်ၶုတ်းလိၼ်။ တေၶေႃၵိၼ်ယွၼ်းၵိၼ်ၵေႃႈလီဢၢႆပိူၼ်ႈၼႃႇဢေႃႈ။-
ဝၢႆးသေဢရႃႇၽူႈပႂ်ႉထိင်းဢုၵ်ႉၸႃႇၼႆႉတူၵ်းၵႂႃႇယဝ်ႉၼၼ်ႉၼင်ႇႁိုဝ်ၵဝ်ပေႃးတေမီးၵေႃႉသႄႈဢၼ်ႁပ်ႉတုင်းဢဝ်ၵဝ်ၵႃႈၼႂ်းႁိူၼ်းၶဝ်ၸိုင်၊ၵဝ်တေႁဵတ်းၸိူဝ်ႉၼင်ႇႁိုဝ်ဝႃႈၼႆၵဝ်ႁုယဝ်ႉ၊’ ဝႃႈၼႆသေယဝ်ႉ၊-
ႁွင်ႉဢဝ်ၵူၼ်းၸိူဝ်းဢၼ်ထုၵ်ႇၼီႈတီႈပေႃႈလဵင်ႉမၼ်းၵူႈၵေႃႉၵူႈၵူၼ်းမႃးလႄႈထၢမ်ၵေႃႉၼိုင်ႈလႄႈဝႃႈ၊ ‘မႂ်းထုၵ်ႇၼီႈတီႈပေႃႈလဵင်ႉၵဝ်ၵႃႈႁိုဝ်၊’ ဝႃႈၼႆလႄႈ၊-
ၵေႃႉၼၼ်ႉၶိုၼ်းလၢတ်ႈလႄႈဝႃႈ၊ ‘မီးၼီႈၼမ်ႉမၼ်းပၢၵ်ႇပုင်းၶႃႈဢေႃႈ၊’ ဝႃႈၼႆဢေႃႈ။ ၽူႈပႂ်ႉထိင်းဢုၵ်ႉၸႃႇၼၼ်ႉၵေႃႈလၢတ်ႈလႄႈဝႃႈ၊ ‘ဢဝ်ၸရၢင်းမႂ်းၵႂႃႇ၊ၼင်ႈလႄႈတႅမ်ႈႁႃႈသိပ်းၽႂ်းၽႂ်းတႃႉ၊’ ဝႃႈၼႆဢေႃႈ။-
မၼ်းသမ်ႉထၢမ်တီႈၵေႃႉၼိုင်ႈထႅင်ႈလႄႈဝႃႈ၊ ‘မႂ်းၸမ်ႉ၊ထုၵ်ႇၼီႈၵႃႈႁိုဝ်၊’ ဝႃႈၼႆလႄႈၵေႃႉၼၼ်ႉၶိုၼ်းလၢတ်ႈလႄႈဝႃႈ၊ ‘မီးၼီႈၶဝ်ႈပိူၵ်ႇပၢၵ်ႇထူင်ၶႃႈဢေႃႈ၊’ ဝႃႈၼႆဢေႃႈ။ မၼ်းၵေႃႈလၢတ်ႈလႄႈဝႃႈ၊ ‘ဢဝ်ၸရၢင်းမႂ်းၵႂႃႇတႅမ်ႈပႅတ်ႇသိပ်းထူင်တႃႉ၊’ ဝႃႈၼႆဢေႃႈ။-
တီႈတၢင်းႁဵတ်းဢၼ်ၽူႈပႂ်ႉထိင်းဢုၵ်ႉၸႃႇဢၼ်ဢမ်ႇမီးသဵတ်ႈၸႃႇမီးပိင်ႇၺႃႇမဵဝ်းၼႆႉၼၼ်ႉပေႃႈလဵင်ႉမၼ်းဢၢမ်းၺၢၼ်ႇမၼ်း၊ပိူဝ်ႈဢၼ်မၼ်းလၵ်းလႅမ်ၸိူဝ်ႉၼင်ႇၼၼ်ၼၼ်ႉဢေႃႈ။ လွင်ႈမၼ်းၸမ်ႉ၊ၵူၼ်းလေႃးၵီႇတင်းလၢႆယဵင်ႈၶႅၼ်းလၵ်းလႅမ်ၼႂ်းၼႃႈၵၢၼ်ၶဝ်ၼင်ႇၵၼ်လိူဝ်သေၵူၼ်းၸိူဝ်းဢၼ်ပဵၼ်လုၵ်ႈဢၼ်လႅင်းယဝ်ႉၼၼ်ႉဢေႃႈ။
“ၵဝ်သမ်ႉဝႃႈထႅင်ႈၸမ်ႉ၊မိူဝ်ႈဢၼ်ၸေးၸိမ်ႇလေႃးၵႃႉၼၼ်ႉသဵင်ႈသုတ်းၼၼ်ႉၸိုင်၊ၼင်ႇႁိုဝ်ၶဝ်ၸိူဝ်းဢၼ်မီးၼႂ်းႁိူၼ်းထႃႇဝရႃႉၼၼ်ႉတၵ်းႁပ်ႉတုင်းဢဝ်သူၸိုင်၊ႁဵတ်းၵေႃႉသႄႈလူၺ်ႈၸေးၸိမ်ႇလေႃးၵႃႉၼႆႉဝႆႉပုၼ်ႈသူတႃႉ။-
ၽူႈလႂ်သေဢမ်ႇဝႃႈ၊ၵေႃႉဢၼ်မီးသဵတ်ႈၸႃႇၵႃႈၼိူဝ်ဢၼ်လဵၵ်ႉဢၼ်ၵေႇၼၼ်ႉ၊ၵႃႈၼိူဝ်ဢၼ်ယႂ်ႇဢၼ်လူင်ၵေႃႈ၊ၵေႃႉၼၼ်ႉတေမီးသဵတ်ႈၸႃႇဢေႃႈ။ ၵေႃႉဢၼ်ဢမ်ႇမီးသဵတ်ႈၸႃႇၵႃႈၼိူဝ်ဢၼ်လဵၵ်ႉဢၼ်ၵေႇၼၼ်ႉၸမ်ႉ၊ၵႃႈၼိူဝ်ဢၼ်ယႂ်ႇဢၼ်လူင်ၵေႃႈ၊ၵေႃႉၼၼ်ႉတေဢမ်ႇမီးသဵတ်ႈၸႃႇယဝ်ႉ။-
ပိူဝ်ႈၼႆလႄႈပေႃးသူဢမ်ႇမီးသဵတ်ႈၸႃႇၵႃႈၼိူဝ်ဢုၵ်ႉၸႃႇလေႃးၵႃႉၸိုင်၊ၽူႈလႂ်တၵ်းဢဝ်ဢုၵ်ႉၸႃႇဢၼ်ၸိုဝ်ႈဢၼ်ၸႂ်ႈၼၼ်ႉဢၢပ်ႈပၼ်တီႈသူ။-
သမ်ႉပေႃးသူဢမ်ႇမီးသဵတ်ႈၸႃႇၵႃႈၼိူဝ်ၶွင်ပိူၼ်ႈၸိုင်၊ၽူႈလႂ်တေဢဝ်ၵႃႈသင်မႅင်ႇႁႂ်ႈပဵၼ်ၶွင်သူလႆႈ။
“လုၵ်ႈၸၢင်ႈၵေႃႉလႂ်သေဢမ်ႇဝႃႈ၊ဢမ်ႇၶၢမ်ႇတၢင်းဢၼ်ၸႂ်ႉသွႆၼႂ်းမိုဝ်းပေႃႈလဵင်ႉသွင်ၵေႃႉလႆႈ။ မၼ်းတေၸင်းပေႃႈလဵင်ႉၵေႃႉၼိုင်ႈလႄႈႁၵ်ႉပေႃႈလဵင်ႉတၢင်ႇၵေႃႉဢေႃႈ။ မၼ်းတေပႂ်ႉသဵတ်ႈၸႃႇတီႈပေႃႈလဵင်ႉၵေႃႉၼိုင်ႈလႄႈႁဵတ်းဢမ်ႇၼပ်ႉဢမ်ႇၶၢၼ်းတီႈပေႃႈလဵင်ႉတၢင်ႇၵေႃႉဢေႃႈ။ သူၵေႃႈဢမ်ႇၶၢမ်ႇတၢင်းဢၼ်ၸႂ်ႉသွႆတီႈၽြႃးပဵၼ်ၸဝ်ႈ၊ဢိၵ်ႇတင်းတီႈဢုၵ်ႉၸႃႇလေႃးၵႃႉၼၼ်ႉလႆႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၵူၼ်းၵိူင်း ၽႃႇရိသႄး၊ ၶဝ်ၸိူဝ်းဢၼ်ၸႂ်ၸပ်းၸႂ်ၸွႆးငိုၼ်းၼၼ်ႉလႆႈငိၼ်းၵႂၢမ်းၼၼ်ႉၸိုင်၊မိတ်းသူပ်းမိတ်းပၢၵ်ႇတီႈ ၸဝ်ႈယေႇသု၊ ဢေႃႈ။-
မၼ်းၸဝ်ႈၵေႃႈလၢတ်ႈလႄႈဝႃႈ၊ “သူၸိူဝ်းၼႆႉ၊ႁဵတ်းႁၢင်ႈသိုဝ်ႈတေႃႇၵႃႈတီႈၽၢႆႇၼႃႈၵူၼ်းၵူၺ်းလႄႈၽြႃးပဵၼ်ၸဝ်ႈႁုၸႅင်ႈႁူဝ်ၸႂ်သူယူႇဢေႃႈ။ လွင်ႈမၼ်းၸမ်ႉ၊တၢင်းဢၼ်ၵူၼ်းထၢင်ႇပဵၼ်ဢၼ်ယႂ်ႇဢၼ်မျၢတ်ႈၼၼ်ႉ၊ပဵၼ်တၢင်းဢၼ်လီႁင်ႈဢဵတ်ႇသဵတ်ႇၵႃႈတႂ်ႈသၢႆတႃၽြႃးပဵၼ်ၸဝ်ႈဢေႃႈ။
“ၵျၢမ်းပိင်းၺၢပ်ႈတြႃးတင်းၵျၢမ်းဢၼႃႇၵတ်ႉတိၸိူဝ်းၼၼ်ႉ၊မီးမႃးတေႃႇထိုင်ႁွတ်ႈၸူဝ်ႈပၢၼ်သြႃႇ ယူဝ်းႁၢၼ်ႇ၊ ယူႇဢေႃႈ။ ၸႃႉၸဵမ်ၸူဝ်ႈပၢၼ်မၼ်းၼၼ်ႉလႄႈႁေႃးလၢတ်ႈၶၢဝ်ႇတြႃးသိူဝ်းပျေႃႇလွင်ႈမိူင်းၽြႃးပဵၼ်ၸဝ်ႈယူႇသေလႄႈၵူၼ်းတင်းလၢႆႁိမ်ၵၼ်ၶဝ်ႈၵႃႈၼႂ်းမိူင်းၸဝ်ႈဢေႃႈ။-
ၵူၺ်းၵႃႈ၊တၢင်းဢၼ်လိၼ်မိူင်းတင်းၵၢင်ႁၢဝ်တၵ်းတေႁၢႆၵႂႃႇၼၼ်ႉ၊ယင်းတေငၢႆႈသေတၢင်းဢၼ်ၸမ်ႈမၼ်းၸမ်ႈၼိုင်ႈၼႂ်းလိၵ်ႈတြႃးထမ်ႇမႃႉတၵ်းႁၢႆၵႂႃႇၼၼ်ႉဢေႃႈ။
“ၽူႈလႂ်သေဢမ်ႇဝႃႈ၊ၵေႃႉဢၼ်ပႅတ်ႈမေးတူဝ်ၸဝ်ႈၵဝ်ႇသေလႄႈသမ်ႉဢဝ်မႄႈယိင်းတၢင်ႇၵေႃႉထႅင်ႈၼၼ်ႉၽိတ်းၵႃႇမေႇသုဢေႃႈ။ ၵေႃႉဢၼ်ဢဝ်မႄႈႁၢင်ႉၼၼ်ႉၵေႃႈၽိတ်းၵႃႇမေႇသုဢေႃႈ။
“မိူဝ်ႈၼၼ်ႉ၊မီးသထေးလူင်ၵေႃႉၼိုင်ႈၼုင်ႈမႆၶူဝ်းၽႃႈၽႄးလႅင်ဢၼ်ထိူၵ်ႈၵႃႈၼႃႇသေလႄႈ ၵိၼ်မူၼ်ႈၵိၼ်ပျေႃႇၼႂ်းၸေးၸိမ်ႇၶျၢမ်းသႃႇယူႇၵူႈဝၼ်းဢေႃႈ။-
မီးၵူၼ်းၽၢၼ်ဢၼ်ႁွင်ႉဝႃႈ၊ လႃႇၸရု၊ ၼၼ်ႉၵေႃႉၼိုင်ႈဢေႃႈ။ မၼ်းၼၼ်ႉပဵၼ်တုမ်ႇၸဵပ်းတင်းတူဝ်တင်းၶိင်းလႄႈ၊-
ႁႂ်ႈလႆႈၵိၼ်ဢၼ်ယွႆႈဢၼ်ယႅမ်းဢၼ်တူၵ်းၵႃႈတီႈၽိူၼ်ၶဝ်ႈသထေးလူင်ၼၼ်ႉလႄႈၼွၼ်းၶူတ်းပႂ်ႉယူႇၵႃႈတီႈၽၵ်းတူႁိူၼ်းသထေးၼၼ်ႉဢေႃႈ။ မႃတင်းလၢႆမႃးလႄးတုမ်ႇၸဵပ်းမၼ်းဢေႃႈ။-
ဝၼ်းၼိုင်ႈၵူၼ်းၽၢၼ်ၼၼ်ႉတၢႆၵႂႃႇလႄႈတမၢၼ်ႇၵၢင်ႁၢဝ်တင်းလၢႆမႃးႁပ်ႉဢဝ်မၼ်းၵႂႃႇၼင်ႈတီႈႁိမ်းၶၢင်ႈ ဢႃႇပြႃႇႁၢမ်ႇ၊ သေဢေႃႈ။ သထေးလူင်ၵေႃႈတၢႆၵႂႃႇသေလႄႈဢဝ်သၢင်းၵျူဝ်ႇသေဢေႃႈ။-
မၼ်းၼၼ်ႉ၊လႆႈၶၢမ်ႇဝူၺ်ႇတၼႃႇယႂ်ႇၼမ်လူင်လၢင်ၵႃႈၼႂ်းမိူင်းမရၼႃႉပုၼ်ႉသေလႄႈ မုင်ႈႁၼ် ဢႃႇပြႃႇႁၢမ်ႇ၊ မီးယူႇတီႈဢၼ်ၵႆၼႃႇ၊ဢိၵ်ႇတင်းလႆႈႁၼ် လႃႇၸရု၊ ၼင်ႈယူႇႁိမ်းမၼ်းၼၼ်ႉဢေႃႈ။-
သထေးၼၼ်ႉ၊ႁွင်ႉသႅၼ်ႇလႄႈဝႃႈ၊ ‘ပေႃႈ ဢႃႇပြႃႇႁၢမ်ႇ၊ တီႈၶႃႈ။ ဢဵတ်းလူၵဝ်ၶႃႈသေၵမ်းၶႃႈ။ ၶႅၼ်းတေႃႈပွႆႇၸႂ်ႉ လႃႇၸရု၊ မႃးဢဝ်ၼိဝ်ႉမိုဝ်းမၼ်းၸုမ်ႇၼမ်ႉလႄႈယွတ်ႇသႂ်ႇလိၼ်ႉၵဝ်ၶႃႈႁႂ်ႈမၼ်းၵတ်းယဵၼ်သေၵမ်းၶႃႈ။ ၵဝ်ၶႃႈလႆႈၶၢမ်ႇၼႃႇလူင်လၢင်ၵႃႈၼႂ်းမုၵ်ႉၽႆးၼႆႉၶႃႈဢေႃႈ၊’ ဝႃႈၼင်ႇၼႆလႄႈ၊-
ဢႃႇပြႃႇႁၢမ်ႇ၊ ၶိုၼ်းလၢတ်ႈလႄႈဝႃႈ၊ ‘လုၵ်ႈၸၢႆးၵဝ်႟။ မိူဝ်ႈဢၼ်မႂ်းဢသၢၵ်ႈယင်းလိပ်းယူႇၼၼ်ႉ မႂ်းလႆႈမၢၵ်ႈမီးလီပဵၼ်ၼႃႇလူင်လၢင်လႄႈ လႃႇၸရု၊ ၸမ်ႉ၊ယၢၵ်ႈၽၢၼ်ၼႃႇလူင်လၢင်ၼၼ်ႉၶုၵ်းၸႂ်လႆႈတႃႉ။ တေႃႈလဵဝ်ၼႆႉမၼ်းလႆႈမူၼ်ႈပျေႃႇၼႃႇလူင်လၢင်ၵႃႈတီႈၼႆႈယဝ်ႉ။ မႂ်းၸမ်ႉ၊လႆႈၶၢမ်ႇတုၵ်ႉၶႃႉဝူၺ်ႇတၼႃႇၼႃႇလူင်လၢင်ဢေႃႈ။-
လိူဝ်သေၼႆႉဢမ်ႇၵႃး၊ၵႃႈၼႂ်းဝူင်ႈၵၢင်ႁဝ်းၼႆႉမီးႁိုၵ်းလူင်ဢၼ်လိုၵ်ႉၼႃႇၶၼ်ႈဝႆႉလႄႈၶဝ်ၸိူဝ်းဢၼ်ၶႂ်ႈလုၵ်ႉသေၵႃႈတီႈႁဝ်းၼႆႉၶၢမ်ႈၵႂႃႇၸူးသူၼၼ်ႉဢမ်ႇပဵၼ်လႆႈ။ လုၵ်ႉသေၵႃႈတီႈသူမီးၼၼ်ႉၵေႃႈဢမ်ႇၸၢင်ႈၶၢမ်ႈမႃးၸူးႁဝ်းလႆႈ၊’ ဝႃႈၼင်ႇၼႆဢေႃႈ။-
သထေးလူင်သမ်ႉလၢတ်ႈထႅင်ႈလႄႈဝႃႈ၊ ‘ပေႃႈ႟။ ပေႃးပဵၼ်ၼႆၸိုင်၊ၶႅၼ်းတေႃႈပွႆႇၸႂ်ႉ လႃႇၸရု၊ ၵႂႃႇၵႃႈတီႈႁိူၼ်းၵဝ်ၶႃႈသေၵမ်းၶႃႈ။-
ၵဝ်ၶႃႈယင်းမီးၼွင်ႉၸၢႆးႁႃႈၵေႃႉလႄႈ ႁႂ်ႈမၼ်းၵႂႃႇမွၵ်ႇလၢတ်ႈပၼ်သတိၶဝ်၊ပုၼ်ႈလွင်ႈၼင်ႇႁိုဝ်ၶဝ်တၵ်းဢမ်ႇလႆႈမႃးၶၢမ်ႇတုၵ်ႉၶႃႉဝူၺ်ႇတၼႃႇၵႃႈတီႈၼႆႈသေၵမ်းၶႃႈ၊’ ဝႃႈၼင်ႇၼႆဢေႃႈ။-
ဢႃႇပြႃႇႁၢမ်ႇ၊ ၶိုၼ်းလၢတ်ႈလႄႈဝႃႈ၊ ‘တီႈၼွင်ႉၸၢႆးမႂ်းၸိူဝ်းၼၼ်ႉ၊မီးတြႃး မူဝ်းသေႇ၊ တင်းတြႃးပရေႃးၽႅတ်ႈ တင်းလၢႆယူႇ။ ႁႂ်ႈၶဝ်ၵမ်ၵျၢင်ႉၸွမ်းတြႃးၸိူဝ်းၼၼ်ႉတႃႉ၊’ ဝႃႈၼႆလႄႈ၊-
သထေးလူင်ၶိုၼ်းလၢတ်ႈလႄႈဝႃႈ၊ ‘ဢမ်ႇၸႂ်ႈၶႃႈၵူၺ်း၊ပေႃႈ ဢႃႇပြႃႇႁၢမ်ႇ၊ တီႈၶႃႈ။ သင်ဝႃႈၵူၼ်းတၢႆသေၵေႃႉၵေႃႉလုၵ်ႉၶိုၼ်းလိပ်းလႄႈၵႂႃႇႁေႃးလၢတ်ႈပၼ်ၶဝ်ၸိုင်၊ၶဝ်တေၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်ၶဝ်ဢေႃႈ၊’ ဝႃႈၼင်ႇၼႆသေၵေႃႈ၊-
ဢႃႇပြႃႇႁၢမ်ႇ၊ ၶိုၼ်းလၢတ်ႈလႄႈဝႃႈ၊ ‘ပေႃးၶဝ်ယင်းဢမ်ႇထွမ်ႇဢဝ်တြႃး မူဝ်းသေႇ၊ ဢိၵ်ႇတင်းတြႃးပရေႃးၽႅတ်ႈၸိူဝ်းၼၼ်ႉၸိုင်၊ပိၵ်ႉသမ်ႉသေၵေႃႉသေၵူၼ်းလုၵ်ႉၵႃႈတၢင်းတၢႆၶိုၼ်းလိပ်းသေယဝ်ႉ၊ၵႂႃႇႁေႃးလၢတ်ႈသေၵေႃႈၶဝ်တေဢမ်ႇယုမ်ႇမၢတ်ႈၵူၺ်း၊’ ဝႃႈၼင်ႇၼႆယဝ်ႉ၊” ဝႃႈၼင်ႇၼႆ ၸဝ်ႈယေႇသု၊ ႁေႃႈလၢတ်ႈဢေႃႈ။
ၸဝ်ႈယေႇသု၊ လၢတ်ႈတီႈတပႄးၸဝ်ႈၸိူဝ်းၼၼ်ႉလႄႈဝႃႈ၊ “ၶိူင်ႈဢၼ်ၶီႈလိုတ်းဢၼ်ႁဵတ်းႁႂ်ႈၽိတ်းပိူင်ႈတြႃးၵႂႃႇၼၼ်ႉတၵ်းပဵၼ်မႃးဢေႃႈ။ ၵူၺ်းၵႃႈ၊ၵေႃႉဢၼ်ႁဵတ်းႁႂ်ႈၶီႈလိုတ်းၼၼ်ႉ႟။ မႂ်းမီးဢႃႉမၢင်ႇၵလႃႇဢေႃႈ။-
တီႈၵေႃႉၼၼ်ႉ ပေႃးဢဝ်မၢၵ်ႇႁိၼ်လူၺ်မတ်ႉႁွႆႈၶေႃးမၼ်းလႄႈဢဝ်ထိမ်ႈတူၵ်းၵႃႈၼႂ်းၼမ်ႉပၢင်ႇလၢႆႇတီႈဢၼ်လိုၵ်ႉၼၼ်ႉၸိုင်၊ယဵင်ႈၶႅၼ်းတေလီသေၵေႃႉဢၼ်ႁႂ်ႈလုၵ်ႈဢွၼ်ႇၸိူဝ်းၼႆႉသေၵေႃႉသေၵူၼ်းၶီႈလိုတ်းလႄႈလႆႈႁဵတ်းဢပျတ်ႈၼၼ်ႉဢေႃႈ။-
ႁဵတ်းသတိတီႈတူဝ်ၸဝ်ႈၵဝ်ႇတႃႉ။ “ပေႃးပီႈၼွင်ႉမႂ်းႁဵတ်းတၢင်းၽိတ်းတေႃႇမႂ်းၸိုင်၊သင်ႇသွၼ်သုင်းမႃႉမၼ်းတႃႉ။ ပေႃးမၼ်းၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်ၸိုင်၊ပွႆႇၶႂၢင်းပၼ်တၢင်းၽိတ်းမၼ်းတႃႉ။-
ပေႃးမၼ်းမႃးၽိတ်းမႂ်းၸဵတ်းပွၵ်ႈၼႂ်းဝၼ်းလဵဝ်ၵူၺ်းလႄႈမၼ်းသမ်ႉမႃးလၢတ်ႈဝႃႈ၊ ‘ၵဝ်ၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်ယဝ်ႉ၊’ ဝႃႈၼႆပွၵ်ႈလႂ်ပွၵ်ႈၼၼ်ႉၸိုင်၊မႂ်းတၵ်းလႆႈပွႆႇၶႂၢင်းပၼ်တၢင်းၽိတ်းမၼ်းဢေႃႈ၊” ဝႃႈၼင်ႇၼႆဢေႃႈ။
တမၢၼ်ႇၸဝ်ႈတင်းလၢႆလၢတ်ႈတီႈၸဝ်ႈၽြႃးလႄႈဝႃႈ၊ “ၶႅၼ်းတေႃႈႁဵတ်းႁႂ်ႈတၢင်းယုမ်ႇမၢတ်ႈႁဝ်းၶႃႈၼမ်ၵိုၼ်းမႃးသေၵမ်းၶႃႈ၊” ဝႃႈၼင်ႇၼႆဢေႃႈ။
ၸဝ်ႈၽြႃးၶိုၼ်းလၢတ်ႈလႄႈဝႃႈ၊ “ပေႃးတၢင်းယုမ်ႇမၢတ်ႈသူမီးထၢၼ်ႇမဵတ်ႉၽၼ်းၽၵ်းၵၢတ်ႇမဵတ်ႉၼိုင်ႈၵူၺ်းၵေႃႈပေႃးသူလၢတ်ႈတီႈတူၼ်ႈမၢၵ်ႇလိူဝ်ႇလႄႈဝႃႈ၊ ‘ထူၺ်ႈဢဝ်ၸဵမ်ႁၢၵ်ႈမႂ်းလႄႈၵႂႃႇပၵ်းယူႇၵႃႈၼႂ်းၼမ်ႉပၢင်ႇလၢႆႇပုၼ်ႉတႃႉ၊’ ဝႃႈၼင်ႇၼႆၸိုင်၊တူၼ်ႈၼၼ်ႉတၵ်းထွမ်ႇဢဝ်ၵႂၢမ်းသူဢေႃႈ။
“ၼႂ်းသူၼႆႉမီးလုၵ်ႈၸၢင်ႈဢၼ်ထႆၼႃးယူႇ၊ဢမ်ႇၼၼ်ၵေႃႈလဵင်ႉသူဝ်းယူႇဝႃႈၼႆလူးၵွၼ်ႇတႃႉ။ မိူဝ်ႈဢၼ်မၼ်းပွၵ်ႈၼႃးမႃးၼၼ်ႉၸိုင်၊ၸွင်ႇသူလၢတ်ႈတီႈမၼ်းလႄႈဝႃႈ၊ ‘မႃးၵိၼ်ၶဝ်ႈမႂ်းၵမ်းလဵဝ်တႃႉ၊’ ဝႃႈၼင်ႇၼႆႁိုဝ်း။-
သူဢမ်ႇဝႃႈၸိူဝ်ႉၼင်ႇၼႆၵူၺ်းဢမ်ႇၵႃး၊သူၸၢင်ႈလၢတ်ႈတီႈမၼ်းလႄႈဝႃႈ၊ ‘ႁႅၼ်းၽိူၼ်ၶဝ်ႈပၼ်ၵဝ်လူး။ ဢဝ်ၽႃႈႁတ်ႉဢႅဝ်လႄႈပႂ်ႉထႅမ်ၶဝ်ႈထႅမ်ၽၵ်းၵဝ်တေႃႇႁွတ်ႈၵဝ်ၵိၼ်ယဝ်ႉတႃႉ။ လိုၼ်းၼၼ်ႉမႂ်းၸင်ႇႁႅၼ်းၵိၼ်တႃႉ၊’ ဝႃႈၼင်ႇၼႆဢမ်ႇၸႂ်ႈႁိုဝ်း။-
လုၵ်ႈၸၢင်ႈၼၼ်ႉပိူဝ်ႈဢၼ်ႁဵတ်းၸွမ်းၵႃႈဢၼ်ပေႃႈလဵင်ႉမၼ်းၸႂ်ႉႁဵတ်းၼၼ်ႉလႄႈလႆႈၶၢမ်ႇဢဝ်ၵႂၢမ်းဢၼ်ပေႃႈလဵင်ႉမၼ်းတၢင်ႇၵျေးၸူးႁိုဝ်း။ ၵဝ်ဢမ်ႇထၢင်ႇၵူၺ်း။-
သူၵေႃႈ၊မိူၼ်ၵၼ်ယဝ်ႉ။ မိူဝ်ႈဢၼ်သူႁဵတ်းၵႃႈဢၼ်ၸဝ်ႈသူၸႂ်ႉႁဵတ်းၼၼ်ႉယဝ်ႉတူဝ်ႈလီငၢမ်းယဝ်ႉၸိုင်၊သူလၢတ်ႈဝႃႈ၊ ‘ႁဝ်းပဵၼ်ၵူၼ်းၸႂ်ႉၵူၼ်းသွႆယူဝ်းယူဝ်းလႄႈ ႁဝ်းႁဵတ်းႁႂ်ႈၼႃႈၵၢၼ်ႁဝ်းယဝ်ႉတူဝ်ႈၵူၺ်းဢေႃႈ၊’ ဝႃႈၼႆႁပ်ႉတုင်းဢဝ်တႃႉ၊” မၼ်းၸဝ်ႈဝႃႈၼင်ႇၼႆဢေႃႈ။
ၼႂ်းၶၢဝ်းတၢင်းဢၼ် ၸဝ်ႈယေႇသု၊ ပႆၵႂႃႇၸူးဝဵင်း ယေႇရုသလႅမ်ႇ၊ ၼၼ်ႉ၊မၼ်းၸဝ်ႈပႆၽႃႇၸွမ်းလႅၼ်လိၼ်မိူင်း သမႃႇရိ၊ တင်းမိူင်း ၵႃႇလိလႄး၊ ၵႂႃႇဢေႃႈ။-
မိူဝ်ႈဢၼ်မၼ်းၸဝ်ႈၸမ်တေၶဝ်ႈဝၢၼ်ႈဝၢၼ်ႈၼိုင်ႈၼၼ်ႉၸိုင်၊ၵူၼ်းတုတ်ႈ သိပ်းၵေႃႉၸုၵ်းယူႇၵႃႈတီႈဢၼ်ၵႆသေလႄႈႁပ်ႉႁူဝ်တၢင်းမၼ်းၸဝ်ႈဢေႃႈ။-
ၶဝ်ႁွင်ႉပၢဝ်ႇလႄႈဝႃႈ၊ “ ယေႇသု၊ ၸဝ်ႈႁဝ်းတီႈၶႃႈ။ ၶႅၼ်းတေႃႈဢဵတ်းလူႁဝ်းၶႃႈသေၵမ်းၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ႁၼ်ၶဝ်လႄႈလၢတ်ႈတီႈၶဝ်ဝႃႈ၊ “ၵႂႃႇၵႃႈတီႈယဵၸ်ႈပရေႃးႁဵၵ်ႈ လႄႈ၊ႁႂ်ႈၶဝ်ၸႅတ်ႈတူၺ်းယေႃးၵႃႇသူတႃႉ၊” ဝႃႈၼင်ႇၼႆဢေႃႈ။ မိူဝ်ႈဢၼ်ၶဝ်ယင်းတိုၵ်ႉၵႂႃႇယူႇၼၼ်ႉၸိုင်၊ၶဝ်လႆႈႁွတ်ႈထိုင်တၢင်းဢၼ်မူတ်းသႂ်ဢေႃႈ။-
ၼႂ်းၶဝ်ၼၼ်ႉၵေႃႉၼိုင်ႈ၊လႆႈႁၼ်တုတ်ႈမၼ်းမူတ်းသႂ်ယဝ်ႉၼၼ်ႉလႄႈၶိုၼ်းပွၵ်ႈမႃးသေယဝ်ႉ၊ယွင်ႈယေႃးၽြႃးပဵၼ်ၸဝ်ႈလူၺ်ႈတင်းသဵင်ဢၼ်ယႂ်ႇၼႃႇဢေႃႈ။-
မၼ်းၶုပ်ႉမူပ်ႇႁိမ်းတိၼ် ၸဝ်ႈယေႇသု၊ လႄႈလၢတ်ႈဝႃႈ၊ “ၵျေးၸူးၸဝ်ႈႁဝ်းယႂ်ႇၼႃႇၶႃႈဢေႃႈ၊” ဝႃႈၼင်ႇၼႆဢေႃႈ။ ၵေႃႉၼၼ်ႉပဵၼ်ၵူၼ်းမဵဝ်း သမႃႇရိ၊ ဢေႃႈ။-
ၸဝ်ႈယေႇသု၊ ၵေႃႈထၢမ်လႄႈဝႃႈ၊ “ၵူၼ်းသိပ်းၵေႃႉလႆႈႁွတ်ႈထိုင်တၢင်းဢၼ်မူတ်းသႂ်ဢမ်ႇၸႂ်ႈႁိုဝ်း။ ၵဝ်ႈၵေႃႉၼၼ်ႉမီးၵႃႈတီႈလႂ်။-
လိူဝ်သေၵူၼ်းတၢင်ႇၸိူဝ်ႉတၢင်ႇၶိူဝ်းၼႆႉဢမ်ႇမီးၵေႃႉဢၼ်တေၶိုၼ်းပွၵ်ႈမႃးယွင်ႈယေႃးၵျေးၸူးၽြႃးပဵၼ်ၸဝ်ႈသေၵေႃႉသေၵူၼ်းယဝ်ႉႁိုဝ်း၊” ဝႃႈၼင်ႇၼႆသေယဝ်ႉ၊-
သမ်ႉလၢတ်ႈတီႈၵေႃႉၼၼ်ႉလႄႈဝႃႈ၊ “လုၵ်ႉလႄႈမိူဝ်းၵႂႃႇတႃႉ။ တၢင်းယုမ်ႇမၢတ်ႈမႂ်းႁဵတ်းႁႂ်ႈတၢင်းၶႆႈတၢင်းပဵၼ်မႂ်းႁၢႆယဝ်ႉ၊” ဝႃႈၼင်ႇၼႆဢေႃႈ။
ၵူၼ်းၵိူင်း ၽႃႇရိသႄး၊ ၶဝ်ၵမ်ႈၽွင်ႈလဝ်ႈထၢမ် ၸဝ်ႈယေႇသု၊ လူၺ်ႈလွင်ႈမိူင်းၽြႃးပဵၼ်ၸဝ်ႈတၵ်းတႄႇပဵၼ်မႃးမိူဝ်ႈလႂ်ၼၼ်ႉလႄႈ မၼ်းၸဝ်ႈၶိုၼ်းလၢတ်ႈလႄႈဝႃႈၸမ်ႉ၊ “မိူင်းၽြႃးပဵၼ်ၸဝ်ႈတၵ်းတႄႇပဵၼ်ၵႃႈတီႈဢၼ်တႃၵူၼ်းႁၼ်လႆႈဢမ်ႇၸႂ်ႈ။-
‘တူၺ်းၵႃႈတီႈၼႆႈတႃႉ၊’ ‘တူၺ်းၵႃႈတီႈၼၼ်ႈတႃႉ၊’ ဝႃႈၼႆဢမ်ႇမီးတီႈဢၼ်တၵ်းၸိၼႄလႆႈ။ ၵွပ်ႈၸိူဝ်ႉႁိုဝ်လႄႈဝႃႈၸမ်ႉ၊မိူင်းၽြႃးပဵၼ်ၸဝ်ႈမီးယူႇၵႃႈၼႂ်းသူဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈသမ်ႉလၢတ်ႈတီႈတပႄးၸဝ်ႈၸိူဝ်းၼၼ်ႉလႄႈဝႃႈ၊ “မိူဝ်းၼႃႈထႃႈလိုၼ်းသူတၵ်းၸႂ်ထိုင်ၶႂ်ႈႁၼ်ဝၼ်း လုၵ်ႈၵူၼ်း၊ သေဝၼ်းၼိုင်ႈၵေႃႈ တၵ်းဢမ်ႇလႆႈႁၼ်မၼ်းယဝ်ႉ။-
တၵ်းမီးၵူၼ်းၸိူဝ်းဢၼ်လၢတ်ႈလႄႈဝႃႈ၊ ‘တူၺ်းၵႃႈတီႈၼႆႈတႃႉ၊’ ‘တူၺ်းၵႃႈတီႈၼၼ်ႈတႃႉ၊’ ဝႃႈၼင်ႇၼႆၼၼ်ႉဢေႃႈ။ ၵူၺ်းၵႃႈ၊ယႃႇပေၸွမ်းၵႂႃႇတူၺ်း။-
ဝၼ်း လုၵ်ႈၵူၼ်း၊ ၼၼ်ႉ တၵ်းပဵၼ်မႃးမိူၼ်ၸိူဝ်ႉၼင်ႇၽႃႉမႅပ်ႈဢၼ်မၢပ်ႈၵႃႈတီႈၸဵင်ႇတွင်ႉၽႃႉၸဵင်ႇၼိုင်ႈ ႁိူဝ်ႈလႅင်းႁွတ်ႈၵႂႃႇထိုင်ၸဵင်ႇၼိုင်ႈၼၼ်ႉဢေႃႈ။-
ၵူၺ်းၵႃႈ၊ၸူဝ်ႈဢၼ်လွင်ႈတၢင်းၸိူဝ်းၼႆႉဢမ်ႇပႆႇပဵၼ်ၼၼ်ႉမၼ်းၸဝ်ႈတၵ်းလႆႈၶၢမ်ႇဝူၺ်ႇတၼႃႇလူင်လၢင်၊ဢိၵ်ႇတင်းတၢင်းဢၼ်ၵူၼ်းၸူဝ်ႈပၢၼ်ၼႆႉပႄႇပႅတ်ႈမၼ်းၸဝ်ႈၼၼ်ႉဢွၼ်တၢင်းဢေႃႈ။-
ၸိူဝ်ႉၼင်ႇဢၼ်ပဵၼ်ယဝ်ႉၼႂ်းၸူဝ်ႈပၢၼ် ၼူဝ်းဢႃႇ၊ ၼၼ်ႉ၊တၵ်းပဵၼ်ၼႂ်းဝၼ်း လုၵ်ႈၵူၼ်း၊ ဢေႃႈ။-
ၵူၼ်းတင်းလၢႆဢွၼ်ၵၼ်ၵိၼ်ယူႇ၊ဢဝ်ၽူဝ်ဢဝ်မေးတေႃႇထိုင်ႁွတ်ႈဝၼ်းဢၼ် ၼူဝ်းဢႃႇ၊ ၶဝ်ႈႁိူဝ်းသၢင်းၽေႃးသေယဝ်ႉ၊ၼမ်ႉထူမ်ႈမိူင်းလႄႈဢဝ်တၢႆၶဝ်တင်းသဵင်ႈတင်းလူင်ၼၼ်ႉဢေႃႈ။-
ပိူင်လဵဝ်ၵၼ်တၵ်းပဵၼ်မိူၼ်ၸိူဝ်ႉၼင်ႇဢၼ်ပဵၼ်ယဝ်ႉၼႂ်းၸူဝ်ႈပၢၼ် လေႃးတႃႉ၊ ၼၼ်ႉဢေႃႈ။ ၵူၼ်းတင်းလၢႆၵိၼ်ယူႇ၊သိုဝ်ႉယူႇၶၢႆယူႇ၊ၽုၵ်ႇယူႇသွမ်ႈယူႇ၊တႄႇတင်ႈႁဵတ်းႁိူၼ်းယူႇဢေႃႈ။-
ၼႂ်းဝၼ်းဢၼ် လေႃးတႃႉ၊ ဢွၵ်ႇဝဵင်း သေႃးတုမ်ႇ၊ ၼၼ်ႉၽူၼ်ၽႆးဢၼ်လေႃးၵၼ်တင်းၵၢၼ်ႉလုၵ်ႉသေၵႃႈၼိူဝ်တွင်ႉၽႃႉတူၵ်းလူင်းမႃးလႄႈမႆႈၶဝ်တင်းသဵင်ႈတင်းလူင်တၢႆပႅတ်ႈၼၼ်ႉဢေႃႈ။-
ၼႂ်းဝၼ်းဢၼ် လုၵ်ႈၵူၼ်း၊ ပေႃႇမႃးၼၼ်ႉတၵ်းပဵၼ်ၸိူဝ်ႉၼင်ႇၼၼ်ဢေႃႈ။
“ၼႂ်းဝၼ်းၼၼ်ႉၵူၼ်းၵေႃႉဢၼ်မီးယူႇၵႃႈၼိူဝ်လင်ၶႃးႁိူၼ်း ၼၼ်ႉတၵ်းဢမ်ႇလႆႈလူင်းမႃးဢဝ်ၶူဝ်းလဵင်းမၼ်းဢၼ်မီးၵႃႈၼႂ်းႁိူၼ်း၊ပိူင်လဵဝ်ၵၼ်၊ၵေႃႉဢၼ်ဢွၵ်ႇၵႂႃႇမီးယူႇၵႃႈတီႈတူင်ႈၼႃးၵေႃႈ တၵ်းဢမ်ႇလႆႈပွၵ်ႈမႃးၸူးတီႈႁိူၼ်းမၼ်း။-
ဝူၼ်ႉၸႂ်တူၺ်းလူၺ်ႈလွင်ႈမေး လေႃးတႃႉ၊ ၼၼ်ႉလူး။-
ၽူႈလႂ်သေဢမ်ႇဝႃႈ၊ၵေႃႉဢၼ်ၶႂ်ႈၵႄႇသႄႇဢဝ်ဢသၢၵ်ႈတူဝ်ၸဝ်ႈၵဝ်ႇၼၼ်ႉ ၵေႃႉၼၼ်ႉတၵ်းသုမ်းဢသၢၵ်ႈဢေႃႈ။ ၽူႈလႂ်သေဢမ်ႇဝႃႈ၊ၵေႃႉဢၼ်သုမ်းဢသၢၵ်ႈၼၼ်ႉ ၵေႃႉၼၼ်ႉတၵ်းၵႄႇသႄႇဢဝ်ဢသၢၵ်ႈတူဝ်ၸဝ်ႈၵဝ်ႇဢေႃႈ။-
ၵဝ်ဝႃႈတီႈသူၸမ်ႉ၊ၼႂ်းၶိုၼ်းၼၼ်ႉၵူၼ်းသွင်ၵေႃႉၼွၼ်းယူႇၵႃႈၼိူဝ်ၵူႇဢၼ်လဵဝ်ၵၼ်ၼၼ်ႉ၊တၵ်းလႆႈၶၢမ်ႇတၢင်းဢၼ်သိမ်းဢဝ်ၵႂႃႇၵေႃႉၼိုင်ႈလႄႈတၵ်းဝႆႉၵိုတ်းယူႇၵေႃႉၼိုင်ႈဢေႃႈ။-
မႄႈယိင်းသွင်ၵေႃႉတၵ်းလူၺ်ၶဝ်ႈၸွမ်းၵၼ်ယူႇဢေႃႈ။ ၵေႃႉၼိုင်ႈတၵ်းလႆႈၶၢမ်ႇတၢင်းဢၼ်သိမ်းဢဝ်ၵႂႃႇလႄႈၵေႃႉၼိုင်ႈတၵ်းၵိုတ်းၵျၢၼ်ႇဝႆႉယူႇဢေႃႈ။-
[ၵူၼ်းၸၢႆးသွင်ၵေႃႉတၵ်းႁဵတ်းၵၢၼ်ယူႇၵႃႈၼႂ်းတူင်ႈၼႃးဢေႃႈ။ တၵ်းသိမ်းဢဝ်ၵႂႃႇၵေႃႉၼိုင်ႈလႄႈတၵ်းဝႆႉၵိုတ်းယူႇၵေႃႉၼိုင်ႈဢေႃႈ၊]” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊တပႄးၸဝ်ႈတင်းလၢႆလဝ်ႈထၢမ်လႄႈဝႃႈ၊ “တၵ်းပဵၼ်မႃးၵႃႈတီႈလႂ်ၶႃႈ၊ၸဝ်ႈ၊” ဝႃႈၼင်ႇၼႆလႄႈ၊ မၼ်းၸဝ်ႈၵေႃႈလၢတ်ႈလႄႈဝႃႈ၊ “တီႈဢၼ်တူဝ်တၢႆမီးၼၼ်ႉလၢင်းတႃႉတင်းလၢႆၸုတုမ်ဝႆႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ၸဝ်ႈယေႇသု၊ ဢဝ်တင်းၵႂၢမ်းဢုပမႃႇလၢတ်ႈၼႄၶဝ်၊ႁႂ်ႈလႆႈသွၼ်ပၼ်လွင်ႈၼင်ႇႁိုဝ်ၶဝ်တၵ်းဢမ်ႇၸႂ်လုလႄႈတၵ်းသူးတွင်းယူႇသေႇသေႇလႄႈဝႃႈၸမ်ႉ၊-
“ၼႂ်းဝဵင်းၼိုင်ႈမီးၶုၼ်ဢၼ်ၸီႇယၢင်ႇတြႃးၵေႃႉၼိုင်ႈဢေႃႈ။ ၶုၼ်ၼၼ်ႉဢမ်ႇၵူဝ်ႁႄၽြႃးပဵၼ်ၸဝ်ႈ၊ဢမ်ႇၼပ်ႉဢမ်ႇၶၢၼ်းၵူၼ်းလႄႈယူႇဢေႃႈ။-
မႄႈမၢႆႈဢၼ်မီးယူႇၼႂ်းဝဵင်းၼၼ်ႉၵေႃႉၼိုင်ႈၵမ်းၵမ်းၵႂႃႇၵႃႈတီႈၶုၼ်ၼၼ်ႉလႄႈ တွင်းပၢၼ်ႇလႄႈဝႃႈ၊ ‘ၶႅၼ်းတေႃႈဢဝ်တင်းတြႃးတၢင်းဢၼ်သိုဝ်ႈတေႃႇသေလႄႈ ၸီႇယၢင်ႇပၼ်ႁႂ်ႈၽၢႆႇၵဝ်ၶႃႈပႄႉဢမုၼႆႉသေၵမ်းၶႃႈ၊’ ဝႃႈၼႆယူႇၶိူဝ်းၶိူဝ်းဢေႃႈ။-
ၶုၼ်ၼၼ်ႉ၊ယင်းဢမ်ႇဝႆႉဢမုလႄႈယူႇႁိုင်တၢၼ်ႇတၢၼ်ႇသေယဝ်ႉ၊ၵမ်းလိုၼ်းမၼ်းၵျၢမ်ႇပွင်ၵႃႈၼႂ်းၸႂ်မၼ်းလႄႈဝႃႈ၊ ‘ပိၵ်ႉသမ်ႉၵဝ်ဢမ်ႇၵူဝ်ႁႄၽြႃးပဵၼ်ၸဝ်ႈလႄႈ ဢမ်ႇၼပ်ႉဢမ်ႇၶၢၼ်းၵူၼ်းတင်းလၢႆ၊-
ၵူၺ်းၵႃႈ၊မႄႈမၢႆႈၵေႃႉၼႆႉမႃးပၼ်တုၵ်ႉၶႃႉတီႈၵဝ်ၼမ်ၼႃႇလႄႈ ၵဝ်တၵ်းဢဝ်တြႃးတၢင်းဢၼ်သိုဝ်ႈတေႃႇၸီႇယၢင်ႇပၼ်ၽၢႆႇမၼ်းယဝ်ႉ။ ပေႃးဢမ်ႇၼၼ်မၼ်းတၵ်းမႃးၶိူဝ်းၶိူဝ်းယႂ်းယႂ်းလႄႈႁႂ်ႈၵဝ်ယၢပ်ႇၸႂ်ၵူၺ်းဢေႃႈ၊’ ဝႃႈၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။
ၸဝ်ႈၽြႃးသိုပ်ႇလၢတ်ႈလႄႈဝႃႈ၊ “ဝူၼ်ႉၸႂ်တူၺ်းၶေႃႈၵႂၢမ်းၶုၼ်ဢၼ်ဢမ်ႇတြႃးဢၼ်မၼ်းၵျၢမ်ႇပွင်ၼၼ်ႉလူး။-
ၸွင်ႇၽြႃးပဵၼ်ၸဝ်ႈတၵ်းဢမ်ႇၸီႇယၢင်ႇၽၢႆႇၵူၼ်းမၼ်းၸဝ်ႈဢၼ်လဝ်ႈယွၼ်းတၢင်းဢၼ်ၸွႆႈထႅမ်မႃႉၸႃႉယူႇၵူႈဝၼ်းၵူႈၶိုၼ်းၼၼ်ႉႁိုဝ်း။ ၸွင်ႇမၼ်းၸဝ်ႈတၵ်းၼၢၼ်းၸွႆႈထႅမ်မႃႉၸႃႉၶဝ်ႁိုဝ်း။-
ၵဝ်ဝႃႈတီႈသူၸမ်ႉ၊မၼ်းၸဝ်ႈတၵ်းယူႇၽၢႆႇၶဝ်လႄႈၸီႇယၢင်ႇပၼ်ၶၼ်ၶၼ်ၽႂ်းၽႂ်းဢေႃႈ။ ၼႂ်းဝႃႈၼၼ်သေၵေႃႈ၊မိူဝ်ႈဢၼ် လုၵ်ႈၵူၼ်း၊ မႃးၼၼ်ႉ၊ၸွင်ႇမၼ်းၸဝ်ႈတၵ်းထူပ်းႁၼ်တၢင်းယုမ်ႇမၢတ်ႈၵႃႈၼိူဝ်လိၼ်မိူင်းၼႆႉႁိုဝ်း၊” ၸဝ်ႈၽြႃးဝႃႈၼင်ႇၼႆဢေႃႈ။
ၸဝ်ႈယေႇသု၊ သမ်ႉလၢတ်ႈၵႂၢမ်းတီႈၶဝ်ၸိူဝ်းဢၼ်၊ဢိင်ပိုင်ႈၵုသူဝ်ႇတူဝ်ၸဝ်ႈၵဝ်ႇလႄႈႁဵတ်းဢမ်ႇၼပ်ႉဢမ်ႇၶၢၼ်းတီႈပိူၼ်ႈတၢင်ႇၵေႃႉၼၼ်ႉလႄႈဝႃႈၸမ်ႉ၊-
“ၵူၼ်းသွင်ၵေႃႉၶိုၼ်ႈၵျွင်းပိၵ်ႈမၢၼ်ႇၸဝ်ႈၵႂႃႇႁႂ်ႈလႆႈသူးတွင်းဢေႃႈ။ ၵေႃႉၼိုင်ႈပဵၼ်ၵူၼ်းၵိူင်း ၽႃႇရိသႄး၊ လႄႈ ၵေႃႉၼိုင်ႈပဵၼ်ၵူၼ်းၵဵပ်းၶွၼ်ႇဢေႃႈ။-
ၵူၼ်းၵိူင်း ၽႃႇရိသႄး၊ ၼၼ်ႉလုၵ်ႉၸုၵ်းယူႇၶေႃၶေႃမၼ်းသေယဝ်ႉ၊သူးတွင်းလႄႈဝႃႈ၊ ‘ဢူဝ်းၽြႃးပဵၼ်ၸဝ်ႈတီႈၶႃႈ။ ၵွပ်ႈပိူဝ်ႈၶႃႈၸဝ်ႈဢမ်ႇမီးၸႂ်ဢၼ်ၵူတ်ႉၵိၼ်ပိူၼ်ႈ၊ဢမ်ႇၵမ်ၵျၢင်ႉမဵဝ်းဢၼ်ဢမ်ႇတြႃး၊ဢမ်ႇၽိတ်းၵႃႇမေႇသုမိူၼ်ပိူၼ်ႈလႄႈၵျေးၸူးၸဝ်ႈႁဝ်းယႂ်ႇၼႃႇဢေႃႈ။ ပိူဝ်ႈဢၼ်ၶႃႈၸဝ်ႈဢမ်ႇပဵၼ်မိူၼ်ၸိူဝ်ႉၼင်ႇၵူၼ်းၵဵပ်းၶွၼ်ႇၼၼ်ႉၵေႃႈတၢင်ႇၵျေးၸူးၸဝ်ႈႁဝ်းတီႈၶႃႈဢေႃႈ။-
ၼႂ်းၼိုင်ႈပၢတ်ႈၶႃႈၸဝ်ႈၵမ်သိၼ်ဢမ်ႇၵိၼ်တၢင်းၵိၼ်သွင်ပွၵ်ႈၶႃႈဢေႃႈ။ ၵႃႈၼႂ်းငိုၼ်းဢၼ်ၶႃႈၸဝ်ႈလႆႈမႃးၼၼ်ႉ၊သိပ်းပုၼ်ႈလူႇပုၼ်ႈၼိုင်ႈၶႃႈဢေႃႈ၊’ ဝႃႈၼႆဢေႃႈ။-
ၵူၺ်းၵႃႈ၊ၵူၼ်းၵဵပ်းၶွၼ်ႇၼၼ်ႉၸုၵ်းယူႇတီႈဢၼ်ၵႆလႄႈယင်းဢမ်ႇႁတ်းႁႅၼ်တူၺ်းၵႃႈၼိူဝ်ၽႃႉၵၢင်ႁၢဝ်လႄႈတူပ်းႁူဝ်ဢူၵ်းယူႇသေယဝ်ႉသူးတွင်းလႄႈဝႃႈ၊ ‘ဢူဝ်းၽြႃးပဵၼ်ၸဝ်ႈတီႈၶႃႈ။ ၶႅၼ်းတေႃႈဢဵတ်းလူၶႃႈၸဝ်ႈဢၼ်မီးဢပျတ်ႈၼမ်ၼႃႇၼႆႉသေၵမ်းတီႈၶႃႈ၊’ ဝႃႈၼႆဢေႃႈ။-
ၵဝ်ဝႃႈတီႈသူၸမ်ႉ၊ၵူၼ်းၵဵပ်းၶွၼ်ႇၼႆႉၼႂ်းမိူဝ်ႈဢၼ်လူင်းႁိူၼ်းၵႂႃႇၼၼ်ႉ၊မၼ်းလႆႈၶၢမ်ႇတၢင်းဢၼ်မၢတ်ႈပဵၼ်ၵူၼ်းသိုဝ်ႈတေႃႇၼႃႇသေၵူၼ်းၵိူင်း ၽႃႇရိသႄး၊ ၼၼ်ႉဢေႃႈ။ လွင်ႈမၼ်းၸမ်ႉ၊ၵေႃႉဢၼ်ယုၵ်ႉယွင်ႈတူဝ်ၸဝ်ႈၵဝ်ႇၼၼ်ႉ၊တၵ်းလႆႈၶၢမ်ႇၶျႃးတူၵ်းၵႃႈတီႈတႅမ်ႇလႄႈ ၵေႃႉဢၼ်ၶျႃးတႅမ်ႇတူဝ်ၸဝ်ႈၵဝ်ႇၼၼ်ႉၸမ်ႉ၊တၵ်းလႆႈၶၢမ်ႇတၢင်းဢၼ်ယုၵ်ႉယွင်ႈဢေႃႈ၊” ဝႃႈၼင်ႇၼႆဢေႃႈ။
မီးပွၵ်ႈၼိုင်ႈၵူၼ်းၵမ်ႈၽွင်ႈဢဝ်လုၵ်ႈဢွၼ်ႇၶဝ်ၶဝ်ႈမႃးၸူးၵႃႈတီႈ ၸဝ်ႈယေႇသု၊ ႁႂ်ႈမၼ်းၸဝ်ႈဢဝ်မိုဝ်းတၢင်ႇၵႃႈၼိူဝ်ၶဝ်ဢေႃႈ။ တပႄးၸဝ်ႈၸိူဝ်းၼၼ်ႉႁၼ်ၶဝ်လႄႈ ႁၢမ်ႈတၢပ်ႈၶဝ်ယႃႇႁႂ်ႈၶဝ်ႁဵတ်းၸိူဝ်ႉၼင်ႇၼၼ်ဢေႃႈ။-
ၵူၺ်းၵႃႈ၊မၼ်းၸဝ်ႈႁွင်ႉဢဝ်ၶဝ်ၸိူဝ်းၼၼ်ႉမႃးၵႃႈတီႈမၼ်းၸဝ်ႈလႄႈလၢတ်ႈဝႃႈ၊ “ႁႂ်ႈလုၵ်ႈဢွၼ်ႇၸိူဝ်းၼၼ်ႉမႃးၵႃႈတီႈၵဝ်တႃႉ။ ယႃႇပေႁၢမ်ႈတၢပ်ႈၶဝ်။ မိူင်းၽြႃးပဵၼ်ၸဝ်ႈပဵၼ်မိူင်းပုၼ်ႈမဵဝ်းလုၵ်ႈဢွၼ်ႇၸိူဝ်ႉၼင်ႇၼႆဢေႃႈ။-
ၵဝ်ဝႃႈတီႈၸိုဝ်ႈၸႂ်ႈမၼ်းတီႈသူၸမ်ႉ၊ၽူႈလႂ်သေဢမ်ႇဝႃႈ၊ၵေႃႉဢၼ်ဢမ်ႇၶၢမ်ႇဢဝ်မိူင်းၽြႃးပဵၼ်ၸဝ်ႈ၊မိူၼ်ၸိူဝ်ႉၼင်ႇဢၼ်လုၵ်ႈဢွၼ်ႇတင်းလၢႆၶၢမ်ႇဢဝ်ၼၼ်ႉ၊ၵေႃႉၼၼ်ႉဢမ်ႇလႆႈၶဝ်ႈၵႃႈၼႂ်းမိူင်းၽြႃးပဵၼ်ၸဝ်ႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၵူၼ်းၵႄႇၵူၼ်းႁူဝ်ၵူၼ်းမဵဝ်း ၵျူး၊ ၶဝ်ၵေႃႉၼိုင်ႈလဝ်ႈထၢမ်လႄႈဝႃႈ၊ “သြႃႇၸဝ်ႈဢၼ်မျၢတ်ႈလီၶႃႈ႟။ ၼင်ႇႁိုဝ်ၵဝ်ၶႃႈတေလႆႈဢသၢၵ်ႈထႃႇဝရႃႉၸိုင်၊ၵဝ်ၶႃႈထုၵ်ႇလီႁဵတ်းတၢင်းလီဢၼ်လႂ်ၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈတီႈမၼ်းလႄႈဝႃႈ၊ “ႁဵတ်းသင်လႄႈမႂ်းႁွင်ႉၵဝ်ဝႃႈ၊ဢၼ်မျၢတ်ႈလီဝႃႈၼႆၼင်ႇႁိုဝ်။ လိူဝ်သေၽြႃးပဵၼ်ၸဝ်ႈၵူၺ်းၽူႈလႂ်ဢမ်ႇမျၢတ်ႈလီသေၵေႃႉ။-
မႂ်းႁုပိင်းၺၢပ်ႈၸဝ်ႈယူႇဢမ်ႇၸႂ်ႈႁိုဝ်း။ ‘ယႃႇပေၽိတ်းၵႃႇမေႇသု၊ယႃႇပေဢဝ်ၵူၼ်းတၢႆ၊ယႃႇပေလၵ်ႉပေလိူတ်ႇ၊ယႃႇပေလၢတ်ႈၵႂၢမ်းမုသႃႇ၊ႁဵတ်းတၢင်းဢၼ်ရူဝ်ႇသေႇၵူဝ်ယမ်တီႈပေႃႈမႄႈမႂ်းတႃႉ၊’ မီးၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။
ၵေႃႉၼၼ်ႉၶိုၼ်းလၢတ်ႈလႄႈဝႃႈ၊ “ပိင်းၺၢပ်ႈၸဝ်ႈၸိူဝ်းၼႆႉၵဝ်ၶႃႈၵမ်ၵျၢင်ႉမႃးၸဵမ်မိူဝ်ႈပဵၼ်လုၵ်ႈဢွၼ်ႇၼၼ်ႉၶႃႈယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈဢၼ် ၸဝ်ႈယေႇသု၊ ငိၼ်းၵႂၢမ်းၼၼ်ႉၸိုင်၊ၶိုၼ်းလၢတ်ႈလႄႈဝႃႈ၊ “မႂ်းလူဝ်ႇထႅင်ႈဢၼ်ၼိုင်ႈၵူၺ်းယဝ်ႉ။ ၶၢႆၵႃႈဢၼ်မႂ်းမီးတင်းမူတ်းသေယဝ်ႉ၊ဢဝ်ငိုၼ်းၼၼ်ႉပၼ်တီႈၵူၼ်းယၢၵ်ႈၵူၼ်းၽၢၼ်တင်းလၢႆတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊မႂ်းတေလႆႈမၢၵ်ႈမီးလီပဵၼ်ၵႃႈၼႂ်းမိူင်းၵၢင်ႁၢဝ်ပုၼ်ႉဢေႃႈ။ လိုၼ်းၼၼ်ႉၸင်ႇမႃးၸွမ်းၵဝ်တႃႉ၊” ဝႃႈၼင်ႇၼႆဢေႃႈ။-
ၵေႃႉၼၼ်ႉ၊မိူဝ်ႈဢၼ်ငိၼ်းၵႂၢမ်းၼၼ်ႉၸိုင်၊မီးႁူဝ်ၸႂ်ဢၼ်ငိူဝ်ႈငဝ်ၵႂႃႇသေလႄႈဢွၵ်ႇၵႂႃႇၵွပ်ႈပိူဝ်ႈမၼ်းပဵၼ်ၵေႃႉဢၼ်မၢၵ်ႈမီးၼႃႇၼၼ်ႉဢေႃႈ။
ၸဝ်ႈယေႇသု၊ ႁၼ်ၼႃႈမၼ်းငိူဝ်ႈငဝ်ၵႂႃႇၼၼ်ႉလႄႈလၢတ်ႈဝႃႈ၊ “ၶဝ်ၸိူဝ်းဢၼ်ၸၢင်ႈမၢၵ်ႈၸၢင်ႈမီးၼၼ်ႉၶဝ်ႈမိူင်းၽြႃးပဵၼ်ၸဝ်ႈယၢပ်ႇၼႃႇဢေႃႈ။-
ၵလႃႇဢုၵ်ႈလၼ်ႈၶဝ်ႈႁူးၶဵမ်ငၢႆႈသေၵူၼ်းမၢၵ်ႈၵူၼ်းမီးၶဝ်ႈမိူင်းၽြႃးပဵၼ်ၸဝ်ႈဢေႃႈ၊” ဝႃႈၼင်ႇၼႆဢေႃႈ။
ၶဝ်ၸိူဝ်းဢၼ်ငိၼ်းၼၼ်ႉလၢတ်ႈလႄႈဝႃႈ၊ “ပေႃးပဵၼ်ၼႆၸိုင်၊ၽူႈလႂ်တေလႆႈၶၢမ်ႇတၢင်းဢၼ်ၵႄႇၶျွတ်ႈဢဝ်လႆႈၶႃႈ၊” ဝႃႈၼင်ႇၼႆလႄႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “မဵဝ်းဢၼ်ၵူၼ်းဢမ်ႇတၢတ်ႈၼိူင်ႇလႆႈၼၼ်ႉ၊ၽြႃးပဵၼ်ၸဝ်ႈတၢတ်ႈၼိူင်ႇလႆႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ပေႇတရု၊ လၢတ်ႈလႄႈဝႃႈ၊ “တူၺ်းၶႃႈလူး။ ႁဝ်းၶႃႈၼႆႉၸုၼ်ႉပႅတ်ႈႁိူၼ်းယေးႁဝ်းၶႃႈသေလႄႈၸွမ်းလင်ၸဝ်ႈႁဝ်းၶႃႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈလၢတ်ႈတီႈၶဝ်လႄႈဝႃႈ၊ “ၸႂ်ႈယဝ်ႉ။ ၵဝ်ဝႃႈတီႈၸိုဝ်ႈၸႂ်ႈမၼ်းၸမ်ႉ၊ၽူႈလႂ်သေဢမ်ႇဝႃႈ၊ၵေႃႉဢၼ်ၸုၼ်ႉပႅတ်ႈႁိူၼ်းယေး၊လုၵ်ႈမေး၊ပေႃႈမႄႈပီႈၼွင်ႉမၼ်းတင်းလၢႆပုၼ်ႈဢၵျူဝ်းမိူင်းၽြႃးပဵၼ်ၸဝ်ႈၼၼ်ႉ၊-
ၵေႃႉၼၼ်ႉ၊တၵ်းလႆႈၶၢမ်ႇဢဝ်ဢၵျူဝ်းၼမ်ၼႃႇၼႂ်းၸၢတ်ႈၼႆႉ၊ဢိၵ်ႇတင်းတၵ်းလႆႈထႃႇဝရႃႉဢသၢၵ်ႈၼႂ်းၸၢတ်ႈၼႃႈပုၼ်ႉဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၸင်ႇႁွင်ႉဢဝ်သိပ်းသွင်ၵေႃႉၼၼ်ႉၽၢတ်ႇဢွၵ်ႇၵႂႃႇသေယဝ်ႉ၊လၢတ်ႈတီႈၶဝ်လႄႈဝႃႈ၊ “ထွမ်ႇလူး။ ႁဝ်းဢွၼ်ၵၼ်ၵႂႃႇတီႈဝဵင်း ယေႇရုသလႅမ်ႇ၊ ယူႇဢေႃႈ။ ၵႃႈတီႈၼၼ်ႈၵႃႈၼင်ႇဢၼ်ပရေႃးၽႅတ်ႈ တင်းလၢႆတႅမ်ႈဝႆႉလွင်ႈ လုၵ်ႈၵူၼ်း၊ ၼၼ်ႉ တၵ်းပျေႉၸုမ်ႇပဵၼ်ၸွမ်းဢေႃႈ။-
မၼ်းၸဝ်ႈတၵ်းလႆႈၶၢမ်ႇတၢင်းဢၼ်ဢၢပ်ႈၵႃႈၼႂ်းမိုဝ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆသေယဝ်ႉ၊တၵ်းလႆႈၶၢမ်ႇႁဵတ်းပျၢၵ်ႈႁဵတ်းၶူဝ်၊လႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသႄး၊ဢိၵ်ႇတင်းလႆႈၶၢမ်ႇတၢင်းဢၼ်ထူမ်ႇၼမ်ႉလၢႆးသႂ်ႇဢေႃႈ။-
ၶဝ်တၵ်းပေႃႉထုပ်ႉမၼ်းၸဝ်ႈသေယဝ်ႉ၊ဢဝ်တၢႆဢေႃႈ။ ၼႂ်းဝႃႈၼၼ်သေၵေႃႈ၊မိူဝ်ႈဢၼ်ထူၼ်ႈထိုင်သၢမ်ဝၼ်းၸိုင်၊မၼ်းၸဝ်ႈတၵ်းလုၵ်ႉၶိုၼ်းလိပ်းဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊တမၢၼ်ႇၸဝ်ႈၸိူဝ်းၼၼ်ႉဢမ်ႇႁုထွမ်ႇသေဢိတ်း၊ၵွပ်ႈပိူဝ်ႈဢၼၢၵ်ႈဢထိၵ်ႈပႄႇမၼ်းသိူင်ႇဝႆႉဢမ်ဝႆႉၼၼ်ႉလႄႈ ၸဝ်ႈယေႇသု၊ ၶႂ်ႈဝႃႈၸိူဝ်ႉၼင်ႇႁိုဝ်၊ၶဝ်ဢမ်ႇပွင်ႇၸႂ်လႄႈယူႇဢေႃႈ။
ၼႂ်းမိူဝ်ႈဢၼ် ၸဝ်ႈယေႇသု၊ ၸမ်ႁွတ်ႈထိုင်ဝဵင်း ယေႇရိၶူဝ်း၊ မႃးၼၼ်ႉ၊မီးၵူၼ်းတႃမွတ်ႇၵေႃႉၼိုင်ႈၼင်ႈယူႇႁိမ်းတၢင်းလႄႈယွၼ်းၵိၼ်ၶေႃၵိၼ်ယူႇဢေႃႈ။-
မိူဝ်ႈဢၼ်မၼ်းငိၼ်းသဵင်မုၵ်ႉၵူၼ်းၸိူဝ်းၵူၼ်းပႆၵၢႆၵႂႃႇယူႇၼၼ်ႉမၼ်းထၢမ်လႄႈဝႃႈ၊ “ပဵၼ်ၵႃႈသင်ၶႃႈ၊” ဝႃႈၼင်ႇၼႆလႄႈ။
“ ယေႇသု၊ ၵူၼ်းဝဵင်း ၼႃႇၸရႅတ်ႈ၊ ပႆၵၢႆၵႂႃႇယူႇဢိူဝ်း၊” ဝႃႈၼႆၶဝ်ၶိုၼ်းလၢတ်ႈပၼ်မၼ်းဢေႃႈ။
မိူဝ်ႈၼၼ်ႉမၼ်းႁွင်ႉသႅၼ်ႇလႄႈဝႃႈ၊ “ ယေႇသု၊ လုၵ်ႈ တႃႇဝိတ်ႈ၊ ႟။ ဢဵတ်းလူၵဝ်ၶႃႈသေၵမ်းၶႃႈ၊” ဝႃႈၼင်ႇၼႆဢေႃႈ။
ၶဝ်ၸိူဝ်းဢၼ်ပႆၵႂႃႇပႃႈၼႃႈၼၼ်ႉ ႁိုတ်းႁၢတ်ႇသႂ်ႇမၼ်းႁႂ်ႈမၼ်းယူႇတဵတ်ႇတဵတ်ႇဢေႃႈ။ ၵူၺ်းၵႃႈ၊မၼ်းယဵင်ႈၶႅၼ်းပၢဝ်ႇလႄႈႁွင်ႉသႅၼ်ႇဝႃႈ၊ “လုၵ်ႈ တႃႇဝိတ်ႈ၊ တီႈၶႃႈ႟။ ဢဵတ်းလူၵဝ်ၶႃႈသေၵမ်းၶႃႈ၊” ဝႃႈၼင်ႇၼႆယူႇဢေႃႈ။
ၸဝ်ႈယေႇသု၊ ၸင်ႇၵိုတ်းသဝ်းသေယဝ်ႉ၊မီးဢမိင်ႉႁႂ်ႈၶဝ်ၸုင်ဢဝ်ၵူၼ်းတႃမွတ်ႇၼၼ်ႉမႃးၵႃႈႁိမ်းမၼ်းၸဝ်ႈယဝ်ႉၸင်ႇ၊မိူဝ်ႈဢၼ်မၼ်းႁွတ်ႈမႃးၸမ်ၸမ်ၼၼ်ႉ ၸဝ်ႈယေႇသု၊ ထၢမ်မၼ်းလႄႈဝႃႈ၊-
“ၶႂ်ႈႁႂ်ႈၵဝ်ႁဵတ်းၸိူဝ်ႉၼင်ႇႁိုဝ်တီႈမႂ်း၊” ဝႃႈၼင်ႇၼႆလႄႈ၊မၼ်းၶိုၼ်းလဝ်ႈလၢတ်ႈလႄႈဝႃႈ။ “ၸဝ်ႈႁဝ်းတီႈၶႃႈ၊ႁဵတ်းႁႂ်ႈမၢၵ်ႇတႃၵဝ်ၶႃႈႁၼ်လႆႈမႃးသေၵမ်းၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “ႁႂ်ႈမၢၵ်ႇတႃမႂ်းလႆႈဢၼ်လႅင်းတႃႉ။ တၢင်းယုမ်ႇမၢတ်ႈမႂ်းၼၼ်ႉႁဵတ်းႁႂ်ႈမႂ်းလီၸႂ်ယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၵမ်းလဵဝ်မၢၵ်ႇတႃမၼ်းႁၼ်လႆႈမႃးသေယဝ်ႉ၊ၸွမ်းလင်မၼ်းၸဝ်ႈၵႂႃႇလႄႈယွင်ႈယေႃးတၢင်ႇၵျေးၸူးၽြႃးပဵၼ်ၸဝ်ႈယူႇဢေႃႈ။ ၵူၼ်းတင်းလၢႆႁၼ်သေယဝ်ႉ၊ဢွၼ်ၵၼ်ယွင်ႈယေႃးၽြႃးပဵၼ်ၸဝ်ႈဢေႃႈ။
ၸဝ်ႈယေႇသု၊ ၶဝ်ႈဝဵင်း ယေႇရိၶူဝ်း၊ သေယဝ်ႉ၊ပႆၸွမ်းတၢင်းၵႂႃႇယူႇဢေႃႈ။-
ၵႃႈၼႂ်းဝဵင်းၼၼ်ႉ၊မီးၶုၼ်ၵႄႇၵူၼ်းၵဵပ်းၶွၼ်ႇၵေႃႉၼိုင်ႈဢၼ်လႆႈၸိုဝ်ႈဝႃႈ၊ ၸၢၵ်ႈၶႄး၊ လႄႈ မၼ်းပဵၼ်ၵူၼ်းမၢၵ်ႈၵူၼ်းမီးဢေႃႈ။-
မၼ်းၶတ်းၸႂ်ၽိုတ်ႉဢီးႁႂ်ႈလႆႈႁၼ် ၸဝ်ႈယေႇသု၊ ပဵၼ်ၵူၼ်းၸိူဝ်ႉၼင်ႇႁိုဝ်ၼၼ်ႉလႄႈ၊ပိူဝ်ႈဢၼ်ၵူၼ်းၼမ်ၼႃႇလူင်လၢင်မၼ်းၵေႃႈပဵၼ်ၵူၼ်းပွတ်းၵူၼ်းတႅမ်ႇၼၼ်ႉလႄႈဢမ်ႇႁၼ်လႆႈ။-
မၼ်းၸင်ႇလႅၼ်ႈၵႂႃႇပႃႈၼႃႈမူႇၵူၼ်းတင်းလၢႆသေယဝ်ႉ၊ၶိုၼ်ႈတူၼ်ႈမၢၵ်ႇလိူဝ်ႇဢၼ်မီးႁိမ်းတၢင်းဢၼ် ၸဝ်ႈယေႇသု၊ ပႆမႃးယူႇၼၼ်ႉသေယဝ်ႉ၊ပႂ်ႉတူၺ်းမၼ်းၸဝ်ႈယူႇဢေႃႈ။-
မိူဝ်ႈဢၼ် ၸဝ်ႈယေႇသု၊ ႁွတ်ႈၽႅဝ်ၵႃႈတီႈၼၼ်ႈၸိုင်၊မၼ်းၸဝ်ႈႁႅၼ်တူၺ်းလႄႈလၢတ်ႈတီႈ ၸၢၵ်ႈၶႄး၊ လႄႈဝႃႈ၊ “ ၸၢၵ်ႈၶႄး၊ ႟။ လူင်းမႃးၶၼ်ၶၼ်ၽႂ်းၽႂ်းတႃႉ။ ဝၼ်းမိူဝ်ႈၼႆႉ ၵဝ်တၵ်းၵႂႃႇဝႄႉလိုဝ်ႈၵႃႈတီႈႁိူၼ်းမႂ်းဢေႃႈ၊” ဝႃႈၼင်ႇၼႆဢေႃႈ။
မၼ်းၼႅတ်ႈလူင်းၶၼ်ၶၼ်ၽႂ်းၽႂ်းသေလႄႈႁပ်ႉတွၼ်ႈမၼ်းၸဝ်ႈၵႂႃႇၵႃႈတီႈႁိူၼ်းမၼ်းၸူမ်းၸူမ်းသိူဝ်းသိူဝ်းဢေႃႈ။-
ၵူၼ်းတင်းလၢႆႁၼ်လွင်ႈၼၼ်ႉလႄႈသႄႉသွမ်းမၼ်းၸဝ်ႈလႄႈဝႃႈ၊ “ၵေႃႉၼႆႉယင်းၶဝ်ႈၵႂႃႇႁဵတ်းၶႅၵ်ႇၵႃႈၼႂ်းႁိူၼ်းၵူၼ်းႁၢႆႉၼႆႉလူင်ပႄႇ၊” ဝႃႈၼင်ႇၼႆဢေႃႈ။
ၸၢၵ်ႈၶႄး၊ လုၵ်ႉၸုၵ်းသေယဝ်ႉ၊လၢတ်ႈတီႈၸဝ်ႈၽြႃးလႄႈဝႃႈ၊ “ထွမ်ႇငိၼ်းသေၵမ်းၶႃႈၸဝ်ႈ။ ၵဝ်ၶႃႈတၵ်းဢဝ်ၵႃႈဢၼ်ပဵၼ်ၶူဝ်းၶွင်ၵဝ်ၶႃႈၶိုင်ႈၼိုင်ႈၽေးၸွၼ်းယိုၼ်ႈမႅင်ႇပၼ်ၵူၼ်းယၢၵ်ႈၵူၼ်းၽၢၼ်တင်းလၢႆၶႃႈဢေႃႈ။ ပေႃးၵဝ်ၶႃႈမၢပ်ႇၵိၼ်ၶူဝ်းၶွင်သေမဵဝ်းမဵဝ်းတီႈသေၵေႃႉၵေႃႉၸိုင်၊ၵဝ်ၶႃႈတၵ်းၶိုၼ်းတႅၼ်းပၼ်သီႇပုၼ်ႈၶႃႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈလၢတ်ႈတီႈမၼ်းလႄႈဝႃႈ၊ “တြႃးတၢင်းဢၼ်ၵႄႇၶျွတ်ႈဢဝ်တူၵ်းႁွတ်ႈတူၵ်းထိုင်ၵႃႈၼိူဝ်ႁိူၼ်းၼႆႉၼႂ်းဝၼ်းမိူဝ်ႈၼႆႉယဝ်ႉ။ လွင်ႈမၼ်းၸမ်ႉ၊ၵေႃႉၼႆႉၵေႃႈပဵၼ်လုၵ်ႈ ဢႃႇပြႃႇႁၢမ်ႇ၊ ဢေႃႈ။-
လုၵ်ႈၵူၼ်း၊ မႃးႁႂ်ႈလႆႈသွၵ်ႈႁႃလႄႈၵႄႇၶျွတ်ႈဢဝ်ၶဝ်ၸိူဝ်းဢၼ်ၵႂၢင်တၢင်းႁၢႆၵႂႃႇၼၼ်ႉဢေႃႈ၊” ဝႃႈၼင်ႇၼႆဢေႃႈ။
ယၢမ်းမိူဝ်ႈဢၼ်ၵူၼ်းတင်းလၢႆယင်းတိုၵ်ႉထွမ်ႇငိၼ်းတြႃးၸိူဝ်းၼႆႉယူႇၼၼ်ႉၸိုင်၊ပိူဝ်ႈဢၼ် ၸဝ်ႈယေႇသု၊ ႁွတ်ႈၸမ်မႃးၵႃႈတီႈဝဵင်း ယေႇရုသလႅမ်ႇ၊ ယဝ်ႉ၊ဢိၵ်ႇတင်းပိူဝ်ႈဢၼ်ၵူၼ်းတင်းလၢႆထၢင်ႇဝႃႈမိူင်းၽြႃးပဵၼ်ၸဝ်ႈတေၸဵဝ်းတႄႇပဵၼ်မႃးၵမ်းလဵဝ်ၼၼ်ႉလႄႈမၼ်းၸဝ်ႈၸင်ႇသိုပ်ႇလၢတ်ႈၵႂၢမ်းလႄႈဝႃႈၸမ်ႉ၊-
“မိူဝ်ႈၼၼ်ႉ၊မီးၶုၼ်လူင်ၵေႃႉၼိုင်ႈဢၼ်ဢွၵ်ႇၵႂႃႇဝၢၼ်ႈၵႆမိူင်းယၢၼ်ႁႂ်ႈလႆႈၶၢမ်ႇဢဝ်ဢရႃႇၶုၼ်ႁေႃၶမ်းယဝ်ႉၸင်ႇၵျၢမ်ႇဢၢင်ႈႁႂ်ႈလႆႈပွၵ်ႈၶိုၼ်းမိူဝ်းဢေႃႈ။-
ၸူဝ်ႈဢၼ်မၼ်းဢမ်ႇပႆႇဢွၵ်ႇၵႂႃႇၼၼ်ႉမၼ်းႁွင်ႉဢဝ်လုၵ်ႈၸၢင်ႈမၼ်းသိပ်းၵေႃႉမႃးသေလႄႈဢၢပ်ႈပၼ်ၶမ်းယေႈၵေႃႉယေႈၶႅပ်းယဝ်ႉၸင်ႇသင်ႇလၢတ်ႈလႄႈဝႃႈ၊ ‘ၸူဝ်ႈဢၼ်ၵဝ်ဢွၵ်ႇၶၢဝ်းတၢင်းၵႂႃႇၼႆႉဢဝ်ႁဵတ်းတၢင်းၵႃႉတၢင်းၶၢႆတႃႉ၊’ ဝႃႈၼင်ႇၼႆဢေႃႈ။-
ၵူၺ်းၵႃႈ၊ၵူၼ်းဝၢၼ်ႈၵူၼ်းမိူင်းမၼ်းၸင်းမၼ်းလႄႈပွႆႇၸႂ်ႉၵူၼ်းၵႂႃႇၸွမ်းႁႂ်ႈလႆႈလၢတ်ႈထိုင်လႄႈဝႃႈ၊ ‘ႁဝ်းၶႃႈဢမ်ႇမီးဢလူဝ်ႇၵေႃႉၼႆႉႁႂ်ႈမၼ်းမႃးပဵၼ်ၶုၼ်ႁေႃၶမ်းႁဝ်း၊’ ဝႃႈၼင်ႇၼႆဢေႃႈ။
“ၶုၼ်လူင်ၼၼ်ႉၶၢမ်ႇဢဝ်ဢရႃႇၶုၼ်ႁေႃၶမ်းသေယဝ်ႉ၊ၶိုၼ်းမိူဝ်းဢေႃႈ။ မိူဝ်ႈၼၼ်ႉၵမ်းလဵဝ်မၼ်းႁွင်ႉဢဝ်လုၵ်ႈၸၢင်ႈမၼ်းၸိူဝ်းၼၼ်ႉမႃးၶဝ်ႈၸူးၵႃႈတီႈၽၢႆႇၼႃႈမၼ်းႁႂ်ႈလႆႈႁုလွင်ႈၵေႃႉလႂ်လႆႈၼမ်ႉမျၢတ်ႈမၼ်းၵႃႈႁိုဝ်ၼၼ်ႉဢေႃႈ။-
ၵေႃႉတီႈၼိုင်ႈၼၼ်ႉမႃးလႄႈလဝ်ႈလၢတ်ႈဝႃႈ၊ ‘ၸဝ်ႈ႟။ ၼႂ်းၶမ်းၶႅပ်းၼိုင်ႈဢၼ်ၸဝ်ႈႁဝ်းဢၢပ်ႈဝႆႉတီႈၵဝ်ၶႃႈၼႆႉလႆႈၼမ်ႉမျၢတ်ႈမႃးသိပ်းၶႅပ်းၶႃႈဢေႃႈ၊’ ဝႃႈၼႆလႄႈ၊-
မၼ်းၼၼ်ႉၵေႃႈလၢတ်ႈလႄႈဝႃႈ၊ ‘လီယဝ်ႉ၊ၵူၼ်းဢွၼ်ႇဢၼ်လီၼႆႉ႟။ ပိူဝ်ႈဢၼ်မႂ်းမီးသဵတ်ႈၸႃႇၵႃႈၼိူဝ်ဢၼ်လဵၵ်ႉဢၼ်ၵေႇၼႆႉလႄႈႁဵတ်းၶုၼ်ဢၼ်ဢုပ်ႉပိူင်ႇသိပ်းဝဵင်းတႃႉ၊’ ဝႃႈၼႆဢေႃႈ။-
ၵေႃႉတီႈသွင်မႃးလႄႈလဝ်ႈလၢတ်ႈဝႃႈ၊ ‘ၸဝ်ႈႁဝ်း။ ၼႂ်းၶမ်းၶႅပ်းၼိုင်ႈဢၼ်ၸဝ်ႈႁဝ်းဢၢပ်ႈဝႆႉတီႈၵဝ်ၶႃႈၼႆႉလႆႈၼမ်ႉမျၢတ်ႈမႃးႁႃႈၶႅပ်းၶႃႈဢေႃႈ၊’ ဝႃႈၼႆလႄႈ၊-
မၼ်းၼၼ်ႉၵေႃႈ၊လၢတ်ႈတီႈၵေႃႉၼၼ်ႉလႄႈဝႃႈ၊ ‘မႂ်းႁဵတ်းၶုၼ်ဢၼ်ဢုပ်ႉပိူင်ႇႁႃႈဝဵင်းတႃႉ၊’ ဝႃႈၼႆဢေႃႈ။-
တၢင်ႇၵေႃႉမႃးလႄႈလဝ်ႈလၢတ်ႈဝႃႈ၊ ‘ၸဝ်ႈ႟။ ၶႅပ်းၶမ်းၸဝ်ႈႁဝ်းၼၼ်ႉၵဝ်ၶႃႈဢဝ်ၽႃႈပူၵ်ႉႁေႃႇဝႆႉလီလီလႄႈၵဵပ်းသိမ်းဝႆႉယူႇၶႃႈဢေႃႈ။-
ပိူဝ်ႈဢၼ်ၵဝ်ၶႃႈႁုလွင်ႈဢၼ်ၸဝ်ႈႁဝ်းႁဵတ်းယၢပ်ႇႁဵတ်းယဵၼ်းလႄႈၸၢင်ႈၵဵပ်းသိမ်းဢဝ်ဢၼ်ၸဝ်ႈႁဝ်းဢမ်ႇႁဵတ်း၊ၸၢင်ႈပၢတ်ႇဢဝ်ဢၼ်ၸဝ်ႈႁဝ်းဢမ်ႇၽုၵ်ႇဢမ်ႇသွမ်ႈၼၼ်ႉလႄႈ ၵဝ်ၶႃႈၵူဝ်ၸဝ်ႈႁဝ်းတီႈၶႃႈဢေႃႈ၊’ ဝႃႈၼႆလႄႈ၊-
မၼ်းၼၼ်ႉၵေႃႈလၢတ်ႈလႄႈဝႃႈ၊ ‘ၵူၼ်းဢွၼ်ႇဢၼ်ႁၢႆႉမိူၵ်ႈၼႆႉ႟။ ၵဝ်တၵ်းဢဝ်တင်းၵႂၢမ်းမႂ်းလႄႈၸီႇယၢင်ႇဢမုမႂ်းဢေႃႈ။ ပေႃးမႂ်းႁုလွင်ႈဢၼ်ၵဝ်ႁဵတ်းယၢပ်ႇႁဵတ်းယဵၼ်းလႄႈၸၢင်ႈၵဵပ်းသိမ်းဢဝ်ဢၼ်ၵဝ်ဢမ်ႇလႆႈႁဵတ်း၊ၸၢင်ႈပၢတ်ႇဢဝ်ဢၼ်ၵဝ်ဢမ်ႇၽုၵ်ႇဢမ်ႇသွမ်ႈၼၼ်ႉၸိုင်၊-
ၼင်ႇႁိုဝ်ၵဝ်တေလႆႈၶီႈမၼ်းၼႂ်းမိူဝ်ႈဢၼ်ၵဝ်ၶိုၼ်းမိူဝ်းၼၼ်ႉၵွပ်ႈသင်လႄႈဢမ်ႇဢဝ်ၵႂႃႇဝႆႉတီႈၼႂ်းၿၢၼ်ႇ ၼၼ်ႉၼင်ႇႁိုဝ်၊’ ဝႃႈၼင်ႇၼႆယဝ်ႉၸင်ႇ၊-
မၼ်းသမ်ႉလၢတ်ႈတီႈၶဝ်ၸိူဝ်းဢၼ်ၸုၵ်းယူႇႁိမ်းၼၼ်ႉလႄႈဝႃႈ၊ ‘သိမ်းဢဝ်ၶႅပ်းၶမ်းၼၼ်ႉတီႈမၼ်းသေလႄႈပၼ်တီႈၵေႃႉဢၼ်ၸၢင်ႈလႆႈသိပ်းၶႅပ်းမႃးၼၼ်ႉတႃႉ၊’ ဝႃႈၼႆဢေႃႈ။-
ၶဝ်ၸိူဝ်းၼၼ်ႉၶိုၼ်းလၢတ်ႈတီႈမၼ်းလႄႈဝႃႈ၊ ‘ၸဝ်ႈ႟။ ၵေႃႉၼၼ်ႉပေႃးလႆႈၶမ်းသိပ်းၶႅပ်းယဝ်ႉၶႃႈဢေႃႈ၊’ ဝႃႈၼႆလႄႈ၊-
မၼ်းၶိုၼ်းလၢတ်ႈလႄႈဝႃႈ၊ ‘ၵဝ်ဝႃႈတီႈသူၸမ်ႉ၊ၽူႈလႂ်သေဢမ်ႇဝႃႈ၊တီႈၵူႈၵေႃႉဢၼ်မီးယဝ်ႉၼၼ်ႉတၵ်းပၼ်ထႅင်ႈလႄႈ၊တီႈၵေႃႉဢၼ်ဢမ်ႇမီးၼၼ်ႉတၵ်းၼုၵ်ႈဢဝ်ၵႃႈဢၼ်မၼ်းမီးၼၼ်ႉလူးၵွၼ်ႇဢေႃႈ။
“‘တေႃႈလဵဝ်ၼႆႉ၊ႁွင်ႉဢဝ်ရၢၼ်ႇသူႇၵဝ်ၸိူဝ်းဢၼ်ဢမ်ႇၶႂ်ႈၶၢမ်ႇဢဝ်ၵဝ်ႁဵတ်းၶုၼ်ႁေႃၶမ်းၶဝ်ၼၼ်ႉမႃးၵႃႈတီႈၼႆႈသေလႄႈဢဝ်တၢႆၽၢႆႇၼႃႈၵဝ်တင်းသဵင်ႈတင်းလူင်တႃႉ၊’ ဝႃႈၼင်ႇၼႆဢေႃႈ၊” ဝႃႈၼႆ ၸဝ်ႈယေႇသု၊ ၶႆႈၼႄၸိူဝ်ႉၼင်ႇၼႆဢေႃႈ။
ၸဝ်ႈယေႇသု၊ လၢတ်ႈၸိူဝ်ႉၼင်ႇၼႆသေယဝ်ႉ၊ဢွၼ်ႁူဝ်ၵႂႃႇဢွၼ်တၢင်းတပႄးၸဝ်ႈတင်းလၢႆလႄႈၵႂႃႇၸူးဝဵင်း ယေႇရုသလႅမ်ႇ၊ ယူႇဢေႃႈ။-
မိူဝ်ႈဢၼ်မၼ်းၸဝ်ႈၸမ်တၵ်းႁွတ်ႈထိုင်ဝၢၼ်ႈ ပိတ်ႉၽႃႇၵေး၊ ဢိၵ်ႇတင်းဝၢၼ်ႈ ပေႇထၼိ၊ ၵႃႈတီႈလွႆဢၼ်လႆႈၸိုဝ်ႈ၊လွႆ သၢၼ်ႇလုၼ်ႇ၊ ၼၼ်ႉၸိုင်၊မၼ်းၸဝ်ႈပွႆႇတပႄးၸဝ်ႈသွင်ၵေႃႉၵႂႃႇဢွၼ်တၢင်း၊-
တင်းၶေႃႈၵႂၢမ်းဢၼ်သင်ႇလၢတ်ႈလႄႈဝႃႈ၊ “ၵႂႃႇၵႃႈတီႈဝၢၼ်ႈဢၼ်မီးတၢင်းၼႃႈပုၼ်ႉတႃႉ။ ပေႃးသူၶဝ်ႈဝၢၼ်ႈၵႂႃႇၸိုင်၊တၵ်းထူပ်းႁၼ်မႃႉလီႈဢွၼ်ႇဢၼ်ဢမ်ႇပႆႇတွၼ်ႉၽိုၵ်းၶီႇမၼ်းသေပွၵ်ႈၼၼ်ႉမတ်ႉဝႆႉဢေႃႈ။ ၵႄႈၸိူၵ်ႈမၼ်းသေယဝ်ႉ၊ဢဝ်မႃးၵႃႈတီႈၼႆႈတႃႉ။-
ပေႃးသေၵေႃႉသေၵူၼ်းထၢမ်လႄႈဝႃႈ၊ ‘သူၵႄႈဢဝ်မႃႉလီႈၼၼ်ႉၵႂႃႇႁဵတ်းသင်၊’ ဝႃႈၼႆၸိုင်၊ ‘ၸဝ်ႈမီးဢလူဝ်ႇဢေႃႈ၊’ ဝႃႈၼႆတႃႉ၊” ဝႃႈၼင်ႇၼႆဢေႃႈ။
ၶဝ်သွင်ၵေႃႉၵေႃႈၵႂႃႇလႄႈထူပ်းႁၼ်ၵႃႈၼင်ႇဢၼ် ၸဝ်ႈယေႇသု၊ သင်ႇလၢတ်ႈဝႆႉၵူႈၸိူဝ်ႉၵူႈပိူင်ၼၼ်ႉဢေႃႈ။-
မိူဝ်ႈဢၼ်ၶဝ်ၵႄႈၸိူၵ်ႈမႃႉလီႈဢွၼ်ႇၼၼ်ႉယူႇၸိုင်၊ၸဝ်ႈမၼ်းထၢမ်လႄႈဝႃႈ၊ “ႁဵတ်းသင်လႄႈသူၵႄႈၸိူၵ်ႈမႃႉလီႈၼၼ်ႉ၊” ဝႃႈၼႆလႄႈၶဝ်ၶိုၼ်းတွပ်ႇဝႃႈ၊ “ၸဝ်ႈမီးဢလူဝ်ႇဢေႃႈ၊” ဝႃႈၼင်ႇၼႆသေယဝ်ႉ၊ဢဝ်မႃးၸူးတီႈ ၸဝ်ႈယေႇသု၊ ဢေႃႈ။
ၵမ်းၼၼ်ႉ ၶဝ်ဢဝ်သိူဝ်ႈယၢဝ်းၶဝ်သိူဝ်ႇၼိူဝ်လင်မႃႉလီႈဢွၼ်ႇၼၼ်ႉသေယဝ်ႉ၊ပၼ် ၸဝ်ႈယေႇသု၊ ၶိုၼ်ႈၶီႇၵႃႈၼိူဝ်ၼင်မႃႉလီႈဢွၼ်ႇၼၼ်ႉဢေႃႈ။-
ၼႂ်းမိူဝ်ႈဢၼ်မၼ်းၸဝ်ႈယင်းတိုၵ်ႉၶီႇၵႂႃႇယူႇၼၼ်ႉၸိုင်၊ၵူၼ်းတင်းလၢႆဢဝ်သိူဝ်ႈယၢဝ်းၶဝ်ပူသိူဝ်ႇပၼ်ၵႃႈၼိူဝ်ၶူဝ်တၢင်းဢေႃႈ။-
ၼႂ်းမိူဝ်ႈဢၼ်မၼ်းၸဝ်ႈၸမ်ႁွတ်ႈထိုင်ဝဵင်း ယေႇရုသလႅမ်ႇ၊ တီႈဢၼ်ၸွမ်းတၢင်းလေႃႇလူင်းလွႆ သၢၼ်ႇလုၼ်ႇ၊ မႃးယူႇၼၼ်ႉၸိုင်။
တပႄးၸဝ်ႈတင်းမူႇတင်းၸိူဝ်းၼၼ်ႉပိူဝ်ႈဢၼ်လႆႈႁၼ်တၼ်းၶူဝ်းဢၼ်မၼ်းၸဝ်ႈႁဵတ်းၼႄတင်းသဵင်ႈတင်းလူင်ၼၼ်ႉယဝ်ႉလႄႈမီးၸႂ်ဢၼ်သိူဝ်းသႂၢင်ႇၼႃႇဢွၼ်ၵၼ်ယွင်ႈယေႃးၵျေးၸူးၽြႃးပဵၼ်ၸဝ်ႈလူၺ်ႈတင်းသဵင်ဢၼ်ယႂ်ႇၼႃႇလႄႈဝႃႈ၊-
“ႁႂ်ႈၽြႃးပဵၼ်ၸဝ်ႈပၼ်မၢင်ႇၵလႃႇတၢင်းလီတီႈၶုၼ်ႁေႃၶမ်းဢၼ်မႃးၼႂ်းၸိုဝ်ႈသဵင်ၸဝ်ႈၽြႃးၼႆႉသေၵမ်းလူၺ်ႈ။ ႁႂ်ႈတၢင်းၼိမ်မီးၵႃႈၼႂ်းၽုင်ႇၵၢင်ႁၢဝ်လႄႈ မုၼ်ၽုင်းမီးၵႃႈတီႈၽြႃးပဵၼ်ၸဝ်ႈသေၵမ်းလူၺ်ႈ။” ဝႃႈၼင်ႇၼႆဢေႃႈ။
မိူဝ်ႈၼၼ်ႉၵူၼ်းၵိူင်း ၽႃႇရိသႄး၊ ၵမ်ႈၽွင်ႈလုၵ်ႉသေၵႃႈၼႂ်းၵႄႈမူႇၵူၼ်းသေယဝ်ႉ၊လၢတ်ႈတီႈ ၸဝ်ႈယေႇသု၊ လႄႈဝႃႈ၊ “သြႃႇလူင်ၶႃႈ။ ၶႅၼ်းတေႃႈပူင်ဢမိင်ႉႁႂ်ႈတပႄးသြႃႇၸဝ်ႈၸိူဝ်းၼၼ်ႉယူႇတဵတ်ႇတဵတ်ႇသေၵမ်းၶႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၶိုၼ်းလၢတ်ႈလႄႈဝႃႈ၊ “ၵဝ်ဝႃႈတီႈသူၸမ်ႉ၊ပေႃးၶဝ်တဵတ်ႇၵႂႃႇၸိုင်၊မၢၵ်ႇႁိၼ်တင်းလၢႆတေႁွင်ႉသႅၼ်ႇဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ႁွတ်ႈၽႅဝ်ၸမ်ဝဵင်းၼၼ်ႉၵႂႃႇလႄႈမိူဝ်ႈဢၼ်မုင်ႈႁၼ်ဝဵင်းၼၼ်ႉၸိုင်၊မၼ်းၸဝ်ႈႁွင်ႉႁႆႈလူၺ်ႈဝဵင်းၼၼ်ႉလႄႈ၊-
လၢတ်ႈဝႃႈ၊ “ၼႂ်းၶိင်ႇၵႃႇလႃႉဝၼ်းမိူဝ်ႈလဵဝ်ၼႆႉသင်မႂ်းလႆႈႁုႁၼ်လွင်ႈတၢင်းဢၼ်ႁဵတ်းႁႂ်ႈပေႃႇပဵၼ်တၢင်းၼိမ်မႃးၼၼ်ႉတေလီၼႃႇဢေႃႈ။ ၵူၺ်းၵႃႈ၊တေႃႈလဵဝ်ၼႆႉလွင်ႈတၢင်းၸိူဝ်းၼႆႉသိူင်ႇလပ်ႉဝႆႉၵႃႈတီႈမၢၵ်ႇတႃမႂ်းယဝ်ႉ။-
လွင်ႈမၼ်းၸမ်ႉ၊ၵွပ်ႈပိူဝ်ႈမႂ်းဢမ်ႇမၢတ်ႈဢမ်ႇတွင်းၶိင်ႇၵႃႇလႃႉဢၼ်ၽြႃးပဵၼ်ၸဝ်ႈႁွတ်ႈမႃးၵႄႇၶျွတ်ႈဢဝ်မႂ်းၼၼ်ႉလႄႈၶိင်ႇဝၼ်းမိူဝ်ႈဢၼ်ရၢၼ်ႇသူႇမႂ်းတင်းလၢႆတၵ်းတႄႇႁဵတ်းတပ်ႉႁဵတ်းတႃႇလွမ်ႉၶင်မႂ်းဝႆႉၵူႈပႃႈၵူႈၽၢႆႇသေယဝ်ႉ၊-
ၶဝ်တၵ်းၵိူၼ်ႇယႃႉမႂ်းပႃးၸဵမ်ၵူၼ်းဝဵင်းဢၼ်ယူႇၵႃႈၼႂ်းလမ်းဝဵင်းမႂ်းတင်းသဵင်ႈတင်းလူင်တူၵ်းလႄႈမၢၵ်ႇႁိၼ်ဢၼ်ၵေႃႇၵၼ်ဝႆႉၵႃႈတီႈမႂ်းၼၼ်ႉ၊တၵ်းဢမ်ႇၵိုတ်းဝႆႉသေႁူၺ်ႇၼၼ်ႉတၵ်းႁွတ်ႈမႃးတီႈမႂ်းဢေႃႈ၊” ဝႃႈၼင်ႇၼႆဢေႃႈ။
ၵမ်းၼၼ်ႉ၊ ၸဝ်ႈယေႇသု၊ ၶဝ်ႈၵႂႃႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈလႄႈလိုပ်ႈႁေႃႈပႅတ်ႈၵူၼ်းၵႃႉၵူၼ်းၶၢႆတင်းလၢႆဢေႃႈ။-
မၼ်းၸဝ်ႈလၢတ်ႈတီႈၶဝ်လႄႈဝႃႈ၊ “ၵျၢမ်းလိၵ်ႈတႅမ်ႈဝႆႉဝႃႈ၊ ‘ၵျွင်းပိၵ်ႈမၢၼ်ႇၵဝ်ပဵၼ်ႁိူၼ်းတီႈဢၼ်သူးတွင်းဢေႃႈ၊’ ဝႃႈၼင်ႇၼႆဝႆႉဢေႃႈ။ ၵူၺ်းၵႃႈ၊သူႁဵတ်းႁႂ်ႈမၼ်းပဵၼ်ထမ်ႈၸူၼ်ယဝ်ႉၼေႃ၊” ဝႃႈၼင်ၼႆဢေႃႈ။
ၸဝ်ႈယေႇသု၊ ၵေႃႈသင်ႇသွၼ်သုင်းမႃႉပၼ်ၼႂ်းၵျွင်းပိၵ်ႈမၢၼ်ႇၸဝ်ႈယူႇၵူႈဝၼ်းဢေႃႈ။ ယဵၸ်ႈပရေႃးႁဵၵ်ႈ လူင်၊ဢိၵ်ႇတင်းသြႃႇမေႃၵျၢမ်းထမ်ႇမႃႉတင်းလၢႆ၊ဢိၵ်ႇတင်းၵူၼ်းၵႄႇၵူၼ်းႁူဝ်ၶဝ်တင်းလၢႆၶႂ်ႈဢဝ်မၼ်းၸဝ်ႈတၢႆဢေႃႈ။-
ၼႂ်းဝႃႈၼၼ်သေၵေႃႈၵွပ်ႈပိူဝ်ႈဢၼ်ၵူၼ်းတင်းလၢႆဢွၼ်ၵၼ်ထွမ်ႇဢဝ်တြႃးမၼ်းၸဝ်ႈယူႇ၊ယင်းဢမ်ႇၶႂ်ႈႁႂ်ႈတူၵ်းႁူင်ႈသေၶေႃႈသေၵမ်းၼၼ်ႉ လႄႈၶဝ်ဢမ်ႇႁၼ်လွင်ႈႁၼ်တၢင်းပုၼ်ႈတေဢဝ်မၼ်းၸဝ်ႈတၢႆၼၼ်ႉဢေႃႈ။
မီးဝၼ်းၼိုင်ႈၼႂ်းမိူဝ်ႈဢၼ် ၸဝ်ႈယေႇသု၊ ယင်းသင်ႇသွၼ်ပၼ်တီႈၵူၼ်းတင်းလၢႆ ၵႃႈၼႂ်းၵျွင်းပိၵ်ႈမၢၼ်ႇၸဝ်ႈယူႇလႄႈႁေႃးလၢတ်ႈၶၢဝ်ႇတြႃးသိူဝ်းပျေႃႇယူႇၼၼ်ႉၸိုင်၊ယဵၸ်ႈပရေႃးႁဵၵ်ႈလူင်၊ဢိၵ်ႇတင်းသြႃႇမေႃၵျၢမ်းထမ်ႇမႃႉၶဝ်၊ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆမႃးတီႈမၼ်းၸဝ်ႈလႄႈ၊-
လဝ်ႈထၢမ်ဝႃႈ၊ “မႂ်းမီးဢၶႂၢင်ႉဢႃႇၼႃႇၸိူဝ်ႉႁိုဝ်လႄႈမႃးႁဵတ်းၸိူဝ်ႉၼင်ႇၼႆ။ ၽူႈလႂ်ပၼ်ဢၶႂၢင်ႉဢႃႇၼႃႇၼၼ်ႉတီႈမႂ်းဝႃႈၼႆမွၵ်ႇလၢတ်ႈႁဝ်းတႃႉ၊” ဝႃႈၼင်ႇၼႆဢေႃႈ။
မၼ်းၸဝ်ႈၶိုၼ်းလၢတ်ႈလႄႈဝႃႈ၊ “တေႃႈလဵဝ်ၼႆႉႁႂ်ႈၵဝ်လႆႈထၢမ်သူၵႂၢမ်းၶေႃႈၼိုင်ႈလူး။-
ဢၶႂၢင်ႉဢႃႇၼႃႇဢၼ်သြႃႇ ယူဝ်းႁၢၼ်ႇ၊ ပၼ်မၢင်ႇၵလႃႇပပ်ႉတိၸမ်ႇ ၼၼ်ႉလုၵ်ႉသေၵႃႈတီႈၽြႃးပဵၼ်ၸဝ်ႈမႃးႁိုဝ်း။ ဢမ်ႇၼၼ်ၵေႃႈလုၵ်ႉသေၵႃႈတီႈၵူၼ်းမႃးႁိုဝ်းဝႃႈၼႆသူၶိုၼ်းလၢတ်ႈတႃႉ၊” ဝႃႈၼင်ႇၼႆဢေႃႈ။
ၶဝ်ၼင်ႇၵၼ်ဢွၼ်ၵၼ်ၽွမ်ႉၵၼ်ၶႆႈၸႂ်လႄႈဝႃႈ၊ “ႁဝ်းတေလႆႈဝႃႈၸိူဝ်ႉႁိုဝ်။ ပေႃးႁဝ်းဝႃႈ၊ ‘လုၵ်ႉသေၵႃႈတီႈၽြႃးပဵၼ်ၸဝ်ႈမႃး၊’ ဝႃႈၼႆၸိုင်၊မၼ်းတေဝႃႈ၊ ‘ပေႃးၼႆႁဵတ်းသင်လႄႈသူဢမ်ႇယုမ်ႇမၢတ်ႈသြႃႇ ယူဝ်းႁၢၼ်ႇ၊ ’ ဝႃႈၼႆယဝ်ႉ။-
ပေႃးႁဝ်းဝႃႈ၊ ‘လုၵ်ႉသေၵႃႈတီႈၵူၼ်းမႃး၊’ ဝႃႈၼႆၸိုင်၊ၵွပ်ႈပိူဝ်ႈၵူၼ်းတင်းလၢႆယုမ်ႇမၢတ်ႈလွင်ႈသြႃႇ ယူဝ်းႁၢၼ်ႇ၊ ပဵၼ်ပရေႃးၽႅတ်ႈ ပႃးၼိုင်ႈၼၼ်ႉလႄႈ ၶဝ်တေဢဝ်မၢၵ်ႇႁိၼ်ပိုဝ်ႈသႂ်ႇႁဝ်းယဝ်ႉ၊” ဝႃႈၼင်ႇၼႆဢေႃႈ။-
ၵွပ်ႈၼႆလႄႈၶဝ်ၶိုၼ်းလၢတ်ႈလႄႈဝႃႈ၊ “လုၵ်ႉသေၵႃႈတီႈလႂ်မႃးႁဝ်းဢမ်ႇႁုၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈတီႈၶဝ်လႄႈဝႃႈ၊ “ပေႃးပဵၼ်ၼႆၸိုင်၊လွင်ႈဢၼ်ၵဝ်လႆႈဢၶႂၢင်ႉဢႃႇၼႃႇၵႃႈတီႈလႂ်မႃးၼၼ်ႉ ၵဝ်ၵေႃႈတေဢမ်ႇမွၵ်ႇလၢတ်ႈပၼ်သူၵူၺ်း၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ၸဝ်ႈယေႇသု၊ ႁေႃးလၢတ်ႈၵႂၢမ်းဢုပမႃႇတီႈၵူၼ်းတင်းလၢႆလႄႈဝႃႈၸမ်ႉ၊ “မီးၵူၼ်းၵေႃႉၼိုင်ႈၽုၵ်ႇသူၼ်မၢၵ်ႇၸပိတ်ႉလႄႈ ၶၢတ်ႈသူၼ်ၼၼ်ႉပၼ်တီႈၵူၼ်းႁဵတ်းသူၼ်ယဝ်ႉၸင်ႇ၊ဢွၵ်ႇတၢင်းၵႂႃႇယူႇႁိုင်ၼႃႇဢေႃႈ။-
မိူဝ်ႈဢၼ်ထိုင်ၶိင်ႇဝိတ်းမၢၵ်ႇၸပိတ်ႉၼၼ်ႉ မၼ်းပွႆႇၸႂ်ႉၵူၼ်းဢွၼ်ႇမၼ်းၵေႃႉၼိုင်ႈၵႂႃႇယွၼ်းဢဝ်ၵႃႈၶၢတ်ႈသူၼ်တီႈၵူၼ်းၶၢတ်ႈသူၼ်ၸိူဝ်းၼၼ်ႉဢေႃႈ။ ၵူၺ်းၵႃႈ၊ၵူၼ်းႁဵတ်းသူၼ်ၸိူဝ်းၼၼ်ႉပေႃႉထုပ်ႉၵူၼ်းဢွၼ်ႇၼၼ်ႉသေလႄႈပွႆႇပႅတ်ႈတူဝ်လၢႆမိုဝ်းပဝ်ႇၵႂႃႇဢေႃႈ။-
မၼ်းသမ်ႉပွႆႇၸႂ်ႉၵူၼ်းဢွၼ်ႇတၢင်ႇၵေႃႉၵႂႃႇလႄႈၵူၼ်းႁဵတ်းသူၼ်ၸိူဝ်းၼၼ်ႉ၊သမ်ႉပေႃႉထုပ်ႉမၼ်းယႃႉသရေႇမၼ်းသေလႄႈပွႆႇပႅတ်ႈတူဝ်လၢႆမိုဝ်းပဝ်ႇၵႂႃႇထႅင်ႈဢေႃႈ။-
လိုၼ်းၼၼ်ႉ၊မၼ်းသမ်ႉပွႆႇၸႂ်ႉၵူၼ်းဢွၼ်ႇတၢင်ႇၵေႃႉထူၼ်ႈသၢမ်ၵႂႃႇထႅင်ႈလႄႈၶဝ်ပေႃႉထုပ်ႉမၼ်းႁႂ်ႈမၼ်းလႆႈႁွႆးၶွၼ်ႉႁွႆးတၢမ်ႇၼမ်ၼႃႇသေလႄႈႁေႃႈမၼ်းဢွၵ်ႇပႅတ်ႈဢေႃႈ။-
မိူဝ်ႈၼၼ်ႉ၊ၸဝ်ႈသူၼ်ၼၼ်ႉလၢတ်ႈလႄႈဝႃႈ၊ ‘ၵဝ်တေလႆႈႁဵတ်းၸိူဝ်ႉၼင်ႇႁိုဝ်။ ၵဝ်တၵ်းပွႆႇၸႂ်ႉလုၵ်ႈႁၵ်ႉၵဝ်ၼႆႉၵႂႃႇဢေႃႈ။ ၸၢင်ႈၶႄးၶဝ်တေရူဝ်ႇသေႇၵူဝ်ယမ်မၼ်းဢေႃႈ၊’ ဝႃႈၼႆဢေႃႈ။-
ၵူၺ်းၵႃႈ၊မိူဝ်ႈဢၼ်ၵူၼ်းႁဵတ်းသူၼ်ၸိူဝ်းၼၼ်ႉႁၼ်မၼ်းၸိုင်၊ၶဝ်ၼင်ႇၵၼ်လၢတ်ႈတီႈၵၼ်လႄႈဝႃႈ၊ ‘ၵေႃႉၼႆႉပဵၼ်လုၵ်ႈၸၢႆးဢၼ်ၶၢမ်ႇဢမူၺ်ႇဢေႃႈ။ ႁဝ်းဢွၼ်ၵၼ်ဢဝ်မၼ်းတၢႆတႃႉႁဝ်း။ ပေႃးႁဝ်းႁဵတ်းၸိူဝ်ႉၼင်ႇၼႆၸိုင်၊ႁဝ်းတေလႆႈဢမူၺ်ႇမၼ်းယဝ်ႉ၊’ ဝႃႈၼင်ႇၼႆယဝ်ႉၸင်ႇ။-
ႁေႃႈမၼ်းဢွၵ်ႇၵႃႈၼွၵ်ႈသူၼ်သေလႄႈ ဢဝ်မၼ်းတၢႆပႅတ်ႈသေဢေႃႈ။ “ပေႃးပဵၼ်ၸိူဝ်ႉၼင်ႇၼႆၸိုင်၊ၸဝ်ႈသူၼ်ၼၼ်ႉတၵ်းမႃးႁဵတ်းၸိူဝ်ႉၼင်ႇႁိုဝ်တီႈၵူၼ်းႁဵတ်းသူၼ်ၸိူဝ်းၼၼ်ႉ။-
မၼ်းၼၼ်ႉ၊တၵ်းမႃးလႄႈဢဝ်တၢႆပႅတ်ႈၶဝ်ၸိူဝ်းဢၼ်ႁဵတ်းသူၼ်ၼၼ်ႉသေယဝ်ႉ၊တၵ်းဢဝ်သူၼ်ၼၼ်ႉၶၢတ်ႇပၼ်ပိူၼ်ႈတၢင်ႇၵေႃႉဢေႃႈ၊” မၼ်းၸဝ်ႈဝႃႈၼင်ႇၼႆဢေႃႈ။ မိူဝ်ႈဢၼ်ၵူၼ်းတင်းလၢႆလႆႈငိၼ်းၵႂၢမ်းၼၼ်ႉၸိုင်၊ၶဝ်လၢတ်ႈလႄႈဝႃႈ၊ “ဢမ်ႇပဵၼ်ၸိူဝ်ႉၼင်ႇၼၼ်ၵူၺ်း၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ယႅၵ်ႉတူၺ်းၶဝ်သေယဝ်ႉ၊လၢတ်ႈလႄႈဝႃႈ၊ “ပေႃးပဵၼ်ၸိူဝ်ႉၼင်ႇၼႆၸိုင်၊ၵႃႈၼႂ်းၵျၢမ်းလိၵ်ႈတႅမ်ႈဝႆႉလႄႈဝႃႈ၊ “‘မၢၵ်ႇႁိၼ်ဢၼ်ၵူၼ်းႁဵတ်းႁိူၼ်းတိူၵ်ႈၶဝ် ဢမ်ႇမၢတ်ႈမီးၵႃႈၶၼ်ၵႃႈသင်လႄႈ ပႄႇပႅတ်ႈဝႆႉၼၼ်ႉ၊ ၵမ်းလိုၼ်းၸိုင်၊လႆႈပဵၼ်မၢၵ်ႇႁိၼ် ႁူဝ်ၸဵင်ႇတိူၵ်ႈဢေႃႈ၊’ ဝႃႈၼင်ႇၼႆၼၼ်ႉၶႂ်ႈဝႃႈၸိူဝ်ႉၼင်ႇႁိုဝ်။-
ၽူႈလႂ်သေဢမ်ႇဝႃႈ၊ၵေႃႉဢၼ်တူၵ်းသႂ်ႇၵႃႈၼိူဝ်မၢၵ်ႇႁိၼ်ၼႆႉၼၼ်ႉ၊ၵေႃႉၼၼ်ႉတၵ်းပဵၼ်ပွတ်းပဵၼ်တွၼ်ႈၵႂႃႇဢေႃႈ။ ၵႃႈၼိူဝ်ၽူႈလႂ်သေဢမ်ႇဝႃႈ၊ၵေႃႉဢၼ်မၢၵ်ႇႁိၼ်ၼႆႉတူၵ်းသႂ်ႇၼၼ်ႉၵေႃႈၵေႃႉၼၼ်ႉတၵ်းလႅဝ်ပဵၼ်ၽွင်ၵႂႃႇဢေႃႈ၊” ဝႃႈၼင်ႇၼႆဢေႃႈ။
သြႃႇမေႃၵျၢမ်းထမ်ႇမႃႉၶဝ်တင်းယဵၸ်ႈပရေႃးႁဵၵ်ႈလူင်တင်းလၢႆဢၢင်ႈတၵ်းတိဢဝ် ၸဝ်ႈယေႇသု၊ ယၢမ်းၼၼ်ႉၵမ်းလဵဝ်ပိူဝ်ႈဢၼ်ၶဝ်ႁုမၼ်းၸဝ်ႈဢဝ်ၵႂၢမ်းဢုပမႃႇၼႆႉလႄႈလၢတ်ႈၶိတ်ႈၶဝ်ၼၼ်ႉဢေႃႈ။ ၵူၺ်းၵႃႈ၊ၶဝ်ၵူဝ်ၵူၼ်းတင်းလၢႆၸိူဝ်းၼၼ်ႉဢေႃႈ။-
ပိူဝ်ႈၼႆလႄႈၶဝ်ပႂ်ႉထႃႈဢၶႂၢင်ႉဢၼ်သၢင်ႇထုၵ်ႇၼၼ်ႉယူႇသေလႄႈပၼ်သူးလၢပ်ႈတီႈၵူၼ်းၵမ်ႈၽွင်ႈႁႂ်ႈၶဝ်ႁဵတ်းႁၢင်ႈပဵၼ်ၵူၼ်းသိုဝ်ႈတေႃႇၵႂႃႇထၢမ်မၼ်းၸဝ်ႈပုၼ်ႈၶဝ်တေႁႃတၢင်းၽိတ်းၼႂ်းၵႂၢမ်းမၼ်းၸဝ်ႈလၢတ်ႈၼၼ်ႉသေယဝ်ႉ၊ဢဝ်မၼ်းၸဝ်ႈဢၢပ်ႈၼႂ်းမိုဝ်းၶုၼ်ၸွမ်မိူင်းၼၼ်ႉဢေႃႈ။-
ၵူၼ်းၵိၼ်သူးလၢပ်ႈၸိူဝ်းၼၼ်ႉၵေႃႈလၢတ်ႈတီႈမၼ်းၸဝ်ႈလႄႈဝႃႈ၊ “သြႃႇၸဝ်ႈ။ ႁဝ်းၶႃႈႁုလွင်ႈဢၼ်ၸဝ်ႈႁဝ်းႁေႃးလၢတ်ႈသင်ႇသွၼ်တီႈၸိုဝ်ႈတီႈၸႂ်ႈၼၼ်ႉၶႃႈဢေႃႈ။ ႁဝ်းၶႃႈႁုလွင်ႈဢၼ်ၸဝ်ႈႁဝ်းဢမ်ႇထွၵ်ႈလူၺ်ႈၼႃႈၵူၼ်းလႄႈသွၼ်ပၼ်သဵၼ်ႈတၢင်းၽြႃးပဵၼ်ၸဝ်ႈၸိုဝ်ႈၸိုဝ်ႈၸႂ်ႈၸႂ်ႈၼၼ်ႉယူႇၶႃႈဢေႃႈ။-
ၸွမ်းၼင်ႇပိင်းၺၢပ်ႈတြႃးႁဝ်းၶႃႈမီးၼႆႉၸွင်ႇႁဝ်းၶႃႈထုၵ်ႇလီထၢမ်းၶွၼ်ႇတီႈၶုၼ်ႁေႃၶမ်း ၵေႇသႃႇ၊ ၶႃႈႁိုဝ်း၊ဢမ်ႇထုၵ်ႇလီထၢမ်းၶႃႈႁိုဝ်း၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ႁုႁၼ်ပရိယႄႇၶဝ်ယဝ်ႉၸင်ႇလၢတ်ႈတီႈၶဝ်လႄႈဝႃႈ၊ “ဢဝ်ငိုၼ်းၶႅပ်းၼိုင်ႈၼႄၵဝ်လူး။ ၵႃႈတီႈၶႅပ်းငိုၼ်းၼႆႉမီးပုင်ႇႁၢင်ႈၽူႈလႂ်။ တႅမ်ႈၸိုဝ်ႈၽူႈလႂ်ဝႆႉ၊” ဝႃႈၼင်ႇၼႆလႄႈ၊-
“ပဵၼ်ပုင်ႇႁၢင်ႈတင်းၸိုဝ်ႈသဵင်ၶုၼ်ႁေႃၶမ်း ၵေႇသႃႇ၊ ၶႃႈဢေႃႈ၊” ဝႃႈၼႆၶဝ်ၶိုၼ်းလၢတ်ႈဢေႃႈ။
ၸဝ်ႈယေႇသု၊ လၢတ်ႈလႄႈဝႃႈ၊ “လီယဝ်ႉ။ ပေႃးပဵၼ်ၼႆၸိုင်၊ဢဝ်ၶွင်ၶုၼ်ႁေႃၶမ်း ၵေႇသႃႇ၊ ပၼ်တီႈၶုၼ်ႁေႃၶမ်း ၵေႇသႃႇ၊ တႃႉ။ ၶွင်ၽြႃးပဵၼ်ၸဝ်ႈၵေႃႈဢဝ်ပၼ်တီႈၽြႃးပဵၼ်ၸဝ်ႈတႃႉ၊” ဝႃႈၼင်ႇၼႆဢေႃႈ။
ၵႃႈတီႈၽၢႆႇၼႃႈၵူၼ်းတင်းလၢႆၼၼ်ႉၶဝ်ဢမ်ႇၸၢင်ႈႁႃတၢင်းၽိတ်းၶေႃႈၵႂၢမ်းမၼ်းၸဝ်ႈလၢတ်ႈၼၼ်ႉ၊ၵူၺ်းလႆႈဢၢမ်းယူႇသေလႄႈယူႇတဵတ်ႇတဵတ်ႇဝႆႉယူႇဢေႃႈ။
ၵူၼ်းၵိူင်း ၸတ်ႉတုၵႄး၊ ၶဝ်ၵမ်ႈၽွင်ႈမႃးၵႃႈတီႈ ၸဝ်ႈယေႇသု၊ ဢေႃႈ။ ၶဝ်ၸိူဝ်းၼၼ်ႉပဵၼ်ၵိူင်းဢၼ်လၢတ်ႈဝႃႈၵူၼ်းတၢႆတေဢမ်ႇလုၵ်ႉၶိုၼ်းလိပ်းမႃးဝႃႈၼႆၼၼ်ႉဢေႃႈ။-
ၶဝ်လဝ်ႈလၢတ်ႈလႄႈဝႃႈ၊ “သြႃႇၸဝ်ႈ။ မူဝ်းသေႇ၊ တႅမ်ႈပိင်းၺၢပ်ႈတြႃးပုၼ်ႈႁဝ်းၶႃႈလႄႈဝႃႈ၊ ‘ပေႃးသေၵေႃႉသေၵူၼ်းမီးမေးသမ်ႉဢမ်ႇမီးလုၵ်ႈလႄႈတၢႆၵႂႃႇၸိုင်၊ၼွင်ႉၸၢႆးမၼ်းတၵ်းလႆႈသိုပ်ႇဢဝ်မႄႈမၢႆႈၼၼ်ႉ ႁႂ်ႈၸိူဝ်ႉၶိူဝ်းပီႈဢၢႆႈမၼ်းသိုပ်ႇၵႂႃႇဢမ်ႇၶၢတ်ႇဢေႃႈ၊’ ဝႃႈၼႆမီးဝႆႉယဝ်ႉၶႃႈယဝ်ႉ။-
တေႃႈလဵဝ်ၼႆႉမီးၶဝ်ၸဵတ်းၵေႃႉပီႈၼွင်ႉဢေႃႈ။ ပီႈဢၢႆႈၵေႃႉယႂ်ႇၼၼ်ႉဢဝ်မေးသေယဝ်ႉ၊ဢမ်ႇမီးလုၵ်ႈလႄႈတၢႆၵႂႃႇသေဢေႃႈ။-
ၵမ်းၼၼ်ႉ၊ၵေႃႉပဵၼ်ၼွင်ႉတၢမ်းမၼ်းသိုပ်ႇဢဝ်မႄႈယိင်းၼၼ်ႉ၊သမ်ႉဢမ်ႇမီးလုၵ်ႈလႄႈတၢႆၵႂႃႇသေဢေႃႈ။-
မိူၼ်ၼင်ႇၼၼ်ၶဝ်ပီႈၼွင်ႉတင်းၸဵတ်းၵေႃႉ၊ၵေႃႉၼိုင်ႈယဝ်ႉၵေႃႉၼိုင်ႈသိုပ်ႇဢဝ်မႄႈယိင်းၵေႃႉၼၼ်ႉသေၵေႃႈ၊သမ်ႉဢမ်ႇမီးလုၵ်ႈသေလႄႈတၢႆၵႂႃႇၵူႈၵေႃႉဢေႃႈ။-
လိုၼ်းၼၼ်ႉမႄႈယိင်းၼၼ်ႉၵေႃႈတၢႆၵႂႃႇၶႃႈဢေႃႈ။-
ၵွပ်ႈပိူဝ်ႈၸိူဝ်ႉၼင်ႇၼၼ်လႄႈၼႂ်းမိူဝ်ႈဝၼ်းဢၼ်ၵူၼ်းတၢႆလုၵ်ႉၶိုၼ်းလိပ်းၼၼ်ႉ၊မႄႈယိင်းၼၼ်ႉတၵ်းပဵၼ်မေးၵေႃႉလႂ်ၶႃႈ။ ၶဝ်တင်းၸဵတ်းၵေႃႉလႆႈဢဝ်မႄႈယိင်းၼၼ်ႉမႃးယဝ်ႉၶႃႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ၵူၼ်းယိင်းၵူၼ်းၸၢႆးၸူဝ်ႈၼႆႉၸၢတ်ႈၼႆႉဢဝ်ၽူဝ်ဢဝ်မေးဢေႃႈ။-
ၼႂ်းဝႃႈၼၼ်သေၵေႃႈ ၵူၼ်းယိင်းၵူၼ်းၸၢႆးၸိူဝ်းဢၼ်ထိူၵ်ႈၵိုင်ႇႁႂ်ႈလႆႈလုၵ်ႉၶိုၼ်းလိပ်းၼၼ်ႉၸမ်ႉ၊ၼႂ်းၸူဝ်ႈဢသၢၵ်ႈတၢၼ်းၸၢတ်ႈၼႃႈၼၼ်ႉၶဝ်ဢမ်ႇဢဝ်ၽူဝ်ဢဝ်မေး။-
ၶဝ်ပဵၼ်ၸိူဝ်ႉၼင်ႇတမၢၼ်ႇၵၢင်ႁၢဝ်လႄႈဢမ်ႇထဝ်ႈဢမ်ႇတၢႆ။ ၵွပ်ႈပိူဝ်ႈၶဝ်လုၵ်ႉၶိုၼ်းလိပ်းၼၼ်ႉၶဝ်ပဵၼ်လုၵ်ႈလၢင်းၽြႃးပဵၼ်ၸဝ်ႈဢေႃႈ။-
လွင်ႈဢၼ်ၵူၼ်းတၢႆလုၵ်ႉၶိုၼ်းလိပ်းၸိုင်၊ မူဝ်းသေႇ၊ ယင်းၶၢမ်ႇသၢၵ်ႈသေႇဝႆႉၼႂ်းလွင်ႈတၢင်းဢၼ်ယုမ်းၽႆးမႆႈၼၼ်ႉ၊မၼ်းႁွင်ႉထႃႇဝရႃႉၽြႃးလႄႈဝႃႈ၊ ‘ၽြႃး ဢႃႇပြႃႇႁၢမ်ႇ၊ ၽြႃး ဢိၸၢၵ်ႈ၊ ၽြႃး ယႃႇၵုပ်ႈ၊ ’ ဝႃႈၼႆယူႇဢေႃႈ။-
မၼ်းၸဝ်ႈပဵၼ်ၽြႃးၶဝ်ၸိူဝ်းဢၼ်တၢႆယဝ်ႉၼၼ်ႉဢမ်ႇၸႂ်ႈ။ ပဵၼ်ၽြႃးၶဝ်ၸိူဝ်းဢၼ်ဢသၢၵ်ႈလိပ်းယူႇၼၼ်ႉဢေႃႈ။ ၵူၼ်းတင်းသဵင်ႈတင်းလူင်ဢသၢၵ်ႈလိပ်းယူႇတီႈၽြႃးပဵၼ်ၸဝ်ႈဢေႃႈ၊” ဝႃႈၼင်ႇၼႆဢေႃႈ။
သြႃႇမေႃၵျၢမ်းထမ်ႇမႃႉၶဝ်ၵမ်ႈၽွင်ႈၶိုၼ်းလဝ်ႈလၢတ်ႈလႄႈဝႃႈ၊ “သြႃႇၸဝ်ႈ။ ၵႂၢမ်းၸဝ်ႈႁဝ်းပဵၼ်ၵႂၢမ်းတွပ်ႇဢၼ်လီဢေႃႈ၊” ဝႃႈၼင်ႇၼႆဢေႃႈ။-
ၵမ်းလိုၼ်းၶဝ်ဢမ်ႇႁတ်းလဝ်ႈထၢမ်ထႅင်ႈသေၶေႃႈသေၵမ်းလႄႈယူႇဢေႃႈ။
ၸဝ်ႈယေႇသု၊ လၢတ်ႈတီႈၶဝ်လႄႈဝႃႈ၊ “ ၸဝ်ႈၶရိၸ်ႈ၊ ပဵၼ်ၸိူဝ်ႉၶိူဝ်း တႃႇဝိတ်ႈ၊ ဝႃႈၼႆႁဵတ်းႁိုဝ်လႄႈဝႃႈလႆႈ။-
တူဝ် တႃႇဝိတ်ႈ၊ ယင်းလၢတ်ႈဝႃႈ၊ၼႂ်းၵျၢမ်းလိၵ်ႈႁဵတ်းၵႂၢမ်းသႃႇလၢမ်ႇလႄႈဝႃႈၸမ်ႉ၊ “‘ထႃႇဝရႃႉၽြႃးလၢတ်ႈတီႈၸဝ်ႈၵဝ်ၶႃႈလႄႈဝႃႈ၊ ၼင်ႇယူႇၽၢႆႇၶႂႃမိုဝ်းၵဝ်ၼႆႉ။
တေႃႇထိုင်ၵဝ်ဢဝ်ရၢၼ်ႇသူႇမႂ်းတင်းလၢႆ တမ်းဝႆႉၸိူဝ်ႉၼင်ႇၶူင်ႇတီႈတမ်းတိၼ်မႂ်းၼၼ်ႉတႃႉ။’ ဝႃႈၼင်ႇၼႆဢေႃႈ။-
ပိူဝ်ႈဢၼ် တႃႇဝိတ်ႈ၊ ယင်းႁွင်ႉမၼ်းၸဝ်ႈဝႃႈ၊ ‘ၸဝ်ႈၵဝ်ၶႃႈ’ ဝႃႈၼႆယူႇၸိုင်၊ ၸဝ်ႈၶရိၸ်ႈ၊ ပဵၼ်လုၵ်ႈ တႃႇဝိတ်ႈ၊ ဝႃႈၼႆ၊ႁဵတ်းႁိုဝ်လႄႈဝႃႈလႆႈ၊” ဝႃႈၼင်ႇၼႆဢေႃႈ။
ၼႂ်းမိူဝ်ႈဢၼ်ၵူၼ်းတင်းလၢႆ၊ယင်းတိုၵ်ႉထွမ်ႇငိၼ်းယူႇၼၼ်ႉၸိုင်၊မၼ်းၸဝ်ႈလၢတ်ႈတီႈတပႄးၸဝ်ႈတင်းလၢႆလႄႈဝႃႈ၊-
“ႁဵတ်းသတိတီႈသြႃႇမေႃၵျၢမ်းထမ်ႇမႃႉတင်းလၢႆတႃႉ။ ၶဝ်ၼၼ်ႉၵျိူၵ်ႈၼုင်ႈသိူဝ်ႈၶူဝ်းဢၼ်ယၢဝ်းၼႃႇလႄႈလႄႇၵႂႃႇလႄႇမႃးယူႇ၊မီးဢလူဝ်ႇၶႂ်ႈႁႂ်ႈပိူၼ်ႈၵူဝ်ယမ်ၶဝ်လႄႈတၵ်ႉလၢတ်ႈၶဝ်ၵႃႈၼႂ်းၵၢင်ၵၢတ်ႇလႂ်၊လိူၵ်ႈတီႈၼင်ႈတီႈၸၼ်ႉသုင်ၵႃႈၼႂ်းၸရွပ်ႈႁေႃးတြႃးလႂ်၊ဢိၵ်ႇတင်းတီႈၼင်ႈဢၼ်လီဢၼ်ၵျႃႉၵႃႈၼႂ်းပွႆးလႂ်ဢေႃႈ။-
ၶဝ်ၸၢင်ႈပႄႉၵိၼ်ႁိမ်ၵိၼ်ႁိူၼ်းယေးမႄႈမၢႆႈလႂ်လႄႈၸၢင်ႈႁဵတ်းႁၢင်ႈသူးတွင်းလူၺ်ႈၶေႃႈၵႂၢမ်းဢၼ်ယၢဝ်းၼႃႇၼၼ်ႉဢေႃႈ။ ၶဝ်ၼၼ်ႉယဵင်ႈၶႅၼ်းတၵ်းလႆႈၶၢမ်ႇတၢမ်ႇဢပျတ်ႈဢၼ်ယႂ်ႇၼႃႇဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ လဵဝ်တူၺ်းႁွပ်ႈႁွပ်ႈလႄႈႁၼ်ၵူၼ်းမၢၵ်ႈၵူၼ်းမီးတင်းလၢႆ၊ဢွၼ်ၵၼ်လူႇငိုၼ်းၵႃႈတီႈတိူၵ်ႈငိုၼ်းလူႇၵျွင်းပိၵ်ႈမၢၼ်ႇၸဝ်ႈယူႇၼၼ်ႉဢေႃႈ။-
ၵမ်းၼၼ်ႉ၊မႄႈမၢႆႈၵူၼ်းၽၢၼ်ၵေႃႉၼိုင်ႈမႃးလူႇငိုၼ်းဢၼ်ပဵၼ်ၶႅပ်းတွင်းလႅင်သွင်ၶႅပ်းၼၼ်ႉၵေႃႈမၼ်းၸဝ်ႈလႆႈႁၼ်သေယဝ်ႉ၊-
ၸင်ႇလၢတ်ႈလႄႈဝႃႈ၊ “ၵဝ်ဝႃႈတီႈသူၸမ်ႉ၊မႄႈမၢႆႈၵူၼ်းၽၢၼ်ၼႆႉသႂ်ႇငိုၼ်းလူႇၼမ်သေပိူၼ်ႈတင်းသဵင်ႈတင်းလူင်ယဝ်ႉ။-
ၵွပ်ႈသင်လႄႈဝႃႈၸမ်ႉ၊ၶဝ်ၸိူဝ်းၼၼ်ႉဢဝ်ငိုၼ်းဢၼ်လိူဝ်ၵႃႈၼႂ်းဢၼ်ၶဝ်မၢၵ်ႈမီးၼမ်ၼႃႇၼၼ်ႉမႃးလူႇတၢၼ်းဢေႃႈ။ ၵူၺ်းၵႃႈ၊မႄႈမၢႆႈၵေႃႉဢၼ်ၽၢၼ်ၼႃႇၼႆႉၸမ်ႉ၊ဢဝ်ၵႃႈဢၼ်မၼ်းမီးတင်းသဵင်ႈတင်းလူင်ဢၼ်လူဝ်ႇလဵင်ႉၸႂ်မၼ်းၼၼ်ႉလူႇယဝ်ႉ၊” ဝႃႈၼင်ႇၼႆဢေႃႈ။
ၸွမ်းၼင်ႇၵူၼ်းၵမ်ႈၽွင်ႈဢုပ်ႇၵုမ်ၵၼ်လွင်ႈတိူၵ်ႈၵျွင်းပိၵ်ႈမၢၼ်ႇၸဝ်ႈဢၼ်ဢဝ်တင်းမၢၵ်ႇႁိၼ်ၶၢဝ်ဢၼ်ႁၢင်ႈလီၼႃႇ၊ဢိၵ်ႇတင်းတႃႇၼႃႉတၢင်းလူႇၶဝ်ၼၼ်ႉႁၢင်ႈၶိူင်ႈဝႆႉၼၼ်ႉလႄႈ၊-
မၼ်းၸဝ်ႈလၢတ်ႈတီႈၶဝ်လႄႈဝႃႈ၊ “ၵႃႈဢၼ်သူႁၼ်ယူႇတင်းသဵင်ႈတင်းလူင်ၼႆႉ၊ၶိင်ႇၵႃႇလႃႉဢၼ်မၢၵ်ႇႁိၼ်ၸိူဝ်းၼႆႉတၵ်းဢမ်ႇၵေႃႇၵၼ်သေႁူၺ်ႇလႄႈတၵ်းလႆႈၵိူၼ်ႇယႃႉပႅတ်ႈၵူႈႁူၺ်ႇၼၼ်ႉတၵ်းႁွတ်ႈမႃးဢေႃႈ၊” ဝႃႈၼင်ႇၼႆဢေႃႈ။
ၶဝ်ၵေႃႈလဝ်ႈထၢမ်လႄႈဝႃႈ၊ “သြႃႇၸဝ်ႈ။ လွင်ႈတၢင်းၸိူဝ်းၼႆႉတၵ်းပဵၼ်မႃးမိူဝ်ႈလႂ်ၶႃႈ။ ၼိမိၵ်ႈလၢၵ်ႈၶၼႃႇဢၼ်တၵ်းၼႄပျႃးလွင်ႈတၢင်းၸိူဝ်းၼႆႉ၊ၸမ်ၶိင်ႇတၵ်းပဵၼ်မႃးၼၼ်ႉတၵ်းမီးၸိူဝ်ႉၼင်ႇႁိုဝ်ၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ႁဵတ်းသတိတႃႉ။ ယႃႇပေႁႂ်ႈပိူၼ်ႈလႆႈပႅတ်ႉလႅၼ်သူ။ ၵူၼ်းၼမ်ၼႃႇတေၶၢမ်ႇဢဝ်ၸိုဝ်ႈသဵင်ၵဝ်မႃးလႄႈလၢတ်ႈဝႃႈ၊ ‘ၵဝ်ပဵၼ်ၸဝ်ႈၼၼ်ႉယဝ်ႉ၊’ သမ်ႉဝႃႈ၊ ‘ၶိင်ႇၵႃႇလႃႉ ႁွတ်ႈမႃးယဝ်ႉ၊’ ဝႃႈၼႆၼၼ်ႉၼမ်ၼႃႇဢေႃႈ။ ယႃႇပေပႃးၵႂႃႇၸွမ်းၶဝ်။-
မိူဝ်ႈဢၼ်သူလႆႈငိၼ်းသဵင်ၶၢဝ်ႇတိုၵ်းသိုၵ်း၊ဢိၵ်ႇတင်းလွင်ႈတၢင်းဢၼ်လုၵ်ႉၽိုၼ်ႉၶတ်းတႃႉၵၼ်ၼၼ်ႉၸိုင်၊ယႃႇႁႂ်ႈႁူဝ်ၸႂ်သူသၼ်ႇဝႆ။ လွင်ႈတၢင်းၸိူဝ်းၼႆႉတၵ်းပဵၼ်မႃးဢွၼ်တၢင်းဢေႃႈ။ ၵူၺ်းၵႃႈ၊ၶိင်ႇၵႃႇလႃႉလိုၼ်းလင်သုတ်းၸမ်တၵ်းႁွတ်ႈမႃးယဝ်ႉ၊ဝႃႈၼႆဢမ်ႇပႆႇလၢတ်ႈလႆႈလူးၵွၼ်ႇ။
“လိုၼ်းသေၼၼ်ႉ၊ၵူၼ်းမဵဝ်းၼိုင်ႈတၵ်းတိုၵ်းတေႃးၵၼ်တင်းၵူၼ်းမဵဝ်းၼိုင်ႈလႄႈ၊ၵူၼ်းမိူင်းၼိုင်ႈတၵ်းၶတ်းတႃႉၵၼ်တင်းၵူၼ်းမိူင်းၼိုင်ႈဢေႃႈ။-
ဢိင်ႇသၼ်ႇလူင်လႂ်၊ၽေးၶဝ်ႈၵႃႈမၢၵ်ႇပႅင်းလႂ်၊ဢိၵ်ႇတင်းၽေးၵႃႇလႃႉႁႃႈလႅင်မိူင်းလႂ်၊တၵ်းပဵၼ်မႃးပဵၼ်တီႈပဵၼ်တီႈဢေႃႈ။ တၢင်းဢၼ်လၢၵ်ႇလၢႆးလီဢၢမ်း၊ဢိၵ်ႇတင်းလၢၵ်ႈၶၼႃႇဢၼ်လီၵူဝ်လီႁႄတင်းလၢႆ၊တၵ်းပဵၼ်မႃးၵႃႈၼိူဝ်တွင်ႉၽႃႉဢေႃႈ။-
ၸူဝ်ႈဢၼ်လွင်ႈတၢင်းၸိူဝ်းၼႆႉဢမ်ႇပႆႇပဵၼ်မႃးၸိုင်၊ၵွပ်ႈပိူဝ်ႈၼႃႇမႃႉၸိုဝ်ႈသဵင်ၵဝ်လႄႈၶဝ်တၵ်းတိဢဝ်သူၼိၵ်ႈၸၢၵ်ႈငႅၼ်းသႄးသူသေလႄႈၸွႆးတၢင်ႇဢမုတီႈသူၼႂ်းၸရွပ်ႈႁေႃးတြႃးလႂ်၊သႂ်ႇထွင်ႇသႂ်ႇၵႃးလႂ်ၵူၺ်းဢမ်ႇၵႃး၊တၵ်းဢဝ်သူသူင်ႇၵႃႈတီႈၶုၼ်ႁေႃၶမ်းလႂ်တင်းတီႈဢမၢတ်ႈၽွင်းမိူင်းလႂ်ဢေႃႈ။-
ၵွပ်ႈလွင်ႈတၢင်းၸိူဝ်းၼႆႉလႄႈသူတၵ်းလႆႈဢၶႂၢင်ႉဢယေးဢၼ်ႁေႃးလၢတ်ႈၶၢမ်ႇသၢၵ်ႈသေႇသဵင်ၶၢဝ်ႇတြႃးသိူဝ်းပျေႃႇဢေႃႈ။-
ဝႆႉသတိႁႂ်ႈႁူဝ်ၸႂ်သူမီးႁႅင်းပုၼ်ႈလွင်ႈၼင်ႇႁိုဝ်သူတေဢမ်ႇလႆႈမႆႈၸႂ်ပုၼ်ႈတႃႇတေၶိုၼ်းလၢတ်ႈၵႂၢမ်းႁႄႉၵင်ႈတူဝ်ၸဝ်ႈၵဝ်ႇၼၼ်ႉတႃႉ။-
လွင်ႈမၼ်းၸမ်ႉ၊ၵဝ်တၵ်းသႂၢင်းပၼ်ၵႂၢမ်းတင်းၺၢၼ်ႇပိင်ႇၺႃႇတီႈသူ ဢၼ်ရၢၼ်ႇသူႇသူတေဢမ်ႇတွပ်ႇဢမ်ႇထဵင်လႆႈ၊ဢမ်ႇႁႄႉဢမ်ႇၶႄလႆႈၼၼ်ႉဢေႃႈ။-
သူတၵ်းလႆႈၶၢမ်ႇတၢင်းဢၼ်ပေႃႈမႄႈပီႈၼွင်ႉၸိူဝ်ႉၶိူဝ်းသူ၊ဢိၵ်ႇတင်းၵေႃႉသႄႈသူၶၢႆၸိုဝ်ႈသူဢေႃႈ။ ၵမ်ႈၽွင်ႈတေဢဝ်သူတၢႆဢေႃႈ။-
ၵူၼ်းတင်းသဵင်ႈတင်းလူင်တၵ်းၸင်းသူၵွပ်ႈပိူဝ်ႈၵဝ်ဢေႃႈ။-
ၼႂ်းဝႃႈၼၼ်သေၵေႃႈ၊ၶူၼ်ႁူဝ်သူတၵ်းဢမ်ႇလႆႈလုလႆႈႁူင်ႈသေသဵၼ်ႈသေလႂ်။-
သူတၵ်းလႆႈၵႄႇသႄႇဢဝ်ဢသၢၵ်ႈသူၵွပ်ႈလူၺ်ႈတၢင်းယိူၼ်ႉၶၢမ်ႇဢၼ်မၼ်ႈၶိူင်ႇသူဢေႃႈ။
“မိူဝ်ႈဢၼ်သူႁၼ်တပ်ႉသိုၵ်းရၢၼ်ႇသူႇလွမ်ႉႁွပ်ႈဝဵင်း ယေႇရုသလႅမ်ႇ၊ ဝႆႉၼၼ်ႉၸိုင်၊ဢွၼ်ၵၼ်ႁုဝႃႈ၊ဝဵင်းၼၼ်ႉၸမ်တၵ်းလုလႅဝ်ယဝ်ႉၼၼ်ႉဢေႃႈ။-
မိူဝ်ႈၼၼ်ႉ၊ၶဝ်ၸိူဝ်းဢၼ်မီးၼႂ်းမိူင်း ယုတႃႉ၊ တၵ်းလႆႈလႅၼ်ႈပၢႆႈၶိုၼ်ႈလွႆလႄႈၶဝ်ၸိူဝ်းဢၼ်မီးၼႂ်းဝဵင်းတၵ်းလႆႈလႅၼ်ႈပၢႆႈဢွၵ်ႇဝဵင်းၵႂႃႇ၊ၶဝ်ၸိူဝ်းဢၼ်မီးၼႂ်းဝၢၼ်ႈၼွၵ်ႈၼႃးပၢင်ႇတၵ်းဢမ်ႇလႆႈၶဝ်ႈၸူးၵႃႈၼႂ်းဝဵင်းလႄႈယူႇဢေႃႈ။-
လွင်ႈမၼ်းၸမ်ႉ၊ၶိင်ႇၵႃႇလႃႉၼၼ်ႉတၵ်းပဵၼ်ဝၼ်းဢၼ်ၸီႇယၢင်ႇပၼ်တၢမ်ႇႁႂ်ႈၵႃႈဢၼ်တႅမ်ႈဝႆႉၵႃႈၼႂ်းၵျၢမ်းလိၵ်ႈၼၼ်ႉလႆႈပျေႉၸုမ်ႇဢေႃႈ။-
ၽွင်းမိုဝ်ႉဝၼ်းၸိူဝ်းၼၼ်ႉ။ မႄႈယိင်းဢၼ်ပႃးပတိၵ်ႈသၼ်ႇထေႇလႂ်၊ဢိၵ်ႇတင်းမႄႈယိင်းဢၼ်မီးလုၵ်ႈဢွၼ်ႇလႅင်လႂ်၊တၵ်းၵိၼ်းၸႂ်ၼႃႇယဝ်ႉဢေႃႈ။ တုၵ်ႉၶႃႉဝူၺ်ႇတၼႃႇတၵ်းတူၵ်းႁွတ်ႈၵႃႈၼိူဝ်လိၼ်မိူင်းၼႆႉလႄႈ တၢင်းဢၼ်ၽြႃးပဵၼ်ၸဝ်ႈၸီႇယၢင်ႇပၼ်တၢမ်ႇၼၼ်ႉ၊တၵ်းတူၵ်းသႂ်ႇၵႃႈၼိူဝ်ၵူၼ်းၸိူဝ်းၼႆႉယဝ်ႉဢေႃႈ။-
ၶဝ်ၵမ်ႈၽွင်ႈတၵ်းလႆႈၶၢမ်ႇတၢင်းဢၼ်ၽၼ်းတၢႆလႄႈ ၵမ်ႈၽွင်ႈသမ်ႉတေလႆႈၶၢမ်ႇပိူၼ်ႈတိမတ်ႉဢဝ်ၵႂႃႇႁဵတ်းၶႃႈၵႃႈၼႂ်းဝၢၼ်ႈၼႂ်းမိူင်းပိူၼ်ႈၸွတ်ႇသဵင်ႈဢေႃႈ။ ဝဵင်း ယေႇရုသလႅမ်ႇ၊ တၵ်းလႆႈၶၢမ်ႇတၢင်းဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်းယဵပ်ႇယမ်တေႃႇထိုင်ႁွတ်ႈၶိင်ႇၵႃႇလႃႉၵူၼ်းတၢင်ႇၸိူဝ်ႉတၢင်ႇၶိူဝ်းၶဝ်တၵ်းပျေႉၸုမ်ႇၼၼ်ႉဢေႃႈ။
“မိူဝ်ႈၼၼ်ႉ၊ပုၵ်ႉပႃႉၼိမိၵ်ႈလၢၵ်ႈၶၼႃႇတၵ်းပဵၼ်မႃးၵႃႈၼႂ်းတႃဝၼ်း၊ၼႂ်းလိူၼ်၊ၼႂ်းလၢဝ်တင်းလၢႆဢေႃႈ။ ၵႃႈၼိူဝ်လိၼ်မိူင်းၼႆႉၵေႃႈၵူၼ်းၵူႈၸိူဝ်ႉၵူႈမဵဝ်းတၵ်းတူၵ်းၸႂ်တူင်ႉတိုၼ်ႇလႄႈၵူဝ်ႁႄသဵင်လႅင်းၼမ်ႉပိူပ်ႈၼမ်ႉသမ်ႇမုၵ်ႈတြႃႇဢၼ်ဢူၼ်ဢဵၼ်မေႃးလင်ၼႃႇလူင်လၢင်ၼၼ်ႉဢေႃႈ။-
ၵူၼ်းတင်းလၢႆထၢၼ်ႈပေႃးတၢႆလိုမ်းၵႂႃႇၵွပ်ႈပိူဝ်ႈဢၼ်ၶဝ်ၵူဝ်ႁႄယၢမ်းမိူဝ်ႈဢၼ်ယင်းမုင်ႈထႃႈပႂ်ႉတူၺ်းလွင်ႈတၢင်းဢၼ်တၵ်းပဵၼ်မႃးၵႃႈၼိူဝ်လိၼ်မိူင်းၼႆႉၼၼ်ႉ ၵွပ်ႈပိူဝ်ႈတၼ်းၶူဝ်းၵၢင်ႁၢဝ်တင်းလၢႆတၵ်းသၼ်ႇၶွၼ်းဝႆဢေႃႈ။-
မိူဝ်ႈၼၼ်ႉ၊ လုၵ်ႈၵူၼ်း၊ တၵ်းပႃးတင်းမုၼ်ၽုင်းတၼ်းၶူဝ်းဢႃႇၼုၽေႃႇမၼ်းၸဝ်ႈသေလႄႈမႃးၵႃႈၼႂ်းမွၵ်ႇၵုမ်ႈဢေႃႈ။-
မိူဝ်ႈဢၼ်လွင်ႈတၢင်းၸိူဝ်းၼႆႉတႄႇၸႃႉပဵၼ်မႃးၼၼ်ႉၸိုင်၊ၵွပ်ႈပိူဝ်ႈၶိင်ႇဢၼ်ၽြႃးပဵၼ်ၸဝ်ႈတၵ်းထုတ်ႇဢဝ်သူၸမ်မႃးယဝ်ႉလႄႈႁႅၼ်ၼႃႈငွၵ်ႈႁူဝ်တႃႉ၊” ဝႃႈၼင်ႇၼႆ ၸဝ်ႈယေႇသု၊ ႁေႃးလၢတ်ႈဢေႃႈ။
ၸဝ်ႈယေႇသု၊ သမ်ႉဢဝ်တင်းၵႂၢမ်းဢုပမႃႇလႄႈလၢတ်ႈဝႃႈၸမ်ႉ၊ “တူၺ်းတူၼ်ႈမၢၵ်ႇလိူဝ်ႇတင်းတူၼ်ႈမႆႉတင်းလၢႆလူး။-
မိူဝ်ႈဢၼ်သူႁၼ်ၶဝ်ပူင်ႇၽိူဝ်မႃးၼၼ်ႉၸိုင်၊သူႁုလွင်ႈဢၼ်ၶိင်ႇမႆႈႁွတ်ႈၸမ်မႃးယဝ်ႉၼၼ်ႉယဝ်ႉ။-
မိူၼ်ၼင်ႇၼၼ် မိူဝ်ႈဢၼ်သူလႆႈႁၼ်လွင်ႈတၢင်းၸိူဝ်းၼႆႉပဵၼ်မႃးယူႇၼၼ်ႉၸိုင်၊ႁုလွင်ႈဢၼ်မိူင်းၽြႃးပဵၼ်ၸဝ်ႈၸမ်တၵ်းတႄႇပဵၼ်ယဝ်ႉၼၼ်ႉတႃႉ။
“ၵဝ်ဝႃႈတီႈၸိုဝ်ႈၸႂ်ႈမၼ်းတီႈသူၸမ်ႉ၊ၶိူဝ်းၵူၼ်းမဵဝ်းၼႆႉတၵ်းဢမ်ႇပႆႇသဵင်ႈပႆႇမူတ်းတေႃႇထိုင်လွင်ႈတၢင်းၸိူဝ်းၼႆႉလႆႈပဵၼ်မႃးၸေးမူတ်းၼၼ်ႉဢေႃႈ။-
ၽႃႉၵၢင်ႁၢဝ်တင်းလိၼ်မိူင်းတၵ်းဝၢႆးႁၢႆဢေႃႈ။ ၵႂၢမ်းၵဝ်ၸိုင်၊တၵ်းဢမ်ႇႁူင်ႈဢမ်ႇႁၢႆလႃးလႃး။
“ႁဵတ်းသတိ၊တီႈတူဝ်ၸဝ်ႈၵဝ်ႇတႃႉ။ ယႃႇပေႁႂ်ႈႁူဝ်ၸႂ်သူတဵမ်ဝႆႉတင်းတၢင်းဢၼ်ၵိၼ်ပူၼ်ႉၵိၼ်လိူဝ်၊ဢိၵ်ႇတင်းတၢင်းဢၼ်ၶႆႈၸႂ်ဝူၼ်ႉၸႂ်လူၺ်ႈလွင်ႈလေႃးၵီႇယူႇၼႃႇၽႅဝ်။ ပေႃးဢမ်ႇၼၼ်ၼႂ်းမိူဝ်ႈဢၼ်သူဢမ်ႇထၢင်ႇဢမ်ႇထိူမ်ၼၼ်ႉ ၸၢင်ႈၶႄးဝၼ်းၼၼ်ႉတၵ်းထူပ်းမႅၼ်ႈသူ၊-
မိူၼ်ၸိူဝ်ႉၼင်ႇတူင်ႇႁႅဝ်ႉ၊ၵွပ်ႈပိူဝ်ႈဝႃႈဝၼ်းၼၼ်ႉတၵ်းႁွတ်ႈမႃးၵႃႈၼိူဝ်ၵူၼ်းၵႃႈဢၼ်ယူႇသဝ်းၵႃႈၼိူဝ်ၽႅၼ်ႇလိၼ်မိူင်းၼႆႉတင်းသဵင်ႈတင်းလူင်ဢေႃႈ။-
ဢွၼ်ၵၼ်ဝႆႉသတိပႂ်ႉယူႇလႄႈသူးတွင်းပုၼ်ႈလွင်ႈၼင်ႇႁိုဝ်တၵ်းလႆႈဢဵၼ်ႁႅင်းႁႂ်ႈၵၢင်းလွတ်ႈတင်းလွင်ႈတၢင်းဢၼ်တၵ်းပဵၼ်မႃးၸိူဝ်းၼၼ်ႉသေယဝ်ႉ၊လႆႈၸုၵ်းယူႇၽၢႆႇၼႃႈ လုၵ်ႈၵူၼ်း၊ ၼၼ်ႉတႃႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၶိင်ႇၵၢင်ဝၼ်းမၼ်းၸဝ်ႈသင်ႇသွၼ်သုင်းမႃႉပၼ်ၵႃႈၼႂ်းၵျွင်းပိၵ်ႈမၢၼ်ႇၸဝ်ႈၵူႈဝၼ်းလႄႈၶိင်ႇၵၢင်ၶိုၼ်းၸိုင်၊မၼ်းၸဝ်ႈၶိုၼ်ႈၵႂႃႇလိုဝ်ႈႁိူဝ်ႉၵႃႈၼိူဝ်လွႆဢၼ်ႁွင်ႉဝႃႈ၊လွႆ သၢၼ်ႇလုၼ်ႇ၊ ၼၼ်ႉဢေႃႈ။-
ၶိင်ႇၵၢင်ၼႂ်ၸဝ်ႉၸဝ်ႉၸိုင်၊ၵူၼ်းတင်းလၢႆၵႂႃႇၸူးတီႈမၼ်းၸဝ်ႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈႁႂ်ႈလႆႈထွမ်ႇတြႃးၸဝ်ႈဢေႃႈ။
ၵမ်းၼၼ်ႉ၊ပွႆးၵိၼ်ၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈဢၼ်ဝႃႈ၊ပွႆး ပသၶႃႇ၊ ၼၼ်ႉၸမ်မႃးယဝ်ႉလႄႈ၊-
ယဵၸ်ႈပရေႃးႁဵၵ်ႈ လူင်ၶဝ်တင်းသြႃႇမေႃၵျၢမ်းထမ်ႇမႃႉတင်းလၢႆ၊လွမ်ၵျၢမ်ႇႁႃၼႄးလၢႆးဢၼ်တၵ်းဢဝ် ၸဝ်ႈယေႇသု၊ တၢႆယူႇဢေႃႈ။ ႁဵတ်းသင်လႄႈလွမ်ၵျၢမ်ႇႁႃၼႄးလၢႆးယူႇဝႃႈၼႆၸမ်ႉ၊ၶဝ်ၵူဝ်ၵူၼ်းတင်းလၢႆဢေႃႈ။
မိူဝ်ႈၼၼ်ႉ၊ မႃႇၼၢတ်ႈ၊ ၶဝ်ႈၵႃႈၼႂ်းတူဝ် ယုတႃႉ၊ ဢၼ်မီးၸိုဝ်ႈထႅင်ႈဢၼ်ၼိုင်ႈဝႃႈ၊ ဢိသၵႃႇရေႇဢုတ်ႈ၊ ၵေႃႉဢၼ်ၶဝ်ႈပႃးၼႂ်းတပႄးၸဝ်ႈသိပ်းသွင်ၵေႃႉၼၼ်ႉဢေႃႈ။-
မၼ်းဢွၵ်ႇၵႂႃႇၸူးတီႈယဵၸ်ႈပရေႃးႁဵၵ်ႈလူင်ၶဝ်တင်းႁူဝ်ၼႃႈလုၵ်ႈသိုၵ်းဢၼ်ပႂ်ႉၵျွင်းပိၵ်ႈမၢၼ်ႇၸဝ်ႈတင်းလၢႆသေယဝ်ႉ၊ဢုပ်ႇၵုမ်ၶိုင်ႁႃလွင်ႈဢၼ်တၵ်းလႆႈဢဝ် ၸဝ်ႈယေႇသု၊ ဢၢပ်ႈၼႂ်းမိုဝ်းၶဝ်ၸိူဝ်ႉၼင်ႇႁိုဝ်ၼၼ်ႉဢေႃႈ။-
ၶဝ်ၵေႃႈၸူမ်းၼႃႇလႄႈဝႆႉၵတိဝႃႈ၊တႃႇတေပၼ်ငိုၼ်းတီႈမၼ်းဢေႃႈ။-
မၼ်းၵေႃႈၽွမ်ႉယဝ်ႉလႄႈၸင်ႇၵျၢမ်ႇႁႃဢၶိင်ႇဢၼ်သၢင်ႇထုၵ်ႇပုၼ်ႈတႃႇတေလွမ်ဢဝ်မၼ်းၸဝ်ႈဢၢပ်ႈပၼ်ၶဝ်၊တီႈဢၼ်ဢမ်ႇမီးၵူၼ်းၸုတုမ်ၵၼ်ၼၼ်ႉဢေႃႈ။
ၼႂ်းၸူဝ်ႈပွႆးၵိၼ်ၶဝ်ႈမုၼ်းဢၼ်ဢမ်ႇသႂ်ႇၸိူဝ်ႉပႅင်ႈၼၼ်ႉ၊မိူဝ်ႈဢၼ်ထိုင်ဝၼ်းဢၼ်တၵ်းႁႅမ်သူဝ်းဢွၼ်ႇ ပသၶႃႇ၊ ၼၼ်ႉၸိုင်၊-
ၸဝ်ႈယေႇသု၊ ပွႆႇၸႂ်ႉ ပေႇတရု၊ ဢိၵ်ႇတင်း ယူဝ်းႁၢၼ်ႇ၊ လႄႈဝႃႈ၊ “သူၵႂႃႇမႄးႁႅၼ်းပွႆး ပသၶႃႇ၊ ပုၼ်ႈႁဝ်းတၵ်းၵိၼ်တႃႉ၊” ဝႃႈၼင်ႇၼႆဢေႃႈ။
ၶဝ်ၵေႃႈလဝ်ႈထၢမ်လႄႈဝႃႈ၊ “ၸဝ်ႈႁဝ်းၶႂ်ႈႁႂ်ႈႁဝ်းၶႃႈၵႂႃႇမႄးႁႅၼ်းၵႃႈတီႈလႂ်ၶႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၶိုၼ်းလၢတ်ႈလႄႈဝႃႈ၊ “ထွမ်ႇတႃႉ။ မိူဝ်ႈဢၼ်သူၶဝ်ႈဝဵင်းၵႂႃႇယူႇၼၼ်ႉ၊ၵူၼ်းဢၼ်တဵင်ႇမေႃႈၼမ်ႉယူႇၵႃႈၼိူဝ်ႁူဝ်မၼ်းၼၼ်ႉၵေႃႉၼိုင်ႈတၵ်းႁူပ်ႉထူပ်းသူဢေႃႈ။ ၸွမ်းမၼ်းၶဝ်ႈၵႂႃႇၵႃႈၼႂ်းႁိူၼ်းဢၼ်မၼ်းၶဝ်ႈၵႂႃႇၼၼ်ႉသေယဝ်ႉ၊-
လၢတ်ႈတီႈၸဝ်ႈႁိူၼ်းလႄႈဝႃႈ၊ ‘သြႃႇသင်ႇလၢတ်ႈမႃးတီႈမႂ်းလႄႈဝႃႈ၊လုၵ်းဢၼ်ၵဝ်တင်းတပႄးၵဝ်ၸိူဝ်းၼႆႉတၵ်းလႆႈၵိၼ်ပွႆး ပသၶႃႇ၊ ၼၼ်ႉမီးၵႃႈလႂ်၊’ ဝႃႈၼႆတႃႉ။-
ၵေႃႉၼၼ်ႉတၵ်းၼႄပၼ်လုၵ်းလူင်ႁၢၼ်ႉၼိူဝ်ဢၼ်ႁၢင်ႈၶိူင်ႈဝႆႉၼၼ်ႉဢေႃႈ။ မႄးႁႅၼ်းဝႆႉၵႃႈတီႈၼၼ်ႈတႃႉ၊” ဝႃႈၼင်ႇၼႆဢေႃႈ။
တပႄးၸဝ်ႈၸိူဝ်းၼၼ်ႉၵႂႃႇလႄႈထူပ်းႁၼ်လွင်ႈၵႃႈမီးတင်းသဵင်ႈတင်းလူင်ၵႃႈဢၼ် ၸဝ်ႈယေႇသု၊ သင်ႇလၢတ်ႈၵႂႃႇၼၼ်ႉလႄႈမႄးႁႅၼ်းပွႆး ပသၶႃႇ၊ ဝႆႉဢေႃႈ။
မိူဝ်ႈဢၼ်ၶိင်ႇမၼ်းထိုင်ၼၼ်ႉ ၸဝ်ႈယေႇသု၊ ၼင်ႈယူႇၵႃႈတီႈၽိူၼ်တီႈၵိၼ်၊လူၺ်ႈၵၼ်တင်းတမၢၼ်ႇၸဝ်ႈတင်းလၢႆလႄႈ၊-
လၢတ်ႈဝႃႈ၊ “ၸူဝ်ႈဢၼ်ၵဝ်ဢမ်ႇပႆႇလႆႈၶၢမ်ႇတုၵ်ႉၶႃႉဝူၺ်ႇတၼႃႇၼႆႉ၊ၵဝ်မီးၸႂ်ဢၼ်ၶႂ်ႈၵိၼ်ပွႆး ပသၶႃႇ၊ ၼႆႉလူၺ်ႈၵၼ်တင်းသူၼႃႇလူင်လၢင်ဢေႃႈ။-
ၵဝ်ဝႃႈတီႈသူၸမ်ႉ၊ၵဝ်တၵ်းဢမ်ႇၵိၼ်ပွႆးၼႆႉထႅင်ႈတေႃႇထိုင်ႁွတ်ႈပွႆးၼႆႉလႆႈဢွင်ႇမႅင်ႇယဝ်ႉတူဝ်ႈၵႃႈၼႂ်းမိူင်းၽြႃးပဵၼ်ၸဝ်ႈပုၼ်ႉဢေႃႈ၊” ဝႃႈၼင်ႇၼႆယဝ်ႉၸင်ႇ။
မၼ်းၸဝ်ႈဢဝ်ၵွၵ်းလႄႈယွင်ႈယေႃးၵျေးၸူးၸဝ်ႈသေယဝ်ႉ၊လၢတ်ႈလႄႈဝႃႈ၊ “ဢဝ်ၵွၵ်းၼႆႉသေယဝ်ႉ၊မႅင်ႇပၼ်တီႈသူၼင်ႇၵၼ်ၵၼ်တႃႉ။-
ၵဝ်ဝႃႈတီႈသူၸမ်ႉ၊ၵဝ်တၵ်းဢမ်ႇၵိၼ်ၼမ်ႉမၢၵ်ႇၸပိတ်ႉၼႆႉထႅင်ႈတေႃႇထိုင်ႁွတ်ႈမိူင်းၽြႃးပဵၼ်ၸဝ်ႈႁွတ်ႈမႃးၼၼ်ႉဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈဢဝ်ၶဝ်ႈမုၼ်းလႄႈယွင်ႈယေႃးၵျေးၸူးၸဝ်ႈသေယဝ်ႉ၊ဝိတ်းၶဝ်ႈမုၼ်းလႄႈမႅင်ႇပၼ်ၶဝ်သေလႄႈလၢတ်ႈဝႃႈ၊ “ၶဝ်ႈမုၼ်းၼႆႉၸမ်ႉ၊ပဵၼ်တူဝ်ၵဝ်ဢၼ်ၸုၼ်ႉပၼ်သူဢေႃႈ။ ပုၼ်ႈဢၼ်တၵ်းၶုၵ်းၸႂ်လႆႈၶႆႈၸႂ်ထူပ်းၵဝ်ၸိုင်၊ဢွၼ်ၵၼ်ႁဵတ်းၸိူဝ်ႉၼင်ႇၼႆတႃႉ၊” ဝႃႈၼင်ႇၼႆဢေႃႈ။-
မိူၼ်ၸိူဝ်ႉၼင်ႇၼၼ်၊ၵိၼ်ၶဝ်ႈၶမ်ႈသေယဝ်ႉ၊ၵွၵ်းၵေႃႈမၼ်းၸဝ်ႈဢဝ်ပၼ်တီႈၶဝ်လႄႈလၢတ်ႈဝႃႈ၊ “ၵွၵ်းၼႆႉၸမ်ႉ၊ပဵၼ်ပတိၺိၺ်ႇတြႃးဢၼ်မႂ်ႇဢၼ်ဢဝ်တင်းလိူတ်ႈၵဝ်တွၵ်ႇၸုမ်ႈဝႆႉယဝ်ႉလႄႈထွၵ်ႇလႆပုၼ်ႈသူဢေႃႈ။
“ၼႂ်းဝႃႈၼၼ်သေၵေႃႈတူၺ်းလူး။ ၵေႃႉဢၼ်ဢဝ်ၵဝ်ဢၢပ်ႈၼၼ်ႉမီးၵႃႈတီႈၽိူၼ်ၼႆႉလူၺ်ႈၵၼ်တင်းၵဝ်ဢေႃႈ။-
လုၵ်ႈၵူၼ်း၊ တၵ်းလႆႈတၢႆၸွမ်းၵႃႈၼင်ႇဢၼ်ၽြႃးပဵၼ်ၸဝ်ႈမၵ်းၶၢၼ်းဝႆႉၼၼ်ႉမႅၼ်ႈသေၵေႃႈ၊ၵေႃႉဢၼ်ဢဝ် လုၵ်ႈၵူၼ်း၊ ဢၢပ်ႈၼၼ်ႉတေမီးဢႃႉမၢင်ႇၵလႃႇဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၶဝ်ၼင်ႇၵၼ်ၵၼ်တွင်ႈထၢမ်ၵၼ်လွင်ႈဢၼ်ၼႂ်းၶဝ်တေပဵၼ်ၵေႃႉလႂ်တၵ်းႁဵတ်းၸိူဝ်ႉၼင်ႇၼၼ်ၼၼ်ႉဢေႃႈ။
ၵႃႈၼႂ်းတမၢၼ်ႇၸဝ်ႈၼင်ႇၵၼ်ၵၼ်မီးတၢင်းဢၼ်တွပ်ႇထဵင်ၵၼ်လူၺ်ႈလွင်ႈဢၼ်ၼႂ်းၶဝ်ၼၼ်ႉ ၵေႃႉလႂ်တၵ်းယဵင်ႈၶႅၼ်းယႂ်ႇမျၢတ်ႈသေပိူၼ်ႈယူႇလႄႈ၊-
ၸဝ်ႈယေႇသု၊ လၢတ်ႈတီႈၶဝ်လႄႈဝႃႈ၊ “ၶုၼ်ႁေႃၶမ်းၵူၼ်းတၢင်ႇၸိူဝ်ႉတၢင်ႇၶိူဝ်းၶဝ်မီးဢႃႇၼႃႇၵႃႈၼိူဝ်ၵူၼ်းၶဝ်၊ဢိၵ်ႇတင်းၶုၼ်ဢၼ်လႆႈဢုပ်ႉပိူင်ႇတင်းလၢႆလႆႈၶၢမ်ႇတၢင်းဢၼ်ပိူၼ်ႈႁွင်ႉဝႃႈ၊ ‘ၸဝ်ႈၵျေးၸူး’ ဢေႃႈ။-
ၵူၺ်းၵႃႈ၊ပုၼ်ႈသူၸိုင်၊ဢမ်ႇၸႂ်ႈၸိူဝ်ႉၼင်ႇၼၼ်။ ၼႂ်းသူၼႆႉၵေႃႉဢၼ်ႁဵတ်းၵူၼ်းလူင်ပိူၼ်ႈၼၼ်ႉမၼ်းတၵ်းလႆႈပဵၼ်ၸိူဝ်ႉၼင်ႇၵူၼ်းဢွၼ်ႇဢေႃႈ။ ၵေႃႉဢၼ်ပဵၼ်ၵူၼ်းၵႄႇၵူၼ်းႁူဝ်ပိူၼ်ႈၼၼ်ႉတၵ်းလႆႈပဵၼ်ၸိူဝ်ႉၼင်ႇၵူၼ်းၸႂ်ႉၵူၼ်းသွႆပိူၼ်ႈဢေႃႈ။-
ၵေႃႉလႂ်ယဵင်ႈၶႅၼ်းယႂ်ႇမျၢတ်ႈ။ ၵေႃႉဢၼ်ၼင်ႈၵိၼ်ၼၼ်ႉယဵင်ႈၶႅၼ်းယႂ်ႇမျၢတ်ႈႁိုဝ်း။ ၵေႃႉဢၼ်ႁဵတ်းလဵင်ႉႁဵတ်းလူၼၼ်ႉ၊ယဵင်းၶႅၼ်းယႂ်ႇမျၢတ်ႈႁိုဝ်း။ ၵေႃႉဢၼ်ၼင်ႈၵိၼ်ၼၼ်ႉ၊ယဵင်ႈၶႅၼ်းယႂ်ႇမျၢတ်ႈၸႂ်ႈတႄႉယဝ်ႉ၊ၵူၺ်းၵႃႈ၊ၵဝ်ပဵၼ်ၸိူဝ်ႉၼင်ႇၵေႃႉဢၼ်ႁဵတ်းလဵင်ႉႁဵတ်းလူၵႃႈၼႂ်းသူၼႆႉဢေႃႈ။
“သူပဵၼ်ၶဝ်ၸိူဝ်းဢၼ်ႁူမ်ႈလူၺ်ႈၵၼ်တင်းၵဝ်ယူႇၶိူဝ်းၶိူဝ်းၼႂ်းမိူဝ်ႈဢၼ်ၵဝ်လႆႈၶၢမ်ႇတၢင်းဢၼ်ၸၢမ်းတူၺ်းယႃႉယုၵ်ႉၼမ်ၼႃႇၼၼ်ႉဢေႃႈ။-
ၸိူဝ်ႉၼင်ႇဢၼ်ပေႃႈၸဝ်ႈၵဝ်ပၼ်ဢၶႂၢင်ႉဢႃႇၼႃႇဢၼ်ဢုပ်ႉပိူင်ႇတီႈၵဝ်ၼၼ်ႉၵဝ်ၵေႃႈတၵ်းဢဝ်ဢၶႂၢင်ႉဢႃႇၼႃႇဢၼ်မိူၼ်မိူၼ်ၵၼ်တင်းၵဝ်ၼၼ်ႉပၼ်တီႈသူဢေႃႈ။-
သူတေလႆႈၼင်ႈလႄႈၵိၼ်သူတ်ႉၵႃႈတီႈၽိူၼ်ၵဝ်ၵႃႈၼႂ်းမိူင်းၵဝ်၊ဢိၵ်ႇတင်းသူတၵ်းလႆႈၼင်ႈၵႃႈၼိူဝ်ပလၢင်ႇတြႃးႁႂ်ႈလႆႈဢုပ်ႉပိူင်ႇၵႃႈၼိူဝ်ၵူၼ်း ဢိသရေး၊ သိပ်းသွင်မဵဝ်းၼၼ်ႉဢေႃႈ။
“ သိမုၼ်ႇ၊ ႟။ သိမုၼ်ႇ၊ ႟။ ထွမ်ႇလူး။ ၸႃႇတၢၼ်ႇ၊ လႆႈဢၶႂၢင်ႉဢၼ်ၸႅတ်ႈတူၺ်းၸၢမ်းတူၺ်းသူတင်းသဵင်ႈတင်းလူင်ႁႂ်ႈလႆႈၽႄဢဝ်ၵူၼ်းလီဢွၵ်ႇသေၵႃႈၼႂ်းၵူၼ်းႁၢႆႉၵူၼ်းမိူၵ်ႈမိူၼ်ၸိူဝ်ႉၼင်ႇၸဝ်ႈႁႆႈၸဝ်ႈၼႃးၽတ်းဢဝ်ၶဝ်ႈပိူၵ်ႇဢွၵ်ႇသေႁမ်းၵႅပ်ႇၼၼ်ႉယဝ်ႉလႄႈ၊-
သိမုၼ်ႇ၊ ႟။ ၵဝ်သူးတွင်းပုၼ်ႈမႂ်းပုၼ်ႈလွင်ႈၼင်ႇႁိုဝ်တၢင်းယုမ်ႇမၢတ်ႈမႂ်းတၵ်းဢမ်ႇလုၼၼ်ႉယူႇဢေႃႈ။ မိူဝ်ႈဢၼ်မႂ်းၶိုၼ်းမႃးၸူးၵႃႈတီႈၵဝ်ၸိုင်၊မႂ်းတၵ်းလႆႈပၼ်ဢဵၼ်ပၼ်ႁႅင်းတီႈပီႈၼွင်ႉမႂ်းတင်းလၢႆဢေႃႈ၊” ဝႃႈၼင်ႇၼႆဢေႃႈ။
မၼ်းၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈႁဝ်း။ ၼင်ႇႁိုဝ်တၵ်းတူၵ်းထွင်ႇလူၺ်ႈၵၼ်တင်းၸဝ်ႈႁဝ်းလႂ်၊တၵ်းတၢႆၸွမ်းၸဝ်ႈႁဝ်းလႂ်ၼၼ်ႉၸိုင်၊ၵဝ်ၶႃႈတၼ်းဝႆႉယဝ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၵေႃႈဝႃႈ၊ “ ပေႇတရု၊ ႟။ ၵဝ်ဝႃႈတီႈမႂ်းၸမ်ႉ၊ၼႂ်းၶိုၼ်းၼႆႉၸူဝ်ႈဢၼ်ၵႆႇယင်းဢမ်ႇပႆႇၶၼ်ၼၼ်ႉၸိုင်၊မႂ်းတၵ်းထဵင်ပႅတ်ႈၵဝ်ထူၼ်ႈထိုင်သၢမ်ပွၵ်ႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ သမ်ႉထၢမ်ၶဝ်လႄႈဝႃႈ၊ “မိူဝ်ႈဢၼ်ၵဝ်ဢမ်ႇႁႂ်ႈသူပႃးထူင်ငိုၼ်း၊ထူင်ပႃး၊ၶႅပ်းတိၼ်၊သေလႄႈပွႆႇၸႂ်ႉသူၵႂႃႇၵမ်းဢွၼ်တၢင်းၼၼ်ႉ၊ၸွင်ႇသူလူဝ်ႇထႅင်ႈသေၸိူဝ်ႉသေပိူင်ႁိုဝ်း၊” ဝႃႈၼႆလႄႈ။ ၶဝ်ဢွၼ်ၵၼ်ၶိုၼ်းလဝ်ႈလၢတ်ႈလႄႈဝႃႈ၊ “ဢမ်ႇလူဝ်ႇၵႃႈသင်ထႅင်ႈၶႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉမၼ်းၸဝ်ႈလၢတ်ႈလႄႈဝႃႈ၊ “ၵမ်းၼႆႉၸိုင်၊ၵေႃႉဢၼ်မီးထူင်ငိုၼ်းဢမ်ႇၼၼ်ၵေႃႈ၊ၵေႃႉဢၼ်မီးထူင်ပႃးၼၼ်ႉႁႂ်ႈဢဝ်ပႃးၸွမ်းတႃႉ။ ၵေႃႉဢၼ်ဢမ်ႇမီးလႅဝ်းၼၼ်ႉႁႂ်ႈမၼ်းၶၢႆသိူဝ်ႈၶူဝ်းမၼ်းလႄႈသိုဝ်ႉဝႆႉမၢၵ်ႈၼိုင်ႈတႃႉ။-
ၵဝ်ဝႃႈတီႈသူၸမ်ႉ၊ၼႂ်းၵျၢမ်းလိၵ်ႈမီးဝႆႉလႄႈဝႃႈ၊ ‘ၸဝ်ႈၼၼ်ႉၸမ်ႉ၊ပိူၼ်ႈမၢတ်ႈၶဝ်ပႃးၼႂ်းၵူၼ်းဢၼ်ဢမ်ႇတြႃးဢေႃႈ၊’ ဝႃႈၼင်ႇၼႆၼၼ်ႉတၵ်းပျေႉၸုမ်ႇၵႃႈတီႈၵဝ်တေႃႈလဵဝ်ၼႆႉယဝ်ႉ။ တၢင်းဢၼ်တႅမ်ႈဝႆႉလွင်ႈၵဝ်ၸိုင်၊ပဵၼ်မႃးယူႇယဝ်ႉဢေႃႈ၊” ဝႃႈၼင်ႇၼႆဢေႃႈ။
ၶဝ်ၵေႃႈလဝ်ႈလၢတ်ႈလႄႈဝႃႈ၊ “တူၺ်းၶႃႈလူး၊ၸဝ်ႈ။ ႁဝ်းၶႃႈမီးလႅဝ်းသွင်မၢၵ်ႈၶႃႈဢေႃႈ၊” ဝႃႈၼင်ႇၼႆလႄႈ။ မၼ်းၸဝ်ႈဝႃႈ၊ “ပေႃးယဝ်ႉ၊” ဝႃႈၼင်ႇၼႆဢေႃႈ။
လိုၼ်းၼၼ်ႉ၊ ၸဝ်ႈယေႇသု၊ ဢွၵ်ႇဝဵင်းၵႂႃႇၸူးၵႃႈတီႈလွႆ သၢၼ်ႇလုၼ်ႇ၊ ၵႃႈၼင်ႇဢၼ်မၼ်းၸဝ်ႈယၢမ်ႈၵႂႃႇသေႇသေႇၼၼ်ႉလႄႈတပႄးၸဝ်ႈတင်းလၢႆၵေႃႈၸွမ်းၵႂႃႇဢေႃႈ။-
မိူဝ်ႈဢၼ်မၼ်းၸဝ်ႈႁွတ်ႈထိုင်ၵႂႃႇၵႃႈတီႈၼၼ်ႉၸိုင်၊မၼ်းၸဝ်ႈလၢတ်ႈတီႈၶဝ်လႄႈဝႃႈ၊ “ၼင်ႇႁိုဝ်သူတၵ်းဢမ်ႇလွင်ႈဢမ်ႇၸွမ်းၵႂႃႇၼႂ်းတၢင်းဢၼ်ၸူဝ်းၵႂႃႇၼႂ်းဢပျတ်ႈၸိုင်၊ဢွၼ်ၵၼ်သူးတွင်းတႃႉ၊” ဝႃႈၼင်ႇၼႆဢေႃႈ။
မၼ်းၸဝ်ႈၸင်ႇၽၢတ်ႇသေၵႃႈတီႈၶဝ်ၵႂႃႇယၢၼ်သေၸူဝ်ႈမၢၵ်ႇႁိၼ်ဝုတ်ႉၼိုင်ႈလႄႈၶုပ်ႉၶဝ်ႇသေယဝ်ႉ၊သူးတွင်းလႄႈဝႃႈ၊-
“ပေႃႈၸဝ်ႈတီႈၶႃႈ၊ပေႃးၸဝ်ႈႁဝ်းမီးဢလူဝ်ႇၸိုင်၊ႁႂ်ႈၵွၵ်းၼႆႉပိူင်ႈၵႂႃႇသေၵႃႈတီႈၶႃႈၸဝ်ႈသေၵမ်းၶႃႈ။ ၼႂ်းဝႃႈၼၼ်သေၵေႃႈ၊ယႃႇႁႂ်ႈပဵၼ်ၸွမ်းဢလူဝ်ႇၶႃႈၸဝ်ႈလႄႈႁႂ်ႈပဵၼ်ၸွမ်းဢလူဝ်ႇၸဝ်ႈႁဝ်းသေၵမ်းတီႈၶႃႈ၊” ဝႃႈၼင်ႇၼႆဢေႃႈ။-
[မိူဝ်ႈၼၼ်ႉ၊တမၢၼ်ႇၵၢင်ႁၢဝ်ပႃးၼိုင်ႈပေႃႇမႃးပၼ်ဢဵၼ်ပၼ်ႁႅင်းမၼ်းၸဝ်ႈဢေႃႈ။-
မၼ်းၸဝ်ႈၶၢမ်ႇဝူၺ်ႇတၼႃႇၼမ်ၼႃႇလႄႈယိင်းၶႅၼ်းၶတ်းၸႂ်ၵျူဝ်းၸႃးသူးတွင်းယူႇ၊ထၢၼ်ႈပေႃးႁိူဝ်ႇမၼ်းၸဝ်ႈပဵၼ်မိူၼ်ၸိူဝ်ႉၼင်ႇယွတ်ႇလိူတ်ႈယွတ်ႇတူၵ်းၵႃႈၼိူဝ်လိၼ်ၼၼ်ႉဢေႃႈ။]
လုၵ်ႉသေၵႃႈတီႈဢၼ်သူးတွင်းၼၼ်ႉမၼ်းၸဝ်ႈၶိုၼ်းမႃးၸူးတီႈတပႄးၸဝ်ႈၸိူဝ်းၼၼ်ႉလႄႈထူပ်းႁၼ်ၶဝ်ၼွၼ်းလပ်းယူႇ၊ၵွပ်ႈပိူဝ်ႈၶဝ်ၸႂ်လုႁႅင်းဢူၼ်ႈၼႃႇၼၼ်ႉဢေႃႈ။-
မၼ်းၸဝ်ႈၸင်ႇလၢတ်ႈတီႈၶဝ်လႄႈဝႃႈ၊ “သူၼွၼ်းလပ်းယူႇႁဵတ်းသင်။ လုၵ်ႉလႄႈဢွၼ်ၵၼ်သူးတွင်းပုၼ်ႈလွင်ႈၼင်ႇႁိုဝ်သူတၵ်းဢမ်ႇလွင်ႈဢမ်ႇၸွမ်းၵႂႃႇၼႂ်းတၢင်းဢၼ်ၸူဝ်းၵႂႃႇၵႃႈၼႂ်းဢပျတ်ႈၼၼ်ႉတႃႉ၊” ဝႃႈၼင်ႇၼႆဢေႃႈ။
ၼႂ်းမိူဝ်ႈဢၼ် ၸဝ်ႈယေႇသု၊ ယင်းတိုၵ်ႉလၢတ်ႈၸိူဝ်ႉၼင်ႇၼၼ်ယူႇၼၼ်ႉ၊ၵူၼ်းၸုမ်းၼိုင်ႈႁွတ်ႈမႃးလႄႈ ယုတႃႉ၊ ဢၼ်ၶဝ်ႈပႃးၼႂ်းတပႄးၸဝ်ႈသိပ်းသွင်ၵေႃႉၼၼ်ႉဢွၼ်ႁူဝ်ၶဝ်မႃးဢေႃႈ။ မၼ်းၵႂႃႇၸူး ၸဝ်ႈယေႇသု၊ ႁႂ်ႈလႆႈတၵ်ႉလၢတ်ႈလႄႈၼူမ်ဢေႃႈ။-
ၵူၺ်းၵႃႈ၊ ၸဝ်ႈယေႇသု၊ လၢတ်ႈလႄႈဝႃႈ၊ “ ယုတႃႉ၊ ႟။ မႂ်းဢဝ်တင်းတၢင်းဢၼ်ၼူမ်လႄႈဢၢပ်ႈ လုၵ်ႈၵူၼ်း၊ ႁိုဝ်း၊” ဝႃႈၼင်ႇၼႆဢေႃႈ။
မိူဝ်ႈဢၼ်တပႄးၸဝ်ႈဢၼ်မီးလူၺ်ႈၵၼ်တင်းမၼ်းၸဝ်ႈၸိူဝ်းၼၼ်ႉ၊ႁုႁၼ်လွင်ႈတၢင်းဢၼ်တၵ်းပဵၼ်မႃးၼၼ်ႉလႄႈၶဝ်လဝ်ႈထၢမ်လႄႈဝႃႈ၊ “ၸဝ်ႈႁဝ်း။ ႁဝ်းၶႃႈတၵ်းလႆႈဢဝ်လႅဝ်းၽၼ်းၶႃႈႁိုဝ်း၊” မိူဝ်ႈဢၼ်ယင်းဝႃႈယူႇၼၼ်ႉ၊-
ၼႂ်းၶဝ်ၼၼ်ႉၵေႃႉၼိုင်ႈဢဝ်လႅဝ်းၽၼ်းၶႃႈၶုၼ်ယဵၸ်ႈပရေႃးႁဵၵ်ႈ လႄႈဝၢၼ်ႁူမၼ်းၽၢႆႇၶႂႃၶၢတ်ႇတူၵ်းၵႂႃႇဢေႃႈ။
မၼ်းၸဝ်ႈၵေႃႈလၢတ်ႈလႄႈဝႃႈ၊ “ယႃႇပေႁဵတ်းသင်ထႅင်ႈ၊” ဝႃႈၼင်ႇၼႆယဝ်ႉၸင်ႇ၊ဢဝ်မိုဝ်းတိူဝ်ႉသႂ်ႇဝၢၼ်ႁူမၼ်းၼၼ်ႉႁႂ်ႈၶိုၼ်းလီမႃးသေဢေႃႈ။
မိူဝ်ႈၼၼ်ႉ၊မၼ်းၸဝ်ႈလၢတ်ႈတီႈယဵၸ်ႈပရေႃးႁဵၵ်ႈလူင်လႂ်၊ႁူဝ်ၼႃႈလုၵ်ႈသိုၵ်းဢၼ်ပႂ်ႉၵျွင်းပိၵ်ႈမၢၼ်ႇၸဝ်ႈလႂ်၊တင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆၸိူဝ်းဢၼ်မႃးတိဢဝ်မၼ်းၸဝ်ႈၼၼ်ႉလႄႈဝႃႈ၊ “ၸွင်ႇသူလူဝ်ႇလႆႈပႃးဢဝ်လႅဝ်း၊ဢိၵ်ႇတင်းၶွၼ်ႉလႄႈမႃးတိဢဝ်ၵဝ်မိူၼ်ၸိူဝ်ႉၼင်ႇသူတိဢဝ်ၵူၼ်းၸူၼ်ၼၼ်ႉႁိုဝ်း။-
မိူဝ်ႈဢၼ်ၵဝ်မီးယူႇလူၺ်ႈၵၼ်တင်းသူၼႂ်းၵျွင်းပိၵ်ႈမၢၼ်ႇၸဝ်ႈၵူႈဝၼ်းၼၼ်ႉၸိုင်၊သူဢမ်ႇႁႃတိဢဝ်ၵဝ်။ ၵမ်းၼႆႉပဵၼ်ၶိင်ႇသူယဝ်ႉ။ ပဵၼ်ၶိင်ႇတၼ်းၶူဝ်းလပ်းသိင်ႇတၵ်းဢုပ်ႉပိူင်ႇယဝ်ႉ၊” ဝႃႈၼင်ႇၼႆဢေႃႈ။
ၶဝ်တိဢဝ် ၸဝ်ႈယေႇသု၊ ဢဝ်ၵႂႃႇၵႃႈတီႈႁိူၼ်းၶုၼ်ယဵၸ်ႈပရေႃးႁဵၵ်ႈၶဝ်လႄႈ ပေႇတရု၊ ၵေႃႈယူႇတီႈဢၼ်ႁၢင်ႇၵႆသေလႄႈၸွမ်းၵႂႃႇဢေႃႈ။-
ပိူၼ်ႈသုမ်ၽႆးဢွမ်ႇၵႃႈၼႂ်းပၢင်ႇဝၢင်းႁိူၼ်းၼၼ်ႉယူႇလႄႈ ပေႇတရု၊ ၵေႃႈၵႂႃႇငွမ်ဢွမ်ႇၽႆးၸွမ်းၼႂ်းၵႄႈပိူၼ်ႈဢေႃႈ။-
မိူဝ်ႈၼၼ်ႉ၊သၢဝ်လုၵ်ႈၸၢင်ႈၵေႃႉၼိုင်ႈႁၼ်မၼ်းငွမ်ဢွမ်ႇၽႆးယူႇၼၼ်ႉသေယဝ်ႉ၊ယႅၵ်ႉတူၺ်းၼႃႈမၼ်းလီလီယဝ်ႉၸင်ႇလၢတ်ႈလႄႈဝႃႈ၊ “ၵေႃႉၼႆႉပဵၼ်ၵူၼ်းဢၼ်ၸွမ်း ယေႇသု၊ ၼၼ်ႉယဝ်ႉ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ ပေႇတရု၊ ထဵင်ပႅတ်ႈလႄႈဝႃႈ၊ “မႄႈယိင်း႟။ ၵဝ်ယင်းဢမ်ႇႁုၸၵ်းၵေႃႉၼၼ်ႉ၊” ဝႃႈၼင်ႇၼႆဢေႃႈ။
ဝၢႆးသေၼၼ်ႉထႅင်ႈၵမ်းၼိုင်ႈ၊မီးၵူၼ်းၵေႃႉၼိုင်ႈတွင်းမၼ်းလႄႈလၢတ်ႈဝႃႈ၊ “မႂ်းၼႆႉၶဝ်ႈပႃးလူၺ်ႈၵႃႈၼႂ်းၶဝ်ဢေႃႈ၊” ဝႃႈၼင်ႇၼႆလႄႈ ပေႇတရု၊ ၶိုၼ်းလၢတ်ႈလႄႈဝႃႈ၊ “ၵူၼ်းၼႆႉ႟။ ၵဝ်ဢမ်ႇပႃးၸွမ်းၼႂ်းၶဝ်ၵူၺ်း၊” ဝႃႈၼင်ႇၼႆဢေႃႈ။
လိုၼ်းၼၼ်ႉႁိုင်သေၼိုင်ႈမွင်းယဝ်ႉၼၼ်ႉၸိုင်၊ၵူၼ်းတၢင်ႇၵေႃႉသမ်ႉလၢတ်ႈတႄႉတႄႉဝႃႈဝႃႈလႄႈဝႃႈ၊ “ၸႂ်ႈယဝ်ႉ။ ၵေႃႉၼႆႉပဵၼ်ၵူၼ်းပႃးၸွမ်းမၼ်းတႄႉယဝ်ႉ။ မၼ်းပဵၼ်ၵူၼ်းမိူင်း ၵႃႇလိလႄး၊ ဢေႃႈ၊” ဝႃႈၼင်ႇၼႆဢေႃႈ။
ပေႇတရု၊ ၶိုၼ်းလၢတ်ႈလႄႈဝႃႈ၊ “ၶိင်းၼႆႉ႟။ မႂ်းလၢတ်ႈလွင်ႈသင်ၵဝ်ယင်းဢမ်ႇႁု၊” ဝႃႈၼင်ႇၼႆဢေႃႈ။ မိူဝ်ႈၼၼ်ႉၵမ်းလဵဝ်၊ယၢမ်းမိူဝ်ႈဢၼ်မၼ်းယင်းလၢတ်ႈယူႇၼၼ်ႉ၊ၵႆႇၵေႃႈၶၼ်ဢေႃႈ။-
ၸဝ်ႈၽြႃးၵေႃႈဝၢႆႇတူၺ်း ပေႇတရု၊ လႄႈမၼ်းၶုၵ်းၸႂ်လႆႈၶႆႈၸႂ်ထူပ်းၵႂၢမ်းမၼ်းၸဝ်ႈဢၼ်ဝႃႈ၊ “ၸူဝ်ႈဢၼ်ၵႆႇဢမ်ႇပႆႇၶၼ်ၼႂ်းၶိုၼ်းၼႆႉၼၼ်ႉ မႂ်းတေတွပ်ႇထဵင်ဝႃႈ၊မႂ်းဢမ်ႇႁုၸၵ်းၵဝ်ထူၼ်ႈထိုင်သၢမ်ပွၵ်ႈဢေႃႈ၊” ဝႃႈၼင်ႇၼႆၼၼ်ႉသေယဝ်ႉ၊-
မၼ်းဢွၵ်ႇသေၵႃႈတီႈၼၼ်ႈၵႂႃႇလႄႈႁွင်ႉႁႆႈထိုင်ၸႂ်ထိုင်ၶေႃးၼႃႇလူင်လၢင်ဢေႃႈ။
ၵူၼ်းၸိူဝ်းဢၼ်ပႂ်ႉထိင်း ၸဝ်ႈယေႇသု၊ ၼၼ်ႉ၊ဢွၼ်ၵၼ်ႁဵတ်းပျၢၵ်ႈႁဵတ်းၶူဝ်တီႈမၼ်းၸဝ်ႈသေလႄႈ ပေႃႉထုပ်ႉမၼ်းၸဝ်ႈဢေႃႈ။-
ၶဝ်ဢဝ်ၽႃႈႁူမ်ႇၼႃႈမၼ်းၸဝ်ႈသေယဝ်ႉ၊ထၢမ်မၼ်းၸဝ်ႈလႄႈဝႃႈ၊ “ၽူႈလႂ်ပေႃႉထုပ်ႉမႂ်း၊တၵ်ႉတူၺ်းလူး၊” ဝႃႈၼင်ႇၼႆဢေႃႈ။-
လိူဝ်သေၼၼ်ႉၶဝ်လၢတ်ႈၵႂၢမ်းဢၼ်သႄႉသွမ်းၼမ်ၼႃႇတီႈမၼ်းၸဝ်ႈဢေႃႈ။
မိူဝ်ႈဢၼ်မိူင်းလႅင်းမႃးၸိုင်၊ၵူၼ်းဢၼ်ပဵၼ်ၵႄႇပဵၼ်ႁူဝ် ၵျူး၊ ၶဝ်လႂ်၊ယဵၸ်ႈပရေႃးႁဵၵ်ႈလူင်ၶဝ်လႂ်၊ဢိၵ်ႇတင်းသြႃႇမေႃၵျၢမ်းထမ်ႇမႃႉတင်းလၢႆၸုတုမ်တိူင်ႇပၢင်ႇၵၼ်သေယဝ်ႉ၊ဢဝ်မၼ်းၸဝ်ႈၵႂႃႇၸူးတီႈလုမ်းလူင်ယဝ်ႉၸင်ႇ၊-
လၢတ်ႈလႄႈဝႃႈ၊ “မႂ်းၸႂ်ႈ ၸဝ်ႈၶရိၸ်ႈ၊ ႁိုဝ်း၊မွၵ်ႇလၢတ်ႈႁဝ်းတႃႉ၊” ဝႃႈၼင်ႇၼႆဢေႃႈ။ မၼ်းၸဝ်ႈၶိုၼ်းလၢတ်ႈလႄႈဝႃႈ၊ “ပေႃးၵဝ်မွၵ်ႇလၢတ်ႈသူၸိုင်၊သူဢမ်ႇယုမ်ႇ။-
ပေႃးၵဝ်ထၢမ်သူၵေႃႈသူဢမ်ႇၶိုၼ်းလၢတ်ႈ။-
တႄႇၸႃႉဢဝ်မိူဝ်ႈလဵဝ်လႄႈ လုၵ်ႈၵူၼ်း၊ တၵ်းၼင်ႈယူႇၵႃႈတီႈၽၢႆႇၶႂႃဢၼၼ်ႇတႃႉတၼ်းၶူဝ်းၽြႃးပဵၼ်ၸဝ်ႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၶဝ်ဢွၼ်ၵၼ်ထၢမ်လႄႈဝႃႈ၊ “ပေႃးပဵၼ်ၼႆၸိုင်၊မႂ်းၸႂ်ႈလုၵ်ႈၽြႃးပဵၼ်ၸဝ်ႈႁိုဝ်း၊” ဝႃႈၼင်ႇၼႆလႄႈမၼ်းၸဝ်ႈၵေႃႈလၢတ်ႈဝႃႈ၊ “သူလၢတ်ႈၸွမ်းၵႃႈၼင်ႇဢၼ်ၵဝ်ပဵၼ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၶဝ်ၵေႃႈလၢတ်ႈလႄႈဝႃႈ၊ “ႁဝ်းဢမ်ႇလူဝ်ႇသၢၵ်ႈသေႇတၢင်ႇၸိူဝ်ႉတၢင်ႇမဵဝ်းယဝ်ႉ။ တူဝ်ႁဝ်းလႆႈငိၼ်းၵႂၢမ်းဢၼ်ဢွၵ်ႇသူပ်းမၼ်းယဝ်ႉ၊” ဝႃႈၼင်ႇၼႆဢေႃႈ။
ၵူၼ်းဢၼ်ၸုဢၼ်တုမ်တင်းသဵင်ႈတင်းလူင်ဢွၼ်ၵၼ်လုၵ်ႉလႄႈဢဝ် ၸဝ်ႈယေႇသု၊ ၵႂႃႇၵႃႈတီႈၽၢႆႇၼႃႈၶုၼ် ပိလတ်ႉ၊ သေယဝ်ႉ၊-
တၢင်ႇဢပျတ်ႈလႄႈဝႃႈ၊ “ႁဝ်းၶႃႈတိဢဝ်ၵေႃႉၼႆႉမႃး၊ၵွပ်ႈပိူဝ်ႈမၼ်းႁဵတ်းႁႂ်ႈၵူၼ်းမိူင်းႁဝ်းၽိတ်းၵႂႃႇပိူင်ႈၵႂႃႇယင်းႁၢမ်ႈတၢပ်ႈတၢင်းဢၼ်ထၢမ်းၶွၼ်ႇတီႈၶုၼ်ႁေႃၶမ်း ၵေႇသႃႇ၊ ဢိၵ်ႇတင်းႁေႃးလၢတ်ႈဝႃႈ၊မၼ်းပဵၼ် ၸဝ်ႈၶရိၸ်ႈ၊ ဢၼ်ဝႃႈ၊ၶုၼ်ႁေႃၶမ်းပႃးၼိုင်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၶုၼ် ပိလတ်ႉ၊ ၵေႃႈထၢမ်တီႈမၼ်းၸဝ်ႈလႄႈဝႃႈ၊ “ၸွင်ႇမႂ်းၸႂ်ႈၶုၼ်ႁေႃၶမ်းမဵဝ်း ၵျူး၊ ႁိုဝ်း၊” ဝႃႈၼင်ႇၼႆလႄႈ “မႅၼ်ႈၵႃႈၼင်ႇဢၼ်ၸဝ်ႈလၢတ်ႈၼႆႉယဝ်ႉ၊” ဝႃႈၼင်ႇၼႆမၼ်းၸဝ်ႈၶိုၼ်းလၢတ်ႈဢေႃႈ။
မိူဝ်ႈၼၼ်ႉ၊ၶုၼ် ပိလတ်ႉ၊ လၢတ်ႈတီႈယဵၸ်ႈပရေႃးႁဵၵ်ႈ လူင်ၶဝ်တင်းမူႇၵူၼ်းတင်းလၢႆလႄႈဝႃႈ၊ “ၵဝ်ဢမ်ႇႁၼ်ဢပျတ်ႈတီႈၵေႃႉၼႆႉသေၸိူဝ်ႉသေမဵဝ်း၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ၶဝ်ၸိူဝ်းၼၼ်ႉယဵင်ႈၶႅၼ်းႁွင်ႉပၢဝ်ႇတင်းသဵင်ဢၼ်ႁႅင်းၼႃႇလႄႈလၢတ်ႈဝႃႈ၊ “ၵေႃႉၼႆႉသင်ႇသွၼ်ႁႂ်ႈပိူၼ်ႈလုၵ်ႉၽိုၼ်ႉၸွတ်ႇတူဝ်ႈၵႂႃႇၼႂ်းမိူင်း ယုတႃႉ၊ ၵူႈတီႈၵူႇလႅၼ်ဢေႃႈ။ မၼ်းတႄႇၸႃႉတီႈမိူင်း ၵႃႇလိလႄး၊ လႄႈမိူဝ်ႈလဵဝ်ႁွတ်ႈမႃးၵႃႈတီႈၼႆႈၶႃႈယဝ်ႉ၊” ဝႃႈၼင်ႇၼႆဢေႃႈ။
ၶုၼ် ပိလတ်ႉ၊ ငိၼ်းၵႂၢမ်းၼၼ်ႉသေယဝ်ႉ၊ထၢမ်လႄႈဝႃႈ၊ “ၵေႃႉၼႆႉပဵၼ်ၵူၼ်းမိူင်း ၵႃႇလိလႄး၊ ႁိုဝ်း၊” ဝႃႈၼင်ႇၼႆလႄႈ၊-
မိူဝ်ႈဢၼ်ႁုဝႃႈပဵၼ်ၵူၼ်းဢိူင်ႇဢၼ်ၸဝ်ႈၽႃႉ ႁေႇရူတ်ႈ၊ ဢုပ်ႉပိူင်ႇၼၼ်ႉၸိုင်၊ႁႂ်ႈဢဝ် ၸဝ်ႈယေႇသု၊ ၵႂႃႇသူင်ႇၵႃႈတီႈၸဝ်ႈၽႃႉ ႁေႇရူတ်ႈ၊ ဢၼ်မႃးမီးယူႇၵႃႈၼႂ်းဝဵင်း ယေႇရုသလႅမ်ႇ၊ ၶိင်ႇယၢမ်းၼၼ်ႉဢေႃႈ။-
ၸဝ်ႈၽႃႉ ႁေႇရူတ်ႈ၊ ႁၼ် ၸဝ်ႈယေႇသု၊ လႄႈၸူမ်းၼႃႇလူင်လၢင်ၵွပ်ႈပိူဝ်ႈငိၼ်းၶၢဝ်ႇငၢဝ်းလွင်ႈမၼ်းၸဝ်ႈလႄႈၶႂ်ႈထူပ်းၶႂ်ႈၺႃးမၼ်းၸဝ်ႈႁိုင်ၼႃႇယဝ်ႉၸင်ႇ၊မုင်ႈမွင်းႁႂ်ႈလႆႈႁၼ်မၼ်းၸဝ်ႈႁဵတ်းၼႄဢၼ်လၢၵ်ႇလၢႆးလီဢၢမ်းသေၸိူဝ်ႉသေပိူင်ယူႇဢေႃႈ။-
ပိူဝ်ႈၼႆလႄႈၸဝ်ႈၽႃႉ ႁေႇရူတ်ႈ၊ ထၢမ်မၼ်းၸဝ်ႈၼမ်ၼႃႇဢေႃႈ။ ၵူၺ်းၵႃႈ၊မၼ်းၸဝ်ႈဢမ်ႇၶိုၼ်းတွပ်ႇၶိုၼ်းလၢတ်ႈသေၶေႃႈသေၵမ်း။-
ယဵၸ်ႈပရေႃးႁဵၵ်ႈလူင်ၶဝ်တင်းသြႃႇမေႃၵျၢမ်းထမ်ႇမႃႉတင်းလၢႆလုၵ်ႉၸုၵ်းသေယဝ်ႉ၊တၢင်ႇဢပျတ်ႈႁႅင်းၼႃႇတီႈမၼ်းၸဝ်ႈဢေႃႈ။-
ၵမ်းၼၼ်ႉ၊ၸဝ်ႈၽႃႉ ႁေႇရူတ်ႈ၊ တင်းၵူၼ်းသိုၵ်းမၼ်းတင်းလၢႆ၊ယင်းဢမ်ႇၼပ်ႉဢမ်ႇၶၢၼ်းလႄႈႁဵတ်းပျၢၵ်ႈသႄႉသွမ်းမၼ်းၸဝ်ႈသေယဝ်ႉ၊ဢဝ်ၶူဝ်းၽႄးဢၼ်ႁၢင်ႈလီၼၼ်ႉၼုင်ႈပၼ်မၼ်းၸဝ်ႈသေလႄႈဢဝ်သူင်ႇၵႂႃႇပၼ်ၶိုၼ်းတီႈၶုၼ် ပိလတ်ႉ၊ သေဢေႃႈ။-
ၼႂ်းဝၼ်းၼၼ်ႉ၊ၸဝ်ႈၽႃႉ ႁေႇရူတ်ႈ၊ တင်းၶုၼ် ပိလတ်ႉ၊ ႁဵတ်းၵေႃႉႁဵတ်းသႄႈလူၺ်ႈၵၼ်ဢေႃႈ။ မိူဝ်ႈဢွၼ်တၢင်းၼၼ်ႉၶဝ်ဢမ်ႇထုၵ်ႇဢမ်ႇမႅၼ်ႈၵၼ်။
မိူဝ်ႈၼၼ်ႉ၊ၶုၼ် ပိလတ်ႉ၊ ႁွင်ႉဢဝ်ယဵၸ်ႈပရေႃးႁဵၵ်ႈလူင်လႂ်၊ၶုၼ်တီႈလုမ်းလႂ်၊ဢိၵ်ႇတင်းၵူၼ်းတင်းလၢႆၸုတုမ်ၵၼ်လႄႈ၊-
လၢတ်ႈဝႃႈ၊ “သူဢဝ်ၵေႃႉၼႆႉမႃးၸွႆးတၢင်ႇဢပျတ်ႈလႄႈဝႃႈ၊ ‘မၼ်းဢွၼ်ႁူဝ်ပိူၼ်ႈလုၵ်ႉၽိုၼ်ႉဢေႃႈ’ ဝႃႈၼႆယဝ်ႉ။ တေႃႈလဵဝ်ၼႆႉ၊ၵဝ်ၸႅတ်ႈထၢမ်မၼ်းၽၢႆႇၼႃႈသူတင်းသဵင်ႈတင်းလူင်သေၵေႃႈ၊ၵဝ်ဢမ်ႇထူပ်းဢမ်ႇႁၼ်ဢပျတ်ႈဢၼ်သူၸွႆးတၢင်ႇသႂ်ႇၵႃႈၼိူဝ်မၼ်းၼၼ်ႉသေမဵဝ်း။-
ၸဝ်ႈၽႃႉ ႁေႇရူတ်ႈ၊ ၵေႃႈဢမ်ႇထူပ်းလႄႈၸင်ႇဢဝ်သူင်ႇမၼ်းမႃးၵႃႈတီႈၵဝ်ၶိုၼ်းယဝ်ႉ။ မၼ်းဢမ်ႇလႆႈႁဵတ်းၽိတ်းမဵဝ်းဢၼ်ထိူၵ်ႈတေလႆႈဢဝ်တၢႆ။-
ပိူဝ်ႈၼႆလႄႈ ၵဝ်တၵ်းသုင်းမႃႉပၼ်တၢမ်ႇမၼ်းသေလႄႈပွႆႇလွတ်ႈဢေႃႈ၊” ဝႃႈၼင်ႇၼႆဢေႃႈ။
ၼႂ်းပွႆး ပသၶႃႇ၊ ၼၼ်ႉ ၶုၼ် ပိလတ်ႉ၊ လႆႈပွႆႇၵူၼ်းထွင်ႇသေၵေႃႉၵေႃႉပၼ်တီႈၶဝ်ၵူႈပီဢေႃႈ။
ၵူၼ်းတင်းလၢႆၽွမ်ႉၵၼ်ပၢဝ်ႇသႅၼ်ႇလႄႈဝႃႈ၊ “ဢဝ်ၵေႃႉၼႆႉတၢႆပႅတ်ႈသေၵမ်း။ ပွႆႇ ပႃႇရပ်ႉပႃႉ၊ ပၼ်ႁဝ်းၶႃႈသေၵမ်း၊” ဝႃႈၼင်ႇၼႆဢေႃႈ။-
ပႃႇရပ်ႉပႃႉ၊ ဢၼ်ဝႃႈၼၼ်ႉ၊ၵွပ်ႈပိူဝ်ႈပဵၼ်ၵူၼ်းဢၼ်လုၵ်ႉၽိုၼ်ႉဝၢၼ်ႈမိူင်းသေယဝ်ႉ၊လႆႈဢဝ်ၵူၼ်းတၢႆလႄႈတူၵ်းထွင်ႇယူႇဢေႃႈ။
ၶုၼ် ပိလတ်ႉ၊ ၸမ်ႉ၊ၶႂ်ႈပွႆႇ ၸဝ်ႈယေႇသု၊ လွတ်ႈလႄႈသမ်ႉၶိုၼ်းလၢတ်ႈတီႈၵူၼ်းဢၼ်ၸုဢၼ်တုမ်ၸိူဝ်းၼၼ်ႉထႅင်ႈဢေႃႈ။-
ၵူၺ်းၵႃႈ၊ၶဝ်ၶိုၼ်းႁွင်ႉပၢဝ်ႇလႄႈလၢတ်ႈဝႃႈ၊ “ဢဝ်ၵေႃႉၼႆႉတွၵ်ႇဝႆႉၵႃႈၼိူဝ်သဝ်မႆႉဝႃးမိုဝ်းသေၵမ်း။ ဢဝ်တွၵ်ႇတၢႆပႅတ်ႈသေၵမ်း၊” ဝႃႈၼင်ႇၼႆဢေႃႈ။
ၶုၼ် ပိလတ်ႉ၊ သမ်ႉၶိုၼ်းလၢတ်ႈတီႈၶဝ်ပွၵ်ႈထူၼ်ႈသၢမ်လႄႈဝႃႈ၊ “ၵွပ်ႈလွင်ႈသင်လႄႈတၵ်းဢဝ်မၼ်းတွၵ်ႇတၢႆပႅတ်ႈ။ မၼ်းလႆႈႁဵတ်းၽိတ်းဢပျတ်ႈဢၼ်လႂ်ယဝ်ႉ။ ၵဝ်ဢမ်ႇထူပ်းဢမ်ႇႁၼ်ဢပျတ်ႈဢၼ်ၵိုင်ႇဢဝ်မၼ်းတၢႆ။ ၵဝ်တၵ်းသုင်းမႃႉပၼ်တၢမ်ႇမၼ်းသေလႄႈပွႆႇလွတ်ႈဢေႃႈ၊” ဝႃႈၼင်ႇၼႆဢေႃႈ။
ၶဝ်ယဵင်ႈၶႅၼ်းၵိဝ်သဵင်ဢၼ်ယႂ်ႇၼႃႇလႄႈပၢဝ်ႇသႅၼ်ႇႁႂ်ႈဢဝ်မၼ်းၸဝ်ႈတွၵ်ႇတၢႆၵႃႈၼိူဝ်သဝ်မႆႉဝႃးမိုဝ်းသေလႄႈသဵင်ၶဝ်ၼၼ်ႉပႄႉၼႅင်ႇၵႂႃႇသေဢေႃႈ။-
ပိူဝ်ႈၼႆၸင်ႇ၊ၶုၼ် ပိလတ်ႉ၊ ၸီႇယၢင်ႇတြႃးတီႈ ၸဝ်ႈယေႇသု၊ ႁႂ်ႈပဵၼ်ၸိူဝ်ႉၼင်ႇဢၼ်ၶဝ်ယွၼ်းၼၼ်ႉလႄႈ၊-
ပွႆႇလွတ်ႈၵေႃႉဢၼ်ၶဝ်ယွၼ်းဢဝ်ဢၼ်ပဵၼ်ၵူၼ်းတူၵ်းထွင်ႇဢၼ်လုၵ်ႉၽိုၼ်ႉဝၢၼ်ႈမိူင်းလႄႈဢဝ်ၵူၼ်းတၢႆၼၼ်ႉသေယဝ်ႉ၊ဢဝ် ၸဝ်ႈယေႇသု၊ ဢၢပ်ႈပၼ်တီႈၶဝ်၊ႁႂ်ႈၶဝ်လႆႈႁဵတ်းၸွမ်းၵႃႈၼင်ႇဢၼ်ၶဝ်မီးဢလူဝ်ႇၼၼ်ႉသေဢေႃႈ။
ၵူၼ်းသိုၵ်းၶဝ်ဢဝ် ၸဝ်ႈယေႇသု၊ ဢွၵ်ႇၵႂႃႇလႄႈၵႃႈတီႈၵၢင်တၢင်းၶဝ်ထူပ်းၺႃးၵူၼ်းမိူင်း ၵုရေႇၼေႇ၊ ၵေႃႉၼိုင်ႈ၊ဢၼ်လႆႈၸိုဝ်ႈ သိမုၼ်ႇ၊ လုၵ်ႉသေၵႃႈတီႈဝၢၼ်ႈၼွၵ်ႈၶဝ်ႈဝဵင်းမႃးၼၼ်ႉလႄႈၶဝ်တိဢဝ်မၼ်းသေယဝ်ႉ၊ဢဝ်သဝ်မႆႉဝႃးမိုဝ်းတၢင်ႇသႂ်ႇၵႃႈၼိူဝ်မၼ်းႁႂ်ႈမၼ်းမႅၵ်ႇၸွမ်းၽၢႆႇလင် ၸဝ်ႈယေႇသု၊ ၵႂႃႇဢေႃႈ။
မူႇၵူၼ်းၼမ်ၼႃႇၸွမ်းလင်မၼ်းၸဝ်ႈၵႂႃႇလႄႈၵႃႈၼႂ်းမူႇၵူၼ်းၼၼ်ႉ မီးမႄႈယိင်းၵမ်ႈၽွင်ႈဢၼ်ႁွင်ႉႁႆႈလႄႈၸႂ်လဵၵ်ႉပုၼ်ႈမၼ်းၸဝ်ႈၼၼ်ႉဢေႃႈ။-
ၸဝ်ႈယေႇသု၊ ဝၢႆႇတူၺ်းၶဝ်လႄႈလၢတ်ႈဝႃႈ၊ “မႄႈယိင်းဝဵင်း ယေႇရုသလႅမ်ႇ၊ တင်းလၢႆၶဝ်႟။ ယႃႇပေႁွင်ႉႁႆႈပုၼ်ႈၵဝ်။ ဢွၼ်ၵၼ်ႁွင်ႉႁႆႈပုၼ်ႈတူဝ်ၸဝ်ႈၵဝ်ႇ၊ဢိၵ်ႇတင်းပုၼ်ႈလုၵ်ႈသူလၢင်းသူတႃႉ။-
လွင်ႈမၼ်းၸမ်ႉ၊ဝၼ်းၶိင်ႇၵႃႇလႃႉဝၼ်းၵူၼ်းတင်းလၢႆတၵ်းဝႃႈ၊ ‘မႄႈယိင်းမၼ်လႄႈဢမ်ႇမီးလုၵ်ႈၼၼ်ႉမီးမၢင်ႇၵလႃႇဢေႃႈ။ တွင်ႉဢၼ်ဢမ်ႇတွၼ်ႉပႃးပတိၵ်ႈသၼ်ႇထေႇ၊ဢိၵ်ႇတင်းတဝ်ႈၼူမ်းဢၼ်ဢမ်ႇပႆႇတွၼ်ႉလႆႈၶၢမ်ႇၸုပ်ႇၵိၼ်သေပွၵ်ႈၼၼ်ႉ၊မီးမၢင်ႇၵလႃႇဢေႃႈ၊’ ဝႃႈၼင်ႇၼႆၼၼ်ႉတၵ်းႁွတ်ႈမႃးဢေႃႈ။-
မိူဝ်ႈၼၼ်ႉ၊ၶဝ်တၵ်းလၢတ်ႈတီႈလွႆတင်းလၢႆလႄႈဝႃႈ၊ ‘ၵၢၼ်ႉတဵင်ႁဝ်းတႃႉ၊’ သမ်ႉလၢတ်ႈတီႈၵွင်းလွႆလႄႈဝႃႈ၊ ‘ႁူမ်ႇတဵင်ႁဝ်းတႃႉ၊’ ဝႃႈၼင်ႇၼႆဢေႃႈ။-
လွင်ႈမၼ်းၸမ်ႉ၊ပေႃးႁဵတ်းၸိူဝ်ႉၼင်ႇၼႆ၊မႆႉလိပ်းၼၼ်ႉမိူဝ်ႈဢၼ်ႁႅင်ႈၼၼ်ႉၸိုင်၊သမ်ႉတၵ်းပဵၼ်ၸိူဝ်ႉၼင်ႇႁိုဝ်ၼေႃ၊” ဝႃႈၼင်ႇၼႆဢေႃႈ။
ၶဝ်ဢဝ်ၵူၼ်းႁၢႆႉသွင်ၵေႃႉၵႂႃႇႁႂ်ႈလႆႈတွၵ်ႇတၢႆလူၺ်ႈၵၼ်တင်း ၸဝ်ႈယေႇသု၊ ဢေႃႈ။-
မိူဝ်ႈဢၼ်ၶဝ်ႁွတ်ႈထိုင်ၵႃႈတီႈဢၼ်ႁွင်ႉဝႃႈ၊ၵွင်းၵွၵ်းႁူဝ်ၼၼ်ႉၸိုင်၊ၶဝ်ဢဝ် ၸဝ်ႈယေႇသု၊ တွၵ်ႇၵႃႈၼိူဝ်သဝ်မႆႉဝႃးမိုဝ်းလႄႈ ၵူၼ်းႁၢႆႉသွင်ၵေႃႉၼၼ်ႉၵေႃႈ၊တွၵ်ႇဝႆႉၵေႃႉၼိုင်ႈၽၢႆႇၶႂႃၸဝ်ႈ၊ၵေႃႉၼိုင်ႈၽၢႆႇသၢႆႉၸဝ်ႈလူၺ်ႈၵၼ်တင်းမၼ်းၸဝ်ႈဢေႃႈ။-
ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “ဢူဝ်းပေႃႈ။ ပွႆႇလွတ်ႈဢပျတ်ႈၶဝ်ၸိူဝ်းၼႆႉသေၵမ်းတီႈၶႃႈ။ ၶဝ်ဢမ်ႇႁုလွင်ႈဢၼ်ၶဝ်ႁဵတ်းၼၼ်ႉတီႈၶႃႈ၊” ဝႃႈၼင်ႇၼႆဢေႃႈ။ ၶဝ်ၽႄမႅင်ႇဢဝ်ၶူဝ်းၼုင်ႈမၼ်းၸဝ်ႈလူၺ်ႈတၢင်းဢၼ်တူၵ်းၸႃႇၵွၵ်ႈဢေႃႈ။-
ၵူၼ်းၼမ်ၼႃႇၸုၵ်းပႂ်ႉထႃႈတူၺ်းယူႇလႄႈၶုၼ်လုမ်းၶဝ်ၵေႃႈ၊ႁဵတ်းပျၢၵ်ႈႁဵတ်းၶူဝ်တီႈမၼ်းၸဝ်ႈလႄႈဝႃႈ၊ “မၼ်းၸၢင်ႈၶျွတ်ႈပိူၼ်ႈဝႃႈၼႆယဝ်ႉ။ သင်ဝႃႈမၼ်းပဵၼ် ၸဝ်ႈၶရိၸ်ႈ၊ ၵေႃႉဢၼ်ၽြႃးပဵၼ်ၸဝ်ႈလိူၵ်ႈၵဵပ်းဢဝ်တႄႉၸိုင်၊ႁႂ်ႈမၼ်းၶျွတ်ႈဢဝ်တူဝ်ၸဝ်ႈၵဝ်ႇတႃႉ၊” ဝႃႈၼင်ႇၼႆဢေႃႈ။
ၵူၼ်းသိုၵ်းတင်းလၢႆၵေႃႈမႃးတီႈမၼ်းၸဝ်ႈလႄႈႁဵတ်းပျၢၵ်ႈႁဵတ်းၶူဝ်တီႈမၼ်းၸဝ်ႈယူႇ၊ဢဝ်ၼမ်ႉမၢၵ်ႇၸပိတ်ႉသူမ်ႈယိုၼ်ႈပၼ်မၼ်းၸဝ်ႈသေလႄႈဢွၼ်ၵၼ်ဝႃႈ၊-
“ပေႃးမႂ်းၸႂ်ႈၶုၼ်ႁေႃၶမ်းၵူၼ်းမဵဝ်း ၵျူး၊ ၸိုင်၊ၶျွတ်ႈဢဝ်တူဝ်ၸဝ်ႈၵဝ်ႇတႃႉ၊” ဝႃႈၼင်ႇၼႆဢေႃႈ။
လိၵ်ႈဢၼ်ၽုၺ်ႇၼႄဢပျတ်ႈမၼ်းၸဝ်ႈၼၼ်ႉ [တႅမ်ႈတင်းၵႂၢမ်း ႁေႇပြႄး၊ ၵႂၢမ်း ၵရိၵ်ႉ၊ တင်းၵႂၢမ်း ရူဝ်းမႃႉ၊ ] ဢၼ်ဝႃႈ၊ “ၵေႃႉၼႆႉပဵၼ်ၶုၼ်ႁေႃၶမ်းၵူၼ်းမဵဝ်း ၵျူး၊ ဢေႃႈ၊” ဝႃႈၼင်ႇၼႆၼၼ်ႉတွၵ်ႇၸပ်းဝႆႉၵႃႈတီႈႁူဝ်သဝ်ဢေႃႈ။
ၵူၼ်းႁၢႆႉဢၼ်လႆႈၶၢမ်ႇတၢင်းဢၼ်ပိူၼ်ႈတွၵ်ႇဝႆႉတီႈႁိမ်းမၼ်းၸဝ်ႈၼၼ်ႉၵေႃႉၼိုင်ႈသႄႉသွမ်းမၼ်းၸဝ်ႈလႄႈဝႃႈ၊ “မႂ်းပဵၼ် ၸဝ်ႈၶရိၸ်ႈ၊ ဢမ်ႇၸႂ်ႈႁိုဝ်း။ ၶျွတ်ႈဢဝ်တူဝ်ၸဝ်ႈၵဝ်ႇဢိၵ်ႇတင်းႁဝ်းသွင်ၵေႃႉၼႆႉတႃႉ၊” ဝႃႈၼင်ႇၼႆဢေႃႈ။
ၵူၼ်းႁၢႆႉထႅင်ႈၵေႃႉၼိုင်ႈၼၼ်ႉၸမ်ႉ၊ႁိုတ်းႁၢတ်ႇတီႈမၼ်းလႄႈဝႃႈ၊ “မႂ်းဢမ်ႇၵူဝ်ၽြႃးပဵၼ်ၸဝ်ႈႁိုဝ်း။ မႂ်းလႆႈၶၢမ်ႇတၢမ်ႇတၢႆမိူၼ်မိူၼ်ၵၼ်တင်းမၼ်းသေၵေႃႈ၊-
ႁဝ်းသွင်ၵေႃႉၸမ်ႉ၊ပိူဝ်ႈဢၼ်လႆႈၶၢမ်ႇတၢမ်ႇတၢႆဢၼ်ထိူၵ်ႈတၢၼ်ႇၵၼ်တင်းဢပျတ်ႈဢၼ်ႁဝ်းႁဵတ်းမႅၼ်ႈၼၼ်ႉလႄႈလႆႈၶၢမ်ႇၸွမ်းၼင်ႇတြႃးဢေႃႈ။ ၵေႃႉၼႆႉၸမ်ႉ၊ဢမ်ႇႁဵတ်းဢပျတ်ႈသေၸိူဝ်ႉသေပိူင်၊” ဝႃႈၼင်ႇၼႆသေယဝ်ႉ၊-
သမ်ႉလဝ်ႈလၢတ်ႈတီႈ ၸဝ်ႈယေႇသု၊ လႄႈဝႃႈ၊ “ ၸဝ်ႈယေႇသု၊ တီႈၶႃႈ၊ၼႂ်းမိူဝ်ႈဢၼ်ၸဝ်ႈႁဝ်းမႃးၼႂ်းမိူင်းၸဝ်ႈယူႇၼၼ်ႉၸိုင်၊ၶုၵ်းၸႂ်လႆႈၶႆႈၸႂ်ထူပ်းၵဝ်ၶႃႈသေၵမ်းတီႈၶႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၵေႃႈလၢတ်ႈတီႈမၼ်းလႄႈဝႃႈ၊ “ၵဝ်ဝႃႈတီႈၸိုဝ်ႈၸႂ်ႈမၼ်းတီႈမႂ်းၸမ်ႉ၊ဝၼ်းမိူဝ်ႈၼႆႉမႂ်းတၵ်းမီးယူႇလူၺ်ႈၵၼ်တင်းၵဝ်ၵႃႈၼႂ်းမိူင်းၶျၢမ်းသႃႇပုၼ်ႉဢေႃႈ၊” ဝႃႈၼင်ႇၼႆဢေႃႈ။
ၶိင်ႇယၢမ်းၼၼ်ႉပဵၼ်ၶိင်ႇသိပ်းသွင်မွင်းၸမ်ၸမ်လႄႈပဵၼ်ဢၼ်လပ်းသိင်ႇၽိတ်းၽိတ်းၵႂႃႇတင်းဝၢၼ်ႈတင်းမိူင်းတေႃႇထိုင်ႁွတ်ႈၶိင်ႇဝၢႆးဝၼ်းသၢမ်မွင်းဢေႃႈ။-
ၽႃႈၵင်ႈဢၼ်ၽႅၼ်ၵႃႈၼႂ်းၵျွင်းပိၵ်ႈမၢၼ်ႇၸဝ်ႈၵေႃႈသိၵ်ႇၶၢတ်ႇပဵၼ်သွင်သိၵ်ႈၵႂႃႇဢေႃႈ။-
ၸဝ်ႈယေႇသု၊ ၵေႃႈႁွင်ႉသႅၼ်ႇတင်းသဵင်ဢၼ်ယႂ်ႇၼႃႇလႄႈဝႃႈ၊ “ဢူဝ်းပေႃႈ။ ၵဝ်ၶႃႈဢဝ်ၸႂ်ဝိၺိၺ်ႇၵဝ်ၶႃႈဢၢပ်ႈၼႂ်းမိုဝ်းၸဝ်ႈႁဝ်းတီႈၶႃႈဢေႃႈ၊” ဝႃႈၼင်ႇၼႆလႄႈထွတ်ႇၸႂ်မၼ်းၸဝ်ႈၵႂႃႇသေဢေႃႈ။
ၶုၼ်သိုၵ်းလူင်ႁၼ်လွင်ႈတၢင်းဢၼ်ပဵၼ်မႃးၼၼ်ႉသေယဝ်ႉ၊ယွင်ႈယေႃးၽြႃးပဵၼ်ၸဝ်ႈလႄႈဝႃႈ၊ “ၸႂ်ႈတႄႉ။ ၵေႃႉၼႆႉပဵၼ်ၵူၼ်းသိုဝ်ႈတေႃႇတႄႉယဝ်ႉ၊” ဝႃႈၼင်ႇၼႆဢေႃႈ။
ၵူၼ်းၸိူဝ်းဢၼ်ၸုၵ်းပႂ်ႉထႃႈတူၺ်းလွင်ႈတၢင်းၼၼ်ႉၸိူဝ်းၼၼ်ႉ၊မိူဝ်ႈဢၼ်ႁၼ်ၵႃႈဢၼ်ပဵၼ်မႃးယဝ်ႉၼၼ်ႉၸိုင်၊ဢွၼ်ၵၼ်တူပ်းႁူဝ်ဢူၵ်းၶဝ်သေလႄႈၶိုၼ်းမိူဝ်းၵႂႃႇလူၺ်ႈတင်းၸႂ်ဢၼ်လဵၵ်ႉၼႃႇဢေႃႈ။-
ၶဝ်ၸိူဝ်းဢၼ်ႁုၸၵ်းမိုတ်ႈၵိုဝ်းၵၼ်တင်း ၸဝ်ႈယေႇသု၊ ဢိၵ်ႇတင်းမႄႈယိင်းၸိူဝ်းဢၼ်လုၵ်ႉသေၵႃႈတီႈမိူင်း ၵႃႇလိလႄး၊ ၸွမ်းမၼ်းၸဝ်ႈမႃးၼၼ်ႉ၊ၸုၵ်းယူႇတီႈဢၼ်ႁၢင်ႇၵႆသေလႄႈတူၺ်းယူႇဢေႃႈ။
မိူဝ်ႈၼၼ်ႉ၊မီးၵူၼ်းမိူင်း ယုတႃႉ၊ ဝဵင်း ဢရိမသႄး၊ ဢၼ်ၸိုဝ်ႈမၼ်းႁွင်ႉဝႃႈ ယူဝ်းသႅပ်ႈ၊ ၼၼ်ႉၵေႃႉၼိုင်ႈၼၼ်ႉ၊မၼ်းပဵၼ်ၵူၼ်းလီၵူၼ်းသိုဝ်ႈတေႃႇဢၼ်ထိူၵ်ႈရူဝ်ႇသေႇၵူဝ်ယမ်လႄႈ ပဵၼ်ၵေႃႉဢၼ်မုင်ႈထႃႈမွင်းထႃႈမိူင်းၽြႃးပဵၼ်ၸဝ်ႈယူႇၼၼ်ႉဢေႃႈ။-
ပိၵ်ႉသမ်ႉမၼ်းပဵၼ်ၶုၼ်တီႈလုမ်းၵေႃႉၼိုင်ႈသေၵေႃႈ၊မၼ်းဢမ်ႇၽွမ်ႉလွင်ႈတၢင်းဢၼ်ၶဝ်ၼၼ်ႉၸီႇယၢင်ႇတႅပ်းတတ်းလႄႈႁဵတ်းၵႂႃႇၸိူဝ်းၼၼ်ႉ။-
မၼ်းၸင်ႇၶဝ်ႈၸူးၵႃႈတီႈၶုၼ် ပိလတ်ႉ၊ သေလႄႈယွၼ်းဢဝ်တူဝ်တၢႆ ၸဝ်ႈယေႇသု၊ ဢေႃႈ။-
လိုၼ်းၼၼ်ႉ၊မၼ်းၶျႃးတူဝ်တၢႆၸဝ်ႈလူင်းယဝ်ႉၸင်ႇ၊ဢဝ်ၽႃႈပၢၼ်ႇၶျေႃးၶဵၼ်းႁေႃႇသေယဝ်ႉ၊ဢဝ်သႂၢင်းသႂ်ႇၵႃႈၼႂ်းပိုင်ႈပႃႇႁဵဝ်ႈမႂ်ႇဢၼ်ၶုတ်းမူင်ႇၽႃႁိၼ်လႄႈယင်းဢမ်ႇပႆႇတွၼ်ႉသၢင်းၵျူဝ်ႇၽူႈလႂ်သေပွၵ်ႈၼၼ်ႉဢေႃႈ။-
ဝၼ်းၼၼ်ႉ၊ပဵၼ်ဝၼ်းသွၵ်ႈၵျႃႇဝၼ်းၽိတ်ႈလႄႈၸမ်ၶိင်ႇဝၼ်းၵမ်သိၼ်ဢေႃႈ။
မႄႈယိင်းၸိူဝ်းဢၼ်လုၵ်ႉသေၵႃႈတီႈမိူင်း ၵႃႇလိလႄး၊ မႃးလူၺ်ႈၵၼ်တင်း ၸဝ်ႈယေႇသု၊ ၼၼ်ႉ၊ၸွမ်း ယူဝ်းသႅပ်ႈ၊ ၵႂႃႇလူတူၺ်းပိုင်ႈပႃႇႁဵဝ်ႈမၼ်းၸဝ်ႈ၊ဢိၵ်ႇတင်းတူဝ်တၢႆမၼ်းၸဝ်ႈဝၢင်းဝႆႉၸိူဝ်ႉၼင်ႇႁိုဝ်ၼၼ်ႉဢေႃႈ။-
ၶဝ်ၶိုၼ်းမိူဝ်းၵႂႃႇလႄႈမႄးႁႅၼ်းၼမ်ႉမၼ်းႁွမ်၊ဢိၵ်ႇတင်းၼၢမ်ႇသႃႇဢၼ်တၵ်းတႃးတူဝ်တၢႆမၼ်းၸဝ်ႈၼၼ်ႉဢေႃႈ။ ၼႂ်းဝၼ်းၵမ်သိၼ်ၼၼ်ႉ၊ၶဝ်လိုဝ်ႈသဝ်းယူႇၸွမ်းၼင်ႇဢၼ်ပိင်းၺၢပ်ႈတြႃးမီးဝႆႉၼၼ်ႉဢေႃႈ။
ၼႂ်းဝၼ်းတၼၢင်းၼူၺ်ႇႁူဝ်ၼႂ်ၸဝ်ႉၸဝ်ႉၼၼ်ႉ၊မႄႈယိင်းၸိူဝ်းၼၼ်ႉပႃးဢဝ်ၼမ်ႉမၼ်းႁွမ်ဢၼ်ၶဝ်မႄးႁႅၼ်းဝႆႉၼၼ်ႉလႄႈၵႂႃႇၸူးၵႃႈတီႈပိုင်ႈပႃႇႁဵဝ်ႈမၼ်းၸဝ်ႈဢေႃႈ။-
ၶဝ်ထူပ်းႁၼ်မၢၵ်ႇႁိၼ်ၼၼ်ႉၵိင်ႈဢွၵ်ႇသေၵႃႈတီႈပၢၵ်ႇပိုင်ႈပႃႇႁဵဝ်ႈၼၼ်ႉဝႆႉယဝ်ႉလႄႈ၊-
ၶဝ်ၶဝ်ႈၵႂႃႇၵႃႈၼႂ်းမၼ်းဢေႃႈ။ ၵူၺ်းၵႃႈ၊ၶဝ်ဢမ်ႇႁၼ်တူဝ်တၢႆ ၸဝ်ႈယေႇသု၊ ၼၼ်ႉ။-
ၼႂ်းမိူဝ်ႈဢၼ်ၶဝ်ယင်းတိုၵ်ႉၵႂင်ၸႂ်လႄႈဢၢမ်းယူႇၼၼ်ႉၸိုင်၊ၵူၼ်းသွင်ၵေႃႉဢၼ်ၼုင်ႈၶူဝ်းဢၼ်ႁိူဝ်ႈလႅင်းၼႃႇၼၼ်ႉပေႃႇမႃးၸုၵ်းယူႇတီႈႁိမ်းၶဝ်ဢေႃႈ။-
ၼႂ်းမိူဝ်ႈဢၼ်ၶဝ်ၵူဝ်ႁႄၼႃႇလႄႈၵူမ်ႈၼႃႈၸပ်းလိၼ်ယူႇၼၼ်ႉၸိုင်၊ၶဝ်သွင်ၵေႃႉၼၼ်ႉလၢတ်ႈလႄႈဝႃႈ၊ “ႁဵတ်းသင်လႄႈသူသွၵ်ႈႁႃၵေႃႉဢၼ်ဢသၢၵ်ႈလိပ်းၵႃႈၼႂ်းၶဝ်ၸိူဝ်းဢၼ်တၢႆၼၼ်ႉၸိူဝ်ႉၼင်ႇႁိုဝ်။-
မၼ်းၸဝ်ႈဢမ်ႇမီးၵႃႈတီႈၼႆႈ။ မၼ်းၸဝ်ႈလုၵ်ႉၶိုၼ်းလိပ်းယဝ်ႉ။ ၶေႃႈၵႂၢမ်းဢၼ်မၼ်းၸဝ်ႈလၢတ်ႈတီႈသူၵႃႈၼႂ်းမိူင်း ၵႃႇလိလႄး၊ ၼၼ်ႉလႄႈဝႃႈ၊-
‘ လုၵ်ႈၵူၼ်း၊ တၵ်းလႆႈၶၢမ်ႇတၢင်းဢၼ်ဢၢပ်ႈၼႂ်းမိုဝ်းၵူၼ်းႁၢႆႉတင်းလၢႆလႄႈၶၢမ်ႇတၢင်းဢၼ်တွၵ်ႇဝႆႉၵႃႈၼိူဝ်သဝ်မႆႉဝႃးမိုဝ်းသေယဝ်ႉ၊တၵ်းလုၵ်ႉၶိုၼ်းလိပ်းမႃးၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉဢေႃႈ၊’ ဝႃႈၼင်ႇၼႆၼၼ်ႉၶုၵ်းၸႂ်လႆႈတႃႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊မႄႈယိင်းၸိူဝ်းၼၼ်ႉၶုၵ်းၸႂ်လႆႈၶႆႈၸႂ်ထူပ်းၶေႃႈၵႂၢမ်းမၼ်းၸဝ်ႈၸိူဝ်းၼၼ်ႉလႄႈ၊-
လုၵ်ႉတီႈပႃႇႁဵဝ်ႈပွၵ်ႈမိူဝ်းၵႂႃႇသေယဝ်ႉ၊မွၵ်ႇလၢတ်ႈလွင်ႈတင်းသဵင်ႈတင်းလူင်တီႈတမၢၼ်ႇၸဝ်ႈသိပ်းဢဵတ်းပႃး၊ဢိၵ်ႇတင်းၵူၼ်းတၢင်ႇၵေႃႉတၢင်ႇၵူၼ်းတင်းသဵင်ႈတင်းလူင်ၸိူဝ်းၼၼ်ႉဢေႃႈ။-
မႄႈယိင်းၸိူဝ်းဢၼ်ၵႂႃႇမွၵ်ႇလၢတ်ႈလွင်ႈတၢင်းၸိူဝ်းၼၼ်ႉၸမ်ႉ၊ပဵၼ် မႃႇရိမႃႇၵတလႃႉ၊ယူဝ်းႁၢၼ်ႇၼႃႉ၊မႃႇရိ၊ ဢၼ်ပဵၼ်မႄႈ ယႃႇၵုပ်ႈ၊ ဢိၵ်ႇတင်းမႄႈယိင်းတၢင်ႇၵေႃႉၸိူဝ်းဢၼ်ပႃးၸွမ်းၶဝ်ၼၼ်ႉဢေႃႈ။-
တမၢၼ်ႇၸဝ်ႈတင်းလၢႆထၢင်ႇၵႂၢမ်းၶဝ်ၼၼ်ႉပဵၼ်ၵႂၢမ်းလၢႆလၢႆလွၵ်ႇလွၵ်ႇလႄႈဢမ်ႇယုမ်ႇၶဝ်။-
ၼႂ်းဝႃႈၼၼ်သေၵေႃႈ ပေႇတရု၊ လုၵ်ႉလႄႈလႅၼ်ႈၵႂႃႇၸူးၵႃႈတီႈပိုင်ႈပႃႇႁဵဝ်ႈမၼ်းၸဝ်ႈဢေႃႈ။ မိူဝ်ႈဢၼ်မၼ်းၵူမ်ႈတူၺ်းၸိုင်၊လိူဝ်သေၽႃႈပၢၼ်ႇၶျေႃးဢၼ်ၶဵၼ်းႁေႃႇတူဝ်တၢႆၼၼ်ႉမၼ်းဢမ်ႇလႆႈႁၼ်သေၸိူဝ်ႉသေပိူင်။ လိုၼ်းၼၼ်ႉပႃးတင်းၸႂ်ဢၼ်ဢၢမ်းလွင်ႈတၢင်းၼၼ်ႉလႄႈၶိုၼ်းမိူဝ်းၵႂႃႇၵႃႈတီႈႁိူၼ်းမၼ်းသေဢေႃႈ။
ၼႂ်းဝၼ်းၼၼ်ႉ၊တပႄးသွင်ၵေႃႉဢၼ်ၸွမ်းလင် ၸဝ်ႈယေႇသု၊ ပႆတၢင်းၵႂႃႇတီႈဝၢၼ်ႈဢၼ်လႆႈၸိုဝ်ႈဝၢၼ်ႈ ဢေးမွၵ်ႉ၊ ဢၼ်ယၢၼ်ၵႆၵၼ်တင်းဝဵင်း ယေႇရုသလႅမ်ႇ၊ ၸဵတ်းလၵ်းၸမ်ၸမ်ၼၼ်ႉယူႇဢေႃႈ။-
ၶဝ်သွင်ၵေႃႉၼၼ်ႉဢုပ်ႇၵၼ်လၢတ်ႈၸႃၵၼ်လူၺ်ႈလွင်ႈဢၼ်ပဵၼ်မႃးတင်းသဵင်ႈတင်းလူင်ၼၼ်ႉယူႇဢေႃႈ။-
ယၢမ်းမိူဝ်ႈဢၼ်ယင်းတိုၵ်ႉဢုပ်ႇၵၼ်လၢတ်ႈၸႃၵၼ်ယူႇၼၼ်ႉ၊ ၸဝ်ႈယေႇသု၊ ၵႂႃႇၸမ်ၶဝ်လႄႈပႆၸွမ်းၶဝ်ၵႂႃႇဢေႃႈ။-
ၶဝ်ႁၼ်မၼ်းၸဝ်ႈယူႇသေၵေႃႈ၊ပိူဝ်ႈဢၼ်ဢမ်တႃၶဝ်ဝႆႉလႄႈဢမ်ႇႁုလွင်ႈဢၼ်ပဵၼ်မၼ်းၸဝ်ႈ။-
မၼ်းၸဝ်ႈလၢတ်ႈတေႃႇၶဝ်လႄႈဝႃႈ၊ “တၢင်းဢၼ်သူမီးၵႂၢမ်းဢၼ်တွင်ႈထၢမ်လၢတ်ႈၸႃၵၼ်ၸွမ်းတၢင်းမႃးၼႆႉပဵၼ်လွင်ႈၵႃႈသင်၊” ဝႃႈၼင်ႇၼႆဢေႃႈ။ ၶဝ်ၵေႃႈမီးၼႃႈတႃဢၼ်လုလႄႈၵိုတ်းၸုၵ်းယူႇဢေႃႈ။-
ၼႂ်းသွင်ၵေႃႉၼၼ်ႉၵေႃႉၼိုင်ႈဢၼ်လႆႈၸိုဝ်ႈ ၵလေႃးၽႃႉ၊ ၶိုၼ်းလၢတ်ႈလႄႈဝႃႈ၊ “ၼႂ်းၶႅၵ်ႇၵႃႈဢၼ်မီးယူႇၵႃႈၼႂ်းဝဵင်း ယေႇရုသလႅမ်ႇ၊ လႄႈဢမ်ႇႁုလွင်ႈတၢင်းၸိူဝ်းဢၼ်ပဵၼ်ယူႇၼႂ်းဝဵင်းသွင်သၢမ်ဝၼ်းၼႆႉၼၼ်ႉတေမီးမႂ်းၵေႃႉလဵဝ်ၵူၺ်းယူဝ်း၊” ဝႃႈၼင်ႇၼႆဢေႃႈ။
“ပဵၼ်လွင်ႈတၢင်းၵႃႈသင်၊” ဝႃႈၼႆမၼ်းၸဝ်ႈၶိုၼ်းထၢမ်လႄႈ၊ ၶဝ်ၶိုၼ်းလၢတ်ႈလႄႈဝႃႈ၊ “လွင်ႈတၢင်းဢၼ်ပဵၼ်မႃးတီႈ ၸဝ်ႈယေႇသု၊ ၵူၼ်းဝဵင်း ၼႃႇၸရႅတ်ႈ ၼၼ်ႉဢိူဝ်း။ ၵူၼ်းၵေႃႉၼႆႉပဵၼ်ပရေႃးၽႅတ်ႈ ဢိူဝ်း။ ၸႃႉၸဵမ်ၶေႃႈၵႂၢမ်းမၼ်း၊ဢိၵ်ႇတင်းတၢင်းႁဵတ်းမၼ်းၸိူဝ်းၼၼ်ႉမီးႁႅင်းတၼ်းၶူဝ်းၵႃႈတီႈၽၢႆႇၼႃႈၽြႃးပဵၼ်ၸဝ်ႈ၊ဢိၵ်ႇတင်းၽၢႆႇၼႃႈၵူၼ်းတင်းသဵင်ႈတင်းလူင်ဢေႃႈ။-
ယဵၸ်ႈပရေႃးႁဵၵ်ႈ လူင်ႁဝ်းၶဝ်တင်းၶုၼ်ႁဝ်းတင်းလၢႆဢဝ်မၼ်းၸဝ်ႈဢၢပ်ႈႁႂ်ႈလႆႈၸီႇယၢင်ႇဢဝ်တၢႆလႄႈ ဢဝ်တွၵ်ႇဝႆႉၵႃႈၼိူဝ်သဝ်မႆႉဝႃးမိုဝ်းဢေႃႈ။-
ၵူၺ်းၵႃႈ၊ႁဝ်းမုင်ႈမွင်းဝႃႈမၼ်းၸဝ်ႈပဵၼ်ၵေႃႉဢၼ်တၵ်းထုတ်ႇၼုၵ်ႈဢဝ်ၵူၼ်းမဵဝ်း ဢိသရေး၊ ဢေႃႈ။ လိူဝ်သေၼၼ်ႉဢမ်ႇၵႃး၊လွင်ႈတၢင်းၼႆႉပဵၼ်မႃးၸဵမ်မိူဝ်ႈသိုၼ်းယဝ်ႉဢေႃႈ။-
ၼႆႉၵူၺ်းဢမ်ႇၵႃး၊မႄႈယိင်းဢၼ်ၶဝ်ႈပႃးၼႂ်းၸုမ်းႁဝ်းၸိူဝ်းၼၼ်ႉၵမ်ႈၽွင်ႈႁဵတ်းႁႂ်ႈႁဝ်းၵႂင်ၸႂ်ယုင်ႈၸႂ်လွင်ႈဢၼ်ၶဝ်ၵႂႃႇၵႃႈတီႈပိုင်ႈပႃႇႁဵဝ်ႈၶိင်ႇၵၢင်ၼႂ်ၸဝ်ႉၸဝ်ႉၼႆႉလႄႈ၊-
မိူဝ်ႈဢၼ်ဢမ်ႇလႆႈႁၼ်တူဝ်တၢႆမၼ်းၸဝ်ႈၸိုင်၊ၶိုၼ်းမႃးမွၵ်ႇလၢတ်ႈတီႈႁဝ်းလွင်ႈဢၼ်ၶဝ်လႆႈႁၼ်ရူႇပႃႇရူင်ႇဢၼ်တမၢၼ်ႇၵၢင်ႁၢဝ်တင်းလၢႆပေႃႇမႃးလႄႈဝႃႈ၊မၼ်းၸဝ်ႈဢသၢၵ်ႈလိပ်းယူႇၼၼ်ႉဢေႃႈ။-
ၵူၼ်းႁဝ်းၵမ်ႈၽွင်ႈၵေႃႈၵႂႃႇတူၺ်းၵႃႈတီႈပိုင်ႈပႃႇႁဵဝ်ႈလႄႈထူပ်းႁၼ်မႅၼ်ႈၵႃႈၼင်ႇဢၼ်မႄႈယိင်းၸိူဝ်းၼၼ်ႉမွၵ်ႇလၢတ်ႈၼၼ်ႉဢေႃႈ။ ၼႂ်းဝႃႈၼၼ်သေၵေႃႈ ၶဝ်ဢမ်ႇလႆႈထူပ်းႁၼ်တူဝ်မၼ်းၸဝ်ႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈလၢတ်ႈတီႈၶဝ်လႄႈဝႃႈ၊ “သူၸိူဝ်းၼႆႉငိူဝ်ႈလႄႈဢမ်ႇမီးၺၢၼ်ႇ။ ႁူဝ်ၸႂ်သူၼၵ်းထိူင်းၼႃႇၼႂ်းတၢင်းဢၼ်တၵ်းယုမ်ႇၵႂၢမ်းပရေႃးၽႅတ်ႈတင်းလၢႆႁေႃးလၢတ်ႈဝႆႉၼၼ်ႉဢေႃႈ။-
ၸဝ်ႈၶရိၸ်ႈ၊ တၵ်းလႆႈၶၢမ်ႇဝူၺ်ႇတၼႃႇၸိူဝ်းၼႆႉသေယဝ်ႉ၊တၵ်းလႆႈၶဝ်ႈၸၢမ်ႇၸႃးၵႃႈၼႂ်းမုၼ်သရေႇမၼ်းၸဝ်ႈဢမ်ႇၸႂ်ႈႁိုဝ်း၊” ဝႃႈၼင်ႇၼႆသေယဝ်ႉ၊-
မၼ်းၸဝ်ႈဢဝ်ၸႃႉၸဵမ်ၵျၢမ်း မူဝ်းသေႇ၊ ဢိၵ်ႇတင်းၵျၢမ်းပရေႃးၽႅတ်ႈတင်းလၢႆၽုၺ်ႇဢွၵ်ႇလၢတ်ႈၼႄတြႃးဢၼ်တႅမ်ႈဝႆႉလွင်ႈမၼ်းၸဝ်ႈၵႃႈမီးတင်းသဵင်ႈတင်းလူင်ၼၼ်ႉတီႈၶဝ်ဢေႃႈ။
ၶဝ်ၸမ်ႁွတ်ႈထိုင်ဝၢၼ်ႈဢၼ်ၶဝ်ၵႂႃႇယူႇၼၼ်ႉလႄႈ ၸဝ်ႈယေႇသု၊ ႁဵတ်းၸိူဝ်ႉၼင်ႇႁၢင်ႈတၵ်းပူၼ်ႉၵႂႃႇဢေႃႈ။-
ၶဝ်သွင်ၵေႃႉၼၼ်ႉၵေႃႈႁၢမ်ႈမၼ်းၸဝ်ႈလႄႈဝႃႈ၊ “ၶဝ်ႈမႃးလႄႈယူႇသဝ်းလူၺ်ႈၵၼ်တင်းႁဝ်းၶႃႈသေၵမ်း။ ၵၢင်ဝၼ်းတူၵ်းယဝ်ႉလႄႈလပ်းသိင်ႇမႃးၶႃႈယဝ်ႉ၊” ဝႃႈၼင်ႇၼႆလႄႈမၼ်းၸဝ်ႈၵေႃႈ၊ဝႄႈလိုဝ်ႈသဝ်းတီႈၶဝ်သေဢေႃႈ။-
ယၢမ်းမိူဝ်ႈဢၼ်ၶဝ်ၼင်ႈယူႇၵႃႈတီႈၽိူၼ်ၶဝ်ႈၼၼ်ႉ၊မၼ်းၸဝ်ႈဢဝ်ၶဝ်ႈမုၼ်းလႄႈ ယွင်ႈယေႃးတၢင်ႇၵျေးၸူးၽြႃးပဵၼ်ၸဝ်ႈသေယဝ်ႉ၊ဝိတ်းၶဝ်ႈမုၼ်းလႄႈမႅင်ႇပၼ်ၶဝ်ဢေႃႈ။-
မိူဝ်ႈၼၼ်ႉ၊မၢၵ်ႇတႃၶဝ်ၽုၺ်ႇလႅင်းမႃးလႄႈႁုဝႃႈပဵၼ်မၼ်းၸဝ်ႈဢေႃႈ။ ၵူၺ်းၵႃႈ၊မၼ်းၸဝ်ႈလပ်ႉႁၢႆသေပႃႈၼႃႈၶဝ်ၵႂႃႇဢေႃႈ။-
ၶဝ်ၵေႃႈလၢတ်ႈၸႃၵၼ်လႄႈဝႃႈ၊ “ယၢမ်းမိူဝ်ႈဢၼ်မၼ်းၸဝ်ႈၽုၺ်ႇလၢတ်ႈၼႄၵျၢမ်းတြႃးၽြႃးပဵၼ်ၸဝ်ႈတီႈႁဝ်းၵႃႈၼႂ်းၶၢဝ်းတၢင်းၼၼ်ႉၵႃႈၼႂ်းႁူဝ်ၸႂ်ႁဝ်းၼၼ်ႉတိုၼ်ႇတဵၼ်ႈၼႃႇဢမ်ႇၸႂ်ႈႁိုဝ်း၊” ဝႃႈၼင်ႇၼႆဢေႃႈ။
ၶဝ်သွင်ၵေႃႉၼၼ်ႉလုၵ်ႉၵမ်းလဵဝ်လႄႈ ၶိုၼ်းမိူဝ်းၸူးတီႈဝဵင်း ယေႇရုသလႅမ်ႇ၊ သေယဝ်ႉ၊တီႈၼၼ်ႈလႆႈထူပ်းႁၼ်တမၢၼ်ႇၸဝ်ႈသိပ်းဢဵတ်းပႃး၊ဢိၵ်ႇတင်းၵေႃႉသႄႈၶဝ်တၢင်ႇၵေႃႉၸိူဝ်းၼၼ်ႉၸုတုမ်မီးဝႆႉယူႇလႄႈ၊-
လၢတ်ႈတေႃႇၵၼ်ယူႇလႄႈဝႃႈ၊ “ၸဝ်ႈၽြႃးလုၵ်ႉၶိုၼ်းလိပ်းတႄႉယဝ်ႉ၊မၼ်းၸဝ်ႈပေႃႇမႃးထူပ်းၺႃး သိမုၼ်ႇ၊ ယဝ်ႉ၊” မိူဝ်ႈဢၼ်ယင်းတိုၵ်ႉဝႃႈၼင်ႇၼႆယူႇၼၼ်ႉၸိုင်။
ၶဝ်သွင်ၵေႃႉၼၼ်ႉၵေႃႈမွၵ်ႇလၢတ်ႈၼႄလွင်ႈတၢင်းဢၼ်ပဵၼ်မႃးၵႃႈၼႂ်းၶၢဝ်းတၢင်းၶဝ်၊ဢိၵ်ႇတင်းလွင်ႈဢၼ်ၶဝ်ႁဵတ်းၸိူဝ်ႉၼင်ႇႁိုဝ်ႁုဝႃႈ၊ပဵၼ်မၼ်းၸဝ်ႈၼႂ်းမိူဝ်ႈဢၼ်ဝိတ်းၶဝ်ႈမုၼ်းၼၼ်ႉဢေႃႈ။
ယၢမ်းမိူဝ်ႈဢၼ်ၶဝ်သွင်ၵေႃႉယင်းမွၵ်ႇလၢတ်ႈၶႆႈၼႄယူႇၼၼ်ႉ၊တူဝ်ၸဝ်ႈၽြႃးၼၼ်ႉၸုၵ်းယူႇၵႃႈၼႂ်းၵႄႈၵၢင်ၶဝ်သေယဝ်ႉ၊လၢတ်ႈတီႈၶဝ်လႄႈဝႃႈ၊ “ႁႂ်ႈတၢင်းၼိမ်တႄႇယူႇၵႃႈၼိူဝ်သူသေၵမ်းလူၺ်ႈ၊” ဝႃႈၼင်ႇၼႆဢေႃႈ။
ၶဝ်တူၵ်းၸႂ်လႄႈၵူဝ်ႁႄသၼ်ႇဝႆၼႃႇထၢင်ႇဝႃႈလႆႈႁၼ်ၽဵတ်ႇၽီဢေႃႈ။-
မၼ်းၸဝ်ႈၵေႃႈလၢတ်ႈလႄႈဝႃႈ၊ “ႁဵတ်းသင်လႄႈသူတူၵ်းၸႂ်ထၢၼ်ႇၼႆႉ။ ၵွပ်ႈပိူဝ်ႈသင်လႄႈသူထၢင်ႇၼႂ်းႁူဝ်ၸႂ်သူၸိူဝ်ႉၼင်ႇၼႆ။-
တူၺ်းမိုဝ်းၵဝ်တင်းတိၼ်ၵဝ်သေလႄႈႁုႁၼ်လွင်ႈဢၼ်ပဵၼ်တူဝ်ၵဝ်ၼၼ်ႉတႃႉ။ ယိပ်းၵမ်ၵဝ်တူၺ်းတႃႉ။ ၽဵတ်ႇဢမ်ႇမီးၼိူဝ်ႉမီးလုပ်ႇမိူၼ်ၸိူဝ်ႉၼင်ႇၵဝ်မီးၼႆႉ၊” ဝႃႈၼင်ႇၼႆသေယဝ်ႉ။
ၼႄပျႃးမိုဝ်းၸဝ်ႈ၊ဢိၵ်ႇတင်းတိၼ်ၸဝ်ႈတီႈၶဝ်ဢေႃႈ။
ၵွပ်ႈပိူဝ်ႈဢၼ်လီၸႂ်ၸူမ်းသိူဝ်းၼႃႇ၊ဢိၵ်ႇတင်းလီဢၢမ်းၼႃႇၼၼ်ႉလႄႈၶဝ်ဢမ်ႇပႆႇၸၢင်ႈယုမ်ႇလႆႈ။ မၼ်းၸဝ်ႈၸင်ႇထၢမ်ၶဝ်လႄႈဝႃႈ၊ “ၸွင်ႇသူမီးတၢင်းၵိၼ်သေၸိူဝ်ႉသေပိူင်ႁိူဝ်း၊” ဝႃႈၼင်ႇၼႆလႄႈ၊-
ၶဝ်ဢဝ်ပႃပိင်ႈပွတ်းၼိုင်ႈတင်းႁူင်းၽိုင်ႈ ပၼ်တီႈမၼ်းၸဝ်ႈဢေႃႈ။-
မၼ်းၸဝ်ႈၵေႃႈဢဝ်ၵိၼ်ၵႃႈတီႈၽၢႆႇၼႃႈၶဝ်ဢေႃႈ။
မၼ်းၸဝ်ႈသမ်ႉလၢတ်ႈတီႈၶဝ်ထႅင်ႈလႄႈဝႃႈၸမ်ႉ၊ “လွင်ႈတၢင်းတင်းသဵင်ႈတင်းလူင်ဢၼ်ၵဝ်ႁေႃးလၢတ်ႈတီႈသူၼႂ်းမိူဝ်ႈဢၼ်ၵဝ်ယင်းတိုၵ်ႉမီးယူႇလူၺ်ႈၵၼ်တင်းသူၼၼ်ႉလႄႈဝႃႈ၊ ‘ၵႃႈဢၼ်တႅမ်ႈဝႆႉလွင်ႈၵဝ်ၵႃႈၼႂ်းၵျၢမ်းပိင်းၺၢပ်ႈတြႃး မူဝ်းသေႇ၊ ၵႃႈၼႂ်းၵျၢမ်းဢၼႃႇၵတ်ႉတိပရေႃးၽႅတ်ႈတင်းလၢႆ၊ဢိၵ်ႇတင်းၵႃႈၼႂ်းၵျၢမ်းလိၵ်ႈႁဵတ်းၵႂၢမ်းသႃႇလၢမ်ႇၸိူဝ်းၼၼ်ႉတၵ်းလႆႈပျေႉၸုမ်ႇဢေႃႈ၊’ ဝႃႈၼင်ႇၼႆၼၼ်ႉပဵၼ်လွင်ႈတၢင်းၼႆႉယဝ်ႉ၊” ဝႃႈၼင်ႇၼႆဢေႃႈ။
မၼ်းၸဝ်ႈၽုၺ်ႇမၢၵ်ႇတႃႁူဝ်ၸႂ်ၶဝ်၊ႁႂ်ႈၶဝ်လႆႈႁုထွမ်ႇပွင်ႇလႅင်းၵျၢမ်းလိၵ်ႈယဝ်ႉၸင်ႇ၊-
သမ်ႉလၢတ်ႈတီႈၶဝ်လႄႈဝႃႈ၊ “ၼႂ်းၵျၢမ်းလိၵ်ႈတႅမ်ႈဝႆႉၸိူဝ်ႉၼင်ႇၼႆဢေႃႈ။ ၸဝ်ႈၶရိၸ်ႈ၊ တၵ်းလႆႈၶၢမ်ႇတၢင်းတၢႆလႄႈၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉ၊တၵ်းလႆႈလုၵ်ႉၶိုၼ်းလိပ်းဢေႃႈ။-
လိုၼ်းၼၼ်ႉ၊တြႃးလွင်ႈတၢင်းဢၼ်ၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်၊ဢိၵ်ႇတင်းတြႃးလွင်ႈတၢင်းဢၼ်ပွႆႇလွတ်ႈဢပျတ်ႈၼၼ်ႉ၊တၵ်းလႆႈႁေႃးလၢတ်ႈၸႃႉၸဵမ်ၵႃႈတီႈဝဵင်း ယေႇရုသလႅမ်ႇ၊ တေႃႇထိုင်ႁွတ်ႈၵႃႈတီႈၵူၼ်းမဵဝ်းတင်းသဵင်ႈတင်းလူင်ၵႃႈၼႂ်းၼႃႇမႃႉၸိုဝ်ႈသဵင်မၼ်းၸဝ်ႈဢေႃႈ။-
သူၵေႃႈပဵၼ်သၢၵ်ႈသေႇတီႈလွင်ႈတၢင်းၸိူဝ်းၼႆႉဢေႃႈ။-
ၵဝ်ၸမ်ႉ၊တၵ်းသူင်ႇပၼ်ၵတိပေႃႈၸဝ်ႈၵဝ်ဢၼ်မီးဝႆႉၼၼ်ႉတီႈသူဢေႃႈ။ ပိူဝ်ႈၼႆလႄႈပႂ်ႉထႃႈယူႇၵႃႈၼႂ်းဝဵင်းတေႃႇထိုင်ႁွတ်ႈတၼ်းၶူဝ်းဢၼ်လုၵ်ႉၵႃႈၼိူဝ်ၵၢင်ႁၢဝ်ပုၼ်ႉလူင်းမႃးတီႈသူၼၼ်ႉတႃႉ၊” ဝႃႈၼင်ႇၼႆဢေႃႈ။
လိုၼ်းၼၼ်ႉ၊ ၸဝ်ႈယေႇသု၊ ဢွၼ်ၶဝ်ဢွၵ်ႇၵႂႃႇလႄႈ ၸမ်တေႁွတ်ႈထိုင်ဝၢၼ်ႈ ပေႇထၼိ၊ ယဝ်ႉၸင်ႇ၊ယုၵ်ႉမိုဝ်းမၼ်းၸဝ်ႈတင်းသွင်ၶွၼ်သေယဝ်ႉ၊ပၼ်တၢင်းလီမၢင်ႇၵလႃႇတီႈၶဝ်ဢေႃႈ။-
ၼႂ်းမိူဝ်ႈဢၼ်မၼ်းၸဝ်ႈပၼ်တၢင်းလီယူႇၼၼ်ႉၸိုင်၊မၼ်းၸဝ်ႈၽၢတ်ႇယၢၼ်ၵၼ်တင်းၶဝ်ၵႂႃႇ [လႄႈၶၢမ်ႇတၢင်းဢၼ်ဢဝ်ၶိုၼ်ႈၵႂႃႇၵႃႈၼိူဝ်မိူင်းၵၢင်ႁၢဝ်ပုၼ်ႉ] သေဢေႃႈ။-
ၶဝ်ၵေႃႈၶုပ်ႉဝႆႈၵူဝ်းၵႂၢႆႇမၼ်းၸဝ်ႈသေယဝ်ႉ၊ၶိုၼ်းမိူဝ်းၸူးၵႂႃႇတီႈဝဵင်း ယေႇရုသလႅမ်ႇ၊ လူၺ်ႈတင်းႁူဝ်ၸႂ်ဢၼ်သိူဝ်းပျေႃႇၼႃႇလူင်လၢင်ဢေႃႈ။-
ၶဝ်ဢွၼ်ၵၼ်ၵႂႃႇမီးယူႇၼႂ်းၵျွင်းပိၵ်ႈမၢၼ်ႇၸဝ်ႈသေလႄႈယွင်ႈယေႃးတၢင်ႇၵျေးၸူးၽြႃးပဵၼ်ၸဝ်ႈယူႇသေႇသေႇဢေႃႈ။ ၶၢဝ်ႇတြႃးသိူဝ်းပျေႃႇဢၼ်သြႃႇလုၵႃႇတႅမ်ႈယဝ်ႉယဝ်ႉဢေႃႈ။
မိူဝ်ႈၵေႃႇၸႃႉႁူဝ်ပိုင်းၼၼ်ႉ၊မီးၼုၵ်ႈၵပၢတ်ႈၸဝ်ႈဢေႃႈ။ ၼုၵ်ႈၵပၢတ်ႈၸဝ်ႈၼၼ်ႉ၊မီးလူၺ်ႈၵၼ်တင်းၽြႃးပဵၼ်ၸဝ်ႈလႄႈၼုၵ်ႈၵပၢတ်ႈၸဝ်ႈၼၼ်ႉ၊ပဵၼ်ၽြႃးပဵၼ်ၸဝ်ႈဢေႃႈ။-
မၼ်းၸဝ်ႈၼၼ်ႉ၊မီးယူႇၸဵမ်မိူဝ်ႈႁူဝ်ပိုင်းႁူမ်ႈလူၺ်ႈၵၼ်တင်းၽြႃးပဵၼ်ၸဝ်ႈလႄႈ၊-
ၽြႃးပဵၼ်ၸဝ်ႈၽၢၼ်ႇသၢင်းႁဵတ်းပဵၼ်ၶိူင်ႈပိူင်ၵႃႈမီးတင်းသဵင်ႈတင်းလူင်ဢေႃႈ။ ၶိူင်ႈပိူင်ဢၼ်ၵၢင်းလွတ်ႈသေတၢင်းဢၼ်မၼ်းၸဝ်ႈၽၢၼ်ႇသၢင်းႁဵတ်းပဵၼ်ၼၼ်ႉ၊ဢမ်ႇမီးသေၸိူဝ်ႉသေမဵဝ်းဢေႃႈ။-
ၵႃႈၼႂ်းမၼ်းၸဝ်ႈၼၼ်ႉ၊မီးဢသၢၵ်ႈလႄႈ ဢသၢၵ်ႈၼၼ်ႉ၊သမ်ႉပဵၼ်ဢၼ်လႅင်းတီႈၵူၼ်းတင်းလၢႆဢေႃႈ။-
ဢၼ်လႅင်းၼၼ်ႉၵေႃႈ၊ထွင်ႇႁိူဝ်ႈၼႂ်းဢၼ်လပ်းသိင်ႇလႄႈဢၼ်လပ်းသိင်ႇဢမ်ႇၸၢင်ႈပႄႉၼႅင်ႇမၼ်းလႆႈဢေႃႈ။
ၽြႃးပဵၼ်ၸဝ်ႈၼၼ်ႉ၊ပွႆႇၸႂ်ႉၵူၼ်းၵေႃႉၼိုင်ႈဢၼ်လႆႈၸိုဝ်ႈ ယူဝ်းႁၢၼ်ႇ၊ ၼၼ်ႉမႃးဢေႃႈ။-
ၵေႃႉၼၼ်ႉ၊မႃးႁႂ်ႈပဵၼ်သၢၵ်ႈသေႇသေလႄႈၶၢမ်ႇသၢၵ်ႈသေႇလွင်ႈဢၼ်လႅင်းၸဝ်ႈၼၼ်ႉ၊ႁႂ်ႈၵူၼ်းတင်းသဵင်ႈတင်းလူင်လႆႈဢွၼ်ၵၼ်ယုမ်ႇမၢတ်ႈၵွပ်ႈပိူဝ်ႈမၼ်းဢေႃႈ။-
ယူဝ်းႁၢၼ်ႇ၊ ၼၼ်ႉ၊မၼ်းပဵၼ်ဢၼ်လႅင်းၸဝ်ႈဢမ်ႇၸႂ်ႈ၊မၼ်းမႃးႁႂ်ႈလႆႈၶၢမ်ႇသၢၵ်ႈသေႇလွင်ႈဢၼ်လႅင်းၸဝ်ႈၵူၺ်းဢေႃႈ။-
ဢၼ်လႅင်းဢၼ်ၸိုဝ်ႈဢၼ်ၸႂ်ႈ၊ဢၼ်ထွင်ႇႁိူဝ်ႈတီႈၵူၼ်းၵူႈၵေႃႉၵူႈၵူၼ်းၼၼ်ႉ၊မႃးၼႂ်းလေႃးၵႃႉၼႆႉယူႇယဝ်ႉလႄႈ။
မၼ်းၸဝ်ႈမီးယူႇၼႂ်းလေႃးၵႃႉၼႆႉယဝ်ႉ။ လေႃးၵႃႉၼႆႉၵေႃႈလႆႈၶၢမ်ႇတၢင်းဢၼ်ၽၢၼ်ႇသၢင်းႁဵတ်းပဵၼ်ၵွပ်ႈပိူဝ်ႈမၼ်းၸဝ်ႈယဝ်ႉဢေႃႈ။ ၼႂ်းဝႃႈၼၼ်သေၵေႃႈ၊လေႃးၵႃႉၼႆႉဢမ်ႇႁုၸၵ်းမၼ်းၸဝ်ႈ။-
မၼ်းၸဝ်ႈမႃးၸူးဝၢၼ်ႈမိူင်းမၼ်းၸဝ်ႈသေၵေႃႈ၊ၵူၼ်းမဵဝ်းမၼ်းၸဝ်ႈတင်းလၢႆယင်းဢမ်ႇႁပ်ႉတုင်းဢဝ်မၼ်းၸဝ်ႈလႄႈယူႇဢေႃႈ။-
တီႈၶဝ်ၸိူဝ်းဢၼ်ႁပ်ႉတုင်းဢဝ်မၼ်းၸဝ်ႈလႄႈသမ်ႉယုမ်ႇမၢတ်ႈမၼ်းၸဝ်ႈၸိူဝ်းၼၼ်ႉ၊ၵႃႈမီးတင်းသဵင်ႈတင်းလူင်ၸမ်ႉ၊မၼ်းၸဝ်ႈပၼ်ဢၶႂၢင်ႉတၼ်းၶူဝ်းဢၼ်လႆႈပဵၼ်လုၵ်ႈလၢင်းၽြႃးပဵၼ်ၸဝ်ႈဢေႃႈ။-
ၶဝ်ၸိူဝ်းၼၼ်ႉ၊ပဵၼ်လုၵ်ႈလၢင်းၽြႃးပဵၼ်ၸဝ်ႈမႃးၵွပ်ႈပိူဝ်ႈၵိူတ်ႇလဵင်ႉမႃးၸွမ်းၼင်ႇၸႃႇတိၵူၼ်းဢမ်ႇၸႂ်ႈ။ ပဵၼ်လုၵ်ႈလၢင်းဢၼ်ၵိူတ်ႇလဵင်ႉမႃးၵွပ်ႈပိူဝ်ႈၼိူဝ်ႉလိူတ်ႈၵူၼ်းဢမ်ႇၸႂ်ႈ။ ပဵၼ်လုၵ်ႈလၢင်းဢၼ်ၵိူတ်ႇပဵၼ်မႃးၸွမ်းၼင်ႇဢလူဝ်ႇၵၢင်ၸႂ်ၵူၼ်းၵေႃႈဢမ်ႇၸႂ်ႈ။ ပဵၼ်လုၵ်ႈလၢင်းဢၼ်ၵိူတ်ႇပဵၼ်မႃးၵွပ်ႈလူၺ်ႈၽြႃးပဵၼ်ၸဝ်ႈဢေႃႈ။
ၼုၵ်ႈၵပၢတ်ႈၸဝ်ႈၼၼ်ႉ၊လႆႈမႃးၶၢမ်ႇဢဝ်ၸႃႇတိၵူၼ်းလႄႈပျေႉၸုမ်ႇတင်းၵျေးၸူးၸဝ်ႈ၊ဢိၵ်ႇတင်းသဵတ်ႈၸႃႇၸဝ်ႈသေလႄႈတႄႇယူႇၸွမ်းႁဝ်းဢေႃႈ။ ႁဝ်းၵေႃႈလႆႈႁၼ်မုၼ်ၽုင်းမၼ်းၸဝ်ႈဢၼ်ပဵၼ်ၸိူဝ်ႉၼင်ႇမုၼ်ၽုင်းလုၵ်ႈၸဝ်ႈပႃးလဵဝ်ၵူၺ်းဢၼ်လႆႈမႃးၵႃႈတီႈပေႃႈၸဝ်ႈၼၼ်ႉဢေႃႈ။
သြႃႇ ယူဝ်းႁၢၼ်ႇ၊ ၶၢမ်ႇသၢၵ်ႈသေႇလွင်ႈမၼ်းၸဝ်ႈလႄႈႁွင်ႉပၢဝ်ႇဝႃႈ၊ “ၸဝ်ႈဢၼ်ၵဝ်လၢတ်ႈလႄႈဝႃႈ၊ ‘ၸဝ်ႈဢၼ်မႃးလိုၼ်းလင်ၵဝ်ၼၼ်ႉ၊ယင်းယႂ်ႇမျၢတ်ႈၼႃႇသေၵဝ်ပိူဝ်ႈဢၼ်မၼ်းၸဝ်ႈမီးဝႆႉဢွၼ်တၢင်းၵဝ်ဢမ်ႇပႆႇၵိူတ်ႇၼၼ်ႉဢေႃႈ’ ဝႃႈၼင်ႇၼႆၼၼ်ႉပဵၼ်ၸဝ်ႈၼႆႉယဝ်ႉ၊” ဝႃႈၼင်ႇၼႆဢေႃႈ။
ၵႃႈၼႂ်းတၢင်းဢၼ်ပျေႉၸုမ်ႇမၼ်းၸဝ်ႈၼၼ်ႉ၊ႁဝ်းၵႃႈမီးတင်းသဵင်ႈတင်းလူင်လႆႈႁပ်ႉၶၢမ်ႇဢဝ်မၢင်ႇၵလႃႇၵျေးၸူးၸဝ်ႈမဵဝ်းၼိုင်ႈယဝ်ႉ၊သမ်ႉထၢပ်ႈသႂ်ႇထႅင်ႈမဵဝ်းၼိုင်ႈဢေႃႈ။-
လွင်ႈမၼ်းၸမ်ႉ၊ပိင်းၺၢပ်ႈတြႃးၸိုင်၊ၽြႃးပဵၼ်ၸဝ်ႈပၼ်ၼႂ်းမိုဝ်း မူဝ်းသေႇ၊ ဢေႃႈ။ ၵျေးၸူးတြႃးတင်းသဵတ်ႈၸႃႇတြႃးၸမ်ႉ၊ပဵၼ်မႃးၵွပ်ႈလူၺ်ႈ ၸဝ်ႈယေႇသုၶရိၸ်ႈ၊ ဢေႃႈ။-
ၽူႈလႂ်ဢမ်ႇတွၼ်ႉလႆႈႁၼ်ၽြႃးပဵၼ်ၸဝ်ႈ။ ၼႂ်းဝႃႈၼၼ်သေၵေႃႈ၊လုၵ်ႈၸဝ်ႈပႃးလဵဝ်ၵူၺ်းဢၼ်ႁၵ်ႉပႅင်းၸမ်ၸႂ်ပေႃႈၸဝ်ႈၼၼ်ႉ၊ႁႂ်ႈမၼ်းၸဝ်ႈထၢင်ႇသႃးမႃးဢေႃႈ။
ၼႆႉၸမ်ႉ၊ပဵၼ်လွင်ႈသြႃႇ ယူဝ်းႁၢၼ်ႇ၊ ဢေႃႈ။ မိူဝ်ႈဢၼ်ၶုၼ်ဢႃႇၼႃႇၵူၼ်းမဵဝ်း ၵျူး၊ ၶဝ်၊ဢၼ်မီးၼႂ်းဝဵင်း ယေႇရုသလႅမ်ႇ၊ ပွႆႇၸႂ်ႉယဵၸ်ႈပရေႃးႁဵၵ်ႈ ၶဝ်တင်းၵူၼ်းမဵဝ်း လေႇဝိ၊ တင်းလၢႆ၊ၵႂႃႇၸူးသြႃႇ ယူဝ်းႁၢၼ်ႇ၊ ႁႂ်ႈလႆႈထၢမ်မၼ်းလႄႈဝႃႈ၊ “မႂ်းပဵၼ်ၽူႈလႂ်” ဝႃႈၼင်ႇၼႆၼၼ်ႉဢေႃႈ။
မၼ်းယင်းဢမ်ႇသိူင်ႇဢမ်ႇလပ်ႉလႄႈၶိုၼ်းလၢတ်ႈဝႃႈ၊ “ၵဝ်ဢမ်ႇၸႂ်ႈ ၸဝ်ႈၶရိၸ်ႈ၊ ၵူၺ်း၊” ဝႃႈၼႆၶၢမ်ႇသၢၵ်ႈသေႇလႅင်းလႅင်းဢေႃႈ။
ၶဝ်သမ်ႉထၢမ်လႄႈဝႃႈ၊ “ပေႃးပဵၼ်ၼႆၸိုင်၊မႂ်းပဵၼ်ၽူႈလႂ်။ ပဵၼ် ဢေးလိယႃႉ၊ ႁိုဝ်း၊” ဝႃႈၼင်ႇၼႆလႄႈမၼ်းၶိုၼ်းဝႃႈ၊ “ၵဝ်ဢမ်ႇၸႂ်ႈ၊” ဝႃႈၼင်ႇၼႆဢေႃႈ။ ၶဝ်သမ်ႉၶိုၼ်းထၢမ်ဝႃႈ၊ပဵၼ် “ပရေႃးၽႅတ်ႈ ဢၼ်ၵျၢမ်းလိၵ်ႈလၢတ်ႈဝႆႉၼၼ်ႉႁိုဝ်း၊” ဝႃႈၼႆလႄႈမၼ်းၶိုၼ်းဝႃႈ၊ “ဢမ်ႇၸႂ်ႈၵူၺ်း၊” ဝႃႈၼင်ႇၼႆဢေႃႈ။
ၶဝ်ၸင်ႇလၢတ်ႈလႄႈဝႃႈ၊ “မႂ်းပဵၼ်ၽူႈလႂ်။ ႁဝ်းလူဝ်ႇလႆႈၵႂၢမ်းဢၼ်တေၶိုၼ်းၵႂႃႇၶႆႈၼႄၶဝ်ၸိူဝ်းဢၼ်ပွႆႇၸႂ်ႉႁဝ်းမႃးၼၼ်ႉဢေႃႈ။ မႂ်းမီးလွင်ႈတၢင်းဢၼ်တၵ်းလၢတ်ႈလွင်ႈတူဝ်ၸဝ်ႈၵဝ်ႇၸိူဝ်ႉၼင်ႇႁိုဝ်၊” မိူဝ်ႈဢၼ်ဝႃႈၼင်ႇၼႆၸိုင်။
သြႃႇ ယူဝ်းႁၢၼ်ႇ၊ ၵေႃႈလၢတ်ႈလႄႈဝႃႈ၊ “ၵဝ်ပဵၼ်သဵင်ၵေႃႉဢၼ်ႁွင်ႉပၢဝ်ႇယူႇၵႃႈၼႂ်းထိူၼ်ႇလႅင်ႉလႄႈဝႃႈ၊ ‘ႁႂ်ႈသဵၼ်ႈတၢင်းထႃႇဝရႃႉၽြႃးသိုဝ်ႈတႃႉ၊’ ဢၼ်ဝႃႈမႅၼ်ႈၸွမ်းၵႂၢမ်းပရေႃးၽႅတ်ႈ ဢိသႃႇယႃႉ၊ ႁေႃးလၢတ်ႈဝႆႉၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၶဝ်ၸိူဝ်းဢၼ်မႃးၼၼ်ႉ၊ပဵၼ်ၵူၼ်းၵိူင်း ၽႃႇရိသႄး၊ ၶဝ်ပွႆႇၸႂ်ႉမႃးဢေႃႈ။-
ၶဝ်ၼၼ်ႉသမ်ႉထၢမ်ထႅင်ႈလႄႈဝႃႈ၊ “မႂ်းၼႆႉပဵၼ် ၸဝ်ႈၶရိၸ်ႈ၊ ၵေႃႈဢမ်ႇၸႂ်ႈ။ ဢေးလိယႃႉ၊ ၵေႃႈဢမ်ႇၸႂ်ႈ။ ပဵၼ်ပရေႃးၽႅတ်ႈဢၼ်ၵျၢမ်းလိၵ်ႈလၢတ်ႈဝႆႉၼၼ်ႉၵေႃႈဢမ်ႇၸႂ်ႈ၊ႁဵတ်းသင်လႄႈမႂ်းပၼ်မၢင်ႇၵလႃႇပပ်ႉတိၸမ်ႇ ၼင်ႇႁိုဝ်၊” ဝႃႈၼင်ႇၼႆဢေႃႈ။
သြႃႇ ယူဝ်းႁၢၼ်ႇ၊ ၶိုၼ်းလၢတ်ႈလႄႈဝႃႈ၊ “ၵဝ်ပၼ်မၢင်ႇၵလႃႇပပ်ႉတိၸမ်ႇလူၺ်ႈၼမ်ႉဢေႃႈ။ ၵူၺ်းၵႃႈ၊ၼႂ်းၵႄႈၵၢင်သူမီးၸဝ်ႈပႃးၼိုင်ႈဢၼ်သူဢမ်ႇႁုၸၵ်းၼၼ်ႉဢေႃႈ။-
ပိၵ်ႉသမ်ႉၸဝ်ႈၼၼ်ႉမႃးလိုၼ်းလင်ၵဝ်သေၵေႃႈ၊ၵဝ်ၼႆႉယင်းဢမ်ႇထိူၵ်ႈၵႄႈသၢႆၶႅပ်းတိၼ်ၸဝ်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
လွင်ႈတၢင်းၸိူဝ်းၼႆႉ၊ပဵၼ်ၼႂ်းဝၢၼ်ႈ ပေႇထၼိ၊ ၽၢႆႇပုၼ်ႈၼမ်ႉ ယေႃးတၢၼ်ႇ၊ တီႈဢၼ်သြႃႇ ယူဝ်းႁၢၼ်ႇ၊ ပၼ်မၢင်ႇၵလႃႇပပ်ႉတိၸမ်ႇၼၼ်ႉဢေႃႈ။
ထႅင်ႈဝၼ်းၼိုင်ႈ၊သြႃႇ ယူဝ်းႁၢၼ်ႇ၊ ႁၼ် ၸဝ်ႈယေႇသု၊ မႃးၸူးမၼ်းယူႇလႄႈ၊လၢတ်ႈလႄႈဝႃႈ၊ “တူၺ်းလူး။ ၸဝ်ႈၼၼ်ႉပဵၼ်သူဝ်းဢွၼ်ႇၽြႃးပဵၼ်ၸဝ်ႈ၊ၸဝ်ႈဢၼ်ဢဝ်ဢပျတ်ႈၵူၼ်းလေႃးၵီႇၼႆႉၵႂႃႇၼၼ်ႉယဝ်ႉ။-
ၸဝ်ႈဢၼ်ၵဝ်လၢတ်ႈလႄႈဝႃႈ၊ ‘ၸဝ်ႈဢၼ်မႃးလိုၼ်းလင်ၵဝ်ၼၼ်ႉ၊ယင်းယႂ်ႇမျၢတ်ႈၼႃႇသေၵဝ်၊ပိူဝ်ႈဢၼ်မၼ်းၸဝ်ႈမီးဝႆႉယူႇဢွၼ်တၢင်းၵဝ်ၵိူတ်ႇလဵင်ႉမႃးၼၼ်ႉဢေႃႈ၊’ ဝႃႈၼင်ႇၼႆၼၼ်ႉ၊ပဵၼ်ၸဝ်ႈၼႆႉယဝ်ႉ။-
ၸဝ်ႈၼၼ်ႉ၊ပဵၼ်ၽူႈလႂ်ဝႃႈၼႆၵဝ်ဢမ်ႇလႆႈႁု။ ၼႂ်းဝႃႈၼၼ်သေၵေႃႈ၊ၼင်ႇႁိုဝ်ၸဝ်ႈၼၼ်ႉ တၵ်းလႆႈထၢင်ႇသႃးတီႈၵူၼ်းမဵဝ်း ဢိသရေး၊ ၸိုင်၊ၵဝ်ၸင်ႇမႃးပၼ်မၢင်ႇၵလႃႇပပ်ႉတိၸမ်ႇလူၺ်ႈၼမ်ႉဢေႃႈ၊” ဝႃႈၼင်ႇၼႆဢေႃႈ။
လိူဝ်သေၼၼ်ႉ၊သြႃႇ ယူဝ်းႁၢၼ်ႇ၊ ၶၢမ်ႇသၢၵ်ႈသေႇလႄႈလၢတ်ႈဝႃႈ၊ “ၵဝ်လႆႈႁၼ်ဝိၺိၺ်ႇၸဝ်ႈပဵၼ်ၸိူဝ်ႉၼင်ႇႁၢင်ႈၼူၵ်ႉတူႈဢၼ်လုၵ်ႉသေၵႃႈၼိူဝ်ၵၢင်ႁၢဝ်လူင်းမႃးမီးယူႇၵႃႈၼိူဝ်မၼ်းၸဝ်ႈၼၼ်ႉဢေႃႈ။-
ၸဝ်ႈၼၼ်ႉ၊ပဵၼ်ၽူႈလႂ်ဝႃႈၼႆၵဝ်ယင်းဢမ်ႇပႆႇလႆႈႁု။ ၵူၺ်းၵႃႈ၊ၽြႃးပဵၼ်ၸဝ်ႈဢၼ်ပွႆႇၸႂ်ႉၵဝ်မႃးပၼ်မၢင်ႇၵလႃႇပပ်ႉတိၸမ်ႇလူၺ်ႈၼမ်ႉၼၼ်ႉ၊မီးဢမိင်ႉတီႈၵဝ်လႄႈဝႃႈ၊ ‘မႂ်းတၵ်းလႆႈႁၼ်ဝိၺိၺ်ႇၸဝ်ႈလူင်းမႃးမီးယူႇၼိူဝ်ၵူၼ်းၵေႃႉၼိုင်ႈဢေႃႈ။ ၵေႃႉၼၼ်ႉပဵၼ်ၵေႃႉဢၼ်ပၼ်မၢင်ႇၵလႃႇပပ်ႉတိၸမ်ႇလူၺ်ႈဝိၺိၺ်ႇမူတ်းၸၢင်ႇၸဝ်ႈယဝ်ႉ၊’ ဝႃႈၼႆ၊-
ၵႃႈၼင်ႇဢၼ်ဝႃႈၼၼ်ႉ၊ၵဝ်လႆႈႁၼ်ယဝ်ႉလႄႈၶၢမ်ႇသၢၵ်ႈသေႇလွင်ႈဢၼ်ၸဝ်ႈၼၼ်ႉပဵၼ်လုၵ်ႈၽြႃးပဵၼ်ၸဝ်ႈဢေႃႈ၊” ဝႃႈၼင်ႇၼႆဢေႃႈ။
ဝၢႆးသေၼၼ်ႉထႅင်ႈဝၼ်းၼိုင်ႈ၊သြႃႇ ယူဝ်းႁၢၼ်ႇ၊ ၸုၵ်းယူႇလူၺ်ႈၵၼ်တင်းတပႄးမၼ်းသွင်ၵေႃႉလႄႈ၊-
တူၺ်းႁၼ် ၸဝ်ႈယေႇသု၊ ပႆတၢင်းၵႂႃႇယူႇၼၼ်ႉသေလႄႈလၢတ်ႈဝႃႈ၊ “တူၺ်းသူဝ်းဢွၼ်ႇၽြႃးပဵၼ်ၸဝ်ႈတႃႉ။” ဝႃႈၼင်ႇၼႆဢေႃႈ။
တပႄးမၼ်းသွင်ၵေႃႉၼၼ်ႉ၊လႆႈငိၼ်းၵႂၢမ်းမၼ်းလႄႈၵႂႃႇၸွမ်း ၸဝ်ႈယေႇသု၊ ဢေႃႈ။-
ၸဝ်ႈယေႇသု၊ ဝၢႆႇတူၺ်းလႄႈႁၼ်ၶဝ်ၸွမ်းမႃးယူႇၼၼ်ႉၸင်ႇထၢမ်ဝႃႈ၊ “သူႁႃၵႃႈသင်၊” ဝႃႈၼင်ႇၼႆလႄႈၶဝ်ၶိုၼ်းလၢတ်ႈလႄႈဝႃႈ၊ “ရပ်ႉပိ။ ၸဝ်ႈသြႃႇႁဝ်းယူႇၵႃႈလႂ်ၶႃႈ၊” ဝႃႈၼင်ႇၼႆဢေႃႈ။ (ရပ်ႉပိၼၼ်ႉ၊ပွင်ႇဝႃႈသြႃႇလူင်ဢေႃႈ။)
မၼ်းၸဝ်ႈၵေႃႈလၢတ်ႈလႄႈဝႃႈ၊ “မႃးတူၺ်းတႃႉ၊” ဝႃႈၼင်ႇၼႆလႄႈ၊ၶဝ်ၵေႃႈၵႂႃႇလႄႈလႆႈႁၼ်တီႈယူႇမၼ်းၸဝ်ႈဢေႃႈ။ ပိူဝ်ႈဢၼ်ၶိင်ႇယၢမ်းၼၼ်ႉ၊မီးသီႇမွင်းဝၢႆးဝၼ်းယဝ်ႉလႄႈ ဝၼ်းၼၼ်ႉၶဝ်ယူႇၸွမ်းမၼ်းၸဝ်ႈသေဢေႃႈ။
ၼႂ်းၶဝ်သွင်ၵေႃႉဢၼ်လႆႈငိၼ်းၵႂၢမ်းသြႃႇ ယူဝ်းႁၢၼ်ႇ၊ လႄႈ ၵႂႃႇၸွမ်း ၸဝ်ႈယေႇသု၊ ၼၼ်ႉၵေႃႉၼိုင်ႈၸမ်ႉ၊ပဵၼ် ဢၼ်ႇတရေႇ၊ ၼွင်ႉၸၢႆး သိမုၼ်ႇပေႇတရု၊ ဢေႃႈ။-
မၼ်းၵႂႃႇသွၵ်ႈႁၼ်ပီႈဢၢႆႈမၼ်းဢွၼ်တၢင်းပိူၼ်ႈလႄႈလၢတ်ႈၼႄမၼ်းလႄႈဝႃႈ၊ “ႁဝ်းလႆႈထူပ်းႁၼ် ၸဝ်ႈမေႇသိ၊ ယဝ်ႉ၊” ဝႃႈၼင်ႇၼႆဢေႃႈ။ ( ၸဝ်ႈမေႇသိ၊ ၼၼ်ႉ ပွင်ႇဝႃႈ ၸဝ်ႈၶရိၸ်ႈ၊ ဢေႃႈ)။-
မၼ်းၸင်ႇဢွၼ် သိမုၼ်ႇ၊ ၵႂႃႇၸူး ၸဝ်ႈယေႇသု၊ ဢေႃႈ။ ၸဝ်ႈယေႇသု၊ ယႅၵ်ႉတူၺ်းမၼ်းသေလႄႈလၢတ်ႈဝႃႈ၊ “မႂ်းပဵၼ် သိမုၼ်ႇ၊ လုၵ်ႈၸၢႆး ယူဝ်းၼႃႉ၊ ဢေႃႈ။ ၸိုဝ်ႈသဵင်မႂ်းၸိုင်တၵ်းလႆႈႁွင်ႉဝႃႈ၊ ၵေးၽႃႉ၊ ယဝ်ႉ၊” ဝႃႈၼင်ႇၼႆဢေႃႈ။ ( ၵေးၽႃႉ၊ ၼႆႉ၊ဢထိၵ်ႈပႄႇမၼ်းမိူၼ်ၵၼ်တင်း ပေႇတရု၊ ဢၼ်ပွင်ႇဝႃႈ၊ “မၢၵ်ႇႁိၼ်” ဢေႃႈ။)
ထႅင်ႈဝၼ်းၼိုင်ႈ၊ ၸဝ်ႈယေႇသု၊ မီးဢလူဝ်ႇၶႂ်ႈၵႂႃႇၵႃႈတီႈမိူင်း ၵႃႇလိလႄး၊ ဢေႃႈ။ မၼ်းၸဝ်ႈႁၼ် ၽိလိပ်ႉပု၊ လႄႈလၢတ်ႈဝႃႈ၊ “ၸွမ်းၵဝ်မႃးတႃႉ၊” ဝႃႈၼင်ႇၼႆဢေႃႈ။-
ၽိလိပ်ႉပု၊ ၼၼ်ႉ၊ပဵၼ်ၵူၼ်းဝဵင်း ပႅတ်ႉၸေးတႃႉ၊ မိူၼ်ၵၼ်တင်း ဢၼ်ႇတရေႇ၊ တင်း ပေႇတရု၊ ၶဝ်ဢေႃႈ။-
ၽိလိပ်ႉပု၊ ၵႂႃႇသွၵ်ႈႁၼ် ၼႃႇႀၼေႇလႃႉ၊ လႄႈလၢတ်ႈၼႄမၼ်းလႄႈဝႃႈ၊ “ႁဝ်းလႆႈထူပ်းႁၼ်ၸဝ်ႈဢၼ် မူဝ်းသေႇ၊ တႅမ်ႈဝႆႉလွင်ႈမၼ်းၼႂ်းပိင်းၺၢပ်ႈတြႃး၊ဢိၵ်ႇတင်းပရေႃးၽႅတ်ႈ ၶဝ်တႅမ်ႈဝႆႉၼၼ်ႉယဝ်ႉ။ ၸဝ်ႈၼၼ်ႉ၊ပဵၼ် ၸဝ်ႈယေႇသု၊ ၵူၼ်းဝဵင်း ၼႃႇၸရႅတ်ႈ၊ လုၵ်ႈၸၢႆး ယူဝ်းသႅပ်ႈ၊ ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၼႃႇႀၼေႇလႃႉ၊ ၵေႃႈလၢတ်ႈတီႈမၼ်းလႄႈဝႃႈ၊ “လွင်ႈတၢင်းဢၼ်လီဢၼ်ငၢမ်းသေၸိူဝ်ႉသေပိူင်ၸၢင်ႈပေႃႇမႃးၵႃႈတီႈဝဵင်း ၼႃႇၸရႅတ်ႈ၊ လႆႈႁိုဝ်း၊” ဝႃႈၼင်ႇၼႆလႄႈ၊ ၽိလိပ်ႉပု၊ ၶိုၼ်းလၢတ်ႈလႄႈဝႃႈ၊ “ၸွမ်းမႃးတူၺ်းတႃႉ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ႁၼ် ၼႃႇႀၼေႇလႃႉ၊ မႃးၸူးမၼ်းၸဝ်ႈယူႇၼၼ်ႉသေယဝ်ႉ၊လၢတ်ႈလွင်ႈမၼ်းလႄႈဝႃႈ၊ “တူၺ်းလူး။ ၵေႃႉၼႆႉပဵၼ်ၵူၼ်းမဵဝ်း ဢိသရေး၊ ၸႅတ်ႈၸႅတ်ႈ၊ၵေႃႉဢၼ်ဢမ်ႇမီးတီႈတၵ်းပႅတ်ႉလႅၼ်လႆႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၼႃႇႀၼေႇလႃႉ၊ ၵေႃႈထၢမ်လႄႈဝႃႈ၊ “ၸဝ်ႈႁဝ်းပဵၼ်ၸိူဝ်ႉၼင်ႇႁိုဝ်လႄႈႁုၸၵ်းၵဝ်ၶႃႈတီႈၶႃႈ၊” ဝႃႈၼင်ႇၼႆလႄႈ၊ ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ၸူဝ်ႈဢၼ် ၽိလိပ်ႉပု၊ ဢမ်ႇပႆႇႁွင်ႉဢဝ်မႂ်းမႃးၼၼ်ႉ၊ၵဝ်ႁၼ်မႂ်းမီးယူႇတႂ်ႈတူၼ်ႈမၢၵ်ႇလိူဝ်ႇပုၼ်ႉယဝ်ႉ၊” ဝႃႈၼင်ႇၼႆဢေႃႈ။
ၼႃႇႀၼေႇလႃႉ၊ ၵေႃႈၶိုၼ်းလၢတ်ႈလႄႈဝႃႈ၊ “ၸဝ်ႈသြႃႇႁဝ်းပဵၼ်လုၵ်ႈၽြႃးပဵၼ်ၸဝ်ႈတီႈၶႃႈဢေႃႈ။ ၶုၼ်ႁေႃၶမ်းၵူၼ်းမဵဝ်း ဢိသရေး၊ ၵေႃႈပဵၼ်တီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈသမ်ႉလၢတ်ႈလႄႈဝႃႈ၊ “ပိူဝ်ႈဢၼ်ၵဝ်ဝႃႈ၊ၵဝ်ႁၼ်မႂ်းမီးယူႇတႂ်ႈတူၼ်ႈမၢၵ်ႇလိူဝ်ႇပုၼ်ႉ၊ဝႃႈၼင်ႇၼႆလႄႈမႂ်းၸင်ႇယုမ်ႇႁိုဝ်း။ မႂ်းယင်းတၵ်းလႆႈႁၼ်လွင်ႈတၢင်းဢၼ်ယဵင်ႈၶႅၼ်းယႂ်ႇၼႃႇသေဢၼ်ၼႆႉလူးၵွၼ်ႇဢေႃႈ၊” ဝႃႈၼင်ႇၼႆသေယဝ်ႉ၊-
သမ်ႉလၢတ်ႈတီႈၶဝ်လႄႈဝႃႈ၊ “ၵဝ်ဝႃႈတီႈၸိုဝ်ႈၸႂ်ႈမၼ်းၸမ်ႉ၊သူတၵ်းလႆႈႁၼ်ၵၢင်ႁၢဝ်ၽုၺ်ႇပိုတ်ႇဝႆႉ၊ဢိၵ်ႇတင်းတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈတင်းလၢႆ၊ၶိုၼ်ႈၶိုၼ်ႈလူင်းလူင်းၸူး လုၵ်ႈၵူၼ်း၊ ယူႇၼၼ်ႉဢေႃႈ၊” ဝႃႈၼင်ႇၼႆဢေႃႈ။
ဝၢႆးၼၼ်ႉထႅင်ႈသွင်ဝၼ်း၊မီးပွႆးသွင်ႇမၢင်ႇၵလႃႇၵႃႈၼႂ်းဝဵင်း ၵႃႇၼႃႉ၊ မိူင်း ၵႃႇလိလႄး၊ ပုၼ်ႉလႄႈမႄႈ ၸဝ်ႈယေႇသု၊ ၵေႃႈ၊ၶဝ်ႈပႃးၼႂ်းပၢင်ၶႅၵ်ႇၼၼ်ႉဢေႃႈ။-
ၸဝ်ႈယေႇသု၊ တင်းတပႄးၸဝ်ႈတင်းလၢႆၵေႃႈ၊ၶဝ်ၽိတ်ႈပၢင်းႁွင်ႉၵႂႃႇၵႃႈတီႈပွႆးၼၼ်ႉဢေႃႈ။-
မိူဝ်ႈဢၼ်ၼမ်ႉမၢၵ်ႇၸပိတ်ႉမူတ်းၵႂႃႇၸိုင်၊မႄႈၸဝ်ႈမႃးမွၵ်ႇလၢတ်ႈတီႈမၼ်းၸဝ်ႈလႄႈဝႃႈ၊ “ၼမ်ႉမၢၵ်ႇၸပိတ်ႉၶဝ်မူတ်းၵႂႃႇယဝ်ႉ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “မႄႈ႟။ လွင်ႈဢၼ်ၵဝ်ၶႃႈတၵ်းလႆႈႁဵတ်းၵႃႈသင်ၼၼ်ႉ ဢမ်ႇလူဝ်ႇလၢတ်ႈၶႃႈ။ ဢၶိင်ႇၵဝ်ၶႃႈဢမ်ႇပႆႇႁွတ်ႈထိုင်ၵူၺ်း၊” ဝႃႈၼင်ႇၼႆဢေႃႈ။
မႄႈၸဝ်ႈၵေႃႈ၊လၢတ်ႈတီႈၵူၼ်းၸႂ်ႉၵူၼ်းသွႆၸိူဝ်းၼၼ်ႉလႄႈဝႃႈ၊ “ၵႃႈၼင်ႇဢၼ်မၼ်းၸႂ်ႉသူႁဵတ်းတင်းသဵင်ႈတင်းလူင်ၼၼ်ႉႁဵတ်းၸွမ်းတႃႉ၊” ဝႃႈၼင်ႇၼႆဢေႃႈ။
ပုၼ်ႈတႃႇတေသုၵ်ႈႁႂ်ႈမူတ်းသႂ်ၸွမ်းၼင်ႇထုင်းၸၢမ်ႇၽႃႇသႃႇၵူၼ်းမဵဝ်း ၵျူး၊ ၶဝ်မီးၼၼ်ႉၸိုင်၊ၵႃႈတီႈၼၼ်ႈ မီးမေႃႈႁိၼ်လူင်ႁူၵ်းလုၵ်ႈ၊ယေႈလုၵ်ႈသႂ်ႇလႆႈၼမ်ႉသွင်သၢမ်ႁၢပ်ႇၸမ်ၸမ်ၼၼ်ႉတမ်းဝႆႉဢေႃႈ။-
ၸဝ်ႈယေႇသု၊ ၸႂ်ႉႁႂ်ႈၵူၼ်းၸႂ်ႉၵူၼ်းသွႆၸိူဝ်းၼၼ်ႉ၊တၵ်းၼမ်ႉသႂ်ႇမေႃႈႁႂ်ႈတဵမ်တဵမ်ၵူႈလုၵ်ႈလႄႈၶဝ်ၵေႃႈတၵ်းသႂ်ႇတဵမ်တဵမ်ပဵင်းၶွပ်ႇမေႃႈဝႆႉဢေႃႈ။-
ၸဝ်ႈယေႇသု၊ ႁႂ်ႈၶဝ်တၵ်းဢဝ်ၼမ်ႉၼၼ်ႉၵႂႃႇပၼ်ၵေႃႉဢၼ်ဢုပ်ႉထိင်းၵႃႈၼႂ်းပွႆးဢေႃႈ။ ၶဝ်ၵေႃႈတၵ်းဢဝ်ၼမ်ႉလိပ်းဢၼ်တိုၵ်ႉႁႃပိၼ်ႇပဵၼ်ၼမ်ႉမၢၵ်ႇၸပိတ်ႉယဝ်ႉၼၼ်ႉၵႂႃႇပၼ်လႄႈ၊-
ၵေႃႉၼၼ်ႉၵေႃႈၸိမ်းတူၺ်းဢေႃႈ။ ၼမ်ႉမၢၵ်ႇၸပိတ်ႉၼၼ်ႉ၊ဢဝ်ၵႃႈတီႈလႂ်မႃးၸိုင်၊မၼ်းဢမ်ႇႁု။ (ၵူၼ်းၸွႆႈၵူၼ်းထႅမ်ၸိူဝ်းဢၼ်တၵ်းဢဝ်ၼမ်ႉမႃးၼၼ်ႉၵူၺ်းႁုလွင်ႈၼႆႉဢေႃႈ။) ပိူဝ်ႈၼႆလႄႈမၼ်းႁွင်ႉဢဝ်လုၵ်ႈၶူၺ်မႂ်ႇသေယဝ်ႉ၊-
လၢတ်ႈတီႈမၼ်းလႄႈဝႃႈ၊ “ပိူၼ်ႈၸၢင်ႈဢဝ်ၼမ်ႉမၢၵ်ႇၸပိတ်ႉဢၼ်လီလဵင်ႉလူဢွၼ်တၢင်းလႄႈ မိူဝ်ႈဢၼ်ပီႈၼွင်ႉၶႅၵ်ႇၵိၼ်ဢိမ်ႇတၢၼ်ႇတၢၼ်ႇယဝ်ႉၸင်ႇဢဝ်ၼမ်ႉမၢၵ်ႇၸပိတ်ႉဢၼ်ဢမ်ႇပေႃးလီၼၼ်ႉလဵင်ႉလူဢိူဝ်း။ မႂ်းၸမ်ႉ၊ဢဝ်ၼမ်ႉမၢၵ်ႇၸပိတ်ႉဢၼ်လီသိမ်းဝႆႉတေႃႇႁွတ်ႈမိူဝ်ႈလဵဝ်ၼႆႉယဝ်ႉ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ႁဵတ်းၼႄၼိမိၵ်ႈလၢၵ်ႈၶၼႃႇဢၼ်ၼႆႉဢွၼ်တၢင်းသေပိူၼ်ႈတီႈၼႂ်းဝဵင်း ၵႃႇၼႃႉ၊ မိူင်း ၵႃႇလိလႄး၊ လႄႈႁဵတ်းႁႂ်ႈမုၼ်သရေႇမၼ်းၸဝ်ႈထၢင်ႇသႃးမႃးသေယဝ်ႉ၊တပႄးမၼ်းၸဝ်ႈတင်းလၢႆၵေႃႈယုမ်ႇမၢတ်ႈမၼ်းၸဝ်ႈဢေႃႈ။
လိုၼ်းၼၼ်ႉ ၸဝ်ႈယေႇသု၊ ဢိၵ်ႇတင်းမႄႈၸဝ်ႈတင်းၼွင်ႉၸၢႆးၸဝ်ႈတင်းလၢႆတင်းတပႄးၸဝ်ႈတင်းလၢႆဢွၼ်ၵၼ်လူင်းၵႂႃႇၵႃႈတီႈဝဵင်း ၵပိူဝ်ႇၼေႇဢုမ်ႇ၊ လႄႈ ယူႇၵႃႈတီႈၼၼ်ႈၸူဝ်ႈၶၢဝ်းၼိုင်ႈသေဢေႃႈ။
ၵမ်းၼႆႉ၊ၸမ်ၶိင်ႇပွႆး ပသၶႃႇ၊ ၵူၼ်းမဵဝ်း ၵျူး၊ ၶဝ်ၼၼ်ႉလႄႈ ၸဝ်ႈယေႇသု၊ ၶိုၼ်ႈၵႂႃႇၸူးၵႃႈတီႈဝဵင်း ယေႇရုသလႅမ်ႇ၊ ဢေႃႈ။-
ၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉမၼ်းၸဝ်ႈထူပ်းႁၼ်ပိူၼ်ႈၶၢႆဝူဝ်း၊သူဝ်း၊ၵႃၵႄတင်းလၢႆၵူၺ်းဢမ်ႇၵႃး၊ၵူၼ်းဢၼ်လႅၵ်ႈငိုၼ်းၵိၼ်ၸိူဝ်းၼၼ်ႉၵေႃႈၼင်ႈယူႇၵႃႈတီႈၽိူၼ်ၶဝ်ဢေႃႈ။-
မၼ်းၸဝ်ႈဢဝ်ၸိူၵ်ႈဢွၼ်ႇႁွမ်းၵၼ်မတ်ႉၸပ်းၶွၼ်ႉသေယဝ်ႉ၊ပေႃႉၽတ်ႉလိုပ်ႈႁေႃႈၶဝ်တင်းသဵင်ႈတင်းလူင်ဢွၵ်ႇၵျွင်းပိၵ်ႈမၢၼ်ႇၸဝ်ႈပႅတ်ႈသေလႄႈဢီးၽိူၼ်ၶဝ်ပိၼ်ႈပႅတ်ႈယဝ်ႉၸင်ႇ၊-
လၢတ်ႈတီႈၵူၼ်းၶၢႆၵႃၵႄၸိူဝ်းၼၼ်ႉလႄႈဝႃႈ၊ “ဢဝ်ၶူဝ်းၶွင်ၸိူဝ်းၼႆႉၵႂႃႇတႃႉ။ ယႃႇႁႂ်ႈႁိူၼ်းပေႃႈၵဝ်ၼႆႉပဵၼ်ႁိူၼ်းတီႈၵႃႉၶၢႆ၊” ဝႃႈၼင်ႇၼႆဢေႃႈ။-
တီႈလွင်ႈတၢင်းၼၼ်ႉ တပႄးၸဝ်ႈတင်းလၢႆ ၶုၵ်းၸႂ်လႆႈၵႂၢမ်းၵျၢမ်းလိၵ်ႈဢၼ်ဝႃႈ၊ “တၢင်းဢၼ်ၸႂ်ၵဝ်ၶႃႈၸပ်းၸွႆးလွင်ႈႁိူၼ်းၸဝ်ႈႁဝ်းၼၼ်ႉပဵၼ်ဢၼ်မႆႈႁွၼ်ႉၵႃႈၼႂ်းႁူဝ်ၸႂ်ၵဝ်ၶႃႈဢေႃႈ၊” ဝႃႈၼင်ႇၼႆၼၼ်ႉဢေႃႈ။
မိူဝ်ႈၼၼ်ႉၶုၼ်ဢႃႇၼႃႇၵူၼ်းမဵဝ်း ၵျူး၊ ၶဝ်ၵေႃႈဢဝ်တင်းၵႂၢမ်းထၢမ်လႄႈလၢတ်ႈဝႃႈ၊ “တီႈလွင်ႈတၢင်းဢၼ်မႂ်းႁတ်းႁဵတ်းၸိူဝ်ႉၼင်ႇၼႆၸိုင်၊မႂ်းတၵ်းႁဵတ်းၼႄၼိမိၵ်ႈလၢၵ်ႈၶၼႃႇဢၼ်လႂ်တီႈႁဝ်း၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ယႃႉပႅတ်ႈၵျွင်းပိၵ်ႈမၢၼ်ႇၸဝ်ႈၼႆႉတႃႉ။ ၼႂ်းသၢမ်ဝၼ်းၵဝ်တၵ်းၶိုၼ်းႁဵတ်းႁႂ်ႈယဝ်ႉဢေႃႈ၊” ဝႃႈၼင်ႇၼႆဢေႃႈ။
ၵူၼ်းမဵဝ်း ၵျူး၊ ၸိူဝ်းၼၼ်ႉၵေႃႈလၢတ်ႈလႄႈဝႃႈ၊ “ၵျွင်းပိၵ်ႈမၢၼ်ႇၸဝ်ႈၼႆႉလႆႈႁဵတ်းသီႇသိပ်းပၢႆႁူၵ်းပီဢေႃႈ။ မႂ်းသမ်ႉတၵ်းႁဵတ်းပဵၼ်လႆႈၼႂ်းသၢမ်ဝၼ်းၵူၺ်းဝႃႈၼႆႁိုဝ်း၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ၵျွင်းပိၵ်ႈမၢၼ်ႇၸဝ်ႈဢၼ်မၼ်းၸဝ်ႈလၢတ်ႈၼၼ်ႉၶႂ်ႈဝႃႈတူဝ်မၼ်းၸဝ်ႈဢေႃႈ။-
ပိူဝ်ႈၼႆလႄႈ၊မိူဝ်ႈဢၼ်မၼ်းၸဝ်ႈလုၵ်ႈၵႃႈတၢင်းတၢႆၶိုၼ်းလိပ်းမႃးယဝ်ႉၸင်ႇတပႄးမၼ်းၸဝ်ႈတင်းလၢႆၶိုၼ်းၶုၵ်းၸႂ်လႆႈလွင်ႈတၢင်းဢၼ်မၼ်းၸဝ်ႈလၢတ်ႈဝႆႉၸိူဝ်းၼၼ်ႉသေယဝ်ႉ၊ၶဝ်ၸင်ႇယုမ်ႇမၢတ်ႈၵႂၢမ်းၵျၢမ်းလိၵ်ႈ၊ဢိၵ်ႇတင်းၵႂၢမ်းဢၼ်မၼ်းၸဝ်ႈႁေႃးလၢတ်ႈၸိူဝ်းၼၼ်ႉဢေႃႈ။
ယၢမ်းမိူဝ်ႈဢၼ် ၸဝ်ႈယေႇသု၊ မီးယူႇၼႂ်းဝဵင်း ယေႇရုသလႅမ်ႇ၊ ၸူဝ်ႈၶၢဝ်းပွႆး ပသၶႃႇ၊ ၼၼ်ႉၸိုင်၊ၵူၼ်းၼမ်ၼႃႇယုမ်ႇမၢတ်ႈမၼ်းၸဝ်ႈမႃးၵွပ်ႈပိူဝ်ႈၶဝ်လႆႈႁၼ်ၼိမိၵ်ႈလၢၵ်ႈၶၼႃႇဢၼ်မၼ်းၸဝ်ႈႁဵတ်းၼႄၼမ်ၼႃႇတီႈၶဝ်ၼၼ်ႉဢေႃႈ။-
ၼႂ်းဝႃႈၼၼ်သေၵေႃႈ၊ ၸဝ်ႈယေႇသု၊ ဢမ်ႇဢၢပ်ႈတူဝ်ၸဝ်ႈၵဝ်ႇတီႈၶဝ်။ ၵွပ်ႈပိူဝ်ႈမၼ်းၸဝ်ႈႁုၵူၼ်းတင်းသဵင်ႈတင်းလူင်ဢေႃႈ။-
လွင်ႈမၼ်းၸမ်ႉ၊မၼ်းၸဝ်ႈႁုႁၼ်တပ်းပွတ်ႇႁူဝ်ၸႂ်ၵူၼ်းလႄႈ၊ဢမ်ႇလူဝ်ႇသၢၵ်ႈသေႇသေၵေႃႉသေၵူၼ်းတႃႇတေလၢတ်ႈလွင်ႈၵူၼ်းၼႄမၼ်းၸဝ်ႈၼၼ်ႉဢေႃႈ။
မိူဝ်ႈၼၼ်ႉ၊မီးၵူၼ်းၵေႃႉၼိုင်ႈဢၼ်ၶဝ်ႈပႃးၼႂ်းၵိူင်း ၽႃႇရိသႄး၊ ၶဝ်၊ဢၼ်လႆႈၸိုဝ်ႈ ၼိၵေႃးတိၼ်ႇ၊ ဢၼ်ပဵၼ်ၶုၼ်လုမ်းၵူၼ်းမဵဝ်း ၵျူး၊ ၶဝ်ၼၼ်ႉဢေႃႈ။-
မီးၶိုၼ်းၼိုင်ႈ၊မၼ်းမႃးၸူး ၸဝ်ႈယေႇသု၊ လႄႈလၢတ်ႈဝႃႈ၊ “သြႃႇၸဝ်ႈ၊ႁဝ်းၶႃႈႁုလွင်ႈဢၼ်ၸဝ်ႈႁဝ်းပဵၼ်ၸဝ်ႈသြႃႇလူင်ဢၼ်လုၵ်ႉသေၵႃႈတီႈၽြႃးပဵၼ်ၸဝ်ႈမႃးၼၼ်ႉၶႃႈဢေႃႈ။ ၼိမိၵ်ႈလၢၵ်ႈၶၼႃႇဢၼ်ၸဝ်ႈႁဝ်းႁဵတ်းၼႄၸိူဝ်းၼႆႉ ပေႃးၽြႃးပဵၼ်ၸဝ်ႈယင်းဢမ်ႇပႃးၸွမ်းၸိုင်၊ၽူႈလႂ်သေၵေႃႉသေၵူၼ်းဢမ်ႇႁဵတ်းၼႄလႆႈၶႃႈၵူၺ်း၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ၵဝ်ဝႃႈတီႈၸိုဝ်ႈတီႈၸႂ်ႈမၼ်းတီႈမႂ်းၸမ်ႉ၊ၽူႈလႂ်သေဢမ်ႇဝႃႈ၊ပေႃးဢမ်ႇလႆႈၶၢမ်ႇတၢင်းဢၼ်ၵိူတ်ႇလဵင်ႉမႃးထႅင်ႈပွၵ်ႈၼိုင်ႈၸိုင်၊တေဢမ်ႇလႆႈႁၼ်မိူင်းၽြႃးပဵၼ်ၸဝ်ႈ၊” ဝႃႈၼင်ႇၼႆဢေႃႈ။
ၼိၵေႃးတိၼ်ႇ၊ ၵေႃႈလဝ်ႈလၢတ်ႈလႄႈဝႃႈ၊ “ၵူၼ်းဢၼ်ဢသၢၵ်ႈယႂ်ႇယဝ်ႉၼၼ်ႉ၊တေႁဵတ်းၸိူဝ်ႉၼင်ႇႁိုဝ်ၶိုၼ်းၵိူတ်ႇလဵင်ႉလႆႈထႅင်ႈၶႃႈ။ ၸွင်ႇမၼ်းၸၢင်ႈၶိုၼ်းၶဝ်ႈၵႃႈၼႂ်းတွင်ႉမႄႈမၼ်းထႅင်ႈပွၵ်ႈတီႈသွင်လႄႈၶိုၼ်းၵိူတ်ႇလဵင်ႉမႃးၶႃႈႁိုဝ်း၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ၵဝ်ဝႃႈတီႈၸိုဝ်ႈၸႂ်ႈမၼ်းတီႈမႂ်းၸမ်ႉ၊ၽူႈလႂ်သေဢမ်ႇဝႃႈ၊ပေႃးဢမ်ႇလႆႈၶၢမ်ႇတၢင်းဢၼ်ၵိူတ်ႇလဵင်ႉမႃးလူၺ်ႈၼမ်ႉ၊ဢိၵ်ႇတင်းဝိၺိၺ်ႇၸဝ်ႈၸိုင်၊ဢမ်ႇလႆႈၶဝ်ႈၵႃႈၼႂ်းမိူင်းၽြႃးပဵၼ်ၸဝ်ႈ။-
ဢၼ်ၵိူတ်ႇလဵင်ႉမႃးၵႃႈတီႈၼိူဝ်ႉလိူတ်ႈၼၼ်ႉ၊ပဵၼ်ၼိူဝ်ႉလိူတ်ႈဢေႃႈ။ ဢၼ်ၵိူတ်ႇလဵင်ႉမႃးၵႃႈတီႈဝိၺိၺ်ႇၸဝ်ႈၼၼ်ႉ၊ပဵၼ်ဝိၺိၺ်ႇဢေႃႈ။-
လွင်ႈတၢင်းဢၼ်ၵဝ်လၢတ်ႈလႄႈဝႃႈ၊ ‘တၵ်းလႆႈၶၢမ်ႇတၢင်းဢၼ်ၶိုၼ်းၵိူတ်ႇလဵင်ႉထႅင်ႈ’ ဢၼ်ဝႃႈၼၼ်ႉယႃႇပေဢၢမ်း။-
လူမ်းၸိုင်၊ထူဝ်းၵႂႃႇထူဝ်းမႃးၵႃႈၼင်ႇဢၼ်မၼ်းၶႂ်ႈထူဝ်းၼၼ်ႉယူႇဢေႃႈ။ မႂ်းလႆႈငိၼ်းသဵင်ထူဝ်းမၼ်းသေၵေႃႈ၊မၼ်းလုၵ်ႉသေၵႃႈတီႈလႂ်ထူဝ်းမႃးလႄႈ ထူဝ်းၵႂႃႇၵႃႈတီႈလႂ်ၼၼ်ႉမႂ်းဢမ်ႇႁု။ မိူၼ်ၸိူဝ်ႉၼင်ႇၼၼ်ၵေႃႉဢၼ်ၵိူတ်ႇလဵင်ႉမႃးၵႃႈတီႈဝိၺိၺ်ႇၸဝ်ႈၼၼ်ႉၵေႃႈ၊ပဵၼ်ၸိူဝ်ႉၼင်ႇၼၼ်ယဝ်ႉ၊” ဝႃႈၼင်ႇၼႆဢေႃႈ။
ၼိၵေႃးတိၼ်ႇ၊ သမ်ႉလဝ်ႈလၢတ်ႈထႅင်ႈလႄႈဝႃႈ၊ “လွင်ႈတၢင်းၸိူဝ်းၼႆႉတၵ်းပဵၼ်လႆႈၸိူဝ်ႉၼင်ႇႁိုဝ်ၶႃႈ၊” ဝႃႈၼင်ႇၼႆလႄႈ၊-
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “မႂ်းပဵၼ်သြႃႇလူင်ၼႂ်းၵူၼ်းမဵဝ်း ဢိသရေး၊ တင်းလၢႆယူႇလႄႈ၊ယင်းဢမ်ႇႁုလွင်ႈတၢင်းၼႆႉႁိုဝ်း။-
ၵဝ်ဝႃႈတီႈၸိုဝ်ႈၸႂ်ႈမၼ်းတီႈမႂ်းၸမ်ႉ၊ႁဝ်းလၢတ်ႈလွင်ႈတၢင်းဢၼ်ႁဝ်းလႆႈႁုလႄႈ၊ၶၢမ်ႇသၢၵ်ႈသေႇလွင်ႈတၢင်းဢၼ်ႁဝ်းလႆႈႁၼ်ဢေႃႈ။ ၼႂ်းဝႃႈၼၼ်သေၵေႃႈ၊သူဢမ်ႇႁပ်ႉဢမ်ႇဢဝ်ၵႂၢမ်းသၢၵ်ႈသေႇႁဝ်းလႄႈယူႇဢေႃႈ။-
မိူဝ်ႈဢၼ်ၵဝ်မွၵ်ႇလၢတ်ႈသူလွင်ႈၶိူင်ႈပိူင်လေႃးၵႃႉလႄႈပေႃးသူယင်းဢမ်ႇယုမ်ႇၸိုင်၊မိူဝ်ႈဢၼ်ၵဝ်မွၵ်ႇလၢတ်ႈလွင်ႈၶိူင်ႈပိူင်မိူင်းၵၢင်ႁၢဝ်ၸိုင်၊သူတေယုမ်ႇလႆႈၸိူဝ်ႉၼင်ႇႁိုဝ်။-
ၼွၵ်ႈသေ လုၵ်ႈၵူၼ်း၊ ဢၼ်လုၵ်ႉသေၵႃႈတီႈမိူင်းၵၢင်ႁၢဝ်လူင်းမႃးၼၼ်ႉ၊ဢမ်ႇမီးၽူႈလႂ်ၶိုၼ်ႈၵႂႃႇၵႃႈၼိူဝ်မိူင်းၵၢင်ႁၢဝ်ၵႂႃႇသေၵေႃႉသေၵူၼ်းဢေႃႈ။
“ၸိူဝ်ႉၼင်ႇဢၼ် မူဝ်းသေႇ၊ ယုၵ်ႉငူးဝႆႉ၊ၵႃႈၼႂ်းထိူၼ်ႇၼၼ်ႉ၊ လုၵ်ႈၵူၼ်း၊ တၵ်းလႆႈၶၢမ်ႇတၢင်းဢၼ်ယုၵ်ႉဝႆႉ၊-
ပုၼ်ႈလွင်ႈၼင်ႇႁိုဝ်ၶဝ်ၸိူဝ်းဢၼ်ယုမ်ႇမၢတ်ႈမၼ်းၸဝ်ႈၵူႈၵေႃႉၼၼ်ႉ၊တၵ်းလႆႈဢသၢၵ်ႈထႃႇဝရႃႉဢေႃႈ၊” ဝႃႈၼင်ႇၼႆဢေႃႈ။-
လွင်ႈမၼ်းၸမ်ႉ၊ၽြႃးပဵၼ်ၸဝ်ႈႁၵ်ႉၵူၼ်းလေႃးၵီႇတင်းလၢႆၼႃႇလူင်လၢင်ထၢၼ်ႈပေႃးၸုၼ်ႉပႅတ်ႈလုၵ်ႈၸၢႆးၵေႃႉလဵဝ်ဢၼ်မၼ်းၸဝ်ႈမီးၼၼ်ႉ၊ပုၼ်ႈလွင်ႈၼင်ႇႁိုဝ်ၶဝ်ၸိူဝ်းဢၼ်ယုမ်ႇမၢတ်ႈမၼ်းၸဝ်ႈၵူႈၵေႃႉၵူႈၵူၼ်း၊တၵ်းဢမ်ႇလႆႈႁွတ်ႈထိုင်တၢင်းလုတၢင်းလႅဝ်လႄႈတၵ်းလႆႈဢသၢၵ်ႈထႃႇဝရႃႉၼၼ်ႉဢေႃႈ။-
ၽြႃးပဵၼ်ၸဝ်ႈပွႆႇၸႂ်ႉလုၵ်ႈၸဝ်ႈမႃးၼႂ်းလေႃးၵႃႉၼႆႉ၊ႁႂ်ႈလႆႈၸီႇယၢင်ႇဢပျတ်ႈတီႈၵူၼ်းလေႃးၵီႇတင်းလၢႆဢမ်ႇၸႂ်ႈ။ ပွႆႇၸႂ်ႉမႃးႁႂ်ႈၶဝ်လႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်လူၺ်ႈမၼ်းၸဝ်ႈဢေႃႈ။
ၵေႃႉဢၼ်ယုမ်ႇမၢတ်ႈမၼ်းၸဝ်ႈၼၼ်ႉ၊တၵ်းဢမ်ႇလႆႈၶၢမ်ႇတၢင်းဢၼ်ၸီႇယၢင်ႇပၼ်တၢမ်ႇဢပျတ်ႈ။ ၵေႃႉဢၼ်ဢမ်ႇယုမ်ႇမၢတ်ႈၸမ်ႉ၊လႆႈၶၢမ်ႇတၢင်းဢၼ်ၸီႇယၢင်ႇပၼ်တၢမ်ႇဢပျတ်ႈယဝ်ႉယဝ်ႉ၊ၵွပ်ႈပိူဝ်ႈမၼ်းဢမ်ႇယုမ်ႇမၢတ်ႈလုၵ်ႈၸဝ်ႈသူႇလဵဝ်ၼၼ်ႉဢေႃႈ။-
လွင်ႈတၢင်းဢၼ်ၸီႇယၢင်ႇပၼ်တၢမ်ႇဢပျတ်ႈဢၼ်ဝႃႈၼၼ်ႉၸမ်ႉ၊ဢၼ်လႅင်းၶဝ်ႈမႃးၵႃႈၼႂ်းလေႃးၵႃႉၼႆႉယဝ်ႉ၊ၵွပ်ႈပိူဝ်ႈၵူၼ်းတင်းလၢႆၵမ်ၵျၢင်ႉဢၼ်ႁၢႆႉဢၼ်ႁုၵ်းလႄႈယင်းၵျိူၵ်ႈႁၵ်ႉဢၼ်လပ်းသိင်ႇၼႃႇသေဢၼ်လႅင်းယူႇၼၼ်ႉဢေႃႈ။-
ၶဝ်ၸိူဝ်းဢၼ်ၵမ်ၵျၢင်ႉဢၼ်ႁၢႆႉဢၼ်ႁုၵ်းၼၼ်ႉ၊ၸင်းဢၼ်လႅင်းလႄႈ ၶဝ်ဢမ်ႇမႃးၸူးဢၼ်လႅင်း၊ၵွပ်ႈပိူဝ်ႈၶဝ်ၵူဝ်ဢၼ်ႁၢႆႉဢၼ်ႁုၵ်းၶဝ်တၵ်းပေႃႇဢွၵ်ႇထၢင်ႇသႃးမႃးၼၼ်ႉဢေႃႈ။-
ၶဝ်ၸိူဝ်းဢၼ်ၵမ်ၵျၢင်ႉဢၼ်ၸိုဝ်ႈဢၼ်ၸႂ်ႈၸမ်ႉ၊မႃးၸူးၵႃႈၼႂ်းဢၼ်လႅင်းယူႇ၊ၼင်ႇႁိုဝ်တၢင်းၵမ်ၵျၢင်ႉဢၼ်မႅၼ်ႈၵၼ်တင်းဢလူဝ်ႇၽြႃးပဵၼ်ၸဝ်ႈ၊တၵ်းလႆႈပေႃႇဢွၵ်ႇထၢင်ႇသႃးမႃးၼၼ်ႉဢေႃႈ။
ဝၢႆးသေၼၼ်ႉ၊ ၸဝ်ႈယေႇသု၊ တင်းတပႄးမၼ်းၸဝ်ႈတင်းလၢႆ၊ၵႂႃႇၸူးၵႃႈတီႈမိူင်း ယုတႃႉ၊ ယဝ်ႉၸင်ႇ၊ယူႇလူၺ်ႈၵၼ်တင်းၶဝ်ၵႃႈတီႈၼၼ်ႈလႄႈပၼ်မၢင်ႇၵလႃႇပပ်ႉတိၸမ်ႇ ယူႇဢေႃႈ။-
သြႃႇ ယူဝ်းႁၢၼ်ႇ၊ ၵေႃႈပၼ်မၢင်ႇၵလႃႇပပ်ႉတိၸမ်ႇယူႇၵႃႈတီႈ ဢေႇၼုၼ်ႇ၊ တီႈဢၼ်ၸမ်ဝဵင်း သႃႇလိမ်း၊ ၼၼ်ႉ၊ၵွပ်ႈပိူဝ်ႈတီႈၼၼ်ႈမီးၼမ်ႉၼမ်ၼႃႇဢေႃႈ။ ၵူၼ်းတင်းလၢႆဢွၼ်ၵၼ်ၵႂႃႇၸူးၵႃႈတီႈမၼ်းလႄႈ၊မၼ်းၵေႃႈပၼ်မၢင်ႇၵလႃႇပပ်ႉတိၸမ်ႇတီႈၶဝ်ဢေႃႈ။-
ၽွင်းယၢမ်းၼၼ်ႉသြႃႇ ယူဝ်းႁၢၼ်ႇ၊ ဢမ်ႇပႆႇလႆႈတူၵ်းထွင်ႇ။
တပႄးသြႃႇ ယူဝ်းႁၢၼ်ႇ၊ ၵမ်ႈၽွင်ႈလႆႈထဵင်ၵၼ်တင်းၵူၼ်းမဵဝ်း ၵျူး၊ ၵေႃႉၼိုင်ႈလူၺ်ႈလွင်ႈဢၼ်မူတ်းသႂ်ၸွမ်းၼင်ႇထုင်းၸၢမ်ႇၽႃႇသႃႇတြႃးၼၼ်ႉဢေႃႈ။-
ပိူဝ်ႈၼႆလႄႈၶဝ်ၵႂႃႇၸူးသြႃႇ ယူဝ်းႁၢၼ်ႇ၊ လႄႈမွၵ်ႇလၢတ်ႈဝႃႈ၊ “သြႃႇႁဝ်း။ ၸဝ်ႈဢၼ်မီးယူႇလူၺ်ႈၵၼ်တင်းသြႃႇႁဝ်းၽၢႆႇပုၼ်ႉၼမ်ႉ ယေႃးတၢၼ်ႇ၊ လႄႈသြႃႇႁဝ်းၵႆႉလၢတ်ႈလွင်ႈမၼ်းၼၼ်ႉမႃးမီးယူႇၵႃႈတီႈၼႆႈသေပၼ်မၢင်ႇၵလႃႇပပ်ႉတိၸမ်ႇယူႇၶႃႈဢေႃႈ။ ၵူၼ်းတင်းသဵင်ႈတင်းလူင်ၵေႃႈ ႁွတ်ႈမႃးၵႃႈတီႈမၼ်းၼၼ်ႉၶႃႈဢေႃႈ၊” ဝႃႈၼင်ႇၼႆဢေႃႈ။
သြႃႇ ယူဝ်းႁၢၼ်ႇ၊ ၵေႃႈလၢတ်ႈလႄႈဝႃႈ၊ “ၵေႃႉလႂ်ၵူၼ်းလႂ်သေဢမ်ႇဝႃႈ၊ပေႃးဢမ်ႇလႆႈလုၵ်ႉသေၵႃႈတီႈမိူင်းၵၢင်ႁၢဝ်ၼၼ်ႉပၼ်မႃးၸိုင်၊မၼ်းဢမ်ႇၸၢင်ႈလႆႈႁပ်ႉၶၢမ်ႇဢဝ်ၵႃႈသင်ဢေႃႈ။-
သူၶၢမ်ႇသၢၵ်ႈသေႇပၼ်ၵႂၢမ်းဢၼ်ၵဝ်လၢတ်ႈဝႃႈ၊ၵဝ်ဢမ်ႇၸႂ်ႈ ၸဝ်ႈၶရိၸ်ႈ၊ ၵူၺ်းၵႃႈ၊ပဵၼ်ၵေႃႉဢၼ်လႆႈၶၢမ်ႇတၢင်းဢၼ်ပွႆႇၸႂ်ႉမႃးဢွၼ်တၢင်း ၸဝ်ႈၶရိၸ်ႈ၊ ဝႃႈၼႆၼၼ်ႉဢေႃႈ။-
ၵေႃႉဢၼ်သွင်ႇမၢင်ႇၵလႃႇလူၺ်ႈၵၼ်တင်းလုၵ်ႈပႂ်ႉမႂ်ႇၼၼ်ႉပဵၼ်လုၵ်ႈၶူၺ်မႂ်ႇဢေႃႈ။ ၵေႃႉသႄႈဢၼ်ယူႇၸမ်ႁိမ်းလုၵ်ႈၶူၺ်မႂ်ႇလႄႈငိၼ်းၵႂၢမ်းမၼ်းယူႇၼၼ်ႉလႆႈသိူဝ်းပျေႃႇၼႃႇလူင်လၢင်၊ပိူဝ်ႈဢၼ်လႆႈငိၼ်းသဵင်လုၵ်ႈၶူၺ်မႂ်ႇၼၼ်ႉဢေႃႈ။ တၢင်းဢၼ်သိူဝ်းပျေႃႇၵဝ်ၼႆႉလႆႈပျေႉၸုမ်ႇဝႆႉမိူၼ်ၸိူဝ်ႉၼင်ႇၼၼ်ယဝ်ႉ။-
ၸဝ်ႈၼၼ်ႉတၵ်းလႆႈၶိုၼ်ႈယႂ်ႇမႃးလႄႈ၊ၵဝ်တႄႉ၊တၵ်းလႆႈသုတ်ႉယွမ်းၵႂႃႇဢေႃႈ၊” ဝႃႈၼင်ႇၼႆဢေႃႈ။
ၸဝ်ႈဢၼ်လုၵ်ႉသေၵႃႈတီႈမိူင်းၵၢင်ႁၢဝ်ၵျွလူင်းမႃးၼၼ်ႉပဵၼ်ၸိၵ်းပဵၼ်ၸွမ်ပိူၼ်ႈတင်းသဵင်ႈတင်းလူင်ဢေႃႈ။ ၵေႃႉဢၼ်ပဵၼ်မႃးၵႃႈတီႈလိၼ်မိူင်းၼႆႉၸိုင်၊ၸၢပ်ႈသႅင်ႇၵၼ်တင်းလိၼ်မိူင်းလႄႈ ၸၢင်ႈလၢတ်ႈလွင်ႈလိၼ်မိူင်းဢေႃႈ။ ၸဝ်ႈဢၼ်လုၵ်ႉသေၵႃႈတီႈၼိူဝ်မိူင်းၵၢင်ႁၢဝ်ၵျွမႃးၼၼ်ႉ၊ပဵၼ်ၸိၵ်းပဵၼ်ၸွမ်ပိူၼ်ႈတင်းသဵင်ႈတင်းလူင်ဢေႃႈ။-
ၸဝ်ႈၼၼ်ႉၶၢမ်ႇသၢၵ်ႈသေႇလွင်ႈတၢင်းၵႃႈၼင်ႇဢၼ်မၼ်းၸဝ်ႈလႆႈႁၼ်လႆႈငိၼ်းၵႃႈမီးသေၵေႃႈ၊ၽူႈလႂ်သေၵေႃႉသေၵူၼ်းဢမ်ႇႁပ်ႉတုင်းဢဝ်ၵႂၢမ်းသၢၵ်ႈသေႇမၼ်းၸဝ်ႈ။-
ၵေႃႉဢၼ်ႁပ်ႉတုင်းဢဝ်ၵႂၢမ်းသၢၵ်ႈသေႇမၼ်းၸဝ်ႈၼၼ်ႉၵေႃႈ၊လႆႈတွၵ်ႇၸုမ်ႈဝႆႉဝႃႈ၊ၽြႃးပဵၼ်ၸဝ်ႈပဵၼ်ၽြႃးဢၼ်ပႂ်ႉသဵတ်ႈၸႃႇဢေႃႈ။-
ၸဝ်ႈဢၼ်ၽြႃးပဵၼ်ၸဝ်ႈပွႆႇၸႂ်ႉမႃးၼၼ်ႉၸၢင်ႈလၢတ်ႈၵႂၢမ်းၽြႃးပဵၼ်ၸဝ်ႈ၊ၵွပ်ႈပိူဝ်ႈၽြႃးပဵၼ်ၸဝ်ႈပၼ်ဝိၺိၺ်ႇၸဝ်ႈဢၼ်ဢမ်ႇမီးတီႈတႅၵ်ႈတီႈတိူင်းၼၼ်ႉဢေႃႈ။-
ပေႃႈၸဝ်ႈႁၵ်ႉလုၵ်ႈၸဝ်ႈလႄႈ ဢဝ်ၵႃႈမီးတင်းသဵင်ႈတင်းလူင်ဢၢပ်ႈပၼ်ၼႂ်းမိုဝ်းမၼ်းၸဝ်ႈဢေႃႈ။-
ၵေႃႉဢၼ်ယုမ်ႇမၢတ်ႈလုၵ်ႈၸဝ်ႈၼၼ်ႉလႆႈဢသၢၵ်ႈထႃႇဝရႃႉဢေႃႈ။ ၵေႃႉဢၼ်ဢမ်ႇထွမ်ႇဢဝ်လုၵ်ႈၸဝ်ႈၸမ်ႉ၊တၵ်းဢမ်ႇလႆႈထူပ်းဢသၢၵ်ႈဢမ်ႇၵႃး၊ယင်းတၵ်းမီးယူႇတႂ်ႈဢပျတ်ႈတၢမ်ႇဢၼ်ၽြႃးပဵၼ်ၸဝ်ႈတၵ်းပၼ်ၼၼ်ႉဢေႃႈ။
ၵူၼ်းၵိူင်း ၽႃႇရိသႄး၊ ၶဝ်လႆႈငိၼ်းလွင်ႈဢၼ် ၸဝ်ႈယေႇသု၊ ႁႂ်ႈၵူၼ်းၼမ်ၼႃႇၶဝ်ႈပဵၼ်တပႄးၸဝ်ႈမႃးလႄႈပၼ်မၢင်ႇၵလႃႇပပ်ႉတိၸမ်ႇၼမ်ၼႃႇသေသြႃႇ ယူဝ်းႁၢၼ်ႇ၊ ဢေႃႈ။-
( ၸဝ်ႈယေႇသု၊ ၸိုင်၊တူဝ်မၼ်းၸဝ်ႈယင်းဢမ်ႇပၼ်မၢင်ႇၵလႃႇပပ်ႉတိၸမ်ႇတီႈၽူႈလႂ်သေၵေႃႉသေၵူၼ်း။ တပႄးမၼ်းၸဝ်ႈၸိူဝ်းၼၼ်ႉၵူၺ်းပၼ်ဢေႃႈ)။-
မိူဝ်ႈဢၼ် ၸဝ်ႈယေႇသု၊ ငိၼ်းလွင်ႈၸိူဝ်းၼၼ်ႉၸိုင်၊မၼ်းၸဝ်ႈဢွၵ်ႇသေၵႃႈတီႈမိူင်း ယုတႃႉ၊ သေလႄႈမိူဝ်းၵႂႃႇၵႃႈတီႈမိူင်း ၵႃႇလိလႄး၊ ၶိုၼ်းသေဢေႃႈ။-
ၼႂ်းသဵၼ်ႈတၢင်းမၼ်းၸဝ်ႈၼၼ်ႉလႆႈလတ်းၶဝ်ႈမိူင်း သမႃႇရိ၊ ၵႂႃႇဢေႃႈ။
ၵႃႈၼႂ်းမိူင်း သမႃႇရိ၊ ၼၼ်ႉ၊မၼ်းၸဝ်ႈႁွတ်ႈထိုင်ၵႂႃႇၵႃႈတီႈဝဵင်းၼိုင်ႈဢၼ်ႁွင်ႉဝႃႈ၊ဝဵင်း သုၶႃႇ၊ ဝဵင်းဢၼ်ၸမ်ၵၼ်တင်းၵႂၢၵ်ႈလိၼ်ဢၼ် ယႃႇၵုပ်ႈ၊ ပၼ်လုၵ်ႈၸၢႆးမၼ်း ယူဝ်းသႅပ်ႈ၊ ၼၼ်ႉဢေႃႈ။-
ၵႃႈတီႈၼၼ်ႈ၊မီးၼမ်ႉမေႃႇ ယႃႇၵုပ်ႈ၊ ဢေႃႈ။ ပိူဝ်ႈဢၼ်မၼ်းၸဝ်ႈႁိူဝ်ႉၼႃႇၼႂ်းၶၢဝ်းတၢင်းလႄႈၼင်ႈယူႇႁိမ်းၼမ်ႉမေႃႇၼၼ်ႉဢေႃႈ။ ၽွင်းယၢမ်းၼၼ်ႉပဵၼ်ၶိင်ႇၵၢင်ဝၼ်းတဵင်ႈဢေႃႈ။
မႄႈယိင်း သမႃႇရိ၊ ၵေႃႉၼိုင်ႈမႃးတဵၵ်းၼမ်ႉလႄႈ ၸဝ်ႈယေႇသု၊ လၢတ်ႈတီႈမၼ်းလႄႈဝႃႈ၊ “တၵ်းၼမ်ႉပၼ်ၵဝ်ၵိၼ်သေၵမ်း၊” ဝႃႈၼင်ႇၼႆဢေႃႈ။-
မိူဝ်ႈယၢမ်းၼၼ်ႉ၊တပႄးၸဝ်ႈတင်းလၢႆယင်းတိုၵ်ႉၶဝ်ႈၵႂႃႇၵႃႈၼႂ်းဝဵင်းႁႂ်ႈလႆႈသိုဝ်ႉတၢင်းၵိၼ်ယူႇဢေႃႈ။
မႄႈယိင်း သမႃႇရိ၊ ၼၼ်ႉၵေႃႈလၢတ်ႈလႄႈဝႃႈ၊ “ၸဝ်ႈပဵၼ်ၵူၼ်းမဵဝ်း ၵျူး၊ လႄႈယွၼ်းၼမ်ႉၵိၼ်တီႈၵဝ်ၶႃႈဢၼ်ပဵၼ်မႄႈယိင်း သမႃႇရိ၊ ၼႆႉ၊တေပဵၼ်လႆႈၸိူဝ်ႉၼင်ႇႁိုဝ်ၶႃႈ၊” ဝႃႈၸိူဝ်ႉၼင်ႇၼႆၵွပ်ႈပိူဝ်ႈၵူၼ်းမဵဝ်း ၵျူး၊ ၶဝ်ဢမ်ႇမီးလွင်ႈတၢင်းဢၼ်ႁဵတ်းၵေႃႉႁဵတ်းသႄႈလူၺ်ႈၵၼ်တင်းၵူၼ်းမဵဝ်း သမႃႇရိ၊ ၶဝ်ၼၼ်ႉဢေႃႈ။
ၸဝ်ႈယေႇသု၊ သမ်ႉလၢတ်ႈလႄႈဝႃႈ၊ “ပေႃးမႂ်းႁုလွင်ႈဢၼ်ၽြႃးပဵၼ်ၸဝ်ႈပၼ်ၵျေးၸူးဢၼ်လႂ်၊ဢိၵ်ႇတင်းၵေႃႉဢၼ်ယွၼ်းၵိၼ်ၼမ်ႉတီႈမႂ်းၼႆႉ၊ပဵၼ်ၽူႈလႂ်ၸိုင်၊မႂ်းတေယွၼ်းတီႈမၼ်းလႄႈ မၼ်းၵေႃႈတၵ်းပၼ်ၼမ်ႉဢသၢၵ်ႈတီႈမႂ်းဢေႃႈ၊” ဝႃႈၼင်ႇၼႆဢေႃႈ။
မႄႈယိင်းၼၼ်ႉၵေႃႈလၢတ်ႈလႄႈဝႃႈ၊ “ၸဝ်ႈ။ တီႈၸဝ်ႈႁဝ်းၼႆႉ၊ယင်းဢမ်ႇမီးၵႃႈသင်ပုၼ်ႈတႃႇတေတၵ်းၼမ်ႉ။ ၼမ်ႉမေႃႇၼႆႉၵေႃႈလိုၵ်ႉၼႃႇဢေႃႈ။ တေဢဝ်ၼမ်ႉဢသၢၵ်ႈၵႃႈတီႈလႂ်မႃးလႆႈၶႃႈ။-
ပူႇပေႃႈႁဝ်း ယႃႇၵုပ်ႈ၊ ၶုတ်းၼမ်ႉမေႃႇၼႆႉ၊ပၼ်ႁဝ်းၶႃႈလႄႈၸႃႉၸဵမ်တူဝ်မၼ်း၊ဢိၵ်ႇတင်းလုၵ်ႈလၢင်းမၼ်း၊တင်းၽုင်သူဝ်းၽုင်ဝူဝ်းမၼ်းတင်းလၢႆ လႆႈၵိၼ်ၼမ်ႉၵႃႈၼႂ်းၼမ်ႉမေႃႇၼႆႉဢေႃႈ။ ၸဝ်ႈႁဝ်းၼႆႉယဵင်ႈၶႅၼ်းယႂ်ႇမျၢတ်ႈၼႃႇသေ ယႃႇၵုပ်ႈ၊ ဝႃႈၼႆ၊ၸဝ်ႈႁဝ်းၶႂ်ႈဝႃႈၸိူဝ်ႉၼင်ႇၼႆၶႃႈႁိုဝ်း၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ၵူႈၵေႃႉၵူႈၵူၼ်းဢၼ်ၵိၼ်ၼမ်ႉၼႆႉၼၼ်ႉ၊တၵ်းၶိုၼ်းတွင်ႉမႆႈၼမ်ႉထႅင်ႈလူးၵွၼ်ႇဢေႃႈ။-
ၵေႃႉဢၼ်ၵိၼ်ၼမ်ႉဢၼ်ၵဝ်တၵ်းပၼ်ၼႆႉၼၼ်ႉၸမ်ႉ၊တၵ်းဢမ်ႇၶိုၼ်းတွင်ႉမႆႈၼမ်ႉထႅင်ႈသေပွၵ်ႈ။ ၼမ်ႉဢၼ်ၵဝ်တၵ်းပၼ်ၼႆႉ၊ၵႃႈတီႈတူဝ်ၵေႃႉၼၼ်ႉ တၵ်းပဵၼ်ၼမ်ႉဢၼ်ပုၼ်းဢွၵ်ႇယူႇ၊ပုၼ်ႈလွင်ႈၼင်ႇႁိုဝ်တၵ်းပဵၼ်ထႃႇဝရႃႉဢသၢၵ်ႈဢေႃႈ၊” ဝႃႈၼင်ႇၼႆဢေႃႈ။
မႄႈယိင်းၼၼ်ႉၵေႃႈယွၼ်းလႄႈဝႃႈ၊ “ၸဝ်ႈ။ ၼင်ႇႁိုဝ်ၵဝ်ၶႃႈတေဢမ်ႇတွင်ႉမႆႈၼမ်ႉထႅင်ႈလႄႈ ၵဝ်ၶႃႈတေဢမ်ႇလူဝ်ႇမႃးတၵ်းၼမ်ႉၵႃႈတီႈၼႆႈထႅင်ႈၸိုင်၊ပၼ်ၼမ်ႉၼၼ်ႉတီႈၵဝ်ၶႃႈသေၵမ်းၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “ၵႂႃႇႁွင်ႉၽူဝ်မႂ်းလႄႈၶိုၼ်းမႃးၵႃႈတီႈၼႆႈတႃႉ၊” ဝႃႈၼင်ႇၼႆဢေႃႈ။
မႄႈယိင်းၼၼ်ႉၶိုၼ်းလဝ်ႈလၢတ်ႈလႄႈဝႃႈ၊ “ၵဝ်ၶႃႈဢမ်ႇမီးၽူဝ်ၶႃႈ၊” ဝႃႈၼင်ႇၼႆလႄႈ၊ ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “ဢၼ်မႂ်းဝႃႈ၊မႂ်းဢမ်ႇမီးၽူဝ်ဝႃႈၼႆၼၼ်ႉၸႂ်ႈတႄႉယဝ်ႉ။-
မႂ်းပေႃးလႆႈဢဝ်ၽူဝ်မႃးႁႃႈၵေႃႉယဝ်ႉ။ ၵူၼ်းၸၢႆးဢၼ်မႂ်းႁူမ်ႈပွင်းယူႇလူၺ်ႈၵၼ်တေႃႈလဵဝ်ၼႆႉၵေႃႈ၊ဢမ်ႇၸႂ်ႈၽူဝ်မႂ်းၸႅတ်ႈၸႅတ်ႈ။ လွင်ႈတၢင်းၼႆႉ၊မႂ်းလၢတ်ႈၵႂၢမ်းဢၼ်မၢၼ်ႇဢၼ်မႅၼ်ႈယဝ်ႉ၊” ဝႃႈၼင်ႇၼႆဢေႃႈ။
မႄႈယိင်းၼၼ်ႉၵေႃႈလဝ်ႈလၢတ်ႈလႄႈဝႃႈ၊ “ၸဝ်ႈ။ ၵဝ်ၶႃႈႁုလွင်ႈဢၼ်ၸဝ်ႈႁဝ်းပဵၼ်ပရေႃးၽႅတ်ႈ ၼၼ်ႉယဝ်ႉၶႃႈဢေႃႈ။-
ပူႇမွၼ်ႇၵူၼ်းမဵဝ်း သမႃႇရိ၊ ႁဝ်းၶႃႈၵူဝ်းၵႂၢႆႇၽြႃးပဵၼ်ၸဝ်ႈၵႃႈၼိူဝ်လွႆၼႆႉၶႃႈဢေႃႈ။ ၵူၼ်းမဵဝ်း ၵျူး၊ သူၸဝ်ႈၸမ်ႉ၊လၢတ်ႈဝႃႈ၊ ‘ဝဵင်း ယေႇရုသလႅမ်ႇ၊ ပဵၼ်တီႈဢၼ်ၵူၼ်းတင်းလၢႆတၵ်းလႆႈၵူဝ်းၵႂၢႆႇၽြႃးပဵၼ်ၸဝ်ႈဢေႃႈ၊’ ဝႃႈၼင်ႇၼႆၶႃႈဢေႃႈ၊” ဝႃႈၼင်ႇၼႆလႄႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “မႄႈယိင်း႟။ ယုမ်ႇၵႂၢမ်းၵဝ်တႃႉ။ ၶိင်ႇၵႃႇလႃႉဢၼ်သူၵူၺ်းတၵ်းလႆႈၵူဝ်းၵႂၢႆႇပေႃႈၸဝ်ႈၵႃႈၼိူဝ်လွႆၼႆႉဢမ်ႇၸႂ်ႈ၊ၵႃႈတီႈဝဵင်း ယေႇရုသလႅမ်ႇ၊ ၵူၺ်းၵေႃႈဢမ်ႇၸႂ်ႈၼၼ်ႉ၊တၵ်းတေႁွတ်ႈမႃးယူႇဢေႃႈ။-
သူၼႆႉ၊ၵူဝ်းၵႂၢႆႇၽြႃးသူႇလႂ်သူဢမ်ႇႁုဢေႃႈ။ ႁဝ်းၸမ်ႉ၊ၵူဝ်းၵႂၢႆႇၽြႃးသူႇလႂ်ႁဝ်းႁုဢေႃႈ။ လွင်ႈမၼ်းၸမ်ႉ၊တြႃးတၢင်းဢၼ်ၵႄႇၶျွတ်ႈဢဝ်ၼၼ်ႉ၊ပဵၼ်မႃးၵႃႈတီႈၵူၼ်းမဵဝ်း ၵျူး၊ ႁဝ်းဢေႃႈ။-
ၼႂ်းဝႃႈၼၼ်သေၵေႃႈ၊ၶိင်ႇဢၼ်ၵူၼ်းၸိူဝ်းဢၼ်ၸၢင်ႈၵူဝ်းၵႂၢႆႇၸိုဝ်ႈၸိုဝ်ႈၸႂ်ႈၸႂ်ႈတင်းလၢႆ၊တၵ်းပႃးတင်းၸႂ်ဝိၺိၺ်ႇတင်းသဵတ်ႈၸႃႇတြႃးလႄႈ ၵူဝ်းၵႂၢႆႇပေႃႈၸဝ်ႈၼၼ်ႉၸမ်မႃးယဝ်ႉ၊တေႃႈလဵဝ်ၼႆႉၵေႃႈၶိင်ႇၵႃႇလႃႉၼၼ်ႉႁွတ်ႈမႃးယဝ်ႉ။ လွင်ႈမၼ်းၸမ်ႉ၊ပေႃႈၸဝ်ႈႁႃဢဝ်ၵေႃႉၸိူဝ်ႉၼင်ႇၼၼ်ႁႂ်ႈၵူဝ်းၵႂၢႆႇမၼ်းၸဝ်ႈဢေႃႈ။-
ၽြႃးပဵၼ်ၸဝ်ႈပဵၼ်ဝိၺိၺ်ႇၸဝ်ႈဢေႃႈ။ ၶဝ်ၸိူဝ်းဢၼ်ၵူဝ်းၵႂၢႆႇမၼ်းၸဝ်ႈၼၼ်ႉ၊တၵ်းလႆႈပႃးတင်းၸႂ်ဝိၺိၺ်ႇတင်းသဵတ်ႈၸႃႇတြႃးလႄႈၵူဝ်းၵႂၢႆႇဢေႃႈ၊” ဝႃႈၼင်ႇၼႆဢေႃႈ။
မႄႈယိင်းၼၼ်ႉၵေႃႈဝႃႈ၊ “ ၸဝ်ႈမေႇသိ၊ ဢၼ်ဝႃႈ၊ ၸဝ်ႈၶရိၸ်ႈ၊ တၵ်းမႃးၼၼ်ႉ၊ဝႃႈၼႆၵဝ်ၶႃႈႁုယူႇဢေႃႈ။ မိူဝ်ႈဢၼ်မၼ်းၸဝ်ႈႁွတ်ႈမႃးၼၼ်ႉၸိုင်၊မၼ်းၸဝ်ႈတၵ်းႁဵတ်းၼႄလွင်ႈတၢင်းတင်းသဵင်ႈတင်းလူင်တီႈႁဝ်းၶႃႈ၊ၶႃႈဢေႃႈ၊” ဝႃႈၼင်ႇၼႆလႄႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ၵဝ်ဢၼ်လၢတ်ႈတေႃႇၵၼ်တင်းမႂ်းယူႇၼႆႉ၊ပဵၼ် ၸဝ်ႈမေႇသိ၊ ၼၼ်ႉယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈယၢမ်းၼၼ်ႉ၊တပႄးၸဝ်ႈတင်းလၢႆၶိုၼ်းႁွတ်ႈမႃးလႄႈ ၶဝ်ဢၢမ်းလွင်ႈဢၼ်မၼ်းၸဝ်ႈလၢတ်ႈတေႃႇမႄႈယိင်းၵေႃႉၼိုင်ႈယူႇၼၼ်ႉဢေႃႈ။ ၵူၺ်းၵႃႈ၊တီႈမၼ်းၸဝ်ႈၼၼ်ႉ၊ “လၢတ်ႈလွင်ႈဢီႈသင်တေႃႇၵၼ်၊” ဢမ်ႇၼၼ်ၵေႃႈ၊ “ႁဵတ်းသင်လႄႈလၢတ်ႈတေႃႇမႄႈယိင်းၵေႃႉၼၼ်ႉ၊” ဝႃႈၼႆၽူႈလႂ်ၵေႃႈဢမ်ႇလဝ်ႈဢမ်ႇထၢမ်လႄႈယူႇဢေႃႈ။
မႄႈယိင်းၼၼ်ႉၵေႃႈ၊တမ်းပႅတ်ႈမေႃႈၼမ်ႉမၼ်းဝႆႉလႄႈၶဝ်ႈၵႂႃႇၵႃႈၼႂ်းဝဵင်းသေယဝ်ႉ၊မွၵ်ႇလၢတ်ႈတီႈၵူၼ်းတင်းလၢႆလႄႈဝႃႈ၊-
“မႃးလႄႈတူၺ်းၵေႃႉဢၼ်ၽုၺ်ႇဢွၵ်ႇၼႄပျႃးလွင်ႈတၢင်းၵႃႈဢၼ်ၵဝ်ၶႃႈႁဵတ်းမႅၼ်ႈမႃးယဝ်ႉတင်းသဵင်ႈတင်းလူင်ၼၼ်ႉတႃႉ။ ၸဝ်ႈၼၼ်ႉပဵၼ် ၸဝ်ႈၶရိၸ်ႈ၊ ၸွင်ႇပဵၼ်လႆႈၶႃႈႁိုဝ်း၊” ဝႃႈၼင်ႇၼႆဢေႃႈ။-
ၶဝ်ၼၼ်ႉ၊ဢွၼ်ၵၼ်ဢွၵ်ႇဝဵင်းမႃးၸူးမၼ်းၸဝ်ႈဢေႃႈ။
ၽွင်းယၢမ်းၼၼ်ႉ၊တပႄးၸဝ်ႈတင်းလၢႆတွင်းပၢၼ်ႇလႄႈဝႃႈ၊ “သြႃႇႁဝ်း။ ၵိၼ်သေၵမ်းၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ၵဝ်မီးတၢင်းၵိၼ်ဢၼ်သူဢမ်ႇႁုလွင်ႈမၼ်းသေဢိတ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊တပႄးၸဝ်ႈတင်းလၢႆၼင်ႇၵၼ်လၢတ်ႈတီႈၵၼ်လႄႈဝႃႈ၊ “ၸွင်ႇသေၵေႃႉၵေႃႉပၼ်တၢင်းၵိၼ်တီႈမၼ်းၸဝ်ႈယဝ်ႉႁိုဝ်း၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၸင်ႇလၢတ်ႈတီႈၶဝ်လႄႈဝႃႈ၊ “တၢင်းၵိၼ်ၼႆႉပဵၼ်တၢင်းဢၼ်ႁဵတ်းၸွမ်းဢလူဝ်ႇၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉ၊ဢိၵ်ႇတင်းတၢင်းဢၼ်ႁဵတ်းႁႂ်ႈၵၢၼ်ငၢၼ်းဢၼ်မၼ်းၸဝ်ႈၸႂ်ႉႁႂ်ႈႁဵတ်းၼၼ်ႉယဝ်ႉတူဝ်ႈဢေႃႈ။-
‘ဢဝ်ၼႆႉၵႂႃႇထႅင်ႈသီႇလိူၼ် ပဵၼ်ၶိင်ႇပၢတ်ႇၶဝ်ႈဢေႃႈ၊’ ဝႃႈၼႆသူၸၢင်ႈဝႃႈဢမ်ႇၸႂ်ႈႁိုဝ်း။ ဢၼ်ၵဝ်ဝႃႈၸမ်ႉ၊မုင်ႈတူၺ်းတူင်ႈၼႃးဢၼ်ၶဝ်ႈလိူင်ယူႇၸိူဝ်းၼၼ်ႉတႃႉ။ ၶိင်ႇတေႃႈလဵဝ်ၼႆႉပဵၼ်ၶိင်ႇပၢတ်ႇၶဝ်ႈယဝ်ႉဢေႃႈ။-
ၵေႃႉဢၼ်ပၢတ်ႈၶဝ်ႈၼၼ်ႉ၊လႆႈၵႃႈႁႅင်းမၼ်းလႄႈလႆႈၸုသိမ်းဢဝ်မၢၵ်ႇၶဝ်ႈႁူင်းၶဝ်ႈပုၼ်ႈတႃႇတေပဵၼ်ထႃႇဝရႃႉဢသၢၵ်ႈဢေႃႈ။ ပေႃးပဵၼ်ၸိူဝ်ႉၼင်ႇၼႆၸိုင်၊ၵေႃႉဢၼ်ဝၢၼ်ႇပိုၼ်တင်းၵေႃႉဢၼ်ပၢတ်ႇဢဝ်ၼၼ်ႉ၊တေလႆႈသိူဝ်းပျေႃႇလူၺ်ႈၵၼ်ဢေႃႈ။-
ထုင်းၵႂၢမ်းဢၼ်ဝႃႈ၊ ‘ၵေႃႉၼိုင်ႈဝၢၼ်ႇပိုၼ်လႄႈၵေႃႉၼိုင်ႈပၢတ်ႇဢဝ်ဢေႃႈ၊’ ဝႃႈၼင်ႇၼႆၼၼ်ႉမၢၼ်ႇမႅၼ်ႈယဝ်ႉ။-
ၵဝ်ပွႆႇၸႂ်ႉ၊ႁႂ်ႈသူၵႂႃႇပၢတ်ႇဢဝ်တီႈဢၼ်သူဢမ်ႇႁဵတ်းဝႆႉၼၼ်ႉဢေႃႈ။ ပိူၼ်ႈတၢင်ႇၵေႃႉႁဵတ်းၵၢၼ်ႁဵတ်းငၢၼ်းလႄႈသူလႆႈၶဝ်ႈၸူးၵႃႈၼႂ်းၼႃႈၵၢၼ်တၢင်းႁဵတ်းၶဝ်ၼၼ်ႉယဝ်ႉ၊” ဝႃႈၼင်ႈၼႆဢေႃႈ။
ၵူၼ်းမဵဝ်း သမႃႇရိ၊ ၼမ်ၼႃႇၵႃႈၼႂ်းဝဵင်းၼၼ်ႉ၊ယုမ်ႇမၢတ်ႈ ၸဝ်ႈယေႇသု၊ မႃးၵွပ်ႈပိူဝ်ႈမႄႈယိင်းၼၼ်ႉၶၢမ်ႇသၢၵ်ႈသေႇဝႃႈ၊ “မၼ်းၽုၺ်ႇဢွၵ်ႇၼႄပျႃးလွင်ႈတၢင်းၵႃႈဢၼ်ၵဝ်ၶႃႈႁဵတ်းမႅၼ်ႈမႃးယဝ်ႉတင်းသဵင်ႈတင်းလူင်ၼၼ်ႉဢေႃႈ၊” ဝႃႈၼင်ႇၼႆၼၼ်ႉဢေႃႈ။-
ပိူဝ်ႈၼႆလႄႈ မိူဝ်ႈဢၼ်ၵူၼ်းမဵဝ်း သမႃႇရိ၊ ၸိူဝ်းၼၼ်ႉ၊မႃးတီႈမၼ်းၸဝ်ႈသေယဝ်ႉ၊ၶဝ်ယွၼ်းႁႂ်ႈမၼ်းၸဝ်ႈယူႇလူၺ်ႈၵၼ်တင်းၶဝ်လႄႈမၼ်းၸဝ်ႈၵေႃႈယူႇၵႃႈတီႈၼၼ်ႈသွင်ဝၼ်းဢေႃႈ။
ပိူၼ်ႈတၢင်ႇၵေႃႉၼမ်ၼႃႇၵေႃႈယုမ်ႇမၢတ်ႈၵွပ်ႈပိူဝ်ႈၼုၵ်ႈၵပၢတ်ႈၵႂၢမ်းမၼ်းၸဝ်ႈၼၼ်ႉဢေႃႈ။-
ၶဝ်ဢွၼ်ၵၼ်လၢတ်ႈတီႈမႄႈယိင်းၼၼ်ႉလႄႈဝႃႈ၊ “ဢၼ်ႁဝ်းယုမ်ႇမၢတ်ႈတေႃႈလဵဝ်ၼႆႉ၊ယုမ်ႇမၢတ်ႈၵွပ်ႈပိူဝ်ႈၵႂၢမ်းမႂ်းၵူၺ်းဢမ်ႇၸႂ်ႈယဝ်ႉ။ ႁဝ်းယုမ်ႇမၢတ်ႈၵွပ်ႈပိူဝ်ႈတူဝ်ႁဝ်းလႆႈထွမ်ႇငိၼ်းၵႂၢမ်းမၼ်းၸဝ်ႈလႄႈႁဝ်းႁုလွင်ႈဢၼ်မၼ်းၸဝ်ႈပဵၼ်ၸဝ်ႈဢၼ်ၵႄႇၶျွတ်ႈဢဝ်၊ၵူၼ်းလေႃးၵီႇတင်းလၢႆတႄႉတႄႉဝႃႈဝႃႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ဝၢႆးသေ ၸဝ်ႈယေႇသု၊ ယူႇၵႃႈတီႈၼၼ်ႈသွင်ဝၼ်းယဝ်ႉၸိုင်၊မၼ်းၸဝ်ႈဢွၵ်ႇၵႂႃႇၸူးၵႃႈတီႈမိူင်း ၵႃႇလိလႄး၊ သေဢေႃႈ။-
လွင်ႈမၼ်းၸမ်ႉ၊မၼ်းၸဝ်ႈလႆႈလၢတ်ႈလႄႈဝႃႈ၊ “ပရေႃးၽႅတ်ႈ ဢမ်ႇမီးသရေႇၵႃႈၼႂ်းမိူင်းတူဝ်ၸဝ်ႈၵဝ်ႇ၊” ဝႃႈၼင်ႇၼႆၼၼ်ႉဢေႃႈ။-
ပိူဝ်ႈၼႆလႄႈမိူဝ်ႈဢၼ်မၼ်းၸဝ်ႈႁွတ်ႈထိုင်ၸိုင်၊ၵူၼ်းမိူင်း ၵႃႇလိလႄး၊ ၶဝ်ဢွၼ်ၵၼ်ႁပ်ႉတွၼ်ႈမၼ်းၸဝ်ႈ၊ၵွပ်ႈပိူဝ်ႈတူဝ်ၶဝ်လႆႈၵႂႃႇၶဝ်ႈပွႆး ပသၶႃႇ၊ ၵႃႈတီႈဝဵင်း ယေႇရုသလႅမ်ႇ၊ လႄႈလႆႈႁၼ်ၵႃႈဢၼ်မၼ်းၸဝ်ႈႁဵတ်းၵူႈၸိူဝ်ႉၵူႈပိူင်ၼႂ်းပွႆးၼၼ်ႉဢေႃႈ။
ၸဝ်ႈယေႇသု၊ သမ်ႉၵႂႃႇၵႃႈတီႈဝၢၼ်ႈ ၵႃႇၼႃႉ၊ ၼႂ်းမိူင်း ၵႃႇလိလႄး၊ တီႈဢၼ်မၼ်းၸဝ်ႈႁႂ်ႈၼမ်ႉ၊ပိၼ်ႇပဵၼ်ၼမ်ႉမၢၵ်ႇၸပိတ်ႉမႃးၼၼ်ႉဢေႃႈ။ မိူဝ်ႈၼၼ်ႉ၊မီးၶုၼ်ပွင်ၵၢၼ်ၵေႃႉၼိုင်ႈဢၼ်ယူႇၵႃႈၼႂ်းဝဵင်း ၵပိူဝ်ႇၼေႇဢုမ်ႇ၊ လႄႈလုၵ်ႈၸၢႆးမၼ်းၸပ်းတၢင်းၶႆႈတၢင်းပဵၼ်ယူႇဢေႃႈ။-
မိူဝ်ႈဢၼ်မၼ်းလႆႈငိၼ်းဝႃႈ၊ ၸဝ်ႈယေႇသု၊ လုၵ်ႉသေၵႃႈတီႈမိူင်း ယုတႃႉ၊ ႁွတ်ႈမႃးၵႃႈတီႈမိူင်း ၵႃႇလိလႄး၊ ၼၼ်ႉၸိုင်၊ၶုၼ်ၼၼ်ႉၵႂႃႇၸူးမၼ်းၸဝ်ႈသေလဝ်ႈယွၼ်းႁႂ်ႈမၼ်းၸဝ်ႈၵႂႃႇလႄႈယႃပၼ်လုၵ်ႈၸၢႆးမၼ်းဢၼ်ပဵၼ်တၢင်းပဵၼ်ယူႇၸမ်တၵ်းတၢႆၼၼ်ႉဢေႃႈ။-
ၸဝ်ႈယေႇသု၊ လၢတ်ႈတီႈမၼ်းလႄႈဝႃႈ၊ “ပေႃးသူဢမ်ႇလႆႈႁၼ်ၼိမိၵ်ႈလၢၵ်ႈၶၼႃႇ၊ဢိၵ်ႇတင်းလွင်ႈတၢင်းဢၼ်လီဢၢမ်းၸိုင်၊သူဢမ်ႇၸၢင်ႈယုမ်ႇၵူၺ်း၊” ဝႃႈၼင်ႇၼႆဢေႃႈ။
ၶုၼ်ၼၼ်ႉ၊ၶိုၼ်းလၢတ်ႈလႄႈဝႃႈ၊ “ၸဝ်ႈ႟။ ၸူဝ်ႈဢၼ်လုၵ်ႈဢွၼ်ႇၵဝ်ၶႃႈဢမ်ႇပႆႇတၢႆၼၼ်ႉ၊ၶႅၼ်းတေႃႈမႃးပၼ်သေၵမ်းၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “ၵႂႃႇတႃႉ။ လုၵ်ႈၸၢႆးမႂ်းလႆႈဢသၢၵ်ႈၵတ်းယဵၼ်ၶျၢမ်းသႃႇယဝ်ႉ၊” ဝႃႈၼင်ႇၼႆဢေႃႈ။ ၵေႃႉၼၼ်ႉၵေႃႈယုမ်ႇၵႂၢမ်းၸဝ်ႈလႄႈမိူဝ်းၵႂႃႇဢေႃႈ။-
ၼႂ်းၵၢင်တၢင်းမိူဝ်ႈဢၼ်မၼ်းတိုၵ်ႉမိူဝ်းၵႂႃႇယူႇၼၼ်ႉ၊ၵူၼ်းၸႂ်ႉၵူၼ်းသွႆမၼ်းတင်းလၢႆမႃးႁူပ်ႉႁူဝ်တၢင်းမၼ်းလႄႈလၢတ်ႈဝႃႈ၊ “လုၵ်ႈၸၢႆးၸဝ်ႈႁဝ်းလႆႈဢသၢၵ်ႈၶျၢမ်းသႃႇယဝ်ႉၶႃႈ၊” ဝႃႈၼင်ႇၼႆဢေႃႈ။
မၼ်းၵေႃႈ၊ထၢမ်ဢၶိင်ႇယၢမ်းဢၼ်တၢင်းပဵၼ်လုၵ်ႈၸၢႆးမၼ်းလႆႈၸိုၼ်ႈႁၢႆမႃးၶိင်ႇယၢမ်းလႂ်ၼၼ်ႉလႄႈ၊ၶဝ်ၶိုၼ်းလဝ်ႈလၢတ်ႈဝႃႈ၊ “တၢင်းပဵၼ်မၼ်းၸိုၼ်ႈႁၢႆၵႂႃႇမိူဝ်ႈဝႃးၼိုင်ႈမွင်းဝၢႆးဝၼ်းၶႃႈဢေႃႈ၊” ဝႃႈၼင်ႇၼႆလႄႈ၊-
ပေႃႈလုၵ်ႈဢွၼ်ႇၼၼ်ႉ၊လႆႈႁုဝႃႈၶိင်ႇယၢမ်းၼၼ်ႉပဵၼ်ၶိင်ႇယၢမ်းဢၼ် ၸဝ်ႈယေႇသု၊ လၢတ်ႈဝႃႈ၊ “လုၵ်ႈၸၢႆးမႂ်းလႆႈဢသၢၵ်ႈၶျၢမ်းသႃႇယဝ်ႉ၊” ဝႃႈၼင်ႇၼႆၼၼ်ႉဢေႃႈ။ ပိူဝ်ႈၼႆလႄႈၸႃႉၸဵမ်တူဝ်မၼ်း၊ဢိၵ်ႇတင်းၵူၼ်းႁိူၼ်းၵူၼ်းယေးမၼ်းဢွၼ်ၵၼ်ယုမ်ႇမၢတ်ႈ ၸဝ်ႈယေႇသု၊ ဢေႃႈ။
ၼႆႉၸမ်ႉ၊ပဵၼ်ၼိမိၵ်ႈလၢၵ်ႈၶၼႃႇဢၼ် ၸဝ်ႈယေႇသု၊ ႁဵတ်းၼႄပွၵ်ႈတီႈသွင်၊ဝၢႆးသေမၼ်းၸဝ်ႈလုၵ်ႉသေၵႃႈတီႈမိူင်း ယုတႃႉ၊ မႃးၵႃႈတီႈမိူင်း ၵႃႇလိလႄး၊ ၼၼ်ႉဢေႃႈ။
ဝၢႆးသေၼၼ်ႉ၊မီးပွႆးၽႃႇသႃႇ ၵျူး၊ ၶဝ်လႄႈ ၸဝ်ႈယေႇသု၊ ၶိုၼ်ႈၵႂႃႇၵႃႈတီႈဝဵင်း ယေႇရုသလႅမ်ႇ၊ ဢေႃႈ။-
ၼႂ်းဝဵင်း ယေႇရုသလႅမ်ႇ၊ ၵႃႈတီႈႁိမ်း ၽၵ်းတူသူဝ်း၊ ၼၼ်ႉ၊မီးၼမ်ႉၼွင်ႁူၺ်ႇၼိုင်ႈဢၼ်မီးၸရွပ်ႈႁႃႈလင်ဢေႃႈ။ ၼမ်ႉၼွင်ၼၼ်ႉၵႂၢမ်း ႁေႇပြႄး၊ ႁွင်ႉဝႃႈ၊ၼွင် ပႅတ်ႉၸေးတႃႉ၊ ဢေႃႈ။-
ၵႃႈၼိူဝ်ၸရွပ်ႈၸိူဝ်းၼၼ်ႉ၊မီးၵူၼ်းၶႆႈၵူၼ်းပဵၼ်ၼမ်ၼႃႇဢၼ်တႃမွတ်ႇ၊ဢၼ်တိၼ်ပုတ်း၊ဢၼ်တၢႆၽၢၵ်ႇတင်းလၢႆ၊ [ပႂ်ႉထႃႈၽိဝ်ၼမ်ႉတၵ်းတူင်ႉၼိုင်မႃးၼၼ်ႉယူႇဢေႃႈ။-
လွင်ႈမၼ်းၸမ်ႉ၊မိူဝ်ႈဢၼ်ထိုင်ၶိင်ႇမၼ်းၼၼ်ႉၸိုင်၊တမၢၼ်ႇၵၢင်ႁၢဝ်ၸဝ်ႈထႃႇဝရႃႉၽြႃးလူင်းမႃးၵႃႈၼႂ်းၼမ်ႉၼွင်လႄႈၶူၼ်းႁႂ်ႈၼမ်ႉတူင်ႉၼိုင်ဢေႃႈ။ ဝၢႆးသေတမၢၼ်ႇၵၢင်ႁၢဝ်ၶူၼ်းၼမ်ႉႁႂ်ႈတူင်ႉၼိုင်ၼၼ်ႉ၊ၵူၼ်းပဵၼ်ၵေႃႉဢၼ်လႆႈလူင်းၵႂႃႇၵႃႈၼႂ်းၼမ်ႉၼွင်ဢွၼ်တၢင်းပိူၼ်ႈၼၼ်ႉၸိုင်၊မၼ်းမီးတၢင်းၶႆႈတၢင်းပဵၼ်မဵဝ်းလႂ်သေဢမ်ႇဝႃႈ၊ၸိုၼ်ႈႁၢႆၵႂႃႇၵမ်းလဵဝ်ဢေႃႈ။-]
တီႈၼၼ်ႈ၊မီးၵူၼ်းၵေႃႉၼိုင်ႈဢၼ်ၸပ်းတၢင်းပဵၼ်ယူႇသၢမ်သိပ်းပၢႆပႅတ်ႇပီယဝ်ႉဢေႃႈ။-
ၸဝ်ႈယေႇသု၊ ႁၼ်မၼ်းၼၼ်ႉ ၼွၼ်းယူႇလႄႈႁုလွင်ႈဢၼ်ပဵၼ်ႁိုင်ၼႃႇယဝ်ႉၸင်ႇ၊မၼ်းၸဝ်ႈထၢမ်ဝႃႈ၊ “ၸွင်ႇမႂ်းၶႂ်ႈႁႂ်ႈတၢင်းပဵၼ်မႂ်းၸိုၼ်ႈႁၢႆႁိုဝ်း၊” ဝႃႈၼင်ႇၼႆဢေႃႈ။
ၵူၼ်းပဵၼ်ၼၼ်ႉ၊ၶိုၼ်းလၢတ်ႈလႄႈဝႃႈ၊ “ၸဝ်ႈႁဝ်း။ ယၢမ်းမိူဝ်ႈဢၼ်ၼမ်ႉတူင်ႉၼိုင်ၼၼ်ႉ၊ၵဝ်ၶႃႈဢမ်ႇမီးၵေႃႉဢၼ်တေဢဝ်ၵဝ်ၶႃႈလူင်းၵႃႈၼႂ်းၼမ်ႉၼွင်ၼႆႉၶႃႈ။ မိူဝ်ႈဢၼ်ၵဝ်ၶႃႈယင်းတိုၵ်ႉလူင်းၵႂႃႇယူႇၼၼ်ႉ၊ပိူၼ်ႈသမ်ႉပေႃးလူင်းၵႂႃႇဢွၼ်တင်းၵဝ်ၶႃႈယဝ်ႉၶႃႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “လုၵ်ႉတႃႉ။ ဢဝ်သၢတ်ႇတီႈၼွၼ်းမႂ်းလႄႈပႆမိူဝ်းၵႂႃႇတႃႉ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ၵမ်းလဵဝ်တၢင်းပဵၼ်ၵေႃႉၼၼ်ႉၸိုၼ်ႈႁၢႆလႄႈမၼ်းလုၵ်ႉဢဝ်သၢတ်ႇတီႈၼွၼ်းမၼ်းသေပႆတၢင်းၵႂႃႇဢေႃႈ။
ဝၼ်းၼၼ်ႉ၊ပဵၼ်ဝၼ်းၵမ်သိၼ်လႄႈ၊ၵူၼ်းမဵဝ်း ၵျူး၊ ၶဝ်လၢတ်ႈတီႈၵေႃႉဢၼ်တၢင်းပဵၼ်လႆႈၸိုၼ်ႈႁၢႆၼၼ်ႉလႄႈဝႃႈ၊ “မိူဝ်ႈၼႆႉပဵၼ်ဝၼ်းၵမ်သိၼ်ဢေႃႈ။ တၢင်းဢၼ်မႂ်းမႅၵ်ႇၵဵၼ်သၢတ်ႇၵႂႃႇၼႆႉၽိတ်းသိၼ်ယဝ်ႉ၊” ဝႃႈၼင်ႇၼႆဢေႃႈ။
မၼ်းၵေႃႈၶိုၼ်းလၢတ်ႈလႄႈဝႃႈ၊ “ၵေႃႉဢၼ်ႁႂ်ႈတၢင်းပဵၼ်ၵဝ်ၶႃႈၸိုၼ်ႈႁၢႆၼၼ်ႉၸႂ်ႉႁႂ်ႈၵဝ်ၶႃႈဢဝ်သၢတ်ႇတီႈၼွၼ်းၵဝ်ၶႃႈလႄႈ ပႆတၢင်းၵႂႃႇဢေႃႈ၊” ဝႃႈၼင်ႇၼႆဢေႃႈ။
ၶဝ်သမ်ႉထၢမ်ဝႃႈ၊ “ၵေႃႉဢၼ်ၸႂ်ႉႁႂ်ႈမႂ်းႁဵတ်းၸိူဝ်ႉၼင်ႇၼၼ်ၼၼ်ႉပဵၼ်ၽူႈလႂ်၊” ဝႃႈၼင်ႇၼႆဢေႃႈ။
ၵူၼ်းၵေႃႉဢၼ်တၢင်းပဵၼ်မၼ်းလႆႈၸိုၼ်ႈႁၢႆယဝ်ႉၼၼ်ႉ၊ယင်းဢမ်ႇတၼ်းႁုၸၵ်း ၸဝ်ႈယေႇသု၊ ပိူဝ်ႈဢၼ်တီႈၼၼ်ႈမီးၵူၼ်းၼမ်ၼႃႇၽႅဝ်လႄႈမၼ်းၸဝ်ႈပေႃးလွမ်ပၢႆႈဢွၵ်ႇသေၵႃႈတီႈၼၼ်ႈၵႂႃႇယဝ်ႉဢေႃႈ။
ဝၢႆးၼၼ်ႉ ၸဝ်ႈယေႇသု၊ ႁူပ်ႉထူပ်းၵေႃႉၼၼ်ႉၵႃႈၼႂ်းၵျွင်းပိၵ်ႈမၢၼ်ႇၸဝ်ႈလႄႈလၢတ်ႈဝႃႈ၊ “တူၺ်းလူး။ မႂ်းလႆႈယူႇလီၵိၼ်ဝၢၼ်ယဝ်ႉ။ ယႃႇပေၶိုၼ်းႁဵတ်းဢပျတ်ႈထႅင်ႈယဝ်ႉ။ ပေႃးဢမ်ႇၼၼ်ၸိုင်၊ၽေးဢပျတ်ႈဢၼ်ယဵင်ႈၶႅၼ်းၼၵ်းၼႃႇတၵ်းပဵၼ်တီႈမႂ်းဢေႃႈ၊” ဝႃႈၼင်ႇၼႆဢေႃႈ။
ၵေႃႉၼၼ်ႉဢွၵ်ႇၵႂႃႇလႄႈမွၵ်ႇလၢတ်ႈတီႈၵူၼ်းမဵဝ်း ၵျူး၊ ၸိူဝ်းၼၼ်ႉလွင်ႈဢၼ်ၵေႃႉဢၼ်ႁႂ်ႈမၼ်းယူႇလီၵိၼ်ဝၢၼ်မႃးၼၼ်ႉ၊ပဵၼ် ၸဝ်ႈယေႇသု၊ ၼၼ်ႉဢေႃႈ။-
ႁဵတ်းၼၼ်လႄႈ ၶဝ်ၸိူဝ်းၼၼ်ႉၵျၢမ်ႇႁႃႁႂ်ႈလႆႈၼိၵ်ႈၸၢၵ်ႈမၼ်းၸဝ်ႈ ၵွပ်ႈပိူဝ်ႈမၼ်းၸဝ်ႈႁဵတ်းလွင်ႈတၢင်းၼၼ်ႉၼႂ်းဝၼ်းၵမ်သိၼ်ၼၼ်ႉဢေႃႈ။-
ပိူဝ်ႈၼႆလႄႈ ၸဝ်ႈယေႇသု၊ ၶိုၼ်းလၢတ်ႈတီႈၶဝ်လႄႈဝႃႈ၊ “ပေႃႈၸဝ်ႈၵဝ်ယင်းႁဵတ်းၵၢၼ်ႁဵတ်းငၢၼ်းၶိူဝ်းၶိူဝ်းယႂ်းယႂ်းယူႇလႄႈ၊ၵဝ်ၵေႃႈတၵ်းလႆႈႁဵတ်းၵၢၼ်ဢေႃႈ၊” ဝႃႈၼင်ႇၼႆဢေႃႈ။
ၵွပ်ႈပိူဝ်ႈဝႃႈၼင်ႇၼႆလႄႈၵူၼ်းမဵဝ်း ၵျူး၊ ၶဝ်ယဵင်ႈၶႅၼ်းၵျၢမ်ႇႁႃႁႂ်ႈလႆႈဢဝ်မၼ်းၸဝ်ႈတၢႆ ပိူဝ်ႈဢၼ်မၼ်းၸဝ်ႈယႃႉဝၼ်းၵမ်သိၼ်ၵူၺ်းဢမ်ႇၵႃး၊ယင်းဝႃႈၽြႃးပဵၼ်ၸဝ်ႈပဵၼ်ပေႃႈမၼ်းၸဝ်ႈသေလႄႈ၊ယင်းဢဝ်တူဝ်မၼ်းၸဝ်ႈပဵင်းတၢၼ်ႇၵၼ်တင်းၽြႃးပဵၼ်ၸဝ်ႈၼၼ်ႉဢေႃႈ။
ၸဝ်ႈယေႇသု၊ လၢတ်ႈတီႈၶဝ်လႄႈဝႃႈ၊ “ၵဝ်ဝႃႈတီႈၸိုဝ်ႈတီႈၸႂ်ႈမၼ်းတီႈသူၸမ်ႉ၊လုၵ်ႈၸဝ်ႈၸိုင်၊ၸွမ်းဢလူဝ်ႇတူဝ်ၸဝ်ႈၵဝ်ႇလႄႈဢမ်ႇၸၢင်ႈႁဵတ်းသေၸိူဝ်ႉသေပိူင်လႆႈ။ ႁဵတ်းၸွမ်းလွင်ႈတၢင်းဢၼ်ႁၼ်ပေႃႈၸဝ်ႈႁဵတ်းၼၼ်ႉၵူၺ်းဢေႃႈ။ ၵႃႈဢၼ်ပေႃႈၸဝ်ႈႁဵတ်းတင်းသဵင်ႈတင်းလူင်ၼၼ်ႉ လုၵ်ႈၸဝ်ႈၵေႃႈႁဵတ်းၸွမ်းၸိူဝ်ႉၼင်ႇၼၼ်ဢေႃႈ။-
လွင်ႈမၼ်းၸမ်ႉ၊ပေႃႈၸဝ်ႈႁၵ်ႉလုၵ်ႈၸဝ်ႈလႄႈၼႄပျႃးၵႃႈဢၼ်မၼ်းၸဝ်ႈႁဵတ်းယူႇတင်းသဵင်ႈတင်းလူင်ၼၼ်ႉတီႈလုၵ်ႈၸဝ်ႈဢေႃႈ။ မၼ်းၸဝ်ႈယင်းတၵ်းၼႄပျႃးၵၢၼ်ငၢၼ်းဢၼ်ယဵင်ႈၶႅၼ်းယႂ်ႇၼႃႇသေလွင်ႈတၢင်းၸိူဝ်းၼႆႉတီႈလုၵ်ႈၸဝ်ႈႁႂ်ႈသူလႆႈဢၢမ်းဢေႃႈ။-
ၸိူဝ်ႉၼင်ႇဢၼ်ပေႃႈၸဝ်ႈႁႂ်ႈၵူၼ်းတၢႆလုၵ်ႉၶိုၼ်းမႃးလႄႈပၼ်ဢသၢၵ်ႈလိပ်းတီႈၶဝ်ၼၼ်ႉ၊မိူၼ်ၸိူဝ်ႉၼင်ႇၼၼ်လုၵ်ႈၸဝ်ႈၵေႃႈပၼ်ဢသၢၵ်ႈလိပ်းတီႈၶဝ်ၸိူဝ်းဢၼ်မၼ်းၸဝ်ႈမီးဢလူဝ်ႇၼၼ်ႉဢေႃႈ။-
ပိၵ်ႉသမ်ႉပေႃႈၸဝ်ႈဢမ်ႇၸီႇယၢင်ႇတြႃးတီႈသေၵေႃႉသေၵူၼ်းသေၵေႃႈ၊မၼ်းၸဝ်ႈဢၢပ်ႈပၼ်ဢၶႂၢင်ႉဢႃႇၼႃႇတၢင်းဢၼ်ၸီႇယၢင်ႇတြႃးတီႈလုၵ်ႈၸဝ်ႈတင်းသဵင်ႈတင်းမူတ်း၊-
ပုၼ်ႈလွင်ႈၼင်ႇႁိုဝ်ၵူၼ်းတင်းသဵင်ႈတင်းလူင်တၵ်းရူဝ်ႇသေႇလုၵ်ႈၸဝ်ႈ၊ၸိူဝ်ႉၼင်ႇဢၼ်ၶဝ်ရူဝ်ႇသေႇၵူဝ်ယမ်ပေႃႈၸဝ်ႈၼၼ်ႉဢေႃႈ။ ၵေႃႉဢၼ်ဢမ်ႇရူဝ်ႇသေႇလုၵ်ႈၸဝ်ႈၼၼ်ႉ၊ပဵၼ်ၵေႃႉဢၼ်ဢမ်ႇရူဝ်ႇသေႇၵူဝ်ယမ်ပေႃႈၸဝ်ႈဢၼ်ပွႆႇၸႂ်ႉလုၵ်ႈၸဝ်ႈမႃးၼၼ်ႉဢေႃႈ။
“ၵဝ်ဝႃႈတီႈၸိုဝ်ႈတီႈၸႂ်ႈမၼ်းတီႈသူၸမ်ႉ၊ၵေႃႉဢၼ်လႆႈငိၼ်းၵႂၢမ်းတြႃးၵဝ်လႄႈယုမ်ႇမၢတ်ႈၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉ၊လႆႈဢသၢၵ်ႈထႃႇဝရႃႉဢေႃႈ။ မၼ်းတၵ်းဢမ်ႇလႆႈၶၢမ်ႇတၢင်းဢၼ်ၸီႇယၢင်ႇဢပျတ်ႈ၊ပဵၼ်ၵေႃႉဢၼ်လႆႈၶၢမ်ႈပူၼ်ႉတၢင်းတၢႆၵႂႃႇၵႃႈတီႈတၢင်းဢၼ်ဢသၢၵ်ႈလိပ်းပုၼ်ႉဢေႃႈ။-
ၵဝ်သမ်ႉလၢတ်ႈတီႈၸိုဝ်ႈတီႈၸႂ်ႈမၼ်းတီႈသူထႅင်ႈၸမ်ႉ၊ၶိင်ႇၵႃႇလႃႉမႃးယူႇလႄႈ၊တေႃႈလဵဝ်ၼႆႉၵေႃႈႁွတ်ႈမႃးဝႆႉယဝ်ႉ၊မိူဝ်ႈၶဝ်ၸိူဝ်းဢၼ်တၢႆၵႂႃႇယဝ်ႉ၊တၵ်းလႆႈငိၼ်းသဵင်ၵႂၢမ်းလုၵ်ႈၽြႃးပဵၼ်ၸဝ်ႈလႄႈ ၶဝ်ၸိူဝ်းဢၼ်လႆႈငိၼ်းၵေႃႈတၵ်းလႆႈဢသၢၵ်ႈလိပ်းဢေႃႈ။-
လွင်ႈမၼ်းၸမ်ႉ၊ၸွမ်းၵႃႈၼင်ႇဢၼ်ပေႃႈၸဝ်ႈမီးဢသၢၵ်ႈၼႂ်းတူဝ်ၸဝ်ႈၵဝ်ႇၼၼ်ႉ၊မိူၼ်ၸိူဝ်ႉၼင်ႇၼၼ်မၼ်းၸဝ်ႈပၼ်ဢၶႂၢင်ႉႁႂ်ႈလုၵ်ႈၸဝ်ႈမီးဢသၢၵ်ႈၼႂ်းတူဝ်ၸဝ်ႈၵဝ်ႇဢေႃႈ။-
မၼ်းၸဝ်ႈသမ်ႉပၼ်ဢၶႂၢင်ႉဢႃႇၼႃႇတၢင်းဢၼ်ၸီႇယၢင်ႇဢပျတ်ႈၼၼ်ႉတီႈလုၵ်ႈၸဝ်ႈ၊ၵွပ်ႈပိူဝ်ႈလုၵ်ႈၸဝ်ႈပဵၼ် လုၵ်ႈၵူၼ်း၊ ဢေႃႈ။-
ယႃႇပေဢၢမ်းလွင်ႈတၢင်းၼႆႉ။ ၶိင်ႇၵႃႇလႃႉတၵ်းႁွတ်ႈမႃးမိူဝ်ႈဢၼ်ၵူၼ်းတၢႆတင်းသဵင်ႈတင်းလူင်တၵ်းလႆႈငိၼ်းသဵင်ၵႂၢမ်းလုၵ်ႈၸဝ်ႈလႄႈ၊-
ဢွၵ်ႇၶုမ်ပႃႇႁဵဝ်ႈၶဝ်မႃးသေယဝ်ႉ၊ၶဝ်ၸိူဝ်းဢၼ်ၵမ်ၵျၢင်ႉလီလီငၢမ်းငၢမ်းၼၼ်ႉ၊တၵ်းလုၵ်ႉၶိုၼ်းလႄႈလႆႈဢသၢၵ်ႈလိပ်းဢေႃႈ။ ၶဝ်ၸိူဝ်းဢၼ်ဢမ်ႇၵမ်ၵျၢင်ႉလီလီငၢမ်းငၢမ်းၸမ်ႉ၊တၵ်းလုၵ်ႉၶိုၼ်းလႄႈလႆႈၶၢမ်ႇတၢင်းဢၼ်ၸီႇယၢင်ႇဢပျတ်ႈဢေႃႈ။
“ၵဝ်ၼႆႉ၊ၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇလႄႈဢမ်ႇႁဵတ်းသေၸိူဝ်ႉသေပိူင်လႆႈ။ ၸွမ်းၵႃႈၼင်ႇဢၼ်ၵဝ်ငိၼ်းၼၼ်ႉၵဝ်ၸီႇယၢင်ႇတြႃးဢေႃႈ။ တၢင်းဢၼ်ၵဝ်ၸီႇယၢင်ႇၵေႃႈပဵၼ်ဢၼ်သိုဝ်ႈဢၼ်တြႃး၊ပိူဝ်ႈဢၼ်ၵဝ်ဢမ်ႇၸွမ်းဢလူဝ်ႇတူဝ်ၸဝ်ႈၵဝ်ႇ၊ၵူၺ်းၸွမ်းဢလူဝ်ႇၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉဢေႃႈ။
“ပေႃးၵဝ်ၶၢမ်ႇသၢၵ်ႈသေႇလွင်ႈတူဝ်ၸဝ်ႈၵဝ်ႇၸိုင်၊သၢၵ်ႈသေႇၵဝ်ၼၼ်ႉ၊ဢမ်ႇၸၢင်ႈၶၢမ်ႇဢဝ်ႁႂ်ႈပဵၼ်ၵႂၢမ်းဢၼ်မၢၼ်ႇ။-
ၵေႃႉဢၼ်ၶၢမ်ႇသၢၵ်ႈသေႇလွင်ႈၵဝ်ယင်းမီးယူႇပႃးၼိုင်ႈလႄႈ၊ၵဝ်ႁုလွင်ႈဢၼ်သၢၵ်ႈသေႇမၼ်းပဵၼ်ဢၼ်မၢၼ်ႇၼၼ်ႉဢေႃႈ။-
သူပွႆႇၸႂ်ႉၵူၼ်းသူၵႂႃႇၸူးသြႃႇ ယူဝ်းႁၢၼ်ႇ၊ ယဝ်ႉလႄႈမၼ်းၵေႃႈၶၢမ်ႇသၢၵ်ႈသေႇၽၢႆႇတြႃးဢၼ်ၸိုဝ်ႈဢၼ်ၸႂ်ႈၼၼ်ႉဢေႃႈ။-
လွင်ႈတၢင်းၼႆႉၸိုင်၊မၼ်းဢမ်ႇၸႂ်ႈဝႃႈ၊ၵဝ်လူဝ်ႇသၢၵ်ႈသေႇဢၼ်ၵူၼ်းပၼ်ၼၼ်ႉ။ ၵဝ်လၢတ်ႈဝႃႈၸိူဝ်ႉၼင်ႇၼႆႁႂ်ႈသူလႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ဢေႃႈ။-
သြႃႇ ယူဝ်းႁၢၼ်ႇ၊ ၼၼ်ႉ၊ပဵၼ်မိူၼ်ၸိူဝ်ႉၼင်ႇၵွၵ်းၽႆးဢၼ်တႆႈလႄႈလႅင်းၼၼ်ႉဢေႃႈ။ သူၵေႃႈၶႂ်ႈမူၼ်ႈပျေႃႇၼႂ်းဢၼ်လႅင်းမၼ်းယူႇၵမ်းဢွၼ်ႇၼိုင်ႈဢေႃႈ။-
ၼႂ်းဝႃႈၼၼ်သေၵေႃႈ၊ၵဝ်လႆႈသၢၵ်ႈသေႇဢၼ်ယဵင်ႈၶႅၼ်းယႂ်ႇၼႃႇသေသၢၵ်ႈသေႇဢၼ်သြႃႇ ယူဝ်းႁၢၼ်ႇ၊ ပၼ်ၼၼ်ႉလူးၵွၼ်ႇလႄႈ၊ၵၢၼ်ငၢၼ်းဢၼ်ပေႃႈၸဝ်ႈဢၢပ်ႈပၼ်ၼႂ်းမိုဝ်းၵဝ်ႁႂ်ႈလႆႈႁဵတ်းယဝ်ႉတူဝ်ႈၼႆႉ၊ၵဝ်ၵေႃႈယင်းႁဵတ်းၵၢၼ်ငၢၼ်းၼၼ်ႉယူႇလႄႈ၊လွင်ႈတၢင်းၼၼ်ႉၶၢမ်ႇသၢၵ်ႈသေႇလွင်ႈဢၼ်ပေႃႈၸဝ်ႈပွႆႇၸႂ်ႉၵဝ်မႃးၼၼ်ႉဢေႃႈ။-
ပေႃႈၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉၵေႃႈယူႇၽၢႆႇၵဝ်လႄႈၶၢမ်ႇသၢၵ်ႈသေႇလွင်ႈၵဝ်ယူႇဢေႃႈ။ သဵင်ၵႂၢမ်းပေႃႈၸဝ်ႈၼၼ်ႉသူဢမ်ႇတွၼ်ႉလႆႈငိၼ်း၊တူဝ်ႁၢင်ႈမၼ်းၸဝ်ႈၵေႃႈသူဢမ်ႇတွၼ်ႉလႆႈႁၼ်။-
ၼုၵ်ႈၵပၢတ်ႈတြႃးၸဝ်ႈၵေႃႈ ဢမ်ႇမီးၼႂ်းႁူဝ်ၸႂ်သူ။ လွင်ႈမၼ်းၸမ်ႉ၊သူဢမ်ႇယုမ်ႇမၢတ်ႈၵေႃႉဢၼ်မၼ်းၸဝ်ႈပွႆႇၸႂ်ႉမႃးၼၼ်ႉလႄႈယူႇဢေႃႈ။-
သူသွၵ်ႈႁႃၼႂ်းၵျၢမ်းလိၵ်ႈၵွပ်ႈပိူဝ်ႈသူထၢင်ႇတၵ်းလႆႈထႃႇဝရႃႉဢသၢၵ်ႈၵႃႈၼႂ်းၵျၢမ်းလိၵ်ႈဢေႃႈ။ ၵျၢမ်းလိၵ်ႈၼၼ်ႉ ပဵၼ်သၢၵ်ႈသေႇၽၢႆႇၵဝ်ယဝ်ႉ။-
ပိၵ်ႉသမ်ႉသူၶႂ်ႈလႆႈဢသၢၵ်ႈသေၵေႃႈ၊သူဢမ်ႇၶႂ်ႈမႃးၸူးတီႈၵဝ်လႄႈယူႇဢေႃႈ။
ၵဝ်ပႃးတင်းဢၶႂၢင်ႉဢႃႇၼႃႇပေႃႈၸဝ်ႈလႄႈမႃးဢေႃႈ။ ၵူၺ်းၵႃႈ၊သူဢမ်ႇႁပ်ႉတုင်းဢဝ်ၵဝ်။ ပေႃးပိူၼ်ႈတၢင်ႇၵေႃႉပႃးဢဝ်တင်းဢၶႂၢင်ႉတူဝ်ၸဝ်ႈၵဝ်ႇမႃးတႄႉၸိုင်၊သူတၵ်းႁပ်ႉတုင်းဢဝ်ၵေႃႉၼၼ်ႉဢေႃႈ။-
သူၸိူဝ်းဢၼ်ၸၢင်ႈၶၢမ်ႇဢဝ်တၢင်းဢၼ်ၵေႃႉၼိုင်ႈလႄႈၵေႃႉၼိုင်ႈယုၵ်ႉယွင်ႈၵၼ်လႄႈဢမ်ႇၸၢင်ႈႁႃဢၵျူဝ်းဢၼ်ၽြႃးပဵၼ်ၸဝ်ႈသူႇလဵဝ်ၵူၺ်းယုၵ်ႉယွင်ႈၸိူဝ်းၼႆႉ၊တၵ်းႁဵတ်းၸိူဝ်ႉၼင်ႇႁိုဝ်လႄႈယုမ်ႇမၢတ်ႈလႆႈ။-
သူယႃႇပေထၢင်ႇဝႃႈ၊ၵဝ်ပဵၼ်ၵေႃႉဢၼ်တၢင်ႇဢပျတ်ႈၵႃႈၼိူဝ်သူၵႃႈတီႈၽၢႆႇၼႃႈပေႃႈၸဝ်ႈၼၼ်ႉ။ မူဝ်းသေႇ၊ ဢၼ်သူယုမ်ႇယမ်ၼၼ်ႉပဵၼ်ၵေႃႉဢၼ်တၢင်ႇဢပျတ်ႈၵႃႈၼိူဝ်သူယဝ်ႉ။-
ပေႃးသူယုမ်ႇၵႂၢမ်း မူဝ်းသေႇ၊ တႄႉတႄႉၸိုင်၊တီႈၵဝ်ၵေႃႈသူတၵ်းလႆႈယုမ်ႇဢေႃႈ။ ၵွပ်ႈပိူဝ်ႈမၼ်းတႅမ်ႈဝႆႉလွင်ႈၵဝ်ဢေႃႈ။-
ၵူၺ်းၵႃႈ၊ပေႃးသူဢမ်ႇယုမ်ႇၵႂၢမ်းဢၼ်မၼ်းတႅမ်ႈဝႆႉၼၼ်ႉၸိုင်၊သူတၵ်းၸၢင်ႈယုမ်ႇၵႂၢမ်းၵဝ်လႆႈၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ဝၢႆးသေၼၼ်ႉ၊ ၸဝ်ႈယေႇသု၊ ၶၢမ်ႈၵႂႃႇၽၢႆႇပုၼ်ႉၼွင် ၵႃႇလိလႄး၊ ဢၼ်ဝႃႈ၊ၼွင် တိပေႇရိ၊ ၼၼ်ႉဢေႃႈ။-
ၵူၼ်းၼမ်ၼႃႇၸွမ်းမၼ်းၸဝ်ႈၵႂႃႇ၊ၵွပ်ႈပိူဝ်ႈၶဝ်လႆႈႁၼ်ၼိမိၵ်ႈလၢၵ်ႈၶၼႃႇဢၼ်မၼ်းၸဝ်ႈႁႂ်ႈယေႃးၵႃႇတင်းလၢႆၸိုၼ်ႈႁၢႆၼၼ်ႉဢေႃႈ။-
မၼ်းၸဝ်ႈၶိုၼ်ႈၵႂႃႇၵႃႈၼိူဝ်လွႆလႄႈ ၼင်ႈယူႇလူၺ်ႈၵၼ်တင်းတပႄးမၼ်းၸဝ်ႈတင်းလၢႆဢေႃႈ။-
ၶိင်ႇယၢမ်းၼၼ်ႉ၊ၶိင်ႇဢၼ်ပွႆး ပသၶႃႇ၊ ဢၼ်ပဵၼ်ပွႆးၵူၼ်းမဵဝ်း ၵျူး၊ ၶဝ်ၼၼ်ႉၸမ်တၵ်းႁွတ်ႈမႃးယဝ်ႉဢေႃႈ။-
ၸဝ်ႈယေႇသု၊ မုင်ႈတူၺ်းလႄႈႁၼ်ၵူၼ်းၼမ်ၼႃႇမႃးၸူးမၼ်းၸဝ်ႈယူႇသေယဝ်ႉ၊ထၢမ် ၽိလိပ်ႉပု၊ လႄႈဝႃႈ၊ “ႁႂ်ႈပေႃးၵုမ်ႇလဵင်ႉၶဝ်ၸိူဝ်းၼႆႉတင်းမူတ်းၸိုင်၊တေလႆႈသိုဝ်ႉတၢင်းၵိၼ်ၵႃႈတီႈလႂ်၊” ဝႃႈၼင်ႇၼႆ၊-
ႁႂ်ႈလႆႈၸၢမ်းၸႂ် ၽိလိပ်ႉပု၊ ဢေႃႈ။ ဢၼ်တႄႉမၼ်း၊မၼ်းၸဝ်ႈတေလႆႈႁဵတ်းၸိူဝ်ႉၼင်ႇႁိုဝ်ၼၼ်ႉ၊မၼ်းၸဝ်ႈပေႃးႁုဝႆႉယဝ်ႉဢေႃႈ။
ၽိလိပ်ႉပု၊ ၶိုၼ်းလၢတ်ႈလႄႈဝႃႈ၊ “ပုၼ်ႈၶဝ်တေလႆႈၵိၼ်ယေႈၵေႃႉယေႈဢိတ်းၵူၺ်းၵေႃႈ၊ၶဝ်ႈမုၼ်းတႃႇငိုၼ်းတေႇၼႃႇရီႇ သွင်ပၢၵ်ႇၶႅပ်းယင်းတေဢမ်ႇပေႃးၵုမ်ႇလီၶႃႈ၊” ဝႃႈၼင်ႇၼႆဢေႃႈ။
ၼႂ်းတပႄးမၼ်းၸဝ်ႈၸိူဝ်းၼၼ်ႉၵေႃႉၼိုင်ႈ၊ဢၼ်ပဵၼ် ဢၼ်ႇတရေႇ၊ ၼွင်ႉၸၢႆး သိမုၼ်ႇပေႇတရု၊ ၼၼ်ႉ လဝ်ႈလၢတ်ႈတီႈမၼ်းၸဝ်ႈလႄႈဝႃႈ၊-
“ၵႃႈတီႈလုၵ်ႈဢွၼ်ႇၵေႃႉၼိုင်ႈမီးၶဝ်ႈမုၼ်းမုယေႃးႁႃႈႁူၺ်ႇတင်းပႃဢွၼ်ႇသွင်တူဝ်ၶႃႈဢေႃႈ။ ၵူၺ်းၵႃႈ၊တေပွင်ႇလွင်ႈၵႃႈသင်ပုၼ်ႈတႃႇၵူၼ်းၼမ်ၼႃႇထၢၼ်ႇၼႆႉၼၼ်ႉၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၸင်ႇလၢတ်ႈလႄႈဝႃႈ၊ “ႁႂ်ႈၵူၼ်းၸိူဝ်းၼၼ်ႉၼင်ႈယူႇတႃႉ၊” ဝႃႈၼင်ႇၼႆ၊ပိူဝ်ႈဢၼ်တီႈၼၼ်ႈပဵၼ်ပၢင်ႇယိူဝ်ႈဢၼ်ၶဵဝ်လီၼႃႇဢေႃႈ။ ပိူဝ်ႈၼႆၸင်ႇၶဝ်ဢွၼ်ၵၼ်ၼင်ႈလႄႈ၊ၼပ်ႉဢၢၼ်ႇတူၺ်းမီးႁႃႈႁဵင်ၸမ်ၸမ်ဢေႃႈ။-
ၸဝ်ႈယေႇသု၊ ၵေႃႈဢဝ်ၶဝ်ႈမုၼ်းၼၼ်ႉယွင်ႈယေႃးတၢင်ႇၵျေးၸူးၽြႃးပဵၼ်ၸဝ်ႈသေယဝ်ႉ၊ၽႄမႅင်ႇပၼ်ၶဝ်ၸိူဝ်းဢၼ်ၼင်ႈယူႇၼၼ်ႉဢေႃႈ။ ပႃၵေႃႈမၼ်းၸဝ်ႈဢဝ်ႁဵတ်းၸိူဝ်ႉၼင်ႇၼၼ်သေယဝ်ႉမႅင်ႇပၼ်ၶဝ်တင်းသဵင်ႈတင်းလူင်လႄႈၶဝ်လႆႈၵႃႈၼင်ႇဢၼ်ၶဝ်ၶႂ်ႈလႆႈၼၼ်ႉဢေႃႈ။-
မိူဝ်ႈဢၼ်ၶဝ်ၵိၼ်ဢိမ်ႇယဝ်ႉၸိုင်၊မၼ်းၸဝ်ႈလၢတ်ႈတီႈတပႄးၸဝ်ႈၸိူဝ်းၼၼ်ႉလႄႈဝႃႈ၊ “ၼင်ႇႁိုဝ်တေဢမ်ႇပႅတ်ႈလၢႆသေဢိတ်းၸိုင်၊ၵဵပ်းဢဝ်ဢၼ်ယွႆႈဢၼ်ယႅမ်းဢၼ်ၵိုတ်းၵျၢၼ်ႇယူႇၸိူဝ်းၼၼ်ႉတႃႉ၊” ဝႃႈၼင်ႇၼႆလႄႈ၊-
ၶဝ်ၵေႃႈၵဵပ်းဢဝ်ဢၼ်ယွႆႈဢၼ်ယႅမ်းဢၼ်ပိူၼ်ႈၵိၼ်လိူဝ်လႄႈၵိုတ်းၵျၢၼ်ႇဝႆႉသေၵႃႈတီႈၶဝ်ႈမုၼ်းမုယေႃးႁႃႈႁူၺ်ႇၼၼ်ႉ၊လႆႈသိပ်းသွင်ပဵတ်ႈတဵမ်တဵမ်ဢေႃႈ။
ၵွပ်ႈပိူဝ်ႈၶဝ်ၸိူဝ်းဢၼ်မီးၵႃႈတီႈၼၼ်ႈ လႆႈႁၼ်ၼိမိၵ်ႈလၢၵ်ႈၶၼႃႇဢၼ် ၸဝ်ႈယေႇသု၊ ႁဵတ်းၼႄၼၼ်ႉလႄႈၶဝ်လၢတ်ႈလႄႈဝႃႈ၊ “ၵေႃႉၼႆႉပဵၼ်ပရေႃးၽႅတ်ႈ ဢၼ်တၵ်းၵျွမႃးၼႂ်းလေႃးၵႃႉၼႆႉၼၼ်ႉၸႂ်ႈတႄႉဢေႃႈ၊” ဝႃႈၼင်ႇၼႆဢေႃႈ။-
ၸဝ်ႈယေႇသု၊ ႁုလွင်ႈဢၼ်ၶဝ်ဢၢင်ႈတၵ်းမႃးလႄႈတဵၵ်းႁႂ်ႈမၼ်းၸဝ်ႈႁဵတ်းၶုၼ်ႁေႃၶမ်းၶဝ်ၼၼ်ႉလႄႈ၊မၼ်းၸဝ်ႈဢွၵ်ႇလႄႈၶိုၼ်ႈၵႂႃႇၵႃႈၼိူဝ်လွႆပႃးလဵဝ်ၵူၺ်းမၼ်းၸဝ်ႈဢေႃႈ။
မိူဝ်ႈဢၼ်ထိုင်ၶိင်ႇႁူဝ်ၶမ်ႈၸိုင်၊တပႄး ၸဝ်ႈယေႇသု၊ ၸိူဝ်းၼၼ်ႉလူင်းၵႂႃႇၸူးၵႃႈတီႈၼမ်ႉၼွင်လႄႈ၊-
ၶဝ်ႈၵႂႃႇၵႃႈၼႂ်းႁိူဝ်းယဝ်ႉၸင်ႇၶၢမ်ႈၼွင်သေမိူဝ်းၵႂႃႇၸူးၵႃႈတီႈဝဵင်း ၵပိူဝ်ႇၼေႇဢုမ်ႇ၊ ဢေႃႈ။ လပ်းသိင်ႇယဝ်ႉသေၵေႃႈ၊ ၸဝ်ႈယေႇသု၊ ယင်းဢမ်ႇပႆႇႁွတ်ႈထိုင်မႃးၵႃႈတီႈၶဝ်။-
မိူဝ်ႈၼၼ်ႉ၊လူမ်းလူင်ထူဝ်းပတ်ႉမႃးႁႅင်းၼႃႇလႄႈလႅင်းၼမ်ႉလုၵ်ႉၶိုၼ်ႈယႂ်ႇၼႃႇဢေႃႈ။-
မိူဝ်ႈဢၼ်ၶဝ်ၽၢႆးႁိူဝ်းလႄႈႁွတ်ႈၵႂႃႇသၢမ်သီႇလၵ်းၼၼ်ႉၸိုင်၊ၶဝ်ႁၼ် ၸဝ်ႈယေႇသု၊ ပႆၵႃႈၼိူဝ်ၽိဝ်ၼမ်ႉမႃးၸူးႁိမ်းႁိူဝ်းၶဝ်ယူႇလႄႈ ၶဝ်တူၵ်းၸႂ်ၵူဝ်ႁႄၼႃႇဢေႃႈ။-
မၼ်းၸဝ်ႈၵေႃႈလၢတ်ႈတီႈၶဝ်လႄႈဝႃႈ၊ “ယႃႇပေၵူဝ်။ ပဵၼ်ၵဝ်ဢေႃႈ၊” ဝႃႈၼင်ႇၼႆလႄႈ၊-
ၶဝ်ၵေႃႈၸူမ်းသိူဝ်းၼႃႇ၊ႁပ်ႉဢဝ်မၼ်းၸဝ်ႈၶဝ်ႈၵႂႃႇၵႃႈၼႂ်းႁိူဝ်းသေဢေႃႈ။ မိူဝ်ႈၼၼ်ႉ၊ႁိူဝ်းၵေႃႈသိူၵ်ႈၵႃႈတီႈဢၼ်ၶဝ်ၶႂ်ႈၵႂႃႇႁွတ်ႈၼၼ်ႉၵမ်းလဵဝ်ဢေႃႈ။
ၼႂ်းဝၼ်းမိူဝ်ႈၽုၵ်ႈၼၼ်ႉၵူၼ်းဢၼ်ၸုတုမ်လူၺ်ႈၵၼ်တင်း ၸဝ်ႈယေႇသု၊ ၽၢႆႇပုၼ်ႉၽင်ႇၼွင်ၼၼ်ႉလႆႈႁၼ်လွင်ႈဢၼ်ႁိူဝ်းဢွၼ်ႇလမ်းလဵဝ်ၵူၺ်းသိူၵ်ႈယူႇၵႃႈတီႈၼၼ်ႈလႄႈၶဝ်လႆႈႁုလွင်ႈဢၼ် ၸဝ်ႈယေႇသု၊ ယင်းဢမ်ႇၶဝ်ႈၵႂႃႇၵႃႈၼႂ်းႁိူဝ်းၸွမ်းတပႄးမၼ်းၸဝ်ႈတင်းလၢႆလႄႈတပႄးၸဝ်ႈၸိူဝ်းၼၼ်ႉၵူၺ်းၵႂႃႇၼၼ်ႉဢေႃႈ။-
ႁိူဝ်းဢွၼ်ႇတၢင်ႇလမ်းၼမ်ၼႃႇၵေႃႈ လုၵ်ႉသေၵႃႈတီႈဝဵင်း တိပေႃးရိ၊ မႃးသိူၵ်ႈၵႃႈတီႈႁိမ်းၽင်ႇၼွင်တီႈဢၼ်ဝၼ်းၼၼ်ႉၸဝ်ႈၽြႃးယွင်ႈယေႃးၵျေးၸူးၸဝ်ႈသေယဝ်ႉ၊ၵူၼ်းတင်းလၢႆလႆႈၵိၼ်ၶဝ်ႈမုၼ်းၼၼ်ႉဢေႃႈ။-
ပိူဝ်ႈၼႆလႄႈမိူဝ်ႈဢၼ်ၵူၼ်းၸိူဝ်းၼၼ်ႉ၊ႁၼ်လွင်ႈဢၼ် ၸဝ်ႈယေႇသု၊ တင်းတပႄးၸဝ်ႈတင်းလၢႆဢမ်ႇမီးၵႃႈတီႈၼၼ်ႈယဝ်ႉၸိုင်၊ၶဝ်ဢွၼ်ၵၼ်ၶဝ်ႈၵႂႃႇၵႃႈၼႂ်းႁိူဝ်းၸိူဝ်းၼၼ်ႉသေလႄႈၵႂႃႇၸူးဝဵင်း ၵပိူဝ်ႇၼေႇဢုမ်ႇ၊ ႁႂ်ႈလႆႈသွၵ်ႈႁႃ ၸဝ်ႈယေႇသု၊ ဢေႃႈ။
မိူဝ်ႈဢၼ်ၶဝ်ထူပ်းႁၼ် ၸဝ်ႈယေႇသု၊ ၵႃႈတီႈၽၢႆႇပုၼ်ႉၽင်ႇၼမ်ႉၼွင်ၸိုင်၊ၶဝ်လဝ်ႈထၢမ်လႄႈဝႃႈ၊ “သြႃႇႁဝ်း။ ၸဝ်ႈႁဝ်းႁွတ်ႈမႃးၵႃႈတီႈၼႆႈမိူဝ်ႈလႂ်ၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ၵဝ်ဝႃႈတီႈၸိုဝ်ႈၸႂ်ႈမၼ်းတီႈသူၸမ်ႉ၊သူၸွမ်းသွၵ်ႈၸွမ်းႁႃၵဝ်ၵွပ်ႈပိူဝ်ႈသူပွင်ႇလႅင်းၸႂ်လွင်ႈၼိမိၵ်ႈလၢၵ်ႈၶၼႃႇတင်းလၢႆဢမ်ႇၸႂ်ႈ။ သူၸွမ်းႁႃၵွပ်ႈပိူဝ်ႈသူလႆႈၵိၼ်ၶဝ်ႈမုၼ်းဢိမ်ႇဢိမ်ႇတဵမ်တဵမ်ၼၼ်ႉၵူၺ်းဢေႃႈ။-
ယႃႇပေသၢင်ႈႁဵတ်းပုၼ်ႈတၢင်းၵိၼ်ဢၼ်ၸၢင်ႈလုၸၢင်ႈလႅဝ်လႄႈ၊ၵႆႉၶတ်းၸႂ်ႁႂ်ႈလႆႈတၢင်းၵိၼ်ဢၼ်ၸၢင်ႈတႄႇယူႇထူၼ်ႈၸူဝ်ႈထႃႇဝရႃႉဢသၢၵ်ႈတႃႉ။ တၢင်းၵိၼ်မဵဝ်းၼႆႉ လုၵ်ႈၵူၼ်း၊ တၵ်းပၼ်သူၵွပ်ႈပိူဝ်ႈၽြႃးပေႃႈၸဝ်ႈတွၵ်ႇၸုမ်ႈဢၼ်ႁုမၢတ်ႈဢဝ်မၼ်းၸဝ်ႈၼၼ်ႉယဝ်ႉ၊” ဝႃႈၼင်ႇၼႆဢေႃႈ။
ၶဝ်ၵေႃႈလဝ်ႈထၢမ်လႄႈဝႃႈ၊ “ႁႂ်ႈပေႃးမႅၼ်ႈၵၼ်တင်းဢလူဝ်ႇၽြႃးပဵၼ်ၸဝ်ႈၸိုင်၊ႁဝ်းၶႃႈတေလႆႈႁဵတ်းၸိူဝ်ႉၼင်ႇႁိုဝ်ၶႃႈ၊” ဝႃႈၼင်ႇၼႆလႄႈ၊-
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ဢလူဝ်ႇၽြႃးပဵၼ်ၸဝ်ႈဢၼ်ၶႂ်ႈႁႂ်ႈသူၵမ်ၵျၢင်ႉၸမ်ႉ၊ႁႂ်ႈယုမ်ႇမၢတ်ႈဢိင်ပိုင်ႈတီႈၵေႃႉဢၼ်မၼ်းၸဝ်ႈပွႆႇၸႂ်ႉမႃးၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၶဝ်သမ်ႉလဝ်ႈထၢမ်လႄႈဝႃႈ၊ “ႁႂ်ႈႁဝ်းၶႃႈလႆႈႁၼ်လႄႈယုမ်ႇမၢတ်ႈၸဝ်ႈႁဝ်းၸိုင်၊ၸဝ်ႈႁဝ်းတေႁဵတ်းၼႄၼိမိၵ်ႈလၢၵ်ႈၶၼႃႇမဵဝ်းလႂ်ၶႃႈ။ ၸဝ်ႈႁဝ်းတၵ်းႁဵတ်းၼႄဢၼ်လႂ်ၶႃႈ။-
ပူႇမွၼ်ႇႁဝ်းၸိူဝ်းၼၼ်ႉလႆႈၵိၼ်ၶဝ်ႈမုၼ်း မၼ်ႇၼႃႉ၊ ၵႃႈၼႂ်းထိူၼ်ႇလႅင်ႉၼၼ်ႉမႃးမႅၼ်ႈၸွမ်းၵႃႈၼင်ႇဢၼ်တႅမ်ႈဝႆႉၵႃႈၼႂ်းၵျၢမ်းလိၵ်ႈလႄႈဝႃႈ၊ ‘မၼ်းၸဝ်ႈဢဝ်ၶဝ်ႈမုၼ်းဢၼ်လႆႈၵႃႈတီႈၵၢင်ႁၢဝ်ၼၼ်ႉပၼ်ၶဝ်ၵိၼ်ဢေႃႈ၊’ ဝႃႈၼင်ႇၼႆၼၼ်ႉယဝ်ႉ၊” ဝႃႈၼင်ႇၼႆဢေႃႈ။
ပိူဝ်ႈၼႆၸင်ႇ၊ ၸဝ်ႈယေႇသု၊ လၢတ်ႈတီႈၶဝ်လႄႈဝႃႈ၊ “ၵဝ်ဝႃႈတီႈၸိုဝ်ႈၸႂ်ႈမၼ်းတီႈသူၸမ်ႉ၊ၵေႃႉဢၼ်ဢဝ်ၶဝ်ႈမုၼ်းဢၼ်လႆႈၵႃႈတီႈၵၢင်ႁၢဝ်မႃးပၼ်သူၼၼ်ႉ၊ပဵၼ် မူဝ်းသေႇ၊ ဢမ်ႇၸႂ်ႈ။ ပေႃႈၸဝ်ႈၵဝ်ၼၼ်ႉၵူၺ်းၸင်ႇပၼ်ၶဝ်ႈမုၼ်းဢၼ်ၸိုဝ်ႈဢၼ်ၸႂ်ႈဢၼ်လႆႈၵႃႈတီႈၵၢင်ႁၢဝ်မႃးၼၼ်ႉဢေႃႈ။-
လွင်ႈမၼ်းၸမ်ႉ၊ၶဝ်ႈမုၼ်းၽြႃးပဵၼ်ၸဝ်ႈၼၼ်ႉ၊ပဵၼ်ၵေႃႉဢၼ်လုၵ်ႉသေၵႃႈတီႈၵၢင်ႁၢဝ်မႃးလႄႈ ပၼ်ဢသၢၵ်ႈတီႈၵူၼ်းလေႃးၵီႇတင်းလၢႆဢေႃႈ၊” ဝႃႈၼင်ႇၼႆဢေႃႈ။
ၶဝ်ၵေႃႈလဝ်ႈယွၼ်းလႄႈဝႃႈ၊ “ၸဝ်ႈၽြႃးတီႈၶႃႈ။ ၶႅၼ်းတေႃႈပၼ်ၶဝ်ႈမုၼ်းၼၼ်ႉတီႈႁဝ်းၶႃႈသေႇသေႇသေၵမ်းၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ မွၵ်ႇလၢတ်ႈလႄႈဝႃႈ၊ “ၵဝ်ပဵၼ်ၶဝ်ႈမုၼ်းဢသၢၵ်ႈဢေႃႈ။ ၵေႃႉဢၼ်မႃးတီႈၵဝ်ၼၼ်ႉ၊တၵ်းဢမ်ႇတွၼ်ႉလႆႈဢိုပ်းတင်းၵိၼ်။ ၵေႃႉဢၼ်ယုမ်ႇမၢတ်ႈၵဝ်ၼၼ်ႉ တၵ်းဢမ်ႇတွၼ်ႉလႆႈတွင်ႉမႆႈၼမ်ႉယဝ်ႉ။-
ၵူၺ်းၵႃႈ၊သူလႆႈႁၼ်ၵဝ်ယဝ်ႉသေၵေႃႈ ဢမ်ႇယုမ်ႇမၢတ်ႈဝႃႈၼႆၵဝ်ဝႃႈမႃးယဝ်ႉ။-
ၶဝ်ၸိူဝ်းဢၼ်ပေႃႈၸဝ်ႈပၼ်ၵဝ်ဝႆႉတင်းသဵင်ႈတင်းလူင်တၵ်းမႃးၵႃႈတီႈၵဝ်လႄႈ၊ၵေႃႉဢၼ်မႃးၵႃႈတီႈၵဝ်ၼၼ်ႉ၊ၵဝ်တၵ်းဢမ်ႇၸုၼ်ႉဢမ်ႇပႄႇပႅတ်ႈမၼ်းလႃးလႃး။-
လွင်ႈမၼ်းၸမ်ႉ၊ၵဝ်လႆႈလုၵ်ႉသေၵႃႈၼိူဝ်ၵၢင်ႁၢဝ်လူင်းမႃးႁႂ်ႈလႆႈႁဵတ်းၸွမ်းဢလူဝ်ႇတူဝ်ၸဝ်ႈၵဝ်ႇဢမ်ႇၸႂ်ႈ။ မႃးႁႂ်ႈလႆႈႁဵတ်းၸွမ်းဢလူဝ်ႇၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉဢေႃႈ။-
ဢလူဝ်ႇၸဝ်ႈဢၼ်ပွႆႇၸႂ်ႉၵဝ်မႃးၸမ်ႉ၊တၵ်းဢမ်ႇႁႂ်ႈၶဝ်ၸိူဝ်းဢၼ်မၼ်းၸဝ်ႈပၼ်ၵဝ်ၼၼ်ႉလႆႈႁၢႆလၢႆၵႂႃႇသေၵေႃႉသေၵူၼ်းလႄႈႁႂ်ႈၶဝ်တင်းသဵင်ႈတင်းလူင်လုၵ်ႉၶိုၼ်းလိပ်းမႃးၼႂ်းဝၼ်းၵမ်းလိုၼ်းသုတ်းၼၼ်ႉဢေႃႈ။-
ပေႃႈၸဝ်ႈၵဝ်မီးဢလူဝ်ႇၸမ်ႉ၊ပဵၼ်တၢင်းဢၼ်ၶႂ်ႈႁႂ်ႈၶဝ်ၸိူဝ်းဢၼ်လႆႈႁၼ်လုၵ်ႈၸဝ်ႈလႄႈယုမ်ႇမၢတ်ႈမၼ်းၸဝ်ႈၵူႈၵေႃႉၵူႈၵူၼ်းတၵ်းလႆႈဢသၢၵ်ႈထႃႇဝရႃႉၼၼ်ႉဢေႃႈ။ ၵဝ်ၵေႃႈတၵ်းႁႂ်ႈၶဝ်လုၵ်ႉၶိုၼ်းလိပ်းမႃးၼႂ်းဝၼ်းၵမ်းလိုၼ်းသုတ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵူၼ်းမဵဝ်း ၵျူး၊ တင်းလၢႆပွင်ႉလၢတ်ႈလွင်ႈမၼ်းၸဝ်ႈ၊ၵွပ်ႈပိူဝ်ႈမၼ်းၸဝ်ႈဝႃႈ၊ “ၵဝ်ပဵၼ်ၶဝ်ႈမုၼ်းဢၼ်လုၵ်ႉၵႃႈၼိူဝ်ၵၢင်ႁၢဝ်လူင်းမႃးဢေႃႈ၊” ဝႃႈၼင်ႇၼႆၼၼ်ႉလႄႈ၊-
ၶဝ်လၢတ်ႈလႄႈဝႃႈ၊ “ၵေႃႉၼႆႉပဵၼ် ယေႇသု၊ လုၵ်ႈၸၢႆး ယူဝ်းသႅပ်ႈ၊ ဢမ်ႇၸႂ်ႈႁိုဝ်။ ပေႃႈမႄႈမၼ်းၵေႃႈႁဝ်းႁုၸၵ်းယူႇဢေႃႈ။ ႁဵတ်းၸိူဝ်ႉၼင်ႇႁိုဝ်လႄႈမၼ်းဝႃႈ၊မၼ်းလုၵ်ႉၵႃႈၼိူဝ်ၵၢင်ႁၢဝ်လူင်းမႃး၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈတီႈၶဝ်လႄႈဝႃႈ၊ “သူၼင်ႇၵၼ်ယႃႇပေထဵင်ၵၼ်မေႃးၵၼ်ယဝ်ႉ။-
ပေႃးဝႃႈ၊ပေႃႈၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉ၊ယင်းဢမ်ႇဢဝ်ၶဝ်မႃးၸူးၵဝ်ၸိုင်၊ၽူႈလႂ်ၵေႃႈဢမ်ႇမႃးၵႃႈတီႈၵဝ်လႆႈသေၵေႃႉသေၵူၼ်း။ ၵေႃႉဢၼ်မႃးၸူးၵဝ်ၼၼ်ႉ ၵဝ်တၵ်းႁႂ်ႈလုၵ်ႉၶိုၼ်းလိပ်းမႃးၼႂ်းဝၼ်းၵမ်းလိုၼ်းသုတ်းၼၼ်ႉဢေႃႈ။-
ပရေႃးၽႅတ်ႈ ၶဝ်တႅမ်ႈဝႆႉ လႄႈဝႃႈ၊ ‘ၶဝ်တင်းသဵင်ႈတင်းလူင်တၵ်းပဵၼ်ၵေႃႉဢၼ်ၽြႃးပဵၼ်ၸဝ်ႈသင်ႇသွၼ်သုင်းမႃႉဢေႃႈ၊’ ဝႃႈၼင်ႇၼႆယဝ်ႉ။ ၸွမ်းၼင်ႇဢၼ်ဝႃႈၼၼ်ႉ ၵေႃႉဢၼ်လႆႈထွမ်ႇငိၼ်းလႄႈသွၼ်ဢဝ်တီႈပေႃႈၸဝ်ႈယဝ်ႉၼၼ်ႉ၊ဢွၼ်ၵၼ်မႃးတီႈၵဝ်ၵူႈၵေႃႉၵူႈၵူၼ်းဢေႃႈ။-
လွင်ႈတၢင်းၼႆႉ၊ၶႂ်ႈဝႃႈၵူၼ်းသေၵေႃႉသေၵူၼ်းလႆႈႁၼ်ပေႃႈၸဝ်ႈမႃးယဝ်ႉဝႃႈၼႆဢမ်ႇၸႂ်ႈ။ ၸဝ်ႈဢၼ်လုၵ်ႉသေၵႃႈတီႈၽြႃးပဵၼ်ၸဝ်ႈမႃးၼၼ်ႉ၊ပႃးလဵဝ်ၵူၺ်းလႆႈႁၼ်ပေႃႈၸဝ်ႈဢေႃႈ။-
ၵဝ်ဝႃႈတီႈၸိုဝ်ႈတီႈၸႂ်ႈမၼ်းၸမ်ႉ၊ၵေႃႉဢၼ်ယုမ်ႇမၢတ်ႈၵဝ်ၼႆႉၼၼ်ႉ လႆႈဢသၢၵ်ႈထႃႇဝရႃႉဢေႃႈ။-
ၵူၺ်းၵႃႈ၊ၶဝ်ႈမုၼ်းဢၼ်လုၵ်ႉသေၵႃႈၼိူဝ်ၵၢင်ႁၢဝ်မႃးၼႆႉၸမ်ႉ၊ပဵၼ်ပုၼ်ႈလွင်ႈၼင်ႇႁိုဝ်ၵူၼ်းတၵ်းၵိၼ်လႄႈဢမ်ႇလႆႈတၢႆၼၼ်ႉဢေႃႈ။-
ၵဝ်ပဵၼ်ၶဝ်ႈမုၼ်းဢၼ်ဢသၢၵ်ႈလိပ်းယူႇ၊ဢၼ်လုၵ်ႉသေၵႃႈၼိူဝ်ၵၢင်ႁၢဝ်မႃးၼၼ်ႉဢေႃႈ။ ၵေႃႉလႂ်ၵူၼ်းလႂ်သေဢမ်ႇဝႃႈ၊ပေႃးၵိၼ်ၶဝ်ႈမုၼ်းၼႆႉၸိုင်၊တၵ်းဢသၢၵ်ႈလိပ်းယူႇတႃႇသေႇဢေႃႈ။ ၶဝ်ႈမုၼ်းဢၼ်ၵဝ်ၸုၼ်ႉပၼ်ပုၼ်ႈဢသၢၵ်ႈၵူၼ်းလေႃးၵီႇတင်းလၢႆၼၼ်ႉၸမ်ႉ၊ပဵၼ်ၼိူဝ်ႉၵဝ်ဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၵူၼ်းမဵဝ်း ၵျူး၊ ၶဝ်ၼင်ႇၵၼ်တွပ်ႇထဵင်ၵၼ်လႄႈဝႃႈ၊ “မၼ်းပၼ်ၼိူဝ်ႉမၼ်းပုၼ်ႈႁဝ်းတၵ်းၵိၼ်ၼႆႉတေႁဵတ်းႁိုဝ်ပဵၼ်လႆႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈ လၢတ်ႈလႄႈဝႃႈ၊ “ၵဝ်သမ်ႉဝႃႈတီႈၸိုဝ်ႈတီႈၸႂ်ႈမၼ်းတီႈသူၸမ်ႉ၊ပေႃးသူဢမ်ႇၵိၼ်ၼိူဝ်ႉ လုၵ်ႈၵူၼ်း၊ ဢမ်ႇၵိၼ်လိူတ်ႈမၼ်းၸဝ်ႈၸိုင်၊ဢသၢၵ်ႈဢမ်ႇမီးၼႂ်းသူ။-
ၵေႃႉဢၼ်ၵိၼ်ၼိူဝ်ႉတင်းလိူတ်ႈၵဝ်ၼၼ်ႉလႆႈဢသၢၵ်ႈထႃႇဝရႃႉဢေႃႈ။ ၵဝ်ၵေႃႈတၵ်းႁႂ်ႈမၼ်းလုၵ်ႉၶိုၼ်းလိပ်းမႃးၼႂ်းဝၼ်းၵမ်းလိုၼ်းသုတ်းၼၼ်ႉဢေႃႈ။-
လွင်ႈမၼ်းၸမ်ႉ၊ၼိူဝ်ႉၵဝ်ပဵၼ်တၢင်းၵိၼ်ဢၼ်ၸႅတ်ႈဢၼ်မၢၼ်ႇဢေႃႈ။ လိူတ်ႈၵဝ်ပဵၼ်ဢၼ်လီၵိၼ်ဢၼ်ၸႅတ်ႈဢၼ်မၢၼ်ႇဢေႃႈ။-
ၵေႃႉဢၼ်ၵိၼ်ၼိူဝ်ႉၵဝ်၊ဢိၵ်ႇတင်းလိူတ်ႈၵဝ်ၼၼ်ႉတႄႇယူႇၼႂ်းၵဝ်လႄႈၵဝ်ၵေႃႈတႄႇယူႇၵႃႈၼႂ်းမၼ်းဢေႃႈ။-
ၸွမ်းၼင်ႇပေႃႈၸဝ်ႈဢၼ်ဢသၢၵ်ႈလိပ်းယူႇပွႆႇၸႂ်ႉၵဝ်မႃးလႄႈၵဝ်သမ်ႉဢသၢၵ်ႈလိပ်းယူႇၵွပ်ႈလူၺ်ႈပေႃႈၸဝ်ႈၼၼ်ႉ၊ၵေႃႉဢၼ်ၵိၼ်ၵဝ်ၼၼ်ႉတၵ်းဢသၢၵ်ႈလိပ်းၵွပ်ႈလူၺ်ႈၵဝ်ဢေႃႈ။-
ဢၼ်ၼႆႉၸင်ႇပဵၼ်ၶဝ်ႈမုၼ်းဢၼ်လုၵ်ႉသေၵႃႈၼိူဝ်ၵၢင်ႁၢဝ်မႃးလႄႈ၊မၼ်းဢမ်ႇၸႂ်ႈၶဝ်ႈမုၼ်းမဵဝ်းဢၼ်ပူႇမွၼ်ႇသူၸိူဝ်းၼၼ်ႉ ၵိၼ်ယူႇသေလႄႈလႆႈတၢႆၵႂႃႇၼၼ်ႉ။ ၵေႃႉဢၼ်ၵိၼ်ၶဝ်ႈမုၼ်းၼႆႉၸမ်ႉ၊တၵ်းဢသၢၵ်ႈလိပ်းယူႇတႃႇသေႇဢေႃႈ၊” ဝႃႈၼင်ႇၼႆဢေႃႈ။-
ၸဝ်ႈယေႇသု၊ လၢတ်ႈဝႃႈၸိူဝ်ႉၼင်ႇၼႆ ၸွမ်းၼင်ႇဢၼ်မၼ်းၸဝ်ႈသင်ႇသွၼ်သုင်းမႃႉပၼ်ၵႃႈၼႂ်းၸရွပ်ႈႁေႃးတြႃးၵႃႈတီႈဝဵင်း ၵပိူဝ်ႇၼေႇဢုမ်ႇ၊ ၼၼ်ႉဢေႃႈ။
မိူဝ်ႈဢၼ်တပႄးၸဝ်ႈတင်းလၢႆငိၼ်းယဝ်ႉၸိုင်၊ၼႂ်းၶဝ်ၼၼ်ႉၼမ်ၼႃႇလၢတ်ႈလႄႈဝႃႈ၊ “ၵႂၢမ်းတြႃးၼႆႉယၢပ်ႇၼႃႇလႄႈၽူႈလႂ်တၵ်းႁုထွမ်ႇလႆႈ၊” ဝႃႈၼင်ႇၼႆဢေႃႈ။
တၢင်းဢၼ်တပႄးၸဝ်ႈၸိူဝ်းၼၼ်ႉ၊ပွင်ႉလၢတ်ႈယူႇၸိူဝ်ႉၼင်ႇၼၼ်ၼၼ်ႉ၊ ၸဝ်ႈယေႇသု၊ ႁုၵူၺ်းမၼ်းၸဝ်ႈလႄႈလၢတ်ႈဝႃႈ၊ “ၵႂၢမ်းၼႆႉႁဵတ်းႁႂ်ႈသူၸႂ်လုႁိုဝ်း။-
ပေႃးပဵၼ်ၼႆသင်ဝႃႈ၊သူလႆႈႁၼ် လုၵ်ႈၵူၼ်း၊ ၶိုၼ်ႈၵႂႃႇၸူးတီႈယူႇၵဝ်ႇၵဝ်ႇမၼ်းၸဝ်ႈၸိုင်၊ၸႂ်သူတၵ်းပဵၼ်ၸိူဝ်ႉႁိုဝ်။-
ဝိၺိၺ်ႇၸဝ်ႈၵူၺ်းႁႂ်ႈဢသၢၵ်ႈလိပ်းဢေႃႈ။ တၼ်းၶူဝ်းၵူၼ်းၸမ်ႉ၊ဢမ်ႇတၢတ်ႈၼိူင်ႇလႆႈလႃးလႃး။ ၵႂၢမ်းၸိူဝ်းဢၼ်ၵဝ်လၢတ်ႈတီႈသူၼႆႉ၊ပဵၼ်ၸႂ်ဝိၺိၺ်ႇတင်းဢသၢၵ်ႈဢေႃႈ။-
ၼႂ်းဝႃႈၼၼ်သေၵေႃႈ၊ၼႂ်းသူၵမ်ႈၽွင်ႈယင်းဢမ်ႇယုမ်ႇမၢတ်ႈ၊” ဝႃႈၼင်ႇၼႆဢေႃႈ။ လွင်ႈမၼ်းၸမ်ႉ၊ ၸဝ်ႈယေႇသု၊ ႁုဝႆႉၸဵမ်မိူဝ်ႈၵေႃႇၸႃႉႁူဝ်ပိုင်းလွင်ႈဢၼ်ၽူႈလႂ်တၵ်းဢမ်ႇယုမ်ႇမၢတ်ႈ၊ဢိၵ်ႇတင်းၽူႈလႂ်တၵ်းဢဝ်မၼ်းၸဝ်ႈဢၢပ်ႈၼၼ်ႉယူႇဢေႃႈ။-
မၼ်းၸဝ်ႈၸင်ႇသိုပ်ႇလၢတ်ႈလႄႈဝႃႈ၊ “ၵွပ်ႈပိူဝ်ႈၼႆလႄႈ၊ ‘ပေႃးပေႃႈၸဝ်ႈဢမ်ႇပၼ်ဢၶႂၢင်ႉၸိုင်၊ၽူႈလႂ်သေၵေႃႉသေၵူၼ်းဢမ်ႇမႃးၵႃႈတီႈၵဝ်လႆႈ၊’ ဝႃႈၼႆၵဝ်လႆႈလၢတ်ႈသူယဝ်ႉ၊” ဝႃႈၼင်ႇၼႆဢေႃႈ။
တႄႇၸႃႉဢဝ်မိူဝ်ႈၼၼ်ႉၵႂႃႇလႄႈတပႄးမၼ်းၸဝ်ႈၼမ်ၼႃႇၶိုၼ်းမိူဝ်းၵႂႃႇသေယဝ်ႉ၊ဢမ်ႇၶိုၼ်းမႃးၸွမ်းမၼ်းၸဝ်ႈထႅင်ႈသေပွၵ်ႈယဝ်ႉဢေႃႈ။-
ၸဝ်ႈယေႇသု၊ ၸင်ႇလၢတ်ႈတီႈသိပ်းသွင်ၵေႃႉၼၼ်ႉလႄႈဝႃႈ၊ “သူၵေႃႈတေၶႂ်ႈဢွၵ်ႇၵႂႃႇႁိုဝ်း၊” ဝႃႈၼင်ႇၼႆဢေႃႈ။
သိမုၼ်ႇပေႇတရု၊ ၵေႃႈ လဝ်ႈလၢတ်ႈလႄႈဝႃႈ၊ “ၸဝ်ႈၽြႃးတီႈၶႃႈ။ ႁဝ်းၶႃႈတေၸၢင်ႈၵႂႃႇၸူးၽူႈလႂ်ၶႃႈ။ ၸဝ်ႈႁဝ်းမီးၵႂၢမ်းဢၼ်တၵ်းပၼ်ဢသၢၵ်ႈထႃႇဝရႃႉဢေႃႈ။-
ႁဝ်းၶႃႈယုမ်ႇမၢတ်ႈလႄႈႁုလွင်ႈဢၼ်ၸဝ်ႈႁဝ်းပဵၼ်ၸဝ်ႈမူတ်းၸၢင်ႇဢၼ်လုၵ်ႉသေၵႃႈတီႈၽြႃးပဵၼ်ၸဝ်ႈမႃးၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းတွပ်ႇလႄႈဝႃႈ၊ “ၵဝ်လိူၵ်ႈၵဵပ်းဢဝ်သူသိပ်းသွင်ၵေႃႉၼႆႉဢမ်ႇၸႂ်ႈႁိုဝ်း။ ၼႂ်းဝႃႈၼၼ်သေၵေႃႈ ၼႂ်းသူၼႆႉပႃးမႃႇၼၢတ်ႈၵေႃႉၼိုင်ႈဢေႃႈ၊” ဝႃႈၼင်ႇၼႆဢေႃႈ။-
မၼ်းၸဝ်ႈလၢတ်ႈလူၺ်ႈလွင်ႈ ယုတႃႉ၊ လုၵ်ႈၸၢႆး သိမုၼ်ႇဢိသၵႃႇရေႇဢုတ်ႈ၊ ဢေႃႈ။ လွင်ႈမၼ်းၸမ်ႉ၊မၼ်းပဵၼ်ၵေႃႉဢၼ်ၶဝ်ႈပႃးၼႂ်းသိပ်းသွင်ပႃးၼၼ်ႉယူႇလႄႈပဵၼ်ၵေႃႉဢၼ်တၵ်းဢဝ်မၼ်းၸဝ်ႈဢၢပ်ႈၼႂ်းမိုဝ်းရၢၼ်ႇသူႇၼၼ်ႉဢေႃႈ။
လိုၼ်းၼၼ်ႉ၊ ၸဝ်ႈယေႇသု၊ လႄႇလဵပ်ႈၵႃႈၼႂ်းမိူင်း ၵႃႇလိလႄး၊ လႄႈယူႇဢေႃႈ။ မၼ်းၸဝ်ႈဢမ်ႇၶႂ်ႈလႄႇလဵပ်ႈၵႃႈၼႂ်းမိူင်း ယုတႃႉ၊ ၵွပ်ႈပိူဝ်ႈၶုၼ်ဢႃႇၼႃႇၵူၼ်းမဵဝ်း ၵျူး၊ ၶဝ်ၵျၢမ်ႇႁႃဢဝ်မၼ်းၸဝ်ႈတၢႆၼၼ်ႉဢေႃႈ။-
မိူဝ်ႈၼၼ်ႉ၊ၶိင်ႇပွႆးၵူၼ်းမဵဝ်း ၵျူး၊ ၶဝ်ဢၼ်ဝႃႈ၊ပွႆးသုမ်ႉထဵင်ၼၼ်ႉ၊ၸမ်မႃးယဝ်ႉလႄႈ၊-
ၼွင်ႉၸၢႆးၸဝ်ႈၸိူဝ်းၼၼ်ႉလၢတ်ႈတီႈမၼ်းၸဝ်ႈလႄႈဝႃႈ၊ “ႁႂ်ႈတပႄးပီႈႁဝ်းတင်းလၢႆႁၼ်လွင်ႈတၢင်းဢၼ်မႂ်းႁဵတ်းယူႇၸိူဝ်းၼၼ်ႉၸိုင်၊ဢွၵ်ႇသေၵႃႈတီႈၼႆႈလႄႈၵႂႃႇၵႃႈတီႈမိူင်း ယုတႃႉ၊ ပုၼ်ႉတႃႉ။-
ပေႃးသေၵေႃႉသေၵူၼ်းၶႂ်ႈႁႂ်ႈၸိုဝ်ႈသဵင်ဢွၵ်ႇၸိုင်၊မၼ်းဢမ်ႇၸၢင်ႈလၵ်ႉလွမ်ႁဵတ်းၵူၺ်း။ ပေႃးမႂ်းႁဵတ်းလွင်ႈတၢင်းၸိူဝ်းၼႆႉၸိုင်၊ၼႄပျႃးတူဝ်ၸဝ်ႈၵဝ်ႇထၢင်ႇထၢင်ႇသႃးသႃးၵႃႈၼႂ်းလေႃးၵႃႉၼႆႉတႃႉ၊” ဝႃႈၼင်ႇၼႆဢေႃႈ။-
ပိူဝ်ႈဢၼ်ၼွင်ႉၸၢႆးၸဝ်ႈၸိူဝ်းၼၼ်ႉဢမ်ႇယုမ်ႇမၢတ်ႈမၼ်းၸဝ်ႈလႄႈၶဝ်ၸင်ႇဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “ၶိင်ႇၵဝ်ဢၼ်သၢင်ႇထုၵ်ႇၼၼ်ႉဢမ်ႇပႆႇႁွတ်ႈၽႅဝ်။ ၶိင်ႇသူၸမ်ႉ၊သၢင်ႇထုၵ်ႇယူႇတႃႇသေႇဢေႃႈ။-
ၵူၼ်းလေႃးၵီႇတင်းလၢႆဢမ်ႇၸင်းသူ၊ၸင်းၵဝ်ၵူၺ်း၊ၵွပ်ႈပိူဝ်ႈၵဝ်ၶၢမ်ႇသၢၵ်ႈသေႇလွင်ႈဢၼ်တၢင်းၵမ်တၢင်းၵျၢင်ႉၶဝ်ႁၢႆႉမိူၵ်ႈၼၼ်ႉဢေႃႈ။-
သူဢွၼ်ၵၼ်ၵႂႃႇၶဝ်ႈပွႆးၼၼ်ႉတႃႉ။ ပိူဝ်ႈဢၼ်ၶိင်ႇၵဝ်ဢမ်ႇပႆႇပျေႉၸုမ်ႇၼၼ်ႉ ၵဝ်တၵ်းတေဢမ်ႇၶဝ်ႈပွႆးၼၼ်ႉယဝ်ႉ၊-”
ဝႃႈၼင်ႇၼႆသေလႄႈ၊ယူႇၵႃႈၼႂ်းမိူင်း ၵႃႇလိလႄး၊ ယူႇဢေႃႈ။
လိုၼ်းသေၼွင်ႉၸၢႆးၸဝ်ႈၸိူဝ်းၼၼ်ႉ ၵႂႃႇၶဝ်ႈပွႆးယဝ်ႉၼၼ်ႉ၊ ၸဝ်ႈယေႇသု၊ ၵေႃႈၵႂႃႇဢေႃႈ။ ၵူၺ်းၵႃႈ၊ယင်းဢမ်ႇၵႂႃႇထၢင်ႇထၢင်ႇသႃးသႃးလႄႈလွမ်ၵႂႃႇတဵတ်ႇတဵတ်ႇၵူၺ်းဢေႃႈ။-
ၶုၼ်ဢႃႇၼႃႇၵူၼ်းမဵဝ်း ၵျူး၊ ၶဝ်သွၵ်ႈႁႃမၼ်းၸဝ်ႈၵႃႈၼႂ်းပွႆးလႄႈဝႃႈ၊ “မၼ်းမီးၵႃႈလႂ်၊” ဝႃႈၼင်ႇၼႆထၢမ်ႁႃဢေႃႈ။
မူႇၵူၼ်းၸိူဝ်းၼၼ်ႉ၊သွပ်ႉသႅပ်ႉၵၼ်လူၺ်ႈလွင်ႈမၼ်းၸဝ်ႈယူႇဢေႃႈ။ ၵမ်ႈၽွင်ႈဝႃႈ၊ “မၼ်းပဵၼ်ၵူၼ်းလီဢေႃႈ၊” ဝႃႈၼႆ၊မၢင်ၵေႃႉသမ်ႉဝႃႈ၊ “ဢမ်ႇၸႂ်ႈၵူၺ်း။ မၼ်းပဵၼ်ၵေႃႉဢၼ်ဢွၼ်ႁႂ်ႈပိူၼ်ႈၽိတ်းတၢင်းဢေႃႈ၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊ၵွပ်ႈပိူဝ်ႈၶဝ်ၵူဝ်ၶုၼ်ဢႃႇၼႃႇၵူၼ်းမဵဝ်း ၵျူး၊ ၶဝ်လႄႈ ၶဝ်ဢမ်ႇႁတ်းလၢတ်ႈထၢင်ႇထၢင်ႇသႃးသႃးဢေႃႈ။
မိူဝ်ႈဢၼ်ၶၢဝ်းပွႆးၸမ်တူၵ်းၶိုင်ႈၼၼ်ႉ၊ ၸဝ်ႈယေႇသု၊ ၶိုၼ်ႈၵႂႃႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈသေလႄႈသင်ႇသွၼ်သုင်းမႃႉပၼ်ဢေႃႈ။-
ၶုၼ်ဢႃႇၼႃႇၵူၼ်းမဵဝ်း ၵျူး၊ ၶဝ်ဢၢမ်းလႄႈဝႃႈ၊ “မၼ်းၼႆႉ၊ယင်းဢမ်ႇယၢမ်ႈလႆႈသွၼ်ဢဝ်လႄႈ ႁဵတ်းသင်သမ်ႉပႄႉႁုလွင်ႈတြႃးထၢၼ်ႇၼႆႉ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “တြႃးဢၼ်ၵဝ်သွၼ်ပၼ်ၼႆႉပဵၼ်တြႃးၵဝ်ဢမ်ႇၸႂ်ႈ။ ပဵၼ်တြႃးၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉဢေႃႈ။-
ပေႃးသေၵေႃႉသေၵူၼ်းၶႂ်ႈၵမ်ၵျၢင်ႉၸွမ်းဢလူဝ်ႇၸဝ်ႈၸိုင်၊မၼ်းၸၢင်ႈႁုၸႅင်ႈလွင်ႈဢၼ်တြႃးၼႆႉ၊ပဵၼ်တြႃးဢၼ်လုၵ်ႉသေၵႃႈတီႈၽြႃးပဵၼ်ၸဝ်ႈမႃးႁိုဝ်၊ပဵၼ်တြႃးဢၼ်ၵဝ်ႁေႃးလၢတ်ႈၸွမ်းၼင်ႇဢလူဝ်ႇၵဝ်ႁိုဝ်ၼၼ်ႉဢေႃႈ။-
ၵေႃႉဢၼ်ႁေႃးလၢတ်ႈၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇၼၼ်ႉ၊ၸၢင်ႈႁႃမုၼ်သရေႇတူဝ်ၸဝ်ႈၵဝ်ႇဢေႃႈ။ ၵေႃႉဢၼ်ၸၢင်ႈႁႃမုၼ်သရေႇၸဝ်ႈဢၼ်ပွႆႇၸႂ်ႉမၼ်းမႃးၼၼ်ႉၸမ်ႉ၊ပဵၼ်ၵေႃႉဢၼ်လီယုမ်ႇလႄႈ၊တၢင်းၽိတ်းတၢင်းပိူင်ႈဢမ်ႇမီးၵႃႈၼႂ်းမၼ်း။-
မူဝ်းသေႇ၊ ပၼ်ပိင်းၺၢပ်ႈတြႃးတီႈသူဢမ်ႇၸႂ်ႈႁိုဝ်း။ ၼႂ်းဝႃႈၼၼ်သေၵေႃႈ၊ၼႂ်းသူၼႆႉၵေႃႉၼိုင်ႈၵေႃႈဢမ်ႇၵမ်ၵျၢင်ႉၸွမ်းတြႃးၼၼ်ႉ။ ႁဵတ်းသင်လႄႈ သူၵျၢမ်ႇႁႃဢဝ်ၵဝ်တၢႆၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ၵူၼ်းၸိူဝ်းၼၼ်ႉၶိုၼ်းလၢတ်ႈလႄႈဝႃႈ၊ “ၽီႁၢႆႉၶဝ်ႈမႂ်းယဝ်ႉ။ ၽူႈလႂ်ၵျၢမ်ႇႁႃဢဝ်မႂ်းတၢႆ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈၶိုၼ်းလၢတ်ႈလႄႈဝႃႈ၊ “ၵဝ်ႁဵတ်းၼႄၼိမိၵ်ႈလၢၵ်ႈၶၼႃႇဢၼ်ၼိုင်ႈၵူၺ်းလႄႈ သူတင်းသဵင်ႈတင်းလူင်ဢၢမ်းဢေႃႈ။-
မူဝ်းသေႇ၊ ပၼ်တြႃးတၢင်းဢၼ်ပၢတ်ႇပၢႆၼင်တီႈသူဢေႃႈ။ ၵူၺ်းၵႃႈ၊တြႃးၼႆႉပဵၼ်တြႃးဢၼ် မူဝ်းသေႇ၊ ပၼ်ဢမ်ႇၸႂ်ႈ။ ၵူၺ်းပဵၼ်တြႃးဢၼ်ပူႇမွၼ်ႇသူတႄႇၸႃႉႁဵတ်းဝႆႉၼၼ်ႉ၊သူယင်းႁဵတ်းမၢင်ႇၵလႃႇတၢင်းဢၼ်ပၢတ်ႇပၢႆၼင်တီႈၵူၼ်းၸၢႆးသူၼႂ်းဝၼ်းၵမ်သိၼ်ဢေႃႈ။-
ပေႃးၵူၼ်းၸၢႆးၶၢမ်ႇဢဝ်မၢင်ႇၵလႃႇတၢင်းဢၼ်ပၢတ်ႇပၢႆၼင်ၼႂ်းဝၼ်းၵမ်သိၼ်ပုၼ်ႈလွင်ႈၼင်ႇႁိုဝ်တၵ်းဢမ်ႇပူၼ်ႉလိူဝ်တြႃး မူဝ်းသေႇ၊ ၸိုင်၊ၸွင်ႇသူမီးလွင်ႈဢၼ်တၵ်းဢွၵ်ႇတေႃးသႃႉၼိူဝ်ၵဝ်ၵွပ်ႈပိူဝ်ႈၵဝ်ႁႂ်ႈၵူၼ်းတင်းတူဝ်တင်းၶိင်းလီမႃးၼႂ်းဝၼ်းၵမ်သိၼ်ၼၼ်ႉလူးၵွၼ်ႇႁိုဝ်း။-
ယႃႇပေတႅပ်းတတ်းၸွမ်းၼင်ႇတၢင်းၼွၵ်ႈၽိဝ်မၼ်းၵူၺ်းလႄႈတႅပ်းတတ်းၸွမ်းၼင်ႇတြႃးတႃႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၵူၼ်းဝဵင်း ယေႇရုသလႅမ်ႇ၊ ၵမ်ႈၽွင်ႈလၢတ်ႈလႄႈဝႃႈ၊ “ၵေႃႉၼႆႉပဵၼ်ၵေႃႉဢၼ်ၶုၼ်ဢႃႇၼႃႇၶဝ်သွၵ်ႈႁႃႁႂ်ႈလႆႈဢဝ်တၢႆၼၼ်ႉဢမ်ႇၸႂ်ႈႁိုဝ်း။-
တူၺ်းလူး။ မၼ်းႁေႃးလၢတ်ႈထၢင်ႇထၢင်ႇသႃးသႃးလႄႈ၊ၽူႈလႂ်ဢမ်ႇလၢတ်ႈႁႄႉလၢတ်ႈၶႅၼ်ၵႃႈသင်။ ၶုၼ်ဢႃႇၼႃႇတင်းလၢႆႁုမၢတ်ႈမၼ်းပဵၼ် ၸဝ်ႈၶရိၸ်ႈ၊ တႄႉတႄႉၼၼ်ႉယဝ်ႉ။-
ၵူၺ်းၵႃႈ၊မိူဝ်ႈဢၼ် ၸဝ်ႈၶရိၸ်ႈ၊ မႃးၸိုင်၊မၼ်းၸဝ်ႈလုၵ်ႉၵႃႈတီႈလႂ်မႃးဝႃႈၼႆ၊ၽူႈလႂ်ဢမ်ႇလႆႈႁု။ ၵေႃႉၼႆႉၸမ်ႉ၊လုၵ်ႉၵႃႈတီႈလႂ်မႃးဝႃႈၼႆ၊ႁဝ်းႁုယူႇဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ် ၸဝ်ႈယေႇသု၊ ယင်းသင်ႇသွၼ်ပၼ်ယူႇၼႂ်းၵျွင်းပိၵ်ႈမၢၼ်ႇၸဝ်ႈယူႇၼၼ်ႉ၊မၼ်းၸဝ်ႈတိုင်ႈသဵင်လႄႈလၢတ်ႈဝႃႈ၊ “ၸွင်ႇသူႁုၸၵ်းၵဝ်၊လွင်ႈဢၼ်ၵဝ်လုၵ်ႉၵႃႈတီႈလႂ်မႃးၼၼ်ႉႁိုဝ်း။ ၵဝ်ပဵၼ်မႃးၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇဢမ်ႇၸႂ်ႈ။ ၼႂ်းဝႃႈၼၼ်သေၵေႃႈၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉ ပဵၼ်ၸဝ်ႈသဵတ်ႈၸႃႇလႄႈသူဢမ်ႇႁုၸၵ်း။-
ၵဝ်ၸမ်ႉ၊ႁုၸၵ်းမၼ်းၸဝ်ႈၵွပ်ႈပိူဝ်ႈၵဝ်လုၵ်ႉၵႃႈတီႈၸဝ်ႈၼၼ်ႉမႃးဢေႃႈ။ ၸဝ်ႈၼၼ်ႉၵေႃႈပွႆႇၸႂ်ႉၵဝ်မႃးဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၶဝ်ၵျၢမ်ႇႁႃတိဢဝ်မၼ်းၸဝ်ႈဢေႃႈ။ ၵူၺ်းၵႃႈ၊ၽူႈလႂ်ၵေႃႈဢမ်ႇႁတ်းဢဝ်မိုဝ်းတိူဝ်ႉမၼ်းၸဝ်ႈၵွပ်ႈပိူဝ်ႈၶိင်ႇၶႃႇမၼ်းဢမ်ႇပႆႇႁွတ်ႈပႆႇထိုင်ၼၼ်ႉဢေႃႈ။-
ၼႂ်းဝႃႈၼၼ်သေၵေႃႈ၊ၵူၼ်းၸိူဝ်းၼၼ်ႉၼမ်ၼႃႇယုမ်ႇမၢတ်ႈမၼ်းၸဝ်ႈလႄႈလၢတ်ႈဝႃႈ၊ “မိူဝ်ႈဢၼ် ၸဝ်ႈၶရိၸ်ႈ၊ မႃးၼၼ်ႉၸိုင်၊ၸွင်ႇမၼ်းၸဝ်ႈတၵ်းႁဵတ်းၼႄၼိမိၵ်ႈလၢၵ်ႈၶၼႃႇၼမ်ၼႃႇသေၵႃႈဢၼ်ၵေႃႉၼႆႉႁဵတ်းၼႄၵႂႃႇယဝ်ႉၼၼ်ႉလႆႈႁိုဝ်း၊” ဝႃႈၼင်ႇၼႆဢေႃႈ။
မိူဝ်ႈဢၼ်ၵူၼ်းၵိူင်း ၽႃႇရိသႄး၊ ၶဝ်ငိၼ်းမူႇၵူၼ်းၸိူဝ်းၼၼ်ႉသွပ်ႉသႅပ်ႉၵၼ်လူၺ်ႈလွင်ႈမၼ်းၸဝ်ႈယူႇၼၼ်ႉၸိုင်၊ၶဝ်ၽွမ်ႉၸႂ်ၵၼ်တင်းယဵၸ်ႈပရေႃးႁဵၵ်ႈ လူင်တင်းလၢႆသေလႄႈပွႆႇၸႂ်ႉၵူၼ်းပႂ်ႉယၢမ်းၼႂ်းၵျွင်းၽြႃးၶဝ်ၵမ်ႈၽွင်ႈၵႂႃႇႁႂ်ႈလႆႈတိဢဝ်မၼ်းၸဝ်ႈဢေႃႈ။-
ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “ၵဝ်ၼႆႉယူႇလူၺ်ႈၵၼ်တင်းသူႁိုင်ၵမ်းဢွၼ်ႇၼိုင်ႈၵူၺ်းသေယဝ်ႉ၊တၵ်းလႆႈၵႂႃႇၵႃႈတီႈၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉဢေႃႈ။-
သူတၵ်းသွၵ်ႈႁႃၵဝ်ဢေႃႈ။ ၵူၺ်းၵႃႈ၊သူတၵ်းဢမ်ႇလႆႈထူပ်းလႆႈႁၼ်ၵဝ်၊ၵွပ်ႈပိူဝ်ႈတီႈဢၼ်ၵဝ်ၵႂႃႇၼၼ်ႉသူဢမ်ႇႁွတ်ႈဢမ်ႇထိုင်လႆႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၶုၼ်ဢႃႇၼႃႇၵူၼ်းမဵဝ်း ၵျူး၊ ၶဝ်ၼင်ႇၵၼ်လၢတ်ႈတီႈၵၼ်လႄႈဝႃႈ၊ “ၼင်ႇႁိုဝ်ႁဝ်းတၵ်းဢမ်ႇထူပ်းဢမ်ႇႁၼ်မၼ်းလႆႈၸိုင်၊မၼ်းဢၢင်ႈတၵ်းၵႂႃႇၵႃႈတီႈလႂ်။ မၼ်းဢၢင်ႈတၵ်းၵႂႃႇၵႃႈတီႈၵူၼ်းႁဝ်းၸိူဝ်းဢၼ်ယူႇၽၢတ်ႇၽႄၵၼ်ၼႂ်းၵႄႈၵူၼ်းမဵဝ်း ၵရိၵ်ႉ၊ ၶဝ်ၼၼ်ႉသေလႄႈ သင်ႇသွၼ်သုင်းမႃႉပၼ်ၵူၼ်းမဵဝ်း ၵရိၵ်ႉ၊ ၶဝ်ယူဝ်း။-
ၵႂၢမ်းဢၼ်မၼ်းလၢတ်ႈဝႃႈ၊ ‘သူတၵ်းသွၵ်ႈႁႃၵဝ်ဢေႃႈ။ ၵူၺ်းၵႃႈ၊သူတၵ်းဢမ်ႇလႆႈထူပ်းလႆႈႁၼ်ၵဝ်၊’ ဢိၵ်ႇတင်းဢၼ်ဝႃႈ၊ ‘တီႈဢၼ်ၵဝ်ၵႂႃႇၼၼ်ႉသူဢမ်ႇႁွတ်ႈဢမ်ႇထိုင်လႆႈ၊’ ဝႃႈၼင်ႇၼႆၼၼ်ႉၶႂ်ႈဝႃႈၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ၼႂ်းဝၼ်းလိုၼ်းလင်သုတ်းပွႆးဢၼ်ပဵၼ်ဝၼ်းထွတ်ႈဝၼ်းမျၢတ်ႈသေပိူၼ်ႈၼၼ်ႉ၊ ၸဝ်ႈယေႇသု၊ လုၵ်ႉၸုၵ်းသေယဝ်ႉ၊ဢဝ်တင်းသဵင်ဢၼ်ယႂ်ႇၼႃႇသေလႄႈလၢတ်ႈဝႃႈ၊ “ပေႃးသေၵေႃႉသေၵူၼ်းတွင်ႉမႆႈၼမ်ႉၸိုင်၊မႃးတီႈၵဝ်လႄႈၵိၼ်တႃႉ။-
ၵေႃႉဢၼ်ယုမ်ႇမၢတ်ႈၵဝ်ၼၼ်ႉၸမ်ႉ၊မႅၼ်ႈၸွမ်းၵႃႈၼင်ႇဢၼ်ၵျၢမ်းလိၵ်ႈတႅမ်ႈဝႆႉဝႃႈ၊ ‘ၼမ်ႉႁွင်ႈဢၼ်ပၼ်ၼမ်ႉဢသၢၵ်ႈတင်းလၢႆ၊တၵ်းဢွၵ်ႇၵႃႈတီႈႁူဝ်ၸႂ်မၼ်းမႃးလႄႈ လႆၵႂႃႇယူႇဢေႃႈ၊’ ဝႃႈၼင်ႇၼႆၼၼ်ႉယဝ်ႉ၊” ဝႃႈၼင်ႇၼႆဢေႃႈ။-
လွင်ႈတၢင်းၼႆႉ ၸဝ်ႈယေႇသု၊ လၢတ်ႈလူၺ်ႈလွင်ႈဝိၺိၺ်ႇၸဝ်ႈဢၼ်ၶဝ်ၸိူဝ်းဢၼ်ယုမ်ႇမၢတ်ႈတင်းလၢႆ၊တၵ်းလႆႈႁပ်ႉၶၢမ်ႇဢဝ်ၼၼ်ႉဢေႃႈ။ လွင်ႈမၼ်းၸမ်ႉ၊မိူဝ်ႈယၢမ်းၼၼ်ႉ ဝိၺိၺ်ႇမူတ်းၸၢင်ႇၸဝ်ႈဢမ်ႇပႆႇလႆႈပၼ်၊ပိူဝ်ႈဢၼ်မုၼ်ၽုင်း ၸဝ်ႈယေႇသု၊ ဢမ်ႇပႆႇပေႃႇပႆႇဢွၵ်ႇၼၼ်ႉဢေႃႈ။
မိူဝ်ႈဢၼ်ၶဝ်ငိၼ်းၵႂၢမ်းၸိူဝ်းဢၼ်မၼ်းၸဝ်ႈလၢတ်ႈၼၼ်ႉၸိုင်၊ၵမ်ႈၽွင်ႈလၢတ်ႈလႄႈဝႃႈ၊ “ၵေႃႉၼႆႉပဵၼ်ပရေႃးၽႅတ်ႈ ဢၼ်တၵ်းမႃးၼၼ်ႉၸႂ်ႈတႄႉယဝ်ႉ၊” ဝႃႈၼင်ႇၼႆဢေႃႈ။
မၢင်ၵေႃႉဝႃႈ၊ “ၵေႃႉၼႆႉပဵၼ် ၸဝ်ႈၶရိၸ်ႈ၊ ဢေႃႈ၊” ဝႃႈၼင်ႇၼႆလႄႈ၊ၵူၼ်းၵမ်ႈၽွင်ႈသမ်ႉဝႃႈ၊ “ၸွင်ႇ ၸဝ်ႈၶရိၸ်ႈ၊ တၵ်းပေႃႇမႃးၵႃႈၼႂ်းမိူင်း ၵႃႇလိလႄး၊ ႁိုဝ်း။-
ၵျၢမ်းလိၵ်ႈတႅမ်ႈဝႆႉလွင်ႈဢၼ် ၸဝ်ႈၶရိၸ်ႈ၊ တၵ်းပေႃႇဢွၵ်ႇမႃးၵႃႈၼႂ်းၸိူဝ်ႉၶိူဝ်းၶုၼ်ႁေႃၶမ်း တႃႇဝိတ်ႈ၊ လႄႈ တၵ်းၵိူတ်ႇလဵင်ႉမႃးၵႃႈတီႈဝဵင်း ပႅတ်ႉလႁႅမ်ႇ၊ တီႈဢၼ်ပဵၼ်ၸႃႇတိၶုၼ်ႁေႃၶမ်း တႃႇဝိတ်ႈ၊ ၼၼ်ႉဢမ်ႇၸႂ်ႈႁိုဝ်း၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈၵူၼ်းၸိူဝ်းၼၼ်ႉဢမ်ႇၽွမ်ႉၸႂ်ၵၼ်ၵွပ်ႈပိူဝ်ႈမၼ်းၸဝ်ႈဢေႃႈ။-
ၵူၼ်းၵမ်ႈၽွင်ႈၶႂ်ႈတိဢဝ်မၼ်းၸဝ်ႈဢေႃႈ။ ၵူၺ်းၵႃႈ၊ၽူႈလႂ်ဢမ်ႇႁတ်းဢဝ်မိုဝ်းတိူဝ်ႉမၼ်းၸဝ်ႈလႄႈယူႇဢေႃႈ။
မိူဝ်ႈဢၼ်ၵူၼ်းဢၼ်ပႂ်ႉယၢမ်းၶဝ်ၶိုၼ်းမိူဝ်းၵႂႃႇၸိုင်၊ယဵၸ်ႈပရေႃးႁဵၵ်ႈၶဝ်တင်းၵူၼ်းၵိူင်း ၽႃႇရိသႄး၊ တင်းလၢႆထၢမ်လႄႈဝႃႈ၊ “ၵွပ်ႈၸိူဝ်ႉၼင်ႇႁိုဝ်လႄႈသူဢမ်ႇဢဝ်မၼ်းမႃး၊” ဝႃႈၼင်ႇၼႆဢေႃႈ။
ၵူၼ်းဢၼ်ပႂ်ႉယၢမ်းၸိူဝ်းၼၼ်ႉၵေႃႈလဝ်ႈလၢတ်ႈလႄႈဝႃႈ၊ “ၽူႈလႂ်သေၵေႃႉသေၵူၼ်းဢမ်ႇပႆႇတွၼ်ႉႁေႃးလၢတ်ႈမိူၼ်ၸိူဝ်ႉၼင်ႇဢၼ်ၵေႃႉၼၼ်ႉႁေႃးလၢတ်ႈၼၼ်ႉသေပွၵ်ႈၶႃႈ၊” ဝႃႈၼင်ႇၼႆဢေႃႈ။
ၵူၼ်းၵိူင်း ၽႃႇရိသႄး၊ ၸိူဝ်းၼၼ်ႉၸင်ႇလၢတ်ႈလႄႈဝႃႈ၊ “သူၸိူဝ်းၼႆႉၵေႃႈလႆႈၶၢမ်ႇတၢင်းဢၼ်ပႅတ်ႉလႅၼ်ယဝ်ႉႁိုဝ်း။-
ၼႂ်းၶုၼ်ဢႃႇၼႃႇတင်းလၢႆ တင်းၵူၼ်းၵိူင်း ၽႃႇရိသႄး၊ တင်းလၢႆၵေႃႉဢၼ်ယုမ်ႇမၢတ်ႈမၼ်းၼၼ်ႉမီးသေၵေႃႉသေၵူၼ်းႁိုဝ်း။-
မူႇၵူၼ်းၸိူဝ်းၼၼ်ႉ ၵွပ်ႈပိူဝ်ႈၶဝ်ဢမ်ႇႁုတြႃးလႄႈ ၶဝ်လႆႈၶၢမ်ႇတၢင်းဢၼ်ၽြႃးပဵၼ်ၸဝ်ႈၵိၼ်ႇဝႃႈယဝ်ႉ၊” ဝႃႈၼင်ႇၼႆဢေႃႈ။
ၼိၵေႃးတိၼ်ႇ၊ ဢၼ်မိူဝ်ႈဢွၼ်တၢင်းလႆႈမႃးၵႃႈတီႈမၼ်းၸဝ်ႈၼႂ်းၶိင်ႇၵၢင်ၶိုၼ်းၼၼ်ႉၵေႃႈ၊ၶဝ်ႈပႃးၼႂ်းၶဝ်လႄႈမၼ်းၸင်ႇလၢတ်ႈလႄႈဝႃႈ၊-
“တြႃးႁဝ်းၼႆႉ၊ယင်းဢမ်ႇပႆႇလႆႈၸႅတ်ႈသေးတူၺ်းၵူၼ်းဢွၼ်တၢင်းလႄႈႁုဢမုမၼ်းၼၼ်ႉၸွင်ႇထုၵ်ႇလီၸီႇယၢင်ႇႁိုဝ်း၊” ဝႃႈၼင်ႇၼႆဢေႃႈ။
ၶဝ်ၵေႃႈတွပ်ႇလၢတ်ႈလႄႈဝႃႈ၊ “မႂ်းၵေႃႈပဵၼ်ၵူၼ်းမိူင်း ၵႃႇလိလႄး၊ ႁိုဝ်း။ လွင်ႈဢၼ်ပရေႃးၽႅတ်ႈသေၸဝ်ႈသေပႃးဢမ်ႇပေႃႇဢမ်ႇဢွၵ်ႇမႃးၵႃႈတီႈၵူၼ်း ၵႃႇလိလႄး၊ ၼၼ်ႉၸိုင်၊ႁႃတူၺ်းလႄႈသွၼ်ဢဝ်ၼႂ်းၵျၢမ်းလိၵ်ႈလူးၵွၼ်ႇတႃႉ၊” ဝႃႈၼင်ႇၼႆယဝ်ႉ၊-
ၶဝ်မိူဝ်းၵႂႃႇၵႃႈတီႈႁိူၼ်းၽႂ်ႁိူၼ်းမၼ်းသေဢေႃႈ။
[ ၸဝ်ႈယေႇသု၊ သမ်ႉၶိုၼ်ႈၵႂႃႇၵႃႈၼိူဝ်လွႆ သၢၼ်ႇလုၼ်ႇ၊ ပုၼ်ႉသေဢေႃႈ။-
ဝၼ်းမိူဝ်ႈၽုၵ်ႈၵၢင်ၼႂ်ၸဝ်ႉၸဝ်ႉၼၼ်ႉၸိုင်၊မၼ်းၸဝ်ႈၶဝ်ႈၵႂႃႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈလႄႈ၊ၵူၼ်းတင်းသဵင်ႈတင်းလူင်မႃးၵႃႈတီႈမၼ်းၸဝ်ႈဢေႃႈ။ မၼ်းၸဝ်ႈၼင်ႈယူႇလႄႈသင်ႇသွၼ်သုင်းမႃႉၶဝ်ဢေႃႈ။-
မိူဝ်ႈၼၼ်ႉ၊သြႃႇမေႃၵျၢမ်းထမ်ႇမႃႉၶဝ်၊ဢိၵ်ႇတင်းၵူၼ်းၵိူင်း ၽႃႇရိသႄး၊ တင်းလၢႆဢဝ်မႄႈယိင်းၵေႃႉၼိုင်ႈ၊ဢၼ်ထူပ်းၼႂ်းတၢင်းဢၼ်ၽိတ်းၵႃႇမေႇသုလူၺ်ႈၵၼ်တင်းၵူၼ်းၸၢႆးၼၼ်ႉမႃးသေယဝ်ႉ၊ႁႂ်ႈမၼ်းၸုၵ်းယူႇၼႂ်းဝူင်ႈၵၢင်ၶဝ်ၸိူဝ်းၼၼ်ႉသေယဝ်ႉ၊-
ၶဝ်လၢတ်ႈတီႈမၼ်းၸဝ်ႈလႄႈဝႃႈ၊ “သြႃႇၸဝ်ႈ။ မႄႈယိင်းၵေႃႉၼႆႉလႆႈထူပ်းမႅၼ်ႈတၢင်းၽိတ်းမၼ်းၼႂ်းမိူဝ်ႈဢၼ်မၼ်းတိုၵ်ႉႁဵတ်းၽိတ်းၵႃႇမေႇသုယူႇၼၼ်ႉဢေႃႈ။-
ၼႂ်းပိင်းၺၢပ်ႈတြႃးၼၼ်ႉ၊မႄႈယိင်းမဵဝ်းၼႆႉၸိုင်၊တၵ်းလႆႈဢဝ်မၢၵ်ႇႁိၼ်ပိုဝ်ႈသႂ်ႇႁႂ်ႈတၢႆဝႃႈၼႆ မူဝ်းသေႇ၊ ပိင်းၺၢပ်ႈဝႆႉဢေႃႈ။ ၼႂ်းဝႃႈၼၼ်သေၵေႃႈၸဝ်ႈႁဝ်းၶႂ်ႈဝႃႈၸိူဝ်ႉၼင်ႇႁိုဝ်ၶႃႈ၊” ဝႃႈၼင်ႇၼႆဢေႃႈ။-
ၶဝ်လၢတ်ႈဝႃႈၸိူဝ်ႉၼင်ႇၼႆၸၢမ်းတူၺ်းမၼ်းၸဝ်ႈ၊ၼင်ႇႁိုဝ်တေမီးတၢင်းဢၼ်တၢင်ႇဢပျတ်ႈၵႃႈၼိူဝ်မၼ်းၸဝ်ႈၼၼ်ႉဢေႃႈ။ ၵူၺ်းၵႃႈ၊ ၸဝ်ႈယေႇသု၊ ၵူမ်ႈသေလႄႈဢဝ်ၼိဝ်ႉမိုဝ်းမၼ်းၸဝ်ႈၶိတ်ႇတႅမ်ႈၵႃႈတီႈလိၼ်ယူႇဢေႃႈ။-
မိူဝ်ႈဢၼ်ၶဝ်သိုပ်ႇထၢမ်ယူႇၶိူဝ်းၶိူဝ်းၼၼ်ႉ၊ ၸဝ်ႈယေႇသု၊ လုၵ်ႉၸုၵ်းသေလႄႈလၢတ်ႈဝႃႈ၊ “ၼႂ်းသူၼႆႉ ႁႂ်ႈၵေႃႉဢၼ်ဢမ်ႇယၢမ်ႈႁဵတ်းဢပျတ်ႈသေပွၵ်ႈၼၼ်ႉ ဢဝ်မၢၵ်ႇႁိၼ်ပိုဝ်ႈသႂ်ႇမၼ်းဢွၼ်တၢင်းပိူၼ်ႈတႃႉ၊” ဝႃႈၼင်ႇၼႆသေယဝ်ႉ၊-
သမ်ႉၶိုၼ်းၵူမ်ႈလႄႈၶိတ်ႇတႅမ်ႈၵႃႈတီႈလိၼ်ဢေႃႈ။-
မိူဝ်ႈဢၼ်ၶဝ်ငိၼ်းၵႂၢမ်းၼၼ်ႉၸိုင်၊ၶဝ်ႁုတၢင်းၽိတ်းတူဝ်ၸဝ်ႈၵဝ်ႁင်းၽႂ်ႁင်းမၼ်းလႄႈ၊ၸႃႉၸဵမ်ၵေႃႉဢၼ်ဢသၢၵ်ႈယႂ်ႇၸိူဝ်းၼၼ်ႉဢွၵ်ႇပၢႆႈၵႂႃႇဢွၼ်တၢင်းလႄႈၵေႃႉၼိုင်ႈယဝ်ႉၵေႃႉၼိုင်ႈဢွၵ်ႇပၢႆႈၵႂႃႇတေႃႇထိုင်ႁွတ်ႈၵိုတ်းၵျၢၼ်ႇဝႆႉ ၸဝ်ႈယေႇသု၊ ပႃးလဵဝ်ၵူၺ်းဢေႃႈ။ မႄႈယိင်းၼၼ်ႉၸုၵ်းယူႇၽၢႆႇၼႃႈမၼ်းၸဝ်ႈယူႇဢေႃႈ။-
မၼ်းၸဝ်ႈၶိုၼ်းလုၵ်ႉၸုၵ်းသေယဝ်ႉ၊လၢတ်ႈတီႈမႄႈယိင်းၼၼ်ႉလႄႈဝႃႈ၊ “မႄႈယိင်း႟။ ၶဝ်ၸိူဝ်းဢၼ်တၢင်ႇဢပျတ်ႈမႂ်းၼၼ်ႉၵႂႃႇၵႃႈတီႈလႂ်မူတ်းယဝ်ႉ။ ၽူႈလႂ်သေၵေႃႉသေၵူၼ်းဢမ်ႇၸီႇယၢင်ႇဢမုမႂ်းႁိုဝ်း၊” ဝႃႈၼင်ႇၼႆဢေႃႈ။
မႄႈယိင်းၼၼ်ႉၶိုၼ်းလဝ်ႈလၢတ်ႈလႄႈဝႃႈ၊ “ၽူႈလႂ်ၵေႃႈဢမ်ႇၸီႇယၢင်ႇသေၵေႃႉသေၵူၼ်းၶႃႈ၊” ဝႃႈၼင်ႇၼႆလႄႈ၊ ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “ၵဝ်ၵေႃႈဢမ်ႇၸီႇယၢင်ႇဢမုမႂ်းယဝ်ႉ။ ၵႂႃႇတႃႉ။ ၵမ်းလိုၼ်းယႃႇပေႁဵတ်းဢပျတ်ႈထႅင်ႈ၊]” ဝႃႈၼင်ႇၼႆဢေႃႈ။
ၸဝ်ႈယေႇသု၊ သမ်ႉလၢတ်ႈတီႈၵူၼ်းၵိူင်း ၽႃႇရိသႄး၊ ၸိူဝ်းၼၼ်ႉထႅင်ႈလႄႈဝႃႈ၊ “ၵဝ်ပဵၼ်ဢၼ်လႅင်းလေႃးၵႃႉၼႆႉဢေႃႈ။ ၵေႃႉဢၼ်ၸပ်းၸွမ်းၵဝ်ၼၼ်ႉတေဢမ်ႇလႆႈပႆၼႂ်းဢၼ်လပ်းသိင်ႇ။ မၼ်းတၵ်းလႆႈဢၼ်လႅင်းဢသၢၵ်ႈဢေႃႈ၊” ဝႃႈၼင်ႇၼႆဢေႃႈ။
ၵူၼ်းၵိူင်း ၽႃႇရိသႄး၊ ၶဝ်ၵေႃႈလၢတ်ႈတီႈမၼ်းၸဝ်ႈလႄႈဝႃႈ၊ “မႂ်းၶၢမ်ႇသၢၵ်ႈသေႇလွင်ႈတူဝ်ၸဝ်ႈၵဝ်ႇဢေႃႈ။ သၢၵ်ႈသေႇမႂ်းၼၼ်ႉဢမ်ႇမၢၼ်ႇမႅၼ်ႈၵူၺ်း၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ဢမ်ႇၸႂ်ႈၵူၺ်း။ ပိၵ်ႉသမ်ႉၵဝ်ၶၢမ်ႇသၢၵ်ႈသေႇလွင်ႈတူဝ်ၸဝ်ႈၵဝ်ႇသေၵေႃႈ၊သၢၵ်ႈသေႇၵဝ်ၼႆႉမၢၼ်ႇမႅၼ်ႈၸိုဝ်ႈၸႂ်ႈယူႇ၊ၵွပ်ႈပိူဝ်ႈၵဝ်ႁုလွင်ႈဢၼ်ၵဝ်လုၵ်ႉၵႃႈတီႈလႂ်မႃးလႄႈတေၵႂႃႇၵႃႈတီႈလႂ်ၼၼ်ႉယူႇဢေႃႈ။ သူၸမ်ႉ၊ဢမ်ႇႁုလွင်ႈဢၼ်ၵဝ်လုၵ်ႉၵႃႈတီႈလႂ်မႃးလႄႈတေၵႂႃႇၵႃႈတီႈလႂ်ၼၼ်ႉ။-
သူၼႆႉ၊ၸီႇယၢင်ႇၸွမ်းၼင်ႇဢလူဝ်ႇၸႂ်ၵူၼ်းဢေႃႈ။ ၵဝ်ၸမ်ႉ၊ဢမ်ႇၸီႇယၢင်ႇၽူႈလႂ်သေၵေႃႉသေၵူၼ်း။-
ၼႂ်းဝႃႈၼၼ်သေၵေႃႈပေႃးၵဝ်ၸီႇယၢင်ႇၸိုင်၊တၢင်းဢၼ်ၵဝ်ၸီႇယၢင်ႇၼၼ်ႉမၢၼ်ႇမႅၼ်ႈၸိုဝ်ႈၸႂ်ႈ၊ၵွပ်ႈပိူဝ်ႈၵဝ်ၸီႇယၢင်ႇႁင်းၵဝ်ၵေႃႉလဵဝ်ၵူၺ်းဢမ်ႇၸႂ်ႈ။ ၵဝ်တင်းပေႃႈၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉ၊ၽွမ်ႉၵၼ်ၸီႇယၢင်ႇဢေႃႈ။-
လွင်ႈတၢင်းဢၼ်ၵူၼ်းသွင်ၵေႃႉၽွမ်ႉၵၼ်ၶၢမ်ႇသၢၵ်ႈသေႇၼၼ်ႉ၊မၢၼ်ႇမႅၼ်ႈၸိုဝ်ႈၸႂ်ႈဢေႃႈ၊ဝႃႈၼႆတြႃးပိင်းၺၢပ်ႈသူၵေႃႈတႅမ်ႈဝႆႉမီးယူႇဢေႃႈ။-
ၵဝ်ၶၢမ်ႇသၢၵ်ႈသေႇလွင်ႈတူဝ်ၸဝ်ႈၵဝ်ႇယဝ်ႉလႄႈပေႃႈၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉ၊သမ်ႉၶၢမ်ႇသၢၵ်ႈသေႇလွင်ႈၵဝ်ဢေႃႈ၊” ဝႃႈၼင်ႇၼႆဢေႃႈ။
ၶဝ်ၵေႃႈထၢမ်လႄႈဝႃႈ၊ “ပေႃႈမႂ်းမီးၵႃႈလႂ်၊” ဝႃႈၼင်ႇၼႆလႄႈ၊ ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “သူဢမ်ႇႁုၸၵ်းၵဝ်။ ပေႃႈၸဝ်ႈၵဝ်ၵေႃႈသူဢမ်ႇႁုၸၵ်း။ ပေႃးသူႁုၸၵ်းၵဝ်ၸိုင်၊ပေႃႈၸဝ်ႈၵဝ်ၼၼ်ႉၵေႃႈသူတၵ်းႁုၸၵ်းဢေႃႈ၊” ဝႃႈၼင်ႇၼႆဢေႃႈ။
ၵႂၢမ်းတြႃးၸိူဝ်းၼႆႉ၊မၼ်းၸဝ်ႈႁေႃးလၢတ်ႈၵႃႈၼႂ်းလုၵ်းဢၼ်မီးတိူၵ်ႈၽၼ်ႇတႃႇငိုၼ်းလူႇၼႂ်းမိူဝ်ႈဢၼ်မၼ်းၸဝ်ႈသင်ႇသွၼ်သုင်းမႃႉပၼ် ၼႂ်းၵျွင်းပိၵ်ႈမၢၼ်ႇၸဝ်ႈယူႇၼၼ်ႉဢေႃႈ။ ၵွပ်ႈပိူဝ်ႈၶိင်ႇယၢမ်းမၼ်းဢမ်ႇပႆႇႁွတ်ႈထိုင်လႄႈၽူႈလႂ်သေၵေႃႈဢမ်ႇတိဢဝ်မၼ်းၸဝ်ႈလႄႈယူႇဢေႃႈ။
ၸဝ်ႈယေႇသု၊ သမ်ႉလၢတ်ႈတီႈၶဝ်ထႅင်ႈလႄႈဝႃႈ၊ “ၵဝ်တၵ်းဢွၵ်ႇၵႂႃႇဢေႃႈ။ သူတၵ်းၸွမ်းႁႃၵဝ်ဢေႃႈ။ ၵူၺ်းၵႃႈ၊သူတၵ်းတၢႆၵႃႈၼႂ်းဢပျတ်ႈသူဢေႃႈ။ တီႈဢၼ်ၵဝ်ၵႂႃႇၼၼ်ႉၸိုင်၊သူဢမ်ႇႁွတ်ႈထိုင်လႆႈ၊” ဝႃႈၼင်ႇၼႆဢေႃႈ။
ၶုၼ်ဢႃႇၼႃႇၵူၼ်းမဵဝ်း ၵျူး၊ ၶဝ်ၵေႃႈလၢတ်ႈလႄႈဝႃႈ၊ “တၢင်းဢၼ်မၼ်းဝႃႈ၊ ‘တီႈဢၼ်ၵဝ်ၵႂႃႇၼၼ်ႉသူဢမ်ႇႁွတ်ႈထိုင်လႆႈ၊’ ဝႃႈၼင်ႇၼႆၼၼ်ႉၶႂ်ႈဝႃႈ၊မၼ်းတေဢဝ်တူဝ်ၸဝ်ႈၵဝ်ႇတၢႆႁိုဝ်း၊” ဝႃႈၼင်ႇၼႆဢေႃႈ။
မၼ်းၸဝ်ႈၵေႃႈလၢတ်ႈလႄႈဝႃႈ၊ “သူပဵၼ်ၵူၼ်းလိၼ်မိူင်းဢၼ်မီးၵႃႈတႂ်ႈၼႆႉဢေႃႈ။ ၵဝ်ၸမ်ႉ၊လုၵ်ႉၵႃႈတီႈၼိူဝ်မိူင်းၵၢင်ႁၢဝ်မႃးဢေႃႈ။ သူပဵၼ်ၵူၼ်းလေႃးၵီႇဢေႃႈ။ ၵဝ်ၸမ်ႉ၊ဢမ်ႇၸႂ်ႈၵူၼ်းလေႃးၵီႇ။-
ၵွပ်ႈလွင်ႈတၢင်းၼႆႉလႄႈ၊ၵဝ်ၸင်ႇဝႃႈသူတၵ်းတၢႆၵႃႈၼႂ်းဢပျတ်ႈသူဝႃႈၼႆယဝ်ႉ။ ပေႃးသူယင်းဢမ်ႇယုမ်ႇမၢတ်ႈလွင်ႈဢၼ်၊ ‘ၵဝ်ပဵၼ်ၵေႃႉဢၼ်ၵဝ်ပဵၼ်’ ၼၼ်ႉၸိုင်၊သူတၵ်းတၢႆၵႃႈတီႈၼႂ်းဢပျတ်ႈသူဢေႃႈ၊” ဝႃႈၼင်ႇၼႆဢေႃႈ။
ၶဝ်ၵေႃႈထၢမ်လႄႈဝႃႈ၊ “မႂ်းပဵၼ်ၽူႈလႂ်၊” ဝႃႈၼင်ႇၼႆလႄႈ၊ ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ၵဝ်ပဵၼ်ယူႇၵႃႈၼင်ႇဢၼ်ၵဝ်လၢတ်ႈတီႈသူၸဵမ်မိူဝ်ႈႁူဝ်ပိုင်းၼၼ်ႉဢေႃႈ။-
တီႈဢၼ်ၵဝ်လူဝ်ႇလၢတ်ႈလူဝ်ႇဝႃႈလႄႈၸီႇယၢင်ႇလွင်ႈသူၸိုင်၊မီးၼမ်ၼႃႇဢေႃႈ။ ၼႂ်းဝႃႈၼၼ်သေၵေႃႈ၊ၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉ ပဵၼ်ၸဝ်ႈဢၼ်မၢၼ်ႇမႅၼ်ႈၸိုဝ်ႈၸႂ်ႈလႄႈ၊ၵဝ်ၵေႃႈႁေႃးလၢတ်ႈၵႃႈၼႂ်းလေႃးၵႃႉၼႆႉ၊ၸွမ်းၵႃႈၼင်ႇဢၼ်ၵဝ်လႆႈငိၼ်းတီႈၸဝ်ႈၼၼ်ႉၵူၺ်း၊” ဝႃႈၼင်ႇၼႆဢေႃႈ။
ၶဝ်ၸိူဝ်းၼၼ်ႉ၊ယင်းဢမ်ႇႁုလွင်ႈဢၼ် ၸဝ်ႈယေႇသု၊ လၢတ်ႈၼႄၶဝ်လွင်ႈပေႃႈၸဝ်ႈၼၼ်ႉလႄႈယူႇဢေႃႈ။-
ပိူဝ်ႈၼႆၸင်ႇ၊မၼ်းၸဝ်ႈလၢတ်ႈလႄႈဝႃႈ၊ “မိူဝ်ႈဢၼ်သူယုၵ်ႉယွင်ႈ လုၵ်ႈၵူၼ်း၊ ဝႆႉၸိုင်၊သူတၵ်းႁုလွင်ႈဢၼ်ၵဝ်ပဵၼ်ၵေႃႉဢၼ်ၵဝ်ပဵၼ်ၼၼ်ႉ၊ဢိၵ်ႇတင်းလွင်ႈဢၼ်ၵဝ်ဢမ်ႇႁဵတ်းၵႃႈသင်ၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇလႄႈ ၵဝ်ၵူၺ်းႁေႃးလၢတ်ႈၵႃႈၼင်ႇဢၼ်ပေႃႈၸဝ်ႈၵဝ်သွၼ်ပၼ်တီႈၵဝ်ၼၼ်ႉဢေႃႈ။-
ၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉမီးယူႇလူၺ်ႈၵၼ်တင်းၵဝ်ဢေႃႈ။ မၼ်းၸဝ်ႈဢမ်ႇပွႆႇပႅတ်ႈၵဝ်ႁႂ်ႈယူႇၵေႃႉလဵဝ်ၵူၺ်း၊ၵွပ်ႈပိူဝ်ႈၵဝ်ႁဵတ်းလွင်ႈတၢင်းဢၼ်ထုၵ်ႇၸႂ်မၼ်းၸဝ်ႈတႃႇသေႇၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၶဝ်ၸိူဝ်းဢၼ်ငိၼ်းၵႂၢမ်းဢၼ် ၸဝ်ႈယေႇသု၊ ႁေႃးလၢတ်ႈၸိူဝ်ႉၼင်ႇၼႆၼၼ်ႉယုမ်ႇမၢတ်ႈမၼ်းၸဝ်ႈမႃးၼမ်ၼႃႇဢေႃႈ။
မိူဝ်ႈၼၼ်ႉ၊ ၸဝ်ႈယေႇသု၊ လၢတ်ႈတီႈၵူၼ်းမဵဝ်း ၵျူး၊ ၸိူဝ်းဢၼ်ယုမ်ႇမၢတ်ႈမၼ်းၸဝ်ႈၼၼ်ႉလႄႈဝႃႈ၊ “ပေႃးသူၵမ်ၵျၢင်ႉတြႃးၵဝ်ၸိုင်၊သူပဵၼ်တပႄးၵဝ်ၸႅတ်ႈၸႅတ်ႈဢေႃႈ။-
သူတၵ်းလႆႈႁုသမ်ႇမႃႇတြႃးလႄႈ၊သမ်ႇမႃႇတြႃးၼႆႉတၵ်းပွႆႇသူလွတ်ႈဢေႃႈ၊” ဝႃႈၼင်ႇၼႆဢေႃႈ။
ၶဝ်ၶိုၼ်းလၢတ်ႈလႄႈဝႃႈ၊ “ႁဝ်းပဵၼ်ၸိူဝ်ႉၶိူဝ်း ဢႃႇပြႃႇႁၢမ်ႇ၊ ဢေႃႈ။ ႁဝ်းဢမ်ႇတွၼ်ႉလႆႈၶၢမ်ႇပဵၼ်ၶႃႈပိူၼ်ႈသေပွၵ်ႈ။ ‘တၵ်းပွႆႇသူလွတ်ႈဢေႃႈ’ ဝႃႈၼႆၼၼ်ႉမႂ်းၶႂ်ႈဝႃႈၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈၶိုၼ်းလၢတ်ႈလႄႈဝႃႈ၊ “ၵဝ်ဝႃႈတီႈၸိုဝ်ႈတီႈၸႂ်ႈမၼ်းတီႈသူၸမ်ႉ၊ၵေႃႉဢၼ်ႁဵတ်းဢပျတ်ႈၵူႈၵေႃႉၵူႈၵူၼ်းၼၼ်ႉ၊ပဵၼ်ၶႃႈဢပျတ်ႈယဝ်ႉဢေႃႈ။-
ၶႃႈဢၼ်ဝႃႈၼၼ်ႉပဵၼ်ၵူၼ်းႁိူၼ်းၵူၼ်းယေးၸဝ်ႈမၼ်းသေႇသေႇဢမ်ႇၸႂ်ႈ။ လုၵ်ႈၸၢႆးၵူၺ်းၸင်ႇပဵၼ်ၵူၼ်းႁိူၼ်းတႃႇသေႇဢေႃႈ။-
ပိူဝ်ႈၼႆလႄႈပေႃးလုၵ်ႈၸဝ်ႈပွႆႇသူလွတ်ႈၸိုင်၊သူတၵ်းလႆႈလွတ်ႈတႄႉတႄႉဢေႃႈ။-
သူပဵၼ်ၸိူဝ်ႉၶိူဝ်း ဢႃႇပြႃႇႁၢမ်ႇ၊ ၸိုင်၊ၵဝ်ႁုဢေႃႈ။ ၼႂ်းဝႃႈၼၼ်သေၵေႃႈ သူၵျၢမ်ႇႁႃဢဝ်ၵဝ်တၢႆၵွပ်ႈပိူဝ်ႈတြႃးၵဝ်ဢမ်ႇမီးတီႈတၵ်းတႄႇယူႇၵႃႈၼႂ်းသူဢေႃႈ။-
ၵဝ်ၼႆႉႁေႃးလၢတ်ႈၵႃႈၼင်ႇဢၼ်ၵဝ်လႆႈႁၼ်ၵႃႈတီႈပေႃႈၸဝ်ႈၵဝ်ယဝ်ႉၼၼ်ႉဢေႃႈ။ သူၸမ်ႉ၊ႁဵတ်းၵႃႈၼင်ႇဢၼ်လႆႈငိၼ်းတီႈပေႃႈသူသင်ႇလၢတ်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၶဝ်ၵေႃႈလၢတ်ႈလႄႈဝႃႈ၊ “ပေႃႈႁဝ်းၼႆႉပဵၼ် ဢႃႇပြႃႇႁၢမ်ႇ၊ ဢေႃႈ၊” ဝႃႈၼင်ႇၼႆဢေႃႈ။ ၸဝ်ႈယေႇသု၊ ၵေႃႈတွပ်ႇလႄႈဝႃႈ၊ “ပေႃးသူၸႂ်ႈလုၵ်ႈ ဢႃႇပြႃႇႁၢမ်ႇ၊ တႄႉၸိုင်၊သူတၵ်းၵမ်ၵျၢင်ႉၸိူဝ်ႉၼင်ႇ ဢႃႇပြႃႇႁၢမ်ႇ၊ ၵမ်ၵျၢင်ႉၼၼ်ႉဢေႃႈ။-
တေႃႈလဵဝ်ၼႆႉပိၵ်ႉသမ်ႉၵဝ်ပဵၼ်ၵေႃႉဢၼ်ႁေႃးလၢတ်ႈလွင်ႈသဵတ်ႈၸႃႇတြႃးဢၼ်လႆႈငိၼ်းတီႈၽြႃးပဵၼ်ၸဝ်ႈသေၵေႃႈ၊သူၵျၢမ်ႇႁႃဢဝ်ၵဝ်တၢႆဢေႃႈ။ ဢႃႇပြႃႇႁၢမ်ႇ၊ ၵမ်ၵျၢင်ႉၸိူဝ်ႉၼင်ႇၼၼ်ဢမ်ႇၸႂ်ႈ။-
သူၼႆႉ၊ၵမ်ၵျၢင်ႉၸိူဝ်ႉၼင်ႇဢၼ်ပေႃႈသူၵမ်ၵျၢင်ႉၼၼ်ႉယဝ်ႉ၊” ဝႃႈၼင်ႇၼႆဢေႃႈ။ ၶဝ်ၼၼ်ႉၵေႃႈလၢတ်ႈလႄႈဝႃႈ၊ “ၽြႃးပဵၼ်ၸဝ်ႈသူႇလဵဝ်ပႃးလဵဝ်ၵူၺ်းပဵၼ်ပေႃႈႁဝ်းဢေႃႈ။ ႁဝ်းၵေႃႈပဵၼ်လုၵ်ႈလၢင်းဢၼ်ၸႅတ်ႈဢၼ်မၢၼ်ႇမၼ်းၸဝ်ႈဢေႃႈ။” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၸင်ႇလၢတ်ႈလႄႈဝႃႈ၊ “ပေႃးၽြႃးပဵၼ်ၸဝ်ႈၸႂ်ႈပေႃႈသူၸိုင်၊သူတေႁၵ်ႉၵဝ်ဢေႃႈ။ လွင်ႈမၼ်းၸမ်ႉ၊ၵဝ်ပေႃႇပဵၼ်ၵႃႈတီႈၽြႃးပဵၼ်ၸဝ်ႈမႃးဢေႃႈ။ ၵဝ်မႃးၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇဢမ်ႇၸႂ်ႈ။ ၽြႃးပဵၼ်ၸဝ်ႈပွႆႇၸႂ်ႉၵဝ်မႃးဢေႃႈ။-
ႁဵတ်းသင်လႄႈ သူဢမ်ႇႁုထွမ်ႇၵႂၢမ်းၵဝ်ၼင်ႇႁိုဝ်။ ပိူဝ်ႈဢၼ်သူဢမ်ႇၶၢမ်ႇဢမ်ႇဢဝ်ၵႂၢမ်းတြႃးၵဝ်လႆႈလႄႈသူဢမ်ႇပွင်ႇၸႂ် လႆႈဢေႃႈ။-
သူၼႆႉ၊ပဵၼ်လုၵ်ႈလၢင်းပေႃႈသူဢၼ်ဝႃႈ၊မႃႇၼၢတ်ႈၼၼ်ႉလႄႈသူၶႂ်ႈၸွမ်းဢလူဝ်ႇၵၢင်ၸႂ်ပေႃႈသူဢေႃႈ။ မၼ်းၼၼ်ႉပဵၼ်ၽူႈဢၼ်ဢဝ်ဢသၢၵ်ႈၵူၼ်းတၢႆၸဵမ်မိူဝ်ႈႁူဝ်ပိုင်းၼၼ်ႉယဝ်ႉ။ မၼ်းဢမ်ႇမီးလွင်ႈဢၼ်ပႂ်ႉၵမ်သဵတ်ႈၸႃႇတြႃး၊ၵွပ်ႈပိူဝ်ႈသဵတ်ႈၸႃႇတြႃးဢမ်ႇမီးၼႂ်းမၼ်းၼၼ်ႉဢေႃႈ။ မိူဝ်ႈဢၼ်မၼ်းလၢတ်ႈၵႂၢမ်းပႅတ်ႉၵႂၢမ်းလႅၼ်ၸိုင်၊မၼ်းလၢတ်ႈၸွမ်းၼင်ႇၸႃႇတိတူဝ်ၸဝ်ႈၵဝ်ႇဢေႃႈ။ လွင်ႈမၼ်းၸမ်ႉ၊မၼ်းပဵၼ်ၵူၼ်းပႅတ်ႉၵူၼ်းလႅၼ်ဢေႃႈ။ ပေႃႈဢၼ်ပႅတ်ႉဢၼ်လႅၼ်ၵေႃႈပဵၼ်ဢေႃႈ။-
ၵဝ်ၸမ်ႉ၊လၢတ်ႈၵႂၢမ်းသဵတ်ႈၸႃႇၵူၺ်းလႄႈသူၸင်ႇဢမ်ႇယုမ်ႇမၢတ်ႈၵဝ်ဢေႃႈ။-
ၵဝ်မီးဢပျတ်ႈဝႃႈၼႆ၊ၼႂ်းသူၼႆႉၽူႈလႂ်တေၽုၺ်ႇလၢတ်ႈၼႄလႆႈ။ ပေႃးၵဝ်လၢတ်ႈၵႂၢမ်းသဵတ်ႈၸႃႇယူႇၸိုင်၊ႁဵတ်းသင်လႄႈသူဢမ်ႇယုမ်ႇမၢတ်ႈၵဝ်။-
ၵေႃႉဢၼ်ပဵၼ်ၵႃႈတီႈၽြႃးပဵၼ်ၸဝ်ႈမႃးၼၼ်ႉ၊ထွမ်ႇဢဝ်ၵႂၢမ်းၽြႃးပဵၼ်ၸဝ်ႈဢေႃႈ။ သူၸိူဝ်းၼႆႉပဵၼ်ၵႃႈတီႈၽြႃးပဵၼ်ၸဝ်ႈမႃးဢမ်ႇၸႂ်ႈလႄႈဢမ်ႇထွမ်ႇဢဝ်ၵႂၢမ်းၽြႃးပဵၼ်ၸဝ်ႈ၊” ဝႃႈၼင်ႇၼႆဢေႃႈ။
ၵူၼ်းမဵဝ်း ၵျူး၊ ၶဝ်လၢတ်ႈတီႈ ၸဝ်ႈယေႇသု၊ လႄႈဝႃႈ၊ “ၵႂၢမ်းဢၼ်ႁဝ်းဝႃႈ၊ ‘မႂ်းပဵၼ်ၵူၼ်းမဵဝ်း သမႃႇရိ၊ ဢေႃႈ။ ပဵၼ်ၵေႃႉဢၼ်ၽီႁၢႆႉၶဝ်ႈဢေႃႈ၊’ ဝႃႈၼႆၼၼ်ႉၸွင်ႇႁဝ်းဢမ်ႇၵိုင်ႇဝႃႈႁိုဝ်း၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ၵဝ်ပဵၼ်ၵေႃႉဢၼ်ၽီႁၢႆႉၶဝ်ႈဢမ်ႇၸႂ်ႈ။ ၵဝ်ယွင်ႈယေႃးမုၼ်သရေႇပေႃႈၸဝ်ႈၵဝ်ဢေႃႈ။ သူသမ်ႉယႃႉသရေႇၵဝ်ဢေႃႈ။-
ၵဝ်ဢမ်ႇႁႃဢဝ်မုၼ်သရေႇတူဝ်ၸဝ်ႈၵဝ်ႇ။ ၸဝ်ႈဢၼ်ႁႃမုၼ်သရေႇၵဝ်လႄႈၸီႇယၢင်ႇၽၢႆႇၵဝ်ၼၼ်ႉယင်းမီးယူႇလူးၵွၼ်ႇဢေႃႈ။-
ၵဝ်ဝႃႈတီႈၸိုဝ်ႈၸႂ်ႈမၼ်းတီႈသူၸမ်ႉ၊ၵေႃႉဢၼ်ပႂ်ႉၵမ်ပႂ်ႉၸွမ်းၵႂၢမ်းတြႃးၵဝ်ၼၼ်ႉတၵ်းဢမ်ႇတွၼ်ႉလႆႈထူပ်းတၢင်းတၢႆ၊” ဝႃႈၼင်ႇၼႆဢေႃႈ။
ၵူၼ်းမဵဝ်း ၵျူး၊ ၸိူဝ်းၼၼ်ႉၵေႃႈလၢတ်ႈလႄႈဝႃႈ၊ “ၵမ်းၼႆႉႁဝ်းႁုဝႃႈၽီၶဝ်ႈၼႂ်းမႂ်းလီလီယဝ်ႉ။ ဢႃႇပြႃႇႁၢမ်ႇ၊ တၢႆၵႂႃႇယဝ်ႉ။ ပရေႃးၽႅတ်ႈ တင်းလၢႆၵေႃႈ၊လႆႈတၢႆၵႂႃႇယဝ်ႉ။ မႂ်းသမ်ႉယင်းတိုၵ်ႉဝႃႈ၊ ‘ၵေႃႉဢၼ်ပႂ်ႉၵမ်ပႂ်ႉၸွမ်းၵႂၢမ်းတြႃးၵဝ်ၼၼ်ႉတၵ်းဢမ်ႇတွၼ်ႉလႆႈထူပ်းတၢင်းတၢႆ၊’ ဝႃႈၼႆယူႇလူင်ပႄႇ။-
မႂ်းၼႆႉယႂ်ႇမျၢတ်ႈသေ ဢႃႇပြႃႇႁၢမ်ႇ၊ ဢၼ်တၢႆၵႂႃႇယဝ်ႉၼၼ်ႉလူးၵွၼ်ႇႁိုဝ်း။ ပရေႃးၽႅတ်ႈတင်းလၢႆၵေႃႈတၢႆၵႂႃႇယဝ်ႉ။ မႂ်းဢၢင်ႈဝႃႈမႂ်းသမ်ႉပဵၼ်ၽူႈလႂ်လူးၵွၼ်ႇ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ပေႃးၵဝ်ယုၵ်ႉယွင်ႈမုၼ်သရေႇတူဝ်ၸဝ်ႈၵဝ်ႇၸိုင်၊မုၼ်သရေႇၵဝ်ၼၼ်ႉပဵၼ်ဢၼ်ပႅတ်ႈလၢႆလၢႆဢမ်ႇပွင်ႇလွင်ႈၵႃႈသင်ဢေႃႈ။ ၸဝ်ႈဢၼ်ယုၵ်ႉယွင်ႈမုၼ်သရေႇၵဝ်ၼၼ်ႉပဵၼ်ပေႃႈၸဝ်ႈၵဝ်၊ၸဝ်ႈဢၼ်သူဝႃႈ၊ပဵၼ်ၽြႃးပဵၼ်ၸဝ်ႈသူၼၼ်ႉယဝ်ႉ။-
ၼႂ်းဝႃႈၼၼ်သေၵေႃႈသူဢမ်ႇႁုၸၵ်းမၼ်းၸဝ်ႈ။ ၵဝ်ၸမ်ႉ၊ႁုၸၵ်းဢေႃႈ။ သင်ၵဝ်ဝႃႈ၊ ‘ၵဝ်ဢမ်ႇႁုၸၵ်းမၼ်းၸဝ်ႈ၊’ ဝႃႈၼႆၸိုင်၊ၵဝ်တၵ်းပဵၼ်ၵူၼ်းပႅတ်ႉၵူၼ်းလႅၼ်မိူၼ်သူဢေႃႈ။ ၵူၺ်းၵႃႈ၊ၵဝ်ႁုၸၵ်းမၼ်းၸဝ်ႈယူႇလႄႈ၊ၵဝ်ထွမ်ႇဢဝ်ၵႂၢမ်းမၼ်းၸဝ်ႈဢေႃႈ။-
ပေႃႈသူ ဢႃႇပြႃႇႁၢမ်ႇ၊ ၼၼ်ႉ၊ၸူမ်းသိူဝ်းလူၺ်ႈလွင်ႈဢၼ်မၼ်းတၵ်းလႆႈထူပ်းႁၼ်မိုဝ်ႉဝၼ်းဢၼ်ၵဝ်မႃးၼၼ်ႉလႄႈ၊မိူဝ်ႈဢၼ်မၼ်းထူပ်းႁၼ်ၼၼ်ႉမၼ်းသိူဝ်းပျေႃႇၼႃႇဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ ၵူၼ်းမဵဝ်း ၵျူး၊ ၸိူဝ်းၼၼ်ႉလၢတ်ႈလႄႈဝႃႈ၊ “ဢသၢၵ်ႈမႂ်းယင်းဢမ်ႇပႆႇလႆႈႁႃႈသိပ်းပီလႄႈ၊မႂ်းလႆႈႁၼ် ဢႃႇပြႃႇႁၢမ်ႇ၊ ယဝ်ႉႁိုဝ်း၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “ၵဝ်ဝႃႈတီႈၸိုဝ်ႈတီႈၸႂ်ႈမၼ်းတီႈသူၸမ်ႉ၊ၸူဝ်ႈဢၼ် ဢႃႇပြႃႇႁၢမ်ႇ၊ ဢမ်ႇပႆႇၵိူတ်ႇၼၼ်ႉၵဝ်ပဵၼ်ယဝ်ႉယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၶဝ်ဢွၼ်ၵၼ်ၵဵပ်းဢဝ်မၢၵ်ႇႁိၼ်ႁႂ်ႈလႆႈပိုဝ်ႈသႂ်ႇမၼ်းၸဝ်ႈဢေႃႈ။ ၵူၺ်းၵႃႈ၊ ၸဝ်ႈယေႇသု၊ ဝႄႈပၢႆႈလႄႈဢွၵ်ႇၵျွင်းပိၵ်ႈမၢၼ်ႇၸဝ်ႈၵႂႃႇသေဢေႃႈ။
မိူဝ်ႈဢၼ် ၸဝ်ႈယေႇသု၊ ယင်းတိုၵ်ႉပႆၵႂႃႇၸွမ်းတၢင်းယူႇၼၼ်ႉၸိုင်၊မၼ်းၸဝ်ႈႁူပ်ႉထူပ်းၵူၼ်းၵေႃႉၼိုင်ႈဢၼ်တႃမွတ်ႇၸဵမ်မိူဝ်ႈၵိူတ်ႇမႃးၼၼ်ႉဢေႃႈ။-
တပႄးမၼ်းၸဝ်ႈတင်းလၢႆလဝ်ႈထၢမ်လႄႈဝႃႈ၊ “သြႃႇၸဝ်ႈ၊ၵွပ်ႈပိူဝ်ႈဢပျတ်ႈၽႂ်လႄႈၵေႃႉၼႆႉတႃမွတ်ႇၸဵမ်မိူဝ်ႈၵိူတ်ႇမႃးၼၼ်ႉၶႃႈ။ ပဵၼ်ၵွပ်ႈပိူဝ်ႈဢပျတ်ႈမၼ်းၶႃႈႁိုဝ်း။ ဢမ်ႇၼၼ်ပဵၼ်ၵွပ်ႈပိူဝ်ႈဢပျတ်ႈပေႃႈမႄႈမၼ်းၶႃႈႁိုဝ်း၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈတီႈၶဝ်လႄႈဝႃႈ၊ “မၼ်းၼႆႉ၊တႃမွတ်ႇၵွပ်ႈပိူဝ်ႈဢပျတ်ႈမၼ်းဢမ်ႇၸႂ်ႈ။ ၵွပ်ႈဢပျတ်ႈပေႃႈမႄႈမၼ်းၵေႃႈဢမ်ႇၸႂ်ႈ။ ၼင်ႇႁိုဝ်မုၼ်ၽုင်းၽြႃးပဵၼ်ၸဝ်ႈတၵ်းထၢင်ႇသႃးမႃးၵႃႈၼႂ်းမၼ်းၸိုင်၊ၸင်ႇပဵၼ်ဢေႃႈ။-
ၸူဝ်ႈဢၼ်ဢၼ်လႅင်းၵၢင်ဝၼ်းယင်းမီးယူႇၼႆႉ၊ႁဝ်းတၵ်းလႆႈႁဵတ်းၵၢၼ်တၢင်းႁဵတ်းၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉဢေႃႈ။ ၶိင်ႇၵၢင်ၶိုၼ်းဢၼ်ၽူႈလႂ်သေၵေႃႉသေၵူၼ်းဢမ်ႇႁဵတ်းၵႃႈသင်လႆႈၼၼ်ႉယင်းမႃးယူႇလူးၵွၼ်ႇဢေႃႈ။-
ၸူဝ်ႈဢၼ်ၵဝ်ယင်းမီးယူႇၼႂ်းလေႃးၵႃႉၼႆႉၸိုင်၊ၵဝ်ပဵၼ်ဢၼ်လႅင်းလေႃးၵႃႉၼႆႉဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈၵေႃႈထူမ်ႇၼမ်ႉလၢႆးသႂ်ႇၼိူဝ်လိၼ်လႄႈၼွၵ်းႁဵတ်းၵူမ်ႇယဝ်ႉၸင်ႇဢဝ်ၵူမ်ႇၼၼ်ႉတႃးပၼ်တီႈတႃမၼ်းသေလႄႈ၊-
လၢတ်ႈတီႈမၼ်းလႄႈဝႃႈ၊ “ၵႂႃႇသုၵ်ႈပႅတ်ႈၵႃႈတီႈၼမ်ႉၼွင် သီးလွမ်ႇ၊ ပုၼ်ႉတႃႉ၊” ဝႃႈၼင်ႇၼႆဢေႃႈ။ ( သီးလွမ်ႇ၊ ၼၼ်ႉပွင်ႇဝႃႈ၊ပွႆႇၸႂ်ႉၵႂႃႇဢေႃႈ။) မၼ်းၵေႃႈၵႂႃႇသုၵ်ႈသေယဝ်ႉ၊မၢၵ်ႇတႃမၼ်းႁၼ်လႆႈလႄႈ၊မၼ်းသမ်ႉၶိုၼ်းမႃးဢေႃႈ။
ၵူၼ်းႁိူၼ်းၸမ်ၵၼ်တင်းမၼ်း၊ဢိၵ်ႇတင်းၶဝ်ၸိူဝ်းဢၼ်ယၢမ်ႈႁၼ်မၼ်းယွၼ်းၵိၼ်တီႈပိူၼ်ႈမိူဝ်ႈဢွၼ်တၢင်းၼၼ်ႉထၢမ်လႄႈဝႃႈ၊ “ၵေႃႉၼႆႉပဵၼ်ၵေႃႉဢၼ်ယၢမ်ႈၼင်ႈသေလႄႈယွၼ်းၵိၼ်ၼၼ်ႉဢမ်ႇၸႂ်ႈႁိုဝ်း၊” ဝႃႈၼင်ႇၼႆဢေႃႈ။
ၵမ်ႈၽွင်ႈလၢတ်ႈဝႃႈ၊ “ၸႂ်ႈယဝ်ႉ၊ပဵၼ်မၼ်းၼၼ်ႉတႄႉဢေႃႈ၊” ဝႃႈၼႆလႄႈ၊မၢင်ၵေႃႉသမ်ႉဝႃႈ၊ “ဢမ်ႇၸႂ်ႈ။ ပဵၼ်ၵူၼ်းမိူၼ်ၵၼ်ၵူၺ်းဢေႃႈ၊” ဝႃႈၼင်ႇၼႆဢေႃႈ။ မၼ်းၼၼ်ႉၸင်ႇလၢတ်ႈဝႃႈ၊ “ၵဝ်ၶႃႈပဵၼ်ၵေႃႉၼၼ်ႉၶႃႈဢေႃႈ၊” ဝႃႈၼင်ႇၼႆလႄႈ၊-
ၶဝ်ၵေႃႈထၢမ်လႄႈဝႃႈ၊ “မၢၵ်ႇတႃမႂ်းႁဵတ်းၸိူဝ်ႉႁိုဝ်လႄႈႁၼ်လႆႈမႃး၊” ဝႃႈၼင်ႇၼႆဢေႃႈ။
မၼ်းၶိုၼ်းလၢတ်ႈလႄႈဝႃႈ၊ “ၵူၼ်းၵေႃႉၼိုင်ႈဢၼ်လႆႈၸိုဝ်ႈ ယေႇသု၊ ၼၼ်ႉႁဵတ်းၵူမ်ႇလႄႈ တႃးပၼ်တီႈမၢၵ်ႇတႃၵဝ်ၶႃႈသေယဝ်ႉ။ လၢတ်ႈလႄႈဝႃႈ၊ ‘ၵႂႃႇၵႃႈတီႈၼမ်ႉၼွင် သီးလွမ်ႇ၊ လႄႈသုၵ်ႈတႃႉ၊’ ဝႃႈၼႆ၊ၵဝ်ၶႃႈၵေႃႈၵႂႃႇလႄႈ၊မိူဝ်ႈဢၼ်သုၵ်ႈယဝ်ႉၼၼ်ႉၸိုင်၊တႃၵဝ်ၶႃႈလႆႈႁၼ်မႃးၵမ်းလဵဝ်ၶႃႈဢေႃႈ၊” ဝႃႈၼင်ႇၼႆဢေႃႈ။
ၶဝ်ၵေႃႈထၢမ်လႄႈဝႃႈ၊ “ၵေႃႉၼၼ်ႉ မီးၵႃႈလႂ်၊” ဝႃႈၼင်ႇၼႆလႄႈ၊ “ၵဝ်ၶႃႈဢမ်ႇႁုၶႃႈ၊” ဝႃႈၼႆမၼ်းၶိုၼ်းလၢတ်ႈဢေႃႈ။
မိူဝ်ႈၼၼ်ႉ၊ၶဝ်ဢဝ်ၵူၼ်းၵေႃႉဢၼ်တႃမွတ်ႇလႄႈႁၼ်လႆႈမႃးၼၼ်ႉၵႂႃႇသူင်ႇၵႃႈတီႈၵူၼ်းၵိူင်း ၽႃႇရိသႄး၊ ၶဝ်ဢေႃႈ။-
ဝၼ်းဢၼ် ၸဝ်ႈယေႇသု၊ ႁဵတ်းၵူမ်ႇလႄႈၽုၺ်ႇမၢၵ်ႇတႃမၼ်းၼၼ်ႉ ပဵၼ်ဝၼ်းၵမ်သိၼ်ဢေႃႈ။-
ၵူၼ်းၵိူင်း ၽႃႇရိသႄး၊ ၶဝ်သမ်ႉတွင်ႈထၢမ်လွင်ႈဢၼ်မၢၵ်ႇတႃမၼ်းႁဵတ်းႁိုဝ်ႁၼ်လႆႈမႃးၼၼ်ႉထႅင်ႈလႄႈ၊မၼ်းၵေႃႈလၢတ်ႈလႄႈဝႃႈ၊ “မၼ်းၼၼ်ႉဢဝ်ၵူမ်ႇတႃးသႂ်ႇတႃၵဝ်ၶႃႈလႄႈမိူဝ်ႈဢၼ်ၵဝ်ၶႃႈသုၵ်ႈယဝ်ႉၼၼ်ႉၸိုင်၊မၢၵ်ႇတႃႁၼ်လႆႈမႃးၶႃႈဢေႃႈ၊” ဝႃႈၼင်ႇၼႆဢေႃႈ။
ၵူၼ်းၵိူင်း ၽႃႇရိသႄး၊ ၵမ်ႈၽွင်ႈလၢတ်ႈလႄႈဝႃႈ၊ “ၵေႃႉဢၼ်ႁဵတ်းလွင်ႈတၢင်းၼႆႉၼၼ်ႉ၊ပိူဝ်ႈဢၼ်ဢမ်ႇပႂ်ႉဝၼ်းၵမ်သိၼ်လႄႈမၼ်းလုၵ်ႉသေၵႃႈတီႈၽြႃးပဵၼ်ၸဝ်ႈမႃးဝႃႈၼႆဢမ်ႇၸႂ်ႈလႆႈ၊” ဝႃႈၼင်ႇၼႆဢေႃႈ။ မၢင်ၵေႃႉသမ်ႉဝႃႈ၊ “ၵူၼ်းဢၼ်မီးဢပျတ်ႈတၵ်းတေႁဵတ်းၼႄၼိမိၵ်ႈလၢၵ်ႈၶၼႃႇမဵဝ်းၼႆႉလႆႈၸိူဝ်ႉၼင်ႇႁိုဝ်၊” ဝႃႈၼင်ႇၼႆလႄႈ၊ၶဝ်ၼင်ႇၵၼ်ၵၼ်ၸႂ်သၽေႃးတႅၵ်ႇၽႄၵၼ်ၵႂႃႇဢေႃႈ။
ၶဝ်ၸင်ႇလၢတ်ႈတီႈၵေႃႉဢၼ်တႃၶိုၼ်းႁၼ်လႆႈမႃးၼၼ်ႉလႄႈဝႃႈ၊ “ပိူဝ်ႈဝႃႈမၼ်းၽုၺ်ႇမၢၵ်ႇတႃမႂ်းလႄႈ၊မႂ်းၶႂ်ႈဝႃႈလွင်ႈမၼ်းၸိူဝ်ႉၼင်ႇႁိုဝ်၊” ဝႃႈၼင်ႇၼႆလႄႈ၊ “မၼ်းၸဝ်ႈပဵၼ်ပရေႃးၽႅတ်ႈ ၶႃႈဢေႃႈ၊” ဝႃႈၼႆမၼ်းၶိုၼ်းလၢတ်ႈဢေႃႈ။
ၶုၼ်ဢႃႇၼႃႇၵူၼ်းမဵဝ်း ၵျူး၊ ၸိူဝ်းၼၼ်ႉဢမ်ႇပႆႇၶႂ်ႈယုမ်ႇလွင်ႈဢၼ်ၵေႃႉၼၼ်ႉပဵၼ်ၵူၼ်းတႃမွတ်ႇမိူဝ်ႈဢွၼ်တၢင်းၼၼ်ႉလႄႈ၊တႃမၼ်းႁၼ်လႆႈမႃးၼၼ်ႉ၊တေႃႇထိုင်ႁွတ်ႈၶဝ်ႁွင်ႉဢဝ်ပေႃႈမႄႈမၼ်းမႃးသေယဝ်ႉ၊-
ထၢမ်ဝႃႈ၊ “ၵေႃႉၼႆႉပဵၼ်လုၵ်ႈၸၢႆးသူဢၼ်သူဝႃႈ၊တႃမွတ်ႇၸဵမ်မိူဝ်ႈၵိူတ်ႇမႃးၼၼ်ႉၸႂ်ႈတႄႉႁိုဝ်း။ ပေႃးၸႂ်ႈၸိုင်၊တေႃႈလဵဝ်ၼႆႉ မၢၵ်ႇတႃမၼ်းႁဵတ်းႁိုဝ်ႁၼ်လႆႈမႃး၊” ဝႃႈၼင်ႇၼႆဢေႃႈ။
ပေႃႈမႄႈမၼ်းၶိုၼ်းလၢတ်ႈလႄႈဝႃႈ၊ “ႁဝ်းၶႃႈႁုမၼ်းပဵၼ်လုၵ်ႈၸၢႆးႁဝ်းၶႃႈဢေႃႈ။ မၼ်းတႃမွတ်ႇၸဵမ်မိူဝ်ႈၵိူတ်ႇမႃးၼၼ်ႉၵေႃႈႁဝ်းႁုၶႃႈဢေႃႈ။-
ၵူၺ်းၵႃႈ၊ယၢမ်းၼႆႉမၢၵ်ႇတႃမၼ်းႁဵတ်းႁိုဝ်ႁၼ်လႆႈမႃးၼၼ်ႉၸိုင်၊ႁဝ်းၶႃႈဢမ်ႇႁုၶႃႈ။ ၽူႈလႂ်ၽုၺ်ႇမၢၵ်ႇတႃမၼ်းၼၼ်ႉၵေႃႈႁဝ်းၶႃႈဢမ်ႇႁုၶႃႈ။ ထၢမ်မၼ်းၶႃႈတႃႉ။ ဢသၢၵ်ႈဢရွႆႇမၼ်းပေႃးထူၼ်ႈယဝ်ႉယဝ်ႉၶႃႈဢေႃႈ။ မၼ်းတၵ်းလၢတ်ႈၼႄလွင်ႈတူဝ်ၸဝ်ႈၵဝ်ႇလႆႈယူႇၶႃႈဢေႃႈ၊” ဝႃႈၼင်ႇၼႆဢေႃႈ။-
ပေႃႈမႄႈမၼ်းၼၼ်ႉဝႃႈၸိူဝ်ႉၼင်ႇၼၼ်ၵွပ်ႈပိူဝ်ႈၶဝ်ၵူဝ်တၢင်းဢၼ်ၶုၼ်ဢႃႇၼႃႇၵူၼ်းမဵဝ်း ၵျူး၊ ၶဝ်ၽွမ်ႉၸႂ်ၵၼ်ဝႆႉဝႃႈ၊ပေႃးသေၵေႃႉသေၵူၼ်းႁပ်ႉတုင်းဢဝ် ၸဝ်ႈယေႇသု၊ ပဵၼ် ၸဝ်ႈၶရိၸ်ႈ၊ ၸိုင်၊ၶဝ်ၵူဝ်တၵ်းလႆႈၶၢမ်ႇတၢင်းဢၼ်ႁေႃႈဢွၵ်ႇပႅတ်ႈသေၵႃႈၼႂ်းၸရွပ်ႈႁေႃးတြႃးၼၼ်ႉဢေႃႈ။-
ပိူဝ်ႈၼႆၸင်ႇပေႃႈမႄႈမၼ်းလႆႈလၢတ်ႈဝႃႈ၊ “ဢသၢၵ်ႈဢရွႆႇမၼ်းပေႃးထူၼ်ႈယဝ်ႉၶႃႈဢေႃႈ။ ထၢမ်မၼ်းၶႃႈတႃႉ၊” ဝႃႈၼင်ႇၼႆဢေႃႈ။
ၶဝ်သမ်ႉႁွင်ႉဢဝ်ၵေႃႉဢၼ်ပဵၼ်ၵူၼ်းတႃမွတ်ႇမိူဝ်ႈဢွၼ်တၢင်းၼၼ်ႉ၊မႃးထႅင်ႈပွၵ်ႈတီႈသွင်သေယဝ်ႉလၢတ်ႈလႄႈဝႃႈ၊ “ယွင်ႈယေႃးၽြႃးပဵၼ်ၸဝ်ႈၵူၺ်းတႃႉ။ ႁဝ်းႁုလွင်ႈဢၼ်ၵေႃႉၼႆႉပဵၼ်ၵူၼ်းဢၼ်မီးဢပျတ်ႈဢေႃႈ၊” ဝႃႈၼင်ႇၼႆဢေႃႈ။
ၵေႃႉၼၼ်ႉၵေႃႈတွပ်ႇလၢတ်ႈလႄႈဝႃႈ၊ “ၸဝ်ႈၼၼ်ႉပဵၼ်ၵူၼ်းဢၼ်မီးဢပျတ်ႈႁိုဝ်၊ဢမ်ႇမီးဢပျတ်ႈႁိုဝ်၊ၵဝ်ၶႃႈဢမ်ႇႁုၶႃႈ။ ဢၼ်ၵဝ်ၶႃႈႁုလွင်ႈၼိုင်ႈၸမ်ႉ၊ၵဝ်ၶႃႈၼႆႉဢွၼ်တၢင်းတႃမွတ်ႇဢေႃႈ။ တေႃႈလဵဝ်ၼႆႉမၢၵ်ႇတႃလႆႈႁၼ်ယဝ်ႉၼၼ်ႉၵူၺ်းဢေႃႈ၊” ဝႃႈၼင်ႇၼႆဢေႃႈ။
ၶဝ်သမ်ႉထၢမ်လႄႈဝႃႈ၊ “မၼ်းၼၼ်ႉႁဵတ်းၵႃႈသင်ပၼ်တီႈမႂ်း။ မၼ်းႁဵတ်းႁိုဝ်ၽုၺ်ႇပၼ်မၢၵ်ႇတႃမႂ်း၊” ဝႃႈၼင်ႇၼႆဢေႃႈ။
မၼ်းၶိုၼ်းလၢတ်ႈလႄႈဝႃႈ၊ “ၵဝ်ၶႃႈပေႃးလၢတ်ႈၼႄသူယဝ်ႉယဝ်ႉ။ သူဢမ်ႇထွမ်ႇလူင်ပႄႇ။ ႁဵတ်းသင်လႄႈသူၶႂ်ႈထွမ်ႇထႅင်ႈ။ သူၵေႃႈၶႂ်ႈပဵၼ်တပႄးမၼ်းၸဝ်ႈႁိုဝ်း၊” ဝႃႈၼင်ႇၼႆဢေႃႈ။
ၶဝ်ၸိူဝ်းၼၼ်ႉပွင်ႉလႃႇမၼ်းလႄႈလၢတ်ႈဝႃႈ၊ “မႂ်းပဵၼ်တပႄးမၼ်းယဝ်ႉ။ ႁဝ်းၸမ်ႉ၊ပဵၼ်တပႄး မူဝ်းသေႇ၊ ဢေႃႈ။-
လွင်ႈဢၼ်ၽြႃးပဵၼ်ၸဝ်ႈလၢတ်ႈတေႃႇ မူဝ်းသေႇ၊ ၸိုင်၊ႁဝ်းႁုဢေႃႈ။ ၵေႃႉၼၼ်ႉၸိုင်၊ပဵၼ်ၵႃႈတီႈလႂ်မႃးႁဝ်းဢမ်ႇႁု၊” ဝႃႈၼင်ႇၼႆဢေႃႈ။
ၵေႃႉၼၼ်ႉၸင်ႇလၢတ်ႈလႄႈဝႃႈ၊ “လွင်ႈတၢင်းၼႆႉၸိုင်၊သင်ပႄႉမႃးလီဢၢမ်း။ ၸဝ်ႈၼၼ်ႉၽုၺ်ႇမၢၵ်ႇတႃၵဝ်ၶႃႈယဝ်ႉလႄႈ၊မၼ်းၸဝ်ႈလုၵ်ႉသေၵႃႈတီႈလႂ်ပဵၼ်မႃးၼၼ်ႉသူယင်းဢမ်ႇႁု။-
ႁဝ်းႁုလွင်ႈဢၼ်ၽြႃးပဵၼ်ၸဝ်ႈဢမ်ႇထွမ်ႇဢမ်ႇဢဝ်ၵူၼ်းဢၼ်မီးဢပျတ်ႈလႄႈ၊ထွမ်ႇဢဝ်ၵႂၢမ်းၵေႃႉဢၼ်ရူဝ်ႇသေႇၵူဝ်ယမ်မၼ်းၸဝ်ႈသေ ၵမ်ၵျၢင်ႉၸွမ်းၼင်ႇဢလူဝ်ႇမၼ်းၸဝ်ႈၼၼ်ႉဢေႃႈ။-
ၸဵမ်မိူဝ်ႈၵမ်ႇၽႃႇၸႃႉတႄႇပဵၼ်မႃးၼၼ်ႉၽူႈလႂ်သေၵေႃႉသေၵူၼ်းတၢတ်ႈၼိူင်ႇႁႂ်ႈလႆႈၽုၺ်ႇမၢၵ်ႇတႃၵူၼ်းဢၼ်တႃမွတ်ႇၸဵမ်မိူဝ်ႈၵိူတ်ႇမႃးၼၼ်ႉဝႃႈၼႆ၊ၽူႈလႂ်ဢမ်ႇတွၼ်ႉလႆႈငိၼ်းသေပွၵ်ႈ။-
ပေႃးၵေႃႉၼၼ်ႉ၊ဢမ်ႇၸႂ်ႈၵေႃႉဢၼ်ပဵၼ်မႃးသေၵႃႈတီႈၽြႃးပဵၼ်ၸဝ်ႈၸိုင်၊မၼ်းဢမ်ႇတၢတ်ႈၼိူင်ႇလႆႈသေၸိူဝ်ႉသေပိူင်၊” ဝႃႈၼင်ႇၼႆဢေႃႈ။
ၶဝ်ၸိူဝ်းၼၼ်ႉၶိုၼ်းလၢတ်ႈလႄႈဝႃႈ၊ “မႂ်းၼႆႉမီးတုၸရိူၵ်ႈတင်းတူဝ်တင်းၶိင်းၸဵမ်မိူဝ်ႈၵိူတ်ႇမႃးၼၼ်ႉလႄႈ၊ယင်းၶႂ်ႈမႃးသင်ႇသွၼ်သုင်းမႃႉႁဝ်းလူးၵွၼ်ႇႁိုဝ်း၊” ဝႃႈၼင်ႇၼႆသေယဝ်ႉ၊ႁေႃႈမၼ်းဢွၵ်ႇပႅတ်ႈသေၵႃႈၼႂ်းၸရွပ်ႈႁေႃးတြႃးၵႂႃႇဢေႃႈ။
ၸဝ်ႈယေႇသု၊ ငိၼ်းလွင်ႈဢၼ်ၶဝ်ႁေႃႈဢွၵ်ႇၵူၼ်းၵေႃႉၼၼ်ႉပႅတ်ႈသေယဝ်ႉ၊မၼ်းၸဝ်ႈၵႂႃႇႁႃႁႂ်ႈထူပ်းမၼ်းသေလႄႈထၢမ်ဝႃႈ၊ “မႂ်းယုမ်ႇမၢတ်ႈလုၵ်ႈၽြႃးပဵၼ်ၸဝ်ႈႁိုဝ်း၊” ဝႃႈၼင်ႇၼႆလႄႈ။
ၵေႃႉၼၼ်ႉၵေႃႈလဝ်ႈထၢမ်လႄႈဝႃႈ၊ “ၼင်ႇႁိုဝ်ၵဝ်ၶႃႈတၵ်းယုမ်ႇမၢတ်ႈၸဝ်ႈၼၼ်ႉ၊မၼ်းၸဝ်ႈပဵၼ်ၽူႈလႂ်၊လၢတ်ႈၼႄၵဝ်ၶႃႈသေၵမ်းၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈလၢတ်ႈတီႈမၼ်းလႄႈဝႃႈ၊ “မႂ်းလႆႈထူပ်းႁၼ်ၸဝ်ႈၼၼ်ႉယဝ်ႉယဝ်ႉ။ မၼ်းၸဝ်ႈပဵၼ်ၸဝ်ႈဢၼ်လၢတ်ႈတေႃႇမႂ်းယူႇမိူဝ်ႈလဵဝ်ၼႆႉၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵေႃႉၼၼ်ႉၵေႃႈလဝ်ႈလၢတ်ႈလႄႈဝႃႈ၊ “ၸဝ်ႈၽြႃးတီႈၶႃႈ။ ၵဝ်ၶႃႈယုမ်ႇမၢတ်ႈတီႈၶႃႈဢေႃႈ၊” ဝႃႈၼႆသေယဝ်ႉ၊ၶုပ်ႉမူပ်ႇဝႆႈ ၸဝ်ႈယေႇသု၊ ဢေႃႈ။
မိူဝ်ႈၼၼ်ႉ၊ ၸဝ်ႈယေႇသု၊ လၢတ်ႈလႄႈဝႃႈ၊ “ၵဝ်ႁွတ်ႈမႃးၼႂ်းလေႃးၵႃႉၼႆႉႁႂ်ႈလႆႈၸီႇယၢင်ႇတြႃးၼင်ႇႁိုဝ်ၶဝ်ၸိူဝ်းတႃမွတ်ႇတၵ်းႁၼ်လႆႈမႃးလႄႈႁႂ်ႈၶဝ်ၸိူဝ်းဢၼ်မၢၵ်ႇတႃႁၼ်ၼၼ်ႉ တႃမွတ်ႇၵႂႃႇဢေႃႈ၊” ဝႃႈၼင်ႇၼႆဢေႃႈ။
ၵူၼ်းၵိူင်း ၽႃႇရိသႄး၊ ဢၼ်မီးယူႇၵႃႈတီႈၼၼ်ႈၵမ်ႈၽွင်ႈငိၼ်းၵႂၢမ်းၼၼ်ႉသေယဝ်ႉ၊လၢတ်ႈတီႈမၼ်းၸဝ်ႈလႄႈဝႃႈ၊ “မႂ်းၶႂ်ႈဝႃႈႁဝ်းၸိူဝ်းၼႆႉတႃမွတ်ႇယူႇဝႃႈၼႆႁိုဝ်း။” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ပေႃးမၢၵ်ႇတႃသူမွတ်ႇယူႇတႄႉၸိုင်၊သူဢမ်ႇမီးဢပျတ်ႈ။ ၵူၺ်းၵႃႈ၊တေႃႈလဵဝ်ၼႆႉသူဝႃႈ၊ ‘မၢၵ်ႇတႃႁဝ်းႁၼ်ယူႇ၊’ ဝႃႈၼႆလႄႈ၊ဢပျတ်ႈတႄႇယူႇၵႃႈၼႂ်းသူဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ သမ်ႉလၢတ်ႈလႄႈဝႃႈ၊ “ၵဝ်ဝႃႈတီႈၸိုဝ်ႈတီႈၸႂ်ႈမၼ်းတီႈသူၸမ်ႉ၊ၵူၼ်းၵေႃႉဢၼ်ဢမ်ႇၶဝ်ႈၸွမ်းႁူးၽၵ်းတူၶွၵ်ႈသူဝ်းလႄႈၶၢမ်ႈႁူဝ်ႉသေလႄႈၶဝ်ႈၵႂႃႇၵူၺ်းၼၼ်ႉၸိုင်၊ၵေႃႉၼၼ်ႉပဵၼ်ၽူႈလၵ်ႉၵူၼ်းၸူၼ်ဢေႃႈ။-
ၵေႃႉဢၼ်ၶဝ်ႈၸွမ်းႁူးၽၵ်းတူၸမ်ႉ၊ပဵၼ်ၵေႃႉဢၼ်လဵင်ႉသူဝ်းထိင်းသူဝ်းဢေႃႈ။-
တီႈၵေႃႉၼၼ်ႉၸိုင်၊ၵူၼ်းပႂ်ႉၽၵ်းတူၵေႃႈၸၢင်ႈၽုၺ်ႇပၼ်လႄႈၽုင်သူဝ်းၸိူဝ်းၼၼ်ႉၵေႃႈ၊ၸၢင်ႈထွမ်ႇသဵင်မၼ်းမိူဝ်ႈဢၼ်မၼ်းႁွင်ႉၸိုဝ်ႈသဵင်သူဝ်းမၼ်းတူဝ်လႂ်တူဝ်ၼၼ်ႉသေယဝ်ႉ၊ၸၢင်ႈဢွၼ်ၶဝ်ဢွၵ်ႇၵႂႃႇဢေႃႈ။-
မိူဝ်ႈဢၼ်မၼ်းဢဝ်သူဝ်းမၼ်းတင်းသဵင်ႈတင်းလူင်ဢွၵ်ႇပူၼ်ႉယဝ်ႉၸိုင်၊မၼ်းၸၢင်ႈၵႂႃႇတၢင်းၼႃႈၶဝ်လႄႈၽုင်သူဝ်းၼၼ်ႉၵေႃႈၸၢင်ႈၸွမ်းတၢင်းလင်မၼ်းၵႂႃႇ၊ၵွပ်ႈပိူဝ်ႈၶဝ်တွင်းသဵင်မၼ်းဢေႃႈ။-
ၶဝ်ဢမ်ႇၸၢင်ႈၵႂႃႇၸွမ်းတၢင်ႇၵေႃႉတၢင်ႇၵူၼ်းၵူၺ်းဢမ်ႇၵႃး၊ၸၢင်ႈၶုၼ်ႇလႅၼ်ႈဢွၵ်ႇပၢႆႈၵႂႃႇၵွပ်ႈပိူဝ်ႈၶဝ်ဢမ်ႇႁုၸၵ်းသဵင်ၵူၼ်းတၢင်ႇၵေႃႉၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ လၢတ်ႈၵႂၢမ်းဢုပမႃႇၼႆႉၼႄၶဝ်သေၵေႃႈ၊ၶဝ်ဢမ်ႇႁုထွမ်ႇဢၼၢၵ်ႈဢထိၵ်ႈပႄႇၵႂၢမ်းဢၼ်မၼ်းၸဝ်ႈဝႃႈၼၼ်ႉလႃးလႃး။
ၸဝ်ႈယေႇသု၊ သမ်ႉလၢတ်ႈတီႈၶဝ်ထႅင်ႈလႄႈဝႃႈ၊ “ၵဝ်ဝႃႈတီႈၸိုဝ်ႈတီႈၸႂ်ႈမၼ်းတီႈသူၸမ်ႉ၊ၵဝ်ပဵၼ်ႁူးၽၵ်းတူပုၼ်ႈၽုင်သူဝ်းဢေႃႈ။-
ၶဝ်ၸိူဝ်းဢၼ်မႃးဢွၼ်တၢင်းၵဝ်တင်းသဵင်ႈတင်းလူင်ၼၼ်ႉ၊ပဵၼ်ၽူႈလၵ်ႉၵူၼ်းၸူၼ်ဢေႃႈ။ ၵူၺ်းၵႃႈ၊သူဝ်းတင်းလၢႆဢမ်ႇထွမ်ႇဢဝ်ၵႂၢမ်းၶဝ်ၼၼ်ႉ။-
ၵဝ်ပဵၼ်ႁူးၽၵ်းတူဢေႃႈ။ ၽူႈလႂ်သေဢမ်ႇဝႃႈ၊ၵေႃႉဢၼ်ၶဝ်ႈၸွမ်းၵႃႈၼႂ်းၵဝ်ၼၼ်ႉ ၵေႃႉၼၼ်ႉတၵ်းလႆႈလွတ်ႈၽေးဢေႃႈ။ မၼ်းတၵ်းလႆႈပႆၶဝ်ႈပႆဢွၵ်ႇလႄႈလႆႈထူပ်းၺႃးပႃႇယိူဝ်ႈဢၼ်ၶဵဝ်လီၼၼ်ႉဢေႃႈ။-
ၽူႈလၵ်ႉၸိုင်၊ၸၢင်ႈမႃးႁႂ်ႈလႆႈလၵ်ႉ၊ႁႂ်ႈလႆႈႁႅမ်တၢႆ၊ႁႂ်ႈလႆႈယႃႉပႅတ်ႈၵူၺ်းဢေႃႈ။ ၵဝ်ၸမ်ႉ၊မႃးပုၼ်ႈလွင်ႈၼင်ႇႁိုဝ်သူဝ်းတင်းလၢႆတၵ်းလႆႈဢသၢၵ်ႈၵူၺ်းဢမ်ႇၵႃး၊ႁႂ်ႈလႆႈပျေႉၸုမ်ႇဝႆႉတင်းဢသၢၵ်ႈဢေႃႈ။
“ၵဝ်ပဵၼ်ၵူၼ်းလဵင်ႉသူဝ်းထိင်းသူဝ်းဢၼ်လီဢေႃႈ။ ၵူၼ်းလဵင်ႉသူဝ်းထိင်းသူဝ်းဢၼ်လီဢၼ်ဝႃႈၼၼ်ႉ၊ၸၢင်ႈၸုၼ်ႉဢသၢၵ်ႈတူဝ်ၸဝ်ႈၵဝ်ႇပုၼ်ႈသူဝ်းတင်းလၢႆဢေႃႈ။-
ၵူၼ်းၵိၼ်ၸၢင်ႈၵိၼ်ငႃၸမ်ႉ၊ပိူဝ်ႈဝႃႈမၼ်းဢမ်ႇၸႂ်ႈၵူၼ်းလဵင်ႉထိင်းသူဝ်း၊ဢမ်ႇၸႂ်ႈၸဝ်ႈသူဝ်းလႄႈ၊မိူဝ်ႈဢၼ်မၼ်းႁၼ်မႃၼႆးမႃးၼၼ်ႉၸိုင်၊မၼ်းၸၢင်ႈပႅတ်ႈဝႆႉသူဝ်းတင်းလၢႆသေလႄႈလႅၼ်ႈပၢႆႈဢေႃႈ။ မႃၼႆးၵေႃႈတိၺွပ်းၵိၼ်သူဝ်းၸိူဝ်းၼၼ်ႉလႄႈႁႂ်ႈၽၢတ်ႇၽႄတႅၵ်ႇယၢႆႈၵႂႃႇဢေႃႈ။-
ၵူၼ်းၵိၼ်ၸၢင်ႈၵိၼ်ငႃၼၼ်ႉၸၢင်ႈလႅၼ်ႈပၢႆႈၵွပ်ႈပိူဝ်ႈမၼ်းပဵၼ်ၵေႃႉဢၼ်ၵိၼ်ၸၢင်ႈၵိၼ်ငႃၵူၺ်းလႄႈမၼ်းဢမ်ႇမႆႈၸႂ်လူၺ်ႈလွင်ႈသူဝ်းတင်းလၢႆဢေႃႈ။-
ၵဝ်ပဵၼ်ၵူၼ်းလဵင်ႉသူဝ်းထိင်းသူဝ်းဢၼ်လီဢေႃႈ။ ၵဝ်ႁုၸၵ်းသူဝ်းၵဝ်တင်းလၢႆလႄႈ၊သူဝ်းၵဝ်တင်းလၢႆၵေႃႈႁုၸၵ်းၵဝ်၊-
မိူၼ်ၸိူဝ်ႉၼင်ႇပေႃႈၸဝ်ႈႁုၸၵ်းၵဝ်လႄႈၵဝ်ၵေႃႈႁုၸၵ်းပေႃႈၸဝ်ႈၼၼ်ႉဢေႃႈ။ ၵဝ်ၵေႃႈၸုၼ်ႉဢသၢၵ်ႈတူဝ်ၸဝ်ႈၵဝ်ႇပုၼ်ႈသူဝ်းၸိူဝ်းၼၼ်ႉဢေႃႈ။-
ယင်းမီးသူဝ်းတၢင်ႇတူဝ်ၸိူဝ်းဢၼ်ပဵၼ်သူဝ်းၵဝ်လႄႈဢမ်ႇယူႇၼႂ်းၽုင်သူဝ်းၼႆႉၼၼ်ႉၼမ်ၼႃႇလူးၵွၼ်ႇဢေႃႈ။ ၵဝ်တၵ်းလႆႈဢဝ်သူဝ်းၸိူဝ်းၼၼ်ႉမႃးလႄႈ၊ၶဝ်ၵေႃႈတေထွမ်ႇဢဝ်သဵင်ၵဝ်ယူႇဢေႃႈ။ ပိူဝ်ႈၼႆလႄႈတၵ်းတေမီးၽုင်သူဝ်းၽုင်လဵဝ်၊ဢိၵ်ႇတင်းၵူၼ်းလဵင်ႉထိင်းသူဝ်းၵေႃႉလဵဝ်ၵူၺ်းဢေႃႈ။
“ၵွပ်ႈပိူဝ်ႈလွင်ႈတၢင်းၼႆႉလႄႈ ပေႃႈၸဝ်ႈႁၵ်ႉၵဝ်ပိူဝ်ႈဢၼ်ၵဝ်ၸုၼ်ႉဢသၢၵ်ႈတူဝ်ၸဝ်ႈၵဝ်ႇႁႂ်ႈလႆႈဢသၢၵ်ႈၶိုၼ်းၼၼ်ႉဢေႃႈ။-
ၽူႈလႂ်ဢမ်ႇႁိမ်ဢဝ်ဢသၢၵ်ႈၵဝ်ၵႂႃႇသေၵေႃႉသေၵူၼ်း။ ၵဝ်ၸုၼ်ႉဢသၢၵ်ႈၵဝ်ၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇဢေႃႈ။ ၵဝ်မီးဢၶႂၢင်ႉဢႃႇၼႃႇတႃႇတေၸုၼ်ႉဢသၢၵ်ႈၵဝ်လႄႈ၊မီးဢၶႂၢင်ႉဢႃႇၼႃႇတႃႇတေဢဝ်ဢသၢၵ်ႈၵဝ်ၶိုၼ်းဢေႃႈ။ ဢၶႂၢင်ႉဢႃႇၼႃႇၼၼ်ႉၸိုင်၊ပေႃႈၸဝ်ႈၵဝ်ပၼ်ဝႆႉတီႈၵဝ်ယဝ်ႉ၊” ဝႃႈၼင်ႇၼႆဢေႃႈ။
ၵွပ်ႈပိူဝ်ႈၵႂၢမ်းမၼ်းၸဝ်ႈၼၼ်ႉလႄႈ၊ၵူၼ်းမဵဝ်း ၵျူး၊ ၸိူဝ်းၼၼ်ႉ၊ၸႂ်သၽေႃးၶဝ်သမ်ႉလႆႈတႅၵ်ႇၽႄယၢႆႈၵၼ်ၵႂႃႇထႅင်ႈဢေႃႈ။-
ၵူၼ်းၼမ်ၼႃႇဝႃႈ၊ “ၽီႁၢႆႉၶဝ်ႈၼႂ်းမၼ်းယဝ်ႉလႄႈပဵၼ်ၵူၼ်းယွင်ႇယဝ်ႉ။ ႁဵတ်းသင်လႄႈထွမ်ႇဢဝ်ၵႂၢမ်းမၼ်းၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ၵူၼ်းမၢင်ၵေႃႉသမ်ႉဝႃႈ၊ “ၵႂၢမ်းဢၼ်မၼ်းလၢတ်ႈၸိူဝ်းၼႆႉပဵၼ်ၵႂၢမ်းဢၼ်ၵူၼ်းၽီႁၢႆႉၶဝ်ႈဢမ်ႇၸႂ်ႈ။ ၽီႁၢႆႉတၵ်းၽုၺ်ႇမၢၵ်ႇတႃၵူၼ်းတႃမွတ်ႇလႆႈၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ပဵၼ်ၶိင်ႇၵတ်းၶၢဝ်းပွႆးၶွပ်ႈၶူပ်ႇဢၼ်သၢၵ်ႈၵၢပ်ႈၵျွင်းပိၵ်ႈမၢၼ်ႇၸဝ်ႈလႄႈ၊ႁဵတ်းပွႆးၼၼ်ႉၵႃႈၼႂ်းဝဵင်း ယေႇရုသလႅမ်ႇ၊ ဢေႃႈ။-
ၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉ မိူဝ်ႈဢၼ် ၸဝ်ႈယေႇသု၊ ပႆယူႇၼိူဝ်ၸၢၼ်း သေႃးလမုၼ်ႇ၊ ယူႇၼၼ်ႉ၊-
ၵူၼ်းမဵဝ်း ၵျူး၊ ၶဝ်ၸုတုမ်ဝႅင်းႁွပ်ႈမၼ်းၸဝ်ႈလႄႈထၢမ်ဝႃႈ၊ “မႂ်းတၵ်းႁႂ်ႈႁဝ်းၵႂၢင်ၸႂ်ယုင်ႈၸႂ်လူၺ်ႈလွင်ႈမႂ်းထႅင်ႈႁိုင်ၵႃႈႁိုဝ်။ ပေႃးမႂ်းၸႂ်ႈ ၸဝ်ႈၶရိၸ်ႈ၊ ၸိုင်၊လၢတ်ႈႁဝ်းလႅင်းလႅင်းသေၵမ်း၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ၵဝ်ပေႃးလၢတ်ႈသူယဝ်ႉယဝ်ႉ။ သူဢမ်ႇယုမ်ႇ။ ၵၢၼ်တၢင်းႁဵတ်းၸိူဝ်းဢၼ်ၵဝ်ပႃးတင်းဢၶႂၢင်ႉဢႃႇၼႃႇပေႃႈၸဝ်ႈၵဝ်ၼၼ်ႉ၊ၶၢမ်ႇသၢၵ်ႈသေႇၽၢႆႇၵဝ်ယူႇဢေႃႈ။-
ၵူၺ်းၵႃႈ၊သူဢမ်ႇယုမ်ႇ၊ၵွပ်ႈပိူဝ်ႈဢၼ်သူဢမ်ႇၶဝ်ႈပႃးၼႂ်းၽုင်သူဝ်းၵဝ်ဢေႃႈ။-
သူဝ်းၵဝ်တင်းလၢႆၸမ်ႉ၊ထွမ်ႇငိၼ်းသဵင်ၵဝ်ဢေႃႈ။ ၵဝ်ႁုၸၵ်းၶဝ်လႄႈ၊ၶဝ်ၵေႃႈၸွမ်းတၢင်းလင်ၵဝ်ဢေႃႈ။-
ၵဝ်ပၼ်ဢသၢၵ်ႈထႃႇဝရႃႉတီႈၶဝ်လႄႈ ၶဝ်တၵ်းဢမ်ႇလႆႈလုလႅဝ်သေပွၵ်ႈဢေႃႈ။ ၽူႈလႂ်ၵေႃႈဢမ်ႇၸၢင်ႈႁိမ်ဢဝ်ၶဝ်ၵႃႈၼႂ်းမိုဝ်းၵဝ်လႆႈ။-
ပေႃႈၸဝ်ႈၵဝ်ဢၼ်ဢဝ်သူဝ်းၸိူဝ်းၼႆႉဢၢပ်ႈပၼ်ၵဝ်ၼၼ်ႉ၊ယဵင်ႈၶႅၼ်းယႂ်ႇမျၢတ်ႈၼႃႇသေပိူၼ်ႈတင်းသဵင်ႈတင်းလူင်လႄႈ၊ၽူႈလႂ်ၵေႃႈ ဢမ်ႇႁိမ်ဢဝ်ၶဝ်သေၵႃႈၼႂ်းမိုဝ်းပေႃႈၸဝ်ႈၼၼ်ႉလႆႈ။-
ၵဝ်ဢိၵ်ႇတင်းပေႃႈၸဝ်ႈၵဝ်ပဵၼ်ဢၼ်လဵဝ်ၵၼ်ဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၵူၼ်းမဵဝ်း ၵျူး၊ ၶဝ်သမ်ႉၵဵပ်းဢဝ်မၢၵ်ႇႁိၼ်ဢၢင်ႈတၵ်းဢဝ်ပိုဝ်ႈသႂ်ႇမၼ်းၸဝ်ႈထႅင်ႈဢေႃႈ။-
ၸဝ်ႈယေႇသု၊ ၵေႃႈ ၶိုၼ်းလၢတ်ႈလႄႈဝႃႈ၊ “ၵဝ်ပႃးတင်းဢၶႂၢင်ႉဢႃႇၼႃႇပေႃႈၸဝ်ႈၵဝ်သေလႄႈႁဵတ်းၼႄသူၵၢၼ်တၢင်းႁဵတ်းဢၼ်လီဢၼ်ငၢမ်းၼမ်ၼႃႇယဝ်ႉယဝ်ႉ။ ၵွပ်ႈပိူဝ်ႈလွင်ႈတၢင်းဢၼ်လႂ်လႄႈ သူတၵ်းဢဝ်မၢၵ်ႇႁိၼ်ပိုဝ်ႈသႂ်ႇၵဝ်၊” ဝႃႈၼင်ႇၼႆဢေႃႈ။
ၵူၼ်းမဵဝ်း ၵျူး၊ ၸိူဝ်းၼၼ်ႉၵေႃႈတွပ်ႇလႄႈလၢတ်ႈဝႃႈ၊ “ၵွပ်ႈပိူဝ်ႈလွင်ႈတၢင်းဢၼ်လီဢၼ်ငၢမ်းလႄႈႁဝ်းဢဝ်မၢၵ်ႇႁိၼ်ပိုဝ်ႈသႂ်ႇမႂ်းဢမ်ႇၸႂ်ႈ။ တၵ်းပိုဝ်ႈသႂ်ႇမႂ်းၵွပ်ႈပိူဝ်ႈမႂ်းသႄႉသွမ်းၽြႃးပဵၼ်ၸဝ်ႈၼၼ်ႉဢိူဝ်း။ မႂ်းၼႆႉပဵၼ်ၵူၼ်းၵူၺ်းလႄႈႁဵတ်းမိူၼ်ၸိူဝ်ႉၼင်ႇပဵၼ်ၽြႃးပဵၼ်ၸဝ်ႈယဝ်ႉ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ၼႂ်းၵျၢမ်းတြႃးသူၼၼ်ႉတႅမ်ႈဝႆႉလႄႈဝႃႈ၊ ‘ၵဝ်ဝႃႈ၊သူပဵၼ်ၽြႃးဢေႃႈ၊’ ဝႃႈၼႆမီးဝႆႉဢမ်ႇၸႂ်ႈႁိုဝ်း။-
ႁဝ်းႁုလွင်ႈဢၼ်တြႃးၸဝ်ႈပဵၼ်ဢၼ်မၢၼ်ႇမႅၼ်ႈတႃႇသေႇလႄႈ၊တီႈၶဝ်ၸိူဝ်းဢၼ်လႆႈၶၢမ်ႇဢဝ်တြႃးၸဝ်ႈယဝ်ႉၼၼ်ႉ၊ၽြႃးပဵၼ်ၸဝ်ႈယင်းႁွင်ႉၶဝ်ဝႃႈၽြႃးဝႃႈၼႆဢေႃႈ။-
ၵဝ်ၸမ်ႉ၊ပေႃႈၸဝ်ႈလိူၵ်ႈဢဝ်ၵဝ်ပွႆႇၸႂ်ႉၵႂႃႇၵႃႈၼႂ်းမိူင်းလေႃးၵႃႉၼႆႉယဝ်ႉ၊ပေႃးပဵၼ်ၸိူဝ်ႉၼင်ႇၼၼ်ၸိုင်၊ႁဵတ်းသင်လႄႈသူသမ်ႉဝႃႈ၊ၵဝ်လၢတ်ႈပူၼ်ႉလၢတ်ႈလိူဝ်ၽြႃးပဵၼ်ၸဝ်ႈ၊ၵွပ်ႈပိူဝ်ႈၵဝ်ဝႃႈၵဝ်ပဵၼ်လုၵ်ႈၽြႃးပဵၼ်ၸဝ်ႈၼၼ်ႉၼင်ႇႁိုဝ်။-
ပေႃးၵဝ်ဢမ်ႇႁဵတ်းၵၢၼ်တၢင်းႁဵတ်းပေႃႈၸဝ်ႈၸိုင်၊ယႃႇပေယုမ်ႇၵဝ်။-
ၵူၺ်းၵႃႈ၊ပေႃးၵဝ်ႁဵတ်းယူႇၸိုင်၊ပိၵ်ႉသမ်ႉသူဢမ်ႇယုမ်ႇၵဝ်သေၵေႃႈ၊ယုမ်ႇၵၢၼ်တၢင်းႁဵတ်းၵဝ်ၸိူဝ်းၼၼ်ႉတႃႉ။ ပေႃးသူယုမ်ႇၸိုင်၊သူတၵ်းႁုၸႅင်ႈပွင်ႇၸႂ် လွင်ႈဢၼ်ပေႃႈၸဝ်ႈမီးၼႂ်းၵဝ်၊ဢိၵ်ႇတင်းလွင်ႈဢၼ်ၵဝ်မီးၼႂ်းပေႃႈၸဝ်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၶဝ်သမ်ႉၵျၢမ်ႇဢၢင်ႈတၵ်းတိဢဝ်မၼ်းၸဝ်ႈထႅင်ႈဢေႃႈ။ ၵူၺ်းၵႃႈ၊မၼ်းၸဝ်ႈလွမ်ပၢႆႈဢွၵ်ႇသေၵႃႈတီႈၶဝ်ၵႂႃႇသေဢေႃႈ။
မၼ်းၸဝ်ႈၶိုၼ်းၵႂႃႇၽၢႆႇပုၼ်ႉၼမ်ႉ ယေႃးတၢၼ်ႇ၊ တီႈဢၼ်သြႃႇ ယူဝ်းႁၢၼ်ႇ၊ ယၢမ်ႈပၼ်မၢင်ႇၵလႃႇပပ်ႉတိၸမ်ႇ ၼၼ်ႉလႄႈယူႇၵႃႈတီႈၼၼ်ႈဢေႃႈ။-
ၵူၼ်းၼမ်ၼႃႇႁွတ်ႈမႃးတီႈမၼ်းၸဝ်ႈလႄႈလၢတ်ႈဝႃႈ၊ “သြႃႇ ယူဝ်းႁၢၼ်ႇ၊ ဢမ်ႇႁဵတ်းၼိမိၵ်ႈလၢၵ်ႈၶၼႃႇသေမဵဝ်း။ ၵူၺ်းၵႃႈ၊ၵႃႈဢၼ်သြႃႇ ယူဝ်းႁၢၼ်ႇ၊ လၢတ်ႈလွင်ႈၵေႃႉၼႆႉဝႆႉၼၼ်ႉမႅၼ်ႈၵူႈဢၼ်ဢေႃႈ၊” ဝႃႈၼင်ႇၼႆဢေႃႈ။-
ၵူၼ်းၵႃႈ၊တီႈၼၼ်ႈၼမ်ၼႃႇယုမ်ႇမၢတ်ႈမၼ်းၸဝ်ႈဢေႃႈ။
ၵမ်းၼၼ်ႉ၊ၵူၼ်းၵေႃႉၼိုင်ႈဢၼ်လႆႈၸိုဝ်ႈ လႃႇၸရု၊ ၵူၼ်းဝၢၼ်ႈ ပေႇထၼိ၊ ၼၼ်ႉ၊ပဵၼ်ၶႆႈပဵၼ်ၼၢဝ်ယူႇဢေႃႈ။ ဝၢၼ်ႈ ပေႇထၼိ၊ ၼၼ်ႉ၊ပဵၼ်ဝၢၼ်ႈဢၼ် မႃႇထႃႉ၊ တင်းၼွင်ႉယိင်းမၼ်း မႃႇရိ၊ ယူႇသဝ်းၼၼ်ႉဢေႃႈ။-
မႃႇရိ၊ ၵေႃႉၼႆႉ၊ပဵၼ်မႄႈယိင်းဢၼ်ဢဝ်ၼမ်ႉမၼ်းႁွမ်လႃႇသႂ်ႇၼိူဝ်တိၼ်ၸဝ်ႈၽြႃးလႄႈ သမ်ႉဢဝ်ၶူၼ်ႁူဝ်မၼ်းၸဵတ်ႉပၼ်ၼၼ်ႉဢေႃႈ။ လႃႇၸရု၊ ဢၼ်ပဵၼ်ၶႆႈပဵၼ်ၼၢဝ်ယူႇၼၼ်ႉၸမ်ႉ၊ပဵၼ်ပီႈဢၢႆႈမၼ်းဢေႃႈ။-
ၽူႈယိင်းသွင်ၵေႃႉပီႈၼွင်ႉၼၼ်ႉ ပွႆႇၸႂ်ႉၵူၼ်းၵႂႃႇမွၵ်ႇလၢတ်ႈ ၸဝ်ႈယေႇသု၊ လႄႈဝႃႈ၊ “ၸဝ်ႈၽြႃးတီႈၶႃႈ၊ၵေႃႉဢၼ်ၸဝ်ႈႁဝ်းႁၵ်ႉၼၼ်ႉ၊ပဵၼ်ၶႆႈပဵၼ်ၼၢဝ်ယူႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ် ၸဝ်ႈယေႇသု၊ ငိၼ်းၵႂၢမ်းၼၼ်ႉၸိုင်၊မၼ်းၸဝ်ႈလၢတ်ႈလႄႈဝႃႈ၊ “တၢင်းၶႆႈတၢင်းၼၢဝ်ၼၼ်ႉပဵၼ်ဢၼ်ႁႂ်ႈထိုင်တီႈတၢႆဢမ်ႇၸႂ်ႈ။ မၼ်းပဵၼ်ပုၼ်ႈမုၼ်ၽုင်းၽြႃးပဵၼ်ၸဝ်ႈ၊ၼင်ႇႁိုဝ်မုၼ်ၽုင်းလုၵ်ႈၽြႃးပဵၼ်ၸဝ်ႈတၵ်းထၢင်ႇသႃးမႃးၵွပ်ႈပိူဝ်ႈတၢင်းၶႆႈတၢင်းၼၢဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ႁၵ်ႉ မႃႇထႃႉ၊ ဢိၵ်ႇတင်းၼွင်ႉယိင်းမၼ်း၊ဢိၵ်ႇတင်း လႃႇၸရု၊ ၶဝ်ၸိူဝ်းၼၼ်ႉဢေႃႈ။-
မိူဝ်ႈဢၼ်မၼ်းၸဝ်ႈငိၼ်းဝႃႈ၊ လႃႇၸရု၊ ပဵၼ်ၶႆႈပဵၼ်ၼၢဝ်ယူႇၼၼ်ႉၸိုင်၊မၼ်းၸဝ်ႈယင်းသိုပ်ႇယူႇၵႃႈတီႈဢၼ်မၼ်းၸဝ်ႈမီးယူႇၼၼ်ႉထႅင်ႈသွင်ဝၼ်းဢေႃႈ။-
လိုၼ်းၼၼ်ႉၸင်ႇ၊မၼ်းၸဝ်ႈလၢတ်ႈတီႈတပႄးမၼ်းၸဝ်ႈတင်းလၢႆလႄႈဝႃႈ၊ “ႁဝ်းဢွၼ်ၵၼ်ၶိုၼ်းမိူဝ်းၵႂႃႇၵႃႈတီႈမိူင်း ယုတႃႉ၊ ပုၼ်ႉတႃႉႁဝ်း၊” ဝႃႈၼင်ႇၼႆဢေႃႈ။
တပႄးၸဝ်ႈၸိူဝ်းၼၼ်ႉၶိုၼ်းလဝ်ႈလၢတ်ႈလႄႈဝႃႈ၊ “သြႃႇၸဝ်ႈ။ ၵူၼ်းမိူင်းၼၼ်ႉၶဝ်ဢၢင်ႈတၵ်းဢဝ်မၢၵ်ႇႁိၼ်ပိုဝ်ႈသႂ်ႇၸဝ်ႈႁဝ်းယဝ်ႉလႄႈ၊ၸဝ်ႈႁဝ်းသမ်ႉတၵ်းၵႂႃႇၵႃႈတီႈပုၼ်ႉထႅင်ႈလူးၵွၼ်ႇၶႃႈႁိုဝ်း၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ၼႂ်းၸူဝ်ႈၵၢင်ဝၼ်းမီးသိပ်းသွင်ၸူဝ်ႈမွင်းဢမ်ႇၸႂ်ႈႁိုဝ်း။ ပေႃးသေၵေႃႉသေၵူၼ်းပႆၼႂ်းၶိင်ႇၵၢင်ဝၼ်းၸိုင်၊မၼ်းဢမ်ႇၸၢင်ႈၶီႈလိုတ်း၊ပိူဝ်ႈဢၼ်မၼ်းႁၼ်ဢၼ်လႅင်းလေႃးၵႃႉၼၼ်ႉဢေႃႈ။-
ပေႃးမၼ်းပႆၼႂ်းၶိင်ႇၵၢင်ၶိုၼ်းၸိုင်၊မၼ်းၸၢင်ႈၶီႈလိုတ်း၊ပိူဝ်ႈဢၼ်မၼ်းဢမ်ႇမီးဢၼ်လႅင်းၼၼ်ႉဢေႃႈ၊” ဝႃႈၼင်ႇၼႆသေယဝ်ႉ၊-
မၼ်းၸဝ်ႈသိုပ်ႇလၢတ်ႈထႅင်ႈလႄႈဝႃႈ၊ “ၵေႃႉသႄႈႁဝ်း လႃႇၸရု၊ ၼွၼ်းလပ်းၵႂႃႇယဝ်ႉ။ ၵဝ်တၵ်းၵႂႃႇပူၵ်းမၼ်းႁႂ်ႈလႆႈတိုၼ်ႇဢေႃႈ၊” ဝႃႈၼင်ႇၼႆဢေႃႈ။
တပႄးၸဝ်ႈၸိူဝ်းၼၼ်ႉၵေႃႈလဝ်ႈလၢတ်ႈလႄႈဝႃႈ၊ “ပေႃးမၼ်းၼွၼ်းလပ်းၵႂႃႇၸိုင်၊မၼ်းတေယူႇလီမႃးၶႃႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶႂ်ႈဝႃႈ၊ လႃႇၸရု၊ တၢႆယဝ်ႉလႄႈ၊ၶဝ်သမ်ႉထၢင်ႇဝႃႈ၊မၼ်းၸဝ်ႈလၢတ်ႈလွင်ႈ လႃႇၸရု၊ ၼွၼ်းလပ်းၼၼ်ႉဢေႃႈ။-
ပိူဝ်ႈၼႆလႄႈ ၸဝ်ႈယေႇသု၊ ၸင်ႇလၢတ်ႈလႅင်းလႅင်းတီႈၶဝ်လႄႈဝႃႈ၊ “ လႃႇၸရု၊ တၢႆယဝ်ႉ။-
လွင်ႈၼင်ႇႁိုဝ်သူတၵ်းလႆႈယုမ်ႇမၢတ်ႈၸိုင်၊တၢင်းဢၼ်ၵဝ်ဢမ်ႇၵႂႃႇမီးယူႇၵႃႈတီႈမၼ်းၼၼ်ႉ၊ၵဝ်ၸူမ်းသိူဝ်းပုၼ်ႈဢၵျူဝ်းသူဢေႃႈ။ မႃးတႃႉ။ ဢွၼ်ၵၼ်ၵႂႃႇၵႃႈတီႈမၼ်းတႃႉႁဝ်း၊” ဝႃႈၼင်ႇၼႆဢေႃႈ။
ထူဝ်းမႃႉ၊ ဢၼ်လႆႈၸိုဝ်ႈ တိတုမု၊ (ဢၼ်ပွင်ႇဝႃႈလုၵ်ႈၽႃၽႄ) ၼၼ်ႉ လၢတ်ႈတီႈတပႄးၸဝ်ႈၼင်ႇၵၼ်ၵၼ်ၸိူဝ်းၼၼ်ႉလႄႈဝႃႈ၊ “ႁဝ်းၵေႃႈဢွၼ်ၵၼ်ၸွမ်းၵႂႃႇလႄႈၶၢမ်ႇတၢႆလူၺ်ႈၵၼ်တင်းမၼ်းၸဝ်ႈတႃႉႁဝ်း၊” ဝႃႈၼင်ႇၼႆဢေႃႈ။
မိူဝ်ႈဢၼ် ၸဝ်ႈယေႇသု၊ ႁွတ်ႈထိုင်ၵႂႃႇၼၼ်ႉ၊မၼ်းၸဝ်ႈထူပ်းႁၼ်လွင်ႈတၢင်းဢၼ် လႃႇၸရု၊ သမ်ႉပေႃးလႆၶၢမ်ႇတၢင်းဢၼ်သၢင်းၵျူဝ်ႇဝႆႉၵႃႈၼႂ်းၶုမ်ပႃႇႁဵဝ်ႈၼၼ်ႉမီးသီႇဝၼ်းယဝ်ႉဢေႃႈ။-
ဝၢၼ်ႈ ပေႇထၼိ၊ ယၢၼ်ၵၼ်တင်းဝဵင်း ယေႇရုသလႅမ်ႇ၊ သွင်လၵ်းၸမ်ၸမ်ၵူၺ်းလႄႈ၊-
ၵူၼ်းမဵဝ်း ၵျူး၊ ၶဝ်ၼမ်ၼႃႇမႃးသူႇမႃးၸႂ်း မႃႇထႃႉ၊ ဢိၵ်ႇတင်း မႃႇရိ၊ ႁႂ်ႈလႆႈပၼ်ႁႅင်းၸႂ်ဢၼ်ပီႈဢၢႆႈၶဝ်တၢႆၵႂႃႇၼၼ်ႉဢေႃႈ။
မိူဝ်ႈဢၼ် မႃႇထႃႉ၊ ငိၼ်းလွင်ႈဢၼ် ၸဝ်ႈယေႇသု၊ ႁွတ်ႈမႃးၼၼ်ႉၸိုင်၊မၼ်းၵႂႃႇႁပ်ႉႁူဝ်တၢင်းဢေႃႈ။ မႃႇရိ၊ ၸမ်ႉ၊ၼင်ႈယူႇၵႃႈၼႂ်းႁိူၼ်းဢေႃႈ။-
မႃႇထႃႉ၊ ၵေႃႈလဝ်ႈလၢတ်ႈတီႈ ၸဝ်ႈယေႇသု၊ လႄႈဝႃႈ၊ “ၸဝ်ႈၽြႃးတီႈၶႃႈ။ သင်ဝႃႈၸဝ်ႈႁဝ်းမီးယူႇၵႃႈတီႈၼႆႈၸိုင်၊ပီႈဢၢႆႈၵဝ်ၶႃႈတေဢမ်ႇလႆႈတၢႆၶႃႈ။-
ၵူၺ်းၵႃႈ၊တေႃႇႁွတ်ႈမိူဝ်ႈလဵဝ်ၼႆႉၵဝ်ၶႃႈႁုလွင်ႈဢၼ်ၽြႃးပဵၼ်ၸဝ်ႈတၵ်းပၼ်ၵႃႈၼင်ႇဢၼ်ၸဝ်ႈႁဝ်းလဝ်ႈယွၼ်းၼၼ်ႉယူႇၶႃႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “ပီႈဢၢႆႈမႂ်းတၵ်းလုၵ်ႉၶိုၼ်းလိပ်းယူႇဢေႃႈ၊” ဝႃႈၼင်ႇၼႆဢေႃႈ။
မႃႇထႃႉ၊ ၵေႃႈၶိုၼ်းလၢတ်ႈလႄႈဝႃႈ၊ “ၵဝ်ၶႃႈႁုလွင်ႈဢၼ်မၼ်းတၵ်းလႆႈလုၵ်ႉၶိုၼ်းလိပ်းမႃးၼႂ်းဝၼ်းၵမ်းလိုၼ်းသုတ်းဢၼ်ဝႃႈ၊ဝၼ်းဢၼ်ၵူၼ်းတၢႆလုၵ်ႉၶိုၼ်းလိပ်းၼၼ်ႉယူႇၶႃႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၸင်ႇလၢတ်ႈတီႈမၼ်းလႄႈဝႃႈ၊ “ၵဝ်ပဵၼ်လွင်ႈတၢင်းဢၼ်လုၵ်ႉၵႃႈတၢင်းတၢႆၶိုၼ်းလိပ်း၊ဢိၵ်ႇတင်းလွင်ႈတၢင်းဢၼ်ဢသၢၵ်ႈလိပ်းဢေႃႈ။ ၵေႃႉဢၼ်ယုမ်ႇမၢတ်ႈၵဝ်ၼၼ်ႉ၊ပိၵ်ႉသမ်ႉတၢႆၵႂႃႇယဝ်ႉသေၵေႃႈတၵ်းလိပ်းဢေႃႈ။-
ၶဝ်ၸိူဝ်းဢၼ်ဢသၢၵ်ႈလိပ်းလႄႈယုမ်ႇမၢတ်ႈၵဝ်တင်းသဵင်ႈတင်းလူင်ၼၼ်ႉၵေႃႈတၵ်းၵၢင်းလွတ်ႈတင်းတၢင်းတၢႆယူႇတႃႇသေႇဢမ်ႇထၢတ်ႇဢေႃႈ။ ယုမ်ႇၵႂၢမ်းၵဝ်ၼႆႉႁိုဝ်း၊” ဝႃႈၼင်ႇၼႆဢေႃႈ။
မၼ်းၶိုၼ်းလၢတ်ႈလႄႈဝႃႈ၊ “ၸႂ်ႈၶႃႈယဝ်ႉ၊ၸဝ်ႈၽြႃးတီႈၶႃႈ။ ၵဝ်ၶႃႈယုမ်ႇလွင်ႈဢၼ်ၸဝ်ႈႁဝ်းပဵၼ် ၸဝ်ႈၶရိၸ်ႈ၊ လုၵ်ႈၽြႃးပဵၼ်ၸဝ်ႈဢၼ်မႃးၼႂ်းလေႃးၵႃႉၼႆႉၼၼ်ႉၶႃႈယဝ်ႉ၊” ဝႃႈၼင်ႇၼႆဢေႃႈ။
ဝၢႆးသေ မႃႇထႃႉ၊ လၢတ်ႈၸိူဝ်ႉၼင်ႇၼႆယဝ်ႉၼၼ်ႉ၊မၼ်းမိူဝ်းၵႂႃႇလႄႈႁွင်ႉဢဝ်ၼွင်ႉယိင်းမၼ်း မႃႇရိ၊ တဵတ်ႇတဵတ်ႇလႄႈဝႃႈ၊ “ၸဝ်ႈသြႃႇႁွတ်ႈမႃးယဝ်ႉ။ မၼ်းၸဝ်ႈႁွင်ႉမႂ်းဢေႃႈ၊” ဝႃႈၼင်ႇၼႆဢေႃႈ။-
မႃႇရိ၊ ငိၼ်းၵႂၢမ်းၼၼ်ႉလႄႈ၊လုၵ်ႉၵႂႃႇၶၼ်ၶၼ်ၽႂ်းၽႂ်းႁႂ်ႈလႆႈႁပ်ႉႁူဝ်တၢင်းမၼ်းၸဝ်ႈဢေႃႈ။-
မိူဝ်ႈယၢမ်းၼၼ်ႉ ၸဝ်ႈယေႇသု၊ ယင်းဢမ်ႇပႆႇၶဝ်ႈဝၢၼ်ႈမႃးလႄႈတိုၵ်ႉမီးယူႇၵႃႈတီႈဢၼ် မႃႇထႃႉ၊ ႁပ်ႉႁူဝ်တၢင်းမၼ်းၸဝ်ႈၼၼ်ႉဢေႃႈ။-
မိူဝ်ႈဢၼ်ၵူၼ်းမဵဝ်း ၵျူး၊ ဢၼ်မီးယူႇလူၺ်ႈၵၼ်တင်း မႃႇရိ၊ ၵႃႈၼႂ်းႁိူၼ်းဢၼ်မႃးပၼ်ႁႅင်းႁႂ်ႈလႆႈပျေႇၸႂ်ၼိမ်ၸႂ်ယူႇၸိူဝ်းၼၼ်ႉ၊ႁၼ်မၼ်းလုၵ်ႉၵႂႃႇၶၼ်ၶၼ်ၽႂ်းၽႂ်းၼၼ်ႉၸိုင်၊ၶဝ်ၸွမ်းတၢင်းလင်မၼ်းၵႂႃႇ၊ၵွပ်ႈပိူဝ်ႈၶဝ်ထၢင်ႇမၼ်းၵႂႃႇၵႃႈတီႈထမ်ႈပႃႇႁဵဝ်ႈႁႂ်ႈလႆႈႁွင်ႉႁႆႈၵႃႈတီႈၼၼ်ႈဢေႃႈ။
မႃႇရိ၊ ၵေႃႈႁွတ်ႈၵႂႃႇၵႃႈတီႈဢၼ် ၸဝ်ႈယေႇသု၊ မီးယူႇၼၼ်ႉလႄႈႁၼ်မၼ်းၸဝ်ႈသေယဝ်ႉ၊ၶုပ်ႉမူပ်ႇတီႈႁိမ်းတိၼ်မၼ်းၸဝ်ႈလႄႈဝႃႈ၊ “ၸဝ်ႈၽြႃးတီႈၶႃႈ၊ပေႃးၸဝ်ႈႁဝ်းမီးယူႇၵႃႈတီႈၼႆႈၸိုင်၊ပီႈဢၢႆႈၵဝ်ၶႃႈတေဢမ်ႇလႆႈတၢႆၶႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ် ၸဝ်ႈယေႇသု၊ ႁၼ်ၸႃႉၸဵမ် မႃႇရိ၊ ဢိၵ်ႇတင်းၵူၼ်းမဵဝ်း ၵျူး၊ ၸိူဝ်းဢၼ်ၸွမ်းမၼ်းမႃးၸိူဝ်းၼၼ်ႉႁွင်ႉႁႆႈယူႇၼၼ်ႉၸိုင်၊မၼ်းၸဝ်ႈၸႂ်လဵၵ်ႉၶေႃးၶူမ်ၼႃႇလႄႈ၊-
ၸင်ႇထၢမ်ၶဝ်လႄႈဝႃႈ၊ “သူဢဝ်မၼ်းၵႂႃႇသၢင်းၵျူဝ်ႇဝႆႉၵႃႈတီႈလႂ်၊” ဝႃႈၼင်ႇၼႆလႄႈ။ “ၸဝ်ႈၽြႃးတီႈၶႃႈ၊မႃးတူၺ်းသေၵမ်းၶႃႈ၊” ဝႃႈၼႆၶဝ်ၶိုၼ်းလၢတ်ႈဢေႃႈ။
ၸဝ်ႈယေႇသု၊ ၵေႃႈၼမ်ႉတႃတူၵ်းယူႇဢေႃႈ။-
ပိူဝ်ႈၼႆလႄႈ ၵူၼ်းမဵဝ်း ၵျူး၊ ၸိူဝ်းၼၼ်ႉၵေႃႈလၢတ်ႈလႄႈဝႃႈ၊ “တူၺ်းလူးမၼ်းၸဝ်ႈႁၵ်ႉ လႃႇၸရု၊ ၼႃႇလူင်လၢင်ဢေႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ၵူၼ်းၵမ်ႈၽွင်ႈယင်းဝႃႈ၊ “မၼ်းယင်းၽုၺ်ႇမၢၵ်ႇတႃၵူၼ်းတႃမွတ်ႇလႆႈသေလႄႈ၊ၼင်ႇႁိုဝ် လႃႇၸရု၊ တၵ်းဢမ်ႇတၢႆၸိုင်၊မၼ်းဢမ်ႇႁဵတ်းလႆႈႁိုဝ်း၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ၸဝ်ႈယေႇသု၊ သမ်ႉၸႂ်လဵၵ်ႉၸႂ်ဢူၼ်ႈၼႃႇလူင်လၢင်လႄႈၵႂႃႇၸူးၵႃႈတီႈထမ်ႈပႃႇႁဵဝ်ႈဢၼ်ဢဝ်မၢၵ်ႇႁိၼ်လူင်ဢိုတ်းပၢၵ်ႇမၼ်းဝႆႉၼၼ်ႉဢေႃႈ။-
ၸဝ်ႈယေႇသု၊ ၸင်ႇလၢတ်ႈလႄႈဝႃႈ၊ “ၶၢႆႉမၢၵ်ႇႁိၼ်ၼၼ်ႉပႅတ်ႈတႃႉ၊” ဝႃႈၼင်ႇၼႆဢေႃႈ။ မႃႇထႃႉ၊ ၼွင်ႉယိင်းၵေႃႉဢၼ်တၢႆၼၼ်ႉၵေႃႈလၢတ်ႈလႄႈဝႃႈ၊ “ၸဝ်ႈၽြႃးတီႈၶႃႈ၊ယၢမ်းၼႆႉမၼ်းတေမဵၼ်တူႇၶႃႈယဝ်ႉ။ ပေႃးတၢႆလႆႈသီႇဝၼ်းယဝ်ႉၶႃႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈလၢတ်ႈတီႈမၼ်းလႄႈဝႃႈ၊ “ပေႃးမႂ်းယုမ်ႇၸိုင်၊မႂ်းတေလႆႈႁၼ်မုၼ်ၽုင်းဢႃႇၼုၽေႃႇၽြႃးပဵၼ်ၸဝ်ႈဢေႃႈ၊ဝႃႈၼႆၵဝ်လၢတ်ႈမႂ်းဝႆႉယဝ်ႉဢမ်ႇၸႂ်ႈႁိုဝ်း၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ၶဝ်ဢွၼ်ၵၼ်ၶၢႆႉမၢၵ်ႇႁိၼ်ပႅတ်ႈဢေႃႈ။ ၸဝ်ႈယေႇသု၊ ႁႅၼ်တူၺ်းၵႃႈၼိူဝ်သေလႄႈလၢတ်ႈဝႃႈ၊ “ပေႃႈၸဝ်ႈတီႈၶႃႈ။ ပိူဝ်ႈဢၼ်ၸဝ်ႈႁဝ်းထွမ်ႇဢဝ်ၵႂၢမ်းၶႃႈၸဝ်ႈလႄႈၵျေးၸူးၸဝ်ႈယႂ်ႇၼႃႇတီႈၶႃႈဢေႃႈ။-
ၶႃႈၸဝ်ႈႁုလွင်ႈဢၼ်ၸဝ်ႈႁဝ်းထွမ်ႇဢဝ်ၵႂၢမ်းၶႃႈၸဝ်ႈတႃႇသေႇဢမ်ႇထၢတ်ႇၼၼ်ႉယူႇတီႈၶႃႈဢေႃႈ။ ၼႂ်းဝႃႈၼၼ်သေၵေႃႈ၊ၶႃႈၸဝ်ႈထွၵ်ႈလူၺ်ႈဢၵျူဝ်းၶဝ်ၸိူဝ်းဢၼ်မီးယူႇၵႃႈတီႈၼႆႈ တၵ်းယုမ်ႇမၢတ်ႈလွင်ႈဢၼ်ၸဝ်ႈႁဝ်းပွႆႇၸႂ်ႉၶႃႈၸဝ်ႈမႃးၼၼ်ႉၶႃႈၸဝ်ႈၸင်ႇလဝ်ႈလၢတ်ႈၸိူဝ်ႉၼင်ႇၼႆၶႃႈဢေႃႈ၊” ဝႃႈၸိူဝ်ႉၼင်ႇၼႆသေယဝ်ႉ၊-
ဢဝ်တင်းသဵင်ယႂ်ႇၼႃႇႁွင်ႉလႄႈဝႃႈ၊ “ လႃႇၸရု၊ ႟။ ဢွၵ်ႇမႃးတႃႉ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ၵေႃႉဢၼ်တၢႆယဝ်ႉၼၼ်ႉ၊ဢွၵ်ႇမႃးလူၺ်ႈတင်းၶူဝ်းၵူၼ်းတၢႆဢၼ်ယင်းပူၵ်ႉႁေႃႇတိၼ်မိုဝ်းမၼ်းဝႆႉ၊တင်းၽႃႈႁူမ်ႇၼႃႈၵေႃႈယင်းဝဵၼ်းႁူဝ်မၼ်းဝႆႉယူႇၼၼ်ႉဢေႃႈ။ ၸဝ်ႈယေႇသု၊ ၵေႃႈမီးဢမိင်ႉလႄႈဝႃႈ၊ “ၵႄႈပၼ်မၼ်းသေလႄႈပွႆႇပၼ်မၼ်းတႃႉ၊” ဝႃႈၼင်ႇၼႆဢေႃႈ။
ၵွပ်ႈပိူဝ်ႈၼႆလႄႈ ၼႂ်းၵူၼ်းမဵဝ်း ၵျူး၊ ၸိူဝ်းဢၼ်မႃးသူႇမႃးၸႂ်း မႃႇရိ၊ လႄႈလႆႈႁၼ်လွင်ႈတၢင်းဢၼ် ၸဝ်ႈယေႇသု၊ ႁဵတ်းၼၼ်ႉယုမ်ႇမၢတ်ႈမၼ်းၸဝ်ႈမႃးၼမ်ၼႃႇဢေႃႈ။-
ၵူၺ်းၵႃႈ၊ၵမ်ႈၽွင်ႈၵႂႃႇၵႃႈတီႈၵူၼ်းၵိူင်း ၽႃႇရိသႄး၊ ၶဝ်လႄႈမွၵ်ႇလၢတ်ႈၼႄလွင်ႈတၢင်းဢၼ် ၸဝ်ႈယေႇသု၊ ႁဵတ်းၸိူဝ်းၼၼ်ႉဢေႃႈ။-
မိူဝ်ႈၼၼ်ႉၵူၼ်းၵိူင်း ၽႃႇရိသႄး၊ ၸိူဝ်းၼၼ်ႉတင်းယဵၸ်ႈပရေႃးႁဵၵ်ႈ လူင်ၶဝ်ၸၢင်ႈဢုပ်ႇၵုမ်တိူင်ႇပၢင်ႇၵၼ်တင်းၶုၼ်လုမ်းလူင်တင်းလၢႆလႄႈလၢတ်ႈဝႃႈ၊ “ႁဝ်းတေလႆႈႁဵတ်းၸိူဝ်ႉၼင်ႇႁိုဝ်။ ၵေႃႉၼၼ်ႉႁဵတ်းၼႄၼိမိၵ်ႈလၢၵ်ႈၶၼႃႇၼမ်ၼႃႇယဝ်ႉ။-
ပေႃးႁဝ်းပွႆႇမၼ်းဝႆႉၸိူဝ်ႉၼင်ႇၼႆၸိုင်၊ၵူၼ်းၵူႈၵေႃႉတၵ်းယုမ်ႇမၢတ်ႈမၼ်းဢေႃႈ။ ၶုၼ်ဢႃႇၼႃႇၵူၼ်းမဵဝ်း ရူဝ်းမႃႉ၊ ၶဝ်ၵေႃႈ တေမႃးယႃႉၽဵဝ်ႈပႅတ်ႈထႃႇၼႃႉတီႈမူတ်းၸၢင်ႇႁဝ်း၊ဢိၵ်ႇတင်းၵူၼ်းမဵဝ်းႁဝ်းၼႆႉယဝ်ႉ၊” ဝႃႈၼင်ႇၼႆဢေႃႈ။
ၼႂ်းၶဝ်ၼၼ်ႉၵေႃႉၼိုင်ႈဢၼ်လႆႈၸိုဝ်ႈ ၵႃႇယၽႃႉ၊ ဢၼ်ပဵၼ်ၶုၼ်ယဵၸ်ႈပရေႃးႁဵၵ်ႈၼႂ်းပီၼၼ်ႉလၢတ်ႈလႄႈဝႃႈ၊ “သူၼႆႉတိုၼ်းဢမ်ႇႁုသင်လႃးလႃး။-
လွင်ႈဢၼ်ၵူၼ်းၵေႃႉၼိုင်ႈၶၢမ်ႇတၢႆတၢင်ပုၼ်ႈၵူၼ်းတင်းလၢႆၼၼ်ႉ၊ယဵင်ႈၶႅၼ်းလီၼႃႇသေၵူၼ်းမဵဝ်းၵႃႈမီးတင်းသဵင်ႈတင်းလူင်လႆႈလုလႅဝ်ပႅတ်ႈပုၼ်ႈႁဝ်းဢေႃႈဝႃႈၼႆသူဢမ်ႇၶႆႈၸႂ်ထူပ်းႁိုဝ်း၊” ဝႃႈၼင်ႇၼႆဢေႃႈ။-
မၼ်းဝႃႈၸိူဝ်ႉၼင်ႇၼၼ်ၸွမ်းၼင်ႇၺၢၼ်ႇပိင်ႇၺႃႇတူဝ်ၸဝ်ႈၵဝ်ႇဢမ်ႇၸႂ်ႈ။ မၼ်းပဵၼ်ၶုၼ်ယဵၸ်ႈပရေႃးႁဵၵ်ႈၼႂ်းပီၼၼ်ႉလႄႈ ပႃးတင်းၺၢၼ်ႇပရေႃးၽႅတ်ႈ ႁေႃးလၢတ်ႈလွင်ႈ ၸဝ်ႈယေႇသု၊ တၵ်းလႆႈၶၢမ်ႇတၢႆပုၼ်ႈၵူၼ်းမဵဝ်းၼၼ်ႉ၊-
ဢိၵ်ႇတင်းလွင်ႈဢၼ်တၵ်းလႆႈၶၢမ်ႇတၢႆပုၼ်ႈၵူၼ်းမဵဝ်းၼၼ်ႉမဵဝ်းလဵဝ်ၵူၺ်းဢမ်ႇၵႃး၊တၵ်းလႆႈၶၢမ်ႇတၢႆႁႂ်ႈလုၵ်ႈလၢင်းၽြႃးပဵၼ်ၸဝ်ႈဢၼ်ၽၢတ်ႇၽႄမီးၵူႈတီႈၵူႈလႅၼ်လႆႈၸုတုမ်ၵၼ်မႃးဢေႃႈ။
တႄႇဢဝ်ဝၼ်းၼၼ်ႉမႃး၊ၶုၼ်ဢႃႇၼႃႇၵူၼ်းမဵဝ်း ၵျူး၊ ၶဝ်၊ၵျၢမ်ႇႁႃဢဝ်မၼ်းၸဝ်ႈတၢႆဢေႃႈ။-
ၵွပ်ႈပိူဝ်ႈၼႆလႄႈ ၸဝ်ႈယေႇသု၊ ဢမ်ႇၵႂႃႇဢမ်ႇပႆထၢင်ႇထၢင်ႇသႃးသႃးၵႃႈၼႂ်းၵႄႈၵူၼ်းမဵဝ်း ၵျူး၊ ၶဝ်ယဝ်ႉလႄႈ ဢွၵ်ႇသေၵႃႈတီႈၼၼ်ႈၵႂႃႇၸူးတီႈဢၼ်ၸမ်ထိူၼ်ႇဝဵင်း ဢေႇၽရိမ်ႇ၊ ၼၼ်ႉလႄႈ၊ယူႇလူၺ်ႈၵၼ်တင်းတပႄးၸဝ်ႈတင်းလၢႆဢေႃႈ။
ၶၢဝ်းပွႆး ပသၶႃႇ၊ ၵူၼ်းမဵဝ်း ၵျူး၊ ၶဝ်ၸမ်မႃးယဝ်ႉလႄႈ ၵူၼ်းၼမ်ၼႃႇၼင်ႇႁိုဝ်တၵ်းလႆႈႁႂ်ႈတူဝ်ၸဝ်ႈၵဝ်ႇမူတ်းသႂ်ၸိုင်၊လုၵ်ႉသေၵႃႈတီႈဝၢၼ်ႈၼွၵ်ႈၼႃးပၢင်ႇဢွၼ်ၵၼ်ၶိုၼ်ႈၵႂႃႇၵႃႈတီႈဝဵင်း ယေႇရုသလႅမ်ႇ၊ ၸူဝ်ႈဢၼ်ဢမ်ႇပႆႇႁဵတ်းပွႆးၼၼ်ႉဢေႃႈ။-
ၶဝ်သွၵ်ႈႁႃ ၸဝ်ႈယေႇသု၊ ၼႂ်းမိူဝ်ႈဢၼ်ၶဝ်တိုၵ်ႉၸုၵ်းယူႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈလႄႈ ၶဝ်ၼင်ႇၵၼ်လၢတ်ႈၸႃတီႈၵၼ်လႄႈဝႃႈ၊ “သူထၢင်ႇၸိူဝ်ႉၼင်ႇႁိုဝ်။ မၼ်းတေဢမ်ႇမႃးပွႆးယဝ်ႉႁိုဝ်း၊” ဝႃႈၼင်ႇၼႆဢေႃႈ။-
ၵမ်းၼႆႉ၊ယဵၸ်ႈပရေႃးႁဵၵ်ႈလူင်ၶဝ်တင်းၵူၼ်းၵိူင်း ၽႃႇရိသႄး၊ တင်းလၢႆသင်ႇလၢတ်ႈပိုၼ်ၶၢဝ်ႇဝႆႉဝႃႈ၊ပေႃးသေၵေႃႉသေၵူၼ်းႁုတီႈယူႇ ၸဝ်ႈယေႇသု၊ ၸိုင်၊ႁႂ်ႈၸိၼႄပၼ်လႄႈၼင်ႇႁိုဝ်ၶဝ်တေလႆႈတိဢဝ်မၼ်းၸဝ်ႈဢေႃႈ။
ၸူဝ်ႈဢၼ်ဢမ်ႇပႆႇၽႅဝ်ဝၼ်းပွႆး ပသၶႃႇ၊ ႁူၵ်းဝၼ်းၼၼ်ႉၸိုင်၊ ၸဝ်ႈယေႇသု၊ ႁွတ်ႈၵႂႃႇၵႃႈတီႈဝၢၼ်ႈ ပေႇထၼိ၊ ဝၢၼ်ႈဢၼ် လႃႇၸရု၊ ယူႇ၊ၵေႃႉဢၼ် ၸဝ်ႈယေႇသု၊ ႁႂ်ႈလုၵ်ႉသေၵႃႈတၢင်းတၢႆၶိုၼ်းလိပ်းမႃးၼၼ်ႉဢေႃႈ။-
တီႈၼၼ်ႈၶဝ်ႁႅၼ်းၽိူၼ်ၶဝ်ႈၶမ်ႈပုၼ်ႈမၼ်းၸဝ်ႈဢေႃႈ။ မႃႇထႃႉ၊ ႁဵတ်းလဵင်ႉႁဵတ်းလူပၼ်လႄႈ လႃႇၸရု၊ ၵေႃႈၼင်ႈပႃးၼႂ်းဝႅင်းၽိူၼ်ၶဝ်ႈၶဝ်လူၺ်ႈၵၼ်တင်းမၼ်းၸဝ်ႈဢေႃႈ။-
မိူဝ်ႈၼၼ်ႉ၊ မႃႇရိ၊ ဢဝ်ၼမ်ႉမၼ်းႁွမ်ဢၼ်မီးၼမ်ႉၼၵ်းသၢမ်ၶၼ်၊ဢၼ်ပဵၼ်ၼမ်ႉမၼ်းၼၢမ်ႇသႃႇၸႅတ်ႈၸႅတ်ႈဢၼ်ထိူၵ်ႈၵႃႈၶၼ်ယႂ်ႇၼႃႇၼၼ်ႉလေႃႇသႂ်ႇတိၼ် ၸဝ်ႈယေႇသု၊ သေယဝ်ႉ၊ဢဝ်ၶူၼ်ႁူဝ်မၼ်းၸဵတ်ႉပၼ်ဢေႃႈ။ ဢၢႆႁွမ်မၼ်းၼၼ်ႉၸွတ်ႇတူဝ်ႈၵႂႃႇတင်းႁိူၼ်းဢေႃႈ။-
မိူဝ်ႈၼၼ်ႉ၊ၼႂ်းတပႄးၸဝ်ႈၸိူဝ်းၼၼ်ႉၵေႃႉၼိုင်ႈ၊ဢၼ်ပဵၼ် ယုတႃႉဢိသၵႃႇရေႇဢုတ်ႈ၊ လုၵ်ႈၸၢႆး သိမုၼ်ႇ၊ ၵေႃႉဢၼ်တၵ်းဢဝ်မၼ်းၸဝ်ႈဢၢပ်ႈၼႂ်းမိုဝ်းရၢၼ်ႇသူႇၼၼ်ႉၵေႃႈလၢတ်ႈလႄႈဝႃႈ၊-
“ႁဵတ်းသင်လႄႈဢမ်ႇဢဝ်ၼမ်ႉမၼ်းႁွမ်ၼႆႉ၊ၶၢႆသေႁႂ်ႈလႆႈငိုၼ်းတေႇၼႃႇရီႇ သၢမ်ပၢၵ်ႇၶႅပ်းသေယဝ်ႉ၊ဢဝ်ၽေးၸွၼ်းပၼ်တီႈၵူၼ်းၽၢၼ်တင်းလၢႆၼၼ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။-
မၼ်းဝႃႈၸိူဝ်ႉၼင်ႇၼၼ်ၵွပ်ႈပိူဝ်ႈမၼ်းမီးၸႂ်ၸေႇတၼႃႇၼိူဝ်ၵူၼ်းၽၢၼ်ဢမ်ႇၸႂ်ႈ။ ၵွပ်ႈပိူဝ်ႈမၼ်းပဵၼ်ၽူႈလၵ်ႉဢၼ်ပႃးထူင်ငိုၼ်းယူႇသေလႄႈၸၢင်ႈဢဝ်ၸူၵ်းဢဝ်ၸၢႆႇပုၼ်ႈတူဝ်ၸဝ်ႈၵဝ်ႇၵႃႈဢၼ်ၸွမ်ႇသႂ်ႇဝႆႉၵႃႈၼႂ်းထူင်ၼၼ်ႉလႄႈမၼ်းၸင်ႇဝႃႈၸိူဝ်ႉၼင်ႇၼႆဢေႃႈ။
ၸဝ်ႈယေႇသု၊ တွပ်ႇၶိုၼ်း ယုတႃႉ၊ လႄႈဝႃႈ၊ “ယႃႇမၼ်းတႃႉ။ ပွႆႇႁႂ်ႈမၼ်းႁဵတ်းလွင်ႈတၢင်းၼႆႉပုၼ်ႈဝၼ်းဢၼ်တၵ်းသၢင်းၵျူဝ်ႇတူဝ်တၢႆၵဝ်ၼၼ်ႉတႃႉ။-
ၵူၼ်းၽၢၼ်ၸိုင်၊မီးယူႇတီႈသူတႃႇသေႇဢေႃႈ။ ၵဝ်ၸမ်ႉ၊မီးယူႇတီႈသူတႃႇသေႇဢမ်ႇၸႂ်ႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၵူၼ်းမဵဝ်း ၵျူး၊ ၼမ်ၼႃႇႁုလွင်ႈဢၼ်မၼ်းၸဝ်ႈမီးယူႇၵႃႈတီႈဝၢၼ်ႈ ပေႇထၼိ၊ ၼၼ်ႉၸိုင်၊ၶဝ်ဢွၼ်ၵၼ်ၵႂႃႇၵႃႈတီႈၼၼ်ႈ ၵွပ်ႈပိူဝ်ႈလွင်ႈ ၸဝ်ႈယေႇသု၊ လွင်ႈလဵဝ်ၵူၺ်းဢမ်ႇၸႂ်ႈ။ လႃႇၸရု၊ ဢၼ် ၸဝ်ႈယေႇသု၊ ႁႂ်ႈလုၵ်ႉၶိုၼ်းလိပ်းမႃးၼၼ်ႉၵေႃႈ၊ၶဝ်ၶႂ်ႈထူပ်းႁၼ်ဢေႃႈ။-
ပိူဝ်ႈၼႆလႄႈၼင်ႇႁိုဝ်တေလႆႈဢဝ် လႃႇၸရု၊ တၢႆပႅတ်ႈၼၼ်ႉၵေႃႈ၊ယဵၸ်ႈပရေႃးႁဵၵ်ႈ လူင်တင်းလၢႆဢုပ်ႇၵုမ်တိူင်ႇပၢင်ႇၵၼ်ယူႇဢေႃႈ။-
ၵွပ်ႈပိူဝ်ႈလွင်ႈမၼ်းၼၼ်ႉလႄႈၵူၼ်းမဵဝ်း ၵျူး၊ ၼမ်ၼႃႇဢွၵ်ႇၵႂႃႇလႄႈယုမ်ႇမၢတ်ႈ ၸဝ်ႈယေႇသု၊ ၼၼ်ႉဢေႃႈ။
ထႅင်ႈဝၼ်းၼိုင်ႈမူႇၵူၼ်းဢၼ်ၼမ်ၼႃႇၸိူဝ်းဢၼ်မႃးၶဝ်ႈပွႆး ပသၶႃႇ၊ ၼၼ်ႉ၊လႆႈငိၼ်းလွင်ႈဢၼ် ၸဝ်ႈယေႇသု၊ မႃးၵႃႈတီႈဝဵင်း ယေႇရုသလႅမ်ႇ၊ ယူႇၼၼ်ႉဢေႃႈ။-
ၶဝ်ၸင်ႇၽၼ်းဢဝ်ၵိင်ႇမႆႉ ၸုၼ်ႇပလုၼ်ႇ၊ # ႁႂ်ႈလႆႈဢွၵ်ႇၵႂႃႇႁပ်ႉႁူဝ်တၢင်းမၼ်းၸဝ်ႈလႄႈႁွင်ႉသႅၼ်ႇဝႃႈ၊ “ႁူဝ်းသၼ်ႇၼႃႉ ၶုၼ်ႁေႃၶမ်းဢၼ်ပႃးတင်းတၼ်းၶူဝ်းထႃႇဝရႃႉၽြႃးမႃးၼၼ်ႉ ႁႂ်ႈမီးမၢင်ႇၵလႃႇသေၵမ်းလူၺ်ႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ထူပ်းမႃႉလီႈဢွၼ်ႇလႄႈၶိုၼ်ႈၶီႇဢေႃႈ။ မၼ်းမႅၼ်ႈၸွမ်းၼင်ႇဢၼ်ၵျၢမ်းလိၵ်ႈတႅမ်ႈဝႆႉဝႃႈ။
“လုၵ်ႈယိင်းဝဵင်း ၸိဢုၼ်ႇ၊ ႟။ ယႃႇပေမႆႈၸႂ်။ တူၺ်းလူး။ ၶုၼ်ႁေႃၶမ်းမႂ်းၼၼ်ႉ၊ ၶီႇမႃႉလီႈဢွၼ်ႇလႄႈမႃးယူႇဢေႃႈ၊” ဝႃႈၼင်ႇၼႆၼၼ်ႉဢေႃႈ။
မိူဝ်ႈၶိင်ႇၼၼ်ႉ၊တပႄးၸဝ်ႈတင်းလၢႆယင်းဢမ်ႇပႆႇပွင်ႇၸႂ် လူၺ်ႈလွင်ႈတၢင်းၼၼ်ႉလူးၵွၼ်ႇဢေႃႈ။ ဝၢႆးသေမုၼ်ၽုင်းမၼ်းၸဝ်ႈထၢင်ႇသႃးမႃးယဝ်ႉၸင်ႇ၊ၶဝ်ၶုၵ်းၸႂ်လႆႈလွင်ႈဢၼ်ၵႂၢမ်းၵျၢမ်းလိၵ်ႈတႅမ်ႈဝႆႉပုၼ်ႈလွင်ႈမၼ်းၸဝ်ႈ၊ဢိၵ်ႇတင်းၵူၼ်းတင်းလၢႆလႆႈႁဵတ်းလွင်ႈတၢင်းၸိူဝ်းၼၼ်ႉ တီႈမၼ်းၸဝ်ႈၼၼ်ႉဢေႃႈ။
မူႇၵူၼ်းၸိူဝ်းဢၼ်ၶဝ်ႈပႃးလူၺ်ႈၵၼ်တင်းမၼ်းၸဝ်ႈ၊ၼႂ်းမိူဝ်ႈဢၼ်မၼ်းၸဝ်ႈႁွင်ႉဢဝ် လႃႇၸရု၊ သေၵႃႈၼႂ်းထမ်ႈပႃႇႁဵဝ်ႈႁႂ်ႈလုၵ်ႉသေၵႃႈတၢင်းတၢႆၶိုၼ်းလိပ်းမႃးၼၼ်ႉၸိူဝ်းၼၼ်ႉ ၶၢမ်ႇသၢၵ်ႈသေႇလွင်ႈဢၼ်ပဵၼ်မႃးၸိူဝ်းၼၼ်ႉဢေႃႈ။-
ၵွပ်ႈပိူဝ်ႈၵူၼ်းတင်းလၢႆလႆႈငိၼ်းၶၢဝ်ႇလွင်ႈဢၼ်မၼ်းၸဝ်ႈႁဵတ်းၼႄၼိမိၵ်ႈလၢၵ်ႈၶၼႃႇၼၼ်ႉၸင်ႇ၊ၶဝ်ဢွၵ်ႇၵႂႃႇႁပ်ႉႁူဝ်တၢင်းမၼ်းၸဝ်ႈဢေႃႈ။-
မိူဝ်ႈၼၼ်ႉ၊ၵူၼ်းၵိူင်း ၽႃႇရိသႄး၊ ၶဝ်ၼင်ႇၵၼ်လၢတ်ႈၸႃၵၼ်လႄႈဝႃႈ၊ “တူၺ်းလူး။ ႁဝ်းဢမ်ႇတၢတ်ႈၼိူင်ႇလႆႈလႃးလႃးယဝ်ႉ။ ၵူၼ်းလေႃးၵႃႉၼႆႉၸွမ်းၵေႃႉၼၼ်ႉၵႂႃႇသဵင်ႈယဝ်ႉ၊” ဝႃႈၼင်ႇၼႆဢေႃႈ။
ၼႂ်းၶဝ်ၸိူဝ်းဢၼ်ႁွတ်ႈမႃးၶဝ်ႈပွႆးႁႂ်ႈလႆႈၵူဝ်းၵႂၢႆႇၼၼ်ႉ၊ပႃးၵူၼ်းမဵဝ်း ၵရိၵ်ႉ၊ ၵမ်ႈၽွင်ႈဢေႃႈ။-
ၶဝ်ၼၼ်ႉမႃးၸူး ၽိလိပ်ႉပု၊ ၵူၼ်းဝဵင်း ပႅတ်ႉၸေးတႃႉ၊ မိူင်း ၵႃႇလိလႄး၊ ၼၼ်ႉလႄႈ ယွၼ်းဢၶႂၢင်ႉလႄႈဝႃႈ၊ “ႁဝ်းၶႃႈၶႂ်ႈႁၼ် ၸဝ်ႈယေႇသု၊ ဢေႃႈ၊” ဝႃႈၼင်ႇၼႆဢေႃႈ။-
ၽိလိပ်ႉပု၊ ၵေႃႈၵႂႃႇမွၵ်ႇလၢတ်ႈ ဢၼ်ႇတရေႇ၊ လႄႈ ၶဝ်လဝ်ႈလၢတ်ႈတီႈ ၸဝ်ႈယေႇသု၊ ဢေႃႈ။
ၸဝ်ႈယေႇသု၊ ၶိုၼ်းလၢတ်ႈတီႈၶဝ်လႄႈဝႃႈ၊ “ၶိင်ႇယၢမ်းဢၼ်မုၼ်ၽုင်း လုၵ်ႈၵူၼ်း၊ တၵ်းထၢင်ႇသႃးမႃးၼၼ်ႉႁွတ်ႈထိုင်ယဝ်ႉ။-
ၵဝ်ဝႃႈတီႈၸိုဝ်ႈတီႈၸႂ်ႈမၼ်းတီႈသူၸမ်ႉ၊မဵတ်ႉၶဝ်ႈပိူၵ်ႇၼၼ်ႉပေႃးယင်းဢမ်ႇတူၵ်းၶဝ်ႈၼႂ်းလိၼ်လႄႈလုလႅဝ်ၸိုင်၊ပဵၼ်မဵတ်ႉလဵဝ်ယူႇၵူၺ်းမၼ်းဢေႃႈ။ ပေႃးလုလႅဝ်ၸင်ႇၸၢင်ႈၽႄၵိုၼ်းမႃးလႄႈမီးမဵတ်ႉၼမ်ၼႃႇဢေႃႈ။-
ၵေႃႉဢၼ်ႁၵ်ႉဢသၢၵ်ႈတူဝ်ၸဝ်ႈၵဝ်ႇၼၼ်ႉၸၢင်ႈသုမ်းဢသၢၵ်ႈလႄႈ၊ၵေႃႉဢၼ်ၸင်းဢသၢၵ်ႈတူဝ်ၸဝ်ႈၵဝ်ႇၼႂ်းလေႃးၵႃႉၼႆႉၼၼ်ႉၸမ်ႉ၊မၼ်းၸၢင်ႈသိမ်းပႅင်းဝႆႉပုၼ်ႈဢသၢၵ်ႈထႃႇဝရႃႉဢေႃႈ။-
ၽူႈလႂ်သေဢမ်ႇဝႃႈ၊ပေႃးၶႂ်ႈႁဵတ်းၵူၼ်းၸႂ်ႉၵူၼ်းသွႆၵဝ်ၸိုင်၊မၼ်းတၵ်းလႆႈၸွမ်းၵဝ်ဢေႃႈ။ ၼင်ႇၼၼ်လႄႈတီႈဢၼ်ၵဝ်မီးၼၼ်ႉၵူၼ်းၸႂ်ႉၵူၼ်းသွႆၵဝ်ၼၼ်ႉၵေႃႈတၵ်းလႆႈယူႇၸွမ်းဢေႃႈ။ ၽူႈလႂ်သေဢမ်ႇဝႃႈ၊ၵေႃႉဢၼ်ႁဵတ်းၵူၼ်းၸႂ်ႉၵူၼ်းသွႆၵဝ်ၼၼ်ႉ ပေႃႈၸဝ်ႈၵဝ်တၵ်းယုၵ်ႉယွင်ႈမၼ်းဢေႃႈ။
“တေႃႈလဵဝ်ၼႆႉ၊ႁူဝ်ၸႂ်ၵဝ်မီးတၢင်းဢၼ်ယၢပ်ႇၸႂ်မႆႈၸႂ်လႄႈၵဝ်တၵ်းလႆႈလဝ်ႈလၢတ်ႈၸိူဝ်ႉၼင်ႇႁိုဝ်။ ၸွင်ႇတၵ်းဝႃႈလႆႈ၊ ‘ၵႃႈတီႈၶိင်ႇယၢမ်းၼၼ်ႉၶႅၼ်းတေႃႈၵႄႇၶျွတ်ႈဢဝ်ၶႃႈၸဝ်ႈသေၵမ်းတီႈၶႃႈပေႃႈ၊’ ဝႃႈၼႆႁိုဝ်း။ ဢမ်ႇဝႃႈၸိူဝ်ႉၼင်ႇၼၼ်လႆႈ။ လွင်ႈမၼ်းၸမ်ႉ၊ပုၼ်ႈလွင်ႈၼႆႉၵူၺ်းၵဝ်ႁွတ်ႈထိုင်ၶိင်ႇယၢမ်းဢၼ်ၶၢမ်ႇဝူၺ်ႇတၼႃႇၼႆႉဢေႃႈ။-
ဢူဝ်းပေႃႈ၊ၶႅၼ်းတေႃႈယုၵ်ႉယွင်ႈယွင်ႈယေႃးၼႃႇမႃႉၸိုဝ်ႈသဵင်ၸဝ်ႈႁဝ်းသေၵမ်းတီႈၶႃႈ၊” ဝႃႈၼင်ႇၼႆဢေႃႈ။ မိူဝ်ႈၼၼ်ႉ၊သဵင်ၵႂၢမ်းပဵၼ်မႃးၵႃႈတီႈၽႃႉၵၢင်ႁၢဝ်လႄႈဝႃႈ၊ “ၵဝ်ယုၵ်ႉယွင်ႈယွင်ႈယေႃးယဝ်ႉယဝ်ႉ။ ၵဝ်သမ်ႉတၵ်းယုၵ်ႉယွင်ႈယွင်ႈယေႃးထႅင်ႈလူးၵွၼ်ႇဢေႃႈ၊” ဝႃႈၼင်ႇၼႆဢေႃႈ။
မူႇၵူၼ်းဢၼ်မီးယူႇၵႃႈတီႈၼၼ်ႈၼၼ်ႉလႆႈငိၼ်းသဵင်ၼၼ်ႉလႄႈၵမ်ႈၽွင်ႈဝႃႈ၊ “ပဵၼ်သဵင်ၽႃႉလင်ဢေႃႈ၊” ဝႃႈၼႆလႄႈ၊မၢင်ၵေႃႉသမ်ႉဝႃႈ၊ “တမၢၼ်ႇၵၢင်ႁၢဝ်လၢတ်ႈတေႃႇၵၼ်တင်းမၼ်းၸဝ်ႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈၶိုၼ်းလၢတ်ႈလႄႈဝႃႈ၊ “သဵင်ဢၼ်လၢတ်ႈမႃးၼႆႉပဵၼ်ပုၼ်ႈၵဝ်ဢမ်ႇၸႂ်ႈ။ ပဵၼ်ပုၼ်ႈသူဢေႃႈ။-
ၶိင်ႇမိူဝ်ႈလဵဝ်ၼႆႉ၊ပဵၼ်ၶိင်ႇဢၼ်ၸီႇယၢင်ႇလေႃးၵႃႉၼႆႉလႄႈ၊ၶုၼ်ဢၼ်ဢုပ်ႉပိူင်ႇလေႃးၵႃႉၼႆႉတၵ်းလႆႈၶၢမ်ႇတၢင်းဢၼ်ဢီးလူင်းႁၢင်ႈလူင်းႁေႃဢေႃႈ။-
ၵဝ်ၵေႃႈ၊ပေႃးလႆႈၶၢမ်ႇတၢင်းဢၼ်ယူၵ်ႉဝႆႉလႄႈၽၢတ်ႇယၢၼ်ၵၼ်တင်းလိၼ်မိူင်းၸိုင်၊ၵဝ်တၵ်းတိုတ်ႉၸၼ်ဢဝ်ၵူၼ်းတင်းသဵင်ႈတင်းလူင်မႃးတီႈၵဝ်ဢေႃႈ၊” ဝႃႈၼင်ႇၼႆဢေႃႈ။-
မၼ်းၸဝ်ႈလၢတ်ႈဝႃႈၸိူဝ်ႉၼင်ႇၼႆ ႁႂ်ႈလႆႈၼႄပျႃးလွင်ႈဢၼ်မၼ်းၸဝ်ႈတၵ်းလႆႈၶၢမ်ႇတၢႆၸိူဝ်ႉၼင်ႇႁိုဝ်ၼၼ်ႉဢေႃႈ။
မူႇၵူၼ်းၸိူဝ်းၼၼ်ႉၵေႃႈၶိုၼ်းလၢတ်ႈလႄႈဝႃႈ၊ “ႁဝ်းလႆႈသွၼ်ဢဝ်ၼႂ်းပိင်းၺၢပ်ႈတြႃး လွင်ႈဢၼ် ၸဝ်ႈၶရိၸ်ႈ၊ တႄႇယူႇတႃႇသေႇဢမ်ႇထၢတ်ႇဢေႃႈ။ လုၵ်ႈၸဝ်ႈတၵ်းလႆႈၶၢမ်ႇတၢင်းဢၼ်ယုၵ်ႉဝႆႉဝႃႈၼင်ႇၼႆႁဵတ်းႁိုဝ်လႄႈမႂ်းဝႃႈလႆႈၸိူဝ်ႉၼင်ႇႁိုဝ်။ လုၵ်ႈၸဝ်ႈၼၼ်ႉပဵၼ်ၽူႈလႂ်၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၸင်ႇၶိုၼ်းလၢတ်ႈလႄႈဝႃႈ၊ “ဢၼ်လႅင်းတၵ်းတေမီးလူၺ်ႈၵၼ်တင်းသူၸူဝ်ႈၶၢဝ်းဢွၼ်ႇၼိုင်ႈၵူၺ်းဢေႃႈ။ ၵႂႃႇမႃးၼႂ်းၸူဝ်ႈဢၼ်ဢၼ်လႅင်းယင်းတိုၵ်ႉမီးယူႇၼႆႉတႃႉ။ ပေႃးဢမ်ႇၼၼ်ၸိုင်၊ဢၼ်လပ်းသိင်ႇတၵ်းႁူမ်ႇသုမ်ႇသူဢေႃႈ။ ၵေႃႉဢၼ်ၵႂႃႇမႃးၼႂ်းဢၼ်လပ်းသိင်ႇၼၼ်ႉဢမ်ႇႁုလွင်ႈဢၼ်တူဝ်ၸဝ်ႈၵဝ်ႇၵႂႃႇတီႈလႂ်ယူႇၼၼ်ႉ။-
ၸူဝ်ႈဢၼ်၊ဢၼ်လႅင်းယင်းတိုၵ်ႉမီးယူႇလူၺ်ႈၵၼ်တင်းသူၼႆႉယုမ်ႇမၢတ်ႈဢၼ်လႅင်းႁႂ်ႈလႆႈပဵၼ်လုၵ်ႈဢၼ်လႅင်းတႃႉ၊” ဝႃႈၼင်ႇၼႆဢေႃႈ။ ဝၢႆးသေ ၸဝ်ႈယေႇသု၊ လၢတ်ႈၸိူဝ်ႉၼင်ႇၼၼ်ယဝ်ႉၸိုင်၊မၼ်းၸဝ်ႈဢွၵ်ႇၵႂႃႇလႄႈတဵတ်ႇမႅပ်းတူဝ်ၸဝ်ႈၵဝ်ႇသေၵႃႈတီႈၶဝ်ဢေႃႈ။-
ပိၵ်ႉသမ်ႉမၼ်းၸဝ်ႈႁဵတ်းၼႄၼိမိၵ်ႈလၢၵ်ႈၶၼႃႇၼမ်ၼႃႇထၢၼ်ႇၼၼ်ႉသိုဝ်ႈၼႃႈတႂ်ႈတႃၶဝ်သေၵေႃႈ၊ၶဝ်ယင်းဢမ်ႇယုမ်ႇမၢတ်ႈမၼ်းၸဝ်ႈ။-
မၼ်းပဵၼ်မႃးၸိူဝ်ႉၼင်ႇၼၼ်ၼင်ႇႁိုဝ်တၵ်းမႅၼ်ႈၸွမ်းၵႂၢမ်းပရေႃးၽႅတ်ႈ ဢိသႃႇယႃႉ၊ ဢၼ်ႁေႃးဝႆႉလႄႈဝႃႈ၊ “ထႃႇဝရႃႉၽြႃးတီႈၶႃႈ၊ၽူႈလႂ်ယုမ်ႇမၢတ်ႈၶၢဝ်ႇတြႃးဢၼ်ႁဝ်းႁေႃးလၢတ်ႈၼၼ်ႉယဝ်ႉၶႃႈ။ ၶႅၼ်မိုဝ်းထႃႇဝရႃႉၽြႃးၼၼ်ႉၸိုင်၊ထၢင်ႇသႃးၵႃႈတီႈၽူႈလႂ်ယဝ်ႉၶႃႈ၊” ဝႃႈၼင်ႇၼႆၼၼ်ႉလႄႈ။
ၶဝ်ဢမ်ႇၸၢင်ႈယုမ်ႇမၢတ်ႈဢေႃႈ။ လွင်ႈမၼ်းၸမ်ႉ၊ပရေႃးၽႅတ်ႈ ဢိသႃႇယႃႉ၊ သမ်ႉလၢတ်ႈဝႆႉထႅင်ႈလႄႈဝႃႈ။
“ထႃႇဝရႃႉၽြႃးႁဵတ်းႁႂ်ႈတႃၶဝ်မွတ်ႇ၊ ႁႂ်ႈႁူဝ်ၸႂ်ၶဝ်ၵႅၼ်ႇၶႅင်၊ ပုၼ်ႈလွင်ႈၼင်ႇႁိုဝ်တႃၶဝ်တေဢမ်ႇႁၼ်၊ ႁူဝ်ၸႂ်ၶဝ်တေဢမ်ႇၸၢင်ႈႁုၸၢင်ႈပွင်ႇ၊ တေဢမ်ႇဝၢႆႇႁူဝ်မႃးၸူးၵဝ်၊ ႁႂ်ႈၵဝ်လႆႈႁဵတ်းႁႂ်ႈတၢင်းၶႆႈတၢင်းပဵၼ်ၶဝ်ႁၢႆၼၼ်ႉဢေႃႈ၊” ဝႃႈၼင်ႇၼႆဢေႃႈ။
ပရေႃးၽႅတ်ႈ ဢိသႃႇယႃႉ၊ ႁေႃးလၢတ်ႈၵႂၢမ်းၼၼ်ႉ၊ၵွပ်ႈပိူဝ်ႈမၼ်းလႆႈႁၼ်မုၼ်ၽုင်းဢႃႇၼုၽေႃႇၸဝ်ႈလႄႈသမ်ႉလၢတ်ႈလွင်ႈမၼ်းတၢင်းမၼ်းဢေႃႈ။
ၼႂ်းဝႃႈၼၼ်သေၵေႃႈၶုၼ်ဢႃႇၼႃႇၵူၼ်းမဵဝ်း ၵျူး၊ ၶဝ်ယုမ်ႇမၢတ်ႈမၼ်းၸဝ်ႈမႃးၼမ်ၼႃႇဢေႃႈ။ ၵူၺ်းၵႃႈ၊ပိူဝ်ႈဢၼ်ၶဝ်ၵူဝ်ၵူၼ်းၵိူင်း ၽႃႇသႄး၊ တင်းလၢႆတၵ်းႁေႃႈဢွၵ်ႇပႅတ်ႈသေၵႃႈၼႂ်းၸရွပ်ႈႁေႃးတြႃးလႄႈၶဝ်ဢမ်ႇႁပ်ႉတုင်းဢဝ်ထၢင်ႇထၢင်ႇသႃးသႃး။-
လွင်ႈမၼ်းၸမ်ႉ၊ၶဝ်ၵျိူၵ်ႈႁၵ်ႉသရေႇၼႃႈတႃဢၼ်လႆႈၵႃႈတီႈၵူၼ်းၼၼ်ႉ ယဵင်ႈၶႅၼ်းၼႃႇသေသရေႇၼႃႈတႃဢၼ်လႆႈၵႃႈတီႈၽြႃးပဵၼ်ၸဝ်ႈၼၼ်ႉဢေႃႈ။
ၸဝ်ႈယေႇသု၊ ဢဝ်တင်းသဵင်ဢၼ်ယႂ်ႇၼႃႇလႄႈလၢတ်ႈဝႃႈ၊ “ၵေႃႉဢၼ်ယုမ်ႇမၢတ်ႈၵဝ်ၼၼ်ႉယုမ်ႇမၢတ်ႈၵဝ်ၵူၺ်းဢမ်ႇၵႃး၊ယုမ်ႇမၢတ်ႈပႃးတင်းၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉဢေႃႈ။-
ၵေႃႉဢၼ်တူၺ်းႁၼ်ၵဝ်ၼၼ်ႉတူၺ်းႁၼ်ၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉဢေႃႈ။-
ၵဝ်ပဵၼ်ၸိူဝ်ႉၼင်ႇဢၼ်လႅင်းသေလႄႈမႃးၼႂ်းလေႃးၵႃႉၼႆႉပုၼ်ႈလွင်ႈၼင်ႇႁိုဝ်ၶဝ်ၸိူဝ်းဢၼ်ယုမ်ႇမၢတ်ႈၵဝ်ၵူႈၵေႃႉၵူႈၵူၼ်း၊တၵ်းတေဢမ်ႇလႆႈမီးယူႇၼႂ်းတီႈဢၼ်လပ်းသိင်ႇဢေႃႈ။-
ပေႃးသေၵေႃႉသေၵူၼ်းငိၼ်းၶၢဝ်ႇတြႃးၵဝ်လႄႈဢမ်ႇႁဵတ်းၸွမ်းၼၼ်ႉၸိုင်၊ၵဝ်ဢမ်ႇၸီႇယၢင်ႇဢပျတ်ႈမၼ်း။ ၵဝ်မႃးႁႂ်ႈလႆႈၸီႇယၢင်ႇဢပျတ်ႈလေႃးၵႃႉၼႆႉဢမ်ႇၸႂ်ႈ။ မႃးႁႂ်ႈလႆႈၵႄႇၶျွတ်ႈဢဝ်ၵူၼ်းလေႃးၵႃႉဢေႃႈ။-
ၽူႈလႂ်သေဢမ်ႇဝႃႈ၊ၵေႃႉဢၼ်ထဵင်ပႅတ်ႈၵဝ်လႄႈဢမ်ႇထွမ်ႇဢဝ်ၶၢဝ်ႇတြႃးၵဝ်ၼၼ်ႉ၊မီးၸဝ်ႈဢၼ်ၸီႇယၢင်ႇဢပျတ်ႈမၼ်းၼၼ်ႉထႅင်ႈပႃးၼိုင်ႈလူးၵွၼ်ႇဢေႃႈ။ ၵႂၢမ်းဢၼ်ၵဝ်ႁေႃးလၢတ်ႈၼႆႉတၵ်းပဵၼ်ၸဝ်ႈဢၼ်ၸီႇယၢင်ႇဢပျတ်ႈမၼ်းၼႂ်းဝၼ်းၵမ်းလိုၼ်းသုတ်းပုၼ်ႉဢေႃႈ။-
လွင်ႈမၼ်းၸမ်ႉ၊ၵဝ်ႁေႃးလၢတ်ႈၸွမ်းၼင်ႇဢၶႂၢင်ႉဢႃႇၼႃႇတူဝ်ၸဝ်ႈၵဝ်ႇဢမ်ႇၸႂ်ႈ။ ပေႃႈၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉတူဝ်မၼ်းၸဝ်ႈပိင်းၺၢပ်ႈဝႆႉ၊ႁႂ်ႈၵဝ်ဝႃႈၸိူဝ်ႉၼင်ႇႁိုဝ်၊ႁႂ်ႈႁေႃးလၢတ်ႈၸိူဝ်ႉၼင်ႇႁိုဝ်ၼၼ်ႉဢေႃႈ။-
ၼင်ႇၼၼ်လႄႈၵဝ်ႁုဝႃႈပိင်းၺၢပ်ႈၸဝ်ႈၼၼ်ႉပဵၼ်ဢသၢၵ်ႈထႃႇဝရႃႉဢေႃႈ။ ၵႃႈဢၼ်ၵဝ်ႁေႃးလၢတ်ႈၸိူဝ်းၼႆႉၵေႃႈၵဝ်ႁေႃးလၢတ်ႈၸွမ်းၼင်ႇဢၼ်ပေႃႈၸဝ်ႈသင်ႇလၢတ်ႈဝႆႉၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၶိင်ႇမိူဝ်ႈၼၼ်ႉ၊ပဵၼ်ဝၼ်းၽိတ်ႈပွႆး ပသၶႃႇ၊ ဢေႃႈ။ ၸဝ်ႈယေႇသု၊ ႁုလွင်ႈၶိင်ႇယၢမ်းႁွတ်ႈၽႅဝ်မႃးပုၼ်ႈဢၼ်မၼ်းၸဝ်ႈတၵ်းဢွၵ်ႇသေလေႃးၵႃႉၼႆႉၵႂႃႇၸူးၵႃႈတီႈပေႃႈၸဝ်ႈၼၼ်ႉဢေႃႈ။ မၼ်းၸဝ်ႈၸိုင်၊ႁၵ်ႉၵူၼ်းမၼ်းၸဝ်ႈဢၼ်မီးယူႇၼႂ်းလေႃးၵႃႉၼႆႉလႄႈ၊ယင်းႁၵ်ႉတေႃႇထိုင်ႁွတ်ႈတီႈသုတ်းတီႈၵွႆဢေႃႈ။-
ယၢမ်းမိူဝ်ႈဢၼ် ၸဝ်ႈယေႇသု၊ တင်းတပႄးၸဝ်ႈတင်းလၢႆယင်းတိုၵ်ႉၵိၼ်ၶဝ်ႈၶမ်ႈယူႇၼၼ်ႉၸိုင်၊မႃႇၼၢတ်ႈပေႃးသႂ်ႇဝႆႉတၢင်းၵျၢမ်ႇတၢင်းပွင်ၵႃႈၼႂ်းႁူဝ်ၸႂ် ယုတႃႉဢိသၵႃႇရေႇဢုတ်ႈ၊ လုၵ်ႈၸၢႆး သိမုၼ်ႇ၊ ႁႂ်ႈလႆႈဢဝ် ၸဝ်ႈယေႇသု၊ ဢၢပ်ႈၼႂ်းမိုဝ်းရၢၼ်ႇသူႇၼၼ်ႉယဝ်ႉဢေႃႈ။-
ၸဝ်ႈယေႇသု၊ ႁုလွင်ႈဢၼ်ပေႃႈၸဝ်ႈဢၢပ်ႈပၼ်တင်းသဵင်ႈတင်းလူင်ၵႃႈတီႈၼႂ်းမိုဝ်းမၼ်းၸဝ်ႈဝႆႉယဝ်ႉၼၼ်ႉၵူၺ်းဢမ်ႇၵႃး၊ႁုလွင်ႈဢၼ်မၼ်းၸဝ်ႈလုၵ်ႉၵႃႈတီႈၽြႃးပဵၼ်ၸဝ်ႈမႃးလႄႈ တၵ်းၵႂႃႇၸူးၵႃႈတီႈၽြႃးပဵၼ်ၸဝ်ႈၼၼ်ႉဢေႃႈ။-
ပိူဝ်ႈၼႆလႄႈမၼ်းၸဝ်ႈလုၵ်ႉဢွၵ်ႇၽိူၼ်ၶဝ်ႈၵႂႃႇထွတ်ႇသိူဝ်ႈယၢဝ်းမၼ်းၸဝ်ႈသေယဝ်ႉ၊ဢဝ်ၽႃႈၸဵတ်ႉတူဝ်ဝဵၼ်းဢႅဝ်ယဝ်ႉၸင်ႇ၊-
ထွၵ်ႇၼမ်ႉသႂ်ႇၼႂ်းဢၢင်ႇသုၵ်ႈတိၼ်သေသုၵ်ႈပၼ်တိၼ်တပႄးၸဝ်ႈတင်းလၢႆလႄႈ၊သမ်ႉဢဝ်ၽႃႈၸဵတ်ႉတူဝ်ဢၼ်ဝဵၼ်းဢႅဝ်မၼ်းၸဝ်ႈၼၼ်ႉၸဵတ်ႉပၼ်ဢေႃႈ။-
မိူဝ်ႈဢၼ်ထိုင်ၵႃႈတီႈ သိမုၼ်ႇပေႇတရု၊ ၸိုင်၊ သိမုၼ်ႇပေႇတရု၊ လၢတ်ႈတီႈမၼ်းၸဝ်ႈလႄႈဝႃႈ၊ “ၸဝ်ႈၽြႃးတီႈၶႃႈ။ ၸဝ်ႈႁဝ်းတေသုၵ်ႈပၼ်တိၼ်ၵဝ်ၶႃႈႁိုဝ်း၊” ဝႃႈၼင်ႇၼႆလႄႈ၊-
မၼ်းၸဝ်ႈၵေႃႈလၢတ်ႈလႄႈဝႃႈ၊ “ဢၼ်ၵဝ်ႁဵတ်းယူႇၼႆႉမိူဝ်ႈလဵဝ်မႂ်းဢမ်ႇပႆႇႁုလွင်ႈမၼ်း။ ၵူၺ်းၵႃႈ၊ဝၢႆးလိုၼ်းမႂ်းတၵ်းႁုဢေႃႈ၊” ဝႃႈၼင်ႇၼႆဢေႃႈ။
ပေႇတရု၊ ၵေႃႈလဝ်ႈလၢတ်ႈလႄႈဝႃႈ၊ “မိူဝ်ႈလႂ်သေဢမ်ႇဝႃႈၸဝ်ႈႁဝ်းတၵ်းဢမ်ႇလႆႈသုၵ်ႈတိၼ်ၵဝ်ၶႃႈလႃးလႃးၶႃႈ၊” ဝႃႈၼင်ႇၼႆဢေႃႈ။ မၼ်းၸဝ်ႈၶိုၼ်းလၢတ်ႈလႄႈဝႃႈ၊ “ပေႃးၵဝ်ဢမ်ႇလႆႈသုၵ်ႈတိၼ်မႂ်းၸိုင်၊မႂ်းဢမ်ႇၸႂ်ႈတပႄးၵဝ်ၵူၺ်း၊” ဝႃႈၼင်ႇၼႆဢေႃႈ။
သိမုၼ်ႇပေႇတရု၊ ၵေႃႈၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈၽြႃးတီႈၶႃႈ၊ပေႃးဝႃႈၼႆၸိုင်၊ယႃႇပေသုၵ်ႈတိၼ်ၵူၺ်းလႄႈသုၵ်ႈပႃးၸဵမ်မိုဝ်းၸဵမ်ႁူဝ်ၵဝ်ၶႃႈသေၵမ်းၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ၵေႃႉဢၼ်ဢၢပ်ႇၼမ်ႉယဝ်ႉၼၼ်ႉမူတ်းသႂ်တင်းတူဝ်တင်းၶိင်းယူႇလႄႈ၊လိူဝ်သေတၢင်းဢၼ်သုၵ်ႈတိၼ်ၵူၺ်း၊ဢမ်ႇလူဝ်ႇသုၵ်ႈၵႃႈသင်ယဝ်ႉ။ ၼွၵ်ႈသေၵေႃႉလဵဝ်ၵူၺ်းသူၵူႈၵေႃႉမူတ်းသႂ်ဢေႃႈ၊” ဝႃႈၼင်ႇၼႆဢေႃႈ။-
လွင်ႈမၼ်းၸမ်ႉ၊ပိူဝ်ႈဢၼ်မၼ်းၸဝ်ႈႁုၵေႃႉလႂ်တၵ်းဢဝ်မၼ်းၸဝ်ႈဢၢပ်ႈၵႃႈၼႂ်းမိုဝ်းရၢၼ်ႇသူႇၼၼ်ႉလႄႈၸင်ႇလၢတ်ႈဝႃႈ၊ “ၼွၵ်ႈသေၵေႃႉလဵဝ်ၵူၺ်းသူၵူႈၵေႃႉမူတ်းသႂ်ဢေႃႈ၊” ဝႃႈၼင်ႇၼႆဢေႃႈ။
ဝၢႆးသေမၼ်းၸဝ်ႈသုၵ်ႈတိၼ်ၶဝ်ယဝ်ႉၸင်ႇ၊သမ်ႉၶိုၼ်းၼုင်ႈသိူဝ်ႈယၢဝ်းၼၼ်ႉလႄႈ၊ၶိုၼ်းၼင်ႈၵႃႈတီႈၽိူၼ်ၶဝ်ႈသေယဝ်ႉ၊လၢတ်ႈလႄႈဝႃႈ၊ “ဢၼ်ၵဝ်ႁဵတ်းတီႈသူယဝ်ႉတူဝ်ႈၵႂႃႇၼႆႉ ၸွင်ႇသူႁုလွင်ႈမၼ်းႁိုဝ်း။-
ဢၼ်သူႁွင်ႉၵဝ်လႄႈဝႃႈ၊ ‘သြႃႇၸဝ်ႈႁဝ်း၊ဢိၵ်ႇတင်းၸဝ်ႈၽြႃးႁဝ်း’ ဝႃႈၼႆၼၼ်ႉၸိုဝ်ႈၸႂ်ႈတႄႉတႄႉဢေႃႈ။ ၵွပ်ႈသင်လႄႈဝႃႈၸမ်ႉ၊ၵႃႈၼင်ႇဢၼ်သူႁွင်ႉဝႃႈၼၼ်ႉၵဝ်ပဵၼ်ဢေႃႈ။-
ၵဝ်ပဵၼ်ၸဝ်ႈသြႃႇသူ၊ပဵၼ်ၸဝ်ႈၽြႃးသူလႄႈယင်းသုၵ်ႈပၼ်တိၼ်သူယဝ်ႉ။ သူၵေႃႉၼိုင်ႈလႄႈၵေႃႉၼိုင်ႈထုၵ်ႇလီသုၵ်ႈတိၼ်ပၼ်ၵၼ်ဢေႃႈ။-
ၵဝ်ႁဵတ်းၼႄပုင်ႇသၢၵ်ႈသေႇဝႆႉတီႈသူယဝ်ႉ။ သူၵေႃႈတၵ်းလႆႈႁဵတ်းၸွမ်းၵႃႈၼင်ႇဢၼ်ၵဝ်ႁဵတ်းၼၼ်ႉဢေႃႈ။-
ၵဝ်ဝႃႈတီႈၸိုဝ်ႈၸႂ်ႈမၼ်းတီႈသူၸမ်ႉ၊ၶႃႈဢမ်ႇယႂ်ႇမျၢတ်ႈသေၸဝ်ႈမၼ်း။ ၵေႃႉဢၼ်ၶၢမ်ႇတၢင်းဢၼ်ပွႆႇၸႂ်ႉၵႂႃႇၵေႃႈဢမ်ႇယႂ်ႇမျၢတ်ႈသေၵေႃႉဢၼ်ပွႆႇၸႂ်ႉမၼ်းၼၼ်ႉ။-
တေႃႈလဵဝ်ၼႆႉသူႁုတြႃးၼႆႉယဝ်ႉ၊ႁဵတ်းၸွမ်းတႃႉ။ သူတၵ်းမီးမၢင်ႇၵလႃႇဢေႃႈ။
“ၵဝ်လၢတ်ႈလူၺ်ႈလွင်ႈသူတင်းမူတ်းဢမ်ႇၸႂ်ႈ။ ၵဝ်ႁုၸၵ်းသူၸိူဝ်းဢၼ်ၵဝ်လိူၵ်ႈၵဵပ်းဝႆႉၼႆႉၵေႃႉလႂ်ၵေႃႉၼၼ်ႉယူႇဢေႃႈ။ ၵူၺ်းၵႃႈ၊မၼ်းတၵ်းလႆႈပဵၼ်ၸွမ်းပျေႉပျေႉၸုမ်ႇၸုမ်ႇၵႃႈၼင်ႇဢၼ်ၵႂၢမ်းၵျၢမ်းလိၵ်ႈဝႃႈ၊ ‘ၵေႃႉဢၼ်ၵိၼ်တၢင်းၵိၼ်လူၺ်ႈၵၼ်တင်းၵဝ်ၼၼ်ႉဢဝ်တိၼ်ပိတ်ႉၵဝ်ဢေႃႈ၊’ ဝႃႈၼင်ႇၼႆၼၼ်ႉဢေႃႈ။-
ၸူဝ်ႈဢၼ်လွင်ႈတၢင်းၼႆႉဢမ်ႇပႆႇပဵၼ်မႃးၸိုင်၊မိူဝ်ႈလဵဝ်ၵဝ်လၢတ်ႈဝႆႉတီႈသူလႄႈ၊ယၢမ်ႈမိူဝ်ႈဢၼ်လွင်ႈတၢင်းၼၼ်ႉပဵၼ်မႃးၸင်ႇ သူတေယုမ်ႇမၢတ်ႈလွင်ႈဢၼ်၊ ‘ၵဝ်ပဵၼ်ၵေႃႉဢၼ်ၵဝ်ပဵၼ်’ ၼၼ်ႉဢေႃႈ။-
ၵဝ်ဝႃႈတီႈၸိုဝ်ႈတီႈၸႂ်ႈမၼ်းၸမ်ႉ၊ၽူႈလႂ်သေဢမ်ႇဝႃႈ၊ၵေႃႉဢၼ်ႁပ်ႉတုင်းဢဝ်ၵေႃႉဢၼ်ၵဝ်ပွႆႇၸႂ်ႉၵႂႃႇၼၼ်ႉႁပ်ႉတုင်းဢဝ်ၵဝ်ယဝ်ႉ။ ၵေႃႉဢၼ်သမ်ႉႁပ်ႉတုင်းဢဝ်ၵဝ်ၼၼ်ႉၵေႃႈႁပ်ႉတုင်းဢဝ်ၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉဢေႃႈ၊” ဝႃႈၼင်ႇၼႆဢေႃႈ။
ဝၢႆးသေ ၸဝ်ႈယေႇသု၊ လၢတ်ႈၵႂၢမ်းၶေႃႈၼႆႉယဝ်ႉၸိုင်၊ႁူဝ်ၸႂ်မၼ်းၸဝ်ႈမီးတၢင်းဢၼ်ယၢပ်ႇၸႂ်ယုင်ႈၸႂ်ၼႃႇလူင်လၢင်လႄႈၶၢမ်ႇသၢၵ်ႈသေႇလႄႈဝႃႈ၊ “ၵဝ်ဝႃႈတီႈၸိုဝ်ႈတီႈၸႂ်ႈမၼ်းတီႈသူၸမ်ႉ၊ၼႂ်းသူၼႆႉၵေႃႉၼိုင်ႈတၵ်းဢဝ်ၵဝ်ဢၢပ်ႈၵႃႈၼႂ်းမိုဝ်းရၢၼ်ႇသူႇဢေႃႈ၊” ဝႃႈၼင်ႇၼႆဢေႃႈ။-
တပႄးၸဝ်ႈၸိူဝ်းၼၼ်ႉ၊မီးတၢင်းဢၼ်ၵႂင်ၸႂ်ယုင်ႈၸႂ်ၼႃႇလူင်လၢင်လူၺ်ႈလွင်ႈဢၼ်မၼ်းၸဝ်ႈၶႂ်ႈဝႃႈၽူႈလႂ်လႄႈ၊ၵေႃႉၼိုင်ႈလႄႈၵေႃႉၼိုင်ႈတူၺ်းၵၼ်ယူႇဢေႃႈ။-
ၼႂ်းတပႄးၸဝ်ႈၸိူဝ်းၼၼ်ႉၵေႃႉၼိုင်ႈ၊ဢၼ်မၼ်းၸဝ်ႈႁၵ်ႉၼၼ်ႉမီးယူႇၸပ်းၶၢင်ႈၽၢႆႇၶႂႃၸဝ်ႈလႄႈ၊-
သိမုၼ်ႇပေႇတရု၊ ၸိမၼ်းလႄႈလၢတ်ႈဝႃႈ၊ “မၼ်းၸဝ်ႈၶႂ်ႈဝႃႈပဵၼ်ၵေႃႉလႂ်၊လဝ်ႈထၢမ်တူၺ်းလူး၊” ဝႃႈၼင်ႇၼႆဢေႃႈ။
တပႄးၸဝ်ႈၵေႃႉၼၼ်ႉၵေႃႈယဵင်ႈၶႅၼ်းသုတ်ႉၸမ်ႁိမ်းၶၢင်ႈမၼ်းၸဝ်ႈသေယဝ်ႉ၊လဝ်ႈထၢမ်ဝႃႈ၊ “ၸဝ်ႈၽြႃးတီႈၶႃႈ၊ပဵၼ်ၵေႃႉလႂ်ၶႃႈ၊” ဝႃႈၼင်ႇၼႆလႄႈ၊-
ၸဝ်ႈယေႇသု၊ ၵေႃႈၶိုၼ်းလၢတ်ႈလႄႈဝႃႈ၊ “ၵေႃႉၼၼ်ႉပဵၼ်ၵေႃႉဢၼ်ၵဝ်တၵ်းဢဝ်ၶဝ်ႈမုၼ်းတႃႇဢူမ်ၼိုင်ႈၼႆႉၸုမ်ႇလႄႈပၼ်ၼၼ်ႉဢေႃႈ၊” ဝႃႈၼင်ႇၼႆမၼ်းၸဝ်ႈလၢတ်ႈသေယဝ်ႉ၊မၼ်းၸဝ်ႈဢဝ်ၶဝ်ႈမုၼ်းတႃႇဢူမ်ၼိုင်ႈၸုမ်ႇသေလႄႈယိုၼ်ႈပၼ် ယုတႃႉ၊ လုၵ်ႈၸၢႆး သိမုၼ်ႇဢိသၵႃႇရေႇဢုတ်ႈ၊ ဢေႃႈ။-
ယၢမ်းဢၼ် ယတႃႉ၊ ႁပ်ႉဢဝ်ၶဝ်ႈမုၼ်းၼၼ်ႉ၊မႃႇၼၢတ်ႈၶဝ်ႈၵႃႈၼႂ်းမၼ်းၵမ်းလဵဝ်ဢေႃႈ။ ၸဝ်ႈယေႇသု၊ လၢတ်ႈတီႈမၼ်းလႄႈဝႃႈ၊ “ဢၼ်မႂ်းဢၢင်ႈတၵ်းႁဵတ်းၼၼ်ႉႁဵတ်းၽႂ်းၽႂ်းတႃႉ၊” ဝႃႈၼင်ႇၼႆဢေႃႈ။-
ၼႂ်းၶဝ်ၸိူဝ်းဢၼ်မီးယူႇၵႃႈတီႈၽိူၼ်ၶဝ်ႈၼၼ်ႉၵေႃႉၼိုင်ႈၵေႃႈယင်းဢမ်ႇႁုပွင်ႇလွင်ႈဢၼ်မၼ်းၸဝ်ႈႁဵတ်းသင်လႄႈလၢတ်ႈဝႃႈၸိူဝ်ႉၼင်ႇၼၼ်တီႈမၼ်းၼၼ်ႉသေၵေႃႉသေၵူၼ်း။-
ၸွမ်းၼင်ႇ ယုတႃႉ၊ ပဵၼ်ၵေႃႉထိင်းထူင်ငိုၼ်းလႄႈ၊ၵမ်ႈၽွင်ႈထၢင်ႇဝႃႈ၊ ၸဝ်ႈယေႇသု၊ ၸႂ်ႉမၼ်းၵႂႃႇသိုဝ်ႉပုၼ်ႈဢၼ်ၶဝ်တၵ်းလူဝ်ႇၼႂ်းပွႆးၼၼ်ႉ၊ဢမ်ႇၼၼ်ၵေႃႈထၢင်ႇဝႃႈႁႂ်ႈမၼ်းၽေးၸွၼ်းမႅင်ႇပၼ်သေၸိူဝ်ႉသေပိူင်တီႈၵူၼ်းၽၢၼ်တင်းလၢႆၼၼ်ႉဢေႃႈ။-
ယုတႃႉ၊ ၵေႃႈႁပ်ႉဢဝ်ၶဝ်ႈမုၼ်းတႃႇဢူမ်ၼိုင်ႈၼၼ်ႉသေယဝ်ႉ၊ဢွၵ်ႇၵႂႃႇၵမ်းလဵဝ်ဢေႃႈ။ ၶိင်ႇၼၼ်ႉပဵၼ်ၶိင်ႇၵၢင်ၶမ်ႈဢေႃႈ။
ဝၢႆးသေ ယုတႃႉ၊ ဢွၵ်ႇၵႂႃႇယဝ်ႉၼၼ်ႉ၊ ၸဝ်ႈယေႇသု၊ လၢတ်ႈလႄႈဝႃႈ၊ “ၵမ်းၼႆႉမုၼ်ၽုင်း လုၵ်ႈၵူၼ်း၊ ထၢင်ႇသႃးမႃးယဝ်ႉ။ မုၼ်ၽုင်းၽြႃးပဵၼ်ၸဝ်ႈၵေႃႈထၢင်ႇသႃးမႃးၵွပ်ႈလူၺ်ႈ လုၵ်ႈၵူၼ်း၊ ၼၼ်ႉယဝ်ႉ။-
ၼင်ႇၼၼ်လႄႈပေႃးမုၼ်ၽုင်းၽြႃးပဵၼ်ၸဝ်ႈထၢင်ႇသႃးမႃးၵွပ်ႈလူၺ်ႈ လုၵ်ႈၵူၼ်း၊ ၸိုင်၊ၽြႃးပဵၼ်ၸဝ်ႈတၵ်းႁႂ်ႈမုၼ်ၽုင်း လုၵ်ႈၵူၼ်း၊ ထၢင်ႇသႃးမႃးၼႂ်းတူဝ်မၼ်းၸဝ်ႈဢေႃႈ။ တၵ်းႁႂ်ႈမုၼ်ၽုင်း လုၵ်ႈၵူၼ်း၊ ၼၼ်ႉထၢင်ႇသႃးမႃးၵမ်းလဵဝ်ဢေႃႈ။-
လုၵ်ႈလၢင်းၶဝ်႟။ ၵဝ်တေမီးယူႇလူၺ်ႈၵၼ်တင်းသူၵမ်းဢွၼ်ၼိုင်ႈၵူၺ်းယဝ်ႉ။ သူတေသွၵ်ႈႁႃၵဝ်ဢေႃႈ။ ၵူၺ်းၵႃႈ၊ၸိူဝ်ႉၼင်ႇဢၼ်ၵဝ်လၢတ်ႈတီႈၶုၼ်ဢႃႇၼႃႇၵူၼ်းမဵဝ်း ၵျူး၊ ၶဝ်လႄႈဝႃႈ၊ ‘တီႈဢၼ်ၵဝ်ၵႂႃႇၼၼ်ႉသူဢမ်ႇႁွတ်ႈထိုင်လႆႈ၊’ ဝႃႈၼႆၼၼ်ႉ၊ၵမ်းၼႆႉၵဝ်လၢတ်ႈတီႈသူဢေႃႈ။-
ၵဝ်ပၼ်ပိင်းၺၢပ်ႈတြႃးဢၼ်မႂ်ႇတီႈသူမိူဝ်ႈလဵဝ်ၼႆႉၸမ်ႉ၊သူၼင်ႇၵၼ်ၵေႃႉၼိုင်ႈလႄႈၵေႃႉၼိုင်ႈႁၵ်ႉၵၼ်တႃႉ။ ၸိူဝ်ႉၼင်ႇဢၼ်ၵဝ်ႁၵ်ႉသူၼၼ်ႉၵေႃႉၼိုင်ႈလႄႈၵေႃႉၼိုင်ႈႁၵ်ႉၵၼ်တႃႉ။-
ပေႃးသူႁၵ်ႉၵၼ်ၸိူဝ်ႉၼင်ႇၼႆၸိုင်၊ၵူၼ်းတင်းသဵင်ႈတင်းလူင်တၵ်းႁုဝႃႈသူပဵၼ်တပႄးၵဝ်ဢေႃႈ၊” ဝႃႈၼင်ႇၼႆဢေႃႈ။
သိမုၼ်ႇပေႇတရု၊ လဝ်ႈထၢမ်လႄႈဝႃႈ၊ “ၸဝ်ႈၽြႃးတီႈၶႃႈ၊ၸဝ်ႈႁဝ်းတေၵႂႃႇၵႃႈတီႈလႂ်ၶႃႈ၊” ဝႃႈၼင်ႇၼႆလႄႈ၊ မၼ်းၸဝ်ႈၶိုၼ်းလၢတ်ႈလႄႈဝႃႈ၊ “တီႈဢၼ်ၵဝ်ၵႂႃႇၼၼ်ႉတေႃႈလဵဝ်ၼႆႉမႂ်းဢမ်ႇၸွမ်းၵႂႃႇလႆႈ၊ၵမ်းလိုၼ်းၸင်ႇမႂ်းတၵ်းၸွမ်းမႃးဢေႃႈ၊” ဝႃႈၼင်ႇၼႆဢေႃႈ။
ပေႇတရု၊ သမ်ႉလဝ်ႈထၢမ်လႄႈဝႃႈ၊ “ၸဝ်ႈၽြႃးတီႈၶႃႈ၊ႁဵတ်းသင်လႄႈၵဝ်ၶႃႈဢမ်ႇၸွမ်းၸဝ်ႈႁဝ်းၵႂႃႇလႆႈတေႃႈလဵဝ်ၼႆႉၶႃႈ။ ၵဝ်ၶႃႈတၵ်းၸုၼ်ႉဢသၢၵ်ႈပုၼ်ႈၸဝ်ႈႁဝ်းတီႈၶႃႈဢေႃႈ၊” ဝႃႈၼင်ႇၼႆလႄႈ၊-
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ၸွင်ႇမႂ်းတၵ်းၸုၼ်ႉဢသၢၵ်ႈပုၼ်ႈၵဝ်ႁိုဝ်း။ ၵဝ်ဝႃႈတီႈၸိုဝ်ႈတီႈၸႂ်ႈမၼ်းတီႈမႂ်းၸမ်ႉ၊ၸူဝ်ႈဢၼ်ၵႆႇယင်းဢမ်ႇပႆႇၶၼ်ၼၼ်ႉမႂ်းတၵ်းထဵင်ပႅတ်ႈၵဝ်ထူၼ်ႈထိုင်သၢမ်ပွၵ်ႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ လၢတ်ႈတီႈၶဝ်လႄႈဝႃႈ၊ “ယႃႇႁႂ်ႈႁူဝ်ၸႂ်သူမီးတၢင်းဢၼ်မႆႈၸႂ်ၶီၸႂ်ၵႃႈသင်။ ယုမ်ႇမၢတ်ႈၽြႃးပဵၼ်ၸဝ်ႈတႃႉ။ တီႈၵဝ်ၼႆႉၵေႃႈယုမ်ႇမၢတ်ႈတႃႉ။-
ၼႂ်းႁိူၼ်းပေႃႈၸဝ်ႈၵဝ်ၼၼ်ႉမီးတီႈယူႇတီႈသဝ်းၼမ်ၼႃႇဢေႃႈ။ ပေႃးယင်းဢမ်ႇမီးတႄႉၸိုင်၊လွင်ႈဢၼ်ၵဝ်ၵႂႃႇႁႂ်ႈလႆႈမႄးႁႅၼ်းတီႈယူႇပုၼ်ႈသူၼၼ်ႉၵဝ်တၵ်းဢမ်ႇလၢတ်ႈတီႈသူ။-
ဝၢႆးသေၵဝ်ၵႂႃႇမႄးႁႅၼ်းပုၼ်ႈသူယဝ်ႉၸိုင်၊ၵဝ်တၵ်းသမ်ႉၶိုၼ်းမႃးဢဝ်သူၵႂႃႇတီႈၵဝ်ပုၼ်ႉႁႂ်ႈသူလႆႈယူႇၸွမ်းၵႃႈတီႈဢၼ်ၵဝ်ယူႇၼၼ်ႉဢေႃႈ။-
ၵဝ်ၵႂႃႇၵႃႈတီႈလႂ်ဝႃႈၼႆသူႁုယူႇဢေႃႈ။ သဵၼ်ႈတၢင်းဢၼ်ၵဝ်ၵႂႃႇၼၼ်ႉၵေႃႈသူႁုယူႇဢေႃႈ၊” ဝႃႈၼင်ႇၼႆဢေႃႈ။
ထူဝ်းမႃႉ၊ ၵေႃႈလဝ်ႈလၢတ်ႈလႄႈဝႃႈ၊ “ၸဝ်ႈၽြႃးတီႈၶႃႈ၊ၸဝ်ႈႁဝ်းတၵ်းၵႂႃႇၵႃႈတီႈလႂ်ႁဝ်းၶႃႈယင်းဢမ်ႇႁုလႄႈ၊ႁဝ်းၶႃႈတေႁဵတ်းၸိူဝ်ႉၼင်ႇႁိုဝ်ႁုသဵၼ်ႈတၢင်းမၼ်းလႆႈၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈတီႈမၼ်းလႄႈဝႃႈ၊ “ၵဝ်ၼႆႉပဵၼ်သဵၼ်ႈတၢင်းဢေႃႈ။ သမ်ႇမႃႇတြႃးၵေႃႈပဵၼ်ဢေႃႈ။ ဢသၢၵ်ႈၵေႃႈပဵၼ်ဢေႃႈ။ လိူဝ်သေတၢင်းဢၼ်ဢိင်ပိုင်ႈၵဝ်ၼၼ်ႉၽူႈလႂ်ဢမ်ႇႁွတ်ႈထိုင်ၵႃႈတီႈပေႃႈၸဝ်ႈလႆႈ။-
ပေႃးသူႁုၸၵ်းၵဝ်ယဝ်ႉၸိုင်၊ပေႃႈၸဝ်ႈၵဝ်ၼၼ်ႉၵေႃႈသူတၵ်းႁုၸၵ်းဢေႃႈ။ တႄႇဢဝ်မိူဝ်ႈလဵဝ်ၼႆႉၵႂႃႇသူလႆႈႁုလႆႈႁၼ်မၼ်းၸဝ်ႈယဝ်ႉဢေႃႈ၊” ဝႃႈၼင်ႇၼႆဢေႃႈ။
ၽိလိပ်ႉပု၊ ၵေႃႈလဝ်ႈလၢတ်ႈလႄႈဝႃႈ၊ “ၸဝ်ႈၽြႃးတီႈၶႃႈ၊ၼႄပၼ်ပေႃႈၸဝ်ႈၼၼ်ႉတီႈႁဝ်းၶႃႈသေၵမ်းၶႃႈ။ ပေႃးၼႄပၼ်ယဝ်ႉၸိုင်၊ႁဝ်းၶႃႈတေပျေႇၸႂ်ယဝ်ႉဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈတီႈမၼ်းလႄႈဝႃႈ၊ “ ၽိလိပ်ႉပု၊ ႟။ ၵဝ်မီးယူႇလူၺ်ႈၵၼ်တင်းသူႁိုင်ထၢၼ်ႇၼႆႉယဝ်ႉ။ မႂ်းယင်းဢမ်ႇပႆႇႁုၸၵ်းၵဝ်လူးၵွၼ်ႇႁိုဝ်း။ ၵေႃႉဢၼ်လႆႈႁၼ်ၵဝ်ၼၼ်ႉလႆႈႁၼ်ပေႃႈၸဝ်ႈယဝ်ႉဢေႃႈ။ မႂ်းသမ်ႉယင်းမီးလွင်ႈဢၼ်လၢတ်ႈဝႃႈ၊ ‘ၼႄပၼ်ပေႃႈၸဝ်ႈၼၼ်ႉတီႈႁဝ်းၶႃႈသေၵမ်း’ ဝႃႈၸိူဝ်ႉၼင်ႇၼႆၼင်ႇႁိုဝ်။-
လွင်ႈဢၼ်ၵဝ်မီးၼႂ်းပေႃႈၸဝ်ႈလႄႈပေႃႈၸဝ်ႈၵေႃႈမီးၼႂ်းၵဝ်ၼၼ်ႉ၊ ၽိလိပ်ႉပု၊ ႟။ မႂ်းဢမ်ႇယုမ်ႇႁိုဝ်း။ ၵႂၢမ်းဢၼ်ၵဝ်ႁေႃးလၢတ်ႈပၼ်သူၼႆႉၵဝ်ႁေႃးလၢတ်ႈၸွမ်းဢလူဝ်ႇတူဝ်ၸဝ်ႈၵဝ်ႇဢမ်ႇၸႂ်ႈ။ မၼ်းပဵၼ်ၸွမ်းဢလူဝ်ႇပေႃႈၸဝ်ႈဢၼ်မီးယူႇၵႃႈၼႂ်းၵဝ်ၼၼ်ႉပွင်ႁဵတ်းဢေႃႈ။-
လွင်ႈဢၼ်ဝႃႈ၊ၵဝ်မီးယူႇၼႂ်းပေႃႈၸဝ်ႈလႄႈပေႃႈၸဝ်ႈမီးၼႂ်းၵဝ်ၼၼ်ႉယုမ်ႇၵႂၢမ်းၵဝ်တႃႉ။ ပေႃးဢမ်ႇယုမ်ႇၵႂၢမ်းၵဝ်လႆႈၸိုင်၊ထွၵ်ႈလူၺ်ႈၵၢၼ်ဢၼ်ၵဝ်ႁဵတ်းၼၼ်ႉလႄႈယုမ်ႇမၢတ်ႈတႃႉ။-
ၵဝ်ဝႃႈတီႈၸိုဝ်ႈတီႈၸႂ်ႈမၼ်းတီႈသူၸမ်ႉ၊ၵေႃႉဢၼ်ယုမ်ႇမၢတ်ႈၵဝ်ၼႆႉၼၼ်ႉ မၼ်းတၵ်းႁဵတ်းၸွမ်းၵႃႈဢၼ်ၵဝ်ႁဵတ်းၸိူဝ်းၼၼ်ႉဢေႃႈ။ တၢင်းႁဵတ်းဢၼ်ယဵင်ႈၶႅၼ်းယႂ်ႇသေလွင်ႈတၢင်းၸိူဝ်းၼၼ်ႉၵေႃႈမၼ်းတၵ်းႁဵတ်းယူႇ၊ပိူဝ်ႈဝႃႈ၊ၵဝ်ၵႂႃႇၸူးပေႃႈၸဝ်ႈၵဝ်ၼၼ်ႉဢေႃႈ။-
ၵႃႈၼင်ႇဢၼ်သူလဝ်ႈယွၼ်းတီႈၼႂ်းၸိုဝ်ႈသဵင်ၵဝ်ၼၼ်ႉ၊ၵဝ်တၵ်းႁဵတ်းပၼ်ပုၼ်ႈသူ၊လွင်ႈၼင်ႇႁိုဝ်မုၼ်ၽုင်းပေႃႈၸဝ်ႈၼၼ်ႉ၊တၵ်းလႆႈထၢင်ႇသႃးမႃးၼႂ်း လုၵ်ႈၸဝ်ႈ၊ ဢေႃႈ။-
ပေႃးသူလဝ်ႈယွၼ်းသေၸိူဝ်ႉသေပိူင်ၼႂ်းၸိုဝ်ႈသဵင်ၵဝ်ၸိုင်၊ၵဝ်တၵ်းႁဵတ်းပၼ်ဢေႃႈ။
“ပေႃးသူႁၵ်ႉၵဝ်ၸိုင်၊သူတၵ်းတေႁဵတ်းၸွမ်းပိင်းၺၢပ်ႈတြႃးၵဝ်တင်းလၢႆဢေႃႈ။-
ၵဝ်ၵေႃႈတၵ်းလဝ်ႈယွၼ်းတီႈပေႃႈၸဝ်ႈလႄႈ၊မၼ်းၸဝ်ႈသမ်ႉတၵ်းဢဝ်ပၼ်ၸဝ်ႈဢၼ်ၸွႆႈထႅမ်တၢင်ႇပႃး ႁႂ်ႈမၼ်းၸဝ်ႈလႆႈမီးယူႇလူၺ်ႈၵၼ်တင်းသူတႃႇသေႇဢမ်ႇထၢတ်ႇဢေႃႈ။-
ၸဝ်ႈၼၼ်ႉပဵၼ်ဝိၺိၺ်ႇၸဝ်ႈဢၼ်ၼႄပၼ်သမ်ႇမႃႇတြႃးဢေႃႈ။ ပိူဝ်ႈဢၼ်ၵူၼ်းလေႃးၵီႇၼႆႉဢမ်ႇႁုဢမ်ႇႁၼ်မၼ်းၸဝ်ႈလႄႈဢမ်ႇၶၢမ်ႇဢမ်ႇဢဝ်လႆႈ။ ပိူဝ်ႈဝႃႈဝိၺိၺ်ႇၸဝ်ႈၼၼ်ႉမီးယူႇလူၺ်ႈၵၼ်တင်းသူလႄႈသမ်ႉတၵ်းမီးၼႂ်းသူၼၼ်ႉၸိုင်၊သူၸမ်ႉ၊ႁုၸၵ်းမၼ်းၸဝ်ႈဢေႃႈ။
“ၵဝ်တၵ်းဢမ်ႇပႅတ်ႈသူၵႂႃႇႁႂ်ႈသူလႆႈပဵၼ်လုၵ်ႈဢွၼ်ႇၽၢၼ်ပေႃႈၽၢၼ်မႄႈၼၼ်ႉ။ ၵဝ်တၵ်းသမ်ႉၶိုၼ်းမႃးတီႈသူလူးၵွၼ်ႇဢေႃႈ။-
ဢမ်ႇႁိုင်ဢမ်ႇၼၢၼ်းၵူၼ်းလေႃးၵႃႉၼႆႉတၵ်းဢမ်ႇလႆႈႁၼ်ၵဝ်လႃးလႃးယဝ်ႉ။ သူၸမ်ႉ၊တေလႆႈႁၼ်ၵဝ်ပိူဝ်ႈဢၼ်ၵဝ်ဢသၢၵ်ႈလိပ်းယူႇလႄႈ၊သူၵေႃႈတေဢသၢၵ်ႈလိပ်းၸွမ်းယူႇၼၼ်ႉဢေႃႈ။-
ၼႂ်းဝၼ်းၼၼ်ႉသူတေလႆႈႁုလွင်ႈဢၼ်ၵဝ်မီးယူႇၼႂ်းပေႃႈၸဝ်ႈၵဝ်၊သူမီးယူႇၵႃႈၼႂ်းၵဝ်လႄႈၵဝ်ၵေႃႈမီးယူႇၼႂ်းသူၼၼ်ႉဢေႃႈ။
“ၵေႃႉဢၼ်လႆႈပိင်းၺၢပ်ႈတြႃးၵဝ်တင်းလၢႆလႄႈပႂ်ႉၸွမ်းၼၼ်ႉ၊ၵေႃႉၼၼ်ႉပဵၼ်ၵေႃႉဢၼ်ႁၵ်ႉၵဝ်ဢေႃႈ။ ၵေႃႉဢၼ်ႁၵ်ႉၵဝ်ၼၼ်ႉပေႃႈၸဝ်ႈၵဝ်တၵ်းႁၵ်ႉမၼ်းဢေႃႈ။ ၵဝ်ၵေႃႈတၵ်းႁၵ်ႉမၼ်းလႄႈၼႄပျႃးတူဝ်ၵဝ်ထၢင်ႇသႃးတီႈမၼ်းဢေႃႈ၊” ဝႃႈၼင်ႇၼႆဢေႃႈ။
ယုတႃႉ၊ (ၵေႃႉဢၼ်ဢမ်ႇၸႂ်ႈ ယုတႃႉဢိသၵႃႇရေႇဢုတ်ႈ၊ ) ၼၼ်ႉလဝ်ႈလၢတ်ႈလႄႈဝႃႈ၊ “ၸဝ်ႈၽြႃးတီႈၶႃႈ၊ၵွပ်ႈသင်လႄႈၸဝ်ႈႁဝ်းတၵ်းၼႄပျႃးတူဝ်ၸဝ်ႈၵဝ်ႇတီႈႁဝ်းၶႃႈလႄႈ၊သမ်ႉဢမ်ႇၼႄပျႃးတီႈၵူၼ်းလေႃးၵီႇတင်းလၢႆၼၼ်ႉၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈတီႈမၼ်းလႄႈဝႃႈ၊ “ၽူႈလႂ်သေဢမ်ႇဝႃႈ၊ၵေႃႉဢၼ်ႁၵ်ႉၵဝ်ၼၼ်ႉတၵ်းထွမ်ႇဢဝ်ၵႂၢမ်းၵဝ်ဢေႃႈ။ ပေႃႈၸဝ်ႈၵဝ်ၵေႃႈတၵ်းႁၵ်ႉၵေႃႉၼၼ်ႉဢေႃႈ။ ႁဝ်းသမ်ႉတေမႃးတီႈမၼ်းသေလႄႈႁဵတ်းတီႈယူႇတီႈသဝ်းလူၺ်ႈၵၼ်တင်းမၼ်းဢေႃႈ။-
ၵေႃႉဢၼ်ဢမ်ႇႁၵ်ႉၵဝ်ၼၼ်ႉ ဢမ်ႇထွမ်ႇဢဝ်ၵႂၢမ်းၵဝ်။ ၵႂၢမ်းဢၼ်သူလႆႈငိၼ်းၼႆႉ ပဵၼ်ၵႂၢမ်းၵဝ်ဢမ်ႇၸႂ်ႈ။ ပဵၼ်ၵႂၢမ်းပေႃႈၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉဢေႃႈ။
“လွင်ႈတၢင်းၸိူဝ်းၼႆႉ ၵဝ်လၢတ်ႈသူဝႆႉၸူဝ်ႈဢၼ်ၵဝ်မီးယူႇလူၺ်ႈၵၼ်တင်းသူၼႆႉယဝ်ႉ။-
ၸဝ်ႈဢၼ်ၸွႆႈထႅမ်ဢၼ်ဝႃႈဝိၺိၺ်ႇမူတ်းၸၢင်ႇၸဝ်ႈ၊ဢၼ်ပေႃႈၸဝ်ႈတၵ်းပွႆႇၸႂ်ႉမႃးၼႂ်းၸိုဝ်ႈသဵင်ၵဝ်ၼၼ်ႉ၊တၵ်းသင်ႇသွၼ်ၵႃႈမီးတင်းသဵင်ႈပၼ်သူ၊ႁႂ်ႈသူၶုၵ်းၸႂ်လႆႈလွင်ႈတၢင်းၸိူဝ်းဢၼ်ၵဝ်လၢတ်ႈဝႆႉယဝ်ႉတင်းသဵင်ႈတင်းမူတ်းၼၼ်ႉဢေႃႈ။
“ၵဝ်ဢဝ်တၢင်းၼိမ်ဝႆႉတီႈသူဢေႃႈ။ ၵဝ်ဢဝ်တၢင်းၼိမ်ၵဝ်ပၼ်တီႈသူဝႆႉဢေႃႈ။ ၵဝ်ပၼ်ၸိူဝ်ႉၼင်ႇၵူၼ်းလေႃးၵီႇပၼ်ၼၼ်ႉဢမ်ႇၸႂ်ႈ။ ယႃႇပေႁႂ်ႈႁူဝ်ၸႂ်သူလႆႈယၢပ်ႇၸႂ်ယုင်ႈၸႂ်လႄႈလႆႈသၼ်ႇဝႆၵူဝ်ႁႄ။-
သူလႆႈငိၼ်းၵႂၢမ်းဢၼ်ၵဝ်ဝႃႈ၊ ‘ၵဝ်တၵ်းၵႂႃႇလႄႈသမ်ႉတၵ်းၶိုၼ်းမႃးတီႈသူ၊’ ဝႃႈၼႆယဝ်ႉ။ ပေႃးသူႁၵ်ႉၵဝ်ၸိုင်၊သူတၵ်းသိူဝ်းပျေႃႇလူၺ်ႈလွင်ႈဢၼ်ၵဝ်တၵ်းၵႂႃႇၵႃႈတီႈပေႃႈၸဝ်ႈၼၼ်ႉ၊ပိူဝ်ႈဢၼ်ပေႃႈၸဝ်ႈၵဝ်ယဵင်ႈၶႅၼ်းယႂ်ႇမျၢတ်ႈၼႃႇသေၵဝ်ဢေႃႈ။-
ၸူဝ်ႈဢၼ်လွင်ႈတၢင်းၸိူဝ်းၼႆႉဢမ်ႇပႆႇပဵၼ်ၸိုင်၊ၵဝ်လၢတ်ႈဝႆႉတီႈသူမိူဝ်ႈလဵဝ်ၼႆႉယဝ်ႉ။ ပိူဝ်ႈၼႆလႄႈမိူဝ်ႈဢၼ်လွင်ႈတၢင်းၸိူဝ်းၼႆႉပဵၼ်ၸွမ်းမႃးၸိုင်၊သူတၵ်းယုမ်ႇဢေႃႈ။-
ၵွပ်ႈပိူဝ်ႈဝႃႈၶုၼ်ဢၼ်ဢုပ်ႉပိူင်ႇလေႃးၵႃႉၼႆႉၼၼ်ႉမႃးယူႇလႄႈ၊တႄႇၸႃႉဢဝ်မိူဝ်ႈလဵဝ်ၼႆႉၵႂႃႇၵဝ်တၵ်းဢမ်ႇလၢတ်ႈၼမ်ၼမ်တေႃႇသူယဝ်ႉ။ ၼႂ်းဝႃႈၼၼ်သေၵေႃႈမၼ်းၼၼ်ႉဢမ်ႇမီးဢႃႇၼႃႇတၼ်းၶူဝ်းၵႃႈၼိူဝ်ၵဝ်ၵႃႈသင်။-
ၵူၺ်းၵႃႈ၊ၵဝ်ႁဵတ်းၸွမ်းၵႃႈၼင်ႇဢၼ်ပေႃႈၸဝ်ႈသင်ႇလၢတ်ႈဝႆႉၼၼ်ႉ၊ပုၼ်ႈလွင်ႈၼင်ႇႁိုဝ်ၵူၼ်းလေႃးၵီႇတၵ်းႁုလွင်ႈဢၼ်ၵဝ်ႁၵ်ႉပေႃႈၸဝ်ႈၼၼ်ႉဢေႃႈ။ “လုၵ်ႉတႃႉ။ ဢွၼ်ၵၼ်ဢွၵ်ႇသေၵႃႈတီႈၼႆႈၵႂႃႇတႃႉႁဝ်း။
“ၵဝ်ပဵၼ်ၶိူဝ်းမၢၵ်ႇၸပိတ်ႉဢၼ်ၸႅတ်ႈလႄႈပေႃႈၸဝ်ႈၵဝ်ၼၼ်ႉ၊ပဵၼ်ၵေႃႉဢၼ်ႁဵတ်းသူၼ်မၢၵ်ႇၼၼ်ႉဢေႃႈ။-
မၼ်းၸဝ်ႈၽၼ်းပႅတ်ႈၵူႈၵိင်ႇၵူႈၶႃႈဢၼ်ဢမ်ႇၸၢင်ႈမၢၵ်ႇၼၼ်ႉသေယဝ်ႉ၊သမ်ႉတွၼ်ပႅတ်ႈၵူႈၵိင်ႇၵူႈၶႃႈဢၼ်ၸၢင်ႈမၢၵ်ႇၼၼ်ႉ၊ႁႂ်ႈမၼ်းပၢင်ႇလီႁႂ်ႈယိင်းၶႅၼ်းမၢၵ်ႇမၢၵ်ႇမႃးၼမ်ၼမ်ဢေႃႈ။-
သူလႆႈၶၢမ်ႇတၢင်းဢၼ်ႁဵတ်းႁႂ်ႈမူတ်းသႂ်လီ ၵွပ်ႈပိူဝ်ႈၵႂၢမ်းဢၼ်ၵဝ်ႁေႃးလၢတ်ႈၼႆႉယဝ်ႉဢေႃႈ။-
တႄႇယူႇၼႂ်းၵဝ်တႃႉ။ ၵဝ်ၵေႃႈတၵ်းတႄႇယူႇၼႂ်းသူဢေႃႈ။ ၸိူဝ်ႉၼင်ႇဢၼ်ပေႃးၵိင်ႇမၢၵ်ႇၸပိတ်ႉဢမ်ႇၸပ်းယူႇၼႂ်းၶိူဝ်းမၼ်းၸိုင်၊မၼ်းဢမ်ႇၸၢင်ႈမၢၵ်ႇမၢၵ်ႇမၼ်းလႆႈၵူၺ်းမၼ်းၼၼ်ႉ၊သူၵေႃႈပေႃးဢမ်ႇတႄႇယူႇၼႂ်းၵဝ်ၸိုင်၊သူဢမ်ႇၸၢင်ႈမၢၵ်ႇမၢၵ်ႇလႆႈ။
“ၵဝ်ပဵၼ်ၶိူဝ်းမၢၵ်ႇၸပိတ်ႉလႄႈ၊သူပဵၼ်ၵိင်ႇမၼ်းၶႃႈမၼ်းဢေႃႈ။ ၵေႃႉဢၼ်တႄႇယူႇၵႃႈၼႂ်းၵဝ်လႄႈၵဝ်ၵေႃႈတႄႇယူႇၵႃႈၼႂ်းမၼ်းၼၼ်ႉမၼ်းပဵၼ်ၵေႃႉဢၼ်ၸၢင်ႈမၢၵ်ႇမၢၵ်ႇမႃးၼမ်ၼႃႇဢေႃႈ။ ပိူဝ်ႈဝႃႈ၊ပေႃးသူၽၢတ်ႇၵၼ်တင်းၵဝ်ၸိုင်၊သူဢမ်ႇႁဵတ်းၵႃႈသင်လႆႈလႃးလႃး။-
ၽူႈလႂ်သေဢမ်ႇဝႃႈ၊ပေႃးယင်းဢမ်ႇတႄႇယူႇၼႂ်းၵဝ်ၸိုင်၊လႆႈၶၢမ်ႇတၢင်းဢၼ်ထိမ်ႈဢွၵ်ႇပႅတ်ႈၸိူဝ်ႉၼင်ႇၵိင်ႇၼင်ႇၶႃႈလႄႈႁဵဝ်ႇႁႅင်ႈၵႂႃႇဢေႃႈ။ ပိူၼ်ႈမႃးၵဵပ်းသိမ်းဢဝ်ၵိင်ႇၶႃႈၸိူဝ်းၼၼ်ႉလႄႈတုတ်ႇပႅတ်ႈၵႃႈၼႂ်းၽႆးသေဢေႃႈ။-
ပေႃးသူတႄႇယူႇၼႂ်းၵဝ်လႄႈၵႂၢမ်းတြႃးၵဝ်ၵေႃႈတႄႇယူႇၼႂ်းသူၸိုင်၊ၵႃႈၼင်ႇဢၼ်သူမီးဢလူဝ်ႇလႄႈယွၼ်းသေၸိူဝ်ႉသေပိူင်ၼၼ်ႉသူတၵ်းလႆႈဢေႃႈ။-
မုၼ်ၽုင်းပေႃႈၸဝ်ႈၵဝ်လႆႈထၢင်ႇသႃးမႃးၵွပ်ႈပိူဝ်ႈသူမၢၵ်ႇမၢၵ်ႇၼမ်ၼႃႇၼၼ်ႉလႄႈ၊သမ်ႉလႆႈႁုဝႃႈသူပဵၼ်တပႄးၵဝ်ဢေႃႈ။-
ၸိူဝ်ႉၼင်ႇဢၼ်ပေႃႈၸဝ်ႈႁၵ်ႉၵဝ်ၼၼ်ႉၵဝ်ၵေႃႈႁၵ်ႉသူဢေႃႈ။ တႄႇယူႇၼႂ်းတၢင်းႁၵ်ႉမႅတ်ႈတႃႇၵဝ်တႃႉ။-
ပေႃးသူပႂ်ႉၸွမ်းပိင်းၺၢပ်ႈတြႃးၵဝ်တင်းလၢႆၸိုင်၊သူတၵ်းတႄႇယူႇၼႂ်းတၢင်းႁၵ်ႉမႅတ်ႈတႃႇၵဝ်မိူၼ်ၸိူဝ်ႉၼင်ႇဢၼ်ၵဝ်ပႂ်ႉၸွမ်းပိင်းၺၢပ်ႈတြႃးပေႃႈၸဝ်ႈၵဝ်တင်းလၢႆလႄႈတႄႇယူႇၼႂ်းတၢင်းႁၵ်ႉမႅတ်ႈတႃႇမၼ်းၸဝ်ႈၼၼ်ႉဢေႃႈ။
“လွင်ႈတၢင်းၸိူဝ်းၼႆႉၵဝ်ႁေႃးလၢတ်ႈတီႈသူ ႁႂ်ႈတၢင်းဢၼ်သိူဝ်းပျေႃႇၵဝ်တၵ်းမီးယူႇၵႃႈၼႂ်းသူ၊ဢိၵ်ႇတင်းႁႂ်ႈတၢင်းဢၼ်သိူဝ်းပျေႃႇသူတၵ်းပျေႉၸုမ်ႇဢေႃႈ။-
ဢၼ်ၵဝ်ပိင်းၺၢပ်ႈသူၸမ်ႉ၊သူၵေႃႉၼိုင်ႈလႄႈၵေႃႉၼိုင်ႈႁၵ်ႉၵၼ်မိူၼ်ၸိူဝ်ႉၼင်ႇဢၼ်ၵဝ်ႁၵ်ႉသူၼၼ်ႉတႃႉ။-
ဢမ်ႇမီးၽူႈလႂ်သေၵေႃႉသေၵူၼ်းမီးတၢင်းႁၵ်ႉမႅတ်ႈတႃႇဢၼ်ယဵင်ႈၶႅၼ်းယႂ်ႇၼႃႇသေမႅတ်ႈတႃႇဢၼ်ၵူၼ်းၵေႃႉၼိုင်ႈၶၢမ်ႇၸုၼ်ႉဢသၢၵ်ႈတူဝ်ၸဝ်ႈၵဝ်ႇပုၼ်ႈၵေႃႉသႄႈမၼ်းၼၼ်ႉ။-
ပေႃးသူၵမ်ၵျၢင်ႉၸွမ်းၵႃႈၼင်ႇဢၼ်ၵဝ်ပိင်းၺၢပ်ႈဝႆႉၼၼ်ႉၸိုင်၊သူပဵၼ်ၵေႃႉသႄႈၵဝ်ဢေႃႈ။-
တႄႇၸႃႉဢဝ်မိူဝ်ႈလဵဝ်ၼႆႉၵႂႃႇၵဝ်ဢမ်ႇႁွင်ႉသူဝႃႈ၊ၶႃႈယဝ်ႉ။ ၶႃႈဢၼ်ဝႃႈၼၼ်ႉဢမ်ႇလႆႈႁုၸွမ်းတၢင်းႁဵတ်းၸဝ်ႈမၼ်း။ ၵဝ်ႁွင်ႉသူဝႃႈ၊ၵေႃႉသႄႈဢေႃႈ။ ၵွပ်ႈသင်လႄႈဝႃႈၸမ်ႉ၊ၵႃႈဢၼ်ၵဝ်လႆႈငိၼ်းတီႈပေႃႈၸဝ်ႈၵဝ်တင်းသဵင်ႈတင်းမူတ်းၼၼ်ႉၵဝ်ၼႄပျႃးတီႈသူဢေႃႈ။-
သူလိူၵ်ႈၵဵပ်းဢဝ်ၵဝ်ဢမ်ႇၸႂ်ႈ။ ၵဝ်လိူၵ်ႈၵဵပ်းဢဝ်သူလႄႈၶၢၼ်းဝႆႉႁႂ်ႈသူမၢၵ်ႇမၢၵ်ႇမႃး၊ႁႂ်ႈမၢၵ်ႇသူၸိူဝ်းၼၼ်ႉၸပ်းမၼ်ႈယူႇ၊ဢိၵ်ႇတင်းႁႂ်ႈသူလႆႈၵူႈၸိူဝ်ႉၵူႈပိူင်ၵႃႈဢၼ်သူလဝ်ႈယွၼ်းၵႃႈတီႈပေႃႈၸဝ်ႈၵႃႈၼႂ်းၸိုဝ်ႈသဵင်ၵဝ်ၼၼ်ႉဢေႃႈ။-
ၼႆႉၸမ်ႉ၊ပဵၼ်ပိင်းၺၢပ်ႈတြႃးဢၼ်ၵဝ်ပၼ်တီႈသူႁႂ်ႈသူၵေႃႉၼိုင်ႈလႄႈၵေႃႉၼိုင်ႈႁၵ်ႉၵၼ်ဢေႃႈ။
“ပေႃးၵူၼ်းလေႃးၵီႇၼႆႉၸင်းသူၸိုင်၊ဝႃႈဝႆႉဝႃႈၶဝ်သမ်ႉပေႃးလႆႈၸင်းၵဝ်ယဝ်ႉဢွၼ်တၢင်းဢၼ်ဢမ်ႇပႆႇၸင်းသူၼၼ်ႉဢေႃႈ။-
ပေႃးသူပဵၼ်ၵူၼ်းလေႃးၵီႇၼႆႉၸိုင်၊ၵူၼ်းလေႃးၵီႇၼႆႉၵေႃႈတၵ်းႁၵ်ႉသူၸိူဝ်ႉၼင်ႇပဵၼ်ၶွင်မၼ်းဢေႃႈ။ ပိူဝ်ႈဢၼ်သူဢမ်ႇပဵၼ်ၵူၼ်းလေႃးၵီႇ၊ပဵၼ်ၵေႃႉဢၼ်ၵဝ်လိူၵ်ႈၵဵပ်းဢဝ်ၵႃႈၼႂ်းၵူၼ်းလေႃးၵီႇၼႆႉလႄႈၶဝ်ၸင်းသူဢေႃႈ။-
ၶုၵ်းၸႂ်လႆႈၵႂၢမ်းဢၼ်ၵဝ်လၢတ်ႈဝႆႉလႄႈဝႃႈ၊ ‘ၶႃႈဢမ်ႇယႂ်ႇမျၢတ်ႈၼႃႇသေၸဝ်ႈမၼ်း၊’ ဝႃႈၼင်ႇၼႆၼၼ်ႉတႃႉ။ ပေႃးၶဝ်ၼိၵ်ႈၸၢၵ်ႈငႅၼ်းသႄးၵဝ်ၸိုင်၊ၶဝ်တၵ်းၼိၵ်ႈၸၢၵ်ႈငႅၼ်းသႄးသူဢေႃႈ။ ပေႃးၶဝ်ထွမ်ႇဢဝ်ၵႂၢမ်းၵဝ်ၸိုင်၊ၶဝ်တၵ်းထွမ်ႇဢဝ်ၵႂၢမ်းသူၼင်ႇၵဝ်ႇဢေႃႈ။-
ပိူဝ်ႈဢၼ်ၶဝ်ဢမ်ႇႁုၸၵ်းၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉလႄႈၶဝ်တၵ်းႁဵတ်းလွင်ႈတၢင်းၸိူဝ်းၼႆႉတင်းသဵင်ႈတင်းမူတ်းတီႈသူၵွပ်ႈပိူဝ်ႈသူပဵၼ်ၵူၼ်းၵဝ်ၼၼ်ႉဢေႃႈ။-
ပေႃးၵဝ်ယင်းဢမ်ႇမႃးလႄႈႁေႃးလၢတ်ႈတီႈၶဝ်ၸိုင်၊ၶဝ်ၼၼ်ႉဢမ်ႇမီးဢပျတ်ႈ။ တေႃႈလဵဝ်ၼႆႉၸမ်ႉ၊ၶဝ်ဢမ်ႇႁူမ်ႇဢပျတ်ႈၶဝ်ဝႆႉလႆႈ။-
ၵေႃႉဢၼ်ၸင်းၵဝ်ၼၼ်ႉ ၸင်းပႃးပေႃႈၸဝ်ႈၵဝ်ၼင်ႇၵဝ်ႇဢေႃႈ။-
ပေႃးၵဝ်ယင်းဢမ်ႇႁဵတ်းလွင်ႈတၢင်းဢၼ်ပိူၼ်ႈဢမ်ႇပႆႇတွၼ်ႉႁဵတ်းသေပွၵ်ႈၼၼ်ႉၵႃႈၼႂ်းၶဝ်ၸိုင်၊ၶဝ်ၼၼ်ႉယင်းတၵ်းဢမ်ႇမီးဢပျတ်ႈ။ တေႃႈလဵဝ်ၼႆႉၸမ်ႉ၊ၶဝ်လႆႈႁၼ်ယဝ်ႉလႄႈ၊ၸင်းၸႃႉၸဵမ်ၵဝ်ဢိၵ်ႇတင်းပေႃႈၸဝ်ႈၵဝ်ယဝ်ႉ။-
ၵူၺ်းၵႃႈ၊လွင်ႈတၢင်းဢၼ်ပဵၼ်မႃးၸိူဝ်ႉၼင်ႇၼႆၼႆႉ၊မၼ်းတၵ်းလႆႈပဵၼ်ၸွမ်းမႅၼ်ႈၼင်ႇဢၼ်တႅမ်ႈဝႆႉၵႃႈၼႂ်းၵျၢမ်းပိင်းၺၢပ်ႈတြႃးၶဝ်ဢၼ်ဝႃႈ၊ ‘ယင်းဢမ်ႇမီးလွင်ႈၵႃႈသင်လႄႈၶဝ်ၸင်းၵဝ်ဢေႃႈ၊’ ဝႃႈၼင်ႇၼႆၼၼ်ႉဢေႃႈ။
“ၼႂ်းဝႃႈၼၼ်သေၵေႃႈ၊ၸဝ်ႈဢၼ်ၸွႆႈထႅမ်ဢၼ်တၵ်းပွႆႇၸႂ်ႉမၼ်းလုၵ်ႉၵႃႈတီႈပေႃႈၸဝ်ႈမႃးၼၼ်ႉတၵ်းၶၢမ်ႇသၢၵ်ႈသေႇလွင်ႈၵဝ်ဢေႃႈ။ မၼ်းၼၼ်ႉပဵၼ်ၸဝ်ႈဝိၺိၺ်ႇဢၼ်လုၵ်ႉသေၵႃႈတီႈပေႃႈၸဝ်ႈႁွတ်ႈမႃးလႄႈၼႄပျႃးသမ်ႇမႃႇတြႃးဢေႃႈ။-
သူၵေႃႈပိူဝ်ႈဢၼ်မီးယူႇလူၺ်ႈၵၼ်တင်းၵဝ်ၸဵမ်ဢၼ်မိူဝ်ႈတႄႇၸႃႉမႃးၼၼ်ႉလႄႈသူတၵ်းပဵၼ်သၢၵ်ႈသေႇၽၢႆႇၵဝ်ဢေႃႈ။
“ၵဝ်ႁေႃးလၢတ်ႈၵႂၢမ်းၼႆႉပုၼ်ႈလွင်ႈၼင်ႇႁိုဝ်တၢင်းယုမ်ႇမၢတ်ႈသူတၵ်းဢမ်ႇလုၵႂႃႇဢေႃႈ။-
ၶဝ်တၵ်းပႄႇပႅတ်ႈသူဢွၵ်ႇသေၵႃႈတီႈၸရွပ်ႈႁေႃးတြႃးတင်းလၢႆဢေႃႈ။ မိူဝ်ႈဢၼ်သေၵေႃႉသေၵူၼ်းဢဝ်သူတၢႆၼၼ်ႉ၊မၼ်းယင်းတၵ်းဝႃႈ၊ ‘ၵဝ်ႁဵတ်းဝၢတ်ႈၽြႃးပဵၼ်ၸဝ်ႈဢေႃႈ၊’ ဝႃႈၼႆၶိင်ႇၵႃႇလႃႉမဵဝ်းၼၼ်ႉတၵ်းႁွတ်ႈမႃးဢေႃႈ။-
ၵွပ်ႈပိူဝ်ႈဝႃႈ၊ၶဝ်ဢမ်ႇႁုၸၵ်းပေႃႈၸဝ်ႈဢိၵ်ႇတင်းၵဝ်လႄႈၶဝ်တၵ်းႁဵတ်းၸိူဝ်ႉၼင်ႇၼၼ်ဢေႃႈ။-
ၵဝ်လၢတ်ႈလွင်ႈတၢင်းၸိူဝ်းၼႆႉဝႆႉ၊ပုၼ်ႈလွင်ႈၼင်ႇႁိုဝ်ၼႂ်းမိူဝ်ႈဢၼ်ၶိင်ႇၵႃႇလႃႉပုၼ်ႈၶဝ်တၵ်းႁဵတ်းလွင်ႈတၢင်းၸိူဝ်းၼၼ်ႉႁွတ်ႈမႃးၼၼ်ႉၸိုင်၊သူတၵ်းၶုၵ်းၸႂ်လႆႈၵႂၢမ်းဢၼ်ၵဝ်လၢတ်ႈဝႆႉလွင်ႈၶဝ်ၼၼ်ႉဢေႃႈ။ “ပိူဝ်ႈဢၼ်ၵဝ်မီးယူႇလူၺ်ႈၵၼ်တင်းသူယူႇလႄႈ၊ၵဝ်ဢမ်ႇပႆႇတွၼ်ႉလၢတ်ႈလွင်ႈၸိူဝ်းၼႆႉတီႈသူ ၸဵမ်မိူဝ်ႈတႄႇၸႃႉႁူဝ်ပိုင်းၼၼ်ႉသေပွၵ်ႈ။-
တေႃႈလဵဝ်ၼႆႉၸိုင်၊ၵဝ်တၵ်းလႆႈၵႂႃႇၵႃႈတီႈၸဝ်ႈဢၼ်ပွႆႇၸႂ်ႉၵဝ်မႃးပုၼ်ႉလႄႈ၊ၵဝ်တၵ်းၵႂႃႇၵႃႈတီႈလႂ်၊ဝႃႈၼႆသူယင်းဢမ်ႇလဝ်ႈထၢမ်သေၵေႃႉသေၵူၼ်း။-
ၵမ်းၼႆႉ၊ၵဝ်လၢတ်ႈဝႃႈၸိူဝ်ႉၼင်ႇၼႆလႄႈသူၸႂ်လဵၵ်ႉၼႃႇယဝ်ႉဢေႃႈ။-
ၵဝ်ဝႃႈတီႈၸိုဝ်ႈၸႂ်ႈမၼ်းတီႈသူၸမ်ႉ၊ပေႃးၵဝ်ၵႂႃႇၸိုင်တၵ်းယဵင်ႈၶႅၼ်းပဵၼ်ဢၵျူဝ်းပုၼ်ႈသူဢေႃႈ။ လွင်ႈမၼ်းၸမ်ႉ၊ပေႃးၵဝ်ဢမ်ႇၵႂႃႇၸိုင်၊ၸဝ်ႈဢၼ်ၸွႆႈထႅမ်ၼၼ်ႉတေဢမ်ႇမႃးတီႈသူ။ ပေႃးၵဝ်ၵႂႃႇၸိုင်၊ၵဝ်တၵ်းပွႆႇၸႂ်ႉမၼ်းၸဝ်ႈမႃးၵႃႈတီႈသူဢေႃႈ။-
မိူဝ်ႈဢၼ်မၼ်းၸဝ်ႈႁွတ်ႈမႃးၸိုင်၊မၼ်းတၵ်းၽုၺ်ႇၼႄလွင်ႈဢၼ်ၵူၼ်းလေႃးၵီႇႁုပွင်ႇၽိတ်းလွင်ႈတုၸရိူၵ်ႈဢပျတ်ႈ၊ဢိၵ်ႇတင်းလွင်ႈတၢင်းဢၼ်သိုဝ်ႈတေႃႇ၊တင်းလွင်ႈတၢင်းဢၼ်ၽြႃးပဵၼ်ၸဝ်ႈၸီႇယၢင်ႇတြႃးၼၼ်ႉလႅင်းလႅင်းဢေႃႈ။-
မၼ်းတၵ်းၽုၺ်ႇၼႄလွင်ႈတၢင်းၽိတ်းၶဝ်ဢၼ်ၸၢပ်ႈသႅင်ႇၵၼ်တင်းတုၸရိူၵ်ႈဢပျတ်ႈၸမ်ႉ၊ပဵၼ်ၵွပ်ႈပိူဝ်ႈၶဝ်ဢမ်ႇယုမ်ႇမၢတ်ႈၵဝ်ယဝ်ႉ။-
ဢၼ်ၸၢပ်ႈသႅင်ႇၵၼ်တင်းတၢင်းဢၼ်သိုဝ်ႈတေႃႇၽြႃးပဵၼ်ၸဝ်ႈၸမ်ႉ၊ၵဝ်တၵ်းၵႂႃႇၵႃႈတီႈပေႃႈၸဝ်ႈပုၼ်ႉသေလႄႈ၊ၵမ်းလိုၼ်းသူတၵ်းဢမ်ႇလႆႈထူပ်းႁၼ်ၵဝ်ထႅင်ႈယဝ်ႉ။-
ဢၼ်ၸၢပ်ႈသႅင်ႇၵၼ်တင်းတၢင်းဢၼ်မၼ်းၸဝ်ႈတႅပ်းတတ်းတြႃးၼၼ်ႉ၊သမ်ႉပဵၼ်ၵွပ်ႈပိူဝ်ႈၶုၼ်ဢၼ်လႆႈဢုပ်ႉပိူင်ႇလေႃးၵႃႉၼႆႉလႆႈၶၢမ်ႇတၢင်းဢၼ်ၸီႇယၢင်ႇဢပျတ်ႈယဝ်ႉၼၼ်ႉဢေႃႈ။
“ၵဝ်မီးၵႂၢမ်းၼမ်ၼႃႇဢၼ်လူဝ်ႇလၢတ်ႈတီႈသူဢေႃႈ။ ၵူၺ်းၵႃႈ၊တေႃႈလဵဝ်ၼႆႉသူဢမ်ႇၸၢင်ႈၶၢမ်ႇဢဝ်လႆႈ။-
ၼႂ်းဝႃႈၼၼ်သေၵေႃႈမိူဝ်ႈဢၼ်ၸဝ်ႈဝိၺိၺ်ႇဢၼ်ၽုၺ်ႇၼႄလွင်ႈၽြႃးပဵၼ်ၸဝ်ႈမၢၼ်ႇမႅၼ်ႈၸိုဝ်ႈၸႂ်ႈၼၼ်ႉႁွတ်ႈမႃးၸိုင်၊မၼ်းၸဝ်ႈတၵ်းႁဵတ်းႁႂ်ႈသူႁုပွင်ႇလွင်ႈသမ်ႇမႃႇတြႃးတင်းသဵင်ႈတင်းလူင်ဢေႃႈ။ မၼ်းၸဝ်ႈတၵ်းႁေႃးလၢတ်ႈၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇဢမ်ႇၸႂ်ႈလႄႈ၊တၵ်းႁေႃးလၢတ်ႈၵႃႈဢၼ်မၼ်းလႆႈငိၼ်းၼၼ်ႉသေလႄႈ၊မၼ်းၸဝ်ႈတၵ်းမွၵ်ႇလၢတ်ႈလွင်ႈတၢင်းဢၼ်တၵ်းမႃးၵမ်းလိုၼ်းၼၼ်ႉတီႈသူဢေႃႈ။-
မၼ်းၸဝ်ႈၼၼ်ႉတၵ်းႁႂ်ႈမုၼ်ၽုင်းၵဝ်ထၢင်ႇသႃးမႃး၊ၵွပ်ႈပိူဝ်ႈမၼ်းၸဝ်ႈတၵ်းဢဝ်လွင်ႈတၢင်းဢၼ်ၸၢပ်ႈသႅင်ႇၵၼ်တင်းၵဝ်ၼၼ်ႉမွၵ်ႇလၢတ်ႈသူဢေႃႈ။-
လွင်ႈတၢင်းဢၼ်ၸၢပ်ႈသႅင်ႇၵၼ်တင်းပေႃႈၸဝ်ႈၵဝ်တင်းသဵင်ႈတင်းလူင်ၸိူဝ်းၼၼ်ႉ ၸၢပ်ႈသႅင်ႇၵၼ်တင်းၵဝ်ဢေႃႈ။ ပိူဝ်ႈၼႆၸင်ႇၵဝ်ဝႃႈမၼ်းၸဝ်ႈတၵ်းဢဝ်လွင်ႈတၢင်းဢၼ်ၸၢပ်ႈသႅင်ႇၵၼ်တင်းၵဝ်ၼၼ်ႉမွၵ်ႇလၢတ်ႈသူဢေႃႈ။
“ႁိုင်ၵမ်းဢွၼ်ႇၼိုင်ႈၵူၺ်းယဝ်ႉ၊သူတၵ်းဢမ်ႇလႆႈႁၼ်ၵဝ်လႃးလႃးလႄႈသမ်ႉႁိုင်ၵမ်းဢွၼ်ႇၼိုင်ႈၵူၺ်းသူတၵ်းၶိုၼ်းလႆႈႁၼ်ၵဝ်ဢေႃႈ၊” ဝႃႈၼင်ႇၼႆဢေႃႈ။
တပႄးၸဝ်ႈၼင်ႇၵၼ်တွင်ႈထၢမ်ၵၼ်လႄႈဝႃႈ၊ “မၼ်းၸဝ်ႈလၢတ်ႈၼႄႁဝ်းလႄႈဝႃႈ၊ ‘ႁိုင်ၵမ်းဢွၼ်ႇၼိုင်ႈၵူၺ်းယဝ်ႉ၊သူတၵ်းဢမ်ႇလႆႈႁၼ်ၵဝ်လႃးလႃးလႄႈသမ်ႉႁိုင်ၵမ်းဢွၼ်ႇၼိုင်ႈၵူၺ်း၊သူတၵ်းၶိုၼ်းလႆႈႁၼ်ၵဝ်၊’ ဝႃႈၼင်ႇၼႆဢိၵ်ႇတင်းၵႂၢမ်းဢၼ်ဝႃႈ၊ ‘ၵဝ်တၵ်းၵႂႃႇၵႃႈတီႈပေႃႈၸဝ်ႈပုၼ်ႉဢေႃႈ၊’ ဝႃႈၼင်ႇၼႆၼၼ်ႉၶႂ်ႈဝႃႈသင်။-
ၵႂၢမ်းဢၼ်ဝႃႈ၊ ‘ႁိုင်ၵမ်းဢွၼ်ႇၼိုင်ႈၵူၺ်း၊’ ဝႃႈၼင်ႇၼႆၼၼ်ႉၶႂ်ႈဝႃႈၸိူဝ်ႉၼင်ႇႁိုဝ်ႁဝ်းဢမ်ႇပွင်ႇၵႂၢမ်းဢၼ်မၼ်းၸဝ်ႈလၢတ်ႈၼႆႉ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ႁုလွင်ႈၶဝ်ၶႂ်ႈတွင်ႈထၢမ်မၼ်းၸဝ်ႈၼၼ်ႉလႄႈၸင်ႇလၢတ်ႈဝႃႈ၊ “ဢၼ်ၵဝ်ဝႃႈ၊ ‘ႁိုင်ၵမ်းဢွၼ်ႇၼိုင်ႈၵူၺ်းယဝ်ႉ၊သူတၵ်းဢမ်ႇလႆႈႁၼ်ၵဝ်လႃးလႃး၊သမ်ႉႁိုင်ၵမ်းဢွၼ်ႇၼိုင်ႈၵူၺ်း၊သူတၵ်းၶိုၼ်းလႆႈႁၼ်ၵဝ်၊’ ဝႃႈၼင်ႇၼႆၼၼ်ႉသူၼင်ႇၵၼ်တွင်ႈထၢမ်ၵၼ်ယူႇဢမ်ႇၸႂ်ႈႁိုဝ်း။-
ၵဝ်ဝႃႈတီႈၸိုဝ်ႈၸႂ်ႈမၼ်းၸမ်ႉ၊သူၸိုင်၊တၵ်းလႆႈႁွင်ႉႁႆႈပွင်ႉၶၢင်းဢေႃႈ။ ၵူၼ်းလေႃးၵီႇၸမ်ႉ၊တၵ်းသိူဝ်းပျေႃႇဢေႃႈ။ သူၸိူဝ်းၼႆႉတၵ်းလႆႈၸႂ်လဵၵ်ႉဢေႃႈ။ ၵူၺ်းၵႃႈ၊တၢင်းဢၼ်ၸႂ်လဵၵ်ႉၼၼ်ႉတၵ်းပိၼ်ႇပဵၼ်တၢင်းဢၼ်သိူဝ်းပျေႃႇဢေႃႈ။-
မိူဝ်ႈဢၼ်မႄႈယိင်းၸမ်တၵ်းၵိူတ်ႇလဵင်ႉလုၵ်ႈၸိုင်၊မၼ်းၸၢင်ႈၸႂ်လဵၵ်ႉၼႃႇပိူဝ်ႈဢၼ်ထိုင်ၶိင်ႇဢၼ်တၵ်းလႆႈၶၢမ်ႇဝူၺ်ႇတၼႃႇၼၼ်ႉဢေႃႈ။ ၵူၺ်းၵႃႈ၊မိူဝ်ႈဢၼ်လုၵ်ႈဢွၼ်ႇၵိူတ်ႇလဵင်ႉယဝ်ႉၸိုင်၊မၼ်းလိုမ်းပႅတ်ႈဝူၺ်ႇတၼႃႇမၼ်းၼၼ်ႉၵွပ်ႈပိူဝ်ႈမၼ်းလႆႈသိူဝ်းပျေႃႇပိူဝ်ႈဢၼ်လုၵ်ႈဢွၼ်ႇၵေႃႉၼိုင်ႈၵိူတ်ႇလဵင်ႉမႃးၼႂ်းလေႃးၵႃႉၼႆႉၼၼ်ႉဢေႃႈ။-
သူၵေႃႈပဵၼ်ၸိူဝ်ႉၼင်ႇၼၼ်ယဝ်ႉ။ တေႃႈလဵဝ်ၼႆႉသူၸႂ်လဵၵ်ႉသေၵေႃႈ၊ၵမ်းလိုၼ်းၵဝ်တၵ်းထူပ်းႁၼ်သူလႄႈ ႁူဝ်ၸႂ်သူတၵ်းတဵမ်ဝႆႉတင်းတၢင်းဢၼ်သိူဝ်းပျေႃႇဢေႃႈ။ တၢင်းသိူဝ်းပျေႃႇၸိူဝ်ႉၼင်ႇၼၼ်ၼၼ်ႉၽူႈလႂ်သေၵေႃႉသေၵူၼ်းဢမ်ႇႁၢမ်ႈသူလႆႈ။
“မိူဝ်ႈဢၼ်ဝၼ်းၼၼ်ႉႁွတ်ႈထိုင်ၸိုင်၊သူတၵ်းဢမ်ႇတွင်ႈဢမ်ႇထၢမ်ၵဝ်သေၸိူဝ်ႉသေပိူင်ယဝ်ႉ။ ၵဝ်ဝႃႈတီႈၸိုဝ်ႈၸႂ်ႈမၼ်းၸမ်ႉ၊ပေႃႈၸဝ်ႈတၵ်းပၼ်သူၵႃႈၼင်ႇဢၼ်သူလဝ်ႈယွၼ်းမၼ်းၸဝ်ႈၵႃႈၼႂ်းၸိုဝ်ႈသဵင်ၵဝ်ၼၼ်ႉဢေႃႈ။-
ႁၢၼ်ႉတေႃႇမိူဝ်ႈလဵဝ်ၼႆႉ၊သူယင်းဢမ်ႇပႆႇလဝ်ႈယွၼ်းသေၸိူဝ်ႉသေပိူင်ၵႃႈၼႂ်းၸိုဝ်ႈသဵင်ၵဝ်။ ယွၼ်းတႃႉ။ ပေႃးယွၼ်းၸိူဝ်ႉၼင်ႇၼႆၸိုင်တၵ်းလႆႈဢေႃႈ။ ႁဵတ်းၼၼ်ၸင်ႇတၢင်းသိူဝ်းပျေႃႇသူတၵ်းၸေးၸုမ်ႇဢေႃႈ။
“ၵဝ်ဢဝ်တင်းၵႂၢမ်းဢုပမႃႇလႄႈႁေႃးလၢတ်ႈလွင်ႈတၢင်းၸိူဝ်းၼႆႉမႃးယဝ်ႉ။ ၵူၺ်းၵႃႈ၊ၶိင်ႇၵႃႇလႃႉဢၼ်ၵဝ်တၵ်းဢမ်ႇလၢတ်ႈတင်းၵႂၢမ်းဢုပမႃႇၼၼ်ႉတၵ်းႁွတ်ႈမႃးလႄႈၵမ်းၼၼ်ႉ တၵ်းႁေႃးလၢတ်ႈလွင်ႈပေႃႈၸဝ်ႈလႅင်းလႅင်းဢေႃႈ။-
မိူဝ်ႈဢၼ်ဝၼ်းၼၼ်ႉႁွတ်ႈမႃးၸိုင်၊သူတၵ်းလဝ်ႈယွၼ်းၵႃႈၼႂ်းၸိုဝ်ႈသဵင်ၵဝ်ဢေႃႈ။ ၵဝ်တၵ်းသူးတွင်းတီႈပေႃႈၸဝ်ႈပုၼ်ႈသူဝႃႈၼႆၵဝ်ဢမ်ႇဝႃႈ၊-
လွင်ႈမၼ်းၸမ်ႉ၊ပေႃႈၸဝ်ႈၼၼ်ႉတူဝ်မၼ်းၸဝ်ႈႁၵ်ႉသူဢေႃႈ။ မၼ်းၸဝ်ႈၼၼ်ႉႁၵ်ႉသူၵွပ်ႈပိူဝ်ႈသူႁၵ်ႉၵဝ်လႄႈယုမ်ႇလွင်ႈဢၼ်ၵဝ်လုၵ်ႉသေၵႃႈတီႈၽြႃးပဵၼ်ၸဝ်ႈမႃးၼၼ်ႉဢေႃႈ။-
ၵဝ်ဢွၵ်ႇသေပေႃႈၸဝ်ႈလႄႈမႃးၸူးၼႂ်းလေႃးၵႃႉၼႆႉယဝ်ႉ။ ၵဝ်သမ်ႉတၵ်းဢွၵ်ႇသေၵႃႈတီႈလေႃးၵႃႉလႄႈၵႂႃႇၸူးတီႈပေႃႈၸဝ်ႈပုၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊တပႄးၸဝ်ႈၶဝ်လၢတ်ႈလႄႈဝႃႈ၊ “ၸႂ်ႈၶႃႈယဝ်ႉ၊ၸဝ်ႈ။ တေႃႈလဵဝ်ၼႆႉၸဝ်ႈႁဝ်းယင်းဢမ်ႇလၢတ်ႈတင်းၵႂၢမ်းဢုပမႃႇလႄႈႁေႃးလၢတ်ႈလႅင်းလႅင်းဢေႃႈ။-
တေႃႈလဵဝ်ၼႆႉလွင်ႈဢၼ်ၸဝ်ႈႁဝ်းမီးသပ်းပိင်ႇၺႃႇတႃႉၺၢၼ်ႇဢၼ်ႁုၸႅင်ႈတင်းသဵင်ႈတင်းမူတ်း၊ဢိၵ်ႇတင်းလွင်ႈဢၼ်ၸဝ်ႈႁဝ်းယင်းဢမ်ႇလူဝ်ႇႁႂ်ႈၽူႈလႂ်သေၵေႃႉသေၵူၼ်းတွင်ႈထၢမ်တီႈၸဝ်ႈႁဝ်းသေၶေႃႈသေၵမ်းၼၼ်ႉ၊ႁဝ်းၶႃႈႁုယဝ်ႉဢေႃႈ။ ထွၵ်ႈလူၺ်ႈလွင်ႈတၢင်းၸိူဝ်းၼႆႉလႄႈႁဝ်းၶႃႈယုမ်ႇလွင်ႈဢၼ်ၸဝ်ႈႁဝ်းလုၵ်ႉသေၵႃႈတီႈၽြႃးပဵၼ်ၸဝ်ႈမႃးၼၼ်ႉၶႃႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “တေႃႈလဵဝ်ၼႆႉသူယုမ်ႇမၢတ်ႈတႄႉတႄႉယဝ်ႉႁိုဝ်း။-
ၶိင်ႇၵႃႇလႃႉဢၼ်သူတၵ်းလႅၼ်ႈပၢႆႈၽၢတ်ႇၽႄၵၼ်ၵႂႃႇမီးယူႇၵႃႈတီႈႁိူၼ်းၽႂ်ႁိူၼ်းမၼ်းလႄႈပွႆႇပႅတ်ႈၵဝ်ၵိုတ်းယူႇၵူၺ်းၶေႃၵဝ်ၼၼ်ႉတၵ်းႁွတ်ႈမႃးလႄႈ၊တေႃႈလဵဝ်ၼႆႉၵေႃႈႁွတ်ႈထိုင်ဝႆႉယဝ်ႉဢေႃႈ။ ၼႂ်းဝႃႈၼၼ်သေၵေႃႈၵဝ်မီးယူႇၵေႃႉလဵဝ်ၵူၺ်းတႄႉဢမ်ႇၸႂ်ႈ။ ပေႃႈၸဝ်ႈၼၼ်ႉမီးယူႇလူၺ်ႈၵၼ်တင်းၵဝ်ဢေႃႈ။-
ၵဝ်ႁေႃးလၢတ်ႈၵႂၢမ်းၼႆႉႁႂ်ႈသူလႆႈၼိမ်ၸႂ်ၼႂ်းၵဝ်ဢေႃႈ။ ၵူၼ်းလေႃးၵီႇၼႆႉတၵ်းႁဵတ်းႁႂ်ႈသူႁွတ်ႈတုၵ်ႉၶႃႉဢေႃႈ။ ၼႂ်းဝႃႈၼၼ်သေၵေႃႈ၊မီးၸႂ်ႁတ်းႁၢၼ်တႃႉ။ ၵဝ်ပႄႉၼႅင်ႇတၼ်းၶူဝ်းလေႃးၵႃႉၼႆႉယဝ်ႉ၊” ဝႃႈၼင်ႇၼႆဢေႃႈ။
ဝၢႆးသေ ၸဝ်ႈယေႇသု၊ ဝႃႈၸိူဝ်ႉၼင်ႇၼႆယဝ်ႉၸိုင်၊မၼ်းၸဝ်ႈႁႅၼ်တူၺ်းၵႃႈၼိူဝ်ၽႃႉၵၢင်ႁၢဝ်ပုၼ်ႉသေလႄႈလၢတ်ႈဝႃႈ၊ “ဢူဝ်းပေႃႈၸဝ်ႈတီႈၶႃႈ။ ၶိင်ႇယၢမ်းႁွတ်ႈမႃးတီႈၶႃႈယဝ်ႉ။ ပၼ်ႁႂ်ႈမုၼ်ၽုင်းလုၵ်ႈၸဝ်ႈႁဝ်းထၢင်ႇသႃးမႃးပုၼ်ႈလွင်ႈၼင်ႇႁိုဝ်လုၵ်ႈၸဝ်ႈတၵ်းႁဵတ်းႁႂ်ႈမုၼ်ၽုင်းၸဝ်ႈႁဝ်းထၢင်ႇသႃးမႃးၼၼ်ႉသေၵမ်းတီႈၶႃႈ။-
လွင်ႈမၼ်းၸမ်ႉ၊ၸဝ်ႈႁဝ်းပၼ်ဢၶႂၢင်ႉတၼ်းၶူဝ်းတီႈလုၵ်ႈၸဝ်ႈႁႂ်ႈလႆႈဢုပ်ႉပိူင်ႇၵူၼ်းမဵဝ်းတင်းသဵင်ႈတင်းမူတ်းလႄႈၸၢင်ႈပၼ်ဢသၢၵ်ႈထႃႇဝရႃႉတီႈၶဝ်ၸိူဝ်းဢၼ်ၸဝ်ႈႁဝ်းဢဝ်ဢၢပ်ႈပၼ်ၵႃႈၼႂ်းမိုဝ်းလုၵ်ႈၸဝ်ႈၼၼ်ႉဢေႃႈ။-
ဢသၢၵ်ႈထႃႇဝရႃႉဢၼ်ဝႃႈၼၼ်ႉ၊ပဵၼ်တၢင်းဢၼ်ႁုၸၵ်းၸဝ်ႈႁဝ်းဢၼ်ပဵၼ်ၽြႃးပဵၼ်ၸဝ်ႈဢၼ်ၸိုဝ်ႈဢၼ်ၸႂ်ႈသူႇလဵဝ်ပႃးလဵဝ်၊ဢိၵ်ႇတင်း ၸဝ်ႈယေႇသုၶရိၸ်ႈ၊ ဢၼ်ၸဝ်ႈႁဝ်းပွႆႇၸႂ်ႉမႃးၼၼ်ႉတီႈၶႃႈဢေႃႈ။-
ၵဝ်ၶႃႈႁႂ်ႈမုၼ်ၽုင်းၸဝ်ႈႁဝ်းထၢင်ႇသႃးမႃးၵႃႈၼိူဝ်လိၼ်မိူင်းၼႆႉတီႈၶႃႈယဝ်ႉ။ ၵၢၼ်တၢင်းႁဵတ်းဢၼ်ၸဝ်ႈႁဝ်းၸႂ်ႉႁဵတ်းၼၼ်ႉၵေႃႈၵဝ်ၶႃႈႁဵတ်းယဝ်ႉတူဝ်ႈတီႈၶႃႈယဝ်ႉ။-
ဢူဝ်းပေႃႈၸဝ်ႈတီႈၶႃႈ။ ၸိူဝ်ႉၼင်ႇဢၼ်ၵဝ်ၶႃႈလႆႈၸၢမ်ႇၸႃးမုၼ်ၽုင်းသရေႇလူၺ်ႈၵၼ်တင်းၸဝ်ႈႁဝ်းၸဵမ်မိူဝ်ႈဢၼ်ၵမ်ႇၽႃႇၼႆႉဢမ်ႇပႆႇတႄႇၼၼ်ႉ၊တေႃႈလဵဝ်ၼႆႉၵေႃႈၶႅၼ်းတေႃႈယုၵ်ႉယွင်ႈမုၼ်ၽုင်းသရေႇၵဝ်ၶႃႈသိုဝ်ႈၼႃႈတႂ်ႈတႃၸဝ်ႈႁဝ်းသေၵမ်းတီႈၶႃႈ။
“ၵဝ်ၶႃႈႁဵတ်းႁႂ်ႈၸဝ်ႈႁဝ်းလႆႈႁုထၢင်ႇသႃးၵႃႈတီႈၶဝ်ၸိူဝ်းဢၼ်ၸဝ်ႈႁဝ်းဢဝ်ၵႃႈၼႂ်းလေႃးၵႃႉၼႆႉမႃးဢၢပ်ႈပၼ်တီႈၵဝ်ၶႃႈၸိူဝ်းၼၼ်ႉတီႈၶႃႈယဝ်ႉ။ ၶဝ်ပဵၼ်ၵူၼ်းၸဝ်ႈႁဝ်းလႄႈ၊ၸဝ်ႈႁဝ်းဢဝ်ၶဝ်ဢၢပ်ႈပၼ်တီႈၵဝ်ၶႃႈၶႃႈဢေႃႈ။ ၶဝ်ၼၼ်ႉပႂ်ႉၸွမ်းၵႂၢမ်းတြႃးၸဝ်ႈႁဝ်းတီႈၶႃႈဢေႃႈ။-
တေႃႈလဵဝ်ၼႆႉ၊ၶဝ်ႁုလွင်ႈၵႃႈဢၼ်ၸဝ်ႈႁဝ်းဢၢပ်ႈပၼ်တီႈၵဝ်ၶႃႈတင်းသဵင်ႈတင်းမူတ်းၸိူဝ်းၼၼ်ႉ၊ပဵၼ်မႃးၵႃႈတီႈၸဝ်ႈႁဝ်းၼၼ်ႉတီႈၶႃႈဢေႃႈ။-
ၵဝ်ၶႃႈဢဝ်ၵႂၢမ်းတြႃးဢၼ်ၸဝ်ႈႁဝ်းဢၢပ်ႈပၼ်တီႈၵဝ်ၶႃႈၼၼ်ႉပၼ်တီႈၶဝ်လႄႈ။ ၶဝ်ၵေႃႈႁပ်ႉၶၢမ်ႇဢဝ်ဢေႃႈ။ ၶဝ်ႁုလွင်ႈဢၼ်ၵဝ်ၶႃႈလုၵ်ႉသေၵႃႈတီႈၸဝ်ႈႁဝ်းမႃးၸႂ်ႈတႄႉသေလႄႈယုမ်ႇလွင်ႈဢၼ်ၸဝ်ႈႁဝ်းပွႆႇၸႂ်ႉၵဝ်ၶႃႈမႃးၼၼ်ႉတီႈၶႃႈဢေႃႈ။
“ၵဝ်ၶႃႈသူးတွင်းပုၼ်ႈၵူၼ်းလေႃးၵီႇတင်းလၢႆဢမ်ႇၸႂ်ႈတီႈၶႃႈ။ ၵဝ်ၶႃႈသူးတွင်းပုၼ်ႈၶဝ်ၸိူဝ်းဢၼ်ၸဝ်ႈႁဝ်းဢၢပ်ႈပၼ်တီႈၵဝ်ၶႃႈၼၼ်ႉၵွပ်ႈပိူဝ်ႈၶဝ်ပဵၼ်ၵူၼ်းၸဝ်ႈႁဝ်းတီႈၶႃႈဢေႃႈ။-
ၵႃႈဢၼ်ပဵၼ်ၵူၼ်းၵဝ်ၶႃႈၵႃႈမီးတင်းသဵင်ႈတင်းမူတ်းပဵၼ်ၵူၼ်းၸဝ်ႈႁဝ်းလႄႈ၊ၵႃႈဢၼ်ပဵၼ်ၵူၼ်းၸဝ်ႈႁဝ်းၵႃႈမီးတင်းသဵင်ႈတင်းမူတ်းၵေႃႈ၊ပဵၼ်ၵူၼ်းၵဝ်ၶႃႈတီႈၶႃႈဢေႃႈ။ မုၼ်ၽုင်းသရေႇၵဝ်ၶႃႈၵေႃႈ၊လႆႈထၢင်ႇသႃးမႃးၵွပ်ႈလူၺ်ႈၶဝ်တီႈၶႃႈဢေႃႈ။-
တေႃႈလဵဝ်ၼႆႉၵဝ်ၶႃႈမႃးၸူးတီႈၸဝ်ႈႁဝ်းယူႇတီႈၶႃႈလႄႈ၊ၵဝ်ၶႃႈဢမ်ႇမီးၵႃႈၼႂ်းလေႃးၵႃႉၼႆႉတီႈၶႃႈယဝ်ႉ။ ၶဝ်ၸမ်ႉ၊မီးယူႇၼႂ်းလေႃးၵႃႉၼႆႉလူးၵွၼ်ႇဢေႃႈ။ ဢူဝ်းပေႃႈၸဝ်ႈဢၼ်မူတ်းၸၢင်ႇတီႈၶႃႈ႟။ ၼင်ႇႁိုဝ်ၶဝ်တၵ်းပဵၼ်ဢၼ်လဵဝ်ၵၼ်မိူၼ်ၸိူဝ်ႉၼင်ႇၸဝ်ႈႁဝ်းတင်းၵဝ်ၶႃႈပဵၼ်ၼၼ်ႉၸိုင်၊ႁႂ်ႈၶဝ်တႄႇမၼ်ႈယူႇၼႂ်းတၼ်းၶူဝ်းၸိုဝ်ႈသဵင်ၸဝ်ႈဢၼ်ၸဝ်ႈႁဝ်းပၼ်တီႈၵဝ်ၶႃႈၼၼ်ႉသေၵမ်းတီႈၶႃႈ။-
ၸူဝ်ႈဢၼ်ၵဝ်ၶႃႈယင်းမီးယူႇလူၺ်ႈၵၼ်တင်းၶဝ်ၼၼ်ႉၸိုင်၊ၵဝ်ၶႃႈႁႂ်ႈၶဝ်တႄႇမၼ်ႈၼႂ်းတၼ်းၶူဝ်းၸိုဝ်ႈသဵင်ၸဝ်ႈဢၼ်ၸဝ်ႈႁဝ်းပၼ်တီႈၵဝ်ၶႃႈၼၼ်ႉတီႈၶႃႈဢေႃႈ။ ၵဝ်ၶႃႈၵႅတ်ႇၶႄႁႄႉၵင်ႈပၼ်ၶဝ်လႄႈၶဝ်ဢမ်ႇလႆႈႁူင်ႈလႆႈႁၢႆသေၵေႃႉသေၵူၼ်း။ ၵူၺ်းမီးၵေႃႉဢၼ်တိုၼ်းတေလႆႈလုလႆႈလႅဝ်ၼၼ်ႉ၊လႆႈႁူင်ႈလႆႈႁၢႆၵႂႃႇပုၼ်ႈလွင်ႈၼင်ႇႁိုဝ်တၵ်းပဵၼ်ၸွမ်းၵႃႈၼင်ႇဢၼ်ၵျၢမ်းလိၵ်ႈတႅမ်ႈဝႆႉၼၼ်ႉတီႈၶႃႈဢေႃႈ။-
တေႃႈလဵဝ်ၼႆႉၵဝ်ၶႃႈမႃးၸူးတီႈၸဝ်ႈႁဝ်းယူႇလႄႈ၊ၵဝ်ၶႃႈလၢတ်ႈလွင်ႈတၢင်းၸိူဝ်းၼႆႉၼႂ်းလေႃးၵႃႉၼႆႉ၊ႁႂ်ႈတပႄးၸဝ်ႈတင်းလၢႆ၊မီးႁူဝ်ၸႂ်ဢၼ်သိူဝ်းပျေႃႇထူၼ်ႈတဵမ်ၼႃႇမိူၼ်ၸိူဝ်ႉၼင်ႇၵဝ်ၶႃႈသိူဝ်းပျေႃႇၼၼ်ႉတီႈၶႃႈဢေႃႈ။-
ၵဝ်ၶႃႈပၼ်ၶၢဝ်ႇတြႃးၸဝ်ႈႁဝ်းၼၼ်ႉတီႈၶဝ်လႄႈၵူၼ်းလေႃးၵီႇၼႆႉငိၼ်းၸင်းၶဝ်ၵွပ်ႈပိူဝ်ႈၶဝ်ဢမ်ႇမီးၸႂ်သၽေႃးၵူၼ်းလေႃးၵီႇမိူၼ်ၸိူဝ်ႉၼင်ႇဢၼ်ၵဝ်ၶႃႈဢမ်ႇမီးၼၼ်ႉတီႈၶႃႈဢေႃႈ။-
ၵဝ်ၶႃႈလဝ်ႈယွၼ်းႁႂ်ႈၸဝ်ႈႁဝ်းၼုၵ်ႈဢဝ်ၶဝ်ဢွၵ်ႇသေၵႃႈၼႂ်းလေႃးၵႃႉၼႆႉၵႂႃႇဢမ်ႇၸႂ်ႈတီႈၶႃႈလႄႈ၊ၵဝ်ၶႃႈလဝ်ႈယွၼ်းႁႂ်ႈၸဝ်ႈႁဝ်းၵႅတ်ႇၶႄႁႄႉၵင်ႈပၼ်ၶဝ်၊ႁႂ်ႈၶဝ်လွတ်ႈၵၢင်းသေၵႃႈတီႈၶုၼ်ၽီႁၢႆႉၼၼ်ႉတီႈၶႃႈဢေႃႈ။-
ၸိူဝ်ႉၼင်ႇဢၼ်ၵဝ်ၶႃႈဢမ်ႇမီးၸႂ်သၽေႃးၵူၼ်းလေႃးၵီႇၼႆႉၼၼ်ႉ၊ၶဝ်ၼႆႉၵေႃႈဢမ်ႇမီးၸႂ်သၽေႃးၵူၼ်းလေႃးၵီႇၼႆႉတီႈၶႃႈ။-
ၶႅၼ်းတေႃႈႁႂ်ႈၶဝ်ပဵၼ်ၵူၼ်းဢၼ်မူတ်းၸၢင်ႇၸွမ်းၼင်ႇသမ်ႇမႃႇတြႃးၸဝ်ႈႁဝ်းသေၵမ်းတီႈၶႃႈ။ ၼုၵ်ႈၵပၢတ်ႈၸဝ်ႈႁဝ်းပဵၼ်သမ်ႇမႃႇတြႃးတီႈၶႃႈဢေႃႈ။-
ၸိူဝ်ႉၼင်ႇၸဝ်ႈႁဝ်းပွႆႇၸႂ်ႉၵဝ်ၶႃႈမႃးၵႃႈၼႂ်းလေႃးၵႃႉၼႆႉၼၼ်ႉ၊ၵဝ်ၶႃႈပွႆႇၸႂ်ႉၶဝ်ၵႂႃႇၵႃႈၼႂ်းလေႃးၵႃႉၼႆႉတီႈၶႃႈဢေႃႈ။-
ၵဝ်ၶႃႈႁဵတ်းႁႂ်ႈတူဝ်ၸဝ်ႈၵဝ်ႇမူတ်းၸၢင်ႇသေလႄႈဢဝ်သၢၵ်ႈၵၢပ်ႈပုၼ်ႈၶဝ်ၵႃႈတီႈၸဝ်ႈႁဝ်း၊ၼင်ႇႁိုဝ်ၶဝ်ၵေႃႈတၵ်းပဵၼ်ၵူၼ်းဢၼ်မူတ်းၸၢင်ႇတႄႉတႄႉၵႃႈတီႈၸဝ်ႈႁဝ်းၼၼ်ႉတီႈၶႃႈဢေႃႈ။
“ၵဝ်ၶႃႈသူးတွင်းပုၼ်ႈၶဝ်ၵူၺ်းဢမ်ႇၸႂ်ႈတီႈၶႃႈ၊ပုၼ်ႈၵူၼ်းတင်းလၢႆဢၼ်ယုမ်ႇမၢတ်ႈၵဝ်ၶႃႈ၊ၵွပ်ႈပိူဝ်ႈၶၢဝ်ႇတြႃးဢၼ်ၶဝ်ႁေႃးလၢတ်ႈၼၼ်ႉၵေႃႈၵဝ်ၶႃႈသူးတွင်းတီႈၶႃႈဢေႃႈ။-
ၵဝ်ၶႃႈသူးတွင်းႁႂ်ႈၶဝ်ပဵၼ်ဢၼ်ၼိုင်ႈဢၼ်လဵဝ်ၵၼ်တီႈၶႃႈဢေႃႈ။ ဢူဝ်းပေႃႈၸဝ်ႈတီႈၶႃႈ၊ႁႂ်ႈၶဝ်မီးယူႇၵႃႈၼႂ်းႁဝ်းမိူၼ်ၸိူဝ်ႉၼင်ႇဢၼ်ၸဝ်ႈႁဝ်းမီးယူႇၵႃႈၼႂ်းၵဝ်ၶႃႈလႄႈၵဝ်ၶႃႈမီးယူႇၵႃႈၼႂ်းၸဝ်ႈႁဝ်းၼၼ်ႉသေၵမ်းတီႈၶႃႈ။ ႁႂ်ႈၶဝ်ပဵၼ်ဢၼ်ၼိုင်ႈဢၼ်လဵဝ်ၵၼ်ပုၼ်ႈလွင်ႈၼင်ႇႁိုဝ်ၵူၼ်းလေႃးၵီႇၼႆႉတၵ်းယုမ်ႇလွင်ႈဢၼ်ၸဝ်ႈႁဝ်းပွႆႇၸႂ်ႉၵဝ်ၶႃႈမႃးၼၼ်ႉသေၵမ်းတီႈၶႃႈ။-
ၵဝ်ၶႃႈဢဝ်မုၼ်ၵုင်ႇသရေႇဢၼ်ၸဝ်ႈႁဝ်းပၼ်ၵဝ်ၶႃႈၼၼ်ႉ၊ပၼ်တီႈၶဝ်ပုၼ်ႈလွင်ႈၼင်ႇႁိုဝ်ၶဝ်တၵ်းပဵၼ်ဢၼ်ၼိုင်ႈဢၼ်လဵဝ်ၵၼ်မိူၼ်ၸိူဝ်ႉၼင်ႇဢၼ်ၸဝ်ႈႁဝ်းတင်းၵဝ်ၶႃႈပဵၼ်ဢၼ်ၼိုင်ႈဢၼ်လဵဝ်ၵၼ်ၼၼ်ႉလႄႈ၊-
ၵဝ်ၶႃႈမီးယူႇၵႃႈၼႂ်းၶဝ်လႄႈ ၸဝ်ႈႁဝ်းသမ်ႉမီးယူႇၵႃႈၼႂ်းၵဝ်ၶႃႈႁႂ်ႈၶဝ်လႆႈပဵၼ်ဢၼ်ၼိုင်ႈဢၼ်လဵဝ်ၵၼ်ၸေးၸေးၸုမ်ႇၸုမ်ႇ၊ပုၼ်ႈလွင်ႈၼင်ႇႁိုဝ်ၵူၼ်းလေႃးၵီႇၼႆႉတၵ်းႁုလွင်ႈဢၼ်ၸဝ်ႈႁဝ်းပွႆႇၸႂ်ႉၵဝ်ၶႃႈမႃး၊ဢိၵ်ႇတင်းလွင်ႈဢၼ်ၸဝ်ႈႁဝ်းႁၵ်ႉၶဝ်မိူၼ်ၸိူဝ်ႉၼင်ႇဢၼ်ၸဝ်ႈႁဝ်းႁၵ်ႉၵဝ်ၶႃႈၼၼ်ႉတီႈၶႃႈဢေႃႈ။
“ဢူဝ်းပေႃႈၸဝ်ႈတီႈၶႃႈ။ ၶဝ်ၼၼ်ႉၸဝ်ႈႁဝ်းပၼ်တီႈၵဝ်ၶႃႈယဝ်ႉလႄႈ၊ၵဝ်ၶႃႈမီးဢလူဝ်ႇၶႂ်ႈႁႂ်ႈၶဝ်မီးယူႇလူၺ်ႈၵၼ်တင်းၵဝ်ၶႃႈ ၵႃႈၼႂ်းတီႈဢၼ်ၵဝ်ၶႃႈတၵ်းမီးၼၼ်ႉ၊ႁႂ်ႈၶဝ်လႆႈႁၼ်မုၼ်ၵုင်ႇသရေႇၵဝ်ၶႃႈ ဢၼ်ၸဝ်ႈႁဝ်းပၼ်ၵဝ်ၶႃႈၼႂ်းတၢင်းဢၼ်ၸဝ်ႈႁဝ်းႁၵ်ႉၵဝ်ၶႃႈၸဵမ်မိူဝ်ႈၵမ်ႇၽႃႇဢမ်ႇပႆႇတႄႇပဵၼ်ၼၼ်ႉတီႈၶႃႈဢေႃႈ။-
ဢူဝ်းပေႃႈၸဝ်ႈဢၼ်သိုဝ်ႈတေႃႇတီႈၶႃႈ၊ၵူၼ်းလေႃးၵီႇၼႆႉဢမ်ႇႁုၸၵ်းၸဝ်ႈႁဝ်းသေၵေႃႈ၊ၵဝ်ၶႃႈႁုၸၵ်းတီႈၶႃႈဢေႃႈ။ ၶဝ်ၸိူဝ်းၼႆႉၵေႃႈ၊ႁုလွင်ႈဢၼ်ၸဝ်ႈႁဝ်းပွႆႇၸႂ်ႉၵဝ်ၶႃႈမႃးၼၼ်ႉတီႈၶႃႈဢေႃႈ။-
ၵဝ်ၶႃႈမွၵ်ႇၼႄႁႂ်ႈၶဝ်ႁုၸၵ်းၸဝ်ႈႁဝ်းယဝ်ႉတီႈၶႃႈလႄႈတၵ်းမွၵ်ႇၼႄထႅင်ႈလူးၵွၼ်ႇ၊ပုၼ်ႈလွင်ႈၼင်ႇႁိုဝ်တၢင်းႁၵ်ႉမႅတ်ႈတႃႇၸဝ်ႈႁဝ်းဢၼ်ႁၵ်ႉၵဝ်ၶႃႈၼၼ်ႉ၊တၵ်းမီးယူႇၼႂ်းၶဝ်လႄႈ၊ၵဝ်ၶႃႈၼႆႉၵေႃႈတၵ်းမီးယူႇၼႂ်းၶဝ်ၼၼ်ႉတီႈၶႃႈဢေႃႈ၊” ဝႃႈၼင်ႇၼႆသူးတွင်းဢေႃႈ။
ဝၢႆးသေ ၸဝ်ႈယေႇသု၊ သူးတွင်းၸိူဝ်ႉၼင်ႇၼႆယဝ်ႉၸင်ႇ၊မၼ်းၸဝ်ႈဢွၵ်ႇလူၺ်ႈၵၼ်တင်းတပႄးၸဝ်ႈတင်းလၢႆၵႂႃႇၽၢႆႇပုၼ်ႉၼမ်ႉ ၵေႇတရုၼ်ႇ၊ ဢေႃႈ။ ၵႃႈတီႈၼၼ်ႈ မီးသူၼ်ဢူးယဵၼ်ႇလႄႈ ၸဝ်ႈယေႇသု၊ တင်းတပႄးၸဝ်ႈၸိူဝ်းၼၼ်ႉၶဝ်ႈၵႂႃႇဢေႃႈ။-
ယုတႃႉဢိသၵႃႇရေႇဢုတ်ႈ၊ ဢၼ်ဢဝ်မၼ်းၸဝ်ႈဢၢပ်ႈၼႂ်းမိုဝ်းရၢၼ်ႇသူႇၼၼ်ႉႁုတီႈၼၼ်ႈၵွပ်ႈပိူဝ်ႈ ၸဝ်ႈယေႇသု၊ ၵႆႉဢွၼ်ၶဝ်ၵႂႃႇလၢႆပွၵ်ႈယဝ်ႉၼၼ်ႉဢေႃႈ။-
ပိူဝ်ႈၼႆလႄႈ ယုတႃႉ၊ ဢွၼ်ပႃးၵူၼ်းသိုၵ်း ရူဝ်းမႃႉ၊ မူႇၼိုင်ႈဢိၵ်ႇတင်းၵူၼ်းႁၢၼ်ဢွၼ်ႇဢၼ်ပႂ်ႉၵျွင်းၽြႃးၶဝ်ဢၼ်ယဵၸ်ႈပရေႃးႁဵၵ်ႈ လူင်ၶဝ်တင်းၵူၼ်းၵိူင်း ၽႃႇရိသႄး၊ တင်းလၢႆပွႆႇၸႂ်ႉၵႂႃႇၸိူဝ်းၼၼ်ႉမႃးၵႃႈတီႈၼၼ်ႈဢေႃႈ။ ၶဝ်ၸိူဝ်းၼၼ်ႉယိပ်းၵမ်လၢၵ်ႈၼၢၵ်ႈၸေးမိုဝ်းလႄႈပႃးဢဝ်တင်းႁူင်းၽႆးမၢၼ်ႇ၊ဢိၵ်ႇတင်းၵၢၼ်ႈၶႄႈလႂ်မႃးဢေႃႈ။-
ၸဝ်ႈယေႇသု၊ ႁုလွင်ႈတၢင်းဢၼ်တၵ်းပဵၼ်မႃးတီႈမၼ်းၸဝ်ႈၸိူဝ်ႉၼင်ႇႁိုဝ်ၼၼ်ႉလႄႈၵႂႃႇၸူးသေယဝ်ႉ၊ထၢမ်ၶဝ်လႄႈဝႃႈ၊ “သူသွၵ်ႈႁႃၽူႈလႂ်” ဝႃႈၼင်ႇၼႆဢေႃႈ။
ၶဝ်ၶိုၼ်းလၢတ်ႈလႄႈဝႃႈ၊ “ႁဝ်းသွၵ်ႈႁႃ ယေႇသု၊ ၵူၼ်းဝဵင်း ၼႃႇၸရႅတ်ႈ၊ ဢေႃႈ၊” ဝႃႈၼင်ႇၼႆဢေႃႈ။ ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ပဵၼ်ၵဝ်ၼႆႉယဝ်ႉ၊” ဝႃႈၼင်ႇၼႆဢေႃႈ။ ယုတႃႉ၊ ဢၼ်ဢဝ်မၼ်းၸဝ်ႈဢၢပ်ႈၼၼ်ႉၵေႃႈ၊ၸုၵ်းယူႇလူၺ်ႈၵၼ်တင်းၶဝ်ဢေႃႈ။-
မိူဝ်ႈဢၼ် ၸဝ်ႈယေႇသု၊ လၢတ်ႈဝႃႈ၊ “ပဵၼ်ၵဝ်ၼႆႉယဝ်ႉ၊” ဝႃႈၼင်ႇၼႆၼၼ်ႉၶဝ်သုတ်ႉႁူၼ်တၢင်းလင်လႄႈပိၼ်ႈလူမ်ႉၵႂႃႇၵႃႈၼိူဝ်လိၼ်ဢေႃႈ။-
ၸဝ်ႈယေႇသု၊ သမ်ႉထၢမ်ၶဝ်ထႅင်ႈလႄႈဝႃႈ၊ “သူသွၵ်ႈႁႃၽူႈလႂ်” ဝႃႈၼင်ႇၼႆလႄႈ၊ ၶဝ်ၶိုၼ်းလၢတ်ႈလႄႈဝႃႈ၊ “ႁဝ်းသွၵ်ႈႁႃ ယေႇသု၊ ၵူၼ်းဝဵင်း ၼႃႇၸရႅတ်ႈ၊ ဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ သမ်ႉလၢတ်ႈလႄႈဝႃႈ၊ “ပဵၼ်ၵဝ်ၼႆႉယဝ်ႉဝႃႈၼႆ၊ၵဝ်ပေႃးမွၵ်ႇလၢတ်ႈသူယဝ်ႉ။ ပိူဝ်ႈၼႆလႄႈပေႃးသူသွၵ်ႈႁႃၵဝ်ၸိုင်၊ပွႆႇႁႂ်ႈၵူၼ်းၵဝ်ၸိူဝ်းၼႆႉၵႂႃႇသေတႃႉ၊” ဝႃႈၼင်ႇၼႆဢေႃႈ။-
မၼ်းၸဝ်ႈလၢတ်ႈဝႃႈၸိူဝ်ႉၼင်ႇၼႆပုၼ်ႈလွင်ႈၼင်ႇႁိုဝ်ၵႂၢမ်းဢၼ်မၼ်းၸဝ်ႈလၢတ်ႈဝႆႉလႄႈဝႃႈ၊ “ဢူဝ်းပေႃႈၸဝ်ႈတီႈၶႃႈ၊ၶဝ်ၸိူဝ်းဢၼ်ၸဝ်ႈႁဝ်းဢၢပ်ႈပၼ်တီႈၵဝ်ၶႃႈၼၼ်ႉၶဝ်ဢမ်ႇလႆႈႁူင်ႈလႆႈႁၢႆသေၵေႃႉသေၵူၼ်း၊” ဝႃႈၼင်ႇၼႆၼၼ်ႉတၵ်းပဵၼ်ၸွမ်းၵႂၢမ်းၼၼ်ႉဢေႃႈ။
သိမုၼ်ႇပေႇတရု၊ ပႃးလႅဝ်းဝႆႉလႄႈ၊မၼ်းထွတ်ႇလႅဝ်းၽၼ်းသႂ်ႇၶႃႈၶုၼ်ယဵၸ်ႈပရေႃးႁဵၵ်ႈၼၼ်ႉၵေႃႉၼိုင်ႈလႄႈၽၼ်းမႅၼ်ႈဝၢၼ်ႁူမၼ်းၽၢႆႇၶႂႃၶၢတ်ႇတူၵ်းၵႂႃႇဢေႃႈ။ ၸိုဝ်ႈသဵင်ၵူၼ်းၵေႃႉၼၼ်ႉႁွင်ႉဝႃႈ၊ မႃႇလၶု၊ ဢေႃႈ။-
ၸဝ်ႈယေႇသု၊ လၢတ်ႈတီႈ ပေႇတရု၊ လႄႈဝႃႈ၊ “ဢဝ်လႅဝ်းမႂ်းၶိုၼ်းသႂ်ႇၵပ်းမၼ်းဝႆႉတႃႉ။ မႂ်းထၢင်ႇၵဝ်တၵ်းဢမ်ႇၵိၼ်ၵွၵ်းဝူၺ်ႇတၼႃႇဢၼ်ပေႃႈၸဝ်ႈၵဝ်ပၼ်ၵဝ်ဝႆႉၼၼ်ႉႁိုဝ်း၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၵူၼ်းသိုၵ်း ရူဝ်းမႃႉ၊ မူႇၼၼ်ႉပႃးၸဵမ်ႁူဝ်သိုၵ်းၶဝ်၊ဢိၵ်ႇတင်းၵူၼ်းႁၢၼ်ဢွၼ်ႇဢၼ်ပႂ်ႉၵျွင်းၽြႃးၵူၼ်းမဵဝ်း ၵျူး၊ ၶဝ်ၸိူဝ်းၼၼ်ႉတိၺွပ်းဢဝ် ၸဝ်ႈယေႇသု၊ လႄႈမတ်ႉၽုၵ်ႇသေယဝ်ႉ၊-
ဢဝ်ၵႂႃႇၸူးၵႃႈတီႈၶုၼ် ဢၼ်ႇၼတ်ႉ၊ ဢွၼ်တၢင်းဢေႃႈ။ ၶုၼ် ဢၼ်ႇၼတ်ႉ၊ ၸမ်ႉ၊ပဵၼ်ပေႃႈၼၢႆး ၵႃႇယၽႃႉ၊ ဢၼ်ပဵၼ်ၶုၼ်ယဵၸ်ႈပရေႃးႁဵၵ်ႈၼႂ်းပီၼၼ်ႉဢေႃႈ။-
ၵႃႇယၽႃႉ၊ ၼႆႉယဝ်ႉ၊ပဵၼ်ၵေႃႉဢၼ်ပၼ်တၢင်းၵျၢမ်ႇတၢင်းပွင်တီႈၶုၼ်ဢႃႇၼႃႇမဵဝ်း ၵျူး၊ ၶဝ်လႄႈဝႃႈ၊ “တၢင်းဢၼ်ၵူၼ်းၵေႃႉလဵဝ်တၢႆတၢင်ၵူၼ်းတင်းလၢႆၼၼ်ႉယဵင်ႈၶႅၼ်းလီၼႃႇဢေႃႈ၊” ဝႃႈၼင်ႇၼႆၼၼ်ႉဢေႃႈ။
ပေႇတရု၊ တင်းတပႄးၸဝ်ႈတၢင်ႇၵေႃႉၸွမ်းတၢင်းလင် ၸဝ်ႈယေႇသု၊ ၵႂႃႇပိူဝ်ႈဢၼ်တပႄးၸဝ်ႈၵေႃႉၼၼ်ႉ၊မိုတ်ႈၵိုဝ်းၵၼ်တင်းၶုၼ်ယဵၸ်ႈပရေႃးႁဵၵ်ႈလႄႈမၼ်းၸင်ႇၶဝ်ႈလူၺ်ႈၵၼ်တင်း ၸဝ်ႈယေႇသု၊ ၵႂႃႇၵႃႈတီႈၼႂ်းပၢင်ႇဝၢင်းႁိူၼ်းၶုၼ်ယဵၸ်ႈပရေႃးႁဵၵ်ႈၼၼ်ႉဢေႃႈ။-
ပေႇတရု၊ ၸမ်ႉ၊ၸုၵ်းယူႇၽၢႆႇၼွၵ်ႈၵႃႈတီႈႁိမ်းၽၵ်းတူဢေႃႈ။ တပႄးၸဝ်ႈဢၼ်မိုတ်ႈၵိုဝ်းၵၼ်တင်းၶုၼ်ယဵၸ်ႈပရေႃးႁဵၵ်ႈ ၼၼ်ႉၶိုၼ်းဢွၵ်ႇၵႂႃႇလၢတ်ႈတီႈမႄႈယိင်းဢၼ်ပႂ်ႉၽၵ်းတူၼၼ်ႉယဝ်ႉၸင်ႇဢွၼ်ဢဝ် ပေႇတရု၊ ၶဝ်ႈမႃးဢေႃႈ။-
ၵမ်းၼၼ်ႉ၊မႄႈယိင်းၼၼ်ႉလၢတ်ႈတီႈ ပေႇတရု၊ လႄႈဝႃႈ၊ “မႂ်းၵေႃႈၶဝ်ႈပႃးၼႂ်းတပႄးၵူၼ်းၵေႃႉၼၼ်ႉဢမ်ႇၸႂ်ႈႁိုဝ်း၊” ဝႃႈၼင်ႇၼႆလႄႈ၊ ပေႇတရု၊ ၶိုၼ်းလၢတ်ႈလႄႈဝႃႈ၊ “ၵဝ်ဢမ်ႇၶဝ်ႈပႃးၵူၺ်း၊” ဝႃႈၼင်ႇၼႆဢေႃႈ။
မိူဝ်ႈယၢမ်းၼၼ်ႉၵတ်းၼႃႇလႄႈၶႃႈၸႂ်ႉလႂ်၊ဢိၵ်ႇတင်းၵူၼ်းၸၢႆးၼုမ်ႇဢၼ်ပႂ်ႉၵျွင်းၽြႃးၶဝ်ဢွၼ်ၵၼ်သုမ်ထၢၼ်ႇၽႆးသေလႄႈဢွမ်ႇၽႆးၸုၵ်းလွမ်ႉႁွပ်ႈယူႇဢေႃႈ။ ပေႇတရု၊ ၵေႃႈ ၵႂႃႇၸုၵ်းဢွမ်ႇၽႆးၸွမ်းလူၺ်ႈၵၼ်တင်းၶဝ်ယူႇဢေႃႈ။
မိူဝ်ႈၼၼ်ႉၶုၼ်ယဵၸ်ႈပရေႃးႁဵၵ်ႈၸႅတ်ႈထၢမ် ၸဝ်ႈယေႇသု၊ လွင်ႈတပႄးမၼ်းၸဝ်ႈတင်းလၢႆ၊ဢိၵ်ႇတင်းလွင်ႈတြႃးဢၼ်မၼ်းၸဝ်ႈသင်ႇသွၼ်ပၼ်ၼၼ်ႉဢေႃႈ။-
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ၵဝ်ယၢမ်ႈႁေႃးလၢတ်ႈထၢင်ႇထၢင်ႇသႃးသႃးၽၢႆႇၼႃႈၵူၼ်းတင်းလၢႆတႃႇသေႇလႄႈ၊ၵႃႈဢၼ်ၵဝ်သင်ႇသွၼ်ပၼ်ၼၼ်ႉ ၵဝ်ႁေႃးလၢတ်ႈၼႂ်းၸရွပ်ႈႁေႃးတြႃးတင်းလၢႆ၊ဢိၵ်ႇတင်းၵႃႈၼႂ်းၵျွင်းပိၵ်ႈမၢၼ်ႇၸဝ်ႈတီႈဢၼ်ၵူၼ်းမဵဝ်း ၵျူး၊ တင်းသဵင်ႈတင်းလူင်ၸုတုမ်ၵၼ်ၼၼ်ႉသေႇသေႇယဝ်ႉ။ ၵဝ်ဢမ်ႇတွၼ်ႉႁေႃးလၢတ်ႈၼႂ်းတီႈဢၼ်လပ်ႉဢၼ်သိူင်ႇၼၼ်ႉလႃးလႃး။-
ၵွပ်ႈပိူဝ်ႈသင်လႄႈတွင်ႈထၢမ်ၵဝ်ၼင်ႇႁိုဝ်။ တွင်ႈထၢမ်တီႈၶဝ်ၸိူဝ်းဢၼ်လႆႈထွမ်ႇလႆႈငိၼ်းၼၼ်ႉတႃႉ။ ၵဝ်ႁေႃးလၢတ်ႈၸိူဝ်ႉၼင်ႇႁိုဝ်ၸိုင်၊ၶဝ်ႁုထွမ်ႇယဝ်ႉဢေႃႈ၊” ဝႃႈၼင်ၼႆဢေႃႈ။
မိူဝ်ႈဢၼ် ၸဝ်ႈယေႇသု၊ လၢတ်ႈၸိူဝ်ႉၼင်ႇၼၼ်ၼၼ်ႉၸိုင်၊ၵူၼ်းႁၢၼ်ဢွၼ်ႇဢၼ်ပႂ်ႉၵျွင်းၽြႃးၸုၵ်းယူႇၵႃႈတီႈႁိမ်းၼၼ်ႉၵေႃႉၼိုင်ႈပေႃႉထုပ်ႉမၼ်းၸဝ်ႈသေလႄႈဝႃႈ၊ “မႂ်းတၵ်းလႆႈတွပ်ႇထဵင်ၶုၼ်ယဵၸ်ႈပရေႃးႁဵၵ်ႈၸိူဝ်ႉၼင်ႇၼႆႁိုဝ်း၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈ ၶိုၼ်းတွပ်ႇၵေႃႉၼၼ်ႉလႄႈဝႃႈ၊ “ပေႃးၵႂၢမ်းဢၼ်ၵဝ်လၢတ်ႈၼႆႉၽိတ်းပိူင်ႈၸိုင်၊လၢတ်ႈၼႄဢၼ်ၽိတ်းပိူင်ႈၼၼ်ႉသေၵမ်း။ ပေႃးၵဝ်လၢတ်ႈၸိုဝ်ႈၸႂ်ႈယူႇၸိုင်၊ၵွပ်ႈပိူဝ်ႈသင်လႄႈမႂ်းပေႃႉယႅၼ်ႉၵဝ်၊” ဝႃႈၼင်ႇၼႆဢေႃႈ။
ၶုၼ် ဢၼ်ႇၼတ်ႉ၊ ပၼ်ဢမိင်ႉႁႂ်ႈဢဝ် ၸဝ်ႈယေႇသု၊ ဢၼ်လႆႈၶၢမ်ႇၽုၵ်ႇမတ်ႉယူႇၼၼ်ႉ ၵႂႃႇသူင်ႇၵႃႈတီႈၶုၼ်ယဵၸ်ႈပရေႃးႁဵၵ်ႈ ၵႃႇယၽႃႉ၊ သေဢေႃႈ။
မိူဝ်ႈၼၼ်ႉ၊ ပေႇတရု၊ ယင်းၸုၵ်းယူႇၵႃႈတီႈၼၼ်ႈလႄႈဢွမ်ႇၽႆးယူႇဢေႃႈ။ ပိူၼ်ႈၵမ်ႈၽွင်ႈထၢမ်မၼ်းလႄႈဝႃႈ၊ “မႂ်းၵေႃႈၶဝ်ႈပႃးၼႂ်းတပႄးၵူၼ်းၵေႃႉၼၼ်ႉဢမ်ႇၸႂ်ႈႁိုဝ်း၊” ဝႃႈၼင်ႇၼႆဢေႃႈ။ ပေႇတရု၊ ထဵင်ပႅတ်ႈလႄႈဝႃႈ၊ “ၵဝ်ဢမ်ႇၶဝ်ႈပႃးၵူၺ်း၊” ဝႃႈၼင်ႇၼႆဢေႃႈ။
ၶႃႈၶုၼ်ယဵၸ်ႈပရေႃးႁဵၵ်ႈၵေႃႉၼိုင်ႈဢၼ်ပဵၼ်ၸိူဝ်ႉၶိူဝ်းလဵဝ်ၵၼ်တင်းၵေႃႉဢၼ် ပေႇတရု၊ ၽၼ်းဝၢၼ်ႁူမၼ်းၶၢတ်ႇၵႂႃႇၼၼ်ႉၵေႃႈလၢတ်ႈလႄႈဝႃႈ၊ “ၵဝ်ႁၼ်မႂ်းမီးယူႇလူၺ်ႈၵၼ်တင်း ယေႇသု၊ ၵႃႈၼႂ်းသူၼ်ဢူးယဵၼ်ႇၼၼ်ႉဢမ်ႇၸႂ်ႈႁိုဝ်း၊” ဝႃႈၼင်ႇၼႆဢေႃႈ။
ပေႇတရု၊ သမ်ႉထဵင်ပႅတ်ႈထႅင်ႈလႄႈဝႃႈ၊ “ဢမ်ႇၸႂ်ႈၵူၺ်း၊” ဝႃႈၼင်ႇၼႆဢေႃႈ။ ၵႆႇၵေႃႈၶၼ်မိူဝ်ႈၼၼ်ႉၵမ်းလဵဝ်ဢေႃႈ။
မိူဝ်ႈဢၼ်ထိုင်ၶိင်ႇႁူဝ်ၼႂ်ၸဝ်ႉၸဝ်ႉၸိုင်၊ၶဝ်ဢဝ် ၸဝ်ႈယေႇသု၊ ဢွၵ်ႇသေၵႃႈတီႈႁိူၼ်း ၵႃႇယၽႃႉ၊ လႄႈ ၵႂႃႇၵႃႈတီႈႁေႃၸဝ်ႈၽႃႉဢေႃႈ။ ၶုၼ်ဢႃႇၼႃႇၵူၼ်းမဵဝ်း ၵျူး၊ ၶဝ် ပိူဝ်ႈဢၼ်ၶႂ်ႈႁႂ်ႈတူဝ်ၶဝ်မူတ်းသႂ်လႄႈတေလႆႈၵိၼ်ပွႆး ပသၶႃႇ၊ ၸွမ်းၼင်ႇၽႃႇသႃႇတြႃးၶဝ်မီးၼၼ်ႉလႄႈ၊ၶဝ်ဢမ်ႇၶဝ်ႈၵႃႈၼႂ်းႁေႃလႄႈယူႇဢေႃႈ။-
ပိူဝ်ႈၼႆလႄႈ ၶုၼ် ပိလတ်ႉ၊ ဢွၵ်ႇၸူးၵႃႈတီႈဢၼ်ၶဝ်မီးၼၼ်ႉသေလႄႈထၢမ်ဝႃႈ၊ “သူတၢင်ႇဢပျတ်ႈဢၼ်လႂ်တီႈၵူၼ်းၵေႃႉၼႆႉ၊” ဝႃႈၼင်ႇၼႆဢေႃႈ။
ၶဝ်ၵေႃႈၶိုၼ်းလၢတ်ႈလႄႈဝႃႈ၊ “ပေႃးမၼ်းယင်းဢမ်ႇႁဵတ်းဢၼ်ႁၢႆႉဢၼ်မိူၵ်ႈၸိုင်၊ႁဝ်းၶႃႈဢမ်ႇဢဝ်မၼ်းမႃးဢၢပ်ႈတီႈၸဝ်ႈႁဝ်းၶႃႈ၊” ဝႃႈၼင်ႇၼႆဢေႃႈ။
ၶုၼ် ပိလတ်ႉ၊ ၵေႃႈလၢတ်ႈလႄႈဝႃႈ၊ “ပေႃးပဵၼ်ၼႆၸိုင်၊သူဢဝ်မၼ်းၵႂႃႇၸီႇယၢင်ႇၸွမ်းၼင်ႇထုင်းတြႃးၽႃႇသႃႇသူတႃႉ၊” ဝႃႈၼင်ႇၼႆဢေႃႈ။ ၶဝ်ဢွၼ်ၵၼ်ၶိုၼ်းလၢတ်ႈလႄႈဝႃႈ၊ “ႁဝ်းၶႃႈဢမ်ႇပိူင်ႇတၵ်းၸီႇယၢင်ႇႁႂ်ႈဢဝ်ၽူႈလႂ်တၢႆလႆႈၶႃႈ၊” ဝႃႈၼင်ႇၼႆဢေႃႈ။-
လွင်ႈဢၼ်ၶဝ်လၢတ်ႈၸိူဝ်ႉၼင်ႇၼၼ်ၼၼ်ႉၸမ်ႉ၊ၼင်ႇႁိုဝ်ၵႂၢမ်းဢၼ် ၸဝ်ႈယေႇသု၊ လၢတ်ႈၼႄလွင်ႈဢၼ်မၼ်းၸဝ်ႈတၵ်းလႆႈတၢႆၸိူဝ်ႉၼင်ႇႁိုဝ်ၼၼ်ႉ၊တၵ်းပဵၼ်ၸွမ်းၸိုင်၊ၸင်ႇလၢတ်ႈဢေႃႈ။
ၶုၼ် ပိလတ်ႉ၊ ၶိုၼ်းၶဝ်ႈၵႂႃႇၵႃႈၼႂ်းႁေႃလႄႈ ႁွင်ႉဢဝ် ၸဝ်ႈယေႇသု၊ သေယဝ်ႉ၊ထၢမ်လႄႈဝႃႈ၊ “မႂ်းပဵၼ်ၶုၼ်ႁေႃၶမ်းၵူၼ်းမဵဝ်း ၵျူး၊ ၸႂ်ႈတႄႉႁိုဝ်း၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈၶိုၼ်းထၢမ်လႄႈဝႃႈ၊ “ၵႂၢမ်းထၢမ်ၼႆႉၸွင်ႇပဵၼ်မႃးၵႃႈတီႈၶုၼ်လူင်ႁိုဝ်း။ ဢမ်ႇၼၼ်ၵေႃႈပဵၼ်မႃးၵွပ်ႈပိူဝ်ႈပိူၼ်ႈမွၵ်ႇလၢတ်ႈလွင်ႈၵဝ်တီႈမႂ်းဝႆႉယဝ်ႉႁိုဝ်း၊” ဝႃႈၼင်ႇၼႆဢေႃႈ။
ၶုၼ် ပိလတ်ႉ၊ ၵေႃႈၶိုၼ်းလၢတ်ႈလႄႈဝႃႈ၊ “မႂ်းထၢင်ႇၵဝ်ပဵၼ်ၵူၼ်းမဵဝ်း ၵျူး၊ ႁိုဝ်း။ ၵူၼ်းမဵဝ်းမႂ်းတင်းယဵၸ်ႈပရေႃးႁဵၵ်ႈလူင်ၸိူဝ်းၼၼ်ႉပဵၼ်ၶဝ်ၸိူဝ်းဢၼ်ဢဝ်မႂ်းဢၢပ်ႈတီႈၵဝ်ယဝ်ႉ။ မႂ်းႁဵတ်းမႅၼ်ႈဢပျတ်ႈၵႃႈသင်၊” ဝႃႈၼင်ႇၼႆလႄႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “မိူင်းၵဝ်ၼႆႉဢမ်ႇၸၢပ်ႈသႅင်ႇၵၼ်တင်းလေႃးၵႃႉၼႆႉ။ ပေႃးမိူင်းၵဝ်ၸၢပ်ႈသႅင်ႇၵၼ်တင်းလေႃးၵႃႉၼႆႉၸိုင်၊တပႄးၵဝ်တင်းလၢႆတၵ်းတိုၵ်းတေႃးႁႄႉၶႅၼ်ႁႂ်ႈၵဝ်လႆႈလွတ်ႈသေတၢင်းဢၼ်ဢဝ်ဢၢပ်ႈၼႂ်းမိုဝ်းၶုၼ်ဢႃႇၼႃႇမဵဝ်း ၵျူး၊ တင်းလၢႆဢေႃႈ။ မိူင်းၵဝ်ၸၢပ်ႈသႅင်ႇၵၼ်တင်းလိၼ်မိူင်းၼႆႉဢမ်ႇၸႂ်ႈ၊” ဝႃႈၼင်ႇၼႆဢေႃႈ။
ၶုၼ် ပိလတ်ႉ၊ သမ်ႉထၢမ်လႄႈဝႃႈ၊ “ပေႃးပဵၼ်ၼႆၸိုင်၊မႂ်းပဵၼ်ၶုၼ်ႁေႃၶမ်းတႄႉႁိုဝ်း၊” ဝႃႈၼင်ႇၼႆလႄႈ၊ ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ၶုၼ်လူင်လၢတ်ႈဝႃႈၵဝ်ပဵၼ်ၶုၼ်ႁေႃၶမ်းယဝ်ႉ။ ၵဝ်ၵိူတ်ႇလဵင်ႉမႃးၼႂ်းလေႃးၵႃႉၼႆႉတိုၼ်းပဵၼ်ပုၼ်ႈဢၼ်တၵ်းႁေႃးလၢတ်ႈသမ်ႇမႃႇတြႃးယဝ်ႉ။ ၶဝ်ၸိူဝ်းဢၼ်ၸၢပ်ႈသႅင်ႇၵၼ်တင်းသမ်ႇမႃႇတြႃးၵႃႈမီးတင်းသဵင်ႈတင်းလူင်ၼၼ်ႉထွမ်ႇဢဝ်ၵႂၢမ်းၵဝ်ဢေႃႈ၊” ဝႃႈၼင်ႇၼႆဢေႃႈ။
ၶုၼ် ပိလတ်ႉ၊ ၵေႃႈထၢမ်လႄႈဝႃႈ၊ “သမ်ႇမႃႇတြႃးၼၼ်ႉပဵၼ်ဢီႈသင်၊” ဝႃႈၼင်ႇၼႆဢေႃႈ။ ၶုၼ် ပိလတ်ႉ၊ သမ်ႉဢွၵ်ႇၸူးၵႃႈတီႈၵူၼ်းမဵဝ်း ၵျူး၊ ၸိူဝ်းၼၼ်ႉလႄႈလၢတ်ႈဝႃႈ၊ “ၵဝ်ဢမ်ႇႁၼ်လွင်ႈတၢင်းဢၼ်တၵ်းၸီႇယၢင်ႇၼိူဝ်ၵေႃႉၼႆႉသေၸိူဝ်ႉသေပိူင်။-
ပိူဝ်ႈဢၼ်မီးထုင်းၸၢမ်ႇဢၼ်ၵဝ်တၵ်းလႆႈပွႆႇလွတ်ႈၵူၼ်းၵေႃႉၼိုင်ႈပၼ်တီႈသူၼႂ်းဝၼ်းပွႆး ပသၶႃႇ၊ လႄႈ၊သူၶႂ်ႈႁႂ်ႈၵဝ်ပွႆႇလွတ်ႈၶုၼ်ႁေႃၶမ်းၵူၼ်းမဵဝ်း ၵျူး၊ ၼႆႉပၼ်တီႈသူႁိုဝ်း၊” ဝႃႈၼင်ႇၼႆဢေႃႈ။
ၶဝ်ဢွၼ်ၵၼ်ႁွင်ႉပၢဝ်ႇလႄႈလၢတ်ႈဝႃႈ၊ “ဢမ်ႇၶႂ်ႈႁႂ်ႈပွႆႇလွတ်ႈၵေႃႉၼႆႉၶႃႈ။ ၶႂ်ႈႁႂ်ႈပွႆႇလွတ်ႈ ပႃႇရပ်ႉပႃႉ၊ ၶႃႈဢေႃႈ၊” ဝႃႈၼင်ႇၼႆဢေႃႈ။ ပႃႇရပ်ႉပႃႉ၊ ၼၼ်ႉပဵၼ်ၵူၼ်းၸူၼ်ဢေႃႈ။
မိူဝ်ႈၼၼ်ႉၶုၼ် ပိလတ်ႉ၊ ဢဝ် ၸဝ်ႈယေႇသု၊ ၵႂႃႇပုၼ်ႈဢၼ်တၵ်းလႆႈၶၢမ်ႇတၢင်းဢၼ်ပေႃႉယႅၼ်ႉဢေႃႈ။-
ၵူၼ်းသိုၵ်းတင်းလၢႆဢဝ်ၶိူဝ်းၼၢမ်ၶူၺ်ႇႁဵတ်းသရၽူႇသေယဝ်ႉ၊သုပ်းတိုဝ်းပၼ်ၵႃႈၼိူဝ်ႁူဝ်မၼ်းၸဝ်ႈလႄႈ၊ဢဝ်သိူဝ်ႈယၢဝ်းဢၼ်လႅင်ၵမ်ႇၼုင်ႈပၼ်မၼ်းၸဝ်ႈဢေႃႈ။-
ၶဝ်ဢွၼ်ၵၼ်မႃးတီႈမၼ်းၸဝ်ႈသေလႄႈ၊ၽွမ်ႉၵၼ်ဝႃႈ၊ “ၶုၼ်ႁေႃၶမ်းၵူၼ်းမဵဝ်း ၵျူး၊ ႟။ ႁႂ်ႈၸဝ်ႈႁဝ်းမီးမၢင်ႇၵလႃႇသေၵမ်းလူၺ်ႈ၊” ဝႃႈၼင်ႇၼႆသေလႄႈဢွၼ်ၵၼ်ပေႃႉယႅၼ်ႉမၼ်းၸဝ်ႈဢေႃႈ။
ၶုၼ် ပိလတ်ႉ၊ သမ်ႉဢွၵ်ႇၸူးမူႇၵူၼ်းၸိူဝ်းၼၼ်ႉထႅင်ႈလႄႈဝႃႈ၊ “တူၺ်းတႃႉ။ ၵဝ်ဢဝ်ၵေႃႉၼႆႉဢွၵ်ႇၼႄသူႁႂ်ႈသူလႆႈႁုလွင်ႈဢၼ်ၵဝ်ဢမ်ႇႁၼ်လွင်ႈတၢင်းဢၼ်တၵ်းၸီႇယၢင်ႇၼိူဝ်မၼ်းသေၸိူဝ်ႉသေပိူင်ၼၼ်ႉယဝ်ႉ၊” ဝႃႈၼင်ႇၼႆလႄႈ၊-
ၸဝ်ႈယေႇသု၊ ၵေႃႈသုပ်းတိုဝ်းသရၽူႇၼၢမ်ယူႇၼုင်ႈသိူဝ်ႈယၢဝ်းဢၼ်လႅင်ၵမ်ႇယူႇသေလႄႈဢွၵ်ႇမႃးဢေႃႈ။ ၶုၼ် ပိလတ်ႉ၊ လၢတ်ႈတီႈၶဝ်လႄႈဝႃႈ၊ “တူၺ်းတႃႉ။ ၵေႃႉၼႆႉမီးတီႈၼႆႈယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈဢၼ်ယဵၸ်ႈပရေႃးႁဵၵ်ႈ လူင်တင်းလၢႆ၊ဢိၵ်ႇတင်းၵူၼ်းၸၢႆးၼုမ်ႇဢၼ်ပႂ်ႉၵျွင်းၽြႃးၸိူဝ်းၼၼ်ႉႁၼ်မၼ်းၸဝ်ႈၼၼ်ႉ၊ၶဝ်ပၢဝ်ႇလၢတ်ႈဝႃႈ၊ “ဢဝ်မၼ်းတွၵ်ႇဝႆႉၵႃႈၼိူဝ်သဝ်မႆႉဝႃးမိုဝ်းတႃႉ။ ဢဝ်တွၵ်ႇဝႆႉတႃႉ၊” ဝႃႈၼင်ႇၼႆဢေႃႈ။ ၶုၼ် ပိလတ်ႉ၊ ၵေႃႈလၢတ်ႈလႄႈဝႃႈ၊ “ပေႃးပဵၼ်ၼႆၸိုင်၊သူဢဝ်မၼ်းတွၵ်ႇဝႆႉၵႃႈၼိူဝ်သဝ်မႆႉဝႃးမိုဝ်းတႃႉ။ ၵဝ်ဢမ်ႇႁၼ်လွင်ႈတၢင်းဢၼ်တၵ်းၸီႇယၢင်ႇၼိူဝ်မၼ်းၼႆႉ၊” ဝႃႈၼင်ႇၼႆဢေႃႈ။
မူႇၵူၼ်းၸိူဝ်းၼၼ်ႉၶိုၼ်းလဝ်ႈလၢတ်ႈဝႃႈ၊ “ႁဝ်းၶႃႈမီးပိင်းၺၢပ်ႈတြႃးယူႇၶႃႈဢေႃႈ။ ပိူဝ်ႈဢၼ်ၵေႃႉၼႆႉႁဵတ်းတူဝ်ၸဝ်ႈၵဝ်ႇပဵၼ်လုၵ်ႈၽြႃးပဵၼ်ၸဝ်ႈလႄႈ ၸွမ်းၼင်ႇပိင်းၺၢပ်ႈတြႃးၼၼ်ႉမၼ်းထိူၵ်ႈၶၢမ်ႇတၢင်းတၢႆဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်ငိၼ်းၵႂၢမ်းၸိူဝ်ႉၼင်ႇၼၼ်ၸိုင်၊ၶုၼ် ပိလတ်ႉ၊ ယဵင်ႈၶႅၼ်းၵူဝ်ၼႃႇလႄႈ၊-
သမ်ႉၶိုၼ်းၶဝ်ႈၵႃႈၼႂ်းႁေႃသေယဝ်ႉ၊ထၢမ် ၸဝ်ႈယေႇသု၊ လႄႈဝႃႈ၊ “မႂ်းလုၵ်ႉၵႃႈတီႈလႂ်ပဵၼ်မႃး၊” ဝႃႈၼင်ႇၼႆသေၵေႃႈ။ ၸဝ်ႈယေႇသု၊ ဢမ်ႇၶိုၼ်းတွပ်ႇသေၶေႃႈသေၵမ်း။-
ၵမ်းၼၼ်ႉ၊ၶုၼ် ပိလတ်ႉ၊ ၵေႃႈလၢတ်ႈလႄႈဝႃႈ၊ “မႂ်းဢမ်ႇလၢတ်ႈတေႃႇၵဝ်ၼႆႉမီးလွင်ႈၸိူဝ်ႉၼင်ႇႁိုဝ်။ ၵဝ်ပိူင်ႇတၵ်းပွႆႇႁႂ်ႈမႂ်းလွတ်ႈ၊ဢိၵ်ႇတင်းၵဝ်ပိူင်ႇတၢင်းဢၼ်တၵ်းဢဝ်မႂ်းတွၵ်ႇဝႆႉၵႃႈၼိူဝ်သဝ်မႆႉဝႃးမိုဝ်းၼၼ်ႉၸိုင်၊ၶုၵ်းၸႂ်လႆႈတႃႉ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၶိုၼ်းလၢတ်ႈလႄႈဝႃႈ၊ “ပေႃးၽြႃးပဵၼ်ၸဝ်ႈဢမ်ႇပၼ်ဢၶႂၢင်ႉဢႃႇၼႃႇၸိုင်၊ၶုၼ်လူင်ဢမ်ႇပိူင်ႇႁဵတ်းတီႈၵဝ်လႆႈသေၸိူဝ်ႉသေပိူင်။ ပိူဝ်ႈၼႆလႄႈၵေႃႉဢၼ်ဢဝ်ၵဝ်ဢၢပ်ႈၵႃႈၼႂ်းမိုဝ်းၶုၼ်လူင်ၼၼ်ႉ၊ထုၵ်ႇမႅၼ်ႈဢပျတ်ႈဢၼ်ယဵင်ႈၶႅၼ်းယႂ်ႇၼႃႇဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်လႆႈငိၼ်းၵႂၢမ်းၼၼ်ႉၸိုင်၊ၶုၼ် ပိလတ်ႉ၊ ၵျၢမ်ႇႁႃလွင်ႈႁႃတၢင်းႁႂ်ႈလႆႈပွႆႇမၼ်းၸဝ်ႈလွတ်ႈဢေႃႈ။ ၵူၺ်းၵႃႈ၊မူႇၵူၼ်းတင်းလၢႆၶိုၼ်းႁွင်ႉပၢဝ်ႇလႄႈလၢတ်ႈဝႃႈ၊ “ပေႃးၸဝ်ႈႁဝ်းပွႆႇၵေႃႉၼႆႉလွတ်ႈၸိုင်၊ၸဝ်ႈႁဝ်းဢမ်ႇၸႂ်ႈၵေႃႉသႄႈၸဝ်ႈမုၼ်ယႂ်ႇၶုၼ်ႁေႃၶမ်းၶႃႈယဝ်ႉဢေႃႈ။ ၵေႃႉဢၼ်ႁဵတ်းတူဝ်ၸဝ်ႈၵဝ်ႇဝႃႈ၊ပဵၼ်ၶုၼ်ႁေႃၶမ်းၼၼ်ႉ၊ပဵၼ်ၵေႃႉဢၼ်လုၵ်ႉၽိုၼ်ႉၸဝ်ႈမုၼ်ယႂ်ႇၶုၼ်ႁေႃၶမ်းၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်လႆႈငိၼ်းၵႂၢမ်းၼၼ်ႉၸိုင်၊ၶုၼ် ပိလတ်ႉ၊ ဢဝ် ၸဝ်ႈယေႇသု၊ ဢွၵ်ႇၵႂႃႇၵႃႈၼွၵ်ႈသေယဝ်ႉ၊ၼင်ႈၵႃႈၼိူဝ်ပလၢင်ႇဢၼ်ၸီႇယၢင်ႇတြႃးတီႈဢၼ်မီးၸိုဝ်ႈဢၼ်ႁွင်ႉႁဵၵ်ႈဝႃႈ၊မၢၵ်ႇႁိၼ်သိူဝ်ႇ၊ဢၼ်ၼႂ်းၵႂၢမ်း ႁေႇပြႄး၊ ႁွင်ႉဝႃႈ၊ ၵပ်ပထႃႉ၊ ၼၼ်ႉဢေႃႈ။-
ၶိင်ႇယၢမ်းၼၼ်ႉ၊ပဵၼ်ၶိင်ႇၵၢင်ဝၼ်းတဵင်ႈၸမ်ၸမ်၊ပဵၼ်ဝၼ်းၽိတ်ႈပွႆး ပသၶႃႇ၊ ၼၼ်ႉလႄႈ ၶုၼ် ပိလတ်ႉ၊ လၢတ်ႈတီႈၵူၼ်းတင်းလၢႆလႄႈဝႃႈ၊ “ၶုၼ်ႁေႃၶမ်းသူမီးတီႈၼႆႈယဝ်ႉ၊” ဝႃႈၼင်ႇၼႆဢေႃႈ။
ၶဝ်ၶိုၼ်းႁွင်ႉပၢဝ်ႇလႄႈလၢတ်ႈဝႃႈ၊ “ဢဝ်မၼ်းတၢႆတႃႉ။ ဢဝ်မၼ်းတၢႆတႃႉ။ ဢဝ်မၼ်းတွၵ်ႇဝႆႉၵႃႈၼိူဝ်သဝ်မႆႉဝႃးမိုဝ်းတႃႉ၊” ဝႃႈၼင်ႇၼႆဢေႃႈ။ ၶုၼ် ပိလတ်ႉ၊ ၵေႃႈၶိုၼ်းထၢမ်လႄႈဝႃႈ၊ “သူၶႂ်ႈႁႂ်ႈၵဝ်ဢဝ်ၶုၼ်ႁေႃၶမ်းသူတွၵ်ႇဝႆႉၵႃႈၼိူဝ်သဝ်မႆႉဝႃးမိုဝ်းႁိုဝ်း၊” ဝႃႈၼင်ႇၼႆဢေႃႈ။ ယဵၸ်ႈပရေႃးႁဵၵ်ႈလူင်ၸိူဝ်းၼၼ်ႉၵေႃႈၶိုၼ်းလၢတ်ႈဝႃႈ၊ “လိူဝ်သေၸဝ်ႈမုၼ်ယႂ်ႇၶုၼ်ႁေႃၶမ်း ၵေႇသႃႇ၊ ၼၼ်ႉ၊ႁဝ်းၶႃႈဢမ်ႇမီးၶုၼ်ႁေႃၶမ်းသေပႃးၶႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၶုၼ် ပိလတ်ႉ၊ ဢဝ် ၸဝ်ႈယေႇသု၊ ဢၢပ်ႈပၼ်ၵႃႈၼႂ်းမိုဝ်းၶဝ်ႁႂ်ႈဢဝ်မၼ်းၸဝ်ႈတွၵ်ႇဝႆႉၵႃႈၼိူဝ်သဝ်မႆႉဝႃးမိုဝ်းၼၼ်ႉသေဢေႃႈ။ ၶဝ်ၵေႃႈဢဝ်မၼ်းၸဝ်ႈဢွၵ်ႇၵႂႃႇဢေႃႈ။ ၶဝ်ၵေႃႈဢဝ်မၼ်းၸဝ်ႈဢွၵ်ႇၵႂႃႇဢေႃႈ။-
ၸဝ်ႈယေႇသု၊ မႅၵ်ႇသဝ်မႆႉဝႃးမိုဝ်းတူဝ်ၸဝ်ႈၵဝ်ႇသေလႄႈဢွၵ်ႇၵႂႃႇၸူးၵႃႈတီႈဢၼ်ႁွင်ႉႁဵၵ်ႈဝႃႈ၊ၵွင်းၵွၵ်းႁူဝ်ဢၼ်ၼႂ်းၵႂၢမ်း ႁေႇပြႄး၊ ႁွင်ႉဝႃႈ၊ ၵေႃးလႃႉၵေႃးထႃႉ၊ ၼၼ်ႉဢေႃႈ။-
ၵႃႈတီႈၼၼ်ႈၶဝ်ဢဝ်မၼ်းၸဝ်ႈတွၵ်ႇဝႆႉၵႃႈၼိူဝ်သဝ်မႆႉဝႃးမိုဝ်းဢေႃႈ။ ၶဝ်သမ်ႉဢဝ်ၵူၼ်းသွင်ၵေႃႉတွၵ်ႇဝႆႉယေႈၽၢႆႇယေႈၵေႃႉလႄႈ ၸဝ်ႈယေႇသု၊ မီးယူႇၵႃႈတီႈၶိုင်ႈၵၢင်ၶဝ်ဢေႃႈ။-
ၶုၼ် ပိလတ်ႉ၊ ၵေႃႈ တႅမ်ႈလိၵ်ႈသေလႄႈတွၵ်ႇၸပ်းၵႃႈတီႈႁူဝ်သဝ်ဝႆႉဢေႃႈ။ လိၵ်ႈၼၼ်ႉတႅမ်ႈဝႆႉဝႃႈ၊ “ ယေႇသု၊ ၵူၼ်းဝဵင်း ၼႃႇၸရႅတ်ႈ၊ ၶုၼ်ႁေႃၶမ်းၵူၼ်းမဵဝ်း ၵျူး၊ ” ဝႃႈၼင်ႇၼႆဢေႃႈ။-
ၵူၼ်းၼမ်ၼႃႇဢွၼ်ၵၼ်ၽတ်းဢၢၼ်ႇလိၵ်ႈၼၼ်ႉ၊ၵွပ်ႈပိူဝ်ႈတီႈဢၼ်ၶဝ်ဢဝ် ၸဝ်ႈယေႇသု၊ တွၵ်ႇဝႆႉၵႃႈၼိူဝ်သဝ်မႆႉဝႃးမိုဝ်းၼၼ်ႉဢမ်ႇၵႆၵၼ်တင်းဝဵင်း၊ဢိၵ်ႇတင်းၵွပ်ႈပိူဝ်ႈဢၼ်ၶဝ်ဢဝ်တင်းၵႂၢမ်း ႁေႇပြႄး၊ လႄႈၵႂၢမ်း လႃႇတိၼ်ႇ၊ ဢိၵ်ႇတင်းၵႂၢမ်း ၵရိၵ်ႉ၊ တႅမ်ႈဝႆႉဢေႃႈ။-
ယဵၸ်ႈပရေႃးႁဵၵ်ႈလူင်ၵူၼ်းမဵဝ်း ၵျူး၊ ၶဝ်၊ၶဝ်ႈၸူးၵႃႈတီႈၶုၼ် ပိလတ်ႉ၊ လႄႈလဝ်ႈယွၼ်းဝႃႈ၊ “ၶႅၼ်းတေႃႈယႃႇပေတႅမ်ႈဝႃႈ၊ ‘ၶုၼ်ႁေႃၶမ်းၵူၼ်းမဵဝ်း ၵျူး၊ ’ ဝႃႈၼင်ႇၼႆသေၵမ်းၶႃႈ။ ၸဝ်ႈႁဝ်းၶႅၼ်းတေႃႈတႅမ်ႈဝႃႈ၊ ‘ၵေႃႉၼႆႉဝႃႈၵဝ်ပဵၼ်ၶုၼ်ႁေႃၶမ်းၵူၼ်းမဵဝ်း ၵျူး၊ ဢေႃႈ၊’ ဝႃႈၼင်ႇၼႆသေၵမ်းၶႃႈ၊” ဝႃႈၼင်ႇၼႆဢေႃႈ။
ၶုၼ် ပိလတ်ႉ၊ ၶိုၼ်းလၢတ်ႈလႄႈဝႃႈ၊ “ဢၼ်ၵဝ်တႅမ်ႈယဝ်ႉၼၼ်ႉဢမ်ႇလူဝ်ႇမႄးၶိုၼ်း၊” ဝႃႈၼင်ႇၼႆဢေႃႈ။
ဝၢႆးသေၵူၼ်းသိုၵ်းၶဝ်ဢဝ် ၸဝ်ႈယေႇသု၊ တွၵ်ႇဝႆႉၵႃႈၼိူဝ်သဝ်မႆႉဝႃးမိုဝ်းယဝ်ႉၼၼ်ႉၶဝ်ဢဝ်သိူဝ်ႈၶူဝ်းမၼ်းၸဝ်ႈၸိူဝ်းၼၼ်ႉၽႄႁဵတ်းသီႇပွတ်းသေလႄႈမႅင်ႇၵၼ်ဢဝ်ယေႈၵေႃႉယေႈပွတ်းဢေႃႈ။ သိူဝ်ႈႁွင်းႁိူဝ်ႇၸဝ်ႈၼၼ်ႉၸမ်ႉ၊ယင်းဢမ်ႇမီးႁွႆးယဵပ်ႉလႄႈတေႃးဝႆႉၸႃႉၸဵမ်ႁူဝ်တေႃႇတိၼ်ဢေႃႈ။-
ပိူဝ်ႈၼႆလႄႈၶဝ်ၼင်ႇၵၼ်လၢတ်ႈတီႈၵၼ်လႄႈဝႃႈ၊ “သိူဝ်ႈၼႆႉတႄႉႁဝ်းယင်းဢမ်ႇသိၵ်ႇလႄႈ၊ၵေႃႉလႂ်ထုၵ်ႇလီလႆႈၸိုင်၊ႁဝ်းတူၵ်းၸႃႇၵွၵ်ႈသေလႄႈဢဝ်တႃႉႁဝ်း၊” ဝႃႈၼင်ႇၼႆဢေႃႈ။ ပဵၼ်မႃးၸိူဝ်ႉၼင်ႇၼႆပုၼ်ႈလွင်ႈၼင်ႇႁိုဝ်ၵႂၢမ်းၵျၢမ်းလိၵ်ႈဢၼ်တႅမ်ႈဝႆႉဝႃႈ၊ “ၶဝ်ဢဝ်သိူဝ်ႈၶူဝ်းၵဝ်ၶႃႈၽႄမႅင်ႇပၼ်ၵၼ်လႄႈ ဢဝ်သိူဝ်ႈၵဝ်ၶႃႈတူၵ်းၸႃႇၵွၵ်ႈတီႈၶႃႈဢေႃႈ၊” ဝႃႈၼင်ႇၼႆၼၼ်ႉတၵ်းပဵၼ်ၸွမ်းဢေႃႈ။ ပိူဝ်ႈၼႆၸင်ႇၵူၼ်းသိုၵ်းၸိူဝ်းၼၼ်ႉလႆႈႁဵတ်းၸိူဝ်ႉၼင်ႇၼၼ်ဢေႃႈ။
ၵႃႈႁိမ်းသဝ်မႆႉဝႃးမိုဝ်း ၸဝ်ႈယေႇသု၊ ၼၼ်ႉ၊မီးမႄႈၸဝ်ႈ၊ၼွင်ႉယိင်းမႄႈၸဝ်ႈ၊ မႃႇရိ၊ ဢၼ်ပဵၼ်မေး ၵလေႃးၽႃႉ၊ တင်း မႃႇရိမႃႇၵတလႃႉ၊ ၸိူဝ်းၼၼ်ႉၸုၵ်းယူႇဢေႃႈ။-
မိူဝ်ႈဢၼ် ၸဝ်ႈယေႇသု၊ ႁၼ်မႄႈၸဝ်ႈ၊ဢိၵ်ႇတင်းတပႄးၸဝ်ႈဢၼ်မၼ်းၸဝ်ႈႁၵ်ႉၼၼ်ႉၸုၵ်းယူႇႁိမ်းၵၼ်ၼၼ်ႉၸိုင်၊မၼ်းၸဝ်ႈလၢတ်ႈတီႈမႄႈၸဝ်ႈလႄႈဝႃႈ၊ “မၢတ်ႈမၼ်းပဵၼ်လုၵ်ႈၸၢႆးမႄႈႁဝ်းတႃႉ၊” ဝႃႈၼင်ႇၼႆသေယဝ်ႉ။
သမ်ႉလၢတ်ႈတီႈတပႄးၸဝ်ႈၼၼ်ႉလႄႈဝႃႈ၊ “မၢတ်ႈမၼ်းပဵၼ်မႄႈမႂ်းတႃႉ၊” ဝႃႈၼင်ႇၼႆဢေႃႈ။ တႄႇၸႃႉဢဝ်ၸဵမ်မိူဝ်ႈၼၼ်ႉလႄႈတပႄးၸဝ်ႈၼၼ်ႉႁွင်ႉဢဝ်မႄႈၸဝ်ႈၵႂႃႇယူႇၵႃႈတီႈႁိူၼ်းမၼ်းဢေႃႈ။
လိုၼ်းၼၼ်ႉ၊ ၸဝ်ႈယေႇသု၊ ႁုလွင်ႈဢၼ်တင်းသဵင်ႈတင်းလူင်ယဝ်ႉတူဝ်ႈယၢမ်းမိူဝ်ႈၼၼ်ႉလႄႈ ၼင်ႇႁိုဝ်ၵႂၢမ်းၵျၢမ်းလိၵ်ႈဢၼ်တႅမ်ႈဝႆႉတၵ်းပဵၼ်ၸွမ်းၸိုင်၊မၼ်းၸဝ်ႈလၢတ်ႈဝႃႈ၊ “ၵဝ်ယၢၵ်ႇၼမ်ႉဢေႃႈ၊” ဝႃႈၼင်ႇၼႆဢေႃႈ။
ၵႃႈတီႈၼၼ်ႈမီးပုင်းႁူၺ်ႇၼိုင်ႈတဵမ်ဝႆႉတင်းၼမ်ႉမၢၵ်ႇၸပိတ်ႉသူမ်ႈလႄႈ၊ၶဝ်ဢဝ်ၵုၺ်ၸုမ်ႇသႂ်ႇၼႂ်းၼမ်ႉမၢၵ်ႇၸပိတ်ႉသူမ်ႈၼၼ်ႉႁႂ်ႈတဵမ်သေယဝ်ႉ၊သဵပ်ႇပၢႆတူၼ်ႈယိူဝ်ႈယႃႈႁုတ်ႉသူပ်ႉလႄႈယိုၼ်ႈပၼ်တီႈသူပ်းမၼ်းၸဝ်ႈဢေႃႈ။-
ၸဝ်ႈယေႇသု၊ ၶၢမ်ႇဢဝ်ၼမ်ႉမၢၵ်ႇၸပိတ်ႉသူမ်ႈၼၼ်ႉသေယဝ်ႉလၢတ်ႈဝႃႈ၊ “လွင်ႈတၢင်းယဝ်ႉတူဝ်ႈယဝ်ႉ၊” ဝႃႈၼင်ႇၼႆသေလႄႈ၊ ႁူဝ်မၼ်းၸဝ်ႈၵူမ်ႈတူၵ်းၵႂႃႇလႄႈပူတ်းၸႂ်တၢႆၵႂႃႇဢေႃႈ။
မိူဝ်ႈၼၼ်ႉ၊ၶုၼ်ဢႃႇၼႃႇၵူၼ်းမဵဝ်း ၵျူး၊ ၶဝ်၊ၶဝ်ႈၸူးၶုၼ် ပိလတ်ႉ၊ လႄႈယွၼ်းဢၶႂၢင်ႉႁႂ်ႈလႆႈပေႃႉႁၵ်းၶႃၵူၼ်းၸိူဝ်းဢၼ်ဢဝ်တွၵ်ႇဝႆႉၼၼ်ႉ၊ဢိၵ်ႇတၢင်းႁႂ်ႈလႆႈဢဝ်ၶျႃးလူင်းသေၵႃႈတီႈသဝ်မႆႉဝႃးမိုဝ်းၼၼ်ႉဢေႃႈ။ ၶဝ်ႁဵတ်းၸိူဝ်ႉၼင်ႇၼၼ်ၵွပ်ႈပိူဝ်ႈဝၼ်းၼၼ်ႉပဵၼ်ဝၼ်းၽိတ်ႈလႄႈ၊ၶဝ်ဢမ်ႇၶႂ်ႈႁႂ်ႈတူဝ်တၢႆၸိူဝ်းၼၼ်ႉႁွႆႈဝႆႉၵႃႈၼိူဝ်သဝ်ၼႂ်းဝၼ်းၵမ်သိၼ်ဢၼ်ယႂ်ႇမျၢတ်ႈၼႃႇၼၼ်ႉဢေႃႈ။-
မိူဝ်ႈၼၼ်ႉၵူၼ်းသိုၵ်းၸိူဝ်းၼၼ်ႉၵႂႃႇႁၵ်းၶႃၵေႃႉၼိုင်ႈယဝ်ႉသေလႄႈ၊သမ်ႉၵႂႃႇႁၵ်းၶႃတၢင်ႇၵေႃႉဢၼ်တွၵ်ႇဝႆႉၵႃႈၼိူဝ်သဝ်လူၺ်ႈၵၼ်တင်း ၸဝ်ႈယေႇသု၊ ၼၼ်ႉဢေႃႈ။-
ၵူၺ်းၵႃႈ၊မိူဝ်ႈဢၼ်ၶဝ်မႃးတီႈ ၸဝ်ႈယေႇသု၊ ၼၼ်ႉၸိုင်၊ၶဝ်ႁၼ်မၼ်းၸဝ်ႈပူတ်းၸႂ်တၢႆယဝ်ႉလႄႈၶဝ်ဢမ်ႇႁၵ်းၶႃၸဝ်ႈယဝ်ႉ။-
ၼႂ်းၵူၼ်းသိုၵ်းၸိူဝ်းၼၼ်ႉၵေႃႉၼိုင်ႈ၊ဢဝ်ႁွၵ်ႇတႅင်းသႂ်ႇပဵမ်ႉၸဝ်ႈလႄႈလိူတ်ႈတင်းၼမ်ႉလႆဢွၵ်ႇမႃးဢေႃႈ။-
ၵေႃႉဢၼ်ႁၼ်လွင်ႈတၢင်းဢၼ်ပဵၼ်မႃးၼၼ်ႉမၼ်းၶၢမ်ႇသၢၵ်ႈသေႇပုၼ်ႈလွင်ႈၼင်ႇႁိုဝ်သူၵေႃႈတၵ်းယုမ်ႇဢေႃႈ။ တၢင်းဢၼ်မၼ်းၶၢမ်ႇသၢၵ်ႈသေႇၼၼ်ႉပဵၼ်ဢၼ်မၢၼ်ႇဢၼ်မႅၼ်ႈလႄႈမၼ်းႁုလွင်ႈဢၼ်ၵႂၢမ်းမၼ်းၵေႃႈပဵၼ်ဢၼ်မၢၼ်ႇဢၼ်မႅၼ်ႈဢေႃႈ။-
လွင်ႈတၢင်းၼႆႉၸိုင်၊ႁႂ်ႈၵႂၢမ်းၵျၢမ်းလိၵ်ႈဢၼ်တႅမ်ႈဝႆႉဝႃႈ၊ “လုပ်ႇမၼ်းၸဝ်ႈဢၼ်ၼိုင်ႈၵေႃႈတေဢမ်ႇလႆႈႁၵ်း၊” ဝႃႈၼင်ႇၼႆၼၼ်ႉလႄႈသင်၊-
ၶေႃႈၵႂၢမ်းဢၼ်ၵျၢမ်းလိၵ်ႈတၢင်ႇတီႈတႅမ်ႈဝႆႉဝႃႈ၊ “ၵူၼ်းတင်းလၢႆတၵ်းလႆႈဢွၼ်ၵၼ်တူၺ်းႁၼ်ၵေႃႉဢၼ်ၶဝ်တႅင်းပွင်ႇၼၼ်ႉဢေႃႈ၊” ဝႃႈၼင်ႇၼႆၼၼ်ႉပဵၼ်ၸွမ်းဢေႃႈ။
လိုၼ်းၼၼ်ႉ၊ ယူဝ်းသႅပ်ႈ၊ ၵူၼ်းဝဵင်း ဢရိမသႄး၊ ၼၼ်ႉၶဝ်ႈၸူးၶုၼ် ပိလတ်ႉ၊ သေလႄႈယွၼ်းႁႂ်ႈလႆႈဢဝ်တူဝ်တၢႆ ၸဝ်ႈယေႇသု၊ ၵႂႃႇဢေႃႈ။ ယူဝ်းသႅပ်ႈ၊ ၼၼ်ႉပဵၼ်တပႄး ၸဝ်ႈယေႇသု၊ ၵေႃႉၼိုင်ႈဢေႃႈ။ ပိူဝ်ႈဢၼ်ၵူဝ်ၶုၼ်ဢႃႇၼႃႇၵူၼ်းမဵဝ်း ၵျူး၊ ၶဝ်လႄႈလွမ်ပဵၼ်တပႄးၸဝ်ႈယူႇတဵတ်ႇတဵတ်ႇဢေႃႈ။ ၶုၼ် ပိလတ်ႉ၊ ၵေႃႈပၼ်ဢၶႂၢင်ႉလႄႈမၼ်းၸင်ႇဢဝ်တူဝ်တၢႆၼၼ်ႉၵႂႃႇဢေႃႈ။-
ၼိၵေႃးတိၼ်ႇ၊ ၵေႃႉဢၼ်ၵႂႃႇၸူး ၸဝ်ႈယေႇသု၊ ၶိင်ႇၵၢင်ၶိုၼ်းပွၵ်ႈၼိုင်ႈၼၼ်ႉၵေႃႈပႃးဢဝ်တင်းယႃႁွမ်ဢၼ်လေႃးၵၼ်တင်းမုရၼ်ႇတင်းဢၵျေႃႇၼမ်ႉၼၵ်းမၼ်းမီးသၢမ်သိပ်းၸွႆႉၸမ်ၸမ်ၼၼ်ႉလႄႈၵႂႃႇလူၺ်ႈၵၼ်တင်း ယူဝ်းသႅပ်ႈ၊ ဢေႃႈ။-
ၶဝ်ၼၼ်ႉဢဝ်တူဝ်တၢႆ ၸဝ်ႈယေႇသု၊ သေယဝ်ႉ၊ဢဝ်ယႃႁွမ်ၼၼ်ႉသႂ်ႇသေလႄႈဢဝ်ၽႃႈပၢၼ်ႇၶျေႃးၶဵၼ်းႁေႃႇၸွမ်းၼင်ႇထုင်းၸၢမ်ႇၵူၼ်းမဵဝ်း ၵျူး၊ ၶဝ်မႄးႁႅၼ်းလွင်ႈတၢင်းဢၼ်သၢင်းၵျူဝ်ႇၼၼ်ႉဢေႃႈ။-
တီႈႁိမ်းဢၼ်ဢဝ် ၸဝ်ႈယေႇသု၊ တွၵ်ႇဝႆႉၵႃႈၼိူဝ်သဝ်မႆႉဝႃးမိုဝ်းၼၼ်ႉမီးသူၼ်ဢူးယဵၼ်ႇဢေႃႈ။ ၵႃႈၼႂ်းသူၼ်ဢူးယဵၼ်ႇၼၼ်ႉမီးပိုင်ႈပႃႇႁဵဝ်ႈမႂ်ႇဢၼ်ၼိုင်ႈဢၼ်ယင်းဢမ်ႇပႆႇတွၼ်ႉသၢင်းၵျူဝ်ႇၽူႈလႂ်သေပွၵ်ႈၼၼ်ႉဢေႃႈ။-
ၵွပ်ႈပိူဝ်ႈပဵၼ်ဝၼ်းၽိတ်ႈၵူၼ်းမဵဝ်း ၵျူး၊ ၶဝ်ၵူၺ်းဢမ်ႇၵႃး၊ပိုင်ႈပႃႇႁဵဝ်ႈၼၼ်ႉယင်းမီးၸမ်ႁိမ်းၼၼ်ႉၵူၺ်းလႄႈ၊ၶဝ်ဢဝ်တူဝ်တၢႆၸဝ်ႈသၢင်းၵျူဝ်ႇၵႃႈတီႈၼၼ်ႈသေဢေႃႈ။
ၼႂ်းဝၼ်းတၼၢင်းၼူၺ်ႇၸဝ်ႉၸဝ်ႉ၊ၸူဝ်ႈဢၼ်ယင်းတိုၵ်ႉလပ်းသိင်ႇယူႇၼၼ်ႉ မႃႇရိမႃႇၵတလႃႉ၊ ၵႂႃႇၵႃႈတီႈပိုင်ႈပႃႇႁဵဝ်ႈၼၼ်ႉလႄႈထူပ်းႁၼ်မၢၵ်ႇႁိၼ်ဢၼ်ဢိုတ်းဝႆႉၵႃႈတီႈပၢၵ်ႇပိုင်ႈၼၼ်ႉ၊ၵိင်ႈၵႂႃႇမီးဝႆႉတၢင်ႇတီႈယူႇဢေႃႈ။-
မႄႈယိင်းၼၼ်ႉၸင်ႇလႅၼ်ႈၵႂႃႇၸူးတီႈ သိမုၼ်ႇပေႇတရု၊ ဢိၵ်ႇတင်းတီႈတပႄးၸဝ်ႈတၢင်ႇၵေႃႉဢၼ် ၸဝ်ႈယေႇသု၊ ႁၵ်ႉၼၼ်ႉသေယဝ်ႉမွၵ်ႇလၢတ်ႈဝႃႈ၊ “ပိူၼ်ႈဢဝ်ၸဝ်ႈၽြႃးဢွၵ်ႇသေၵႃႈတီႈပိုင်ႈပႃႇႁဵဝ်ႈလႄႈၵႂႃႇဝႆႉၵႃႈတီႈလႂ်ႁဝ်းဢမ်ႇႁုၶႃႈ၊” ဝႃႈၼင်ႇၼႆဢေႃႈ။
ပေႇတရု၊ တင်းတပႄးၸဝ်ႈတၢင်ႇၵေႃႉၼၼ်ႉၵေႃႈ၊ဢွၵ်ႇၵႂႃႇၸူးၵႃႈတီႈပိုင်ႈပႃႇႁဵဝ်ႈၼၼ်ႉဢေႃႈ။-
ၶဝ်ၶုၼ်ႇလႅၼ်ႈၵႂႃႇၸွမ်းၵၼ်သေၵေႃႈပိူဝ်ႈဢၼ်တပႄးၸဝ်ႈတၢင်ႇၵေႃႉၼၼ်ႉလႅၼ်ႈၽႂ်းသေ ပေႇတရု၊ လႄႈႁွတ်ႈၽႅဝ်ၵႂႃႇတီႈပိုင်ႈပႃႇႁဵဝ်ႈဢွၼ်တၢင်းဢေႃႈ။-
မၼ်းၵူမ်ႈတူၺ်းလႄႈလႆႈႁၼ်ၽႃႈပၢၼ်ႇၶျေႃးၼၼ်ႉၵူၺ်းၵိုတ်းၵျၢၼ်ႇမီးဝႆႉယူႇၼၼ်ႉၸိုင်၊မၼ်းယင်းဢမ်ႇၶဝ်ႈၵႂႃႇလႄႈယူႇဢေႃႈ။-
သိမုၼ်ႇပေႇတရု၊ ၵေႃႈႁွတ်ႈၽႅဝ်မႃးပႃႈလင်မၼ်းသေယဝ်ႉ၊ၶဝ်ႈၵႂႃႇၵႃႈၼႂ်းပိုင်ႈၼၼ်ႉၵမ်းလဵဝ်လႄႈလႆႈထူပ်းႁၼ်ၽႃႈပၢၼ်ႇၶျေႃးၵိုတ်းၵျၢၼ်ႇမီးဝႆႉယူႇဢေႃႈ။-
သမ်ႉလႆႈႁၼ်ၽႅၼ်ႇႁူမ်ႇၼႃႈၸဝ်ႈၼၼ်ႉယင်းဢမ်ႇမီးလူၺ်ႈတင်းၽႃႈပၢၼ်ႇၶျေႃးၼၼ်ႉလႄႈႁမ်းၵဵၼ်မီးဝႆႉထႅင်ႈတီႈၼိုင်ႈၵူၺ်းမၼ်းဢေႃႈ။-
ၵမ်းၼၼ်ႉ တပႄးၸဝ်ႈဢၼ်ႁွတ်ႈၽႅဝ်တီႈပိုင်ႈဢွၼ်တၢင်းပိူၼ်ႈၼၼ်ႉၶဝ်ႈၵႂႃႇလႄႈႁၼ်သေယဝ်ႉ၊ယုမ်ႇလွင်ႈၼၼ်ႉဢေႃႈ။-
တေႃႇထိုင်ႁွတ်ႈၶိင်ႇၼၼ်ႉၶဝ်ယင်းဢမ်ႇပႆႇႁုၵႂၢမ်းၵျၢမ်းလိၵ်ႈဢၼ်ဝႃႈ၊မၼ်းၸဝ်ႈတၵ်းလႆႈလုၵ်ႉသေၵႃႈတီႈတၢင်းတၢႆၶိုၼ်းလိပ်းမႃးၼၼ်ႉလူးၵွၼ်ႇဢေႃႈ။-
လိုၼ်းၼၼ်ႉတပႄးၸဝ်ႈၸိူဝ်းၼၼ်ႉၵေႃႈၶိုၼ်းမိူဝ်းႁိူၼ်းၵႂႃႇသေဢေႃႈ။
မႃႇရိ၊ ၸုၵ်းယူႇပႃႈၼွၵ်ႈပိုင်ႈပႃႇႁဵဝ်ႈလႄႈႁွင်ႉႁႆႈယူႇဢေႃႈ။ ယၢမ်းမိူဝ်ႈဢၼ်ယင်းႁွင်ႉႁႆႈယူႇၼၼ်ႉမၼ်းၵူမ်ႈတူၺ်းၵႃႈၼႂ်းပိုင်ႈၼၼ်ႉလႄႈ၊-
ႁၼ်တမၢၼ်ႇၵၢင်ႁၢဝ်သွင်ပႃးၼုင်ႈၶူဝ်းဢၼ်ၽိူၵ်ႇၶၢဝ်သေလႄႈၼင်ႈယူႇၵႃႈတီႈဢၼ်ဝၢင်းတူဝ်တၢႆၸဝ်ႈၼၼ်ႉၽၢႆႇတၢင်းႁူဝ်ၼွၼ်းပႃးၼိုင်ႈၽၢႆႇတၢင်းပၢႆတိၼ်ပႃးၼိုင်ႈဢေႃႈ။-
ၶဝ်ၼၼ်ႉထၢမ်မႄႈယိင်းၼၼ်ႉလႄႈဝႃႈ၊ “မႄႈယိင်း႟။ မႂ်းႁွင်ႉႁႆႈယူႇႁဵတ်းသင်၊” ဝႃႈၼင်ႇၼႆလႄႈ၊ မၼ်းၶိုၼ်းလၢတ်ႈလႄႈဝႃႈ၊ “ပိူၼ်ႈဢဝ်ၸဝ်ႈၽြႃးၵဝ်ၶႃႈၵႂႃႇဝႆႉၵႃႈတီႈလႂ်ၵဝ်ၶႃႈဢမ်ႇႁုၶႃႈ၊” ဝႃႈၼင်ႇၼႆဢေႃႈ။
မၼ်းဝႃႈၸိူဝ်ႉၼင်ႇၼႆသေယဝ်ႉ၊မိူဝ်ႈဢၼ်ဝၢႆႇတူၺ်းၸိုင်၊မၼ်းႁၼ် ၸဝ်ႈယေႇသု၊ ၸုၵ်းယူႇၵႃႈတီႈၽၢႆႇလင်မၼ်းဢေႃႈ။ ၵူၺ်းၵႃႈ၊ဢမ်ႇႁုလွင်ႈဢၼ်ပဵၼ် ၸဝ်ႈယေႇသု ။-
ၸဝ်ႈယေႇသု၊ ၵေႃႈထၢမ်မၼ်းလႄႈဝႃႈ “မႄႈယိင်း႟။ မႂ်းႁွင်ႉႁႆႈယူႇႁဵတ်းသင်။ မႂ်းသွၵ်ႈႁႃၽူႈလႂ်၊” ဝႃႈၼင်ႇၼႆဢေႃႈ။ မႃႇရိ၊ သမ်ႉထၢင်ႇမၼ်းၸဝ်ႈပဵၼ်ၵူၼ်းပႂ်ႉသူၼ်ဢူးယဵၼ်ႇလႄႈလၢတ်ႈလႄႈဝႃႈ၊ “ၸဝ်ႈ႟။ ပေႃးၸဝ်ႈလႆႈဢဝ်တူဝ်တၢႆမၼ်းၸဝ်ႈၵႂႃႇၸိုင်၊ဢဝ်ဝႆႉၵႃႈတီႈလႂ်မွၵ်ႇလၢတ်ႈပၼ်ၶႃႈသေၵမ်း။ ၵဝ်ၶႃႈတၵ်းဢဝ်ၵႂႃႇၶႃႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၸင်ႇလၢတ်ႈလႄႈဝႃႈ၊ “ မႃႇရိ၊ ႟။” မိူဝ်ႈဢၼ်ဝႃႈၸိူဝ်ႉၼင်ႇၼႆၸိုင်၊မၼ်းဝၢႆႇတူၺ်းသေယဝ်ႉ၊ၶိုၼ်းတွပ်ႇၼႂ်းၵႂၢမ်း ႁေႇပြႄး၊ လႄႈဝႃႈ၊ “ရပ်ႉပုၼိ၊” (ဢၼ်ပွင်ဝႃႈ၊ၸဝ်ႈသြႃႇလူင်တီႈၶႃႈ) ဝႃႈၼင်ႇၼႆဢေႃႈ။
ၸဝ်ႈယေႇသု၊ လၢတ်ႈလႄႈဝႃႈ၊ “ယႃႇပေတိူဝ်ႉပေယိပ်းၵဝ်လူးၵွၼ်ႇ။ လွင်ႈမၼ်းၸမ်ႉ၊ၵဝ်ဢမ်ႇပႆႇလႆႈၶိုၼ်းၵႂႃႇၵႃႈတီႈပေႃႈၸဝ်ႈပုၼ်ႉ။ ၵူၺ်းၵႃႈ၊ၵႂႃႇတီႈပီႈၼွင်ႉၵေႃႉသႄႈၵဝ်ၸိူဝ်းၼၼ်ႉပုၼ်ႉသေလႄႈလၢတ်ႈပၼ်လွင်ႈဢၼ်ၵဝ်တၵ်းလႆႈၶိုၼ်းၵႂႃႇၵႃႈတီႈပေႃႈၸဝ်ႈၵဝ်၊ဢၼ်ပဵၼ်ပေႃႈၸဝ်ႈသူ၊သမ်ႉပဵၼ်ၽြႃးပဵၼ်ၸဝ်ႈၵဝ်လႄႈပဵၼ်ၽြႃးပဵၼ်ၸဝ်ႈသူၼၼ်ႉတႃႉ၊” ဝႃႈၼင်ႇၼႆဢေႃႈ။
ၵႃႈၼင်ႇဢၼ်ဝႃႈၼၼ်ႉ၊ မႃႇရိမႃႇၵတလႃႉ၊ ၵႂႃႇလႄႈလၢတ်ႈပၼ်လွင်ႈဢၼ်မၼ်းလႆႈထူပ်းႁၼ်မၼ်းၸဝ်ႈ၊ဢိၵ်ႇတင်းလွင်ႈဢၼ်မၼ်းၸဝ်ႈသင်ႇဝႃႈၸိူဝ်းၼၼ်ႉတီႈတပႄးၸဝ်ႈတင်းလၢႆဢေႃႈ။
ၼႂ်းဝၼ်းၼၼ်ႉ မိူဝ်ႈဢၼ်ထိုင်ၶိင်ႇႁူဝ်ၶမ်ႈၸိုင်၊တပႄးၸဝ်ႈတင်းလၢႆၸုတုမ်ၵၼ်ယူႇလႄႈဢိုတ်းၶတ်းၽၵ်းတူဝႆႉ၊ၵွပ်ႈပိူဝ်ႈၶဝ်ၵူဝ်ၶုၼ်ဢႃႇၼႃႇၵူၼ်းမဵဝ်း ၵျူး၊ ၶဝ်ဢေႃႈ။ မိူဝ်ႈၼၼ်ႉ ၸဝ်ႈယေႇသု၊ မႃးၸုၵ်းယူႇၵႄႈၵၢင်ၶဝ်သေယဝ်ႉလၢတ်ႈဝႃႈ၊ “ႁႂ်ႈတၢင်းၼိမ်မီးတီႈသူသေၵမ်းလူၺ်ႈ၊” ဝႃႈၼင်ႇၼႆဢေႃႈ။-
ဝႃႈၸိူဝ်ႉၼင်ႇၼႆသေယဝ်ႉ၊မၼ်းၸဝ်ႈၼႄၽႃႇမိုဝ်းၸဝ်ႈတင်းပဵမ်ႉၸဝ်ႈတီႈၶဝ်ဢေႃႈ။ တပႄးၸဝ်ႈၸိူဝ်းၼၼ်ႉႁၼ်ၸဝ်ႈၽြႃးသေယဝ်ႉ၊ၸူမ်းသိူဝ်းၼႃႇလူင်လၢင်ဢေႃႈ။-
ၸဝ်ႈယေႇသု၊ သမ်ႉလၢတ်ႈတီႈၶဝ်ထႅင်ႈလႄႈဝႃႈ၊ “ႁႂ်ႈတၢင်းၼိမ်မီးတီႈသူသေၵမ်းလူၺ်ႈ။ ၸိူဝ်ႉၼင်ႇဢၼ်ပေႃႈၸဝ်ႈပွႆႇၸႂ်ႉၵဝ်မႃးၼၼ်ႉၵဝ်ပွႆႇၸႂ်ႉသူဢေႃႈ၊” ဝႃႈၼင်ႇၼႆသေယဝ်ႉ။-
ဢဝ်လူမ်းပဝ်ႇသႂ်ႇၵႃႈၼိူဝ်ၶဝ်လႄႈလၢတ်ႈဝႃႈ၊ “ႁပ်ႉတုင်းဢဝ်ဝိၺိၺ်ႇမူတ်းၸၢင်ႇၸဝ်ႈတႃႉ။-
ပေႃးသူပွႆႇလွတ်ႈဢပျတ်ႈပိူၼ်ႈတၢင်ႇၵေႃႉၸိုင်၊ၶဝ်တၵ်းလႆႈလွတ်ႈဢပျတ်ႈဢေႃႈ။ ပေႃးသူဢမ်ႇပွႆႇလွတ်ႈဢပျတ်ႈၶဝ်ၸိုင်၊ၶဝ်တၵ်းဢမ်ႇလႆႈလွတ်ႈၵၢင်းတင်းဢပျတ်ႈဢေႃႈ၊” ဝႃႈၼင်ႇၼႆဢေႃႈ။
ၼႂ်းတပႄးၸဝ်ႈၸိူဝ်းၼၼ်ႉၵေႃႉၼိုင်ႈဢၼ်ပဵၼ် ထူဝ်းမႃႉ၊ ဢၼ်လႆႈၸိုဝ်ႈ တိတုမု၊ (ပွင်ႇဝႃႈလုၵ်ႈၽႃၽႄ) ၼၼ်ႉ၊ဢမ်ႇမီးယူႇလူၺ်ႈၵၼ်တင်းၶဝ်မိူဝ်ႈဢၼ် ၸဝ်ႈယေႇသု၊ မႃးၼၼ်ႉ။-
ပိူဝ်ႈၼႆလႄႈ တပႄးၸဝ်ႈၸိူဝ်းၼၼ်ႉမွၵ်ႇလၢတ်ႈပၼ်မၼ်းလွင်ႈဢၼ်ၶဝ်လႆႈထူပ်းႁၼ်ၸဝ်ႈၽြႃးၼၼ်ႉသေၵေႃႈ၊မၼ်းယင်းၶိုၼ်းလၢတ်ႈလႄႈဝႃႈ၊ “ပေႃးၵဝ်ယင်းဢမ်ႇလႆႈႁၼ်ႁွႆးလဵၵ်းမၢႆႇၼႃးၵႃႈတီႈမိုဝ်းမၼ်းၸဝ်ႈလႄႈဢမ်ႇလႆႈဢဝ်ၼိဝ်ႉမိုဝ်းသႄႇတူၺ်းႁွႆးလဵၵ်း၊ဢိၵ်ႇတင်းဢမ်ႇလႆႈသႄႇတူၺ်းႁွႆးႁွၵ်ႇၵႃႈတီႈပဵမ်ႉၸဝ်ႈၸိုင်၊ၵဝ်ဢမ်ႇယုမ်ႇ၊” ဝႃႈၼင်ႇၼႆဢေႃႈ။
လိုၼ်းသေၼၼ်ႉပႅတ်ႇဝၼ်း၊တပႄးၸဝ်ႈတင်းလၢႆသမ်ႉၸုတုမ်ၵၼ်ယူႇၵႃႈၼႂ်းႁိူၼ်းထႅင်ႈလႄႈ ထူဝ်းမႃႉ၊ ၵေႃႈၶဝ်ႈပႃးဢေႃႈ။ ၽၵ်းတူၶဝ်ဢိုတ်းၶတ်းဝႆႉသေၵေႃႈ ၸဝ်ႈယေႇသု၊ မႃးၸုၵ်းယူႇၼႂ်းၵႄႈၵၢင်ၶဝ်သေယဝ်ႉလၢတ်ႈဝႃႈ၊ “ႁႂ်ႈတၢင်းၼိမ်မီးတီႈသူသေၵမ်းလူၺ်ႈ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉမၼ်းၸဝ်ႈလၢတ်ႈတီႈ ထူဝ်းမႃႉ၊ လႄႈဝႃႈ၊ “ယိုၼ်ႈၼိဝ်ႉမိုဝ်းမႂ်းမႃးၵႃႈတီႈၼႆႈသေလႄႈတူၺ်းမိုဝ်းၵဝ်ၼႆႉတႃႉ၊သမ်ႉသႄႇတူၺ်းပဵမ်ႉၵဝ်ၼႆႉတႃႉ။ ယႃႇႁႂ်ႈမီးၸႂ်ဢၼ်ထၢင်ႇဢၼ်ထိူမ်သေၵမ်း၊မီးတၢင်းဢၼ်ယုမ်ႇတႃႉ၊” ဝႃႈၼင်ႇၼႆဢေႃႈ။
ထူဝ်းမႃႉ၊ ၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈႁဝ်းပဵၼ်ၸဝ်ႈၽြႃးၵဝ်ၶႃႈ၊ၽြႃးပဵၼ်ၸဝ်ႈၵဝ်ၶႃႈတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ လၢတ်ႈလႄႈဝႃႈ၊ “မႂ်းၼႆႉလႆႈႁၼ်ၵဝ်လႄႈၸင်ႇယုမ်ႇႁိုဝ်း။ ၶဝ်ၸိူဝ်းဢၼ်ဢမ်ႇလႆႈႁၼ်ၵဝ်လႄႈယုမ်ႇမၢတ်ႈၼၼ်ႉမီးမၢင်ႇၵလႃႇဢေႃႈ၊” ဝႃႈၼင်ႇၼႆဢေႃႈ။
ၼိမိၵ်ႈလၢၵ်ႈၶၼႃႇတၢင်ႇၸိူဝ်ႉတၢင်ႇဢၼ်ၼမ်ၼႃႇဢၼ်ဢမ်ႇလႆႈတႅမ်ႈမၢႆဝႆႉၵႃႈၼႂ်းၵျၢမ်းလိၵ်ႈၼႆႉၵေႃႈ ၸဝ်ႈယေႇသု၊ ႁဵတ်းၼႄၵႃႈတီႈၽၢႆႇၼႃႈတပႄးၸဝ်ႈတင်းလၢႆဢေႃႈ။-
လွင်ႈတၢင်းဢၼ်တႅမ်ႈမၢႆဝႆႉထၢၼ်ႇၼႆႉၸိုင်၊ပဵၼ်ပုၼ်ႈလွင်ႈၼင်ႇႁိုဝ်သူတၵ်းလႆႈယုမ်ႇလွင်ႈဢၼ် ၸဝ်ႈယေႇသု၊ ပဵၼ် ၸဝ်ႈၶရိၸ်ႈ၊ လုၵ်ႈၽြႃးပဵၼ်ၸဝ်ႈၼၼ်ႉသေယဝ်ႉ၊ယုမ်ႇသေလႄႈသူတၵ်းတေလႆႈဢသၢၵ်ႈၵႃႈၼႂ်းၸိုဝ်ႈသဵင်ၸဝ်ႈၼၼ်ႉဢေႃႈ။
ဝၢႆးၼၼ်ႉ၊ ၸဝ်ႈယေႇသု၊ ၼႄပျႃးတူဝ်ၸဝ်ႈၵဝ်ႇတီႈတပႄးၸဝ်ႈၸိူဝ်းၼၼ်ႉထႅင်ႈပွၵ်ႈၼိုင်ႈၵႃႈတီႈၼွင် တိပေႇရိ၊ ဢေႃႈ။ ၼႆႉၸမ်ႉ၊ပဵၼ်ၼႄးလၢႆးဢၼ်မၼ်းၸဝ်ႈၼႄပျႃးတူဝ်ၸဝ်ႈၵဝ်ႇၸိူဝ်ႉၼင်ႇႁိုဝ်ၼၼ်ႉဢေႃႈ။-
သိမုၼ်ႇပေႇတရု၊ ဢိၵ်ႇတင်း ထူဝ်းမႃႉ၊ ဢၼ်လႆႈၸိုဝ်ႈ တိတုမု၊ (ပွင်ႇဝႃႈလုၵ်ႈၽႃၽႄ) ဢိၵ်ႇတင်း ၼႃႇႀၼေႇလႃႉ၊ ၵူၼ်းဝဵင်း ၵႃႇၼႃႉ၊ မိူင်း ၵႃႇလိလႄး၊ ဢိၵ်ႇတင်းလုၵ်ႈၸၢႆး ၸေႇပေႇတႄး၊ ၶဝ်၊တင်းတပႄးၸဝ်ႈထႅင်ႈသွင်ၵေႃႉၸိူဝ်းၼၼ်ႉ ၶဝ်ၸုတုမ်ၵၼ်ယူႇဢေႃႈ။-
ပေႇတရု၊ လၢတ်ႈတီႈၶဝ်လႄႈဝႃႈ၊ “ၵဝ်တေၵႂႃႇႁႃပႃဢေႃႈ၊” ဝႃႈၼႆလႄႈ၊ ၶဝ်ၵေႃႈဢွၼ်ၵၼ်ဝႃႈ၊ “ႁဝ်းၵေႃႈတေၵႂႃႇၸွမ်းဢေႃႈ၊” ဝႃႈၼင်ႇၼႆဢေႃႈ။ ပိူဝ်ႈၼႆလႄႈၶဝ်ၶီႇႁိူဝ်းဢွၵ်ႇၵႂႃႇလႄႈႁႃပႃတင်းၶိုၼ်းသေၵေႃႈဢမ်ႇလႆႈပႃသေတူဝ်ဢေႃႈ။-
မိူဝ်ႈဢၼ်ထိုင်ၶိင်ႇလႅတ်ႇဢွၵ်ႇမႃးၸိုင်၊ ၸဝ်ႈယေႇသု၊ ၸုၵ်းယူႇၵႃႈတီႈႁိမ်းၽင်ႇၼွင်ဢေႃႈ။ ၼႂ်းဝႃႈၼၼ်သေၵေႃႈ တပႄးၸဝ်ႈၸိူဝ်းၼၼ်ႉဢမ်ႇႁုလွင်ႈဢၼ်ပဵၼ် ၸဝ်ႈယေႇသု။-
မၼ်းၸဝ်ႈၵေႃႈထၢမ်ၶဝ်လႄႈဝႃႈ၊ “ၵေႃႉသႄႈၶဝ်႟။ ပႃတႃႇတေၵိၼ်ဢမ်ႇမီးသေတူဝ်ႁိုဝ်း၊” ဝႃႈၼင်ႇၼႆလႄႈ၊ ၶဝ်ၶိုၼ်းလၢတ်ႈလႄႈဝႃႈ၊ “ဢမ်ႇမီးၶႃႈ၊” ဝႃႈၼင်ႇၼႆဢေႃႈ။
ၵမ်းၼၼ်ႉ၊မၼ်းၸဝ်ႈလၢတ်ႈလႄႈဝႃႈ၊ “ဝၢၼ်ႇၶႄတူၵ်းၽၢႆႇၶႂႃႁိူဝ်းၼၼ်ႉတႃႉ။ သူတေလႆႈဢေႃႈ၊” ဝႃႈၼႆ၊ၵႃႈၼင်ႇဢၼ်မၼ်းၸဝ်ႈဝႃႈၼၼ်ႉၶဝ်ဝၢၼ်ႇၶႄတူၵ်းလႄႈတိုတ်ႉၸၼ်ဢဝ်ၶႄယင်းဢမ်ႇပႄႉလႆႈ ၵွပ်ႈပိူဝ်ႈဢၼ်ႁူမ်ႇမႅၼ်ႈပႃၼမ်ၼႃႇလူင်လၢင်ၼၼ်ႉဢေႃႈ။
မိူဝ်ႈၼၼ်ႉတပႄးၸဝ်ႈၵေႃႉဢၼ်မၼ်းၸဝ်ႈႁၵ်ႉၼၼ်ႉလၢတ်ႈတီႈ ပေႇတရု၊ လႄႈဝႃႈ၊ “ၵေႃႉၼႆႉပဵၼ်ၸဝ်ႈၽြႃးဢေႃႈ၊” ဝႃႈၼင်ႇၼႆဢေႃႈ။ မိူဝ်ႈဢၼ် ပေႇတရု၊ လႆႈငိၼ်းဝႃႈ၊ပဵၼ်ၸဝ်ႈၽြႃးၼၼ်ႉၸိုင်၊ (ပိူဝ်ႈဢၼ်မၼ်းထွတ်ႇၶူဝ်းၼုင်ႈမၼ်းဝႆႉၼၼ်ႉ) ဢဝ်သိူဝ်ႈမၼ်းဝဵၼ်းတူဝ်ၸဝ်ႈၵဝ်ႇသေလႄႈဝႅၼ်တူၵ်းၵႃႈၼႂ်းၼမ်ႉၵႂႃႇဢေႃႈ။-
တပႄးၸဝ်ႈတၢင်ႇၵေႃႉၸိူဝ်းၼၼ်ႉပိူဝ်ႈဢၼ်ယၢၼ်ၽင်ႇသေပၢၵ်ႇဝႃးၼိုင်ႈၵူၺ်းလႄႈၽၢႆးႁိူဝ်းၶဝ်တိုတ်ႉလၢၵ်ႈပႃးၶႄၶဝ်ဢၼ်တဵမ်ဝႆႉတင်းပႃၼၼ်ႉမႃးၸူးတီႈၽင်ႇၼွင်ဢေႃႈ။-
မိူဝ်ႈဢၼ်ၶဝ်ႁွတ်ႈထိုင်ၵႃႈၼိူဝ်ၵွင်းၸိုင်၊ၶဝ်လႆႈႁၼ်ၵွင်ထၼ်ႇၽႆးဢၼ်ဢဝ်ပႃပိင်ႈၽႆးဝႆႉ၊ဢိၵ်ႇတင်းမီးၶဝ်ႈမုၼ်းၵမ်ႈၽွင်ႈဢေႃႈ။-
ၸဝ်ႈယေႇသု၊ ၵေႃႈဝႃႈ၊ “ပႃဢၼ်သူလႆႈမႃးတေႃႈလဵဝ်ၼႆႉဢဝ်မႃးၵမ်ႈၽွင်ႈတႃႉ၊” ဝႃႈၼင်ႇၼႆဢေႃႈ။
သိမုၼ်ႇပေႇတရု၊ ၶိုၼ်ႈႁိူဝ်းၵႂႃႇလႄႈတိုတ်ႉၸၼ်ၶႄဢၼ်တဵမ်ဝႆႉတင်းပႃတူဝ်ယႂ်ႇၼၼ်ႉ တၢင်ႇၶိုၼ်ႈၵႃႈၼိူဝ်ၵွင်းဢေႃႈ။ ပႃတင်းသဵင်ႈတင်းမူတ်းမီးပၢၵ်ႇပၢႆႁႃႈသိပ်းသၢမ်တူဝ်ဢေႃႈ။ ပိၵ်ႉသမ်ႉၼမ်ထၢၼ်ႇၼၼ်ႉသေၵေႃႈၶႄယင်းဢမ်ႇသိၵ်ႇဢမ်ႇၶၢတ်ႇသေဢိတ်းဢေႃႈ။-
ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “မႃးၵိၼ်ၶဝ်ႈၼႂ်တႃႉ၊” ဝႃႈၼင်ႇၼႆဢေႃႈ။ တပႄးၸဝ်ႈၸိူဝ်းၼၼ်ႉၵေႃႈ၊ပိူဝ်ႈဢၼ်ႁုပဵၼ်ၸဝ်ႈၽြႃးၼၼ်ႉယဝ်ႉလႄႈ၊ “ၸဝ်ႈႁဝ်းပဵၼ်ၽူႈလႂ်၊” ဝႃႈၼႆဢမ်ႇႁတ်းတွင်ႈႁတ်းထၢမ်သေၵေႃႉသေၵူၼ်း။-
ၸဝ်ႈယေႇသု၊ မႃးလႄႈဢဝ်ၶဝ်ႈမုၼ်းတင်းပႃမႅင်ႇပၼ်ၶဝ်ဢေႃႈ။
တၢင်းဢၼ် ၸဝ်ႈယေႇသု၊ ၼႄပျႃးတူဝ်ၸဝ်ႈၵဝ်ႇပွၵ်ႈၼႆႉၸမ်ႉ၊ဝၢႆးသေမၼ်းၸဝ်ႈလုၵ်ႉၵႃႈတၢင်းတၢႆၶိုၼ်းလိပ်းယဝ်ႉၼၼ်ႉ၊ပဵၼ်ပွၵ်ႈဢၼ်ၼႄပျႃးတူဝ်ထူၼ်ႈထိုင်ပွၵ်ႈတီႈသၢမ်ဢေႃႈ။
ဝၢႆးသေၵိၼ်ၶဝ်ႈၼႂ်ယဝ်ႉၼၼ်ႉ၊ ၸဝ်ႈယေႇသု၊ ထၢမ် သိမုၼ်ႇပေႇတရု၊ လႄႈဝႃႈ၊ “ သိမုၼ်ႇ၊ လုၵ်ႈၸၢႆး ယူဝ်းႁၢၼ်ႇ၊ ႟။ ၸွင်ႇမႂ်းႁၵ်ႉၵဝ်ၼႃႇသေၶဝ်ၸိူဝ်းၼႆႉႁၵ်ႉၵဝ်ၼၼ်ႉႁိုဝ်း၊” ဝႃႈၼႆလႄႈ၊ မၼ်းၶိုၼ်းလဝ်ႈလၢတ်ႈလႄႈဝႃႈ၊ “ပဵၼ်ဢၼ်ၸိုဝ်ႈၸႂ်ႈၶႃႈယဝ်ႉ။ ၸဝ်ႈႁဝ်းႁုလွင်ႈဢၼ်ၵဝ်ၶႃႈႁၵ်ႉၸဝ်ႈႁဝ်းၼၼ်ႉယူႇၶႃႈဢေႃႈ၊” ဝႃႈၼင်ႇၼႆဢေႃႈ။ ၸဝ်ႈယေႇသု၊ ၵေႃႈလၢတ်ႈလႄႈဝႃႈ၊ “လဵင်ႉထိင်းသူဝ်းဢွၼ်ႇၵဝ်တင်းလၢႆတႃႉ၊” ဝႃႈၼင်ႇၼႆဢေႃႈ။-
မၼ်းၸဝ်ႈသမ်ႉထၢမ်ထႅင်ႈပွၵ်ႈတီႈသွင်လႄႈဝႃႈ၊ “ သိမုၼ်ႇ၊ လုၵ်ႈၸၢႆး ယူဝ်းႁၢၼ်ႇ၊ ႟။ ၸွင်ႇမႂ်းႁၵ်ႉၵဝ်ႁိုဝ်း၊” ဝႃႈၼႆလႄႈ၊ မၼ်းသမ်ႉၶိုၼ်းလဝ်ႈလၢတ်ႈလႄႈဝႃႈ၊ “ပဵၼ်ဢၼ်ၸိုဝ်ႈၸႂ်ႈတီႈၶႃႈယဝ်ႉ။ ၸဝ်ႈႁဝ်းႁုလွင်ႈဢၼ်ၵဝ်ၶႃႈႁၵ်ႉၸဝ်ႈႁဝ်းၼၼ်ႉယူႇၶႃႈဢေႃႈ၊” ဝႃႈၼင်ႇၼႆဢေႃႈ။ မၼ်းၸဝ်ႈၵေႃႈလၢတ်ႈလႄႈဝႃႈ၊ “ပႂ်ႉသူဝ်းၵဝ်တင်းလၢႆတႃႉ၊” ဝႃႈၼင်ႇၼႆဢေႃႈ။-
မၼ်းၸဝ်ႈသမ်ႉထၢမ်ထႅင်ႈပွၵ်ႈတီႈသၢမ်လႄႈဝႃႈ၊ “ သိမုၼ်ႇ၊ လုၵ်ႈၸၢႆး ယူဝ်းႁၢၼ်ႇ၊ ႟။ ၸွင်ႇမႂ်းႁၵ်ႉၵဝ်ႁိုဝ်း၊” ဝႃႈၼႆလႄႈ၊ပိူဝ်ႈဢၼ်မၼ်းၸဝ်ႈထၢမ်ထူၼ်ႈထိုင်သၢမ်ပွၵ်ႈလႄႈဝႃႈ၊ “ၸွင်ႇမႂ်းႁၵ်ႉၵဝ်ႁိုဝ်း၊” ဝႃႈၼႆၼၼ်ႉ၊ ပေႇတရု၊ ၸႂ်လုလႄႈလဝ်ႈလၢတ်ႈဝႃႈ၊ “ၸဝ်ႈၽြႃးတီႈၶႃႈ။ ၸဝ်ႈႁဝ်းႁုလွင်ႈတၢင်းၵူႈၸိူဝ်ႉၵူႈပိူင်ဢေႃႈ။ ၸဝ်ႈႁဝ်းႁုလွင်ႈဢၼ်ၵဝ်ၶႃႈႁၵ်ႉၸဝ်ႈႁဝ်းၼၼ်ႉယူႇၶႃႈဢေႃႈ၊” ဝႃႈၼင်ႇၼႆဢေႃႈ။ မၼ်းၸဝ်ႈၵေႃႈလၢတ်ႈလႄႈဝႃႈ၊ “လဵင်ႉထိင်းသူဝ်းၵဝ်တင်းလၢႆတႃႉ။-
ၵဝ်ဝႃႈတီႈၸိုဝ်ႈတီႈၸႂ်ႈမၼ်းၸမ်ႉ၊မိူဝ်ႈဢၼ်မႂ်းယင်းၼုမ်ႇယင်းၵမ်ယူႇၼၼ်ႉၸိုင်၊မႂ်းၸၢင်ႈႁတ်ႉသၢႆဢႅဝ်မႂ်းလႄႈၵႂႃႇၵႃႈတီႈဢၼ်မႂ်းၶႂ်ႈၵႂႃႇၼၼ်ႉဢေႃႈ။ ၵူၺ်းၵႃႈ၊မိူဝ်ႈဢၼ်မႂ်းထဝ်ႈမႃးၼၼ်ႉၸမ်ႉ၊မႂ်းတၵ်းယဵတ်ႇမိုဝ်းမႂ်းတင်းသွင်ၶွၼ်လႄႈပိူၼ်ႈတၢင်ႇၵေႃႉတၵ်းမတ်ႉဢႅဝ်မႂ်းသေလႄႈဢဝ်မႂ်းၵႂႃႇၵႃႈတီႈဢၼ်မႂ်းဢမ်ႇၶႂ်ႈၵႂႃႇလႃးလႃးၼၼ်ႉဢေႃႈ၊” ဝႃႈၼင်ႇၼႆဢေႃႈ။-
မၼ်းၸဝ်ႈဝႃႈၸိူဝ်ႉၼင်ႇၼႆႁႂ်ႈလႆႈလၢတ်ႈၼႄလွင်ႈဢၼ် ပေႇတရု၊ တၵ်းလႆႈၶၢမ်ႇတၢႆၸိူဝ်ႉၼင်ႇႁိုဝ်လႄႈ ႁႂ်ႈမုၼ်ၽုင်းၽြႃးပဵၼ်ၸဝ်ႈထၢင်ႇသႃးမႃးၼၼ်ႉဢေႃႈ။ မၼ်းၸဝ်ႈလၢတ်ႈၸိူဝ်ႉၼင်ႇၼၼ်သေယဝ်ႉ၊သမ်ႉလၢတ်ႈတီႈမၼ်းလႄႈဝႃႈ၊ “ၸွမ်းၵဝ်မႃးတႃႉ၊” ဝႃႈၼင်ႇၼႆဢေႃႈ။
ပေႇတရု၊ ဝၢႆႇတူၺ်းလႄႈႁၼ်တပႄးၸဝ်ႈတၢင်ႇၵေႃႉမီးယူႇၽၢႆႇလင်မၼ်းဢေႃႈ။ တပႄးၸဝ်ႈၵေႃႉၼၼ်ႉပဵၼ်ၵေႃႉဢၼ် ၸဝ်ႈယေႇသု၊ ႁၵ်ႉ၊ဢၼ်ယၢမ်ႈယူႇႁိမ်းၶၢင်ႈၽၢႆႇၶႂႃၸဝ်ႈၼႂ်းမိူဝ်ႈဢၼ်ၵိၼ်ၶဝ်ႈၶမ်ႈမိူဝ်ႈၼၼ်ႉသေလႄႈလဝ်ႈထၢမ်ဝႃႈ၊ “ၸဝ်ႈၽြႃးတီႈၶႃႈ။ ၵေႃႉဢၼ်ဢဝ်ၸဝ်ႈႁဝ်းဢၢပ်ႈၼႂ်းမိုဝ်းရၢၼ်ႇသူႇၼၼ်ႉပဵၼ်ၽူႈလႂ်ၶႃႈ၊” ဝႃႈၼင်ႇၼႆၼၼ်ႉဢေႃႈ။-
မိူဝ်ႈဢၼ် ပေႇတရု၊ ႁၼ်တပႄးၸဝ်ႈၵေႃႉၼၼ်ႉၸိုင်၊မၼ်းလဝ်ႈထၢမ်တီႈ ၸဝ်ႈယေႇသု၊ လႄႈဝႃႈ၊ “ၸဝ်ႈၽြႃးတီႈၶႃႈ။ တီႈၵေႃႉၼႆႉသမ်ႉတၵ်းပဵၼ်ၸိူဝ်ႉၼင်ႇႁိုဝ်ၶႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၵေႃႈ လၢတ်ႈလႄႈဝႃႈ၊ “ပေႃးၵဝ်ၶႂ်ႈႁႂ်ႈၵေႃႉၼႆႉလႆႈယူႇတေႃႇထိုင်ႁွတ်ႈၶိင်ႇၵႃႇလႃႉဢၼ်ၵဝ်တၵ်းၶိုၼ်းမႃးၼၼ်ႉၸိုင်၊ၸၢပ်ႈသႅင်ႇၵၼ်တင်းမႂ်းၸိူဝ်ႉၼင်ႇႁိုဝ်။ မႂ်းၸမ်ႉ၊ၸွမ်းၵဝ်မႃးၵူၺ်းတႃႉ၊” ဝႃႈၼင်ႇၼႆဢေႃႈ။
ႁဵတ်းၼၼ်လႄႈ၊ၵႂၢမ်းၸဝ်ႈၶေႃႈဢၼ်ဝႃႈ၊တပႄးၸဝ်ႈၵေႃႉၼၼ်ႉတၵ်းဢမ်ႇလႆႈတၢႆ ဝႃႈၼင်ႇၼႆၼၼ်ႉၸွတ်ႇတူဝ်ႈၵႂႃႇၼႂ်းပီႈၼွင်ႉတင်းလၢႆဢေႃႈ။ ၼႂ်းဝႃႈၼၼ်သေၵေႃႈ၊မၼ်းၸဝ်ႈၶႂ်ႈဝႃႈ၊ၵေႃႉၼၼ်ႉဢမ်ႇလႆႈတၢႆဝႃႈၼႆဢမ်ႇၸႂ်ႈ။ မၼ်းၸဝ်ႈၶႂ်ႈဝႃႈ၊ “ပေႃးၵဝ်ၶႂ်ႈႁႂ်ႈၵေႃႉၼၼ်ႉလႆႈယူႇတေႃႇထိုင်ၶိင်ႇၵႃႇလႃႉဢၼ်ၵဝ်တၵ်းမႃးၼၼ်ႉၸိုင်၊ၸၢပ်ႈသႅင်ႇၵၼ်တင်းမႂ်းၸိူဝ်ႉၼင်ႇႁိုဝ်၊” ဝႃႈၼင်ႇၼႆၵူၺ်းဢေႃႈ။
တပႄးၸဝ်ႈၵေႃႉၼႆႉပဵၼ်ၵေႃႉဢၼ်ၶၢမ်ႇသၢၵ်ႈသေႇလွင်ႈတၢင်းၸိူဝ်းၼႆႉလႄႈ၊တႅမ်ႈဝႆႉလွင်ႈတၢင်းၸိူဝ်းၼႆႉဢေႃႈ။ ပိူဝ်ႈၼႆလႄႈႁဝ်းႁုဝႃႈ၊ၵႃႈဢၼ်မၼ်းၶၢမ်ႇသၢၵ်ႈသေႇၼၼ်ႉပဵၼ်ဢၼ်ၸိုဝ်ႈဢၼ်ၸႂ်ႈဢေႃႈ။
လွင်ႈတၢင်းဢၼ် ၸဝ်ႈယေႇသု၊ ႁဵတ်းတၢင်ႇၸိူဝ်ႉတၢင်ႇဢၼ်ယင်းမီးၼမ်ၼႃႇလူးၵွၼ်ႇဢေႃႈ။ ပေႃးတေတႅမ်ႈဝႆႉလွင်ႈတၢင်းတင်းသဵင်ႈတင်းလူင်ဢၼ်လႂ်ဢၼ်ၼၼ်ႉၸိုင်၊ၵဝ်ထၢင်ႇၵျၢမ်းလိၵ်ႈတၵ်းၼမ်ၼႃႇလူင်လၢင်ထၢၼ်ႈပေႃးတၵ်းလူၼ်ႉလိူဝ်လိၼ်မိူင်းၵႂႃႇဢေႃႈ။ ၶၢဝ်ႇတြႃးသိူဝ်းပျေႃႇဢၼ်သြႃႇယူဝ်းႁၢၼ်ႇတႅမ်ႈယဝ်ႉယဝ်ႉဢေႃႈ။
ၶုၼ် ထေႃးၽိလု၊ တီႈၶႃႈ႟။ ၵႃႈၼႂ်းၽိုၼ်လိၵ်ႈ ဢၼ်ၵဝ်ၶႃႈတႅမ်ႈဢွၼ်တၢင်းၼၼ်ႉ၊ၵဝ်ၶႃႈတႅမ်ႈလွင်ႈၵူႈၸိူဝ်ႉၵူႈမဵဝ်းဢၼ် ၸဝ်ႈယေႇသု၊ တႄႇၸႃႉႁဵတ်းလႄႈသင်ႇသွၼ်ပၼ်၊-
တေႃႇထိုင်ႁွတ်ႈမိုဝ်ႉဝၼ်းဢၼ်မၼ်းၸဝ်ႈၶိုၼ်ႈၵႂႃႇၵႃႈၼိူဝ်မိူင်းၵၢင်ႁၢဝ်ပုၼ်ႉၼၼ်ႉယဝ်ႉၶႃႈဢေႃႈ။ ၸူဝ်ႈဢၼ်မၼ်းၸဝ်ႈဢမ်ႇပႆႇၶိုၼ်ႈၵႂႃႇၵႃႈၼိူဝ်ၼၼ်ႉၸိုင်၊မၼ်းၸဝ်ႈဢဝ်တင်းတၼ်းၶူဝ်းဝိၺိၺ်ႇမူတ်းၸၢင်ႇၸဝ်ႈသင်ႇလၢတ်ႈဝႆႉ၊တီႈတမၢၼ်ႇၸဝ်ႈၸိူဝ်းဢၼ်မၼ်းၸဝ်ႈလိူၵ်ႈၵဵပ်းဢဝ်ဝႆႉၼၼ်ႉဢေႃႈ။-
ဝၢႆးသေမၼ်းၸဝ်ႈၶၢမ်ႇတၢႆလႄႈ လုၵ်ႉၶိုၼ်းလိပ်းယဝ်ႉ၊သီႇသိပ်းဝၼ်းတဵမ်တဵမ်၊မၼ်းၸဝ်ႈၼႄပျႃးတူဝ်ၸဝ်ႈၵဝ်ႇတီႈၶဝ်၊ႁေႃးလၢတ်ႈတြႃးမိူင်းၽြႃးပဵၼ်ၸဝ်ႈသေလႄႈၼႄပျႃးသၢၵ်ႈသေႇဢၼ်ဢမ်ႇတွပ်ႇဢမ်ႇထဵင်လႆႈၼၼ်ႉၼမ်ၼႃႇ၊လွင်ႈဢၼ်မၼ်းၸဝ်ႈဢသၢၵ်ႈလိပ်းၼၼ်ႉဢေႃႈ။-
ယၢမ်းမိူဝ်ႈဢၼ်ၶဝ်ၸုတုမ်ၵၼ်ယူႇၼၼ်ႉၸိုင်၊မၼ်းၸဝ်ႈသင်ႇလၢတ်ႈဝႆႉတီႈၶဝ်လႄႈဝႃႈၸမ်ႉ၊ “ယႃႇပေႁိပ်ႈၼႅတ်ႈဢွၵ်ႇသေၵႃႈၼႂ်းဝဵင်း ယေႇရုသလႅမ်ႇ၊ ၵႂႃႇ။ ပႂ်ႉထႃႈသူးဢၼ်ၵဝ်လၢတ်ႈတီႈသူလူၺ်ႈလွင်ႈသူးပေႃႈၸဝ်ႈၵဝ်ဝႆႉၵတိၼၼ်ႉယူႇတႃႉ။-
သြႃႇ ယူဝ်းႁၢၼ်ႇ၊ ပၼ်မၢင်ႇၵလႃႇပပ်ႉတိၸမ်ႇ ၼႂ်းၼမ်ႉဢေႃႈ။ သူၸမ်ႉ၊ဢမ်ႇပေႃးႁိုင်ပေႃးၼၢၼ်းတၵ်းလႆႈၶၢမ်ႇဢဝ်မၢင်ႇၵလႃႇပပ်ႉတိၸမ်ႇ၊ၼႂ်းဝိၺိၺ်ႇမူတ်းၸၢင်ႇၸဝ်ႈဢေႃႈ။ မီးမႃးၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။
ယၢမ်းမိူဝ်ႈဢၼ်တပႄးၸဝ်ႈတင်းလၢႆ၊ၸုတုမ်ယူႇၵႃႈတီႈ ၸဝ်ႈယေႇသု၊ ၸိုင်၊ၶဝ်လဝ်ႈထၢမ်မၼ်းၸဝ်ႈလႄႈဝႃႈ၊ “ၸဝ်ႈႁဝ်း။ တေႃႈလဵဝ်ၼႆႉ၊ၸဝ်ႈႁဝ်းတေဢဝ်မိူင်းၶိုၼ်းပၼ်တီႈၵူၼ်းမဵဝ်း ဢိသရေး၊ ၶႃႈႁိုဝ်း၊” ဝႃႈၼင်ႇၼႆလႄႈ။
မၼ်းၸဝ်ႈၵေႃႈလၢတ်ႈတီႈၶဝ်လႄႈဝႃႈ၊ “ၶိင်ႇၵႃႇလႃႉတၢင်းဢၼ်ပေႃႈၸဝ်ႈဢဝ်တင်းဢၶႂၢင်ႉဢႃႇၼႃႇတူဝ်ၸဝ်ႈၵဝ်ႇၶိုင်ပွင်ဝႆႉၼၼ်ႉ၊သူဢမ်ႇမီးဢၶႂၢင်ႉဢၼ်တၵ်းလႆႈႁု။-
ၼႂ်းဝႃႈၼၼ်သေၵေႃႈ၊ယၢမ်းမိူဝ်ႈဢၼ်ဝိၺိၺ်ႇမူတ်းၸၢင်ႇၸဝ်ႈ၊လူင်းမႃးၵႃႈၼိူဝ်သူၼၼ်ႉၸိုင်၊သူတၵ်းလႆႈၶၢမ်ႇဢဝ်ႁႅင်းတၼ်းၶူဝ်းလႄႈပဵၼ်သၢၵ်ႈသေႇၵဝ်ၸႃႉၸဵမ်ၵႃႈၼႂ်းဝဵင်း ယေႇရုသလႅမ်ႇ၊ ၵႃႈၼႂ်းမိူင်း ယုတႃႉ၊ ဢိၵ်ႇတင်းမိူင်း သမႃႇရိ ၵူႈတီႈၵူႈလႅၼ်၊တေႃႇထိုင်ႁွတ်ႈတီႈသုတ်းလိၼ်မိူင်းပုၼ်ႉဢေႃႈ၊” ဝႃႈၼင်ႇၼႆဢေႃႈ။-
ဝၢႆးသေလၢတ်ႈဝႃႈၸိူဝ်ႉၼင်ႇၼႆယဝ်ႉၼၼ်ႉ၊ယၢမ်းမိူဝ်ႈဢၼ်ၶဝ်ယင်းတိုၵ်ႉယႅၵ်ႉတူၺ်းမၼ်းၸဝ်ႈယူႇၸိုင်၊မၼ်းၸဝ်ႈလႆႈၶၢမ်ႇတၢင်းဢၼ်ဢုမ်ႈယွင်ႈၶိုၼ်ႈၵႂႃႇၵႃႈၼိူဝ်မိူင်းၵၢင်ႁၢဝ်ပုၼ်ႉသေလႄႈမွၵ်ႇၵုမ်ႈလပ်ႉတႃၶဝ်ၵႂႃႇသေဢေႃႈ။
ၶဝ်ယင်းတိုၵ်ႉမုင်ႈတူၺ်းၵၢင်ႁၢဝ်တီႈဢၼ်မၼ်းၸဝ်ႈၶိုၼ်ႈၵႂႃႇယူႇလႄႈမိူဝ်ႈၼၼ်ႉ၊ၵူၼ်းသွင်ၵေႃႉၼုင်ႈၶူဝ်းဢၼ်ၽိူၵ်ႇၶၢဝ်ၽုတ်းမႃးၸုၵ်းႁိမ်းၶဝ်သေယဝ်ႉ၊-
လၢတ်ႈတီႈၶဝ်လႄႈဝႃႈ၊ “ၵူၼ်း ၵႃႇလိလႄး၊ ၶဝ်႟။ ႁဵတ်းသင်လႄႈသူၸုၵ်းယူႇသေလႄႈႁႅၼ်တူၺ်းၵၢင်ႁၢဝ်ယူႇၼင်ႇႁိုဝ်။ ၸဝ်ႈယေႇသု၊ ဢၼ်ၶၢမ်ႇတၢင်းဢၼ်ယွင်ႈၶိုၼ်ႈၵႂႃႇၵႃႈၼိူဝ်ပုၼ်ႉၼၼ်ႉ၊ၸိူဝ်ႉၼင်ႇဢၼ်သူလႆႈႁၼ်မၼ်းၸဝ်ႈၶိုၼ်ႈၽႃႉၵႂႃႇၼၼ်ႉ၊တၵ်းသမ်ႉၶိုၼ်းလူင်းမႃးၸိူဝ်ႉၼင်ႇၼၼ်ဢေႃႈ၊” ဝႃႈၼင်ႇၼႆဢေႃႈ။
လိုၼ်းၼၼ်ႉ၊တမၢၼ်ႇၸဝ်ႈတင်းလၢႆလုၵ်ႉသေၵႃႈတီႈလွႆ သၢၼ်ႇလုၼ်ႇ၊ မိူဝ်းၵႂႃႇၵႃႈတီႈဝဵင်း ယေႇရုသလႅမ်ႇ ဢၼ်ယၢၼ်ၵႆၵၼ်လၵ်းၼိုင်ႈၸမ်ၸမ်ၼၼ်ႉဢေႃႈ။-
ၶဝ်ၶဝ်ႈဝဵင်းၵႂႃႇလႄႈၶိုၼ်ႈၵႂႃႇၸူးၵႃႈတီႈႁိူၼ်းႁၢၼ်ႉၼိူဝ်တီႈဢၼ်ၶဝ်ယူႇသဝ်းၼၼ်ႉဢေႃႈ။ ၶဝ်ၸိူဝ်းၼၼ်ႉ၊ပဵၼ် ပေႇတရု၊ယူဝ်းႁၢၼ်ႇ၊ယႃႇၵုပ်ႈ၊ဢၼ်ႇတရေႇ၊ၽိလိပ်ႉပု၊ထူဝ်းမႃႉ၊ပႃႇထေႃးလမႄး၊မတ်ႈထႄႇ၊ယႃႇၵုပ်ႈ၊ လုၵ်ႈၸၢႆး ဢႃႇလၽေး၊သိမုၼ်ႇၸေႇလုတ်ႉ၊ ဢိၵ်ႇတင်း ယုတႃႉ၊ လုၵ်ႈၸၢႆး ယႃႇၵုပ်ႈ ဢေႃႈ။-
ၶဝ်ၸိူဝ်းၼႆႉ၊ၵႆႉၸုတုမ်ၵၼ်သူးတွင်းလႄႈႁဵတ်းပထၼႃႇလူၺ်ႈၵၼ်တင်းမႄႈယိင်းတင်းလၢႆ ဢိၵ်ႇတင်း မႃႇရိ၊ မႄႈၸဝ်ႈ ယေႇသု၊ တင်းၼွင်ႉၸၢႆးၸဝ်ႈၸိူဝ်းၼၼ်ႉယူႇဢေႃႈ။
လိုၼ်းၼၼ်ႉ၊ဢမ်ႇႁိုင်ဢမ်ႇၼၢၼ်းတပႄးၸဝ်ႈဢၼ်မီးပၢၵ်ႇပၢႆသၢဝ်းၵေႃႉၸမ်ၸမ်၊ႁဵတ်းပၢင်ၵုမ်သေလႄႈ တီႈၼၼ်ႈ ပေႇတရု၊ လုၵ်ႉၸုၵ်းလႄႈလၢတ်ႈဝႃႈ၊-
“ပီႈၼွင်ႉၶဝ်႟။ တၢင်းဢၼ်ဝိၺိၺ်ႇမူတ်းၸၢင်ႇၸဝ်ႈဢဝ်တင်းသူပ်း တႃႇဝိတ်ႈ၊ ႁေႃးဝႆႉၵႂၢမ်းပျႃႇတိၵ်ႈၵႃႈၼႂ်းၵျၢမ်းလိၵ်ႈလွင်ႈ ယုတႃႉ၊ ၵေႃႉဢၼ်ဢွၼ်ႁူဝ်ၼႄတၢင်းတီႈၶဝ်ၸိူဝ်းဢၼ်တိဢဝ် ၸဝ်ႈယေႇသု၊ ၼၼ်ႉၸိုင်၊ပျေႉၸုမ်ႇယဝ်ႉဢေႃႈ။-
ယုတႃႉ၊ ၼႆႉ၊ၶဝ်ႈပႃးၼႂ်းမူႇၸုမ်းႁဝ်းလႄႈလိူၵ်ႈၵဵပ်းဝႆႉ၊ႁႂ်ႈႁဵတ်းၵၢၼ်ၸဝ်ႈႁူမ်ႈၵၼ်တင်းႁဝ်းယဝ်ႉ။
“(ငိုၼ်းဢၼ်မၼ်းႁဵတ်းဢမ်ႇတြႃးလႄႈလႆႈမႃးၼၼ်ႉ၊သိုဝ်ႉဢဝ်လိၼ်လွၵ်းၼိုင်ႈယဝ်ႉလႄႈတီႈဢၼ်မၼ်းလႆႈလူမ်ႉပၵ်းၶိတ်းတၢႆယဝ်ႉ။ တွင်ႉမၼ်းတႅၵ်ႇလႄႈသႆႈမၼ်းႁႄႈႁၢႆးၵႂႃႇယဝ်ႉ။-
ၵူၼ်း ဝဵင်းယေႇရုသလႅမ်ႇ၊ တင်းသဵင်ႈတင်းလူင်ငိၼ်းလွင်ႈတၢင်းၼၼ်ႉလႄႈ ၶဝ်ဢဝ်တင်းၵႂၢမ်းၽႃႇသႃႇၶဝ်ႁွင်ႉႁဵၵ်ႈတီႈလိၼ်ၼၼ်ႉလႄႈဝႃႈ၊ ဢၵေးလႃႉတမႃႉ၊ ဢၼ်ပွင်ႇဝႃႈလွၵ်းလိၼ်လိူတ်ႈ၊ဝႃႈၼင်ႇၼႆၼၼ်ႉယဝ်ႉ။)
“ၸွမ်းၼင်ႇၵျၢမ်းလိၵ်ႈသႃႇလၢမ်ႇတႅမ်ႈဝႆႉလႄႈဝႃႈ၊ ‘ႁႂ်ႈႁိူၼ်းမၼ်းႁၢမ်းလႄႈ ယႃႇပေႁႂ်ႈၵူၼ်းယူႇသေၵေႃႉသေၵူၼ်း၊’ ဝႃႈၼင်ႇၼႆ၊သမ်ႉတႅမ်ႈဝႆႉထႅင်ႈလႄႈဝႃႈ၊ ‘ႁႂ်ႈပိူၼ်ႈတၢင်ႇၵေႃႉလႆႈသိုပ်ႇဢဝ်ၼႃႈၵၢၼ်မၼ်းတႃႉ၊’ ဝႃႈၼင်ႇၼႆ မီးဝႆႉယဝ်ႉ။
“ပိူဝ်ႈၼႆလႄႈသေၵေႃႉၵေႃႉထုၵ်ႇလီၶဝ်ႈပႃးၸွမ်းႁဝ်း၊မႃးႁႂ်ႈလႆႈၶၢမ်ႇသၢၵ်ႈသေႇလွင်ႈၸဝ်ႈႁဝ်း ယေႇသု၊ လုၵ်ႉၶိုၼ်းလိပ်းၼၼ်ႉဢေႃႈ။ မၼ်းၼၼ်ႉ၊တၵ်းလႆႈပဵၼ်ၵေႃႉဢၼ်ၶဝ်ႈပႃးႁူမ်ႈလူၺ်ႈၵၼ်တင်းႁဝ်းမႃး၊ၸႃႉၸဵမ်ၶိင်ႇၵႃႇလႃႉဢၼ်ၸဝ်ႈ ယေႇသု၊ ၵႂႃႇမႃးၶဝ်ႈဢွၵ်ႇလူၺ်ႈၵၼ်တင်းႁဝ်း၊-
ၸႃႉၸဵမ်မိူဝ်ႈၶိင်ႇဢၼ်သြႃႇ ယူဝ်းႁၢၼ်ႇ၊ ပၼ်မၢင်ႇၵလႃႇပပ်ႉတိၸမ်ႇ တေႃႇထိုင်ႁွတ်ႈဝၼ်းဢၼ် ၸဝ်ႈယေႇသု၊ ၽၢတ်ႇယၢၼ်ၵၼ်တင်းႁဝ်းလႄႈလႆႈၶၢမ်ႇတၢင်းဢၼ်ဢဝ်ၶိုၼ်ႈၵႂႃႇၵႃႈၼိူဝ်ၵၢင်ႁၢဝ်၊သိုဝ်ႈၼႃႈတႂ်ႈတႃႁဝ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၶဝ်ဢွၼ်ၵၼ်ႁွင်ႉဢွၵ်ႇၸိုဝ်ႈၵူၼ်းသွင်ၵေႃႉ၊ၵေႃႉၼိုင်ႈပဵၼ် ယူဝ်းသႅပ်ႈ၊ ဢၼ်ႁွင်ႉဝႃႈ၊ ပႃႇသပႃႉ၊ ( ယုသတု၊ ၵေႃႈႁွင်ႉ) ၼၼ်ႉ၊ဢိၵ်ႇတင်း မတ်ႈထိ၊ ပုၼ်ႈတႃႇတေလိူၵ်ႈဢဝ်ၵေႃႉၼိုင်ႈဢေႃႈ။-
ၵမ်းၼၼ်ႉ၊ၶဝ်သူးတွင်းလႄႈဝႃႈ၊ “ၸဝ်ႈၽြႃးတီႈၶႃႈ။ ၸဝ်ႈႁဝ်းႁုၸႅင်ႈတၢင်းၵျၢမ်ႇတၢင်းပွင်ၵူၼ်းၵူႈၵေႃႉၶႃႈဢေႃႈ။ ပိူဝ်ႈၼႆလႄႈၶႅၼ်းတေႃႈၼႄပျႃးၼႂ်းသွင်ၵေႃႉၼႆႉ၊ၸဝ်ႈႁဝ်းလိူၵ်ႈၵဵပ်းဢဝ်ၵေႃႉလႂ်၊-
ႁႂ်ႈသိုပ်ႇပွင်ႁဵတ်းၼႃႈၵၢၼ်ဢရႃႇထမ်ႇမႃႉသြႃႇ၊ဢိၵ်ႇတင်းဢရႃႇတမၢၼ်ႇၸဝ်ႈ၊တႅၼ်းတီႈ ယုတႃႉ၊ ၵေႃႉဢၼ်ၽၢတ်ႇဢွၵ်ႇၵႂႃႇယူႇၵႃႈတီႈဢၼ်မၼ်းထုၵ်ႇလီယူႇၼၼ်ႉသေၵမ်းတီႈၶႃႈ၊” ဝႃႈၼင်ႇၼႆသေယဝ်ႉ၊-
ၶဝ်တူၵ်းၸႃႇၵွၵ်ႈလႄႈၼႃႈၵၢၼ်ၼၼ်ႉတူၵ်းတီႈ မတ်ႈထိ၊ သေယဝ်ႉ၊မၼ်းလႆႈၶဝ်ႈပႃးႁူမ်ႈလူၺ်ႈၵၼ်တင်း၊မူႇၸုမ်းတမၢၼ်ႇၸဝ်ႈသိပ်းဢဵတ်းပႃးၼၼ်ႉဢေႃႈ။
မိူဝ်ႈဢၼ်ပဵၼ်ဝၼ်းပွႆး ပဵၼ်ႇတေႇၵုၵ်ႉတေႇ၊ ၸိုင်၊ၶဝ်ၸိူဝ်းဢၼ်ယုမ်ႇမၢတ်ႈတင်းသဵင်ႈတင်းလူင်၊ဢွၼ်ၵၼ်ၸုတုမ်ယူႇတီႈၼိုင်ႈဢေႃႈ။-
မိူဝ်ႈၼၼ်ႉၵမ်းလဵဝ်၊သဵင်ဢၼ်မိူၼ်သဵင်လူမ်းၽိဝ်ႁုင်လုၵ်ႉၵႃႈတီႈၵၢင်ႁၢဝ်ပေႃႇမႃး၊တဵမ်ႁိူၼ်းဢၼ်ၶဝ်ၼင်ႈယူႇၼၼ်ႉဝႆႉဢေႃႈ။-
ၶဝ်လႆႈႁၼ်ဢၼ်မိူၼ်ၸိူဝ်ႉၼင်ႇပဵဝ်ၽႆးၼမ်ၼႃႇၽုတ်းမႃးၽႄႈဢွၵ်ႇၵႂႃႇၸပ်းၵႃႈၼိူဝ်ၶဝ်၊ႁင်းၽႂ်ႁင်းမၼ်းဢေႃႈ။-
ၶဝ်ၼၼ်ႉ၊တင်းသဵင်ႈတင်းလူင်ပျေႉၸုမ်ႇတဵမ်ဝႆႉတင်းဝိၺိၺ်ႇမူတ်းၸၢင်ႇၸဝ်ႈလႄႈဝိၺိၺ်ႇၸဝ်ႈႁဵတ်းႁႂ်ႈၶဝ်ၸၢင်ႈမေႃလၢတ်ႈၼႂ်းၵႂၢမ်းၽႃႇသႃႇတၢင်ႇၸိူဝ်ႉတၢင်ႇၶိူဝ်းတင်းလၢႆဢေႃႈ။
မိူဝ်ႈယၢမ်းၼၼ်ႉၵူၼ်းမဵဝ်း ၵျူး၊ ဢၼ်ယုမ်ႇမၢတ်ႈၵူဝ်ယမ်ၽြႃးပဵၼ်ၸဝ်ႈလႄႈလုၵ်ႉသေၵႃႈတီႈတၢင်ႇဝၢၼ်ႈတၢင်ႇဝဵင်း၊ၼႂ်းလေႃးၵႃႉၵူႈတီႈၵူႈလႅၼ်ၼၼ်ႉ မႃးမီးယူႇၼႂ်းဝဵင်း ယေႇရုသလႅမ်ႇ၊ ဢေႃႈ။-
မိူဝ်ႈဢၼ်ၶဝ်ၸိူဝ်းၼၼ်ႉ၊လႆႈငိၼ်းသဵင်ၼၼ်ႉၸိုင်၊ၵူၼ်းၼမ်ၼႃႇၸုတုမ်ၵၼ်မႃးဢေႃႈ။ ၶဝ်ဢွၼ်ၵၼ်ၵႂင်ၸႂ်ယုင်ႈၸႂ်ၵွပ်ႈပိူဝ်ႈၶဝ်လႆႈငိၼ်းတပႄးၸဝ်ႈတင်းလၢႆ၊ႁေႃးလၢတ်ႈတြႃးၼႂ်းၵႂၢမ်းၽႃႇသႃႇၶဝ်ၸိူဝ်းဢၼ်လႆႈငိၼ်းႁင်းၽႂ်ႁင်းမၼ်းယူႇၼၼ်ႉဢေႃႈ။-
ၼႂ်းတၢင်းဢၼ်ၶဝ်ယင်းယုင်ႈၸႂ်ၵႂင်ၸႂ်လႄႈဢၢမ်းၼႃႇလူင်လၢင်ၼၼ်ႉ ၶဝ်လၢတ်ႈလႄႈဝႃႈ၊ “ၵူၼ်းၸိူဝ်းဢၼ်ႁေႃးလၢတ်ႈၸိူဝ်ႉၼင်ႇၼႆယူႇၼႆႉ၊ပဵၼ်ၵူၼ်းမဵဝ်း ၵႃႇလိလႄး၊ ဢမ်ႇၸႂ်ႈႁိုဝ်း။-
သမ်ႉပဵၼ်ၸိူဝ်ႉၼင်ႇႁိုဝ်လႄႈႁဝ်းလႆႈငိၼ်းပဵၼ်ၵႂၢမ်းၽႃႇသႃႇမဵဝ်းႁဝ်းဝႆႉ၊ႁင်းၽႂ်ႁင်းမၼ်းၼင်ႇႁိုဝ်။-
ႁဝ်းၸိူဝ်းၼႆႉ၊ပဵၼ်ၵူၼ်းမဵဝ်း ပႃႇထိ၊ တင်းမိူင်း မေႇတိ၊ တင်းမိူင်း ဢေႇလမ်ႇ၊ တင်းမိူင်း မေႇသူဝ်ႇပူဝ်ႇတေးမီးယႃး၊ တင်းမိူင်း ယုတႃႉ၊ တင်းမိူင်း ၵပ်ႉပတေႃးၵိ၊ တင်းမိူင်း ပွၼ်ႇတု၊ တင်းမိူင်း ဢႃႇသိ၊-
တင်းမိူင်း ၽႃႇရုၵိ၊ တင်းမိူင်း ပမ်ႇပုလိ၊ တင်းမိူင်း ဢေးၵျိပ်ႉ၊ တင်းလၢႆ တင်းၵူၼ်းဝၢၼ်ႈၼွၵ်ႈၼႃးပၢင်ႇမိူင်း လိပ်ႉပီးယႃး၊ ဢၼ်ၸမ်ၵၼ်တင်းဝဵင်း ၵုရေႇၼေႇ၊ ၸိူဝ်းၼၼ်ႉဢေႃႈ။-
ႁဝ်းၵမ်ႈၽွင်ႈယင်းပဵၼ်ၵူၼ်းဝဵင်း ရူဝ်းမႃႉ၊ ၸႃႉၸဵမ်ၵူၼ်းမဵဝ်း ၵျူး၊ တင်းၵူၼ်းတၢင်ႇၸိူဝ်ႉတၢင်ႇၶိူဝ်း၊ဢၼ်လႆႈၶဝ်ႈသႃႇသၼႃႇ ၵျူး၊ မႃးဢိၵ်ႇတင်းႁဝ်းၸိူဝ်းဢၼ်လုၵ်ႉသေၵႃႈတီႈ၊ၵုၼ် ၵရေႇတေႇ၊ ဢိၵ်ႇတင်းမိူင်း ဢရေးပီးယႃး၊ မႃးၸိူဝ်းၼႆႉ လႆႈငိၼ်းၶဝ်ႁေႃးလၢတ်ႈလူၺ်ႈၵႂၢမ်းၽႃႇသႃႇႁဝ်းၵူႈၶိူဝ်းၶိူဝ်း၊ဢၼ်ႁေႃးလၢတ်ႈလွင်ႈတၢင်းဢၼ်ယႂ်ႇဢၼ်မျၢတ်ႈ၊ဢၼ်ၽြႃးပဵၼ်ၸဝ်ႈပွင်ႁဵတ်းၼၼ်ႉယူႇယဝ်ႉ၊” ဝႃႈၼင်ႇၼႆဢေႃႈ။-
ၶဝ်ဢၢမ်းၼႃႇလူင်လၢင်လႄႈဢမ်ႇၸၢင်ႈပွင်ႇၸၢင်ႈလႅင်းသေယဝ်ႉ၊ၶဝ်ၼင်ႇၵၼ်ၵၼ်ၵေႃႉၼိုင်ႈလႄႈၵေႃႉၼိုင်ႈ၊တွင်ႈထၢမ်တီႈၵၼ်လႄႈဝႃႈ၊ “လွင်ႈတၢင်းၼႆႉပဵၼ်ၸိူဝ်ႉၼင်ႇႁိုဝ်၊” ဝႃႈၼင်ႇၼႆယူႇဢေႃႈ။
ၵူၺ်းၵႃႈ၊မီးၵူၼ်းၵမ်ႈၽွင်ႈသႄႉသွမ်းတပႄးၸဝ်ႈၸိူဝ်းၼၼ်ႉလႄႈဝႃႈ၊ “ၶဝ်မဝ်းလဝ်ႈဢိူဝ်း၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ ပေႇတရု၊ လုၵ်ႉၸုၵ်းလူၺ်ႈၵၼ်တင်းတမၢၼ်ႇၸဝ်ႈသိပ်းဢဵတ်းပႃးလႄႈ ဢဝ်တင်းသဵင်ဢၼ်ယႂ်ႇၼႃႇႁေႃးလၢတ်ႈၵႃႈတီႈမူႇၵူၼ်းလႄႈဝႃႈ၊ “ပီႈၼွင်ႉ ၵျူး၊ ၶဝ်ဢိၵ်ႇတင်းသူၸိူဝ်းဢၼ်ယူႇၼႂ်းဝဵင်း ယေႇရုသလႅမ်ႇ၊ တင်းသဵင်ႈတင်းလူင်ၶဝ်႟။ ထွမ်ႇဢဝ်ၵဝ်ၶႃႈသေၵမ်း။ လွင်ႈတၢင်းၼႆႉ၊ပဵၼ်ၸိူဝ်ႉၼင်ႇႁိုဝ်ဝႃႈၼႆႁႂ်ႈၵဝ်ၶႃႈလႆႈလၢတ်ႈၼႄပၼ်သေၵမ်းၶႃႈ။-
ၶိင်ႇယၢမ်းၼႆႉပဵၼ်ၵၢင်ၼႂ်ၵဝ်ႈမွင်းလႄႈၶဝ်ၸိူဝ်းၼႆႉဢမ်ႇမဝ်းလဝ်ႈၸိူဝ်ႉၼင်ႇဢၼ်သူထၢင်ႇပဵၼ်ၼၼ်ႉၶႃႈ။-
လွင်ႈၼႆႉၸမ်ႉ၊ပဵၼ်ၸွမ်းၵႃႈၼင်ႇဢၼ်ၵႂၢမ်းပရေႃးၽႅတ်ႈ ယူဝ်းဢေႇလႃႉ၊ ႁေႃးလၢတ်ႈဝႆႉလႄႈဝႃႈ။
“‘ၽြႃးပဵၼ်ၸဝ်ႈလၢတ်ႈဝႆႉလႄႈဝႃႈ၊ ၼႂ်းၶိင်ႇၵႃႇလႃႉလိုၼ်းသုတ်းၼၼ်ႉ တၵ်းလႆႈပဵၼ်မႃးၸမ်ႉ၊ ၵဝ်တၵ်းပၼ်ဝိၺိၺ်ႇၵဝ်ၵႃႈၼိူဝ် မဵဝ်းၵူၼ်းၵူႈမဵဝ်းဢေႃႈ။ လုၵ်ႈလၢင်းသူတၵ်းဢဝ်တင်းၺၢၼ်ႇပရေႃးၽႅတ်ႈ ႁေႃးလၢတ်ႈဢေႃႈ။ ၵူၼ်းၼုမ်ႇၵူၼ်းၵမ်သူတၵ်းလႆႈႁၼ်ၼိမိၵ်ႈ လၢၵ်ႈၶၼႃႇဢေႃႈ။ ၵူၼ်းထဝ်ႈၵူၼ်းၵႄႇသူၵေႃႈ တၵ်းလႆႈၼွၼ်းၽၼ်ႁၼ်ၼိမိၵ်ႈတင်းလၢႆဢေႃႈ။
ၸႂ်ႈတႄႉ။ ၼႂ်းဝၼ်းၼၼ်ႉၵဝ်တၵ်းပၼ်ဝိၺိၺ်ႇၵဝ်၊ ၵႃႈၼိူဝ်ၶႃႈၵူၼ်းၸၢႆးၶႃႈၵူၼ်းယိင်းၵဝ်တင်းလၢႆလႄႈ ၶဝ်ၵေႃႈ တၵ်းဢဝ်တင်းၺၢၼ်ႇပရေႃးၽႅတ်ႈလႄႈႁေႃးလၢတ်ႈဢေႃႈ။
ၵဝ်တၵ်းႁဵတ်းၼႄမဵဝ်းဢၼ်လီဢၢမ်းၵႃႈၼိူဝ်ၽႃႉၵၢင်ႁၢဝ်၊ ဢိၵ်ႇတင်းၼိမိၵ်ႈဢၼ်လီဢၢမ်းၵႃႈၼိူဝ်လိၼ်မိူင်းၼႆႉဢေႃႈ။ တၢင်းဢၼ်ပဵၼ်လိူတ်ႈပဵၼ်ယၢင်၊ပဵၼ်မုၵ်ႉၽႆးပဵဝ်ၽႆးတင်းတၢင်းဢၼ်ပဵၼ်ၵႂၼ်းၽႆးလႂ်။
တႃဝၼ်းတၵ်းလပ်းသိင်ႇၵႂႃႇၽိတ်းၽိတ်းလႄႈ၊ လိူၼ်ၵေႃႈတၵ်းလႅင်ၸၢင်းႁၢင်းထၢၼ်ႈပေႃးမိူၼ်လိူတ်ႈၵႂႃႇ၊ ၼႂ်းၸူဝ်ႈဢၼ်ဝၼ်းထွတ်ႈဝၼ်းမျၢတ်ႈလူင်ထႃႇဝရႃႉၽြႃး၊ဢမ်ႇပႆႁွတ်ႈမႃးၼၼ်ႉဢေႃႈ။
မိူဝ်ႈၼၼ်ႉ၊ၽူႈလႂ်သေဢမ်ႇဝႃႈ၊ၵေႃႉဢၼ်ၵၢဝ်ႇႁႃဢေႁႃထႃႇဝရႃႉၽြႃး၊ ပုၼ်ႈတၢင်းဢၼ်တၵ်းမႃႉၸႃႉၸွႆႈထႅမ်ၼၼ်ႉ၊ ၵေႃႉၼၼ်ႉတၵ်းလွတ်ႈဢေႃႈ၊’ ဝႃႈၼင်ႇၼႆၼၼ်ႉယဝ်ႉဢေႃႈ။
“ပိူဝ်ႈၼႆလႄႈပီႈၼွင်ႉၸိူဝ်ႉၶိူဝ်း ဢိသရေး၊ ၶဝ်႟။ ထွမ်ႇငိၼ်းဢဝ်ၵႂၢမ်းၼႆႉၸေးၸေးတႃႉ။ ၸဝ်ႈယေႇသု၊ ၵူၼ်းဝဵင်း ၼႃႇၸရႅတ်ႈ၊ ၼႆႉ၊လႆႈၶၢမ်ႇတၢင်းဢၼ်ဢႃႇၼႃႇတၼ်းၶူဝ်းၽြႃးပဵၼ်ၸဝ်ႈ၊ၶၢမ်ႇသၢၵ်ႈသေႇဝႆႉ၊ၽၢႆႇၼႃႈသူထၢင်ႇထၢင်ႇသႃးသႃး၊ၵႃႈၼႂ်းတၢင်းဢၼ်ၽြႃးပဵၼ်ၸဝ်ႈဢဝ်မၼ်းၸဝ်ႈၼၼ်ႉသေလႄႈပွင်ႁဵတ်းၼိမိၵ်ႈဢၼ်လီဢၢမ်း၊ဢိၵ်ႇတင်းတၼ်းၶူဝ်းဢၼ်လၢၵ်ႇလၢႆးယဝ်ႉ။ ၵွပ်ႈပိူဝ်ႈလွင်ႈတၢင်းၼႆႉတင်းသဵင်ႈတင်းလူင်၊ႁဵတ်းပဵၼ်သိုဝ်ႈၼႃႈတႂ်ႈတႃသူမူတ်းမူတ်းလႄႈသူႁုႁၼ်ယူႇယဝ်ႉ။-
ၸွမ်းၼင်ႇဢလူဝ်ႇၽြႃးပဵၼ်ၸဝ်ႈမၵ်းၶၢၼ်းဝႆႉၼၼ်ႉ၊မၼ်းၸဝ်ႈဢဝ် ၸဝ်ႈယေႇသု၊ ဢၢပ်ႈပၼ်တီႈသူသေလႄႈသူၵေႃႈ၊ၸႂ်ႉၶဝ်ၸိူဝ်းဢၼ်ဢမ်ႇတြႃးၼၼ်ႉ၊တွၵ်ႇမၼ်းၸဝ်ႈဝႆႉၵႃႈၼိူဝ်သဝ်မႆႉဝႃးမိုဝ်းလႄႈဢဝ်မၼ်းၸဝ်ႈတၢႆယဝ်ႉ။-
ၵူၺ်းၵႃႈ၊ၽြႃးပဵၼ်ၸဝ်ႈသမ်ႉႁႂ်ႈမၼ်းၸဝ်ႈလုၵ်ႉသေၵႃႈတၢင်းတၢႆၶိုၼ်းလိပ်းမႃးသေလႄႈ ပွႆႇႁႂ်ႈမၼ်းၸဝ်ႈလွတ်ႈသေၵႃႈတီႈတၼ်းၶူဝ်းတၢင်းတၢႆ၊ပိူဝ်ႈဢၼ်ၶုၼ်မရၼႃႉဢမ်ႇၸၢင်ႈမတ်ႉၽုၵ်ႇမၼ်းၸဝ်ႈဝႆႉလႆႈၼၼ်ႉဢေႃႈ။-
ပိူဝ်ႈၼႆလႄႈ တႃႇဝိတ်ႈ၊ တႅမ်ႈဝႆႉလွင်ႈမၼ်းၸဝ်ႈလႄႈဝႃႈ၊ “‘ၵဝ်ၸမ်ႉ၊ႁၼ်ထႃႇဝရႃႉၽြႃးသိုဝ်ႈၼႃႈတႂ်ႈတႃတႃႇသေႇဢမ်ႇထၢတ်ႇဢေႃႈ။ မၼ်းၸဝ်ႈမီးယူႇၽၢႆႇၶႂႃၵဝ်လႄႈ ၵဝ်ဢမ်ႇလႆႈႁွတ်ႈထိုင်တၢင်းဢၼ်ၵူဝ်ႁႄၸႂ်သၼ်ႇ။
ပိူဝ်ႈၼႆလႄႈ ႁူဝ်ၸႂ်ၵဝ်ပၢင်ႇၸိုၼ်ႈဢေႃႈ။ ၵႂၢမ်းၵဝ်ၵေႃႈသႂၢင်ႇသိူဝ်းဢေႃႈ။ လိူဝ်သေၼၼ်ႉ၊ၵဝ်ဢၼ်ပဵၼ်ၵူၼ်းဢၼ်ၸၢင်ႈလုၸၢင်ႈလႅဝ်ၼႆႉၵေႃႈ၊ ၵွပ်ႈပိူဝ်ႈတၢင်းဢၼ်မုင်ႈထႃႈမွင်းထႃႈလႄႈတၵ်းလႆႈလိုဝ်ႈၸႂ်ဢေႃႈ။
ၸဝ်ႈႁဝ်းတၵ်းဢမ်ႇပိၼ်ႉဢမ်ႇပႅတ်ႈဝိၺိၺ်ႇၵဝ်ၶႃႈဝႆႉၵႃႈၼႂ်းမိူင်းမရၼႃႉတီႈၶႃႈ။ တီႈၵူၼ်းမူတ်းၸၢင်ႇၸဝ်ႈႁဝ်းၼၼ်ႉၵေႃႈ၊ ၸဝ်ႈႁဝ်းတၵ်းဢမ်ႇႁႂ်ႈလႆႈတူႇၼဝ်ႈၵႃႈၼႂ်းပႃႇႁဵဝ်ႈတီႈၶႃႈ။
ၸဝ်ႈႁဝ်းၼႄပၼ်သဵၼ်ႈတၢင်းသူင်ႇထိုင်တီႈဢၼ်ဢသၢၵ်ႈလိပ်းလႄႈ တၢင်းဢၼ်ၵဝ်ၶႃႈလႆႈယူႇသိုဝ်ႈၼႃႈတႂ်ႈတႃၸဝ်ႈႁဝ်းၼၼ်ႉ၊ ႁဵတ်းႁႂ်ႈၵဝ်ၶႃႈသိူဝ်းၸူမ်းတီႈၶႃႈဢေႃႈ၊’ ဝႃႈၼင်ႇၼႆဝႆႉဢေႃႈ။
“ပီႈၼွင်ႉၶဝ်႟။ ၵဝ်တၵ်းမွၵ်ႇလၢတ်ႈလွင်ႈပူႇမွၼ်ႇႁဝ်း တႃႇဝိတ်ႈ၊ ၼၼ်ႉ၊သၢင်းသၢင်းလၢင်းလၢင်းတီႈသူလူးၵွၼ်ႇဢေႃႈ။ မၼ်းတၢႆၵႂႃႇယဝ်ႉလႄႈဢဝ်ၽင်ဝႆႉယဝ်ႉဢေႃႈ။ ၶုမ်ပႃႇႁဵဝ်ႈမၼ်းမီးယူႇတီႈႁဝ်းတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။-
ၸွမ်းလူၺ်ႈမၼ်းပဵၼ်ပရေႃးၽႅတ်ႈၵေႃႉၼိုင်ႈလႄႈ ႁုႁၼ်လွင်ႈတၢင်းဢၼ်ၽြႃးပဵၼ်ၸဝ်ႈ၊မီးၵႂၢမ်းၵတိဢၼ်ၸိုဝ်ႈဢၼ်ၸႂ်ႈဝႃႈဝႆႉတီႈမၼ်း၊လူၺ်ႈလွင်ႈဢၼ်မၼ်းၸဝ်ႈတၵ်းလႆႈယုၵ်ႉတၢင်ႇဝႆႉ၊ၶုၼ်ႁေႃၶမ်းပႃးၼိုင်ႈၵႃႈၼႂ်းၸိူဝ်ႉၶိူဝ်းမၼ်းၼင်ႈၵႃႈၼိူဝ်ပလၢင်ႇမၼ်းၼၼ်ႉဢေႃႈ။-
တႃႇဝိတ်ႈ၊ ၼၼ်ႉ၊ယင်းႁုထႃႈလႄႈႁေႃးလၢတ်ႈဝႆႉ၊လွင်ႈၸဝ်ႈၶရိၸ်ႈတၵ်းလုၵ်ႉၶိုၼ်းလိပ်းၼၼ်ႉလႄႈဝႃႈ၊ “‘ဝိၺိၺ်ႇမၼ်းၸဝ်ႈၼၼ်ႉ၊ဢမ်ႇလႆႈပႅတ်ႈဝႆႉၵႃႈၼႂ်းမိူင်းမရၼႃႉ၊ ၼိူဝ်ႉမၼ်းၸဝ်ႈၵေႃႈဢမ်ႇလႆႈတူႇလႆႈၼဝ်ႈၵႃႈတီႈၼႂ်းၶုမ်ပႃႇႁဵဝ်ႈ၊’ ဝႃႈၼင်ႇၼႆဢေႃႈ။-
ၸဝ်ႈယေႇသု၊ ၼၼ်ႉ၊ၽြႃးပဵၼ်ၸဝ်ႈႁႂ်ႈမၼ်းၸဝ်ႈလုၵ်ႉၶိုၼ်းလိပ်းယဝ်ႉလႄႈႁဝ်းၵႃႈမီးၼႆႉ၊လႆႈပဵၼ်ၵေႃႉဢၼ်ၶၢမ်ႇသၢၵ်ႈသေႇဢေႃႈ။-
မၼ်းၸဝ်ႈၸိုင်၊လႆႈၶၢမ်ႇယွင်ႈဢဝ်ဝႆႉၵႃႈတီႈၽၢႆႇၶႂႃမိုဝ်းၽြႃးပဵၼ်ၸဝ်ႈဢၼ်ပဵၼ်ပေႃႈၸဝ်ႈၼၼ်ႉသေယဝ်ႉ၊လႆႈၶၢမ်ႇဢဝ်ဝိၺိၺ်ႇဢၼ်မူတ်းၸၢင်ႇၸဝ်ႈ၊မႅၼ်ႈၼင်ႇဢၼ်ၵတိၸဝ်ႈမီးဝႆႉၼၼ်ႉယဝ်ႉ။ ၵႃႈဢၼ်သူလႆႈႁုငိၼ်းမိူဝ်ႈလဵဝ်ၼႆႉပဵၼ်သူးၵျေးၸူးတၢင်းလီဢၼ်မၼ်းၸဝ်ႈပၼ်ၵႃႈၼိူဝ်ႁဝ်းၼၼ်ႉယဝ်ႉ။-
လွင်ႈမၼ်းၸမ်ႉ၊ တႃႇဝိတ်ႈ၊ ပဵၼ်ၵေႃႉဢၼ်လႆႈၶိုၼ်ႈၵႂႃႇၵႃႈၼိူဝ်ၵၢင်ႁၢဝ်ပုၼ်ႉဢမ်ႇၸႂ်ႈလႄႈမၼ်းၸင်ႇလၢတ်ႈလႄႈဝႃႈ၊ ‘ထႃႇဝရႃႉၽြႃးလၢတ်ႈတီႈၸဝ်ႈၵဝ်ၶႃႈလႄႈဝႃႈ၊ ၼင်ႈၵႃႈတီႈၽၢႆႇၶႂႃၵဝ်ၼႆႉ။
တေႃႇထိုင်ႁွတ်ႈၵဝ်ဢဝ်ရၢၼ်ႇသူႇမႂ်းတင်းလၢႆ၊ တမ်းပႃႈတႂ်ႈတိၼ်မႂ်းႁႂ်ႈလႆႈပဵၼ်တီႈတၢင်ႇတိၼ်မႂ်းၼၼ်ႉတႃႉ၊’ ဝႃႈၼင်ႇၼႆဢေႃႈ။
“ၵွပ်ႈပိူဝ်ႈလွင်ႈတၢင်းၼႆႉလႄႈႁႂ်ႈမဵဝ်းၸိူဝ်ႉၶိူဝ်း ဢိသရေး၊ တင်းသဵင်ႈတင်းလူင်၊ႁုမၢတ်ႈထၢင်ႇထၢင်ႇသႃးသႃးလွင်ႈ ၸဝ်ႈယေႇသု၊ ဢၼ်သူတွၵ်ႇဝႆႉၵႃႈၼိူဝ်သဝ်မႆႉဝႃးမိုဝ်းၼႆႉ၊ပဵၼ်ၸဝ်ႈဢၼ်ၽြႃးပဵၼ်ၸဝ်ႈယုၵ်ႉတၢင်ႇဝႆႉ၊ႁႂ်ႈပဵၼ်ၸဝ်ႈပဵၼ်ၸွမ်ဢိၵ်ႇတင်းၼႂ်းဢရႃႇ ၸဝ်ႈၶရိၸ်ႈ၊ ၼၼ်ႉတႃႉ၊” ဝႃႈၼင်ႇၼႆဢေႃႈ။-
မိူဝ်ႈဢၼ်ၵူၼ်းတင်းလၢႆလႆႈငိၼ်းၼၼ်ႉၸိုင်၊မီးႁူဝ်ၸႂ်ဢၼ်မႆႈႁွၼ်ႉၼႃႇလႄႈဢွၼ်ၵၼ်တွင်ႈထၢမ် ပေႇတရု၊ တင်းတမၢၼ်ႇၸဝ်ႈတၢင်ႇၵေႃႉၸိူဝ်းၼၼ်ႉလႄႈဝႃႈ၊ “ပီႈၼွင်ႉၶဝ်႟။ ႁဝ်းၶႃႈတေလႆႈႁဵတ်းၸိူဝ်ႉၼင်ႇႁိုဝ်ၶႃႈ၊” ဝႃႈၼင်ႇၼႆဢေႃႈ။
ပေႇတရု၊ ၶိုၼ်းလၢတ်ႈလႄႈဝႃႈ၊ “ပုၼ်ႈလွင်ႈၼင်ႇႁိုဝ်သူတၵ်းလွတ်ႈဢပျတ်ႈၸိုင်၊သူဢွၼ်ၵၼ်ၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်သေယဝ်ႉ၊ၶၢမ်ႇဢဝ်မၢင်ႇၵလႃႇပပ်ႉတိၸမ်ႇၼႂ်းၸိုဝ်ႈသဵင် ၸဝ်ႈယေႇသုၶရိၸ်ႈ၊ တႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ဢပျတ်ႈသူတၵ်းလႆႈလွတ်ႈလႄႈ သူတၵ်းလႆႈႁပ်ႉၶၢမ်ႇဢဝ်သူး၊ဢၼ်ပဵၼ်ဝိၺိၺ်ႇမူတ်းၸၢင်ႇၸဝ်ႈဢေႃႈ။-
လွင်ႈမၼ်းၸမ်ႉ၊ၵတိၸဝ်ႈၼၼ်ႉ၊ဝႆႉပုၼ်ႈသူတင်းလုၵ်ႈလၢင်းသူ၊ဢိၵ်ႇတင်းၵူၼ်းၸိူဝ်းဢၼ်မီးတီႈၵႆတင်းသဵင်ႈတင်းလူင်ဢၼ်ဝႃႈ၊ၵႃႈဢၼ်ၽြႃးပဵၼ်ၸဝ်ႈႁဝ်းထႃႇဝရႃႉၽြႃးႁွင်ႉဢဝ်ဝႆႉ၊ပုၼ်ႈမၼ်းၸဝ်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ပေႇတရု၊ ၶၢမ်ႇသၢၵ်ႈသေႇလွင်ႈၸိူဝ်းၼႆႉၵူၺ်းဢမ်ႇၵႃး၊ယင်းဢဝ်တင်းၵႂၢမ်းတၢင်ႇၸိူဝ်ႉတၢင်ႇဢၼ်ၼမ်ၼႃႇတိုၵ်းယူင်းၶဝ်လႄႈဝႃႈ၊ “ၵႄႇသႄႇဢဝ်တူဝ်ၸဝ်ႈၵဝ်ႇသေၵႃႈတီႈဢပျတ်ႈတၢမ်ႇ၊ဢၼ်ႁွတ်ႈထိုင်ၵႃႈတီႈၶဝ်ၸိူဝ်းဢၼ်ၸႂ်ၵူတ်ႉၸႂ်ငေႃးၼၼ်ႉတႃႉ၊” ဝႃႈၼင်ႇၼႆဢေႃႈ။-
ၵူၼ်းၼမ်ၼႃႇယုမ်ႇမၢတ်ႈတြႃးၸဝ်ႈဢၼ် ပေႇတရု၊ ႁေႃးလၢတ်ႈၼၼ်ႉလႄႈ ၶၢမ်ႇဢဝ်မၢင်ႇၵလႃႇပပ်ႉတိၸမ်ႇ ဢေႃႈ။ ၼႂ်းဝၼ်းၼၼ်ႉ၊ၵူၼ်းသၢမ်ႁဵင်ၸမ်ၸမ်ၶဝ်ႈပႃးမႃးၼႂ်းၽုင်မူႇၸုမ်းဢေႃႈ။-
ၶဝ်ၼၼ်ႉ၊ဢွၼ်ၵၼ်သွၼ်ဢဝ်တီႈတမၢၼ်ႇၸဝ်ႈတင်းလၢႆယူႇ၊ၶဝ်ႈပႃးၼႂ်းတၢင်းဢၼ်ႁဵတ်းမုၵ်ႉႁဵတ်းၸိူဝ်းယူႇ၊ၼင်ႇၵၼ်ၵၼ်ၽႄမႅင်ႇတၢင်းၵိၼ်တီႈၵၼ်ယူႇ၊ဢိၵ်ႇတင်းႁဵတ်းပထၼႃႇသူးတွင်းယူႇတႃႇသေႇဢေႃႈ။
တမၢၼ်ႇၸဝ်ႈတင်းလၢႆ၊ႁဵတ်းၼႄၼိမိၵ်ႈလၢၵ်ႈၶၼႃႇတၢင်းဢၼ်လီဢၢမ်းၼမ်ၼႃႇလႄႈၵူႈၵေႃႉၵူႈၵူၼ်းၵူဝ်ယမ်ၽြႃးပဵၼ်ၸဝ်ႈၼႃႇဢေႃႈ။-
ၶဝ်ၸိူဝ်းဢၼ်ယုမ်ႇမၢတ်ႈတင်းသဵင်ႈတင်းလူင်ၼၼ်ႉၵေႃႈ၊ႁဵတ်းမုၵ်ႉႁဵတ်းၸိူဝ်းယူႇလူၺ်ႈၵၼ်ၶိူဝ်းၶိူဝ်းလႄႈ ဢဝ်ၶူဝ်းလဵင်းၵႃႈမီးႁူမ်ႈၵၼ်ၸၢႆႇမႅင်ႇပၼ်ၵၼ်ယူႇဢေႃႈ။-
ၶဝ်ၶၢႆဢုၵ်ႉၸႃႇၶူဝ်းလဵင်းဢၼ်ၶဝ်ပိူင်ႇႁင်းၽႂ်ႁင်းမၼ်းၸိူဝ်းၼၼ်ႉလႄႈဢဝ်ငိုၼ်းၼၼ်ႉၽႄမႅင်ႇပၼ်တီႈၵၼ်ၸွမ်းၵႃႈၼင်ႇဢၼ်ၽႂ်လူဝ်ႇႁင်းၽႂ်ႁင်းမၼ်းၼၼ်ႉဢေႃႈ။-
ၶဝ်ဢွၼ်ၵၼ်ၶိုၼ်ႈၵျွင်းပိၵ်ႈမၢၼ်ႇၸဝ်ႈ၊ၸုတုမ်ၵၼ်ၵူႈမိုဝ်ႉၵူႈဝၼ်းယူႇ၊ၵိၼ်ၶဝ်ႈႁူမ်ႈလူၺ်ႈၵၼ်ၵႃႈတီႈႁိူၼ်းၶဝ်တင်းႁူဝ်ၸႂ်ဢၼ်ၶၢဝ်သႂ်တင်းၸႂ်ဢၼ်သႂၢင်ႇသိူဝ်းယူႇ၊-
ဢွၼ်ၵၼ်ယွင်ႈယေႃးၽြႃးပဵၼ်ၸဝ်ႈယူႇလႄႈ လႆႈၼႃႈလႆႈတႃၵႃႈတီႈၽၢႆႇၼႃႈၵူၼ်းတင်းလၢႆယူႇဢေႃႈ။ ထႃႇဝရႃႉၽြႃးယင်းထၢပ်ႈထႅင်ႈပၼ်ၵူၼ်းၸိူဝ်းဢၼ်လႆႈတၢင်းဢၼ်ၵႄႇၶျွတ်ႈဢဝ်ၼၼ်ႉ၊တီႈၼႂ်းၸိူဝ်းၸဝ်ႈၵူႈမိူဝ်ႈၵူႈဝၼ်းယူႇဢေႃႈ။
ဝၼ်းၼိုင်ႈ၊ ပေႇတရု၊ တင်း ယူဝ်းႁၢၼ်ႇ၊ ၶိုၼ်ႈၵႂႃႇၵႃႈတီႈၵျွင်းပိၵ်ႈမၢၼ်ႇၸဝ်ႈဢၶိင်ႇသၢမ်မွင်းဝၢႆးဝၼ်း၊ၶိင်ႇဢၼ်ႁဵတ်းသူးတွင်းပထၼႃႇၼၼ်ႉဢေႃႈ။-
ၵႃႈတီႈၼႃႈၽၵ်းတူဢၼ်ႁွင်ႉဝႃႈ၊ၽၵ်းတူႁၢင်ႈလီၼၼ်ႉ၊မီးၵူၼ်းဢၼ်တိၼ်တၢႆဢၼ်ပဵၼ်မႃးၸဵမ်မိူဝ်ႈၼႂ်းတွင်ႉမႄႈမၼ်းၼၼ်ႉၵေႃႉၼိုင်ႈဢေႃႈ။ ပိူၼ်ႈႁၢမ်ဢဝ်မႃးဝၢင်းဝႆႉ၊ၵႃႈတီႈၼႃႈၽၵ်းတူၼၼ်ႉၵူႈဝၼ်း၊ႁႂ်ႈလႆႈယွၼ်းလႆႈၶေႃငိုၼ်းတီႈၶဝ်ၸိူဝ်းဢၼ်မႃးၶိုၼ်ႈၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။-
မိူဝ်ႈဢၼ်မၼ်းႁၼ် ပေႇတရု၊ တင်း ယူဝ်းႁၢၼ်ႇ၊ ၶိုၼ်ႈၵျွင်းပိၵ်ႈမၢၼ်ႇၸဝ်ႈမႃးယူႇၼၼ်ႉၸိုင်၊မၼ်းယိုၼ်းမိုဝ်းယွၼ်းၶဝ်ထၢင်ႇတေလႆႈသေၸိူဝ်ႉသေပိူင်ဢေႃႈ။-
ၶဝ်ၵေႃႈယႅၵ်ႉတူၺ်းမၼ်းၸေးၸေးသေလႄႈ ပေႇတရု၊ လၢတ်ႈလႄႈဝႃႈ၊ “ႁႅၼ်တူၺ်းႁဝ်းလူး၊” ဝႃႈၼင်ႇၼႆဢေႃႈ။-
မၼ်းမုင်ႈမွင်းတေလႆႈသေမဵဝ်းမဵဝ်းတီႈၶဝ်လႄႈႁႅၼ်တူၺ်းဢေႃႈ။-
ၵူၺ်းၵႃႈ၊ ပေႇတရု၊ လၢတ်ႈလႄႈဝႃႈ၊ “ၵဝ်ဢမ်ႇမီးငိုၼ်းမီးၶမ်း။ ၵူၺ်းၵႃႈ၊ၵႃႈဢၼ်ၵဝ်မီးၼၼ်ႉ၊ၵဝ်တၵ်းပၼ်ဢေႃႈ။ ၵဝ်ဢိင်ပိုင်ႈၸိုဝ်ႈသဵင် ၸဝ်ႈယေႇသုၶရိၸ်ႈ၊ ၵူၼ်းဝဵင်း ၼႃႇၸရႅတ်ႈ၊ သေလႄႈ မီးဢမိင်ႉတီႈမႂ်းၸမ်ႉ၊လုၵ်ႉလႄႈပႆတႃႉ၊” ဝႃႈၼင်ႇၼႆသေယဝ်ႉ၊-
ယိပ်းဢဝ်မိုဝ်းၶွၼ်ၶႂႃမၼ်းသေၸၼ်မၼ်းလုၵ်ႉဢေႃႈ။ ယၢမ်းၼၼ်ႉတိၼ်တင်းတႃတိၼ်မၼ်းၼၼ်ႉတင်းသွင်ၶွၼ်မီးႁႅင်းမႃးၵမ်းလဵဝ်လႄႈ၊-
ၵေႃႉၼၼ်ႉ၊လုၵ်ႉၸုၵ်းမႃးလႆႈၵွႆးမၼ်းသေယဝ်ႉ၊ပႆၵႂႃႇပႆမႃးသေလႄႈ ၶဝ်ႈၸွမ်းၶဝ်ၵႂႃႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈ၊ၵျွၵ်းဝႅၼ်ယူႇ၊ယွင်ႈယေႃးၵျေးၸူးၽြႃးပဵၼ်ၸဝ်ႈယူႇဢေႃႈ။-
မိူဝ်ႈဢၼ်ၵူၼ်းတင်းလၢႆႁၼ်မၼ်းပႆတၢင်းလႄႈယွင်ႈယေႃးၵျေးၸူးၽြႃးပဵၼ်ၸဝ်ႈယူႇၼၼ်ႉၸိုင်၊-
ပိူဝ်ႈဢၼ်ၶဝ်ႁုၸၵ်း၊မၼ်းပဵၼ်ၵူၼ်းယွၼ်းဢၼ်ၼင်ႈယူႇၵႃႈတီႈၼႃႈၽၵ်းတူႁၢင်ႈလီၼၼ်ႉလႄႈဢွၼ်ၵၼ်ဢၢမ်းၼႃႇလူင်လၢင်၊ၵႂင်ၸႂ်ယုင်ႈၸႂ်ယူႇလူၺ်ႈလွင်ႈတၢင်းဢၼ်ပဵၼ်မႃးတီႈမၼ်းၼၼ်ႉဢေႃႈ။
မိူဝ်ႈဢၼ်ၵေႃႉၼၼ်ႉယိပ်းၵမ်ၸွမ်းလင် ပေႇတရု၊ တင်း ယူဝ်းႁၢၼ်ႇ၊ ၵႂႃႇၵႃႈၼႂ်းၸၢၼ်းဢၼ်ႁွင်ႉဝႃႈ၊ၸၢၼ်း သေႃးလမုၼ်ႇ၊ ၼၼ်ႉၸိုင်၊ပိူၼ်ႈဢွၼ်ၵၼ်ဢၢမ်းမၼ်းလႄႈမၼ်းၵေႃႈလႅၼ်ႈၵႂႃႇၸူးတီႈၶဝ်ၸိူဝ်းၼၼ်ႉဢႃႈ။-
မိူဝ်ႈဢၼ် ပေႇတရု၊ ႁၼ်ၵူၼ်းၸိူဝ်းၼၼ်ႉၼၼ်ႉၸိုင်၊မၼ်းႁေႃးလၢတ်ႈတီႈၶဝ်လႄႈဝႃႈ၊ “ပီႈၼွင်ႉ ဢိသရေး၊ ၶဝ်႟။ ႁဵတ်းသင်လႄႈသူဢၢမ်းလွင်ႈတၢင်းၼႆႉ၊ႁဵတ်းသင်လႄႈယႅၵ်ႉတူၺ်းႁဝ်းထၼ်ႇၼႆႉ။ သူထၢင်ႇၵွပ်ႈပိူဝ်ႈတၼ်းၶူဝ်းတူဝ်ၸဝ်ႈၵဝ်ႇဢမ်ႇၼၼ်၊ၵွပ်ႈပိူဝ်ႈသီႇလႃႉတူဝ်ၸဝ်ႈၵဝ်ႇလႄႈႁဝ်းႁဵတ်းႁႂ်ႈၵေႃႉၼႆႉပႆတၢင်းလႆႈဝႃႈၼႆႁိုဝ်း။-
ၽြႃးပဵၼ်ၸဝ်ႈ ဢႃႇပြႃႇႁၢမ်ႇ၊ဢိၸၢၵ်ႈ၊ယႃႇၵုပ်ႈ၊ ၶဝ်ၸိူဝ်းဢၼ်ပဵၼ်ပူႇမွၼ်ႇႁဝ်းၼၼ်ႉ၊ႁဵတ်းႁႂ်ႈမုၼ်ၽုင်းထၢင်ႇသႃးၵႃႈတီႈလုၵ်ႈမၼ်းၸဝ်ႈ ၸဝ်ႈယေႇသု၊ ဢၼ်သူဢဝ်ဢၢပ်ႈပၼ်တီႈၶုၼ်ဢႃႇၼႃႇတင်းလၢႆသေလႄႈ ပိၵ်ႉသမ်ႉၶုၼ် ပိလတ်ႉ၊ ဢၢင်ႈတၵ်းပွႆႇလွတ်ႈမၼ်းၸဝ်ႈသေၵေႃႈသူပႄႇပႅတ်ႈၽၢႆႇၼႃႈၶုၼ် ပိလတ်ႉ၊ ယဝ်ႉ။-
မၼ်းၸဝ်ႈၼၼ်ႉ၊မူတ်းၸၢင်ႇသိုဝ်ႈတေႃႇထၼ်ႇၼၼ်ႉသေၵေႃႈ၊သူပႄႇပႅတ်ႈမၼ်းၸဝ်ႈသေယဝ်ႉ၊သူယွၼ်းႁႂ်ႈလႆႈပွႆႇလွတ်ႈၵူၼ်းဢၼ်ဢဝ်ဢသၢၵ်ႈၵူၼ်းတၢႆၼၼ်ႉဢေႃႈ။-
ၸဝ်ႈဢၼ်ဢွၼ်သူင်ႇၵႃႈတီႈတၢင်းဢၼ်ဢသၢၵ်ႈလိပ်းၼၼ်ႉၸမ်ႉ၊သူဢဝ်တၢႆဢေႃႈ။ ၼႂ်းဝႃႈၼၼ်သေၵေႃႈ၊ၽြႃးပဵၼ်ၸဝ်ႈႁဵတ်းႁႂ်ႈၸဝ်ႈၼၼ်ႉလုၵ်ႉၶိုၼ်းလိပ်းမႃးသေယဝ်ႉ၊ႁဝ်းၸိူဝ်းၼႆႉ၊ပဵၼ်ၵေႃႉဢၼ်ၶၢမ်ႇသၢၵ်ႈသေႇၽၢႆႇၸဝ်ႈၼၼ်ႉယူႇဢေႃႈ။-
ၼႆႉၸမ်ႉ၊ပဵၼ်တၼ်းၶူဝ်းၼႃႇမႃႉၸိုဝ်ႈသဵင်ၸဝ်ႈၼၼ်ႉ၊ႁႂ်ႈၵူၼ်းတိၼ်တၢႆၼႆႉမီးႁႅင်းမႃးဢေႃႈ။ ၵႃႈဢၼ်သူလႆႈႁုလႆႈႁၼ်ၼႆႉ၊ပဵၼ်မႃးၵွပ်ႈပိူဝ်ႈတၢင်းဢၼ်ယုမ်ႇမၢတ်ႈၼႃႇမႃႉၸိုဝ်ႈသဵင်ၸဝ်ႈၼၼ်ႉယဝ်ႉ။ ၵႃႈဢၼ်လႆႈၸိုၼ်ႈႁၢႆမႃးသိုဝ်ႈၼႃႈတႂ်ႈတႃသူၼႆႉ၊ပဵၼ်မႃးၵွပ်ႈပိူဝ်ႈတၢင်းႁဝ်းဢၼ်ယုမ်ႇမၢတ်ႈတီႈ ၸဝ်ႈယေႇသု၊ ဢေႃႈ။
“တေႃႈလဵဝ်ၼႆႉ၊ပီႈၼွင်ႉၶဝ်႟။ ၵွပ်ႈပိူဝ်ႈသူဢမ်ႇၸၢင်ႈႁုလႄႈသူဢိၵ်ႇတင်းၵူၼ်းႁူဝ်သူတင်းလၢႆ၊ႁဵတ်းၸိူဝ်ႉၼင်ႇၼႆတီႈ ၸဝ်ႈယေႇသု၊ ၸိုင်၊ၵဝ်ႁုဢေႃႈ။-
ၽြႃးပဵၼ်ၸဝ်ႈဢဝ်တင်းပရေႃးၽႅတ်ႈ တင်းလၢႆႁေႃးထႃႈဝႆႉၸဵမ်မိူဝ်ႈဢွၼ်တၢင်းလွင်ႈဢၼ် ၸဝ်ႈၶရိၸ်ႈ၊ တၵ်းလႆႈၶၢမ်ႇဝူၺ်ႇတၼႃႇတၢင်းတၢႆၸိူဝ်ႉၼင်ႇၼႆလႄႈမၼ်းၸဝ်ႈႁႂ်ႈပျေႉၸုမ်ႇယဝ်ႉတူဝ်ႈဢေႃႈ။-
ပိူဝ်ႈၼႆလႄႈလွင်ႈၼင်ႇႁိုဝ်မၼ်းၸဝ်ႈတၵ်းပွႆႇလွတ်ႈဢပျတ်ႈသူၵႃႈမီးၸိုင်၊ၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်ၸူးတီႈၽြႃးပဵၼ်ၸဝ်ႈတႃႉ။ ပေႃးသူႁဵတ်းၸိူဝ်ႉၼင်ႇၼၼ်ၸိုင်၊-
ၶိင်ႇၵႃႇလႃႉဢၼ်ၵတ်းယဵၼ်ၶျၢမ်းသႃႇတၵ်းလုၵ်ႉသေၵႃႈတီႈၽြႃးပဵၼ်ၸဝ်ႈႁွတ်ႈမႃးလႄႈ မၼ်းၸဝ်ႈတၵ်းပွႆႇၸႂ်ႉမႃး ၸဝ်ႈယေႇသု၊ ဢၼ်ဝႃႈ၊ ၸဝ်ႈၶရိၸ်ႈ၊ ဢၼ်မၼ်းၸဝ်ႈလိူၵ်ႈၵဵပ်းဝႆႉ၊ပုၼ်ႈသူၼၼ်ႉဢေႃႈ။-
မၼ်းၸဝ်ႈၼၼ်ႉ၊တၵ်းပႂ်ႉဝႆႉမီးယူႇၵႃႈၼႂ်းမိူင်းၵၢင်ႁၢဝ်၊တေႃႇထိုင်ႁွတ်ႈၵၢပ်ႈၵႃႇလႃႉၵႃႈမီးတင်းသဵင်ႈတင်းလူင်လႆႈမႄးပဵၼ်ဢၼ်မႂ်ႇ၊ဢၼ်မႅၼ်ႈၸွမ်းၵႃႈၼင်ႇဢၼ်၊ၽြႃးပဵၼ်ၸဝ်ႈဢဝ်တင်းသူပ်းပရေႃးၽႅတ်ႈဢၼ်မူတ်းၸၢင်ႇႁေႃးလၢတ်ႈထႃႈဝႆႉ၊ၸဵမ်မိူဝ်ႈဢွၼ်တၢင်းႁိုင်ၼႃႇယဝ်ႉၼၼ်ႉဢေႃႈ။-
မူဝ်းသေႇ၊ လၢတ်ႈဝႆႉလႄႈဝႃႈ၊ ‘ၽြႃးပဵၼ်ၸဝ်ႈသူၸဝ်ႈထႃႇဝရႃႉၽြႃး၊တၵ်းႁႂ်ႈပရေႃးၽႅတ်ႈၵေႃႉဢၼ်မိူၼ်ၸိူဝ်ႉၼင်ႇၵဝ်၊ပေႃႇဢွၵ်ႇမႃးၵႃႈၼႂ်းပီႈၼွင်ႉၸိူဝ်ႉၶိူဝ်းသူပုၼ်ႈသူဢေႃႈ။ သူတၵ်းလႆႈထွမ်ႇဢဝ်ၵႃႈဢၼ်မၼ်းႁေႃးလၢတ်ႈတီႈသူၵူႈၸိူဝ်ႉၵူႈပိူင်ၼၼ်ႉဢေႃႈ။-
ၽူႈလႂ်သေဢမ်ႇဝႃႈ၊ၵေႃႉဢၼ်ဢမ်ႇထွမ်ႇဢဝ်ၵႂၢမ်းပရေႃးၽႅတ်ႈ ၼၼ်ႉ၊ၵေႃႉၼၼ်ႉတၵ်းလႆႈၶၢမ်ႇပႄႇပႅတ်ႈသေၵႃႈတီႈၵူၼ်းၽြႃးပဵၼ်ၸဝ်ႈလႄႈ လႆႈၶၢမ်ႇယႃႉၽဵဝ်ႈပႅတ်ႈဢေႃႈ၊’ ဝႃႈၼင်ႇၼႆဝႆႉယဝ်ႉ။-
ၸႃႉၸဵမ်ပရေႃးၽႅတ်ႈ သမူၺ်ႇလႃႉ၊ တင်းပရေႃးၽႅတ်ႈဢၼ်မႃးပႃႈလိုၼ်းမၼ်းၵူႈၵေႃႉၸိူဝ်းၼၼ်ႉၵေႃႈ၊ႁေႃးမွၵ်ႇလၢတ်ႈလွင်ႈဢၼ်ပဵၼ်ယူႇၶိင်ႇၵႃႇလႃႉဝၼ်းၸိူဝ်းၼႆႉဝႆႉဢေႃႈ။-
ၵတိၽြႃးပဵၼ်ၸဝ်ႈဢၼ်ဝႆႉၵႃႈတီႈပရေႃးၽႅတ်ႈတင်းလၢႆၼၼ်ႉ၊ပဵၼ်ပုၼ်ႈသူလႄႈသူလႆႈၶၢမ်ႇဢဝ်သဵတ်ႈၸႃႇဢၼ်ၽြႃးပဵၼ်ၸဝ်ႈပၼ်တီႈပူႇမွၼ်ႇႁဝ်း၊ၸွမ်းၼင်ႇဢၼ်မၼ်းၸဝ်ႈလၢတ်ႈတီႈ ဢႃႇပြႃႇႁၢမ်ႇ၊ လႄႈဝႃႈ၊ ‘ၵႃႈၼႂ်းၸိူဝ်ႉၶိူဝ်းမႂ်းၼႆႉ၊မဵဝ်းၵူၼ်းတင်းသဵင်ႈတင်းလူင်တၵ်းလႆႈၶၢမ်ႇဢဝ်တၢင်းလီမၢင်ႇၵလႃႇဢေႃႈ၊’ ဝႃႈၼင်ႇၼႆၼၼ်ႉဢေႃႈ။-
ပိူဝ်ႈၼႆလႄႈ မၼ်းၸဝ်ႈလိူၵ်ႈၵဵပ်းဢဝ် ၸဝ်ႈယေႇသု၊ လုၵ်ႈမၼ်းၸဝ်ႈသေလႄႈ ပွႆႇၸႂ်ႉမၼ်းၸဝ်ႈမႃးၸူးသူဢွၼ်တၢင်းႁႂ်ႈမၼ်းၸဝ်ႈပၼ်တၢင်းလီမၢင်ႇၵလႃႇတီႈသူ၊ၼႂ်းလွင်ႈတၢင်းဢၼ်တၵ်းႁႂ်ႈသူၵူႈၵေႃႉၵူႈၵူၼ်းဝႄႈပိူင်ႈသေဢပျတ်ႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၼႂ်းမိူဝ်ႈဢၼ် ပေႇတရု၊ တင်း ယူဝ်းႁၢၼ်ႇ၊ ႁေႃးလၢတ်ႈတီႈၵူၼ်းတင်းလၢႆၸိူဝ်ႉၼင်ႇၼၼ်ယူႇၼၼ်ႉၸိုင်၊ယဵၸ်ႈပရေႃးႁဵၵ်ႈ ၶဝ်၊ႁူဝ်ၼႃႈလုၵ်ႈသိုၵ်းဢၼ်ပႂ်ႉၵျွင်းပိၵ်ႈမၢၼ်ႇၸဝ်ႈၶဝ်၊ဢိၵ်ႇတင်းၵူၼ်းၵိူင်း ၸတ်ႉတုၵႄး၊ ၶဝ်ၵမ်ႈၽွင်ႈႁွတ်ႈထိုင်မႃးလႄႈ၊-
ၶဝ်မႆႈၸႂ်ၵႂင်ၸႂ်လူၺ်ႈတြႃးၸဝ်ႈ၊ဢၼ်ၶဝ်ႁေႃးလၢတ်ႈတီႈၵူၼ်းတင်းလၢႆ၊လွင်ႈ ၸဝ်ႈယေႇသု၊ လႆႈလုၵ်ႉၶိုၼ်းလိပ်းမႃးၼၼ်ႉ၊ပဵၼ်သၢၵ်ႈသေႇတီႈတြႃးဢၼ်ဝႃႈ၊ၵူၼ်းတၢႆလုၵ်ႉၶိုၼ်းလိပ်းမႃးၼၼ်ႉထၢင်ႇသႃးမႃးဢေႃႈ။-
ၵွပ်ႈပိူဝ်ႈၼႆ၊ၶဝ်ဢွၼ်ၵၼ်တိဢဝ်ၶဝ်သွင်ၵေႃႉ၊ၶင်ဝႆႉၼႂ်းထွင်ႇတေႃႇထိုင်ႁွတ်ႈဝၼ်းမိူဝ်ႈၽုၵ်ႈၵွပ်ႈပိူဝ်ႈပဵၼ်ၶိင်ႇၵၢင်ၶမ်ႈယဝ်ႉၼၼ်ႉဢေႃႈ။-
ၼႂ်းဝႃႈၼၼ်သေၵေႃႈၶဝ်ၸိူဝ်းဢၼ်ငိၼ်းတြႃးၼၼ်ႉ၊ယုမ်ႇမၢတ်ႈၼမ်ၼႃႇလႄႈ ၼပ်ႉဢၢၼ်ႇတူၺ်းမီးႁႃႈႁဵင်ၸမ်ၸမ်ဢေႃႈ။
ၼႂ်းဝၼ်းမိူဝ်ႈၽုၵ်ႈၼၼ်ႉ၊ၶုၼ်လူင် ၵျူး၊ ၶဝ်၊ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်၊တင်းသြႃႇမေႃၵျၢမ်းထမ်ႇမႃႉတင်းလၢႆ၊ၸုတုမ်ၵၼ်ၵႃႈၼႂ်းဝဵင်း ယေႇရုသလႅမ်ႇ၊-
ႁူမ်ႈလူၺ်ႈၵၼ်တင်းၶုၼ်ယဵၸ်ႈပရေႃးႁဵၵ်ႈ ဢၼ်ႇၼတ်ႉ၊ ၼၼ်ႉ၊ ၵႃႇယၽႃႉ၊ယူဝ်းႁၢၼ်ႇ၊ဢလႅၵ်ႉၸၼ်းတႃး၊ ၶဝ်တင်းလၢႆ၊ဢိၵ်ႇတင်းတၢင်ႇၵေႃႉတၢင်ႇၵူၼ်းၶဝ်ႈပႃးၼႂ်းၸိူဝ်ႉၼႂ်းၶိူဝ်းၶုၼ်ယဵၸ်ႈပရေႃးႁဵၵ်ႈဢေႃႈ။-
ၶဝ်ဢဝ် ပေႇတရု၊ တင်း ယူဝ်းႁၢၼ်ႇ၊ ၸုၵ်းယူႇၽၢႆႇၼႃႈၶဝ်လႄႈထၢမ်ဝႃႈ၊ “သူဢဝ်တင်းတၼ်းၶူဝ်းဢၼ်လႂ်၊ဢိင်ၼႃႇမႃႉၸိုဝ်ႈသဵင်ၽူႈလႂ်သေလႄႈႁဵတ်းလွင်ႈတၢင်းၼႆႉ၊” ဝႃႈၼင်ႇၼႆဢေႃႈ။
ပေႇတရု၊ ၵေႃႈ၊တဵမ်ဝႆႉတင်းဝိၺိၺ်ႇမူတ်းၸၢင်ႇၸဝ်ႈသေလႄႈၶိုၼ်းလၢတ်ႈလႄႈဝႃႈ၊ “ၶုၼ်ဢၼ်ဢုပ်ႉပိူင်ႇၵူၼ်းတင်းလၢႆ၊ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆၶဝ်႟။-
မိူဝ်ႈၼႆႉ၊ပေႃးႁဝ်းၶႃႈလႆႈၶၢမ်ႇတၢင်းဢၼ်ၸႅတ်ႈထၢမ်လူၺ်ႈလွင်ႈဢၼ်ႁဝ်းႁဵတ်းၵျေးၸူးတီႈၵူၼ်းဢၼ်တိၼ်တၢႆၵေႃႉၼႆႉလႄႈမၼ်းႁဵတ်းၸိူဝ်ႉႁိုဝ်ၸိုၼ်ႈႁၢႆမႃးၼႆႉၸိုင်၊-
ႁႂ်ႈသူဢိၵ်ႇတင်းၵူၼ်းမဵဝ်း ဢိသရေး၊ တင်းသဵင်ႈတင်းလူင်၊ထုၵ်ႇလီႁူလွင်ႈဢၼ်ၵူၼ်းၵေႃႉဢၼ်ၸုၵ်းယူႇၽၢႆႇၼႃႈသူ၊ၵႃႈတီႈၼႆႈၸိုၼ်ႈႁၢႆၶႅၼ်းမႃးလီလီ၊သိုဝ်ႈၼႃႈတႂ်ႈတႃသူၵွပ်ႈပိူဝ်ႈတၼ်းၶူဝ်းၼႃႇမႃႉၸိုဝ်ႈသဵင် ၸဝ်ႈယေႇသုၶရိၸ်ႈ၊ ၵူၼ်းဝဵင်း ၼႃႇၸရႅတ်ႈ၊ ဢၼ်သူတွၵ်ႇတၢႆၵႃႈၼိူဝ်သဝ်မႆႉသေယဝ်ႉ၊ၽြႃးပဵၼ်ၸဝ်ႈသမ်ႉႁႂ်ႈမၼ်းၸဝ်ႈၶိုၼ်းလိပ်းမႃးၼၼ်ႉယဝ်ႉ။-
ၸဝ်ႈယေႇသု၊ ၼႆႉ၊ပဵၼ်ၸဝ်ႈဢၼ်ၵျၢမ်းလိၵ်ႈတႅမ်ႈဝႆႉလႄႈဝႃႈ၊ “‘မၢၵ်ႇႁိၼ်ဢၼ်သူၸိူဝ်းဢၼ်ႁဵတ်းႁိူၼ်းတိူၵ်ႈဢဝ်ပႄႇပႅတ်ႈဝႆႉၼၼ်ႉ၊ ပိၼ်ႇပဵၼ်မၢၵ်ႇႁိၼ်ႁူဝ်ၸဵင်ႇတိူၵ်ႈဢေႃႈ၊’ ဝႃႈၼင်ႇၼႆဢေႃႈ။-
လိူဝ်သေၼၼ်ႉ၊တြႃးတၢင်းဢၼ်ၵႄႇၶျွတ်ႈဢဝ်ဢၼ်ဝႃႈၼၼ်ႉၵေႃႈ၊မီးၼႂ်းၸဝ်ႈၼႆႉသူႇလဵဝ်ပႃးလဵဝ်ၵူၺ်းဢေႃႈ။ ၵႃႈၼႂ်းၶူင်းၵၢင်မိူင်းလေႃးၵႃႉၼႆႉ၊လိူဝ်သေၼႃႇမႃႉၸိုဝ်ႈသဵင်မၼ်းၸဝ်ႈလႄႈဢမ်ႇမီးၸဝ်ႈတၢင်ႇသူႇတၢင်ႇပႃးဢၼ်ၵႄႇၶျွတ်ႈဢဝ်ႁဝ်းလႆႈ၊” ဝႃႈၼင်ႇၼႆဢေႃႈ။
ၵူၼ်းၸိူဝ်းဢၼ်ၶဝ်ႈပႃးၼႂ်းမူႇၶုၼ်လုမ်းၸိူဝ်းၼၼ်ႉ၊လႆႈႁၼ်တၢင်းဢၼ်ႁတ်းဢၼ်ႁၢၼ် ပေႇတရု၊ တင်း ယူဝ်းႁၢၼ်ႇ၊ လႄႈ၊ႁုလွင်ႈဢၼ်ၶဝ်ဢမ်ႇပေႃးမေႃလိၵ်ႈတႄႉတႄႉဝႃႈဝႃႈ၊ပဵၼ်ၵူၼ်းပၢၼ်ၵၢင်ၵူၺ်းၼၼ်ႉၸိုင်၊ဢၢမ်းၼႃႇသေလႄႈၶဝ်ၶုၵ်းၸႂ်လႆႈလွင်ႈဢၼ်ယၢမ်ႈပဵၼ်ၵူၼ်းၸွမ်းလင် ၸဝ်ႈယေႇသု၊ မႃးယဝ်ႉၼၼ်ႉဢေႃႈ။-
ၵူၺ်းၵႃႈ၊ၶဝ်ဢမ်ႇၸၢင်ႈတွပ်ႇသေၸိူဝ်ႉသေပိူင်၊ၵွပ်ႈပိူဝ်ႈၵူၼ်းတိၼ်တၢႆဢၼ်လႆႈၸိုၼ်ႈႁၢႆမႃးၼၼ်ႉၵူၺ်း၊ၸုၵ်းႁိမ်း ပေႇတရု၊ တင်း ယူဝ်းႁၢၼ်ႇ ဝႆႉယူႇၼၼ်ႉလႄႈ၊-
ၶဝ်ႁႂ်ႈ ပေႇတရု၊ တင်း ယူဝ်းႁၢၼ်ႇ၊ ဢွၵ်ႇၵႂႃႇပႃႈၼွၵ်ႈလုမ်းယဝ်ႉၸင်ႇ၊ၶဝ်ၼင်ႇၵၼ်ၵၼ်တိူင်ႇပၢင်ႇၵၼ်လႄႈဝႃႈ၊-
“ႁဝ်းတေလႆႈႁဵတ်းၸိူဝ်ႉၼင်ႇႁိုဝ်တီႈၶဝ်ၼၼ်ႉ။ ၵူၼ်းဝဵင်း ယေႇရုသလႅမ်ႇ၊ တင်းလၢႆ၊ႁုလွင်ႈဢၼ်ၼိမိၵ်ႈလၢၵ်ႈၶၼႃႇ၊ဢၼ်ထၢင်ႇသႃးၼႆႉ၊ပဵၼ်ဢၼ်ၶဝ်သွင်ၵေႃႉႁဵတ်းၼၼ်ႉယဝ်ႉ။ ႁဝ်းဢမ်ႇၸၢင်ႈတွပ်ႇၸၢင်ႈထဵင်လႆႈ။-
ၵူၺ်းၵႃႈ၊ၼင်ႇႁိုဝ်ၶၢဝ်ႇငၢဝ်းၼႆႉ၊တေဢမ်ႇလႆႈၸွတ်ႇတူဝ်ႈၵႂႃႇထႅင်ႈၸိုင်၊ႁဝ်းဢွၼ်ၵၼ်လွၵ်ႇငိုတ်ႈၶဝ်၊ၵမ်းလိုၼ်းယႃႇပေႁႂ်ႈၶဝ်ႁေႃးလၢတ်ႈၼႂ်းၼႃႇမႃႉၸိုဝ်ႈသဵင် ယေႇသု၊ တီႈၽူႈလႂ်ထႅင်ႈၼၼ်ႉတႃႉႁဝ်း၊” ဝႃႈၼင်ႇၼႆဢေႃႈ။
ၸင်ႇၶိုၼ်းႁွင်ႉဢဝ်ၶဝ်သွင်ၵေႃႉၼၼ်ႉၶဝ်ႈမႃးသေယဝ်ႉ၊သင်ႇလၢတ်ႈလႄႈဝႃႈ၊ “ပဵၼ်ႁိုဝ်မႃးသေဢမ်ႇဝႃႈ၊သူသွင်ၵေႃႉတၵ်းဢမ်ႇလႆႈႁေႃးလၢတ်ႈသင်ႇသွၼ်ၼႂ်းၼႃႇမႃႉၸိုဝ်ႈသဵင် ယေႇသု၊ ၼၼ်ႉသေဢိတ်း၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊ ပေႇတရု၊ တင်း ယူဝ်းႁၢၼ်ႇ၊ ၶိုၼ်းလၢတ်ႈတီႈၶဝ်လႄႈဝႃႈ၊ “ႁဝ်းၶႃႈတၵ်းထွမ်ႇဢဝ်ၵႂၢမ်းသူၼႃႇသေထွမ်ႇဢဝ်ၵႂၢမ်းၽြႃးပဵၼ်ၸဝ်ႈႁိုဝ်း၊သူဝူၼ်ႉၸႂ်လီလီလႄႈတွပ်ႇသိုဝ်ႈသိုဝ်ႈတေႃႇတေႃႇၽၢႆႇၼႃႈၽြႃးပဵၼ်ၸဝ်ႈသေၵမ်း။-
ပေႃးဢမ်ႇႁေႃးဢမ်ႇလၢတ်ႈလွင်ႈဢၼ်ႁဝ်းလႆႈႁၼ်လႆႈငိၼ်းၸိူဝ်းၼၼ်ႉၸိုင်၊ႁဝ်းဢမ်ႇယူႇလႆႈၶႃႈ၊” ဝႃႈၼင်ႇၼႆဢေႃႈ။-
ႁဵတ်းၼၼ်ႉလႄႈၶဝ်ဢမ်ႇႁၼ်လွင်ႈဢၼ်တၵ်းပၼ်တၢမ်ႇတီႈၶဝ်သွင်ၵေႃႉၼၼ်ႉၵွပ်ႈပိူဝ်ႈၵူၼ်းတင်းလၢႆယွင်ႈယေႃးၽြႃးပဵၼ်ၸဝ်ႈ၊လူၺ်ႈလွင်ႈဢၼ်ပဵၼ်မႃးယဝ်ႉၼၼ်ႉၸိုင်၊မူႇၶုၼ်လုမ်းၶဝ်သမ်ႉလွၵ်ႇငိုတ်ႈထႅင်ႈသေယဝ်ႉ၊ပွႆႇၶဝ်လွတ်ႈသေဢေႃႈ။-
ၵူၼ်းၵေႃႉဢၼ်လႆႈႁွတ်ႈထိုင်တၢင်းဢၼ်ၸိုၼ်ႈႁၢႆၶႅၼ်းမႃး၊ၵွပ်ႈပိူဝ်ႈၼိမိၵ်ႈလၢၵ်ႈၶၼႃႇၼၼ်ႉ၊ဢသၢၵ်ႈမီးသီႇသိပ်းပီလိူဝ်ယဝ်ႉဢေႃႈ။
ဝၢႆးသေ ပေႇတရု၊ တင်း ယူဝ်းႁၢၼ်ႇ၊ ဢွၵ်ႇၵႂႃႇၼၼ်ႉ၊ၶဝ်မိူဝ်းၸူးတီႈမုၵ်ႉၸုမ်းၵူၼ်းၶဝ်လႄႈမွၵ်ႇလၢတ်ႈၼႄလွင်ႈၵႂၢမ်းဢၼ်ယဵၸ်ႈပရေႃးႁဵၵ်ႈလူင်ၶဝ်၊ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၶဝ်၊သင်ႇလၢတ်ႈတီႈၶဝ်သွင်ၵေႃႉၼၼ်ႉဢေႃႈ။-
ၶဝ်လႆႈငိၼ်းလႄႈၽွမ်ႉၵၼ်ၵၢဝ်ႇတိူင်ႇၽြႃးပဵၼ်ၸဝ်ႈသူးတွင်းလႄႈဝႃႈ၊ “ၸဝ်ႈဢၼ်ပိူင်ႇတီႈၶႃႈ႟။ ၸဝ်ႈႁဝ်းပဵၼ်ၸဝ်ႈဢၼ်ၽၢၼ်ႇသၢင်းႁဵတ်းပဵၼ်ၵၢင်ႁၢဝ်လိၼ်မိူင်း၊ၼမ်ႉသမ်ႇမုၵ်ႈတြႃႇ၊ဢိၵ်ႇတင်းၵႃႈဢၼ်မီးၵႃႈၼႂ်းၸိူဝ်းၼၼ်ႉ၊တင်းသဵင်ႈတင်းလူင်တီႈၶႃႈဢေႃႈ။-
ၸဝ်ႈႁဝ်းဢဝ်သူပ်းၶႃႈၸဝ်ႈႁဝ်း တႃႇဝိတ်ႈ၊ လၢတ်ႈလူၺ်ႈဝိၺိၺ်ႇမူတ်းၸၢင်ႇၸဝ်ႈဝႆႉလႄႈဝႃႈ၊ “‘ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆတူၵ်းၸႂ်ဢူၼ်မေႃးႁဵတ်းသင်။ ၵူၼ်းမဵဝ်းတင်းလၢႆၶိုင်ပွင်လၢႆလၢႆလွၵ်ႇလွၵ်ႇႁဵတ်းသင်။
ၶုၼ်ႁေႃၶမ်းလေႃးၵီႇတင်းလၢႆၵျၢမ်ႇပွင်မႄးႁႅၼ်းလႄႈမူးမၢတ်ႈၽွင်းမိူင်းတင်းလၢႆၸုတုမ်ၶိုင်ႁႃ၊ ႁႂ်ႈလႆႈႁဵတ်းၶတ်းၸဝ်ႈထႃႇဝရႃႉၽြႃး၊ တင်း ၸဝ်ႈၶရိၸ်ႈ၊ မၼ်းၸဝ်ႈဢေႃႈ။’ ဝႃႈၼင်ႇၼႆၼၼ်ႉ၊-
ပဵၼ်ၸွမ်းၸိူဝ်ႉၼင်ႇဢၼ်ၸဝ်ႈၽႃႉ ႁေႇရူတ်ႈ၊ တင်းၶုၼ် ပွၼ်ႇတိပိလတ်ႉ၊ ၸုတုမ်ၵၼ်တင်းၵူၼ်း၊တၢင်ႇၸိူဝ်ႉတၢင်ႇၶိူဝ်းတင်းလၢႆ၊ဢိၵ်ႇတင်းၵူၼ်းမဵဝ်း ဢိသရေး၊ တင်းလၢႆ၊ၵႃႈတီႈဝဵင်းၼႆႉ ႁႂ်ႈလႆႈႁဵတ်းၶတ်း၊ ၸဝ်ႈယေႇသု၊ လုၵ်ႈၸဝ်ႈႁဝ်းဢၼ်ၸဝ်ႈႁဝ်းပၼ်ၽိၵ်ႈသိၵ်ႈဝႆႉ၊ႁႂ်ႈပဵၼ် ၸဝ်ႈၶရိၸ်ႈ၊ ၼၼ်ႉတီႈၶႃႈဢေႃႈ။-
ၶဝ်ၽွမ်ႉၵၼ်ႁႂ်ႈလႆႈႁဵတ်းၵူႈၸိူဝ်ႉၵူႈပိူင်ၸွမ်းၼင်ႇတၼ်းၶူဝ်းၸဝ်ႈႁဝ်း၊တင်းဢလူဝ်ႇၵၢင်ၸႂ်ၸဝ်ႈႁဝ်းမၵ်းၶၢၼ်းဝႆႉ၊ႁႂ်ႈပဵၼ်မႃးၸိူဝ်းၼၼ်ႉတီႈၶႃႈယဝ်ႉ။-
ပိူဝ်ႈၼႆလႄႈၸဝ်ႈႁဝ်းတီႈၶႃႈ၊တေႃႈလဵဝ်ၼႆႉၶႅၼ်းတေႃႈလူတူၺ်းတၢင်းဢၼ်ၶဝ်ႁႄႉၶႅၼ်ၸိူဝ်းၼၼ်ႉသေလႄႈၶႅၼ်းတေႃႈပၼ်ဢၶႂၢင်ႉၶႃႈၸဝ်ႈႁဝ်းၶဝ်ၸိူဝ်းၼႆႉ၊တၵ်းလႆႈႁေႃးလၢတ်ႈတြႃးၸဝ်ႈႁဝ်းႁတ်းႁတ်းႁၢၼ်ႁၢၼ်သေၵမ်းတီႈၶႃႈ။-
ၶႅၼ်းတေႃႈယိုၼ်းမိုဝ်းၸဝ်ႈႁဝ်း၊ႁႂ်ႈတၢင်းၶႆႈတၢင်းပဵၼ်ၸိုၼ်ႈႁၢႆၶႅၼ်းမႃး၊ဢိၵ်ႇတင်းပၼ်ဢၶႂၢင်ႉႁဵတ်းၼိမိၵ်ႈလၢၵ်ႈၶၼႃႇတၢင်းဢၼ်လီဢၢမ်းၼႃႇၸိူဝ်းၼၼ်ႉ၊ၵႃႈၼႂ်းၼႃႇမႃႉၸိုဝ်ႈသဵင် ယေႇသု၊ လုၵ်ႈၸဝ်ႈႁဝ်းၶႃႈဢၼ်မူတ်းၸၢင်ႇၼၼ်ႉသေၵမ်းတီႈၶႃႈ၊” ဝႃႈၼင်ႇၼႆသူးတွင်းဢေႃႈ။
ဝၢႆးသေၶဝ်သူးတွင်းယဝ်ႉၵႂႃႇၸိုင်၊တီႈဢၼ်ၶဝ်ၸုတုမ်ၵၼ်ၼၼ်ႉ၊သၼ်ႇဝႆၵႂႃႇဢေႃႈ။ ၶဝ်ၵေႃႈတဵမ်ဝႆႉတင်းဝိၺိၺ်ႇမူတ်းၸၢင်ႇၸဝ်ႈသေလႄႈတႄႇၸႃႉႁေႃးလၢတ်ႈတြႃးၽြႃးပဵၼ်ၸဝ်ႈႁတ်းႁတ်းႁၢၼ်ႁၢၼ်ဢေႃႈ။
မူႇၵူၼ်းၸိူဝ်းဢၼ်ယုမ်ႇမၢတ်ႈၼၼ်ႉ၊ဝႆႉၸႂ်ၶဝ်ပဵၼ်ဢၼ်လဵဝ်ၵၼ်လႄႈ ၽွမ်ႉသဵင်ပဵင်းပၢၵ်ႇၵၼ်ဝႆႉဢေႃႈ။ ၽူႈလႂ်ယင်းဢမ်ႇဝႃႈ၊ၶွင်ၵဝ်ၶွင်မႂ်းလႄႈၶဝ်ဢဝ်ဢုၵ်ႉၸႃႇဢၼ်ၶဝ်မီးၼၼ်ႉ၊ၽႄမႅင်ႇပၼ်တီႈၵၼ်ယူႇဢေႃႈ။-
တမၢၼ်ႇၸဝ်ႈတင်းလၢႆၵေႃႈ၊ပႃးတင်းတၼ်းၶူဝ်းယႂ်ႇၼႃႇလႄႈၶၢမ်ႇသၢၵ်ႈသေႇလွင်ႈ ၸဝ်ႈယေႇသု၊ လုၵ်ႉၶိုၼ်းလိပ်းၼၼ်ႉယူႇသေလႄႈၽြႃးပဵၼ်ၸဝ်ႈသွၼ်းလေႃႇပၼ်တၢင်းလီမၢင်ႇၵလႃႇၼမ်ၼႃႇၵႃႈတီႈၶဝ်ၵူႈၵေႃႉဢေႃႈ။-
ၼႂ်းၶဝ်ၼၼ်ႉ၊ဢမ်ႇမီးၵေႃႉဢၼ်ၸုတ်ႈဢၼ်လုတ်ႈသေၵေႃႉသေၵူၼ်း။ ၶဝ်ၸိူဝ်းဢၼ်မီးသူၼ်မီးႁိူၼ်းၼၼ်ႉၶၢႆပႅတ်ႈသေယဝ်ႉ၊ဢဝ်ငိုၼ်းဢၼ်လႆႈၼၼ်ႉမႃး၊-
ဢၢပ်ႈပၼ်တီႈတမၢၼ်ႇၸဝ်ႈတင်းလၢႆ ႁႂ်ႈၽႄမႅင်ႇပၼ်ၸွမ်းၵႃႈၼင်ႇဢၼ်ၽူႈလႂ်လူဝ်ႇၸူၵ်းလူဝ်ႇၸၢႆႇၵိၼ်ႁင်းၽႂ်ႁင်းမၼ်းၼၼ်ႉဢေႃႈ။
မိူဝ်ႈၼၼ်ႉ၊ ယူဝ်းသႅပ်ႈ၊ ၵူၼ်းမဵဝ်း လေႇဝိ၊ ၸႃႇတိၵုၼ် သၢႆးပရၢတ်ႈ၊ ဢၼ်တမၢၼ်ႇၸဝ်ႈတင်းလၢႆ၊ပၼ်ၸိုဝ်ႈမၼ်းလႄႈဝႃႈ၊ ပႃႇၼပႃႉ၊ (ဢၼ်ပွင်ႇဝႃႈ၊ၽူႈပၼ်ႁႅင်းၸႂ်) ၼၼ်ႉ၊-
ၶၢႆပႅတ်ႈသူၼ်မၼ်းလႄႈဢဝ်ငိုၼ်းဢၼ်လႆႈၼၼ်ႉ၊မႃးဢၢပ်ႈပၼ်တီႈတမၢၼ်ႇၸဝ်ႈတင်းလၢႆဢေႃႈ။
ၵူၺ်းၵႃႈ၊ၵူၼ်းၵေႃႉၼိုင်ႈဢၼ်လႆႈၸိုဝ်ႈ ဢႃႇၼၼိ၊ တင်းမေးမၼ်း သပ်ႉၽိရေႇ၊ ၸမ်ႉ၊ၶၢႆဢုၵ်ႉၸႃႇၶဝ်ၵမ်ႈၽွင်ႈသေယဝ်ႉ၊-
ၶဝ်ၽူဝ်မေးၽွမ်ႉၵၼ်ဢဝ်ငိုၼ်းဢၼ်လႆႈၼၼ်ႉ၊သိမ်းဝႆႉပုၼ်ႈၼိုင်ႈသေလႄႈဢဝ်ပုၼ်ႈၼိုင်ႈၵူၺ်းၵႂႃႇဢၢပ်ႈပၼ်တီႈတမၢၼ်ႇၸဝ်ႈတင်းလၢႆဢေႃႈ။-
ပေႇတရု၊ ၵေႃႈလၢတ်ႈတီႈမၼ်းလႄႈဝႃႈ၊ “ ဢႃႇၼၼိ၊ ႟။ ႁဵတ်းသင်လႄႈ မႂ်းႁႂ်ႈ ၸႃႇတၢၼ်ႇ၊ ဢုပ်ႉပိူင်ႇႁူဝ်ၸႂ်မႂ်း၊ႁႂ်ႈမႂ်းလႆႈပႅတ်ႉလႅၼ်ဝိၺိၺ်ႇမူတ်းၸၢင်ႇၸဝ်ႈလႄႈဢဝ်ငိုၼ်းဢၼ်မႂ်းၶၢႆလႆႈမႃးပုၼ်ႈၵႃႈၶၼ်ဢုၵ်ႉၸႃႇမႂ်းၼၼ်ႉ၊သိမ်းဝႆႉပုၼ်ႈၼိုင်ႈၼင်ႇႁိုဝ်။-
မိူဝ်ႈဢၼ်ဢမ်ႇပႆႇၶၢႆၼၼ်ႉဢုၵ်ႉၸႃႇၼၼ်ႉ၊ပဵၼ်ၶွင်မႂ်းဢမ်ႇၸႂ်ႈႁိုဝ်။ ၶၢႆယဝ်ႉလႄႈငိုၼ်းဢၼ်လႆႈမႃးၼၼ်ႉပဵၼ်ငိုၼ်းမႂ်းဢေႃႈ။ ၵွပ်ႈလွင်ႈၼႆႉလႄႈႁဵတ်းသင်မႂ်းတႅပ်းတတ်းၸႂ်ႁဵတ်းၸိူဝ်ႉၼင်ႇၼႆ။ မႂ်းပႅတ်ႉလႅၼ်ၵူၼ်းၵူၺ်းဢမ်ႇၸႂ်ႈ။ မႂ်းပႅတ်ႉလႅၼ်ၽြႃးပဵၼ်ၸဝ်ႈယဝ်ႉ၊” ဝႃႈၼင်ႇၼႆဢေႃႈ။-
မိူဝ်ႈဢၼ် ဢႃႇၼၼိ၊ ငိၼ်းၵႂၢမ်းၼၼ်ႉၸိုင်၊မၼ်းလူမ်ႉတၢႆၵႂႃႇဢေႃႈ။ ၵူၼ်းဢၼ်လႆႈငိၼ်းလွင်ႈတၢင်းၼၼ်ႉတင်းသဵင်ႈတင်းလူင်၊မီးၸႂ်ဢၼ်ၵူဝ်ႁႄၼႃႇလူင်လၢင်ဢေႃႈ။-
ၵူၼ်းၼုမ်ႇၶဝ်မႃးလႄႈဢဝ်ၶူဝ်းလဵင်းပူၵ်ႉႁေႃႇယဝ်ႉၸင်ႇႁၢမ်ၵႂႃႇသၢင်းၵျူဝ်ႇသေဢေႃႈ။
လိုၼ်းၼၼ်ႉ၊ႁိုင်သေသၢမ်မွင်းၸမ်ၸမ်၊မေးမၼ်းယင်းဢမ်ႇပႆႇႁုလွင်ႈဢၼ်ပဵၼ်ယဝ်ႉၼၼ်ႉလႄႈၶဝ်ႈမႃးဢေႃႈ။-
ပေႇတရု၊ ၵေႃႈထၢမ်မၼ်းလႄႈဝႃႈ၊ “သူၽူဝ်မေးၶၢႆသူၼ်လႄႈလႆႈထၼ်ႇၼႆႉၵူၺ်းႁိုဝ်း။ လၢတ်ႈၵဝ်လူး၊” ဝႃႈၼင်ႇၼႆလႄႈ၊ “ၸႂ်ႈၶႃႈဢေႃႈ။ လႆႈထၼ်ႇၼႆႉၵူၺ်းၶႃႈဢေႃႈ၊” ဝႃႈၼင်ႇၼႆမၼ်းၶိုၼ်းလၢတ်ႈဢေႃႈ။
ပိူဝ်ႈၼႆလႄႈ ပေႇတရု၊ သမ်ႉလၢတ်ႈတီႈမၼ်းလႄႈဝႃႈ၊ “ႁဵတ်းသင်သူၽူဝ်မေးတႅပ်းတတ်းၸႂ်သူသေလႄႈ၊ၸၢမ်းတူၺ်းဝိၺိၺ်ႇၸဝ်ႈၽြႃးၸိူဝ်ႉၼင်ႇၼႆ။ တူၺ်းလူး။ ၵူၼ်းၸိူဝ်းဢၼ်ၵႂႃႇသၢင်းၵျူဝ်ႇၽူဝ်မႂ်းၼၼ်ႉ၊ႁွတ်ႈမႃးၵႃႈႁိမ်းၽၵ်းတူယဝ်ႉ။ ၶဝ်သမ်ႉတၵ်းတေႁၢမ်မႂ်းလူးၵွၼ်ႇဢေႃႈ၊” ဝႃႈၼင်ႇၼႆသေယဝ်ႉ၊-
ယၢမ်းၼၼ်ႉၵမ်းလဵဝ်၊မၼ်းလူမ်ႉတၢႆၵႃႈႁိမ်းတိၼ် ပေႇတရု၊ ၵႂႃႇဢေႃႈ။ ၵူၼ်းၼုမ်ႇၸိူဝ်းၼၼ်ႉၶဝ်ႈမႃးလႄႈမိူဝ်ႈဢၼ်ထူပ်းႁၼ်မၼ်းတၢႆယဝ်ႉၸိုင်၊ၶဝ်ႁၢမ်ၵႂႃႇၽင်ဝႆႉႁိမ်းၽူဝ်မၼ်းသေဢေႃႈ။-
ၵူၼ်းၶဝ်ႈၸိူဝ်းၸဝ်ႈတင်းလၢႆ၊ဢိၵ်ႇတင်းၵူၼ်းတၢင်ႇၵေႃႉတၢင်ႇၵူၼ်းတင်းလၢႆ၊လႆႈငိၼ်းလွင်ႈဢၼ်ပဵၼ်မႃးၼၼ်ႉလႄႈၵူဝ်ႁႄၼႃႇလူင်လၢင်ဢေႃႈ။
တမၢၼ်ႇၸဝ်ႈတင်းလၢႆၵေႃႈႁဵတ်းၼိမိၵ်ႈလၢၵ်ႈၶၼႃႇလႄႈတၢင်းဢၼ်လီဢၢမ်းၼမ်ၼႃႇၵႃႈတီႈၽၢႆႇၼႃႈၵူၼ်းတင်းလၢႆဢေႃႈ။ ၵူၼ်းၸိူဝ်းဢၼ်ယုမ်ႇမၢတ်ႈတင်းသဵင်ႈတင်းလူင်၊ၸုတုမ်ၵၼ်ၵႃႈတီႈၸၢၼ်း သေႃးလမုၼ်ႇ၊ ဢေႃႈ။-
ၵူၼ်းပႃႈၼွၵ်ႈမူႇၸုမ်းၶဝ်ၸိူဝ်းၼၼ်ႉ၊ၽူႈလႂ်ၵေႃႈဢမ်ႇႁတ်းႁဵတ်းၵေႃႉႁဵတ်းသႄႈၶဝ်သေၵေႃႉသေၵူၼ်း။ ၵူၺ်းၵႃႈ၊ၵူၼ်းၸိူဝ်းၼၼ်ႉယွင်ႈယေႃးၶဝ်ဢေႃႈ။-
ၼႂ်းဝႃႈၼၼ်သေၵေႃႈၸဵမ်ယိင်းၸဵမ်ၸၢႆးၼမ်ၼႃႇယင်းယုမ်ႇမၢတ်ႈၸဝ်ႈၽြႃးလႄႈဢွၼ်ၵၼ်ယဵင်ႈၶႅၼ်းၶဝ်ႈမႃးၼႂ်းမူႇၸုမ်းၶဝ်ယူႇၶိူဝ်းၶိူဝ်းဢေႃႈ။-
ပိူၼ်ႈဢွၼ်ၵၼ်ႁၢမ်ဢဝ်၊ၵူၼ်းၶႆႈၵူၼ်းပဵၼ်ၶဝ်ဢွၵ်ႇဝႆႉႁိမ်းတၢင်း၊တၢင်ႇဝႆႉၼိူဝ်ၵူႇ၊ၼိူဝ်သၢတ်ႇတင်းလၢႆပုၼ်ႈလွင်ႈၼင်ႇႁိုဝ်ၼႂ်းမိူဝ်ႈဢၼ် ပေႇတရု၊ ပႆၸွမ်းတၢင်းၵႂႃႇယူႇၼၼ်ႉ၊ၵွင်ႉငဝ်း ပေႇတရု၊ တၵ်းႁူမ်ႇမႅၼ်ႈၶဝ်ၵူၺ်းလႄႈၶဝ်တၵ်းႁၢႆလီဢေႃႈ။-
ၵူၼ်းဝၢၼ်ႈၵူၼ်းဝဵင်းႁိမ်းႁွမ်းဝဵင်း ယေႇရုသလႅမ်ႇ၊ ၸိူဝ်းၼၼ်ႉ၊ႁၢမ်ဢဝ်ၵူၼ်းၶႆႈၵူၼ်းပဵၼ်၊ဢိၵ်ႇတင်းၵူၼ်းၽီၶဝ်ႈတင်းလၢႆမႃးၸူးလႄႈၶဝ်တင်းသဵင်ႈတင်းလူင်ၵေႃႈ၊လႆႈၸိုၼ်ႈႁၢႆၵႂႃႇၵူႈၵေႃႉၵူႈၵူၼ်းဢေႃႈ။
မိူဝ်ႈၼၼ်ႉၶုၼ်ယဵၸ်ႈပရေႃးႁဵၵ်ႈ ၊ဢိၵ်ႇတင်းၵူၼ်းမၼ်းတင်းလၢႆ၊ဢၼ်ပဵၼ်ၵူၼ်းၵိူင်း ၸတ်ႉတုၵႄး၊ ၸိူဝ်းၼၼ်ႉ၊ၸႂ်မႆႈၶႂ်ႈၸႃႉတေႃႇတမၢၼ်ႇၸဝ်ႈတင်းလၢႆၼႃႇလူင်လၢင်လႄႈၶဝ်တႅပ်းတတ်းႁႂ်ႈလႆႈႁဵတ်းဢမုၵႃႈၼိူဝ်တမၢၼ်ႇၸဝ်ႈၸိူဝ်းၼၼ်ႉဢေႃႈ။-
ပိူဝ်ႈၼႆလႄႈၶဝ်တိဢဝ်တမၢၼ်ႇၸဝ်ႈၸိူဝ်းၼၼ်ႉသေလႄႈၶင်ဝႆႉၼႂ်းထွင်ႇသေဢေႃႈ။-
ၵူၺ်းၵႃႈ၊ၼႂ်းၶိုၼ်းၼၼ်ႉတမၢၼ်ႇၵၢင်ႁၢဝ်ၸဝ်ႈၽြႃးၽုၺ်ႇၽၵ်းတူထွင်ႇယဝ်ႉၸင်ႇ၊ဢွၼ်တမၢၼ်ႇၸဝ်ႈၸိူဝ်းၼၼ်ႉဢွၵ်ႇၵႂႃႇသေလႄႈသင်ႇလၢတ်ႈဝႃႈ၊-
“ၵႂႃႇၸုၵ်းယူႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈလႄႈႁေႃးလၢတ်ႈတြႃးလွင်ႈဢသၢၵ်ႈတၢၼ်းဢၼ်မႂ်ႇၼႆႉ၊တီႈၵူၼ်းတင်းလၢႆတႃႉ၊” ဝႃႈၼင်ႇၼႆဢေႃႈ။-
တမၢၼ်ႇၸဝ်ႈၸိူဝ်းၼၼ်ႉ၊ထွမ်ႇဢဝ်ဢမိင်ႉၼၼ်ႉသေလႄႈၶိင်ႇၵၢင်ၼႂ်ၸဝ်ႉၸဝ်ႉ ၶဝ်ႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈၵႂႃႇသင်ႇသွၼ်ပၼ်ယူႇဢေႃႈ။ ၶုၼ်ယဵၸ်ႈပရေႃးႁဵၵ်ႈ၊ဢိၵ်ႇတင်းၵူၼ်းမၼ်းတင်းလၢႆ၊ႁွင်ႉဢဝ်ၵူၼ်းဢၼ်ပဵၼ်ၵႄႇပဵၼ်ႁူဝ်မဵဝ်း ၵျူး၊ ၶဝ်၊တင်းသဵင်ႈတင်းလူင်မႃးၸုတုမ်လႄႈႁဵတ်းပၢင်ၵုမ်လူင်သေယဝ်ႉ၊ပွႆႇၸႂ်ႉၵူၼ်းၵႂႃႇၵႃႈတီႈထွင်ႇ၊ႁႂ်ႈလႆႈႁွင်ႉဢဝ်တမၢၼ်ႇၸဝ်ႈၸိူဝ်းၼၼ်ႉမႃးဢေႃႈ။-
မိူဝ်ႈဢၼ်ၵူၼ်းၶဝ်ၸိူဝ်းၼၼ်ႉႁွတ်ႈထိုင်ၵႃႈတီႈထွင်ႇၸိုင်၊ၶဝ်ဢမ်ႇႁၼ်တမၢၼ်ႇၸဝ်ႈၸိူဝ်းၼၼ်ႉ ၵႃႈၼႂ်းထွင်ႇယဝ်ႉၸင်ႇ၊ၶိုၼ်းမႃးသေလႄႈ၊-
လဝ်ႈလၢတ်ႈဝႃႈ၊ “မိူဝ်ႈဢၼ်ႁဝ်းၶႃႈႁွတ်ႈထိုင်ၵႃႈတီႈထွင်ႇၼၼ်ႉ၊ႁဝ်းၶႃႈထူပ်းႁၼ်ၽၵ်းတူထွင်ႇဢိုတ်းဝႆႉ၊သေႇၶျႃႇလီငၢမ်းလႄႈၵူၼ်းပႂ်ႉၵူႈၵေႃႉၵေႃႈၸုၵ်းပႂ်ႉၽၵ်းတူဝႆႉယူႇလီလီဢေႃႈ။ ၵူၺ်းၵႃႈ၊မိူဝ်ႈဢၼ်ႁဝ်းၶႃႈၽုၺ်ႇၽၵ်းတူတူၺ်းၼၼ်ႉ၊ဢမ်ႇထူပ်းဢမ်ႇႁၼ်သေၵေႃႉသေၵူၼ်းၵႃႈၼႂ်းၼၼ်ႉၶႃႈ၊” ဝႃႈၼင်ႇၼႆဢေႃႈ။-
ႁူဝ်ၼႃႈၵူၼ်းသိုၵ်းပႂ်ႉၵျွင်းပိၵ်ႈမၢၼ်ႇၸဝ်ႈတင်းယဵၸ်ႈပရေႃးႁဵၵ်ႈလူင်ၶဝ်ၸိူဝ်းၼၼ်ႉ၊လႆႈငိၼ်းလႄႈဢၢမ်းလွင်ႈတၢင်းဢၼ်ပဵၼ်မႃးၵႃႈတီႈတမၢၼ်ႇၸဝ်ႈၸိူဝ်းၼၼ်ႉဢေႃႈ။-
မိူဝ်ႈယၢမ်းၼၼ်ႉ ၵူၼ်းၵေႃႉၼိုင်ႈၶဝ်ႈမႃးလဝ်ႈလၢတ်ႈလႄႈဝႃႈ၊ “ထွမ်ႇၶႃႈလူး။ ၵူၼ်းဢၼ်သူၶင်ဝႆႉၼႂ်းထွင်ႇၸိူဝ်းၼၼ်ႉ၊သမ်ႉပေႃးမီးယူႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈလႄႈသင်ႇသွၼ်ပၼ်ၵူၼ်းတင်းလၢႆယူႇၶႃႈယဝ်ႉ၊” ဝႃႈၼင်ႇၼႆဢေႃႈ။-
ႁူဝ်ၼႃႈလုၵ်ႈသိုၵ်းပႂ်ႉၵျွင်းပိၵ်ႈမၢၼ်ႇၸဝ်ႈၼၼ်ႉ၊ဢွၵ်ႇၵႂႃႇလူၺ်ႈၵၼ်တင်းၵူၼ်းဢွၼ်ႇမၼ်းတင်းလၢႆသေယဝ်ႉ၊ယင်းဢမ်ႇႁဵတ်းဢထမ်ႇမႃႉလႄႈႁွင်ႉဢဝ်တမၢၼ်ႇၸဝ်ႈၸိူဝ်းၼၼ်ႉၶိုၼ်းမႃး၊ၵွပ်ႈပိူဝ်ႈၶဝ်ၵူဝ်ၵူၼ်းတင်းလၢႆတၵ်းဢဝ်မၢၵ်ႇႁိၼ်ပိုဝ်ႈသႂ်ႇၶဝ်ၼၼ်ႉဢေႃႈ။
ၶဝ်ဢဝ်တမၢၼ်ႇၸဝ်ႈၸိူဝ်းၼၼ်ႉမႃးလႄႈႁႂ်ႈၸုၵ်းယူႇၽၢႆႇၼႃႈပၢင်ၵုမ်လူင်ယဝ်ႉၸင်ႇ၊ၶုၼ်ယဵၸ်ႈပရေႃးႁဵၵ်ႈၼၼ်ႉထၢမ်လႄႈ၊-
လၢတ်ႈဝႃႈ၊ “လွင်ႈၼင်ႇႁိုဝ်သူတၵ်းဢမ်ႇဢိင်ပိုင်ႈၸိုဝ်ႈသဵင်ၵေႃႉၼၼ်ႉသေလႄႈႁေႃးလၢတ်ႈသင်ႇသွၼ်ပိူၼ်ႈၸိုင်၊ႁဝ်းႁၢမ်ႈတၢပ်ႈသူဝႆႉလီလီယဝ်ႉဢမ်ႇၸႂ်ႈႁိုဝ်း။ ၵူၺ်းၵႃႈ၊တူၺ်းဢၼ်သူႁဵတ်းၼႆႉလူး။ သူႁဵတ်းႁႂ်ႈၵႂၢမ်းသင်ႇသွၼ်သူၸွတ်ႇတူဝ်ႈၵႂႃႇၵႃႈတီႈၼႂ်းဝဵင်း ယေႇရုသလႅမ်ႇ၊ ၵူႈၸွၵ်ႉၵူႈၸဵင်ႇယဝ်ႉလႄႈဢၢင်ႈၶႂ်ႈႁႂ်ႈလိူတ်ႈၵေႃႉၼၼ်ႉ၊တူၵ်းႁွတ်ႈၵႃႈၼိူဝ်ႁဝ်းယဝ်ႉ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ ပေႇတရု၊ တင်းတမၢၼ်ႇၸဝ်ႈတၢင်ႇၵေႃႉၸိူဝ်းၼၼ်ႉၶိုၼ်းလၢတ်ႈလႄႈဝႃႈ၊ “ႁဝ်းၶႃႈထုၵ်ႇလီထွမ်ႇဢဝ်ၵႂၢမ်းၽြႃးပဵၼ်ၸဝ်ႈၼႃႇသေၵႂၢမ်းၵူၼ်းဢေႃႈ။-
ၽြႃးပူႇမွၼ်ႇႁဝ်းၼၼ်ႉ၊ႁဵတ်းႁႂ်ႈ ၸဝ်ႈယေႇသု၊ ဢၼ်သူတွၵ်ႇတၢႆၵႃႈၼိူဝ်သဝ်မႆႉၼၼ်ႉ၊လုၵ်ႉၶိုၼ်းလိပ်းမႃးဢေႃႈ။-
ၽြႃးပဵၼ်ၸဝ်ႈယုၵ်ႉယွင်ႈမၼ်းၸဝ်ႈဝႆႉ၊ၽၢႆႇၶႂႃမိုဝ်းၸဝ်ႈၵႃႈၼႂ်းဢရႃႇၸဝ်ႈဢၼ်ဢုပ်ႉပိူင်ႇ၊ဢိၵ်ႇတင်းဢရႃႇၸဝ်ႈဢၼ်ၵႄႇၶျွတ်ႈ၊ႁႂ်ႈလႆႈပၼ်ဢၶႂၢင်ႉႁႂ်ႈၵူၼ်း ဢိသရေး၊ တင်းလၢႆ၊လႆႈၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်မႃးၶၢမ်ႇဢဝ်တၢင်းဢၼ်ပွႆႇလွတ်ႈဢပျတ်ႈၼၼ်ႉဢေႃႈ။-
ႁဝ်းၶႃႈပဵၼ်ၵေႃႉဢၼ်ၶၢမ်ႇသၢၵ်ႈသေႇလွင်ႈတၢင်းၸိူဝ်းၼႆႉၶႃႈဢေႃႈ။ ဝိၺိၺ်ႇမူတ်းၸၢင်ႇၸဝ်ႈဢၼ်ၽြႃးပဵၼ်ၸဝ်ႈပၼ်သူးတီႈၶဝ်ၸိူဝ်းဢၼ်ထွမ်ႇဢဝ်ၵႂၢမ်းမၼ်းၸဝ်ႈၼၼ်ႉၵေႃႈၶၢမ်ႇသၢၵ်ႈသေႇၼင်ႇၵဝ်ႇဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၶဝ်ၸိူဝ်းဢၼ်ၶဝ်ႈပႃးၼႂ်းပၢင်ၵုမ်လူင်ၼၼ်ႉတင်းလၢႆ၊လႆႈငိၼ်းၵႂၢမ်းၼၼ်ႉၸိုင်၊တေႃးသႃႉတႅၵ်ႇၸႂ်လမ်သႆႈၵမ်ႇၼႃႇလူင်လၢင်သမ်ႉပေႃးၶႂ်ႈဢဝ်တမၢၼ်ႇၸဝ်ႈၸိူဝ်းၼၼ်ႉတၢႆဢေႃႈ။-
ၵူၺ်းၵႃႈ၊ၼႂ်းၶဝ်ၼၼ်ႉၵေႃႉၼိုင်ႈ၊ၵူၼ်းၵိူင်း ၽႃႇရိသႄး၊ ဢၼ်လႆႈၸိုဝ်ႈ ၵႃႇမလျေးလႃႉ၊ ပဵၼ်သြႃႇဢၼ်သွၼ်ပၼ်တြႃးၸဝ်ႈလႄႈၵူၼ်းတင်းလၢႆရူဝ်ႇသေႇၵူဝ်ယမ်ၼၼ်ႉ၊လုၵ်ႉၸုၵ်းၵႃႈၼႂ်းပၢင်ၵုမ်လူင်သေယဝ်ႉ၊မီးဢမိင်ႉႁႂ်ႈတမၢၼ်ႇၸဝ်ႈၸိူဝ်းၼၼ်ႉ၊ဢွၵ်ႇၵႂႃႇၵႃႈၼွၵ်ႈၵမ်းၼိုင်ႈယဝ်ႉ၊-
ၸင်ႇလၢတ်ႈလႄႈဝႃႈ၊ “ၵူၼ်း ဢိသရေး၊ ၶဝ်႟။ လွင်ႈဢၼ်သူတၵ်းႁဵတ်းတီႈၵူၼ်းၸိူဝ်းၼႆႉၼၼ်ႉဝႆႉသတိတႃႉ။-
ၸွင်ႇသူၶုၵ်းၸႂ်လႆႈၵူၼ်းဢၼ်လႆႈၸိုဝ်ႈ ထတႃႉ၊ ပေႃႇမႃးမိူဝ်ႈၶိင်ႇပူၼ်ႉမႃးၼၼ်ႉလႄႈလၢတ်ႈဝႃႈ၊မၼ်းပဵၼ်ၵူၼ်းထွတ်ႈၵူၼ်းမျၢတ်ႈၵေႃႉၼိုင်ႈဝႃႈၼႆသေယဝ်ႉ၊ၵူၼ်းသီႇပၢၵ်ႇၸမ်ၸမ်ပဵၼ်ၵူၼ်းမၼ်းၵႂႃႇၼၼ်ႉႁိုဝ်း။ ဝၢႆးသေပိူၼ်ႈဢဝ်မၼ်းတၢႆၸိုင်၊တပႄးမၼ်းတင်းလၢႆၽၢတ်ႇၽႄလႄႈႁၢႆလၢႆၵႂႃႇဢမ်ႇၸႂ်ႈႁိုဝ်း။-
ဝၢႆးသေၵေႃႉၼၼ်ႉ၊ၵူၼ်း ၵႃႇလိလႄး၊ ၵေႃႉၼိုင်ႈ၊ဢၼ်လႆႈၸိုဝ်ႈ ယုတႃႉ၊ ၵေႃႈ၊ပေႃႇမႃးၼႂ်းၶိင်ႇဢၼ်ႁဵတ်းတၢင်းဢၼ်ၵဵပ်းၸရၢင်းၵူၼ်းမိူင်းၼၼ်ႉ၊တိုၵ်းယူင်းၸူဝ်းဢဝ်လႆႈၵူၼ်းၼမ်တၢၼ်ႇတၢၼ်ႇ၊ပဵၼ်တပႄးမၼ်းယဝ်ႉသေၵေႃႈ၊ဝၢႆးသေမၼ်းလႆႈၶၢမ်ႇတၢင်းဢၼ်ဢဝ်တၢႆယဝ်ႉၸိုင်၊တပႄးမၼ်းတင်းလၢႆၽၢတ်ႇၽႄၵႂႃႇၵူၺ်းဢေႃႈ။-
လွင်ႈၼႆႉၵေႃႈၵဝ်ဝႃႈတီႈသူၸမ်ႉ၊ယႃႇပေၵႂႃႇၵဝ်းၶဝ်။ ပွႆႇၶဝ်ဝႆႉလူးၵွၼ်ႇတႃႉ။ တၢင်းဢၼ်ၶဝ်ၶိုင်ႁၢင်ႈသၢင်ႈပွင်ၼႆႉ၊သင်ဝႃႈပဵၼ်ဢလူဝ်ႇၵူၼ်းၸိုင်၊တၵ်းတေလုႁၢႆၵႂႃႇဢေႃႈ။-
ၵူၺ်းၵႃႈ၊ပေႃးပဵၼ်ဢလူဝ်ႇၽြႃးပဵၼ်ၸဝ်ႈၸိုင်၊ဢမ်ႇယႃႉပႅတ်ႈလႆႈဢမၢၼ်ႇၶၼ်ပဵၼ်ဢေႃႈ။ ၵူဝ်သူတၵ်းပဵၼ်ၵေႃႉဢၼ်တိုၵ်းတေႃးၵၼ်တင်းၽြႃးပဵၼ်ၸဝ်ႈဢေႃႈ၊” ဝႃႈၼင်ႇၼႆဢေႃႈ။ ၶဝ်ၸိူဝ်းဢၼ်ၶဝ်ႈပႃးၼႂ်းပၢင်ၵုမ်လူင်ၼၼ်ႉတင်းလၢႆ၊ထွမ်ႇဢဝ်ၵႂၢမ်းသြႃႇ ၵႃႇမလျေးလႃႉ၊ သေယဝ်ႉ၊-
ၶဝ်ၶိုၼ်းႁွင်ႉဢဝ်တမၢၼ်ႇၸဝ်ႈၸိူဝ်းၼၼ်ႉၶဝ်ႈမႃးလႄႈပေႃႉယႅၼ်ႉၶဝ်ယဝ်ႉၸင်ႇ၊ၼင်ႇႁိုဝ်ၶဝ်တၵ်းဢမ်ႇႁေႃးလၢတ်ႈၵႃႈၼႂ်းၸိုဝ်ႈသဵင် ၸဝ်ႈယေႇသု၊ ထႅင်ႈၸိုင်၊ႁၢမ်ႈတၢပ်ႈႁႄႉၶႅၼ်လႄႈပွႆႇၶဝ်ၵႂႃႇသေဢေႃႈ။-
ယၢမ်းမိူဝ်ႈဢၼ်တမၢၼ်ႇၸဝ်ႈၸိူဝ်းၼၼ်ႉ၊ဢွၵ်ႇပၢင်ၵုမ်လူင်ၵႂႃႇယူႇၼၼ်ႉၸိုင်၊ၵွပ်ႈပိူဝ်ႈၽြႃးပဵၼ်ၸဝ်ႈမၢတ်ႈၶဝ်ပဵၼ်၊ၸိူဝ်းဢၼ်ထိူၵ်ႈၶၢမ်ႇတၢင်းဢၼ်လီဢူၵ်းလီဢၢႆၽၢႆႇၼႃႈပိူၼ်ႈ၊ပုၼ်ႈၸိုဝ်ႈသဵင် ၸဝ်ႈယေႇသု၊ ၼၼ်ႉလႄႈၶဝ်ၸူမ်းသိူဝ်းၼႃႇဢေႃႈ။-
ၶဝ်သင်ႇသွၼ်ပၼ်ယူႇလႄႈႁေႃးလၢတ်ႈၶၢဝ်ႇတြႃးသိူဝ်းပျေႃႇ၊ၵႃႈၼႂ်းၵျွင်းပိၵ်ႈမၢၼ်ႇၸဝ်ႈ၊ဢိၵ်ႇတင်းၵႃႈၼႂ်းႁိူၼ်းပိူၼ်ႈလွင်ႈ ၸဝ်ႈယေႇသု၊ ပဵၼ် ၸဝ်ႈၶရိၸ်ႈ၊ ၼၼ်ႉၵူႈမိုဝ်ႉၵူႈဝၼ်းဢေႃႈ။
ဝၢႆးသေၼၼ်ႉဢမ်ႇပေႃးႁိုင်၊ၸိူဝ်ႉၼင်ႇဢၼ်တပႄးၸဝ်ႈၶဝ်ယင်းတိုၵ်ႉၼမ်မႃးၵိုၼ်းမႃးယူႇၶိူဝ်းၶိူဝ်းၼၼ်ႉၸိုင်၊ၵႃႈၼႂ်းၵူၼ်းမဵဝ်း ၵျူး၊ ဢၼ်လၢတ်ႈၵႂၢမ်း ၵရိၵ်ႉ၊ တင်းၵူၼ်းမဵဝ်း ၵျူး၊ ၸႅတ်ႈၸႅတ်ႈၼၼ်ႉ၊ၼင်ႇၵၼ်ၵၼ်မီးသူပ်းမီးၵႂၢမ်းမႃးဢေႃႈ။ ၵူၼ်းမဵဝ်း ၵျူး၊ ဢၼ်လၢတ်ႈၵႂၢမ်း ၵရိၵ်ႉ၊ တင်းလၢႆတၢင်ႇဢပျတ်ႈလႄႈဝႃႈ၊ “မႄႈမၢႆႈၵႃႈၼႂ်းၵူၼ်းမဵဝ်းႁဝ်းၼႆႉ၊ဢမ်ႇပေႃးလႆႈၶၢမ်ႇဢဝ်တၢင်းဢၼ်ႁဵတ်းလဵင်ႉႁဵတ်းလူ၊ၼႂ်းမိူဝ်ႈဢၼ်ၽႄမႅင်ႇပၼ်ပုၼ်ႈဝၼ်းလႂ်ဝၼ်းၼၼ်ႉ၊ၼၼ်ႉဢေႃႈ၊” ဝႃႈၼင်ႇၼႆဢေႃႈ။-
တမၢၼ်ႇၸဝ်ႈသိပ်းသွင်ပႃးၼၼ်ႉ၊ၸင်ႇႁွင်ႉဢဝ်မူႇၵူၼ်းဢၼ်ယုမ်ႇမၢတ်ႈတင်းလၢႆၸုတုမ်ၵၼ်သေယဝ်ႉ၊လၢတ်ႈလႄႈဝႃႈ၊ “ႁဝ်းဢမ်ႇထုၵ်ႇလီၶျႃးဝႆႉၵၢၼ်ဢၼ်ႁေႃးလၢတ်ႈၼုၵ်ႈၵပၢတ်ႈတြႃး၊ၽြႃးပဵၼ်ၸဝ်ႈသေလႄႈယိပ်းၵမ်ၼႃႈၵၢၼ်ငိုၼ်းလူႇငိုၼ်းတၢၼ်းၼၼ်ႉ။-
ပိူဝ်ႈၼႆလႄႈပီႈၼွင်ႉၶဝ်႟။ လိူၵ်ႈဢဝ်ၵူၼ်းၸိူဝ်းဢၼ်မီးသရေႇတၢင်းဢၼ်ပျေႉၸုမ်ႇဝႆႉ၊တင်းဝိၺိၺ်ႇမူတ်းၸၢင်ႇၸဝ်ႈ၊ဢိၵ်ႇတင်းပိင်ႇၺႃႇၼၼ်ႉၸဵတ်းၵေႃႉ၊ၵႃႈၼႂ်းသူတႃႉ။ ႁဝ်းတၵ်းယုၵ်ႉတၢင်ႇၶဝ်ဝႆႉ၊ႁႂ်ႈယိပ်းၵမ်လွင်ႈတၢင်းၼႆႉဢေႃႈ။-
ႁဝ်းၸိူဝ်းၼႆႉၸမ်ႉ၊တၵ်းပၼ်ဢၶိင်ႇၵႃႈဢၼ်ႁဝ်းမီးၼၼ်ႉ၊ၼႂ်းတၢင်းဢၼ်ႁဵတ်းသူးတွင်းပထၼႃႇ၊ဢိၵ်ႇတင်းၼႂ်းတၢင်းဢၼ်ႁေႃးလၢတ်ႈၼုၵ်ႈၵပၢတ်ႈတြႃးၸဝ်ႈယူႇၵူၺ်းဢေႃႈ၊” ဝႃႈၼင်ႇၼႆဢေႃႈ။
ၵူၼ်းတင်းသဵင်ႈတင်းလူင်ထုၵ်ႇၸႂ်ၵျိူၵ်ႈၸႂ်ၵႂၢမ်းတမၢၼ်ႇၸဝ်ႈၸိူဝ်းၼၼ်ႉလႄႈၶဝ်လိူၵ်ႈဢဝ် သထေႇၽၢၼ်ႇ၊ ၵေႃႉဢၼ်တဵမ်ဝႆႉတင်းတၢင်းယုမ်ႇမၢတ်ႈတင်းဝိၺိၺ်ႇမူတ်းၸၢင်ႇၸဝ်ႈ၊ဢိၵ်ႇတင်း ၽိလိပ်ႉပု၊ပျေႃႇၶေႃႇ၊ၼိၵၼေႃႇ၊တိမုၼ်ႇ၊ပႃႇမေႇၼႃႉ၊ တင်း ၼိၵေႃးလႃႉ၊ ၵူၼ်းဝဵင်း ဢၼ်ႇတိဢူၵ်ႉ၊ ဢၼ်ၶဝ်ႈၽႃႇသႃႇ ယုတႃႉ၊ ၼၼ်ႉ၊ၸိူဝ်းၼၼ်ႉဢေႃႈ။-
မူႇၵူၼ်းဢၼ်ယုမ်ႇမၢတ်ႈတင်းလၢႆ၊ဢဝ်ၶဝ်ဝႆႉၵႃႈတီႈၽၢႆႇၼႃႈတမၢၼ်ႇၸဝ်ႈၶဝ်သေယဝ်ႉ၊တမၢၼ်ႇၸဝ်ႈၸိူဝ်းၼၼ်ႉၵေႃႈဢဝ်မိုဝ်းတၢင်ႇၵႃႈၼိူဝ်ၶဝ်လႄႈသူးတွင်းဢေႃႈ။
ႁဵတ်းၼၼ်လႄႈၼုၵ်ႈၵပၢတ်ႈၽြႃးပဵၼ်ၸဝ်ႈယႂ်ႇၽႄၸွတ်ႇတူဝ်ႈမႃးယူႇ၊တပႄးၸဝ်ႈၼမ်မႃးၵိုၼ်းမႃးယူႇၶိူဝ်းၶိူဝ်းၵႃႈၼႂ်းဝဵင်း ယေႇရုသလႅမ်ႇ၊ ဢေႃႈ။ ယဵၸ်ႈပရေႃးႁဵၵ်ႈ ၼမ်ၼႃႇၵေႃႈႁပ်ႉတုင်းဢဝ်တြႃးတၢင်းဢၼ်ယုမ်ႇမၢတ်ႈဢေႃႈ။
သထေႇၽၢၼ်ႇ၊ ၼၼ်ႉ၊လႆႈၶၢမ်ႇဢဝ်ၵျေးၸူးမၢင်ႇၵလႃႇၽြႃးပဵၼ်ၸဝ်ႈ၊တဵမ်ဝႆႉတင်းတၼ်းၶူဝ်းလႄႈႁဵတ်းၼိမိၵ်ႈလၢၵ်ႈၶၼႃႇဢၼ်ယႂ်ႇ၊ဢိၵ်ႇတင်းတၢင်းဢၼ်လီဢၢမ်းၵႃႈၼႂ်းၵူၼ်းတင်းလၢႆဢေႃႈ။-
ပိူဝ်ႈၼႆလႄႈမီးၵူၼ်းၵမ်ႈၽွင်ႈဢၼ်ပဵၼ်ၵူၼ်းဢၼ်လႆႈႁွင်ႉၸိုဝ်ႈဝႃႈ၊မူႇၸုမ်းၵူၼ်းလွတ်ႈဢၼ်ၶဝ်ႈပႃး ၵျူး၊ ၵူၼ်းဝဵင်း ၵုရေႇၼေႇ၊ တင်းၵူၼ်းဝဵင်း ဢႃႇလေႇၸၼ်ႇတရီးယႃး၊ ဢိၵ်ႇတင်းၵူၼ်းမိူင်း ၵိလိၵိ၊ တင်းၵူၼ်းမိူင်း ဢႃႇသိ၊ ၶဝ်တွပ်ႇထဵင်ၵၼ်တင်း သထေႇၽၢၼ်ႇ၊ ဢေႃႈ။-
ၵူၺ်းၵႃႈ၊တၢင်းဢၼ်ဝိၺိၺ်ႇၸဝ်ႈပၼ်ပိင်ႇၺႃႇလႄႈမၼ်းႁေႃးလၢတ်ႈၼၼ်ႉ၊ၶဝ်ဢမ်ႇထဵင်ပႄႉမၼ်းလႆႈ။-
ပိူဝ်ႈၼႆၸင်ႇၶဝ်ၸၢင်ႈဢဝ်ၵူၼ်းၵမ်ႈၽွင်ႈ၊ႁႂ်ႈၶၢမ်ႇသၢၵ်ႈသေႇလႄႈဝႃႈ၊ “ႁဝ်းၶႃႈလႆႈငိၼ်းမၼ်းလၢတ်ႈပူၼ်ႉလၢတ်ႈလိူဝ်တြႃး မူဝ်းသေႇ၊ တင်းတြႃးၽြႃးပဵၼ်ၸဝ်ႈဢေႃႈ၊” ဝႃႈၼင်ႇၼႆဢေႃႈ။-
ၵွပ်ႈလွင်ႈၼႆႉလႄႈၶဝ်တိုၵ်းသူၼ်းၵူၼ်းတင်းလၢႆ၊ၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆ၊ဢိၵ်ႇတင်းသြႃႇမေႃၵျၢမ်းထမ်ႇမႃႉတင်းလၢႆမႃးလႄႈတိဢဝ် သထေႇၽၢၼ်ႇ၊ ၵႂႃႇသူင်ႇၵႃႈတီႈလုမ်းလူင်ဢေႃႈ။-
မိူဝ်ႈၼၼ်ႉ၊ၶဝ်ႁွင်ႉဢဝ်ၵူၼ်းၵမ်ႈၽွင်ႈ၊ႁႂ်ႈၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈလႄႈလၢတ်ႈဝႃႈ၊ “ၵေႃႉၼႆႉႁေႃးလၢတ်ႈတြႃးဢၼ်ၶတ်းၵၼ်တင်းၵျွင်းပိၵ်ႈမၢၼ်ႇဢၼ်မူတ်းၸၢင်ႇၸဝ်ႈႁဝ်းၼႆႉ၊ဢိၵ်ႇတင်းတြႃး မူဝ်းသေႇ၊ ဢေႃႈ။-
ႁဝ်းလႆႈငိၼ်းမၼ်းႁေႃးလၢတ်ႈဝႃႈ၊ ‘ ယေႇသု၊ ၵူၼ်းဝဵင်း ၼႃႇၸရႅတ်ႈ၊ ၼႆႉ၊တၵ်းယႃႉပႅတ်ႈၵျွင်းပိၵ်ႈမၢၼ်ႇၸဝ်ႈသေလႄႈတၵ်းပိၼ်ႈၶွမ်ႈပႅတ်ႈထုင်းတြႃး မူဝ်းသေႇ၊ ဢၼ်ႁဝ်းၵမ်ၵျၢင်ႉၸွမ်းယူႇၼႆႉဢေႃႈ၊’ ဝႃႈၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။-
ၶဝ်ၸိူဝ်းဢၼ်ၼင်ႈယူႇၵႃႈၼႂ်းလုမ်းလူင်ၼၼ်ႉတင်းသဵင်ႈတင်းလူင်၊ယႅၵ်ႉတူၺ်းၼႃႈ သထေႇၽၢၼ်ႇ၊ ယူႇသေလႄႈလႆႈႁၼ်ၼႃႈမၼ်းပဵၼ်ၸိူဝ်ႉၼင်ႇၼႃႈတမၢၼ်ႇၵၢင်ႁၢဝ်ဝႆႉဢေႃႈ။
ၶုၼ်ယဵၸ်ႈပရေႃးႁဵၵ်ႈထၢမ် သထေႇၽၢၼ်ႇ၊ လႄႈဝႃႈ၊ “လွင်ႈတၢင်းၸိူဝ်းၼႆႉမႅၼ်ႈႁိုဝ်း၊” ဝႃႈၼင်ႇၼႆဢေႃႈ။
မၼ်းၶိုၼ်းလၢတ်ႈလႄႈဝႃႈ၊ “ပီႈၼွင်ႉဢိၵ်ႇတင်းပေႃႈၶဝ်႟။ ထွမ်ႇသေၵမ်းၶႃႈ။ ၸူဝ်ႈဢၼ်ပူႇမွၼ်ႇႁဝ်း ဢႃႇပြႃႇႁၢမ်ႇ၊ ဢမ်ႇပႆႇၵႂႃႇယူႇသဝ်းၵႃႈတီႈဝဵင်း ၶႃႇရၼ်ႇ၊ ၼၼ်ႉ၊ၽြႃးပဵၼ်ၸဝ်ႈဢၼ်မုၼ်ၽုင်းယႂ်ႇၼႃႇၼၼ်ႉ၊ပေႃႇမႃးၵႃႈတီႈမၼ်းၼႂ်းမိူင်း မေႇသူဝ်ႇပူဝ်ႇတေးမီးယႃး၊ ပုၼ်ႉလႄႈ၊-
မီးဢမိင်ႉဝႃႈ၊ ‘ဢွၵ်ႇသေၵႃႈတီႈမိူင်းမႂ်း၊ဢိၵ်ႇတင်းပီႈၼွင်ႉၸိူဝ်ႉၶိူဝ်းမႂ်းလႄႈၵႂႃႇၵႃႈတီႈမိူင်းဢၼ်ၵဝ်တၵ်းၼႄပၼ်တီႈမႂ်းၼၼ်ႉတႃႉ၊’ ဝႃႈၼင်ႇၼႆသေယဝ်ႉ၊-
မၼ်းၵေႃႈဢွၵ်ႇသေၵႃႈတီႈမိူင်း ၶႃႇလတေး၊ လႄႈၵႂႃႇယူႇသဝ်းၵႃႈၼႂ်းမိူင်း ၶႃႇရၼ်ႇ၊ ဢေႃႈ။ ဝၢႆးသေပေႃႈမၼ်းတၢႆယဝ်ႉၸင်ႇ၊ၽြႃးပဵၼ်ၸဝ်ႈႁႂ်ႈမၼ်းၶၢႆႉမႃးၵႃႈတီႈမိူင်းဢၼ်သူယူႇတေႃႈလဵဝ်ၼႆႉဢေႃႈ။-
ပိၵ်ႉသမ်ႉၽြႃးပဵၼ်ၸဝ်ႈဢမ်ႇပၼ်ဢမူၺ်ႇလွၵ်းလိၼ်ၵႃႈၼႂ်းမိူင်းၼႆႉတီႈမၼ်းသေဢိတ်းထၢၼ်ႈပေႃးပုၼ်ႈတိၼ်ၶွၼ်ၼိုင်ႈတၵ်းယဵပ်ႇယင်းဢမ်ႇမီးသေၵေႃႈ၊မၼ်းၸဝ်ႈယင်းဝႆႉၵတိတီႈမၼ်း၊ႁႂ်ႈလႆႈပဵၼ်မိူင်းမၼ်းၸႃႉၸဵမ်ၸူဝ်ႈလုၵ်ႈပၢၼ်လၢၼ်မၼ်း၊ၸဵမ်မိူဝ်ႈမၼ်းဢမ်ႇပႆႇမီးလုၵ်ႈမီးလၢင်းၼၼ်ႉယဝ်ႉ။-
ၼႆႉၸမ်ႉ၊ပဵၼ်ပျႃႇတိၵ်ႈဢၼ်ၽြႃးပဵၼ်ၸဝ်ႈလၢတ်ႈတီႈမၼ်းလႄႈဝႃႈ၊ ‘ၸိူဝ်ႉၶိူဝ်းမႂ်းတၵ်းလႆႈၵႂႃႇပဵၼ်ၶႅၵ်ႇၵႃႈၼႂ်းမိူင်းပိူၼ်ႈလႄႈၵႃႈတီႈၼၼ်ႈ၊ၶဝ်တၵ်းလႆႈပဵၼ်ၶႃႈပိူၼ်ႈလႆႈၶၢမ်ႇတၢင်းဢၼ်ပိူၼ်ႈၼိၵ်ႈၸၢၵ်ႈငႅၼ်းသႄးသီႇပၢၵ်ႇပီဢေႃႈ။-
ၼႂ်းဝႃႈၼၼ်သေၵေႃႈၵဝ်တၵ်းၸီႇယၢင်ႇပၼ်တၢမ်ႇတီႈၵူၼ်းမဵဝ်းဢၼ်ၸႂ်ႉၵိၼ်ၶဝ်ၼၼ်ႉလႄႈလိုၼ်းၼၼ်ႉ၊ၶဝ်တၵ်းလႆႈဢွၵ်ႇမိူင်းၼၼ်ႉ၊မႃးႁဵတ်းဝၢတ်ႈၵူဝ်းၵႂၢႆႇၵဝ်ၵႃႈတီႈၼႆႈဢေႃႈ၊’ ဝႃႈၼင်ႇၼႆဢေႃႈ။-
ႁႂ်ႈလႆႈပဵၼ်သၢၵ်ႈသေႇၵႂၢမ်းသဵတ်ႈၸႃႇၸဝ်ႈၸိုင်၊ၽြႃးပဵၼ်ၸဝ်ႈႁႅၼ်းပွႆးမၢင်ႇၵလႃႇဢၼ်ပၢတ်ႇပၢႆၼင်တီႈ ဢႃႇပြႃႇႁၢမ်ႇ၊ ဢေႃႈ။ ၼင်ႇၼၼ်လႄႈမိူဝ်ႈဢၼ်လုၵ်ႈၸၢႆးမၼ်း ဢိၸၢၵ်ႈ၊ ၵိူတ်ႇလဵင်ႉမႃးလႆႈၸဵတ်းဝၼ်းၼၼ်ႉ၊ ဢႃႇပြႃႇႁၢမ်ႇ၊ ႁဵတ်းတၢင်းဢၼ်ပၢတ်ႇပၢႆၼင်တီႈ ဢိၸၢၵ်ႈ၊ ဢေႃႈ။ ဢိၸၢၵ်ႈ၊ သမ်ႉႁဵတ်းတၢင်းဢၼ်ပၢတ်ႇပၢႆၼင်တီႈ ယႃႇၵုပ်ႈ၊ သေလႄႈ ယႃႇၵုပ်ႈ၊ သမ်ႉႁဵတ်းတၢင်းဢၼ်ပၢတ်ႇပၢႆၼင်တီႈလုၵ်ႈၸၢႆးမၼ်းသိပ်းသွင်ၵေႃႉ၊ဢၼ်ပဵၼ်ပေႃႈၸိူဝ်ႉၶိူဝ်းႁဝ်းဢၼ်မီးသရေႇၸိူဝ်းၼၼ်ႉဢေႃႈ။
“ပေႃႈၸိူဝ်ႉၶိူဝ်းႁဝ်းတင်းလၢႆၼၼ်ႉ၊သီႈၵေႉႁေႈတႃၼွင်ႉၶဝ် ယူဝ်းသႅပ်ႈ၊ လႄႈၶၢႆပႅတ်ႈမၼ်းႁႂ်ႈၵႂႃႇပဵၼ်ၶႃႈၵႃႈၼႂ်းမိူင်း ဢေးၵျိပ်ႉ၊ ဢေႃႈ။ ၵူၺ်းၵႃႈ၊ၽြႃးပဵၼ်ၸဝ်ႈမီးယူႇလူၺ်ႈၵၼ်တင်းမၼ်းလႄႈ၊-
ထုတ်ႇၼုၵ်ႈဢဝ်မၼ်းဢွၵ်ႇသေၵႃႈၼႂ်းတုၵ်ႉၶႃႉတၢင်းၽၢၼ်တင်းလၢႆသေယဝ်ႉ၊မိူဝ်ႈဢၼ် ယူဝ်းသႅပ်ႈ၊ ႁွတ်ႈၽႅဝ်ၽၢႆႇၼႃႈၶုၼ်ႁေႃၶမ်း ၽႃႇရေႃး၊ မိူင်း ဢေးၵျိပ်ႉ၊ ၼၼ်ႉၸိုင်၊ၽြႃးပဵၼ်ၸဝ်ႈပၼ်ဢၶႂၢင်ႉ၊ဢၼ်မီးၼႃႈမီးတႃ၊ဢိၵ်ႇတင်းဢတၢတ်ႈပိင်ႇၺႃႇသေယဝ်ႉ၊ၶုၼ်ႁေႃၶမ်းၵေႃႈယုၵ်ႉတၢင်ႇမၼ်းဝႆႉၼႂ်းဢရႃႇၶုၼ်ဢၼ်ဢုပ်ႉပိူင်ႇမိူင်း ဢေးၵျိပ်ႉ၊ ဢိၵ်ႇတင်းၼႂ်းႁၢင်ႈၼႂ်းႁေႃဢေႃႈ။-
မိူဝ်ႈၼၼ်ႉ၊ၶဝ်ႈၵႃႈမၢၵ်ႇပႅင်းတူၵ်းႁွတ်ႈထိုင်ၵႃႈၼိူဝ်မိူင်း ဢေးၵျိပ်ႉ၊ ဢိၵ်ႇတင်းၵႃႈၼိူဝ်မိူင်း ၶႃႇၼၼ်ႇ၊ လႄႈ လႆႈၶၢမ်ႇတုၵ်ႉၶႃႉတၢင်းၽၢၼ်ယႂ်ႇၼႃႇလူင်လၢင်ဢေႃႈ။ ပူႇမွၼ်ႇႁဝ်းၸိူဝ်းၼၼ်ႉၵေႃႈတၢင်းၵိၼ်မူတ်းၵႂႃႇဢေႃႈ။-
မိူဝ်ႈဢၼ် ယႃႇၵုပ်ႈ၊ လႆႈငိၼ်း၊လွင်ႈဢၼ်ၶဝ်ႈပိူၵ်ႇၶဝ်ႈသၢၼ်မီးၵႃႈၼႂ်းမိူင်း ဢေးၵျိပ်ႉ၊ ၼၼ်ႉၸိုင်၊မၼ်းပွႆႇၸႂ်ႉလုၵ်ႈၸၢႆးမၼ်းတင်းလၢႆ၊ဢၼ်ပဵၼ်ပူႇမွၼ်ႇႁဝ်းၸိူဝ်းၼၼ်ႉၵႂႃႇပွၵ်ႈတီႈၼိုင်ႈဢေႃႈ။-
ပွၵ်ႈတီႈသွင်ၼၼ်ႉ၊ ယူဝ်းသႅပ်ႈ၊ ၽုၺ်ႇဢွၵ်ႇမွၵ်ႇလၢတ်ႈ၊လွင်ႈတၢင်းတီႈပီႈၼွင်ႉမၼ်းတင်းလၢႆလႄႈ ၶုၼ်ႁေႃၶမ်း ၽႃႇရေႃး၊ လႆႈႁုၸိူဝ်ႉၶိူဝ်း ယူဝ်းသႅပ်ႈ၊ ၵႂႃႇဢေႃႈ။-
မိူဝ်ႈၼၼ်ႉ၊ ယူဝ်းသႅပ်ႈ၊ ပွႆႇၸႂ်ႉၵူၼ်းၵႂႃႇႁွင်ႉဢဝ်ပေႃႈမၼ်း ယႃႇၵုပ်ႈ၊ ဢိၵ်ႇတင်းပီႈၼွင်ႉၸိူဝ်ႉၶိူဝ်းမၼ်းတင်းသဵင်ႈတင်းလူင်၊ဢၼ်မီးၸဵတ်းသိပ်းပၢႆႁႃႈၵေႃႉၸိူဝ်းၼၼ်ႉ၊မႃးယူႇသဝ်းၵႃႈတီႈမိူင်း ဢေးၵျိပ်ႉ၊ ဢေႃႈ။-
မိူဝ်ႈၼၼ်ႉ၊ ယႃႇၵုပ်ႈ၊ ၵႂႃႇယူႇသဝ်းတီႈမိူင်း ဢေးၵျိပ်ႉ၊ လႄႈတီႈၼၼ်ႈတူဝ်မၼ်းတင်းလုၵ်ႈၸၢႆးမၼ်းတင်းလၢႆတၢႆၵႂႃႇဢေႃႈ။-
တူဝ်တၢႆၶဝ်ၼၼ်ႉ၊လႆႈၶၢမ်ႇတၢင်းဢၼ်ဢဝ်ၵႂႃႇသူင်ႇၵႃႈတီႈဝဵင်း သေးၶိမ်ႇ၊ လႄႈသၢင်းၵျူဝ်ႇၵႃႈတီႈပႃႇႁဵဝ်ႈဢၼ် ဢႃႇပြႃႇႁၢမ်ႇ၊ ဢဝ်ငိုၼ်းသိုဝ်ႉဢဝ်ၵႃႈတီႈလုၵ်ႈလၢၼ် ႁေႇမေႃႇ၊ ဝႆႉၼၼ်ႉဢေႃႈ။
“မိူဝ်ႈဢၼ်ၶိင်ႇၵႃႇလႃႉဢၼ်ၵတိၽြႃးပဵၼ်ၸဝ်ႈမီးဝႆႉ၊ၵႃႈတီႈ ဢႃႇပြႃႇႁၢမ်ႇ၊ ၸမ်တၵ်းပဵၼ်ၸွမ်းမႃးယဝ်ႉၼၼ်ႉၸိုင်၊ၵူၼ်းမဵဝ်းႁဝ်းၵႃႈၼႂ်းမိူင်း ဢေးၵျိပ်ႉ၊ ၼၼ်ႉ၊ယႂ်ႇၽႄႈၼမ်ၵိုၼ်းမႃးၼႃႇလူင်လၢင်ယဝ်ႉဢေႃႈ။-
ၶုၼ်ႁေႃၶမ်းထႅင်ႈပႃးၼိုင်ႈ၊ဢၼ်ဢမ်ႇႁုၸၵ်း ယူဝ်းသႅပ်ႈ၊ ၶိုၼ်ႈၼင်ႈႁၢင်ႈၼင်ႈႁေႃၵႃႈၼႂ်းမိူင်း ဢေးၵျိပ်ႉ၊ သေယဝ်ႉ၊-
ႁဵတ်းပရိယႄႇတီႈပူႇမွၼ်ႇႁဝ်းၸိူဝ်းၼၼ်ႉလႄႈႁဵတ်းႁၢႆႉႁဵတ်းမိူၵ်ႈၵႃႈတီႈၶဝ်၊တဵၵ်းငႅၼ်းႁႂ်ႈၶဝ်ဢဝ်လုၵ်ႈၸၢႆးဢွၼ်ႇၶဝ်၊ထိမ်ႈဢွၵ်ႇႁိူၼ်းၶဝ်ၵႂႃႇႁႂ်ႈလႆႈဢဝ်တၢႆဢေႃႈ။-
မိူဝ်ႈၼၼ်ႉ၊ မူဝ်းသေႇ၊ ဢၼ်ႁၢင်ႈလီၼႃႇၵိူတ်ႇလဵင်ႉမႃးယဝ်ႉလႄႈ လႆႈၶၢမ်ႇတၢင်းဢၼ်လဵင်ႉလူဝႆႉ၊ၵႃႈၼႂ်းႁိူၼ်းပေႃႈမၼ်းသၢမ်လိူၼ်ယဝ်ႉၸင်ႇ၊-
မိူဝ်ႈဢၼ်မၼ်းၵေႃႈလႆႈၶၢမ်ႇတၢင်းဢၼ်ဢဝ်ဢွၵ်ႇႁိူၼ်းၵႂႃႇၼၼ်ႉၸိုင်၊လုၵ်ႈယိင်းၶုၼ်ႁေႃၶမ်း ၽႃႇရေႃး၊ ၵဵပ်းလဵင်ႉမၼ်းဝႆႉသေလႄႈယႂ်ႇသုင်မႃးမိူၼ်ၸိူဝ်ႉၼင်ႇလုၵ်ႈတူဝ်ၸဝ်ႈၵဝ်ႇဢေႃႈ။-
မၼ်းၵေႃႈလႆႈသွၼ်ဢဝ်ဢတၢတ်ႈပိင်ႇၺႃႇမိူင်း ဢေးၵျိပ်ႉ၊ ၵူႈၸိူဝ်ႉၵူႈပိူင်လႄႈလႆႈပဵၼ်ၵူၼ်းလူင်ဢၼ်သူပ်းၸၢင်ႈလၢတ်ႈမိုဝ်းၸၢင်ႈႁဵတ်းၵေႃႉၼိုင်ႈဢေႃႈ။
“မိူဝ်ႈဢၼ်ဢသၢၵ်ႈ မူဝ်းသေႇ၊ လႆႈသီႇသိပ်းပီၼၼ်ႉၸိုင်၊မၼ်းၵျၢမ်ႇပွင်ၼႂ်းၸႂ်မၼ်းႁႂ်ႈလႆႈၵႂႃႇလွမ်တူၺ်းၵူၼ်းမဵဝ်းမၼ်း ဢိသရေး၊ တင်းလၢႆဢေႃႈ။-
မၼ်းႁၼ်ပီႈၼွင်ႉၸိူဝ်ႉၶိူဝ်းမၼ်းၵေႃႉၼိုင်ႈလႆႈၶၢမ်ႇတၢင်းဢၼ်ႁဵတ်းပႄႉႁဵတ်းၼႅင်ႇၵႃႈၼႂ်းမိုဝ်းၵူၼ်း ဢေးၵျိပ်ႉ၊ ၵေႃႉၼိုင်ႈယူႇၼၼ်ႉလႄႈမၼ်းၸင်ႇၽွမ်ႉၸႂ်ၵေႃႉၼၼ်ႉသေယဝ်ႉ၊ပေႃႉယႅၼ်ႉၵူၼ်းမဵဝ်း ဢေးၵျိပ်ႉ၊ ၼၼ်ႉတၢႆပႅတ်ႈဢေႃႈ။-
မၼ်းထၢင်ႇပီႈၼွင်ႉမၼ်းၸိူဝ်းၼၼ်ႉ၊တၵ်းႁုထွမ်ႇလွင်ႈဢၼ်ၽြႃးပဵၼ်ၸဝ်ႈတၵ်းၸႂ်ႉမၼ်းႁႂ်ႈလႆႈထုတ်ႇၼုၵ်ႈဢဝ်ၶဝ်ၼၼ်ႉသေၵေႃႈ၊ၶဝ်ဢမ်ႇပွင်ႇၸႂ်လႅင်းၸႂ်။-
ၼႂ်းဝၼ်းမိူဝ်ႈၽုၵ်ႈၼၼ်ႉ၊မၼ်းႁၼ်ၵူၼ်းမဵဝ်း ဢိသရေး၊ ၼင်ႇၵၼ်သွင်ၵေႃႉ၊ၽိတ်းၵၼ်ယူႇၼၼ်ႉလႄႈမၼ်းၵႂႃႇၸူဝ်းဢဝ်ၶဝ်ႁႂ်ႈတဵတ်ႇယဵၼ်လႄႈဝႃႈ၊ ‘ထွမ်ႇလူး။ ၵူၼ်းႁဝ်းၶဝ်႟။ သူပဵၼ်ၶိူဝ်း ဢိသရေး၊ ၼင်ႇၵၼ်လႄႈၽိတ်းၵၼ်ႁဵတ်းသင်၊’ ဝႃႈၼင်ႇၼႆဢေႃႈ။-
ၵူၺ်းၵႃႈ၊ၵေႃႉဢၼ်ႁဵတ်းပႄႉႁဵတ်းၼႅင်တီႈၵေႃႉသႄႈမၼ်းၼၼ်ႉ၊ဢီးပႅတ်ႈ မူဝ်းသေႇ၊ လႄႈလၢတ်ႈဝႃႈ၊ ‘ၽူႈလႂ်ယုၵ်ႉတၢင်ႇမႂ်း၊ႁႂ်ႈလႆႈဢုပ်ႉၼိူဝ်ႁဝ်းလႄႈၸီႇယၢင်ႇၼင်ႇၼႆ။-
မႂ်းၶႂ်ႈဢဝ်ၵဝ်တၢႆ၊မိူၼ်ၸိူဝ်ႉၼင်ႇဢၼ်မႂ်းဢဝ်ၵူၼ်းမဵဝ်း ဢေးၵျိပ်ႉ၊ ၵေႃႉၼိုင်ႈတၢႆမိူဝ်ႈဝႃးၼၼ်ႉႁိုဝ်း၊’ ဝႃႈၼင်ႇၼႆဢေႃႈ။-
မူဝ်းသေႇ၊ ငိၼ်းၵႂၢမ်းၼၼ်ႉသေယဝ်ႉ၊ဢွၵ်ႇပၢႆႈသေၵႃႈတီႈမိူင်း ဢေးၵျိပ်ႉ၊ ၵႂႃႇယူႇသဝ်းၵႃႈတီႈမိူင်း မိတျၼ်ႇ၊ လႄႈတီႈၼၼ်ႈမၼ်းလႆႈလုၵ်ႈၸၢႆးသွင်ၵေႃႉဢေႃႈ။
“မိူဝ်ႈဢၼ်ပူၼ်ႉသေသီႇသိပ်းပီၸိုင်၊တမၢၼ်ႇၵၢင်ႁၢဝ်ပေႃႇမႃးၵႃႈတီႈ မူဝ်းသေႇ၊ ၵႃႈၼႂ်းပဵဝ်ၽႆးဢၼ်မႆႈယုမ်းၵႃႈၼႂ်းထိူၼ်ႇလႅင်ႉတီႈလွႆ သိၼႃႉ၊ ဢေႃႈ။-
မူဝ်းသေႇ၊ ဢၢမ်းလွင်ႈတၢင်းဢၼ်မၼ်းလႆႈႁၼ်ၼၼ်ႉလႄႈသုတ်ႉၸမ်ၵႂႃႇၸူးယုမ်းၽႆးမႆႈၼၼ်ႉ၊ႁႂ်ႈလႆႈယႅၵ်ႉတူၺ်းလီလီဢေႃႈ။ ၵမ်းၼၼ်ႉ၊မၼ်းလႆႈငိၼ်းသဵင်ထႃႇဝရႃႉၽြႃးပဵၼ်မႃးလႄႈဝႃႈ၊-
‘ၵဝ်ပဵၼ်ၽြႃးပဵၼ်ၸဝ်ႈၸူဝ်ႈပူႇၸူဝ်ႈပေႃႈမႂ်း၊ၽြႃး ဢႃႇပြႃႇႁၢမ်ႇ၊ဢိၸၢၵ်ႈ၊ယႃႇၵုပ်ႈ၊ ၸိူဝ်းၼၼ်ႉဢေႃႈ၊’ ဝႃႈၼင်ႇၼႆလႄႈ မူဝ်းသေႇ၊ ၵူဝ်ႁႄသၼ်ႇဝႆၼႃႇဢမ်ႇႁတ်းႁႅၼ်တူၺ်း။-
ထႃႇဝရႃႉၽြႃးမီးဢမိင်ႉထႅင်ႈလႄႈဝႃႈ၊ ‘ထွတ်ႇၶႅပ်းတိၼ်မႂ်းတႃႉ။ တီႈဢၼ်မႂ်းယဵပ်ႇၼႆႉ၊ပဵၼ်လိၼ်ဢၼ်မူတ်းၸၢင်ႇဢေႃႈ။-
ၵဝ်လႆႈႁၼ်တၢင်းဢၼ်ၵူၼ်းမဵဝ်းၵဝ်တင်းလၢႆ၊လႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသႄးယူႇၵႃႈၼႂ်းမိူင်း ဢေးၵျိပ်ႉ၊ ၼၼ်ႉလႄႈၵဝ်လႆႈငိၼ်းသဵင်ဢၼ်ၶဝ်ပွင်ႉၶၢင်းၼၼ်ႉယဝ်ႉ။ ၵဝ်ၵျွမႃးႁႂ်ႈလႆႈထုတ်ႇၼုၵ်ႈဢဝ်ၶဝ်ၼၼ်ႉယဝ်ႉ။ ၵႂႃႇတေႃႈလဵဝ်တႃႉ။ ၵဝ်ပွႆႇၸႂ်ႉမႂ်းၵႂႃႇၵႃႈတီႈမိူင်း ဢေးၵျိပ်ႉ၊ ပုၼ်ႉယဝ်ႉ၊’ ဝႃႈၼင်ႇၼႆဢေႃႈ။
“ မူဝ်းသေႇ၊ လႆႈပဵၼ်ၵေႃႉဢၼ်ၵူၼ်းမဵဝ်းမၼ်း ဢိသရေး၊ ၶဝ်ပႄႇပႅတ်ႈလႄႈယင်းလၢတ်ႈဝႃႈ၊ ‘ၽူႈလႂ်ယုၵ်ႉတၢင်ႇမႂ်းဝႆႉ၊ႁႂ်ႈလႆႈဢုပ်ႉပိူင်ႇႁဝ်းလႄႈၸီႇယၢင်ႇၸိူဝ်ႉၼင်ႇၼႆ၊’ ဝႃႈၼင်ႇၼႆယူႇလူးၵွၼ်ႇဢေႃႈ။ မၼ်းၼၼ်ႉ၊လႆႈပဵၼ်ၵေႃႉဢၼ်ၽြႃးပဵၼ်ၸဝ်ႈပွႆႇၸႂ်ႉၵႂႃႇဢုပ်ႉၵူၼ်းၸိူဝ်းၼၼ်ႉ၊ႁႂ်ႈလႆႈထုတ်ႇၼုၵ်ႈဢဝ်ၶဝ်လူၺ်ႈဢဵၼ်ႁႅင်းတမၢၼ်ႇၵၢင်ႁၢဝ်ဢၼ်ပေႃႇမႃးၼႂ်းယုမ်းၽႆးမႆႈၸွႆႈထႅမ်မၼ်းၼၼ်ႉဢေႃႈ။-
မၼ်းၼၼ်ႉ၊ၼုၵ်ႈဢဝ်ၶဝ်ဢွၵ်ႇမိူင်း ဢေးၵျိပ်ႉ၊ မႃးလႄႈႁဵတ်းၼိမိၵ်ႈလၢၵ်ႈၶၼႃႇ၊ဢိၵ်ႇတင်းလွင်ႈတၢင်းဢၼ်လီဢၢမ်းၼမ်ၼႃႇ၊ၸႃႉၸဵမ်ၵႃႈၼႂ်းမိူင်း ဢေးၵျိပ်ႉ၊ ဢိၵ်ႇတင်း ပၢင်ႇလၢႆႇလႅင်၊ ဢိၵ်ႇတင်းၵႃႈၼႂ်းထိူၼ်ႇသီႇသိပ်းပီတဵမ်တဵမ်ဢေႃႈ။-
မူဝ်းသေႇ၊ ၼၼ်ႉ၊ပဵၼ်ၵေႃႉဢၼ်လၢတ်ႈၵႃႈတီႈၵူၼ်းမဵဝ်း ဢိသရေး၊ တင်းလၢႆလႄႈဝႃႈ၊ ‘ၽြႃးပဵၼ်ၸဝ်ႈတၵ်းပွႆႇၸႂ်ႉပရေႃးၽႅတ်ႈ ပႃးၼိုင်ႈ၊ပေႃႇမႃးၵႃႈတီႈသူမိူၼ်ၸိူဝ်ႉၼင်ႇၵဝ်ၼႆႉလႄႈမၼ်းၼၼ်ႉတၵ်းပေႃႇပဵၼ်မႃးၵႃႈၼႂ်းၸိူဝ်ႉၶိူဝ်းသူၼႆႉဢေႃႈ၊’ ဝႃႈၼင်ႇၼႆဢေႃႈ။-
မၼ်းၼၼ်ႉ၊ပဵၼ်ၵေႃႉဢၼ်မီးယူႇလူၺ်ႈၵၼ်တင်းၵူၼ်းမဵဝ်း ဢိသရေး၊ ဢၼ်ၸုတုမ်ဝႆႉ၊ၵႃႈၼႂ်းထိူၼ်ႇလႅင်ႉႁူမ်ႈလူၺ်ႈၵၼ်တင်းပူႇမွၼ်ႇႁဝ်းတင်းလၢႆ၊ဢိၵ်ႇတင်းတမၢၼ်ႇၵၢင်ႁၢဝ်ဢၼ်တၵ်ႉလၢတ်ႈမၼ်းၵႃႈၼိူဝ်လွႆ သိၼႃႉ၊ လႄႈမၼ်းၼၼ်ႉလႆႈၶၢမ်ႇဢဝ်တြႃးဢၼ်ဢသၢၵ်ႈလိပ်းၽြႃးပဵၼ်ၸဝ်ႈ၊ဢၼ်တၵ်းသိုပ်ႇဢၢပ်ႈပၼ်တီႈႁဝ်းၼၼ်ႉဢေႃႈ။
“ၵူၺ်းၵႃႈ၊ပူႇမွၼ်ႇႁဝ်းၸိူဝ်းၼၼ်ႉ၊ဢမ်ႇၶႂ်ႈထွမ်ႇဢဝ်ၵႂၢမ်းမၼ်းယင်းပႄႇပႅတ်ႈမၼ်းလႄႈ ဢၢင်ႈၶႂ်ႈၶိုၼ်းမိူဝ်းၸူးမိူင်း ဢေးၵျိပ်ႉ၊ ဢေႃႈ။-
ၶဝ်ၸင်ႇလၢတ်ႈတီႈ ဢႃႇရုၼ်ႇ၊ လႄႈဝႃႈ၊ ‘ႁဵတ်းၽြႃးဢၼ်တၵ်းဢွၼ်ႁူဝ်ႁဝ်းၼၼ်ႉပၼ်ႁဝ်းသေၵမ်း။ မူဝ်းသေႇ၊ ဢၼ်ဢဝ်ႁဝ်းဢွၵ်ႇမိူင်း ဢေးၵျိပ်ႉ၊ မႃးၼၼ်ႉ၊ပဵၼ်ၸိူဝ်ႉၼင်ႇႁိုဝ်ယူႇၸိုင်၊ႁဝ်းဢမ်ႇႁု၊’ ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ၶဝ်ႁဵတ်းႁၢင်ႈဝူဝ်းဢွၼ်ႇသေယဝ်ႉ၊ႁႅၼ်းတႄႇႁႅၼ်းတမ်းတၢင်းလူႇပၼ်တီႈဢၼ်ၼၼ်ႉလႄႈၶၢမ်ႇပွႆးဢၼ်ယုၵ်ႉယွင်ႈၶိူင်ႈဢၼ်ဢဝ်တင်းမိုဝ်းၶဝ်ႁဵတ်းၼၼ်ႉဢေႃႈ။-
ပိူဝ်ႈၼႆၸင်ႇ၊ၽြႃးပဵၼ်ၸဝ်ႈဝၢႆႇၼႃႈပႅတ်ႈၶဝ်သေလႄႈပွႆႇပဵတ်ႈႁႂ်ႈၶဝ်ၵူဝ်းၵႂၢႆႇလၢဝ်ၵၢင်ႁၢဝ်တင်းလၢႆ၊ဢၼ်မႅၼ်ႈၸွမ်းၵႃႈၼင်ႇဢၼ်ပရေႃးၽႅတ်ႈၶဝ်တႅမ်ႈဝႆႉ၊ၼႂ်းၵျၢမ်းလိၵ်ႈလႄႈဝႃႈ၊ “‘မဵဝ်း ဢိသရေး၊ ၶဝ်႟။ သူလႆႈဢဝ်တူဝ်သတ်းဢၼ်သူႁႅမ်ၼၼ်ႉ၊ ဢိၵ်ႇတင်းၶိူင်ႈလူႇတင်းလၢႆသၢၵ်ႈလူႇတီႈၵဝ်၊ ၵႃႈၼႂ်းထိူၼ်ႇသီႇသိပ်းပီတဵမ်တဵမ်ဢမ်ႇၸႂ်ႈႁိုဝ်း။
သူႁၢပ်ႇဢဝ်ႁၢမ်ဢဝ်သုမ်ႉထဵင်ၽြႃး မူးလွၵ်ႉ၊ တင်းႁုၼ်ႇႁၢင်ႈ ရိမ်ႇၽၼ်ႇ၊ ဢၼ်ပဵၼ်ၽြႃးလၢဝ်သူလႄႈ ၸိူဝ်းၼၼ်ႉ၊ပဵၼ်ႁုၼ်ႇႁၢင်ႈသၢင်းထုဢၼ်သူၵူဝ်းၵႂၢႆႇၼၼ်ႉယဝ်ႉ။ ပိူဝ်ႈၼႆလႄႈၵဝ်တၵ်းဢဝ်သူသူင်ႇၵႂႃႇတူၵ်းၵႅၼ်း ၵႃႈတီႈၽၢႆႇပုၼ်ႉဝဵင်း ပႃႇပုလုၼ်ႇ၊ ဢေႃႈ။’ ဝႃႈၼင်ႇၼႆၼၼ်ႉယဝ်ႉ။
“ပူႇမွၼ်ႇႁဝ်းၸိူဝ်းၼၼ်ႉ၊မီးသုမ်ႉထဵင်ၽြႃးပဵၼ်ၸဝ်ႈဢၼ်ပဵၼ်သၢၵ်ႈသေႇတၢင်းဢၼ်မၼ်းၸဝ်ႈမီးလူၺ်ႈၵၼ်တင်းၶဝ်ၵႃႈၼႂ်းထိူၼ်ႇၼၼ်ႉဢေႃႈ။ သုမ်ႉထဵင်ၸဝ်ႈၼၼ်ႉ၊ႁဵတ်းဝႆႉၸွမ်းၵႃႈၼင်ႇဢၼ်သင်ႇလၢတ်ႈဝႆႉတီႈ မူဝ်းသေႇ၊ ၵႃႈၼႂ်းပုင်ႇႁၢင်ႈဢၼ်ၽြႃးပဵၼ်ၸဝ်ႈၼႄပျႃးတီႈ မူဝ်းသေႇ၊ ဝႆႉၼၼ်ႉဢေႃႈ။-
လိုၼ်းၼၼ်ႉ၊ပူႇမွၼ်ႇႁဝ်းၸိူဝ်းဢၼ်သိုပ်ႇႁပ်ႉၶၢမ်ႇဢဝ်သုမ်ႉထဵင်ၼၼ်ႉသေၵႃႈတီႈ၊ပူႇၶဝ်ပေႃႈၶဝ်ၸိူဝ်းၼၼ်ႉ၊ႁၢပ်ႇႁၢမ်ၸွမ်းၶဝ်ၼႂ်းမိူဝ်ႈဢၼ်ၶဝ်ၵႂႃႇလူၺ်ႈၵၼ်တင်း ယေႃးသု၊ သေလႄႈ သိမ်းဢဝ်လိၼ်ၵူၼ်းတၢင်ႇၸိူဝ်ႉတၢင်ႇၶိူဝ်းတီႈဢၼ်ၽြႃးပဵၼ်ၸဝ်ႈႁေႃႈဢွၵ်ႇပႅတ်ႈၽၢႆႇၼႃႈပူႇမွၼ်ႇႁဝ်းပႄႉၼႅင်ႇၶိုၼ်ႈမႃးယူႇၼၼ်ႉဢေႃႈ။ ၼင်ႇၼၼ်လႄႈသုမ်ႉထဵင်ၸဝ်ႈၼၼ်ႉ၊မီးယူႇၵႃႈတီႈၼၼ်ႈတေႃႇထိုင်ႁွတ်ႈၸူဝ်ႈပၢၼ်ၶုၼ်ႁေႃၶမ်း တႃႇဝိတ်ႈ၊ ဢေႃႈ။-
တႃႇဝိတ်ႈ၊ ၼၼ်ႉ၊လႆႈၼႃႈလႆႈတႃၽၢႆႇၼႃႈၽြႃးပဵၼ်ၸဝ်ႈလႄႈမၼ်းလဝ်ႈယွၼ်းၽြႃးပဵၼ်ၸဝ်ႈႁႂ်ႈလႆႈဢၶႂၢင်ႉဢၼ်တႄႇႁဵတ်းထႃႇၼႃႉတီႈဢၼ်ၽြႃးပဵၼ်ၸဝ်ႈ ယႃႇၵုပ်ႈ၊ ၵူဝ်းၵႂၢႆႇၼၼ်ႉတၵ်းသဝ်းယူႇဢေႃႈ။-
ၵူၺ်းၵႃႈ၊ၼႂ်းၸူဝ်ႈပၢၼ်ၶုၼ်ႁေႃၶမ်း သေႃးလမုၼ်ႇ၊ ၼၼ်ႉ၊ၸင်ႇလႆႈႁဵတ်းၵျွင်းပိၵ်ႈမၢၼ်ႇၸဝ်ႈပုၼ်ႈတႃႇမၼ်းၸဝ်ႈဢေႃႈ။
“ၼႂ်းဝႃႈၼၼ်သေၵေႃႈ ၽြႃးပဵၼ်ၸဝ်ႈဢၼ်သုင်ၼႃႇသေပိူၼ်ႈၼၼ်ႉ၊ဢမ်ႇသဝ်းယူႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈ၊ဢၼ်ဢဝ်တင်းမိုဝ်းၵူၼ်းႁဵတ်းၼၼ်ႉၸွမ်းၵႃႈၼင်ႇဢၼ်ပရေႃးၽႅတ်ႈတႅမ်ႈဝႆႉလႄႈဝႃႈ။
“‘ၽႃႉၵၢင်ႁၢဝ်ပဵၼ်ပလၢင်ႇၵဝ်ဢေႃႈ။ လိၼ်မိူင်းပဵၼ်တီႈတၢင်ႇတိၼ်ၵဝ်ဢေႃႈ။ တၵ်းတႄႇႁဵတ်းၵျွင်းပိၵ်ႈမၢၼ်ႇၸိူဝ်ႉၼင်ႇႁိုဝ်ပုၼ်ႈၵဝ်။ တီႈလႂ်တၢၼ်းလႂ်ပဵၼ်တီႈဢၼ်ၵဝ်သဝ်းယူႇၼၼ်ႉ။
တူဝ်ၵဝ်ၽၢၼ်ႇသၢင်းႁဵတ်းပဵၼ်ၸိူဝ်းၼႆႉ၊တင်းသဵင်ႈတင်းလူင်ဢမ်ႇၸႂ်ႈႁိုဝ်း၊’ ဝႃႈၼင်ႇၼႆၼၼ်ႉယဝ်ႉ။
“ၵူၼ်းႁူဝ်ၶႅင်သူ႟။ သူၼူၵ်ႇၼႃတိုဝ်တၼ်ဢမ်ႇႁဵတ်းၸွမ်းၵႂၢမ်းၽြႃးပဵၼ်ၸဝ်ႈ။ သူၸင်ႇၶတ်းၵၼ်တင်းဝိၺိၺ်ႇဢၼ်မူတ်းၸၢင်ႇၸဝ်ႈယူႇတႃႇသေႇမိူၼ်မိူၼ်ၵၼ်တင်းပူႇမွၼ်ႇသူဢေႃႈ။-
ၸွင်ႇမီးပရေႃးၽႅတ်ႈသေၵေႃႉသေၵူၼ်းဢၼ်ၵၢင်းလွတ်ႈသေတၢင်းဢၼ်ပူႇမွၼ်ႇသူတဵၵ်းငႅၼ်းၼိၵ်ႈၸၢၵ်ႈၶဝ်ၼၼ်ႉႁိုဝ်။ ပူႇမွၼ်ႇသူၼၼ်ႉဢဝ်တၢႆသြႃႇဢၼ်ႁေႃးတြႃးလွင်ႈဢၼ်ၵူၼ်းသိုဝ်ႈတေႃႇတၵ်းမႃးၼၼ်ႉဢေႃႈ။ မၼ်းၸဝ်ႈၼၼ်ႉၵေႃႈတေႃႈလဵဝ်သူၶၢႆပႅတ်ႈလႄႈဢဝ်တၢႆတႄႉဢေႃႈ။-
သူၸိူဝ်းၼႆႉ၊ပဵၼ်ၶဝ်ၸိူဝ်းဢၼ်လႆႈၶၢမ်ႇဢဝ်ပိင်းၺၢပ်ႈတြႃးၸဝ်ႈ၊ဢၼ်တမၢၼ်ႇၵၢင်ႁၢဝ်တင်းလၢႆယိုၼ်ႈမႅင်ႇပၼ်ၼၼ်ႉသေၵေႃႈသူဢမ်ႇၵမ်ဢမ်ႇၵျၢင်ႉၸွမ်းလူင်ပႄႇ၊” ဝႃႈၼင်ႇၼႆဢေႃႈ။
ၶုၼ်လုမ်းတၵ်းလႆႈငိၼ်းၵႂၢမ်း သထေႇၽၢၼ်ႇ၊ လၢတ်ႈၼၼ်ႉသေယဝ်ႉ၊ဢွၵ်ႇတေႃးသႃႉၼႃႇလူင်လၢင်၊ထၢၼ်ႈပေႃးၵတ်းၶဵဝ်ႈၵတ်းၽၼ်းတေႃႇမၼ်းဢေႃႈ။-
ၵူၺ်းၵႃႈ၊မၼ်းတဵမ်ဝႆႉတင်းဝိၺိၺ်ႇမူတ်းၸၢင်ႇၸဝ်ႈယူႇသေလႄႈႁႅၼ်တူၺ်းၵႃႈၼိူဝ်ၵၢင်ႁၢဝ်လႆႈႁၼ်မုၼ်ၽုင်းၽြႃးပဵၼ်ၸဝ်ႈ၊ဢိၵ်ႇတင်း ၸဝ်ႈယေႇသု၊ ၸုၵ်းယူႇၽၢႆႇၶႂႃၽြႃးပဵၼ်ၸဝ်ႈသေယဝ်ႉ၊-
မၼ်းလၢတ်ႈလႄႈဝႃႈ၊ “တူၺ်းလူး။ ၵဝ်ႁၼ်ၵၢင်ႁၢဝ်ၽုၺ်ႇပိုတ်ႇလႄႈ လုၵ်ႈၵူၼ်း၊ ၸုၵ်းယူႇၽၢႆႇၶႂႃၽြႃးပဵၼ်ၸဝ်ႈဝႆႉၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၶုၼ်လုမ်းၸိူဝ်းၼၼ်ႉပၢဝ်ႇသႅၼ်ႇလူၺ်ႈတင်းသဵင်ဢၼ်ယႂ်ႇၼႃႇလႄႈဢိုတ်းႁူၶဝ်သေၽွမ်ႉၵၼ်ၶုၼ်ႇလႅၼ်ႈၸူးတီႈမၼ်းၵမ်းလဵဝ်သေလႄႈ၊-
တိုတ်ႉလၢၵ်ႈမၼ်းဢွၵ်ႇဝဵင်းၵႂႃႇသေယဝ်ႉ၊ဢဝ်မၢၵ်ႇႁိၼ်ပိုဝ်ႈသႂ်ႇမၼ်းဢေႃႈ။ ၵူၼ်းၶၢမ်ႇသၢၵ်ႈသေႇတင်းလၢႆၼၼ်ႉ၊ထွတ်ႇလွၼ်ႈသိူဝ်ႈယၢဝ်းၶဝ်ဝႆႉတီႈၵူၼ်းၼုမ်ႇဢၼ်လႆႈၸိုဝ်ႈ သေႃးလု၊ ၼၼ်ႉ၊ႁႂ်ႈမၼ်းပႂ်ႉထိင်းဝႆႉဢေႃႈ။-
ၶဝ်ဢဝ်မၢၵ်ႇႁိၼ်ပိုဝ်ႈသႂ်ႇ သထေႇၽၢၼ်ႇ၊ တိၵ်းတိၵ်း၊ယၢမ်းမိူဝ်ႈဢၼ်မၼ်းသူးတွင်းယူႇသေလႄႈလၢတ်ႈဝႃႈ၊ “ ၸဝ်ႈယေႇသု၊ တီႈၶႃႈ။ ၶႅၼ်းတေႃႇႁပ်ႉတုင်းဢဝ်ဝိၺိၺ်ႇၵဝ်ၶႃႈသေၵမ်းတီႈၶႃႈ၊” ဝႃႈၼင်ႇၼႆဢေႃႈ။-
မၼ်းၶုပ်ႉၶဝ်ႇသေယဝ်ႉ၊ႁဵတ်းတင်းသဵင်ဢၼ်ယႂ်ႇၼႃႇႁွင်ႉသႅၼ်ႇလႄႈဝႃႈ၊ “ၸဝ်ႈၽြႃးတီႈၶႃႈ။ ယႃႇပေဢဝ်တုၸရိူၵ်ႈဢပျတ်ႈၼႆႉတၢင်ႇၵႃႈၼိူဝ်ၶဝ်သေၵမ်းတီႈၶႃႈ၊” ဝႃႈၸိူဝ်ႉၼင်ႇၼႆယဝ်ႉၸင်ႇလူမ်ႉၼွၼ်းတၢႆၵႂႃႇဢေႃႈ။ သေႃးလု၊ ၵေႃႈႁပ်ႉတုင်းဢဝ်လွင်ႈဢၼ်မၼ်းတၢႆယဝ်ႉၼၼ်ႉသေဢေႃႈ။
ၼႂ်းဝၼ်းၼၼ်ႉ၊ၸိူဝ်းၸဝ်ႈဝဵင်း ယေႇရုသလႅမ်ႇ၊ လႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသႄးၼႃႇလူင်လၢင်ဢေႃႈ။ လိူဝ်သေတမၢၼ်ႇၸဝ်ႈတင်းလၢႆၼၼ်ႉ၊ၶဝ်ၸိူဝ်းဢၼ်ယုမ်ႇမၢတ်ႈတင်းသဵင်ႈတင်းမူတ်း၊ဢွၵ်ႇပၢႆႈၽၢတ်ႇၽႄၵၼ်ၸွတ်ႇၵႂႃႇၵႃႈၼႂ်းမိူင်း ယုတႃႉ၊ တင်းၵႃႈၼႂ်းမိူင်း သမႃႇရိ၊ ၵူႈတီႈၵူႈလႅၼ်ဢေႃႈ။-
ၶဝ်ၸိူဝ်းဢၼ်ၵူဝ်ယမ်ၽြႃးပဵၼ်ၸဝ်ႈၼၼ်ႉ၊ၵမ်ႈၽွင်ႈဢဝ်တူဝ်တၢႆ သထေႇၽၢၼ်ႇ၊ သၢင်းၵျူဝ်ႇသေယဝ်ႉ၊ပွင်ႉၶၢင်းႁွင်ႉႁႆႈလူၺ်ႈတင်းသဵင်ဢၼ်ယႂ်ႇၼႃႇ၊ၵွပ်ႈပိူဝ်ႈၶဝ်သေလၢႆမၼ်းဢေႃႈ။
သေႃးလု၊ ၸမ်ႉ၊ၶတ်းၸႂ်ယႃႉပႅတ်ႈၸိူဝ်းၸဝ်ႈဢေႃႈ။ မၼ်းၶဝ်ႈႁိူၼ်းၼိုင်ႈဢွၵ်ႇႁိုၼ်းၼိုင်ႈလႄႈ တိုတ်ႉလၢၵ်ႈၶဝ်ၸိူဝ်းဢၼ်ယုမ်ႇမၢတ်ႈၸဵမ်ယိင်းၸဵမ်ၸၢႆးၵႂႃႇသႂ်ႇထွင်ႇဝႆႉဢေႃႈ။
ၶဝ်ၸိူဝ်းယုမ်ႇမၢတ်ႈဢၼ်ၽၢတ်ႇၽႄၵႂႃႇၵူႈတီႈၵူႈလႅၼ်ၼၼ်ႉ၊ဢွၼ်ၵၼ်ႁေႃးလၢတ်ႈၼုၵ်ႈၵပၢတ်ႈတြႃးသိူဝ်းပျေႃႇၸဝ်ႈယူႇဢေႃႈ။-
ၽိလိပ်ႉပု၊ ၼၼ်ႉ၊လူင်းၵႂႃႇၸူးတီႈဝဵင်းလူင်ၼႂ်းမိူင်း သမႃႇရိ၊ လႄႈ ႁေႃးလၢတ်ႈတြႃးလွင်ႈ ၸဝ်ႈၶရိၸ်ႈ၊ ဢေႃႈ။-
မိူဝ်ႈဢၼ်မူႇၵူၼ်းတင်းလၢႆလႆႈငိၼ်းတြႃးၸဝ်ႈ၊ဢိၵ်ႇတင်းလႆႈႁၼ်ၼိမိၵ်ႈလၢၵ်ႈၶၼႃႇဢၼ် ၽိလိပ်ႉပု၊ ႁဵတ်းၼၼ်ႉၸိုင်၊ၶဝ်ၽွမ်ႉၵၼ်ၸပ်းၸွမ်းထွမ်ႇဢဝ်မၼ်းဢေႃႈ။-
ၽီႁၢႆႉၼမ်ၼႃႇဢၼ်ၶဝ်ႈၼႂ်းၵူၼ်းတင်းလၢႆႁဵတ်းသဵင်ဢၼ်ယႂ်ႇၼႃႇပၢဝ်ႇသႅၼ်ႇသေလႄႈဢွၵ်ႇၵႂႃႇၼမ်ၼႃႇ၊ၶဝ်ၸိူဝ်းဢၼ်တၢႆၽၢၵ်ႇ၊ၵူၼ်းၶႃႁၵ်းၶႃၶႄႉတင်းလၢႆလႆႈသၢၵ်ႈသႃႇၸိုၼ်ႈႁၢႆၵႂႃႇလႄႈ၊-
ၵႃႈၼႂ်းဝဵင်းၼၼ်ႉ၊မီးတၢင်းသိူဝ်းၸူမ်းၼႃႇလူင်လၢင်ဢေႃႈ။
ၵႃႈၼႂ်းဝဵင်းၼၼ်ႉ၊မီးၵူၼ်းၵေႃႉၼိုင်ႈဢၼ်လႆႈၸိုဝ်ႈ သိမုၼ်ႇ၊ လႄႈဢဝ်တင်းဢတၢတ်ႈၽီမေႃႇႁဵတ်းႁႂ်ႈၵူၼ်း သမႃႇရိ၊ ၶဝ်ဢၢမ်းဢေႃးယွင်ႈယေႃးဝႆႉ၊ႁိုင်ၼႃႇယဝ်ႉၼၼ်ႉဢေႃႈ။ မၼ်းလၢတ်ႈလွင်ႈဢၼ်မၼ်းပဵၼ်ၵူၼ်းထွတ်ႈၵူၼ်းမျၢတ်ႈၵေႃႉၼိုင်ႈ၊-
ၵူၼ်းၵူႈၸၼ်ႉၸၼ်ႉဢၼ်မီးၼႂ်းဝဵင်းၼၼ်ႉ၊ၵူႈၵေႃႉၵူႈၵူၼ်းၸပ်းၸွမ်းထွမ်ႇဢဝ်မၼ်းသေလႄႈဢွၼ်ၵၼ်လၢတ်ႈဝႃႈ၊ “ၵေႃႉၼႆႉပဵၼ်မႁႃႇတၼ်းၶူဝ်းၽြႃးပဵၼ်ၸဝ်ႈယဝ်ႉ၊” ဝႃႈၼင်ႇၼႆဢေႃႈ။-
ပိူၼ်ႈဢွၼ်ၵၼ်ၸပ်းၸွမ်းထွမ်ႇဢဝ်မၼ်း၊ၵွပ်ႈပိူဝ်ႈမၼ်းႁဵတ်းဢတၢတ်ႈၽီမေႃႇဢၼ်လီဢၢမ်းမႃးႁိုင်ၼႃႇယဝ်ႉဢေႃႈ။-
ၵူၺ်းၵႃႈ၊မိူဝ်ႈဢၼ်ၶဝ်ယုမ်ႇမၢတ်ႈၼုၵ်ႈၵပၢတ်ႈတြႃးဢၼ် ၽိလိပ်ႉပု၊ ႁေႃးလၢတ်ႈၶၢဝ်ႇတြႃးသိူဝ်းပျေႃႇလွင်ႈမိူင်းၽြႃးပဵၼ်ၸဝ်ႈ၊တင်းလွင်ႈ ၸဝ်ႈယေႇသု ၶရိၸ်ႈ၊ ၼၼ်ႉၸိုင်၊ၸဵမ်ယိင်းၸဵမ်ၸၢႆးၶၢမ်ႇဢဝ်မၢင်ႇၵလႃႇပပ်ႉတိၸမ်ႇ ဢေႃႈ။-
သိမုၼ်ႇ၊ ၵေႃႈ၊တူဝ်ၸဝ်ႈၵဝ်ႇယုမ်ႇမၢတ်ႈလႄႈဝၢႆးသေၶၢမ်ႇဢဝ်မၢင်ႇၵလႃႇပပ်ႉတိၸမ်ႇယဝ်ႉၼၼ်ႉ၊မၼ်းယူႇလူၺ်ႈၵၼ်တင်း ၽိလိပ်ႉပု၊ သေလႄႈဢၢမ်းဢေႃးယွင်ႈယေႃးတၼ်းၶူဝ်းတၢင်းဢၼ်လီဢၢမ်း၊ဢိၵ်ႇတင်းၼိမိၵ်ႈလၢၵ်ႈၶၼႃႇ၊ဢၼ်ယႂ်ႇၼႃႇဢၼ်မၼ်းလႆႈႁၼ်မႃးၸိူဝ်းၼၼ်ႉဢေႃႈ။
တမၢၼ်ႇၸဝ်ႈၸိူဝ်းဢၼ်မီးယူႇၼႂ်းဝဵင်း ယေႇရုသလႅမ်ႇ၊ ၼၼ်ႉ၊လႆႈငိၼ်းၶၢဝ်ႇဢၼ်ၵူၼ်းမိူင်း သမႃႇရိ၊ ၶဝ်ႁပ်ႉတုင်းဢဝ်ၼုၵ်ႈၵပၢတ်ႈတြႃးၸဝ်ႈယဝ်ႉလႄႈၶဝ်ပွႆႇၸႂ်ႉ ပေႇတရု၊ တင်း ယူဝ်းႁၢၼ်ႇ၊ ၵႂႃႇဢေႃႈ။-
ၶဝ်သွင်ၵေႃႉၵႂႃႇထိုင်သေယဝ်ႉ၊သူးတွင်းပုၼ်ႈၵူၼ်းၸိူဝ်းဢၼ်ယုမ်ႇမၢတ်ႈတင်းလၢႆ၊ၼင်ႇႁိုဝ်တၵ်းလႆႈၶၢမ်ႇဢဝ်ဝိၺိၺ်ႇမူတ်းၸၢင်ႇၸဝ်ႈဢေႃႈ။-
လွင်ႈမၼ်းၸမ်ႉ၊ဝိၺိၺ်ႇမူတ်းၸၢင်ႇၸဝ်ႈဢမ်ႇပႆႇလူင်းမႃးၵႃႈၼိူဝ်ၶဝ်သေၵေႃႉသေၵူၼ်းလႄႈၶဝ်ၼၼ်ႉၶၢမ်ႇဢဝ်မၢင်ႇၵလႃႇပပ်ႉတိၸမ်ႇ၊ၼႂ်းၼႃႇမႃႉၸိုဝ်ႈသဵင် ၸဝ်ႈယေႇသု၊ ၵူၺ်းဢေႃႈ။-
မိူဝ်ႈၼၼ်ႉ၊ၶဝ်သွင်ၵေႃႉဢဝ်မိုဝ်းတၢင်ႇၵႃႈၼိူဝ်ၶဝ်ယဝ်ႉၸင်ႇ၊ၶဝ်လႆႈၶၢမ်ႇဢဝ်ဝိၺိၺ်ႇမူတ်းၸၢင်ႇၸဝ်ႈဢေႃႈ။
သိမုၼ်ႇ၊ ၼၼ်ႉ၊လႆႈႁၼ်ဝိၺိၺ်ႇမူတ်းၸၢင်ႇၸဝ်ႈ၊လူင်းမႃးၵႃႈၼိူဝ်ၶဝ်ၸိူဝ်းဢၼ်ယုမ်ႇမၢတ်ႈ ၵွပ်ႈပိူဝ်ႈတမၢၼ်ႇၸဝ်ႈၸိူဝ်းၼၼ်ႉ၊ဢဝ်မိုဝ်းတၢင်ႇၵႃႈၼိူဝ်ၶဝ်ၸိူဝ်ႉၼင်ႇၼၼ်ၸိုင်၊မၼ်းဢဝ်ငိုၼ်းမႃးပၼ်တီႈတမၢၼ်ႇၸဝ်ႈၸိူဝ်းၼၼ်ႉလႄႈယွၼ်းဝႃႈ၊-
“ၼင်ႇႁိုဝ်ၵေႃႉဢၼ်ၵဝ်ၶႃႈဢဝ်မိုဝ်းတၢင်ႇၼၼ်ႉၵေႃႈ၊တၵ်းလႆႈၶၢမ်ႇဢဝ်ဝိၺိၺ်ႇမူတ်းၸၢင်ႇၸဝ်ႈၸိုင်၊ပၼ်တၼ်းၶူဝ်းၼၼ်ႉတီႈၵဝ်ၶႃႈသေၵမ်း၊” ဝႃႈၼင်ႇၼႆဢေႃႈ။
ပေႇတရု၊ ၵေႃႈလၢတ်ႈတီႈမၼ်းလႄႈဝႃႈ၊ “ၵွပ်ႈပိူဝ်ႈဢၼ်မႂ်းထၢင်ႇဝႃႈ၊မႂ်းတၵ်းဢဝ်တင်းငိုၼ်းသိုဝ်ႉဢဝ်သူးၽြႃးပဵၼ်ၸဝ်ႈလႆႈၼၼ်ႉလႄႈမႂ်းတၵ်းလႆႈတူၵ်းငရၢႆးႁူမ်ႈလူၺ်ႈၵၼ်တင်းငိုၼ်းမႂ်းယဝ်ႉ။-
မႂ်းဢမ်ႇသႅင်ႇၵၼ်တင်းၼႃႈၵၢၼ်ႁဝ်းသေဢိတ်း။ ႁူဝ်ၸႂ်မႂ်းၵေႃႈဢမ်ႇမႅၼ်ႈၸႂ်ၽြႃးပဵၼ်ၸဝ်ႈ။-
ပိူဝ်ႈၼႆလႄႈပိၼ်ႇၸႂ်မႂ်းသေၵႃႈတီႈဢၼ်ႁၢႆႉဢၼ်မိူၵ်ႈ၊ဢၼ်မႂ်းၶိုင်ပွင်တေႃႈလဵဝ်ၼၼ်ႉသေလႄႈသူးတွင်းႁႂ်ႈၽြႃးပဵၼ်ၸဝ်ႈပွႆႇလွတ်ႈပၼ်ဢပျတ်ႈဢၼ်မႂ်းၵျၢမ်ႇပွင်ၸိူဝ်ႉၼင်ႇၼႆၼၼ်ႉတႃႉ။-
ၵဝ်ႁုႁၼ်လွင်ႈဢၼ်မႂ်းၼႆႉတဵမ်ဝႆႉတင်းႁူဝ်ၸႂ်ဢၼ်ၶူမ်ၼႃႇလႄႈပဵၼ်ၶႃႈတုၸရိူၵ်ႈဢပျတ်ႈဝႆႉၼၼ်ႉဢေႃႈ၊” ဝႃႈၼင်ႇၼႆဢေႃႈ။
သိမုၼ်ႇ၊ ၵေႃႈၶိုၼ်းလၢတ်ႈလႄႈဝႃႈ၊ “ၼင်ႇႁိုဝ်လွင်ႈတၢင်းဢၼ်ၸဝ်ႈဝႃႈၼႆႉ၊တၵ်းဢမ်ႇႁွတ်ႈထိုင်ၵႃႈၼိူဝ်ၵဝ်ၶႃႈသေၸိူဝ်ႉသေပိူင်ၸိုင်၊သူးတွင်းတီႈၽြႃးပုၼ်ႈၵဝ်ၶႃႈသေၵမ်း၊” ဝႃႈၼင်ႇၼႆဢေႃႈ။
ဝၢႆးသေ ပေႇတရု၊ တင်း ယူဝ်းႁၢၼ်ႇ၊ ၶၢမ်ႇသၢၵ်ႈသေႇလႄႈႁေႃးလၢတ်ႈၼုၵ်ႈၵပၢတ်ႈတြႃးၸဝ်ႈၽြႃးယဝ်ႉၸိုင်၊ၶဝ်ၶိုၼ်းမိူဝ်းၸူးဝဵင်း ယေႇရုသလႅမ်ႇ၊ သေဢေႃႈ။ ၼႂ်းၶၢဝ်းတၢင်းၼၼ်ႉ၊ၶဝ်ႁေႃးလၢတ်ႈၶၢဝ်ႇတြႃးသိူဝ်းပျေႃႇၸဝ်ႈ၊ၵႃႈၼႂ်းဝၢၼ်ႈပိူၼ်ႈၵူႈၶၢဝ်းတၢင်းၼႂ်းမိူင်း သမႃႇရိ၊ ပုၼ်ႉဢေႃႈ။
ၵမ်းၼၼ်ႉ၊တမၢၼ်ႇၵၢင်ႁၢဝ်လၢတ်ႈတီႈ ၽိလိပ်ႉပု၊ လႄႈဝႃႈ၊ “မႂ်းလုၵ်ႉလႄႈၵႂႃႇၼႃႈတၢင်းၸၢၼ်း၊ၸူးၵႃႈတီႈသဵၼ်ႈတၢင်းဢၼ်လုၵ်ႉသေၵႃႈတီႈဝဵင်း ယေႇရုသလႅမ်ႇ၊ လူင်းၵႂႃႇၵႃႈတီႈဝဵင်း ၵႃႇၸႃႉ၊ ပုၼ်ႉတႃႉ၊” ဝႃႈၼင်ႇၼႆဢေႃႈ။ (တၢင်းၼၼ်ႉ၊ပဵၼ်တၢင်းထိူၼ်ႇဢေႃႈ။-)
မၼ်းၵေႃႈလုၵ်ႉလႄႈၵႂႃႇၸိူဝ်ႉၼင်ႇၼၼ်ဢေႃႈ။ ၼႂ်းၶၢဝ်းတၢင်းၼၼ်ႉ၊မီးၵူၼ်းမိူင်း ဢေႇတီႇဢူဝ်းပီးယႃး၊ ၵေႃႉၼိုင်ႈ၊ဢၼ်ပဵၼ်ၵူၼ်းတွၼ်လႄႈပဵၼ်ဢမၢတ်ႈဢၼ်ပႂ်ႉထိင်းၽၼ်ႇတႃႇၼၢင်းႁေႃၶမ်း ၵၼ်ႇတေႇၵိ၊ ဢၼ်ဢုပ်ႉပိူင်ႇမိူင်း ဢေႇတီႇဢူဝ်းပီးယႃး၊ ၼၼ်ႉ၊-
မႃးၵႃႈတီႈဝဵင်း ယေႇရုသလႅမ်ႇ၊ ႁႂ်ႈလႆႈႁဵတ်းဝၢတ်ႈၵူဝ်းၵႂၢႆႇထႃႇဝရႃႉၽြႃးလႄႈ ၶီႇလေႃႉမႃႉမၼ်းပွၵ်ႈၵႂႃႇၶိုၼ်းဢေႃႈ။ ၵႃႈၼႂ်းလေႃႉမႃႉၼၼ်ႉ၊မၼ်းၽတ်းဢၢၼ်ႇၵျၢမ်းလိၵ်ႈၼႂ်းလိၵ်ႈပရေႃးၽႅတ်ႈ ဢိသႃႇယႃႉ၊ ယူႇဢေႃႈ။-
ဝိၺိၺ်ႇမူတ်းၸၢင်ႇၸဝ်ႈ၊သင်ႇလၢတ်ႈတီႈ ၽိလိပ်ႉပု၊ လႄႈဝႃႈ၊ “သုတ်ႉၸပ်းလႄႈပႆၸွမ်းလေႃႉမႃႉၼၼ်ႉၵႂႃႇတႃႉ၊” ဝႃႈၼႆ၊ၵႃႈၼင်ႇဢၼ်ဝႃႈၼၼ်ႉ၊-
မၼ်းလႅၼ်ႈၵႂႃႇၸူးလေႃႉမႃႉၼၼ်ႉလႄႈလႆႈငိၼ်းၵေႃႉၼၼ်ႉၽတ်းဢၢၼ်ႇၵျၢမ်းလိၵ်ႈ၊ၼႂ်းလိၵ်ႈပရေႃးၽႅတ်ႈ ဢိသႃႇယႃႉ၊ ယူႇၼၼ်ႉသေယဝ်ႉ၊လဝ်ႈထၢမ်လႄႈဝႃႈ၊ “ဢၼ်ၸဝ်ႈၽတ်းဢၢၼ်ႇယူႇၼႆႉ၊ၸွင်ႇပွင်ႇၸႂ်ယူႇၶႃႈႁိုဝ်း၊” ဝႃႈၼင်ႇၼႆဢေႃႈ။
ဢမၢတ်ႈၼၼ်ႉၶိုၼ်းလၢတ်ႈလႄႈဝႃႈ၊ “ပေႃးဢမ်ႇမီးၵေႃႉဢၼ်သွၼ်ပၼ်ၸိုင်၊ၵဝ်တၵ်းပွင်ႇၸႂ်လႆႈၸိူဝ်ႉၼင်ႇႁိုဝ်၊” ဝႃႈၼႆယဝ်ႉ၊ၸင်ႇႁွင်ႉပၢင်းဢဝ် ၽိလိပ်ႉပု၊ ၶိုၼ်ႈၵႃႈၼိူဝ်လေႃႉမႃႉလႄႈၶီႇၸွမ်းမၼ်းၵႂႃႇဢေႃႈ။-
ၼႂ်းၵျၢမ်းလိၵ်ႈတီႈဢၼ်မၼ်းၽတ်းဢၢၼ်ႇယူႇၼၼ်ႉဝႃႈၸမ်ႉ၊ “မၼ်းလႆႈၶၢမ်ႇတၢင်းဢၼ်ဢဝ်ၵႂႃႇ၊ မိူၼ်ၸိူဝ်ႉၼင်ႇသူဝ်းဢၼ်ဢဝ်ၵႂႃႇႁႂ်ႈလႆႈႁႅမ်၊ ဢိၵ်ႇတင်းမိူၼ်ၸိူဝ်ႉၼင်ႇသူဝ်းဢွၼ်ႇဢၼ်ယင်းဢမ်ႇႁွင်ႉဢမ်ႇသႅၼ်ႇ၊ ယၢမ်းမိူဝ်ႈဢၼ်ပိူၼ်ႈႁႆးၶူၼ်မၼ်းယူႇၼၼ်ႉ၊ ယင်းဢမ်ႇတၵ်ႉသဵင်လႄႈယူႇဢေႃႈ။
ၼႂ်းတၢင်းဢၼ်ပိူၼ်ႈတဵၵ်းငႅၼ်းၵႅၼ်ႉၶေႃးမၼ်းႁႂ်ႈတူၵ်းတီႈတႅမ်ႇၼၼ်ႉ၊ ၶဝ်ၸီႇယၢင်ႇဢမုမၼ်းဢမ်ႇၸွမ်းၼင်ႇတြႃးသေဢိတ်းဢေႃႈ။ ပိူဝ်ႈဢၼ်ဢသၢၵ်ႈမၼ်းလႆႈၶၢမ်ႇသိမ်းဢဝ်သေၵႃႈတီႈလိၼ်မိူင်းၼႆႉၵႂႃႇလႄႈ ဢမ်ႇမီးၽူႈလႂ်သေၵေႃႉသေၵူၼ်းတေၸၢင်ႈၶႆႈၼႄလွင်ႈၸိူဝ်ႉၶိူဝ်းမဵဝ်းမၼ်းလႆႈ၊” ဝႃႈၼင်ႇၼႆၼၼ်ႉဢေႃႈ။
ဢမၢတ်ႈၼၼ်ႉ တွင်ႈထၢမ် ၽိလိပ်ႉပု၊ လႄႈဝႃႈ၊ “ၵႂၢမ်းပရေႃးၽႅတ်ႈဢၼ်ဝႃႈဝႆႉၸိူဝ်ႉၼင်ႇၼႆၼႆႉ၊ၶႂ်ႈဝႃႈၽူႈလႂ်။ ၸွင်ႇၶႂ်ႈဝႃႈတူဝ်မၼ်းႁိုဝ်း။ ဢမ်ႇၼၼ်ၵေႃႈၶႂ်ႈဝႃႈသေၵေႃႉၵေႃႉႁိုဝ်း။ လၢတ်ႈၼႄၵဝ်လူး၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ ၽိလိပ်ႉပု၊ ပိုတ်ႇပၢၵ်ႇလႄႈတႄႇၸႃႉဢဝ်တီႈငဝ်ႈၵႂၢမ်းၵျၢမ်းလိၵ်ႈၼၼ်ႉ၊မၼ်းႁေႃးလၢတ်ႈၶၢဝ်ႇတြႃးသိူဝ်းပျေႃႇ၊လွင်ႈ ၸဝ်ႈယေႇသု၊ တီႈၵေႃႉၼၼ်ႉဢေႃႈ။-
ၼႂ်းမိူဝ်ႈဢၼ်ၶဝ်ယင်းတိုၵ်ႉၶီႇလေႃႉမႃႉၸွမ်းတၢင်းၵႂႃႇယူႇၸိူဝ်ႉၼင်ႇၼၼ်ၼၼ်ႉၸိုင်၊ၶဝ်ႁွတ်ႈထိုင်တီႈဢၼ်မီးၼမ်ႉလႄႈဢမၢတ်ႈၼၼ်ႉလၢတ်ႈလႄႈဝႃႈ၊ “တီႈၼႆႈမီးၼမ်ႉၶႃႈဢေႃႈ။ ၼင်ႇႁိုဝ်ၵဝ်ၶႃႈတၵ်းဢမ်ႇလႆႈၶၢမ်ႇဢဝ်မၢင်ႇၵလႃႇပပ်ႉတိၸမ်ႇ ၸိုင်၊မီးဢီႈသင်ႁၢမ်ႈတၢပ်ႈႁႄႉၶႅၼ်ၶႃႈ၊” ဝႃႈၼင်ႇၼႆဢေႃႈ။-
[ ၽိလိပ်ႉပု၊ ၵေႃႈလၢတ်ႈတီႈမၼ်းလႄႈဝႃႈ၊ “ပေႃးၸဝ်ႈမီးႁူဝ်ၸႂ်ဢၼ်ယုမ်ႇမၢတ်ႈတႄႉတႄႉၸိုင်၊ၶၢမ်ႇဢဝ်မၢင်ႇၵလႃႇပပ်ႉတိၸမ်ႇလႆႈယူႇယဝ်ႉ၊” ဝႃႈၼင်ႇၼႆလႄႈ၊ “ၵဝ်ၶႃႈယုမ်ႇယဝ်ႉ။ ၸဝ်ႈယေႇသုၶရိၸ်ႈ၊ ပဵၼ်လုၵ်ႈၽြႃးပဵၼ်ၸဝ်ႈဝႃႈၼႆ၊ၵဝ်ၶႃႈယုမ်ႇယဝ်ႉ၊” ဝႃႈၼင်ႇၼႆဢမၢတ်ႈၼၼ်ႉၶိုၼ်းလၢတ်ႈဢေႃႈ။]
ဢမၢတ်ႈၼၼ်ႉ၊ပၼ်ဢမိင်ႉႁႂ်ႈလေႃႉမႃႉၵိုတ်းသဝ်းသေယဝ်ႉ၊ ၽိလိပ်ႉပု၊ တင်းဢမၢတ်ႈၼၼ်ႉ၊လူင်းၵႃႈၼႂ်းၼမ်ႉလူၺ်ႈၵၼ်လႄႈ ၽိလိပ်ႉပု၊ ပၼ်မၢင်ႇၵလႃႇပပ်ႉတိၸမ်ႇတီႈမၼ်းသေဢေႃႈ။-
ဝၢႆးသေ၊ၶဝ်ဢွၵ်ႇသေၵႃႈၼႂ်းၼမ်ႉမႃးယဝ်ႉၸိုင်၊ဝိၺိၺ်ႇၸဝ်ႈၽြႃးဢဝ် ၽိလိပ်ႉပု၊ ၵႂႃႇသေလႄႈဢမၢတ်ႈၼၼ်ႉ၊ဢမ်ႇႁၼ်မၼ်းယဝ်ႉၸင်ႇ၊သိုပ်ႇၶၢဝ်းတၢင်းမၼ်းၵႂႃႇတင်းႁူဝ်ၸႂ်ဢၼ်သိူဝ်းသႂၢင်ႇၼႃႇဢေႃႈ။-
ၽိလိပ်ႉပု၊ ၼၼ်ႉ၊ပေႃႇမႃးမီးယူႇၵႃႈၼႂ်းဝဵင်း ဢႃႇၸုတ်ႉ၊ သေယဝ်ႉ၊ၸွမ်းတၢင်းၵႂႃႇၸူးဝဵင်း ၵေႇသရိ၊ သေလႄႈၼႂ်းၶၢဝ်းတၢင်းၼၼ်ႉ၊မၼ်းႁေႃးလၢတ်ႈၶၢဝ်ႇတြႃးသိူဝ်းပျေႃႇၸဝ်ႈၵႃႈၼႂ်းဝဵင်းၵူႈဝဵင်းဢေႃႈ။
ယၢမ်းမိူဝ်ႈဢၼ် သေႃးလု၊ ယင်းဢဝ်ၵႂၢမ်းဢၼ်ႁႅင်းၼႃႇၼၼ်ႉ၊လွၵ်ႇငိုတ်ႈဝႃႈ၊တေဢဝ်တၢႆတပႄးၸဝ်ႈၽြႃးတင်းလၢႆယူႇၼၼ်ႉ၊မၼ်းၶဝ်ႈၸူးၵႃႈတီႈၶုၼ်ယဵၸ်ႈပရေႃးႁဵၵ်ႈ သေယဝ်ႉ၊-
ယွၼ်းဢဝ်လိၵ်ႈသၢၵ်ႈသေႇသေယဝ်ႉ၊ၵႂႃႇၵႃႈတီႈၵႄႇၸရွပ်ႈႁေႃးတြႃးၸိူဝ်းဢၼ်မီးၵႃႈၼႂ်းဝဵင်း တမ်ႇမတ်ႉသၵတ်ႉ၊ ၼၼ်ႉ၊ပုၼ်ႈလွင်ႈၼင်ႇႁိုဝ်တၵ်းလႆႈသွၵ်ႈႁႃတပႄးၸဝ်ႈၽြႃးတင်းလၢႆလႄႈႁႂ်ႈလႆႈတိဢဝ်ၸဵမ်ယိင်းၸဵမ်ၸၢႆးမႃးၵႃႈတီႈဝဵင်း ယေႇရုသလႅမ်ႇ၊ ဢေႃႈ။
ၼႂ်းမိူဝ်ႈဢၼ် သေႃးလု၊ ၵႂႃႇလႄႈမိူဝ်ႈဢၼ်ၸမ်တၵ်းႁွတ်ႈထိုင်ဝဵင်း တမ်ႇမတ်ႉသၵတ်ႉ၊ ၼၼ်ႉၸိုင်၊ဢၼ်လႅင်းၵၢင်ႁၢဝ်သွင်ႇမၢပ်ႈသႂ်ႇႁွပ်ႈတူဝ်မၼ်းၵမ်းလဵဝ်ဢေႃႈ။-
မၼ်းၵေႃႈလူမ်ႉၵႂႃႇၵႃႈၼိူဝ်လိၼ်သေလႄႈလႆႈငိၼ်းသဵင်လၢတ်ႈတေႃႇမၼ်းလႄႈဝႃႈ၊ “ သေႃးလု၊ ႟။ သေႃးလု၊ ႟။ ႁဵတ်းသင်လႄႈမႂ်းၼိၵ်ႈၸၢၵ်ႈငႅၼ်းသႄးၵဝ်၊” ဝႃႈၼင်ႇၼႆဢေႃႈ။
မၼ်းၵေႃႈၶိုၼ်းလဝ်ႈထၢမ်လႄႈဝႃႈ၊ “ၸဝ်ႈႁဝ်းပဵၼ်ၽူႈလႂ်ၶႃႈ၊” ဝႃႈၼင်ႇၼႆလႄႈ။ သဵင်ၼၼ်ႉၶိုၼ်းလၢတ်ႈတီႈမၼ်းလႄႈဝႃႈ၊ “ၵဝ်ပဵၼ် ယေႇသု၊ ဢၼ်မႂ်းၼိၵ်ႈၸၢၵ်ႈငႅၼ်းသႄးၼၼ်ႉယဝ်ႉ။-
ၼႂ်းဝႃႈၼၼ်သေၵေႃႈမႂ်းလုၵ်ႉလႄႈၶဝ်ႈၵႂႃႇၵႃႈၼႂ်းဝဵင်းတႃႉ။ တီႈၼၼ်ႈတၵ်းမီးၵူၼ်းသင်ႇလၢတ်ႈပၼ်လွင်ႈဢၼ်မႂ်းတၵ်းလႆႈႁဵတ်းၵႃႈသင်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၵူၼ်းဢၼ်ၵႂႃႇၸွမ်းလူၺ်ႈၵၼ်တင်းမၼ်းၸိူဝ်းၼၼ်ႉ၊လႆႈငိၼ်းသဵင်ၵူၺ်း၊သမ်ႉဢမ်ႇလႆႈႁၼ်ၽူႈလႂ်သေၵေႃႉသေၵူၼ်းလႄႈဢမ်ႇၸၢင်ႈလၢတ်ႈၵႂၢမ်းၵႃႈသင်၊ဢွၼ်ၵၼ်ၸုၵ်းယူႇဢေႃႈ။-
သေႃးလု၊ ၼၼ်ႉ၊လုၵ်ႉၶိုၼ်ႈသေၵႃႈတီႈလိၼ်မႃးလႄႈမိုၼ်းတႃဢမ်ႇႁၼ်ၵႃႈသင်လႆႈယဝ်ႉ။ မိူဝ်ႈၼၼ်ႉ၊ပိူၼ်ႈၸုင်ဢဝ်မိုဝ်းမၼ်းသေယဝ်ႉ၊ၵႂႃႇသူင်ႇၵႃႈတီႈဝဵင်း တမ်ႇမတ်ႉသၵတ်ႉ၊ ဢေႃႈ။-
သၢမ်ဝၼ်းတဵမ်တဵမ်၊တႃမၼ်းယင်းဢမ်ႇႁၼ်လႆႈလႄႈၼႂ်းၸူဝ်ႈၶၢဝ်းၼၼ်ႉမၼ်းယင်းဢမ်ႇၵိၼ်ၵႃႈသင်သေၸိူဝ်ႉသေပိူင်လႄႈယူႇဢေႃႈ။
ၵႃႈၼႂ်းဝဵင်း တမ်ႇမတ်ႉသၵတ်ႉ၊ ၼၼ်ႉ၊မီးတပႄးၸဝ်ႈၽြႃးၵေႃႉၼိုင်ႈဢၼ်လႆႈၸိုဝ်ႈ ဢႃႇၼၼိ၊ ၼၼ်ႉဢေႃႈ။ မၼ်းလႆႈႁၼ်ၼိမိၵ်ႈဢၼ်ၸဝ်ႈၽြႃးလၢတ်ႈတေႃႇမၼ်းလႄႈဝႃႈ၊ “ ဢႃႇၼၼိ၊ ႟၊” ဝႃႈၼင်ႇၼႆသေယဝ်ႉ။ “ဢေႃႈၶႃႈၸဝ်ႈ။ ၵဝ်ၶႃႈမီးယူႇၶႃႈဢေႃႈ၊” ဝႃႈၼႆ၊မၼ်းၶိုၼ်းလဝ်ႈလၢတ်ႈဢေႃႈ။
ၸဝ်ႈၽြႃးၵေႃႈ လၢတ်ႈတီႈမၼ်းလႄႈဝႃႈ၊ “မႂ်းလုၵ်ႉလႄႈၵႂႃႇၵႃႈတီႈသဵၼ်ႈတၢင်းဢၼ်မီးၸိုဝ်ႈႁွင်ႉႁဵၵ်ႈဝႃႈ၊ သဵၼ်ႈတၢင်းသိုဝ်ႈ၊ ၼၼ်ႉတႃႉ။ ၶဝ်ႈၵႃႈၼႂ်းႁိူၼ်းၵူၼ်းဢၼ်လႆႈၸိုဝ်ႈ ယုတႃႉ၊ ၼၼ်ႉသေလႄႈထၢမ်ႁႃၵူၼ်းဝဵင်း တႃႇသု၊ ဢၼ်လႆႈၸိုဝ်ႈ သေႃးလု၊ ၼၼ်ႉတႃႉ။ မၼ်းၼၼ်ႉသူးတွင်းယူႇလႄႈ၊-
ၼႂ်းၼိမိၵ်ႈဢၼ်ၵဝ်လႆႈၼႄႁႂ်ႈမၼ်းႁၼ်ၵူၼ်းၵေႃႉၼိုင်ႈမီးၸိုဝ်ႈႁွင်ႉႁဵၵ်ႈဝႃႈ၊ ဢႃႇၼၼိ၊ ၼၼ်ႉ၊ၶဝ်ႈမႃးၸူးမၼ်းလႄႈဢဝ်မိုဝ်းတၢင်ႇၵႃႈၼိူဝ်မၼ်း၊ၼင်ႇႁိုဝ်မၢၵ်ႇတႃမၼ်းတေၶိုၼ်းႁၼ်လႆႈမႃးထႅင်ႈၼၼ်ႉယဝ်ႉ၊” ဝႃႈၼင်ႇၼႆဢေႃႈ။
ဢႃႇၼၼိ၊ ၵေႃႈၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈႁဝ်း။ ၵူၼ်းၼမ်ၼႃႇမွၵ်ႇလၢတ်ႈၶႃႈၸဝ်ႈႁဝ်း၊လွင်ႈဢၼ်မၼ်းၼိၵ်ႈၸၢၵ်ႈငႅၼ်းသႄးၵူၼ်းမူတ်းၸၢင်ႇၸဝ်ႈႁဝ်းၵႃႈၼႂ်းဝဵင်း ယေႇရုသလႅမ်ႇ၊ ၸိူဝ်းၼၼ်ႉထၢၼ်ႇႁိုဝ်ၼၼ်ႉၶႃႈယဝ်ႉ၊-
ဢိၵ်ႇတင်းမၼ်းမႃးၵႃႈတီႈဝဵင်းၼႆႉၵေႃႈပႃးဢဝ်တင်းဢၶႂၢင်ႉဢႃႇၼႃႇၵႃႈတီႈယဵၸ်ႈပရေႃးႁဵၵ်ႈလူင်၊မႃးႁႂ်ႈလႆႈတိမတ်ႉၶဝ်ၸိူဝ်းဢၼ်ၵူဝ်းၵႂၢႆႇၸဝ်ႈႁဝ်းၼၼ်ႉ၊ဝႃႈၼႆတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၸဝ်ႈၽြႃးသမ်ႉလၢတ်ႈတီႈမၼ်းလႄႈဝႃႈ၊ “မႂ်းၵႂႃႇတႃႉ။ ၵဝ်လိူၵ်ႈၵဵပ်းဢဝ်မၼ်းႁႂ်ႈပွင်ႁဵတ်းၼႃႈၵၢၼ်ၵဝ်ၼႂ်းတၢင်းဢၼ်ႁဵတ်းႁႂ်ႈၸိုဝ်ႈသဵင်ၵဝ်ၸွတ်ႇတူဝ်ႈၵႂႃႇ၊ၵႃႈတီႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ၊ၵႃႈတီႈၶုၼ်ႁေႃၶမ်းတင်းလၢႆ၊ဢိၵ်ႇတင်းၵႃႈတီႈၵူၼ်းမဵဝ်း ဢိသရေး၊ တင်းလၢႆယဝ်ႉ။-
လိုၼ်းၼၼ်ႉၸင်ႇ၊ၵဝ်တၵ်းၼႄပျႃးတီႈမၼ်းလွင်ႈဢၼ်မၼ်းတၵ်းလႆႈၶၢမ်ႇထၢၼ်ႇႁိုဝ်၊ၵွပ်ႈပိူဝ်ႈၼႃႇမႃႉၸိုဝ်ႈသဵင်ၵဝ်ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ဢႃႇၼၼိ၊ ၵေႃႈၵႂႃႇလႄႈ ၶဝ်ႈၵႃႈၼႂ်းႁိူၼ်းဢၼ် သေႃးလု၊ မီးယူႇၼၼ်ႉသေယဝ်ႉ၊ဢဝ်မိုဝ်းတၢင်ႇၵႃႈၼိူဝ်မၼ်းလႄႈလၢတ်ႈဝႃႈ၊ “ၼွင်ႉၵဝ် သေႃးလု၊ ႟။ ၸဝ်ႈႁဝ်း ယေႇသု၊ ဢၼ်ပေႃႇမႃးတီႈမႂ်း၊ၵႃႈၼႂ်းၵၢင်တၢင်းဢၼ်သူမႃးၼၼ်ႉ၊ပွႆႇၸႂ်ႉၵဝ်မႃးႁဵတ်းႁႂ်ႈမၢၵ်ႇတႃမႂ်းၶိုၼ်းႁၼ်၊ဢိၵ်ႇတင်းႁႂ်ႈမႂ်းလႆႈတဵမ်ဝႆႉတင်းဝိၺိၺ်ႇမူတ်းၸၢင်ႇၸဝ်ႈဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ၵမ်းလဵဝ်ၶႅပ်းဢွၼ်ႇဢၼ်မိူၼ်ၵဵတ်းပႃၵွၵ်းတူၵ်းသေၵႃႈတီႈမၢၵ်ႇတႃ သေႃးလု၊ ၵႂႃႇလႄႈတႃမၼ်းၶိုၼ်းႁၼ်လႆႈမႃးဢေႃႈ။ မၼ်းလုၵ်ႉသေလႄႈၶၢမ်ႇဢဝ်မၢင်ႇၵလႃႇပပ်ႉတိၸမ်ႇ သေဢေႃႈ။-
မၼ်းၵိၼ်တၢင်းၵိၼ်လႄႈမီးႁႅင်းမႃးဢေႃႈ။ လိုၼ်းၼၼ်ႉ၊ သေႃးလု၊ ယူႇလူၺ်ႈၵၼ်တင်းတပႄးၸဝ်ႈၽြႃးတင်းလၢႆ၊ဢၼ်မီးၼႂ်းဝဵင်း တမ်ႇမတ်ႉသၵတ်ႉ၊ ႁိုင်တၢၼ်ႇတၢၼ်ႇသေယဝ်ႉ၊-
မၼ်းၶဝ်ႈၸူးၵႃႈၼႂ်းၸရွပ်ႈႁေႃးတြႃးတင်းလၢႆ၊ႁေႃးလၢတ်ႈလွင်ႈ ၸဝ်ႈယေႇသု၊ ပဵၼ်လုၵ်ႈၽြႃးပဵၼ်ၸဝ်ႈၼၼ်ႉဢေႃႈ။
ၶဝ်ၸိူဝ်းဢၼ်ငိၼ်းၼၼ်ႉ၊ဢၢမ်းၼႃႇလႄႈလၢတ်ႈဝႃႈ၊ “မၼ်းပဵၼ်ၵေႃႉဢၼ်ဢဝ်တၢႆၶဝ်ၸိူဝ်းဢၼ်ယုမ်ႇမၢတ်ႈ ၸဝ်ႈယေႇသု၊ တင်းလၢႆ၊ၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉဢမ်ႇၸႂ်ႈႁိုဝ်း။ မၼ်းမႃးၵႃႈတီႈၼႆႈၵေႃႈပဵၼ်လွင်ႈဢၼ်တၵ်းတိဢဝ်ၶဝ်ၸိူဝ်းၼၼ်ႉသေလႄႈၵႂႃႇသူင်ႇၵႃႈတီႈယဵၸ်ႈပရေႃးႁဵၵ်ႈလူင်ၶဝ်ဢမ်ႇၸႂ်ႈႁိုဝ်း၊” ဝႃႈၼင်ႇၼႆဢေႃႈ။
ပိၵ်ႉသမ်ႉဝႃႈၼၼ်သေၵေႃႈတၢင်းဢၼ် သေႃးလု၊ ႁေႃးတြႃးၸဝ်ႈၼၼ်ႉ၊ယဵင်ႈၶႅၼ်းမီးတၼ်းၶူဝ်းမႃးတိၵ်းတိၵ်းလႄႈတၢင်းဢၼ်ၽေႃႇပျႃးသၢၵ်ႈသေႇလွင်ႈ ၸဝ်ႈယေႇသု၊ ပဵၼ် ၸဝ်ႈၶရိၸ်ႈ၊ ၼၼ်ႉ၊ပဵၼ်ဢၼ်မၢၼ်ႇမႅၼ်ႈၸိုဝ်ႈၸႂ်ႈၼႃႇတေႃႇထိုင်ႁွတ်ႈၵူၼ်းမဵဝ်း ၵျူး၊ ၸိူဝ်းဢၼ် မီးၼႂ်းဝဵင်းတင်းလၢႆ၊ထၢၼ်ႈပေႃးဢမ်ႇတွပ်ႇဢမ်ႇထဵင်မၼ်းလႆႈဢေႃႈ။
ဝၢႆးသေပူၼ်ႉမႃးလၢႆဝၼ်းယဝ်ႉၼၼ်ႉ၊ၵူၼ်းမဵဝ်း ၵျူး၊ ၶဝ်ဢွၼ်ၵၼ်ၸုတုမ်ၵၼ်သေယဝ်ႉ၊တိူင်ႇပၢင်ႇၵၼ်ႁႂ်ႈလႆႈဢဝ် သေႃးလု၊ တၢႆဢေႃႈ။-
ၵူၺ်းၵႃႈ၊ သေႃးလု၊ လႆႈႁုတၢင်းဢၼ်ၶဝ်ၵျၢမ်ႇပွင်ၼၼ်ႉဢေႃႈ။ ၶဝ်ပႂ်ႉၽၵ်းတူဝဵင်းဝၼ်းဝၼ်းၶိုၼ်းၶိုၼ်း၊ႁႂ်ႈလႆႈဢဝ်မၼ်းတၢႆဢေႃႈ။-
ၶိုၼ်းၼိုင်ႈတပႄးၸဝ်ႈၸိူဝ်းၼၼ်ႉ၊ဢဝ်မၼ်းသႂ်ႇၵႃႈၼႂ်းၵူၺ်သေယဝ်ႉ၊ယွၼ်ႇလူင်းသေၵႃႈတီႈႁူးလမ်းဝဵင်းဢေႃႈ။
သေႃးလု၊ ႁွတ်ႈၽႅဝ်ဝဵင်း ယေႇရုသလႅမ်ႇ၊ ၵႂႃႇလႄႈမၼ်းၵျူဝ်းၸႃးႁဵတ်းၵေႃႉႁဵတ်းသႄႈ လူၺ်ႈၵၼ်တင်းတပႄးၸဝ်ႈတင်းလၢႆဢေႃႈ။ ၵူၺ်းၵႃႈ၊ၶဝ်ၸိူဝ်းၼၼ်ႉ၊ဢမ်ႇယုမ်ႇလွင်ႈဢၼ်မၼ်းပဵၼ်တပႄးၸဝ်ႈၵေႃႉၼိုင်ႈမႃးယဝ်ႉၼၼ်ႉလႄႈၵူဝ်မၼ်းဢေႃႈ။-
မိူဝ်ႈၼၼ်ႉ၊ ပႃႇၼပႃႉ၊ ၸွႆႈထႅမ်မၼ်းလႄႈဢွၼ်သူင်ႇၵႂႃႇတီႈတမၢၼ်ႇၸဝ်ႈတင်းလၢႆယဝ်ႉၸင်ႇ၊မွၵ်ႇလၢတ်ႈၶႆႈၼႄၶဝ်လွင်ႈဢၼ် သေႃးလု၊ လႆႈထူပ်းႁၼ်ၸဝ်ႈၽြႃးၵႃႈတီႈၵၢင်တၢင်း၊ဢိၵ်ႇတင်းလွင်ႈဢၼ်ၸဝ်ႈၽြႃးလၢတ်ႈတေႃႇမၼ်းၸိူဝ်ႉၼင်ႇႁိုဝ်ၼၼ်ႉဢေႃႈ။ သမ်ႉလၢတ်ႈၼႄလွင်ႈဢၼ် သေႃးလု၊ ဢိင်ပိုင်ႈၼႃႇမႃႉၸိုဝ်ႈသဵင် ၸဝ်ႈယေႇသု၊ သေလႄႈႁေႃးလၢတ်ႈႁတ်းႁတ်းႁၢၼ်ႁၢၼ်ၵႃႈၼႂ်းဝဵင်း တမ်ႇမတ်ႉသၵတ်ႉ၊ ၼၼ်ႉဢေႃႈ။-
လိုၼ်းၼၼ်ႉ၊ သေႃးလု၊ ယူႇလူၺ်ႈၶဝ်လႄႈ ၵႂႃႇၵႂႃႇမႃးမႃးၵႃႈၼႂ်းဝဵင်း ယေႇရုသလႅမ်ႇ၊ ယူႇ၊ဢိင်ပိုင်ႈၼႃႇမႃႉၸိုဝ်ႈသဵင် ၸဝ်ႈယေႇသု၊ လႄႈႁေႃးလၢတ်ႈႁတ်းႁတ်းႁၢၼ်ႁၢၼ်ယူႇဢေႃႈ။-
မၼ်းဢုပ်ႇၵုမ်ထဵင်ၵၼ်တင်းၵူၼ်းမဵဝ်း ၵျူး၊ ဢၼ်လၢတ်ႈၵႂၢမ်း ၵရိၵ်ႉ၊ ၸိူဝ်းၼၼ်ႉလႄႈၶဝ်ၵျၢမ်ႇႁႃဢဝ်မၼ်းတၢႆဢေႃႈ။-
မိူဝ်ႈဢၼ်ၶဝ်ၸိူဝ်းဢၼ်ယုမ်ႇမၢတ်ႈတင်းလၢႆ၊ႁုငိၼ်းလွင်ႈတၢင်းၼၼ်ႉၸိုင်၊ၶဝ်ဢဝ်မၼ်းၵႂႃႇသူင်ႇၵႃႈတီႈဝဵင်း ၵေႇသရိ၊ လႄႈပွႆႇၸႂ်ႉမၼ်းၵႂႃႇၸူးၵႃႈတီႈဝဵင်း တႃႇသု၊ ပုၼ်ႉသေဢေႃႈ။
ႁဵတ်းၼၼ်လႄႈၸိူဝ်းၸဝ်ႈလႆႈမီးတၢင်းဢၼ်ၼိမ်ၸႂ်ယူႇၵႃႈၼႂ်းမိူင်း ယုတႃႉ၊ မိူင်း ၵႃႇလိလႄး၊ ဢိၵ်ႇတင်းမိူင်း သမႃႇရိ၊ ၵူႈတီႈၵူႈလႅၼ်လႄႈတႄႇပဵၼ်ယူႇဢေႃႈ။ ၸွမ်းလူၺ်ႈဝိၺိၺ်ႇမူတ်းၸၢင်ႇၸဝ်ႈၸွႆႈၵမ်ႉၸွႆႈထႅမ်၊ဢိၵ်ႇတင်းတၢင်းဢၼ်ၵူဝ်ယမ်ၸဝ်ႈၽြႃးၼၼ်ႉၸိုင်၊ၸိူဝ်းၸဝ်ႈလႆႈမီးဢဵၼ်မီးႁႅင်းမႃးလႄႈယႂ်ႇၽႄႈၼမ်ၵိုၼ်းမႃးဢေႃႈ။
ပေႇတရု၊ လႄႇၵႂႃႇလဵပ်ႈၵႂႃႇၵူႈတီႈၵူႈလႅၼ်၊ၵႃႈၼႂ်းၸိူဝ်းၸဝ်ႈတင်းသဵင်ႈတင်းလူင်လႄႈၽဝ်ႇၼိုင်ႈမၼ်းၵႂႃႇႁွတ်ႈထိုင်ၵႃႈတီႈၵူၼ်းၽြႃးပဵၼ်ၸဝ်ႈ၊ၼႂ်းဝဵင်း လုတ်ႉတႃႉ၊ ပုၼ်ႉဢေႃႈ။-
တီႈၼၼ်ႈ၊မၼ်းထူပ်းႁၼ်ၵူၼ်းၵေႃႉၼိုင်ႈ၊ဢၼ်လႆႈၸိုဝ်ႈ ဢေႇၼေး၊ ဢၼ်ပဵၼ်ၵူၼ်းတၢႆၽၢၵ်ႇလႄႈလႆႈၼွၼ်းယူႇၵႃႈၼိူဝ်ၽႃႈၵွပ်းပႅတ်ႇပီယဝ်ႉၼၼ်ႉဢေႃႈ။-
ပေႇတရု၊ လၢတ်ႈတီႈၵေႃႉၼၼ်ႉလႄႈဝႃႈ၊ “ ဢေႇၼေး၊ ႟။ ၸဝ်ႈယေႇသုၶရိၸ်ႈ၊ ႁႂ်ႈမႂ်းၸိုၼ်ႈႁၢႆယဝ်ႉ။ လုၵ်ႉလႄႈၵဵၼ်ၽႃႈၵွပ်းမႂ်းတႃႉ၊” ဝႃႈၼင်ႇၼႆလႄႈ ဢေႇၼေး၊ လုၵ်ႉၵမ်းလဵဝ်ဢေႃႈ။-
ၵူၼ်းဝဵင်း လုတ်ႉတႃႉ၊ တင်းၵူၼ်းဝဵင်း သႃႇရုၼ်ႇ၊ တင်းလၢႆႁၼ်မၼ်းၼၼ်ႉသေယဝ်ႉ၊ဢွၼ်ၵၼ်ပိၼ်ႇၸႂ်ၶၢႆႉပုတ်ႈမႃးၽၢႆႇၸဝ်ႈၽြႃးဢေႃႈ။
ၼႂ်းဝဵင်း ယွပ်ႉပႃႉ၊ ၼၼ်ႉ၊မီးမႄႈယိင်းဢၼ်လႆႈၸိုဝ်ႈ တပိထႃႉ၊ ဢၼ်ပဵၼ်တပႄးၸဝ်ႈၵေႃႉၼိုင်ႈၼၼ်ႉဢေႃႈ။ (ၸိုဝ်ႈမၼ်းၼႂ်းၵႂၢမ်း ၵရိၵ်ႉ၊ ႁွင်ႉဝႃႈ၊ တေႃႇၵႃႇ၊ ဢၼ်ပွင်ႇဝႃႈၵႂၢင်ဢေႃႈ။) မႄႈယိင်းၼၼ်ႉ၊ၼႂ်းၸူဝ်ႈတႃႇဢသၢၵ်ႈမၼ်းၼၼ်ႉ၊ႁဵတ်းတၢင်းလီၼမ်ၼႃႇလႄႈၽေးၸွၼ်းယိုၼ်ႈမႅင်ႇပၼ်ၵူၼ်းယၢၵ်ႈၵူၼ်းၽၢၼ်တင်းလၢႆယူႇဢေႃႈ။-
မိူဝ်ႈၼၼ်ႉ၊မၼ်းၼၢဝ်လႄႈတၢႆၵႂႃႇဢေႃႈ။ ၶဝ်ဢဝ်တူဝ်တၢႆမၼ်းဢၢပ်ႇၼမ်ႉသေယဝ်ႉ၊ဝၢင်းဝႆႉၵႃႈၼႂ်းလုၵ်းႁၢၼ်ႉၼိူဝ်ဢေႃႈ။-
ဝဵင်း ယွပ်ႉပႃႉ၊ ၼၼ်ႉ၊မီးၸမ်ၵၼ်တင်းဝဵင်း လုတ်ႉတႃႉ၊ လႄႈတပႄးၸဝ်ႈၼႂ်းဝဵင်း ယွပ်ႉပႃႉ၊ ငိၼ်းလွင်ႈဢၼ် ပေႇတရု၊ မီးယူႇၼႂ်းဝဵင်း လုတ်ႉတႃႉ၊ ယဝ်ႉၸင်ႇ၊ပွႆႇၵူၼ်းသွင်ၵေႃႉၵႂႃႇႁွင်ႉပၢင်းမၼ်းမႃးၶၼ်ၶၼ်ၽႂ်းၽႂ်းဢေႃႈ။-
မၼ်းၵေႃႈလုၵ်ႉသေၸွမ်းၶဝ်မႃးၵမ်းလဵဝ်သေယဝ်ႉ၊မိူဝ်ႈဢၼ်ႁွတ်ႈထိုင်ၸိုင်၊ၶဝ်ဢွၼ်ၵၼ်ၶိုၼ်ႈၵႂႃႇၵႃႈတီႈလုၵ်းႁၢၼ်ႉၼိူဝ်ၼၼ်ႉဢေႃႈ။ ၵႃႈတီႈၼၼ်ႈမႄႈမၢႆႈတင်းလၢႆၸုတုမ်ၵၼ်မႃးလွမ်ႉမၼ်းသေႁွင်ႉႁႆႈလႄႈၼႄပျႃးသိူဝ်ႈတင်းၶူဝ်းၼုင်ႈတင်းလၢႆဢၼ် တေႃႇၵႃႇ၊ ယဵပ်ႉဝႆႉ၊ၸဵမ်မိူဝ်ႈဢၼ်မၼ်းယင်းမီးယူႇလူၺ်ႈၵၼ်တင်းၶဝ်ၼၼ်ႉဢေႃႈ။-
ပေႇတရု၊ ၵေႃႈႁႂ်ႈၶဝ်တင်းသဵင်ႈတင်းလူင်ဢွၵ်ႇၵႂႃႇၵႃႈၼွၵ်ႈသေလႄႈတူဝ်မၼ်းၸမ်ႉ၊ၶုပ်ႉၶဝ်ႇသူးတွင်းယဝ်ႉၸင်ႇ၊ဝၢႆႇၼႃႈၸူးတူဝ်တၢႆၼၼ်ႉလႄႈလၢတ်ႈဝႃႈ၊ “ တပိထႃႉ၊ ႟။ လုၵ်ႉတႃႉ၊” ဝႃႈၼင်ႇၼႆဢေႃႈ။ မႄႈယိင်းၼၼ်ႉ၊မိုၼ်းတႃမႃးလႄႈ မိူဝ်ႈဢၼ်ႁၼ် ပေႇတရု၊ ၸိုင်၊လုၵ်ႉၼင်ႈဢေႃႈ။-
ပေႇတရု၊ ၵေႃႈယိုၼ်ႈမိုဝ်းတိုတ်ႉဢဝ်မၼ်းလုၵ်ႉၸုၵ်းသေယဝ်ႉ၊ႁွင်ႉဢဝ်တပႄးၸဝ်ႈတင်းလၢႆတင်းမႄႈမၢႆႈတင်းသဵင်ႈတင်းမူတ်းၶဝ်ႈမႃးလႄႈဢဝ် တပိထႃႉ၊ ဢၼ်ဢသၢၵ်ႈလိပ်းမႃးၶိုၼ်းယဝ်ႉၼၼ်ႉဢၢပ်ႈပၼ်ၶဝ်ဢေႃႈ။-
ၶၢဝ်ႇငၢဝ်းၼၼ်ႉ၊ၸွတ်ႇတူဝ်ႈၵႂႃႇၵႃႈၼႂ်းဝဵင်း ယွပ်ႉပႃႉ၊ သေလႄႈၵူၼ်းၼမ်ၼႃႇယုမ်ႇမၢတ်ႈၸဝ်ႈၽြႃးဢေႃႈ။-
ပေႇတရု၊ ၵေႃႈသိုပ်ႇယူႇၵႃႈၼႂ်းဝဵင်း ယွပ်ႉပႃႉ၊ လူၺ်ႈၵၼ်တင်းၵူၼ်းႁဵတ်းၼင်ဢၼ်လႆႈၸိုဝ်ႈ သိမုၼ်ႇ၊ ၼၼ်ႉႁိုင်ၼႃႇဢေႃႈ။
ၵႃႈၼႂ်းဝဵင်း ၵေႇသရိ၊ ၼၼ်ႉ မီးၵူၼ်းၵေႃႉၼိုင်ႈ၊ဢၼ်လႆႈၸိုဝ်ႈ ၵေႃးၼီႇလိ၊ လႄႈပဵၼ်ၶုၼ်သိုၵ်းလူင်ဢၼ်ဢုပ်ႉၵူၼ်းသိုၵ်းပၢၵ်ႇၼိုင်ႈၵႃႈၼႂ်းတပ်ႉသိုၵ်း ရူဝ်းမႃႉ၊ ဢၼ်ၶဝ်ႁွင်ႉဝႃႈ၊တပ်ႉ ဢိတလီႇ၊ ၼၼ်ႉဢေႃႈ။-
မၼ်းပဵၼ်ၵူၼ်းဢၼ်မူၼ်ႈပျေႃႇၼႂ်းဝၢတ်ႈၽြႃးမၼ်းဢိၵ်ႇလူၺ်ႈၵူၼ်းႁိူၼ်းၵူၼ်းယေးမၼ်းယုမ်ႇမၢတ်ႈၵူဝ်းၵႂၢႆႇၽြႃးပဵၼ်ၸဝ်ႈဢေႃႈ။ မၼ်းႁဵတ်းတႃႇၼႃႉတၢင်းလူႇဢၼ်ၽေးၸွၼ်းယိုၼ်ႈမႅင်ႇတီႈၵူၼ်းမဵဝ်း ၵျူး၊ ၸိူဝ်းဢၼ်ယၢၵ်ႈဢၼ်ၽၢၼ်တင်းလၢႆလႄႈႁဵတ်းသူးတွင်းပထၼႃႇတီႈၽြႃးပဵၼ်ၸဝ်ႈယူႇသေႇသေႇဢေႃႈ။-
ဝၼ်းၼိုင်ႈၶိင်ႇဝၢႆးဝၼ်းသၢမ်မွင်းၸမ်ၸမ်ၼၼ်ႉ၊မၼ်းလႆႈပျႃႇတိၵ်ႈၼိမိၵ်ႈဢၼ်ႁၼ်တမၢၼ်ႇၵၢင်ႁၢဝ်ၽြႃးပဵၼ်ၸဝ်ႈပႃးၼိုင်ႈထၢင်ႇထၢင်ႇသႃးသႃးပေႃႇမႃးႁွင်ႉမၼ်းလႄႈဝႃႈ၊ “ ၵေႃးၼီႇလိ၊ ႟၊” ဝႃႈၼင်ႇၼႆဢေႃႈ။-
မၼ်းယႅၵ်ႉတူၺ်းတမၢၼ်ႇၵၢင်ႁၢဝ်ၼၼ်ႉသေလႄႈတူၵ်းၸႂ်လႄႈထၢမ်ဝႃႈ၊ “ၸဝ်ႈႁဝ်းမီးလွင်ႈၵႃႈသင်ၶႃႈ၊” ဝႃႈၼင်ႇၼႆဢေႃႈ။ တမၢၼ်ႇၵၢင်ႁၢဝ်ၵေႃႈၶိုၼ်းလၢတ်ႈလႄႈဝႃႈ၊ “ၽြႃးပဵၼ်ၸဝ်ႈၵျိူၵ်ႈၸႂ်ထုၵ်ႇၸႂ်တၢင်းဢၼ်မႂ်းႁဵတ်းသူးတွင်းပထၼႃႇ၊ဢိၵ်ႇတင်းတၢင်းဢၼ်မႂ်းႁဵတ်းတႃႇၼႃႉတၢင်းလူႇ၊ဢၼ်ၽေးၸွၼ်းယိုၼ်ႈမႅင်ႇၼၼ်ႉယဝ်ႉလႄႈမၼ်းၸဝ်ႈတၵ်းၶိုၼ်းတွပ်ႇတႅၼ်းတီႈမႂ်းယဝ်ႉ။-
တေႃႈလဵဝ်ပွႆႇၸႂ်ႉၵူၼ်းၵမ်ႈၽွင်ႈ၊ၵႂႃႇၵႃႈတီႈဝဵင်း ယွပ်ႉပႃႉ၊ ႁႂ်ႈလႆႈႁွင်ႉပၢင်းဢဝ် သိမုၼ်ႇ၊ ဢၼ်လႆႈၸိုဝ်ႈမႂ်ႇႁွင်ႉဝႃႈ၊ ပေႇတရု၊ ၼၼ်ႉမႃးတႃႉ။-
မၼ်းၼၼ်ႉ၊သွၼ်ႈပိုင်ႈယူႇၼႂ်းႁိူၼ်း သိမုၼ်ႇ၊ ၵူၼ်းႁဵတ်းၼင်၊ဢၼ်မီးႁိမ်းၽင်ႇပၢင်ႇလၢႆႇၼၼ်ႉဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈဢၼ်တမၢၼ်ႇၵၢင်ႁၢဝ်ၵႂႃႇယဝ်ႉၸိုင်၊ ၵေႃးၼီႇလိ၊ ႁွင်ႉဢဝ်ၵူၼ်းဢွၼ်ႇမၼ်းသွင်ၵေႃႉ တင်းၵူၼ်းသိုၵ်းၵေႃႉၼိုင်ႈ၊ဢၼ်ၸၢင်ႈၵူဝ်ယမ်ၽြႃးပဵၼ်ၸဝ်ႈလႄႈ ပဵၼ်ၵူၼ်းတမ်းၸႂ်မၼ်းၼၼ်ႉမႃးသေယဝ်ႉ၊-
မွၵ်ႇလၢတ်ႈၼႄလွင်ႈဢၼ်ပဵၼ်မႃးၸိူဝ်းၼၼ်ႉ၊တင်းသဵင်ႈတင်းလူင်ယဝ်ႉၸင်ႇ၊ပွႆႇၸႂ်ႉၶဝ်ၵႂႃႇၸူးဝဵင်း ယွပ်ႉပႃႉ၊ ပုၼ်ႉဢေႃႈ။
ထိုင်ဝၼ်းမိူဝ်ႈၽုၵ်ႈၼၼ်ႉ၊ၼႂ်းမိူဝ်ႈဢၼ်ၶဝ်ယင်းတိုၵ်ႉသိုပ်ႇၶၢဝ်းတၢင်းၵႂႃႇယူႇလႄႈၸမ်ႁိမ်းဝဵင်း ယွပ်ႉပႃႉ၊ ၼၼ်ႉၸိုင်၊ ပေႇတရု၊ ၶိုၼ်ႈၵႂႃႇၵႃႈၼိူဝ်လင်ၶႃးႁိူၼ်းႁႂ်ႈလႆႈသူးတွင်းမိူဝ်ႈၶိင်ႇၵၢင်ဝၼ်းတဵင်ႈၼၼ်ႉဢေႃႈ။-
မိူဝ်ႈၼၼ်ႉ၊မၼ်းတွင်ႉမႆႈမႃးလႄႈမီးၸႂ်ဢၼ်ၶႂ်ႈၵိၼ်တၢင်းၵိၼ်သေယဝ်ႉ၊ယၢမ်းမိူဝ်ႈဢၼ်ယင်းတိုၵ်ႉႁႅၼ်းၽိူၼ်ၶဝ်ႈယူႇၼၼ်ႉမၼ်းလႆႈပျႃႇတိၵ်ႈၼိမိၵ်ႈ၊-
ဢၼ်လႆႈႁၼ်ၵၢင်ႁၢဝ်ၽုၺ်ႇပိုတ်ႇလႄႈၶိူင်ႈပိူင်မဵဝ်းၼိုင်ႈဢၼ်မိူၼ်ၼင်ႇႁၢင်ႈၽႃႈၽိုၼ်ယႂ်ႇဢၼ်မတ်ႉသီႇၸဵင်ႇမၼ်းသေလႄႈယွၼ်ႇတူၵ်းၵႃႈတီႈလိၼ်မိူင်းၼၼ်ႉလူင်းမႃးၸူးမၼ်းဢေႃႈ။-
ၼႂ်းၶိူင်ႈပိူင်ၼၼ်ႉ၊မီးၸႃႉၸဵမ်တူဝ်သီႇတိၼ်၊တူဝ်ဢၼ်လိူၼ်ႈဢၼ်ၵၢၼ်းတင်းလၢႆ၊တင်းၼူၵ်ႉတင်းလၢႆၵူႈၸိူဝ်ႉၵူႈပိူင်ဢေႃႈ။-
သဵင်ၵႂၢမ်းလၢတ်ႈတီႈမၼ်းလႄႈဝႃႈ၊ “ ပေႇတရု၊ ႟။ လုၵ်ႉလႄႈႁႅမ်ၵိၼ်တႃႉ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ ပေႇတရု၊ ၶိုၼ်းလၢတ်ႈလႄႈဝႃႈ၊ “ဢမ်ႇပဵၼ်လႆႈၶႃႈ၊ၸဝ်ႈ႟။ ၵဝ်ၶႃႈဢမ်ႇတွၼ်ႉၵိၼ်ၶိူင်ႈပိူင်ဢၼ်ၼႂ်းတြႃးဝႃႈ၊ပဵၼ်ဢၼ်ၵူဝ်ႈၵိူၵ်ႇလႄႈဢမ်ႇမူတ်းသႂ်ၼၼ်ႉသေပွၵ်ႈၶႃႈ၊” ဝႃႈၼင်ႇၼႆဢေႃႈ။
သဵင်ၵႂၢမ်းသမ်ႉလၢတ်ႈလႄႈဝႃႈ၊ “မဵဝ်းဢၼ်ၽြႃးပဵၼ်ၸဝ်ႈႁႂ်ႈမူတ်းသႂ်ၼၼ်ႉ၊မႂ်းယႃႇပေထၢင်ႇဝႃႈၵူဝ်ႈၵိူၵ်ႇ၊” ဝႃႈၼင်ႇၼႆဢေႃႈ။-
လွင်ႈတၢင်းၼၼ်ႉ၊ပဵၼ်မႃးထူၼ်ႈထိုင်သၢမ်ပွၵ်ႈသေယဝ်ႉ၊ၶိူင်ႈပိူင်ၼၼ်ႉလႆႈၶၢမ်ႇတၢင်းဢၼ်သိမ်းဢဝ်ၶိုၼ်ႈၵႂႃႇၵႃႈၼိူဝ်ၵၢင်ႁၢဝ်သေဢေႃႈ။
ယၢမ်းမိူဝ်ႈဢၼ် ပေႇတရု၊ ယင်းတိုၵ်ႉၶႆႈၸႂ်ဝူၼ်ႉၸႂ်၊လူၺ်ႈပျႃႇတိၵ်ႈၼိမိၵ်ႈၼၼ်ႉၶႂ်ႈဝႃႈသင်ယူႇၼၼ်ႉၸိုင်၊ၵူၼ်းဢၼ်ၶုၼ်သိုၵ်းလူင် ၵေႃးၼီႇလိ၊ ပွႆႇၸႂ်ႉမႃးၸိူဝ်းၼၼ်ႉ၊ထၢမ်ႁႃႁိူၼ်း သိမုၼ်ႇ၊ သေယဝ်ႉ၊ၸုၵ်းယူႇၽၢႆႇၼႃႈၽၵ်းတူယူႇဢေႃႈ။-
ၶဝ်ႁွင်ႉထၢမ်လႄႈဝႃႈ၊ “ၶႅၵ်ႇဢၼ်ႁွင်ႉႁဵၵ်ႈၸိုဝ်ႈဝႃႈ၊ သိမုၼ်ႇ၊ ဢၼ်လႆႈၸိုဝ်ႈမႂ်ႇႁွင်ႉဝႃႈ၊ ပေႇတရု၊ ၼၼ်ႉ၊ၸွင်ႇမီးၵႃႈတီႈၼႆႈၶႃႈႁိုဝ်း၊” ဝႃႈၼင်ႇၼႆဢေႃႈ။
မိူဝ်ႈယၢမ်းၼၼ်ႉ၊ ပေႇတရု၊ ယင်းတိုၵ်ႉၶႆႈၸႂ်ဝူၼ်ႉၸႂ်၊ႁႂ်ႈလႆႈပွင်ႇလႅင်းၸႂ်လွင်ႈပျႃႇတိၵ်ႈၼိမိၵ်ႈၼၼ်ႉၶႂ်ႈဝႃႈသင်ယူႇၼၼ်ႉၸိုင်၊ဝိၺိၺ်ႇၸဝ်ႈလၢတ်ႈတီႈမၼ်းလႄႈဝႃႈ၊ “ထွမ်ႇလူး။ ၵူၼ်းသၢမ်ၵေႃႉမႃးထၢမ်ႁႃမႂ်းတီႈၼႆႈယူႇယဝ်ႉ။-
ပိူဝ်ႈၼႆလႄႈ လုၵ်ႉလႄႈလူင်းၵႂႃႇတႃႉ။ ၵွပ်ႈပိူဝ်ႈၵဝ်ပွႆႇၸႂ်ႉၶဝ်မႃးလႄႈ ယင်းဢမ်ႇၶႆႈၸႂ်ဝူၼ်ႉၸႂ်ယူႇလႄႈ၊ၸွမ်းၶဝ်ၵႂႃႇတႃႉ၊” ဝႃႈၼင်ႇၼႆဢေႃႈ။-
ပေႇတရု၊ ၵေႃႈလူင်းၵႂႃႇလႄႈလၢတ်ႈတီႈၶဝ်လႄႈဝႃႈ၊ “ၵဝ်ပဵၼ်ၵေႃႉဢၼ်သူထၢမ်ႁႃၼႆႉယဝ်ႉ။ မီးလွင်ႈၵႃႈသင်လႄႈမႃး၊” ဝႃႈၼင်ႇၼႆဢေႃႈ။
ၶဝ်ၶိုၼ်းလၢတ်ႈလႄႈဝႃႈ၊ “ၶုၼ်သိုၵ်းလူင် ၵေႃးၼီႇလိ၊ ပွႆႇၸႂ်ႉႁဝ်းၶႃႈမႃးၶႃႈဢေႃႈ။ မၼ်းၼၼ်ႉ၊ပဵၼ်ၵူၼ်းလီၵူၼ်းငၢမ်းဢၼ်ၵူဝ်းၵႂၢႆႇၽြႃးပဵၼ်ၸဝ်ႈလႄႈမီးသရေႇၼႃႈတႃၵႃႈၼႂ်းၵူၼ်းမဵဝ်း ၵျူး၊ တင်းလၢႆဢေႃႈ။ တမၢၼ်ႇၵၢင်ႁၢဝ်ၽြႃးပဵၼ်ၸဝ်ႈပၼ်ပျႃႇတိၵ်ႈၼိမိၵ်ႈတီႈမၼ်း၊ႁႂ်ႈမၼ်းႁွင်ႉပၢင်းဢဝ်ၸဝ်ႈႁဝ်းၵႂႃႇၸူးၵႃႈတီႈႁိူၼ်းမၼ်း၊ႁႂ်ႈလႆႈထွမ်ႇဢဝ်ၵႂၢမ်းၸဝ်ႈႁဝ်းၶႃႈဢေႃႈ၊” ဝႃႈၼင်ႇၼႆဢေႃႈ။-
ပေႇတရု၊ တွၼ်ႈႁပ်ႉဢဝ်ၶဝ်ၶဝ်ႈၵႃႈၼႂ်းႁိူၼ်းသေလႄႈ တိုၵ်းယူင်းႁႂ်ႈၶဝ်ၵိုတ်းသဝ်းၼွၼ်းၶိုၼ်းၼိုင်ႈတီႈၼၼ်ႈသေဢေႃႈ။ ဝၼ်းမိူဝ်ႈၽုၵ်ႈၼၼ်ႉ၊ ပေႇတရု၊ လုၵ်ႉလႄႈၸွမ်းၶဝ်ၵႂႃႇဢေႃႈ။ တပႄးၸဝ်ႈဝဵင်း ယွပ်ႉပႃႉ၊ ၵမ်ႈၽွင်ႈၸွမ်းသူင်ႇဢေႃႈ။-
လိုၼ်းၼၼ်ႉ၊ထႅင်ႈဝၼ်းၼိုင်ႈၶဝ်ၶဝ်ႈၵႃႈၼႂ်းဝဵင်း ၵေႇသရိ၊ လႄႈၵႃႈတီႈၼၼ်ႈ ၵေႃးၼီႇလိ၊ ပႂ်ႉတွၼ်ႈႁပ်ႉ ပေႇတရု၊ ယူႇႁူမ်ႈလူၺ်ႈတင်းပီႈၼွင်ႉၸိူဝ်ႉၶိူဝ်းမၼ်း၊ဢိၵ်ႇတင်းၵေႃႉသႄႈဢၼ်ၸမ်ၸႂ်ၵၼ်တင်းမၼ်းတင်းလၢႆ၊ဢၼ်မၼ်းၽိတ်ႈႁွင်ႉဝႆႉၼၼ်ႉဢေႃႈ။-
မိူဝ်ႈဢၼ် ပေႇတရု၊ ႁွတ်ႈထိုင်ၸိုင်၊ ၵေႃးၼီႇလိ၊ ႁပ်ႉႁူဝ်တၢင်းမၼ်းလႄႈၶုပ်ႉမူပ်ႇႁိမ်းတိၼ်မၼ်းသေယဝ်ႉ၊ႁဵတ်းတၢင်းဢၼ်ရူဝ်ႇသေႇၵူဝ်ယမ်ဢေႃႈ။-
ပေႇတရု၊ တိုတ်ႉမၼ်းလုၵ်ႉလႄႈလၢတ်ႈဝႃႈ၊ “လုၵ်ႉတႃႉ။ ၵဝ်ၼႆႉပဵၼ်ၵူၼ်းၵူၺ်းဢေႃႈ၊” ဝႃႈၼင်ႇၼႆဢေႃႈ။-
ပေႇတရု၊ တူင်ႉတၵ်ႉၸိူဝ်ႉၼင်ႇၼၼ်ယူႇသေလႄႈၶဝ်ႈႁိူၼ်းၵႂႃႇသေယဝ်ႉ၊လႆႈထူပ်းႁၼ်ၵူၼ်းၸုတုမ်ၵၼ်ဝႆႉၼမ်ၼႃႇဢေႃႈ။-
မၼ်းၵေႃႈလၢတ်ႈတီႈၶဝ်လႄႈဝႃႈ၊ “လွင်ႈဢၼ်ၸွမ်းၼင်ႇထုင်းၸၢမ်ႇၽႃႇသႃႇၵူၼ်းမဵဝ်း ၵျူး၊ ၼၼ်ႉ၊မၼ်းဢမ်ႇမီးဢၶႂၢင်ႉဢၼ်တေၶဝ်ႈၸူးလႄႈႁဵတ်းၵေႃႉႁဵတ်းသႄႈလူၺ်ႈၵၼ်တင်းၵူၼ်းတၢင်ႇၸိူဝ်ႉတၢင်ႇၶိူဝ်းဝႃႈၼႆ၊သူႁုလီလီယူႇဢေႃႈ။ ၼႂ်းဝႃႈၼၼ်သေၵေႃႈၼင်ႇႁိုဝ်ၵဝ်တၵ်းဢမ်ႇၶႆႈၸႂ်ဝူၼ်ႉၸႂ်လွင်ႈဢၼ်ၵူၼ်းၵေႃႉၼၼ်ႉ၊ၵေႃႉၼႆႉ၊ပဵၼ်ၵူၼ်းၵူဝ်ႈၵိူၵ်ႇဢမ်ႇမူတ်းသႂ်ၸိုင်၊ၽြႃးပဵၼ်ၸဝ်ႈၼႄပျႃးၵႃႈတီႈၵဝ်ယဝ်ႉ။-
ၵွပ်ႈၼႆႉၸင်ႇ၊မိူဝ်ႈဢၼ်သူပွႆႇၸႂ်ႉၵႂႃႇႁွင်ႉၵဝ်ၼၼ်ႉ၊ၵဝ်ယင်းဢမ်ႇထဵင်ပႅတ်ႈလႄႈမႃးယဝ်ႉ။ ပိူဝ်ႈၼႆလႄႈၵွပ်ႈၸိူဝ်ႉၼင်ႇႁိုဝ်သူႁွင်ႉၵဝ်မႃး၊ၵဝ်ထၢမ်သူလူး၊” ဝႃႈၼင်ႇၼႆဢေႃႈ။
ၵေႃးၼီႇလိ၊ ၵေႃႈၶိုၼ်းလၢတ်ႈလႄႈဝႃႈ၊ “မိူဝ်ႈပူၼ်ႉမႃးသီႇဝၼ်း၊ၶၢဝ်းယၢမ်းၸိူဝ်ႉၼင်ႇၼႆၼၼ်ႉ၊မိူဝ်ႈဢၼ်ၵဝ်ၶႃႈယင်းသူးတွင်းၵႃႈၼႂ်းႁိူၼ်းၵဝ်ၶႃႈယူႇ၊ဢၶိင်ႇသၢမ်မွင်းဝၢႆးမၼ်းၼၼ်ႉၸိုင်၊ၵူၼ်းဢၼ်ၼုင်ႈၶူဝ်းဢၼ်ႁိူဝ်ႈမၢပ်ႈဝႆႉၼၼ်ႉ၊ပေႃႇမႃးၸုၵ်းယူႇၽၢႆႇၼႃႈၵဝ်ၶႃႈသေလႄႈ၊-
လၢတ်ႈဝႃႈ၊ ‘ ၵေႃးၼီႇလိ၊ ႟။ ၽြႃးပဵၼ်ၸဝ်ႈလႆႈငိၼ်းၵႂၢမ်းသူးတွင်းမႂ်းသေလႄႈႁုမၢတ်ႈတၢင်းဢၼ်မႂ်းၽေးၸွၼ်းယိုၼ်ႈမႅင်ႇၼၼ်ႉယဝ်ႉ။-
ပွႆႇၸႂ်ႉၵူၼ်းၵႂႃႇၵႃႈတီႈဝဵင်း ယွပ်ႉပႃႉ၊ လႄႈပၢင်းဢဝ် သိမုၼ်ႇ၊ ၵေႃႉဢၼ်လႆႈၸိုဝ်ႈဢၼ်မႂ်ႇဢၼ်ႁွင်ႉဝႃႈ၊ ပေႇတရု၊ ၼၼ်ႉမႃးတႃႉ။ မၼ်းသွၼ်ႈပိုင်ႈယူႇၼႂ်းႁိူၼ်း သိမုၼ်ႇ၊ ပဵၼ်ၵူၼ်းႁဵတ်းၼင်ဢၼ်ႁိူၼ်းမၼ်းမီးႁိမ်းၽင်ႇပၢင်ႇလၢႆႇၼၼ်ႉဢေႃႈ။ မိူဝ်ႈဢၼ်မၼ်းႁွတ်ႈမႃးၸိုင်၊မၼ်းတၵ်းႁေႃးလၢတ်ႈတီႈမႂ်းဢေႃႈ၊’ ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၸင်ႇ၊ၵဝ်ၶႃႈၸင်ႇပွႆႇၸႂ်ႉၵူၼ်းၵႂႃႇႁွင်ႉပၢင်းၸဝ်ႈႁဝ်းၵမ်းလဵဝ်လႄႈၸဝ်ႈႁဝ်းၵေႃႈမီးၸႂ်လီၸႂ်ဝၢၼ်ႁွတ်ႈမႃးတီႈၶႃႈယဝ်ႉ။ တေႃႈလဵဝ်ၼႆႉ၊ႁဝ်းၶႃႈတင်းသဵင်ႈတင်းလူင်မီးယူႇၵႃႈတီႈၽၢႆႇၼႃႈၽြႃးပဵၼ်ၸဝ်ႈ၊ပႂ်ႉထွမ်ႇၶေႃႈၵႂၢမ်းၸဝ်ႈၽြႃးဢၼ်သင်ႇလၢတ်ႈဝႆႉ၊ႁႂ်ႈၸဝ်ႈႁဝ်းႁေႃးလၢတ်ႈၼၼ်ႉယူႇၶႃႈဢေႃႈ၊” ဝႃႈၼင်ႇၼႆဢေႃႈ။
ပေႇတရု၊ ၵေႃႈပိုတ်ႇပၢၵ်ႇႁေႃးလၢတ်ႈလႄႈဝႃႈ၊ “တေႃႈလဵဝ်ၼႆႉ၊ၵဝ်ႁုမၢတ်ႈလွင်ႈဢၼ်ၽြႃးပဵၼ်ၸဝ်ႈဢမ်ႇလိူၵ်ႈၼႃႈၵူၼ်းလႄႈ၊-
ၽူႈလႂ်သေဢမ်ႇဝႃႈ၊ၵေႃႉဢၼ်ၵူဝ်းၵႂၢႆႇမၼ်းၸဝ်ႈလႄႈၵမ်ၵျၢင်ႉဢၼ်လီဢၼ်ငၢမ်းၼၼ်ႉ၊ပိၵ်ႉသမ်ႉပဵၼ်ၵူၼ်းၸိူဝ်ႉႁိုဝ်မဵဝ်းလႂ်သေၵေႃႈမၼ်းၸဝ်ႈႁပ်ႉတုင်းဢဝ်ဢေႃႈ။-
တြႃးဢၼ်မၼ်းၸဝ်ႈပၼ်ၵႂႃႇၵႃႈတီႈၵူၼ်းမဵဝ်း ဢိသရေး၊ တင်းလၢႆလႄႈ ယင်းတိုၵ်ႉႁေႃးလၢတ်ႈၶၢဝ်ႇတြႃးသိူဝ်းပျေႃႇဢၼ်ပဵၼ်တြႃးတၢင်းၼိမ်၊ၵွပ်ႈပိူဝ်ႈ ၸဝ်ႈယေႇသုၶရိၸ်ႈ၊ ၸဝ်ႈဢၼ်ပဵၼ်ၸဝ်ႈၽြႃးၵႃႈၼိူဝ်ၵႃႈမီးတင်းသဵင်ႈတင်းလူင်ၼၼ်ႉသူႁုယူႇဢေႃႈ။-
သူႁုလွင်ႈဢၼ်တြႃးၸဝ်ႈၼၼ်ႉ၊တႄႇၸႃႉႁေႃးမွၵ်ႇလၢတ်ႈၵႃႈၼႂ်းမိူင်း ၵႃႇလိလႄး၊ လႄႈ ၸွတ်ႇတူဝ်ႈၵႂႃႇၵႃႈၼႂ်းဢိူင်ႇ ဢိသရေး၊ ၵူႈတီႈၵူႈလႅၼ်ဝၢႆးလင်သြႃႇ ယူဝ်းႁၢၼ်ႇ၊ ႁေႃးလၢတ်ႈတြႃးမၢင်ႇၵလႃႇပပ်ႉတိၸမ်ႇ ၼၼ်ႉယူႇဢေႃႈ။-
သူယင်းႁုလွင်ႈဢၼ်ၽြႃးပဵၼ်ၸဝ်ႈဢဝ်ဝိၺိၺ်ႇမူတ်းၸၢင်ႇၸဝ်ႈ၊ဢိၵ်ႇတင်းတၼ်းၶူဝ်းၸဝ်ႈပၼ်ၽိၵ်ႈသိၵ်ႈတီႈ ၸဝ်ႈယေႇသု၊ ၵူၼ်းဝဵင်း ၼႃႇၸရႅတ်ႈ၊ ထၼ်ႇႁိုဝ်ၼၼ်ႉယူႇဢေႃႈ။ မၼ်းၸဝ်ႈၼၼ်ႉ၊ၵႂႃႇၵူႈတီႈၵူႈလႅၼ်လႄႈႁဵတ်းၵျေးၸူးတၢင်းလီ၊ဢိၵ်ႇတင်းႁႂ်ႈၶဝ်ၸိူဝ်းဢၼ်မီးတႂ်ႈမိုဝ်းတၼ်းၶူဝ်း မႃႇၼၢတ်ႈ၊ တင်းလၢႆ၊လႆႈၵတ်းယဵၼ်ၶျၢမ်းသႃႇၵွပ်ႈပိူဝ်ႈၽြႃးပဵၼ်ၸဝ်ႈ မီးယူႇလူၺ်ႈၵၼ်တင်းမၼ်းၸဝ်ႈဢေႃႈ။-
ႁဝ်းၼႆႉ၊လႆႈပဵၼ်သၢၵ်ႈသေႇတီႈလွင်ႈတၢင်းၵူႈၸိူဝ်ႉၵူႈပိူင်၊ဢၼ်မၼ်းၸဝ်ႈႁဵတ်းၼႂ်းမိူင်း ဢိသရေး၊ ဢိၵ်ႇတင်းၼႂ်းဝဵင်း ယေႇရုသလႅမ်ႇ၊ ၼႆႉဢေႃႈ။ ၶဝ်ဢဝ်ၸဝ်ႈၼၼ်ႉ၊တွၵ်ႇၸပ်းသဝ်မႆႉဝႃးမိုဝ်းလႄႈဢဝ်တၢႆဢေႃႈ။-
ၵူၺ်းၵႃႈ၊ဝၢႆးလင်ၼၼ်ႉသၢမ်ဝၼ်းၽြႃးပဵၼ်ၸဝ်ႈႁႂ်ႈမၼ်းၸဝ်ႈလုၵ်ႉၶိုၼ်းလိပ်းမႃးလႄႈၼႄပျႃးတူဝ်မၼ်းၸဝ်ႈထၢင်ႇထၢင်ႇသႃးသႃးဢေႃႈ။-
ၼႂ်းဝႃႈၼၼ်သေၵေႃႈယင်းဢမ်ႇၼႄပျႃးတီႈၵူၼ်းၵူႈၵေႃႉလႄႈၼႄပျႃးတီႈၵူၼ်းဢၼ်ၶၢမ်ႇသၢၵ်ႈသေႇၸိူဝ်းဢၼ်ၽြႃးပဵၼ်ၸဝ်ႈလိူၵ်ႈၵဵပ်းၶၢၼ်းဝႆႉဢွၼ်တၢင်းဢၼ်ပဵၼ်ႁဝ်းဢၼ်ၵိၼ်လူၺ်ႈၵၼ်တင်းမၼ်းၸဝ်ႈ၊ဝၢႆးလင်မၼ်းၸဝ်ႈလုၵ်ႉၵႃႈတၢင်းတၢႆၶိုၼ်းလိပ်းယဝ်ႉၼၼ်ႉ၊ၸိူဝ်းၼႆႉၵူၺ်းဢေႃႈ။-
မိူဝ်ႈၼၼ်ႉ၊မၼ်းၸဝ်ႈပိင်းၺၢပ်ႈတီႈႁဝ်းဝႆႉ၊ႁႂ်ႈႁေႃးလၢတ်ႈၶၢဝ်ႇတြႃးသိူဝ်းပျေႃႇၸဝ်ႈ ၵႃႈတီႈၵူၼ်းတင်းလၢႆ၊ဢိၵ်ႇတင်းႁႂ်ႈၶၢမ်ႇသၢၵ်ႈသေႇလွင်ႈဢၼ်မၼ်းၸဝ်ႈပဵၼ်ၸဝ်ႈဢၼ်ၽြႃးပဵၼ်ၸဝ်ႈၶၢၼ်းဝႆႉ၊ပုၼ်ႈဢၼ်တၵ်းၸီႇယၢင်ႇတြႃးတီႈၵူၼ်းဢၼ်ဢသၢၵ်ႈလိပ်း၊ဢိၵ်ႇတင်းၵူၼ်းတၢႆတင်းလၢႆဢေႃႈ။-
ပရေႃးၽႅတ်ႈ တင်းသဵင်ႈတင်းလူင်ၵေႃႈႁေႃးလၢတ်ႈလွင်ႈမၼ်းၸဝ်ႈလွင်ႈဢၼ်ဝႃႈ၊ၶဝ်ၸိူဝ်းဢၼ်ယုမ်ႇမၢတ်ႈမၼ်းၸဝ်ႈၼၼ်ႉ၊ဢပျတ်ႈၶဝ်တၵ်းလႆႈၶၢမ်ႇတၢင်းဢၼ်ပွႆႇလွတ်ႈၵႃႈၼႂ်းတၼ်းၶူဝ်းၼႃႇမႃႉၸိုဝ်ႈသဵင်မၼ်းၸဝ်ႈဢေႃႈ၊” ဝႃႈၼင်ႇၼႆဢေႃႈ။
ယၢမ်းမိူဝ်ႈဢၼ် ပေႇတရု၊ ယင်းႁေႃးလၢတ်ႈယူႇၼၼ်ႉ၊ဝိၺိၺ်ႇမူတ်းၸၢင်ႇၸဝ်ႈလူင်းမႃးၵႃႈၼိူဝ်ၶဝ်ၸိူဝ်းဢၼ်ထွမ်ႇဢဝ်ၼုၵ်ႈၵပၢတ်ႈတြႃးၸဝ်ႈယူႇၸိူဝ်းၼၼ်ႉဢေႃႈ။-
ၵူၼ်းမဵဝ်း ၵျူး၊ ဢၼ်ယုမ်ႇမၢတ်ႈၸိူဝ်းဢၼ်လုၵ်ႉတီႈဝဵင်း ယွပ်ႉပႃႉ၊ ၸွမ်း ပေႇတရု၊ မႃးၼၼ်ႉ၊ဢွၼ်ၵၼ်ဢၢမ်းလွင်ႈဢၼ်ၵႃႈၼိူဝ်ၵူၼ်းတၢင်ႇၸိူဝ်ႉတၢင်ႇၶိူဝ်းၵေႃႈ ၽြႃးပဵၼ်ၸဝ်ႈသွၼ်းလေႃႇဝိၺိၺ်ႇမူတ်းၸၢင်ႇၸဝ်ႈၼၼ်ႉဢေႃႈ။-
လွင်ႈမၼ်းၸမ်ႉ၊ၶဝ်လႆႈငိၼ်းၵူၼ်းၸိူဝ်းၼၼ်ႉ၊ဢဝ်တင်းၵႂၢမ်းၽႃႇသႃႇဢၼ်လၢၵ်ႇဢၼ်လၢႆးလႄႈယွင်ႈယေႃးတၢင်းဢၼ်ယႂ်ႇမျၢတ်ႈၽြႃးပဵၼ်ၸဝ်ႈၼၼ်ႉဢေႃႈ။-
ပေႇတရု၊ ၵေႃႈလၢတ်ႈလႄႈဝႃႈ၊ “ၵူၼ်းၸိူဝ်းၼႆႉ၊လႆႈၶၢမ်ႇဢဝ်ဝိၺိၺ်ႇမူတ်းၸၢင်ႇၸဝ်ႈ၊မိူၼ်ၸိူဝ်ႉၼင်ႇဢၼ်ႁဝ်းလႆႈၶၢမ်ႇဢဝ်ယဝ်ႉၼၼ်ႉဢေႃႈ။ ပိူဝ်ႈၼႆလႄႈၼင်ႇႁိုဝ်ၶဝ်တၵ်းဢမ်ႇလႆႈၶၢမ်ႇဢဝ်မၢင်ႇၵလႃႇပပ်ႉတိၸမ်ႇလူၺ်ႈၼမ်ႉၸိုင်၊ၽူႈလႂ်ႁၢမ်ႈတၢပ်ႈႁႄႉၶႅၼ်လႆႈ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊မၼ်းၶိုင်ပွင်ႁႂ်ႈၶဝ်လႆႈၶၢမ်ႇဢဝ်မၢင်ႇၵလႃႇပပ်ႉတိၸမ်ႇ၊ၵႃႈၼႂ်းၼႃႇမႃႉၸိုဝ်ႈသဵင် ၸဝ်ႈယေႇသုၶရိၸ်ႈ၊ သေယဝ်ႉ။ လိုၼ်းၼၼ်ႉ ၶဝ်ယွၼ်းႁႂ်ႈ ပေႇတရု၊ ယူႇလူၺ်ႈၶဝ်ႁိုင်တၢၼ်ႇတၢၼ်ႇဢေႃႈ။
တမၢၼ်ႇၸဝ်ႈတင်းလၢႆတင်းပီႈၼွင်ႉၸိူဝ်းဢၼ်ယုမ်ႇမၢတ်ႈတင်းလၢႆ၊ဢၼ်မီးၼႂ်းမိူင်း ယုတႃႉ၊ ၼၼ်ႉ၊လႆႈငိၼ်းလွင်ႈဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်းၶဝ်ၵေႃႈ၊ၶၢမ်ႇဢဝ်ၼုၵ်ႈၵပၢတ်ႈတြႃးၸဝ်ႈၼၼ်ႉလႄႈ၊-
မိူဝ်ႈဢၼ် ပေႇတရု၊ ၶိုၼ်းႁွတ်ႈမႃးတီႈဝဵင်း ယေႇရုသလႅမ်ႇ၊ ၼၼ်ႉၸိုင်၊ၶဝ်ၸိူဝ်းဢၼ်ထုၵ်ႇၸႂ်တၢင်းဢၼ်ၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ၸိူဝ်းၼၼ်ႉတၢင်ႇဢပျတ်ႈလႄႈဝႃႈ၊-
“မႂ်းၼႆႉ၊ၶဝ်ႈလႄႈႁဵတ်းၶႅၵ်ႇၵႃႈၼႂ်းႁိူၼ်းၵူၼ်းဢၼ်ဢမ်ႇၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ၸိူဝ်းၼၼ်ႉလႄႈယင်းၵိၼ်လူၺ်ႈၵၼ်တင်းၶဝ်လူင်ပႄႇ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ ပေႇတရု၊ ၽုၺ်ႇမွၵ်ႇလၢတ်ႈၼႄၶဝ်ၸႃႉၸဵမ်ငဝ်ႈတေႃႇပၢႆလႄႈဝႃႈၸမ်ႉ။
“ယၢမ်းမိူဝ်ႈဢၼ်ၵဝ်ယင်းတိုၵ်ႉသူးတွင်းယူႇ၊ၵႃႈတီႈဝဵင်း ယွပ်ႉပႃႉ၊ ၼၼ်ႉ၊ၵဝ်လႆႈပျႃႇတိၵ်ႈၼိမိၵ်ႈဢၼ်ႁၼ်ၶိူင်ႈပိူင်မဵဝ်းၼိုင်ႈ၊ဢၼ်မိူၼ်ၸိူဝ်ႉၼင်ႇၽႃႈၽိုၼ်ယႂ်ႇဢၼ်မတ်ႉသီႇၸဵင်ႇမၼ်းသေလႄႈ လုၵ်ႉၵႃႈၼိူဝ်ၵၢင်ႁၢဝ်ယွၼ်ႇလူင်းမႃးၵိုတ်းသဝ်းယူႇႁိမ်းၵဝ်ဢေႃႈ။-
ၵဝ်ငွၵ်ႈတူၺ်းၸမ်ၸမ်လႄႈလႆႈႁၼ်သတ်းတူဝ်သီႇတိၼ်တင်းတူဝ်ထိူၼ်ႇတင်းလၢႆ၊တူဝ်ဢၼ်လိူၼ်ႈဢၼ်ၵၢၼ်း၊ဢိၵ်ႇတင်းၼူၵ်ႉတင်းလၢႆၵူႈၸိူဝ်ႉၵူႈပိူင်ဢေႃႈ။-
မိူဝ်ႈၼၼ်ႉ၊ၵဝ်လႆႈငိၼ်းသဵင်လၢတ်ႈတီႈၵဝ်လႄႈဝႃႈ၊ ‘ ပေႇတရု၊ ႟။ လုၵ်ႉလႄႈႁႅမ်ၵိၼ်တႃႉ၊’ ဝႃႈၼင်ႇၼႆဢေႃႈ။-
ၵူၺ်းၵႃႈ၊ၵဝ်လၢတ်ႈလႄႈဝႃႈ၊ ‘ဢမ်ႇပဵၼ်လႆႈၶႃႈ၊ၸဝ်ႈ႟။ တၢင်းၵိၼ်ဢၼ်ၼႂ်းတြႃးဝႃႈ၊ပဵၼ်မဵဝ်းဢၼ်ၵူဝ်ႈၵိူၵ်ႇလႄႈဢမ်ႇမူတ်းသႂ်ၼၼ်ႉဢမ်ႇတွၼ်ႉၶဝ်ႈသူပ်းၵဝ်ၶႃႈသေပွၵ်ႈၶႃႈ၊’ ဝႃႈၼင်ႇၼႆလႄႈ၊-
သဵင်ၼၼ်ႉ၊သမ်ႉပဵၼ်မႃးၵႃႈတီႈၵၢင်ႁၢဝ်လႄႈဝႃႈ၊ ‘မဵဝ်းဢၼ်ၽြႃးပဵၼ်ၸဝ်ႈႁႂ်ႈမူတ်းသႂ်ၼၼ်ႉ၊မႂ်းယႃႇပေထၢင်ႇပဵၼ်ဢၼ်ၵူဝ်ႈၵိူၵ်ႇ၊’ ဝႃႈၼင်ႇၼႆဢေႃႈ။-
ပဵၼ်ၸိူဝ်ႉၼင်ႇၼႆယဝ်ႉသၢမ်ပွၵ်ႈလႄႈၶိူင်ႈပိူင်တင်းမူတ်းလႆႈၶၢမ်ႇတိုတ်ႉၶိုၼ်ႈၵၢင်ႁၢဝ်ၵႂႃႇၶိုၼ်းဢေႃႈ။-
မိူဝ်ႈၼၼ်ႉၵမ်းလဵဝ်၊ၵူၼ်းသၢမ်ၵေႃႉဢၼ်လုၵ်ႉသေၵႃႈတီႈဝဵင်း ၵေႇသရိ၊ လႆႈၶၢမ်ႇတၢင်းဢၼ်ပွႆႇၸႂ်ႉမႃးႁွင်ႉၵဝ်ၼၼ်ႉ၊ႁွတ်ႈထိုင်မႃးၵႃႈတီႈႁိူၼ်းဢၼ်ၵဝ်သွၼ်ႈပိုင်ႈယူႇၼၼ်ႉဢေႃႈ။-
ၼင်ႇႁိုဝ်ၵဝ်တၵ်းဢမ်ႇဝူၼ်ႉၸႂ်သေဢိတ်းလႄႈၸွမ်းၶဝ်ၵႂႃႇၼၼ်ႉ၊ဝိၺိၺ်ႇၸဝ်ႈသင်ႇလၢတ်ႈၵႃႈတီႈၵဝ်ဢေႃႈ။ ပီႈၼွင်ႉတပႄးၸဝ်ႈႁူၵ်းၵေႃႉၼႆႉၵေႃႈလုၵ်ႉသေၵႃႈတီႈဝဵင်း ယွပ်ႉပႃႉ၊ ၸွမ်းၵဝ်ၵႂႃႇၵႃႈတီႈဝဵင်း ၵေႇသရိ၊ လႄႈႁဝ်းတင်းမူတ်းၶဝ်ႈၵႂႃႇၵႃႈၼႂ်းႁိူၼ်းၶုၼ်သိုၵ်းလူင် ၵေႃးၼီႇလိ၊ ဢေႃႈ။-
မၼ်းၵေႃႈမွၵ်ႇလၢတ်ႈၼႄႁဝ်းလွင်ႈဢၼ်မၼ်းႁၼ်တမၢၼ်ႇၵၢင်ႁၢဝ်၊ပေႃႇမႃးၸုၵ်းယူႇၵႃႈၼႂ်းႁိူၼ်းမၼ်းလႄႈလၢတ်ႈဝႃႈ၊ ‘ပွႆႇၸႂ်ႉၵူၼ်းၵႂႃႇၵႃႈတီႈဝဵင်း ယွပ်ႉပႃႉ၊ လႄႈႁွင်ႉပၢင်းဢဝ်ၵူၼ်းၵေႃႉၼိုင်ႈ၊ဢၼ်လႆႈၸိုဝ်ႈ သိမုၼ်ႇပေႇတရု၊ ၼၼ်ႉမႃးတႃႉ။-
မၼ်းတၵ်းႁေႃးလၢတ်ႈတြႃးဢၼ်ၸႃႉၸဵမ်မႂ်း၊ဢိၵ်ႇတင်းၵူၼ်းႁိူၼ်းၵူၼ်းယေးမႂ်းတင်းမူတ်း၊တၵ်းလႆႈၶၢမ်ႇတၢင်းဢၼ်ၵႄႇၶျွတ်ႈဢဝ်ၼၼ်ႉတီႈမႂ်းဢေႃႈ၊’ ဝႃႈၼင်ႇၼႆဢေႃႈ။-
မိူဝ်ႈၵဝ်ၸႃႉႁေႃးလၢတ်ႈၼၼ်ႉ၊ဝိၺိၺ်ႇမူတ်းၸၢင်ႇၸဝ်ႈလူင်းမႃးၵႃႈၼိူဝ်ၶဝ်မိူၼ်မိူၼ်ၵၼ်တင်းတၢင်းဢၼ်လူင်းမႃးၵႃႈၼိူဝ်ႁဝ်းမိူဝ်ႈဢွၼ်တၢင်းၼၼ်ႉဢေႃႈ။-
မိူဝ်ႈၼၼ်ႉ၊ၵဝ်ၶုၵ်းၸႂ်လႆႈၵႂၢမ်းဢၼ်ၸဝ်ႈၽြႃးလၢတ်ႈလႄႈဝႃႈ၊ ‘သြႃႇ ယူဝ်းႁၢၼ်ႇ၊ ပၼ်မၢင်ႇၵလႃႇပပ်ႉတိၸမ်ႇ ၼႂ်းၼမ်ႉဢေႃႈ။ သူၸမ်ႉ၊တၵ်းလႆႈၶၢမ်ႇဢဝ်မၢင်ႇၵလႃႇပပ်ႉတိၸမ်ႇ၊ၵႃႈၼႂ်းဝိၺိၺ်ႇမူတ်းၸၢင်ႇၸဝ်ႈဢေႃႈ၊’ ဝႃႈၼင်ႇၼႆၼၼ်ႉဢေႃႈ။-
ပေႃးၽြႃးပဵၼ်ၸဝ်ႈပၼ်သူးတီႈၵူၼ်းတၢင်ႇၸိူဝ်ႉတၢင်ႇၶိူဝ်းမိူၼ်မိူၼ်ၵၼ်တင်းတၢင်းဢၼ်မၼ်းၸဝ်ႈပၼ်တီႈႁဝ်းမိူဝ်ႈဢၼ်ယုမ်ႇမၢတ်ႈ ၸဝ်ႈယေႇသုၶရိၸ်ႈ၊ ၼၼ်ႉၸိုင်၊ၵဝ်ၼႆႉပဵၼ်ၵူၼ်းၸိူဝ်ႉၼင်ႇႁိုဝ်လႄႈတေႁၢမ်ႈတၢပ်ႈႁႄႉၶႅၼ်ၽြႃးပဵၼ်ၸဝ်ႈလႆႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၶဝ်ငိၼ်းလွင်ႈတၢင်းၸိူဝ်းၼႆႉၸိုင်၊ၶဝ်ယင်းဢမ်ႇတွပ်ႇဢမ်ႇထဵင်လႄႈယွင်ႈယေႃးမုၼ်ၵုင်ႇၽြႃးပဵၼ်ၸဝ်ႈလႄႈဝႃႈ၊ “တီႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၵေႃႈ၊ၽြႃးပဵၼ်ၸဝ်ႈပၼ်ဢၶႂၢင်ႉဢၼ်လႆႈၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်မႂ်ႇမႃးသေယဝ်ႉ၊ႁွတ်ႈထိုင်ဢသၢၵ်ႈတၢၼ်းဢၼ်မႂ်ႇၼၼ်ႉဝႆႉယဝ်ႉ၊” ဝႃႈၼင်ႇၼႆဢေႃႈ။
ၶဝ်ၸိူဝ်းဢၼ်ယုမ်ႇမၢတ်ႈၵမ်ႈၽွင်ႈၸိူဝ်းဢၼ်လႆႈၽၢတ်ႇၽႄၵႂႃႇ၊ၵွပ်ႈလူၺ်ႈၽေးဢၼ်ၼိၵ်ႈၸၢၵ်ႈငႅၼ်းသႄးဢၼ်တူၵ်းႁွတ်ႈၼိူဝ်သြႃႇ သထေႇၽၢၼ်ႇ၊ လႆႈၶၢမ်ႇတၢႆၼၼ်ႉ၊ဢွၵ်ႇပၢႆႈၵႂႃႇတေႃႇထိုင်ႁွတ်ႈမိူင်း ၽိၼိတ်ႉ၊ ၵုၼ် သၢႆးပရၢတ်ႈ၊ တင်းဝဵင်း ဢၼ်ႇတိဢူၵ်ႉ၊ ၸိူဝ်းၼၼ်ႉ၊ႁေႃးလၢတ်ႈၼုၵ်ႈၵပၢတ်ႈတြႃးၸဝ်ႈတီႈၵူၼ်းမဵဝ်း ၵျူး၊ ၶဝ်ၵူၺ်းဢေႃႈ။-
ၵူၺ်းၵႃႈ၊ၵူၼ်းၸိူဝ်းဢၼ်ယုမ်ႇမၢတ်ႈၵမ်ႈၽွင်ႈဢၼ်လုၵ်ႉၵႃႈတီႈၵုၼ် သၢႆးပရၢတ်ႈ၊ တင်းမိူင်း ၵုရေႇၼေႇ၊ မႃးၸိူဝ်းၼၼ်ႉၵေႃႈႁွတ်ႈၵႂႃႇၵႃႈတီႈဝဵင်း ဢၼ်ႇတိဢူၵ်ႉ၊ လႄႈႁေႃးလၢတ်ႈတြႃးသိူဝ်းပျေႃႇလွင်ႈ ၸဝ်ႈယေႇသု၊ တီႈၵူၼ်းမဵဝ်း ၵရိၵ်ႉ၊ တင်းလၢႆဢေႃႈ။-
ပိူဝ်ႈဢၼ်တၼ်းၶူဝ်းၽြႃးပဵၼ်ၸဝ်ႈပႃးလူၺ်ႈၵၼ်တင်းၶဝ်လႄႈ ၵူၼ်းၼမ်ၼႃႇယုမ်ႇမၢတ်ႈသေယဝ်ႉ၊ၶဝ်ႈမႃးၽၢႆႇၸဝ်ႈၽြႃးဢေႃႈ။
ၶၢဝ်ႇငၢဝ်းလွင်ႈတၢင်းၼၼ်ႉ၊ႁွတ်ႈထိုင်ၵူၼ်းၸိူဝ်းၸဝ်ႈဝဵင်း ယေႇရုသလႅမ်ႇ၊ လႄႈၶဝ်ပွႆႇၸႂ်ႉ ပႃႇၼပႃႉ၊ ၵႂႃႇၸူးဝဵင်း ဢၼ်ႇတိဢူၵ်ႉ၊ ဢေႃႈ။-
မၼ်းႁွတ်ႈထိုင်ၵႂႃႇလႄႈလႆႈႁၼ်သုၵျေးၸူးၽြႃးပဵၼ်ၸဝ်ႈၵႃႈၼိူဝ်ၶဝ်သေယဝ်ႉ၊မၼ်းသိူဝ်းပျေႃႇလႄႈတိုၵ်းယူင်းႁႂ်ႈၶဝ်မီးသဵတ်ႈၸႃႇမၼ်ႈၶိူင်ႇဢမ်ႇၽၢတ်ႇဢမ်ႇယၢၼ်ၸဝ်ႈၽြႃးၼၼ်ႉဢေႃႈ။-
ပိူဝ်ႈဢၼ် ပႃႇၼပႃႉ၊ ၼႆႉ၊ပဵၼ်ၵူၼ်းလီတဵမ်ဝႆႉတင်းဝိၺိၺ်ႇမူတ်းၸၢင်ႇၸဝ်ႈ၊တင်းတၢင်းယုမ်ႇမၢတ်ႈၼၼ်ႉလႄႈၵူၼ်းၼမ်ၼႃႇၶဝ်ႈမႃးၽၢႆႇၸဝ်ႈၽြႃးဢေႃႈ။
လိုၼ်းၼၼ်ႉ၊ ပႃႇၼပႃႉ၊ ၵႂႃႇၵႃႈတီႈဝဵင်း တႃႇသု၊ ႁႂ်ႈလႆႈသွၵ်ႈႁႃ သေႃးလု၊ ဢေႃႈ။-
မိူဝ်ႈဢၼ်ထူပ်းႁၼ်ၸိုင်၊ႁွင်ႉဢဝ်မၼ်းမႃးၵႃႈတီႈဝဵင်း ဢၼ်ႇတိဢူၵ်ႉ၊ လႄႈပီၼိုင်ႈတဵမ်တဵမ်၊ၶဝ်သွင်ၵေႃႉၸုတုမ်ၵၼ်တင်းၵူၼ်းၸိူဝ်းၸဝ်ႈတင်းလၢႆ၊သွၼ်ပၼ်မူႇၵူၼ်းၼမ်ၼႃႇဢေႃႈ။ ၼႆႉၸမ်ႉ၊ၵႃႈၼႂ်းဝဵင်း ဢၼ်ႇတိဢူၵ်ႉ၊ ၼၼ်ႉ၊ပိူၼ်ႈတႄႇၸႃႉႁွင်ႉတပႄးၸဝ်ႈဝႃႈ၊ၶရိၸ်ႈယၢၼ်ႇဝႃႈၼႆဢေႃႈ။
ၽွင်းယၢမ်းၼၼ်ႉ ပရေႃးၽႅတ်ႈ ၵမ်ႈၽွင်ႈလုၵ်ႉတီႈဝဵင်း ယေႇရုသလႅမ်ႇ၊ ၵႂႃႇၵႃႈတီႈဝဵင်း ဢၼ်ႇတိဢူၵ်ႉ၊ ဢေႃႈ။-
ၼႂ်းၶဝ်ၼၼ်ႉၵေႃႉၼိုင်ႈ၊ဢၼ်လႆႈၸိုဝ်ႈ ဢႃႇၵပု၊ ၼၼ်ႉ၊လုၵ်ႉၸုၵ်းသေယဝ်ႉ၊ၵွပ်ႈပိူဝ်ႈဝိၺိၺ်ႇၸဝ်ႈလႄႈၽုၺ်ႇလၢတ်ႈလႄႈဝႃႈ၊ “ၵႃႈၼိူဝ်လိၼ်မိူင်းၼႆႉတင်းသဵင်ႈတင်းလူင်၊တၵ်းပဵၼ်ၶဝ်ႈၵႃႈမၢၵ်ႇပႅင်းယႂ်ႇၼႃႇဢေႃႈ၊” ဝႃႈၼင်ႇၼႆၽေးၼၼ်ႉတႄႇပဵၼ်မႃးၼႂ်းၸူဝ်ႈပၢၼ်ၶုၼ်ႁေႃၶမ်း ၵေႇသႃႇၵလေႃးတိ၊ ဢေႃႈ။-
တပႄးၸဝ်ႈတင်းလၢႆၽွမ်ႉၸႂ်ၵၼ်ဢဝ်လွင်ႈၵႃႈဢၼ်ႁင်းၽႂ်ႁင်းမၼ်းတၢတ်ႈၼိူင်ႇလႆႈၼၼ်ႉ၊တၵ်းသူင်ႇပၼ်တၢင်းဢၼ်ၸွႆႈၵမ်ႉၸွႆႈထႅမ်ၵႂႃႇၵႃႈတီႈပီႈၼွင်ႉၸိူဝ်းဢၼ်ယုမ်ႇမၢတ်ႈၵႃႈၼႂ်းမိူင်း ယုတႃႉ၊ တင်းလၢႆဢေႃႈ။-
ၶဝ်ႁဵတ်းၸွမ်းလႄႈဢဝ်ငိုၼ်းလူႇၽၢၵ်ႇ ပႃႇၼပႃႉ၊ ဢိၵ်ႇတင်း သေႃးလု၊ သူင်ႇႁွတ်ႈၵူၼ်းဢုပ်ႉၸိူဝ်းၸဝ်ႈတင်းလၢႆဢေႃႈ။
ၽွင်းယၢမ်းၼၼ်ႉ၊ၸဝ်ႈၽႃႉ ႁေႇရူတ်ႈ၊ တႄႇၸႃႉ၊ၼိၵ်ႈၸၢၵ်ႈတဵၵ်းငႅၼ်းၵူၼ်းၶဝ်ႈၸိူဝ်းၸဝ်ႈၵမ်ႈၽွင်ႈဢေႃႈ။-
မၼ်းဢဝ်လၢပ်ႇၽၼ်း ယႃႇၵုပ်ႈ၊ ပီႈဢၢႆႈ ယူဝ်းႁၢၼ်ႇ၊ ၼၼ်ႉတၢႆဢေႃႈ။-
မိူဝ်ႈဢၼ်မၼ်းႁၼ်ၵူၼ်းမဵဝ်း ၵျူး၊ ၶဝ်ထုၵ်ႇၸႂ်ၼၼ်ႉၸိုင်၊မၼ်းသမ်ႉတိဢဝ် ပေႇတရု၊ (ၼႂ်းဝၼ်းပွႆးၵိၼ်ၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈၼၼ်ႉ) ဢေႃႈ။-
ဝၢႆးလင်မၼ်းတိဢဝ်ယဝ်ႉၼၼ်ႉ၊မၼ်းဢဝ် ပေႇတရု၊ သႂ်ႇထွင်ႇဝႆႉလႄႈ ဢၢပ်ႈပၼ်ၼႂ်းမိုဝ်းၵူၼ်းသိုၵ်းသီႇၸုမ်း၊ဢၼ်ယေႈၸုမ်းမီးသီႇၵေႃႉပႂ်ႉဝႆႉဢေႃႈ။ ၸဝ်ႈၽႃႉ ႁေႇရူတ်ႈ၊ ၼၼ်ႉ၊ဢၢင်ႈတၵ်းၸီႇယၢင်ႇၸႅတ်ႈထၢမ်မၼ်းၵႃႈတီႈၽၢႆႇၼႃႈၵူၼ်းတင်းလၢႆ၊ဝၢႆးပွႆး ပသၶႃႇ၊ ဢေႃႈ။-
ႁဵတ်းၼၼ်လႄႈ ပေႇတရု၊ လႆႈၶမ်တူၵ်းထွင်ႇဝႆႉယဝ်ႉၸင်ႇ၊ၵူၼ်းၸိူဝ်းၸဝ်ႈတင်းလၢႆဢွၼ်ၵၼ်ၶတ်းၸႂ်သူးတွင်းပထၼႃႇ၊တီႈၽြႃးပဵၼ်ၸဝ်ႈပုၼ်ႈမၼ်းဢေႃႈ။
ၼႂ်းၶိင်ႇတဵင်ႈၶိုၼ်းဢၼ်ၸမ်တၵ်းထိုင်ဝၼ်းဢၼ်ၸဝ်ႈၽႃႉ ႁေႇရူတ်ႈ၊ တၵ်းဢဝ် ပေႇတရု၊ ဢွၵ်ႇၼႄၵူၼ်းတင်းလၢႆၼၼ်ႉ၊ ပေႇတရု၊ ၼွၼ်းလပ်းယူႇၼႂ်းဝူင်ႈၵၢင်ၵူၼ်းပႂ်ႉသွင်ၵေႃႉဢေႃႈ။ မၼ်းလႆႈၶၢမ်ႇတၢင်းဢၼ်ပိူၼ်ႈဢဝ်ၸိူၵ်ႈလဵၵ်းသွင်သဵၼ်ႈမတ်ႉဝႆႉလႄႈ ၵူၼ်းသိုၵ်းၸိူဝ်းဢၼ်တူၵ်းပုၼ်ႈၽွၼ်းၵေႃႈပႂ်ႉၽၵ်းတူထွင်ႇဝႆႉယူႇၵူႈၵေႃႉဢေႃႈ။-
မိူဝ်ႈၼၼ်ႉၵမ်းလဵဝ်၊တမၢၼ်ႇၵၢင်ႁၢဝ်ထႃႇဝရႃႉၽြႃးမႃးၸုၵ်းယူႇၵႃႈတီႈၼၼ်ႈလႄႈဢၼ်လႅင်းထွင်ႇႁိူဝ်ႈဝႆႉၼႂ်းထွင်ႇၼၼ်ႉဢေႃႈ။ တမၢၼ်ႇၵၢင်ႁၢဝ်ၼၼ်ႉတူပ်းႁူဝ်မႃႇ ပေႇတရု၊ ပူၵ်းႁႂ်ႈမၼ်းတိုၼ်ႇလႄႈလၢတ်ႈဝႃႈ၊ “လုၵ်ႉၽႂ်းၽႂ်းတႃႉ၊” ဝႃႈၼင်ႇၼႆဢေႃႈ။ ၸိူၵ်ႈလဵၵ်းၸိူဝ်းၼၼ်ႉ၊လွတ်ႈတူၵ်းမိုဝ်းမၼ်းၵႂႃႇၵူၺ်းမၼ်းဢေႃႈ။-
မိူဝ်ႈၼၼ်ႉ၊တမၢၼ်ႇၵၢင်ႁၢဝ်လၢတ်ႈလႄႈဝႃႈ၊ “ႁတ်ႉသၢႆဢႅဝ်မႂ်းလႄႈတိုဝ်းသွၵ်းတိၼ်မႂ်းတႃႉ၊” ဝႃႈၼင်ႇၼႆလႄႈမၼ်းႁဵတ်းၸွမ်းသေယဝ်ႉ၊သမ်ႉလၢတ်ႈထႅင်ႈလႄႈဝႃႈ၊ “ၼုင်ႈသိူဝ်ႈယၢဝ်းမႂ်းလႄႈၸွမ်းၵဝ်မႃးတႃႉ၊” ဝႃႈၼင်ႇၼႆဢေႃႈ။-
ပေႇတရု၊ ၸွမ်းမၼ်းဢွၵ်ႇထွင်ႇၵႂႃႇယူႇလႄႈယင်းဢမ်ႇႁုဝႃႈပဵၼ်တႄႉတႄႉလႄႈယင်းထၢင်ႇဝႃႈ၊မၼ်းလႆႈႁၼ်ပျႃႇတိၵ်ႈၼိမိၵ်ႈယူႇဢေႃႈ။-
မိူဝ်ႈဢၼ်ၶဝ်ပူၼ်ႉသေၵူၼ်းပႂ်ႉယၢမ်းၸုမ်းတီႈၼိုင်ႈၵႂႃႇလႄႈသမ်ႉပူၼ်ႉၵူၼ်းပႂ်ႉယၢမ်းၸုမ်းတီႈသွင်သေယဝ်ႉ၊ႁွတ်ႈထိုင်ၵႃႈတီႈၽၵ်းတူလဵၵ်းတီႈသုတ်းပုၼ်ႉ ဢၼ်ၶဝ်ႈၸူးၵႃႈၼႂ်းဝဵင်းၵႂႃႇၼၼ်ႉၸိုင်၊ၽၵ်းတူၼၼ်ႉယူႇလၢႆလၢႆၽုၺ်ႇဝႆႉၵူၺ်းမၼ်းလႄႈၶဝ်ဢွၵ်ႇၵႂႃႇၸွမ်းတၢင်းသဵၼ်ႈၼိုင်ႈသေယဝ်ႉ၊တမၢၼ်ႇၵၢင်ႁၢဝ်ၼၼ်ႉ၊ၽၢတ်ႇယၢၼ်သေၵႃႈတီႈ ပေႇတရု၊ ၵမ်းလဵဝ်ဢေႃႈ။
ပေႇတရု၊ ႁုတူဝ်မႃးလႄႈလၢတ်ႈဝႃႈ၊ “တေႃႈလဵဝ်ၼႆႉၵဝ်လႆႈႁုဝႃႈပဵၼ်တႄႉတႄႉၼၼ်ႉယဝ်ႉ။ ၸဝ်ႈၽြႃးပွႆႇၸႂ်ႉတမၢၼ်ႇၵၢင်ႁၢဝ်မၼ်းၸဝ်ႈ၊မႃးၵႄႇသႄႇၼုၵ်ႈဢဝ်ၵဝ်သေၵႃႈၼႂ်းမိုဝ်းၸဝ်ႈၽႃႉ ႁေႇရူတ်ႈ၊ ဢိၵ်ႇတင်းၵႃႈၼႂ်းတၢင်းဢၼ်ၵူၼ်းမဵဝ်း ၵျူး၊ ၶဝ်မုင်ႈမွင်းႁႂ်ႈလႆႈႁဵတ်းၵႃႈတီႈၵဝ်ၵူႈၸိူဝ်းၵူႈပိူင်ၼၼ်ႉယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈဢၼ်မၼ်းႁုတူဝ်မႃး လီလီငၢမ်းငၢမ်းယဝ်ႉၸိုင်၊မၼ်းၵႂႃႇၸူးႁိူၼ်း မႃႇရိ၊ ဢၼ်ပဵၼ်မႄႈ ယူဝ်းႁၢၼ်ႇ ဢၼ်တၢင်ႇၸိုဝ်ႈဝႃႈ၊ မႃႇၵု၊ ၼၼ်ႉလႄႈတီႈၼၼ်ႈၵူၼ်းၼမ်ၼႃႇၸုတုမ်ၵၼ်ႁဵတ်းသူးတွင်းပထၼႃႇယူႇဢေႃႈ။-
ပေႇတရု၊ တွႆႇၽၵ်းတူၼႃႈႁိူၼ်းလႄႈ ရူဝ်းတေႇ၊ ဢၼ်ပဵၼ်သၢဝ်ၵူၼ်းၸႂ်ႉၶဝ်၊မႃးတူၺ်းႁႂ်ႈလႆႈႁုဝႃႈ၊ပဵၼ်ၽူႈလႂ်ၼၼ်ႉဢေႃႈ။-
မၼ်းတွင်းသဵင် ပေႇတရု၊ လႄႈပိူဝ်ႈဝႃႈ၊ၸူမ်းသိူဝ်းၼႃႇၽႅဝ်ၼၼ်ႉယင်းဢမ်ႇၽုၺ်ႇပၼ်လႄႈၶိုၼ်းလႅၼ်ႈၶဝ်ႈၵႂႃႇမွၵ်ႇလၢတ်ႈလွင်ႈဢၼ် ပေႇတရု၊ မႃးၸုၵ်းယူႇၵႃႈၼွၵ်ႈၽၵ်းတူယူႇယဝ်ႉၼၼ်ႉဢေႃႈ။-
ၶဝ်ၸိူဝ်းၼၼ်ႉ၊ယင်းလၢတ်ႈတီႈမၼ်းလႄႈဝႃႈ၊ “မႂ်းယွင်ႇယဝ်ႉ၊” ဝႃႈၼင်ႇၼႆလႄႈမၼ်းၵေႃႈလၢတ်ႈတႄႉတႄႉဝႃႈဝႃႈ၊လွင်ႈဢၼ်ၸႂ်ႈတႄႉတႄႉၼၼ်ႉသေယဝ်ႉ၊ၶဝ်သမ်ႉဝႃႈ၊ “ပဵၼ်တမၢၼ်ႇၵၢင်ႁၢဝ် ပေႇတရု၊ ဢေႃႈ၊” ဝႃႈၼင်ႇၼႆဢေႃႈ။
ၽွင်းယၢမ်းၼၼ်ႉ ပေႇတရု၊ တွႆႇယူႇၶိူဝ်းၶိူဝ်းလႄႈၶဝ်ၽုၺ်ႇၽၵ်းတူႁၼ်မၼ်းသေယဝ်ႉ၊ဢၢမ်းၼႃႇလူင်လၢင်ဢေႃႈ။-
မၼ်းၵေႃႈၼႄမိုဝ်းႁႂ်ႈၶဝ်ယူႇတဵတ်ႇတဵတ်ႇသေလႄႈမွၵ်ႇလၢတ်ႈၼႄလွင်ႈဢၼ်ၸဝ်ႈၽြႃးႁဵတ်းၸိူဝ်ႉၼင်ႇႁိုဝ်၊ဢဝ်မၼ်းဢွၵ်ႇထွင်ႇမႃးၼၼ်ႉတီႈၶဝ်သေယဝ်ႉ၊သင်ႇလၢတ်ႈလႄႈဝႃႈ၊ “မွၵ်ႇလၢတ်ႈလွင်ႈတၢင်းၸိူဝ်းၼႆႉတီႈ ယႃႇၵုပ်ႈ၊ တင်းပီႈၼွင်ႉၸိူဝ်းဢၼ်ယုမ်ႇမၢတ်ႈတင်းလၢႆၼၼ်ႉတႃႉ၊” ဝႃႈၼင်ႇၼႆယဝ်ႉၸင်ႇ၊ဢွၵ်ႇၵႂႃႇတၢင်ႇတီႈသေဢေႃႈ။
မိူဝ်ႈဢၼ်မိူင်းလႅင်းမႃးၸိုင်၊ၵူၼ်းသိုၵ်းဢၼ်ပႂ်ႉၸိူဝ်းၼၼ်ႉလၢတ်ႈၵၼ်ဢူၼ်မေႃးယူႇလူၺ်ႈ၊ ပေႇတရု၊ ႁၢႆၵႂႃႇတၢင်းလႂ်ၼၼ်ႉယူႇဢေႃႈ။-
ၸဝ်ႈၽႃႉ ႁေႇရူတ်ႈ၊ ၵေႃႈပူင်ဢမိင်ႉႁႂ်ႈသွၵ်ႈႁႃသေၵေႃႈၶဝ်ဢမ်ႇထူပ်းဢမ်ႇႁၼ်။ ပိူဝ်ႈၼႆလႄႈမၼ်းၸႅတ်ႈထၢမ်ၵူၼ်းသိုၵ်းဢၼ်ပႂ်ႉၸိူဝ်းၼၼ်ႉသေယဝ်ႉ၊ၸီႇယၢင်ႇႁႂ်ႈဢဝ်ၶဝ်တၢႆဢေႃႈ။ လိုၼ်းၼၼ်ႉ၊ၸဝ်ႈၽႃႉ ႁေႇရူတ်ႈ၊ မိူင်း ယုတႃႉ၊ ၵႂႃႇယူႇသဝ်းၵႃႈတီႈဝဵင်း ၵေႇသရိ၊ ႁိုင်တၢၼ်ႇတၢၼ်ႇဢေႃႈ။
ပိူဝ်ႈဢၼ်ၸဝ်ႈၽႃႉ ႁေႇရူတ်ႈ၊ ၶႂ်ႈၸႃႉတေႃႇၵူၼ်းဝဵင်း တုရု၊ တင်းၵူၼ်းဝဵင်း ၸတုၼ်ႇ၊ တင်းလၢႆလႄႈၵူၼ်းဝဵင်းၸိူဝ်းၼၼ်ႉၽွမ်ႉၵၼ်ၵႂႃႇၸူးမၼ်းၸဝ်ႈဢေႃႈ။ ၶဝ်ၶဝ်ႈၸူးဢမၢတ်ႈဢၼ်လႆႈၸိုဝ်ႈ လတ်ႉတု၊ ဢွၼ်တၢင်းႁႂ်ႈမၼ်းၸွႆႈလၢတ်ႈၶျေႃးဝွၼ်းပၼ်ဢေႃႈ။ ၶဝ်ၸင်ႇၶဝ်ႈၸူးတီႈၸဝ်ႈၽႃႉလႄႈတွင်းပၢၼ်ႇႁႂ်ႈမိူင်းၶဝ်ၶိုၼ်းလီၵၼ်မႃးဢေႃႈ။ လွင်ႈမၼ်းၸမ်ႉ၊ၵူၼ်းဝဵင်းၸိူဝ်းၼၼ်ႉ၊လႆႈၶၢမ်ႇဢဝ်ၶဝ်ႈၼမ်ႉတၢင်းၵိၼ်သေၵႃႈတီႈမိူင်းၸဝ်ႈၽႃႉၼၼ်ႉယူႇဢေႃႈ။
ၼႂ်းဝၼ်းဢၼ်ၶဵၼ်းဝႆႉၼၼ်ႉ၊ၸဝ်ႈၽႃႉ ႁေႇရူတ်ႈ၊ ၼုင်ႈမႆၶူဝ်းၼုင်ႈၶုၼ်သေလႄႈ ၼင်ႈၵႃႈၼိူဝ်ပလၢင်ႇၸဝ်ႈသေယဝ်ႉ၊လၢတ်ႈၵႂၢမ်းတေႃႇၵူၼ်းတင်းလၢႆဢေႃႈ။-
ၵူၼ်းၸိူဝ်းၼၼ်ႉပၢဝ်ႇသေႃႇလႄႈဝႃႈ၊ “သဵင်ၼႆႉၸမ်ႉ၊ဢမ်ႇၸႂ်ႈသဵင်ၵူၼ်း။ ပဵၼ်သဵင်ၽြႃးဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈဢၼ်ဝႃႈၼင်ႇၼႆၸိုင်၊ၸဝ်ႈၽႃႉၼၼ်ႉ၊ဢမ်ႇၼပ်ႉဢမ်ႇၶၢၼ်းမုၼ်သရေႇၽြႃးပဵၼ်ၸဝ်ႈလႄႈတမၢၼ်ႇၵၢင်ႁၢဝ်ထႃႇဝရႃႉၽြႃးထုပ်ႉၼၢၵ်ႈမၼ်းတူၵ်းၵမ်းလဵဝ်သေယဝ်ႉ၊ၼွၼ်သႆႉၵိၼ်မၼ်းလႄႈတၢႆၵႂႃႇဢေႃႈ။
ၽွင်းယၢမ်းၼၼ်ႉ၊ၼုၵ်ႈၵပၢတ်ႈတြႃးၽြႃးပဵၼ်ၸဝ်ႈသိုပ်ႇၽႄႈၸွတ်ႇတူဝ်ႈၵႂႃႇလႄႈယႂ်ႇၵႂၢင်ႈၼမ်ၵိုၼ်းမႃးဢေႃႈ။
ပႃႇၼပႃႉ၊ တင်း သေႃးလု၊ ၵေႃႈမိူဝ်ႈဢၼ်ၼႃႈၵၢၼ်သႃႇသၼႃႇယဝ်ႉတူဝ်ႈၵႂႃႇၼၼ်ႉ၊ႁွင်ႉဢဝ် ယူဝ်းႁၢၼ်ႇ၊ ဢၼ်မီးၸိုဝ်ႈထႅင်ႈဝႃႈ၊ မႃႇၵု၊ ၸွမ်းၶဝ်သွင်ၵေႃႉဢွၵ်ႇဝဵင်း ယေႇရုသလႅမ်ႇ၊ မိူဝ်းၵႂႃႇသေဢေႃႈ။
ၼႂ်းၸိူဝ်းၸဝ်ႈဝဵင်း ဢၼ်ႇတိဢူၵ်ႉ၊ ၼၼ်ႉ၊မီးၶဝ်ၸိူဝ်းဢၼ်ႁဵတ်းပရေႃးၽႅတ်ႈ တင်းၸိူဝ်းဢၼ်ႁဵတ်းသြႃႇသွၼ်တြႃးဢၼ်ပဵၼ် ပႃႇၼပႃႉ၊ ဢိၵ်ႇတင်း သုမွင်ႇ၊ ဢၼ်လႆႈႁွင်ႉ ၼိၵႃႇ၊ ဢိၵ်ႇတင်း လုၵိ၊ ၵူၼ်းဝဵင်း ၵုရေႇၼေႇ၊ ဢိၵ်ႇတင်း မႃႇၼႅၼ်ႇ၊ ဢၼ်မိူဝ်ႈလဵၵ်ႉလႆႈပဵၼ်ၵေႃႉသႄႈၸဝ်ႈၽႃႉ ႁေႇရူတ်ႈ၊ မႃးဢိၵ်ႇတင်း သေႃးလု၊ ဢေႃႈ။-
ၼႂ်းမိူဝ်ႈဢၼ်ၶဝ်ယင်းႁဵတ်းဝၢတ်ႈၽြႃးလႄႈၵမ်သိၼ်ဢမ်ႇၵိၼ်တၢင်းၵိၼ်ယူႇၼၼ်ႉၸိုင်၊ဝိၺိၺ်ႇမူတ်းၸၢင်ႇၸဝ်ႈမီးဢမိင်ႉလႄႈဝႃႈ၊ “ၶၢၼ်းဢဝ် ပႃႇၼပႃႉ၊ ဢိၵ်ႇတင်း သေႃးလု၊ ဝႆႉပုၼ်ႈၵဝ်ႁႂ်ႈလႆႈထၢမ်းႁဵတ်းၼႃႈၵၢၼ်ဢၼ်ၵဝ်ႁွင်ႉဢဝ်ၼၼ်ႉတႃႉ၊” ဝႃႈၼင်ႇၼႆဢေႃႈ။
ၵႃႈၼင်ႇဢၼ်မၼ်းၸဝ်ႈဝႃႈၼၼ်ႉ၊ၶဝ်ၵမ်သိၼ်ဢမ်ႇၵိၼ်တၢင်းၵိၼ်လႄႈႁဵတ်းပထၼႃႇသူးတွင်းသေယဝ်ႉ၊ဢဝ်မိုဝ်းတၢင်ႇၵႃႈၼိူဝ်ႁူဝ်ၶဝ်သွင်ၵေႃႉၼၼ်ႉလႄႈပွႆႇၸႂ်ႉၶဝ်ၵႂႃႇသေဢေႃႈ။
ႁဵတ်းၼၼ်လႄႈ ဝိၺိၺ်ႇမူတ်းၸၢင်ႇၸဝ်ႈဢွၼ်သူင်ႇ ပႃႇၼပႃႉ၊ တင်း သေႃးလု၊ လူင်းၵႂႃႇၵႃႈတီႈဝဵင်း သေလုၵိ၊ လႄႈသမ်ႉလုၵ်ႉသေၵႃႈတီႈၼၼ်ႈၶီႇႁိူဝ်းသၢင်းၽေႃးၵႂႃႇၸူးၵုၼ် သၢႆးပရၢတ်ႈ၊ ပုၼ်ႉဢေႃႈ။-
မိူဝ်ႈဢၼ်ႁွတ်ႈထိုင်ဝဵင်း သႃႇလမိ၊ ၸိုင်၊ၶဝ်ႁေႃးလၢတ်ႈၼုၵ်ႈၵပၢတ်ႈတြႃးၽြႃးပဵၼ်ၸဝ်ႈၵႃႈၼႂ်းၸရွပ်ႈႁေႃးတြႃးၵူၼ်းမဵဝ်း ၵျူး၊ ၶဝ်ဢေႃႈ။ ယူဝ်းႁၢၼ်ႇမႃႇၵု၊ ၼၼ်ႉ၊မီးယူႇလူၺ်ႈၵၼ်တင်းၶဝ်လႄႈ ၸွႆႈထႅမ်ၼႂ်းၼႃႈၵၢၼ်ၶဝ်ဢေႃႈ။
ၶဝ်ပႆၽႃႇလတ်းၶဝ်ႈၵုၼ်ၵႂႃႇႁွတ်ႈထိုင်ဝဵင်း ၽႃႇပု၊ လႄႈၵႃႈတီႈၼၼ်ႈၶဝ်ထူပ်းၺႃးသြႃႇၽီမေႃႇၵေႃႉၼိုင်ႈဢၼ်လႆႈၸိုဝ်ႈ ပႃႇယေႇသု၊ ဢၼ်ပဵၼ်ၵူၼ်းမဵဝ်း ၵျူး၊ လႄႈႁဵတ်းမိၵ်ႉသႃႇပရေႃးၽႅတ်ႈ ၼၼ်ႉဢေႃႈ။-
မၼ်းၼၼ်ႉ၊ယူႇၸွမ်းၶုၼ် သေႇရၵိပေႃးလု၊ ၵေႃႉဢၼ်မီးပိင်ႇၺႃႇတၢင်းႁုသုင်ၼႂ်းၵုၼ်ၼၼ်ႉဢေႃႈ။ ၶုၼ်ၼၼ်ႉ၊ပိူဝ်ႈဢၼ်ၶႂ်ႈထွမ်ႇၶႂ်ႈငိၼ်းၼုၵ်ႈၵပၢတ်ႈတြႃး၊ၽြႃးပဵၼ်ၸဝ်ႈလႄႈႁွင်ႉဢဝ် ပႃႇၼပႃႉ၊ တင်း သေႃးလု၊ ႁႂ်ႈၶဝ်ႈၸူးမၼ်းဢေႃႈ။-
ၵူၺ်းၵႃႈ၊သြႃႇၽီမေႃႇ ပႃႇယေႇသု၊ (ဢၼ်မၼ်းလႆႈမီးၸိုဝ်ႈၼႂ်းၵႂၢမ်း ၵရိၵ်ႉ၊ ဝႃႈ၊ ဢေးလုမႃႉ၊ ) ၼၼ်ႉ ဢမ်ႇၶႂ်ႈႁႂ်ႈၶုၼ်ၼၼ်ႉ၊ႁပ်ႉတုင်းဢဝ်တၢင်းယုမ်ႇမၢတ်ႈၼၼ်ႉလႄႈႁၢမ်ႈတၢပ်ႈၶဝ်ဢေႃႈ။-
မိူဝ်ႈၼၼ်ႉ၊ သေႃးလု၊ ဢၼ်လႆႈႁွင်ႉၸိုဝ်ႈ ပေႃးလု၊ ၵေႃႈတဵမ်ဝႆႉတင်းဝိၺိၺ်ႇမူတ်းၸၢင်ႇၸဝ်ႈသေယဝ်ႉ၊ယႅၵ်ႉတူၺ်းသြႃႇမေႃၽီၼၼ်ႉၸေးၸေးသေလႄႈ၊-
လၢတ်ႈဝႃႈ၊ “မႂ်းဢၼ်ပဵၼ်လုၵ်ႈ မႃႇၼၢတ်ႈ၊ ၼႆႉ႟။ မႂ်းပဵၼ်ရၢၼ်ႇသူႇတြႃးဢၼ်သိုဝ်ႈတေႃႇလႄႈတဵမ်ဝႆႉတင်းတၢင်းဢၼ်ႁဵတ်းႁုၵ်းႁဵတ်းႁၢႆႉသေယဝ်ႉ၊ၵျူဝ်းၸႃးႁဵတ်းႁႂ်ႈတြႃးဢၼ်သိုဝ်ႈတေႃႇၸဝ်ႈၽြႃး၊ပိၼ်ႇပဵၼ်တၢင်းဢၼ်ပႅတ်ႉဢၼ်လႅၼ်ဢေႃႈ။-
တေႃႈလဵဝ်ၼႆႉ၊မိုဝ်းထႃႇဝရႃႉၽြႃးတၵ်းတူၵ်းႁွတ်ႈၵႃႈၼိူဝ်မႂ်းလႄႈတႃမႂ်းတၵ်းမွတ်ႇထၢၼ်ႈပေႃးဢမ်ႇႁၼ်ဢၼ်လႅင်းၵၢင်ဝၼ်းၸူဝ်ႈၼိုင်ႈၶၢဝ်းၼိုင်ႈဢေႃႈ၊” ဝႃႈၼင်ႇၼႆဢေႃႈ။ မိူဝ်ႈၼၼ်ႉ၊ၵမ်းလဵဝ်တႃမၼ်းမူဝ်းမႃးလႄႈလပ်းသိင်ႇၽိတ်းၽိတ်းၵႂႃႇသေယဝ်ႉ၊ပၼ်ႇၵႂႃႇပၼ်ႇၶိုၼ်းႁႃၵေႃႉဢၼ်တၵ်းၸုင်ဢဝ်မိုဝ်းမၼ်းဢေႃႈ။-
မိူဝ်ႈဢၼ်ၶုၼ်ၼၼ်ႉႁၼ်ၸိူဝ်ႉၼင်ႇၼၼ်ၼၼ်ႉၸိုင်၊မၼ်းယုမ်ႇမၢတ်ႈမႃးၵွပ်ႈပိူဝ်ႈဢၼ်မၼ်းဢၢမ်းတေႇသၼႃႇတြႃးၸဝ်ႈၽြႃးၼႃႇလူင်လၢင်ၼၼ်ႉဢေႃႈ။
သြႃႇ ပေႃးလု၊ တင်းၵူၼ်းမၼ်းၸိူဝ်းၼၼ်ႉ၊ၶီႇႁိူဝ်းသၢင်းၽေႃးဢွၵ်ႇသေၵႃႈတီႈဝဵင်း ၽႃႇပု၊ ၵႂႃႇၸူးဝဵင်း ပေႇရၵေႇ၊ မိူင်း ပမ်ႇပုလိ၊ သေယဝ်ႉ၊တီႈၼၼ်ႈ ယူဝ်းႁၢၼ်ႇမႃႇၵု၊ ၽၢတ်ႇၶဝ်ၵႂႃႇလႄႈ မိူဝ်းၵႂႃႇၸူးဝဵင်း ယေႇရုသလႅမ်ႇ၊ ဢေႃႈ။-
ၶဝ်သမ်ႉဢွၵ်ႇၵႂႃႇသေၵႃႈတီႈဝဵင်း ပေႇရၵေႇ၊ ႁွတ်ႈထိုင်ၵႂႃႇၵႃႈတီႈဝဵင်း ဢၼ်ႇတိဢူၵ်ႉ၊ မိူင်း ပိသိတိ၊ သေလႄႈ ၼႂ်းဝၼ်းၵမ်သိၼ်ၶဝ်ၶဝ်ႈၵႃႈၼႂ်းၸရွပ်ႈႁေႃးတြႃးလႄႈၼင်ႈယူႇဢေႃႈ။-
ဝၢႆးသေၽတ်းဢၢၼ်ႇၵျၢမ်းပိင်းၺၢပ်ႈတိဢၼ်ပဵၼ်ၽိုၼ်လိၵ်ႈတြႃး မူဝ်းသေႇ၊ ဢိၵ်ႇတင်းၵျၢမ်းဢၼႃႇၵတ်ႉတိဢၼ်ပဵၼ်ၽိုၼ်လိၵ်ႈတြႃးပရေႃးၽႅတ်ႈၸိူဝ်းၼၼ်ႉယဝ်ႉယဝ်ႉၸိုင်၊ၵႄႇၸရွပ်ႈႁေႃးတြႃးၶဝ်ပွႆႇၸႂ်ႉၵူၼ်းမႃးလၢတ်ႈလႄႈဝႃႈ၊ “ၵေႃႉသႄႈၶဝ်႟။ ပေႃးသူမီးတြႃးဢၼ်တၵ်းတိုၵ်းယူင်းၵူၼ်းတင်းလၢႆၸိုင်၊ႁေႃးလၢတ်ႈသေၵမ်းတႃႉ၊” ဝႃႈၼင်ႇၼႆဢေႃႈ။-
သြႃႇ ပေႃးလု၊ ၵေႃႈလုၵ်ႉၼႄမိုဝ်းလႄႈႁေႃးလၢတ်ႈဝႃႈၸမ်ႉ၊ “ပီႈၼွင်ႉၵူၼ်းမဵဝ်း ဢိသရေး၊ တင်းသူၸိူဝ်းဢၼ်ၵူဝ်ယမ်ၽြႃးပဵၼ်ၸဝ်ႈတင်းလၢႆၶဝ်႟။ ထွမ်ႇငိၼ်းတႃႉ။-
ၽြႃးပဵၼ်ၸဝ်ႈၵူၼ်းမဵဝ်း ဢိသရေး၊ ၼႆႉ၊လိူၵ်ႈဢဝ်ပူႇမွၼ်ႇႁဝ်းလႄႈယုၵ်ႉယွင်ႈႁႂ်ႈပဵၼ်ၵူၼ်းမဵဝ်းဢၼ်ယႂ်ႇမျၢတ်ႈၼႂ်းၸူဝ်ႈဢၼ်ၶဝ်ပဵၼ်ၶႅၵ်ႇၵႃႈၼႂ်းမိူင်း ဢေးၵျိပ်ႉ၊ ၼၼ်ႉသေယဝ်ႉ၊ဢဝ်တင်းမိုဝ်းဢၼ်မီးတၼ်းၶူဝ်းၼၼ်ႉ၊ထုတ်ႇၼုၵ်ႈဢဝ်ၶဝ်ဢွၵ်ႇသေၵႃႈၼႂ်းမိူင်းၼၼ်ႉဢေႃႈ။-
သီႇသိပ်းပီတဵမ်တဵမ်မၼ်းၸဝ်ႈလဵင်ႉလူၶဝ်ၵႃႈၼႂ်းထိူၼ်ႇသေလႄႈ၊-
မၼ်းၸဝ်ႈယႃႉပႅတ်ႈၵူၼ်းၸဵတ်းမဵဝ်းဢၼ်ယူႇၵႃႈၼႂ်းမိူင်း ၶႃႇၼၼ်ႇ၊ သေယဝ်ႉ၊ဢဝ်မိူင်းၼၼ်ႉၽႄမႅင်ႇပၼ်ၶဝ်၊ႁႂ်ႈလႆႈဢုပ်ႉပိူင်ႇဢေႃႈ။-
ႁိုင်သီႇပၢၵ်ႇပၢႆႁႃႈသိပ်းပီၸမ်ၸမ်ၼၼ်ႉ၊မၼ်းၸဝ်ႈပၼ်ၵူၼ်းဢၼ်ၸီႇယၢင်ႇတြႃးၸိူဝ်းၼၼ်ႉတီႈၶဝ်တေႃႇထိုင်ႁွတ်ႈပၢၼ်ပရေႃးၽႅတ်ႈ သမူၺ်ႇလႃႉ၊ ဢေႃႈ။-
ႁဵတ်းၼၼ်လႄႈမိူဝ်ႈဢၼ်ၶဝ်လဝ်ႈယွၼ်းၶုၼ်ႁေႃၶမ်းၼၼ်ႉၸိုင်၊ၽြႃးပဵၼ်ၸဝ်ႈပၼ် သေႃးလု၊ လုၵ်ႈၸၢႆး ၵိသႃႉ၊ ဢၼ်ပဵၼ်ၶိူဝ်း ပိၼ်ႇယႃႇမိၼ်ႇ၊ ႁႂ်ႈပဵၼ်ၶုၼ်ႁေႃၶမ်းၶဝ်သီႇသိပ်းပီယဝ်ႉ။-
ဝၢႆးသေဢီးမၼ်းပႅတ်ႈယဝ်ႉၼၼ်ႉ၊ၽြႃးပဵၼ်ၸဝ်ႈပၼ် တႃႇဝိတ်ႈ၊ ႁႂ်ႈပဵၼ်ၶုၼ်ႁေႃၶမ်းၶဝ်ဢေႃႈ။ ၼႆႉၸမ်ႉ၊ပဵၼ်ၸွမ်းၵႃႈၼင်ႇဢၼ်ၽြႃးပဵၼ်ၸဝ်ႈၶၢမ်ႇသၢၵ်ႈသေႇလွင်ႈမၼ်းလႄႈဝႃႈ၊ ‘ၵဝ်လႆႈထူပ်းလွင်ႈဢၼ် တႃႇဝိတ်ႈ၊ လုၵ်ႈၸၢႆး ယေႇသႄး၊ ၼၼ်ႉ၊ပဵၼ်ၵေႃႉဢၼ်မႅၼ်ႈၸႂ်ၵဝ်လႄႈမၼ်းပဵၼ်ၵေႃႉဢၼ်တၵ်းႁဵတ်းၸွမ်းဢလူဝ်ႇၵဝ်တင်းသဵင်ႈတင်းလူင်ၼၼ်ႉယဝ်ႉ၊’ ဝႃႈၼင်ႇၼႆၼၼ်ႉဢေႃႈ။-
ၸဝ်ႈယေႇသု၊ ၼႆႉ၊လႆႈပေႃႇမႃးၵႃႈၼႂ်းၸိူဝ်ႉၶိူဝ်း တႃႇဝိတ်ႈ၊ ၼၼ်ႉလႄႈ ၽြႃးပဵၼ်ၸဝ်ႈႁႂ်ႈမၼ်းၸဝ်ႈပဵၼ်ၸဝ်ႈၵႄႇၶျွတ်ႈတီႈၵူၼ်းမဵဝ်း ဢိသရေး၊ ၸွမ်းၼင်ႇၵတိၸဝ်ႈမီးဝႆႉၼၼ်ႉဢေႃႈ။-
ၸူဝ်ႈဢၼ် ၸဝ်ႈယေႇသု၊ ဢမ်ႇပႆႇတႄႇၸႃႉၵၢၼ်ငၢၼ်းမၼ်းၸဝ်ႈၼၼ်ႉ၊သြႃႇ ယူဝ်းႁၢၼ်ႇ၊ ပေႃႇမႃးႁေႃးလၢတ်ႈတီႈၵူၼ်းမဵဝ်း ဢိသရေး၊ တင်းသဵင်ႈတင်းလူင်၊ႁႂ်ႈၶဝ်ၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်သေယဝ်ႉ၊ၶၢမ်ႇဢဝ်မၢင်ႇၵလႃႇပပ်ႉတိၸမ်ႇ ဢေႃႈ။-
ၼႂ်းမိူဝ်ႈဢၼ်သြႃႇ ယူဝ်းႁၢၼ်ႇ၊ ၸမ်တၵ်းႁဵတ်းၵၢၼ်ငၢၼ်းမၼ်းယဝ်ႉတူဝ်ႈၼၼ်ႉ၊မၼ်းလၢတ်ႈတီႈၵူၼ်းတင်းလၢႆလႄႈဝႃႈ၊ ‘သူထၢင်ႇၵဝ်ပဵၼ်ၽူႈလႂ်။ ၵဝ်ပဵၼ်ၸဝ်ႈၵႄႇၶျွတ်ႈၼၼ်ႉဢမ်ႇၸႂ်ႈ။ ပိူဝ်ႈၼႆထွမ်ႇငိၼ်းတႃႉ။ မၼ်းၸဝ်ႈၼၼ်ႉ၊မႃးပႃႈလိုၼ်းၵဝ်လႄႈၵဝ်ယင်းဢမ်ႇၵိုင်ႇထွတ်ႇၶႅပ်းတိၼ်မၼ်းၸဝ်ႈၼၼ်ႉ၊’ ဝႃႈၼင်ႇၼႆဢေႃႈ။
“ပီႈၼွင်ႉၵဝ် ဢိသရေး၊ ၸိူဝ်ႉၶိူဝ်း ဢႃႇပြႃႇႁၢမ်ႇ၊ ဢိၵ်ႇတင်းပီႈၼွင်ႉတၢင်ႇၸိူဝ်ႉတၢင်ႇၶိူဝ်း၊ၸိူဝ်းဢၼ်ယုမ်ႇယမ်ၽြႃးပဵၼ်ၸဝ်ႈတင်းလၢႆၶဝ်႟။ တြႃးတၢင်းဢၼ်ၵႄႇၶျွတ်ႈဢဝ်ၼႆႉ၊မၼ်းၸဝ်ႈပွႆႇပၼ်မႃးၵႃႈတီႈႁဝ်းယဝ်ႉ။-
ၵူၼ်းၸိူဝ်းဢၼ်ယူႇၼႂ်းဝဵင်း ယေႇရုသလႅမ်ႇ၊ ဢိၵ်ႇတင်းၶုၼ်ၶဝ်တင်းလၢႆ၊ပိူဝ်ႈဢၼ်ဢမ်ႇႁုလွင်ႈဢၼ်မၼ်းၸဝ်ႈပဵၼ်ၸဝ်ႈၵႄႇၶျွတ်ႈ၊ဢမ်ႇႁုထွမ်ႇဢမ်ႇပွင်ႇလႅင်းၵႂၢမ်းပရေႃးၽႅတ်ႈ ၸိူဝ်းဢၼ်ၽတ်းဢၢၼ်ႇၼႂ်းဝၼ်းၵမ်သိၼ်ၵူႈသိၼ်ၼၼ်ႉယဝ်ႉၸင်ႇ၊ၶဝ်ၸီႇယၢင်ႇၸဝ်ႈၼၼ်ႉ၊ႁႂ်ႈၵႂၢမ်းၸိူဝ်းၼၼ်ႉယဝ်ႉတူဝ်ႈယဝ်ႉဢေႃႈ။-
ပိၵ်ႉသမ်ႉၶဝ်ဢမ်ႇထူပ်းဢမုဢၼ်ထုၵ်ႇလီဢဝ်မၼ်းၸဝ်ႈတၢႆၼၼ်ႉသေၵေႃႈၶဝ်လဝ်ႈယွၼ်းတီႈၶုၼ် ပိလတ်ႉ၊ ႁႂ်ႈလႆႈဢဝ်တၢႆဢေႃႈ။-
ဝၢႆးသေဢၼ်ၶဝ်ႁဵတ်းႁႂ်ႈၵႂၢမ်းတြႃးၵျၢမ်းလိၵ်ႈဢၼ်တႅမ်ႈဝႆႉလွင်ႈၸဝ်ႈၼၼ်ႉ၊ယဝ်ႉတူဝ်ႈယဝ်ႉ၊ၵူႈၸိူဝ်ႉၵူႈပိူင်ၸိုင်၊ၶဝ်ဢဝ်တူဝ်တၢႆၸဝ်ႈၶျႃးလူင်းသဝ်မႆႉဝႃးမိုဝ်းမႃးလႄႈသၢင်းၵျူဝ်ႇဝႆႉၵႃႈၼႂ်းပိုင်ႈပႃႇႁဵဝ်ႈဢေႃႈ။-
ၵူၺ်းၵႃႈ၊ၽြႃးပဵၼ်ၸဝ်ႈႁႂ်ႈၸဝ်ႈၼၼ်ႉလုၵ်ႉသေၵႃႈတၢင်းတၢႆၶိုၼ်းလိပ်းမႃးလႄႈ၊-
မိူဝ်ႈဝၼ်းၼမ်ၼႃႇၸဝ်ႈၼၼ်ႉ၊ၼႄပျႃးတူဝ်ၸဝ်ႈၵဝ်ႇၵႃႈတီႈၶဝ်ၸိူဝ်းဢၼ်လုၵ်ႉသေၵႃႈတီႈမိူင်း ၵႃႇလိလႄး၊ ၸွမ်းၸဝ်ႈၼၼ်ႉ၊မႃးႁွတ်ႈထိုင်ဝဵင်း ယေႇရုသလႅမ်ႇ၊ ၼၼ်ႉဢေႃႈ။ ၶဝ်ၸိူဝ်းၼၼ်ႉ၊ပဵၼ်ၵေႃႉဢၼ်ၶၢမ်ႇသၢၵ်ႈသေႇလွင်ႈၸဝ်ႈၼၼ်ႉတီႈၵူၼ်းတင်းလၢႆဢေႃႈ။-
ပိူဝ်ႈၼႆလႄႈ ႁဝ်းမႃးမွၵ်ႇလၢတ်ႈၶၢဝ်ႇငၢဝ်းတြႃးသိူဝ်းပျေႃႇ၊ၸိူဝ်ႉၼင်ႇဢၼ်ၽြႃးပဵၼ်ၸဝ်ႈဝႆႉၵတိတီႈပူႇမွၼ်ႇႁဝ်းၼၼ်ႉ၊မိူဝ်ႈလဵဝ်မၼ်းၸဝ်ႈႁဵတ်းၸွမ်းၵႃႈတီႈႁဝ်းၸိူဝ်းဢၼ်ပဵၼ်လုၵ်ႈလၢၼ်ၶဝ်ၼႂ်းလွင်ႈတၢင်းဢၼ်ႁႂ်ႈ ၸဝ်ႈယေႇသု၊ လုၵ်ႉၶိုၼ်းလိပ်းၼၼ်ႉ၊-
မႅၼ်ႈၸွမ်းၵႃႈၼင်ႇဢၼ်ၵျၢမ်းလိၵ်ႈႁဵတ်းၵႂၢမ်းသႃႇလၢမ်ႇတွၼ်ႈတီႈသွင်တႅမ်ႈဝႆႉလႄႈဝႃႈ၊ “‘မႂ်းၼႆႉပဵၼ်လုၵ်ႈၸၢႆးၵဝ်ဢေႃႈ။ ၼႂ်းဝၼ်းမိူဝ်ႈၼႆႉၵဝ်လႆႈပဵၼ်ပေႃႈမႂ်းယဝ်ႉ၊’ ဝႃႈၼင်ႇၼႆၼၼ်ႉ။
ဢိၵ်ႇတင်းလွင်ႈၽြႃးပဵၼ်ၸဝ်ႈႁႂ်ႈၸဝ်ႈၼၼ်ႉ၊လုၵ်ႉၵႃႈတၢင်းတၢႆၶိုၼ်းလိပ်းလႄႈၵမ်းလိုၼ်းတၵ်းဢမ်ႇၶိုၼ်းလႆႈတူႇလႆႈၼဝ်ႈၵႃႈတီႈၶုမ်ပႃႇႁဵဝ်ႈၼၼ်ႉ ပျႃႇတိၵ်ႈဝႆႉလႄႈဝႃႈ၊ ‘ၵဝ်တၵ်းဢဝ်ၵျေးၸူးၸဝ်ႈဢၼ်မူတ်းၸၢင်ႇလႄႈမၼ်ႈၶိူင်ႇ၊ ဢၼ်ၵဝ်ဝႆႉၵတိတီႈ တႃႇဝိတ်ႈ၊ ၼၼ်ႉပၼ်တီႈသူ၊’ ဝႃႈၼင်ႇၼႆဝႆႉဢေႃႈ။-
ပိူဝ်ႈၼႆလႄႈ ၼႂ်းၵျၢမ်းလိၵ်ႈႁဵတ်းၵႂၢမ်းသႃႇလၢမ်ႇတီႈၼိုင်ႈသမ်ႉတႅမ်ႈဝႆႉထႅင်ႈလႄႈဝႃႈ၊ ‘တီႈၸဝ်ႈဢၼ်မူတ်းၸၢင်ႇၸဝ်ႈႁဝ်းၼၼ်ႉၸိုင်၊ ၸဝ်ႈႁဝ်းတၵ်းဢမ်ႇပၼ်ဢၶႂၢင်ႉ ႁႂ်ႈလႆႈတူႇလႆႈၼဝ်ႈၵႃႈၼႂ်းၶုမ်ပႃႇႁဵဝ်ႈ၊’ ဝႃႈၼင်ႇၼႆဝႆႉလူးၵွၼ်ႇဢေႃႈ။-
တႃႇဝိတ်ႈ၊ ၼၼ်ႉပွင်ႁဵတ်းၸွမ်းဢလူဝ်ႇၽြႃးပဵၼ်ၸဝ်ႈ၊ၼႂ်းၸူဝ်ႈပၢၼ်မၼ်းၼၼ်ႉယဝ်ႉ။ ဝၢႆးၼၼ်ႉမၼ်းတၢႆလႄႈလႆႈၶဝ်ႈၸူးၵႃႈတီႈဢၼ်ပူႇပေႃႈတူဝ်ၸဝ်ႈၵဝ်ႇမီးၼၼ်ႉလႄႈတူဝ်တၢႆမၼ်းတူႇၵႂႃႇၼဝ်ႈၵႂႃႇၵႃႈၼႂ်းၶုမ်ပႃႇႁဵဝ်ႈဢေႃႈ။-
ၵူၺ်းၵႃႈ၊တီႈၸဝ်ႈဢၼ်ၽြႃးပဵၼ်ၸဝ်ႈႁႂ်ႈလုၵ်ႉသေၵႃႈတၢင်းတၢႆၶိုၼ်းလိပ်းၼၼ်ႉၸမ်ႉ၊ဢမ်ႇလႆႈႁွတ်ႈထိုင်တၢင်းဢၼ်တူႇဢၼ်ၼဝ်ႈ။-
ပိူဝ်ႈၼႆလႄႈပီႈၼွင်ႉၵဝ် ဢိသရေး၊ ၶဝ်႟။ ႁဝ်းၶႂ်ႈႁႂ်ႈသူႁုလွင်ႈတြႃးဢၼ်ပွႆႇလွတ်ႈဢပျတ်ႈ၊ၵွပ်ႈပိူဝ်ႈ ၸဝ်ႈယေႇသု၊ ၼႆႉၼၼ်ႉႁေႃးလၢတ်ႈတီႈသူ၊-
ဢိၵ်ႇတင်းလွင်ႈဢၼ်ၵေႃႉဢၼ်ယုမ်ႇမၢတ်ႈမၼ်းၸဝ်ႈၼၼ်ႉ၊ၵႃႈမီးတင်းသဵင်ႈတင်းလူင် လႆႈၵၢင်းလွတ်ႈတင်းဢပျတ်ႈၵူႈၸိူဝ်ႉၵူႈပိူင်၊ဢၼ်တြႃး မူဝ်းသေႇ၊ ဢမ်ႇပွႆႇဢမ်ႇၶႂၢင်းပၼ်လႆႈၸိူဝ်းၼၼ်ႉဢေႃႈ။-
ပိူဝ်ႈၼႆလႄႈႁႂ်ႈမီးသတိတႃႉ။ ပရေႃးၽႅတ်ႈ လႆႈႁေႃးဝႆႉလႄႈဝႃႈ၊ ‘ၵူၼ်းၸိူဝ်းဢၼ်ဢမ်ႇၼပ်ႉဢမ်ႇၶၢၼ်းၵႂၢမ်းၽြႃးပဵၼ်ၸဝ်ႈၶဝ်႟။ လူတူၺ်း၊ဢၢမ်းဢေႃးသေလႄႈတၢႆၵႂႃႇတႃႉ။-
လွင်ႈမၼ်းၸမ်ႉ၊ဢၼ်ၵဝ်ပွင်ႁဵတ်းယူႇ၊ဝၼ်းမိူဝ်ႈၼႆႉၼၼ်ႉပိၵ်ႉသမ်ႉပိူၼ်ႈမွၵ်ႇလၢတ်ႈၼႄသူသေၵေႃႈ၊ ယင်းတိုၵ်ႉပဵၼ်မဵဝ်းဢၼ်သူဢမ်ႇတွၼ်ႉယုမ်ႇလႆႈဢေႃႈ၊’ ဝႃႈၼႆ၊ၶေႃႈၵႂၢမ်းပျႃႇတိၵ်ႈၼႆႉ ၼင်ႇႁိုဝ်တၵ်းဢမ်ႇႁွတ်ႈထိုင်တီႈသူၸိုင်၊ႁဵတ်းသတိတႃႉ၊” ဝႃႈၼင်ႇၼႆဢေႃႈ။
ယၢမ်းမိူဝ်ႈဢၼ် ပေႃးလု၊ တင်း ပႃႇၼပႃႉ၊ ဢွၵ်ႇၸရွပ်ႈႁေႃးတြႃးမႃးယူႇၼၼ်ႉၸိုင်၊ၵူၼ်းတင်းလၢႆၽိတ်ႈပၢင်းႁႂ်ႈၶဝ်မႃးႁေႃးလွင်ႈတၢင်းၸိူဝ်းၼႆႉထႅင်ႈၼမ်ၼမ်၊ၼႂ်းဝၼ်းၵမ်သိၼ်တေမႃးၼၼ်ႉဢေႃႈ။-
လိုၼ်းသေပွႆးပၢင်ၸုတုမ်ယဝ်ႉၼၼ်ႉၸိုင်၊ၵူၼ်းၼမ်ၼႃႇဢၼ်ပဵၼ် ၵျူး၊ တင်းၵူၼ်းတၢင်ႇၸိူဝ်ႉတၢင်ႇၶိူဝ်းၸိူဝ်းဢၼ်ၶဝ်ႈၽႃႇသႃႇ ၵျူး၊ ၸိူဝ်းၼၼ်ႉ၊ဢွၼ်ၵၼ်ၸွမ်း ပေႃးလု၊ တင်း ပႃႇၼပႃႉ၊ ၵႂႃႇဢေႃႈ။ တမၢၼ်ႇၸဝ်ႈၸိူဝ်းၼၼ်ႉၵေႃႈလၢတ်ႈတေႃႇၶဝ်လႄႈပၼ်ဢဵၼ်ပၼ်ႁႅင်းတီႈၶဝ်၊ႁႂ်ႈၶဝ်မၼ်ႈၶိူင်ႇၼႂ်းၵျေးၸူးၽြႃးပဵၼ်ၸဝ်ႈဢေႃႈ။
ၼႂ်းဝၼ်းၵမ်သိၼ်လိုၼ်းၼၼ်ႉ၊ထၢၼ်ႈပေႃးႁမ်ႉၵူၼ်းတင်းသဵင်ႈတင်းဝဵင်းဢွၼ်ၵၼ်မႃးထွမ်ႇၼုၵ်ႈၵပၢတ်ႈတြႃးၸဝ်ႈဢေႃႈ။-
ၵူၺ်းၵႃႈ၊မိူဝ်ႈဢၼ်ၵူၼ်းမဵဝ်း ၵျူး၊ ၶဝ်လႆႈႁၼ်မူႇၵူၼ်းမီးၼမ်ၼႃႇထၼ်ႇၼၼ်ႉၸိုင်၊ၶဝ်တဵမ်ဝႆႉတင်းၸႂ်ဢၼ်ငိၼ်းၶွႆသေယဝ်ႉ၊တွပ်ႇထဵင်ၵႂၢမ်းသြႃႇ ပေႃးလု၊ ၵူၺ်းဢမ်ႇၵႃး၊လႃႇလင်သႄႉသွမ်းဢေႃႈ။-
ၼႂ်းဝႃႈၼၼ်သေၵေႃႈ၊သြႃႇ ပေႃးလု၊ တင်း ပႃႇၼပႃႉ၊ ႁေႃးလၢတ်ႈႁတ်းႁတ်းႁၢၼ်ႁၢၼ်လႄႈဝႃႈ၊ “ၼုၵ်ႈၵပၢတ်ႈတြႃး၊ၽြႃးပဵၼ်ၸဝ်ႈၼႆႉ၊လႆႈႁေႃးလၢတ်ႈယဝ်ႉတီႈသူဢွၼ်တၢင်းဢေႃႈ။ ၵူၺ်းၵႃႈ၊သူပႄႇပႅတ်ႈလႄႈမၢတ်ႈတူဝ်သူဢမ်ႇထိူၵ်ႈၶၢမ်ႇထႃႇဝရႃႉဢသၢၵ်ႈဝႃႈၼႆလႄႈႁဝ်းတၵ်းဢွၵ်ႇသေၵႃႈတီႈသူသေယဝ်ႉ၊ဝၢႆႇၸူးၵူၼ်းတၢင်ႇၸိူဝ်းတၢင်ႇၶိူဝ်းတင်းလၢႆဢေႃႈ။-
လွင်ႈမၼ်းၸမ်ႉ၊ၽြႃးပဵၼ်ၸဝ်ႈပိင်းၺၢပ်ႈဝႆႉတီႈႁဝ်းလႄႈဝႃႈ၊ “‘ၵဝ်ႁႂ်ႈသူလႆႈပဵၼ်ဢၼ်လႅင်းပုၼ်ႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ၊ ပုၼ်ႈလွင်ႈၼင်ႇႁိုဝ်ၵူၼ်းလေႃးၵီႇတင်းသဵင်ႈတင်းလူင်၊တၵ်းလႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ဢေႃႈ၊’ ဝႃႈၼင်ႇၼႆဝႆႉယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉ၊ငိၼ်းၵႂၢမ်းၼၼ်ႉၸိုင်၊ၶဝ်သိူဝ်းပျေႃႇလႄႈယွင်ႈယေႃးၼုၵ်ႈၵပၢတ်ႈထႃႇဝရႃႉၽြႃးဢေႃႈ။ ၶဝ်ၸိူဝ်းဢၼ်လႆႈၶၢမ်ႇမၵ်းၶၢၼ်းဝႆႉ၊ႁႂ်ႈလႆႈဢသၢၵ်ႈထႃႇဝရႃႉၼၼ်ႉၵူႈၵေႃႉၵူႈၵူၼ်းၵေႃႈ၊ဢွၼ်ၵၼ်ၶဝ်ႈပဵၼ်ၵူၼ်းၸိူဝ်းဢၼ်ယုမ်ႇမၢတ်ႈဢေႃႈ။
ၼုၵ်ႈၵပၢတ်ႈထႃႇဝရႃႉၽြႃးၼၼ်ႉၸွတ်ႇတူဝ်ႈၵႂႃႇတင်းမိူင်းဢေႃႈ။-
မိူဝ်ႈၼၼ်ႉ၊ၵူၼ်းမဵဝ်း ၵျူး၊ ၶဝ်တိုၵ်းသူၼ်းၵူၼ်းၵႄႇၵူၼ်းႁူဝ်ၸိူဝ်းဢၼ်မီးၵႃႈၼႂ်းဝဵင်းဢိၵ်ႇတင်းမႄႈယိင်းၵူၼ်းတၢင်ႇၸိူဝ်ႉတၢင်ႇၶိူဝ်း၊ၸိူဝ်းဢၼ်မီးသရေႇလႄႈၵူဝ်းၵႂၢႆႇၽြႃးပဵၼ်ၸဝ်ႈတင်းလၢႆၸိူဝ်းၼၼ်ႉ၊ႁဵတ်းတၢင်းဢၼ်ၼိၵ်ႈၸၢၵ်ႈငႅၼ်းသႄးသြႃႇ ပေႃးလု၊ ဢိၵ်ႇတင်း ပႃႇၼပႃႉ၊ သေယဝ်ႉ၊ႁေႃႈၶဝ်ဢွၵ်ႇသေၵႃႈတီႈလႅၼ်လိၼ်မိူင်းၶဝ်ၵႂႃႇဢေႃႈ။-
ၶဝ်ၵေႃႈ သၼ်ႇမုၼ်ႈလိၼ်ဢၼ်ၸပ်းတိၼ်ၶဝ်၊ၼႄလွင်ႈဢၼ်ၶတ်းၵၼ်တင်းၵူၼ်းမိူင်းၼၼ်ႉသေယဝ်ႉ၊ဢွၵ်ႇၵႂႃႇၸူးဝဵင်း ဢိၵေႃးၼိ၊ သေဢေႃႈ။-
တပႄးၸဝ်ႈၸိူဝ်းဢၼ်မီးၵႃႈၼႂ်းဝဵင်း ဢၼ်ႇတိဢူၵ်ႉ၊ တင်းလၢႆ၊တဵမ်ဝႆႉတင်းၸႂ်ဢၼ်သိူဝ်းသႂၢင်ႇ၊ဢိၵ်ႇတင်းဝိၺိၺ်ႇမူတ်းၸၢင်ႇၸဝ်ႈဢေႃႈ။
ၵႃႈတီႈဝဵင်း ဢိၵေႃးၼိ၊ ၼၼ်ႉၵေႃႈ သြႃႇ ပေႃးလု၊ ဢိၵ်ႇတင်း ပႃႇၼပႃႉ၊ ၶဝ်ႈၼႂ်းၸရွပ်ႈႁေႃးတြႃး ၵျူး၊ ၶဝ်လႄႈ ႁေႃးလၢတ်ႈၸိူဝ်ႉၼင်ႇၼၼ်ထၢၼ်ႈပေႃးၵူၼ်းမဵဝ်း ၵျူး၊ တင်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၼမ်ၼႃႇၶဝ်ႈပဵၼ်ၵူၼ်းၸိူဝ်းဢၼ်ယုမ်ႇမၢတ်ႈဢေႃႈ။-
ၵူၺ်းၵႃႈ၊ၵူၼ်းမဵဝ်း ၵျူး၊ ၸိူဝ်းဢၼ်ဢမ်ႇယုမ်ႇမၢတ်ႈၼၼ်ႉ၊တိုၵ်းသူၼ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ ႁႂ်ႈၶဝ်ၶႂ်ႈၸႃႉတေႃႇတပႄးၸဝ်ႈၸိူဝ်းၼၼ်ႉဢေႃႈ။-
ပိူဝ်ႈၼႆၸင်ႇ၊ၶဝ်ယူႇၵႃႈတီႈၼၼ်ႈႁိုင်ၼႃႇႁေႃးလၢတ်ႈတြႃး၊ၸဝ်ႈၽြႃးႁတ်းႁတ်းႁၢၼ်ႁၢၼ်ဢေႃႈ။ ၸဝ်ႈၽြႃးၵေႃႈ၊ၶၢမ်ႇသၢၵ်ႈသေႇၽၢႆႇတြႃးၸဝ်ႈဢၼ်ၶဝ်ႁေႃးလွင်ႈၵျေးၸူးမၼ်းၸဝ်ႈဢၼ်မၢၼ်ႇမႅၼ်ႈၸိုဝ်ႈၸႂ်ႈ၊ၼႂ်းတၢင်းဢၼ်ၶဝ်လႆႈဢၶႂၢင်ႉ၊ဢၼ်ႁဵတ်းၼိမိၵ်ႈလၢၵ်ႈၶၼႃႇ၊ဢိၵ်ႇတင်းလွင်ႈတၢင်းဢၼ်လီဢၢမ်းတင်းလၢႆဢေႃႈ။-
ၵူၼ်းဝဵင်းတင်းလၢႆၵေႃႈ တႅၵ်ႇၽႄဢွၵ်ႇပဵၼ်သွင်ၸုမ်းၵႂႃႇလႄႈၵမ်ႈၽွင်ႈယူႇၽၢႆႇၵူၼ်းမဵဝ်း ၵျူး၊ ၶဝ်၊ၵမ်ႈၽွင်ႈယူႇၽၢႆႇတမၢၼ်ႇၸဝ်ႈၸိူဝ်းၼၼ်ႉဢေႃႈ။
မိူဝ်ႈၼၼ်ႉ၊ၵူၼ်းတၢင်ႇၸိူဝ်ႉတၢင်ႇၶိူဝ်းၵမ်ႈၽွင်ႈ၊ဢိၵ်ႇတင်းၵူၼ်းမဵဝ်း ၵျူး၊ ၶဝ်ၽွမ်ႉၵၼ်တင်းၶုၼ်ဢၼ်မီးဢႃႇၼႃႇတင်းလၢႆလႄႈၽွမ်ႉၸႂ်ၵၼ်ႁႂ်ႈလႆႈႁဵတ်းမိူၵ်ႈတီႈတမၢၼ်ႇၸဝ်ႈၸိူဝ်းၼၼ်ႉ၊ဢိၵ်ႇတင်းႁႂ်ႈလႆႈဢဝ်မၢၵ်ႇႁိၼ်ပိုဝ်ႈႁႂ်ႈတၢႆဢေႃႈ။-
မိူဝ်ႈဢၼ်တမၢၼ်ႇၸဝ်ႈၸိူဝ်းၼၼ်ႉႁုႁၼ်ၼၼ်ႉၸိုင်၊ဢွၵ်ႇပၢႆႈၵႂႃႇၸူးဝဵင်း လုတ်ႉတရႃႉ၊ တင်းဝဵင်း တေႇရပေႇ၊ ဢၼ်ပဵၼ်ဝဵင်းလူင်ၼႂ်းမိူင်း လုၵေႃးၼိ၊ ဢိၵ်ႇတင်းၵႃႈတီႈဝၢၼ်ႈၼွၵ်ႈၼႃးပၢင်ႇၵႃႈၼႂ်းမိူင်းၼၼ်ႉသေယဝ်ႉ၊-
ႁေႃးလၢတ်ႈၶၢဝ်ႇတြႃးသိူဝ်းပျေႃႇၸဝ်ႈၵႃႈတီႈၼၼ်ႈဢေႃႈ။
ၼႂ်းဝဵင်း လုတ်ႉတရႃႉ၊ ၼၼ်ႉ၊မီးၵူၼ်းတိၼ်ဢမ်ႇလီၸဵမ်မိူဝ်ႈၼႂ်းတွင်ႉမႄႈမၼ်းမႃးလႄႈ ဢမ်ႇပႆလႆႈၼၼ်ႉၵေႃႉၼိုင်ႈဢေႃႈ။-
မၼ်းၼင်ႈလႄႈထွမ်ႇဢဝ်ၵႂၢမ်းဢၼ်သြႃႇ ပေႃးလု၊ ႁေႃးလၢတ်ႈၼၼ်ႉယူႇဢေႃႈ။ သြႃႇ ပေႃးလု၊ ယႅၵ်ႉတူၺ်းမၼ်းၸေးၸေးလႄႈႁုႁၼ်မၼ်းၼၼ်ႉ၊မီးၸႂ်ဢၼ်ယုမ်ႇမၢတ်ႈထၢၼ်ႈပေႃး တၢင်းၶႆႈတၢင်းပဵၼ်ၸိုၼ်ႈႁၢႆလႆႈၼၼ်ႉသေယဝ်ႉ၊-
လၢတ်ႈတင်းသဵင်ဢၼ်ယႂ်ႇၼႃႇလႄႈဝႃႈ၊ “လုၵ်ႉၸုၵ်းသိုဝ်ႈသိုဝ်ႈတႃႉ၊” ဝႃႈၼင်ႇၼႆလႄႈ၊ၵေႃႉၼၼ်ႉၵေႃႈလုၵ်ႉၸုၵ်းပႆၵႂႃႇပႆမႃးဢေႃႈ။-
မိူဝ်ႈဢၼ်မူႇၵူၼ်းတင်းလၢႆႁၼ်တၢင်းဢၼ်သြႃႇ ပေႃးလု၊ ႁဵတ်းၼၼ်ႉၸိုင်၊ဢွၼ်ၵၼ်ပၢဝ်ႇလၢတ်ႈၼႂ်းၵႂၢမ်းၽႃႇသႃႇ လုၵေႃးၼိ၊ ၶဝ်လႄႈဝႃႈ၊ “ၸဝ်ႈၽြႃးတင်းလၢႆပိၼ်ႇပဵၼ်ႁၢင်ႈၵူၼ်းသေလႄႈၵျွမႃးၸူးႁဝ်းယဝ်ႉ။” ဝႃႈၼင်ႇၼႆဢေႃႈ။-
တီႈ ပႃႇၼပႃႉ၊ ၼၼ်ႉၶဝ်ပၼ်ၸိုဝ်ႈဝႃႈ၊ၽြႃး ၸုသႃႉ၊ ဝႃႈၼႆလႄႈတီႈသြႃႇ ပေႃးလု၊ ၼၼ်ႉ၊ပိူဝ်ႈဢၼ်ပဵၼ်ၵေႃႉဢၼ်ယဵင်ႈၶႅၼ်းႁေႃးလၢတ်ႈၼမ်ၼမ်ၸိုင်၊ၶဝ်ႁွင်ႉဝႃႈၽြႃး ႁိူဝ်ႇမိ၊ ဢေႃႈ။-
ၸဝ်ႈသၢင်ႇၶႃႇၽြႃး ၸုသႃႉ၊ ၶဝ်၊ဢၼ်ၵျွင်းဝၢတ်ႈၶဝ်ၵူၺ်းမီးၵႃႈတီႈၽၢႆႇၼႃႈဝဵင်းၼၼ်ႉ၊ပိူဝ်ႈဢၼ်ၶႂ်ႈႁဵတ်းတၢင်းလူႇတီႈတမၢၼ်ႇၸဝ်ႈၸိူဝ်းၼၼ်ႉလႄႈမၼ်းဢိၵ်ႇတင်းမူႇၵူၼ်းမၼ်းတင်းလၢႆဢဝ်ၶူဝ်းလူႇဢၼ်ပဵၼ်ဝူဝ်းတင်းမွၵ်ႇယႃႈၸိူဝ်းၼၼ်ႉ၊မႃးၵႃႈတီႈၼႃႈၽၵ်းတူဝဵင်းဢေႃႈ။
ၵူၺ်းၵႃႈ၊မိူဝ်ႈဢၼ်တမၢၼ်ႇၸဝ်ႈၸိူဝ်းဢၼ်ပဵၼ် ပႃႇၼပႃႉ၊ တင်းသြႃႇ ပေႃးလု၊ ငိၼ်းလွင်ႈဢၼ်ၶဝ်ၸိူဝ်းၼၼ်ႉဢၢင်ႈႁဵတ်းၼၼ်ႉၸိုင်၊ၶဝ်ၸၵ်ႉသိၵ်ႇၶူဝ်းၼုင်ႈတူဝ်ၸဝ်ႈၵဝ်ႇလႄႈလႅၼ်ႈၶဝ်ႈၵႃႈၼႂ်းၵႄႈၵူၼ်းၸိူဝ်းၼၼ်ႉသေယဝ်ႉ၊-
ပၢဝ်ႇလၢတ်ႈလႄႈဝႃႈ၊ “ၵူၼ်းတင်းလၢႆၶဝ်႟။ ၵွပ်ႈသင်လႄႈသူႁဵတ်းၸိူဝ်ႉၼင်ႇၼႆ။ ႁဝ်းပဵၼ်ၵူၼ်းမိူၼ်ၸိူဝ်ႉၼင်ႇသူၵူၺ်းဢေႃႈ။ ႁဝ်းမႃးၵႃႈတီႈၼႆႈ ႁႂ်ႈလႆႈႁေႃးလၢတ်ႈၶၢဝ်ႇတြႃးသိူဝ်းပျေႃႇၸဝ်ႈၽြႃး၊ပုၼ်ႈလွင်ႈၼင်ႇႁိုဝ်သူတၵ်းဝၢႆႇပႅတ်ႈသေမဵဝ်းဢၼ်လၢႆလၢႆလွၵ်ႇလွၵ်ႇၸိူဝ်းၼၼ်ႉသေလႄႈမႃးၸူးၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇ၊ဢၼ်ၽၢၼ်ႇသၢင်းႁဵတ်းပဵၼ်ၸႃႉၸဵမ်ၵၢင်ႁၢဝ်၊ဢိၵ်ႇတင်းလိၼ်မိူင်း၊ၼမ်ႉသမ်ႇမုၵ်ႈတြႃႇဢိၵ်ႇတင်းၶိူင်ႈပိူင်ဢၼ်မီးၵႃႈၼႂ်းမၼ်းတင်းသဵင်ႈတင်းလူင်ၼၼ်ႉဢေႃႈ။-
ၼႂ်းၸူဝ်ႈၸၢတ်ႈၵူၼ်းဢၼ်ပူၼ်ႉယဝ်ႉၼၼ်ႉ၊မၼ်းၸဝ်ႈပွႆႇပၼ်ႁႂ်ႈၵူၼ်းတင်းလၢႆၵမ်ၵျၢင်ႉၸွမ်းၼင်ႇဢလူဝ်ႇၶဝ်မီးၼၼ်ႉဢေႃႈ။-
ၼႂ်းဝႃႈၼၼ်သေၵေႃႈ၊မၼ်းၸဝ်ႈယင်းႁဵတ်းၼႄသၢၵ်ႈသေႇလွင်ႈဢၼ်မၼ်းၸဝ်ႈတႄႇယူႇတႃႇသေႇဢမ်ႇထၢတ်ႇ၊ၼႂ်းလွင်ႈတၢင်းဢၼ်မၼ်းၸဝ်ႈႁဵတ်းၵျေးၸူးဢၼ်လီဢၼ်ငၢမ်း၊ဢၼ်ႁႂ်ႈၽူၼ်လုၵ်ႉတီႈၵႃႈၼိူဝ်ၵၢင်ႁၢဝ်တူၵ်းလူင်းမႃးလႄႈ ပၼ်မၢၵ်ႇၶဝ်ႈႁူင်းၶဝ်ႈၼႂ်းၶိင်ႇဢုတုဢၼ်သၢင်ႇထုၵ်ႇ၊ႁႂ်ႈလႆႈပဵၼ်ဢေႃႇၸႃႇတၢင်းၵိၼ်၊ဢိၵ်ႇတင်းတၢင်းဢၼ်ႁႂ်ႈႁူဝ်ၸႂ်သူလႆႈၸူမ်းပျေႃႇၼၼ်ႉဢေႃႈ၊” ဝႃႈၼင်ႇၼႆဢေႃႈ။-
ပိၵ်ႉသမ်ႉႁေႃးလၢတ်ႈထၢၼ်ႇၼၼ်ႉသေၵေႃႈ၊တမၢၼ်ႇၸဝ်ႈၸိူဝ်းၼၼ်ႉ၊ၸမ်တေဢမ်ႇပႄႉႁၢမ်ႈတၢပ်ႈတၢင်းဢၼ်ၶဝ်တၵ်းႁဵတ်းတၢင်းလူႇတီႈၶဝ်ၼၼ်ႉလႆႈ။
ၵူၼ်းမဵဝ်း ၵျူး၊ ၵမ်ႈၽွင်ႈလုၵ်ႉသေၵႃႈတီႈဝဵင်း ဢၼ်ႇတိဢူၵ်ႉ၊ မိူင်း ပိသိတိ၊ တင်းဝဵင်း ဢိၵေႃးၼိ၊ မႃးလႄႈတိုၵ်းသူၼ်းမူႇၵူၼ်းတင်းလၢႆ၊ဢဝ်မၢၵ်ႇႁိၼ်ပိုဝ်ႈသႂ်ႇသြႃႇ ပေႃးလု၊ လႄႈထၢင်ႇမၼ်းတၢႆယဝ်ႉၸင်ႇ၊တိုတ်ႉလၢၵ်ႈဢွၵ်ႇၵႂႃႇပႅတ်ႈၵႃႈၼွၵ်ႈဝဵင်းဢေႃႈ။-
ၵူၺ်းၵႃႈ၊မိူဝ်ႈဢၼ်တပႄးၸဝ်ႈတင်းလၢႆလွမ်ႉႁွပ်ႈမၼ်းယူႇၼၼ်ႉၸိုင်၊မၼ်းလုၵ်ႉလႄႈၶဝ်ႈဝဵင်းၵႂႃႇဢေႃႈ။ ဝၼ်းမိူဝ်ႈၽုၵ်ႈၼၼ်ႉမၼ်းတင်း ပႃႇၼပႃႉ၊ ၵႂႃႇၸူးဝဵင်း တေႇရပေႇ၊ သေဢေႃႈ။
သြႃႇ ပေႃးလု၊ တင်း ပႃႇၼပႃႉ၊ ႁေႃးလၢတ်ႈၶၢဝ်ႇတြႃးသိူဝ်းပျေႃႇ၊ၼႂ်းဝဵင်း တေႇရပေႇ၊ လႄႈၵူၼ်းၼမ်ၼႃႇၶဝ်ႈပဵၼ်တပႄးၸဝ်ႈမႃးဢေႃႈ။ လိုၼ်းၼၼ်ႉ၊ၶိုၼ်းမိူဝ်းၸူးဝဵင်း လုတ်ႉတရႃႉ၊ ၸူးဝဵင်း ဢိၵေႃးၼိ မိူဝ်းၸူးဝဵင်း ဢၼ်ႇတိဢူၵ်ႉ၊ မိူင်း ပိသိတိ၊ ဢေႃႈ။-
ပၼ်ႁႅင်းႁႂ်ႈႁူဝ်ၸႂ်တပႄးၸဝ်ႈတင်းလၢႆမၼ်ႈၶိူင်ႇလႄႈတိုၵ်းယူင်းႁႂ်ႈၶဝ်တႄႇယူႇၼႂ်းတၢင်းဢၼ်ယုမ်ႇမၢတ်ႈလႄႈလၢတ်ႈဝႃႈ၊ “ႁဝ်းတၵ်းလႆႈၶၢမ်ႇတုၵ်ႉၶႃႉၼမ်ၼႃႇသေလႄႈၶဝ်ႈၵႃႈၼႂ်းမိူင်းၽြႃးပဵၼ်ၸဝ်ႈဢေႃႈ၊” ဝႃႈၼင်ႇၼႆဢေႃႈ။-
ၵႃႈၼႂ်းၸိူဝ်းၸဝ်ႈၵူႈတီႈၵူႈလႅၼ်ၼၼ်ႉ၊ၶဝ်ၶၢၼ်းဝႆႉၵူၼ်းဢုပ်ႉၸိူဝ်းၸဝ်ႈတင်းလၢႆယဝ်ႉၸင်ႇ၊ၵမ်သိၼ်ဢမ်ႇၵိၼ်တၢင်းၵိၼ်သူးတွင်းႁဵတ်းပထၼႃႇသေလႄႈ ဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းၸဝ်ႈၽြႃးဢၼ်ၶဝ်ယုမ်ႇမၢတ်ႈၼၼ်ႉဢေႃႈ။
ဝၢႆးသေၶဝ်သွင်ၵေႃႉၼၼ်ႉ၊လႄႇလဵပ်ႈၵႂႃႇဝၢၼ်ႈၼွၵ်ႈၼႃးပၢင်ႇမိူင်း ပိသိတိ၊ ယဝ်ႉၼၼ်ႉ၊ၶဝ်ႁွတ်ႈထိုင်ၵႃႈတီႈမိူင်း ပမ်ႇပုလိ၊ ဢေႃႈ။-
တီႈၼၼ်ႈ၊သွင်ၶႃႁေႃးတြႃးၸဝ်ႈၼႂ်းဝဵင်း ပေႇရၵေႇ၊ လႄႈလူင်းၵႂႃႇၸူးတီႈဝဵင်း ဢတ်ႉတလိ၊ ဢေႃႈ။-
ၶဝ်လုၵ်ႉသေၵႃႈတီႈဝဵင်းၼၼ်ႉၶီႇႁိူဝ်းသၢင်းၽေႃးမိူဝ်းၵႂႃႇတီႈဝဵင်း ဢၼ်ႇတိဢူၵ်ႉ၊ တီႈဢၼ်ၶဝ်လႆႈၶၢမ်ႇဢၢပ်ႈဝၢင်းၼႂ်းၵျေးၸူးၽြႃးပဵၼ်ၸဝ်ႈပုၼ်ႈၼႃႈၵၢၼ်ဢၼ်ၶဝ်လႆႈႁဵတ်းယဝ်ႉတူဝ်ႈမႃးၼၼ်ႉဢေႃႈ။
ၶဝ်ႁွတ်ႈထိုင်သေယဝ်ႉ၊ႁွင်ႉဢဝ်ၵူၼ်းၸိူဝ်းၸဝ်ႈတင်းလၢႆၸုတုမ်သေလႄႈမွၵ်ႇလၢတ်ႈၶႆႈၼႄလွင်ႈတၢင်းၵႃႈဢၼ်ၽြႃးပဵၼ်ၸဝ်ႈၸွႆႈထႅမ်ၶဝ်ႁဵတ်းၸိူဝ်းၼၼ်ႉ၊ဢိၵ်ႇတင်းလွင်ႈတၢင်းဢၼ်မၼ်းၸဝ်ႈၽုၺ်ႇပၼ်ၽၵ်းတူပုၼ်ႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆတၵ်းလႆႈယုမ်ႇမၢတ်ႈၼၼ်ႉဢေႃႈ။-
ၶဝ်ယူႇလူၺ်ႈတပႄးၸဝ်ႈၸိူဝ်းၼၼ်ႉႁိုင်ၼႃႇဢေႃႈ။
ၵူၼ်းၵမ်ႈၽွင်ႈလုၵ်ႉသေၵႃႈတီႈမိူင်း ယုတႃႉ၊ ႁွတ်ႈမႃးၵႃႈတီႈဝဵင်း ဢၼ်ႇတိဢူၵ်ႉ၊ သေယဝ်ႉ၊ႁေႃးလၢတ်ႈသင်ႇသွၼ်ပၼ်တီႈတပႄးၸဝ်ႈတင်းလၢႆလႄႈဝႃႈ၊ “ပေႃးသူယင်းဢမ်ႇၶၢမ်ႇဢဝ်မၢင်ႇၵလႃႇဢၼ်ပၢတ်ႇပၢႆၼင်၊ၸွမ်းၼင်ႇတြႃး မူဝ်းသေႇ၊ မီးဝႆႉၼၼ်ႉၸိုင်၊သူဢမ်ႇႁွတ်ႈထိုင်တၢင်းဢၼ်ၵႄႇၶျွတ်ႈဢဝ်လႆႈ၊” ဝႃႈၼင်ႇၼႆဢေႃႈ။-
သြႃႇ ပေႃးလု၊ တင်း ပႃႇၼပႃႉ၊ ၵေႃႈတိူင်ႇပၢင်ႇထဵင်ၵၼ်တင်းၶဝ်ၼၼ်ႉၼမ်ၼႃႇ၊လူၺ်ႈလွင်ႈတၢင်းၼႆႉလႄႈၸင်ႇၽွမ်ႉၸႂ်ဝႃႈ၊သြႃႇ ပေႃးလု၊ ဢိၵ်ႇတင်း ပႃႇၼပႃႉ၊ တင်းၵူၼ်းဝဵင်းတၢင်ႇၵေႃႉၵမ်ႈၽွင်ႈတၵ်းလႆႈလူင်းၵႂႃႇၸူးဝဵင်း ယေႇရုသလႅမ်ႇ၊ ႁႂ်ႈလႆႈဢုပ်ႇၵုမ်တိူင်ႇပၢင်ႇၵၼ်တင်းတမၢၼ်ႇၸဝ်ႈတင်းလၢႆ၊ဢိၵ်ႇတင်းၵူၼ်းဢုပ်ႉၸိူဝ်းၸဝ်ႈၶဝ်လူၺ်ႈလွင်ႈတၢင်းယၢပ်ႇဢၼ်ၶဝ်ထဵင်ၵၼ်ၼၼ်ႉဢေႃႈ။
ၵူၼ်းၸိူဝ်းၸဝ်ႈတင်းလၢႆၸွမ်းသူင်ႇၶဝ်ၵႂႃႇပွတ်းတၢင်းသေယဝ်ႉ၊ၼႂ်းၶၢဝ်းတၢင်းဢၼ်ၶဝ်လတ်းၶဝ်ႈမိူင်း ၽိၼိတ်ႉ၊ ဢိၵ်ႇတင်းမိူင်း သမႃႇရိ၊ ၵႂႃႇၼၼ်ႉ၊ၶဝ်မွၵ်ႇလၢတ်ႈလွင်ႈဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်းၼမ်ၼႃႇၶဝ်ႈပဵၼ်တပႄးၸဝ်ႈမႃးၼၼ်ႉလႄႈၶၢဝ်ႇငၢဝ်းၼၼ်ႉႁဵတ်းႁႂ်ႈတပႄးၸဝ်ႈတင်းသဵင်ႈတင်းမူတ်းသိူဝ်းပျေႃႇဢေႃႈ။-
မိူဝ်ႈဢၼ်ၶဝ်ႁွတ်ႈထိုင်ဝဵင်း ယေႇရုသလႅမ်ႇ၊ ၵႂႃႇၼၼ်ႉၸိုင်၊ၶဝ်လႆႈၶၢမ်ႇတၢင်းဢၼ်တမၢၼ်ႇၸဝ်ႈ၊ဢိၵ်ႇတင်းၵူၼ်းဢုပ်ႉၸိူဝ်းၸဝ်ႈတင်းလၢႆ၊ဢိၵ်ႇတင်းၵူၼ်းၸိူဝ်းၸဝ်ႈတင်းသဵင်ႈတင်းမူတ်းႁပ်ႉတွၼ်ႈလႄႈၶဝ်ၵေႃႈမွၵ်ႇလၢတ်ႈၶႆႈၼႄလွင်ႈတၢင်းဢၼ်ၽြႃးပဵၼ်ၸဝ်ႈဢဝ်ၶဝ်ႁဵတ်းၸိူဝ်းၼၼ်ႉဢေႃႈ။-
ၵူၺ်းၵႃႈ၊ၵူၼ်းၸိူဝ်းယုမ်ႇမၢတ်ႈၵမ်ႈၽွင်ႈဢၼ်ပဵၼ်ၵိူင်း ၽႃႇရိသႄး၊ ၼၼ်ႉလုၵ်ႉလႄႈလၢတ်ႈဝႃႈ၊ “ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆတၵ်းလႆႈၶၢမ်ႇဢဝ်မၢင်ႇၵလႃႇပၢတ်ႇပၢႆၼင်သေလႄႈတၵ်းလႆႈသွၼ်ပၼ်ႁႂ်ႈၶဝ်ၵမ်ၵျၢင်ႉၸွမ်းတြႃး မူဝ်းသေႇ၊ ဢေႃႈ၊” ဝႃႈၼင်ႇၼႆဢေႃႈ။
တမၢၼ်ႇၸဝ်ႈဢိၵ်ႇတင်းၵူၼ်းဢုပ်ႉၸိူဝ်းၸဝ်ႈတင်းလၢႆၸုတုမ်ၵၼ်လႄႈၶႆႈၸႂ်ဝူၼ်ႉၸႂ်လူၺ်ႈလွင်ႈတၢင်းယၢပ်ႇၼႆႉဢေႃႈ။-
ဝၢႆးသေတိူင်ႇပၢင်ႇလၢတ်ႈၸႃၵၼ်ၼမ်ၼႃႇယဝ်ႉၼၼ်ႉ၊ ပေႇတရု၊ လုၵ်ႉလႄႈလၢတ်ႈဝႃႈ၊ “ပီႈၼွင်ႉၶဝ်႟။ သူႁုလွင်ႈဢၼ်ၽြႃးပဵၼ်ၸဝ်ႈ၊လိူၵ်ႈဢဝ်ၵဝ်သေၵႃႈၼႂ်းသူၸဵမ်မိူဝ်ႈဢွၼ်တၢင်းႁိုင်ၼႃႇႁႂ်ႈႁေႃးလၢတ်ႈၶၢဝ်ႇတြႃးသိူဝ်းပျေႃႇၸဝ်ႈ၊တီႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ၊ပုၼ်ႈဢၼ်ၶဝ်တၵ်းငိၼ်းလႄႈယုမ်ႇမၢတ်ႈၼၼ်ႉယူႇဢေႃႈ။-
ၽြႃးပဵၼ်ၸဝ်ႈဢၼ်ႁုၸႅင်ႈႁူဝ်ၸႂ်ၵူၼ်းၵူႈၵေႃႉၼၼ်ႉ၊ၶၢမ်ႇသၢၵ်ႈသေႇၽၢႆႇၵူၼ်းတၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉ၊ၼႂ်းတၢင်းဢၼ်ပၼ်ဝိၺိၺ်ႇမူတ်းၸၢင်ႇၸဝ်ႈ၊မိူၼ်ၸိူဝ်ႉၼင်ႇဢၼ်ပၼ်တီႈႁဝ်းၼၼ်ႉဢေႃႈ။-
မၼ်းၸဝ်ႈဢမ်ႇႁဵတ်းႁႂ်ႈၶဝ်ပႅၵ်ႇပိူင်ႈၵၼ်တင်းႁဝ်း။ မၼ်းၸဝ်ႈႁႂ်ႈႁူဝ်ၸႂ်ၶဝ်မူတ်းသႂ်ၵွပ်ႈလူၺ်ႈတၢင်းယုမ်ႇမၢတ်ႈၶဝ်ၼၼ်ႉယူႇဢေႃႈ။-
ပိူဝ်ႈၼႆလႄႈတေႃႈလဵဝ်ၼႆႉ၊ႁဵတ်းသင်လႄႈၶႂ်ႈၸၢမ်းတူၺ်းၽြႃးပဵၼ်ၸဝ်ႈၼႂ်းတၢင်းဢၼ်ဢဝ်ၵၢၼ်းဢၼ်ပူႇမွၼ်ႇႁဝ်း၊ဢိၵ်ႇတင်းႁဝ်းယင်းႁၢပ်ႇဢမ်ႇပႄႉလႆႈၼၼ်ႉ၊တၢင်ႇသႂ်ႇၵႃႈၼိူဝ်ႁူဝ်မႃႇတပႄးၸဝ်ႈတင်းလၢႆၸိူဝ်ႉၼင်ႇႁိုဝ်။-
ဢမ်ႇၸႂ်ႈၸိူဝ်ႉၼင်ႇၼၼ်ၵူၺ်း။ ႁဝ်းၸိုင်၊ယုမ်ႇမၢတ်ႈလႄႈလႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၵွပ်ႈပိူဝ်ႈၵျေးၸူး ၸဝ်ႈယေႇသုၶရိၸ်ႈ၊ ၵူၺ်းမိူၼ်မိူၼ်ၵၼ်တင်းၶဝ်ဢေႃႈ၊” ဝႃႈၼင်ႇၼႆဢေႃႈ။
မူႇၵူၼ်းတင်းလၢႆယူႇတဵတ်ႇတဵတ်ႇလႄႈထွမ်ႇဢဝ်သြႃႇ ပေႃးလု၊ ဢိၵ်ႇတင်း ပႃႇၼပႃႉ မွၵ်ႇလၢတ်ႈၶႆႈၼႄလွင်ႈၼိမိၵ်ႈလၢၵ်ႈၶၼႃႇ၊ဢိၵ်ႇတင်းတၢင်းဢၼ်လီဢၢမ်းတင်းလၢႆ၊ဢိၵ်ႇတင်းၵႃႈဢၼ်ၽြႃးပဵၼ်ၸဝ်ႈဢဝ်ၶဝ်ႁဵတ်းၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းၼၼ်ႉယူႇဢေႃႈ။-
ဝၢႆးသေၶဝ်လၢတ်ႈယဝ်ႉၵႂႃႇၼၼ်ႉ၊ ယႃႇၵုပ်ႈ၊ လၢတ်ႈလႄႈဝႃႈ၊ “ပီႈၼွင်ႉၶဝ်႟။ ထွမ်ႇၵဝ်သေၵမ်း။-
သိမုၼ်ႇ၊ လၢတ်ႈၼႄလွင်ႈတၢင်းဢၼ်ၽြႃးပဵၼ်ၸဝ်ႈႁဵတ်းၸိူဝ်ႉၼင်ႇႁိုဝ်လႄႈမႃးလူတူၺ်းၵူၼ်းတၢင်ႇၸိူဝ်ႉတၢင်ႇၶိူဝ်းပွၵ်ႈဢွၼ်တၢင်း၊ၼင်ႇႁိုဝ်ၵႃႈၼႂ်းၶဝ်ၼၼ်ႉတၵ်းၼုၵ်ႈဢဝ်မဵဝ်းၵူၼ်းပုၼ်ႈၼႃႇမႃႉၸိုဝ်ႈသဵင်မၼ်းၸဝ်ႈၼၼ်ႉယဝ်ႉ။-
ၵႂၢမ်းပရေႃးၽႅတ်ႈ တင်းလၢႆၵေႃႈမႅၼ်ႈၵၼ်တင်းလွင်ႈတၢင်းၼႆႉလႄႈတႅမ်ႈဝႆႉၼႂ်းၵျၢမ်းလိၵ်ႈလႄႈဝႃႈ။
“‘ထႃႇဝရႃႉၽြႃးမီးဢမိင်ႉၸမ်ႉ၊လိုၼ်းၼၼ်ႉၵဝ်တၵ်းၶိုၼ်းမႃးလႄႈမႄးၵုမ်းမႄးႁဵတ်းႁိူၼ်း တႃႇဝိတ်ႈ၊ ဢေႃႈ။ ၵဝ်တၵ်းၶိုၼ်းတႄႇၶိုၼ်းတင်ႈဢၼ်လူမ်ႉပင်းလုလႅဝ်လႄႈႁႂ်ႈမၼ်ႈၶိူင်ႇၶိုၼ်းဢေႃႈ။
ႁဵတ်းၸိူဝ်ႉၼင်ႇၼၼ်လႄႈၵူၼ်းဢၼ်ၵိုတ်းဢၼ်ၵျၢၼ်ႇတင်းလၢႆ၊တၵ်းၶိုၼ်းမႃးႁႃၸဝ်ႈထႃႇဝရႃႉၽြႃးလႄႈ ၵူၼ်းတၢင်ႇၸိူဝ်ႉတၢင်ႇၶိူဝ်း၊ ၵႃႈဢၼ်လႆႈႁွင်ႉၸွမ်းၼႃႇမႃႉၸိုဝ်ႈသဵင်ၵဝ်ၸိူဝ်းၼၼ်ႉတၵ်းပႃးဢေႃႈ။
ၸဝ်ႈၽြႃးဢၼ်ႁဵတ်းႁႂ်ႈလွင်ႈတၢင်းၸိူဝ်းၼႆႉ၊ထၢင်ႇသႃးမႃးၸဵမ်မိူဝ်ႈၵေႃႇၸႃႉႁူဝ်ပိုင်းၼၼ်ႉ မီးပျႃႇတိၵ်ႈဝႆႉဢေႃႈ၊’ ဝႃႈၼင်ႇၼႆမီးမႃးၼင်ႇၼႆယဝ်ႉ။
“ပိူဝ်ႈၼႆလႄႈသၽေႃးၵဝ်ၸမ်ႉ၊ႁဝ်းဢမ်ႇထုၵ်ႇလီယႃႉယူၵ်ႉၵူၼ်းတၢင်ႇၸိူဝ်ႉတၢင်ႇၶိူဝ်း၊ၸိူဝ်းဢၼ်ပိၼ်ႇၸႂ်မႃးၸူးၽြႃးပဵၼ်ၸဝ်ႈၼႆႉၼၼ်ႉ။-
ႁဝ်းယင်းလီတႅမ်ႈလိၵ်ႈပၼ်ၵႂႃႇၵႃႈတီႈၶဝ်၊သင်ႇႁႂ်ႈၶဝ်ဝႄႈပႅတ်ႈတၢင်းၵိၼ်ဢၼ်ၵူဝ်ႈၵိူၵ်ႇဢၼ်လႆႈတၢင်ႇပၼ်တမ်းပၼ်တီႈႁုၼ်ႇႁၢင်ႈသၢင်းထုယဝ်ႉပိူင်ၼိုင်ႈ၊ၵႃႇမေႇသုဢၼ်ဢမ်ႇတြႃးပိူင်ၼိုင်ႈ၊ဢိၵ်ႇတင်းႁႂ်ႈၶဝ်ဢမ်ႇၵိၼ်ၼိူဝ်ႉသတ်းဢၼ်လႆႈၶၢမ်ႇငႅၼ်းၶေႃးတၢႆ၊ဢိၵ်ႇတင်းလိူတ်ႈမၼ်းၸိူဝ်းၼၼ်ႉဢေႃႈ။-
လွင်ႈမၼ်းၸမ်ႉ၊ပိင်းၺၢပ်ႈတြႃး မူဝ်းသေႇ၊ ၼၼ်ႉလႆႈၽတ်းဢၢၼ်ႇၵႃႈၼႂ်းၸရွပ်ႈႁေႃးတြႃးတင်းလၢႆ၊ၼႂ်းဝၼ်းၵမ်သိၼ်ၵူႈသိၼ်လႄႈတြႃးမၼ်းၼၼ်ႉၵေႃႈလႆႈႁေႃးလၢတ်ႈၵႃႈၼႂ်းဝဵင်းၵူႈဝဵင်း၊ၸဵမ်မိူဝ်ႈဢွၼ်တၢင်းႁိုင်ၼႃႇၼၼ်ႉမႃးယဝ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊တမၢၼ်ႇၸဝ်ႈတင်းၵူၼ်းဢုပ်ႉၸိူဝ်းၸဝ်ႈတင်းလၢႆ၊ဢိၵ်ႇတင်းၵူၼ်းၸိူဝ်းၸဝ်ႈတင်းသဵင်ႈတင်းလူင်၊ၽွမ်ႉၵၼ်လိူၵ်ႈဢဝ်ၵူၼ်းၵမ်ႈၽွင်ႈၵႃႈၼႂ်းၶဝ်ၼၼ်ႉသေလႄႈပွႆႇၸႂ်ႉၵႂႃႇၵႃႈတီႈဝဵင်း ဢၼ်ႇတိဢူၵ်ႉ၊ ႁူမ်ႈလူၺ်ႈၵၼ်တင်းသြႃႇ ပေႃးလု၊ ဢိၵ်ႇတင်း ပႃႇၼပႃႉ၊ ဢေႃႈ။ ၶဝ်လိူၵ်ႈဢဝ်ၵူၼ်းသွင်ၵေႃႉ၊ဢၼ်တပႄးၸဝ်ႈတင်းလၢႆရူဝ်ႇသေႇဢၼ်ပဵၼ် ယုတႃႉ၊ ဢၼ်လႆႈၸိုဝ်ႈမႂ်ႇႁွင်ႉဝႃႈ၊ ပႃသပႃႉ၊ ဢိၵ်ႇတင်း သီႇလႃႉ၊ လႄႈ၊-
ဢဝ်လိၵ်ႈၼၼ်ႉ၊ၽၢၵ်ႇၸွမ်းၶဝ်ၵႂႃႇဢေႃႈ။ ၼႂ်းလိၵ်ႈၼၼ်ႉဝႃႈၸမ်ႉ၊ “ႁဝ်းၵႃႈဢၼ်ပဵၼ်တမၢၼ်ႇၸဝ်ႈတင်းၵူၼ်းဢုပ်ႉၸိူဝ်းၸဝ်ႈ၊ဢိၵ်ႇတင်းၵႃႈပီႈၵႃႈၼွင်ႉတင်းလၢႆၸိူဝ်းၼႆႉ၊ပႃးတင်းမႅတ်ႈတႃႇမီးလိၵ်ႈလီလၢႆးၸိုၼ်ႈသေယိုၼ်ႈႁွတ်ႈပၼ်ထိုင်ပီႈၼွင်ႉႁဝ်း၊ၸိူဝ်းဢၼ်ပဵၼ်ၸႃႇတိၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ၊ၸိူဝ်းဢၼ်ယူႇၵႃႈတီႈၸႃႉၸဵမ်ၼႂ်းဝဵင်း ဢၼ်ႇတိဢူၵ်ႉ၊ မိူင်း သီးရီးယႃး၊ တင်းမိူင်း ၵိလိၵိ၊ တင်းသဵင်ႈတင်းလူင်ဢေႃႈ။-
ႁဝ်းလႆႈငိၼ်းဝႃႈ၊ၵူၼ်းၵမ်ႈၽွင်ႈၵႃႈတီႈမူႇၸုမ်းႁဝ်းၼႆႉ၊ၵႂႃႇယႃႉယုၵ်ႉႁႂ်ႈသူယၢပ်ႇၸႂ်ယုင်ႈၸႂ်လူၺ်ႈၵႂၢမ်းဢၼ်ၶဝ်ႁေႃးလၢတ်ႈဝႃႈ၊လူဝ်ႇၶၢမ်ႇမၢင်ႇၵလႃႇပၢတ်ႇပၢႆၼင်လႄႈၸွမ်းတြႃး မူဝ်းသေႇ၊ ၵူႈၵေႃႉၵူႈၵူၼ်းၼၼ်ႉယူႇဢေႃႈ။ ၶဝ်ယင်းဢမ်ႇလႆႈဢၶႂၢင်ႉတီႈႁဝ်းၵႃႈသင်လႄႈၵႂႃႇဢေႃႈ။-
ပိူဝ်ႈၼႆၸင်ႇ၊ႁဝ်းၸုတုမ်ဢုပ်ႇၵုမ်ၵၼ်သေယဝ်ႉ၊ၽွမ်ႉၸႂ်ၵၼ်လိူၵ်ႈဢဝ်ၵူၼ်းသေလႄႈပွႆႇၸႂ်ႉၵႂႃႇၸွမ်းၵေႃႉသႄႈႁဝ်း ပႃႇၼပႃႉ၊ ဢိၵ်ႇတင်းသြႃႇ ပေႃးလု၊-
ဢၼ်ႁတ်းၸုၼ်ႉဢသၢၵ်ႈတူဝ်ၸဝ်ႈၵဝ်ႇပုၼ်ႈ ၸဝ်ႈယေႇသုၶရိၸ်ႈ၊ ၼၼ်ႉၵႂႃႇၸူးသူဢေႃႈ။-
တေႃႈလဵဝ်ႁဝ်းပွႆႇၸႂ်ႉ ယုတႃႉ၊ တင်း သီႇလႃႉ၊ ဢၼ်တၵ်းဢဝ်တင်းသူပ်းၶဝ်မွၵ်ႇလၢတ်ႈၸိူဝ်ႉၼင်ႇဢၼ်ႁဝ်းတႅမ်ႈပၼ်ၵႂႃႇၼႆႉယူႇဢေႃႈ။-
လိူဝ်သေတၢင်းဢၼ်သူထုၵ်ႇလီႁဵတ်းၸိူဝ်းၼၼ်ႉလႄႈဝိၺိၺ်ႇမူတ်းၸၢင်ႇၸဝ်ႈ၊ဢိၵ်ႇတင်းႁဝ်းၽွမ်ႉၵၼ်လႄႈဢမ်ႇၶႂ်ႈဢဝ်ၶူဝ်းဢၼ်ၼၵ်းၼႃႇတၢင်ႇၸိူဝ်ႉတၢင်ႇဢၼ်တၢင်ႇသႂ်ႇၵႃႈၼိူဝ်သူ။-
လွင်ႈဢၼ်သူထုၵ်ႇလီႁဵတ်းၸမ်ႉ၊ယႃႇပေၵိၼ်တၢင်းၵိၼ်ဢၼ်တၢင်ႇပၼ်တမ်းပၼ်ၽၢႆႇၼႃႈႁုၼ်ႇႁၢင်ႈသၢင်းထုယဝ်ႉၼၼ်ႉ။ ယႃႇပေၵိၼ်လိူတ်ႈ။ ယႃႇပေၵိၼ်ၼိူဝ်ႉတူဝ်သတ်းဢၼ်လႆႈၶၢမ်ႇငႅၼ်းၶေႃးတၢႆၼၼ်ႉ၊ဝႄႈပႅတ်ႈၵႃႇမေႇသုဢၼ်ဢမ်ႇတြႃးတင်းလၢႆၼၼ်ႉတႃႉ။ ပေႃးသူဝႄႈပႅတ်ႈလွင်ႈတၢင်းၸိူဝ်းၼႆႉၸိုင်၊သူႁဵတ်းဢၼ်လီဢၼ်ငၢမ်းယဝ်ႉ။ ႁႂ်ႈယူႇလီၵိၼ်ဝၢၼ်သေၵမ်းလူၺ်ႈ၊” ဝႃႈၼင်ႇၼႆဢေႃႈ။
ၽူႈတၢင်တူဝ်ၸိူဝ်းၼၼ်ႉလႆႈၶၢမ်ႇတၢင်းဢၼ်ပွႆႇၸႂ်ႉၵႂႃႇလႄႈၶဝ်ၵႂႃႇၵႃႈတီႈဝဵင်း ဢၼ်ႇတိဢူၵ်ႉ၊ ယဝ်ႉၸင်ႇ၊တီႈၼၼ်ႈၶဝ်ႁွင်ႉဢဝ်တပႄးၸဝ်ႈတင်းမူႇတင်းၸုမ်းၸုတုမ်ၵၼ်လႄႈဢၢပ်ႈပၼ်လိၵ်ႈၼၼ်ႉဢေႃႈ။-
ၶဝ်ၽတ်းဢၢၼ်ႇလိၵ်ႈၼၼ်ႉလႄႈ မီးတၢင်းဢၼ်သိူဝ်းၸူမ်းၵွပ်ႈပိူဝ်ႈၵႂၢမ်းဢၼ်ပၼ်ဢဵၼ်ပၼ်ႁႅင်းၼၼ်ႉဢေႃႈ။-
ယုတႃႉ၊ တင်း သီႇလႃႉ၊ ၼၼ်ႉ ပိူဝ်ႈဢၼ်ပဵၼ်ပရေႃးၽႅတ်ႈ လႄႈလၢတ်ႈတေႃႇၶဝ်ႁိုင်ၼႃႇတင်းၵႂၢမ်းဢၼ်တိုၵ်းယူင်းပၼ်ဢဵၼ်ပၼ်ႁႅင်းတီႈၶဝ်ဢေႃႈ။-
ဝၢႆးသေယူႇတီႈၼၼ်ႈႁိုင်တၢၼ်ႇတၢၼ်ႇယဝ်ႉၸိုင်၊တပႄးၸဝ်ႈၸိူဝ်းၼၼ်ႉပွႆႇၶဝ်မိူဝ်းၵႂႃႇၼိမ်ၼိမ်လီလီလႄႈၶဝ်ၵေႃႈမိူဝ်းၵႂႃႇၵႃႈတီႈၵူၼ်းၸိူဝ်းဢၼ်ပွႆႇၶဝ်မႃးၼၼ်ႉဢေႃႈ။-
[ၵူၺ်းၵႃႈ၊ သီႇလႃႉ၊ ၼၼ်ႉ၊ဝႆႉၸႂ်ၵိုတ်းသဝ်းယူႇတီႈၼၼ်ႈဢေႃႈ။]
သြႃႇ ပေႃးလု၊ တင်း ပႃႇၼပႃႉ၊ ယင်းယူႇတီႈၼႂ်းဝဵင်း ဢၼ်ႇတိဢူၵ်ႉ၊ လႄႈ သင်ႇသွၼ်သုင်းမႃႉပၼ်၊ဢိၵ်ႇတင်းႁေႃးလၢတ်ႈၼုၵ်ႈၵပၢတ်ႈတြႃးၸဝ်ႈၽြႃးႁူမ်ႈလူၺ်ႈၵၼ်တင်းပိူၼ်ႈတၢင်ႇၵေႃႉၼမ်ၼႃႇဢေႃႈ။
လိုၼ်းၼၼ်ႉ၊ဢမ်ႇႁိုင်ဢမ်ႇၼၢၼ်းသြႃႇ ပေႃးလု၊ လၢတ်ႈတီႈ ပႃႇၼပႃႉ၊ လႄႈဝႃႈ၊ “ႁဝ်းဢွၼ်ၵၼ်ၶိုၼ်းၵႂႃႇလႄႇထိုင်ၵႃႈပီႈၵႃႈၼွင်ႉၵူႈဝဵင်းၵူႈဝဵင်း၊တီႈဢၼ်ႁဝ်းယၢမ်ႈႁေႃးတြႃးၸဝ်ႈၽြႃးၸိူဝ်းၼၼ်ႉလႄႈလူတူၺ်းလွင်ႈဢၼ်ၶဝ်မီးယူႇၸိူဝ်ႉၼင်ႇႁိုဝ်ၼၼ်ႉတႃႉႁဝ်း၊” ဝႃႈၼင်ႇၼႆဢေႃႈ။-
ပႃႇၼပႃႉ၊ ၶႂ်ႈႁွင်ႉဢဝ် ယူဝ်းႁၢၼ်ႇမႃႇၵု၊ ၸွမ်းၵႂႃႇသေၵေႃႈ၊-
သြႃႇ ပေႃးလု၊ ထၢင်ႇဝႃႈဢမ်ႇထုၵ်ႇလီႁွင်ႉၸွမ်း၊ပိူဝ်ႈဢၼ်မၼ်းယင်းဢမ်ႇၸွမ်းဢမ်ႇၵႂႃႇတေႃႇထိုင်ႁွတ်ႈၵၢၼ်တၢင်းႁဵတ်းၸဝ်ႈယဝ်ႉတူဝ်ႈလႄႈပႅတ်ႈၶဝ်သွင်ၵေႃႉဝႆႉၵႃႈတီႈမိူင်း ပမ်ႇပုလိ၊ လႄႈပွၵ်ႈၶိုၼ်းမိူဝ်းၵႂႃႇၼၼ်ႉဢေႃႈ။-
တီႈၼၼ်ႈၶဝ်လႆႈတွပ်ႇထဵင်ၵၼ်ႁႅင်းတၢၼ်ႇတၢၼ်ႇ၊ထၢၼ်ႈပေႃးလႆႈၽၢတ်ႇၵၼ်ၵႂႃႇၵေႃႉတီႈၵေႃႉတၢင်းလႄႈ ပႃႇၼပႃႉ၊ ႁွင်ႉဢဝ် မႃႇၵု၊ ၶီႇႁိူဝ်းသၢင်းၽေႃးၵႂႃႇၸူးၵုၼ် သႆးပရၢတ်ႈ၊ သေဢေႃႈ။-
သြႃႇ ပေႃးလု၊ ၸမ်ႉ၊ႁွင်ႉဢဝ် သီႇလႃႉ၊ လႄႈ လႆႈၶၢမ်ႇတၢင်းဢၼ်တပႄးၸဝ်ႈတင်းလၢႆ၊ဢဝ်ၶဝ်ဢၢပ်ႈဝၢင်းၼႂ်းၵျေးၸူးၽြႃးပဵၼ်ၸဝ်ႈလႄႈဢွၵ်ႇၵႂႃႇသေဢေႃႈ။-
မၼ်းလတ်းၶဝ်ႈၵႂႃႇၵႃႈၼႂ်းမိူင်း သီးရီးယႃး၊ ဢိၵ်ႇတင်းမိူင်း ၵိလိၵိ၊ လႄႈတိုၵ်းယူင်းၸိူဝ်းၸဝ်ႈတင်းလၢႆႁႂ်ႈမၼ်ႈၶိူင်ႇယူႇဢေႃႈ။
သြႃႇ ပေႃးလု၊ ၵႂႃႇႁွတ်ႈၵႃႈတီႈဝဵင်း တေႇရပေႇ၊ ဢိၵ်ႇတင်းဝဵင်း လုတ်ႉတရႃႉ၊ ဢေႃႈ။ တီႈၼၼ်ႈ၊မီးၶရိၸ်ႈယၢၼ်ႇၵေႃႉၼိုင်ႈဢၼ်လႆႈၸိုဝ်ႈ တိမေႃးသေႇ၊ ဢေႃႈ။ မႄႈမၼ်းပဵၼ်ၶရိၸ်ႈယၢၼ်ႇၵူၼ်းမဵဝ်း ၵျူး၊ ဢေႃႈ။ ပေႃႈမၼ်းၸမ်ႉ၊ပဵၼ်ၵူၼ်းမဵဝ်း ၵရိၵ်ႉ၊ ဢေႃႈ။-
မၼ်းၼၼ်ႉ၊ပဵၼ်ၵူၼ်းဢၼ်မီးသရေႇၼႂ်းၵႄႈတပႄးၸဝ်ႈ၊ဝဵင်း လုတ်ႉတရႃႉ၊ ဢိၵ်ႇတင်းဝဵင်း ဢိၵေႃးၼိ၊ ၸိူဝ်းၼၼ်ႉဢေႃႈ။-
သြႃႇ ပေႃးလု၊ ၶႂ်ႈႁွင်ႉဢဝ်မၼ်းၸွမ်းၵႂႃႇလႄႈၸင်ႇႁဵတ်းမၢင်ႇၵလႃႇတၢင်းဢၼ်ပၢတ်ႇပၢႆၼင်တီႈမၼ်းဢေႃႈ။ သြႃႇ ပေႃးလု၊ ႁဵတ်းၸိူဝ်ႉၼင်ႇၼၼ်ၵွပ်ႈပိူဝ်ႈၵူၼ်းမဵဝ်း ၵျူး၊ ဢၼ်မီးတီႈၼၼ်ႈ၊ႁုလွင်ႈဢၼ်ပေႃႈ တိမေႃးသေႇ၊ ၶဝ်ပဵၼ်ၵူၼ်းမဵဝ်း ၵရိၵ်ႉ၊ ၼၼ်ႉဢေႃႈ။-
ၼႂ်းမိူဝ်ႈဢၼ်ၶဝ်လႄႇၵႂႃႇၵႃႈတီႈဝဵင်းၸိူဝ်းၼၼ်ႉၸိုင်၊ၶဝ်ဢဝ်ပိင်းၺၢပ်ႈၸိူဝ်းဢၼ်တမၢၼ်ႇၸဝ်ႈ၊ဢိၵ်ႇတင်းၵူၼ်းဢုပ်ႉၸိူဝ်းၸဝ်ႈတင်းလၢႆ၊ဢၼ်ယူႇတီႈဝဵင်း ယေႇရုသလႅမ်ႇ၊ ၶိုင်ပွင်ဝႆႉၼၼ်ႉ၊မွၵ်ႇလၢတ်ႈပၼ်ႁႂ်ႈၸိူဝ်းၸဝ်ႈၵမ်ၵျၢင်ႉၸွမ်းဢေႃႈ။-
ပိူဝ်ႈၼႆလႄႈၸိူဝ်းၸဝ်ႈတင်းလၢႆၼၼ်ႉ၊တၢင်းယုမ်ႇမၢတ်ႈၶဝ်တႄႇဝႆႉမၼ်ႈၶိူင်ႇယူႇလႄႈၵူၼ်းၶဝ်ႈမႃးၵေႃႈယဵင်ႈၶႅၼ်းၼမ်မႃးၵိုၼ်းမႃးၵူႈဝၼ်းယူႇဢေႃႈ။
ၶဝ်လႄႇၵႂႃႇၼႂ်းမိူင်း ၽရုၵိ၊ ဢိၵ်ႇတင်းၼႂ်းမိူင်း ၵလႃႇတိ၊ ၵွပ်ႈပိူဝ်ႈဝိၺိၺ်ႇမူတ်းၸၢင်ႇၸဝ်ႈဢမ်ႇပၼ်ဢၶႂၢင်ႉ၊ႁႂ်ႈၶဝ်ႁေႃးတြႃးၸဝ်ႈၵႃႈၼႂ်းမိူင်း ဢႃႇသိ၊ ၼၼ်ႉဢေႃႈ။-
မိူဝ်ႈဢၼ်ၶဝ်ႁွတ်ႈထိုင်ၵႃႈတီႈလႅၼ်လိၼ်မိူင်း မုသိယႃႉ၊ လႄႈၶဝ်ဢၢင်ႈတၵ်းၵႂႃႇၵႃႈတီႈမိူင်း ပိသုၼိ၊ ၼၼ်ႉၸိုင်၊ဝိၺိၺ်ႇ ၸဝ်ႈယေႇသု၊ ဢမ်ႇပၼ်ဢၶႂၢင်ႉတီႈၶဝ်။-
ပိူဝ်ႈၼႆၸင်ႇ၊ၶဝ်ဝႄႈပႅတ်ႈ ဝဵင်း မုသိယႃႉ၊ လူင်းၵႂႃႇၵႃႈတီႈဝဵင်း ထရေႃး၊ သေဢေႃႈ။-
ၶိုၼ်းၼၼ်ႉ၊သြႃႇ ပေႃးလု၊ လႆႈပျႃႇတိၵ်ႈၼိမိၵ်ႈဢၼ်ႁၼ်ၵူၼ်းမိူင်း မႃႇၵေႇတေႃးၼိ၊ ၵေႃႉၼိုင်ႈ၊ၸုၵ်းယူႇသေလႄႈတွင်းပၢၼ်ႇမၼ်းလႄႈဝႃႈ၊ “ၶၢမ်ႈမႃးၵႃႈတီႈမိူင်း မႃႇၵေႇတေႃးၼိ၊ ၼႆႉလႄႈၸွႆႈထႅမ်ႁဝ်းၶႃႈသေၵမ်း၊” ဝႃႈၼင်ႇၼႆၼၼ်ႉဢေႃႈ။-
မိူဝ်ႈဢၼ်သြႃႇ ပေႃးလု၊ လႆႈႁၼ်ပျႃႇတိၵ်ႈၼိမိၵ်ႈၼၼ်ႉ၊ပိူဝ်ႈဢၼ်ႁဝ်းပွင်ႇၸႂ် ဝႃႈ၊ၽြႃးပဵၼ်ၸဝ်ႈႁွင်ႉဢဝ်ႁဝ်း၊ႁႂ်ႈလႆႈႁေႃးၶၢဝ်ႇတြႃးသိူဝ်းပျေႃႇၸဝ်ႈၵႃႈတီႈၼၼ်ႈ၊ၼၼ်ႉလႄႈ ႁဝ်းႁႅၼ်းႁႂ်ႈလႆႈဢွၵ်ႇၵႂႃႇၸူးမိူင်း မႃႇၵေႇတေႃးၼိ၊ ၵမ်းလဵဝ်ဢေႃႈ။
ႁဝ်းဢွၵ်ႇသေၵႃႈတီႈဝဵင်း ထရေႃး၊ ၶီႇႁိူဝ်းသၢင်းၽေႃးၶၢမ်ႈၵႂႃႇၸူးၵုၼ် သမေႃးထရိတ်ႉ၊ လႄႈၼႂ်းဝၼ်းမိူဝ်ႈၽုၵ်ႈသမ်ႉၵႂႃႇၸူးတီႈဝဵင်း ၼႃႇပေႃးလိ၊ ဢေႃႈ။-
လုၵ်ႉသေၵႃႈတီႈၼၼ်ႈသမ်ႉၵႂႃႇၵႃႈၼႂ်းမိူင်းလႄႈႁွတ်ႈထိုင်ၵႂႃႇၼႂ်းဝဵင်း ၽိလိပ်ႉပိ၊ ဢၼ်ပဵၼ်ဝဵင်းလူင်တီႈဢိူင်ႇၼိုင်ႈ၊ၼႂ်းမိူင်း မႃႇၵေႇတေႃးၼိ၊ လႄႈသမ်ႉပဵၼ်ဝဵင်းဢၼ် ရူဝ်းမႃႉ၊ ၶဝ်ဢုပ်ႉပိူင်ႇၼၼ်ႉသေယဝ်ႉ၊ယူႇၵႃႈတီႈၼၼ်ႈႁိုင်တၢၼ်ႇတၢၼ်ႇဢေႃႈ။-
ၼႂ်းဝၼ်းၵမ်သိၼ်ႁဝ်းဢွၵ်ႇဝဵင်းၵႂႃႇၸူးၵႃႈတီႈ၊ႁိမ်းၽင်ႇၼမ်ႉႁွင်ႈတီႈဢၼ်ႁဝ်းထၢင်ႇတၵ်းမီးၵူၼ်းမဵဝ်း ၵျူး၊ ၶဝ်ၸုတုမ်လႄႈႁဵတ်းသူးတွင်းပထၼႃႇၼၼ်ႉဢေႃႈ။-
ႁဝ်းၼင်ႈလႄႈဢုပ်ႇၵုမ်မႄႈယိင်းၸိူဝ်းဢၼ်ၸုတုမ်ယူႇတီႈၼၼ်ႈလႄႈၵႃႈၼႂ်းၶဝ်ၸိူဝ်းဢၼ်ထွမ်ႇဢဝ်ႁဝ်းၼၼ်ႉ၊မီး လုတိ၊ မႄႈယိင်းဝဵင်း သွႃႇတီႇရေႇ၊ ၵႃႉၶၢႆၶူဝ်းလဵင်းဢၼ်လႅင်ၵမ်ႇယူႇလႄႈပဵၼ်ၵေႃႉဢၼ်ၵူဝ်းၵႂၢႆႇၽြႃးပဵၼ်ၸဝ်ႈယူႇၼၼ်ႉသေယဝ်ႉ၊ၽြႃးပဵၼ်ၸဝ်ႈၽုၺ်ႇပိုတ်ႇႁူဝ်ၸႂ်မၼ်းႁႂ်ႈမၼ်းပႃးၸႂ်ပႃးၶေႃးထွမ်ႇဢဝ်တြႃးဢၼ်သြႃႇ ပေႃးလု၊ ႁေႃးလၢတ်ႈၼၼ်ႉဢေႃႈ။-
ဝၢႆးသေမၼ်း၊ဢိၵ်ႇတင်းၵူၼ်းႁိူၼ်းၵူၼ်းယေးမၼ်းတင်းလၢႆ၊ၶၢမ်ႇဢဝ်မၢင်ႇၵလႃႇပပ်ႉတိၸမ်ႇ ယဝ်ႉၼၼ်ႉၸိုင်၊မၼ်းႁွင်ႉပၢင်းႁဝ်းလႄႈဝႃႈ၊ “ပေႃးသူၸဝ်ႈမၢတ်ႈၵဝ်ၶႃႈပဵၼ်ၵေႃႉဢၼ်ယုမ်ႇမၢတ်ႈၸဝ်ႈၽြႃးဢမၢၼ်ႇၶၼ်ပဵၼ်ၸိုင်၊မႃးယူႇသဝ်းၵႃႈၼႂ်းႁိူၼ်းၵဝ်ၶႃႈသေၵမ်းၶႃႈ၊” ဝႃႈၼင်ႇၼႆၸူဝ်းဢဝ်ႁဝ်းဢေႃႈ။
ဝၼ်းၼိုင်ႈ၊မိူဝ်ႈဢၼ်ႁဝ်းယင်းတိုၵ်ႉၵႂႃႇၸူးတီႈဢၼ်ႁဵတ်းသူးတွင်းပထၼႃႇယူႇၼၼ်ႉၸိုင်၊ၶႃႈမႄႈယိင်းဢွၼ်ႇၼၼ်ႉၵေႃႉၼိုင်ႈၽီၶဝ်ႈလႄႈၸၢင်ႈႁေႃးလွင်ႈဢၼ်တၵ်းပဵၼ်မႃးၼႂ်းဝၼ်းမိူဝ်းၼႃႈၼၼ်ႉသေလႄႈႁႂ်ႈၸဝ်ႈမၼ်းတင်းလၢႆလႆႈငိုၼ်းၼမ်ၼႃႇၼၼ်ႉ၊ႁႄႉႁပ်ႉႁူဝ်တၢင်းႁဝ်းဢေႃႈ။-
မၼ်းၸွမ်းလင်သြႃႇ ပေႃးလု၊ တင်းႁဝ်းလႄႈႁွင်ႉပၢဝ်ႇႁွင်ႉသေႃႇလႄႈဝႃႈ၊ “ၵူၼ်းၸိူဝ်းၼႆႉပဵၼ်ၵူၼ်းၸႂ်ႉၵူၼ်းသွႆၽြႃးပဵၼ်ၸဝ်ႈ၊ဢၼ်သုင်ၼႃႇသေပိူၼ်ႈၼၼ်ႉလႄႈႁေႃးလၢတ်ႈသဵၼ်ႈတၢင်းတြႃးဢၼ်ၵႄႇၶျွတ်ႈတီႈသူဢေႃႈ၊” ဝႃႈၼင်ႇၼႆဢေႃႈ။-
မၼ်းႁဵတ်းၸိူဝ်ႉၼင်ႇၼၼ်မိုဝ်ႉဝၼ်းၼမ်ၼႃႇတေႃႇထိုင်ႁွတ်ႈသြႃႇ ပေႃးလု၊ မီးၸႂ်ဢၼ်သုၵ်ႉသၢၵ်ႉလႄႈ ၸင်ႇဝၢႆႇၼႃႈလႄႈလၢတ်ႈတီႈၽီၼၼ်ႉဝႃႈ၊ “ၵဝ်ဢိင်ပိုင်ႈၼႃႇမႃႉၸိုဝ်ႈသဵင် ၸဝ်ႈယေႇသုၶရိၸ်ႈ၊ လႄႈမီးဢမိင်ႉတီႈမႂ်းႁႂ်ႈဢွၵ်ႇသေၵႃႈၼႂ်းမၼ်းၵႂႃႇတႃႉ၊” ဝႃႈၼင်ႇၼႆလႄႈၽီၼၼ်ႉဢွၵ်ႇၵႂႃႇၵမ်းလဵဝ်ဢေႃႈ။-
ၸဝ်ႈမၼ်းၸိူဝ်းၼၼ်ႉ၊မိူဝ်ႈဢၼ်ႁုႁၼ်လွင်ႈဢၼ်ၶဝ်ဢမ်ႇၸၢင်ႈတေႁဵတ်းႁႂ်ႈလႆႈၵိၼ်ၸွမ်းမၼ်းထႅင်ႈၼၼ်ႉၸိုင်၊ၶဝ်တိဢဝ်သြႃႇ ပေႃးလု၊ တင်း သီႇလႃႉ၊ လႄႈတိုတ်ႉၸၼ်ၵႂႃႇၸူးတီႈၶုၼ်ဢႃႇၼႃႇတင်းလၢႆၵႃႈတီႈပၢင်တုမ်ၵူၼ်းဝဵင်းဢေႃႈ။-
ၶဝ်ႁွတ်ႈၵႂႃႇၵႃႈတီႈၶုၼ်တႅပ်းတတ်းတြႃးၶဝ်လႄႈလဝ်ႈလၢတ်ႈလႄႈဝႃႈ၊ “ၵူၼ်းၸိူဝ်းၼႆႉပဵၼ်ၵူၼ်းမဵဝ်း ၵျူး၊ လႄႈၸၢင်ႈယႃႉယုၵ်ႉဝဵင်းႁဝ်းၼႆႉၶႃႈဢေႃႈ။-
ၶဝ်သွၼ်ပၼ်ထုင်းၸၢမ်ႇဢၼ်ၶတ်းၵၼ်တင်းထုင်းဢုပတေႇႁဝ်းဢေႃႈ။ ႁဝ်းၼႆႉပဵၼ်ၵူၼ်းမိူင်း ရူဝ်းမႃႉ၊ လႄႈထုင်းၸၢမ်ႇၶဝ်ၼၼ်ႉ၊ႁဝ်းဢမ်ႇၶၢမ်ႇဢမ်ႇဢဝ်လႆႈဢမ်ႇၵမ်ၵျၢင်ႉၸွမ်းလႆႈၶႃႈ၊” ဝႃႈၼင်ႇၼႆဢေႃႈ။-
မူႇၵူၼ်းတင်းလၢႆၽွမ်ႉၸႂ်ၵၼ်လုၵ်ႉၽိုၼ်ႉတေႃႇသြႃႇ ပေႃးလု၊ ဢိၵ်ႇတင်း သီႇလႃႉ၊ ဢေႃႈ။ ၶုၼ်ၸိူဝ်းၼၼ်ႉ၊ထွတ်ႇပႅတ်ႈၶူဝ်းၼုင်ႈသြႃႇ ပေႃးလု၊ ဢိၵ်ႇတင်း သီႇလႃႉ၊ လႄႈသိၵ်ႇပႅတ်ႈသေယဝ်ႉ၊ပၼ်ဢမိင်ႉႁႂ်ႈဢဝ်ၶွၼ်ႉပေႃႉယႅၼ်ႉဢေႃႈ။-
ဝၢႆးသေပေႃႉယႅၼ်ႉၼမ်ၼႃႇလူင်လၢင်ယဝ်ႉၸင်ႇ၊ၶင်ၶဝ်ဝႆႉၵႃႈၼႂ်းထွင်ႇလႄႈပၼ်ဢမိင်ႉတီႈထွင်ႇမူးႁႂ်ႈၶတ်းၽၵ်းတူဝႆႉၼႅၼ်ႈၼႅၼ်ႈဢေႃႈ။-
ၵႃႈၼင်ႇဢၼ်လႆႈၶၢမ်ႇဢဝ်ဢမိင်ႉၼၼ်ႉ၊ထွင်ႇမူးၵေႃႈဢဝ်ၶဝ်ၶင်ဝႆႉၵႃႈၼႂ်းႁွင်ႈတၢင်းၼႂ်းလႄႈသႂ်ႇထၢင်ႇတိၼ်ဝႆႉသေဢေႃႈ။
မိူဝ်ႈထိုင်ၶိင်ႇတဵင်ႈၶိုၼ်းၸိုင်၊သြႃႇ ပေႃးလု၊ တင်း သီႇလႃႉ၊ သူးတွင်းႁဵတ်းၵႂၢမ်းယွင်ႈယေႃးၽြႃးပဵၼ်ၸဝ်ႈယူႇလႄႈၵူၼ်းထွင်ႇတင်းလၢႆဢွၼ်ၵၼ်ထွမ်ႇၶဝ်ယူႇဢေႃႈ။-
မိူဝ်ႈၼၼ်ႉ၊ၵိုင်ႉၵၢင်ႉဢိင်ႇသၼ်ႇပဵၼ်မႃးႁႅင်းၼႃႇလႄႈတိၼ်ထွင်ႇၵေႃႈသၼ်ႇၶွၼ်းဝႆဢေႃႈ။ ၽၵ်းတူထွင်ႇၵႃႈမီးၵေႃႈၽုၺ်ႇပိုတ်ႇၵႂႃႇၵမ်းလဵဝ်လႄႈၸိူၵ်ႈလဵၵ်းလုတ်ႈတူၵ်းသေၵႃႈတီႈၵူၼ်းထွင်ႇတင်းသဵင်ႈတင်းမူတ်းၵႂႃႇဢေႃႈ။-
ထွင်ႇမူးၼၼ်ႉတိုၼ်ႇမႃးလႄႈ မိူဝ်ႈဢၼ်ႁၼ်ၽၵ်းတူထွင်ႇၽုၺ်ႇပိုတ်ႇဝႆႉယူႇၼၼ်ႉၸိုင်၊ထၢင်ႇဝႃႈ၊ၵူၼ်းထွင်ႇၸိူဝ်းၼၼ်ႉဢွၵ်ႇပၢႆႈၵႂႃႇမူတ်းယဝ်ႉဝႃႈၼႆလႄႈထွတ်ႇလၢပ်ႇဢၢင်ႈတၵ်းတႅင်းတူဝ်ၸဝ်ႈၵဝ်ႇတၢႆဢေႃႈ။-
ပေႃးလု၊ ၸင်ႇၵိဝ်သဵင်ယႂ်ႇၼႃႇလႄႈဝႃႈ၊ “ယႃႇပေႁဵတ်းဢၼ်ဢမ်ႇလီတီႈတူဝ်ၸဝ်ႈၵဝ်ႇသေၵမ်း။ ႁဝ်းတင်းသဵင်ႈတင်းလူင်မီးယူႇၵႃႈတီႈၼႆႈဢေႃႈ၊” ဝႃႈၼင်ႇၼႆဢေႃႈ။
ထွင်ႇမူးၼၼ်ႉ၊ၸင်ႇႁႂ်ႈၵူၼ်းဢဝ်ၽႆးၵၢၼ်ႈၶႄႈမႃးသေယဝ်ႉ၊လႅၼ်ႈၶဝ်ႈၵႂႃႇသၼ်ႇသၼ်ႇသၢႆသၢႆယူႇသေလႄႈၶုပ်ႉမူပ်ႇၵႃႈတီႈႁိမ်းတိၼ်သြႃႇ ပေႃးလု၊ တင်း သီႇလႃႉ၊ ဢေႃႈ။-
ႁဵတ်းၼၼ်လႄႈမၼ်းဢဝ်ၶဝ်သွင်ၵေႃႉၼၼ်ႉ၊ဢွၵ်ႇမႃးသေယဝ်ႉထၢမ်ဝႃႈ၊ “ၸဝ်ႈၶဝ်႟။ ၼင်ႇႁိုဝ်ၵဝ်ၶႃႈတၵ်းႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၸိုင်၊တၵ်းလႆႈႁဵတ်းၸိူဝ်ႉႁိုဝ်ၶႃႈ၊” ဝႃႈၼင်ႇၼႆဢေႃႈ။
ၶဝ်ၵေႃႈလၢတ်ႈလႄႈဝႃႈ၊ “ယုမ်ႇမၢတ်ႈ ၸဝ်ႈယေႇသုၶရိၸ်ႈ၊ တႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊မႂ်းဢိၵ်ႇတင်းၵူၼ်းႁိူၼ်းၵူၼ်းယေးမႂ်း၊တၵ်းႁွတ်ႈထိုင်တၢင်းဢၼ်ၵႄႇၶျွတ်ႈယဝ်ႉဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ၶဝ်ႁေႃးလၢတ်ႈၼုၵ်ႈၵပၢတ်ႈၸဝ်ႈၽြႃးတီႈမၼ်း၊ဢိၵ်ႇတင်းၵူၼ်းၵႃႈဢၼ်မီးယူႇၵႃႈၼႂ်းႁိူၼ်းမၼ်းသေလႄႈ၊-
ၼႂ်းၶိင်ႇၼႃႇရီႇၶိုၼ်းၼၼ်ႉ၊ထွင်ႇမူးသုၵ်ႈပၼ်ႁွႆးၸဵပ်းၶဝ်သေယဝ်ႉ၊မၼ်းဢိၵ်ႇတင်းၵူၼ်းႁိူၼ်းၵူၼ်းယေးမၼ်းတင်းသဵင်ႈတင်းလူင်ၶၢမ်ႇဢဝ်မၢင်ႇၵလႃႇပပ်ႉတိၸမ်ႇ ၵမ်းလဵဝ်ဢေႃႈ။-
ၵမ်းၼၼ်ႉ၊မၼ်းပၢင်းဢဝ်သြႃႇ ပေႃးလု၊ တင်း သီႇလႃႉ၊ ၵႂႃႇၵႃႈတီႈႁိူၼ်းမၼ်းသေလႄႈႁဵတ်းလဵင်ႉႁဵတ်းလူဢေႃႈ။ ပိူဝ်ႈဢၼ်တေႃႈလဵဝ်ၼႆႉ၊ယုမ်ႇမၢတ်ႈၽြႃးပဵၼ်ၸဝ်ႈယဝ်ႉလႄႈမၼ်းဢိၵ်ႇတင်းၵူၼ်းႁိူၼ်းၵူၼ်းယေးမၼ်းတင်းလၢႆၸူမ်းသိူဝ်းၼႃႇလူင်လၢင်ဢေႃႈ။
မိူဝ်ႈဢၼ်မိူင်းလႅင်းယဝ်ႉၼၼ်ႉ၊ၶုၼ်ဢၼ်တႅပ်းတတ်းတြႃးၶဝ်ပွႆႇၸႂ်ႉၶုၼ်ႁၢၼ်ၶဝ်မႃးပႃးတင်းဢမိင်ႉဢၼ်ဝႃႈ၊ “ပွႆႇၵူၼ်းၸိူဝ်းၼႆႉလွတ်ႈတႃႉ၊” ဝႃႈၼင်ႇၼႆၼၼ်ႉဢေႃႈ။
ပိူဝ်ႈၼႆလႄႈထွင်ႇမူးလၢတ်ႈတီႈသြႃႇ ပေႃးလု၊ လႄႈဝႃႈ၊ “ၶုၼ်တင်းလၢႆပွႆႇၸႂ်ႉမႃးႁႂ်ႈပွႆႇလွတ်ႈသူၸဝ်ႈၶႃႈယဝ်ႉ။ ပိူဝ်ႈၼႆလႄႈသူၸဝ်ႈဢွၵ်ႇၵႂႃႇလႆႈၶႃႈယဝ်ႉ။ ၵႂႃႇၼိမ်ၼိမ်လီလီသေၵမ်းၶႃႈတႃႉ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊သြႃႇ ပေႃးလု၊ ၶိုၼ်းလၢတ်ႈတီႈၶုၼ်ႁၢၼ်ၸိူဝ်းၼၼ်ႉလႄႈဝႃႈ၊ “ႁဝ်းၼႆႉယင်းဢမ်ႇမီးဢပျတ်ႈၵႃႈသင်လႄႈလႆႈၶၢမ်ႇပေႃႉယႅၼ်ႉၵႃႈတီႈၽၢႆႇၼႃႈမူႇၵူၼ်းထၢင်ႇထၢင်ႇသႃးသႃးယဝ်ႉ။ ႁဝ်းၼႆႉပဵၼ်ၵူၼ်းမိူင်း ရူဝ်းမႃႉ၊ ဢေႃႈ။ ယင်းလႆႈၶၢမ်ႇတၢင်းဢၼ်တူၵ်းထွင်ႇယဝ်ႉလႄႈၶဝ်ၶႂ်ႈလွမ်ပွႆႇဢွၵ်ႇတဵတ်ႇတဵတ်ႇႁိုဝ်း။ ဢမ်ႇထုၵ်ႇလီႁဵတ်းၸိူဝ်ႉၼင်ႇၼႆ။ ႁႂ်ႈတူဝ်ၶုၼ်တႅပ်းတတ်းတြႃးၸိူဝ်းၼၼ်ႉမႃးၼုၵ်ႈဢဝ်ႁဝ်းဢွၵ်ႇတႃႉ၊” ဝႃႈၼင်ႇၼႆဢေႃႈ။
ၶုၼ်ႁၢၼ်ၸိူဝ်းၼၼ်ႉၵေႃႈ၊ဢဝ်ၵႂၢမ်းၼၼ်ႉၵႂႃႇမွၵ်ႇလၢတ်ႈထိုင်ၵႃႈတီႈၶုၼ်ဢၼ်တႅပ်းတတ်းတြႃးတင်းလၢႆလႄႈ မိူဝ်ႈဢၼ်ၶဝ်ငိၼ်းလွင်ႈဢၼ်သြႃႇ ပေႃးလု၊ တင်း သီႇလႃႉ၊ ပဵၼ်ၵူၼ်းမိူင်း ရူဝ်းမႃႉ၊ ၼၼ်ႉၸိုင်၊ၶဝ်ၵူဝ်ႁႄၼႃႇဢေႃႈ။-
ပိူဝ်ႈၼႆလႄႈဢွၼ်ၵၼ်ၵႂႃႇတွင်းပၢၼ်ႇတီႈၶဝ်သေယဝ်ႉ၊ဢဝ်ၶဝ်ဢွၵ်ႇထွင်ႇမႃးယဝ်ႉၸင်ႇ၊ၶျေႃးဝွၼ်းႁႂ်ႈၶဝ်ဢွၵ်ႇဝဵင်းၼၼ်ႉၵႂႃႇဢေႃႈ။-
ၶဝ်ၵေႃႈဢွၵ်ႇထွင်ႇၵႂႃႇလႄႈၶဝ်ႈၵႃႈၼႂ်းႁိူၼ်း လုတိ၊ သေယဝ်ႉ၊ထူပ်းႁၼ်တပႄးၸဝ်ႈတင်းလၢႆလႄႈတိုၵ်းယူင်းပၼ်ႁႅင်းၶဝ်ယဝ်ႉၸင်ႇဢွၵ်ႇၵႂႃႇသေဢေႃႈ။
လိုၼ်းၼၼ်ႉ၊သြႃႇ ပေႃးလု၊ တင်း သီႇလႃႉ၊ သိုပ်ႇၶၢဝ်းတၢင်းၵႂႃႇၸူးဝဵင်း ဢမ်ႇၽိပေႃးလိ၊ တင်းဝဵင်း ဢႃႇပေႃႇလေႃႇၼိ၊ လႄႈ ႁွတ်ႈထိုင်ၵႂႃႇၵႃႈတီႈဝဵင်း ထိတ်ႉသႃႇလေႃးၼိၵ်ႈ၊ တီႈဢၼ်မီးၸရွပ်ႈႁေႃးတြႃး ၵျူး၊ ၶဝ်ၼၼ်ႉဢေႃႈ။-
ၵႃႈၼင်ႇဢၼ်သြႃႇ ပေႃးလု၊ ယၢမ်ႈႁဵတ်းၼၼ်ႉ၊မၼ်းၶဝ်ႈၵႃႈၼႂ်းၸရွပ်ႈႁေႃးတြႃးသေယဝ်ႉ၊တီႈၼၼ်ႈဝၼ်းၵမ်သိၼ်သၢမ်သိၼ်တဵမ်တဵမ်၊မၼ်းဢဝ်ၵႂၢမ်းၼႂ်းၵျၢမ်းလိၵ်ႈဢုပ်ႇၵၼ်တင်းၵူၼ်းတင်းလၢႆလႄႈ၊-
ၽုၺ်ႇၼႄဢၼၢၵ်ႈဢထိၵ်ႈပႄႇမၼ်းသေလႄႈၶၢမ်ႇသၢၵ်ႈသေႇလွင်ႈဢၼ် ၸဝ်ႈၶရိၸ်ႈ၊ တၵ်းလႆႈၶၢမ်ႇတၢႆသေယဝ်ႉ၊တၵ်းလႆႈလုၵ်ႉၶိုၼ်းလိပ်းမႃးၼၼ်ႉယဝ်ႉၸင်ႇ၊လၢတ်ႈလႄႈဝႃႈ၊ “ ၸဝ်ႈယေႇသု၊ ဢၼ်ၵဝ်ႁေႃးလၢတ်ႈၼႄသူၼႆႉယဝ်ႉပဵၼ် ၸဝ်ႈၶရိၸ်ႈ၊ ၼၼ်ႉဢေႃႈ၊” ဝႃႈၼင်ႇၼႆႁေႃးလၢတ်ႈလႅင်းလႅင်းဢေႃႈ။-
ၼႂ်းၶဝ်ၼၼ်ႉၵမ်ႈၽွင်ႈယုမ်ႇမၢတ်ႈလႄႈႁဵတ်းၵေႃႉႁဵတ်းသႄႈလူၺ်ႈၵၼ်တင်းသြႃႇ ပေႃးလု၊ တင်း သီႇလႃႉ၊ ဢေႃႈ။ မိူၼ်ၼင်ႇၼၼ်ၵူၼ်းမဵဝ်း ၵရိၵ်ႉ၊ ၼမ်ၼႃႇၸိူဝ်းဢၼ်ၵူဝ်းၵႂၢႆႇၽြႃးပဵၼ်ၸဝ်ႈ၊ဢိၵ်ႇတင်းမႄႈယိင်းဢၼ်မီးသရေႇၼႃႈတႃၶဝ်ၼမ်ၼႃႇၸိူဝ်းၼၼ်ႉၵေႃႈယုမ်ႇမၢတ်ႈဢေႃႈ။
ၵူၺ်းၵႃႈ၊ၵူၼ်း ၵျူး၊ ၸိူဝ်းဢၼ်ဢမ်ႇယုမ်ႇမၢတ်ႈၼၼ်ႉ၊ႁဵတ်းသီႈၵေႉႁေႈတႃသေလႄႈႁွင်ႉဢဝ်ၵူၼ်းဢၼ်မဝ်မၢင်ႁၢႆႉမိူၵ်ႈဢၼ်မီးၸွမ်းတႃႈၸွမ်းတၢင်းၸိူဝ်းၼၼ်ႉသေလႄႈတင်ႈႁဵတ်းမုၵ်ႉႁဵတ်းၸုမ်းယဝ်ႉၸင်ႇ၊ႁဵတ်းဢူၼ်ႁဵတ်းမေႃးၵႃႈၼႂ်းဝဵင်းၼၼ်ႉဢေႃႈ။ ၶဝ်ၵႂႃႇယႃႉႁိူၼ်း ယႃႇသုၼ်ႇ၊ သွၵ်ႈႁႃသြႃႇ ပေႃးလု၊ တင်း သီႇလႃႉ၊ ႁႂ်ႈလႆႈတိုတ်ႉၸၼ်ဢွၵ်ႇၸူးၽၢႆႇၼႃႈၵူၼ်းတင်းလၢႆဢေႃႈ။-
မိူဝ်ႈဢၼ်ဢမ်ႇထူပ်းႁၼ်ၶဝ်သွင်ၵေႃႉၼၼ်ႉၸိုင်၊ၶဝ်တိုတ်ႉၸၼ် ယႃႇသုၼ်ႇ၊ တင်းတပႄးၸဝ်ႈၵမ်ႈၽွင်ႈ၊ဢဝ်ၵႂႃႇၵႃႈတီႈၶုၼ်ဢႃႇၼႃႇဝဵင်းလႄႈႁွင်ႉသႅၼ်ႇဝႃႈ၊ “ၵူၼ်းၸိူဝ်းၼႆႉယႃႉၵဝ်းၵူႈတီႈၵူႈလႅၼ်လႄႈတေႃႈလဵဝ်ၶဝ်ႁွတ်ႈထိုင်မႃးၵႃႈတီႈဝဵင်းႁဝ်းၶႃႈၼႆႉယဝ်ႉ။-
ယႃႇသုၼ်ႇ၊ ၵေႃႈႁပ်ႉတုင်းဢဝ်ၶဝ်သွင်ၵေႃႉၼႆႉၶႃႈယဝ်ႉ။ ၶဝ်တင်းသဵင်ႈတင်းလူင်၊သၢၼ်ၶတ်းဢုပတေႇၶုၼ်ႁေႃၶမ်း ၵေႇသႃႇ၊ လႄႈလၢတ်ႈဝႃႈ၊မီးၶုၼ်ႁေႃၶမ်းတၢင်ႇပႃးဢၼ်လႆႈၸိုဝ်ႈ ယေႇသု၊ ၼၼ်ႉဝႃႈၼႆၶႃႈဢေႃႈ၊” ဝႃႈၼင်ႇၼႆဢေႃႈ။-
ၵႂၢမ်းၸိူဝ်းၼၼ်ႉ၊ယႃႉယုၵ်ႉႁူဝ်ၸႂ်ၵူၼ်းဢၼ်ၸုဢၼ်တုမ်တင်းလၢႆ၊ဢိၵ်ႇတင်းၶုၼ်ဢႃႇၼႃႇဝဵင်းၸိူဝ်းၼၼ်ႉဢေႃႈ။-
မိူဝ်ႈၼၼ်ႉ၊ၶုၼ်ဢႃႇၼႃႇဝဵင်းၸိူဝ်းၼၼ်ႉမႂ်ဢဝ်ငိုၼ်းတီႈ ယႃႇသုၼ်ႇ၊ ဢိၵ်ႇတင်းတီႈတၢင်ႇၵေႃႉတၢင်ႇၵူၼ်းၸိူဝ်းၼၼ်ႉသေလႄႈပွႆႇၶဝ်ၵႂႃႇဢေႃႈ။
ၼႂ်းၶမ်ႈၼၼ်ႉၵမ်းလဵဝ်၊တပႄးၸဝ်ႈတင်းလၢႆပွႆႇၸႂ်ႉသြႃႇ ပေႃးလု၊ တင်း သီႇလႃႉ၊ ၵႂႃႇၵႃႈတီႈဝဵင်း ပေႇရိ၊ ပုၼ်ႉလႄႈမိူဝ်ႈဢၼ်ၶဝ်ႁွတ်ႈထိုင်ၸိုင်၊ၶဝ်ႈၵႃႈၼႂ်းၸရွပ်ႈႁေႃးတြႃး ၵျူး၊ ၶဝ်ၵႂႃႇဢေႃႈ။-
ၵူၼ်းမဵဝ်း ၵျူး၊ ဝဵင်းၼၼ်ႉၸႂ်လီသေၵူၼ်းဝဵင်း ထိတ်ႉသႃႇလေႃးၼိၵ်ႈ၊ လႄႈၶဝ်ပႃးၸႂ်ပႃးၶေႃးထွမ်ႇဢဝ်ၼုၵ်ႈၵပၢတ်ႈတြႃးၸဝ်ႈယူႇသေလႄႈၽတ်းဢၢၼ်ႇၵျၢမ်းလိၵ်ႈၵူႈဝၼ်း၊ႁႂ်ႈလႆႈႁုလွင်ႈဢၼ်သြႃႇ ပေႃးလု၊ ႁေႃးလၢတ်ႈၼၼ်ႉၸႂ်ႈႁိုဝ်ဢမ်ႇၸႂ်ႈႁိုဝ်ၼၼ်ႉယူႇဢေႃႈ။-
ၵူၼ်းမဵဝ်း ၵျူး၊ ၸိူဝ်းၼၼ်ႉၼမ်ၼႃႇယုမ်ႇမၢတ်ႈဢေႃႈ။ မႄႈယိင်းၵူၼ်းမဵဝ်း ၵရိၵ်ႉ၊ ၸိူဝ်းဢၼ်မီးသရေႇၼႃႈတႃ၊ဢိၵ်ႇတင်းၵူၼ်းၸၢႆး ၵရိၵ်ႉ၊ တင်းလၢႆယုမ်ႇမၢတ်ႈဢေႃႈ။-
ၵူၺ်းၵႃႈ၊မိူဝ်ႈဢၼ်ၵူၼ်းမဵဝ်း ၵျူး၊ ဝဵင်း ထိတ်ႉသႃႇလေႃးၼိၵ်ႈ၊ ၶဝ်လႆႈငိၼ်းဝႃႈ၊သြႃႇ ပေႃးလု၊ ယင်းႁေႃးလၢတ်ႈၼုၵ်ႈၵပၢတ်ႈတြႃး၊ၽြႃးပဵၼ်ၸဝ်ႈယူႇၵႃႈၼႂ်းဝဵင်း ပေႇရိ၊ ၼၼ်ႉၸိုင်၊ၶဝ်သမ်ႉမႃးၵႃႈတီႈဝဵင်းၼၼ်ႉတိုၵ်းယူင်းၸူဝ်းဢဝ်ၵူၼ်းတင်းလၢႆဢေႃႈ။-
မိူဝ်ႈၼၼ်ႉ၊ပီႈၼွင်ႉၸိူဝ်းၸဝ်ႈတင်းလၢႆသူင်ႇသြႃႇ ပေႃးလု၊ ၵႂႃႇၸူးၽင်ႇပၢင်ႇလၢႆႇၵမ်းလဵဝ်ဢေႃႈ။ သီႇလႃႉ၊ တင်း တိမေႃးသေႇ၊ ၸမ်ႉ၊ၵိုတ်းသဝ်းယူႇတီႈဝဵင်း ပေႇရိ၊ ဢေႃႈ။-
ၶဝ်ၸိူဝ်းၼၼ်ႉ၊ၸွမ်းသူင်ႇသြႃႇ ပေႃးလု၊ ၵႂႃႇ၊တေႃႇထိုင်ႁွတ်ႈဝဵင်း ဢႃႇထိၼ်ႇ၊ လႄႈမိူဝ်ႈဢၼ်ၶဝ်ပွၵ်ႈၶိုၼ်းမႃးၼၼ်ႉ၊သြႃႇ ပေႃးလု၊ သင်ႇဝႃႈ၊ႁႂ်ႈၶဝ်မွၵ်ႇလၢတ်ႈတီႈ သီႇလႃႉ၊ တင်း တိမေႃးသေႇ၊ ၸဵဝ်းၵႂႃႇၶိုတ်းၵၼ်တင်းမၼ်းဢေႃႈ။
ၼႂ်းမိူဝ်ႈဢၼ်သြႃႇ ပေႃးလု၊ ယင်းပႂ်ႉထႃႈ သီႇလႃႉ၊ တင်း တိမေႃးသေႇ၊ ၵႃႈတီႈဝဵင်း ဢႃႇထိၼ်ႇ၊ ယူႇၼၼ်ႉၸိုင်၊ႁၼ်ဝဵင်းၼၼ်ႉတဵမ်ဝႆႉတင်းႁုၼ်ႇႁၢင်ႈသၢင်းထုၼမ်ၼႃႇလႄႈ မၼ်းမီးတၢင်းဢၼ်မႆႈၸႂ်ၵွပ်ႈၼႃႇလူင်လၢင်ဢေႃႈ။-
ပိူဝ်ႈၼႆလႄႈမၼ်းတိူင်ႇပၢင်ႇလၢတ်ႈၸႃၵၼ်တင်းၵူၼ်းမဵဝ်း ၵျူး၊ ၶဝ်၊ဢိၵ်ႇတင်းၵူၼ်းတၢင်ႇၸိူဝ်ႉတၢင်ႇၶိူဝ်း၊ၸိူဝ်းဢၼ်ၵူဝ်းၵႂၢႆႇၽြႃးပဵၼ်ၸဝ်ႈၵႃႈၼႂ်းၸရွပ်ႈႁေႃးတြႃး၊ဢိၵ်ႇတင်းၵႃႈတီႈၵၢင်ၵၢတ်ႇၵေႃႈမၼ်းဢုပ်ႇၵုမ်လူၺ်ႈၵၼ်တင်းၶဝ်ၸိူဝ်းဢၼ်ၵၢႆၵႂႃႇၵၢႆမႃးၼၼ်ႉၵူႈဝၼ်းဢေႃႈ။-
သြႃႇၵိူင်း ဢေးပိၵုရု၊ ၶဝ်တင်းသြႃႇၵိူင်း သတေႃးဢိၵ်ႉ၊ ၶဝ်ၵေႃႈမႃးလၢတ်ႈၶဵင်ႇၵၼ်တင်းမၼ်းဢေႃႈ။ ၵမ်ႈၽွင်ႈဝႃႈ၊ “ၵူၼ်းဢၼ်ဢမ်ႇလႆႈလွင်ႈၼႆႉ၊တၵ်းၶႂ်ႈဝႃႈၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။ ၵမ်ႈၽွင်ႈၵေႃႈဝႃႈ၊ “မိူၼ်ၼင်ႇႁၢင်ႈမၼ်းႁေႃးလၢတ်ႈလွင်ႈၽြႃးတၢင်ႇဝၢၼ်ႈတၢင်ႇမိူင်း၊” ဝႃႈၼင်ႇၼႆဢေႃႈ။ ၶဝ်လၢတ်ႈဝႃႈၸိူဝ်ႉၼင်ႇၼႆၵွပ်ႈပိူဝ်ႈသြႃႇ ပေႃးလု၊ ႁေႃးလၢတ်ႈတြႃးလွင်ႈ ၸဝ်ႈယေႇသု၊ ဢိၵ်ႇတင်းတြႃးတၢင်းဢၼ်လုၵ်ႉၶိုၼ်းလိပ်းၼၼ်ႉဢေႃႈ။-
ပိူဝ်ႈၼႆလႄႈၶဝ်ၽိတ်ႈပၢင်းသြႃႇ ပေႃးလု၊ ၵႂႃႇၵႃႈတီႈၵွင်းပၢင်ၵုမ် ဢႃႇရေႇ၊ သေယဝ်ႉ၊လၢတ်ႈလႄႈဝႃႈ၊-
“ႁဝ်းၶႂ်ႈႁုထုင်းတြႃးဢၼ်မႂ်ႇဢၼ်မႂ်းႁေႃးလၢတ်ႈၼႆႉပဵၼ်ၸိူဝ်ႉၼင်ႇႁိုဝ်ၼၼ်ႉဢေႃႈ။ ၵႂၢမ်းဢၼ်မႂ်းလၢတ်ႈၼၼ်ႉမၢင်ၶေႃႈႁဝ်းဢမ်ႇတွၼ်ႉႁုတွၼ်ႉငိၼ်းသေပွၵ်ႈ။ လွင်ႈတၢင်းၸိူဝ်းၼႆႉၶႂ်ႈဝႃႈၸိူဝ်ႉၼင်ႇႁိုဝ်ႁဝ်းၶႂ်ႈႁုဢေႃႈ၊” ဝႃႈၼင်ႇၼႆဢေႃႈ။-
ၵူၼ်းဝဵင်း ဢႃႇထိၼ်ႇ၊ ဢိၵ်ႇတင်းၶႅၵ်ႇၼွၵ်ႈမိူင်းဢၼ်မီးၵႃႈၼႂ်းဝဵင်းယူႇၼၼ်ႉ၊ၶႂ်ႈမွၵ်ႇၶႂ်ႈလၢတ်ႈ၊ဢိၵ်ႇတင်းၶႂ်ႈထွမ်ႇၶႂ်ႈငိၼ်းလွင်ႈတၢင်းဢၼ်မႂ်ႇယူႇႁႂ်ႈမၼ်းသုတ်းဝၼ်းၵႂႃႇဢေႃႈ။
သြႃႇ ပေႃးလု၊ ၵေႃႈလုၵ်ႉၸုၵ်းၵႃႈၼႂ်းၵႄႈၵၢင်ပၢင်ၵုမ် ဢႃႇရေႇ၊ သေယဝ်ႉ၊လၢတ်ႈလႄႈဝႃႈ၊ “ၵူၼ်းဝဵင်း ဢႃထိၼ်ႇ၊ ၶဝ်႟။ ၵဝ်လႆႈႁုလွင်ႈဢၼ်သူၸၢင်ႈပဵၼ်ၵူၼ်းဢၼ်ႁႃၽြႃးတြႃး၊ၼႂ်းလွင်ႈတၢင်းၵႃႈမီးတင်းသဵင်ႈတင်းလူင်ၼႃႇလူင်လၢင်ဢေႃႈ။-
မိူဝ်ႈဢၼ်ၵဝ်ပႆၸွမ်းတၢင်းလႄႈ လူတူၺ်းတီႈဢၼ်သူႁဵတ်းဝၢတ်ႈၵူဝ်းၵႂၢႆႇၼၼ်ႉၸိုင်၊ၵဝ်ထူပ်းႁၼ်ၶဵင်ႇၽြႃးဢၼ်ၼိုင်ႈ၊တႅမ်ႈသႂ်ႇတူဝ်လိၵ်ႈဝႆႉလႄႈဝႃႈ၊ ‘ပုၼ်ႈၽြႃးပဵၼ်ၸဝ်ႈဢၼ်ႁဝ်းဢမ်ႇႁုၼၼ်ႉဢေႃႈ၊’ ဝႃႈၼႆဝႆႉၼၼ်ႉဢေႃႈ။ ၽြႃးပဵၼ်ၸဝ်ႈဢၼ်သူယင်းဢမ်ႇႁုလႄႈၵူဝ်းၵႂၢႆႇၼၼ်ႉ၊တေႃႈလဵဝ်ၵဝ်တၵ်းႁေႃးလၢတ်ႈလွင်ႈမၼ်းၸဝ်ႈတီႈသူဢေႃႈ။-
ၽြႃးပဵၼ်ၸဝ်ႈဢၼ်ၽၢၼ်ႇသၢင်းၸႃႉၸဵမ်လေႃးၵထၢတ်ႈတင်းၵႃႈဢၼ်မီးၼႂ်းမၼ်းၼႆႉၼၼ်ႉ၊ပဵၼ်ၸဝ်ႈဢၼ်ဢုပ်ႉပိူင်ႇၵၢင်ႁၢဝ်တင်းလိၼ်မိူင်းဢေႃႈ။ မၼ်းၸဝ်ႈဢမ်ႇယူႇၼႂ်းၵျွင်းပိၵ်ႈမၢၼ်ႇဢၼ်ဢဝ်တင်းမိုဝ်းၵူၼ်းႁဵတ်း။-
ဢမ်ႇၶၢမ်ႇဢဝ်တၢင်းဢၼ်မိုဝ်းၵူၼ်းႁဵတ်းလဵင်ႉႁဵတ်းလူၸိူဝ်ႉၼင်ႇဢၼ်မၼ်းၸဝ်ႈမီးဢလူဝ်ႇၶႂ်ႈလႆႈသေၸိူဝ်ႉသေပိူင်ၼၼ်ႉ။ လွင်ႈမၼ်းၸမ်ႉ၊မၼ်းၸဝ်ႈပဵၼ်ၸဝ်ႈဢၼ်ပၼ်ၸီႇဝႃႉဢသၢၵ်ႈ၊ဢိၵ်ႇတင်းတၢင်းဢၼ်ထူၺ်ႈၸႂ်ၶဝ်ႈထူၺ်ႈၸႂ်ဢွၵ်ႇ၊ဢိၵ်ႇတင်းၵႃႈမီးၵူႈၸိူဝ်ႉၵူႈပိူင်တီႈၵူၼ်းၵူႈၵေႃႉၵူႈၵူၼ်းဢေႃႈ။-
မၼ်းၸဝ်ႈဢဝ်တင်းၵူၼ်းၵေႃႉၼိုင်ႈၽၢၼ်ႇသၢင်းႁဵတ်းပဵၼ်ၵူၼ်းၵူႈၸိူဝ်ႉၵူႈၶိူဝ်း၊ႁႂ်ႈလႆႈယူႇၵႃႈၼိူဝ်လိၼ်မိူင်းလေႃးၵႃႉၼႆႉၸွတ်ႇတူဝ်ႈၵႂႃႇဢေႃႈ။ ၸဵမ်မိူဝ်ႈဢွၼ်တၢင်းၼၼ်ႉ၊ၶိင်ႇၵႃႇလႃႉဢၼ်တႅပ်းတတ်းဝႆႉလႄႈသင်၊တီႈယူႇတီႈသဝ်းလႅၼ်လိၼ်ဢၼ်ၶၼ်ႈဝႆႉၶႅၼ်ႈဝႆႉလႄႈသင်၊တူဝ်မၼ်းၸဝ်ႈမၢတ်ႈမၢႆဝႆႉ၊ပုၼ်ႈၵူၼ်းႁဝ်းဢေႃႈ။-
မၼ်းၸဝ်ႈႁဵတ်းၸိူဝ်ႉၼင်ႇၼႆပုၼ်ႈလွင်ႈၼင်ႇႁိုဝ်ၵူၼ်းႁဝ်းတၵ်းၸၢမ်းႁႃၽြႃးပဵၼ်ၸဝ်ႈလႄႈမီးလွင်ႈဢၼ်ၸၢင်ႈၶႄးတၵ်းထူပ်းဢေႃႈ။ ၼႂ်းဝႃႈၼၼ်သေၵေႃႈ၊မၼ်းၸဝ်ႈဢမ်ႇမီးၵႆၵၼ်တင်းႁဝ်းသေၵေႃႉသေၵူၼ်း။-
မႅၼ်ႈၸွမ်းၵႃႈၼင်ႇဢၼ်ထုင်းၵႂၢမ်းမီးဝႆႉလႄႈဝႃႈ၊ “‘ၵွပ်ႈပိူဝ်ႈမၼ်းၸဝ်ႈလႄႈႁဝ်းၼႆႉလိပ်းယူႇ၊တူင်ႉၼိုင်ယူႇ၊ပဵၼ်ယူႇဢေႃႈ။’ ဝႃႈၼင်ႇၼႆလႄႈသင်၊ဢိၵ်ႇတင်းၵႂၢမ်းဢၼ်သြႃႇလၢင်ႇၵႃႇသူၸၢပ်ႈဝႆႉလႄႈဝႃႈ၊ ‘ႁဝ်းၼႆႉ၊ပဵၼ်လုၵ်ႈလၢင်းၽြႃးပဵၼ်ၸဝ်ႈဢေႃႈ။’ ဝႃႈၼင်ႇၼႆၼၼ်ႉဢေႃႈ။-
ၸွမ်းလူၺ်ႈႁဝ်းပဵၼ်လုၵ်ႈလၢင်းၽြႃးပဵၼ်ၸဝ်ႈၼၼ်ႉလႄႈႁဝ်းဢမ်ႇထုၵ်ႇလီထၢင်ႇၸႃႇတိၽြႃးပဵၼ်ၸဝ်ႈမိူၼ်ၵၼ်တင်းႁုၼ်ႇႁၢင်ႈသၢင်းထုၶမ်း၊ႁုၼ်ႇႁၢင်ႈသၢင်းထုငိုၼ်း၊ႁုၼ်ႇႁၢင်ႈသၢင်းထုမၢၵ်ႇႁိၼ်ဢၼ်ၵူၼ်းႁဝ်းဢဝ်တင်းပိင်ႇၺႃႇၶႆႈၸႂ်လႄႈတွင်ႈႁဵတ်းဝႆႉၼၼ်ႉ။-
ၽြႃးပဵၼ်ၸဝ်ႈဢမ်ႇဝႆႉဢမု၊ၸွမ်းၶိင်ႇၵႃႇလႃႉမိူဝ်ႈဢၼ်ၵူၼ်းႁဝ်းဢမ်ႇပႆႇႁုမၼ်းၸဝ်ႈၼၼ်ႉသေၵေႃႈတေႃႈလဵဝ်ၼႆႉမၼ်းၸဝ်ႈပိင်းၺၢပ်ႈၵူၼ်းတင်းသဵင်ႈတင်းလူင်၊ၵူႈတီႈၵူႈလႅၼ်လႄႈဝႃႈ၊ၶုၵ်းၸႂ်လႆႈမႆႈၸႂ်ဢပျတ်ႈတူဝ်ၸဝ်ႈၵဝ်ႇလႄႈပိၼ်ႇၸႂ်သူတႃႉ၊ဝႃႈၼင်ႇၼႆယဝ်ႉ။-
လွင်ႈမၼ်းၸမ်ႉ၊မၼ်းၸဝ်ႈၶဵၼ်းဝၼ်းဝၼ်းၼိုင်ႈ၊ဢၼ်မၼ်းၸဝ်ႈတၵ်းဢဝ်ၵူၼ်းၵေႃႉၼိုင်ႈ၊ၵေႃႉဢၼ်မၼ်းၸဝ်ႈလိူၵ်ႈဢဝ်ဝႆႉယဝ်ႉၼၼ်ႉလႄႈ ႁႂ်ႈၸီႇယၢင်ႇၵူၼ်းလေႃးၵီႇတင်းလၢႆ၊ၸွမ်းၼင်ႇတြႃးဢၼ်သိုဝ်ႈတေႃႇၼၼ်ႉဝႆႉယဝ်ႉ။ မၼ်းၸဝ်ႈၼႄပျႃးသၢၵ်ႈသေႇဢၼ်လီယုမ်ႇ၊တီႈၵူၼ်းတင်းသဵင်ႈတင်းလူင်ၼႂ်းတၢင်းဢၼ်ႁႂ်ႈၵူၼ်းၵေႃႉၼၼ်ႉ၊လုၵ်ႉၵႃႈတၢင်းတၢႆၶိုၼ်းလိပ်းမႃးၼၼ်ႉဢေႃႈ၊” ဝႃႈၼင်ႇၼႆသြႃႇ ပေႃးလု၊ ႁေႃးလၢတ်ႈဢေႃႈ။
မိူဝ်ႈဢၼ်ၶဝ်ငိၼ်းသြႃႇ ပေႃးလု၊ လၢတ်ႈလွင်ႈၵူၼ်းတၢႆလုၵ်ႉၶိုၼ်းလိပ်းၼၼ်ႉၸိုင်၊ၵမ်ႈၽွင်ႈၶူဝ်ဢေႃႈ။ ၵူၺ်းၵႃႈ၊ၵမ်ႈၽွင်ႈဝႃႈ၊ “ႁဝ်းၶႂ်ႈထွမ်ႇလွင်ႈဢၼ်ႁေႃးလၢတ်ႈၼႆႉထႅင်ႈလူးၵွၼ်ႇဢေႃႈ၊” ဝႃႈၼင်ႇၼႆဢေႃႈ။-
သြႃႇ ပေႃးလု၊ ၵေႃႈဢွၵ်ႇသေၵႃႈၼႂ်းပၢင်ၵုမ်ၼၼ်ႉၵႂႃႇဢေႃႈ။-
ၵူၼ်းၵမ်ႈၽွင်ႈၸပ်းၸွမ်းၵႃႈတီႈသြႃႇ ပေႃးလု၊ လႄႈႁွတ်ႈထိုင်တၢင်းဢၼ်ယုမ်ႇမၢတ်ႈဢေႃႈ။ ၼႂ်းၶဝ်ၼၼ်ႉ၊ပႃး တယေႃႇၼုသိ၊ ၵူၼ်းလူင်ၼႂ်းမူႇပၢင်ၵုမ်ၵွင်း ဢႃႇရေႇ၊ ၼၼ်ႉၵေႃႉၼိုင်ႈတင်းမႄႈယိင်းဢၼ်လႆႈၸိုဝ်ႈ တမႃႇရိ၊ ၵေႃႉၼိုင်ႈ၊ဢိၵ်ႇတင်းၵူၼ်းတၢင်ႇၵေႃႉတၢင်ႇၵူၼ်းၵမ်ႈၽွင်ႈဢေႃႈ။
လိုၼ်းၼၼ်ႉ၊သြႃႇ ပေႃးလု၊ ဢွၵ်ႇသေၵႃႈတီႈဝဵင်း ဢႃႇထိၼ်ႇ၊ လႄႈၵႂႃႇၸူးဝဵင်း ၵေႃးရိၼ်ႇထု၊ ဢေႃႈ။-
တီႈၼၼ်ႈ၊မၼ်းထူပ်းၺႃးၵူၼ်းမဵဝ်း ၵျူး၊ ၵေႃႉၼိုင်ႈ၊ဢၼ်လႆႈၸိုဝ်ႈ ဢႃႇၵုလႃႉ၊ ဢၼ်ပဵၼ်ၸႃႇတိမိူင်း ပုၼ်ႇတု၊ ဢၼ်ဢမ်ႇပႆႇပေႃးႁိုင်ပႃးဢဝ်တင်းမေးမၼ်း ပရီႇသီးလႃႇ၊ လုၵ်ႉသေၵႃႈတီႈမိူင်း ဢိတလီႇ၊ မႃး၊ၵွပ်ႈပိူဝ်ႈဢၼ်ၶုၼ်ႁေႃၶမ်း ၵလေႃးတိ၊ မီးဢမိင်ႉႁႂ်ႈၵူၼ်းမဵဝ်း ၵျူး၊ တင်းသဵင်ႈတင်းလူင်ဢွၵ်ႇမိူင်း ရူဝ်းမႃႉ၊ ၵႂႃႇၼၼ်ႉဢေႃႈ။ သြႃႇ ပေႃးလု၊ ၶဝ်ႈၸူးတီႈၶဝ်သေယဝ်ႉ၊-
ၵွပ်ႈပိူဝ်ႈၵၢၼ်တၢင်းႁဵတ်းဢၼ်ယဵပ်ႉမူဝ်းၵႃႇလဵင်ႉတွင်ႉမိူၼ်ၵၼ်လႄႈယူႇလူၺ်ႈၵၼ်တင်းၶဝ်သေယဝ်ႉ၊ၸွႆႈႁဵတ်းၵၢၼ်ၶဝ်ယူႇဢေႃႈ။-
မၼ်းဢုပ်ႇၵုမ်လၢတ်ႈၸႃၵႃႈၼႂ်းၸရွပ်ႈႁေႃးတြႃးၵူႈသိၼ်ယူႇလႄႈ ၵႆႉၶတ်းၸႂ်ၸူဝ်းဢဝ်ၵူၼ်းမဵဝ်း ၵျူး၊ တင်းၵူၼ်းမဵဝ်း ၵရိၵ်ႉ၊ တင်းလၢႆယူႇဢေႃႈ။
မိူဝ်ႈဢၼ် သီႇလႃႉ၊ တင်း တိမေႃးသေႇ၊ လုၵ်ႉသေၵႃႈတီႈမိူင်း မႃႇၵေႇတေႃးၼိ၊ ႁွတ်ႈမႃးၼၼ်ႉၸိုင်၊သြႃႇ ပေႃးလု၊ ၶတ်းၸႂ်ႁေႃးတြႃးယူႇသုတ်းဝၼ်းလႄႈၶၢမ်ႇသၢၵ်ႈသေႇတီႈၵူၼ်းမဵဝ်း ၵျူး၊ ၶဝ်လွင်ႈဢၼ် ၸဝ်ႈယေႇသု၊ ပဵၼ် ၸဝ်ႈၶရိၸ်ႈ၊ ၼၼ်ႉဢေႃႈ။-
မိူဝ်ႈဢၼ်ၶဝ်တွပ်ႇထဵင်ၵၼ်လႄႈသႄႉသွမ်းၼၼ်ႉၸိုင်၊မၼ်းသၼ်ႇပႅတ်ႈၶူဝ်းၼုင်ႈမၼ်းၼႄလွင်ႈဢၼ်မၼ်းႁဵတ်းၶတ်းၶဝ်သေယဝ်ႉ၊လၢတ်ႈလႄႈဝႃႈ၊ “ၵွပ်ႈပိူဝ်ႈသူၽိတ်းပိူင်ႈၼႆႉသူတၵ်းလႆႈတၢႆၼႂ်းဢပျတ်ႈဢေႃႈ။ ၵဝ်ၸမ်ႉ၊ၵၢင်းလွတ်ႈယဝ်ႉ။ ၸႃႉၸဵမ်မိူဝ်ႈလဵဝ်လႄႈၵဝ်တၵ်းၵႂႃႇႁေႃးလၢတ်ႈတီႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၵူၺ်းယဝ်ႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈမၼ်းဢွၵ်ႇသေၵႃႈတီႈၶဝ်ၵႂႃႇယူႇသဝ်းၵႃႈတီႈႁိူၼ်းၵူၼ်းတၢင်ႇၸိူဝ်ႉတၢင်ႇၶိူဝ်း၊ဢၼ်လႆႈၸိုဝ်ႈ တိတုယုသတု၊ ဢၼ်ၵူဝ်းၵႂၢႆႇၽြႃးပဵၼ်ၸဝ်ႈၼၼ်ႉဢေႃႈ။ ႁိူၼ်းမၼ်းၼၼ်ႉ၊ၸပ်းၵၼ်ဝႆႉတင်းၸရွပ်ႈႁေႃးတြႃးဢေႃႈ။-
ၵရိပု၊ ၵႄႇၸရွပ်ႈႁေႃးတြႃး၊ဢိၵ်ႇတင်းၵူၼ်းႁိူၼ်းၵူၼ်းယေးမၼ်းၵူႈၵေႃႉယုမ်ႇမၢတ်ႈၸဝ်ႈၽြႃးဢေႃႈ။ ၵူၼ်းဝဵင်း ၵေႃးရိၼ်ႇထု၊ ၶဝ်ၼမ်ၼႃႇၵေႃႈ၊လႆႈငိၼ်းတြႃးၸဝ်ႈသေယဝ်ႉ၊ယုမ်ႇမၢတ်ႈလႄႈၶၢမ်ႇဢဝ်မၢင်ႇၵလႃႇပပ်ႉတိၸမ်ႇ ဢေႃႈ။
ၶိုၼ်းၼိုင်ႈ၊ၸဝ်ႈၽြႃးပေႃႇမႃးလၢတ်ႈတေႃႇသြႃႇ ပေႃးလု၊ ၼႂ်းပျႃႇတိၵ်ႈၼိမိၵ်ႈလႄႈဝႃႈ၊ “မႂ်းယႃႇပေၵူဝ်။ ယႃႇပေယူႇတဵတ်ႇတဵတ်ႇ။ ႁေႃးလၢတ်ႈတႃႉ။-
ၵဝ်မီးယူႇလူၺ်ႈၵၼ်တင်းမႂ်းဢေႃႈ။ ၽူႈလႂ်တၵ်းဢမ်ႇႁဵတ်းၽေးသႂ်ႇတီႈမႂ်းလႆႈ။ ၼႂ်းဝဵင်းၼႆႉ၊မီးၵူၼ်းၵဝ်ၼမ်ၼႃႇဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈသြႃႇ ပေႃးလု၊ ယူႇၵႃႈတီႈၼၼ်ႈ၊ပီပၢႆႁူၵ်းလိူၼ်တဵမ်တဵမ်ႁေႃးလၢတ်ႈၼုၵ်ႈၵပၢတ်ႈတြႃး၊ၽြႃးပဵၼ်ၸဝ်ႈတီႈၵူၼ်းတင်းလၢႆဢေႃႈ။
မိူဝ်ႈဢၼ်ၶုၼ် ၵႃႇလီႇဢူဝ်ႇ၊ လႆႈဢရႃႇၶုၼ်ၸွမ်မိူင်း၊မိူင်း ဢၶႃႇယႃႉ၊ ၼၼ်ႉ၊ၵူၼ်းမဵဝ်း ၵျူး၊ ၶဝ်ၸုတုမ်ၽွမ်ႉၸႂ်ၵၼ်တိဢဝ်သြႃႇ ပေႃးလု၊ သေလႄႈၵႂႃႇသူင်ႇၵႃႈတီႈလုမ်းၼၼ်ႉသေယဝ်ႉ၊-
လၢတ်ႈလႄႈဝႃႈ၊ “ၵူၼ်းၵေႃႉၼႆႉ၊တိုၵ်းယူင်းၸူဝ်းဢဝ်ၵူၼ်းတင်းလၢႆ၊ႁႂ်ႈၵူဝ်းၵႂၢႆႇၽြႃးၼႂ်းတၢင်းဢၼ်ၶတ်းၵၼ်တင်းဢုပတေႇဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်သြႃႇ ပေႃးလု၊ ဢၢင်ႈတၵ်းပိုတ်ႇပၢၵ်ႇလၢတ်ႈၵႂၢမ်းၼၼ်ႉၸိုင်၊ၶုၼ် ၵႃႇလီႇဢူဝ်ႇ၊ လၢတ်ႈတီႈၵူၼ်းမဵဝ်း ၵျူး၊ ၸိူဝ်းၼၼ်ႉလႄႈဝႃႈ၊ “ဢူဝ်းၵူၼ်း ၵျူး၊ ၶဝ်႟။ ပေႃးပဵၼ်ဢမုဢၼ်ဢမ်ႇတြႃး၊ဢမ်ႇၼၼ်ဢမုဢၼ်ႁၢႆႉမိူၵ်ႈၸိုင်၊ၵဝ်တၵ်းမီးလွင်ႈတၢင်းဢၼ်ယိူၼ်ႉၶၢမ်ႇသူဢေႃႈ။-
ၵူၺ်းၵႃႈ၊လွင်ႈတၢင်းၼႆႉပဵၼ်တၢင်းဢၼ်သူတွပ်ႇထဵင်ၵၼ်လူၺ်ႈလွင်ႈၶေႃႈၵႂၢမ်း၊ဢိၵ်ႇတင်းလူၺ်ႈလွင်ႈၸိုဝ်ႈသဵင်ဢၼ်ၸၢပ်ႈသႅင်ႇၵၼ်တင်းၽႃႇသႃႇတြႃးသူၼၼ်ႉလႄႈသူၼင်ႇၵၼ်ၵၼ်ထုၵ်ႇလီတိူင်ႇပၢင်ႇၵၼ်ႁႂ်ႈယဵၼ်ၵၼ်ဢေႃႈ။ ၵဝ်တၵ်းဢမ်ႇၸီႇယၢင်ႇယဝ်ႉ၊” ဝႃႈၼင်ႇၼႆသေယဝ်ႉ၊-
မၼ်းလိုပ်ႈႁေႃႈၵူၼ်းမဵဝ်း ၵျူး၊ ၸိူဝ်းၼၼ်ႉ၊ဢွၵ်ႇပႅတ်ႈသေၵႃႈတီႈပလၢင်ႇဢၼ်ၸီႇယၢင်ႇတြႃးၼၼ်ႉဢေႃႈ။-
မိူဝ်ႈၼၼ်ႉ၊ၶဝ်တင်းသဵင်ႈတင်းလူင်ဢွၼ်ၵၼ်တိဢဝ် သွတ်ႇသၼိ၊ ဢၼ်ပဵၼ်ၵႄႇၸရွပ်ႈႁေႃးတြႃးလႄႈပေႃႉယႅၼ်ႉၵႃႈတီႈၽၢႆႇၼႃႈပလၢင်ႇဢၼ်ၸီႇယၢင်ႇတြႃးၼၼ်ႉဢေႃႈ။ တီႈလွင်ႈတၢင်းၼၼ်ႉ၊ၶုၼ် ၵႃႇလီႇဢူဝ်ႇ၊ ယင်းဢမ်ႇဝႆႉဢယေးသေဢိတ်းလႄႈယူႇဢေႃႈ။
ဝၢႆးသေၼၼ်ႉ၊သြႃႇ ပေႃးလု၊ ယူႇႁိုင်ၼႃႇလူၺ်ႈၵၼ်တင်းတပႄးၸဝ်ႈတင်းလၢႆ၊ၵႃႈတီႈဝဵင်း ၵေႃးရိၼ်ႇထု၊ ယဝ်ႉၸင်ႇ၊တၵ်ႉၼၢႆၵၼ်တင်းပီႈၼွင်ႉတင်းလၢႆသေလႄႈဢွၵ်ႇသေၵႃႈတီႈဝဵင်းၼၼ်ႉၵႂႃႇႁွင်ႉပႃးဢဝ် ပရီႇသီးလႃႇ၊ တင်း ဢႃႇၵုလႃႉ၊ ၶီႇႁိူဝ်းသၢင်းၽေႃးမိူဝ်းၵႂႃႇၸူးမိူင်း သီးရီးယႃး၊ ပုၼ်ႉဢေႃႈ။ ၸူဝ်ႈဢၼ်ႁိူဝ်းသၢင်းၽေႃးဢမ်ႇပႆႇဢွၵ်ႇဝဵင်း ၵိၼ်ႇၶျေႇ၊ ၼၼ်ႉ၊မၼ်းထႃႁူဝ်ပိူဝ်ႈဢၼ်မၼ်းလႆႈတိူင်ႇၵတိသဵတ်ႈၸႃႇၼၼ်ႉဢေႃႈ။-
မိူဝ်ႈဢၼ်ၶဝ်ႁွတ်ႈထိုင်ဝဵင်း ဢေးၽႅတ်ႈ၊ ၼၼ်ႉၸိုင်၊သြႃႇ ပေႃးလု၊ ႁႂ်ႈ ပရီႇသီးလႃႇ၊ တင်း ဢႃႇၵုလႃႉ၊ ၵိုတ်းသဝ်းယူႇၵႃႈတီႈၼၼ်ႈသေယဝ်ႉ၊မၼ်းၶဝ်ႈၵႂႃႇၵႃႈၼႂ်းၸရွပ်ႈႁေႃးတြႃးသေလႄႈ ဢုပ်ႇၵုမ်လၢတ်ႈၸႃၵၼ်တင်းၵူၼ်းမဵဝ်း ၵျူး၊ တင်းလၢႆဢေႃႈ။-
ၵူၼ်းၵႃႈ၊တီႈၼၼ်ႈတွင်းပၢၼ်ႇႁႂ်ႈမၼ်းယူႇႁမ်ႉႁိုင်တၢၼ်ႇတၢၼ်ႇထႅင်ႈသေၵေႃႈမၼ်းဢမ်ႇႁပ်ႉတုင်းဢဝ်။-
မၼ်းသင်ႇလၢတ်ႈဝႆႉလႄႈဝႃႈ၊ “ပေႃးၽြႃးပဵၼ်ၸဝ်ႈမီးဢလူဝ်ႇၸိုင်၊ၵဝ်တၵ်းသမ်ႉၶိုၼ်းမႃးၸူးတီႈသူထႅင်ႈလူးၵွၼ်ႇဢေႃႈ၊” ဝႃႈၼင်ႇၼႆသေယဝ်ႉ၊ၶီႇႁိူဝ်းသၢင်းၽေႃးဢွၵ်ႇဝဵင်း ဢေးၽႅတ်ႈ၊ ၵႂႃႇသေဢေႃႈ။
မိူဝ်ႈဢၼ်မၼ်းႁွတ်ႈထိုင်ဝဵင်း ၵေႇသရိ၊ ၼၼ်ႉၸိုင်၊မၼ်းၶိုၼ်ႈၵႂႃႇၸူးဝဵင်း ယေႇရုသလႅမ်ႇ၊ လႄႈတူင်ႉတၵ်ႉၵၼ်တင်းၸိူဝ်းၸဝ်ႈယဝ်ႉၸင်ႇ၊မိူဝ်းၵႂႃႇၸူးဝဵင်း ဢၼ်ႇတိဢူၵ်ႉ၊ သေဢေႃႈ။-
ဝၢႆးသေမၼ်းယူႇၵႃႈတီႈၼၼ်ႈႁိုင်တၢၼ်ႇတၢၼ်ႇယဝ်ႉၸိုင်၊သမ်ႉဢွၵ်ႇၵႂႃႇၵႃႈတီႈမိူင်း ၵလႃႇတိ၊ တင်းမိူင်း ၽရုၵိ၊ ၶဝ်ႈမိူင်းၼိုင်ႈဢွၵ်ႇမိူင်းၼိုင်ႈ၊တိုၵ်းယူင်းပၼ်ႁႅင်းတပႄးၸဝ်ႈတင်းသဵင်ႈတင်းလူင်ႁႂ်ႈမၼ်ႈၶိူင်ႇဢေႃႈ။
မိူဝ်ႈၼၼ်ႉမီးၵူၼ်းမဵဝ်း ၵျူး၊ ၵေႃႉၼိုင်ႈ၊ဢၼ်လႆႈၸိုဝ်ႈ ဢႃႇပေႃးလု၊ ၸႃႇတိၵူၼ်းဝဵင်း ဢႃႇလေႇၸၼ်ႇတရီးယႃး၊ ၼၼ်ႉ၊ႁွတ်ႈမႃးၵႃႈတီႈဝဵင်း ဢေးၽႅတ်ႈ၊ ဢေႃႈ။ မၼ်းပဵၼ်သြႃႇဢၼ်မေႃလၢတ်ႈမေႃၸႃလႄႈႁုမေႃၼႂ်းၵျၢမ်းလိၵ်ႈၼႃႇလူင်လၢင်ဢေႃႈ။-
မၼ်းယၢမ်ႈသွၼ်ဢဝ်ၽႃႇသႃႇတြႃးၸဝ်ႈၽြႃးလႄႈပႃးတင်းၸႂ်ဢၼ်ႁႅင်းယႂ်ႇၼႃႇႁေႃးလၢတ်ႈသင်ႇသွၼ်ပၼ်၊လွင်ႈ ၸဝ်ႈယေႇသု၊ မၢၼ်ႇမႅၼ်ႈၸိုဝ်ႈၸႂ်ႈၼႃႇဢေႃႈ။ ၼႂ်းဝႃႈၼၼ်သေၵေႃႈ၊မၼ်းႁုလွင်ႈတြႃးဢၼ်ၶၢမ်ႇဢဝ်မၢင်ႇၵလႃႇပပ်ႉတိၸမ်ႇ ဢၼ်သြႃႇ ယူဝ်းႁၢၼ်ႇ၊ သွၼ်ပၼ်ဝႆႉၼၼ်ႉၵူၺ်းဢေႃႈ။-
မၼ်းၵႂႃႇႁေႃးလၢတ်ႈႁတ်းႁတ်းႁၢၼ်ႁၢၼ်၊ၼႂ်းၸရွပ်ႈႁေႃးတြႃးလႄႈမိူဝ်ႈဢၼ် ဢႃႇၵုလႃႉ၊ တင်း ပရီႇသီးလႃႇ၊ လႆႈငိၼ်းၵႂၢမ်းမၼ်းၼၼ်ႉၸိုင်၊ၶဝ်ႁွင်ႉဢဝ်မၼ်းၵႂႃႇၵႃႈတီႈႁိူၼ်းၶဝ်လႄႈသွၼ်ပၼ်ၽႃႇသႃႇတြႃးၽြႃးပဵၼ်ၸဝ်ႈ၊ႁႂ်ႈယဵင်ႈၶႅၼ်းၸေးၸုမ်ႇဢေႃႈ။-
ပိူဝ်ႈဢၼ် ဢႃႇပေႃးလု၊ ၶႂ်ႈၵႂႃႇၸူးမိူင်း ဢႃႇၶႃႇယႃႉ၊ လႄႈတပႄးၸဝ်ႈဝဵင်း ဢေးၽႅတ်ႈ၊ ၸိူဝ်းၼၼ်ႉ၊ၸွႆႈထႅမ်မၼ်းၼႂ်းတၢင်းဢၼ်တႅမ်ႈလိၵ်ႈၵႂႃႇႁႂ်ႈၶဝ်ႁပ်ႉတုင်းဢဝ်မၼ်းဢေႃႈ။ မိူဝ်ႈဢၼ်မၼ်းႁွတ်ႈထိုင်ၸိုင်၊မၼ်းၸွႆႈထႅမ်တပႄးၸဝ်ႈၸိူဝ်းဢၼ်လႆႈယုမ်ႇမၢတ်ႈၵွပ်ႈပိူဝ်ႈၵျေးၸူးၸဝ်ႈၼၼ်ႉတႄႉတႄႉဝႃႈဝႃႈဢေႃႈ။-
ပိူဝ်ႈဢၼ်မၼ်းတွပ်ႇထဵင်ႁႅင်းလႄႈပႄႉၼႅင်ႇၵူၼ်းမဵဝ်း ၵျူး၊ ၶဝ်ၼမ်ၼႃႇၵႃႈၼႂ်းပၢင်တြႃးၼႂ်းတၢင်းဢၼ်ဢဝ်ၵျၢမ်းလိၵ်ႈၽုၺ်ႇဢွၵ်ႇၼႄပျႃးလွင်ႈဢၼ် ၸဝ်ႈယေႇသု၊ ပဵၼ် ၸဝ်ႈၶရိၸ်ႈ၊ ၼၼ်ႉဢေႃႈ။
ၼႂ်းမိူဝ်ႈဢၼ် ဢႃႇပေႃးလု၊ ယင်းမီးယူႇၵႃႈၼႂ်းဝဵင်း ၵေႃးရိၼ်ႇထု၊ ၼၼ်ႉ၊သြႃႇ ပေႃးလု၊ လႄႇလဵပ်ႈၵႂႃႇၵႃႈၼႂ်းမိူင်းပွတ်းၼိူဝ်ယဝ်ႉၸင်ႇ၊ႁွတ်ႈထိုင်ဝဵင်း ဢေးၽႅတ်ႈ၊ လႄႈထူပ်းၺႃးတပႄးၸဝ်ႈၵမ်ႈၽွင်ႈသေယဝ်ႉ၊-
မၼ်းထၢမ်ဝႃႈ၊ “ဝၢႆးသေသူယုမ်ႇမၢတ်ႈယဝ်ႉၼၼ်ႉ၊ၸွင်ႇသူလႆႈၶၢမ်ႇဢဝ်ဝိၺိၺ်ႇမူတ်းၸၢင်ႇၸဝ်ႈႁိုဝ်း၊” ဝႃႈၼင်ႇၼႆဢေႃႈ။ “ႁဝ်းၶႃႈယင်းဢမ်ႇတွၼ်ႉငိၼ်းလွင်ႈဢၼ်မီးဝိၺိၺ်ႇမူတ်းၸၢင်ႇၸဝ်ႈၶႃႈ၊” ဝႃႈၼႆၶဝ်ၶိုၼ်းလၢတ်ႈဢေႃႈ။
သြႃႇ ပေႃးလု၊ သမ်ႉထၢမ်လႄႈဝႃႈ၊ “ပေႃးပဵၼ်ၼႆၸိုင်၊သူလႆႈၶၢမ်ႇဢဝ်မၢင်ႇၵလႃႇပပ်ႉတိၸမ်ႇ ဢၼ်လႂ်” ဝႃႈၼင်ႇၼႆလႄႈ။ “လႆႈၶၢမ်ႇဢဝ်မၢင်ႇၵလႃႇပပ်ႉတိၸမ်ႇ၊ဢၼ်သြႃႇ ယူဝ်းႁၢၼ်ႇ၊ သွၼ်ပၼ်ဝႆႉၼၼ်ႉၶႃႈဢေႃႈ၊” ဝႃႈၼႆ၊ၶဝ်ၶိုၼ်းလၢတ်ႈဢေႃႈ။
သြႃႇ ပေႃးလု၊ ၵေႃႈလၢတ်ႈလႄႈဝႃႈ၊ “သြႃႇ ယူဝ်းႁၢၼ်ႇ၊ ပၼ်မၢင်ႇၵလႃႇပပ်ႉတိၸမ်ႇ၊ပုၼ်ႈဢၼ်တၵ်းၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်သေယဝ်ႉ၊ႁေႃးလၢတ်ႈႁႂ်ႈၵူၼ်းတင်းလၢႆယုမ်ႇမၢတ်ႈၸဝ်ႈဢၼ်ၵျွမႃးပႃႈလိုၼ်းမၼ်း၊ဢၼ်ပဵၼ် ၸဝ်ႈယေႇသုၶရိၸ်ႈ၊ ၼၼ်ႉဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၶဝ်ငိၼ်းၵႂၢမ်းၼၼ်ႉၸိုင်၊ၶဝ်ဢွၼ်ၵၼ်ၶၢမ်ႇဢဝ်မၢင်ႇၵလႃႇပပ်ႉတိၸမ်ႇ၊ၵႃႈၼႂ်းၼႃႇမႃႉၸိုဝ်ႈသဵင် ၸဝ်ႈယေႇသု၊ ဢေႃႈ။-
သြႃႇ ပေႃးလု၊ ၸင်ႇဢဝ်မိုဝ်းတၢင်ႇၵႃႈၼိူဝ်ၶဝ်လႄႈၶဝ်လႆႈၶၢမ်ႇဢဝ်ဝိၺိၺ်ႇမူတ်းၸၢင်ႇၸဝ်ႈသေယဝ်ႉ၊ၶဝ်ၸၢင်ႈလၢတ်ႈၵႂၢမ်းၽႃႇသႃႇဢၼ်လၢၵ်ႇဢၼ်လၢႆးလႄႈႁေႃးလၢတ်ႈၵႂၢမ်းပျႃႇတိၵ်ႈဢေႃႈ။-
ၶဝ်ၸိူဝ်းၼၼ်ႉ မီးသိပ်းသွင်ၵေႃႉဢေႃႈ။
လိုၼ်းၼၼ်ႉသြႃႇ ပေႃးလု၊ ၶဝ်ႈၵႃႈၼႂ်းၸရွပ်ႈႁေႃးတြႃးလႄႈႁေႃးလၢတ်ႈႁတ်းႁတ်းႁၢၼ်ႁၢၼ်၊တီႈၵူၼ်းတင်းလၢႆသၢမ်လိူၼ်တဵမ်တဵမ်၊ဢုပ်ႇၵုမ်လၢတ်ႈၸႃၵၼ်လူၺ်ႈလွင်ႈတြႃးမိူင်းၽြႃးပဵၼ်ၸဝ်ႈဢေႃႈ။-
ၵူၺ်းၵႃႈ၊ၶဝ်ၵမ်ႈၽွင်ႈႁူဝ်ၸႂ်ၵႅၼ်ႇၶႅင်လႄႈယင်းဢမ်ႇယုမ်ႇမၢတ်ႈၵူၺ်းဢမ်ႇၵႃး၊ယင်းသႄႉသွမ်းၽႃႇသႃႇတြႃးၸဝ်ႈၽြႃးၵႃႈတီႈၽၢႆႇၼႃႈၵူၼ်းတင်းလၢႆဢေႃႈ။ သြႃႇ ပေႃးလု၊ ၸင်ႇၽႄဢဝ်တပႄးၸဝ်ႈတင်းလၢႆ၊ဢွၵ်ႇမႃးၶေႃၶေႃသေယဝ်ႉ၊ဢုပ်ႇၵုမ်ႁေႃးလၢတ်ႈၵႃႈၼႂ်းၸရွပ်ႈသွၼ်လိၵ်ႈ တုရၼ်ႇၼု၊ ၵူႈဝၼ်းဢေႃႈ။-
ၶဝ်ႁဵတ်းၸိူဝ်ႉၼင်ႇၼၼ်ယူႇသွင်ပီတဵမ်တဵမ်လႄႈၵူၼ်းဢၼ်မီးယူႇၼႂ်းမိူင်း ဢႃႇသိ၊ ၸႃႉၸဵမ်ၵူၼ်းမဵဝ်း ၵျူး၊ လႄႈၵူၼ်းမဵဝ်း ၵရိၵ်ႉ တင်းလၢႆ၊လႆႈငိၼ်းၼုၵ်ႈၵပၢတ်ႈတြႃးၸဝ်ႈၽြႃးဢေႃႈ။
ၽြႃးပဵၼ်ၸဝ်ႈဢဝ်သြႃႇ ပေႃးလု၊ ႁဵတ်းၼႄတၼ်းၶူဝ်းဢၼ်လၢၵ်ႇလၢႆးၼမ်ၼႃႇဢေႃႈ။-
ၶဝ်လႆႈဢဝ်ၽႃႈၸဵတ်ႉမၼ်း၊ဢိၵ်ႇတင်းၽႃႈဝဵၼ်းတူဝ်မၼ်းၼမ်ၼႃႇ၊ပၼ်ၵႂႃႇၵႃႈတီႈၵူၼ်းၶႆႈၵူၼ်းပဵၼ်တင်းလၢႆလႄႈတၢင်းၶႆႈတၢင်းပဵၼ်ၶဝ်လႆႈၸိုၼ်ႈႁၢႆၵႂႃႇ၊ဢိၵ်ႇတင်းၽီႁၢႆႉၵေႃႈဢွၵ်ႇသေၵႃႈၼႂ်းၶဝ်ၵႂႃႇဢေႃႈ။-
မိူဝ်ႈၼၼ်ႉ၊ၵူၼ်းမဵဝ်း ၵျူး၊ ၵမ်ႈၽွင်ႈ၊ၸိူဝ်းဢၼ်လႄႇၵႂႃႇၵူႈတီႈၵူႈလႅၼ်ႁႂ်ႈလႆႈလိုပ်ႈႁေႃႈၽီၽိူဝ်ႉၸိူဝ်းၼၼ်ႉၵေႃႈ၊တိူင်ႇၼႃႇမႃႉၸိုဝ်ႈသဵင် ၸဝ်ႈယေႇသု၊ လႄႈႁဵတ်းၸၢမ်းတူၺ်းဢေႃႈ။ ၶဝ်လၢတ်ႈတီႈၽီႁၢႆႉလႄႈဝႃႈ၊ “ၵဝ်တိူင်ႇၸိုဝ်ႈသဵင် ယေႇသု၊ ဢၼ် ပေႃးလု၊ ႁေႃးလၢတ်ႈၼၼ်ႉလႄႈပၼ်ဢမိင်ႉတီႈမႂ်းယဝ်ႉ၊” ဝႃႈၼင်ႇၼႆဢေႃႈ။-
လုၵ်ႈၸၢႆး သၵေးဝႃႉ၊ ဢၼ်ပဵၼ်ၶုၼ်ယဵၸ်ႈပရေႃးႁဵၵ်ႈ ၵူၼ်းမဵဝ်း ၵျူး၊ ၶဝ်တင်းၸဵတ်းၵေႃႉပီႈၼွင်ႉႁဵတ်းၸိူဝ်ႉၼင်ႇၼၼ်ဢေႃႈ။
ၵူၺ်းၵႃႈ၊ၽီႁၢႆႉၼၼ်ႉလၢတ်ႈဝႃႈ၊ “ ယေႇသု၊ ၼၼ်ႉၵဝ်ႁုၸၵ်းဢေႃႈ။ လွင်ႈ ပေႃးလု၊ ၵေႃႈၵဝ်ႁုဢေႃႈ။ သူၸမ်ႉ၊ပဵၼ်ၽူႈလႂ်၊” ဝႃႈၼင်ႇၼႆဢေႃႈ။
ၵမ်းၼၼ်ႉ၊ၵေႃႉဢၼ်ၽီႁၢႆႉၶဝ်ႈၼၼ်ႉ၊ဝႅၼ်ၶိုၼ်ႈတဵၵ်းၶီႇၵႃႈၼိူဝ်ၶဝ်လႄႈ ႁဵတ်းပႄႉႁဵတ်းၼႅင်ႇတီႈၶဝ်ၵူႈၵေႃႉဢေႃႈ။ ၶဝ်ပီႈၼွင်ႉလႆႈဢွၵ်ႇပၢႆႈသေၵႃႈၼႂ်းႁိူၼ်းၼၼ်ႉသမ်ႉပေႃးလႆႈတၢင်းၸဵပ်းတၢင်းသႅပ်ႇလႄႈၶူဝ်းၼုင်ႈၶဝ်ထၢၼ်ႈပေႃးယွၵ်းပေႃးၶၢတ်ႇသဵင်ႈဢေႃႈ။-
လွင်ႈတၢင်းၼၼ်ႉၵူၼ်းမဵဝ်း ၵျူး၊ ၶဝ်၊ဢိၵ်ႇတင်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ၊ဢၼ်ယူႇၼႂ်းဝဵင်း ဢေးၽႅတ်ႈ၊ ၸိူဝ်းၼၼ်ႉငိၼ်းလႄႈၶဝ်ၵူဝ်ႁႄၼႃႇလူင်လၢင်၊ယွင်ႈယေႃးၼႃႇမႃႉၸိုဝ်ႈသဵင် ၸဝ်ႈယေႇသု၊ ဢေႃႈ။-
ၶဝ်ၸိူဝ်းဢၼ်ယုမ်ႇမၢတ်ႈၼမ်ၼႃႇၵေႃႈ၊မႃးၽုၺ်ႇဢွၵ်ႇၼႄပျႃးတၢင်းဢၼ်ၶဝ်ၵမ်ၵျၢင်ႉဢမ်ႇလီဢမ်ႇငၢမ်းယဝ်ႉၸိူဝ်းၼၼ်ႉလႄႈတွင်းပၢၼ်ႇဢေႃႈ။-
ၵူၼ်းၸိူဝ်းဢၼ်ယိပ်းၵမ်ဢတၢတ်ႈၽီမေႃႇၼမ်ၼႃႇၵေႃႈ၊ဢဝ်ၽိုၼ်လိၵ်ႈၶဝ်မႃးလႄႈတုတ်ႇၽႆးၵႃႈတီႈၽၢႆႇၼႃႈၵူၼ်းတင်းလၢႆလႄႈၶဝ်တႂၢၵ်ႈတူၺ်းၵႃႈၶၼ်ၽိုၼ်လိၵ်ႈၸိူဝ်းၼၼ်ႉ၊တၢၼ်ႇငိုၼ်းႁႃႈမိုၼ်ႇၶႅပ်းဢေႃႈ။-
ၵွပ်ႈလွင်ႈတၼ်းၶူဝ်းဢၼ်ယႂ်ႇၼႃႇၼႆႉလႄႈၵႂၢမ်းတြႃးၸဝ်ႈၽြႃးယႂ်ႇၽႄႈၼမ်ၵိုၼ်းလႄႈပႄႉၼႅင်ႇလူင်လၢင်ဢေႃႈ။
လိုၼ်းသေလွင်ႈတၢင်းၸိူဝ်းၼႆႉ၊ပဵၼ်ယဝ်ႉၼၼ်ႉၸိုင်၊သြႃႇ ပေႃးလု၊ ၼၼ်ႉၵႃႈၼႂ်းၸႂ်မၼ်းပွင်ႇပဵၼ်မႃးလႄႈဝႃႈ၊တၵ်းၸွမ်းတၢင်းလတ်းၶဝ်ႈၵႃႈၼႂ်းမိူင်း မႃႇၵေႇတေႃးၼိ၊ တင်းမိူင်း ဢႃႇၶႃႇယႃႉ၊ သေယဝ်ႉ၊မိူဝ်းၵႂႃႇၸူးဝဵင်း ယေႇရုသလႅမ်ႇ၊ ဢေႃႈ။ မၼ်းလၢတ်ႈဝႃႈ၊ “ဝၢႆးသေၵဝ်ႁွတ်ႈထိုင်ၵႃႈတီႈဝဵင်း ယေႇရုသလႅမ်ႇ၊ ယဝ်ႉၼၼ်ႉ၊ၵဝ်တၵ်းလႆႈၵႂႃႇတူၺ်းဝဵင်း ရူဝ်းမႃႉ၊ ဢေႃႈ၊” ဝႃႈၼင်ႇၼႆသေလႄႈ၊-
ပွႆႇၸႂ်ႉ တိမေႃးသေႇ၊ တင်း ဢေႇရတ်ႉတု၊ ၵူၼ်းသွင်ၵေႃႉဢၼ်ၸွႆႈၵမ်ႉၸွႆႈထႅမ်မၼ်းၼၼ်ႉ၊ၵႂႃႇၸူးမိူင်း မႃႇၵေႇတေႃးၼိ၊ သေယဝ်ႉ၊တူဝ်မၼ်းၵိုတ်းသဝ်းယူႇၵႃႈၼႂ်းမိူင်း ဢႃႇသိ၊ ၸူဝ်ႈၼိုင်ႈၶၢဝ်းၼိုင်ႈဢေႃႈ။
ၸူဝ်ႈၶၢဝ်းယၢမ်းၼၼ်ႉ၊လွင်ႈဢၼ်ယုင်ႈယၢင်ႈဢူၼ်မေႃးၼႃႇလူင်လၢင်ပဵၼ်မႃးၵႃႈၼႂ်းဝဵင်း ဢေးၽႅတ်ႈ၊ ၵွပ်ႈပိူဝ်ႈၽႃႇသႃႇတြႃးၸဝ်ႈၽြႃးဢေႃႈ။-
လွင်ႈမၼ်းၸမ်ႉ၊ၸၢင်ႈငိုၼ်းၵေႃႉၼိုင်ႈဢၼ်လႆႈၸိုဝ်ႈ တေႇမေႇတရိ၊ ဢၼ်ၸၢင်ႈငိုၼ်းႁဵတ်းၵျွင်းၽြႃးငိုၼ်းဢွၼ်ႇ၊ဢၼ်ပဵၼ်ႁိူၼ်းၼၢင်းၽီ ဢႃႇတေႇမိ၊ ၼၼ်ႉ၊ႁဵတ်းႁႂ်ႈၸၢင်ႈငိုၼ်းမၼ်းတင်းလၢႆလႆႈဢၼ်မျၢတ်ႈဢၵျူဝ်းၼမ်ၼႃႇဢေႃႈ။-
မၼ်းၼၼ်ႉ၊ႁွင်ႉဢဝ်ၶဝ်တင်းသဵင်ႈတင်းလူင်ၸႃႉၸဵမ်ပိူၼ်ႈတၢင်ႇၵေႃႉ၊ၸိူဝ်းဢၼ်ၵၢၼ်ငၢၼ်းၶဝ်မိူၼ်ၵၼ်ၼၼ်ႉ၊မႃးၸုတုမ်လႄႈလၢတ်ႈဝႃႈ၊ “ၵူၼ်းတင်းလၢႆၶဝ်႟။ သူႁုလွင်ႈဢၼ်ႁဝ်းၼႆႉ မၢၵ်ႈမီးလီပဵၼ်ၵွပ်ႈပိူဝ်ႈၵၢၼ်ၼႆႉၼၼ်ႉယူႇဢေႃႈ။-
တေႃႈလဵဝ်ၼႆႉသူၵေႃႈလႆႈႁၼ်လႆႈငိၼ်းလွင်ႈဢၼ် ပေႃးလု၊ ႁဵတ်းယူႇၼႆႉၼၼ်ႉဢေႃႈ။ မၼ်းလၢတ်ႈဝႃႈ၊ၽြႃးဢၼ်ဢဝ်မိုဝ်းၵူၼ်းႁဵတ်းတင်းလၢႆၼႆႉ၊ဢမ်ႇၸႂ်ႈၽြႃးဝႃႈၼႆလႄႈတိုၵ်းယူင်းၵူၼ်းၼမ်ၼႃႇၵႃႈတီႈဝဵင်း ဢေးၽႅတ်ႈ၊ ၼႆႉၵူၺ်းဢမ်ႇၵႃး၊မိူင်း ဢႃႇသိ၊ ၼႆႉ၊ၸမ်တေသဵင်ႈတင်းမိူင်းဢမ်ႇဝႆႈၽြႃးႁဝ်းၼႆႉယဝ်ႉ။-
ပိူဝ်ႈၼႆလႄႈၵူဝ်ၵၢၼ်ငၢၼ်းႁဝ်းၼႆႉတၵ်းလုၵႂႃႇဢမ်ႇၵႃး၊ၵျွင်းၽြႃးၼၢင်းၽီ ဢႃႇတေႇမိ၊ ဢၼ်ယႂ်ႇမျၢတ်ႈၼႆႉၵေႃႈ၊ၵူဝ်မၼ်းႁွတ်ႈထိုင်တၢင်းဢၼ်လူလၢႆလႄႈမုၼ်ၽုင်းၼၢင်းၽီဢၼ်ၵူၼ်းမိူင်း ဢႃႇသိ၊ ၵူႈၵေႃႉဢိၵ်ႇတင်းၵူၼ်းမိူင်းလေႃးၵီႇတင်းလၢႆၵူဝ်းၵႂၢႆႇယူႇၼႆႉၵေႃႈ၊တၵ်းလုလႅဝ်ၵႂႃႇဢေႃႈ၊” ဝႃႈၼင်ႇၼႆဢေႃႈ။
မူႇၵူၼ်းတင်းလၢႆလႆႈငိၼ်းၵႂၢမ်းၼၼ်ႉလႄႈဢွၵ်ႇတေႃးသႃႉၸႂ်လမ်ၶႂ်ႈၸႃႉၼႃႇလူင်လၢင်လႄႈႁွင်ႉသႅၼ်ႇလႄႈဝႃႈ၊ “ ဢႃႇတေႇမိ၊ ၽြႃးဝဵင်း ဢေးၽႅတ်ႈ၊ ၼႆႉယႂ်ႇမျၢတ်ႈၼႃႇဢေႃႈ၊” ဝႃႈၼင်ႇၼႆဢေႃႈ။-
တၢင်းဢၼ်ယုင်ႈယၢင်ႈဢူၼ်မေႃးၼၼ်ႉ၊ၸွတ်ႇၵႂႃႇတင်းဝဵင်းလႄႈ မူႇၵူၼ်းၸိူဝ်းၼၼ်ႉတိဢဝ် ၵႃႇယု၊ တင်း ဢႃႇရိတ်ႉတႃႇၶု၊ ၵူၼ်းမိူင်း မႃႇၵေႇတေႃးၼိ၊ သွင်ၵေႃႉဢၼ်ဢွၵ်ႇတၢင်းပႆတၢင်းၸွမ်းသြႃႇ ပေႃးလု၊ ၼၼ်ႉၵႂႃႇသေယဝ်ႉ၊ၶဝ်ဢွၼ်ၵၼ်ၶုၼ်ႇလႅၼ်ႈၵႂႃႇၸူးပၢင်ပွႆးဢေႃႈ။-
သြႃႇ ပေႃးလု၊ ၶႂ်ႈၶဝ်ႈၸူးၼႂ်းပၢင်ၵူၼ်းၸိူဝ်းၼၼ်ႉဢေႃႈ။ ၵူၺ်းၵႃႈ၊တပႄးၸဝ်ႈတင်းလၢႆဢမ်ႇပၼ်မၼ်းၵႂႃႇ။-
ၶုၼ်ဢႃႇၼႃႇမိူင်း ဢႃႇသိ၊ ၵမ်ႈၽွင်ႈ၊ၸိူဝ်းဢၼ်ပဵၼ်ၵေႃႉသႄႈသြႃႇ ပေႃးလု၊ ၸိူဝ်းၼၼ်ႉၵေႃႈ၊သင်ႇလၢတ်ႈတင်းၵႂၢမ်းတွင်းပၢၼ်ႇၵႂႃႇ၊ၼင်ႇႁိုဝ်မၼ်းတၵ်းဢမ်ႇၵႂႃႇၼႄတူဝ်ၸဝ်ႈၵဝ်ႇၵႃႈတီႈပၢင်ပွႆးၼၼ်ႉဢေႃႈ။-
ယၢမ်းမိူဝ်ႈၼၼ်ႉ၊မူႇၵူၼ်းတင်းလၢႆယုင်ႈယၢင်ႈဢူၼ်မေႃးၼႃႇလူင်လၢင်ထၢၼ်ႈပေႃးၵူၼ်းၵၼ်ႈၼမ်ယင်းဢမ်ႇႁုလွင်ႈဢၼ်ၶဝ်မႃးၸုတုမ်ၵၼ်လွင်ႈသင်ၼၼ်ႉလႄႈ ၵမ်ႈၽွင်ႈႁွင်ႉသႅၼ်ႇယေႈၸိူဝ်ႉ၊ၵမ်ႈၽွင်ႈႁွင်ႉသႅၼ်ႇယေႈမဵဝ်းႁင်းၽႂ်ႁင်းမၼ်းဢေႃႈ။-
ၵူၼ်းၵမ်ႈၽွင်ႈပၼ်ဢၵျၢမ်ႇႁႂ်ႈ ဢလႅၵ်ႉၸၼ်းတႃး၊ ဢဝ်ပုၼ်ႈၽွၼ်းၼၼ်ႉသေလႄႈ ၵူၼ်းမဵဝ်း ၵျူး၊ ၶဝ်၊ဢီးမၼ်းၶိုၼ်ႈပႃႈၼႃႈမူႇၵူၼ်းတင်းလၢႆဢေႃႈ။ မိူဝ်ႈဢၼ်မၼ်းၼႄမိုဝ်းႁႂ်ႈၵူၼ်းတင်းလၢႆတဵတ်ႇၵႂႃႇ ပုၼ်ႈဢၼ်တၵ်းလၢတ်ႈၵႂၢမ်းၶႄတူဝ်ၼၼ်ႉၸိုင်၊-
ပိူၼ်ႈလႆႈႁုလွင်ႈဢၼ်မၼ်းပဵၼ်ၵူၼ်းမဵဝ်း ၵျူး၊ ၵေႃႉၼိုင်ႈၼၼ်ႉသေယဝ်ႉ၊ၶဝ်တင်းသဵင်ႈတင်းလူင်ႁဵတ်းတင်းသဵင်ဢၼ်ယႂ်ႇၼႃႇႁွင်ႉသႅၼ်ႇၵႂၢမ်းၶေႃႈလဵဝ်လႄႈဝႃႈ၊ “ ဢႃႇတေႇမိ၊ ၽြႃးဝဵင်း ဢေးၽႅတ်ႈ၊ ၼႆႉယႂ်ႇမျၢတ်ႈၼႃႇဢေႃႈ၊” ဝႃႈၼင်ႇၼႆယူႇႁိုင်သွင်မွင်းၸမ်ၸမ်ဢေႃႈ။
ၵမ်းၼၼ်ႉ၊ၸရေးလုမ်းဝဵင်းၼၼ်ႉမွၵ်ႇႁႂ်ႈၵူၼ်းတင်းလၢႆတဵတ်ႇယဵၼ်ၵႂႃႇလႆႈယဝ်ႉၸင်ႇလၢတ်ႈလႄႈဝႃႈ၊ “ၵူၼ်းဝဵင်း ဢေးၽႅတ်ႈ၊ ၶဝ်႟။ လွင်ႈဢၼ်ၵူၼ်းဝဵင်း ဢေးၽႅတ်ႈ၊ ၼႆႉ၊ဝႆႈၵျွင်းၽြႃးဢွၼ်ႇၼၢင်းၽီ ဢႃႇတေႇမိ၊ ဢၼ်ယႂ်ႇမျၢတ်ႈၼႃႇ၊တင်းလွင်ႈဢၼ်ဝႆႈႁုၼ်ႇႁၢင်ႈသၢင်းထုႁိၼ်၊ဢၼ်လုၵ်ႉသေၵႃႈတီႈၽြႃး ၸုသႃႉ၊ တူၵ်းမႃးၼႆႉၸိုင်၊ႁုၵူႈၵေႃႉယူႇဢေႃႈ။-
လွင်ႈတၢင်းၼႆႉ၊ၽူႈလႂ်သေၵေႃႉသေၵူၼ်းဢမ်ႇတွပ်ႇဢမ်ႇထဵင်လႆႈ။ ပိူဝ်ႈၼႆလႄႈသူထုၵ်ႇလီယူႇတဵတ်ႇတဵတ်ႇၵူၺ်းသေယဝ်ႉ၊ယင်းဢမ်ႇပႃးသတိလႄႈယႃႇပေႁဵတ်းၵႃႈသင်သေၸိူဝ်ႉသေပိူင်။-
သူတိဢဝ်ၶဝ်ၸိူဝ်းဢၼ်ယင်းဢမ်ႇလႆႈလၵ်ႉၶူဝ်းၵျွင်းတီႈလႂ်၊ဢိၵ်ႇတင်းဢမ်ႇလႆႈသႄႉသွမ်းၼၢင်းၽြႃးႁဝ်းၼၼ်ႉမႃးယဝ်ႉ။-
ပေႃး တေႇမေႇတရိ၊ တင်းၵူၼ်းႁဵတ်းၵၢၼ်မၼ်းတင်းလၢႆ၊ၶႂ်ႈႁဵတ်းဢမုသႂ်ႇတီႈသေၵေႃႉသေၵူၼ်းၸိုင်၊ႁဝ်းမီးၶုၼ်ဢႃႇၼႃႇတင်းလၢႆ၊ဢိၵ်ႇတင်းဝၼ်းဢၼ်ၶိုၼ်ႈလုမ်းယူႇဢေႃႈ။ ႁႂ်ႈၸဝ်ႈဢမုၼင်ႇၵၼ်ၸွႆးတြႃးသႂ်ႇတီႈၵၼ်တႃႉ။-
ၼႂ်းၼၼ်လႄႈပေႃးသူမီးဢမုတၢင်ႇၸိူဝ်ႉတၢင်ႇဢၼ်ၸိုင်၊သူထုၵ်ႇလီၵႂႃႇၵႄႈလိတ်ႈၵၼ်ၵႃႈတီႈပၢင်တုမ်ဢၼ်မႅၼ်ႈတြႃးၼၼ်ႉဢေႃႈ။-
လွင်ႈတၢင်းဢၼ်ယုင်ႈယၢင်ႈဢူၼ်မေႃးဝၼ်းမိူဝ်ႈၼႆႉၸိုင်၊ၸၢင်ႈၶႄးဢမုတၵ်းႁွတ်ႈထိုင်ၵႃႈၼိူဝ်ႁဝ်းသေလႄႈႁဝ်းၼႆႉတေဢမ်ႇၵၢင်းလွတ်ႈဢပျတ်ႈလႆႈယဝ်ႉ။ လွင်ႈမၼ်းၸမ်ႉ၊ႁဝ်းတေဢမ်ႇမီးလွင်ႈဢၼ်တၵ်းၵႄႈလိတ်ႈတီႈလွင်ႈတၢင်းဢၼ်ယုင်ႈယၢင်ႈဢူၼ်မေႃးၼႆႉ၊သေၸိူဝ်ႉသေပိူင်ဢေႃႈ၊” ဝႃႈၼင်ႇၼႆသေယဝ်ႉ၊-
ပွႆႇမူႇၵူၼ်းၸိူဝ်းၼၼ်ႉၵႂႃႇသေဢေႃႈ။
ဝၢႆးသေတၢင်းဢၼ်ယုင်ႈယၢင်ႈဢူၼ်မေႃးထၢတ်ႇယဵၼ်ၵႂႃႇယဝ်ႉၼၼ်ႉ၊သြႃႇ ပေႃးလု၊ ႁွင်ႉဢဝ်တပႄးၸဝ်ႈတင်းလၢႆၸုတုမ်ၵၼ်သေလႄႈ၊တိုၵ်းယူင်းပၼ်ႁႅင်းယဝ်ႉၸင်ႇသင်ႇလၢတ်ႈၶဝ်သေယဝ်ႉ၊ဢွၵ်ႇၵႂႃႇၸူးမိူင်း မႃႇၵေႇတေႃးၼိ၊ ပုၼ်ႉသေဢေႃႈ။-
မၼ်းလႄႇလဵပ်ႈၵႂႃႇၼႂ်းဢိူင်ႇၼႂ်းမိူင်းၸိူဝ်းၼၼ်ႉသေလႄႈဢဝ်တင်းၵႂၢမ်းတြႃးၼမ်ၼႃႇသင်ႇသွၼ်ပၼ်ၶဝ်သေယဝ်ႉ၊ၸင်ႇႁွတ်ႈထိုင်ၵႃႈတီႈမိူင်း ဢႃႇၶႃႇယႃႉ၊ ၵႂႃႇဢေႃႈ။-
တီႈၼၼ်ႈယူႇႁိုင်သၢမ်လိူၼ်ဢေႃႈ။ မိူဝ်ႈဢၼ်မၼ်းဢၢင်ႈတၵ်းၶၢမ်ႈပၢင်ႇလၢႆႇၵႂႃႇၵႃႈတီႈမိူင်း သီးရီးယႃး၊ ၼၼ်ႉၸိုင်၊ပိူဝ်ႈဢၼ်မၼ်းလႆႈႁုၵူၼ်းမဵဝ်း ၵျူး၊ ၶဝ်ၵျၢမ်ႇပွင်ႁဵတ်းဢၼ်ဢမ်ႇလီတီႈမၼ်းၼၼ်ႉလႄႈမၼ်းၶိုၼ်းပိၼ်ႇၸႂ်ႁႂ်ႈလႆႈမိူဝ်းၸွမ်းသဵၼ်ႈတၢင်းမိူင်း မႃႇၵေႇတေႃးၼိ၊ ၵႂႃႇဢေႃႈ။-
ၸႃႉၸဵမ် သေႃးပတရု၊ လုၵ်ႈၸၢႆး ပုရု၊ ၵူၼ်းဝဵင်း ပေႇရိ၊ဢႃႇရိတ်ႉတႃႇၶု၊ တင်း သေးၶုၼ်ႇတု၊ ၵူၼ်းဝဵင်း ထိတ်ႉသႃႇလေႃးၼိၵ်ႈ၊ ၵႃႇယု၊ ၵူၼ်းဝဵင်း တေႇရပေႇ၊တုၶႅၵ်ႉ၊ တင်း တရေႃႇၽိမ်ႇ၊ ၵူၼ်းမိူင်း ဢႃႇသိ၊ တင်း တိမေႃးသေႇ၊ ၶဝ်ၸိူဝ်းၼႆႉ၊ၵႂႃႇၸွမ်းပႆၸွမ်းသြႃႇ ပေႃးလု၊ ဢေႃႈ။-
ၶဝ်ၵႂႃႇဢွၼ်တၢင်းႁဝ်းလႄႈပႂ်ႉထႃႈယူႇၵႃႈတီႈဝဵင်း ထရေႃး၊ ဢေႃႈ။-
ႁဝ်းၸမ်ႉ၊ဝၢႆးပွႆးၵိၼ်ၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈၼၼ်ႉယဝ်ႉၸင်ႇ၊လုၵ်ႉသေၵႃႈတီႈဝဵင်း ၽိလိပ်ႉပိ၊ ၶီႇႁိူဝ်းသၢင်းၽေႃးၵႂႃႇႁိုင်ႁႃႈဝၼ်းၸင်ႇၵႂႃႇႁူပ်ႉထူပ်းၵၼ်တင်းၶဝ်၊ၵႃႈတီႈဝဵင်း ထရေႃး၊ လႄႈယူႇၵႃႈတီႈၼၼ်ႈပၢတ်ႈၼိုင်ႈဢေႃႈ။
ၼႂ်းဝၼ်းၸၼေႇႁူဝ်ၶမ်ႈၼၼ်ႉ၊ႁဝ်းၸုတုမ်ၵၼ်ႁႂ်ႈလႆႈဝိတ်းၵိၼ်ၶဝ်ႈမုၼ်းဢေႃႈ။ ၸွမ်းလူၺ်ႈတၵ်းလႆႈၽၢတ်ႇၵၼ်ၼႂ်းဝၼ်းမိူဝ်ႈၽုၵ်ႈၼၼ်ႉလႄႈသြႃႇ ပေႃးလု၊ ႁေႃးလၢတ်ႈယူႇတေႃႇထိုင်ႁွတ်ႈတဵင်ႈၶိုၼ်းဢေႃႈ။-
ၵႃႈတီႈဢၼ်ၸုတုမ်ၵၼ်ၼိူဝ်ႁိူၼ်းႁၢၼ်ႉၼိူဝ်ၼၼ်ႉ၊ၵွၵ်းၽႆးတႆႈဝႆႉၼမ်ၼႃႇဢေႃႈ။-
ၵူၼ်းၼုမ်ႇဢွၼ်ႇၵေႃႉၼိုင်ႈဢၼ်လႆႈၸိုဝ်ႈ ဢုတုၶု၊ ၼၼ်ႉ၊ၼင်ႈယူႇၵႃႈတီႈႁူးလၢင်းတဵၼ်လႄႈပိူဝ်ႈဢၼ်သြႃႇ ပေႃးလု၊ ႁေႃးလၢတ်ႈယူႇၶိူဝ်းၶိူဝ်းၼၼ်ႉၸိုင်၊ ဢုတုၶု၊ ငဝ်ၼွၼ်းယူႇတေႃႇထိုင်ႁွတ်ႈထၢၼ်ႈပေႃးၼွၼ်းလပ်းၵႂႃႇသေယဝ်ႉ၊ပိၼ်ႈတူၵ်းႁိူၼ်းႁၢၼ်ႉသၢမ်ထၢပ်ႈၼၼ်ႉၵႂႃႇဢေႃႈ။ မိူဝ်ႈဢၼ်ၶဝ်ဢွၼ်ၵၼ်ၵႂႃႇဢုမ်ႈဢဝ်မၼ်းၼၼ်ႉၸိုင်၊မၼ်းတၢႆၵႂႃႇယဝ်ႉယဝ်ႉဢေႃႈ။-
သြႃႇ ပေႃးလု၊ ၵေႃႈ၊လူင်းၵႂႃႇလႄႈဢဝ်တူဝ်မၼ်းဢူပ်ႉၸပ်းသေၵွတ်ႇမၼ်းဝႆႉလႄႈလၢတ်ႈဝႃႈ၊ “ယႃႇပေမႆႈၸႂ်တူၵ်းၸႂ်ၵၼ်။ ၸႂ်မၼ်းယင်းမီးယူႇဢေႃႈ၊” ဝႃႈၼင်ႇၼႆဢေႃႈ။-
လိုၼ်းၼၼ်ႉ၊မၼ်းၶိုၼ်းၶိုၼ်ႈၵႂႃႇဝိတ်းၶဝ်ႈမုၼ်းၵိၼ်လႄႈဝၢႆးသေႁေႃးလၢတ်ႈႁိုင်ၼႃႇတေႃႇထိုင်ႁွတ်ႈမိူင်းလႅင်းသေယဝ်ႉ၊ဢွၵ်ႇၵႂႃႇသေဢေႃႈ။-
ၶဝ်ၸင်ႇဢဝ်ၵူၼ်းၼုမ်ႇဢၼ်ဢသၢၵ်ႈယင်းလိပ်းယူႇၼၼ်ႉမိူဝ်းၵႂႃႇလႄႈမီးၸႂ်ဢၼ်သၢၵ်ႈသႃႇၼႃႇလူင်လၢင်ဢေႃႈ။
ႁဝ်းဢွၵ်ႇၵႂႃႇဢွၼ်တၢင်းလႄႈၶီႇႁိူဝ်းသၢင်းၽေႃးၵႂႃႇၸူးဝဵင်း ဢတ်ႉသု၊ ဢၢင်ႈတၵ်းဝႄႉႁပ်ႉဢဝ်သြႃႇ ပေႃးလု၊ ၵႃႈတီႈၼၼ်ႈပိူဝ်ႈဢၼ်မၼ်းပႆတိၼ်ၵႂႃႇတၢင်းလွႆဢေႃႈ။ ႁဝ်းႁဵတ်းၸွမ်းၸိူဝ်ႉၼင်ႇဢၼ်မၼ်းသင်ႇလၢတ်ႈႁဝ်းဝႆႉၼၼ်ႉဢေႃႈ။-
မိူဝ်ႈဢၼ်မၼ်းထူပ်းၵၼ်တင်းႁဝ်းၵႃႈတီႈဝဵင်း ဢတ်ႉသု၊ ယဝ်ႉၸိုင်၊ႁဝ်းႁပ်ႉဢဝ်မၼ်းၵႃႈၼိူဝ်ႁိူဝ်းၼၼ်ႉလႄႈၵႂႃႇၸူးၵႃႈတီႈဝဵင်း မိတုလိၼ်ႇ၊ ဢေႃႈ။-
ႁဝ်းၸင်ႇၶီႇႁိူဝ်းသၢင်းၽေႃးဢွၵ်ႇသေၵႃႈတီႈဝဵင်းၼၼ်ႉလႄႈဝၼ်းမိူဝ်ႈၽုၵ်ႈလဵပ်ႈၵႂႃႇႁိမ်းၵုၼ် ၶီးဢု၊ သေယဝ်ႉ၊ထႅင်ႈဝၼ်းၼိုင်ႈႁွတ်ႈထိုင်ၵႃႈတီႈၵုၼ် သမု၊ လႄႈသိူၵ်ႈၵႃႈတီႈႁိမ်းၸဵင်ႇလႅမ်၊ၵုၼ် ထရေႃႇၵုလိ၊ ဢေႃႈ။ လိုၼ်းၼၼ်ႉထႅင်ႈဝၼ်းၼိုင်ႈႁွတ်ႈထိုင်ၵႃႈတီႈဝဵင်း မီးလိတ်ႉ၊ သေဢေႃႈ။-
သြႃႇ ပေႃးလု၊ ဢမ်ႇၶႂ်ႈၵိုတ်းၼႂ်းမိူင်း ဢႃႇသိ၊ ႁိုင်ၼႃႇလႄႈဢၢင်ႈၶႂ်ႈၶီႇႁိူဝ်းသၢင်းၽေႃးဝႄႈပူၼ်ႉဝဵင်း ဢေးၽႅတ်ႈ၊ ၵႂႃႇဢေႃႈ။ လွင်ႈမၼ်းၸမ်ႉ၊ပေႃးပဵၼ်လႆႈၸိုင်၊မၼ်းၶႂ်ႈႁွတ်ႈထိုင်ဝဵင်း ယေႇရုသလႅမ်ႇ၊ ၼႂ်းဝၼ်းပွႆး ပဵၼ်ႇတေႇၵုၵ်ႉတေႇ၊ ဢေႃႈ။
သြႃႇ ပေႃးလု၊ ၸင်ႇပွႆႇၸႂ်ႉၵူၼ်းလုၵ်ႉသေၵႃႈတီႈဝဵင်း မီးလိတ်ႉ၊ ၵႂႃႇၵႃႈတီႈဝဵင်း ဢေးၽႅတ်ႈ၊ လႄႈႁွင်ႉဢဝ်ၵူၼ်းဢုပ်ႉၸိူဝ်းၸဝ်ႈတင်းလၢႆမႃးဢေႃႈ။-
မိူဝ်ႈဢၼ်ၶဝ်ႁွတ်ႈမႃးတီႈမၼ်းၼၼ်ႉၸိုင်၊မၼ်းလၢတ်ႈတီႈၶဝ်လႄႈဝႃႈ၊ “ၸႃႉၸဵမ်ဝၼ်းဢၼ်တိၼ်ၵဝ်မႃးယဵပ်ႇလိၼ်မိူင်း ဢႃႇသိ၊ တေႃႇႁွတ်ႈမိူဝ်ႈလဵဝ်ၼႆႉ၊ၵဝ်မီးယူႇလူၺ်ႈၵၼ်တင်းသူၸိူဝ်ႉၼင်ႇႁိုဝ်ၸိုင်၊သူႁုဢေႃႈ။-
ၼင်ႇႁိုဝ်တၵ်းပွင်ႁဵတ်းၵၢၼ်ၽြႃးပဵၼ်ၸဝ်ႈၸိုင်၊ၵဝ်ပႃးတင်းၸႂ်ဢၼ်ၶျႃးတႅမ်ႇ၊ဢိၵ်ႇတင်းတၢင်းဢၼ်ၼမ်ႉတႃတူၵ်းလႄႈ ၶၢမ်ႇတၢင်းဢၼ်ၸၢမ်းတူၺ်းယႃႉယုၵ်ႉၵွပ်ႈပိူဝ်ႈၵူၼ်းမဵဝ်း ၵျူး၊ ၶဝ်ၵျၢမ်ႇႁႃႁဵတ်းတၢင်းဢၼ်ဢမ်ႇလီတီႈၵဝ်ၼၼ်ႉဢေႃႈ။-
သူႁုလွင်ႈဢၼ်ၵဝ်ယင်းဢမ်ႇဝႄႈပႅတ်ႈလွင်ႈတၢင်းဢၼ်တၵ်းပွင်ဢၵျူဝ်းသူသေၸိူဝ်ႉသေပိူင်ၼၼ်ႉလႄႈႁေႃးလၢတ်ႈသင်ႇသွၼ်ပၼ်ၵႃႈၼႂ်းပၢင်ၵူၼ်းၸုၵူၼ်းတုမ်၊ဢိၵ်ႇတင်းၵႃႈၼႂ်းႁိူၼ်းသူတင်းလၢႆၼၼ်ႉယူႇဢေႃႈ။-
ၼင်ႇႁိုဝ်တၵ်းၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်ၸူးတီႈၽြႃးပဵၼ်ၸဝ်ႈ၊ဢိၵ်ႇတင်းတၵ်းယုမ်ႇမၢတ်ႈၸဝ်ႈႁဝ်း ယေႇသုၶရိၸ်ႈ၊ ၸိုင်၊ၵဝ်ၶၢမ်ႇသၢၵ်ႈသေႇတီႈၵူၼ်းမဵဝ်း ၵျူး၊ တင်းၵူၼ်းမဵဝ်း ၵရိၵ်ႉ၊ ၶဝ်မိူၼ်မိူၼ်ၵၼ်ဢေႃႈ။-
တေႃႈလဵဝ်ၼႆႉၵေႃႈ၊ၸွမ်းၼင်ႇဝိၺိၺ်ႇၸဝ်ႈၸႂ်ႉၵဝ်ၼၼ်ႉ၊ၵဝ်တၵ်းၵႂႃႇၵႃႈတီႈဝဵင်း ယေႇရုသလႅမ်ႇ၊ ဢေႃႈ။ ၵႃႈတီႈၼၼ်ႈတၵ်းပဵၼ်ၸိူဝ်ႉႁိုဝ်မႃးတီႈၵဝ်၊ၵဝ်ဢမ်ႇႁု။-
ဢၼ်ၵဝ်ႁုၸမ်ႉ၊ၵႃႈၼႂ်းဝဵင်းလႂ်သေဢမ်ႇဝႃႈ၊ဝိၺိၺ်ႇမူတ်းၸၢင်ႇၸဝ်ႈပၼ်သတိတီႈၵဝ်၊လွင်ႈတၢင်းဢၼ်ဢဝ်ၶင်ၼႂ်းထွင်ႇ၊ဢိၵ်ႇတင်းတုၵ်ႉၶႃႉၶၢၼ်ၸႂ်ပႂ်ႉထႃႈၵဝ်ဝႆႉယဝ်ႉၼၼ်ႉဢေႃႈ။-
ၼႂ်းဝႃႈၼၼ်သေၵေႃႈၵဝ်ဢမ်ႇမၢတ်ႈတၢင်းဢၼ်လႆႈၶၢမ်ႇၼိၵ်ႈၸၢၵ်ႈငႅၼ်းသႄးၼၼ်ႉ၊ပဵၼ်ဢၼ်လီၵူဝ်လႄႈၵဝ်ဢမ်ႇသေလၢႆဢသၢၵ်ႈၵဝ်။ ၵဝ်ၵူၺ်းမီးဢလူဝ်ႇၶႂ်ႈႁႂ်ႈၵၢၼ်ဢၼ် ၸဝ်ႈယေႇသု၊ ၸႂ်ႉၵဝ်ႁဵတ်း၊ဢၼ်ဝႃႈတၢင်းဢၼ်ႁေႃးမွၵ်ႇလၢတ်ႈၶၢဝ်ႇတြႃးသိူဝ်းပျေႃႇလွင်ႈၵျေးၸူးၽြႃးပဵၼ်ၸဝ်ႈၼႆႉ၊တၵ်းပျေႉၸုမ်ႇယဝ်ႉတူဝ်ႈၵႂႃႇၼၼ်ႉၵူၺ်းဢေႃႈ။
“ၵဝ်လႆႈႁေႃးလၢတ်ႈလွင်ႈမိူင်းၽြႃးပဵၼ်ၸဝ်ႈၵႃႈၼႂ်းသူတင်းသဵင်ႈတင်းလူင်ယဝ်ႉဢေႃႈ။ တေႃႈလဵဝ်ၵဝ်ႁုလွင်ႈဢၼ်သူတၵ်းတေဢမ်ႇၶိုၼ်းလႆႈႁၼ်ၼႃႈၵဝ်ထႅင်ႈသေပွၵ်ႈယဝ်ႉၼၼ်ႉယူႇဢေႃႈ။-
ပိူဝ်ႈၼႆလႄႈဝၼ်းမိူဝ်ႈၼႆႉၵဝ်ၶၢမ်ႇသၢၵ်ႈသေႇတီႈသူၸမ်ႉ၊ပေႃးၼႂ်းသူသေၵေႃႉသေၵူၼ်းလွင်ႈၵႂႃႇၸွမ်းၵႂႃႇၵႃႈၼႂ်းဢပျတ်ႈၸိုင်၊ပုၼ်ႈတႃႇတေၸိၼႄးတီႈၵဝ်ၼၼ်ႉဢမ်ႇမီးယဝ်ႉ။-
လွင်ႈမၼ်းၸမ်ႉ၊ၵဝ်ယင်းဢမ်ႇဝႄႈလႄႈႁေႃးမွၵ်ႇလၢတ်ႈၼႄဢလူဝ်ႇၽြႃးပဵၼ်ၸဝ်ႈ၊ၵႃႈမီးတင်းသဵင်ႈတင်းမူတ်းတီႈသူယဝ်ႉယဝ်ႉ။-
ပိူဝ်ႈၼႆပႃးတင်းသမႃႇသတိလႄႈပႂ်ႉထိင်းတူဝ်ၸဝ်ႈၵဝ်ႇ၊ဢိၵ်ႇတင်းၽုင်သူဝ်းတင်းၽုင်။ ဢၼ်ဝိၺိၺ်ႇမူတ်းၸၢင်ႇၸဝ်ႈဢၢပ်ႈပၼ်ဝႆႉ ႁႂ်ႈသူလႆႈလုမ်းလႃးၼၼ်ႉတႃႉ။ ႁႂ်ႈပဵၼ်ၵေႃႉဢၼ်လဵင်ႉထိင်းၸိူဝ်းၸဝ်ႈၽြႃးပဵၼ်ၸဝ်ႈ၊ဢၼ်မၼ်းၸဝ်ႈႁဵတ်းႁႂ်ႈပဵၼ်ၶွင်မၼ်းၸဝ်ႈၵွပ်ႈလူၺ်ႈလုၵ်ႈၸဝ်ႈလႆႈၶၢမ်ႇတၢင်းတၢႆၼၼ်ႉဢေႃႈ။
ၵဝ်ႁုလွင်ႈဢၼ်ဝၢႆးသေၵဝ်ဢွၵ်ႇၵႂႃႇယဝ်ႉၼၼ်ႉၸိုင်၊မႃထိူၼ်ႇဢၼ်ႁၢဝ်ႉၵျၢမ်းၼႃႇတင်းလၢႆ၊ယင်းဢမ်ႇဢဵတ်းလူၽုင်သူဝ်းတင်းလၢႆလႄႈတၵ်းၶဝ်ႈမႃးၵႃႈၼႂ်းသူဢေႃႈ။-
ၶိင်ႇၵႃႇလႃႉတၵ်းႁွတ်ႈမႃးမိူဝ်ႈဢၼ်ၵူၼ်းၵႃႈၼႂ်းသူၵမ်ႈၽွင်ႈတၵ်းပေႃႇဢွၵ်ႇမႃးပႅတ်ႉလႅၼ်ၸူဝ်းဢဝ်တပႄးၸဝ်ႈတင်းလၢႆၸွမ်းလင်ၶဝ်ၵႂႃႇၼၼ်ႉဢေႃႈ။-
ၵွပ်ႈလွင်ႈတၢင်းၼႆႉလႄႈ ပႃးတင်းသတိပႂ်ႉယူႇတႃႉ။ ၶုၵ်းၸႂ်လႆႈတၢင်းဢၼ်ၵဝ်ၼမ်ႉတႃတူၵ်းယူႇလႄႈသင်ႇသွၼ်သုင်းမႃႉသူ၊ဝၼ်းဝၼ်းၶိုၼ်းၶိုၼ်းဢမ်ႇထၢတ်ႇသၢမ်ပီတဵမ်တဵမ်ၼၼ်ႉတႃႉ။
“ပီႈၼွင်ႉၶဝ်႟။ တေႃႈလဵဝ်ၼႆႉၵဝ်ဢဝ်သူဢၢပ်ႈၵႃႈတီႈၽြႃးပဵၼ်ၸဝ်ႈ၊ဢိၵ်ႇတင်းတီႈၵျေးၸူးတြႃးမၼ်းၸဝ်ႈဢၼ်ၸၢင်ႈတႄႇႁဵတ်းသူလႆႈၼၼ်ႉလႄႈႁဵတ်းႁႂ်ႈသူမီးပုၼ်ႈမီးတႃႇၼႂ်းတၢင်းလီမၢင်ႇၵလႃႇဢၼ်ၽြႃးပဵၼ်ၸဝ်ႈမီးဝႆႉ၊ပုၼ်ႈၵူၼ်းမၼ်းၸဝ်ႈတင်းသဵင်ႈဢေႃႈ။-
ၵဝ်ဢမ်ႇမီးၸႂ်ၶႂ်ႈလႆႈငိုၼ်း၊ၶမ်း၊ၶူဝ်းၼုင်ႈတၢင်းမႆတီႈၽူႈလႂ်။-
တူဝ်သူႁုလွင်ႈဢၼ်ၵဝ်ဢဝ်တင်းမိုဝ်းၵဝ်သွင်ၶွၼ်ၼႆႉ၊ႁဵတ်းလဵင်ႉႁဵတ်းလူတီႈၵဝ်၊ဢိၵ်ႇတင်းၶဝ်ၸိူဝ်းဢၼ်ပႃးၸွမ်းၵၼ်တင်းၵဝ်ၼၼ်ႉယူႇဢေႃႈ။-
ၼႂ်းလွင်ႈတၢင်းၵူႈၸိူဝ်ႉၵူႈပိူင်ၼၼ်ႉၵဝ်ႁဵတ်းၼႄဝႆႉတီႈသူလွင်ႈဢၼ်သူတၵ်းလႆႈၶတ်းၸႂ်ႁဵတ်းၵၢၼ်လႄႈၸွႆႈထႅမ်မႃႉၸႃႉၶဝ်ၸိူဝ်းဢၼ်ႁႅင်းၵေႇၼၼ်ႉ၊ဢိၵ်ႇတင်းလွင်ႈဢၼ်သူတၵ်းလႆႈ၊ၶုၵ်းၸႂ်လႆႈၶေႃႈၵႂၢမ်းဢၼ် ၸဝ်ႈယေႇသု၊ လၢတ်ႈလႄႈဝႃႈ၊ ‘တၢင်းဢၼ်ၽေးၸွၼ်းယိုၼ်ႈမႅင်ႇယဵင်ႈၶႅၼ်းမီးမၢင်ႇၵလႃႇၼႃႇသေတၢင်းဢၼ်ႁပ်ႉဢဝ်ဢေႃႈ၊’ ဝႃႈၼင်ႇၼႆၼၼ်ႉမီးဝႆႉဢေႃႈ၊” ဝႃႈၼင်ႇၼႆဢေႃႈ။
သြႃႇ ပေႃးလု၊ လၢတ်ႈၸိူဝ်ႉၼင်ႇၼႆယဝ်ႉလႄႈၶုပ်ႉၶဝ်ႇသူးတွင်းလူၺ်ႈၵၼ်တင်းၶဝ်တင်းသဵင်ႈတင်းလူင်ဢေႃႈ။-
ၶဝ်တင်းသဵင်ႈတင်းလူင်ႁွင်ႉႁႆႈယူႇယၢမ်းမိူဝ်ႈဢၼ်ၶဝ်ၵွတ်ႇၶေႃးမၼ်းလႄႈၼူမ်မၼ်းယူႇၼၼ်ႉဢေႃႈ။-
ၶဝ်ၸိူဝ်းၼၼ်ႉ၊ယဵင်ႈၶႅၼ်းငိၼ်းၽၢၼ်ၶေႃးၶူမ်ၵွပ်ႈပိူဝ်ႈၶေႃႈၵႂၢမ်းဢၼ်မၼ်းလၢတ်ႈဝႃႈ၊ၶဝ်တၵ်းတေဢမ်ႇၶိုၼ်းလႆႈႁၼ်ၼႃႈမၼ်းထႅင်ႈသေပွၵ်ႈယဝ်ႉၼၼ်ႉဢေႃႈ။ လိုၼ်းၼၼ်ႉ၊ၶဝ်ၸွမ်းသူင်ႇမၼ်းၵႂႃႇတေႃႇထိုင်ႁွတ်ႈႁိူဝ်းသၢင်းၽေႃးဢေႃႈ။
ႁဝ်းၽၢတ်ႇယၢၼ်ၵၼ်တင်းၶဝ်သေယဝ်ႉ၊ၶီႇႁိူဝ်းသၢင်းၽေႃးဢွၵ်ႇၵႂႃႇၸူးၵုၼ် ၵေႃႉသႃႉ၊ သိုဝ်ႈသိုဝ်ႈလႄႈဝၼ်းမိူဝ်ႈၽုၵ်ႈႁဝ်းႁွတ်ႈထိုင်ၵုၼ် ရေႃးတႃႉ၊ ယဝ်ႉၸင်ႇ၊လုၵ်ႉသေၵႃႈတီႈၼၼ်ႈႁွတ်ႈထိုင်ၵႃႈတီႈဝဵင်း ပႃႇတရႃႉ၊ ဢေႃႈ။-
ၵႃႈတီႈဝဵင်းၼၼ်ႉႁဝ်းထူပ်းႁၼ်ႁိူဝ်းသၢင်းၽေႃးဢၼ်ၶၢမ်ႈၵႂႃႇတၢင်းမိူင်း ၽိၼိတ်ႉ၊ ၼၼ်ႉလႄႈႁဝ်းၶိုၼ်ႈၶီႇႁိူဝ်းသၢင်းၽေႃးၼၼ်ႉသိုပ်ႇဢွၵ်ႇၵႂႃႇထႅင်ႈဢေႃႈ။-
ႁဝ်းႁွတ်ႈထိုင်ၵႃႈတီႈဢၼ်မုင်ႈႁၼ်ၵုၼ် သၢႆးပရၢတ်ႈ၊ လႄႈလဵပ်ႈၵႂႃႇၽၢႆႇတၢင်းၸၢၼ်းၵုၼ်ၼၼ်ႉ ၵႂႃႇၸူးမိူင်း သီးရီးယႃး၊ သေယဝ်ႉ၊သိူၵ်ႈၵႃႈတီႈဝဵင်း တုရု၊ ဢေႃႈ။ တီႈၼၼ်ႈ၊ၶဝ်ၶျႃးၵုၼ်ႇၶူဝ်းဢၼ်ပႃးမႃးၼႂ်းႁိူဝ်းသၢင်းၽေႃးၼၼ်ႉဢေႃႈ။-
ၵႃႈတီႈဝဵင်းၼၼ်ႉ ႁဝ်းထူပ်းႁၼ်တပႄးၸဝ်ႈၵမ်ႈၽွင်ႈသေယဝ်ႉ၊ယူႇလူၺ်ႈၶဝ်ၸဵတ်းဝၼ်းဢေႃႈ။ ၶဝ်ၸိူဝ်းၼၼ်ႉလႆႈတၼ်းၶူဝ်းဝိၺိၺ်ႇၸဝ်ႈလႄႈလွင်ႈၼင်ႇႁိုဝ်သြႃႇ ပေႃးလု၊ တၵ်းဢမ်ႇၵႂႃႇၸူးဝဵင်း ယေႇရုသလႅမ်ႇ၊ ၸိုင်၊ၶဝ်ႁၢမ်ႈမၼ်းဢေႃႈ။-
ၵူၺ်းၵႃႈ၊မိူဝ်ႈဢၼ်ၶိင်ႇဢၼ်ႁဝ်းလႆႈယူႇလူၺ်ႈၶဝ်ၸေးဝၼ်းယဝ်ႉၼၼ်ႉၸိုင်၊တပႄးၸဝ်ႈတင်းလၢႆပႃးၸဵမ်လုၵ်ႈၶဝ်မေးၶဝ်ၸွမ်းသူင်ႇဢွၵ်ႇဝဵင်းၵႂႃႇတေႃႇထိုင်ႁွတ်ႈၽင်ႇပၢင်ႇလၢႆႇလႄႈတီႈၼၼ်ႈ ႁဝ်းၶုပ်ႉၶဝ်ႇသူးတွင်းယဝ်ႉၸင်ႇ၊-
ၼင်ႇၵၼ်ၵၼ်တၵ်ႉလၢတ်ႈၵၼ်သေယဝ်ႉ၊ႁဝ်းၶီႇႁိူဝ်းသၢင်းၽေႃးဢွၵ်ႇၵႂႃႇလႄႈၶဝ်ၵေႃႈၶိုၼ်းမိူဝ်းၵႂႃႇဢေႃႈ။
မိူဝ်ႈဢၼ်ႁဝ်းလုၵ်ႉသေၵႃႈတီႈဝဵင်း တုရု၊ သိုပ်ႇၶၢဝ်းတၢင်းၵႂႃႇႁွတ်ႈထိုင်ၵႃႈတီႈဝဵင်း ပႃႇတေႃႇလိၼ်ႇ၊ ၼၼ်ႉၸိုင်၊သိူၵ်ႈၵႃႈတီႈၼၼ်ႈသေယဝ်ႉ၊ႁဝ်းလႆႈတၵ်ႉလၢတ်ႈၵၼ်တင်းတပႄးၸဝ်ႈ၊ဝဵင်း ပႃႇတေႃႇလိၼ်ႇ၊ ၶဝ်လႄႈယူႇဝၼ်းၼိုင်ႈဢေႃႈ။-
ဝၼ်းမိူဝ်ႈၽုၵ်ႈႁဝ်းဢွၵ်ႇလႄႈႁွတ်ႈထိုင်ၵႃႈတီႈဝဵင်း ၵေႇသရိ၊ သေယဝ်ႉ၊ႁဝ်းၶဝ်ႈယူႇၵႃႈၼႂ်းႁိူၼ်း ၽိလိပ်ႉပု၊ သြႃႇႁေႃးၶၢဝ်ႇတြႃးသိူဝ်းပျေႃႇဢၼ်ပႃးၼႂ်းသြႃႇၸဵတ်းပႃးၸိူဝ်းဢၼ်လိူၵ်ႈၶၢၼ်းဝႆႉ၊ႁႂ်ႈလႆႈၸွႆႈၵမ်ႉၸွႆႈထႅမ်ၵႃႈတီႈၼႂ်းဝဵင်း ယေႇရုသလႅမ်ႇ၊ ၼၼ်ႉဢေႃႈ။-
မၼ်းၼၼ်ႉ၊မီးလုၵ်ႈယိင်းသၢဝ်သီႇၵေႃႉဢၼ်ႁေႃးလၢတ်ႈၵႂၢမ်းပရေႃးၽႅတ်ႈ ယူႇၼၼ်ႉဢေႃႈ။-
ႁဝ်းယူႇၵႃႈတီႈႁိူၼ်းၼၼ်ႉႁိုင်မႃးတၢၼ်ႇတၢၼ်ႇလႄႈပရေႃးၽႅတ်ႈ ၵေႃႉၼိုင်ႈဢၼ်လႆႈၸိုဝ်ႈ ဢႃႇၵပု၊ ၼၼ်ႉ၊လုၵ်ႉသေၵႃႈတီႈမိူင်း ယုတႃႉ၊ မႃး၊-
ၶဝ်ႈၸူးၵႃႈတီႈႁဝ်းသေယဝ်ႉ၊ဢဝ်သၢႆဢႅဝ်သြႃႇ ပေႃးလု၊ မတ်ႉတိၼ်မတ်ႉမိုဝ်းတူဝ်ၸဝ်ႈၵဝ်ႇသေလႄႈလၢတ်ႈဝႃႈ၊ “ဝိၺိၺ်ႇမူတ်းၸၢင်ႇၸဝ်ႈဝႃႈၸမ်ႉ၊ၵေႃႉပဵၼ်ၸဝ်ႈသၢႆဢႅဝ်ၼႆႉ၊တၵ်းလႆႈၶၢမ်ႇတၢင်းဢၼ်ၵူၼ်းမဵဝ်း ၵျူး၊ ၶဝ်မတ်ႉၽုၵ်ႇၸိူဝ်ႉၼင်ႇၼႆၵႃႈၼႂ်းဝဵင်း ယေႇရုသလႅမ်ႇ၊ ပုၼ်ႉလႄႈဢဝ်ဢၢပ်ႈပၼ်ၵႃႈၼႂ်းမိုဝ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆဢေႃႈ၊” ဝႃႈၼင်ႇၼႆဢေႃႈ။
ႁဝ်းလႆႈငိၼ်းၵႂၢမ်းၼၼ်ႉသေယဝ်ႉ၊ႁဝ်းဢိၵ်ႇတင်းၶဝ်ၸိူဝ်းဢၼ်မီးယူႇၵႃႈတီႈၼၼ်ႈၼၼ်ႉ၊ၼင်ႇႁိုဝ်သြႃႇ ပေႃးလု၊ တၵ်းဢမ်ႇၵႂႃႇၵႃႈတီႈဝဵင်း ယေႇရုသလႅမ်ႇ၊ ၸိုင်၊ဢွၼ်ၵၼ်တွင်းပၢၼ်ႇဢေႃႈ။-
ၵူၺ်းၵႃႈ၊မၼ်းၶိုၼ်းလၢတ်ႈလႄႈဝႃႈ၊ “သူႁဵတ်းသင်ႁွင်ႉႁႆႈၸိူဝ်ႉၼင်ႇၼႆယူႇသေလႄႈႁဵတ်းႁႂ်ႈႁူဝ်ၸႂ်ၵဝ်တႅၵ်ႇၵႂႃႇလႅဝ်ၵႂႃႇၼင်ႇႁိုဝ်။ ၵဝ်မႄးႁႅၼ်းဝႆႉႁႂ်ႈလႆႈၶၢမ်ႇတၢင်းဢၼ်မတ်ႉၽုၵ်ႇၸိူဝ်ႉၼင်ႇၼႆ ၵႃႈၼႂ်းဝဵင်း ယေႇရုသလႅမ်ႇ၊ ၼႆႉဢမ်ႇၵႃး၊ပုၼ်ႈဢၼ်တၵ်းၶၢမ်ႇတၢႆပုၼ်ႈၼႃႇမႃႉၸိုဝ်ႈသဵင် ၸဝ်ႈယေႇသု၊ ၸိုင်၊ၵဝ်တၼ်းဝႆႉယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈဢၼ်ႁဝ်းႁၢမ်ႈမၼ်းဢမ်ႇလႆႈၸိုင်၊ႁဝ်းၶၢမ်ႇသုမ်းမၼ်းလႄႈလၢတ်ႈဝႃႈ၊ “ႁႂ်ႈပဵၼ်ၸွမ်းဢလူဝ်ႇတေႃႇၽြႃးပဵၼ်ၸဝ်ႈသေၵမ်းလူၺ်ႈ၊” ဝႃႈၼင်ႇၼႆဢေႃႈ။
ဝၢႆးသေဢၼ်ႁဝ်းယူႇႁိုင်တၢၼ်ႇတၢၼ်ႇယဝ်ႉၸိုင်၊ႁဝ်းႁႅၼ်းၶူဝ်းလႄႈၶိုၼ်ႈၵႂႃႇၸူးဝဵင်း ယေႇရုသလႅမ်ႇ၊ ဢေႃႈ။-
တပႄးၸဝ်ႈဝဵင်း ၵေႇသရိ၊ ၵမ်ႈၽွင်ႈၵႂႃႇၸွမ်းႁဝ်းလႄႈဢဝ်ႁဝ်းၵႂႃႇသူင်ႇၵႃႈတီႈႁိူၼ်း မၼႃသုၼ်ႇ၊ ၵူၼ်းၵုၼ် သၢႆးပရၢတ်ႈ၊ ဢၼ်ပဵၼ်တပႄးၸဝ်ႈၸဵမ်မိူဝ်ႈဢွၼ်တၢင်းႁိုင်ၼႃႇယဝ်ႉ၊ၵေႃႉဢၼ်တၵ်းၶၢမ်ႇၶႅၵ်ႇႁဝ်းၼၼ်ႉဢေႃႈ။
မိူဝ်ႈဢၼ်ႁဝ်းႁွတ်ႈထိုင်ဝဵင်း ယေႇရုသလႅမ်ႇ၊ ၸိုင်၊တပႄးၸဝ်ႈတင်းလၢႆ၊ႁပ်ႉတွၼ်ႈဢဝ်ႁဝ်းၸူမ်းၸူမ်းသိူဝ်းသိူဝ်းဢေႃႈ။-
ဝၼ်းမိူဝ်ႈၽုၵ်ႈသြႃႇ ပေႃးလု၊ တင်းႁဝ်းဢွၼ်ၵၼ်ၵႂႃႇၸူးတီႈ ယႃႇၵုပ်ႈ၊ လႄႈၵူၼ်းဢုပ်ႉၸိူဝ်းၸဝ်ႈတင်းလၢႆၵေႃႈ၊ၸုတုမ်ပႃးဢေႃႈ။-
သြႃႇ ပေႃးလု၊ တူင်ႉတၵ်ႉၶဝ်လႄႈမွၵ်ႇလၢတ်ႈၶႆႈၼႄလွင်ႈတၢင်းၵႃႈဢၼ်ၽြႃးပဵၼ်ၸဝ်ႈႁဵတ်းတီႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၵူႈၸိူဝ်ႉၵူႈပိူင်ၵွပ်ႈပိူဝ်ႈၵၢၼ်ထမ်ႇမႃႉသြႃႇဢၼ်မၼ်းပွင်ႁဵတ်းၼၼ်ႉဢေႃႈ။-
ဝၢႆးသေၶဝ်ငိၼ်းၵႂၢမ်းမၼ်းယဝ်ႉၼၼ်ႉဢွၼ်ၵၼ်ယွင်ႈယေႃးမုၼ်ၽုင်းၽြႃးပဵၼ်ၸဝ်ႈလႄႈ လၢတ်ႈတီႈမၼ်းလႄႈဝႃႈ၊ “ပီႈၼွင်ႉႁဝ်း ပေႃးလု၊ ႟။ မႂ်းႁုလွင်ႈဢၼ်ၵူၼ်းမဵဝ်း ၵျူး၊ တင်းလၢႆ ၶဝ်ႈပဵၼ်တပႄးၸဝ်ႈမႃးလၢႆမိုၼ်ႇလၢႆႁဵင်ယဝ်ႉ၊ဢိၵ်ႇတင်းလွင်ႈဢၼ်ၶဝ်တင်းသဵင်ႈတင်းလူင်၊ႁႅင်းယႂ်ႇၼႂ်းတၢင်းဢၼ်ၵူဝ်ယမ်ပိင်းၺၢပ်ႈတြႃးၸဝ်ႈထၢၼ်ႇႁိုဝ်ၼၼ်ႉယူႇဢေႃႈ။-
ၶဝ်လႆႈငိၼ်းလွင်ႈဢၼ်မႂ်းသင်ႇသွၼ်သုင်းမႃႉပၼ်ၵူၼ်းမဵဝ်း ၵျူး၊ တင်းလၢႆ၊ၸိူဝ်းဢၼ်ယူႇၼႂ်းၵႄႈၵူၼ်းတၢင်ႇၸိူဝ်ႉတၢင်ႇၶိူဝ်းၼၼ်ႉ၊ႁႂ်ႈၶဝ်ဝႄႈပႅတ်ႈတြႃး မူဝ်းသေႇ၊ ဢိၵ်ႇတင်းလုၵ်ႈလၢင်းၶဝ်ဢမ်ႇလူဝ်ႇၶၢမ်ႇဢဝ်မၢင်ႇၵလႃႇပၢတ်ႇပၢႆၼင်လႄႈတၵ်းဢမ်ႇလႆႈၵမ်ၵျၢင်ႉၸွမ်းထုင်းၽိင်ႈၶဝ်ၼၼ်ႉဝႃႈၼႆယဝ်ႉ။-
လွင်ႈဢၼ်မႂ်းႁွတ်ႈၽႅဝ်မႃးၼႆႉ၊ၵူၼ်းၼမ်ၼႃႇတေလႆႈငိၼ်းတႄႉတႄႉလႄႈၸုတုမ်မႃးယဝ်ႉ။ ပိူဝ်ႈၼႆလႄႈတေလႆႈႁဵတ်းၸိူဝ်ႉၼင်ႇႁိုဝ်။-
ဢၼ်ႁဝ်းၶႂ်ႈႁႂ်ႈမႂ်းႁဵတ်းၼႆႉၸမ်ႉ၊တီႈႁဝ်းၼႆႉမီးၵူၼ်းသီႇၵေႃႉ၊ဢၼ်တိူင်ႇၵတိသဵတ်ႈၸႃႇယူႇၼၼ်ႉဢေႃႈ။-
ၵႂႃႇၶဝ်ႈပႃးၸွမ်းၼႂ်းတၢင်းဢၼ်ႁဵတ်းမၢင်ႇၵလႃႇဢၼ်ႁႂ်ႈတူဝ်လႆႈမူတ်းၸၢင်ႇၼၼ်ႉလႄႈၶၢမ်ႇပၼ်ငိုၼ်းပုၼ်ႈတၢင်းလူႇၶဝ်၊ႁႂ်ႈၶဝ်ထႃႁူဝ်ၶဝ်သေၵမ်း။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ၵူၼ်းတင်းလၢႆတၵ်းႁုလွင်ႈဢၼ်ၶၢဝ်ႇငၢဝ်းဢၼ်ၶဝ်လႆႈငိၼ်းလွင်ႈဢၼ်မႂ်းသင်ႇသွၼ်ၼၼ်ႉ၊ပဵၼ်ဢၼ်ဢမ်ႇမၢၼ်ႇဢမ်ႇမႅၼ်ႈဢိၵ်ႇတင်းၶဝ်တၵ်းႁုလွင်ႈဢၼ်တူဝ်မႂ်းပႂ်ႉၸွမ်းတြႃး မူဝ်းသေႇ၊ လႄႈၵမ်ၵျၢင်ႉယူႇၼၼ်ႉဢေႃႈ။-
ပုၼ်ႈၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ယုမ်ႇမၢတ်ႈၸိူဝ်းၼၼ်ႉၸမ်ႉ၊ႁဝ်းပေႃးလႆႈပၼ်လိၵ်ႈၵႂႃႇလွင်ႈဢၼ်ႁဝ်းၽွမ်ႉၸႂ်ၵၼ်လႄႈဝႃႈ၊ၶဝ်ဢမ်ႇလႆႈၵိၼ်တၢင်းၵိၼ်ဢၼ်တၢင်ႇပၼ်တမ်းပၼ်ၽၢႆႇၼႃႈႁုၼ်ႇႁၢင်ႈသၢင်းထု၊တင်းလိူတ်ႈသေၸိူဝ်ႉသေမဵဝ်း၊တင်းၼိူဝ်ႉတူဝ်သတ်းဢၼ်လႆႈၶၢမ်ႇငႅၼ်းၶေႃးတၢႆ၊ဢိၵ်ႇတင်းၶဝ်တၵ်းလႆႈဝႄႈပႅတ်ႈၵႃႇမေႇသု၊ဢၼ်ဢမ်ႇတြႃးၼၼ်ႉဝႃႈၼႆယဝ်ႉ၊” ဝႃႈၼင်ႇၼႆဢေႃႈ။
ပိူဝ်ႈၼႆၸင်ႇ၊သြႃႇ ပေႃးလု၊ ႁွင်ႉဢဝ်ၶဝ်လႄႈဝၼ်းမိူဝ်ႈၽုၵ်ႈၶဝ်ႁဵတ်းမၢင်ႇၵလႃႇဢၼ်မူတ်းၸၢင်ႇႁူမ်ႈလူၺ်ႈၵၼ်ဢေႃႈ။ လိုၼ်းၼၼ်ႉ၊မၼ်းၶဝ်ႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈသင်ႇလၢတ်ႈလွင်ႈဢၼ်ၶဝ်ႁဵတ်းႁႂ်ႈတူဝ်မူတ်းၸၢင်ႇတၵ်းၸေးဝၼ်းလႂ်ၼၼ်ႉလႄႈဝၼ်းဢၼ်ၸေးၼၼ်ႉႁႂ်ႈလႆႈႁဵတ်းတၢင်းလူႇပုၼ်ႈၶဝ်ၵေႃႉလႂ်ၵေႃႉၼၼ်ႉႁင်းၽႂ်ႁင်းမၼ်းၼၼ်ႉဝႆႉသေဢေႃႈ။
မိူဝ်ႈဢၼ်ၸမ်တၵ်းၸေးၸဵတ်းဝၼ်းၼၼ်ႉၸိုင်၊ၵူၼ်းမဵဝ်း ၵျူး၊ ၵမ်ႈၽွင်ႈဢၼ်လုၵ်ႉသေၵႃႈတီႈမိူင်း ဢႃႇသိ၊ မႃးၸိူဝ်းၼၼ်ႉႁၼ်သြႃႇ ပေႃးလု၊ ၵႃႈၼႂ်းၵျွင်းပိၵ်ႈမၢၼ်ႇၸဝ်ႈဢေႃႈ။ ၶဝ်ၸင်ႇတိုၵ်းယူင်းမူႇၵူၼ်းတင်းသဵင်ႈတင်းလူင်လႄႈတိဢဝ်သြႃႇ ပေႃးလု၊ သေယဝ်ႉ၊-
ပၢဝ်ႇသႅၼ်ႇလႄႈလၢတ်ႈဝႃႈ၊ “ၵူၼ်းမဵဝ်း ဢိသရေး၊ ၶဝ်႟။ ၸွႆႈထႅမ်ႁဝ်းသေၵမ်း။ ၵေႃႉၼႆႉပဵၼ်ၵူၼ်းဢၼ်လႄႇၵႂႃႇၵူႈတီႈၵူႈလႅၼ်သင်ႇသွၼ်ပၼ်ႁႂ်ႈၵူႈၵေႃႉၵူႈၵူၼ်းႁဵတ်းၶတ်းၵၼ်တင်းၵူၼ်းမဵဝ်း ဢိသရေး၊ တင်းတြႃး မူဝ်းသေႇ၊ ဢိၵ်ႇတင်းၵျွင်းပိၵ်ႈမၢၼ်ႇၸဝ်ႈၼႆႉဢေႃႈ။ လိူဝ်သေၼၼ်ႉမၼ်းယင်းဢဝ်ၵူၼ်းတၢင်ႇၸိူဝ်ႉတၢင်ႇၶိူဝ်းသူင်ႇၶဝ်ႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈ၊ႁဵတ်းႁႂ်ႈထႃႇၼႃႉတီႈမူတ်းၸၢင်ႇၼႆႉၵူဝ်ႈၵိူၵ်ႇဢေႃႈ၊” ဝႃႈၼင်ႇၼႆဢေႃႈ။-
ၶဝ်ဝႃႈၼင်ႇၼႆၵွပ်ႈပိူဝ်ႈၶဝ်ယၢမ်ႈလႆႈႁၼ် တရေႃႇၽိမ်ႇ၊ ၵူၼ်းဝဵင်း ဢေးၽႅတ်ႈ၊ ၼၼ်ႉ၊မီးယူႇလူၺ်ႈၵၼ်တင်းသြႃႇ ပေႃးလု၊ ၵႃႈၼႂ်းဝဵင်းလႄႈၶဝ်ထၢင်ႇသြႃႇ ပေႃးလု၊ ဢဝ်ၵေႃႉၼၼ်ႉသူင်ႇၶဝ်ႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈဢေႃႈ။
တၢင်းဢၼ်ယုင်ႈယၢင်ႈဢူၼ်မေႃးၸွတ်ႇၵႂႃႇတင်းဝဵင်းလႄႈၵူၼ်းတင်းလၢႆဢွၼ်ၵၼ်လႅၼ်ႈမႃးတိဢဝ်သြႃႇ ပေႃးလု၊ သေ၊တိုတ်ႉၸၼ်ဢွၵ်ႇၵႂႃႇၵႃႈၼွၵ်ႈၵျွင်းပိၵ်ႈမၢၼ်ႇၸဝ်ႈသေယဝ်ႉ၊ဢိုတ်းၽၵ်းတူဝႆႉၵမ်းလဵဝ်ဢေႃႈ။-
မိူဝ်ႈဢၼ်မူႇၵူၼ်းတင်းလၢႆၵျၢမ်ႇႁႃဢဝ်တၢႆသြႃႇ ပေႃးလု၊ ယူႇၼၼ်ႉၸိုင်၊လွင်ႈတၢင်းဢၼ်ယုင်ႈယၢင်ႈဢူၼ်မေႃးၵႃႈၼႂ်းဝဵင်း ယေႇရုသလႅမ်ႇ၊ တင်းဝဵင်းၼၼ်ႉ၊ႁွတ်ႈထိုင်ႁူၸဝ်ႈၵွၼ်းတပ်ႉသိုၵ်းဢၼ်ဢုပ်ႉၵူၼ်းသိုၵ်း ရူဝ်းမႃႉ၊ ႁဵင်ၼိုင်ႈၼၼ်ႉၵႂႃႇဢေႃႈ။-
ၸဝ်ႈၵွၼ်းတပ်ႉသိုၵ်းၼၼ်ႉ၊ႁွင်ႉဢဝ်ၶုၼ်သိုၵ်းၵမ်ႈၽွင်ႈတင်းၵူၼ်းသိုၵ်းတင်းလၢႆၵမ်းလဵဝ်သေယဝ်ႉ၊လႅၼ်ႈလူင်းၵႂႃႇၸူးၵႃႈတီႈမူႇၵူၼ်းၸိူဝ်းၼၼ်ႉဢေႃႈ။ မိူဝ်ႈဢၼ်ၶဝ်ႁၼ်မၼ်းလႅၼ်ႈလူင်းမႃးလူၺ်ႈၵၼ်တင်းလုၵ်ႈသိုၵ်းၸိူဝ်းၼၼ်ႉၸိုင်၊ၶဝ်ယင်းဢမ်ႇပေႃႉယႅၼ်ႉသြႃႇ ပေႃးလု၊ လႄႈၵိုတ်းယူႇဢေႃႈ။-
ၸဝ်ႈၵွၼ်းတပ်ႉသိုၵ်းၼၼ်ႉၸင်ႇၵႂႃႇၸမ်ၸမ်လႄႈတိၺွပ်းဢဝ်သြႃႇ ပေႃးလု၊ သေယဝ်ႉ၊ပူင်ဢမိင်ႉႁႂ်ႈဢဝ်ၸိူၵ်ႈလဵၵ်းသွင်သဵၼ်ႈမတ်ႉဝႆႉယဝ်ႉၸင်ႇ၊ထၢမ်လႄႈဝႃႈ၊ “ၵေႃႉၼႆႉပဵၼ်ၽူႈလႂ်။ မၼ်းႁဵတ်းၽိတ်းၵႃႈသင်ယဝ်ႉ၊” ဝႃႈၼင်ႇၼႆဢေႃႈ။-
ၵူၼ်းဢၼ်ၸုဢၼ်တုမ်ၵမ်ႈၽွင်ႈပၢဝ်ႇလၢတ်ႈယေႈၸိူဝ်ႉ၊ၵမ်ႈၽွင်ႈပၢဝ်ႇလၢတ်ႈယေႈမဵဝ်းဢေႃႈ။ ပိူဝ်ႈဢၼ်မီးၵႂၢမ်းလၢႆၸိူဝ်ႉလၢႆမဵဝ်းလႄႈၸဝ်ႈၵွၼ်းတပ်ႉသိုၵ်းၼၼ်ႉ၊ဢမ်ႇၸၢင်ႈႁုဢၼ်မၢၼ်ႇဢၼ်မႅၼ်ႈလႆႈယဝ်ႉၸင်ႇ၊ပူင်ဢမိင်ႉႁႂ်ႈၵူၼ်းသိုၵ်းမၼ်းၸိူဝ်းၼၼ်ႉဢဝ်သြႃႇ ပေႃးလု၊ ၵႂႃႇၵႃႈၼႂ်းတပ်ႉသေဢေႃႈ။-
မိူဝ်ႈဢၼ်ၶဝ်ႁွတ်ႈထိုင်ၶူဝ်လႆၵႂႃႇၼၼ်ႉၸိုင်၊ၵူၼ်းဢၼ်ၸုဢၼ်တုမ်ၸိူဝ်းၼၼ်ႉ၊ႁၢဝ်ႉၵျၢမ်းၼႃႇလူင်လၢင်တေႃႇထိုင်ႁွတ်ႈထၢၼ်ႈပေႃးလုၵ်ႈသိုၵ်းၶဝ်လႆႈႁွပ်ႇဢဝ်သြႃႇ ပေႃးလု၊ ၵႂႃႇဢေႃႈ။-
ၵူၼ်းတင်းသဵင်ႈတင်းလူင်ၸွမ်းမႃးသေယဝ်ႉ၊ႁွင်ႉသႅၼ်ႇလႄႈဝႃႈ၊ “ဢဝ်မၼ်းတၢႆတႃႉ၊” ဝႃႈၼင်ႇၼႆယူႇဢေႃႈ။
သြႃႇ ပေႃးလု၊ ၼၼ်ႉ၊မိူဝ်ႈဢၼ်ၸမ်တၵ်းၶဝ်ႈတပ်ႉၵႂႃႇၸိုင်၊ထၢမ်ၸဝ်ႈၵွၼ်းတပ်ႉသိုၵ်းၼၼ်ႉလႄႈဝႃႈ၊ “ၸွင်ႇၵဝ်ၶႃႈလၢတ်ႈၵႂၢမ်းတေႃႇၸဝ်ႈၶုၼ်လႆႈၶႃႈႁိုဝ်း၊” ဝႃႈၼင်ႇၼႆလႄႈ။
မၼ်းၶိုၼ်းလၢတ်ႈလႄႈဝႃႈ၊ “မႂ်းမေႃလၢတ်ႈၵႂၢမ်း ၵရိၵ်ႉ၊ ႁိုဝ်း။ ပေႃးပဵၼ်ၸိူဝ်ႉၼင်ႇၼႆၸိုင်၊မႂ်းဢမ်ႇၸႂ်ႈၵူၼ်း ဢေးၵျိပ်ႉ၊ ဢၼ်လုၵ်ႉၽိုၼ်ႉမိူင်းမိူဝ်ႈပူၼ်ႉမႃးၼၼ်ႉ၊ဢွၼ်ႁူဝ်ၵူၼ်းသီႇႁဵင်ဢွၵ်ႇၵႂႃႇၵႃႈၼႂ်းထိူၼ်ႇၼၼ်ႉႁိုဝ်း၊” ဝႃႈၼင်ႇၼႆဢေႃႈ။
သြႃႇ ပေႃးလု၊ ၵေႃႈၶိုၼ်းလၢတ်ႈလႄႈဝႃႈ၊ “ၵဝ်ၶႃႈပဵၼ်ၵူၼ်းမဵဝ်း ၵျူး၊ ၸႃႇတိဝဵင်း တႃႇသု၊ မိူင်း ၵိလိၵိ၊ ၶႃႈလႄႈပဵၼ်ၵူၼ်းဝဵင်းၸိုဝ်ႈသဵင်ယႂ်ႇၼၼ်ႉၵေႃႉၼိုင်ႈဢေႃႈ။ ႁဵတ်းၵျေးၸူးပၼ်ဢၶႂၢင်ႉႁႂ်ႈၵဝ်ၶႃႈလႆႈလၢတ်ႈတေႃႇၵူၼ်းၸိူဝ်းၼႆႉသေၵမ်းၶႃႈ၊” ဝႃႈၼင်ႇၼႆဢေႃႈ။
ၸဝ်ႈၵွၼ်းတပ်ႉသိုၵ်းၵေႃႈ၊ပၼ်ဢၶႂၢင်ႉတီႈမၼ်းလႄႈသြႃႇ ပေႃးလု၊ ၸုၵ်းယူႇၵႃႈၼိူဝ်ၶူဝ်လႆယဝ်ႉၸင်ႇ၊ၼႄမိုဝ်းႁႂ်ႈၵူၼ်းတင်းလၢႆယူႇတဵတ်ႇတဵတ်ႇဢေႃႈ။ မိူဝ်ႈဢၼ်ၶဝ်တဵတ်ႇယဵၼ်ၵႂႃႇၼၼ်ႉ၊မၼ်းလၢတ်ႈတေႃႇၶဝ်ၼႂ်းၽႃႇသႃႇၵႂၢမ်း ႁေႇပြႄး၊ လႄႈဝႃႈၸမ်ႉ၊-
“ပေႃႈမႄႈပီႈၼွင်ႉတင်းလၢႆၶဝ်႟။ ထွမ်ႇငိၼ်းတၢင်းဢၼ်ၵဝ်ၶႃႈတၵ်းလၢတ်ႈၶႄတူဝ်ၸဝ်ႈၵဝ်ႇၽၢႆႇၼႃႈသူတေႃႈလဵဝ်ၼႆႉသေၵမ်းၶႃႈ၊” ဝႃႈၼင်ႇၼႆသေလႄႈ၊-
မိူဝ်ႈဢၼ်ၶဝ်ငိၼ်းမၼ်းလၢတ်ႈၼႂ်းၽႃႇသႃႇ ႁေႇပြႄး၊ ၼၼ်ႉၸိုင်၊ၶဝ်ယဵင်ႈၶႅၼ်းတဵတ်ႇယဵၼ်ၵႂႃႇၼႃႇလူင်လၢင်လႄႈသြႃႇ ပေႃးလု၊ သိုပ်ႇလၢတ်ႈလႄႈဝႃႈ။
“ၵဝ်ၶႃႈပဵၼ်ၵူၼ်းမဵဝ်း ၵျူး၊ ၸႃႇတိဝဵင်း တႃႇသု၊ မိူင်း ၵိလိၵိ၊ လႄႈယႂ်ႇမႃးၵႃႈၼႂ်းဝဵင်း ယေႇရုသလႅမ်ႇ၊ ဢမ်ႇၵႃး၊လႆႈသွၼ်ဢဝ်ၵႃႈတီႈသြႃႇ ၵႃႇမလျေးလႃႉ၊ ၶႃႈဢေႃႈ။ ၵဝ်ၶႃႈလႆႈၶၢမ်ႇဢဝ်ၼႄးဢုပတေႇတြႃးၵႃႈဢၼ်ပူႇပေႃႈႁဝ်းသင်ႇသွၼ်သုင်းမႃႉၼၼ်ႉ၊သေႇၶျႃႇလီငၢမ်းသေလႄႈ ၸႂ်ၸပ်းၽၢႆႇၽြႃးပဵၼ်ၸဝ်ႈမိူၼ်မိူၼ်ၵၼ်တင်းသူၸဝ်ႈတင်းသဵင်ႈတင်းလူင်ဢၼ်မီးယူႇၵႃႈတီႈၼႆႈၼႂ်းဝၼ်းမိူဝ်ႈၼႆႉၼၼ်ႉဢေႃႈ။-
ၵဝ်ၶႃႈၼိၵ်ႈၸၢၵ်ႈငႅၼ်းသႄးၶဝ်ၸိူဝ်းဢၼ်ၶဝ်ႈၸွမ်းၽႃႇသႃႇတြႃးၸဝ်ႈၼႆႉၼၼ်ႉၶႃႈယဝ်ႉ။ ၵဝ်ၶႃႈယင်းတိမတ်ႉၸဵမ်ယိင်းၸဵမ်ၸၢႆးလႄႈဢဝ်ၶဝ်ၶင်ၵႃႈၼႂ်းထွင်ႇယဝ်ႉ။-
ၸႃႉၸဵမ်ၶုၼ်ယဵၸ်ႈပရေႃးႁဵၵ်ႈ ဢိၵ်ႇတင်းၶုၼ်လုမ်းတင်းလၢႆၶၢမ်ႇသၢၵ်ႈသေႇလွင်ႈဢၼ်ၵဝ်ၶႃႈလၢတ်ႈတီႈၸိုဝ်ႈတီႈၸႂ်ႈၼၼ်ႉလႆႈယူႇၶႃႈဢေႃႈ။ ၵဝ်ၶႃႈလႆႈၶၢမ်ႇဢဝ်လိၵ်ႈတီႈၶဝ်ဢၼ်တႅမ်ႈပၼ်ၵႂႃႇတီႈပီႈၼွင်ႉၵူၼ်းမဵဝ်း ၵျူး၊ တင်းလၢႆၼၼ်ႉသေယဝ်ႉ၊ၶိုၼ်ႈၵႂႃႇၵႃႈတီႈဝဵင်း တမ်ႇမတ်ႉသၵတ်ႉ၊ ပုၼ်ႉ၊ႁႂ်ႈလႆႈတိဢဝ်ၵူၼ်းၶဝ်ႈၽႃႇသႃႇၼႆႉၸိူဝ်းဢၼ်မီးယူႇၼႂ်းဝဵင်းၼၼ်ႉသေလႄႈသူင်ႇၵႂႃႇၵႃႈတီႈဝဵင်း ယေႇရုသလႅမ်ႇ၊ ႁႂ်ႈလႆႈၸီႇယၢင်ႇပၼ်တၢမ်ႇၶဝ်ဢေႃႈ။
“ယၢမ်းမိူဝ်ႈၵဝ်ၶႃႈယင်းတိုၵ်ႉၸွမ်းတၢင်းၵႂႃႇလႄႈၸမ်တၵ်းႁွတ်ႈထိုင်ဝဵင်း တမ်ႇမတ်ႉသၵတ်ႉ၊ ၼၼ်ႉ၊ၶိင်ႇၵၢင်ဝၼ်းတဵင်ႈယဝ်ႉလႄႈဢၼ်လႅင်းဢၼ်ႁိူဝ်ႈၼႃႇလုၵ်ႉသေၵႃႈတီႈၵၢင်ႁၢဝ်ထွင်ႇလႅင်းလဵပ်ႈႁွပ်ႈၵဝ်ၶႃႈၵမ်းလဵဝ်ၶႃႈဢေႃႈ။-
ၵဝ်ၶႃႈလူမ်ႉတူၵ်းဢူပ်ႇပူပ်ႇၵႃႈၼိူဝ်လိၼ်ၵႂႃႇလႄႈလႆႈငိၼ်းသဵင်ဢၼ်လၢတ်ႈတေႃႇၵဝ်ၶႃႈလႄႈဝႃႈ၊ ‘ သေႃးလု၊ ႟။ သေႃးလု၊ ႟။ ႁဵတ်းသင်လႄႈမႂ်းၼိၵ်ႈၸၢၵ်ႈငႅၼ်းသႄးၵဝ်ၸိူဝ်ႉၼင်ႇႁိုဝ်၊’ ဝႃႈၼင်ႇၼႆဢေႃႈ။-
ၵဝ်ၶႃႈၵေႃႈထၢမ်လႄႈဝႃႈ၊ ‘ၸဝ်ႈႁဝ်းပဵၼ်ၽူႈလႂ်ၶႃႈ၊’ ဝႃႈၼင်ႇၼႆလႄႈမၼ်းၸဝ်ႈၶိုၼ်းလၢတ်ႈလႄႈဝႃႈ၊ ‘ၵဝ်ပဵၼ် ယေႇသု၊ ၵူၼ်းဝဵင်း ၼႃႇၸရႅတ်ႈ၊ ဢၼ်မႂ်းၼိၵ်ႈၸၢၵ်ႈငႅၼ်းသႄးၼၼ်ႉယဝ်ႉ၊’ ဝႃႈၼင်ႇၼႆဢေႃႈ။-
ၵူၼ်းၸိူဝ်းဢၼ်ပႃးၸွမ်းၵဝ်ၶႃႈၸိူဝ်းၼၼ်ႉ၊လႆႈႁၼ်ဢၼ်လႅင်းၼၼ်ႉသေၵေႃႈၶဝ်ဢမ်ႇလႆႈငိၼ်းသဵင်ၵႂၢမ်းၸဝ်ႈဢၼ်လၢတ်ႈတေႃႇၵဝ်ၶႃႈၼၼ်ႉ။-
မိူဝ်ႈၼၼ်ႉ၊ၵဝ်ၶႃႈလဝ်ႈလၢတ်ႈလႄႈဝႃႈ၊ ‘ၸဝ်ႈ႟။ ၵဝ်ၶႃႈတၵ်းလႆႈႁဵတ်းၸိူဝ်ႉၼင်ႇႁိုဝ်၊’ ဝႃႈၼႆလႄႈၸဝ်ႈၽြႃးၶိုၼ်းလၢတ်ႈတီႈၵဝ်ၶႃႈလႄႈဝႃႈ၊ ‘လုၵ်ႉလႄႈၶဝ်ႈၵႃႈၼႂ်းဝဵင်း တမ်ႇမတ်ႉသၵတ်ႉ၊ တႃႉ။ တီႈၼၼ်ႈတၵ်းလၢတ်ႈပၼ်ၵူႈၸိူဝ်ႉၵူႈပိူင် ၵႃႈဢၼ်ၽြႃးပဵၼ်ၸဝ်ႈၶၢၼ်းဝႆႉ၊ပုၼ်ႈဢၼ်မႂ်းတၵ်းလႆႈႁဵတ်းၸိူဝ်းၼၼ်ႉယူႇ၊’ ဝႃႈၼင်ႇၼႆဢေႃႈ။-
ၵွပ်ႈပိူဝ်ႈႁႅင်းသၢႆဢရွင်ႇဢၼ်ႁိူဝ်ႈလႅင်းၼၼ်ႉလႄႈၵဝ်ၶႃႈတႃမွတ်ႇၵႂႃႇသေယဝ်ႉ၊ၵူၼ်းဢၼ်ပႃးၸွမ်းၵဝ်ၶႃႈၸိူဝ်းၼၼ်ႉ၊ၸုင်မိုဝ်းၵဝ်ၶႃႈၶဝ်ႈဝဵင်း တမ်ႇမတ်ႉသၵတ်ႉ၊ ၵႂႃႇဢေႃႈ။
“ၵႃႈၼႂ်းဝဵင်းၼၼ်ႉ၊မီးၵူၼ်းၵေႃႉၼိုင်ႈဢၼ်လႆႈၸိုဝ်ႈ ဢႃႇၼၼိ၊ ဢၼ်ပဵၼ်ၵေႃႉဢၼ်ၸၢင်ႈမူၼ်ႈပျေႃႇၼႂ်းဝၢတ်ႈၽြႃးပဵၼ်ၸဝ်ႈၸၢင်ႈၵမ်ၵျၢင်ႉၸွမ်းၼင်ႇပိင်းၺၢပ်ႈတြႃးလႄႈမီးၵုင်ႇသရေႇၵႃႈတီႈၼႂ်းၵူၼ်းမဵဝ်း ၵျူး၊ တင်းသဵင်ႈတင်းလူင်ၵႃႈၼႂ်းဝဵင်းၼၼ်ႉဢေႃႈ။-
မၼ်းမႃးၸူးၵဝ်ၶႃႈ၊ၸုၵ်းယူႇႁိမ်းၵဝ်ၶႃႈလႄႈလၢတ်ႈဝႃႈ၊ ‘ၼွင်ႉၵဝ် သေႃးလု၊ ႟။ ႁႂ်ႈတႃမႂ်းၶိုၼ်းႁၼ်လႆႈတႃႉ၊’ ဝႃႈၼင်ႇၼႆလႄႈ ယၢမ်းမိူဝ်ႈၼၼ်ႉၵမ်းလဵဝ်မၢၵ်ႇတႃၵဝ်ၶႃႈၶိုၼ်းႁၼ်မႃးလႄႈမုင်ႈတူၺ်းၼႃႈမၼ်းဢေႃႈ။-
မၼ်းလၢတ်ႈတီႈၵဝ်ၶႃႈလႄႈဝႃႈ၊ ‘ၽြႃးပဵၼ်ၸဝ်ႈပူႇမွၼ်ႇႁဝ်းၼၼ်ႉလိူၵ်ႈဢဝ်မႂ်းႁႂ်ႈလႆႈႁုဢလူဝ်ႇတေႃႇၽြႃးပဵၼ်ၸဝ်ႈ၊ဢိၵ်ႇတင်းႁႂ်ႈလႆႈႁၼ် ၸဝ်ႈယေႇသု၊ ၸဝ်ႈဢၼ်သိုဝ်ႈတေႃႇ၊ဢိၵ်ႇတင်းႁႂ်ႈမႂ်းလႆႈငိၼ်းသဵင်ၵႂၢမ်းဢၼ်ဢွၵ်ႇသူပ်းၸဝ်ႈၼၼ်ႉဢေႃႈ။-
လွင်ႈမၼ်းၸမ်ႉ၊မႂ်းတၵ်းလႆႈပဵၼ်သၢၵ်ႈသေႇပုၼ်ႈမၼ်းၸဝ်ႈလႄႈတၵ်းလႆႈမွၵ်ႇလၢတ်ႈၵႃႈဢၼ်မႂ်းလႆႈႁၼ်၊ၵႃႈဢၼ်မႂ်းလႆႈငိၼ်းၸိူဝ်းၼႆႉတီႈၵူႈၵေႃႉၵူႈၵူၼ်းဢေႃႈ။-
တေႃႈလဵဝ်ၼႆႉၵေႃႈ၊ႁဵတ်းသင်လႄႈမႂ်းပႂ်ႉယူႇႁိုင်ႁိုင်ၼင်ႇႁိုဝ်။ လုၵ်ႉလႄႈၶၢမ်ႇဢဝ်မၢင်ႇၵလႃႇပပ်ႉတိၸမ်ႇ သေလႄႈႁႂ်ႈဢပျတ်ႈမႂ်းလႆႈသုၵ်ႈပွတ်ႈၵွပ်ႈလူၺ်ႈတၢင်းဢၼ်ႁဵတ်းသူးတွင်းပထၼႃႇတီႈမၼ်းၸဝ်ႈၼၼ်ႉတႃႉ၊’ ဝႃႈၼင်ႇၼႆဢေႃႈ။
“ၵဝ်ၶႃႈၶိုၼ်းမိူဝ်းၸူးတီႈဝဵင်း ယေႇရုသလႅမ်ႇ၊ သေယဝ်ႉ၊ယၢမ်းမိူဝ်ႈဢၼ်ၵဝ်ၶႃႈယင်းသူးတွင်းယူႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉၸိုင်၊ၵဝ်ၶႃႈလႆႈပျႃႇတိၵ်ႈၼိမိၵ်ႈဢေႃႈ။-
ၼႂ်းၼၼ်ႉ၊ၵဝ်ၶႃႈလႆႈထူပ်းႁၼ်ၸဝ်ႈၽြႃးလႄႈမၼ်းၸဝ်ႈလၢတ်ႈတီႈၵဝ်ၶႃႈလႄႈဝႃႈ၊ ‘မႂ်းႁဵတ်းၶၼ်ႁဵတ်းၽႂ်းႁႂ်ႈလႆႈဢွၵ်ႇသေၵႃႈတီႈဝဵင်း ယေႇရုသလႅမ်ႇ၊ ၵႂႃႇၵမ်းလဵဝ်တႃႉ။ လွင်ႈမၼ်းၸမ်ႉ၊ၵူၼ်းတီႈၼႆႈတၵ်းဢမ်ႇၶၢမ်ႇဢဝ်ၵႂၢမ်းဢၼ်မႂ်းၶၢမ်ႇသၢၵ်ႈသေႇလွင်ႈၵဝ်ၼႆႉ၊’ ဝႃႈၼင်ႇၼႆဢေႃႈ။-
ၵဝ်ၶႃႈၶိုၼ်းလဝ်ႈလၢတ်ႈလႄႈဝႃႈ၊ ‘ၸဝ်ႈႁဝ်းတီႈၶႃႈ။ လွင်ႈဢၼ်ၵဝ်ၶႃႈၶဝ်ႈၸရွပ်ႈႁေႃးတြႃးလႂ်သေလႄႈတိဢဝ်ၶဝ်ၸိူဝ်းဢၼ်ယုမ်ႇမၢတ်ႈၸဝ်ႈႁဝ်းတင်းလၢႆပေႃႉယႅၼ်ႉၶဝ်လႄႈဢဝ်ၶဝ်ၶင်ထွင်ႇဝႆႉၸိူဝ်းၼၼ်ႉ၊ၶဝ်ႁုယူႇလီလီၶႃႈဢေႃႈ။-
ယၢမ်းမိူဝ်ႈဢၼ်ၵူၼ်းၶၢမ်ႇသၢၵ်ႈသေႇၸဝ်ႈႁဝ်း၊ဢၼ်ပဵၼ် သထေႇၽၢၼ်ႇ၊ လႆႈၶၢမ်ႇတၢင်းဢၼ်ဢဝ်တၢႆၼၼ်ႉၵေႃႈ၊တူဝ်ၵဝ်ၶႃႈၸုၵ်းယူႇၵႃႈတီႈၼၼ်ႈသေယဝ်ႉ၊ၸူမ်းၸႂ်ထုၵ်ႇၸႂ်လွင်ႈဢၼ်မၼ်းလႆႈတၢႆၼၼ်ႉဢေႃႈ။ ၵဝ်ၶႃႈပႂ်ႉၶူဝ်းလဵင်းပၼ်ၶဝ်ၸိူဝ်းဢၼ်ဢဝ်မၼ်းတၢႆၼၼ်ႉယူႇၶႃႈဢေႃႈ၊’ ဝႃႈၼင်ႇၼႆဢေႃႈ။-
ၸဝ်ႈၽြႃးသမ်ႉလၢတ်ႈလႄႈဝႃႈ၊ ‘ၵႂႃႇတႃႉ၊ၵဝ်တၵ်းပွႆႇၸႂ်ႉမႂ်းၵႂႃႇၵႆၵႆ၊တီႈဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်းမီးၼၼ်ႉဢေႃႈ၊’ ဝႃႈၼင်ႇၼႆမီးဢမိင်ႉဢေႃႈ၊” ဝႃႈၼင်ႇၼႆဢေႃႈ။
ၵူၼ်းၸိူဝ်းၼၼ်ႉ၊ထွမ်ႇၵႂၢမ်းမၼ်းတေႃႇထိုင်ႁွတ်ႈထၼ်ႇၼၼ်ႉသေယဝ်ႉ၊ဢွၼ်ၵၼ်ၵိဝ်သဵင်ႁွင်ႉပၢဝ်ႇသႅၼ်ႇလႄႈဝႃႈ၊ “ၵူၼ်းၸိူဝ်ႉၼင်ႇမၼ်းၼႆႉဢဝ်တၢႆပႅတ်ႈသေၵႃႈၼိူဝ်လိၼ်မိူင်းၼႆႉတႃႉ။ မၼ်းဢမ်ႇထုၵ်ႇလီဢသၢၵ်ႈလိပ်းယူႇၵူၺ်း၊” ဝႃႈၼင်ႇၼႆဢေႃႈ။-
ၶဝ်ဢွၼ်ၵၼ်ပၢဝ်ႇသႅၼ်ႇယူႇ၊ဢဝ်ၶူဝ်းလဵင်းထိမ်ႈၶိုၼ်ႈၼိူဝ်ႁူဝ်ၶဝ်ယူႇလႄႈၶဝ်ၵမ်ႈၽွင်ႈဢဝ်မုၼ်ႈလိၼ်ပိုၼ်ၶိုၼ်ႈၵႃႈၼိူဝ်ၵၢင်ႁၢဝ်ယူႇၸိူဝ်ႉၼင်ႇၼၼ်ဢေႃႈ။-
မိူဝ်ႈၼၼ်ႉၸဝ်ႈၵွၼ်းတပ်ႉသိုၵ်း ရူဝ်းမႃႉ၊ ၼၼ်ႉပူင်ဢမိင်ႉႁႂ်ႈၵူၼ်းသိုၵ်းမၼ်းတင်းလၢႆ၊ဢဝ်သြႃႇ ပေႃးလု၊ ၶဝ်ႈၵႂႃႇၵႃႈၼႂ်းတပ်ႉလႄႈသင်ႇလၢတ်ႈႁႂ်ႈၶဝ်ပေႃႉယႅၼ်ႉၸႅတ်ႈသေးတူၺ်းလွင်ႈဢၼ်ႁဵတ်းသင်လႄႈၵူၼ်းမဵဝ်း ၵျူး၊ တင်းလၢႆ၊ထၢၼ်ႈပေႃးပၢဝ်ႇသႅၼ်ႇယူႇၸိူဝ်ႉၼင်ႇၼၼ်ၼၼ်ႉဢေႃႈ။-
ၵူၺ်းၵႃႈ၊ယၢမ်းမိူဝ်ႈဢၼ်ၶဝ်ယင်းတိုၵ်ႉမတ်ႉၽုၵ်ႇမၼ်းပုၼ်ႈဢၼ်တၵ်းပေႃႉယႅၼ်ႉမၼ်းယူႇၼၼ်ႉ သြႃႇ ပေႃးလု၊ လၢတ်ႈတီႈတပ်ႉမူးဢၼ်ၸုၵ်းယူႇၵႃႈတီႈၼၼ်ႉလႄႈဝႃႈ၊ “တီႈၵူၼ်း ရူဝ်းမႃႉ၊ ၵေႃႉၼိုင်ႈၼၼ်ႉ၊ယင်းဢမ်ႇၸႅတ်ႈထၢမ်ၸွမ်းၼင်ႇတြႃး ရူဝ်းမႃႉ၊ လႄႈသူပေႃႉယႅၼ်ႉလႆႈႁိုဝ်း” ဝႃႈၼင်ႇၼႆဢေႃႈ။
တပ်ႉမူးၼၼ်ႉ၊ငိၼ်းသေယဝ်ႉၵႂႃႇၸူးၵႃႈတီႈၸဝ်ႈၵွၼ်းတပ်ႉသိုၵ်းလႄႈထၢမ်ဝႃႈ၊ “တၵ်းလႆႈႁဵတ်းၸိူဝ်ႉၼင်ႇႁိုဝ်ၶႃႈ။ ၵေႃႉၼႆႉပဵၼ်ၵူၼ်း ရူဝ်းမႃႉ၊ ဢေႃႈ၊” ဝႃႈၼင်ႇၼႆဢေႃႈ။
ၸဝ်ႈၵွၼ်းတပ်ႉသိုၵ်းၼၼ်ႉၵေႃႈမႃးၸူးတီႈသြႃႇ ပေႃးလု၊ လႄႈထၢမ်ဝႃႈ၊ “လၢတ်ႈလူး။ ၸွင်ႇမႂ်းပဵၼ်ၵူၼ်း ရူဝ်းမႃႉ၊ ႁိုဝ်း၊” ဝႃႈၼင်ႇၼႆလႄႈ။ “ၸႂ်ႈၶႃႈယဝ်ႉ” ဝႃႈၼႆ၊သြႃႇ ပေႃးလု၊ ၶိုၼ်းလၢတ်ႈဢေႃႈ။
ၸဝ်ႈၵွၼ်းတပ်ႉသိုၵ်းၵေႃႈလၢတ်ႈလႄႈဝႃႈ၊ “ၵဝ်ပၼ်ငိုၼ်းၼမ်ၼႃႇလႄႈၸင်ႇလႆႈပဵၼ်ၵူၼ်း ရူဝ်းမႃႉ၊ ၵေႃႉၼိုင်ႈဢိူဝ်း၊” ဝႃႈၼင်ႇၼႆလႄႈသြႃႇ ပေႃးလု၊ ၶိုၼ်းလၢတ်ႈလႄႈဝႃႈ၊ “ၵဝ်ၶႃႈၼႆႉ၊ပဵၼ်ၸွမ်းၸႃႇတိဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၵူၼ်းၸိူဝ်းဢၼ်ဢၢင်ႈတၵ်းၸႅတ်ႈထၢမ်သြႃႇ ပေႃးလု၊ ၼၼ်ႉ၊ႁူၼ်ဢွၵ်ႇသေၵႃႈတီႈမၼ်းၵႂႃႇၵမ်းလဵဝ်လႄႈၸဝ်ႈၵွၼ်းတပ်ႉသိုၵ်းၵေႃႈမိူဝ်ႈဢၼ်လႆႈႁုလွင်ႈဢၼ်သြႃႇ ပေႃးလု၊ ပဵၼ်ၵူၼ်း ရူဝ်းမႃႉ၊ ၵေႃႉၼိုင်ႈ၊သမ်ႉလႆႈဢဝ်ၸိူၵ်ႈလဵၵ်းမတ်ႉၽုၵ်ႇမႅၼ်ႈၵူၼ်း ရူဝ်းမႃႉ၊ ၼၼ်ႉၸိုင်၊မီးတၢင်းဢၼ်ၵူဝ်ႁႄၼႃႇလူင်လၢင်ဢေႃႈ။
ၸဝ်ႈၵွၼ်းတပ်ႉသိုၵ်းၶႂ်ႈႁုဢၼ်ၸိုဝ်ႈဢၼ်ၸႂ်ႈ၊ၵွပ်ႈလွင်ႈသင်လႄႈၵူၼ်းမဵဝ်း ၵျူး၊ တင်းလၢႆ၊တၢင်ႇဢပျတ်ႈၼိူဝ်သြႃႇ ပေႃးလု၊ ထၼ်ႇၼႆႉၼၼ်ႉလႄႈ ဝၼ်းမိူဝ်ႈၽုၵ်ႈမၼ်းၵႄႈပၼ်ၸိူၵ်ႈလဵၵ်းၵႃႈတီႈသြႃႇ ပေႃးလု၊ သေယဝ်ႉ၊ပူင်ဢမိင်ႉႁႂ်ႈယဵၸ်ႈပရေႃးႁဵၵ်ႈ လူင်တင်းလၢႆ၊ဢိၵ်ႇတင်းၶုၼ်လုမ်းလူင်တင်းသဵင်ႈတင်းလူင်ၸုတုမ်ၵၼ်သေလႄႈႁွင်ႉဢဝ်သြႃႇ ပေႃးလု၊ မႃးၸုၵ်းၵႃႈတီႈၽၢႆႇၼႃႈၶဝ်ဢေႃႈ။
သြႃႇ ပေႃးလု၊ ၵေႃႈယႅၵ်ႉတူၺ်းၶုၼ်လုမ်းလူင်ၸိူဝ်းၼၼ်ႉၸေးၸေးသေလႄႈလၢတ်ႈဝႃႈ၊ “ပီႈၼွင်ႉ ဢိသရေး၊ ၶဝ်႟။ ၼႂ်းလွင်ႈတၢင်းဢၼ်ႁဵတ်းဝၢတ်ႈၽြႃးပဵၼ်ၸဝ်ႈၼႆႉ၊ၸႂ်ဢၼ်ႁုတူဝ်ၸဝ်ႈၵဝ်ႇ၊ၵဝ်ၶႃႈၼႆႉယင်းဢမ်ႇတၢင်ႇဢပျတ်ႈတူဝ်ၸဝ်ႈၵဝ်ႇလႄႈပွင်ႁဵတ်းယူႇတေႃႇဝၼ်းမိူဝ်ႈၼႆႉၶႃႈဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ၶုၼ်ယဵၸ်ႈပရေႃးႁဵၵ်ႈ ဢႃႇၼၼိ၊ ပၼ်ဢမိင်ႉတီႈၶဝ်ၸိူဝ်းဢၼ်ၸုၵ်းယူႇတီႈႁိမ်းသြႃႇ ပေႃးလု၊ ၼၼ်ႉ၊ႁႂ်ႈၶဝ်တူပ်းသူပ်းမၼ်းဢေႃႈ။-
သြႃႇ ပေႃးလု၊ ၵေႃႈလၢတ်ႈလႄႈဝႃႈ၊ “မႂ်းဢၼ်ပဵၼ်မိူၼ်ၼင်ႇၽႃသၢင်ႉဢုတ်ႇဢၼ်တႃးထုၼ်ၽိူၵ်ႇၼႆႉ႟။ ၽြႃးပဵၼ်ၸဝ်ႈတၵ်းတူပ်းယႅၼ်ႉမႂ်းဢေႃႈ။ မႂ်းၼင်ႈၵႃႈတီႈၼၼ်ႈႁႂ်ႈလႆႈၸႅတ်ႈထၢမ်ၵဝ်ၸွမ်းၼင်ႇတြႃးဢေႃႈ။ ၵူၺ်းၵႃႈ၊မႂ်းႁဵတ်းၶတ်းၵၼ်တင်းတြႃးလႄႈၸီႇယၢင်ႇႁႂ်ႈလႆႈပေႃႉယႅၼ်ႉၵဝ်ဢေႃႈ၊” ဝႃႈၼင်ႇၼႆဢေႃႈ။
ၵူၼ်းၸိူဝ်းဢၼ်ၸုၵ်းယူႇႁိမ်းသြႃႇ ပေႃးလု၊ ၸိူဝ်းၼၼ်ႉ၊လၢတ်ႈတီႈမၼ်းလႄႈဝႃႈ၊ “မႂ်းသႄႉသွမ်းၶုၼ်ယဵၸ်ႈပရေႃးႁဵၵ်ႈၽြႃးပဵၼ်ၸဝ်ႈႁိုဝ်း၊” ဝႃႈၼင်ႇၼႆလႄႈ။
သြႃႇ ပေႃးလု၊ ၵေႃႈလၢတ်ႈလႄႈဝႃႈ၊ “ပီႈၼွင်ႉ ဢိသရေး၊ ၶဝ်႟။ ၵဝ်ဢမ်ႇႁုလွင်ႈဢၼ်မၼ်းပဵၼ်ၶုၼ်ယဵၸ်ႈပရေႃးႁဵၵ်ႈၶႃႈ။ ဢၼ်တႅမ်ႈဝႆႉၼႂ်းၵျၢမ်းလိၵ်ႈလႄႈဝႃႈၸမ်ႉ၊ ‘မႂ်းတၵ်းဢမ်ႇလႆႈသႄႉသွမ်းၶုၼ်ဢၼ်ဢုပ်ႉပိူင်ႇၵူၼ်းမဵဝ်းၸိူဝ်ႉၶိူဝ်းမႂ်း၊’ ဝႃႈၼင်ႇၼႆမႃးယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈဢၼ်သြႃႇ ပေႃးလု၊ ႁုႁၼ်လွင်ႈဢၼ်ၶုၼ်လုမ်းၸိူဝ်းၼၼ်ႉၵမ်ႈၽွင်ႈ ပဵၼ်ၵိူင်း ၸတ်ႉတုၵႄး၊ ၵမ်ႈၽွင်ႈပဵၼ်ၵိူင်း ၽႃႇရိသႄး၊ ၼၼ်ႉၸိုင်၊မၼ်းပၢဝ်ႇလၢတ်ႈၵႃႈတီႈလုမ်းလူင်လႄႈဝႃႈ၊ “ပီႈၼွင်ႉ ဢိသရေး၊ ၶဝ်႟။ ၵဝ်ၶႃႈပဵၼ်ၵူၼ်းၵိူင်း ၽႃႇရိသႄး၊ ၵေႃႉၼိုင်ႈလႄႈပဵၼ်လုၵ်ႈၸၢႆးၵူၼ်း ၽႃႇရိသႄး၊ ဢေႃႈ။ ၵဝ်ၶႃႈလႆႈၶၢမ်ႇတၢင်းဢၼ်ၸႅတ်ႈထၢမ်ၵႃႈတီႈၼႆႈၵွပ်ႈပိူဝ်ႈမီးတၢင်းဢၼ်မုင်ႈထႃႈမွင်းထႃႈလွင်ႈဢၼ်ၶဝ်ၸိူဝ်းဢၼ်တၢႆယဝ်ႉၼၼ်ႉ၊တၵ်းလုၵ်ႉၶိုၼ်းလိပ်းၼၼ်ႉၶႃႈယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈဢၼ်မၼ်းလၢတ်ႈၸိူဝ်ႉၼင်ႇၼႆၼၼ်ႉၸိုင်၊ၵူၼ်း ၽႃႇရိသႄး၊ တင်းၵူၼ်း ၸတ်ႉတုၵႄး၊ ၸိူဝ်းၼၼ်ႉ ၵေႃႉၼိုင်ႈလႄႈၵေႃႉၼိုင်ႈ၊တွပ်ႇထဵင်ၵၼ်လႄႈမူႇၵူၼ်းတင်းလၢႆၽၢတ်ႇၽႄၵၼ်ၵႂႃႇဢေႃႈ။-
လွင်ႈမၼ်းၸမ်ႉ၊ၵိူင်း ၸတ်ႉတုၵႄး၊ ၶဝ်ဝႃႈ၊တၢင်းဢၼ်လုၵ်ႉၶိုၼ်းလိပ်းဢမ်ႇမီး၊တမၢၼ်ႇၵၢင်ႁၢဝ်ဢမ်ႇမီး၊ၸႂ်ဝိၺိၺ်ႇၵေႃႈဢမ်ႇမီး၊ဝႃႈၼင်ႇၼႆဢေႃႈ။ ၵိူင်း ၽႃႇရိသႄး၊ ၶဝ်ၸမ်ႉ၊ယုမ်ႇလွင်ႈတင်းသၢမ်ပိူင်ၼႆႉဢေႃႈ။-
ၵမ်းၼၼ်ႉ၊သဵင်ဢၼ်ပၢဝ်ႇဢၼ်သႅၼ်ႇတွပ်ႇထဵင်ၵၼ်ယဵင်ႈၶႅၼ်းႁႅင်းမႃးလႄႈသြႃႇမေႃၵျၢမ်းထမ်ႇမႃႉၼႂ်းၵိူင်း ၽႃႇရိသႄး၊ ၶဝ်ၵမ်ႈၽွင်ႈ လုၵ်ႉၸုၵ်းတွပ်ႇထဵင်ႁႅင်းၼႃႇလႄႈဝႃႈ၊ “ႁဝ်းဢမ်ႇထူပ်းဢပျတ်ႈၵေႃႉၼႆႉလႃးလႃး၊တေၸႂ်ႈယူႇတႄႉ၊ၸႂ်ဝိၺိၺ်ႇဢမ်ႇၼၼ်ၵေႃႈတမၢၼ်ႇၵၢင်ႁၢဝ်လႆႈလၢတ်ႈတေႃႇမၼ်းတႄႉယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊တၢင်းဢၼ်တွပ်ႇထဵင်ၵၼ်ယုင်ႈယၢင်ႈမႃးၼႃႇလူင်လၢင်လႄႈၸဝ်ႈၵွၼ်းတပ်ႉသိုၵ်းၼၼ်ႉ ၵူဝ်ၶဝ်တၵ်းတိုတ်ႉၸၼ်သြႃႇ ပေႃးလု၊ ၶၢတ်ႇပဵၼ်ပွတ်းပဵၼ်တွၼ်ႈၵႂႃႇလႄႈၸင်ႇပူင်ဢမိင်ႉၵူၼ်းသိုၵ်းမၼ်းတင်းလၢႆၶဝ်ႈၵႂႃႇႁိမ်ဢဝ်သြႃႇ ပေႃးလု၊ ဢွၵ်ႇသေၵႃႈၼႂ်းၵႄႈၶဝ်ၵႂႃႇသူင်ႇတီႈၼႂ်းတပ်ႉသေဢေႃႈ။
ၼႂ်းၶိုၼ်းဝၼ်းမိူဝ်ႈၽုၵ်ႈၼၼ်ႉ၊ၸဝ်ႈၽြႃးပေႃႇမႃးႁိမ်းသြႃႇ ပေႃးလု၊ လႄႈလၢတ်ႈဝႃႈ၊ “မီးၸႂ်ဢၼ်ႁတ်းႁၢၼ်တႃႉ။ မႂ်းၶၢမ်ႇသၢၵ်ႈသေႇပုၼ်ႈၵဝ်ၼႂ်းဝဵင်း ယေႇရုသလႅမ်ႇ၊ ၼႆႉယဝ်ႉ။ မိူၼ်ၼင်ႇၼၼ် မႂ်းတၵ်းလႆႈၵႂႃႇႁဵတ်းၸိူဝ်ႉၼင်ႇၼႆၵႃႈၼႂ်းဝဵင်း ရူဝ်းမႃႉ၊ လူးၵွၼ်ႇဢေႃႈ၊” ဝႃႈၼင်ႇၼႆဢေႃႈ။
ၶိင်ႇႁူဝ်ၼႂ်ဝၼ်းမိူဝ်ႈၽုၵ်ႈၼၼ်ႉ၊ၵူၼ်းမဵဝ်း ၵျူး၊ ၵမ်ႈၽွင်ႈၸုတုမ်ၵၼ်လႄႈၽွမ်ႉၸႂ်ၵၼ်ႁဵတ်းတိၵ်ႈထၢၼ်ႇၵတိတီႈတူဝ်ၸဝ်ႈၵဝ်ႇလႄႈဝႃႈ၊ပေႃးႁဝ်းဢမ်ႇပႆႇလႆႈဢဝ် ပေႃးလု၊ တၢႆၸိုင်၊တၵ်းဢမ်ႇၵိၼ်တၢင်းၵိၼ်သေဢိတ်းဝႃႈၼႆဢေႃႈ။-
ၶဝ်ၸိူဝ်းဢၼ်ႁဵတ်းမုၵ်ႉႁဵတ်းၸုမ်းၸိူဝ်ႉၼင်ႇၼၼ်ၼၼ်ႉ၊မီးသီႇသိပ်းလိူဝ်လိူဝ်ဢေႃႈ။-
ၶဝ်၊ၶဝ်ႈၸူးတီႈယဵၸ်ႈပရေႃးႁဵၵ်ႈလူင်၊ဢိၵ်ႇတင်းတီႈၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆလႄႈလဝ်ႈလၢတ်ႈဝႃႈ၊ “ႁဝ်းၶႃႈၼႆႉ၊ႁဵတ်းတိၵ်ႈထၢၼ်ႇၵိၼ်ႇတီႈတူဝ်ၸဝ်ႈၵဝ်ႇလႄႈဝႃႈ၊ပေႃးယင်းဢမ်ႇပႆႇလႆႈဢဝ် ပေႃးလု၊ တၢႆၸိုင်၊တၵ်းဢမ်ႇၵိၼ်တၢင်းၵိၼ်သေဢိတ်း၊ဝႃႈၼင်ႇၼႆၶႃႈယဝ်ႉ။-
ပိူဝ်ႈၼႆလႄႈ သူၸဝ်ႈတင်းၶုၼ်လုမ်းလူင်တင်းလၢႆ၊ဢွၼ်ၵၼ်ၶဝ်ႈလဝ်ႈယွၼ်းတီႈၸဝ်ႈၵွၼ်းတပ်ႉသိုၵ်း၊ႁႂ်ႈမၼ်းၸဝ်ႈဢဝ် ပေႃးလု၊ မႃးၸူးသူၸဝ်ႈလႄႈ ႁဵတ်းၸိူဝ်ႉၼင်ႇႁၢင်ႈတၵ်းၸႅတ်ႈထၢမ်တူၺ်းႁႂ်ႈလႆႈယဵင်ႈၶႅၼ်းႁုလွင်ႈမၼ်းလီလီငၢမ်းငၢမ်းၼၼ်ႉသေၵမ်းၶႃႈ။ ၸူဝ်ႈဢၼ်မၼ်းဢမ်ႇပႆႇႁွတ်ႈထိုင်ၵႃႈတီႈၼႆႈၼၼ်ႉ၊ႁဝ်းၶႃႈတၵ်းပႂ်ႉႁႅၼ်းဝႆႉႁႂ်ႈလႆႈဢဝ်တၢႆဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊လၢၼ်ၸၢႆး ပေႃးလု၊ ငိၼ်းလွင်ႈဢၼ်ၶဝ်ပႂ်ႉလွမ်ယူႇၵၢင်တၢင်းၸိူဝ်ႉၼင်ႇၼၼ်ၼၼ်ႉသေယဝ်ႉ၊ၶဝ်ႈၵႃႈၼႂ်းတပ်ႉလႄႈမွၵ်ႇလၢတ်ႈတီႈသြႃႇ ပေႃးလု၊ ဢၼ်ပဵၼ်ၼႃႉမၼ်းၼၼ်ႉဢေႃႈ။-
သြႃႇ ပေႃးလု၊ ၸင်ႇႁွင်ႉဢဝ်တပ်ႉမူးၵေႃႉၼိုင်ႈလႄႈလၢတ်ႈဝႃႈ၊ “ဢွၼ်ၵူၼ်းၼုမ်ႇၵေႃႉၼႆႉၶဝ်ႈၸူးၸဝ်ႈၵွၼ်းတပ်ႉသိုၵ်းသေၵမ်း။ မၼ်းမီးလွင်ႈတၢင်းဢၼ်တၵ်းမွၵ်ႇလၢတ်ႈသေၸိူဝ်ႉသေပိူင်ဢေႃႈ၊” ဝႃႈၼင်ႇၼႆဢေႃႈ။-
တပ်ႉမူးၵေႃႈ၊ဢွၼ်မၼ်းၵႂႃႇၶဝ်ႈၸူးၸဝ်ႈၵွၼ်းတပ်ႉသိုၵ်းလႄႈလဝ်ႈလၢတ်ႈဝႃႈ၊ “ ပေႃးလု၊ ၵူၼ်းထွင်ႇၼၼ်ႉ၊ယွၼ်းႁႂ်ႈၵဝ်ၶႃႈဢွၼ်ၵူၼ်းၼုမ်ႇၵေႃႉၼႆႉ၊ၶဝ်ႈၸူးၸဝ်ႈႁဝ်းပိူဝ်ႈဢၼ်မၼ်းမီးလွင်ႈတၢင်းဢၼ်တၵ်းမွၵ်ႇလၢတ်ႈသေၸိူဝ်ႉသေပိူင်တီႈၸဝ်ႈႁဝ်းဝႃႈၼႆဢေႃႈ၊” ဝႃႈၼင်ႇၼႆဢေႃႈ။
ၸဝ်ႈၵွၼ်းတပ်ႉသိုၵ်းၵေႃႈယိပ်းၸုင်မိုဝ်းၵူၼ်းၼုမ်ႇၵေႃႉၼၼ်ႉၵႂႃႇၸူးတီႈဢၼ်ဢမ်ႇမီးၵူၼ်းၼၼ်ႉသေယဝ်ႉထၢမ်ဝႃႈ၊ “မႂ်းမီးလွင်ႈတၢင်းဢၼ်တၵ်းမွၵ်ႇလၢတ်ႈၵႃႈသင်တီႈၵဝ်၊” ဝႃႈၼင်ႇၼႆဢေႃႈ။
ၵူၼ်းၼုမ်ႇၼၼ်ႉလဝ်ႈလၢတ်ႈလႄႈဝႃႈ၊ “ၵူၼ်းမဵဝ်း ၵျူး၊ ဢၼ်မီးဢႃႇၼႃႇတင်းလၢႆ၊ၽွမ်ႉၸႂ်ၵၼ်ႁႂ်ႈလႆႈၶဝ်ႈၸူးၸဝ်ႈႁဝ်းဝၼ်းမိူဝ်ႈၽုၵ်ႈလႄႈတၵ်းယွၼ်းဢဝ် ပေႃးလု၊ ဢၼ်ပဵၼ်ၼႃႉၵဝ်ၶႃႈ၊လူင်းၵႂႃႇၵႃႈတီႈလုမ်းလူင်ပုၼ်ႉလႄႈႁဵတ်းမိူၼ်ၼင်ႇႁၢင်ႈတၵ်းၸႅတ်ႈထၢမ်တူၺ်းႁႂ်ႈလႆႈယဵင်ႈၶႅၼ်းႁုလွင်ႈမၼ်းလီလီငၢမ်းငၢမ်းၼၼ်ႉၶႃႈဢေႃႈ။-
ၵူၺ်းၵႃႈ၊ယႃႇပေၸွမ်းၵႂၢမ်းၶဝ်သေၵမ်းၶႃႈ။ မီးၵူၼ်းသီႇသိပ်းလိူဝ်လိူဝ်တၵ်းပႂ်ႉလွမ်မၼ်းဝႆႉယူႇၵၢင်တၢင်းၶႃႈဢေႃႈ။ ၶဝ်ႁဵတ်းတိၵ်ႈထၢၼ်ႇၵတိတီႈတူဝ်ၸဝ်ႈၵဝ်ႇလႄႈဝႃႈ၊ ‘ပေႃးႁဝ်းယင်းဢမ်ႇပႆႇလႆႈဢဝ် ပေႃးလု၊ တၢႆၸိုင်၊တၵ်းဢမ်ႇၵိၼ်တၢင်းၵိၼ်သေဢိတ်း၊’ ဝႃႈၼႆဢေႃႈ။ ၶဝ်မႄးႁႅၼ်းတၼ်းဝႆႉ၊ႁႂ်ႈလႆႈႁဵတ်းၸိူဝ်ႉၼင်ႇၼၼ်လႄႈတေႃႈလဵဝ်ၵူၺ်းပႂ်ႉထႃႈၵႂၢမ်းဢၼ်ၸဝ်ႈႁဝ်းတၵ်းႁပ်ႉတုင်းဢဝ်ၼၼ်ႉယူႇၶႃႈယဝ်ႉ၊” ဝႃႈၼင်ႇၼႆဢေႃႈ။
ၸဝ်ႈၵွၼ်းတပ်ႉသိုၵ်းၵေႃႈသင်ႇလၢတ်ႈတီႈၵူၼ်းၼုမ်ႇၼၼ်ႉလႄႈဝႃႈ၊ “လွင်ႈတၢင်းဢၼ်မႂ်းလၢတ်ႈတီႈၵဝ်ၼႆႉ၊ယႃႇပေမွၵ်ႇလၢတ်ႈတီႈၽူႈလႂ်၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၸဝ်ႈၵွၼ်းတပ်ႉသိုၵ်းႁွင်ႉဢဝ်တပ်ႉမူးမၼ်းသွင်ၵေႃႉလႄႈလၢတ်ႈဝႃႈ၊ “မႄးႁႅၼ်းၵူၼ်းသိုၵ်းသွင်ပၢၵ်ႇလူၺ်ႈၵၼ်တင်းၵူၼ်းသိုၵ်းၶီႇမႃႉၸဵတ်းသိပ်းၵေႃႉ၊တင်းၵူၼ်းသိုၵ်းယိပ်းႁွၵ်ႇသွင်ပၢၵ်ႇၵေႃႉႁႂ်ႈလႆႈၵႂႃႇၸူးတီႈဝဵင်း ၵေႇသရိ၊ ၶမ်ႈၼႆႉၵဝ်ႈမွင်းတႃႉ။-
ဢဝ်မႃႉၵမ်ႈၽွင်ႈပၼ် ပေႃးလု၊ တၵ်းၶီႇလႄႈဢွၼ်သူင်ႇၵႂႃႇၵႃႈတီႈၶုၼ် ၽေးလိတ်ႉ၊ လူင်ႉလီလွတ်ႈလီတႃႉ၊” ဝႃႈၼင်ႇၼႆဢေႃႈ။-
ၸဝ်ႈၵွၼ်းတပ်ႉသိုၵ်းတႅမ်ႈလိၵ်ႈဢၼ်မီးၶေႃႈၵႂၢမ်းလၢတ်ႈဝႃႈၸမ်ႉ။
“ၵဝ်ၶႃႈ၊ ၵလေႃးတိလုသိ၊ မီးတၢင်းဢၼ်ၼပ်ႉယမ်သေလႄႈလဝ်ႈလၢတ်ႈပၼ်ငိၼ်းၵႂႃႇၵႃႈတီႈၶုၼ် ၽေးလိတ်ႉ၊ ဢၼ်ယႂ်ႇမျၢတ်ႈၼႃႇၶႃႈဢေႃႈ။ ႁႂ်ႈၸဝ်ႈႁဝ်းယူႇလီၵိၼ်ဝၢၼ်သေၵမ်းလူၺ်ႈ။
ၵူၼ်းမဵဝ်း ၵျူး၊ ၶဝ်တိဢဝ်ၵေႃႉၼႆႉလႄႈဢၢင်ႈတၵ်းဢဝ်တၢႆဢေႃႈ။ ၵဝ်ၶႃႈႁုငိၼ်းလွင်ႈဢၼ်မၼ်းပဵၼ်ၵူၼ်း ရူဝ်းမႃႉ၊ ၵေႃႉၼိုင်ႈလႄႈၵဝ်ၶႃႈဢဝ်ၵူၼ်းသိုၵ်းၵဝ်ၶႃႈတင်းလၢႆ၊ၵႂႃႇၵႄႇသႄႇဢဝ်မၼ်းၶႃႈဢေႃႈ။-
ပိူဝ်ႈဢၼ်ၵဝ်ၶႃႈၶႂ်ႈႁုလွင်ႈၵွပ်ႈဢပျတ်ႈသင်လႄႈ ၶဝ်ႁဵတ်းဢမုသႂ်ႇမၼ်းၼၼ်ႉ၊ၵဝ်ၶႃႈဢဝ်မၼ်းၵႂႃႇသူင်ႇၵႃႈတီႈလုမ်းလူင်ၶဝ်ၶႃႈဢေႃႈ။-
မိူဝ်ႈၼၼ်ႉ၊ၵဝ်ၶႃႈလႆႈႁုႁၼ်လွင်ႈဢၼ်မၼ်းဢမ်ႇမီးဢပျတ်ႈဢၼ်ထိူၵ်ႈတၢႆ၊ဢမ်ႇၼၼ်ဢပျတ်ႈဢၼ်ထိူၵ်ႈတူၵ်းထွင်ႇၼၼ်ႉဢေႃႈ။ ၶဝ်ႁဵတ်းဢမုသႂ်ႇမၼ်း၊ဢၼ်ၸၢပ်ႈသႅင်ႇၵၼ်တင်းဢၼ်တွပ်ႇထဵင်ၵၼ်လွင်ႈၽႃႇသႃႇတြႃးၶဝ်ၼၼ်ႉၵူၺ်းဢေႃႈ။-
မိူဝ်ႈဢၼ်ၵဝ်ၶႃႈလႆႈငိၼ်းလွင်ႈဢၼ်ပိူၼ်ႈၵျၢမ်ႇဢဝ်မၼ်းတၢႆၼၼ်ႉၸိုင်၊ၵဝ်ၶႃႈၸႂ်ႉႁႂ်ႈဢဝ်မၼ်းၵႂႃႇသူင်ႇၸူးတီႈၸဝ်ႈႁဝ်းၵမ်းလဵဝ်ၶႃႈဢေႃႈ။ ၵဝ်ၶႃႈ၊သင်ႇလၢတ်ႈတီႈၶဝ်ၸိူဝ်းဢၼ်ႁဵတ်းဢမုသႂ်ႇမၼ်းၼၼ်ႉ၊ၵႂႃႇလဝ်ႈလၢတ်ႈၵႃႈတီႈၽၢႆႇၼႃႈၸဝ်ႈႁဝ်းၶႃႈဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈၵူၼ်းသိုၵ်းတင်းလၢႆႁဵတ်းၸွမ်းဢမိင်ႉၼၼ်ႉလႄႈၶမ်ႈၼၼ်ႉၵမ်းလဵဝ်၊ၶဝ်ဢဝ်သြႃႇ ပေႃးလု၊ ၵႂႃႇသူင်ႇႁွတ်ႈထိုင်ဝဵင်း ဢၼ်ႇတိပတရိ၊ ဢေႃႈ။-
ဝၼ်းမိူဝ်ႈၽုၵ်ႈတပ်ႉတိၼ်တင်းလၢႆၶိုၼ်းမိူဝ်းၸူးၼႂ်းတပ်ႉလႄႈပွႆႇၵူၼ်းသိုၵ်းတပ်ႉမႃႉၵႂႃႇလူၺ်ႈၵၼ်တင်းမၼ်းဢေႃႈ။-
ၶဝ်ၸိူဝ်းၼၼ်ႉ၊ဢဝ်မၼ်းၵႂႃႇသူင်ႇထိုင်ဝဵင်း ၵေႇသရိ၊ သေယဝ်ႉ၊ဢဝ်လိၵ်ႈၼၼ်ႉဢၢပ်ႈပၼ်တီႈၶုၼ်လႄႈဢဝ်သြႃႇ ပေႃးလု၊ ဢၢပ်ႈပၼ်ၼႂ်းမိုဝ်းမၼ်းၸဝ်ႈသေဢေႃႈ။-
ၶုၼ်ၼၼ်ႉ၊ၽတ်းဢၢၼ်ႇလိၵ်ႈယဝ်ႉၸင်ႇ၊တွင်ႈထၢမ်လွင်ႈသြႃႇ ပေႃးလု၊ ပဵၼ်ၵူၼ်းမိူင်းလႂ်ၼၼ်ႉဢေႃႈ။ မိူဝ်ႈဢၼ်မၼ်းၸဝ်ႈလႆႈႁုလွင်ႈဢၼ်မၼ်းပဵၼ်ၵူၼ်းမိူင်း ၵိလိၵိ၊ ၼၼ်ႉၸိုင်၊-
မၼ်းၸဝ်ႈလၢတ်ႈလႄႈဝႃႈ၊ “မိူဝ်ႈဢၼ်ၶဝ်ၸိူဝ်းဢၼ်ႁဵတ်းဢမုသႂ်ႇမႂ်းၼၼ်ႉႁွတ်ႈမႃးၸိုင်၊ၵဝ်တၵ်းထွမ်ႇဢဝ်လူးၵွၼ်ႇဢေႃႈ၊” ဝႃႈၼင်ႇၼႆသေယဝ်ႉ၊ၶိုင်ပွင်ႁႂ်ႈသြႃႇ ပေႃးလု၊ ၶၢမ်ႇတၢင်းဢၼ်ပႂ်ႉထိင်းၼႂ်းဝၢင်းႁေႃၶုၼ် ၼၼ်ႉသေဢေႃႈ။
ဝၢႆးၼၼ်ႉႁႃႈဝၼ်း၊ၶုၼ်ယဵၸ်ႈပရေႃးႁဵၵ်ႈ ဢႃႇၼၼိ၊ ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၵမ်ႈၽွင်ႈ တင်းၽူႈၵႄႈၵႂၢမ်းဢမုၼႂ်းလုမ်း၊ဢၼ်လႆႈၸိုဝ်ႈ တေးရတုလု၊ ၶဝ်၊လူင်းၵႂႃႇၸူးတီႈဝဵင်း ၵေႇသရိ၊ လႄႈ ၶဝ်ႈၸူးၵႃႈတီႈၶုၼ် ၽေးလိတ်ႉ၊ သေယဝ်ႉ၊လဝ်ႈတၢင်ႇဢမုသႂ်ႇသြႃႇ ပေႃးလု၊ ဢေႃႈ။-
ၸင်ႇႁွင်ႉဢဝ်သြႃႇ ပေႃးလု၊ မႃးသေလႄႈ တေးရတုလု၊ ၵေႃႈ၊လဝ်ႈလၢတ်ႈၵႂၢမ်းဢၼ်တၢင်ႇဢပျတ်ႈတီႈမၼ်းလႄႈဝႃႈၸမ်ႉ။ “ၸဝ်ႈဢၼ်မုၼ်ယႂ်ႇၼႃႇၶႃႈ႟။ ၵွပ်ႈလူၺ်ႈၵုင်ႇမုၼ်ပိင်ႇၺႃႇၸဝ်ႈႁဝ်းလႄႈႁဝ်းၶႃႈလႆႈယူႇၼိမ်ၼိမ်လီလီႁိုင်ၼႃႇလႄႈသင်၊ၵွပ်ႈလူၺ်ႈၵုင်ႇမုၼ်ၵျေးၸူးဢၼ်ၸဝ်ႈႁဝ်း၊ပွင်ႁဵတ်းပွင်မႄးဝၢၼ်ႈမိူင်းလီငၢမ်းၼႃႇလႄႈသင်၊-
ၼႂ်းၵူႈၸိူဝ်ႉၵူႈပိူင်၊ၵူႈတီႈၵူႈလႅၼ်၊ႁဝ်းၶႃႈႁပ်ႉတုင်းဢဝ်တီႈၶႃႈလႄႈၵျေးၸူးၸဝ်ႈႁဝ်းယႂ်ႇၼႃႇၶႃႈဢေႃႈ။-
ၵဝ်ၶႃႈ၊ယင်းဢမ်ႇၶႂ်ႈယႃႉယုၵ်ႉၸဝ်ႈႁဝ်းႁိုင်ၼႃႇလႄႈၶႅၼ်းတေႃႈၸဝ်ႈႁဝ်းဢဵတ်းလူယိူၼ်ႉၶၢမ်ႇ၊ထွမ်ႇငိၼ်းၵႂၢမ်းဢၼ်ၵဝ်ၶႃႈတၵ်းလၢတ်ႈဢိတ်းဢွၼ်ႇၼိုင်ႈၼႆႉသေၵမ်းတီႈၶႃႈဢေႃႈ။-
ႁဝ်းၶႃႈထူပ်းႁၼ်လွင်ႈဢၼ်ၵေႃႉၼႆႉပဵၼ်ၵူၼ်းယႃႉၵူၼ်းၵဝ်း၊ၵူၼ်းဢၼ်တိုၵ်းယူင်းၵူၼ်းမဵဝ်း ၵျူး၊ တင်းလၢႆၵူႈတီႈၵူႈလႅၼ်ႁႂ်ႈယုင်ႈဢူၼ်သၢၼ်ၶတ်းလႄႈပဵၼ်ၵူၼ်းဢၼ်ဢွၼ်ႁူဝ်ၵႃႈၼႂ်းၶဝ်ၸိူဝ်းဢၼ်ၶဝ်ႈမုၵ်ႉၸုမ်းၵူၼ်းဝဵင်း ၼႃႇၸရႅတ်ႈ၊ ၼၼ်ႉတီႈၶႃႈဢေႃႈ။-
မၼ်းယင်းဢၢင်ႈႁဵတ်းႁႂ်ႈၵျွင်းပိၵ်ႈမၢၼ်ႇၸဝ်ႈၵူဝ်ႈၵိူၵ်ႇလႄႈႁဝ်းၶႃႈတိဢဝ်မၼ်းသေယဝ်ႉ၊ဢၢင်ႈတၵ်းၸီႇယၢင်ႇၸွမ်းၼင်ႇထုင်းတြႃးႁဝ်းၶႃႈ၊ၶႃႈဢေႃႈ။-
ၵူၺ်းၵႃႈ၊ၸဝ်ႈၵွၼ်းတပ်ႉသိုၵ်း လုသိ၊ မႃးသေလႄႈႁိမ်ဢဝ်တူဝ်မၼ်းၵႃႈၼႂ်းမိုဝ်းႁဝ်းၶႃႈၵႂႃႇလႄႈ၊-
ပူင်ဢမိင်ႉ၊ႁႂ်ႈဢဝ်ဢမုၼႆႉလွႆးဢၢပ်ႈပၼ်တီႈၸဝ်ႈႁဝ်းတီႈၶႃႈဢေႃႈ။ ပေႃးၸဝ်ႈႁဝ်းၸႅတ်ႈထၢမ်ၵေႃႉၼႆႉၸိုင်၊တူဝ်ၸဝ်ႈႁဝ်းတၵ်းလႆႈႁုလွင်ႈတၢင်းဢၼ်ႁဝ်းၶႃႈတၢင်ႇဢပျတ်ႈတီႈမၼ်းတင်းသဵင်ႈတင်းလူင်၊လီလီငၢမ်းငၢမ်းၶႃႈဢေႃႈ၊” ဝႃႈၼင်ႇၼႆဢေႃႈ။
ၵူၼ်းမဵဝ်း ၵျူး၊ ၸိူဝ်းၼၼ်ႉၵေႃႈလၢတ်ႈလႄႈဝႃႈ၊ “ၵႂၢမ်းမၼ်းၼႆႉမၢၼ်ႇမႅၼ်ႈၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်ၶုၼ် ၽေးလိတ်ႉ၊ ၼႄမိုဝ်းတီႈသြႃႇ ပေႃးလု၊ ႁႂ်ႈမၼ်းလၢတ်ႈၼႄလႄႈသြႃႇ ပေႃးလု၊ ၵေႃႈလဝ်ႈလၢတ်ႈလႄႈဝႃႈ၊ “ၵဝ်ၶႃႈႁုလွင်ႈဢၼ်ၸဝ်ႈႁဝ်းပဵၼ်ၵေႃႉဢၼ်လႆႈဢုပ်ႉပိူင်ႇၵူၼ်းမဵဝ်းၼႆႉပီမိူင်းၼမ်ၼႃႇယဝ်ႉလႄႈ ၵဝ်ၶႃႈမီးတၢင်းဢၼ်ၸူမ်းသိူဝ်းႁတ်းႁၢၼ်၊ႁႂ်ႈလႆႈလဝ်ႈလၢတ်ႈၵႂၢမ်းဢၼ်ၵႅတ်ႇၶႄတူဝ်ၸဝ်ႈၵဝ်ႇၽၢႆႇၼႃႈၸဝ်ႈႁဝ်းၶႃႈဢေႃႈ။-
ၵႃႈၼင်ႇဢၼ်ၸဝ်ႈႁဝ်းသိုပ်ႇႁုၸွမ်းလႆႈၼၼ်ႉ၊မိူဝ်ႈပူၼ်ႉမႃးဢမ်ႇႁိုင်သေသိပ်းသွင်ဝၼ်းၼၼ်ႉ၊ၵဝ်ၶႃႈၶိုၼ်ႈၵႂႃႇၵႃႈတီႈဝဵင်း ယေႇရုသလႅမ်ႇ၊ လႄႈႁဵတ်းဝၢတ်ႈၽြႃးပဵၼ်ၸဝ်ႈတီႈၶႃႈဢေႃႈ။-
ၵူၼ်းမဵဝ်း ၵျူး၊ ၸိူဝ်းၼႆႉ၊ဢမ်ႇလႆႈႁၼ်ၵဝ်ၶႃႈတိူင်ႇပၢင်ႇထဵင်ၵၼ်တင်းၽူႈလႂ်သေၵေႃႉသေၵူၼ်း၊ၵႃႈၼႂ်းၵျွင်းပိၵ်ႈမၢၼ်ႇၸဝ်ႈဢမ်ႇလႆႈႁၼ်ၵဝ်ၶႃႈတိုၵ်းယူင်းၸူဝ်းဢဝ်ၵူၼ်းသေၵေႃႉသေၵူၼ်း၊ႁႂ်ႈယုင်ႈဢူၼ်မေႃးမႄးၵႃႈၼႂ်းၸရွပ်ႈႁေႃးတြႃးဢမ်ႇၼၼ်ၵႃႈတီႈသေတီႈသေလႅၼ်ၵႃႈၼႂ်းဝဵင်းၼၼ်ႉၶႃႈ။-
မိူၼ်ၼင်ႇၼၼ်ၶဝ်ဢမ်ႇၸၢင်ႈၼႄပျႃးသၢၵ်ႈသေႇတီႈဢၼ်ၶဝ်တၢင်ႇဢပျတ်ႈၵဝ်ၶႃႈမိူဝ်ႈလဵဝ်ၼႆႉလႆႈၶႃႈ။-
ၼႂ်းဝႃႈၼၼ်သေၵေႃႈ၊ၵဝ်ၶႃႈႁပ်ႉၶၢမ်ႇတီႈၸဝ်ႈႁဝ်းလွင်ႈဢၼ်ၵဝ်ၶႃႈၵူဝ်းၵႂၢႆႇထႃႇဝရႃႉၽြႃး၊ဢၼ်ပူႇမွၼ်ႇႁဝ်းၶဝ်ၵူဝ်းၵႂၢႆႇၼၼ်ႉၵမ်ၵျၢင်ႉၸွမ်းၽႃႇသႃႇတြႃးဢၼ်ၶဝ်ဝႃႈ၊ၽႃႇသႃႇတြႃးဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉၶႃႈဢေႃႈ။ လိူဝ်သေၼၼ်ႉ၊ၵဝ်ၶႃႈယုမ်ႇမၢတ်ႈၵႃႈဢၼ်တႅမ်ႈဝႆႉၵႃႈၼႂ်းၵျၢမ်းပိင်းၺၢပ်ႈတြႃး၊ဢိၵ်ႇတင်းၵျၢမ်းပရေႃးၽႅတ်ႈ တင်းလၢႆတီႈၶႃႈဢေႃႈ။-
ၵဝ်ၶႃႈဢိင်ပိုင်ႈၽြႃးပဵၼ်ၸဝ်ႈလႄႈ မုင်ႈထႃႈမွင်းထႃႈမိူၼ်မိူၼ်ၵၼ်တင်းတၢင်းဢၼ်ၶဝ်မုင်ႈထႃႈမွင်းထႃႈဢၼ်ဝႃႈ၊ၵူၼ်းတင်းသဵင်ႈတင်းလူင်ၸဵမ်ၵူၼ်းလီလႄႈၵူၼ်းၸႃႉ၊တၵ်းလုၵ်ႉၵႃႈတၢင်းတၢႆၶိုၼ်းလိပ်းမႃးၼၼ်ႉဢေႃႈ။-
ပိူဝ်ႈၼႆလႄႈၵဝ်ၶႃႈၶတ်းၸႂ်ၵျူဝ်းၸႃးႁႂ်ႈၸႂ်ဢၼ်ႁုတူဝ်ၸဝ်ႈၵဝ်ႇၼၼ်ႉၵၢင်းလွတ်ႈတင်းတၢင်းဢၼ်တၢင်ႇဢပျတ်ႈၽၢႆႇၼႃႈၽြႃးပဵၼ်ၸဝ်ႈ၊ဢိၵ်ႇတင်းၽၢႆႇၼႃႈၵူၼ်းယူႇတႃႇသေႇဢေႃႈ။
“လိုၼ်းသေဢၼ်ဢွၵ်ႇသေဝဵင်း ယေႇရုသလႅမ်ႇ၊ ၵႂႃႇပီမိူင်းႁိုင်ယဝ်ႉၼၼ်ႉ၊ၵဝ်ၶႃႈပႃးမႃးငိုၼ်းလူႇႁႂ်ႈလႆႈၽႄမႅင်ႇပၼ်တီႈၵူၼ်းမဵဝ်းၵဝ်ၶႃႈ၊ဢိၵ်ႇတင်းႁႂ်ႈလႆႈႁဵတ်းတၢင်းလူႇတီႈၽြႃးပဵၼ်ၸဝ်ႈၶႃႈဢေႃႈ။-
မိူဝ်ႈဢၼ်ၵဝ်ၶႃႈ၊ယင်းတိုၵ်ႉႁဵတ်းၸိူဝ်ႉၼင်ႇၼၼ်ၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉၸိုင်၊ၶဝ်ထူပ်းႁၼ်ၵဝ်ၶႃႈယင်းဢမ်ႇမီးယူႇလူၺ်ႈၵၼ်တင်းမူႇၵူၼ်း၊ဢမ်ႇမီးတၢင်းဢၼ်ႁဵတ်းဢူၼ်ဢဵၼ်မေႃးမႄးၵႃႈသင်လႄႈႁဵတ်းဝၢတ်ႈတၢင်းဢၼ်ႁႂ်ႈတူဝ်မူတ်းသႂ်ယူႇၵူၺ်းၼၼ်ႉဢေႃႈ။ မိူဝ်ႈၼၼ်ႉ၊မီးၵူၼ်းမဵဝ်း ၵျူး၊ ၵမ်ႈၽွင်ႈဢၼ်လုၵ်ႉသေၵႃႈတီႈမိူင်း ဢႃႇသိ၊ မႃးၼၼ်ႉ၊ၸင်ႇႁဵတ်းတၢင်းဢၼ်ယုင်ႈယၢင်ႈဢူၼ်မေႃးၶႃႈဢေႃႈ။-
ပေႃးၶဝ်မီးတီႈတၵ်းတၢင်ႇဢပျတ်ႈတႄႉၸိုင်၊တူဝ်ၶဝ်လီမႃးလဝ်ႈလၢတ်ႈၵႃႈတီႈၽၢႆႇၼႃႈၸဝ်ႈႁဝ်းၶႃႈဢေႃႈ။-
ဢမ်ႇၼၼ်ၵေႃႈ၊ႁႂ်ႈၶဝ်ၸိူဝ်းဢၼ်မီးယူႇၵႃႈတီႈၼႆႈၽုၺ်ႇၼႄဢပျတ်ႈဢၼ်ၵဝ်ၶႃႈလႆႈႁဵတ်းမႅၼ်ႈၼၼ်ႉသေၵမ်းတႃႉ။-
လိူဝ်သေၵႂၢမ်းၶေႃႈၼိုင်ႈဢၼ်ၵဝ်ၶႃႈၸုၵ်းၵႃႈတီႈၽၢႆႇၼႃႈၶဝ်၊ၵႃႈၼႂ်းလုမ်းလူင်သေလႄႈႁွင်ႉသႅၼ်ႇလႄႈဝႃႈ၊ ‘ၵဝ်ၶႃႈလႆႈၶၢမ်ႇတၢင်းဢၼ်ၸႅတ်ႈထၢမ်ၸီႇယၢင်ႇဝၼ်းမိူဝ်ႈၼႆႉ၊ပဵၼ်ၵွပ်ႈပိူဝ်ႈၵဝ်ၶႃႈယုမ်ႇမၢတ်ႈတၢင်းဢၼ်ၵူၼ်းတၢႆလုၵ်ႉၶိုၼ်းလိပ်းဢေႃႈ၊’ ဝႃႈၼင်ႇၼႆဢေႃႈ။”
မိူဝ်ႈၼၼ်ႉ၊ၶုၼ် ၽေးလိတ်ႉ၊ ၵေႃႉဢၼ်လႆႈႁုလွင်ႈၽႃႇသႃႇတြႃးၼၼ်ႉလီလီငၢမ်းငၢမ်းယဝ်ႉၼၼ်ႉၸိုင်၊ယူၵ်ႉသိမ်းပၢင်ၵုမ်ဢၼ်ၸီႇယၢင်ႇတြႃးလႄႈဝႃႈ၊ “မိူဝ်ႈဢၼ်ၸဝ်ႈၵွၼ်းတပ်ႉသိုၵ်း လုသိ၊ လူင်းမႃးၸင်ႇၵဝ်တေၸႅတ်ႈဢမုၼႆႉထႅင်ႈလူးၵွၼ်ႇဢေႃႈ၊” ဝႃႈၼင်ႇၼႆဢေႃႈ။-
မၼ်းၸဝ်ႈၸင်ႇပူင်ဢမိင်ႉတီႈၶုၼ်သိုၵ်းႁႂ်ႈဢဝ်သြႃႇ ပေႃးလု၊ ၵႂႃႇပႂ်ႉထိင်းဝႆႉယူႇလီလီ၊ယႃႇႁႂ်ႈမၼ်းလႆႈယူႇၵိတ်ႇယူႇယၢပ်ႇ၊ဢိၵ်ႇတင်းပၼ်ဢၶႂၢင်ႉႁႂ်ႈၵေႃႉသႄႈမၼ်းတင်းလၢႆ၊လႆႈမႃးႁဵတ်းလဵင်ႉႁဵတ်းလူၵႃႈဢၼ်မၼ်းလူဝ်ႇၼၼ်ႉဢေႃႈ။
လိုၼ်းၼၼ်ႉ၊ဢမ်ႇႁိုင်ဢမ်ႇၼၢၼ်းၶုၼ် ၽေးလိတ်ႉ၊ တင်းမေးမၼ်းၼၢင်း တရုသိလႃႉ၊ ဢၼ်ပဵၼ်ၵူၼ်းမဵဝ်း ၵျူး၊ ႁွင်ႉဢဝ်သြႃႇ ပေႃးလု မႃးသေယဝ်ႉ၊ထွမ်ႇဢဝ်ၵႂၢမ်းလွင်ႈတၢင်းဢၼ်ယုမ်ႇမၢတ်ႈ ၸဝ်ႈယေႇသုၶရိၸ်ႈ၊ ဢေႃႈ။-
မိူဝ်ႈဢၼ်သြႃႇ ပေႃးလု၊ ႁေႃးလၢတ်ႈတြႃးတၢင်းဢၼ်သိုဝ်ႈတေႃႇ၊တြႃးတၢင်းဢၼ်ၶျုၵ်ႈတူဝ်ၸဝ်ႈၵဝ်ႇ၊ဢိၵ်ႇတင်းတြႃးတၢင်းဢၼ်ၸီႇယၢင်ႇ၊ဢၼ်တၵ်းႁွတ်ႈမႃးဝၼ်းၼိုင်ႈၼၼ်ႉ၊ၼၼ်ႉၸိုင်၊ၶုၼ် ၽေးလိတ်ႉ၊ ၵူဝ်ၼႃႇလူင်လၢင်လႄႈလၢတ်ႈဝႃႈ၊ “တေႃႈလဵဝ်ၼႆႉပွၵ်ႈၵႂႃႇလူးၵွၼ်ႇတႃႉ။ မိူဝ်ႈလႂ်ပေႃးၵဝ်တၼ်းၵွၼ်ႇၵဝ်ၸင်ႇတေႁွင်ႉမႂ်းထႅင်ႈ၊” ဝႃႈၼင်ႇၼႆဢေႃႈ။-
မၼ်းၸဝ်ႈမုင်ႈမွင်းသြႃႇ ပေႃးလု၊ တၵ်းပၼ်ငိုၼ်းသူးငိုၼ်းလၢပ်ႈႁႂ်ႈတူဝ်ၸဝ်ႈၵဝ်ႇလႆႈလွတ်ႈလႄႈ ၵမ်းၵမ်းႁွင်ႉမႃးဢုပ်ႇၵုမ်မၼ်းၸဝ်ႈဢေႃႈ။
လိုၼ်းၼၼ်ႉသွင်ပီၶုၼ် ပေႃးၵိၽိတ်ႉတု၊ လႆႈပုတ်ႈဢဝ်ဢရႃႇၶုၼ် ၽေးလိတ်ႉ၊ ၼၼ်ႉယဝ်ႉလႄႈၶုၼ် ၽေးလိတ်ႉ၊ ၼၼ်ႉ၊ၶႂ်ႈၶၢမ်ႇဢဝ်တၢင်းဢၼ်ၵူၼ်းမဵဝ်း ၵျူး၊ ၶဝ်ထုၵ်ႇၸႂ်ၼၼ်ႉလႄႈ ဢဝ်သြႃႇ ပေႃးလု၊ ၶိုၼ်းသႂ်ႇထွင်ႇဝႆႉဢေႃႈ။
လိုၼ်းသေၶုၼ် ၽိတ်ႉတု၊ ႁွတ်ႈၽႅဝ်ၵႃႈတီႈမိူင်းၼၼ်ႉယဝ်ႉသၢမ်ဝၼ်းၸိုင်၊မၼ်းၸဝ်ႈလုၵ်ႉသေၵႃႈတီႈဝဵင်း ၵေႇသရိ၊ လႄႈၶိုၼ်ႈၵႂႃႇၸူးဝဵင်း ယေႇရုသလႅမ်ႇ၊ ဢေႃႈ။-
တီႈၼၼ်ႈယဵၸ်ႈပရေႃးႁဵၵ်ႈလူင် ၶဝ်တင်းၵူၼ်းၵႄႇၵူၼ်းႁူဝ်ၵူၼ်းမဵဝ်း ၵျူး၊ ၶဝ်၊ဢဝ်ဢမုသြႃႇ ပေႃးလု၊ ၼၼ်ႉ၊ၸွႆးတၢင်ႇတီႈမၼ်းၸဝ်ႈဢေႃႈ။-
ၶဝ်တၢင်ႇလဝ်ႈယွၼ်းႁႂ်ႈၶုၼ် ၽိတ်ႉတု၊ ႁဵတ်းၵျေးၸူးဢဝ်သြႃႇ ပေႃးလု၊ မႃးၵႃႈတီႈဝဵင်း ယေႇရုသလႅမ်ႇ၊ ပိူဝ်ႈဢၼ်ၶဝ်ၵျၢမ်ႇပွင်ႁႂ်ႈလႆႈဢဝ် ပေႃးလု၊ တၢႆၵႃႈတီႈၵၢင်တၢင်းၼၼ်ႉဢေႃႈ။-
ၶုၼ် ၽိတ်ႉတု၊ ၶိုၼ်းလၢတ်ႈလႄႈဝႃႈ၊ “ ပေႃးလု၊ လႆႈတူၵ်းထွင်ႇယူႇၵႃႈၼႂ်းဝဵင်း ၵေႇသရိ၊ လႄႈတူဝ်ၵဝ်တၵ်းၸဵဝ်းမိူဝ်းဢေႃႈ။-
ႁႂ်ႈၵူၼ်းၵႄႇၵူၼ်းႁူဝ်သူၸိူဝ်းၼႆႉ၊ၸွမ်းၵဝ်ၵႂႃႇၵႃႈတီႈၼၼ်ႈသေလႄႈတၢင်ႇဢပျတ်ႈမၼ်းလွင်ႈဢၼ်မၼ်းၽိတ်းပိူင်ႈၼၼ်ႉတႃႉ၊” ဝႃႈၼင်ႇၼႆဢေႃႈ။
ၶုၼ် ၽိတ်ႉတု၊ ယူႇလူၺ်ႈၶဝ်မွၵ်ႈသိပ်းဝၼ်းယဝ်ႉၸင်ႇ၊မိူဝ်းၵႂႃႇတီႈဝဵင်း ၵေႇသရိ၊ ဢေႃႈ။ ၼႂ်းဝၼ်းမိူဝ်ႈၽုၵ်ႈမၼ်းၸဝ်ႈၶိုၼ်ႈလုမ်းဢၼ်ၸီႇယၢင်ႇတြႃးလႄႈႁွင်ႉဢဝ်သြႃႇ ပေႃးလု၊ မႃးဢေႃႈ။-
မိူဝ်ႈဢၼ်သြႃႇ ပေႃးလု၊ ၶဝ်ႈႁွတ်ႈမႃးၼၼ်ႉၸိုင်၊ၵူၼ်းမဵဝ်း ၵျူး၊ ၸိူဝ်းဢၼ်လုၵ်ႉသေၵႃႈတီႈဝဵင်း ယေႇရုသလႅမ်ႇ၊ မႃးၼၼ်ႉ၊လွမ်ႉႁွပ်ႈမၼ်းသေလႄႈတၢင်ႇဢပျတ်ႈဢၼ်ၼၵ်းၼႃႇလၢႆၸိူဝ်ႉလၢႆမဵဝ်းဢၼ်ဢမ်ႇၼႄသၢၵ်ႈသေႇလႆႈသေဢိတ်းၼၼ်ႉဢေႃႈ။-
သြႃႇ ပေႃးလု၊ ၸမ်ႉ၊လၢတ်ႈၵႂၢမ်းၶႄတူဝ်ၸဝ်ႈၵဝ်ႇလႄႈဝႃႈ၊ “ၵႃႈတီႈၼႄးဢုပတေႇတြႃးၵူၼ်းမဵဝ်း ၵျူး၊ လႄႈသင်၊ၵႃႈတီႈၵျွင်းပိၵ်ႈမၢၼ်ႇလႄႈသင်၊ၵႃႈတီႈၸဝ်ႈမုၼ်ယႂ်ႇၶုၼ်ႁေႃၶမ်း ရူဝ်းမႃႉ၊ လႄႈသင်၊ၵဝ်ၶႃႈဢမ်ႇၽိတ်းဢမ်ႇပိူင်ႈၵႃႈသင်ၶႃႈ၊” ဝႃႈၼင်ႇၼႆဢေႃႈ။
ၵူၺ်းၵႃႈ၊ၶုၼ် ၽိတ်ႉတု၊ ၼၼ်ႉ၊ၶႂ်ႈၶၢမ်ႇဢဝ်တၢင်းဢၼ်ၵူၼ်းမဵဝ်း ၵျူး၊ ၶဝ်ထုၵ်ႇၸႂ်ၵျိူၵ်ႈၸႂ်ၼၼ်ႉလႄႈၸင်ႇထၢမ်သြႃႇ ပေႃးလု၊ လႄႈဝႃႈ၊ “ၸွင်ႇမႂ်းၶႂ်ႈၵႂႃႇၵႃႈတီႈဝဵင်း ယေႇရုသလႅမ်ႇ၊ လႄႈၶၢမ်ႇၸႅတ်ႈၽၢႆႇၼႃႈၵဝ်ၵႃႈတီႈၼၼ်ႈႁိုဝ်း၊” ဝႃႈၼင်ႇၼႆဢေႃႈ။
သြႃႇ ပေႃးလု၊ ၵေႃႈလၢတ်ႈလႄႈဝႃႈ၊ “ၵဝ်ၶႃႈၸုၵ်းယူႇၵႃႈတီႈၽၢႆႇၼႃႈပလၢင်ႇဢၼ်ၸီႇယၢင်ႇတြႃးၸဝ်ႈမုၼ်ယႂ်ႇၶုၼ်ႁေႃၶမ်း ၵေႇသႃႇ၊ တီႈဢၼ်ၵဝ်ၶႃႈထိူၵ်ႈၶၢမ်ႇဢဝ်တၢင်းဢၼ်ၸီႇယၢင်ႇၼႆႉၶႃႈဢေႃႈ။ ၵႃႈၼင်ႇဢၼ်ၸဝ်ႈႁဝ်းႁုလီလီငၢမ်းငၢမ်းၼၼ်ႉ၊ၵဝ်ၶႃႈဢမ်ႇၽိတ်းဢမ်ႇပိူင်ႈၵူၼ်းမဵဝ်း ၵျူး၊ ၶဝ်သေဢိတ်းၶႃႈ။-
သင်ၵဝ်ၶႃႈႁဵတ်းဢပျတ်ႈဢၼ်ထိူၵ်ႈၶၢမ်ႇဢၼ်တၵ်းလႆႈတၢႆၸိုင်၊ၵဝ်ၶႃႈဢမ်ႇလဝ်ႈဢမ်ႇယွၼ်းႁႂ်ႈလႆႈလွတ်ႈၵူၺ်း။ ၵူၺ်းၵႃႈ၊သင်ဝႃႈတၢင်းဢၼ်ၶဝ်တၢင်ႇဢပျတ်ႈၵဝ်ၶႃႈၼႆႉ၊ဢမ်ႇၸိုဝ်ႈဢမ်ႇၸႂ်ႈသေဢိတ်းၸိုင်၊ၽူႈလႂ်ၵေႃႈဢမ်ႇဢဝ်ၵဝ်ၶႃႈဢၢပ်ႈၼႂ်းမိုဝ်းၶဝ်လႆႈၶႃႈ။ ၵဝ်ၶႃႈယွၼ်းႁႂ်ႈလႆႈၶၢမ်ႇၸႅတ်ႈၵႃႈတီႈၸဝ်ႈမုၼ်ယႂ်ႇၶုၼ်ႁေႃၶမ်း ၵေႇသႃႇ၊ ၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၶုၼ် ၽိတ်ႉတု၊ ၵေႃႈ၊ဝၢႆးသေတိူင်ႇပၢင်ႇၵၼ်တင်းၵူၼ်းပၼ်တၢင်းၵျၢမ်ႇတင်းလၢႆယဝ်ႉၼၼ်ႉၸိုင်၊လၢတ်ႈလႄႈဝႃႈ၊ “မႂ်းယွၼ်းႁႂ်ႈလႆႈၶၢမ်ႇၸႅတ်ႈတီႈၸဝ်ႈမုၼ်ယႂ်ႇၶုၼ်ႁေႃၶမ်းယဝ်ႉ။ မႂ်းတၵ်းလႆႈၵႂႃႇၵႃႈတီႈၸဝ်ႈမုၼ်ယႂ်ႇၶုၼ်ႁေႃၶမ်း ၵေႇသႃႇ၊ ဢေႃႈ၊” ဝႃႈၼင်ႇၼႆဢေႃႈ။
လိုၼ်းၼၼ်ႉ၊ဢမ်ႇပေႃးႁိုင်ပေႃးၼၢၼ်းၶုၼ်ႁေႃၶမ်း ဢၵရိပ်ႉပႃႉ၊ တင်းၼၢင်း ပေႇရၼိတ်ႉ၊ ႁွတ်ႈထိုင်မႃးၵႃႈတီႈဝဵင်း ၵေႇသရိ၊ ႁႂ်ႈလႆႈဝႄႉၶဝ်ႈတူင်ႉတၵ်ႉၶုၼ် ၽိတ်ႉတု၊ ဢေႃႈ။-
မိူဝ်ႈဢၼ်ၵိုတ်းသဝ်းတီႈၼၼ်ႈႁိုင်တၢၼ်ႇတၢၼ်ႇၼၼ်ႉၸိုင်၊ၶုၼ် ၽိတ်ႉတု၊ ဢဝ်လွင်ႈသြႃႇ ပေႃးလု၊ လဝ်ႈလၢတ်ႈထိုင်ၶုၼ်ႁေႃၶမ်းလႄႈဝႃႈ၊ “တီႈၼႆႈမီးၵူၼ်းၵေႃႉၼိုင်ႈဢၼ်ၶုၼ် ၽေးလိတ်ႉ၊ ဢဝ်သႂ်ႇထွင်ႇဝႆႉၼၼ်ႉၶႃႈဢေႃႈ။-
မိူဝ်ႈဢၼ်ၵဝ်ၶႃႈၶိုၼ်ႈၵႂႃႇၵႃႈတီႈဝဵင်း ယေႇရုသလႅမ်ႇ၊ ၼၼ်ႉ၊ယဵၸ်ႈပရေႃးႁဵၵ်ႈလူင်ၵူၼ်းမဵဝ်း ၵျူး၊ ၶဝ်တင်းၵူၼ်းဢၼ်ပဵၼ်ၵႄႇပဵၼ်ႁူဝ်ၶဝ်ၸွႆးတၢင်ႇဢမုသႂ်ႇမၼ်းလႄႈ လဝ်ႈလၢတ်ႈႁႂ်ႈၵဝ်ၶႃႈၸီႇယၢင်ႇၵေႃႉၼၼ်ႉဢေႃႈ။-
ၵူၺ်းၵႃႈ၊ၵဝ်ၶႃႈလၢတ်ႈၼႄလွင်ႈဢၼ်ၵူၼ်းမဵဝ်း ရူဝ်းမႃႉ၊ ႁဝ်းၼႆႉ၊ၸူဝ်ႈဢၼ်ၵေႃႉဢၼ်လႆႈၶၢမ်ႇတၢင်ႇဢမုဢမ်ႇပႆႇလႆႈတေႃႇၼႃႈၵၼ်တင်းၶဝ်ၸိူဝ်းဢၼ်တၢင်ႇဢမုတီႈမၼ်းၼၼ်ႉလႄႈလႆႈဢၶႂၢင်ႉဢၼ်လၢတ်ႈၵႂၢမ်းၶႄတူဝ်ၸဝ်ႈၵဝ်ႇၼၼ်ႉၸိုင်၊ဢမ်ႇတွၼ်ႉဢၢပ်ႈပၼ်ၼႂ်းမိုဝ်းၽူႈလႂ်ဝႃႈၼႆၶႃႈဢေႃႈ။-
ပိူဝ်ႈၼႆလႄႈမိူဝ်ႈဢၼ်ၶဝ်ႁွတ်ႈထိုင်မႃးၵႃႈတီႈၼႆႈၸိုင်၊ၵဝ်ၶႃႈယင်းဢမ်ႇၶၢမ်ႇသုမ်းဢၶိင်ႇၼႂ်းဝၼ်းမိူဝ်ႈၽုၵ်ႈၼၼ်ႉၵမ်းလဵဝ်၊ၵဝ်ၶႃႈၶိုၼ်ႈၼင်ႈလုမ်းဢၼ်ၸီႇယၢင်ႇတြႃးလႄႈပူင်ဢမိင်ႉႁႂ်ႈဢဝ်ၵေႃႉၼၼ်ႉမႃးဢေႃႈ။-
မိူဝ်ႈဢၼ်ၶဝ်ၸိူဝ်းၼၼ်ႉတၢင်ႇဢပျတ်ႈမၼ်းလုၵ်ႉမႃးလၢတ်ႈၵႂၢမ်းၼၼ်ႉ၊ၶဝ်ဢမ်ႇတၢင်ႇဢပျတ်ႈဢၼ်ၵဝ်ၶႃႈထၢင်ႇဝႆႉၼၼ်ႉၶႃႈဢေႃႈ။-
ဢၼ်ၶဝ်တင်းသဵင်ႈတွပ်ႇထဵင်လၢတ်ႈၸႃၼၼ်ႉ၊ၸၢပ်ႈသႅင်ႇၵၼ်တင်းၽႃႇသႃႇတြႃးၶဝ်၊ဢိၵ်ႇလူၺ်ႈလွင်ႈၵူၼ်းၵေႃႉၼိုင်ႈဢၼ်လႆႈၸိုဝ်ႈ ယေႇသု၊ ဢၼ်တၢႆၵႂႃႇယဝ်ႉၼၼ်ႉဢေႃႈ။ ၵူၺ်းၵႃႈ၊ ပေႃးလု၊ ႁေႃးလၢတ်ႈဝႃႈ၊ ယေႇသု၊ ၼၼ်ႉဢသၢၵ်ႈလိပ်းယူႇဝႃႈၼႆၶႃႈဢေႃႈ။-
ပိူဝ်ႈဢၼ်ၵဝ်ၶႃႈဢမ်ႇပေႃးႁုၸႅင်ႈလွင်ႈမဵဝ်းမၼ်းၼၼ်ႉလီလီလႄႈၵဝ်ၶႃႈထၢမ်တူၺ်းမၼ်း၊မၼ်းၸၢင်ႈၶႄးၶႂ်ႈၵႂႃႇၵႃႈတီႈဝဵင်း ယေႇရုသလႅမ်ႇ၊ ပုၼ်ႉလႄႈၶၢမ်ႇဢဝ်တၢင်းဢၼ်ၸီႇယၢင်ႇဢမုၼႆႉဢေႃႈ။-
ၵူၺ်းၵႃႈ၊ ပေႃးလု၊ သမ်ႉယွၼ်းႁႂ်ႈလႆႈၶၢမ်ႇတူၵ်းၵႅၼ်းဝႆႉ၊ပုၼ်ႈဢၼ်ၸဝ်ႈမုၼ်ယႂ်ႇၶုၼ်ႁေႃၶမ်းတၵ်းၸီႇယၢင်ႇဢမုမၼ်းၼၼ်ႉဢေႃႈ။ ၵွပ်ႈၼႆၵဝ်ၶႃႈပူင်ဢမိင်ႉႁႂ်ႈမၼ်းတူၵ်းၵႅၼ်းယူႇတေႃႇထိုင်ႁွတ်ႈဝၼ်းဢၼ်ၵဝ်ၶႃႈဢဝ်မၼ်းသူင်ႇၵႂႃႇၸူးတီႈၸဝ်ႈမုၼ်ယႂ်ႇၶုၼ်ႁေႃၶမ်း ၵေႇသႃႇ၊ ၼၼ်ႉၶႃႈဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်း ဢၵရိပ်ႉပႃႉ၊ လၢတ်ႈတီႈၶုၼ် ၽိတ်ႉတု၊ လႄႈဝႃႈ၊ “တူဝ်ၵဝ်ၶႂ်ႈထွမ်ႇငိၼ်းၵႂၢမ်းမၼ်းလူးၵွၼ်ႇဢေႃႈ၊” ဝႃႈၼင်ႇၼႆလႄႈ။ ၶုၼ် ၽိတ်ႉတု၊ ၶိုၼ်းလၢတ်ႈလႄႈဝႃႈ၊ “ပႂ်ႉထွမ်ႇငိၼ်းၵႂၢမ်းမၼ်းၼႂ်းဝၼ်းမိူဝ်ႈၽုၵ်ႈသေၵမ်း၊” ဝႃႈၼင်ႇၼႆဢေႃႈ။
ၼႂ်းဝၼ်းမိူဝ်ႈၽုၵ်ႈၶုၼ်ႁေႃၶမ်း ဢၵရိပ်ႉပႃႉ၊ တင်းၸဝ်ႈၼၢင်း ပေႇရၼိတ်ႉ၊ မီးတင်းမုၼ်သရေႇဢၼ်ယႂ်ႇၼႃႇလူင်လၢင်လႄႈပႃးတင်းၸဝ်ႈသိုၵ်းလူင်၊ဢိၵ်ႇတင်းၵူၼ်းတူၼ်ႈၵူၼ်းႁူဝ်ၵႃႈၼႂ်းဝဵင်းတင်းလၢႆ၊ၶဝ်ႈၵႃႈၼႂ်းၼႃႈႁေႃသေယဝ်ႉ၊ၶုၼ် ၽိတ်ႉတု၊ ႁႂ်ႈဢဝ်သြႃႇ ပေႃးလု၊ မႃးဢေႃႈ။-
ၶုၼ် ၽိတ်ႉတု၊ ၵေႃႈလၢတ်ႈလႄႈဝႃႈ၊ “ၶုၼ်ႁေႃၶမ်း ဢၵရိပ်ႉပႃႉ၊ ဢိၵ်ႇတင်းၶဝ်ၸိူဝ်းဢၼ်မီးယူႇလူၺ်ႈၵၼ်တင်းႁဝ်းတင်းသဵင်ႈတင်းလူင်ၶဝ်႟။ တူၺ်းၵေႃႉၼႆႉၶႃႈလူး။ ၵူၼ်းမဵဝ်း ၵျူး၊ တင်းသဵင်ႈတင်းလူင်ဢၼ်မီးၸႃႉၸဵမ်ၵႃႈတီႈဝဵင်း ယေႇရုသလႅမ်ႇ၊ ဢိၵ်ႇတင်းၵႃႈတီႈၼႆႈ၊ၸွႆးဢမုသႂ်ႇမၼ်းလႄႈတၢင်ႇဝႆႉတီႈၵဝ်ၶႃႈသေလႄႈပၢဝ်ႇသႅၼ်ႇလႄႈဝႃႈ၊မၼ်းဢမ်ႇထိူၵ်ႈဢသၢၵ်ႈလိပ်းထႅင်ႈသေဢိတ်းယဝ်ႉ၊ဝႃႈၼႆဢေႃႈ။-
ၵူၺ်းၵႃႈ၊ၵဝ်ၶႃႈဢမ်ႇႁၼ်တၢင်းၽိတ်းဢၼ်ထိူၵ်ႈဢဝ်မၼ်းတၢႆၼၼ်ႉ။ ၸွမ်းၵႃႈၼင်ႇဢၼ်မၼ်းယွၼ်းႁႂ်ႈလႆႈၶၢမ်ႇတၢင်းဢၼ်ၸႅတ်ႈသေးၵႃႈတီႈၽၢႆႇၼႃႈၸဝ်ႈမုၼ်ယႂ်ႇၶုၼ်ႁေႃၶမ်း ၵေႇသႃႇ၊ ၸိုင်၊ၵဝ်ၶႃႈတၵ်းလႆႈဢဝ်သူင်ႇၵႂႃႇၶႃႈဢေႃႈ။-
ၼႂ်းဝႃႈၼၼ်သေၵေႃႈ ၵဝ်ၶႃႈဢမ်ႇမီးလွင်ႈတၢင်းဢၼ်တၵ်းတႅမ်ႈလွင်ႈမၼ်းတႄႉတႄႉဝႃႈဝႃႈလႄႈပၼ်ၵႂႃႇတီႈၸဝ်ႈမုၼ်ယႂ်ႇၶုၼ်ႁေႃၶမ်းၶႃႈ။ ပိူဝ်ႈၼႆ၊ၵဝ်ၶႃႈၸင်ႇဢဝ်မၼ်းမႃးၵႃႈတီႈၽၢႆႇၼႃႈသူၸဝ်ႈ၊လိူဝ်တွၼ်းၼႃႇသေပိူၼ်ႈၼၼ်ႉ ဢဝ်မၼ်းမႃးၵႃႈတီႈၽၢႆႇၼႃႈၸဝ်ႈႁဝ်းၶုၼ်ႁေႃၶမ်း ဢၵရိပ်ႉပႃႉ၊ ၶႃႈဢေႃႈ။ သူၸဝ်ႈၶႅၼ်းတေႃႈၸႅတ်ႈထၢမ်တူၺ်းမၼ်းပုၼ်ႈလွင်ႈၼင်ႇႁိုဝ်ၵဝ်ၶႃႈတၵ်းမီးလွင်ႈတၢင်းဢၼ်တႅမ်ႈလိၵ်ႈသေၵမ်းၶႃႈ။-
လွင်ႈမၼ်းၸမ်ႉ၊ယင်းဢမ်ႇၼႄပျႃးဢပျတ်ႈၵူၼ်းထွင်ႇလႆႈလီလီငၢမ်းငၢမ်းလႄႈသူင်ႇၵူၼ်းထွင်ႇၵႂႃႇၼၼ်ႉ၊ဢမ်ႇထုၵ်ႇဢမ်ႇလီၶႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၶုၼ်ႁေႃၶမ်း ဢၵရိပ်ႉပႃႉ၊ လၢတ်ႈတီႈသြႃႇ ပေႃးလု၊ လႄႈဝႃႈ၊ “မႂ်းမီးဢၶႂၢင်ႉလၢတ်ႈပုၼ်ႈတူဝ်ၸဝ်ႈၵဝ်ႇဢေႃႈ၊” ဝႃႈၼင်ႇၼႆလႄႈသြႃႇ ပေႃးလု၊ ၵေႃႈယုၵ်ႉမိုဝ်းမၼ်းၶိုၼ်ႈသေလႄႈလၢတ်ႈၵႂၢမ်းဢၼ်ၶႄတူဝ်ၸဝ်ႈၵဝ်ႇလႄႈဝႃႈ။
“ၶုၼ်ႁေႃၶမ်း ဢၵရိပ်ႉပႃႉ၊ တီႈၶႃႈ႟။ ၵဝ်ၶႃႈမၢတ်ႈတူဝ်ၸဝ်ႈၵဝ်ႇမီးမၢင်ႇၵလႃႇလီၼႃႇၵွပ်ႈပိူဝ်ႈဝၼ်းမိူဝ်ႈၼႆႉ၊ၵဝ်ၶႃႈလႆႈဢၶႂၢင်ႉဢၼ်လၢတ်ႈၵႂၢမ်းၶႄတူဝ်ၸဝ်ႈၵဝ်ႇဢၼ်ၵူၼ်းမဵဝ်း ၵျူး၊ ၶဝ်ၸွႆးတၢင်ႇဢမုသႂ်ႇၵဝ်ၶႃႈၼႆႉ၊ၵႃႈတီႈၽၢႆႇၼႃႈၸဝ်ႈႁဝ်းၶႃႈဢေႃႈ။-
လိူဝ်တွၼ်းၼႃႇသေပိူၼ်ႈၵွပ်ႈပိူဝ်ႈၸဝ်ႈႁဝ်းၸၢင်ႈႁုၸၢင်ႈမေႃထုင်းၽိင်ႈၵူၼ်းမဵဝ်း ၵျူး၊ ၶဝ်၊ဢိၵ်ႇတင်းမဵဝ်းဢၼ်ၶဝ်တွင်ႈထၢမ်ၵၼ်ၼၼ်ႉၶႃႈဢေႃႈ။ ပိူဝ်ႈၼႆလႄႈၸဝ်ႈႁဝ်းၶႅၼ်းတေႃႇမီးတင်းၸႂ်ဢၼ်ယိူၼ်ႉၶၢမ်ႇထွမ်ႇငိၼ်းၵႂၢမ်းၵဝ်ၶႃႈသေၵမ်းတီႈၶႃႈ။
“ၵူၼ်းမဵဝ်း ၵျူး၊ တင်းသဵင်ႈတင်းလူင်၊ႁုလွင်ႈၵဝ်ၶႃႈၸဵမ်မိူဝ်ႈၵဝ်ၶႃႈယင်းလဵၵ်ႉၶႃႈဢေႃႈ။ ၶဝ်ႁုၸူဝ်ႈတႃႇဢသၢၵ်ႈၵဝ်ၶႃႈ၊ႁဵတ်းၸိူဝ်ႉႁိုဝ်ယူႇသဝ်းႁဵတ်းသၢင်ႈၸဵမ်မိူဝ်ႈၵဝ်ၶႃႈယင်းမီးယူႇၼႂ်းဝၢၼ်ႈၵဝ်ႇမိူင်းလင်ၵဝ်ၶႃႈ၊ဢိၵ်ႇတင်းယူႇၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉတီႈၶႃႈဢေႃႈ။-
ပေႃးၶဝ်ၶႂ်ႈၶၢမ်ႇသၢၵ်ႈသေႇလွင်ႈဢၼ်ၵဝ်ၶႃႈၶဝ်ႈၵိူင်းဢၼ်ၵမ်ၵျၢင်ႉၶႅင်သေပိူၼ်ႈၵႃႈၼႂ်းၽႃႇသႃႇ ၵျူး၊ ဢၼ်ဝႃႈ၊ၵိူင်း ၽႃႇရိသႄး၊ ၼၼ်ႉၸိုင်၊ၶဝ်ႁုၸဵမ်မိူဝ်ႈဢွၼ်တၢင်းၼၼ်ႉတီႈၶႃႈဢေႃႈ။-
ဢၼ်ယၢမ်းမိူဝ်ႈလဵဝ်ၵဝ်ၶႃႈၸုၵ်းယူႇတီႈၼႆႈ၊လႆႈၶၢမ်ႇတၢင်းဢၼ်ၸႅတ်ႈထၢမ်ၼႆႉပဵၼ်ၵွပ်ႈပိူဝ်ႈတၢင်းဢၼ်ၵဝ်ၶႃႈမုင်ႈထႃႈမွင်းထႃႈၵတိတေႃႇၽြႃးပဵၼ်ၸဝ်ႈဢၼ်မီးဝႆႉၵႃႈတီႈပူႇမွၼ်ႇႁဝ်း၊-
ဢၼ်ၸိူဝ်ႉၶိူဝ်းၵူၼ်းမဵဝ်းႁဝ်း ဢိသရေး၊ သိပ်းသွင်မဵဝ်း၊ဢၢင်ႈဢၢၼ်းႁႂ်ႈတၢင်းမုင်ႈမွင်းၼႆႉလႆႈပျေႉၸုမ်ႇၸိုင်၊ၶဝ်ဢွၼ်ၵၼ်ၵူဝ်းၵႂၢႆႇၽြႃးပဵၼ်ၸဝ်ႈဝၼ်းဝၼ်းၶိုၼ်းၶိုၼ်းတီႈၶႃႈဢေႃႈ။ ၶုၼ်လူင်ဢၼ်မျၢတ်ႈၼႃႇတီႈၶႃႈ႟။ ၵွပ်ႈပိူဝ်ႈလွင်ႈတြႃးတၢင်းဢၼ်မုင်ႈထႃႈမွင်းထႃႈၼၼ်ႉလႄႈၵူၼ်းမဵဝ်း ၵျူး၊ ၸိူဝ်းၼႆႉႁဵတ်းဢမုသႂ်ႇၵဝ်ၶႃႈ၊ၶႃႈဢေႃႈ။-
ၵွပ်ႈသင်လႄႈသူၸဝ်ႈၸိူဝ်းဢၼ်မီးယူႇၵႃႈတီႈၼႆႈထၢင်ႇဝႃႈ၊လွင်ႈဢၼ်ၽြႃးပဵၼ်ၸဝ်ႈႁဵတ်းႁႂ်ႈၵူၼ်းတၢႆလုၵ်ႉၶိုၼ်းလိပ်းၼၼ်ႉ၊ဢမ်ႇမီးလွင်ႈတၵ်းယုမ်ႇလႆႈ၊ဝႃႈၼႆၸိူဝ်ႉၼင်ႇႁိုဝ်။
“တူဝ်ၵဝ်ၶႃႈယၢမ်ႈထၢင်ႇလႄႈဝႃႈ၊ၵႃႈၼင်ႇဢၼ်ၵဝ်ၶႃႈႁဵတ်းလႆႈၼၼ်ႉ၊ထုၵ်ႇလီႁဵတ်းတၢင်းဢၼ်ၶတ်းၵၼ်တင်း ၸဝ်ႈယေႇသု၊ ၵူၼ်းဝဵင်း ၼႃႇၸရႅတ်ႈ၊ ၼၼ်ႉ၊ၵူႈၸိူဝ်ႉၵူႈပိူင်ဢေႃႈ၊ဝႃႈၼႆလႄႈ၊-
ၵဝ်ၶႃႈႁဵတ်းလွင်ႈတၢင်းၸိူဝ်းၼၼ်ႉ၊ၵႃႈၼႂ်းဝဵင်း ယေႇရုသလႅမ်ႇ၊ တီႈၶႃႈဢေႃႈ။ ၵဝ်ၶႃႈၶၢမ်ႇဢဝ်ဢၶႂၢင်ႉတီႈယဵၸ်ႈပရေႃးႁဵၵ်ႈလူင် တင်းလၢႆသေယဝ်ႉ၊ဢဝ်ၵူၼ်းမူတ်းၸၢင်ႇၽြႃးပဵၼ်ၸဝ်ႈတင်းလၢႆ၊သႂ်ႇထွင်ႇဝႆႉ၊ဢိၵ်ႇတင်းမိူဝ်ႈဢၼ်ၶဝ်လႆႈၶၢမ်ႇတၢင်းဢၼ်ၸီႇယၢင်ႇဢဝ်တၢႆၼၼ်ႉၸိုင်၊ၵဝ်ၶႃႈႁပ်ႉတုင်းဢဝ်တီႈၶႃႈဢေႃႈ။-
ၵဝ်ၶႃႈပၼ်တၢမ်ႇၶဝ်တီႈၼႂ်းၸရွပ်ႈႁေႃးတြႃးတင်းလၢႆ၊ၶိူဝ်းၶိူဝ်းယႂ်းယႂ်းဢမ်ႇႁုလၢႆပွၵ်ႈလႄႈတဵၵ်းငႅၼ်းႁႂ်ႈပႄႇပႅတ်ႈၸႂ်ဢၼ်ၶဝ်ယုမ်ႇမၢတ်ႈၼၼ်ႉဢေႃႈ။ ၵဝ်ၶႃႈႁဵတ်းႁၢဝ်ႉႁဵတ်းၵျၢမ်းၼႃႇလူင်လၢင်ၵူၺ်းဢမ်ႇၵႃး၊ယင်းၵႂႃႇတၢင်ႇဝၢၼ်ႈတၢင်ႇမိူင်းႁႂ်ႈလႆႈၼိၵ်ႈၸၢၵ်ႈငႅၼ်းသႄးၶဝ်လူးၵွၼ်ႇတီႈၶႃႈဢေႃႈ။
“ပုၼ်ႈလွင်ႈတၢင်းၼႆႉလႄႈၵဝ်ၶႃႈၶၢမ်ႇဢဝ်ဢမိင်ႉ၊ဢိၵ်ႇတင်းဢၶႂၢင်ႉဢႃႇၼႃႇတီႈယဵၸ်ႈပရေႃးႁဵၵ်ႈလူင်တင်းလၢႆသေယဝ်ႉ၊ၶိုၼ်ႈၵႂႃႇၸူးဝဵင်း တမ်ႇမတ်ႉသၵတ်ႉ၊ ပုၼ်ႉဢေႃႈ။-
ၶုၼ်လူင်ဢၼ်မျၢတ်ႈၼႃႇတီႈၶႃႈ႟။ ၼႂ်းၶၢဝ်းတၢင်းၼၼ်ႉ၊ၶိင်ႇၵၢင်ဝၼ်းတဵင်ႈဢၼ်လႅင်းၵၢင်ႁၢဝ်ဢၼ်သၢႆဢရွင်ႇႁိူဝ်ႈလႅင်းၼႃႇသေသၢႆဝၼ်းၼၼ်ႉ၊ထွင်ႇမၢပ်ႈသႂ်ႇၵႃႈၼိူဝ်ၵဝ်ၶႃႈ၊ဢိၵ်ႇတင်းၵူၼ်းၸိူဝ်းဢၼ်ၸွမ်းၵဝ်ၶႃႈၼၼ်ႉဢေႃႈ။-
ႁဝ်းၶႃႈတင်းသဵင်ႈတင်းလူင်လူမ်ႉၵႂႃႇၵႃႈၼိူဝ်လိၼ်လႄႈၵဝ်ၶႃႈလႆႈငိၼ်းသဵင်လၢတ်ႈတေႃႇၵဝ်ၶႃႈၼႂ်းၵႂၢမ်း ႁေႇပြႄး၊ လႄႈဝႃႈ၊ ‘ သေႃးလု၊ ႟။ သေႃးလု၊ ႟။ ႁဵတ်းသင်လႄႈမႂ်းၼိၵ်ႈၸၢၵ်ႈငႅၼ်းသႄးၵဝ်။ မႂ်းႁဵတ်းႁႂ်ႈတူဝ်ၸဝ်ႈၵဝ်ႇၵိၼ်းၸႂ်မိူၼ်ၸိူဝ်ႉၼင်ႇဢၼ်ဝူဝ်းပိတ်ႉသႂ်ႇၶွၼ်ႉလႅမ်ၸဝ်ႈမၼ်းၼၼ်ႉယဝ်ႉ၊’ ဝႃႈၼင်ႇၼႆဢေႃႈ။-
ၵဝ်ၶႃႈၵေႃႈလဝ်ႈထၢမ်လႄႈဝႃႈ၊ ‘ၸဝ်ႈၽြႃးတီႈၶႃႈ။ ၸဝ်ႈႁဝ်းပဵၼ်ၽူႈလႂ်ၶႃႈ၊’ ဝႃႈၼင်ႇၼႆသေယဝ်ႉ၊မၼ်းၸဝ်ႈၶိုၼ်းလၢတ်ႈလႄႈဝႃႈ၊ ‘ၵဝ်ၸမ်ႉ၊ပဵၼ် ယေႇသု၊ ၸဝ်ႈဢၼ်မႂ်းၼိၵ်ႈၸၢၵ်ႈငႅၼ်းသႄးၼၼ်ႉဢေႃႈ။-
ၼႂ်းဝႃႈၼၼ်သေၵေႃႈ၊လုၵ်ႉလႄႈၸုၵ်းယူႇသိုဝ်ႈသိုဝ်ႈတႃႉ။ ၵဝ်ပေႃႇမႃးၵႃႈတီႈမႂ်းႁႂ်ႈလႆႈၶၢၼ်းမႂ်းဝႆႉ၊ၼႂ်းဢရႃႇၵေႃႉဢၼ်ပွင်ႁဵတ်းၵၢၼ်ၵဝ်ဢေႃႈ။ မႂ်းတၵ်းလႆႈဢဝ်ၵႃႈဢၼ်မႂ်းႁၼ်လွင်ႈၵဝ်ၼႂ်းဝၼ်းမိူဝ်ႈၼႆႉ၊ဢိၵ်ႇတင်းလွင်ႈဢၼ်ၵဝ်တေၼႄပျႃးတီႈမႂ်းထႅင်ႈၼႂ်းဝၼ်းမိူဝ်းၼႃႈၼၼ်ႉ၊ၵႂႃႇမွၵ်ႇလၢတ်ႈၶႆႈၼႄတီႈပိူၼ်ႈၸိူဝ်းၼၼ်ႉဢေႃႈ။-
ၵဝ်တၵ်းၵႄႇသႄႇဢဝ်မႂ်းၵႃႈၼႂ်းမိုဝ်းၵူၼ်းမဵဝ်း ဢိသရေး၊ ဢိၵ်ႇတင်းၵူၼ်းတၢင်ႇၸိူဝ်ႉတၢင်ႇၶိူဝ်း၊ၸိူဝ်းဢၼ်ၵဝ်တၵ်းပွႆႇၸႂ်ႉမႂ်းၵႂႃႇၸူးတီႈၶဝ်ၼၼ်ႉဢေႃႈ။-
မႂ်းတၵ်းလႆႈၵႂႃႇလႄႈၽုၺ်ႇမၢၵ်ႇတႃၶဝ်ဢွၵ်ႇသေၵႃႈၼႂ်းလပ်းသိင်ႇမႃးၸူးၼႂ်းဢၼ်လႅင်း၊ဢိၵ်ႇတင်းၶၢႆႉသေၵႃႈၼႂ်းဢႃႇၼႃႇ ၸႃႇတၢၼ်ႇ၊ မႃးၸူးတီႈၽြႃးပဵၼ်ၸဝ်ႈ၊ဢိၵ်ႇတင်းပုၼ်ႈလွင်ႈၼင်ႇႁိုဝ်ၵွပ်ႈလူၺ်ႈတၢင်းဢၼ်ၶဝ်ယုမ်ႇမၢတ်ႈၵဝ်ၼၼ်ႉလႄႈတၵ်းလႆႈၶၢမ်ႇဢဝ်ၵျေးၸူးတၢင်းဢၼ်လွတ်ႈဢပျတ်ႈ၊ဢိၵ်ႇတင်းတၵ်းလႆႈၶၢမ်ႇဢဝ်ႁပ်ႉဢဝ်တီႈယူႇတီႈသဝ်းၶဝ်၊ၵႃႈၼႂ်းမဵဝ်းၵူၼ်းဢၼ်ၽြႃးပဵၼ်ၸဝ်ႈလိူၵ်ႈဢဝ်ဝႆႉၼၼ်ႉဢေႃႈ၊’ ဝႃႈၼင်ႇၼႆတီႈၶႃႈဢေႃႈ။
“ပိူဝ်ႈၼႆလႄႈ ၶုၼ်ႁေႃၶမ်း ဢၵရိပ်ႉပႃႉ၊ တီႈၶႃႈ႟။ ပျႃႇတိၵ်ႈၼိမိၵ်ႈဢၼ်ပဵၼ်မႃးၵႃႈတီႈၵၢင်ႁၢဝ်ၼၼ်ႉ၊ယင်းဢမ်ႇထွမ်ႇဢဝ်လႄႈၵဝ်ၶႃႈဢမ်ႇယူႇလႆႈၶႃႈ။-
ၵဝ်ၶႃႈတႄႇၸႃႉႁေႃးတြႃးၵႃႈၼႂ်းဝဵင်း တမ်ႇမတ်ႉသၵတ်ႉ၊ ဢွၼ်တၢင်း၊လိုၼ်းၼၼ်ႉ၊တေႁေႃးၵႃႈတီႈဝဵင်း ယေႇရုသလႅမ်ႇ၊ သေယဝ်ႉ၊ႁေႃးၵႃႈၼႂ်းမိူင်း ယုတႃႉ၊ ၵူႈတီႈၵူႈလႅၼ်၊ဢိၵ်ႇတင်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ၊ႁႂ်ႈၶဝ်ၶုၵ်းၸႂ်လႆႈမႆႈၸႂ်ဢပျတ်ႈတူဝ်ၸဝ်ႈၵဝ်ႇသေယဝ်ႉ၊ပိၼ်ႇၸႂ်မႃးၸူးၽြႃးပဵၼ်ၸဝ်ႈသေလႄႈၵမ်ၵျၢင်ႉၸွမ်းၵႃႈၼင်ႇဢၼ်ၶဝ်လႆႈပိၼ်ႇၸႂ်ၸူးၽြႃးပဵၼ်ၸဝ်ႈၼၼ်ႉတီႈၶႃႈဢေႃႈ။-
ၵွပ်ႈပိူဝ်ႈလွင်ႈတၢင်းၼႆႉလႄႈ ၵူၼ်းမဵဝ်း ၵျူး၊ တင်းလၢႆတိဢဝ်ၵဝ်ၶႃႈယၢမ်းမိူဝ်ႈဢၼ်ၵဝ်ၶႃႈယင်းမီးယူႇ၊ၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉသေယဝ်ႉ၊ၵျၢမ်ႇပွင်ႁႂ်ႈလႆႈဢဝ်ၵဝ်ၶႃႈတၢႆၶႃႈဢေႃႈ။-
ၼႂ်းဝႃႈၼၼ်သေၵေႃႈ၊တေႃႇထိုင်ႁွတ်ႈဝၼ်းမိူဝ်ႈၼႆႉ၊ၵဝ်ၶႃႈလႆႈၶၢမ်ႇဢဝ်တၢင်းဢၼ်ၽြႃးပဵၼ်ၸဝ်ႈမႃႉၸႃႉၸွႆႈထႅမ်ဢၼ်လႆႈၸုၵ်းယူႇၽၢႆႇၼႃႈသူၸဝ်ႈ၊ၸဵမ်လဵၵ်ႉၸဵမ်ယႂ်ႇတင်းသဵင်ႈတင်းလူင်လႄႈလႆႈၶၢမ်ႇသၢၵ်ႈသေႇယူႇၶႃႈဢေႃႈ။ ၵႃႈဢၼ်ၵဝ်ၶႃႈမွၵ်ႇလၢတ်ႈၸိူဝ်းၼႆႉ၊ပဵၼ်ဢၼ်လဵဝ်ၵၼ်တင်းတြႃး မူဝ်းသေႇ၊ ဢိၵ်ႇတင်းတြႃးပရေႃးၽႅတ်ႈတင်းလၢႆႁေႃးဝႆႉဝႃႈ၊တၵ်းပဵၼ်မႃးၸိူဝ်းၼၼ်ႉ၊-
ပဵၼ်လွင်ႈဢၼ်ဝႃႈ၊ ၸဝ်ႈၶရိၸ်ႈ၊ တၵ်းလႆႈၶၢမ်ႇတၢႆ၊ဢိၵ်ႇတင်းလွင်ႈဢၼ်မၼ်းၸဝ်ႈတၵ်းလႆႈပဵၼ်ၵေႃႉဢၼ်လုၵ်ႉၵႃႈတၢင်းတၢႆၶိုၼ်းလိပ်းဢွၼ်တၢင်းပိူၼ်ႈလႄႈပၼ်ဢၼ်လႅင်းတြႃးတီႈၵူၼ်းမဵဝ်း ၵျူး၊ ၶဝ်၊ဢိၵ်ႇတင်းတီႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၼၼ်ႉ၊ယူႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်သြႃႇ ပေႃးလု၊ လၢတ်ႈၵႂၢမ်းၶႄတူဝ်ၸဝ်ႈၵဝ်ႇၸိူဝ်ႉၼင်ႇၼၼ်ယဝ်ႉၼၼ်ႉၸိုင်၊ၶုၼ် ၽိတ်ႉတု၊ ႁွင်ႉသႅၼ်ႇလႄႈဝႃႈ၊ “ ပေႃးလု၊ ႟။ မႂ်းယွင်ႇယဝ်ႉ။ မႂ်းသွၼ်ဢဝ်ဢတၢတ်ႈပိင်ႇၺႃႇၼမ်ၼႃႇလႄႈပဵၼ်ၵူၼ်းယွင်ႇၵႂႃႇယဝ်ႉ၊” ဝႃႈၼင်ႇၼႆဢေႃႈ။
သြႃႇ ပေႃးလု၊ ၵေႃႈၶိုၼ်းလၢတ်ႈလႄႈဝႃႈ၊ “ၶုၼ်ဢၼ်ယႂ်ႇမျၢတ်ႈၼႃႇတီႈၶႃႈ႟။ ၵဝ်ၶႃႈ၊ဢမ်ႇယွင်ႇၶႃႈ။ ၵဝ်ၶႃႈမီးႁူဝ်ၸႂ်ဢၼ်လီလႄႈလၢတ်ႈၵႂၢမ်းဢၼ်ၸိုဝ်ႈၸႂ်ႈၶႃႈဢေႃႈ။-
ၶုၼ်ႁေႃၶမ်း ဢၵရိပ်ႉပႃႉ၊ တီႈၶႃႈ႟။ ပိူဝ်ႈဢၼ်ၸဝ်ႈႁဝ်းပဵၼ်ၶုၼ်ဢၼ်ၸၢင်ႈႁုၸၢင်ႈႁၼ်လႄႈၵဝ်ၶႃႈႁတ်းလၢတ်ႈလႅင်းလႅင်းတီႈၶႃႈဢေႃႈ။ ၵဝ်ၶႃႈယုမ်ႇလွင်ႈဢၼ်ၸဝ်ႈႁဝ်းႁုမၢတ်ႈလွင်ႈတၢင်းၸိူဝ်းၼႆႉၵူႈၸိူဝ်ႉၵူႈပိူင်၊ၵွပ်ႈပိူဝ်ႈလွင်ႈတၢင်းၸိူဝ်းၼႆႉ၊ပဵၼ်လွင်ႈတၢင်းဢၼ်ႁဵတ်းတီႈၸွၵ်ႉတီႈၸဵင်ႇဢမ်ႇၸႂ်ႈၼၼ်ႉတီႈၶႃႈဢေႃႈ။-
ၶုၼ်ႁေႃၶမ်း ဢၵရိပ်ႉပႃႉ၊ တီႈၶႃႈ။ ၸွင်ႇၸဝ်ႈႁဝ်းယုမ်ႇၵျၢမ်းပရေႃးၽႅတ်ႈၸိူဝ်းၼၼ်ႉၶႃႈႁိုဝ်း။ ၸဝ်ႈႁဝ်းယုမ်ႇယူႇဝႃႈၼႆ၊ၵဝ်ၶႃႈႁုယူႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်း ဢၵရိပ်ႉပႃႉ၊ ၵေႃႈလၢတ်ႈတီႈသြႃႇ ပေႃးလု၊ လႄႈဝႃႈ၊ “ၼႂ်းၸူဝ်ႈၵႅပ်ႉဢွၼ်ႇၼိုင်ႈၵူၺ်း၊မႂ်းထၢင်ႇဝႃႈမႂ်းတၵ်းၸူဝ်းဢဝ်ၵဝ်ပဵၼ် ၶရိၸ်ႈယၢၼ်ႇ၊ လႆႈၼႆႁိုဝ်း၊” ဝႃႈၼင်ႇၼႆဢေႃႈ။
သြႃႇ ပေႃးလု၊ ၶိုၼ်းလၢတ်ႈဝႃႈ၊ “ဢဝ်တင်းၶေႃႈၵႂၢမ်းဢိတ်းဢွၼ်ႇၼိုင်ႈၵူၺ်းသေဢမ်ႇဝႃႈ၊ဢဝ်တင်းၶေႃႈၵႂၢမ်းၼမ်ၼမ်သေၸူဝ်းဢဝ်ၸဝ်ႈႁဝ်းၼၼ်ႉ၊ၼွၵ်ႈသေၸိူၵ်ႈလဵၵ်းၸိူဝ်းၼႆႉ၊ၵူၼ်းၵႃႈဢၼ်ငိၼ်းၵႂၢမ်းၵဝ်ၶႃႈဝၼ်းမိူဝ်ႈၼႆႉၵူႈၵေႃႉၵူႈၵူၼ်း၊တၵ်းပဵၼ်ၸိူဝ်ႉၼင်ႇဢၼ်ၵဝ်ၶႃႈပဵၼ်ယူႇၼႆႉၸိုင်၊ၵဝ်ၶႃႈသူးတွင်းတီႈၽြႃးပဵၼ်ၸဝ်ႈယူႇၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၸႃႉၸဵမ်ၶုၼ်ႁေႃၶမ်း ဢၵရိပ်ႉပႃႉ၊ တင်းၶုၼ် ၽိတ်ႉတု၊ တင်းၼၢင်း ပေႇရၼိတ်ႉ၊ ဢိၵ်ႇတင်းၵူၼ်းဢၼ်ၼင်ႈၸွမ်းၶဝ်ၸိူဝ်းၼၼ်ႉတင်းသဵင်ႈတင်းလူင်ဢွၼ်ၵၼ်လုၵ်ႉလႄႈ၊-
မိူဝ်ႈဢၼ်ဢွၵ်ႇၵႂႃႇယူႇၼၼ်ႉၸိုင်၊ၶဝ်ၼင်ႇၵၼ်ၵၼ်လၢတ်ႈတီႈၵၼ်လႄႈဝႃႈ၊ “ၵေႃႉၼႆႉဢမ်ႇႁဵတ်းၽိတ်းဢမုဢၼ်ထိူၵ်ႈလႆႈၶၢမ်ႇတၢႆယင်းဢမ်ႇၵႃး၊ဢမ်ႇထိူၵ်ႈၶၢမ်ႇလႆႈတူၵ်းထွင်ႇၵူၺ်း၊” ဝႃႈၼင်ႇၼႆဢေႃႈ။-
ၶုၼ်ႁေႃၶမ်း ဢၵရိပ်ႉပႃႉ၊ လၢတ်ႈတီႈၶုၼ် ၽိတ်ႉတု၊ လႄႈဝႃႈ၊ “သင်မၼ်းဢမ်ႇလႆႈလၢတ်ႈဝႃႈ၊တၵ်းယွၼ်းႁႂ်ႈလႆႈၶၢမ်ႇၸႅတ်ႈသေးတီႈၸဝ်ႈမုၼ်ယႂ်ႇၶုၼ်ႁေႃၶမ်းၸိုင်၊ထုၵ်ႇလီပွႆႇႁႂ်ႈမၼ်းလွတ်ႈယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၶုၼ် ၽိတ်ႉတု၊ ႁႂ်ႈႁဝ်းၶီႇႁိူဝ်းသၢင်းၽေႃးၵႂႃႇၸူးမိူင်း ဢိတလီႇ၊ သေယဝ်ႉ၊ၶဝ်ဢဝ်သြႃႇ ပေႃးလု၊ တင်းၵူၼ်းထွင်ႇၵမ်ႈၽွင်ႈဢၼ်လႆႈၶၢမ်ႇတၢင်းဢၼ်ဢၢပ်ႈပၼ်ၵႃႈၼႂ်းမိုဝ်းၶုၼ်သိုၵ်း ၵျူးလိယတ်ႉ၊ တပ်ႉသိုၵ်း ရူဝ်းမႃႉ၊ ဢၼ်ဝႃႈ၊ “တပ်ႉသိုၵ်းၸဝ်ႈမုၼ်ယႂ်ႇၶုၼ်ႁေႃၶမ်း” ၼၼ်ႉဢေႃႈ။-
ႁဝ်းလႆႈၶဝ်ႈၵႃႈၼႂ်းႁိူဝ်းသၢင်းၽေႃးဢၼ်လုၵ်ႉသေၵႃႈတီႈ ဢႃႇတရႃႉမုတ်ႉတိ၊ မႃးဢၼ်တၵ်းဢွၵ်ႇၵႂႃႇၸွမ်းၽင်ႇပၢင်ႇလၢႆႇမိူင်း ဢႃႇသိ၊ ၼၼ်ႉသေလႄႈဢွၵ်ႇတၢင်းၵႂႃႇဢေႃႈ။ ဢႃႇရိတ်ႉတႃႇၶု၊ ၵူၼ်းဝဵင်း ထိတ်ႉသႃႇလေႃးၼိၵ်ႈ၊ မိူင်း မႃႇၵေႇတေႃးၼိ၊ ၼၼ်ႉၵေႃႈပႃးၸွမ်းႁဝ်းၵႂႃႇဢေႃႈ။-
ၼႂ်းဝၼ်းမိူဝ်ႈၽုၵ်ႈႁဝ်းႁိူဝ်းသၢင်းၽေႃးႁဝ်းသိူၵ်ႈၵႃႈတီႈဝဵင်း ၸိတုၼ်ႇ၊ သေယဝ်ႉ၊ၶုၼ်သိုၵ်း ၵျူးလိယတ်ႉ၊ ႁဵတ်းၵျေးၸူးတီႈသြႃႇ ပေႃးလု၊ ပၼ်ဢၶႂၢင်ႉႁႂ်ႈမၼ်းၵႂႃႇႁႃလႄႇၵႃႈတီႈၵေႃႉသႄႈမၼ်းတင်းလၢႆလႄႈၶၢမ်ႇဢဝ်တၢင်းဢၼ်ၶဝ်ႁဵတ်းလဵင်ႉႁဵတ်းလူဢေႃႈ။-
ႁဝ်းၸင်ႇသမ်ႉဢွၵ်ႇသေၵႃႈတီႈၼၼ်ႈၵႂႃႇသေလႄႈပိူဝ်ႈဢၼ်လူမ်းမႃးဢမ်ႇထုၵ်ႇသၢႆတၢင်းႁဝ်းၼၼ်ႉ၊ႁဝ်းလဵပ်ႈၸွမ်းၵုၼ် သႆးပရၢတ်ႈ၊ ၽၢႆႇဢၼ်လပ်ႉလူမ်းၵႂႃႇလႄႈ၊-
ၶၢမ်ႈပၢင်ႇလၢႆႇမိူင်း ၵိလိၵိ၊ တင်းမိူင်း ပမ်ႇပုလိ၊ သေယဝ်ႉ၊ႁွတ်ႈထိုင်ၵႃႈတီႈဝဵင်း မုရႃႉ၊ မိူင်း လုၵိ၊ ၵႂႃႇဢေႃႈ။-
တီႈဝဵင်းၼၼ်ႉ၊ၶုၼ်သိုၵ်းထူပ်းႁၼ်ႁိူဝ်းသၢင်းၽေႃးလမ်းၼိုင်ႈဢၼ်လုၵ်ႉသေၵႃႈတီႈဝဵင်း ဢႃႇလေႇၸၼ်ႇတရီးယႃး၊ မႃး၊ဢၢင်ႈတၵ်းၵႂႃႇၸူးမိူင်း ဢိတလီႇ၊ ၼၼ်ႉလႄႈမၼ်းဢဝ်ႁဝ်းၶီႇႁိူဝ်းသၢင်းၽေႃးၼၼ်ႉၵႂႃႇဢေႃႈ။
ႁဝ်းလႆႈၵႂႃႇလွႆးလွႆးၵူၺ်းလႄႈသဵင်ႈၶိင်ႇဝၼ်းၼမ်ၼႃႇ၊ၼႂ်းတၢင်းဢၼ်ယၢပ်ႇၽိုတ်ႇတုၵ်ႉၶႃႉၼႃႇလူင်လၢင်ႁွတ်ႈထိုင်ၵႂႃႇၵႃႈတီႈဢၼ်သိုဝ်ႈၵၼ်တင်းဝဵင်း ၵၼိတ်ႉ၊ သေယဝ်ႉ၊ပိူဝ်ႈဢၼ်လူမ်းထူဝ်းမႃးဢမ်ႇထုၵ်ႇၼၼ်ႉလႄႈ၊ႁဝ်းဢမ်ႇၸၢင်ႈၵႂႃႇထႅင်ႈၽၢႆႇၼႃႈလႃးလႃးယဝ်ႉၸင်ႇ၊လဵပ်ႈၸွမ်းၵုၼ် ၵရေႇတေႇ၊ ၵႂႃႇၽၢႆႇဢၼ်လပ်ႉလူမ်းၼၼ်ႉလႄႈပူၼ်ႉၵုၼ်ယွၼ်ႇ သႃႇလမုၼ်ႇ၊ ၵႂႃႇဢေႃႈ။-
ဢွၼ်ၵၼ်ၶတ်းၸႂ်ၵျူဝ်းၸႃးဢဝ်ႁိူဝ်းသၢင်းၽေႃးႁဝ်းလဵပ်ႈၸွမ်းၵုၼ်ယွၼ်ႇၼၼ်ႉၵႂႃႇလူၺ်ႈတၢင်းဢၼ်ယၢပ်ႇၽိုတ်ႇၼႃႇယဝ်ႉၸင်ႇႁွတ်ႈထိုင်ၵႂႃႇၵႃႈတီႈဢၼ်ႁွင်ႉဝႃႈ၊တႃႈႁိူဝ်းလပ်ႉလူမ်းဢၼ်ၸမ်ၵၼ်တင်းဝဵင်း လႃႇသေး၊ ၼၼ်ႉဢေႃႈ။
ႁဝ်းလႆႈၸႂ်ႉဢၶိင်ႇပႅတ်ႈၼမ်ၼႃႇၵႃႈတီႈၼၼ်ႈသေယဝ်ႉ၊ပုၼ်ႈတၵ်းသိုပ်ႇဢွၵ်ႇတၢင်းၵႂႃႇၵေႃႈမီးၽေးၼမ်ၼႃႇ၊ၵွပ်ႈပိူဝ်ႈဝၼ်းၵမ်သိၼ်ဢၼ်ဢမ်ႇၵိၼ်တၢင်းၵိၼ်ၼၼ်ႉၵေႃႈပူၼ်ႉၵႂႃႇယဝ်ႉလႄႈ၊-
သြႃႇ ပေႃးလု၊ ၸင်ႇပၼ်သတိတီႈၶဝ်လႄႈဝႃႈ၊ “ၵူၼ်းတင်းလၢႆၶဝ်႟။ ပေႃးၶၢမ်ႈပၢင်ႇလၢႆႇတေႃႈလဵဝ်ၼႆႉၸိုင်၊ၵဝ်ႁုႁၼ်လွင်ႈဢၼ်တေမီးၽေးၼမ်ၼႃႇလႄႈႁိူဝ်းသၢင်းၽေႃး၊ဢိၵ်ႇတင်းၵုၼ်ႇသိၼ်ၶူဝ်းလဵင်းၵူၺ်းဢမ်ႇၵႃး၊ဢသၢၵ်ႈႁဝ်းၵေႃႈၸၢင်ႈတၵ်းသုမ်းၸွမ်းလူးၵွၼ်ႇဢေႃႈ၊” ဝႃႈၼင်ႇၼႆဢေႃႈ။-
ၼႂ်းဝႃႈၼၼ်သေၵေႃႈ၊ၶုၼ်သိုၵ်းၼၼ်ႉထွမ်ႇဢဝ်ၵႂၢမ်းၵူၼ်းၶတ်းႁၢင်ႁိူဝ်း၊ဢိၵ်ႇတင်းၵူၼ်းဢွၼ်ႁူဝ်ၼႂ်းႁိူဝ်းသၢင်းၽေႃးလၢတ်ႈၼၼ်ႉၼႃႇသေၵႂၢမ်းဢၼ်သြႃႇ ပေႃးလု၊ လၢတ်ႈၼၼ်ႉဢေႃႈ။-
ၵွပ်ႈပိူဝ်ႈတႃႈႁိူဝ်းၼၼ်ႉ၊ဢမ်ႇထုၵ်ႇလီသွၼ်ႈယူႇၼႂ်းၶၢဝ်းၶိင်ႇၵတ်းလႄႈၵူၼ်းၵမ်ႈၼမ်ပၼ်သတိႁႂ်ႈဢဝ်ႁိူဝ်းသၢင်းၽေႃးဢွၵ်ႇၵႂႃႇသေလႄႈၵျူဝ်းၸႃးႁႂ်ႈၶိုတ်းထိုင်ဝဵင်း ၽိၼိတ်ႉ၊ သေယဝ်ႉ၊ပေႃးပဵၼ်လႆႈၸိုင်၊ႁႂ်ႈလႆႈၵႂႃႇသွၼ်ႈယူႇၸူဝ်ႈၶၢဝ်းၶိင်ႇၵတ်းၵႃႈတီႈတႃႈႁိူဝ်းၼၼ်ႉဢေႃႈ။ တႃႈႁိူဝ်း ၽိၼိတ်ႉ၊ ၸမ်ႉ၊မီးၼႂ်းၵုၼ် ၵရေႇတေႇ၊ ၽၢႆႇတၢင်းဝၼ်းတူၵ်းၸဵင်ႇႁွင်ႇ၊ဢိၵ်ႇတင်းၽၢႆႇတၢင်းဝၼ်းတူၵ်းၸဵင်ႇၸၢၼ်းၼၼ်ႉဢေႃႈ။
မိူဝ်ႈဢၼ်လူမ်းတၢင်းၸၢၼ်းပတ်ႉမႃးလွႆးလွႆးယူႇၼၼ်ႉၸိုင်၊ၶဝ်ထၢင်ႇတေၶိုတ်းထိုင်ၸွမ်းၼင်ႇဢၵျၢမ်ႇၶဝ်လႆႈလႄႈတိုတ်ႉထွၼ်ဢဝ်ၶေႃလဵၵ်းၶတ်းႁိူဝ်းဢွၵ်ႇသေယဝ်ႉ၊ၵႃႈၼင်ႇဢၼ်လဵပ်ႈၸမ်ႁိမ်းၽင်ႇလႆႈၼၼ်ႉႁႂ်ႈလဵပ်ႈၸွမ်းၽင်ႇၵုၼ် ၵရေႇတေႇ၊ ၵႂႃႇဢေႃႈ။-
ၵူၺ်းၵႃႈ၊လူမ်းၽိဝ်ႁုင်ဢၼ်လႆႈၸိုဝ်ႈလူမ်းၽၢႆႇတၢင်းဝၼ်းဢွၵ်ႇၸဵင်ႇႁွင်ႇလုၵ်ႉသေၵႃႈတီႈၵုၼ်ထူဝ်းပတ်ႉမႃးၵမ်းလဵဝ်လႄႈ၊-
ထူဝ်းပတ်ႉသႂ်ႇႁိူဝ်းသၢင်းၽေႃး၊သမ်ႉပေႃးဢမ်ႇၶၢမ်ႇလူမ်းလႆႈ၊ႁဝ်းၵေႃႈႁႅင်းဢူၼ်ႈယဝ်ႉလႄႈပွႆႇလွင်ႈၵႂႃႇၸွမ်းႁႅင်းလူမ်းသေဢေႃႈ။-
ၼႂ်းမိူဝ်ႈဢၼ်ႁဝ်းယင်းတိုၵ်ႉလဵပ်ႈၵႂႃႇၽၢႆႇတၢင်းဢၼ်လပ်ႉလူမ်းတီႈၵုၼ်ဢွၼ်ႇ ၵလေႃးတေႇ၊ ယူႇၼၼ်ႉၸိုင်၊ႁဝ်းၺႃးၽေးဢၼ်ယၢပ်ႇၼႃႇလႄႈၶတ်းၸႂ်ၵျူဝ်းၸႃးဢဝ်ႁိူဝ်းဢွၼ်ႇၸိူဝ်းဢၼ်ႁွႆႈၵွပ်ႈၸွမ်းႁိူဝ်းသၢင်းၽေႃးၼၼ်ႉတၵ်းဢမ်ႇလုၸိုင်၊-
တိုတ်ႉတၢင်ႇၵႃႈၼိူဝ်ႁိူဝ်းသၢင်းၽေႃးသေလႄႈ ဢဝ်ၸိူၵ်ႈမတ်ႉၸပ်းႁိူဝ်းသၢင်းၽေႃးဝႆႉမၼ်ႈမၼ်ႈသေဢေႃႈ။ ပိူဝ်ႈဢၼ်ၶဝ်ၵူဝ်ႁိူဝ်းသၢင်းၽေႃးတၵ်းပၢၼ်ႉႁၢတ်ႇသၢႆးႁိမ်းၽင်ႇမိူင်း လိပ်ႉပီးယႃး၊ ၼၼ်ႉၸိုင်၊ၶဝ်သိမ်းဢဝ်လၢင်းယၢၼ်းလူင်းသေယဝ်ႉ၊ပွႆႇႁိူဝ်းသၢင်းၽေႃးလွင်ႈၸွမ်းသၢႆလူမ်းၵႂႃႇဢေႃႈ။-
ၽူၼ်လူင်လူမ်းလူင်ယင်းပတ်ႉထူဝ်းယူႇၶိူဝ်းၶိူဝ်းလႄႈဝၼ်းမိူဝ်ႈၽုၵ်ႈၶဝ်ဢဝ်ၵုၼ်ႇသိၼ်ၶူဝ်းလဵင်းၵမ်ႈၽွင်ႈထိမ်ႈတူၵ်းဢေႃႈ။-
ထႅင်ႈဝၼ်းၼိုင်ႈၼၼ်ႉ၊ၶဝ်သမ်ႉဢဝ်ၶိူင်ႈၸႂ်ႉၶိူင်ႈတိုဝ်းႁိူဝ်းသၢင်းၽေႃးၵမ်ႈၽွင်ႈထိမ်ႈတူၵ်းထႅင်ႈဢေႃႈ။-
ႁဝ်းယင်းဢမ်ႇလႆႈႁၼ်ၵၢင်ဝၼ်း၊ဢမ်ႇလႆႈႁၼ်လၢဝ်လၢႆဝၼ်းယဝ်ႉလႄႈ၊ၽူၼ်လူင်လူမ်းလူင်ယင်းတိုၵ်ႉႁႅင်းယႂ်ႇၼႃႇဢေႃႈ။ မိူဝ်ႈၼၼ်ႉ၊ႁဝ်းဢမ်ႇမီးတီႈမုင်ႈမွင်းဢၼ်တၵ်းလႆႈလွတ်ႈဢသၢၵ်ႈၼၼ်ႉယဝ်ႉ။
မိူဝ်ႈဢၼ်ၵူၼ်းႁဝ်းဢမ်ႇလႆႈၵိၼ်တၢင်းၵိၼ်ႁိုင်ၼႃႇၼၼ်ႉၸိုင်၊သြႃႇ ပေႃးလု၊ လုၵ်ႉၸုၵ်းၽၢႆႇၼႃႈၶဝ်လႄႈလၢတ်ႈဝႃႈ၊ “ၵူၼ်းႁဝ်းၶဝ်႟။ ပေႃးသူထွမ်ႇဢဝ်ၵႂၢမ်းၵဝ်လႄႈဢမ်ႇဢွၵ်ႇသေၵႃႈတီႈၵုၼ် ၵရေႇတေႇ၊ မႃးၸိုင်၊တၵ်းၵၢင်းလွတ်ႈတင်းတၢင်းဢၼ်လုဢၼ်သုမ်းၼႆႉယဝ်ႉ။-
ၼႂ်းဝႃႈၼၼ်သေၵေႃႈ၊တေႃႈလဵဝ်ၵဝ်တိုၵ်းယူင်းသူ၊ႁႂ်ႈဢွၼ်ၵၼ်မီးၸႂ်ႁႅင်းယႂ်ႇယူႇတႃႉ။ ၸၢင်ႈၶႄးႁိူဝ်းသၢင်းၽေႃးၼႆႉတၵ်းလုသုမ်းသေၵေႃႈ၊ၼႂ်းသူၼႆႉဢမ်ႇလႆႈလုသုမ်းဢသၢၵ်ႈသေၵေႃႉသေၵူၼ်း။-
လွင်ႈမၼ်းၸမ်ႉ၊ၶိုၼ်းပူၼ်ႉမႃးၼႆႉၵူၺ်းတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈဢၼ်ဢုပ်ႉပိူင်ႇၵဝ်၊ဢၼ်ၵဝ်ၵူဝ်းၵႂၢႆႇၼၼ်ႉပေႃႇမႃးတီႈၵဝ်လႄႈ၊-
လၢတ်ႈဝႃႈ၊ ‘ ပေႃးလု၊ ႟။ ယႃႇပေမႆႈၸႂ်။ မႂ်းတၵ်းလႆႈႁွတ်ႈထိုင်ၵႃႈတီႈၽၢႆႇၼႃႈၸဝ်ႈမုၼ်ယႂ်ႇၶုၼ်ႁေႃၶမ်း ၵေႇသႃႇ၊ ဢေႃႈ။ ၽြႃးပဵၼ်ၸဝ်ႈမီးၸႂ်လီၸႂ်ဝၢၼ်ၵႃႈၼိူဝ်မႂ်းလႄႈတၵ်းဢမ်ႇႁႂ်ႈဢသၢၵ်ႈၵူၼ်းၸိူဝ်းဢၼ်ၶီႇႁိူဝ်းသၢင်းၽေႃးၸွမ်းမႂ်းၼၼ်ႉ၊လႆႈလုလႆႈသုမ်းသေၵေႃႉသေၵူၼ်း၊’ ဝႃႈၼင်ႇၼႆယဝ်ႉ။-
ပိူဝ်ႈၼႆလႄႈၵူၼ်းႁဝ်းၶဝ်႟။ မီးၸႂ်ဢၼ်ႁႅင်းယႂ်ႇယူႇတႃႉ။ ပိူဝ်ႈဢၼ်ၵဝ်ယုမ်ႇမၢတ်ႈၽြႃးပဵၼ်ၸဝ်ႈၼၼ်ႉလႄႈတၵ်းပဵၼ်ၸွမ်းၵႃႈၼင်ႇဢၼ်မၼ်းၸဝ်ႈလၢတ်ႈတီႈၵဝ်ၼၼ်ႉဢေႃႈ။-
ၼႂ်းဝႃႈၼၼ်သေၵေႃႈ၊ႁိူဝ်းသၢင်းၽေႃးႁဝ်းၼႆႉၸိုင်၊တၵ်းလႆႈပဵဝ်ၵႂႃႇတၢင်ႇဝႆႉၵႃႈၼိူဝ်ၵုၼ်၊သေၵုၼ်ၵုၼ်ဢေႃႈ၊” ဝႃႈၼင်ႇၼႆဢေႃႈ။
ၶမ်ႈဢၼ်ထူၼ်ႈထိုင်သိပ်းသီႇဝၼ်းၼၼ်ႉ၊ႁိူဝ်းသၢင်းၽေႃးႁဝ်းလႆႈၶၢမ်ႇတၢင်းဢၼ်ထိပ်ႇၵႂႃႇထိပ်ႇၶိုၼ်းယူႇၵႃႈၼႂ်းပၢင်ႇလၢႆႇ မေႇတိထေးရီးယၼ်း၊ ၼၼ်ႉယူႇဢေႃႈ။ ထိုင်ၶိင်ႇတဵင်ႈၶိုၼ်းမႃး၊ၵူၼ်းႁိူဝ်းသၢင်းၽေႃးၸိူဝ်းၼၼ်ႉထၢင်ႇဝႃႈ၊ႁဝ်းၸမ်တၵ်းႁွတ်ႈႁိမ်းၽင်ႇသေတီႈတီႈလႄႈ၊-
ၶဝ်ယွၼ်ႇၸိူၵ်ႈလူင်းႁႂ်ႈလႆႈယႅင်ႇၸၢမ်းတူၺ်းၼမ်ႉလႄႈထူပ်းႁၼ်ၼမ်ႉလိုၵ်ႉသၢဝ်းဝႃးဢေႃႈ။ ၵႂႃႇထႅင်ႈဢိတ်းၼိုင်ႈသေယဝ်ႉ၊သမ်ႉယႅင်ႇၸၢမ်းတူၺ်းထႅင်ႈလႄႈႁုဝႃႈ၊ၼမ်ႉလိုၵ်ႉသိပ်းႁႃႈဝႃးဢေႃႈ။-
ၶဝ်ၵူဝ်ႁိူဝ်းသၢင်းၽေႃးတၵ်းတုမ်ႉမႅၼ်ႈမၢၵ်ႇႁိၼ်လႄႈၶျႃးၶေႃလဵၵ်းဢၼ်ၶတ်းႁိူဝ်းသီႇမၢၵ်ႈတူၵ်းၽၢႆႇတၢင်းႁၢင်ႁိူဝ်းသၢင်းၽေႃးသေလႄႈ သူးတွင်းႁႂ်ႈမိူင်းလႅင်းဢေႃႈ။-
မိူဝ်ႈၼၼ်ႉ၊ၵူၼ်းႁိူဝ်းသၢင်းၽေႃးၸိူဝ်းၼၼ်ႉ၊ၵျၢမ်ႇဢၢင်ႈတၵ်းဢွၵ်ႇပၢႆႈၵႂႃႇလႄႈႁဵတ်းၼင်ႇႁၢင်ႈတၵ်းၶျႃးၶေႃလဵၵ်းၶတ်းႁိူဝ်းတူၵ်းၽၢႆႇႁူဝ်ႁိူဝ်းသၢင်းၽေႃးလႄႈဢဝ်ႁိူဝ်းဢွၼ်ႇယွၼ်ႇလူင်းဢေႃႈ။-
ၵမ်းၼၼ်ႉ၊သြႃႇ ပေႃးလု၊ လၢတ်ႈတီႈၶုၼ်သိုၵ်း၊ဢိၵ်ႇတင်းၵူၼ်းသိုၵ်းၸိူဝ်းၼၼ်ႉလႄႈဝႃႈ၊ “ပေႃးၵူၼ်းႁိူဝ်းသၢင်းၽေႃးၶဝ်ဢမ်ႇမီးၵႃႈၼိူဝ်ႁိူဝ်းသၢင်းၽေႃးယူႇၸိုင်၊သူဢမ်ႇမီးတီႈမုင်ႈမွင်းတႃႇတေလွတ်ႈဢသၢၵ်ႈလႆႈၵူၺ်း၊” ဝႃႈၼင်ႇၼႆဢေႃႈ။-
ၵူၼ်းသိုၵ်းၸိူဝ်းၼၼ်ႉၵေႃႈၽၼ်းၸိူၵ်ႈႁိူဝ်းဢွၼ်ႇၼၼ်ႉတူၵ်းပႅတ်ႈသေဢေႃႈ။
ၸူဝ်ႈဢၼ်မိူင်းဢမ်ႇပႆႇလႅင်းၼၼ်ႉ၊သြႃႇ ပေႃးလု၊ တိုၵ်းယူင်းၵူၼ်းတင်းသဵင်ႈတင်းလူင်ႁႂ်ႈၶဝ်ၵိၼ်တၢင်းၵိၼ်သေမဵဝ်းမဵဝ်းလႄႈလၢတ်ႈဝႃႈ၊ “တေႃႈလဵဝ်ၼႆႉ၊သူၶၢမ်ႇဢိုပ်းလႄႈပႂ်ႉထႃႈယူႇမီးမႃးသိပ်းသီႇဝၼ်းယဝ်ႉ။-
ပိူဝ်ႈၼႆလႄႈၵဝ်တိုၵ်းယူင်းႁႂ်ႈသူဢဝ်ၵိၼ်တၢင်းၵိၼ်သေမဵဝ်းမဵဝ်းတႃႉ။ သူလူဝ်ႇၵိၼ်ပုၼ်ႈဢၼ်တၵ်းမီးႁႅင်းဢေႃႈ။ ၶူၼ်ႁူဝ်သူတၵ်းဢမ်ႇလႆႈလုလႆႈသုမ်းသေသဵၼ်ႈ၊” ဝႃႈၼင်ႇၼႆသေယဝ်ႉ၊-
မၼ်းဢဝ်ၶဝ်ႈမုၼ်းၵမ်ႈၽွင်ႈယွင်ႈယေႃးၵျေးၸူးၽြႃးပဵၼ်ၸဝ်ႈၵႃႈတီႈၽၢႆႇၼႃႈၵူၼ်းတင်းသဵင်ႈတင်းလူင်ယဝ်ႉၸင်ႇ၊ဝိတ်းမႅင်ႇပၼ်ၵိၼ်ဢေႃႈ။-
ၶဝ်ဝႆႉၸႂ်ႁႅင်းယႂ်ႇလႄႈဢွၼ်ၵၼ်ၵိၼ်ၵူႈၵေႃႉဢေႃႈ။-
ႁဝ်းၸိူဝ်းဢၼ်မီးၼႂ်းႁိူဝ်းသၢင်းၽေႃးၼၼ်ႉ၊မီးသွင်ပၢၵ်ႇၸဵတ်းသိပ်းပၢႆႁူၵ်းၵေႃႉဢေႃႈ။-
ဝၢႆးသေၶဝ်ၵိၼ်ဢိမ်ႇယဝ်ႉၼၼ်ႉ၊ဢဝ်ၶဝ်ႈၵျုင်ႇတင်းမူတ်းထိမ်ႈပႅတ်ႈၵႃႈၼႂ်းၼမ်ႉပၢင်ႇလၢႆႇ၊ႁဵတ်းႁႂ်ႈႁိူဝ်းသၢင်းၽေႃးမဝ်မႃးဢေႃႈ။
မိူဝ်ႈဢၼ်မိူင်းလႅင်းမႃးၼၼ်ႉၸိုင်၊ၵူၼ်းႁိူဝ်းသၢင်းၽေႃးၸိူဝ်းၼၼ်ႉ၊ဢမ်ႇႁုဢမ်ႇတွင်းၽင်ႇႁိုၵ်းၼၼ်ႉပဵၼ်တီႈလႂ်ၼၼ်ႉယဝ်ႉ။ ၵူၺ်းၵႃႈ၊ၶဝ်ႁၼ်ၸဵင်ႇၵူတ်ႉႁိုၵ်းဢၼ်ၼိုင်ႈလႄႈတႅပ်းတတ်းၸႂ်ဝႃႈ၊ပေႃးပဵၼ်လႆႈၸိုင်၊ဢၢင်ႈဢၢၼ်းဢဝ်ႁိူဝ်းသၢင်းၽေႃးၵႂႃႇသိူၵ်ႈၵႃႈတီႈၼၼ်ႈဢေႃႈ။-
ပိူဝ်ႈၼႆလႄႈၶဝ်တႅပ်းၸိူၵ်ႈၶေႃလဵၵ်းဢၼ်ၶတ်းႁိူဝ်းၸိူဝ်းၼၼ်ႉၵိုတ်းၸူမ်ဝႆႉၼႂ်းၼမ်ႉပၢင်ႇလၢႆႇသေလႄႈၽွင်းယၢမ်းမိူဝ်ႈလဵဝ်ၵၼ်၊ၶဝ်ၵႄႈၸိူၵ်ႈဢၼ်မတ်ႉမႆႉလၢမ်ႈၶတ်းႁၢင်ႁိူဝ်းသေယဝ်ႉ၊ၵီႈၽုၺ်ႇလၢင်းယၢၼ်းၽၢႆႇႁူဝ်ႁိူဝ်းသၢင်းၽေႃးထွင်ႇလူမ်းၵႂႃႇၸူးၽင်ႇႁိုၵ်းယူႇဢေႃႈ။-
ႁွတ်ႈထိုင်ၵႃႈတီႈသၢႆၼမ်ႉသွင်ၽၢႆႇၸၢပ်ႈၵၼ်ၼၼ်ႉသေယဝ်ႉ၊ႁိူဝ်းသၢင်းၽေႃးၵႂႃႇပၢၼ်ႉႁၢတ်ႇလႄႈ ႁူဝ်ႁိူဝ်းသၢင်းၽေႃးၶမ်ႁၢတ်ႇသၢႆးဝႆႉ၊ယင်းဢမ်ႇတူင်ႉဢမ်ႇၼိုင်လႆႈယဝ်ႉ။ ၽၢႆႇႁၢင်ႁိူဝ်းသၢင်းၽေႃးၸမ်ႉ၊ပိူဝ်ႈဢၼ်လႅင်းၼမ်ႉပိူပ်ႈၼမ်ႉထိပ်ႇၽင်ႈႁႅင်းၼႃႇလူင်လၢင်လႄႈႁၢင်မၼ်းႁၵ်းၵႂႃႇဢေႃႈ။
ၵူၼ်းသိုၵ်းၸိူဝ်းၼၼ်ႉ၊ၵူဝ်ၵူၼ်းထွင်ႇတင်းလၢႆလုၺ်းၼမ်ႉဢွၵ်ႇပၢႆႈလွတ်ႈၵႂႃႇလႄႈဢၢင်ႈတၵ်းဢဝ်ၶဝ်တၢႆဢေႃႈ။-
ၵူၺ်းၵႃႈ၊ၶုၼ်သိုၵ်းၶႂ်ႈၵႄႇသႄႇဢဝ်ဢသၢၵ်ႈသြႃႇ ပေႃးလု၊ လႄႈ ႁၢမ်ႈတၢပ်ႈဢၵျၢမ်ႇၶဝ်ၼၼ်ႉသေယဝ်ႉ၊သင်ႇလၢတ်ႈႁႂ်ႈၶဝ်ၸိူဝ်းဢၼ်မေႃလုၺ်းၼမ်ႉၵူႈၵေႃႉဝႅၼ်လူင်းႁိူဝ်းၵႂႃႇဢွၼ်တၢင်းလႄႈလုၺ်းၼမ်ႉၵႂႃႇၸူးၵႃႈၼိူဝ်ၵုင်းဢေႃႈ။-
ၸိူဝ်းဢၼ်ၵိုတ်းၵျၢၼ်ႇဝႆႉၼၼ်ႉၸမ်ႉ၊ႁႂ်ႈၶဝ်ၶီႇမႆႉပႅၼ်ႈ၊ဢိၵ်ႇတင်းၶိူင်ႈၸႂ်ႉႁိူဝ်းသၢင်းၽေႃးတင်းလၢႆၵႂႃႇဢေႃႈ။ ၼင်ႇၼၼ်လႄႈႁဝ်းႁွတ်ႈၵႂႃႇၵႃႈၼိူဝ်ၵုင်းၵူႈၵေႃႉ၊လီလီငၢမ်းငၢမ်းဢေႃႈ။
မိူဝ်ႈဢၼ်ႁဝ်းလွတ်ႈၽေးယဝ်ႉၼၼ်ႉၸိုင်၊ႁဝ်းလႆႈႁုလွင်ႈဢၼ်ၵုၼ်ၼၼ်ႉ၊ပဵၼ်ၵုၼ်ဢၼ်မီးၸိုဝ်ႈႁွင်ႉဝႃႈ၊ၵုၼ် မေႃႇတႃႇ၊ ၼၼ်ႉဢေႃႈ။-
ၵူၼ်းဢၼ်ယူႇၵႃႈၼႂ်းၵုၼ်ၸိူဝ်းၼၼ်ႉ၊ဢဵတ်းလူႁဝ်းပိူဝ်ႈဢၼ်ၽူၼ်တူၵ်းလႄႈၵတ်းၼႃႇလူင်လၢင်ၼၼ်ႉ၊ၶဝ်သုမ်ၽႆးပၼ်သေယဝ်ႉ၊ႁပ်ႉတွၼ်ႈႁဝ်းတင်းသဵင်ႈတင်းမူတ်းဢေႃႈ။-
မိူဝ်ႈဢၼ်သြႃႇ ပေႃးလု၊ ႁွပ်ႇၽိုၼ်းသႂ်ႇၽႆးယူႇၼၼ်ႉ၊ငူးႁၢႆႉတူဝ်ၼိုင်ႈလႆႈဢၢႆၽႆးလႄႈဢွၵ်ႇမႃးၵၢပ်ႈႁွႆႈၸပ်းမိုဝ်းမၼ်းယူႇဢေႃႈ။-
ၵူၼ်းၵုၼ်ၸိူဝ်းၼၼ်ႉႁၼ်သေယဝ်ႉ၊ၼင်ႇၵၼ်ၵၼ်လၢတ်ႈတီႈၵၼ်လႄႈဝႃႈ၊ “ၵူၼ်းၵေႃႉၼႆႉႁဵတ်းႁိုဝ်ၵေႃႈ၊ပဵၼ်ၵူၼ်းဢၼ်လႆႈဢဝ်ဢသၢၵ်ႈပိူၼ်ႈတၢႆဢမၢၼ်ႇၶၼ်ပဵၼ်ယဝ်ႉ။ ပိၵ်ႉသမ်ႉ၊လွတ်ႈၽေးပၢင်ႇလၢႆႇသေၵေႃႈ၊တြႃးတၢင်းဢၼ်သိုဝ်ႈတေႃႇယင်းဢမ်ႇပၼ်ဢၶႂၢင်ႉႁႂ်ႈဢသၢၵ်ႈမၼ်းလႆႈလိပ်းယူႇ၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊သြႃႇ ပေႃးလု၊ သၼ်ႇၽႅတ်းပႅတ်ႈငူးၼၼ်ႉ၊တူၵ်းၵႃႈၼႂ်းၽႆးလႄႈဢမ်ႇပဵၼ်ၽေးၵႃႈသင်သေဢိတ်း။-
ၶဝ်ပႂ်ႉတူၺ်းမိုဝ်းမၼ်းတၵ်းၵႂ်ႈမႃး၊ဢမ်ႇၼၼ်ၵေႃႈမၼ်းတၵ်းတၢႆလႄႈလူမ်ႉၵႂႃႇၵမ်းလဵဝ်ၼၼ်ႉဢေႃႈ။ ၵူၺ်းၵႃႈ၊ၶဝ်ပႂ်ႉတူၺ်းႁိုင်ၼႃႇသေၵေႃႈမိူဝ်ႈဢၼ်ဢမ်ႇႁၼ်မၼ်းပႅၵ်ႇပိူင်ႈမႃးသေၸိူဝ်ႉသေပိူင်ၼၼ်ႉၸိုင်၊ၸႂ်ၶဝ်လႅၵ်ႈလၢႆႈသေလႄႈလၢတ်ႈဝႃႈ၊ “ၵေႃႉၼႆႉပဵၼ်ၽြႃးဢေႃႈ၊” ဝႃႈၼင်ႇၼႆဢေႃႈ။-
ၵႃႈတီႈႁိမ်းၼၼ်ႉမီးလိၼ်လွၵ်းၼိုင်ႈဢၼ်ၸဝ်ႈမၼ်းမီးၸိုဝ်ႈဝႃႈ၊ ပုပိလိ၊ ၵေႃႉပဵၼ်ပူႇၵႄႇၵုၼ်ၼၼ်ႉဢေႃႈ။ မၼ်းႁပ်ႉတွၼ်ႈဢဝ်ႁဝ်းလႄႈႁဵတ်းဝၢတ်ႈၶႅၵ်ႇတီႈႁဝ်းလီလီငၢမ်းငၢမ်းသၢမ်ဝၼ်းဢေႃႈ။-
ပေႃႈပူႇၵႄႇ ပုပိလိ၊ ၼၼ်ႉၼၢဝ်ယူႇ၊ဢိၵ်ႇတင်းတွင်ႉၵႂႃႇပႃးလိူတ်ႈလႄႈၼွၼ်းယူႇဢေႃႈ။ သြႃႇ ပေႃးလု၊ ၵႂႃႇလႄႇမၼ်းလႄႈသူးတွင်းသေယဝ်ႉ၊ဢဝ်မိုဝ်းတၢင်ႇၵႃႈၼိူဝ်မၼ်းႁဵတ်းႁႂ်ႈတၢင်းၶႆႈတၢင်းပဵၼ်မၼ်းၸိုၼ်ႈႁၢႆမႃးဢေႃႈ။-
ပိူဝ်ႈဢၼ်ပဵၼ်ၸိူဝ်ႉၼင်ႇၼၼ်လႄႈတၢင်ႇၵေႃႉတၢင်ႇၵူၼ်းဢၼ်မီးတၢင်းၶႆႈတၢင်းပဵၼ်တင်းလၢႆၼႂ်းၵုၼ်ၼၼ်ႉ၊ဢွၼ်ၵၼ်မႃးၸူးမၼ်းလႄႈလႆႈၸိုၼ်ႈႁၢႆၵႂႃႇဢေႃႈ။-
ၶဝ်ပၼ်ၶွင်ၽၢၵ်ႇလၢၵ်ႈသွင်ႇၼမ်ၼႃႇလႄႈမိူဝ်ႈဢၼ်ႁဝ်းၶီႇႁိူဝ်းသၢင်းၽေႃးဢွၵ်ႇၵႂႃႇၼၼ်ႉၸိုင်၊ၶဝ်ဢဝ်ၶိူင်ႈပိူင်ဢၼ်ႁဝ်းလူဝ်ႇၵူႈၸိူဝ်ႉၵူႈပိူင်သႂ်ႇပၼ်ပုၼ်ႈႁဝ်းၵႃႈၼႂ်းႁိူဝ်းသၢင်းၽေႃးဢေႃႈ။
ဝၢႆးသေႁဝ်းယူႇၵႃႈတီႈၵုၼ်ၼၼ်ႉသၢမ်လိူၼ်၊ႁဝ်းသမ်ႉလႆႈၶီႇႁိူဝ်းသၢင်းၽေႃးဢၼ်လုၵ်ႉသေၵႃႈတီႈဝဵင်း ဢႃႇလေႇၸၼ်ႇတရီးယႃး၊ မႃးၼၼ်ႉသေယဝ်ႉ၊သမ်ႉၵိုတ်းသွၼ်ႈယူႇၵႃႈတီႈၵုၼ်ၼၼ်ႉၼႂ်းၶၢဝ်းၶိင်ႇၵတ်းၼၼ်ႉဢေႃႈ။ ႁိူဝ်းၼၼ်ႉ၊မီးႁုၼ်ႇႁၢင်ႈသၢင်းထုၽြႃးၽႃၽႄဢၼ်ၸပ်းဝႆႉၵႃႈတီႈႁူဝ်ႁိူဝ်းမၼ်းဢေႃႈ။-
ႁဝ်းႁွတ်ႈထိုင်တီႈဝဵင်း သုရၵုတ်ႉ၊ လႄႈယူႇသဝ်းတီႈၼၼ်ႈသၢမ်ဝၼ်းဢေႃႈ။-
လုၵ်ႉသေၵႃႈတီႈၼၼ်ႈသိုပ်ႇၶီႇႁိူဝ်းသၢင်းၽေႃးၵႂႃႇထိုင်ဝဵင်း ရေႇၵျုၼ်ႇ၊ လႄႈထိုင်ဝၼ်းမိူဝ်ႈၽုၵ်ႈလူမ်းၽၢႆႇတၢင်းၸၢၼ်းထူဝ်းပတ်ႉမႃးလႄႈၼႂ်းသွင်ဝၼ်းၵူၺ်းႁဝ်းလႆႈႁွတ်ႈထိုင်တီႈဝဵင်း ပေႃႇတယေႃႇလိ၊ ဢေႃႈ။-
ၵႃႈတီႈဝဵင်းၼၼ်ႉ၊ႁဝ်းထူပ်းႁၼ်တပႄးၸဝ်ႈလႂ်လႄႈၶဝ်တွင်းပၢၼ်ႇႁႂ်ႈႁဝ်းယူႇၵႃႈတီႈၼၼ်ႈၸဵတ်းဝၼ်းလႄႈယူႇၸွမ်းၶဝ်ယဝ်ႉၸင်ႇပႆတၢင်းၵႂႃႇၸူးဝဵင်း ရူဝ်းမႃႉ၊ ဢေႃႈ။-
ၵူၼ်းဝဵင်း ရူဝ်းမႃႉ၊ ၸိူဝ်းဢၼ်ယုမ်ႇမၢတ်ႈၼၼ်ႉ၊မိူဝ်ႈဢၼ်ႁုငိၼ်းလွင်ႈဢၼ်ႁဝ်းမႃးၼၼ်ႉၸိုင်၊ၶဝ်ဢွၼ်ၵၼ်ဢွၵ်ႇမႃးႁပ်ႉႁူဝ်တၢင်းႁဝ်း၊ၵမ်ႈၽွင်ႈထိုင်ၸဵမ်ဝဵင်း ၵၢတ်ႇဢပ်ႉပိ၊ ၵမ်ႈၽွင်ႈတေႃႇထိုင်ႁွတ်ႈ ၸရွပ်ႈသၢမ်လင်၊ ဢေႃႈ။ မိူဝ်ႈဢၼ်သြႃႇ ပေႃးလု၊ ႁၼ်ၶဝ်ၼၼ်ႉၸိုင်၊ယွင်ႈယေႃးၵျေးၸူးၽြႃးပဵၼ်ၸဝ်ႈလႄႈမီးႁႅင်းၸႂ်ဢၼ်ယႂ်ႇမႃးၼႃႇလူင်လၢင်ဢေႃႈ။
မိူဝ်ႈဢၼ်ႁဝ်းႁွတ်ႈထိုင်ၵႃႈတီႈဝဵင်း ရူဝ်းမႃႉ၊ ၼၼ်ႉၸိုင်၊သြႃႇ ပေႃးလု၊ ၸမ်ႉ၊လႆႈဢၶႂၢင်ႉဢၼ်ယူႇႁင်းၵူၺ်းမၼ်းလႄႈၵူၼ်းသိုၵ်းၵေႃႉၼိုင်ႈၵူၺ်းပႂ်ႉမၼ်းဝႆႉဢေႃႈ။
ဝၢႆးသေၼၼ်ႉ၊သၢမ်ဝၼ်းၸင်ႇသြႃႇ ပေႃးလု၊ ႁွင်ႉဢဝ်ၵူၼ်းၵႄႇၵူၼ်းႁူဝ်ၵူၼ်းမဵဝ်း ၵျူး၊ ၶဝ်တင်းလၢႆ၊မႃးၸုတုမ်ၵၼ်သေယဝ်ႉ၊လၢတ်ႈတီႈၶဝ်လႄႈဝႃႈ၊ “ပီႈၼွင်ႉၶဝ်႟၊ပိၵ်ႉသမ်ႉၵဝ်ဢမ်ႇၽိတ်းဢမ်ႇပိူင်ႈၵူၼ်းမဵဝ်းႁဝ်း၊ဢိၵ်ႇတင်းထုင်းၽိင်ႈပူႇမွၼ်ႇႁဝ်းၵမ်ၵျၢင်ႉၸိူဝ်းၼၼ်ႉသေၵေႃႈၵူၼ်းဝဵင်း ယေႇရုသလႅမ်ႇ၊ ၶဝ်၊ဢဝ်ၵဝ်ၶႃႈတူၵ်းၵႅၼ်းလႄႈဢၢပ်ႈပၼ်ၵႃႈၼႂ်းမိုဝ်းၵူၼ်း ရူဝ်းမႃႉ၊ တင်းလၢႆယဝ်ႉ။-
ၶဝ်ၸႅတ်ႈထၢမ်ၸႅတ်ႈတူၺ်းၵဝ်ၶႃႈသေယဝ်ႉ၊ပိူဝ်ႈဢၼ်ဢမ်ႇထူပ်းဢပျတ်ႈဢၼ်ထိူၵ်ႈတေလႆႈၶၢမ်ႇတၢႆသေၸိူဝ်ႉသေပိူင်လႄႈၵူၼ်းမဵဝ်း ရူဝ်းမႃႉ၊ ၶဝ်ၶႂ်ႈပွႆႇလွတ်ႈယူႇဢေႃႈ။-
ၵူၺ်းၵႃႈ၊ၵူၼ်းမဵဝ်း ၵျူး၊ တင်းလၢႆႁႄႉၶႅၼ်လွင်ႈဢၼ်တၵ်းပွႆႇၵဝ်ၶႃႈလွတ်ႈၼၼ်ႉလႄႈၵဝ်ၶႃႈၸင်ႇလႆႈယွၼ်းႁႂ်ႈလႆႈၶၢမ်ႇၸႅတ်ႈသေးၵႃႈတီႈၸဝ်ႈမုၼ်ယႂ်ႇၶုၼ်ႁေႃၶမ်း ၵေႇသႃႇ၊ ဢေႃႈ။ ၼႂ်းဝႃႈၼၼ်သေၵေႃႈ၊ၵဝ်ၶႃႈဢမ်ႇမီးၸႂ်ဢၼ်တၢင်ႇဢပျတ်ႈၵႃႈၼိူဝ်ၵူၼ်းမဵဝ်းတူဝ်ၸဝ်ႈၵဝ်ႇ။-
ၵွပ်ႈၼႆလႄႈၵဝ်ၶႃႈယွၼ်းႁႂ်ႈလႆႈထူပ်းႁၼ်သူလႄႈလၢတ်ႈတေႃႇသူဢေႃႈ။ ၵွပ်ႈပိူဝ်ႈလွင်ႈတၢင်းၼႆႉလႄႈၵဝ်ၶႃႈလႆႈၶၢမ်ႇတၢင်းဢၼ်ၸိူၵ်ႈလဵၵ်းမတ်ႉဝႆႉ ၸိူဝ်ႉၼင်ႇၼႆပဵၼ်ပုၼ်ႈၸဝ်ႈဢၼ်ၵူၼ်းမဵဝ်း ဢိသရေး၊ မုင်ႈထႃႈမွင်းထႃႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၶဝ်ၵေႃႈလၢတ်ႈလႄႈဝႃႈ၊ “ႁဝ်းၶႃႈဢမ်ႇလႆႈလိၵ်ႈၵႃႈတီႈမိူင်း ယုတႃႉ၊ ဢၼ်တႅမ်ႈလွင်ႈသူၸဝ်ႈ၊ၼႂ်းပီႈၼွင်ႉဢၼ်လုၵ်ႉသေၵႃႈတီႈမိူင်းၼၼ်ႉ၊မႃးၸိူဝ်းၼၼ်ႉၵေႃႈၽူႈလႂ်သေၵေႃႉသေၵူၼ်းဢမ်ႇလၢတ်ႈဢမ်ႇဝႃႈ၊လွင်ႈဢၼ်တၢင်ႇဢပျတ်ႈတီႈၸဝ်ႈ။-
ၼႂ်းဝႃႈၼၼ်သေၵေႃႈႁဝ်းၶႃႈၶႂ်ႈထွမ်ႇၶႂ်ႈငိၼ်းဢလူဝ်ႇၵၢင်ၸႂ်ၸဝ်ႈ၊ပိူဝ်ႈဢၼ်ႁဝ်းၶႃႈႁုလွင်ႈဢၼ်၊မုၵ်ႉၸုမ်းသူၸဝ်ႈၼႆႉ၊ပဵၼ်မုၵ်ႉၸုမ်းဢၼ်ပိူၼ်ႈသႄႉသွမ်းတၢင်ႇဢပျတ်ႈၼၼ်ႉယူႇၶႃႈဢေႃႈ၊” ဝႃႈၼင်ႇၼႆဢေႃႈ။
ၼင်ႇၼၼ်ႉလႄႈ ၶဝ်ၶဵၼ်းမိုဝ်ႉၶဵၼ်းဝၼ်းဝႆႉသေယဝ်ႉ၊ၼႂ်းဝၼ်းၶဵၼ်းၼၼ်ႉၶဝ်ၼမ်ၼႃႇဢွၼ်ၵၼ်မႃးၵႃႈတီႈဢၼ်သြႃႇ ပေႃးလု၊ ယူႇသဝ်းၼၼ်ႉဢေႃႈ။ မၼ်းၵေႃႈတႄႇၸႃႉႁူဝ်ၼႂ်တေႃႇထိုင်ၶိင်ႇၵၢင်ၶမ်ႈၽုၺ်ႇဢွၵ်ႇႁေႃးလၢတ်ႈလွင်ႈမိူင်းၽြႃးပဵၼ်ၸဝ်ႈလႄႈၼင်ႇႁိုဝ်ၶဝ်တၵ်းယုမ်ႇမၢတ်ႈ ၸဝ်ႈယေႇသု၊ ၸိုင်၊ဢဝ်တင်းၵျၢမ်းတြႃး မူဝ်းသေႇ၊ ဢိၵ်ႇတင်းၵျၢမ်းတြႃးပရေႃးၽႅတ်ႈ တင်းလၢႆႁေႃးလၢတ်ႈဢေႃႈ။-
ၵမ်ႈၽွင်ႈငိၼ်းလႄႈယုမ်ႇမၢတ်ႈဢေႃႈ။ ၵမ်ႈၽွင်ႈၵေႃႈဢမ်ႇယုမ်ႇမၢတ်ႈ။-
ပိူဝ်ႈၼႆလႄႈ ၶဝ်ၼင်ႇၵၼ်ၵၼ်သၽေႃးပိူင်ႈၵၼ်၊တွပ်ႇထဵင်ၵၼ်လႄႈဢွၵ်ႇၵႂႃႇ၊ဝၢႆးသေသြႃႇ ပေႃးလု၊ လၢတ်ႈၵႂၢမ်းၶေႃႈၼိုင်ႈဢၼ်ဝႃႈ၊ “ဝိၺိၺ်ႇဢၼ်မူတ်းၸၢင်ႇၸဝ်ႈဢဝ်တင်းပရေႃးၽႅတ်ႈ ဢိသႃႇယႃႉ၊ လၢတ်ႈတီႈပူႇမွၼ်ႇသူၼၼ်ႉဝႆႉသေႇၶျႃႇလီငၢမ်းလႄႈဝႃႈ၊-
“‘ၵႂႃႇမွၵ်ႇလၢတ်ႈတီႈၵူၼ်းမဵဝ်းၼႆႉလႄႈဝႃႈ၊ သူတၵ်းငိၼ်းယူႇ၊ငိၼ်းယူႇသေၵေႃႈ၊တၵ်းဢမ်ႇႁုထွမ်ႇပွင်ႇလႅင်း။ သူတၵ်းတူၺ်းယူႇ၊တူၺ်းယူႇသေၵေႃႈတၵ်းဢမ်ႇႁၼ်။
ပိူဝ်ႈဢၼ်ၵူၼ်းမဵဝ်းၼႆႉႁူဝ်ၸႂ်ၶဝ်ၼူၵ်ႇတၼ်ၼႃႇလႄႈ ၶဝ်ဢိုတ်းႁူၶဝ်ယူႇ၊လပ်းတႃၶဝ်ဝႆႉယူႇဢေႃႈ။ ပေႃးဢမ်ႇၼၼ်တႃၶဝ်တၵ်းႁၼ်၊ႁူၶဝ် တၵ်းလႆႈငိၼ်း၊ႁူဝ်ၸႂ်ၶဝ်ၸၢင်ႈပွင်ႇၸၢင်ႈလႅင်းသေလႄႈ၊ ၶဝ်တၵ်းဝၢႆႇႁူဝ်ၶဝ်ၸူးတီႈၵဝ်လႄႈ၊ၵဝ်တၵ်းႁႂ်ႈတၢင်းၶႆႈတၢင်းပဵၼ်ၶဝ်၊ ၸိုၼ်ႈႁၢႆဢေႃႈ၊’ ၽြႃးပဵၼ်ၸဝ်ႈလၢတ်ႈဝႃႈၸိူဝ်ႉၼင်ႇၼႆယဝ်ႉ။”
သြႃႇ ပေႃးလု၊ သမ်ႉလၢတ်ႈထႅင်ႈလႄႈဝႃႈ၊ “ပိူဝ်ႈၼႆလႄႈ သူၸဝ်ႈထုၵ်ႇလီႁုလွင်ႈဢၼ်တြႃးၽြႃးပဵၼ်ၸဝ်ႈဢၼ်ဝႃႈ၊တြႃးတၢင်းဢၼ်ၵႄႇၶျွတ်ႈဢဝ်ၼၼ်ႉ၊လႆႈသူင်ႇပၼ်ၵႂႃႇၵႃႈတီႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းယဝ်ႉလႄႈၶဝ်ၵေႃႈတၵ်းထွမ်ႇဢဝ်ဢေႃႈ၊” ဝႃႈၼင်ႇၼႆဢေႃႈ။-
(ဝၢႆးသေသြႃႇ ပေႃးလု၊ လၢတ်ႈၸိူဝ်ႉၼင်ႇၼႆယဝ်ႉၼၼ်ႉၸိုင်၊ၵူၼ်းမဵဝ်း ၵျူး၊ ၸိူဝ်းၼၼ်ႉ၊ဢွၵ်ႇၵႂႃႇလႄႈမီးတၢင်းဢၼ်တွပ်ႇထဵင်ၵၼ်ႁႅင်းၼႃႇဢေႃႈ။)
သြႃႇ ပေႃးလု၊ ၵေႃႈယူႇၵႃႈၼႂ်းႁိူၼ်းဢၼ်မၼ်းၶၢတ်ႈယူႇၼၼ်ႉ၊သွင်ပီတဵမ်တဵမ်လႄႈၶၢမ်ႇၶႅၵ်ႇတီႈၵူၼ်းၸိူဝ်းဢၼ်မႃးတီႈမၼ်းတင်းသဵင်ႈတင်းလူင်ၼၼ်ႉဢေႃႈ။-
မၼ်းႁေႃးလၢတ်ႈတြႃးမိူင်းၽြႃးပဵၼ်ၸဝ်ႈ၊ဢိၵ်ႇတင်းသင်ႇသွၼ်ၼႄပျႃးလွင်ႈၽြႃးၸဝ်ႈ ယေႇသုၶရိၸ်ႈ၊ ယူႇႁတ်းႁတ်းႁၢၼ်ႁၢၼ်လွတ်ႈလွတ်ႈလႅဝ်းလႅဝ်းဢေႃႈ။ ပိုၼ်းၼႃႈၵၢၼ်တမၢၼ်ႇၸဝ်ႈယဝ်ႉယဝ်ႉဢေႃႈ။
ၵဝ် ပေႃးလု၊ ဢၼ်ပဵၼ်ၶႃႈ ၸဝ်ႈယေႇသုၶရိၸ်ႈ၊ လႄႈပဵၼ်တမၢၼ်ႇၸဝ်ႈဢၼ်ၽြႃးပဵၼ်ၸဝ်ႈလိူၵ်ႈၵဵပ်းႁွင်ႉဢဝ်ႁႂ်ႈလႆႈႁေႃးလၢတ်ႈၶၢဝ်ႇတြႃးသိူဝ်းပျေႃႇမၼ်းၸဝ်ႈၼၼ်ႉတႅမ်ႈလိၵ်ႈပၼ်ၵႂႃႇႁႂ်ႈလႆႈႁုဢေႃႈ။
ၶၢဝ်ႇတြႃးသိူဝ်းပျေႃႇၸဝ်ႈၼႆႉပဵၼ်တြႃးဢၼ်ၽြႃးပဵၼ်ၸဝ်ႈဢဝ်တင်းသူပ်းပရေႃးၽႅတ်ႈ တင်းလၢႆ ပၼ်ၵတိဝႆႉၸဵမ်မိူဝ်ႈဢွၼ်တၢင်းၼၼ်ႉလႄႈတႅမ်ႈဝႆႉၵႃႈၼႂ်းၵျၢမ်းလိၵ်ႈဢၼ်မူတ်းၸၢင်ႇၸဝ်ႈၼၼ်ႉဢေႃႈ။-
ၶၢဝ်ႇတြႃးသိူဝ်းပျေႃႇၼႆႉပဵၼ်ၶၢဝ်ႇတြႃးလွင်ႈလုၵ်ႈမၼ်းၸဝ်ႈဢၼ်ဝႃႈ၊ၸဝ်ႈၽြႃးႁဝ်း ၸဝ်ႈယေႇသုၶရိၸ်ႈ၊ ၸွမ်းၼင်ႇၸႃႇတိၵူၼ်းပဵၼ်ၸိူဝ်ႉၶိူဝ်းၶုၼ်ႁေႃၶမ်း တႃႇဝိတ်ႈ၊ လႄႈ၊-
ၸွမ်းၼင်ႇဝိၺိၺ်ႇဢၼ်မူတ်းၸၢင်ႇၸဝ်ႈၼႄပျႃးလူၺ်ႈတၼ်းၶူဝ်းဢၼ်ယႂ်ႇၼႃႇႁႂ်ႈႁုဝႃႈမၼ်းၸဝ်ႈပဵၼ်လုၵ်ႈၽြႃးပဵၼ်ၸဝ်ႈ ၵွပ်ႈပိူဝ်ႈမၼ်းၸဝ်ႈလုၵ်ႉသေၵႃႈတၢင်းတၢႆၶိုၼ်းလိပ်းမႃးၼၼ်ႉဢေႃႈ။-
ၵွပ်ႈလူၺ်ႈ၊ ၸဝ်ႈယေႇသု၊ ၼႆႉလႄႈၽြႃးပဵၼ်ၸဝ်ႈပၼ်ဢၶႂၢင်ႉၵျေးၸူးတီႈၵဝ်ႁႂ်ႈလႆႈပဵၼ်တမၢၼ်ႇၸဝ်ႈဢၼ်တၵ်းဢွၼ်ႁူဝ်ၵူၼ်းၵူႈၸိူဝ်ႉၵူႈၶိူဝ်း လႆႈယုမ်ႇမၢတ်ႈလႄႈထွမ်ႇဢဝ်ၵႂၢမ်းမၼ်းၸဝ်ႈ ၵႃႈၼႂ်းၼႃႇမႃႉၸိုဝ်ႈသဵင် ၸဝ်ႈၶရိၸ်ႈ၊ ဢေႃႈ။-
သူၸိူဝ်းဢၼ်ပဵၼ်ၵူၼ်းဝဵင်း ရူဝ်းမႃႉ၊ တင်းလၢႆၵေႃႈလႆႈၶဝ်ႈပႃးၼႂ်းတၢင်းဢၼ်ၽြႃးပဵၼ်ၸဝ်ႈႁွင်ႉဝႆႉႁႂ်ႈလႆႈပဵၼ်ၵူၼ်း ၸဝ်ႈယေႇသုၶရိၸ်ႈ၊ ၼၼ်ႉၼင်ႇၵဝ်ႇဢေႃႈ။
ပိူဝ်ႈၼႆလႄႈၵဝ်ၸင်ႇမီးလိၵ်ႈပၼ်ၵႂႃႇတီႈသူၵူၼ်းဝဵင်း ရူဝ်းမႃႉ၊ တင်းလၢႆ ဢၼ်ၽြႃးပဵၼ်ၸဝ်ႈႁဝ်းႁၵ်ႉပႅင်းလႄႈႁွင်ႉဢဝ်ဝႆႉႁႂ်ႈပဵၼ်ၵူၼ်းမူတ်းၸၢင်ႇမၼ်းၸဝ်ႈၼၼ်ႉဢေႃႈ။ ႁႂ်ႈပေႃႈႁဝ်းၶႃႈၽြႃးပဵၼ်ၸဝ်ႈဢိၵ်ႇတင်းၸဝ်ႈၽြႃးႁဝ်း ၸဝ်ႈယေႇသုၶရိၸ်ႈ၊ ပၼ်သုၵျေးၸူး ဢိၵ်ႇတင်းတၢင်းၼိမ်တီႈသူသေၵမ်းလူၺ်ႈ။
ဢွၼ်တၢင်းသေပိူၼ်ႈ ၵဝ်တၢင်ႇၵျေးၸူးၽြႃးပဵၼ်ၸဝ်ႈၵႃႈၼႂ်းၼႃႇမႃႉၸိုဝ်ႈသဵင် ၸဝ်ႈယေႇသုၶရိၸ်ႈ၊ ပုၼ်ႈသူတင်းသဵင်ႈတင်းလူင်၊ၵွပ်ႈပိူဝ်ႈၵူၼ်းမိူင်းၶူင်းၵၢင်ၵူႈတီႈၵူႈလႅၼ်လႆႈငိၼ်းၶၢဝ်ႇလွင်ႈတၢင်းယုမ်ႇမၢတ်ႈသူယဝ်ႉၼၼ်ႉဢေႃႈ။-
လွင်ႈဢၼ်ၵဝ်လၢတ်ႈၼႆႉပဵၼ်ဢၼ်မၢၼ်ႇမႅၼ်ႈၸိုဝ်ႈၸႂ်ႈယူႇဝႃႈၼႆ၊ၽြႃးပဵၼ်ၸဝ်ႈဢၼ်ၵဝ်ပႃးၸႂ်ပႃးၶေႃးထၢမ်းၵၢၼ်ဢၼ်ႁေႃးလၢတ်ႈၶၢဝ်ႇတြႃးသိူဝ်းပျေႃႇလွင်ႈလုၵ်ႈမၼ်းၸဝ်ႈၼၼ်ႉၶၢမ်ႇသၢၵ်ႈသေႇဢေႃႈ။ မၼ်းၸဝ်ႈႁုလွင်ႈဢၼ်ၵဝ်ၶုၵ်းၸႂ်လႆႈသူယူႇသေႇသေႇလႄႈသူးတွင်းပုၼ်ႈသူယူႇဢမ်ႇထၢတ်ႇၼၼ်ႉဢေႃႈ။-
ၵဝ်လဝ်ႈယွၼ်းၽြႃးပဵၼ်ၸဝ်ႈ ပေႃးမၼ်းၸဝ်ႈမီးဢလူဝ်ႇၸိုင်၊ႁႂ်ႈၵဝ်လႆႈၸဵဝ်းၵႂႃႇလႄႇသူဢေႃႈ။-
ၼင်ႇႁိုဝ်တၵ်းလႆႈပၼ်ဢဵၼ်ပၼ်ႁႅင်းသူလႄႈၽႄမႅင်ႇပၼ်ၽၢႆႇၸႂ်ဝိၺိၺ်ႇတီႈသူၸိုင်၊ၵဝ်ၶႂ်ႈထူပ်းၺႃးသူတႄႉတႄႉဢေႃႈ။-
ၼင်ႇၼၼ်လႄႈတၢင်းယုမ်ႇမၢတ်ႈသူတေပၼ်ႁႅင်းတီႈၵဝ်လႄႈတၢင်းယုမ်ႇမၢတ်ႈၵဝ်ၵေႃႈတေပၼ်ႁႅင်းတီႈသူဢေႃႈ။
ပီႈၼွင်ႉၶဝ်႟။ ၵဝ်ၶိုင်ပွင်ႁႂ်ႈလႆႈၵႂႃႇလႄႇသူလၢႆပွၵ်ႈယဝ်ႉသေၵေႃႈၵွပ်ႈမဵဝ်းၼိုင်ႈယဝ်ႉမဵဝ်းၼိုင်ႈလႄႈဢမ်ႇၸၢင်ႈၵႂႃႇဝႃႈၼႆ၊ႁုထွမ်ႇသေၵမ်း။ ၸိူဝ်ႉၼင်ႇဢၼ်ၵဝ်လႆႈဢၵျူဝ်း ၵႃႈၼႂ်းၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၶဝ်ႈပဵၼ်တပႄး ၸဝ်ႈယေႇသု၊ မႃးၼၼ်ႉ၊ၵႃႈၼႂ်းသူၼႆႉၵေႃႈၵဝ်ၶႂ်ႈလႆႈဢၵျူဝ်းၸိူဝ်ႉၼင်ႇၼၼ်ယူႇၼင်ႇၵဝ်ႇဢေႃႈ။-
ၵဝ်ပဵၼ်ၼီႈမီးတႃႇဝုၼ်ႇႁေႃးၶၢဝ်ႇတြႃးသိူဝ်းပျေႃႇပၼ်ၵူၼ်းတင်းလၢႆ၊ၸႃႉၸဵမ်ၵူၼ်းယဵၼ်ႇငႄႈတင်းၵူၼ်းလိူင်း၊ၵူၼ်းမီးပိင်ႇၺႃႇ၊တင်းၵူၼ်းဢမ်ႇမီးပိင်ႇၺႃႇတင်းလၢႆလႄႈ၊-
ၵဝ်မီးၸႂ်ၸေႇတၼႃႇႁႅင်းယႂ်ႇၼႃႇႁႂ်ႈလႆႈႁေႃးလၢတ်ႈၶၢဝ်ႇတြႃးသိူဝ်းပျေႃႇၸဝ်ႈပၼ်သူဢၼ်ပဵၼ်ၵူၼ်းဝဵင်း ရူဝ်းမႃႉ၊ ၼၼ်ႉဢေႃႈ။
ၵဝ်တိုၼ်းဢမ်ႇၵူဝ်ဢမ်ႇဢၢႆပိူၼ်ႈၼႂ်းလွင်ႈၶၢဝ်ႇတြႃးသိူဝ်းပျေႃႇၸဝ်ႈဢေႃႈ။ လွင်ႈမၼ်းၸမ်ႉ၊ၶၢဝ်ႇတြႃးသိူဝ်းပျေႃႇၸဝ်ႈပဵၼ်တၼ်းၶူဝ်းၽြႃးပဵၼ်ၸဝ်ႈဢၼ်ၸၢင်ႈၵႄႇၶျွတ်ႈဢဝ်ၶဝ်ၸိူဝ်းဢၼ်ယုမ်ႇမၢတ်ႈမၼ်းၸဝ်ႈတင်းသဵင်ႈတင်းလူင်၊ဢၼ်ၵူၼ်းမဵဝ်း ၵျူး၊ ၶဝ်လႆႈၶၢမ်ႇဢဝ်ဢွၼ်တၢင်းပိူၼ်ႈလႄႈၵူၼ်းမဵဝ်း ၵရိၵ်ႉ၊ လႆႈၶၢမ်ႇဢဝ်လိုၼ်းလင်ၼၼ်ႉဢေႃႈ။-
ၶၢဝ်ႇငၢဝ်းတြႃးသိူဝ်းပျေႃႇၸဝ်ႈၽုၺ်ႇပျႃးလၢတ်ႈၼႄလွင်ႈဢၼ်ၽြႃးပဵၼ်ၸဝ်ႈႁဵတ်းႁႂ်ႈ ၵူၼ်းႁွတ်ႈထိုင်တၢင်းဢၼ်သိုဝ်ႈတေႃႇ၊ဢၼ်တႄႇၼိူဝ်တၢင်းဢၼ်ယုမ်ႇမၢတ်ႈၸဵမ်တီႈၸႃႉတေႃႇတီႈသုတ်း၊ၼၼ်ႉဢေႃႈ။ ၸွမ်းၼင်ႇဢၼ်တႅမ်ႈဝႆႉၼႂ်းၵျၢမ်းလိၵ်ႈလႄႈဝႃႈ၊ “ၵေႃႉဢၼ်သိုဝ်ႈတေႃႇၵွပ်ႈလူၺ်ႈတၢင်းယုမ်ႇမၢတ်ႈၼၼ်ႉမၼ်းတၵ်းဢသၢၵ်ႈလိပ်းဢေႃႈ။” ဝႃႈၼင်ႇၼႆဢေႃႈ။
လွင်ႈတၢင်းဢၼ်ၽြႃးပဵၼ်ၸဝ်ႈတၵ်းၸီႇယၢင်ႇပၼ်တၢမ်ႇဢပျတ်ႈၼၼ်ႉၼႄပျႃးၵႃႈတီႈမိူင်းၽႃႉၵၢင်ႁၢဝ်ႁႂ်ႈလႆႈႁွတ်ႈထိုင်ၼိူဝ်ၶဝ်ၸိူဝ်းဢၼ်ၽိတ်းပိူင်ႈၽြႃးတြႃး၊ဢိၵ်ႇတင်းႁဵတ်းဢၼ်ႁၢႆႉမိူၵ်ႈဢမ်ႇတြႃးၵူႈၸိူဝ်ႉၵူႈပိူင်သေလႄႈ၊ဢဝ်တၢင်းႁၢႆႉမိူၵ်ႈၶဝ်လပ်ႉမွတ်ႇဝႆႉတြႃးၸဝ်ႈဢၼ်ၸႅတ်ႈမၢၼ်ႇၼၼ်ႉဢေႃႈ။-
ၽြႃးပဵၼ်ၸဝ်ႈ တၵ်းၸီႇယၢင်ႇပၼ်တၢမ်ႇၶဝ်ၵွပ်ႈပိူဝ်ႈဢၼ်ၶဝ်ထုၵ်ႇလီႁုလွင်ႈၽြႃးပဵၼ်ၸဝ်ႈၼၼ်ႉၽုၺ်ႇဝႆႉထၢင်ႇထၢင်ႇသႃးသႃးပၼ်ၶဝ်ယဝ်ႉဢေႃႈ။ ၽြႃးပဵၼ်ၸဝ်ႈၽုၺ်ႇၼႄလူင်ႉလႅင်းလီၼႃႇတီႈၶဝ်ယဝ်ႉဢေႃႈ။-
တႄႇဢဝ်ၸဵမ်မိူဝ်ႈဢၼ်ၽြႃးပဵၼ်ၸဝ်ႈၽၢၼ်ႇသၢင်းၵမ်ႇၽႃႇၼၼ်ႉၶိူင်ႈပိူင်မၼ်းၸဝ်ႈဢၼ်တႃဢမ်ႇႁၼ်လႆႈဢၼ်ဝႃႈ၊ထႃႇဝရႃႉတၼ်းၶူဝ်းမၼ်းၸဝ်ႈဢိၵ်ႇတင်းၸႂ်ၸႃႇတိဢၼ်မူတ်းၸၢင်ႇယႂ်ႇမျၢတ်ႈမၼ်းၸဝ်ႈၸိူဝ်းၼၼ်ႉႁုႁၼ်လႆႈထၢင်ႇထၢင်ႇသႃးသႃးဢေႃႈ။ ၵူၼ်းၸၢင်ႈၶႆႈၸႂ် လူတူၺ်းၶိူင်ႈပိူင်ဢၼ်ၽြႃးပဵၼ်ၸဝ်ႈၽၢၼ်ႇသၢင်းၼၼ်ႉလႄႈႁုႁၼ်လႆႈဢေႃႈ။ ၵွပ်ႈၼႆလႄႈၵူၼ်းၸိုင်၊ဢမ်ႇႁူမ်ႇဢပျတ်ႈၶဝ်ဝႆႉလႆႈ။-
ပိၵ်ႉသမ်ႉၶဝ်ႁုၽြႃးပဵၼ်ၸဝ်ႈသေၵေႃႈၶဝ်ယင်းဢမ်ႇရူဝ်ႇသေႇၵူဝ်ယမ်မၼ်းၸဝ်ႈၸွမ်းၼင်ႇၶဝ်ထုၵ်ႇလီရူဝ်ႇသေႇၽြႃးပဵၼ်ၸဝ်ႈလႄႈၶဝ်ၵေႃႈဢမ်ႇတၢင်ႇၵျေးၸူးမၼ်းၸဝ်ႈလႄႈယူႇဢေႃႈ။ ၵွပ်ႈၼႆလႄႈတၢင်းဢၼ်ၶႆႈၸႂ်ဝူၼ်ႉၸႂ်ၶဝ်ၼၼ်ႉဢမ်ႇပွင်ႇလွင်ႈၵႃႈသင်လႄႈႁူဝ်ၸႂ်ဢၼ်ဢမ်ႇပွင်ႇလႅင်းၶဝ်ၼၼ်ႉၶႆႈၸႂ်ဝူၼ်ႉၸႂ်လူၺ်ႈလွင်ႈဢၼ်လပ်းသိင်ႇဢေႃႈ။-
ၶဝ်ဝႃႈ၊ၶဝ်မီးပိင်ႇၺႃႇသေၵေႃႈ တီႈတႄႉမၼ်းၶဝ်ငိူဝ်ႈငႃႉ ဢေႃႈ။-
ၶဝ်ဢဝ်မုၼ်ၽုင်းၽြႃးပဵၼ်ၸဝ်ႈဢၼ်ၵၢင်းလွတ်ႈတင်းတၢင်းဢၼ်ၸၢင်ႈလုလႅဝ်လႄႈလႅၵ်ႈဢဝ်ႁုၼ်ႇႁၢင်ႈၵူၼ်းဢၼ်ၸၢင်ႈလုလႅဝ်၊ႁုၼ်ႇႁၢင်ႈတူဝ်ၼူၵ်ႉ၊တူဝ်သတ်းတူဝ်မႅင်းၸိူဝ်းၼၼ်ႉဝႆႉၵူဝ်းၵႂၢႆႇဢေႃႈ။
ၵွပ်ႈပိူဝ်ႈၵူၼ်းႁၢႆႉမိူၵ်ႈၸိူဝ်ႉၼင်ႇၼႆလႄႈၽြႃးပဵၼ်ၸဝ်ႈပွႆႇႁႂ်ႈၶဝ်ႁဵတ်းၵိလေႇသႃႇၸွမ်းၼင်ႇၶဝ်မီးဢလူဝ်ႇၵၢင်ၸႂ်ၼၼ်ႉဢေႃႈ။ ၶဝ်ယႃႉသရေႇတူဝ်ၶၼ်ႇထႃႇၶဝ်ၼင်ႇၵၼ်လႄႈႁဵတ်းၵူဝ်ႈႁဵတ်းၵိူၵ်ႇဢၼ်လီဢၢႆပိူၼ်ႈၼၼ်ႉတီႈၵၼ်ဢေႃႈ။-
ၶဝ်ၼၼ်ႉဢမ်ႇယုမ်ႇမၢတ်ႈလွင်ႈတၢင်းဢၼ်ၸႅတ်ႈမၢၼ်ႇလွင်ႈၽြႃးပဵၼ်ၸဝ်ႈသေၵႂႃႇယုမ်ႇမၢတ်ႈဢၼ်ဢမ်ႇၸိုဝ်ႈဢမ်ႇၸႂ်ႈဢၼ်ပိူင်ႈဢၼ်လွႆးၼၼ်ႉသေလႄႈၶဝ်ၵူဝ်းၵႂၢႆႇၶိူင်ႈပိူင်ဢၼ်ၽြႃးပဵၼ်ၸဝ်ႈၽၢၼ်ႇသၢင်းႁဵတ်းပဵၼ်ဝႆႉၼၼ်ႉၵူၺ်းလႄႈဢမ်ႇၵူဝ်းၵႂၢႆႇတူဝ်ၽြႃးပဵၼ်ၸဝ်ႈဢၼ်ၽၢၼ်ႇသၢင်းၶိူင်ႈပိူင်၊ၸဝ်ႈဢၼ်မီးမၢင်ႇၵလႃႇထႃႇဝရႃႉၼၼ်ႉဢေႃႈ။ ဢႃမိၼ်ႈ။
ၵွပ်ႈပိူဝ်ႈၵူၼ်းႁဵတ်းၸိူဝ်ႉၼင်ႇၼႆလႄႈၽြႃးပဵၼ်ၸဝ်ႈပွႆႇႁႂ်ႈၶဝ်တူၵ်းႁွတ်ႈၼႂ်းၸႂ်ၵိလေႇသႃႇဢၼ်သရေႇလုလႄႈလီဢၢႆပိူၼ်ႈၼၼ်ႉဢေႃႈ။ တေႃႇထိုင်ႁွတ်ႈမႄႈယိင်းၶဝ်ယင်းႁဵတ်းမေႇထုင်ႇဢၼ်ဢမ်ႇတြႃးလူၺ်ႈမႄႈယိင်းၼင်ႇၵၼ်ဢၼ်ၶတ်းသၽႃႇဝႃႉၵူၼ်းၼၼ်ႉဢေႃႈ။-
ပိူင်လဵဝ်ၵၼ်ၽူႈၸၢႆးၶဝ်ၵေႃႈဢမ်ႇမီးၸႂ်ၵိလေႇသႃႇဢၼ်ၶႂ်ႈသိူၵ်ႈသမ်ႇတင်းမႄႈယိင်းၸွမ်းၼင်ႇသၽႃႇဝႃႉၵူၼ်းၼၼ်ႉသေယဝ်ႉ၊သမ်ႉမီးၸႂ်ၵိလေႇသႃႇမႆႈႁွၼ်ႉၶႂ်ႈသိူၵ်ႈသမ်ႇၽူႈၸၢႆးၼင်ႇၵၼ်ၵူၺ်းဢေႃႈ။ ၵွပ်ႈပိူဝ်ႈၵူၼ်းၸၢႆးၼင်ႇၵၼ်ႁဵတ်းတၢင်းဢၼ်လီဢူၵ်းလီဢၢႆတီႈၵၼ်ၼၼ်ႉလႄႈၶဝ်လႆႈၶၢမ်ႇတၢမ်ႇဢပျတ်ႈတူဝ်ၸဝ်ႈၵဝ်ႇၵႃႈၼင်ႇဢၼ်ၶဝ်ထိူၵ်ႈၶၢမ်ႇၸွမ်းၼင်ႇဢၼ်ၶဝ်ႁဵတ်းၽိတ်းၼၼ်ႉဢေႃႈ။
ပိူဝ်ႈဢၼ်ၵူၼ်းၸိူဝ်းၼၼ်ႉဢမ်ႇၶႂ်ႈႁုၸၵ်းၽြႃးပဵၼ်ၸဝ်ႈလႄႈၽြႃးပဵၼ်ၸဝ်ႈပွႆႇႁႂ်ႈၶဝ်ၶႆႈၸႂ်လွင်ႈဢၼ်ႁုၵ်းဢၼ်ႁၢႆႉသေယဝ်ႉ၊ၶဝ်လႆႈၵမ်ၵျၢင်ႉဢၼ်ဢမ်ႇလီဢမ်ႇထုၵ်ႇၼၼ်ႉဢေႃႈ။-
ၸႂ်ၶဝ်တဵမ်ဝႆႉတင်းတၢင်းဢၼ်မိူၵ်ႈဢၼ်လိူင်းၵူႈၸိူဝ်ႉၵူႈပိူင်ဢၼ်ပဵၼ်ၸႃႉၸဵမ်ၸႂ်ဢၼ်ႁၢႆႉမိူၵ်ႈ၊ၸႂ်လေႃးၽႃႉပူၼ်ႉလိူဝ်၊ၸႂ်ဢၼ်ဢမ်ႇၼႃႇလူဝ်ႇၶွႆပိူၼ်ႈ၊ၸႂ်ဢၼ်ၶႂ်ႈဢဝ်ပိူၼ်ႈတၢႆ၊ၸႂ်ဢၼ်ၶတ်းၶႅင်ႁႅင်းတႃႉၵၼ်၊ၸႂ်ဢၼ်ၶႂ်ႈပႅတ်ႉလႅၼ်ပိူၼ်ႈဢိၵ်ႇတင်းၸႂ်ဢၼ်မူမ်ႇဝႆႉတၢင်းၽိတ်းပိူၼ်ႈဢေႃႈ။ ၶဝ်မီးၸႂ်ဢၼ်ၶႂ်ႈၶႃႉၸိုဝ်ႈၶၢႆသဵင်ပိူၼ်ႈလႄႈ၊-
ၶႂ်ႈလၢတ်ႈၵႂၢမ်းဢၼ်သႄႉသွမ်းပိူၼ်ႈဢေႃႈ။ ၶဝ်ပဵၼ်ၵူၼ်းမဵဝ်းဢၼ်ၽြႃးပဵၼ်ၸဝ်ႈၸင်း၊ၵူၼ်းမဵဝ်းဢၼ်ႁဵတ်းႁႂ်ႈပိူၼ်ႈၸဵပ်းၸႂ်၊ၵူၼ်းမဵဝ်းဢၼ်မႃႇၼႃႉၸႂ်သုင်လႄႈၸႂ်ၵႂ်ဢေႃႈ။ ၶဝ်ၸၢင်ႈႁႃႁဵတ်းႁၢႆႉမဵဝ်းဢၼ်ပိူၼ်ႈဢမ်ႇႁဵတ်းလႄႈဢမ်ႇၸၢင်ႈထွမ်ႇသူပ်းဢဝ်ၵႂၢမ်းပေႃႈမႄႈဢေႃႈ။-
ၶဝ်ဢမ်ႇၸၢင်ႈမေႃၶႆႈၸႂ်လႄႈဢမ်ႇၸၢင်ႈမီးၵတိသဵတ်ႈၸႃႇ၊ၶဝ်ဢမ်ႇၸၢင်ႈႁၵ်ႉဢဵတ်းလူပိူၼ်ႈၸိူဝ်းၼၼ်ႉဢေႃႈ။-
ၶဝ်ၸိူဝ်းၼႆႉႁုလွင်ႈဢၼ်ၽြႃးပဵၼ်ၸဝ်ႈပိင်းၺၢပ်ႈဝႆႉဝႃႈ၊ၵူၼ်းၸိူဝ်းဢၼ်ၵမ်ၵျၢင်ႉၸိူဝ်ႉၼင်ႇၶဝ်ၼႆႉတၵ်းလႆႈၶၢမ်ႇတၢမ်ႇတၢႆဝႃႈၼႆသေၵေႃႈတူဝ်ၶဝ်ယင်းၵမ်ၵျၢင်ႉႁဵတ်းယူႇတိၵ်းတိၵ်းၵူၺ်းဢမ်ႇၵႃး၊ၶဝ်ယင်းမူၼ်ႈပျေႃႇၸွမ်းပိူၼ်ႈၸိူဝ်းဢၼ်ၵမ်ၵျၢင်ႉၸိူဝ်ႉၼင်ႇၼႆၼၼ်ႉဢေႃႈ။
မဵဝ်းၵူၼ်း႟။ ဢမ်ႇဝႃႈမႂ်းပဵၼ်ၽႂ်ၵေႃႈပေႃးမႂ်းၸႅတ်ႈသေးတႅပ်းတတ်းပိူၼ်ႈၸိုင်၊မႂ်းဢမ်ႇႁူမ်ႇဢပျတ်ႈမႂ်းဝႆႉလႆႈ။ လွင်ႈမၼ်းၸမ်ႉ၊တၢင်းဢၼ်မႂ်းတႅပ်းတတ်းဢပျတ်ႈပိူၼ်ႈၼၼ်ႉပဵၼ်တၢင်းဢၼ်ၸီႇယၢင်ႇပၼ်တၢမ်ႇတူဝ်မႂ်းၵူၺ်း၊ၵွပ်ႈပိူဝ်ႈမႂ်းတႅပ်းတတ်းဢပျတ်ႈပိူၼ်ႈၼၼ်ႉလႄႈလႆႈႁဵတ်းဢပျတ်ႈမိူၼ်ၵၼ်တင်းပိူၼ်ႈဢေႃႈ။-
ႁဝ်းႁုလွင်ႈဢၼ်ၽြႃးပဵၼ်ၸဝ်ႈၸီႇယၢင်ႇဢပျတ်ႈၸွမ်းၼင်ႇတြႃးၼိူဝ်ၶဝ်ၸိူဝ်းဢၼ်ၵမ်ၵျၢင်ႉၸိူဝ်ႉၼင်ႇၼႆၼၼ်ႉဢေႃႈ။-
ၵူၺ်းၵႃႈ၊မဵဝ်းၵူၼ်း႟။ မႂ်းတႅပ်းတတ်းၶဝ်ၸိူဝ်းဢၼ်ၵမ်ၵျၢင်ႉဢမ်ႇလီၸိူဝ်ႉၼင်ႇၼႆသေလႄႈတူဝ်မႂ်းၵေႃႈႁဵတ်းမိူၼ်ပိူၼ်ႈယူႇယဝ်ႉ။ ၸွင်ႇမႂ်းထၢင်ႇတူဝ်ၸဝ်ႈၵဝ်ႇတၵ်းၵၢင်းလွတ်ႈတၢင်းဢၼ်ၽြႃးပဵၼ်ၸဝ်ႈၸီႇယၢင်ႇႁိုဝ်း။-
ဢမ်ႇၼၼ်ၵေႃႈလွင်ႈဢၼ်ၵရုၼႃႇၽြႃးပဵၼ်ၸဝ်ႈမီးဝႆႉႁႂ်ႈၸူဝ်းဢဝ်မႂ်းၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်မႃးၼၼ်ႉမႂ်းဢမ်ႇႁုလူင်ပႄႇ။ ၸွင်ႇမႂ်းလူလၢႆၵရုၼႃႇၽြႃးပဵၼ်ၸဝ်ႈဢိၵ်ႇလူၺ်ႈၸႂ်ယႂ်ႇၸႂ်ယၢဝ်းဢၼ်မၼ်းၸဝ်ႈယိူၼ်ႉၶၢမ်ႇမႂ်းၼၼ်ႉႁိုဝ်း။-
ၵူၺ်းၵႃႈ၊မႂ်းၸမ်ႉ၊မီးႁူဝ်ၸႂ်ဢၼ်တိုဝ်တၼ်ၼႃႇဢမ်ႇၸၢင်ႈပိၼ်ႇၸႂ်မႃးလႄႈမႂ်းလႆႈၵွင်ဝႆႉသိမ်းဢဝ်တၢင်းၸႂ်မႆႈၸဝ်ႈပုၼ်ႈတူဝ်ၸဝ်ႈၵဝ်ႇတေႃႇထိုင်ဝၼ်းဢၼ်ၽြႃးပဵၼ်ၸဝ်ႈတၵ်းပွႆႇတေႃးသႃႉႁႅင်းၼႃႇလႄႈၸီႇယၢင်ႇၸွမ်းၼင်ႇတၢင်းသိုဝ်ႈတေႃႇၸဝ်ႈထၢင်ႇထၢင်ႇသႃးသႃးၼၼ်ႉဢေႃႈ။-
လွင်ႈမၼ်းၸမ်ႉ၊ၽြႃးပဵၼ်ၸဝ်ႈတႅၼ်းပၼ်ဢၵျူဝ်းတီႈၵူၼ်းၵူႈၵေႃႉၸွမ်းၼင်ႇဢၼ်မၼ်းလႆႈၵမ်ၵျၢင်ႉႁဵတ်းမႃးၼၼ်ႉဢေႃႈ။-
တီႈၶဝ်ၸိူဝ်းဢၼ်သိုပ်ႇၵျူဝ်းၸႃးၵမ်ၵျၢင်ႉဢၼ်လီၵူၺ်းလႄႈသမ်ႉၵျၢမ်ႇႁႃမုၼ်ၽုင်းသရေႇဢိၵ်ႇတင်းဢသၢၵ်ႈဢၼ်ဢမ်ႇသုတ်းသဵင်ႈၼၼ်ႉ၊မၼ်းၸဝ်ႈတၵ်းပၼ်သၢၵ်ႈထႃႇဝရႃႉဢေႃႈ။-
ၵူၺ်းၵႃႈ၊တီႈၶဝ်ၸိူဝ်းဢၼ်ၸၢင်ႈၶတ်းၶႅင်ႁႅင်းတႃႉလႄႈထဵင်ပႅတ်ႈသမ်ႇမႃႇတြႃးသေ၊သမ်ႉထွမ်ႇဢဝ်တၢင်းႁၢႆႉမိူၵ်ႈၼၼ်ႉတေလႆႈဢၵျူဝ်းဢၼ်ၸႂ်မႆႈၸဝ်ႈႁႅင်းၼႃႇဢေႃႈ။-
ၶဝ်ၸိူဝ်းဢၼ်ၵမ်ၵျၢင်ႉတၢင်းဢၼ်ႁၢႆႉမိူၵ်ႈၵူႈၵေႃႉၵူႈၵူၼ်းတၵ်းလႆႈထူပ်းၺႃးၽေးတုၵ်ႉၶႃႉဢိၵ်ႇတင်းတၢင်းဢၼ်တိပ်ႇၸႂ်ၵိၼ်းၸႂ်ဢေႃႈ။ ၸႃႉၸဵမ်ၵူၼ်းမဵဝ်း ၵျူး၊ ၶဝ်ဢွၼ်တၢင်းပိူၼ်ႈလႄႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းဝၢႆးလင်ဢေႃႈ။-
တီႈၶဝ်ၸိူဝ်းဢၼ်ၵမ်ၵျၢင်ႉတၢင်းၵမ်တၢင်းၵျၢင်ႉဢၼ်လီၵူႈၵေႃႉၵူႈၵူၼ်းၸမ်ႉ၊ၽြႃးပဵၼ်ၸဝ်ႈတၵ်းပၼ်မုၼ်ၽုင်းသရေႇ ဢိၵ်ႇတင်းတၢင်းၼိမ်ၸႂ်ဢေႃႈ။ ၸႃႉၸဵမ်ၵူၼ်းမဵဝ်း ၵျူး၊ ၶဝ်ဢွၼ်တၢင်းပိူၼ်ႈလႄႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းဝၢႆးလင်ဢေႃႈ။-
ၵွပ်ႈပိူဝ်ႈၸိူဝ်ႉၼင်ႇႁိုဝ်ဝႃႈၼႆၸမ်ႉ၊ၽြႃးပဵၼ်ၸဝ်ႈၸီႇယၢင်ႇတြႃးပၼ်ၵူၼ်းၵူႈၵေႃႉၽဵင်ႇပဵင်းၵၼ်ဢေႃႈ။
ၵူၼ်းၵႃႈဢၼ်ယူႇၵႃႈၼွၵ်ႈပိင်းၺၢပ်ႈတြႃးလႄႈႁဵတ်းဢပျတ်ႈၼၼ်ႉတၵ်းလုသုမ်းၵႃႈၼွၵ်ႈတြႃး၊သမ်ႉၵူၼ်းၵႃႈဢၼ်ယူႇၼႂ်းပိင်းၺၢပ်ႈတြႃးလႄႈႁဵတ်းဢပျတ်ႈၼၼ်ႉတၵ်းလႆႈၶၢမ်ႇတၢင်းဢၼ်ၸီႇယၢင်ႇၸွမ်းၼင်ႇပိင်းၺၢပ်ႈတြႃးၼင်ႇၵဝ်ႇဢေႃႈ။-
လွင်ႈမၼ်းၸမ်ႉ၊ၵွပ်ႈပိူဝ်ႈထွမ်ႇဢဝ်ပိင်းၺၢပ်ႈတြႃးလၢႆလၢႆလႄႈၽြႃးပဵၼ်ၸဝ်ႈမၢတ်ႈၶဝ်ပဵၼ်ၵူၼ်းသိုဝ်ႈတေႃႇဢမ်ႇၸႂ်ႈ။ ၵွပ်ႈပိူဝ်ႈၵမ်ၵျၢင်ႉၸွမ်းပိင်းၺၢပ်ႈတြႃးၼၼ်ႉၵူၺ်းလႆႈမၢတ်ႈၶဝ်ပဵၼ်ၵူၼ်းသိုဝ်ႈတေႃႇဢေႃႈ။-
ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉဢမ်ႇမီးပိင်းၺၢပ်ႈတြႃးၸဝ်ႈသေၵေႃႈ၊ပေႃးၸွမ်းၼင်ႇၸႂ်ဢၼ်ႁုတူဝ်ၸဝ်ႈၵဝ်ႇသေၵမ်ၵျၢင်ႉၸွမ်းတြႃးၸဝ်ႈၸိုင်၊ၶဝ်ဢမ်ႇမီးပိင်းၺၢပ်ႈတြႃးသေၵေႃႈ၊ၶဝ်မီးတြႃးၼႂ်းတူဝ်ၸဝ်ႈၵဝ်ႇယဝ်ႉ။-
ၶဝ်ၼၼ်ႉၼႄပျႃးဢၵျူဝ်းတြႃးၸဝ်ႈဢၼ်မၼ်းၸဝ်ႈတႅမ်ႈဝႆႉၼႂ်းႁူဝ်ၸႂ်ၶဝ်ဢေႃႈ။ ၸႂ်ဢၼ်ႁုတူဝ်ၸဝ်ႈၵဝ်ႇၶဝ်ၼၼ်ႉၵေႃႈၶၢမ်ႇသၢၵ်ႈသေႇဢၵျူဝ်းတြႃးၸဝ်ႈၼၼ်ႉမၢၼ်ႇမႅၼ်ႈၸိုဝ်ႈၸႂ်ႈ၊ပိူဝ်ႈဝႃႈတၢင်းၶႆႈၸႂ်ၵျၢမ်ႇပွင်ၶဝ်မၢင်ပွၵ်ႈတၢင်ႇဢပျတ်ႈၶဝ်လႄႈမၢင်ပွၵ်ႈၵႄႈလိတ်ႈဢပျတ်ႈၶဝ်ယူႇၼၼ်ႉဢေႃႈ။-
ၸွမ်းၼင်ႇၶၢဝ်ႇတြႃးသိူဝ်းပျေႃႇဢၼ်ၵဝ်ႁေႃးလၢတ်ႈၼႆႉၼၼ်ႉ၊မၼ်းတၵ်းပဵၼ်မႃးၼင်ႇၼႆၼႂ်းမိုဝ်ႉဝၼ်းဢၼ်ၽြႃးပဵၼ်ၸဝ်ႈတၵ်းဢဝ်တင်း ၸဝ်ႈယေႇသုၶရိၸ်ႈ၊ လႄႈၸႅတ်ႈသေးတၢင်းၵျၢမ်ႇတၢင်းပွင်ၵူၼ်းဢၼ်ၶဝ်သိူင်ႇဝႆႉၼၼ်ႉဢေႃႈ။
မႂ်းဝႃႈတူဝ်မႂ်းပဵၼ်ၵူၼ်းမဵဝ်း ၵျူး၊ လႄႈဢိင်ပိုင်ႈပိင်းၺၢပ်ႈတြႃးၸဝ်ႈယူႇႁူဝ်ၸႂ်ၽႅၼ်သုင်ၼႂ်းတၢင်းဢၼ်မႂ်းပဵၼ်ၵူၼ်းၽြႃးပဵၼ်ၸဝ်ႈယူႇ၊-
ၵွပ်ႈပိူဝ်ႈမႂ်းလႆႈသွၼ်ဢဝ်တြႃးၸဝ်ႈယဝ်ႉလႄႈလႆႈႁုႁၼ်ဢလူဝ်ႇၸဝ်ႈဢိၵ်ႇတင်းလွင်ႈတၢင်းဢၼ်မျၢတ်ႈလီယူႇ၊-
မႂ်းယုမ်ႇဝႃႈမႂ်းပဵၼ်ၵူၼ်းဢၼ်ၼႄတၢင်းၵူၼ်းတႃမွတ်ႇသေပဵၼ်ဢၼ်လႅင်းပုၼ်ႈတႃႇၶဝ်ၸိူဝ်းဢၼ်ယူႇၼႂ်းလပ်းသိင်ႇယူႇ၊-
ပဵၼ်ၵေႃႉဢၼ်သုင်းမႃႉၵူၼ်းငိူဝ်ႈၶဝ်လႄႈပဵၼ်သြႃႇၶဝ်ၸိူဝ်းဢၼ်ဢမ်ႇမီးပိင်ႇၺႃႇတင်းလၢႆဝႃႈၼႆယဝ်ႉဢေႃႈ။ မႂ်းယုမ်ႇဝႃႈၼႂ်းပိင်းၺၢပ်ႈတြႃးၸဝ်ႈၵေႃႈမႂ်းမီးပၵ်းမီးပိူင်တၢင်းႁုဢိၵ်ႇတင်းသဵတ်ႈၸႃႇတြႃးယူႇဝႃႈၼႆဢေႃႈ။-
ပေႃးပဵၼ်ၼၼ်မႂ်းသင်ႇသွၼ်ပိူၼ်ႈလႄႈသမ်ႉဢမ်ႇသင်ႇသွၼ်တူဝ်ၸဝ်ႈၵဝ်ႇႁိုဝ်း။ မႂ်းႁေႃးလၢတ်ႈဝႃႈ၊ “ယႃႇပေလၵ်ႉၶူဝ်းပိူၼ်ႈ” ဝႃႈၼႆသေယဝ်ႉ၊တူဝ်မႂ်းသမ်ႉၸၢင်ႈလၵ်ႉပိူၼ်ႈႁိုဝ်း။-
မႂ်းလၢတ်ႈဝႃႈ၊ “ယႃႇပေၵူတ်ႉၽူဝ်ၵူတ်ႉမေးပိူၼ်ႈ” ဝႃႈၼႆသေယဝ်ႉ၊တူဝ်မႂ်းသမ်ႉၵူတ်ႉမေးပိူၼ်ႈႁိုဝ်း။ မႂ်းလီႁင်ႈႁုၼ်ႇႁၢင်ႈၽြႃးၸိူဝ်းၼၼ်ႉလႄႈမႂ်းသမ်ႉၸူၼ်ဢဝ်ၶူဝ်းၵျွင်းၶဝ်ႁိုဝ်း။-
မႂ်းဢုပ်ႇဝၢဝ်းၼႂ်းပိင်းၺၢပ်ႈတြႃးၸဝ်ႈလႄႈ၊မႂ်းသမ်ႉပူၼ်ႉလိူဝ်တြႃးၼၼ်ႉသေယဝ်ႉ၊ယႃႉမုၼ်သရေႇၽြႃးပဵၼ်ၸဝ်ႈႁိုဝ်း။-
ၼႂ်းၵျၢမ်းလိၵ်ႈၸင်ႇတႅမ်ႈဝႆႉလႄႈဝႃႈ၊ “ၵွပ်ႈပိူဝ်ႈမႂ်းဢၼ်ပဵၼ်ၵူၼ်းမဵဝ်း ၵျူး၊ ၼႆႉလႄႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၶဝ်သႄႉသွမ်းလၢတ်ႈပူၼ်ႉလိူဝ်ၼႃႇမႃႉၸိုဝ်ႈသဵင်ၽြႃးပဵၼ်ၸဝ်ႈယဝ်ႉ၊” ဝႃႈၼင်ႇၼႆဝႆႉဢေႃႈ။
ပေႃးမႂ်းၵမ်ၵျၢင်ႉႁဵတ်းၸွမ်းတြႃးၸဝ်ႈၸိုင်၊တၢင်းဢၼ်မႂ်းၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ၼၼ်ႉမီးဢၵျူဝ်းဢေႃႈ။ ၵူၺ်းၵႃႈ၊ပေႃးမႂ်းပူၼ်ႉလိူဝ်တြႃးၸဝ်ႈၸိုင်၊တၢင်းဢၼ်မႂ်းၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ၼၼ်ႉတၵ်းပဵၼ်ၸိူဝ်ႉၼင်ႇဢမ်ႇလႆႈၶၢမ်ႇဢဝ်ယဝ်ႉ။-
ၼႄးၼိုင်ႈၸမ်ႉ၊ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၶဝ်ဢမ်ႇလႆႈၶၢမ်ႇဢဝ်မၢင်ႇၵလႃႇပၢတ်ႇပၢႆၼင်။ ၼႂ်းဝႃႈၼၼ်သေၵေႃႈပေႃးၶဝ်ၵမ်ၵျၢင်ႉၸွမ်းတြႃးၸဝ်ႈၸိုင်၊ၽြႃးပဵၼ်ၸဝ်ႈတၵ်းမၢတ်ႈၶဝ်ပဵၼ်ၸိူဝ်ႉၼင်ႇၵူၼ်းၸိူဝ်းဢၼ်လႆႈၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ယဝ်ႉၼၼ်ႉဢမၢၼ်ႇၶၼ်ပဵၼ်ဢေႃႈ။-
ၵွပ်ႈၼႆလႄႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၸိူဝ်းဢၼ်ဢမ်ႇလႆႈၶၢမ်ႇဢဝ်မၢင်ႇၵလႃႇပၢတ်ႇပၢႆၼင်၊ၵူၺ်းၵႃႈ၊ၵမ်ၵျၢင်ႉႁဵတ်းၸွမ်းတြႃးၸဝ်ႈယူႇၼၼ်ႉ တၵ်းတၢင်ႇဢပျတ်ႈၵူၼ်းမဵဝ်း ၵျူး၊ ၸိူဝ်းဢၼ်လႆႈၶၢမ်ႇဢဝ်မၢင်ႇၵလႃႇပၢတ်ႇပၢႆၼင်သေဢမ်ႇၵႃး၊ယင်းမီးတြႃးၸဝ်ႈတႅမ်ႈဝႆႉၼႂ်းၵျၢမ်းလိၵ်ႈၼၼ်ႉလႄႈသမ်ႉဢမ်ႇၵမ်ၵျၢင်ႉၸွမ်းၼၼ်ႉဢေႃႈ။-
လွင်ႈမၼ်းၸမ်ႉ၊တၢင်းဢၼ်ပဵၼ်ၵူၼ်းမဵဝ်း ၵျူး၊ ၽၢႆႇတၢင်းၼွၵ်ႈၵူၺ်းၼၼ်ႉဢမ်ႇပဵၼ် ၵျူး၊ ၸႅတ်ႈၸႅတ်ႈ။ တၢင်းဢၼ်ၶၢမ်ႇဢဝ်မၢင်ႇၵလႃႇပၢတ်ႇပၢႆၼင်တီႈတူဝ်ၵႃႇယႃႉၽၢႆႇတၢင်းၼွၵ်ႈၵူၺ်းၼၼ်ႉၵေႃႈဢမ်ႇၸႂ်ႈမၢင်ႇၵလႃႇပၢတ်ႇပၢႆၼင်ၸႅတ်ႈၸႅတ်ႈဢေႃႈ။-
ၵူၼ်းမဵဝ်း ၵျူး၊ ၸႅတ်ႈၸႅတ်ႈဢၼ်ဝႃႈၼၼ်ႉပဵၼ်ၵူၼ်းမဵဝ်း ၵျူး၊ ဢၼ်ၵႃႈၼႂ်းႁူဝ်ၸႂ်မၼ်းၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ၸႅတ်ႈၸႅတ်ႈဢၼ်ဝႃႈတၢင်းဢၼ်ဝိၺိၺ်ႇၽြႃးပဵၼ်ၸဝ်ႈႁဵတ်းပၼ်လႄႈပဵၼ်မႃးၵႃႈၼႂ်းၸႂ်မၼ်း၊ပဵၼ်မႃးၵွပ်ႈပိူဝ်ႈတြႃးၸဝ်ႈဢၼ်တႅမ်ႈဝႆႉဢမ်ႇၸႂ်ႈၼၼ်ႉဢေႃႈ။ ၵေႃႉၸိူဝ်ႉၼင်ႇၼႆၼၼ်ႉဢမ်ႇလူဝ်ႇတၢင်းဢၼ်ၵူၼ်းယွင်ႈယေႃးၶဝ်လႄႈၶဝ်ပႂ်ႉထွမ်ႇဢဝ်တၢင်းဢၼ်ၽြႃးပဵၼ်ၸဝ်ႈယွင်ႈယေႃးၵူၺ်းဢေႃႈ။
ပေႃးပဵၼ်ၸိူဝ်ႉၼင်ႇၼႆၸိုင်၊ၵူၼ်းမဵဝ်း ၵျူး၊ ၶဝ်တွၼ်းလိူဝ်သေၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းႁိုဝ်း။ ဢမ်ႇၼၼ်ၵေႃႈၵွပ်ႈပိူဝ်ႈၶၢမ်ႇဢဝ်မၢင်ႇၵလႃႇပၢတ်ႇပၢႆၼင်လႄႈမီးဢၵျူဝ်းၵႃႈသင်။-
ၸႂ်ႈတႄႉမီးဢၵျူဝ်းၵူႈၸိူဝ်ႉၵူႈပိူင်ၼမ်ၼႃႇဢေႃႈ။ ဢၵျူဝ်းဢၼ်တွၼ်းလိူဝ်ပိူၼ်ႈၼၼ်ႉၸမ်ႉ၊ပဵၼ်တၢင်းဢၼ်ၽြႃးပဵၼ်ၸဝ်ႈယုမ်ႇယမ်ဢၢပ်ႈဝႆႉၼုၵ်ႈၵပၢတ်ႈတြႃးၸဝ်ႈၵႃႈတီႈၵူၼ်းမဵဝ်း ၵျူး၊ ၶဝ်ၼၼ်ႉဢေႃႈ။-
ပေႃးဝႃႈၶဝ်ၵမ်ႈၽွင်ႈဢမ်ႇယုမ်ႇမၢတ်ႈၸိုင်၊တေပဵၼ်ၸိူဝ်ႉႁိုဝ်မႃး။ တၢင်းဢၼ်ၶဝ်ဢမ်ႇယုမ်ႇမၢတ်ႈၼၼ်ႉၸွင်ႇတေယႃႉသဵတ်ႈၸႃႇၽြႃးပဵၼ်ၸဝ်ႈလႆႈႁိုဝ်း။-
ဢမ်ႇပဵၼ်ၸိူဝ်ႉၼင်ႇၼၼ်။ ပိၵ်ႉသမ်ႉၵူၼ်းၵူႈၵေႃႉပဵၼ်ၵူၼ်းပႅတ်ႉၵူၼ်းလႅၼ်သေၵေႃႈၽြႃးပဵၼ်ၸဝ်ႈယင်းတေမီးသဵတ်ႈၸႃႇယူႇၸွမ်းၼင်ႇၵျၢမ်းလိၵ်ႈတႅမ်ႈဝႆႉလႄႈဝႃႈ၊ “ၵႂၢမ်းဢၼ်ၸဝ်ႈႁဝ်းလၢတ်ႈၼၼ်ႉ၊ ၵူၼ်းၵူႈၵေႃႉတၵ်းႁၼ်ဝႃႈမၢၼ်ႇမႅၼ်ႈဢေႃႈ။ မိူဝ်ႈဢၼ်ပိူၼ်ႈၸီႇယၢင်ႇဢမုၸဝ်ႈႁဝ်းၼၼ်ႉ၊ၸဝ်ႈႁဝ်းတၵ်းပႄႉၼႅင်ႇၶႃႈဢေႃႈ၊” ဝႃႈၼင်ႇၼႆၼၼ်ႉဢေႃႈ။
ၵူၺ်းၵႃႈ၊သင်ဝႃႈတၢင်းဢၼ်ႁဝ်းႁဵတ်းဢၼ်ဢမ်ႇတြႃးၼၼ်ႉႁဵတ်းႁႂ်ႈတၢင်းသိုဝ်ႈတေႃႇၽြႃးပဵၼ်ၸဝ်ႈထၢင်ႇသႃးမႃးၸိုင်၊ႁဝ်းတေဝႃႈၸိူဝ်ႉၼင်ႇႁိုဝ်။ ၸွင်ႇႁဝ်းတေဝႃႈၽြႃးပဵၼ်ၸဝ်ႈဢမ်ႇတြႃးမိူဝ်ႈဢၼ်မၼ်းၸဝ်ႈပၼ်တၢမ်ႇႁဝ်းၼၼ်ႉႁိုဝ်း။ (ၵဝ်လၢတ်ႈၸွမ်းသၽေႃးၵူၼ်းဢေႃႈ။)-
ဢမ်ႇပဵၼ်ၸိူဝ်ႉၼင်ႇၼၼ်။ ပေႃးဝႃႈၽြႃးပဵၼ်ၸဝ်ႈဢမ်ႇတြႃးၸိုင်၊မၼ်းၸဝ်ႈတေၸီႇယၢင်ႇတြႃးၵူၼ်းလေႃးၵႃႉ ၼႆႉလႆႈၸိူဝ်ႉၼင်ႇႁိုဝ်။
ပေႃးဝႃႈၵွပ်ႈပိူဝ်ႈၵဝ်ႁဵတ်းဢၼ်ဢမ်ႇတြႃးၼၼ်ႉႁဵတ်းႁႂ်ႈမုၼ်သရေႇၽြႃးပဵၼ်ၸဝ်ႈယဵင်ႈၶႅၼ်းထၢင်ႇသႃးမႃးၵွပ်ႈပိူဝ်ႈမၼ်းၸဝ်ႈမီးသဵတ်ႈၸႃႇၼၼ်ႉၸိုင်၊ႁဵတ်းသင်လႄႈမၼ်းၸဝ်ႈၸီႇယၢင်ႇၵဝ်ယူႇလႄႈဝႃႈၵဝ်ပဵၼ်ၵူၼ်းမီးဢပျတ်ႈၼင်ႇႁိုဝ်။-
ပေႃးပဵၼ်ၸိူဝ်ႉၼင်ႇၼႆၸိုင်၊ႁဵတ်းသင်လႄႈ ဢမ်ႇဝႃႈ၊ “ဢွၼ်ၵၼ်ႁဵတ်းႁၢႆႉမိူၵ်ႈႁႂ်ႈမီးဢၵျူဝ်းဢၼ်လီတႃႉႁဝ်း” ဝႃႈၼင်ႇၼႆၸွမ်းၼင်ႇဢၼ်ၵူၼ်းၵမ်ႈၽွင်ႈသႄႉသွမ်းဝႃႈၵဝ်ႁေႃးလၢတ်ႈၸိူဝ်ႉၼင်ႇၼၼ်ၼၼ်ႉၼင်ႇႁိုဝ်။ ၶဝ်ၸိူဝ်းဢၼ်ဝႃႈၸိူဝ်ႉၼင်ႇၼႆၼၼ်ႉထိူၵ်ႈၶၢမ်ႇတၢမ်ႇဢပျတ်ႈၶဝ်ဢေႃႈ။
ပေႃးပဵၼ်ၸိူဝ်ႉၼင်ႇၼႆၸိုင်တၵ်းပဵၼ်ၸိူဝ်ႉၼင်ႇႁိုဝ်၊ၵူၼ်းမဵဝ်း ၵျူး၊ ႁဝ်းၼႆႉမျၢတ်ႈလီတွၼ်းလိူဝ်သေၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းယဝ်ႉႁိုဝ်း။ ဢမ်ႇမျၢတ်ႈသေဢိတ်း။ ၵဝ်လႆႈလၢတ်ႈၼႄဝႃႈ၊ၵူၼ်းမဵဝ်း ၵျူး၊ ၶဝ်တင်းၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၶဝ်ၵူႈၵေႃႉၵူႈၵူၼ်းတူၵ်းယူႇၼႂ်းဢႃႇၼႃႇဢပျတ်ႈမိူၼ်မိူၼ်ၵၼ်ယဝ်ႉ၊ဝႃႈၼင်ႇၼႆယဝ်ႉ။-
မၼ်းပဵၼ်ၸွမ်းၼင်ႇဢၼ်တႅမ်ႈဝႆႉၼႂ်းၵျၢမ်းလိၵ်ႈလႄႈဝႃႈ၊ “ၵူၼ်းဢၼ်သိုဝ်ႈတေႃႇဢမ်ႇမီး။ တိုၼ်းဢမ်ႇမီးသေၵေႃႉသေၵူၼ်း။
ၵူၼ်းဢၼ်ႁုဢမ်ႇမီး။ ၵူၼ်းဢၼ်ႁႃၽြႃးပဵၼ်ၸဝ်ႈဢမ်ႇမီး။
ၵူၼ်းတင်းသဵင်ႈတင်းလူင်ဝၢႆႇၼႃႈပႅတ်ႈသေၽြႃးပဵၼ်ၸဝ်ႈလႄႈ ပဵၼ်ၵူၼ်းဢၼ်ဢမ်ႇလႆႈလွင်ႈၵူၺ်းၵူၺ်းယဝ်ႉ။ ၵူၼ်းဢၼ်ႁဵတ်းတၢင်းလီဢမ်ႇမီး။ သေၵေႃႉၵေႃႉဢမ်ႇမီး။
ၵူင်ၶေႃးၶဝ်ပဵၼ်ၸိူဝ်ႉၼင်ႇၶုမ်ပႃႇႁဵဝ်ႈဢၼ်ၽုၺ်ႇဝႆႉလႄႈ ၶဝ်ဢဝ်လိၼ်ႉၶဝ်ပႅတ်ႉလႅၼ်ပိူၼ်ႈလႄႈ ၵွင်ႉငူးမီးဝႆႉယူႇၼႂ်းသီႇသူပ်းၶဝ်ဢေႃႈ။
သူပ်းၶဝ်ၼၼ်ႉတဵမ်ဝႆႉတင်းၵႂၢမ်းၵိၼ်ႇလႃႇ၊ဢၼ်ၶူမ်ၶၼ်းၼႃႇၼၼ်ႉဢေႃႈ။
တိၼ်ၶဝ်ၼၼ်ႉၸၢင်ႈၶၼ်ၽႂ်းၼႃႇၼႂ်းတၢင်းဢၼ်ဢဝ်ဢသၢၵ်ႈပိူၼ်ႈတၢႆၼၼ်ႉလႄႈ။
ၶဝ်ၵႂႃႇတီႈလႂ်ၵေႃႈၶဝ်ႁဵတ်းႁႂ်ႈပိူၼ်ႈၶၢၼ်ၸႂ်လႄႈလုလႅဝ်ဢေႃႈ။
ၶဝ်ဢမ်ႇႁုသဵၼ်ႈတၢင်းဢၼ်ၼိမ်ၸႂ်ၶျၢမ်းသႃႇလႄႈ။
ၶဝ်ဢမ်ႇသွၼ်ဢဝ်တၢင်းဢၼ်ၸၢင်ႈၵူဝ်ယမ်ၽြႃးပဵၼ်ၸဝ်ႈ၊” ဝႃႈၼင်ႇၼႆၼၼ်ႉဢေႃႈ။
တေႃႈလဵဝ်ၼႆႉ၊ႁဝ်းႁုလွင်ႈဢၼ်ပိင်းၺၢပ်ႈတြႃးၸဝ်ႈဝႃႈမႃးၸိူဝ်ႉၼင်ႇႁိုဝ်ၵေႃႈမၼ်းသင်ႇသွၼ်ၶဝ်ၸိူဝ်းဢၼ်ယူႇၼႂ်းၶွပ်ႇတြႃးၼၼ်ႉၼင်ႇႁိုဝ်တၵ်းဢိုတ်းပႅတ်ႈသူပ်းၵူၼ်းၵူႈၵေႃႉလႄႈၵူၼ်းၶူင်းၵၢင်တင်းလူင်တၵ်းလႆႈၶၢမ်ႇတၢင်းဢၼ်ၽြႃးပဵၼ်ၸဝ်ႈၸီႇယၢင်ႇတြႃးၼၼ်ႉဢေႃႈ။-
ၵွပ်ႈပိူဝ်ႈၸိူဝ်ႉႁိုဝ်လႄႈဝႃႈၸမ်ႉ၊ၵွပ်ႈပိူဝ်ႈတၢင်းဢၼ်ၵမ်ၵျၢင်ႉႁဵတ်းၸွမ်းတြႃးၸဝ်ႈလႄႈၵူၼ်းႁဝ်းလႆႈပဵၼ်ၵေႃႉဢၼ်သိုဝ်ႈတေႃႇၼႂ်းသၢႆတႃၽြႃးပဵၼ်ၸဝ်ႈလႆႈဢမ်ႇၸႂ်ႈ။ ပိင်းၺၢပ်ႈတြႃးၸဝ်ႈၸမ်ႉ၊ပဵၼ်ၶိူင်ႈဢၼ်ၸိၼႄႁႂ်ႈၵူၼ်းႁဝ်းလႆႈႁုလွင်ႈဢၼ်ႁဝ်းလႆႈၽိတ်းပိူင်ႈမၼ်းၸဝ်ႈယဝ်ႉၼၼ်ႉၵူၺ်းဢေႃႈ။
မိူဝ်ႈလဵဝ်ၼႆႉၼႄးလၢႆးဢၼ်ၽြႃးပဵၼ်ၸဝ်ႈႁဵတ်းႁႂ်ႈၵူၼ်းပဵၼ်ၵေႃႉဢၼ်သိုဝ်ႈတေႃႇၼၼ်ႉလႆႈပေႃႇဢွၵ်ႇထၢင်ႇသႃးမႃးယဝ်ႉဢေႃႈ။ မၼ်းဢမ်ႇသႅင်ႇၵၼ်တင်းတၢင်းဢၼ်ၵမ်ၵျၢင်ႉႁဵတ်းၸွမ်းတြႃးၸဝ်ႈသေဢိတ်း။ ၼႂ်းဝႃႈၼၼ်သေၵေႃႈ၊ၵျၢမ်းပိင်းၺၢပ်ႈၸဝ်ႈဢိၵ်ႇတင်းၵျၢမ်းပျႃႇတိၵ်ႈတင်းလၢႆၼၼ်ႉၶၢမ်ႇသၢၵ်ႈသေႇလွင်ႈၼႆႉဝႆႉဢေႃႈ။-
ၽြႃးပဵၼ်ၸဝ်ႈမၢတ်ႈၶဝ်ၸိူဝ်းဢၼ်ယုမ်ႇမၢတ်ႈ ၸဝ်ႈယေႇသုၶရိၸ်ႈ၊ ၼၼ်ႉၵူၺ်းပဵၼ်ၵူၼ်းသိုဝ်ႈတေႃႇဢေႃႈ။ ပဵၼ်ၼင်ႇၼႆပုၼ်ႈတႃႇၵူႈၵေႃႉဢမ်ႇဝႃႈမၼ်းပဵၼ်ၸိူဝ်ႉၶိူဝ်းလႂ်ၼၼ်ႉဢေႃႈ။-
ၵူၼ်းတင်းသဵင်တင်းလူင်မီးဢပျတ်ႈလႄႈလႆႈၽၢတ်ႇယၢၼ်ၵႂႃႇသေၵႃႈတီႈၵျေးၸူးတၢင်းဢၼ်ၽြႃးပဵၼ်ၸဝ်ႈၵႄႇၶျွတ်ႈဢဝ်ၼၼ်ႉယဝ်ႉ။-
ၵူၺ်းၵႃႈ၊ၵျေးၸူးၽြႃးပဵၼ်ၸဝ်ႈဢၼ်ဢမ်ႇဢဝ်ၵႃႈဢဝ်ၶၼ်ၼၼ်ႉဢဝ် ၸဝ်ႈယေႇသုၶရိၸ်ႈ၊ ထုတ်ႇဢဝ်ၵူၼ်းတင်းလၢႆ ႁဵတ်းႁႂ်ႈပဵၼ်ၵူၼ်းသိုဝ်ႈတေႃႇယဝ်ႉဢေႃႈ။-
ၽြႃးပဵၼ်ၸဝ်ႈႁႂ်ႈ ၸဝ်ႈယေႇသု၊ ထွၵ်ႇလိူတ်ႈမၼ်းၸဝ်ႈသေၶၢမ်ႇတၢႆပုၼ်ႈလွင်ႈၼင်ႇႁိုဝ်တၵ်းၽႄႇဢပျတ်ႈၶဝ်ၸိူဝ်းဢၼ်ယုမ်ႇမၢတ်ႈမၼ်းၸဝ်ႈၼၼ်ႉဢေႃႈ။ ၽြႃးပဵၼ်ၸဝ်ႈႁဵတ်းၸိူဝ်ႉၼင်ႇၼႆၼင်ႇႁိုဝ်တၵ်းၼႄပျႃးတၢင်းဢၼ်သိုဝ်ႈတေႃႇမၼ်းၸဝ်ႈၼၼ်ႉဢေႃႈ။ ၼႂ်းၶိင်ႇၵႃႇလႃႉဢၼ်ပူၼ်ႉမႃးၼၼ်ႉမၼ်းၸဝ်ႈယိူၼ်ႉၶၢမ်ႇလႄႈဢမ်ႇမၢတ်ႈဢမ်ႇမၢႆဢပျတ်ႈၵူၼ်းႁဝ်းဝႆႉ။-
ၵူၺ်းၵႃႈ၊မိူဝ်ႈလဵဝ်ၼႆႉမၼ်းၸဝ်ႈၸီႇယၢင်ႇဢပျတ်ႈၵူၼ်းႁဝ်းႁႂ်ႈလႆႈၼႄပျႃးတၢင်းဢၼ်သိုဝ်ႈတေႃႇမၼ်းၸဝ်ႈယဝ်ႉဢေႃႈ။ ၼႂ်းလွင်ႈတၢင်းဢၼ်ႁဵတ်းၸိူဝ်ႉၼင်ႇၼႆၼႆႉမၼ်းၸဝ်ႈၼႄပျႃးလွင်ႈဢၼ်မၼ်းၸဝ်ႈသိုဝ်ႈတေႃႇဢိၵ်ႇတင်းလွင်ႈဢၼ်မၼ်းၸဝ်ႈႁဵတ်းႁႂ်ႈၶဝ်ၸိူဝ်းဢၼ်ယုမ်ႇမၢတ်ႈ ၸဝ်ႈယေႇသု၊ ၵူႈၵေႃႉသိုဝ်ႈတေႃႇၼၼ်ႉဢေႃႈ။
ပေႃးပဵၼ်ၸိူဝ်ႉၼင်ႇၼႆၸိုင်၊ႁဝ်းမီးတီႈတၵ်းဢုပ်ႇဝၢဝ်းလွင်ႈတူဝ်ၸဝ်ႈၵဝ်ႇၵႃႈသင်။ မၼ်းဢမ်ႇမီးၵႃႈသင်ဢေႃႈ။ ၵွပ်ႈသင်ဢမ်ႇမီး။ ၵွပ်ႈပိူဝ်ႈႁဝ်းၵမ်ၵျၢင်ႉၸွမ်းတြႃးၸဝ်ႈႁိုဝ်း။ ဢမ်ႇၸႂ်ႈၸိူဝ်ႉၼင်ႇၼၼ်။ မၼ်းပဵၼ်ၵွပ်ႈပိူဝ်ႈႁဝ်းယုမ်ႇမၢတ်ႈဢေႃႈ။-
ႁဝ်းလႆႈႁုလွင်ႈဢၼ်ၽြႃးပဵၼ်ၸဝ်ႈမၢတ်ႈႁဝ်းပဵၼ်ၵူၼ်းသိုဝ်ႈတေႃႇၵွပ်ႈပိူဝ်ႈႁဝ်းယုမ်ႇမၢတ်ႈၼၼ်ႉၵူၺ်းလႄႈဢမ်ႇၸႂ်ႈဝႃႈၵွပ်ႈပိူဝ်ႈႁဝ်းၵမ်ၵျၢင်ႉၸွမ်းတြႃးမၼ်းၸဝ်ႈၼၼ်ႉဢေႃႈ။-
သမ်ႉထႅင်ႈပိူင်ၼိုင်ႈ၊ၽြႃးပဵၼ်ၸဝ်ႈပဵၼ်ၽြႃးၵူၼ်းမဵဝ်း ၵျူး၊ ၶဝ်ၵူၺ်းႁိုဝ်း။ ၸွင်ႇမၼ်းၸဝ်ႈဢမ်ႇပဵၼ်ၽြႃးပႃးၵၼ်တင်းၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းႁိုဝ်း။ ၸႂ်ႈတႄႉ။ မၼ်းၸဝ်ႈပဵၼ်ၽြႃးပႃးတင်းၵူၼ်းတၢင်ႇၸိူဝ်ႉတၢင်ႇၶိူဝ်းဢေႃႈ။-
ၽြႃးပဵၼ်ၸဝ်ႈပဵၼ်ၽြႃးသူႇလဵဝ်ၵူၺ်းလႄႈမၼ်းၸဝ်ႈႁဵတ်းႁႂ်ႈၵူၼ်းမဵဝ်း ၵျူး၊ ဢၼ်ၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ၼၼ်ႉပဵၼ်ၵူၼ်းဢၼ်သိုဝ်ႈတေႃႇ ၵွပ်ႈပိူဝ်ႈၶဝ်ယုမ်ႇမၢတ်ႈသေ၊မၼ်းၸဝ်ႈယင်းႁဵတ်းႁႂ်ႈ ၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ဢမ်ႇၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ၼၼ်ႉပဵၼ်ၵူၼ်းသိုဝ်ႈတေႃႇၵွပ်ႈပိူဝ်ႈၶဝ်ယုမ်ႇမၢတ်ႈၼၼ်ႉမိူၼ်မိူၼ်ၵၼ်ဢေႃႈ။-
ပေႃးပဵၼ်ၸိူဝ်ႉၼင်ႇၼႆၸိုင်၊ၵွပ်ႈပိူဝ်ႈတၢင်းယုမ်ႇမၢတ်ႈလႄႈႁဝ်းတေပႄႇပႅတ်ႈပိင်းၺၢပ်ႈတြႃးၸဝ်ႈႁိုဝ်း။ ဢမ်ႇပႄႇပႅတ်ႈၵူၺ်းဢမ်ႇၵႃး ႁဝ်းယဵင်ႈၶႅၼ်းဢဝ်တၢင်းယုမ်ႇမၢတ်ႈၵမ်ႉထွၵ်ႈတြႃးၸဝ်ႈဢေႃႈ။
ပေႃးပဵၼ်ၸိူဝ်ႉၼင်ႇၼႆၸိုင်၊ ဢႃႇပြႃႇႁၢမ်ႇ၊ ဢၼ်ပဵၼ်ပေႃႈၵူၼ်းမဵဝ်းၸိူဝ်ႉၶိူဝ်းႁဝ်းၼၼ်ႉႁဵတ်းႁိုဝ်ပဵၼ်ၵူၼ်းသိုဝ်ႈတေႃႇမႃး။-
ပေႃးမၼ်းလႆႈပဵၼ်ၵူၼ်းသိုဝ်ႈတေႃႇမႃးၵွပ်ႈပိူဝ်ႈတၢင်းၵမ်တၢင်းၵျၢင်ႉမၼ်းၸိုင်၊မၼ်းမီးလွင်ႈတႃႇတေဢုပ်ႇယွင်ႈတူဝ်ၸဝ်ႈၵဝ်ႇဢေႃႈ။ ၵူၺ်းၵႃႈ၊မၼ်းဢမ်ႇၸၢင်ႈလႆႈဢုပ်ႇယွင်ႈတူဝ်မၼ်းၽၢႆႇၼႃႈၽြႃးပဵၼ်ၸဝ်ႈ။-
ၼႂ်းၵျၢမ်းလိၵ်ႈတႅမ်ႈဝႆႉလႄႈဝႃႈ၊ “ ဢႃႇပြႃႇႁၢမ်ႇ၊ ယုမ်ႇမၢတ်ႈဢိင်ပိုင်ႈၽြႃးပဵၼ်ၸဝ်ႈလႄႈ ၵွပ်ႈပိူဝ်ႈတၢင်းယုမ်ႇမၢတ်ႈမၼ်းၼၼ်ႉမၼ်းၸဝ်ႈမၢတ်ႈမၼ်းပဵၼ်ၵူၼ်းသိုဝ်ႈတေႃႇဢေႃႈ၊” ဝႃႈၼင်ႇၼႆဢေႃႈ။-
ၵေႃႉဢၼ်ႁဵတ်းၵၢၼ် တၵ်းလႆႈငိုၼ်းၵႃႈႁႅင်းမၼ်းဢေႃႈ။ ငိုၼ်းၵႃႈႁႅင်းၼၼ်ႉ ပိူၼ်ႈဢမ်ႇမၢတ်ႈပဵၼ်ၶွင်ၽၢၵ်ႇလၢၵ်ႈသွင်ႇလႄႈမၢတ်ႈပဵၼ်ငိုၼ်းၵႃႈၸၢင်ႈဢၼ်မၼ်းထိူၵ်ႈလႆႈၼၼ်ႉဢေႃႈ။-
ၵူၺ်းၵႃႈ၊ၵေႃႉဢၼ်ဢမ်ႇဢိင်ပိုင်ႈတၢင်းၵမ်တၢင်းႁဵတ်းတူဝ်မၼ်းလႄႈယုမ်ႇမၢတ်ႈဢိင်ပိုင်ႈၽြႃးပဵၼ်ၸဝ်ႈ ဢၼ်ၽေႇဢပျတ်ႈၶဝ်ၸိူဝ်းဢၼ်ပိူင်ႈလွႆးၽြႃးတြႃးၼၼ်ႉၽြႃးပဵၼ်ၸဝ်ႈမၢတ်ႈမၼ်းပဵၼ်ၵူၼ်းသိုဝ်ႈတေႃႇၵွပ်ႈပိူဝ်ႈမၼ်းယုမ်ႇမၢတ်ႈဢေႃႈ။-
ၵွပ်ႈၼႆလႄႈ ၶုၼ်ႁေႃၶမ်း တႃႇဝိတ်ႈ၊ ၸင်ႇလၢတ်ႈလွင်ႈမၢင်ႇၵလႃႇတၢင်းလီၵူၼ်းၵေႃႉဢၼ်ၽြႃးပဵၼ်ၸဝ်ႈ မၢတ်ႈပဵၼ်ၵူၼ်းသိုဝ်ႈတေႃႇ၊ပိၵ်ႉသမ်ႉမၼ်းဢမ်ႇဢိင်တၢင်းၵမ်တၢင်းၵျၢင်ႉၼၼ်ႉလႄႈ တႅမ်ႈဝႆႉဝႃႈၸမ်ႉ။
“ၶဝ်ၸိူဝ်းဢၼ်ၽြႃးပဵၼ်ၸဝ်ႈပွႆႇၶႂၢင်းပၼ်ဢပျတ်ႈၶဝ်လႄႈ ႁူမ်ႇပၼ်တၢင်းၽိတ်းၶဝ်ၼၼ်ႉမီးမၢင်ႇၵလႃႇဢေႃႈ။
ၶဝ်ၸိူဝ်းဢၼ်ၸဝ်ႈၽြႃးဢမ်ႇတွင်းဢမ်ႇမၢတ်ႈ၊ လွင်ႈတၢင်းၽိတ်းၶဝ်ၼၼ်ႉမီးမၢင်ႇၵလႃႇဢေႃႈ၊” ဝႃႈၼင်ႇၼႆဢေႃႈ။
မၢင်ႇၵလႃႇတၢင်းလီဢၼ်ၶုၼ်ႁေႃၶမ်းလၢတ်ႈဝႃႈၼႆႉ ပဵၼ်ပုၼ်ႈတႃႇၶဝ်ၸိူဝ်းဢၼ်လႆႈၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ဝႆႉၼၼ်ႉၵူၺ်းႁိုဝ်း။ ဢမ်ႇၼၼ်ပုၼ်ႈတႃႇၶဝ်ၸိူဝ်းဢၼ်ဢမ်ႇလႆႈၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ဝႆႉၼၼ်ႉၵေႃႈပႃးႁိုဝ်း။ ႁဝ်းလၢတ်ႈဝႃႈ၊ “ ဢႃႇပြႃႇႁၢမ်ႇ၊ ယုမ်ႇမၢတ်ႈဢိင်ပိုင်ႈၽြႃးပဵၼ်ၸဝ်ႈလႄႈၵွပ်ႈပိူဝ်ႈတၢင်းယုမ်ႇမၢတ်ႈမၼ်းၼၼ်ႉ မၼ်းၸဝ်ႈမၢတ်ႈမၼ်းပဵၼ်ၵူၼ်းသိုဝ်ႈတေႃႇဢေႃႈ၊” ဝႃႈၼင်ႇၼႆဢေႃႈ။-
ၽြႃးပဵၼ်ၸဝ်ႈမၢတ်ႈမၼ်းမိူဝ်ႈလႂ်။ ဢွၼ်တၢင်းမၼ်းလႆႈၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ၼၼ်ႉႁိုဝ်း။ ဝၢႆးလင်ၼၼ်ႉႁိုဝ်း။ ၽြႃးပဵၼ်ၸဝ်ႈမၢတ်ႈမၼ်းပဵၼ်ၵူၼ်းသိုဝ်ႈတေႃႇဝၢႆးလင်ၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ၼၼ်ႉဢမ်ႇၸႂ်ႈ။ မၢတ်ႈပဵၼ်ၸဵမ်မိူဝ်ႈဢွၼ်တၢင်းၼၼ်ႉယဝ်ႉဢေႃႈ။-
တၢင်းဢၼ်မၼ်းလႆႈၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ၼၼ်ႉ ပဵၼ်သၢၵ်ႈသေႇတၼ်းသိၵ်ႈလွင်ႈဢၼ်ၽြႃးပဵၼ်ၸဝ်ႈမၢတ်ႈမၼ်းပဵၼ်ၵူၼ်းသိုဝ်ႈတေႃႇ ၵွပ်ႈပိူဝ်ႈမၼ်းယုမ်ႇမၢတ်ႈၸဵမ်မိူဝ်ႈဢွၼ်တၢင်းမၼ်းဢမ်ႇပႆႇၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ၼၼ်ႉဢေႃႈ။ ၽြႃးပဵၼ်ၸဝ်ႈႁႂ်ႈမၼ်းႁဵတ်းၼင်ႇၼႆပုၼ်ႈလွင်ႈၼင်ႇႁိုဝ် ဢႃႇပြႃႇႁၢမ်ႇ၊ တၵ်းလႆႈပဵၼ်ပေႃႈၸႃႇတိဝိၺိၺ်ႇတီႈၵူၼ်းတင်းသဵင်ႈတင်းလူင်ၸိူဝ်းဢၼ်ပိၵ်ႉသမ်ႉယင်းဢမ်ႇပႆႇလႆႈၶၢမ်ႇဢဝ်မၢင်ႇၵလႃႇပၢတ်ႇပၢႆၼင်သေၵေႃႈၵွပ်ႈပိူဝ်ႈယုမ်ႇမၢတ်ႈလႄႈလႆႈၶၢမ်ႇတၢင်းဢၼ်ၽြႃးပဵၼ်ၸဝ်ႈမၢတ်ႈပဵၼ်ၵူၼ်းသိုဝ်ႈတေႃႇၸိူဝ်းၼၼ်ႉဢေႃႈ။-
လိူဝ်သေၼၼ်ႉ မၼ်းၵေႃႈလႆႈပဵၼ်ပေႃႈၶဝ်ၸိူဝ်းဢၼ်ၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ၼၼ်ႉဢေႃႈ။ ၵူၺ်းၵႃႈ၊မၢတ်ႈပဵၼ်ၵွပ်ႈပိူဝ်ႈၶဝ်ၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ဢမ်ႇၸႂ်ႈလႄႈ၊မၢတ်ႈပဵၼ်ၵွပ်ႈပိူဝ်ႈၶဝ်ပႆၸွမ်းသဵၼ်ႈတၢင်းတၢင်းယုမ်ႇမၢတ်ႈဢၼ်ပေႃႈႁဝ်း ဢႃႇပြႃႇႁၢမ်ႇ၊ လႆႈပႆၵႂႃႇၸဵမ်မိူဝ်ႈဢၼ်မၼ်းဢမ်ႇပႆႇၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ၼၼ်ႉဢေႃႈ။
ၽြႃးပဵၼ်ၸဝ်ႈပၼ်ၵတိဝႆႉတီႈ ဢႃႇပြႃႇႁၢမ်ႇ၊ ဢိၵ်ႇတင်းတီႈၸိူဝ်ႉၶိူဝ်းမၼ်းဝႃႈ၊ၶဝ်တၵ်းလႆႈၶၢမ်ႇဢဝ်မိူင်းၶူင်းၵၢင်ၼႆႉ ပဵၼ်ဢမူၺ်ႇၶဝ်ဢေႃႈ။ မၼ်းၸဝ်ႈပၼ်ၵတိၼႆႉ ၵွပ်ႈပိူဝ်ႈ ဢႃႇပြႃႇႁၢမ်ႇ၊ ၵမ်ၵျၢင်ႉၸွမ်းတြႃးပိင်းၺၢပ်ႈၸဝ်ႈဢမ်ႇၸႂ်ႈ။ ပၼ်ၵတိၵွပ်ႈပိူဝ်ႈမၼ်းယုမ်ႇမၢတ်ႈလႄႈၽြႃးပဵၼ်ၸဝ်ႈမၢတ်ႈမၼ်းပဵၼ်ၵူၼ်းသိုဝ်ႈတေႃႇဢေႃႈ။-
လွင်ႈမၼ်းၸမ်ႉ၊ပေႃးၶဝ်ၸိူဝ်းဢၼ်တၵ်းလႆႈႁပ်ႉဢဝ်ဢမူၺ်ႇၼၼ်ႉလႆႈႁပ်ႉဢဝ်ၵွပ်ႈပိူဝ်ႈၶဝ်ၵမ်ၵျၢင်ႉၸွမ်းတြႃးၸဝ်ႈၸိုင်၊တြႃးတၢင်းဢၼ်ယုမ်ႇမၢတ်ႈတၵ်းဢမ်ႇမီးဢၵျူဝ်းလႄႈၵႂၢမ်းၵတိၽြႃးပဵၼ်ၸဝ်ႈၵေႃႈတၵ်းဢမ်ႇပွင်ႇလွင်ႈၵႃႈသင်ယဝ်ႉ။-
ပိင်းၺၢပ်ႈတြႃးၸဝ်ႈၼၼ်ႉ ၸၢင်ႈႁႂ်ႈၵူၼ်းလႆႈၶၢမ်ႇတၢမ်ႇဢပျတ်ႈတီႈၸဝ်ႈၽြႃးဢေႃႈ။ ၵူၺ်းၵႃႈ၊ပေႃးဢမ်ႇမီးပိင်းၺၢပ်ႈတြႃးၸိုင်၊ဢပျတ်ႈတၢင်းဢၼ်ၽိတ်းပိူင်ႈပူၼ်ႉလိူဝ်ၼၼ်ႉဢမ်ႇမီး။
ပိူဝ်ႈၼႆလႄႈ ၵတိၸဝ်ႈတႄႇၼိူဝ်တၢင်းယုမ်ႇမၢတ်ႈဝႆႉပုၼ်ႈလွင်ႈၼင်ႇႁိုဝ်ၵတိၸဝ်ႈတၵ်းပဵၼ်ၶိူင်ႈဢႃႇမႃႉၶၢမ်ႇဢၼ်ဝႃႈ သုၵျေးၸူးၸဝ်ႈဢၼ်ဢမ်ႇဢဝ်ၵႃႈဢဝ်ၶၼ် ပၼ်တီႈလုၵ်ႈလၢၼ်ၸိူဝ်ႉၶိူဝ်း ဢႃႇပြႃႇႁၢမ်ႇ၊ တင်းသဵင်ႈတင်းလူင်ၸႃႉၸဵမ်ၶဝ်ၸိူဝ်းဢၼ်ၵမ်ၵျၢင်ႉၸွမ်းတြႃးၸဝ်ႈၵူၺ်းဢမ်ႇၵႃး၊ပၼ်တီႈၶဝ်ၸိူဝ်းဢၼ်မီးတၢင်းယုမ်ႇမၢတ်ႈ မိူၼ်ၸိူဝ်ႉၼင်ႇ ဢႃႇပြႃႇႁၢမ်ႇ၊ ယုမ်ႇမၢတ်ႈၼၼ်ႉဢေႃႈ။ လွင်ႈမၼ်းၸမ်ႉ၊ ဢႃႇပြႃႇႁၢမ်ႇ၊ ပဵၼ်ပေႃႈၸႃႇတိဝိၺိၺ်ႇတီႈႁဝ်းတင်းသဵင်ႈတင်းလူင်ၼၼ်ႉ၊-
ၸွမ်းၼင်ႇဢၼ်တႅမ်ႈဝႆႉၼႂ်းၵျၢမ်းလိၵ်ႈဝႃႈ၊ “ၸဝ်ႈၽြႃးလၢတ်ႈဝႃႈ၊ ‘ၵဝ်ယွင်ႈတၢင်ႇမႂ်းႁႂ်ႈလႆႈပဵၼ်ပေႃႈၵူၼ်းမဵဝ်းၼမ်ၼႃႇဢေႃႈ’ ဝႃႈၼင်ႇၼႆဢေႃႈ၊” တႅမ်ႈဝႆႉၼင်ႇၼႆဢေႃႈ။ ပိူဝ်ႈၼႆၸင်ႇ ဢႃႇပြႃႇႁၢမ်ႇ၊ လႆႈပဵၼ်ပေႃႈႁဝ်းၸွမ်းၼင်ႇၵတိၸဝ်ႈ၊ၽၢႆႇၼႃႈၽြႃးပဵၼ်ၸဝ်ႈ၊ၸဝ်ႈဢၼ်မၼ်းယုမ်ႇမၢတ်ႈဢိင်ပိုင်ႈ၊ၸဝ်ႈဢၼ်ႁဵတ်းႁႂ်ႈၵူၼ်းတၢႆလုၵ်ႉၶိုၼ်းလိပ်းမႃး၊ၸဝ်ႈဢၼ်ႁဵတ်းႁႂ်ႈလွင်ႈတၢင်းဢၼ်ဢမ်ႇပႆႇမီးပေႃႇပဵၼ်မႃးၼၼ်ႉဢေႃႈ။-
ဢႃႇပြႃႇႁၢမ်ႇ၊ ၼၼ်ႉ ယုမ်ႇမၢတ်ႈၵႂၢမ်းၵတိၸဝ်ႈၽြႃးလႄႈမုင်ႈမွင်းယူႇၼႂ်းမိူဝ်ႈဢၼ်ဢမ်ႇထၢင်ႇတေပဵၼ်လႆႈၼၼ်ႉသေယဝ်ႉ၊လႆႈပဵၼ် “ပေႃႈၵူၼ်းမဵဝ်းၼမ်ၼႃႇ” မႃး၊မႅၼ်ႈၸွမ်းၼင်ႇၵျၢမ်းလိၵ်ႈတႅမ်ႈဝႆႉဝႃႈ၊ “ၸိူဝ်ႉၶိူဝ်းမႂ်းတၵ်းၼမ်ၵိုၼ်းၼႃႇဢေႃႈ၊” ဝႃႈၼင်ႇၼႆၼၼ်ႉဢေႃႈ။-
မိူဝ်ႈဢၼ်မၼ်းဝူၼ်ႉတူၺ်းတူဝ်မၼ်း၊ပိၵ်ႉသမ်ႉဝႃႈဢသၢၵ်ႈမၼ်းၸမ်ထူၼ်ႈပၢၵ်ႇပီယဝ်ႉလႄႈတူဝ်မၼ်းမိူၼ်ၼင်ႇၵူၼ်းတၢႆဝႆႉ၊ဢိၵ်ႇတင်းမိူဝ်ႈဢၼ်ဝူၼ်ႉတူၺ်းမေးမၼ်း ၸႃႇရႃႇ၊ ၵေႃႈ ပဵၼ်မႄႈယိင်းမၼ်ဝႆႉသေၵေႃႈတၢင်းယုမ်ႇမၢတ်ႈမၼ်းဢမ်ႇသုတ်ႉဢမ်ႇယွမ်းၵႂႃႇ။-
မၼ်းယင်းယုမ်ႇမၢတ်ႈယူႇသေ ဢမ်ႇမီးၸႂ်ထၢင်ႇၽိတ်းၼိူဝ်ၵတိၸဝ်ႈလႄႈယင်းယွင်ႈယေႃးၽြႃးပဵၼ်ၸဝ်ႈယူႇလႄႈ ၵွပ်ႈပိူဝ်ႈတၢင်းယုမ်ႇမၢတ်ႈမၼ်းယဵင်ႈၶႅၼ်းမၼ်ႈၶိူင်ႇဢေႃႈ။-
မၼ်းယုမ်ႇတႄႉတႄႉဝႃႈဝႃႈလွင်ႈဢၼ်ၽြႃးပဵၼ်ၸဝ်ႈၸၢင်ႈႁဵတ်းၵႃႈၼင်ႇဢၼ်မၼ်းၸဝ်ႈပၼ်ၵတိဝႆႉၼၼ်ႉဢေႃႈ။-
ၵွပ်ႈၼႆလႄႈ ၽြႃးပဵၼ်ၸဝ်ႈ “မၢတ်ႈမၼ်းပဵၼ်ၵူၼ်းသိုဝ်ႈတေႃႇ” ဢေႃႈ။-
ၵႂၢမ်းဢၼ်ဝႃႈ “မၢတ်ႈမၼ်းပဵၼ်ၵူၼ်းဢၼ်သိုဝ်ႈတေႃႇ” ဢၼ်ဝႃႈၼၼ်ႉတႅမ်ႈဝႆႉပုၼ်ႈဢၵျူဝ်း ဢႃႇပြႃႇႁၢမ်ႇ၊ ၵေႃႉလဵဝ်ၵူၺ်းဢမ်ႇၸႂ်ႈ။-
ပုၼ်ႈဢၵျူဝ်းႁဝ်းၵေႃႈတႅမ်ႈပႃးဢေႃႈ။ ပေႃးႁဝ်းယုမ်ႇမၢတ်ႈၸဝ်ႈဢၼ်ႁဵတ်းႁႂ်ႈၸဝ်ႈၽြႃးႁဝ်း ၸဝ်ႈယေႇသု၊ လုၵ်ႉၵႃႈတၢင်းတၢႆၶိုၼ်းလိပ်းမႃးၼၼ်ႉၸိုင်၊မၼ်းၸဝ်ႈတၵ်း “မၢတ်ႈႁဝ်းပဵၼ်ၵူၼ်းသိုဝ်ႈတေႃႇ” ဢေႃႈ။-
ၸဝ်ႈယေႇသု၊ ၼၼ်ႉလႆႈၶၢမ်ႇတၢႆၵွပ်ႈပိူဝ်ႈဢပျတ်ႈႁဝ်းလႄႈသမ်ႉလႆႈလုၵ်ႉၶိုၼ်းလိပ်းမႃးႁႂ်ႈလႆႈႁဵတ်းႁႂ်ႈႁဝ်းသိုဝ်ႈတေႃႇဢေႃႈ။
ၵမ်းၼႆႉ၊ၵွပ်ႈႁဝ်းယုမ်ႇမၢတ်ႈၸင်ႇၽြႃးပဵၼ်ၸဝ်ႈမၢတ်ႈႁဝ်းပဵၼ်ၵူၼ်းသိုဝ်ႈတေႃႇယဝ်ႉ။ ၵွပ်ႈပိူဝ်ႈၼႆလႄႈႁဝ်းတင်းၽြႃးပဵၼ်ၸဝ်ႈထုၵ်ႇမေႃၵၼ်ယူႇၵွပ်ႈလူၺ်ႈၸဝ်ႈၽြႃးႁဝ်း ၸဝ်ႈယေႇသုၶရိၸ်ႈ၊ ဢေႃႈ။-
ၵွပ်ႈပိူဝ်ႈ ၸဝ်ႈယေႇသု၊ ၼၼ်ႉႁဝ်းလႆႈယုမ်ႇမၢတ်ႈသေလႄႈလႆႈဢၶႂၢင်ႉဢၼ်ၶဝ်ႈၸၢမ်ႇၸႃးၵျေးၸူးၸဝ်ႈတီႈဢၼ်ႁဝ်းတႄႇဝႆႉယူႇၼၼ်ႉသေယဝ်ႉ၊ႁဝ်းလႆႈသိူဝ်းၸူမ်းၼႂ်းတၢင်းဢၼ်ႁဝ်းမုင်ႈမွင်းႁႂ်ႈလႆႈၸၢမ်ႇၸႃးမုၼ်ၽုင်းၽြႃးပဵၼ်ၸဝ်ႈၼၼ်ႉဢေႃႈ။-
လိူဝ်သေၼၼ်ႉႁဝ်းသိူဝ်းၸူမ်းၼႂ်းတၢင်းဢၼ်ႁဝ်းတုၵ်ႉၶႃႉၺႃးၽေး၊ၵွပ်ႈပိူဝ်ႈႁဝ်းႁုလွင်ႈဢၼ်ၽေးတုၵ်ႉၶႃႉၼၼ်ႉၸၢင်ႈသွၼ်ပၼ်ႁႂ်ႈႁဝ်းမေႃယိူၼ်ႉၶၢမ်ႇၸႂ်ယၢဝ်းဢေႃႈ။-
တၢင်းဢၼ်ယိူၼ်ႉၶၢမ်ႇၼၼ်ႉႁဵတ်းႁႂ်ႈၽြႃးပဵၼ်ၸဝ်ႈထုၵ်ႇၸႂ်ႁဝ်းလႄႈ၊တၢင်းဢၼ်မၼ်းၸဝ်ႈထုၵ်ႇၸႂ်ၼၼ်ႉပွင်ႁဵတ်းပွင်သၢင်ႈတၢင်းဢၼ်မုင်ႈထႃႈမွင်းထႃႈဢေႃႈ။-
တၢင်းဢၼ်မုင်ႈမွင်းၼၼ်ႉတိုၼ်းဢမ်ႇႁႂ်ႈႁဝ်းလႆႈဢူၵ်းလႆႈဢၢႆပိူၼ်ႈ၊ၵွပ်ႈပိူဝ်ႈၽြႃးပဵၼ်ၸဝ်ႈဢဝ်ဝိၺိၺ်ႇမူတ်းၸၢင်ႇၸဝ်ႈဢၼ်ပဵၼ်သုၵျေးၸူးတီႈႁဝ်းၼၼ်ႉလႄႈသွၼ်းလေႃႇတၢင်းႁၵ်ႉမႅတ်ႈတႃႇမၼ်းၸဝ်ႈဝႆႉၵႃႈၼႂ်းႁူဝ်ၸႂ်ႁဝ်းယဝ်ႉဢေႃႈ။
ၼႂ်းမိူဝ်ႈဢၼ်ႁဝ်းယင်းတိုၵ်ႉႁႅင်းဢူၼ်ႈယူႇၼၼ်ႉလႄႈၶိင်ႇမၼ်းၵေႃႈသၢင်ႇထုၵ်ႇယဝ်ႉၸင်ႇ ၸဝ်ႈၶရိၸ်ႈ၊ ၶၢမ်ႇတၢႆတၢင်ၵူၼ်းၸိူဝ်းဢၼ်ၽိတ်းပိူင်ႈၽြႃးတြႃးၼၼ်ႉဢေႃႈ။-
တၢင်းဢၼ်သေၵေႃႉသေၵူၼ်းတၵ်းၶၢမ်ႇတၢႆတၢင်ၵူၼ်းဢၼ်ၵမ်ၵျၢင်ႉၸွမ်းတြႃးၼၼ်ႉပဵၼ်လွင်ႈဢၼ်ၶႆႈၸႂ်ယၢပ်ႇယူႇဢေႃႈ။ ၵေႃႉဢၼ်ႁတ်းၶၢမ်ႇတၢႆတၢင်ၵူၼ်းဢၼ်မျၢတ်ႈလီၼၼ်ႉၸိုင်၊ၸၢင်ႈၶႄးတၵ်းမီးယူႇဢေႃႈ။-
ၵူၺ်းၵႃႈ၊ၽြႃးပဵၼ်ၸဝ်ႈၼႄပျႃးတၢင်းဢၼ်မၼ်းၸဝ်ႈႁၵ်ႉႁဝ်းထၼ်ႇလႂ်ၼၼ်ႉၼႂ်းတၢင်းဢၼ် ၸဝ်ႈၶရိၸ်ႈ၊ ၶၢမ်ႇတၢႆတၢင်ႁဝ်းယၢမ်းမိူဝ်ႈဢၼ်ႁဝ်းယင်းတိုၵ်ႉပဵၼ်ၵူၼ်းၽိတ်းပိူင်ႈယူႇၼၼ်ႉဢေႃႈ။-
ၵွပ်ႈပိူဝ်ႈမၼ်းၸဝ်ႈထွၵ်ႇလိူတ်ႈမၼ်းၸဝ်ႈ၊ၶၢမ်ႇတၢႆတၢင်ႁဝ်း၊ႁႂ်ႈႁဝ်းလႆႈပဵၼ်ၵူၼ်းသိုဝ်ႈတေႃႇၼၼ်ႉလႄႈ မၼ်းၸဝ်ႈတၵ်းယဵင်ႈၶႅၼ်းၵႄႇၶျွတ်ႈဢဝ်ႁဝ်းဢွၵ်ႇသေၵႃႈတီႈတၢမ်ႇဢပျတ်ႈဢၼ်ၽြႃးပဵၼ်ၸဝ်ႈတၵ်းၸီႇယၢင်ႇၼၼ်ႉဢေႃႈ။-
ႁဝ်းၼႆႉပိၵ်ႉသမ်ႉပဵၼ်ရၢၼ်ႇသူႇၽြႃးပဵၼ်ၸဝ်ႈသေၵေႃႈပေႃးမၼ်းၸဝ်ႈယင်းႁႂ်ႈလုၵ်ႈၸဝ်ႈၶၢမ်ႇတၢႆႁႂ်ႈႁဝ်းလႆႈၶိုၼ်းလီၵၼ်တင်းမၼ်းၸဝ်ႈၸိုင်၊တေႃႈလဵဝ်ၼႆႉႁဝ်းၶိုၼ်းလီၵၼ်တင်းမၼ်းၸဝ်ႈယဝ်ႉလႄႈမၼ်းၸဝ်ႈတၵ်းယဵင်ႈၶႅၼ်းၵႄႇၶျွတ်ႈဢဝ်ႁဝ်းၵွပ်ႈပိူဝ်ႈဢသၢၵ်ႈ ၸဝ်ႈၶရိၸ်ႈ၊ ၼၼ်ႉဢေႃႈ။-
လိူဝ်သေၼႆႉၵူၺ်းဢမ်ႇၵႃး၊ႁဝ်းလႆႈသိူဝ်းၸူမ်းၼႂ်းၽြႃးပဵၼ်ၸဝ်ႈၵွပ်ႈပိူဝ်ႈမိူဝ်ႈလဵဝ်ၼႆႉၸဝ်ႈႁဝ်းၶႃႈ ၸဝ်ႈယေႇသုၶရိၸ်ႈ၊ ႁဵတ်းႁႂ်ႈႁဝ်းၶိုၼ်းလီၵၼ်တင်းၽြႃးပဵၼ်ၸဝ်ႈယဝ်ႉၼၼ်ႉဢေႃႈ။
ဢပျတ်ႈတြႃးၶဝ်ႈမႃးၼႂ်းလေႃးၵႃႉၼႆႉၵွပ်ႈပိူဝ်ႈၵူၼ်းၵေႃႉၼိုင်ႈလႄႈတြႃးတၢင်းတၢႆၵေႃႈၶဝ်ႈၸွမ်းဢပျတ်ႈတြႃးၼၼ်ႉမႃးဢေႃႈ။ ၵွပ်ႈပိူဝ်ႈၵူၼ်းတင်းသဵင်ႈတင်းလူင်မီးဢပျတ်ႈလႄႈတြႃးတၢင်းတၢႆလႆႈၸွတ်ႇတူဝ်ႈၵႂႃႇၵႃႈၼႂ်းၸိူဝ်ႉၶိူဝ်းၵူၼ်းတင်းသဵင်ႈတင်းမူတ်းဢေႃႈ။-
ဢပျတ်ႈတြႃးၼၼ်ႉမီးဝႆႉၼႂ်းလေႃးၵႃႉၼႆႉဢွၼ်တၢင်းၽြႃးပဵၼ်ၸဝ်ႈပၼ်ပိင်းၺၢပ်ႈတြႃးၸဝ်ႈၼၼ်ႉဢေႃႈ။ ၵူၺ်းၵႃႈ၊ၵွပ်ႈပိူဝ်ႈမၼ်းၸဝ်ႈယင်းဢမ်ႇပႆႇပၼ်တြႃးၸဝ်ႈလႄႈမၼ်းၸဝ်ႈဢမ်ႇမၢတ်ႈမၢႆဢပျတ်ႈၶဝ်ဝႆႉ။-
ၼႂ်းဝႃႈၼၼ်သေၵေႃႈၸႃႉၸဵမ်ၸူဝ်ႈပၢၼ် ဢႃႇတမ်ႇ၊ တေႃႇထိုင်ၸူဝ်ႈပၢၼ်သြႃႇ မူဝ်းသေႇ၊ ၼၼ်ႉတြႃးတၢင်းတၢႆဢုပ်ႉပိူင်ႇယူႇၼိူဝ်ၵူၼ်းတင်းသဵင်ႈတင်းလူင်ဢေႃႈ။ တီႈၶဝ်ၸိူဝ်းဢၼ်ပိၵ်ႉသမ်ႉဢမ်ႇၽိတ်းပိူင်ႈမဵဝ်းဢၼ် ဢႃႇတမ်ႇ၊ လိူဝ်ၵႂၢမ်းၸဝ်ႈၼၼ်ႉၵေႃႈတြႃးတၢင်းတၢႆယင်းလႆႈဢုပ်ႉပိူင်ႇဢေႃႈ။ ဢႃႇတမ်ႇ၊ ၼႆႉပဵၼ်ပုင်ႇႁၢင်ႈၸိၼႄၸဝ်ႈဢၼ်တၵ်းမႃးၵမ်းလိုၼ်းၼၼ်ႉဢေႃႈ။-
ၵူၺ်းၵႃႈ၊သုၵျေးၸူးၸဝ်ႈဢၼ်ဢမ်ႇဢဝ်ၵႃႈဢဝ်ၶၼ်ၼၼ်ႉဢမ်ႇမိူၼ်ၸိူဝ်ႉၼင်ႇဢပျတ်ႈ ဢႃႇတမ်ႇ၊ ၵွပ်ႈဢပျတ်ႈၵူၼ်းၵေႃႉၼိုင်ႈလႄႈၵူၼ်းတင်းလၢႆလႆႈၶၢမ်ႇတၢင်းတၢႆဢေႃႈ။ ၵူၺ်းၵႃႈ၊ၵွပ်ႈၵျေးၸူးၵူၼ်းၵေႃႉၼိုင်ႈဢၼ်ဝႃႈ ၸဝ်ႈယေႇသုၶရိၸ်ႈ၊ ၼၼ်ႉလႄႈၵူၼ်းတင်းလၢႆလႆႈႁပ်ႉဢဝ်သုၵျေးၸူးၸဝ်ႈၽြႃးဢၼ်ယဵင်ႈၶႅၼ်းယႂ်ႇမျၢတ်ႈၼႃႇလႄႈယင်းဢမ်ႇဢဝ်ၵႃႈဢဝ်ၶၼ်ၼၼ်ႉဢေႃႈ။-
လိူဝ်သေၼၼ်ႉ သုၵျေးၸူးၸဝ်ႈၽြႃးပႅၵ်ႇပိူင်ႈၵၼ်တင်းဢပျတ်ႈၵူၼ်းၵေႃႉၼိုင်ႈၼၼ်ႉဢေႃႈ။ ၵွပ်ႈပိူဝ်ႈပျတ်ႈဢၼ်ၼိုင်ႈလႄႈမၼ်းလႆႈၶၢမ်ႇတၢမ်ႇဢၼ်ၸီႇယၢင်ႇလႄႈၵွပ်ႈလွင်ႈသုၵျေးၸူးၸဝ်ႈၼၼ်ႉၸမ်ႉ၊ပိၵ်ႉသမ်ႉၵူၼ်းမီးဢပျတ်ႈၼမ်ၼႃႇသေၵေႃႈလႆႈႁပ်ႉၶၢမ်ႇဢဝ်တၢင်းဢၼ်ၽြႃးပဵၼ်ၸဝ်ႈမၢတ်ႈၶဝ်ပဵၼ်ၵူၼ်းသိုဝ်ႈတေႃႇဢေႃႈ။-
လိူဝ်သေၼၼ်ႉပေႃးဝႃႈၵွပ်ႈၵူၼ်းၵေႃႉၼိုင်ႈၽိတ်းပိူင်ႈလႄႈတြႃးတၢင်းတၢႆလႆႈဢုပ်ႉပိူင်ႇၵွပ်ႈၵူၼ်းၵေႃႉၼၼ်ႉၸိုင်၊ၵွပ်ႈပိူဝ်ႈၸဝ်ႈပႃးၼိုင်ႈဢၼ်ဝႃႈ ၸဝ်ႈယေႇသုၶရိၸ်ႈ၊ ဢၼ်ယဵင်ႈၶႅၼ်းယႂ်ႇမျၢတ်ႈၼႃႇၼၼ်ႉလႄႈၶဝ်ၸိူဝ်းဢၼ်လႆႈႁပ်ႉၶၢမ်ႇဢဝ်ၵျေးၸူးၸဝ်ႈၼမ်ၵိုၼ်းၼႃႇ၊ဢိၵ်ႇတင်းလႆႈၶၢမ်ႇမၢတ်ႈပဵၼ်ၵူၼ်းသိုဝ်ႈတေႃႇၵွပ်ႈပိူဝ်ႈၵျေးၸူးၸဝ်ႈၼၼ်ႉတၵ်းလႆႈဢုပ်ႇပိူင်ႇလႄႈၸၢမ်ႇၸႃးဢသၢၵ်ႈၵွပ်ႈလူၺ်ႈၸဝ်ႈၼၼ်ႉဢေႃႈ။
ပိူဝ်ႈၼႆလႄႈၸွမ်းၼင်ႇၵူၼ်းတင်းသဵင်ႈတင်းလူင်လႆႈၶၢမ်ႇၸီႇယၢင်ႇဢပျတ်ႈတၢမ်ႇၵွပ်ႈပိူဝ်ႈၵူၼ်းၵေႃႉၼိုင်ႈမီးဢပျတ်ႈၼၼ်ႉၵူၼ်းတင်းလၢႆလႆႈၶၢမ်ႇတၢင်းဢၼ်ပွႆႇလွတ်ႈဢပျတ်ႈလႄႈလႆႈဢသၢၵ်ႈၶျၢမ်းသႃႇၵွပ်ႈပိူဝ်ႈၵူၼ်းၵေႃႉၼိုင်ႈႁဵတ်းလွင်ႈတၢင်းဢၼ်သိုဝ်ႈတေႃႇဢေႃႈ။-
ပိူင်လဵဝ်ၵၼ် ၸွမ်းၼင်ႇၵူၼ်းတင်းလၢႆၽိတ်းပိူင်ႈၵွပ်ႈပိူဝ်ႈၵူၼ်းၵေႃႉၼိုင်ႈဢမ်ႇထွမ်ႇဢဝ်ၵႂၢမ်းၸဝ်ႈၽြႃးၼၼ်ႉ၊ၵူၼ်းၼမ်ၼႃႇတၵ်းလႆႈပဵၼ်ၵူၼ်းသိုဝ်ႈတေႃႇၵွပ်ႈပိူဝ်ႈၸဝ်ႈပႃးၼိုင်ႈထွမ်ႇဢဝ်ၵႂၢမ်းၸဝ်ႈၽြႃးၼၼ်ႉဢေႃႈ။
ၼႄးၼိုင်ႈၸမ်ႉ၊ပိင်းၺၢပ်ႈတြႃးၸဝ်ႈပၼ်မႃးႁႂ်ႈၵူၼ်းၽိတ်းပိူင်ႈၼမ်မႃးၵိုၼ်းမႃးဢေႃႈ။ ၵူၺ်းၵႃႈ၊ၵႃႈၼင်ႇဢၼ်ဢပျတ်ႈတၢင်းဢၼ်ၽိတ်းပိူင်ႈတူဝ်းၼမ်မႃးၼၼ်ႉၵျေးၸူးၽြႃးပဵၼ်ၸဝ်ႈယဵင်ႈၶႅၼ်းၼမ်ၵိုၼ်းမႃးၼႃႇသေၼၼ်ႉဢေႃႈ။-
ၵွပ်ႈပိူဝ်ႈၸိူဝ်ႉၼင်ႇၼႆလႄႈၸိူဝ်ႉၼင်ႇဢၼ်ဢပျတ်ႈတြႃးလႆႈဢုပ်ႉပိူင်ႇႁွတ်ႈထိုင်တၢင်းတၢႆၼၼ်ႉၸိုင်၊ၵျေးၸူးတြႃးတၵ်းလႆႈဢဝ်တြႃးဢၼ်သိုဝ်ႈတေႃႇဢုပ်ႉပိူင်ႇႁွတ်ႈထိုင်ထႃႇဝရႃႉဢသၢၵ်ႈၵွပ်ႈပိူဝ်ႈၸဝ်ႈၽြႃးႁဝ်း ၸဝ်ႈယေႇသုၶရိၸ်ႈ၊ ဢေႃႈ။
ပေႃးပဵၼ်ၸိူဝ်ႉၼင်ႇၼႆၸိုင်၊ႁဝ်းတေဝႃႈႁိုဝ်။ ၼင်ႇႁိုဝ်ၵျေးၸူးၸဝ်ႈတၵ်းၼမ်ၵိုၼ်းမႃးၸိုင်၊ႁဝ်းတေႁဵတ်းၽိတ်းပိူင်ႈယူႇတိၵ်းတိၵ်းဝႃႈၼႆႁိုဝ်း။-
မၼ်းဢမ်ႇပဵၼ်ၸိူဝ်ႉၼင်ႇၼၼ်လႃးလႃး။ ပေႃးႁဝ်းပဵၼ်မိူၼ်ၼင်ႇဢၼ်တၢႆသေဢပျတ်ႈတြႃးယဝ်ႉ၊တေၶိုၼ်းၵႂႃႇလိပ်းယူႇၼႂ်းဢပျတ်ႈထႅင်ႈၸိူဝ်ႉႁိုဝ်။-
မိူဝ်ႈဢၼ်ႁဝ်းၶၢမ်ႇမၢင်ႇၵလႃႇပပ်ႉတိၸမ်ႇ ၼႂ်း ၸဝ်ႈယေႇသုၶရိၸ်ႈ၊ ၼၼ်ႉလႆႈၶၢမ်ႇဢဝ်မၢင်ႇၵလႃႇပပ်ႉတိၸမ်ႇၼႂ်းတၢင်းဢၼ်မၼ်းၸဝ်ႈၶၢမ်ႇတၢင်းတၢႆၼၼ်ႉယဝ်ႉ၊ဝႃႈၼႆသူၸဝ်ႈဢမ်ႇႁုႁိုဝ်း။-
ပိူဝ်ႈၼႆလႄႈမိူဝ်ႈဢၼ်ႁဝ်းၶၢမ်ႇဢဝ်မၢင်ႇၵလႃႇပပ်ႉတိၸမ်ႇၼၼ်ႉပဵၼ်တၢင်းဢၼ်ႁဝ်းလႆႈတၢႆၸွမ်းမၼ်းၸဝ်ႈသေလႄႈလႆႈၽင်ဝႆႉၸွမ်းမၼ်းၸဝ်ႈယဝ်ႉဢေႃႈ။ ၸိူဝ်ႉၼင်ႇဢၼ် ၸဝ်ႈၶရိၸ်ႈ၊ လုၵ်ႉသေၵႃႈတၢင်းတၢႆၶိုၼ်းလိပ်းမႃးၵွပ်ႈလူၺ်ႈမုၼ်ၽုင်းပေႃႈၸဝ်ႈၼၼ်ႉႁဝ်းၵေႃႈတၵ်းလႆႈလုၵ်ႉၶိုၼ်ႈမႃးပႆၼႂ်းသဵၼ်ႈတၢင်းဢၼ်မီးဢသၢၵ်ႈမႂ်ႇမႂ်ႇဢေႃႈ။
ၼႄးၼိုင်ႈၸမ်ႉ၊ပေႃးႁဝ်းလႆႈၽင်ဝႆႉႁူမ်ႈလူၺ်ႈမၼ်းၸဝ်ႈၼႂ်းတၢင်းတၢႆၼၼ်ႉၸိုင်၊ႁဝ်းတၵ်းလႆႈႁူမ်ႈလူၺ်ႈၵၼ်တင်းမၼ်းၸဝ်ႈၼႂ်းတၢင်းဢၼ်လုၵ်ႉၶိုၼ်းလိပ်းၼၼ်ႉဢေႃႈ။-
လိူဝ်သေၼၼ်ႉႁဝ်းႁုလွင်ႈဢၼ်ၵူၼ်းၵဝ်ႇႁဝ်းၼႆႉလႆႈၶၢမ်ႇဢဝ်တွၵ်ႇဝႆႉၵႃႈၼိူဝ်သဝ်မႆႉဝႃးမိုဝ်းလူၺ်ႈၵၼ်တင်း ၸဝ်ႈၶရိၸ်ႈ၊ ပုၼ်ႈလွင်ႈၼင်ႇႁိုဝ်တၵ်းလႆႈယႃႉလုယႃႉလႅဝ်ပႅတ်ႈဢႃႇၼႃႇဢပျတ်ႈတြႃးႁႂ်ႈႁဝ်းလႆႈလွတ်ႈသေၵႃႈတီႈတၢင်းဢၼ်ပဵၼ်ၶႃႈဢပျတ်ႈတြႃးၼၼ်ႉဢေႃႈ။-
လွင်ႈမၼ်းၸမ်ႉ၊ၵူၼ်းတၢႆၼၼ်ႉလႆႈလွတ်ႈသေၵႃႈတီႈဢႃႇၼႃႇဢပျတ်ႈတြႃးယဝ်ႉဢေႃႈ။-
ပေႃးႁဝ်းတၢႆလူၺ်ႈ ၸဝ်ႈၶရိၸ်ႈ၊ ၸိုင်၊ႁဝ်းယုမ်ႇလွင်ႈဢၼ်ႁဝ်းၵေႃႈတၵ်းတေလႆႈလုၵ်ႉၶိုၼ်းလိပ်းမီးဢသၢၵ်ႈမႂ်ႇလူၺ်ႈမၼ်းၸဝ်ႈဢေႃႈ။-
လွင်ႈမၼ်းၸမ်ႉ၊ႁဝ်းႁုလွင်ႈဢၼ် ၸဝ်ႈၶရိၸ်ႈ၊ လႆႈလုၵ်ႉၵႃႈတၢင်းတၢႆၶိုၼ်းလိပ်းမီးဢသၢၵ်ႈမႂ်ႇလႄႈ တၵ်းတေဢမ်ႇၶိုၼ်းတၢႆထႅင်ႈသေပွၵ်ႈဢမ်ႇၵႃး၊တြႃးတၢင်းတၢႆဢမ်ႇလႆႈမီးဢႃႇၼႃႇၵႃႈၼိူဝ်မၼ်းၸဝ်ႈယဝ်ႉဢေႃႈ။-
တၢင်းတၢႆဢၼ်မၼ်းၸဝ်ႈၶၢမ်ႇတၢႆၵႂႃႇၼၼ်ႉပဵၼ်တၢင်းဢၼ်တၢႆပုၼ်ႈတႃႇဢပျတ်ႈတြႃးဢေႃႈ။ တၢႆပွၵ်ႈလဵဝ်ၵူၺ်းလႄႈဢသၢၵ်ႈဢၼ်မၼ်းၸဝ်ႈလိပ်းယူႇမိူဝ်ႈလဵဝ်ၼႆႉပဵၼ်ဢသၢၵ်ႈဢၼ်လိပ်းယူႇမႂ်ႇမႂ်ႇ ပုၼ်ႈတႃႇၽြႃးပဵၼ်ၸဝ်ႈဢေႃႈ။-
ပိူင်လဵဝ်ၵၼ် သူၵေႃႈလူဝ်ႇမၢတ်ႈတူဝ်ၸဝ်ႈၵဝ်ႇပဵၼ်ၵူၼ်းတၢႆပုၼ်ႈတႃႇဢပျတ်ႈတြႃးယဝ်ႉလႄႈလႆႈပဵၼ်ၵူၼ်းလိပ်းမီးဢသၢၵ်ႈမႂ်ႇၼႂ်း ၸဝ်ႈယေႇသုၶရိၸ်ႈ၊ ပုၼ်ႈတႃႇၽြႃးပဵၼ်ၸဝ်ႈယဝ်ႉဢေႃႈ။
ပိူဝ်ႈၼႆလႄႈယႃႇပေပၼ်ဢၶႂၢင်ႉဢၼ်ဢပျတ်ႈတြႃးလႆႈဢုပ်ႉပိူင်ႇတူဝ်ၶၼ်ႇထႃႇသူ။ ယႃႇပေၸွမ်းဢလူဝ်ႇၸႂ်ၵိလေႇသႃႇတူဝ်ၵႃႇယႃႉသူဢၼ်ၸၢင်ႈလုလႅဝ်ၼၼ်ႉ။-
ယႃႇပေဢဝ်ဢၢင်ႇၵႃႇတူဝ်သူသေၸိူဝ်ႉသေပိူင်ဢၢပ်ႈပၼ်ၵႃႈတီႈဢပျတ်ႈတြႃးႁႂ်ႈလႆႈပဵၼ်ၶိူင်ႈၸႂ်ႉၶိူင်ႈႁဵတ်းတၢင်းဢၼ်ႁၢႆႉမိူၵ်ႈဢမ်ႇတြႃးၼၼ်ႉ။ ဢဝ်တူဝ်သူဢၢပ်ႈပၼ်ၵႃႈတီႈၽြႃးပဵၼ်ၸဝ်ႈမိူၼ်ၸိူဝ်ႉၼင်ႇၵူၼ်းဢၼ်လႆႈလုၵ်ႉသေၵႃႈတၢင်းတၢႆၶိုၼ်းလိပ်းမီးဢသၢၵ်ႈမႂ်ႇမႃးၼၼ်ႉတႃႉ။ ႁႂ်ႈဢၢင်ႇၵႃႇတူဝ်သူလႆႈပဵၼ်ၶိူင်ႈၸႂ်ႉၶိူင်ႈႁဵတ်းတၢင်းဢၼ်သိုဝ်ႈတေႃႇတႃႉ။-
ပိူဝ်ႈဢၼ်သူဢမ်ႇယူႇတႂ်ႈဢႃႇၼႃႇပိင်းၺၢပ်ႈတြႃးၸဝ်ႈယဝ်ႉ၊မီးယူႇတႂ်ႈၵျေးၸူးတြႃးၸဝ်ႈယဝ်ႉၼၼ်ႉလႄႈသူဢမ်ႇလူဝ်ႇမီးတႂ်ႈဢႃႇၼႃႇဢပျတ်ႈတြႃးယဝ်ႉဢေႃႈ။
ပေႃးပဵၼ်ၸိူဝ်ႉၼင်ႇၼႆၸိုင်၊ႁဝ်းတေဝႃႈႁိုဝ်။ ၵွပ်ႈပိူဝ်ႈႁဝ်းဢမ်ႇယူႇတႂ်ႈပိင်းၺၢပ်ႈတြႃးၸဝ်ႈယဝ်ႉ၊ယူႇတႂ်ႈၵျေးၸူးတြႃးၸဝ်ႈၼၼ်ႉလႄႈႁဝ်းတၵ်းတေႁဵတ်းၽိတ်းပိူင်ႈယူႇႁိုဝ်း။ မၼ်းဢမ်ႇပဵၼ်ၸိူဝ်ႉၼင်ႇၼၼ်။-
ပေႃးသူဢၢပ်ႈတူဝ်ၸဝ်ႈၵဝ်ႇႁႂ်ႈလႆႈပဵၼ်ၶႃႈဢၼ်ထွမ်ႇၵႂၢမ်းတီႈသေၵေႃႉၵေႃႉၸိုင်၊သူၶဝ်ႈပဵၼ်ၶႃႈၵႃႈတီႈၸဝ်ႈၼၼ်ႉယဝ်ႉ၊ဝႃႈၼႆသူဢမ်ႇႁုႁိုဝ်း။ ပေႃးပဵၼ်ၶႃႈဢပျတ်ႈတြႃးၸိုင်၊တေလႆႈႁွတ်ႈထိုင်တၢင်းတၢႆလႄႈပေႃးပဵၼ်ၶႃႈဢၼ်ထွမ်ႇဢဝ်ၵႂၢမ်းၸဝ်ႈၽြႃးၸိုင်၊တေလႆႈပဵၼ်ၵူၼ်းသိုဝ်ႈတေႃႇဢေႃႈ။-
ပိၵ်ႉသမ်ႉသူယၢမ်ႈပဵၼ်ၶႃႈဢပျတ်ႈတြႃးသေၵေႃႈပိူဝ်ႈဢၼ်သူပႃးၸႂ်ပႃးၶေႃးထွမ်ႇဢဝ်ၵႂၢမ်းၸဝ်ႈၽြႃးဢၼ်သူလႆႈသွၼ်ဢဝ်ၼၼ်ႉလႄႈၵျေးၸူးၽြႃးပဵၼ်ၸဝ်ႈယႂ်ႇၼႃႇဢေႃႈ။-
ပိူဝ်ႈဢၼ်သူလႆႈၶၢမ်ႇဢဝ်တၢင်းဢၼ်ပွႆႇလွတ်ႈၶႂၢင်းပၼ်ဢပျတ်ႈသေယဝ်ႉ၊လႆႈပဵၼ်ၶႃႈတြႃးတၢင်းဢၼ်သိုဝ်ႈတေႃႇယဝ်ႉဢေႃႈ။-
ၸွမ်းလူၺ်ႈၺၢၼ်ႇတူဝ်ၵႃႇယႃႉသူၵႄႇၼႃႇၼၼ်ႉၵဝ်လႆႈဢဝ်ၵႂၢမ်းငၢႆႈငၢႆႈလၢတ်ႈၸွမ်းသၽေႃးၵူၼ်းဢေႃႈ။ ၸိူဝ်ႉၼင်ႇဢၼ်သူယၢမ်ႈဢဝ်ဢၢင်ႇၵႃႇတူဝ်သူဢၢပ်ႈႁႂ်ႈလႆႈပဵၼ်ၶႃႈၵႃႈတီႈတြႃးတၢင်းဢၼ်ၵူဝ်ႈၵိူၵ်ႇထိုင်ပဵၼ်ၵူၼ်းႁၢႆႉမိူၵ်ႈၼၼ်ႉ မိူဝ်ႈလဵဝ်ၼႆႉဢွၼ်ၵၼ်ဢဝ်တူဝ်ၵႃႇယႃႉသူဢၢပ်ႈႁႂ်ႈလႆႈပဵၼ်ၶႃႈၵႃႈတီႈတြႃးတၢင်းဢၼ်သိုဝ်ႈတေႃႇလႄႈပဵၼ်ၵူၼ်းမူတ်းၸၢင်ႇတႃႉ။
ၼႂ်းၶိင်ႇမိူဝ်ႈဢၼ်သူပဵၼ်ၶႃႈဢပျတ်ႈတြႃးယူႇၼၼ်ႉၸိုင်၊သူၵၢင်းလွတ်ႈသေတြႃးတၢင်းဢၼ်သိုဝ်ႈတေႃႇဢေႃႈ။-
ၵွပ်ႈပိူဝ်ႈဢၼ်သူၵမ်ၵျၢင်ႉတၢင်းၵမ်တၢင်းၵျၢင်ႉဢၼ်သူလီဢၢႆပိူၼ်ႈတေႃႈလဵဝ်ၼႆႉၼၼ်ႉသူလႆႈဢၵျူဝ်းၵႃႈသင်။ တီႈသုတ်းတၢင်းၵမ်တၢင်းၵျၢင်ႉၸိူဝ်ႉၼင်ႇၼၼ်ၼၼ်ႉပဵၼ်တၢင်းတၢႆဢေႃႈ။-
ၵူၺ်းၵႃႈ၊တေႃႈလဵဝ်ၼႆႉ သူလႆႈဢၶႂၢင်ႉဢၼ်ပွႆႇလွတ်ႈသေၵႃႈတီႈဢပျတ်ႈတြႃးယဝ်ႉလႄႈလႆႈၶဝ်ႈပဵၼ်ၶႃႈၽြႃးပဵၼ်ၸဝ်ႈယဝ်ႉသေယဝ်ႉ၊လႆႈဢၵျူဝ်းဢၼ်ပဵၼ်ၵူၼ်းမူတ်းၸၢင်ႇလႄႈတီႈသုတ်းမၼ်းလႆႈထႃႇဝရႃႉဢသၢၵ်ႈဢေႃႈ။-
လွင်ႈမၼ်းၸမ်ႉ၊ၵႃႈၶၼ်ဢပျတ်ႈပဵၼ်တၢင်းတၢႆဢေႃႈ။ ၵူၺ်းၵႃႈ၊သုၵျေးၸူးၽြႃးပဵၼ်ၸဝ်ႈဢၼ်ဢမ်ႇဢဝ်ၵႃႈဢဝ်ၶၼ်ပၼ်ၼၼ်ႉၸမ်ႉ၊ပဵၼ်ဢသၢၵ်ႈထႃႇဝရႃႉၼႂ်းၸဝ်ႈၽြႃးႁဝ်း ၸဝ်ႈယေႇသုၶရိၸ်ႈ၊ ဢေႃႈ။
ပီႈၼွင်ႉၶဝ်႟။ ပိူဝ်ႈဢၼ်သူႁုပိင်းၺၢပ်ႈတြႃးလႄႈၵႂၢမ်းဢၼ်ၵဝ်တေလၢတ်ႈၼႆႉသူတေႁုတီႈပွင်ႇယူႇဢေႃႈ။ ၵူၼ်းႁဝ်းလႆႈယူႇတႂ်ႈပိင်းၺၢပ်ႈတြႃးတေႃႇၸူဝ်ႈဢၼ်ႁဝ်းဢသၢၵ်ႈယင်းလိပ်းယူႇၼႆႉၵူၺ်းဢေႃႈ။-
ဢုပမႃႇမၼ်းမႄႈယိင်းဢၼ်မီးၽူဝ်ၼၼ်ႉတေႃႇၸူဝ်ႈဢၼ်ၽူဝ်မၼ်းဢသၢၵ်ႈယင်းလိပ်းယူႇၼၼ်ႉၸိုင်၊ၸွမ်းၼင်ႇပိင်းၺၢပ်ႈတြႃးလႄႈမၼ်းလႆႈႁူမ်ႈပွင်းၽူဝ်မၼ်းဢေႃႈ။ ပေႃးၽူဝ်မၼ်းတၢႆၵႂႃႇၸိုင်၊မၼ်းလွတ်ႈသေတြႃးဢၼ်မတ်ႉၽုၵ်ႇမၼ်းတင်းၽူဝ်မၼ်းယဝ်ႉ။-
ပိူဝ်ႈၼႆလႄႈၸူဝ်ႈဢၼ်ၽူဝ်မၼ်းဢသၢၵ်ႈယင်းလိပ်းယူႇၼၼ်ႉပေႃးမၼ်းၵႂႃႇႁူမ်ႈပွင်းၵၼ်တင်းၵူၼ်းၸၢႆးတၢင်ႇၵေႃႉၸိုင်၊မၼ်းလႆႈၶၢမ်ႇတၢင်းဢၼ်ႁွင်ႉဝႃႈမႄႈယိင်းဢၼ်လဵၼ်ႈၽူဝ်ၼွႆႉဢေႃႈ။ ၵူၺ်းၵႃႈ၊ပေႃးၽူဝ်မၼ်းတၢႆၵႂႃႇၸိုင်၊မၼ်းပဵၼ်မႄႈယိင်းဢၼ်လွတ်ႈလႅဝ်းၸွမ်းၼင်ႇတြႃးလႄႈပိၵ်ႉသမ်ႉမၼ်းႁဵတ်းမေးၵူၼ်းၸၢႆးတၢင်ႇၵေႃႉသေၵေႃႈၽႂ်ဢမ်ႇဝႃႈမၼ်းလဵၼ်ႈၽူဝ်ၼွႆႉယဝ်ႉ။-
မိူၼ်ၼင်ႇၼၼ် ပီႈၼွင်ႉၶဝ်႟။ ၸိူဝ်ႉၼင်ႇဢၼ် ၸဝ်ႈၶရိၸ်ႈ၊ လႆႈတၢႆၼၼ်ႉသူၵေႃႈတၢႆသေၵႃႈတီႈပိင်းၺၢပ်ႈတြႃးၸဝ်ႈလႄႈၶဝ်ႈပဵၼ်မေးတၢင်ႇၵေႃႉဢၼ်ဝႃႈ ၸဝ်ႈၶရိၸ်ႈ၊ ၸဝ်ႈဢၼ်လုၵ်ႉၵႃႈတၢင်းတၢႆၶိုၼ်းလိပ်းၼၼ်ႉႁႂ်ႈႁဝ်းလႆႈပွင်ႁဵတ်းပွင်သၢင်ႈၵၢၼ်ငၢၼ်းၽြႃးပဵၼ်ၸဝ်ႈဢေႃႈ။-
မိူဝ်ႈဢၼ်ႁဝ်းယူႇၸွမ်းဢလူဝ်ႇၼိူဝ်ႉလိူတ်ႈၵူၼ်းႁဝ်းၼၼ်ႉ ၸႂ်ၵိလေႇသႃႇမႆႈႁွၼ်ႉၵိုၼ်းမႃးၵွပ်ႈပိူဝ်ႈပိင်းၺၢပ်ႈတြႃးလႄႈပွင်ၵၢၼ်ယူႇၼႂ်းတူဝ်ႁဝ်းႁႂ်ႈႁဝ်းပွင်ႁဵတ်းပွင်သၢင်ႈမဵဝ်းဢၼ်ဢွၼ်ႁဝ်းႁွတ်ႈထိုင်တၢင်းတၢႆဢေႃႈ။-
ၵူၺ်းၵႃႈ၊တေႃႈလဵဝ်ၼႆႉၸမ်ႉ၊ႁဝ်းလႆႈလွတ်ႈသေပိင်းၺၢပ်ႈတြႃး၊ၵွပ်ႈပိူဝ်ႈႁဝ်းတၢႆသေၵႃႈတီႈတြႃးဢၼ်ႁဝ်းလႆႈၶၢမ်ႇတူၵ်းၵႅၼ်းယူႇၼၼ်ႉဢေႃႈ။ ႁဝ်းဢမ်ႇလူဝ်ႇႁဵတ်းဝၢတ်ႈၽြႃးပဵၼ်ၸဝ်ႈၸွမ်းပိင်းၺၢပ်ႈတြႃးၵဝ်ႇဢၼ်တႅမ်ႈဝႆႉၼႂ်းၽိုၼ်လိၵ်ႈတြႃးၼၼ်ႉယဝ်ႉလႄႈ၊ႁဝ်းလူဝ်ႇႁဵတ်းၸွမ်းသဵၼ်ႈတၢင်းတြႃးမႂ်ႇၼႂ်းဝိၺိၺ်ႇၸဝ်ႈယဝ်ႉဢေႃႈ။
ပေႃးပဵၼ်ၸိူဝ်ႉၼင်ႇၼႆၸိုင်၊ႁဝ်းတေဝႃႈႁိုဝ်။ ပိင်းၺၢပ်ႈတြႃးတိုၼ်းပဵၼ်ဢပျတ်ႈဢေႃႈဝႃႈၼႆၸွင်ႇႁဝ်းတေဝႃႈလႆႈႁိုဝ်း။ မၼ်းဢမ်ႇဝႃႈလႆႈၸိူဝ်ႉၼင်ႇၼၼ်။ ပိူဝ်ႈဢၼ်မီးပိင်းၺၢပ်ႈတြႃးၵူၺ်းၸင်ႇ ၵဝ်လႆႈႁုသၽေႃးဢပျတ်ႈဢေႃႈ။ ပေႃးပိင်းၺၢပ်ႈတြႃးဢမ်ႇဝႃႈ “ယႃႇပေမီးၸႂ်လေႃးၽႃႉ” ဝႃႈၼႆၸိုင်၊ၵဝ်ဢမ်ႇလႆႈႁုၸႂ်သၽေႃးလေႃးၽႃႉပဵၼ်ၸိူဝ်ႉၼင်ႇႁိုဝ်ၼၼ်ႉ။-
ၵွပ်ႈပိူဝ်ႈၶေႃႈၵႂၢမ်းပိင်းၺၢပ်ႈၸဝ်ႈလႄႈဢပျတ်ႈတြႃးလႆႈဢၶႂၢင်ႉဢယေးဢၼ်ပွင်ၵၢၼ်ၼႂ်းၵဝ်၊ႁႂ်ႈၵဝ်ၸႂ်ၸပ်းၶႂ်ႈလႆႈလၢႆၸိူဝ်ႉလၢႆမဵဝ်းဢေႃႈ။ လွင်ႈမၼ်းၸမ်ႉ၊ပေႃးဢမ်ႇမီးပိင်းၺၢပ်ႈတြႃးၸိုင်၊ဢပျတ်ႈတြႃးဢမ်ႇမီးဢႃႇၼႃႇၶႂ်ႈမိူၼ်ၵူၼ်းတၢႆဝႆႉဢေႃႈ။-
မိူဝ်ႈၵွၼ်ႇၼၼ်ႉၵဝ်ဢမ်ႇႁုပိင်းၺၢပ်ႈတြႃးလႄႈလႆႈဢသၢၵ်ႈလိပ်းယူႇဢေႃႈ။ ၵူၺ်းၵႃႈ၊မိူဝ်ႈဢၼ်ၶေႃႈၵႂၢမ်းပိင်းၺၢပ်ႈႁွတ်ႈမႃးၵႃႈၼိူဝ်ၵဝ်ၸိုင်၊ဢပျတ်ႈတြႃးတိုၼ်ႇမႃးလႄႈၵဝ်လႆႈတၢႆဢေႃႈ။-
ၶေႃႈၵႂၢမ်းပိင်းၺၢပ်ႈဢၼ်ၽြႃးပဵၼ်ၸဝ်ႈပၼ်ဝႆႉၼင်ႇႁိုဝ်ႁဝ်းတၵ်းဢသၢၵ်ႈလိပ်းၼၼ်ႉပုၼ်ႈၵဝ်ၸမ်ႉ၊ပဵၼ်တြႃးတၢင်းတၢႆဢေႃႈ။-
ဢပျတ်ႈတြႃးလႆႈဢၶႂၢင်ႉၵွပ်ႈပိူဝ်ႈၶေႃႈၵႂၢမ်းပိင်းၺၢပ်ႈၸဝ်ႈတႃႇတေပႅတ်ႉလႅၼ်ၵဝ်သမ်ႉဢဝ်တြႃးၸဝ်ႈၼၼ်ႉဢဝ်ၵဝ်တၢႆဢေႃႈ။
ပိူဝ်ႈၼႆလႄႈပိင်းၺၢပ်ႈတြႃးတိုၼ်းပဵၼ်ဢၼ်မူတ်းၸၢင်ႇဢေႃႈ။ ၶေႃႈၵႂၢမ်းပိင်းၺၢပ်ႈၸဝ်ႈၵူႈၶေႃႈၵေႃႈပဵၼ်ဢၼ်မူတ်းၸၢင်ႇသိုဝ်ႈတေႃႇလႄႈမျၢတ်ႈလီဢေႃႈ။-
ပေႃးပဵၼ်ၼႆၸွင်ႇၶႂ်ႈဝႃႈ၊တၢင်းဢၼ်မျၢတ်ႈလီဢဝ်ၵဝ်တၢႆႁိုဝ်း။ မၼ်းဢမ်ႇဝႃႈလႆႈၸိူဝ်ႉၼင်ႇၼၼ်။ ဢပျတ်ႈတြႃးၸင်ႇဢဝ်တင်းဢၼ်မျၢတ်ႈလီသေပွင်ၵၢၼ်ၼႂ်းၵဝ် ႁႂ်ႈၵဝ်တၢႆၼင်ႇႁိုဝ်သၽေႃးဢပျတ်ႈတြႃးတၵ်းထၢင်ႇသႃးမႃးဢေႃႈ။ ၵွပ်ႈပိူဝ်ႈၶေႃႈၵႂၢမ်းပိင်းၺၢပ်ႈၸဝ်ႈၼၼ်ႉလႄႈလႆႈၶၢမ်ႇတၢင်းဢၼ်ၼႄပျႃးလွင်ႈမၼ်းယဵင်ႈၶႅၼ်းႁၢႆႉမိူၵ်ႈၼႃႇၼၼ်ႉဢေႃႈ။
ႁဝ်းႁုလွင်ႈဢၼ်ပိင်းၺၢပ်ႈတြႃးပဵၼ်ၽၢႆႇၸႂ်ဝိၺိၺ်ႇဢေႃႈ။ ၵဝ်ၼႆႉၸမ်ႉ၊ပဵၼ်ၽၢႆႇၼိူဝ်ႉလိူတ်ႈၵူၼ်းဢၼ်လႆႈၶၢမ်ႇၶၢႆပႅတ်ႈ ႁႂ်ႈလႆႈပဵၼ်ၶႃႈဢပျတ်ႈတြႃးဢေႃႈ။-
လွင်ႈမၼ်းၸမ်ႉ၊ၵဝ်ဢမ်ႇႁုတီႈပွင်ႇလွင်ႈဢၼ်ၵဝ်ၵမ်ၵျၢင်ႉၼၼ်ႉလႄႈဢၼ်ၵဝ်ၶႂ်ႈၵမ်ၵျၢင်ႉၼၼ်ႉၵဝ်ဢမ်ႇၵမ်ၵျၢင်ႉ၊ၵူၺ်းၵမ်ၵျၢင်ႉမဵဝ်းၵဝ်ၸင်းၼၼ်ႉဢေႃႈ။-
ပိူဝ်ႈဢၼ်ၵဝ်ၵမ်ၵျၢင်ႉမဵဝ်းဢၼ်ၵဝ်ဢမ်ႇၶႂ်ႈၵမ်ၵျၢင်ႉၼၼ်ႉၸိုင်၊ပဵၼ်တၢင်းဢၼ်ၼႄပျႃးသၽေႃးဢၼ်ၽွမ်ႉၸႂ်ဝႃႈပိင်းၺၢပ်ႈတြႃးမၢၼ်ႇမႅၼ်ႈဢေႃႈ။-
ပိူဝ်ႈဢၼ်ပဵၼ်ၸိူဝ်ႉၼင်ႇၼႆလႄႈမၼ်းပဵၼ်ဢၼ်ၵဝ်ၵမ်ၵျၢင်ႉဢမ်ႇၸႂ်ႈယဝ်ႉ။ မၼ်းပဵၼ်ဢပျတ်ႈတြႃးဢၼ်တႄႇယူႇၼႂ်းၵဝ်ၼၼ်ႉၵမ်ၵျၢင်ႉဢေႃႈ။-
ၵဝ်ႁုလွင်ႈဢၼ်မျၢတ်ႈလီသေၸိူဝ်ႉသေပိူင်ဢမ်ႇမီးၼႂ်းတူဝ်ၵဝ်ဢၼ်ပဵၼ်တူဝ်ၸႃႇတိၼိူဝ်ႉလိူတ်ႈၼႆႉၼၼ်ႉဢေႃႈ။ ပိၵ်ႉသမ်ႉၵဝ်မီးဢလူဝ်ႇၵၢင်ၸႂ်ၶႂ်ႈၵမ်ၵျၢင်ႉမဵဝ်းဢၼ်လီသေၵေႃႈၵဝ်ဢမ်ႇၸၢင်ႈၵမ်ၵျၢင်ႉလႆႈ။-
ၵဝ်ယင်းဢမ်ႇၵမ်ၵျၢင်ႉမဵဝ်းဢၼ်လီဢၼ်ၵဝ်မီးဢလူဝ်ႇၵၢင်ၸႂ်ၶႂ်ႈၵမ်ၵျၢင်ႉၼၼ်ႉလႄႈသမ်ႉၵမ်ၵျၢင်ႉမဵဝ်းဢၼ်ႁၢႆႉဢၼ်မိူၵ်ႈဢၼ်ၵဝ်ဢမ်ႇၶႂ်ႈၵမ်ၵျၢင်ႉၼၼ်ႉဢေႃႈ။-
ပေႃးၵဝ်ၵမ်ၵျၢင်ႉမဵဝ်းဢၼ်ၵဝ်ဢမ်ႇၶႂ်ႈၵမ်ၵျၢင်ႉၼၼ်ႉၸိုင်မၼ်းပဵၼ်ဢၼ်ၵဝ်ၵမ်ၵျၢင်ႉဢမ်ႇၸႂ်ႈယဝ်ႉ။ မၼ်းပဵၼ်ဢပျတ်ႈတြႃးဢၼ်တႄႇယူႇၼႂ်းၵဝ်ၼၼ်ႉၵမ်ၵျၢင်ႉဢေႃႈ။
ၵွပ်ႈၼႆလႄႈၵဝ်ႁၼ်ဝႃႈမီးတြႃးထႅင်ႈပိူင်ၼိုင်ႈမိူဝ်ႈဢၼ်ၵဝ်ဢၢင်ႈၵမ်ၵျၢင်ႉဢၼ်လီၼၼ်ႉၸိုင်၊ဢၼ်ႁၢႆႉမိူၵ်ႈၼၼ်ႉမႃးၸမ်ၵဝ်လႄႈၶႂ်ႈႁႂ်ႈၵဝ်ယိပ်းဢဝ်မၼ်းဢေႃႈ။-
ၸွမ်းၼင်ႇၸႂ်ၵဝ်ၸိုင်၊ၵဝ်မူၼ်ႈပျေႃႇၵႃႈၼႂ်းပိင်းၺၢပ်ႈတြႃးၽြႃးပဵၼ်ၸဝ်ႈဢေႃႈ။-
ၵူၺ်းၵႃႈ၊ၵဝ်ႁၼ်လွင်ႈဢၼ်ၼႂ်းတူဝ်ဢၢင်ႇၵႃႇၵဝ်ၼၼ်ႉမီးဢႃႇၼႃႇမဵဝ်းၼိုင်ႈမႃးတိုၵ်းတေႃးပိင်းၺၢပ်ႈတြႃးဢၼ်ၸႂ်ဝိၺိၺ်ႇၵဝ်ႁပ်ႉတုင်းဢဝ်ဝႆႉၼၼ်ႉလႄႈဢႃႇၼႃႇၼၼ်ႉတိဢဝ်ၵဝ်ႁႂ်ႈလႆႈတူၵ်းၵႅၼ်းၼႂ်းဢပျတ်ႈတြႃးဢၼ်ပွင်ၵၢၼ်ယူႇၼႂ်းတူဝ်ဢၢင်ႇၵႃႇၵဝ်ၼၼ်ႉဢေႃႈ။-
ၵဝ်ၼႆႉၵိၼ်းၸႂ်တုၵ်ႉၶႃႉၼႃႇလူင်လၢင်ဢေႃႈ။ ၽူႈလႂ်တၵ်းၵႄႇသႄႇၵဝ် ဢွၵ်ႇသေၵႃႈၼႂ်းတူဝ်တၢႆၼႆႉတီႈၶႃႈ။-
ၵဝ်တၢင်ႇၵျေးၸူးၽြႃးပဵၼ်ၸဝ်ႈၵွပ်ႈပိူဝ်ႈၸဝ်ႈၽြႃးႁဝ်း ၸဝ်ႈယေႇသုၶရိၸ်ႈ၊ ၵႄႇသႄႇဢဝ်ၵဝ်ၼၼ်ႉဢေႃႈ။ ၵွပ်ႈပိူဝ်ႈလွင်ႈတၢင်းၼႆႉလႄႈ ဢၼ်ၵဝ်ပဵၼ်ယူႇၼႆႉၸမ်ႉ၊တူဝ်ၵဝ်ဢဝ်တင်းၸႂ်ဝိၺိၺ်ႇၵမ်ၵျၢင်ႉၸွမ်းတြႃးၽြႃးပဵၼ်ၸဝ်ႈသေလႄႈဢဝ်တင်းဢလူဝ်ႇၼိူဝ်ႉလိူတ်ႈ၊ၵမ်ၵျၢင်ႉၸွမ်းဢပျတ်ႈတြႃးဢေႃႈ။
ပိူဝ်ႈၼႆလႄႈၶဝ်ၸိူဝ်းဢၼ်တႄႇယူႇၼႂ်း ၸဝ်ႈယေႇသုၶရိၸ်ႈ၊ ၼၼ်ႉတၵ်းဢမ်ႇလႆႈၶၢမ်ႇတၢမ်ႇဢပျတ်ႈၶဝ်ယဝ်ႉ။-
လွင်ႈမၼ်းၸမ်ႉ၊တြႃးဝိၺိၺ်ႇၸဝ်ႈဢၼ်ႁႂ်ႈႁဝ်းဢသၢၵ်ႈလိပ်းၼႂ်း ၸဝ်ႈယေႇသုၶရိၸ်ႈ၊ ၼၼ်ႉပွႆႇၵဝ်လွတ်ႈသေၵႃႈတီႈဢပျတ်ႈတြႃးဢိၵ်ႇတင်းတြႃးတၢင်းတၢႆယဝ်ႉဢေႃႈ။-
ပိူဝ်ႈဢၼ်ၼိူဝ်ႉလိူတ်ႈၵူၼ်းႁဝ်းႁႅင်းလဵၵ်ႉႁႅင်းၵေႇလႄႈတၢင်းဢၼ်ပိင်းၺၢပ်ႈတြႃးဢမ်ႇၸၢင်ႈႁဵတ်းပၼ်လႆႈၼၼ်ႉၽြႃးပဵၼ်ၸဝ်ႈလႆႈပွင်ႁဵတ်းပၼ်ၼႂ်းတၢင်းဢၼ်ပွႆႇၸႂ်ႉလုၵ်ႈမၼ်းၸဝ်ႈၵျွမႃးၼႂ်းပုင်ႇႁၢင်ႈၵူၼ်းဢၼ်ၼိူဝ်ႉလိူတ်ႈမီးဝူတ်ႈဢပျတ်ႈသေယဝ်ႉသမ်ႉႁႂ်ႈလုၵ်ႈၸဝ်ႈၼၼ်ႉၶၢမ်ႇတၢမ်ႇဢၼ်ၸီႇယၢင်ႇတြႃးၵႃႈၼိူဝ်ဢပျတ်ႈၼိူဝ်ႉလိူတ်ႈၵူၼ်းဢေႃႈ။-
ၽြႃးပဵၼ်ၸဝ်ႈလႆႈႁဵတ်းၸိူဝ်ႉၼင်ႇၼႆၼင်ႇႁိုဝ်ႁဝ်းၸိူဝ်းဢၼ်ၵမ်ၵျၢင်ႉၸွမ်းဝိၺိၺ်ႇၸဝ်ႈလႄႈ၊ဢမ်ႇၵမ်ၵျၢင်ႉၸွမ်းၼိူဝ်ႉလိူတ်ႈၼၼ်ႉတၵ်းလႆႈႁဵတ်းႁႂ်ႈတၢင်းဢၼ်သိုဝ်ႈတေႃႇဢၼ်ပိင်းၺၢပ်ႈတြႃးပူင်ဝႆႉၼၼ်ႉလႆႈပျေႉၸုမ်ႇၼႂ်းႁဝ်းဢေႃႈ။-
လွင်ႈမၼ်းၸမ်ႉ၊ၶဝ်ၸိူဝ်းဢၼ်ၵမ်ၵျၢင်ႉၸွမ်းဢလူဝ်ႇၼိူဝ်ႉလိူတ်ႈၼၼ်ႉၸၢင်ႈၸႂ်ထိုင်ၸပ်းၸွႆးလွင်ႈတၢင်းဢၼ်ၸၢပ်ႈသႅင်ႇၼိူဝ်ႉလိူတ်ႈဢေႃႈ။ ၵူၺ်းၵႃႈ၊ၶဝ်ၸိူဝ်းဢၼ်ၵမ်ၵျၢင်ႉၸွမ်းဝိၺိၺ်ႇၸဝ်ႈၸမ်ႉ၊ၸႂ်ၶဝ်ၸပ်းၸွႆးၶိူင်ႈပိူင်ဢၼ်ၸၢပ်ႈသႅင်ႇၵၼ်တင်းဝိၺိၺ်ႇၸဝ်ႈဢေႃႈ။-
ၶဝ်ၸိူဝ်းဢၼ်ၸပ်းၸွႆးၼိူဝ်ႉလိူတ်ႈၼၼ်ႉတၵ်းလႆႈႁွတ်ႈထိုင်တၢင်းတၢႆလႄႈၶဝ်ၸိူဝ်းဢၼ်ၸႂ်ၸပ်းၸႂ်ၸွႆးဝိၺိၺ်ႇၸဝ်ႈၸမ်ႉ၊တၵ်းလႆႈႁွတ်ႈထိုင်တၢင်းဢၼ်ဢသၢၵ်ႈလိပ်းဢိၵ်ႇတင်းတၢင်းၼိမ်ၶျၢမ်းသႃႇဢေႃႈ။-
လိူဝ်သေၼၼ်ႉၶဝ်ၸိူဝ်းဢၼ်ၸႂ်ၸပ်းၸႂ်ၸွႆးၼိူဝ်ႉလိူတ်ႈၼၼ်ႉပဵၼ်ရၢၼ်ႇသူႇၽြႃးပဵၼ်ၸဝ်ႈ၊ၵွပ်ႈပိူဝ်ႈၶဝ်ဢမ်ႇထွမ်ႇဢဝ်တြႃးၽြႃးပဵၼ်ၸဝ်ႈဢေႃႈ။ တီႈတႄႉမၼ်းမၼ်းၶႂ်ႈထွမ်ႇဢဝ်သေၵေႃႈမၼ်းဢမ်ႇၸၢင်ႈထွမ်ႇဢဝ်လႆႈ။-
ပိူဝ်ႈၼႆလႄႈၶဝ်ၸိူဝ်းဢၼ်ၸႂ်ၸပ်းၸႂ်ၸွႆးၼိူဝ်ႉလိူတ်ႈၼၼ်ႉဢမ်ႇၸၢင်ႈႁဵတ်းႁႂ်ႈၽြႃးပဵၼ်ၸဝ်ႈထုၵ်ႇၸႂ်လႆႈဢေႃႈ။
ပေႃးဝိၺိၺ်ႇၽြႃးပဵၼ်ၸဝ်ႈတႄႇယူႇၼႂ်းသူတႄႉတႄႉၸိုင်၊သူတိုၼ်းဢမ်ႇၵမ်ၵျၢင်ႉၸွမ်းဢလူဝ်ႇၼိူဝ်ႉလိူတ်ႈ၊ၵမ်ၵျၢင်ႉၸွမ်းသၽေႃးဝိၺိၺ်ႇၸဝ်ႈယဝ်ႉလႄႈ၊ၽူႈလႂ်သေဢမ်ႇဝႃႈပေႃးမၼ်းဢမ်ႇမီးဝိၺိၺ်ႇ ၸဝ်ႈၶရိၸ်ႈ၊ ၸိုင်၊မၼ်းဢမ်ႇၸႂ်ႈၵူၼ်းမၼ်းၸဝ်ႈ။-
ပေႃး ၸဝ်ႈၶရိၸ်ႈ၊ မီးၵႃႈၼႂ်းသူၸိုင်၊ပိၵ်ႉသမ်ႉတူဝ်ၵႃႇယႃႉသူလႆႈတၢႆၵွပ်ႈပိူဝ်ႈဢပျတ်ႈတြႃးသေၵေႃႈ၊ၵွပ်ႈပိူဝ်ႈၸဝ်ႈၽြႃးမၢတ်ႈသူပဵၼ်ၵူၼ်းသိုဝ်ႈတေႃႇၼၼ်ႉလႄႈဝိၺိၺ်ႇၸဝ်ႈၽြႃးတၵ်းႁႂ်ႈဢသၢၵ်ႈၸႂ်ဝိၺိၺ်ႇသူလိပ်းဢေႃႈ။-
ပေႃးဝိၺိၺ်ႇၸဝ်ႈၽြႃးဢၼ်ႁႂ်ႈ ၸဝ်ႈယေႇသု၊ လုၵ်ႉၵႃႈတၢင်းတၢႆၶိုၼ်းလိပ်းမႃးၼၼ်ႉမီးယူႇၵႃႈၼႂ်းသူၸိုင်၊ၸဝ်ႈဢၼ်ႁႂ်ႈ ၸဝ်ႈၶရိၸ်ႈ၊ လုၵ်ႉၶိုၼ်းလိပ်းၼၼ်ႉတၵ်းပၼ်ဢသၢၵ်ႈတီႈတူဝ်သူ ဢၼ်ၸၢင်ႈလုၸၢင်ႈလႅဝ်ၼႆႉၵွပ်ႈပိူဝ်ႈဝိၺိၺ်ႇၸဝ်ႈမီးယူႇၵႃႈၼႂ်းသူၼၼ်ႉဢေႃႈ။
ၵွပ်ႈပိူဝ်ႈၸိူဝ်ႉၼင်ႇၼႆလႄႈ၊ပီႈၼွင်ႉၶဝ်႟။ ႁဝ်းထုၵ်ႇၼီႈၼိူဝ်ႉလိူတ်ႈႁဝ်းၼၼ်ႉဢမ်ႇၸႂ်ႈ၊ႁဝ်းဢမ်ႇလူဝ်ႇၵမ်ၵျၢင်ႉၸွမ်းဢလူဝ်ႇၼိူဝ်ႉလိူတ်ႈယဝ်ႉ။-
ပေႃးသူၵမ်ၵျၢင်ႉၸွမ်းဢလူဝ်ႇၼိူဝ်ႉလိူတ်ႈၸိုင်၊သူတၵ်းလႆႈတၢႆဢေႃႈ။ ၵူၺ်းၵႃႈ၊ပေႃးသူဢိင်ဝိၺိၺ်ႇၸဝ်ႈလႄႈဢဝ်တၢႆပႅတ်ႈတၢင်းၵမ်တၢင်းၵျၢင်ႉတူဝ်ၵႃႇယႃႉသူၸိုင်၊သူတၵ်းလႆႈဢသၢၵ်ႈလိပ်းဢေႃႈ။-
ၶဝ်ၸိူဝ်းဢၼ်ၶၢမ်ႇဢဝ်တၢင်းဢၼ်ဝိၺိၺ်ႇၸဝ်ႈၽြႃးယိပ်းၸုင်ဢွၼ်သူင်ႇပၼ်ၼၼ်ႉပဵၼ်လုၵ်ႈၽြႃးပဵၼ်ၸဝ်ႈဢေႃႈ။-
လွင်ႈမၼ်းၸမ်ႉ၊သူလႆႈႁပ်ႉၶၢမ်ႇၸႂ်သၽေႃးၶႃႈႁႂ်ႈပေႃးလႆႈၶိုၼ်းၵူဝ်ႁႄဢမ်ႇၸႂ်ႈ။ သူလႆႈႁပ်ႉၶၢမ်ႇၸႂ်သၽေႃးဢၼ်ပဵၼ်လုၵ်ႈၽြႃးပဵၼ်ၸဝ်ႈၼၼ်ႉယဝ်ႉၸင်ႇ၊သူလႆႈဢၶႂၢင်ႉဢၼ်ႁွင်ႉၽြႃးပဵၼ်ၸဝ်ႈဝႃႈ၊ “ ဢပ်ႉပႃႉ၊ ပေႃႈ႟။” ဝႃႈၼင်ႇၼႆဢေႃႈ။-
ႁဝ်းပဵၼ်လုၵ်ႈၽြႃးပဵၼ်ၸဝ်ႈဝႃႈၼႆ ဝိၺိၺ်ႇၸဝ်ႈၶၢမ်ႇသၢၵ်ႈသေႇလူၺ်ႈၵၼ်တင်းဝိၺိၺ်ႇႁဝ်းယူႇဢေႃႈ။-
ပိူဝ်ႈဢၼ်ႁဝ်းပဵၼ်လုၵ်ႈမၼ်းၸဝ်ႈလႄႈ၊ႁဝ်းတၵ်းလႆႈၶၢမ်ႇၸၢမ်ႇၸႃးဢမူၺ်ႇမၼ်းၸဝ်ႈ၊ဢမူၺ်ႇဢၼ်လႆႈၶၢမ်ႇၸၢမ်ႇၸႃးလူၺ်ႈၵၼ်တင်း ၸဝ်ႈၶရိၸ်ႈ၊ ဢေႃႈ။ ပေႃးႁဝ်းႁူမ်ႈၶၢမ်ႇတုၵ်ႉၶႃႉတၢင်းၽၢၼ်လူၺ်ႈ ၸဝ်ႈၶရိၸ်ႈ၊ ၸိုင်၊ႁဝ်းတၵ်းလႆႈႁူမ်ႈၶၢမ်ႇမုၼ်ၽုင်းမၼ်းၸဝ်ႈဢေႃႈ။
ၵဝ်ၶႆႈၸႂ်တူၺ်းလႄႈႁုဝႃႈဢၼ်တုၵ်ႉၶႃႉတၢင်းၽၢၼ်ဢၼ်ႁဝ်းလႆႈၶၢမ်ႇယူႇတေႃႈလဵဝ်တႂ်ႈတႃၼႆႉၼၼ်ႉဢမ်ႇမီးတီႈတၵ်းတႅၵ်ႈၼိူင်းလူၺ်ႈမုၼ်ၽုင်းဢၼ်တၵ်းထၢင်ႇသႃးမႃးမိူဝ်းၼႃႈၼၼ်ႉလႃးလႃး။-
ၶိူင်ႈပိူင်ဢၼ်ၽြႃးပဵၼ်ၸဝ်ႈၽၢၼ်ႇသၢင်းဝႆႉၵႃႈမီးတင်းသဵင်ႈတင်းလူင်မုင်ႈမွင်းၼႃႇလူင်လၢင်လႄႈပႂ်ႉထႃႈတၢင်းဢၼ်ၽြႃးပဵၼ်ၸဝ်ႈ တၵ်းၼႄပျႃးလုၵ်ႈမၼ်းၸဝ်ႈတင်းလၢႆထၢင်ႇသႃးမႃးၼၼ်ႉဢေႃႈ။-
လွင်ႈမၼ်းၸမ်ႉ၊ၶိူင်ႈပိူင်ဢၼ်ၽြႃးပဵၼ်ၸဝ်ႈၽၢၼ်ႇသၢင်းဝႆႉတင်းသဵင်ႈၼႆႉလႆႈတူၵ်းၵႃႈၼႂ်းဢၼတ်ႉတႃႉတြႃးၵႂႃႇၸွမ်းဢလူဝ်ႇမၼ်းဢမ်ႇၸႂ်ႈ၊ပဵၼ်ၸွမ်းဢလူဝ်ႇၽြႃးပဵၼ်ၸဝ်ႈဢေႃႈ။ ၼႂ်းဝႃႈၼၼ်သေၵေႃႈမီးတီႈမုင်ႈမွင်းယူႇဝႃႈ၊-
ၶိူင်ႈပိူင်ဢၼ်မၼ်းၸဝ်ႈၽၢၼ်ႇသၢင်းတင်းသဵင်ႈၼႆႉ၊ဝၼ်းၼိုင်ႈတၵ်းလႆႈလွတ်ႈဢွၵ်ႇၼႂ်းတၢင်းဢၼ်ပဵၼ်ၶႃႈၸၢင်ႈၽွၵ်ႈပျၢၼ်ႇလုလႅဝ်ၼၼ်ႉလႄႈတၵ်းလႆႈလွတ်ႈၸွမ်းၵႂႃႇလူၺ်ႈၵၼ်တင်းလုၵ်ႈၽြႃးပဵၼ်ၸဝ်ႈတင်းလၢႆၶဝ်ႈၵႃႈၼႂ်းတီႈႁိူဝ်ႈႁိူင်းလွတ်ႈလႅဝ်းၼၼ်ႉဢေႃႈ။-
ႁဝ်းႁုလွင်ႈဢၼ်တေႃႇထိုင်မိူဝ်ႈလဵဝ်ၼႆႉၶိူင်ႈပိူင်လေႃးၵႃႉတင်းသဵင်ႈၼႆႉၶၢင်းၶီၶၢင်းၽၢၼ်လူၺ်ႈတုၵ်ႉၶႃႉဝူၺ်ႇတၼႃႇမိူၼ်ၼင်ႇမႄႈယိင်းလႆႈၶၢမ်ႇၵိၼ်းၸႂ်ယၢမ်းမိူဝ်ႈဢၼ်ၸမ်တၵ်းၵိူတ်ႇလဵင်ႉလုၵ်ႈၼၼ်ႉဢေႃႈ။-
ၶိူင်ႈပိူင်လေႃးၵႃႉတင်းသဵင်ႈၼႆႉၵူၺ်းဢမ်ႇၵႃးႁဝ်းၸိူဝ်းဢၼ်လႆႈၶၢမ်ႇဢဝ်ဝိၺိၺ်ႇၸဝ်ႈ၊ဢၼ်ဝႃႈ ငဝ်ႈႁၢၵ်ႈသုၵျေးၸူးဢၼ်ၽြႃးပဵၼ်ၸဝ်ႈပၼ်ႁဝ်းၼၼ်ႉၵေႃႈလႆႈၶၢင်းၶီၶၢင်းၽၢၼ်ယူႇၼႂ်းႁူဝ်ၸႂ်ႁဝ်း၊ၸွမ်းၼင်ႇဢၼ်ႁဝ်းပႂ်ႉထႃႈတၢင်းဢၼ်ၽြႃးပဵၼ်ၸဝ်ႈတၵ်းႁဵတ်းႁႂ်ႈႁဝ်းၶဝ်ႈပဵၼ်လုၵ်ႈမၼ်းၸဝ်ႈလႄႈပွႆႇႁႂ်ႈတူဝ်ၶၼ်ႇထႃႇႁဝ်းလွတ်ႈၼၼ်ႉယူႇဢေႃႈ။-
ႁဝ်းမီးတၢင်းမုင်ႈမွင်းၼႆႉလႄႈႁဝ်းလႆႈၶၢမ်ႇၵႄႇၶျွတ်ႈဢဝ်ဢေႃႈ။ ၵူၺ်းၵႃႈ၊ပေႃးႁဝ်းထူပ်းႁၼ်ၶိူင်ႈပိူင်ဢၼ်ႁဝ်းမုင်ႈမွင်းၼၼ်ႉၸိုင်၊ဢၼ်ၼၼ်ႉဢမ်ႇၸႂ်ႈတၢင်းမုင်ႈမွင်းၸႅတ်ႈၸႅတ်ႈယဝ်ႉ။ ၵွပ်ႈၼႆလႄႈၽူႈလႂ်ယင်းတၵ်းမုင်ႈမွင်းၶိူင်ႈပိူင်ဢၼ်ၸဝ်ႈၵဝ်ႇလႆႈထူပ်းႁၼ်ယဝ်ႉၼၼ်ႉၸိူဝ်ႉၼင်ႇႁိုဝ်။-
ၵူၺ်းၵႃႈ၊ပေႃးမုင်ႈမွင်းၶိူင်ႈပိူင်ဢၼ်ႁဝ်းဢမ်ႇထူပ်းႁၼ်ၼၼ်ႉၸင်ႇႁဝ်းၸၢင်ႈပႃးၸႂ်ယိူၼ်ႉၶၢမ်ႇလႄႈပႂ်ႉထႃႈယူႇဢေႃႈ။
မိူၼ်ၸိူဝ်ႉၼင်ႇၼၼ်ဝိၺိၺ်ႇၸဝ်ႈမႃးၸွႆႈႁဝ်းပိူဝ်ႈဢၼ်ႁဝ်းႁႅင်းလဵၵ်ႉႁႅင်းၵေႇၼၼ်ႉဢေႃႈ။ ႁဝ်းထုၵ်ႇလီသူးတွင်းယွၼ်းဢၼ်လႂ်ႁဝ်းယင်းဢမ်ႇႁုသေၵေႃႈ၊ဝိၺိၺ်ႇၸဝ်ႈဢဝ်တင်းတၢင်းဢၼ်ၶၢင်းၶီၶၢင်းၽၢၼ်ဢၼ်ဢမ်ႇၸၢင်ႈဢဝ်သူပ်းလၢတ်ႈၼၼ်ႉတွင်းပၢၼ်ႇၽြႃးပဵၼ်ၸဝ်ႈပုၼ်ႈႁဝ်းယူႇဢေႃႈ။-
ၽြႃးပဵၼ်ၸဝ်ႈဢၼ်ႁုတပ်းပွတ်ႇႁူဝ်ၸႂ်ၵူၼ်းၼၼ်ႉၵေႃႈႁုႁၼ်သၽေႃးဝိၺိၺ်ႇၸဝ်ႈ၊ၵွပ်ႈပိူဝ်ႈဝိၺိၺ်ႇၸဝ်ႈၼၼ်ႉတၢင်တူဝ်ၵူၼ်းမူတ်းၸၢင်ႇမၼ်းၸဝ်ႈတင်းလၢႆလႄႈ၊တွင်းပၢၼ်ႇၽြႃးပဵၼ်ၸဝ်ႈၸွမ်းၼင်ႇဢလူဝ်ႇမၼ်းၸဝ်ႈမီးၼၼ်ႉဢေႃႈ။
ႁဝ်းႁုလွင်ႈဢၼ် ၵႃႈၼႂ်းလွင်ႈတၢင်းၵူႈၸိူဝ်ႉၵူႈပိူင်ၽြႃးပဵၼ်ၸဝ်ႈပွင်ဢၵျူဝ်းဢၼ်လီတီႈၶဝ်ၸိူဝ်းဢၼ်ႁၵ်ႉပႅင်းမၼ်းၸဝ်ႈ၊ဢၼ်ဝႃႈၶဝ်ၸိူဝ်းဢၼ်မၼ်းၸဝ်ႈႁွင်ႉဢဝ်ၸွမ်းၼင်ႇဢလူဝ်ႇတၢင်းၵျၢမ်ႇမၼ်းၸဝ်ႈမီးၼၼ်ႉဢေႃႈ။-
ၼင်ႇႁိုဝ်လုၵ်ႈၸဝ်ႈတၵ်းပဵၼ်လုၵ်ႈတူၼ်ႈၼႂ်းၼွင်ႉမၼ်းၸဝ်ႈၼမ်ၼႃႇၸိုင်၊တီႈၶဝ်ၸိူဝ်းဢၼ်ၽြႃးပဵၼ်ၸဝ်ႈႁုဝႆႉၸဵမ်မိူဝ်ႈဢွၼ်တၢင်းၼၼ်ႉမၼ်းၸဝ်ႈႁဵတ်းဝႆႉႁႂ်ႈၶဝ်လႆႈပဵၼ်ၸိူဝ်ႉၼင်ႇပုင်ႇႁၢင်ႈလုၵ်ႈၸဝ်ႈဢေႃႈ။-
ၼင်ႇၼၼ်လႄႈၶဝ်ၸိူဝ်းဢၼ်ၽြႃးပဵၼ်ၸဝ်ႈၶိုင်ပွင်ဝႆႉၼၼ်ႉမၼ်းၸဝ်ႈႁွင်ႉဢဝ်ဢေႃႈ။ ၶဝ်ၸိူဝ်းဢၼ်ၽြႃးပဵၼ်ၸဝ်ႈႁွင်ႉဢဝ်ၼၼ်ႉမၼ်းၸဝ်ႈမၢတ်ႈပဵၼ်ၵူၼ်းသိုဝ်ႈတေႃႇဢေႃႈ။ ၶဝ်ၸိူဝ်းဢၼ်မၼ်းၸဝ်ႈမၢတ်ႈပဵၼ်ၵူၼ်းသိုဝ်ႈတေႃႇၼၼ်ႉ၊မၼ်းၸဝ်ႈသမ်ႉႁႂ်ႈၶဝ်မီးမုၼ်ၽုင်းဢေႃႈ။
ပေႃးပဵၼ်ၸိူဝ်ႉၼင်ႇၼႆၸိုင်၊ႁဝ်းတေဝႃႈၸိူဝ်ႉႁိုဝ်။ ပေႃးၽြႃးပဵၼ်ၸဝ်ႈယူႇၽၢႆႇႁဝ်းၸိုင်၊ၽူႈလႂ်တၵ်းၶတ်းႁဝ်းလႆႈ။-
မၼ်းၸဝ်ႈယင်းဢမ်ႇသေလၢႆ လုၵ်ႈပႃးလဵဝ်တူဝ်ၸဝ်ႈၵဝ်ႇလႄႈ၊ယင်းဢၢပ်ႈပၼ်ႁႂ်ႈလႆႈၶၢမ်ႇတၢႆတၢင်ႁဝ်းတင်းလၢႆယဝ်ႉ။ ပေႃးမၼ်းၸဝ်ႈပၼ်လုၵ်ႈၸဝ်ႈၸိုင်၊မၼ်းၸဝ်ႈယင်းဢမ်ႇပၼ်ႁဝ်းၵူႈၸိူဝ်ႉၵူႈပိူင်လႄႈတၵ်းယူႇလႆႈႁိုဝ်း။-
ၽူႈလႂ်တၵ်းတၢင်ႇဢပျတ်ႈၶဝ်ၸိူဝ်းဢၼ်ၽြႃးပဵၼ်ၸဝ်ႈလိူၵ်ႈၵဵပ်းဢဝ်ဝႆႉၼၼ်ႉ။ တူဝ်ၽြႃးပဵၼ်ၸဝ်ႈလႆႈမၢတ်ႈၶဝ်ပဵၼ်ၵူၼ်းသိုဝ်ႈတေႃႇဢေႃႈ။-
ပေႃးပဵၼ်ၼႆၽူႈလႂ်တၵ်းၸီႇယၢင်ႇၶဝ်လႆႈ။ ဢမ်ႇမီးၽူႈလႂ်ဢေႃႈ။ ၼႆႉၸမ်ႉ၊ ၸဝ်ႈယေႇသု၊ ၶၢမ်ႇတၢႆလႄႈ၊တၢႆယဝ်ႉဢမ်ႇၵႃး၊လုၵ်ႉၵႃႈတၢင်းတၢႆၶိုၼ်းလိပ်းသေယဝ်ႉ မီးယူႇၽၢႆႇၶႂႃၽြႃးပဵၼ်ၸဝ်ႈလႄႈတွင်းပၢၼ်ႇတီႈမၼ်းၸဝ်ႈပုၼ်ႈႁဝ်းယူႇဢေႃႈ။-
ပိူဝ်ႈၼႆလႄႈ ၽူႈလႂ်တၵ်းႁႂ်ႈႁဝ်းၽၢတ်ႇယၢၼ်ၵၼ်တင်းတၢင်းႁၵ်ႉမႅတ်ႈတႃႇ ၸဝ်ႈၶရိၸ်ႈ၊ လႆႈ။ ၸွင်ႇတၢင်းဢၼ်ၺႃးၽေးတုၵ်ႉၶႃႉ၊တၢင်းဢၼ်ယၢပ်ႇၸႂ်ၵိၼ်းၸႂ်၊တၢင်းဢၼ်ပိူၼ်ႈၼိၵ်ႈၸၢၵ်ႈငႅၼ်းသႄး၊တၢင်းဢၼ်ဢိုပ်းယၢၵ်ႈ၊တၢင်းဢၼ်ၽၢၼ်ငိုၼ်းၽၢၼ်ၶမ်း၊တၢင်းဢၼ်ထူပ်းၽေးဢၼ်ႇတရေႇ၊ဢမ်ႇၼၼ်ၽေးတၢင်းတၢႆၸိူဝ်းၼၼ်ႉတၵ်းႁႂ်ႈႁဝ်းၽၢတ်ႇယၢၼ်ၵၼ်တင်းမႅတ်ႈတႃႇ ၸဝ်ႈၶရိၸ်ႈ၊ လႆႈႁိုဝ်း။-
ၸွမ်းၼင်ႇတႅမ်ႈဝႆႉၼႂ်းၵျၢမ်းလိၵ်ႈဝႃႈ၊ “ၵွပ်ႈပိူဝ်ႈႁဝ်းယုမ်ႇၸဝ်ႈႁဝ်းလႄႈႁဝ်းလႆႈထူပ်းၽေးတၢင်းတၢႆၵူႈမိူဝ်ႈၵူႈဝၼ်းဢေႃႈ။ ပိူၼ်ႈႁဵတ်းတီႈႁဝ်းမိူၼ်ၼင်ႇၶဝ်တေႁႅမ်သူဝ်းၸိူဝ်းဢၼ်ၸတ်းဝႆႉယဝ်ႉၼၼ်ႉဢေႃႈ၊” ဝႃႈၼင်ႇၼႆၼၼ်ႉဢေႃႈ။-
ၸိူဝ်းၼႆႉတေႁႂ်ႈႁဝ်းၽၢတ်ႇသေမႅတ်ႈတႃႇၸဝ်ႈဢမ်ႇၸႂ်ႈၵူၺ်းဢမ်ႇၵႃး၊ၵႃႈၼႂ်းလွင်ႈတၢင်းၵူႈၸိူဝ်ႉၵူႈပိူင်ၸိူဝ်းၼႆႉႁဝ်းၸၢင်ႈပႄႉၼႅင်ႇတဵမ်ထူၼ်ႈၵွပ်ႈပိူဝ်ႈၸဝ်ႈဢၼ်ႁၵ်ႉႁဝ်းၼၼ်ႉဢေႃႈ။-
ၵဝ်ယုမ်ႇတႄႉလွင်ႈဢၼ်ၶိူင်ႈပိူင်ဢၼ်တၵ်းႁႂ်ႈႁဝ်းၽၢတ်ႇယၢၼ်သေၵႃႈတီႈတၢင်းႁၵ်ႉမႅတ်ႈတႃႇမၼ်းၸဝ်ႈလႆႈၼၼ်ႉဢမ်ႇမီးသေမဵဝ်း။ ၸႃႉၸဵမ်တၢင်းတၢႆသေဢမ်ႇဝႃႈ၊တၢင်းဢၼ်ဢသၢၵ်ႈလိပ်းသေဢမ်ႇဝႃႈ၊တမၢၼ်ႇၵၢင်ႁၢဝ်သေဢမ်ႇဝႃႈ၊ၶုၼ်ဢၼ်ဢုပ်ႉပိူင်ႇၼႃႈၽႃႉၵၢင်ႁၢဝ်တင်းဢႃႇၼႃႇတၼ်းၶူဝ်းသေဢမ်ႇဝႃႈ၊သိုဝ်ႈၼႃႈတႂ်ႈတႃသေဢမ်ႇဝႃႈ၊ဢၼ်တၵ်းပဵၼ်မႃးၵမ်းလိုၼ်းသေဢမ်ႇဝႃႈ၊-
မိူင်းၵၢင်ႁၢဝ်သေဢမ်ႇဝႃႈ၊မိူင်းမရၼႃႉသေဢမ်ႇဝႃႈ၊ၶိူင်ႈပိူင်ဢၼ်ၽြႃးပဵၼ်ၸဝ်ႈၽၢၼ်ႇသၢင်းဝႆႉၵႃႈမီးတင်းသဵင်ႈတင်းလူင်ဢၼ်လႂ်သေၵေႃႈဢမ်ႇၸၢင်ႈႁဵတ်းႁႂ်ႈႁဝ်းၽၢတ်ႇယၢၼ်ၵၼ်ၵႂႃႇသေၵႃႈတီႈတၢင်းႁၵ်ႉမႅတ်ႈတႃႇၽြႃးပဵၼ်ၸဝ်ႈဢၼ်မီးယူႇၼႂ်းၸဝ်ႈၽြႃးႁဝ်း ၸဝ်ႈယေႇသုၶရိၸ်ႈ၊ ၼၼ်ႉဢေႃႈ။
ၵဝ်လၢတ်ႈၵႂၢမ်းသဵတ်ႈၸႃႇလႄႈဝႃႈၸမ်ႉ၊ပိူဝ်ႈဢၼ်ၵဝ်ပဵၼ်ၵူၼ်း ၸဝ်ႈၶရိၸ်ႈ၊ လႄႈၵဝ်ဢမ်ႇပႅတ်ႉဢမ်ႇလႅၼ်ဢေႃႈ။ ဝိၺိၺ်ႇမူတ်းၸၢင်ႇၸဝ်ႈဢုပ်ႉပိူင်ႇၸႂ်ဢၼ်ႁုတူဝ်ၸဝ်ႈၵဝ်ႇၵဝ်ဢၼ်ၶၢမ်ႇသၢၵ်ႈသေႇၽၢႆႇၵဝ်ဢေႃႈ။-
ၵဝ်မႆႈၸႂ်ၶူမ်ၸႂ်ၼႃႇလူင်လၢင်လႄႈၵဝ်ငိၼ်းၶီဢမ်ႇယဝ်ႉဢမ်ႇဝၢႆးပုၼ်ႈပီႈၼွင်ႉၼိူဝ်ႉလိူတ်ႈၵဝ်၊ၵူၼ်းမဵဝ်း ဢိသရေး၊ ၶဝ်ဢေႃႈ။-
ပေႃးတေပဵၼ်ဢၵျူဝ်းၶဝ်ၸိုင်၊ၵဝ်သမ်ႉပေႃးၶႂ်ႈယွၼ်းၽၢတ်ႇ ၸဝ်ႈၶရိၸ်ႈ၊ လႄႈၶၢမ်ႇတၢင်းဢၼ်ၽြႃးပဵၼ်ၸဝ်ႈပၼ်တၢမ်ႇၵဝ်တႅၼ်းၶဝ်ဢေႃႈ။-
ၶဝ်ၼႆႉပဵၼ်ၵူၼ်းမဵဝ်း ဢိသရေး၊ လႄႈလႆႈၶၢမ်ႇပဵၼ်လုၵ်ႈလၢင်းၽြႃးပဵၼ်ၸဝ်ႈ၊လႆႈၶၢမ်ႇဢဝ်ဢမူၺ်ႇမုၼ်ၽုင်းမၼ်းၸဝ်ႈ၊လႆႈၶၢမ်ႇဢဝ်ပတိၺိၺ်ႇတြႃး၊လႆႈၶၢမ်ႇဢဝ်ပိင်းၺၢပ်ႈတြႃးၸဝ်ႈလႆႈၶၢမ်ႇဢဝ်တင်းဢၼ်ၵူဝ်းၵႂၢႆႇၸဝ်ႈၽြႃးလႄႈလႆႈၶၢမ်ႇဢဝ်ၵႂၢမ်းၵတိမၼ်းၸဝ်ႈၸိူဝ်းၼၼ်ႉဢေႃႈ။-
ၶဝ်လႆႈပဵၼ်ၸိူဝ်ႉၶိူဝ်းဢၼ်သိုပ်ႇလူင်းမႃးၵႃႈတီႈပူႇမွၼ်ႇၵူၼ်းမဵဝ်း ႁေႇပြႄး၊ ၶဝ်သေလႄႈၸွမ်းၼင်ႇၵတိမီးၼၼ်ႉတူဝ် ၸဝ်ႈၶရိၸ်ႈ၊ မႃးၶၢမ်ႇဢဝ်ၸႃႇတိၵူၼ်း၊ပေႃႇမႃးၵႃႈၼႂ်းၸိူဝ်ႉၶိူဝ်းၶဝ်ဢေႃႈ။ ႁႂ်ႈၽြႃးပဵၼ်ၸဝ်ႈဢၼ်ဢုပ်ႉပိူင်ႇၵႃႈၼိူဝ်ၵူႈၸိူဝ်ႉၵူႈပိူင်ၼၼ်ႉမီးမၢင်ႇၵလႃႇတၢင်းလီတႃႇသေႇဢမ်ႇထၢတ်ႇသေၵမ်းလူၺ်ႈ။ ဢႃမိၼ်ႈ။
ၸွမ်းၼင်ႇၵတိၽြႃးပဵၼ်ၸဝ်ႈမီးၼၼ်ႉမၼ်းဢမ်ႇပဵၼ်မႃးၸွမ်းဝႃႈၼႆၵဝ်ဢမ်ႇဝႃႈ။ လွင်ႈမၼ်းၸမ်ႉ၊ၸိူဝ်ႉၶိူဝ်းၵူၼ်းမဵဝ်း ဢိသရေး၊ ၵူႈၵေႃႉပဵၼ်ၵူၼ်းမဵဝ်း ဢိသရေး၊ ၸႅတ်ႈၸႅတ်ႈဢမ်ႇၸႂ်ႈ။-
ၼႄးလဵဝ်ၵၼ်၊ၵွပ်ႈပိူဝ်ႈပဵၼ်ၸိူဝ်ႉၶိူဝ်းလုၵ်ႈလၢၼ် ဢႃႇပြႃႇႁၢမ်ႇ၊ လႄႈၵူႈၵေႃႉပဵၼ်လုၵ်ႈလၢၼ် ဢႃႇပြႃႇႁၢမ်ႇ၊ ၸႅတ်ႈၸႅတ်ႈဢမ်ႇၸႂ်ႈ။ ၵႂၢမ်းဢၼ်ၽြႃးပဵၼ်ၸဝ်ႈလၢတ်ႈတီႈ ဢႃႇပြႃႇႁၢမ်ႇ၊ လႄႈဝႃႈ၊ “ၵဝ်တၵ်းမၢတ်ႈလုၵ်ႈလၢင်း ဢိၸၢၵ်ႈ၊ ၵူၺ်းပဵၼ်လုၵ်ႈလၢင်းမႂ်းဢေႃႈ၊” ဝႃႈၼင်ႇၼႆၼၼ်ႉ၊-
ၶႂ်ႈဝႃႈလုၵ်ႈလၢင်းဢၼ်ၵိူတ်ႇလဵင်ႉမႃးၸွမ်းၼင်ႇၸႃႇတိၼိူဝ်ႉလိူတ်ႈပဵၼ်လုၵ်ႈလၢင်းၽြႃးပဵၼ်ၸဝ်ႈၵူႈၵေႃႉဢမ်ႇၸႂ်ႈလႄႈ၊လုၵ်ႈလၢင်းဢၼ်ၵိူတ်ႇမႃးၸွမ်းၼင်ႇၵတိၽြႃးပဵၼ်ၸဝ်ႈၼၼ်ႉၵူၺ်းမၼ်းၸဝ်ႈမၢတ်ႈပဵၼ်ၸိူဝ်ႉၶိူဝ်းမၼ်းၸဝ်ႈဢေႃႈ။-
ၵႂၢမ်းၵတိမၼ်းၸဝ်ႈၼၼ်ႉမီးဝႆႉလႄႈဝႃႈၸမ်ႉ၊ “မိူဝ်ႈဢၼ်ၶွပ်ႈၶိုၼ်းၶိင်ႇၼႆႉၵဝ်တၵ်းၶိုၼ်းမႃးလႄႈ၊မေးမႂ်း ၸႃႇရႃႇ၊ တၵ်းၵိူတ်ႇလဵင်ႉလုၵ်ႈၸၢႆးဢေႃႈ၊” ဝႃႈၼင်ႇၼႆဢေႃႈ။
လိူဝ်သေၼၼ်ႉဢမ်ႇၵႃး၊မိူဝ်ႈဢၼ် ရေႇပႅၵ်ႉၵႃႉ၊ မီးလုၵ်ႈၸၢႆးသွင်ၵေႃႉဢၼ်ႁူမ်ႈပေႃႈၵၼ်ဢၼ်ပဵၼ်ပူႇမွၼ်ႇႁဝ်း ဢိၸၢၵ်ႈ၊ ၼၼ်ႉဢေႃႈ။ ၼႂ်းဝႃႈၼၼ်သေၵေႃႈၼင်ႇႁိုဝ်တၢင်းဢၼ်ၽြႃးပဵၼ်ၸဝ်ႈလိူၵ်ႈၵဵပ်းဢဝ်ဝႆႉလုၵ်ႈၵေႃႉၼိုင်ႈၼၼ်ႉတၵ်းတႄႇယူႇပဵၼ်ၸွမ်းဢလူဝ်ႇမၼ်းၸဝ်ႈၸိုင်၊မၼ်းၸဝ်ႈလၢတ်ႈတီႈ ရေႇပႅၵ်ႉၵႃႉ၊ လႄႈဝႃႈ၊ “လုၵ်ႈၸၢႆးလူင်တၵ်းလႆႈပဵၼ်ၵူၼ်းၸႂ်ႉလုၵ်ႈၸၢႆးဢွၼ်ႇဢေႃႈ၊” ဝႃႈၼင်ႇၼႆဢေႃႈ။-
မၼ်းၸဝ်ႈလၢတ်ႈၸိူဝ်ႉၼင်ႇၼႆၸဵမ်မိူဝ်ႈလုၵ်ႈဢွၼ်ႇသွင်ပီႈၼွင်ႉၼၼ်ႉယင်းဢမ်ႇပႆႇၵိူတ်ႇယင်းဢမ်ႇပႆႇမေႃႁဵတ်းလီႁဵတ်းႁၢႆႉၼၼ်ႉယဝ်ႉဢေႃႈ။-
ပိူဝ်ႈၼႆလႄႈ တၢင်းဢၼ်ၽြႃးပဵၼ်ၸဝ်ႈလိူၵ်ႈၵဵပ်းဢဝ်ၼၼ်ႉတႄႇၼိူဝ်တၢင်းၵမ်တၢင်းၵျၢင်ႉၶဝ်ဢမ်ႇၸႂ်ႈ။ ပဵၼ်ၸွမ်းၼင်ႇဢလူဝ်ႇမၼ်းၸဝ်ႈႁွင်ႉဢဝ်ၼၼ်ႉဢေႃႈ။-
မၼ်းလႆႈပဵၼ်ၸွမ်း ဢၼ်တႅမ်ႈဝႆႉၼႂ်းၵျၢမ်းလိၵ်ႈလႄႈဝႃႈ၊ “ၽြႃးပဵၼ်ၸဝ်ႈလၢတ်ႈဝႃႈ၊ ‘ၵဝ်လႆႈႁၵ်ႉ ယႃႇၵုပ်ႈ၊ လႄႈလႆႈၸင်း ဢေးသေႃး၊ ဢေႃႈ၊’ ဝႃႈၼႆ” တႅမ်ႈဝႆႉၼင်ႇၼႆဢေႃႈ။
ပေႃးပဵၼ်ၸိူဝ်ႉၼင်ႇၼႆၸိုင်၊ႁဝ်းတေဝႃႈၸိူဝ်ႉႁိုဝ်။ ၽြႃးပဵၼ်ၸဝ်ႈႁဵတ်းတၢင်းဢၼ်ဢမ်ႇတြႃးႁိုဝ်း။ ဢမ်ႇဝႃႈလႆႈၸိူဝ်ႉၼင်ႇၼၼ်။-
မၼ်းၸဝ်ႈလၢတ်ႈတီႈသြႃႇ မူဝ်းသေႇ၊ လႄႈဝႃႈ၊ “ၵဝ်တၵ်းႁဵတ်းၵျေးၸူး တီႈၵေႃႉဢၼ်ၵဝ်ၶႂ်ႈႁဵတ်းၵျေးၸူးလႄႈၵဝ်တၵ်းဢဵတ်းလူတီႈၵေႃႉဢၼ်ၵဝ်ၶႂ်ႈဢဵတ်းလူဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၽြႃးပဵၼ်ၸဝ်ႈႁဵတ်းၵျေးၸူးၸွမ်းၼင်ႇတၢင်းဢၢင်ႈဢၢၼ်းၵူၼ်းဢမ်ႇၼၼ်တၢင်းႁဵတ်းၵူၼ်းဢမ်ႇၸႂ်ႈ၊မၼ်းပဵၼ်ၸွမ်းၼင်ႇၽြႃးပဵၼ်ၸဝ်ႈဢဵတ်းလူၵူၺ်းဢေႃႈ။-
ၵျၢမ်းလိၵ်ႈၸင်ႇတႅမ်ႈဝႆႉလွင်ႈဢၼ်ၽြႃးပဵၼ်ၸဝ်ႈလၢတ်ႈတီႈၶုၼ်ႁေႃၶမ်း ၽႃႇရေႃး၊ လႄႈဝႃႈ၊ “တၢင်းၵျၢမ်ႇတၢင်းပွင်ဢၼ်ၵဝ်ယုၵ်ႉယွင်ႈမႂ်းဝႆႉပဵၼ်ၶုၼ်ႁေႃၶမ်းၸမ်ႉ၊ပဵၼ်လွင်ႈတၢင်းဢၼ်ဢဝ်မႂ်းၼႄပျႃးတၼ်းၶူဝ်းၵဝ် ဢိၵ်ႇတင်းႁႂ်ႈၼႃႇမႃႉၸိုဝ်ႈသဵင်ၵဝ်လႆႈႁူင်ႁၢင်းၸွတ်ႇတူဝ်ႈၵႂႃႇၵႃႈၼိူဝ်လိၼ်မိူင်းတင်းသဵင်ႈဢေႃႈ၊” ဝႃႈၼင်ႇၼႆဢေႃႈ။-
ၵွပ်ႈလွင်ႈတၢင်းၼႆႉလႄႈၽြႃးပဵၼ်ၸဝ်ႈႁဵတ်းၵျေးၸူးတီႈၵေႃႉဢၼ်မၼ်းၸဝ်ႈၶႂ်ႈႁဵတ်းၵျေးၸူးလႄႈမၼ်းၸဝ်ႈႁဵတ်းႁႂ်ႈၸႂ်တိုမ်ၸႂ်တၼ်တီႈၵေႃႉဢၼ်မၼ်းၸဝ်ႈၶႂ်ႈႁဵတ်းႁႂ်ႈၸႂ်တိုမ်ၸႂ်တၼ်ၼၼ်ႉဢေႃႈ။
သူသမ်ႉတၵ်းထၢမ်ၵဝ်ဝႃႈ၊ “ပေႃးပဵၼ်ၸိူဝ်ႉၼင်ႇၼႆၸိုင်၊ႁဵတ်းသင်လႄႈၽြႃးပဵၼ်ၸဝ်ႈႁႃဢပျတ်ႈၵူၼ်း။ ၽူႈလႂ်တၵ်းတေၶတ်းဢလူဝ်ႇၽြႃးပဵၼ်ၸဝ်ႈလႆႈ၊” ဝႃႈၼင်ႇၼႆလူးၵွၼ်ႇႁိုဝ်း။-
ၵူၺ်းၵႃႈ၊ၵေႃႉသႄႈၶဝ်႟။ သူပဵၼ်ၽူႈလႂ်လႄႈႁတ်းတွပ်ႇထဵင်ၽြႃးပဵၼ်ၸဝ်ႈ။ မေႃႈလိၼ်ဢမ်ႇတွၼ်ႉထၢမ်ၸဝ်ႈမေႃႈဢၼ်ပၼ်ႈႁဵတ်းမၼ်းဝႃႈ၊ “ၵွပ်ႈသင်လႄႈသူႁဵတ်းပုင်ႇႁၢင်ႈၵဝ်ၸိူဝ်ႉၼင်ႇၼႆ၊” ဝႃႈၼင်ႇၼႆဢေႃႈ။-
ၸဝ်ႈမေႃႈၼၼ်ႉမီးဢၶႂၢင်ႉဢယေးတႃႇတေဢဝ်လိၼ်ၼဵဝ်ႁဵတ်းၸွမ်းၼင်ႇဢၼ်မၼ်းမီးဢလူဝ်ႇလႄႈလိၼ်ၼဵဝ်ၵွၼ်ႈလဵဝ်ၵူၺ်းမၼ်းပိူင်ႇႁဵတ်းမေႃႈလီမေႃႈၺၢမ်ႉဢမ်ႇၸႂ်ႈႁိုဝ်း။
ၽြႃးပဵၼ်ၸဝ်ႈၵေႃႈၶႂ်ႈမိူၼ်ၸဝ်ႈမေႃႈၼၼ်ႉဢေႃႈ။ မၼ်းၸဝ်ႈၶႂ်ႈၼႄပျႃးတၢမ်ႇဢၼ်မၼ်းၸဝ်ႈၸီႇယၢင်ႇဢပျတ်ႈဢိၵ်ႇတင်းတၼ်းၶူဝ်းမၼ်းၸဝ်ႈၼၼ်ႉထၢင်ႇသႃးသေၵေႃႈမၼ်းၸဝ်ႈလႆႈဝႆႉၸႂ်ယႂ်ႇၸႂ်ယၢဝ်းယိူၼ်ႉၶၢမ်ႇမေႃႈဢၼ်ထိူၵ်ႈလႆႈၶၢမ်ႇတၢမ်ႇၸဝ်ႈဢၼ်ၽွမ်ႉဝႆႉပုၼ်ႈတႃႇတၵ်းယႃႉလႅဝ်ၼၼ်ႉဢေႃႈ။-
ၼႄးလဵဝ်ၵၼ်မၼ်းၸဝ်ႈၶႂ်ႈၼႄပျႃးမုၼ်ၽုင်းဢႃႇၼုၽေႃႇမၼ်းၸဝ်ႈဢၼ်ယႂ်ႇၼမ်ၵိုၼ်းၼႃႇပုၼ်ႈတႃႇမေႃႈဢၼ်ထိူၵ်ႈလႆႈၶၢမ်ႇၵရုၼႃႇၸဝ်ႈၸင်ႇ၊မေႃႈၸိူဝ်းၼၼ်ႉၵေႃႈလႆႈမႄးႁႅၼ်းဝႆႉၸဵမ်မိူဝ်ႈဢွၼ်တၢင်းၼႆႉႁႂ်ႈလႆႈႁပ်ႉဢဝ်မုၼ်ၽုင်းမၼ်းၸဝ်ႈၼၼ်ႉဢေႃႈ။-
လွင်ႈမၼ်းၸမ်ႉ၊ႁဝ်းၸိူဝ်ႉၼႆႉပဵၼ်ၶဝ်ၸိူဝ်းဢၼ်မၼ်းၸဝ်ႈႁွင်ႉဢဝ် ၵႃႈၼႂ်းၵူၼ်းမဵဝ်း ၵျူး၊ ၵူၺ်းဢမ်ႇၵႃး၊ပႃးၸဵမ်ၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းႁႂ်ႈလႆႈပဵၼ်မေႃႈဢၼ်မၼ်းၸဝ်ႈမႄးႁႅၼ်းဝႆႉ၊-
မိူၼ်ၼင်ႇသြႃႇ ႁူဝ်းသေႇ၊ ႁေႃးဝႆႉလႄႈဝႃႈ၊ “ၸဝ်ႈၽြႃးလၢတ်ႈဝႃႈ၊ ‘ၵူၼ်းၸိူဝ်းဢၼ်ဢမ်ႇၸႂ်ႈၵူၼ်းၵဝ်ၼၼ်ႉ၊ ၵဝ်တၵ်းႁွင်ႉၶဝ်ဝႃႈ ၵူၼ်းၵဝ် ဝႃႈၼႆလႄႈ ၵူၼ်းၸိူဝ်းဢၼ်ၵဝ်ဢမ်ႇယၢမ်ႈႁၵ်ႉၼၼ်ႉၵဝ်တၵ်းႁွင်ႉဝႃႈၵေႃႉဢၼ်ၵဝ်ႁၵ်ႉ႟ ဝႃႈၼႆဢေႃႈ။
ၵႃႈတီႈဢၼ်လႆႈလၢတ်ႈလွင်ႈၶဝ်ဝႃႈဢမ်ႇၸႂ်ႈၵူၼ်းၵဝ်ဝႃႈၼႆၼၼ်ႉၸိုင်၊ တီႈၼၼ်ႈၵမ်းလဵဝ်ၽြႃးပဵၼ်ၸဝ်ႈတၵ်းႁွင်ႉၶဝ်ဝႃႈလုၵ်ႈၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇ၊’ ဝႃႈၼင်ႇၼႆဢေႃႈ၊” ႁေႃးဝႆႉၼင်ႇၼႆဢေႃႈ။-
လိူဝ်သေၼၼ်ႉသြႃႇ ဢိသႃႇယႃႉ၊ ၵေႃႈႁွင်ႉသေႃႇလွင်ႈၵူၼ်းမဵဝ်း ဢိသရေး၊ လႄႈဝႃႈ၊ “ပိၵ်ႉသမ်ႉၵူၼ်းမဵဝ်း ဢိသရေး၊ ၼမ်ၵိုၼ်းၼႃႇထၼ်ႇမဵတ်ႉႁိၼ်မဵတ်ႉသၢႆးၼမ်ႉသမ်ႇမုၵ်ႈတြႃႇသေၵေႃႈၼႂ်းၶဝ်ၼၼ်ႉၵမ်ႈၽွင်ႈၵူၺ်းတၵ်းလႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ဢေႃႈ။-
လွင်ႈမၼ်းၸမ်ႉ၊ၸဝ်ႈၽြႃးတၵ်းၸွမ်းတြႃးသိုဝ်ႈတေႃႇတႅပ်းတတ်းႁႂ်ႈၸဵဝ်းယဝ်ႉၸဵဝ်းတူဝ်ႈၵႃႈၼိူဝ်လိၼ်မိူင်းဢေႃႈ၊” ဝႃႈၼင်ႇၼႆႁေႃးဝႆႉဢေႃႈ။-
မၼ်းပဵၼ်ၸွမ်းၼင်ႇၵႂၢမ်းဢၼ်သြႃႇ ဢိသႃႇယႃႉ၊ ႁေႃးဝႆႉထႅင်ႈဝႃႈ၊ “ပေႃးဝႃႈထႃႇဝရႃႉၽြႃးၸဝ်ႈဢၼ်ယႂ်ႇမျၢတ်ႈၼႃႇၼၼ်ႉယင်းဢမ်ႇႁႂ်ႈၸိူဝ်ႉၽၼ်းႁဝ်းၵိုတ်းဝႆႉၸိုင်၊ႁဝ်းတၵ်းမိူၼ်ၼင်ႇၵူၼ်းမဵဝ်း သေႃးတုမ်ႇ၊ လႄႈတၵ်းလႆႈပဵၼ်ၼင်ႇၵူၼ်းမဵဝ်း ၵေႃးမေႃးရႃႉ၊ ဢေႃႈ၊” ဝႃႈၼင်ႇၼႆႁေႃးဝႆႉၼၼ်ႉဢေႃႈ။
ပေႃးပဵၼ်ၸိူဝ်ႉၼင်ႇၼႆၸိုင်၊ႁဝ်းတေဝႃႈၸိူဝ်ႉႁိုဝ်။ ႁဝ်းတေဝႃႈၸိူဝ်ႉၼင်ႇၼႆဢေႃႈ။ ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၸိူဝ်းဢၼ်ဢမ်ႇၶတ်းၸႂ်ၵျၢမ်ႇပဵၼ်ၵူၼ်းသိုဝ်ႈတေႃႇၼၼ်ႉလႆႈၶဝ်ႈပဵၼ်ၵူၼ်းသိုဝ်ႈတေႃႇၵွပ်ႈပိူဝ်ႈတၢင်းယုမ်ႇမၢတ်ႈၶဝ်ဢေႃႈ။-
ၵူၼ်းမဵဝ်း ဢိသရေး၊ ၶဝ်ၵျၢမ်ႇႁႃၵမ်ၵျၢင်ႉၸွမ်းပိင်းၺၢပ်ႈတြႃးၸဝ်ႈႁႂ်ႈလႆႈပဵၼ်ၵူၼ်းသိုဝ်ႈတေႃႇလႄႈသမ်ႉဢမ်ႇလႆႈပဵၼ်ဢေႃႈ။-
ၵွပ်ႈသင်လႄႈဢမ်ႇလႆႈပဵၼ်ၸမ်ႉ၊တၢင်းဢၼ်ၶဝ်ၵျၢမ်ႇႁႃပဵၼ်ၵူၼ်းသိုဝ်ႈတေႃႇၼၼ်ႉၶဝ်ဢမ်ႇပႃးတၢင်းယုမ်ႇမၢတ်ႈ၊ၶဝ်ဢိင်ပိုင်ႈတၢင်းၵမ်တၢင်းၵျၢင်ႉတူဝ်ၸဝ်ႈၵဝ်ႇၵူၺ်းၼၼ်ႉဢေႃႈ။ ၶဝ်ၶီႈလိုတ်းလႄႈလူမ်ႉၵႃႈတီႈ “မၢၵ်ႇႁိၼ်ဢၼ်ႁဵတ်းႁႂ်ႈၵူၼ်းၶီႈလိုတ်း” ၼၼ်ႉ၊-
ၸွမ်းၼင်ႇၵျၢမ်းလိၵ်ႈတႅမ်ႈဝႆႉလွင်ႈမၢၵ်ႇႁိၼ်ၼၼ်ႉဝႃႈ၊ “ၸဝ်ႈၽြႃးလၢတ်ႈဝႃႈ၊ ‘တူၺ်းလူး။ ၵႃႈၼႂ်းဝဵင်း ၸိဢုၼ်ႇ၊ ၼၼ်ႉ ၵဝ်တၵ်းဝၢင်း မၢၵ်ႇႁိၼ်ဢၼ်ႁႂ်ႈၶီႈလိုတ်းႁူၺ်ႇၼိုင်ႈ ဢၼ်ၸၢင်ႈႁႂ်ႈၵူၼ်းၶီႈလိုတ်းလူမ်ႉဢေႃႈ။ ၵူၺ်းၵႃႈ၊ၵေႃႉဢၼ်ယုမ်ႇမၢတ်ႈမၼ်းၸဝ်ႈၼၼ်ႉၸမ်ႉ၊ တၵ်းဢမ်ႇလႆႈလီဢူၵ်းလီဢၢႆပိူၼ်ႈ၊’ ” ဝႃႈၼင်ႇၼႆဝႆႉဢေႃႈ။
ပီႈၼွင်ႉၵဝ်တင်းလၢႆၶဝ်႟။ ၵဝ်မီးၸႂ်ၸေႇတၼႃႇလႄႈသူးတွင်းၽြႃးပဵၼ်ၸဝ်ႈႁႂ်ႈၵူၼ်းမဵဝ်းၵဝ်တင်းလၢႆႁွတ်ႈထိုင်တၢင်းဢၼ်ၵႄႇၶျွတ်ႈဢဝ်တႄႉတႄႉဢေႃႈ။-
ၵဝ်ၶၢမ်ႇသၢၵ်ႈသေႇၽၢႆႇၶဝ်လွင်ႈဢၼ်ၶဝ်ၸႂ်ႁႅင်းယႂ်ႇၼႂ်းၽြႃးပဵၼ်ၸဝ်ႈၼၼ်ႉဢေႃႈ။ ၵူၺ်းၵႃႈ၊ၶဝ်ဢမ်ႇပွင်ႇၸႂ်ၼႂ်းၽြႃးပဵၼ်ၸဝ်ႈလီလီဢေႃႈ။-
ပိူဝ်ႈဢၼ်ၶဝ်ဢမ်ႇပွင်ႇၸႂ်လွင်ႈတၢင်းဢၼ်တြႃးတၢင်းသိုဝ်ႈတေႃႇပဵၼ်မႃးၵႃႈတီႈၽြႃးပဵၼ်ၸဝ်ႈၼၼ်ႉလႄႈ ၶဝ်ၵျၢမ်ႇႁဵတ်းဢဝ်ၵူၺ်းၶဝ်ၸင်ႇၶဝ်ဢမ်ႇႁပ်ႉဢဝ်တြႃးတၢင်းသိုဝ်ႈတေႃႇၽြႃးပဵၼ်ၸဝ်ႈလႄႈယူႇဢေႃႈ။-
လွင်ႈမၼ်းၸမ်ႉ၊ ၸဝ်ႈၶရိၸ်ႈ၊ ပဵၼ်တီႈသုတ်းတီႈၵွႆပိင်းၺၢပ်ႈတြႃးပုၼ်ႈလွင်ႈၼင်ႇႁိုဝ်ၶဝ်ၸိူဝ်းဢၼ်ယုမ်ႇမၢတ်ႈမၼ်းၸဝ်ႈၵူႈၵေႃႉလႆႈထိုင်ပဵၼ်ၵူၼ်းသိုဝ်ႈတေႃႇဢေႃႈ။
ၼႆႉၸမ်ႉ၊ပဵၼ်ၵႂၢမ်းဢၼ်သြႃႇ မူဝ်းသေႇ၊ တႅမ်ႈဝႆႉလွင်ႈဢၼ်ၵူၼ်းလႆႈပဵၼ်ၵူၼ်းသိုဝ်ႈတေႃႇမႃး ၵွပ်ႈပိူဝ်ႈတၢင်းဢၼ်ၵမ်ၵျၢင်ႉၸွမ်းပိင်းၺၢပ်ႈတြႃးၼၼ်ႉလႄႈဝႃႈ၊ “ၵေႃႉဢၼ်ၵမ်ၵျၢင်ႉၸွမ်းပိင်းၺၢပ်ႈတြႃးၼၼ်ႉဢသၢၵ်ႈမၼ်းတၵ်းလိပ်းၵွပ်ႈပိူဝ်ႈတြႃးၼၼ်ႉဢေႃႈ၊” ဝႃႈၼင်ႇၼႆဢေႃႈ။-
ၼႂ်းဝႃႈၼၼ်သေၵေႃႈမၼ်းသမ်ႉတႅမ်ႈဝႆႉလွင်ႈတၢင်းဢၼ်လႆႈပဵၼ်ၵူၼ်းသိုဝ်ႈတေႃႇၵွပ်ႈပိူဝ်ႈတၢင်းဢၼ်ယုမ်ႇမၢတ်ႈၼၼ်ႉလႄႈဝႃႈ၊ “ယႃႇပေထၢင်ႇၼႂ်းၸႂ်လႄႈဝႃႈ၊ ‘ၽူႈလႂ်တၵ်းၶိုၼ်ႈၵႂႃႇၵႃႈၼိူဝ်ၵၢင်ႁၢဝ်၊’” (ၶႂ်ႈဝႃႈၵႂႃႇဢဝ် ၸဝ်ႈၶရိၸ်ႈ၊ လူင်းမႃးဢေႃႈ။) ဝႃႈၼင်ႇၼႆ၊-
ဢမ်ႇၼၼ်ၵေႃႈ “ယႃႇပေဝႃႈ၊ ‘ၽူႈလႂ်တၵ်းလူင်းၵႂႃႇမိူင်းၶူင်းတႂ်ႈ၊’ (ၶႂ်ႈဝႃႈၵႂႃႇဢဝ် ၸဝ်ႈၶရိၸ်ႈ၊ လုၵ်ႉၶိုၼ်ႈမႃးသေၵႃႈတီႈတၢင်းတၢႆဢေႃႈ။) ဝႃႈၼင်ႇၼႆ၊” ဝႃႈၼင်ႈၼႆတႅမ်ႈဝႆႉဢေႃႈ။-
ၼႂ်းၵျၢမ်းလိၵ်ႈတႅမ်ႈဝႆႉမီးထႅင်ႈဝႃႈ၊ “တြႃးၸဝ်ႈမီးၸမ်ၵၼ်တင်းမႂ်း၊ၵႃႈတီႈၼႂ်းသူပ်းဢိၵ်ႇတင်းၼႂ်းႁူဝ်ၸႂ်မႂ်းဢေႃႈ၊” ဝႃႈၼင်ႇၼႆဢေႃႈ။ တြႃးၸဝ်ႈၼႆႉပဵၼ်တြႃးတၢင်းဢၼ်ယုမ်ႇမၢတ်ႈဢၼ်ႁဝ်းႁေႃးလၢတ်ႈယူႇၼႆႉဢေႃႈ။-
ပေႃးမႂ်းဢဝ်တင်းသူပ်းမႂ်းႁပ်ႉတုင်းဢဝ်လွင်ႈ “ ၸဝ်ႈယေႇသု၊ ပဵၼ်ၸဝ်ႈၽြႃး” လႄႈယုမ်ႇၼႂ်းႁူဝ်ၸႂ်မႂ်းလွင်ႈဢၼ်ၽြႃးပဵၼ်ၸဝ်ႈဢဝ်မၼ်းၸဝ်ႈလုၵ်ႉသေၵႃႈတၢင်းတၢႆၶိုၼ်းလိပ်းမႃးၸိုင်၊မႂ်းတၵ်းလႆႈၶၢမ်ႇတၢင်းဢၼ်ၽြႃးပဵၼ်ၸဝ်ႈၵႄႇၶျွတ်ႈဢဝ်ဢေႃႈ။-
လွင်ႈမၼ်းၸမ်ႉ၊ၵူၼ်းၸိုင်ဢဝ်တင်းႁူဝ်ၸႂ်ယုမ်ႇမၢတ်ႈၸင်ႇလႆႈထိုင်ပဵၼ်ၵူၼ်းသိုဝ်ႈတေႃႇဢေႃႈ။ ဢဝ်တင်းသူပ်းႁပ်ႉတုင်းဢဝ်လႄႈလႆႈၶၢမ်ႇတၢင်းဢၼ်ၵႄႇၶျွတ်ႈဢဝ်ဢေႃႈ။-
ၵျၢမ်းလိၵ်ႈတႅမ်ႈဝႆႉမီးယူႇလႄႈဝႃႈ၊ “ၵူၼ်းၵေႃႉဢၼ်ယုမ်ႇမၢတ်ႈမၼ်းၸဝ်ႈၵူႈၵေႃႉတၵ်းဢမ်ႇလႆႈဢူၵ်းလႆႈဢၢႆပိူၼ်ႈ၊” ဝႃႈၼင်ႇၼႆဢေႃႈ။-
ၽြႃးပဵၼ်ၸဝ်ႈပဵၼ်သူႇလဵဝ်ၽြႃးတီႈၵူၼ်းတင်းသဵင်ႈတင်းလူင်လႄႈမၼ်းၸဝ်ႈဢမ်ႇလိူၵ်ႈဢမ်ႇၶႂၢႆးၵူၼ်းမဵဝ်း ၵျူး၊ လႂ်တင်းၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၶဝ်သေလႄႈပၼ်မၢင်ႇၵလႃႇတၢင်းလီတီႈၶဝ်ၸိူဝ်းဢၼ်ၵၢဝ်ႇႁႃမၼ်းၸဝ်ႈၼၼ်ႉၵူႈၵေႃႉၵူႈၵူၼ်းဢေႃႈ။-
မၼ်းမႅၼ်ႈၸွမ်းၼင်ႇဢၼ်ၼႂ်းၵျၢမ်းလိၵ်ႈတႅမ်ႈဝႆႉလႄႈဝႃႈ၊ “ၵူၼ်းၵေႃႉဢၼ်ၵၢဝ်ႇႁႃဢေႁႃၼႃႇမႃႉၸိုဝ်ႈသဵင်ၸဝ်ႈၽြႃးၵူႈၵေႃႉ တၵ်းလႆႈၶၢမ်ႇတၢင်းဢၼ်ၽြႃးပဵၼ်ၸဝ်ႈၵႄႇၶျွတ်ႈဢဝ်ဢေႃႈ၊” ဝႃႈၼင်ႇၼႆၼၼ်ႉဢေႃႈ။
ၵူၺ်းၵႃႈ၊ယင်းဢမ်ႇပႆႇယုမ်ႇမၢတ်ႈၸိုင်၊ၶဝ်တၵ်းႁဵတ်းၸိူဝ်ႉႁိုဝ်ၵၢဝ်ႇႁႃဢေႁႃမၼ်းၸဝ်ႈလႆႈ။ လိူဝ်သေၼၼ်ႉပေႃးယင်းဢမ်ႇပႆႇငိၼ်းတြႃးၸဝ်ႈၸိုင်၊ၶဝ်တၵ်းႁဵတ်းၸိူဝ်ႉႁိုဝ်ယုမ်ႇမၢတ်ႈလႆႈ။ ပေႃးယင်းဢမ်ႇႁေႃးဢမ်ႇလၢတ်ႈၸိုင်၊သမ်ႉတၵ်းႁဵတ်းၸိူဝ်ႉႁိုဝ်လႆႈငိၼ်း။-
ပေႃးၽူႈလႂ်ဢမ်ႇပွႆႇၸႂ်ႉၵူၼ်းၵႂႃႇႁေႃးလၢတ်ႈၸိုင်၊ၶၢဝ်ႇတြႃးၸဝ်ႈၼၼ်ႉတၵ်းႁဵတ်းၸိူဝ်ႉႁိုဝ်ႁေႃးလၢတ်ႈလႆႈ။ မၼ်းမႅၼ်ႈၸွမ်းၼင်ႇဢၼ်ၼႂ်းၵျၢမ်းလိၵ်ႈတႅမ်ႈဝႆႉလႄႈဝႃႈ၊ “လွင်ႈဢၼ်မီးၵူၼ်းမႃးႁေႃးလၢတ်ႈၶၢဝ်ႇတြႃးသိူဝ်းပျေႃႇၸဝ်ႈၼၼ်ႉပဵၼ်လွင်ႈဢၼ်မျၢတ်ႈလီၼႃႇဢေႃႈ၊” ဝႃႈၼင်ႇၼႆၼၼ်ႉဢေႃႈ။-
ၵူၺ်းၵႃႈ၊ၶဝ်ၵူႈၵေႃႉဢမ်ႇႁပ်ႉတုင်းဢဝ်ၶၢဝ်ႇတြႃးသိူဝ်းပျေႃႇၼၼ်ႉ။ ပိူဝ်ႈၼႆလႄႈသြႃႇ ဢိသႃႇယႃႉ၊ လၢတ်ႈလႄႈဝႃႈ၊ “ၸဝ်ႈႁဝ်းတီႈၶႃႈ။ ၽူႈလႂ်ယုမ်ႇမၢတ်ႈတြႃးၸဝ်ႈဢၼ်ႁဝ်းႁေႃးၼၼ်ႉတီႈၶႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈတၢင်းဢၼ်လႆႈယုမ်ႇမၢတ်ႈၼၼ်ႉပဵၼ်မႃးၵွပ်ႈပိူဝ်ႈလႆႈထွမ်ႇလႆႈငိၼ်းၶၢဝ်ႇတြႃးသိူဝ်းပျေႃႇၸဝ်ႈဢေႃႈ။ ၶၢဝ်ႇတြႃးသိူဝ်းပျေႃႇၸဝ်ႈၼၼ်ႉပဵၼ်မႃးၵွပ်ႈပိူဝ်ႈႁေႃးလၢတ်ႈလွင်ႈ ၸဝ်ႈၶရိၸ်ႈ၊ ဢေႃႈ။
ၵူၺ်းၵႃႈ၊ၵဝ်ၶႂ်ႈထၢမ်လႄႈဝႃႈ၊ၶဝ်ဢမ်ႇပႆႇလႆႈငိၼ်းၶၢဝ်ႇတြႃးသိူဝ်းပျေႃႇၸဝ်ႈဢၼ်ဝႃႈၼၼ်ႉၸႂ်ႈတႄႉႁိုဝ်း။ ၶဝ်လႆႈငိၼ်းယဝ်ႉဢမၢၼ်ႇဢေႃႈ။ ၼႂ်းၵျၢမ်းလိၵ်ႈတႅမ်ႈဝႆႉလႄႈဝႃႈ၊ “သဵင်ၶဝ်ႁေႃးလၢတ်ႈတြႃးၸဝ်ႈၼၼ်ႉၸွတ်ႇတူဝ်ႈၵႂႃႇၵႃႈၼိူဝ်လိၼ်မိူင်းယဝ်ႉ။ ၶေႃႈၵႂၢမ်းၶဝ်ၽႅဝ်ၵႂႃႇတီႈႁိမ်းလႅၼ်သုတ်းလိၼ်မိူင်းပုၼ်ႉယဝ်ႉဢေႃႈ၊” ဝႃႈၼင်ႇၼႆဢေႃႈ။-
ၵဝ်သမ်ႉၶႂ်ႈထၢမ်ထႅင်ႈဝႃႈ၊ၵူၼ်းမဵဝ်း ဢိသရေး၊ ၶဝ်ဢမ်ႇႁုပွင်ႇၸႂ် ႁိုဝ်း။ သြႃႇ မူဝ်းသေႇ၊ ပဵၼ်ၵေႃႉဢၼ်ၶိုၼ်းတွပ်ႇၶေႃႈထၢမ်ၼႆႉဢွၼ်တၢင်းပိူၼ်ႈလႄႈဝႃႈ၊ “ၸဝ်ႈၽြႃးလၢတ်ႈဝႃႈ၊ ‘ၵဝ်တၵ်းႁဵတ်းႁႂ်ႈသူၶွႆၵူၼ်းမဵဝ်းဢၼ်ဢမ်ႇမီးမိူင်းၼၼ်ႉဢေႃႈ။ ၵဝ်တၵ်းႁဵတ်းႁႂ်ႈသူဢွၵ်ႇတေႃးသႃႉၶႂ်ႈၸႃႉၵူၼ်းမဵဝ်းဢၼ်ငိူဝ်ႈငႃႉၼၼ်ႉဢေႃႈ၊’” ဝႃႈၼင်ႇၼႆဢေႃႈ။-
သြႃႇ ဢိသႃႇယႃႉ၊ သမ်ႉယဵင်ႈၶႅၼ်းႁတ်းလၢတ်ႈသိုဝ်ႈသိုဝ်ႈလႄႈဝႃႈ၊ “ၸဝ်ႈၽြႃးလၢတ်ႈဝႃႈ၊ ‘ၶဝ်ၸိူဝ်းဢၼ်ဢမ်ႇသွၵ်ႈႁႃၵဝ်ၼၼ်ႉထူပ်းႁၼ်ၵဝ်ယဝ်ႉ။ ၵဝ်လႆႈၼႄပျႃးတူဝ်ၵဝ်ၵႃႈတီႈၶဝ်ၸိူဝ်းဢၼ်ဢမ်ႇထၢမ်ႁႃၵဝ်ၼၼ်ႉယဝ်ႉ၊’” ဝႃႈၼင်ႇၼႆၼၼ်ႉဢေႃႈ။
ၵူၺ်းၵႃႈ၊ၸၢပ်ႈသႅင်ႇလူၺ်ႈလွင်ႈၵူၼ်းမဵဝ်း ဢိသရေး၊ ၶဝ်ၼၼ်ႉမၼ်းသမ်ႉလၢတ်ႈလႄႈဝႃႈ၊ “ၸဝ်ႈၽြႃးလၢတ်ႈဝႃႈ၊ ‘ၵဝ်ယိုၼ်းမိုဝ်းၵဝ်တင်းဝၼ်းပႂ်ႉႁပ်ႉၶဝ်ၸိူဝ်းဢၼ်ဢမ်ႇထွမ်ႇၵႂၢမ်းၵဝ်သေသၢၼ်ၶတ်းၵဝ်ၸိူဝ်းၼၼ်ႉဢေႃႈ၊’” ဝႃႈၼင်ႇၼႆဢေႃႈ။
ပိူဝ်ႈၼႆလႄႈၵဝ်ၶႂ်ႈထၢမ်ဝႃႈ၊ၸွင်ႇၽြႃးပဵၼ်ၸဝ်ႈပႄႇပႅတ်ႈၵူၼ်းမဵဝ်းမၼ်းၸဝ်ႈမဵဝ်း ဢိသရေး၊ ၼၼ်ႉႁိုဝ်း။ မၼ်းဢမ်ႇၸႂ်ႈၸိူဝ်ႉၼင်ႇၼၼ်။ တူဝ်ၵဝ်ၼႆႉပဵၼ်ၵူၼ်းမဵဝ်း ဢိသရေး၊ ဢၼ်ပဵၼ်ၸိူဝ်ႉၶိူဝ်းပူႇမွၼ်ႇႁဝ်း ဢႃႇပြႃႇႁၢမ်ႇ၊ ၵႃႈၼႂ်းၸိူဝ်ႉၶိူဝ်း ပိၼ်ႇယႃႇမိၼ်ႇ၊ ဢေႃႈ။-
ၽြႃးပဵၼ်ၸဝ်ႈဢမ်ႇပႄႇပႅတ်ႈၵူၼ်းမဵဝ်းဢၼ်မၼ်းၸဝ်ႈလိူၵ်ႈၵဵပ်းဢဝ်ဝႆႉၸဵမ်မိူဝ်ႈဢွၼ်တၢင်းၼၼ်ႉ။ သူဢမ်ႇႁုၼႂ်းၵျၢမ်းလိၵ်ႈၶေႃႈဢၼ်လၢတ်ႈလွင်ႈသြႃႇ ဢေးလိယႃႉ၊ တွင်းပၢၼ်ႇၽြႃးပဵၼ်ၸဝ်ႈလႄႈတၢင်ႇဢပျတ်ႈၵူၼ်းမဵဝ်း ဢိသရေး၊ ၼၼ်ႉႁိုဝ်း။-
မၼ်းဝႃႈ၊ “ဢူဝ်းၽြႃးတီႈၶႃႈ။ ၶဝ်ဢဝ်ပရေႃးၽႅတ်ႈ ၸဝ်ႈႁဝ်းတင်းလၢႆတၢႆယဝ်ႉလႄႈယႃႉၽဵဝ်ႈၶဵင်ႇတၢင်းလူႇၸဝ်ႈႁဝ်းတင်းလၢႆပႅတ်ႈယဝ်ႉၶႃႈဢေႃႈ။ ၵိုတ်းၵျၢၼ်ႇၵဝ်ၶႃႈၵေႃႉလဵဝ်ၵူၺ်းယဝ်ႉလႄႈၶဝ်ယင်းၵျၢမ်ႇႁႃဢဝ်ၵဝ်ၶႃႈတၢႆယူႇၶႃႈဢေႃႈ၊” ဝႃႈၼင်ႇၼႆလႄႈ၊-
ၽြႃးပဵၼ်ၸဝ်ႈၶိုၼ်းတွပ်ႇလၢတ်ႈမၼ်းၸိူဝ်ႉႁိုဝ်ဝႃႈၼႆၸမ်ႉ၊ “ၵဝ်ဢဝ်ၵူၼ်းၸဵတ်းႁဵင်ဢၼ်ဢမ်ႇၶုပ်ႉၶဝ်ႇဝႆႈၽြႃး ပႃႇလႃႉ၊ ၼၼ်ႉၵိုတ်းၵျၢၼ်ႇဝႆႉပုၼ်ႈၵဝ်ယူႇယဝ်ႉ၊” ဝႃႈၼင်ႇၼႆဢေႃႈ။-
မိူၼ်ၼင်ႇၼၼ် ယၢမ်းမိူဝ်ႈလဵဝ်ၵေႃႈ ၶဝ်ၸိူဝ်းဢၼ်ၽြႃးပဵၼ်ၸဝ်ႈဢဝ်တင်းၵျေးၸူးၸဝ်ႈတၢင်းဢၼ်ဢဵတ်းလူလိူၵ်ႈၵဵပ်းဢဝ်ဝႆႉၼၼ်ႉၸိူဝ်းဢၼ်ၵိုတ်းၵျၢၼ်ႇဝႆႉယင်းမီးယူႇဢေႃႈ။-
ပေႃးမၼ်းပဵၼ်ၵွပ်ႈပိူဝ်ႈၵျေးၸူးၸဝ်ႈၸိုင်၊မၼ်းဢမ်ႇၸႂ်ႈၵွပ်ႈပိူဝ်ႈတၢင်းၵမ်တၢင်းၵျၢင်ႉၶဝ်။ သင်ဝႃႈတၢင်းဢၼ်လိူၵ်ႈၵဵပ်းဢဝ်ၼၼ်ႉပဵၼ်ၵွပ်ႈပိူဝ်ႈတၢင်းၵမ်တၢင်းၵျၢင်ႉၸိုင်၊ၵျေးၸူးၸဝ်ႈၼၼ်ႉဢမ်ႇပဵၼ်ၵျေးၸူးၸဝ်ႈၸႅတ်ႈၸႅတ်ႈယဝ်ႉဢေႃႈ။
ပေႃးပဵၼ်ၸိူဝ်ႉၼင်ႇၼႆၸိုင်၊ႁဝ်းတေဝႃႈၸိူဝ်ႉႁိုဝ်။ ၵူၼ်းမဵဝ်း ဢိသရေး၊ ဢမ်ႇထူပ်းၺႃးလွင်ႈတၢင်းဢၼ်ၶဝ်သွၵ်ႈႁႃၼၼ်ႉလႄႈၵူၼ်းၸိူဝ်းဢၼ်ၽြႃးပဵၼ်ၸဝ်ႈလိူၵ်ႈၵဵပ်းဢဝ်ဝႆႉၼၼ်ႉၵူၺ်းလႆႈထူပ်းၺႃးဢေႃႈ။ တၢင်ႇၵေႃႉတၢင်ႇၵူၼ်းၸိူဝ်းၼၼ်ႉၸမ်ႉ၊ၸႂ်တိုမ်ၸႂ်တၼ်ဢမ်ႇငိၼ်းတၢင်းဢၼ်ၽြႃးပဵၼ်ၸဝ်ႈႁွင်ႉဢဝ်ၼၼ်ႉ။-
မၼ်းမႅၼ်ႈၸွမ်းၼင်ႇၼႂ်းၵျၢမ်းလိၵ်ႈတႅမ်ႈဝႆႉဝႃႈ၊ “ၽြႃးပဵၼ်ၸဝ်ႈႁဵတ်းႁႂ်ႈမၢၵ်ႇတႃႁူဝ်ၸႂ်ၶဝ်ၼူၵ်ႇတၼ်လႄႈ၊ႁၢၼ်ႉတေႃႇဝၼ်းမိူဝ်ႈၼႆႉမၢၵ်ႇတႃၶဝ်ဢမ်ႇၸၢင်ႈႁၼ်၊ႁူၶဝ်ဢမ်ႇၸၢင်ႈငိၼ်း၊” ဝႃႈၼင်ႇၼႆၼၼ်ႉဢေႃႈ။-
ၶုၼ်ႁေႃၶမ်း တႃႇဝိတ်ႈ၊ သမ်ႉလၢတ်ႈလႄႈဝႃႈ၊ “ႁႂ်ႈတၢင်းဢၼ်ၶဝ်ၵိၼ်မူၼ်ႈၵိၼ်ပျေႃႇၼႂ်းပွႆးၼၼ်ႉ ပဵၼ်တူင်ႇႁႅဝ်ႉတူင်ႇၶိုမ်းတီႈၶဝ်၊ပဵၼ်ၶတ်းႁၢဝ်ႇပုၼ်ႈၶဝ်သေၵမ်းလူၺ်ႈ။ ႁႂ်ႈၶဝ်လႆႈလူမ်ႉပင်းလႄႈ လႆႈၶၢမ်ႇတၢမ်ႇဢပျတ်ႈၶဝ်သေၵမ်းလူၺ်ႈ။-
ႁႂ်ႈမၢၵ်ႇတႃၶဝ်မွတ်ႇၵႂႃႇထၢၼ်ႈပေႃးဢမ်ႇႁၼ်လႆႈလႄႈ၊ ႁႂ်ႈလင်ၶဝ်ၵွမ်းလူၺ်ႈတုၵ်ႉၶႃႉတႃႇသေႇသေၵမ်းလူၺ်ႈ၊” ဝႃႈၼင်ႇၼႆဢေႃႈ။
ပေႃးပဵၼ်ၸိူဝ်ႉၼင်ႇၼႆၸိုင်၊ၵဝ်ၶႂ်ႈထၢမ်ဝႃႈ၊မိူဝ်ႈဢၼ်ၵူၼ်းမဵဝ်း ၵျူး၊ ၶဝ်ၶီႈလိုတ်းၼၼ်ႉၸွင်ႇၶဝ်လူမ်ႉတူၵ်းလုလႅဝ်ၵႂႃႇႁိုဝ်း။ မၼ်းဢမ်ႇပဵၼ်ၸိူဝ်ႉၼင်ႇၼၼ်။ ၵွပ်ႈပိူဝ်ႈၶဝ်ႁဵတ်းဢပျတ်ႈလႄႈတြႃးတၢင်းဢၼ်ၵႄႇၶျွတ်ႈဢဝ်လႆႈႁွတ်ႈထိုင်ၵႃႈတီႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်း၊ၼင်ႇႁိုဝ်ၵူၼ်းမဵဝ်း ဢိသရေး၊ တၵ်းၶွႆၶဝ်ဢေႃႈ။-
ပေႃးဝႃႈဢပျတ်ႈၵူၼ်းမဵဝ်း ဢိသရေး၊ ၶဝ်ပွင်ဢၵျူဝ်းတၢင်းလီမၢင်ႇၵလႃႇလိူင်ႇၼမ်ၼႃႇပုၼ်ႈၵူၼ်းလေႃးၵီႇလႄႈတၢင်းဢၼ်တူၵ်းသုမ်းၶဝ်ပွင်ဢၵျူဝ်းတၢင်းလီမၢင်ႇၵလႃႇလိူင်ႇၼမ်ၼႃႇပုၼ်ႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၸိုင်၊မၼ်းတေယဵင်ႈၶႅၼ်းမီးဢၵျူဝ်းတၢင်းလီမၢင်ႇၵလႃႇထၼ်ႇႁိုဝ်။ ၽိူဝ်ႇထိုင်ၵူၼ်းမဵဝ်း ဢိသရေး၊ တင်းလၢႆၵေႃႈၶဝ်ႈပႃးၼႂ်းၶဝ်ၸိူဝ်းဢၼ်ၽြႃးပဵၼ်ၸဝ်ႈၵႄႇၶျွတ်ႈဢဝ်ၼၼ်ႉဢေႃႈ။
ၵမ်းၼႆႉၵဝ်ၶႂ်ႈဢုပ်ႇသူဢၼ်ပဵၼ်ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၼၼ်ႉဢေႃႈ။ ၵွပ်ႈပိူဝ်ႈၵဝ်ပဵၼ်တမၢၼ်ႇၸဝ်ႈဢၼ်ႁေႃးလၢတ်ႈၶၢဝ်ႇတြႃးသိူဝ်းပျေႃႇၵႃႈတီႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၼၼ်ႉလႄႈၵဝ်ဢဝ်ၵုင်ႇဢဝ်မုၼ်လူၺ်ႈဢရႃႇၵဝ်ဢေႃႈ။-
ၵဝ်ၶႂ်ႈႁဵတ်းၸိူဝ်ႉၼင်ႇၼႆႁႂ်ႈၵူၼ်းမဵဝ်းၵဝ်ၶွႆၼင်ႇႁိုဝ်ၶဝ်ၵမ်ႈၽွင်ႈ တၵ်းလႆႈၶၢမ်ႇတၢင်းဢၼ်ၸဝ်ႈၽြႃးၵႄႇၶျွတ်ႈဢဝ်ၶဝ်ဢေႃႈ။-
လွင်ႈမၼ်းၸမ်ႉ၊ၼႂ်းမိူဝ်ႈဢၼ်ၸဝ်ႈၽြႃးမၢင်ပႅတ်ႈၵူၼ်းမဵဝ်း ဢိသရေး၊ ၼၼ်ႉ ၵူၼ်းလေႃးၵီႇလႆႈၶိုၼ်းလီၵၼ်တင်းၸဝ်ႈၽြႃးဢေႃႈ။ ပိူဝ်ႈၼႆလႄႈပေႃးၸဝ်ႈၽြႃးႁပ်ႉဢဝ်ၵူၼ်း ဢိသရေး၊ ၶဝ်ၸိုင်၊မၼ်းတၵ်းပဵၼ်ၸိူဝ်ႉၼင်ႇႁိုဝ်၊မၼ်းတေမိူၼ်ၸိူဝ်ႉၼင်ႇၵူၼ်းတၢႆလႆႈၶိုၼ်းလိပ်းမီးဢသၢၵ်ႈမႃးဢေႃႈ။
ပေႃးဢဝ်ၶဝ်ႈမုၼ်းဢၼ်ဝိတ်းဢွၼ်တၢင်းပိူၼ်ႈၼၼ်ႉလႆႈသၢၵ်ႈၵၢပ်ႈၽြႃးပဵၼ်ၸဝ်ႈၸိုင်၊ၶဝ်ႈမုၼ်းတင်းႁူၺ်ႇၵေႃႈပဵၼ်ၶွင်မၼ်းၸဝ်ႈဢေႃႈ။ မိူၼ်ၸိူဝ်ႉၼင်ႇၼၼ်ပေႃးဢဝ်ႁၢၵ်ႈမႆႉသၢၵ်ႈလူႇၽြႃးပဵၼ်ၸဝ်ႈၸိုင်၊ၵိင်ႇမၼ်းၵေႃႈပဵၼ်ၶွင်မၼ်းၸဝ်ႈဢေႃႈ။-
ၵိင်ႇတူၼ်ႈသၢၼ်ႇလုၼ်ႇဢၼ်လုမ်းလႃးဝႆႉလီလီၵမ်ႈၽွင်ႈၼၼ်ႉၸဝ်ႈမၼ်းတႅပ်းသေယဝ်ႉ၊သမ်ႉဢဝ်ၵိင်ႇတူၼ်ႈသၢၼ်ႇလုၼ်ႇထိူၼ်ႇမႃးၵပ်းသႂ်ႇၵႃႈတီႈတေႃမႆႉၵဝ်ႇၼၼ်ႉဢေႃႈ။ သူၸိူဝ်းဢၼ်ပဵၼ်ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၼႆႉပဵၼ်ၸိူဝ်ႉၼင်ႇၵိင်ႇတူၼ်ႈသၢၼ်ႇလုၼ်ႇထိူၼ်ႇၼၼ်ႉလႄႈတေႃႈလဵဝ်ၼႆႉသူလႆႈၶၢမ်ႇဢဝ်ဢၵျူဝ်းၽၢႆႇၸႂ်ဝိၺိၺ်ႇႁူမ်ႈၵၼ်တင်းၵူၼ်းမဵဝ်း ဢိသရေး၊ ၶဝ်ယဝ်ႉဢေႃႈ။-
ၵွပ်ႈပိူဝ်ႈဢၼ်ပဵၼ်ၸိူဝ်ႉၼင်ႇၼႆလႄႈသူယႃႇပေသႄႉသွမ်းၶဝ်ၸိူဝ်းဢၼ်ၽြႃးပဵၼ်ၸဝ်ႈတႅပ်းၶဝ်မိူၼ်ၸိူဝ်ႉၼင်ႇၵိင်ႇဢၼ်ႁၵ်းၵႂႃႇၼၼ်ႉ။ သူတိုၼ်းဢမ်ႇမီးဢၶႂၢင်ႉဢၼ်တၵ်းလႆႈဢုပ်ႇဝၢဝ်းတေႃႇၵိင်ႇဢၼ်ၶၢတ်ႇၵႂႃႇၼၼ်ႉလႃးလႃး။ သူပဵၼ်ၵိင်ႇမႆႉၵူၺ်းဢေႃႈ။ ၵိင်ႇမၼ်းဢမ်ႇလဵင်ႉငဝ်ႈႁၢၵ်ႈတူၼ်ႈ။ ငဝ်ႈႁၢၵ်ႈတူၼ်ႈလဵင်ႉၵိင်ႇမၼ်းဢေႃႈ။
သူၸၢင်ႈၶႄးတၵ်းလၢတ်ႈဝႃႈ၊ “ၵိင်ႇၸိူဝ်းၼၼ်ႉၸဝ်ႈမၼ်းတႅပ်းႁႂ်ႈမီးတေႃပုၼ်ႈၵဝ်တၵ်းၵပ်းသႂ်ႇဢေႃႈ၊” ဝႃႈၼင်ႇၼႆဢေႃႈ။-
ၸႂ်ႈယူႇတႄႉဢေႃႈ။ ၶဝ်လႆႈၶၢမ်ႇတႅပ်းပႅတ်ႈၵွပ်ႈပိူဝ်ႈၶဝ်ဢမ်ႇယုမ်ႇမၢတ်ႈဢေႃႈ။ သူၸမ်ႉ၊လႆႈၵပ်းသႂ်ႇၵွပ်ႈပိူဝ်ႈတၢင်းယုမ်ႇမၢတ်ႈဢေႃႈ။ ယႃႇပေထၢင်ႇယႂ်ႇတူဝ်ၸဝ်ႈၵဝ်ႇ။ ႁႂ်ႈမီးၸႂ်ဢၼ်ၵူဝ်ယမ်ၸဝ်ႈၽြႃးတႃႉ။-
ပေႃးၽြႃးပဵၼ်ၸဝ်ႈယင်းဢမ်ႇသေလၢႆၵူၼ်းမဵဝ်း ဢိသရေး၊ ၶဝ်ဢၼ်ဝႃႈၵိင်ႇၵဝ်ႇဢၼ်မၼ်းၸဝ်ႈတႅပ်းၼၼ်ႉၸိုင်၊သူထၢင်ႇမၼ်းၸဝ်ႈတၵ်းသေလၢႆသူႁိုဝ်း။-
ၽြႃးပဵၼ်ၸဝ်ႈမီးၸႂ်ၵရုၼႃႇဢဵတ်းလူထၼ်ႇႁိုဝ်ဢိၵ်ႇတင်းမၼ်းၸဝ်ႈၸၢင်ႈၸီႇယၢင်ႇပၼ်တၢမ်ႇႁႅင်းၵႃႈႁိုဝ်ဢၼ်ဝႃႈၼၼ်ႉ၊တွင်းဝႆႉလီလီတႃႉ။ မၼ်းၸဝ်ႈပၼ်တၢမ်ႇႁႅင်းၼႃႇတီႈၶဝ်ၸိူဝ်းဢၼ်လူမ်ႉပင်းၼၼ်ႉသေၵေႃႈ မၼ်းၸဝ်ႈမီးၸႂ်ၵရုၼႃႇၼိူဝ်သူ၊ပေႃးသူတႄႇယူႇၼႂ်းၵရုၼႃႇမၼ်းၸဝ်ႈၼၼ်ႉဢေႃႈ။ ၵူၺ်းၵႃႈ၊ပေႃးသူယင်းဢမ်ႇတႄႇယူႇၼႂ်းၵရုၼႃႇၼၼ်ႉၸိုင်၊သူၵေႃႈ တၵ်းလႆႈၶၢမ်ႇတၢင်းဢၼ်မၼ်းၸဝ်ႈတႅပ်းပႅတ်ႈဢေႃႈ။-
ၵူၼ်းမဵဝ်း ဢိသရေး၊ ၶဝ်ၵေႃႈပေႃးၶဝ်ဢဝ်ပႅတ်ႈၸႂ်ဢၼ်ဢမ်ႇယုမ်ႇမၢတ်ႈၸိုင်၊မၼ်းၸဝ်ႈတၵ်းဢဝ်ၶဝ်ၶိုၼ်းၵပ်းသိုပ်ႇတီႈတူၼ်ႈမၼ်း၊ၵွပ်ႈပိူဝ်ႈၽြႃးပဵၼ်ၸဝ်ႈမီးဢႃႇၼႃႇဢၼ်ဢဝ်ၶဝ်ၵပ်းသိုပ်ႇၶိုၼ်းၼၼ်ႉဢေႃႈ။-
ပေႃးမၼ်းၸဝ်ႈၸၢင်ႈဢဝ်သူၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၸိူဝ်းဢၼ်ပဵၼ်ၵိင်ႇတူၼ်ႈသၢၼ်ႇလုၼ်ႇထိူၼ်ႇဢၼ်ၶၢတ်ႇၵႂႃႇၼၼ်ႉလႄႈပိၵ်ႉသမ်ႉမၼ်းဢမ်ႇၸႂ်ႈမဵဝ်းမၼ်းသေၵေႃႈယင်းဢဝ်ၵပ်းသိုပ်ႇတီႈတူၼ်ႈသၢၼ်ႇလုၼ်ႇဢၼ်လီလႆႈၸိုင်၊မၼ်းၸဝ်ႈယဵင်ႈၶႅၼ်းၸၢင်ႈဢဝ်ၵူၼ်းမဵဝ်း ဢိသရေး၊ ဢၼ်ပဵၼ်ၵိင်ႇမႆႉၵဝ်ႇဢၼ်တႅပ်းပႅတ်ႈသေၵႃႈတီႈတူၼ်ႈသၢၼ်ႇလုၼ်ႇဢၼ်လီလႄႈၵပ်းသိုပ်ႇၶိုၼ်းၵႃႈတီႈတူၼ်ႈၵဝ်ႇၵဝ်ႇၶဝ်ၼၼ်ႉဢေႃႈ။
ပီႈၼွင်ႉၶဝ်႟။ ၼင်ႇႁိုဝ်သူတၵ်းဢမ်ႇထၢင်ႇယႂ်ႇတူဝ်ၸဝ်ႈၵဝ်ႇၸိုင်၊ၵဝ်ၶႂ်ႈႁႂ်ႈသူႁုတြႃးဢၼ်လိုၵ်ႉဢၼ်လမ်ႇပိူင်ၼိုင်ႈဢၼ်ဝႃႈ၊တၢင်းဢၼ်ၵူၼ်းမဵဝ်း ဢိသရေး၊ ၶဝ်ႁူဝ်ၸႂ်ၼူၵ်ႇတၼ်ၼၼ်ႉတၵ်းတိုၼ်းပဵၼ်ယူႇတႃႇသေႇဢမ်ႇၸႂ်ႈ။ ၵူၺ်းတၵ်းပဵၼ်ၵႂႃႇတေႃႇထိုင်ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၶဝ်ၶဝ်ႈမႃးၸေးမူတ်းမူတ်းယဝ်ႉၼၼ်ႉဢေႃႈ။-
ၼင်ႇၼၼ်လႄႈၵူၼ်းမဵဝ်း ဢိသရေး၊ တင်းလူင်တၵ်းလႆႈၶၢမ်ႇၵႄႇၶျွတ်ႈဢဝ်ၸွမ်းၼင်ႇဢၼ်တႅမ်ႈဝႆႉၼႂ်းၵျၢမ်းလိၵ်ႈလႄႈဝႃႈ၊ “ၸဝ်ႈၵႄႇၶျွတ်ႈတၵ်းလုၵ်ႉသေၵႃႈတီႈလွႆ ၸိဢုၼ်ႇ၊ မႃးလႄႈပႄႇၽဵဝ်ႈပႅတ်ႈ၊ ႁူဝ်ၸႂ်ဢၼ်ႁၢႆႉမိူၵ်ႈသေၵႃႈတီႈၸိူဝ်ႉၶိူဝ်း ယႃႇၵုပ်ႈ၊ ဢေႃႈ။-
ၸဝ်ႈၽြႃးသမ်ႉမီးဢမိင်ႉဝႃႈ၊ ‘မိူဝ်ႈဢၼ်ၵဝ်ဢဝ်ပႅတ်ႈဢပျတ်ႈၶဝ်ၼၼ်ႉၸိုင်၊ ၵဝ်တၵ်းပၼ်ပတိၺိၺ်ႇတြႃးၼႆႉတီႈၶဝ်ဢေႃႈ၊’ ” ဝႃႈၼင်ႇၼႆၼၼ်ႉဢေႃႈ။
ၵွပ်ႈပိူဝ်ႈၶဝ်ပႄႇပႅတ်ႈၶၢဝ်ႇတြႃးသိူဝ်းပျေႃႇၸဝ်ႈၼၼ်ႉလႄႈၵူၼ်းမဵဝ်း ဢိသရေး၊ ၶဝ်ပဵၼ်ရၢၼ်ႇသူႇၽြႃးပဵၼ်ၸဝ်ႈသေလႄႈလႆႈပဵၼ်ဢၵျူဝ်းပုၼ်ႈသူၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းတင်းလၢႆဢေႃႈ။ ၼင်ႇၼၼ်လႄႈၵွပ်ႈပိူဝ်ႈၽြႃးပဵၼ်ၸဝ်ႈ လိူၵ်ႈၵဵပ်းဢဝ်ၶဝ်ၼၼ်ႉလႄႈၶဝ်လႆႈပဵၼ်လုၵ်ႈႁၵ်ႉမၼ်းၸဝ်ႈၸွမ်းၼင်ႇၵတိမၼ်းၸဝ်ႈဝႆႉတီႈပူႇမွၼ်ႇၶဝ်တင်းလၢႆၼၼ်ႉဢေႃႈ။-
ပဵၼ်ၵွပ်ႈၸိူဝ်ႉႁိုဝ်ဝႃႈၼႆၸမ်ႉ၊မၼ်းၸဝ်ႈဢမ်ႇမီးၸႂ်ဢၼ်ၶိုၼ်းၽွၵ်ႈပျၢၼ်ႇၵႃႈၼိူဝ်ၵျေးၸူးဢၼ်မၼ်းၸဝ်ႈလိူၵ်ႈၵဵပ်းႁွင်ႉဢဝ်ဝႆႉ ဢိၵ်ႇတင်းၵႃႈၼိူဝ်တၢင်းဢၼ်မၼ်းၸဝ်ႈပၼ်မၢင်ႇၵလႃႇတၢင်းလီၼၼ်ႉဢေႃႈ။-
သူၸိူဝ်းဢၼ်ပဵၼ်ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၼႆႉပိၵ်ႉသမ်ႉမိူဝ်ႈဢွၼ်တၢင်းၼၼ်ႉသူဢမ်ႇထွမ်ႇၵႂၢမ်းၽြႃးပဵၼ်ၸဝ်ႈသေၵေႃႈ တေႃႈလဵဝ်ၼႆႉသူလႆႈၶၢမ်ႇဢဝ်ၵျေးၸူးၵရုၼႃႇၸဝ်ႈၵွပ်ႈပိူဝ်ႈၵူၼ်းမဵဝ်း ဢိသရေး၊ ၶဝ်ဢမ်ႇထွမ်ႇၵႂၢမ်းမၼ်းၸဝ်ႈၼၼ်ႉယဝ်ႉ။-
မိူၼ်ၼင်ႇၼၼ် ၵူၼ်းမဵဝ်း ဢိသရေး၊ ၶဝ်ဢမ်ႇထွမ်ႇၵႂၢမ်းတေႃႈလဵဝ်ၼႆႉသေၵေႃႈၵွပ်ႈပိူဝ်ႈသူလႆႈၶၢမ်ႇဢဝ်ၵျေးၸူးၵရုၼႃႇၸဝ်ႈယဝ်ႉလႄႈၶဝ်ၵေႃႈတၵ်းလႆႈၶၢမ်ႇဢဝ်ၵျေးၸူးၵရုၼႃႇၸဝ်ႈယဝ်ႉဢေႃႈ။-
လွင်ႈမၼ်းၸမ်ႉ၊ၼင်ႇႁိုဝ်ၽြႃးပဵၼ်ၸဝ်ႈတၵ်းလႆႈၼႄပျႃးၵျေးၸူးၵရုၼႃႇမၼ်းၸဝ်ႈၵႃႈတီႈၵူၼ်းတင်းလၢႆၸိုင်၊မၼ်းၸဝ်ႈပွႆႇႁႂ်ႈၵူၼ်းတင်းလၢႆ ႁဵတ်းၸွမ်းဢလူဝ်ႇၵၢင်ၸႂ်ၶဝ်ဢၼ်ဢမ်ႇၶႂ်ႈထွမ်ႇဢဝ်ၵႂၢမ်းၽြႃးပဵၼ်ၸဝ်ႈၼၼ်ႉဢေႃႈ။
မုၼ်ၸေးၸိမ်ႇၽြႃးပဵၼ်ၸဝ်ႈယႂ်ႇၼႃႇဢေႃႈ။ ၺၢၼ်ႇပိင်ႇၺႃႇမၼ်းၸဝ်ႈလိုၵ်ႉလမ်ႇၼႃႇလူင်လၢင်ဢေႃႈ။ ၽူႈလႂ်တၵ်းၶိုတ်းထိုင်တၢင်းဢၼ်မၼ်းၸဝ်ႈၸီႇယၢင်ႇတႅပ်းတတ်းတြႃးၼၼ်ႉလႆႈ။ ၽူႈလႂ်တၵ်းႁုသဵၼ်ႈတၢင်းမၼ်းၸဝ်ႈလႆႈ။
မၼ်းပဵၼ်ၸွမ်းၼင်ႇၵျၢမ်းလိၵ်ႈတႅမ်ႈဝႆႉလႄႈဝႃႈ၊ “ၽူႈလႂ်ႁုၸႂ်သၽေႃးၸဝ်ႈၽြႃး။ ၽူႈလႂ်ၸၢင်ႈတိူင်ႇပၢင်ႇပၼ်ဢၵျၢမ်ႇမၼ်းၸဝ်ႈလႆႈ။
ၽူႈလႂ်ယၢမ်ႈပၼ်သေၸိူဝ်ႉသေပိူင်တီႈမၼ်းၸဝ်ႈ၊ ႁႂ်ႈမၼ်းၸဝ်ႈပေႃးလႆႈၶိုၼ်းတႅၼ်းပၼ်ၼၼ်ႉ၊” ဝႃႈၼင်ႇၼႆၼၼ်ႉဢေႃႈ။
လွင်ႈမၼ်းၸမ်ႉ၊ၶိူင်ႈပိူင်ၵႃႈမီးၵူႈၸိူဝ်ႉၵူႈပိူင်ပဵၼ်မႃးသေၵႃႈတီႈမၼ်းၸဝ်ႈ၊ပဵၼ်ယူႇၵွပ်ႈပိူဝ်ႈမၼ်းၸဝ်ႈ၊ပုၼ်ႈတႃႇမၼ်းၸဝ်ႈဢေႃႈ။ ႁႂ်ႈမၼ်းၸဝ်ႈမီးမုၼ်ၽုင်းယူႇတႃႇသေႇဢမ်ႇထၢတ်ႇသေၵမ်းလူၺ်ႈ။ ဢႃမိၼ်ႈ။
ပိူဝ်ႈၼႆလႄႈ ပီႈၼွင်ႉၶဝ်႟။ ၵွပ်ႈပိူဝ်ႈၵျေးၸူးၵရုၼႃႇၽြႃးပဵၼ်ၸဝ်ႈယႂ်ႇၼႃႇပုၼ်ႈႁဝ်းလႄႈၵဝ်တိုၵ်းယူင်းတွင်းပၢၼ်ႇသူလႄႈဝႃႈၸမ်ႉ၊ဢဝ်တူဝ်သူသၢၵ်ႈလူႇတီႈၽြႃးပဵၼ်ၸဝ်ႈႁႂ်ႈလႆႈပဵၼ်ၶိူင်ႈတၢင်းလူႇဢၼ်ဢသၢၵ်ႈလိပ်းယူႇ၊မူတ်းၸၢင်ႇလႄႈထုၵ်ႇၸႂ်ၽြႃးပဵၼ်ၸဝ်ႈတႃႉ။ ၼႆႉၸမ်ႉ၊ပဵၼ်တၢင်းဢၼ်ၵူဝ်းၵႂၢႆႇၸႅတ်ႈၸႅတ်ႈဢၼ်သူထုၵ်ႇလီႁဵတ်းၼၼ်ႉဢေႃႈ။-
ယႃႇပေႁဵတ်းၸွမ်းၸိူဝ်ႉၼင်ႇၵူၼ်းလေႃးၵီႇၶဝ်သေၵမ်း။ ယဵင်ႈၶႅၼ်းၶၢမ်ႇဢဝ်တၢင်းဢၼ်ၽြႃးပဵၼ်ၸဝ်ႈၶိုၼ်းမႄးပၼ်တၢင်းၶႆႈၸႂ်သူပဵၼ်ဢၼ်မႂ်ႇမႃးလႄႈပုတ်ႈလၢႆႈဢၵျၢင်ႉၵဝ်သူၼၼ်ႉတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊သူတၵ်းလႆႈႁုလူဝ်ႇၽြႃးပဵၼ်ၸဝ်ႈဢၼ်မျၢတ်ႈလီ၊တၢင်းဢၼ်ထုၵ်ႇၸႂ်မၼ်းၸဝ်ႈဢိၵ်ႇတင်းတၢင်းဢၼ်ပျေႉၸုမ်ႇၼၼ်ႉဢေႃႈ။
ၵွပ်ႈပိူဝ်ႈၽြႃးပဵၼ်ၸဝ်ႈႁဵတ်းၵျေးၸူးပၼ်ၵဝ်ၼမ်ၼႃႇၼၼ်ႉလႄႈၵဝ်သင်ႇလၢတ်ႈသူတင်းသဵင်ႈတင်းလူင်လႄႈဝႃႈၸမ်ႉ၊ယႃႇပေထၢင်ႇယႂ်ႇတူဝ်ၸဝ်ႈၵဝ်ႇလိူဝ်တွၼ်းသေဢၼ်သူထုၵ်ႇလီထၢင်ႇၼၼ်ႉသေၵမ်း။ ၶႅၼ်းတေႃႈၶႆႈၸႂ်ဝူၼ်ႉတူၺ်းတူဝ်ၸဝ်ႈၵဝ်ႇၸွမ်းၼင်ႇတၢင်းယုမ်ႇမၢတ်ႈၽႂ်တၢင်းယုမ်ႇမၢတ်ႈမၼ်းဢၼ်ၽြႃးပဵၼ်ၸဝ်ႈပၼ်ဝႆႉၼၼ်ႉၵူၺ်းတႃႉ။-
ႁဝ်းမီးတူဝ်ၶၼ်ႇထႃႇဢၼ်မီးဢၢင်ႇၵႃႇလၢႆမဵဝ်းၼၼ်ႉလႄႈ ဢၢင်ႇၵႃႇမဵဝ်းလႂ်မဵဝ်းၼၼ်ႉမီးဢၵျူဝ်းႁင်းၽႂ်ႁင်းမၼ်းဢေႃႈ။-
မိူၼ်ၼင်ႇၼၼ်ပိၵ်ႉသမ်ႉႁဝ်းမီးၵူၼ်းလၢႆၵေႃႉသေၵေႃႈႁဝ်းလႆႈပဵၼ်ၸိူဝ်ႉၼင်ႇတူဝ်ၶၼ်ႇထႃႇဢၼ်လဵဝ်ၵၼ်ၼႂ်း ၸဝ်ႈၶရိၸ်ႈ၊ ပႃးလဵဝ်ၵူၺ်းသေလႄႈႁဝ်းၵပ်းသိုပ်ႇၵၼ်ဝႆႉၸိူဝ်ႉၼင်ႇဢၢင်ႇၵႃႇၼင်ႇၵၼ်ၼႂ်းတူဝ်ၶၼ်ႇထႃႇဢၼ်လဵဝ်ၼၼ်ႉဢေႃႈ။-
ပိူဝ်ႈၼႆလႄႈႁဝ်းလူဝ်ႇၸႂ်ႉလူဝ်ႇသုင်းသုၵျေးၸူးၸဝ်ႈဢၼ်ပႅၵ်ႇပိူင်ႈၵၼ်ႁင်းၽႂ်ႁင်းၽႂ်မၼ်းၸွမ်းၼင်ႇၵျေးၸူးဢၼ်မၼ်းၸဝ်ႈပၼ်ဝႆႉတီႈႁဝ်းၼၼ်ႉဢေႃႈ။ ပေႃးပဵၼ်ပုၼ်ႈဢၼ်တၵ်းႁေႃးလၢတ်ႈတြႃးမၼ်းၸဝ်ႈၸိုင်၊ႁဝ်းတၵ်းလႆႈႁေႃးၸွမ်းၼင်ႇဢၼ်ႁဝ်းမီးတၢင်းယုမ်ႇမၢတ်ႈၼၼ်ႉဢေႃႈ။-
ပေႃးပဵၼ်ပုၼ်ႈဢၼ်တၵ်းပွင်ၵၢၼ်ၽြႃးၸိုင်၊ႁဝ်းတၵ်းလႆႈပွင်ၵၢၼ်ၽြႃးဢေႃႈ။ ပေႃးပဵၼ်ပုၼ်ႈဢၼ်တၵ်းသင်ႇသွၼ်ပၼ်ၸိုင်၊သင်ႇသွၼ်ပၼ်တႃႉႁဝ်း။-
ပေႃးပဵၼ်ပုၼ်ႈတၵ်းပၼ်ဢဵၼ်ပၼ်ႁႅင်းၸိုင်၊ႁဵတ်းၸွမ်းတႃႉ။ ပေႃးပဵၼ်ပုၼ်ႈတၵ်းၽေးၸွၼ်းၸိုင်၊ပႃးၸႂ်ၸေႇတၼႃႇပၼ်တႃႉ။ ပေႃးပဵၼ်ပုၼ်ႈတၵ်းဢွၼ်ႁူဝ်ပိူၼ်ႈၸိုင်၊ၵႆႉမီးဝိရိယႃႉတႃႉ။ ပေႃးပဵၼ်ပုၼ်ႈတၵ်းဢဵတ်းလူၸွႆႈပိူၼ်ႈၸိုင်၊ဢွၼ်ၵၼ်မီးၸႂ်ၸူမ်းသိူဝ်းၸွႆႈတႃႉႁဝ်း။
ႁႂ်ႈၸႂ်မႅတ်ႈတႃႇတဵမ်ဝႆႉတင်းၸႂ်သိုဝ်ႈၸႂ်ယူဝ်းတႃႉ။ လီႁင်ႈလွင်ႈတၢင်းဢၼ်ႁၢႆႉမိူၵ်ႈလႄႈၵမ်ၵျၢင်ႉလွင်ႈတၢင်းဢၼ်လီဢၼ်ငၢမ်းတႃႉ။-
ၵေႃႉၼိုင်ႈလႄႈၵေႃႉၼိုင်ႈႁၵ်ႉပႅင်းၵၼ်မိူၼ်ၸိူဝ်ႉၼင်ႇပီႈၼွင်ႉၵၼ်ၼႂ်း ၸဝ်ႈၶရိၸ်ႈ၊ လႄႈၶဵင်ႇၵၼ်ပၼ်ၵုင်ႇသရေႇၵၼ်တႃႉ။-
ၵႆႉႁဵတ်းၵၢၼ်တႃႉ။ ယႃႇပေၶၢၼ်ႉပေဢိူၼ်။ ပႃးၸႂ်ပႃးၶေႃးႁဵတ်းၵၢၼ်ၸဝ်ႈၽြႃးတႃႉ။-
ႁႂ်ႈတၢင်းဢၼ်မုင်ႈမွင်းသူၼၼ်ႉႁဵတ်းႁႂ်ႈသူၸူမ်းသိူဝ်းလႄႈယိူၼ်ႉၶၢမ်ႇၽေးတုၵ်ႉၶႃႉလႆႈတႃႉ။ သူးတွင်းၵူႈၶိင်ႇၵူႈမိူဝ်ႈယူႇတႃႉ။-
ၽေးၸွၼ်းပၼ်ပီႈၼွင်ႉ ၶရိၸ်ႈယၢၼ်ႇ၊ ၼင်ႇၵၼ်ၸိူဝ်းဢၼ်ၸုတ်ႈဢၼ်လုတ်ႈတင်းလၢႆလႄႈႁႂ်ႈမေႃႁပ်ႉၶၢမ်ႇလဵင်ႉလူၶႅၵ်ႇတႃႉ။-
တီႈၶဝ်ၸိူဝ်းဢၼ်ၼိၵ်ႈၸၢၵ်ႈငႅၼ်းသႄးသူၼၼ်ႉသူးတွင်းႁႂ်ႈၽြႃးပဵၼ်ၸဝ်ႈပၼ်မၢင်ႇၵလႃႇတီႈၶဝ်တႃႉ။ သူးတွင်းႁႂ်ႈၽြႃးပဵၼ်ၸဝ်ႈၵိၼ်ႇလႃႇဢမ်ႇၸႂ်ႈလႄႈသူးတွင်းႁႂ်ႈပၼ်မၢင်ႇၵလႃႇတႃႉ။-
ၸွၼ်ၸူမ်းလူၺ်ႈၵၼ်တင်းၶဝ်ၸိူဝ်းဢၼ်ၸူမ်းသိူဝ်းလႄႈႁွင်ႉႁႆႈလူၺ်ႈၵၼ်တင်းၶဝ်ၸိူဝ်းဢၼ်ႁွင်ႉႁႆႈၼၼ်ႉတႃႉ။-
ၵေႃႉၼိုင်ႈလႄႈၵေႃႉၼိုင်ႈမီးၸႂ်သၽေႃးဢၼ်လဵဝ်ၵၼ်တႃႉ။ ယႃႇပေထၢင်ႇယႂ်ႇတူဝ်ၸဝ်ႈၵဝ်ႇလႄႈႁပ်ႉႁဵတ်းၵၢၼ်ဢၼ်ၶျႃးတႅမ်ႇၼၼ်ႉတႃႉ။ ယႃႇပေထၢင်ႇတူဝ်ၸဝ်ႈၵဝ်ႇပဵၼ်ၵူၼ်းမီးပိင်ႇၺႃႇ။
ပေႃးသေၵေႃႉသေၵူၼ်းႁဵတ်းႁၢႆႉမိူၵ်ႈတီႈသူၸိုင်၊ယႃႇပေဢဝ်လွင်ႈတၢင်းဢၼ်ႁၢႆႉမိူၵ်ႈၶိုၼ်းတွပ်ႇ။ ၵမ်ၵျၢင်ႉႁဵတ်းၸွမ်းမဵဝ်းဢၼ်ၵူၼ်းၵူႈၵေႃႉမၢတ်ႈပဵၼ်ဢၼ်လီဢၼ်ငၢမ်းၼၼ်ႉတႃႉ။-
ၵႃႈၼင်ႇဢၼ်ပဵၼ်လႆႈၼၼ်ႉပုၼ်ႈသူတၵ်းလႆႈႁဵတ်းၸိုင်၊ယူႇႁႂ်ႈထုၵ်ႇမေႃၵၼ်တင်းၵူၼ်းတင်းလၢႆတႃႉ။-
ၵေႃႉသႄႈၶဝ်႟။ ယႃႇပေၶိုၼ်းတွပ်ႇတၢင်းၽိတ်းပိူၼ်ႈ။ ႁႂ်ႈၽြႃးပဵၼ်ၸဝ်ႈၶိုၼ်းတွပ်ႇတႅၼ်းပၼ်တၢမ်ႇၶဝ်တႃႉ။ ၸွမ်းၼင်ႇဢၼ်ၼႂ်းၵျၢမ်းလိၵ်ႈတႅမ်ႈဝႆႉဝႃႈ၊ “ၸဝ်ႈၽြႃးမီးဢမိင်ႉၸမ်ႉ၊ ‘လွင်ႈဢၼ်ပၼ်တၢမ်ႇဢပျတ်ႈၼၼ်ႉပဵၼ်ၵၢၼ်ၵဝ်ၵူၺ်း။ ၵဝ်တၵ်းတွပ်ႇတႅၼ်းပၼ်ဢေႃႈ၊’ ဝႃႈၼင်ႇၼႆဢေႃႈ၊” ဝႃႈၼင်ႇၼႆတႅမ်ႈဝႆႉဢေႃႈ။-
ယင်းဢမ်ႇၶိုၼ်းတွပ်ႇဢမ်ႇၵႃး၊ႁဵတ်းၸွမ်းၵႂၢမ်းဢၼ်တႅမ်ႈဝႆႉထႅင်ႈဝႃႈ၊ “ပေႃးရၢၼ်ႇသူႇမႂ်းတွင်ႉမႆႈၸိုင်၊လဵင်ႉလူမၼ်းတႃႉ။ ပေႃးမၼ်းတွင်ႉမႆႈၼမ်ႉၸိုင်၊ပၼ်ၼမ်ႉၵိၼ်တီႈမၼ်းတႃႉ။ ပေႃးမႂ်းႁဵတ်းၸိူဝ်ႉၼင်ႇၼႆၸိုင်၊မိူၼ်ၼင်ႇမႂ်းၵွင်ထၢၼ်ႇၽႆးလႅင်ယူႇၼိူဝ်ႁူဝ်မၼ်းဢေႃႈ၊” ဝႃႈၼင်ႇၼႆၼၼ်ႉတႃႉ။-
ယႃႇပေႁႂ်ႈတၢင်းဢၼ်ႁၢႆႉမိူၵ်ႈပႄႉၼႅင်ႇသူ။ ဢဝ်တၢင်းဢၼ်လီဢၼ်ငၢမ်းပႄႉၼႅင်ႇဢၼ်ႁၢႆႉဢၼ်မိူၵ်ႈတႃႉ။
ႁႂ်ႈၵူၼ်းၵူႈၵေႃႉၶၢမ်ႇဢဝ်ဢႃႇၼႃႇၶုၼ်ဢုပ်ႉမိူင်းၶဝ်တႃႉ။ လွင်ႈမၼ်းၸမ်ႉ၊ဢႃႇၼႃႇဢၼ်လႂ်သေဢမ်ႇဝႃႈပေႃးၽြႃးပဵၼ်ၸဝ်ႈယင်းဢမ်ႇပၼ်ဢၶႂၢင်ႉၸိုင်၊ဢမ်ႇတႄႇဢမ်ႇမၼ်ႈလႆႈလႄႈဢႃႇၼႃႇဢၼ်တႄႇယူႇမီးယူႇတင်းသဵင်ႈတင်းလူင်ၼၼ်ႉပဵၼ်ဢၼ်ၽြႃးပဵၼ်ၸဝ်ႈပၼ်ဝႆႉတီႈၶဝ်ဢေႃႈ။-
ပိူဝ်ႈၼႆလႄႈ ၵေႃႉဢၼ်ႁဵတ်းၶတ်းဢႃႇၼႃႇဢၼ်ၽြႃးပဵၼ်ၸဝ်ႈၶၢၼ်းဝႆႉၼၼ်ႉၸိုင်၊မၼ်းႁဵတ်းၶတ်းဢမိင်ႉၽြႃးပဵၼ်ၸဝ်ႈဢေႃႈ။ လိူဝ်သေၼၼ်ႉၵေႃႉဢၼ်ႁဵတ်းၶတ်းၼၼ်ႉတၵ်းလႆႈၶၢမ်ႇတၢမ်ႇဢပျတ်ႈဢေႃႈ။-
ၶုၼ်ဢုပ်ႉမိူင်းဢၼ်ဝႃႈၼၼ်ႉပဵၼ်ပုၼ်ႈတႃႇၵူၼ်းလီၵူၼ်းငၢမ်းတၵ်းလႆႈၵူဝ်ႁႄဢမ်ႇၸႂ်ႈ။ ပဵၼ်ပုၼ်ႈတႃႇၵူၼ်းႁၢႆႉၵူၼ်းမိူၵ်ႈတင်းလၢႆတၵ်းလႆႈၵူဝ်ႁႄဢေႃႈ။ ၸွင်ႇမႂ်းၶႂ်ႈပဵၼ်ၵေႃႉဢၼ်ဢမ်ႇလူဝ်ႇၵူဝ်ႁႄၶုၼ်ဢၼ်မီးဢႃႇၼႃႇၼၼ်ႉႁိုဝ်း။ ႁဵတ်းၵူၼ်းလီတႃႉ။ မၼ်းယင်းတၵ်းယုၵ်ႉယွင်ႈမႂ်းဢေႃႈ။-
လွင်ႈမၼ်းၸမ်ႉ၊ၶုၼ်ဢုပ်ႉမိူင်းပဵၼ်ၵူၼ်းၸႂ်ႉၵူၼ်းသွႆၽြႃးပဵၼ်ၸဝ်ႈပုၼ်ႈဢၵျူဝ်းတၢင်းလီမႂ်းဢေႃႈ။ ၵူၺ်းၵႃႈ၊ပေႃးမႂ်းႁဵတ်းႁၢႆႉႁဵတ်းမိူၵ်ႈၸိုင်၊ၵူဝ်ႁႄမၼ်းတႃႉ။ ၵွပ်ႈလွင်ႈၼင်ႇႁိုဝ်ဝႃႈၼႆၸမ်ႉ၊မၼ်းယိပ်းလၢပ်ႇသၢၼ်ႇလႅၵ်ႈယူႇလၢႆလၢႆဢမ်ႇၸႂ်ႈ။ မၼ်းပဵၼ်ၵူၼ်းၸႂ်ႉၵူၼ်းသွႆၽြႃးပဵၼ်ၸဝ်ႈလႄႈဢဝ်တၢင်းဢၼ်ၽြႃးပဵၼ်ၸဝ်ႈၶိုၼ်းတွပ်ႇတႅၼ်းဢပျတ်ႈၼၼ်ႉၸီႇယၢင်ႇတီႈၶဝ်ၸိူဝ်းဢၼ်ႁဵတ်းႁၢႆႉႁဵတ်းမိူၵ်ႈၼၼ်ႉဢေႃႈ။-
ၵွပ်ႈၼႆလႄႈသူထုၵ်ႇလီၶၢမ်ႇဢဝ်ဢႃႇၼႃႇၶုၼ်ဢုပ်ႉမိူင်းဢေႃႈ။ ဢမ်ႇၸႂ်ႈၵွပ်ႈပိူဝ်ႈၵူဝ်တၢမ်ႇဢၼ်ၽြႃးပဵၼ်ၸဝ်ႈၶိုၼ်းတွပ်ႇတႅၼ်းဢပျတ်ႈၵူၺ်းလႄႈ ၶၢမ်ႇဢဝ်ၵွပ်ႈပိူဝ်ႈၸႂ်ဢၼ်ႁုတူဝ်ၸဝ်ႈၵဝ်ႇၼၼ်ႉတႃႉ။
ၵွပ်ႈလွင်ႈၸိူဝ်ႉၼင်ႇၼႆလႄႈသူလႆႈထၢမ်းၶွၼ်ႇဢေႃႈ။ ၶုၼ်ဢုပ်ႉမိူင်းတင်းလၢႆပဵၼ်ၵူၼ်းၸႂ်ႉၵူၼ်းသွႆၽြႃးပဵၼ်ၸဝ်ႈလႄႈၶဝ်ပွင်ႁဵတ်းပွင်ထၢမ်းၼႃႈၵၢၼ်ၸဝ်ႈၼႂ်းလွင်ႈတၢင်းၵူႈၸိူဝ်ႉၵူႈပိူင်ၼႆႉဢေႃႈ။-
ပိူဝ်ႈၼႆလႄႈၸွမ်းၵႃႈၼင်ႇဢၼ်သူထုၵ်ႇလီပၼ်ၼၼ်ႉဢဝ်ပၼ်တႃႉ။ ၶွၼ်ႇဢၼ်သူထုၵ်ႇလီထၢမ်းၼၼ်ႉၵေႃႈထၢမ်းတႃႉ။ ငိုၼ်းၵႅပ်းငိုၼ်းၵၢင်ဢၼ်သူထုၵ်ႇလီပၼ်ၼၼ်ႉၵေႃႈပၼ်တႃႉ။ ၵေႃႉဢၼ်ထုၵ်ႇလီလႆႈၵဵပ်းတီႈမၼ်းၵေႃႈႁႂ်ႈၵဵပ်းဢဝ်တႃႉ။ ရူဝ်ႇသေႇၵေႃႉဢၼ်သူထုၵ်ႇလီရူဝ်ႇသေႇၼၼ်ႉတႃႉ။ ပၼ်ၵုင်ႇသရေႇၵေႃႉဢၼ်သူထုၵ်ႇလီပၼ်ၵုင်ႇသရေႇၼၼ်ႉတႃႉ။
ယႃႇပေႁႂ်ႈမီးၼီႈသေမဵဝ်းတီႈၽူႈလႂ်။ ႁႂ်ႈမီးၼီႈတၢင်းႁၵ်ႉမႅတ်ႈတႃႇတၢင်းဢၼ်သူၵေႃႉၼိုင်ႈလႄႈၵေႃႉၼိုင်ႈထုၵ်ႇလီမီးၼိူဝ်ၵၼ်ၼၼ်ႉၵူၺ်းတႃႉ။ ၵေႃႉဢၼ်ႁၵ်ႉပိူၼ်ႈၼၼ်ႉထွမ်ႇဢဝ်လႄႈၵမ်ၵျၢင်ႉၸွမ်းပိင်းၺၢပ်ႈတြႃးၸဝ်ႈယဝ်ႉ။-
ပိင်းၺၢပ်ႈတြႃးၸဝ်ႈဢၼ်ဝႃႈ၊ “ယႃႇပေၽိတ်းပိူင်ႈၵူတ်ႉၽူဝ်ၵူတ်ႉမေးပိူၼ်ႈ။ ယႃႇပေဢဝ်ဢသၢၵ်ႈၵူၼ်းတၢႆ၊ယႃႇပေလၵ်ႉပိူၼ်ႈ၊ယႃႇပေၸပ်းၸွႆးၶႂ်ႈလႆႈၶွင်ပိူၼ်ႈ၊” ဢၼ်ဝႃႈၸိူဝ်ႉၼင်ႇၼႆတင်းသဵင်ႈဢိၵ်ႇတင်းပိင်းၺၢပ်ႈတြႃးတၢင်ႇၸိူဝ်ႉတၢင်ႇဢၼ်တင်းလၢႆႁူမ်ႈပွင်းၵၼ်ဝႆႉ ၼႂ်းပိင်းၺၢပ်ႈတြႃးမဵဝ်းလဵဝ်ဢၼ်ဝႃႈ၊ “ႁၵ်ႉၵူၼ်းဢၼ်ၸၢပ်ႈသႅင်ႇၵၼ်တင်းမႂ်းမိူၼ်ၸိူဝ်ႉၼင်ႇဢၼ်မႂ်းႁၵ်ႉတူဝ်ၸဝ်ႈၵဝ်ႇၼၼ်ႉတႃႉ၊” ဝႃႈၼင်ႇၼႆၼၼ်ႉဢေႃႈ။-
ၵေႃႉဢၼ်ႁၵ်ႉၵူၼ်းတင်းလၢႆၼၼ်ႉတၵ်းဢမ်ႇတွၼ်ႉႁဵတ်းမိူၵ်ႈတီႈပိူၼ်ႈဢေႃႈ။ ပိူဝ်ႈၼႆလႄႈၵေႃႉဢၼ်ၸၢင်ႈႁၵ်ႉပိူၼ်ႈၼၼ်ႉပဵၼ်ၵေႃႉဢၼ်ထွမ်ႇဢဝ်လႄႈၵမ်ၵျၢင်ႉၸွမ်းပိင်းၺၢပ်ႈတြႃးတင်းမူတ်းယဝ်ႉဢေႃႈ။
သူထုၵ်ႇလီႁဵတ်းၸိူဝ်ႉၼင်ႇၼႆၵွပ်ႈပိူဝ်ႈသူႁုဢၶိင်ႇမၼ်းယူႇယဝ်ႉလႄႈတေႃႈလဵဝ်ၼႆႉသူလူဝ်ႇတိုၼ်ႇမႃးသေၵႃႈတီႈတၢင်းဢၼ်ၼွၼ်းလပ်းယူႇၼၼ်ႉယဝ်ႉဢေႃႈ။ ဢၶိင်ႇဢၼ်ႁဝ်းတၵ်းလႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၼၼ်ႉမိူဝ်ႈလဵဝ်ၼႆႉၸမ်မႃးသေယၢမ်းမိူဝ်ႈဢၼ်ႁဝ်းတႄႇၸႃႉယုမ်ႇမၢတ်ႈၼၼ်ႉယဝ်ႉဢေႃႈ။-
ၶိင်ႇၵၢင်ၶိုၼ်းၸမ်တၵ်းသဵင်ႈယဝ်ႉလႄႈၸမ်ၶိင်ႇၽႃႉပၢင်ႇမိူင်းလႅင်းမႃးယဝ်ႉ၊ဢွၼ်ၵၼ်ပႄႇပႅတ်ႈတၢင်းၵမ်တၢင်းၵျၢင်ႉဢၼ်လပ်းသိင်ႇၼၼ်ႉလႄႈယိပ်းတိုဝ်းၶိူင်ႈလၢၵ်ႈၼၢၵ်ႈပုၼ်ႈတႃႇၼႂ်းဢၼ်လႅင်းၵၼ်တႃႉႁဝ်း။-
ႁပ်ႉတွၼ်ႈၵေႃႉဢၼ်တၢင်းယုမ်ႇမၢတ်ႈႁႅင်းလဵၵ်ႉႁႅင်းၵေႇၼၼ်ႉသေလႄႈယႃႇပေတွပ်ႇထဵင်ၵၼ်တင်းမၼ်းလူၺ်ႈလွင်ႈဢၼ်မၼ်းထၢင်ႇထိူမ်ၼၼ်ႉ။-
ၵူၼ်းၵမ်ႈၽွင်ႈယုမ်ႇမၢတ်ႈဝႃႈၶဝ်လီၵိၼ်တၢင်းၵိၼ်ၵူႈၸိူဝ်ႉၵူႈပိူင်ဢေႃႈ။ ၵူၺ်းၵႃႈ၊ၵေႃႉဢၼ်တၢင်းယုမ်ႇမၢတ်ႈႁႅင်းလဵၵ်ႉႁႅင်းၵေႇၸမ်ႉ၊ၵိၼ်ၽၵ်းယိူဝ်ႈၽၵ်းၶဵဝ်ၵူၺ်းဢေႃႈ။-
ၵေႃႉဢၼ်ၵိၼ်ၵူႈၸိူဝ်ႉၵူႈပိူင်ၼၼ်ႉဢမ်ႇထုၵ်ႇလီထၢင်ႇလဵၵ်ႉတီႈၵေႃႉဢၼ်ဢမ်ႇၵိၼ်ၼၼ်ႉ။ ၵေႃႉဢၼ်ၵိၼ်ၽၵ်းယိူဝ်ႈၽၵ်းၶဵဝ်ၵူၺ်းၼၼ်ႉၵေႃႈဢမ်ႇထုၵ်ႇလီတၢင်ႇဢပျတ်ႈတီႈၵေႃႉဢၼ်ၵိၼ်ၵူႈၸိူဝ်ႉၵူႈပိူင်ၼၼ်ႉ။ လွင်ႈမၼ်းၸမ်ႉ၊ၽြႃးပဵၼ်ၸဝ်ႈႁပ်ႉတုင်းဢဝ်ၵေႃႉၼၼ်ႉယဝ်ႉဢေႃႈ။-
မႂ်းပဵၼ်ၽူႈလႂ်လႄႈၵႂႃႇတၢင်ႇဢပျတ်ႈတီႈၵူၼ်းၸႂ်ႉၵူၼ်းသွႆပိူၼ်ႈတၢင်ႇၵေႃႉၼၼ်ႉ။ ၸဝ်ႈမၼ်းၼၼ်ႉၵူၺ်းတၵ်းၸႅတ်ႈတူၺ်းတႅပ်းတတ်းလွင်ႈဢၼ်မၼ်းႁဵတ်းလီ၊ဢမ်ႇလီၼၼ်ႉဢေႃႈ။ ၼင်ႇၼႆလႄႈမၼ်းတၵ်းလႆႈလီၵွပ်ႈပိူဝ်ႈၸဝ်ႈၽြႃးႁဵတ်းႁႂ်ႈမၼ်းလီလႆႈဢေႃႈ။
ၵူၼ်းမၢင်ၵေႃႉၸၢင်ႈထၢင်ႇဝႃႈဝၼ်းၼိုင်ႈယဵင်ႈၶႅၼ်းမျၢတ်ႈလီသေဝၼ်းတၢင်ႇဝၼ်းသေၵေႃႈၵူၼ်းၵမ်ႈၽွင်ႈသမ်ႉထၢင်ႇဝႃႈၵူႈဝၼ်းမျၢတ်ႈလီမိူၼ်ၵၼ်မူတ်းဢေႃႈ။ ႁႂ်ႈၵူႈၵေႃႉတႅပ်းတတ်းၸႂ်တူဝ်ၸဝ်ႈၵဝ်ႇဢဝ်ႁင်းၽႂ်ႁင်းမၼ်းတႃႉ။-
ၵေႃႉဢၼ်ထၢင်ႇဝႃႈဝၼ်းၼၼ်ႉဝၼ်းၼႆႉမျၢတ်ႈလီၼၼ်ႉမၼ်းပၼ်ၵုင်ႇသရေႇၸဝ်ႈၽြႃးလႄႈမၼ်းၵမ်သိၼ်ဝၼ်းၼၼ်ႉဢေႃႈ။ ၵေႃႉဢၼ်ၵိၼ်ၵူႈၸိူဝ်ႉၵူႈပိူင်ၼၼ်ႉၵေႃႈမၼ်းပၼ်ၵုင်ႇသရေႇၸဝ်ႈၽြႃးလႄႈၵိၼ်ၵွပ်ႈပိူဝ်ႈမၼ်းတၢင်ႇၵျေးၸူးၽြႃးပဵၼ်ၸဝ်ႈပုၼ်ႈတၢင်းၵိၼ်မၼ်းဢွၼ်တၢင်းလႄႈၸင်ႇၵိၼ်ၼၼ်ႉဢေႃႈ။ ၵေႃႉဢၼ်ဝႄႈၵမ်ဢမ်ႇၵိၼ်တၢင်းၵိၼ်မၢင်မဵဝ်းၼၼ်ႉၵေႃႈမၼ်းပၼ်ၵုင်ႇသရေႇၸဝ်ႈၽြႃးလႄႈဝႄႈၵမ်ဢမ်ႇၵိၼ်တၢင်းၵိၼ်သေတၢင်ႇၵျေးၸူးၽြႃးပဵၼ်ၸဝ်ႈယူႇဢေႃႈ။-
ၼႂ်းႁဝ်းၼႆႉၽူႈလႂ်သေၵေႃႈဢမ်ႇထုၵ်ႇလီဢသၢၵ်ႈလိပ်းယူႇပုၼ်ႈတႃႇဢၵျူဝ်းတူဝ်ၸဝ်ႈၵဝ်ႇၵူၺ်းလႄႈ၊ၽူႈလႂ်ၵေႃႈဢမ်ႇထုၵ်ႇလီတၢႆပုၼ်ႈတႃႇဢၵျူဝ်းတူဝ်ၸဝ်ႈၵဝ်ႇၵူၺ်းဢေႃႈ။-
ပေႃးႁဝ်းဢသၢၵ်ႈလိပ်းယူႇၸိုင်၊ႁဝ်းထုၵ်ႇလီဢသၢၵ်ႈလိပ်းယူႇပုၼ်ႈတႃႇဢၵျူဝ်းၸဝ်ႈၽြႃးလႄႈပေႃးႁဝ်းတၢႆၵေႃႈထုၵ်ႇလီတၢႆပုၼ်ႈတႃႇဢၵျူဝ်းၸဝ်ႈၽြႃးဢေႃႈ။ ပိူဝ်ႈၼႆလႄႈႁဝ်းဢသၢၵ်ႈလိပ်းယူႇသေဢမ်ႇဝႃႈႁဝ်းတၢႆသေဢမ်ႇဝႃႈႁဝ်းပဵၼ်ၵူၼ်းၸဝ်ႈၽြႃးဢေႃႈ။-
လွင်ႈမၼ်းၸမ်ႉ၊ ၸဝ်ႈၶရိၸ်ႈ၊ လႆႈတၢႆသေလႄႈလႆႈလုၵ်ႉၶိုၼ်းလိပ်းမႃးႁႂ်ႈလႆႈပဵၼ်ၸဝ်ႈဢၼ်ဢုပ်ႉပိူင်ႇၶဝ်ၸိူဝ်းဢၼ်ဢသၢၵ်ႈလိပ်းဢိၵ်ႇတင်းၶဝ်ၸိူဝ်းဢၼ်တၢႆယဝ်ႉၼၼ်ႉဢေႃႈ။-
ပိူဝ်ႈၼႆလႄႈမႂ်းႁဵတ်းသင်လႄႈတၢင်ႇဢပျတ်ႈတီႈပီႈၼွင်ႉမႂ်း။ မႂ်းသမ်ႉႁဵတ်းသင်လႄႈထၢင်ႇလဵၵ်ႉပီႈၼွင်ႉမႂ်း။ ႁဝ်းၵႃႈမီးတင်းသဵင်ႈတင်းလူင်တၵ်းလႆႈၸုၵ်းၵႃႈတီႈၽၢႆႇၼႃႈၽြႃးပဵၼ်ၸဝ်ႈလႄႈၶၢမ်ႇဢဝ်တၢင်းဢၼ်မၼ်းၸဝ်ႈၸီႇယၢင်ႇဢပျတ်ႈဢေႃႈ။-
ၼႂ်းၵျၢမ်းလိၵ်ႈတႅမ်ႈဝႆႉဝႃႈ၊ “ၵႃႈၼင်ႇဢၼ်ၵဝ်ဢသၢၵ်ႈလိပ်းယူႇၼၼ်ႉ၊ ၵူၼ်းၵူႈၵေႃႉၵူႈၵူၼ်းတၵ်းၶုပ်ႉၶဝ်ႇၵႃႈတီႈၽၢႆႇၼႃႈၵဝ်ဢေႃႈ။ ၵူၼ်းၵူႈၵေႃႉၵူႈၵူၼ်းတၵ်းပိုတ်ႇပၢၵ်ႇႁပ်ႉတုင်းဢဝ်ဝႃႈၵဝ်ပဵၼ်၊ ၽြႃးပဵၼ်ၸဝ်ႈဢေႃႈဝႃႈၼႆၸဝ်ႈၽြႃးမီးဢမိင်ႉဢေႃႈ၊” ဝႃႈၼင်ႇၼႆဢေႃႈ။-
ၵွပ်ႈၼႆလႄႈႁဝ်းၸိူဝ်းၼႆႉၵူႈၵေႃႉၵူႈၵူၼ်းတၵ်းလႆႈၽုၺ်ႇၼႄလွင်ႈတၢင်းၵမ်တၢင်းၵျၢင်ႉတူဝ်ၸဝ်ႈၵဝ်ႇႁင်းၽႂ်ႁင်းမၼ်းၽၢႆႇၼႃႈၽြႃးပဵၼ်ၸဝ်ႈဢေႃႈ။
ပိူဝ်ႈၼႆလႄႈဢွၼ်ၵၼ်ဝႄႈပႅတ်ႈတၢင်းဢၼ်ၼင်ႇၵၼ်ၵၼ်တၢင်ႇဢပျတ်ႈတီႈၵၼ်ၼၼ်ႉတႃႉႁဝ်း။ ႁဝ်းဢွၼ်ၵၼ်ၽွမ်ႉၵၼ်တႅပ်းတတ်းဝႃႈႁဝ်းတေဢမ်ႇႁဵတ်းသေၸိူဝ်ႉသေမဵဝ်းဢၼ်တၵ်းႁႂ်ႈပီႈၼွင်ႉႁဝ်းၶီႈလိုတ်းလႄႈလူမ်ႉၵႃႈၼႂ်းတၢင်းၽိတ်းတႃႉႁဝ်း။-
ၸွမ်းလူၺ်ႈၵဝ်လႆႈသွၼ်ဢဝ်တီႈၸဝ်ႈၽြႃး ယေႇသု၊ ၼၼ်ႉလႄႈၵဝ်လႆႈႁုသေႇၶျႃႇလီငၢမ်းဝႃႈမၼ်းဢမ်ႇမီးတၢင်းၵိၼ်သေမဵဝ်းဢၼ်ဝႃႈဢမ်ႇမူတ်းသႂ်ၵူၺ်းမၼ်းၼၼ်ႉဢေႃႈ။ ၼႂ်းဝႃႈၼၼ်သေၵေႃႈပေႃးသေၵေႃႉသေၵူၼ်းထၢင်ႇဝႃႈ တၢင်းၵိၼ်မၢင်မဵဝ်းဢမ်ႇမူတ်းသႂ်ၸိုင်၊တၢင်းၵိၼ်ၼၼ်ႉဢမ်ႇမူတ်းသႂ်ပုၼ်ႈတႃႇမၼ်းဢေႃႈ။-
ပေႃးမႂ်းႁဵတ်းႁႂ်ႈပီႈၼွင်ႉမႂ်းၸဵပ်းၸႂ်ၵွပ်ႈပိူဝ်ႈတၢင်းၵိၼ်မႂ်းၸိုင်၊မႂ်းဢမ်ႇၵမ်ၵျၢင်ႉၸွမ်းတြႃးမႅတ်ႈတႃႇယဝ်ႉဢေႃႈ။ ယႃႇပေႁႂ်ႈတၢင်းၵိၼ်ဢၼ်မႂ်းၵိၼ်ၼၼ်ႉယႃႉၵဝ်းၵေႃႉဢၼ် ၸဝ်ႈၶရိၸ်ႈ၊ လႆႈၶၢမ်ႇတၢႆတၢင်ပၼ်ၼၼ်ႉလႆႈလုလႅဝ်ၵႂႃႇ။-
ယႃႇပေပၼ်ဢၶႂၢင်ႉႁႂ်ႈပိူၼ်ႈလႆႈသႄႉသွမ်းမဵဝ်းဢၼ်လီပုၼ်ႈသူၼၼ်ႉ။-
လွင်ႈမၼ်းၸမ်ႉ၊မိူင်းၽြႃးပဵၼ်ၸဝ်ႈဢၼ်ဝႃႈၼၼ်ႉတႄႇယူႇၼိူဝ်ၶဝ်ႈၼမ်ႉတၢင်းၵိၼ်ဢမ်ႇၸႂ်ႈ။ မၼ်းတႄႇယူႇၼိူဝ်လွင်ႈတၢင်းဢၼ်သိုဝ်ႈတေႃႇ၊လွင်ႈတၢင်းၼိမ်ၶျၢမ်းသႃႇ၊ဢိၵ်ႇတင်းလွင်ႈတၢင်းဢၼ်ၸူမ်းသိူဝ်းၼႂ်းဝိၺိၺ်ႇမူတ်းၸၢင်ႇၸဝ်ႈဢေႃႈ။-
ၵွပ်ႈၼႆလႄႈၵေႃႉဢၼ်ပွင်ၵၢၼ် ၸဝ်ႈၶရိၸ်ႈ၊ ၸိူဝ်ႉၼင်ႇၼႆၼၼ်ႉပဵၼ်ၵေႃႉဢၼ်ၽြႃးပဵၼ်ၸဝ်ႈထုၵ်ႇၸႂ်ဢိၵ်ႇတင်းၵေႃႉဢၼ်ၵူၼ်းတင်းလႆႈယုၵ်ႉယွင်ႈဢေႃႈ။
ပိူဝ်ႈၼႆလႄႈႁဝ်းဢွၼ်ၵၼ်ဢဵၼ်းဢၢၼ်းႁႃႁဵတ်းလွင်ႈတၢင်းဢၼ်ပွင်ဢၵျူဝ်းတၢင်းၼိမ်ၶျၢမ်းသႃႇဢိၵ်ႇတင်းလွင်ႈဢၼ်ႁဝ်းၼင်ႇၵၼ်ပၼ်ဢဵၼ်ပၼ်ႁႅင်းၵၼ်ယူႇတႃႇသေႇတႃႉႁဝ်း။-
ၵွပ်ႈတၢင်းၵိၼ်လႄႈယႃႇပေႁႂ်ႈၵၢၼ်ၽြႃးပဵၼ်ၸဝ်ႈလႆႈလုၵႂႃႇ။ တၢင်းၵိၼ်ၵူႈမဵဝ်းလီၵိၼ်ဢေႃႈ။ ၵူၺ်းၵႃႈ၊ပေႃးႁဝ်းၵိၼ်လႄႈႁႂ်ႈသေၵေႃႉသေၵူၼ်းတူၵ်းလူမ်ႉၼႂ်းဢပျတ်ႈၸိုင်၊ႁဝ်းၽိတ်းယဝ်ႉဢေႃႈ။-
ဢမ်ႇထုၵ်ႇလီႁဵတ်းၸႃႉၸဵမ်တၢင်းဢၼ်ၵိၼ်ၼိူဝ်ႉ၊တၢင်းဢၼ်ၵိၼ်လဝ်ႈၼမ်ႉမၢၵ်ႇၸပိတ်ႉဢိၵ်ႇတင်းတၢင်ႇမဵဝ်းဢၼ်တၵ်းႁႂ်ႈပီႈၼွင်ႉမႂ်းၶီႈလိုတ်းလႄႈလူမ်ႉတူၵ်းၼႂ်းဢပျတ်ႈၸိူဝ်းၼၼ်ႉ။-
ၸွင်ႇမႂ်းၵိၼ်လူၺ်ႈတၢင်းယုမ်ႇမၢတ်ႈႁိုဝ်း။ ႁႂ်ႈတၢင်းယုမ်ႇမၢတ်ႈမႂ်းၼၼ်ႉမီးႁင်းၵူၺ်းမႂ်းၵႃႈတီႈၽၢႆႇၼႃႈၸဝ်ႈတႃႉ။ ၵေႃႉဢၼ်ႁဵတ်းၸွမ်းတၢင်းဢၼ်မၼ်းယုမ်ႇမၢတ်ႈလႄႈဢမ်ႇမီးသွင်ၸႂ်သွင်ၶေႃးၼၼ်ႉမီးမၢင်ႇၵလႃႇဢေႃႈ။-
ၵူၺ်းၵႃႈ၊ပေႃးမၼ်းယင်းမီးၸႂ်ဢၼ်ယုမ်ႇၶိုင်ႈၼိုင်ႈဢမ်ႇယုမ်ႇၶိုင်ႈၼိုင်ႈလႄႈၵိၼ်ၸိုင်၊မၼ်းတၵ်းလႆႈၶၢမ်ႇတၢမ်ႇဢၼ်ၽြႃးပဵၼ်ၸဝ်ႈၸီႇယၢင်ႇၵွပ်ႈပိူဝ်ႈမၼ်းဢမ်ႇလႆႈႁဵတ်းၸွမ်းတၢင်းယုမ်ႇမၢတ်ႈမၼ်းၼၼ်ႉဢေႃႈ။ တၢင်းၵမ်တၢင်းၵျၢင်ႉမဵဝ်းလႂ်သေဢမ်ႇဝႃႈ၊ပေႃးမၼ်းဢမ်ႇလႆႈပဵၼ်ၸွမ်းတၢင်းယုမ်ႇမၢတ်ႈၸိုင်၊ပဵၼ်လွင်ႈတၢင်းဢၼ်ၽိတ်းပိူင်ႈဢေႃႈ။
ႁဝ်းၸိူဝ်းဢၼ်မီးတၢင်းယုမ်ႇမၢတ်ႈႁႅင်းယႂ်ႇၼႆႉထုၵ်ႇလီၸွႆႈထႅမ်ၶဝ်ၸိူဝ်းဢၼ်မီးတၢင်းယုမ်ႇမၢတ်ႈႁႅင်းလဵၵ်ႉႁႅင်းၵေႇဢေႃႈ။ ႁဝ်းဢမ်ႇထုၵ်ႇလီႁႃဢၵျူဝ်းတူဝ်ၸဝ်ႈၵဝ်ႇ။-
ၼင်ႇၼၼ်လႄႈႁဝ်းၵူႈၵေႃႉထုၵ်ႇလီႁႃဢၵျူဝ်းပၼ်ပီႈၼွင်ႉႁဝ်းႁႂ်ႈလႆႈတႄႇႁဵတ်းတၢင်းယုမ်ႇမၢတ်ႈၶဝ်ႁႂ်ႈမၼ်ႈၶိူင်ႇဢေႃႈ။-
ၸဝ်ႈၶရိၸ်ႈ၊ ယင်းဢမ်ႇႁႃဢၵျူဝ်းတူဝ်ၸဝ်ႈၵဝ်ႇ၊ၸွမ်းၼင်ႇၼႂ်းၵျၢမ်းလိၵ်ႈတႅမ်ႈဝႆႉဝႃႈ၊ “ၵႂၢမ်းဢၼ်ပိူၼ်ႈသႄႉသွမ်းမႂ်းၼၼ်ႉပဵၼ်ဢၼ်သႄႉသွမ်းၵဝ်ဢေႃႈ၊” ဝႃႈၼင်ႇၼႆၼၼ်ႉဢေႃႈ။-
ၵႂၢမ်းတြႃးဢၼ်တႅမ်ႈဝႆႉၼႂ်းၵျၢမ်းလိၵ်ႈၵႃႈမီးတင်းသဵင်ႈတင်းလူင်ၼၼ်ႉပဵၼ်ဢၼ်တႅမ်ႈဝႆႉႁႂ်ႈလႆႈသင်ႇသွၼ်ႁဝ်း၊ၼင်ႇႁိုဝ်ႁဝ်းတၵ်းမီးတၢင်းဢၼ်မုင်ႈမွင်းၵွပ်ႈပိူဝ်ႈတၢင်းဢၼ်ယိူၼ်ႉၶၢမ်ႇဢိၵ်ႇတင်းတၢင်းဢၼ်ၸႂ်ႁႅင်းယႂ်ႇၸွမ်းၼင်ႇၵျၢမ်းလိၵ်ႈဢၼ်ပၼ်ဝႆႉတီႈႁဝ်းၼၼ်ႉဢေႃႈ။-
ႁႂ်ႈၽြႃးပဵၼ်ၸဝ်ႈ ၸဝ်ႈဢၼ်ပၼ်ၸႂ်ဢၼ်ယိူၼ်ႉၶၢမ်ႇဢိၵ်ႇတင်းတၢင်းဢၼ်ၸႂ်ႁႅင်းယႂ်ႇၼၼ်ႉပွင်ႁဵတ်းႁႂ်ႈသူၼင်ႇၵၼ်ၽွမ်ႉၵၼ်ယိူင်ႈၸွမ်း ၸဝ်ႈယေႇသုၶရိၸ်ႈ၊ -
ၼင်ႇႁိုဝ်သူတင်းသဵင်ႈတင်းလူင်တၵ်းၽွမ်ႉၵၼ်ဢဝ်တင်းသဵင်လဵဝ်ယွင်ႈယေႃးၽြႃးပဵၼ်ၸဝ်ႈ၊ဢၼ်ပဵၼ်ပေႃႈၸဝ်ႈ၊ၸဝ်ႈၽြႃးႁဝ်း ယေႇသုၶရိၸ်ႈ၊ ၼၼ်ႉသေၵမ်းလူၺ်ႈ။
ၼင်ႇႁိုဝ်ပိူၼ်ႈတၵ်းယွင်ႈယေႃးမုၼ်ၽုင်းၽြႃးပဵၼ်ၸဝ်ႈၸိုင်၊ႁပ်ႉတုင်းဢဝ်ၵၼ်ၸိူဝ်ႉၼင်ႇ ၸဝ်ႈယေႇသု၊ ႁပ်ႉတုင်းဢဝ်သူၼၼ်ႉတႃႉ။-
ၵဝ်သမ်ႉမွၵ်ႇလၢတ်ႈသူထႅင်ႈၸမ်ႉ၊ၼႂ်းၸူဝ်ႈဢသၢၵ်ႈ ၸဝ်ႈၶရိၸ်ႈ၊ ၼၼ်ႉမၼ်းၸဝ်ႈပွင်ၵၢၼ်ဢၵျူဝ်းပုၼ်ႈၵူၼ်းမဵဝ်း ၵျူး၊ ၶဝ်ႁႂ်ႈလႆႈၼႄပျႃးလွင်ႈဢၼ်ၽြႃးပဵၼ်ၸဝ်ႈမီးသဵတ်ႈၸႃႇလႄႈႁဵတ်းႁႂ်ႈၵတိၽြႃးပဵၼ်ၸဝ်ႈဢၼ်ပၼ်ဝႆႉၵႃႈတီႈပူႇမွၼ်ႇႁဝ်းတင်းလၢႆပျေႉၸုမ်ႇ၊-
ဢိၵ်ႇတင်းၼင်ႇႁိုဝ်ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းတင်းလၢႆတၵ်းလႆႈယွင်ႈယေႃးၵျေးၸူးၵရုၼႃႇၽြႃးပဵၼ်ၸဝ်ႈဢေႃႈ။ မၼ်းမႅၼ်ႈၸွမ်းၼင်ႇၵျၢမ်းလိၵ်ႈတႅမ်ႈဝႆႉဝႃႈ၊ “ၵွပ်ႈပိူဝ်ႈၼႆလႄႈၵဝ်တၵ်းယွင်ႈယေႃးၵျေးၸူးၸဝ်ႈႁဝ်းၵႃႈၼႂ်းၵႄႈဝူင်ႈၵၢင်ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းဢေႃႈ။ ၵဝ်တၵ်းႁဵတ်းၵႂၢမ်းယွင်ႈယေႃးၼႃႇမႃႉၸိုဝ်ႈသဵင်ၸဝ်ႈႁဝ်းဢေႃႈ၊” ဝႃႈၼင်ႇၼႆၼၼ်ႉဢေႃႈ။
သမ်ႉတႅမ်ႈဝႆႉထႅင်ႈဝႃႈ၊ “ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၶဝ်႟။ ၸူမ်းသိူဝ်းလူၺ်ႈၵၼ်တင်းၵူၼ်းၽြႃးပဵၼ်ၸဝ်ႈတႃႉ၊” ဝႃႈၼႆ။
သမ်ႉထႅင်ႈတီႈၼိုင်ႈတႅမ်ႈဝႆႉဝႃႈ၊ “ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းတင်းလၢႆၶဝ်႟။ ယွင်ႈယေႃးၸဝ်ႈၽြႃးတႃႉ။ ၵူၼ်းမဵဝ်းၵႃႈမီးတင်းသဵင်ႈတင်းလူင်ၶဝ်႟။ ယွင်ႈယေႃးမၼ်းၸဝ်ႈတႃႉ၊” ဝႃႈၼင်ႇၼႆၼၼ်ႉဢေႃႈ။
သြႃႇ ဢိသႃႇယႃႉ၊ ၵေႃႈႁေႃးလၢတ်ႈလႄႈဝႃႈ၊ “ႁၢၵ်ႈၶိူဝ်းၶွင် ယေႇသႄး၊ တၵ်းတႅၵ်ႇၼေႃႇႁုၼ်ႈမႃးလႄႈ ၽြႃးပဵၼ်ၸဝ်ႈတၵ်းယူၵ်ႉမၼ်းၼၼ်ႉၶိုၼ်ႈႁႂ်ႈလႆႈဢုပ်ႉပိူင်ႇၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းဢေႃႈ။ ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းတၵ်းမွင်းပႂ်ႉမၼ်းၼၼ်ႉဢေႃႈ။” ဝႃႈၼင်ႇၼႆႁေႃးဝႆႉဢေႃႈ။
ၼင်ႇႁိုဝ်တၢင်းဢၼ်သူမုင်ႈမွင်းၼၼ်ႉတၵ်းၼမ်ၵိုၼ်းမႃးယူႇၶိူဝ်းၶိူဝ်းၼႂ်းတၼ်းၶူဝ်းဝိၺိၺ်ႇမူတ်းၸၢင်ႇၸဝ်ႈၸိုင်၊ႁႂ်ႈၽြႃးပဵၼ်ၸဝ်ႈဢၼ်ပဵၼ်ငဝ်ႈႁၢၵ်ႈတၢင်းဢၼ်မုင်ႈမွင်းၼၼ်ႉထႅင်ႈႁႅင်းပၼ်ႁႅင်းႁႂ်ႈသူလႆႈပျေႉၸုမ်ႇဝႆႉတင်းတၢင်းဢၼ်ၸူမ်းသိူဝ်းဢိၵ်ႇတင်းတၢင်းၼိမ်ၶျၢမ်းသႃႇၵွပ်ႈပိူဝ်ႈသူယုမ်ႇမၢတ်ႈမၼ်းၸဝ်ႈၼၼ်ႉသေၵမ်းလူၺ်ႈ။
ပီႈၼွင်ႉၶဝ်႟။ ၵဝ်ပျေႇၸႂ်လူၺ်ႈလွင်ႈဢၼ်ဝႃႈသူမီးသၽေႃးဢၼ်လီဢၼ်ငၢမ်း၊တဵမ်ဝႆႉတင်းပိင်ႇၺႃႇလႄႈၸၢင်ႈသင်ႇသွၼ်သုင်းမႃႉၵၼ်ၼၼ်ႉဢေႃႈ။-
ၵူၺ်းၵႃႈ၊ၼႂ်းၽိုၼ်လိၵ်ႈၼႆႉၵဝ်ႁတ်းၽုၺ်ႇလၢတ်ႈတႅမ်ႈဝႆႉလူၺ်ႈလွင်ႈလၢႆၸိူဝ်ႉလၢႆမဵဝ်းလႅင်းလႅင်း၊ၼင်ႇႁိုဝ်ၵဝ်တၵ်းလႆႈပၼ်သတိသူဢေႃႈ။ ၵဝ်လႆႈႁတ်းႁၢၼ်ၵွပ်ႈပိူဝ်ႈၽြႃးပဵၼ်ၸဝ်ႈပၼ်ၵျေးၸူးၼႆႉတီႈၵဝ်၊-
ႁႂ်ႈလႆႈပဵၼ်ၵူၼ်းၸႂ်ႉၵူၼ်းသွႆၸဝ်ႈ ယေႇသုၶရိၸ်ႈ၊ ပုၼ်ႈတႃႇတၵ်းပွင်ၵၢၼ်မၼ်းၸဝ်ႈၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းဢေႃႈ။ ၵဝ်လႆႈႁဵတ်းမိူၼ်ၸိူဝ်ႉၼင်ႇယဵၸ်ႈပရေႃးႁဵၵ်ႈ လႄႈႁေႃးလၢတ်ႈၶၢဝ်ႇတြႃးသိူဝ်းပျေႃႇၽြႃးပဵၼ်ၸဝ်ႈၼင်ႇႁိုဝ်ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၶဝ်တၵ်းပဵၼ်ၶိူင်ႈတၢင်းလူႇဢၼ်ဝိၺိၺ်ႇမူတ်းၸၢင်ႇၸဝ်ႈႁႂ်ႈမူတ်းၸၢင်ႇမႃးလႄႈၽြႃးပဵၼ်ၸဝ်ႈႁပ်ႉတုင်းဢဝ်ၼၼ်ႉဢေႃႈ။-
ပိူဝ်ႈၼႆလႄႈၵဝ်ဢိင်ပိုင်ႈ ၸဝ်ႈယေႇသုၶရိၸ်ႈ၊ လႄႈၸႂ်ယႂ်ႇၸူမ်းသိူဝ်းလူၺ်ႈၵၢၼ်ဢၼ်ၵဝ်လႆႈပွင်ႁဵတ်းပုၼ်ႈၽြႃးပဵၼ်ၸဝ်ႈၼၼ်ႉဢေႃႈ။-
ၵဝ်ဢမ်ႇႁတ်းလၢတ်ႈလွင်ႈသေၸိူဝ်ႉသေမဵဝ်းလိူဝ်သေလွင်ႈဢၼ် ၸဝ်ႈၶရိၸ်ႈ၊ ဢဝ်ၵဝ်ပွင်ႁဵတ်းႁႂ်ႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းလႆႈမႃးထွမ်ႇဢဝ်ၵႂၢမ်းၽြႃးပဵၼ်ၸဝ်ႈၼၼ်ႉဢေႃႈ။-
မၼ်းၸဝ်ႈလႆႈဢဝ်တင်းၵႂၢမ်းဢၼ်ၵဝ်ႁေႃးလၢတ်ႈ၊တၢင်းဢၼ်ၵဝ်ၵမ်ၵျၢင်ႉ၊တၼ်းၶူဝ်းၼိမိၵ်ႈလၢၵ်ႈၶၼႃႇဢၼ်လၢၵ်ႇဢၼ်လၢႆး၊ဢိၵ်ႇတင်းတၼ်းၶူဝ်းဝိၺိၺ်ႇမူတ်းၸၢင်ႇၸဝ်ႈပွင်ႁဵတ်းလွင်ႈတၢင်းၸိူဝ်းၼၼ်ႉလႄႈၵဝ်လႆႈလႄႇၵႂႃႇႁေႃးလၢတ်ႈၶၢဝ်ႇတြႃးသိူဝ်းပျေႃႇ ၸဝ်ႈၶရိၸ်ႈ၊ ၸႃႉၸဵမ်ၵႃႈတီႈဝဵင်း ယေႇရုသလႅမ်ႇ၊ တေႃႇထိုင်ႁွတ်ႈမိူင်း ဢိလိရၵမ်ႇ၊ ပုၼ်ႉဢေႃႈ။-
ၵဝ်မီးၸႂ်ၸေႇတၼႃႇတႃႇသေႇၶႂ်ႈႁေႃးမွၵ်ႇလၢတ်ႈၶၢဝ်ႇတြႃးသိူဝ်းပျေႃႇၸဝ်ႈၵႃႈတီႈၶဝ်ၸိူဝ်းဢၼ်ဢမ်ႇပႆႇတွၼ်ႉလႆႈငိၼ်းလွင်ႈ ၸဝ်ႈၶရိၸ်ႈ၊ ၼၼ်ႉဢေႃႈ။ ၼင်ႇၼၼ်လႄႈ ၵဝ်ဢမ်ႇၶႂ်ႈထၢပ်ႈလႄႈတႄႇႁဵတ်းၼိူဝ်ငဝ်ႈႁၢၵ်ႈဢၼ်ပိူၼ်ႈတၢင်ႇၵေႃႉတႄႇတင်ႈဝႆႉၼၼ်ႉဢေႃႈ။-
မႅၼ်ႈၸွမ်းၼင်ႇဢၼ်ၼႂ်းၵျၢမ်းလိၵ်ႈတႅမ်ႈဝႆႉဝႃႈ၊ “ၶဝ်ၸိူဝ်းဢၼ်ဢမ်ႇယၢမ်ႈလႆႈငိၼ်းပိူၼ်ႈမွၵ်ႇလၢတ်ႈၶႆႈၼႄ လွင်ႈမၼ်းၸဝ်ႈၼၼ်ႉတၵ်းလႆႈႁၼ်ဢေႃႈ။ ၶဝ်ၸိူဝ်းဢၼ်ဢမ်ႇတွၼ်ႉလႆႈငိၼ်းလွင်ႈမၼ်းၸဝ်ႈၼၼ်ႉ တၵ်းတေႁုထွမ်ႇပွင်ႇလႅင်းဢေႃႈ၊” ဝႃႈၼင်ႇၼႆၼၼ်ႉဢေႃႈ။
ၵွပ်ႈပိူဝ်ႈလွင်ႈတၢင်းၼႆႉလႄႈၵဝ်ဢမ်ႇပဵၼ်မႃးလႄႇထိုင်သူၵွပ်ႈပိူဝ်ႈမီးဢၼ်ႁႄႉဢၼ်ၶႅၼ်ယူႇၶိူဝ်းၶိူဝ်းဢေႃႈ။-
မိူဝ်ႈလဵဝ်ၵၢၼ်ငၢၼ်းၵဝ်တီႈၼႂ်းမိူင်းၼႆႉၵဝ်လႆႈႁဵတ်းယဝ်ႉတူဝ်ႈယဝ်ႉလႄႈၸိူဝ်ႉၼင်ႇဢၼ်ၵဝ်မီးၸႂ်ၶႂ်ႈမႃးလႄႇထိုင်သူႁိုင်ၼႃႇယဝ်ႉၼၼ်ႉ၊-
တေႃႈလဵဝ်ၼႆႉၵဝ်ထၢင်ႇတေပဵၼ်လႆႈယဝ်ႉဢေႃႈ။ ၵဝ်ဢၢင်ႈဝႄႉၶဝ်ႈၸူးသူၼႂ်းသဵၼ်ႈတၢင်းဢၼ်ၵဝ်တၵ်းၵႂႃႇမိူင်း သပဵၼ်ႇ၊ ၼၼ်ႉဢေႃႈ။ ဝၢႆးသေယူႇမူၼ်ႈမူၼ်ႈပျေႃႇပျေႃႇတင်းသူႁိုင်တၢၼ်ႇတၢၼ်ႇယဝ်ႉၸင်ႇ၊တၵ်းၶၢမ်ႇဢဝ်တၢင်းဢၼ်သူၸွႆႈထႅမ်ထွၵ်ႈၵမ်ႉႁႂ်ႈၵဝ်လႆႈသိုပ်ႇဢွၵ်ႇၶၢဝ်းတၢင်းၵႂႃႇၸူးမိူင်းၼၼ်ႉဢေႃႈ။-
ဝႃႈၸိူဝ်ႉႁိုဝ်သေၵေႃႈ တေႃႈလဵဝ်ၵဝ်တၵ်းၵႂႃႇၵႃႈတီႈဝဵင်း ယေႇရုသလႅမ်ႇ၊ ႁႂ်ႈလႆႈၸွႆႈထႅမ်ၵူၼ်းၸဝ်ႈၽြႃးၸိူဝ်းၼၼ်ႉလူးၵွၼ်ႇဢေႃႈ။-
လွင်ႈမၼ်းၸမ်ႉ၊ၸိူဝ်းၸဝ်ႈမိူင်း မႃႇၵေႇတေႃးၼိ၊ ဢိၵ်ႇတင်းၸိူဝ်းၸဝ်ႈမိူင်း ၵရိၵ်ႉ၊ တင်းလၢႆပႃးတင်းၸႂ်ၸေႇတၼႃႇသေလႄႈလႆႈလူႇငိုၼ်းႁႂ်ႈလႆႈၸွႆႈထႅမ်ၵူၼ်းၸဝ်ႈၽြႃးၸိူဝ်းဢၼ်ယၢၵ်ႈၽၢၼ်ၵႃႈၼႂ်းဝဵင်း ယေႇရုသလႅမ်ႇ၊ ပုၼ်ႉဢေႃႈ။-
ၶဝ်မီးၸႂ်ၸေႇတၼႃႇၶႂ်ႈလူႇႁင်းၵူၺ်းၶဝ်ဢေႃႈ။ ၵူၺ်းၵႃႈ၊တီႈတႄႉမၼ်းၶဝ်မီးတႃႇဝုၼ်ႇၸွႆႈထႅမ်ၵူၼ်းယၢၵ်ႈၽၢၼ်ၸိူဝ်းၼၼ်ႉၸွမ်းၼင်ႇဢၼ်ၵူၼ်းမဵဝ်း ၵျူး၊ ၶဝ်ယင်းၸၢင်ႈၽႄမႅင်ႇၵျေးၸူးတၢင်းလီၽၢႆႇၸႂ်ဝိၺိၺ်ႇပၼ်ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၼၼ်ႉ၊ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၶဝ်ၵေႃႈထုၵ်ႇလီတွပ်ႇၵျေးၸူးတၢင်းလီၽၢႆႇတူဝ်ၶၼ်ႇထႃႇဢၼ်ပဵၼ်ငိုၼ်းတွင်းပၼ်ၵူၼ်းမဵဝ်း ၵျူး၊ ၶဝ်ဢေႃႈ။-
ဝၢႆးသေၵဝ်ဢဝ်ငိုၼ်းလူႇတင်းသဵင်ႈတင်းလူင်ဢၼ်ပိူၼ်ႈၵဵပ်းဝႆႉပုၼ်ႈၶဝ်ၼၼ်ႉဢၢပ်ႈပၼ်ၶဝ်ယဝ်ႉၼၼ်ႉၸိုင်၊ၵဝ်တၵ်းဢွၵ်ႇတၢင်းၵႂႃႇမိူင်း သပဵၼ်ႇ၊ လႄႈၼႂ်းၶၢဝ်းတၢင်းၼၼ်ႉၵဝ်တၵ်းဝႄႉၶဝ်ႈၸူးသူဢေႃႈ။-
မိူဝ်ႈဢၼ်ၵဝ်မႃးၸူးသူၼၼ်ႉၵဝ်တၵ်းပႃးမၢင်ႇၵလႃႇတၢင်းလီ ၸဝ်ႈၶရိၸ်ႈ၊ ဢၼ်ပျေႉၸုမ်ႇၼၼ်ႉမႃးဢေႃႈ၊ဝႃႈၼႆၵဝ်ႁုဢေႃႈ။
ပီႈၼွင်ႉၶဝ်႟။ ၵဝ်ဢိင်ပိုင်ႈၸဝ်ႈၽြႃးႁဝ်း ၸဝ်ႈယေႇသုၶရိၸ်ႈ၊ ဢိၵ်ႇတင်းမႅတ်ႈတႃႇၵရုၼႃႇဝိၺိၺ်ႇၸဝ်ႈသေလႄႈတိုၵ်းယူင်းႁႂ်ႈသူၶတ်းၸႂ်သေႁူမ်ႈၵၼ်တင်းၵဝ်လႄႈသူးတွင်းတီႈၽြႃးပဵၼ်ၸဝ်ႈပုၼ်ႈၵဝ်ဢေႃႈ။-
ၶႅၼ်းတေႃႈသူးတွင်းပၼ်ၼင်ႇႁိုဝ်ၵဝ်တၵ်းလွတ်ႈၽေးသေၵႃႈတီႈၵူၼ်းဢၼ်ဢမ်ႇယုမ်ႇမၢတ်ႈတင်းလၢႆၼႂ်းမိူင်း ယုတႃႉ၊ ၼၼ်ႉဢိၵ်ႇတင်းသူးတွင်းႁႂ်ႈၵၢၼ်ဢၼ်ၵဝ်တၵ်းပွင်ႁဵတ်းၵႃႈၼႂ်းဝဵင်း ယေႇရုသလႅမ်ႇ၊ ၼၼ်ႉတၵ်းပဵၼ်ဢၵျူဝ်းပုၼ်ႈၵူၼ်းၸဝ်ႈၽြႃးၶဝ်သေၵမ်း။-
ႁဵတ်းၼၼ်လႄႈပေႃးၽြႃးပဵၼ်ၸဝ်ႈမီးဢလူဝ်ႇၸိုင်၊ၵဝ်တၵ်းလႆႈႁွတ်ႈၽႅဝ်တီႈသူၸူမ်းၸူမ်းသိူဝ်းသိူဝ်းလႄႈတၵ်းလႆႈမႃးလိုဝ်ႈႁိူဝ်ႉၵႃႈတီႈသူဢေႃႈ။-
ႁႂ်ႈၽြႃးပဵၼ်ၸဝ်ႈၸဝ်ႈဢၼ်ပဵၼ်ငဝ်ႈႁၢၵ်ႈတၢင်းၼိမ်ၶျၢမ်းသႃႇၼၼ်ႉမီးယူႇလူၺ်ႈၵၼ်တင်းသူတင်းသဵင်ႈသေၵမ်းလူၺ်ႈ။ ဢႃမိၼ်ႈ။
ၵဝ်ၶႂ်ႈႁႂ်ႈသူႁုလွင်ႈဢၼ်ၼွင်ႉယိင်းႁဝ်း ၽိပေႇ၊ ဢၼ်ပွင်ၵၢၼ်ၸိူဝ်းၸဝ်ႈယူႇၵႃႈတီႈဝဵင်း ၵိၼ်ႇၶျေႇ၊ ၼၼ်ႉပဵၼ်ၵူၼ်းလီဢေႃႈ။-
ၵွပ်ႈပိူဝ်ႈမၼ်းပဵၼ်ၵူၼ်းၸဝ်ႈၽြႃးလႄႈႁပ်ႉတုင်းဢဝ်မၼ်းၸွမ်းၵႃႈၼင်ႇဢၼ်ၵူၼ်းၸဝ်ႈၽြႃးထုၵ်ႇလီႁဵတ်းၼၼ်ႉသေလႄႈပေႃးမၼ်းလူဝ်ႇတၢင်းၸွႆႈထႅမ်သေၸိူဝ်ႉသေပိူင်ၸိုင်၊ၸွႆႈထႅမ်မၼ်းတႃႉ။ လွင်ႈမၼ်းၸမ်ႉ၊မၼ်းလႆႈၸွႆႈထႅမ်ၵူၼ်းၼမ်ၼႃႇဢိၵ်ႇပႃးတင်းၵဝ်ဢေႃႈ။
တူင်ႉတၵ်ႉ ပရီႇသီးလႃႇ၊ တင်းၽူဝ်မၼ်း ဢႃႇၵုလႃႉ၊ ဢၼ်လႆႈႁူမ်ႈပွင်းႁဵတ်းၵၢၼ် ၸဝ်ႈယေႇသုၶရိၸ်ႈ၊ လူၺ်ႈၵၼ်တင်းၵဝ်ၼၼ်ႉတႃႉ။-
ၶဝ်ႁတ်းၶၢမ်ႇၽေးတၢင်းတၢႆပုၼ်ႈၵဝ်ဢေႃႈ။ ၵဝ်ၵူၺ်းဢမ်ႇၵႃး၊ၸႃႉၸဵမ်ၸိူဝ်းၸဝ်ႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းတင်းလၢႆၵေႃႈဢွၼ်ၵၼ်တၢင်ႇၵျေးၸူးၶဝ်သွင်ၵေႃႉဢေႃႈ။-
တူင်ႉတၵ်ႉပႃးၸွမ်းၵူၼ်းၸိူဝ်းၸဝ်ႈဢၼ်ၸုတုမ်ၵႃႈၼႂ်းႁိူၼ်းၶဝ်ၼၼ်ႉတႃႉ။ တူင်ႉတၵ်ႉပႃး ဢေႇပေႇၼိတ်ႉ၊ ဢၼ်ပဵၼ်ၵေႃႉသႄႈၵဝ်ႁၵ်ႉၼႃႇ၊ၵေႃႉဢၼ်ယုမ်ႇမၢတ်ႈ ၸဝ်ႈၶရိၸ်ႈ၊ ဢွၼ်တၢင်းသေပိူၼ်ႈၵႃႈၼႂ်းမိူင်း ဢႃႇသိ၊ ၼၼ်ႉတႃႉ။-
တူင်ႉတၵ်ႉပႃးၼၢင်း မႃႇရိ၊ ၵေႃႉဢၼ်ၶတ်းၸႂ်ပွင်ႁဵတ်းပုၼ်ႈသူၼၼ်ႉတႃႉ။-
တူင်ႉတၵ်ႉပႃး ဢၼ်ႇတြႃးၼိတ်ႉ၊ တင်း ယုၼိ၊ ဢၼ်ပဵၼ်ပီႈၼွင်ႉၸိူဝ်ႉၶိူဝ်းၵဝ်လႄႈလႆႈတူၵ်းထွင်ႇလူၺ်ႈၵၼ်တင်းၵဝ်ၼၼ်ႉတႃႉ။ ၼႂ်းၵႄႈၵၢင်တမၢၼ်ႇၸဝ်ႈၸိူဝ်းဢၼ်ဢွၵ်ႇၸိုဝ်ႈဢွၵ်ႇသဵင်လႄႈပဵၼ် ၶရိၸ်ႈယၢၼ်ႇ၊ မႃးဢွၼ်တၢင်းၵဝ်ဢေႃႈ။
တူင်ႉတၵ်ႉပႃး ဢမ်ႇပလိ၊ ၵေႃႉသႄႈၵဝ်ႁၵ်ႉၼႃႇၼႂ်းၸဝ်ႈၽြႃးၼၼ်ႉတႃႉ။-
တူင်ႉတၵ်ႉပႃး ဢုရၽၢၼ်ႇ၊ ဢၼ်ႁူမ်ႈၵၼ်ပွင်ၵၢၼ် ၸဝ်ႈၶရိၸ်ႈ၊ လူၺ်ႈႁဝ်းဢိၵ်ႇတင်း သႃႇတႃႇၶု၊ ၵေႃႉသႄႈၵဝ်ႁၵ်ႉၼႃႇၼၼ်ႉတႃႉ။-
တူင်ႉတၵ်ႉပႃး ဢပေႇလေႇ၊ ၵေႃႉဢၼ်မီးသၢၵ်ႈသေႇၼႂ်းတၢင်းဢၼ်ရူဝ်ႇသေႇၵူဝ်ယမ် ၸဝ်ႈၶရိၸ်ႈ၊ ၼၼ်ႉတႃႉ။ တူင်ႉတၵ်ႉပႃးၵူၼ်းႁိူၼ်းၵူၼ်းယေး ဢႃႇရိတ်ႉတေႃႇပုလု၊ ၼၼ်ႉတႃႉ။-
တူင်ႉတၵ်ႉပႃး ႁေႇရူဝ်းတရၼ်ႇ၊ ၵေႃႉဢၼ်ပဵၼ်ပီႈၼွင်ႉၸိူဝ်ႉၶိူဝ်းၵဝ်၊ဢိၵ်ႇတင်းပီႈၼွင်ႉၶရိၸ်ႈယၢၼ်ႇၵူၼ်းႁိူၼ်းၵူၼ်းယေး ၼႃႇၵိသု၊ ၼၼ်ႉတႃႉ။
တူင်ႉတၵ်ႉပႃး တရုၽေႇၼိ၊ တင်း တရုၽူဝ်းသႃႉ၊ ၸိူဝ်းဢၼ်ၶတ်းၸႂ်ပွင်ႁဵတ်းၵၢၼ်ၸဝ်ႈၽြႃးၼၼ်ႉတႃႉ။ တူင်ႉတၵ်ႉပႃး ပေႇရုသိ၊ ၵေႃႉသႄႈဢၼ်လီႁၵ်ႉၼႃႇမႄႈယိင်းတီႈၵေႃႉဢၼ်ၶတ်းၸႂ်ပွင်ႁဵတ်းၵၢၼ်ၸဝ်ႈၽြႃးၼမ်တႄႉတႄႉၼၼ်ႉတႃႉ။-
တူင်ႉတၵ်ႉပႃး ရုၽု၊ ၵေႃႉဢၼ်လႆႈၼႃႈလႆႈတႃၵႃႈၼႂ်းၵၢၼ်ၽြႃးပဵၼ်ၸဝ်ႈဢၼ်မၼ်းႁဵတ်းဢိၵ်ႇတင်းမႄႈမၼ်းဢၼ်မၢတ်ႈၵဝ်ပဵၼ်လုၵ်ႈၸၢႆးမၼ်းၼၼ်ႉတႃႉ။-
တူင်ႉတၵ်ႉပႃးၸႃႉၸဵမ် ဢႃႇသိၼ်ႇၵရိတ်ႉတု၊ၽလေႇၵုၼ်ႇ၊ႁေရမိတ်ႉ၊ပတ်ႉတြေႃးပႃႉ၊ႁေႇရမတ်ႉ၊ ဢိၵ်ႇတင်းပီႈၼွင်ႉၶရိၸ်ႈယၢၼ်ႇဢၼ်မီးယူႇလူၺ်ႈၵၼ်တင်းၶဝ်ၼၼ်ႉတႃႉ။-
တူင်ႉတၵ်ႉပႃးတင်း ၽိလေႃးၵုတ်ႉ၊ယုလိ၊ၼေႇရု၊ တင်းၼွင်ႉယိင်းမၼ်း၊ဢိၵ်ႇတင်း ဢေႃးလုမ်ႇပႃႉ၊ တင်းၵူၼ်းၽြႃးပဵၼ်ၸဝ်ႈၵူႈၵေႃႉဢၼ်မီးယူႇလူၺ်ႈၵၼ်တင်းၶဝ်ၼၼ်ႉတႃႉ။
ၵေႃႉၼိုင်ႈလႄႈၵေႃႉၼိုင်ႈတူင်ႉတၵ်ႉၼူမ်ၵၼ်ၵၼ်မိူၼ်ၼင်ႇပီႈၼွင်ႉဢၼ်ႁၵ်ႉပႅင်းၵၼ်ၼၼ်ႉတႃႉ။ ၸိူဝ်းၸဝ်ႈ ၸဝ်ႈၶရိၸ်ႈ၊ တင်းလၢႆ တူင်ႉတၵ်ႉထၢမ်ႁႃသူယူႇဢေႃႈ။
ပီႈၼွင်ႉၶဝ်႟။ ဝႆႉသတိၶဝ်ၸိူဝ်းဢၼ်ၸၢင်ႈႁဵတ်းႁႂ်ႈၽႄၵိူင်းၶႂၢႆးၵိူင်းၵၼ်၊ၸၢင်ႈႁဵတ်းႁႂ်ႈတၢင်းယုမ်ႇမၢတ်ႈပိူၼ်ႈလုလႅဝ်၊ဢိၵ်ႇတင်းၸၢင်ႈသင်ႇသွၼ်ၶတ်းၵၼ်တင်းတၢင်းဢၼ်သူလႆႈသွၼ်ဢဝ်ဝႆႉယဝ်ႉၼၼ်ႉသေလႄႈဝႄႈပႅတ်ႈၵူၼ်းၸိူဝ်းၼၼ်ႉတႃႉဝႃႈၼႆၵဝ်တိုၵ်းယူင်းသူဢေႃႈ။-
ၶဝ်ၸိူဝ်းၼၼ်ႉ ပွင်ဢၵျူဝ်းပုၼ်ႈတွင်ႉၶဝ်ၵူၺ်းလႄႈဢမ်ႇပွင်ႁဵတ်းၵၢၼ်ၸဝ်ႈၽြႃးႁဝ်း ၸဝ်ႈယေႇသုၶရိၸ်ႈ ။ ၶဝ်ၸၢင်ႈဢဝ်ၵႂၢမ်းလီၵႂၢမ်းဝၢၼ်တင်းၵႂၢမ်းဢၼ်ၶျေႃးဝွၼ်းသေလႄႈပႅတ်ႉလႅၼ်ၶဝ်ၸိူဝ်းဢၼ်ၸႂ်သိုဝ်ႈၸႂ်ယူဝ်းၼၼ်ႉဢေႃႈ။-
ပိူၼ်ႈတင်းလၢႆလႆႈႁုလွင်ႈတၢင်းဢၼ်သူယုမ်ႇမၢတ်ႈထွမ်ႇဢဝ်ၵႂၢမ်းတြႃးၸဝ်ႈၽြႃးၼၼ်ႉလႄႈၵဝ်ၸူမ်းသိူဝ်းတႄႉတႄႉဢေႃႈ။ ၵဝ်ၶႂ်ႈႁႂ်ႈသူမီးပိင်ႇၺႃႇသတိၼႂ်းလွင်ႈတၢင်းဢၼ်လီဢၼ်မျၢတ်ႈလႄႈသိုဝ်ႈယူဝ်းၵၢင်းလွတ်ႈတင်းဢပျတ်ႈတၢင်းဢၼ်ႁၢႆႉမိူၵ်ႈၼၼ်ႉဢေႃႈ။-
ႁဵတ်းၼၼ်လႄႈၽြႃးပဵၼ်ၸဝ်ႈဢၼ်ပဵၼ်ငဝ်ႈႁၢၵ်ႈတၢင်းၼိမ်ၶျၢမ်းသႃႇၼၼ်ႉတၵ်းၸဵဝ်းၶိုတ်ႈႁူဝ် ၸႃႇတၢၼ်ႇ၊ တႂ်ႈတိၼ်သူဢေႃႈ။ ႁႂ်ႈၵျေးၸူးၸဝ်ႈၽြႃးႁဝ်း ၸဝ်ႈယေႇသုၶရိၸ်ႈ၊ မီးယူႇလူၺ်ႈသူသေၵမ်းလူၺ်ႈ။
တိမေႃးသေႇ၊ ၵေႃႉဢၼ်ပွင်ႁဵတ်းၵၢၼ်ၸဝ်ႈႁူမ်ႈလူၺ်ႈၵဝ်ၼၼ်ႉထၢမ်ႁႃသူဢေႃႈ။ လုၵိ၊ယႃႇသုၼ်ႇ၊ တင်း သေႃးသိပတႃႉ၊ ဢၼ်ပဵၼ်ပီႈၼွင်ႉၸိူဝ်ႉၶိူဝ်းၵဝ်ၵေႃႈထၢမ်ႁႃသူဢေႃႈ။
ၵဝ်ၶႃႈ တေႇရတိ၊ ၵေႃႉဢၼ်ပဵၼ်ၸရေးတႅမ်ႈလိၵ်ႈၼႆႉၵေႃႈထၢမ်ႁႃသူၸဝ်ႈၼႂ်းၸဝ်ႈၽြႃးဢေႃႈ။
ၸဝ်ႈႁိူၼ်းၵဝ် ၵႃႇယု၊ ၵေႃႉဢၼ်ႁႂ်ႈၵူၼ်းၸိူဝ်းၸဝ်ႈၸုတုမ်ၼႂ်းႁိူၼ်းမၼ်းၼၼ်ႉၵေႃႈထၢမ်ႁႃသူဢေႃႈ။ ဢေးရတ်ႉတု၊ ၽူႈထိင်းငိုၼ်းဝဵင်းဢိၵ်ႇတင်းၼွင်ႉႁဝ်း ၵွႃႇၸု၊ ၵေႃႈထၢမ်ႁႃသူဢေႃႈ။-
[ႁႂ်ႈၵျေးၸူးၸဝ်ႈႁဝ်း ၸဝ်ႈယေႇသုၶရိၸ်ႈ၊ မီးယူႇလူၺ်ႈသူတင်းသဵင်ႈတင်းလူင်သေၵမ်းလူၺ်ႈ။ ဢႃမိၼ်ႈ။]
ဢွၼ်ၵၼ်ယွင်ႈယေႃးမုၼ်ၽုင်းၽြႃးပဵၼ်ၸဝ်ႈတႃႉႁဝ်း။ မၼ်းၸဝ်ႈၸၢင်ႈႁဵတ်းႁႂ်ႈတၢင်းယုမ်ႇမၢတ်ႈသူမၼ်ႈၶိူင်ႇၸွမ်းၼင်ႇၶၢဝ်ႇတြႃးသိူဝ်းပျေႃႇ ၸဝ်ႈယေႇသုၶရိၸ်ႈ၊ ဢၼ်ၵဝ်ႁေႃးလၢတ်ႈယူႇၼၼ်ႉ၊ဢိၵ်ႇတင်းၸွမ်းၼင်ႇၵျေးၸူးတၢင်းဢၼ်ၽုၺ်ႇၼႄသမ်ႇမႃႇတြႃးဢၼ်လိုၵ်ႉဢၼ်လမ်ႇဢၼ်သိူင်ႇဝႆႉလပ်ႉဝႆႉၸဵမ်မိူဝ်ႈၵၢပ်ႈၵႃႇလႃႉဢွၼ်တၢင်းၼၼ်ႉဢေႃႈ။-
မိူဝ်ႈလဵဝ်ၼႆႉ သမ်ႇမႃႇတြႃးၼၼ်ႉလႆႈပေႃႇဢွၵ်ႇထၢင်ႇသႃးမႃးၼႂ်းၵျၢမ်းလိၵ်ႈဢၼ်ပရေႃးၽႅတ်ႈ ၶဝ်တႅမ်ႈဝႆႉၵွပ်ႈပိူဝ်ႈထႃႇဝရႃႉၽြႃးပဵၼ်ၸဝ်ႈမီးဢမိင်ႉႁႂ်ႈၵူၼ်းမဵဝ်းတင်းသဵင်ႈတင်းလူင်လႆႈႁုလႄႈႁႂ်ႈၶဝ်တင်းသဵင်ႈတၵ်းယုမ်ႇမၢတ်ႈထွမ်ႇဢဝ်ၵႂၢမ်းမၼ်းၸဝ်ႈၼၼ်ႉဢေႃႈ။
ၵွပ်ႈလူၺ်ႈ ၸဝ်ႈယေႇသုၶရိၸ်ႈ၊ လႄႈႁႂ်ႈၽြႃးပဵၼ်ၸဝ်ႈဢၼ်ပဵၼ်သူႇလဵဝ်ၽြႃး၊ဢၼ်ပျေႉၸုမ်ႇတင်းပိင်ႇၺႃႇၼၼ်ႉမီးမုၼ်ၽုင်းယႂ်ႇၼႃႇၵူႈၵၢပ်ႈၵမ်ႇၽႃႇသိုပ်ႇသိုပ်ႇတၢမ်တၢမ်သေၵမ်းလူၺ်ႈ။ ဢႃမိၼ်ႈ။ (လိၵ်ႈတြႃးရူဝ်းမႃႉယဝ်ႉယဝ်ႉဢေႃႈ)
ၵဝ် ပေႃးလု၊ ဢၼ်ၸွမ်းၼင်ႇဢလူဝ်ႇၽြႃးပဵၼ်ၸဝ်ႈလႄႈလႆႈၶၢမ်ႇႁွင်ႉဢဝ်ဝႆႉၼႂ်းဢရႃႇတမၢၼ်ႇ ၸဝ်ႈယေႇသုၶရိၸ်ႈ၊ ဢိၵ်ႇတင်းၼွင်ႉႁဝ်း သုတ်ႉသိၼ်ႇ၊ ၼႆႉ။
မီးလိၵ်ႈတႅမ်ႈထိုင်ၸိူဝ်းၸဝ်ႈၽြႃးပဵၼ်ၸဝ်ႈ၊ဢၼ်မီးယူႇၵႃႈၼႂ်းဝဵင်း ၵေႃးရိၼ်ႇထု၊ သူၸိူဝ်းဢၼ်လႆႈၶၢမ်ႇတၢင်းဢၼ်ၽြႃးပဵၼ်ၸဝ်ႈႁွင်ႉဢဝ်ႁႂ်ႈလႆႈပဵၼ်ၵူၼ်းမူတ်းၸၢင်ႇမၼ်းၸဝ်ႈ၊ဢၼ်မၼ်းၸဝ်ႈႁဵတ်းႁႂ်ႈပဵၼ်ၵူၼ်းမၼ်းၸဝ်ႈၼႂ်း ၸဝ်ႈယေႇသုၶရိၸ်ႈ၊ ႁူမ်ႈလူၺ်ႈၵၼ်တင်းၵူၼ်းတင်းသဵင်ႈတင်းလူင်ၵူႈတီႈၵူႈလႅၼ်ၸိူဝ်းဢၼ်ၵၢဝ်ႇႁႃႁွင်ႉႁႃၼႃႇမႃႉၸိုဝ်ႈသဵင်ၸဝ်ႈႁဝ်းၶႃႈ ၸဝ်ႈယေႇသုၶရိၸ်ႈ၊ ၸဝ်ႈဢၼ်ပဵၼ်ၸဝ်ႈၶဝ်၊ဢိၵ်ႇတင်းပဵၼ်ၸဝ်ႈႁဝ်းၼၼ်ႉဢေႃႈ။
ၶႅၼ်းတေႃႈႁႂ်ႈပေႃႈၸဝ်ႈႁဝ်းၽြႃးပဵၼ်ၸဝ်ႈ၊ဢိၵ်ႇတင်းၸဝ်ႈၽြႃး ယေႇသုၶရိၸ်ႈ၊ ပၼ်သုၵျေးၸူး၊ဢိၵ်ႇတင်းတၢင်းၼိမ်ၶျၢမ်းသႃႇတီႈသူသေၵမ်းလူၺ်ႈ။
ၵဝ်တၢင်ႇၵျေးၸူးၽြႃးပဵၼ်ၸဝ်ႈပုၼ်ႈသူတႃႇသေႇၵွပ်ႈပိူဝ်ႈသူလႆႈၶၢမ်ႇဢဝ်သုၵျေးၸူးၽြႃးပဵၼ်ၸဝ်ႈဢၼ်ပၼ်တီႈသူၼႂ်း ၸဝ်ႈယေႇသုၶရိၸ်ႈ၊ ၼၼ်ႉဢေႃႈ။-
ၼႂ်း ၸဝ်ႈၶရိၸ်ႈ၊ ၼၼ်ႉသူလႆႈမၢၵ်ႈမီးလူၺ်ႈမၢၵ်ႇသူပ်းမၢၵ်ႇၺၢၼ်ႇၵူႈၸိူဝ်ႉၵူႈပိူင်ၼႂ်းတၢင်းဢၼ်သူၸၢင်ႈႁေႃးၸၢင်ႈလၢတ်ႈ၊ဢိၵ်ႇတင်းၸၢင်ႈမီးပိင်ႇၺႃႇတင်းလၢႆၼၼ်ႉဢေႃႈ။-
မႅၼ်ႈၼင်ႇသၢၵ်ႈသေႇလွင်ႈ ၸဝ်ႈၶရိၸ်ႈ၊ လႆႈတႄႇဝႆႉ၊မၼ်ႈမၼ်ႈၶိူင်ႇၶိူင်ႇၵႃႈၼႂ်းသူသေယဝ်ႉလႄႈ၊-
သူယင်းဢမ်ႇလုတ်ႈဢမ်ႇႁၢမ်းသုၵျေးၸူးမၢင်ႇၵလႃႇၸဝ်ႈသေၸိူဝ်ႉသေပိူင်လႄႈသူယင်းပႂ်ႉမွင်းပႂ်ႉထႃႈတၢင်းဢၼ်ၸဝ်ႈႁဝ်းၶႃႈ ၸဝ်ႈယေႇသုၶရိၸ်ႈ၊ တၵ်းထၢင်ႇသႃးၵျွလူင်းမႃးထႅင်ႈၼၼ်ႉဢေႃႈ။-
မၼ်းၸဝ်ႈတၵ်းပႂ်ႉလူပႂ်ႉတူၺ်းသူႁႂ်ႈမၼ်ႈၶိူင်ႇတေႃႇထိုင်တီႈသုတ်းတီႈၵွႆလႄႈတၵ်းႁႂ်ႈသူလႆႈၵၢင်းလွတ်ႈတင်းဢပျတ်ႈၼႂ်းမိုဝ်ႉဝၼ်းဢၼ်ၸဝ်ႈႁဝ်း ၸဝ်ႈယေႇသုၶရိၸ်ႈ၊ တၵ်းၸီႇယၢင်ႇတြႃးၼၼ်ႉဢေႃႈ။-
ၽြႃးပဵၼ်ၸဝ်ႈဢၼ်သိုဝ်ႈတေႃႇႁွင်ႉဢဝ်သူ ႁႂ်ႈလႆႈသိူၵ်ႈသမ်ႇၵၼ်တင်းလုၵ်ႈမၼ်းၸဝ်ႈ ၸဝ်ႈယေႇသုၶရိၸ်ႈ၊ ဢၼ်ပဵၼ်ၸဝ်ႈႁဝ်းၼၼ်ႉဢေႃႈ။
ပီႈၼွင်ႉၶဝ်႟။ ၵဝ်တွင်းပၢၼ်ႇသူၼႂ်းၼႃႇမႃႉၸိုဝ်ႈသဵင်ၸဝ်ႈႁဝ်း ယေႇသုၶရိၸ်ႈ၊ ႁႂ်ႈသူၵူႈၵေႃႉၽွမ်ႉသဵင်ပဵင်းပၢၵ်ႇၵၼ်လႄႈယႃႇပေႁႂ်ႈမီးၸႂ်ဢၼ်တႅၵ်ႇၽႄၵၼ်ၼႂ်းသူၼၼ်ႉဢေႃႈ။ ပိူဝ်ႈၼႆလႄႈၼႂ်းတၢင်းဢၼ်ၵျၢမ်ႇပွင်သၢင်ႈႁဵတ်းၵူႈလွင်ႈ၊ဢိၵ်ႇတင်းတၢင်းဢၼ်တႅပ်းတတ်းၼၼ်ႉႁႂ်ႈပဵၼ်ၸႂ်ဢၼ်လဵဝ်ၵၼ်တႃႉ။-
ၵွပ်ႈၸိူဝ်ႉႁိုဝ်လႄႈဝႃႈၸမ်ႉ၊ပီႈၼွင်ႉၶဝ်႟။ လွင်ႈဢၼ်သူတွပ်ႇထဵင်ၵၼ်ၽိတ်းၵၼ်ၼၼ်ႉ ၼႂ်းၵူၼ်းႁိူၼ်းၼၢင်း ၶလေႃးဢေး၊ ၶဝ်ၵမ်ႈၽွင်ႈမွၵ်ႇလၢတ်ႈထိုင်တီႈၵဝ်ယဝ်ႉဢေႃႈ။-
ဢၼ်ၵဝ်ၶႂ်ႈဝႃႈၼႆႉ၊သူၵေႃႉၼိုင်ႈလႄႈၵေႃႉၼိုင်ႈလၢတ်ႈၵႂၢမ်းၶတ်းၵၼ်ယူႇဢေႃႈ။ ၼႂ်းသူၵမ်ႈၽွင်ႈဝႃႈ၊ “ၵဝ်ပဵၼ်တပႄးသြႃႇ ပေႃးလု၊ ဢေႃႈ၊” ဝႃႈၼႆ၊ၵမ်ႈၽွင်ႈဝႃႈ၊ “ၵဝ်ပဵၼ်တပႄးသြႃႇ ဢႃႇပေႃးလု၊ ဢေႃႈ၊” ဝႃႈၼႆ၊ၵမ်ႈၽွင်ႈဝႃႈ၊ “ၵဝ်ပဵၼ်တပႄးသြႃႇ ၵႄးၽႃႉ၊ ဢေႃႈ၊” ဝႃႈၼႆလႄႈ၊ၵမ်ႈၽွင်ႈဝႃႈ၊ “ၵဝ်ပဵၼ်တပႄး ၸဝ်ႈၶရိၸ်ႈ၊ ဢေႃႈ၊” ဝႃႈၼင်ႇၼႆတွပ်ႇထဵင်ၵၼ်ယူႇဢေႃႈ။-
ပေႃးပဵၼ်ၸိူဝ်ႉၼင်ႇၼႆၸိုင်၊သူႁႂ်ႈ ၸဝ်ႈၶရိၸ်ႈ၊ လႆႈၶၢမ်ႇတၢင်းဢၼ်တႅပ်းမႅင်ႇပဵၼ်လၢႆပွတ်းပဵၼ်လၢႆမူႇလၢႆၸုမ်းၵႂႃႇယဝ်ႉဢေႃႈ။ ၸွင်ႇသြႃႇ ပေႃးလု၊ ၶၢမ်ႇတွၵ်ႇတၢႆၵႃႈၼိူဝ်သဝ်မႆႉဝႃးမိုဝ်းပုၼ်ႈသူႁိုဝ်း။ သူၶၢမ်ႇဢဝ်မၢင်ႇၵလႃႇပပ်ႉတိၸမ်ႇ ႁႂ်ႈလႆႈပဵၼ်တပႄးသြႃႇ ပေႃးလု၊ ႁိုဝ်း။
လိူဝ်သေ ၵရိပု၊ တင်း ၵႃႇယု၊ ၼၼ်ႉပိူဝ်ႈဢၼ်ၵဝ်ဢမ်ႇလႆႈပၼ်မၢင်ႇၵလႃႇပပ်ႉတိၸမ်ႇတီႈသူသေၵေႃႉသေၵူၼ်းၼၼ်ႉလႄႈၵဝ်တၢင်ႇၵျေးၸူးၽြႃးပဵၼ်ၸဝ်ႈဢေႃႈ။-
ပိူဝ်ႈၼႆလႄႈသူၽူႈလႂ်ၵေႃႈ ဢမ်ႇၸၢင်ႈလၢတ်ႈဝႃႈ၊သူလႆႈၶၢမ်ႇဢဝ်မၢင်ႇၵလႃႇပပ်ႉတိၸမ်ႇႁႂ်ႈပဵၼ်တပႄးၵဝ်ဢေႃႈ။-
(ဢူဝ်းၸႂ်ႈယဝ်ႉ။ ၵဝ်ယင်းလႆႈပၼ်မၢင်ႇၵလႃႇပပ်ႉတိၸမ်ႇတီႈ သထေႇၽၢၼ်ႇ၊ ဢိၵ်ႇတင်းၵူၼ်းႁိူၼ်းၵူၼ်းယေးမၼ်းဢေႃႈ။ လိူဝ်သေၼၼ်ႉၵဝ်ဢမ်ႇထၢင်ႇၵဝ်လႆႈပၼ်မၢင်ႇၵလႃႇပပ်ႉတိၸမ်ႇတီႈၽူႈလႂ်သေၵေႃႉသေၵူၼ်းဢေႃႈ။-)
ၸဝ်ႈၶရိၸ်ႈ၊ ပွႆႇၸႂ်ႉၵဝ်ၵႂႃႇႁႂ်ႈလႆႈပၼ်မၢင်ႇၵလႃႇပပ်ႉတိၸမ်ႇဢမ်ႇၸႂ်ႈလႄႈမၼ်းၸဝ်ႈပွႆႇၸႂ်ႉၵဝ်ၵႂႃႇႁႂ်ႈလႆႈႁေႃးလၢတ်ႈၶၢဝ်ႇတြႃးသိူဝ်းပျေႃႇၸဝ်ႈၵူၺ်းဢေႃႈ။ ၼႂ်းတၢင်းဢၼ်ၵဝ်ႁေႃးလၢတ်ႈၼၼ်ႉၵဝ်ယင်းဢမ်ႇဢဝ်ၵႂၢမ်းပိင်ႇၺႃႇလေႃးၵီႇလႄႈလၢတ်ႈ၊ၼင်ႇႁိုဝ်တၼ်းၶူဝ်းတၢင်းဢၼ် ၸဝ်ႈၶရိၸ်ႈ၊ ၶၢမ်ႇတၢႆၵႃႈၼိူဝ်သဝ်မႆႉဝႃးမိုဝ်းၼၼ်ႉတၵ်းဢမ်ႇသုတ်ႉယွမ်းၼၼ်ႉဢေႃႈ။
ၶၢဝ်ႇငၢဝ်းတြႃးတၢင်းဢၼ် ၸဝ်ႈၶရိၸ်ႈ၊ လႆႈၶၢမ်ႇတၢႆၵႃႈၼိူဝ်သဝ်မႆႉဝႃးမိုဝ်းၼၼ်ႉပဵၼ်ၵႂၢမ်းၽၢင်းၵႂၢမ်းငိူဝ်ႈပုၼ်ႈတႃႇၵူၼ်းၸိူဝ်းဢၼ်ပႆၸွမ်းသဵၼ်ႈတၢင်းဢၼ်ၵႂႃႇႁွတ်ႈထိုင်တၢင်းဢၼ်လုလႅဝ်ၼၼ်ႉသေၵေႃႈ၊ပုၼ်ႈတႃႇႁဝ်းၸိူဝ်းဢၼ်ပႆၸွမ်းသဵၼ်ႈတၢင်းဢၼ်ၵႂႃႇႁွတ်ႈထိုင်တၢင်းဢၼ်ၸဝ်ႈၽြႃးၵႄႇၶျွတ်ႈဢဝ်ၼႆႉၸမ်ႉ၊ႁုဝႃႈၶၢဝ်ႇငၢဝ်းတြႃးၼၼ်ႉပဵၼ်တြႃးဢၼ်ၼႄပျႃးတၼ်းၶူဝ်းၽြႃးပဵၼ်ၸဝ်ႈဢေႃႈ။-
မၼ်းပဵၼ်ၸွမ်းၼင်ႇၼႂ်းၵျၢမ်းလိၵ်ႈတႅမ်ႈဝႆႉဝႃႈ၊ “ၸဝ်ႈၽြႃးလၢတ်ႈဝႃႈ၊ ‘ၵဝ်တၵ်းယႃႉပႅတ်ႈပိင်ႇၺႃႇၶဝ်ၸိူဝ်းဢၼ်မီးပိင်ႇၺႃႇၼၼ်ႉလႄႈ ၵဝ်တၵ်းႁႂ်ႈတၢင်းႁုတၢင်းႁၼ်ၵူၼ်းလၵ်းၵူၼ်းလႅမ်ၶဝ်ဝွတ်ႈႁၢႆၵႂႃႇဢေႃႈ၊’ ” ဝႃႈၼင်ႇၼႆဢေႃႈ။
ပေႃးပဵၼ်ၸိူဝ်ႉၼင်ႇၼႆၸိုင်၊ၵူၼ်းမီးပိင်ႇၺႃႇၶဝ်ၸၢင်ႈႁဵတ်းႁိုဝ်။ သြႃႇမေႃၵျၢမ်းထမ်ႇမႃႉၶဝ်ၸၢင်ႈႁဵတ်းႁိုဝ်။ သြႃႇမေႃၵႂၢမ်းဢၼ်ၸၢင်ႈၵႄႈလိတ်ႈၵႂၢမ်းယၢပ်ႇၼႂ်းလေႃးၵႃႉၼႆႉၵေႃႈ၊ၶဝ်ၸၢင်ႈႁဵတ်းႁိုဝ်။ ၽြႃးပဵၼ်ၸဝ်ႈႁဵတ်းႁႂ်ႈပိင်ႇၺႃႇလေႃးၵီႇၼႆႉဢမ်ႇလၵ်းဢမ်ႇလႅမ်ယဝ်ႉဢေႃႈ။
လွင်ႈမၼ်းၸမ်ႉ၊ၽြႃးပဵၼ်ၸဝ်ႈဢဝ်ပိင်ႇၺႃႇမၼ်းၸဝ်ႈၼၼ်ႉလႄႈႁဵတ်းႁႂ်ႈၵူၼ်းတင်းသဵင်ႈတင်းလူင်ဢမ်ႇၸၢင်ႈဢိင်ပိုင်ႈပိင်ႇၺႃႇတူဝ်ၸဝ်ႈၵဝ်ႇလႄႈႁုၸၵ်းမၼ်းၸဝ်ႈဢေႃႈ။ ပိူဝ်ႈၼႆလႄႈမၼ်းၸဝ်ႈၸင်ႇမီးၸႂ်ၸေႇတၼႃႇႁႂ်ႈလႆႈၵႄႇၶျွတ်ႈဢဝ်ၶဝ်ၸိူဝ်းဢၼ်ယုမ်ႇမၢတ်ႈၼႂ်းၶၢဝ်ႇငၢဝ်းတြႃးဢၼ်ႁဝ်းႁေႃးလၢတ်ႈယူႇ၊ဢၼ်ၵူၼ်းတင်းလၢႆထၢင်ႇဝႃႈ၊ပဵၼ်ၵႂၢမ်းၽၢင်းၵႂၢမ်းငိူဝ်ႈၼၼ်ႉဢေႃႈ။-
ၵူၼ်းမဵဝ်း ၵျူး၊ ၶဝ်မီးဢလူဝ်ႇၶႂ်ႈႁၼ်ၼိမိၵ်ႈလၢၵ်ႈၶၼႃႇလႄႈၵူၼ်းမဵဝ်း ၵရိၵ်ႉ၊ ၶဝ်ၸမ်ႉ၊မီးၸႂ်ဢၼ်ၶႂ်ႈလႆႈပိင်ႇၺႃႇဢေႃႈ။-
ႁဝ်းၸမ်ႉ၊ႁေႃးလၢတ်ႈတြႃး ၸဝ်ႈၶရိၸ်ႈ၊ ဢၼ်လႆႈၶၢမ်ႇတၢႆၵႃႈၼိူဝ်သဝ်မႆႉဝႃးမိုဝ်း၊တြႃးဢၼ်ႁဵတ်းႁႂ်ႈၵူၼ်းမဵဝ်း ၵျူး၊ ၶဝ်ၶီႈလိုတ်းလႄႈႁဵတ်းႁႂ်ႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၶဝ်ထၢင်ႇဝႃႈ၊မၼ်းပဵၼ်ၵႂၢမ်းၽၢင်းၵႂၢမ်းငိူဝ်ႈဢေႃႈ။-
ၵူၺ်းၵႃႈ၊ပုၼ်ႈတႃႇၶဝ်ၸႃႉၸဵမ်ၵူၼ်းမဵဝ်း ၵျူး၊ တင်းၵူၼ်းမဵဝ်း ၵရိၵ်ႉ၊ ၸိူဝ်းဢၼ်ၽြႃးပဵၼ်ၸဝ်ႈႁွင်ႉဢဝ်ဝႆႉၸိူဝ်းၼၼ်ႉၸမ်ႉ၊မၼ်းပဵၼ်တြႃး ၸဝ်ႈၶရိၸ်ႈ၊ ၸဝ်ႈဢၼ်ပဵၼ်တၼ်းၶူဝ်းၽြႃးပဵၼ်ၸဝ်ႈတင်းပိင်ႇၺႃႇၽြႃးပဵၼ်ၸဝ်ႈၼၼ်ႉဢေႃႈ။-
လွင်ႈမၼ်းၸမ်ႉ၊တၢင်းငိူဝ်ႈၽြႃးပဵၼ်ၸဝ်ႈၼၼ်ႉမီးပိင်ႇၺႃႇယႂ်ႇၼမ်သေၵူၼ်းလႄႈတၢင်းဢၼ်ႁႅင်းလဵၵ်ႉႁႅင်းၵေႇၽြႃးပဵၼ်ၸဝ်ႈၼၼ်ႉ၊ယင်းႁႅင်းယႂ်ႇသေႁႅင်းၵူၼ်းဢေႃႈ။
ပီႈၼွင်ႉၶဝ်႟။ ၶႆႈၸႂ်တူၺ်းတူဝ်ၸဝ်ႈၵဝ်ႇလွင်ႈဢၼ်သူပဵၼ်ၵူၼ်းၸိူဝ်ႉႁိုဝ်မိူဝ်ႈဢၼ်ၽြႃးပဵၼ်ၸဝ်ႈႁွင်ႉဢဝ်သူၼၼ်ႉတႃႉ။ ၼႂ်းသူၼႆႉပေႃးဢဝ်တင်းတႃၵူၼ်းလေႃးၵီႇတူၺ်းၸိုင်၊ၵူၼ်းဢၼ်မီးပိင်ႇၺႃႇ၊ၵူၼ်းဢၼ်မီးဢႃႇၼႃႇတၼ်းၶူဝ်း၊ၵူၼ်းဢၼ်ၸိူဝ်ႉယႂ်ႇၶိူဝ်းလူင်ၸိူဝ်းၼႆႉဢမ်ႇပေႃးမီးၼမ်ၵႃႈႁိုဝ်။-
ၼႂ်းဝႃႈၼၼ်သေၵေႃႈ၊ၽြႃးပဵၼ်ၸဝ်ႈလိူၵ်ႈၵဵပ်းဢဝ်ၶဝ်ၸိူဝ်းဢၼ်ၵူၼ်းလေႃးၵီႇၶဝ်ထၢင်ႇဝႃႈ၊ငိူဝ်ႈငႃႉၼၼ်ႉသေလႄႈႁဵတ်းႁႂ်ႈၵူၼ်းမီးပိင်ႇၺႃႇၶဝ်လႆႈဢူၵ်းလႆႈဢၢႆဢေႃႈ။ မၼ်းၸဝ်ႈလိူၵ်ႈၵဵပ်းဢဝ်ၶဝ်ၸိူဝ်းဢၼ်ၵူၼ်းလေႃးၵီႇၶဝ်ထၢင်ႇဝႃႈ၊ႁႅင်းဢူၼ်ႈၼၼ်ႉသေလႄႈႁဵတ်းႁႂ်ႈၵူၼ်းႁႅင်းယႂ်ႇၶဝ်လႆႈဢူၵ်းလႆႈဢၢႆဢေႃႈ။-
မၼ်းၸဝ်ႈလိူၵ်ႈၵဵပ်းဢဝ်ၶဝ်ၸိူဝ်းဢၼ်ၵူၼ်းလေႃးၵီႇၶဝ်ထၢင်ႇလဵၵ်ႉလႄႈငိၼ်းၸင်းၶၢၼ်ႉႁၼ်၊ဢိၵ်ႇတင်းၶဝ်ၸိူဝ်းဢၼ်ပိူၼ်ႈထၢင်ႇဝႃႈ၊ၵူၼ်းဢၼ်ဢမ်ႇလႆႈလွင်ႈၵႃႈသင်ၼၼ်ႉသေလႄႈ ယႃႉပႅတ်ႈၶဝ်ၸိူဝ်းဢၼ်ၼႃႈယႂ်ႇတႃလူင်တင်းလၢႆဢေႃႈ။-
လွင်ႈတၢင်းၸိူဝ်းၼႆႉပဵၼ်မႃးၼၼ်ႉ၊ပုၼ်ႈလွင်ႈၼင်ႇႁိုဝ်ၽူႈလႂ်ၵေႃႈ ဢမ်ႇၸၢင်ႈမီးႁူဝ်ၸႂ်ၽႅၼ်သုင်ၽၢႆႇၼႃႈၽြႃးပဵၼ်ၸဝ်ႈသေၵေႃႉသေၵူၼ်းၼၼ်ႉဢေႃႈ။-
ၽြႃးပဵၼ်ၸဝ်ႈတႄႇယူႇၼႂ်း ၸဝ်ႈယေႇသုၶရိၸ်ႈ၊ သေလႄႈႁႂ်ႈ ၸဝ်ႈၶရိၸ်ႈ၊ ပဵၼ်ၸဝ်ႈပိင်ႇၺႃႇလႄႈပဵၼ်တၢင်းသိုဝ်ႈတေႃႇပုၼ်းႁဝ်းလႄႈႁႂ်ႈႁဝ်းပဵၼ်ၵူၼ်းမူတ်းၸၢင်ႇ၊ဢိၵ်ႇတင်းထႆႇဢဝ်ႁဝ်းဝႆႉ၊ႁႂ်ႈပူၼ်ႉလွတ်ႈသေဝူတ်ႈဢပျတ်ႈဢေႃႈ။-
ပိူဝ်ႈၼႆလႄႈ၊ၼႂ်းၵျၢမ်းလိၵ်ႈၸင်ႇတႅမ်ႈဝႆႉဝႃႈ၊ “ႁႂ်ႈၵေႃႉဢၼ်ဢုပ်ႇဝၢဝ်းတူဝ်ၸဝ်ႈၵဝ်ႇၼၼ်ႉ၊ဢုပ်ႇဝၢဝ်းၼႂ်းၸဝ်ႈထႃႇဝရႃႉၽြႃးၵူၺ်းသေၵမ်းလူၺ်ႈ၊” ဝႃႈၼင်ႇၼႆဢေႃႈ။
ပီႈၼွင်ႉၶဝ်႟။ မိူဝ်ႈဢၼ်ၵဝ်မႃးၸူးသူလႄႈႁေႃးလၢတ်ႈတြႃး၊ၽြႃးပဵၼ်ၸဝ်ႈဢၼ်လိုၵ်ႉဢၼ်လမ်ႇၼၼ်ႉၸိုင်၊ၵဝ်ယင်းဢမ်ႇဢဝ်ၵႂၢမ်းပိင်ႇၺႃႇဢၼ်ၶိုၵ်ႉ၊ဢိၵ်ႇတင်းၵႂၢမ်းဢၼ်သုင်ဢၼ်ယႂ်ႇသေလႄႈသင်ႇသွၼ်ပၼ်ဢေႃႈ။-
ယၢမ်းမိူဝ်ႈဢၼ်ၵဝ်မီးယူႇလူၺ်ႈတင်းသူၼၼ်ႉ ၵဝ်ဝႆႉၸႂ်ဝႃႈ၊ၵဝ်ဢမ်ႇႁုၵႃႈသင်၊လိူဝ်သေလွင်ႈ ၸဝ်ႈယေႇသုၶရိၸ်ႈ၊ ဢိၵ်ႇတင်းလွင်ႈဢၼ်မၼ်းၸဝ်ႈလႆႈၶၢမ်ႇတွၵ်ႇတၢႆၵႃႈၼိူဝ်သဝ်မႆႉဝႃးမိုဝ်းၼၼ်ႉၵူၺ်းဢေႃႈ။-
ပိူဝ်ႈၼႆလႄႈမိူဝ်ႈဢၼ်ၵဝ်မႃးၸူးသူၼၼ်ႉ၊တူဝ်ၵႃႇယႃႉၵဝ်ႁႅင်းဢူၼ်ႈသေၵူဝ်ႁႄသၼ်ႇဝႆၼႃႇလႄႈ၊-
ၵႂၢမ်းၵဝ်ဢိၵ်ႇတင်းတြႃးဢၼ်ၵဝ်ႁေႃးၼၼ်ႉ ဢမ်ႇပႃးၼမ်ႉၵႂၢမ်းဢၼ်ၵတ်ႉဢၼ်ၶၼ်ၼႂ်းပိင်ႇၺႃႇၵူၼ်း။ ၵူၺ်းၵႃႈ၊ၵႂၢမ်းၵဝ်ၼၼ်ႉၽုၺ်ႇၼႄတၼ်းၶူဝ်းဝိၺိၺ်ႇၽြႃးပဵၼ်ၸဝ်ႈထၢင်ႇထၢင်ႇသႃးသႃးဢေႃႈ။-
ပိူဝ်ႈၼႆလႄႈႁႂ်ႈတၢင်းယုမ်ႇမၢတ်ႈသူတႄႇယူႇၼႂ်းပိင်ႇၺႃႇၵူၼ်းဢမ်ႇၸႂ်ႈ၊တႄႇယူႇၼႂ်းတၼ်းၶူဝ်းၽြႃးပဵၼ်ၸဝ်ႈဢေႃႈ။
တီႈၶဝ်ၸိူဝ်းဢၼ်မီးၸႂ်ဝိၺိၺ်ႇထူၼ်ႈၵႄႇၼၼ်ႉၵႂၢမ်းဢၼ်ၵဝ်ႁေႃးလၢတ်ႈၼၼ်ႉပဵၼ်ပိင်ႇၺႃႇဢေႃႈ။ ၵူၺ်းၵႃႈ၊ပိင်ႇၺႃႇၼၼ်ႉဢမ်ႇၸႂ်ႈပိင်ႇၺႃႇၵူၼ်းလေႃးၵီႇ၊ပိင်ႇၺႃႇတၼ်းၶူဝ်းဢၼ်ဢုပ်ႉပိူင်ႇလေႃးၵႃႉဢၼ်ၸၢင်ႈၽူင်ႉယၢႆႈႁၢႆၵႂႃႇၼၼ်ႉၵေႃႈဢမ်ႇၸႂ်ႈဢေႃႈ။-
ၵဝ်ႁေႃးလၢတ်ႈပိင်ႇၺႃႇၽြႃးပဵၼ်ၸဝ်ႈဢၼ်လိုၵ်ႉဢၼ်လမ်ႇ၊ဢၼ်သိူင်ႇဝႆႉလပ်ႉဝႆႉၵႃႈတီႈၵူၼ်းလႄႈပဵၼ်ပိင်ႇၺႃႇဢၼ်ၽြႃးပဵၼ်ၸဝ်ႈမၵ်းၶၢၼ်းဝႆႉ၊ပုၼ်ႈမုၼ်ၽုင်းသရေႇႁဝ်းၸဵမ်မိူဝ်ႈၵမ်ႇၽႃႇလိၼ်မိူင်းယင်းဢမ်ႇပႆႇတႄႇပဵၼ်မႃးၼၼ်ႉယဝ်ႉဢေႃႈ။-
ၶုၼ်လေႃးၵီႇတင်းလၢႆဢမ်ႇႁုပိင်ႇၺႃႇၼၼ်ႉသေၸဝ်ႈသေပႃး။ ပေႃးၶဝ်ႁုၸိုင်၊ၶဝ်တၵ်းဢမ်ႇဢဝ် ၸဝ်ႈယေႇသု၊ ၸဝ်ႈဢၼ်မီးမုၼ်ၽုင်းၼၼ်ႉတွၵ်ႇတၢႆၵႃႈၼိူဝ်သဝ်မႆႉဝႃးမိုဝ်းယဝ်ႉ။-
မၼ်းမႅၼ်ႈၸွမ်းၼႂ်းၵျၢမ်းလိၵ်ႈဢၼ်တႅမ်ႈဝႆႉၼၼ်ႉလႄႈဝႃႈ၊ “မဵဝ်းဢၼ်ၵူၼ်းဢမ်ႇတွၼ်ႉႁၼ်တွၼ်ႉငိၼ်း၊ မဵဝ်းဢၼ်ၵူၼ်းၸဵၼ်းၸႃးၶႆႈၸႂ်ဢမ်ႇၶိုတ်းထိုင်ၼၼ်ႉ၊ ၽြႃးပဵၼ်ၸဝ်ႈမႄးႁႅၼ်းဝႆႉပုၼ်ႈၶဝ်ၸိူဝ်းဢၼ်ႁၵ်ႉမၼ်းၸဝ်ႈၼၼ်ႉဢေႃႈ၊” ဝႃႈၼင်ႇၼႆၼၼ်ႉဢေႃႈ။-
ၵူၺ်းၵႃႈ၊ၵႃႈတီႈႁဝ်းၼႆႉၽြႃးပဵၼ်ၸဝ်ႈဢဝ်ဝိၺိၺ်ႇၸဝ်ႈၼႄပျႃးလွင်ႈဢၼ်လိုၵ်ႉဢၼ်လမ်ႇမၼ်းၸဝ်ႈဢေႃႈ။ လွင်ႈမၼ်းၸမ်ႉ၊ဝိၺိၺ်ႇၸဝ်ႈၸႅတ်ႈတူၺ်းၵူႈလွင်ႈၵူႈတၢင်းၸႃႉၸဵမ်တၢင်းၵျၢမ်ႇတၢင်းပွင်ၽြႃးပဵၼ်ၸဝ်ႈဢၼ်လိုၵ်ႉဢၼ်လမ်ႇၼၼ်ႉဢေႃႈ။-
လိူဝ်သေၸႂ်ဝိၺိၺ်ႇၵူၼ်းဢၼ်မီးၼႂ်းတူဝ်ၸဝ်ႈၵဝ်ႇၼၼ်ႉလႄႈၽူႈလႂ်ဢမ်ႇၸၢင်ႈႁုၸႂ်ၵူၼ်းလႆႈ။ ၼႄးလဵဝ်ၵၼ်လိူဝ်သေဝိၺိၺ်ႇၽြႃးပဵၼ်ၸဝ်ႈၼၼ်ႉ ၽူႈလႂ်ၵေႃႈဢမ်ႇၸၢင်ႈႁုၸႂ်ၽြႃးပဵၼ်ၸဝ်ႈလႆႈဢေႃႈ။-
ၵွပ်ႈပိူဝ်ႈၸိူဝ်ႉၼင်ႇၼႆလႄႈတၢင်းဢၼ်ႁဝ်းႁုသုၵျေးၸူးၸဝ်ႈၵႃႈဢၼ်ၽြႃးပဵၼ်ၸဝ်ႈသွၼ်းလေႃႇပၼ်ႁဝ်းၼၼ်ႉ၊ႁဝ်းႁုၵွပ်ႈပိူဝ်ႈႁဝ်းလႆႈႁပ်ႉတုင်းဢဝ်ၸႂ်ဝိၺိၺ်ႇၵူၼ်းလေႃးၵီႇဢမ်ႇၸႂ်ႈလႄႈႁဝ်းႁုၵွပ်ႈပိူဝ်ႈႁဝ်းလႆႈႁပ်ႉတုင်းဢဝ်ဝိၺိၺ်ႇဢၼ်ၽြႃးပဵၼ်ၸဝ်ႈပွႆႇၸႂ်ႉလူင်းမႃးၼၼ်ႉဢေႃႈ။
ပိူဝ်ႈၼႆလႄႈႁဝ်းဢမ်ႇႁေႃးလၢတ်ႈၵႂၢမ်းဢၼ်ဢဝ်တင်းပိင်ႇၺႃႇၵူၼ်းသင်ႇသွၼ်ပၼ်ၼၼ်ႉ။ ႁဝ်းဢဝ်ၵႂၢမ်းဢၼ်ဝိၺိၺ်ႇၸဝ်ႈသွၼ်ပၼ်ၼၼ်ႉႁေႃးလၢတ်ႈတြႃးဢၼ်ၸၢပ်ႈသႅင်ႇၵၼ်တင်းဝိၺိၺ်ႇၸဝ်ႈတီႈၶဝ်ၸိူဝ်းဢၼ်မီးဝိၺိၺ်ႇၸဝ်ႈၵူၺ်းတၵ်းႁုထွမ်ႇပွင်ႇၸႂ် ၼၼ်ႉဢေႃႈ။-
ၽူႈလႂ်သေဢမ်ႇဝႃႈ၊ၵေႃႉဢၼ်ဢမ်ႇမီးဝိၺိၺ်ႇၸဝ်ႈၵႃႈၼႂ်းမၼ်းၼၼ်ႉၸိုင်၊ဢမ်ႇၸၢင်ႈႁပ်ႉတုင်းဢဝ်သုၵျေးၸူးဢၼ်ဝိၺိၺ်ႇၽြႃးပဵၼ်ၸဝ်ႈပၼ်ၼၼ်ႉလႆႈ။ မၼ်းၸၢင်ႈထၢင်ႇၸိူဝ်းၼၼ်ႉပဵၼ်ဢၼ်ဢမ်ႇမီးဢၵျူဝ်းလႄႈမၼ်းယင်းဢမ်ႇႁုထွမ်ႇပွင်ႇၸႂ် လႆႈ။ ၵွပ်ႈပိူဝ်ႈဢဝ်တင်းတႃဝိၺိၺ်ႇၸဝ်ႈတူၺ်းၵူၺ်းလႄႈၸၢင်ႈထူပ်းႁၼ်ဢေႃႈ။-
ၽူႈလႂ်သေဢမ်ႇဝႃႈ၊ၵေႃႉဢၼ်မီးဝိၺိၺ်ႇၸဝ်ႈၼၼ်ႉၸၢင်ႈၸၵ်းၽႄတႅပ်းတတ်းဢၵျူဝ်းဢပျတ်ႈၵူႈၸိူဝ်ႉၵူႈမဵဝ်းလႆႈ၊ၵူၺ်းၵႃႈ၊ဢမ်ႇမီးၽူႈလႂ်ၸၢင်ႈတႅပ်းတတ်းလွင်ႈမၼ်းလႆႈဢေႃႈ။-
မၼ်းမႅၼ်ႈၸွမ်းၵႃႈၼႂ်းၵျၢမ်းလိၵ်ႈဢၼ်တႅမ်ႈဝႆႉလႄႈဝႃႈ၊ “ၽူႈလႂ်ႁုၸႂ်ၸဝ်ႈၽြႃးလႆႈ။ ၽူႈလႂ်ၸၢင်ႈပၼ်ဢၵျၢမ်ႇမၼ်းၸဝ်ႈလႆႈ၊” ဝႃႈၼင်ႇၼႆၼၼ်ႉဢေႃႈ။ ႁဝ်းၸမ်ႉ၊လႆႈၶၢမ်ႇဢဝ်ၸႂ်သၽေႃး ၸဝ်ႈၶရိၸ်ႈ၊ ယဝ်ႉဢေႃႈ။
ပီႈၼွင်ႉၶဝ်႟။ တၢင်းဢၼ်ၵဝ်ႁေႃးလၢတ်ႈပၼ်သူမႃးၸိူဝ်းၼႆႉၵဝ်ဢမ်ႇၸၢင်ႈလၢတ်ႈတေႃႇသူၸိူဝ်ႉၼင်ႇဢၼ်လၢတ်ႈတေႃႇၶဝ်ၸိူဝ်းဢၼ်မီးဝိၺိၺ်ႇၸဝ်ႈၼၼ်ႉ။ ၵူၺ်းလႆႈလၢတ်ႈၸိူဝ်ႉၼင်ႇဢၼ်လၢတ်ႈတေႃႇၵူၼ်းၸႃႇတိၼိူဝ်ႉလိူတ်ႈ၊ၸိူဝ်ႉၼင်ႇလၢတ်ႈတေႃႇလုၵ်ႈဢွၼ်ႇလႅင်ဢၼ်တိုၵ်ႉၵိူတ်ႇမႃးၼႂ်း ၸဝ်ႈၶရိၸ်ႈ၊ ၼၼ်ႉၵူၺ်းဢေႃႈ။-
ၵွပ်ႈပိူဝ်ႈသူယင်းဢမ်ႇပႆႇၵိုင်ႇပႆႇထိူၵ်ႈၼၼ်ႉလႄႈၵဝ်ယင်းဢမ်ႇလႆႈဢဝ်တၢင်းၵိၼ်ဢၼ်ၵႅၼ်ႇဢၼ်ၶႅင်လဵင်ႉပၼ်သူလႄႈလႆႈဢဝ်ၼမ်ႉၼူမ်းၵူၺ်းလဵင်ႉသူမႃးဢေႃႈ။ တေႃႇႁွတ်ႈမိူဝ်ႈလဵဝ်ၵွပ်ႈပိူဝ်ႈသူယင်းၸွမ်းဢလူဝ်ႇၼိူဝ်ႉလိူတ်ႈယူႇၼၼ်ႉ၊သူယင်းဢမ်ႇပႆႇၵိုင်ႇပႆႇထိူၵ်ႈလူးၵွၼ်ႇဢေႃႈ။-
မိူဝ်ႈဢၼ်သူယင်းသီႈၵေႉႁေႈတႃၵၼ်လႄႈၽိတ်းၵၼ်ယူႇၸိုင်၊သူယင်းတိုၵ်ႉၸွမ်းဢလူဝ်ႇၼိူဝ်ႉလိူတ်ႈလႄႈၵမ်ၵျၢင်ႉမိူၼ်ၵူၼ်းလေႃးၵီႇယူႇဢမ်ႇၸႂ်ႈႁိုဝ်း။-
မိူဝ်ႈဢၼ်သေၵေႃႉၵေႃႉလၢတ်ႈဝႃႈ၊ “ၵဝ်ပဵၼ်တပႄးသြႃႇ ပေႃးလု၊ ဢေႃႈ၊” ဝႃႈၼႆလႄႈ၊တၢင်ႇၵေႃႉသမ်ႉဝႃႈ၊ “ၵဝ်ပဵၼ်တပႄးသြႃႇ ဢႃႇပေႃးလု၊ ဢေႃႈ၊” ဝႃႈၼင်ႇၼႆၸိုင်၊သူၵမ်ၵျၢင်ႉယူႇမိူၼ်ၵူၼ်းလေႃးၵီႇဢမ်ႇၸႂ်ႈႁိုဝ်း။
ပေႃးဝႃႈၼင်ႇၼၼ်ၸိုင်၊သြႃႇ ဢႃႇပေႃးလု၊ ပဵၼ်ၽူႈလႂ်။ သြႃႇ ပေႃးလု၊ ပဵၼ်ၽူႈလႂ်။ ႁဝ်းသွင်ၵေႃႉၼႆႉပဵၼ်ၵူၼ်းၸႂ်ႉၵူၼ်းသွႆၸဝ်ႈၽြႃး၊ဢၼ်မၼ်းၸဝ်ႈၸႂ်ႉမႃးယုမ်ႇမၢတ်ႈမိူၼ်ၵၼ်ၵူၺ်းဢေႃႈ။ ႁဝ်းတင်းသွင်ၵေႃႉႁဵတ်းၼႃႈၵၢၼ်ဢၼ်ၽြႃးပဵၼ်ၸဝ်ႈဢၢပ်ႈပၼ်ဝႆႉႁင်းၽႂ်ႁင်းမၼ်းဢေႃႈ။-
ၵဝ်ၽုၵ်ႇၸိူဝ်ႉၽၼ်းလႄႈသြႃႇ ဢႃႇပေႃးလု၊ ႁူတ်းၼမ်ႉပၼ်ဢေႃႈ။ ၽြႃးပဵၼ်ၸဝ်ႈၸမ်ႉ၊ပဵၼ်ၵေႃႉဢၼ်ႁဵတ်းႁႂ်ႈတူၼ်ႈၼၼ်ႉယႂ်ႇမႃးဢေႃႈ။-
ၵေႃႉဢၼ်ၽုၵ်ႇ၊ဢိၵ်ႇတင်းၵေႃႉဢၼ်ႁူတ်းၼမ်ႉၼၼ်ႉဢမ်ႇပေႃးၶိုၵ်ႉၶမ်ႇလမ်ႇလွင်ႈ။ ၽြႃးပဵၼ်ၸဝ်ႈ၊ၸဝ်ႈဢၼ်ႁဵတ်းႁႂ်ႈတူၼ်ႈယႂ်ႇမႃးၼၼ်ႉၵူၺ်းၶိုၵ်ႉၶမ်ႇလမ်ႇလွင်ႈဢေႃႈ။-
ၵေႃႉဢၼ်ၽုၵ်ႇ၊ဢိၵ်ႇတင်းၵေႃႉဢၼ်ႁူတ်းၼမ်ႉၼၼ်ႉၽဵင်ႇပဵင်းၵၼ်ဝႆႉလႄႈၽြႃးပဵၼ်ၸဝ်ႈတၵ်းတွပ်ႇတႅၼ်းပၼ်ၵႃႈၶၼ်ၸွမ်းၼင်ႇၼႃႈၵၢၼ်ဢၼ်ၶဝ်ႁဵတ်းႁင်းၽႂ်ႁင်းမၼ်းၼၼ်ႉဢေႃႈ။-
ႁဝ်းသွင်ၵေႃႉၼႆႉပဵၼ်ၵူၼ်းႁဵတ်းၵၢၼ်ႁူမ်ႈပွင်းၵၼ်ပုၼ်ႈၽြႃးပဵၼ်ၸဝ်ႈလႄႈသူပဵၼ်သူၼ်ဢူးယဵၼ်ႇၽြႃးပဵၼ်ၸဝ်ႈဢေႃႈ။ ထႅင်ႈလၢႆးၼိုင်ႈၸမ်ႉ၊သူပဵၼ်တိူၵ်ႈၵျွင်းၽြႃးပဵၼ်ၸဝ်ႈဢေႃႈ။-
ၵဝ်ဢဝ်ႁႅင်းၵျေးၸူးဢၼ်ၽြႃးပဵၼ်ၸဝ်ႈပၼ်ၼၼ်ႉသေလႄႈႁဵတ်းၵၢၼ်ပဵၼ်ၸၢင်ႈမႆႉလူင်ဢၼ်ၵတ်ႉဢၼ်ၶႅၼ်ႇလႄႈၶျႃးငဝ်ႈႁၢၵ်ႈတိူၵ်ႈၵျွင်းယဝ်ႉၸင်ႇ၊ၵူၼ်းတၢင်ႇၵေႃႉသမ်ႉထၢပ်ႈၵေႃႇႁဵတ်းယူႇၼိူဝ်ငဝ်ႈႁၢၵ်ႈၼၼ်ႉဢေႃႈ။ ၼႂ်းဝႃႈၼၼ်သေၵေႃႈ၊ၵေႃႉဢၼ်ထၢပ်ႈၵေႃႇႁဵတ်းၼၼ်ႉမၼ်းႁဵတ်းၸိူဝ်ႉႁိုဝ်လႄႈတႄႇသၢင်ႈၵေႃႇႁဵတ်းၼၼ်ႉ၊ႁႂ်ႈဝႆႉသတိႁင်းၽႂ်ႁင်းမၼ်းတႃႉ။-
လွင်ႈမၼ်းၸမ်ႉ၊လိူဝ်သေငဝ်ႈႁၢၵ်ႈဢၼ်ၶျႃးဝႆႉဢၼ်ဝႃႈ၊ ၸဝ်ႈယေႇသုၶရိၸ်ႈ၊ ၵူၺ်းၼၼ်ႉၽူႈလႂ်ဢမ်ႇၸၢင်ႈၶျႃးငဝ်ႈႁၢၵ်ႈတိူၵ်ႈတၢင်ႇဢၼ်လႆႈထႅင်ႈ။-
ၵမ်ႈၽွင်ႈဢဝ်ၶမ်း၊ၵမ်ႈၽွင်ႈဢဝ်ငိုၼ်း၊ၵမ်ႈၽွင်ႈဢဝ်သႅင်လီပတ်ႈတမျႃးလႄႈၵမ်ႈၽွင်ႈၸၢင်ႈဢဝ်မႆႉ၊ဢဝ်ယိူဝ်ႈယႃႈဢမ်ႇၼၼ်ၽိူင်းသေလႄႈၵေႃႇၼိူဝ်ငဝ်ႈႁၢၵ်ႈတိူၵ်ႈၼၼ်ႉဢေႃႈ။-
ၼင်ႇၼၼ်လႄႈၼႃႈၵၢၼ်တၢင်းႁဵတ်းၽႂ်ၽႂ်မၼ်းမၼ်းၼၼ်ႉတၵ်းပေႃႇဢွၵ်ႇထၢင်ႇသႃးမႃးၼႂ်းဝၼ်းဢၼ် ၸဝ်ႈၶရိၸ်ႈ၊ ၵျွမႃးၼၼ်ႉဢေႃႈ။ ၼႂ်းဝၼ်းၼၼ်ႉၽြႃးပဵၼ်ၸဝ်ႈတၵ်းဢဝ်ၽႆးသေလႄႈၸႅတ်ႈတူၺ်းႁႂ်ႈလႆႈႁုၵၢၼ်ငၢၼ်းၵေႃႉလႂ်ပဵၼ်မဵဝ်းလႂ်ၼၼ်ႉဢေႃႈ။-
ပေႃးတိူၵ်ႈဢၼ်တႄႇဝႆႉ၊ၵႃႈၼိူဝ်ငဝ်ႈႁၢၵ်ႈၼၼ်ႉၶၢမ်ႇၽႆးလႆႈၸိုင်၊ၵေႃႉဢၼ်ႁဵတ်းၼၼ်ႉတၵ်းလႆႈၶၢမ်ႇဢဝ်ဢၵျူဝ်းမၼ်းဢေႃႈ။-
ပေႃးတၢင်းႁဵတ်းၼၼ်ႉမႆႈၶႅမ်ႈၵႂႃႇၸိုင်၊ၵေႃႉဢၼ်ႁဵတ်းၼၼ်ႉတၵ်းလႆႈသုမ်းဢေႃႈ။ ၼႂ်းဝႃႈၼၼ်သေၵေႃႈ၊တူဝ်ၵူၼ်းၵေႃႉၼၼ်ႉတၵ်းလႆႈၶၢမ်ႇတၢင်းဢၼ်ၵႄႇသႄႇဢဝ်မိူၼ်ၸိူဝ်ႉၼင်ႇဢၼ်လွတ်ႈသေၵႃႈတီႈၽႆးၼၼ်ႉဢေႃႈ။
သူဢမ်ႇႁုလွင်ႈဢၼ်သူပဵၼ်ၵျွင်းပိၵ်ႈမၢၼ်ႇၸဝ်ႈၼၼ်ႉလႄႈဝိၺိၺ်ႇၽြႃးပဵၼ်ၸဝ်ႈတႄႇသဝ်းမီးယူႇၵႃႈၼႂ်းသူၼၼ်ႉႁိုဝ်း။-
ပိူဝ်ႈၼႆလႄႈၵေႃႉဢၼ်ယႃႉမုၼ်သရေႇၵျွင်းပိၵ်ႈမၢၼ်ႇၽြႃးပဵၼ်ၸဝ်ႈၼၼ်ႉ၊ၽြႃးပဵၼ်ၸဝ်ႈတၵ်းယႃႉမုၼ်သရေႇၵေႃႉၼၼ်ႉဢေႃႈ။ လွင်ႈမၼ်းၸမ်ႉ၊ၵျွင်းပိၵ်ႈမၢၼ်ႇၸဝ်ႈၼၼ်ႉမူတ်းၸၢင်ႇလႄႈ သူၵေႃႈပဵၼ်ၵျွင်းပိၵ်ႈမၢၼ်ႇၸဝ်ႈၼၼ်ႉဢေႃႈ။
ၽူႈလႂ်သေဢမ်ႇဝႃႈ၊ယႃႇပေပႅတ်ႉလႅၼ်တူဝ်ၸဝ်ႈၵဝ်ႇ။ ၼႂ်းသူၼႆႉပေႃးသေၵေႃႉသေၵူၼ်းထၢင်ႇဝႃႈ၊တူဝ်ၸဝ်ႈၵဝ်ႇမီးပိင်ႇၺႃႇလေႃးၵီႇၸိုင်၊ႁႂ်ႈမၼ်းမၢတ်ႈတူဝ်ၸဝ်ႈၵဝ်ႇပဵၼ်ၵူၼ်းငိူဝ်ႈငႃႉ၊ၼင်ႇႁိုဝ်တၵ်းလႆႈပိင်ႇၺႃႇဢၼ်ၸႅတ်ႈၼၼ်ႉတႃႉ။-
လွင်ႈမၼ်းၸမ်ႉ၊ၵႃႈဢၼ်ၵူၼ်းလေႃးၵီႇထၢင်ႇဝႃႈ၊ပဵၼ်ပိင်ႇၺႃႇဢၼ်ၶိုၵ်ႉၼၼ်ႉမၼ်းပဵၼ်ဢၼ်ဢမ်ႇပွင်ႇလွင်ႈၵႃႈသင်ၽၢႆႇၼႃႈၽြႃးပဵၼ်ၸဝ်ႈ၊မႅၼ်ႈၸွမ်းၼင်ႇၵႃႈၼႂ်းၵျၢမ်းလိၵ်ႈတႅမ်ႈဝႆႉဝႃႈ၊ “ၽြႃးပဵၼ်ၸဝ်ႈဢဝ်ဢၵျၢမ်ႇဢၼ်လၵ်းလႅမ်ၵူၼ်းမီးပိင်ႇၺႃႇၶဝ်ၼၼ်ႉသေယဝ်ႉ၊ၶိုၼ်းတိၺွပ်းဢဝ်ၶဝ်ၼၼ်ႉဢေႃႈ၊” ဝႃႈၼင်ႇၼႆၵူၺ်းဢမ်ႇၵႃး၊-
တႅမ်ႈဝႆႉထႅင်ႈဝႃႈ၊ “ၸဝ်ႈၽြႃးႁုလွင်ႈတၢင်းၵျၢမ်ႇတၢင်းပွင်ၶဝ်ၸိူဝ်းဢၼ်မီးပိင်ႇၺႃႇၼၼ်ႉ၊ပဵၼ်ဢၼ်လၢႆလၢႆဢမ်ႇပွင်ႇလွင်ႈၵႃႈသင်ၼၼ်ႉယူႇဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈၽူႈလႂ်သေဢမ်ႇဝႃႈ၊ယႃႇပေဢုပ်ႇဝၢဝ်းတၢင်းဢၼ်ၵူၼ်းႁဝ်းႁဵတ်းလႆႈသၢင်ႈလႆႈၸိူဝ်းၼၼ်ႉတႃႉ။ ပေႃးၶႆႈၸႂ်ၸေးၸေးၸိုင်၊ၵႃႈမီးတင်းသဵင်ႈတင်းလူင်ပဵၼ်ၶွင်သူတင်းလၢႆဢေႃႈ။-
ၸႃႉၸဵမ်သြႃႇ ပေႃးလု၊ သြႃႇ ဢႃႇပေႃးလု၊ တင်းသြႃႇ ၵေးၽႃႉ၊ ၵူၺ်းဢမ်ႇၵႃး၊လေႃးၵႃႉၼႆႉသေဢမ်ႇဝႃႈ၊တၢင်းဢၼ်ဢသၢၵ်ႈလိပ်းသေဢမ်ႇဝႃႈ၊တၢင်းတၢႆသေဢမ်ႇဝႃႈ၊ၵၢပ်ႈပၢၼ်ၼႆႉဢိၵ်ႇတင်းဢၼ်တၵ်းမႃးၵမ်းလိုၼ်းသေဢမ်ႇဝႃႈ၊လွင်ႈတၢင်းၸိူဝ်းၼႆႉၵႃႈမီးတင်းသဵင်ႈပဵၼ်ၶွင်သူတင်းလၢႆဢေႃႈ။-
သူၸမ်ႉ၊ပဵၼ်ၵူၼ်း ၸဝ်ႈၶရိၸ်ႈ၊ လႄႈ၊ ၸဝ်ႈၶရိၸ်ႈ၊ သမ်ႉပဵၼ်လုၵ်ႈၽြႃးပဵၼ်ၸဝ်ႈဢေႃႈ။
ႁႂ်ႈၵူၼ်းၵူႈၵေႃႉမၢတ်ႈႁဝ်းပဵၼ်ၵူၼ်းၸႂ်ႉၵူၼ်းသွႆ ၸဝ်ႈၶရိၸ်ႈ၊ လႄႈပဵၼ်ၵူၼ်းပႂ်ႉထိင်းလွင်ႈဢၼ်လိုၵ်ႉဢၼ်လမ်ႇၽြႃးပဵၼ်ၸဝ်ႈၼၼ်ႉတႃႉ။-
ၵူၼ်းပႂ်ႉထိင်းၸမ်ႉ၊လူဝ်ႇမီးသဵတ်ႈၸႃႇဢေႃႈ။-
ပိၵ်ႉသမ်ႉသူ၊ဢိၵ်ႇတင်းပိူၼ်ႈတၢင်ႇၵေႃႉတႅပ်းတတ်းလွင်ႈၵဝ်သေၵေႃႈ၊ၵဝ်ဢမ်ႇဝႆႉဢယေး။ ၵဝ်ၵေႃႈယင်းဢမ်ႇတႅပ်းတတ်းတူဝ်ၸဝ်ႈၵဝ်ႇ။-
ၸႂ်ၵဝ်ဢမ်ႇမီးလွင်ႈဢၼ်တႃႇတေတၢင်ႇဢပျတ်ႈတူဝ်ၸဝ်ႈၵဝ်ႇသေၸိူဝ်ႉသေပိူင်ဢေႃႈ။ ၼႂ်းဝႃႈၼၼ်သေၵေႃႈ ၵဝ်ၵၢင်းလွတ်ႈတင်းဢပျတ်ႈဝႃႈၼႆၵဝ်ၶႃႈဢမ်ႇဝႃႈ။ ၸဝ်ႈၽြႃးတၵ်းၸီႇယၢင်ႇတြႃးၵဝ်ဢေႃႈ။-
ပိူဝ်ႈၼႆလႄႈသူယႃႇပေၼႅတ်ႈတႅပ်းတတ်းသေၸိူဝ်ႉသေပိူင်ဢွၼ်တၢင်းဢၶိင်ႇမၼ်းထုၵ်ႇၼၼ်ႉတၢင်းဢၼ်ၸီႇယၢင်ႇတြႃးလိုၼ်းသုတ်းၼၼ်ႉတၵ်းလႆႈပႂ်ႉထႃႈတေႃႇထိုင်ႁွတ်ႈၸဝ်ႈၽြႃးၵျွမႃးၼၼ်ႉလႄႈ၊မၼ်းၸဝ်ႈတၵ်းႁႂ်ႈၵႃႈဢၼ်လပ်းသိင်ႇႁူမ်ႇဝႆႉၸိူဝ်းၼၼ်ႉပိုတ်ႇပၢင်ႇလႅင်းလီလႄႈ၊ၵႃႈဢၼ်ႁူဝ်ၸႂ်ၵူၼ်းမူမ်ႇဝႆႉၼၼ်ႉၵေႃႈတၵ်းႁႂ်ႈထၢင်ႇသႃးမႃးဢေႃႈ။ ဝၢႆးၼၼ်ႉ၊ၽြႃးပဵၼ်ၸဝ်ႈတၵ်းယုၵ်ႉယွင်ႈၵူၼ်းၵူႈၵေႃႉ ၸွမ်းၵႃႈၼင်ႇဢၼ်လႆႈထိူၵ်ႈၶၢမ်ႇဢဝ်ႁင်းၽႂ်ႁင်းမၼ်းၼၼ်ႉဢေႃႈ။
ပီႈၼွင်ႉၶဝ်႟။ ၵဝ်ဢဝ်သြႃႇ ဢႃႇပေႃးလု၊ ဢိၵ်ႇတင်းတူဝ်ၵဝ်ႁဵတ်းပုင်ႇသၢၵ်ႈသေႇပုၼ်ႈဢၵျူဝ်းသူ၊ႁႂ်ႈသူလႆႈသွၼ်ဢဝ်တီႈႁဝ်းသေလႄႈတၵ်းဢမ်ႇပူၼ်ႉလိူဝ်ၵျၢမ်းလိၵ်ႈဢၼ်တႅမ်ႈဝႆႉၼၼ်ႉဢေႃႈ။ ပိူဝ်ႈၼႆလႄႈသူယႃႇပေႁၵ်ႉၵေႃႉၼိုင်ႈလႄႈငိၼ်းၸင်းၶၢၼ်ႉႁၼ်တၢင်ႇၵေႃႉၼၼ်ႉသေၵမ်း။-
ၽူႈလႂ်ယုၵ်ႉယွင်ႈႁႂ်ႈသူယႂ်ႇမျၢတ်ႈသေပိူၼ်ႈတၢင်ႇၵေႃႉ။ ၵႃႈဢၼ်သူလႆႈလီလႆႈပဵၼ်ယူႇၼႆႉ ပဵၼ်ၵွပ်ႈပိူဝ်ႈသုၵျေးၸူးၽြႃးပဵၼ်ၸဝ်ႈပၼ်ၵူၺ်းဢမ်ႇၸႂ်ႈႁိုဝ်း။ ပိူဝ်ႈၼႆလႄႈ၊ႁဵတ်းသင်သူယင်းဢုပ်ႇယွင်ႈတူဝ်ၸဝ်ႈၵဝ်ႇယူႇမိူၼ်ၸိူဝ်ႉၼင်ႇႁၢင်ႈၵႃႈဢၼ်သူပဵၼ်ယူႇၼႆႉမၼ်းဢမ်ႇၸႂ်ႈသုၵျေးၸူးၽြႃးပဵၼ်ၸဝ်ႈၵူၺ်း။
သူပျေႉၸုမ်ႇဝႆႉ၊လူၺ်ႈၵႃႈဢၼ်သူမီးဢလူဝ်ႇလႄႈပဵၼ်ၵူၼ်းမၢၵ်ႈၵူၼ်းမီးဝႆႉယဝ်ႉတႄႉႁိုဝ်း။ သူပဵၼ်ၶုၼ်ဝႆႉယဝ်ႉတႄႉႁိုဝ်း။ ႁဝ်းတႄႉဢမ်ႇပဵၼ်ၸဝ်ႈ၊ဢမ်ႇပဵၼ်ၶုၼ်။ ၵဝ်ၸမ်ႉ၊မုင်ႈမွင်းႁႂ်ႈသူပဵၼ်ၶုၼ်တႄႉတႄႉယဝ်ႉလႄႈႁႂ်ႈႁဝ်းပေႃးလႆႈဢၶႂၢင်ႉလႆႈဢုပ်ႉပိူင်ႇၸွမ်းသူဢေႃႈ။-
ၵဝ်ထၢင်ႇၽြႃးပဵၼ်ၸဝ်ႈဢဝ်ႁဝ်းၸိူဝ်းဢၼ်ပဵၼ်တမၢၼ်ႇၸဝ်ႈႁႂ်ႈပဵၼ်ၵူၼ်းၼႃႈလဵၵ်ႉၼႃႈၼွႆႉ၊မိူၼ်ၸိူဝ်ႉၼင်ႇၵူၼ်းဢၼ်ထုၵ်ႇဢမုဢၼ်တၵ်းၶၢမ်ႇဢဝ်တၢႆၼႂ်းပွႆးၽၢႆႇၼႃႈၵူၼ်းတင်းလၢႆ၊ဢိၵ်ႇတင်းတမၢၼ်ႇၵၢင်ႁၢဝ်တင်းလၢႆ၊တၵ်းဢွၼ်ၵၼ်လွမ်တူၺ်းၼၼ်ႉဢေႃႈ။-
ပုၼ်ႈဢၵျူဝ်း ၸဝ်ႈၶရိၸ်ႈ၊ ၸိုင်၊ႁဝ်းလႆႈၶၢမ်ႇပဵၼ်ၵူၼ်းငိူဝ်ႈဢေႃႈ။ ၵူၺ်းၵႃႈသူၸမ်ႉ၊ပဵၼ်ၵူၼ်းမီးပိင်ႇၺႃႇၼႂ်း ၸဝ်ႈၶရိၸ်ႈ၊ ဢေႃႈ။ ႁဝ်းပဵၼ်ၵူၼ်းႁႅင်းဢူၼ်ႈဢေႃႈ။ သူၸမ်ႉ၊ပဵၼ်ၵူၼ်းႁႅင်းယႂ်ႇၼႃႇဢေႃႈ။ ႁဝ်းၼႃႈလဵၵ်ႉၼႃႈၼွႆႉဢေႃႈ။ သူၸမ်ႉ၊မီးသရေႇၼႃႈတႃယႂ်ႇၼႃႇဢေႃႈ။-
ႁဝ်းယင်းဢိုပ်းၶဝ်ႈဢိုပ်းၼမ်ႉႁၢၼ်ႉတေႃႇမိူဝ်ႈလဵဝ်လႄႈလႆႈၼုင်ႈမႆၶူဝ်းယွၵ်းၶူဝ်းၶၢတ်ႇသေလႄႈလႆႈၶၢမ်ႇပိူၼ်ႈပေႃႉယႅၼ်ႉဢမ်ႇၵႃး၊ပဵၼ်ၵူၼ်းဢၼ်ဢမ်ႇမီးႁိူၼ်းမီးယေးလႄႈ၊လႄႇၵႂႃႇလႄႇမႃးယူႇဢေႃႈ။-
ပဵၼ်ၵူၼ်းဢၼ်ဢဝ်မိုဝ်းႁဵတ်းၵၢၼ်လဵင်ႉတွင်ႉတူဝ်ၸဝ်ႈၵဝ်ႇယၢပ်ႇၽိုတ်ႇၼႃႇဢေႃႈ။ မိူဝ်ႈဢၼ်ပိူၼ်ႈလႃႇႁဝ်းၸိုင်၊ႁဝ်းသူင်ႇမႅတ်ႈတႃႇပၼ်ဢေႃႈ။ မိူဝ်ႈဢၼ်ပိူၼ်ႈၼိၵ်ႈၸၢၵ်ႈငႅၼ်းသႄးႁဝ်းၸိုင်၊ႁဝ်းယိူၼ်ႉၶၢမ်ႇဢေႃႈ။-
မိူဝ်ႈဢၼ်ပိူၼ်ႈၶႃႉၸိုဝ်ႈၶၢႆသဵင်ႁဝ်းၸိုင်၊ႁဝ်းဢဝ်သူပ်းဢူၼ်ႈၵႂၢမ်းဢွၼ်ႇၶိုၼ်းလၢတ်ႈတေႃႇၶဝ်ဢေႃႈ။ ပိူၼ်ႈမၢတ်ႈႁဝ်းပဵၼ်ၵူၼ်းဢၼ်လီႁင်ႈဢဵတ်ႇသဵတ်ႇၼႂ်းလေႃးၵႃႉၼႆႉ၊မိူၼ်ၸိူဝ်ႉၼင်ႇၶႆးဢၼ်ပိူၼ်ႈသီပႅတ်ႈၼၼ်ႉတေႃႇထိုင်ႁွတ်ႈဝၼ်းမိူဝ်ႈလဵဝ်ၼႆႉဢေႃႈ။
ၵဝ်တႅမ်ႈၸိူဝ်ႉၼင်ႇၼႆႁႂ်ႈသူလႆႈဢူၵ်းဢၢႆပိူၼ်ႈဢမ်ႇၸႂ်ႈ။ ၵဝ်ၶႂ်ႈသင်ႇသွၼ်ပၼ်သူမိူၼ်ၸိူဝ်ႉၼင်ႇလုၵ်ႈႁၵ်ႉၵဝ်ၼၼ်ႉဢေႃႈ။-
ၼႂ်း ၸဝ်ႈၶရိၸ်ႈ၊ ၼၼ်ႉပိၵ်ႉသမ်ႉသူမီးသြႃႇၼမ်ၼႃႇၼပ်ႉဢၢၼ်ႇမီးႁူဝ်ႁဵင်မၼ်းယူႇသေၵေႃႈသူမီးပေႃႈၵေႃႉလဵဝ်ၵူၺ်းဢေႃႈ။ ၵွပ်ႈပိူဝ်ႈၵဝ်ဢဝ်ၶၢဝ်ႇတြႃးသိူဝ်းပျေႃႇၸဝ်ႈသေလႄႈ ဢွၼ်သူမႃးယုမ်ႇမၢတ်ႈ ၸဝ်ႈယေႇသုၶရိၸ်ႈ၊ ၼၼ်ႉၵဝ်ပဵၼ်ပေႃႈသူယဝ်ႉဢေႃႈ။-
ပိူဝ်ႈၼႆလႄႈၵဝ်တိုၵ်းယူင်းႁႂ်ႈသူႁဵတ်းၸွမ်းတၢင်းၵမ်တၢင်းၵျၢင်ႉၵဝ်ဢေႃႈ။-
ပုၼ်ႈလွင်ႈတၢင်းၸိူဝ်းၼႆႉၸိုင်၊ၵဝ်ပွႆႇၸႂ်ႉ တိမေႃးသေႇ၊ ၵႂႃႇၸူးသူယဝ်ႉ။ မၼ်းပဵၼ်လုၵ်ႈႁၵ်ႉၵဝ်၊ဢၼ်မီးသဵတ်ႈၸႃႇၼႂ်းၸဝ်ႈၽြႃးၼၼ်ႉဢေႃႈ။ မၼ်းတၵ်းလၢတ်ႈၼႄႁႂ်ႈသူၶုၵ်းၸႂ်လႆႈလွင်ႈဢၼ်ၵဝ်ႁဵတ်းၸိူဝ်ႉၼင်ႇႁိုဝ်ၵမ်ၵျၢင်ႉၸွမ်းသဵၼ်ႈတၢင်းတြႃး ၸဝ်ႈၶရိၸ်ႈ၊ ဢၼ်ၵဝ်သင်ႇသွၼ်ၸိူဝ်းၸဝ်ႈၵႃႈမီးၵူႈတီႈၵူႈလႅၼ်ၼၼ်ႉဢေႃႈ။
ၼႂ်းသူၵမ်ႈၽွင်ႈထၢင်ႇဝႃႈ၊ၵဝ်တၵ်းဢမ်ႇၶိုၼ်းၵႂႃႇသူႇၵႂႃႇၸႂ်းသူယဝ်ႉလႄႈ၊ၶဝ်ၸိုင်မီးႁူဝ်ၸႂ်ၽႅၼ်သုင်ဢေႃႈ။-
တီႈတႄႉမၼ်း၊ပေႃးၸဝ်ႈၽြႃးမီးဢလူဝ်ႇၸိုင်၊ၵဝ်တၵ်းၸဵဝ်းၵႂႃႇၸူးတီႈသူဢေႃႈ။ မိူဝ်ႈဢၼ်လႆႈႁူပ်ႉထူပ်းၵူၼ်းႁူဝ်ၸႂ်ၽႅၼ်သုင်ၸိူဝ်းၼၼ်ႉ၊ၵဝ်ၶႂ်ႈႁုႁၼ်သူပ်းၵႂၢမ်းၶဝ်ဢမ်ႇၸႂ်ႈ၊ၵဝ်ၶႂ်ႈႁုႁၼ်တၼ်းၶူဝ်းၶဝ်ၵူၺ်းဢေႃႈ။-
လွင်ႈမၼ်းၸမ်ႉ၊မိူင်းၽြႃးပဵၼ်ၸဝ်ႈတႄႇပဵၼ်ၼႂ်းၶေႃႈၵႂၢမ်းဢမ်ႇၸႂ်ႈ။ တႄႇပဵၼ်ၼႂ်းတၼ်းၶူဝ်းၸဝ်ႈဢေႃႈ။-
သူတေလိူၵ်ႈဢဝ်ဢၼ်လႂ်။ သူၶႂ်ႈႁႂ်ႈၵဝ်ပႃးၶွၼ်ႉႁဵဝ်းၵႂႃႇၸူးတီႈသူႁိုဝ်း။ ဢမ်ႇၼၼ်လႄႈၶႂ်ႈႁႂ်ႈၵဝ်ပႃးတင်းၸႂ်ႁၵ်ႉမႅတ်ႈတႃႇ၊ဢိၵ်ႇတင်းၸႂ်ဢၼ်ဢူၼ်ႈဢွၼ်ႇသေလႄႈၵႂႃႇႁိုဝ်း။
မိူဝ်ႈလဵဝ်ၼႆႉၵဝ်လႆႈငိၼ်းပိူၼ်ႈလၢတ်ႈလွင်ႈဢၼ်ၼႂ်းသူၼႆႉမီးၵူၼ်းၵေႃႉၼိုင်ႈႁဵတ်းမေႇထုင်ႇဢၼ်ဢမ်ႇတြႃးၵူတ်ႉမေးပိူၼ်ႈလႄႈႁၢႆႉမိူၵ်ႈၼႃႇမဵဝ်းၼၼ်ႉၵူၼ်းဢၼ်ဢမ်ႇၵူဝ်းၵႂၢႆႇၸဝ်ႈၽြႃးၶဝ်ၵေႃႈ တေႃႈယင်းဢမ်ႇတွၼ်ႉႁဵတ်းသေပွၵ်ႈ။ ပိူၼ်ႈမွၵ်ႇလၢတ်ႈၵဝ်ဝႃႈ၊မၼ်းၼၼ်ႉဢဝ်မႄႈသိုပ်ႇမၼ်းဝႃႈၼႆဢေႃႈ။-
ပေႃးပဵၼ်ၸိူဝ်ႉၼင်ႇၼႆၸိုင်၊သူတေမီးႁူဝ်ၸႂ်ဢၼ်ၽႅၼ်သုင်လႆႈၸိူဝ်ႉၼင်ႇႁိုဝ်၊သူထုၵ်ႇလီငိၼ်းၶီငိၼ်းၽၢၼ်လႄႈဢဝ်ၵေႃႉဢၼ်ႁဵတ်းၽိတ်းပိူင်ႈၸိူဝ်ႉၼင်ႇၼႆၼၼ်ႉဢွၵ်ႇပႅတ်ႈသေၵႃႈၼႂ်းမူႇၸုမ်းသူယဝ်ႉ။-
ၵဝ်ၼႆႉ၊ပိၵ်ႉသမ်ႉတူဝ်ၵဝ်ယူႇၵႆၵၼ်တင်းသူသေၵေႃႈ၊ၸႂ်ဝိၺိၺ်ႇၵဝ်ၶႃႈယင်းမီးၸွမ်းလူၺ်ႈၵၼ်တင်းသူလႄႈၵႃႈၼင်ႇဢၼ်ၸႂ်ဝိၺိၺ်ႇၵဝ်မီးယူႇလူၺ်ႈသူၼၼ်ႉၵဝ်ဢိင်ပိုင်ႈၼႃႇမႃႉၸိုဝ်ႈသဵင်ၸဝ်ႈႁဝ်း ၸဝ်ႈယေႇသု၊ သေလႄႈတႅပ်းတတ်းၸွမ်းၼင်ႇတြႃးတီႈၵေႃႉဢၼ်ၽိတ်းပိူင်ႈၸိူဝ်ႉၼင်ႇၼၼ်ၼၼ်ႉဢေႃႈ။-
မိူဝ်ႈဢၼ်သူၸုတုမ်ၵၼ်ၼၼ်ႉၸႂ်ဝိၺိၺ်ႇၵဝ်ၵေႃႈ၊ၶဝ်ႈပႃးလူၺ်ႈၵၼ်တင်းသူဢေႃႈ။ ဢိင်ပိုင်ႈတၼ်းၶူဝ်းၸဝ်ႈႁဝ်း ၸဝ်ႈယေႇသု၊ သေယဝ်ႉ၊-
သူဢွၼ်ၵၼ်ဢဝ်ၵေႃႉၼၼ်ႉ ဢၢပ်ႈပၼ်ၼႂ်းမိုဝ်းမႃႇၼၢတ်ႈတႃႉ။ ႁႂ်ႈတူဝ်ၼိူဝ်ႉလိူတ်ႈမၼ်းလႆႈၶၢမ်ႇတၢင်းဢၼ်ယႃႉပႅတ်ႈ၊ၼင်ႇႁိုဝ်ၸႂ်ဝိၺိၺ်ႇမၼ်းတၵ်းလႆႈၶၢမ်ႇတၢင်းဢၼ်ၵႄႇၶျွတ်ႈဢဝ်ၼႂ်းဝၼ်းၸဝ်ႈၽြႃးၼၼ်ႉတႃႉ။
သူဢမ်ႇထုၵ်ႇလီဢုပ်ႇဝၢဝ်းလွင်ႈၸိူဝ်းၸဝ်ႈသူလႃးလႃး။ သူဢမ်ႇႁုထုင်းၵႂၢမ်းဢၼ်ဝႃႈ၊ “ၸိူဝ်ႉပႅင်ႈဢိတ်းဢွၼ်ႇၼိုင်ႈၵူၺ်းၸၢင်ႈႁဵတ်းႁႂ်ႈၶဝ်ႈမုၼ်းတင်းၵွၼ်ႈပွင်းၶိုၼ်ႈမႃးၼၼ်ႉဢေႃႈ၊” ဝႃႈၼင်ႇၼႆၼၼ်ႉႁိုဝ်း။-
သူတၵ်းလႆႈဢဝ်ၸိူဝ်ႉပႅင်ႈဢၼ်ပွင်ႇဝႃႈ၊ဢပျတ်ႈဢၼ်ၵဝ်ႇၼၼ်ႉဢွၵ်ႇပႅတ်ႈ၊ၼင်ႇႁိုဝ်သူတၵ်းပဵၼ်ၶဝ်ႈမုၼ်းၵွၼ်ႈမႂ်ႇဢၼ်မူတ်းသႂ်ၼၼ်ႉဢေႃႈ။ လွင်ႈမၼ်းၸမ်ႉ၊ ၸဝ်ႈၶရိၸ်ႈ၊ ဢၼ်ပဵၼ်သူဝ်းဢွၼ်ႇဢၼ်ပဵၼ်ၶိူင်ႈတၢင်းလူႇၼႂ်းပွႆးပသၶႃႇၼၼ်ႉ၊သမ်ႉပေႃးလႆႈၶၢမ်ႇတၢႆပုၼ်ႈႁဝ်းယဝ်ႉဢေႃႈ။-
ပိူဝ်ႈၼႆလႄႈႁဝ်းယင်းဢမ်ႇဢဝ်ၶဝ်ႈမုၼ်းဢၼ်ပႃးၸိူဝ်ႉပႅင်ႈဢၼ်ပဵၼ်ဢပျတ်ႈလွင်ႈတၢင်းဢၼ်ႁၢႆႉမိူၵ်ႈၼၼ်ႉၶဝ်ႈၵႃႈၼႂ်းပွႆးပသၶႃႇလႄႈဢွၼ်ၵၼ်ဢဝ်ၶဝ်ႈမုၼ်းဢၼ်ဢမ်ႇသႂ်ႇပႃးၸိူဝ်ႉပႅင်ႈဢၼ်ၶႂ်ႈဝႃႈ၊ၸႂ်ဢၼ်ၶၢဝ်သႂ်လႄႈမီးသဵတ်ႈၸႃႇၼၼ်ႉၶဝ်ႈၵႃႈၼႂ်းပွႆးတႃႉႁဝ်း။
ၼႂ်းလိၵ်ႈဢၼ်ၵဝ်တႅမ်ႈပၼ်ၵႂႃႇတီႈသူၽိုၼ်ဢွၼ်တၢင်းၼၼ်ႉ၊ၵဝ်သင်ႇလၢတ်ႈဝႃႈ၊သူဢမ်ႇလီႁဵတ်းၵေႃႉလူၺ်ႈၶဝ်ၸိူဝ်းဢၼ်ႁဵတ်းမေႇထုင်ႇဢၼ်ဢမ်ႇတြႃးၼၼ်ႉဢေႃႈ။-
လွင်ႈၼႆႉၸိုင်၊ၵဝ်ဢမ်ႇဝႃႈ၊တၵ်းဢမ်ႇႁဵတ်းၵေႃႉလူၺ်ႈၵၼ်တင်းၵူၼ်းလေႃးၵီႇတင်းလူင်ၸႃႉဢၼ်ႁဵတ်းမေႇထုင်ႇဢၼ်ဢမ်ႇတြႃး၊ဢၼ်မီးၸႂ်လေႃးၽႃႉ၊ဢၼ်ၸၢင်ႈၽၢမ်းၵိၼ်မႂ်ၵိၼ်ပိူၼ်ႈ၊ဢမ်ႇၼၼ်ၸႃႉဢၼ်ၵူဝ်းၵႂၢႆႇဝႆႈႁုၼ်ႇႁၢင်ႈသၢင်းထုၼၼ်ႉ။ ပေႃးသူယင်းဢမ်ႇႁဵတ်းၵေႃႉလူၺ်ႈၵူၼ်းၸိူဝ်းၼႆႉၸိုင်၊သူလူဝ်ႇပၢႆႈဢွၵ်ႇသေၵမ်ႇၽႃႇလေႃးၵႃႉၼႆႉၵႂႃႇၵူၺ်းယဝ်ႉဢေႃႈ။-
ဢၼ်ၵဝ်ၶႂ်ႈဝႃႈၸမ်ႉ၊ၶဝ်ၸိူဝ်းဢၼ်ၶၢမ်ႇဢဝ်ၸိုဝ်ႈၵူၺ်းဝႃႈ၊ပဵၼ်ပီႈၼွင်ႉၵၼ်ၼႂ်းတၢင်းယုမ်ႇမၢတ်ႈသေလႄႈသမ်ႉႁဵတ်းမေႇထုင်ႇဢၼ်ဢမ်ႇတြႃးယူႇ၊မီးၸႂ်လေႃးၽႃႉယူႇ၊ၵူဝ်းၵႂၢႆႇဝႆႈႁုၼ်ႇႁၢင်ႈသၢင်းထုယူႇ၊ၶႃႉၸိုဝ်ႈၶၢႆသဵင်ၵၼ်ယူႇ၊ၵိၼ်လဝ်ႈမဝ်းၵမ်ယူႇ၊ဢမ်ႇၼၼ်ၸၢင်ႈမၢပ်ႇၵိၼ်မႂ်ၵိၼ်ပိူၼ်ႈယူႇၸိူဝ်းၼၼ်ႉ၊သူတၵ်းတေဢမ်ႇလႆႈႁဵတ်းၵေႃႉႁူမ်ႈပွင်းလူၺ်ႈၵူၼ်းမဵဝ်းၼႆႉၵူၺ်းဢမ်ႇၵႃး၊ၵိၼ်ၶဝ်ႈလူၺ်ႈၵၼ်တင်းၶဝ်ၵေႃႈယႃႇပေႁဵတ်းသေၵမ်း။
ပေႃးဝႃႈတႄႉမၼ်း၊ဢမ်ႇၸႂ်ႈၵၢၼ်ၵဝ်ပုၼ်ႈတႃႇတေၸၵ်းၽႄတႅပ်းတတ်းၸွမ်းတြႃး၊တီႈၵူၼ်းၼွၵ်ႈၸိူဝ်းၸဝ်ႈတင်းလၢႆၸိူဝ်းၼၼ်ႉ။ ၵူၼ်းၵႃႈၼႂ်းၸိူဝ်းၸဝ်ႈၼင်ႇၵၼ်ၵူၺ်း၊တၵ်းလႆႈၸၵ်းၽႄတႅပ်းတတ်းၸွမ်းတြႃးၵၼ်ဢေႃႈ။-
ၵူၼ်းၵႃႈၼွၵ်ႈၸိူဝ်းၸဝ်ႈတင်းလၢႆၸိုင်၊ၽြႃးပဵၼ်ၸဝ်ႈတၵ်းၸီႇယၢင်ႇၶဝ်ဢေႃႈ။ ပိူဝ်ႈၼႆလႄႈတႅပ်းတတ်းၸွမ်းၼင်ႇၵႃႈၼႂ်းၵျၢမ်းလိၵ်ႈဢၼ်တႅမ်ႈဝႆႉၼၼ်ႉလႄႈဝႃႈ၊ “ပႄႇပႅတ်ႈၵူၼ်းႁၢႆႉမိူၵ်ႈသေၵႃႈၼႂ်းမူႇၸုမ်းသူၼၼ်ႉတႃႉ၊” ဝႃႈၼင်ႇၼႆၼၼ်ႉဢေႃႈ။
ၼႂ်းသူၼင်ႇၵၼ်မိူဝ်ႈဢၼ်မီးတၢင်းဢၼ်ၽိတ်းၵၼ်ၼၼ်ႉၸိုင်၊ႁဵတ်းသင်လႄႈသူယင်းဢမ်ႇႁဵတ်းႁႂ်ႈဢမုၼၼ်ႉၵႄႈလိတ်ႈယဝ်ႉတူဝ်ႈၵႃႈၼႂ်းၵူၼ်းမူတ်းၸၢင်ႇၸဝ်ႈၽြႃးၼင်ႇၵၼ်ၵၼ်သေလႄႈသူႁတ်းၵႂႃႇၵႃႈတီႈၶုၼ်လေႃးၵီႇဢၼ်ဢမ်ႇသိုဝ်ႈတေႃႇၼၼ်ႉ ႁႂ်ႈၸီႇယၢင်ႇတြႃးပၼ်သူၼၼ်ႉၸိူဝ်ႉၼင်ႇႁိုဝ်။-
ၵူၼ်းမူတ်းၸၢင်ႇၸဝ်ႈၽြႃးတင်းလၢႆတၵ်းတႅပ်းတတ်းဢမုၵူၼ်းမိူင်းလေႃးၵီႇဝႃႈၼႆသူဢမ်ႇႁုႁိုဝ်း။ ပေႃးသူယင်းတေတႅပ်းတတ်းဢမုၵူၼ်းမိူင်းလေႃးၵီႇယူႇၸိုင်၊ဢၼ်သူၽိတ်းၵၼ်ဢိတ်းဢွတ်းၼိုင်ႈၼၼ်ႉ သူဢမ်ႇၸၢင်ႈတႅပ်းတတ်းဢမုၵၼ်ႁိုဝ်း။-
ႁဝ်းယင်းတၵ်းတႅပ်းတတ်းဢမုပၼ်တမၢၼ်ႇၵၢင်ႁၢဝ်ၶဝ်ဝႃႈၼႆသူဢမ်ႇႁုႁိုဝ်း။ ႁဝ်းယဵင်ႈၶႅၼ်းလီတႅပ်းတတ်းဢမုပၼ်ၵူၼ်းႁဝ်းၼႂ်းၸူဝ်ႈပၢၼ်ၼႆႉဢေႃႈ။-
ပေႃးသူမီးဢမုၸိူဝ်ႉၼင်ႇၼႆမႃးၸိုင်၊သူယင်းတၵ်းၵႂႃႇၸူးတီႈၶဝ်ၸိူဝ်းဢၼ်ဢမ်ႇပေႃးမီးသရေႇၼႂ်းၸိူဝ်းၸဝ်ႈၼၼ်ႉႁႂ်ႈၶဝ်တႅပ်းတတ်းဢမုပၼ်သူႁိုဝ်း။-
ၵဝ်လၢတ်ႈၸိူဝ်ႉၼင်ႇၼႆႁႂ်ႈသူလႆႈငိၼ်းဢၢႆပိူၼ်ႈဢေႃႈ။ ၸွင်ႇၼႂ်းသူၼႆႉဢမ်ႇမီးသေၵေႃႉၵေႃႉ၊ဢၼ်မီးပိင်ႇၺႃႇပုၼ်ႈတႃႇတေၶိုင်ႁႃတႅပ်းတတ်းဢမုၵႃႈၼႂ်းၵႄႈဝူင်ႈၵၢင်သူပီႈၼွင်ႉၼင်ႇၵၼ်ၵၼ်ၼၼ်ႉယဝ်ႉႁိုဝ်း။-
သူယင်းပွႆႇပီႈၼွင်ႉၼင်ႇၵၼ်ႁဵတ်းဢမုသႂ်ႇတီႈၵၼ်သေယဝ်ႉ၊သမ်ႉပၼ်ၶဝ်ၸိူဝ်းဢၼ်ဢမ်ႇယုမ်ႇမၢတ်ႈၼၼ်ႉၸီႇယၢင်ႇတြႃးယဝ်ႉလူင်ပႄႇ။
လွင်ႈတၢင်းဢၼ်သူၼင်ႇၵၼ်ၵၼ်ၸၢင်ႈၽိတ်းၵၼ်လႄႈႁဵတ်းဢမုသႂ်ႇတီႈၵၼ်ၼၼ်ႉ၊ပဵၼ်တၢင်းဢၼ်သူသုတ်ႉယွမ်းၼႂ်းၸဝ်ႈၽြႃးဢေႃႈ။ ႁဵတ်းသင်လႄႈသူဢမ်ႇယိူၼ်ႉၶၢမ်ႇမိူဝ်ႈဢၼ်ပိူၼ်ႈၽိတ်းသူ။ ႁဵတ်းသင်လႄႈသူဢမ်ႇယိူၼ်ႉၶၢမ်ႇတၢင်းဢၼ်ဢုၵ်ႉၸႃႇတူဝ်ၸဝ်ႈၵဝ်ႇသုမ်းၼၼ်ႉၸိူဝ်ႉၼင်ႇႁိုဝ်။-
သူၸမ်ႉ၊ဢမ်ႇၶၢမ်ႇဢဝ်ၸိူဝ်ႉၼင်ႇၼၼ်ၵူၺ်းဢမ်ႇၵႃး၊ယင်းၵႂႃႇၽိတ်းပီႈၼွင်ႉၼင်ႇၵၼ်ၵၼ်လႄႈသမ်ႉႁိမ်ဢဝ်ဢုၵ်ႉၸႃႇၶဝ်လူင်ပႄႇ။-
လွင်ႈဢၼ်ဝႃႈ၊ၶဝ်ၸိူဝ်းဢၼ်ဢမ်ႇသိုဝ်ႈတေႃႇၼၼ်ႉဢမ်ႇလႆႈၶၢမ်ႇဢမူၺ်ႇမိူင်းၽြႃးပဵၼ်ၸဝ်ႈဝႃႈၼႆသူဢမ်ႇႁုႁိုဝ်း။ သူယႃႇပေပႅတ်ႉလႅၼ်တူဝ်ၸဝ်ႈၵဝ်ႇ၊ၶဝ်ၸိူဝ်းဢၼ်ႁဵတ်းမေႇထုင်ႇဢၼ်ဢမ်ႇတြႃးလႄႈသင်၊ၵူဝ်းၵႂၢႆႇဝႆႈႁုၼ်ႇႁၢင်ႈသၢင်းထုလႄႈသင်၊ၵူတ်ႉၽူဝ်ၵူတ်ႉမေးပိူၼ်ႈလႄႈသင်၊ဢၼ်ပဵၼ်ၵူၼ်းၸၢႆးၼင်ႇၵၼ်ၵၼ်ဢမ်ႇၼၼ်ၽူႈယိင်းၼင်ႇၵၼ်ၵၼ်ႁဵတ်းမေႇထုင်ႇတီႈၵၼ်လႄႈသင်၊-
ၶဝ်ၸိူဝ်းဢၼ်ၸၢင်ႈလၵ်ႉပိူၼ်ႈလႄႈသင်၊မီးၸႂ်လေႃးၽႃႉလႄႈသင်၊ၵိၼ်လဝ်ႈမဝ်းၵမ်လႄႈသင်၊ၶႃႉၸိုဝ်ႈၶၢႆသဵင်ပိူၼ်ႈလႄႈသင်၊ၸၢင်ႈၸူၼ်ပိူၼ်ႈလႄႈသင်၊ၶဝ်ၸိူဝ်းၼႆႉဢမ်ႇလႆႈၶၢမ်ႇဢဝ်ဢမူၺ်ႇမိူင်းၽြႃးပဵၼ်ၸဝ်ႈ။-
ၼႂ်းသူၵမ်ႈၽွင်ႈယၢမ်ႈပဵၼ်ၸိူဝ်ႉၼင်ႇၼႆမႃးယဝ်ႉ။ ၵူၺ်းၵႃႈ၊သူၼႆႉလႆႈၶၢမ်ႇတၢင်းဢၼ်သုၵ်ႈပွတ်ႈသေၵႃႈတီႈဢပျတ်ႈယဝ်ႉ။ သူလႆႈပဵၼ်ၵူၼ်းမူတ်းၸၢင်ႇယဝ်ႉ။ သူလႆႈၶၢမ်ႇတၢင်းဢၼ်မၢတ်ႈပဵၼ်ၵူၼ်းသိုဝ်ႈတေႃႇၵႃႈၼႂ်းၼႃႇမႃႉၸိုဝ်ႈသဵင် ၸဝ်ႈယေႇသုၶရိၸ်ႈ၊ ဢိၵ်ႇတင်းၵႃႈၼႂ်းဝိၺိၺ်ႇၽြႃးပဵၼ်ၸဝ်ႈယဝ်ႉ။
ၵူၼ်းၵမ်ႈၽွင်ႈၸၢင်ႈတၵ်းဝႃႈ၊ “ၵဝ်မီးဢၶႂၢင်ႉႁႂ်ႈလႆႈႁဵတ်းၵူႈၸိူဝ်ႉၵူႈပိူင်ဢေႃႈ၊” ဝႃႈၼႆၸႂ်ႈတႄႉသေၵေႃႈ၊ၵူႈၸိူဝ်ႉၵူႈပိူင်ၼၼ်ႉဢမ်ႇပဵၼ်ဢၵျူဝ်း။ ၵဝ်ၵေႃႈၸၢင်ႈလၢတ်ႈဝႃႈ၊ “ၵဝ်မီးဢၶႂၢင်ႉႁႂ်ႈလႆႈႁဵတ်းၵူႈၸိူဝ်ႉၵူႈပိူင်ဢေႃႈ၊” ဝႃႈၼႆသေၵေႃႈ၊ၵဝ်တၵ်းဢမ်ႇပွႆႇတူဝ်ၸဝ်ႈၵဝ်ႇပဵၼ်ၶႃႈသေၸိူဝ်ႉသေပိူင်ၼၼ်ႉ။-
ၵူၼ်းတၢင်ႇၵေႃႉၵေႃႈၸၢင်ႈလၢတ်ႈဝႃႈ၊ “တၢင်းၵိၼ်ပဵၼ်ပုၼ်ႈတွင်ႉဢေႃႈ။ တွင်ႉၵေႃႈပဵၼ်ပုၼ်ႈတၢင်းၵိၼ်ဢေႃႈ၊” ဝႃႈၼႆၸႂ်ႈတႄႉသေၵေႃႈ၊ၽြႃးပဵၼ်ၸဝ်ႈတၵ်းယႃႉပႅတ်ႈတင်းသွင်ပိူင်ၼၼ်ႉဢေႃႈ။ ဢမ်ႇထုၵ်ႇလီၸႂ်ႉတူဝ်ၶၼ်ႇထႃႇႁဝ်းႁဵတ်းမေႇထုင်ႇဢၼ်ဢမ်ႇတြႃး။ ထုၵ်ႇလီႁဵတ်းဝၢတ်ႈတီႈၸဝ်ႈၽြႃးလႄႈ၊ၸဝ်ႈၽြႃးၵေႃႈလဵင်ႉလူတူဝ်ၶၼ်ႇထႃႇဢေႃႈ။-
ၸိူဝ်ႉၼင်ႇဢၼ်ၽြႃးပဵၼ်ၸဝ်ႈႁႂ်ႈ ၸဝ်ႈၶရိၸ်ႈ၊ လုၵ်ႉသေၵႃႈတၢင်းတၢႆလုၵ်ႉၶိုၼ်းလိပ်းမႃးယဝ်ႉၼၼ်ႉ၊မၼ်းၸဝ်ႈတၵ်းႁႂ်ႈႁဝ်းလုၵ်ႉၶိုၼ်းလိပ်းမႃးၵွပ်ႈပိူဝ်ႈတၼ်းၶူဝ်းမၼ်းၸဝ်ႈၼၼ်ႉဢေႃႈ။
လွင်ႈဢၼ်ဝႃႈတူဝ်ၶၼ်ႇထႃႇသူပဵၼ်တူဝ်ဢၢင်ႇၵႃႇ ၸဝ်ႈၶရိၸ်ႈ၊ ၼၼ်ႉ၊သူဢမ်ႇႁုႁိုဝ်း။ ၸွင်ႇၵဝ်ထုၵ်ႇလီဢဝ်ဢၢင်ႇၵႃႇ ၸဝ်ႈၶရိၸ်ႈ၊ သေဢၼ်ဢၼ်ၵႂႃႇပဵၼ်ဢၢင်ႇၵႃႇမႄႈမွၵ်ႇယႃႈႁိုဝ်း။ ဢမ်ႇလႆႈပဵၼ်ၸိူဝ်ႉၼင်ႇၼၼ်လႃးလႃး။-
ၵွပ်ႈပိူဝ်ႈၼႂ်းၵျၢမ်းလိၵ်ႈတႅမ်ႈဝႆႉဝႃႈ၊ “ၶဝ်သွင်ၵေႃႉၼၼ်ႉ၊တၵ်းလႆႈပဵၼ်ၼိူဝ်ႉဢၼ်လဵဝ်ၵၼ်လိူတ်ႈဢၼ်လဵဝ်ၵၼ်ဢေႃႈ၊” ဝႃႈၼင်ႇၼႆလႄႈ၊ၵေႃႉဢၼ်ဢဝ်တူဝ်ၶၼ်ႇထႃႇမၼ်းၵႂႃႇႁူမ်ႈပွင်းလူၺ်ႈၵၼ်တင်းမႄႈမွၵ်ႇယႃႈၼၼ်ႉ၊တူဝ်ၶၼ်ႇထႃႇမၼ်းပဵၼ်ဢၼ်လဵဝ်ၵၼ်တင်းမႄႈမွၵ်ႇယႃႈၼၼ်ႉယဝ်ႉ၊ဝႃႈၼႆသူဢမ်ႇႁုႁိုဝ်း။-
ၵူၺ်းၵႃႈ၊ၽူႈလႂ်သေဢမ်ႇဝႃႈ၊ၵေႃႉဢၼ်ဢဝ်ၸႂ်ဝိၺိၺ်ႇမၼ်းႁူမ်ႈပွင်းလူၺ်ႈၵၼ်တင်း ၸဝ်ႈၶရိၸ်ႈ၊ ၸိုင်၊ၸႂ်ဝိၺိၺ်ႇမၼ်းၼၼ်ႉပဵၼ်ဢၼ်လဵဝ်ၵၼ်တင်းမၼ်းၸဝ်ႈဢေႃႈ။
ဝႄႈပဵတ်ႈတၢင်းဢၼ်ႁဵတ်းမေႇထုင်ႇဢၼ်ဢမ်ႇတြႃးတႃႉ။ ဢပျတ်ႈတၢင်ႇၸိူဝ်ႉတၢင်ႇမဵဝ်းၸိုင်၊ၵေႃႉဢၼ်ၽိတ်းပိူင်ႈၼၼ်ႉဢမ်ႇတိူဝ်ႉတီႈတူဝ်မၼ်း။ ၵူၺ်းၵႃႈ၊ဢပျတ်ႈဢၼ်ႁဵတ်းမေႇထုင်ႇဢၼ်ဢမ်ႇတြႃးၼၼ်ႉတိူဝ်ႉၶိူၵ်ႈတီႈတူဝ်မၼ်းၵမ်းလဵဝ်ဢေႃႈ။-
သူဢမ်ႇႁုလွင်ႈဢၼ်တူဝ်ၶၼ်ႇထႃႇသူပဵၼ်ၵျွင်းပိၵ်ႈမၢၼ်ႇပုၼ်ႈဝိၺိၺ်ႇမူတ်းၸၢင်ႇၸဝ်ႈ၊ဢၼ်တႄႇယူႇၵႃႈၼႂ်းသူဢၼ်ၽြႃးပဵၼ်ၸဝ်ႈပၼ်သူ။ ဢိၵ်ႇတင်းသူဢမ်ႇပိူင်ႇတူဝ်ၶၼ်ႇထႃႇသူၼၼ်ႉႁိုဝ်း။-
ၽြႃးပဵၼ်ၸဝ်ႈဢဝ်တင်းၵႃႈၶၼ်ဢၼ်ယႂ်ႇၼႃႇသေလႄႈ သိုဝ်ႉဢဝ်သူယဝ်ႉ။ ပိူဝ်ႈၼႆလႄႈႁႂ်ႈတူဝ်ၶၼ်ႇထႃႇသူပဵၼ်တီႈယုၵ်ႉယွင်ႈမုၼ်ၽုင်းၽြႃးပဵၼ်ၸဝ်ႈတႃႉ။
လူၺ်ႈလွင်ႈလိၵ်ႈဢၼ်သူတႅမ်ႈထၢမ်မႃးၼၼ်ႉ၊ပေႃးၵူၼ်းၸၢႆးယင်းဢမ်ႇသိူၵ်ႈသမ်ႇမႄႈယိင်းလႄႈယူႇၸိုင်လီယဝ်ႉဢေႃႈ။-
ၵူၺ်းၵႃႈ၊ၵွပ်ႈပိူဝ်ႈၽိတ်းပိူင်ႈလူၺ်ႈတၢင်းဢၼ်ႁဵတ်းမေႇထုင်ႇဢၼ်ဢမ်ႇတြႃးၼၼ်ႉ မီးၼမ်ၼႃႇၽႅဝ်လႄႈၵူၼ်းၸၢႆးၵူႈၵေႃႉထုၵ်ႇလီမီးမေးတူဝ်ၸဝ်ႈၵဝ်ႇႁင်းၽႂ်ႁင်းမၼ်း၊ဢိၵ်ႇတင်းမႄႈယိင်းၵူႈၵေႃႉထုၵ်ႇလီမီးၽူဝ်တူဝ်ၸဝ်ႈၵဝ်ႇႁင်းၽႂ်ႁင်းမၼ်းဢေႃႈ။-
ႁႂ်ႈၵူၼ်းၸၢႆးႁဵတ်းၸွမ်းၼင်ႇဢၼ်မၼ်းထုၵ်ႇလီႁဵတ်းဝၢတ်ႈတီႈမေးမၼ်းလႄႈႁႂ်ႈမႄႈယိင်းႁဵတ်းဝၢတ်ႈတီႈၽူဝ်မၼ်းႁႂ်ႈၵေႃႉၼိုင်ႈလႄႈၵေႃႉၼိုင်ႈႁဵတ်းႁႂ်ႈပျေႃႇၸႂ်တီႈၵၼ်တႃႉ။-
မေးၸိုင်၊ဢမ်ႇပိူင်ႇတူဝ်ၶၼ်ႇထႃႇမၼ်း၊ၽူဝ်မၼ်းၵူၺ်းပိူင်ႇဢေႃႈ။ ၼႄးလဵဝ်ၵၼ်ၽူဝ်ၵေႃႈဢမ်ႇပိူင်ႇတူဝ်ၶၼ်ႇထႃႇမၼ်း၊မေးမၼ်းၵူၺ်းပိူင်ႇဢေႃႈ။-
ယႃႇပေဝႄႈပႅတ်ႈတၢင်းဢၼ်ၽူဝ်မေးယူႇႁူမ်ႈလူၺ်ႈၵၼ်။ ၼွၵ်ႈသေပေႃးမီးၸႂ်သၽေႃးမိူၼ်မိူၼ်ၵၼ်ဢၼ်ၶႂ်ႈႁဵတ်းဝၢတ်ႈသူးတွင်းၸိုင်၊တင်းသွင်ၵေႃႉယိူၼ်ႉယႃႇၵၼ်ယေႈၵႅပ်ႈယေႈၸူဝ်ႈတႃႉ။ ႁဵတ်းၼင်ႇၼႆယဝ်ႉၸင်ႇ၊ၼင်ႇႁိုဝ် ၸႃႇတၢၼ်ႇ၊ တၵ်းဢမ်ႇလႆႈၸူဝ်းဢဝ်သူႁႂ်ႈလုလႅဝ်ၸိုင်၊ၶိုၼ်းႁူမ်ႈပွင်းၵၼ်တႃႉ။
ၵဝ်လၢတ်ႈၸိူဝ်ႉၼင်ႇၼႆၼႆႉ၊ဢမ်ႇၸႂ်ႈဝႃႈပၼ်ဢမိင်ႉ။ ၵူၺ်းမိူၼ်ၼင်ႇဝႃႈပၢၵ်ႈလွင်ႈၼႄတၢင်းပၼ်လွင်ႈဢၶႂၢင်ႉဢယေးၽူဝ်လႄႈမေးၼၼ်ႉဢေႃႈ။-
တီႈတႄႉမၼ်းၸမ်ႉ၊ၵဝ်ၶႂ်ႈႁႂ်ႈၵူၼ်းၸၢႆးၵူႈၵေႃႉယူႇမိူၼ်ၼင်ႇၵဝ်ဢေႃႈ။ ၵူၺ်းၵႃႈ၊ၽြႃးပဵၼ်ၸဝ်ႈပၼ်တၢင်းလီတီႈၵူႈၵေႃႉႁင်းၽႂ်ႁင်းမၼ်းလႄႈတီႈၵမ်ႈၽွင်ႈပၼ်တၢင်းလီမဵဝ်းၼိုင်ႈလႄႈတီႈတၢင်ႇၵေႃႉသမ်ႉပၼ်တၢင်းလီတၢင်ႇမဵဝ်းဢေႃႈ။
ၵမ်းၼႆႉ၊ၵဝ်သမ်ႉတၵ်းလၢတ်ႈလူၺ်ႈလွင်ႈၶဝ်ၸိူဝ်းဢၼ်ဢမ်ႇပႆႇတႄႇၼႃႈႁိူၼ်း၊ဢိၵ်ႇတင်းမႄႈမၢႆႈၶဝ်ဢေႃႈ။ ပေႃးၶဝ်သိုပ်ႇယူႇၵေႃႉလဵဝ်ၵႂႃႇမိူၼ်ၼင်ႇၵဝ်ၼႆႉၵေႃႈလီယဝ်ႉဢေႃႈ။-
ၵူၺ်းၵႃႈ၊ပေႃးၶဝ်ယင်းဢမ်ႇၶျုၵ်ႈတူဝ်ၶဝ်ၸႂ်ၶဝ်လႆႈၸိုင်၊တႄႇၼႃႈႁိူၼ်းသေတႃႉ။ လွင်ႈမၼ်းၸမ်ႉ၊တၢင်းဢၼ်တႄႇၼႃႈႁိူၼ်းၼၼ်ႉယဵင်ႈၶႅၼ်းလီသေတၢင်းဢၼ်မႆႈႁွၼ်ႉလူၺ်ႈၸႂ်ၵိလေႇသႃႇၼၼ်ႉဢေႃႈ။
ၶဝ်ၸိူဝ်းဢၼ်တႄႇၼႃႈႁိူၼ်းယဝ်ႉၼၼ်ႉ၊ၵဝ်ဢမ်ႇဢဝ်ၵႂၢမ်းၵဝ်ၵူၺ်းဝႃႈလႄႈၵဝ်ဢဝ်ဢမိင်ႉၸဝ်ႈၽြႃးလႄႈဝႃႈၸမ်ႉ၊မႄႈယိင်းတၵ်းဢမ်ႇလႆႈၽၢတ်ႇလႆႈယၢၼ်ၵၼ်တင်းၽူဝ်တူဝ်ၸဝ်ႈၵဝ်ႇ။-
ပေႃးမၼ်းၽၢတ်ႇယၢၼ်ၸိုင်၊မၼ်းတၵ်းလႆႈယူႇၵူၺ်းၶေႃမၼ်း၊ဢမ်ႇၼၼ်ၶိုၼ်းႁူမ်ႈပွင်းလူၺ်ႈၵၼ်တင်းၽူဝ်ၵဝ်ႇမၼ်းၼၼ်ႉတႃႉ။ ၵူၼ်းၸၢႆးၵေႃႈယႃႇပေပႅတ်ႈမေးတူဝ်ၸဝ်ႈၵဝ်ႇ။
တီႈတၢင်ႇၵေႃႉတၢင်ႇၵူၼ်းတင်းလၢႆၸမ်ႉ၊ၸဝ်ႈၽြႃးယင်းဢမ်ႇပိင်းၺၢပ်ႈဝႆႉလႄႈၵဝ်သမ်ႉမီးၵႂၢမ်းသင်ႇသွၼ်ထႅင်ႈၼႄးၼိုင်ႈလႄႈဝႃႈ၊ပေႃးၵူၼ်းၸၢႆးၶရိၸ်ႈယၢၼ်ႇၵေႃႉၼိုင်ႈမီးမေးဢၼ်ဢမ်ႇယုမ်ႇမၢတ်ႈၼၼ်ႉလႄႈ မေးမၼ်းမီးဢလူဝ်ႇၶႂ်ႈယူႇႁူမ်ႈပွင်းလူၺ်ႈၵၼ်တင်းမၼ်းၵႂႃႇၸိုင်၊မၼ်းတၵ်းတေဢမ်ႇလႆႈပႅတ်ႈမေးမၼ်းၼၼ်ႉ။-
ၼႄးလဵဝ်ၵၼ်ပေႃးမႄႈယိင်းၶရိၸ်ႈယၢၼ်ႇၵေႃႉၼိုင်ႈမီးၽူဝ်ဢၼ်ဢမ်ႇယုမ်ႇမၢတ်ႈၼၼ်ႉလႄႈၽူဝ်မၼ်းမီးဢလူဝ်ႇၶႂ်ႈယူႇႁူမ်ႈပွင်းလူၺ်ႈၵၼ်တင်းမၼ်းၵႂႃႇၸိုင်၊မၼ်းတၵ်းတေဢမ်ႇလႆႈပႅတ်ႈၽူဝ်မၼ်းၼၼ်ႉ။-
လွင်ႈမၼ်းၸမ်ႉ၊ၽူဝ်ဢၼ်ဢမ်ႇယုမ်ႇမၢတ်ႈၼၼ်ႉၽြႃးပဵၼ်ၸဝ်ႈထွၵ်ႈတေႃႇၼႃႈမေးမၼ်းလႄႈႁပ်ႉတုင်းဢဝ်ဝႆႉဢေႃႈ။ မေးဢၼ်ဢမ်ႇယုမ်ႇမၢတ်ႈၼၼ်ႉၵေႃႈၽြႃးပဵၼ်ၸဝ်ႈထွၵ်ႈတေႃႇၼႃႈၽူဝ်မၼ်းလႄႈႁပ်ႉတုင်းဢဝ်ဝႆႉဢေႃႈ။ ပေႃးယင်းဢမ်ႇပဵၼ်ၸိူဝ်ႉၼင်ႇၼႆၸိုင်၊လုၵ်ႈလၢင်းၶဝ်တၵ်းတေဢမ်ႇမူတ်းသႂ်ဢေႃႈ။ ၵွပ်ႈပိူဝ်ႈပဵၼ်ၸိူဝ်ႉၼင်ႇၼႆၸင်ႇ၊ၽြႃးပဵၼ်ၸဝ်ႈမၢတ်ႈၶဝ်မူတ်းသႂ်ဢေႃႈ။-
ၼႂ်းဝႃႈၼၼ်သေၵေႃႈပေႃးၵေႃႉဢၼ်ဢမ်ႇယုမ်ႇမၢတ်ႈၼၼ်ႉၽူဝ်သေဢမ်ႇဝႃႈ၊မေးသေဢမ်ႇဝႃႈ၊ၶႂ်ႈၽၢတ်ႇၵႂႃႇၸိုင်၊ႁႂ်ႈမၼ်းၽၢတ်ႇၵႂႃႇတႃႉ။ ပေႃးပဵၼ်ၸိူဝ်ႉၼင်ႇၼႆၵႂႃႇၸိုင်၊ၽူဝ်ဢၼ်ယုမ်ႇမၢတ်ႈဢမ်ႇၼၼ်မေးဢၼ်ယုမ်ႇမၢတ်ႈၼၼ်ႉပဵၼ်ၵူၼ်းလွတ်ႈလႅဝ်းယဝ်ႉ၊ၵွပ်ႈပိူဝ်ႈၽြႃးပဵၼ်ၸဝ်ႈႁွင်ႉဢဝ်သူႁႂ်ႈသူလႆႈယူႇထုၵ်ႇမေႃၵၼ်ဢေႃႈ။-
ၵေႃႉဢၼ်ပဵၼ်မေး႟။ မႂ်းတေၸွႆႈႁႂ်ႈၽူဝ်မႂ်းလွတ်ႈလႆႈႁိုဝ်ဢမ်ႇလွတ်ႈလႆႈႁိုဝ်ဝႃႈၼႆ၊ႁုလႆႈၸိူဝ်ႉၼင်ႇႁိုဝ်။ ၵေႃႉဢၼ်ပဵၼ်ၽူဝ်႟။ မႂ်းတေၸွႆႈမေးမႂ်းလွတ်ႈလႆႈႁိုဝ်၊ဢမ်ႇလွတ်ႈလႆႈႁိုဝ်ဝႃႈၼႆ၊ႁုလႆႈၸိူဝ်ႉၼင်ႇႁိုဝ်။
ၽူႈလႂ်သေဢမ်ႇဝႃႈ၊မၼ်းထုၵ်ႇလီယူႇၸွမ်းၸိူဝ်ႉၼင်ႇဢၼ်ၸဝ်ႈၽြႃးပၼ်သုၵျေးၸူးတီႈမၼ်းၼၼ်ႉလႄႈမၼ်းထုၵ်ႇလီယူႇမိူၼ်ၵဝ်ႇၸွမ်းၼင်ႇမိူဝ်ႈဢၼ်ၽြႃးပဵၼ်ၸဝ်ႈႁွင်ႉဢဝ်မၼ်းၼၼ်ႉဢေႃႈ။ လွင်ႈတၢင်းၼႆႉၸိုင်၊ၵဝ်သင်ႇသွၼ်ပၼ်ၵႃႈတီႈၸိူဝ်းၸဝ်ႈၵူႈတီႈယဝ်ႉ။-
ပေႃးမီးသေၵေႃႉသေၵူၼ်းဢၼ်ၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ယဝ်ႉလႄႈ၊မိူဝ်ႈဢၼ်ၽြႃးပဵၼ်ၸဝ်ႈႁွင်ႉဢဝ်မၼ်းၼၼ်ႉၸိုင်၊ယႃႇပေႁႂ်ႈမၼ်းယႃႉပႅတ်ႈႁွႆးပၢတ်ႇၼၼ်ႉ။ ပေႃးမီးၵေႃႉဢၼ်ယင်းဢမ်ႇပႆႇလႆႈၶၢမ်ႇဢဝ်မၢင်ႇၵလႃႇပၢတ်ႇပၢႆၼင်မိူဝ်ႈဢၼ်ၽြႃးပဵၼ်ၸဝ်ႈႁွင်ႉဢဝ်မၼ်းၼၼ်ႉၸိုင်၊ယႃႇပေႁႂ်ႈမၼ်းၶၢမ်ႇတၢင်းဢၼ်ပၢတ်ႇပၢႆၼင်ၼၼ်ႉယဝ်ႉ။-
ပၢတ်ႇပၢႆၼင်သေဢမ်ႇဝႃႈ၊ဢမ်ႇပၢတ်ႇပၢႆၼင်သေဢမ်ႇဝႃႈ၊မၼ်းဢမ်ႇမီးဢၵျူဝ်း။ ဢၼ်မီးဢၵျူဝ်းၼၼ်ႉၸမ်ႉ၊လူဝ်ႇထွမ်ႇဢဝ်ပိင်းၺၢပ်ႈတြႃးၽြႃးပဵၼ်ၸဝ်ႈတင်းလၢႆလႄႈၵမ်ၵျၢင်ႉၸွမ်းၵူၺ်းဢေႃႈ။-
ၽူႈလႂ်သေဢမ်ႇဝႃႈ၊မိူဝ်ႈဢၼ်ၽြႃးပဵၼ်ၸဝ်ႈႁွင်ႉဢဝ်မၼ်းၼၼ်ႉမၼ်းပဵၼ်ယူႇၸိူဝ်ႉႁိုဝ်ၵေႃႈမၼ်းထုၵ်ႇလီယူႇၸွမ်းၵႂႃႇမိူၼ်ၵဝ်ႇၼၼ်ႉဢေႃႈ။-
မိူဝ်ႈဢၼ်ၽြႃးပဵၼ်ၸဝ်ႈႁွင်ႉဢဝ်မႂ်းၼၼ်ႉမႂ်းပဵၼ်ၶႃႈပိူၼ်ႈဝႆႉႁိုဝ်း။ ယႃႇပေၸႂ်လု။ ၵူၺ်းၵႃႈ၊ပေႃးမႂ်းလႆႈဢၶႂၢင်ႉလွတ်ႈလႅဝ်းၸိုင်၊ဢဝ်ဢၶႂၢင်ႉဢယေးဢၼ်ပဵၼ်ၵူၼ်းလွတ်ႈလႅဝ်းၼၼ်ႉတႃႉ။-
လွင်ႈမၼ်းၸမ်ႉ၊ၼႂ်းမိူဝ်ႈဢၼ်မၼ်းယင်းပဵၼ်ၶႃႈပိူၼ်ႈယူႇလႄႈသမ်ႉလႆႈၶၢမ်ႇဢဝ်တၢင်းဢၼ်ၽြႃးပဵၼ်ၸဝ်ႈႁွင်ႉဢဝ်ၼၼ်ႉ၊ၵေႃႉၼၼ်ႉပဵၼ်ၵူၼ်းလွတ်ႈလႅဝ်းၼႂ်းၸဝ်ႈၽြႃးဢေႃႈ။ ပိူင်လဵဝ်ၵၼ်ၵူၼ်းလွတ်ႈလႅဝ်းဢၼ်ၽြႃးပဵၼ်ၸဝ်ႈႁွင်ႉဢဝ်ၼၼ်ႉပဵၼ်ၶႃႈ ၸဝ်ႈၶရိၸ်ႈ၊ ဢေႃႈ။-
ၽြႃးပဵၼ်ၸဝ်ႈဢဝ်ၵႃႈၶၼ်ဢၼ်ယႂ်ႇသေသိုဝ်ႉဢဝ်သူယဝ်ႉလႄႈယႃႇပေၶၢမ်ႇပဵၼ်ၶႃႈတီႈသေၵေႃႉသေၵူၼ်း။-
ပီႈၼွင်ႉၶဝ်႟။ ၽူႈလႂ်သေဢမ်ႇဝႃႈ၊မိူဝ်ႈဢၼ်ၽြႃးပဵၼ်ၸဝ်ႈႁွင်ႉဢဝ်မၼ်းၼၼ်ႉ၊မၼ်းပဵၼ်ယူႇၸိူဝ်ႉႁိုဝ်ၵေႃႈမၼ်းထုၵ်ႇလီယူႇၸွမ်းၵႂႃႇမိူၼ်ၵဝ်ႇၼႂ်းၽြႃးပဵၼ်ၸဝ်ႈဢေႃႈ။
လူၺ်ႈလွင်ႈၶဝ်ၸိူဝ်းဢၼ်ဢမ်ႇတႄႇၼႃႈႁိူၼ်းၼၼ်ႉၸမ်ႉ၊ၸဝ်ႈၽြႃးယင်းဢမ်ႇပိင်းၺၢပ်ႈဝႆႉသေၵေႃႈ၊ၸွမ်းၼင်ႇၵဝ်ပဵၼ်ၵေႃႉဢၼ်ၸဝ်ႈၽြႃးဢဵတ်းလူလႄႈပဵၼ်ၵေႃႉဢၼ်ထိူၵ်ႈယုမ်ႇယမ်ၼၼ်ႉၵဝ်မီးၵႂၢမ်းပၼ်သတိၼင်ႇၼႆဢေႃႈ။
ထွၵ်ႈလူၺ်ႈၶိင်ႇယၢမ်းတုၵ်ႉၶႃႉၸမ်ႁွတ်ႈထိုင်မႃးယဝ်ႉလႄႈၵဝ်ထၢင်ႇဝႃႈ၊ၵူၼ်းၸၢႆးထုၵ်ႇလီယူႇၵႂႃႇၸိူဝ်ႉၼင်ႇဢၼ်မၼ်းပဵၼ်ယူႇမိူဝ်ႈလဵဝ်ၼႆႉဢေႃႈ။-
သင်မီးမေးယဝ်ႉၸိုင်၊ယႃႇပေၶႆႈၸႂ်ႁႂ်ႈလႆႈၽၢတ်ႇယၢၼ်ၵၼ်တင်းမေးမႂ်း။ သင်ဝႃႈဢမ်ႇပႆႇတႄႇၼႃႈႁိူၼ်းၵေႃႈယႃႇပေတႄႇၼႃႈႁိူၼ်းယဝ်ႉ။-
ၼႂ်းဝႃႈၼၼ်သေၵေႃႈပေႃးမႂ်းတႄႇၼႃႈႁိူၼ်းၸိုင်၊ဢမ်ႇမီးဢပျတ်ႈ။ မႄႈယိင်းဢၼ်ဢမ်ႇပႆႇတွၼ်ႉမီးၽူဝ်ၵေႃႈ ပေႃးမၼ်းတႄႇၼႃႈႁိူၼ်းၸိုင်၊မၼ်းၵေႃႈဢမ်ႇမီးဢပျတ်ႈ။ ၵူၺ်းၵႃႈ၊ၶဝ်ၸိူဝ်းဢၼ်တႄႇၼႃႈႁိူၼ်းၼၼ်ႉ တၵ်းလႆႈၶၢမ်ႇတုၵ်ႉၶႃႉၼႂ်းလေႃးၵႃႉၼႆႉလႄႈၵဝ်ဢမ်ႇၶႂ်ႈႁႂ်ႈသူလႆႈၶၢမ်ႇတုၵ်ႉၶႃႉၼၼ်ႉဢေႃႈ။
ပီႈၼွင်ႉၶဝ်႟။ ၵဝ်လၢတ်ႈၸိူဝ်ႉၼင်ႇၼႆၵွပ်ႈပိူဝ်ႈၶိင်ႇမိုဝ်ႉဝၼ်းၵမ်ႇၽႃႇၸမ်တေသုတ်းသဵင်ႈယဝ်ႉလႄႈၶဝ်ၸိူဝ်းဢၼ်မီးမေးၼၼ်ႉတၵ်းလႆႈပဵၼ်မိူၼ်ၸိူဝ်ႉၼင်ႇဢမ်ႇမီးမေးဢေႃႈ။-
ၶဝ်ၸိူဝ်းဢၼ်ႁွင်ႉႁႆႈၼၼ်ႉၵေႃႈတၵ်းလႆႈပဵၼ်မိူၼ်ၸိူဝ်ႉၼင်ႇဢမ်ႇမီးတၢင်းမႆႈၸႂ်ၶီၸႂ်ၵႃႈသင်ဢေႃႈ။ ၶဝ်ၸိူဝ်းဢၼ်ယုမ်ႉၶူဝ်ၼၼ်ႉၵေႃႈတၵ်းလႆႈပဵၼ်မိူၼ်ၸိူဝ်ႉၼင်ႇဢမ်ႇမီးတၢင်းၸူမ်းတၢင်းသိူဝ်းဢေႃႈ။ ၶဝ်ၸိူဝ်းဢၼ်သိုဝ်ႉဢဝ်ၼၼ်ႉၵေႃႈတၵ်းလႆႈပဵၼ်မိူၼ်ၸိူဝ်ႉၼင်ႇဢၼ်ဢမ်ႇလႆႈပိူင်ႇၵႃႈသင်ၼၼ်ႉဢေႃႈ။-
ၶဝ်ၸိူဝ်းဢၼ်ၸႂ်ၸပ်းၸႂ်ၸွႆးလေႃးၵႃႉၼႆႉၼၼ်ႉၵေႃႈတၵ်းလႆႈပဵၼ်မိူၼ်ၸိူဝ်ႉၼင်ႇၶဝ်ဢမ်ႇၸပ်းၸွႆးမၼ်းၼၼ်ႉဢေႃႈ။ လွင်ႈမၼ်းၸမ်ႉ၊ပုင်ႇႁၢင်ႈလေႃးၵႃႉဢၼ်ပဵၼ်ယူႇမိူဝ်ႈလဵဝ်ၼႆႉတၵ်းၸဵဝ်းသုတ်းၸဵဝ်းဝၢႆးၵႂႃႇဢေႃႈ။
ၵဝ်ၶႂ်ႈႁႂ်ႈသူလွတ်ႈၵၢင်းတင်းတၢင်းဢၼ်မႆႈၸႂ်ၶီၸႂ်ဢေႃႈ။ ၵေႃႉဢၼ်ဢမ်ႇတႄႇၼႃႈႁိူၼ်းၼၼ်ႉ လွတ်ႈလႅဝ်းလႄႈၸၢင်ႈလႆႈၶတ်းၸႂ်ႁဵတ်းၼႃႈၵၢၼ်ၸဝ်ႈၽြႃးလုမ်းလုမ်း၊ၵွပ်ႈပိူဝ်ႈမၼ်းလႆႈၶတ်းၸႂ်ယူႇႁႂ်ႈထုၵ်ႇၸႂ်ၸဝ်ႈၽြႃးဢေႃႈ။-
ၵေႃႉဢၼ်တႄႇၼႃႈႁိူၼ်းၼၼ်ႉၸမ်ႉ၊လႆႈၶတ်းၸႂ်ႁဵတ်းၼႃႈၵၢၼ်လေႃးၵီႇ ၵွပ်ႈပိူဝ်ႈမၼ်းလႆႈၶတ်းၸႂ်ယူႇႁႂ်ႈထုၵ်ႇၸႂ်မေးမၼ်းဢေႃႈ။-
ပိူဝ်ႈၼႆလႄႈၸႂ်မၼ်းလႆႈပဵၼ်သွင်ၸႂ်ဝႆႉဢေႃႈ။ မႄႈယိင်းဢၼ်ဢမ်ႇဢဝ်ၽူဝ်၊ဢမ်ႇၼၼ်သၢဝ်ၵၼ်ႇၺႃႇဢွၼ်ႇၼၼ်ႉၵေႃႈလႆႈဢဝ်တူဝ်ၶဝ်တင်းၸႂ်ဝိၺိၺ်ႇၶဝ်သၢၵ်ႈၵၢပ်ႈတီႈၸဝ်ႈၽြႃးလႄႈၶဝ်လႆႈလွတ်ႈလႅဝ်းႁႂ်ႈလႆႈၶတ်းၸႂ်ႁဵတ်းၼႃႈၵၢၼ်ၸဝ်ႈၽြႃးလုမ်းလုမ်းဢေႃႈ။ မႄႈယိင်းဢၼ်တႄႇၼႃႈႁိူၼ်းၸမ်ႉ၊လႆႈၶတ်းၸႂ်ႁဵတ်းၼႃႈၵၢၼ်လေႃးၵီႇၵွပ်ႈပိူဝ်ႈမၼ်းလႆႈၶတ်းၸႂ်ယူႇႁႂ်ႈထုၵ်ႇၸႂ်ၽူဝ်မၼ်းဢေႃႈ။
ၵဝ်လၢတ်ႈၸိူဝ်ႉၼင်ႇၼႆၼၼ်ႉ၊ၵဝ်ထွၵ်ႈလူၺ်ႈဢၵျူဝ်းသူလႄႈလၢတ်ႈဢေႃႈ။ ဢမ်ႇၸႂ်ႈၵဝ်လၢတ်ႈႁႂ်ႈလႆႈဢဝ်တူင်ႇၸိူၵ်ႈသေလႄႈၵၢင်မတ်ႉဢဝ်သူ။ ၵဝ်ပၼ်ဢၵျၢမ်ႇႁႂ်ႈလႆႈၸွႆႈထႅမ်သူ၊ႁႂ်ႈသူလႆႈႁဵတ်းဢၼ်လီဢၼ်ငၢမ်းၸွမ်းတၢင်းဢၼ်မၢၼ်ႇမႅၼ်ႈဢမ်ႇၵႃး၊ႁႂ်ႈသူလႆႈသၢၵ်ႈၵၢပ်ႈတူဝ်သူပုၼ်ႈၼႃႈၵၢၼ်ၸဝ်ႈၽြႃးလုမ်းလုမ်း၊ယႃႇပေႁႂ်ႈမီးတီႈသုတ်ႉတီႈယွမ်းၼၼ်ႉဢေႃႈ။
ပေႃးသေၵေႃႉသေၵူၼ်းႁုဝႃႈ၊တၢင်းဢၼ်မၼ်းလႆႈႁဵတ်းပူၼ်ႉလိူဝ်ဢၼ်ဢမ်ႇထုၵ်ႇဢမ်ႇလီၵႃႈတီႈၽူႈသၢဝ်ဢၼ်မၼ်းမၼ်ႈဝႆႉၼၼ်ႉၸိုင်၊ပေႃးၽူႈသၢဝ်ၼၼ်ႉဢသၢၵ်ႈထူၼ်ႈသေယဝ်ႉယင်းဢမ်ႇပႆႇမီးၽူဝ်လႄႈပေႃးတေဢဝ်ဢၢပ်ႈပၼ်ၵၼ်ၸိုင်၊ႁႂ်ႈၵေႃႉၼၼ်ႉႁဵတ်းၸွမ်းၵႃႈၼင်ႇဢၼ်မၼ်းႁၼ်ဝႃႈလီၼၼ်ႉတႃႉ။ ဢၢပ်ႈပၼ်ႁႂ်ႈၶဝ်ဢဝ်ၵၼ်သေတႃႉ၊မၼ်းဢမ်ႇမီးဢပျတ်ႈ။-
ၵူၺ်းၵႃႈ၊ပေႃးၵေႃႉဢၼ်မီးၸႂ်မၼ်ႈၶိူင်ႇ၊ပိူဝ်ႈဢၼ်မၼ်းမီးဢၶႂၢင်ႉဢယေးၼၼ်ႉ၊ဝႆႉၸႂ်ၶျုၵ်ႈၵၼ်ႈဢလူဝ်ႇတူဝ်ၸဝ်ႈၵဝ်ႇလႄႈတႅပ်းတတ်းဝႆႉၼႂ်းၸႂ်မၼ်းလႄႈမၼ်းဢမ်ႇဢဝ်ၽူႈသၢဝ်ၼၼ်ႉၸိုင်၊မၼ်းႁဵတ်းဢၼ်ထုၵ်ႇဢၼ်လီယဝ်ႉဢေႃႈ။-
ပိူဝ်ႈၼႆလႄႈၵေႃႉဢၼ်ဢဝ်ၽူႈသၢဝ်ၼၼ်ႉလႆႈႁဵတ်းဢၼ်လီဢၼ်ထုၵ်ႇယဝ်ႉဢေႃႈ။ ၼႂ်းဝႃႈၼၼ်သေၵေႃႈၵေႃႉဢၼ်ဢမ်ႇဢဝ်ၽူႈသၢဝ်ၼၼ်ႉယဵင်ႈၶႅၼ်းႁဵတ်းဢၼ်ထုၵ်ႇဢၼ်လီဢေႃႈ။
မႄႈယိင်းဢၼ်မီးၽူဝ်ၼၼ်ႉၸူဝ်ႈဢၼ်ၽူဝ်မၼ်းယင်းဢသၢၵ်ႈလိပ်းယူႇၼၼ်ႉဢမ်ႇလွတ်ႈလႅဝ်း။ ၵူၺ်းၵႃႈ၊ပေႃးၽူဝ်မၼ်းတၢႆၵႂႃႇၸိုင်၊မၼ်းလွတ်ႈလႅဝ်းႁႂ်ႈလႆႈဢဝ်ၽူဝ်ၵေႃႉမႂ်ႇထႅင်ႈဢၼ်မၼ်းၶႂ်ႈဢဝ်ၼၼ်ႉဢေႃႈ။ ၼႂ်းဝႃႈၼၼ်သေၵေႃႈမၼ်းတၵ်းလႆႈဢဝ်ၶရိၸ်ႈယၢၼ်ႇၼင်ႇၵၼ်ဢေႃႈ။-
ၵူၺ်းၵႃႈ၊ပေႃးမၼ်းယင်းဢမ်ႇၶိုၼ်းဢဝ်ၽူဝ်ထႅင်ႈၸိုင်၊မၼ်းတေယဵင်ႈၶႅၼ်းမီးၸႂ်ၶျၢမ်းသႃႇဢေႃႈ။ လွင်ႈတၢင်းၼႆႉပဵၼ်လွင်ႈဢၼ်ၵဝ်ႁၼ်ထိုင်ဝႃႈ၊ပဵၼ်လွင်ႈဢၼ်လီဢမ်ႇလီၼၼ်ႉလႄႈ၊ၵဝ်ထၢင်ႇဝိၺိၺ်ႇၸဝ်ႈၽြႃးၼႄပျႃးပၼ်ၵဝ်ဢေႃႈ။
ၼႆႉၸမ်ႉ၊ၸၢပ်ႈသႅင်ႇလူၺ်ႈတၢင်းၵိၼ်ဢၼ်ပိူၼ်ႈလူႇတီႈႁုၼ်ႇႁၢင်ႈသၢင်းထုယဝ်ႉၼၼ်ႉဢေႃႈ။ ၵႂၢမ်းဢၼ်ဝႃႈ၊ “ႁဝ်းမီးတၢင်းႁုတၢင်းႁၼ်ႁင်းၽႂ်ႁင်းမၼ်းဢေႃႈ၊” ဝႃႈၼင်ႇၼႆၼၼ်ႉမၢၼ်ႇမႅၼ်ႈၸိုဝ်ႈၸႂ်ႈသေၵေႃႈ၊တၢင်းႁုတၢင်းႁၼ်ၼၼ်ႉၸၢင်ႈႁဵတ်းႁႂ်ႈၵူၼ်းမီးႁူဝ်ၸႂ်ၽႅၼ်သုင်ဢေႃႈ။ တၢင်းႁၵ်ႉမႅတ်ႈတႃႇၸမ်ႉ၊ၸၢင်ႈပၼ်ဢဵၼ်ပၼ်ႁႅင်းၸႂ်ဝိၺိၺ်ႇဢေႃႈ။-
ၵေႃႉဢၼ်ထၢင်ႇဝႃႈ၊မၼ်းႁုသေၸိူဝ်ႉသေပိူင်ယဝ်ႉ၊တီႈတႄႉမၼ်း၊မၼ်းယင်းဢမ်ႇပႆႇႁုဢၼ်မၼ်းထုၵ်ႇလီႁုၼၼ်ႉဢေႃႈ။-
ၵူၺ်းၵႃႈ၊ၵေႃႉဢၼ်ႁၵ်ႉၽြႃးပဵၼ်ၸဝ်ႈၼၼ်ႉၸမ်ႉ၊ၸဝ်ႈၽြႃးႁုၸၵ်းမၼ်းဢေႃႈ။
ပိူဝ်ႈၼႆလႄႈ၊လူၺ်ႈလွင်ႈဢၼ်ၵိၼ်တၢင်းၵိၼ်ဢၼ်ပိူၼ်ႈလူႇတီႈႁုၼ်ႇႁၢင်ႈသၢင်းထုၼၼ်ႉႁဝ်းႁုလွင်ႈဢၼ်ႁုၼ်ႇႁၢင်ႈသၢင်းထုပဵၼ်ဢၼ်ဢမ်ႇမီးၸႂ်တႄႉတႄႉ၊ဢိၵ်ႇတင်းႁုလွင်ႈဢၼ်ၽြႃးပဵၼ်ၸဝ်ႈမီးသူႇလဵဝ်ပႃးလဵဝ်ၵူၺ်းၼၼ်ႉဢေႃႈ။-
ပိၵ်ႉသမ်ႉပိူၼ်ႈယုမ်ႇဝႃႈ၊မီးၽြႃးၼမ်ၼႃႇၵႃႈၼိူဝ်ၽႃႉၵၢင်ႁၢဝ်၊ဢိၵ်ႇတင်းၵႃႈၼိူဝ်လိၼ်မိူင်းၼႆႉလႄႈသင်၊ပိၵ်ႉသမ်ႉမီးၽြႃးၼမ်ၵႃႈႁိုဝ်သေၵေႃႈ၊-
ပုၼ်ႈႁဝ်းၸမ်ႉ၊မီးၽြႃးပဵၼ်ၸဝ်ႈသူႇလဵဝ်ပႃးလဵဝ်ၵူၺ်း၊ၸဝ်ႈဢၼ်ပဵၼ်ပေႃႈႁဝ်း၊ၸဝ်ႈဢၼ်ၽၢၼ်ႇသၢင်းႁဵတ်းပဵၼ်ၵႃႈမီးတင်းသဵင်ႈတင်းလူင်လႄႈႁဝ်းၵေႃႈလႆႈပဵၼ်ၵူၼ်းမၼ်းၸဝ်ႈဢေႃႈ။ ႁဝ်းၵူၺ်းမီးၸဝ်ႈၽြႃးပႃးလဵဝ်ဢၼ်ပဵၼ် ၸဝ်ႈယေႇသုၶရိၸ်ႈ၊ လႄႈၸႃႉၸဵမ်ၶိူင်ႈပိူင်ၵႃႈမီးတင်းသဵင်ႈတင်းလူင်ဢၼ်ပဵၼ်မႃးၵွပ်ႈလူၺ်ႈမၼ်းၸဝ်ႈလႄႈႁဝ်းၵေႃႈမီးဢသၢၵ်ႈၵွပ်ႈလူၺ်ႈမၼ်းၸဝ်ႈဢေႃႈ။
ၼႂ်းဝႃႈၼၼ်သေၵေႃႈၵူၼ်းၵူႈၵေႃႉဢမ်ႇႁုလွင်ႈၼႆႉ။ ၵူၼ်းၵမ်ႈၽွင်ႈယၢမ်ႈၵူဝ်းၵႂၢႆႇဝႆႈႁုၼ်ႇႁၢင်ႈသၢင်းထုလႄႈႁၢၼ်ႉတေႃႇမိူဝ်ႈလဵဝ်ၼႆႉမိူဝ်ႈဢၼ်ၶဝ်ၵိၼ်တၢင်းၵိၼ်ဢၼ်ပိူၼ်ႈလႆႈလူႇပၼ်တီႈႁုၼ်ႇႁၢင်ႈသၢင်းထုယဝ်ႉၼၼ်ႉၸိုင်၊ၵွပ်ႈပိူဝ်ႈၸႂ်ဢၼ်ႁုတူဝ်ၸဝ်ႈၵဝ်ႇၶဝ်ႁႅင်းလဵၵ်ႉလႄႈၶဝ်ထၢင်ႇတၢင်းၵိၼ်ၼၼ်ႉ ပဵၼ်ၶွင်ႁုၼ်ႇႁၢင်ႈသၢင်းထုတႄႉတႄႉလႄႈၶဝ်ထၢင်ႇဝႃႈ၊တၢင်းၵိၼ်ၼၼ်ႉႁဵတ်းႁႂ်ႈၶဝ်ဢမ်ႇမူတ်းၸၢင်ႇၵႂႃႇဢေႃႈ။-
ပေႃးဝႃႈတႄႉမၼ်း၊တၢင်းၵိၼ်ဢမ်ႇၸၢင်ႈႁဵတ်းႁႂ်ႈထုၵ်ႇၸႂ်ၽြႃးပဵၼ်ၸဝ်ႈလႆႈဢေႃႈ။ ၵွပ်ႈပိူဝ်ႈႁဝ်းဢမ်ႇၵိၼ်လႄႈတေသုမ်းသေၸိူဝ်ႉသေပိူင်ၵေႃႈဢမ်ႇၸႂ်ႈ။ ပေႃးႁဝ်းၵိၼ်လႄႈသမ်ႉတေမီးဢၵျူဝ်းၵေႃႈဢမ်ႇၸႂ်ႈဢေႃႈ။
ၼႂ်းဝႃႈၼၼ်သေၵေႃႈလွင်ႈတၢင်းဢၼ်သူလွတ်ႈလႅဝ်းႁႂ်ႈလႆႈႁဵတ်းၵူႈၸိူဝ်ႉၵူႈပိူင်ၼၼ်ႉတၵ်းတေဢမ်ႇႁဵတ်းႁႂ်ႈၵေႃႉဢၼ်မီးတၢင်းယုမ်ႇမၢတ်ႈႁႅင်းၵေႇၼၼ်ႉလႆႈၶီႈလိုတ်းလႄႈထုၵ်ႇမႅၼ်ႈဢပျတ်ႈၸိုင်၊ႁဵတ်းသတိတႃႉ။-
ပေႃးၵေႃႉဢၼ်ၸႂ်ႁုတူဝ်ၸဝ်ႈၵဝ်ႇႁႅင်းၵေႇၼၼ်ႉႁၼ်မႂ်းၵေႃႉဢၼ်ဝႃႈ၊ “ၵဝ်မီးတၢင်းႁုတၢင်းႁၼ်” ၼၼ်ႉၼင်ႈၵိၼ်တၢင်းၵိၼ်ၼႂ်းႁိူၼ်းႁုၼ်ႇႁၢင်ႈသၢင်းထုယူႇၸိုင်၊တၵ်းပဵၼ်တၢင်းဢၼ်ႁဵတ်းႁႂ်ႈၵေႃႉၼၼ်ႉၸႂ်ႁႅင်းယႂ်ႇမႃးလႄႈႁတ်းၵိၼ်တၢင်းၵိၼ်ဢၼ်ပိူၼ်ႈလူႇတီႈႁုၼ်ႇႁၢင်ႈသၢင်းထုၼၼ်ႉဢမ်ႇၸႂ်ႈႁိုဝ်း။-
ပိူဝ်ႈၼႆလႄႈပီႈၼွင်ႉမႂ်းဢၼ်ၸႂ်ႁုတူဝ်ၸဝ်ႈၵဝ်ႇႁႅင်းၵေႇ၊ၵေႃႉဢၼ် ၸဝ်ႈၶရိၸ်ႈ၊ လႆႈၶၢမ်ႇတၢႆပုၼ်ႈမၼ်းၼၼ်ႉတၵ်းႁွတ်ႈထိုင်တၢင်းဢၼ်လုလႅဝ်ၵႂႃႇၵွပ်ႈပိူဝ်ႈမႂ်းၵေႃႉဢၼ် “မီးတၢင်းႁုတၢင်းႁၼ်” ၼၼ်ႉယဝ်ႉဢေႃႈ။-
ပိူဝ်ႈဢၼ်မႂ်းၽိတ်းပိူင်ႈပီႈၼွင်ႉမႂ်းၸိူဝ်ႉၼင်ႇၼၼ်လႄႈ ႁဵတ်းႁႂ်ႈၸႂ်ႁုတူဝ်ၸဝ်ႈၵဝ်ႇၶဝ်ဢၼ်ႁႅင်းၵေႇၼၼ်ႉလႆႈတုၵ်ႉၶႃႉၸိုင်၊မႂ်းၵေႃႈမီးဢပျတ်ႈၽၢႆႇၼႃႈ ၸဝ်ႈၶရိၸ်ႈ၊ ယဝ်ႉ။-
ပိူဝ်ႈၼႆလႄႈပေႃးတၢင်းၵိၼ်ႁဵတ်းႁႂ်ႈပီႈၼွင်ႉၵဝ်မီးဢပျတ်ႈၸိုင်၊ၵဝ်တၵ်းတေဢမ်ႇၵိၼ်ၼိူဝ်ႉသတ်းၼၼ်ႉထႅင်ႈသေပွၵ်ႈ၊ၼင်ႇႁိုဝ်ပီႈၼွင်ႉၵဝ်တၵ်းတေဢမ်ႇလႆႈမီးဢပျတ်ႈၼၼ်ႉဢေႃႈ။
ၵဝ်ဢမ်ႇၸႂ်ႈၵူၼ်းလွတ်ႈႁိုဝ်း။ ၵဝ်ၼႆႉဢမ်ႇၸႂ်ႈတမၢၼ်ႇၸဝ်ႈၵေႃႉၼိုင်ႈႁိုဝ်း။ ၵဝ်ဢမ်ႇလႆႈထူပ်းႁၼ်ၸဝ်ႈႁဝ်း ၸဝ်ႈယေႇသု၊ ႁိုဝ်း။ သူၸိူဝ်းၼႆႉပဵၼ်ဢၵျူဝ်းဢၼ်ပေႃႇမႃးၼႂ်းၵၢၼ်ဢၼ်ၵဝ်ႁဵတ်းၼႂ်းၸဝ်ႈၽြႃးၼၼ်ႉဢမ်ႇၸႂ်ႈႁိုဝ်း။-
ပိၵ်ႉသမ်ႉပိူၼ်ႈတၢင်ႇၵေႃႉဢမ်ႇႁပ်ႉတုင်းဢဝ်ၵဝ်ပဵၼ်တမၢၼ်ႇၸဝ်ႈသေၵေႃႈသူတႄႉႁပ်ႉတုင်းဢဝ်ၵဝ်ယူႇဢေႃႈ။ လွင်ႈမၼ်းၸမ်ႉ၊ၵဝ်ပဵၼ်တမၢၼ်ႇၸဝ်ႈဝႃႈၼႆသူပဵၼ်သၢၵ်ႈသေႇပုၼ်ႈၵဝ်ၵွပ်ႈပိူဝ်ႈဢၼ်သူမီးၼႂ်းၸဝ်ႈၽြႃးၼၼ်ႉဢေႃႈ။
မိူဝ်ႈဢၼ်ပိူၼ်ႈတွင်ႈထၢမ်ၸႅတ်ႈသေးၵဝ်ၼၼ်ႉၵဝ်တွပ်ႇၶဝ်လႄႈဝႃႈၸမ်ႉ၊-
ၵဝ်ဢမ်ႇမီးဢၶႂၢင်ႉဢယေးဢၼ်လႆႈၵိၼ်လႆႈယႅမ်ႉႁိုဝ်း။-
မိူဝ်ႈဢၼ်ႁဝ်းၵႂႃႇတႃႈပႆတၢင်းၼၼ်ႉ၊ၸိူဝ်ႉၼင်ႇဢၼ်တမၢၼ်ႇၸဝ်ႈတၢင်ႇၵေႃႉ၊ၼွင်ႉၸၢႆး ၸဝ်ႈယေႇသု၊ တင်းသြႃႇ ၵေးၽႃႉ၊ ၶဝ်မီးဢၶႂၢင်ႉဢယေးပႃးမေးၶဝ်ၵႂႃႇၸွမ်းၶဝ်ၼၼ်ႉၵဝ်ၼႆႉၵေႃႈဢမ်ႇမီးဢၶႂၢင်ႉဢယေးမိူၼ်ၼင်ႇၶဝ်ႁိုဝ်း။-
ဢမ်ႇၼၼ်ၵေႃႈၵဝ်တင်းသြႃႇ ပႃႇၼပႃႉ၊ ႁဝ်းသွင်ၵေႃႉၼႆႉၵူၺ်းတၵ်းလႆႈႁဵတ်းလဵင်ႉတွင်ႉတူဝ်ၸဝ်ႈၵဝ်ႇႁိုဝ်း။-
ၸွင်ႇတွၼ်ႉမီးလုၵ်ႈသိုၵ်းၵႃႈၼႂ်းတပ်ႉသိုၵ်းၼၼ်ႉ၊လႆႈႁဵတ်းလဵင်ႉတွင်ႉပုၼ်ႈတူဝ်ၸဝ်ႈၵဝ်ႇႁိုဝ်း။ မိူၼ်ၼင်ႇၼၼ်ၸွင်ႇတွၼ်ႉမီးၸဝ်ႈသူၼ်မၢၵ်ႇၸပိတ်ႉဢၼ်ဢမ်ႇၵိၼ်မၢၵ်ႇၸပိတ်ႉၵႃႈၼႂ်းသူၼ်တူဝ်ၸဝ်ႈၵဝ်ႇၼၼ်ႉႁိုဝ်း။ ဢမ်ႇၼၼ်၊ၸွင်ႇတွၼ်ႉမီးၵူၼ်းလဵင်ႉပႄႉ၊ယင်းဢမ်ႇၵိၼ်ၼမ်ႉၼူမ်းပႄႉၼၼ်ႉႁိုဝ်း။
လွင်ႈတၢင်းၸိူဝ်းၼႆႉပဵၼ်ထုင်းၸၢမ်ႇၵူၼ်းၵူၺ်းဢမ်ႇၵႃး၊ၼႂ်းၵျၢမ်းလိၵ်ႈၵေႃႈတႅမ်ႈဝႆႉဝႃႈၸိူဝ်ႉၼင်ႇၼႆဢေႃႈ။-
သြႃႇ မူဝ်းသေႇ၊ တႅမ်ႈပိင်းၺၢပ်ႈတြႃးဝႆႉဝႃႈ၊ “ယႃႇပေသၢၼ်သွင်းသုပ်းတီႈသူပ်းဝူဝ်းမိူဝ်ႈဢၼ်မၼ်းယဵပ်ႇၶဝ်ႈယူႇၼၼ်ႉ၊” ဝႃႈၼင်ႇၼႆဢေႃႈ။ ၽြႃးပဵၼ်ၸဝ်ႈၶႂ်ႈဝႃႈပုၼ်ႈဝူဝ်းၵူၺ်းႁိုဝ်း။-
ဢမ်ႇၼၼ်လႄႈဢၼ်မၼ်းၸဝ်ႈလၢတ်ႈၼၼ်ႉၶႂ်ႈဝႃႈပုၼ်ႈႁဝ်းႁိုဝ်း။ ၸႂ်ႈတႄႉယဝ်ႉဢေႃႈ။ ၵႂၢမ်းၼႆႉပဵၼ်ပုၼ်ႈဢၵျူဝ်းႁဝ်းတႄႉဢေႃႈ။ ၵူၼ်းထႆၼႃးလႄႈသင်၊ၵူၼ်းပၢတ်ႇၶဝ်ႈလႄႈသင်၊ၶဝ်ႁဵတ်းၵၢၼ်ၶဝ်ၵွပ်ႈပိူဝ်ႈၶဝ်မုင်ႈမွင်းၶႂ်ႈလႆႈမၢၵ်ႇၶဝ်ႈႁူင်းၶဝ်ႈဢၼ်ပဵၼ်ၵႃႈႁႅင်းၶဝ်ၼၼ်ႉဢေႃႈ။-
ႁဝ်းၼႆႉဝၢၼ်ႇၸိူဝ်ႉၽၼ်းၽၢႆႇၸႂ်ဝိၺိၺ်ႇၵႃႈၼႂ်းသူဢေႃႈ။ သင်ႁဝ်းပၢတ်ႇဢဝ်ဢၵျူဝ်းၽၢႆႇလေႃးၵႃႉၼႆႉတီႈသူၸိုင်၊ၸွင်ႇၽိတ်းႁိုဝ်း။-
ပေႃးပိူၼ်ႈတၢင်ႇၵေႃႉ၊ယင်းမီးဢၶႂၢင်ႉဢယေးလႆႈဢၵျူဝ်းတီႈသူၸိုင်၊ႁဝ်းသမ်ႉယဵင်ႈၶႅၼ်းမီးဢၶႂၢင်ႉဢယေးဢမ်ႇၸႂ်ႈႁိုဝ်း။ ၵူၺ်းၵႃႈ၊ႁဝ်းယင်းဢမ်ႇတွၼ်ႉဢဝ်ဢၶႂၢင်ႉဢယေးဢၼ်လႆႈဢၵျူဝ်းတီႈသူၼၼ်ႉသေပွၵ်ႈ။ ၼွၵ်ႈသေၼၼ်ႉႁဝ်းယင်းလႆႈယိူၼ်ႉၶၢမ်ႇၼႂ်းလွင်ႈတၢင်းၵူႈၸိူဝ်ႉၵူႈပိူင်ၼင်ႇႁိုဝ်တၵ်းတေဢမ်ႇမီးတၢင်းဢၼ်ႁႄႉၶႅၼ်ၶၢဝ်ႇတြႃးသိူဝ်းပျေႃႇလွင်ႈ ၸဝ်ႈၶရိၸ်ႈ၊ ၼၼ်ႉလူးၵွၼ်ႇဢေႃႈ။-
လွင်ႈဢၼ်ၵူၼ်းၵေႃႉလႂ်သေဢမ်ႇဝႃႈ၊ပေႃးမၼ်းႁဵတ်းၵၢၼ်ၼႂ်းၵျွင်းပိၵ်ႈမၢၼ်ႇၸဝ်ႈၸိုင်၊မၼ်းလႆႈၵိၼ်ၸွမ်းၵႃႈတီႈၵျွင်းပိၵ်ႈမၢၼ်ႇၸဝ်ႈၼၼ်ႉ၊ဢိၵ်ႇတင်းၵေႃႉဢၼ်သၢၵ်ႈသူႇတၢင်းလူႇတီႈထႃႇဝရႃႉၽြႃးၵႃႈတီႈၶဵင်ႇတၢင်းလူႇၼၼ်ႉၵေႃႈ လႆႈၵိၼ်ၸွမ်းၶိူင်ႈတၢင်းလူႇၼၼ်ႉဝႃႈၼႆသူဢမ်ႇႁုႁိုဝ်း။-
မိူၼ်ၸိူဝ်ႉၼင်ႇၼၼ်ၸဝ်ႈၽြႃးသင်ႇလၢတ်ႈဝႆႉ၊ႁႂ်ႈၶဝ်ၸိူဝ်းဢၼ်ႁေႃးလၢတ်ႈၶၢဝ်ႇတြႃးသိူဝ်းပျေႃႇၸဝ်ႈၼၼ်ႉတၵ်းလႆႈၵိၼ်ၸွမ်းၼႂ်းၶၢဝ်ႇတြႃးသိူဝ်းပျေႃႇလႄႈလဵင်ႉတွင်ႉၶဝ်ဢေႃႈ။
ၵူၺ်းၵႃႈ၊ၵဝ်ႁတ်းဢုပ်ႇလၢတ်ႈဝႃႈ၊ၵဝ်ဢမ်ႇတွၼ်ႉယွၼ်းဢဝ်ဢၶႂၢင်ႉဢယေးၸိူဝ်ႉၼင်ႇၼၼ်ၼၼ်ႉသေပွၵ်ႈ။ လွင်ႈဢၼ်ၵဝ်တႅမ်ႈမိူဝ်ႈလဵဝ်ၼႆႉၵေႃႈ၊ၵဝ်တႅမ်ႈယွၼ်းဢၶႂၢင်ႉဢယေးၼၼ်ႉဢမ်ႇၸႂ်ႈ။ ပေႃးပိူၼ်ႈႁဵတ်းႁႂ်ႈၵႂၢမ်းဢၼ်ၵဝ်ဢုပ်ႇဝၢဝ်းၼၼ်ႉပဵၼ်ၵႂၢမ်းဢၼ်ဢမ်ႇပွင်ႇလွင်ႈၵႃႈသင်ၸိုင်၊ၵဝ်ၶၢမ်ႇတၢႆၵႂႃႇယဵင်ႈၶႅၼ်းတေလီဢေႃႈ။-
လွင်ႈမၼ်းၸမ်ႉ၊ၵဝ်ဢမ်ႇမီးလွင်ႈဢၼ်တၵ်းဢုပ်ႇဝၢဝ်းပုၼ်ႈတူဝ်ၸဝ်ႈၵဝ်ႇ ၵွပ်ႈပိူဝ်ႈၵဝ်ႁေႃးလၢတ်ႈၶၢဝ်ႇတြႃးသိူဝ်းပျေႃႇၸဝ်ႈလႄႈမၼ်းပဵၼ်ၼႃႈၵၢၼ်ဢၼ်ၵဝ်ႁပ်ႉဢဝ်ဝႆႉဢေႃႈ။ ပေႃးၵဝ်ယင်းဢမ်ႇႁေႃးဢမ်ႇလၢတ်ႈၶၢဝ်ႇတြႃးသိူဝ်းပျေႃႇၸဝ်ႈၸိုင်၊ၵဝ်တေမီးဢႃႉမၢင်ႇၵလႃႇဢေႃႈ။-
ပေႃးၵဝ်မီးၸေႇတၼႃႇသေလႄႈႁေႃးလၢတ်ႈၸိုင်၊ၵဝ်တၵ်းလႆႈဢၵျူဝ်းၵႃႈၶၼ်မၼ်းဢေႃႈ။ ၵူၺ်းၵႃႈ၊ပေႃးၵဝ်ႁေႃးလၢတ်ႈၸွမ်းၵႃႈၼင်ႇတႃႇဝုၼ်ႇပုၼ်ႈၽွၼ်းၸိုင်၊ၽြႃးပဵၼ်ၸဝ်ႈယုမ်ႇယမ်တမ်းၸႂ်လႄႈဢၢပ်ႈဝႆႉၼႃႈၵၢၼ်ဢၼ်ႁေႃးလၢတ်ႈၼၼ်ႉတီႈၵဝ်ဢေႃႈ။-
ပေႃးပဵၼ်ၼႆၸိုင်၊ပုၼ်ႈဢၵျူဝ်းၵႃႈႁႅင်းၵဝ်ၼၼ်ႉတေလႆႈဢီႈသင်။ ဢၵျူဝ်းၵႃႈႁႅင်းဢၼ်ၵဝ်လႆႈၼၼ်ႉၸမ်ႉ၊ပဵၼ်တၢင်းဢၼ်ၵဝ်လႆႈႁေႃးလၢတ်ႈၶၢဝ်ႇတြႃးသိူဝ်းပျေႃႇဢၼ်ဢမ်ႇႁဵတ်းႁႂ်ႈၶဝ်ၸိူဝ်းဢၼ်လႆႈထွမ်ႇငိၼ်းၼၼ်ႉ၊လႆႈသဵင်ႈငိုၼ်းသဵင်ႈတွင်းဢေႃႈ။ လွင်ႈမၼ်းၸမ်ႉ၊ၵဝ်ဢမ်ႇယွၼ်းဢဝ်ဢၶႂၢင်ႉဢယေးသေၸိူဝ်ႉသေပိူင်ဢၼ်ၸၢပ်ႈသႅင်ႇၵၼ်တင်းၼႃႈၵၢၼ်ၶၢဝ်ႇတြႃးသိူဝ်းပျေႃႇဢၼ်ၵဝ်ႁေႃးလၢတ်ႈၼၼ်ႉဢေႃႈ။
ၵဝ်ပဵၼ်ၵူၼ်းလွတ်ႈလႅဝ်းလႄႈဢမ်ႇၸႂ်ႈၶႃႈၽူႈလႂ်သေၵေႃႉသေၵူၼ်း။ ၵူၺ်းၵႃႈ၊ၵဝ်ၶၢမ်ႇႁဵတ်းၶႃႈၵူႈၵေႃႉၵူႈၵူၼ်းၼင်ႇႁိုဝ်တၵ်းလႆႈၸူဝ်းဢဝ်ၶဝ်တင်းလၢႆမႃးယုမ်ႇမၢတ်ႈ ၸဝ်ႈယေႇသု၊ ဢေႃႈ။-
မိူဝ်ႈဢၼ်ၵဝ်ယူႇလူၺ်ႈၵၼ်တင်းၵူၼ်းမဵဝ်း ၵျူး၊ ၶဝ်ၸိုင်၊ၵဝ်ယူႇမိူၼ်ၸိူဝ်ႉၼင်ႇဢၼ်ၵဝ်ပဵၼ်ၵူၼ်းမဵဝ်း ၵျူး၊ ၼင်ႇႁိုဝ်တၵ်းလႆႈတိုၵ်းယူင်းၸူဝ်းဢဝ်ၶဝ်ဢေႃႈ။ ပိၵ်ႉသမ်ႉၵဝ်ဢမ်ႇယူႇတႂ်ႈဢႃႇၼႃႇပိင်းၺၢပ်ႈတြႃးသြႃႇ မူဝ်းသေႇ၊ သေၵေႃႈမိူဝ်ႈဢၼ်ၵဝ်ယူႇလူၺ်ႈၵၼ်တင်းၶဝ်ၸိူဝ်းဢၼ်ယူႇတႂ်ႈဢႃႇၼႃႇပိင်းၺၢပ်ႈတြႃးၼၼ်ႉၸိုင်၊ၵဝ်ယူႇမိူၼ်ၸိူဝ်ႉၼင်ႇဢၼ်ၵဝ်ယူႇတႂ်ႈဢႃႇၼႃႇပိင်းၺၢပ်ႈတြႃး၊ၼင်ႇႁိုဝ်တၵ်းလႆႈတိုၵ်းယူင်းၸူဝ်းဢဝ်ၶဝ်ဢေႃႈ။-
ပိူင်လဵဝ်ၵၼ်မိူဝ်ႈဢၼ်ၵဝ်ယူႇလူၺ်ႈၵၼ်တင်းၶဝ်ၸိူဝ်းဢၼ်ယူႇၵႃႈၼွၵ်ႈပိင်းၺၢပ်ႈတြႃးၼၼ်ႉၵေႃႈ၊ၵဝ်ယူႇမိူၼ်ၸိူဝ်ႉၼင်ႇဢၼ်ယူႇၵႃႈၼွၵ်ႈပိင်းၺၢပ်ႈတြႃး မူဝ်းသေႇ၊ ဢမ်ႇၸႂ်ႈဝႃႈ၊ၵဝ်သၢၼ်ၶတ်းတြႃးၽြႃးပဵၼ်ၸဝ်ႈလႄႈတီႈတႄႉမၼ်းၵဝ်ယူႇတႂ်ႈဢႃႇၼႃႇတြႃး ၸဝ်ႈၶရိၸ်ႈ၊ ၼင်ႇႁိုဝ်တၵ်းလႆႈတိုၵ်းယူင်းၸူဝ်းဢဝ်ၶဝ်ၸိူဝ်းယူႇၵႃႈၼွၵ်ႈပိင်းၺၢပ်ႈတြႃးၼၼ်ႉဢေႃႈ။-
လူၺ်ႈလွင်ႈၶဝ်ၸိူဝ်းဢၼ်ၸႂ်ႁႅင်းဢူၼ်ႈၼၼ်ႉႁႂ်ႈပေႃးတိုၵ်းယူင်းၸူဝ်းဢဝ်ၶဝ်လႆႈၸိုင်၊ၵဝ်ၶၢမ်ႇပဵၼ်ၵူၼ်းၸႂ်ႁႅင်းဢူၼ်ႈမိူၼ်ၶဝ်ဢေႃႈ။ ပိူဝ်ႈၼႆလႄႈၵဝ်ၶၢမ်ႇပဵၼ်ၵူႈၸိူဝ်ႉၵူႈပိူင်ပုၼ်ႈၵူၼ်းၵူႈၵေႃႉ၊ၼင်ႇႁိုဝ်တၵ်းလႆႈၵႄႇသႄႇဢဝ်ၵမ်ႈၽွင်ႈလူၺ်ႈလွၵ်းလၢႆးၵူႈၸိူဝ်ႉၵူႈမဵဝ်းဢေႃႈ။
ၵဝ်ႁဵတ်းလွင်ႈတၢင်းၸိူဝ်းၼႆႉတင်းသဵင်ႈတင်းလူင်ပုၼ်ႈတႃႇဢၵျူဝ်းၶၢဝ်ႇတြႃးသိူဝ်းပျေႃႇၸဝ်ႈ၊ၼင်ႇႁိုဝ်ၵဝ်တၵ်းလႆႈႁပ်ႉဢဝ်ဢၼ်လူဝ်ႇလႆႈၵႃႈၼႂ်းမၢင်ႇၵလႃႇတၢင်းလီၼၼ်ႉဢေႃႈ။-
လွင်ႈဢၼ်ဝႃႈ၊ၼႂ်းပွႆးလႅၼ်ႈၶေႉၵၼ်ၼၼ်ႉၵူၼ်းၼမ်ၼႃႇၶဝ်ႈပႃးသေၵေႃႈၵူၼ်းဢၼ်လႆႈသူးၼၼ်ႉမီးၵေႃႉလဵဝ်ၵူၺ်းဝႃႈၼႆ၊သူဢမ်ႇႁုႁိုဝ်း။ ပိူဝ်ႈၼႆလႄႈလႅၼ်ႈၽႂ်းၽႂ်းၼင်ႇႁိုဝ်တၵ်းလႆႈသူးၼၼ်ႉတႃႉ။-
ၶဝ်ၸိူဝ်းဢၼ်ၶဝ်ႈၶေႉၶဵင်ႇၼႂ်းပွႆးလႅၼ်ႈၶေႉၵၼ်ၼၼ်ႉ၊လႆႈၶျုၵ်ႈထိင်းတူဝ်ၸဝ်ႈၵဝ်ႇလႄႈၽိုၵ်းဢဵၼ်ၽိုၵ်းႁႅင်းၼႂ်းလွင်ႈၵူႈၸိူဝ်ႉၵူႈပိူင်ၼင်ႇႁိုဝ်တၵ်းလႆႈသုပ်းတိုဝ်းသရၽူႇၽူႇမႂ်မႆႉဢၼ်ၸၢင်ႈႁဵဝ်ႇႁႅင်ႈလုလႅဝ်ၵႂႃႇၵႃႈၼႂ်းၸူဝ်ႈၵမ်းဢွၼ်ႇၼိုင်ႈၵူၺ်းၼၼ်ႉဢေႃႈ။ ႁဝ်းၼႆႉၸမ်ႉ၊ၶတ်းၸႂ်ႁႂ်ႈလႆႈပၢၼ်းၵုမ်းဢၼ်တႄႇမၼ်ႈယူႇဢမ်ႇၸၢင်ႈႁဵဝ်ႇႁႅင်ႈလႄႈလုလႅဝ်ၵႂႃႇၼၼ်ႉဢေႃႈ။-
ပိူဝ်ႈၼႆလႄႈယင်းဢမ်ႇမီးတီႈဢဵၼ်းဢၢၼ်းလႄႈၵဝ်လႅၼ်ႈလၢႆလၢႆလွၵ်ႇလွၵ်ႇဢမ်ႇၸႂ်ႈ။ ၵဝ်ပေႃႉပူၺ်းၵေႃႈၵဝ်ပေႃႉလူမ်းပေႃးလႅင်ႉလၢႆလၢႆလွၵ်ႇလွၵ်ႇဢမ်ႇၸႂ်ႈ။-
ၵဝ်ၶျုၵ်ႈဢလူဝ်ႇတူဝ်ၶၼ်ႇထႃႇၵဝ်၊လႆႈပႂ်ႉထိင်းမၼ်းဝႆႉၼင်ႇႁိုဝ်ၼႂ်းမိူဝ်ႈဢၼ်ၵဝ်ႁေႃးလၢတ်ႈသင်ႇသွၼ်ပၼ်ပိူၼ်ႈယဝ်ႉၼၼ်ႉ၊ၵဝ်တၵ်းဢမ်ႇလႆႈတူၵ်းသုမ်းၼၼ်ႉဢေႃႈ။
ပီႈၼွင်ႉၶဝ်႟။ ၵဝ်ၶႂ်ႈႁႂ်ႈသူၶုၵ်းၸႂ်လႆႈလွင်ႈပူႇမွၼ်ႇႁဝ်းၶဝ်ၼႂ်းၸူဝ်ႈပၢၼ်သြႃႇ မူဝ်းသေႇ၊ ၼၼ်ႉဢေႃႈ။ ၶဝ်တင်းသဵင်ႈၼၼ်ႉ၊သဝ်မွၵ်ႇၵုမ်ႈႁႄႉၵင်ႈၶဝ်ဝႆႉလႄႈၶဝ်လႆႈၶၢမ်ႈပူၼ်ႉပၢင်ႇလၢႆႇဢၼ်မီးၸိုဝ်ႈဝႃႈ၊ ပၢင်ႇလၢႆႇလႅင်၊ ၼၼ်ႉလီလီငၢမ်းငၢမ်းဢေႃႈ။-
ၶဝ်တင်းသဵင်ႈလႆႈၶၢမ်ႇဢဝ်မၢင်ႇၵလႃႇပပ်ႉတိၸမ်ႇ ၼႂ်းသဝ်မွၵ်ႇၵုမ်ႈ၊ဢိၵ်ႇတင်းၵႃႈၼႂ်းပၢင်ႇလၢႆႇၼၼ်ႉ ႁႂ်ႈလႆႈပဵၼ်တပႄးသြႃႇ မူဝ်းသေႇ၊ ဢေႃႈ။-
ၶဝ်တင်းမူတ်းလႆႈၵိၼ်တၢင်းၵိၼ်ၽၢႆႇၸႂ်ဝိၺိၺ်ႇလူၺ်ႈၵၼ်လႄႈ၊-
ၶဝ်တင်းမူတ်းလႆႈၵိၼ်ၼမ်ႉၽၢႆႇၸႂ်ဝိၺိၺ်ႇလူၺ်ႈၵၼ်၊ၶဝ်လႆႈၼမ်ႉဢၼ်ဢွၵ်ႇမႃးသေၵႃႈတီႈၽႃႁိၼ်ၸဝ်ႈဢၼ်ၵႂႃႇၸွမ်းၶဝ်ၼၼ်ႉဢေႃႈ။ ၽႃႁိၼ်ၸဝ်ႈၼၼ်ႉပဵၼ် ၸဝ်ႈၶရိၸ်ႈ၊ ဢေႃႈ။-
ၼႂ်းဝႃႈၼၼ်သေၵေႃႈ၊ၽြႃးပဵၼ်ၸဝ်ႈဢမ်ႇထုၵ်ႇၸႂ်ၶဝ်ၵမ်ႈၼမ်လႄႈတူဝ်တၢႆၶဝ်လႆႈၸၢတ်ႇၽႄၵႂႃႇၵႃႈၼႂ်းထိူၼ်ႇလႅင်ႉဢေႃႈ။
မိူဝ်ႈလဵဝ်ၼႆႉလွင်ႈတၢင်းၸိူဝ်းၼၼ်ႉပဵၼ်ပုင်ႇတႅၵ်ႈႁႂ်ႈလႆႈပၼ်သတိတီႈႁဝ်း၊ၼင်ႇႁိုဝ်ႁဝ်းတၵ်းတေဢမ်ႇၸပ်းၸွႆးတၢင်းဢၼ်ႁၢႆႉမိူၵ်ႈမိူၼ်ၸိူဝ်ႉၼင်ႇၶဝ်၊-
ဢိၵ်ႇတင်းတၵ်းတေဢမ်ႇၵူဝ်းၵႂၢႆႇဝႆႈႁုၼ်ႇႁၢင်ႈသၢင်းထုမိူၼ်ၸိူဝ်ႉၼင်ႇဢၼ်ၶဝ်ၵမ်ႈၽွင်ႈႁဵတ်း၊ဢၼ်မႅၼ်ႈၸွမ်းၼင်ႇၼႂ်းၵျၢမ်းလိၵ်ႈတႅမ်ႈဝႆႉဝႃႈ၊ “ၵူၼ်းတင်းလၢႆဢွၼ်ၵၼ်ၼင်ႈၵႃႈတီႈၽိူၼ်ပွႆးတၢင်းၵိၼ်လူင်သေယဝ်ႉ၊လိုၼ်းၼၼ်ႉဢွၼ်ၵၼ်လုၵ်ႉသေၵႃႈဝႅၼ်ဢေႃႈ၊” ဝႃႈၼင်ႈၼႆၼၼ်ႉဢေႃႈ။-
ႁဝ်းတၵ်းတေဢမ်ႇလႆႈႁဵတ်းမေႇထုင်ႇဢၼ်ဢမ်ႇတြႃးမိူၼ်ၸိူဝ်ႉၼင်ႇဢၼ်ၶဝ်ၵမ်ႈၽွင်ႈႁဵတ်းမႃးၼၼ်ႉ။ ၵွပ်ႈပိူဝ်ႈၶဝ်ႁဵတ်းၸိူဝ်ႉၼင်ႇၼၼ်လႄႈၵူၼ်းသွင်မိုၼ်ႇသၢမ်ႁဵင်ၵေႃႉလႆႈတၢႆၵႂႃႇၵႃႈၼႂ်းဝၼ်းလဵဝ်ၼၼ်ႉဢေႃႈ။-
ႁဝ်းတၵ်းတေဢမ်ႇလႆႈၸၢမ်းတူၺ်း ၸဝ်ႈၶရိၸ်ႈ၊ မိူၼ်ၸိူဝ်ႉၼင်ႇၶဝ်ၵမ်ႈၽွင်ႈၸၢမ်းတူၺ်းၼၼ်ႉ၊ၶဝ်လႆႈၶၢမ်ႇတၢင်းဢၼ်ငူးတွတ်ႇတၢႆဢေႃႈ။-
ႁဝ်းတၵ်းတေဢမ်ႇလႆႈပွင်ႉလႃႇပွင်ႉဝႃႈ၊မိူၼ်ၸိူဝ်ႉၼင်ႇဢၼ်ၶဝ်ၵမ်ႈၽွင်ႈႁဵတ်းမႃးၼၼ်ႉ။ ၵွပ်ႈပိူဝ်ႈၶဝ်ၵမ်ႈၽွင်ႈပွင်ႉလႃႇပွင်ႉဝႃႈလႄႈၶဝ်လႆႈၶၢမ်ႇတၢင်းဢၼ်ၶုၼ်မရၼႃႉ၊ယႃႉၽဵဝ်ႈပႅတ်ႈဢေႃႈ။
လွင်ႈတၢင်းဢၼ်ပဵၼ်တီႈၶဝ်ပူၼ်ႉမႃးၸိူဝ်းၼၼ်ႉတင်းမူတ်း၊ပဵၼ်မႃးႁႂ်ႈလႆႈပဵၼ်ပုင်ႇၸၢမ်ႇပုၼ်ႈၵူၼ်းတင်းလၢႆလႄႈၶဝ်တႅမ်ႈဝႆႉႁႂ်ႈလႆႈပၼ်သတိႁဝ်း၊ၵွပ်ႈပိူဝ်ႈႁဝ်းမီးယူႇၼႂ်းၸူဝ်ႈပၢၼ်ၽွင်းယၢမ်းဢၼ်ၸမ်တၵ်းသုတ်းသဵင်ႈပူၼ်ႉၵႂႃႇၼၼ်ႉဢေႃႈ။
ၽူႈလႂ်သေဢမ်ႇဝႃႈ၊ၵေႃႉဢၼ်ထၢင်ႇတူဝ်မၼ်းၸုၵ်းယူႇမၼ်ႈၶိူင်ႇလီၼၼ်ႉၼင်ႇႁိုဝ်မၼ်းတၵ်းဢမ်ႇလူမ်ႉတူၵ်းၵႂႃႇၸိုင်၊ႁႂ်ႈမၼ်းဝႆႉသတိတႃႉ။-
တၢင်းဢၼ်ယႃႉၵဝ်းၸၢမ်းတူၺ်းၵူႈၸိူဝ်ႉၵူႈပိူင်မဵဝ်းဢၼ်သူလႆႈၶၢမ်ႇၼၼ်ႉၵူၺ်းပဵၼ်မဵဝ်းဢၼ်ၸၢင်ႈပဵၼ်တီႈၵူၼ်းႁဝ်းၼၼ်ႉဢေႃႈ။ ၽြႃးပဵၼ်ၸဝ်ႈမီးသဵတ်ႈၸႃႇလႄႈမၼ်းၸဝ်ႈတၵ်းဢမ်ႇႁႂ်ႈသူလႆႈၶၢမ်ႇတၢင်းၸၢမ်းတူၺ်းႁႅင်းၼႃႇတေႃႇထိုင်ႁွတ်ႈသူတၵ်းဢမ်ႇၶၢမ်ႇလႆႈၼၼ်ႉဢေႃႈ။ ပိူဝ်ႈၼႆလႄႈၽွင်းယၢမ်းဢၼ်သူလႆႈၶၢမ်ႇတၢင်းဢၼ်ယႃႉၵဝ်းၸၢမ်းတူၺ်းၼၼ်ႉမၼ်းၸဝ်ႈတၵ်းတေပၼ်ႁႅင်းဢၼ်ႁႂ်ႈသူၸုၵ်းၶၢမ်ႇလႆႈ၊ၵွပ်ႈၼႆလႄႈမၼ်းၸဝ်ႈတၵ်းၽုၺ်ႇပၼ်သဵၼ်ႈတၢင်းဢၼ်သူတေလွတ်ႈဢွၵ်ႇလႆႈၼၼ်ႉယူႇဢေႃႈ။
ပိူဝ်ႈၼႆလႄႈၵေႃႉသႄႈဢၼ်ၵဝ်ႁၵ်ႉၶဝ်႟။ ဝႄႈပႅတ်ႈတၢင်းဢၼ်ၵူဝ်းၵႂၢႆႇဝႆႈႁုၼ်ႇႁၢင်ႈသၢင်းထုတႃႉ။-
ၵဝ်မၢတ်ႈသူပဵၼ်ၵူၼ်းဢၼ်မီးပိင်ႇၺႃႇ၊ဢွၼ်ၵၼ်ၸၵ်းၽႄလႄႈၶႆႈၸႂ်ၵႂၢမ်းဢၼ်ၵဝ်လၢတ်ႈတေႃႇသူႁင်းၽႂ်ႁင်းမၼ်းၼၼ်ႉတႃႉ။-
မိူဝ်ႈဢၼ်ႁဝ်းၵိၼ်ပွႆးၸဝ်ႈ ၼႂ်းၵွၵ်းမၢင်ႇၵလႃႇဢၼ်ႁဝ်းဢဝ်လႄႈယွင်ႈယေႃးတၢင်ႇၵျေးၸူးၽြႃးပဵၼ်ၸဝ်ႈၼၼ်ႉ ႁဝ်းႁူမ်ႈပွင်းၵၼ်ၼႂ်းလိူတ်ႈမျၢတ်ႈ ၸဝ်ႈၶရိၸ်ႈ၊ ဢမ်ႇၸႂ်ႈႁိုဝ်း။ ပိူင်လဵဝ်ၵၼ်မိူဝ်ႈဢၼ်ႁဝ်းဝိတ်းၶဝ်ႈမုၼ်းၼၼ်ႉႁဝ်းႁူမ်ႈပွင်းၵၼ်ၼႂ်းတူဝ် ၸဝ်ႈၶရိၸ်ႈ၊ ဢမ်ႇၸႂ်ႈႁိုဝ်း။-
ၵွပ်ႈပိူဝ်ႈဢၼ်မီးၶဝ်ႈမုၼ်းႁူၺ်ႇလဵဝ်ၵူၺ်းလႄႈႁဝ်းၸိူဝ်းၼႆႉပိၵ်ႉသမ်ႉမီးၼမ်ၼႃႇထၢၼ်ႇႁိုဝ်သေၵေႃႈပဵၼ်တူဝ်ဢၼ်လဵဝ်ၵၼ်ဢၼ်ႁဝ်းႁူမ်ႈပွင်းၵၼ်ၵိၼ်ၶဝ်ႈမုၼ်းႁူၺ်ႇလဵဝ်ၼၼ်ႉဢေႃႈ။
ဝူၼ်ႉၸႂ်တူၺ်းလွင်ႈၸိူဝ်ႉၶိူဝ်း ဢိသရေး၊ ၶဝ်ၼၼ်ႉလူး။ ၶဝ်ၸိူဝ်းဢၼ်ၵိၼ်တူဝ်သၢၵ်ႈလူႇၼၼ်ႉလႆႈႁူမ်ႈပွင်းၵၼ်တင်းၶဵင်ႇတၢင်းလူႇၸဝ်ႈၼၼ်ႉဢမ်ႇၸႂ်ႈႁိုဝ်း။-
ၵဝ်ၶႂ်ႈဝႃႈၸိူဝ်ႉႁိုဝ်။ ၸွင်ႇၵဝ်လၢတ်ႈဝႃႈ၊တၢင်းၵိၼ်ဢၼ်ပိူၼ်ႈသၢၵ်ႈလူႇတီႈႁုၼ်ႇႁၢင်ႈသၢင်းထုၼၼ်ႉ၊ပဵၼ်တၢင်းလူႇဢၼ်မျၢတ်ႈလီ၊ဢမ်ႇၼၼ်ႁုၼ်ႇႁၢင်ႈသၢင်းထုၼၼ်ႉမီးၸႂ်တႄႉတႄႉဝႃႈၼႆႁိုဝ်း။ ဢမ်ႇၸႂ်ႈဝႃႈၸိူဝ်ႉၼင်ႇၼၼ်။-
ဢၼ်ၵဝ်ၶႂ်ႈဝႃႈၸမ်ႉ၊ၶိူင်ႈတၢင်းလူႇဢၼ်ပိူၼ်ႈသၢၵ်ႈလူႇတီႈႁုၼ်ႇႁၢင်ႈသၢင်းထုၼၼ်ႉၶဝ်သၢၵ်ႈလူႇၽြႃးပဵၼ်ၸဝ်ႈဢမ်ႇၸႂ်ႈ။ ၶဝ်သၢၵ်ႈလူႇတီႈၽီဢေႃႈ။ ၵဝ်ဢမ်ႇၶႂ်ႈႁႂ်ႈသူသိူၵ်ႈသမ်ႇလူၺ်ႈၵၼ်တင်းၽီဢေႃႈ။-
သူဢမ်ႇၸၢင်ႈၵိၼ်ၵႃႈၼႂ်းၵွၵ်းၸဝ်ႈၽြႃး၊ဢိၵ်ႇတင်းၵႃႈၼႂ်းၵွၵ်းၽီ။ ၼင်ႇၼၼ်လႄႈသူဢမ်ႇၸၢင်ႈၵိၼ်ၵႃႈတီႈၽိူၼ်ၸဝ်ႈၽြႃး၊ဢိၵ်ႇတင်းၵႃႈတီႈၽိူၼ်ၽီဢေႃႈ။-
ႁဝ်းၶႂ်ႈၶတ်းၵၼ်တင်းၸဝ်ႈၽြႃးႁႂ်ႈမၼ်းၸဝ်ႈၶႂ်ႈၸႃႉႁဝ်းႁိုဝ်း။ ႁဝ်းမီးတၼ်းၶူဝ်းႁႅင်းယႂ်ႇသေမၼ်းၸဝ်ႈႁိုဝ်း။
ၵူၼ်းၵမ်ႈၽွင်ႈၸၢင်ႈလၢတ်ႈဝႃႈ၊ “ႁဝ်းမီးဢၶႂၢင်ႉႁႂ်ႈလႆႈႁဵတ်းၵူႈၸိူဝ်ႉၵူႈပိူင်ဢေႃႈ၊” ဝႃႈၼႆၸႂ်ႈတႄႉသေၵေႃႈၵူႈၸိူဝ်ႉၵူႈပိူင်ၼၼ်ႉဢမ်ႇပဵၼ်ဢၵျူဝ်း။ “ႁဝ်းမီးဢၶႂၢင်ႉဢၼ်တေလႆႈႁဵတ်းၵူႈၸိူဝ်ႉၵူႈပိူင်ဢေႃႈ၊” ဝႃႈၼႆသေၵေႃႈၵူႈၸိူဝ်ႉၵူႈပိူင်ၼၼ်ႉဢမ်ႇၸၢင်ႈပဵၼ်ဢဵၼ်ပဵၼ်ႁႅင်းၸႂ်ဝိၺိၺ်ႇပိူၼ်ႈဢေႃႈ။-
ၽူႈလႂ်သေဢမ်ႇဝႃႈ၊မၼ်းဢမ်ႇထုၵ်ႇလီႁႃဢၵျူဝ်းပုၼ်ႈတူဝ်ၸဝ်ႈၵဝ်ႇ။ မၼ်းထုၵ်ႇလီႁႃဢၵျူဝ်းပုၼ်ႈပိူၼ်ႈတၢင်ႇၵေႃႉဢေႃႈ။
သူမီးဢၶႂၢင်ႉတႃႇတေသိုဝ်ႉၵိၼ်ၼိူဝ်ႉၵူႈၸိူဝ်ႉၵူႈမဵဝ်းဢၼ်ပိူၼ်ႈၶၢႆၼႂ်းၵၢတ်ႇၼၼ်ႉဢေႃႈ။ ၵူၺ်းၵႃႈ၊ၼင်ႇႁိုဝ်တၵ်းဢမ်ႇတိူဝ်ႉၶိူၵ်ႈၸႂ်ဢၼ်ႁုတူဝ်ၸဝ်ႈၵဝ်ႇၸိုင်၊ယႃႇပေထၢမ်တူၺ်းၵႃႈသင်။-
ၵွပ်ႈၸိူဝ်ႉႁိုဝ်လႄႈဝႃႈၸမ်ႉ၊ၼႂ်းၵျၢမ်းလိၵ်ႈတႅမ်ႈဝႆႉဝႃႈ၊ “လိၼ်မိူင်းဢိၵ်ႇတင်းၵႃႈဢၼ်မီးၼႂ်းမၼ်းတင်းမူတ်းပဵၼ်ၶွင်ၸဝ်ႈၽြႃးဢေႃႈ၊” ဝႃႈၼင်ႇၼႆယဝ်ႉဢေႃႈ။
ပေႃးသေၵေႃႉၵေႃႉဢၼ်ဢမ်ႇယုမ်ႇမၢတ်ႈ ၸဝ်ႈယေႇသု၊ ၼၼ်ႉႁွင်ႉပၢင်းသူၵႂႃႇၵိၼ်တီႈမၼ်းလႄႈသူၶႂ်ႈၵႂႃႇၸိုင်၊တၢင်းၵိၼ်ၵႃႈဢၼ်တမ်းပၼ်သူၵႃႈၼိူဝ်ၽိူၼ်ၼၼ်ႉၵိၼ်တႃႉ။ ၵူၺ်းၵႃႈ၊ၼင်ႇႁိုဝ်တၵ်းဢမ်ႇတိူဝ်ႉၶိူၵ်ႈၸႂ်ဢၼ်ႁုတူဝ်ၸဝ်ႈၵဝ်ႇၸိုင်၊ယႃႇပေထၢမ်တူၺ်းၵႃႈသင်။-
ၵူၺ်းၵႃႈ၊ပေႃးသေၵေႃႉၵေႃႉမွၵ်ႇလၢတ်ႈၼႄသူလႄႈဝႃႈ၊ “တၢင်းၵိၼ်ၼႆႉပဵၼ်ဢၼ်ၶဝ်သၢၵ်ႈလူႇတီႈႁုၼ်ႇႁၢင်ႈသၢင်းထုယဝ်ႉဢေႃႈ၊” ယႃႇပေၵိၼ်၊ဝႃႈၼင်ႇၼႆၸိုင်၊သူထုၵ်ႇလီၶႆႈၸႂ်ပုၼ်ႈၵေႃႉဢၼ်မွၵ်ႇလၢတ်ႈၼႄသူၼၼ်ႉၼင်ႇႁိုဝ်တၵ်းဢမ်ႇတိူဝ်ႉၶိူၵ်ႈၸႂ်ဢၼ်ႁုတူဝ်ၸဝ်ႈၵဝ်ႇဢေႃႈ။-
ၵဝ်လၢတ်ႈ၊ပုၼ်ႈၸႂ်သူဢၼ်ႁုတူဝ်ၸဝ်ႈၵဝ်ႇဢမ်ႇၸႂ်ႈလႄႈၵဝ်လၢတ်ႈပုၼ်ႈၸႂ်ဢၼ်ႁုတူဝ်ၸဝ်ႈၵဝ်ႇၵေႃႉဢၼ်မွၵ်ႇလၢတ်ႈၼႄသူၼၼ်ႉဢေႃႈ။ သေၵေႃႉၵေႃႉၸၢင်ႈၶႂ်ႈထၢမ်လႄႈဝႃႈ၊ “ပေႃးဝႃႈၼႆၸိုင်၊ၵွပ်ႈသင်ၸႂ်ဢၼ်ႁုတူဝ်ၸဝ်ႈၵဝ်ႇပိူၼ်ႈတၢင်ႇၵေႃႉၼၼ်ႉ၊သမ်ႉမႃးႁၢမ်ႈတၢပ်ႈတၢင်းဢၼ်ၵဝ်လွတ်ႈလႅဝ်းၼၼ်ႉၸိူဝ်ႉၼင်ႇႁိုဝ်။-
ပေႃးၵဝ်ယင်းယွင်ႈယေႃးတၢင်ႇၵျေးၸူးၸဝ်ႈၽြႃးသေလႄႈၵိၼ်ၸိုင်၊ၽူႈလႂ်တၵ်းတၢင်ႇဢပျတ်ႈလွင်ႈတၢင်းၵိၼ်ဢၼ်ၵဝ်ယွင်ႈယေႃးတၢင်ႇၵျေးၸူးၸဝ်ႈၽြႃးယဝ်ႉၼၼ်ႉလႆႈၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ပဵၼ်ၸိူဝ်ႉႁိုဝ်သေဢမ်ႇဝႃႈ၊ၵႃႈဢၼ်သူႁဵတ်း၊ၵႃႈဢၼ်သူၵိၼ်ၼၼ်ႉႁဵတ်းပုၼ်ႈမုၼ်ၽုင်းၽြႃးပဵၼ်ၸဝ်ႈတႃႉ။-
ၼႂ်းတၢင်းဢၼ်သူၵမ်ၵျၢင်ႉသၢင်ႈႁဵတ်းၼၼ်ႉယႃႇပေႁႂ်ႈလႆႈပဵၼ်တီႈဢၼ်ၵူၼ်းမဵဝ်း ၵျူး၊ လႂ်၊ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းလႂ်၊ဢိၵ်ႇတင်းၵူၼ်းၸိူဝ်းၸဝ်ႈၽြႃးပဵၼ်ၸဝ်ႈတင်းလၢႆ လႆႈၽိတ်းတၢင်းၵႂႃႇသေၵမ်း။-
ၵမ်ၵျၢင်ႉမိူၼ်ၵဝ်တႃႉ။ ၵႃႈဢၼ်ၵဝ်ၵမ်ၵျၢင်ႉၸမ်ႉ၊ၵဝ်ၶတ်းၸႂ်ႁဵတ်းႁႂ်ႈၵူၼ်းၵူႈၵေႃႉထုၵ်ႇၸႂ်ဢေႃႈ။ ၵဝ်ယင်းဢမ်ႇႁႃဢၵျူဝ်းတူဝ်ၸဝ်ႈၵဝ်ႇလႄႈႁႃဢၵျူဝ်းပၼ်ပိူၼ်ႈတၢင်ႇၵေႃႉ၊ၼင်ႇႁိုဝ်ၶဝ်တၵ်းလႆႈၶၢမ်ႇတၢင်းဢၼ်ၸဝ်ႈၽြႃးၵႄႇၶျွတ်ႈဢဝ်ၼၼ်ႉဢေႃႈ။
ပိူဝ်ႈၼႆလႄႈဢွၼ်ၵၼ်ၵမ်ၵျၢင်ႉမိူၼ်ၸိူဝ်ႉၼင်ႇဢၼ်ၵဝ်ၵမ်ၵျၢင်ႉၸွမ်း ၸဝ်ႈၶရိၸ်ႈ၊ ၼၼ်ႉတႃႉ။
ၵဝ်ယွင်ႈယေႃးသူၵွပ်ႈပိူဝ်ႈသူၶုၵ်းၸႂ်လႆႈၵဝ်တႃႇသေႇလႄႈႁဵတ်းၸွမ်းၵႂၢမ်းသင်ႇသွၼ်ဢၼ်ၵဝ်ဢၢပ်ႈပၼ်ဝႆႉတီႈသူၼၼ်ႉဢေႃႈ။-
ၵူၺ်းၵႃႈ၊ၵဝ်ၶႂ်ႈႁႂ်ႈသူပွင်ႇလႅင်းၸႂ်လွင်ႈဢၼ်ဝႃႈ၊ ၸဝ်ႈၶရိၸ်ႈ၊ ပဵၼ်ႁူဝ်တီႈၵူၼ်းၸၢႆးၵူႈၵေႃႉလႄႈၵူၼ်းၸၢႆးဢၼ်ပဵၼ်ၽူဝ်ၼၼ်ႉပဵၼ်ႁူဝ်မေးၶဝ်ဢေႃႈ။ ၽြႃးပဵၼ်ၸဝ်ႈသမ်ႉပဵၼ်ႁူဝ် ၸဝ်ႈၶရိၸ်ႈ၊ ဢေႃႈ။-
ပိူဝ်ႈၼႆလႄႈၼႂ်းမိူဝ်ႈဢၼ်ႁဵတ်းဝၢတ်ႈၵူဝ်းၵႂၢႆႇၽၢႆႇၼႃႈၵူၼ်းတင်းလၢႆၼၼ်ႉပေႃးၵူၼ်းၸၢႆးႁူမ်ႇႁူဝ်တူဝ်ၸဝ်ႈၵဝ်ႇလႄႈသူးတွင်းလႄႈသင်၊ႁေႃးၵႂၢမ်းၸဝ်ႈၽြႃးလႄႈသင်၊မၼ်းယႃႉသရေႇႁူဝ်မၼ်းဢၼ်ဝႃႈ၊ ၸဝ်ႈၶရိၸ်ႈ၊ ၼၼ်ႉဢေႃႈ။-
ထႅင်ႈၼႄးၼိုင်ႈၸမ်ႉ၊ၼႂ်းမိူဝ်ႈဢၼ်ႁဵတ်းဝၢတ်ႈၵူဝ်းၵႂၢႆႇၽၢႆႇၼႃႈၵူၼ်းတင်းလၢႆၼၼ်ႉပေႃးမႄႈယိင်းသေၵေႃႉၵေႃႉယင်းဢမ်ႇဢဝ်သေၸိူဝ်ႉသေပိူင်ႁူမ်ႇႁူဝ်မၼ်းသေလႄႈသူးတွင်းလႄႈသင်၊ႁေႃးၵႂၢမ်းၸဝ်ႈၽြႃးလႄႈသင်၊မၼ်းယႃႉသရေႇၽူဝ်မၼ်းဢေႃႈ။ မႄႈယိင်းၼၼ်ႉမိူၼ်ၸိူဝ်ႉၼင်ႇမႄႈယိင်းဢၼ်ထႃႁူဝ်လွမ်ႈၼၼ်ႉဢေႃႈ။-
ပေႃးမႄႈယိင်းၵေႃႉၼၼ်ႉယင်းဢမ်ႇႁူမ်ႇႁူဝ်မၼ်းၸိုင်၊မၼ်းထုၵ်ႇလီၵႅတ်းၶူၼ်ႁူဝ်မၼ်းပႅတ်ႈဢေႃႈ။ ပေႃးဝႃႈ၊မႄႈယိင်းဢၼ်ထႃႁူဝ်လွမ်ႈဝႆႉ၊ဢမ်ႇၼၼ်ၵေႃႈၵႅတ်းၶူၼ်ႁူဝ်ဝႆႉၼၼ်ႉ၊ပဵၼ်ဢၼ်လီဢူၵ်းလီဢၢႆၸိုင်၊မၼ်းထုၵ်ႇလီႁူမ်ႇႁူဝ်တူဝ်ၸဝ်ႈၵဝ်ႇဝႆႉဢေႃႈ။-
ၵူၼ်းၸၢႆးတႄႉဢမ်ႇလူဝ်ႇႁူမ်ႇႁူဝ်မၼ်း၊ၵွပ်ႈပိူဝ်ႈမၼ်းပဵၼ်မိူၼ်ႁၢင်ႈၽၢင်ၽြႃးပဵၼ်ၸဝ်ႈ၊ဢိၵ်ႇတင်းမုၼ်ၽုင်းသရေႇမၼ်းၸဝ်ႈဢေႃႈ။ မႄႈယိင်းၸမ်ႉ၊ပဵၼ်မိူၼ်မုၼ်ၽုင်းသရေႇၵူၼ်းၸၢႆးဢေႃႈ။-
လွင်ႈမၼ်းၸမ်ႉ၊ၵူၼ်းၸၢႆးလႆႈၶၢမ်ႇတၢင်းဢၼ်ၽၢၼ်ႇသၢင်းႁဵတ်းပဵၼ်သေၵႃႈတီႈမႄႈယိင်းမႃးဢမ်ႇၸႂ်ႈ။ မႄႈယိင်းလႆႈၶၢမ်ႇတၢင်းဢၼ်ၽၢၼ်ႇသၢင်းႁဵတ်းပဵၼ်သေၵႃႈတီႈၵူၼ်းၸၢႆးမႃးဢေႃႈ။-
လိူဝ်သေၼၼ်ႉၽြႃးပဵၼ်ၸဝ်ႈၽၢၼ်ႇသၢင်းၵူၼ်းၸၢႆးပုၼ်ႈမႄႈယိင်းဢမ်ႇၸႂ်ႈ။ မၼ်းၸဝ်ႈၽၢၼ်ႇသၢင်းမႄႈယိင်းပုၼ်ႈၵူၼ်းၸၢႆးဢေႃႈ။-
ၵွပ်ႈၼႆလႄႈထွၵ်ႈၼႃႈတမၢၼ်ႇၵၢင်ႁၢဝ်လႄႈမႄႈယိင်းထုၵ်ႇလီႁူမ်ႇႁူဝ်မၼ်းဝႆႉႁႂ်ႈလႆႈၼႄလွင်ႈဢၼ်မၼ်းမီးတႂ်ႈဢႃႇၼႃႇၽူဝ်မၼ်းဢေႃႈ။-
ၼႂ်းဝႃႈၼၼ်သေၵေႃႈၼႂ်းတၢင်းဢၼ်ဢသၢၵ်ႈလိပ်းယူႇၼႂ်းၸဝ်ႈၽြႃးၼၼ်ႉမႄႈယိင်းလူဝ်ႇဢိင်ပိုင်ႈၵူၼ်းၸၢႆးလႄႈၵူၼ်းၸၢႆးၵေႃႈ၊လူဝ်ႇဢိင်ပိုင်ႈမႄႈယိင်းဢေႃႈ။-
ၵွပ်ႈသင်လႄႈဝႃႈၸမ်ႉ၊မႄႈယိင်းလႆႈၶၢမ်ႇတၢင်းဢၼ်ၽၢၼ်ႇသၢင်းႁဵတ်းပဵၼ်သေၵႃႈတီႈၵူၼ်းၸၢႆးလႄႈၵူၼ်းၸၢႆးၵေႃႈ၊လႆႈၵိူတ်ႇလဵင်ႉမႃးၵႃႈတီႈမႄႈယိင်းဢေႃႈ။ ၵႃႈမီးတင်းသဵင်ႈတင်းလူင်သမ်ႉလုၵ်ႉသေၵႃႈတီႈၽြႃးပဵၼ်ၸဝ်ႈပဵၼ်မႃးဢေႃႈ။
မႄႈယိင်းယင်းဢမ်ႇႁူမ်ႇႁူဝ်မၼ်းလႄႈသူးတွင်းၽၢႆႇၼႃႈၵူၼ်းတင်းလၢႆၼႂ်းတၢင်းဢၼ်ႁဵတ်းဝၢတ်ႈၸဝ်ႈၽြႃးၼၼ်ႉၸွင်ႇထုၵ်ႇၸွင်ႇလီႁိုဝ်းဢၼ်ဝႃႈၼၼ်ႉ၊သူၶႆႈၸႂ်တူၺ်းတႃႉ။-
ၸွမ်းၼင်ႇဢၼ်ပဵၼ်မႃးၸဵမ်မိူဝ်ႈၽြႃးပဵၼ်ၸဝ်ႈၽၢၼ်ႇသၢင်းၵူၼ်းၼၼ်ႉ၊တၢင်းဢၼ်ၵူၼ်းၸၢႆးဝႆႉၶူၼ်ႁူဝ်ယၢဝ်းၸိုင်၊ပဵၼ်ဢၼ်ဢမ်ႇမီးသရေႇဢေႃႈ။-
ၵူၺ်းၵႃႈ၊တၢင်းဢၼ်မႄႈယိင်းဝႆႉၶူၼ်ႁူဝ်ယၢဝ်းၸမ်ႉ၊ပဵၼ်ၵုင်ႇသရေႇမၼ်းဢေႃႈ။ ၵွပ်ႈပိူဝ်ႈဝႃႈ၊ၶူၼ်ႁူဝ်မၼ်းၼၼ်ႉပဵၼ်ပုၼ်ႈတႃႇႁူမ်ႇႁူဝ်မၼ်းဢေႃႈ။-
ပေႃးသေၵေႃႉသေၵူၼ်းၶႂ်ႈတွပ်ႇထဵင်လွင်ႈတၢင်းၼႆႉၸိုင်၊ၵဝ်မီးတီႈတၵ်းလၢတ်ႈဝႃႈ၊ၼႂ်းတၢင်းဢၼ်ႁဵတ်းဝၢတ်ႈၵူဝ်းၵႂၢႆႇၼၼ်ႉလိူဝ်သေထုင်းၸၢမ်ႇၸိူဝ်းၼႆႉလႄႈႁဝ်းဢမ်ႇမီးထုင်းၸၢမ်ႇတၢင်ႇဢၼ်၊ၸိူဝ်းၸဝ်ႈၽြႃးပဵၼ်ၸဝ်ႈတင်းလၢႆၵေႃႈဢမ်ႇမီးထုင်းၸၢမ်ႇတၢင်ႇဢၼ်ယဝ်ႉဢေႃႈ။
ၼႂ်းလွင်ႈတၢင်းဢၼ်တၵ်းသင်ႇသွၼ်ပၼ်သူထႅင်ႈၼႆႉၵဝ်ဢမ်ႇၸၢင်ႈယွင်ႈယေႃးသူဢေႃႈ။ လွင်ႈမၼ်းၸမ်ႉ၊မိူဝ်ႈဢၼ်သူၸုတုမ်ၵၼ်ႁဵတ်းဝၢတ်ႈၵူဝ်းၵႂၢႆႇၸဝ်ႈၽြႃးၼၼ်ႉသူႁဵတ်းလွင်ႈတၢင်းဢၼ်ဢမ်ႇလီၼၼ်ႉၼမ်ၼႃႇသေႁဵတ်းလွင်ႈတၢင်းဢၼ်လီဢေႃႈ။-
ဢွၼ်တၢင်းသေပိူၼ်ႈၵဝ်ငိၼ်းလွင်ႈတၢင်းဢၼ်သူတႅၵ်ႇၽၢတ်ႇၽႄၵၼ်ၼႂ်းမိူဝ်ႈဢၼ်သူၸုတုမ်ၵၼ်ၼႂ်းၸိူဝ်းၸဝ်ႈၼၼ်ႉဢေႃႈ။ လွင်ႈၼႆႉၵဝ်ထၢင်ႇၵမ်ႈၽွင်ႈတေၸႂ်ႈတႄႉယူႇဢေႃႈ။-
လွင်ႈမၼ်းၸမ်ႉ၊တၵ်းလႆႈမီးတၢင်းဢၼ်ၽႄၵိူင်းၵၼ်ၼႂ်းသူၼင်ႇၵၼ်ဢေႃႈ။ ပေႃးမီးၸိူဝ်ႉၼင်ႇၼၼ်ၸင်ႇ၊ၶဝ်ၸိူဝ်းဢၼ်ယုမ်ႇမၢတ်ႈၸိုဝ်ႈၸႂ်ႈၼၼ်ႉတၵ်းၸၢင်ႈထၢင်ႇသႃးမႃးဢေႃႈ။-
မိူဝ်ႈဢၼ်သူၸုတုမ်ၵၼ်လႄႈၵိၼ်လူၺ်ႈၵၼ်ၼၼ်ႉ၊သူၸုတုမ်ၵၼ်ႁႂ်ႈလႆႈၵိၼ်ပွႆးၸဝ်ႈၽြႃးဢမ်ႇၸႂ်ႈဢေႃႈ။-
လွင်ႈမၼ်းၸမ်ႉ၊မိူဝ်ႈဢၼ်သူၵိၼ်လူၺ်ႈၵၼ်ၼၼ်ႉယင်းဢမ်ႇပႂ်ႉထႃႈၵၼ်လႄႈၼႅတ်ႈၵိၼ်တၢင်းၵိၼ်ၽႂ်တၢင်းၵိၼ်မၼ်းဢေႃႈ။ ၵမ်ႈၽွင်ႈထၢၼ်ႈပေႃးၵိၼ်ဢိမ်ႇၵိၼ်လိူဝ်မဝ်းလဝ်ႈယူႇယဝ်ႉသေၵေႃႈ၊ၵမ်ႈၽွင်ႈယင်းဢမ်ႇမီးဢီႈသင်တၵ်းၵိၼ်လႄႈတွင်ႉမႆႈယူႇဢေႃႈ။-
သူဢမ်ႇမီးႁိူၼ်းမီးယေးပုၼ်ႈတႃႈႁႂ်ႈလႆႈယူႇလႆႈၵိၼ်ၼၼ်ႉႁိုဝ်း။ သူဢမ်ႇမီးၸႂ်ဢၼ်ရူဝ်ႇသေႇၸိူဝ်းၸဝ်ႈ၊ၽြႃးပဵၼ်ၸဝ်ႈႁိုဝ်း။ ဢမ်ႇၼၼ်ၵေႃႈ၊သူၶႂ်ႈႁႂ်ႈၵူၼ်းယၢၵ်ႈၵူၼ်းၽၢၼ်လႆႈဢူၵ်းလႆႈဢၢႆႁိုဝ်း။ သူၶႂ်ႈႁႂ်ႈၵဝ်ႁဵတ်းၸိူဝ်ႉၼင်ႇႁိုဝ်တီႈသူလူၺ်ႈလွင်ႈၼႆႉ။ ၸွင်ႇၵဝ်ထုၵ်ႇလီယွင်ႈယေႃးသူႁိုဝ်း။ ၵဝ်ဢမ်ႇယွင်ႈယေႃးသူလႆႈဢေႃႈ။
ၵဝ်ဢဝ်လွင်ႈတၢင်းဢၼ်ၸဝ်ႈၽြႃးသင်ႇသွၼ်ပၼ်ၼၼ်ႉသိုပ်ႇသွၼ်ပၼ်သူလႄႈဝႃႈၸမ်ႉ၊ ၸဝ်ႈယေႇသု၊ ၼၼ်ႉၼႂ်းၶမ်ႈဢၼ်မၼ်းၸဝ်ႈလႆႈၶၢမ်ႇတၢင်းဢၼ်ဢၢပ်ႈၵႃႈၼႂ်းမိုဝ်းရၢၼ်ႇသူႇၼၼ်ႉမၼ်းၸဝ်ႈဢဝ်ၶဝ်ႈမုၼ်းသေလႄႈ၊-
ယွင်ႈယေႃးတၢင်ႇၵျေးၸူးၽြႃးပဵၼ်ၸဝ်ႈယဝ်ႉၸင်ႇ၊ဝိတ်းၶဝ်ႈမုၼ်းလႄႈလၢတ်ႈဝႃႈ၊ “ၶဝ်ႈမုၼ်းၼႆႉၸမ်ႉ၊ပဵၼ်တူဝ်ၵဝ်ဢၼ်လႆႈၶၢမ်ႈဝိတ်းပုၼ်ႈသူဢေႃႈ။ ဢွၼ်ၵၼ်ၵိၼ်တႃႉ။ ပုၼ်ႈဢၼ်တၵ်းၶုၵ်းၸႂ်လႆႈၵဝ်ၸိုင်၊ဢွၼ်ၵၼ်ႁဵတ်းၸိူဝ်ႉၼင်ႇၼႆတႃႉ၊” ဝႃႈၼင်ႇၼႆဢေႃႈ။-
မိူၼ်ၼင်ႇၼၼ်၊မိူဝ်ႈဢၼ်ၵိၼ်ယဝ်ႉၼၼ်ႉၸိုင်၊မၼ်းၸဝ်ႈသမ်ႉယိပ်းဢဝ်ၵွၵ်းသေလႄႈလၢတ်ႈဝႃႈ၊ “ၵွၵ်းၼႆႉပဵၼ်ပတိၺိၺ်ႇတြႃးဢၼ်မႂ်ႇဢၼ်တႄႇယူႇၼႂ်းလိူတ်ႈၵဝ်ဢေႃႈ။ ယၢမ်းမိူဝ်ႈဢၼ်သူၵိၼ်ၵွၵ်းၼႆႉၵူႈပွၵ်ႈၶုၵ်းၸႂ်လႆႈၵဝ်လႄႈဢွၼ်ၵၼ်ၵိၼ်တႃႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈယၢမ်းမိူဝ်ႈဢၼ်သူၵိၼ်ၶဝ်ႈမုၼ်း၊ဢိၵ်ႇတင်းၵွၵ်းၸဝ်ႈမိူဝ်ႈလႂ်သေဢမ်ႇဝႃႈ၊သူပၢဝ်ႇသေႃႇလၢတ်ႈလွင်ႈတၢင်းဢၼ်ၸဝ်ႈၽြႃးလႆႈၶၢမ်ႇတၢႆပုၼ်ႈႁဝ်းၼၼ်ႉတေႃႇႁွတ်ႈထိုင်ႁွတ်ႈမၼ်းၸဝ်ႈပွၵ်ႈၶိုၼ်းမႃးၼၼ်ႉဢေႃႈ။-
ပိူဝ်ႈၼႆလႄႈပေႃးသေၵေႃႉသေၵူၼ်းယင်းဢမ်ႇၸဵၼ်းၸႃးၶႆႈၸႂ်လီလီလႄႈၵိၼ်ၶဝ်ႈမုၼ်းပွႆးၸဝ်ႈ၊ဢိၵ်ႇတင်းၵွၵ်းၸဝ်ႈၽြႃးၸိုင်၊ၵေႃႉၼၼ်ႉၽိတ်းပိူင်ႈတူဝ်ၸဝ်ႈၽြႃး၊ဢိၵ်ႇတင်းလိူတ်ႈၸဝ်ႈၽြႃးယဝ်ႉဢေႃႈ။-
ၵွပ်ႈၼႆလႄႈႁႂ်ႈၵူၼ်းၵူႈၵေႃႉၵူႈၵူၼ်းဢွၼ်ၵၼ်ၸႅတ်ႈသေးတူဝ်ၸဝ်ႈၵဝ်ႇတူၺ်းႁင်းၽႂ်ႁင်းမၼ်းယဝ်ႉၸင်ႇ၊ၵိၼ်ၶဝ်ႈမုၼ်း၊ဢိၵ်ႇတင်းၵိၼ်ဢၼ်မီးၵႃႈၼႂ်းၵွၵ်းၼၼ်ႉတႃႉ။-
လွင်ႈမၼ်းၸမ်ႉ၊ပေႃးမၼ်းယင်းလႆႈယိူင်းမၢႆလႄႈႁၼ်ထိုင်တူဝ်ၸဝ်ႈၽြႃးသေယဝ်ႉၵိၼ်ၶဝ်ႈမုၼ်း၊ဢိၵ်ႇတင်းၵိၼ်ဢၼ်မီးၵႃႈၼႂ်းၵွၵ်းၸဝ်ႈၸိုင်၊မၼ်းႁဵတ်းႁႂ်ႈတၢမ်ႇဢပျတ်ႈတူၵ်းႁွတ်ႈၵႃႈၼိူဝ်တူဝ်ၸဝ်ႈၵဝ်ႇၵူၺ်းဢေႃႈ။-
ၵွပ်ႈၼႆလႄႈၼႂ်းသူၵမ်ႈၼမ်ပဵၼ်ၶႆႈပဵၼ်ၼၢဝ်ႁႅင်းဢူၼ်ႈသေလႄႈၵမ်ႈၽွင်ႈပေႃးတၢႆၵႂႃႇယဝ်ႉဢေႃႈ။-
ပေႃးႁဝ်းၸႅတ်ႈသေးတူဝ်ၸဝ်ႈၵဝ်ႇတူၺ်းဢွၼ်တၢင်းၸင်ႇ၊ႁဝ်းတၵ်းၵၢင်းလွတ်ႈတၢမ်ႇၸဝ်ႈၽြႃးဢေႃႈ။-
ၼႂ်းဝႃႈၼၼ်သေၵေႃႈ ၸဝ်ႈၽြႃးပၼ်တၢမ်ႇလႄႈသွၼ်ႁဝ်းၼၼ်ႉ၊ၼင်ႇႁိုဝ်ႁဝ်းတၵ်းလႆႈၵၢင်းလွတ်ႈမိူဝ်ႈဢၼ်မၼ်းၸဝ်ႈၸီႇယၢင်ႇတြႃးၵူၼ်းလေႃးၵီႇႁူမ်ႈလူၺ်ႈၵၼ်တင်းမူတ်းၼၼ်ႉဢေႃႈ။
ပိူဝ်ႈၼႆလႄႈပီႈၼွင်ႉၶဝ်႟။ မိူဝ်ႈဢၼ်သူၵိၼ်ပွႆးၸဝ်ႈၸိုင်၊ၵေႃႉၼိုင်ႈလႄႈၵေႃႉၼိုင်ႈပႂ်ႉထႃႈၵၼ်တႃႉ။-
ပေႃးသေၵေႃႉသေၵူၼ်းတွင်ႉမႆႈၸိုင်၊ႁႂ်ႈမၼ်းၵိၼ်ၶဝ်ႈတီႈႁိူၼ်းမၼ်းမႃးတႃႉ။ ႁဵတ်းၼၼ်ၸင်ႇ၊မိူဝ်ႈဢၼ်သူၸုတုမ်ၵၼ်ၼၼ်ႉသူတၵ်းၵၢင်းလွတ်ႈတၢမ်ႇၸဝ်ႈၽြႃးဢေႃႈ။ လူၺ်ႈလွင်ႈတၢင်ႇၸိူဝ်ႉတၢင်ႇမဵဝ်းၸမ်ႉ၊ၵဝ်တၵ်းတေသင်ႇသွၼ်လၢတ်ႈၼႄပၼ်မိူဝ်ႈဢၼ်ၵဝ်မႃးၼၼ်ႉဢေႃႈ။
လူၺ်ႈလွင်ႈသုၵျေးၸူးဝိၺိၺ်ႇၸဝ်ႈဢၼ်သူတႅမ်ႈထၢမ်မႃးၼၼ်ႉ၊ပီႈၼွင်ႉၶဝ်႟။ ၵဝ်ၶႂ်ႈႁႂ်ႈသူႁုပွင်ႇလႅင်းၸႂ်လွင်ႈဢၼ်ၸိုဝ်ႈဢၼ်ၸႂ်ႈတႄႉတႄႉၼၼ်ႉဢေႃႈ။-
မိူဝ်ႈဢၼ်သူယင်းဢမ်ႇပႆႇယုမ်ႇမၢတ်ႈၸဝ်ႈၽြႃးၼၼ်ႉပိူၼ်ႈဢွၼ်သူယုမ်ႇၽိတ်းၼႂ်းတၢင်းဢၼ်ၵႂႃႇၵူဝ်းၵႂၢႆႇဝႆႈႁုၼ်ႇႁၢင်ႈသၢင်းထုဢၼ်ဢမ်ႇမီးၸႂ်ၼၼ်ႉဢေႃႈ။-
ၵဝ်ၶႂ်ႈႁႂ်ႈသူႁုပွင်ႇလႅင်းၸႂ်လွင်ႈဢၼ်ဝႃႈ၊ၽူႈလႂ်သေဢမ်ႇဝႃႈ၊ပေႃးမၼ်းၶၢမ်ႇဢဝ်တၢင်းဢၼ်ဝိၺိၺ်ႇၽြႃးပဵၼ်ၸဝ်ႈဢွၼ်သူင်ႇၸိုင်၊မၼ်းတၵ်းဢမ်ႇၵိၼ်ႇလႃႇ ၸဝ်ႈယေႇသု၊ ဢေႃႈ။ ၽူႈလႂ်သေဢမ်ႇဝႃႈ၊ပေႃးဝိၺိၺ်ႇမူတ်းၸၢင်ႇၸဝ်ႈဢမ်ႇၼႄတၢင်းၸိုင်၊မၼ်းဢမ်ႇၸၢင်ႈလၢတ်ႈလႄႈဝႃႈ၊ “ ၸဝ်ႈယေႇသု၊ ပဵၼ်ၸဝ်ႈၽြႃး၊” ဝႃႈၼင်ႇၼႆလႆႈဢေႃႈ။
သုၵျေးၸူးဝိၺိၺ်ႇၸဝ်ႈမီးလၢႆၸိူဝ်ႉလၢႆမဵဝ်းသေၵေႃႈ၊ဝိၺိၺ်ႇၸဝ်ႈဢၼ်ပၼ်တၢင်းလီၼၼ်ႉမီးပႃးလဵဝ်ၵူၺ်းဢေႃႈ။-
ၵၢၼ်ငၢၼ်းၸဝ်ႈၽြႃးဢၼ်ႁဝ်းႁဵတ်းၼၼ်ႉမီးၼမ်လၢႆၸိူဝ်ႉလၢႆမဵဝ်းသေၵေႃႈၸဝ်ႈထႃႇဝရႃႉၽြႃးမီးသူႇလဵဝ်ၵူၺ်းဢေႃႈ။-
ဢတၢတ်ႈတၢင်းမေႃဢၼ်ႁဝ်းတေပွင်ႁဵတ်းပွင်ထၢမ်းမီးၼမ်လၢႆၸိူဝ်ႉလၢႆမဵဝ်းသေၵေႃႈၽြႃးပဵၼ်ၸဝ်ႈမီးသူႇလဵဝ်ၵူၺ်းလႄႈပၼ်တၢင်းၵတ်ႉတၢင်းၶၼ်ႁႂ်ႈႁဝ်းႁဵတ်းၵၢၼ်ၽႂ်ၵၢၼ်မၼ်းၼၼ်ႉဢေႃႈ။-
ၼင်ႇႁိုဝ်ႁဝ်းတၵ်းပဵၼ်ဢၵျူဝ်းပုၼ်ႈၵူၼ်းတင်းလၢႆၸိုင်၊မၼ်းၸဝ်ႈပၼ်ဝိၺိၺ်ႇၸဝ်ႈတီႈၵူၼ်းၵူႈၵေႃႉႁႂ်ႈလႆႈထၢင်ႇသႃးၵႃႈၼႂ်းႁဝ်းႁင်းၽႂ်ႁင်းမၼ်းဢေႃႈ။-
ဝိၺိၺ်ႇၸဝ်ႈၼၼ်ႉႁဵတ်းႁႂ်ႈၵေႃႉၼိုင်ႈမေႃႁေႃးလၢတ်ႈၵႂၢမ်းပိင်ႇၺႃႇလႄႈဝိၺိၺ်ႇၸဝ်ႈၼၼ်ႉၼင်ႇၵဝ်ႇႁဵတ်းႁႂ်ႈတၢင်ႇၵေႃႉမေႃလၢတ်ႈၵႂၢမ်းဢၼ်ပႃးတၢင်းႁုၸႅင်ႈလႆႈဢေႃႈ။-
ဝိၺိၺ်ႇၸဝ်ႈပႃးၼၼ်ႉၼင်ႇၵဝ်ႇႁဵတ်းႁႂ်ႈၵေႃႉၼိုင်ႈမီးတၢင်းယုမ်ႇမၢတ်ႈလႄႈႁႂ်ႈတၢင်ႇၵေႃႉမီးတၼ်းၶူဝ်းဢၼ်ႁႂ်ႈတၢင်းၶႆႈတၢင်းပဵၼ်ၸိုၼ်ႈႁၢႆဢေႃႈ။-
ဝိၺိၺ်ႇၸဝ်ႈၼၼ်ႉပၼ်တၼ်းၶူဝ်းႁႂ်ႈၵေႃႉၼိုင်ႈၸၢင်ႈၼႄပျႃးၼိမိၵ်ႈလၢၵ်ႈၶၼႃႇဢၼ်လၢၵ်ႈဢၼ်လၢႆး၊သမ်ႉႁႂ်ႈၵေႃႉၼိုင်ႈၸၢင်ႈမေႃလၢတ်ႈၵႂၢမ်းၸဝ်ႈၽြႃး၊ႁႂ်ႈၵေႃႉၼိုင်ႈၸၢင်ႈမီးၺၢၼ်ႇဢၼ်ၸၵ်းၽႄသုၵျေးၸူးတင်းလၢႆလုၵ်ႉတီႈဝိၺိၺ်ႇၸဝ်ႈမႃးႁိုဝ်၊ဢမ်ႇၸႂ်ႈလုၵ်ႉတီႈဝိၺိၺ်ႇၸဝ်ႈမႃးႁိုဝ်ၼၼ်ႉဢေႃႈ။ ဝိၺိၺ်ႇၸဝ်ႈၼၼ်ႉပၼ်ႁႂ်ႈၵေႃႉၼိုင်ႈမီးပိင်ႇၺႃႇဢၼ်ၸၢင်ႈလၢတ်ႈၵႂၢမ်းၽႃႇသႃႇဢၼ်ပႅၵ်ႇပိူင်ႈတၢင်ႇမဵဝ်းလႄႈႁႂ်ႈၵေႃႉၼိုင်ႈသမ်ႉမေႃၽုၺ်ႇၼႄဢထိၵ်ႈပႄႇၵႂၢမ်းၽႃႇသႃႇၼၼ်ႉဢေႃႈ။-
ဢတၢတ်ႈတၢင်းမေႃၵႃႈမီးၸိူဝ်းၼႆႉ ဝိၺိၺ်ႇၸဝ်ႈပႃးလဵဝ်ၵူၺ်းႁဵတ်းပဵၼ်လႄႈမၼ်းၸဝ်ႈမႅင်ႇပၼ်သုၵျေးၸူးဢၼ်ပႅၵ်ႇဢၼ်ပိူင်ႈတီႈၵူၼ်းၵူႈၵေႃႉႁင်းၽႂ်ႁင်းမၼ်းၵႃႈၼင်ႇဢၼ်ဢလူဝ်ႇမၼ်းၸဝ်ႈမီးၼၼ်ႉဢေႃႈ။
ၸိူဝ်ႉၼင်ႇဢၼ်ၼႂ်းတူဝ်ဢၼ်လဵဝ်မီးဢၢင်ႇၵႃႇၼမ်ၼႃႇလႄႈပိၵ်ႉသမ်ႉမီးဢၢင်ႇၵႃႇၼမ်ၼႃႇသေၵေႃႈပဵၼ်တူဝ်ဢၼ်လဵဝ်ၼၼ်ႉ၊ ၸဝ်ႈၶရိၸ်ႈ၊ ၵေႃႈပဵၼ်မိူၼ်ၸိူဝ်ႉၼင်ႇၼၼ်ဢေႃႈ။-
မိူၼ်ၸိူဝ်ႉၼင်ႇၼၼ်ၵူၼ်းမဵဝ်း ၵျူး၊ သေဢမ်ႇဝႃႈ၊ပဵၼ်ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းသေဢမ်ႇဝႃႈ၊ပဵၼ်ၶႃႈသေဢမ်ႇဝႃႈ၊ပဵၼ်ၵူၼ်းလွတ်ႈသေဢမ်ႇဝႃႈ၊ႁဝ်းၵႃႈမီးတင်းသဵင်ႈတင်းလူင်ၼႆႉၶၢမ်ႇဢဝ်မၢင်ႇၵလႃႇပပ်ႉတိၸမ်ႇ ၵႃႈၼႂ်းတူဝ်ဢၼ်လဵဝ်ၵူၺ်း၊ၼႂ်းဝိၺိၺ်ႇၸဝ်ႈပႃးလဵဝ်ၵူၺ်းလႄႈႁဝ်းၵႃႈမီးၸိူဝ်းၼႆႉ၊လႆႈၵိၼ်တီႈဝိၺိၺ်ႇၸဝ်ႈပႃးလဵဝ်ၵူၺ်းဢေႃႈ။
တူဝ်ၸိုင်၊ဢဝ်ဢၢင်ႇၵႃႇဢၼ်လဵဝ်ၵူၺ်းႁဵတ်းပဵၼ်ဝႆႉဢမ်ႇၸႂ်ႈ။ ဢဝ်ဢၢင်ႇၵႃႇၼမ်ၼႃႇႁဵတ်းပဵၼ်ဝႆႉဢေႃႈ။-
ပေႃးတိၼ်ဝႃႈ၊ “ၵွပ်ႈပိူဝ်ႈၵဝ်ဢမ်ႇၸႂ်ႈမိုဝ်းလႄႈၵဝ်ဢမ်ႇသႅင်ႇသင်ၵၼ်တင်းတူဝ်၊” ဝႃႈၼင်ႇၼႆၸိုင်၊မၼ်းပဵၼ်ၸွမ်းၵႃႈၼင်ႇဢၼ်လၢတ်ႈၼၼ်ႉဢမ်ႇၸႂ်ႈ။-
ပေႃးႁူၵေႃႈဝႃႈ၊ “ၵွပ်ႈပိူဝ်ႈၵဝ်ဢမ်ႇၸႂ်ႈတႃလႄႈ၊ၵဝ်ဢမ်ႇသႅင်ႇၵၼ်တင်းတူဝ်၊” ဝႃႈၼင်ႇၼႆၸိုင်၊မၼ်းပဵၼ်ၸွမ်းၵႃႈၼင်ႇဢၼ်လၢတ်ႈၼၼ်ႉဢမ်ႇၸႂ်ႈ။-
ပေႃးတင်းတူဝ်တင်းၶိင်းပဵၼ်မၢၵ်ႇတႃၵူၺ်းၵူၺ်းၸိုင်၊တၵ်းတေႁဵတ်းႁိုဝ်လႆႈငိၼ်း။ ပေႃးတင်းတူဝ်တင်းၶိင်းသမ်ႉပဵၼ်ႁူၵူၺ်းၵူၺ်းၵေႃႈတၵ်းတေၼူမ်လႆႈၸိူဝ်ႉၼင်ႇႁိုဝ်။-
ပိူဝ်ႈၼႆလႄႈ ၵႃႈဢၼ်ပဵၼ်ယူႇၼႆႉ၊ၽြႃးပဵၼ်ၸဝ်ႈၶိုင်ပွင်ပၼ်ဢၢင်ႇၵႃႇတင်းလၢႆၼႂ်းတူဝ်ဝႆႉႁင်းၽႂ်ႁင်းမၼ်းၵႃႈၼင်ႇဢၼ်မၼ်းၸဝ်ႈမီးဢလူဝ်ႇၼၼ်ႉဢေႃႈ။-
ပေႃးပဵၼ်ဢၢင်ႇၵႃႇမဵဝ်းလဵဝ်ၵူၺ်းၸိုင်၊မၼ်းဢမ်ႇပဵၼ်တူဝ်ပဵၼ်ၶိင်းလႆႈ။-
ၵႃႈၼင်ႇဢၼ်ပဵၼ်ယူႇၼႆႉ၊မီးဢၢင်ႇၵႃႇၼမ်ၼႃႇလႄႈပဵၼ်တူဝ်ၶိင်းဢၼ်လဵဝ်ၵူၺ်းဢေႃႈ။
ပိူဝ်ႈၼႆလႄႈမၢၵ်ႇတႃဢမ်ႇလႆႈလၢတ်ႈတီႈမိုဝ်းလႄႈဝႃႈ၊ “ၵဝ်ဢမ်ႇလူဝ်ႇမႂ်း၊” ဝႃႈၼႆ။ ပိူင်လဵဝ်ၵၼ်ႁူဝ်ၵေႃႈဢမ်ႇလႆႈလၢတ်ႈတီႈတိၼ်လႄႈဝႃႈ၊ “ၵဝ်ဢမ်ႇလူဝ်ႇမႂ်း” ဝႃႈၼင်ႇၼႆ။-
လိူဝ်သေၼၼ်ႉဢမ်ႇၵႃး၊ႁဝ်းဢမ်ႇၸၢင်ႈပႄႇပႅတ်ႈဢၢင်ႇၵႃႇဢၼ်ႁႅင်းလဵၵ်ႉႁႅင်းၵေႇသေၵႃႈတီႈတူဝ်ၶၼ်ႇထႃႇႁဝ်း။-
ဢၢင်ႇၵႃႇဢၼ်ႁဝ်းထၢင်ႇဝႃႈ၊မၼ်းဢမ်ႇမီးၵုင်ႇသရေႇၵႃႈႁိုဝ်ၼၼ်ႉႁဝ်းၸၢင်ႈယဵင်ႈၶႅၼ်းပႂ်ႉထိင်းၵုင်ႇသရေႇမၼ်းဢေႃႈ။ ဢၢင်ႇၵႃႇဢၼ်ဢမ်ႇပေႃးလီတူၺ်းၼၼ်ႉႁဝ်းၸၢင်ႈႁူမ်ႇဝႆႉႁႂ်ႈမၼ်းလႅပ်ႈလီလႄႈ၊-
ဢၢင်ႇၵႃႇဢၼ်လီငၢမ်းၼၼ်ႉႁဝ်းဢမ်ႇလူဝ်ႇလုမ်းလႃးၵႃႈႁိုဝ်။ ၽြႃးပဵၼ်ၸဝ်ႈႁဵတ်းႁႂ်ႈတူဝ်ၶၼ်ႇထႃႇၵိုင်ႇၵၼ်လႅပ်ႈၵၼ်ၸိူဝ်ႉၼင်ႇၼႆလႄႈပၼ်ၵုင်ႇသရေႇယဵင်ႈၶႅၼ်းၼမ်တီႈဢၢင်ႇၵႃႇဢၼ်ဢမ်ႇပေႃးလီတူၺ်းၸိူဝ်းၼၼ်ႉဢေႃႈ။-
မၼ်းၸဝ်ႈႁဵတ်းၸိူဝ်ႉၼင်ႇၼႆ၊ၼင်ႇႁိုဝ်တၵ်းတေဢမ်ႇၽၢတ်ႇၽႄၵၼ်ၼႂ်းတူဝ်ၶၼ်ႇထႃႇလႄႈ ႁႂ်ႈဢၢင်ႇၵႃႇၵႃႈမီးတၵ်းၽွမ်ႉၵၼ်မီးတၢင်းဢၼ်မႆႈၸႂ်ပုၼ်ႈၵၼ်ၼၼ်ႉဢေႃႈ။-
ပေႃးဢၢင်ႇၵႃႇဢၼ်ၼိုင်ႈႁွတ်ႈတုၵ်ႉၶႃႉၸိုင်၊ဢၢင်ႇၵႃႇၵႃႈမီးတင်းမူတ်းလႆႈတုၵ်ႉၶႃႉၸွမ်းဢေႃႈ။ ပေႃးဢၢင်ႇၵႃႇဢၼ်ၼိုင်ႈလႆႈၶၢမ်ႇတၢင်းဢၼ်ပိူၼ်ႈပၼ်ၵုင်ႇသရေႇယႂ်ႇၼမ်ၸိုင်၊ဢၢင်ႇၵႃႇၵႃႈမီးတင်းမူတ်းၵေႃႈလႆႈၸူမ်းသိူဝ်းၸွမ်းဢေႃႈ။
သူပဵၼ်တူဝ် ၸဝ်ႈၶရိၸ်ႈ၊ လႄႈပဵၼ်ဢၢင်ႇၵႃႇၼႂ်းတူဝ်ၼၼ်ႉႁင်းၽႂ်ႁင်းမၼ်းဢေႃႈ။-
ပိူဝ်ႈၼႆလႄႈၵႃႈၼႂ်းၸိူဝ်းၸဝ်ႈၼႆႉၵေႃႈၽြႃးပဵၼ်ၸဝ်ႈၽႄမႅင်ႇပၼ်ၵၢၼ်ငၢၼ်းတီႈၽႂ်တီႈမၼ်းဢေႃႈ။ ၵၢၼ်ငၢၼ်းဢၼ်ယႂ်ႇသေပိူၼ်ႈ၊ပဵၼ်ဢရႃႇတမၢၼ်ႇၸဝ်ႈတင်းလၢႆ၊တၢမ်းသွင်ပဵၼ်ဢရႃႇပရေႃးၽႅတ်ႈ တင်းလၢႆ၊တၢမ်းသၢမ်ပဵၼ်ဢရႃႇသြႃႇတင်းလၢႆ၊လိုၼ်းၼၼ်ႉၶဝ်ၸိူဝ်းဢၼ်မေႃႁဵတ်းၼိမိၵ်ႈလၢၵ်ႈၶၼႃႇဢၼ်လၢၵ်ႇဢၼ်လၢႆး၊လိုၼ်းၼၼ်ႉၶဝ်ၸိူဝ်းဢၼ်ၸၢင်ႈႁဵတ်းႁႂ်ႈတၢင်းၶႆႈတၢင်းပဵၼ်ၸိုၼ်ႈႁၢႆ၊သမ်ႉၶဝ်ၸိူဝ်းဢၼ်ၸၢင်ႈၸွႆႈၵၢၼ်ၸိူဝ်းၸဝ်ႈ၊သမ်ႉၶဝ်ၸိူဝ်းဢၼ်မေႃၶိုင်ပွင်ၼႃႈၵၢၼ်၊ဢိၵ်ႇတင်းၶဝ်ၸိူဝ်းဢၼ်ၸၢင်ႈလၢတ်ႈၵႂၢမ်းပႅၵ်ႇပိူင်ႈတၢင်ႇမဵဝ်းၼၼ်ႉဢေႃႈ။-
ၶဝ်ဢမ်ႇၸႂ်ႈတမၢၼ်ႇၸဝ်ႈၵူႈၵေႃႉ။ ၶဝ်ဢမ်ႇၸႂ်ႈပရေႃးၽႅတ်ႈၵူႈၵေႃႉ။ ၶဝ်ဢမ်ႇၸႂ်ႈသြႃႇၵူႈၵေႃႉ။ ၶဝ်ၵူႈၵေႃႉဢမ်ႇၸၢင်ႈႁဵတ်းၼိမိၵ်ႈလၢၵ်ႈၶၼႃႇ။-
ၶဝ်ၵူႈၵေႃႉဢမ်ႇၸၢင်ႈႁဵတ်းႁႂ်ႈတၢင်းၶႆႈတၢင်းပဵၼ်ၸိုၼ်ႈႁၢႆလႆႈ။ ၶဝ်ၵူႈၵေႃႉဢမ်ႇၸၢင်ႈလၢတ်ႈၵႂၢမ်းပႅၵ်ႇပိူင်ႈတၢင်ႇမဵဝ်းလႆႈ။ ၶဝ်ဢမ်ႇၸၢင်ႈၽုၺ်ႇၼႄဢထိၵ်ႈပႄႇၵႂၢမ်းၸိူဝ်းၼၼ်ႉလႆႈၵူႈၵေႃႉဢေႃႈ။-
ၵူၺ်းၵႃႈ၊သူဢွၼ်ၵၼ်ၶတ်းၸႂ်ၼႃႇၼႃႇႁႂ်ႈလႆႈသုၵျေးၸူးၸဝ်ႈဢၼ်မျၢတ်ႈလီသေပိူၼ်ႈၼၼ်ႉတႃႉ။ ဝႃႈၸိူဝ်ႉႁိုဝ်သေၵေႃႈၵဝ်တၵ်းၼႄပၼ်သဵၼ်ႈတၢင်းဢၼ်ယဵင်ႈၶႅၼ်းမျၢတ်ႈလီသေၼႆႉလူးၵွၼ်ႇဢေႃႈ။
ပိၵ်ႉသမ်ႉၵဝ်မေႃလၢတ်ႈၵႂၢမ်းၽႃႇသႃႇၵူၼ်းၼမ်ၼႃႇသေဢမ်ႇၵႃး၊ယင်းမေႃလၢတ်ႈၵႂၢမ်းၽႃႇသႃႇတမၢၼ်ႇၵၢင်ႁၢဝ်တင်းလၢႆသေၵေႃႈပေႃးၵဝ်ယင်းဢမ်ႇမီးၸႂ်ႁၵ်ႉမႅတ်ႈတႃႇၸိုင်၊ၶေႃႈၵႂၢမ်းၵဝ်ၼၼ်ႉတၵ်းတေပဵၼ်မိူၼ်ၸိူဝ်ႉၼင်ႇမွင်းဢမ်ႇၼၼ်သႅင်ႇဢၼ်မီးသဵင်လင်မေႃးၼၼ်ႉၵူၺ်းဢေႃႈ။-
ပိၵ်ႉသမ်ႉၵဝ်လႆႈသုၵျေးၸူးၸဝ်ႈဢၼ်ၸၢင်ႈႁေႃးလၢတ်ႈၵႂၢမ်းၸဝ်ႈၽြႃး၊ဢိၵ်ႇတင်းမီးပိင်ႇၺႃႇဢၼ်ႁုၸႅင်ႈလွင်ႈဢၼ်လိုၵ်ႉဢၼ်လမ်ႇ၊ၸၢင်ႈႁုၸၢင်ႈႁၼ်ၵူႈမဵဝ်းသေဢမ်ႇၵႃး၊ယင်းမီးတၢင်းယုမ်ႇမၢတ်ႈဢၼ်ၶၢႆႉလွႆတင်းလၢႆလႆႈသေၵေႃႈ၊ပေႃးၵဝ်ယင်းဢမ်ႇမီးၸႂ်ႁၵ်ႉမႅတ်ႈတႃႇၸိုင်၊ၵဝ်ဢမ်ႇပွင်ႇလွင်ႈၵႃႈသင်ဢေႃႈ။-
ပိၵ်ႉသမ်ႉၵဝ်ၽေးၸွၼ်းဢုၵ်ႉၸႃႇၵဝ်၊ၵႃႈမီးတင်းသဵင်ႈၵူၺ်းဢမ်ႇၵႃး၊ဢမ်တူဝ်ၶၼ်ႇထႃႇၵဝ်ဢၢပ်ႈပၼ်ႁႂ်ႈလႆႈၶၢမ်ႇတၢင်းဢၼ်တုတ်ႇၽႆးပႅတ်ႈသေၵေႃႈ၊ပေႃးၵဝ်ယင်းဢမ်ႇမီးၸႂ်ႁၵ်ႉမႅတ်ႈတႃႇၸိုင်၊မၼ်းဢမ်ႇမီးဢၵျူဝ်းတီႈၵဝ်ဢေႃႈ။
ၸႂ်ႁၵ်ႉမႅတ်ႈတႃႇဢၼ်ဝႃႈၼၼ်ႉၸၢင်ႈၸႂ်ယႂ်ႇၸႂ်ယၢဝ်း၊ၸၢင်ႈယိူၼ်ႉၶၢမ်ႇလႄႈၸၢင်ႈႁဵတ်းၵျေးၸူးပၼ်ပိူၼ်ႈဢေႃႈ။ ၸႂ်ႁၵ်ႉမႅတ်ႈတႃႇၼၼ်ႉဢမ်ႇၸၢင်ႈၶွႆပိူၼ်ႈ၊ဢမ်ႇၸၢင်ႈယွင်ႈတူဝ်ၸဝ်ႈၵဝ်ႇ၊ဢမ်ႇၸၢင်ႈမီးၸႂ်ၽႅၼ်သုင်ဢေႃႈ။-
ၸႂ်ႁၵ်ႉမႅတ်ႈတႃႇၼၼ်ႉဢမ်ႇၸၢင်ႈမီးၸႂ်ဢၼ်ၵျၢမ်ႇႁဵတ်းမိူၵ်ႈတီႈပိူၼ်ႈ၊ဢမ်ႇၸၢင်ႈႁႃဢၵျူဝ်းပုၼ်ႈတူဝ်ၸဝ်ႈၵဝ်ႇ၊ဢမ်ႇၸၢင်ႈဢွၵ်ႇတေႃးသႃႉ၊ဢမ်ႇၸၢင်ႈမၢတ်ႈတွင်းတၢင်းၽိတ်းပိူၼ်ႈ။-
ဢမ်ႇၸၢင်ႈၸူမ်းသိူဝ်းၼႂ်းတၢင်းဢၼ်ႁၢႆႉမိူၵ်ႈ၊ၸၢင်ႈၸူမ်းသိူဝ်းၼႂ်းတၢင်းဢၼ်ႁဵတ်းလွင်ႈဢၼ်လီငၢမ်းၵူၺ်းဢေႃႈ။-
ၸႂ်ႁၵ်ႉမႅတ်ႈတႃႇၼၼ်ႉၸၢင်ႈယိူၼ်ႉၶၢမ်ႇတီႈၵူၼ်းဢၼ်ႁဵတ်းၽိတ်းၼၼ်ႉဢေႃႈ။ ယုမ်ႇၼႂ်းတၢင်းဢၼ်လီၼႂ်းပိူၼ်ႈတႃႇသေႇ၊မီးတၢင်းမုင်ႈမွင်းယူႇတႃႇသေႇ၊ယိူၼ်ႉၶၢမ်ႇလႆႈၼႂ်းလွင်ႈတၢင်းၵူႈၸိူဝ်ႉၵူႈပိူင်ဢေႃႈ။
ၸႂ်ႁၵ်ႉမႅတ်ႈတႃႇၼၼ်ႉၸၢင်ႈတႄႇယူႇတႃႇသေႇဢေႃႈ။ တၢင်းဢၼ်မေႃႁေႃးလၢတ်ႈၵႂၢမ်းၸဝ်ႈၽြႃးၼၼ်ႉၸၢင်ႈသုတ်းဝၢႆးၵႂႃႇဢေႃႈ။ သုၵျေးၸူးၸဝ်ႈဢၼ်ႁႂ်ႈႁဝ်းၸၢင်ႈလၢတ်ႈၵႂၢမ်းဢၼ်ပႅၵ်ႇပိူင်ႈၼၼ်ႉၸၢင်ႈထၢတ်ႇၵႂႃႇဢေႃႈ။ ပိင်ႇၺႃႇတၢင်းႁုတၢင်းႁၼ်ၵေႃႈၸၢင်ႈမွတ်ႇႁၢႆၵႂႃႇဢေႃႈ။-
ၵွပ်ႈပိူဝ်ႈတၢင်းႁုတၢင်းမေႃႁဝ်းဢမ်ႇပျေႉၸုမ်ႇလႄႈတၢင်းဢၼ်ႁေႃးလၢတ်ႈၼုၵ်ႈၵပၢတ်ႈတြႃးၸဝ်ႈၵေႃႈဢမ်ႇပျေႉၸုမ်ႇဢေႃႈ။-
ၵူၺ်းၵႃႈ၊မိူဝ်ႈဢၼ်လွင်ႈတၢင်းဢၼ်ပျေႉၸုမ်ႇတဵမ်ထူၼ်ႈၼၼ်ႉႁွတ်ႈထိုင်ၸိုင်၊တၢင်းဢၼ်ဢမ်ႇပျေႉၸုမ်ႇဢမ်ႇတဵမ်ထူၼ်ႈၼၼ်ႉတၵ်းႁၢႆလၢႆၵႂႃႇဢေႃႈ။
မိူဝ်ႈဢၼ်ၵဝ်ယင်းပဵၼ်လုၵ်ႈဢွၼ်ႇၼၼ်ႉတၢင်းဢၼ်ၵဝ်လၢတ်ႈၵႂၢမ်း၊တၢင်းဢၼ်ၵဝ်ၶႆႈၸႂ်ၵျၢမ်ႇပွင်၊ဢိၵ်ႇတင်းတၢင်းႁုတၢင်းႁၼ်ၵဝ်၊မိူၼ်ၸိူဝ်ႉၼင်ႇလုၵ်ႈဢွၼ်ႇၵူၺ်းဢေႃႈ။ မိူဝ်ႈလဵဝ်ၼႆႉ၊ၵဝ်ပဵၼ်ၵူၼ်းလူင်ယဝ်ႉလႄႈၵဝ်ၸုၼ်ႉဢၵျၢင်ႉတၢင်းႁဵတ်းလုၵ်ႈဢွၼ်ႇတင်းလၢႆပႅတ်ႈဢေႃႈ။-
မိူဝ်ႈလဵဝ်ၼႆႉ၊ႁဝ်းႁၼ်မူဝ်းမူဝ်းဝႆႉ၊မိူၼ်ၸိူဝ်ႉၼင်ႇႁဝ်းႁၼ်ၼႂ်းမၢၼ်ႇၸမ်ၼၼ်ႉၵူၺ်းသေၵေႃႈဝၼ်းၼိုင်ႈႁဝ်းတၵ်းလႆႈႁၼ်တေႃႇၼႃႈၵၼ်ဢေႃႈ။ မိူဝ်ႈလဵဝ်ၼႆႉ၊ၵဝ်ႁုႁၼ်ဢမ်ႇပျေႉၸုမ်ႇဢမ်ႇတဵမ်ထူၼ်ႈသေၵေႃႈ၊ဝၼ်းၼိုင်ႈၵဝ်တၵ်းႁုႁၼ်ပျေႉၸုမ်ႇတဵမ်ထူၼ်ႈမႃး၊မိူၼ်ၸိူဝ်ႉၼင်ႇၽြႃးပဵၼ်ၸဝ်ႈႁုႁၼ်ၵဝ်ၼၼ်ႉဢေႃႈ။
ၵွပ်ႈပိူဝ်ႈၼႆလႄႈတၢင်းယုမ်ႇမၢတ်ႈ၊တၢင်းမုင်ႈမွင်း၊တၢင်းႁၵ်ႉမႅတ်ႈတႃႇသၢမ်ၸိူဝ်ႉသၢမ်ပိူင်ၼႆႉ၊ဢမ်ႇသုတ်းဢမ်ႇဝၢႆးမီးဝႆႉယူႇဢေႃႈ။ ၼႂ်းသၢမ်ပိူင်ၼႆႉ၊တၢင်းႁၵ်ႉမႅတ်ႈတႃႇၼၼ်ႉပဵၼ်ဢၼ်ယႂ်ႇမျၢတ်ႈသေပိူၼ်ႈဢေႃႈ။
ၶတ်းၸႂ်ႁႂ်ႈမီးၸႂ်မႅတ်ႈတႃႇတႃႉ။ မီးၸႂ်ဢၼ်ၶႂ်ႈလႆႈသုၵျေးၸူးဢၼ်ဝိၺိၺ်ႇၸဝ်ႈပၼ်ၸိူဝ်းၼၼ်ႉၼႃႇလူင်လၢင်တႃႉ။ လိူဝ်သေၼၼ်ႉယဵင်ႈၶႅၼ်းမီးၸႂ်ဢၼ်ၶႂ်ႈလႆႈသုၵျေးၸူးဢၼ်မေႃႁေႃးလၢတ်ႈၵႂၢမ်းၸဝ်ႈၽြႃးတႃႉ။-
ၵေႃႉဢၼ်ၸၢင်ႈလၢတ်ႈၵႂၢမ်းၽႃႇသႃႇဢၼ်ပႅၵ်ႇဢၼ်ပိူင်ႈတၢင်ႇမဵဝ်းၼၼ်ႉမၼ်းဢမ်ႇလၢတ်ႈတေႃႇၵူၼ်း၊လၢတ်ႈတေႃႇၽြႃးပဵၼ်ၸဝ်ႈၵူၺ်း၊ၵွပ်ႈပိူဝ်ႈၽူႈလႂ်ဢမ်ႇႁုထွမ်ႇၵႂၢမ်းမၼ်းၼၼ်ႉဢေႃႈ။ မၼ်းဢဝ်တၼ်းၶူဝ်းဝိၺိၺ်ႇၸဝ်ႈလႄႈလၢတ်ႈလွင်ႈဢၼ်လိုၵ်ႉဢၼ်လမ်ႇၵူၺ်းဢေႃႈ။-
ၵူၺ်းၵႃႈ၊ၵေႃႉဢၼ်ႁေႃးလၢတ်ႈၵႂၢမ်းၸဝ်ႈၽြႃးၼၼ်ႉၸမ်ႉ၊လၢတ်ႈတေႃႇၵူၼ်းတင်းလၢႆလႄႈပဵၼ်တၢင်းဢၼ်ၸွႆႈထႅမ်ပၼ်ဢဵၼ်ပၼ်ႁႅင်းလႄႈႁႂ်ႈၸႂ်ဝိၺိၺ်ႇၶဝ်လႆႈသၢၵ်ႈသႃႇဢေႃႈ။-
ၵေႃႉဢၼ်လၢတ်ႈၵႂၢမ်းၽႃႇသႃႇဢၼ်ပႅၵ်ႇပိူင်ႈတၢင်ႇမဵဝ်းၼၼ်ႉၸၢင်ႈပွင်ဢၵျူဝ်းတူဝ်ၸဝ်ႈၵဝ်ႇၵူၺ်းလႄႈၵေႃႉဢၼ်ႁေႃးလၢတ်ႈၵႂၢမ်းၸဝ်ႈၽြႃးၸမ်ႉ၊ၸၢင်ႈပွင်ဢၵျူဝ်းၸိူဝ်းၸဝ်ႈတင်းမူႇတင်းၸုမ်းဢေႃႈ။
ၵဝ်ၶႂ်ႈႁႂ်ႈသူလၢတ်ႈၵႂၢမ်းၽႃႇသႃႇဢၼ်ပႅၵ်ႇပိူင်ႈတၢင်ႇမဵဝ်းၼၼ်ႉယူႇဢေႃႈ။ ၵူၺ်းၵႃႈ၊လိူဝ်တွၼ်းၼႃႇသေၼၼ်ႉၵဝ်ၶႂ်ႈႁႂ်ႈသူလႆႈၶၢမ်ႇဢဝ်သုၵျေးၸူးၸဝ်ႈဢၼ်ၸၢင်ႈႁေႃးလၢတ်ႈၵႂၢမ်းၸဝ်ႈၽြႃးဢေႃႈ။ လွင်ႈမၼ်းၸမ်ႉ၊ၵေႃႉဢၼ်ႁေႃးလၢတ်ႈၵႂၢမ်းၸဝ်ႈၽြႃးၼၼ်ႉယဵင်ႈၶႅၼ်းယႂ်ႇမျၢတ်ႈသေၵေႃႉဢၼ်လၢတ်ႈၵႂၢမ်းၽႃႇသႃႇဢၼ်ပႅၵ်ႇပိူင်ႈတၢင်ႇမဵဝ်းၼၼ်ႉဢေႃႈ။ ၼွၵ်ႈသေဝႃႈ၊ပေႃးမီးသေၵေႃႉၵေႃႉၸၢင်ႈၽုၺ်ႇၼႄဢထိၵ်ႈပႄႇၵႂၢမ်းၼၼ်ႉၸင်ႇ၊တေပဵၼ်ဢၵျူဝ်းပုၼ်ႈၸိူဝ်းၸဝ်ႈဢေႃႈ။-
ပိူဝ်ႈၼႆလႄႈပီႈၼွင်ႉၶဝ်႟။ မိူဝ်ႈဢၼ်ၵဝ်မႃးလႄႇထိုင်သူၼၼ်ႉၸိုင်၊ပေႃးၵဝ်လၢတ်ႈၵႂၢမ်းၽႃႇသႃႇဢၼ်ပႅၵ်ႇပိူင်ႈတၢင်ႇမဵဝ်းတီႈသူၵူၺ်းၸိုင်၊ၸွင်ႇတေပွင်ဢၵျူဝ်းလႆႈႁိုဝ်း။ မိူဝ်ႈလႂ်ၵဝ်ႁေႃးလၢတ်ႈတၢင်းဢၼ်ၸဝ်ႈၽြႃးၶႂ်ႈႁႂ်ႈၵဝ်ၽုၺ်ႇဢွၵ်ႇမွၵ်ႇလၢတ်ႈၼႄသူၼၼ်ႉလႄႈသင်၊ပၼ်ပိင်ႇၺႃႇတီႈသူသေၸိူဝ်ႉသေပိူင်လႄႈသင်၊ႁေႃးလၢတ်ႈပၼ်ၵႂၢမ်းၸဝ်ႈၽြႃးလႄႈသင်၊ဢမ်ႇၼၼ်ၵေႃႈ၊သင်ႇသွၼ်သုင်းမႃႉသူလႄႈသင်၊ၸင်ႇတေမီးဢၵျူဝ်းဢမ်ႇၸႂ်ႈႁိုဝ်း။
ၶိူင်ႈတူႇရိယႃႇဢၼ်ဢမ်ႇမီးဢသၢၵ်ႈဢၼ်ပဵၼ်ပီႇသေဢမ်ႇဝႃႈ၊တိင်ႇသေဢမ်ႇဝႃႈၼၼ်ႉ၊တေႃႈယင်းမီးသဵင်ယူႇဢမ်ႇၸႂ်ႈႁိုဝ်း။ ၵူၺ်းၵႃႈ၊ပေႃးယင်းဢမ်ႇလဵတ်းသဵင်ၶိုၼ်ႈသဵင်လူင်းမၼ်းမၢၼ်ႇမၢၼ်ႇၸိုင်၊ၽူႈလႂ်တေၶႂ်ႈထွမ်ႇငိၼ်းသဵင်မၼ်း။-
ပိူင်လဵဝ်ၵၼ်သဵင်ၼႄးၶရႃႇၵေႃႈပေႃးယင်းဢမ်ႇပဝ်ႇဢမ်ႇတိုင်ႈႁႂ်ႈသဵင်မၼ်းဢွၵ်ႇမႃးထၢင်ႇထၢင်ႇသႃးသႃးၸိုင်၊ၽူႈလႂ်တၵ်းႁုလွင်ႈဢၼ်တၵ်းလႆႈႁႅၼ်းၶိူင်ႈတိုၵ်းသိုၵ်း။-
မိူၼ်ၸိူဝ်ႉၼင်ႇၼၼ်ပေႃးၵႂၢမ်းဢၼ်မႂ်းလၢတ်ႈၼၼ်ႉပဵၼ်ၵႂၢမ်းပႅၵ်ႇပိူင်ႈတၢင်ႇမဵဝ်းလႄႈဢမ်ႇၸိုၼ်ႈဢမ်ႇလႅင်းတီႈႁူပိူၼ်ႈၸိုင်၊ၽူႈလႂ်တေႁုထွမ်ႇ။ ၶေႃႈၵႂၢမ်းမႂ်းၸိူဝ်းၼၼ်ႉမိူၼ်လၢတ်ႈတေႃႇၵၼ်တင်းလူမ်းၵူၺ်းဢေႃႈ။-
ၼႂ်းလေႃးၵႃႉၼႆႉမီးၵႂၢမ်းၵူၼ်းဢၼ်ပႅၵ်ႇပိူင်ႈၵၼ်ၼမ်တႄႉတႄႉဢေႃႈ။ ၶေႃႈၵႂၢမ်းၸိူဝ်းၼၼ်ႉ မီးဢၼၢၵ်ႈဢထိၵ်ႈပႄႇဝႆႉ၊ၵူႈၶေႃႈၵူႈၵမ်းဢေႃႈ။-
ၵူၺ်းၵႃႈ၊ပေႃးၵဝ်သမ်ႉဢမ်ႇႁုထွမ်ႇၵႂၢမ်းၵူၼ်းၵေႃႉဢၼ်လၢတ်ႈတေႃႇၵဝ်ၼၼ်ႉၸိုင်၊ၵဝ်တင်းပဵၼ်ၵူၼ်းတၢင်ႇၸိူဝ်ႉၶိူဝ်းတီႈမၼ်းလႄႈ၊မၼ်းၵေႃႈတေပဵၼ်ၵူၼ်းတၢင်ႇၸိူဝ်ႉၶိူဝ်းတီႈၵဝ်ဢေႃႈ။-
ၸွမ်းၼင်ႇဢၼ်သူမီးဢလူဝ်ႇၶႂ်ႈလႆႈသုၵျေးၸူးဝိၺိၺ်ႇၸဝ်ႈၼႃႇလူင်လၢင်ၼၼ်ႉဢွၼ်ၵၼ်ၶတ်းၸႂ်ပွင်ႁဵတ်းၵၢၼ်ဢၼ်ႁႂ်ႈၸိူဝ်းၸဝ်ႈၶိုၼ်ႈယႂ်ႇၼၼ်ႉတႃႉ။
ပိူဝ်ႈၼႆလႄႈၵေႃႉဢၼ်ၸၢင်ႈလၢတ်ႈၵႂၢမ်းၽႃႇသႃႇဢၼ်ပႅၵ်ႇပိူင်ႈတၢင်ႇမဵဝ်းၼၼ်ႉ၊ႁႂ်ႈမၼ်းသူးတွင်းယွၼ်းဢဝ်သုၵျေးၸူးၸဝ်ႈဢၼ်ၸၢင်ႈၽုၺ်ႇၼႄဢၼၢၵ်ႈဢထိၵ်ႈပႄႇၵႂၢမ်းၸိူဝ်းၼၼ်ႉတႃႉ။-
ပေႃးၵဝ်သူးတွင်းလူၺ်ႈၵႂၢမ်းပႅၵ်ႇပိူင်ႈၸိူဝ်ႉၼင်ႇၼၼ်လႄႈ၊ၸႂ်ဝိၺိၺ်ႇၵဝ်သူးတွင်းသေၵေႃႈၺၢၼ်ႇၵဝ်ဢမ်ႇႁုပွင်ႇၵႂၢမ်းၼၼ်ႉလႄႈဢမ်ႇၸၢင်ႈသူးတွင်းၸွမ်းဢေႃႈ။-
ပိူဝ်ႈၼႆလႄႈၵဝ်တၵ်းလႆႈႁဵတ်းၸိူဝ်ႉၼင်ႇႁိုဝ်။ ၵဝ်တၵ်းဢဝ်ၸႂ်ဝိၺိၺ်ႇၵဝ်၊ဢိၵ်ႇတင်းၺၢၼ်ႇၵဝ်သူးတွင်းဢေႃႈ။ ၵဝ်တၵ်းဢဝ်ၸႂ်ဝိၺိၺ်ႇၵဝ်၊ဢိၵ်ႇတင်းၺၢၼ်ႇၵဝ်ႁဵတ်းၵႂၢမ်းဢေႃႈ။-
ပေႃးသူဢဝ်တင်းၸႂ်ဝိၺိၺ်ႇၵူၺ်းသူးတွင်းယွင်ႈယေႃးတၢင်ႇၵျေးၸူးၸဝ်ႈၽြႃးၸိုင်၊ၵူၼ်းယူဝ်းယူဝ်းဢၼ်ၶဝ်ႈပႃးၵႃႈၼႂ်းၸိူဝ်းၸဝ်ႈၼၼ်ႉပိူဝ်ႈဢၼ်မၼ်းဢမ်ႇႁုထွမ်ႇၵႂၢမ်းသူၼၼ်ႉလႄႈမၼ်းတၵ်းဝႃႈ၊ “ဢႃမိၼ်ႈ” ၸွမ်းတၢင်းဢၼ်သူ၊သူးတွင်းယွင်ႈယေႃးတၢင်ႇၵျေးၸူးၸဝ်ႈၽြႃးၼၼ်ႉလႆႈၸိူဝ်ႉႁိုဝ်။-
ပိၵ်ႉသမ်ႉတၢင်းဢၼ်သူ၊သူးတွင်းယွင်ႈယေႃးတၢင်ႇၵျေးၸူးၸဝ်ႈၽြႃးၼၼ်ႉ၊လီၵႃႈႁိုဝ်သေၵေႃႈ ပုၼ်ႈၵေႃႉဢၼ်ဢမ်ႇႁုထွမ်ႇၼၼ်ႉဢမ်ႇမီးဢၵျူဝ်းလႃးလႃးဢေႃႈ။
ၵဝ်တၢင်ႇၵျေးၸူးၽြႃးပဵၼ်ၸဝ်ႈၵွပ်ႈပိူဝ်ႈၵဝ်လၢတ်ႈၵႂၢမ်းၽႃႇသႃႇဢၼ်ပႅၵ်ႇပိူင်ႈၼၼ်ႉၼမ်သေသူၵူႈၵေႃႉလၢတ်ႈၼၼ်ႉဢေႃႈ။-
ၵူၺ်းၵႃႈ၊ၼႂ်းမိူဝ်ႈဢၼ်ၸိူဝ်းၸဝ်ႈၸုတုမ်ႁဵတ်းဝၢတ်ႈၵူဝ်းၵႂၢႆႇၼၼ်ႉ၊ၼင်ႇႁိုဝ်တၵ်းလႆႈသင်ႇသွၼ်သုင်းမႃႉၶဝ်ၸိုင်၊ပေႃးၵဝ်ႁေႃးလၢတ်ႈၵႂၢမ်းႁႃႈၶေႃႈဢၼ်ၵူၼ်းၵူႈၵေႃႉႁုထွမ်ႇၼၼ်ႉ၊ယဵင်ႈၶႅၼ်းလီသေႁေႃးလၢတ်ႈၶေႃႈၵႂၢမ်းၽႃႇသႃႇဢၼ်ပႅၵ်ႇပိူင်ႈမိုၼ်ႇၶေႃႈဢေႃႈ။
ပီႈၼွင်ႉၶဝ်႟။ ယႃႇပေႁႂ်ႈပဵၼ်မိူၼ်ၸိူဝ်ႉၼင်ႇလုၵ်ႈဢွၼ်ႇၼႂ်းတၢင်းၶႆႈၸႂ်သူ။ ၼႂ်းလွင်ႈတၢင်းဢၼ်ႁၢႆႉမိူၵ်ႈၼၼ်ႉႁႂ်ႈပဵၼ်ဢၼ်ဢမ်ႇႁုသင်မိူၼ်လုၵ်ႈဢွၼ်ႇတႃႉ။ ၼႂ်းတၢင်းဢၼ်ၶႆႈၸႂ်ၸမ်ႉ၊ႁႂ်ႈပဵၼ်ၵူၼ်းဢၼ်ဢသၢၵ်ႈယႂ်ႇၼၼ်ႉတႃႉ။-
ၼႂ်းၵျၢမ်းလိၵ်ႈတႅမ်ႈဝႆႉဝႃႈ၊ “ၸဝ်ႈၽြႃးလၢတ်ႈဝႃႈ၊ၵဝ်တၵ်းဢဝ်ၵူၼ်းလၢတ်ႈၵႂၢမ်းပႅၵ်ႇပိူင်ႈတၢင်ႇမဵဝ်းၼၼ်ႉ၊ လၢတ်ႈတေႃႇၵူၼ်းၵဝ်တင်းလၢႆဢေႃႈ။ ၵဝ်ယင်းတၵ်းၸႂ်ႉသူပ်းၵူၼ်းတၢင်ႇၸိူဝ်ႉတၢင်ႇမဵဝ်းလၢတ်ႈတေႃႇၶဝ်ဢေႃႈ။ ၵူၺ်းၵႃႈ၊ၵူၼ်းၵဝ်ၸိူဝ်းၼၼ်ႉယင်းတေဢမ်ႇထွမ်ႇဢမ်ႇဢဝ်ၵႂၢမ်းၵဝ်၊” ဝႃႈၼင်ႇၼႆဝႆႉဢေႃႈ။-
ပိူဝ်ႈၼႆလႄႈ သုၵျေးၸူးၸဝ်ႈဢၼ်မေႃလၢတ်ႈၵႂၢမ်းပႅၵ်ႇပိူင်ႈၼၼ်ႉပဵၼ်တၢင်းဢၼ်ၼႄပျႃးတၼ်းၶူဝ်းဝိၺိၺ်ႇၸဝ်ႈ၊ပုၼ်ႈတႃႇၶဝ်ၸိူဝ်းဢၼ်ဢမ်ႇယုမ်ႇမၢတ်ႈလႄႈဢမ်ႇၸႂ်ႈပုၼ်ႈတႃႇၶဝ်ၸိူဝ်းဢၼ်ယုမ်ႇမၢတ်ႈဢေႃႈ။ သုၵျေးၸူးၸဝ်ႈဢၼ်ၸၢင်ႈႁေႃးလၢတ်ႈၵႂၢမ်းၸဝ်ႈၽြႃးၸမ်ႉ၊ပဵၼ်တၢင်းဢၼ်ၼႄပျႃးတၼ်းၶူဝ်းဝိၺိၺ်ႇၸဝ်ႈပုၼ်ႈတႃႇၶဝ်ၸိူဝ်းဢၼ်ယုမ်ႇမၢတ်ႈလႄႈဢမ်ႇၸႂ်ႈပုၼ်ႈတႃႇၶဝ်ၸိူဝ်းဢၼ်ဢမ်ႇယုမ်ႇမၢတ်ႈၼၼ်ႉဢေႃႈ။
ပေႃးဝႃႈၸိူဝ်းၸဝ်ႈတင်းၸုမ်းၸုတုမ်ၵၼ်လႄႈဢွၼ်ၵၼ်လၢတ်ႈၵႂၢမ်းၽႃႇသႃႇဢၼ်ပႅၵ်ႇပိူင်ႈတၢင်ႇမဵဝ်းၵူၺ်းယူႇလႄႈပေႃးမီးၵူၼ်းဢၼ်ဢမ်ႇပႆႇႁုၼမ်၊ဢိၵ်ႇတင်းၵူၼ်းဢၼ်ဢမ်ႇယုမ်ႇမၢတ်ႈသေၵေႃႉၵေႃႉမႃးၶဝ်ႈပႃးထွမ်ႇငိၼ်းၸိုင်၊ၸွင်ႇမၼ်းဢမ်ႇထၢင်ႇဝႃႈ၊သူပဵၼ်ၵူၼ်းယွင်ႇႁိုဝ်း။-
ၵူၺ်းၵႃႈ၊ပေႃးသူဢွၼ်ၵၼ်ႁေႃးလၢတ်ႈၵႂၢမ်းၸဝ်ႈၽြႃးလႄႈပေႃးမီးၵူၼ်းဢၼ်ဢမ်ႇပႆႇႁုၼမ်၊ဢိၵ်ႇတင်းၵူၼ်းဢၼ်ဢမ်ႇယုမ်ႇမၢတ်ႈသေၵေႃႉၵေႃႉ၊မႃးၶဝ်ႈပႃးထွမ်ႇငိၼ်းၸိုင်၊မၼ်းတၵ်းႁုလွင်ႈဢပျတ်ႈမၼ်းၵူၺ်းဢမ်ႇၵႃး၊ၵႃႈဢၼ်မၼ်းလႆႈငိၼ်းၵူႈၶေႃႈၵူႈၵမ်းၼၼ်ႉ ႁဵတ်းႁႂ်ႈမၼ်းတၢင်ႇဢပျတ်ႈႁူဝ်ၸႂ်မၼ်းလႄႈ၊-
မၼ်းတၵ်းၽုၺ်ႇဢွၵ်ႇတၢင်းၽိတ်းဢၼ်မၼ်းသိူင်ႇလပ်ႉဝႆႉ၊ၵႃႈၼႂ်းႁူဝ်ၸႂ်မၼ်းသေ၊မၼ်းတၵ်းၶုပ်ႉမူပ်ႇၵူဝ်းၵႂၢႆႇၽြႃးပဵၼ်ၸဝ်ႈလႄႈၶၢမ်ႇသၢၵ်ႈသေႇလႄႈဝႃႈ၊ “ၽြႃးပဵၼ်ၸဝ်ႈမီးယူႇလူၺ်ႈၵၼ်တင်းသူၸႂ်ႈတႄႉဢေႃႈ၊” ဝႃႈၼင်ႇၼႆဢေႃႈ။
ပီႈၼွင်ႉၶဝ်႟။ ဢၼ်ၵဝ်ၶႂ်ႈဝႃႈၸမ်ႉ၊ၼႂ်းမိူဝ်ႈဢၼ်သူၸုတုမ်ၵၼ်သေလႄႈၵူဝ်းၵႂၢႆႇၸဝ်ႈၽြႃးၼၼ်ႉ၊ၵေႃႉၼိုင်ႈႁဵတ်းၵႂၢမ်းတွၼ်ႈၼိုင်ႈ၊ၵေႃႉၼိုင်ႈသင်ႇသွၼ်သုင်းမႃႉတွၼ်ႈၼိုင်ႈ၊ၵေႃႉၼိုင်ႈႁေႃးလၢတ်ႈၵႂၢမ်းဢၼ်ၸဝ်ႈၽြႃးႁႂ်ႈၽုၺ်ႇဢွၵ်ႇမွၵ်ႇလၢတ်ႈၼၼ်ႉတွၼ်ႈၼိုင်ႈ၊ၵေႃႉၼိုင်ႈလၢတ်ႈၵႂၢမ်းၽႃႇသႃႇဢၼ်ပႅၵ်ႇပိူင်ႈတၢင်ႇမဵဝ်းၼၼ်ႉတွၼ်ႈၼိုင်ႈလႄႈတၢင်ႇၵေႃႉသမ်ႉၽုၺ်ႇၼႄဢထိၵ်ႈပႄႇၵႂၢမ်းပႅၵ်ႇပိူင်ႈၼၼ်ႉ၊ႁႂ်ႈၵူၼ်းႁုထွမ်ႇတွၼ်ႈၼိုင်ႈတႃႉ။ ၽူႈလႂ်ႁဵတ်းသင်ၵေႃႈႁႂ်ႈပဵၼ်တၢင်းဢၼ်ၸွႆႈၵမ်ႉၸွႆႈထွၵ်ႈၸႂ်ဝိၺိၺ်ႇၸိူဝ်းၸဝ်ႈတင်းသဵင်ႈတင်းလူင်တႃႉ။-
ပေႃးမီးၶဝ်ၸိူဝ်းဢၼ်ၶႂ်ႈႁေႃးၶႂ်ႈလၢတ်ႈၵႂၢမ်းၽႃႇသႃႇဢၼ်ပႅၵ်ႇပိူင်ႈၸိုင်၊ၼမ်သေပိူၼ်ႈႁႂ်ႈမီးသွင်ၵေႃႉသၢမ်ၵေႃႉၵူၺ်းတႃႉ။ ႁႂ်ႈၵေႃႉၼိုင်ႈလၢတ်ႈယဝ်ႉၸင်ႇ၊ႁႂ်ႈတၢင်ႇၵေႃႉသိုပ်ႇလၢတ်ႈသေယဝ်ႉ၊သမ်ႉႁႂ်ႈမီးၵေႃႉၼိုင်ႈၽုၺ်ႇၼႄဢထိၵ်ႈပႄႇၵႂၢမ်းၼၼ်ႉတႃႉ။-
ပေႃးၵႃႈတီႈၼၼ်ႈယင်းဢမ်ႇမီးၵေႃႉဢၼ်ၽုၺ်ႇၼႄဢထိၵ်ႈပႄႇၵႂၢမ်းၽႃႇသႃႇဢၼ်ပႅၵ်ႇပိူင်ႈလႆႈၼၼ်ႉၸိုင်၊ယႃႇပေႁႂ်ႈၽူႈလႂ်လၢတ်ႈၵႂၢမ်းၽႃႇသႃႇဢၼ်ပႅၵ်ႇပိူင်ႈၼၼ်ႉသေၵမ်း။ ႁႂ်ႈၶဝ်ယူႇတဵတ်ႇတဵတ်ႇၼႂ်းၸိူဝ်းၸဝ်ႈသေ၊လၢတ်ႈၼႂ်းၸႂ်ၶဝ်၊ဢိၵ်ႇတင်းတီႈၽြႃးပဵၼ်ၸဝ်ႈၵူၺ်းတႃႉ။-
ပေႃးမီးၵူၼ်းသွင်သၢမ်ၵေႃႉႁေႃးလၢတ်ႈၵႂၢမ်းၸဝ်ႈၽြႃးၸိုင်၊ႁႂ်ႈၵူၼ်းတၢင်ႇၵေႃႉၸႅတ်ႈတူၺ်းၶေႃႈၵႂၢမ်းၶဝ်ၼၼ်ႉတႃႉ။-
မိူဝ်ႈၵူၼ်းသေၵေႃႉၵေႃႉဢၼ်ၼင်ႈယူႇၵႃႈၼႂ်းပၢင်ၵုမ်ၼၼ်ႉလႄႈလႆႈႁပ်ႉဢဝ်ၶၢဝ်ႇတြႃးၸဝ်ႈၽြႃးၸိုင်၊ႁႂ်ႈၵေႃႉဢၼ်ႁေႃးလၢတ်ႈယူႇၼၼ်ႉၵိုတ်းသေတႃႉ။-
သူၵူႈၵေႃႉမီးဢၶႂၢင်ႉဢၼ်ႁေႃးလၢတ်ႈၵႂၢမ်းၸဝ်ႈၽြႃးယူႇဢေႃႈ။ ၵူၺ်းၵႃႈ၊ၵေႃႉၼိုင်ႈႁေႃးလၢတ်ႈယဝ်ႉၸင်ႇ၊ႁႂ်ႈတၢင်ႇၵေႃႉသိုပ်ႇႁေႃးလၢတ်ႈၵႂႃႇ၊ၼင်ႇႁိုဝ်သူၵူႈၵေႃႉတၵ်းလႆႈသွၼ်ဢဝ်လႄႈႁႂ်ႈၵူႈၵေႃႉလႆႈဢဵၼ်ႁႅင်းတႃႉ။-
ၵေႃႉဢၼ်မီးသုၵျေးၸူးၸဝ်ႈဢၼ်ႁေႃးလၢတ်ႈၵႂၢမ်းၸဝ်ႈၽြႃးၼၼ်ႉတၵ်းလူဝ်ႇမေႃၶျုၵ်ႈထိင်းၸႂ်ဝိၺိၺ်ႇတူဝ်ၸဝ်ႈၵဝ်ႇဢေႃႈ။-
လွင်ႈမၼ်းၸမ်ႉ၊ၽြႃးပဵၼ်ၸဝ်ႈဢမ်ႇၶႂ်ႈႁႂ်ႈႁဝ်းလႆႈယုင်ႈယၢင်ႈသုၵ်ႉသၢၵ်ႉလႄႈမၼ်းၸဝ်ႈၶႂ်ႈႁႂ်ႈႁဝ်းၼိမ်ၸႂ်ၶျၢမ်းသႃႇဢေႃႈ။ ၼႂ်းမူႇၸုမ်းၸိူဝ်းၸဝ်ႈၵူၼ်းၸဝ်ႈၽြႃးတင်းလၢႆၵူႈတီႈၵူႈလႅၼ်ၼၼ်ႉ၊-
မႄႈယိင်းတင်းလၢႆတၵ်းလႆႈယူႇတဵတ်ႇတဵတ်ႇမိူဝ်ႈဢၼ်သူၸုတုမ်ၵူဝ်းၵႂၢႆႇၸဝ်ႈၽြႃးၼၼ်ႉဢေႃႈ။ ၸိူဝ်ႉၼင်ႇဢၼ်ပိင်းၺၢပ်ႈတြႃးၵူၼ်းမဵဝ်း ၵျူး၊ ၶဝ်မီးဝႆႉၼၼ်ႉၶဝ်ဢမ်ႇမီးဢၶႂၢင်ႉလၢတ်ႈၵႂၢမ်းလႄႈၶဝ်တၵ်းလႆႈယူႇတႂ်ႈဢႃႇၼႃႇၽူဝ်ၶဝ်ဢေႃႈ။-
ပေႃးၶဝ်ၶႂ်ႈႁုလွင်ႈတၢင်းသေၸိူဝ်ႉသေပိူင်ၸိုင်၊ႁႂ်ႈၶဝ်ထၢမ်ၽူဝ်ၶဝ်ၵႃႈတီႈႁိူၼ်းၶဝ်ပုၼ်ႉတႃႉ။ တၢင်းဢၼ်မႄႈယိင်းလၢတ်ႈၵႂၢမ်းၼႂ်းမိူဝ်ႈဢၼ်ၸိူဝ်းၸဝ်ႈၸုတုမ်ၵၼ်ၵူဝ်းၵႂၢႆႇၸဝ်ႈၽြႃးၼၼ်ႉပဵၼ်လွင်ႈတၢင်းဢၼ်လီဢူၵ်းလီဢၢႆဢေႃႈ။
ၼုၵ်ႈၵပၢတ်ႈတြႃး၊ၽြႃးပဵၼ်ၸဝ်ႈလုၵ်ႉသေၵႃႈတီႈသူႁေႃးဢွၵ်ႇမႃးတႄႉႁိုဝ်း။ ဢမ်ႇၼၼ်လႄႈတြႃးၸဝ်ႈၽြႃးႁွတ်ႈထိုင်ၵႃႈတီႈသူၵူၺ်းႁိုဝ်း။-
ပေႃးသေၵေႃႉသေၵူၼ်းထၢင်ႇဝႃႈ၊မၼ်းပဵၼ်ပရေႃးၽႅတ်ႈ လႄႈသင်၊ထၢင်ႇဝႃႈမၼ်းလႆႈသုၵျေးၸူးဝိၺိၺ်ႇၸဝ်ႈလႄႈသင်၊မၼ်းတၵ်းလႆႈႁုမၢတ်ႈၵႂၢမ်းၵဝ်ဢၼ်တႅမ်ႈၵႂႃႇၸိူဝ်းၼႆႉပဵၼ်ပိင်းၺၢပ်ႈၸဝ်ႈၽြႃးဢေႃႈ။-
ပေႃးမၼ်းဢမ်ႇဝႆႉဢယေးၵႂၢမ်းၵဝ်ၸိုင်၊ယႃႇပေဝႆႉဢယေးမၼ်းတႃႉ။
ပိူဝ်ႈၼႆလႄႈပီႈၼွင်ႉၶဝ်႟။ ၶတ်းၸႂ်ၶႂ်ႈႁေႃးလၢတ်ႈၵႂၢမ်းၸဝ်ႈၽြႃးတႃႉ။ ၼႂ်းဝႃႈၼၼ်သေၵေႃႈ၊ယႃႇပေႁႄႉၶႅၼ်ၶဝ်ၸိူဝ်းဢၼ်လၢတ်ႈၵႂၢမ်းၽႃႇသႃႇဢၼ်ပႅၵ်ႇပိူင်ႈၼၼ်ႉတႃႉ။-
သူႁဵတ်းသင်သေဢမ်ႇဝႃႈ၊ႁဵတ်းႁႂ်ႈထုၵ်ႇႁႂ်ႈဢၢပ်ႈၸွမ်းလွင်ႈၸွမ်းတၢင်းမၼ်းတႃႉ။
မိူဝ်ႈလဵဝ်ၼႆႉ၊ပီႈၼွင်ႉၶဝ်႟။ ၵဝ်ၶႂ်ႈပၼ်သတိသူလူၺ်ႈလွင်ႈၶၢဝ်ႇတြႃးသိူဝ်းပျေႃႇဢၼ်ၵဝ်ၶႃႈႁေႃးလၢတ်ႈပၼ်သူဢၼ်သူႁပ်ႉတုင်းဢဝ်၊ဢိၵ်ႇတင်းသူယုမ်ႇမၢတ်ႈဢိင်ပိုင်ႈယူႇမၼ်ႈမၼ်ႈၶိူင်ႇၶိူင်ႇၼၼ်ႉဢေႃႈ။-
ၶၢဝ်ႇတြႃးသိူဝ်းပျေႃႇဢၼ်ၵဝ်ႁေႃးလၢတ်ႈၼႆႉပေႃးသူၵမ်ၵျၢင်ႉႁဵတ်းၸွမ်းယူႇမၼ်ႈမၼ်ႈလႄႈယင်းဢမ်ႇယုမ်ႇလၢႆလၢႆလွၵ်ႇလွၵ်ႇၸိုင်၊ၸဝ်ႈၽြႃးတၵ်းၵႄႇၶျွတ်ႈဢဝ်သူဢေႃႈ။
ၵဝ်ဢဝ်လွင်ႈတၢင်းဢၼ်ၵဝ်လႆႈႁပ်ႉတုင်းဢဝ်ဝႆႉ၊ဢၼ်ဢယေးယႂ်ႇသေပိူၼ်ႈၼၼ်ႉဢၢပ်ႈပၼ်တီႈသူဢေႃႈ။ လွင်ႈတၢင်းၼၼ်ႉၸမ်ႉ၊ပဵၼ်လွင်ႈတၢင်းဢၼ် ၸဝ်ႈၶရိၸ်ႈ၊ လႆႈၶၢမ်ႇတၢႆပုၼ်ႈဢပျတ်ႈႁဝ်းတင်းလၢႆမႅၼ်ႈၸွမ်းၵႃႈၼင်ႇဢၼ်တႅမ်ႈဝႆႉၼႂ်းၵျၢမ်းလိၵ်ႈၼၼ်ႉဢေႃႈ။-
ပိူၼ်ႈသၢင်းၵျူဝ်ႇမၼ်းၸဝ်ႈသေယဝ်ႉ၊ၽြႃးပဵၼ်ၸဝ်ႈသမ်ႉဢဝ်မၼ်းၸဝ်ႈလုၵ်ႉၶိုၼ်းလိပ်းမႃးမိူဝ်ႈဢၼ်ထူၼ်ႈထိုင်သၢမ်ဝၼ်းၼၼ်ႉလႄႈမႅၼ်ႈၸွမ်းၵႃႈၼင်ႇဢၼ်တႅမ်ႈဝႆႉ၊ၵႃႈၼႂ်းၵျၢမ်းလိၵ်ႈၼၼ်ႉဢေႃႈ။-
မၼ်းၸဝ်ႈပေႃႇမႃးၼႄတူဝ်မၼ်းၸဝ်ႈၵႃႈတီႈသြႃႇ ပေႇတရု၊ သေယဝ်ႉ၊သမ်ႉပေႃႇမႃးထႅင်ႈၵႃႈတီႈတမၢၼ်ႇၸဝ်ႈသိပ်းသွင်ၵေႃႉၼၼ်ႉဢေႃႈ။-
ဝၢႆးၼၼ်ႉမၼ်းၸဝ်ႈပေႃႇမႃးၵႃႈတီႈၽၢႆႇၼႃႈပႄးၸဝ်ႈႁႃႈပၢၵ်ႇပၢႆၵေႃႉၼႂ်းၶိင်ႇလဵဝ်ဢေႃႈ။ ၼႂ်းၶဝ်ၸိူဝ်းဢၼ်လႆႈႁၼ်မၼ်းၸဝ်ႈၼၼ်ႉပိၵ်ႉသမ်ႉၶဝ်ၵမ်ႈၽွင်ႈတၢႆၵႂႃႇယဝ်ႉသေၵေႃႈၵမ်ႈၼမ်ဢသၢၵ်ႈယင်းလိပ်းယူႇတေႃႇထိုင်ႁွတ်ႈမိူဝ်ႈလဵဝ်ၼႆႉဢေႃႈ။-
လိုၼ်းၼၼ်ႉမၼ်းၸဝ်ႈပေႃႇမႃးၵႃႈတီႈ ယႃႇၵုပ်ႈ၊ သေယဝ်ႉ၊သမ်ႉပေႃႇမႃးၵႃႈတီႈတမၢၼ်ႇၸဝ်ႈတင်းလၢႆထႅင်ႈဢေႃႈ။
လိုၼ်းသုတ်းသေပိူၼ်ႈၼၼ်ႉ၊မၼ်းၸဝ်ႈပေႃႇမႃးၵႃႈတီႈၵဝ်၊ဢၼ်ပဵၼ်ၸိူဝ်ႉၼင်ႇၵေႃႉဢၼ်ၵိူတ်ႇမႃးဢၼ်ဢမ်ႇထုၵ်ႇၶိင်ႇထုၵ်ႇမိူဝ်ႈၼၼ်ႉဢေႃႈ။-
လွင်ႈမၼ်းၸမ်ႉ၊ၵဝ်ၼႆႉဢမ်ႇထိူၵ်ႈၶၢမ်ႇႁွင်ႉဝႃႈ၊တမၢၼ်ႇၸဝ်ႈၽြႃးလႄႈပဵၼ်ၵေႃႉဢၼ်ယင်းတႅမ်ႇယေႃႈသေပိူၼ်ႈ၊ၵႃႈၼႂ်းတမၢၼ်ႇၸဝ်ႈတင်းလၢႆ၊ၵွပ်ႈပိူဝ်ႈၵဝ်ယၢမ်ႈၼိၵ်ႈၸၢၵ်ႈငႅၼ်းသႄးၸိူဝ်းၸဝ်ႈ၊ၸဝ်ႈၽြႃးမႃးၼၼ်ႉဢေႃႈ။-
ၵူၺ်းၵႃႈ၊ၵွပ်ႈပိူဝ်ႈၵျေးၸူးၽြႃးပဵၼ်ၸဝ်ႈလႄႈ ၵဝ်လႆႈပဵၼ်ၸိူဝ်ႉၼင်ႇဢၼ်ၵဝ်ပဵၼ်ယူႇမိူဝ်ႈလဵဝ်ၼႆႉလႄႈၵျေးၸူးၽြႃးပဵၼ်ၸဝ်ႈၼၼ်ႉ ၵဝ်လႆႈၶၢမ်ႇဢဝ်လၢႆလၢႆဢမ်ႇၸႂ်ႈဢေႃႈ။ ၵဝ်လႆႈၶတ်းၸႂ်ႁဵတ်းၵၢၼ်လိူဝ်တွၼ်းၼႃႇသေတမၢၼ်ႇၸဝ်ႈတၢင်ႇၵေႃႉၸိူဝ်းၼၼ်ႉဢေႃႈ။ ပိၵ်ႉသမ်ႉဝႃႈၸိူဝ်ႉၼင်ႇၼႆသေၵေႃႈ၊မၼ်းဢမ်ႇၸႂ်ႈၵဝ်ၵေႃႉလဵဝ်ၵူၺ်းႁဵတ်း၊ပဵၼ်ၵျေးၸူးၽြႃးပဵၼ်ၸဝ်ႈဢၼ်တႄႇယူႇၼႂ်းၵဝ်ၼၼ်ႉပၼ်ဢဵၼ်ပၼ်ႁႅင်းၵဝ်လႄႈႁဵတ်းဢေႃႈ။-
ပိူဝ်ႈၼႆလႄႈပိၵ်ႉသမ်ႉပဵၼ်ၵဝ်ႁေႃးလၢတ်ႈသေဢမ်ႇဝႃႈ၊ပဵၼ်တမၢၼ်ႇၸဝ်ႈတၢင်ႇၵေႃႉႁေႃးလၢတ်ႈသေဢမ်ႇဝႃႈ၊ႁဝ်းႁေႃးလၢတ်ႈၵႂၢမ်းမိူၼ်ၵၼ်လႄႈသူတင်းသဵင်ႈတင်းလူင်ၵေႃႈယုမ်ႇမၢတ်ႈၸိူဝ်ႉၼင်ႇၼၼ်ဢေႃႈ။
ပေႃးႁဝ်းႁေႃးလၢတ်ႈတြႃးၸဝ်ႈလွင်ႈ ၸဝ်ႈၶရိၸ်ႈ၊ လုၵ်ႉၵႃႈတၢင်းတၢႆၶိုၼ်းလိပ်းမႃးၼၼ်ႉၸိုင်၊ႁဵတ်းသင်လႄႈၼႂ်းသူၵမ်ႈၽွင်ႈသမ်ႉဝႃႈ၊ၵူၼ်းတၢႆဢမ်ႇၸၢင်ႈလုၵ်ႉၶိုၼ်းလိပ်းမႃးလႆႈ၊ဝႃႈၼင်ႇၼႆၸိူဝ်ႉၼင်ႇႁိုဝ်။-
ပေႃးတေပဵၼ်ၸိူဝ်ႉၼင်ႇဢၼ်ၶဝ်ဝႃႈၼၼ်ႉၸိုင်၊ ၸဝ်ႈၶရိၸ်ႈ၊ ဢမ်ႇၸၢင်ႈလုၵ်ႉၶိုၼ်းလိပ်းမႃးလႆႈယဝ်ႉဢေႃႈ။-
ပေႃး ၸဝ်ႈၶရိၸ်ႈ၊ ယင်းဢမ်ႇလႆႈလုၵ်ႉၶိုၼ်းလိပ်းမႃးၸိုင်၊တၢင်းဢၼ်ႁဝ်းႁေႃးလၢတ်ႈၼႆႉဢမ်ႇမီးဢၵျူဝ်း။ တၢင်းဢၼ်သူယုမ်ႇမၢတ်ႈၵေႃႈဢမ်ႇမီးဢၵျူဝ်း။-
လိူဝ်သေၼၼ်ႉဢမ်ႇၵႃး၊ပေႃးၵူၼ်းတၢႆဢမ်ႇၸၢင်ႈလုၵ်ႉၶိုၼ်းလိပ်းမႃးလႆႈၸႂ်ႈတႄႉလႄႈၽြႃးပဵၼ်ၸဝ်ႈၵေႃႈဢမ်ႇလႆႈဢဝ် ၸဝ်ႈၶရိၸ်ႈ၊ လုၵ်ႉၶိုၼ်းလိပ်းမႃးၸိုင်၊တၢင်းဢၼ်ႁဝ်းႁေႃးလၢတ်ႈၼႆႉ၊ပဵၼ်တၢင်းဢၼ်ႁဝ်းပႅတ်ႉလႅၼ်ပိူၼ်ႈလွင်ႈၽြႃးပဵၼ်ၸဝ်ႈ၊ၵွပ်ႈပိူဝ်ႈႁဝ်းႁေႃးလၢတ်ႈဝႃႈ၊ၽြႃးပဵၼ်ၸဝ်ႈလႆႈဢဝ် ၸဝ်ႈၶရိၸ်ႈ၊ လုၵ်ႉၶိုၼ်းလိပ်းမႃးၼၼ်ႉဢေႃႈ။-
ပေႃးၵူၼ်းတၢႆဢမ်ႇၸၢင်ႈလုၵ်ႉၶိုၼ်းလိပ်းမႃးၸိုင်၊ ၸဝ်ႈၶရိၸ်ႈ၊ ၵေႃႈဢမ်ႇလႆႈလုၵ်ႉၶိုၼ်းလိပ်းမႃးယဝ်ႉဢေႃႈ။-
ပေႃး ၸဝ်ႈၶရိၸ်ႈ၊ ယင်းဢမ်ႇလုၵ်ႉၶိုၼ်းလိပ်းမႃးၸိုင်၊တၢင်းယုမ်ႇမၢတ်ႈသူၼၼ်ႉၵေႃႈဢမ်ႇပွင်ႇလွင်ႈၵႃႈသင်ယဝ်ႉလႄႈသူၵေႃႈယင်းမီးဢပျတ်ႈတုၸရိူၵ်ႈယူႇၵူၺ်းဢမ်ႇၵႃး၊-
ၶဝ်ၸိူဝ်းဢၼ်ယုမ်ႇမၢတ်ႈ ၸဝ်ႈၶရိၸ်ႈ၊ သေ၊ၼွၼ်းလပ်းၼႂ်းတၢင်းတၢႆၵႂႃႇၸိူဝ်းၼၼ်ႉၵေႃႈလႆႈလုသုမ်းၵႂႃႇယဝ်ႉဢေႃႈ။-
ပေႃးႁဝ်းဢိင် ၸဝ်ႈၶရိၸ်ႈ၊ လႄႈၸၢင်ႈမုင်ႈမွင်းပုၼ်ႈတႃႇၸူဝ်ႈၼႆႉၸၢတ်ႈၼႆႉၵူၺ်းၸိုင်၊ႁဝ်းၸိူဝ်းၼႆႉပဵၼ်ၵူၼ်းဢၼ်လီဢဵတ်းလူၼႃႇသေၵူၼ်းလေႃးၵီႇၵႃႈမီးတင်းသဵင်ႈတင်းလူင်ယဝ်ႉဢေႃႈ။
ၵူၺ်းၵႃႈ၊လွင်ႈတႄႉမၼ်းၸမ်ႉ၊ ၸဝ်ႈၶရိၸ်ႈ၊ လႆႈၶၢမ်ႇတၢင်းဢၼ်ၽြႃးပဵၼ်ၸဝ်ႈဢဝ်လုၵ်ႉၶိုၼ်းလိပ်းမႃးလႄႈပဵၼ်ဢႃႇမႃႉၶၢမ်ႇပုၼ်ႈၶဝ်ၸိူဝ်းဢၼ်ၼွၼ်းလပ်းယူႇၵႃႈၼႂ်းတၢင်းတၢႆၼၼ်ႉတၵ်းလႆႈၶိုၼ်းလိပ်းမႃးၼၼ်ႉဢေႃႈ။-
လွင်ႈမၼ်းၸမ်ႉ၊ၸိူဝ်ႉၼင်ႇဢၼ်တၢင်းတၢႆလႆႈၶဝ်ႈမႃးၵႃႈၼႂ်းလေႃးၵႃႉၼႆႉ ၵွပ်ႈလူၺ်ႈၵူၼ်းၵေႃႉၼိုင်ႈၼၼ်ႉ၊တၢင်းဢၼ်လုၵ်ႉၶိုၼ်းလိပ်းမႃးသေၵႃႈတီႈတၢင်းတၢႆၼၼ်ႉၵေႃႈပဵၼ်မႃးၵွပ်ႈလူၺ်ႈၵူၼ်းၵေႃႉၼိုင်ႈဢေႃႈ။-
ၸိူဝ်ႉၼင်ႇဢၼ်ၵူၼ်းတင်းသဵင်ႈတင်းလူင်ႁွတ်ႈထိုင်တၢင်းတၢႆ၊ၵွပ်ႈပိူဝ်ႈ ဢႃႇတမ်ႇ၊ ၼၼ်ႉ၊ၵူၼ်းတင်းသဵင်ႈတင်းလူင်တၵ်းလႆႈလုၵ်ႉသေၵႃႈတီႈတၢင်းတၢႆၶိုၼ်းမီးဢသၢၵ်ႈမႃးၼၼ်ႉ၊ပဵၼ်ၵွပ်ႈပိူဝ်ႈ ၸဝ်ႈၶရိၸ်ႈ၊ ဢေႃႈ။-
ၼႂ်းဝႃႈၼၼ်သေၵေႃႈၵမ်းၽႂ်ၵမ်းမၼ်းတၵ်းတၢမ်းၵၼ်ပဵၼ်မႃးဢေႃႈ။ ၸဝ်ႈၶရိၸ်ႈ၊ ၶိုၼ်းမီးဢသၢၵ်ႈမႃးဢွၼ်တၢင်းပိူၼ်ႈသေယဝ်ႉ၊ၼႂ်းမိူဝ်ႈဢၼ်မၼ်းၸဝ်ႈၵျွမႃးၼၼ်ႉၶဝ်ၸိူဝ်းဢၼ်ပဵၼ်ၵူၼ်းမၼ်းၸဝ်ႈတင်းလၢႆတၵ်းၶိုၼ်းမီးဢသၢၵ်ႈမႃးဢေႃႈ။-
လိုၼ်းၼၼ်ႉၵမ်ၽႃႇတၵ်းသုတ်းသဵင်ႈလႄႈ ၸဝ်ႈၶရိၸ်ႈ၊ တၵ်းပႄႉၼႅင်ႇလႄႈယႃႉပဵတ်ႈၶုၼ်ၽီႁၢႆႉတင်းသဵင်ႈတင်းလူင်၊ၶုၼ်ဢႃႇၼႃႇတင်းသဵင်ႈတင်းလူင်၊ဢိၵ်ႇတင်းၶုၼ်တၼ်းၶူဝ်းတင်းသဵင်ႈတင်းလူင်သေယဝ်ႉ၊ဢဝ်မိူင်းၸဝ်ႈဢၢပ်ႈပၼ်ၵႃႈၼႂ်းမိုဝ်းၽြႃးပဵၼ်ၸဝ်ႈ၊ပေႃႈၸဝ်ႈၼၼ်ႉဢေႃႈ။-
လွင်ႈမၼ်းၸမ်ႉ၊ ၸဝ်ႈၶရိၸ်ႈ၊ တၵ်းဢုပ်ႉပိူင်ႇတေႃႇထိုင်ႁွတ်ႈၶိင်ႇဢၼ်ၽြႃးပဵၼ်ၸဝ်ႈယႃႉၽဵဝ်ႈပႅတ်ႈရၢၼ်ႇသူႇတင်းလၢႆလႄႈဢဝ်ဝႆႉၵႃႈတီႈတႂ်ႈတိၼ်မၼ်းၸဝ်ႈၼၼ်ႉဢေႃႈ။-
ရၢၼ်ႇသူႇလိုၼ်းသုတ်းၸမ်ႉ၊ပဵၼ်ၶုၼ်မရၼႃႉဢေႃႈ။-
လွင်ႈမၼ်းၸမ်ႉ၊မၼ်းမႅၼ်ႈၸွမ်းၵႃႈၼႂ်းၵျၢမ်းလိၵ်ႈတႅမ်ႈဝႆႉဝႃႈ၊ “ၽြႃးပဵၼ်ၸဝ်ႈဢဝ်ၵႃႈမီးတင်းသဵင်ႈတင်းလူင်၊ဝႆႉၵႃႈတႂ်ႈတိၼ်မၼ်းၸဝ်ႈဢေႃႈ၊” ဝႃႈၼင်ႇၼႆၼၼ်ႉသေၵေႃႈႁဝ်းႁုပွင်ႇလႅင်းၵႂၢမ်းဢၼ်ဝႃႈ၊ “ၵႃႈမီးတင်းသဵင်ႈတင်းလူင်” ၼၼ်ႉဢမ်ႇပႃးတူဝ်ၽြႃးပဵၼ်ၸဝ်ႈ၊ၸဝ်ႈဢၼ်ဢဝ်ၵႃႈမီးတင်းသဵင်ႈတင်းလူင်၊ဝႆႉၵႃႈတႂ်ႈတိၼ် ၸဝ်ႈၶရိၸ်ႈ၊ ၼၼ်ႉဢေႃႈ။-
မိူဝ်ႈဢၼ်ၵႃႈမီးတင်းသဵင်ႈတင်းလူင်တူၵ်းႁွတ်ႈၵႃႈတႂ်ႈတိၼ် ၸဝ်ႈၶရိၸ်ႈ၊ ယဝ်ႉၼၼ်ႉၸိုင်၊ ၸဝ်ႈၶရိၸ်ႈ၊ ၵေႃႉဢၼ်ပဵၼ်လုၵ်ႈၸဝ်ႈၼၼ်ႉတၵ်းဢဝ်တူဝ်ၸဝ်ႈၵဝ်ႇယူႇတႂ်ႈဢႃႇၼႃႇၽြႃးပဵၼ်ၸဝ်ႈ၊ၸဝ်ႈဢၼ်ဢဝ်ၵႃႈမီးတင်းသဵင်ႈတင်းလူင်၊ဝႆႉၵႃႈတႂ်ႈတၢင်းဢၼ်မၼ်းၸဝ်ႈဢုပ်ႉပိူင်ႇၼၼ်ႉဢေႃႈ။ မိူဝ်ႈၼၼ်ႉ၊ၽြႃးပဵၼ်ၸဝ်ႈတၵ်းဢုပ်ႉပိူင်ႇၵႃႈမီးတင်းသဵင်ႈတင်းလူင်ပျေႉပျေႉၸုမ်ႇၸုမ်ႇဢေႃႈ။
ထႅင်ႈမဵဝ်းၼိုင်ႈၸမ်ႉ၊မီးၶဝ်ၸိူဝ်းဢၼ်ၶၢမ်ႇဢဝ်မၢင်ႇၵလႃႇပပ်ႉတိၸမ်ႇ ပုၼ်ႈၵူၼ်းဢၼ်တၢႆယဝ်ႉၼၼ်ႉလူးၵွၼ်ႇဢေႃႈ။ လွင်ႈဢၼ်ၶဝ်ႁဵတ်းၼၼ်ႉမီးဢၵျူဝ်းၵႃႈသင်။ ပေႃးၵူၼ်းတၢႆယဝ်ႉ၊ယင်းဢမ်ႇလုၵ်ႉၶိုၼ်းမီးဢသၢၵ်ႈမႃးလႆႈ၊မႅၼ်ႈၸွမ်းၼင်ႇၶဝ်ၵမ်ႈၽွင်ႈဝႃႈၼၼ်ႉၸိုင်၊ၶဝ်လူဝ်ႇလႆႈၶၢမ်ႇဢဝ်မၢင်ႇၵလႃႇပပ်ႉတိၸမ်ႇပုၼ်ႈၶဝ်ၸိူဝ်းဢၼ်တၢႆၵႂႃႇယဝ်ႉၼၼ်ႉႁဵတ်းသင်။-
ႁဝ်းၸိူဝ်းၼႆႉၸမ်ႉ၊ၶၢမ်ႇၽေးဢၢၼ်ႇတရေႇယူႇၵူႈၶိင်ႇၵူႈယၢမ်းႁဵတ်းသင်။-
ပီႈၼွင်ႉၶဝ်႟။ ၵဝ်ထူပ်းၽေးတၢင်းတၢႆယူႇၵူႈဝၼ်းဢေႃႈ။ ၵဝ်ႁတ်းလၢတ်ႈၸိူဝ်ႉၼင်ႇၼႆၵွပ်ႈပိူဝ်ႈၵဝ်သိူဝ်းပျေႃႇၼႂ်းလွင်ႈဢၼ်သူတႄႇယူႇၼႂ်းၸဝ်ႈႁဝ်း ၸဝ်ႈယေႇသုၶရိၸ်ႈ၊ ဢေႃႈ။-
ပိၵ်ႉသမ်ႉၵဝ်တိုၵ်းတေႃးတူဝ်ထိူၼ်ႇႁၢႆႉလူင်ၵႃႈတီႈၼႂ်းဝဵင်း ဢေးၽႅတ်ႈ၊ ၼႆႉသေၵေႃႈ၊ၸွမ်းၼင်ႇဢလူဝ်ႇၵူၼ်းလေႃးၵီႇဝႃႈၸိုင်၊ၵဝ်တၵ်းမီးဢၵျူဝ်းၵႃႈသင်။ ပေႃးၵူၼ်းတၢႆဢမ်ႇလုၵ်ႉၶိုၼ်းလႄႈမီးဢသၢၵ်ႈမႃးလႆႈတႄႉၸိုင်၊ႁႂ်ႈႁဝ်းဢွၼ်ၵၼ်ႁဵတ်းၸွမ်းထုင်းၵႂၢမ်းဢၼ်ဝႃႈ၊ “ဢွၼ်ၵၼ်ၵိၼ်၊ဢွၼ်ၵၼ်သူတ်ႉမူၼ်ႈမူၼ်ႈပျေႃႇပျေႃႇမိူဝ်ႈလဵဝ်ၼႆႉတႃႉႁဝ်း။ ပိူဝ်ႈဝႃႈ၊ႁဝ်းတေတၢႆမိူဝ်ႈၽုၵ်ႈႁိုဝ်ဢမ်ႇႁု၊” ဝႃႈၼင်ႇၼႆၼၼ်ႉတႃႉႁဝ်း။
ယႃႇပေထွမ်ႇၽိတ်းသေၵမ်း။ ၵႂၢမ်းဢၼ်ဝႃႈ၊ “ၵေႃႉသႄႈဢၼ်ႁၢႆႉမိူၵ်ႈၼၼ်ႉၸၢင်ႈယႃႉပႅတ်ႈဢၵျၢင်ႉဢၼ်လီဢေႃႈ၊” ဝႃႈၼင်ႇၼႆၼၼ်ႉၸႂ်ႈတႄႉဢေႃႈ။-
ၶိုၼ်းမႃးၸွမ်းသဵၼ်ႈတၢင်းဢၼ်သိုဝ်ႈတေႃႇလႄႈယႃႇပေႁဵတ်းဢပျတ်ႈတုၸရိူၵ်ႈ။ ၼႂ်းသူၼႆႉ၊ယင်းမီးၶဝ်ၸိူဝ်းဢၼ်ဢမ်ႇႁုၽြႃးပဵၼ်ၸဝ်ႈလႄႈၵဝ်ဝႃႈၸိူဝ်ႉၼင်ႇၼႆႁႂ်ႈသူလႆႈဢူၵ်းလႆႈဢၢႆဢေႃႈ။
ၵူၼ်းၵမ်ႈၽွင်ႈၸၢင်ႈထၢမ်လႄႈဝႃႈ၊ “ၶဝ်ၸိူဝ်းဢၼ်တၢႆယဝ်ႉၼၼ်ႉတေႁဵတ်းၸိူဝ်ႉၼင်ႇႁိုဝ်လုၵ်ႉၶိုၼ်းလိပ်းမႃးလႆႈ။ ပေႃးၶဝ်လုၵ်းၶိုၼ်းလိပ်းမႃးၸိုင်၊တူဝ်ၶၼ်ႇထႃႇၶဝ်တေပဵၼ်တူဝ်ၸိူဝ်ႉၼင်ႇႁိုဝ်ဝႆႉ၊” ဝႃႈၼင်ႇၼႆဢေႃႈ။-
သူၸိူဝ်းဢၼ်ၺၢၼ်ႇတိုၼ်ႈၶဝ်႟။ မိူဝ်ႈဢၼ်သူဝၢၼ်ႇမဵတ်ႉၽၼ်းၵႃႈၼႂ်းလိၼ်ၼၼ်ႉ ပေႃးမၼ်းဢမ်ႇတၢႆၸိုင်၊မၼ်းတေႁဵတ်းႁိုဝ်တႅၵ်ႇငွၵ်ႈဢွၵ်ႇမႃးလႆႈ။-
မဵတ်ႉၶဝ်ႈၵျုင်ႇသေဢမ်ႇဝႃႈ၊မဵတ်ႉၶဝ်ႈမဵဝ်းလႂ်သေဢမ်ႇဝႃႈ၊မဵတ်ႉၽၼ်းဢၼ်သူဝၢၼ်ႇပိုၼ်ၵႃႈၼႂ်းလိၼ်ၼၼ်ႉပဵၼ်မဵတ်ႉၽၼ်းမၼ်းၵူၺ်းဢေႃႈ။ သူဢမ်ႇဢဝ်တူၼ်ႈမၼ်းၽုၵ်ႇဢေႃႈ။-
ၽြႃးပဵၼ်ၸဝ်ႈႁဵတ်းႁႂ်ႈတူၼ်ႈဢၼ်မၼ်းၸဝ်ႈမီးဢလူဝ်ႇၼၼ်ႉ၊တႅၵ်ႇငွၵ်ႈဢွၵ်ႇမႃးၵႃႈတီႈမဵတ်ႉၽၼ်းမဵဝ်းၽႂ်မဵဝ်းမၼ်း၊ပဵၼ်မႃးတူၼ်ႈမဵဝ်းလႂ်မဵဝ်းၼၼ်ႉဢေႃႈ။
လွင်ႈမၼ်းၸမ်ႉ၊ၵႃႈဢၼ်မီးဢသၢၵ်ႈတင်းမူတ်းမီးၼိူဝ်ႉဢၼ်ပႅၵ်ႇပိူင်ႈၵၼ်ႁင်းၽႂ်ႁင်းမၼ်းဢေႃႈ။ ၼိူဝ်ႉၵူၼ်းပဵၼ်ႁင်းမၼ်းမဵဝ်းၼိုင်ႈ၊ၼိူဝ်ႉတူဝ်သီႇတိၼ်ပဵၼ်မဵဝ်းၼိုင်ႈ၊ၼိူဝ်ႉၼူၵ်ႉပဵၼ်မဵဝ်းၼိုင်ႈ၊ၼိူဝ်ႉပႃပဵၼ်မဵဝ်းၼိုင်ႈ၊ပဵၼ်ဝႆႉမဵဝ်းၽႂ်မဵဝ်းမၼ်းဢေႃႈ။
မိူၼ်ၼင်ႇၼၼ်၊မီးတူဝ်ၶၼ်ႇထႃႇမဵဝ်းဢၼ်ယူႇၵႃႈၼိူဝ်ၽႃႉၵၢင်ႁၢဝ်၊ဢိၵ်ႇတင်းတူဝ်ၶၼ်ႇထႃႇမဵဝ်းဢၼ်မီးယူႇၵႃႈၼိူဝ်လိၼ်မိူင်းဢေႃႈ။ ၵူၺ်းၵႃႈ၊မုၼ်သရေႇႁၢင်ႈၽၢင်တူဝ်ၶၼ်ႇထႃႇမဵဝ်းဢၼ်ယူႇၼႂ်းၽႃႉၵၢင်ႁၢဝ်ဢမ်ႇမိူၼ်မုၼ်သရေႇႁၢင်ႈၽၢင်တူဝ်ၶၼ်ႇထႃႇမဵဝ်းဢၼ်ယူႇၵႃႈၼိူဝ်လိၼ်မိူင်းၼႆႉဢေႃႈ။-
လႅတ်ႇၵၢင်ဝၼ်းမီးမုၼ်သရေႇမဵဝ်းၼိုင်ႈ၊လိူၼ်မီးမုၼ်သရေႇမဵဝ်းၼိုင်ႈလႄႈလၢဝ်တင်းလၢႆသမ်ႉမီးမုၼ်သရေႇမဵဝ်းၼိုင်ႈဢေႃႈ။ လၢဝ်တင်းလၢႆႁူၺ်ႇၼိုင်ႈလႄႈႁူၺ်ႇၼိုင်ႈယင်းမီးမုၼ်သရေႇဢၼ်ပႅၵ်ႇပိူင်ႈၵၼ်ယူႇဢေႃႈ။
မိူဝ်ႈဢၼ်လုၵ်ႉသေၵႃႈတၢင်းတၢႆလုၵ်ႉၶိုၼ်းလိပ်းမႃးၼၼ်ႉၵေႃႈမၼ်းတၵ်းပဵၼ်ၸိူဝ်ႉၼင်ႇၼၼ်ဢေႃႈ။ တူဝ်ၶၼ်ႇထႃႇဢၼ်ဢဝ်ၽင်ၵႂႃႇၼၼ်ႉပဵၼ်တူဝ်ဢၼ်ၸၢင်ႈလုလႅဝ်တူႇၼဝ်ႈဢေႃႈ။ မိူဝ်ႈလုၵ်ႉၶိုၼ်းလိပ်းမႃးၸမ်ႉ၊မၼ်းဢမ်ႇၸၢင်ႈလုလႅဝ်တူႇၼဝ်ႈဢေႃႈ။-
တူဝ်ၶၼ်ႇထႃႇဢၼ်ဢဝ်ၽင်ၵႂႃႇၼၼ်ႉဢမ်ႇမီးသရေႇလႄႈဢမ်ႇလီတူၺ်း။ မိူဝ်ႈတူဝ်ၶၼ်ႇထႃႇၼၼ်ႉလုၵ်ႉၶိုၼ်းလိပ်းမႃးၼၼ်ႉၸမ်ႉ၊မၼ်းမီးႁႅင်းတၼ်းၶူဝ်း၊ဢိၵ်ႇတၢင်းမီးမုၼ်သရေႇဢေႃႈ။-
တူဝ်ၶၼ်ႇထႃႇဢၼ်ဢဝ်ၽင်ၵႂႃႇၼၼ်ႉပဵၼ်တူဝ်ၼိူဝ်ႉလိူတ်ႈဢေႃႈ။ မိူဝ်ႈတူဝ်ၶၼ်ႇထႃႇၼၼ်ႉလုၵ်ႉၶိုၼ်းလိပ်းမႃးၼၼ်ႉၸမ်ႉ၊မၼ်းပဵၼ်တူဝ်ဝိၺိၺ်ႇဢေႃႈ။ ၸိူဝ်ႉၼင်ႇဢၼ်မီးတူဝ်ၶၼ်ႇထႃႇၼိူဝ်ႉလိူတ်ႈၼၼ်ႉပဵၼ်တူဝ်ဝိၺိၺ်ႇဢေႃႈ။-
လွင်ႈမၼ်းၸမ်ႉ၊ၵျၢမ်းလိၵ်ႈတႅမ်ႈဝႆႉလႄႈဝႃႈ၊ “ ဢႃႇတမ်ႇ၊ ၵေႃႉဢၼ်ပဵၼ်မႃးဢွၼ်တၢင်းပိူၼ်ႈၼၼ်ႉပဵၼ်ၵူၼ်းၼိူဝ်ႉလိူတ်ႈဢၼ်ဢသၢၵ်ႈလိပ်းယူႇဢေႃႈ၊” ဝႃႈၼင်ႇၼႆလႄႈ ဢႃႇတမ်ႇ၊ ၵေႃႉဢၼ်ပဵၼ်မႃးၵမ်းလိုၼ်းၼၼ်ႉၸမ်ႉ၊ပဵၼ်ၸဝ်ႈဝိၺိၺ်ႇဢၼ်ပၼ်သၢၵ်ႈဢေႃႈ။-
တူဝ်ဝိၺိၺ်ႇမႃးဢွၼ်တၢင်းဢမ်ႇၸႂ်ႈ။ တူဝ်ၼိူဝ်ႉလိူတ်ႈမႃးဢွၼ်တၢင်းယဝ်ႉၸင်ႇ၊တူဝ်ဝိၺိၺ်ႇမႃးဢေႃႈ။-
ဢႃႇတမ်ႇ၊ ၵေႃႉဢွၼ်တၢင်းၼၼ်ႉၽြႃးပဵၼ်ၸဝ်ႈဢဝ်မုၼ်ႈလိၼ်ႁဵတ်းလႄႈမၼ်းပဵၼ်ၵူၼ်းဢၼ်လုၵ်ႉတီႈလိၼ်မႃးဢေႃႈ။ ဢႃႇတမ်ႇ၊ ၵေႃႉၵမ်းလိုၼ်းၼၼ်ႉၸမ်ႉ၊လုၵ်ႉၵႃႈတီႈၽႃႉၵၢင်ႁၢဝ်မႃးဢေႃႈ။-
ၶဝ်ၸိူဝ်းဢၼ်ၸၢပ်ႈသႅင်ႇၵၼ်တင်းလိၼ်မိူင်းတင်းလၢႆလႆႈပဵၼ်မိူၼ်ၵူၼ်းဢၼ်လုၵ်ႉၵႃႈတီႈလိၼ်မႃးၼၼ်ႉဢေႃႈ။ ၶဝ်ၸိူဝ်းဢၼ်ပဵၼ်ၵူၼ်းမိူင်းၽႃႉၵၢင်ႁၢဝ်တင်းလၢႆၵေႃႈ၊လႆႈပဵၼ်မိူၼ်ၵေႃႉဢၼ်လုၵ်ႉၵႃႈတီႈၽႃႉၵၢင်ႁၢဝ်မႃးၼၼ်ႉဢေႃႈ။-
ၸိူဝ်ႉၼင်ႇဢၼ်ႁဝ်းမီးႁၢင်ႈၽၢင်ၵူၼ်းဢၼ်လုၵ်ႉၵႃႈတီႈလိၼ်မႃးလႄႈယင်းမီးႁၢင်ႈၽၢင်ၵူၼ်းဢၼ်လုၵ်ႉၵႃႈတီႈၽႃႉၵၢင်ႁၢဝ်မႃးၼၼ်ႉဢေႃႈ။
ပီႈၼွင်ႉၶဝ်႟။ ၵဝ်လၢတ်ႈဝႃႈ၊ၵူၼ်းဢၼ်ပဵၼ်ၼိူဝ်ႉပဵၼ်လိူတ်ႈဢမ်ႇၸၢင်ႈၶၢမ်ႇဢဝ်ဢမူၺ်ႇမိူင်းၽြႃးပဵၼ်ၸဝ်ႈလႆႈဢေႃႈ။ မိူၼ်ၼင်ႇၼၼ်မဵဝ်းဢၼ်ၸၢင်ႈတူႇၸၢင်ႈၼဝ်ႈၼၼ်ႉၵေႃႈဢမ်ႇၸၢင်ႈၶၢမ်ႇဢဝ်ဢမူၺ်ႇဢၼ်ဢမ်ႇတူႇဢမ်ႇၼဝ်ႈၼၼ်ႉလႆႈဢေႃႈ။
ထွမ်ႇဢဝ်တြႃးဢၼ်လိုၵ်ႉဢၼ်လမ်ႇၼႆႉတႃႉ။ ႁဝ်းၸိူဝ်းၼႆႉၵူႈၵေႃႉတေလႆႈတၢႆဢမ်ႇၸႂ်ႈ။-
ၵူၺ်းၵႃႈ၊ၸူဝ်ႈၽႅပ်ႉတႃၼိုင်ႈၵူၺ်း၊ႁဝ်းၵူႈၵေႃႉတၵ်းၶၢမ်ႇတၢင်းဢၼ်လႅၵ်ႈလၢႆႈပဵၼ်ဢၼ်မႂ်ႇမူတ်းၼႂ်းမိူဝ်ႈဢၼ်မီးသဵင်ပဝ်ႇၼႄးၶရႃႇလိုၼ်းလင်သုတ်းၼၼ်ႉဢေႃႈ။ လွင်ႈမၼ်းၸမ်ႉ၊ၼႂ်းမိူဝ်ႈဢၼ်သဵင်ၼႄးၶရႃႇပေႃႇမႃးၼၼ်ႉၸိုင်၊ၶဝ်ၸိူဝ်းဢၼ်တၢႆယဝ်ႉၼၼ်ႉတၵ်းလုၵ်ႉၶိုၼ်းလိပ်းမႃးတႄႇယူႇၼႂ်းတၢင်းဢၼ်ဢမ်ႇတူႇဢမ်ႇၼဝ်ႈလႄႈႁဝ်းၵူႈၵေႃႉၵေႃႈတၵ်းၶၢမ်ႇတၢင်းဢၼ်လႅၵ်ႈလၢႆႈၵႂႃႇဢေႃႈ။-
လွင်ႈမၼ်းၸမ်ႉ၊တၢင်းဢၼ်ၸၢင်ႈတူႇၸၢင်ႈၼဝ်ႈၼႆႉတၵ်းလႅၵ်ႈလၢႆႈပဵၼ်တၢင်းဢၼ်ဢမ်ႇၸၢင်ႈတူႇၸၢင်ႈၼဝ်ႈၵႂႃႇၼၼ်ႉလႄႈၵူၼ်းၼိူဝ်ႉလိူတ်ႈဢၼ်ၸၢင်ႈတၢႆၼႆႉၵေႃႈတၵ်းလႅၵ်ႈလၢႆႈပဵၼ်ၵူၼ်းဢၼ်ဢမ်ႇၸၢင်ႈတၢႆဢေႃႈ။-
ပိူဝ်ႈၼႆလႄႈ မိူဝ်ႈဢၼ်တၢင်းဢၼ်ၸၢင်ႈတူႇၸၢင်ႈၼဝ်ႈလႆႈလႅၵ်ႈလၢႆႈၵႂႃႇပဵၼ်တၢင်းဢၼ်ဢမ်ႇၸၢင်ႈတူႇၸၢင်ႈၼဝ်ႈၼၼ်ႉသေယဝ်ႉ၊ၵူၼ်းၼိူဝ်ႉလိူတ်ႈဢၼ်ၸၢင်ႈတၢႆၵေႃႈလႆႈလႅၵ်ႈလၢႆႈပဵၼ်ၵူၼ်းဢၼ်ဢမ်ႇၸၢင်ႈတၢႆယဝ်ႉၼၼ်ႉၸိုင်၊တၵ်းမႅၼ်ႈၸွမ်းၵႃႈၼႂ်းၵျၢမ်းလိၵ်ႈဢၼ်တႅမ်ႈဝႆႉဝႃႈ၊ “မရၼႃႉလႆႈလုသုမ်းယဝ်ႉလႄႈလႆႈၶမ်ႇတၢင်းဢၼ်ပႄႉၼႅင်ႇယဝ်ႉ၊” ဝႃႈၼင်ႇၼႆလႄႈသမ်ႉတႅမ်ႈဝႆႉထႅင်ႈဝႃႈ။
“ၶုၼ်မရၼႃႉ႟။ တၢင်းဢၼ်မႂ်းပႄႉၼႅင်ႇၼၼ်ႉ၊ဢမ်ႇမီးၵႃႈလႂ်ယဝ်ႉ။ ၶုၼ်မရၼႃႉ႟။ ၵွင်ႉႁႅၼ်ႇမႂ်းၼၼ်ႉမီးၵႃႈတီႈလႂ်ယဝ်ႉ၊” ဝႃႈၼင်ႇၼႆၼၼ်ႉဢေႃႈ။
ၵွင်ႉႁႅၼ်ႇၶုၼ်မရၼႃႉၼၼ်ႉပဵၼ်ဢပျတ်ႈဢေႃႈ။ တၼ်းၶူဝ်းဢပျတ်ႈၸမ်ႉ၊ပဵၼ်ပိင်းၺၢပ်ႈတြႃးဢေႃႈ။-
ၵူၺ်းၵႃႈ၊ၵျေးၸူးၽြႃးပဵၼ်ၸဝ်ႈဢၼ်ပၼ်ဢၶႂၢင်ႉႁႂ်ႈႁဝ်းလႆႈပႄႉၼႅင်ႇၵွပ်ႈပိူဝ်ႈၸဝ်ႈႁဝ်း ၸဝ်ႈယေႇသုၶရိၸ်ႈ၊ ၼၼ်ႉယႂ်ႇၼႃႇလူင်လၢင်ဢေႃႈ။
ပိူဝ်ႈၼႆလႄႈ၊ပီႈၼွင်ႉဢၼ်ၵဝ်ႁၵ်ႉၶဝ်႟။ တႄႇယူႇၼႂ်းတၢင်းယုမ်ႇမၢတ်ႈမၼ်ႈမၼ်ႈၶိူင်ႇၶိူင်ႇလႄႈ ယႃႇပေႁႂ်ႈလႆႈၸၢႆႉၵႂႃႇပိူင်ႈၵႂႃႇတႃႉ။ ၸွမ်းၼင်ႇသူႁုဝႃႈ၊ၵၢၼ်ငၢၼ်း ၸဝ်ႈယေႇသု၊ ဢၼ်သူပွင်ႁဵတ်းၼၼ်ႉမၼ်းဢမ်ႇသုမ်းဢၵျူဝ်းလႄႈဢွၼ်ၵၼ်ၶတ်းၸႂ်ၶတ်းၶေႃးပွင်ႁဵတ်းၵၢၼ်မၼ်းၸဝ်ႈတႃႇသေႇဢမ်ႇထၢတ်ႇတႃႉ။
လူၺ်ႈလွင်ႈဢၼ်သူတႅမ်ႈထၢမ်လွင်ႈငိုၼ်းလူႇဢၼ်သူတၵ်းလႆႈၵဵပ်းႁွမ်ဝႆႉ၊ပုၼ်ႈၵူၼ်းၸဝ်ႈၽြႃးဢၼ်မီးၵႃႈၼႂ်းမိူင်း ယုတႃႉ၊ ၼၼ်ႉၸမ်ႉ၊သူထုၵ်ႇလီႁဵတ်းမိူၼ်ၼင်ႇဢၼ်ၵဝ်သင်ႇလၢတ်ႈဝႆႉ၊တီႈၸိူဝ်းၸဝ်ႈတင်းလၢႆၵႃႈၼႂ်းမိူင်း ၵလႃႇတိ၊ ၼၼ်ႉဢေႃႈ။-
ၼႂ်းဝၼ်းတၼၢင်းၼူၺ်ႇၵူႈဝၼ်းၼၼ်ႉႁႂ်ႈၵူႈၵေႃႉၵူႈၵူၼ်းသႂ်ႇငိုၼ်းလူႇၼမ်ၼမ်ၵေႇၵေႇၸွမ်းၼင်ႇဢၼ်မၼ်းမီးၼၼ်ႉတႃႉ။ ဢဝ်ငိုၼ်းလူႇၼၼ်ႉၵဵပ်းႁွမ်ဝႆႉ၊ၼင်ႇႁိုဝ်ၵဝ်တၵ်းဢမ်ႇလႆႈၵဵပ်းထႅင်ႈမိူဝ်ႈဢၼ်ၵဝ်မႃးတီႈသူၼၼ်ႉတႃႉ။-
ႁဵတ်းၼၼ်လႄႈမိူဝ်ႈဢၼ်ၵဝ်ႁွတ်ႈထိုင်တီႈသူၼၼ်ႉ၊ၵဝ်တၵ်းပွႆႇၸႂ်ႉၵူၼ်းၸိူဝ်းဢၼ်သူယုမ်ႇၸႂ်ၼၼ်ႉလႄႈ ႁႂ်ႈၶဝ်ပႃးဢဝ်လိၵ်ႈၵဝ်၊ဢိၵ်ႇတင်းငိုၼ်းလူႇသူၼၼ်ႉၵႂႃႇသူင်ႇၵႃႈတီႈဝဵင်း ယေႇရုသလႅမ်ႇ၊ ဢေႃႈ။-
ပေႃးဝႃႈၵဝ်ၵေႃႈထုၵ်ႇလီၵႂႃႇၸိုင်၊တၵ်းၵႂႃႇဢေႃႈ၊ၶဝ်ၸိူဝ်းၼၼ်ႉၵေႃႈတေၵႂႃႇၸွမ်းလူၺ်ႈၵၼ်တင်းၵဝ်ဢေႃႈ။
ပိူဝ်ႈဢၼ်ၵဝ်လူဝ်ႇၵႂႃႇၵႃႈတီႈမိူင်း မႃႇၵေႇတေႃးၼိ၊ လႄႈၵဝ်တေလတ်းၵႂႃႇၸွမ်းသဵၼ်ႈတၢင်းမိူင်း မႃႇၵေႇတေႃးၼိ၊ သေလႄႈမႃးၸူးသူဢေႃႈ။-
ၵဝ်ဢၢင်ႈတေယူႇတီႈသူႁိုင်တၢၼ်ႇတၢၼ်ႇလႄႈ၊ယူဝ်တေယူႇၸူဝ်ႈၶၢဝ်းၶိင်ႇၵတ်းတေႃႇပေႃးပူၼ်ႉဢေႃႈ။ သူၵေႃႈတေၸၢင်ႈၸွႆႈထႅမ်ၵဝ်ႁႂ်ႈလႆႈသိုပ်ႇၶၢဝ်းတၢင်းၵႂႃႇ၊ႁႂ်ႈလႆႈႁွတ်ႈထိုင်ၵႂႃႇတီႈဢၼ်ၵဝ်ၶႂ်ႈၵႂႃႇထႅင်ႈၼၼ်ႉဢေႃႈ။-
ၵဝ်ဢမ်ႇၶႂ်ႈမႃးလႄႇသူၵႅပ်ႈၼိုင်ႈၵမ်းဢွၼ်ႇၼိုင်ႈၵူၺ်းလႄႈပူၼ်ႉၵႂႃႇဢေႃႈ။ ပေႃးၸဝ်ႈၽြႃးမီးဢလူဝ်ႇၸိုင်၊ၵဝ်တေယူႇႁိုင်တၢၼ်ႇတၢၼ်ႇဢေႃႈ။
ၼႂ်းဝႃႈၼၼ်သေၵေႃႈၵဝ်တေယူႇၵႃႈတီႈဝဵင်း ဢေးၽႅတ်ႈ၊ ၼႆႉ၊တေႃႇထိုင်ႁွတ်ႈဝၼ်းပွႆး ပဵၼ်ႇတေႇၵုၵ်ႉတေႇ၊ လူးၵွၼ်ႇဢေႃႈ။-
ၵႃႈတီႈၼႆႈပိၵ်ႉသမ်ႉမီးၶဝ်ၸိူဝ်းဢၼ်သၢၼ်ၶတ်းၵၼ်တင်းႁဝ်းၼမ်ၼႃႇသေၵေႃႈမီးဢၶႂၢင်ႉဢယေးလီၼႃႇပုၼ်ႈတႃႇၼႃႈၵၢၼ်သႃႇသၼႃႇၸဝ်ႈၽြႃးတႄႉတႄႉဢေႃႈ။
မိူဝ်ႈဢၼ်သြႃႇ တိမေႃးသေႇ၊ ႁွတ်ႈမႃးၵႃႈတီႈသူၸိုင်၊လူတူၺ်းမၼ်းၼင်ႇႁိုဝ်မၼ်းတၵ်းဢမ်ႇလႆႈမီးတၢင်းဢၼ်ၵူဝ်ႁႄၼၼ်ႉတႃႉ။ မၼ်းပဵၼ်ၵေႃႉဢၼ်ပွင်ႁဵတ်းၵၢၼ်ၸဝ်ႈၽြႃးမိူၼ်ၸိူဝ်ႉၼင်ႇၵဝ်ဢေႃႈ။-
ပိူဝ်ႈၼႆလႄႈယႃႇပေႁႂ်ႈၽူႈလႂ်ႁဵတ်းဢမ်ႇသၢင်းၵိၼ်မၼ်း။ ဢွၼ်ၵၼ်ၸွႆႈၵမ်ႉၸွႆႈထႅမ်မၼ်း၊ႁႂ်ႈမၼ်းလႆႈၸဵဝ်းၶိုၼ်းမႃးၸူးတီႈၵဝ်တႃႉ။ ၵဝ်မွင်းထႃႈမၼ်းတၵ်းၶိုၼ်းမႃးႁူမ်ႈလူၺ်ႈၵၼ်တင်းပီႈၼွင်ႉတၢင်ႇၵေႃႉၸိူဝ်းၼၼ်ႉယူႇဢေႃႈ။
ၵမ်းၼႆႉ၊လူၺ်ႈလွင်ႈပီႈၼွင်ႉႁဝ်းသြႃႇ ဢႃႇပေႃးလု၊ ၸမ်ႉ၊ၵဝ်လႆႈၵႆႉပၼ်ႁႅင်းမၼ်း၊ႁႂ်ႈမၼ်းၸွမ်းပီႈၼွင်ႉတၢင်ႇၵေႃႉတၢင်ႇၵူၼ်းမႃးလႄႇတီႈသူယူႇဢေႃႈ။ ၵူၺ်းၵႃႈ၊ၶိင်ႇယၢမ်းမၼ်းယင်းဢမ်ႇပႆႇသၢင်ႇထုၵ်ႇလႄႈမၼ်းဢမ်ႇပႆႇၸၢင်ႈမႃးမိူဝ်ႈလဵဝ်ၼႆႉ။ မိူဝ်ႈဢၼ်မၼ်းတၼ်းၼၼ်ႉမၼ်းတေမႃးလႄႇႁႃသူယူႇဢေႃႈ။
သူၸဝ်ႈဢွၼ်ၵၼ်ဝႆႉသတိလႄႈတႄႇမၼ်ႈယူႇၵႃႈၼႂ်းတၢင်းယုမ်ႇမၢတ်ႈတႃႉ။ မီးၸႂ်ႁတ်းႁၢၼ်လႄႈဢဝ်ဢဵၼ်ဢဝ်ႁႅင်းတႃႉ။-
ၼႃႈၵၢၼ်တၢင်းႁဵတ်းၵႃႈမီးတင်းသဵင်ႈတင်းလူင်ၼၼ်ႉဢွၼ်ၵၼ်ပႃးတင်းၸႂ်ႁၵ်ႉမႅတ်ႈတႃႇသေလႄႈပွင်ႁဵတ်းတႃႉ။
ပီႈၼွင်ႉၶဝ်႟။ သူႁုလွင်ႈဢၼ် သထေႇၽၢၼ်ႇ၊ တင်းၵူၼ်းႁိူၼ်းၵူၼ်းယေးမၼ်းပဵၼ်ၶဝ်ၸိူဝ်းဢၼ်ၶဝ်ႈပဵၼ်ၶရိၸ်ႈယၢၼ်ႇဢွၼ်တၢင်းပိူၼ်ႈ၊ၼႂ်းမိူင်း ဢၶႃႇယႃႉ၊ ၼၼ်ႉယူႇဢေႃႈ။ ၶဝ်ဢဝ်တူဝ်ၶဝ်သၢၵ်ႈၵၢပ်ႈၼႂ်းၼႃႈၵၢၼ်ဢၼ်ၸွႆႈထႅမ်ၵူၼ်းၸဝ်ႈၽြႃးတင်းလၢႆဢေႃႈ။-
ပိူဝ်ႈၼႆလႄႈပီႈၼွင်ႉၶဝ်႟။ ထွမ်ႇဢဝ်ၵႂၢမ်းၵူၼ်းဢွၼ်ႁူဝ်ၸိူဝ်ႉၼင်ႇၶဝ်ၼႆႉ၊ဢိၵ်ႇတင်းၶဝ်ၸိူဝ်းဢၼ်ပွင်ႁဵတ်းၵၢၼ်ၸဝ်ႈၽြႃးႁူမ်ႈလူၺ်ႈၵၼ်တင်းၶဝ်ၼၼ်ႉတႃႉ၊ဝႃႈၼႆၵဝ်တိုၵ်းယူင်းတွင်းပၢၼ်ႇသူဢေႃႈ။
ပိူဝ်ႈဢၼ် သထေႇၽၢၼ်ႇ၊ၽေႃႇတုၼိတ်ႉ၊ တင်း ဢၶႃႇယၶူႇ၊ ၶဝ်ႁွတ်ႈမႃးလႄႈၵဝ်ၸူမ်းတႄႉတႄႉယဝ်ႉ၊လွင်ႈမၼ်းၸမ်ႉ၊ၶဝ်လႆႈပွင်ႁဵတ်းၵၢၼ်ဢၼ်သူဢမ်ႇၸၢင်ႈႁဵတ်းၼၼ်ႉဢေႃႈ။-
ၶဝ်ႁဵတ်းႁႂ်ႈၵဝ်လႆႈၸူမ်းသိူဝ်းယူႇမိူၼ်ၸိူဝ်ႉၼင်ႇဢၼ်ၶဝ်ႁဵတ်းႁႂ်ႈသူၸူမ်းသိူဝ်းယူႇၼၼ်ႉဢေႃႈ။ ၵူၼ်းၸိူဝ်ႉၼင်ႇၶဝ်ၼႆႉ၊ႁဝ်းထုၵ်ႇလီပၼ်ၵုင်ႇသရေႇၶဝ်ဢေႃႈ။
ၽုင်မူႇၸုမ်းၸိူဝ်းၸဝ်ႈတင်းလၢႆၵႃႈၼႂ်းမိူင်း ဢႃႇသိ၊ ၼႆႉ၊ၽၢၵ်ႇတွၼ်ႈၵႂၢမ်းတၵ်ႉၼၢႆထိုင်မႃးတီႈသူဢေႃႈ။ ဢႃႇၵုလႃႉ၊ တင်း ပရီႇသီးလႃႇ၊ ၶဝ်ၽူဝ်မေး၊တင်းၸိူဝ်းၸဝ်ႈဢၼ်ၸုတုမ်ၵႃႈၼႂ်းႁိူၼ်းၶဝ်ၼၼ်ႉၵေႃႈၽၢၵ်ႇတွၼ်ႈၵႂၢမ်းႁၵ်ႉၸႂ်ထိုင်သူၼႂ်း ၸဝ်ႈယေႇသု၊ ဢေႃႈ။-
ပီႈၼွင်ႉၵႃႈမီးတင်းသဵင်ႈတင်းလူင်ထၢမ်ႁႃသူဢေႃႈ။ ၵေႃႉၼိုင်ႈလႄႈၵေႃႉၼိုင်ႈတူင်ႉတၵ်ႉၼူမ်ၵၼ်မိူၼ်ၼင်ႇပီႈၼွင်ႉဢၼ်ႁၵ်ႉပႅင်းၵၼ်ၼၼ်ႉတႃႉ။
ၵဝ် ပေႃးလု၊ ဢဝ်တင်းမိုဝ်းတူဝ်ၸဝ်ႈၵဝ်ႇလႄႈတႅမ်ႈၵႂၢမ်းတၵ်ႉလၢတ်ႈထၢမ်ႁႃသူၸမ်ႉ၊-
ၽူႈလႂ်သေဢမ်ႇဝႃႈ၊ပေႃးမၼ်းဢမ်ႇႁၵ်ႉၸဝ်ႈၽြႃးၸိုင်၊ႁႂ်ႈဢႃႉမၢင်ႇၵလႃႇတူၵ်းႁွတ်ႈၵႃႈၼိူဝ်မၼ်းသေၵမ်းလူၺ်ႈ။ မရၼ်းၼတႃႇဢၼ်ပွင်ႇဝႃႈ၊ၸဝ်ႈၽြႃးမႃးသေၵမ်းလူၺ်ႈ။
ႁႂ်ႈၵျေးၸူး ၸဝ်ႈယေႇသု၊ မီးယူႇလူၺ်ႈသူသေၵမ်းလူၺ်ႈ။
ႁႂ်ႈတၢင်းႁၵ်ႉမႅတ်ႈတႃႇၵဝ်ဢၼ်မီးၼႂ်း ၸဝ်ႈယေႇသုၶရိၸ်ႈ၊ ၼၼ်ႉမီးယူႇလူၺ်ႈၵၼ်တင်းသူတင်းသဵင်ႈသေၵမ်းလူၺ်ႈ။ ဢႃမိၼ်ႈ။ လိၵ်ႈတြႃးၵေႃးရိၼ်ႇထုၽိုၼ်တီႈၼိုင်ႈယဝ်ႉယဝ်ႉဢေႃႈ။
ၵဝ် ပေႃးလု၊ ၵေႃႉပဵၼ်တမၢၼ်ႇ ၸဝ်ႈယေႇသုၶရိၸ်ႈ၊ ဢၼ်ပဵၼ်ၸွမ်းဢလူဝ်ႇၽြႃးပဵၼ်ၸဝ်ႈ၊ဢိၵ်ႇတင်းၼွင်ႉႁဝ်း တိမေႃးသေႇ။ မီးလိၵ်ႈပၼ်ထိုင်ၸိူဝ်းၸဝ်ႈဢၼ်မီးၵႃႈတီႈဝဵင်း ၵေႃးရိၼ်ႇထု၊ ဢိၵ်ႇတင်းၵူၼ်းၸဝ်ႈၽြႃးဢၼ်ယူႇၵႃႈၼႂ်းမိူင်း ဢၶႃႇယႃႉ၊ တင်းသဵင်ႈတင်းလူင်ဢေႃႈ။
ႁႂ်ႈပေႃႈႁဝ်းၶႃႈၽြႃးပဵၼ်ၸဝ်ႈ၊ဢိၵ်ႇတင်းၸဝ်ႈၽြႃးႁဝ်း ၸဝ်ႈယေႇသုၶရိၸ်ႈ၊ ပၼ်ၵျေးၸူးတၢင်းၼိမ်တီႈသူသေၵမ်းလူၺ်ႈ။
ဢွၼ်ၵၼ်ယွင်ႈယေႃးတၢင်ႇၵျေးၸူးၽြႃးပဵၼ်ၸဝ်ႈ၊ဢၼ်ပဵၼ်ပေႃႈၸဝ်ႈ၊ၸဝ်ႈၽြႃးႁဝ်း ယေႇသုၶရိၸ်ႈ၊ ပေႃႈၸဝ်ႈဢၼ်မီးၸႂ်ၵရုၼႃႇ၊သမ်ႉပဵၼ်ၽြႃးပဵၼ်ၸဝ်ႈဢၼ်ပၼ်ႁႅင်းႁႂ်ႈၸႂ်သၢၵ်ႈသႃႇၵူႈၸိူဝ်ႉၵူႈပိူင်ၼၼ်ႉတႃႉႁဝ်း။-
မၼ်းၸဝ်ႈႁႂ်ႈၸႂ်ႁဝ်းသၢၵ်ႈသႃႇမိူဝ်ႈဢၼ်ႁဝ်းထူပ်းၽေးတုၵ်ႉၶႃႉတၢင်းယၢပ်ႇၸႂ်ၶၢၼ်ၸႂ်တင်းလၢႆ၊ၼင်ႇႁိုဝ်ႁဝ်းၵေႃႈတၵ်းၸၢင်ႈဢဝ်တၢင်းသၢၵ်ႈသႃႇဢၼ်မၼ်းၸဝ်ႈပၼ်တီႈႁဝ်းၼၼ်ႉသေလႄႈသမ်ႉပၼ်တၢင်းဢၼ်ၸႂ်သၢၵ်ႈသႃႇတီႈပိူၼ်ႈၸိူဝ်းဢၼ်လႆႈထူပ်းၺႃးၽေးတုၵ်ႉၶႃႉသေၸိူဝ်ႉသေပိူင်ယူႇၼၼ်ႉဢေႃႈ။-
ၸိူဝ်ႉၼင်ႇဢၼ်ႁဝ်းလႆႈၶၢမ်ႇတုၵ်ႉၶႃႉတၢင်းၽၢၼ်ၼမ်ၼႃႇႁူမ်ႈလူၺ်ႈၵၼ်တင်း ၸဝ်ႈၶရိၸ်ႈ၊ ၼၼ်ႉ၊ႁဝ်းသမ်ႉတေလႆႈၶၢမ်ႇဢဝ်တၢင်းဢၼ်မၼ်းၸဝ်ႈပၼ်ႁႂ်ႈၸႂ်ႁဝ်းသၢၵ်ႈသႃႇၼမ်ၼႃႇၵွပ်ႈပိူဝ်ႈ ၸဝ်ႈၶရိၸ်ႈ၊ ဢေႃႈ။-
ပေႃးႁဝ်းထူပ်းၽေးတုၵ်ႉၶႃႉတၢင်းယၢပ်ႇၸႂ်ၶၢၼ်ၸႂ်ၸိုင်၊မၼ်းပဵၼ်ပုၼ်ႈသူတၵ်းလႆႈၶၢမ်ႇဢဝ်တၢင်းဢၼ်ၽြႃးပဵၼ်ၸဝ်ႈပၼ်ႁႂ်ႈၸႂ်သၢၵ်ႈသႃႇလႄႈၵႄႇၶျွတ်ႈဢဝ်ဢေႃႈ။ ပေႃးႁဝ်းလႆႈၶၢမ်ႇဢဝ်တၢင်းဢၼ်ၽြႃးပဵၼ်ၸဝ်ႈပၼ်ႁႂ်ႈၸႂ်သၢၵ်ႈသႃႇၸမ်ႉ၊မၼ်းပဵၼ်ပုၼ်ႈသူၵေႃႈတၵ်းလႆႈၶၢမ်ႇဢဝ်တၢင်းဢၼ်ႁႂ်ႈၸႂ်သၢၵ်ႈသႃႇမိူၼ်ၵၼ်လႄႈသူသမ်ႉတၵ်းၸၢင်ႈဝႆႉၸႂ်ယၢဝ်းယၢဝ်း၊ယိူၼ်ႉၶၢမ်ႇၽေးတုၵ်ႉၶႃႉဢၼ်လဵဝ်ၵၼ်တင်းဢၼ်ႁဝ်းလႆႈၶၢမ်ႇၼၼ်ႉဢေႃႈ။-
ပိူဝ်ႈၼႆလႄႈတၢင်းဢၼ်ႁဝ်းမုင်ႈမွင်းဝၢင်းၸႂ်ၼႂ်းသူၼၼ်ႉဢမ်ႇၸၢႆႉဢမ်ႇၶွၼ်း။ ႁဝ်းႁုဝႃႈၸိူဝ်ႉၼင်ႇဢၼ်သူၶၢမ်ႇၽေးတုၵ်ႉၶႃႉၼမ်ၼႃႇႁူမ်ႈလူၺ်ႈႁဝ်းလႄႈသူၵေႃႈတၵ်းလႆႈၶၢမ်ႇဢဝ်တၢင်းဢၼ်ၽြႃးပဵၼ်ၸဝ်ႈပၼ်ႁႂ်ႈၸႂ်သၢၵ်ႈသႃႇႁူမ်ႈလူၺ်ႈႁဝ်းဢေႃႈ။
ပီႈၼွင်ႉၶဝ်႟။ လွင်ႈၽေးတုၵ်ႉၶႃႉဢၼ်ႁဝ်းလႆႈထူပ်းၺႃးၵႃႈၼႂ်းမိူင်း ဢႃႇသိ၊ ၼၼ်ႉႁဝ်းၶႂ်ႈႁႂ်ႈသူႁုဢေႃႈ။ မၼ်းပဵၼ်ဢၼ်ယႂ်ႇၼႃႇ၊တေႃႇထိုင်ႁွတ်ႈႁဝ်းဢမ်ႇၶၢမ်ႇလႆႈလႄႈထၢင်ႇဝႃႈ၊ဢသၢၵ်ႈႁဝ်းတၵ်းတေဢမ်ႇလွတ်ႈလႆႈဢေႃႈ။-
ႁဝ်းထၢၼ်ႈပေႃးထၢင်ႇဝႃႈ၊ဢမိင်ႉတၢႆတူၵ်းႁွတ်ႈၼိူဝ်ႁဝ်းဢေႃႈ။ တီႈတႄႉမၼ်းၼၼ်ႉမၼ်းပဵၼ်မႃးၼင်ႇၼၼ်ႁႂ်ႈလႆႈသွၼ်တူဝ်သွၼ်ၸႂ်ႁဝ်းႁႂ်ႈႁဝ်းဢမ်ႇဢိင်ပိုင်ႈႁႅင်းတူဝ်ၸဝ်ႈၵဝ်ႇလႄႈႁႂ်ႈႁဝ်းလႆႈဢိင်ပိုင်ႈၽြႃးပဵၼ်ၸဝ်ႈၸဝ်ႈဢၼ်ႁႂ်ႈၵူၼ်းတၢႆလုၵ်ႉၶိုၼ်းလိပ်းမႃးၼၼ်ႉၵူၺ်းဢေႃႈ။-
လွင်ႈမၼ်းၸမ်ႉ၊မၼ်းၸဝ်ႈယင်းၵႄႇသႄႇဢဝ်ႁဝ်းၵႃႈၼႂ်းၽေးတုၵ်ႉၶႃႉတၢင်းတၢႆၼႆႉယဝ်ႉလႄႈမၼ်းၸဝ်ႈတၵ်းၵႄႇၶျွတ်ႈဢဝ်ႁဝ်းဢေႃႈ။ ႁဝ်းမုင်ႈမွင်းမၼ်းၸဝ်ႈတၵ်းတေသိုပ်ႇၵႄႇသႄႇဢဝ်ႁဝ်းဢေႃႈ။-
ၶႅၼ်းတေႃႈၸွႆႈသူးတွင်းပုၼ်ႈႁဝ်းသေၵမ်း။ ႁဵတ်းၼၼ်လႄႈတၢင်းဢၼ်ၵူၼ်းၼမ်ၼႃႇသူးတွင်းပုၼ်ႈႁဝ်းၼၼ်ႉ၊ၽြႃးပဵၼ်ၸဝ်ႈတၵ်းထွမ်ႇဢဝ်လႄႈတၵ်းပၼ်မၢင်ႇၵလႃႇတၢင်းလီတီႈႁဝ်းဢေႃႈ။ လိူဝ်သေၼၼ်ႉ၊ၵူၼ်းၼမ်ၼႃႇတၵ်းႁဵတ်းသဵင်ဢၼ်ယႂ်ႇၼႃႇယွင်ႈယေႃးတၢင်ႇၵျေးၸူးမၼ်းၸဝ်ႈပုၼ်ႈႁဝ်းဢေႃႈ။
တၢင်းဢၼ်ႁဝ်းလႆႈဢုပ်ႇဝၢဝ်းၸူမ်းသိူဝ်းၸမ်ႉ၊ပဵၼ်လွင်ႈဢၼ်ၸႂ်ႁုတူဝ်ၸဝ်ႈၵဝ်ႇဢမ်ႇတၢင်ႇဢပျတ်ႈႁဝ်းၼႂ်းတၢင်းဢၼ်ႁဝ်းၵမ်ၵျၢင်ႉသၢင်ႈႁဵတ်းၼႂ်းလေႃးၵႃႉၼႆႉၵူၺ်းဢမ်ႇၵႃး၊ၼႂ်းတၢင်းဢၼ်ႁဝ်းသၢင်ႈႁဵတ်းတေႃႇသူၼၼ်ႉဢမ်ႇလႆႈဢိင်ပိင်ႇၺႃႇလေႃးၵီႇ၊ဢိင်ၵျေးၸူးၽြႃးပဵၼ်ၸဝ်ႈသေလႄႈဢဝ်ၸႂ်ဢၼ်မူတ်းသႂ်တင်းၸႂ်ဢၼ်ဢမ်ႇမီးသွင်ငၢမ်ႈဢၼ်ၽြႃးပဵၼ်ၸဝ်ႈၵျိူၵ်ႈၸႂ်ၼၼ်ႉ၊ၵမ်ၵျၢင်ႉသၢင်ႈႁဵတ်းဢေႃႈ။-
ဢၼ်ႁဝ်းတႅမ်ႈလိၵ်ႈပၼ်သူၼႆႉ၊ႁဝ်းဢမ်ႇတႅမ်ႈၶေႃႈၵႂၢမ်းမဵဝ်းဢၼ်သူဢမ်ႇၸၢင်ႈၽတ်းဢၢၼ်ႇလႄႈႁုထွမ်ႇဢဝ်လႆႈၼၼ်ႉသေၸိူဝ်ႉသေမဵဝ်းဢေႃႈ။ ၵဝ်ယုမ်ႇယမ်ဝႃႈ၊သူတၵ်းႁုထွမ်ႇဢဝ်လႆႈလီလီတေႃႇထိုင်တီႈသုတ်း၊-
ၸိူဝ်ႉၼင်ႇဢၼ်သူႁုထွမ်ႇဢဝ်ၵမ်ႈၽွင်ႈယဝ်ႉၼၼ်ႉဢေႃႈ။ ႁဵတ်းၼၼ်လႄႈ ၼႂ်းဝၼ်းဢၼ်ၸဝ်ႈၽြႃးႁဝ်း ၸဝ်ႈယေႇသု၊ မႃးၼၼ်ႉသူတၵ်းဢုပ်ႇဝၢဝ်းလူၺ်ႈလွင်ႈႁဝ်း၊မိူၼ်ၸိူဝ်ႉၼင်ႇႁဝ်းတၵ်းဢုပ်ႇဝၢဝ်းလူၺ်ႈလွင်ႈသူၼႂ်းဝၼ်းၼၼ်ႉဢေႃႈ။
ၵွပ်ႈပိူဝ်ႈၵဝ်ယုမ်ႇယမ်သေႇၶျႃႇဝႆႉလွင်ႈၼၼ်ႉ၊ၵဝ်ဢၢင်ႈမႃးလႄႇႁႃသူဢွၼ်တၢင်းၼင်ႇႁိုဝ်သူတၵ်းလႆႈဢၵျူဝ်းဢၼ်ႁဝ်းမႃးလႄႇသွင်ပွၵ်ႈၼၼ်ႉဢေႃႈ။-
လွင်ႈမၼ်းၸမ်ႉ၊ၵဝ်ၶႃႈဢၢင်ႈၵႂႃႇဝႄႉလႄႇသူၼႂ်းၶၢဝ်းတၢင်းမိူဝ်ႈဢၼ်ၵဝ်ၵႂႃႇၸူးမိူင်း မႃႇၵေႇတေႃးၼိ၊ လႄႈမိူဝ်ႈဢၼ်ၶိုၼ်းမိူဝ်းၵေႃႈႁႂ်ႈလႆႈၶဝ်ႈဝႄႉထႅင်ႈ၊ႁႂ်ႈသူတၵ်းၸၢင်ႈၸွႆႈထႅမ်ၵမ်ႉထွၵ်ႈၶၢဝ်းတၢင်းဢၼ်ၵဝ်တေသိုပ်ႇၵႂႃႇၸူးတီႈမိူင်း ယုတႃႉ၊ ပုၼ်ႉၼၼ်ႉဢေႃႈ။-
ဢၼ်ၵဝ်ပိၼ်ႇၸႂ်ဢၼ်ဢၢင်ႈမႃးလႄႇၼၼ်ႉ၊ၸွင်ႇမၼ်းပွင်ႇဝႃႈ၊ၵဝ်ၸႂ်ဢမ်ႇသေႇဢမ်ႇမၼ်ႈဝႃႈၼႆႁိုဝ်း။ ၸွင်ႇၵဝ်ၸွမ်းဢလူဝ်ႇၸႂ်တူဝ်ၸဝ်ႈၵဝ်ႇလႄႈၵျၢမ်ႇဢၢင်ႈမဵဝ်းၼိုင်ႈသေလႄႈလၢတ်ႈဝႃႈ၊ “ၸႂ်ႈယဝ်ႉ။ ၸႂ်ႈယဝ်ႉ” ဝႃႈၼႆလႄႈ၊သမ်ႉၶိုၼ်းၶိုၼ်ၵႂၢမ်းလႄႈလၢတ်ႈဝႃႈ၊ “ဢမ်ႇၸႂ်ႈ၊ဢမ်ႇၸႂ်ႈ” ဝႃႈၼင်ႇၼႆႁိုဝ်း။-
မၼ်းဢမ်ႇပဵၼ်ၸိူဝ်ႉၼင်ႇၼၼ်။ ၸိူဝ်ႉၼင်ႇဢၼ်ၽြႃးပဵၼ်ၸဝ်ႈမီးသဵတ်ႈၸႃႇၼၼ်ႉၵႂၢမ်းၵတိဢၼ်ၵဝ်ဝႃႈ၊ “ၸႂ်ႈယဝ်ႉ” ၼၼ်ႉ၊ၵဝ်ဢမ်ႇၶိုၼ်းၵႂၢမ်းလႄႈလၢတ်ႈဝႃႈ၊ “ဢမ်ႇၸႂ်ႈ” ဝႃႈၼင်ႇၼႆဢေႃႈ။-
လွင်ႈမၼ်းၸမ်ႉ၊ ၸဝ်ႈယေႇသုၶရိၸ်ႈ၊ လုၵ်ႈၽြႃးပဵၼ်ၸဝ်ႈ၊ၸဝ်ႈဢၼ်သြႃႇ သီႇလႃႉ၊ တင်းသြႃႇ တိမေႃးသေႇ၊ ဢိၵ်ႇတင်းၵဝ်ႁေႃးလၢတ်ႈလွင်ႈမၼ်းၸဝ်ႈပၼ်တီႈသူၼၼ်ႉဢမ်ႇၸႂ်ႈၸဝ်ႈဢၼ်လၢတ်ႈဝႃႈ၊ “ၸႂ်ႈယဝ်ႉ” ဝႃႈၼႆသေလႄႈသမ်ႉၶိုၼ်းၶိုၼ်ၵႂၢမ်းလႄႈလၢတ်ႈဝႃႈ၊ “ဢမ်ႇၸႂ်ႈ” ဝႃႈၼင်ႇၼႆၼၼ်ႉဢေႃႈ။ တီႈတႄႉမၼ်း၊မၼ်းၸဝ်ႈလၢတ်ႈဝႃႈ၊ “ၸႂ်ႈယဝ်ႉ” ဝႃႈၼႆၵူၺ်းဢေႃႈ။-
လွင်ႈမၼ်းၸမ်ႉ၊ၵတိၽြႃးပဵၼ်ၸဝ်ႈၵႃႈမီးၼၼ်ႉ၊ပဵၼ်လွင်ႈတၢင်းဢၼ်မၼ်းၸဝ်ႈလၢတ်ႈဝႃႈ၊ “ၸႂ်ႈယဝ်ႉ” ၼၼ်ႉဢေႃႈ။ ၵွပ်ႈၼႆလႄႈႁဝ်းဢိင် ၸဝ်ႈယေႇသုၶရိၸ်ႈ၊ လႄႈလၢတ်ႈဝႃႈ၊ “ဢႃမိၼ်ႈ” မိူဝ်ႈဢၼ်ႁဝ်းယွင်ႈယေႃးမုၼ်ၽုင်းၽြႃးပဵၼ်ၸဝ်ႈၼၼ်ႉဢေႃႈ။-
ၸဝ်ႈဢၼ်ဢဝ်သူတင်းႁဝ်းတႄႇယူႇမၼ်းၶိူင်ႇၼႂ်း ၸဝ်ႈၶရိၸ်ႈ၊ ပဵၼ်ၽြႃးပဵၼ်ၸဝ်ႈဢၼ်လိူၵ်ႈဢဝ်ႁဝ်းဝႆႉဢေႃႈ။-
မၼ်းၸဝ်ႈတွၵ်ႇၸုမ်ႈသေယဝ်ႉ၊မၢတ်ႈမၢႆႁဝ်းပဵၼ်ၵူၼ်းမၼ်းၸဝ်ႈလႄႈပၼ်ဝိၺိၺ်ႇမူတ်းၸၢင်ႇၸဝ်ႈၼႂ်းႁူဝ်ၸႂ်ႁဝ်း၊ႁႂ်ႈလႆႈၼႄပျႃးဝႃႈ၊ပဵၼ်ဢႃႇမႃႉၶၢမ်ႇလွင်ႈဢၼ်မၼ်းၸဝ်ႈတၵ်းပၼ်ႁဝ်းၼႂ်းဝၼ်းမိူဝ်းၼႃႈၼၼ်ႉဢေႃႈ။
ႁႂ်ႈၽြႃးပဵၼ်ၸဝ်ႈပဵၼ်သၢၵ်ႈသေႇၽၢႆႇႁူဝ်ၸႂ်ၵဝ်လႄႈဝႃႈ၊ၵဝ်ယင်းဢမ်ႇပႆႇမႃးၵႃႈတီႈဝဵင်း ၵေႃးရိၼ်ႇထု၊ ၼၼ်ႉၵွပ်ႈပိူဝ်ႈဢမ်ႇပႆႇၶႂ်ႈပၼ်တၢမ်ႇသူၼၼ်ႉဢေႃႈ။-
ႁဝ်းဢမ်ႇပဵၼ်ၵေႃႉဢၼ်တဵၵ်းငႅၼ်းသူႁႂ်ႈယုမ်ႇလႄႈႁဝ်းပဵၼ်ၵေႃႉဢၼ်ႁဵတ်းၵၢၼ်လူၺ်ႈၵၼ်တင်းသူ၊ႁႂ်ႈသူၸူမ်းသိူဝ်းဢေႃႈ။ ပဵၼ်လွင်ႈၸိူဝ်ႉႁိုဝ်ဝႃႈၼႆၸမ်ႉ၊သူတႄႇယူႇၵႃႈၼႂ်းတၢင်းယုမ်ႇမၢတ်ႈဢေႃႈ။
ပိူဝ်ႈၼႆလႄႈၵဝ်တႅပ်းတတ်းၸႂ်ဢမ်ႇမႃးလႄႇသူထႅင်ႈ၊ၼင်ႇႁိုဝ်သူတၵ်းဢမ်ႇလႆႈမႆႈၸႂ်ၼၼ်ႉဢေႃႈ။-
လွင်ႈမၼ်းၸမ်ႉ၊ပေႃးသူလႆႈမႆႈၸႂ်ၸိုင်၊ၼွၵ်ႈသေၵေႃႉဢၼ်ၵဝ်ၶႃႈႁဵတ်းႁႂ်ႈမႆႈၸႂ်ၼၼ်ႉၽူႈလႂ်တၵ်းႁဵတ်းႁႂ်ႈၵဝ်ၶႃႈၸူမ်းသိူဝ်းလႆႈ။-
ပိူဝ်ႈၼႆလႄႈၵဝ်ဢမ်ႇၶႂ်ႈႁႂ်ႈသူၸိူဝ်းဢၼ်ထုၵ်ႇလီႁဵတ်းႁႂ်ႈၵဝ်ၸူမ်းသိူဝ်းၼၼ်ႉသမ်ႉႁဵတ်းႁႂ်ႈၵဝ်လႆႈမႆႈၸႂ်လႄႈၵဝ်ၸင်ႇဢမ်ႇပႆႇမႃးလႄႇသူဝႃႈၼႆ၊လႆႈတႅမ်ႈလိၵ်ႈၽိုၼ်ဢွၼ်တၢင်းၼၼ်ႉပၼ်သူယဝ်ႉဢေႃႈ။ လွင်ႈမၼ်းၸမ်ႉ၊ၵဝ်ႁုဝႃႈ၊တၢင်းဢၼ်ၵဝ်ၸူမ်းသိူဝ်းၼၼ်ႉပဵၼ်လွင်ႈတၢင်းဢၼ်သူၵူႈၵေႃႉလႆႈသိူဝ်းပျေႃႇဢေႃႈ။-
မိူဝ်ႈဢၼ်ၵဝ်တႅမ်ႈလိၵ်ႈၼၼ်ႉၵဝ်ပႃးတင်းၸႂ်တုၵ်ႉၶႃႉ၊ၸႂ်ဢၼ်ငိၼ်းၽၢၼ်ၼႃႇလႄႈၼမ်ႉတႃတူၵ်းယူႇသေယဝ်ႉ၊တႅမ်ႈပၼ်ၵႂႃႇႁႂ်ႈသူလႆႈၸဵပ်းၸႂ်ဢမ်ႇၸႂ်ႈ။ တႅမ်ႈပၼ်ၵႂႃႇႁႂ်ႈသူလႆႈႁုၸႂ်ႁၵ်ႉမႅတ်ႈတႃႇၵဝ်ဢၼ်မီးၵႃႈၼိူဝ်သူၼမ်ၵႃႈႁိုဝ်ၼၼ်ႉဢေႃႈ။
ၵမ်းၼႆႉ၊ပေႃးသေၵေႃႉသေၵူၼ်းလႆႈႁဵတ်းႁႂ်ႈသေၵေႃႉၵေႃႉလႆႈၸဵပ်းၸႂ်ၸိုင်၊မၼ်းႁဵတ်းႁႂ်ႈၵဝ်ၵေႃႉလဵဝ်လႆႈၸဵပ်းၸႂ်ဢမ်ႇၸႂ်ႈ။ မၼ်းလႆႈႁဵတ်းႁႂ်ႈသူၵမ်ႈၽွင်ႈလႆႈၸဵပ်းၸႂ်ၸွမ်းဢေႃႈ။ (ၵဝ်ၶႃႈဝႃႈၵမ်ႈၽွင်ႈၼၼ်ႉၵွပ်ႈပိူဝ်ႈၵဝ်ဢမ်ႇၶႂ်ႈတၢင်ႇဢပျတ်ႈၵေႃႉၼၼ်ႉၼႃႇလူင်လၢင်ဢေႃႈ။)-
ပေႃးၼႂ်းသူၵမ်ႈၼမ်ပၼ်တၢမ်ႇမၼ်းၸိူဝ်ႉၼင်ႇၼၼ်ယဝ်ႉၵေႃႈပေႃးယဝ်ႉဢေႃႈ။-
မိူဝ်ႈလဵဝ်ၼႆႉၸမ်ႉ၊ၼင်ႇႁိုဝ်မၼ်းတၵ်းဢမ်ႇလႆႈၸဵပ်းၸႂ်ႁႅင်းၼႃႇလႄႈၸႂ်လုႁႅင်းဢူၼ်ႈၵႂႃႇၸိုင်၊သူထုၵ်ႇလီပွႆႇဢပျတ်ႈမၼ်းသေလႄႈပၼ်ဢဵၼ်ပၼ်ႁႅင်းမၼ်းဢေႃႈ။-
ႁႂ်ႈမၼ်းလႆႈႁုလွင်ႈဢၼ်သူႁၵ်ႉမၼ်းတႄႉတႄႉဝႃႈဝႃႈၸိုင်၊ၼႄပျႃးၸႂ်မႅတ်ႈတႃႇတီႈမၼ်းတႃႉ၊ဝႃႈၼႆၵဝ်ၶႃႈတိုၵ်းယူင်းသူဢေႃႈ။-
ပိူဝ်ႈၼႆၸင်ႇ၊ၵဝ်တႅမ်ႈလိၵ်ႈၽိုၼ်ၼိုင်ႈပၼ်ၵႂႃႇတီႈသူၵွပ်ႈပိူဝ်ႈၶႂ်ႈၸၢမ်းတူၺ်းလႄႈႁႂ်ႈလႆႈႁုဝႃႈ၊သူယင်းပႂ်ႉထွမ်ႇဢဝ်ၵႂၢမ်းၵဝ်ၵူႈၸိူဝ်ႉၵူႈမဵဝ်းယူႇႁိူဝ်း။-
ပေႃးသူပွႆႇလွတ်ႈဢပျတ်ႈပိူၼ်ႈသေၵေႃႉၵေႃႉၸိုင်၊ၵဝ်ၵေႃႈတၵ်းပွႆႇလွတ်ႈပၼ်ၵေႃႉၼၼ်ႉဢေႃႈ။ ပေႃးမီးလွင်ႈဢၼ်ၵဝ်ပွႆႇလွတ်ႈဢပျတ်ႈသေၵေႃႉသေၵူၼ်းၸိုင်၊ၵဝ်လႆႈပွႆႇလွတ်ႈဢပျတ်ႈၵေႃႉၼၼ်ႉၵွပ်ႈပိူဝ်ႈၵဝ်ထွၵ်ႈတေႃႇၼႃႈသူတင်းလၢႆၵႃႈတီႈၽၢႆႇၼႃႈ ၸဝ်ႈၶရိၸ်ႈ၊ ဢေႃႈ။-
လွင်ႈမၼ်းၸမ်ႉ၊တၢင်းဢၼ်ပွႆႇလွတ်ႈဢပျတ်ႈၵၼ်ၼၼ်ႉတၵ်းလႆႈဝႆႉၵတိ၊ၼင်ႇႁိုဝ်ႁဝ်းတၵ်းဢမ်ႇလႆႈတူၵ်းတႂ်ႈဢႃႇၼႃႇ ၸႃႇတၢၼ်ႇ၊ ၵႂႃႇ၊ပိူဝ်ႈဝႃႈႁဝ်းႁုတၢင်းၵျၢမ်ႇမၼ်းၼၼ်ႉဢေႃႈ။
မိူဝ်ႈဢၼ်ၵဝ်ႁွတ်ႈၽႅဝ်ၵႂႃႇၵႃႈတီႈဝဵင်း ထရေႃး၊ ႁႂ်ႈလႆႈႁေႃးလၢတ်ႈၶၢဝ်ႇတြႃးသိူဝ်းပျေႃႇ ၸဝ်ႈၶရိၸ်ႈ၊ ၸိုင်၊ၵဝ်လႆႈႁုလွင်ႈဢၼ်ၸဝ်ႈၽြႃးၽုၺ်ႇပၼ်ၽၵ်းတူႁႂ်ႈၵဝ်လႆႈပွင်ႁဵတ်းၼႃႈၵၢၼ်ၵဝ်ၼၼ်ႉဢေႃႈ။-
ၵူၺ်းၵႃႈ၊ၵွပ်ႈပိူဝ်ႈၵဝ်ဢမ်ႇလႆႈထူပ်းႁၼ်ၼွင်ႉၵဝ် တိတု၊ ၵႃႈတီႈၼၼ်ႈၸိုင်၊ၸႂ်ၵဝ်ဢမ်ႇလီဢမ်ႇၶျၢမ်းသႃႇလႄႈၵဝ်ၸင်ႇတၵ်ႉလၢတ်ႈတီႈပီႈၼွင်ႉၵႃႈတီႈၼၼ်ႈသေယဝ်ႉ၊ဢွၵ်ႇတၢင်းၵႂႃႇၸူးမိူင်း မႃႇၵေႇတေႃးၼိ၊ သေဢေႃႈ။
ယွင်ႈယေႃးတၢင်ႇၵျေးၸူးၽြႃးပဵၼ်ၸဝ်ႈတီႈၶႃႈဢေႃႈ။ လွင်ႈမၼ်းၸမ်ႉ၊မၼ်းၸဝ်ႈၸုင်သူင်ႇႁဝ်းလူၺ်ႈ ၸဝ်ႈၶရိၸ်ႈ၊ ႁႂ်ႈႁဝ်းလႆႈၶၢမ်ႇပွႆးဢၼ်ပႄႉၼႅင်ႇတႃႇသေႇဢမ်ႇၵႃး၊မၼ်းၸဝ်ႈယင်းၸႂ်ႉႁဝ်းႁႂ်ႈႁေႃးလၢတ်ႈလွင်ႈ ၸဝ်ႈၶရိၸ်ႈ၊ ၼၼ်ႉၸွတ်ႇတူဝ်ႈၵႂႃႇၵႃႈတီႈၵူၼ်းၵူႈၵေႃႉၵူႈၵူၼ်းမိူၼ်ၸိူဝ်ႉၼင်ႇဢၢႆႁွမ်ၸွတ်ႇတူဝ်ႈၵႂႃႇၵူႈတီႈၵူႈလႅၼ်ၼၼ်ႉဢေႃႈ။-
ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ၊ႁဝ်းပဵၼ်ဢၢႆဢၼ်ႁွမ်ဢၼ်ႁူၺ်းဢၼ် ၸဝ်ႈၶရိၸ်ႈ၊ သၢၵ်ႈလူႇတီႈၽြႃးပဵၼ်ၸဝ်ႈ၊ဢၼ်ၸွတ်ႇၵႂႃႇၵႃႈၼႂ်းၵႄႈၵူၼ်းၸိူဝ်းဢၼ်ၽြႃးပဵၼ်ၸဝ်ႈၵႄႇၶျွတ်ႈဢဝ်၊ဢိၵ်ႇတင်းၶဝ်ၸိူဝ်းဢၼ်တူၵ်းႁွတ်ႈယူႇၵႃႈၼႂ်းဢၼ်လုလႅဝ်ၵႂႃႇၸိူဝ်းၼၼ်ႉဢေႃႈ။-
ပုၼ်ႈၶဝ်ၸိူဝ်းဢၼ်ယင်းႁွတ်ႈတၢင်းဢၼ်လုလႅဝ်ၵႂႃႇယူႇၼၼ်ႉ၊ပဵၼ်ဢၢႆမဵၼ်ဢၼ်ပၼ်တၢမ်ႇတၢႆၶဝ်ၼၼ်ႉလႄႈပုၼ်ႈၶဝ်ၸိူဝ်းဢၼ်ၽြႃးပဵၼ်ၸဝ်ႈၵႄႇၶျွတ်ႈဢဝ်ယူႇၸမ်ႉ၊ပဵၼ်ဢၢႆႁွမ်ဢၼ်ပၼ်ဢသၢၵ်ႈၶဝ်ၼၼ်ႉဢေႃႈ။ ပေႃးပဵၼ်ၼႆၸိုင်၊ၽူႈလႂ်တၢတ်ႈၼိူင်ႇလႄႈၸၢင်ႈႁဵတ်းၵၢၼ်ငၢၼ်းၸိူဝ်ႉၼင်ႇၼႆလႆႈ။-
ႁဝ်းဢမ်ႇမိူၼ်ပိူၼ်ႈတၢင်ႇၵေႃႉၼမ်ၼႃႇဢၼ်ႁဵတ်းႁႂ်ႈၵႃႈၶၼ်ၼုၵ်ႈၵပၢတ်ႈတြႃး၊ၽြႃးပဵၼ်ၸဝ်ႈတူၵ်းယွမ်းၵႂႃႇၼၼ်ႉလႄႈ၊ၵွပ်ႈပိူဝ်ႈၽြႃးပဵၼ်ၸဝ်ႈပွႆႇၸႂ်ႉႁဝ်းၼၼ်ႉႁဝ်းမီးၸႂ်ဢၼ်သိုဝ်ႈဢၼ်ယူဝ်းႁေႃးလၢတ်ႈၸိူဝ်ႉၼင်ႇၵူၼ်းၸႂ်ႉၵူၼ်းသွႆ ၸဝ်ႈၶရိၸ်ႈ၊ ၵႃႈတီႈၽၢႆႇၼႃႈၽြႃးပဵၼ်ၸဝ်ႈဢေႃႈ။
ၸွင်ႇၵႂၢမ်းႁဝ်းၼႆႉပဵၼ်ၵႂၢမ်းဢၼ်ႁဝ်းယွင်ႈယေႃးတူဝ်ၸဝ်ႈၵဝ်ႇႁိုဝ်း။ ဢမ်ႇၼၼ်ၵေႃႈၸွင်ႇႁဝ်းတေလႆႈမီးလိၵ်ႈဢၼ်ထွၵ်ႈၶၢမ်ႇတူဝ်ၵဝ်ၼၼ်ႉပၼ်တီႈသူ မိူၼ်ၵူၼ်းၵမ်ႈၽွင်ႈႁဵတ်းၼၼ်ႉႁိုၼ်း၊ၸွင်ႇႁဝ်းတေလႆႈမီးလိၵ်ႈထွၵ်ႈၶၢမ်ႇဢၼ်သူတႅမ်ႈပၼ်ၼၼ်ႉႁိုဝ်း။-
တူဝ်သူပဵၼ်တူဝ်လိၵ်ႈဢၼ်တႅမ်ႈဝႆႉ၊ၵႃႈၼႂ်းမၢၵ်ႇႁူဝ်ၸႂ်ႁဝ်း၊လိၵ်ႈဢၼ်ၵူၼ်းၵူႈၵေႃႉႁုလႄႈၽတ်းဢၢၼ်ႇလႆႈၼၼ်ႉဢေႃႈ။-
သူပဵၼ်တူဝ်လိၵ်ႈဢၼ် ၸဝ်ႈၶရိၸ်ႈ၊ တႅမ်ႈၼၼ်ႉလႄႈႁဝ်းလႆႈဢဝ်သူင်ႇၵႂႃႇၼၼ်ႉ၊ဢမ်ႇလႆႈဢဝ်တင်းၼမ်ႉမိုၵ်ႉတႅမ်ႈဝႆႉ၊ဢၼ်လႆႈဢဝ်တင်းဝိၺိၺ်ႇၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉတႅမ်ႈဝႆႉလႄႈ၊ဢမ်ႇလႆႈတႅမ်ႈဝႆႉၵႃႈၼိူဝ်ၶႅပ်းမၢၵ်ႇႁိၼ်၊တႅမ်ႈသႂ်ႇဝႆႉၵႃႈၼႂ်းႁူဝ်ၸႂ်ၵူၼ်းဢေႃႈ။
ႁဝ်းယုမ်ႇယမ်တမ်းၸႂ်ၼႂ်းၽြႃးပဵၼ်ၸဝ်ႈၵွပ်ႈလူၺ်ႈ ၸဝ်ႈၶရိၸ်ႈ၊ လႄႈႁဝ်းလၢတ်ႈၸိူဝ်ႉၼင်ႇၼႆဢေႃႈ။-
မၼ်းဢမ်ႇၸႂ်ႈဝႃႈ၊ႁဝ်းၵတ်ႉၶႅၼ်ႇၼႃႇလႄႈဢိင်ပိင်ႇၺႃႇတူဝ်ၸဝ်ႈၵဝ်ႇသေယဝ်ႉ၊ၸၢင်ႈႁဵတ်းၵၢၼ်ငၢၼ်းၸိူဝ်းၼႆႉ။ ႁဝ်းဢိင်ပိင်ႇၺႃႇၽြႃးပဵၼ်ၸဝ်ႈလႄႈတၢတ်ႈၼိူင်ႇလႆႈဢေႃႈ။-
မၼ်းၸဝ်ႈႁဵတ်းႁႂ်ႈႁဝ်းၸၢင်ႈမေႃႁႂ်ႈလႆႈပဵၼ်သြႃႇပွင်ၵၢၼ်ပတိၺိၺ်ႇတြႃးဢၼ်မႂ်ႇဢေႃႈ။ ပတိၺိၺ်ႇတြႃးၼၼ်ႉ၊ပဵၼ်ၸွမ်းတြႃးဢၼ်တႅမ်ႈဝႆႉဢမ်ႇၸႂ်ႈ။ မၼ်းပဵၼ်ၸွမ်းဝိၺိၺ်ႇၸဝ်ႈဢေႃႈ။ တြႃးဢၼ်တႅမ်ႈဝႆႉၼၼ်ႉ၊ၸၢင်ႈပၼ်တၢမ်ႇတၢႆလႄႈဝိၺိၺ်ႇၸဝ်ႈၸမ်ႉ၊ၸၢင်ႈပၼ်ဢသၢၵ်ႈဢေႃႈ။
တြႃးၵဝ်ႇၼၼ်ႉ၊ပဵၼ်တူဝ်လိၵ်ႈဢႅၵ်ႉၶရႃႇဢၼ်ၶႅၵ်းဝႆႉ၊ၵႃႈၼိူဝ်ၶႅပ်းမၢၵ်ႇႁိၼ်လႄႈမိူဝ်ႈဢၼ်ၽြႃးပဵၼ်ၸဝ်ႈပၼ်တြႃးၼၼ်ႉၸိုင်၊မုၼ်ၽုင်းမၼ်းၸဝ်ႈလႆႈပေႃႇဢွၵ်ႇထၢင်ႇသႃးမႃးၵႃႈတီႈ မူဝ်းသေႇ၊ ဢေႃႈ။ ပိၵ်ႉသမ်ႉဝႃႈ၊ဢရွင်ႇၼႃႈ မူဝ်းသေႇ၊ ဢၼ်ႁိူဝ်ႈႁိူင်းၼႃႇၼၼ်ႉပဵၼ်ဢၼ်ၸၢင်ႈႁၢႆၵႂႃႇသေၵေႃႈ၊မၼ်းပဵၼ်သၢႆဢရွင်ႇဢၼ်ႁိူဝ်ႈလႅင်းၼႃႇထၢၼ်ႈပေႃးၵူၼ်းမဵဝ်း ဢိသရေး၊ ၶဝ်ဢမ်ႇယႅၵ်ႉဢမ်ႇတူၺ်းၼႃႈမၼ်းလႆႈဢေႃႈ။ ပေႃးတြႃးဢၼ်ပၼ်တၢမ်ႇတၢႆၼၼ်ႉ၊ယင်းမီးမုၼ်ၽုင်းထၢၼ်ႇၼၼ်ႉၸိုင်၊-
တၢင်းဢၼ်ႁဵတ်းၸွမ်းတြႃးဝိၺိၺ်ႇၸဝ်ႈၼၼ်ႉ၊ယဵင်ႈၶႅၼ်းတေဢမ်ႇမီးမုၼ်ၽုင်းဢၼ်ယႂ်ႇမျၢတ်ႈၼႃႇသေၼၼ်ႉႁိုဝ်း။-
ပေႃးတြႃးဢၼ်ၸီႇယၢင်ႇဢပျတ်ႈၵူၼ်းၼၼ်ႉယင်းမီးမုၼ်ၽုင်းၸိုင်၊တၢင်းႁဵတ်းတၢင်းသၢင်ႈဝိၺိၺ်ႇၸဝ်ႈဢၼ်ႁႂ်ႈၵူၼ်းသိုဝ်ႈတေႃႇၼၼ်ႉယဵင်ႈၶႅၼ်းမီးမုၼ်ၽုင်းယႂ်ႇၼႃႇဢေႃႈ။-
တီႈတႄႉမၼ်းၼၼ်ႉသၢႆဢရွင်ႇမုၼ်ၽုင်းဢၼ်မႂ်ႇၼၼ်ႉႁိူဝ်ႈလႅင်းပႄႉၵႂႃႇလႄႈသၢႆဢရွင်ႇမုၼ်ၽုင်းဢၼ်ၵဝ်ႇဢၼ်ယၢမ်ႈႁိူဝ်ႈႁိူင်းမိူဝ်ႈၵွၼ်ႇၼၼ်ႉလႆႈမွတ်ႇႁၢႆၵႂႃႇဢေႃႈ။-
ပေႃးတြႃးဢၼ်ၸၢင်ႈမွတ်ႇႁၢႆၵႂႃႇၼၼ်ႉယင်းမီးမုၼ်ၽုင်းၸိုင်၊တၢင်းႁဵတ်းတၢင်းသၢင်ႈဝိၺိၺ်ႇၸဝ်ႈဢၼ်တႄႇယူႇတႃႇသေႇၼၼ်ႉယဵင်ႈၶႅၼ်းမီးမုၼ်ၽုင်းဢေႃႈ။
ၵွပ်ႈပိူဝ်ႈႁဝ်းမီးတၢင်းဢၼ်မုင်ႈထႃႈမွင်းထႃႈၸိူဝ်ႉၼင်ႇၼႆလႄႈႁဝ်းၸႂ်ယႂ်ႇႁတ်းႁၢၼ်ၼႃႇဢေႃႈ။-
ႁဝ်းၼႆႉဢမ်ႇႁဵတ်းမိူၼ်ၸိူဝ်ႉၼင်ႇသြႃႇ မူဝ်းသေႇ၊ ဢၼ်ဢဝ်ၽႃႈသေႁူမ်ႇၼႃႈတူဝ်ၸဝ်ႈၵဝ်ႇဝႆႉ၊ၼင်ႇႁိုဝ်ၵူၼ်းမဵဝ်း ဢိသရေး၊ ၶဝ်တၵ်းဢမ်ႇလႆႈတူၺ်းလႆႈႁၼ်ဢရွင်ႇႁိူဝ်ႈႁိူင်းၼၼ်ႉလႆႈဝွတ်ႈႁၢႆၵႂႃႇလွႆးလွႆးၼၼ်ႉဢေႃႈ။-
ႁူဝ်ၸႂ်ၶဝ်ၼၼ်ႉ၊ၼူၵ်ႇၼႃတိုဝ်တၼ်ဝႆႉလႄႈမိူဝ်ႈဢၼ်ၶဝ်ၽတ်းဢၢၼ်ႇလိၵ်ႈပတိၺိၺ်ႇတြႃးၵဝ်ႇၼၼ်ႉၽႃႈဢၼ်ႁူမ်ႇၼႃႈၼၼ်ႉယင်းႁူမ်ႇဝႆႉဢမ်ႇပိုတ်ႇဢမ်ႇပႅတ်ႈႁၢၼ်ႉတေႃႇမိူဝ်ႈလဵဝ်ၶဝ်ဢမ်ႇႁုပွင်ႇလႅင်းလႆႈဢေႃႈ။ ၽႃႈဢၼ်ႁူမ်ႇဝႆႉၼၼ်ႉ၊တၵ်းၽုၺ်ႇပိုတ်ႇယၢမ်းမိူဝ်ႈဢၼ်ၶဝ်ယုမ်ႇမၢတ်ႈ ၸဝ်ႈၶရိၸ်ႈ၊ ၼၼ်ႉၵူၺ်းဢေႃႈ။-
ၸႂ်ႈတႄႉ၊မိူဝ်ႈဢၼ်ၶဝ်ၽတ်းဢၢၼ်ႇၵျၢမ်းတြႃးသြႃႇ မူဝ်းသေႇ၊ ၼၼ်ႉၽႃႈၼၼ်ႉ၊ယင်းႁူမ်ႇသုမ်ႇႁူဝ်ၸႂ်ၶဝ်ဝႆႉယူႇႁၢၼ်ႉတေႃႇမိူဝ်ႈလဵဝ်ဢေႃႈ။-
ၵူၺ်းၵႃႈ၊မိူဝ်ႈဢၼ်ၵူၼ်းႁဝ်းၶၢႆႉပုတ်ႈၶဝ်ႈၸူးတီႈၸဝ်ႈၽြႃးၼၼ်ႉၸိုင်၊လွင်ႈတၢင်းဢၼ်ႁူမ်ႇသုမ်ႇဝႆႉၼၼ်ႉတၵ်းပိုတ်ႇဢွၵ်ႇႁၢႆၵႂႃႇဢေႃႈ။-
လွင်ႈမၼ်းၸမ်ႉ၊ “ၸဝ်ႈၽြႃး” ၼၼ်ႉ၊ပဵၼ်ဝိၺိၺ်ႇၸဝ်ႈလႄႈတီႈဢၼ်ဝိၺိၺ်ႇၸဝ်ႈၽြႃးမီးၼၼ်ႉ၊မီးၵတ်းယဵၼ်ၶျၢမ်းသႃႇလႄႈတၢင်းဢၼ်လွတ်ႈလႅဝ်းဢေႃႈ။-
ပိူဝ်ႈၼႆလႄႈႁဝ်းၵႃႈမီးၵူႈၵေႃႉၵူႈၵူၼ်းၽုၺ်ႇပိုတ်ႇၽႃႈဢၼ်ႁူမ်ႇသုမ်ႇၼႃႈၼၼ်ႉပႅတ်ႈသေယဝ်ႉ၊ႁၼ်မုၼ်ၽုင်းၸဝ်ႈၽြႃးသေလႄႈၸဝ်ႈၽြႃးဢၼ်ပဵၼ်ၸဝ်ႈဝိၺိၺ်ႇၼၼ်ႉ၊ႁဵတ်းႁႂ်ႈႁဝ်းၶၢႆႉပုတ်ႈလႅၵ်ႈလၢႆႈပဵၼ်မိူၼ်ၼင်ႇႁၢင်ႈၽၢင်မၼ်းၸဝ်ႈလႄႈ၊မုၼ်ၽုင်းၸဝ်ႈပႃးၼိုင်ႈယဝ်ႉပႃးၼိုင်ႈထၢပ်ႈသႂ်ႇၸွမ်းၼင်ႇဝိၺိၺ်ႇၸဝ်ႈၽြႃးပွႆႇမုၼ်ၽုင်းမၼ်းၸဝ်ႈၼၼ်ႉဢေႃႈ။
ၵွပ်ႈပိူဝ်ႈၽြႃးပဵၼ်ၸဝ်ႈဢဵတ်းလူလႄႈပၼ်ၼႃႈၵၢၼ်ၸိူဝ်ႉၼင်ႇၼႆတီႈႁဝ်းၼၼ်ႉ၊ႁဝ်းဢမ်ႇလႆႈၸႂ်လဵၵ်ႉႁႅင်းဢူၼ်ႈဢေႃႈ။-
ႁဝ်းပႄႇပႅတ်ႈလွင်ႈတၢင်းဢၼ်လၵ်ႉလွမ်ႁဵတ်းတင်းလၢႆ၊ဢိၵ်ႇတင်းလွင်ႈတၢင်းဢၼ်လီဢူၵ်းလီဢၢႆလႂ်ယဝ်ႉ၊ႁဝ်းဢမ်ႇႁဵတ်းတၢင်းဢၼ်ပႅတ်ႉလႅၼ်၊ႁဝ်းဢမ်ႇၶွမ်ႈပိၼ်ႈပႅတ်ႈၼုၵ်ႈၵပၢတ်ႈတြႃးၸဝ်ႈလႄႈႁဝ်းမွၵ်ႇလၢတ်ႈတြႃးၸဝ်ႈဢၼ်မၢၼ်ႇဢၼ်မႅၼ်ႈၼၼ်ႉလႅင်းလႅင်းဢေႃႈ။ ႁဝ်းယင်းၶတ်းၸႂ်ၼႄပျႃးသဵတ်ႈၸႃႇလႄႈတူဝ်ႁဝ်းႁႂ်ႈမႅၼ်ႈၸႂ်ဢၼ်ႁုတူဝ်ၸဝ်ႈၵဝ်ႇၵူၼ်းၵူႈၵေႃႉၵူႈၵူၼ်းၵႃႈတီႈၽၢႆႇၼႃႈၽြႃးပဵၼ်ၸဝ်ႈၼၼ်ႉဢေႃႈ။-
ပေႃးၶၢဝ်ႇတြႃးသိူဝ်းပျေႃႇၸဝ်ႈ၊ဢၼ်ႁဝ်းႁေႃးလၢတ်ႈၼႆႉ၊မီးတၢင်းဢၼ်ႁူမ်ႇသုမ်ႇဝႆႉၸိုင်၊မၼ်းႁူမ်ႇသုမ်ႇဝႆႉပုၼ်ႈတႃႇၶဝ်ၸိူဝ်းဢၼ်တၵ်းႁွတ်ႈထိုင်တၢင်းဢၼ်လုသုမ်းၼၼ်ႉၵူၺ်းဢေႃႈ။-
ၶဝ်ၼၼ်ႉ၊ဢမ်ႇယုမ်ႇမၢတ်ႈၵွပ်ႈပိူဝ်ႈၽြႃးလေႃးၵီႇၼႆႉဢဝ်ၸႂ်ၶဝ်သိမ်းဝႆႉၵႃႈၼႂ်းလပ်းသိင်ႇဢေႃႈ။ မၼ်းလပ်ႉၵင်ႈဢမ်ႇႁႂ်ႈၶဝ်လႆႈႁၼ်ဢၼ်လႅင်းဢၼ်ထွင်ႇႁိူဝ်ႈၸူးတီႈၶဝ်၊ဢၼ်လႅင်းဢၼ်ပဵၼ်မႃးၵႃႈတီႈၶၢဝ်ႇတြႃးသိူဝ်းပျေႃႇလွင်ႈမုၼ်ၽုင်း ၸဝ်ႈၶရိၸ်ႈ၊ ၸဝ်ႈဢၼ်ပဵၼ်ပုင်ႇႁၢင်ႈၽြႃးပဵၼ်ၸဝ်ႈၸႅတ်ႈၸႅတ်ႈၼၼ်ႉဢေႃႈ။-
ႁဝ်းႁေႃးလၢတ်ႈလွင်ႈတူဝ်ၸဝ်ႈၵဝ်ႇဢမ်ႇၸႂ်ႈ။ ႁဝ်းႁေႃးလၢတ်ႈလွင်ႈ ၸဝ်ႈယေႇသုၶရိၸ်ႈ၊ ပဵၼ်ၸဝ်ႈၽြႃး၊ဢိၵ်ႇတင်းလွင်ႈဢၼ်ႁဝ်းပဵၼ်ၵူၼ်းၸႂ်ႉၵူၼ်းသွႆသူလႄႈပဵၼ်ပုၼ်ႈဢၵျူဝ်း ၸဝ်ႈယေႇသု၊ ဢေႃႈ။-
ဢၼ်ၽြႃးပဵၼ်ၸဝ်ႈလၢတ်ႈဝႃႈ၊ “ႁႂ်ႈဢၼ်လႅင်းႁိူဝ်ႈလႅင်းမႃးၵႃႈၼႂ်းဢၼ်လပ်းသိင်ႇသေ၊” ဝႃႈၼင်ႇၼႆၼၼ်ႉ၊ပဵၼ်ၽြႃးသူႇလဵဝ်ၵၼ်တင်းၸဝ်ႈၽြႃးဢၼ်ႁႂ်ႈဢၼ်လႅင်းၸဝ်ႈထွင်ႇႁိူဝ်ႈၵႃႈၼႂ်းႁူဝ်ၸႂ်ႁဝ်း၊ႁႂ်ႈႁဝ်းလႆႈႁၼ်မုၼ်ၽုင်းၽြႃးပဵၼ်ၸဝ်ႈဢၼ်ႁိူဝ်ႈလႅင်းယူႇၵႃႈၼိူဝ်ၼႃႈ ၸဝ်ႈၶရိၸ်ႈ၊ ၼၼ်ႉဢေႃႈ။
ၼႂ်းဝႃႈၼၼ်သေၵေႃႈ၊ၽြႃးပဵၼ်ၸဝ်ႈဢဝ်ၽၼ်ႇတႃႇဢၼ်လီဢၼ်မျၢတ်ႈၼႆႉ၊သိမ်းဝႆႉၼႂ်းႁဝ်းဢၼ်မိူၼ်မေႃႈလိၼ်ၼၼ်ႉၼင်ႇႁိုဝ်မၼ်းၸဝ်ႈတၵ်းလႆႈၼႄပျႃးလွင်ႈဢၼ်ၽုင်းတၼ်းၶူဝ်းဢၼ်ယႂ်ႇမျၢတ်ႈၵႃႈၼိူဝ်တင်းလၢႆဢၼ်ဢမ်ႇၸႂ်ႈၶွင်ႁဝ်း၊ပဵၼ်ၶွင်ၽြႃးပဵၼ်ၸဝ်ႈၵူၺ်းဢေႃႈ။-
ႁဝ်းၵမ်းၵမ်းလႆႈၶၢမ်ႇတုၵ်ႉၶႃႉၵိၼ်းၸႂ်ဢေႃႈ။ ၵူၺ်းၵႃႈ၊ဢမ်ႇလႆႈႁွတ်ႈတၢင်းဢၼ်ႁၵ်းႁိၵ်းလုလႅဝ်။ မၢင်ပွၵ်ႈႁဝ်းၶႆႈၸႂ်ဢမ်ႇၶိုတ်းဢမ်ႇထိုင်ဢေႃႈ။ ၵူၺ်းၵႃႈ၊ၸႂ်ဢမ်ႇလုသေပွၵ်ႈ။-
ႁဝ်းမီးရၢၼ်ႇသူႇၼမ်ၼႃႇဢေႃႈ။ ၵူၺ်းၵႃႈ၊ႁဝ်းဢမ်ႇတွၼ်ႉၵၢင်းလွတ်ႈတင်းၵေႃႉသႄႈ။ ႁဝ်းယၢမ်ႈလႆႈၶၢမ်ႇပိူၼ်ႈပေႃႉပိူၼ်ႈထုပ်ႉလၢႆပွၵ်ႈဢေႃႈ။ ၵူၺ်းၵႃႈ၊ဢမ်ႇလႆႈႁွတ်ႈထိုင်တၢင်းဢၼ်လုလႅဝ်ၵႂႃႇဢေႃႈ။-
ႁဝ်းပႃးဢဝ်တၢင်းတၢႆ ၸဝ်ႈယေႇသု၊ ၼၼ်ႉ၊ဝႆႉၼႂ်းတူဝ်ၶၼ်ႇထႃႇႁဝ်းတႃႇသေႇ၊ႁႂ်ႈလွင်ႈဢၼ် ၸဝ်ႈယေႇသု၊ ဢသၢၵ်ႈလိပ်းယူႇၼၼ်ႉ၊တၵ်းထၢင်ႇသႃးၵႃႈၼႂ်းတူဝ်ၶၼ်ႇထႃႇႁဝ်းဢေႃႈ။-
ၼႂ်းၸူဝ်ႈတႃႇဢသၢၵ်ႈႁဝ်းၼႆႉႁဝ်းလႆႈထူပ်းၺႃးၽေးတၢင်းတၢႆတႃႇသေႇ၊ပုၼ်ႈဢၵျူဝ်း ၸဝ်ႈယေႇသု၊ ႁႂ်ႈလွင်ႈဢၼ် ၸဝ်ႈယေႇသု၊ ဢသၢၵ်ႈလိပ်းယူႇၼၼ်ႉတၵ်းထၢင်ႇသႃးၵႃႈၼႂ်းတူဝ်ၼိူဝ်ႉလိူတ်ႈႁဝ်းဢၼ်ၸၢင်ႈတူႇၼဝ်ႈၼၼ်ႉဢေႃႈ။-
လွင်ႈတၢင်းၼႆႉမၼ်းပွင်ႇဝႃႈ၊ႁဝ်းလႆႈထူပ်းၺႃးၽေးတၢင်းတၢႆလႄႈသူသမ်ႉလႆႈထူပ်းၺႃးဢသၢၵ်ႈဢေႃႈ။
ၸွမ်းၼင်ႇဢၼ်ႁဝ်းမီးၸႂ်ဝိၺိၺ်ႇတၢင်းယုမ်ႇမၢတ်ႈဢၼ်လဵဝ်ၵၼ်တင်းၵေႃႉဢၼ်တႅမ်ႈဝႆႉၼႂ်းၵျၢမ်းလိၵ်ႈလႄႈဝႃႈ၊ “ၵဝ်ႁေႃးလၢတ်ႈၵွပ်ႈပိူဝ်ႈၵဝ်ယုမ်ႇမၢတ်ႈဢေႃႈ၊” ဝႃႈၼင်ႇၼႆၼၼ်ႉလႄႈ၊ႁဝ်းၵေႃႈယုမ်ႇမၢတ်ႈလႄႈႁေႃးလၢတ်ႈဢေႃႈ။-
ႁဝ်းႁုလွင်ႈဢၼ်ၽြႃးပဵၼ်ၸဝ်ႈ၊ၸဝ်ႈဢၼ်ဢဝ် ၸဝ်ႈယေႇသု၊ လုၵ်ႉၶိုၼ်းလိပ်းလႄႈမီးဢသၢၵ်ႈမႃးၼၼ်ႉ၊တၵ်းႁဵတ်းႁႂ်ႈႁဝ်းလုၵ်ႉၶိုၼ်းလိပ်းမႃးလူၺ်ႈၵၼ်တင်း ၸဝ်ႈယေႇသု၊ လႄႈတၵ်းဢဝ်သူတင်းႁဝ်းၶဝ်ႈၸူးၵႃႈတီႈမၼ်းၸဝ်ႈဢေႃႈ။-
လွင်ႈတၢင်းၵူႈၸိူဝ်ႉၵူႈပိူင်ၸိူဝ်းၼႆႉ၊ပဵၼ်မႃးပုၼ်ႈဢၵျူဝ်းသူလႄႈၵျေးၸူးၽြႃးပဵၼ်ၸဝ်ႈတူၵ်းႁွတ်ႈၵႃႈၼိူဝ်ၵူၼ်းၼမ်ၼႃႇမႃးတိၵ်းတိၵ်းသေယဝ်ႉ၊ၶဝ်တၵ်းလႆႈဢွၼ်ၵၼ်သူးတွင်းယွင်ႈယေႃးတၢင်ႇၵျေးၸူးၼမ်မႃးတိၵ်းတိၵ်း၊ႁႂ်ႈမုၼ်ၽုင်းၽြႃးပဵၼ်ၸဝ်ႈထၢင်ႇသႃးဢေႃႈ။
ၵွပ်ႈၼႆလႄႈႁဝ်းဢမ်ႇတွၼ်ႉၸႂ်လုသေပွၵ်ႈ။ ပိၵ်ႉသမ်ႉတူဝ်ၶၢပ်ႈၽၢႆႇတၢင်းၼွၵ်ႈႁဝ်းႁူင်ႈႁၢႆၵႂႃႇယူႇတိၵ်းတိၵ်းသေၵေႃႈ၊ၸႂ်ဝိၺိၺ်ႇၽၢႆႇတၢင်းၼႂ်းႁဝ်းၸမ်ႉ၊လႆႈၶၢမ်ႇတၢင်းဢၼ်မႄးႁဵတ်းပဵၼ်ဢၼ်မႂ်ႇယူႇၵူႈမိူဝ်ႈၵူႈဝၼ်းဢေႃႈ။-
ၽေးတုၵ်ႉၶႃႉဢၼ်ႁဝ်းလႆႈထူပ်းၺႃးဢိတ်းဢီႈၸူဝ်ႈၼိုင်ႈၶၢဝ်းၼိုင်ႈၼႆႉ တၵ်းႁဵတ်းႁႂ်ႈႁဝ်းမီးမုၼ်သရေႇထႃႇဝရႃႉလႄႈမုၼ်သရေႇၼၼ်ႉတၵ်းယဵင်ႈၶႅၼ်းယႂ်ႇမျၢတ်ႈၼႃႇသေၽေးတုၵ်ႉၶႃႉၼၼ်ႉဢေႃႈ။-
လွင်ႈမၼ်းၸမ်ႉ၊ႁဝ်းၸႂ်ၸပ်းၸႂ်ၸွႆးမဵဝ်းဢၼ်တႃႁၼ်လႆႈၼၼ်ႉဢမ်ႇၸႂ်ႈ။ ႁဝ်းၸႂ်ၸပ်းၸႂ်ၸွႆးမဵဝ်းဢၼ်တႃဢမ်ႇႁၼ်လႆႈၼၼ်ႉဢေႃႈ။ မဵဝ်းဢၼ်တႃႁၼ်လႆႈၼၼ်ႉၸၢင်ႈတႄႇယူႇၸူဝ်ႈၼိုင်ႈၶၢဝ်းၼိုင်ႈၵူၺ်းလႄႈမဵဝ်းဢၼ်တႃဢမ်ႇႁၼ်လႆႈၼၼ်ႉၸမ်ႉ၊တႄႇယူႇၼိၵ်ႈၸႃႉထႃႇဝရႃႉဢေႃႈ။
ႁဝ်းႁုလွင်ႈဢၼ်ပေႃးတူဝ်ၶၼ်ႇထႃႇႁဝ်း၊ဢၼ်ပဵၼ်သုမ်ႉဢၼ်ႁဝ်းသွၼ်ႈယူႇၼႂ်းလိၼ်မိူင်းၸူဝ်ႈၶၢဝ်းၼိုင်ႈၼႆႉလုၸိုင်၊ႁဝ်းမီးႁိူၼ်းၼိၵ်ႈၸႃႉထႃႇဝရႃႉဢၼ်ဢမ်ႇဢဝ်တင်းမိုဝ်းၵူၼ်းႁဵတ်းလႄႈပဵၼ်ႁိူၼ်းဢၼ်ၽြႃးပဵၼ်ၸဝ်ႈၽၢၼ်ႇသၢင်းႁဵတ်းပဵၼ်ဝႆႉ၊ပုၼ်ႈႁဝ်းၵႃႈၼိူဝ်မိူင်းၵၢင်ႁၢဝ်ပုၼ်ႉၼၼ်ႉယူႇဢေႃႈ။-
ၼႂ်းမိူဝ်ႈဢၼ်ႁဝ်းယင်းမီးယူႇၼႂ်းသုမ်ႉလိၼ်မိူင်းၼႆႉႁဝ်းၶႂ်ႈၼုင်ႈႁေႃႇတူဝ်မႂ်ႇႁဝ်းဢၼ်ဝႃႈ၊ႁိူၼ်းမိူင်းၵၢင်ႁၢဝ်ႁဝ်းၼႃႇၼၼ်ႉလႄႈၶၢင်းၶီၶၢင်းၽၢၼ်ယူႇဢေႃႈ။-
ပေႃးႁဝ်းလႆႈၼုင်ႈႁေႃႇတူဝ်မႂ်ႇႁဝ်းၸိုင်၊ႁဝ်းတၵ်းလႆႈယူႇတူဝ်ပူၺ်ဢမ်ႇၸႂ်ႈ။-
ႁဝ်းလႆႈယူႇၼႂ်းသုမ်ႉလိၼ်မိူင်းၼႆႉလႄႈတုၵ်ႉၶႃႉႁႅင်းၼႃႇလူင်လၢင်ၸင်ႇၶၢင်းၶီၶၢင်းၽၢၼ်ယူႇၼႆႉ။ ဢမ်ႇၸႂ်ႈဝႃႈ၊ႁဝ်းၶႂ်ႈထွတ်ႇပႅတ်ႈတူဝ်ၶၢပ်ႈၵဝ်ႇႁဝ်းဢေႃႈ။ ႁဝ်းၶၢင်းၵွပ်ႈပိူဝ်ႈႁဝ်းၶႂ်ႈၼုင်ႈႁေႃႇတူဝ်ၶၼ်ႇထႃႇဢၼ်မႂ်ႇ၊ၼင်ႇႁိုဝ်တူဝ်ၶၼ်ႇထႃႇႁဝ်းဢၼ်ၸၢင်ႈလုၸၢင်ႈတၢႆၼႆႉ၊ႁႂ်ႈလႆႈၶၢမ်ႇတၢင်းဢၼ်ဢသၢၵ်ႈထႃႇဝရႃႉဢိုၼ်ၵိၼ်ပႅတ်ႈၼၼ်ႉဢေႃႈ။-
ၽြႃးပဵၼ်ၸဝ်ႈ၊ပဵၼ်ၸဝ်ႈဢၼ်မႄးႁဵတ်းပၼ်ႁႂ်ႈႁဝ်းလႆႈၶၢႆႉပုတ်ႈၸိူဝ်ႉၼင်ႇၼႆလႄႈမၼ်းၸဝ်ႈဢဝ်ဝိၺိၺ်ႇၸဝ်ႈပၼ်ဝႆႉတီႈႁဝ်း၊ႁႂ်ႈလႆႈပဵၼ်ၸရၢၼ်ႇဢၼ်ဝႆႉတီႈႁဝ်းပုၼ်ႈဝၼ်းမိူဝ်းၼႃႈၼၼ်ႉဢေႃႈ။
ပိူဝ်ႈၼႆလႄႈႁဝ်းမီးၸႂ်ဢၼ်ယုမ်ႇယမ်တမ်းၸႂ်ယူႇတႃႇသေႇဝႃႈ၊မိူဝ်ႈဢၼ်ႁဝ်းယင်းတိုၵ်ႉမီးယူႇၼႂ်းၶၢပ်ႈတူဝ်ၶၼ်ႇထႃႇၼႆႉၸိုင်၊ႁဝ်းယၢၼ်ၵၼ်တင်းၸဝ်ႈၽြႃးယူႇဢေႃႈ။-
ႁဝ်းၵမ်ၵျၢင်ႉယူႇၸွမ်းမဵဝ်းဢၼ်တႃႁၼ်လႆႈၼၼ်ႉဢမ်ႇၸႂ်ႈ။ ႁဝ်းၵမ်ၵျၢင်ႉယူႇၸွမ်းတၢင်းယုမ်ႇမၢတ်ႈလႄႈ၊-
ႁဝ်းမီးတၢင်းဢၼ်မၼ်ႈၸႂ်ၼႂ်းတၢင်းဢၼ်ၶႂ်ႈၽၢတ်ႇဢွၵ်ႇသေတူဝ်ၶၼ်ႇထႃႇႁဝ်းၼႆႉသေယဝ်ႉ၊ၵႂႃႇယူႇလူၺ်ႈၵၼ်တင်းၸဝ်ႈၽြႃးဢေႃႈ။-
ပဵၼ်ႁိုဝ်သေဢမ်ႇဝႃႈ၊ႁဝ်းတေယူႇၼႂ်းႁိူၼ်းဢၼ်ပဵၼ်တူဝ်ၶၼ်ႇထႃႇၼႆႉသေဢမ်ႇဝႃႈ၊ဢမ်ႇယူႇသေဢမ်ႇဝႃႈ၊ႁဝ်းတေလႆႈၶတ်းၸႂ်ႁဵတ်းႁႂ်ႈထုၵ်ႇၸႂ်မၼ်းၸဝ်ႈဢေႃႈ။-
လွင်ႈမၼ်းၸမ်ႉ၊ႁဝ်းၵႃႈမီးတင်းသဵင်ႈတင်းလူင်တၵ်းလႆႈႁွတ်ႈၽႅဝ်ၽၢႆႇၼႃႈပလၢင်ႇတီႈဢၼ် ၸဝ်ႈၶရိၸ်ႈ၊ ၸီႇယၢင်ႇတြႃး၊ၼင်ႇႁိုဝ်ႁဝ်းၵူႈၵေႃႉတၵ်းလႆႈၶၢမ်ႇဢဝ်မၢင်ႇၵလႃႇတၢင်းလီ၊ဢမ်ႇၼၼ်ၶၢမ်ႇဢဝ်တၢမ်ႇဢပျတ်ႈၸွမ်းလူၺ်ႈတၢင်းဢၼ်ႁဝ်းလႆႈႁဵတ်းလီႁဵတ်းႁၢႆႉ မိူဝ်ႈဢၼ်ႁဝ်းယင်းမီးယူႇၼႂ်းႁိူၼ်းတူဝ်ၶၼ်ႇထႃႇႁဝ်းၼၼ်ႉဢေႃႈ။
ပိူဝ်ႈၼႆလႄႈႁဝ်းႁုလွင်ႈဢၼ်တၵ်းလႆႈၵူဝ်ႁႄၽြႃးပဵၼ်ၸဝ်ႈလႄႈႁဝ်းတိုၵ်းယူင်းၸူဝ်းဢဝ်ၵူၼ်းတင်းလၢႆဢေႃႈ။ ၸဝ်ႈၽြႃးၼၼ်ႉ၊ႁုႁၼ်တူဝ်ၸႂ်ႁဝ်းၸႅင်ႈလီလႄႈၵဝ်ယုမ်ႇဝႃႈသူၵေႃႈ၊လႆႈဢဝ်ၸႂ်ဢၼ်ႁုတူဝ်ၸဝ်ႈၵဝ်ႇၼၼ်ႉ၊ႁုႁၼ်တူဝ်ၸႂ်ႁဝ်းဢေႃႈ။-
ႁဝ်းသမ်ႉယွင်ႈယေႃးတူဝ်ၸဝ်ႈၵဝ်ႇၽၢႆႇၼႃႈသူထႅင်ႈဢမ်ႇၸႂ်ႈ။ ႁဝ်းလၢတ်ႈၼႄလွင်ႈတၢင်းမၼ်းတီႈသူ၊ႁႂ်ႈသူလႆႈဢုပ်ႇဝၢဝ်းၵွပ်ႈပိူဝ်ႈႁဝ်း၊ၼင်ႇႁိုဝ်သူတၵ်းတေမေႃတွပ်ႇၶိုၼ်းၵႂၢမ်းၶဝ်ၸိူဝ်းဢၼ်ဢုပ်ႇဝၢဝ်းလူၺ်ႈလွင်ႈမဵဝ်းဢၼ်ဢဝ်တႃတူၺ်းႁၼ်လႆႈလႄႈ ဢမ်ႇလႆႈဢုပ်ႇဝၢဝ်းမဵဝ်းဢၼ်ယူႇၼႂ်းၸႂ်ၼၼ်ႉဢေႃႈ။-
ၸွင်ႇႁဝ်းပဵၼ်ၵူၼ်းယွင်ႇႁိုဝ်း။ ပေႃးႁဝ်းယွင်ႇၵေႃႈ၊ႁဝ်းယွင်ႇပုၼ်ႈဢၵျူဝ်းၸဝ်ႈၽြႃးၵူၺ်းဢေႃႈ။ သင်ဝႃႈ၊ႁဝ်းဢမ်ႇယွင်ႇၵေႃႈ၊ႁဝ်းပဵၼ်ၵူၼ်းၸႂ်လီပုၼ်ႈဢၵျူဝ်းသူဢေႃႈ။-
တၢင်းႁၵ်ႉမႅတ်ႈတႃႇ ၸဝ်ႈၶရိၸ်ႈ၊ ဢုပ်ႉပိူင်ႇတၢင်ႇတဵင်ၼိူဝ်ႁဝ်း၊ၵွပ်ႈပိူဝ်ႈႁဝ်းႁုမၢတ်ႈလွင်ႈဢၼ်မၼ်းၸဝ်ႈဢၼ်ပဵၼ်ၵူၼ်းၵေႃႉလဵဝ်လႆႈၶၢမ်ႇတၢႆတၢင်ၵူၼ်းတင်းသဵင်ႈတင်းလူင်ဢေႃႈ။ ၵွပ်ႈၼႆလႄႈၵူၼ်းတင်းသဵင်ႈတင်းလူင်တၢႆယဝ်ႉဢေႃႈ။-
မၼ်းၸဝ်ႈၶၢမ်ႇတၢႆတၢင်ၵူၼ်းတင်းသဵင်ႈတင်းလူင်၊ၼင်ႇႁိုဝ်ၶဝ်ၸိူဝ်းဢၼ်ဢသၢၵ်ႈလိပ်းယူႇတင်းလၢႆတၵ်းတေဢမ်ႇၵမ်ၵျၢင်ႉၸွမ်းဢလူဝ်ႇတူဝ်ၸဝ်ႈၵဝ်ႇလႄႈတၵ်းတေၵမ်ၵျၢင်ႉၸွမ်းဢလူဝ်ႇၸဝ်ႈဢၼ်ၶၢမ်ႇတၢႆတၢင်ပုၼ်ႈၶဝ်ၼၼ်ႉသေယဝ်ႉ၊လုၵ်ႉၶိုၼ်းလိပ်းမႃးၼၼ်ႉဢေႃႈ။
ပိူဝ်ႈၼႆလႄႈဢဝ်ၼႆႉၵႂႃႇၼႃႈ၊ၽူႈလႂ်သေဢမ်ႇဝႃႈ၊ႁဝ်းတေဢမ်ႇႁုၸၵ်းမၼ်းၸွမ်းၼင်ႇၸႃႇတိၼိူဝ်ႉၼင်ၵူၺ်း။ ပိၵ်ႉသမ်ႉ၊ႁဝ်းယၢမ်ႈႁုၸၵ်း ၸဝ်ႈၶရိၸ်ႈ၊ ၸွမ်းၼင်ႇၸႃႇတိၼိူဝ်ႉၼင်သေၵေႃႈ၊တေႃႈလဵဝ်ၼႆႉၵႂႃႇမိူဝ်းၼႃႈႁဝ်းတၵ်းဢမ်ႇႁုၸၵ်းၸိူဝ်ႉၼင်ႇၼၼ်ယဝ်ႉဢေႃႈ။-
ၵွပ်ႈလွင်ႈၸိူဝ်ႉႁိုဝ်လႄႈဝႃႈၸမ်ႉ၊မိူဝ်ႈဢၼ်ၵူၼ်းသေၵေႃႉၵေႃႉ၊မီးၼႂ်း ၸဝ်ႈၶရိၸ်ႈ၊ ၸိုင်၊မၼ်းပဵၼ်ၵေႃႉဢၼ်ၽြႃးပဵၼ်ၸဝ်ႈၽၢၼ်ႇသၢင်းႁဵတ်းပဵၼ်ဢၼ်မႂ်ႇယဝ်ႉလႄႈဢၼ်ၵဝ်ႇၵဝ်ႇတင်းလၢႆၵေႃႈလႆႈလပ်ႉႁၢႆၵႂႃႇသေပဵၼ်ဢၼ်မႂ်ႇမႃးၵူၺ်းၵူၺ်းဢေႃႈ။-
လွင်ႈတၢင်းဢၼ်ပဵၼ်မႃးၸိူဝ်ႉၼင်ႇၼႆၸိုင်၊ပဵၼ်ၵွပ်ႈပိူဝ်ႈၽြႃးပဵၼ်ၸဝ်ႈဢဝ်တင်း ၸဝ်ႈၶရိၸ်ႈ၊ လႄႈႁဵတ်းႁႂ်ႈႁဝ်းၶိုၼ်းလီၵၼ်တင်းမၼ်းၸဝ်ႈၵူၺ်းဢမ်ႇၵႃး၊သမ်ႉယင်းပၼ်ၼႃႈၵၢၼ်ႁဝ်းႁႂ်ႈၸွႆႈႁဵတ်းႁႂ်ႈပိူၼ်ႈတၢင်ႇၵေႃႉၸိူဝ်းၼၼ်ႉလႆႈၶိုၼ်းလီၵၼ်တင်းမၼ်းၸဝ်ႈၼၼ်ႉဢေႃႈ။-
ၶၢဝ်ႇတြႃးႁဝ်းၸမ်ႉ၊ၽြႃးပဵၼ်ၸဝ်ႈဢဝ်တင်း ၸဝ်ႈၶရိၸ်ႈ၊ လႄႈႁဵတ်းႁႂ်ႈၵူၼ်းၵႃႈမီးၶိုၼ်းလီၵၼ်တင်းမၼ်းၸဝ်ႈၼၼ်ႉဢေႃႈ။ ၽြႃးပဵၼ်ၸဝ်ႈယင်းဢမ်ႇမၢတ်ႈဢမ်ႇမၢႆဢပျတ်ႈၶဝ်တင်းလၢႆလႄႈဢဝ်တြႃးဢၼ်ၶိုၼ်းလီၵၼ်ၼၼ်ႉဢၢပ်ႈပၼ်ႁဝ်းႁႂ်ႈႁဝ်းၵႂႃႇႁေႃးလၢတ်ႈဢေႃႈ။
ပိူဝ်ႈၼႆလႄႈ၊ႁဝ်းၼႆႉႁေႃးလၢတ်ႈတၢင်တူဝ် ၸဝ်ႈၶရိၸ်ႈ၊ ယူႇမိူၼ်ၸိူဝ်ႉၼင်ႇတူဝ်ၽြႃးပဵၼ်ၸဝ်ႈၸႂ်ႉႁႂ်ႈႁဝ်းတိုၵ်းယူင်းသူၼၼ်ႉဢေႃႈ။ ႁဝ်းၸင်ႇၸူဝ်းဢဝ်သူၼႂ်းၼႃႇမႃႉၸိုဝ်ႈသဵင်ၸဝ်ႈၶရိၸ်ႈယူႇႁႂ်ႈလႆႈၶိုၼ်းလီၵၼ်တင်းမၼ်းၸဝ်ႈဢေႃႈ။-
ၸဝ်ႈၶရိၸ်ႈ၊ ၵၢင်းလွတ်ႈတင်းဢပျတ်ႈဢေႃႈ။ ၼႂ်းဝႃႈၼၼ်သေၵေႃႈ၊ၽြႃးပဵၼ်ၸဝ်ႈႁႂ်ႈၸဝ်ႈဢၼ်ၵၢင်းလွတ်ႈဢပျတ်ႈၼၼ်ႉ၊မီးဢပျတ်ႈတႅၼ်းႁဝ်းၼင်ႇႁိုဝ်ႁဝ်းတၵ်းလႆႈပဵၼ်တၢင်းဢၼ်သိုဝ်ႈတေႃႇၽြႃးပဵၼ်ၸဝ်ႈ၊ၵႃႈၼႂ်း ၸဝ်ႈၶရိၸ်ႈ၊ ၼၼ်ႉဢေႃႈ။
ၸိူဝ်ႉၼင်ႇဢၼ်ႁဝ်းပဵၼ်ၵူၼ်းႁူမ်ႈၵၢၼ်လူၺ်ႈၵၼ်တင်းၽြႃးပဵၼ်ၸဝ်ႈလႄႈႁဝ်းတိုၵ်းယူင်းတွင်းပၢၼ်ႇသူႁႂ်ႈလႆႈႁပ်ႉဢဝ်ၵျေးၸူးၽြႃးပဵၼ်ၸဝ်ႈၼၼ်ႉယႃႇႁႂ်ႈမၼ်းပဵၼ်ဢၼ်လၢႆလၢႆလွၵ်ႇလွၵ်ႇၵႂႃႇသေၵမ်း။-
ထွမ်ႇဢဝ်ၵႂၢမ်းဢၼ်မၼ်းၸဝ်ႈလၢတ်ႈဝႆႉဝႃႈ၊ “ၼႂ်းယၢမ်းမိူဝ်ႈဢၼ်ၶိင်ႇမၼ်းသၢင်ႇထုၵ်ႇၼၼ်ႉၵဝ်ထွမ်ႇငိၼ်းၵႂၢမ်းမႂ်းလႄႈ ၼႂ်းၶိင်ႇဝၼ်းဢၼ်ၵႄႇၶျွတ်ႈဢဝ်ၼၼ်ႉၵဝ်ၸွႆႈထႅမ်မႂ်းယဝ်ႉ၊” ဝႃႈၼင်ႇၼႆၼၼ်ႉထွမ်ႇဢဝ်တႃႉ။ တူၺ်းလူး။ မိူဝ်ႈလဵဝ်ၼႆႉ၊ပဵၼ်ၶိင်ႇဢၼ်သၢင်ႇထုၵ်ႇဢေႃႈ။ မိူဝ်ႈၼႆႉပဵၼ်ဝၼ်းဢၼ်ၵႄႇၶျွတ်ႈဢဝ်ဢေႃႈ။
ၼင်ႇႁိုဝ်ၽူႈလႂ်တၵ်းဢမ်ႇလႆႈတၢင်ႇဢပျတ်ႈၼႃႈၵၢၼ်ႁဝ်းၸိုင်၊ႁဝ်းဢမ်ႇႁဵတ်းလွင်ႈဢၼ်ႁႂ်ႈပဵၼ်တၢင်းဢၼ်ၶတ်းၶႂၢင်တၢင်းၵႃႈတီႈၽူႈလႂ်သေၵေႃႉသေၵူၼ်း။-
ၵႃႈဢၼ်ႁဝ်းႁဵတ်းၵူႈၸိူဝ်ႉၵူႈပိူင်ၸိုင်၊ႁဝ်းၼႄပျႃးလွင်ႈဢၼ်ႁဝ်းပဵၼ်ၵူၼ်းပွင်ၵၢၼ်ၽြႃးပဵၼ်ၸဝ်ႈၼႂ်းတၢင်းဢၼ်ၸႂ်ယၢဝ်းယိူၼ်ႉၶၢမ်ႇလႄႈၶၢမ်ႇၽေးတုၵ်ႉၶႃႉ၊ဢိၵ်ႇတင်းၼႂ်းတၢင်းဢၼ်ၶၢမ်ႇယၢပ်ႇၽိုတ်ႇလႄႈၺႃးလွင်ႈမႆႈၸႂ်ၵိၼ်းၸႂ်ၼၼ်ႉဢေႃႈ။-
ႁဝ်းလႆႈၶၢမ်ႇတၢင်းဢၼ်ပေႃႉယႅၼ်ႉ၊တၢင်းဢၼ်တူၵ်းထွင်ႇ၊တၢင်းဢၼ်ၵူၼ်းဝၢၼ်ႈၵူၼ်းမိူင်းႁဵတ်းသုၵ်ႉသၢၵ်ႉယုင်ႈယၢင်ႈတီႈႁဝ်း၊ႁဝ်းလႆႈႁၢပ်ႇၼႃႈၵၢၼ်ဢၼ်ၼၵ်းၼႃႇ၊ထၢၼ်ႈပေႃးဢမ်ႇလႆႈလပ်းလႆႈၼွၼ်း၊ဢမ်ႇလႆႈၵိၼ်လႆႈၶူပ်းဢေႃႈ။-
ၼႂ်းတၢင်းဢၼ်ႁဝ်းမီးၸႂ်မူတ်းသႂ်၊မီးပိင်ႇၺႃႇ၊ၸၢင်ႈယိူၼ်ႉၶၢမ်ႇလႄႈဢဵတ်းလူပိူၼ်ႈၼၼ်ႉ၊ႁဝ်းၼႄပျႃးလွင်ႈဢၼ်ႁဝ်းပဵၼ်ၵူၼ်းပွင်ၵၢၼ်ၽြႃးပဵၼ်ၸဝ်ႈဢေႃႈ။ ႁဝ်းယင်းၼႄပျႃးၼႂ်းႁႅင်းတၼ်းၶူဝ်းဝိၺိၺ်ႇမူတ်းၸၢင်ႇၸဝ်ႈ၊ၼႂ်းတၢင်းႁၵ်ႉမႅတ်ႈတႃႇဢၼ်ၸႅတ်ႈ၊-
ၼႂ်းတၢင်းဢၼ်ႁေႃးလၢတ်ႈတြႃးဢၼ်မၢၼ်ႇဢၼ်မႅၼ်ႈ၊ဢိၵ်ႇတင်းၼႂ်းမုၼ်ၽုင်းတၼ်းၶူဝ်းၽြႃးပဵၼ်ၸဝ်ႈဢေႃႈ။ ႁဝ်းယိပ်းၵမ်တၢင်းသိုဝ်ႈတေႃႇၼႂ်းမိုဝ်းၶွၼ်သၢႆႉၶွၼ်ၶႂႃဝႆႉ၊မိူၼ်ၸိူဝ်ႉၼင်ႇၶိူင်ႈလၢၵ်ႈၼၢၵ်ႈတႃႇတေႁႄႉၵင်ႈ၊ဢိၵ်ႇတင်းပုၼ်ႈတၵ်းတိုၵ်းတေႃးဢေႃႈ။-
ႁဝ်းလႆႈၶၢမ်ႇတၢင်းဢၼ်ယုၵ်ႉယွင်ႈ၊ဢိၵ်ႇတင်းတၢင်းဢၼ်ယႃႉသရေႇဢေႃႈ။ ႁဝ်းလႆႈၶၢမ်ႇတၢင်းဢၼ်ပိူၼ်ႈဝႃႈႁၢႆႉ၊ဢိၵ်ႇတင်းတၢင်းဢၼ်ပိူၼ်ႈဝႃႈလီဢေႃႈ။ ပိၵ်ႉသမ်ႉပိူၼ်ႈထၢင်ႇႁဝ်းပဵၼ်ၵူၼ်းပႅတ်ႉလႅၼ်သေၵေႃႈ၊ႁဝ်းလၢတ်ႈၵႂၢမ်းဢၼ်ၸိုဝ်ႈဢၼ်ၸႂ်ႈၵူၺ်းဢေႃႈ။-
ပိူၼ်ႈဢမ်ႇၶႂ်ႈႁုၸၵ်းႁဝ်းသေၵေႃႈ၊ၵူၼ်းၼမ်ၼႃႇႁုၸၵ်းႁဝ်းဢေႃႈ။ ပိၵ်ႉသမ်ႉပိူၼ်ႈထၢင်ႇႁဝ်းပဵၼ်ၸိူဝ်ႉၼင်ႇၵူၼ်းတၢႆဝႆႉသေၵေႃႈ၊တူၺ်းလူး။ ႁဝ်းဢသၢၵ်ႈလိပ်းယူႇဢေႃႈ။ ပိၵ်ႉသမ်ႉလႆႈၶၢမ်ႇတၢမ်ႇသေၵေႃႈ၊ႁဝ်းယင်းလွတ်ႈတၢင်းတၢႆယူႇဢေႃႈ။-
ပိၵ်ႉသမ်ႉလႆႈၸႂ်လဵၵ်ႉၸႂ်ဢူၼ်ႈသေၵေႃႈ၊ႁဝ်းယင်းၸူမ်းသိူဝ်းယူႇတႃႇသေႇဢေႃႈ။ ပိၵ်ႉသမ်ႉႁဝ်းပဵၼ်မိူၼ်ၵူၼ်းၽၢၼ်သေၵေႃႈ၊ႁဝ်းလႆႈႁဵတ်းႁႂ်ႈၵူၼ်းၼမ်ၼႃႇမၢၵ်ႈမီးဢေႃႈ။ ပိၵ်ႉသမ်ႉႁဝ်းပဵၼ်ၸိူဝ်ႉၼင်ႇၵူၼ်းဢမ်ႇမီးသင်သေၵေႃႈ၊ႁဝ်းပိူင်ႇၵူႈၸိူဝ်ႉၵူႈပိူင်ဢေႃႈ။
ပီႈၼွင်ႉၵူၼ်းဝဵင်း ၵေႃးရိၼ်ႇထု၊ ၶဝ်႟။ ႁဝ်းပိုတ်ႇဢူၵ်းပိုတ်ႇၸႂ်ၵႂၢင်ႈၵႂၢင်ႈလႄႈႁေႃးလၢတ်ႈပၼ်သူလႅင်းလႅင်းယဝ်ႉဢေႃႈ။-
ႁဝ်းဢမ်ႇၸႂ်ႈၵေႃႉဢၼ်ၸႂ်သၽေႃးၵႅပ်ႈလႄႈဢမ်ႇႁပ်ႉတုင်းဢဝ်သူ၊သူပဵၼ်ၵေႃႉဢၼ်ၸႂ်သၽေႃးၵႅပ်ႈလႄႈဢမ်ႇႁပ်ႉတုင်းဢဝ်ႁဝ်းၵူၺ်းဢေႃႈ။-
ၵဝ်မၢတ်ႈသူပဵၼ်လုၵ်ႈလၢင်းၵဝ်လႄႈႁႂ်ႈသူပိုတ်ႇႁူဝ်ၸႂ်သူၵႂၢင်ႈၵႂၢင်ႈမိူၼ်ၸိူဝ်ႉၼင်ႇႁဝ်းဢေႃႈ။
ယႃႇပေႁူမ်ႈပွင်းႁဵတ်းၵၢၼ်လူၺ်ႈၵၼ်တင်းၶဝ်ၸိူဝ်းဢၼ်ဢမ်ႇယုမ်ႇမၢတ်ႈၼၼ်ႉ၊လွင်ႈတၢင်းဢၼ်မႅၼ်ႈတြႃးလႄႈလွင်ႈတၢင်းဢၼ်ဢမ်ႇတြႃးၼၼ်ႉ တေႁဵတ်းၸိူဝ်ႉၼင်ႇႁိုဝ်ပွင်းၽေႃႇၵၼ်လႆႈ။ ဢၼ်လႅင်းဢိၵ်ႇတင်းဢၼ်လပ်းသိင်ႇတေႁဵတ်းၸိူဝ်ႉၼင်ႇႁိုဝ်ႁူမ်ႈပွင်းၵၼ်လႆႈ။-
ၸဝ်ႈၶရိၸ်ႈ၊ တင်းမႃႇၼၢတ်ႈတေႁဵတ်းႁိုဝ်ၽွမ်ႉၸႂ်ၵၼ်လႆႈ။ ၵေႃႉဢၼ်ယုမ်ႇမၢတ်ႈ၊ဢိၵ်ႇတင်းၵေႃႉဢၼ်ဢမ်ႇယုမ်ႇမၢတ်ႈၼၼ်ႉၵေႃႈတေမီးလွင်ႈၸိူဝ်ႉႁိုဝ်ႁႂ်ႈၶဝ်ပဵၼ်ၸႂ်လဵဝ်ၵၼ်လႆႈ။-
ၵျွင်းပိၵ်ႈမၢၼ်ႇၽြႃးပဵၼ်ၸဝ်ႈၼၼ်ႉ၊တေမီးလွင်ႈဢၼ်မႅၼ်ႈၵၼ်တင်းႁုၼ်ႇႁၢင်ႈသၢင်းထုလႆႈၸိူဝ်ႉၼင်ႇႁိုဝ်။ လွင်ႈမၼ်းၸမ်ႉ၊ႁဝ်းပဵၼ်ၵျွင်းပိၵ်ႈမၢၼ်ႇၽြႃးပဵၼ်ၸဝ်ႈဢၼ်မီးဢသၢၵ်ႈယူႇလႄႈမႅၼ်ႈၸွမ်းၼင်ႇဢၼ်ၽြႃးပဵၼ်ၸဝ်ႈမီးဢမိင်ႉလႄႈဝႃႈ၊ “ၵဝ်တၵ်းတႄႇယူႇမီးလူၺ်ႈၵၼ်တင်းၶဝ်လႄႈၵႂႃႇမႃးႁူမ်ႈလူၺ်ႈၵၼ်တင်းၶဝ်ဢေႃႈ။ ၵဝ်တၵ်းပဵၼ်ၽြႃးပဵၼ်ၸဝ်ႈၶဝ်လႄႈၶဝ်ၵေႃႈတၵ်းပဵၼ်ၵူၼ်းၵဝ်ဢေႃႈ၊” ဝႃႈၼင်ႇၼႆၼၼ်ႉဢေႃႈ။
ထႃႇဝရႃႉၽြႃးသမ်ႉမီးဢမိင်ႉထႅင်ႈလႄႈဝႃႈ၊ “သူဢွၵ်ႇသေၵႃႈၼႂ်းၶဝ်လႄႈၵႂႃႇယူႇၵူၺ်းၶေႃသူတႃႉ။ ယႃႇပေတိူဝ်ႉတၢင်းဢၼ်ဢမ်ႇမူတ်းသႂ်ၼၼ်ႉသေမဵဝ်း။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ၵဝ်တၵ်းႁပ်ႉတုင်းဢဝ်သူဢေႃႈ။
ၵဝ်တၵ်းပဵၼ်ပေႃႈသူလႄႈသူတၵ်းပဵၼ်လုၵ်ႈၸၢႆးလုၵ်ႈယိင်းၵဝ်ဢေႃႈ၊” ဝႃႈၼင်ႇၼႆ၊ထႃႇဝရႃႉၽြႃးဢၼ်မီးဢႃႇၼႃႇတၼ်းၶူဝ်းၼၼ်ႉမီးဢမိင်ႉဢေႃႈ။
ၵႂၢမ်းဢၼ်ဝႃႈၸိူဝ်ႉၼင်ႇၼႆၼၼ်ႉပဵၼ်ၵႂၢမ်းၵတိသဵတ်ႈၸႃႇဢၼ်မၼ်းၸဝ်ႈပၼ်တီႈႁဝ်းဢေႃႈ။ ပီႈၼွင်ႉဢၼ်ၵဝ်ႁၵ်ႉၶဝ်႟။ ပိူဝ်ႈၼႆလႄႈႁဝ်းဢွၼ်ၵၼ်သုၵ်ႈပွတ်ႈတူဝ်ၸႂ်ႁဝ်း၊ႁႂ်ႈၵၢင်းလွတ်ႈတင်းၵူႈၸိူဝ်ႉၵူႈပိူင်ဢၼ်ၸၢင်ႈႁဵတ်းႁႂ်ႈၵူၼ်းႁဝ်းၵူဝ်ႈၵိူၵ်ႇၼၼ်ႉသေလႄႈဢွၼ်ၵၼ်ၵူဝ်ႁႄၽြႃးပဵၼ်ၸဝ်ႈလႄႈပျေႉၸုမ်ႇဝႆႉတင်းပႃႇရမီႇတၢင်းဢၼ်မူတ်းၸၢင်ႇၼၼ်ႉတႃႉႁဝ်း။
ၽုၺ်ႇပိုတ်ႇႁူဝ်ၸႂ်သူလႄႈႁပ်ႉတုင်းဢဝ်ႁဝ်းတႃႉ။ ႁဝ်းဢမ်ႇလႆႈၽိတ်းၽူႈလႂ်။ ႁဝ်းဢမ်ႇလႆႈယႃႉၵဝ်းၽူႈလႂ်ၵူၺ်းဢမ်ႇၵႃး၊ႁဝ်းဢမ်ႇလႆႈမၢပ်ႇၵိၼ်မႂ်ၵိၼ်ၽူႈလႂ်သေၵေႃႉသေၵူၼ်း။-
လွင်ႈတၢင်းၸိူဝ်းၼႆႉ၊ၵဝ်လၢတ်ႈၵႂၢမ်းတၢင်ႇဢပျတ်ႈတီႈသူဢမ်ႇၸႂ်ႈ။ ၵွပ်ႈၸိူဝ်ႉႁိုဝ်လႄႈဝႃႈၼႆၸမ်ႉ၊ၸိူဝ်ႉၼင်ႇဢၼ်ၵဝ်ယၢမ်ႈလၢတ်ႈတီႈသူၼၼ်ႉၵဝ်ႁၵ်ႉပႅင်းသူထၢၼ်ႈပေႃးမီးၸႂ်ဢၼ်ဝႃႈ၊ပေႃးတၢႆၵေႃႈႁႂ်ႈလႆႈတၢႆလူၺ်ႈၵၼ်တင်းသူ၊ပေႃးလိပ်းၵေႃႈႁႂ်ႈလႆႈလိပ်းယူႇလူၺ်ႈၵၼ်တင်းသူဝႃႈၼႆဢေႃႈ။-
ၵွပ်ႈပိူဝ်ႈၵဝ်ယုမ်ႇယမ်သူၼၼ်ႉလႄႈၵဝ်ဢုပ်ႇဝၢဝ်းၸူမ်းသိူဝ်းၵွပ်ႈလူၺ်ႈသူဢေႃႈ။ ပိၵ်ႉသမ်ႉႁဝ်းထူပ်းၽေးတုၵ်ႉၶႃႉထၢၼ်ႇႁိုဝ်သေၵေႃႈ၊ၵဝ်ယင်းႁတ်းႁၢၼ်ၸူမ်းသိူဝ်းၼႃႇလူင်လၢင်ဢေႃႈ။
ဝၢႆးသေဢၼ်ႁဝ်းႁွတ်ႈထိုင်ၵႂႃႇတီႈမိူင်း မႃႇၵေႇတေႃးၼိ၊ ယဝ်ႉၼၼ်ႉ၊တူဝ်ႁဝ်းဢမ်ႇလႆႈလိုဝ်ႈလႆႈသဝ်းလႄႈႁဝ်းလႆႈၺႃးၽေးတုၵ်ႉၶႃႉၵူႈတီႈၵူႈလႅၼ်၊လႆႈတွပ်ႇထဵင်ပိူၼ်ႈယူႇ၊ဢိၵ်ႇတင်းၼႂ်းၸႂ်ႁဝ်းလႆႈယၢပ်ႇၸႂ်ၵူဝ်ႁႄယူႇဢေႃႈ။-
ၵူၺ်းၵႃႈ၊ၽြႃးပဵၼ်ၸဝ်ႈဢၼ်ၸွႆႈထႅမ်ႁူဝ်ၸႂ်ဢၼ်ႁႅင်းဢူၼ်ႈၼၼ်ႉလူၺ်ႈတၢင်းဢၼ်သူင်ႇသြႃႇ တိတု၊ မႃးႁႂ်ႈလႆႈပၼ်ဢဵၼ်ပၼ်ႁႅင်းႁဝ်းဢေႃႈ။-
ႁဝ်းလႆႈႁႅင်းၸႂ်ၵွပ်ႈပိူဝ်ႈမၼ်းႁွတ်ႈၽႅဝ်မႃးၵူၺ်းဢမ်ႇၵႃး၊ႁဝ်းလႆႈႁႅင်းၸွမ်းၵွပ်ႈပိူဝ်ႈလႆႈငိၼ်းၶၢဝ်ႇငၢဝ်းလွင်ႈသူပၼ်ဢဵၼ်ပၼ်ႁႅင်းမၼ်းထၢၼ်ႇႁိုဝ်ၼၼ်ႉဢေႃႈ။ မၼ်းလၢတ်ႈၼႄႁဝ်းလွင်ႈဢၼ်သူၸႂ်ထိုင်ၵဝ်ထၢၼ်ႇႁိုဝ်၊သူမႆႈၸႂ်ထၢၼ်ႇႁိုဝ်၊ဢိၵ်ႇတင်းလွင်ႈတၢင်းဢၼ်သူမီးၸႂ်ၸေႇတၼႃႇႁႅင်းယႂ်ႇပုၼ်ႈဢၵျူဝ်းၵဝ်ထၢၼ်ႇႁိုဝ်ၼၼ်ႉလႄႈၵဝ်ယဵင်ႈၶႅၼ်းၸူမ်းသိူဝ်းၼႃႇလူင်လၢင်ဢေႃႈ။
ပိၵ်ႉသမ်ႉလိၵ်ႈဢၼ်ၵဝ်တႅမ်ႈပၼ်ၵႂႃႇတီႈသူၼၼ်ႉ၊ႁဵတ်းႁႂ်ႈသူၸႂ်လဵၵ်ႉသေၵေႃႈၵဝ်ဢမ်ႇမႆႈၸႂ်။ မိူဝ်ႈဢၼ်ၵဝ်လႆႈႁုဝႃႈ၊လိၵ်ႈၵဝ်ၼၼ်ႉႁဵတ်းႁႂ်ႈသူၸႂ်လဵၵ်ႉၵႂႃႇၸူဝ်ႈၶၢဝ်းၵမ်းဢွၼ်ႇၼိုင်ႈၵူၺ်းလႄႈမိူဝ်ႈၼၼ်ႉၵဝ်ပေႃးၶႂ်ႈမႆႈၸႂ်ယူႇဢေႃႈ။-
ၵူၺ်းၵႃႈ၊တေႃႈလဵဝ်ၼႆႉၵဝ်ၸူမ်းသိူဝ်းယဝ်ႉ။ ၵဝ်ၸူမ်းသိူဝ်းၵွပ်ႈလူၺ်ႈသူလႆႈၸႂ်လဵၵ်ႉၼၼ်ႉဢမ်ႇၸႂ်ႈ။ ၵဝ်ၸူမ်းသိူဝ်းၵွပ်ႈလူၺ်ႈတၢင်းဢၼ်ၸႂ်လဵၵ်ႉၼၼ်ႉႁဵတ်းႁႂ်ႈသူပိၼ်ႇၸႂ်မႃးၼၼ်ႉဢေႃႈ။ သူလႆႈၸႂ်လဵၵ်ႉမႅၼ်ႈၸွမ်းဢလူဝ်ႇၽြႃးပဵၼ်ၸဝ်ႈလႄႈသူဢမ်ႇလုသုမ်းၵႃႈသင်ၵွပ်ႈႁဝ်းဢေႃႈ။-
လွင်ႈမၼ်းၸမ်ႉ၊တၢင်းဢၼ်ၸႂ်လဵၵ်ႉဢၼ်ၸွမ်းဢလူဝ်ႇၽြႃးပဵၼ်ၸဝ်ႈၼၼ်ႉ၊ၸၢင်ႈႁဵတ်းႁႂ်ႈၵူၼ်းႁဝ်းပိၼ်ႇၸႂ်မႃးႁႂ်ႈလႆႈႁွတ်ႈထိုင်တၢင်းဢၼ်ၽြႃးပဵၼ်ၸဝ်ႈၵႄႇၶျွတ်ႈဢဝ်လႄႈမၼ်းဢမ်ႇမီးလွင်ႈတၵ်းသေလၢႆဢေႃႈ။ ၵူၺ်းၵႃႈ၊တၢင်းဢၼ်ၸႂ်လဵၵ်ႉၸွမ်းၽၢႆႇလေႃးၵီႇၼၼ်ႉၸမ်ႉ၊ၸၢင်ႈႁွတ်ႈထိုင်တၢင်းတၢႆဢေႃႈ။-
ဝူၼ်ႉတူၺ်းလွင်ႈတၢင်းဢၼ်ၽြႃးပဵၼ်ၸဝ်ႈႁဵတ်းႁႂ်ႈသူၸႂ်လဵၵ်ႉၼၼ်ႉလူး။ လွင်ႈတၢင်းၼၼ်ႉပွင်ႁဵတ်းႁႂ်ႈသူၶတ်းၸႂ်ၶတ်းၶေႃးထၢၼ်ႇႁိုဝ်။ ႁႂ်ႈသူမီးၸႂ်ၼႄပျႃးလွင်ႈဢၼ်သူၵၢင်းလွတ်ႈတင်းဢပျတ်ႈထၢၼ်ႇႁိုဝ်။ တၢင်းဢၼ်သူတိူဝ်ႉၸႂ်၊တူၵ်းၸႂ်ထၢၼ်ႇႁိုဝ်၊တၢင်းဢၼ်သူၶႆႈၸႂ်ထိုင်ၵဝ်ထၢၼ်ႇႁိုဝ်၊သူပႂ်ႉသဵတ်ႈၸႃႇထၢၼ်ႇႁိုဝ်၊သူၽွမ်ႉၵၼ်ပၼ်တၢမ်ႇဢပျတ်ႈထၢၼ်ႇႁိုဝ်ၸိူဝ်းၼႆႉ၊ၼႄပျႃးတၢင်းဢၼ်သူၵၢင်းလွတ်ႈတင်းဢပျတ်ႈၼႂ်းလွင်ႈတၢင်းၵူႈၸိူဝ်ႉၵူႈပိူင်ၼႆႉယဝ်ႉဢေႃႈ။
ပိူဝ်ႈၼႆလႄႈပိၵ်ႉသမ်ႉၵဝ်တႅမ်ႈလိၵ်ႈၼၼ်ႉသေၵေႃႈ၊ၵဝ်တႅမ်ႈၵွပ်ႈပိူဝ်ႈၵေႃႉဢၼ်ၽိတ်းပိူင်ႈ၊ဢိၵ်ႇတင်းၵေႃႉဢၼ်လႆႈၶၢမ်ႇတၢင်းဢၼ်ၽိတ်းပိူင်ႈၼၼ်ႉဢမ်ႇၸႂ်ႈ။ ၵဝ်တႅမ်ႈပၼ်ၵႂႃႇႁႂ်ႈလႆႈၼႄပျႃးတီႈသူလွင်ႈဢၼ်ၸေႇတၼႃႇသူမီးၼိူဝ်ႁဝ်းထၢၼ်ႇႁိုဝ်ၵႃႈတီႈၽၢႆႇၼႃႈၽြႃးပဵၼ်ၸဝ်ႈၼၼ်ႉဢေႃႈ။-
ၵွပ်ႈလွင်ႈတၢင်းၼႆႉလႄႈႁဝ်းလႆႈမီးၸႂ်သၢၵ်ႈသႃႇတႄႉတႄႉဢေႃႈ။ ႁဝ်းလႆႈမီးၸႂ်သၢၵ်ႈသႃႇၵူၺ်းဢမ်ႇၵႃး၊ႁဝ်းလႆႈၸူမ်းသိူဝ်းၵွပ်ႈပိူဝ်ႈသူတင်းသဵင်ႈႁဵတ်းႁႂ်ႈႁူဝ်ၸႂ်သြႃႇ တိတု၊ သၢၵ်ႈသႃႇသိူဝ်းပျေႃႇၼၼ်ႉဢေႃႈ။-
ၵႃႈဢၼ်ၵဝ်ယၢမ်ႈလၢတ်ႈၼႄလွင်ႈသူတီႈမၼ်းၼၼ်ႉ၊ၵဝ်ယင်းဢမ်ႇလႆႈဢူၵ်းလႆႈဢၢႆ၊ၵွပ်ႈပိူဝ်ႈဝႃႈ၊ၵႃႈဢၼ်ၵဝ်လၢတ်ႈၼႄလွင်ႈသူၽၢႆႇၼႃႈသြႃႇ တိတု၊ ၼၼ်ႉပဵၼ်ၵႂၢမ်းဢၼ်ၸိုဝ်ႈဢၼ်ၸႂ်ႈလႄႈမိူၼ်ၵႂၢမ်းသဵတ်ႈၸႃႇဢၼ်ႁဝ်းလၢတ်ႈတီႈသူတႃႇသေႇၼၼ်ႉဢေႃႈ။-
ပိူဝ်ႈၼႆလႄႈၸႂ်မႅတ်ႈတႃႇဢၼ်မၼ်းႁၵ်ႉသူၼၼ်ႉယဵင်ႈၶႅၼ်းယႂ်ႇၼမ်မႃး၊ပိူဝ်ႈဢၼ်မၼ်းမၢတ်ႈတွင်းလွင်ႈဢၼ်သူထွမ်ႇဢဝ်ၵႂၢမ်းမၼ်း၊ဢိၵ်ႇတင်းလွင်ႈဢၼ်သူႁပ်ႉတွၼ်ႈမၼ်းလူၺ်ႈၸႂ်ဢၼ်ၵူဝ်ႁႄသၼ်ႇဝႆၼၼ်ႉဢေႃႈ။-
ၵွပ်ႈပိူဝ်ႈၵဝ်ယုမ်ႇယမ်သူလႆႈလုမ်းလုမ်းၼႂ်းလွင်ႈတၢင်းၵူႈၸိူဝ်ႉၵူႈမဵဝ်းလႄႈၵဝ်ၸူမ်းသိူဝ်းၼႃႇဢေႃႈ။
ပီႈၼွင်ႉၶဝ်႟။ ၵဝ်ၶႂ်ႈႁႂ်ႈသူႁုလွင်ႈၵျေးၸူးၽြႃးပဵၼ်ၸဝ်ႈဢၼ်မႅင်ႇပၼ်ၵႃႈၼိူဝ်ၸိူဝ်းၸဝ်ႈတင်းလၢႆ ဢၼ်မီးၼႂ်းမိူင်း မႃႇၵေႇတေႃးၼိ၊ ၼၼ်ႉဢေႃႈ။-
ၸိူဝ်းၸဝ်ႈ၊ၸိူဝ်းၼၼ်ႉပိၵ်ႉသမ်ႉလႆႈၶၢမ်ႇတၢင်းဢၼ်ၽေးတုၵ်ႉၶႃႉၸႅတ်ႈၸၢမ်းတူၺ်းၼမ်ၼႃႇလူင်လၢင်သေၵေႃႈ၊ၶဝ်ယင်းမီးတၢင်းဢၼ်သိူဝ်းပျေႃႇၼႃႇ၊ဢိၵ်ႇတင်းပိၵ်ႉသမ်ႉယၢၵ်ႈၽၢၼ်ၼႃႇသေၵေႃႈၶဝ်ယင်းမီးၸႂ်ၸေႇတၼႃႇဢၼ်ၽေးၸွၼ်းယိုၼ်ႈမႅင်ႇၼမ်ၼႃႇဢေႃႈ။-
ၶဝ်လူႇတၢၼ်းၵႃႈၼင်ႇဢၼ်ၶဝ်တၢတ်ႈၼိူင်ႇလႆႈဢမ်ႇၵႃး၊ၵဝ်ၶၢမ်ႇသၢၵ်ႈသေႇလွင်ႈဢၼ်ၶဝ်ယင်းလူႇတၢၼ်းၼမ်ၼႃႇသေၼၼ်ႉလူးၵွၼ်ႇဢေႃႈ။ ၵႃႈၼင်ႇဢၼ်ၶဝ်မီးၸေႇတၼႃႇၼၼ်ႉ၊-
ၶဝ်တိုၵ်းယူင်းတွင်းပၢၼ်ႇႁႂ်ႈႁဝ်းႁပ်ႉတုင်းဢဝ်တႃႇၼႃႉတၢင်းလူႇၶဝ်၊ၼင်ႇႁိုဝ်ၶဝ်တၵ်းလႆႈၶဝ်ႈပႃးၼႂ်းတၢင်းဢၼ်ၸွႆႈထႅမ်ၽေးၸွၼ်းယိုၼ်ႈမႅင်ႇပၼ်တီႈၵူၼ်းၸဝ်ႈၽြႃးၼင်ႇၵၼ်ဢၼ်မီးယူႇၵႃႈတီႈမိူင်း ယုတႃႉ၊ ပုၼ်ႉၼၼ်ႉဢေႃႈ။-
တၢင်းဢၼ်ၶဝ်လူႇတၢၼ်းၼၼ်ႉၼမ်ၼႃႇသေဢၼ်ႁဝ်းမုင်ႈမွင်းၼၼ်ႉဢေႃႈ။ ၶဝ်ဢဝ်တူဝ်ၶဝ်သၢၵ်ႈလူႇတီႈၽြႃးပဵၼ်ၸဝ်ႈဢွၼ်တၢင်းယဝ်ႉၸင်ႇ၊ဢၢပ်ႈပၼ်တီႈႁဝ်းၸွမ်းၼင်ႇဢလူဝ်ႇၽြႃးပဵၼ်ၸဝ်ႈမီးၼၼ်ႉဢေႃႈ။-
ပိူဝ်ႈၼႆလႄႈ၊ႁဝ်းတိုၵ်းယူင်းသြႃႇ တိတု၊ ၵေႃႉဢၼ်တႄႇၸႃႉႁဵတ်းၵၢၼ်တႃႇၼႃႉတၢင်းလူႇၼႆႉၼၼ်ႉႁႂ်ႈမၼ်းၵႂႃႇၸွႆႈသူႁဵတ်းၵၢၼ်တၢင်းႁၵ်ႉမႅတ်ႈတႃႇၼႆႉ၊တေႃႇပေႃးယဝ်ႉတူဝ်ႈဢေႃႈ။-
ၸိူဝ်ႉၼင်ႇဢၼ်သူမီးတၢင်းယုမ်ႇမၢတ်ႈယႂ်ႇၼႃႇ၊မေႃႁေႃးတြႃး၊မီးတၢင်းႁုတၢင်းႁၼ်၊မီးၸႂ်ၸေႇတၼႃႇၶႂ်ႈၸွႆႈထႅမ်၊ဢိၵ်ႇတင်းမီးၸႂ်ႁၵ်ႉမႅတ်ႈတႃႇၼိူဝ်ႁဝ်းၸိူဝ်းၼႆႉ၊လိူဝ်တွၼ်းၼႃႇသေပိူၼ်ႈၼၼ်ႉ၊ႁဝ်းမီးဢလူဝ်ႇၶႂ်ႈႁႂ်ႈသူ၊တၵ်းတေမီးၸႂ်ၸေႇတၼႃႇဢၼ်ႁဵတ်းၼႃႈၵၢၼ်တႃႇၼႃႉတၢင်းႁၵ်ႉမႅတ်ႈတႃႇၼႆႉ၊လိူဝ်တွၼ်းၼႃႇသေပိူၼ်ႈဢေႃႈ။
ၵဝ်လၢတ်ႈၸိူဝ်ႉၼင်ႇဢၼ်ပၼ်ဢမိင်ႉဢမ်ႇၸႂ်ႈ။ ၵူၺ်းၵႃႈ၊ၵဝ်ဢဝ်တင်းတၢင်းဢၼ်ပိူၼ်ႈႁဵတ်းတႃႇၼႃႉတၢင်းလူႇၼၼ်ႉလၢတ်ႈၼႄသူ၊ႁႂ်ႈတၢင်းႁၵ်ႉမႅတ်ႈတႃႇသူယႂ်ႇၵႃႈႁိုဝ်ၼၼ်ႉလႆႈထၢင်ႇသႃးမႃးဢေႃႈ။-
သူႁုလွင်ႈဢၼ်ၵျေးၸူးၸဝ်ႈႁဝ်း ၸဝ်ႈယေႇသုၶရိၸ်ႈ၊ ယႂ်ႇၼႃႇၵႃႈႁိုဝ်ၼၼ်ႉယူႇဢေႃႈ။ ပိၵ်ႉသမ်ႉမၼ်းၸဝ်ႈမၢၵ်ႈမီးသေၵေႃႈ၊မၼ်းၸဝ်ႈၶၢမ်ႇယၢၵ်ႈၽၢၼ်ပုၼ်ႈသူ၊ၵွပ်ႈပိူဝ်ႈႁၼ်ထိုင်ပုၼ်ႈဢၵျူဝ်းသူတင်းလၢႆ၊ၼင်ႇႁိုဝ်သူတၵ်းလႆႈမၢၵ်ႈမီးၵွပ်ႈလူၺ်ႈတၢင်းၽၢၼ်မၼ်းၸဝ်ႈၼၼ်ႉဢေႃႈ။
ၸွမ်းၼင်ႇဢၼ်ၵဝ်ႁၼ်ၼၼ်ႉၸမ်ႉ၊ၵၢၼ်ဢၼ်သူတႄႇၸႃႉမိူဝ်ႈပီၵၢႆၼၼ်ႉႁဵတ်းႁႂ်ႈယဝ်ႉတေႃႈလဵဝ်ၸိုင်၊ယဵင်ႈၶႅၼ်းလီသေပိူၼ်ႈဢေႃႈ။ သူပဵၼ်ၵေႃႉဢၼ်ၵဵပ်းငိုၼ်းလူႇဢွၼ်တၢင်းပိူၼ်ႈဢမ်ႇၵႃး၊ၸႂ်ဢၼ်ၶႂ်ႈၸွႆႈထႅမ်ၼၼ်ႉၵေႃႈသူမီးၸႂ်ဢွၼ်တၢင်းပိူၼ်ႈယဝ်ႉ။-
ပိူဝ်ႈၼႆလႄႈၶတ်းၸႂ်ပွင်ႁဵတ်းၵႃႈဢၼ်သူၶိုင်ပွင်မႃးၼၼ်ႉလူၺ်ႈတင်းၸႂ်ၸေႇတၼႃႇဢၼ်မိူၼ်မိူဝ်ႈၼၼ်ၼၼ်ႉလႄႈတေႃႈလဵဝ်ၼႆႉၵေႃႈ ၵႃႈၼင်ႇဢၼ်သူတၢတ်ႈၼိူင်ႇလႆႈၼၼ်ႉ၊ႁဵတ်းႁႂ်ႈယဝ်ႉတူဝ်ႈတႃႉ။-
ပေႃးသူမီးၸႂ်ၸေႇတၼႃႇၸိုင်၊ၽြႃးပဵၼ်ၸဝ်ႈႁပ်ႉတုင်းဢဝ်တႃႇၼႃႉတၢင်းလူႇသူၸွမ်းၼင်ႇဢၼ်သူမီးၼၼ်ႉလႄႈမၼ်းၸဝ်ႈဢမ်ႇၶႂ်ႈလႆႈမဵဝ်းဢၼ်သူဢမ်ႇမီးၼၼ်ႉဢေႃႈ။
ၵဝ်ဢမ်ႇလႆႈမီးၸႂ်ဝႃႈ၊ႁႂ်ႈပိူၼ်ႈလႆႈသၢၵ်ႈသႃႇသေလႄႈႁႂ်ႈသူလႆႈႁၢပ်ႇၼၵ်းၼၼ်ႉဢေႃႈ။-
ၼႂ်းဝႃႈၼၼ်သေၵေႃႈ၊ႁႂ်ႈလႆႈသၢင်ႇထုၵ်ႇပုၼ်ႈတင်းသွင်ၽၢႆႇသွင်ပႃႈၸိုင်၊မိူဝ်ႈလဵဝ်ၼႆႉ၊တၢင်းဢၼ်သူမၢၵ်ႈမီးၼၼ်ႉသူထုၵ်ႇလီၸွႆႈထႅမ်ၶဝ်ၸိူဝ်းဢၼ်လူဝ်ႇတၢင်းၸွႆႈထႅမ်ၼၼ်ႉဢေႃႈ။ ဝၢႆးၼၼ်ႉမႃး၊မိူဝ်ႈဢၼ်ၶဝ်မၢၵ်ႈမီးၼၼ်ႉ၊ၶဝ်တၵ်းၸွႆႈထႅမ်သူမိူဝ်ႈဢၼ်သူလူဝ်ႇတၢင်းၸွႆႈထႅမ်ၼၼ်ႉဢေႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊မၼ်းတေၽဵင်ႇပဵင်းၵၼ်ဢေႃႈ။-
မၼ်းပဵၼ်ဢၼ်မႅၼ်ႈၸွမ်းၼင်ႇၼႂ်းၵျၢမ်းလိၵ်ႈတႅမ်ႈဝႆႉလႄႈဝႃႈ၊ “ၵေႃႉဢၼ်သိမ်းပႅင်းဝႆႉၼမ်ၼမ်ၼၼ်ႉ၊တၵ်းတေဢမ်ႇလိူဝ်ဝႆႉၵႃႈသင်လႄႈၵေႃႉဢၼ်သိမ်းပႅင်းၵေႇၼၼ်ႉတၵ်းတေဢမ်ႇၸုတ်ႈဢမ်ႇလုတ်ႈဢေႃႈ၊” ဝႃႈၼင်ႇၼႆၼၼ်ႉဢေႃႈ။
ႁဝ်းတၢင်ႇၵျေးၸူးၽြႃးပဵၼ်ၸဝ်ႈၵွပ်ႈပိူဝ်ႈႁဵတ်းႁႂ်ႈသြႃႇ တိတု၊ မီးၸႂ်ၸေႇတၼႃႇၶႂ်ႈၸွႆႈသူမိူၼ်ႁဝ်းၼၼ်ႉဢေႃႈ။-
မၼ်းထွမ်ႇဢဝ်ၵႂၢမ်းဢၼ်ႁဝ်းတိုၵ်းယူင်းမၼ်းၼၼ်ႉဢမ်ႇၵႃး၊မၼ်းမီးၸႂ်ၸေႇတၼႃႇႁႅင်းယႂ်ႇၼႃႇၶႂ်ႈၵႂႃႇၸူးသူၸွမ်းၼင်ႇမီးၼႂ်းၸႂ်မၼ်းဝႆႉၼၼ်ႉဢေႃႈ။-
ႁဝ်းတေပွႆႇၸႂ်ႉၼွင်ႉႁဝ်း၊ၵေႃႉဢၼ်ၸိူဝ်းၸဝ်ႈတင်းလၢႆယွင်ႈယေႃးမၼ်းလူၺ်ႈၼႃႈၵၢၼ်ဢၼ်ႁေႃးလၢတ်ႈၶၢဝ်ႇတြႃးသိူဝ်းပျေႃႇၸဝ်ႈၼၼ်ႉ၊ၵႂႃႇၸွမ်းသြႃႇ တိတု၊ ဢေႃႈ။-
လိူဝ်သေၼၼ်ႉ၊မၼ်းပဵၼ်ၵေႃႉဢၼ်ၸိူဝ်းၸဝ်ႈတင်းလၢႆလိူၵ်ႈဢဝ်ဝႆႉ၊ႁႂ်ႈလႆႈၵႂႃႇၸွမ်းႁဝ်းၵႃႈၼႂ်းၼႃႈၵၢၼ်ဢၼ်ႁဵတ်းတၢင်းလူႇပုၼ်ႈဢၵျူဝ်းၵုင်ႇသရေႇၽြႃးပဵၼ်ၸဝ်ႈ၊ဢိၵ်ႇတင်းပုၼ်ႈဢၼ်တၵ်းၼႄပျႃးၸႂ်ၸေႇတၼႃႇႁဝ်းတီႈၼၼ်ႈဢေႃႈ။
လွင်ႈၼင်ႇႁိုဝ်ႁဝ်းတၵ်းၵၢင်းလွတ်ႈတင်းတၢင်းဢၼ်ပိူၼ်ႈတၢင်ႇဢပျတ်ႈၼႂ်းတၢင်းဢၼ်ႁဝ်းယိပ်းၵမ်ငိုၼ်းလူႇငိုၼ်းတၢၼ်းၸိူဝ်းၼႆႉၸိုင်၊ဢွၼ်ၵၼ်ဝႆႉသတိယူႇဢေႃႈ။-
ႁဝ်းၵျၢမ်ႇပွင်ႁဵတ်းသၢင်ႈသိုဝ်ႈသိုဝ်ႈတေႃႇတေႃႇၽၢႆႇၼႃႈၸဝ်ႈၽြႃးၵူၺ်းဢမ်ႇၵႃး၊ႁဝ်းႁဵတ်းသိုဝ်ႈသိုဝ်ႈတေႃႇတေႃႇၽၢႆႇၼႃႈၵူၼ်းဢေႃႈ။
လိူဝ်သေၶဝ်ၼၼ်ႉ၊ႁဝ်းယင်းတေပွႆႇၸႂ်ႉၼွင်ႉႁဝ်း၊ၵေႃႉဢၼ်ႁဝ်းယၢမ်ႈလႆႈၸၢမ်းတူၺ်းမၼ်းလၢႆပွၵ်ႈယဝ်ႉလႄႈလႆႈႁုလွင်ႈဢၼ်မၼ်းၶတ်းၸႂ်ၵႆႉပွင်ၼႃႈၵၢၼ်ၵူႈၸိူဝ်ႉၵူႈပိူင်ၼၼ်ႉဢေႃႈ။ မိူဝ်ႈလဵဝ်ၼႆႉမၼ်းမီးတၢင်းဢၼ်မၼ်ႈၸႂ်တူဝ်ၸဝ်ႈၵဝ်ႇၼႃႇလူင်လၢင်လႄႈမၼ်းယဵင်ႈၶႅၼ်းၵႆႉၼႃႇဢေႃႈ။-
သြႃႇ တိတု၊ ၸမ်ႉ၊ပဵၼ်ၵေႃႉသႄႈၵဝ်၊ၵေႃႉဢၼ်ပွင်ၵၢၼ်ႁူမ်ႈလူၺ်ႈၵၼ်တင်းၵဝ်ၼႂ်းတၢင်းဢၼ်ၸွႆႈထႅမ်သူၼၼ်ႉဢေႃႈ။ ပီႈၼွင်ႉႁဝ်းၸိူဝ်းဢၼ်ၵႂႃႇၸွမ်းမၼ်းၸိူဝ်းၼၼ်ႉၸမ်ႉ၊ပဵၼ်ၽူႈတၢင်တူဝ်ၸိူဝ်းၸဝ်ႈတင်းလၢႆဢၼ်ၵႂႃႇပွင်ၵၢၼ်ပုၼ်ႈမုၼ်ၽုင်း ၸဝ်ႈၶရိၸ်ႈ၊ ၼၼ်ႉဢေႃႈ။-
ၼင်ႇႁိုဝ်တၵ်းၵိုင်ႇတၢၼ်ႇၵၼ်တင်းဢၼ်ႁဝ်းလႆႈဢုပ်ႇဝၢဝ်းလွင်ႈသူၽၢႆႇၼႃႈၸိူဝ်းၸဝ်ႈတင်းလၢႆၼၼ်ႉၸိုင်၊ဢွၼ်ၵၼ်ၼႄပျႃးတၢင်းႁၵ်ႉမႅတ်ႈတႃႇသူၵႃႈတီႈၶဝ်တင်းလၢႆတႃႉ။
လွင်ႈတႃႇၼႃႉတၢင်းလူႇဢၼ်သူင်ႇၵႂႃႇၸွႆႈထႅမ်ၵူၼ်းမူတ်းၸၢင်ႇၸဝ်ႈၽြႃးၵႃႈတီႈမိူင်း ယုတႃႉ၊ ၼၼ်ႉၵဝ်ဢမ်ႇလူဝ်ႇတႅမ်ႈမွၵ်ႇလၢတ်ႈၵႃႈသင်ထႅင်ႈယဝ်ႉ။-
လွင်ႈမၼ်းၸမ်ႉ၊ၵဝ်ႁုၸႂ်ၸေႇတၼႃႇသူလႄႈ ၵဝ်ယင်းဢုပ်ႇဝၢဝ်းလွင်ႈသူၵႃႈတီႈၵူၼ်း မႃႇၵေႇတေႃးၼိ၊ ၶဝ်လႄႈဝႃႈ၊ “ပီႈၼွင်ႉမိူင်း ဢၶႃႇယႃႉ၊ ၶဝ်ပေႃးတၼ်းဝႆႉပုၼ်ႈတႃႇႁႂ်ႈလႆႈၸွႆႈထႅမ်ၸဵမ်မိူဝ်ႈပီၵၢႆယဝ်ႉ၊” ဝႃႈၼႆဢေႃႈ။ ၸႂ်ၸေႇတၼႃႇသူၼၼ်ႉ၊ႁဵတ်းႁႂ်ႈၶဝ်ၵမ်ႈၼမ်တူင်ႉတိုၼ်ႇမႃးတႄႉတႄႉဢေႃႈ။-
ပိူဝ်ႈၼႆလႄႈ၊မိူဝ်ႈလဵဝ်ဢၼ်ၵဝ်သူင်ႇၼွင်ႉႁဝ်းၶဝ်ၵႂႃႇၵႃႈတီႈသူၼႆႉ၊ၼင်ႇႁိုဝ်ၵႂၢမ်းဢၼ်ၵဝ်လႆႈဢဝ်လွင်ႈသူဢုပ်ႇဝၢဝ်းၼၼ်ႉတၵ်းတေဢမ်ႇပဵၼ်လၢႆလၢႆလွၵ်ႇလွၵ်ႇၵႂႃႇၸိုင်၊ၵဵပ်းႁွမ်ငိုၼ်းလူႇထႃႈဝႆႉတႃႉ။-
ပေႃးဢမ်ႇၼၼ်သင်ဝႃႈ၊ပီႈၼွင်ႉ မႃႇၵေႇတေႃးၼိ၊ ၶဝ်ၸွမ်းၵဝ်ၵႂႃႇလႄႈႁၼ်လွင်ႈဢၼ်သူယင်ႉဢမ်ႇပႆႇတၼ်းၸိုင်၊ဢမ်ႇၸႂ်ႈသူၵူၺ်းတၵ်းလႆႈဢူၵ်းဢၢႆ၊ၵဝ်ၵေႃႉဢၼ်ယုမ်ႇယမ်သူလႄႈဢုပ်ႇဝၢဝ်းလွင်ႈသူမႃးၼၼ်ႉၵေႃႈ၊တေလႆႈဢူၵ်းဢၢႆၼႃႇဢေႃႈ။-
ပိူဝ်ႈၼႆၸင်ႇ၊ၵဝ်ပွႆႇၸႂ်ႉၼွင်ႉႁဝ်းၸိူဝ်းၼႆႉၵႂႃႇဢွၼ်တၢင်းၵဝ်၊ႁႂ်ႈၶဝ်လႆႈၵဵပ်းႁွမ်ငိုၼ်းလူႇဢၼ်သူပၼ်ၵတိထႃႈဝႆႉၼၼ်ႉလႄႈမိူဝ်ႈဢၼ်ၵဝ်ႁွတ်ႈၵႂႃႇၼၼ်ႉ၊ႁႂ်ႈလႆႈၼႄပျႃးလွင်ႈတၢင်းဢၼ်သူၸွႆႈထႅမ်ပိူၼ်ႈပဵၼ်ၵွပ်ႈပိူဝ်ႈတၢင်းဢၼ်တဵၵ်းငႅၼ်းၶေႃးသူဢမ်ႇၸႂ်ႈ၊သူၸွႆႈထႅမ်ၵွပ်ႈပိူဝ်ႈသူမီးၸႂ်ၸေႇတၼႃႇၼၼ်ႉဢေႃႈ။
လွင်ႈမၼ်းၸမ်ႉ၊ၵေႃႉဢၼ်ဝၢၼ်ႇၸိူဝ်ႉဝၢၼ်ႇၽၼ်းဢိတ်းဢီႈၼိုင်ႈၼၼ်ႉ၊တၵ်းလႆႈလိုၼ်ႈၶဝ်ႈႁူင်းၶဝ်ႈဢိတ်းဢီႈၼိုင်ႈၵူၺ်းလႄႈၵေႃႉဢၼ်ဝၢၼ်ႇၸိူဝ်ႉဝၢၼ်ႇၽၼ်းၼမ်ၼမ်ၼၼ်ႉတၵ်းလႆႈလိုၼ်ႈၶဝ်ႈႁူင်းၶဝ်ႈၼမ်ၼမ်ဢေႃႈ၊ဝႃႈၼႆမၢတ်ႈတွင်းတႃႉ။-
ပိူဝ်ႈဝႃႈၽြႃးပဵၼ်ၸဝ်ႈၵျိူၵ်ႈၸႂ်ထုၵ်ႇၸႂ်ၶဝ်ၸိူဝ်းဢၼ်ပႃးၸႂ်ၸေႇတၼႃႇလူႇတၢၼ်းၼၼ်ႉလႄႈၽူႈလႂ်သေဢမ်ႇဝႃႈ၊ၵႃႈၼင်ႇဢၼ်မၼ်းဢၢင်ႈဢၢၼ်းၼႂ်းၸႂ်မၼ်းဝႆႉၼၼ်ႉ၊ယင်းဢမ်ႇမီးၸႂ်သေလၢႆ၊ယင်းဢမ်ႇမၢတ်ႈပဵၼ်ဝုတ်ႈတြႃးလႄႈလူႇတၢၼ်းႁင်းၽႂ်ႁင်းမၼ်းတႃႉ။-
လွင်ႈၼင်ႇႁိုဝ်သူတၵ်းမီးပုၼ်ႈဢၼ်တူဝ်ၸဝ်ႈၵဝ်ႇၵုမ်ႇၵိၼ်ၵုမ်ႇၸႂ်ႉသေႇသေႇ၊ဢိၵ်ႇတင်းတၢင်းဢၼ်မၢၵ်ႈမီးပုၼ်ႈဢၼ်တၵ်းလႆႈႁဵတ်းၵျေးၸူးတၢင်းလီၵူႈၸိူဝ်ႉၵူႈပိူင်ၼၼ်ႉ၊ၽြႃးပဵၼ်ၸဝ်ႈတၢတ်ႈၼိူင်ႇပၼ်မၢင်ႇၵလႃႇတၢင်းလီၼမ်ၼႃႇသေဢၼ်သူလူဝ်ႇၼၼ်ႉဢေႃႈ။-
မၼ်းမႅၼ်ႈၸွမ်းၼႂ်းၵျၢမ်းလိၵ်ႈဢၼ်တႅမ်ႈဝႆႉလႄႈဝႃႈ၊ “မၼ်းၼၼ်ႉၽေးၸွၼ်းယဝ်ႉ။ မၼ်းမႅင်ႇပၼ် တီႈၶဝ်ၸိူဝ်းဢၼ်ယၢၵ်ႈၽၢၼ်ၼၼ်ႉၼမ်ၼႃႇလႄႈ ၵရုၼႃႇမၼ်းၵေႃႈတႄႇယူႇတႃႇသေႇဢေႃႈ၊” ဝႃႈၼင်ႇၼႆဢေႃႈ။
ၸဝ်ႈဢၼ်ပၼ်ၸိူဝ်ႉပၼ်ၽၼ်း၊ဢိၵ်ႇတင်းၶဝ်ႈမုၼ်းပုၼ်ႈတႃႇဢႁႃႇရႃႉတၢင်းၵိၼ်တီႈၵေႃႉဢၼ်ဝၢၼ်ႇပိုၼ်ၼၼ်ႉတၵ်းပၼ်ၵႃႈဢၼ်သူဝၢၼ်ႇပိုၼ်ႁႂ်ႈမၼ်းၼမ်ၵိုၼ်းမႃး၊ဢိၵ်ႇတင်းမၢၵ်ႇၶဝ်ႈႁူင်းၶဝ်ႈဢၼ်ဝႃႈ၊ဢၵျူဝ်းတၢင်းသိုဝ်ႈတေႃႇသူတၵ်းႁႂ်ႈၽႄႈၵႂၢင်ႈၼမ်ၵိုၼ်းမႃးဢေႃႈ။-
မၼ်းၸဝ်ႈတၵ်းႁႂ်ႈသူမၢၵ်ႈမီးၼႂ်းၵူႈၸိူဝ်ႉၵူႈပိူင်၊ပုၼ်ႈတႃႇတေလႆႈၽေးၸွၼ်းယိုၼ်ႈမႅင်ႇၵူႈၶိင်ႇၵူႈၶႃႇ၊ပုၼ်ႈလွင်ႈၼင်ႇႁိုဝ်ၵူၼ်းတင်းလၢႆတၵ်းလႆႈယွင်ႈယေႃးတၢင်ႇၵျေးၸူးၽြႃးပဵၼ်ၸဝ်ႈၵွပ်ႈပိူဝ်ႈငိုၼ်းလူႇဢၼ်သူၽၢၵ်ႇႁဝ်းမႃးၼၼ်ႉဢေႃႈ။-
ၵွပ်ႈသင်လႄႈဝႃႈၸမ်ႉ၊တႃႇၼႃႉတၢင်းလူႇဢၼ်သူႁဵတ်းၼႆႉပဵၼ်တၢင်းဢၼ်ၸွႆႈၵမ်ႉၸွႆႈထႅမ်ၵူၼ်းၸဝ်ႈၽြႃးၵူၺ်းဢမ်ႇၵႃး၊ယင်းပဵၼ်တၢင်းဢၼ်ၵူၼ်းၼမ်ၼႃႇယွင်ႈယေႃးတၢင်ႇၵျေးၸူးၽြႃးပဵၼ်ၸဝ်ႈဢေႃႈ။-
ၵွပ်ႈပိူဝ်ႈတၢင်းႁဵတ်းသူၼၼ်ႉလႄႈၵူၼ်းၼမ်ၼႃႇတၵ်းဢွၼ်ၵၼ်ယွင်ႈယေႃးမုၼ်ၵုင်ႇၽြႃးပဵၼ်ၸဝ်ႈ၊လူၺ်ႈလွင်ႈတၢင်းဢၼ်သူၵမ်ၵျၢင်ႉၸွမ်းၶၢဝ်ႇတြႃးသိူဝ်းပျေႃႇ ၸဝ်ႈၶရိၸ်ႈ၊ ဢၼ်သူယုမ်ႇမၢတ်ႈၼၼ်ႉ၊ဢိၵ်ႇတင်းလူၺ်ႈလွင်ႈၸႂ်ၸေႇတၼႃႇဢၼ်သူၽေးၸွၼ်းတီႈၶဝ်၊ဢိၵ်ႇတင်းတီႈပိူၼ်ႈၵူႈၵေႃႉၼၼ်ႉဢေႃႈ။-
ၼင်ႇၼၼ်လႄႈၶဝ်တၵ်းပႃးၸႂ်ပႃးၶေႃးသူးတွင်းသူင်ႇပၼ်မႅတ်ႈတႃႇပုၼ်ႈသူ၊ၵွပ်ႈပိူဝ်ႈၶဝ်ထွၵ်ႈလူၺ်ႈၵျေးၸူးၽြႃးပဵၼ်ၸဝ်ႈဢၼ်မျၢတ်ႈလီၼႃႇဢၼ်ၶဝ်ႁၼ်ၵႃႈၼႂ်းသူၼၼ်ႉဢေႃႈ။-
ႁဝ်းၵေႃႈ၊ဢွၼ်ၵၼ်ယွင်ႈယေႃးၽြႃးပဵၼ်ၸဝ်ႈပုၼ်ႈသုၵျေးၸူးမၼ်းၸဝ်ႈဢၼ်လိူဝ်တွၼ်းသေသူပ်းလၢတ်ႈလႆႈၼၼ်ႉတႃႉႁဝ်း။
ၵဝ် ပေႃးလု၊ ဢၼ်ဢူၼ်ႈဢွၼ်ႇၶျႃးတႅမ်ႇမိူဝ်ႈဢၼ်ယူႇၽၢႆႇၼႃႈသူလႄႈသမ်ႉႁတ်းႁၢၼ်မိူဝ်ႈဢၼ်ယူႇၵႆသူၼႆႉ၊ဢဝ်တင်းၸႂ်ဢၼ်ၼိမ်လီ၊ဢိၵ်ႇတင်းၸႂ်ၵရုၼႃႇ ၸဝ်ႈၶရိၸ်ႈ၊ လႄႈတွင်းပၢၼ်ႇသူလႄႈဝႃႈၸမ်ႉ၊-
ယႃႇပေႁဵတ်းႁႂ်ႈၵဝ်ၼႄတၢင်းႁတ်းႁၢၼ်တေႃႇသူမိူဝ်ႈဢၼ်ၵဝ်မႃးတီႈသူၼၼ်ႉသေၵမ်း။ လွင်ႈမၼ်းၸမ်ႉ၊ၵဝ်မၼ်ႈၸႂ်ဝႃႈ၊ၵဝ်ၸၢင်ႈႁတ်းႁၢၼ်တေႃႇၶဝ်ၸိူဝ်းဢၼ်မၢတ်ႈဝႃႈ၊ႁဝ်းႁဵတ်းၸွမ်းဢလူဝ်ႇၵူၼ်းလေႃးၵီႇၼၼ်ႉဢေႃႈ။-
ပိၵ်ႉသမ်ႉႁဝ်းမီးယူႇၼႂ်းလေႃးၵႃႉသေၵေႃႈ၊ႁဝ်းၸွမ်းၼိူဝ်ႉလိူတ်ႈၸႃႇတိသေလႄႈတိုၵ်းတေႃးဢမ်ႇၸႂ်ႈ။-
ၶိူင်ႈလၢၵ်ႈၼၢၵ်ႈဢၼ်ႁဝ်းယိပ်းတိုဝ်းႁႂ်ႈလႆႈယႃႉၽဵဝ်ႈပႅတ်ႈတပ်ႉရၢၼ်ႇသူႇၼၼ်ႉ၊ဢမ်ႇၸႂ်ႈၶိူင်ႈလၢၵ်ႈၼၢၵ်ႈလေႃးၵႃႉၼႆႉလႄႈပဵၼ်ၶိူင်ႈလၢၵ်ႈၼၢၵ်ႈဢၼ်မီးတၼ်းၶူဝ်းၽြႃးပဵၼ်ၸဝ်ႈၼၼ်ႉဢေႃႈ။-
ႁဝ်းယႃႉၽဵဝ်ႈပႅတ်ႈၵႂၢမ်းဢၼ်တွပ်ႇထဵင်ၸဝ်ႈၽြႃး၊ဢိၵ်ႇတင်းၸႂ်မႃႇၼႃႉသုင်ဢၼ်ႁႄႉၶႅၼ်ပိင်ႇၺႃႇဢၼ်ႁုၸၵ်းၽြႃးပဵၼ်ၸဝ်ႈၼၼ်ႉဢေႃႈ။ ႁဝ်းတိၺွပ်းဢဝ်တၢင်းၶႆႈၸႂ်ၵျၢမ်ႇပွင်ၵူႈမဵဝ်းလႄႈဢဝ်ၶျုၵ်ႈဝႆႉ၊ႁႂ်ႈလႆႈယူႇတႂ်ႈဢမိင်ႉလႄႈထွမ်ႇဢဝ်ၵႂၢမ်း ၸဝ်ႈၶရိၸ်ႈ၊ ဢေႃႈ။-
မိူဝ်ႈဢၼ်သူပႂ်ႉသဵတ်ႈၸႃႇတဵမ်ထူၼ်ႈယဝ်ႉၸိုင်၊ႁဝ်းၵေႃႈတၵ်းတၼ်းဝႆႉ၊ႁႂ်ႈလႆႈပၼ်တၢမ်ႇတီႈၶဝ်ၸိူဝ်းဢၼ်ဢမ်ႇထွမ်ႇဢဝ်ၼၼ်ႉၵူႈၵေႃႉၵူႈၵူၼ်းဢေႃႈ။
သူၸၢင်ႈတူၺ်းသရေႇၽၢႆႇၼွၵ်ႈၵူၺ်းဢေႃႈ။ ပေႃးသေၵေႃႉသေၵူၼ်းမၢတ်ႈတူဝ်ၸဝ်ႈၵဝ်ႇပဵၼ်ၵူၼ်း ၸဝ်ႈၶရိၸ်ႈ၊ ၸိုင်၊ႁႂ်ႈမၼ်းဝူၼ်ႉတူၺ်းထႅင်ႈလွင်ႈတူဝ်ၸဝ်ႈၵဝ်ႇလႄႈႁုဝႃႈ၊ႁဝ်းၵေႃႈပဵၼ်ၵူၼ်း ၸဝ်ႈၶရိၸ်ႈ၊ မိူၼ်မၼ်းၼင်ႇၵဝ်ႇၼၼ်ႉတႃႉ။-
ပိၵ်ႉသမ်ႉၵဝ်လႆႈဢုပ်ႇဝၢဝ်းပူၼ်ႉလိူဝ်လူၺ်ႈလွင်ႈဢႃႇၼႃႇဢၼ်ၸဝ်ႈၽြႃးဢၢပ်ႈပၼ်ႁဝ်းဝႆႉၼၼ်ႉပဵၼ်ပုၼ်ႈဢၼ်တၵ်းတေႁဵတ်းသူဢေႃႈ။ ပုၼ်ႈတၵ်းယႃႉၽဵဝ်ႈပႅတ်ႈသူဢမ်ႇၸႂ်ႈ၊ၵဝ်ၵေႃႈ၊တေဢမ်ႇလႆႈဢူၵ်းဢၢႆ။-
ၵဝ်ဢမ်ႇၶႂ်ႈႁႂ်ႈလိၵ်ႈဢၼ်ၵဝ်တႅမ်ႈပၼ်ၵႂႃႇၼၼ်ႉပဵၼ်တၢင်းဢၼ်လွၵ်ႇငိုတ်ႈတီႈသူ။-
ၵူၼ်းၵမ်ႈၽွင်ႈၸၢင်ႈလၢတ်ႈလႄႈဝႃႈ၊ “သြႃႇ ပေႃးလု၊ ၼႆႉမိူဝ်ႈဢၼ်တူဝ်မၼ်းမီးလူၺ်ႈၵၼ်တင်းႁဝ်းၼၼ်ႉ၊ပဵၼ်ၵူၼ်းဢူၼ်ႈဢွၼ်ႇၵူၺ်းလႄႈၵႂၢမ်းမၼ်းၵေႃႈဢမ်ႇပွင်ႇလွင်ႈၵႃႈသင်၊ၵူၺ်းၵႃႈ၊လိၵ်ႈဢၼ်မၼ်းတႅမ်ႈမႃးၼႆႉသမ်ႉပဵၼ်လိၵ်ႈဢၼ်မီးဢေႃးၸႃႇဢႃႇၼႃႇဝႆႉၼေႃ၊” ဝႃႈၼင်ႇၼႆဢေႃႈ။-
ႁႂ်ႈၵူၼ်းဢၼ်ၸၢင်ႈလၢတ်ႈၸိူဝ်ႉၼင်ႇၼၼ်ၼၼ်ႉႁုဝႃႈ၊မိူဝ်ႈဢၼ်ႁဝ်းယူႇတီႈၵႆလႄႈတႅမ်ႈလိၵ်ႈမႃးဝႃႈ၊ႁဝ်းတေႁဵတ်းၸိူဝ်ႉႁိုဝ်ၼၼ်ႉ၊ႁဝ်းၵေႃႈတေႁဵတ်းၸွမ်းၸိူဝ်ႉၼင်ႇၼၼ်၊မိူဝ်ႈဢၼ်ႁဝ်းလႆႈမႃးယူႇလူၺ်ႈၵၼ်တင်းသူဢေႃႈ။
ၼႂ်းဝႃႈၼၼ်သေၵေႃႈ၊ႁဝ်းဢမ်ႇႁတ်းဢဝ်တူဝ်ၸဝ်ႈၵဝ်ႇတႅၵ်ႈတိူင်းလူၺ်ႈၵၼ်တင်းၵူၼ်းၵမ်ႈၽွင်ႈဢၼ်ယုၵ်ႉယွင်ႈတူဝ်ၸဝ်ႈၵဝ်ႇၼၼ်ႉ။ ၶဝ်ၸိူဝ်းၼၼ်ႉၵေႃႉၼိုင်ႈလႄႈၵေႃႉၼိုင်ႈ၊ၶေႉၶဵင်ႇၵၼ်လႄႈတႅၵ်ႈတိူင်းၵၼ်ယူႇၵူၺ်းလႄႈပဵၼ်တၢင်းဢၼ်ပိင်ႇၺႃႇတိုၼ်ႈၼႃႇဢေႃႈ။-
ႁဝ်းၼႆႉၸမ်ႉ၊တၢင်းဢၼ်ႁဝ်းဢုပ်ႇဝၢဝ်းၼၼ်ႉ၊ဢမ်ႇပူၼ်ႉဢမ်ႇပႅၼ်၊ၵူၺ်းႁတ်းဢုပ်ႇဝၢဝ်းၵႃႈၼႂ်းဢၶႂၢင်ႉဢယေးဢၼ်ၽြႃးပဵၼ်ၸဝ်ႈဢၢပ်ႈပၼ်ႁဝ်းဝႆႉၼၼ်ႉဢေႃႈ။ သူၸိူဝ်းၼႆႉၵေႃႈ၊ၶဝ်ႈပႃးၼႂ်းၼႆႉယဝ်ႉဢေႃႈ။-
ပိူဝ်ႈဢၼ်သူၶဝ်ႈပႃးမီးယူႇၵႃႈၼႂ်းဢၶႂၢင်ႉဢယေးဢၼ်ၽြႃးပဵၼ်ၸဝ်ႈဢၢပ်ႈပၼ်ႁဝ်းၼၼ်ႉၸိုင်၊မိူဝ်ႈဢၼ်ႁဝ်းဢဝ်ၶၢဝ်ႇတြႃးသိူဝ်းပျေႃႇလွင်ႈ ၸဝ်ႈၶရိၸ်ႈ၊ သေလႄႈမႃးတီႈသူမိူဝ်ႈဢွၼ်တၢင်းၼၼ်ႉ၊ႁဝ်းဢမ်ႇလႆႈပူၼ်ႉလိူဝ်ဢၶႂၢင်ႉၽြႃးပဵၼ်ၸဝ်ႈဢေႃႈ။-
ပိူဝ်ႈၼႆလႄႈႁဝ်းဢမ်ႇဢုပ်ႇဝၢဝ်းလွင်ႈၵၢၼ်ပိူၼ်ႈတၢင်ႇၵေႃႉ၊ဢၼ်ႁဵတ်းပူၼ်ႉလိူဝ်သေတီႈဢၼ်ၽြႃးပဵၼ်ၸဝ်ႈဢၢပ်ႈပၼ်ႁဝ်းၼၼ်ႉလႄႈႁဝ်းမီးတၢင်းဢၼ်မုင်ႈမွင်းပႃႇရမီႇတၢင်းယုမ်ႇမၢတ်ႈသူတၵ်းယႂ်ႇၼမ်မႃးသေယဝ်ႉ၊ႁဝ်းတၵ်းလႆႈႁဵတ်းၵၢၼ်ဢၼ်ယဵင်ႈၶႅၼ်းၼမ်ၵိုၼ်းၼႃႇတီႈသူ၊ၵႃႈၼႂ်းဢၶႂၢင်ႉဢယေးဢၼ်ၽြႃးပဵၼ်ၸဝ်ႈဢၢပ်ႈပၼ်ႁဝ်းဝႆႉၼၼ်ႉဢေႃႈ။-
ႁဵတ်းၼၼ်လႄႈႁဝ်းတၵ်းလႆႈၶၢမ်ႈမိူင်းသူၵႂႃႇတၢင်ႇမိူင်းၽၢႆႇပုၼ်ႉလႄႈႁေႃးလၢတ်ႈၶၢဝ်ႇတြႃးသိူဝ်းပျေႃႇဢေႃႈ။ ႁဝ်းတၵ်းဢမ်ႇဢုပ်ႇဝၢဝ်းၵၢၼ်ဢၼ်ပိူၼ်ႈႁဵတ်းၼၼ်ႉလႄႈဝႃႈ၊ပဵၼ်ၵၢၼ်ႁဝ်းဢေႃႈ။
ၵူၺ်းၵႃႈ၊ၼႂ်းၵျၢမ်းလိၵ်ႈမီးဝႆႉလႄႈဝႃႈ၊ “ၵေႃႉဢၼ်ၶႂ်ႈဢုပ်ႇဝၢဝ်းၼၼ်ႉ၊ဢုပ်ႇဝၢဝ်းၼႂ်းလွင်ႈတၢင်းဢၼ်ၸဝ်ႈၽြႃးပွင်ႁဵတ်းၼၼ်ႉၵူၺ်းတႃႉ၊” ဝႃႈၼင်ႇၼႆဢေႃႈ။-
လွင်ႈမၼ်းၸမ်ႉ၊ၵေႃႉဢၼ်ယွင်ႈယေႃးတူဝ်ၸဝ်ႈၵဝ်ႇၼၼ်ႉ၊ပဵၼ်ၵေႃႉဢၼ်ၸဝ်ႈၽြႃးႁပ်ႉတုင်းဢဝ်ဢမ်ႇၸႂ်ႈ။ ၵေႃႉဢၼ်လႆႈၶၢမ်ႇတၢင်းဢၼ်ၸဝ်ႈၽြႃးယွင်ႈယေႃးၼၼ်ႉၵူၺ်းပဵၼ်ၵေႃႉဢၼ်မၼ်းၸဝ်ႈႁပ်ႉတုင်းဢဝ်ဢေႃႈ။
ၶႅၼ်းတေႃႈယိူၼ်ႉၶၢမ်ႇဢိတ်းဢွၼ်ႇၼိုင်ႈၼႂ်းတၢင်းဢၼ်ၵဝ်ၶႃႈလၢတ်ႈၵႂၢမ်းမိူၼ်ၵူၼ်းငိူဝ်ႈၼၼ်ႉသေၵမ်း။ ဝႃႈၼႆၵဝ်ၶႃႈတွင်းပၢၼ်ႇသူဢေႃႈ။-
ၸိူဝ်ႉၼင်ႇဢၼ်ၽြႃးပဵၼ်ၸဝ်ႈၶႅၼ်သူၼၼ်ႉ၊ၵဝ်ၶႃႈၵေႃႈၶႅၼ်ၸွမ်းဢေႃႈ။ ၵွပ်ႈပိူဝ်ႈၵဝ်ၶႃႈမၢတ်ႈသူပဵၼ်ၸိူဝ်ႉၼင်ႇၵၼ်ႇၺႃႇသၢဝ်ၸႅတ်ႈဢၼ်ၵဝ်ဢဵၼ်းဢၢၼ်းတေသွင်ႇမၢင်ႇၵလႃႇပၼ်ၽူဝ်ၵေႃႉလဵဝ်၊ဢၼ်ပဵၼ် ၸဝ်ႈၶရိၸ်ႈ၊ ၼၼ်ႉဢေႃႈ။-
ၵဝ်ၶႃႈၵူဝ်ႁူဝ်ၸႂ်သူတၵ်းပိၼ်ႇၵႂႃႇလႄႈတၢင်းဢၼ်သူပႃးတင်းႁူဝ်ၸႂ်ဢၼ်မူတ်းသႂ်သေလႄႈၵူဝ်းၵႂၢႆႇ ၸဝ်ႈၶရိၸ်ႈ၊ ၼၼ်ႉ၊တၵ်းလုလႅဝ်ၵႂႃႇမိူၼ်ၸိူဝ်ႉၼင်ႇဢၼ်ငူးပႃးတင်းပရိယႄႇလႄႈပႅတ်ႉလႅၼ် ဢေးဝႃႉ၊ ၼၼ်ႉဢေႃႈ။-
လွင်ႈမၼ်းၸမ်ႉ၊မိူဝ်ႈဢၼ်ပိူၼ်ႈတၢင်ႇၵေႃႉမႃးႁေႃးလၢတ်ႈလွင်ႈ ၸဝ်ႈယေႇသု၊ ဢၼ်ဢမ်ႇၸႂ်ႈပႃးလဵဝ်ၵၼ်တင်း ၸဝ်ႈယေႇသု၊ ဢၼ်ႁဝ်းႁေႃးၼၼ်ႉ၊သူယိူၼ်ႉၶၢမ်ႇၵေႃႉၼၼ်ႉဢေႃႈ။ လိူဝ်သေၼၼ်ႉသူႁပ်ႉတုင်းဢဝ်ဝိၺိၺ်ႇဢၼ်ပႅၵ်ႇပိူင်ႈၵၼ်တင်းဝိၺိၺ်ႇဢၼ်သူလႆႈႁပ်ႉတုင်းဢဝ်ယဝ်ႉၼၼ်ႉဢမ်ႇၵႃး၊သူၸဝ်ႈထွမ်ႇဢဝ်ၶၢဝ်ႇတြႃးသိူဝ်းပျေႃႇဢၼ်ပႅၵ်ႇပိူင်ႈၵၼ်တင်းၶၢဝ်ႇတြႃးသိူဝ်းပျေႃႇဢၼ်ႁဝ်းႁေႃးပၼ်တီႈသူဝႆႉၼၼ်ႉယဝ်ႉဢေႃႈ။
ၵဝ်ၶႃႈထၢင်ႇတႄႉ၊ၵဝ်ၶႃႈဢမ်ႇတူၵ်းတႅမ်ႇသေၶဝ်ၸိူဝ်းဢၼ်ႁဵတ်းႁၢင်ႈပဵၼ်တမၢၼ်ႇၸဝ်ႈဢၼ်ယႂ်ႇမျၢတ်ႈၸိူဝ်းၼၼ်ႉဢေႃႈ။-
ပိၵ်ႉသမ်ႉ၊ၵဝ်ၶႃႈဢမ်ႇမေႃႁေႃးလၢတ်ႈထၢၼ်ႇႁိုဝ်သေၵေႃႈ၊တၢင်းႁုတၢင်းႁၼ်ၵဝ်ၶႃႈဢမ်ႇၺၢမ်ႉ၊ၵဝ်ၶႃႈပေႃးလႆႈၼႄပျႃးႁႂ်ႈထၢင်ႇသႃးတီႈသူၵႃႈၼႂ်းၵၼ်ငၢၼ်းၵူႈၸိူဝ်ႉၵူႈမဵဝ်းမႃးယဝ်ႉ။
မိူဝ်ႈဢၼ်ၵဝ်ၶႃႈႁေႃးလၢတ်ႈၶၢဝ်ႇတြႃးသိူဝ်းပျေႃႇပၼ်တီႈသူၼၼ်ႉ၊ၵဝ်ၶႃႈဢမ်ႇယွၼ်းၵႃႈမၼ်းၶၼ်မၼ်းတီႈသူသေပွၵ်ႈ။ ၵဝ်ၶႃႈၶၢမ်ႇၶျႃးတူၵ်းတူဝ်ၸဝ်ႈၵဝ်ႇလူင်းတႅမ်ႇႁႂ်ႈလႆႈယုၵ်ႉယွင်ႈသူဢေႃႈ။ ဢၼ်ၵဝ်ၶႃႈႁဵတ်းၼင်ႇၼႆၼၼ်ႉ၊ၸွင်ႇၵဝ်ၶႃႈၽိတ်းႁိုဝ်း။-
ၵဝ်ၶႃႈႁပ်ႉၶၢမ်ႇဢဝ်တၢင်းဢၼ်ၸွႆႈထႅမ်ဢၼ်ၸိူဝ်းၸဝ်ႈတၢင်ႇတီႈတၢင်ႇလႅၼ်ပၼ်မႃးၼၼ်ႉ၊ထၢၼ်ႈပေႃးတေလႆႈလၢတ်ႈဝႃႈ၊ၵဝ်ၶႃႈၸူၼ်ဢဝ်တီႈၶဝ်ႁႂ်ႈလႆႈပွင်ၵၢၼ်ငၢၼ်းၵႃႈၼႂ်းသူဢေႃႈ။-
လိူဝ်သေၼၼ်ႉ၊မိူဝ်ႈဢၼ်ၵဝ်ၶႃႈမီးယူႇလူၺ်ႈၵၼ်တင်းသူလႄႈလူဝ်ႇငိုၼ်းဢိတ်းဢီႈၼၼ်ႉၸိုင်၊ၵဝ်ၶႃႈဢမ်ႇတွၼ်ႉယွၼ်းတီႈသူၸဝ်ႈသေပွၵ်ႈ။ ပီႈၼွင်ႉဢၼ်လုၵ်ႉတီႈမိူင်း မႃႇၵေႇတေႃးၼိ၊ ၸိူဝ်းၼၼ်ႉ၊ဢဝ်မႃးပၼ်ၵႃႈဢၼ်ၵဝ်ၶႃႈလူဝ်ႇၼၼ်ႉဢေႃႈ။ မိူၼ်ၼင်ႇၵႃႈပူၼ်ႉမႃးယဝ်ႉၼၼ်ႉ၊မိူဝ်းၼႃႈမႃးၵေႃႈၵဝ်ၶႃႈတၵ်းဢမ်ႇယွၼ်းတီႈသူသေပွၵ်ႈဢေႃႈ။-
ၵဝ်ၶႃႈလၢတ်ႈၵႂၢမ်းသဵတ်ႈၸႃႇၼႂ်း ၸဝ်ႈၶရိၸ်ႈ၊ လႄႈပၼ်ၵတိဝႃႈ၊လွင်ႈတၢင်းဢၼ်ၵဝ်ၶႃႈဢုပ်ႇဝၢဝ်းၸိူဝ်ႉၼင်ႇၼႆၼၼ်ႉ၊ၵႃႈၼႂ်းမိူင်း ဢၶႃႇယႃႉ၊ ၼႆႉ၊ၽူႈလႂ်ဢမ်ႇၸၢင်ႈႁႄႉၶႅၼ်ၵဝ်ၶႃႈလႆႈဢေႃႈ။-
ၵွပ်ႈသင်လႄႈၵဝ်ၶႃႈလၢတ်ႈဝႃႈၸိူဝ်ႉၼင်ႇၼႆ။ ၵွပ်ႈပိူဝ်ႈၵဝ်ၶႃႈဢမ်ႇႁၵ်ႉသူႁိုဝ်း။ ၽြႃးပဵၼ်ၸဝ်ႈႁုလွင်ႈဢၼ်ၵဝ်ၶႃႈႁၵ်ႉသူၼၼ်ႉယူႇဢေႃႈ။
ၼင်ႇႁိုဝ် “တမၢၼ်ႇၸဝ်ႈတၢင်ႇၵေႃႉၸိူဝ်းၼၼ်ႉ” တၵ်းဢမ်ႇၸၢင်ႈဢုပ်ႇဝၢဝ်းလႄႈဝႃႈ၊ၶဝ်ပွင်ႁဵတ်းၸိူဝ်ႉၼင်ႇဢၼ်ႁဝ်းပွင်ႁဵတ်းၼၼ်ႉလႆႈဝႃႈၼႆၼၼ်ႉၸိုင်၊ၵႃႈၼင်ႇဢၼ်ၵဝ်ၶႃႈႁဵတ်းလႄႈဢမ်ႇလႆႈယွၼ်းဢဝ်ၵႃႈၶၼ်ၵၢၼ်ၼၼ်ႉ၊ၵဝ်ၶႃႈတၵ်းသိုပ်ႇႁဵတ်းၵႂႃႇဢေႃႈ။-
ၶဝ်ၸိူဝ်းၼၼ်ႉ၊ပဵၼ်တမၢၼ်ႇၸဝ်ႈဢၼ်ဢမ်ႇၸိုဝ်ႈဢမ်ႇၸႂ်ႈလႄႈၶဝ်ပႅတ်ႉလႅၼ်လွင်ႈၵၢၼ်ငၢၼ်းၶဝ်သေႁဵတ်းႁၢင်ႈပဵၼ်တမၢၼ်ႇ ၸဝ်ႈၶရိၸ်ႈ၊ ဢေႃႈ။-
လွင်ႈတၢင်းၸိူဝ်းၼႆႉ၊ပဵၼ်ဢၼ်လီဢၢမ်းဢမ်ႇၸႂ်ႈ။ ၸႃႇတၢၼ်ႇ၊ ၵေႃႈၸၢင်ႈႁဵတ်းၸိူဝ်ႉၼင်ႇႁၢင်ႈတမၢၼ်ႇၵၢင်ႁၢဝ်ဢၼ်ႁိူဝ်ႈလႅင်းၼၼ်ႉယူႇဢေႃႈ။-
ပိူဝ်ႈၼႆလႄႈတၢင်းဢၼ်တပႄး ၸႃႇတၢၼ်ႇ၊ ႁဵတ်းႁၢင်ႈပဵၼ်ၸိူဝ်ႉၼင်ႇတမၢၼ်ႇဢၼ်သိုဝ်ႈတေႃႇၼၼ်ႉၵေႃႈ၊မၼ်းဢမ်ႇၸႂ်ႈလွင်ႈဢၼ်လီဢၢမ်းဢေႃႈ။ တီႈသုတ်းတီႈၵွႆမၼ်း၊ၶဝ်တၵ်းလႆႈၶၢမ်ႇဢဝ်ဢၵျူဝ်းဢပျတ်ႈ၊ၸွမ်းၵႃႈၼင်ႇဢၼ်ၶဝ်ႁဵတ်းၶဝ်သၢင်ႈၼၼ်ႉဢေႃႈ။
ၵဝ်ၶႃႈသမ်ႉဝႃႈထႅင်ႈၸမ်ႉ၊ယႃႇႁႂ်ႈၽူႈလႂ်ထၢင်ႇဝႃႈ၊ၵဝ်ၶႃႈပဵၼ်ၵူၼ်းငိူဝ်ႈ။ ၵူၺ်းၵႃႈ၊ပေႃးသူယင်းမၢတ်ႈၵဝ်ၶႃႈပဵၼ်ၵူၼ်းငိူဝ်ႈၸိုင်၊ၶႅၼ်းတေႃႈယိူၼ်ႉၶၢမ်ႇၵူၼ်းငိူဝ်ႈၼႆႉႁႂ်ႈၵဝ်ၶႃႈလႆႈဢုပ်ႇဝၢဝ်းလွင်ႈတူဝ်ၸဝ်ႈၵဝ်ႇဢိတ်းဢွၼ်ႇၼိုင်ႈသေၵမ်း။-
လွင်ႈတၢင်းဢၼ်ၵဝ်ၶႃႈလၢတ်ႈယူႇယၢမ်းလဵဝ်ၼႆႉ၊ဢမ်ႇၸႂ်ႈၸွမ်းဢလူဝ်ႇၸဝ်ႈၽြႃးလႄႈဢၼ်ၵဝ်ၶႃႈဢုပ်ႇဝၢဝ်းယူႇၼႆႉပဵၼ်ဢၼ်ၵဝ်ၶႃႈဢုပ်ႇလၢတ်ႈမိူၼ်ၸိူဝ်ႉၼင်ႇၵူၼ်းငိူဝ်ႈဢေႃႈ။-
ၵွပ်ႈပိူဝ်ႈၵူၼ်းၼမ်ၼႃႇ၊ဢဝ်ဢလူဝ်ႇၸႂ်ၵူၼ်းလေႃးၵီႇလႄႈဢုပ်ႇဝၢဝ်းၼၼ်ႉၵဝ်ၶႃႈၵေႃႈတၵ်းဢုပ်ႇဝၢဝ်းၸိူဝ်ႉၼင်ႇၼၼ်ဢေႃႈ။-
ၵွပ်ႈပိူဝ်ႈသူပဵၼ်ၵူၼ်းမီးပိင်ႇၺႃႇလႄႈသူမီးၸႂ်ယိုၼ်းၸႂ်ယၢဝ်းယိူၼ်ႉၶၢမ်ႇၵူၼ်းငိူဝ်ႈတင်းလၢႆဢေႃႈ။-
သူယင်းယိူၼ်ႉၶၢမ်ႇတၢင်းဢၼ်ပိူၼ်ႈဢဝ်သူၵႂႃႇပဵၼ်ၶႃႈၶဝ်၊တၢင်းဢၼ်ပိူၼ်ႈၶၢႆၵိၼ်သူ၊တၢင်းဢၼ်ပိူၼ်ႈပႄႉၵိၼ်သူ၊တၢင်းဢၼ်ပိူၼ်ႈထၢင်ႇလဵၵ်ႉသူ၊ဢိၵ်ႇတင်းတၢင်းဢၼ်ပိူၼ်ႈတူပ်းၵႅမ်ႈသူၸိူဝ်းၼၼ်ႉဢေႃႈ။-
ၵွပ်ႈပိူဝ်ႈႁဝ်းဢမ်ႇႁဵတ်းလႆႈၸိူဝ်ႉၼင်ႇၼၼ်လႄႈၵဝ်ငိၼ်းလီဢၢႆတႄႉတႄႉဢေႃႈ။ ၵူၺ်းၵႃႈ၊ပေႃးပိူၼ်ႈယင်းႁတ်းဢုပ်ႇဝၢဝ်းၸိုင်၊ၵဝ်ၶႃႈလၢတ်ႈမိူၼ်ၸိူဝ်ႉၼင်ႇၵႂၢမ်းၵူၼ်းငိူဝ်ႈလႄႈဝႃႈၸမ်ႉ၊ၵဝ်ၶႃႈၵေႃႈတေဢုပ်ႇဝၢဝ်းဢေႃႈ။-
ၶဝ်ဢုပ်ႇဝႃႈ၊ၶဝ်ပဵၼ်ၵူၼ်းမဵဝ်း ႁေႇပြႄး၊ ဝႃႈၼႆႁိုဝ်း။ ၵဝ်ၶႃႈၵေႃႈပဵၼ်ၵူၼ်း ႁေႇပြႄး၊ ဢေႃႈ။ ၶဝ်ဢုပ်ႇဝႃႈ၊ၶဝ်ပဵၼ်ၵူၼ်းမဵဝ်း ဢိသရေး၊ ဝႃႈၼႆႁိုဝ်း။ ၵဝ်ၶႃႈၵေႃႈပဵၼ်ဢေႃႈ။ ၶဝ်ဢုပ်ႇဝႃႈ၊ၶဝ်ပဵၼ်ၸိူဝ်ႉၶိူဝ်း ဢႃႇပြႃႇႁၢမ်ႇ၊ ဝႃႈၼႆႁိုဝ်း။ ၵဝ်ၶႃႈၵေႃႈပဵၼ်ဢေႃႈ။-
ၶဝ်ဢုပ်ႇဝႃႈ၊ၶဝ်ပဵၼ်ၵူၼ်းပွင်ၵၢၼ် ၸဝ်ႈၶရိၸ်ႈ၊ ဝႃႈၼႆႁိုဝ်း။ ၵဝ်ၶႃႈယဵင်ႈၶႅၼ်းပဵၼ်ၵူၼ်းပွင်ၵၢၼ် ၸဝ်ႈၶရိၸ်ႈ၊ ဢၼ်လီလိူဝ်သေၶဝ်လူးၵွၼ်ႇဢေႃႈ။ ၵႂၢမ်းၼႆႉပဵၼ်ၸိူဝ်ႉၼင်ႇၵႂၢမ်းၵူၼ်းယွင်ႇဢေႃႈ။ ၵဝ်ၶႃႈယဵင်ႈၶႅၼ်းၶတ်းၸႂ်ပွင်ႁဵတ်းၵၢၼ်မၼ်းၸဝ်ႈၼႃႇသေၶဝ်၊လႆႈၶၢမ်ႇတူၵ်းထွင်ႇၼႃႇသေၶဝ်၊လႆႈၶၢမ်ႇပိူၼ်ႈပေႃႉယႅၼ်ႉၼႃႇသေၶဝ်၊ယင်းလႆႈၶၢမ်ႇၽေးဢၼ်ၸမ်တၵ်းတၢႆၼႃႇသေၶဝ်လၢႆပွၵ်ႈဢေႃႈ။-
ၵဝ်ၶႃႈလႆႈၶၢမ်ႇတၢမ်ႇၶွၼ်ႉဢၼ်ၵူၼ်းလူင် ၵျူး၊ ၶဝ်ပေႃႉႁႃႈပွၵ်ႈ၊ပွၵ်ႈၼိုင်ႈသၢမ်သိပ်းၵဝ်ႈၵမ်းဢေႃႈ။-
ၶုၼ် ရူဝ်းမႃႉ၊ ၶဝ်ပၼ်တၢမ်ႇဢဝ်ၶွၼ်ႉပေႃႉၵဝ်ၶႃႈသၢမ်ပွၵ်ႈဢေႃႈ။ သမ်ႉလႆႈၶၢမ်ႇပိူၼ်ႈဢဝ်မၢၵ်ႇႁိၼ်ပိုဝ်ႈသႂ်ႇပွၵ်ႈၼိုင်ႈဢေႃႈ။ ၵဝ်ၶႃႈယၢမ်ႈလႆႈထူပ်းၽေးႁိူဝ်းသၢင်းၽေႃးၸူမ်သၢမ်ပွၵ်ႈလႄႈ ပွၵ်ႈၼိုင်ႈၵဝ်ၶႃႈလႆႈၽူးယူႇၼႂ်းၼမ်ႉပၢင်ႇလၢႆႇဝၼ်းၼိုင်ႈၶိုၼ်းၼိုင်ႈဢေႃႈ။-
ၼႂ်းသဵၼ်ႈတႃသၢႆတၢင်းၵဝ်ၶႃႈၸိူဝ်းၼၼ်ႉ၊ၵဝ်ၶႃႈလႆႈထူပ်းၺႃးၽေးတုၵ်ႉၶႃႉၼမ်ၼႃႇဢေႃႈ။ ၵဝ်ၶႃႈလႆႈထူပ်းၽေးဢၼ်ၼမ်ႉႁွင်ႈၼမ်ႉၵႄးထူမ်ႈ၊ၽေးၵူၼ်းႁၢႆႉၵူၼ်းၸူၼ်၊ၽေးဢၼ်ၵူၼ်းမဵဝ်း ၵျူး၊ ၼင်ႇၵၼ်ယႃႉၵဝ်း၊ၽေးၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၼိၵ်ႈၸၢၵ်ႈ၊ၽေးဢၼ်ထူပ်းၼႂ်းမိူင်းယႂ်ႇဝဵင်းလူင်၊ၽေးဢၼ်ထူပ်းၼႂ်းထိူၼ်ႇၼႂ်းလွႆ၊ၽေးပၢင်ႇလၢႆႇ၊ၽေးၵေႃႉသႄႈဢၼ်ဢမ်ႇမီးသဵတ်ႈၸႃႇၸိူဝ်းၼႆႉ၊ၵဝ်ၶႃႈလႆႈၶၢမ်ႇမႃးယဝ်ႉဢေႃႈ။-
ၵဝ်ၶႃႈလႆႈၶတ်းၸႂ်ၶတ်းၶေႃးပွင်ႁဵတ်းၵၢၼ်ထၢၼ်ႈပေႃးၵူၼ်ႉပေႃးၶိုၼ်ႈတင်းတူဝ်တင်းၶိင်း၊ဢမ်ႇလႆႈလပ်းလႆႈၼွၼ်းလႄႈပႂ်ႉယူႇဢမ်ႇႁုလၢႆပွၵ်ႈ၊ယင်းၶၢမ်ႇဢိုပ်းၶဝ်ႈဢိုပ်းၼမ်ႉ၊လႆႈၵမ်တၢင်းၵိၼ်လၢႆပွၵ်ႈ၊မၢင်ပွၵ်ႈလႆႈၶၢမ်ႇၵတ်းၶၢမ်ႇၼၢဝ်၊မၢင်ပွၵ်ႈဢမ်ႇမီးၶူဝ်းၼုင်ႈၶူဝ်းမႆဢေႃႈ။-
လိူဝ်သေလွင်ႈတၢင်းဢၼ်မီးၵႃႈၼွၵ်ႈၸိူဝ်းၼႆႉၼၼ်ႉ၊ၵႃႈၼႂ်းႁူဝ်ၸႂ်ၵဝ်ၶႃႈၵေႃႈတၢင်းဢၼ်မႆႈၸႂ်ၵွပ်ႈလူၺ်ႈၸိူဝ်းၸဝ်ႈတင်းလၢႆ၊မီးဝႆႉၵူႈမိူဝ်ႈၵူႈဝၼ်းယူႇဢေႃႈ။-
မိူဝ်ႈဢၼ်သေၵေႃႉသေၵူၼ်းႁႅင်းလဵၵ်ႉႁႅင်းဢူၼ်ႈၼၼ်ႉ၊ၵဝ်ၶႃႈၵေႃႈႁႅင်းလဵၵ်ႉႁႅင်းဢူၼ်ႈၸွမ်းၶဝ်ဢေႃႈ။ မိူဝ်ႈဢၼ်ပိူၼ်ႈႁဵတ်းႁႂ်ႈသေၵေႃႉသေၵူၼ်းတူၵ်းၸူမ်ၵႃႈၼႂ်းဢပျတ်ႈၼၼ်ႉၵေႃႈၵဝ်ၶႃႈမႆႈၸႂ်ဢေႃႈ။
ပေႃးမီးလွင်ႈတၢင်းဢၼ်ၵဝ်ထုၵ်ႇလီဢုပ်ႇဝၢဝ်းၸိုင်၊ၵဝ်ၶႃႈတၵ်းဢုပ်ႇဝၢဝ်းလွင်ႈဢၼ်ၵဝ်ၶႃႈႁႅင်းလဵၵ်ႉႁႅင်းၵေႇၼၼ်ႉဢေႃႈ။-
ၵဝ်ၶႃႈဢမ်ႇပႅတ်ႉလႅၼ်ဝႃႈၼႆ၊ၽြႃးပဵၼ်ၸဝ်ႈပေႃႈၸဝ်ႈႁဝ်း ၸဝ်ႈယေႇသုၶရိၸ်ႈ၊ ၸဝ်ႈဢၼ်ႁဝ်းယွင်ႈယေႃးယူႇတႃႇသေႇဢမ်ႇထၢတ်ႇၼၼ်ႉႁုယူႇဢေႃႈ။-
မိူဝ်ႈဢၼ်ၵဝ်ၶႃႈမီးယူႇၼႂ်းဝဵင်း တမ်ႇမတ်ႉသၵတ်ႉ၊ ၼၼ်ႉ၊ၸဝ်ႈၽႃႉဢၼ်ၶုၼ်ႁေႃၶမ်း ဢရေႇတႃႉ၊ တၢင်ႇဝႆႉၼၼ်ႉ၊ဢဝ်လုၵ်ႈသိုၵ်းမၼ်းပႂ်ႉၽၵ်းတူဝဵင်းဝႆႉ၊ႁႂ်ႈလႆႈတိဢဝ်ၵဝ်ၶႃႈဢေႃႈ။-
ၵူၺ်းၵႃႈ၊ပိူၼ်ႈဢဝ်ၵဝ်ၶႃႈသႂ်ႇၼႂ်းၵူၺ်လႄႈယွၼ်ႇလူင်းႁူးပွင်ႇလမ်းဝဵင်းသေယဝ်ႉ၊ၵဝ်ၶႃႈလႆႈလွတ်ႈသေၵႃႈတီႈမိုဝ်းၸဝ်ႈၽႃႉၼၼ်ႉဢေႃႈ။
ပိၵ်ႉသမ်ႉဝႃႈ၊တၢင်းဢၼ်ဢုပ်ႇဝၢဝ်းလွင်ႈတူဝ်ၸဝ်ႈၵဝ်ႇဢမ်ႇမီးဢၵျူဝ်းသေၵေႃႈ၊ၵဝ်ၶႃႈတၵ်းဢုပ်ႇဝၢဝ်းၵႂႃႇထႅင်ႈလွင်ႈၼိမိၵ်ႈတင်းပျႃႇတိၵ်ႈၸဝ်ႈၽြႃးၼၼ်ႉဢေႃႈ။-
ၵဝ်ၶႃႈႁုဝႃႈ၊ၵူၼ်း ၸဝ်ႈၶရိၸ်ႈ၊ ၵေႃႉၼိုင်ႈ၊မိူဝ်ႈပူၼ်ႉမႃးသိပ်းသီႇပီၼၼ်ႉ၊မၼ်းလႆႈၶၢမ်ႇဢုမ်ႈၶိုၼ်ႈၵႂႃႇမိူင်းၽႃႉၵၢင်ႁၢဝ်တီႈသၢမ် ပုၼ်ႉၼၼ်ႉဢေႃႈ။ (လွင်ႈတၢင်းၼႆႉၶိုၼ်ႈၵႂႃႇတင်းတူဝ်ႁိုဝ်။ ဝိၺိၺ်ႇၵူၺ်းႁိုဝ်ၵဝ်ဢမ်ႇၸၢင်ႈလၢတ်ႈ။ ၽြႃးပဵၼ်ၸဝ်ႈၵူၺ်းႁုဢေႃႈ။-)
ၵဝ်ၶႃႈသမ်ႉလၢတ်ႈထႅင်ႈၸမ်ႉ၊ၵဝ်ၶႃႈႁုဝႃႈ၊ၵူၼ်းၵေႃႉၼၼ်ႉလႆႈၶၢမ်ႇဢုမ်ႈၶိုၼ်ႈၵႂႃႇၵႃႈၼိူဝ်မိူင်းၶျၢမ်းသႃႇတီႈသုင်သုတ်းပုၼ်ႉဢေႃႈ။ (လွင်ႈၼႆႉၸမ်ႉ၊မၼ်းလႆႈၶိုၼ်ႈၵႂႃႇတင်းတူဝ်ႁိုဝ်။ ဝိၺိၺ်ႇၵူၺ်းႁိုဝ်၊ၵဝ်ၶႃႈဢမ်ႇၸၢင်ႈလၢတ်ႈ။ ၽြႃးပဵၼ်ၸဝ်ႈၵူၺ်းႁုဢေႃႈ။-)
ၵႃႈတီႈၼၼ်ႈမၼ်းလႆႈငိၼ်းမဵဝ်းဢၼ်ဢမ်ႇၸၢင်ႈလၢတ်ႈပဵၼ်ၵႂၢမ်းၵူၼ်း၊မဵဝ်းဢၼ်ၽြႃးပဵၼ်ၸဝ်ႈဢမ်ႇပၼ်လၢတ်ႈၼၼ်ႉဢေႃႈ။-
ပိူဝ်ႈၼႆလႄႈၵဝ်ၶႃႈတေဢုပ်ႇဝၢဝ်းလွင်ႈၵေႃႉၼၼ်ႉဢေႃႈ။ ၵူၺ်းၵႃႈ၊ၵဝ်ၶႃႈတေဢမ်ႇဢုပ်ႇဝၢဝ်းလွင်ႈတူဝ်ၸဝ်ႈၵဝ်ႇ၊လိူဝ်သေလွင်ႈတၢင်းဢၼ်ၼႄဝႃႈ၊ၵဝ်ၶႃႈႁႅင်းလဵၵ်ႉႁႅင်းၵေႇၼၼ်ႉၵူၺ်းဢေႃႈ။-
ပေႃးၵဝ်ၶႃႈလႆႈဢုပ်ႇဝၢဝ်းလွင်ႈတူဝ်ၸဝ်ႈၵဝ်ႇၸိုင်၊ၵဝ်တၵ်းပဵၼ်ၵူၼ်းယွင်ႇၵူၼ်းမႃႈဢမ်ႇၸႂ်ႈ၊ၵွပ်ႈပိူဝ်ႈၵဝ်ၶႃႈၸၢင်ႈလၢတ်ႈၵႂၢမ်းသဵတ်ႈၸႃႇၼၼ်ႉဢေႃႈ။ ၵူၺ်းၵႃႈ၊ၵဝ်ၶႃႈဢမ်ႇဢုပ်ႇဝၢဝ်းယဝ်ႉ။ ၵဝ်ၶႃႈဢမ်ႇၶႂ်ႈႁႂ်ႈပိူၼ်ႈထၢင်ႇယႂ်ႇၵဝ်ၶႃႈလိူဝ်သေဢၼ်ၶဝ်လႆႈငိၼ်းလႆႈႁၼ်ဢၼ်ၵဝ်ၶႃႈလၢတ်ႈၵဝ်ႁဵတ်းၼၼ်ႉဢေႃႈ။
ၼင်ႇႁိုဝ်ၵဝ်ၶႃႈတၵ်းဢမ်ႇမီးၸႂ်ၽႅၼ်သုင်ၵွပ်ႈပိူဝ်ႈပျႃႇတိၵ်ႈဢၼ်ယႂ်ႇဢၼ်ၼမ်ၼၼ်ႉၸိုင်၊ၽြႃးပဵၼ်ၸဝ်ႈႁႂ်ႈၵဝ်ၶႃႈလႆႈၶၢမ်ႇၸဵပ်းမိူၼ်ၼင်ႇၼၢမ်သဵပ်ႇၼိူဝ်ႉ၊ဢိၵ်ႇတင်းမိူၼ်ၼင်ႇတပႄး ၸႃႇတၢၼ်ႇ၊ ဢဝ်တႃမိုဝ်းထုပ်ႉၵဝ်ၶႃႈ၊ၼင်ႇႁိုဝ်ၵဝ်တၵ်းဢမ်ႇမီးႁူဝ်ၸႂ်ၽႅၼ်သုင်ၼၼ်ႉဢေႃႈ။-
ၼင်ႇႁိုဝ်ၼၢမ်ၼၼ်ႉတၵ်းလုတ်းဢွၵ်ႇသေၵဝ်ၶႃႈၵႂႃႇၼၼ်ႉ၊ၵဝ်ၶႃႈသူးတွင်းတီႈၸဝ်ႈၽြႃးသၢမ်ပွၵ်ႈယဝ်ႉဢေႃႈ။-
မၼ်းၸဝ်ႈၶိုၼ်းလၢတ်ႈတီႈၵဝ်ၶႃႈလႄႈဝႃႈ၊ “မုၼ်ၵျေးၸူးၵဝ်ၶႃႈပေႃးၵုမ်ႇပုၼ်ႈမႂ်းဢေႃႈ။ လွင်ႈမၼ်းၸမ်ႉ၊မိူဝ်ႈဢၼ်မႂ်းႁႅင်းဢူၼ်ႈၼၼ်ႉ၊တၼ်းၶူဝ်းၵဝ်ၶႃႈႁႅင်းယႂ်ႇၼႃႇဢေႃႈ။” ဝႃႈၼင်ႇၼႆဢေႃႈ။ ပိူဝ်ႈၼႆလႄႈ၊ၵဝ်ၶႃႈၸူမ်းသိူဝ်းၼႂ်းလွင်ႈတၢင်းဢၼ်တၵ်းလႆႈဢုပ်ႇဝၢဝ်းလူၺ်ႈလွင်ႈတၢင်းဢၼ်ၵဝ်ၶႃႈႁႅင်းလဵၵ်ႉႁႅင်းၵေႇၼၼ်ႉ၊ၼင်ႇႁိုဝ်တၼ်းၶူဝ်း ၸဝ်ႈၶရိၸ်ႈ၊ တၵ်းႁူမ်ႇၼိူဝ်ၵဝ်ၶႃႈဢေႃႈ။-
ၵဝ်ၶႃႈပျေႇၸႂ်ၼႂ်းလွင်ႈတၢင်းဢၼ်ၵဝ်ၶႃႈႁႅင်းလဵၵ်ႉႁႅင်းၵေႇ၊ၼႂ်းလွင်ႈတၢင်းဢၼ်ပိူၼ်ႈသႄႉသွမ်းၵဝ်ၶႃႈ၊ၼႂ်းလွင်ႈတၢင်းဢၼ်လႆႈၶၢမ်ႇတၢင်းယၢပ်ႇၽိုတ်ႇ၊ၼႂ်းလွင်ႈတၢင်းဢၼ်ပိူၼ်ႈၼိၵ်ႈၸၢၵ်ႈငႅၼ်းသႄးၵဝ်ၶႃႈ၊ဢိၵ်ႇတင်းၼႂ်းလွင်ႈတၢင်းဢၼ်ၵဝ်ၶႃႈၺႃးတၢင်းဢၼ်ယၢပ်ႇၸႂ်ၵိၼ်းၸႂ်ပုၼ်ႈတႃႇ ၸဝ်ႈၶရိၸ်ႈ၊ ၸိူဝ်းၼၼ်ႉဢေႃႈ။ ၵွပ်ႈလွင်ႈၼင်ႇႁိုဝ်လႄႈဝႃႈၸမ်ႉ၊မိူဝ်ႈဢၼ်ၵဝ်ၶႃႈႁႅင်းလဵၵ်ႉႁႅင်းၵေႇၼၼ်ႉ၊ၽြႃးပဵၼ်ၸဝ်ႈပၼ်ဢဵၼ်ပၼ်ႁႅင်းၵဝ်ဢေႃႈ။
ၵဝ်ၶႃႈလၢတ်ႈၵႂၢမ်းမိူၼ်ၵူၼ်းငိူဝ်ႈယဝ်ႉဢေႃႈ။ သူၸၢင်ႈႁဵတ်းႁႂ်ႈၵဝ်ၶႃႈပဵၼ်ၼင်ႇၼၼ်ဢေႃႈ။ လွင်ႈမၼ်းၸမ်ႉ၊သူထုၵ်ႇလီယွင်ႈယေႃးၵဝ်ၶႃႈဢေႃႈ။ ၵဝ်ၶႃႈၼႆႉ၊ပိၵ်ႉသမ်ႉပဵၼ်ၵေႃႉဢၼ်ဢမ်ႇပွင်ႇလွင်ႈၵႃႈသင်သေၵေႃႈ၊ၵဝ်ၶႃႈဢမ်ႇတူၵ်းတႅမ်ႇသေ၊ “တမၢၼ်ႇၸဝ်ႈဢၼ်မျၢတ်ႈ” ၸိူဝ်းၼၼ်ႉဢေႃႈ။-
လွင်ႈတၢင်းဢၼ်ၶၢမ်ႇသၢၵ်ႈသေႇဝႃႈ၊ၵဝ်ၶႃႈပဵၼ်တမၢၼ်ႇၸဝ်ႈၼၼ်ႉ၊ထၢင်ႇသႃးယူႇၼႂ်းတၢင်းဢၼ်ၵဝ်ၶႃႈၸႂ်ယၢဝ်းယိူၼ်ႉၶၢမ်ႇသေလႄႈပွင်ႁဵတ်းၵၢၼ်ၵႂႃႇၵႃႈၼႂ်းသူၼၼ်ႉၵူၺ်းဢမ်ႇၵႃး၊ယင်းမီးၼိမိၵ်ႈလၢၵ်ႈၶၼႃႇဢၼ်လီဢၢမ်းတင်းလၢႆထႅင်ႈလူးၵွၼ်ႇဢေႃႈ။-
ၵဝ်ၶႃႈလႆႈႁဵတ်းႁႂ်ႈသူတူၵ်းတႅမ်ႇသေၸိူဝ်းၸဝ်ႈတၢင်ႇတီႈၸိူဝ်ႉၼင်ႇႁိုဝ်။ ၼွၵ်ႈသေလွင်ႈဢၼ်ၵဝ်ၶႃႈဢမ်ႇယွၼ်းသူႁႂ်ႈလႆႈၸွႆႈၵမ်ႉၸွႆႈထႅမ်ၵဝ်ၶႃႈၼၼ်ႉ။ ၵွပ်ႈပိူဝ်ႈၵဝ်ၶႃႈလႆႈႁဵတ်းၸိူဝ်ႉၼင်ႇၼႆလႄႈၶႅၼ်းတေႃႈပွႆႇလွတ်ႈဢပျတ်ႈၵဝ်ၶႃႈသေၵမ်း။
ပွၵ်ႈၼႆႉ၊ပဵၼ်ပွၵ်ႈတီႈသၢမ်ဢၼ်ၵဝ်ၶႃႈဢၢင်ႈမႃးလႄႇတီႈသူၼၼ်ႉဢေႃႈ။ ၵဝ်ၶႃႈဢမ်ႇၶႂ်ႈယွၼ်းဢဝ်ၵႃႈသင်တီႈသူ။ ၵဝ်ၶႃႈဢမ်ႇၶႂ်ႈလႆႈၶွင်သူ၊ၵဝ်ၶႃႈၶႂ်ႈလႆႈတူဝ်သူၵူၺ်းဢေႃႈ။ လွင်ႈမၼ်းၸမ်ႉ၊လုၵ်ႈလၢင်းလဵင်ႉလူပေႃႈမႄႈဢမ်ႇၸႂ်ႈ။ ပေႃႈမႄႈလဵင်ႉလူလုၵ်ႈလၢင်းဢေႃႈ။-
ပိၵ်ႉသမ်ႉတၢင်းႁၵ်ႉၵဝ်ၶႃႈယႂ်ႇမႃးၵႃႈၼိူဝ်သူသေၵေႃႈ၊တၢင်းႁၵ်ႉသူသုတ်ႉယွမ်းၵႃႈၼိူဝ်ၵဝ်ၶႃႈၵႂႃႇလႄႈၵဝ်ၶႃႈယင်းတေၸူမ်းၸူမ်းသိူဝ်းသိူဝ်းဢဝ်ၶွင်ၵဝ်ၶႃႈၶၢမ်ႇသဵင်ႈပၼ်၊ဢိၵ်ႇတင်းၶၢမ်ႇဢၢပ်ႈတူဝ်ၵဝ်ၶႃႈသဵင်ႈၵႂႃႇပုၼ်ႈဢၵျူဝ်းၸႂ်ဝိၺိၺ်ႇသူဢေႃႈ။
ၵူၺ်းၵႃႈ၊လွင်ႈဢၼ်ဝႃႈ၊ၵဝ်ၶႃႈဢမ်ႇႁႂ်ႈသူလႆႈယၢပ်ႇၸႂ်ၵွပ်ႈၵဝ်ၶႃႈၼၼ်ႉသူၽွမ်ႉၸႂ်တင်းၵဝ်ၶႃႈယူႇသေၵေႃႈ၊ၵမ်ႈၽွင်ႈၸၢင်ႈတၵ်းလၢတ်ႈဝႃႈ၊ၵဝ်ၶႃႈဢဝ်တင်းပရိယႄႇသေပႅတ်ႉၵိၼ်လႅၼ်ၵိၼ်သူဢေႃႈ။-
ၸွင်ႇၵဝ်ၶႃႈပွႆႇၸႂ်ႉသေၵေႃႉသေၵူၼ်းၵႂႃႇလႄႈပႅတ်ႉလႅၼ်ဢဝ်ဢၵျူဝ်းတီႈသူႁိုဝ်း။-
ၵဝ်ၶႃႈလႆႈယွၼ်းႁႂ်ႈသြႃႇ တိတု၊ တင်းၼွင်ႉႁဝ်းတၢင်ႇၵေႃႉၸွမ်းမၼ်းၵႂႃႇဢေႃႈ။ ၸွင်ႇသြႃႇ တိတု၊ ပႅတ်ႉလႅၼ်ဢဝ်ဢၵျူဝ်းတီႈသူႁိုဝ်း။ မၼ်းတင်းၵဝ်ၶႃႈၼႆႉ၊မီးၸႂ်ဝိၺိၺ်ႇသဵၼ်ႈလဵဝ်ၵၼ်လႄႈၵမ်ၵျၢင်ႉမိူၼ်ၵၼ်ဢမ်ႇၸႂ်ႈႁိုဝ်း။
ၼႂ်းလွင်ႈတၢင်းဢၼ်ႁဝ်းလၢတ်ႈမႃးတင်းသဵင်ႈတင်းလူင်ၼႆႉသူသမ်ႉထၢင်ႇဝႃႈ၊ႁဝ်းလၢတ်ႈၵႂၢမ်းၶႄတူဝ်ၸဝ်ႈၵဝ်ႇၵႃႈတီႈၽၢႆႇၼႃႈသူဝႃႈၼႆႁိုဝ်း။ မၼ်းဢမ်ႇၸႂ်ႈၸိူဝ်ႉၼင်ႇၼၼ်ဢေႃႈ။ ပီႈၼွင်ႉဢၼ်ႁဝ်းႁၵ်ႉၶဝ်႟။ ႁဝ်းလၢတ်ႈဝႃႈၼႂ်း ၸဝ်ႈၶရိၸ်ႈ၊ သိုဝ်ႈၼႃႈတႂ်ႈတႃၽြႃးပဵၼ်ၸဝ်ႈႁႂ်ႈလႆႈပွင်ႁဵတ်းဢၵျူဝ်းၸႂ်ဝိၺိၺ်ႇသူၵူၺ်းဢေႃႈ။-
မိူဝ်ႈဢၼ်ၵဝ်ၶႃႈႁွတ်ႈၵႂႃႇတီႈသူၼၼ်ႉ၊ၵဝ်ၶႃႈၵူဝ်ဝႃႈ၊ဢၼ်တၵ်းထူပ်းႁၼ်သူၼၼ်ႉ၊တေဢမ်ႇပဵၼ်ၸွမ်းၵႃႈၼင်ႇဢၼ်သူထုၵ်ႇလီပဵၼ်ၼၼ်ႉလႄႈသူၵေႃႈတၵ်းလႆႈထူပ်းႁၼ်ၵဝ်ၶႃႈဢမ်ႇပဵၼ်ၸွမ်းၵႃႈၼင်ႇဢၼ်သူၶႂ်ႈႁႂ်ႈၵဝ်ၶႃႈပဵၼ်ၼၼ်ႉဢေႃႈ။ ၵဝ်ၶႃႈၵူဝ်ဝႃႈ၊တေလႆႈထူပ်းႁၼ်လွင်ႈတၢင်းဢၼ်ၽိတ်းၵၼ်၊လွင်ႈတၢင်းဢၼ်ၶွႆၵၼ်၊လွင်ႈတၢင်းဢၼ်ၶႂ်ႈၸႃႉၸႂ်လမ်တေႃႇၵၼ်၊လွင်ႈတၢင်းဢၼ်ၶႆႈၸႂ်ဢၵျူဝ်းပုၼ်ႈတူဝ်ၸဝ်ႈၵဝ်ႇ၊လွင်ႈတၢင်းဢၼ်ယႃႉသရေႇၵၼ်၊လွင်ႈတၢင်းဢၼ်ၶႃႉၸိုဝ်ႈၶၢႆသဵင်ၵၼ်၊လွင်ႈတၢင်းဢၼ်ႁူဝ်ၸႂ်ၽႅၼ်သုင်၊ဢိၵ်ႇတင်းလွင်ႈတၢင်းဢၼ်ဢမ်ႇၽွမ်ႉၸႂ်ၵၼ်ၸိူဝ်းၼၼ်ႉဢေႃႈ။-
ၵဝ်ၶႃႈၵူဝ်ဝႃႈ၊မိူဝ်ႈဢၼ်ၵဝ်ႁွတ်ႈၵႂႃႇတီႈသူထႅင်ႈတၢင်ႇပွၵ်ႈၼၼ်ႉ၊ၽြႃးပဵၼ်ၸဝ်ႈၵဝ်ၶႃႈတၵ်းႁႂ်ႈၵဝ်ၶႃႈလႆႈဢူၵ်းလႆႈဢူၵ်းဢၢႆၽၢႆႇၼႃႈသူလႄႈလႆႈႁွင်ႉႁႆႈၵွပ်ႈပိူဝ်ႈၵူၼ်းတင်းလၢႆ၊လႆႈၽိတ်းပိူင်ႈဝႆႉလႄႈယင်းဢမ်ႇၶုၵ်းၸႂ်လႆႈမႆႈၸႂ်တၢင်းၽိတ်းလႄႈပိၼ်ႇၸႂ်ၶဝ်သေၵႃႈတီႈတၢင်းၵမ်တၢင်းၵျၢင်ႉဢၼ်ၵူဝ်ႈၵိူၵ်ႇ၊တၢင်းဢၼ်ႁဵတ်းမေႇထုင်ႇဢၼ်ဢမ်ႇတြႃး၊ဢိၵ်ႇတင်းတၢင်းဢၼ်မီးၸႂ်ၵိလေႇသႃႇပူၼ်ႉလိူဝ်ၸိူဝ်းၼၼ်ႉဢေႃႈ။
ၼႆႉၸမ်ႉ၊ပဵၼ်ပွၵ်ႈတီႈသၢမ်ဢၼ်ၵဝ်ၶႃႈတေမႃးႁႃလႄႇသူဢေႃႈ။ ၵျၢမ်းလိၵ်ႈတႅမ်ႈဝႆႉလႄႈဝႃႈ၊ “ပေႃးသေၵေႃႉသေၵူၼ်းမီးတီႈတၵ်းတၢင်ႇဢပျတ်ႈၸိုင်၊ႁႂ်ႈမီးသၢၵ်ႈသေႇတီႈၵေႇမၼ်းသွင်ၵေႃႉသၢမ်ၵေႃႉတႃႉ၊” ဝႃႈၼင်ႇၼႆဢေႃႈ။-
ၵဝ်ၶႃႈၶႂ်ႈပၼ်သတိတီႈသူၸိူဝ်းဢၼ်လႆႈႁဵတ်းတၢင်းၽိတ်းဝႆႉ၊ဢိၵ်ႇတင်းတီႈၶဝ်တၢင်ႇၵေႃႉၸိူဝ်းၼၼ်ႉဢေႃႈ။ ၼႂ်းမိူဝ်ႈဢၼ်ၵဝ်ၶႃႈႁွတ်ႈထိုင်တီႈသူပွၵ်ႈတီႈသွင်ၼၼ်ႉ၊ၵဝ်ၶႃႈပေႃးလႆႈလၢတ်ႈတီႈသူဝႆႉယဝ်ႉ။ ၵူၺ်းၵႃႈ၊မိူဝ်ႈဢၼ်ၵဝ်ၶႃႈယင်းယူႇၵႆၵၼ်တင်းသူမိူဝ်ႈလဵဝ်ၼႆႉ၊ၵဝ်ၶႃႈသမ်ႉတၵ်းလၢတ်ႈထႅင်ႈလႄႈဝႃႈ၊ပေႃးၵဝ်ၶႃႈႁွတ်ႈထိုင်ၵႂႃႇတီႈသူထႅင်ႈပွၵ်ႈၼိုင်ႈၸိုင်၊ၽူႈလႂ်ၵေႃႈတေဢမ်ႇလႆႈလွတ်ႈတၢမ်ႇဢပျတ်ႈဢေႃႈ။-
သူၶႂ်ႈႁၼ်သၢၵ်ႈသေႇလွင်ႈဢၼ် ၸဝ်ႈၶရိၸ်ႈ၊ ဢဝ်ၵဝ်ၶႃႈႁေႃးလၢတ်ႈတြႃးမၼ်းၸဝ်ႈဢမ်ႇၸႂ်ႈႁိုဝ်း။ မၼ်းၸဝ်ႈဢမ်ႇဢူၼ်ႈဢွၼ်ႇႁႅင်းလဵၵ်ႉၵႃႈၼႂ်းသူ၊မၼ်းၸဝ်ႈတေၼႄပျႃးတၼ်းၶူဝ်းမၼ်းၸဝ်ႈတီႈသူဢေႃႈ။-
ပိၵ်ႉသမ်ႉဝႃႈ၊ၵွပ်ႈပိူဝ်ႈတၢင်းဢၼ်မၼ်းၸဝ်ႈႁႅင်းဢူၼ်ႈလႄႈလႆႈၶၢမ်ႇဢဝ်တၢႆၵႃႈၼိူဝ်သဝ်မႆႉဝႃးမိုဝ်းသေၵေႃႈ၊မၼ်းၸဝ်ႈလႆႈဢသၢၵ်ႈလိပ်းယူႇၵွပ်ႈပိူဝ်ႈတၼ်းၶူဝ်းၽြႃးပဵၼ်ၸဝ်ႈဢေႃႈ။ ႁဝ်းၼႆႉၵေႃႈႁႅင်းဢူၼ်ႈမိူၼ်ၸိူဝ်ႉၼင်ႇ ၸဝ်ႈၶရိၸ်ႈ၊ ဢေႃႈ။ ၵူၺ်းၵႃႈ၊မိူဝ်ႈလဵဝ်ၼႆႉႁဝ်းလႆႈဢသၢၵ်ႈလိပ်းယူႇလူၺ်ႈၵၼ်တင်းမၼ်းၸဝ်ႈၵွပ်ႈပိူဝ်ႈတၼ်းၶူဝ်းမၼ်းၸဝ်ႈဢေႃႈ။
ၸွင်ႇသူမၼ်ႈၶိူင်ႇယူႇၼႂ်းတၢင်းယုမ်ႇမၢတ်ႈႁိုဝ်းဝႃႈၼႆ၊ၸႅတ်ႈထၢမ်တူဝ်ၸဝ်ႈၵဝ်ႇ၊ဢိၵ်ႇတင်းၸၢမ်းတူၺ်းတူဝ်ၸဝ်ႈၵဝ်ႇလူးၵွၼ်ႇတႃႉ။ သူႁုဝႃႈတူဝ် ၸဝ်ႈၶရိၸ်ႈ၊ မီးယူႇၵႃႈၼႂ်းသူဢမ်ႇၸႂ်ႈႁိုဝ်း။ ပေႃးဢမ်ႇၼၼ်သူပဵၼ်ၵေႃႉဢၼ်တူၵ်းသုမ်းၼႂ်းတၢင်းဢၼ်ၸႅတ်ႈထၢမ်ဢေႃႈ။-
ၵဝ်ၶႃႈယုမ်ႇဝႃႈ၊သူတၵ်းႁုလွင်ႈဢၼ်ႁဝ်းပဵၼ်ၵေႃႉဢၼ်ဢမ်ႇတူၵ်းသုမ်းၼႂ်းတၢင်းဢၼ်ၸႅတ်ႈထၢမ်ၼၼ်ႉဢေႃႈ။-
ႁဝ်းသူးတွင်းတီႈၽြႃးပဵၼ်ၸဝ်ႈၼင်ႇႁိုဝ်သူတၵ်းဢမ်ႇႁဵတ်းၽိတ်းပိူင်ႈဢေႃႈ။ လွင်ႈၼႆႉၸိုင်၊မၼ်းဢမ်ႇၸႂ်ႈဝႃႈၵွပ်ႈပိူဝ်ႈႁဝ်းၶႂ်ႈမီးၸိုဝ်ႈသဵင်လီဢေႃႈ။ ပိၵ်ႉသမ်ႉႁဝ်းတၵ်းၸိုဝ်ႈသဵင်လုသေၵေႃႈ၊ႁဝ်းၶႂ်ႈႁႂ်ႈသူၵမ်ၵျၢင်ႉဢၼ်သိုဝ်ႈတေႃႇၵူၺ်းဢေႃႈ။-
လွင်ႈမၼ်းၸမ်ႉ၊ႁဝ်းဢမ်ႇၸၢင်ႈႁဵတ်းၵႃႈသင်ဢၼ်တၵ်းၶတ်းၵၼ်တင်းတြႃးဢၼ်ၸိုဝ်ႈဢၼ်ၸႂ်ႈလႄႈႁဝ်းၸၢင်ႈယူႇၽၢႆႇတြႃးဢၼ်ၸိုဝ်ႈဢၼ်ၸႂ်ႈၼၼ်ႉၵူၺ်းဢေႃႈ။-
မိူဝ်ႈဢၼ်ႁဝ်းႁႅင်းလဵၵ်ႉလႄႈသူႁႅင်းယႂ်ႇၼၼ်ႉ၊ႁဝ်းၸူမ်းသိူဝ်းဢေႃႈ။ ပိူဝ်ႈၼႆလႄႈႁဝ်းသူးတွင်းၼင်ႇႁိုဝ်သူတၵ်းတေမီးတၢင်းဢၼ်ပျေႉၸုမ်ႇဢေႃႈ။-
ၵွပ်ႈၼႆလႄႈၵဝ်ၶႃႈတႅမ်ႈၸိူဝ်ႉၼင်ႇၼႆ၊မိူဝ်ႈဢၼ်ၵဝ်ၶႃႈမီးၵႆၵၼ်တင်းသူၼၼ်ႉဢေႃႈ။ ၵွပ်ႈလွင်ႈၸိူဝ်ႉၼႆလႄႈမိူဝ်ႈဢၼ်ၵဝ်ၶႃႈႁွတ်ႈထိုင်တီႈသူၼၼ်ႉ၊ၵဝ်ၶႃႈတၵ်းတေဢမ်ႇလူဝ်ႇဢဝ်ဢႃႇၼႃႇဢၼ်ၸဝ်ႈၽြႃးပၼ်တီႈၵဝ်ၶႃႈၼၼ်ႉ၊ပၼ်တၢမ်ႇႁႅင်းႁႅင်းတီႈသူဢေႃႈ။ ဢႃႇၼႃႇတၼ်းၶူဝ်းမၼ်းၸဝ်ႈၼႆႉ၊ပဵၼ်ပုၼ်ႈတႃႇယႃႉၽဵဝ်ႈသူပႅတ်ႈဢမ်ႇၸႂ်ႈ၊ပဵၼ်ပုၼ်ႈတႃႇတေတႄႇႁဵတ်းသူဢေႃႈ။
ပိူဝ်ႈၼႆလႄႈပီႈၼွင်ႉၶဝ်႟။ ၵႂၢမ်းၵဝ်ၶႃႈတေသုတ်းတီႈၼႆႈယဝ်ႉ။ ၶတ်းၸႂ်ႁႂ်ႈလႆႈပျေႉၸုမ်ႇတႃႉ။ ထွမ်ႇဢဝ်ၵႂၢမ်းဢၼ်ၵဝ်ၶႃႈသင်ႇလၢတ်ႈၼၼ်ႉတႃႉ။ ယူႇၽွမ်ႉၸႂ်ၵၼ်ၼႂ်းတၢင်းဢၼ်ၵတ်းၼိမ်ၶျၢမ်းသႃႇတႃႉ။ ပေႃးႁဵတ်းၸိူဝ်ႉၼင်ႇၼႆၸိုင်၊ၽြႃးပဵၼ်ၸဝ်ႈဢၼ်ပဵၼ်ၸဝ်ႈတၢင်းႁၵ်ႉမႅတ်ႈတႃႇ၊ၸဝ်ႈတၢင်းၼိမ်ၶျၢမ်းသႃႇၼၼ်ႉ၊တၵ်းမီးယူႇလူၺ်ႈၵၼ်တင်းသူဢေႃႈ။
တူင်ႉတၵ်ႉလႄႈၼူမ်ၵၼ်မိူၼ်ၸိူဝ်ႉၼင်ႇပီႈၼွင်ႉဢၼ်ႁၵ်ႉပႅင်းၵၼ်ၼၼ်ႉတႃႉ။-
ၵူၼ်းၸဝ်ႈၽြႃးတင်းလၢႆထၢမ်ႁႃသူယူႇဢေႃႈ။
ႁႂ်ႈၵျေးၸူးၸဝ်ႈၽြႃး ၸဝ်ႈယေႇသုၶရိၸ်ႈ၊ ဢိၵ်ႇတင်းတၢင်းႁၵ်ႉမႅတ်ႈတႃႇၽြႃးပဵၼ်ၸဝ်ႈ၊တင်းမိၵ်ႈသႁႃႇယႃႉဢၼ်ႁူမ်ႈပွင်းဝိၺိၺ်ႇမူတ်းၸၢင်ႇၸဝ်ႈမီးယူႇလူၺ်ႈၵၼ်တင်းသူသေၵမ်းလူၺ်ႈ။ လိၵ်ႈတြႃးၵေႃးရိၼ်ႇထုၽိုၼ်တီႈသွင်ယဝ်ႉယဝ်ႉဢေႃႈ။
ၵဝ် ပေႃးလု၊ ၵေႃႉပဵၼ်တမၢၼ်ႇၸဝ်ႈ၊ဢၼ်ဢမ်ႇၸႂ်ႈၵူၼ်းၶၢၼ်းလႄႈပဵၼ်မႃး၊ဢမ်ႇၼၼ်တၢင်တူဝ်ၵူၼ်းသေလႄႈၶၢၼ်းဝႆႉၵေႃႈဢမ်ႇၸႂ်ႈ၊ပဵၼ် ၸဝ်ႈယေႇသုၶရိၸ်ႈ၊ ဢိၵ်ႇတင်းၽြႃးပေႃႈၸဝ်ႈဢၼ်ႁႂ်ႈ ၸဝ်ႈယေႇသုၶရိၸ်ႈ၊ လုၵ်ႉၵႃႈတၢင်းတၢႆၶိုၼ်းလိပ်းမႃးၼၼ်ႉၶၢၼ်းလႄႈပဵၼ်မႃးၼႆႉ။-
ဢိၵ်ႇတင်းပီႈၼွင်ႉဢၼ်မီးယူႇလူၺ်ႈၵၼ်တင်းၵဝ်တင်းသဵင်ႈတင်းလူင်ၸိူဝ်းၼႆႉလႆႈဢွၼ်ၵၼ်တႅမ်ႈလိၵ်ႈပၼ်ထိုင်ၵႃႈတီႈၸိူဝ်းၸဝ်ႈတင်းလၢႆဢၼ်မီးၼႂ်းမိူင်း ၵလႃႇတိ၊ ဢေႃႈ။
ႁႂ်ႈၽြႃးပဵၼ်ၸဝ်ႈဢၼ်ဝႃႈ၊ပေႃႈၸဝ်ႈႁဝ်းဢိၵ်ႇတင်းၸဝ်ႈႁဝ်း ၸဝ်ႈယေႇသုၶရိၸ်ႈ၊ ပၼ်သုၵျေးၸူးဢိၵ်ႇတင်းတၢင်းၼိမ်ၶျၢမ်းသႃႇတီႈသူသေၵမ်းလူၺ်ႈ။
ၸဝ်ႈၶရိၸ်ႈ၊ ၸုၼ်ႉပႅတ်ႈတူဝ်ၸဝ်ႈၵဝ်ႇပုၼ်ႈဢပျတ်ႈႁဝ်းလႄႈႁႂ်ႈလႆႈၵႄႇသႄႇဢဝ်ႁဝ်းဢွၵ်ႇသေၵၢပ်ႈပၢၼ်ဢၼ်ႁၢႆႉမိူၵ်ႈ၊ယၢမ်းမိူဝ်ႈလဵဝ်ၼႆႉၸွမ်းၼင်ႇဢလူဝ်ႇၽြႃးပဵၼ်ၸဝ်ႈဢၼ်ပဵၼ်ပေႃႈၸဝ်ႈႁဝ်းၼၼ်ႉယဝ်ႉဢေႃႈ။-
ႁႂ်ႈမုၼ်ၵုင်ႇသရေႇမီးတီႈၽြႃးပဵၼ်ၸဝ်ႈတႃႇသေႇဢမ်ႇထၢတ်ႇသေၵမ်းလူၺ်ႈ။ ဢႃမိၼ်ႈ။
ၵဝ်ဢၢမ်းၼႃႇလူင်လၢင်မိူဝ်ႈဢၼ်သူၽၢတ်ႇယၢၼ်ၶၼ်ၶၼ်ၽႂ်းသေၵႃႈတီႈၸဝ်ႈဢၼ်ဢဝ်တင်းသုၵျေးၸူး ၸဝ်ႈၶရိၸ်ႈ၊ သေလႄႈႁွင်ႉဢဝ်သူဝႆႉၼၼ်ႉသေယဝ်ႉ၊သမ်ႉႁပ်ႉတုင်းဢဝ်ၶၢဝ်ႇတြႃးသိူဝ်းပျေႃႇတၢင်ႇဢၼ်ၼၼ်ႉဢေႃႈ။-
ဝႃႈတႄႉမၼ်း၊မၼ်းဢမ်ႇမီး၊ “ၶၢဝ်ႇတြႃးသိူဝ်းပျေႃႇတၢင်ႇဢၼ်” ယဝ်ႉဢေႃႈ။ ၵူၺ်းၵႃႈ၊မီးၵူၼ်းၵမ်ႈၽွင်ႈပၼ်ၸႂ်သူလႆႈတုၵ်ႉၶႃႉလႄႈၶွမ်ႈပိၼ်ႈၶၢဝ်ႇတြႃးသိူဝ်းပျေႃႇ ၸဝ်ႈၶရိၸ်ႈ၊ ၼၼ်ႉပႅတ်ႈဢေႃႈ။-
ပိၵ်ႉသမ်ႉ၊ပဵၼ်ႁဝ်းလႄႈသင်၊ပဵၼ်တမၢၼ်ႇၵၢင်ႁၢဝ်ဢၼ်လူင်းသေၵၢင်ႁၢဝ်မႃးလႄႈသင်၊ပေႃးဝႃႈႁေႃးလၢတ်ႈၶၢဝ်ႇတြႃးသိူဝ်းပျေႃႇဢၼ်ယင်းပႅၵ်ႇပိူင်ႈၵၼ်တင်းၶၢဝ်ႇတြႃးသိူဝ်းပျေႃႇ ဢၼ်ႁဝ်းႁေႃးလၢတ်ႈဝႆႉၼၼ်ႉၸိုင်၊ႁႂ်ႈၵေႃႉဢၼ်ႁေႃးၼၼ်ႉလႆႈၶၢမ်ႇတၢမ်ႇတူၵ်းငရၢႆးသေၵမ်းလူၺ်ႈ။-
ၸိူဝ်ႉၼင်ႇဢၼ်မိူဝ်ႈဢွၼ်တၢင်းၼၼ်ႉႁဝ်းဝႃႈဝႆႉ၊ဢၼ်ဝႃႈလိူဝ်သေၶၢဝ်ႇတြႃးသိူဝ်းပျေႃႇဢၼ်သူႁပ်ႉတုင်းဢဝ်ဝႆႉၼၼ်ႉ၊ပေႃးသေၵေႃႉသေၵူၼ်းႁေႃးလၢတ်ႈၶၢဝ်ႇတြႃးသိူဝ်းပျေႃႇတၢင်ႇဢၼ်ၸိုင်၊ႁႂ်ႈၵေႃႉဢၼ်ႁေႃးလၢတ်ႈၼၼ်ႉ၊လႆႈၶၢမ်ႇတၢမ်ႇဢၼ်တူၵ်းငရၢႆးသေၵမ်းလူၺ်ႈဝႃႈၼႆ၊တေႃႈလဵဝ်ၼႆႉၵဝ်သမ်ႉဝႃႈထႅင်ႈဢေႃႈ။
လွင်ႈမၼ်းၸမ်ႉ၊တေႃႈလဵဝ်ၼႆႉၵဝ်ၸွမ်းဢလူဝ်ႇၵူၼ်းႁိုဝ်း။ ၵဝ်ၸွမ်းဢလူဝ်ႇၽြႃးပဵၼ်ၸဝ်ႈႁိုဝ်း။ ၸွင်ႇၵဝ်ၵျၢမ်ႇႁႃႁႂ်ႈလႆႈထုၵ်ႇၸႂ်ၵူၼ်းႁိုဝ်း။ ပေႃးၵဝ်ယင်းၵျၢမ်ႇႁႃႁႂ်ႈလႆႈထုၵ်ႇၸႂ်ၵူၼ်းယူႇၸိုင်၊ၵဝ်ဢမ်ႇထုၵ်ႇလီပဵၼ်ၵူၼ်းၸႂ်ႉၵူၼ်းသွႆ ၸဝ်ႈၶရိၸ်ႈ၊ ယဝ်ႉဢေႃႈ။
ပီႈၼွင်ႉၶဝ်႟။ ၵဝ်ၶႃႈၶႂ်ႈႁႂ်ႈသူႁုဝႃႈ၊ၶၢဝ်ႇတြႃးသိူဝ်းပျေႃႇဢၼ်ၵဝ်ႁေႃးလၢတ်ႈၼၼ်ႉဢမ်ႇၸႂ်ႈတြႃးၵူၼ်း။-
ၵဝ်ဢမ်ႇလႆႈၶၢမ်ႇဢဝ်ၵႃႈတီႈၵူၼ်း။ ဢမ်ႇလႆႈသွၼ်ဢဝ်ၵႃႈတီႈသေၵေႃႉသေၵူၼ်းဢေႃႈ။ မၼ်းတိုၼ်းပဵၼ်တြႃးဢၼ် ၸဝ်ႈယေႇသုၶရိၸ်ႈ၊ ပျႃႇတိၵ်ႈဝႆႉပၼ်ၵဝ်ဢေႃႈ။
သူလႆႈႁုငိၼ်းလွင်ႈမိူဝ်ႈဢၼ်ၵဝ်ယင်းမီးၼႂ်းၽႃႇသႃႇ ၵျူး၊ ၶဝ်ၼၼ်ႉ၊ၵဝ်ႁဵတ်းတၢင်းဢၼ်ႁၢႆႉၵျၢမ်းၼႃႇထၢၼ်ႈပေႃးလႆႈၼိၵ်ႈၸၢၵ်ႈငႅၼ်းသႄးႁႅင်းၼႃႇလႄႈယႃႉပႅတ်ႈၸိူဝ်းၸဝ်ႈၽြႃးပဵၼ်ၸဝ်ႈၼၼ်ႉဢေႃႈ။-
ၼႂ်းတၢင်းဢၼ်ၵမ်ၵျၢင်ႉၸွမ်းၽႃႇသႃႇ ၵျူး၊ ၶဝ်လႄႈသင်၊ၼႂ်းတၢင်းဢၼ်ၸွမ်းထုင်းတြႃးပူႇမွၼ်ႇႁဝ်းၵႃႈမီးလႄႈသင်၊ၵဝ်ႁႅင်းယႂ်ႇသေပိူၼ်ႈၼႂ်းၵူၼ်းပၢၼ်လဵဝ်ၵၼ်တင်းၵဝ်ၵႃႈၼႂ်းၵူၼ်းမဵဝ်းၵဝ်ၼၼ်ႉဢေႃႈ။
ၵူၺ်းၵႃႈ၊ၽြႃးပဵၼ်ၸဝ်ႈလိူၵ်ႈဢဝ်ၵဝ်ဝႆႉ၊ၸဵမ်မိူဝ်ႈယင်းမီးယူႇၵႃႈၼႂ်းတွင်ႉမႄႈၼၼ်ႉလႄႈဢဝ်တင်းသုၵျေးၸူးၸဝ်ႈႁွင်ႉဢဝ်ၵဝ်ပုၼ်ႈတၵ်းထၢမ်းႁဵတ်းၵၢၼ်မၼ်းၸဝ်ႈဢေႃႈ။-
ၸွမ်းၼင်ႇဢၼ်ထုၵ်ႇၸႂ်ၸဝ်ႈၼၼ်ႉ၊မၼ်းၸဝ်ႈၼႄပျႃးလုၵ်ႈမၼ်းၸဝ်ႈတီႈၵဝ်၊ႁႂ်ႈၵဝ်လႆႈႁေႃးလၢတ်ႈၶၢဝ်ႇတြႃးသိူဝ်းပျေႃႇၸဝ်ႈၵႃႈတီႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၼၼ်ႉဢေႃႈ။ ၵမ်းၼၼ်ႉ၊ၵဝ်ဢမ်ႇလႆႈတိူင်ႇပၢင်ႇၵၼ်တင်းၵူၼ်းၵေႃႉလႂ်သေၵေႃႈ၊-
ယင်းဢမ်ႇၵႂႃႇၵႃႈတီႈဝဵင်း ယေႇရုသလႅမ်ႇ၊ ၸူးတီႈၶဝ်ၸိူဝ်းဢၼ်ပဵၼ်တမၢၼ်ႇၸဝ်ႈဢွၼ်တၢင်းၵဝ်ၸိူဝ်းၼၼ်ႉ။ ၵဝ်ၵႂႃႇပႅတ်ႈၵႃႈတီႈမိူင်း ဢရေးပီးယႃး၊ ၵမ်းလဵဝ်လႄႈသမ်ႉၶိုၼ်းမိူဝ်းၵႃႈတီႈဝဵင်း တမ်ႇမတ်ႉသၵတ်ႉ၊ ဢေႃႈ။-
ဝၢႆးသေသၢမ်ပီယဝ်ႉၸင်ႇ၊ၵဝ်ၶိုၼ်ႈၵႂႃႇၵႃႈတီႈဝဵင်း ယေႇရုသလႅမ်ႇ၊ ႁႂ်ႈလႆႈမိုတ်ႈၵိုဝ်းသြႃႇ ပေႇတရု၊ လႄႈယူႇၵႃႈတီႈမၼ်းသိပ်းႁႃႈဝၼ်းဢေႃႈ။-
လိူဝ်သေ ယႃႇၵုပ်ႈ၊ ၼွင်ႉၸၢႆးၸဝ်ႈၽြႃးၼၼ်ႉ၊ၵဝ်ဢမ်ႇလႆႈထူပ်းၺႃးတမၢၼ်ႇၸဝ်ႈတၢင်ႇၵေႃႉဢေႃႈ။
လွင်ႈဢၼ်ၵဝ်တႅမ်ႈၵႂႃႇၼႆႉပဵၼ်ဢၼ်ၸိုဝ်ႈဢၼ်ၸႂ်ႈလႄႈ၊ၽြႃးပဵၼ်ၸဝ်ႈႁုယူႇဝႃႈ၊ၵဝ်ဢမ်ႇပႅတ်ႉဢမ်ႇလႅၼ်ၼၼ်ႉဢေႃႈ။
လိုၼ်းၼၼ်ႉ၊ၵဝ်ၵႂႃႇၵႃႈတီႈမိူင်း သီးရီးယႃး၊ တင်းမိူင်း ၵိလိၵိ၊ ဢေႃႈ။-
ၽွင်းယၢမ်းၼၼ်ႉ၊ၸိူဝ်းၸဝ်ႈ ၸဝ်ႈၶရိၸ်ႈ၊ ၸိူဝ်းဢၼ်မီးၼႂ်းဢိူင်ႇ ယုတႃႉ၊ ၼၼ်ႉ၊ဢမ်ႇပႆႇႁုၸၵ်းၵဝ်။-
ၶဝ်ၵူၺ်းလႆႈငိၼ်းပိူၼ်ႈဝႃႈ၊ “ၵူၼ်းၵေႃႉဢၼ်ယၢမ်ႈၼိၵ်ႈၸၢၵ်ႈႁဝ်းၼၼ်ႉမိူဝ်ႈလဵဝ်ႁေႃးလၢတ်ႈတြႃးတၢင်းယုမ်ႇမၢတ်ႈဢၼ်တူဝ်မၼ်းၶတ်းၸႂ်လႄႈယႃႉၵဝ်းမႃးၼၼ်ႉယဝ်ႉ၊” ဝႃႈၼင်ႇၼႆဢေႃႈ။-
ၵွပ်ႈၼႆလႄႈၶဝ်ဢွၼ်ၵၼ်ယွင်ႈယေႃးၽြႃးပဵၼ်ၸဝ်ႈၵွပ်ႈပိူဝ်ႈၵဝ်ဢေႃႈ။
ဝၢႆးသေႁိုင်သိပ်းသီႇပီယဝ်ႉၼၼ်ႉ၊ၵဝ်တင်းသြႃႇ ပႃႇၼပႃႉ၊ ႁွင်ႉဢဝ်သြႃႇ တိတု၊ သေယဝ်ႉ၊ဢွၼ်ၵၼ်ၶိုၼ်ႈၵႂႃႇၵႃႈတီႈဝဵင်း ယေႇရုသလႅမ်ႇ၊ ဢေႃႈ။-
ၵဝ်ၵႂႃႇၸွမ်းၼင်ႇပျႃႇတိၵ်ႈၸဝ်ႈသေလႄႈမွၵ်ႇလၢတ်ႈၶႆႈၼႄလွင်ႈၶၢဝ်ႇတြႃးသိူဝ်းပျေႃႇဢၼ်ၵဝ်ႁေႃးလၢတ်ႈပၼ်တီႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၼၼ်ႉဢေႃႈ။ ၵဝ်လၢတ်ႈၼႄတီႈၵူၼ်းလူင်ၼႂ်းၸိူဝ်းၸဝ်ႈလွင်ႈဢၼ်ဢမ်ႇၶႂ်ႈႁႂ်ႈၵၢၼ်ငၢၼ်းဢၼ်ၵဝ်ပွင်ႁဵတ်းမႃး၊ဢိၵ်ႇတင်းၵၢၼ်ငၢၼ်းဢၼ်ႁဵတ်းယူႇယၢမ်းမိူဝ်ႈလဵဝ်ၼႆႉလုၵႂႃႇၼၼ်ႉဢေႃႈ။-
ၵူၺ်းၵႃႈ၊သြႃႇ တိတု၊ ဢၼ်ၵႂႃႇၸွမ်းၵဝ်ၼၼ်ႉ၊ပိၵ်ႉသမ်ႉမၼ်းပဵၼ်ၵူၼ်းမဵဝ်း ၵရိၵ်ႉ၊ သေၵေႃႈ၊ၶဝ်ဢမ်ႇတဵၵ်းငႅၼ်းႁႂ်ႈမၼ်းၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ဢေႃႈ။-
ၵူၺ်းမီးၵူၼ်းၸိူဝ်းဢၼ်ႁဵတ်းႁၢင်ႈပဵၼ်ပီႈပဵၼ်ၼွင်ႉၼၼ်ႉ၊လွမ်ၶဝ်ႈမႃးၵႃႈၼႂ်းႁဝ်း၊သွပ်ႇၶၢဝ်ႇလႄႈလၵ်ႉလွမ်တူၺ်းတၢင်းလွတ်ႈလႅဝ်းႁဝ်းဢၼ်ႁဝ်းလႆႈၶၢမ်ႇၸၢမ်ႇၸႃး၊ၵွပ်ႈလူၺ်ႈ ၸဝ်ႈယေႇသုၶရိၸ်ႈ၊ ၼၼ်ႉသေယဝ်ႉ၊ၶဝ်ဢၢင်ႈတၵ်းဢဝ်ႁဝ်းၶိုၼ်းပဵၼ်ၶႃႈတြႃး မူဝ်းသေႇ၊ ဢေႃႈ။-
ၼင်ႇႁိုဝ်ၶၢဝ်ႇတြႃးသိူဝ်းပျေႃႇဢၼ်ၸႅတ်ႈမၢၼ်ႇၼၼ်ႉတၵ်းတႄႇယူႇၵႃႈၼႂ်းသူၸိုင်၊ၸူဝ်ႈၵမ်းဢွၼ်ႇၼိုင်ႈၵူၺ်းၵေႃႈ၊ႁဝ်းတိုၼ်းဢမ်ႇၶၢမ်ႇသုမ်းၶဝ်သေဢိတ်း။
ၶဝ်ၸိူဝ်းဢၼ်မိူၼ်ႁၢင်ႈမီးၼႃႈမီးတႃၵႃႈၼႂ်းပၢင်ၵုမ်ၼၼ်ႉ၊ပိၵ်ႉသမ်ႉၶဝ်ပဵၼ်ၵူၼ်းလူင်ၸိူဝ်ႉၼင်ႇႁိုဝ်သေၵေႃႈ၊ၵဝ်ဢမ်ႇမၢတ်ႈၶဝ်ပဵၼ်ၵႃႈသင်၊ၸွမ်းၼင်ႇၽြႃးပဵၼ်ၸဝ်ႈဢမ်ႇတူၺ်းၼႃႈၵူၼ်းလႄႈၶဝ်ၼၼ်ႉဢမ်ႇလႆႈထႅင်ႈပိင်ႇၺႃႇတီႈၵဝ်ၵႃႈသင်၊-
ယင်းဢမ်ႇၵႃး၊ၶဝ်လႆႈႁုႁၼ်ဝႃႈၽြႃးပဵၼ်ၸဝ်ႈပုၼ်ႈၽွၼ်းၼႃႈၵၢၼ်လူင်တီႈၵဝ်၊ႁႂ်ႈၵဝ်ႁေႃးလၢတ်ႈၶၢဝ်ႇတြႃးသိူဝ်းပျေႃႇၸဝ်ႈတီႈၵူၼ်းၸိူဝ်းဢၼ်ဢမ်ႇလႆႈၶၢမ်ႇမၢင်ႇၵလႃႇပၢတ်ႇပၢႆၼင်၊မိူၼ်ၸိူဝ်ႉၼင်ႇဢၼ်ႁႂ်ႈသြႃႇ ပေႇတရု၊ ႁေႃးလၢတ်ႈပၼ်တီႈၵူၼ်းၸိူဝ်းဢၼ်ၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ၼၼ်ႉဢေႃႈ။-
လွင်ႈမၼ်းၸမ်ႉ၊ၽြႃးပဵၼ်ၸဝ်ႈဢၼ်ဢၢပ်ႈပၼ်ပုၼ်ႈၽွၼ်းၼႃႈၵၢၼ်လူင်ႁႂ်ႈသြႃႇ ပေႇတရု၊ ပဵၼ်တမၢၼ်ႇၸဝ်ႈၵႃႈၼႂ်းၵူၼ်းၸိူဝ်းဢၼ်ၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ၼၼ်ႉ၊မၼ်းၸဝ်ႈဢၢပ်ႈပၼ်ႁႂ်ႈၵဝ်ပဵၼ်တမၢၼ်ႇၸဝ်ႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းဢေႃႈ။-
ပိူဝ်ႈၼႆလႄႈ မိူဝ်ႈဢၼ်ၶဝ်သုႁုၵျေးၸူးၸဝ်ႈဢၼ်ၵဝ်လႆႈၶၢမ်ႇဢဝ်ၼၼ်ႉၸိုင်၊သြႃႇ ယႃႇၵုပ်ႈ၊ပေႇတရု၊ တင်း ယူဝ်းႁၢၼ်ႇ၊ ၸိူဝ်းဢၼ်ပဵၼ်ၵူၼ်းလူင်ဢၼ်ပဵၼ်သဝ်ငဝ်ႈၸိူဝ်းၼၼ်ႉ ၸင်ႇယိုၼ်းမိုဝ်းၶွၼ်ၶႂႃၼုၵ်ႈသၢၵ်ႈၵဝ်တင်းသြႃႇ ပႃႇၼပႃႉ၊ ၼႄလွင်ႈဢၼ်ၶဝ်တင်းမူတ်းၽွမ်ႉၸႂ်ၵၼ်ဝႃႈ၊ႁႂ်ႈႁဝ်းသွင်ၵေႃႉၼႆႉ၊သၢင်ႈႁဵတ်းၵႃႈၼႂ်းၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းလႄႈၶဝ်သမ်ႉသၢင်ႈႁဵတ်းၵႃႈၼႂ်းၵူၼ်းၸိူဝ်းဢၼ်ၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ၼၼ်ႉဢေႃႈ။-
ဢၼ်ၶဝ်ယွၼ်းဢိင်ယွၼ်းပိုင်ႈႁဝ်းမဵဝ်းၼိုင်ႈၸမ်ႉ၊ႁႂ်ႈႁဝ်းၶႆႈၸႂ်ထူပ်းၶဝ်ၸိူဝ်းဢၼ်ယၢၵ်ႈၽၢၼ်ၼၼ်ႉၵူၺ်းဢေႃႈ။ လွင်ႈတၢင်းၼႆႉၸိုင်၊ပဵၼ်ၵၢၼ်ဢၼ်ၵဝ်ၵႆႉၶတ်းၸႂ်လႄႈတေႁဵတ်းၼၼ်ႉဢေႃႈ။
ဝၢႆးၼၼ်ႉ၊မိူဝ်ႈဢၼ်သြႃႇ ပေႇတရု၊ ႁွတ်ႈမႃးၵႃႈတီႈဝဵင်း ဢၼ်ႇတိဢူၵ်ႉ၊ ၼၼ်ႉ၊ၵွပ်ႈပိူဝ်ႈမီးလွင်ႈတၵ်းတၢင်ႇဢပျတ်ႈတီႈမၼ်းၼၼ်ႉလႄႈၵဝ်လႆႈၶတ်းၵၼ်တင်းမၼ်းတေႃႇၼႃႈၵူၼ်းတင်းလၢႆဢေႃႈ။-
ၸူဝ်ႈဢၼ်ၵူၼ်းၸိူဝ်းဢၼ်သြႃႇ ယႃႇၵုပ်ႈ၊ ပွႆႇမႃးၼၼ်ႉယင်းဢမ်ႇပႆႇႁွတ်ႈထိုင်မႃးၼၼ်ႉၸိုင်၊မၼ်းၵိၼ်လူၺ်ႈၵၼ်တင်းၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းတင်းလၢႆသေၵေႃႈ၊မိူဝ်ႈဢၼ်ၶဝ်ၸိူဝ်းၼၼ်ႉႁွတ်ႈထိုင်မႃးၸိုင်၊ပိူဝ်ႈဢၼ်မၼ်းၵူဝ်ၵူၼ်းၸိူဝ်းဢၼ်ဝႆႉဢယေးလွင်ႈတၢင်းဢၼ်ပၢတ်ႇပၢႆၼင်ၼၼ်ႉလႄႈ မၼ်းသုတ်ႉႁူၼ်သေ၊ဢမ်ႇႁတ်းၵိၼ်လူၺ်ႈၵၼ်တင်းပီႈၼွင်ႉတၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉယဝ်ႉ။-
ၵူၼ်းမဵဝ်း ၵျူး၊ တၢင်ႇၵေႃႉတၢင်ႇၵူၼ်းတင်းလၢႆၵေႃႈ၊ၸွမ်းမၼ်းၵႂႃႇလႄႈ၊တေႃႇထိုင်ႁွတ်ႈသြႃႇ ပႃႇၼပႃႉ၊ သမ်ႉပေႃးၶဝ်ႈပႃးၵႂႃႇၸွမ်းၼႂ်းတၢင်းဢၼ်ၶဝ်သုတ်ႉႁူၼ်ၵႂႃႇၼၼ်ႉဢေႃႈ။-
မိူဝ်ႈဢၼ်ၵဝ်ႁၼ်ၶဝ်ဢမ်ႇၵမ်ၵျၢင်ႉၸွမ်းသဵတ်ႈၸႃႇၶၢဝ်ႇတြႃးသိူဝ်းပျေႃႇသိုဝ်ႈသိုဝ်ႈၸိုင်၊ၵဝ်ႁတ်းလၢတ်ႈတီႈသြႃႇ ပေႇတရု၊ ၽၢႆႇၼႃႈၶဝ်တင်းသဵင်ႈတင်းလူင်လႄႈဝႃႈ၊ “မႂ်းၼႆႉပဵၼ်ၵူၼ်းမဵဝ်း ၵျူး၊ ဢေႃႈ။ ပေႃးသူယင်းဢမ်ႇၵမ်ဢမ်ႇၵျၢင်ႉၸိူဝ်ႉၼင်ႇ ၵျူး၊ ၵေႃႉၼိုင်ႈလႄႈသမ်ႉယူႇသဝ်းမိူၼ်ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းယူႇၸိုင်၊ႁဵတ်းသင်လႄႈမႂ်းတဵၵ်းငႅၼ်းႁႂ်ႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၵမ်ၵျၢင်ႉၸွမ်းထုင်းတြႃး ၵျူး၊ ယူႇၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။
ၵဝ်လၢတ်ႈထႅင်ႈလႄႈဝႃႈ၊ “ႁဝ်းၸိူဝ်းၼႆႉပဵၼ်ၸႃႇတိၵူၼ်းမဵဝ်း ၵျူး၊ လႄႈဢမ်ႇပဵၼ်ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းဢၼ်မီးဢပျတ်ႈၼၼ်ႉဢေႃႈ။-
ႁဝ်းႁုဝႃႈ၊ႁဝ်းလႆႈပဵၼ်ၵူၼ်းသိုဝ်ႈတေႃႇၵႃႈတီႈၽြႃးပဵၼ်ၸဝ်ႈ၊ၵွပ်ႈလူၺ်ႈၵမ်ၵျၢင်ႉၸွမ်းပိင်းၺၢပ်ႈတြႃးဢမ်ႇၸႂ်ႈလႄႈမၼ်းလႆႈပဵၼ်ၵွပ်ႈလူၺ်ႈႁဝ်းယုမ်ႇမၢတ်ႈ ၸဝ်ႈယေႇသုၶရိၸ်ႈ၊ ၼၼ်ႉဢေႃႈ။ ႁဝ်းၼႆႉၵေႃႈလႆႈယုမ်ႇမၢတ်ႈ ၸဝ်ႈယေႇသုၶရိၸ်ႈ၊ ႁႂ်ႈလႆႈပဵၼ်ၵူၼ်းသိုဝ်ႈတေႃႇၵႃႈတီႈၽြႃးပဵၼ်ၸဝ်ႈၵွပ်ႈလူၺ်ႈႁဝ်းယုမ်ႇမၢတ်ႈ ၸဝ်ႈယေႇသုၶရိၸ်ႈ၊ ၼၼ်ႉလႄႈၵွပ်ႈလူၺ်ႈၵမ်ၵျၢင်ႉၸွမ်းပိင်းၺၢပ်ႈတြႃးဢမ်ႇၸႂ်ႈ။ လွင်ႈမၼ်းၸမ်ႉ၊ၵွပ်ႈလူၺ်ႈၵမ်ၵျၢင်ႉၸွမ်းပိင်းၺၢပ်ႈတြႃးလႄႈၽူႈလႂ်ၵေႃႈဢမ်ႇပဵၼ်ၵူၼ်းသိုဝ်ႈတေႃႇလႆႈ၊” ဝႃႈၼင်ႇၼႆဢေႃႈ။-
ၵူၺ်းၵႃႈ၊ၼႂ်းတၢင်းဢၼ်ႁဝ်းၶတ်းၸႂ်ႁႂ်ႈလႆႈပဵၼ်ၵူၼ်းသိုဝ်ႈတေႃႇၵႃႈၼႂ်းၸဝ်ႈၶရိၸ်ႈၼၼ်ႉ၊သင်ဝႃႈႁဝ်းပဵၼ်ၵေႃႉဢၼ်မီးဢပျတ်ႈၼမ်မိူၼ်ၸိူဝ်ႉၼင်ႇၵူၼ်းတၢင်ႇၸိူဝ်ႉတၢင်ႇၶိူဝ်းၸိုင်၊ ၸဝ်ႈၶရိၸ်ႈ၊ ပဵၼ်ၵေႃႉဢၼ်ပၼ်ႁဵင်းႁႂ်ႈႁဵတ်းဢပျတ်ႈႁိုဝ်း။ ဢမ်ႇပဵၼ်ၸိူဝ်ႉၼင်ႇၼၼ်။-
ပေႃးၵဝ်ၶိုၼ်းတႄႇႁဵတ်းဢၼ်ၵဝ်ၵိူၼ်ႇယႃႉပႅတ်ႈဝႆႉၼၼ်ႉၸိုင်၊မၼ်းပဵၼ်လွင်ႈဢၼ်တူဝ်ၸဝ်ႈၵဝ်ႇၼႄပျႃးဝႃႈ၊တူဝ်ၸဝ်ႈၵဝ်ႇမီးဢပျတ်ႈဢေႃႈ။-
လွင်ႈမၼ်းၸမ်ႉ၊ၵွပ်ႈပိူဝ်ႈပိင်းၺၢပ်ႈတြႃးၼၼ်ႉ၊ၵဝ်လႆႈတၢႆသေၵႃႈတီႈပိင်းၺၢပ်ႈတြႃးယဝ်ႉလႄႈ၊ႁႂ်ႈလႆႈမီးဢသၢၵ်ႈလႄႈယူႇလူၺ်ႈၵၼ်တင်းၽြႃးပဵၼ်ၸဝ်ႈဢေႃႈ။-
ၵဝ်လႆႈၶၢမ်ႇတွၵ်ႇတၢႆလူၺ်ႈၵၼ်တင်း ၸဝ်ႈၶရိၸ်ႈ၊ ၵႃႈတီႈသဝ်မႆႉဝႃးမိုဝ်းယဝ်ႉလႄႈ၊ဢမ်ႇမီးဢသၢၵ်ႈယဝ်ႉ။ ပဵၼ် ၸဝ်ႈၶရိၸ်ႈ၊ ၵူၺ်းဢၼ်မီးဢသၢၵ်ႈလိပ်းယူႇၵႃႈၼႂ်းၵဝ်၊ဢၼ်ၵဝ်မီးဢသၢၵ်ႈလိပ်းယူႇၼႆႉၵေႃႈလိပ်းလူၺ်ႈတၢင်းဢၼ်ယုမ်ႇမၢတ်ႈလုၵ်ႈၽြႃးပဵၼ်ၸဝ်ႈ၊ၸဝ်ႈဢၼ်ႁၵ်ႉပႅင်းၵဝ်လႄႈၶၢမ်ႇၸုၼ်ႉတူဝ်ၸဝ်ႈၵဝ်ႇပုၼ်ႈၵဝ်ၼၼ်ႉဢေႃႈ။-
ၵဝ်တိုၼ်းဢမ်ႇပႄႇဢမ်ႇပႅတ်ႈသုၵျေးၸူးၽြႃးပဵၼ်ၸဝ်ႈ။ လွင်ႈမၼ်းၸမ်ႉ၊သင်ဝႃႈႁဝ်းလႆႈပဵၼ်ၵူၼ်းသိုဝ်ႈတေႃႇၵႃႈတီႈၽြႃးပဵၼ်ၸဝ်ႈလူၺ်ႈတၢင်းဢၼ်ၵမ်ၵျၢင်ႉၸွမ်းပိင်းၺၢပ်ႈတြႃးၸိုင်၊တၢင်းဢၼ် ၸဝ်ႈၶရိၸ်ႈ၊ လႆႈၶၢမ်ႇတၢႆၼၼ်ႉ၊ဢမ်ႇမီးဢၵျူဝ်းၵႃႈသင်ယဝ်ႉဢေႃႈ။
ဢူဝ်း၊ၵူၼ်းမိူင်း ၵလႃႇတိ၊ ဢၼ်ငိူဝ်ႈငႃႉၶဝ်႟။ ၽူႈလႂ်ဢဝ်ဢတၢတ်ႈၽီမေႃႇလႄႈၸူဝ်းဢဝ်သူႁႂ်ႈလႆႈပႄႇပႅတ်ႈသဵတ်ႈၸႃႇတြႃးတၢင်းဢၼ် ၸဝ်ႈယေႇသုၶရိၸ်ႈ၊ ၶၢမ်ႇတၢႆၵႃႈတီႈသဝ်မႆႉဝႃးမိုဝ်းဢၼ်ၼႄပျႃးထၢင်ႇထၢင်ႇသႃးသႃးသိုဝ်ႈၼႃႈတႂ်ႈတႃသူၼၼ်ႉ။-
ႁႂ်ႈၵဝ်လႆႈထၢမ်သူမဵဝ်းၼိုင်ႈသေၵမ်း။ သူလႆႈႁပ်ႉဢဝ်ဝိၺိၺ်ႇၸဝ်ႈၵွပ်ႈလူၺ်ႈၵမ်ၵျၢင်ႉၸွမ်းပိင်းၺၢပ်ႈတြႃးႁိုဝ်း။ ဢမ်ႇၼၼ်၊လႆႈႁပ်ႉဢဝ်ၵွပ်ႈလူၺ်ႈလႆႈငိၼ်းၶၢဝ်ႇတြႃးသိူဝ်းပျေႃႇယဝ်ႉလႄႈယုမ်ႇမၢတ်ႈၼၼ်ႉႁိုဝ်း။-
သူငိူဝ်ႈထၢၼ်ႇၼႆႉႁိုဝ်း။ သူတႄႇၸႃႉဢဝ်ႁႅင်းတီႈဝိၺိၺ်ႇသေယဝ်ႉ၊တေႃႈလဵဝ်ၼႆႉသူသမ်ႉဢၢင်ႈတၵ်းႁႂ်ႈသုတ်းသဵင်ႈလူၺ်ႈၼိူဝ်ႉလိူတ်ႈႁိုဝ်း။-
တၢင်းဢၼ်သူလႆႈထူပ်းလႆႈၺႃးပူၼ်ႉမႃးၼႂ်းလွင်ႈတၢင်းဢၼ်ၼမ်ၼႃႇၼၼ်ႉ၊ပဵၼ်ဢၼ်ဢမ်ႇပွင်ႇလွင်ႈၵႃႈသင်ယဝ်ႉႁိုဝ်း။ ပေႃးပဵၼ်တၢင်းဢၼ်ဢမ်ႇပွင်ႇလွင်ႈၵႃႈသင်တႄႉတႄႉၸိုင်။-
တၢင်းဢၼ်မၼ်းၸဝ်ႈပၼ်ဝိၺိၺ်ႇၸဝ်ႈတီႈသူလႄႈၼႄပျႃးၼိမိၵ်ႈလၢၵ်ႈၶၼႃႇၼမ်ၼႃႇတီႈသူၼၼ်ႉ၊ၵွပ်ႈပိူဝ်ႈသူၵမ်ၵျၢင်ႉၸွမ်းပိင်းၺၢပ်ႈတြႃးလႄႈပၼ်ႁိုဝ်း။ ဢမ်ႇၼၼ်၊ၵွပ်ႈပိူဝ်ႈသူလႆႈငိၼ်းၶၢဝ်ႇတြႃးသိူဝ်းပျေႃႇသေယဝ်ႉ၊ယုမ်ႇမၢတ်ႈလႄႈပၼ်ႁိုဝ်း။
မိူၼ်ၼင်ႇၼၼ်၊ ဢႃႇပြႃႇႁၢမ်ႇ၊ ၼၼ်ႉ၊ “မၼ်းယုမ်ႇမၢတ်ႈၽြႃးပဵၼ်ၸဝ်ႈလႄႈၽြႃးပဵၼ်ၸဝ်ႈမၢတ်ႈမၼ်းပဵၼ်ၵူၼ်းသိုဝ်ႈတေႃႇဢေႃႈ။-”
ပိူဝ်ႈၼႆလႄႈၶဝ်ၸိူဝ်းဢၼ်မီးတၢင်းယုမ်ႇမၢတ်ႈၼၼ်ႉၵူၺ်းၸင်ႇပဵၼ်လုၵ်ႈ ဢႃႇပြႃႇႁၢမ်ႇ၊ ဝႃႈၼႆႁုတႃႉ။-
ၵႃႈၼႂ်းၵျၢမ်းလိၵ်ႈၼၼ်ႉႁေႃးထႃႈဝႆႉဝႃႈ၊ၽြႃးပဵၼ်ၸဝ်ႈတၵ်းႁႂ်ႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းလႆႈပဵၼ်ၵူၼ်းသိုဝ်ႈတေႃႇၵႃႈတီႈမၼ်းၸဝ်ႈလႄႈၸင်ႇလႆႈႁေႃးလၢတ်ႈၶၢဝ်ႇသိူဝ်းပျေႃႇတီႈ ဢႃႇပြႃႇႁၢမ်ႇ၊ ထႃႈဝႆႉဢွၼ်တၢင်းလႄႈဝႃႈ၊ “ၵွပ်ႈလူၺ်ႈမႂ်းလႄႈၽြႃးပဵၼ်ၸဝ်ႈတၵ်းပၼ်တၢင်းလီမၢင်ႇၵလႃႇၵႃႈတီႈၵူၼ်းၵူႈၸိူဝ်ႉၵူႈမဵဝ်းဢေႃႈ” ဝႃႈၼင်ႇၼႆဢေႃႈ။-
ၵွပ်ႈပိူဝ်ႈ ဢႃႇပြႃႇႁၢမ်ႇ၊ ယုမ်ႇမၢတ်ႈလႄႈၽြႃးပဵၼ်ၸဝ်ႈပၼ်တၢင်းလီမၢင်ႇၵလႃႇတီႈမၼ်းဢေႃႈ။ မိူၼ်ၼင်ႇၼၼ်၊တီႈၶဝ်ၸိူဝ်းဢၼ်ယုမ်ႇမၢတ်ႈတင်းသဵင်ႈတင်းလူင်ၵေႃႈ၊လႆႈႁပ်ႉဢဝ်တၢင်းလီမၢင်ႇၵလႃႇလူၺ်ႈၵၼ်တင်းမၼ်းဢေႃႈ။
ၶဝ်ၸိူဝ်းဢၼ်ဢိင်ပိုင်ႈတၢင်းဢၼ်ၵမ်ၵျၢင်ႉၸွမ်းပိင်းၺၢပ်ႈတြႃးၼၼ်ႉ၊လႆႈၶၢမ်ႇတၢင်းဢၼ်ၵိၼ်ႇဝႃႈပၼ်တၢမ်ႇဢေႃႈ။ လွင်ႈမၼ်းၸမ်ႉ၊ၵျၢမ်းလိၵ်ႈတႅမ်ႈဝႆႉဝႃႈ၊ “ႁႂ်ႈၶဝ်ၸိူဝ်းဢၼ်ဢမ်ႇၵမ်ဢမ်ႇၸွမ်းပိင်းၺၢပ်ႈတြႃးၵူႈၸိူဝ်ႉၵူႈမဵဝ်းယူႇသေႇသေႇၼၼ်ႉ၊ၵူႈၵေႃႉၵူႈၵူၼ်းလႆႈၶၢမ်ႇတၢင်းဢၼ်မၼ်းၸဝ်ႈၵိၼ်ႇဝႃႈပၼ်တၢမ်ႇ” ဝႃႈၼင်ႇၼႆဢေႃႈ။-
ဢမ်ႇမီးၽူႈလႂ်ပဵၼ်ၵူၼ်းသိုဝ်ႈတေႃႇၵႃႈတီႈၽြႃးပဵၼ်ၸဝ်ႈ၊ၵွပ်ႈပိူဝ်ႈပိင်းၺၢပ်ႈတြႃးလႆႈၼၼ်ႉ၊ထၢင်ႇသႃးယူႇၵွပ်ႈပိူဝ်ႈၵျၢမ်းလိၵ်ႈတႅမ်ႈဝႆႉဝႃႈ၊ “ၶဝ်ၸိူဝ်းဢၼ်သိုဝ်ႈတေႃႇၵႃႈတီႈၽြႃးပဵၼ်ၸဝ်ႈ၊ၵွပ်ႈလူၺ်ႈတၢင်းယုမ်ႇမၢတ်ႈၼၼ်ႉၵူၺ်းဢသၢၵ်ႈတၵ်းလိပ်းဢေႃႈ၊” ဝႃႈၼင်ႇၼႆဢေႃႈ။-
ပိင်းၺၢပ်ႈတြႃးဢမ်ႇလႆႈဢိင်ပိုင်ႈၵႃႈၼိူဝ်တၢင်းယုမ်ႇမၢတ်ႈ၊ၸွမ်းၼင်ႇၵျၢမ်းလိၵ်ႈမီးဝႆႉဝႃႈ၊ “ၵေႃႉဢၼ်ၵမ်ၵျၢင်ႉၸွမ်းပိင်းၺၢပ်ႈတြႃးၼၼ်ႉ၊ဢသၢၵ်ႈတၵ်းလိပ်းၸွမ်းတၢင်းၵမ်တၢင်းၵျၢင်ႉၼၼ်ႉဢေႃႈ။”
မၼ်းမႅၼ်ႈၸွမ်းၼင်ႇဢၼ်ၵႃႈၼႂ်းၵျၢမ်းလိၵ်ႈတႅမ်ႈဝႆႉဝႃႈ၊ “ၽူႈလႂ်သေဢမ်ႇဝႃႈ၊ၵေႃႉဢၼ်လႆႈၶၢမ်ႇတၢင်းဢၼ်ႁွႆႈၽႅၼ်ၼိူဝ်သဝ်မႆႉၼၼ်ႉ၊ပဵၼ်ၵေႃႉဢၼ်လႆႈၶၢမ်ႇတၢင်းဢၼ်ၵိၼ်ႇဝႃႈပၼ်တၢမ်ႇၼၼ်ႉဢေႃႈ” ဝႃႈၼင်ႇၼႆၼၼ်ႉ၊ ၸဝ်ႈၶရိၸ်ႈ၊ ၸိုင်လႆႈၶၢမ်ႇတၢင်းဢၼ်ၵိၼ်ဝႃႈပၼ်တၢမ်ႇပုၼ်ႈႁဝ်းလႄႈ လႆႈထႆႇဢဝ်ႁဝ်းဢွၵ်ႇသေၵႃႈတီႈဢၼ်လႆႈၶၢမ်ႇတၢင်းဢၼ်ၵိၼ်ႇဝႃႈပၼ်တၢမ်ႇၵွပ်ႈပိူဝ်ႈပိင်းၺၢပ်ႈတြႃးၼၼ်ႉဢေႃႈ။-
ၸဝ်ႈယေႇသုၶရိၸ်ႈ၊ ၶၢမ်ႇႁဵတ်းၸိူဝ်ႉၼင်ႇၼၼ်၊ပုၼ်ႈလွင်ႈၼင်ႇႁိုဝ်တၢင်းလီမၢင်ႇၵလႃႇဢၼ်ၽြႃးပဵၼ်ၸဝ်ႈဝႆႉၵတိတီႈ ဢႃႇပြႃႇႁၢမ်ႇ၊ ၼၼ်ႉ၊တၵ်းလႆႈႁွတ်ႈထိုင်ၵႃႈတီႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းလႄႈႁဝ်းၵေႃႈၵွပ်ႈလူၺ်ႈတၢင်းယုမ်ႇမၢတ်ႈလႄႈတၵ်းလႆႈႁပ်ႉဢဝ်ဝိၺိၺ်ႇၸဝ်ႈဢၼ်ၽြႃးပဵၼ်ၸဝ်ႈဝႆႉၵတိၼၼ်ႉဢေႃႈ။
ပီႈၼွင်ႉၶဝ်႟။ ၵဝ်ဢဝ်လွင်ႈတၢင်းဢၼ်ပဵၼ်ယူႇၵူႈမိူဝ်ႈၵူႈဝၼ်းၼၼ်ႉတႅၵ်ႈၼႄတီႈသူၸမ်ႉ၊မိူဝ်ႈဢၼ်ၵူၼ်းသွင်ၵေႃႉလႆႈၽွမ်ႉၸႂ်ၵၼ်ႁဵတ်းလိၵ်ႈလူင်းလၢႆးမိုဝ်းဝႆႉယဝ်ႉၸိုင်၊ၽူႈလႂ်သေဢမ်ႇဝႃႈ၊ဢမ်ႇလႆႈယႃႉသဵတ်ႈၸႃႇၼၼ်ႉဢမ်ႇၵႃး၊ဢမ်ႇလႆႈသႂ်ႇထႅင်ႈၵႂၢမ်းၵႃႈသင်ဢေႃႈ။-
ၵတိတင်းလၢႆၸိုင်၊ၽြႃးပဵၼ်ၸဝ်ႈဝႆႉတီႈ ဢႃႇပြႃႇႁၢမ်ႇ၊ ဢိၵ်ႇတင်းၸိူဝ်ႉၶိူဝ်းမၼ်းၵေႃႉၼိုင်ႈ၊ဢမ်ႇလႆႈလၢတ်ႈဝႃႈ၊ “ၸိူဝ်ႉၶိူဝ်းမၼ်းတင်းလၢႆ” ဢၼ်ပွင်ႇဝႃႈ၊ၵူၼ်းၼမ်ၵူၼ်းလၢႆၼၼ်ႉ။ မၼ်းဝႃႈ၊ “ၸိူဝ်ႉၶိူဝ်းမၼ်း” ဢၼ်ၶႂ်ႈဝႃႈ၊လွင်ႈၵေႃႉလဵဝ်ဢၼ်ပဵၼ် ၸဝ်ႈၶရိၸ်ႈ၊ ၼၼ်ႉဢေႃႈ။-
ၵဝ်ၶႂ်ႈဝႃႈၸမ်ႉ၊ၽြႃးပဵၼ်ၸဝ်ႈႁဵတ်းပတိၺိၺ်ႇတြႃးလူၺ်ႈၵၼ်တင်း ဢႃႇပြႃႇႁၢမ်ႇ၊ လႄႈပႂ်ႉၵတိၼၼ်ႉယူႇဢေႃႈ။ ပိင်းၺၢပ်ႈတြႃးဢၼ်ပေႃႇမႃးပႃႈလိုၼ်းသီႇပၢၵ်ႇပၢႆသၢမ်သိပ်းပီမိူင်းၼၼ်ႉ၊ဢမ်ႇယႃႉၵႂၢမ်းပတိၺိၺ်ႇတြႃးၼၼ်ႉလႆႈ။ ဢမ်ႇပႄႇဢမ်ႇပႅတ်ႈၵတိၽြႃးပဵၼ်ၸဝ်ႈၼၼ်ႉလႆႈဢေႃႈ။-
လွင်ႈမၼ်းၸမ်ႉ၊ပေႃးဢမူၺ်ႇၸဝ်ႈတႄႇယူႇၵႃႈၼိူဝ်ပိင်းၺၢပ်ႈတြႃးၸိုင်၊မၼ်းဢမ်ႇသႅင်ႇၵၼ်တင်းၵတိၸဝ်ႈဢေႃႈ။ ၵူၺ်းၵႃႈ၊ၽြႃးပဵၼ်ၸဝ်ႈပၼ်ဢမူၺ်ႇၸဝ်ႈတီႈ ဢႃႇပြႃႇႁၢမ်ႇ၊ ၸွမ်းၼင်ႇၵတိမၼ်းၸဝ်ႈၼၼ်ႉဢေႃႈ။
ပေႃးပဵၼ်ၸိူဝ်ႉၼင်ႇၼႆၸိုင်၊ပိင်းၺၢပ်ႈတြႃးမီးဢၵျူဝ်းၵႃႈသင်။ ပိင်းၺၢပ်ႈတြႃးၼႆႉ၊ထၢပ်ႈသႂ်ႇထႅင်ႈႁႂ်ႈလႆႈႁုလွင်ႈတၢင်းၽိတ်းတၢင်းပိူင်ႈ၊ဢိၵ်ႇတင်းပဵၼ်ဢၼ်တၵ်းတႄႇယူႇတေႃႇထိုင်ၸူဝ်ႈဢၼ်ၸိူဝ်ႉၶိူဝ်း ဢႃႇပြႃႇႁၢမ်ႇ၊ ဢၼ်ၶၢမ်ႇဢဝ်ၵတိၸဝ်ႈၼၼ်ႉႁွတ်ႈထိုင်မႃးၼၼ်ႉဢေႃႈ။ မၼ်းၸဝ်ႈႁႂ်ႈတမၢၼ်ႇၵၢင်ႁၢဝ်တင်းလၢႆဢဝ်တြႃးၼၼ်ႉဝႆႉ၊ၵႃႈၼႂ်းမိုဝ်းၵူၼ်းဝူင်ႈၵၢင်ဢေႃႈ။-
မိူဝ်ႈဢၼ်မီးၽၢႆႇလဵဝ်ႁဵတ်းၵၢၼ်လႆႈၼၼ်ႉၸိုင်၊ဢမ်ႇလူဝ်ၵူၼ်းဝူင်ႈၵၢင်ယဝ်ႉ၊ၽြႃးပဵၼ်ၸဝ်ႈၸမ်ႉ၊ပဵၼ်ၽၢႆႇလဵဝ်ၼၼ်ႉဢေႃႈ။
ပေႃးပဵၼ်ၼႆၸိုင်၊ပိင်းၺၢပ်ႈတြႃးၼၼ်ႉၶတ်းၵၼ်တင်းၵတိၽြႃးပဵၼ်ၸဝ်ႈႁိုဝ်း။ မၼ်းဢမ်ႇၶတ်းၵၼ်လႃးလႃး။ ပေႃးၽြႃးပဵၼ်ၸဝ်ႈပၼ်ပိင်းၺၢပ်ႈတြႃးဢၼ်ႁႂ်ႈၵူၼ်းဢသၢၵ်ႈလိပ်းၸိုင်၊ၵူၼ်းတၵ်းလႆႈပဵၼ်ၵူၼ်းဢၼ်သိုဝ်ႈတေႃႇၵႃႈတီႈၽြႃးပဵၼ်ၸဝ်ႈၵွပ်ႈပိူဝ်ႈၵမ်ၵျၢင်ႉၸွမ်းတြႃးၼၼ်ႉယူႇဢေႃႈ။-
ၵူၺ်းၵႃႈ၊ၵျၢမ်းလိၵ်ႈတႅမ်ႈဝႆႉဝႃႈၸမ်ႉ၊ၵူၼ်းလေႃးၵီႇတင်းသဵင်ႈတင်းလူင်တူၵ်းၸူမ်ယူႇၵႃႈၼႂ်းတုၸရိူၵ်ႈဢပျတ်ႈဢေႃႈ၊ဝႃႈၼႆၶဝ်ၸိူဝ်းဢၼ်ယုမ်ႇမၢတ်ႈၼၼ်ႉ၊တၵ်းလႆႈႁပ်ႉဢဝ်ၵတိၸဝ်ႈလူၺ်ႈတၢင်းယုမ်ႇမၢတ်ႈဢၼ်ၶဝ်မီးတီႈ ၸဝ်ႈယေႇသုၶရိၸ်ႈ၊ ၼၼ်ႉဢေႃႈ။
ၵူၺ်းၵႃႈ၊ၸူဝ်ႈဢၼ်တြႃးတၢင်းယုမ်ႇမၢတ်ႈဢမ်ႇပႆႇႁွတ်ႈထိုင်မႃးၼၼ်ႉ၊ပိင်းၺၢပ်ႈတြႃးပႂ်ႉထိင်းႁဝ်းယူႇလႄႈၶင်ႁဝ်းဝႆႉတေႃႇထိုင်ႁွတ်ႈတြႃးတၢင်းယုမ်ႇမၢတ်ႈပေႃႇဢွၵ်ႇမႃးၼၼ်ႉဢေႃႈ။-
ပိူဝ်ႈၼႆလႄႈပိင်းၺၢပ်ႈတြႃးပဵၼ်မိူၼ်ၵေႃႉဢၼ်ပႂ်ႉထိင်းႁဝ်းလႄႈဢွၼ်သူင်ႇတီႈ ၸဝ်ႈၶရိၸ်ႈ၊ ႁႂ်ႈႁဝ်းလႆႈပဵၼ်ၵူၼ်းသိုဝ်ႈတေႃႇၵႃႈတီႈၽြႃးပဵၼ်ၸဝ်ႈၵွပ်ႈပိူဝ်ႈတြႃးတၢင်းယုမ်ႇမၢတ်ႈၼၼ်ႉဢေႃႈ။-
တေႃႈလဵဝ်ၼႆႉ၊ၽွင်းယၢမ်းတြႃးတၢင်းယုမ်ႇမၢတ်ႈၼၼ်ႉ၊ႁွတ်ႈၽႅဝ်မႃးယဝ်ႉလႄႈႁဝ်းလႆႈလွတ်ႈသေၵႃႈၼႂ်းမိုဝ်းၵူၼ်းဢၼ်ပႂ်ႉထိင်းႁဝ်းၼၼ်ႉယဝ်ႉဢေႃႈ။
ပိူဝ်ႈၼႆလႄႈၵႃႈၼႂ်း ၸဝ်ႈၶရိၸ်ႈ၊ ၼၼ်ႉ၊သူလႆႈပဵၼ်လုၵ်ႈၽြႃးပဵၼ်ၸဝ်ႈၵွပ်ႈပိူဝ်ႈတၢင်းယုမ်ႇမၢတ်ႈဢေႃႈ။-
လွင်ႈမၼ်းၸမ်ႉ၊သူၸိူဝ်းဢၼ်ၶၢမ်ႇဢဝ်မၢင်ႇၵလႃႇပပ်ႉတိၸမ်ႇ ၵႃႈၼႂ်း ၸဝ်ႈၶရိၸ်ႈ၊ ၼၼ်ႉ၊ပဵၼ်ၵေႃႉဢၼ်ႁပ်ႉဢဝ်သၽေႃး ၸဝ်ႈၶရိၸ်ႈ၊ ဢေႃႈ။-
ၵွပ်ႈၼႆလႄႈၼႂ်းၸဝ်ႈၶရိၸ်ႈၼၼ်ႉဢမ်ႇၽႄဢမ်ႇမႅင်ႇဝႃႈပဵၼ်ၵူၼ်းမဵဝ်း ၵျူး၊ ပဵၼ်ၵူၼ်းမဵဝ်း ၵရိၵ်ႉ၊ ပဵၼ်ၶႃႈ၊ပဵၼ်ၵူၼ်းလွတ်ႈလႅဝ်း၊ပဵၼ်ၽူႈၸၢႆး၊ပဵၼ်ၽူႈယိင်း၊သူတင်းသဵင်ႈတင်းလူင်ပဵၼ်ဢၼ်ၼိုင်ႈဢၼ်လဵဝ်ၵၼ်ဢေႃႈ။-
ပေႃးသူပဵၼ်ၵူၼ်း ၸဝ်ႈၶရိၸ်ႈ၊ ၸိုင်၊သူပဵၼ်ၸိူဝ်ႉၶိူဝ်း ဢႃႇပြႃႇႁၢမ်ႇ၊ ယဝ်ႉလႄႈသူလႆႈၶၢမ်ႇဢမူၺ်ႇၸွမ်းၼင်ႇၵတိၸဝ်ႈဢေႃႈ။
ၵႂၢမ်းဢၼ်သိုပ်ႇလၢတ်ႈထႅင်ႈၸမ်ႉ၊လုၵ်ႈဢၼ်လႆႈၶၢမ်ႇဢဝ်ဢမူၺ်ႇလႄႈပဵၼ်ၵေႃႉဢၼ်ထိူၵ်ႈပိူင်ႇဢုၵ်ႉၸႃႇတင်းသဵင်ႈတင်းလူင်သေၵေႃႈ၊မိူဝ်ႈမၼ်းယင်းတိုၵ်ႉပဵၼ်လုၵ်ႈဢွၼ်ႇယူႇၼၼ်ႉ၊မၼ်းလႆႈၶၢမ်ႇတၢင်းဢၼ်ၸႂ်ႉသွႆမိူၼ်ၸိူဝ်ႉၼင်ႇပဵၼ်ၶႃႈၼၼ်ႉဢေႃႈ။-
ၵူၺ်းၵႃႈ၊မၼ်းလႆႈယူႇတႂ်ႈမိုဝ်းၵူၼ်းဢၼ်ပႂ်ႉထိင်းဢုၵ်ႉၸႃႇမၼ်းတင်းလၢႆ၊တေႃႇထိုင်ႁွတ်ႈၽွင်းယၢမ်းဢၼ်ပေႃႈမၼ်းမၵ်းၶၢၼ်းဝႆႉၼၼ်ႉဢေႃႈ။-
ပိူင်လဵဝ်ၵၼ်ႁဝ်းၼႆႉၵေႃႈ၊ၸူဝ်ႈဢၼ်ႁဝ်းယင်းပဵၼ်လုၵ်ႈဢွၼ်ႇယူႇၼၼ်ႉၸိုင်၊လႆႈပဵၼ်ၶႃႈၵႃႈၼႂ်းမိုဝ်းၽီဢၼ်ဢုပ်ႉပိူင်ႇၼႂ်းၸၵျႃႇဝလႃႇၼႆႉဢေႃႈ။-
ၵူၺ်းၵႃႈ၊မိူဝ်ႈဢၼ်ၶိင်ႇမၼ်းၸေးယဝ်ႉၸိုင်၊ၽြႃးပဵၼ်ၸဝ်ႈပွႆႇၸႂ်ႉလုၵ်ႈၸဝ်ႈၵျွလူင်းမႃးႁႂ်ႈလႆႈၵိူတ်ႇလဵင်ႉၵႃႈတီႈတွင်ႉမႄႈယိင်းလႄႈ၊ၵိူတ်ႇလဵင်ႉၵႃႈတႂ်ႈပိင်းၺၢပ်ႈတြႃးမႃး၊-
ႁႂ်ႈလႆႈထုတ်ႇၼုၵ်ႈဢဝ်ၶဝ်ၸိူဝ်းဢၼ်မီးၵႃႈတႂ်ႈပိင်းၺၢပ်ႈတြႃး၊ၼင်ႇႁိုဝ်တေလႆႈႁပ်ႉတုင်းဢဝ်ႁဝ်းပဵၼ်လုၵ်ႈၽြႃးပဵၼ်ၸဝ်ႈဢေႃႈ။
ၸွမ်းလူၺ်ႈသူပဵၼ်လုၵ်ႈမၼ်းၸဝ်ႈၼၼ်ႉ၊ၽြႃးပဵၼ်ၸဝ်ႈပွႆႇၸႂ်ႉဝိၺိၺ်ႇလုၵ်ႈၸဝ်ႈဢၼ်ၸၢင်ႈႁွင်ႉလႄႈဝႃႈ၊ “ဢပ်ႉပႃႉ၊ပေႃႈၸဝ်ႈတီႈၶႃႈ႟၊” ဝႃႈၼင်ႇၼႆၼၼ်ႉ၊မႃးၵႃႈၼႂ်းႁူဝ်ၸႂ်ႁဝ်းယဝ်ႉဢေႃႈ။-
ပိူဝ်ႈၼႆၸင်ႇ၊ၵွပ်ႈပိူဝ်ႈၽြႃးပဵၼ်ၸဝ်ႈလႄႈသူဢမ်ႇလႆႈပဵၼ်ၶႃႈထႅင်ႈယဝ်ႉလႄႈလႆႈပဵၼ်လုၵ်ႈယဝ်ႉဢေႃႈ။ ပိူဝ်ႈဝႃႈပဵၼ်လုၵ်ႈလႄႈပဵၼ်ၵေႃႉဢၼ်လႆႈၶၢမ်ႇဢဝ်ဢမူၺ်ႇဢေႃႈ။
မိူဝ်ႈဢွၼ်ၼႆႉၼၼ်ႉ၊သူဢမ်ႇႁုၽြႃးပဵၼ်ၸဝ်ႈလႄႈသူလႆႈၶၢမ်ႇပဵၼ်ၶႃႈၵႃႈတီႈမဵဝ်းဢၼ်ဢမ်ႇၸႂ်ႈၸဝ်ႈဢၼ်ထွတ်ႈဢၼ်မျၢတ်ႈၸိူဝ်းၼၼ်ႉဢေႃႈ။-
တေႃႈလဵဝ်ၼႆႉၸမ်ႉ၊သူႁုၸၵ်းၽြႃးပဵၼ်ၸဝ်ႈယဝ်ႉ။ ႁႂ်ႈလႆႈပဵၼ်ဢၼ်မၢၼ်ႇမႅၼ်ႈၼၼ်ႉၸမ်ႉ၊ၽြႃးပဵၼ်ၸဝ်ႈႁုၸၵ်းသူယဝ်ႉ။ ႁဵတ်းသင်လႄႈသူသမ်ႉပိၼ်ႇၸႂ်သေလႄႈၶိုၼ်းၵႂႃႇၸူးၵႃႈၼႂ်းမိုဝ်းၽီလေႃးၵီႇဢၼ်ဢမ်ႇမီးႁႅင်း၊ဢၼ်ဢမ်ႇပၼ်ၵတ်းယဵၼ်ၶျၢမ်းသႃႇလႆႈၼၼ်ႉ။ ၵွပ်ႈပိူဝ်ႈၸိူဝ်ႉႁိုဝ်လႄႈသူၶႂ်ႈၶိုၼ်းၵႂႃႇပဵၼ်ၶႃႈၽီလေႃးၵီႇၼၼ်ႉထႅင်ႈ။-
သူဝႆႉပဵၼ်ဢၼ်လမ်ႇလွင်ႈတၢင်းဢၼ်တူၺ်းပီတူၺ်းလိူၼ်၊တူၺ်းမိူဝ်ႈတူၺ်းဝၼ်းၼႃႇဢေႃႈ။-
ၵဝ်မႆႈၸႂ်ပုၼ်ႈသူတႄႉတႄႉဢေႃႈ။ ၵဝ်ၵူဝ်တၢင်းဢၼ်ၵဝ်ၵႆႉၶတ်းၸႂ်ပုၼ်ႈသူၼၼ်ႉ၊တေပဵၼ်ဢၼ်ဢမ်ႇပွင်ႇလွင်ႈၵႃႈသင်ၵႂႃႇဢေႃႈ။
ပီႈၼွင်ႉၶဝ်႟။ ၵဝ်တွင်းပၢၼ်ႇသူ၊ႁႂ်ႈသူပဵၼ်မိူၼ်ၸိူဝ်ႉၼင်ႇၵဝ်၊ပိူဝ်ႈဝႃႈၵဝ်ၵေႃႈလႆႈလႅၵ်ႈလၢႆႈပဵၼ်မိူၼ်ၸိူဝ်ႉၼင်ႇသူၵႂႃႇယဝ်ႉဢေႃႈ။ သူဢမ်ႇလႆႈႁဵတ်းၽိတ်းတေႃႇၵဝ်သေၸိူဝ်ႉသေပိူင်။-
ပွၵ်ႈဢွၼ်တၢင်းၼၼ်ႉ၊ၵွပ်ႈပိူဝ်ႈၵဝ်ဢမ်ႇယူႇလီလႄႈၵဝ်လႆႈဢၶႂၢင်ႉႁေႃးလၢတ်ႈၶၢဝ်ႇတြႃးသိူဝ်းပျေႃႇပၼ်သူၼၼ်ႉ၊ၸွင်ႇသူတွင်းယူႇႁိုဝ်း။-
ၽွင်းယၢမ်းၼၼ်ႉ၊ပိၵ်ႉသမ်ႉတူဝ်ၶၼ်ႇထႃႇၵဝ်ဢၼ်ဢမ်ႇယူႇလီၼၼ်ႉ၊ပဵၼ်ဢၼ်ၸၢမ်းတူၺ်းၸႂ်သူသေၵေႃႈ၊သူဢမ်ႇမီးၸႂ်ဢၼ်ဢမ်ႇၼပ်ႉဢမ်ႇၶၢၼ်းၵဝ်၊ဢမ်ႇပႄႇပႅတ်ႈၵဝ်ၵူၺ်းဢမ်ႇၵႃး၊သူယင်းႁပ်ႉတုင်းဢဝ်ၵဝ်၊မိူၼ်ၸိူဝ်ႉၼင်ႇဢၼ်တၵ်းလႆႈႁပ်ႉတုင်းဢဝ်တမၢၼ်ႇၵၢင်ႁၢဝ်ၽြႃးပဵၼ်ၸဝ်ႈ၊မိူၼ်ၸိူဝ်ႉၼင်ႇဢၼ်တၵ်းလႆႈႁပ်ႉတုင်းဢဝ် ၸဝ်ႈယေႇသုၶရိၸ်ႈ၊ ၼၼ်ႉဢေႃႈ။-
သူလိုမ်းပႅတ်ႈတၢင်းဢၼ်ပျေႃႇၸႂ်ပျေႃႇၶေႃးသူၼၼ်ႉယဝ်ႉႁိုဝ်း။ မိူဝ်ႈဢွၼ်ၼႆႉၼၼ်ႉ၊ပေႃးပဵၼ်လႆႈၸိုင်၊သူယင်းၶႂ်ႈၶွၵ်းဢဝ်မၢၵ်ႇတႃသူသေလႄႈပၼ်ၵဝ်ဢေႃႈ၊ဝႃႈၼႆၵဝ်ႁတ်းၶၢမ်ႇသၢၵ်ႈသေႇဢေႃႈ။-
ၵူၺ်းၵႃႈ၊တေႃႈလဵဝ်ၼႆႉ ၵွပ်ႈပိူဝ်ႈၵဝ်ႁေႃးလၢတ်ႈတြႃးဢၼ်ၸိုဝ်ႈဢၼ်ၸႂ်ႈၼၼ်ႉလႄႈၵဝ်ပဵၼ်ရၢၼ်ႇသူႇသူၵႂႃႇယဝ်ႉႁိုဝ်း။
ၵူၼ်းၸိူဝ်းၼၼ်ႉႁၵ်ႉသူတႄႉတႄႉဝႃႈၼႆၸႂ်ႈယူႇသေၵေႃႈ၊ႁူဝ်ၸႂ်ၶဝ်ဢမ်ႇၶၢဝ်ၸၢင်ႇဢေႃႈ။ ၶဝ်ၶႂ်ႈႁဵတ်းႁႂ်ႈသူၽၢတ်ႇယၢၼ်ၵၼ်တင်းၵဝ်သေယဝ်ႉ၊ႁႂ်ႈႁၵ်ႉၶဝ်ၼၼ်ႉဢေႃႈ။-
ပေႃးမီးၸႂ်ဢၼ်ၶၢဝ်ၸၢင်ႇလွင်ႈတၢင်းဢၼ်ႁၵ်ႉပိူၼ်ႈၼၼ်ႉ၊ပဵၼ်ဢၼ်လီဢၼ်ငၢမ်းဢေႃႈ။ ထုၵ်ႇလီမီးၸႂ်ဢၼ်မေႃႁၵ်ႉတႃႇသေႇ၊ဢမ်ႇၸႂ်ႈဝႃႈမိူဝ်ႈဢၼ်ၵဝ်မီးယူႇလူၺ်ႈၵၼ်တင်းသူၼၼ်ႉၵူၺ်း။-
လုၵ်ႈလၢင်းဢၼ်ၵဝ်ႁၵ်ႉၶဝ်႟။ ၸိူဝ်ႉၼင်ႇဢၼ်ဝူၺ်ႇတၼႃႇဢၼ်မႄႈလုၵ်ႈဢွၼ်ႇၵိူတ်ႇလုၵ်ႈၼၼ်ႉ၊ၵဝ်သမ်ႉလႆႈၶၢမ်ႇၸဵပ်းၸႂ်ပုၼ်ႈသူၼႃႇလူင်လၢင်တေႃႇထိုင်ႁွတ်ႈၸႂ်သၽေႃး ၸဝ်ႈၶရိၸ်ႈ၊ တၵ်းတႄႇပဵၼ်မႃးၵႃႈၼႂ်းတူဝ်သူဢေႃႈ။-
တေႃႈလဵဝ်ၼႆႉ၊ၵဝ်ၶႂ်ႈၵႂႃႇမီးယူႇလူၺ်ႈၵၼ်တင်းသူလႄႈၶႂ်ႈမႄးလၢႆႈၶေႃႈၵႂၢမ်းၵဝ်ၵွပ်ႈပိူဝ်ႈၵဝ်မီးၸႂ်ဢၼ်ထၢင်ႇထိူမ်ၵႃႈၼိူဝ်သူၼၼ်ႉဢေႃႈ။ ၵဝ်မႆႈၸႂ်ပုၼ်ႈသူတႄႉတႄႉဢေႃႈ။
ၵဝ်ၶႂ်ႈတွင်ႈထၢမ်တူၺ်းသူ၊ၸိူဝ်းဢၼ်ၶႂ်ႈယူႇတႂ်ႈပိင်းၺၢပ်ႈတြႃးၼၼ်ႉလႄႈဝႃႈၸမ်ႉ၊သူဢမ်ႇလႆႈထွမ်ႇငိၼ်းလွင်ႈပိင်းၺၢပ်ႈတြႃးႁိုဝ်း။-
တြႃးၼၼ်ႉတႅမ်ႈဝႆႉဝႃႈ၊ ဢႃႇပြႃႇႁၢမ်ႇ၊ မီးလုၵ်ႈၸၢႆးသွင်ၵေႃႉဢေႃႈ။ ၵေႃႉၼိုင်ႈၵိူတ်ႇမႃးၵႃႈတီႈမႄႈယိင်းဢၼ်ပဵၼ်ၶႃႈလႄႈ၊ၵေႃႉၼိုင်ႈၸမ်ႉ၊ၵိူတ်ႇမႃးၵႃႈတီႈမႄႈယိင်းဢၼ်လွတ်ႈလႅဝ်းဢေႃႈ။-
လုၵ်ႈၸၢႆးမႄႈယိင်းဢၼ်ပဵၼ်ၶႃႈၼၼ်ႉ၊ၵိူတ်ႇမႃးၸွမ်းလူၺ်ႈၸႃႇတိၼိူဝ်ႉလိူတ်ႈလႄႈလုၵ်ႈၸၢႆးမႄႈယိင်းဢၼ်လွတ်ႈလႅဝ်းၼၼ်ႉၸမ်ႉ၊ၵိူတ်ႇမႃးၸွမ်းလူၺ်ႈၵတိၽြႃးပဵၼ်ၸဝ်ႈဢေႃႈ။-
လွင်ႈတၢင်းၼႆႉမၼ်းပဵၼ်ပုင်ႇတႅၵ်ႈဢေႃႈ။ မႄႈယိင်းသွင်ၵေႃႉၼၼ်ႉ၊ပဵၼ်ပတိၺိၺ်ႇတြႃးသွင်သဵၼ်ႈဢေႃႈ။ တႅၵ်ႈတိူင်းမႄႈယိင်းၵေႃႉၼိုင်ႈၼၼ်ႉ၊ပဵၼ်ပတိၺိၺ်ႇတြႃးဢၼ်ႁဵတ်းၵႃႈတီႈလွႆ သိၼႃႉ၊ လႄႈ၊ၵိူတ်ႇလဵင်ႉမႃးလုၵ်ႈလၢင်းဢၼ်ၶၢမ်ႇႁဵတ်းၶႃႈၵူၺ်းဢေႃႈ။ ၵေႃႉၼၼ်ႉပဵၼ် ႁႃႇၵရႃႉ၊ ဢေႃႈ။-
ႁႃႇၵရႃႉ၊ ၼၼ်ႉပွင်ႇဝႃႈ၊ပဵၼ်လွႆ သိၼႃႉ၊ ဢၼ်မီးၼႂ်းမိူင်း ဢရေးပီးယႃး၊ ဢိၵ်ႇတင်းတႅၵ်ႈတိူင်းဝႃႈ၊ပဵၼ်ဝဵင်း ယေႇရုသလႅမ်ႇ၊ ဢၼ်မီးမိူဝ်ႈလဵဝ်ၼႆႉ၊ဢိၵ်ႇတင်းၵူၼ်းမၼ်းတင်းလၢႆ၊လႆႈၶၢမ်ႇႁဵတ်းၶႃႈၼၼ်ႉဢေႃႈ။-
ၵူၺ်းၵႃႈ၊ဝဵင်း ယေႇရုသလႅမ်ႇ၊ ဢၼ်မီးၵႃႈၼိူဝ်ၸမ်ႉ၊ပွင်ႇဝႃႈပဵၼ်မႄႈယိင်းလွတ်ႈလႅဝ်းဢၼ်ဝႃႈ၊ပဵၼ်မႄႈႁဝ်းတင်းသဵင်ႈတင်းလူင်ၼၼ်ႉဢေႃႈ။-
တႅမ်ႈဝႆႉၵႃႈၼႂ်းၵျၢမ်းလိၵ်ႈလႄႈဝႃႈၸမ်ႉ၊ “မႄႈမၼ်ဢၼ်ဢမ်ႇၵိူတ်ႇလဵင်ႉလုၵ်ႈ႟။ သိူဝ်းပျေႃႇတႃႉ။ မႄႈယိင်းဢၼ်ဢမ်ႇတွၼ်ႉၶၢမ်ႇဝူၺ်ႇတၼႃႇဢၼ်ၵိူတ်ႇလဵင်ႉလုၵ်ႈ႟။ ပၢဝ်ႇသႅၼ်ႇမူၼ်ႈမူၼ်ႈပျေႃႇပျေႃႇတႃႉ။ လွင်ႈမၼ်းၸမ်ႉ၊မႄႈယိင်းဢၼ်ၶၢမ်ႇၸုၼ်ႉပႅတ်ႈဝႆႉၼၼ်ႉ၊ တၵ်းယဵင်ႈၶႅၼ်းၵိူတ်ႇလဵင်ႉလုၵ်ႈၼမ်ၼႃႇသေ မႄႈယိင်းဢၼ်မီးၽူဝ်ၼၼ်ႉယဝ်ႉ” ဝႃႈၼင်ႇၼႆဢေႃႈ။
ပိူဝ်ႈၼႆလႄႈပီႈၼွင်ႉၶဝ်႟။ တေႃႈလဵဝ်ၼႆႉႁဝ်းၸိူဝ်းၼႆႉ၊ပဵၼ်လုၵ်ႈလၢင်းၸွမ်းၼင်ႇၵတိၸဝ်ႈ၊ဢၼ်မိူၼ်ၵၼ်တင်း ဢိၸၢၵ်ႈ၊ ဢေႃႈ။-
မိူဝ်ႈဢွၼ်ၼၼ်ႉလုၵ်ႈဢၼ်ၵိူတ်ႇမႃးၸွမ်းလူၺ်ႈၸႃႇတိၼိူဝ်ႉလိူတ်ႈလႆႈၼိၵ်ႈၸၢၵ်ႈငႅၼ်းသႄးတီႈလုၵ်ႈဢၼ်ၵိူတ်ႇလဵင်ႉမႃးၸွမ်းလူၺ်ႈဝိၺိၺ်ႇၸဝ်ႈၼၼ်ႉ၊မိူဝ်ႈလဵဝ်ၼႆႉၵေႃႈယင်းမိူၼ်ၸိူဝ်ႉၼင်ႇၼၼ်ယူႇဢေႃႈ။-
ၼႂ်းဝႃႈၼၼ်သေၵေႃႈ၊ၵႃႈၼႂ်းၵျၢမ်းလိၵ်ႈတႅမ်ႈဝႆႉၸိူဝ်ႉႁိုဝ်လႄႈဝႃႈၸမ်ႉ၊ “လိုပ်ႈပႅတ်ႈမႄႈယိင်းဢၼ်ပဵၼ်ၶႃႈတင်းလုၵ်ႈၸၢႆးမၼ်းတႃႉ။ လုၵ်ႈၸၢႆးမႄႈယိင်းဢၼ်ပဵၼ်ၶႃႈၼၼ်ႉ၊တၵ်းဢမ်ႇလႆႈၶၢမ်ႇဢဝ်ဢမူၺ်ႇႁူမ်ႈလူၺ်ႈၵၼ်တင်းလုၵ်ႈၸၢႆးမႄႈယိင်းဢၼ်လွတ်ႈလႅဝ်းၼၼ်ႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ၊ပီႈၼွင်ႉၶဝ်႟။ ႁဝ်းပဵၼ်လုၵ်ႈလၢင်းမႄႈယိင်းဢၼ်ပဵၼ်ၶႃႈၼၼ်ႉဢမ်ႇၸႂ်ႈ။ ႁဝ်းပဵၼ်လုၵ်ႈလၢင်းမႄႈယိင်းဢၼ်လွတ်ႈလႅဝ်းၼၼ်ႉဢေႃႈ။
ၸဝ်ႈၶရိၸ်ႈ၊ ပွႆႇႁႂ်ႈႁဝ်းလွတ်ႈယဝ်ႉ။ တႄႇမၼ်ႈယူႇၼႂ်းဢၶႂၢင်ႉတၢင်းဢၼ်လွတ်ႈလႅဝ်းၼၼ်ႉတႃႉ။ ယႃႇပေသမ်ႉၶိုၼ်းႁပ်ႉတုင်းဢဝ်ၵၢၼ်းႁၢပ်ႇဢၼ်ဝႃႈ၊ၶၢမ်ႇႁဵတ်းၶႃႈၼၼ်ႉသေၵမ်း။
ၵဝ် ပေႃးလု၊ လၢတ်ႈၼႆႉထွမ်ႇဢဝ်သေၵမ်း။ ပေႃးသူၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ၸိုင်၊ ၸဝ်ႈၶရိၸ်ႈ၊ တေဢမ်ႇၸၢင်ႈႁဵတ်းမဵဝ်းဢၼ်မီးဢၵျူဝ်းပုၼ်ႈသူၼၼ်ႉလႆႈယဝ်ႉဢေႃႈ။-
ၵဝ်သမ်ႉၶၢမ်ႇသၢၵ်ႈသေႇတီႈၶဝ်ၸိူဝ်းဢၼ်ၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ၼၼ်ႉ ၵူႈၵေႃႉၵူႈၵူၼ်းလႄႈဝႃႈ၊ၶဝ်ၸိူဝ်းၼၼ်ႉတၵ်းတေလႆႈၵမ်ၵျၢင်ႉၸွမ်းပိင်းၺၢပ်ႈတြႃး၊ၵႃႈမီးတင်းသဵင်ႈတင်းမူတ်းဢေႃႈ။-
သူၸိူဝ်းဢၼ်ၵမ်ၵျၢင်ႉၸွမ်းပိင်းၺၢပ်ႈတြႃး၊ႁႂ်ႈလႆႈပဵၼ်ၵူၼ်းသိုဝ်ႈတေႃႇၵႃႈတီႈၽြႃးပဵၼ်ၸဝ်ႈၼၼ်ႉ၊ပဵၼ်တၢင်းဢၼ်ၽၢတ်ႇယၢၼ် ၸဝ်ႈၶရိၸ်ႈ၊ လႄႈပဵၼ်ၶဝ်ၸိူဝ်းဢၼ်ပိူင်ႈလွႆးၵႂႃႇသေသုၵျေးၸူးၽြႃးပဵၼ်ၸဝ်ႈယဝ်ႉဢေႃႈ။-
ႁဝ်းၼႆႉၸမ်ႉ၊ဢိင်လူၺ်ႈဝိၺိၺ်ႇၸဝ်ႈ၊ဢိၵ်ႇတင်းတၢင်းယုမ်ႇမၢတ်ႈလႄႈပႂ်ႉထႃႈတၢင်းသိုဝ်ႈတေႃႇဢၼ်ႁဝ်းမုင်ႈမွင်းဝႃႈ၊ႁဝ်းတေလႆႈႁပ်ႉဢဝ်ၼၼ်ႉဢေႃႈ။-
ပိူဝ်ႈဢၼ်ႁဝ်းၶဝ်ႈႁူမ်ႈလူၺ်ႈ ၸဝ်ႈၶရိၸ်ႈ၊ ၼၼ်ႉ၊တၢင်းဢၼ်ၶၢမ်ႇမၢင်ႇၵလႃႇပၢတ်ႇပၢႆၼင်သေဢမ်ႇဝႃႈ၊ဢမ်ႇလႆႈၶၢမ်ႇဢဝ်သေဢမ်ႇဝႃႈ၊ဢမ်ႇမီးဢၵျူဝ်း။ တၢင်းယုမ်ႇမၢတ်ႈဢၼ်ႁႂ်ႈပိူၼ်ႈႁၼ်လႄႈႁဵတ်းၵၢၼ်လူၺ်ႈတၢင်းႁၵ်ႉမႅတ်ႈတႃႇၼၼ်ႉၵူၺ်းမီးဢၵျူဝ်းဢေႃႈ။
သူဢွၼ်ၵၼ်ၶုၼ်ႇလႅၼ်ႈလီလီငၢမ်းငၢမ်းယူႇယဝ်ႉ။ ၽူႈလႂ်ႁႄႉၶႅၼ်သူဢမ်ႇႁႂ်ႈထွမ်ႇဢဝ်လွင်ႈတၢင်းဢၼ်ၸိုဝ်ႈဢၼ်ၸႂ်ႈၼၼ်ႉ။-
တၢင်းဢၼ်ၸူဝ်းဢဝ်ၸိူဝ်ႉၼင်ႇၼၼ်ၼၼ်ႉ၊ဢမ်ႇလႆႈပဵၼ်မႃးၵႃႈတီႈမၼ်းၸဝ်ႈဢၼ်ႁွင်ႉဢဝ်သူတင်းလၢႆ။-
“ၸိူဝ်ႉပႅင်ႈဢိတ်းဢွၼ်ႇၼိုင်ႈၵူၺ်း၊ၸၢင်ႈႁႂ်ႈၶဝ်ႈမုၼ်းလိပ်းတင်းၵွၼ်ႈပွင်းမႃးဢေႃႈ” ဝႃႈၼႆမီးထုင်းၵႂၢမ်းဝႆႉဢေႃႈ။-
ၼႂ်းဝႃႈၼၼ်သေၵေႃႈ၊ၵဝ်မၼ်ႈၸႂ်ၼႂ်းၸဝ်ႈၽြႃးလႄႈႁုဝႃႈသူတေဢမ်ႇယုမ်ႇဢၼ်ပႅၵ်ႇဢၼ်ပိူင်ႈဢေႃႈ။ ၵေႃႉဢၼ်မႃးယႃႉၵဝ်းသူၼၼ်ႉတေပဵၼ်ၽူႈလႂ်သေဢမ်ႇဝႃႈ၊မၼ်းတၵ်းလႆႈၶၢမ်ႇတၢင်းဢၼ်ၽြႃးပဵၼ်ၸဝ်ႈပၼ်တၢမ်ႇဢေႃႈ။
ပုၼ်ႈၵဝ်ၸမ်ႉ၊ပီႈၼွင်ႉၶဝ်႟။ ပေႃးၵဝ်ယင်းႁေႃးတြႃးတိုၵ်းယူင်းၸူဝ်းဢဝ်ႁႂ်ႈၶဝ်ပၢတ်ႇပၢႆၼင်ယူႇၸိုင်၊ၵွပ်ႈသင်လႄႈၵဝ်ယင်းလႆႈၶၢမ်ႇၼိၵ်ႈၸၢၵ်ႈငႅၼ်းသႄးယူႇထႅင်ႈၸိူဝ်ႉၼင်ႇႁိုဝ်။ ပေႃးပဵၼ်ၸိူဝ်ႉၼင်ႇၼၼ်ၸိုင်၊သဝ်မႆႉဝႃးမိုဝ်းၵေႃႈဢမ်ႇၸႂ်ႈပဵၼ်တီႈဢၼ်တိူဝ်ႉမႅၼ်ႈလႄႈလူမ်ႉယဝ်ႉဢေႃႈ။-
ၵဝ်ယင်းမီးၸႂ်ဝႃႈ၊ၶဝ်ၸိူဝ်းဢၼ်ႁဵတ်းႁႂ်ႈသူမီးတၢင်းယၢပ်ႇၽိုတ်ႇၼၼ်ႉ၊ႁႂ်ႈၶဝ်တွၼ်ပႅတ်ႈတူဝ်ၸဝ်ႈၵဝ်ႇတႃႉ။
ပုၼ်ႈသူၸမ်ႉ၊ပီႈၼွင်ႉၶဝ်႟။ သူလႆႈၶၢမ်ႇတၢင်းဢၼ်ႁွင်ႉဢဝ်ႁႂ်ႈလႆႈလွတ်ႈလႅဝ်းယဝ်ႉ။ ယႃႇပေဢဝ်တၢင်းဢၼ်လွတ်ႈလႅဝ်းသူၼၼ်ႉ၊ပဵၼ်ၶိူင်ႈၸႂ်ႉၶိူင်ႈတိုဝ်းပုၼ်ႈဢၵျူဝ်းတူဝ်ၼိူဝ်ႉလိူတ်ႈသူသေၵမ်း။ ပိူဝ်ႈၼႆလႄႈသူဢွၼ်ၵၼ်ပွင်ဢၵျူဝ်းတီႈၵၼ်လူၺ်ႈတင်းၸႂ်မႅတ်ႈတႃႇတႃႉ။-
လွင်ႈမၼ်းၸမ်ႉ၊ၵျၢမ်းပိင်းၺၢပ်ႈတြႃးတင်းသဵင်ႈတင်းမူတ်း၊ႁုပ်ႈၶျုၵ်ႈဝႆႉၼႂ်းတြႃးၶေႃႈလဵဝ်လႄႈဝႃႈၸမ်ႉ၊ “ၵေႃႉဢၼ်ၸၢပ်ႈသႅင်ႇၵၼ်တင်းမႂ်းၼၼ်ႉၸိုင်၊ႁႂ်ႈႁၵ်ႉမိူၼ်ၸိူဝ်ႉၼင်ႇတူဝ်ၸဝ်ႈၵဝ်ႇတႃႉ” ဝႃႈၼင်ႇၼႆဢေႃႈ။-
ပေႃးဢမ်ႇၼၼ်၊ပေႃးၵေႃႉၼိုင်ႈလႄႈၵေႃႉၼိုင်ႈၶူပ်းၵၼ်ၵၢပ်ႈၵၼ်မိူၼ်တူဝ်သတ်းလႂ်ၼၼ်ႉၸိုင်၊ဝႆႉသတိတႃႉ။ ၵူဝ်ဝႃႈ၊သူတၵ်းလႆႈလုလႅဝ်ၸွမ်းၵၼ်ၵႂႃႇတင်းသဵင်ႈတင်းမူတ်းဢေႃႈ။
ပိူဝ်ႈၼႆလႄႈၵႂၢမ်းဢၼ်ၵဝ်ဝႃႈၸမ်ႉ၊ၵမ်ၵျၢင်ႉၸွမ်းၼင်ႇဝိၺိၺ်ႇၸဝ်ႈတႃႉ။ ပေႃးၵမ်ၵျၢင်ႉၸိူဝ်ႉၼင်ႇၼၼ်ၸိုင်၊သူတၵ်းဢမ်ႇၸွမ်းဢလူဝ်ႇၼိူဝ်ႉလိူတ်ႈၵူၼ်းၼၼ်ႉယဝ်ႉ။-
လွင်ႈမၼ်းၸမ်ႉ၊ဢလူဝ်ႇၼိူဝ်ႉလိူတ်ႈၵူၼ်းၶတ်းၵၼ်တင်းဢလူဝ်ႇဝိၺိၺ်ႇၸဝ်ႈဢေႃႈ။ ပိူင်ႈလဵဝ်ၵၼ်ဢလူဝ်ႇဝိၺိၺ်ႇၸဝ်ႈၵေႃႈ၊ၶတ်းၵၼ်တင်းဢလူဝ်ႇၼိူဝ်ႉလိူတ်ႈၵူၼ်းဢေႃႈ။ ဢလူဝ်ႇၸႂ်သွင်သဵၼ်ႈၼႆႉပဵၼ်ရၢၼ်ႇသူႇၵၼ်လႄႈထၢၼ်ႈပေႃးႁႂ်ႈသူဢမ်ႇၸၢင်ႈၵမ်ၵျၢင်ႉလႆႈမဵဝ်းဢၼ်သူၶႂ်ႈၵမ်ၵျၢင်ႉၼၼ်ႉဢေႃႈ။-
ၼႂ်းဝႃႈၼၼ်သေၵေႃႈ၊ပေႃးဝိၺိၺ်ႇၸဝ်ႈဢွၼ်ႁူဝ်သူၸိုင်၊သူလႆႈလွတ်ႈသေတၢင်းဢၼ်ယူႇတႂ်ႈပိင်းၺၢပ်ႈတြႃးယဝ်ႉဢေႃႈ။
တၢင်းႁဵတ်းဢလူဝ်ႇၼိူဝ်ႉလိူတ်ႈၵူၼ်းၼၼ်ႉႁၼ်လႆႈထၢင်ႇသႃးဢေႃႈ။ ဢၼ်ၸိူဝ်းၼၼ်ႉၸမ်ႉ၊တၢင်းဢၼ်ႁဵတ်းၵႃႇမၵုင်ႇဢၼ်ဢမ်ႇတြႃး၊တၢင်းဢၼ်ၵူတ်ႉၽူဝ်ၵူတ်ႉမေးပိူၼ်ႈ၊တၢင်းဢၼ်ႁဵတ်းၵူဝ်ႈႁဵတ်းၵိူၵ်ႇ၊-
တၢင်းဢၼ်ဝႆႈသႃႁုၼ်ႇႁၢင်ႈသၢင်းထု၊ဢိၵ်ႇတင်းတၢင်းဢၼ်ႁဵတ်းဢတၢတ်ႈၽီမေႃႇ၊မီးၸႂ်ဢၼ်ငိၼ်းၸင်းပိူၼ်ႈ၊ၸႂ်ဢၼ်ၶွႆပိူၼ်ႈ၊ၸႂ်လမ်သႆႈၵမ်ႇတေႃႇပိူၼ်ႈ၊ၶေႉၵၼ်ၶႅင်ႇၵၼ်လႄႈတႅၵ်ႇၵၼ်ၽႄၵၼ်၊ၽႄၵိူင်းၶႂၢႆးၵိူင်းၵၼ်။-
မီးၸႂ်ဢၼ်သီႈၵေႉႁေႈတႃတီႈၵၼ်၊ဢဝ်ဢသၢၵ်ႈပိူၼ်ႈတၢႆလႄႈၵိၼ်လဝ်ႈမဝ်းၵမ်ယူႇ၊ႁဵတ်းပွႆးႁဵတ်းလၢမ်းယူႇဢေႃႈ။ ၸိူဝ်ႉၼင်ႇဢၼ်ၵဝ်သင်ႇလၢတ်ႈသူမိူဝ်ႈဢွၼ်ၼႆႉၼၼ်ႉ၊မိူဝ်ႈလဵဝ်ၵဝ်သမ်ႉဝႃႈထႅင်ႈၸမ်ႉ၊ၶဝ်ၸိူဝ်းဢၼ်ၵမ်ၵျၢင်ႉၸိူဝ်ႉၼင်ႇၼၼ်ၼၼ်ႉ၊တၵ်းဢမ်ႇလႆႈၶၢမ်ႇဢဝ်ဢမူၺ်ႇၵႃႈၼႂ်းမိူင်းၽြႃးပဵၼ်ၸဝ်ႈဢေႃႈ။
ၵူၺ်းၵႃႈ၊ဢၵျူဝ်းဝိၺိၺ်ႇၸဝ်ႈၸမ်ႉ၊မီးၸႂ်တၢင်းဢၼ်ၸၢင်ႈႁၵ်ႉပႅင်း၊ၸၢင်ႈမီးၸႂ်ဢၼ်သိူဝ်းပျေႃႇ၊မီးၸႂ်ၼိမ်လီ၊မီးၸႂ်ယႂ်ႇၸႂ်ယၢဝ်း၊ၸၢင်ႈႁဵတ်းၵျေးၸူးတီႈပိူၼ်ႈ၊ၸၢင်ႈႁဵတ်းမဵဝ်းဢၼ်မျၢတ်ႈလီ၊ၸၢင်ႈတႄႇမၼ်ႈၵႃႈၼႂ်းတၢင်းယုမ်ႇမၢတ်ႈ၊-
ၸၢင်ႈမီးၸႂ်ဢၼ်ၶျႃးတႅမ်ႇလႄႈၸၢင်ႈၶျုၵ်ႈထိင်းတူဝ်ၸဝ်ႈၵဝ်ႇဢေႃႈ။ ဢမ်ႇမီးပိင်းၺၢပ်ႈၸဝ်ႈၶေႃႈလႂ်ႁၢမ်ႈတၢင်းၵမ်တၢင်းၵျၢင်ႉၸိူဝ်ႉၼင်ႇၼႆဢေႃႈ။-
ၶဝ်ၸိူဝ်းဢၼ်ပဵၼ်ၵူၼ်း ၸဝ်ႈၶရိၸ်ႈ၊ ၼၼ်ႉ၊ဢဝ်ဢလူဝ်ႇၼိူဝ်ႉလိူတ်ႈၵူၼ်း၊ဢိၵ်ႇတင်းၸႂ်ၵိလေႇသႃႇၼၼ်ႉတွၵ်ႇၸပ်းဝႆႉၵႃႈတီႈသဝ်မႆႉဝႃးမိုဝ်းယဝ်ႉဢေႃႈ။-
ပေႃးႁဝ်းဢသၢၵ်ႈလိပ်းၵွပ်ႈလူၺ်ႈဝိၺိၺ်ႇၸဝ်ႈၵေႃႈ၊ႁႂ်ႈဢွၼ်ၵၼ်ၵမ်ၵျၢင်ႉၸွမ်းဝိၺိၺ်ႇၸဝ်ႈတႃႉႁဝ်း။-
ဢွၼ်ၵၼ်ပႄႇပႅတ်ႈၸႂ်ဢၼ်ၽႅၼ်သုင်၊ဢိၵ်ႇတင်းၸႂ်ဢၼ်ဝႆႉတၢင်းၽိတ်းယႃႉယုၵ်ႉၵၼ်၊ဢိၵ်ႇတင်းၸႂ်ဢၼ်သီႈၵေႉႁေႈတႃၵၼ်၊ၸႂ်ဢၼ်ၶွႆၵၼ်ၸိူဝ်းၼၼ်ႉတႃႉႁဝ်း။
ပီႈၼွင်ႉၶဝ်႟။ ပေႃးသေၵေႃႉသေၵူၼ်းလႆႈႁဵတ်းၽိတ်းႁဵတ်းပိူင်ႈၵႂႃႇၸိုင်၊သူၸိူဝ်းဢၼ်ယူႇၽၢႆႇဝိၺိၺ်ႇၸဝ်ႈၼႆႉ၊ဢွၼ်ၵၼ်ပႃးတင်းၸႂ်ဢၼ်ၼိမ်သိမ်ႇၶျႃးတႅမ်ႇသေလႄႈၸွႆႈထႅမ်ၵေႃႉၼၼ်ႉႁႂ်ႈမၼ်းၶိုၼ်းတင်ႈမၼ်ႈယူႇတႃႉ။ တီႈတူဝ်သူၵေႃႈၼင်ႇႁိုဝ်တၵ်းဢမ်ႇလႆႈၶၢမ်ႇတၢင်းဢၼ်ၸူဝ်းၵႂႃႇၵႃႈၼႂ်းဢပျတ်ႈၸိုင်၊ဝႆႉသတိတႃႉ။-
ၵေႃႉၼိုင်ႈလႄႈၵေႃႉၼိုင်ႈၸွႆႈႁၢပ်ႇတႃႇဝုၼ်ႇပုၼ်ႈၽွၼ်းပၼ်ၵၼ်တႃႉ။ ပေႃးႁဵတ်းၸိူဝ်ႉၼင်ႇၼႆၸိုင်၊ပဵၼ်တၢင်းဢၼ်သူလႆႈႁဵတ်းၸွမ်းပိင်းၺၢပ်ႈတြႃး ၸဝ်ႈၶရိၸ်ႈ၊ ယဝ်ႉဢေႃႈ။-
ပေႃးသေၵေႃႉသေၵူၼ်းပဵၼ်ၵူၼ်းဢၼ်ဢမ်ႇမီးဢၵျူဝ်းလႄႈယင်းမၢတ်ႈတူဝ်ၸဝ်ႈၵဝ်ႇဝႃႈ၊မၼ်းပဵၼ်ၵူၼ်းၶိုၵ်ႉၵူၼ်းၶမ်ႇၸိုင်၊မၼ်းၼၼ်ႉပဵၼ်ၵေႃႉဢၼ်ပႅတ်ႉလႅၼ်တူဝ်ၸဝ်ႈၵဝ်ႇဢေႃႈ။-
ႁႂ်ႈၵူၼ်းၵူႈၵေႃႉၸႅတ်ႈသေးတူၺ်းၵၢၼ်တၢင်းႁဵတ်းတူဝ်ၸဝ်ႈၵဝ်ႇတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊မၼ်းၸၢင်ႈလႆႈဢုပ်ႇဝၢဝ်းလူၺ်ႈတၢင်းၵမ်ၵျၢင်ႉတူဝ်ၸဝ်ႈၵဝ်ႇလႄႈဢမ်ႇၸႂ်ႈႁႂ်ႈတႅၵ်ႈတိူင်းၵၼ်တင်းတၢင်းၵမ်တၢင်းၵျၢင်ႉပိူၼ်ႈဢေႃႈ။-
လွင်ႈမၼ်းၸမ်ႉ၊ၵူၼ်းၵူႈၵေႃႉတၵ်းလႆႈႁၢပ်ႇၶူဝ်းၽႂ်ၶူဝ်းမၼ်းဢေႃႈ။
ႁႂ်ႈၵေႃႉဢၼ်လႆႈၶၢမ်ႇတၢင်းဢၼ်သွၼ်လွင်ႈၼုၵ်ႈၵပၢတ်ႈတြႃးၸဝ်ႈၼၼ်ႉ၊ဢဝ်လွင်ႈဢၼ်လီဢၼ်ငၢမ်းတင်းသဵင်ႈတင်းလူင်ၽႄမႅင်ႇပၼ်တီႈသြႃႇမၼ်းၼၼ်ႉတႃႉ။
ယႃႇပေပႅတ်ႉလႅၼ်တူဝ်ၸဝ်ႈၵဝ်ႇ။ ၽူႈလႂ်ၵေႃႈဢမ်ႇၸၢင်ႈပႅတ်ႉလႅၼ်ၽြႃးပဵၼ်ၸဝ်ႈလႆႈ။ ၵူၼ်းၸိုင်ၸွမ်းၵႃႈၼင်ႇဢၼ်မၼ်းဝၢၼ်ႇၸိူဝ်ႉဝၢၼ်ႇၽၼ်းၼၼ်ႉ၊တၵ်းလႆႈပၢတ်ႇဢဝ်ဢေႃႈ။-
ၵေႃႉဢၼ်ဝၢၼ်ႇၸိူဝ်ႉၽၼ်းဢၼ်ၸပ်းၸွႆးၼိူဝ်ႉလိူတ်ႈတူဝ်ၸဝ်ႈၵဝ်ႇၼၼ်ႉ၊မၼ်းတၵ်းလႆႈပၢတ်ႇဢဝ်ဢၼ်တူႇဢၼ်ၼဝ်ႈၵႃႈတီႈၼိူဝ်ႉလိူတ်ႈမၼ်းၼၼ်ႉဢေႃႈ။ ၵေႃႉဢၼ်ဝၢၼ်ႇၸိူဝ်ႉၽၼ်းဢၼ်ၸပ်းၸွႆးဝိၺိၺ်ႇၸဝ်ႈၼၼ်ႉၸမ်ႉ၊မၼ်းတၵ်းလႆႈပၢတ်ႇဢဝ်ဢသၢၵ်ႈထႃႇဝရႃႉ၊ၵႃႈတီႈဝိၺိၺ်ႇၸဝ်ႈၼၼ်ႉဢေႃႈ။-
ပိူဝ်ႈၼႆလႄႈႁဝ်းၸႂ်ယင်းဢမ်ႇလုႁႅင်းယင်းဢမ်ႇဢူၼ်ႈလႄႈၵႆႉၶတ်းၸႂ်ႁဵတ်းဢၼ်လီဢၼ်ငၢမ်းတႃႉႁဝ်း။ ပေႃးႁဝ်းၸႂ်ဢမ်ႇလုလႄႈၵႆႉႁဵတ်းယူႇၸိုင်၊မိူဝ်ႈဢၼ်ၶိင်ႇမၼ်းထိုင်မႃးၼၼ်ႉ၊ႁဝ်းတၵ်းလႆႈပၢတ်ႇဢဝ်ဢေႃႈ။-
ပိူဝ်ႈၼႆလႄႈ၊ၵႃႈၼင်ႇဢၼ်ႁဝ်းတၼ်းလႄႈမီးၽွင်းယၢမ်းၼၼ်ႉ၊ႁဝ်းဢွၼ်ၵၼ်ႁဵတ်းၵျေးၸူးတီႈၵူႈၵေႃႉၵူႈၵူၼ်းတႃႉႁဝ်း။ လိူဝ်တွၼ်းၼႃႇသေပိူၼ်ႈဢွၼ်ၵၼ်ႁဵတ်းလွင်ႈတၢင်းဢၼ်လီဢၼ်ငၢမ်းပၼ်တီႈၵူၼ်းႁိူၼ်းၵူၼ်းယေးၸိူဝ်းဢၼ်မီးတၢင်းယုမ်ႇမၢတ်ႈၼၼ်ႉတႃႉႁဝ်း။
ဢွၼ်ၵၼ်တူၺ်းတူဝ်လိၵ်ႈဢၼ်ၵဝ်ဢဝ်တင်းမိုဝ်းတူဝ်ၸဝ်ႈၵဝ်ႇသေလႄႈတႅမ်ႈထိုင်တီႈသူၼၼ်ႉ၊တူဝ်ယႂ်ႇၵႃႈႁိုဝ်ၼၼ်ႉတႃႉ။-
ၶဝ်ၸိူဝ်းဢၼ်ၶႂ်ႈလႆႈၼႃႈလႆႈတႃၵႃႈမီးၸိူဝ်းၼၼ်ႉ၊ၸၢင်ႈတဵၵ်းၶေႃးသူ၊ႁႂ်ႈသူၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ဢေႃႈ။ ၶဝ်ႁဵတ်းၸိူဝ်ႉၼင်ႇၼၼ်ၼင်ႇႁိုဝ်ၶဝ်တေလႆႈၵၢင်းလွတ်ႈသေတၢင်းဢၼ်ၼိၵ်ႈၸၢၵ်ႈငႅၼ်းသႄးဢၼ်လႆႈၶၢမ်ႇၵွပ်ႈပိူဝ်ႈသဝ်မႆႉဝႃးမိုဝ်း ၸဝ်ႈၶရိၸ်ႈ၊ ၼၼ်ႉၵူၺ်းဢေႃႈ။-
ၶဝ်ၸိူဝ်းဢၼ်ၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ၼၼ်ႉ၊ယင်းဢမ်ႇၵမ်ၵျၢင်ႉၸွမ်းပိင်းၺၢပ်ႈတြႃးၵူၺ်းဢမ်ႇၵႃး၊ၶဝ်ၶႂ်ႈႁႂ်ႈသူၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ပုၼ်ႈလွင်ႈၼင်ႇႁိုဝ်ၶဝ်တေလႆႈဢုပ်ႇဝၢဝ်းလူၺ်ႈတူဝ်ႁၢင်ႈၼိူဝ်ႉလိူတ်ႈသူဢေႃႈ။-
ပုၼ်ႈၵဝ်တႄႉ၊လိူဝ်သေသဝ်မႆႉဝႃးမိုဝ်းၸဝ်ႈႁဝ်း ၸဝ်ႈယေႇသုၶရိၸ်ႈ၊ ၼၼ်ႉ၊ၵဝ်ဢမ်ႇဢုပ်ႇဝၢဝ်းၼႂ်းမုၼ်သရေႇသေၸိူဝ်ႉသေပိူင်ဢေႃႈ။ ၵႃႈတီႈသဝ်မႆႉဝႃးမိုဝ်းၼၼ်ႉ၊လေႃးၵႃႉၼႆႉလႆႈၶၢမ်ႇတွၵ်ႇတၢႆဝႆႉပုၼ်ႈၵဝ်ယဝ်ႉ။ ၵဝ်ၵေႃႈလႆႈၶၢမ်ႇတွၵ်ႇတၢႆဝႆႉပုၼ်ႈလေႃးၵႃႉၼႆႉယဝ်ႉဢေႃႈ။-
လွင်ႈမၼ်းၸမ်ႉ၊ၵႃႈၼႂ်း ၸဝ်ႈယေႇသုၶရိၸ်ႈ၊ ၼၼ်ႉ၊တၢင်းဢၼ်ၶၢမ်ႇဢဝ်မၢင်ႇၵလႃႇပၢတ်ႇပၢႆၼင်၊တၢင်းဢၼ်ဢမ်ႇၶၢမ်ႇဢဝ်မၢင်ႇၵလႃႇပၢတ်ႈပၢႆၼင်ၼၼ်ႉဢမ်ႇၸႂ်ႈလွင်ႈဢယေးယႂ်ႇ၊တၢင်းဢၼ်လႆႈၶၢမ်ႇႁဵတ်းပဵၼ်သတ်ႉတဝႃႇဢၼ်မႂ်ႇၼၼ်ႉၵူၺ်းပဵၼ်လွင်ႈဢယေးယႂ်ႇဢေႃႈ။-
ၼင်ႇၼၼ်လႄႈတီႈၶဝ်ၸိူဝ်းဢၼ်ၵမ်ၵျၢင်ႉႁဵတ်းၸွမ်းၼႄးဢုပတေႇၼႆႉ၊ႁႂ်ႈတၢင်းၼိမ်ၸဝ်ႈ၊ဢိၵ်ႇတင်းတၢင်းဢၼ်မၼ်းၸဝ်ႈဢဵတ်းလူၼၼ်ႉ၊ႁွတ်ႈထိုင်ၵႃႈၼိူဝ်ၶဝ်တင်းသဵင်ႈတင်းလူင်၊ဢိၵ်ႇတင်းၵႃႈၼိူဝ်ၵူၼ်းမဵဝ်း ဢိသရေး၊ ဢၼ်ပဵၼ်ၵူၼ်းၽြႃးပဵၼ်ၸဝ်ႈၼၼ်ႉသေၵမ်းလူၺ်ႈ။
ဢဝ်ၼႆႉၵႂႃႇၼႃႈ၊ယႃႇပေႁႂ်ႈၽူႈလႂ်ပၼ်တၢင်းယႃႉယုၵ်ႉတီႈၵဝ်သေၵမ်း။ လွင်ႈမၼ်းၸမ်ႉ၊ႁွႆးတၢမ်ႇဢၼ်မီးၵႃႈၼိူဝ်တူဝ်ၵဝ်ၼၼ်ႉၼႄပျႃးလွင်ႈဢၼ်ၵဝ်ပဵၼ်ၶႃႈ ၸဝ်ႈယေႇသု၊ ယဝ်ႉဢေႃႈ။
ပီႈၼွင်ႉၶဝ်႟။ ႁႂ်ႈသုၵျေးၸူးၸဝ်ႈႁဝ်း ၸဝ်ႈယေႇသုၶရိၸ်ႈ၊ မီးယူႇလူၺ်ႈၵၼ်တင်းသူတင်းသဵင်ႈတင်းလူင်သေၵမ်းလူၺ်ႈ။ ဢႃမိၼ်ႈ။ လိၵ်ႈတြႃးၵလႃႇတိယဝ်ႉယဝ်ႉဢေႃႈ။
ၵဝ် ပေႃးလု၊ ဢၼ်ၸွမ်းၼင်ႇဢလူဝ်ႇၽြႃးပဵၼ်ၸဝ်ႈလႄႈလႆႈပဵၼ်တမၢၼ်ႇ ၸဝ်ႈယေႇသုၶရိၸ်ႈ၊ ၼႆႉ၊တႅမ်ႈလိၵ်ႈသူင်ႇပၼ်ၵႂႃႇၵႃႈတီႈၵူၼ်းမူတ်းၸၢင်ႇတင်းလၢႆ၊ဢၼ်ယူႇၵႃႈၼႂ်းဝဵင်း ဢေးၽႅတ်ႈ၊ ဢၼ်ပဵၼ်ၶဝ်ၸိူဝ်းဢၼ်ယုမ်ႇမၢတ်ႈ ၸဝ်ႈယေႇသုၶရိၸ်ႈ၊ ၼၼ်ႉဢေႃႈ။
ႁႂ်ႈပေႃႈႁဝ်းၶႃႈၽြႃးပဵၼ်ၸဝ်ႈ၊ဢိၵ်ႇတင်းၸဝ်ႈၽြႃး ၸဝ်ႈယေႇသုၶရိၸ်ႈ၊ ပၼ်သုၵျေးၸူးလႄႈတၢင်းၼိမ်ၶျၢမ်းသႃႇတီႈသူသေၵမ်းလူၺ်ႈ။
ႁႂ်ႈမၢင်ႇၵလႃႇမီးတီႈၽြႃးပဵၼ်ၸဝ်ႈပေႃႈၸဝ်ႈႁဝ်း ၸဝ်ႈယေႇသုၶရိၸ်ႈ၊ သေၵမ်းလူၺ်ႈ။ မၼ်းၸဝ်ႈဢဝ်တၢင်းလီမၢင်ႇၵလႃႇၽၢႆႇၸႂ်ဝိၺိၺ်ႇၵူႈၸိူဝ်ႉၵူႈပိူင်ဢၼ်မီးၵႃႈၼႂ်းတမ်ႇတိူင်းမိူင်းၵၢင်ႁၢဝ်လႄႈဢဵတ်းလူပၼ်မၢင်ႇၵလႃႇတီႈႁဝ်းၵႃႈၼႂ်း ၸဝ်ႈၶရိၸ်ႈ၊ ဢေႃႈ။-
မၼ်းၸဝ်ႈလိူၵ်ႈဢဝ်ႁဝ်းၵႃႈၼႂ်း ၸဝ်ႈၶရိၸ်ႈ၊ ဝႆႉၸဵမ်မိူဝ်ႈဢၼ်ၵမ်ႇၽႃႇၼႆႉဢမ်ႇပႆႇတႄႇပႆႇမီးႁႂ်ႈႁဝ်းလႆႈပဵၼ်ၵူၼ်းမူတ်းၸၢင်ႇလႄႈ ၵၢင်းလွတ်ႈတင်းဢပျတ်ႈၵႃႈတီႈၽၢႆႇၼႃႈမၼ်းၸဝ်ႈဢေႃႈ။
ၵွပ်ႈပိူဝ်ႈမႅတ်ႈတႃႇမၼ်းၸဝ်ႈၼၼ်ႉ၊ၽြႃးပဵၼ်ၸဝ်ႈလိူၵ်ႈဢဝ်ႁဝ်းဝႆႉ၊ၸဵမ်မိူဝ်ႈဢွၼ်တၢင်းႁႂ်ႈႁဝ်းလႆႈပဵၼ်လုၵ်ႈမၼ်းၸဝ်ႈ၊ၵႃႈၼႂ်း ၸဝ်ႈၶရိၸ်ႈ၊ ၸွမ်းၵႃႈၼင်ႇဢၼ်ၸဝ်ႈမီးဢလူဝ်ႇလႄႈဢဵၼ်ဢၢၼ်းဝႆႉၼၼ်ႉဢေႃႈ။-
ဢွၼ်ၵၼ်ယွင်ႈယေႃးမုၼ်သရေႇၽြႃးပဵၼ်ၸဝ်ႈ၊ဢိၵ်ႇတင်းၵျေးၸူးဢၼ်ဢဝ်လုၵ်ႈႁၵ်ႉမၼ်းၸဝ်ႈပၼ်တီႈႁဝ်းၼၼ်ႉတႃႉႁဝ်း။-
ၵႃႈတီႈလုၵ်ႈၸဝ်ႈၼၼ်ႉ၊ႁဝ်းလႆႈၶၢမ်ႇဢဝ်ၵျေးၸူးတၢင်းဢၼ်ထုတ်ႇဢဝ်လူၺ်ႈလိူတ်ႈမျၢတ်ႈမၼ်းၸဝ်ႈ၊လႆႈၶၢမ်ႇတၢင်းဢၼ်ပွႆႇလွတ်ႈဢပျတ်ႈၸွမ်းလူၺ်ႈၵျေးၸူးၸဝ်ႈဢၼ်ယႂ်ႇၼမ်ၼႃႇၼၼ်ႉလႄႈ၊-
ပၼ်ႁႂ်ႈႁဝ်းလိူင်ႇၼမ်ၼႂ်းပိင်ႇၺႃႇ၊ဢိၵ်ႇတင်းတၢင်းႁုတၢင်းႁၼ်ၵူႈၸိူဝ်ႉၵူႈပိူင်ဢေႃႈ။
မၼ်းၸဝ်ႈၼႄပျႃးတီႈႁဝ်းႁႂ်ႈႁုလွင်ႈတၢင်းဢၼ်လိုၵ်ႉဢၼ်လမ်ႇ၊ဢလူဝ်ႇမၼ်းၸဝ်ႈဢၼ်ၸွမ်းလူၺ်ႈၸႂ်ၸေႇတၼႃႇမီးလႄႈၶိုင်ပွင်ဝႆႉၵႃႈၼႂ်းႁူဝ်ၸႂ်ၸဝ်ႈၼၼ်ႉ၊ႁႂ်ႈဢလူဝ်ႇမၼ်းၸဝ်ႈလႆႈပျေႉၸုမ်ႇၼႂ်း ၸဝ်ႈၶရိၸ်ႈ၊ ဢေႃႈ။-
လွင်ႈတၢင်းဢၼ်လိုၵ်ႉဢၼ်လမ်ႇၼၼ်ႉၸမ်ႉ၊ၼႂ်းမိူဝ်ႈဢၼ်ၶိင်ႇၵႃႇလႃႉမၼ်းၸေးယဝ်ႉၼၼ်ႉ၊မၼ်းၸဝ်ႈတၵ်းဢဝ်ၶိူင်ႈပိူင်တင်းသဵင်ႈတင်းလူင်ၸႃႉၸဵမ်ၵႃႈဢၼ်မီးၵႃႈၼိူဝ်ၽႃႉလႄႈလိၼ်မိူင်းႁုပ်ႈၸုတွမ်ၵၼ်ဝႆႉႁႂ်ႈ ၸဝ်ႈၶရိၸ်ႈ၊ ပဵၼ်ႁူဝ်ဢေႃႈ။
ၶိူင်ႈပိူင်ၵႃႈမီးတင်းသဵင်ႈတင်းလူင်ၼၼ်ႉလႆႈၶၢမ်ႇတၢင်းဢၼ်မၼ်းၸဝ်ႈႁဵတ်းပဵၼ်မႃးၸွမ်းၼင်ႇမၼ်းၸဝ်ႈၵျၢမ်ႇပွင်ဝႆႉလႄႈတႅပ်းတတ်းၸႂ်ဝႆႉၼၼ်ႉဢေႃႈ။ မၼ်းၸဝ်ႈလိူၵ်ႈဢဝ်ႁဝ်းဝႆႉႁႂ်ႈပဵၼ်ၵူၼ်းမၼ်းၸဝ်ႈၸွမ်းၼင်ႇဢၼ်မၼ်းၸဝ်ႈမီးတၢင်းၵျၢမ်ႇတၢင်းပွင်ဝႆႉၸဵမ်မိူဝ်ႈၵေႃႇၸႃႉႁူဝ်ပိုင်းၼၼ်ႉယဝ်ႉဢေႃႈ။-
ႁဝ်းၸိူဝ်းဢၼ်လႆႈမုင်ႈထႃႈမွင်းထႃႈ ၸဝ်ႈၶရိၸ်ႈ၊ မႃးၵွၼ်ႇယဝ်ႉၼႆႉ၊လႆႈၶၢမ်ႇတၢင်းဢၼ်လိူၵ်ႈဝႆႉ၊ႁႂ်ႈပဵၼ်ၵေႃႉဢၼ်ယွင်ႈယေႃးမုၼ်ၵုင်ႇသရေႇမၼ်းၸဝ်ႈဢေႃႈ။
ၵႃႈတီႈမၼ်းၸဝ်ႈၼၼ်ႉ၊ဝၢႆးသေသူလႆႈငိၼ်းတြႃးဢၼ်ၸိုဝ်ႈဢၼ်ၸႂ်ႈဢၼ်ဝႃႈ၊ၶၢဝ်ႇတြႃးသိူဝ်းပျေႃႇဢၼ်ပဵၼ်တြႃးတၢင်းဢၼ်ၵႄႇၶျွတ်ႈဢဝ်ၼၼ်ႉလႄႈသူၵေႃႈလႆႈယုမ်ႇမၢတ်ႈ ၸဝ်ႈၶရိၸ်ႈ၊ သေယဝ်ႉ၊ဝၢႆးသေသူယုမ်ႇမၢတ်ႈၼၼ်ႉ၊ၽြႃးပဵၼ်ၸဝ်ႈတွၵ်ႇၸုမ်ႈဝိၺိၺ်ႇမူတ်းၸၢင်ႇၸဝ်ႈတီႈသူၸွမ်းလူၺ်ႈၵတိၸဝ်ႈမီးၼၼ်ႉဢေႃႈ။-
ဝိၺိၺ်ႇၸဝ်ႈၼၼ်ႉ၊ဢႃႇမႃႉၶၢမ်ႇပၼ်ဢမူၺ်ႇဢၼ်ႁဝ်းတၵ်းလႆႈႁပ်ႉဢဝ်ဢၼ်မၼ်းၸဝ်ႈမီးၵတိဝႆႉပုၼ်ႈတၵ်းပၼ်တီႈၵူၼ်းမၼ်းၸဝ်ႈၼၼ်ႉလႄႈႁႂ်ႈႁဝ်းလႆႈဢွၼ်ၵၼ်ယွင်ႈယေႃးမုၼ်သရေႇမၼ်းၸဝ်ႈဢေႃႈ။
ပိူဝ်ႈၼႆလႄႈၸဵမ်မိူဝ်ႈၵဝ်လႆႈငိၼ်းလွင်ႈသူယုမ်ႇမၢတ်ႈ ၸဝ်ႈယေႇသုၶရိၸ်ႈ၊ ဢိၵ်ႇတင်းလွင်ႈဢၼ်သူႁၵ်ႉၵူၼ်းမူတ်းၸၢင်ႇတင်းသဵင်ႈတင်းလူင်ၼၼ်ႉၸိုင်၊-
ၵဝ်ယွင်ႈယေႃးတၢင်ႇၵျေးၸူးၽြႃးပဵၼ်ၸဝ်ႈပုၼ်ႈသူယူႇတႃႇသေႇ၊ၶုၵ်းၸႂ်လႆႈသူၼႂ်းတၢင်းဢၼ်ၵဝ်သူးတွင်းတႃႇသေႇၼၼ်ႉဢေႃႈ။-
ၵဝ်သူးတွင်းလႄႈဝႃႈၸမ်ႉ၊ႁႂ်ႈပေႃႈၸဝ်ႈဢၼ်မုၼ်ယႂ်ႇလႄႈပဵၼ်ၽြႃးၸဝ်ႈႁဝ်း ယေႇသုၶရိၸ်ႈ၊ ၼၼ်ႉ၊ပၼ်ပိင်ႇၺႃႇၺၢၼ်ႇဢၼ်ပွင်ႇလႅင်းလီပုၼ်ႈဢၼ်သူတၵ်းႁုၸၵ်းမၼ်းၸဝ်ႈလီလီငၢမ်းငၢမ်းလႄႈ၊-
ႁႂ်ႈမၢၵ်ႇတႃႁူဝ်ၸႂ်သူလႅင်းသႂ်မႃးလႄႈၸၢင်ႈႁုတၢင်းဢၼ်မၼ်းၸဝ်ႈႁွင်ႉဢဝ်သူ၊မီးတီႈမုင်ႈထႃႈမွင်းထႃႈၸိူဝ်ႉၼင်ႇႁိုဝ်ၼၼ်ႉ၊လွင်ႈဢၼ်မုၼ်ၸေးၸိမ်ႇဢမူၺ်ႇၸဝ်ႈဢၼ်ၵူၼ်းမူတ်းၸၢင်ႇတင်းလၢႆလႆႈၶၢမ်ႇဢဝ်ၼၼ်ႉယႂ်ႇၼႃႇၵႃႈႁိုဝ်ၼၼ်ႉ၊-
ဢိၵ်ႇတင်းၸၢင်ႈႁုလွင်ႈဢၼ်တၼ်းၶူဝ်းၸဝ်ႈဢၼ်ယႂ်ႇၼႃႇၼၼ်ႉ၊ပွင်ႁဵတ်းထၢၼ်ႇႁိုဝ်ၵႃႈၼႂ်းႁဝ်းၸိူဝ်းဢၼ်ယုမ်ႇမၢတ်ႈၼၼ်ႉၵဝ်သူးတွင်းပုၼ်ႈသူဢေႃႈ။-
တၼ်းၶူဝ်းၸဝ်ႈဢၼ်ပွင်ႁဵတ်းၼႂ်းႁဝ်းၼၼ်ႉၸမ်ႉ၊ပဵၼ်မႁႃႇႁႅင်းတၼ်းၶူဝ်းဢႃႇၼုၽေႃႇဢၼ်ပွင်ႁဵတ်းၼႂ်း ၸဝ်ႈၶရိၸ်ႈ၊ မိူဝ်ႈဢၼ်မၼ်းၸဝ်ႈႁႂ်ႈ ၸဝ်ႈၶရိၸ်ႈ၊ လုၵ်ႉၵႃႈတၢင်းတၢႆၶိုၼ်းလိပ်းမႃးသေယဝ်ႉ၊ပၼ်တီႈၼင်ႈၽၢႆႇၶႂႃမိုဝ်းမၼ်းၸဝ်ႈ၊ၵႃႈၼႂ်းမိူင်းၵၢင်ႁၢဝ်ဢေႃႈ။-
သုင်သေဢၼ်ထွတ်ႈဢၼ်မျၢတ်ႈ၊သုင်သေၽုင်းတၼ်းၶူဝ်းဢႃႇၼႃႇၸၢၵ်ႈ၊တၢင်းဢၼ်ဢုပ်ႉပိူင်ႇ၊ဢိၵ်ႇတင်းၵႃႈၼိူဝ်ၸိုဝ်ႈသဵင်ဢၼ်ၸၢင်ႈႁွင်ႉႁဵၵ်ႈၵၢပ်ႈပၢၼ်မိူဝ်ႈလဵဝ်ၼႆႉၵူၺ်းဢမ်ႇၵႃး၊တေႃႇထိုင်ၵၢပ်ႈပၢၼ်ၼႂ်းဝၼ်းမိူဝ်းၼႃႈဢၼ်တေမႃးထိုင်ၼၼ်ႉဢေႃႈ။-
ၽြႃးပဵၼ်ၸဝ်ႈဢဝ်လွင်ႈတၢင်းၵႃႈမီးတင်းသဵင်ႈတင်းလူင်၊ဝၢင်းဝႆႉၵႃႈတီႈတႂ်ႈတိၼ် ၸဝ်ႈၶရိၸ်ႈ၊ ႁႂ်ႈမၼ်းၸဝ်ႈပဵၼ်ႁူဝ်ၵႃႈၼိူဝ်လွင်ႈတၢင်းတင်းသဵင်ႈတင်းလူင်ပုၼ်ႈၸိူဝ်းၸဝ်ႈဢေႃႈ။-
ၸိူဝ်းၸဝ်ႈၼၼ်ႉၸမ်ႉ၊ပဵၼ်တူဝ် ၸဝ်ႈၶရိၸ်ႈ၊ ဢၼ်ပျေႉၸုမ်ႇလူၺ်ႈမၼ်းၸဝ်ႈ၊ၸဝ်ႈဢၼ်ႁႂ်ႈပျေႉၸုမ်ႇၵူႈၸိူဝ်ႉၵူႈမဵဝ်းလႄႈၵူႈတီႈၵူႈလႅၼ်ဢေႃႈ။
ပိၵ်ႉသမ်ႉသူလႆႈႁဵတ်းတုၸရိူၵ်ႈလႄႈတၢႆယူႇၼႂ်းဢပျတ်ႈသေၵေႃႈ၊ၽြႃးပဵၼ်ၸဝ်ႈႁဵတ်းႁႂ်ႈသူတင်းလၢႆမီးဢသၢၵ်ႈလိပ်းယူႇဢေႃႈ။-
ၸဵမ်မိူဝ်ႈၵွၼ်ႇသူယၢမ်ႈႁဵတ်းလႄႈၵမ်ၵျၢင်ႉၸွမ်းသဵၼ်ႈတၢင်းလေႃးၵီႇ၊ႁဵတ်းၸွမ်းၶုၼ်ၸဵမ်မိူဝ်ႈဢွၼ်တၢင်းဢၼ်ဝႃႈ၊တၢင်းဢၼ်ၸပ်းၸွမ်းသဵၼ်ႈတၢင်းလေႃးၵီႇ၊တၢင်းဢၼ်ၸပ်းၸွမ်းဢလူဝ်ႇၶုၼ်ဢၼ်ဢုပ်ႉပိူင်ႇဢႃႇၵႃႇသႃႉၵၢင်ႁၢဝ်ဢၼ်ပဵၼ်ဝိၺိၺ်ႇဢၼ်ဢုပ်ႉပိူင်ႇၵႃႈၼိူဝ်ၵူၼ်းၸိူဝ်းဢၼ်ဢမ်ႇထွမ်ႇၵႂၢမ်းၽြႃးပဵၼ်ၸဝ်ႈၸိူဝ်းၼၼ်ႉဢေႃႈ။-
ဝႃႈတႄႉမၼ်းၸိုင်၊ႁဝ်းတင်းသဵင်ႈတင်းလူင်ၸိူဝ်းၼႆႉမိူဝ်ႈဢွၼ်တၢင်းၼၼ်ႉ၊ယၢမ်ႈႁဵတ်းၸွမ်းဢလူဝ်ႇၼိူဝ်ႉလိူတ်ႈမိူၼ်ၶဝ်ၸိူဝ်းၼၼ်ႉ၊ဢိၵ်ႇတင်းဢလူဝ်ႇၵၢင်ၸႂ်ၶဝ်မႃးၼၼ်ႉလႄႈႁဝ်းၸိူဝ်းၼႆႉၵေႃႈ၊ထိူၵ်ႈၶၢမ်ႇတၢမ်ႇဢပျတ်ႈတၢင်းဢၼ်ၽြႃးပဵၼ်ၸဝ်ႈၸီႇယၢင်ႇၼၼ်ႉမိူၼ်မိူၼ်ၵၼ်တင်းတၢင်ႇၵေႃႉတၢင်ႇၵူၼ်းၸိူဝ်းၼၼ်ႉဢေႃႈ။
ၼႂ်းဝႃႈၼၼ်သေၵေႃႈ၊ၵရုၼႃႇၽြႃးပဵၼ်ၸဝ်ႈၼၼ်ႉၼမ်ၵိုၼ်းဝႆႉပုၼ်ႈႁဝ်း၊တၢင်းႁၵ်ႉမႅတ်ႈတႃႇမၼ်းၸဝ်ႈၵေႃႈယႂ်ႇၼႃႇလူင်လၢင်ပုၼ်ႈႁဝ်းလႄႈ၊-
ပိၵ်ႉသမ်ႉႁဝ်းၸိူဝ်းၼႆႉ၊တၢႆယူႇၼႂ်းဢပျတ်ႈတၢင်းဢၼ်ၽိတ်းပိူင်ႈသေၵေႃႈ၊မၼ်းၸဝ်ႈႁႂ်ႈဢသၢၵ်ႈႁဝ်းလႆႈလိပ်းလူၺ်ႈၵၼ်တင်း ၸဝ်ႈၶရိၸ်ႈ၊ ၵွပ်ႈပိူဝ်ႈသုၵျေးၸူးၸဝ်ႈၼၼ်ႉလႄႈသူတင်းလၢႆလႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ဢေႃႈ။-
ၽြႃးပဵၼ်ၸဝ်ႈႁႂ်ႈႁဝ်းလုၵ်ႉၶိုၼ်းလိပ်းမႃးလူၺ်ႈၵၼ်တင်း ၸဝ်ႈၶရိၸ်ႈ၊ လႄႈပၼ်တီႈဢၼ်ႁဝ်းလႆႈၼင်ႈလူၺ်ႈၵၼ်တင်းမၼ်းၸဝ်ႈ၊ၵႃႈၼႂ်းမိူင်းၵၢင်ႁၢဝ်ၼၼ်ႉပဵၼ်ၵွပ်ႈလူၺ်ႈ ၸဝ်ႈယေႇသုၶရိၸ်ႈ၊ ဢေႃႈ။-
မၼ်းၸဝ်ႈႁဵတ်းၸိူဝ်ႉၼင်ႇၼႆႁႂ်ႈလႆႈၼႄပျႃးၵျေးၸူးမၼ်းၸဝ်ႈဢၼ်ၼမ်ၵိုၼ်းၼႃႇထၢၼ်ႈပေႃးဢမ်ႇဝႃႈဢမ်ႇတႅၵ်ႈလႆႈၼၼ်ႉ၊ထၢင်ႇသႃးၼႂ်းၶိင်ႇၵႃႇလႃႉၵမ်းလိုၼ်းၼႂ်းတၢင်းဢၼ်မၼ်းၸဝ်ႈႁၵ်ႉဢဵတ်းလူႁဝ်း၊ၵွပ်ႈလူၺ်ႈ ၸဝ်ႈယေႇသုၶရိၸ်ႈ၊ ၼၼ်ႉဢေႃႈ။-
လွင်ႈမၼ်းၸမ်ႉ၊ၵွပ်ႈလူၺ်ႈၵျေးၸူးၽြႃးပဵၼ်ၸဝ်ႈလႄႈႁဝ်းလႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၵွပ်ႈလူၺ်ႈတၢင်းယုမ်ႇမၢတ်ႈဢေႃႈ။ မၼ်းပဵၼ်ၵွပ်ႈလူၺ်ႈတၢင်းၵမ်တၢင်းၵျၢင်ႉတူဝ်ၸဝ်ႈၵဝ်ႇဢမ်ႇၸႂ်ႈ။ မၼ်းပဵၼ်ၵွပ်ႈလူၺ်ႈၽြႃးပဵၼ်ၸဝ်ႈဢဵတ်းလူပၼ်ဢေႃႈ။-
မၼ်းပဵၼ်ၵွပ်ႈလူၺ်ႈတၢင်းၵမ်တၢင်းၵျၢင်ႉတူဝ်ၸဝ်ႈၵဝ်ႇဢမ်ႇၸႂ်ႈလႄႈၽူႈလႂ်ဢမ်ႇမီးဢၶႂၢင်ႉဢၼ်လႆႈဢုပ်ႇဝၢဝ်းဢေႃႈ။-
ပိူဝ်ႈဢၼ်ႁဝ်းပဵၼ်ၵေႃႉဢၼ်မၼ်းၸဝ်ႈၽၢၼ်ႇသၢင်းလႄႈႁဵတ်းပဵၼ်ၼႂ်း ၸဝ်ႈယေႇသုၶရိၸ်ႈ၊ ပုၼ်ႈလွင်ႈၼင်ႇႁိုဝ်ႁဝ်းတၵ်းလႆႈၵမ်ၵျၢင်ႉဢၼ်လီဢေႃႈ။ ၽြႃးပဵၼ်ၸဝ်ႈမႄးႁႅၼ်းႁဝ်းဝႆႉ၊ၸဵမ်မိူဝ်ႈဢွၼ်တၢင်းႁႂ်ႈႁဝ်းလႆႈၵမ်ၵျၢင်ႉလီလီငၢမ်းငၢမ်းၸိူဝ်ႉၼင်ႇၼၼ်ဢေႃႈ။
ပိူဝ်ႈၼႆလႄႈ၊မိူဝ်ႈဢွၼ်တၢင်းၼၼ်ႉပေႃးဝႃႈၸွမ်းၸႃႇတိၼိူဝ်ႉၼင်ၸိုင်၊သူယၢမ်ႈလႆႈပဵၼ်ၵူၼ်းတၢင်ႇၸိူဝ်ႉတၢင်ႇၶိူဝ်းလႄႈၵူၼ်းၸိူဝ်းဢၼ်ႁပ်ႉဢဝ်မၢင်ႇၵလႃႇတၢင်းဢၼ်ပၢတ်ႇပၢႆၼင်ဢၼ်ႁဵတ်းတီႈၼိူဝ်ႉၼင်လူၺ်ႈမိုဝ်းၼၼ်ႉယၢမ်ႈႁွင်ႉသူဝႃႈ၊ “ၵူၼ်းၸိူဝ်းဢၼ်ဢမ်ႇမီးမၢင်ႇၵလႃႇတၢင်းဢၼ်ပၢတ်ႇပၢႆၼင်” ဝႃႈၼင်ႇၼႆၼၼ်ႉၶုၵ်းၸႂ်လႆႈတႃႉ။
မိူဝ်ႈယၢမ်းၼၼ်ႉ၊သူယူႇၽၢတ်ႇယၢၼ်ၵၼ်တင်း ၸဝ်ႈၶရိၸ်ႈ၊ ဢမ်ႇလႆႈၶဝ်ႈပႃးၵႃႈၼႂ်းတၢင်းဢၼ်ပဵၼ်ၵူၼ်းမဵဝ်း ဢိသရေး၊ ၶဝ်လႄႈဢမ်ႇလႆႈၶဝ်ႈပႃးၵႃႈၼႂ်းပတိၺိၺ်ႇတြႃးဢၼ်မၼ်းၸဝ်ႈဝႆႉၵတိၼၼ်ႉလႄႈယူႇၼႂ်းယူႇၼႂ်းလေႃးၵႃႉၼႆႉဢမ်ႇမီးတၢင်းမုင်ႈထႃႈမွင်းထႃႈ၊ဢိၵ်ႇတင်းဢမ်ႇမီးၽြႃးပဵၼ်ၸဝ်ႈၼၼ်ႉၵေႃႈ၊ၶုၵ်းၸႂ်လႆႈတႃႉ။-
ၵူၺ်းၵႃႈ၊တေႃႈလဵဝ်ၼႆႉ၊ၵွပ်ႈပိူဝ်ႈတၢင်းဢၼ်မီးယူႇၼႂ်း ၸဝ်ႈၶရိၸ်ႈ၊ ၼၼ်ႉ၊သူၸိူဝ်းဢၼ်ယၢမ်ႈယၢၼ်ၵႆၼၼ်ႉ၊လႆႈၶၢမ်ႇတၢင်းဢၼ်ဢဝ်ၶဝ်ႈၸူးၵၼ်ပဵၼ်ၵွပ်ႈလူၺ်ႈတၢင်းဢၼ် ၸဝ်ႈၶရိၸ်ႈ၊ ၶၢမ်ႇတၢႆၼၼ်ႉယဝ်ႉဢေႃႈ။-
ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ၊မၼ်းၸဝ်ႈပဵၼ်ၸဝ်ႈတၢင်းၼိမ်ႁဝ်းလႄႈႁဵတ်းႁႂ်ႈႁဝ်းဢၼ်ပဵၼ်ၵူၼ်းသွင်မဵဝ်းၼႆႉပဵၼ်ၵူၼ်းမဵဝ်းလဵဝ်ၵၼ်မႃးသေလႄႈမၼ်းၸဝ်ႈယႃႉၽႃဢၼ်ႁႄႉၶၼ်ႈဝႆႉတီႈၶိုင်ႈၵၢင်ႁဝ်းၼၼ်ႉပႅတ်ႈဢေႃႈ။-
မၼ်းၸဝ်ႈဢဝ်တူဝ်ၼိူဝ်ႉလိူတ်ႈမၼ်းၸဝ်ႈပႄႇၽဵဝ်ႈပႅတ်ႈတၢင်းဢၼ်ၶတ်းၵၼ်ဢၼ်ဝႃႈ၊ပိင်းၺၢပ်ႈတြႃးဢိၵ်ႇတင်းၼႄးဢုပတေႇတြႃးၶဝ်ၼၼ်ႉသေလႄႈပွင်ႁဵတ်းႁႂ်ႈၵူၼ်းသွင်မဵဝ်းပဵၼ်ၵူၼ်းမဵဝ်းလဵဝ်ၵၼ်မႃးမႂ်ႇမႂ်ႇ၊ၵႃႈၼႂ်းတၢင်းဢၼ်မီးယူႇလူၺ်ႈၵၼ်တင်းမၼ်းၸဝ်ႈၼၼ်ႉ၊ၸိူဝ်ႉၼင်ႇၼၼ်မၼ်းၸဝ်ႈႁႂ်ႈမီးတၢင်းၼိမ်ၶျၢမ်းသႃႇဢေႃႈ။-
ၵွပ်ႈပိူဝ်ႈလၢႆးဢၼ်မၼ်းၸဝ်ႈၶၢမ်ႇတၢႆၵႃႈၼိူဝ်သဝ်မႆႉဝႃးမိုဝ်းၼၼ်ႉလႄႈ ၸဝ်ႈၶရိၸ်ႈ၊ ႁႂ်ႈတၢင်းဢၼ်ႁဝ်းပဵၼ်ရၢၼ်ႇသူႇၵၼ်ၼၼ်ႉထၢတ်ႇယဵၼ်သေယဝ်ႉ၊ၵွပ်ႈလူၺ်ႈသဝ်မႆႉဝႃးမိုဝ်းၼၼ်ႉ၊ႁဝ်းဢၼ်ပဵၼ်ၶိူဝ်းၵူၼ်းသွင်မဵဝ်းၼႆႉလႆႈႁူမ်ႈပွင်းၵၼ်ပဵၼ်ဢၼ်လဵဝ်လႄႈ လႆႈၶၢမ်ႇဢဝ်ၶဝ်ႈၸူးၵႃႈတီႈၽြႃးပဵၼ်ၸဝ်ႈဢေႃႈ။-
ၸဝ်ႈၶရိၸ်ႈ၊ မႃးလႄႈႁေႃးလၢတ်ႈၶၢဝ်ႇတြႃးသိူဝ်းပျေႃႇဢၼ်ဝႃႈ၊တြႃးဢၼ်ႁႂ်ႈမီးတၢင်းၼိမ်ၼၼ်ႉ၊တီႈသူၸိူဝ်းဢၼ်မီးယူႇၵႃႈတီႈဢၼ်ၵႆ၊ဢိၵ်ႇတင်းတီႈၶဝ်ၸိူဝ်းဢၼ်မီးၸမ်ၼၼ်ႉဢေႃႈ။-
ၼင်ႇၼၼ်လႄႈၵွပ်ႈပိူဝ်ႈ ၸဝ်ႈၶရိၸ်ႈ၊ ၼၼ်ႉ၊ႁဝ်းၸိူဝ်းဢၼ်ပဵၼ်ၶိူဝ်းၵူၼ်းသွင်မဵဝ်းၼႆႉ၊လႆႈဢိင်ပိုင်ႈဝိၺိၺ်ႇၸဝ်ႈပႃးလဵဝ်သေယဝ်ႉ၊လႆႈဢၶႂၢင်ႉဢၼ်ၶဝ်ႈၸူးတီႈပေႃႈၸဝ်ႈဢေႃႈ။
ပိူဝ်ႈၼႆလႄႈသူပဵၼ်ၵူၼ်းတၢင်ႇဝၢၼ်ႈတၢင်ႇမိူင်းဢမ်ႇၸႂ်ႈ။ သူပဵၼ်ၶႅၵ်ႇဢမ်ႇၸႂ်ႈယဝ်ႉဢေႃႈ။ သူပဵၼ်ၵူၼ်းမိူင်းလဵဝ်ၵၼ်တင်းၵူၼ်းမူတ်းၸၢင်ႇတင်းလၢႆလႄႈ၊သူပဵၼ်ၵူၼ်းႁိူၼ်းၵူၼ်းယေးၽြႃးပဵၼ်ၸဝ်ႈဢေႃႈ။-
သူလႆႈၶၢမ်ႇတၢင်းဢၼ်ၵေႃႇတင်ႈၶိုၼ်ႈၵႃႈၼိူဝ်ငဝ်ႈႁၢၵ်ႈတိူၵ်ႈဢၼ်ပဵၼ်တမၢၼ်ႇၸဝ်ႈ၊ဢိၵ်ႇတင်းပရေႃးၽႅတ်ႈ တင်းလၢႆဢေႃႈ။ တူဝ် ၸဝ်ႈယေႇသုၶရိၸ်ႈ၊ ၸမ်ႉ၊ပဵၼ်ငဝ်ႈႁၢၵ်ႈမၢၵ်ႇႁိၼ်ၸဵင်ႇတိူၵ်ႈဢေႃႈ။-
ၼႂ်းၸဝ်ႈၼၼ်ႉ၊ႁိူၼ်းတိူၵ်ႈတင်းလင်ၵေႃႇတင်ႈႁႂ်ႈၶဝ်ႈၼႅၼ်ႈၵၼ်ဝႆႉလႄႈသုင်ၶိုၼ်ႈမႃးပဵၼ်ၵျွင်းပိၵ်ႈမၢၼ်ႇဢၼ်မူတ်းၸၢင်ႇပုၼ်ႈထႃႇဝရႃႉၽြႃးဢေႃႈ။-
ၼႂ်းမၼ်းၸဝ်ႈၼၼ်ႉ၊သူၵေႃႈတေလႆႈၶၢမ်ႇတၢင်းဢၼ်ၵေႃႇတင်ႈၶိုၼ်ႈလူၺ်ႈၵၼ်တင်းႁဝ်း၊ပုၼ်ႈတႃႇတေႁႂ်ႈပဵၼ်တီႈဢၼ်ဝိၺိၺ်ႇၽြႃးပဵၼ်ၸဝ်ႈၵိင်းဝၢပ်ႈၼၼ်ႉဢေႃႈ။
ၵွပ်ႈပိူဝ်ႈလွင်ႈတၢင်းၸိူဝ်းၼႆႉလႄႈ၊ၵဝ် ပေႃးလု၊ ၵေႃႉဢၼ်လႆႈၶၢမ်ႇတူၵ်းထွင်ႇထွၵ်ႈလူၺ်ႈ ၸဝ်ႈယေႇသုၶရိၸ်ႈ၊ လႄႈပုၼ်ႈသူၸိူဝ်းဢၼ်ပဵၼ်ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းၼၼ်ႉ၊-
ႁုဝႃႈ၊သူလႆႈငိၼ်းလွင်ႈဢၼ်ၵႃႈၼႂ်းၵျေးၸူးၸဝ်ႈၼၼ်ႉ၊ၵဝ်လႆႈႁပ်ႉၶၢမ်ႇဢဝ်ၵၢၼ်ငၢၼ်းဢၼ်ၽြႃးပဵၼ်ၸဝ်ႈဢၢပ်ႈပၼ်ႁႂ်ႈၵဝ်ပွင်ႁဵတ်းဢၵျူဝ်းသူၼၼ်ႉယူႇဢေႃႈ။-
ၽြႃးပဵၼ်ၸဝ်ႈၽုၺ်ႇဢွၵ်ႇၼႄပျႃးလွင်ႈတၢင်းဢၼ်လိုၵ်ႉဢၼ်လမ်ႇမၼ်းၸဝ်ႈၼၼ်ႉ၊ႁႂ်ႈၵဝ်လႆႈႁုယဝ်ႉၸင်ႇ၊ၵဝ်လႆႈတႅမ်ႈလွင်ႈမၼ်းဢိတ်းၼိုင်ႈမိူဝ်ႈဢွၼ်တၢင်းၼၼ်ႉယဝ်ႉ။-
ပေႃးသူၶိုၼ်းၽတ်းဢၢၼ်ႇတူၺ်းလိၵ်ႈဢၼ်ၵဝ်တႅမ်ႈဝႆႉၼၼ်ႉၸိုင်၊သူတေလႆႈႁုႁၼ်တၢင်းဢၼ်ၵဝ်ႁုၸႅင်ႈလွင်ႈတၢင်းဢၼ်လိုၵ်ႉဢၼ်လမ်ႇ ၸဝ်ႈၶရိၸ်ႈ၊ ၼၼ်ႉဢေႃႈ။-
ၼႂ်းၸူဝ်ႈပၢၼ်မိူဝ်ႈပူၼ်ႉမႃးၸိူဝ်းၼၼ်ႉ၊လွင်ႈတၢင်းဢၼ်လိုၵ်ႉဢၼ်လမ်ႇၸိူဝ်းၼႆႉဢမ်ႇၼႄပျႃးတီႈၸိူဝ်ႉၵူၼ်းၶိူဝ်းၵူၼ်း။ ၵူၺ်းၵႃႈ၊တေႃႈလဵဝ်ၼႆႉၽြႃးပဵၼ်ၸဝ်ႈဢဝ်တင်းဝိၺိၺ်ႇၸဝ်ႈၼႄပျႃးတီႈတမၢၼ်ႇၸဝ်ႈဢၼ်မူတ်းၸၢင်ႇတင်းလၢႆ၊ဢိၵ်ႇတင်းပရေႃးၽႅတ်ႈတင်းလၢႆယဝ်ႉဢေႃႈ။-
တၢင်းဢၼ်လိုၵ်ႉဢၼ်လမ်ႇၼႆႉ၊ပဵၼ်တၢင်းဢၼ်ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းတင်းလၢႆ၊လႆႈၶၢမ်ႇဢမူၺ်ႇလူၺ်ႈၵၼ်တင်းၵူၼ်းမဵဝ်း ၵျူး၊ ၶဝ်၊လႆႈၶဝ်ႈပဵၼ်တူဝ်ၵႃႇယႃႉဢၼ်လဵဝ်လႄႈလႆႈၶဝ်ႈၸၢမ်ႇၸႃးၵတိၸဝ်ႈၼႂ်း ၸဝ်ႈၶရိၸ်ႈ၊ ၵွပ်ႈပိူဝ်ႈၶၢဝ်ႇတြႃးသိူဝ်းပျေႃႇၸဝ်ႈဢေႃႈ။
ၵဝ်လႆႈပဵၼ်သြႃႇႁေႃးတြႃးၶၢဝ်ႇသိူဝ်းပျေႃႇၵႃႈၼင်ႇဢၼ်လႆႈၶၢမ်ႇဢဝ်သုၵျေးၸူးၽြႃးပဵၼ်ၸဝ်ႈ၊ဢၼ်မၼ်းၸဝ်ႈဢဵတ်းလူပၼ်တီႈၵဝ်ၸွမ်းၼင်ႇတၼ်းၶူဝ်းၸဝ်ႈပွင်ႁဵတ်းၼၼ်ႉဢေႃႈ။-
မၼ်းၸဝ်ႈပၼ်ၵျေးၸူးဝႆႉတီႈၵဝ်ဢၼ်ပဵၼ်ၵေႃႉလဵၵ်ႉ၊ဢၼ်ယဵင်ႈၶႅၼ်းလဵၵ်ႉၼႃႇသေၵေႃႉဢၼ်လဵၵ်ႉ၊ၵႃႈၼႂ်းၵူၼ်းမူတ်းၸၢင်ႇတင်းလၢႆ၊ႁႂ်ႈၵဝ်လႆႈဢဝ်ၶၢဝ်ႇတြႃးလွင်ႈၸေးၸိမ်ႇ ၸဝ်ႈၶရိၸ်ႈ၊ ဢၼ်ဢမ်ႇမီးတီႈတိူၵ်ႉတီႈသုတ်းလႆႈၼၼ်ႉႁေႃးလၢတ်ႈပၼ်တီႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းတင်းလၢႆ၊-
ႁႂ်ႈၵူၼ်းတင်းသဵင်ႈတင်းမူတ်းလႆႈႁုႁၼ်လွင်ႈဢလူဝ်ႇၽြႃးပဵၼ်ၸဝ်ႈဢၼ်လိုၵ်ႉဢၼ်လမ်ႇဢၼ်သိူင်ႇဝႆႉလပ်ႉဝႆႉ၊ၸႃႉၸဵမ်မိူဝ်ႈၵမ်ႇၽႃႇၸႃႉတႄႇပဵၼ်မႃးၵႃႈၼႂ်းၽြႃးပဵၼ်ၸဝ်ႈဢၼ်ၽၢၼ်ႇသၢင်းႁဵတ်းပဵၼ်ၵႃႈမီးတင်းသဵင်ႈတင်းလူင်ၼၼ်ႉ၊-
ဢိၵ်ႇတင်းႁႂ်ႈဢၼ်ထွတ်ႈဢၼ်မျၢတ်ႈတင်းဢႃႇၼႃႇၵႃႈၼႂ်းထႃႇၼႃႉမိူင်းၵၢင်ႁၢဝ်တင်းလၢႆ၊လႆႈႁုႁၼ်ပိင်ႇၺႃႇၽြႃးပဵၼ်ၸဝ်ႈဢၼ်လၢၵ်ႇလၢႆးၼၼ်ႉ၊တေႃႈလဵဝ်ၼႆႉထၢင်ႇသႃးမႃးၵွပ်ႈလူၺ်ႈၸိူဝ်းၸဝ်ႈဢေႃႈ။-
ၽြႃးပဵၼ်ၸဝ်ႈႁဵတ်းၸိူဝ်ႉၼင်ႇၼႆ၊ၸွမ်းၵႃႈၼင်ႇဢၼ်မၼ်းၸဝ်ႈမီးတၢင်းၵျၢမ်ႇတၢင်းပွင်ထႃႇဝရႃႉဢၼ်ႁဵတ်းႁႂ်ႈပျေႉၸုမ်ႇဝႆႉၼႂ်းၸဝ်ႈႁဝ်း ၸဝ်ႈယေႇသုၶရိၸ်ႈ၊ ၼၼ်ႉဢေႃႈ။-
ၼႂ်းမၼ်းၸဝ်ႈၼၼ်ႉ၊ႁဝ်းမီးၸႂ်ဢၼ်ႁတ်းႁၢၼ်လႄႈမၼ်ႈၸႂ်သေလႆႈၶဝ်ႈၸူးၽၢႆႇၼႃႈၽြႃးပဵၼ်ၸဝ်ႈ၊ၵွပ်ႈလူၺ်ႈႁဝ်းယုမ်ႇမၢတ်ႈမၼ်းၸဝ်ႈဢေႃႈ။-
ၵွပ်ႈပိူဝ်ႈၸိူဝ်ႉၼင်ႇၼႆလႄႈၵဝ်တွင်းပၢၼ်ႇသူၸမ်ႉ၊မိူဝ်ႈဢၼ်သူႁၼ်တုၵ်ႉၶႃႉတၢင်းၽၢၼ်ဢၼ်ၵဝ်လႆႈၶၢမ်ႇပုၼ်ႈသူ၊ဢၼ်ပွင်ႁဵတ်းသရေႇသူၼၼ်ႉၸိုင်၊သူယႃႇပေၸႂ်လုသေၵမ်း။
ၵွပ်ႈပိူဝ်ႈလွင်ႈတၢင်းၸိူဝ်းၼႆႉလႄႈၵဝ်ၶုပ်ႉမူပ်ႇသူးတွင်းၵႃႈတီႈၽၢႆႇၼႃႈပေႃႈၸဝ်ႈ၊-
ဢၼ်ပဵၼ်ၸဝ်ႈဢၼ်ပၼ်ၸိုဝ်ႈပၼ်သဵင်တီႈၵူၼ်းႁိူၼ်းၵူၼ်းယေး၊မဵဝ်းၵူၼ်းၵႃႈၼိူဝ်ၵၢင်ႁၢဝ်လိၼ်မိူင်းတင်းသဵင်ႈတင်းလူင်ဢေႃႈ။-
ၵဝ်သူးတွင်းတီႈၽြႃးပဵၼ်ၸဝ်ႈ၊ႁႂ်ႈမၼ်းၸဝ်ႈပၼ်ဢဵၼ်ႁႅင်းၸႂ်တီႈသူလူၺ်ႈတၼ်းၶူဝ်းဝိၺိၺ်ႇၸဝ်ႈ၊ၸွမ်းၼင်ႇမုၼ်သရေႇဢၼ်ၼမ်ၵိုၼ်းမၼ်းၸဝ်ႈ၊-
ဢိၵ်ႇတင်းႁႂ်ႈ ၸဝ်ႈၶရိၸ်ႈ၊ တႄႇယူႇမီးယူႇၼႂ်းႁူဝ်ၸႂ်သူ၊ၵွပ်ႈလူၺ်ႈတၢင်းယုမ်ႇမၢတ်ႈ၊ဢိၵ်ႇတင်းႁႂ်ႈသူတၵ်းယင်ႇႁၢၵ်ႈတႄႇယူႇၼႂ်းတၢင်းႁၵ်ႉမႅတ်ႈတႃႇသေယဝ်ႉ၊-
ႁႂ်ႈသူမီးတၼ်းၶူဝ်းဢၼ်ႁုၸႅင်ႈတၢင်းၵႂၢင်ႈတၢင်းယၢဝ်း၊တၢင်းသုင်တၢင်းလိုၵ်ႉ၊မႅတ်ႈတႃႇ ၸဝ်ႈၶရိၸ်ႈ၊ ႁူမ်ႈလူၺ်ႈၵၼ်တင်းၵူၼ်းမူတ်းၸၢင်ႇၸဝ်ႈတင်းလၢႆ၊-
ဢိၵ်ႇတင်းႁႂ်ႈသူလႆႈႁုမႅတ်ႈတႃႇၸဝ်ႈဢၼ်ၺၢၼ်ႇၵူၼ်းဢမ်ႇၶိုတ်းဢမ်ႇထိုင်လႆႈၼၼ်ႉသေလႄႈ၊ႁႂ်ႈသူလႆႈပျေႉၸုမ်ႇမႅၼ်ႈၸွမ်းၼင်ႇဢၼ်ၽြႃးပဵၼ်ၸဝ်ႈပျေႉၸုမ်ႇၼၼ်ႉသေၵမ်းလူၺ်ႈ၊ဝႃႈၼႆသူးတွင်းဢေႃႈ။
ႁႂ်ႈၽြႃးပဵၼ်ၸဝ်ႈဢၼ်တၢတ်ႈၼိူင်ႇလႆႈလိူဝ်တွၼ်းၼႃႇသေၵႃႈဢၼ်ႁဝ်းမေႃၵျၢမ်ႇပွင်လဝ်ႈယွၼ်းၸွမ်းၼင်ႇတၼ်းၶူဝ်းဢၼ်ပွင်ႁဵတ်းၼႂ်းႁဝ်းၼၼ်ႉ၊-
ႁႂ်ႈမီးမုၼ်သရေႇယႂ်ႇၼႃႇၵႃႈၼႂ်းၸိူဝ်းၸဝ်ႈၵွပ်ႈလူၺ်ႈ ၸဝ်ႈယေႇသုၶရိၸ်ႈ၊ ၵူႈၸူဝ်ႈၵူႈပၢၼ်တႃႇသေႇဢမ်ႇထၢတ်ႇသေၵမ်းလူၺ်ႈ။ ဢႃမိၼ်ႈ။
ၵဝ်ဢၼ်ပဵၼ်ၵူၼ်းတူၵ်းထွင်ႇၵွပ်ႈပိူဝ်ႈၵဝ်ႁဵတ်းၵၢၼ်ၸဝ်ႈၽြႃး ယေႇသု၊ ၼႆႉ၊တိုၵ်းယူင်းသူလႄႈဝႃႈၸမ်ႉ၊ၵမ်ၵျၢင်ႉႁႂ်ႈၵိုင်ႇထိူၵ်ႈၵၼ်တင်းတၢင်းဢၼ်သူလႆႈၶၢမ်ႇဢဝ်ၵျေးၸူးဢၼ်မၼ်းၸဝ်ႈႁွင်ႉဢဝ်ၼၼ်ႉတႃႉ။-
ဢွၼ်ၵၼ်မီးႁူဝ်ၸႂ်ၶျႃးတႅမ်ႇ၊ႁူဝ်ၸႂ်ဢၼ်ၼိမ်သိမ်ႇဢူၼ်ႈဢွၼ်ႇ၊ႁူဝ်ၸႂ်ဢၼ်ၸႂ်ယႂ်ႇၸႂ်ယၢဝ်း၊ၵေႃႉၼိုင်ႈလႄႈၵေႃႉၼိုင်ႈႁၵ်ႉပႅင်းၵၼ်သေယဝ်ႉ၊မီးတၢင်းဢၼ်ယိူၼ်ႉၶၢမ်ႇတေႃႇၵၼ်တႃႉ။-
ဢွၼ်ၵၼ်ၶတ်းၸႂ်လႄႈပႂ်ႉထိင်းတၢင်းဢၼ်ပဵၼ်ၼမ်ႉၼိုင်ႈၸႂ်လဵဝ်ၵၼ်ဢၼ်ပွင်ႇဝႃႈ၊ပဵၼ်တၢင်းၼိမ်တၢင်းလီဢၼ်ဝိၺိၺ်ႇၸဝ်ႈပၼ်ႁဝ်းၼၼ်ႉတႃႉ။-
ၸိူဝ်ႉၼင်ႇဢၼ်ၽြႃးပဵၼ်ၸဝ်ႈႁွင်ႉဢဝ်သူ၊ႁႂ်ႈမီးတၢင်းမုင်ႈထႃႈမွင်းထႃႈဢၼ်လဵဝ်ၵူၺ်းၼၼ်ႉ၊မီးတူဝ်ဢၼ်လဵဝ်၊ဢိၵ်ႇတင်းဝိၺိၺ်ႇၸဝ်ႈပႃးလဵဝ်ၵူၺ်းဢေႃႈ။-
မီးၸဝ်ႈၽြႃးပႃးလဵဝ်၊တၢင်းယုမ်ႇမၢတ်ႈမဵဝ်းလဵဝ်၊မၢင်ႇၵလႃႇပပ်ႉတိၸမ်ႇ မဵဝ်းလဵဝ်၊-
ၽြႃးပဵၼ်ၸဝ်ႈသူႇလဵဝ်ဢၼ်ပဵၼ်ပေႃႈၸဝ်ႈႁဝ်းတင်းသဵင်ႈတင်းလူင်ဢၼ်ယူႇၵႃႈၼိူဝ်ၵူၼ်းတင်းသဵင်ႈတင်းလူင်လႄႈယူႇၸွတ်ႇၵႂႃႇၵႃႈၼႂ်းၵႄႈၵူၼ်းတင်းသဵင်ႈတင်းလူင်လႄႈယူႇၵႃႈၼႂ်းၵူၼ်းတင်းသဵင်ႈတင်းလူင်ၼၼ်ႉဢေႃႈ။
ၼႂ်းဝႃႈၼၼ်သေၵေႃႈ၊ႁဝ်းလႆႈၶၢမ်ႇဢဝ်ၵျေးၸူးၸဝ်ႈၸွမ်းၵႃႈၼင်ႇဢၼ် ၸဝ်ႈၶရိၸ်ႈ၊ ပၼ်သုၵျေးၸူးဢၼ်ၵိုင်ႇတၢၼ်ႇတူဝ်ၽႂ်တူဝ်မၼ်းၼၼ်ႉ၊-
မႅၼ်ႈၸွမ်းၼင်ႇဢၼ်တႅမ်ႈဝႆႉၵႃႈၼႂ်းၵျၢမ်းလိၵ်ႈလႄႈဝႃႈ၊ “မိူဝ်ႈဢၼ်မၼ်းၸဝ်ႈၶိုၼ်ႈၵႂႃႇၵႃႈတီႈဢၼ်သုင်ၼၼ်ႉ၊ မၼ်းၸဝ်ႈတိပႃးဢဝ်ၵႂႃႇၵူၼ်းတူၵ်းၵႅၼ်းၼမ်ၼႃႇလႄႈ၊ မၼ်းၸဝ်ႈပၼ်သူးလၢပ်ႈတီႈၵူၼ်းတင်းလၢႆယဝ်ႉ၊” ဝႃႈၼင်ႇၼႆၼၼ်ႉဢေႃႈ။-
ၵႂၢမ်းဢၼ်ဝႃႈ၊ “မၼ်းၸဝ်ႈၶိုၼ်ႈၵႂႃႇ” ၼႆႉၸိုင်ၶႂ်ႈဝႃႈ၊မိူဝ်ႈဢွၼ်တၢင်းၼၼ်ႉ၊မၼ်းၸဝ်ႈၵျွလူင်းမႃးၵႃႈတႂ်ႈလိၼ်မိူင်းဢၼ်လိုၵ်ႉဢၼ်တႅမ်ႇၼႃႇၼႆႉယဝ်ႉဢေႃႈ။-
ၸဝ်ႈဢၼ်ၵျွလူင်းၵႂႃႇၼၼ်ႉ၊ပဵၼ်ၸဝ်ႈတၢင်ႇပႃးဢမ်ႇၸႂ်ႈ။ ပဵၼ်ၸဝ်ႈဢၼ်ၶိုၼ်ႈၵႂႃႇပူၼ်ႉပၢႆၸိၵ်းၸွမ်ၽႃႉၵၢင်ႁၢဝ်တင်းလၢႆ၊ႁႂ်ႈတင်းသဵင်ႈတင်းလူင်လႆႈပျေႉၸုမ်ႇၸွမ်းလူၺ်ႈၵၼ်တင်းမၼ်းၸဝ်ႈဢေႃႈ။-
ၸဝ်ႈဢၼ်၊ “ပၼ်သူးတီႈၵူၼ်းတင်းလၢႆ” ၸမ်ႉ၊မၼ်းၸဝ်ႈႁႂ်ႈၵမ်ႈၽွင်ႈပဵၼ်တမၢၼ်ႇၸဝ်ႈ၊ႁႂ်ႈၵမ်ႈၽွင်ႈပဵၼ်ပရေႃးၽႅတ်ႈ၊ ႁႂ်ႈၵမ်ႈၽွင်ႈပဵၼ်သြႃႇဢၼ်လႄႇပွင်သႃႇသၼႃႇ၊ႁႂ်ႈၵမ်ႈၽွင်ႈပဵၼ်သြႃႇဢုပ်ႉၸိူဝ်းၸဝ်ႈလႄႈသြႃႇသွၼ်တြႃး၊-
ႁႂ်ႈလႆႈမႄးၵုမ်းမႄးသၢင်ႈၵူၼ်းဢၼ်မူတ်းၸၢင်ႇတင်းလၢႆ၊ပုၼ်ႈၼႃႈၵၢၼ်သႃႇသၼႃႇ၊ပုၼ်ႈတႃႇတႄႇသၢင်ႈႁဵတ်းတူဝ် ၸဝ်ႈၶရိၸ်ႈ၊ ႁႂ်ႈၶိုၼ်းယႂ်ႇမႃး၊-
တေႃႇထိုင်ႁွတ်ႈႁဝ်းၵႃႈမီးတင်းသဵင်ႈတင်းလူင်လႆႈမီးတၢင်းဢၼ်ပဵၼ်ၼမ်ႉၼိုင်ႈၸႂ်လဵဝ်ၵၼ်ၼႂ်းတၢင်းဢၼ်ယုမ်ႇမၢတ်ႈ၊ဢိၵ်ႇတင်းတၢင်းဢၼ်ႁုၸၵ်းလုၵ်ႈၽြႃးပဵၼ်ၸဝ်ႈ၊တေႃႇထိုင်ႁွတ်ႈႁဝ်းပဵၼ်ၵူၼ်းလူင်တဵမ်ထူၼ်ႈၼၼ်ႉ၊ပဵၼ်တၢင်းဢၼ်ပျေႉၸုမ်ႇ ၸဝ်ႈၶရိၸ်ႈ၊ ဢေႃႈ။-
လွင်ႈမၼ်းၸမ်ႉ၊ၼင်ႇႁိုဝ်ၵမ်းလိုၼ်းႁဝ်းတၵ်းဢမ်ႇပဵၼ်မိူၼ်ၸိူဝ်ႉၼင်ႇလုၵ်ႈဢွၼ်ႇဢၼ်ပိဝ်ၵႂႃႇလွင်ႈၵႂႃႇၸွမ်းၵႂၢမ်းသင်ႇသွၼ်ၵူႈၸိူဝ်ႉၵူႈမဵဝ်းဢၼ်ပဵၼ်လူမ်းပၢၵ်ႇလၢႆလၢႆ၊ဢိၵ်ႇတင်းပႃးတင်းပရိယႄႇသေလႄႈပႅတ်ႉလႅၼ်ၸူဝ်းဢဝ်ၵႂႃႇၵႃႈၼႂ်းတၢင်းဢၼ်ၽိတ်းၼၼ်ႉဢေႃႈ။-
ၵူၺ်းၵႃႈ၊ပႃးၸႂ်မႅတ်ႈတႃႇသေလႄႈလၢတ်ႈၵႂၢမ်းဢၼ်မၢၼ်ႇမႅၼ်ႈၸိုဝ်ႈၸႂ်ႈႁႂ်ႈၶိုၼ်ႈယႂ်ႇမႂ်ႇသုင်မႃးၵူႈၸိူဝ်ႉၵူႈပိူင်ၵႃႈတီႈ ၸဝ်ႈၶရိၸ်ႈ၊ ဢၼ်ပဵၼ်ႁူဝ်ႁဝ်းၼၼ်ႉတႃႉ။-
ၵႃႈၼင်ႇဢၼ်မၼ်းၸဝ်ႈၶိုင်ပွင်ၼၼ်ႉ၊ဢၢင်ႇၵႃႇဢၼ်လႂ်ဢၼ်ၼၼ်ႉငီႇငႅၼ်ႇၵွပ်ႈၸပ်းၵၼ်ဝႆႉလႄႈတင်းတူဝ်တင်းၶိင်းႁုပ်ႈၸုသိုပ်ႇၸပ်းၵၼ်ဝႆႉ၊ၵွပ်ႈပိူဝ်ႈပွင်ႈလုပ်ႇတင်းလၢႆပုၼ်ႈၽႂ်ပုၼ်ႈမၼ်းဢေႃႈ။ ပိူဝ်ႈဢၼ်ဢၢင်ႇၵႃႇဢၼ်လႂ်ဢၼ်ၼၼ်ႉပွင်ႁဵတ်းၼႃႈၵၢၼ်ၽႂ်ၵၢၼ်မၼ်းၼၼ်ႉလႄႈၸၢင်ႈႁႂ်ႈသုင်ယႂ်ႇမႃးလႄႈလႆႈတႄႇႁဵတ်းတူဝ်ၸဝ်ႈၵဝ်ႇၵႃႈၼႂ်းမႅတ်ႈတႃႇဢေႃႈ။
ပိူဝ်ႈၼႆလႄႈၵႃႈၼႂ်းၸိုဝ်ႈသဵင်ၸဝ်ႈၽြႃး ယေႇသု၊ ၼၼ်ႉ၊ၵဝ်ပၼ်သတိသူလႄႈဝႃႈၸမ်ႉ၊ယႃႇပေသိုပ်ႇၵမ်ၵျၢင်ႉမိူၼ်ၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ၸႂ်ၶဝ်ၸပ်းၸွႆးမဵဝ်းဢၼ်ဢမ်ႇပွင်ႇလွင်ႈၵႃႈသင်ၼၼ်ႉသေၵမ်း။-
တၢင်းၶႆႈၸႂ်ၸဵၼ်းၸႃးၶဝ်ၼၼ်ႉလပ်းသိင်ႇမိုတ်ႈၵႂႃႇလႄႈၶဝ်ယူႇၽၢတ်ႇယၢၼ်ၵၼ်တင်းဢသၢၵ်ႈဢၼ်ၽြႃးပဵၼ်ၸဝ်ႈပၼ်ၼၼ်ႉ၊တူဝ်ၶဝ်ဢမ်ႇႁုၵႃႈသင်လုမ်းလုမ်းယဝ်ႉ၊ၵွပ်ႈပိူဝ်ႈႁူဝ်ၸႂ်ၶဝ်ၵႅၼ်ႇၶႅင်ယူႇၼၼ်ႉဢေႃႈ။-
ၶဝ်ဢမ်ႇၸၢင်ႈၵူဝ်ၸၢင်ႈဢၢႆလႄႈဢဝ်တူဝ်ၶဝ်ဢၢပ်ႈၼႂ်းၵႃႇမၵုင်ႇသေယဝ်ႉ၊ယင်းဢမ်ႇၸၢင်ႈၶျုၵ်ႈၸႂ်တူဝ်ၸဝ်ႈၵဝ်ႇလႄႈႁဵတ်းဢၼ်ၵူဝ်ႈၵိူၵ်ႇဢဵတ်ႇသဵတ်ႇၵူႈၸိူဝ်ႉၵူႈပိူင်ဢေႃႈ။
သူသွၼ်ဢဝ်တြႃး ၸဝ်ႈၶရိၸ်ႈ၊ ႁႂ်ႈလႆႈပဵၼ်ၸိူဝ်ႉၼင်ႇၼၼ်ဢမ်ႇၸႂ်ႈ။-
သူလႆႈငိၼ်းလွင်ႈ ၸဝ်ႈၶရိၸ်ႈ၊ လႄႈသွၼ်ဢဝ်တီႈမၼ်းၸဝ်ႈၸွမ်းၼင်ႇတြႃးဢၼ်ၸိုဝ်ႈဢၼ်ၸႂ်ႈဢၼ်မီးၼႂ်း ၸဝ်ႈယေႇသု၊ ၼၼ်ႉယဝ်ႉဢေႃႈ။-
ပိူဝ်ႈၼႆလႄႈၸုၼ်ႉပႅတ်ႈဢၵျၢင်ႉတူဝ်ၵဝ်ႇသူဢၼ်ယၢမ်ႈႁဵတ်းဢၼ်ဝႃႈ၊ဢၵျၢင်ႉၵဝ်ႇသူဢၼ်ၸၢင်ႈႁဵတ်းႁႂ်ႈသူလုလႅဝ်၊ၵွပ်ႈပိူဝ်ႈၸႂ်လေႃးၽႃႉပႅတ်ႉလႅၼ်ၼၼ်ႉတႃႉ။-
ႁႂ်ႈဢွၼ်ၵၼ်ပိၼ်ႇပဵၼ်ၸႂ်သၽေႃးဢၼ်မႂ်ႇလႄႈ။-
ဢွၼ်ၵၼ်ၼုင်ႈမႆသၽေႃးၵူၼ်းမႂ်ႇဢၼ်ဝႃႈ၊ၸႂ်သၽေႃးဢၼ်ၽၢၼ်ႇသၢင်းဝႆႉ၊ၸွမ်းၼင်ႇႁၢင်ႈၽၢင်ၸဝ်ႈၽြႃးလႄႈပဵၼ်ၸႂ်သၽေႃးဢၼ်သိုဝ်ႈတေႃႇဢၼ်မူတ်းၸၢင်ႇၸိုဝ်ႈၸိုဝ်ႈၸႂ်ႈၸႂ်ႈၼၼ်ႉတႃႉ။-
ပိူဝ်ႈၼႆလႄႈၸုၼ်ႉပႅတ်ႈၵႂၢမ်းမုသႃႇဢၼ်ၸၢင်ႈပႅတ်ႉၸၢင်ႈလႅၼ်သေယဝ်ႉ၊ၵေႃႉၼိုင်ႈလႄႈၵေႃႉၼိုင်ႈလၢတ်ႈၵႂၢမ်းဢၼ်မၢၼ်ႇဢၼ်မႅၼ်ႈတေႃႇၵၼ်ၵူၺ်းတႃႉ။ လွင်ႈမၼ်းၸမ်ႉ၊ႁဝ်းပဵၼ်ဢၢင်ႇၵႃႇၼင်ႇၵၼ်ၵႃႈတီႈတူဝ် ၸဝ်ႈၶရိၸ်ႈ၊ ဢေႃႈ။-
ပေႃးသူမီးတင်းဢၼ်ၸႂ်လမ်ၶႂ်ႈၸႃႉၸိုင်၊ယႃႇပေႁႂ်ႈတၢင်းၸႂ်လမ်ၶႂ်ႈၸႃႉသူၼၼ်ႉႁဵတ်းႁႂ်ႈသူမီးဢပျတ်ႈလႄႈယႃႇပေမီးတၢင်းဢၼ်ၸႂ်လမ်ၶႂ်ႈၸႃႉယူႇတေႃႇထိုင်ႁွတ်ႈၵၢင်ဝၼ်းတေတူၵ်းလိၼ်ၼၼ်ႉတႃႉ။-
သူယႃႇပေဢုပ်ႇလၢတ်ႈၵႂၢမ်းဢၼ်ၵူဝ်ႈဢၼ်ၵိူၵ်ႇသေၵမ်း။ လၢတ်ႈၵႂၢမ်းဢၼ်လီဢၼ်ငၢမ်းလႄႈႁႂ်ႈၶဝ်ၸိူဝ်းဢၼ်လႆႈထွမ်ႇလႆႈငိၼ်းၼၼ်ႉၵေႃႈ မီးတၢင်းဢၼ်ၶိုၼ်ႈယႂ်ႇလႄႈပဵၼ်ဢၵျူဝ်းၼၼ်ႉၵူၺ်းတႃႉ။-
ယႃႇပေႁဵတ်းႁႂ်ႈဝိၺိၺ်ႇမူတ်းၸၢင်ႇၽြႃးပဵၼ်ၸဝ်ႈလႆႈၸဵပ်းၸႂ်။ လွင်ႈမၼ်းၸမ်ႉ၊ဝိၺိၺ်ႇၸဝ်ႈၼၼ်ႉလႆႈတွၵ်ႇၸုမ်ႈၽြႃးပဵၼ်ၸဝ်ႈၵႃႈတီႈသူဢၼ်ပဵၼ်ဢႃႇမႃႉၶၢမ်ႇဝႆႉတေႃႇထိုင်ဝၼ်းဢၼ်မၼ်းၸဝ်ႈတၵ်းထုတ်ႇၼုၵ်ႈဢဝ်သူႁွတ်ႈထိုင်မႃးၼၼ်ႉဢေႃႈ။-
ဢဝ်ပႅတ်ႈၸႂ်ဢၼ်ပွတ်းဢၼ်လွတ်း၊ၸႂ်မႆႈၸႂ်လိူတ်ႇတင်းၸႂ်တေႃးသႃႉဢွၵ်ႇၸိူဝ်းၼႆႉၵူႈၸိူဝ်ႉၵူႈပိူင်တႃႉ။ ယႃႇပေႁိုတ်းလႃႇလႄႈယႃႉသရေႇပိူၼ်ႈ၊ယႃႇပေမီးၸႂ်ဢၼ်ငိၼ်းၸင်းၶၢၼ်ႉႁၼ်ပိူၼ်ႈၼၼ်ႉသေၵမ်း။-
ႁႂ်ႈၵေႃႉၼိုင်ႈလႄႈၵေႃႉၼိုင်ႈဢဵတ်းလူၵၼ်၊ႁၵ်ႉႁွမ်ၸူမ်းပႅင်းၵၼ်လႄႈၵေႃႉၼိုင်ႈလႄႈၵေႃႉၼိုင်ႈပွႆႇလွတ်ႈဢပျတ်ႈၵၼ်မိူၼ်ၸိူဝ်ႉၼင်ႇဢၼ်ၽြႃးပဵၼ်ၸဝ်ႈပွႆႇလွတ်ႈဢပျတ်ႈသူလူၺ်ႈ ၸဝ်ႈၶရိၸ်ႈ၊ ၼၼ်ႉတႃႉ။
ၸွမ်းၼင်ႇသူပဵၼ်လုၵ်ႈႁၵ်ႉၽြႃးပဵၼ်ၸဝ်ႈၼၼ်ႉ၊ၶတ်းၸႂ်ၵမ်ၵျၢင်ႉႁႂ်ႈမိူၼ်ၸိူဝ်ႉၼင်ႇမၼ်းၸဝ်ႈတႃႉ။-
ၵႂႃႇမႃးၵႃႈၼႂ်းတၢင်းႁၵ်ႉမႅတ်ႈတႃႇၸိူဝ်ႉၼင်ႇဢၼ် ၸဝ်ႈၶရိၸ်ႈ၊ ႁၵ်ႉႁဝ်းၼၼ်ႉတႃႉ။ မၼ်းၸဝ်ႈၸုၼ်ႉဢသၢၵ်ႈပုၼ်ႈႁဝ်း ႁႂ်ႈပဵၼ်တၢင်းလူႇဢၢႆႁွမ်ဢၢႆႁူၺ်းမဵဝ်းဢၼ်သၢၵ်ႈလူႇဢၼ်ၽြႃးပဵၼ်ၸဝ်ႈၵျိူၵ်ႈၸႂ်ထုၵ်ႇၸႂ်ၼၼ်ႉဢေႃႈ။
ၸိူဝ်ႉၼင်ႇဢၼ်ၵိုင်ႇထိူၵ်ႈလႆႈပဵၼ်ၵူၼ်းဢၼ်မူတ်းၸၢင်ႇၸဝ်ႈၼၼ်ႉ၊သူယႃႇပေဢုပ်ႇလၢတ်ႈလွင်ႈၵႃႇမေႇသုဢၼ်ဢမ်ႇတြႃး၊တၢင်းဢၼ်ၸႂ်ၵိလေႇသႃႇၵူဝ်ႈၵိူၵ်ႇၵူႈၸိူဝ်ႉၵူႈပိူင်၊ဢိၵ်ႇတင်းတၢင်းဢၼ်ၸႂ်လေႃးၽႃႉပူၼ်ႉလိူဝ်ၸိူဝ်းၼၼ်ႉလႃးလႃး။-
လိူဝ်သေၼၼ်ႉၵႂၢမ်းဢၼ်ႁင်ႈဢၼ်ဝူၺ်ႇ၊ၵႂၢမ်းဢၼ်မိူၵ်ႈဢၼ်လိူင်း၊ၵႂၢမ်းဢၼ်လၢတ်ႈပျၢၵ်ႈလၢတ်ႈၶူဝ်ဢၼ်ဢမ်ႇလီဢမ်ႇထုၵ်ႇၸိူဝ်းၼၼ်ႉၵေႃႈယႃႇပေလၢတ်ႈဢွၵ်ႇသူပ်းသူ။ ႁႂ်ႈၵႂၢမ်းသူၼၼ်ႉ၊ႁႂ်ႈပဵၼ်ၵႂၢမ်းဢၼ်ယွင်ႈယေႃးတၢင်ႇၵျေးၸူးၽြႃးပဵၼ်ၸဝ်ႈတႃႉ။-
သူႁုယူႇဝႃႈ၊ၵေႃႉဢၼ်ၽိတ်းၵႃႇမေႇသုလႄႈသင်၊ၵေႃႉဢၼ်ႁဵတ်းၵူဝ်ႈႁဵတ်းၵိူၵ်ႇလႄႈသင်၊ၵေႃႉဢၼ်ၸႂ်လေႃးၽႃႉပူၼ်ႉလိူဝ်ဢၼ်ပဵၼ်မိူၼ်ၸိူဝ်ႉၼင်ႇၵေႃႉဢၼ်ၵူဝ်းၵႂၢႆႇႁုၼ်ႇႁၢင်ႈသၢင်းထုသေၵေႃႉသေၵူၼ်းလႄႈသင်၊ဢမ်ႇလႆႈၶၢမ်ႇဢမူၺ်ႇမိူင်း ၸဝ်ႈၶရိၸ်ႈ၊ ဢိၵ်ႇတင်းဢမူၺ်ႇမိူင်းၽြႃးပဵၼ်ၸဝ်ႈၼၼ်ႉဢေႃႈ။
ယႃႇပေႁႂ်ႈပိူၼ်ႈလႆႈဢဝ်တင်းၵႂၢမ်းမဝ်မၢင်သေလႄႈပႅတ်ႉလႅၼ်သူ။ ၵွပ်ႈပိူဝ်ႈလွင်ႈတၢင်းၸိူဝ်ႉၼင်ႇၼၼ်လႄႈဢပျတ်ႈတၢမ်ႇၽြႃးပဵၼ်ၸဝ်ႈၸင်ႇႁွတ်ႈထိုင်ၵႃႈၼိူဝ်ၶဝ်ၸိူဝ်းဢၼ်ဢမ်ႇထွမ်ႇဢမ်ႇဢဝ်ၵႂၢမ်းၽြႃးပဵၼ်ၸဝ်ႈၼၼ်ႉဢေႃႈ။-
ပိူဝ်ႈၼႆလႄႈယႃႇပေႁဵတ်းၵေႃႉႁဵတ်းသႄႈလႄႈၵႂႃႇမႃးလူၺ်ႈၵၼ်တင်းၶဝ်။-
မိူဝ်ႈၵွၼ်ႇၼၼ်ႉ၊သူယၢမ်ႈပဵၼ်ဢၼ်လပ်းသိင်ႇမႃးယဝ်ႉဢေႃႈ။ တေႃႈလဵဝ်ၼႆႉၸမ်ႉ၊သူပဵၼ်ဢၼ်လႅင်းၼႂ်းၸဝ်ႈၽြႃးယဝ်ႉ။ ပိူဝ်ႈၼႆလႄႈၵမ်ၵျၢင်ႉၸိူဝ်ႉၼင်ႇလုၵ်ႈဢၼ်လႅင်းတႃႉ။-
လွင်ႈမၼ်းၸမ်ႉ၊ဢၵျူဝ်းဢၼ်လႅင်းၼၼ်ႉပဵၼ်လွင်ႈတၢင်းဢၼ်လီဢၼ်ငၢမ်းၵူႈၸိူဝ်ႉၵူႈပိူင်၊ပဵၼ်တၢင်းဢၼ်သိုဝ်ႈတေႃႇ၊ဢိၵ်ႇတင်းပဵၼ်တၢင်းဢၼ်ၸိုဝ်ႈဢၼ်ၸႂ်ႈဢေႃႈ။-
ၵႆႉၶတ်းၸႂ်သွၼ်ဢဝ်လွင်ႈတၢင်းဢၼ်ထုၵ်ႇၸႂ်ၸဝ်ႈၽြႃးၼၼ်ႉတႃႉ။-
ယႃႇပေၶဝ်ႈပႃးလူၺ်ႈၵၼ်တင်းတၢင်းဢၼ်လပ်းသိင်ႇဢၼ်ဢမ်ႇမီးဢၵျူဝ်းၼၼ်ႉဢမ်ႇၵႃး၊ၽုၺ်ႇဢွၵ်ႇႁႂ်ႈဢပျတ်ႈၸိူဝ်ႉၼင်ႇၼၼ်ၼၼ်ႉ၊ထၢင်ႇသႃးၼႂ်းဢၼ်လႅင်းတႃႉ။-
လွင်ႈမၼ်းၸမ်ႉ၊လွင်ႈတၢင်းၸိူဝ်းဢၼ်ပိူၼ်ႈလၵ်ႉလွမ်ႁဵတ်းၼၼ်ႉ၊တေဢဝ်ၵႂၢမ်းလၢတ်ႈၸၢပ်ႈလူၺ်ႈလွင်ႈမၼ်းၵူၺ်းၵေႃႈယင်းပဵၼ်ဢၼ်လီဢူၵ်းလီဢၢႆယူႇဢေႃႈ။-
ၵူၺ်းၵႃႈ၊မိူဝ်ႈဢၼ်လွင်ႈၵႃႈမီးတင်းသဵင်ႈတင်းလူင်ထၢင်ႇသႃးပေႃႇဢွၵ်ႇမႃးၼႂ်းဢၼ်လႅင်းၸိုင်၊လွင်ႈၼၼ်ႉၵေႃႈတၵ်းထၢင်ႇသႃးလီဢေႃႈ။ ၵွပ်ႈပိူဝ်ႈဝႃႈလွင်ႈတၢင်းဢၼ်ထၢင်ႇသႃးဝႆႉတင်းသဵင်ႈတင်းလူင်ၼၼ်ႉ၊ပဵၼ်ဢၼ်လႅင်းဢေႃႈ။-
ပိူဝ်ႈၼႆလႄႈၵႂၢမ်းဢၼ်လၢတ်ႈဝႆႉလႄႈဝႃႈ၊ “ၵေႃႉဢၼ်ၼွၼ်းလပ်းယူႇ႟၊တိုၼ်ႇမႃးတႃႉ။ လုၵ်ႉသေၵႃႈတၢင်းတၢႆၶိုၼ်းလိပ်းမႃးတႃႉ။ ၸဝ်ႈၶရိၸ်ႈ၊ တၵ်းပၼ်ဢၼ်လႅင်းတီႈမႂ်းဢေႃႈ၊” ဝႃႈၼင်ႇၼႆဢေႃႈ။
ၵွပ်ႈၼႆလႄႈၼင်ႇႁိုဝ်တေဢမ်ႇပဵၼ်ၵူၼ်းငိူဝ်ႈငႃႉလႄႈ ႁႂ်ႈလႆႈပဵၼ်ၵေႃႉဢၼ်မီးပိင်ႇၺႃႇၸိုင်၊တေလႆႈၵမ်ၵျၢင်ႉၸိူဝ်ႉႁိုဝ်ၼၼ်ႉႁဵတ်းသတိတႃႉ။-
ၵွပ်ႈပိူဝ်ႈၶိင်ႇၵႃႇလႃႉတေႃႈလဵဝ်ၼႆႉပဵၼ်ၶိင်ႇၵႃႇလႃႉဢၼ်ႁၢႆႉမိူၵ်ႈလႄႈဢွၼ်ၵၼ်ႁဵတ်းလွင်ႈလီမိူဝ်ႈဢၼ်သူမီးဢၶႂၢင်ႉဢယေးၵူႈၶိင်ႇၼၼ်ႉတႃႉ။-
ပိူဝ်ႈၼႆလႄႈယႃႇပေႁဵတ်းၵူၼ်းငိူဝ်ႈ။ ပဵၼ်ၵေႃႉဢၼ်ၸၢင်ႈၶႆႈၸႂ်လႄႈႁုဢလူဝ်ႇၸဝ်ႈၽြႃးဝႃႈ၊မၼ်းၸဝ်ႈၶႂ်ႈႁႂ်ႈသူႁဵတ်းဢီႈသင်ၼၼ်ႉတႃႉ။
ယႃႇပေမဝ်းၼမ်ႉလဝ်ႈမၢၵ်ႇၸပိတ်ႉဢၼ်ၸၢင်ႈႁႂ်ႈၵူၼ်းလုလႅဝ်ၼၼ်ႉ၊ႁႂ်ႈပျေႉၸုမ်ႇတင်းဝိၺိၺ်ႇၸဝ်ႈတႃႉ။-
ၵေႃႉၼိုင်ႈလႄႈၵေႃႉၼိုင်ႈ၊ၼင်ႇၵၼ်ၵၼ်လၢတ်ႈတေႃႇၵၼ်လူၺ်ႈၵႂၢမ်းသႃႇလၢမ်ႇ၊ဢိၵ်ႇတင်းၵႂၢမ်းထမ်ႇမႃႉ၊ၵႂၢမ်းၽၢႆႇဝိၺိၺ်ႇၸဝ်ႈသေလႄႈပႃးၸႂ်ပႃးၶေႃးႁဵတ်းၵႂၢမ်းယွင်ႈယေႃးထေႃးပၼႃႇၵႃႈတီႈၽြႃးပဵၼ်ၸဝ်ႈ၊-
ယွင်ႈယေႃးတၢင်ႇၵျေးၸူးတီႈၽြႃးပေႃႈၸဝ်ႈ၊လွင်ႈၵႃႈမီးတင်းသဵင်ႈတင်းလူင်ၵႃႈၼႂ်းၼႃႇမႃႉၸိုဝ်ႈသဵင် ၸဝ်ႈယေႇသုၶရိၸ်ႈ၊ ယူႇတႃႇသေႇတႃႉႁဝ်း။
ၵေႃႉၼိုင်ႈလႄႈၵေႃႉၼိုင်ႈ၊ၼင်ႇၵၼ်ၵၼ်ၶျႃးတႅမ်ႇတေႃႇၵၼ်ၵွပ်ႈပိူဝ်ႈသူရူဝ်ႇသေႇၵူဝ်ယမ် ၸဝ်ႈၶရိၸ်ႈ၊ ၼၼ်ႉတႃႉ။
ၶဝ်ၸိူဝ်းဢၼ်ပဵၼ်မေးၶဝ်႟။ ၸိူဝ်ႉၼင်ႇဢၼ်သူႁပ်ႉတုင်းဢဝ်တၢင်းဢၼ်ၸဝ်ႈၽြႃး ယေႇသု၊ ဢုပ်ႉပိူင်ႇၼၼ်ႉ၊ႁပ်ႉတုင်းဢဝ်တၢင်းဢၼ်ၽူဝ်သူဢုပ်ႉပိူင်ႇတႃႉ။-
လွင်ႈမၼ်းၸမ်ႉ၊ၽူဝ်ပဵၼ်ႁူဝ်ၵႃႈၼိူဝ်မေးမၼ်းၸိူဝ်ႉၼင်ႇဢၼ် ၸဝ်ႈၶရိၸ်ႈ၊ ပဵၼ်ႁူဝ်ၵႃႈၼိူဝ်ၸိူဝ်းၸဝ်ႈဢၼ်ပဵၼ်တူဝ်မၼ်းၸဝ်ႈလႄႈမၼ်းၸဝ်ႈသမ်ႉပဵၼ်ၸဝ်ႈဢၼ်ၵႄႇၶျွတ်ႈဢဝ်ၸိူဝ်းၸဝ်ႈၼၼ်ႉဢေႃႈ။-
ပိူဝ်ႈၼႆလႄႈၸိူဝ်ႉၼင်ႇဢၼ်ၸိူဝ်းၸဝ်ႈႁပ်ႉတုင်းဢဝ်တၢင်းဢၼ် ၸဝ်ႈၶရိၸ်ႈ၊ ဢုပ်ႉပိူင်ႇၼၼ်ႉ၊ႁႂ်ႈၶဝ်ၸိူဝ်းဢၼ်ပဵၼ်မေးတင်းလၢႆၵေႃႈႁပ်ႉတုင်းဢဝ်တၢင်းဢၼ်ၽူဝ်ဢုပ်ႉပိူင်ႇၼႂ်းလွင်ႈတၢင်းၵူႈၸိူဝ်ႉၵူႈပိူင်တႃႉ။
ၸိူဝ်းဢၼ်ပဵၼ်ၽူဝ်ၶဝ်႟။ သူၵေႃႈႁၵ်ႉမေးသူမိူၼ်ၸိူဝ်ႉၼင်ႇဢၼ် ၸဝ်ႈၶရိၸ်ႈ၊ ႁၵ်ႉၸိူဝ်းၸဝ်ႈလႄႈၶၢမ်ႇၸုၼ်ႉတူဝ်ၸဝ်ႈၵဝ်ႇပုၼ်ႈၸိူဝ်းၸဝ်ႈၼၼ်ႉတႃႉ။-
မၼ်းၸဝ်ႈႁဵတ်းၸိူဝ်ႉၼင်ႇၼႆ၊ပုၼ်ႈလွင်ႈၼင်ႇႁိုဝ်ၸိူဝ်းၸဝ်ႈတၵ်းလႆႈမူတ်းၸၢင်ႇၸိုင်၊မၼ်းၸဝ်ႈဢဝ်တင်းၼုၵ်ႈၵပၢတ်ႈတြႃးၸဝ်ႈ၊ဢိၵ်ႇတင်းၼမ်ႉသေလႄႈသုၵ်ႈပွတ်ႈဢေႃႈ။-
ၼင်ႇႁိုဝ်မၼ်းၸဝ်ႈတၵ်းလႆႈဢဝ်ၸိူဝ်းၸဝ်ႈဢၼ်မီးမုၼ်သရေႇလႄႈၵၢင်းလွတ်ႈတင်းတၢင်းဢၼ်ပိူၼ်ႈၸိပိူၼ်ႈၼႄး၊တၢင်းဢၼ်ဢမ်ႇလီဢမ်ႇငၢမ်း၊ဢိၵ်ႇတင်းတၢင်းဢၼ်မူတ်းၸၢင်ႇ၊ဢမ်ႇမီးတၢင်းဢၼ်ၽိတ်းဢၼ်ပိူင်ႈသေလႄႈသၢၵ်ႈၵၢပ်ႈတီႈတူဝ်ၸဝ်ႈၵဝ်ႇၼၼ်ႉ။-
မိူၼ်ၸိူဝ်ႉၼင်ႇၼၼ်ၵူၼ်းၸၢႆးဢၼ်ပဵၼ်ၽူဝ်ၼၼ်ႉထုၵ်ႇလီႁၵ်ႉမေးၶဝ်မိူၼ်ၸိူဝ်ႉၼင်ႇဢၼ်ႁၵ်ႉတူဝ်ၸဝ်ႈၵဝ်ႇၼၼ်ႉဢေႃႈ။ ၵေႃႉဢၼ်ႁၵ်ႉမေးမၼ်းၼၼ်ႉ၊ပဵၼ်ၵေႃႉဢၼ်ႁၵ်ႉတူဝ်ၸဝ်ႈၵဝ်ႇဢေႃႈ။-
ၵေႃႉဢၼ်ၸင်းၼိူဝ်ႉၸင်းလိူတ်ႈမၼ်းၼၼ်ႉ၊ဢမ်ႇမီးသေၵေႃႉသေၵူၼ်း။ မၼ်းၸၢင်ႈလဵင်ႉလူလုမ်းလႃးၼိူဝ်ႉလိူတ်ႈမၼ်းမိူၼ်ၸိူဝ်ႉၼင်ႇဢၼ် ၸဝ်ႈၶရိၸ်ႈ၊ လဵင်ႉလူလုမ်းလႃးၸိူဝ်းၸဝ်ႈၼၼ်ႉဢေႃႈ။-
လွင်ႈမၼ်းၸမ်ႉ၊ႁဝ်းၶဝ်ႈပႃးယူႇၵႃႈၼႂ်းဢၢင်ႇၵႃႇတူဝ်မၼ်းၸဝ်ႈဢေႃႈ။-
ၵွပ်ႈပိူဝ်ႈလွင်ႈတၢင်းၼၼ်ႉလႄႈၵႃႈၼႂ်းၵျၢမ်းလိၵ်ႈလၢတ်ႈဝႆႉဝႃႈ၊ “ၵူၼ်းၸၢႆးတၵ်းလႆႈၽၢတ်ႇယၢၼ်ပေႃႈမႄႈမၼ်းသေယဝ်ႉ၊ယူႇႁူမ်ႈလူၺ်ႈၵၼ်တင်းမေးမၼ်းဢေႃႈ။ ၶဝ်သွင်ၵေႃႉၼၼ်ႉတၵ်းလႆႈပဵၼ်ၼိူဝ်ႉလိူတ်ႈဢၼ်လဵဝ်ၵၼ်ဢေႃႈ။-”
လွင်ႈတၢင်းၼႆႉ၊ပဵၼ်လွင်ႈဢၼ်လိုၵ်ႉဢၼ်လမ်ႇၼႃႇဢေႃႈ။ လွင်ႈဢၼ်ၼႆႉၸမ်ႉ၊ၵဝ်ပွင်ႇၸႂ် ဝႃႈ၊မၼ်းပဵၼ်တၢင်းဢၼ်လၢတ်ႈလူၺ်ႈလွင်ႈ ၸဝ်ႈၶရိၸ်ႈ၊ တင်းၸိူဝ်းၸဝ်ႈဢေႃႈ။-
ၼႂ်းဝႃႈၼၼ်သေၵေႃႈ၊ႁႂ်ႈၶဝ်ၸိူဝ်းဢၼ်ပဵၼ်ၽူဝ်ၼၼ်ႉႁၵ်ႉမေးၶဝ်မိူၼ်ၸိူဝ်ႉၼင်ႇဢၼ်ၶဝ်ႁၵ်ႉတူဝ်ၸဝ်ႈၵဝ်ႇၼၼ်ႉတႃႉ။ ႁႂ်ႈၶဝ်ၸိူဝ်းဢၼ်ပဵၼ်မေးၵေႃႈ၊ရူဝ်ႇသေႇၵူဝ်ယမ်ၽူဝ်ၶဝ်တႃႉ။
ၶဝ်ၸိူဝ်းဢၼ်ပဵၼ်လုၵ်ႈလၢင်းၶဝ်႟။ ထွမ်ႇဢဝ်ၵႂၢမ်းပေႃႈမႄႈသူ၊ဢၼ်မႅၼ်ႈၸွမ်းဢလူဝ်ႇၸဝ်ႈၽြႃးၼၼ်ႉတႃႉ။ လွင်ႈၼႆႉ၊ပဵၼ်မဵဝ်းဢၼ်ၸိုဝ်ႈၸႂ်ႈလႄႈထုၵ်ႇလီႁဵတ်းဢေႃႈ။-
“ရူဝ်ႇသေႇၵူဝ်ယမ်ပေႃႈမႄႈမႂ်းတႃႉ” ဝႃႈၼင်ႇၼႆၼၼ်ႉပဵၼ်ပိင်းၺၢပ်ႈတြႃးၶေႃႈဢွၼ်တၢင်းဢၼ်ပႃးၵႂၢမ်းၵတိၸဝ်ႈပၼ်ဝႆႉဝႃႈ၊-
“မႂ်းတၵ်းလႆႈလီလႆႈပဵၼ်လႄႈဢသၢၵ်ႈတၵ်းယၢဝ်းယိုၼ်းၵႃႈၼိူဝ်လိၼ်မိူင်းဢေႃႈ။”
ၶဝ်ၸိူဝ်းဢၼ်ပဵၼ်ပေႃႈမႄႈၶဝ်႟။ ယႃႇပေႁဵတ်းႁႂ်ႈလုၵ်ႈလၢင်းသူလႆႈၸႂ်မႆႈလႄႈၶႂ်ႈၸႃႉ။ ၵူၺ်းၵႃႈ၊ပႂ်ႉထိင်းၶဝ်သင်ႇသွၼ်ၼႄတၢင်းၶဝ် ဢၼ်မႅၼ်ႈၵၼ်တင်းဢလူဝ်ႇၸဝ်ႈၽြႃးၼၼ်ႉသေယဝ်ႉ၊လဵင်ႉလူၶဝ်တႃႉ။
ၶဝ်ၸိူဝ်းဢၼ်ပဵၼ်ၶႃႈၶဝ်႟။ ၵူဝ်ႁႄသၼ်ႇဝႆယူႇယင်းဢမ်ႇမီးႁူဝ်ၸႂ်သွင်ငၢမ်ႈလႄႈထွမ်ႇဢဝ်ၵႂၢမ်းၵေႃႉဢၼ်ပဵၼ်ၸဝ်ႈသူၼႂ်းလေႃးၵႃႉၼႆႉ၊မိူၼ်ၸိူဝ်ႉၼင်ႇဢၼ်သူထွမ်ႇဢဝ်ၵႂၢမ်း ၸဝ်ႈၶရိၸ်ႈ၊ ၼၼ်ႉတႃႉ။-
ဢမ်ႇၸႂ်ႈဝႃႈႁဵတ်းၵၢၼ်မိူဝ်ႈဢၼ်ပိူၼ်ႈပႂ်ႉတူၺ်းသူယူႇၼၼ်ႉၵူၺ်း၊ဢၼ်ၼၼ်ႉပဵၼ်တၢင်းဢၼ်ဢဝ်ၸႂ်ပိူၼ်ႈႁဵတ်းႁႂ်ႈပိူၼ်ႈယွင်ႈသူဢေႃႈ။ ဢမ်ႇၸႂ်ႈၸိူဝ်ႉၼင်ႇၼၼ်သူတေလႆႈပႃးတင်းၸႂ်ၸေႇတၼႃႇသေႁဵတ်းၸွမ်းဢလူဝ်ႇၽြႃးပဵၼ်ၸဝ်ႈလႄႈႁဵတ်းမိူၼ်ၸိူဝ်ႉၼင်ႇဢၼ်ပဵၼ်ၶႃႈ ၸဝ်ႈၶရိၸ်ႈ၊ ၼၼ်ႉဢေႃႈ။-
ပႃးတင်းၸႂ်ဢၼ်လီဢၼ်ငၢမ်းသေလႄႈၶၢမ်ႇၸႂ်ႉသွႆတီႈၸဝ်ႈသူမိူၼ်ၸိူဝ်ႉၼင်ႇဢၼ်ၶၢမ်ႇၸႂ်ႉသွႆတီႈၽြႃးပဵၼ်ၸဝ်ႈတႃႉ။ ဢမ်ႇၸႂ်ႈမိူၼ်ၸိူဝ်ႉၼင်ႇဢၼ်ႁဵတ်းၵၢၼ်ပၼ်တီႈၵူၼ်း။-
ၸဝ်ႈၽြႃးတၵ်းတႅၼ်းပၼ်ဢၵျူဝ်းတီႈၵူႈၵေႃႉၵူႈၵူၼ်းၸဵမ်ၸဝ်ႈၸဵမ်ၶႃႈ၊ၸွမ်းၼင်ႇတၢင်းဢၼ်ၶဝ်ႁဵတ်းဢၼ်လီဢၼ်ငၢမ်းၼၼ်ႉဝႃႈၼႆမၢတ်ႈတွင်းဝႆႉတႃႉ။
သူၸိူဝ်းဢၼ်ပဵၼ်ၸဝ်ႈၶဝ်႟။ ယင်းဢမ်ႇလွၵ်ႇဢမ်ႇငိုတ်ႈၶႃႈသူလႄႈႁဵတ်းပၼ်လွင်ႈတၢင်းဢၼ်လီတီႈၶႃႈသူတႃႉ။ ၶုၵ်းၸႂ်လႆႈလွင်ႈဢၼ်ဝႃႈ၊ၸဝ်ႈဢၼ်မီးၵႃႈၼိူဝ်သူ၊ဢိၵ်ႇတင်းၸဝ်ႈဢၼ်မီးၵႃႈၼိူဝ်ၶႃႈသူၼၼ်ႉ၊ပဵၼ်ၸဝ်ႈပႃးလဵဝ်ၵၼ်ဢၼ်မီးၵႃႈၼိူဝ်မိူင်းၵၢင်ႁၢဝ်ၼၼ်ႉလႄႈမၼ်းၸဝ်ႈဢမ်ႇတူၺ်းၼႃႈလဵၵ်ႉၼႃႈယႂ်ႇၽူႈလႂ်ၼၼ်ႉတႃႉ။
ၵႂၢမ်းတီႈသုတ်းတီႈၵွႆၼႆႉၸမ်ႉ၊ပီႈၼွင်ႉၶဝ်႟။ ႁႂ်ႈမီးႁႅင်းဢၼ်တႄႇမၼ်ႈယူႇၵႃႈၼႂ်းၸဝ်ႈၽြႃး၊ဢိၵ်ႇတင်းၵႃႈၼႂ်းတၼ်းၶူဝ်းၸဝ်ႈဢၼ်ယႂ်ႇမျၢတ်ႈၼႃႇၼၼ်ႉတႃႉ။-
ဢဝ်ၶိူင်ႈလၢၵ်ႈၼၢၵ်ႈတင်းသဵင်ႈဢၼ်ၽြႃးပဵၼ်ၸဝ်ႈပၼ်ၼၼ်ႉသေလႄႈၼုင်ႈမႆတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊သူတေၸုၵ်းၶၢမ်ႇပရိယႄႇမႃႇၼၢတ်ႈလႆႈဢေႃႈ။-
လွင်ႈမၼ်းၸမ်ႉ၊ႁဝ်းလႆႈၶေႉၶဵင်ႇတိုၵ်းတေႃးၵၼ်တင်းရၢၼ်ႇသူႇဢၼ်မီးၼိူဝ်ႉမီးလိူတ်ႈမဵဝ်းၼၼ်ႉဢမ်ႇၸႂ်ႈ။ ႁဝ်းလႆႈၶတ်းတႃႉလႄႈႁႄႉၶႅင်ႇတိုၵ်းတေႃးၵၼ်တင်းဢၼ်ထွတ်ႈဢၼ်မျၢတ်ႈလႂ်၊ဢႃႇၼႃႇတၼ်းၶူဝ်းလႂ်၊ၶုၼ်ဢၼ်ဢုပ်ႉပိူင်ႇၼႂ်းလပ်းသိင်ႇလေႃးၵီႇလႂ်၊ၽီၽိူဝ်ႉႁၢႆႉဢၼ်ယူႇၵႃႈၼိူဝ်ၽႃႉၵၢင်ႁၢဝ်ၸိူဝ်းၼၼ်ႉဢေႃႈ။-
ပိူဝ်ႈၼႆလႄႈယိပ်းၵမ်ၶိူင်ႈလၢၵ်ႈၼၢၵ်ႈၸုမ်ႇၽြႃးပဵၼ်ၸဝ်ႈဝႆႉတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ၼႂ်းမိူဝ်ႈၶိင်ႇဝၼ်းဢၼ်ႁၢႆႉမိူၵ်ႈႁွတ်ႈမႃးၼၼ်ႉ၊သူတၵ်းၸၢင်ႈႁႄႉၶႅၼ်ၽေးရၢၼ်ႇသူႇဢၼ်မႃးတိုၵ်းတေႃးသူၼၼ်ႉသေလႄႈဝၢႆးသေတိုၵ်းတေႃးယဝ်ႉတူဝ်ႈၵႂႃႇၼၼ်ႉ၊သူယင်းတၵ်းတေၸုၵ်းၶၢမ်ႇဝႆႉယူႇလူးၵွၼ်ႇဢေႃႈ။
ၵွပ်ႈၼႆလႄႈဢဝ်သဵတ်ႈၸႃႇဢၼ်မိူၼ်သၢႆဢႅဝ်ၼၼ်ႉႁတ်ႉယူႇလႄႈဢဝ်ပႃႇရမီႇတၢင်းဢၼ်သိုဝ်ႈတေႃႇဢၼ်မိူၼ်ၶႅပ်းႁႄႉၼႃႈဢူၵ်းၼၼ်ႉၼုင်ႈမႆတႃႉ၊-
ဢဝ်သွၵ်းတိၼ်ဢၼ်ဝႃႈ၊တၢင်းဢၼ်ႁေႃးလၢတ်ႈၶၢဝ်ႇတြႃးသိူဝ်းပျေႃႇလွင်ႈတၢင်းၼိမ်ၼၼ်ႉတိုဝ်းတႃႉ၊-
ၵူႈၶိင်ႇၵူႈၶႃႇ၊ဢဝ်တင်းယုမ်ႇမၢတ်ႈဢၼ်မိူၼ်ၶိူင်ႈဢၼ်ႁႄႉလၢၵ်ႈၼၢၵ်ႈ၊ဢၼ်ႁႄႉၵင်ႈလႆႈလိမ်ႈၵၢင်ႇၽႆး၊ဢၼ်မႃႇၼၢတ်ႈပိုတ်းယိုဝ်းမႃးၼၼ်ႉၵင်ႈဝႆႉတႃႉ၊-
ဢဝ်တၢင်းၵႄႇၶျွတ်ႈဢၼ်မိူၼ်မွၵ်ႇႁူဝ်လဵၵ်းၼၼ်ႉသုပ်းဝႆႉတႃႉ။ ဢိၵ်ႇတင်းဢဝ်ၼုၵ်ႈၵပၢတ်ႈတြႃးၽြႃးပဵၼ်ၸဝ်ႈဢၼ်မိူၼ်လၢပ်ႇဝိၺိၺ်ႇၸဝ်ႈၼၼ်ႉ၊ယိပ်းၵမ်ဝႆႉတႃႉ။-
ဢိင်ပိုင်ႈဝိၺိၺ်ႇၸဝ်ႈသေလႄႈသူးတွင်းၵူႈၶိင်ႇၵူႈၶႃႇတႃႉ။ ၼင်ႇႁိုဝ်သူတၵ်းသူးတွင်းလဝ်ႈယွၼ်းၵူႈၸိူဝ်ႉၵူႈပိူင်ၸိုင်၊ယင်းဢမ်ႇမီးတၢင်းဢၼ်ၸႂ်လုႁႅင်းဢူၼ်ႈလႄႈ၊မီးၸႂ်ဢၼ်တူင်ႉတိုၼ်ႇယူႇသေယဝ်ႉ၊သူးတွင်းပုၼ်ႈၵူၼ်းမူတ်းၸၢင်ႇၸဝ်ႈတင်းလၢႆယူႇသေလႄႈပႂ်ႉထႃႈယူႇတႃႉ။-
ပုၼ်ႈၵဝ်ၵေႃႈ၊ၼင်ႇႁိုဝ်ၵဝ်တၵ်းလႆႈမီးဢၶႂၢင်ႉဢၼ်ပိုတ်ႇပၢၵ်ႇႁေႃးလၢတ်ႈၶၢဝ်ႇတြႃးသိူဝ်းပျေႃႇဢၼ်လိုၵ်ႉဢၼ်လမ်ႇၼၼ်ႉလူၺ်ႈၸႂ်ႁတ်းႁတ်းႁၢၼ်ႁၢၼ်ၼၼ်ႉၵေႃႈ၊သူးတွင်းပုၼ်ႈၵဝ်တႃႉ။-
ၵွပ်ႈပိူဝ်ႈၶၢဝ်ႇတြႃးသိူဝ်းပျေႃႇလႄႈၵဝ်လႆႈပဵၼ်ၽူႈတၢင်တူဝ် ၸဝ်ႈၶရိၸ်ႈ၊ လႄႈလႆႈၶၢမ်ႇတၢင်းဢၼ်ၸိူၵ်ႈလဵၵ်းမတ်ႉၽုၵ်ႇဝႆႉၼႆႉ၊ႁႂ်ႈၵဝ်လႆႈၽုၺ်ႇဢွၵ်ႇမွၵ်ႇလၢတ်ႈၵႃႈဢၼ်ၵဝ်ထုၵ်ႇလီႁေႃးလၢတ်ႈႁတ်းႁတ်းႁၢၼ်ႁၢၼ်ၼၼ်ႉၵေႃႈ၊သူးတွင်းပုၼ်ႈၵဝ်တႃႉ။
တုၶႅၵ်ႉ၊ ၵေႃႉပဵၼ်ၼွင်ႉ၊ဢၼ်ၵဝ်ႁၵ်ႉၼႃႇဢၼ်ႁဵတ်းသြႃႇဢၼ်မီးသဵတ်ႈၸႃႇၵႃႈတီႈၸဝ်ႈၽြႃး ယေႇသု၊ ၼၼ်ႉ၊တၵ်းမွၵ်ႇလၢတ်ႈၶၢဝ်ႇငၢဝ်းလွင်ႈၵဝ်တင်းသဵင်ႈတင်းလူင်၊ႁႂ်ႈသူလႆႈႁုလွင်ႈဢၼ်ၵဝ်ပဵၼ်ယူႇမီးယူႇၸိူဝ်ႉၼင်ႇႁိုဝ်၊ဢိၵ်ႇတင်းလွင်ႈတၢင်းဢၼ်ၵဝ်တၵ်းပွင်ႁဵတ်းပွင်သၢင်ႈၸိူဝ်ႉၼင်ႇႁိုဝ်ၼၼ်ႉယူႇဢေႃႈ။-
ၵွပ်ႈလွင်ႈၼႆႉလႄႈ၊ၵဝ်ပွႆႇၸႂ်ႉမၼ်းၵႂႃႇတီႈသူႁႂ်ႈသူလႆႈႁုလွင်ႈႁဝ်း၊ဢိၵ်ႇတင်းႁႂ်ႈမၼ်းလႆႈပၼ်ဢဵၼ်ပၼ်ႁႅင်းတီႈႁူဝ်ၸႂ်သူဢေႃႈ။
ႁႂ်ႈၽြႃးပေႃႈၸဝ်ႈတင်း ၸဝ်ႈယေႇသုၶရိၸ်ႈ၊ ပၼ်တၢင်းၼိမ်၊ဢိၵ်ႇတင်းတၢင်းႁၵ်ႉမႅတ်ႈတႃႇတင်းတၢင်းယုမ်ႇမၢတ်ႈၵႃႈတီႈပီႈၼွင်ႉတင်းလၢႆသေၵမ်းလူၺ်ႈ။-
ႁႂ်ႈသုၵျေးၸူးၸဝ်ႈမီးယူႇလူၺ်ႈၵၼ်တင်းၶဝ်ၸိူဝ်းဢၼ်ႁၵ်ႉၸဝ်ႈႁဝ်း ၸဝ်ႈယေႇသုၶရိၸ်ႈ၊ လူၺ်ႈတင်းတၢင်းႁၵ်ႉမႅတ်ႈတႃႇဢၼ်ဢမ်ႇသုတ်းသဵင်ႈလႆႈၼၼ်ႉသေၵမ်းလူၺ်ႈ။ လိၵ်ႈတြႃးဢေးၽႅတ်ႈယဝ်ႉယဝ်ႉဢေႃႈ။
ၵဝ် ပေႃးလု၊ တင်းသြႃႇ တိမေႃးသေႇ၊ ဢၼ်ပဵၼ်ၶႃႈ ၸဝ်ႈယေႇသုၶရိၸ်ႈ၊ ၼႆႉတႅမ်ႈလိၵ်ႈၽၢၵ်ႇထိုင်ၵူၼ်းမူတ်းၸၢင်ႇၸဝ်ႈတင်းလၢႆၸိူဝ်းဢၼ်မီးယူႇၵႃႈၼႂ်းဝဵင်း ၽိလိပ်ႉပိ၊ ၵႃႈမီးတင်းသဵင်ႈတင်းလူင်၊ပႃးတင်းသြႃႇဢုပ်ႉၸိူဝ်းၸဝ်ႈဢိၵ်ႇတင်းၵူၼ်းလူင်ၼႂ်းၸိူဝ်းၸဝ်ႈတင်းလၢႆဢေႃႈ။
ႁႂ်ႈပေႃႈၸဝ်ႈႁဝ်းၶႃႈ၊ၽြႃးပဵၼ်ၸဝ်ႈ၊ဢိၵ်ႇတင်းၸဝ်ႈၽြႃး ယေႇသုၶရိၸ်ႈ၊ ပၼ်သုၵျေးၸူးတၢင်းလီဢိၵ်ႇတင်းတၢင်းၼိမ်ၵႃႈၼိူဝ်သူသေၵမ်းလူၺ်ႈ။
ၼႂ်းမိူဝ်ႈဢၼ်ၵဝ်ၶႆႈၸႂ်ထိုင်သူၵူႈပွၵ်ႈၼၼ်ႉ ၵဝ်တၢင်ႇၵျေးၸူးၽြႃးပဵၼ်ၸဝ်ႈၵဝ်ပုၼ်ႈသူၵူႈၵေႃႉဢေႃႈ။-
ၼႂ်းမိူဝ်ႈဢၼ်ၵဝ်သူးတွင်းၵူႈပွၵ်ႈၼၼ်ႉၵဝ်သူးတွင်းပုၼ်ႈသူၵူႈၵေႃႉလူၺ်ႈတင်းၸႂ်ဢၼ်ၸူမ်းသိူဝ်းဢေႃႈ။-
ၵွပ်ႈပိူဝ်ႈလွင်ႈၸိူဝ်ႉႁိုဝ်ဝႃႈၼႆၸမ်ႉ၊ၵဝ်ၸူမ်းသိူဝ်းပိူဝ်ႈဢၼ်သူၸွႆႈထႅမ်ၵဝ်ၼႂ်းၼႃႈၵၢၼ်ၶၢဝ်ႇတြႃးသိူဝ်းပျေႃႇၸႃႉၸဵမ်မိူဝ်ႈဢွၼ်တၢင်းတေႃႇထိုင်ႁွတ်ႈဝၼ်းမိူဝ်ႈလဵဝ်ၼႆႉၼၼ်ႉဢေႃႈ။-
ၼင်ႇၼၼ်လႄႈၵဝ်ယုမ်ႇမၢတ်ႈတမ်းၸႂ်လွင်ႈဢၼ်ၽြႃးပဵၼ်ၸဝ်ႈဢၼ်တႄႇၸႃႉႁဵတ်းလွင်ႈတၢင်းဢၼ်လီဢၼ်ငၢမ်းၵႃႈၼႂ်းသူၼၼ်ႉ၊တၵ်းသိုပ်ႇႁဵတ်းၵႂႃႇတေႃႇထိုင်ႁွတ်ႈယဝ်ႉတူဝ်ႈလီငၢမ်းၼႂ်းဝၼ်းဢၼ် ၸဝ်ႈယေႇသုၶရိၸ်ႈ၊ တၵ်းမႃးၼၼ်ႉယူႇဢေႃႈ။-
ၵဝ်ထုၵ်ႇလီဝူၼ်ႉၸႂ်လူၺ်ႈလွင်ႈသူၸိူဝ်ႉၼင်ႇၼႆၵွပ်ႈပိူဝ်ႈၵဝ်ႁွပ်ႇဢုမ်ႈသူဝႆႉ၊ၼႂ်းဢူၵ်းၼႂ်းၸႂ်လူၺ်ႈလွင်ႈဢၼ်သူတင်းသဵင်ႈတင်းလူင်လႆႈၶၢမ်ႇဢဝ်ၵျေးၸူးၸဝ်ႈႁူမ်ႈၵၼ်တင်းၵဝ်၊ၸႃႉၸဵမ်တၢင်းဢၼ်ၵဝ်လႆႈတူၵ်းထွင်ႇယူႇတေႃႈလဵဝ်ဢိၵ်ႇတင်းတၢင်းဢၼ်ၵဝ်လႆႈလွတ်ႈလႅဝ်းႁႂ်ႈလႆႈၶၢမ်ႇသၢၵ်ႈသေႇၶၢဝ်ႇတြႃးသိူဝ်းပျေႃႇလႄႈႁႂ်ႈၶၢဝ်ႇတြႃးၼၼ်ႉတႄႇယူႇၼၼ်ႉဢေႃႈ။-
ၵွပ်ႈပိူဝ်ႈမႅတ်ႈတႃႇၵရုၼႃႇ ၸဝ်ႈယေႇသုၶရိၸ်ႈ၊ လႄႈၵဝ်ၶႆႈၸႂ်ထိုင်သူတင်းသဵင်ႈတင်းလူင်တႄႉတႄႉဝႃႈၼႆ၊ၽြႃးပဵၼ်ၸဝ်ႈပဵၼ်သၢၵ်ႈသေႇၽၢႆႇၵဝ်ဢေႃႈ။
ၵႂၢမ်းဢၼ်သူးတွင်းပုၼ်ႈသူၸမ်ႉ၊ႁႂ်ႈၸႂ်ႁၵ်ႉမႅတ်ႈတႃႇသူတၵ်းယႂ်ႇၼမ်မႃးလူၺ်ႈၺၢၼ်ႇပိင်ႇၺႃႇ ဢိၵ်ႇတင်းတၢင်းဢၼ်ၸၢင်ႈၸၵ်းၽႄၵူႈၸိူဝ်ႉၵူႈပိူင်ယူႇလႄႈ၊-
ႁႂ်ႈသူၸၢင်ႈလိူၵ်ႈဢဝ်လွင်ႈဢၼ်လီသေပိူၼ်ႈၸိူဝ်းၼၼ်ႉယူႇ၊ဢိၵ်ႇတင်းႁႂ်ႈသူတၵ်းမီးႁူဝ်ၸႂ်ဢၼ်ၶၢဝ်ၸၢင်ႇသေလႄႈၵၢင်းလွတ်ႈတင်းတၢင်းဢၼ်တၢင်ႇဢပျတ်ႈၼႂ်းမိုဝ်ႉဝၼ်းဢၼ် ၸဝ်ႈၶရိၸ်ႈ၊ တၵ်းမႃးၼၼ်ႉယူႇသေယဝ်ႉ၊-
ႁႂ်ႈသူတၵ်းပျေႉၸုမ်ႇတင်းတၢင်းၵမ်တၢင်းၵျၢင်ႉဢၼ်သိုဝ်ႈတေႃႇမဵဝ်းဢၼ်ၸၢင်ႈပဵၼ်မႃးၵႃႈတီႈ ၸဝ်ႈယေႇသုၶရိၸ်ႈ၊ ၼၼ်ႉယူႇ၊ၼင်ႇႁိုဝ်တၵ်းလႆႈယွင်ႈယေႃးမုၼ်ၽုင်းၽြႃးပဵၼ်ၸဝ်ႈၸိုင်၊ၵဝ်သူးတွင်းဢေႃႈ။
ပီႈၼွင်ႉၶဝ်႟။ ၵဝ်ၶႂ်ႈႁႂ်ႈသူႁုဝႃႈ၊ၵႃႈဢၼ်ပဵၼ်မႃးၼိူဝ်ၵဝ်ၼႆႉပဵၼ်လွင်ႈတၢင်းဢၼ်တႄႇႁဵတ်းႁႂ်ႈၶၢဝ်ႇတြႃးသိူဝ်းပျေႃႇၸဝ်ႈၸွတ်ႇတူဝ်ႈၵႂႃႇလၢႆတီႈလၢႆတၢင်းၼၼ်ႉဢေႃႈ။-
ၵွပ်ႈပိူဝ်ႈပဵၼ်ၸိူဝ်ႉၼင်ႇၼႆလႄႈ၊လွင်ႈဢၼ်ဝႃႈၵဝ်လႆႈၶၢမ်ႇတူၵ်းထွင်ႇဝႆႉၼႆႉပဵၼ်ၵွပ်ႈပိူဝ်ႈဢၼ်ၵဝ်ပွင်ႁဵတ်းၵၢၼ် ၸဝ်ႈၶရိၸ်ႈ၊ ၼၼ်ႉထၢင်ႇသႃးၸွတ်ႇတူဝ်ႈၵႂႃႇၵႃႈၼႂ်းႁေႃၶမ်းယဝ်ႉဢမ်ႇၵႃး၊ထၢင်ႇသႃးၵူႈတီႈၵူႈလႅၼ်ယူႇဢေႃႈ။-
ၼႆႉၵူၺ်းဢမ်ႇၵႃး၊တၢင်းဢၼ်ၵဝ်လႆႈၶၢမ်ႇတူၵ်းထွင်ႇၼႆႉႁဵတ်းႁႂ်ႈပီႈၼွင်ႉၼႂ်းၸဝ်ႈၽြႃးၼမ်ၼႃႇမီးတၢင်းဢၼ်ယုမ်ႇယမ်တမ်းၸႂ်ၼႂ်းၸဝ်ႈၽြႃးမႃးဢိၵ်ႇတင်းႁႂ်ႈၶဝ်ဢမ်ႇၵူဝ်ဢမ်ႇႁႄ၊ယဵင်ႈၶႅၼ်းႁတ်းႁေႃးလၢတ်ႈၼုၵ်ႈၵပၢတ်ႈတြႃးၸဝ်ႈမႃးဢေႃႈ။
ၵမ်ႈၽွင်ႈၵူၺ်းၶႂ်ႈသီႈၵေႉႁဵတ်းတၢင်းဢၼ်ၽိတ်းၵၼ်လႄႈႁေႃးလၢတ်ႈတြႃး ၸဝ်ႈၶရိၸ်ႈ၊ ဢေႃႈ။ ၵူၺ်းၵႃႈ၊ၵမ်ႈၽွင်ႈတိုၼ်းမီးၸႂ်ၸေႇတၼႃႇသေလႄႈႁေႃးဢေႃႈ။-
ၸုမ်းဢၼ်ဝႃႈမႃးပႃႈလိုၼ်းၼႆႉ ႁုလွင်ႈဢၼ်ၽြႃးပဵၼ်ၸဝ်ႈပၼ်ၵၢၼ်ႁႂ်ႈၵဝ်လႆႈၵႅတ်ႇၶႄႁႄႉၵင်ႈၶၢဝ်ႇတြႃးသိူဝ်းပျေႃႇၸဝ်ႈလႄႈၶဝ်မီးၸႂ်မႅတ်ႈတႃႇႁေႃးလၢတ်ႈတြႃးၸဝ်ႈဢေႃႈ။-
ၸုမ်းဢၼ်ဝႃႈမႃးဢွၼ်တၢင်းၼၼ်ႉၸမ်ႉ၊မီးၸႂ်သၽေႃးဢၼ်ဢမ်ႇသိုဝ်ႈလႄႈႁေႃးလၢတ်ႈဢေႃႈ။ ၶဝ်ၵူၺ်းမီးၸႂ်ဢၼ်ဢမ်ႇၼႃႇလူဝ်ႇလႄႈၶႂ်ႈႁႂ်ႈၵဝ်ယဵင်ႈၶႅၼ်းၶၢၼ်ၸႂ်ၼႃႇၼႂ်းတၢင်းဢၼ်ၵဝ်လႆႈတူၵ်းထွင်ႇၼႆႉၵူၺ်းဢေႃႈ။
ယႃႇမၼ်းတႃႉ။ ၽူႈလႂ်မီးၸႂ်ဢၼ်ႁဵတ်းႁၢင်ႈလႄႈႁေႃးလၢတ်ႈသေဢမ်ႇဝႃႈ၊မီးၸႂ်ဢၼ်ၸိုဝ်ႈၸႂ်ႈလႄႈႁေႃးလၢတ်ႈသေဢမ်ႇဝႃႈ၊သမ်ႉမီးသၽေႃးၸိူဝ်ႉၼင်ႇႁိုဝ်လႄႈႁေႃးလၢတ်ႈသေဢမ်ႇဝႃႈ၊ပဵၼ်ဢၼ်မၼ်းႁေႃးလၢတ်ႈတြႃး ၸဝ်ႈၶရိၸ်ႈ၊ ၵူၺ်းလႄႈၵဝ်ၸူမ်းသိူဝ်းဢေႃႈ။-
ၵဝ်တၵ်းလႆႈၸူမ်းသိူဝ်းတႄႉဢေႃႈ။ လွင်ႈမၼ်းၸမ်ႉ၊ၵဝ်လႆႈႁုႁၼ်လွင်ႈဢၼ်ၵဝ်တၵ်းလႆႈၶၢမ်ႇတၢင်းဢၼ်ၵႄႇသႄႇပွႆႇလွတ်ႈၵွပ်ႈပိူဝ်ႈဢၼ်သူသူးတွင်း၊ဢိၵ်ႇတင်းၵွပ်ႈပိူဝ်ႈဢၼ်ဝိၺိၺ်ႇ ၸဝ်ႈယေႇသုၶရိၸ်ႈ၊ ၸွႆႈထႅမ်ၼၼ်ႉဢေႃႈ။-
လွင်ႈတၢင်းဢၼ်ၵဝ်မီးဢလူဝ်ႇလႄႈမုင်ႈမွင်းၸမ်ႉ၊ၼင်ႇႁိုဝ်ၵဝ်တၵ်းဢမ်ႇလႆႈဢူၵ်းလႆႈဢၢႆၵွပ်ႈပိူဝ်ႈလွင်ႈသေၸိူဝ်ႉသေပိူင်လႄႈ၊မိူဝ်ႈလဵဝ်ၼႆႉၵဝ်တၵ်းတဵမ်ဝႆႉတင်းၸႂ်ဢၼ်ႁတ်းႁၢၼ်ယူႇ၊ၵဝ်ဢသၢၵ်ႈလိပ်းသေဢမ်ႇဝႃႈ၊ၵဝ်တၢႆသေဢမ်ႇဝႃႈ၊ႁႂ်ႈမုၼ်ၵုင်ႇ ၸဝ်ႈၶရိၸ်ႈ၊ ထၢင်ႇသႃးယူႇၼႂ်းတူဝ်ၶၼ်ႇထႃႇၵဝ်တႃႇသေႇဢမ်ႇထၢတ်ႇၼၼ်ႉဢေႃႈ။-
လွင်ႈမၼ်းၸမ်ႉ၊ပုၼ်ႈၵဝ်ၸိုင်၊တၢင်းဢၼ်ဢသၢၵ်ႈလိပ်းၼႆႉပဵၼ် ၸဝ်ႈၶရိၸ်ႈ၊ ဢေႃႈ။ သမ်ႉတၢႆၵႂႃႇသေၵေႃႈတၵ်းမီးဢၵျူဝ်းဢေႃႈ။-
ၼႂ်းဝႃႈၼၼ်သေၵေႃႈပေႃးၵဝ်ယင်းမီးဢသၢၵ်ႈယူႇၼႂ်းတူဝ်ၶၼ်ႇထႃႇၸိုင်၊ၵဝ်တၵ်းလႆႈယဵင်ႈၶႅၼ်းပွင်ႁဵတ်းၵၢၼ်ငၢၼ်းဢၼ်မီးဢၵျူဝ်းယႂ်ႇၼႃႇဢေႃႈ၊ဝႃႈၼႆသေၵေႃႈ၊ၵဝ်တေလိူၵ်ႈဢဝ်ဢၵျူဝ်းဢၼ်လႂ်ဝႃႈၼႆၵဝ်ဢမ်ႇပႆႇႁု။-
ၵဝ်လႆႈတူၵ်းၵၢင်ၸႂ်ယူႇၼႂ်းဝူင်ႈၵၢင်ဢၵျူဝ်းသွင်ပိူင်ၼႆႉဢေႃႈ။ ၵဝ်မီးၸႂ်ဢၼ်ၶႂ်ႈပူၼ်ႉသေၸၢတ်ႈၼႆႉလႄႈယူႇလူၺ်ႈၵၼ်တင်း ၸဝ်ႈၶရိၸ်ႈ၊ ဢၼ်ယဵင်ႈၶႅၼ်းလီၸူမ်းသိူဝ်းၼႃႇၼၼ်ႉဢေႃႈ။-
ၵူၺ်းၵႃႈ၊တၢင်းဢၼ်ယင်းမီးယူႇၼႂ်းတူဝ်ၶၼ်ႇထႃႇၼႆႉယဵင်ႈၶႅၼ်းပဵၼ်ဢၵျူဝ်းယႂ်ႇၼႃႇပုၼ်ႈတႃႇသူဢေႃႈ။-
ထွၵ်ႈလူၺ်ႈလွင်ႈတၢင်းၼႆႉလႄႈၵဝ်ႁုဝႃႈၵဝ်ထုၵ်ႇလီမီးယူႇသေလႄႈႁဵတ်းၵေႃႉသႄႈသူၵႃႈမီးတင်းသဵင်ႈတင်းလူင်ယူႇပုၼ်ႈလွင်ႈၼင်ႇႁိုဝ်သူတၵ်းၶိုၼ်ႈယႂ်ႇမႂ်ႇသုင်မႃးဢိၵ်ႇတင်းၼင်ႇႁိုဝ်သူတၵ်းလႆႈၸူမ်းသိူဝ်းၼႂ်းတၢင်းယုမ်ႇမၢတ်ႈဢေႃႈ။-
ၵွပ်ႈၼၼ်လႄႈ၊သူတၵ်းလႆႈဢိင်ပိုင်ႈ ၸဝ်ႈယေႇသုၶရိၸ်ႈ၊ သေလႄႈယဵင်ႈၶႅၼ်းလႆႈသိူဝ်းပျေႃႇလူၺ်ႈလွင်ႈၵဝ်၊ၵွပ်ႈပိူဝ်ႈၵဝ်တၵ်းသမ်ႉၶိုၼ်းမႃးတီႈသူထႅင်ႈပွၵ်ႈၼိုင်ႈၼၼ်ႉဢေႃႈ။
ဢွၼ်ၵၼ်ၵမ်ၵျၢင်ႉသၢင်ႈႁဵတ်းဢၼ်ထုၵ်ႇမႅၼ်ႈတင်းၶၢဝ်ႇတြႃးသိူဝ်းပျေႃႇ ၸဝ်ႈၶရိၸ်ႈ၊ ၼၼ်ႉၵူၺ်းတႃႉ။ ပိၵ်ႉသမ်ႉၵဝ်ႁွတ်ႈၵႂႃႇလႄႈထူပ်းႁၼ်သူလႆႈသေဢမ်ႇဝႃႈ၊ဢမ်ႇပဵၼ်ၵႂႃႇလႆႈသေဢမ်ႇဝႃႈ၊ၵဝ်တၵ်းလႆႈႁုလႆႈငိၼ်းလွင်ႈဢၼ်သူၸုၵ်းၶၢမ်ႇတႄႇယူႇၼႂ်းၸႂ်သၽေႃးဢၼ်လဵဝ်ၵူၺ်းလႄႈၽွမ်ႉၸႂ်ၵၼ်ၵႆႉၶတ်းၸႂ်ပုၼ်ႈတၢင်းယုမ်ႇမၢတ်ႈၼႂ်းၶၢဝ်ႇတြႃးသိူဝ်းပျေႃႇၸဝ်ႈၼၼ်ႉ။-
လွင်ႈတၢင်းဢၼ်သူယင်းဢမ်ႇၵူဝ်ဢမ်ႇသၼ်ႇၵွပ်ႈရၢၼ်ႇသူႇတင်းလၢႆလႃးလႃးၼၼ်ႉပဵၼ်ၼိမိၵ်ႈလၢၵ်ႈၶၼႃႇ တၢင်းဢၼ်လုသုမ်းပုၼ်ႈၶဝ်ဢေႃႈ။ ပုၼ်ႈသူၸမ်ႉ၊ပဵၼ်ၼိမိၵ်ႈလၢၵ်ႈၶၼႃႇတၢင်းဢၼ်ၵႄႇၶျွတ်ႈဢဝ်ဢၼ်လႆႈမႃးၵႃႈတီႈၽြႃးပဵၼ်ၸဝ်ႈဢေႃႈ။-
ထွၵ်ႈလူၺ်ႈ ၸဝ်ႈၶရိၸ်ႈ၊ လႄႈသူလႆႈဢၶႂၢင်ႉဢၼ်သူယုမ်ႇမၢတ်ႈမၼ်းၸဝ်ႈၵူၺ်းဢမ်ႇၵႃး၊လႆႈဢၶႂၢင်ႉဢၼ်တၵ်းလႆႈၶၢမ်ႇတုၵ်ႉၶႃႉပုၼ်ႈမၼ်းၸဝ်ႈၼၼ်ႉဢေႃႈ။-
ၼင်ႇၼၼ်လႄႈ သူလႆႈၶဝ်ႈပႃးႁူမ်ႈလူၺ်ႈၵဝ်ၼႂ်းတၢင်းဢၼ်တိုၵ်းတေႃးဢၼ်သူလႆႈႁၼ်ၵဝ်ယၢမ်ႈတိုၵ်းတေႃးမိူဝ်ႈဢွၼ်ၼႆႉလႄႈ၊ဢၼ်တေႃႈလဵဝ်ၼႆႉၵေႃႈသူလႆႈငိၼ်းၵဝ်ယင်းတိုၵ်ႉတိုၵ်းတေႃးယူႇၼၼ်ႉဢေႃႈ။
သူမီးၸႂ်ႁႅင်းယႂ်ႇယူႇၼႂ်း ၸဝ်ႈၶရိၸ်ႈ၊ လႄႈမႅတ်ႈတႃႇၸဝ်ႈပၼ်ႁႂ်ႈႁူဝ်ၸႂ်သူၵတ်းယဵၼ်ၶျၢမ်းသႃႇယူႇသေယဝ်ႉ၊သူလႆႈတႄႇယူႇၼႂ်းဝိၺိၺ်ႇၸဝ်ႈဢိၵ်ႇတင်းသူမီးၸႂ်ဢၼ်ၸၢင်ႈႁၵ်ႉဢဵတ်းလူၵၼ်ယူႇဢမ်ႇၸႂ်ႈႁိုဝ်း။-
ပိူဝ်ႈၼႆလႄႈ၊ပုၼ်ႈလွင်ႈၼင်ႇႁိုဝ်ၵဝ်တၵ်းလႆႈၸူမ်းသိူဝ်းတဵမ်ထူၼ်ႈလူၺ်ႈတၢင်းဢၼ်သူတၵ်းၵျၢမ်ႇပွင်ဢၼ်လဵဝ်ၵၼ်ယူႇ၊တၵ်းႁၵ်ႉပႅင်းၵၼ်ၼႂ်းမႅတ်ႈတႃႇဢၼ်လဵဝ်ယူႇ၊ယင်းဢမ်ႇမီးၸႂ်ဢၼ်ၽၢတ်ႇၽႄၵၼ်လႄႈတၵ်းမီးၸႂ်သၽေႃးသဵၼ်ႈလဵဝ်ၵၼ်ယူႇၸိုင်၊ၵဝ်တိုၵ်းယူင်းသူဢေႃႈ။-
ယႃႇပေမီးၸႂ်သၽေႃးဢၼ်တူၺ်းထိုင်ပုၼ်ႈတူဝ်ၸဝ်ႈၵဝ်ႇ၊ယႃႇပေမီးၸႂ်ဢၼ်ၸပ်းၸွႆးၶႂ်ႈလႆႈၸိုဝ်ႈယႂ်ႇသဵင်ယႂ်ႇလႄႈ၊ၵူၺ်းမီးႁူဝ်ၸႂ်ဢၼ်ၶျႃးတႅမ်ႇဢိၵ်ႇတင်းတၢင်းဢၼ်ၵေႃႉၼိုင်ႈလႄႈၵေႃႉၼိုင်ႈမၢတ်ႈမၢတ်ႈတီႈၵၼ်လႄႈဝႃႈ၊ပိူၼ်ႈတၢင်ႇၵေႃႉယႂ်ႇမျၢတ်ႈသေတူဝ်ၸဝ်ႈၵဝ်ႇၼၼ်ႉတႃႉ။-
လိူဝ်သေၼၼ်ႉ၊ယင်းဢမ်ႇတူၺ်းဢၵျူဝ်းတူဝ်ၸဝ်ႈၵဝ်ႇၵူၺ်းလႄႈတူၺ်းပႃးဢၵျူဝ်းပိူၼ်ႈတၢင်ႇၵေႃႉတႃႉ။-
ႁႂ်ႈၸႂ်သၽေႃး ၸဝ်ႈၶရိၸ်ႈ၊ ၼၼ်ႉမီးၼႂ်းသူတႃႉ။
ၸႂ်သၽေႃးမၼ်းၸဝ်ႈၸမ်ႉ၊ မၼ်းၸဝ်ႈၼၼ်ႉပျေႉၸုမ်ႇဝႆႉတင်းပုင်ႇႁၢင်ႈၽြႃးပဵၼ်ၸဝ်ႈတႃႇသေႇသေၵေႃႈ။ ၸႂ်သၽေႃးမၼ်းၸဝ်ႈၼၼ်ႉဢမ်ႇမၢတ်ႈဝႃႈ၊ တၢင်းဢၼ်ပဵင်းတၢၼ်ႇၵၼ်တင်းၽြႃးပဵၼ်ၸဝ်ႈၼၼ်ႉ၊ပဵၼ်လွင်ႈဢၼ်တၵ်းလႆႈဢဝ်သိမ်းဝႆႉဢေႃႈ။
ၵူၺ်းၵႃႈ၊မၼ်းၸဝ်ႈၸုၼ်ႉပႅတ်ႈမုၼ်သရေႇတူဝ်ၸဝ်ႈၵဝ်ႇတင်းသဵင်ႈတင်းလူင်၊ ၶၢမ်ႇပဵၼ်ၼင်ႇႁၢင်ႈပဵၼ်ၶႃႈဢမ်ႇၵႃး၊ ၶၢမ်ႇတၢင်းဢၼ်ၵိူတ်ႇပဵၼ်ၵူၼ်းမႃးဢေႃႈ။
ၸိူဝ်ႉၼင်ႇဢၼ်ပဵၼ်ပုင်ႇႁၢင်ႈၵူၼ်းၼၼ်ႉၸိုင်၊ မၼ်းၸဝ်ႈၶျႃးတူဝ်ၸဝ်ႈၵဝ်ႇတူၵ်းတႅမ်ႇၵူမ်ႈၵွမ်း၊ ပႆၸွမ်းၼႂ်းသဵၼ်ႈတၢင်းဢၼ်ထွမ်ႇဢဝ် တေႃႇထိုင်ႁွတ်ႈၶၢမ်ႇတၢႆ၊ထၢၼ်ႈပေႃး ၶၢမ်ႇတၢႆၵႃႈၼိူဝ်သဝ်မႆႉဝႃးမိုဝ်းဢေႃႈ။
ၵွပ်ႈလွင်ႈတၢင်းၼႆႉယဝ်ႉ၊ၽြႃးပဵၼ်ၸဝ်ႈယုၵ်ႉယွင်ႈမၼ်းၸဝ်ႈတီႈဢၼ်သုင်တွၼ်းလိူဝ်၊ သမ်ႉပၼ်ၸိုဝ်ႈသဵင်ဢၼ်ယႂ်ႇမျၢတ်ႈသေၸိုဝ်ႈသဵင်တင်းလၢႆဢေႃႈ။
ပိူဝ်ႈၼႆၸင်ႇ၊သတ်ႉတဝႃႇၵၢင်ႁၢဝ်၊သတ်ႉတဝႃႇလိၼ်မိူင်း၊ သတ်ႉတဝႃႇဢၼ်မီးတႂ်ႈလိၼ်မိူင်း၊တၵ်းႁႂ်ႈလႆႈၶုပ်ႉမူပ်ႇ၊ ၵူဝ်းၵႂၢႆႇၸိုဝ်ႈသဵင် ၸဝ်ႈယေႇသု၊ လႄႈ။
သူပ်းတင်းလၢႆတၵ်းလႆႈႁပ်ႉတုင်းဢဝ်လႄႈဝႃႈ၊ ၸဝ်ႈယေႇသုၶရိၸ်ႈ၊ ပဵၼ်ၸဝ်ႈၽြႃးဢေႃႈ။ ဝႃႈၼင်ႇၼႆလႄႈ၊ႁႂ်ႈမုၼ်သရေႇၽြႃးပေႃႈၸဝ်ႈထၢင်ႇသႃးမႃးဢေႃႈ။
ပိူဝ်ႈဢၼ်ပဵၼ်ၸိူဝ်ႉၼင်ႇၼႆလႄႈ၊ၵေႃႉသႄႈဢၼ်ၵဝ်ႁၵ်ႉၶဝ်႟။ ၸိူဝ်ႉၼင်ႇဢၼ်သူယၢမ်ႈထွမ်ႇဢဝ်ၵႂၢမ်းၵဝ်တႂ်ႈတႃၵူၺ်းဢမ်ႇၵႃး၊တေႃႈလဵဝ်ၼႆႉလပ်ႉလင်ၵဝ်ၵေႃႈ၊ယဵင်ႈၶႅၼ်းလူဝ်ႇထွမ်ႇဢဝ်ယူႇလူးၵွၼ်ႇဢေႃႈ။ မီးၸႂ်ဢၼ်ၵူဝ်ႁႄသၼ်ႇဝႆယူႇသေလႄႈၵႆႉၶတ်းၸႂ်ႁႂ်ႈတြႃးတၢင်းဢၼ်ၵႄႇၶျွတ်ႈပျေႉၸုမ်ႇၼႂ်းသူတႃႉ။-
လွင်ႈမၼ်းၸမ်ႉ၊ၽြႃးပဵၼ်ၸဝ်ႈယင်းပွင်ႁဵတ်းၵႃႈၼႂ်းသူႁႂ်ႈသူလႆႈမီးဢလူဝ်ႇဢိၵ်ႇတင်းႁႂ်ႈသူလႆႈၵမ်ၵျၢင်ႉၸွမ်းဢလူဝ်ႇၽြႃးပဵၼ်ၸဝ်ႈဢေႃႈ။
ယင်းဢမ်ႇပွင်ႉဢမ်ႇၶၢင်း၊ဢမ်ႇတွပ်ႇဢမ်ႇထဵင်လႄႈပွင်ႁဵတ်းလွင်ႈတၢင်းၵူႈၸိူဝ်ႉၵူႈပိူင်ယူႇတႃႉ။-
ပေႃးႁဵတ်းၸိူဝ်ႉၼင်ႇၼၼ်ၸိုင်၊သူတၵ်းဢမ်ႇမီးတီႈတၵ်းတၢင်ႇဢပျတ်ႈ၊ၶၢဝ်ၸၢင်ႇယူႇလႄႈပဵၼ်လုၵ်ႈၽြႃးပဵၼ်ၸဝ်ႈဢၼ်ၵၢင်းလွတ်ႈတၢင်းဢၼ်ပိူၼ်ႈတၢင်ႇဢပျတ်ႈလႄႈဢသၢၵ်ႈလိပ်းယူႇၵႃႈၼႂ်းၵႄႈၵၢင်ၵူၼ်းလေႃးၵီႇဢၼ်ဢမ်ႇသိုဝ်ႈဢမ်ႇတြႃးလႄႈၸၢင်ႈၽွၵ်ႈပျၢၼ်ႇလႅၵ်ႈလၢႆႈၼႆႉဢေႃႈ။ ႁႂ်ႈဢၼ်လႅင်းသူထွင်ႇႁိူဝ်ႈႁိူင်းၸိူဝ်ႉၼင်ႇဢၼ်လႅင်းၵၢင်ဝၼ်း၊လိူၼ်လၢဝ်ၵၢင်ႁၢဝ်ၼၼ်ႉယူႇၵႃႈတီႈၶဝ်ၸိူဝ်ႉၼင်ႇၼၼ်၊-
ၼႂ်းတၢင်းဢၼ်သူၼႄပျႃးၼုၵ်ႈၵပၢတ်ႈတြႃးဢၼ်မီးဢသၢၵ်ႈၼၼ်ႉတႃႉ။ ပေႃးႁဵတ်းၸိူဝ်ႉၼင်ႇၼႆၸိုင်၊ၵဝ်တေလႆႈဢုပ်ႇဝၢဝ်းသိူဝ်းပျေႃႇၼႂ်းဝၼ်း ၸဝ်ႈၶရိၸ်ႈ၊ ၵွပ်ႈပိူဝ်ႈၵၢၼ်ငၢၼ်းဢၼ်ၵဝ်ၶတ်းၸႂ်ႁဵတ်းၼၼ်ႉဢၵျူဝ်းမၼ်းဢမ်ႇလုလႆႈဢေႃႈ။
လိူဝ်သေၼၼ်ႉ၊သင်ဝႃႈၵဝ်လူဝ်ႇလႆႈဢဝ်လိူတ်ႈၵဝ်သၢၵ်ႈလူႇၸိူဝ်ႉၼင်ႇၶိူင်ႈတၢင်းလူႇပုၼ်ႈတၢင်းယုမ်ႇမၢတ်ႈသူဝႃႈၼႆသေၵေႃႈ၊ၵဝ်သိူဝ်းပျေႃႇဢမ်ႇၵႃး၊ၵဝ်ယင်းသိူဝ်းပျေႃႇလူၺ်ႈၵၼ်တင်းသူၵႃႈမီးတင်းသဵင်ႈတင်းလူင်ဢေႃႈ။-
မိူၼ်ၸိူဝ်ႉၼင်ႇၼၼ်သူၵေႃႈသိူဝ်းပျေႃႇတႃႉ။ သိူဝ်းပျေႃႇလူၺ်ႈၵၼ်တင်းၵဝ်တႃႉ။
ၵဝ်ဢိင်ပိုင်ႈၸဝ်ႈၽြႃး ယေႇသု၊ ႁႂ်ႈလႆႈၸဵဝ်းပွႆႇၸႂ်ႉသြႃႇ တိမေႃးသေႇ၊ ၵႂႃႇၸူးသူႁႂ်ႈၵဝ်လႆႈငိၼ်းၶၢဝ်ႇငၢဝ်းသူလႄႈလႆႈသၢၵ်ႈသႃႇၸႂ်ၼၼ်ႉဢေႃႈ။-
ၵဝ်ဢမ်ႇမီးသေၵေႃႉသေၵူၼ်းဢၼ်ၸႂ်သၽေႃးမိူၼ်မၼ်းၸၢင်ႈမေႃၶႆႈၸႂ်လူတူၺ်းဢၵျူဝ်းသူၼၼ်ႉဢေႃႈ။-
ပိူၼ်ႈတၢင်ႇၵေႃႉၸိူဝ်းၼၼ်ႉယင်းဢမ်ႇမႆႈၸႂ်လူတူၺ်းဢၵျူဝ်း ၸဝ်ႈယေႇသုၶရိၸ်ႈ၊ လႄႈၸၢင်ႈႁႃဢၵျူဝ်းတူဝ်ၸဝ်ႈၵဝ်ႇၵူၺ်းဢေႃႈ။-
ၵူၺ်းၵႃႈ၊သြႃႇ တိမေႃးသေႇ၊ ၸမ်ႉ၊မီးဢၵျူဝ်းထၼ်ႇႁိုဝ်သူႁုယူႇဢေႃႈ။ ၼႂ်းတၢင်းဢၼ်မၼ်းပွင်ၵၢၼ်ၶၢဝ်ႇတြႃးသိူဝ်းပျေႃႇလူၺ်ႈၵၼ်တင်းၵဝ်ၼၼ်ႉ၊ပေႃးတၢၼ်ႇပဵၼ်ပေႃႈလုၵ်ႈၵၼ်ဢေႃႈ။-
ပိူဝ်ႈၼႆလႄႈမိူဝ်ႈဢၼ်ၵဝ်လႆႈႁုလွင်ႈဢၼ်တၵ်းပဵၼ်ၸိူဝ်ႉၼင်ႇႁိုဝ်မႃးတီႈၵဝ်ၼၼ်ႉၵမ်းလဵဝ်ၸိုင်၊ၵဝ်ဢၢင်ႈပွႆႇၸႂ်ႉမၼ်းၵႂႃႇၸူးသူဢေႃႈ။-
ၵဝ်ၵေႃႈၼင်ႇႁိုဝ်တေၸဵဝ်းႁွတ်ႈၽႅဝ်တီႈသူၸိုင်၊ၵဝ်ယုမ်ႇမၢတ်ႈၸပ်းၸွႆးၼႂ်းၸဝ်ႈၽြႃးယူႇဢေႃႈ။
ၵဝ်ထၢင်ႇတႄႉ၊ၵဝ်လူဝ်ႇပွႆႇၸႂ်ႉၼွင်ႉၵဝ် ဢေးပႃႉၽရေႃးတိတ်ႉ၊ ၵေႃႉဢၼ်ႁူမ်ႈၵၢၼ်လူၺ်ႈၵၼ်တင်းၵဝ်လႄႈပဵၼ်ၵူၼ်းသိုၵ်းႁူမ်ႈလူၺ်ႈၵၼ်တင်းၵဝ်ဢၼ်ဝႃႈ၊ၽူႈတၢင်တူဝ်သူမႃးၸွႆႈထႅမ်လူတူၺ်းၵဝ်ၼၼ်ႉၵႂႃႇတီႈသူတေႃႈလဵဝ်ၼႆႉဢေႃႈ။-
မၼ်းၸႂ်ထိုင်သူတင်းသဵင်ႈတင်းလူင်လႄႈ၊မီးၸႂ်ဢၼ်ဢမ်ႇသႃႇၼႃႇလူင်လၢင်ၵွပ်ႈပိူဝ်ႈဢၼ်သူလႆႈငိၼ်းၶၢဝ်ႇဢၼ်မၼ်းဢမ်ႇယူႇလီၼၼ်ႉဢေႃႈ။-
မၼ်းမီးၶႆႈမီးၼၢဝ်ၼႃႇလူင်လၢင်ထၢၼ်ႈပေႃးၸမ်တၵ်းတၢႆဢေႃႈ။ ၵူၺ်းၵႃႈ၊ၽြႃးပဵၼ်ၸဝ်ႈဢဵတ်းလူမၼ်းဢေႃႈ။ ဢဵတ်းလူမၼ်းၵူၺ်းဢမ်ႇၵႃး၊ဢဵတ်းလူပႃးတင်းၵဝ်၊ပေႃးဢမ်ႇၼၼ်ၵဝ်တၵ်းလႆႈၶၢၼ်ၸႂ်ယဝ်ႉၶၢၼ်ၸႂ်ထႅင်ႈဢေႃႈ။-
ပိူဝ်ႈၼႆၸင်ႇၵဝ်ယဵင်ႈၶႅၼ်းၶႂ်ႈပွႆႇၸႂ်ႉမၼ်းၵႂႃႇၸူးသူႁႂ်ႈသူလႆႈထူပ်းႁၼ်မၼ်းၸူမ်းၸူမ်းသိူဝ်းသိူဝ်းလႄႈ၊တၢင်းဢၼ်ၸႂ်မႆႈၸႂ်လဵၵ်ႉၵဝ်ၵေႃႈတၵ်းႁၢႆၵႂႃႇဢေႃႈ။-
ပိူဝ်ႈၼႆလႄႈတွၼ်ႈႁပ်ႉဢဝ်မၼ်းမိူၼ်ၸိူဝ်ႉၼင်ႇပီႈၼွင်ႉၵၼ်ၼႂ်းၸဝ်ႈၽြႃးလူၺ်ႈၸႂ်ဢၼ်သိူဝ်းပျေႃႇတႃႉ။ ရူဝ်ႇသေႇၵူဝ်ယမ်ၵူၼ်းၸိူဝ်ႉၼင်ႇမၼ်းၼၼ်ႉတႃႉ။-
လွင်ႈမၼ်းၸမ်ႉ၊မၼ်းၶၢမ်ႇတၢင်းယၢပ်ႇပွင်ႁဵတ်းၵၢၼ် ၸဝ်ႈၶရိၸ်ႈ၊ တေႃႇထိုင်ႁွတ်ႈၸမ်တၵ်းတၢႆၵႂႃႇၼႂ်းတၢင်းဢၼ်မၼ်းတၢင်တူဝ်သူသေလႄႈၸွႆႈထႅမ်ၵဝ်ယဝ်ႉတူဝ်ႈၵႂႃႇပျေႉပျေႉၸုမ်ႇၸုမ်ႇၼၼ်ႉဢေႃႈ။
ၵႂၢမ်းဢၼ်သုတ်းဢၼ်ၵွႆၸမ်ႉ၊ပီႈၼွင်ႉၶဝ်႟။ မီးၸႂ်ဢၼ်သိူဝ်းပျေႃႇၼႂ်းၸဝ်ႈၽြႃးတႃႉ။ တၢင်းဢၼ်သမ်ႉၵႂၢမ်းၵဝ်ႇလႄႈတႅမ်ႈပၼ်သူယူႇၶိူဝ်းၶိူဝ်းယႂ်းယႂ်းၼႆႉဢမ်ႇယၢပ်ႇၸႂ်ပုၼ်ႈၵဝ်သေၵေႃႈပုၼ်ႈသူၸမ်ႉ၊မီးဢၵျူဝ်းဢေႃႈ။-
ဝႆႉသတိ တီႈၶဝ်ၸိူဝ်းဢၼ်မီးၸႂ်မႃၸိူဝ်းၼၼ်ႉတႃႉ။ ဝႆႉသတိတီႈၶဝ်ၸိူဝ်းဢၼ်ၵမ်ၵျၢင်ႉဢမ်ႇလီဢမ်ႇငၢမ်းၸိူဝ်းၼၼ်ႉတႃႉ။ ဝႆႉသတိတီႈၶဝ်ၸိူဝ်းဢၼ်ပၢတ်ႇၼိူဝ်ႉပၢတ်ႇၼင်ၼၼ်ႉတႃႉ။-
ႁဝ်းၼႆႉၸမ်ႉ၊ပဵၼ်ၵေႃႉဢၼ်ၶၢမ်ႇမၢင်ႇၵလႃႇပၢတ်ႇပၢႆၼင်ဢၼ်ၸႅတ်ႈ၊ၵွပ်ႈပိူဝ်ႈႁဝ်းပႃးတင်းၸႂ်ဝိၺိၺ်ႇၵူဝ်းၵႂၢႆႇၽြႃးပဵၼ်ၸဝ်ႈသေယဝ်ႉ၊ၸူဝ်ႈဢသၢၵ်ႈႁဝ်းၼႆႉႁဝ်းသိူဝ်းပျေႃႇၼႂ်း ၸဝ်ႈယေႇသုၶရိၸ်ႈ၊ ၵူၺ်းလႄႈ၊ယင်းဢမ်ႇဢိင်ပိုင်ႈၸႃႇတိၼိူဝ်ႉလိူတ်ႈလႃးလႃးဢေႃႈ။-
သင်ပဵၼ်ၵဝ်ၼႆႉၸိုင်၊ၵဝ်မီးတီႈတၵ်းဢိင်ပိုင်ႈၸႃႇတိၼိူဝ်ႉလိူတ်ႈယဝ်ႉဢေႃႈ။ ပေႃးတၢင်ႇၵေႃႉထၢင်ႇဝႃႈမၼ်းမီးတီႈတၵ်းဢိင်ပိုင်ႈၸႃႇတိၼိူဝ်ႉလိူတ်ႈၸိုင်၊ၵဝ်ယဵင်ႈၶႅၼ်းမီးဢေႃႈ။-
ၵဝ်ၼႆႉ၊လႆႈၶၢမ်ႇဢဝ်မၢင်ႇၵလႃႇပၢတ်ႇပၢႆၼင်မိူဝ်ႈဢၼ်ဢသၢၵ်ႈၵဝ်ယင်းမီးပႅတ်ႇဝၼ်းၼၼ်ႉဢေႃႈ။ ပဵၼ်ၵူၼ်းမဵဝ်း ဢိသရေး၊ ၸိူဝ်ႉၶိူဝ်း ပိၼ်ႇယႃႇမိၼ်ႇ၊ ဢေႃႈ။ ပဵၼ်ၵူၼ်းမဵဝ်း ႁေႇပြႄး၊ ဢၼ်ၵိူတ်ႇမႃးတီႈၵူၼ်းမဵဝ်း ႁေႇပြႄး၊ ဢေႃႈ။ ဢဝ်တင်းၽႃႇသႃႇတြႃးဝႃႈၸိုင်၊ပဵၼ်ၵိူင်း ၽႃႇရိသႄး၊ ဢေႃႈ။-
ဢဝ်တင်းႁူဝ်ၸႂ်ႁႅင်းယႂ်ႇၼႂ်းၼႃႈၵၢၼ်ၸဝ်ႈၽြႃးဝႃႈၸိုင်၊ပဵၼ်ၵေႃႉဢၼ်ၼိၵ်ႈၸၢၵ်ႈငႅၼ်းသႄးၸိူဝ်းၸဝ်ႈဢေႃႈ။ ဢဝ်တင်းတၢင်းဢၼ်သိုဝ်ႈတေႃႇလႄႈဝႃႈ၊ၸွမ်းၼင်ႇပိင်းၺၢပ်ႈတြႃးၸိုင်၊ပဵၼ်ၵေႃႉဢၼ်ၵၢင်းလွတ်ႈတင်းတၢင်းဢၼ်တၢင်ႇဢပျတ်ႈဢေႃႈ။-
ၼႂ်းဝႃႈၼၼ်သေၵေႃႈဢၵျူဝ်းဢၼ်ၵဝ်လႆႈႁဵတ်းမႃးၸိူဝ်းၼၼ်ႉ၊မိူဝ်ႈလဵဝ်ၼႆႉၵဝ်မၢတ်ႈပဵၼ်ဢၼ်သုမ်းပႅတ်ႈပုၼ်ႈဢၵျူဝ်း ၸဝ်ႈၶရိၸ်ႈ၊ ဢေႃႈ။-
ဝႃႈတႄႉမၼ်း၊ၵဝ်မၢတ်ႈလွင်ႈတၢင်းၵူႈၸိူဝ်ႉၵူႈပိူင်သုမ်းဢၵျူဝ်းယဝ်ႉ၊ၵွပ်ႈပိူဝ်ႈၵဝ်လႆႈဢၼ်မျၢတ်ႈၼႃႇဢၼ်ဝႃႈ၊ပိင်ႇၺႃႇဢၼ်ႁုၸၵ်းၸဝ်ႈၽြႃးၵဝ် ၸဝ်ႈယေႇသုၶရိၸ်ႈ၊ ဢေႃႈ။ ပုၼ်ႈတႃႇဢၵျူဝ်းမၼ်းၸဝ်ႈၸိုင်၊ၵဝ်ၸုၼ်ႉပႅတ်ႈတင်းသဵင်ႈတင်းလူင်ယဝ်ႉဢေႃႈ။ ၵဝ်မၢတ်ႈလွင်ႈတၢင်းၸိူဝ်းၼၼ်ႉပဵၼ်ဢၼ်လီႁင်ႈဢဵတ်ႇသဵတ်ႇပုၼ်ႈလွင်ႈၼင်ႇႁိုဝ်တေလႆႈဢၵျူဝ်းၼႂ်း ၸဝ်ႈၶရိၸ်ႈ၊ လႄႈ၊-
ႁႂ်ႈလႆႈၶဝ်ႈႁူမ်ႈပွင်းၼႂ်းမၼ်းၸဝ်ႈၼၼ်ႉဢေႃႈ။ ၵဝ်ယင်းတေဢမ်ႇဢိင်ပိုင်ႈတၢင်းဢၼ်သိုဝ်ႈတေႃႇတူဝ်ၸဝ်ႈၵဝ်ႇဢၼ်လႆႈမႃးၵွပ်ႈပိူဝ်ႈပိင်းၺၢပ်ႈတြႃးလႄႈ၊ၵူၺ်းဢိင်ပိုင်ႈတၢင်းသိုဝ်ႈတေႃႇဢၼ်လႆႈမႃးၵွပ်ႈလူၺ်ႈတၢင်းယုမ်ႇမၢတ်ႈၼႂ်း ၸဝ်ႈၶရိၸ်ႈ၊ ဢၼ်ဝႃႈ၊တၢင်းသိုဝ်ႈတေႃႇလုၵ်ႉၵႃႈတီႈၽြႃးပဵၼ်ၸဝ်ႈမႃးဢၼ်တင်ႈမၼ်ႈယူႇၼႂ်းတၢင်းယုမ်ႇမၢတ်ႈၼၼ်ႉဢေႃႈ။-
ၵဝ်ၶႂ်ႈႁုၸၵ်း ၸဝ်ႈၶရိၸ်ႈ၊ တင်းတၼ်းၶူဝ်းဢၼ်မၼ်းၸဝ်ႈလုၵ်ႉၶိုၼ်းလိပ်းမႃးသေယဝ်ႉ၊ႁႂ်ႈၵဝ်လႆႈထိူၵ်ႈၶၢမ်ႇတၢင်းဢၼ်ယၢၵ်ႈဢၼ်ၽၢၼ်၊ၸွမ်းမၼ်းၸဝ်ႈလႄႈၶၢမ်ႇတၢႆမိူၼ်ၸိူဝ်ႉၼင်ႇဢၼ်မၼ်းၸဝ်ႈၶၢမ်ႇတၢႆသေယဝ်ႉ၊-
တူဝ်ၵဝ်ၶႃႈၵေႃႈၶႂ်ႈလုၵ်ႉၶိုၼ်းလိပ်းမႃးသေၵႃႈတၢင်းတၢႆၼၼ်ႉဢေႃႈ။
ၵဝ်ပေႃးလႆႈၶၢမ်ႇဢၵျူဝ်းတင်းသဵင်ႈတင်းမူတ်းယဝ်ႉ၊ဢမ်ႇၼၼ်ၵေႃႈၵဝ်ပေႃးလႆႈပျေႉၸုမ်ႇယဝ်ႉဝႃႈၼႆၵဝ်ဢမ်ႇၶႂ်ႈဝႃႈ။ လွင်ႈၼင်ႇႁိုဝ်ၵဝ်တၵ်းလႆႈယိပ်းၵမ်ဢဝ်ဢၵျူဝ်းႁႂ်ႈလႆႈႁဵတ်းပဵၼ်ၶွင်တူဝ်ၸဝ်ႈၵဝ်ႇ၊ၵွပ်ႈပိူဝ်ႈ ၸဝ်ႈယေႇသုၶရိၸ်ႈ၊ လႆႈယိပ်းၵမ်ဢဝ်ၵဝ်ၶႃႈႁႂ်ႈပဵၼ်ၶွင်မၼ်းၸဝ်ႈၼၼ်ႉ၊ၵဝ်ယင်းတိုၵ်ႉလႅၼ်ႈၸွမ်းယူႇဢေႃႈ။-
ပီႈၼွင်ႉၶဝ်႟။ ၵဝ်ဢမ်ႇထၢင်ႇဝႃႈၵဝ်ပေႃးယိပ်းၵမ်ဢဝ်မႅၼ်ႈယဝ်ႉဝႃႈၼႆ။ လွင်ႈတၢင်းဢၼ်ၵဝ်ႁဵတ်းဢၼ်ၼိုင်ႈၼၼ်ႉ၊လိုမ်းပႅတ်ႈလွင်ႈတၢင်းဢၼ်ပူၼ်ႉမႃးယဝ်ႉၸိူဝ်းၼၼ်ႉလႄႈလမ်းၸွမ်းဢဝ်လွင်ႈတၢင်းဢၼ်မီးၽၢႆႇၼႃႈၸိူဝ်းၼၼ်ႉၵူၺ်းဢေႃႈ။-
ပိူဝ်ႈၼႆလႄႈၵဝ်ၶုၼ်ႇလႅၼ်ႈသိုဝ်ႈသိုဝ်ႈၸူးၵႃႈတီႈသဝ်လၵ်းယူႇႁႂ်ႈလႆႈႁပ်ႉဢဝ်သူးၼႂ်း ၸဝ်ႈယေႇသုၶရိၸ်ႈ၊ ၼၼ်ႉ၊ၽြႃးပဵၼ်ၸဝ်ႈယူႇၵႃႈတီႈၼိူဝ်လႄႈႁွင်ႉႁႂ်ႈႁဝ်းၵႂႃႇႁပ်ႉဢဝ်ၼၼ်ႉယူႇဢေႃႈ။
ပိူဝ်ႈၼႆလႄႈႁဝ်းၸိူဝ်းဢၼ်ပဵၼ်ၵူၼ်းလူင်ၼႂ်းတၢင်းယုမ်ႇမၢတ်ႈၼႆႉထုၵ်ႇလီမီးၸႂ်ဢၼ်ၸပ်းၸွႆးၸိူဝ်ႉၼင်ႇၼႆဢေႃႈ။ ပေႃးသူမီးၸႂ်သၽေႃးဢၼ်ပႅၵ်ႇပိူင်ႈၵၼ်ၼႂ်းသေၸိူဝ်ႉသေပိူင်ၸိုင်၊ၽြႃးပဵၼ်ၸဝ်ႈတၵ်းၽုၺ်ႇၼႄလွင်ႈတၢင်းၼၼ်ႉပၼ်သူထၢင်ႇထၢင်ႇသႃးသႃးဢေႃႈ။-
ပဵၼ်ၸိူဝ်ႉၼင်ႇႁိုဝ်သေဢမ်ႇဝႃႈ၊ႁဝ်းဢွၼ်ၵၼ်ၵမ်ၵျၢင်ႉမဵဝ်းလဵဝ်ၵၼ်ဢၼ်ႁဝ်းယၢမ်ႈၵမ်ၵျၢင်ႉႁဵတ်းၸွမ်းမႃးၼၼ်ႉတႃႉႁဝ်း။
ပီႈၼွင်ႉၶဝ်႟။ ၽွမ်ႉၵၼ်ယိူင်ႈၸွမ်းၵဝ်တႃႉ။ တီႈၶဝ်ၸိူဝ်းဢၼ်ႁဵတ်းၸွမ်းပုင်ႇသၢၵ်ႈသေႇဢၼ်ႁဝ်းၼႄဝႆႉၸိူဝ်းၼၼ်ႉၵေႃႈမၢတ်ႈတွင်းဢဝ်တႃႉ။-
လွင်ႈမၼ်းၸမ်ႉ၊ၵဝ်ယင်းမွၵ်ႇလၢတ်ႈသူၶိူဝ်းၶိူဝ်းယႂ်းယႂ်းလၢႆပွၵ်ႈဝႆႉယဝ်ႉ။ တေႃႈလဵဝ်ၼႆႉၵေႃႈ၊ၵဝ်ၼမ်ႉတႃတူၵ်းယူႇသေလႄႈသမ်ႉလၢတ်ႈထႅင်ႈလႄႈဝႃႈၸမ်ႉ၊မီးၵူၼ်းၸိူဝ်းဢၼ်ၵမ်ၵျၢင်ႉႁႂ်ႈပဵၼ်ရၢၼ်ႇသူႇသဝ်မႆႉဝႃးမိုဝ်း ၸဝ်ႈၶရိၸ်ႈ၊ ၼၼ်ႉၼမ်ၼႃႇဢေႃႈ။-
သဵၼ်ႈတၢင်းၶဝ်ၼၼ်ႉ၊ၸၢင်ႈသုတ်းတိူၵ်ႉၵႃႈၼႂ်းတီႈဢၼ်လုလႅဝ်ဢေႃႈ။ ၽြႃးၶဝ်ၸမ်ႉ၊ပဵၼ်တွင်ႉၶဝ်ဢေႃႈ။ ၶဝ်ၸၢင်ႈဢဝ်ၵုင်ႇဢဝ်မုၼ်ၼႂ်းမဵဝ်းဢၼ်လီဢူၵ်းလီဢၢႆၼၼ်ႉလႄႈမီးၸႂ်ဢၼ်ၸပ်းၸွႆးၶိူင်ႈပိူင်လေႃးၵႃႉၵူၺ်းဢေႃႈ။-
ႁဝ်းၸမ်ႉ၊ၵမ်ၵျၢင်ႉမဵဝ်းဢၼ်ၸၢပ်ႈသႅင်ႇၵၼ်တင်းမိူင်းၵၢင်ႁၢဝ်လႄႈ၊မိူင်းဢၼ်ႁဝ်းမုင်ႈမွင်းပႂ်ႉထႃႈၸမ်ႉ၊ပဵၼ်တီႈဢၼ်ၸဝ်ႈၵႄႇၶျွတ်ႈဢၼ်ဝႃႈ၊ ၸဝ်ႈယေႇသုၶရိၸ်ႈ၊ တၵ်းလုၵ်ႉၵႃႈတီႈၼၼ်ႈလူင်းမႃးၼၼ်ႉဢေႃႈ။-
ၸဝ်ႈၼၼ်ႉ၊တၵ်းၶၢႆႉပုတ်ႈတူဝ်ၵႃႇယႃႉဢၼ်ႁႅင်းလဵၵ်ႉႁႅင်းၵေႇႁဝ်းၼႆႉ ႁႂ်ႈလႆႈပဵၼ်မိူၼ်တူဝ်ႁၢင်ႈမၼ်းၸဝ်ႈဢၼ်မီးမုၼ်သရေႇၼၼ်ႉ၊ၸွမ်းၵႃႈၼင်ႇဢၼ်မၼ်းၸဝ်ႈမီးတၼ်းၶူဝ်းဢၼ်တိုတ်ႉၸၼ်ဢဝ်လွင်ႈတၢင်း၊ၵႃႈမီးတင်းသဵင်ႈတင်းလူင်ၶျႃးတူၵ်းတီႈတႅမ်ႇၵႃႈတႂ်ႈတိၼ်မၼ်းၸဝ်ႈၼၼ်ႉဢေႃႈ။
ပိူဝ်ႈၼႆလႄႈ၊ပီႈၼွင်ႉၶဝ်႟။ သူပဵၼ်ၵေႃႉဢၼ်ၵဝ်ႁၵ်ႉၼႃႇလႄႈၶုၵ်းၸႂ်လႆႈၶႆႈၸႂ်ထိုင်ၼႃႇလူင်လၢင်ဢေႃႈ။ သူပဵၼ်တီႈဢၼ်ၵဝ်သိူဝ်းၸူမ်း၊ပဵၼ်သရၽူႇၶမ်းၵဝ်ဢေႃႈ။ ၵွပ်ႈၼႆလႄႈပီႈၼွင်ႉဢၼ်ၵဝ်ႁၵ်ႉၼႃႇၶဝ်႟။ ဢွၼ်ၵၼ်တႄႇယူႇၼႂ်းၸဝ်ႈၽြႃးမၼ်ႈမၼ်ႈၶိူင်ႇၶိူင်ႇ၊ၸွမ်းၼင်ႇၵႃႈဢၼ်ၵဝ်ဝႃႈမႃးယဝ်ႉၼၼ်ႉတႃႉ။
ဢေးဝူဝ်းတိ၊ တင်း သုၼ်ႇတုၵ်ႉ၊ ၶဝ်ၵေႃႈၵဝ်တိုၵ်းယူင်းႁႂ်ႈမီးတၢင်းဢၼ်ၽွမ်ႉၸႂ်ထုၵ်ႇၵၼ်ၼႂ်းၸဝ်ႈၽြႃးဢေႃႈ။-
မႂ်းဢၼ်ပဵၼ်ၵေႃႉဢၼ်ႁူမ်ႈၵၢၼ်ၵၼ်ၸႅတ်ႈၸႅတ်ႈလူၺ်ႈၵၼ်တင်းၵဝ်ၼႆႉၵေႃႈၵဝ်တွင်းပၢၼ်ႇဝႃႈ၊ၸွႆႈထႅမ်ၽူႈယိင်းသွင်ၵေႃႉၼႆႉတႃႉ။ ပိူဝ်ႈဢၼ်ၶဝ်သွင်ၵေႃႉၼႆႉၵႆႉၶတ်းၸႂ်ၸွႆႈထႅမ်ၼႂ်းတၢင်းဢၼ်ၵဝ်ႁေႃးလၢတ်ႈၶၢဝ်ႇတြႃးသိူဝ်းပျေႃႇ၊ႁူမ်ႈလူၺ်ႈၵၼ်တင်း ၵလေႇမိၼ်ႇ၊ တင်းၽူႈပွင်ၵၢၼ်ႁူမ်ႈလူၺ်ႈၵၼ်တင်းၵဝ်တၢင်ႇၵေႃႉတၢင်ႇၵူၼ်း ဢၼ်ၸိုဝ်ႈၶဝ်ၶဝ်ႈပႃးၵႃႈၼႂ်းၸရၢင်းၽိုၼ်လိၵ်ႈဢသၢၵ်ႈၸိူဝ်းၼၼ်ႉဢေႃႈ။
ၸူမ်းသိူဝ်းၼႂ်းၸဝ်ႈၽြႃးယူႇတႃႇသေႇတႃႉ။ ၵဝ်သမ်ႉဝႃႈထႅင်ႈၸမ်ႉ၊ၸူမ်းသိူဝ်းတႃႉ။
ႁႂ်ႈၵူၼ်းတင်းလၢႆႁုႁၼ်လွင်ႈတၢင်းဢၼ်ႁူဝ်ၸႂ်သူဢူၼ်ႈဢွၼ်ႇၼၼ်ႉတႃႉ။ ၸဝ်ႈၽြႃးမီးၸမ်ယူႇဢေႃႈ။-
ယႃႇပေမႆႈၸႂ်လူၺ်ႈလွင်ႈတၢင်းၵႃႈသင်သေမဵဝ်း။ ၵူၺ်းလဝ်ႈယွၼ်းသူးတွင်းမဵဝ်းဢၼ်သူလူဝ်ႇၼၼ်ႉတီႈၽြႃးပဵၼ်ၸဝ်ႈလႄႈ၊မိူဝ်ႈဢၼ်ႁဵတ်းသူးတွင်းပထၼႃႇၵူႈပွၵ်ႈၼၼ်ႉ၊ယွင်ႈယေႃးတၢင်ႇၵျေးၸူးမၼ်းၸဝ်ႈတႃႉ။-
ပေႃးႁဵတ်းၸိူဝ်ႉၼင်ႇၼၼ်ၸိုင်၊တၢင်းၼိမ်ၽြႃးပဵၼ်ၸဝ်ႈဢၼ်ၽူႈလႂ်ၵျၢမ်ႇပွင်လႄႈဢမ်ႇၶိုတ်းဢမ်ႇထိုင်လႆႈၼၼ်ႉ၊တၵ်းပႂ်ႉၸွႆႈပႂ်ႉထႅမ်ႁူဝ်ၸႂ်သူယူႇၼႂ်း ၸဝ်ႈယေႇသုၶရိၸ်ႈ၊ ဢေႃႈ။
ၵႂၢမ်းတီႈသုတ်းတီႈၵွႆၸမ်ႉ၊ပီႈၼွင်ႉၶဝ်႟။ လွင်ႈတၢင်းမဵဝ်းလႂ်သေဢမ်ႇဝႃႈ၊လွင်ႈတၢင်းဢၼ်မၢၼ်ႇမႅၼ်ႈၸိုဝ်ႈၸႂ်ႈ၊လွင်ႈတၢင်းဢၼ်သိုဝ်ႈယူဝ်း၊တၢင်းဢၼ်သိုဝ်ႈတေႃႇ၊လွင်ႈတၢင်းဢၼ်မူတ်းသႂ်၊လွင်ႈတၢင်းဢၼ်လီႁၵ်ႉ၊လွင်ႈတၢင်းဢၼ်ထိူၵ်ႈရူဝ်ႇသေႇၵႃႈမီးၸိူဝ်းၼၼ်ႉ၊ပေႃးမၼ်းမျၢတ်ႈလီ၊ပေႃးမၼ်းထိူၵ်ႈလီယွင်ႈယေႃးၸိုင်၊ဢဝ်လွင်ႈတၢင်းၸိူဝ်းၼႆႉၶႆႈၸႂ်ဝူၼ်ႉၸႂ်တႃႉ။
သူဢွၼ်ၵၼ်ၵမ်ၵျၢင်ႉႁဵတ်းၸွမ်းၵႃႈဢၼ်သူလႆႈႁပ်ႉၵႃႈၼႂ်းတၢင်းဢၼ်ၵဝ်သွၼ်ပၼ်ၸႃႉၸဵမ်ၼႂ်းတၢင်းလၢတ်ႈဢိၵ်ႇတင်းၵႃႈၼႂ်းတၢင်းႁဵတ်းၵဝ်ၸိူဝ်းၼၼ်ႉတႃႉ။ ၽြႃးပဵၼ်ၸဝ်ႈ၊ၸဝ်ႈတၢင်းၼိမ်ၼၼ်ႉတၵ်းမီးယူႇလူၺ်ႈၵၼ်တင်းသူဢေႃႈ။
တေႃႈလဵဝ်ၼႆႉသူၶိုၼ်းလႆႈဢၶႂၢင်ႉဢၼ်ၼႄပျႃးၸႂ်ၸေႇတၼႃႇတၢင်းဢၼ်လူတူၺ်းၵဝ်ၼၼ်ႉ၊ၵဝ်သိူဝ်းပျေႃႇၼႃႇလူင်လၢင်ၼႂ်းၸဝ်ႈၽြႃးဢေႃႈ။ ၵႃႈပူၼ်ႉမႃးၼႆႉ သူဢမ်ႇမီးၸႂ်ၸေႇတၼႃႇဝႃႈၼႆၵဝ်ဢမ်ႇၶႂ်ႈဝႃႈ။ မၼ်းပဵၼ်ၵွပ်ႈပိူဝ်ႈသူဢမ်ႇမီးဢၶႂၢင်ႉၵူၺ်းဢေႃႈ။-
ၵွပ်ႈပိူဝ်ႈၵဝ်လႆႈၸုတ်ႈလႆႈလုတ်ႈလႄႈဝႃႈၼင်ႇၼႆဢမ်ႇၸႂ်ႈ။ ၼင်ႇႁိုဝ်ၵဝ်တၵ်းၸၢင်ႈပျေႇၸႂ်ၼိမ်ၸႂ်လူၺ်ႈၵႃႈဢၼ်ၵဝ်ပဵၼ်ယူႇၼႆႉၸိုင်၊ၵဝ်လႆႈသွၼ်ဢဝ်ယဝ်ႉ။-
ၵဝ်ၸၢင်ႈၶၢမ်ႇတၢင်းဢၼ်တူၵ်းၽၢၼ်တင်းတၢင်းဢၼ်ပျေႉၸုမ်ႇဢၼ်လိူင်ႇၸႂ်ယဝ်ႉ။ ပိၵ်ႉသမ်ႉလႆႈၵိၼ်ဢိမ်ႇၵိၼ်တဵမ်သေဢမ်ႇဝႃႈ၊လႆႈဢိုပ်းယၢၵ်ႈတွင်ႉမႆႈသေဢမ်ႇဝႃႈ၊သမ်ႉလႆႈမီးၸေးၸိမ်ႇသေဢမ်ႇဝႃႈ၊လႆႈတူၵ်းယၢၵ်ႈတူၵ်းၽၢၼ်သေဢမ်ႇဝႃႈ၊ပဵၼ်တီႈလႂ်သေဢမ်ႇဝႃႈ၊ပဵၼ်မိူဝ်ႈလႂ်သေဢမ်ႇဝႃႈ၊ၼင်ႇႁိုဝ်တၵ်းၸၢင်ႈပျေႇၸႂ်ၼိမ်ၸႂ်ၸိုင်၊ၵဝ်လႆႈသွၼ်ဢဝ်ၸေးၸေးယဝ်ႉ။-
ၵဝ်တၢတ်ႈၼိူင်ႇႁဵတ်းလႆႈလွင်ႈတၢင်းၵႃႈမီးတင်းသဵင်ႈတင်းလူင်ၼႂ်း ၸဝ်ႈၶရိၸ်ႈ၊ ဢၼ်ႁႂ်ႈၵဝ်မီးႁႅင်းၼၼ်ႉဢေႃႈ။
ၵူၺ်းၵႃႈ၊တၢင်းဢၼ်သူၸွႆႈထႅမ်ၵဝ်ၼႂ်းတၢင်းဢၼ်ၵဝ်ယၢပ်ႇၽိုတ်ႇတုၵ်ႉၶႃႉၼၼ်ႉၸိုင်၊သူလႆႈႁဵတ်းလွင်ႈလီလွင်ႈငၢမ်းယဝ်ႉ။-
ၸိူဝ်းသူၵူၼ်းဝဵင်း ၽိလိပ်ႉပိ၊ ၼႆႉ၊ၸႂ်ႁုၸႂ်ႁၼ်ၼႂ်းမိူဝ်ႈဢၼ် ၵဝ်တႄႇၸႃႉႁေႃးလၢတ်ႈၶၢဝ်ႇတြႃးသိူဝ်းပျေႃႇလႄႈဢွၵ်ႇမိူင်း မႃႇၵေႇတေႃးၼိ၊ ၵႂႃႇၼၼ်ႉၸိုင်၊ၸိူဝ်းၸဝ်ႈဢၼ်လႂ်သေၵေႃႈဢမ်ႇၶဝ်ႈပႃးၼႂ်းတၢင်းဢၼ်လူႇဢၼ်တၢၼ်းဢိၵ်ႇတင်းတၢင်းဢၼ်ၶၢမ်ႇဢဝ်တၢင်းလူႇတၢင်းတၢၼ်းလႄႈ၊မီးၸိူဝ်းၸဝ်ႈသူဢၼ်လဵဝ်ၵူၺ်းၶဝ်ႈပႃးလူၺ်ႈၵၼ်တင်းၵဝ်ဢေႃႈ။-
ၼႂ်းမိူဝ်ႈဢၼ်ၵဝ်မီးယူႇၼႂ်းဝဵင်း ထိတ်ႉသႃႇလေႃးၼိၵ်ႈ၊ လႄႈၸုတ်ႈၵႂႃႇလုတ်ႈၵႂႃႇၼၼ်ႉၵေႃႈ၊သူသူင်ႇပၼ်ငိုၼ်းလူႇပွၵ်ႈၼိုင်ႈၵူၺ်းဢမ်ႇၵႃး၊ယင်းသူင်ႇပၼ်ထႅင်ႈပွၵ်ႈၼိုင်ႈလူးၵွၼ်ႇဢေႃႈ။-
ၵဝ်ၶႂ်ႈလႆႈငိုၼ်းလူႇငိုၼ်းတၢၼ်းလႄႈဝႃႈၼင်ႇၼႆဢမ်ႇၸႂ်ႈ။ ၵဝ်ၶႂ်ႈႁၼ်ဢၵျူဝ်းဢၼ်တၵ်းထၢပ်ႈထႅင်ႈတီႈသူၼၼ်ႉၵူၺ်းဢေႃႈ။-
ၵဝ်လႆႈႁပ်ႉတုင်းဢဝ်ၵႃႈဢၼ်သူပၼ်ၵဝ်မႃးၼၼ်ႉပျေႉပျေႉၸုမ်ႇၸုမ်ႇယဝ်ႉလႄႈပဵၼ်ဢၼ်လူၼ်ႉလိူဝ်ၵႃႈဢၼ်ၵဝ်လူဝ်ႇၼၼ်ႉယဝ်ႉ။ တေႃႈလဵဝ်ၼႆႉၵေႃႈ၊ ဢေးပႃႉၽရေႃးတိတ်ႉ၊ ပႃးငိုၼ်းလူႇဢၼ်သူၽၢၵ်ႇမႃးၼၼ်ႉၵဝ်လႆႈတင်းမူတ်းၵႃႈဢၼ်ၵဝ်လူဝ်ႇၼၼ်ႉယဝ်ႉ။ လွင်ႈတၢင်းၸိူဝ်းၼႆႉပဵၼ်ၶိူင်ႈတၢင်းလူႇဢၼ်ဢၢႆႁွမ်ႁူၺ်းၼႃႇ၊ဢၼ်လႆႈသၢၵ်ႈလူႇတီႈၽြႃးပဵၼ်ၸဝ်ႈလႄႈပဵၼ်ဢၼ်မၼ်းၸဝ်ႈထုၵ်ႇၸႂ်ၵျိူၵ်ႈၸႂ်ၼႃႇလူင်လၢင်ယဝ်ႉဢေႃႈ။-
ၼင်ႇၼၼ်လႄႈၽြႃးပဵၼ်ၸဝ်ႈၵဝ်တၵ်းဢဝ်တင်းၸေးၸိမ်ႇၵႃႈဢၼ်မၼ်းၸဝ်ႈလိူင်ႇၼမ်မၢၵ်ႈမီး၊ဢၼ်မၼ်းၸဝ်ႈၸၢမ်ႇၸႃးမုၼ်သရေႇၼၼ်ႉ၊ပၼ်ၵႃႈဢၼ်သူလူဝ်ႇႁႂ်ႈပျေႉၸုမ်ႇၼႂ်း ၸဝ်ႈယေႇသုၶရိၸ်ႈ၊ ဢေႃႈ။-
ႁႂ်ႈမုၼ်ၽုင်းၽြႃးပဵၼ်ၸဝ်ႈႁဝ်းဢၼ်ဝႃႈ၊ပေႃႈၸဝ်ႈၼၼ်ႉယႂ်ႇၼႃႇၵူႈၵမ်ႇၽႃႇသိုပ်ႇသိုပ်ႇတၢမ်တၢမ်သေၵမ်းလူၺ်ႈ။ ဢႃမိၼ်ႈ။
တၵ်ႉၼၢႆၵူၼ်းမူတ်းၸၢင်ႇဢၼ်မီးၼႂ်း ၸဝ်ႈယေႇသုၶရိၸ်ႈ၊ ၼၼ်ႉၵူႈၵေႃႉၵူႈၵူၼ်းယူႇဢေႃႈ။ ပီႈၼွင်ႉၵႃႈဢၼ်မီးယူႇလူၺ်ႈၵၼ်တင်းၵဝ်ၸိူဝ်းၼႆႉၵေႃႈတၵ်ႉၼၢႆထၢမ်ႁႃသူယူႇဢေႃႈ။-
ၵူၼ်းမူတ်းၸၢင်ႇတင်းသဵင်ႈတင်းလူင်တၵ်ႉၼၢႆသူယူႇဢေႃႈ။ လိူဝ်တွၼ်းၼႃႇသေပိူၼ်ႈၵူၼ်းမူတ်းၸၢင်ႇၼႂ်းႁၢင်ႈၼႂ်းႁေႃၸဝ်ႈမုၼ်ယႂ်ႇၶုၼ်ႁေႃၶမ်း ၵေႇသႃႇ၊ တင်းလၢႆၼႆႉတၵ်ႉၼၢႆထၢမ်ႁႃသူယူႇဢေႃႈ။
ႁႂ်ႈၵျေးၸူးၸဝ်ႈၽြႃး ယေႇသုၶရိၸ်ႈ၊ မီးလူၺ်ႈၵၼ်တင်းသူတင်းသဵင်ႈတင်းလူင်သေၵမ်းလူၺ်ႈ။ ဢႃမိၼ်ႈ။ လိၵ်ႈတြႃးၽိလိပ်ႉပိယဝ်ႉယဝ်ႉဢေႃႈ။
ၵဝ် ပေႃးလု၊ ဢၼ်ပဵၼ်တမၢၼ်ႇ ၸဝ်ႈယေႇသုၶရိၸ်ႈ၊ ဢိၵ်ႇတင်းၼွင်ႉႁဝ်း တိမေႃးသေႇ၊ ၸွမ်းၼင်ႇဢလူဝ်ႇၽြႃးပဵၼ်ၸဝ်ႈမီးၼၼ်ႉ။
လႆႈတႅမ်ႈလိၵ်ႈပၼ်ၵႂႃႇတီႈၵူၼ်းမူတ်းၸၢင်ႇၸဝ်ႈတင်းလၢႆ၊ဢၼ်ဝႃႈပီႈၼွင်ႉၶဝ်ၸိူဝ်းဢၼ်ယုမ်ႇမၢတ်ႈ ၸဝ်ႈယေႇသုၶရိၸ်ႈ၊ လႄႈမီးယူႇၵႃႈၼႂ်းဝဵင်း ၵေႃးလေႃးသေး၊ ၼၼ်ႉဢေႃႈ။ ႁႂ်ႈပေႃႈၸဝ်ႈႁဝ်းၽြႃးပဵၼ်ၸဝ်ႈပၼ်သုၵျေးၸူး၊ဢိၵ်ႇတင်းတၢင်းၼိမ်ၶျၢမ်းသႃႇတီႈသူသေၵမ်းလူၺ်ႈ။
မိူဝ်ႈဢၼ်ႁဝ်းသူးတွင်းပုၼ်ႈသူၼၼ်ႉ၊ႁဝ်းယွင်ႈယေႃးတၢင်ႇၵျေးၸူးၽြႃးပဵၼ်ၸဝ်ႈဢၼ်ပဵၼ်ပေႃႈၸဝ်ႈ ယေႇသုၶရိၸ်ႈ၊ ႁဝ်းယူႇတႃႇသေႇဢေႃႈ။-
လွင်ႈမၼ်းၸမ်ႉ၊ႁဝ်းလႆႈငိၼ်းဝႃႈ၊သူယုမ်ႇမၢတ်ႈ ၸဝ်ႈယေႇသုၶရိၸ်ႈ၊ လႄႈႁၵ်ႉၵူၼ်းမူတ်းၸၢင်ႇတင်းသဵင်ႈတင်းလူင်ယူႇၼၼ်ႉ၊-
ၸွမ်းၼင်ႇဢၼ်သူမီးတၢင်းဢၼ်မုင်ႈထႃႈမွင်းထႃႈဢၼ်လႆႈသိမ်းဝႆႉပုၼ်ႈသူၵႃႈၼိူဝ်မိူင်းၵၢင်ႁၢဝ်ပုၼ်ႉၼၼ်ႉယဝ်ႉ။ လွင်ႈတၢင်းၼႆႉ၊ၸဵမ်မိူဝ်ႈဢွၼ်တၢင်းၼၼ်ႉ၊သူလႆႈငိၼ်းၼႂ်းၼုၵ်ႈၵပၢတ်ႈတြႃးဢၼ်ၸႅတ်ႈ၊ဢၼ်ဝႃႈၶၢဝ်ႇတြႃးသိူဝ်းပျေႃႇၸဝ်ႈ၊-
ဢၼ်ႁွတ်ႈထိုင်တီႈသူၼၼ်ႉဢေႃႈ။ ၶၢဝ်ႇတြႃးသိူဝ်းပျေႃႇၼၼ်ႉ၊ၽႄႈၸွတ်ႇတူဝ်ႈၵႂႃႇၵႃႈၼႂ်းမိူင်းလေႃးၵီႇၵူႈတီႈၵူႈလႅၼ်လႄႈႁဵတ်းပဵၼ်ဢၵျူဝ်းဢၼ်မၢၵ်ႈလီ၊ဢိၵ်ႇတင်းပဵၼ်ဢၼ်ၼမ်ၵိုၼ်းမႃးၼႂ်းသူၸႃႉၸဵမ်မိူဝ်ႈဝၼ်းဢၼ်သူလႆႈငိၼ်းလႄႈႁုၵျေးၸူးၽြႃးပဵၼ်ၸဝ်ႈဢၼ်ၸႅတ်ႈၸႅတ်ႈၼၼ်ႉဢေႃႈ။-
သူလႆႈသွၼ်ဢဝ်လွင်ႈၵျေးၸူးၽြႃးပဵၼ်ၸဝ်ႈတီႈသြႃႇ ဢေႇပႃႇၽရတ်ႉ၊ ဢၼ်ႁူမ်ႈၵၢၼ်လူၺ်ႈၵၼ်တင်းႁဝ်းဢၼ်ႁဝ်းႁၵ်ႉၼႃႇၼၼ်ႉဢေႃႈ။ မၼ်းၼၼ်ႉ၊ပဵၼ်သြႃႇဢၼ်မီးသဵတ်ႈၸႃႇၵႃႈၼႂ်းတၢင်းဢၼ်ပွင်ႁဵတ်းၵၢၼ်ၼႂ်း ၸဝ်ႈၶရိၸ်ႈ၊ ပုၼ်ႈႁဝ်းဢေႃႈ။-
မၼ်းမွၵ်ႇလၢတ်ႈၼႄႁဝ်းလွင်ႈဢၼ်ဝႃႈ၊သူဢွၼ်ၵၼ်မီးၸႂ်ႁၵ်ႉမႅတ်ႈတႃႇဢၼ်ဝိၺိၺ်ႇၸဝ်ႈပၼ်ၼၼ်ႉဢေႃႈ။
ၵွပ်ႈပိူဝ်ႈလွင်ႈၸိူဝ်ႉၼင်ႇၼႆလႄႈၸႃႉၸဵမ်မိူဝ်ႈဝၼ်းဢၼ်ႁဝ်းလႆႈငိၼ်းၼၼ်ႉ၊ႁဝ်းသူးတွင်းပုၼ်ႈသူတႃႇသေႇဢမ်ႇထၢတ်ႇဢေႃႈ။ ႁဝ်းယွၼ်းတီႈၽြႃးပဵၼ်ၸဝ်ႈႁႂ်ႈသူၸၢင်ႈႁုၸႅင်ႈဢလူဝ်ႇၽြႃးပဵၼ်ၸဝ်ႈတဵမ်ထူၼ်ႈလူၺ်ႈပိင်ႇၺႃႇ၊ဢိၵ်ႇတင်းတၢင်းပွင်ႇၸႂ်ၽၢႆႇၸႂ်ဝိၺိၺ်ႇၼၼ်ႉယူႇ၊-
ႁႂ်ႈသူတၵ်းၵမ်ၵျၢင်ႉၵႃႈၼင်ႇဢၼ်ထိူၵ်ႈတၢၼ်ႇတင်းၸဝ်ႈၽြႃးလႄႈထုၵ်ႇၸႂ်မၼ်းၸဝ်ႈ၊ဢိၵ်ႇတင်းႁႂ်ႈမီးတၢင်းၵမ်တၢင်းၵျၢင်ႉဢၼ်ပွင်ဢၵျူဝ်းဢၼ်မၢၵ်ႈလီလႄႈႁႂ်ႈပိင်ႇၺႃႇဢၼ်ႁုၸၵ်းၽြႃးပဵၼ်ၸဝ်ႈတူဝ်းတွၼ်းမႃးၼၼ်ႉယူႇၸိုင်၊ၵဝ်သူးတွင်းယူႇဢေႃႈ။-
ႁႂ်ႈတၼ်းၶူဝ်းၸဝ်ႈထႅင်ႈႁႅင်းပၼ်ႁႅင်းသူၸွမ်းၵႃႈၼင်ႇဢၼ်မၼ်းၸဝ်ႈမီးမုၼ်ၽုင်းယႂ်ႇၼႃႇၼၼ်ႉ၊ပုၼ်ႈတၢင်းယိူၼ်ႉၶၢမ်ႇၵူႈၸိူဝ်ႉၵူႈပိူင်၊တၢင်းဢၼ်ၸႂ်ယႂ်ႇၸႂ်ႈယၢဝ်း၊ဢိၵ်ႇတင်းၸႂ်ဢၼ်သိူဝ်းပျေႃႇၼၼ်ႉယူႇ၊-
ႁႂ်ႈယွင်ႈယေႃးတၢင်ႇၵျေးၸူးပေႃႈၸဝ်ႈ၊ၸဝ်ႈဢၼ်ႁဵတ်းၵျေးၸူးႁႂ်ႈႁဝ်းပဵၼ်ၵူၼ်းဢၼ်ထိူၵ်ႈၶၢမ်ႇလႆႈႁပ်ႉဢဝ်ဢမူၺ်ႇလူၺ်ႈၵၼ်တင်းၵူၼ်းဢၼ်သိုဝ်ႈတေႃႇတင်းလၢႆ၊ဢၼ်ယူႇၼႂ်းဢၼ်လႅင်းၼၼ်ႉဢေႃႈ။-
မၼ်းၸဝ်ႈထုတ်ႇၼုၵ်ႈဢဝ်ႁဝ်းဢွၵ်ႇၵႃႈၼႂ်းတၼ်းၶူဝ်းဢၼ်လပ်းသိင်ႇသေလႄႈဢဝ်ႁဝ်းသႂၢင်းၶဝ်ႈၵႂႃႇယူႇၵႃႈၼႂ်းမိူင်းလုၵ်ႈႁၵ်ႉၸဝ်ႈၼၼ်ႉယဝ်ႉ။-
လုၵ်ႈၸဝ်ႈၼၼ်ႉၵေႃႈႁႂ်ႈႁဝ်းလႆႈၶၢမ်ႇဢဝ်ၵျေးၸူးတၢင်းဢၼ်မၼ်းၸဝ်ႈထုတ်ႇဢဝ်၊ဢၼ်ဝႃႈတၢင်းဢၼ်မၼ်းၸဝ်ႈပွႆႇလွတ်ႈဢပျတ်ႈၼၼ်ႉယူႇဢေႃႈ။
ၸဝ်ႈၶရိၸ်ႈ၊ ပဵၼ်တူဝ်ႁၢင်ႈၽြႃးပဵၼ်ၸဝ်ႈ၊ၸဝ်ႈဢၼ်တႃၵူၼ်းတူၺ်းဢမ်ႇႁၼ်လႆႈၼၼ်ႉလႄႈ ပဵၼ်လုၵ်ႈတူၼ်ႈၵႃႈၼိူဝ်သတ်ႉတဝႃႇတင်းသဵင်ႈတင်းလူင်ဢၼ်ၽြႃးပဵၼ်ၸဝ်ႈၽၢၼ်ႇသၢင်းၼၼ်ႉဢေႃႈ။-
လွင်ႈမၼ်းၸမ်ႉ၊ၼႂ်းလုၵ်ႈၸဝ်ႈၼၼ်ႉ၊ၽြႃးပဵၼ်ၸဝ်ႈၽၢၼ်ႇသၢင်းႁဵတ်းပဵၼ်ၶိူင်ႈပိူင်ဢၼ်မီးၼိူဝ်ၽႃႉၵၢင်ႁၢဝ်၊ၶိူင်ႈပိူင်ဢၼ်မီးၵႃႈၼိူဝ်လိၼ်မိူင်း၊ၶိူင်ႈပိူင်ဢၼ်တႃၵူၼ်းတူၺ်းႁၼ်လႆႈ၊ၶိူင်ႈပိူင်ဢၼ်တႃၵူၼ်းတူၺ်းဢမ်ႇႁၼ်လႆႈ၊ဢိၵ်ႇပႃးတင်းၶုၼ်ဢၼ်ဢုပ်ႉပိူင်ႇသေဢမ်ႇဝႃႈ၊ၸဝ်ႈတၼ်းၶူဝ်းသေဢမ်ႇဝႃႈ၊ၶုၼ်ထွတ်ႈၶုၼ်မျၢတ်ႈသေဢမ်ႇဝႃႈ၊ဢႃႇၼႃႇတၼ်းၶူဝ်းသေဢမ်ႇဝႃႈ၊လွင်ႈတၢင်းတင်းသဵင်ႈတင်းလူင်ၽြႃးပဵၼ်ၸဝ်ႈၽၢၼ်ႇသၢင်းလူၺ်ႈ ၸဝ်ႈၶရိၸ်ႈ၊ လႄႈပုၼ်ႈ ၸဝ်ႈၶရိၸ်ႈ၊ ဢေႃႈ။-
ၸဝ်ႈၶရိၸ်ႈ၊ ပဵၼ်မႃးဢွၼ်တၢင်းၶိူင်ႈပိူင်ၵႃႈမီးတင်းသဵင်ႈတင်းလူင်လႄႈၶိူင်ႈပိူင်ၵႃႈမီးတင်းသဵင်ႈတင်းလူင်တႄႇယူႇမီးယူႇလီလီႁင်းၽႂ်ႁင်းမၼ်းၵႃႈၼႂ်းမၼ်းၸဝ်ႈဢေႃႈ။-
မၼ်းၸဝ်ႈပဵၼ်ႁူဝ်ၵႃႈတီႈတူဝ်ဢၼ်ဝႃႈၸိူဝ်းၸဝ်ႈဢေႃႈ။ မၼ်းၸဝ်ႈပဵၼ်ငဝ်ႈႁၢၵ်ႈႁူဝ်ပိုင်း၊ပဵၼ်လုၵ်ႈတူၼ်ႈၵႃႈၼႂ်းၶဝ်ၸိူဝ်းဢၼ်လုၵ်ႉသေၵႃႈတၢင်းတၢႆၶိုၼ်းလိပ်းမႃး၊ပုၼ်ႈလွင်ႈၼင်ႇႁိုဝ်မၼ်းၸဝ်ႈပႃးလဵဝ်ၵူၺ်းတၵ်းယႂ်ႇမျၢတ်ႈၼႃႇသေပိူၼ်ႈၼႂ်းၵူႈၸိူဝ်ႉၵူႈပိူင်ဢေႃႈ။-
လွင်ႈမၼ်းၸမ်ႉ၊ၽြႃးပဵၼ်ၸဝ်ႈမီးဢလူဝ်ႇၶႂ်ႈႁႂ်ႈၸႂ်သၽေႃးမၼ်းၸဝ်ႈပျေႉၸုမ်ႇၼႂ်းလုၵ်ႈၸဝ်ႈၼၼ်ႉဢေႃႈ။-
ၼႆႉၵူၺ်းဢမ်ႇၵႃး၊ၽြႃးပဵၼ်ၸဝ်ႈဢဝ်ၶိူင်ႈပိူင်လိၼ်မိူင်း၊ဢိၵ်ႇတင်းၶိူင်ႈပိူင်ၽႃႉၵၢင်ႁၢဝ်ဢၼ်ဝႃႈ၊ၶိူင်ႈပိူင်ၵႃႈမီးတင်းသဵင်ႈတင်းလူင်ႁႂ်ႈထုၵ်ႇၵၼ်တင်းမၼ်းၸဝ်ႈၵွပ်ႈလူၺ်ႈလုၵ်ႈၸဝ်ႈ၊ဢၼ်ဢဝ်တင်းလိူတ်ႈသေလႄႈသွၼ်းလေႃႇၵႃႈတီႈသဝ်မႆႉဝႃးမိုဝ်းၸဝ်ႈလႄႈႁဵတ်းႁႂ်ႈတၢင်းၽိတ်းထၢတ်ႇယဵၼ်ၼၼ်ႉဢေႃႈ။
ၼင်ႇၼၼ်လႄႈသူၸိူဝ်းဢၼ်ယၢမ်ႈယၢၼ်ၵႆၵၼ်တင်းမၼ်းၸဝ်ႈ၊ဢိၵ်ႇတင်းမီးၸႂ်ဢၼ်ၶတ်းဢၼ်ၶႂၢင်လႄႈၵမ်ၵျၢင်ႉဢၼ်ဢမ်ႇလီဢမ်ႇငၢမ်းမိူဝ်ႈဢွၼ်ၼႆႉၼၼ်ႉ၊-
တေႃႈလဵဝ်ၼႆႉ၊မၼ်းၸဝ်ႈႁႂ်ႈၶိုၼ်းလီၵၼ်တင်းမၼ်းၸဝ်ႈလူၺ်ႈတၢင်းတၢႆၵႃႈၼႂ်းၼိူဝ်ႉလိူတ်ႈၼၼ်ႉ၊ပုၼ်ႈလွင်ႈၼင်ႇႁိုဝ်သူတၵ်းမူတ်းၸၢင်ႇၶၢဝ်သႂ်လႄႈၵၢင်းလွတ်ႈတင်းတၢင်းဢၼ်တၢင်ႇဢပျတ်ႈၵႃႈတီႈၽၢႆႇၼႃႈမၼ်းၸဝ်ႈဢေႃႈ။-
သူလူဝ်ႇမီးတၢင်းဢၼ်ယုမ်ႇမၢတ်ႈမၼ်ႈၶိူင်ႇယူႇတႃႇသေႇ၊ယင်းဢမ်ႇသုတ်ႉဢမ်ႇႁူၼ်သေၵႃႈၼႂ်းတင်းဢၼ်မုင်ႈထႃႈမွင်းထႃႈၼႂ်းၶၢဝ်ႇတြႃးသိူဝ်းပျေႃႇဢၼ်သူလႆႈထွမ်ႇငိၼ်းႁပ်ႉတုင်းဢဝ်ယဝ်ႉၼၼ်ႉဢေႃႈ။ ၶၢဝ်ႇတြႃးသိူဝ်းပျေႃႇၼၼ်ႉ၊ပဵၼ်တြႃးဢၼ်ႁေႃးလၢတ်ႈၸွတ်ႇတူဝ်ႈၵႂႃႇၵႃႈတီႈဝူၺ်ႇၼေႇယႃႉသတ်ႉတဝႃႇၵႃႈဢၼ်မီးတႂ်ႈၽႃႉၵၢင်ႁၢဝ်၊ၵဝ် ပေႃးလု၊ ၵေႃႈလႆႈပဵၼ်ၵူၼ်းၸႂ်ႉသွႆဢၼ်ႁေႃးလၢတ်ႈတြႃးၼၼ်ႉဢေႃႈ။
တေႃႈလဵဝ်ၼႆႉ၊ၵဝ်သိူဝ်းပျေႃႇၼႂ်းတၢင်းဢၼ်ၵဝ်ၶၢမ်ႇတၢင်းၽၢၼ်ပုၼ်ႈသူၼၼ်ႉဢေႃႈ။ တုၵ်ႉၶႃႉတၢင်းၽၢၼ် ၸဝ်ႈၶရိၸ်ႈ၊ ဢၼ်ယင်းၵိုတ်းယင်းၵျၢၼ်ႇဝႆႉၸိူဝ်းၼၼ်ႉ၊ၵဝ်ၶၢမ်ႇႁႂ်ႈပျေႉၸုမ်ႇၵႂႃႇၵႃႈၼႂ်းတူဝ်ၼိူဝ်ႉလိူတ်ႈၵဝ်၊ပုၼ်ႈတူဝ်မၼ်းၸဝ်ႈဢၼ်ဝႃႈၸိူဝ်းၸဝ်ႈၼၼ်ႉဢေႃႈ။-
ပုၼ်ႈၸိူဝ်းၸဝ်ႈၼၼ်ႉၵဝ်လႆႈထိုင်ပဵၼ်ထမ်ႇမႃႉသြႃႇမႃးၸွမ်းၵႃႈၼင်ႇဢၼ်ၽြႃးပဵၼ်ၸဝ်ႈထွၵ်ႈလူၺ်ႈဢၵျူဝ်းသူလႄႈၽႄမႅင်ႇပၼ်ၼႃႈၵၢၼ်ၵဝ်ၼၼ်ႉ၊ႁႂ်ႈၵဝ်လႆႈၽုၺ်ႇၼႄၼုၵ်ႈၵပၢတ်ႈတြႃးၽြႃးပဵၼ်ၸဝ်ႈပေႃႇဢွၵ်ႇထၢင်ႇထၢင်ႇသႃးသႃးမႃးၼၼ်ႉဢေႃႈ။-
ၼုၵ်ႈၵပၢတ်ႈတြႃးၸဝ်ႈၼၼ်ႉ၊ပဵၼ်ဢၼ်လိုၵ်ႉလမ်ႇၼႃႇလႄႈသိူင်ႇဝႆႉလပ်ႉဝႆႉၵူႈၸူဝ်ႈၵူႈပၢၼ်သေၵႃႈတီႈၵူၼ်းတင်းလၢႆဢေႃႈ။ ၵူၺ်းၵႃႈ၊တေႃႈလဵဝ်ၼႆႉၽုၺ်ႇဢွၵ်ႇၼႄပျႃးတီႈၵူၼ်းမူတ်းၸၢင်ႇတင်းလၢႆဢေႃႈ။-
တၢင်းဢၼ်မၼ်းၸဝ်ႈၶိုင်ပွင်ႁဵတ်းဝႆႉၸမ်ႉ၊မၼ်းၸဝ်ႈႁဵတ်းႁႂ်ႈၵႃႈဢၼ်သိူင်ႇဝႆႉ၊ဢၼ်လိုၵ်ႉဢၼ်လမ်ႇဢၼ်ယႂ်ႇဢၼ်မျၢတ်ႈၼႃႇၼၼ်ႉထၢင်ႇသႃးတီႈၵူၼ်းမၼ်းၸဝ်ႈတင်းသဵင်ႈတင်းလူင်ႁႂ်ႈၶဝ်လႆႈႁုဢေႃႈ။ ဢၼ်လိုၵ်ႉဢၼ်လမ်ႇၸမ်ႉ၊ပဵၼ်တၢင်းဢၼ် ၸဝ်ႈၶရိၸ်ႈ၊ မီးၵႃႈၼႂ်းသူဢၼ်ဝႃႈ၊သူတၵ်းလႆႈၶၢမ်ႇဢဝ်မုၼ်ၽုင်းၽြႃးပဵၼ်ၸဝ်ႈၼၼ်ႉဢေႃႈ။-
ႁဝ်းႁေႃးလၢတ်ႈလွင်ႈ ၸဝ်ႈၶရိၸ်ႈ၊ ၼၼ်ႉပၼ်သူယူႇ၊ပၼ်သတိတီႈၵူၼ်းတင်းသဵင်ႈတင်းလူင်ယူႇ၊ဢဝ်တင်းပိင်ႇၺႃႇၵူႈမဵဝ်းမဵဝ်းလႄႈသင်ႇသွၼ်ပၼ်ၵူႈၵေႃႉၵူႈၵူၼ်းႁႂ်ႈလႆႈႁွတ်ႈထိုင်တၢင်းဢၼ်ၶိုၼ်ႈယႂ်ႇမႃးၼႂ်း ၸဝ်ႈၶရိၸ်ႈ၊ ဢေႃႈ။-
ပုၼ်ႈၵၢၼ်ငၢၼ်းၼႆႉၸိုင်၊ၵဝ်ၶတ်းၸႂ်ဢဝ်တင်းဢဵၼ်ႁႅင်းဢၼ် ၸဝ်ႈၶရိၸ်ႈ၊ ဢဝ်တၼ်းၶူဝ်းၸဝ်ႈဢၼ်ယႂ်ႇၼႃႇပွင်ႁဵတ်းၵႃႈၼႂ်းၵဝ်ၼၼ်ႉသေလႄႈပွင်ၵၢၼ်ယူႇဢေႃႈ။
လွင်ႈမၼ်းၸမ်ႉ၊ၵဝ်ၶႂ်ႈႁႂ်ႈသူႁုလွင်ႈဢၼ်ၵဝ်ၶတ်းၸႂ်လႄႈႁဵတ်းၵၢၼ်ယၢပ်ႇၵႃႈႁိုဝ်ပုၼ်ႈသူ၊ဢိၵ်ႇတင်းပီႈၼွင်ႉဝဵင်း လေႃးတိၵိ၊ ဢိၵ်ႇတင်းပီႈၼွင်ႉၸိူဝ်းဢၼ်ဢမ်ႇပႆႇယၢမ်ႈႁၼ်ၼႃႈၵဝ်သေပွၵ်ႈၼၼ်ႉဢေႃႈ။-
လွင်ႈတၢင်းဢၼ်ၵဝ်ၶတ်းၸႂ်ၸမ်ႉ၊ပုၼ်ႈလွင်ႈၼင်ႇႁိုဝ်ၶဝ်တၵ်းမီးႁႅင်းၸႂ်လူၺ်ႈတၢင်းဢၼ်ၶဝ်ၼင်ႇၵၼ်ၵၼ်လႆႈမီးမႅတ်ႈတႃႇမတ်ႉၶွတ်ႇၵွတ်ႇၶဵၼ်းဝႆႉတီႈၵၼ်သေလႄႈတၵ်းလႆႈပျေႉၸုမ်ႇဝႆႉတင်းၺၢၼ်ႇဢၼ်လီၼႃႇဢၼ်ၸၢင်ႈႁုလွင်ႈတၢင်းဢၼ်လိုၵ်ႉဢၼ်လမ်ႇၽြႃးပေႃႈၸဝ်ႈဢၼ်ဝႃႈ၊ ၸဝ်ႈၶရိၸ်ႈ၊ ၼၼ်ႉဢေႃႈ။-
ၵႃႈၼႂ်းၸဝ်ႈၼၼ်ႉ၊ၽၼ်ႇတႃႇပိင်ႇၺႃႇၽြႃးပဵၼ်ၸဝ်ႈ၊ဢိၵ်ႇတင်းၽၼ်ႇတႃႇၺၢၼ်ႇဢၼ်ႁုၸၵ်းမၼ်းၸဝ်ႈၼၼ်ႉ၊သိူင်ႇဝႆႉလပ်ႉဝႆႉဢေႃႈ။
ၼင်ႇႁိုဝ်ၽူႈလႂ်တၵ်းဢမ်ႇလႆႈဢဝ်တင်းၵႂၢမ်းဢၼ်ၶျေႃးဝွၼ်းၸူဝ်းဢဝ်လႄႈပႅတ်ႉလႅၼ်သူၼၼ်ႉ ၵဝ်လၢတ်ႈၵႂၢမ်းၶႃႈၼႆႉဢေႃႈ။-
ပိၵ်ႉသမ်ႉတူဝ်ၶၼ်ႇထႃႇၵဝ်ၽၢတ်ႇယၢၼ်ၵၼ်တင်းသူသေၵေႃႈ၊ၸႂ်ဝိၺိၺ်ႇၵဝ်ယင်းမီးယူႇလူၺ်ႈၵၼ်တင်းသူလႄႈၵဝ်လႆႈသိူဝ်းပျေႃႇပိူဝ်ႈဢၼ်လႆႈႁၼ်သူၸၢင်ႈပွင်ႁဵတ်းလီလီငၢမ်းငၢမ်း၊ဢိၵ်ႇတင်းသူယုမ်ႇမၢတ်ႈ ၸဝ်ႈၶရိၸ်ႈ၊ ယူႇမၼ်ႈမၼ်ႈၶိူင်ႇၶိူင်ႇၼၼ်ႉဢေႃႈ။
ၸိူဝ်ႉၼင်ႇဢၼ်သူလႆႈႁပ်ႉတုင်းဢဝ် ၸဝ်ႈၶရိၸ်ႈ၊ ပဵၼ်ၸဝ်ႈၽြႃးဝႆႉၼၼ်ႉ၊ဢွၼ်ၵၼ်ႁဵတ်းၸွမ်းၸဝ်ႈၼၼ်ႉတႃႉ။-
ႁႂ်ႈႁၢၵ်ႈတြႃးသူယင်ႇၼႂ်းမၼ်းၸဝ်ႈလိုၵ်ႉလိုၵ်ႉသေလႄႈဢဝ်ဢသၢၵ်ႈသူတႄႇယူႇၵႃႈၼႂ်းမၼ်းၸဝ်ႈ၊ဢိၵ်ႇတင်းႁႂ်ႈမီးဢဵၼ်ႁႅင်းၼႂ်းတၢင်းယုမ်ႇမၢတ်ႈယူႇသေလႄႈ၊ႁဵတ်းၸွမ်းၵႃႈၼင်ႇဢၼ်သူလႆႈသွၼ်ဢဝ်ၼၼ်ႉသေလႄႈဢွၼ်ၵၼ်ယွင်ႈယေႃးတၢင်ႇၵျေးၸူးမၼ်းၸဝ်ႈယူႇတႃႉ။
ၵေႃႉဢၼ်ဢမ်ႇၸွမ်းတြႃး ၸဝ်ႈၶရိၸ်ႈ၊ လႄႈၵူၺ်းၸွမ်းၼႄးပိင်ႇၺႃႇၵူၼ်း၊ဢိၵ်ႇတင်းၸွမ်းၼႄးပရိယႄႇလၢႆလၢႆ၊ဢၼ်ဢမ်ႇပွင်ႇလွင်ႈၵႃႈသင်၊မဵဝ်းဢၼ်တႄႇၵႃႈၼိူဝ်တြႃးဢၼ်သိုပ်ႇလူင်းမႃးၵႃႈတီႈၵူၼ်းမိူဝ်ႈၵွၼ်ႇ၊ဢိၵ်ႇတင်းတၢင်းဢၼ်ၸွမ်းၼင်ႇၽီၸိူဝ်းဢၼ်ဢုပ်ႉပိူင်ႇၼႂ်းၸၵျႃႇဝလႃႇၼႆႉ၊ၼင်ႇႁိုဝ်မၼ်းတၵ်းဢမ်ႇလႆႈယႃႉယုၵ်ႉႁိမ်ဢဝ်သူၸိုင်၊ႁဵတ်းသတိတႃႉ။-
လွင်ႈမၼ်းၸမ်ႉ၊ၵႃႈၼႂ်း ၸဝ်ႈၶရိၸ်ႈ၊ ၼၼ်ႉၸႃႇတိၽြႃးပဵၼ်ၸဝ်ႈတင်းသဵင်ႈတင်းလူင်တႄႇယူႇပျေႉပျေႉၸုမ်ႇၸုမ်ႇဢေႃႈ။-
သူၵေႃႈ၊လႆႈပျေႉၸုမ်ႇၼႂ်းမၼ်းၸဝ်ႈဢၼ်ပဵၼ်ႁူဝ်ၵႃႈၼိူဝ်ဢၼ်ထွတ်ႈမျၢတ်ႈဢၼ်သုင်သုတ်း၊ဢိၵ်ႇတင်းၵႃႈၼိူဝ်ဢႃႇၼႃႇၸၢၵ်ႈၵႃႈမီးတင်းသဵင်ႈတင်းလူင်ၼၼ်ႉဢေႃႈ။
ၵႃႈၼႂ်းမၼ်းၸဝ်ႈၼၼ်ႉ၊သူသမ်ႉလႆႈၶၢမ်ႇဢဝ်မၢင်ႇၵလႃႇတၢင်းဢၼ်ပၢတ်ႇပၢႆၼင်ဢၼ်ဢမ်ႇဢဝ်တင်းမိုဝ်းၵူၼ်းႁဵတ်းၼၼ်ႉလႄႈသူလႆႈၶၢမ်ႇတၢင်းဢၼ်ပၢတ်ႇပႅတ်ႈၼိူဝ်ႉၼင်ဢပျတ်ႈ၊ၵွပ်ႈပိူဝ်ႈမၢင်ႇၵလႃႇတၢင်းဢၼ်ပၢတ်ႇပၢႆၼင်ဢၼ်သူလႆႈၶၢမ်ႇဢဝ်တီႈ ၸဝ်ႈၶရိၸ်ႈ၊ ၼၼ်ႉဢေႃႈ။-
သူလႆႈၶၢမ်ႇတၢင်းဢၼ်သၢင်းၵျူဝ်ႇၽင်ဝႆႉလူၺ်ႈၵၼ်တင်း ၸဝ်ႈၶရိၸ်ႈ၊ ၼႂ်းတၢင်းဢၼ်သူၶၢမ်ႇဢဝ်မၢင်ႇၵလႃႇပပ်ႉတိၸမ်ႇ ၼၼ်ႉဢေႃႈ။ ၵႃႈၼႂ်းမၢင်ႇၵလႃႇၼၼ်ႉ၊သူသမ်ႉလႆႈလုၵ်ႉၶိုၼ်းလိပ်းမႃးလူၺ်ႈၵၼ်တင်း ၸဝ်ႈၶရိၸ်ႈ၊ ၼၼ်ႉ၊ၵွပ်ႈပိူဝ်ႈသူယုမ်ႇမၢတ်ႈတၼ်းၶူဝ်းၽြႃးပဵၼ်ၸဝ်ႈဢၼ်ႁႂ်ႈ ၸဝ်ႈၶရိၸ်ႈ၊ လုၵ်ႉၵႃႈတၢင်းတၢႆၶိုၼ်းလိပ်းမႃးၼၼ်ႉဢေႃႈ။-
မိူဝ်ႈဢွၼ်ၼၼ်ႉ၊သူလႆႈတၢႆၼႂ်းတုၸရိူၵ်ႈဢပျတ်ႈ၊ဢိၵ်ႇတင်းပဵၼ်ၵေႃႉဢၼ်ဢမ်ႇၶၢမ်ႇဢဝ်မၢင်ႇၵလႃႇပၢတ်ႇပၢႆၼင်ၵႃႈတီႈတူဝ်ၼိူဝ်ႉလိူတ်ႈသူသေၵေႃႈ၊တေႃႈလဵဝ်ၼႆႉၽြႃးပဵၼ်ၸဝ်ႈႁဵတ်းႁႂ်ႈသူဢသၢၵ်ႈလိပ်းလူၺ်ႈၵၼ်တင်း ၸဝ်ႈၶရိၸ်ႈ၊ သေယဝ်ႉ၊ဢဵတ်းလူပွႆႇလွတ်ႈဢပျတ်ႈၵႃႈမီးတင်းသဵင်ႈတင်းလူင်ၵႃႈတီႈႁဝ်းဢေႃႈ။-
မၼ်းၸဝ်ႈမွတ်ႇၸရၢင်းဢၼ်မတ်ႉၽုၵ်ႇႁဝ်းလူၺ်ႈပိင်းၺၢပ်ႈလၢႆမဵဝ်းဢၼ်ႁႄႉၶႂၢင်ႁဝ်းၼၼ်ႉပႅတ်ႈသေယဝ်ႉ၊ဢဝ်တွၵ်ႇၸပ်းဝႆႉၵႃႈၼိူဝ်သဝ်မႆႉဝႃးမိုဝ်းဢေႃႈ။-
ၼင်ႇၼၼ်လႄႈၵႃႈၼိူဝ်သဝ်မႆႉဝႃးမိုဝ်းၼၼ်ႉ ၸဝ်ႈၶရိၸ်ႈ၊ လႆႈဢဝ်တူဝ်မၼ်းၸဝ်ႈလွတ်ႈဢွၵ်ႇသေၵႃႈတီႈတၼ်းၶူဝ်းဢၼ်ထွတ်ႈမျၢတ်ႈ၊ဢိၵ်ႇတင်းဢႃႇၼႃႇၸၢၵ်ႈတင်းလၢႆယဝ်ႉၸင်ႇ၊ၼႄပျႃးတူဝ်မၼ်းၸဝ်ႈထၢင်ႇသႃးတီႈၶဝ်လႄႈၶၢမ်ႇပွႆးဢၼ်ပႄႉၼႅင်ႇဢေႃႈ။
ပိူဝ်ႈၼႆလႄႈယႃႇပေႁႂ်ႈၽူႈလႂ်လႆႈၸီႇယၢင်ႇတၢင်ႇဢပျတ်ႈသူ၊ၵွပ်ႈလူၺ်ႈလွင်ႈတၢင်းၵိၼ်၊ဢမ်ႇၼၼ်ၵွပ်ႈလူၺ်ႈလွင်ႈတၢင်းဢၼ်ပႂ်ႉၵမ်ဝၼ်းပွႆး၊ဝၼ်းလိူၼ်မႂ်ႇဢမ်ႇၼၼ်ဝၼ်းၵမ်သိၼ်ၸိူဝ်းၼၼ်ႉတႃႉ။-
လွင်ႈတၢင်းၸိူဝ်းၼၼ်ႉပဵၼ်သၢႆငၢႆလွင်ႈတၢင်းဢၼ်တၵ်းပဵၼ်မႃးၵမ်းလိုၼ်းၼၼ်ႉၵူၺ်းလႄႈလွင်ႈတၢင်းဢၼ်ပဵၼ်တူဝ်ပဵၼ်ႁၢင်ႈတႄႉတႄႉၸမ်ႉ၊ပဵၼ် ၸဝ်ႈၶရိၸ်ႈ၊ ဢေႃႈ။-
ယႃႇပေႁႂ်ႈသေၵေႃႉသေၵူၼ်းဢၼ်ပၢဝ်ႇသေႃႇဝႃႈ၊မၼ်းယႂ်ႇမျၢတ်ႈသေပိူၼ်ႈၵွပ်ႈပိူဝ်ႈဝႃႈမၼ်းလႆႈႁၼ်ၼိမိၵ်ႈဢၼ်ထွတ်ႈဢၼ်မျၢတ်ႈလႄႈသွၼ်ႁႂ်ႈႁဵတ်းႁၢင်ႈမီးၸႂ်ၶျႃးတႅမ်ႇ၊ဢိၵ်ႇတင်းၵူဝ်းၵႂၢႆႇတမၢၼ်ႇၵၢင်ႁၢဝ်သေယဝ်ႉ၊ယင်းဢမ်ႇမီးလွင်ႈတၢင်းလႄႈမီးၸႂ်ၽႅၼ်သုင်ၸွမ်းၼင်ႇတၢင်းၶႆႈၸႂ်ၸဵၼ်းၸႃးၵူၼ်းၵူၺ်းၼၼ်ႉ၊ယႃႇပေႁႂ်ႈၶဝ်လႆႈႁိမ်ဢဝ်ဢၵျူဝ်းတီႈသူ။-
ၶဝ်ၼၼ်ႉ၊ယင်းဢမ်ႇဢိင် ၸဝ်ႈၶရိၸ်ႈ၊ ဢၼ်ပဵၼ်ႁူဝ်တူဝ်ၶၼ်ႇထႃႇၼၼ်ႉဢေႃႈ။ ၵႃႈတီႈႁူဝ်ၼၼ်ႉတင်းတူဝ်တင်းၶိင်းလႆႈယႂ်ႇမႃးမူႈမႃး၊မီးဢဵၼ်မီးႁႅင်းၵွပ်ႈပိူဝ်ႈၸႃႉဢၼ်ပဵၼ်ၶေႃႈပဵၼ်ၵပ်းတင်းလၢႆလႆႈၸုတွမ်ၸပ်းၵၼ်ယူႇယဝ်ႉၸင်ႇယႂ်ႇမႃးၸွမ်းၼင်ႇဢလူဝ်ႇၽြႃးပဵၼ်ၸဝ်ႈႁႂ်ႈယႂ်ႇမႃးၼၼ်ႉဢေႃႈ။
ပိူဝ်ႈဝႃႈသူတၢႆလူၺ်ႈၵၼ်တင်း ၸဝ်ႈၶရိၸ်ႈ၊ ယဝ်ႉလႄႈလႆႈၵၢင်းလွတ်ႈသေၵႃႈတီႈၽီဢၼ်ဢုပ်ႉပိူင်ႇၼႂ်းၸၵျႃႇဝလႃႇယဝ်ႉၼၼ်ႉၸိုင်၊ႁဵတ်းသင်လႄႈသူယင်းၵမ်ၵျၢင်ႉၸိူဝ်ႉၼင်ႇဢၼ်ယူႇၽၢႆႇလေႃးၵီႇၼႆႉ။ ႁဵတ်းသင်လႄႈသူယင်းထွမ်ႇဢဝ်ပိင်းၺၢပ်ႈၸိူဝ်းဢၼ်ဝႃႈ၊-
“ယႃႇပေဢဝ်ယိပ်းၵမ်ဢၼ်ၼႆႉ၊ယႃႇပေၸၢမ်းၸိမ်းဢၼ်ၼၼ်ႉ၊ယႃႇပေတိူဝ်ႉထုၵ်ႇၶဝ်” ဝႃႈၼင်ႇၼႆၼၼ်ႉၸိူဝ်ႉၼင်ႇႁိုဝ်။-
ထုင်းတြႃးၸိူဝ်းၼႆႉ၊ပဵၼ်လွင်ႈမဵဝ်းဢၼ်ၸၢင်ႈလုလႅဝ်ယဝ်ႉ၊ၵွပ်ႈပိူဝ်ႈဝႃႈပဵၼ်ထုင်းတြႃးဢၼ်ၵူၼ်းသၢင်ႈပွင်လႄႈသင်ႇသွၼ်ပၼ်ၼၼ်ႉၵူၺ်းဢေႃႈ။-
ထုင်းတြႃးၸိူဝ်ႉၼင်ႇၼႆၼၼ်ႉ၊ပဵၼ်တၢင်းဢၼ်ႁဵတ်းၸိူဝ်ႉၼင်ႇႁၢင်ႈမီးပိင်ႇၺႃႇ၊ၼႂ်းတၢင်းဢၼ်ၵူဝ်းၵႂၢႆႇတမၢၼ်ႇၵၢင်ႁၢဝ်၊တၢင်းဢၼ်ႁဵတ်းႁၢင်ႈမီးၸႂ်ၶျႃးတႅမ်ႇ၊ဢိၵ်ႇတင်းတၢင်းဢၼ်တဵၵ်းငႅၼ်းတူဝ်ၵႃႇယႃႉ၊ၵူၺ်းၵႃႈၼႂ်းတၢင်းဢၼ်တိုၵ်းတေႃးၵၼ်တင်းဢလူဝ်ႇၼိူဝ်ႉၼင်ႇၼၼ်ႉဢမ်ႇမီးဢၵျူဝ်းၵႃႈသင်ဢေႃႈ။
ပေႃးဝႃႈ၊သူလႆႈလုၵ်ႉၶိုၼ်းလိပ်းမႃးလူၺ်ႈၵၼ်တင်း ၸဝ်ႈၶရိၸ်ႈ၊ ယဝ်ႉၼၼ်ႉၸိုင်၊သူဢွၼ်ၵၼ်ႁႃဢဝ်ၶိူင်ႈပိူင်တင်းလၢႆဢၼ်မီးၵႃႈၼိူဝ်လႄႈၵႃႈၼႂ်းတီႈဢၼ် ၸဝ်ႈၶရိၸ်ႈ၊ ၼင်ႈယူႇၽၢႆႇၶႂႃၽြႃးပဵၼ်ၸဝ်ႈၼၼ်ႉတႃႉ။-
ယင်းဢမ်ႇႁႂ်ႈႁူဝ်ၸႂ်သူၸပ်းၸွႆးၶိူင်ႈပိူင်တင်းလၢႆဢၼ်မီးၵႃႈတီႈလိၼ်မိူင်းၼႆႉလႄႈႁႂ်ႈၸပ်းၸွႆးၶိူင်ႈပိူင်တင်းလၢႆဢၼ်မီးၵႃႈၼိူဝ်ၼၼ်ႉတႃႉ။-
လွင်ႈမၼ်းၸမ်ႉ၊သူလႆႈတၢႆယဝ်ႉလႄႈၸႂ်သူၼၼ်ႉ၊လႆႈသိူင်ႇဝႆႉလူၺ်ႈၵၼ်တင်း ၸဝ်ႈၶရိၸ်ႈ၊ ၼႂ်းၽြႃးပဵၼ်ၸဝ်ႈယဝ်ႉဢေႃႈ။-
မိူဝ်ႈဢၼ် ၸဝ်ႈၶရိၸ်ႈ၊ ဢၼ်ပဵၼ်ၸႂ်ဢသၢၵ်ႈႁဝ်းၼၼ်ႉ၊ပေႃႇမႃးထၢင်ႇသႃးၸိုင်၊သူၵေႃႈတၵ်းပေႃႇမႃးထၢင်ႇသႃးၸွမ်းၵၼ်တင်းမၼ်းၸဝ်ႈလူၺ်ႈမုၼ်သရေႇဢၼ်ယႂ်ႇၼႃႇၼၼ်ႉဢေႃႈ။
ပိူဝ်ႈၼႆလႄႈသူတၵ်းလႆႈဢဝ်တၢႆပႅတ်ႈၸႂ်သၽေႃးဢၼ်ၸၢပ်ႈသႅင်ႇၵၼ်ၵႃႈၼိူဝ်လိၼ်မိူင်းဢၼ်မီးၼႂ်းသူ။ ဢၼ်ဝႃႈ၊တၢင်းဢၼ်ၽိတ်းပိူင်ႈၵႃႇမေႇသု၊တၢင်းဢၼ်ၵမ်ၵျၢင်ႉဢၼ်ၵူဝ်ႈဢၼ်ၵိူၵ်ႇ၊တၢင်းဢၼ်ၸႂ်ၵိလေႇသႃႇမႆႈႁွၼ်ႉ၊တၢင်းဢၼ်ၸပ်းၸွႆးဢၼ်ႁၢႆႉမိူၵ်ႈ၊တၢင်းဢၼ်လေႃးၽႃႉပူၼ်ႉလိူဝ်ၸိူဝ်းၼႆႉ၊ပဵၼ်တၢင်းဢၼ်ၵူဝ်းၵႂၢႆႇႁုၼ်ႇႁၢင်ႈသၢင်းထုဢေႃႈ။-
ၵွပ်ႈပိူဝ်ႈလွင်ႈတၢင်းၸိူဝ်ႉၼႆႉလႄႈတၢင်းဢၼ်ၽြႃးပဵၼ်ၸဝ်ႈၸီႇယၢင်ႇပၼ်တၢမ်ႇၼၼ်ႉ၊ၸၢင်ႈတူၵ်းႁွတ်ႈၵႃႈၼိူဝ်ၶဝ်ၸိူဝ်းဢၼ်ဢမ်ႇထွမ်ႇဢမ်ႇဢဝ်ၵႂၢမ်းမၼ်းၸဝ်ႈၼၼ်ႉဢေႃႈ။-
မိူဝ်ႈဢွၼ်ၼႆႉၼၼ်ႉ၊သူယၢမ်ႈၵမ်ၵျၢင်ႉၸွမ်းဢလူဝ်ႇၸႂ်ၸိူဝ်ႉၼင်ႇၼၼ်မႃးယၢမ်းမိူဝ်ႈဢၼ်ၸႂ်သၽေႃးသူယင်းယူႇတႂ်ႈဢႃႇၼႃႇမဵဝ်းၼၼ်ႉယူႇဢေႃႈ။
ၵူၺ်းၵႃႈ၊တေႃႈလဵဝ်ၼႆႉၸမ်ႉ၊သူဢွၼ်ၵၼ်ပႄႇပႅတ်ႈလွင်ႈတၢင်းၸိူဝ်းၼႆႉတင်းသဵင်ႈ၊ဢၼ်ဝႃႈတၢင်းဢၼ်ၸႂ်လမ်သႆႈၵမ်ႇ၊တၢင်းဢၼ်တေႃးသႃႉဢွၵ်ႇၽႂ်းၼႃႇ၊တၢင်းဢၼ်ႁၢႆႉမိူၵ်ႈ၊တၢင်းဢၼ်ယႃႉသရေႇပိူၼ်ႈႁႂ်ႈလု၊ဢိၵ်ႇတင်းတၢင်းဢၼ်လၢတ်ႈၵႂၢမ်းၵူဝ်ႈၵိူၵ်ႇဢွၵ်ႇသူပ်းသူၼၼ်ႉဢေႃႈ။-
ၵေႃႉၼိုင်ႈလႄႈၵေႃႉၼိုင်ႈ ယႃႇပေလၢတ်ႈၵႂၢမ်းပႅတ်ႉၵၼ်လႅၼ်ၵၼ်၊ထွၵ်ႈလူၺ်ႈတၢင်းဢၼ်သူထွတ်ႇလွၼ်ႈပႅတ်ႈၸႂ်သၽေႃးၵူၼ်းၵဝ်ႇ၊ဢိၵ်ႇတင်းတၢင်းၵမ်တၢင်းၵျၢင်ႉမၼ်းၸိူဝ်းၼၼ်ႉသေလႄႈ၊-
ပဵၼ်ၵေႃႉဢၼ်ၼုင်ႈမႆၸႂ်သၽေႃးၵူၼ်းမႂ်ႇဢၼ်ၶၢမ်ႇတၢင်းဢၼ်ႁဵတ်းပဵၼ်ဢၼ်မႂ်ႇ၊ၸွမ်းၼင်ႇပုင်ႇႁၢင်ႈၸဝ်ႈဢၼ်ၽၢၼ်ႇသၢင်းမၼ်းၼၼ်ႉ၊ႁႂ်ႈလႆႈႁုၸၵ်းၽြႃးပဵၼ်ၸဝ်ႈတႃႉ။-
ၼႂ်းၵူၼ်းမႂ်ႇဢၼ်မၼ်းၸဝ်ႈၽၢၼ်ႇသၢင်းႁဵတ်းပဵၼ်ၼႆႉ၊ဢမ်ႇမီးၵူၼ်းမဵဝ်း ၵရိၵ်ႉ၊ ဢမ်ႇမီးၵူၼ်းမဵဝ်း ၵျူး၊ ဢမ်ႇမီးၵူၼ်းဢၼ်ၶၢမ်ႇဢဝ်မၢင်ႇၵလႃႇပၢတ်ႇပၢႆၼင်၊ဢမ်ႇမီးၵူၼ်းဢၼ်ဢမ်ႇၶၢမ်ႇဢဝ်မၢင်ႇၵလႃႇပၢတ်ႇပၢႆၼင်၊ဢမ်ႇမီးၵူၼ်းလိူင်း၊ဢမ်ႇမီးၵူၼ်းႁၢဝ်ႉၵူၼ်းၵျၢမ်း၊ဢမ်ႇမီးၶႃႈ၊ဢမ်ႇမီးၵူၼ်းလွတ်ႈလႅဝ်း။ ၸဝ်ႈၶရိၸ်ႈ၊ ပဵၼ်တင်းသဵင်ႈတင်းလူင်လႄႈမီးယူႇၵႃႈၼႂ်းၶဝ်တင်းသဵင်ႈတင်းလူင်ဢေႃႈ။
ပိူဝ်ႈၼႆလႄႈၸိူဝ်ႉၼင်ႇဢၼ်သူပဵၼ်ၵေႃႉဢၼ်ၽြႃးပဵၼ်ၸဝ်ႈလိူၵ်ႈဢဝ်ဝႆႉလႄႈပဵၼ်ၵေႃႉဢၼ်မူတ်းၸၢင်ႇ၊ၵေႃႉဢၼ်မၼ်းၸဝ်ႈႁၵ်ႉပႅင်းၼၼ်ႉၸိုင်၊ဢွၼ်ၵၼ်ၼုင်ႈမႆၸႂ်ၸေႇတၼႃႇ၊ၸႂ်ဢၼ်ၸၢင်ႈႁၵ်ႉဢဵတ်းလူ၊ၸႂ်ဢၼ်ၶျႃးတႅမ်ႇ၊ၸႂ်ဢၼ်ၼိမ်သိမ်ႇဢူၼ်ႈဢွၼ်ႇ၊ဢိၵ်ႇတင်းၸႂ်ယႂ်ႇၸႂ်ယၢဝ်းၸိူဝ်းၼၼ်ႉတႃႉ။-
ဢွၼ်ၵၼ်မီးၸႂ်ဢၼ်ယိူၼ်ႉၶၢမ်ႇၵၼ်လႄႈပွႆႇလွတ်ႈဢပျတ်ႈၵၼ်၊ၼႂ်းမိူဝ်ႈဢၼ်ၵေႃႉၼိုင်ႈလႄႈၵေႃႉၼိုင်ႈမီးလွင်ႈတၢင်းဢၼ်တၵ်းတၢင်ႇဢပျတ်ႈတီႈၵၼ်ၼၼ်ႉတႃႉ။ ၸိူဝ်ႉၼင်ႇဢၼ်ၽြႃးပဵၼ်ၸဝ်ႈဢဵတ်းလူပွႆႇလွတ်ႈဢပျတ်ႈသူၼၼ်ႉ၊သူၵေႃႈပွႆႇလွတ်ႈဢပျတ်ႈၵၼ်တႃႉ။-
လိူဝ်သေၼၼ်ႉ၊ၵႃႈၼိူဝ်လွင်ႈတၢင်းၸိူဝ်းၼႆႉတင်းသဵင်ႈတင်းလူင်ၼၼ်ႉ၊ဢဝ်တၢင်းႁၵ်ႉမႅတ်ႈတႃႇထၢပ်ႈထႅင်ႈလႄႈၼုင်ႈမႆတႃႉ။ တၢင်းႁၵ်ႉမႅတ်ႈတႃႇၼၼ်ႉ၊တၵ်းမတ်ႉႁွမ်းႁူဝ်ၸႂ်သူႁႂ်ႈပဵၼ်ဢၼ်လဵဝ်ၵၼ်ဢေႃႈ။-
ႁႂ်ႈတၢင်းၼိမ် ၸဝ်ႈၶရိၸ်ႈ၊ ဢုပ်ႉပိူင်ႇႁူဝ်ၸႂ်သူတႃႉ။ ၽြႃးပဵၼ်ၸဝ်ႈႁွင်ႉသူမႃးႁႂ်ႈပဵၼ်တူဝ်ၵႃႇယႃႉဢၼ်လဵဝ်ၵၼ်ဢေႃႈ။ ဢွၼ်ၵၼ်တၢင်ႇၵျေးၸူးၽြႃးပဵၼ်ၸဝ်ႈတႃႉ။-
ႁႂ်ႈၼုၵ်ႈၵပၢတ်ႈတြႃး ၸဝ်ႈၶရိၸ်ႈ၊ တႄႇယူႇၼႂ်းသူၼမ်ၼမ်တႃႉ။ ဢဝ်တင်းပိင်ႇၺႃႇၵူႈၸိူဝ်ႉၵူႈပိူင်လႄႈသင်ႇသွၼ်ပၼ်ၵၼ်ယူႇ၊ပၼ်သတိတီႈၵၼ်ယူႇတႃႉ။ ပႃးၸႂ်ပႃးၶေႃးႁဵတ်းၵႂၢမ်းသႃႇလၢမ်ႇလႂ်၊ႁဵတ်းၵႂၢမ်းထမ်ႇမႃႉလႂ်၊ဢိၵ်ႇတင်းႁဵတ်းၵႂၢမ်းဢၼ်ဝိၺိၺ်ႇသွၼ်ပၼ်တင်းလၢႆလႄႈယွင်ႈယေႃးတၢင်ႇၵျေးၸူးၽြႃးပဵၼ်ၸဝ်ႈယူႇတႃႉ။-
ၵႃႈဢၼ်သူသၢင်ႈႁဵတ်းလၢတ်ႈၸႃတင်းသဵင်ႈၼၼ်ႉ၊ထွၵ်ႈလူၺ်ႈၸိုဝ်ႈသဵင်ၸဝ်ႈၽြႃး ၸဝ်ႈယေႇသု၊ သေလႄႈႁဵတ်းလွင်ႈတၢင်းတင်းသဵင်ႈတင်းလူင်တႃႉ။ ဢိင် ၸဝ်ႈၶရိၸ်ႈ၊ လႄႈတၢင်ႇၵျေးၸူးၽြႃးပေႃႈၸဝ်ႈယူႇတႃႉ။
ၶဝ်ၸိူဝ်းဢၼ်ပဵၼ်မေးၶဝ်႟။ ႁပ်ႉၶၢမ်ႇဢဝ်တၢင်းဢၼ်ၽူဝ်သူဢုပ်ႉပိူင်ႇတႃႉ။ လွင်ႈမၼ်းၸမ်ႉ၊ပဵၼ်လွင်ႈဢၼ်ထုၵ်ႇလီႁဵတ်းၼႂ်းၸဝ်ႈၽြႃးဢေႃႈ။
ၶဝ်ၸိူဝ်းဢၼ်ပဵၼ်ၽူဝ်ၶဝ်႟။ ႁၵ်ႉမေးသူတႃႉ။ ယႃႇပေႁဵတ်းပႄႉႁဵတ်းၼႅင်ႇတီႈၶဝ်။
ၶဝ်ၸိူဝ်းဢၼ်ပဵၼ်လုၵ်ႈလၢင်းၶဝ်႟။ ထွမ်ႇဢဝ်ၵႂၢမ်းပေႃႈၵႂၢမ်းမႄႈၼႂ်းလွင်ႈတၢင်းၵူႈၸိူဝ်ႉၵူႈပိူင်တႃႉ။ လွင်ႈတၢင်းၼႆႉၸမ်ႉ၊ပဵၼ်တၢင်းဢၼ်ထုၵ်ႇၸႂ်ၸဝ်ႈၽြႃးဢေႃႈ။
ၶဝ်ၸိူဝ်းဢၼ်ပဵၼ်ပေႃႈၶဝ်႟။ ယႃႇပေႁႂ်ႈလုၵ်ႈလၢင်းသူလႆႈၸဵပ်းၸႂ်။ ပေႃးႁဵတ်းၸိူဝ်ႉၼင်ႇၼႆၸိုင်၊ၶဝ်ၸၢင်ႈၸႂ်လုႁႅင်းဢူၼ်ႈၵႂႃႇဢေႃႈ။
ၶဝ်ၸိူဝ်းဢၼ်ပဵၼ်ၶႃႈၶဝ်႟။ ထွမ်ႇဢဝ်ၵႂၢမ်းၵေႃႉဢၼ်ပဵၼ်ၸဝ်ႈသူၼႂ်းလေႃးၵႃႉၼႆႉ၊ၼႂ်းလွင်ႈတၢင်းၵူႈၸိူဝ်ႉၵူႈပိူင်တႃႉ။ ၼႂ်းလွင်ႈတၢင်းဢၼ်ႁဵတ်းၵၢၼ်ၼၼ်ႉ၊သူႁဵတ်းၵွပ်ႈပိူဝ်ႈၸဝ်ႈသူပႂ်ႉတူၺ်းယူႇၼၼ်ႉဢမ်ႇၸႂ်ႈ၊ၶႂ်ႈၶၢမ်ႇဢဝ်တၢင်းဢၼ်ၸဝ်ႈသူယွင်ႈယေႃးၼၼ်ႉၵေႃႈဢမ်ႇၸႂ်ႈလႄႈပႃးၸႂ်ပႃးၶေႃးႁဵတ်းပုၼ်ႈၶဝ်လူၺ်ႈၸႂ်ဢၼ်သူၵူဝ်ႁႄၸဝ်ႈၽြႃးၼၼ်ႉတႃႉ။-
ၼႂ်းၵႃႈဢၼ်သူႁဵတ်းတင်းသဵင်ႈတင်းလူင်ၼၼ်ႉ၊ပႃးတင်းၸႂ်ၸေႇတၼႃႇသေလႄႈ ႁဵတ်းၸိူဝ်ႉၼင်ႇဢၼ်ပွင်ႁဵတ်းၵၢၼ်ၵူၼ်းဢမ်ႇၸႂ်ႈၵူၺ်းလႄႈႁဵတ်းၸိူဝ်ႉၼင်ႇဢၼ်ပွင်ႁဵတ်းၵၢၼ်ၸဝ်ႈၽြႃးၼၼ်ႉတႃႉ။-
ႁုမၢတ်ႈဝႃႈ၊သူတၵ်းလႆႈၶၢမ်ႇဢဝ်သူးဢၼ်ဝႃႈ၊ဢမူၺ်ႇၵႃႈတီႈၸဝ်ႈၽြႃးၼၼ်ႉဢေႃႈ။ လွင်ႈမၼ်းၸမ်ႉ၊သူပွင်ႁဵတ်းၼႃႈၵၢၼ် ၸဝ်ႈၶရိၸ်ႈ၊ ယူႇၼၼ်ႉဢေႃႈ။-
ၵေႃႉဢၼ်ႁဵတ်းဢမ်ႇတြႃးၼၼ်ႉၸမ်ႉ၊မၼ်းတၵ်းလႆႈၶၢမ်ႇဢဝ်ဢၵျူဝ်းတၢင်းဢၼ်ႁဵတ်းဢမ်ႇတြႃးၼၼ်ႉဢေႃႈ။ လွင်ႈမၼ်းၸမ်ႉ၊ၸဝ်ႈၽြႃးဢမ်ႇထွၵ်ႈလူၺ်ႈၼႃႈၽူႈလႂ်သေၵေႃႉသေၵူၼ်းဢေႃႈ။
ၶဝ်ၸိူဝ်းဢၼ်ပဵၼ်ၸဝ်ႈၶဝ်႟။ ႁုမၢတ်ႈဝႃႈ၊သူယင်းမီးၸဝ်ႈဢၼ်ယူႇၵႃႈၼိူဝ်မိူင်းၵၢင်ႁၢဝ်ၼၼ်ႉသေယဝ်ႉ၊ႁဵတ်းမႅၼ်ႈၸွမ်းၼင်ႇတြႃးတၢင်းဢၼ်သိုဝ်ႈတေႃႇတီႈၶႃႈသူလႄႈႁဵတ်းႁႂ်ႈမီးၸႂ်ဢၼ်ၽဵင်ႇပဵင်းၵၼ်တႃႉ။
ပႃးတင်းၸႂ်ဢၼ်တူင်ႉတိုၼ်ႇယူႇလႄႈသိုပ်ႇႁဵတ်းသူးတွင်းပထၼႃႇယူႇတႃႇသေႇတႃႉ။ ပႃးတင်းတၢင်းဢၼ်ယွင်ႈယေႃးတၢင်ႇၵျေးၸူးလႄႈပႂ်ႉယူႇတႃႉ။-
ၼႂ်းမိူဝ်ႈဢၼ်သူသူးတွင်းၼၼ်ႉသူးတွင်းပုၼ်ႈၸိူဝ်းႁဝ်းၼႆႉတႃႉ၊ႁႂ်ႈၽြႃးပဵၼ်ၸဝ်ႈၽုၺ်ႇပၼ်ၽၵ်းတူပုၼ်ႈတၵ်းႁေႃးလၢတ်ႈၼုၵ်ႈၵပၢတ်ႈတြႃးလွင်ႈ ၸဝ်ႈၶရိၸ်ႈ၊ ဢၼ်လိုၵ်ႉလမ်ႇၼၼ်ႉ၊ၵွပ်ႈပိူဝ်ႈတြႃးၼၼ်ႉႁဝ်းလႆႈတူၵ်းၶမ်ၼႂ်းထွင်ႇယူႇလႄႈ၊-
ဢိၵ်ႇတင်းသူးတွင်းပုၼ်ႈလွင်ႈၼင်ႇႁိုဝ်ၵဝ်တၵ်းလႆႈႁဵတ်းႁႂ်ႈဢၼ်လိုၵ်ႉဢၼ်လမ်ႇၼၼ်ႉ၊ထၢင်ႇသႃးမႃးၵႃႈၼင်ႇဢၼ်ၵဝ်ထုၵ်ႇလီႁေႃးလၢတ်ႈၼၼ်ႉတႃႉ။
ဢွၼ်ၵၼ်သိူၵ်ႈသမ်ႇၵၼ်တင်းၵူၼ်းပႃႈၼွၵ်ႈတင်းလၢႆပႃးတင်းပိင်ႇၺႃႇသတိတႃႉ။ ႁႂ်ႈမေႃဢဝ်ဢၶႂၢင်ႉဢယေးၵႃႈၼႂ်းဢၶိင်ႇဢၼ်သူမီးၼၼ်ႉတႃႉ။-
ႁႂ်ႈၶေႃႈၵႂၢမ်းသူမီးၵျေးၸူးမိူၼ်ၸိူဝ်ႉၼင်ႇဢၼ်သႂ်ႇၵိူဝ်ၸဵမ်းလႄႈႁႂ်ႈဝၢၼ်ႁူဝၢၼ်ၸႂ်ပိူၼ်ႈသေႇသေႇ၊ပုၼ်ႈလွင်ႈၼင်ႇႁိုဝ်သူတေႁုၵႂၢမ်းဢၼ်တေလႆႈၶိုၼ်းတွပ်ႇတီႈၵူၼ်းၵူႈၵေႃႉၸိူဝ်ႉၼင်ႇႁိုဝ်ၼၼ်ႉသေၵမ်း။
ၼွင်ႉႁၵ်ႉႁဝ်းသြႃႇ တုၶႅၵ်ႉ၊ ဢၼ်မီးသဵတ်ႈၸႃႇၼႂ်းၸဝ်ႈၽြႃးလႄႈပဵၼ်ၵေႃႉဢၼ်ႁူမ်ႈပွင်ၵၢၼ်လူၺ်ႈၵၼ်တင်းႁဝ်းၼႆႉ၊တေမွၵ်ႇလၢတ်ႈၼႄလွင်ႈၵဝ်ၵူႈၸိူဝ်ႉၵူႈမဵဝ်းတီႈသူယူႇဢေႃႈ။-
ၵွပ်ႈလွင်ႈၼႆႉယဝ်ႉၵဝ်လႆႈပွႆႇၸႂ်ႉမၼ်းၵႂႃႇၼင်ႇႁိုဝ်သူတၵ်းလႆႈႁုလွင်ႈႁဝ်းပဵၼ်ႁိုဝ်မီးႁိုဝ်ၼၼ်ႉယဝ်ႉ၊ဢိၵ်ႇတင်းၼင်ႇႁိုဝ်မၼ်းတၵ်းလႆႈပၼ်ဢဵၼ်ပၼ်ႁႅင်းသူ။-
ဢိၵ်ႇတင်းပွႆႇၸႂ်ႉ ဢေႃးၼေႇသိမ်ႇ၊ ဢၼ်ပဵၼ်ၼွင်ႉႁၵ်ႉၵဝ်လႄႈမီးသဵတ်ႈၸႃႇဢၼ်ၶဝ်ႈပႃးၼႂ်းၵူၼ်းသူၼၼ်ႉ၊ၵႂႃႇတီႈသူဢေႃႈ။ ၶဝ်တၵ်းမွၵ်ႇလၢတ်ႈၼႄလွင်ႈတၢင်းၵႃႈဢၼ်ပဵၼ်ယူႇၵႃႈၼႂ်းဝဵင်းၼႆႉၼၼ်ႉတီႈသူဢေႃႈ။
ဢႃႇရိတ်ႉတႃႇၶု၊ ဢၼ်ၶၢမ်ႇတူၵ်းထွင်ႇလူၺ်ႈၵၼ်တင်းၵဝ်၊ မႃႇၵု၊ ဢၼ်ပဵၼ်လၢၼ်ၸၢႆးသြႃႇ ပႃႇၼပႃႉ၊ တင်း ယေႃးသု ဢၼ်လႆႈႁွင်ႉႁဵၵ်ႈၸိုဝ်ႈ ယုသႃႉ၊ ၶဝ်ၸိူဝ်းၼႆႉ၊တၵ်ႉၼၢႆသူဢေႃႈ။ လွင်ႈ မႃႇၵု၊ ၸိုင်၊ၸွမ်းၼင်ႇဢၼ်ၵဝ်လႆႈသင်ႇလၢတ်ႈဝႆႉတီႈသူယဝ်ႉၼၼ်ႉ၊ပေႃးမၼ်းၵႂႃႇတီႈသူၸိုင်၊ႁပ်ႉတုင်းဢဝ်မၼ်းတႃႉ။-
ၼႂ်းၵူၼ်းၸိူဝ်းဢၼ်ၶၢမ်ႇဢဝ်မၢင်ႇၵလႃႇပၢတ်ႇပၢႆၼင်တင်းလၢႆၼၼ်ႉ၊ၶဝ်သၢမ်ၵေႃႉၼႆႉၵူၺ်းၶဝ်ႈပဵၼ်ၵူၼ်းႁူမ်ႈၵၢၼ်လူၺ်ႈၵၼ်တင်းၵဝ်၊ပုၼ်ႈမိူင်းၽြႃးပဵၼ်ၸဝ်ႈလႄႈ ၸၢင်ႈႁႂ်ႈၸႂ်ၵဝ်လႆႈသၢၵ်ႈသႃႇဢေႃႈ။
ဢေႇပႃႇၽရတ်ႉ၊ ၶႃႈ ၸဝ်ႈၶရိၸ်ႈ၊ ဢၼ်ၶဝ်ႈပႃးၵႃႈၼႂ်းၵူၼ်းသူၼႆႉ၊တၵ်ႉၼၢႆသူဢေႃႈ။ မၼ်းၶုၵ်းၸႂ်လႆႈသူလႄႈသူးတွင်းပုၼ်ႈသူ၊ၼင်ႇႁိုဝ်သူတၵ်းၸုၵ်းၶၢမ်ႇမၼ်ႈၶိူင်ႇယူႇ၊မီးၸႂ်ဢၼ်ပဵၼ်ၵူၼ်းလူင်ယူႇလႄႈပျေႉၸုမ်ႇၼႂ်းတၢင်းယုမ်ႇမၢတ်ႈသေယဝ်ႉ၊ထွမ်ႇဢဝ်ဢလူဝ်ႇၽြႃးပဵၼ်ၸဝ်ႈယူႇတႃႇသေႇဢမ်ႇထၢတ်ႇဢေႃႈ။-
လွင်ႈဢၼ်မၼ်းၶတ်းၸႂ်ႁဵတ်းၵၢၼ်ပုၼ်ႈသူၼႃႇလူင်လၢင်၊ဢိၵ်ႇတင်းပုၼ်ႈၵူၼ်းဝဵင်း လေႃးတိၵိ၊ တင်းၵူၼ်းဝဵင်း ႁေႇရပေႃးလိ၊ ဝႃႈၼႆ၊ၵဝ်ၶၢမ်ႇသၢၵ်ႈသေႇဢေႃႈ။-
သြႃႇမေႃယႃလူင် လုၵႃႇ၊ ဢၼ်ႁဝ်းႁၵ်ႉ၊ဢိၵ်ႇတင်း တေႇမႃႉ၊ ၸိူဝ်းၼႆႉၵေႃႈတၵ်ႉၼၢႆသူဢေႃႈ။
ႁဝ်းတၵ်ႉၼၢႆပီႈၼွင်ႉတင်းလၢႆ ဢၼ်မီးၵႃႈၼႂ်းဝဵင်း လေႃးတိၵိ၊ ဢိၵ်ႇတင်း ၼုမ်ႇၽႃႉ၊ တင်းၸိူဝ်းၸဝ်ႈဢၼ်ၸုတုမ်ၵၼ်ၵႃႈၼႂ်းႁိူၼ်းမႄႈယိင်းၼၼ်ႉဢေႃႈ။-
ဝၢႆးသေဢၼ်သူၽတ်းဢၢၼ်ႇလိၵ်ႈၼႆႉယဝ်ႉၸိုင်၊ဢဝ်ပၼ်ၸိူဝ်းၸဝ်ႈဝဵင်း လေႃးတိၵိ၊ ၽတ်းဢၢၼ်ႇတႃႉ။ လိၵ်ႈဢၼ်လုၵ်ႉတီႈဝဵင်း လေႃးတိၵိ၊ သူင်ႇပၼ်မႃးၼၼ်ႉၵေႃႈ၊သူၽတ်းဢၢၼ်ႇတႃႉ။-
တီႈ ဢႃႇၶိပ်ႉပု၊ ၼၼ်ႉၸိုင်၊ “ၼင်ႇႁိုဝ်ၵၢၼ်ထမ်ႇမႃႉဢၼ်မႂ်းလႆႈၶၢမ်ႇဢဝ်ၵႃႈတီႈၸဝ်ႈၽြႃးၼၼ်ႉတၵ်းယဝ်ႉတူဝ်ႈၸိုင်၊ႁဵတ်းသတိတႃႉ၊” ဝႃႈၼင်ၼႆ၊လၢတ်ႈပၼ်မၼ်းသေၵမ်း။
ၵဝ် ပေႃးလု၊ ဢဝ်တင်းမိုဝ်းတူဝ်ၸဝ်ႈၵဝ်ႇတႅမ်ႈၵႂၢမ်းတၵ်ႉၼၢႆၼႆႉပၼ်ၵႂႃႇတီႈသူဢေႃႈ။ ၶုၵ်းၸႂ်လႆႈၶႆႈၸႂ်ထိုင်ၸိူၵ်ႈလဵၵ်းဢၼ်မတ်ႉၽုၵ်ႇၵဝ်ၼႆႉတႃႉ။ ႁႂ်ႈၵျေးၸူးၸဝ်ႈ ယေႇသုၶရိၸ်ႈ၊ တႄႇယူႇၵႃႈၼိူဝ်သူတင်းလၢႆသေၵမ်းလူၺ်ႈ။ လိၵ်ႈတြႃးၵေႃးလေႃးသေးယဝ်ႉယဝ်ႉဢေႃႈ။
သြႃႇ ပေႃးလု၊ သြႃႇ သီႇလႃႉ၊ တင်းသြႃႇ တိမေႃးသေႇ၊ ၸိူဝ်းၼႆႉ၊တႅမ်ႈလိၵ်ႈပၼ်ထိုင်ၸိူဝ်းၸဝ်ႈဝဵင်း ထိတ်ႉသႃႇလေႃးၼိၵ်ႈ၊ ဢၼ်တႄႇယူႇၼႂ်းၽြႃးပေႃႈၸဝ်ႈ၊ဢိၵ်ႇတင်းၸဝ်ႈၽြႃး ယေႇသုၶရိၸ်ႈ၊ ဢေႃႈ။ ႁႂ်ႈၵျေးၸူးဢိၵ်ႇတင်းတၢင်းၼိမ်ဢၼ်ပဵၼ်မႃးၵႃႈတီႈၽြႃးပဵၼ်ၸဝ်ႈပဵၼ်ပုၼ်ႈသူသေၵမ်းလူၺ်ႈ။
ႁဝ်းယွင်ႈယေႃးတၢင်ႇၵျေးၸူးၽြႃးပဵၼ်ၸဝ်ႈပုၼ်ႈသူယူႇတႃႇသေႇလႄႈသူးတွင်းပုၼ်ႈသူတႃႇသေႇဢမ်ႇထၢတ်ႇဢေႃႈ။-
ႁဝ်းၶုၵ်းၸႂ်လႆႈတၢင်းဢၼ်သူၵမ်ၵျၢင်ႉၸွမ်းတၢင်းယုမ်ႇမၢတ်ႈသူမီးၸႂ်ဢၼ်ႁၵ်ႉလႄႈ ဢဝ်ႁႅင်းၶတ်းၸႂ်ၵျူဝ်းၸႃးႁဵတ်းၵၢၼ်၊ဢိၵ်ႇတင်းမီးၸႂ်ဢၼ်မုင်ႈထႃႈမွင်းထႃႈၸဝ်ႈႁဝ်း ယေႇသုၶရိၸ်ႈ၊ လႄႈမၼ်ႈၶိူင်ႇယူႇၵႃႈတီႈၽၢႆႇၼႃႈၽြႃးပဵၼ်ၸဝ်ႈ၊ပေႃႈၸဝ်ႈႁဝ်းၼၼ်ႉဢေႃႈ။-
လွင်ႈမၼ်းၸမ်ႉ၊ပီႈၼွင်ႉဢၼ်ၽြႃးပဵၼ်ၸဝ်ႈႁၵ်ႉၶဝ်႟။ ႁဝ်းႁုလွင်ႈတၢင်းဢၼ်ၽြႃးပဵၼ်ၸဝ်ႈလိူၵ်ႈဢဝ်သူၼၼ်ႉယူႇဢေႃႈ။-
ပိူဝ်ႈဝႃႈ၊ၶၢဝ်ႇတြႃးသိူဝ်းပျေႃႇဢၼ်ႁဝ်းႁေႃးလၢတ်ႈတီႈသူၼႆႉပဵၼ်ၵႂၢမ်းလၢႆလၢႆၵူၺ်းဢမ်ႇၸႂ်ႈ။ မိူဝ်ႈဢၼ်ႁဝ်းႁေႃးလၢတ်ႈၼၼ်ႉ၊ပႃးတၼ်းၶူဝ်းတင်းဝိၺိၺ်ႇဢၼ်မူတ်းၸၢင်ႇၸဝ်ႈ၊ဢိၵ်ႇတင်းတၢင်းဢၼ်ယုမ်ႇမၢတ်ႈတမ်းၸႂ်ၼၼ်ႉဢေႃႈ။ ႁဝ်းပဵၼ်ၵူၼ်းၸိူဝ်ႉၼင်ႇႁိုဝ်ပုၼ်ႈဢၵျူဝ်းသူ၊ၼႂ်းမိူဝ်ႈဢၼ်ႁဝ်းမီးယူႇလူၺ်ႈၵၼ်တင်းသူၼၼ်ႉသူႁုယူႇဢေႃႈ။-
ၼႂ်းတၢင်းဢၼ်လႆႈၶၢမ်ႇတုၵ်ႉၶႃႉတၢင်းၽၢၼ်ယႂ်ႇၼႃႇၼၼ်ႉ၊သူႁပ်ႉၶၢမ်ႇဢဝ်ၼုၵ်ႈၵပၢတ်ႈတြႃးၸဝ်ႈလူၺ်ႈတၢင်းၸူမ်းသိူဝ်းဢၼ်ဝိၺိၺ်ႇၸဝ်ႈပၼ်ၼၼ်ႉလႄႈသူလႆႈထိုင်ပဵၼ်ၵူၼ်းဢၼ်ႁဵတ်းၸွမ်းႁဝ်း၊ဢိၵ်ႇတင်းၸဝ်ႈၽြႃးဢေႃႈ။-
ႁဵတ်းၸိူဝ်ႉၼင်ႇၼၼ်လႄႈသူသမ်ႉလႆႈပဵၼ်ပုင်ႇသၢၵ်ႈသေႇပုၼ်ႈၵူၼ်းဢၼ်ယုမ်ႇမၢတ်ႈၸိူဝ်းဢၼ်မီးၼႂ်းမိူင်း မႃႇၵေႇတေႃးၼိ၊ တင်းမိူင်း ဢၶႃႇယႃႉ၊ တင်းသဵင်ႈတင်းလူင်ၼၼ်ႉဢေႃႈ။-
ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ၊သဵင်ဢၼ်ႁေႃးလၢတ်ႈၼုၵ်ႈၵပၢတ်ႈတြႃး၊ၸဝ်ႈၽြႃးၼၼ်ႉဢွၵ်ႇသေၵႃႈတီႈသူမႃးၸွတ်ႇတူဝ်ႈၵႂႃႇၼႂ်းမိူင်း မႃႇၵေႇတေႃးၼိ၊ တင်းမိူင်း ဢၶႃႇယႃႉ၊ ၵူၺ်းဢမ်ႇၵႃး၊ၶၢဝ်ႇငၢဝ်းလွင်ႈဢၼ်သူယုမ်ႇမၢတ်ႈၽြႃးပဵၼ်ၸဝ်ႈၼၼ်ႉၵေႃႈၸွတ်ႇတူဝ်ႈၵႂႃႇၵူႈတီႈၵူႈလႅၼ်ဢေႃႈ။ ၵွပ်ႈၼႆလႄႈလွင်ႈဢၼ်ႁဝ်းတၵ်းလႆႈလၢတ်ႈဢမ်ႇမီးသေၸိူဝ်ႉသေပိူင်၊-
ၵူၼ်းၸိူဝ်းၼၼ်ႉတူဝ်ၶဝ်မွၵ်ႇလၢတ်ႈၶႆႈၼႄႁဝ်းလွင်ႈဢၼ်သူႁဵတ်းဝၢတ်ႈၶႅၵ်ႇတီႈႁဝ်းထၢၼ်ႇႁိုဝ်ၼႂ်းမိူဝ်ႈဢၼ်ႁဝ်းၵႂႃႇလႄႇၵႂႃႇၸႂ်းသူၼၼ်ႉ၊ဢိၵ်ႇတင်းလွင်ႈဢၼ်သူဝႄႈပႅတ်ႈသေတၢင်းဢၼ်ဝႆႈႁုၼ်ႇႁၢင်ႈသၢင်းထုသေလႄႈပိၼ်ႇၸႂ်မႃးၸူးတီႈၽြႃးပဵၼ်ၸဝ်ႈႁႂ်ႈလႆႈပွင်ႁဵတ်းၵၢၼ်ၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇလႄႈမၼ်ႈၶိူင်ႇၸိုဝ်ႈၸႂ်ႈၼၼ်ႉ၊-
ဢိၵ်ႇတင်းႁႂ်ႈလႆႈပႂ်ႉထႃႈလုၵ်ႈၸဝ်ႈဢၼ်လုၵ်ႉသေၵႃႈတီႈၽႃႉၵၢင်ႁၢဝ်ၵျွလူင်းမႃး၊လုၵ်ႈၸဝ်ႈဢၼ်ဝႃႈ၊ ၸဝ်ႈယေႇသု၊ ဢၼ်ၽြႃးပဵၼ်ၸဝ်ႈႁႂ်ႈလုၵ်ႉၵႃႈတၢင်းတၢႆၶိုၼ်းလိပ်းမႃး၊ႁႂ်ႈလႆႈထုတ်ႇဢဝ်ႁဝ်းသေၵႃႈတီႈၽေးတၢမ်ႇဢၼ်တၵ်းႁွတ်ႈမႃးၼၼ်ႉဢေႃႈ။
လွင်ႈမၼ်းၸမ်ႉ၊ပီႈၼွင်ႉၶဝ်႟။ တူဝ်သူႁုဝႃႈတၢင်းဢၼ်ႁဝ်းၵႂႃႇလႄႇထိုင်သူၼၼ်ႉဢမ်ႇပဵၼ်လၢႆလၢႆလွၵ်ႇလွၵ်ႇၼၼ်ႉဢေႃႈ။-
ၸူဝ်ႈဢၼ်ႁဝ်းဢမ်ႇပႆႇၵႂႃႇၵႃႈတီႈဝဵင်း ထိတ်ႉသႃႇလေႃးၼိၵ်ႈ၊ ၼၼ်ႉႁဝ်းပေႃးလႆႈၶၢမ်ႇတုၵ်ႉၶႃႉတၢင်းၽၢၼ်၊ဢိၵ်ႇတင်းတၢင်းဢၼ်ပိူၼ်ႈသႄႉသွမ်းၵႃႈႁိုဝ်၊ၵႃႈၼႂ်းဝဵင်း ၽိလိပ်ႉပိ၊ ၼၼ်ႉသူႁုယူႇဢေႃႈ။ ၼႂ်းဝႃႈၼၼ်သေၵေႃႈ၊ပိၵ်ႉသမ်ႉမီးတၢင်းဢၼ်သၢၼ်ၶတ်းၵၼ်ၼမ်ၼႃႇသေၵေႃႈ၊ႁဝ်းၶၢမ်ႇဢဝ်ဢဵၼ်ႁႅင်းတီႈၽြႃးပဵၼ်ၸဝ်ႈသေယဝ်ႉ၊ႁေႃးလၢတ်ႈပၼ်သူၶၢဝ်ႇတြႃးသိူဝ်းပျေႃႇဢၼ်လုၵ်ႉသေၵႃႈတီႈမၼ်းၸဝ်ႈမႃးၼၼ်ႉ၊ႁတ်းႁတ်းႁၢၼ်ႁၢၼ်ဢေႃႈ။-
လွင်ႈမၼ်းၸမ်ႉ၊ႁဝ်းဢဝ်တင်းတၢင်းဢၼ်ၽိတ်းဢၼ်ပိူင်ႈ၊တၢင်းဢၼ်ဢမ်ႇမူတ်းၸၢင်ႇ၊တၢင်းဢၼ်ပႅတ်ႉလႅၼ်သေလႄႈၸူဝ်းဢဝ်သူဢမ်ႇၸႂ်ႈ၊-
မႅၼ်ႈၸွမ်းၼင်ႇဢၼ်ၽြႃးပဵၼ်ၸဝ်ႈႁပ်ႉဢဝ်ႁဝ်းလႄႈဢၢပ်ႈဝၢင်းၶၢဝ်ႇတြႃးသိူဝ်းပျေႃႇၸဝ်ႈတီႈႁဝ်းၼၼ်ႉ၊ႁဝ်းႁေႃးလၢတ်ႈၸွမ်းၼင်ႇဢၼ်ထုၵ်ႇၸႂ်ၵူၼ်းဢမ်ႇၸႂ်ႈ၊ႁဝ်းႁေႃးလၢတ်ႈၸွမ်းၼင်ႇဢၼ်ထုၵ်ႇၸႂ်ၽြႃးပဵၼ်ၸဝ်ႈ၊ၸဝ်ႈဢၼ်ၸႅတ်ႈထၢမ်ၸၢမ်းတူၺ်းႁူဝ်ၸႂ်ႁဝ်းၼၼ်ႉဢေႃႈ။-
လွင်ႈမၼ်းၸမ်ႉ၊ၵႃႈၼင်ႇဢၼ်သူႁုယူႇၼၼ်ႉ၊ႁဝ်းဢမ်ႇတွၼ်ႉၸႂ်ႉၵႂၢမ်းဢၼ်ၶျေႃးၵိၼ်၊ဢိၵ်ႇတင်းၸႂ်ႉၵႂၢမ်းဢၼ်ၸႂ်လေႃးၽႃႉပူၼ်ႉလိူဝ်၊ဢၼ်သိူင်ႇဝႆႉဢမ်ဝႆႉၸိူဝ်းၼၼ်ႉၸိုင်၊ၽြႃးပဵၼ်ၸဝ်ႈပဵၼ်သၢၵ်ႈသေႇႁဝ်းဢေႃႈ။-
ပိၵ်ႉသမ်ႉႁဝ်းပဵၼ်တမၢၼ်ႇၸဝ်ႈဢၼ်မီးဢၶႂၢင်ႉဢၼ်ပူင်ဢမိင်ႉၵႃႈၼိူဝ်သူသေၵေႃႈႁဝ်းဢမ်ႇႁႃၵုင်ႇသရေႇဢၼ်ၵူၼ်းပၼ်ၼၼ်ႉသေဢိတ်း။ တီႈသူၵေႃႈႁဝ်းဢမ်ႇႁႃ။ တီႈပိူၼ်ႈတၢင်ႇၵေႃႉၵေႃႈ၊ႁဝ်းဢမ်ႇႁႃ။-
ၵူၺ်းၵႃႈ၊မိူဝ်ႈဢၼ်ႁဝ်းမီးယူႇလူၺ်ႈၵၼ်တင်းသူၼၼ်ႉႁဝ်းႁဵတ်းၼိမ်ၼိမ်လီလီတီႈသူမိူၼ်ၸိူဝ်ႉၼင်ႇဢၼ်မႄႈလုၵ်ႈဢွၼ်ႇဢၼ်လုမ်းလႃးလုၵ်ႈၶဝ်ၼၼ်ႉဢေႃႈ။-
ၵွပ်ႈၼႆလႄႈၸွမ်းၼင်ႇဢၼ်ႁဝ်းႁၵ်ႉသူၼႃႇလူင်လၢင်ၼၼ်ႉ၊ႁဝ်းပေႃးပႃးတင်းတၢင်းဢၼ်ဢဵတ်းလူႁၵ်ႉပႅင်းသူယူႇသေလႄႈမီးၸႂ်ၸေႇတၼႃႇၶႂ်ႈမႅင်ႇၶႂ်ႈပၼ်ၶၢဝ်ႇတြႃးသိူဝ်းပျေႃႇၽြႃးပဵၼ်ၸဝ်ႈၵူၺ်းဢမ်ႇၵႃး၊ၶႂ်ႈမႅင်ႇၶႂ်ႈပၼ်ဢသၢၵ်ႈတူဝ်ၸဝ်ႈၵဝ်ႇပႃးလူးၵွၼ်ႇဢေႃႈ။-
လွင်ႈမၼ်းၸမ်ႉ၊ပီႈၼွင်ႉၶဝ်႟။ သူမၢတ်ႈတွင်းဝႆႉလွင်ႈဢၼ်ႁဝ်းႁဵတ်းသၢင်ႈယၢပ်ႇၽိုတ်ႇၼႃႇလူင်လၢင်လႄႈလႆႈဢဝ်ႁႅင်းၵႆႉၶတ်းၸႂ်ၼၼ်ႉယူႇဢေႃႈ။ ၼႂ်းတၢင်းဢၼ်ႁေႃးလၢတ်ႈၶၢဝ်ႇတြႃးသိူဝ်းပျေႃႇၽြႃးပဵၼ်ၸဝ်ႈပၼ်သူၼၼ်ႉၼင်ႇႁိုဝ်တၵ်းဢမ်ႇပဵၼ်တုၵ်ႉၶႃႉတီႈသူသေၵေႃႉသေၵူၼ်းၸိုင်၊ႁဝ်းၶတ်းၸႂ်ႁဵတ်းယူႇဝၼ်းဝၼ်းၶိုၼ်းၶိုၼ်းဢေႃႈ။
သူပဵၼ်သၢၵ်ႈသေႇတီႈႁဝ်းဢေႃႈ။ ၽြႃးပဵၼ်ၸဝ်ႈၵေႃႈပဵၼ်သၢၵ်ႈသေႇတီႈလွင်ႈတၢင်းဢၼ်ႁဝ်းယူႇသဝ်းသၢင်ႈႁဵတ်းၼႂ်းသူၸိူဝ်းဢၼ်ယုမ်ႇမၢတ်ႈၼႆႉၼၼ်ႉပဵၼ်ဢၼ်မူတ်းၸၢင်ႇသိုဝ်ႈတေႃႇလႄႈၵၢင်းလွတ်ႈတၢင်းဢၼ်တၢင်ႇဢပျတ်ႈၼၼ်ႉယူႇဢေႃႈ။-
လွင်ႈမၼ်းၸမ်ႉ၊သူႁုဝႃႈႁဝ်းလုမ်းလႃးသူမိူၼ်ၸိူဝ်ႉၼင်ႇဢၼ်ပေႃႈလုမ်းလႃးလုၵ်ႈလၢင်းမၼ်းတင်းလၢႆၼၼ်ႉယူႇဢေႃႈ။ ႁဝ်းတိုၵ်းယူင်းသူ၊ပၼ်ႁႅင်းတီႈသူသေလႄႈ ၸူဝ်းဢဝ်သူၼႃႇလူင်လၢင်၊-
ႁႂ်ႈသူလႆႈၵမ်ၵျၢင်ႉတၢင်းၵမ်တၢင်းၵျၢင်ႉဢၼ်ထုၵ်ႇၸႂ်ၽြႃးပဵၼ်ၸဝ်ႈ၊ၸဝ်ႈဢၼ်ႁွင်ႉသူၶဝ်ႈၵႂႃႇၵႃႈၼႂ်းမိူင်းၸဝ်ႈ၊ဢိၵ်ႇတင်းမုၼ်ၸဝ်ႈၼၼ်ႉဢေႃႈ။
သမ်ႉထႅင်ႈမဵဝ်းၼိုင်ႈ၊ႁဝ်းမီးတၢင်းဢၼ်ယွင်ႈယေႃးတၢင်ႇၵျေးၸူး၊ၽြႃးပဵၼ်ၸဝ်ႈတႃႇသေႇလူၺ်ႈလွင်ႈၼႂ်းမိူဝ်ႈဢၼ်သူၶၢမ်ႇဢဝ်ၼုၵ်ႈၵပၢတ်ႈတြႃး၊ၽြႃးပဵၼ်ၸဝ်ႈဢၼ်လႆႈငိၼ်းတီႈႁဝ်းၼၼ်ႉ၊သူယင်းဢမ်ႇၶၢမ်ႇဢဝ်ၸိူဝ်ႉၼင်ႇပဵၼ်ၵႂၢမ်းၵူၼ်းလႄႈၶၢမ်ႇဢဝ်ၸိူဝ်ႉၼင်ႇဢၼ်ပဵၼ်ၼုၵ်ႈၵပၢတ်ႈတြႃးဢၼ်မၢၼ်ႇဢၼ်မႅၼ်ႈ၊ၸိူဝ်ႉၼင်ႇဢၼ်ပဵၼ်တြႃးၸဝ်ႈဢၼ်ပွင်ႁဵတ်းၵႃႈၼႂ်းသူၸိူဝ်းဢၼ်ယုမ်ႇမၢတ်ႈၼၼ်ႉဢေႃႈ။-
ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ၊ပီႈၼွင်ႉၶဝ်႟။ သူလႆႈၶၢမ်ႇမိူၼ်မိူၼ်ၵၼ်ၸိူဝ်ႉၼင်ႇၸိူဝ်းၸဝ်ႈၽြႃးပဵၼ်ၸဝ်ႈတင်းလၢႆ၊ဢၼ်ပဵၼ်ၵူၼ်း ၸဝ်ႈယေႇသုၶရိၸ်ႈ၊ ၼႂ်းမိူင်း ယုတႃႉ၊ ၸိူဝ်းၼၼ်ႉဢေႃႈ။ သူလႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသႄးၼႂ်းမိုဝ်းၸိူဝ်ႉၶိူဝ်းတူဝ်ၸဝ်ႈၵဝ်ႇမိူၼ်ၸိူဝ်ႉၼင်ႇဢၼ်ၶဝ်လႆႈၶၢမ်ႇၵႃႈတီႈၵူၼ်းမဵဝ်း ၵျူး၊ တင်းလၢႆ၊-
ၸိူဝ်းဢၼ်ဢဝ် ၸဝ်ႈယေႇသု၊ တင်းပရေႃးၽႅတ်ႈ တင်းလၢႆတၢႆသေယဝ်ႉ၊သမ်ႉၼိၵ်ႈၸၢၵ်ႈငႅၼ်းသႄးႁဝ်းလႄႈႁေႃႈႁဝ်းဢွၵ်ႇပႅတ်ႈၼၼ်ႉဢေႃႈ။ ၶဝ်ဢမ်ႇၸွမ်းၼင်ႇဢလူဝ်ႇၽြႃးပဵၼ်ၸဝ်ႈ၊ပဵၼ်ဢၼ်ၶတ်းၵၼ်တင်းၵူၼ်းတင်းသဵင်ႈတင်းလူင်ဢေႃႈ။-
ၶဝ်ႁႄႉၶႅၼ်တၢင်းဢၼ်ႁဝ်းႁေႃးလၢတ်ႈႁႂ်ႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ၊လႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၼၼ်ႉဢေႃႈ။ ၶဝ်ႁဵတ်းၸိူဝ်ႉၼင်ႇၼႆႁႂ်ႈဢပျတ်ႈတဵမ်ဝႆႉၼႂ်းၶဝ်ယူႇၶိူဝ်းၶိူဝ်းဢေႃႈ။ ပဵၼ်ၸိူဝ်ႉႁိုဝ်သေၵေႃႈဢပျတ်ႈတၢမ်ႇဢၼ်ၽြႃးပဵၼ်ၸဝ်ႈၸီႇယၢင်ႇၼၼ်ႉတူၵ်းႁွတ်ႈၵႃႈၼိူဝ်ၶဝ်ယဝ်ႉယဝ်ႉဢေႃႈ။
ပီႈၼွင်ႉၶဝ်႟။ ၸဵမ်မိူဝ်ႈႁဝ်းတႄႇၸႃႉၽၢတ်ႇယၢၼ်သူမႃးဢမ်ႇပေႃးႁိုင်ၼၼ်ႉ၊ပိူဝ်ႈဢၼ်ႁူဝ်ၸႂ်ႁဝ်းၽၢတ်ႇယၢၼ်သူမႃးဢမ်ႇၸႂ်ႈ၊တူဝ်ၶၼ်ႇထႃႇႁဝ်းၽၢတ်ႇယၢၼ်မႃးၵူၺ်းၼၼ်ႉလႄႈႁဝ်းၸႂ်ထိုင်သူၼႃႇလူင်လၢင်လႄႈယဵင်ႈၶႅၼ်းၵႆႉၶတ်းၸႂ်ႁႂ်ႈလႆႈထူပ်းႁၼ်သူထႅင်ႈဢေႃႈ။-
ၵဝ် ပေႃးလု၊ ၶႂ်ႈမႃးၸူးတီႈသူပွၵ်ႈၼိုင်ႈယဝ်ႉပွၵ်ႈၼိုင်ႈယူႇ။ ၵူၺ်းၵႃႈ၊ ၸႃႇတၢၼ်ႇ၊ ႁႄႉၶႅၼ်ႁဝ်းယူႇဢေႃႈ။-
ၵႃႈတီႈၽၢႆႇၼႃႈၸဝ်ႈၽြႃးႁဝ်း ၸဝ်ႈယေႇသု၊ ၼႂ်းမိူဝ်ႈဢၼ်မၼ်းၸဝ်ႈတၵ်းမႃးၼၼ်ႉ၊လွင်ႈတၢင်းဢၼ်ႁဝ်းမုင်ႈထႃႈမွင်းထႃႈ၊လွင်ႈတၢင်းဢၼ်ႁဝ်းတၵ်းသိူဝ်းပျေႃႇ၊ဢိၵ်ႇတင်းလွင်ႈတၢင်းဢၼ်ႁဝ်းတၵ်းဢုပ်ႇဝၢဝ်းၼႂ်းတၢင်းဢၼ်ပႄႉၼႅင်ႇၼၼ်ႉပဵၼ်ဢၼ်လႂ်။ ပဵၼ်သူၸိူဝ်းၼႆႉယဝ်ႉဢမ်ႇၸႂ်ႈႁိုဝ်း။-
လွင်ႈမၼ်းၸမ်ႉ၊သူပဵၼ်ၵုင်ႇသရေႇႁဝ်း၊ဢိၵ်ႇတင်းတၢင်းဢၼ်သိူဝ်းပျေႃႇႁဝ်းဢေႃႈ။
တီႈသုတ်းတီႈၵွႆမၼ်း၊မိူဝ်ႈဢၼ်ႁဝ်းဢမ်ႇယိူၼ်ႉလႆႈသေဢိတ်းယဝ်ႉၼၼ်ႉ၊ႁဝ်းထၢင်ႇဝႃႈသင်ႁဝ်းၵိုတ်းဝႆႉတီႈဝဵင်း ဢႃႇထိၼ်ႇ၊ ၵူၺ်းၸိုင်တေလီဢေႃႈ၊ဝႃႈၼင်ႇၼႆၸင်ႇ၊-
ႁဝ်းပွႆႇၸႂ်ႉသြႃႇ တိမေႃးသေႇ၊ ၼွင်ႉၸၢႆးႁဝ်းဢၼ်ပဵၼ်ၵူၼ်းၸႂ်ႉၵူၼ်းသွႆၽြႃးပဵၼ်ၸဝ်ႈဢၼ်ႁေႃးလၢတ်ႈၶၢဝ်ႇတြႃးသိူဝ်းပျေႃႇ ၸဝ်ႈၶရိၸ်ႈ၊ ၼၼ်ႉၵႂႃႇၸူးတီႈသူႁႂ်ႈလႆႈပၼ်ဢဵၼ်ပၼ်ႁႅင်း၊ဢိၵ်ႇတင်းႁႂ်ႈလႆႈၸွႆႈထႅမ်တၢင်းယုမ်ႇမၢတ်ႈသူဢေႃႈ။-
ပိူဝ်ႈၼႆလႄႈၵွပ်ႈပိူဝ်ႈတုၵ်ႉၶႃႉတၢင်းၽၢၼ်ၸိူဝ်းၼႆႉလႄႈသူဢမ်ႇထုၵ်ႇလီသုတ်ႉယွမ်းၵႂႃႇသေၵေႃႉသေၵူၼ်း။ တုၵ်ႉၶႃႉတၢင်းၽၢၼ်ၸိူဝ်ႉၼင်ႇၼႆၼၼ်ႉပဵၼ်ဢလူဝ်ႇၽြႃးပဵၼ်ၸဝ်ႈဝႃႈၼႆ၊သူႁုယူႇဢေႃႈ။-
ၸႃႉၸဵမ်မိူဝ်ႈႁဝ်းမီးယူႇလူၺ်ႈၵၼ်တင်းသူၼၼ်ႉၵေႃႈ၊ႁဝ်းတၵ်းလႆႈဢွၼ်ၵၼ်ၶၢမ်ႇတုၵ်ႉၶႃႉတၢင်းၽၢၼ်ဝႃႈၼႆ၊ႁဝ်းလႆႈလၢတ်ႈဝႆႉယဝ်ႉ။ ၸွမ်းၼင်ႇသူႁုယူႇၼၼ်ႉပဵၼ်မႃးၵႃႈၼင်ႇဢၼ်လၢတ်ႈဝႆႉယဝ်ႉၼၼ်ႉဢေႃႈ။-
ၵွပ်ႈပိူဝ်ႈလွင်ႈတၢင်းၼႆႉလႄႈၵဝ်ဢမ်ႇယိူၼ်ႉလႆႈယဝ်ႉၸင်ႇၵဝ်လႆႈပွႆႇၸႂ်ႉသြႃႇ တိမေႃးသေႇ၊ ၵႂႃႇႁႃထၢမ်တူၺ်းတၢင်းယုမ်ႇမၢတ်ႈသူ၊ပိူဝ်ႈဝႃႈၵဝ်ၵူဝ်မႃႇၼၢတ်ႈတၵ်းၸၢမ်းတူၺ်းၸူဝ်းဢဝ်သူၵႂႃႇလႄႈၵူဝ်ၵၢၼ်တၢင်းႁဵတ်းႁဝ်းၼၼ်ႉ၊ဢမ်ႇပွင်ႇလွင်ႈၵႃႈသင်ၵႂႃႇဢေႃႈ။
ၵူၺ်းၵႃႈ၊တေႃႈလဵဝ်ၼႆႉသြႃႇ တိမေႃးသေႇ၊ ပွၵ်ႈၶိုၼ်းသေၵႃႈတီႈသူမႃးလႄႈမွၵ်ႇလၢတ်ႈၶၢဝ်ႇငၢဝ်းဢၼ်လီဢၢမ်းလူၺ်ႈလွင်ႈတၢင်းယုမ်ႇမၢတ်ႈလႄႈတၢင်းႁၵ်ႉဢၼ်မီးတီႈသူ၊ဢိၵ်ႇတင်းလွင်ႈတၢင်းဢၼ်သူမီးၸႂ်လီၸႂ်ဝၢၼ်ၶုၵ်းၸႂ်လႆႈႁဝ်းယူႇလႄႈၸႂ်ထိုင်ႁဝ်းယူႇတႃႇသေႇၸိူဝ်ႉၼင်ႇဢၼ်ႁဝ်းၸႂ်ထိုင်သူၼၼ်ႉဢေႃႈ။-
ၵွပ်ႈပိူဝ်ႈလွင်ႈတၢင်းၼႆႉလႄႈပီႈၼွင်ႉၶဝ်႟။ ၵႃႈဢၼ်ႁဝ်းလႆႈၶၢမ်ႇတုၵ်ႉၶႃႉလႄႈယၢပ်ႇၽိုတ်ႇယူႇတင်းသဵင်ႈတင်းလူင်ၼၼ်ႉႁဝ်းလႆႈသၢၵ်ႈသႃႇမႃးၵွပ်ႈပိူဝ်ႈတၢင်းယုမ်ႇမၢတ်ႈသူၼၼ်ႉဢေႃႈ။-
လွင်ႈမၼ်းၸမ်ႉ၊တေႃႈလဵဝ်ၼႆႉပေႃးသူမၼ်ႈၶိူင်ႇယူႇၼႂ်းၸဝ်ႈၽြႃးၸိုင်၊ဢသၢၵ်ႈႁဝ်းၵေႃႈမီးတၢင်းဢၼ်ၶျၢမ်းသႃႇဢေႃႈ။-
တေႃႈလဵဝ်ၼႆႉ၊ႁဝ်းလႆႈယွင်ႈယေႃးတၢင်ႇၵျေးၸူးၽြႃးပဵၼ်ၸဝ်ႈပုၼ်ႈသူဢေႃႈ။ ႁဝ်းယွင်ႈယေႃးတၢင်ႇၵျေးၸူးမၼ်းၸဝ်ႈပုၼ်ႈလွင်ႈဢၼ်ႁဝ်းလႆႈသိူဝ်းပျေႃႇၵႃႈတီႈၽၢႆႇၼႃႈၽြႃးပဵၼ်ၸဝ်ႈၵွပ်ႈပိူဝ်ႈသူဢေႃႈ။-
ႁဝ်းပႃးၸႂ်ပႃးၶေႃးသေလႄႈသူးတွင်းၵူႈဝၼ်းၵူႈၶိုၼ်းတႃႇသေႇဢမ်ႇထၢတ်ႇ၊ပုၼ်ႈလွင်ႈၼင်ႇႁိုဝ်တၵ်းလႆႈထူပ်းႁၼ်သူ၊ဢိၵ်ႇတင်းႁႂ်ႈလႆႈထႅင်ႈပၼ်ႁႅင်းတၢင်းယုမ်ႇမၢတ်ႈသူဢေႃႈ။
ၶႅၼ်းတေႃႈႁႂ်ႈၽြႃးပဵၼ်ၸဝ်ႈဢၼ်ဝႃႈ၊ပေႃႈႁဝ်းဢိၵ်ႇတၢင်းၸဝ်ႈၽြႃးႁဝ်း ၸဝ်ႈယေႇသု၊ မႄးသဵၼ်ႈတၢင်းပုၼ်ႈႁဝ်းတၵ်းၵႂႃႇၸူးသူၼၼ်ႉဝႆႉသေၵမ်းလူၺ်ႈ။-
ႁႂ်ႈၽြႃးပဵၼ်ၸဝ်ႈထႅင်ႈႁႅင်းပၼ်ၸႂ်မႅတ်ႈတႃႇဢၼ်သူၼင်ႇၵၼ်ၵၼ်ႁၵ်ႉပႅင်းၵၼ်၊ဢိၵ်ႇတင်းႁၵ်ႉပႅင်းပိူၼ်ႈတင်းသဵင်ႈတင်းလူင်ၼၼ်ႉယႂ်ႇၽႄၼမ်ၵိုၼ်းမႃးမိူၼ်ၸိူဝ်ႉၼင်ႇဢၼ်ႁဝ်းႁၵ်ႉသူၼၼ်ႉသေၵမ်းလူၺ်ႈ။-
ၼင်ႇၼၼ်လႄႈႁႂ်ႈၽြႃးပဵၼ်ၸဝ်ႈမႄးၵုမ်းမႄးႁဵတ်းႁူဝ်ၸႂ်သူႁႂ်ႈလႆႈၵၢင်းလွတ်ႈတင်းတီႈဢၼ်တၢင်ႇဢပျတ်ႈၼၼ်ႉလႄႈလႆႈမၼ်ႈၶိူင်ႇယူႇၵႃႈၼႂ်းပႃႇရမီႇတၢင်းဢၼ်မူတ်းၸၢင်ႇၵႃႈတီႈၽၢႆႇၼႃႈၽြႃးပဵၼ်ၸဝ်ႈဢၼ်ဝႃႈပေႃႈႁဝ်း၊ၼႂ်းမိူဝ်ႈဢၼ်ၸဝ်ႈၽြႃးႁဝ်း ၸဝ်ႈယေႇသု၊ ၵျွမႃးလူၺ်ႈၵၼ်တင်းၵူၼ်းမူတ်းၸၢင်ႇမၼ်းၸဝ်ႈတင်းသဵင်ႈတင်းလူင်ၼၼ်ႉသေၵမ်းလူၺ်ႈ။
လိူဝ်သေၼၼ်ႉပီႈၼွင်ႉၶဝ်႟။ ႁဝ်းဢိင်ၸဝ်ႈၽြႃး ယေႇသု၊ လႄႈတွင်းပၢၼ်ႇတိုၵ်းယူင်းသူၸမ်ႉ၊ၵႃႈၼင်ႇဢၼ်သူလႆႈသွၼ်ဢဝ်တီႈႁဝ်းလွင်ႈဢၼ်သူတၵ်းလႆႈၵမ်ၵျၢင်ႉၸိူဝ်ႉၼင်ႇႁိုဝ်၊တၵ်းလႆႈထုၵ်ႇၸႂ်ၽြႃးပဵၼ်ၸဝ်ႈၸိူဝ်ႉၼင်ႇႁိုဝ်ၼၼ်ႉတေႃႈလဵဝ်သူၵမ်ၵျၢင်ႉၸွမ်းယူႇယဝ်ႉ။ ဢွၼ်ၵၼ်ယဵင်ႈၶႅၼ်းၶတ်းၸႂ်ၵမ်ၵျၢင်ႉယူႇတိၵ်းတိၵ်းတႃႉ။-
သူႁုလွင်ႈဢၼ်ႁဝ်းဢဝ်ဢၶႂၢင်ႉဢႃႇၼႃႇတီႈၸဝ်ႈၽြႃး ယေႇသု၊ လႄႈသင်ႇလၢတ်ႈတီႈသူၸိူဝ်ႉၼင်ႇႁိုဝ်ၼၼ်ႉယူႇဢေႃႈ။-
လွင်ႈမၼ်းၸမ်ႉ၊ၽြႃးပဵၼ်ၸဝ်ႈမီးဢလူဝ်ႇၸမ်ႉ၊မၼ်းၸဝ်ႈၶႂ်ႈႁႂ်ႈသူမူတ်းၸၢင်ႇယူႇလႄႈၵၢင်းလွတ်ႈတင်းတၢင်းဢၼ်ၽိတ်းၵႃႇမေႇသုဢေႃႈ။-
သူၵူႈၵေႃႉထုၵ်ႇလီႁုလွင်ႈဢၼ်တေလႆႈႁဵတ်းၸိူဝ်ႉႁိုဝ်တႄႇၼႃႈႁိူၼ်းလႄႈသိူၵ်ႈသမ်ႇၵၼ်တင်းမေးတူဝ်ၸဝ်ႈၵဝ်ႇၼႂ်းတၢင်းဢၼ်မူတ်းၸၢင်ႇလႄႈမီးၵုင်ႇသရေႇယူႇၼၼ်ႉ၊-
ဢိၵ်ႇတင်းယင်းဢမ်ႇမီးၸႂ်ၵိလေႇသႃႇဢၼ်ၸပ်းၸွႆးမိူၼ်ၸိူဝ်ႉၼင်ႇၵူၼ်းၼွၵ်ႈသႃႇသၼႃႇၸိူဝ်းဢၼ်ဢမ်ႇႁုၸၵ်းၽြႃးပဵၼ်ၸဝ်ႈၼၼ်ႉဢေႃႈ။-
ၵွပ်ႈၼႆလႄႈလွင်ႈဢၼ်ၼႆႉၽူႈလႂ်သေၵေႃႉသေၵူၼ်းတၵ်းတေဢမ်ႇလႆႈႁဵတ်းဢၼ်ၽိတ်းဢၼ်ပိူင်ႈ၊ဢိၵ်ႇတင်းတၢင်းဢၼ်ယႃႉၵဝ်းၼႃႈႁိူၼ်းပီႈၼွင်ႉၼင်ႇၵၼ်ၵၼ်ၼၼ်ႉ။ ၶဝ်ၸိူဝ်းဢၼ်ၽိတ်းပိူင်ႈၸိူဝ်ႉၼင်ႇၼႆၼၼ်ႉၸဝ်ႈၽြႃးတၵ်းၸီႇယၢင်ႇတြႃးတီႈၶဝ်ဢေႃႈ၊ဝႃႈၼႆႁဝ်းႁေႃးလၢတ်ႈပၼ်သတိသူဝႆႉလီလီ၊ၸဵမ်မိူဝ်ႈဢွၼ်တၢင်းၼၼ်ႉယဝ်ႉဢေႃႈ။-
ၽြႃးပဵၼ်ၸဝ်ႈႁွင်ႉဢဝ်ႁဝ်း၊ႁႂ်ႈႁွတ်ႈထိုင်တၢင်းဢၼ်ၵူဝ်ႈၵိူၵ်ႇဢမ်ႇၸႂ်ႈ။ ႁႂ်ႈလႆႈႁွတ်ႈထိုင်တၢင်းဢၼ်မူတ်းၸၢင်ႇဢေႃႈ။-
ပိူဝ်ႈၼႆလႄႈၵေႃႉဢၼ်ထဵင်ပႅတ်ႈၼၼ်ႉ၊ထဵင်ပႅတ်ႈၵူၼ်းဢမ်ႇၸႂ်ႈ။ ထဵင်ပႅတ်ႈၽြႃးပဵၼ်ၸဝ်ႈဢၼ်ပၼ်ဝိၺိၺ်ႇမူတ်းၸၢင်ႇမၼ်းၸဝ်ႈတီႈသူၼၼ်ႉဢေႃႈ။
လွင်ႈတၢင်းဢၼ်သူပီႈၼွင်ႉၼင်ႇၵၼ်တၵ်းလႆႈႁၵ်ႉပႅင်းၵၼ်ၸိုင်၊ဢမ်ႇမီးတီႈတၵ်းတႅမ်ႈပၼ်ၵႂႃႇတီႈသူယဝ်ႉ။ ၵွပ်ႈပိူဝ်ႈၼင်ႇႁိုဝ်ဝႃႈၼႆၸမ်ႉ၊သူပဵၼ်ၵေႃႉဢၼ်ၽြႃးပဵၼ်ၸဝ်ႈသင်ႇသွၼ်ပၼ်ႁႂ်ႈၵေႃႉၼိုင်ႈလႄႈၵေႃႈၼိုင်ႈႁၵ်ႉပႅင်းၵၼ်ဢေႃႈ။-
လိူဝ်သေၼၼ်ႉဢမ်ႇၵႃး၊သူႁဵတ်းၸိူဝ်ႉၼင်ႇၼၼ်ႁၵ်ႉပႅင်းပီႈၼွင်ႉမိူင်း မႃႇၵေႇတေႃးၼိ၊ ၶဝ်ၵူႈတီႈၵူႈလႅၼ်ၸိူဝ်းၼၼ်ႉယူႇဢေႃႈ။ ၼႂ်းဝႃႈၼၼ်သေၵေႃႈ၊ပီႈၼွင်ႉၶဝ်႟။ ႁဝ်းတိုၵ်းယူင်းတွင်းပၢၼ်ႇႁႂ်ႈသူတၵ်းယဵင်ႈၶႅၼ်းႁဵတ်းၸိူဝ်ႉၼင်ႇၼၼ်ယူႇတိၵ်းတိၵ်း၊-
ဢိၵ်ႇတင်းႁႂ်ႈမီးၸႂ်ဢၼ်ယူႇၼိမ်ၼိမ်လီလီလႄႈပွင်ႁဵတ်းၼႃႈၵၢၼ်တူဝ်ၸဝ်ႈၵဝ်ႇယူႇ၊ႁဵတ်းလဵင်ႉတွင်ႉတူဝ်ၸဝ်ႈၵဝ်ႇယူႇ၊ၸွမ်းၵႃႈၼင်ႇဢၼ်ႁဝ်းသင်ႇလၢတ်ႈတီႈသူဝႆႉ၊ၸဵမ်မိူဝ်ႈဢွၼ်ၼႆႉၼၼ်ႉဢေႃႈ။-
ၵွပ်ႈပိူဝ်ႈသူႁဵတ်းၸိူဝ်ႉၼင်ႇၼႆလႄႈသူတၵ်းလႆႈၶၢမ်ႇဢဝ်တၢင်းဢၼ်ၶဝ်ၸိူဝ်းဢၼ်ဢမ်ႇယုမ်ႇမၢတ်ႈတင်းလၢႆရူဝ်ႇသေႇၵူဝ်ယမ်သူ၊ဢိၵ်ႇတင်းလွင်ႈဢၼ်ဢမ်ႇလူဝ်ႇဢိင်ပိုင်ႈပိူၼ်ႈပုၼ်ႈတၢင်းဢၼ်သူလူဝ်ႇတင်းသဵင်ႈတင်းလူင်ၼၼ်ႉဢေႃႈ။
ပီႈၼွင်ႉၶဝ်႟။ ႁဝ်းဢမ်ႇမီးၸႂ်ဢၼ်ၶႂ်ႈႁႂ်ႈသူဢမ်ႇႁုၸၵ်းသမ်ႇမႃႇတြႃး၊ဢၼ်ၸၢပ်ႈသႅင်ႇလွင်ႈၶဝ်ၸိူဝ်းဢၼ်ၼွၼ်းလပ်းယဝ်ႉၼၼ်ႉ၊ သူဢမ်ႇလူဝ်ႇၼႅင်ၸႂ်မိူၼ်ပိူၼ်ႈၸိူဝ်းဢၼ်ဢမ်ႇမီးတၢင်းဢၼ်မုင်ႈထႃႈမွင်းထႃႈတင်းလၢႆၼႅင်ၸႂ်ၼၼ်ႉဢေႃႈ။-
လွင်ႈမၼ်းၸမ်ႉ၊ၸိူဝ်ႉၼင်ႇဢၼ်ႁဝ်းယုမ်ႇမၢတ်ႈဝႃႈ၊ ၸဝ်ႈယေႇသု၊ တၢႆယဝ်ႉသမ်ႉလုၵ်ႉၶိုၼ်းယဝ်ႉၼၼ်ႉ၊မိူၼ်ၸိူဝ်ႉၼင်ႇၼၼ်ၶဝ်ၸိူဝ်းဢၼ်ၼွၼ်းလပ်းၼႂ်း ၸဝ်ႈယေႇသု၊ ယဝ်ႉၼၼ်ႉၵေႃႈ၊ၽြႃးပဵၼ်ၸဝ်ႈတၵ်းဢဝ်ၶဝ်မႃးၶိုၼ်းလူၺ်ႈၵၼ်တင်းမၼ်းၸဝ်ႈၼၼ်ႉဢေႃႈ။
ႁဝ်းသမ်ႉဢဝ်တင်းၼုၵ်ႈၵပၢတ်ႈတြႃးၸဝ်ႈၽြႃးလႄႈသင်ႇလၢတ်ႈတီႈသူၸမ်ႉ၊ႁဝ်းၸိူဝ်းဢၼ်ဢသၢၵ်ႈလိပ်းလႄႈၵိုတ်းၵျၢၼ်ႇယူႇၼႂ်းဝၼ်းၸဝ်ႈၽြႃးမႃးၼၼ်ႉတၵ်းလႆႈႁွတ်ႈထိုင်ၵႂႃႇဢွၼ်တၢင်းၶဝ်ၸိူဝ်းဢၼ်ၼွၼ်းလပ်းယဝ်ႉၼၼ်ႉဢမ်ႇၸႂ်ႈ။-
လွင်ႈမၼ်းၸမ်ႉ၊တူဝ်ၸဝ်ႈၽြႃးတၵ်းလုၵ်ႉၵႃႈၼိူဝ်ၵၢင်ႁၢဝ်ၵျွလူင်းမႃး၊ပႃးတင်းတၢင်းဢၼ်ပၢဝ်ႇသေႃႇ၊တၢင်းဢၼ်ၶုၼ်တမၢၼ်ႇၵၢင်ႁၢဝ်ႁွင်ႉပၢဝ်ႇ၊ဢိၵ်ႇတင်းသဵင်ၼႄးၶရႃႇၽြႃးပဵၼ်ၸဝ်ႈလင်မေႃးပၼ်းၵႂႃႇၸိူဝ်းၼၼ်ႉ၊ၶဝ်ၸိူဝ်းဢၼ်တၢႆၼႂ်း ၸဝ်ႈၶရိၸ်ႈ၊ ၵႂႃႇၼၼ်ႉ၊တၵ်းလႆႈလုၵ်ႉၶိုၼ်းဢွၼ်တၢင်းဢေႃႈ။-
မိူဝ်ႈၼၼ်ႉ၊ႁဝ်းၸိူဝ်းဢၼ်ဢသၢၵ်ႈလိပ်းလႄႈၵိုတ်းၵျၢၼ်ႇယူႇၼႆႉ၊တၵ်းလႆႈၶၢမ်ႇတၢင်းဢၼ်ယွင်ႈဢုမ်ႈၶိုၼ်ႈၵႂႃႇလူၺ်ႈၵၼ်တင်းၶဝ်ၵႃႈၼႂ်းမွၵ်ႇၵုမ်ႈႁႂ်ႈလႆႈထူပ်းႁၼ်ၸဝ်ႈၽြႃး၊ၼႂ်းဢႃႇၵႃႇသႃႉၵၢင်ႁၢဝ်ၼၼ်ႉလႄႈယူႇလူၺ်ႈၵၼ်တင်းၸဝ်ႈၽြႃးယူႇတႃႇသေႇဢမ်ႇထၢတ်ႇဢေႃႈ။-
ၵွပ်ႈပိူဝ်ႈလွင်ႈတၢင်းၼႆႉလႄႈၵေႃႉၼိုင်ႈလႄႈၵေႃႉၼိုင်ႈဢဝ်တင်းၵႂၢမ်းၸိူဝ်းၼႆႉသေလႄႈပၼ်ႁႅင်းတီႈၵၼ်တႃႉ။
ပီႈၼွင်ႉၶဝ်႟။ လွင်ႈဢၼ်တၵ်းပဵၼ်မႃးမိူဝ်ႈလႂ်၊တၵ်းပဵၼ်မႃးၸိူဝ်ႉႁိုဝ်ၼၼ်ႉၸိုင်၊ဢမ်ႇလူဝ်ႇတႅမ်ႈမွၵ်ႇၵႂႃႇႁႂ်ႈသူႁုထႅင်ႈယဝ်ႉ။-
ၵွပ်ႈပိူဝ်ႈၸိူဝ်ႉၼင်ႇႁိုဝ်ဝႃႈၼႆၸမ်ႉ၊သူႁုသေႇၶျႃႇလီငၢမ်းလွင်ႈဝၼ်းဢၼ်ၸဝ်ႈၽြႃးတၵ်းမႃးၸိူဝ်ႉၼင်ႇၽူႈလၵ်ႉ၊မႃးၼႂ်းၶိင်ႇၵၢင်ၶိုၼ်းၼၼ်ႉဢေႃႈ။-
ၼႂ်းမိူဝ်ႈဢၼ်ၶဝ်ယင်းတိုၵ်ႉလၢတ်ႈလႄႈဝႃႈ၊ “မီးတၢင်းၼိမ်လီယူႇလႄႈယင်းလွတ်ႈတင်းၽေးယူႇဢေႃႈ၊” ဝႃႈၼင်ႇၼႆယူႇၼၼ်ႉၸိုင်၊ယၢမ်းၼၼ်ႉၵမ်းလဵဝ်၊တၢင်းလုတၢင်းလႅဝ်တၵ်းႁွတ်ႈမႃးၵႃႈၼိူဝ်ၶဝ်လႄႈၶဝ်တၵ်းဢမ်ႇလႆႈၵၢင်းလွတ်ႈမိူၼ်ၸိူဝ်ႉၼင်ႇဢၼ်ဝူၺ်ႇတၼႃႇတူၵ်းႁွတ်ႈမႃးၵႃႈတီႈမႄႈယိင်းဢၼ်ၸမ်တၵ်းၵိူတ်ႇလဵင်ႉလုၵ်ႈၼၼ်ႉဢေႃႈ။-
ၵူၺ်းၵႃႈ၊ပီႈၼွင်ႉၶဝ်႟။ သူမီးယူႇၼႂ်းဢၼ်လပ်းသိင်ႇဢမ်ႇၸႂ်ႈယဝ်ႉလႄႈယႃႇပေတူၵ်းၸႂ်ဝၼ်းဢၼ်တၵ်းႁွတ်ႈမႃး၊မိူၼ်ၸိူဝ်ႉၼင်ႇဢၼ်ၽူႈလၵ်ႉမႃးၼၼ်ႉသေၵမ်း။-
သူၵႃႈမီးတင်းသဵင်ႈတင်းလူင်ပဵၼ်လုၵ်ႈဢၼ်လႅင်း၊ပဵၼ်လုၵ်ႈၵၢင်ဝၼ်းဢေႃႈ။ ႁဝ်းပဵၼ်လုၵ်ႈၵၢင်ၶိုၼ်းဢမ်ႇၸႂ်ႈ၊ပဵၼ်လုၵ်ႈဢၼ်လပ်းသိင်ႇၵေႃႈဢမ်ႇၸႂ်ႈဢေႃႈ။-
ပိူဝ်ႈဢၼ်ပဵၼ်ၼင်ႇၼႆလႄႈ၊ႁဝ်းယင်းဢမ်ႇၼွၼ်းလပ်းယူႇမိူၼ်ပိူၼ်ႈ၊ဢွၼ်ၵၼ်တိုၼ်ႇယူႇလႄႈပႂ်ႉယူႇလူၺ်ႈသမ်ႇမႃႇသတိတႃႉႁဝ်း။-
လွင်ႈမၼ်းၸမ်ႉ၊ၼႂ်းၶိင်ႇၵၢင်ၶိုၼ်းၼၼ်ႉ၊ပဵၼ်ၶိင်ႇဢၼ်ၵူၼ်းၼွၼ်းလပ်း၊ဢိၵ်ႇတင်းပဵၼ်ၶိင်ႇဢၼ်ၵူၼ်းမဝ်းလဝ်ႈမဝ်းၵမ်ၶဝ်မဝ်းလဝ်ႈၼၼ်ႉဢေႃႈ။-
ၵူၺ်းၵႃႈ၊မိူၼ်ၸိူဝ်ႉၼင်ႇဢၼ်ႁဝ်းၸိူဝ်းဢၼ်ပဵၼ်ၵူၼ်းဢၼ်ၸၢပ်ႈသႅင်ႇၵၼ်တင်းၵၢင်ဝၼ်းၼႆႉဢွၼ်ၵၼ်မီးသမႃႇသတိယူႇလႄႈဢဝ်ၶိူင်ႈႁႄႉႁူဝ်ဢူၵ်းဢၼ်ဝႃႈ၊တၢင်းယုမ်ႇမၢတ်ႈ၊ဢိၵ်ႇတင်းတၢင်းႁၵ်ႉၼၼ်ႉၼုင်ႈမႆယူႇ၊ဢဝ်မွၵ်ႇႁူဝ်လဵၵ်းဢၼ်ဝႃႈ၊တၢင်းဢၼ်မုင်ႈထႃႈမွင်းထႃႈတၢင်းဢၼ်ၵႄႇၶျွတ်ႈဢဝ်ၼၼ်ႉ၊တိုဝ်းယူႇတႃႉႁဝ်း။-
လွင်ႈမၼ်းၸမ်ႉ၊ၽြႃးပဵၼ်ၸဝ်ႈယုၵ်ႉတၢင်ႇႁဝ်းဝႆႉ၊ႁႂ်ႈလႆႈၶၢမ်ႇတၢမ်ႇဢပျတ်ႈဢၼ်မၼ်းၸဝ်ႈတၵ်းၸီႇယၢင်ႇတြႃးၼၼ်ႉဢမ်ႇၸႂ်ႈ။ ယုၵ်ႉတၢင်ႇႁဝ်းဝႆႉ၊ႁႂ်ႈလႆႈတၢင်းဢၼ်ၵႄႇၶျွတ်ႈဢဝ်ၵွပ်ႈပိူဝ်ႈၸဝ်ႈၽြႃးႁဝ်း ၸဝ်ႈယေႇသုၶရိၸ်ႈ၊ -
ဢၼ်လႆႈၶၢမ်ႇတၢႆပုၼ်ႈႁဝ်းၼၼ်ႉ၊ႁဝ်းတိုၼ်ႇယူႇသေဢမ်ႇဝႃႈ၊ၼွၼ်းလပ်းယူႇသေဢမ်ႇဝႃႈ၊ႁႂ်ႈႁဝ်းလႆႈဢသၢၵ်ႈလိပ်းလူၺ်ႈၵၼ်တင်းမၼ်းၸဝ်ႈၼၼ်ႉဢေႃႈ။-
ပိူဝ်ႈၼႆလႄႈၵႃႈၼင်ႇဢၼ်သူႁဵတ်းယူႇတေႃႈလဵဝ်ၼႆႉၼၼ်ႉ၊ၵေႃႉၼိုင်ႈလႄႈၵေႃႉၼိုင်ႈတိုၵ်းယူင်းပၼ်ႁႅင်းၵၼ်ယူႇ၊ၸွႆႈထႅမ်ၵၼ်ယူႇတႃႉ။
လိူဝ်သေၼၼ်ႉပီႈၼွင်ႉၶဝ်႟။ ႁဝ်းတွင်းပၢၼ်ႇသူႁႂ်ႈသူရူဝ်ႇသေႇၶဝ်ၸိူဝ်းဢၼ်ပွင်ႁဵတ်းၵၢၼ်ၸဝ်ႈၵႃႈတီႈသူ၊ၶဝ်ၸိူဝ်းဢၼ်ဢွၼ်ႁူဝ်ၼႄတၢင်းသူ၊ၼႂ်းၸဝ်ႈၽြႃးလႄႈပၼ်သတိသူၸိူဝ်းၼၼ်ႉဢေႃႈ။-
ပႃးတင်းၸႂ်ၸေႇတၼႃႇသေလႄႈရူဝ်ႇသေႇႁၵ်ႉပႅင်းၶဝ်ၼႃႇလူင်လၢင်ၵွပ်ႈပိူဝ်ႈၼႃႈၵၢၼ်ဢၼ်ၶဝ်ႁဵတ်းၼၼ်ႉတႃႉ။ သူၵေႃႉၼိုင်ႈလႄႈၵေႃႉၼိုင်ႈယူႇႁႂ်ႈထုၵ်ႇထုၵ်ႇမေႃမေႃၵၼ်ယူႇတႃႉ။
ႁဝ်းသမ်ႉတိုၵ်းယူင်းသူထႅင်ႈၸမ်ႉ၊ပီႈၼွင်ႉၶဝ်႟။ ပၼ်သတိတီႈၶဝ်ၸိူဝ်းဢၼ်ယူႇလွၵ်ႇယူႇလၢႆယူႇၼၼ်ႉတႃႉ။ ပၼ်ၸႂ်ႁႅင်းယႂ်ႇတီႈၶဝ်ၸိူဝ်းဢၼ်ၸႂ်လုႁႅင်းဢူၼ်ႈၼၼ်ႉတႃႉ။ ၸွႆႈၵမ်ႉၸွႆႈထွၵ်ႈၶဝ်ၸိူဝ်းဢၼ်ႁႅင်းလဵၵ်ႉၼၼ်ႉလႄႈယိူၼ်ႉၶၢမ်ႇတီႈၵူၼ်းၵူႈၵေႃႉယူႇတႃႉ။
ၼင်ႇႁိုဝ်ၽူႈလႂ်တၵ်းဢမ်ႇဢဝ်တၢင်းၽိတ်းတွပ်ႇတႅၼ်းၶိုၼ်းတၢင်းၽိတ်းတီႈပိူၼ်ႈၸိုင်၊ႁဵတ်းသတိလႄႈ၊ၵူၺ်းၵျၢမ်ႇႁႃပွင်ဢၵျူဝ်းတီႈၵေႃႉၼိုင်ႈလႄႈၵေႃႉၼိုင်ႈ၊ဢိၵ်ႇတင်းတီႈၵူၼ်းတင်းသဵင်ႈတင်းလူင်ယူႇၵူႈၶိင်ႇၵူႈၶႃႇတႃႉ။
မီးတၢင်းဢၼ်ၸူမ်းသိူဝ်းမူၼ်ႈပျေႃႇယူႇသေႇသေႇတႃႉ။-
ႁဵတ်းတၢင်းသူးတွင်းပထၼႃႇယူႇတႃႇသေႇတႃႉ။-
ၼႂ်းလွင်ႈတၢင်းဢၼ်ပဵၼ်မႃးၵူႈၸိူဝ်ႉၵူႈပိူင်ၼၼ်ႉ၊ယွင်ႈယေႃးတၢင်ႇၵျေးၸူးၸဝ်ႈတႃႉ။ လွင်ႈမၼ်းၸမ်ႉ၊ပဵၼ်ဢလူဝ်ႇၽြႃးပဵၼ်ၸဝ်ႈဢၼ်ထၢင်ႇသႃးယူႇၵႃႈၼႂ်းတူဝ် ၸဝ်ႈယေႇသုၶရိၸ်ႈ၊ ပုၼ်ႈသူတင်းလၢႆၼၼ်ႉဢေႃႈ။-
ယႃႇပေႁႂ်ႈတၼ်းၶူဝ်းဝိၺိၺ်ႇၸဝ်ႈလႆႈထၢတ်ႇလႆႈယဵၼ်။-
ယႃႇပေႁဵတ်းဢမ်ႇၼပ်ႉဢမ်ႇၶၢၼ်းတီႈၵႂၢမ်းပရေႃးၽႅတ်ႈ ဢၼ်လိုၵ်ႉလမ်ႇၼၼ်ႉ။-
ၸၢမ်းတူၺ်းၵူႈမဵဝ်းမဵဝ်းသေလႄႈယိပ်းၵမ်ဢဝ်ဢၼ်လီဢၼ်ငၢမ်းၼၼ်ႉႁႂ်ႈမၼ်ႈၵိုမ်းဝႆႉတႃႉ။-
ဝႄႈပႅတ်ႈလွင်ႈတၢင်းဢၼ်ႁၢႆႉဢၼ်မိူၵ်ႈၵူႈၸိူဝ်ႉၵူႈပိူင်တႃႉ။
ၶႅၼ်းတေႃႈႁႂ်ႈၽြႃးပဵၼ်ၸဝ်ႈ၊ၸဝ်ႈဢၼ်ပၼ်တၢင်းၼိမ်တီႈႁဝ်းၼၼ်ႉႁဵတ်းႁႂ်ႈသူမူတ်းၸၢင်ႇၼႂ်းၵူႈသမ်ႇၵူႈပိူင်သေၵမ်းလူၺ်ႈ။ ႁႂ်ႈမၼ်းၸဝ်ႈပႂ်ႉၸွႆႈပႂ်ႉထႅမ်ဝိၺိၺ်ႇသူတင်းႁူဝ်ၸႂ်သူ၊ဢိၵ်ႇတင်းတူဝ်ၶၼ်ႇထႃႇသူတင်းသဵင်ႈတင်းလူင်၊ႁႂ်ႈလႆႈၵၢင်းလွတ်ႈတၢင်းဢၼ်တၢင်ႇဢပျတ်ႈတေႃႇထိုင်ႁွတ်ႈဝၼ်းဢၼ်ၸဝ်ႈၽြႃး ယေႇသုၶရိၸ်ႈ၊ မႃးၼၼ်ႉသေၵမ်းလူၺ်ႈ။-
ၵွပ်ႈပိူဝ်ႈဝႃႈ၊ၸဝ်ႈဢၼ်ႁွင်ႉဢဝ်သူၼၼ်ႉ မီးသဵတ်ႈၸႃႇလႄႈမၼ်းၸဝ်ႈတၵ်းႁဵတ်းၸိူဝ်ႉၼင်ႇၼၼ်ဢေႃႈ။
ပီႈၼွင်ႉၶဝ်႟။ သူးတွင်းပုၼ်ႈႁဝ်းတႃႉ။
ဢဝ်တင်းထုင်းၸၢမ်ႇဢၼ်ၸုပ်ႇၼူမ်ဢၼ်မူတ်းၸၢင်ႇၶၢဝ်သႂ်သေလႄႈတူင်ႉတၵ်ႉၵၼ်ၵႃႈၼႂ်းပီႈၼွင်ႉၵူႈၵေႃႉၵူႈၵူၼ်းတႃႉ။
ၵဝ်ဢိင်ဢႃႇၼႃႇၸဝ်ႈၽြႃးလႄႈတိုၵ်းယူင်းႁႂ်ႈသူၽတ်းဢၢၼ်ႇလိၵ်ႈၼႆႉၼႄပၼ်တီႈပီႈၼွင်ႉတင်းလၢႆဢေႃႈ။
ႁႂ်ႈၵျေးၸူးၸဝ်ႈၽြႃး ယေႇသုၶရိၸ်ႈ၊ မီးယူႇၵႃႈၼိူဝ်သူသေၵမ်းလူၺ်ႈ။ ဢႃမိၼ်ႈ။ လိၵ်ႈတြႃးထိတ်ႉသႃႇလေႃးၼိၵ်ႈၽိုၼ်တီႈၼိုင်ႈယဝ်ႉယဝ်ႉဢေႃႈ။
သြႃႇ ပေႃးလု၊ သြႃႇ သီႇလႃႉ၊ တင်းသြႃႇ တိမေႃးသေႇ၊ ၶဝ်တင်းမူတ်း။ တႅမ်ႈလိၵ်ႈပၼ်ထိုင်ၵႂႃႇတီႈၸိူဝ်းၸဝ်ႈဝဵင်း ထိတ်ႉသႃႇလေႃးၼိၵ်ႈ၊ ဢၼ်တႄႇယူႇၼႂ်းၽြႃးပေႃႈၸဝ်ႈႁဝ်းတင်းၸဝ်ႈၽြႃး ယေႇသုၶရိၸ်ႈ၊ ၼၼ်ႉဢေႃႈ။
ႁႂ်ႈၽြႃးပေႃႈၸဝ်ႈႁဝ်းတင်းၸဝ်ႈၽြႃး ယေႇသုၶရိၸ်ႈ၊ ပၼ်ၵျေးၸူးဢိၵ်ႇတင်းတၢင်းၼိမ်ၵႃႈၼိူဝ်သူသေၵမ်းလူၺ်ႈ။
ပီႈၼွင်ႉၶဝ်႟။ ႁဝ်းလႆႈယွင်ႈယေႃးတၢင်ႇၵျေးၸူးၽြႃးပဵၼ်ၸဝ်ႈပုၼ်ႈသူယူႇတႃႇသေႇ၊ၸွမ်းၼင်ႇဢၼ်ႁဝ်းထုၵ်ႇလီႁဵတ်း၊ၵွပ်ႈပိူဝ်ႈတၢင်းယုမ်ႇမၢတ်ႈသူယႂ်ႇမႃးၼမ်ၼႃႇလႄႈၸႂ်ႁၵ်ႉမႅတ်ႈတႃႇဢၼ်သူၵေႃႉၼိုင်ႈလႄႈၵေႃႉၼိုင်ႈမီးတေႃႇၵၼ်ၼၼ်ႉၵေႃႈတူဝ်းတွၼ်းၼမ်ၵိုၼ်းမႃးယူႇတိၵ်းတိၵ်းၼၼ်ႉဢေႃႈ။-
ပိူဝ်ႈၼႆလႄႈႁဝ်းမီးတၢင်းဢၼ်ဢုပ်ႇဝၢဝ်းလွင်ႈသူ၊ၼႂ်းၸိူဝ်းၸဝ်ႈၽြႃးပဵၼ်ၸဝ်ႈတင်းလၢႆ၊လူၺ်ႈလွင်ႈဢၼ်သူမီးတၢင်းဢၼ်ယိူၼ်ႉၸႂ်၊ဢိၵ်ႇတင်းၸႂ်ဢၼ်ယုမ်ႇမၢတ်ႈၼႂ်းလွင်ႈတၢင်းဢၼ်သူလႆႈၶၢမ်ႇတၢင်းဢၼ်ငႅၼ်းသႄး၊တုၵ်ႉၶႃႉတၢင်းၽၢၼ်ၵႃႈမီးတင်းသဵင်ႈတင်းလူင်ၼၼ်ႉဢေႃႈ။
လွင်ႈတၢင်းၸိူဝ်းၼႆႉပဵၼ်သၢၵ်ႈသေႇပုၼ်ႈတၢင်းဢၼ်ၽြႃးပဵၼ်ၸဝ်ႈၸၢမ်းတူၺ်းၸွမ်းၼင်ႇတြႃးလႄႈ တၵ်းလႆႈၶၢမ်ႇတၢင်းဢၼ်ႁဵတ်းႁႂ်ႈထိူၵ်ႈပဵၼ်ၵူၼ်းမိူင်းမၼ်းၸဝ်ႈ၊ပုၼ်ႈဢၼ်သူၶၢမ်ႇတုၵ်ႉၶႃႉယူႇၼၼ်ႉဢေႃႈ။-
ၽြႃးပဵၼ်ၸဝ်ႈတၵ်းၸီႇယၢင်ႇၸွမ်းၼင်ႇတြႃးလႄႈမၼ်းၸဝ်ႈတၵ်းတႅၼ်းပၼ်တုၵ်ႉၶႃႉတၢင်းၽၢၼ်တီႈၶဝ်ၸိူဝ်းဢၼ်ပၼ်တုၵ်ႉၶႃႉတၢင်းၽၢၼ်တီႈသူၼၼ်ႉသေလႄႈ၊-
သမ်ႉတႅၼ်းပၼ်ၵတ်းယဵၼ်ၶျၢမ်းသႃႇ၊တီႈသူၸိူဝ်းဢၼ်ၶၢမ်ႇတုၵ်ႉၶႃႉတၢင်းၽၢၼ်လူၺ်ႈၵၼ်တင်းႁဝ်း၊ၼႂ်းမိူဝ်ႈဢၼ်ၸဝ်ႈၽြႃး ၸဝ်ႈယေႇသု၊ လုၵ်ႉသေၵႃႈတီႈၵၢင်ႁၢဝ်ပေႃႇမႃးလူၺ်ႈၵၼ်တင်းတမၢၼ်ႇၵၢင်ႁၢဝ်ဢၼ်မီးတၼ်းၶူဝ်းၸိူဝ်းၼၼ်ႉ၊-
ပႃးဢဝ်တင်းမုၵ်ႉၽႆးလူင်းမႃးႁႂ်ႈလႆႈၸီႇယၢင်ႇပၼ်တၢမ်ႇၵႃႈၼိူဝ်ၶဝ်ၸိူဝ်းဢၼ်ဢမ်ႇႁုၽြႃးပဵၼ်ၸဝ်ႈ၊ဢိၵ်ႇတင်းၵႃႈၼိူဝ်ၶဝ်ၸိူဝ်းဢၼ်ဢမ်ႇထွမ်ႇဢဝ်ၶၢဝ်ႇတြႃးသိူဝ်းပျေႃႇၸဝ်ႈၽြႃးႁဝ်း ၸဝ်ႈယေႇသု၊ ၼၼ်ႉဢေႃႈ။-
ၶဝ်ၼၼ်ႉ၊တၵ်းလႆႈၶၢမ်ႇတၢမ်ႇဢပျတ်ႈဢၼ်လုလႅဝ်ထႃႇဝရႃႉလႄႈတၵ်းလႆႈၽၢတ်ႇယၢၼ်သေၵႃႈတီႈၽၢႆႇၼႃႈၸဝ်ႈၽြႃး၊ဢိၵ်ႇတင်းၵႃႈတီႈမုၼ်ၽုင်းတၼ်းၶူဝ်းၸဝ်ႈ၊-
မိူဝ်ႈဢၼ်မၼ်းၸဝ်ႈမႃးၼႂ်းဝၼ်းၼၼ်ႉ၊ႁႂ်ႈလႆႈၶၢမ်ႇဢဝ်မုၼ်သရေႇၵႃႈတီႈၵူၼ်းမူတ်းၸၢင်ႇမၼ်းၸဝ်ႈတင်းလၢႆ၊ဢိၵ်ႇတင်းႁႂ်ႈလႆႈၶၢမ်ႇဢဝ်တၢင်းဢၼ်ယွင်ႈယေႃးၵႃႈတီႈၵူၼ်းဢၼ်ယုမ်ႇမၢတ်ႈတင်းသဵင်ႈတင်းလူင်ၵွပ်ႈပိူဝ်ႈသူယုမ်ႇမၢတ်ႈၵႂၢမ်းသၢၵ်ႈသေႇဢၼ်ႁဝ်းႁေႃးလၢတ်ႈၼၼ်ႉဢေႃႈ။
ပိူဝ်ႈၼႆၸင်ႇ၊ႁဝ်းသူးတွင်းပုၼ်ႈသူယူႇသေႇသေႇ၊ၶႅၼ်းတေႃႈႁႂ်ႈၽြႃးပဵၼ်ၸဝ်ႈတၵ်းမၢတ်ႈသူပဵၼ်ၶဝ်ၸိူဝ်းဢၼ်ထိူၵ်ႈၶၢမ်ႇဢဝ်ၵျေးၸူးတၢင်းဢၼ်မၼ်းၸဝ်ႈႁွင်ႉဢဝ်ၼၼ်ႉ၊ဢိၵ်ႇတင်းႁႂ်ႈမၼ်းၸဝ်ႈဢဝ်တင်းမုၼ်ၽုင်းမၼ်းၸဝ်ႈလႄႈႁဵတ်းႁႂ်ႈၸေႇတၼႃႇတၢင်းဢၼ်မျၢတ်ႈလီတင်းသဵင်ႈတင်းလူင်၊ဢိၵ်ႇတင်းၼႃႈၵၢၼ်တၢင်းယုမ်ႇမၢတ်ႈသူၼၼ်ႉပျေႉၸုမ်ႇတဵမ်ထူၼ်ႈမႃး၊-
ဢိၵ်ႇတင်းပုၼ်ႈလွင်ႈၼင်ႇႁိုဝ်တၵ်းႁႂ်ႈၸိုဝ်ႈသဵင်ၸဝ်ႈၽြႃးႁဝ်း ၸဝ်ႈယေႇသု၊ မီးမုၼ်သရေႇ၊ၵွပ်ႈပိူဝ်ႈသူတင်းလၢႆ၊သူတင်းလၢႆၵေႃႈတၵ်းမုၼ်သရေႇၵွပ်ႈပိူဝ်ႈမၼ်းၸဝ်ႈၸွမ်းၼင်ႇသုၵျေးၸူးၽြႃးပဵၼ်ၸဝ်ႈႁဝ်း၊ဢိၵ်ႇတင်း ၸဝ်ႈယေႇသုၶရိၸ်ႈ၊ ၼၼ်ႉဢေႃႈ။
ၸၢပ်ႈသႅင်ႇလူၺ်ႈလွင်ႈၸဝ်ႈၽြႃးႁဝ်းၸဝ်ႈ ယေႇသုၶရိၸ်ႈ၊ တၵ်းမႃး၊ဢိၵ်ႇတင်းလွင်ႈဢၼ်ႁဝ်းတၵ်းလႆႈၸုတုမ်ၵၼ်ၵႃႈတီႈမၼ်းၸဝ်ႈၼၼ်ႉ၊ပီႈၼွင်ႉၶဝ်႟၊ႁဝ်းတိုၵ်းယူင်းသူဝႃႈ၊-
ၼင်ႇႁိုဝ်သူတၵ်းဢမ်ႇမီးတၢင်းဢၼ်ယုင်ႈၸႂ်ၵႂင်ၸႂ်ၵႂႃႇၼႂ်းတၢင်းဢၼ်သူၶႆႈၸႂ်ၸဵၼ်းၸႃး၊ဢမ်ႇၼၼ်တူၵ်းၸႂ်ၵႂႃႇၵွပ်ႈပိူဝ်ႈၵႂၢမ်းဢၼ်ဝႃႈ၊မိုဝ်ႉဝၼ်းၸဝ်ႈၽြႃးႁွတ်ႈမႃးယဝ်ႉ၊ဝႃႈၼင်ႇၼႆၼၼ်ႉၸိုင်၊ၵဝ်တွင်းပၢၼ်ႇသူဢေႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်ဝႃႈၼႆၸမ်ႉ၊ပိူၼ်ႈဝႃႈႁဝ်းႁေႃးလၢတ်ႈၵႂၢမ်းပျႃႇတိၵ်ႈၸိူဝ်ႉၼင်ႇၼႆဝႆႉ၊ဢမ်ႇၼၼ်ႁဝ်းႁေႃးလၢတ်ႈဢွၵ်ႇသူပ်းဝႆႉ၊ဢမ်ႇၼၼ်ႁဝ်းတႅမ်ႈဝႆႉၵႃႈၼႂ်းလိၵ်ႈဢေႃႈ။-
ယႃႇပေႁႂ်ႈၽူႈလႂ်လႆႈပႅတ်ႉလႅၼ်သူၼႂ်းလူၺ်ႈလွင်ႈမဵဝ်းၼိုင်ႈမဵဝ်းလႂ်။ လွင်ႈမၼ်းၸမ်ႉ၊ၸူဝ်ႈဢၼ်ဝၼ်းၼၼ်ႉဢမ်ႇပႆႇႁွတ်ႈထိုင်ၸိုင်၊တၢင်းဢၼ်ၶေႉၶဵင်ႇလုၵ်ႉၽိုၼ်ႉတၵ်းပဵၼ်ဢွၼ်တၢင်းလႄႈ “ၶုၼ်ႁၢႆႉမိူၵ်ႈ” ဢၼ်ဝႃႈ၊လုၵ်ႈၸၢႆးတၢင်းလုတၢင်းလႅဝ်ၼၼ်ႉတၵ်းပေႃႇမႃးဢေႃႈ။-
ၶုၼ်ႁၢႆႉမိူၵ်ႈၼၼ်ႉ၊တၵ်းၶတ်းၵၼ်တင်းၵႃႈဢၼ်ႁွင်ႉဝႃႈ၊ၽြႃးဢိၵ်ႇတင်းမဵဝ်းဢၼ်ထိူၵ်ႈၵူဝ်းၵႂၢႆႇၼၼ်ႉသေလႄႈယုၵ်ႉယွင်ႈတူဝ်မၼ်းသုင်သေပိူၼ်ႈတင်းသဵင်ႈတင်းလူင်ဢေႃႈ။ မၼ်းယင်းတေၶဝ်ႈၵႂႃႇၼင်ႈၵႃႈၼႂ်းၵျွင်းပိၵ်ႈမၢၼ်ႇၽြႃးပဵၼ်ၸဝ်ႈသေယဝ်ႉ၊တၵ်းလၢတ်ႈဝႃႈ၊မၼ်းပဵၼ်ၽြႃးပဵၼ်ၸဝ်ႈဢေႃႈ။
ၸူဝ်ႈၶၢဝ်းဢၼ်ၵဝ်မီးလူၺ်ႈၵၼ်တင်းသူၼၼ်ႉ၊လွင်ႈတၢင်းၸိူဝ်းၼႆႉတင်းသဵင်ႈတင်းလူင်၊ၵဝ်လၢတ်ႈဝႆႉတီႈသူယဝ်ႉ၊ၸွင်ႇသူဢမ်ႇၶုၵ်းၸႂ်လႆႈႁိုဝ်း။-
တေႃႈလဵဝ်ၼႆႉ၊သူၵေႃႈႁုၸၵ်းမဵဝ်းဢၼ်ႁႄႉမၼ်းႁၢမ်ႈမၼ်းၼၼ်ႉယဝ်ႉလႄႈ၊ၼင်ႇႁိုဝ်မၼ်းတၵ်းပေႃႇဢွၵ်ႇမႃးၼႂ်းၶိင်ႇၵႃႇလႃႉမၼ်းၼၼ်ႉယဝ်ႉ။-
ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ၊တၢင်းဢၼ်လိုၵ်ႉဢၼ်လမ်ႇဢၼ်ႁၢႆႉမိူၵ်ႈၼၼ်ႉ၊သမ်ႉပေႃးပွင်ႁဵတ်းၵၢၼ်ငၢၼ်းဝႆႉယူႇယဝ်ႉ။ ၼႂ်းဝႃႈၼၼ်သေၵေႃႈၽူႈဢၼ်ႁႄႉၶႅၼ်ယူႇတေႃႈလဵဝ်ၼႆႉ၊တၵ်းႁႄႉၶႅၼ်ယူႇတေႃႇထိုင်ႁွတ်ႈတၢင်းဢၼ်ပႄႇၽဵဝ်ႈပႅတ်ႈၼၼ်ႉဢေႃႈ။-
ၵမ်းၼၼ်ႉ ၶုၼ်ႁၢႆႉမိူၵ်ႈတၵ်းပေႃႇမႃးလႄႈၸဝ်ႈၽြႃး ယေႇသု၊ တၵ်းဢဝ်တင်းလူမ်းထူၺ်ႈၸႂ်မၼ်းၸဝ်ႈၼၼ်ႉဢဝ်မၼ်းတၢႆပႅတ်ႈသေလႄႈ၊ဢဝ်တင်းသၢႆဢရွင်ႇဢၼ်မၼ်းၸဝ်ႈပေႃႇမႃးၼၼ်ႉယႃႉၽဵဝ်ႈပႅတ်ႈမၼ်းဢေႃႈ။-
ၶုၼ်ႁၢႆႉမိူၵ်ႈၼၼ်ႉ၊တၵ်းပႃးဢဝ်တင်းတၼ်းၶူဝ်းမႃႇၼၢတ်ႈပေႃႇမႃးသေလႄႈႁဵတ်းၼႄၼိမိၵ်ႈလၢၵ်ႈၶၼႃႇလွင်ႈတၢင်းဢၼ်လီဢၢမ်း၊ဢၼ်ၽိတ်းဢၼ်ပိူင်ႈၵူႈၸိူဝ်ႉၵူႈပိူင်၊-
ဢိၵ်ႇတင်းပႃးဢဝ်တင်းပရိယႄႇဢၼ်ႁၢႆႉဢၼ်မိူၵ်ႈၵူႈၸိူဝ်ႉၵူႈပိူင်လႄႈပႅတ်ႉလႅၼ်ၶဝ်ၸိူဝ်းဢၼ်တၵ်းလုသုမ်းဢေႃႈ။ ၶဝ်ၼၼ်ႉ၊တၵ်းလႆႈႁွတ်ႈတၢင်းဢၼ်လုလႅဝ်ၵွပ်ႈပိူဝ်ႈၶဝ်ဢမ်ႇၶၢမ်ႇဢမ်ႇဢဝ်၊ၸႂ်ဢၼ်ႁၵ်ႉပႅင်းသမ်ႇမႃႇတြႃးဢၼ်ႁႂ်ႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၼၼ်ႉဢေႃႈ။-
ပိူဝ်ႈၼႆလႄႈၽြႃးပဵၼ်ၸဝ်ႈပွႆႇပၼ်ဢၶႂၢင်ႉ၊ႁႂ်ႈတၼ်းၶူဝ်းဢၼ်ၽိတ်းဢၼ်ပိူင်ႈၼၼ်ႉပွင်ႁဵတ်းႁႂ်ႈၶဝ်လႆႈယုမ်ႇၽိတ်းယုမ်ႇပိူင်ႈဢေႃႈ။-
ဢၵျူဝ်းဢၼ်ပေႃႇပဵၼ်မႃးၸမ်ႉ၊ၶဝ်ၸိူဝ်းဢၼ်ဢမ်ႇယုမ်ႇမၢတ်ႈသမ်ႇမႃႇတြႃးလႄႈၸၢင်ႈမူၼ်ႈပျေႃႇၼႂ်းတၢင်းဢၼ်ဢမ်ႇတြႃးတင်းသဵင်ႈတင်းလူင်ၼၼ်ႉတၵ်းလႆႈႁွတ်ႈထိုင်တၢင်းဢၼ်ၶၢမ်ႇတၢမ်ႇဢပျတ်ႈဢေႃႈ။
ပီႈၼွင်ႉဢၼ်ၸဝ်ႈၽြႃးႁၵ်ႉၶဝ်႟။ ႁဝ်းတၵ်းလႆႈယွင်ႈယေႃးတၢင်ႇၵျေးၸူးၽြႃးပဵၼ်ၸဝ်ႈပုၼ်ႈသူယူႇတႃႇသေႇဢမ်ႇထၢတ်ႇ၊ၵွပ်ႈပိူဝ်ႈၽြႃးပဵၼ်ၸဝ်ႈလိူၵ်ႈဢဝ်သူဝႆႉ၊ၸဵမ်မိူဝ်ႈႁူဝ်ပိုင်းၼၼ်ႉ၊ႁႂ်ႈသူလႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၵွပ်ႈလူၺ်ႈဝိၺိၺ်ႇၸဝ်ႈႁဵတ်းႁႂ်ႈသူမူတ်းၸၢင်ႇ၊ဢိၵ်ႇတင်းၵွပ်ႈလူၺ်ႈတၢင်းဢၼ်သူယုမ်ႇမၢတ်ႈသမ်ႇမႃႇတြႃးၼၼ်ႉဢေႃႈ။-
ၽြႃးပဵၼ်ၸဝ်ႈႁွင်ႉဢဝ်သူမႃး၊ႁႂ်ႈပဵၼ်ၸိူဝ်ႉၼင်ႇၼႆၵွပ်ႈလူၺ်ႈၶၢဝ်ႇတြႃးသိူဝ်းပျေႃႇဢၼ်ႁဝ်းႁေႃးလၢတ်ႈပၼ်သူ၊ပုၼ်ႈလွင်ႈၼင်ႇႁိုဝ်သူတၵ်းလႆႈပိူင်ႇထိူၵ်ႈမုၼ်သရေႇၸဝ်ႈၽြႃးႁဝ်း ၸဝ်ႈယေႇသုၶရိၸ်ႈ၊ ဢေႃႈ။-
ၵွပ်ႈၼႆလႄႈပီႈၼွင်ႉၶဝ်႟။ ယိပ်းၵမ်ဢဝ်ၼႄးဢုပတေႇတြႃးဢၼ်သိုဝ်ႈတေႃႇၸွမ်းၼင်ႇဢၼ်ႁဝ်းသင်ႇသွၼ်ပၼ်သူၵႃႈၼႂ်းၵႂၢမ်းဢၼ်ႁဝ်းႁေႃးလၢတ်ႈ၊ဢိၵ်ႇတင်းၵႂၢမ်းဢၼ်ႁဝ်းတႅမ်ႈသႂ်ႇၼႂ်းလိၵ်ႈၸိူဝ်းၼၼ်ႉယူႇသေလႄႈၸုၵ်းၶၢမ်ႇယူႇမၼ်ႈမၼ်ႈၶိူင်ႇၶိူင်ႇတႃႉ။
ပိူဝ်ႈၼႆလႄႈၶႅၼ်းတေႃႈႁႂ်ႈတူဝ်ၸဝ်ႈၽြႃးႁဝ်း ယေႇသုၶရိၸ်ႈ၊ ဢိၵ်ႇတင်းၽြႃးပေႃႈၸဝ်ႈႁဝ်းဢၼ်ႁၵ်ႉႁဝ်းလႄႈပၼ်တၢင်းဢၼ်သၢၵ်ႈသႃႇထႃႇဝရႃႉ၊ဢိၵ်ႇတင်းတၢင်းဢၼ်မုင်ႈထႃႈမွင်းထႃႈဢၼ်လီဢၼ်ငၢမ်းၸွမ်းၼင်ႇၵျေးၸူးၸဝ်ႈၼၼ်ႉ၊-
ပၼ်ႁူဝ်ၸႂ်ဢၼ်သၢၵ်ႈသႃႇတီႈသူလႄႈႁႂ်ႈသူမၼ်ႈၶိူင်ႇယူႇၼႂ်းတၢင်းဢၼ်ၸၢင်ႈၵမ်ၵျၢင်ႉဢၼ်လီဢၼ်ငၢမ်း၊ဢိၵ်ႇတင်းၼႂ်းတၢင်းဢၼ်ၸၢင်ႈလၢတ်ႈၸႃဢၼ်လီဢၼ်ငၢမ်းၵူႈၸိူဝ်ႉၵူႈပိူင်သေၵမ်းလူၺ်ႈ။
တီႈသုတ်းတီႈၵွႆၸမ်ႉ၊ပီႈၼွင်ႉၶဝ်႟။ ၼင်ႇႁိုဝ်ၼုၵ်ႈၵပၢတ်ႈတြႃးၸဝ်ႈၽြႃးတၵ်းတေၸွတ်ႇတူဝ်ႈၵႂႃႇၶၼ်ၶၼ်ၽႂ်းၽႂ်းလႄႈမုၼ်သရေႇထၢင်ႇသႃးၵူႈတီႈၵူႈလႅၼ်မိူၼ်ၸိူဝ်ႉၼင်ႇဢၼ်ပဵၼ်ယူႇၼႂ်းသူၼၼ်ႉၸိုင်၊သူးတွင်းပုၼ်ႈႁဝ်းသေၵမ်း။-
ၵွပ်ႈပိူဝ်ႈၵူၼ်းၵူႈၵေႃႉၵူႈၵူၼ်းဢမ်ႇပႆႇယုမ်ႇမၢတ်ႈတြႃးၸဝ်ႈၼၼ်ႉ၊ၼင်ႇႁိုဝ်ၽြႃးပဵၼ်ၸဝ်ႈတၵ်းၵႄႇသႄႇဢဝ်ႁဝ်းသေၵႃႈတီႈၵူၼ်းႁၢႆႉၵူၼ်းမိူၵ်ႈတင်းလၢႆၵေႃႈသူးတွင်းပုၼ်ႈႁဝ်းသေၵမ်း။
ၵူၺ်းၵႃႈ၊ၸဝ်ႈၽြႃးမီးသဵတ်ႈၸႃႇယူႇဢေႃႈ။ မၼ်းၸဝ်ႈတၵ်းပၼ်ဢဵၼ်ပၼ်ႁႅင်းသူလႄႈၵႅတ်ႇၶႄႁႂ်ႈသူလႆႈၵၢင်းလွတ်ႈတင်းၶုၼ်ႁၢႆႉမိူၵ်ႈၼၼ်ႉဢေႃႈ။-
ၸဝ်ႈၽြႃးပၼ်ႁႂ်ႈႁဝ်းမီးတၢင်းဢၼ်ယုမ်ႇယမ်တမ်းၸႂ်လူၺ်ႈလွင်ႈဢၼ်သူၵမ်ၵျၢင်ႉၸွမ်းၵႃႈၼင်ႇဢၼ်ႁဝ်းသင်ႇသွၼ်ပၼ်သူၼၼ်ႉလႄႈသူတၵ်းတေသိုပ်ႇၵမ်ၵျၢင်ႉသၢင်ႈႁဵတ်းယူႇၶိူဝ်းၶိူဝ်းၼၼ်ႉဢေႃႈ။
ၶႅၼ်းတေႃႈႁႂ်ႈၸဝ်ႈၽြႃးမႄးပၼ်ႁႂ်ႈသူယဵင်ႈၶႅၼ်းႁုၸႅင်ႈတၢင်းႁၵ်ႉၽြႃးပဵၼ်ၸဝ်ႈလႄႈမီးၸႂ်ဢၼ်ယိူၼ်ႉၶၢမ်ႇၸိူဝ်ႉၼင်ႇ ၸဝ်ႈၶရိၸ်ႈ၊ ယူႇသေၵမ်းလူၺ်ႈ။
ၵႃႈၼႂ်းၸိုဝ်ႈသဵင်ၸဝ်ႈၽြႃးႁဝ်း ၸဝ်ႈယေႇသုၶရိၸ်ႈ၊ ၼၼ်ႉႁဝ်းပိင်းၺၢပ်ႈသူလႄႈဝႃႈၸမ်ႉ၊ပီႈၼွင်ႉၶဝ်႟။ ဝႄႈပႅတ်ႈပီႈၼွင်ႉဢၼ်ၶၢၼ်ႉဢိူၼ်ၸိူဝ်းဢၼ်ဢမ်ႇၵမ်ဢမ်ႇၵျၢင်ႉၸွမ်းၼင်ႇၵႂၢမ်းသင်ႇသွၼ်၊ဢၼ်ႁဝ်းပၼ်တီႈၶဝ်ၼၼ်ႉၸိူဝ်းၼၼ်ႉတႃႉ။-
လွင်ႈမၼ်းၸမ်ႉ၊သူတၵ်းလႆႈႁဵတ်းၸွမ်းႁဝ်းၸိူဝ်ႉၼင်ႇႁိုဝ်ဝႃႈၼႆတူဝ်သူယဵင်ႈၶႅၼ်းႁုလီဢေႃႈ။ မိူဝ်ႈဢၼ်ႁဝ်းမီးယူႇလူၺ်ႈၵၼ်တင်းသူၼၼ်ႉ၊ႁဝ်းဢမ်ႇၶၢၼ်ႉဢမ်ႇဢိူၼ်။-
ႁဝ်းဢမ်ႇၵိၼ်ၶွင်လၢႆၽူႈလႂ်။ ၼင်ႇႁိုဝ်တၵ်းဢမ်ႇလႆႈယၢပ်ႇၸႂ်သူၸိုင်၊ႁဝ်းၵႆႉၶတ်းၸႂ်ႁဵတ်းၵၢၼ်ယူႇၵူႈဝၼ်းၵူႈၶိုၼ်းဢေႃႈ။-
ႁဝ်းႁဵတ်းၸိူဝ်ႉၼင်ႇၼႆ၊ၵွပ်ႈပိူဝ်ႈႁဝ်းဢမ်ႇထိူၵ်ႈၶၢမ်ႇဢဝ်တၢင်းဢၼ်ၸွႆႈဢၼ်ၵမ်ႉၼၼ်ႉဢမ်ႇၸႂ်ႈ။ ႁဝ်းႁဵတ်းႁႂ်ႈပဵၼ်ပုင်ႇသၢၵ်ႈသေႇဢၼ်သူတၵ်းႁဵတ်းၸွမ်းဢေႃႈ။-
မိူဝ်ႈဢၼ်ႁဝ်းမီးလူၺ်ႈၵၼ်တင်းသူၼၼ်ႉ၊ႁဝ်းယင်းလႆႈပိင်းၺၢပ်ႈလႄႈဝႃႈ၊ “ၽူႈလႂ်သေဢမ်ႇဝႃႈ၊ၵေႃႉဢၼ်ၶၢၼ်ႉႁဵတ်းၵၢၼ်ၼၼ်ႉယႃႇပေႁႂ်ႈၵိၼ်၊” ဝႃႈၼင်ႇၼႆဢေႃႈ။
ႁဝ်းလၢတ်ႈဝႃႈၸိူဝ်ႉၼင်ႇၼႆၵွပ်ႈပိူဝ်ႈႁဝ်းလႆႈငိၼ်းဝႃႈ၊ၵူၼ်းၵမ်ႈၽွင်ႈၶၢၼ်ႉဢိူၼ်လႄႈဢမ်ႇႁဵတ်းဢမ်ႇသၢင်ႈၵႃႈသင်၊ၵူၺ်းလေႃလႄလူၺ်ႈၵၢၼ်ငၢၼ်းပိူၼ်ႈၼၼ်ႉမီးၼႂ်းသူၼၼ်ႉဢေႃႈ။-
ႁဝ်းဢိင်ၸိုဝ်ႈသဵင်ၸဝ်ႈၽြႃး ယေႇသုၶရိၸ်ႈ၊ သေလႄႈမီးဢမိင်ႉတိုၵ်းယူင်းၶဝ်လႄႈဝႃႈၸမ်ႉ၊ၶဝ်တၵ်းလႆႈႁဵတ်းၵၢၼ်ၼိမ်ၼိမ်လီလီလႄႈႁဵတ်းလဵင်ႉတွင်ႉၶဝ်ဢေႃႈ။
ၵူၺ်းၵႃႈ၊ပီႈၼွင်ႉၶဝ်႟။ သူၸမ်ႉ၊ယႃႇႁႂ်ႈမီးတၢင်းဢၼ်ၸႂ်လုႁႅင်းဢူၼ်ႈ၊ၼႂ်းတၢင်းဢၼ်ၵမ်ၵျၢင်ႉသၢင်ႈႁဵတ်းဢၼ်လီဢၼ်ငၢမ်းၼၼ်ႉသေၵမ်း။-
ၸၢင်ႈၶႄးမီးသေၵေႃႉသေၵူၼ်းဢၼ်ဢမ်ႇၶႂ်ႈထွမ်ႇဢဝ်ၵႂၢမ်းဢၼ်ႁဝ်းသင်ႇသွၼ်ပၼ်ၵႃႈၼႂ်းလိၵ်ႈၼႆႉၼၼ်ႉဢေႃႈ။ ပေႃးမီးၸိုင်၊မၢတ်ႈတွင်းၵေႃႉၼၼ်ႉဝႆႉတႃႉ။ ၼင်ႇႁိုဝ်မၼ်းတၵ်းလႆႈဢူၵ်းဢၢႆၸိုင်၊ယႃႇပေဝႆႉဢယေးမၼ်း။-
ၼႂ်းဝႃႈၼၼ်သေၵေႃႈယႃႇပေမၢတ်ႈမၼ်းပဵၼ်ၸိူဝ်ႉၼင်ႇရၢၼ်ႇသူႇလႄႈမၢတ်ႈမၼ်းပဵၼ်ၸိူဝ်ႉၼင်ႇပီႈၼွင်ႉလႄႈပၼ်သတိတႃႉ။
ႁႂ်ႈတူဝ်ၸဝ်ႈၽြႃးဢၼ်ဝႃႈ၊ၸဝ်ႈတၢင်းၼိမ်ၼၼ်ႉပၼ်တၢင်းၼိမ်တီႈသူ၊ၼႂ်းလွင်ႈတၢင်းၵူႈၸိူဝ်ႉၵူႈပိူင်တႃႇသေႇဢမ်ႇထၢတ်ႇသေၵမ်းလူၺ်ႈ။ ႁႂ်ႈၸဝ်ႈၽြႃးမီးယူႇလူၺ်ႈၵၼ်တင်းသူတင်းသဵင်ႈတင်းလူင်သေၵမ်းလူၺ်ႈ။
ၵဝ် ပေႃးလု၊ ဢဝ်တင်းမိုဝ်းတူဝ်ၸဝ်ႈၵဝ်ႇတႅမ်ႈၵႂၢမ်းတၵ်ႉၼၢႆဢေႃႈ။ ဢၼ်ၼႆႉၸမ်ႉ၊ပဵၼ်လွင်ႈတၢင်းဢၼ်ၵဝ်လူင်းလၢႆးမိုဝ်းၵႃႈၼႂ်းၽိုၼ်လိၵ်ႈၵဝ်ၵူႈၽိုၼ်ၼၼ်ႉယဝ်ႉ။ ဢၼ်ၼႆႉပဵၼ်ၼႄးလၢႆးဢၼ်ၵဝ်တႅမ်ႈလိၵ်ႈဢေႃႈ။
ႁႂ်ႈၵျေးၸူးၸဝ်ႈၽြႃးႁဝ်းၸဝ်ႈ ယေႇသုၶရိၸ်ႈ၊ မီးၼိူဝ်သူၵူႈၵေႃႉၵူႈၵူၼ်းသေၵမ်းလူၺ်ႈ။ လိၵ်ႈတြႃးထိတ်ႉသႃႇလေႃးၼိၵ်ႈၽိုၼ်တီႈသွင်ယဝ်ႉယဝ်ႉဢေႃႈ။
ၵဝ် ပေႃးလု၊ ၵေႃႉပဵၼ်တမၢၼ်ႇ ၸဝ်ႈယေႇသုၶရိၸ်ႈ၊ ၸွမ်းၼင်ႇဢမိင်ႉၽြႃးပဵၼ်ၸဝ်ႈ၊ၸဝ်ႈဢၼ်ၵႄႇၶျွတ်ႈဢဝ်ႁဝ်း၊ဢိၵ်ႇတင်း ၸဝ်ႈယေႇသုၶရိၸ်ႈ၊ ဢၼ်ႁဝ်းမုင်ႈထႃႈမွင်းထႃႈၼၼ်ႉ၊-
မီးလိၵ်ႈတႅမ်ႈထိုင် တိမေႃးသေႇ၊ လုၵ်ႈၸၢႆးၵဝ်ၸႅတ်ႈၸႅတ်ႈၵႃႈၼႂ်းတၢင်းယုမ်ႇမၢတ်ႈၼၼ်ႉဢေႃႈ။ ႁႂ်ႈပေႃႈႁဝ်းၶႃႈၽြႃးပဵၼ်ၸဝ်ႈ၊ဢိၵ်ႇတင်းၸဝ်ႈၽြႃးႁဝ်း ၸဝ်ႈယေႇသုၶရိၸ်ႈ၊ ပၼ်ၵျေးၸူး၊ၵရုၼႃႇဢိၵ်ႇတင်းတၢင်းၼိမ်ၶျၢမ်းသႃႇတီႈမႂ်းသေၵမ်းလူၺ်ႈ။
ၵဝ်မီးဢလူဝ်ႇၶႂ်ႈႁႂ်ႈမႂ်းၵိုတ်းသဝ်းယူႇၵႃႈတီႈဝဵင်း ဢေးၽႅတ်ႈ၊ ၸွမ်းၼင်ႇဢၼ်ၵဝ်သင်ႇလၢတ်ႈမႂ်းဝႆႉ၊ၼႂ်းမိူဝ်ႈဢၼ်ၵဝ်ဢွၵ်ႇတၢင်းၵႂႃႇၸူးတီႈမိူင်း မႃႇၵေႇတေႃးၼိ၊ ပုၼ်ႉၼၼ်ႉဢေႃႈ။ ၵဝ်ၶႂ်ႈႁႂ်ႈမႂ်းႁၢမ်ႈတၢပ်ႈၵူၼ်းၵမ်ႈၽွင်ႈၵႃႈတီႈၼၼ်ႈၼင်ႇႁိုဝ်ၶဝ်တေဢမ်ႇသင်ႇသွၼ်တြႃးဢၼ်ပႅၵ်ႇပိူင်ႈတၢင်ႇမဵဝ်းဢေႃႈ။-
သွၼ်ႁႂ်ႈၶဝ်ၼင်ႇႁိုဝ်တေဢမ်ႇဢဝ်သႂ်ႇၼႂ်းၸႂ်၊ဢပုမ်ႇဢၼ်ပိူၼ်ႈၶႆႈၵၼ်၊ဢိၵ်ႇတင်းၸရၢင်းၸိူဝ်ႉၶိူဝ်းဢၼ်ဢမ်ႇၸၢင်ႈသုတ်းသဵင်ႈလႆႈၸိူဝ်းၼၼ်ႉတႃႉ။ လွင်ႈတၢင်းၸိူဝ်းၼႆႉၸၢင်ႈႁဵတ်းႁႂ်ႈၵေႃႉၼိုင်ႈလႄႈၵေႃႉၼိုင်ႈတွပ်ႇထဵင်ၵၼ်ၵူၺ်းလႄႈယင်းဢမ်ႇၸၢင်ႈႁဵတ်းၸွမ်းတြႃးၽြႃးပဵၼ်ၸဝ်ႈဢၼ်ႁဝ်းၸၢင်ႈႁုၸၢင်ႈႁၼ်ၵွပ်ႈလူၺ်ႈတၢင်းယုမ်ႇမၢတ်ႈၼၼ်ႉဢေႃႈ။-
လွင်ႈတၢင်းဢၼ်သင်ႇလၢတ်ႈၸိူဝ်ႉၼင်ႇၼၼ်ၼၼ်ႉၸမ်ႉ၊ပဵၼ်ၶေႃႈဢဵၼ်းဢၢၼ်းႁႂ်ႈမီးတၢင်းႁၵ်ႉမႅတ်ႈတႃႇဢၼ်ဢွၵ်ႇမႃးၵႃႈတီႈႁူဝ်ၸႂ်ဢၼ်ၶၢဝ်ၸၢင်ႇ၊ၸႂ်ဢၼ်ႁူတူဝ်ၸဝ်ႈၵဝ်ႇဢၼ်လီဢၼ်ငၢမ်း၊ဢိၵ်ႇတင်းတၢင်းယုမ်ႇမၢတ်ႈၸႅတ်ႈၸၢင်ႇၼၼ်ႉဢေႃႈ။-
ၵူၼ်းၵမ်ႈၽွင်ႈဢမ်ႇမီးၸႂ်ၸိူဝ်ႉၼင်ႇၼၼ်လႄႈပိူင်ႈတၢင်းၵႂႃႇသေလႄႈဢုပ်ႇလၢတ်ႈၵႂၢမ်းၽၢင်းလၢႆလၢႆလွၵ်ႇလွၵ်ႇၵူၺ်းၼၼ်ႉယဝ်ႉ။-
ၶဝ်ယင်းဢမ်ႇႁုတီႈပွင်ႇၵႂၢမ်းဢၼ်တူဝ်ၸဝ်ႈၵဝ်ႇႁေႃး၊ဢိၵ်ႇတင်းလွင်ႈဢၼ်ၶဝ်ပဵၼ်သၢၵ်ႈသေႇၼၼ်ႉသေၵေႃႈ၊ယင်းၶႂ်ႈပဵၼ်သြႃႇဢၼ်သွၼ်ပိူၼ်ႈယူႇၼၼ်ႉဢေႃႈ။
ႁဝ်းႁုဝႃႈ၊ပိင်းၺၢပ်ႈတြႃးၸဝ်ႈပဵၼ်ဢၼ်လီတီႈၵေႃႉဢၼ်ၵမ်ၵျၢင်ႉၸွမ်းၵႃႈၼင်ႇဢၼ်မၼ်းထုၵ်ႇလီၵမ်ၵျၢင်ႉၼၼ်ႉဢေႃႈ။-
ၵူၺ်းၵႃႈ၊မၢတ်ႈတွင်းဝႆႉပိင်းၺၢပ်ႈတြႃးၸဝ်ႈဢမ်ႇၸႂ်ႈပုၼ်ႈတႃႇၵူၼ်းသိုဝ်ႈတြႃးၼၼ်ႉတႃႉ။ ပိင်းၺၢပ်ႈတြႃးၸဝ်ႈပဵၼ်ပုၼ်ႈတႃႇၵူၼ်းဢၼ်ဢမ်ႇႁုၽြႃးတြႃး၊ဢိၵ်ႇတင်းၵူၼ်းဢၼ်ဢမ်ႇၸွမ်းတြႃး၊ဢိၵ်ႇတင်းပုၼ်ႈၵူၼ်းဢၼ်ဢမ်ႇၵူဝ်းၵႂၢႆႇၽြႃး၊ဢိၵ်ႇတင်းၵူၼ်းဢၼ်ၽိတ်းပိူင်ႈဢပျတ်ႈ၊ပုၼ်ႈတႃႇၵူၼ်းဢၼ်ဢမ်ႇမူတ်းၸၢင်ႇ၊ဢိၵ်ႇတင်းပုၼ်ႈၵူၼ်းဢၼ်ဢမ်ႇရူဝ်ႇသေႇၵူဝ်ယမ်ၸဝ်ႈၽြႃး၊ပုၼ်ႈတႃႇၵူၼ်းဢၼ်ဢဝ်ပေႃႈမႄႈတၢႆ၊တင်းၵူၼ်းဢၼ်ဢဝ်ဢသၢၵ်ႈပိူၼ်ႈတၢႆ၊-
ပဵၼ်ပုၼ်ႈတႃႇၵူၼ်းဢၼ်ၽိတ်းၵႃႇမေႇသု၊ပုၼ်ႈၵေႃႉဢၼ်ႁဵတ်းမေႇထုင်ႇလူၺ်ႈၽူႈၸၢႆးၼင်ႇၵၼ်၊ဢိၵ်ႇတင်းပုၼ်ႈၵေႃႉဢၼ်လၵ်ႉတိဢဝ်ၵူၼ်းၵႂႃႇၶၢႆႁႂ်ႈၵႂႃႇပဵၼ်ၶႃႈပိူၼ်ႈ၊ပုၼ်ႈၵေႃႉဢၼ်ပႅတ်ႉဢၼ်လႅၼ်၊ဢိၵ်ႇတင်းပုၼ်ႈၵေႃႉဢၼ်ၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈ၊ဢိၵ်ႇတင်းပုၼ်ႈၵူၼ်းၸိူဝ်းဢၼ်ၶတ်းၵၼ်တင်းတြႃးဢၼ်မၢၼ်ႇမႅၼ်ႈၸိူဝ်းၼၼ်ႉဢေႃႈ။-
တြႃးၼၼ်ႉၸမ်ႉ၊မီးယူႇၸွမ်းၼင်ႇၼႂ်းၶၢဝ်ႇတြႃးသိူဝ်းပျေႃႇၽြႃးပဵၼ်ၸဝ်ႈဢၼ်မီးမၢင်ႇၵလႃႇ၊ဢၼ်ဢၢပ်ႈပၼ်တီႈၵဝ်ၼၼ်ႉဢေႃႈ။
ၵဝ်ယွင်ႈယေႃးတၢင်ႇၵျေးၸူး ၸဝ်ႈယေႇသုၶရိၸ်ႈ၊ ၸဝ်ႈၽြႃးႁဝ်းၸဝ်ႈဢၼ်ပၼ်ဢဵၼ်ပၼ်ႁႅင်းၵဝ်ပုၼ်ႈၵၢၼ်မၼ်းၸဝ်ႈၼႆႉၵွပ်ႈပိူဝ်ႈမၼ်းၸဝ်ႈမၢတ်ႈၵဝ်ပဵၼ်ၵေႃႉဢၼ်မီးသဵတ်ႈၸႃႇလႄႈယုၵ်ႉတၢင်ႇၵဝ်ႁႂ်ႈႁဵတ်းၵၢၼ်မၼ်းၸဝ်ႈဢေႃႈ။-
ပိၵ်ႉသမ်ႉၵဝ်ယၢမ်ႈပဵၼ်ၵေႃႉဢၼ်သႄႉသွမ်း၊ၼိၵ်ႈၸၢၵ်ႈလႄႈယႃႉၵဝ်းမၼ်းၸဝ်ႈမႃးသေၵေႃႈ၊ၽြႃးပဵၼ်ၸဝ်ႈယင်းႁၵ်ႉဢဵတ်းလူၵဝ်၊ပိူဝ်ႈဝႃႈၵဝ်ဢမ်ႇပႆႇယုမ်ႇလႄႈဢမ်ႇႁုလွင်ႈဢၼ်ၵဝ်လႆႈႁဵတ်းမႅၼ်ႈၼၼ်ႉဢေႃႈ။-
ၵျေးၸူးၸဝ်ႈၽြႃးႁဝ်းၼၼ်ႉလိူင်ႇၼမ်လူၼ်ႉလိူဝ်ယူႇပုၼ်ႈၵဝ်၊ဢိၵ်ႇတင်းပၼ်တၢင်းယုမ်ႇမၢတ်ႈလႄႈတၢင်းႁၵ်ႉမႅတ်ႈတႃႇဢၼ်တၵ်းၵႂႃႇမႃးလူၺ်ႈၵၼ်တင်း ၸဝ်ႈယေႇသုၶရိၸ်ႈ၊ ၼၼ်ႉဢေႃႈ။-
ၵႂၢမ်းဢၼ်ဝႃႈ၊ “ ၸဝ်ႈယေႇသုၶရိၸ်ႈ၊ ၵျွမႃးၼႂ်းလေႃးၵႃႉၼႆႉ၊ႁႂ်ႈလႆႈၵႄႇၶျွတ်ႈဢဝ်ၵူၼ်းၸိူဝ်းဢၼ်မီးဢပျတ်ႈၼၼ်ႉဢေႃႈ၊” ဝႃႈၼင်ႇၼႆၼၼ်ႉပဵၼ်ၵႂၢမ်းသဵတ်ႈၸႃႇဢၼ်ႁဝ်းထုၵ်ႇလီႁပ်ႉတုင်းဢဝ်လုမ်းလုမ်းဢေႃႈ။ ၼႂ်းၵူၼ်းၸိူဝ်းဢၼ်မီးဢပျတ်ႈတင်းလၢႆၼၼ်ႉၵဝ်ၼႆႉမီးဢပျတ်ႈၼမ်ၼႃႇသေပိူၼ်ႈယဝ်ႉ။-
ၵူၺ်းၵႃႈ၊ၽြႃးပဵၼ်ၸဝ်ႈမီးၸႂ်ၵရုၼႃႇဢဵတ်းလူၵဝ်လႄႈၼင်ႇႁိုဝ် ၸဝ်ႈယေႇသု၊ တၵ်းၼႄပျႃးၸႂ်ယႂ်ႇၸႂ်ယၢဝ်းမၼ်းၸဝ်ႈၵႃႈၼိူဝ်ၵဝ်ၶႃႈဢၼ်ပဵၼ်ၵူၼ်းမီးဢပျတ်ႈၼမ်ၼႃႇသေပိူၼ်ႈၼၼ်ႉသေယဝ်ႉ၊ႁဵတ်းၸိူဝ်ႉၼင်ႇၼႆႁႂ်ႈလႆႈပဵၼ်ပုင်ႇသၢၵ်ႈသေႇပုၼ်ႈၶဝ်ၸိူဝ်းဢၼ်ဝၢႆးလိုၼ်းတေယုမ်ႇမၢတ်ႈမၼ်းၸဝ်ႈလႄႈႁပ်ႉဢဝ်ဢသၢၵ်ႈထႃႇဝရႃႉၼၼ်ႉဢေႃႈ။-
ႁႂ်ႈၶုၼ်ႁေႃၶမ်းဢၼ်ၸၢမ်ႇယူႇၼႂ်းၵူႈၵၢပ်ႈၵူႈပၢၼ်၊ၸဝ်ႈဢၼ်ၵၢင်းလွတ်ႈတၢင်းတၢႆ၊ၸဝ်ႈဢၼ်မၢၵ်ႇတႃၵူၼ်းတူၺ်းဢမ်ႇႁၼ်လႆႈ၊ၸဝ်ႈဢၼ်ပဵၼ်ၽြႃးပဵၼ်ၸဝ်ႈသူႇလဵဝ်ၵူၺ်းၼၼ်ႉ၊ႁႂ်ႈလႆႈထိူၵ်ႈၶၢမ်ႇဢဝ်တၢင်းဢၼ်ရူဝ်ႇသေႇၵူဝ်ယမ်၊ဢိၵ်ႇတင်းမုၼ်ၵုင်ႇသရေႇတႃႇသေႇဢမ်ႇထၢတ်ႇသေၵမ်းလူၺ်ႈ။ ဢႃမိၼ်ႈ။
လုၵ်ႈၸၢႆးၵဝ် တိမေႃးသေႇ၊ ႟။ ၵဝ်ဢဝ်ၵႂၢမ်းပိင်းၺၢပ်ႈၼႆႉဢၢပ်ႈပၼ်မႂ်းၸွမ်းၼင်ႇၵႂၢမ်းပျႃႇတိၵ်ႈဢၼ်လႆႈႁေႃးဝႆႉ၊ပုၼ်ႈတႃႇမႂ်းၼၼ်ႉယဝ်ႉ။ ႁႂ်ႈၵႂၢမ်းၼၼ်ႉပဵၼ်ႁႅင်းၸႂ်ဢၼ်ၸွႆႈႁႂ်ႈမႂ်းတိုၵ်းႁတ်းႁတ်းႁၢၼ်ႁၢၼ်၊-
ၸွႆႈႁႂ်ႈမႂ်းယိပ်းၵမ်တၢင်းယုမ်ႇမၢတ်ႈမႂ်းဝႆႉမၼ်ႈၵႅၼ်ႇ၊ဢိၵ်ႇတင်းၸွႆႈႁႂ်ႈမႂ်းမီးၸႂ်ဢၼ်ႁုတူဝ်ၸဝ်ႈၵဝ်ႇဢၼ်မူတ်းသႂ်ၼၼ်ႉတႃႉ။ ၵူၼ်းၵမ်ႈၽွင်ႈယင်းဢမ်ႇထွမ်ႇဢဝ်ၸႂ်ဢၼ်ႁုတူဝ်ၸဝ်ႈၵဝ်ႇၶဝ်ၼၼ်ႉလႄႈတၢင်းယုမ်ႇမၢတ်ႈၶဝ်လႆႈလုလႅဝ်ၵႂႃႇဢေႃႈ။-
ၵႃႈၼႂ်းၶဝ်ၼၼ်ႉပႃး ႁုမေႇၼေႇ၊ တင်း ဢလႅၵ်ႉၸၼ်းတႃး၊ ဢေႃႈ။ ၶဝ်သွင်ၵေႃႉၼၼ်ႉၵဝ်လႆႈဢၢပ်ႈပၼ်ၼႂ်းမိုဝ်း ၸႃႇတၢၼ်ႇ၊ ႁႂ်ႈၶဝ်လႆႈသွၼ်ဢဝ်တၢင်းဢၼ်ၸၢင်ႈဝႄႈပႅတ်ႈၵႂၢမ်းဢၼ်သႄႉသွမ်းၸဝ်ႈၽြႃးၼၼ်ႉဢေႃႈ။
ပိူဝ်ႈၼႆလႄႈဢွၼ်တၢင်းသေပိူၼ်ႈ၊ၵဝ်တိုၵ်းယူင်းႁႂ်ႈမႂ်းသူးတွင်းလဝ်ႈယွၼ်းယူႇ၊ႁဵတ်းပထၼႃႇယူႇ၊ယွင်ႈယေႃးတၢင်ႇၵျေးၸူးၸဝ်ႈၽြႃးပုၼ်ႈၵူၼ်းတင်းလၢႆ၊-
ၸႃႉၸဵမ်ၶုၼ်ႁေႃၶမ်း၊ဢိၵ်ႇတင်းၶုၼ်ဢၼ်မီးဢႃႇၼႃႇ၊ၵႃႈမီးတင်းသဵင်ႈတင်းလူင်၊ၼင်ႇႁိုဝ်ႁဝ်းတၵ်းလႆႈယူႇၵတ်းယဵၼ်ၼိမ်လီလႄႈၼပ်ႉယမ်ၽြႃးတြႃး၊ဢိၵ်ႇတင်းလႆႈၵမ်ၵျၢင်ႉၼႂ်းတၢင်းဢၼ်မီးသရေႇၵူႈသမ်ႇၵူႈပိူင်ၼၼ်ႉဢေႃႈ။-
တၢင်းၵမ်ၵျၢင်ႉၸိူဝ်ႉၼင်ႇၼႆၼၼ်ႉ၊ပဵၼ်ဢၼ်လီဢၼ်ထုၵ်ႇၵႃႈတီႈသိုဝ်ႈၼႃႈတႂ်ႈတႃၽြႃးပဵၼ်ၸဝ်ႈ၊ၸဝ်ႈဢၼ်ၵႄႇၶျွတ်ႈဢဝ်ႁဝ်း၊-
ၸဝ်ႈဢၼ်မီးဢလူဝ်ႇၶႂ်ႈႁႂ်ႈၵူၼ်းတင်းသဵင်ႈတင်းလူင်ႁွတ်ႈထိုင်တၢင်းဢၼ်ၵႄႇၶျွတ်ႈဢဝ်လႄႈႁုၸႅင်ႈတြႃးဢၼ်မၢၼ်ႇမႅၼ်ႈၼၼ်ႉဢေႃႈ။-
ၽြႃးပဵၼ်ၸဝ်ႈမီးသူႇလဵဝ်ၵူၺ်းဢေႃႈ။ ၼႂ်းၵႄႈဝူင်ႈၵၢင်ၽြႃးပဵၼ်ၸဝ်ႈတင်းၵူၼ်းႁဝ်းၼႆႉ၊မီးၸဝ်ႈဝူင်ႈၵၢင်ပႃးလဵဝ်ၵူၺ်းဢၼ်ဝႃႈ၊ ၸဝ်ႈယေႇသုၶရိၸ်ႈ၊ ဢၼ်ပဵၼ်ၸႃႇတိၵူၼ်းၼၼ်ႉဢေႃႈ။-
မၼ်းၸဝ်ႈၼၼ်ႉၶၢမ်ႇၸုၼ်ႉပႅတ်ႈဢသၢၵ်ႈတူဝ်ၸဝ်ႈၵဝ်ႇႁႂ်ႈလႆႈထုတ်ႇဢဝ်မဵဝ်းၵူၼ်းတင်းသဵင်ႈတင်းလူင်ဢေႃႈ။ လွင်ႈတၢင်းၼႆႉပဵၼ်သၢၵ်ႈသေႇဢၼ်ထၢင်ႇသႃးမႃးၼႂ်းၶိင်ႇဢၼ်သၢင်ႇထုၵ်ႇၼၼ်ႉဢေႃႈ။-
ၵွပ်ႈပိူဝ်ႈၼႆလႄႈၵဝ်လႆႈၶၢမ်ႇတၢင်းဢၼ်ၸဝ်ႈၽြႃးၶၢၼ်းဝႆႉႁႂ်ႈပဵၼ်တမၢၼ်ႇၸဝ်ႈ၊ၼႂ်းဢရႃႇသြႃႇႁေႃးတြႃး၊ႁႂ်ႈလႆႈသင်ႇသွၼ်ပၼ်လွင်ႈတၢင်းယုမ်ႇမၢတ်ႈ၊တင်းတြႃးဢၼ်မၢၼ်ႇမႅၼ်ႈတီႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းတင်းလၢႆဢေႃႈ။ ၵဝ်ဢမ်ႇပႅတ်ႉလႅၼ်။ ၵဝ်ဝႃႈၵႂၢမ်းဢၼ်မၢၼ်ႇဢေႃႈ။
ၼႂ်းၸိူဝ်းၸဝ်ႈၵူႈတီႈၼၼ်ႉၵဝ်ၶႂ်ႈႁႂ်ႈၵူၼ်းၸၢႆးတင်းလၢႆယင်းဢမ်ႇဢွၵ်ႇတေႃးသႃႉ၊ဢမ်ႇတွပ်ႇထဵင်ၵၼ်လႄႈၶႂ်ႈႁႂ်ႈၶဝ်ႁွမ်းမိုဝ်းဢၼ်မူတ်းၸၢင်ႇသေသူးတွင်းတီႈၸဝ်ႈၽြႃးဢေႃႈ။-
ၼႄးလဵဝ်ၵၼ်၊မႄႈယိင်းၶဝ်ၵေႃႈၵဝ်ၶႂ်ႈႁႂ်ႈၶဝ်ပႂ်ႉဢဵင်ႇသရေႇၼႂ်းတၢင်းဢၼ်ၼုင်ႈၶူဝ်းဢၼ်ထုၵ်ႇတႃၼၼ်ႉဢေႃႈ။ ၶဝ်ဢမ်ႇထုၵ်ႇလီႁၢင်ႈၶိူင်ႈတူဝ်ၸဝ်ႈၵဝ်ႇလူၺ်ႈႁၢင်ႈၽၢင်ၶူၼ်ႁူဝ်ၵူႈမဵဝ်းမဵဝ်း၊လူၺ်ႈၶူဝ်းၶမ်းလႄႈသႅင်ပူးလႄး၊ဢိၵ်ႇတင်းၶူဝ်းလဵင်းဢၼ်ၵႃႈၶၼ်ယႂ်ႇၸိူဝ်းၼၼ်ႉလႄႈ၊-
ၶဝ်ထုၵ်ႇလီဢဝ်တင်းတၢင်းၵမ်တၢင်းၵျၢင်ႉဢၼ်လီဢၼ်ငၢမ်းဢၼ်ဢၢပ်ႈၵိုင်ႇၵၼ်တင်းမႄႈယိင်းဢၼ်ၼပ်ႉယမ်ၽြႃးတြႃးၼၼ်ႉႁဵတ်းပဵၼ်ၶိူင်ႈၶူဝ်းႁၢင်ႈၶိူင်ႈတူဝ်ၸဝ်ႈၵဝ်ႇဢေႃႈ။-
ႁႂ်ႈမႄႈယိင်းၶဝ်သွၼ်ဢဝ်တြႃးတဵတ်ႇတဵတ်ႇယဵၼ်ယဵၼ်လူၺ်ႈသၽေႃးဢၼ်ၶၢမ်ႇဢဝ်တၢင်းဢၼ်ဢုပ်ႉပိူင်ႇတႃႉ။-
ၵဝ်ဢမ်ႇပၼ်ဢၶႂၢင်ႉႁႂ်ႈမႄႈယိင်းသင်ႇသွၼ်ၵူၼ်းၸၢႆးတင်းလၢႆလႄႈမီးဢႃႇၼႃႇၼိူဝ်ၶဝ်။ မႄႈယိင်းၸိုင်၊တၵ်းလႆႈယူႇတဵတ်ႇတဵတ်ႇဢေႃႈ။-
လွင်ႈမၼ်းၸမ်ႉ၊ၽြႃးပဵၼ်ၸဝ်ႈၽၢၼ်ႇသၢင်း ဢႃႇတမ်ႇ၊ ဢွၼ်တၢင်းယဝ်ႉၸင်ႇၽၢၼ်ႇသၢင်း ဢေးဝႃႉ၊ ဢေႃႈ။-
လိူဝ်သေၼၼ်ႉ ဢႃႇတမ်ႇ၊ လႆႈၶၢမ်ႇတၢင်းဢၼ်ပႅတ်ႉလႅၼ်ဢမ်ႇၸႂ်ႈ။ မႄႈယိင်းပဵၼ်ၵေႃႉဢၼ်လႆႈၶၢမ်ႇတၢင်းဢၼ်ပႅတ်ႉလႅၼ်လႄႈလိူဝ်ၵႂၢမ်းၽြႃးပဵၼ်ၸဝ်ႈဢေႃႈ။-
ၼႂ်းဝႃႈၼၼ်သေၵေႃႈမႄႈယိင်းတၵ်းလႆႈၶၢမ်ႇတၢင်းဢၼ်ၵႄႇၶျွတ်ႈဢဝ်ၵွပ်ႈလူၺ်ႈတၢင်းဢၼ်ၵိူတ်ႇလဵင်ႉလုၵ်ႈလဵင်ႉလၢင်း၊ပေႃးမၼ်းပႂ်ႉထိင်းတူဝ်ၸဝ်ႈၵဝ်ႇလႄႈတႄႇယူႇၼႂ်းတၢင်းယုမ်ႇမၢတ်ႈ၊ၼႂ်းတၢင်းႁၵ်ႉမႅတ်ႈတႃႇ၊ဢိၵ်ႇတင်းၼႂ်းတၢင်းဢၼ်မူတ်းၸၢင်ႇပႃးဢဵင်ႇသရေႇၼၼ်ႉဢေႃႈ။
ၵႂၢမ်းဢၼ်ဝႃႈ၊ပေႃးသေၵေႃႉသေၵူၼ်းမီးၸႂ်ၶႂ်ႈပဵၼ်ၵူၼ်းလူင်ၼႂ်းၸိူဝ်းၸဝ်ႈၸိုင်၊မၼ်းမီးၸႂ်ၶႂ်ႈႁဵတ်းၵၢၼ်ဢၼ်လီဢၼ်ငၢမ်းဢေႃႈ၊ဝႃႈၼင်ႇၼႆၼၼ်ႉပဵၼ်ၵႂၢမ်းသဵတ်ႈၸႃႇဢေႃႈ။-
ပိူဝ်ႈၼႆလႄႈၵူၼ်းလူင်ၼႂ်းၸိူဝ်းၸဝ်ႈၸိုင်၊တၵ်းလႆႈပဵၼ်ၵေႃႉဢၼ်ၵၢင်းလွတ်ႈတင်းတီႈဢၼ်တၢင်ႇဢပျတ်ႈလႄႈတေလႆႈပဵၼ်ၵေႃႉဢၼ်မီးမေးၵေႃႉလဵဝ်ၵူၺ်းလႄႈမီးသမ်ႇမႃႇသတိ၊တေလႆႈပဵၼ်ၵေႃႉဢၼ်ပႂ်ႉထိင်းတူဝ်ၸဝ်ႈၵဝ်ႇ၊တေလႆႈပဵၼ်ၵေႃႉဢၼ်ၵမ်ၵျၢင်ႉဢၼ်သၢင်ႇထုၵ်ႇ၊တေလႆႈပဵၼ်ၵေႃႉဢၼ်ၸူမ်းတွၼ်ႈႁပ်ႉၶႅၵ်ႇ၊တေလႆႈပဵၼ်ၵေႃႉဢၼ်ၸၢင်ႈသင်ႇသွၼ်သုင်းမႃႉပိူၼ်ႈဢေႃႈ။-
မၼ်းတၵ်းဢမ်ႇလႆႈပဵၼ်ၵေႃႉဢၼ်မၵ်ႉလဝ်ႈမဝ်းယႃလႄႈၸၢင်ႈပေႃႉယႅၼ်ႉပိူၼ်ႈ၊မၼ်းတၵ်းလႆႈပဵၼ်ၵေႃႉဢၼ်မီးၸႂ်ယႂ်ႇၸႂ်ယၢဝ်းလႄႈယိူၼ်ႉၶၢမ်ႈပိူၼ်ႈ၊တေလႆႈပဵၼ်ၵေႃႉဢၼ်ဢမ်ႇၽိတ်းဢမ်ႇထဵင်ပိူၼ်ႈ၊တေလႆႈပဵၼ်ၵေႃႉဢၼ်ဢမ်ႇမီးၸႂ်လေႃးၽႃႉပူၼ်ႉလိူဝ်လႄႈၸႂ်ၸပ်းငိုၼ်းတွင်းဢေႃႈ။-
မၼ်းတၵ်းလႆႈပဵၼ်ၵေႃႉဢၼ်ၸၢင်ႈဢုပ်ႉထိင်းၼႃႈႁိူၼ်းတူဝ်ၸဝ်ႈၵဝ်ႇလီလီလႄႈၸၢင်ႈသင်ႇသွၼ်ႁႂ်ႈလုၵ်ႈလၢင်းမၼ်းရူဝ်ႇသေႇၵူဝ်ယမ်မၼ်းလႄႈထွမ်ႇသူပ်းဢဝ်ၵႂၢမ်းမၼ်းဢေႃႈ။-
ပေႃးမၼ်းယင်းဢမ်ႇမေႃဢုပ်ႉၼႃႈႁိူၼ်းတူဝ်ၸဝ်ႈၵဝ်ႇၸိုင်၊မၼ်းတေႁဵတ်းႁိုဝ်ၸၢင်ႈၸွႆႈဢုပ်ႉထိင်းၸိူဝ်းၸဝ်ႈၽြႃးပဵၼ်ၸဝ်ႈလႆႈ။-
မၼ်းတၵ်းဢမ်ႇလႆႈပဵၼ်ၵေႃႉဢၼ်တိုၵ်ႉႁႃၶဝ်ႈၽႃႇသႃႇမႃးမႂ်ႇမႂ်ႇၼၼ်ႉဢေႃႈ။ ၵူဝ်မၼ်းၸၢင်ႈမီးႁူဝ်ၸႂ်ၽႅၼ်သုင်သေလႄႈလႆႈၶၢမ်ႇၸီႇယၢင်ႇတြႃးမိူၼ်ၸိူဝ်ႉၼင်ႇမႃႇၼၢတ်ႈလႆႈၶၢမ်ႇၼၼ်ႉဢေႃႈ။-
လိူဝ်သေၼၼ်ႉမၼ်းထုၵ်ႇလီပဵၼ်ၵူၼ်းၵေႃႉဢၼ်ၵူၼ်းၼွၵ်ႈၸိူဝ်းၸဝ်ႈၶဝ်ရူဝ်ႇသေႇၼၼ်ႉဢေႃႈ။ ပေႃးဢမ်ႇၼၼ်မၼ်းၸၢင်ႈလႆႈဢူၵ်းလႆႈဢၢႆလႄႈတူၵ်းၶမ်ယူႇၵႃႈၼႂ်းတူင်ႇၶိုမ်းၽီႁၢႆႉမႃႇၼၢတ်ႈၼၼ်ႉဢေႃႈ။
မိူၼ်ၸိူဝ်ႉၼင်ႇၼၼ်ၽူႈၸွႆႈထၢမ်းၵၢၼ်ၸိူဝ်းၸဝ်ႈတင်းလၢႆၵေႃႈတေဢမ်ႇလႆႈပဵၼ်ၵူၼ်းလိၼ်ႉသွင်ငၢမ်ႈ၊တၵ်းလႆႈမီးဢဵင်ႇသရေႇဢၼ်လီလႄႈ၊ဢမ်ႇလႆႈၵိၼ်ၼမ်ႉမၢၵ်ႇၸပိတ်ႉႁႂ်ႈပူၼ်ႉလိူဝ်၊-
ၶဝ်တၵ်းလႆႈမီးၸႂ်ဢၼ်ႁုတူဝ်ၸဝ်ႈၵဝ်ႇဢၼ်ၶၢဝ်ၸၢင်ႇသေလႄႈၸႂ်ၸပ်းတြႃးတၢင်းယုမ်ႇမၢတ်ႈဢၼ်လိုၵ်ႉဢၼ်လမ်ႇၼႂ်းၸဝ်ႈၽြႃးၼၼ်ႉဢေႃႈ။-
ႁႂ်ႈၶဝ်လႆႈၶၢမ်ႇၸႅတ်ႈၸၢမ်းတူၺ်းဢွၼ်တၢင်းတႃႉ။ ပေႃးၶဝ်ၵၢင်းလွတ်ႈတၢင်းဢၼ်တၢင်ႇဢပျတ်ႈၸိုင်၊ႁႂ်ႈၶဝ်လုမ်းလႃးၼႂ်းၸိူဝ်းၸဝ်ႈၼႂ်းဢရႃႇၵူၼ်းလူင်ၼႂ်းၸိူဝ်းၸဝ်ႈတႃႉ။-
မေးၶဝ်ၵေႃႈတၵ်းလႆႈမီးဢဵင်ႇသရေႇဢၼ်လီလႄႈၶဝ်တၵ်းဢမ်ႇလႆႈၶႃႉၸိုဝ်ႈၶၢႆသဵင်ပိူၼ်ႈ၊တၵ်းလႆႈပဵၼ်ၵေႃႉဢၼ်မီးသမ်ႇမႃႇသတိ၊ၵေႃႉဢၼ်မီးသဵတ်ႈၸႃႇၵႃႈၼႂ်းၵူႈၸိူဝ်ႉၵူႈပိူင်ဢေႃႈ။-
ၵူၼ်းလူင်ၼႂ်းၸိူဝ်းၸဝ်ႈတၵ်းလႆႈမီးမေးၵေႃႉလဵဝ်ၵူၺ်းလႄႈပဵၼ်ၵေႃႉဢၼ်မေႃဢုပ်ႉထိင်းလုၵ်ႈလၢင်းမၼ်းတင်းၼႃႈႁိူၼ်းမၼ်းလီလီတႃႉ။-
လွင်ႈမၼ်းၸမ်ႉ၊ၶဝ်ၸိူဝ်းဢၼ်လုမ်းလႃးၸိူဝ်းၸဝ်ႈလီလီငၢမ်းငၢမ်းၼႂ်းဢရႃႇၵူၼ်းလူင်ၼႂ်းၸိူဝ်းၸဝ်ႈၼၼ်ႉလႆႈဢၵျူဝ်းပုၼ်ႈတူဝ်ၸဝ်ႈၵဝ်ႇလႄႈၸၢင်ႈႁေႃးလၢတ်ႈလွင်ႈတင်းယုမ်ႇမၢတ်ႈဢၼ်မီးၼႂ်း ၸဝ်ႈယေႇသုၶရိၸ်ႈ၊ ၼၼ်ႉႁတ်းႁတ်းႁၢၼ်ႁၢၼ်ဢေႃႈ။
ၵဝ်ဢၢၼ်းၸဵဝ်းမႃးၸူးတီႈမႂ်းယူႇ၊ၵူၺ်းၵႃႈၵဝ်လႆႈတႅမ်ႈလိၵ်ႈၽိုၼ်ၼႆႉထိုင်မႂ်းယဝ်ႉ၊-
ပေႃးၵဝ်ၼၢၼ်းႁွတ်ႈမႃးၸိုင်၊လိၵ်ႈၼႆႉတၵ်းႁႂ်ႈမႂ်းလႆႈႁုဝႃႈ၊ႁဝ်းတၵ်းလႆႈႁဵတ်းၸိူဝ်ႉၼင်ႇႁိုဝ်သၢင်ႈႁဵတ်းၵမ်ၵျၢင်ႉၼႂ်းႁိူၼ်းၽြႃးပဵၼ်ၸဝ်ႈဢေႃႈ။ ႁိူၼ်းၸဝ်ႈၼၼ်ႉၸမ်ႉ၊ပဵၼ်ၸိူဝ်းၸဝ်ႈၽြႃးပဵၼ်ၸဝ်ႈ၊ၸဝ်ႈဢၼ်ဢသၢၵ်ႈလိပ်းယူႇၼၼ်ႉဢေႃႈ။ ၸိူဝ်းၸဝ်ႈၼၼ်ႉပဵၼ်သဝ်ဢၼ်ၵမ်ႉထွၵ်ႈသမ်ႇမႃႇတြႃးလႄႈသမ်ႉပဵၼ်ငဝ်ႈႁၢၵ်ႈတီႈဢၼ်သမ်ႇမႃႇတြႃးတႄႇယူႇဢေႃႈ။-
လွင်ႈတၢင်းဢၼ်လိုၵ်ႉဢၼ်လမ်ႇၽႃႇသႃႇတြႃးႁဝ်းၼႆႉပဵၼ်ဢၼ်ယႂ်ႇမျၢတ်ႈၼႃႇလူင်လၢင်ဢေႃႈ၊ဝႃႈၼႆၽူႈလႂ်ဢမ်ႇၸၢင်ႈတွပ်ႇထဵင်လႆႈ။ ၸဝ်ႈၽြႃးလႆႈပေႃႇမႃးၼႂ်းတူဝ်ႁၢင်ႈၵူၼ်းလႄႈ၊ လႆႈၼႄပျႃးဝႃႈမၼ်းၸဝ်ႈသိုဝ်ႈတေႃႇၼႂ်းဝိၺိၺ်ႇၸဝ်ႈသေယဝ်ႉ၊ လႆႈၶၢမ်ႇတၢင်းဢၼ်တမၢၼ်ႇၵၢင်ႁၢဝ်တင်းလၢႆတူၺ်းႁၼ်ယဝ်ႉၸင်ႇ၊ လႆႈၶၢမ်ႇတၢင်းဢၼ်ႁေႃးလၢတ်ႈလွင်ႈမၼ်းၵႃႈၼႂ်းၵူၼ်းၵူႈၶိူဝ်းၶိူဝ်း၊ လႆႈၶၢမ်ႇတၢင်းဢၼ်ၵူၼ်းလေႃးၵီႇတင်းလၢႆယုမ်ႇမၢတ်ႈဢိင်ပိုင်ႈသေလႄႈ၊ လႆႈၶၢမ်ႇတၢင်းဢၼ်ၽြႃးပဵၼ်ၸဝ်ႈဢဝ်ၶိုၼ်ႈၵႂႃႇၵႃႈၼိူဝ်မိူင်းၵၢင်ႁၢဝ်ယဝ်ႉဢေႃႈ။
ဝိၺိၺ်ႇၸဝ်ႈလၢတ်ႈလႅင်းလႅင်းၸမ်ႉ၊ၼႂ်းၵၢပ်ႈပၢၼ်ၵမ်းလိုၼ်းၼၼ်ႉ ၵူၼ်းၵမ်ႈၽွင်ႈတၵ်းၸုၼ်ႉပႅတ်ႈတၢင်းယုမ်ႇမၢတ်ႈၶဝ်သေယဝ်ႉ၊ၵႂႃႇၸွမ်းဝိၺိၺ်ႇဢၼ်ၸၢင်ႈပႅတ်ႉလႅၼ်လႄႈ ၵမ်ၵျၢင်ႉၸွမ်းၵႂၢမ်းသင်သွၼ်ၽီတင်းလၢႆဢေႃႈ။-
ၵႂၢမ်းသင်သွၼ်ၸိူဝ်းၼၼ်ႉ ဢွၵ်ႇမႃးၵႃႈတီႈၵူၼ်းဢၼ်ပႅတ်ႉလႅၼ်၊ဢၼ်ၸႂ်ႁုတူဝ်ၸဝ်ႈၵဝ်ႇမၼ်းဢမ်ႇႁုၸၵ်းတီႈၽိတ်းတီႈထုၵ်ႇလႄႈ ပဵၼ်ၵႂႃႇမိူၼ်ၼိူဝ်ႉတၢႆဢၼ်ဢဝ်လဵၵ်းတၢမ်ၽႆးၼၼ်ႉၸမ်ႈၶႅမ်ႈဝႆႉၼၼ်ႉဢေႃႈ။-
ၶဝ်ၼၼ်ႉ၊ၸၢင်ႈသင်ႇသွၼ်ဝႃႈ၊ဢမ်ႇလီတႄႇၼႃႈႁိူၼ်း။ ဢမ်ႇလီၵိၼ်တၢင်းၵိၼ်မဵဝ်းၼၼ်ႉ မဵဝ်းၼႆႉဝႃႈၼႆဢေႃႈ။ ၵူၺ်းၵႃႈ၊ႁဝ်းႁုဝႃႈ၊ၽြႃးပဵၼ်ၸဝ်ႈၽၢၼ်ႇသၢင်းႁဵတ်းပဵၼ်ဝႆႉ၊တၢင်းၵိၼ်ၵူႈၸိူဝ်ႉၵူႈပိူင်ပုၼ်ႈတႃႇၵူၼ်းၸိူဝ်းဢၼ်ယုမ်ႇမၢတ်ႈလႄႈႁုသမ်ႇမႃႇတြႃးၼၼ်ႉ တၵ်းယွင်ႈယေႃးတၢင်ႇၵျေးၸူးၸဝ်ႈၽြႃးသေလႄႈၵိၼ်ၼၼ်ႉဢေႃႈ။-
မဵဝ်းဢၼ်ၽြႃးပဵၼ်ၸဝ်ႈၽၢၼ်ႇသၢင်းႁဵတ်းပဵၼ်ဝႆႉတင်းမူတ်းပဵၼ်ဢၼ်လီဢေႃႈ။ ပေႃးႁဝ်းလႆႈသူးတွင်းတၢင်ႇၵျေးၸူးၸဝ်ႈၽြႃးလႄႈၶၢမ်ႇဢဝ်ၸိုင်၊ဢမ်ႇလူဝ်ႇဝႄႈၵမ်သေၸိူဝ်ႉသေပိူင်ဢေႃႈ။-
လွင်ႈမၼ်းၸမ်ႉ၊ၵွပ်ႈပိူဝ်ႈၼုၵ်ႈၵပၢတ်ႈတြႃး၊ၽြႃးပဵၼ်ၸဝ်ႈ၊ဢိၵ်ႇတင်းၵွပ်ႈပိူဝ်ႈတၢင်းသူးတွင်းႁဝ်းၼၼ်ႉ ႁဵတ်းႁႂ်ႈၵူႈၸိူဝ်ႉၵူႈပိူင်မူတ်းၸၢင်ႇယဝ်ႉဢေႃႈ။
ပေႃးမႂ်းသင်ႇသွၼ်ၵႂၢမ်းၸိူဝ်ႉၼင်ႇၼႆပၼ်ပီႈၼွင်ႉၸိူဝ်းၸဝ်ႈၸိုင်၊မႂ်းတေပဵၼ်ၵူၼ်းပွင်ၵၢၼ်ဢၼ်လီပုၼ်ႈ ၸဝ်ႈယေႇသုၶရိၸ်ႈ၊ ဢေႃႈ။ ဢဝ်ၵႂၢမ်းသင်ႇသွၼ်ဢၼ်ၸၢပ်ႈသႅင်ႇၵၼ်တၢင်းယုမ်ႇမၢတ်ႈ၊ဢိၵ်ႇတင်းၵႂၢမ်းဢၼ်ၸၢပ်ႈသႅင်ႇၵၼ်တင်းတြႃးဢၼ်မၢၼ်ႇမႅၼ်ႈဢၼ်မႂ်းယၢမ်ႈၵမ်ၵျၢင်ႉၸွမ်းၼၼ်ႉလဵင်ႉၸႂ်ဝိၺိၺ်ႇမႂ်းတႃႉ။-
ဝႄႈပႅတ်ႈဢပုမ်ႇၵႂၢမ်းလၢႆဢၼ်မႄႈထဝ်ႈၶဝ်ၶႆႈၵၼ်ဢၼ်ဢမ်ႇၶဝ်ႈပႃးၼႂ်းတြႃးၸဝ်ႈၽြႃးၼၼ်ႉသေလႄႈဢွၵ်ႇႁႅင်းၽိုၵ်းၵျၢင်ႉတူဝ်ၸဝ်ႈၵဝ်ႇႁႂ်ႈယူႇၼႂ်းသဵၼ်ႈတၢင်းၽြႃးတြႃးတႃႉ။-
တၢင်းဢၼ်ဢွၵ်ႇႁႅင်းၽိုၵ်းၵျၢင်ႉတူဝ်ၶၼ်ႇထႃႇၼၼ်ႉမီးဢၵျူဝ်းၼင်ႇၵဝ်ႇဢေႃႈ။ တၢင်းဢၼ်ဢွၵ်ႇႁႅင်းၽိုၵ်းၵျၢင်ႉၸႂ်ဝိၺိၺ်ႇၸမ်ႉ၊ၵွပ်ႈပိူဝ်ႈလႆႈၵတိဢၼ်ၸၢပ်ႈသႅင်ႇၵၼ်တင်းၸူဝ်ႈတႃႇဢသၢၵ်ႈၵၢပ်ႈပၢၼ်ၼႆႉ၊ဢိၵ်ႇတင်းၸူဝ်ႈတႃႇဢသၢၵ်ႈဢၼ်တၵ်းမႃးတၢင်းၼႃႈလႄႈယဵင်ႈၶႅၼ်းမီးဢၵျူဝ်းၵူႈၽၢႆႇၵူႈပႃႈဢေႃႈ။-
ၵႂၢမ်းၼႆႉ၊ပဵၼ်ၵႂၢမ်းသဵတ်ႈၸႃႇလႄႈပဵၼ်ၵႂၢမ်းဢၼ်ထုၵ်ႇလီႁပ်ႉတုင်းယုမ်ႇမၢတ်ႈတႄႉတႄႉဢေႃႈ။-
ႁဝ်းၵႆႉၶတ်းၸႂ်ႁဵတ်းယၢပ်ႇၽိုတ်ႇၼႃႇၵွပ်ႈပိူဝ်ႈႁဝ်းမီးတၢင်းမုင်ႈမွင်းၼႂ်းၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇ၊ပဵၼ်ၸဝ်ႈၽြႃးဢၼ်ၵႄႇၶျွတ်ႈဢဝ်ၵူၼ်းတင်းလၢႆလႄႈ၊လိူဝ်တွၼ်းၼႃႇသေပိူၼ်ႈတၵ်းၵႄႇၶျွတ်ႈဢဝ်ၶဝ်၊ၸိူဝ်းဢၼ်ယုမ်ႇမၢတ်ႈမၼ်းၸဝ်ႈၼၼ်ႉဢေႃႈ။
ဢဝ်လွင်ႈၸိူဝ်းၼႆႉပိင်းၺၢပ်ႈလႄႈသင်ႇသွၼ်ပၼ်တႃႉ။-
ယႃႇပေႁႂ်ႈပိူၼ်ႈလႆႈလူလၢႆမႂ်းၵွပ်ႈပိူဝ်ႈမႂ်းယင်းၼုမ်ႇယင်းၵမ်ယူႇၼၼ်ႉတႃႉ။ ႁႂ်ႈပဵၼ်ပုင်ႇသၢၵ်ႈသေႇပုၼ်ႈၶဝ်ၸိူဝ်းဢၼ်ယုမ်ႇမၢတ်ႈတင်းလၢႆ ၼႂ်းတၢင်းဢၼ်မႂ်းလၢတ်ႈၸႃႁဵတ်းသၢင်ႈ၊ၼႂ်းတၢင်းဢၼ်မႂ်းႁၵ်ႉပႅင်းပိူၼ်ႈ၊ၼႂ်းတၢင်းဢၼ်မႂ်းယုမ်ႇမၢတ်ႈ၊ဢိၵ်ႇတင်းၼႂ်းတၢင်းဢၼ်မႂ်းမီးၸႂ်ၶၢဝ်ၸၢင်ႇၼၼ်ႉတႃႉ။-
တေႃႇထိုင်ၵဝ်မႃးၼၼ်ႉၵႆႉၶတ်းၸႂ်ၼႂ်းတၢင်းဢၼ်ၽတ်းဢၢၼ်ႇၵျၢမ်းလိၵ်ႈၵႃႈၼႂ်းၸုမ်းၸိူဝ်းၸဝ်ႈ၊ၼႂ်းတၢင်းဢၼ်ႁေႃးလၢတ်ႈတြႃးလႄႈၼႂ်းတၢင်းဢၼ်သင်ႇသွၼ်တြႃးၼၼ်ႉတႃႉ။-
ယႃႇပေလူင်လိုမ်းသုၵျေးၸူးဢၼ်ၵတ်ႉၶၼ်ဢၼ်မီးၵႃႈၼႂ်းမႂ်းဢၼ်ၸွမ်းၼင်ႇၵႂၢမ်းပျႃႇတိၵ်ႈၸဝ်ႈသေလႄႈဢၢပ်ႈပၼ်မႂ်းဝႆႉၼၼ်ႉ၊မိူဝ်ႈဢၼ်ၵူၼ်းလူင်ၼႂ်းၸိူဝ်းၸဝ်ႈၶဝ်ဢဝ်မိုဝ်းတၢင်ႇၵႃႈၼိူဝ်မႂ်းၼၼ်ႉတႃႉ။-
ၵမ်ၵျၢင်ႉလွင်ႈတၢင်းၸိူဝ်းၼႆႉလႄႈၶတ်းၸႂ်ၶတ်းႁႅင်းလႄႈႁဵတ်းၼႃႈၵၢၼ်မႂ်းၼင်ႇႁိုဝ်ၵူၼ်းၵူႈၵေႃႉတၵ်းႁၼ်လွင်ႈတၢင်းဢၼ်မႂ်းၶိုၼ်ႈယႂ်ႇမႂ်ႇသုင်မႃးၼၼ်ႉထၢင်ႇထၢင်ႇသႃးသႃးတႃႉ။-
ဝႆႉသတိတူဝ်ၸဝ်ႈၵဝ်ႇ၊ဢိၵ်ႇတင်းၵႂၢမ်းသင်ႇသွၼ်မႂ်းတႃႉ။ သိုပ်ႇႁဵတ်းၸွမ်းၵႂၢမ်းဢၼ်လၢတ်ႈမႃးၼၼ်ႉႁႂ်ႈမၼ်ႈမၼ်ႈၶိူင်ႇၶိူင်ႇတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊မႂ်းတၵ်းၵႄႇသႄႇဢဝ်ၸႃႉၸဵမ်တူဝ်မႂ်း၊ဢိၵ်ႇတင်းၶဝ်ၸိူဝ်းဢၼ်ထွမ်ႇဢဝ်ၵႂၢမ်းမႂ်းၼၼ်ႉဢေႃႈ။
ယႃႇပေႁိုတ်းထႃႉၵေႃႉဢၼ်ဢသၢၵ်ႈၵႄႇထဝ်ႈသေမႂ်းၼၼ်ႉ။ မၢတ်ႈမၼ်းပဵၼ်မိူၼ်ၸိူဝ်ႉၼင်ႇပေႃႈသေလႄႈတွင်းပၢၼ်ႇမၼ်းတႃႉ။ မၢတ်ႈၵေႃႉဢၼ်ဢသၢၵ်ႈလဵၵ်ႉသေမႂ်းၸိူဝ်းၼၼ်ႉပဵၼ်မိူၼ်ၸိူဝ်ႉၼင်ႇၼွင်ႉၸၢႆး၊-
မၢတ်ႈမႄႈယိင်းဢၼ်ဢသၢၵ်ႈၵႄႇထဝ်ႈသေမႂ်းၸိူဝ်းၼၼ်ႉ၊ပဵၼ်မိူၼ်ၸိူဝ်ႉၼင်ႇမႄႈ၊မီးတင်းၸႂ်ဢၼ်ၶၢဝ်ၸၢင်ႇသေလႄႈ၊မၢတ်ႈၽူႈယိင်းဢၼ်ဢသၢၵ်ႈလဵၵ်ႉသေမႂ်းၸိူဝ်းၼၼ်ႉပဵၼ်မိူၼ်ၸိူဝ်ႉၼင်ႇၼွင်ႉယိင်းတႃႉ။
ႁဵတ်းတၢင်းဢၼ်ၼပ်ႉယမ်တီႈမႄႈမၢႆႈတင်းလၢႆဢၼ်ဢမ်ႇမီးတီႈပိုင်ႈၼၼ်ႉတႃႉ။-
ပေႃးပဵၼ်မႄႈမၢႆႈဢၼ်မီးလုၵ်ႈလၢၼ်ၸိုင်၊ႁႂ်ႈလုၵ်ႈလၢၼ်ၶဝ်သွၼ်ဢဝ်တႃႇဝုၼ်ႇၼႃႈၵၢၼ်ၽြႃးသေယဝ်ႉ၊ႁႂ်ႈၶဝ်မေႃႁဵတ်းတေႃႇၼႃႈႁိူၼ်းတူဝ်ၸဝ်ႈၵဝ်ႇလႄႈမေႃတွပ်ႇၵျေးၸူးပေႃႈမႄႈၶဝ်၊ပူႇၶဝ်ၼၢႆးၶဝ်တႃႉ။ လွင်ႈတၢင်းၸိူဝ်ႉၼင်ႇၼႆပဵၼ်လွင်ႈတၢင်းဢၼ်ထုၵ်ႇၸႂ်ၽြႃးပဵၼ်ၸဝ်ႈဢေႃႈ။-
မႄႈမၢႆႈဢၼ်ယူႇၵူၺ်းၶေႃမၼ်းလႄႈဢမ်ႇမီးၽူႈလႂ်လုမ်းလႃးမၼ်းတႄႉတႄႉၼၼ်ႉ၊ၸၢင်ႈမီးတၢင်းမုင်ႈမွင်းၼႂ်းၽြႃးပဵၼ်ၸဝ်ႈၵူၺ်းလႄႈသူးတွင်းလဝ်ႈယွၼ်းတီႈမၼ်းၸဝ်ႈၵူႈဝၼ်းၵူႈၶိုၼ်းႁႂ်ႈလႆႈတၢင်းၸွႆႈထႅမ်ဢေႃႈ။-
ၵူၺ်းၵႃႈ၊မႄႈမၢႆႈဢၼ်ၸၢင်ႈမူၼ်ႈပျေႃႇၸွမ်းၸႂ်ၵႃႇမၵုင်ႇၼၼ်ႉ၊ပိၵ်ႉသမ်ႉမၼ်းဢသၢၵ်ႈလိပ်းယူႇသေၵေႃႈမၼ်းမိူၼ်ၵူၼ်းတၢႆယဝ်ႉဢေႃႈ။-
ၼင်ႇႁိုဝ်ပိူၼ်ႈတၵ်းဢမ်ႇၸၢင်ႈတၢင်ႇဢပျတ်ႈၶဝ်ၼၼ်ႉၸိုင်၊ဝႆႉပိင်းၺၢပ်ႈၸိူဝ်ႉၼင်ႇၼႆတီႈၶဝ်တႃႉ။-
ပေႃးသေၵေႃႉသေၵူၼ်းဢမ်ႇလဵင်ႉလူလုမ်းလႃးပီႈၼွင်ႉၸိူဝ်ႉၶိူဝ်းတူဝ်ၸဝ်ႈၵဝ်ႇဢမ်ႇၵႃး၊ဢမ်ႇလဵင်ႉလူလုမ်းလႃးၵူၼ်းႁိူၼ်းတူဝ်ၸဝ်ႈၵဝ်ႇၼၼ်ႉၸိုင်၊မၼ်းထဵင်ပႅတ်ႈတြႃးတၢင်းဢၼ်ယုမ်ႇမၢတ်ႈလႄႈ ယဵင်ႈၶႅၼ်းယုတ်ႈၺၢမ်ႉၼႃႇသေၵေႃႉဢၼ်ဢမ်ႇတွၼ်ႉယုမ်ႇမၢတ်ႈၼၼ်ႉဢေႃႈ။
ပေႃးမႄႈမၢႆႈဢသၢၵ်ႈဢမ်ႇပႆႇလႆႈႁူၵ်းသိပ်း၊ဢမ်ႇၼၼ်ၵေႃႉဢၼ်ယၢမ်ႈတႄႇၼႃႈႁိူၼ်းၼမ်သေပွၵ်ႈၼိုင်ႈၼၼ်ႉ၊ယႃႇပေဢဝ်ၶဝ်သႂ်ႇၵႃႈၼႂ်းၸရၢင်းမႄႈမၢႆႈ။-
မၼ်းတၵ်းလႆႈပဵၼ်မႄႈမၢႆႈဢၼ်ပိူၼ်ႈၶၢမ်ႇသၢၵ်ႈသေႇဝႃႈ၊မၼ်းပဵၼ်ၵေႃႉဢၼ်မီးသရေႇလႄႈၵမ်ၵျၢင်ႉလီလီငၢမ်းငၢမ်း၊ၵေႃႉဢၼ်ယၢမ်ႈမေႃသင်ႇသွၼ်လုၵ်ႈလၢၼ်မၼ်း၊ၵေႃႉဢၼ်ၸူမ်းတွၼ်ႈႁပ်ႉၶႅၵ်ႇ၊ၵေႃႉဢၼ်ၸၢင်ႈသုၵ်ႈပၼ်တိၼ် ၵူၼ်းမူတ်းၸၢင်ႇၸဝ်ႈၽြႃး၊သုၵ်ႈပၼ်တိၼ်ၵေႃႉဢၼ်ၸၢင်ႈၸွႆႈထႅမ်ၶဝ်ၸိူဝ်းဢၼ်ထူပ်းၽေးတုၵ်ႉၶႃႉ၊ဢိၵ်ႇတင်းၵေႃႉဢၼ်ၸၢင်ႈၵႆႉၶတ်းၸႂ်ပွင်ႁဵတ်းၵၢၼ်တၢင်းလီၵူႈၸိူဝ်ႉၵူႈပိူင်ၼၼ်ႉဢေႃႈ။
မႄႈမၢႆႈဢသၢၵ်ႈယင်းၼုမ်ႇယူႇၼၼ်ႉယႃႇပေဢဝ်သႂ်ႇၼႂ်းၸရၢင်းမႄႈမၢႆႈ။ ၵွပ်ႈၸိူဝ်ႉႁိုဝ်လႄႈဝႃႈၸမ်ႉ၊မိူဝ်ႈဢၼ်ၶဝ်မီးဢလူဝ်ႇၶႂ်ႈၶိုၼ်းတႄႇၼႃႈႁိူၼ်းၸိုင်၊ၶဝ်ၸၢင်ႈဝႄႈပႅတ်ႈ ၸဝ်ႈၶရိၸ်ႈ၊ လႄႈ၊-
ၸၢင်ႈႁွတ်ႈထိုင်တၢင်းဢၼ်ထုၵ်ႇဢပျတ်ႈၵွပ်ႈပိူဝ်ႈဢမ်ႇယိူၼ်ႉလႆႈလႄႈယႃႉသဵတ်ႈၸႃႇဢၼ်ၶဝ်လႆႈဝႆႉတီႈမၼ်းၸဝ်ႈမိူဝ်ႈဢွၼ်တၢင်းၼၼ်ႉဢေႃႈ။-
လိူဝ်သေၼၼ်ႉ၊ၶဝ်ဢမ်ႇမီးၵၢၼ်သင်လႄႈၸၢင်ႈလႄႇၵႂႃႇႁိူၼ်းၼိုင်ႈယဝ်ႉႁိူၼ်းၼိုင်ႈသေၸၢင်ႈၶၢၼ်ႉၸၢင်ႈဢိူၼ်ၵူၺ်းဢမ်ႇၵႃး၊ၶဝ်ၸၢင်ႈၶႃႉၸိုဝ်ႈၶၢႆသဵင်ပိူၼ်ႈ၊ၵဝ်းၼႃႈႁိူၼ်းတႃယေးပိူၼ်ႈလႄႈလၢတ်ႈၵႂၢမ်းဢၼ်ၶဝ်ဢမ်ႇထုၵ်ႇလီလၢတ်ႈၼၼ်ႉဢေႃႈ။-
ၵွပ်ႈပိူဝ်ႈလွင်ႈတၢင်းၼႆႉလႄႈၵဝ်မီးဢလူဝ်ႇၶႂ်ႈႁႂ်ႈမႄႈမၢႆႈဢၼ်ယင်းၼုမ်ႇယင်းၵီႈၶဝ်ၶိုၼ်းတႄႇၼႃႈႁိူၼ်းထႅင်ႈလႄႈၵိူတ်ႇလဵင်ႉလုၵ်ႈလဵင်ႉလၢင်းသေယဝ်ႉ၊ထိင်းၼႃႈႁိူၼ်းတႃယေးတူဝ်ၸဝ်ႈၵဝ်ႇယူႇ၊ၼင်ႇႁိုဝ်ရၢၼ်ႇသူႇႁဝ်းတၵ်းဢမ်ႇလႆႈဢၶႂၢင်ႉတႃႇတေသႄႉသွမ်းႁဝ်းၼၼ်ႉဢေႃႈ။-
လွင်ႈမၼ်းၸမ်ႉ၊မႄႈမၢႆႈၵမ်ႈၽွင်ႈသမ်ႉပေႃးဝႄႈပႅတ်ႈ ၸဝ်ႈယေႇသု၊ သေလႄႈၸွမ်းပႃႈလင် ၸႃႇတၢၼ်ႇ၊ ၵႂႃႇယဝ်ႉဢေႃႈ။-
ပေႃးၵူၼ်းၸၢႆးဢမ်ႇၼၼ်မႄႈယိင်းသေၵေႃႉၵေႃႉ၊ဢၼ်ယုမ်ႇမၢတ်ႈၸဝ်ႈၽြႃးၼၼ်ႉ၊မီးပီႈၼွင်ႉဢၼ်ပဵၼ်မႄႈမၢႆႈၸိုင်၊ႁႂ်ႈၵေႃႉၼၼ်ႉဢဝ်ပုၼ်ႈၽွၼ်းလုမ်းလႃးၶဝ်ၵႂႃႇတႃႉ။ ယႃႇပေပၼ်တၢင်းယၢပ်ႇတီႈၸိူဝ်းၸဝ်ႈသေၵမ်း။ ႁႂ်ႈၸိူဝ်းၸဝ်ႈလႆႈလဵင်ႉလူလုမ်းလႃးမႄႈမၢႆႈတႄႉတႄႉဢၼ်ယူႇၵေႃႉလဵဝ်ၵူၺ်းၼၼ်ႉတႃႉ။
ၵေႃႉဢၼ်ပဵၼ်ၵူၼ်းလူင်ၼႂ်းၸိူဝ်းၸဝ်ႈဢၼ်ဢုပ်ႉထိင်းၸိူဝ်းၸဝ်ႈလီလီငၢမ်းငၢမ်းၼၼ်ႉ၊ပဵၼ်ၵေႃႉဢၼ်ထိူၵ်ႈၶၢမ်ႇဢဝ်တၢင်းဢၼ်ယုၵ်ႉယွင်ႈသွင်ပုၼ်ႈလႄႈ၊လိူဝ်တွၼ်းၼႃႇသေပိူၼ်ႈၼၼ်ႉၵေႃႉဢၼ်ႁေႃးတြႃးလႄႈသင်ႇသွၼ်သုင်းမႃႉပိူၼ်ႈၼၼ်ႉဢေႃႈ။-
လွင်ႈမၼ်းၸမ်ႉ၊ၵႃႈၼႂ်းၵျၢမ်းလိၵ်ႈတႅမ်ႈဝႆႉလႄႈဝႃႈ၊ “ဢမ်ႇလႆႈဢဝ်သွင်းသုပ်း၊သူပ်းဝူဝ်းဢၼ်ယဵပ်ႇၶဝ်ႈၼၼ်ႉ၊” ဝႃႈၼင်ႇၼႆလႄႈသမ်ႉတႅမ်ႈဝႆႉထႅင်ႈလႄႈဝႃႈ၊ “ၵူၼ်းႁဵတ်းၵၢၼ်ထိူၵ်ႈလႆႈၶၢမ်ႇဢဝ်ၵႃႈႁႅင်းမၼ်းဢေႃႈ၊” ဝႃႈၼင်ႇၼႆဢေႃႈ။-
ပေႃးယင်းဢမ်ႇမီးၵူၼ်းဢၼ်ၶၢမ်ႇသၢၵ်ႈသေႇသွင်ၵေႃႉသၢမ်ၵေႃႉၸိုင်၊ယႃႇပေထွမ်ႇဢဝ်ၵႂၢမ်းဢၼ်တၢင်ႇဢပျတ်ႈၵႃႈၼိူဝ်ၵူၼ်းလူင်ၸိူဝ်းၸဝ်ႈၼၼ်ႉ။-
တီႈၶဝ်ၸိူဝ်းဢၼ်ႁဵတ်းၽိတ်းပိူင်ႈၼၼ်ႉ၊သုင်းမႃႉၶဝ်ၵႃႈတီႈၽၢႆႇၼႃႈၵူၼ်းတင်းသဵင်ႈတင်းလူင်ၼင်ႇႁိုဝ်ၵူၼ်းတၢင်ႇၵေႃႉတၵ်းလႆႈၵူဝ်ႁႄၼၼ်ႉတႃႉ။
ၼင်ႇႁိုဝ်မႂ်းတၵ်းႁဵတ်းၸွမ်းၵႂၢမ်းဢၼ်ၵဝ်သင်ႇလၢတ်ႈၸိူဝ်းၼႆႉသေလႄႈတၵ်းဢမ်ႇတူၺ်းၼႃႈလဵၵ်ႉၼႃႈယႂ်ႇ၊တၵ်းၶိုင်ပွင်ၽဵင်ႇၽဵင်ႇၼၼ်ႉၸိုင်၊ၵဝ်ဢဝ်ပိင်းၺၢပ်ႈၼႆႉ၊ပူင်ပၼ်မႂ်းၵႃႈတီႈၽၢႆႇၼႃႈၽြႃးပဵၼ်ၸဝ်ႈ၊တင်း ၸဝ်ႈယေႇသုၶရိၸ်ႈ၊ ဢိၵ်ႇတင်းတမၢၼ်ႇၵၢင်ႁၢဝ်ဢၼ်မူတ်းၸၢင်ႇတင်းလၢႆဢေႃႈ။-
ယႃႇပေႁိပ်ႈၼႅတ်ႈဢဝ်မိုဝ်းယုၵ်ႉတၢင်ႇၵႃႈၼိူဝ်လႄႈၶၢၼ်းဢရႃႇသေၵေႃႉသေၵူၼ်းပုၼ်ႈၵၢၼ်ၸဝ်ႈၽြႃးၼၼ်ႉ။ ယႃႇပေၶဝ်ႈပႃးၵႃႈၼႂ်းဢပျတ်ႈၵူၼ်းတၢင်ႇၵေႃႉႁဵတ်းၼၼ်ႉ၊ပႂ်ႉထိင်းတူဝ်ၸဝ်ႈၵဝ်ႇႁႂ်ႈမူတ်းၸၢင်ႇၶၢဝ်သႂ်တႃႉ။
ၼင်ႇႁိုဝ်တၵ်းပဵၼ်ဢၵျူဝ်းပုၼ်ႈတွင်ႉမႂ်း၊ဢိၵ်ႇတင်းတၢင်းၶႆႈတၢင်းၼၢဝ်ဢၼ်မႂ်းၵႆႉပဵၼ်ၼၼ်ႉၸိုင်၊ယႃႇပေၵိၼ်ၼမ်ႉလၢႆလၢႆၵူၺ်းလႄႈၵိၼ်ပႃးၼမ်ႉလဝ်ႈမၢၵ်ႇၸပိတ်ႉဢိတ်းဢွၼ်ႇၼိုင်ႈၸွမ်းတႃႉ။
ဢပျတ်ႈၵူၼ်းၵမ်ႈၽွင်ႈၼၼ်ႉထၢင်ႇသႃးၼႃႇလႄႈပိူၼ်ႈၸၢင်ႈႁၼ်ဢပျတ်ႈၶဝ်၊ဢွၼ်တၢင်းၶဝ်လႆႈၶၢမ်ႇၸီႇယၢင်ႇတြႃးၼၼ်ႉဢေႃႈ။ ၵူၺ်းၵႃႈ၊ဢပျတ်ႈၵူၼ်းၵမ်ႈၽွင်ႈတႄႉၸၢင်ႈထၢင်ႇသႃးမႃးၵမ်းလိုၼ်းဢေႃႈ။-
မိူၼ်ၸိူဝ်ႉၼင်ႇၼၼ်၊ၵၢၼ်တၢင်းလီၵူၼ်းၵမ်ႈၽွင်ႈၵေႃႈထၢင်ႇသႃးၼႃႇဢေႃႈ။ ပိၵ်ႉသမ်ႉဝႃႈ၊ၵၢၼ်တၢင်းလီၵူၼ်းၵမ်ႈၽွင်ႈဢမ်ႇထၢင်ႇသႃးမႃးၵမ်းလဵဝ်သေၵေႃႈ၊မၼ်းဢမ်ႇသိူင်ႇဢမ်ႇလပ်ႉဝႆႉလႆႈတႃႇသေႇဢေႃႈ။
ပုၼ်ႈလွင်ႈၼင်ႇႁိုဝ်ၼႃႇမႃႉၸိုဝ်ႈသဵင်ၽြႃးပဵၼ်ၸဝ်ႈ၊ဢိၵ်ႇတင်းတြႃးၸဝ်ႈတၵ်းၵၢင်းလွတ်ႈတၢင်းဢၼ်ပိူၼ်ႈသႄႉသွမ်းၼၼ်ႉၸိုင်၊ႁႂ်ႈၶဝ်ၸိူဝ်းဢၼ်ၶၢမ်ႇပဵၼ်ၶႃႈယူႇၼၼ်ႉမၢတ်ႈၸဝ်ႈၶဝ်ပဵၼ်ၵေႃႉဢၼ်ထိူၵ်ႈၶၢမ်ႇတၢင်းဢၼ်ရူဝ်ႇသေႇၵူဝ်ယမ်တႃႉ။-
ၶႃႈၵေႃႉဢၼ်ၸဝ်ႈမၼ်းပဵၼ်ၵူၼ်းယုမ်ႇမၢတ်ႈၼၼ်ႉတၵ်းဢမ်ႇလႆႈႁဵတ်းတၢင်းဢၼ်ဢမ်ႇသၢင်းၵိၼ်ၸဝ်ႈမၼ်းပိူဝ်ႈဝႃႈၶဝ်ပဵၼ်ပီႈၼွင်ႉၵၼ်ၼႂ်းၸဝ်ႈၽြႃးၼၼ်ႉဢေႃႈ။ ၶဝ်ယင်းလူဝ်ႇယဵင်ႈၶႅၼ်းပွင်ႁဵတ်းၵၢၼ်ၶဝ်လီလီ ၵွပ်ႈပိူဝ်ႈၶဝ်ၸိူဝ်းဢၼ်လႆႈၶၢမ်ႇဢဝ်ဢၵျူဝ်းၵၢၼ်ၶဝ်ၼၼ်ႉပဵၼ်ပီႈၼွင်ႉၼႂ်းတၢင်းယုမ်ႇမၢတ်ႈဢၼ်ၶဝ်ႁၵ်ႉပႅင်းၼၼ်ႉဢေႃႈ။ ၶႅၼ်းတေႃႈသင်ႇသွၼ်သုင်းမႃႉလႄႈတိုၵ်းယူင်းလွင်ႈတႃႇဝုၼ်ႇၼႃႈၵၢၼ်ၸိူဝ်းၼႆႉတႃႉ။-
ပေႃးသေၵေႃႉသေၵူၼ်းသင်ႇသွၼ်ပႅၵ်ႇပိူင်ႈၵၼ်တင်းႁဝ်းလႄႈဢမ်ႇမႅၼ်ႈၵၼ်တင်းတြႃးဢၼ်မၢၼ်ႇဢၼ်မႅၼ်ႈၸဝ်ႈၽြႃးႁဝ်း ၸဝ်ႈယေႇသုၶရိၸ်ႈ၊ ဢိၵ်ႇတင်းဢမ်ႇမႅၼ်ႈၵၼ်တင်းၵႂၢမ်းသွၼ်ဢၼ်ထုၵ်ႇမႅၼ်ႈတၢင်းဢၼ်ၼပ်ႉယမ်ၽြႃးတြႃးၼၼ်ႉၸိုင်၊-
မၼ်းမဝ်းတူဝ်ၸဝ်ႈၵဝ်ႇလူၺ်ႈႁူဝ်ၸႂ်ၽႅၼ်သုင်လႄႈဢမ်ႇႁုၵႃႈသင်လႃးလႃးယဝ်ႉဢေႃႈ။ မၼ်းၸၢင်ႈမီးဢလူဝ်ႇၵၢင်ၸႂ်ဢၼ်တွပ်ႇထဵင်ပိူၼ်ႈႁႂ်ႈၵႂၢမ်းမၼ်းပႄႉၼႅင်ႇ၊ဢၼ်ၸၢင်ႈႁဵတ်းႁႂ်ႈပေႃႇပဵၼ်မႃးတၢင်းဢၼ်ၶွႆၵၼ်၊ၽိတ်းၵၼ်၊ယႃႉသရေႇၵၼ်၊ထၢင်ႇၽိတ်းၼိူဝ်ၵၼ်၊-
ဢိၵ်ႇတင်းတၢင်းဢၼ်မေႃးၵၼ်ထဵင်ၵၼ်ၼႂ်းၶဝ်ၸိူဝ်းဢၼ်မီးႁူဝ်ၸႂ်ၵူဝ်ႈၵိူၵ်ႇလႄႈဢမ်ႇမီးသဵတ်ႈၸႃႇတြႃးဢေႃႈ။ ၶဝ်ထၢင်ႇဝႃႈပေႃးၶဝ်ၼပ်ႉယမ်ၽြႃးတြႃးၸိုင်၊ၶဝ်တၵ်းလႆႈဢၵျူဝ်းဢၼ်မၢၵ်ႈမီးဢေႃႈ။
ၸႂ်ႈတႄႉဢေႃႈ။ ပေႃးမီးတၢင်းဢၼ်ပျေႇၸႂ်ၼႂ်းလွင်ႈတၢင်းဢၼ်တူဝ်ၸဝ်ႈၵဝ်ႇမီးၼၼ်ႉၸိုင်၊တၢင်းဢၼ်ၼပ်ႉယမ်ၽြႃးတြႃးၼၼ်ႉ၊ပဵၼ်ဢၵျူဝ်းမၢၵ်ႈမီးဢၼ်ယႂ်ႇၼႃႇဢေႃႈ။-
လွင်ႈမၼ်းၸမ်ႉ၊ႁဝ်းဢမ်ႇပႃးၵႃႈသင်မႃးၼႂ်းလေႃးၵႃႉၼႆႉလႄႈႁဝ်းဢမ်ႇၸၢင်ႈဢဝ်ၵႃႈသင်ဢွၵ်ႇသေလေႃးၵႃႉၼႆႉၵႂႃႇဢေႃႈ။-
ပေႃးပဵၼ်ၸိူဝ်ႉၼင်ႇၼႆၸိုင်၊ပေႃးႁဝ်းမီးၶဝ်ႈၼမ်ႉတၢင်းၵိၼ်တင်းၶူဝ်းၼုင်ႈၶူဝ်းမႆၸိုင်၊ပေႃးၵုမ်ႇပုၼ်ႈႁဝ်းယဝ်ႉဢေႃႈ။-
ၵူၺ်းၵႃႈ၊ၶဝ်ၸိူဝ်းဢၼ်ၶႂ်ႈမၢၵ်ႈၶႂ်ႈမီးၼၼ်ႉၸမ်ႉ၊ၸၢင်ႈၺႃးတၢင်းဢၼ်ဢပျတ်ႈၸူဝ်းဢဝ်၊ၸၢင်ႈလႆႈၶမ်တူင်ႇႁႅဝ်ႉတူင်ႇၶိုမ်းၸႂ်ၵိလေႇသႃႇဢၼ်ႁၢႆႉမိူၵ်ႈ၊ဢၼ်တိုတ်ႉၸၼ်ၵူၼ်းတင်းလၢႆတူၵ်းၸူမ်ၼႂ်းတၢင်းဢၼ်လုလႅဝ်ၵႂႃႇမူတ်းမူတ်းၼၼ်ႉဢေႃႈ။-
လွင်ႈမၼ်းၸမ်ႉ၊ႁူဝ်ၸႂ်ဢၼ်ၸပ်းၸွႆးငိုၼ်းၼၼ်ႉ၊ပဵၼ်ငဝ်ႈႁၢၵ်ႈလွင်ႈတၢင်းဢၼ်ႁၢႆႉမိူၵ်ႈၵူႈသမ်ႇၵူႈပိူင်ဢေႃႈ။ ၵူၼ်းၵမ်ႈၽွင်ႈၸႂ်ၸပ်းၸႂ်ၸွႆးၼင်ႇၼၼ်လႄႈဝႄႈဢွၵ်ႇသေတြႃးတၢင်းယုမ်ႇမၢတ်ႈၵႂႃႇသေယဝ်ႉ၊ႁူဝ်ၸႂ်ၶဝ်တႅၵ်ႇလႅဝ်ၵႂႃႇၵွပ်ႈပိူဝ်ႈတၢင်းမႆႈတၢင်းၶီၼမ်ၼႃႇၼၼ်ႉဢေႃႈ။
ၵူၺ်းၵႃႈ၊မႂ်းဢၼ်ပဵၼ်ၵူၼ်းၽြႃးပဵၼ်ၸဝ်ႈၼႆႉ႟။ ဝႄႈပႅတ်ႈဢပျတ်ႈၸိူဝ်းၼႆႉတႃႉ။ လိုပ်ႈၸွမ်းႁႂ်ႈၶိုတ်းတၢင်းဢၼ်ၵမ်ၵျၢင်ႉဢၼ်သိုဝ်ႈတေႃႇ၊တၢင်းဢၼ်ၼပ်ႉယမ်ၽြႃးတြႃး၊တၢင်းဢၼ်ယုမ်ႇမၢတ်ႈ၊တၢင်းဢၼ်ႁၵ်ႉပႅင်း၊တၢင်းဢၼ်ယိူၼ်ႉၶၢမ်ႇ၊ဢိၵ်ႇတင်းတၢင်းဢၼ်ၸႂ်ၼိမ်ဢူၼ်ႈဢွၼ်ႇၼၼ်ႉတႃႉ။-
ၶတ်းၸႂ်ၸိုၼ်ႈဢဝ်ႁႅင်းလႅၼ်ႈၸွမ်းတၢင်းယုမ်ႇမၢတ်ႈမႂ်း၊ႁႂ်ႈလႆႈထိုင်သဝ်လၵ်းလႄႈႁပ်ႉဢဝ်ဢသၢၵ်ႈထႃႇဝရႃႉ၊ပုၼ်ႈတူဝ်ၸဝ်ႈၵဝ်ႇတႃႉ။ ၼင်ႇႁိုဝ်တေလႆႈဢသၢၵ်ႈၼၼ်ႉၸိုင်၊ၸဝ်ႈၽြႃးႁွင်ႉဢဝ်မႂ်း၊ၼႂ်းမိူဝ်ႈမႂ်းႁပ်ႉတုင်းဢဝ်မၼ်းၸဝ်ႈၽၢႆႇၼႃႈၵူၼ်းၼမ်ၼႃႇဢၼ်ပဵၼ်သၢၵ်ႈသေႇၼၼ်ႉဢေႃႈ။-
ၵႃႈတီႈၽၢႆႇၼႃႈၽြႃးပဵၼ်ၸဝ်ႈဢၼ်ပၼ်ဢသၢၵ်ႈၵႃႈၼိူဝ်ၵူႈၸိူဝ်ႉၵူႈပိူင်၊ဢိၵ်ႇတင်းၽၢႆႇၼႃႈ ၸဝ်ႈယေႇသုၶရိၸ်ႈ၊ ဢၼ်ၶၢမ်ႇသၢၵ်ႈသေႇမၼ်ႈမၼ်ႈၶိူင်ႇၶိူင်ႇၽၢႆႇၼႃႈၶုၼ် ပွၼ်ႇတိပိလတ်ႉ၊ ၼၼ်ႉၵဝ်သင်ႇလၢတ်ႈတီႈမႂ်းလႄႈဝႃႈၸမ်ႉ၊-
ထွမ်ႇဢဝ်ပိင်းၺၢပ်ႈတြႃးၸဝ်ႈလႄႈမီးသဵတ်ႈၸႃႇပႂ်ႉၵမ်ပႂ်ႉၸွမ်းႁႂ်ႈလႆႈၵၢင်းလွတ်ႈတင်းတၢင်းဢၼ်ၽိတ်းပိူင်ႈတေႃႇထိုင်ႁွတ်ႈဝၼ်းဢၼ်ၸဝ်ႈၽြႃးႁဝ်း ၸဝ်ႈယေႇသုၶရိၸ်ႈ၊ ၵျွမႃးၼၼ်ႉတႃႉ။-
တၢင်းဢၼ်မၼ်းၸဝ်ႈၵျွမႃးၼၼ်ႉ၊ၽြႃးပဵၼ်ၸဝ်ႈတၵ်းႁႂ်ႈထၢင်ႇသႃးမႃးၼႂ်းဢၶိင်ႇဢၼ်သၢင်ႇထုၵ်ႇၼၼ်ႉဢေႃႈ။ ၽြႃးပဵၼ်ၸဝ်ႈၼၼ်ႉမီးမၢင်ႇၵလႃႇလႄႈပဵၼ်သူႇလဵဝ်ပႃးလဵဝ်ၵူၺ်းလႄႈပဵၼ်ၸဝ်ႈဢၼ်ဢုပ်ႉပိူင်ႇၸၵျႃႇဝလႃႇတင်းသဵင်ႈတင်းလူင်၊ပဵၼ်ၶုၼ်ႁေႃၶမ်းၵႃႈၼိူဝ်ၶုၼ်ႁေႃၶမ်းတင်းသဵင်ႈတင်းမူတ်း၊ဢိၵ်ႇတင်းၸဝ်ႈၼိူဝ်ၸဝ်ႈတင်းသဵင်ႈတင်းမူတ်းဢေႃႈ။-
မၼ်းၸဝ်ႈသူႇလဵဝ်ၵူၺ်း၊ပဵၼ်ၸဝ်ႈဢၼ်ၵၢင်းလွတ်ႈမရၼႃႉတၢင်းတၢႆလႄႈမၼ်းၸဝ်ႈယူႇၵႃႈၼႂ်းဢၼ်လႅင်းဢမ်ႇမီးၽူႈလႂ်ၶဝ်ႈၸမ်လႆႈ၊ဢမ်ႇမီးၽူႈလႂ်တွၼ်ႉႁၼ်၊ဢၼ်ၽူႈလႂ်ဢမ်ႇႁၼ်လႆႈၼၼ်ႉဢေႃႈ။ ႁႂ်ႈမၼ်းၸဝ်ႈၼၼ်ႉ၊လႆႈႁပ်ႉဢဝ်တၢင်းဢၼ်ရူဝ်ႇသေႇၵူဝ်ယမ်၊ဢိၵ်ႇတင်းမုၼ်သရေႇလႄႈၽုင်းတၼ်းၶူဝ်းဢၼ်ဢုပ်ႉပိူင်ႇထႃႇဝရႃႉၼၼ်ႉသေၵမ်းလူၺ်ႈ။ ဢႃမိၼ်ႈ။
တီႈၶဝ်ၸိူဝ်းဢၼ်မၢၵ်ႈမီးၸေးၸိမ်ႇလေႃးၵႃႉၼၼ်ႉၸိုင်၊ပိင်းၺၢပ်ႈၶဝ်ယႃႇႁႂ်ႈၶဝ်မီးၸႂ်ၽႅၼ်သုင်လႄႈယႃႇႁႂ်ႈၶဝ်ဢိင်ပိုင်ႈၸေးၸိမ်ႇဢၼ်ဢမ်ႇမၼ်ႈၶိူင်ႇ၊ႁႂ်ႈၶဝ်ဢိင်ပိုင်ႈၽြႃးပဵၼ်ၸဝ်ႈ၊ၸဝ်ႈဢၼ်ပၼ်ၵူႈၸိူဝ်ႉၵူႈပိူင်လိူင်ႇလိူင်ႇၼမ်ၼမ်၊ပုၼ်ႈတႃႇႁဝ်းတၵ်းၸၢမ်ႇၸႃးၼၼ်ႉတႃႉ။-
ႁႂ်ႈၶဝ်ႁဵတ်းတၢင်းလီ၊ႁႂ်ႈၶဝ်မၢၵ်ႈမီးၼႂ်းတၢင်းဢၼ်ၵမ်ၵျၢင်ႉဢၼ်လီဢၼ်ငၢမ်း၊ႁႂ်ႈၶဝ်မီးၸႂ်ၸေႇတၼႃႇဢၼ်ၸၢင်ႈၽေးၸွၼ်းယိုၼ်ႈမႅင်ႇတီႈပိူၼ်ႈၼမ်ၼမ်တႃႉ။-
ပေႃးၶဝ်ႁဵတ်းၸိူဝ်ႉၼင်ႇၼၼ်ၸိုင်၊ၶဝ်သိမ်းပႅင်းပုၼ်ႈတူဝ်ၸဝ်ႈၵဝ်ႇ၊တၵ်းပဵၼ်ငဝ်ႈႁၢၵ်ႈပုၼ်ႈၸူဝ်ႈတႃႇဢသၢၵ်ႈၶဝ်ၼႂ်းဝၼ်းမိူဝ်းၼႃႈသေလႄႈၶဝ်တၵ်းလႆႈၸၢမ်ႇၸႃးဢသၢၵ်ႈဢၼ်ၸႅတ်ႈဢၼ်မၢၼ်ႇၼၼ်ႉဢေႃႈ။
တိမေႃးသေႇ၊ ႟။ ပႂ်ႉထိင်းလွင်ႈတၢင်းဢၼ်ၵဝ်လႆႈဢၢပ်ႈဝႆႉတီႈမႂ်းၼၼ်ႉတႃႉ။ ဝႄႈပႅတ်ႈၵႂၢမ်းဢၼ်ဢမ်ႇၼပ်ႉယမ်ၽြႃးတြႃး၊တင်းၵႂၢမ်းဢၼ်ဢမ်ႇပွင်ႇလွင်ႈၵႃႈသင်၊ဢိၵ်ႇတင်းၵႂၢမ်းဢၼ်တွပ်ႇထဵင်ၵၼ်ဢၼ်ၵူၼ်းႁွင်ႉၽိတ်းဝႃႈ၊ဢတၢတ်ႈပိင်ႇၺႃႇၼၼ်ႉတႃႉ။-
လွင်ႈမၼ်းၸမ်ႉ၊ၵူၼ်းၵမ်ႈၽွင်ႈလႆႈဢတၢတ်ႈပိင်ႇၺႃႇၸိူဝ်ႉၼင်ႇၼၼ်ၼၼ်ႉလႄႈဝႄႈဢွၵ်ႇပႅတ်ႈသေသဵၼ်ႈတၢင်းတြႃးတၢင်းဢၼ်ယုမ်ႇမၢတ်ႈၵႂႃႇယဝ်ႉဢေႃႈ။ ႁႂ်ႈၵျေးၸူးၸဝ်ႈမီးယူႇလူၺ်ႈၵၼ်တင်းသူတင်းသဵင်ႈသေၵမ်းလူၺ်ႈ။ လိၵ်ႈတြႃးတိမေႃးသေႇၽိုၼ်တီႈၼိုင်ႈယဝ်ႉယဝ်ႉဢေႃႈ။
ၵဝ် ပေႃးလု၊ ဢၼ်ပဵၼ်တမၢၼ်ႇ ၸဝ်ႈယေႇသုၶရိၸ်ႈ၊ လႄႈပဵၼ်ၵေႃႉဢၼ်ၽြႃးပဵၼ်ၸဝ်ႈဢဝ်တင်းဢလူဝ်ႇၸဝ်ႈၸႂ်ႉႁေႃးလၢတ်ႈလွင်ႈၵတိၸဝ်ႈဢၼ်ဝႃႈ၊ႁဝ်းတၵ်းမီးဢသၢၵ်ႈဢၼ်မႂ်ႇၼႂ်း ၸဝ်ႈယေႇသုၶရိၸ်ႈ၊ ၼၼ်ႉ၊-
မီးလိၵ်ႈတႅမ်ႈထိုင် တိမေႃးသေႇ၊ ၵေႃႉဢၼ်ၵဝ်ႁၵ်ႉမိူၼ်ပဵၼ်လုၵ်ႈၸၢႆးၵဝ်ၼၼ်ႉဢေႃႈ။ ႁႂ်ႈၽြႃးပေႃႈၸဝ်ႈ၊ဢိၵ်ႇတင်းၸဝ်ႈၽြႃးႁဝ်း ၸဝ်ႈယေႇသုၶရိၸ်ႈ၊ ပၼ်ၵျေးၸူးၵရုၼႃႇ၊ဢိၵ်ႇတင်းတၢင်းၼိမ်ၶျၢမ်းသႃႇတီႈမႂ်းသေၵမ်းလူၺ်ႈ။
ၵဝ်ယွင်ႈယေႃးတၢင်ႇၵျေးၸူးၽြႃးပဵၼ်ၸဝ်ႈ၊ၸဝ်ႈဢၼ်ၵဝ်ပႃးတင်းၸႂ်ဢၼ်ႁုတူဝ်ၸဝ်ႈၵဝ်ႇဢၼ်မူတ်းၸၢင်ႇလႄႈႁဵတ်းဝၢတ်ႈတီႈမၼ်းၸဝ်ႈမိူၼ်ၸိူဝ်ႉၼင်ႇပူႇမွၼ်ႇၵဝ်တင်းလၢႆၵူဝ်းၵႂၢႆႇမႃးၼၼ်ႉဢေႃႈ။ ၵဝ်ယွင်ႈယေႃးၵျေးၸူးမၼ်းၸဝ်ႈမိူဝ်ႈဢၼ်ၵဝ်ၶုၵ်းၸႂ်လႆႈမႂ်း၊ၼႂ်းတၢင်းဢၼ်ၵဝ်သူးတွင်းတႃႇသေႇၵူႈဝၼ်းၵူႈၶိုၼ်းၼၼ်ႉဢေႃႈ။-
ၵဝ်ၶုၵ်းၸႂ်လႆႈၼမ်ႉတႃမႂ်းလႄႈၸႂ်ထိုင်ၶႂ်ႈႁၼ်မႂ်းၼႃႇလူင်လၢင်လႄႈတၵ်းလႆႈသိူဝ်းပျေႃႇၼၼ်ႉဢေႃႈ။-
ၵဝ်ၶႆႈၸႂ်ထူပ်းတၢင်းယုမ်ႇမၢတ်ႈမႂ်းဢၼ်ၸႅတ်ႈၸၢင်ႇ၊ဢၼ်ပဵၼ်ၸိူဝ်ႉၼင်ႇတၢင်းယုမ်ႇမၢတ်ႈမႄႈၼၢႆးမႂ်း လေႃးဢိ၊ တင်းမႄႈမႂ်း ဢုၼိၵ်ႉ၊ ဢၼ်ၶဝ်မီးမႃးမိူဝ်ႈဢွၼ်တၢင်းၼၼ်ႉ၊ၵဝ်ယုမ်ႇဝႃႈမီးၵႃႈၼႂ်းမႂ်းမိူဝ်ႈလဵဝ်ၼႆႉဢေႃႈ။-
ၵွပ်ႈၼႆလႄႈ သုၵျေးၸူးဢၼ်ၽြႃးပဵၼ်ၸဝ်ႈပၼ်ဝႆႉတီႈမႂ်းဢၼ်ၵဝ်ဢဝ်မိုဝ်းတၢင်ႇၵႃႈၼိူဝ်မႂ်းၼၼ်ႉႁႂ်ႈၶိုၼ်ႈယႂ်ႇမႃးတႃႉ၊ဝႃႈၼႆၵဝ်ပၼ်သတိတီႈမႂ်းဢေႃႈ။-
လွင်ႈမၼ်းၸမ်ႉ၊ၽြႃးပဵၼ်ၸဝ်ႈပၼ်သၽေႃးဢၼ်ၸၢင်ႈၵူဝ်ၸၢင်ႈႁႄၼၼ်ႉတီႈႁဝ်းဢမ်ႇၸႂ်ႈ။ မၼ်းၸဝ်ႈပၼ်ၸႂ်ဢၼ်ပႃးတၼ်းၶူဝ်း၊ၸႂ်ဢၼ်ၸၢင်ႈႁၵ်ႉၸၢင်ႈပႅင်း၊ဢိၵ်ႇတင်းၸႂ်သၽေႃးဢၼ်ၸၢင်ႈထိင်းတူဝ်ၸဝ်ႈၵဝ်ႇတီႈႁဝ်းဢေႃႈ။
ပိူဝ်ႈၼႆလႄႈယႃႇပေဢူၵ်းဢၢႆပုၼ်ႈတႃႇတေၶၢမ်ႇသၢၵ်ႈသေႇၽၢႆႇၸဝ်ႈၽြႃးႁဝ်း၊ဢိၵ်ႇတင်းၽၢႆႇၵဝ်ၵေႃႉဢၼ်လႆႈတူၵ်းထွင်ႇယူႇၵွပ်ႈပိူဝ်ႈမၼ်းၸဝ်ႈၼၼ်ႉ။ မႂ်းၸမ်ႉ၊ၶဝ်ႈပႃးၼႂ်းတၢင်းဢၼ်ၶၢမ်ႇတုၵ်ႉၶႃႉတၢင်းၽၢၼ်ၵွပ်ႈပိူဝ်ႈႁေႃးလၢတ်ႈၶၢဝ်ႇတြႃးသိူဝ်းပျေႃႇ၊ၸွမ်းၼင်ႇဢၼ်ၽြႃးပဵၼ်ၸဝ်ႈပၼ်ႁႅင်းတၼ်းၶူဝ်းတီႈမႂ်းၼၼ်ႉတႃႉ။-
မၼ်းၸဝ်ႈၵႄႇသႄႇဢဝ်ႁဝ်းလႄႈသႂၢင်းသႂ်ႇဝႆႉၵႃႈၼႂ်းဢရႃႇၵူၼ်းမူတ်းၸၢင်ႇမၼ်းၸဝ်ႈ၊ၵွပ်ႈပိူဝ်ႈဝႃႈ၊ႁဝ်းလႆႈႁဵတ်းၵုသူဝ်ႇတၢင်းလီဝႆႉဢမ်ႇၸႂ်ႈ၊ၵွပ်ႈပိူဝ်ႈမၼ်းၸဝ်ႈႁဵတ်းၸွမ်းတၢင်းဢၼ်တူဝ်မၼ်းၸဝ်ႈၵျၢမ်ႇပွင်၊ဢိၵ်ႇတင်းၸွမ်းသုၵျေးၸူးဢၼ်ပၼ်တီႈႁဝ်းၵႃႈၼႂ်း ၸဝ်ႈယေႇသုၶရိၸ်ႈ၊ ၸဵမ်မိူဝ်ႈဢွၼ်တၢင်းၸူဝ်ႈဢၼ်ၵမ်ႇၽႃႇဢမ်ႇပႆႇပေႃႇပဵၼ်မႃးၼၼ်ႉဢေႃႈ။-
ၵူၺ်းၵႃႈ၊ၵျေးၸူးၸဝ်ႈထၢင်ႇသႃးမႃးမိူဝ်ႈလဵဝ်ၵွပ်ႈပိူဝ်ႈတၢင်းဢၼ်ၸဝ်ႈၵႄႇၶျွတ်ႈႁဝ်း ၸဝ်ႈယေႇသုၶရိၸ်ႈ၊ ပေႃႇမႃးၼၼ်ႉဢေႃႈ။ ၸဝ်ႈၼၼ်ႉ၊ယႃႉပႅတ်ႈတၼ်းၶူဝ်းၶုၼ်မရၼႃႉတၢင်းတၢႆသေယဝ်ႉ၊ႁႂ်ႈဢသၢၵ်ႈဢၼ်ၵၢင်းလွတ်ႈတၢင်းတၢႆၼၼ်ႉ၊ထၢင်ႇသႃးမႃးၵွပ်ႈပိူဝ်ႈၶၢဝ်ႇတြႃးသိူဝ်းပျေႃႇၸဝ်ႈဢေႃႈ။
ပုၼ်ႈတႃႇၶၢဝ်ႇတြႃးသိူဝ်းပျေႃႇၼႆႉ၊မၼ်းၸဝ်ႈၶၢၼ်းၵဝ်ဝႆႉ၊ႁႂ်ႈပဵၼ်တမၢၼ်ႇၸဝ်ႈ၊သြႃႇႁေႃးတြႃး၊ဢိၵ်ႇတင်းသြႃႇသင်ႇသွၼ်သုင်းမႃႉပိူၼ်ႈဢေႃႈ။-
ၵွပ်ႈပိူဝ်ႈၸိူဝ်ႉၼင်ႇၼႆၸင်ႇၵဝ်လႆႈၶၢမ်ႇတုၵ်ႉၶႃႉတၢင်းၽၢၼ်ဢေႃႈ။ ၼႂ်းဝႃႈၼၼ်သေၵေႃႈၵဝ်ဢမ်ႇၵူဝ်ဢမ်ႇဢၢႆ။ ၵဝ်ယုမ်ႇမၢတ်ႈၽူႈလႂ်ဝႃႈၼႆၵဝ်ႁုယူႇဢေႃႈ။ လွင်ႈတၢင်းဢၼ်ဢဝ်တူဝ်ၵဝ်ဢၢပ်ႈဝႆႉၼႂ်းမိုဝ်းမၼ်းၸဝ်ႈၼႆႉၵေႃႈမၼ်းၸဝ်ႈတၵ်းပႂ်ႉထိင်းတေႃႇထိုင်ႁွတ်ႈဝၼ်းၼၼ်ႉလႆႈယူႇဢေႃႈ၊ဝႃႈၼႆၵဝ်တမ်းၸႂ်သေႇၶျႃႇဝႆႉယဝ်ႉဢေႃႈ။-
ႁဵတ်းၸွမ်းၵႂၢမ်းသင်ႇသွၼ်ဢၼ်မၢၼ်ႇမႅၼ်ႈမၼ်ႈၶိူင်ႇဢၼ်ၵဝ်လႆႈသွၼ်ပၼ်တီႈမႂ်းၼၼ်ႉလူၺ်ႈတၢင်းယုမ်ႇမၢတ်ႈ၊ဢိၵ်ႇတင်းတၢင်းႁၵ်ႉမႅတ်ႈတႃႇဢၼ်ႁဝ်းမီးၼႂ်း ၸဝ်ႈယေႇသုၶရိၸ်ႈ၊ ၼၼ်ႉတႃႉ။-
ပႂ်ႉထိင်းသမ်ႇမႃႇတြႃးဢၼ်ဢၢပ်ႈဝႆႉၵႃႈတီႈမႂ်းလူၺ်ႈဝိၺိၺ်ႇမူတ်းၸၢင်ႇၸဝ်ႈဢၼ်တႄႇယူႇၵႃႈၼႂ်းႁဝ်းၼၼ်ႉတႃႉ။
ၵူၼ်းယုမ်ႇမၢတ်ႈၼႂ်းမိူင်း ဢႃႇသိ၊ ၵူႈၵေႃႉ၊ပႃးၸဵမ် ၽုၵႄႇလု၊ တင်း ႁေႇရမေႃးၵိၼ်ႇ၊ ၶဝ်ပၢႆႈပႅတ်ႈၵဝ်ၵႂႃႇၼၼ်ႉမႂ်းႁုယူႇဢေႃႈ။-
ႁႂ်ႈၸဝ်ႈၽြႃးဢဵတ်းလူပၼ်မႅတ်ႈတႃႇၵရုၼႃႇၵႃႈၼိူဝ်ၵူၼ်းႁိူၼ်းၵူၼ်းယေး ဢေႃးၼေႇသိၽေႃး၊ သေၵမ်းလူၺ်ႈ။ မၼ်းၼၼ်ႉ၊ပၼ်ႁႅင်းၵဝ်ယူႇၶိူဝ်းၶိူဝ်းလႄႈယင်းဢမ်ႇဢူၵ်းဢၢႆၼႂ်းတၢင်းဢၼ်ၵဝ်လႆႈတူၵ်းထွင်ႇယူႇၼၼ်ႉဢေႃႈ။-
မိူဝ်ႈဢၼ်မၼ်းႁွတ်ႈထိုင်ဝဵင်း ရူဝ်းမႃႉ၊ မႃးၼၼ်ႉ၊မၼ်းၶတ်းၸႂ်သွၵ်ႈႁႃၵဝ်တေႃႇထိုင်လႆႈထူပ်းႁၼ်ၵဝ်ဢေႃႈ။-
ႁႂ်ႈၸဝ်ႈၽြႃးဢဵတ်းလူလႄႈမီးမႅတ်ႈတႃႇၵရုၼႃႇၵႃႈၼိူဝ်မၼ်း၊ၼႂ်းမိုဝ်ႉဝၼ်းၼၼ်ႉ သေၵမ်းလူၺ်ႈ။ မၼ်းၸွႆႈၵဝ်ထၢၼ်ႇႁိုဝ်ၵႃႈတီႈဝဵင်း ဢေးၽႅတ်ႈ၊ ၼၼ်ႉၵေႃႈ၊မႂ်းႁုယူႇဢေႃႈ။
လုၵ်ႈၸၢႆးၵဝ်႟။ မႂ်းၸမ်ႉ၊ႁႂ်ႈမၼ်ႈၶိူင်ႇလႄႈႁႅင်းယႂ်ႇယူႇၼႂ်းသုၵျေးၸူး ၸဝ်ႈယေႇသုၶရိၸ်ႈ၊ တႃႉ။-
ဢဝ်ၵႂၢမ်းဢၼ်မႂ်းလႆႈငိၼ်းဢၼ်ၵဝ်ႁေႃးလၢတ်ႈၵႃႈတီႈၽၢႆႇၼႃႈၵူၼ်းဢၼ်ပဵၼ်သၢၵ်ႈသေႇၼမ်ၼႃႇၸိူဝ်းၼၼ်ႉသေလႄႈဢၢပ်ႈပၼ်ၵႃႈၼႂ်းမိုဝ်းၶဝ်ၸိူဝ်းဢၼ်မီးသဵတ်ႈၸႃႇလႄႈၸၢင်ႈမေႃသင်ႇသွၼ်ပိူၼ်ႈၼၼ်ႉတႃႉ။
တူဝ်မႂ်းၸမ်ႉ၊ၶဝ်ႈပႃးၼႂ်းတၢင်းဢၼ်ၶၢမ်ႇတုၵ်ႉၶႃႉတၢင်းၽၢၼ်၊မိူၼ်ၸိူဝ်ႉၼင်ႇၵူၼ်းသိုၵ်းဢၼ်မီးသဵတ်ႈၸႃႇတီႈ ၸဝ်ႈယေႇသုၶရိၸ်ႈ၊ ၼၼ်ႉတႃႉ။-
ၵူၼ်းသိုၵ်းဢၼ်ထၢမ်းၵၢၼ်သိုၵ်းယူႇၼၼ်ႉ၊ၶႂ်ႈႁဵတ်းႁႂ်ႈၶုၼ်သိုၵ်းမၼ်းထုၵ်ႇၸႂ်လႄႈမၼ်းဢမ်ႇသုၵ်ႉသၢၵ်ႉလေႃးလႄးၸွမ်းၼႂ်းၵၢၼ်ၵူၼ်းမိူင်းဢေႃႈ။-
ၵူၼ်းဢၼ်ၶဝ်ႈပႃးၼႂ်းပွႆးလႅၼ်ႈၶေႉၵၼ်ၼၼ်ႉၵေႃႈ၊ပေႃးမၼ်းယင်းဢမ်ႇႁဵတ်းၸွမ်းထုင်းမၵ်းမၢႆပွႆးလႅၼ်ႈၶေႉၼၼ်ႉၸိုင်၊မၼ်းတၵ်းတေဢမ်ႇလႆႈသူးယဝ်ႉဢေႃႈ။-
ၵူၼ်းႁဵတ်းၼႃးၵေႃႉဢၼ်ႁဵတ်းၵၢၼ်ၼၵ်းၼႃႇၼၼ်ႉ၊တၵ်းတေလႆႈႁပ်ႉဢဝ်မၢၵ်ႇၶဝ်ႈႁူင်းၶဝ်ႈဢွၼ်တၢင်းပိူၼ်ႈဢေႃႈ။-
ၶႆႈၸႂ်ဝူၼ်ႉတူၺ်းၵႂၢမ်းဢၼ်ၵဝ်လၢတ်ႈၼႆႉတႃႉ။ ၸဝ်ႈၽြႃးတၵ်းႁႂ်ႈမႂ်းႁုပွင်ႇလႅင်းၵူႈၸိူဝ်ႉၵူႈပိူင်ဢေႃႈ။
ၶုၵ်းၸႂ်လႆႈ ၸဝ်ႈယေႇသုၶရိၸ်ႈ၊ ၸဝ်ႈဢၼ်လုၵ်ႉသေၵႃႈတၢင်းတၢႆၶိုၼ်းလိပ်းမႃး၊ၸဝ်ႈဢၼ်ပဵၼ်ၸိူဝ်ႉၶိူဝ်းၶုၼ်ႁေႃၶမ်း တႃႇဝိတ်ႈ၊ ၸွမ်းၼင်ႇၶၢဝ်ႇတြႃးသိူဝ်းပျေႃႇဢၼ်ၵဝ်ႁေႃးလၢတ်ႈၼၼ်ႉတႃႉ။-
ၵွပ်ႈပိူဝ်ႈၶၢဝ်ႇတြႃးသိူဝ်းပျေႃႇၼၼ်ႉလႄႈၵဝ်လႆႈၶၢမ်ႇတုၵ်ႉၶႃႉတၢင်းၽၢၼ်ထၢၼ်ႈပေႃးလႆႈၶၢမ်ႇတၢင်းဢၼ်ပိူၼ်ႈမတ်ႉၽုၵ်ႇဝႆႉ၊ၸိူဝ်ႉၼင်ႇၵူၼ်းႁၢႆႉယဝ်ႉဢေႃႈ။ ၼႂ်းဝႃႈၼၼ်သေၵေႃႈ၊ၼုၵ်ႈၵပၢတ်ႈတြႃးၽြႃးပဵၼ်ၸဝ်ႈၸမ်ႉ၊ဢမ်ႇမတ်ႉၽုၵ်ႇဝႆႉလႆႈဢေႃႈ။-
ပိူဝ်ႈၼႆလႄႈၵဝ်ယိူၼ်ႉၶၢမ်ႇၵူႈၸိူဝ်ႉၵူႈပိူင်ၼင်ႇႁိုဝ်ၵူၼ်းဢၼ်ၽြႃးပဵၼ်ၸဝ်ႈလိူၵ်ႈၵဵပ်းဢဝ်ဝႆႉၸိူဝ်းၼၼ်ႉ၊တၵ်းလႆႈၶၢမ်ႇတၢင်းဢၼ် ၸဝ်ႈယေႇသု၊ ၵႄႇၶျွတ်ႈဢဝ်၊ဢိၵ်ႇတင်းလႆႈႁပ်ႉဢဝ်မုၼ်သရေႇထႃႇဝရႃႉၼၼ်ႉဢေႃႈ။-
ၼႆႉၸမ်ႉ၊ပဵၼ်ၵႂၢမ်းသဵတ်ႈၸႃႇဢၼ်လၢတ်ႈဝႆႉလႄႈဝႃႈ၊ “ပေႃးႁဝ်းတၢႆလူၺ်ႈၵၼ်တင်းမၼ်းၸဝ်ႈၸိုင်၊ ႁဝ်းၵေႃႈတၵ်းလိပ်းလူၺ်ႈၵၼ်တင်းမၼ်းၸဝ်ႈဢေႃႈ။
ပေႃးႁဝ်းမီးၸႂ်ဢၼ်ယိူၼ်ႉၶၢမ်ႇၸိုင်၊ ႁဝ်းတၵ်းလႆႈဢုပ်ႉပိူင်ႇလူၺ်ႈၵၼ်တင်းမၼ်းၸဝ်ႈဢေႃႈ။ ပေႃးႁဝ်းပႄႇပႅတ်ႈမၼ်းၸဝ်ႈၸိုင်၊ မၼ်းၸဝ်ႈၵေႃႈတၵ်းပႄႇပႅတ်ႈႁဝ်းဢေႃႈ။
ပိၵ်ႉသမ်ႉႁဝ်းဢမ်ႇမီးသဵတ်ႈၸႃႇသေၵေႃႈ၊ မၼ်းၸဝ်ႈယင်းမီးသဵတ်ႈၸႃႇယူႇဢေႃႈ။ လွင်ႈမၼ်းၸမ်ႉ၊မၼ်းၸဝ်ႈဢမ်ႇပႄႇၵႂၢမ်းတူဝ်ၸဝ်ႈၵဝ်ႇပႅတ်ႈလႆႈဢေႃႈ၊” ဝႃႈၼင်ႇၼႆဢေႃႈ။
ဢဝ်လွင်ႈတၢင်းၸိူဝ်းၼႆႉပၼ်သတိတီႈၵူၼ်းမႂ်းတႃႉ။ သင်ႇလၢတ်ႈၶဝ်တႄႉတႄႉဝႃႈဝႃႈ၊ၽၢႆႇၼႃႈၽြႃးပဵၼ်ၸဝ်ႈႁႂ်ႈၶဝ်ဝႄႈပႅတ်ႈလွင်ႈတၢင်းဢၼ်တွပ်ႇထဵင်ၵၼ်လွင်ႈၵႂၢမ်းဢၼ်ဢမ်ႇပွင်ဢၵျူဝ်းၵႃႈသင်ၼၼ်ႉတႃႉ။ ၵႂၢမ်းၼၼ်ႉ၊ယင်းၸၢင်ႈယႃႉၵဝ်းၶဝ်ၸိူဝ်းဢၼ်လႆႈထွမ်ႇငိၼ်းၼၼ်ႉလူးၵွၼ်ႇဢေႃႈ။-
မႂ်းၸမ်ႉ၊ၶတ်းၸႂ်ႁႂ်ႈလႆႈပဵၼ်ၵူၼ်းပွင်ၵၢၼ်ၽြႃးပဵၼ်ၸဝ်ႈဢၼ်ထုၵ်ႇၸႂ်မၼ်းၸဝ်ႈ၊ၵူၼ်းႁဵတ်းၵၢၼ်ဢၼ်ယင်းဢမ်ႇလူဝ်ႇဢူၵ်းဢၢႆၵၢၼ်တူဝ်ၸဝ်ႈၵဝ်ႇလႄႈပဵၼ်သြႃႇဢၼ်ၸၢင်ႈဢဝ်တြႃးၸဝ်ႈဢၼ်ၸိုဝ်ႈၸႂ်ႈၼၼ်ႉ၊သင်ႇသွၼ်မၢၼ်ႇမၢၼ်ႇမႅၼ်ႈမႅၼ်ႈတႃႉ။-
ဝႄႈပႅတ်ႈၵႂၢမ်းဢၼ်ဢမ်ႇၶဝ်ႈၼႂ်းတြႃး၊ဢိၵ်ႇတင်းၵႂၢမ်းလၢႆလၢႆလွၵ်ႇလွၵ်ႇဢၼ်ဢမ်ႇပွင်ႇလွင်ႈၵႃႈသင်ၸိူဝ်းၼၼ်ႉတႃႉ။ ၵႂၢမ်းမဵဝ်းၼႆႉ၊ၸၢင်ႈႁဵတ်းႁႂ်ႈၵူၼ်းႁဝ်းၽၢတ်ႇယၢၼ်ၵႆၵၼ်ၵႂႃႇတင်းၸဝ်ႈၽြႃးဢေႃႈ။-
ၵႂၢမ်းၶဝ်လၢတ်ႈၼၼ်ႉ၊ပဵၼ်မိူၼ်ၸိူဝ်ႉၼင်ႇၸဵပ်းၶူႇၸဵပ်းယဵၼ်းဢၼ်ၶူပ်းၼိူဝ်ႉၶူပ်းၼင်ၼၼ်ႉဢေႃႈ။ ၵူၼ်းသွင်ၵေႃႉဢၼ်သွၼ်ပၼ်ၸိူဝ်ႉၼင်ႇၼၼ်ၼၼ်ႉ၊ပဵၼ် ႁုမေႇၼေႇ၊ ဢိၵ်ႇတင်း ၽိလိတ်ႉ ဢေႃႈ။-
ၶဝ်ပိူင်ႈသေသဵၼ်ႈတၢင်းဢၼ်မၢၼ်ႇမႅၼ်ႈၵႂႃႇလႄႈ ပိၼ်ႈၶွမ်ႈပႅတ်ႈတၢင်းယုမ်ႇမၢတ်ႈၵူၼ်းၵမ်ႈၽွင်ႈလူၺ်ႈၵႂၢမ်းသွၼ်ဢၼ်ဝႃႈ၊တၢင်းဢၼ်လုၵ်ႉၶိုၼ်းလိပ်းၼၼ်ႉပူၼ်ႉၵႂႃႇယဝ်ႉ၊ဝႃႈၼင်ႇၼႆၼၼ်ႉဢေႃႈ။-
ၵူၺ်းၵႃႈ၊ငဝ်ႈႁၢၵ်ႈဢၼ်ၽြႃးပဵၼ်ၸဝ်ႈတႄႇဝႆႉၼၼ်ႉ၊မၼ်ႈၶိူင်ႇယူႇလႄႈယင်းဢမ်ႇသၼ်ႇဢမ်ႇဝႆဢေႃႈ။ ၵႃႈၼိူဝ်ငဝ်ႈႁၢၵ်ႈမၼ်းၸဝ်ႈၼၼ်ႉ၊မီးၶေႃႈၵႂၢမ်းတွၵ်ႇဝႆႉဝႃႈ၊ “ၸဝ်ႈၽြႃးႁုၸၵ်းၶဝ်ၸိူဝ်းဢၼ်ပဵၼ်ၵူၼ်းမၼ်းၸဝ်ႈၼၼ်ႉဢေႃႈ၊” ဢိၵ်ႇတင်းဢၼ်ဝႃႈ၊ “ၽူႈလႂ်သေဢမ်ႇဝႃႈ၊ပေႃးမၼ်းလၢတ်ႈဝႃႈ၊မၼ်းပဵၼ်ၵူၼ်းၸဝ်ႈၽြႃးၸိုင်၊ႁႂ်ႈမၼ်းဝႄႈပႅတ်ႈလွင်ႈတၢင်းဢၼ်ဢမ်ႇတြႃးတႃႉ၊” ဝႃႈၼင်ႇၼႆဢေႃႈ။
ၼႂ်းႁိူၼ်းဢၼ်ယႂ်ႇဢၼ်လူင်ၼၼ်ႉ၊မီးမေႃႈမီးဝၢၼ်ႇၵူႈၸိူဝ်ႉၵူႈပိူင်ဢေႃႈ။ ၵမ်ႈၽွင်ႈပဵၼ်မဵဝ်းဢၼ်ဢဝ်ငိုၼ်းဢဝ်ၶမ်းႁဵတ်းဝႆႉသေလႄႈၵမ်ႈၽွင်ႈသမ်ႉပဵၼ်မဵဝ်းဢၼ်ဢဝ်တင်းမႆႉလႄႈဢဝ်တင်းလိၼ်ႁဵတ်းဝႆႉဢေႃႈ။ ၵမ်ႈၽွင်ႈဝႆႉပဵၼ်ၶိူင်ႈၸႂ်ႉၶိူင်ႈတိုဝ်းၼႂ်းပွႆးၼႂ်းလၢမ်းလႄႈမီးသရေႇသေၵေႃႈ၊ၵမ်ႈၽွင်ႈဝႆႉပဵၼ်ၶိူင်ႈၸႂ်ႉၶိူင်ႈတိုဝ်းတီႈႁိူၼ်းယူဝ်းယူဝ်းလႄႈဢမ်ႇမီးသရေႇဢေႃႈ။-
ပေႃးသေၵေႃႉသေၵူၼ်းႁဵတ်းႁႂ်ႈတူဝ်ၸဝ်ႈၵဝ်ႇမူတ်းသႂ်လႄႈၵၢင်းလွတ်ႈသေလွင်ႈတၢင်းဢၼ်ဢမ်ႇမီးသရေႇၼၼ်ႉၸိုင်၊တူဝ်မၼ်းတၵ်းပဵၼ်ၸိူဝ်ႉၼင်ႇမေႃႈဝၢၼ်ႇဢၼ်မီးသရေႇ၊ၵွပ်ႈပိူဝ်ႈဢၼ်မၼ်းသၢၵ်ႈၵၢပ်ႈႁႂ်ႈလႆႈပဵၼ်ၶိူင်ႈၸႂ်ႉၶိူင်ႈသွႆပုၼ်ႈၸဝ်ႈႁိူၼ်းၼၼ်ႉလႄႈႁႅၼ်းတၼ်းဝႆႉ၊ပုၼ်ႈတႃႇၸႂ်ႉသွႆၼႂ်းၵၢၼ်ငၢၼ်းဢၼ်လီဢၼ်ငၢမ်းသေမဵဝ်းမဵဝ်းၼၼ်ႉဢေႃႈ။-
ဝႄႈပႅတ်ႈသေၵႃႈတီႈၸႂ်ၵိလေႇသႃႇဢၼ်ၽူႈမၢဝ်ႇတင်းလၢႆၸပ်းၸွႆးၼၼ်ႉသေလႄႈလိုပ်ႈၸွမ်းႁႂ်ႈၶိုတ်းလွင်ႈတၢင်းဢၼ်သိုဝ်ႈတေႃႇ၊တၢင်းဢၼ်ယုမ်ႇမၢတ်ႈ၊တၢင်းဢၼ်ႁၵ်ႉပႅင်း၊ဢိၵ်ႇတင်းတၢင်းဢၼ်ၸႂ်ၼိမ်လီ၊ႁူမ်ႈလူၺ်ႈၵၼ်တင်းၶဝ်ၸိူဝ်းဢၼ်ႁူဝ်ၸႂ်ၶၢဝ်ၸၢင်ႇလႄႈလဝ်ႈယွၼ်းတၢင်းဢၼ်ၸွႆႈဢၼ်ထႅမ်ၵႃႈတီႈၸဝ်ႈၽြႃးယူႇၸိူဝ်းၼၼ်ႉတႃႉ။-
ယႃႇပေလၢတ်ႈၸၢပ်ႈၵႂၢမ်းမိူၵ်ႈၵႂၢမ်းလိူင်းဢၼ်ဢမ်ႇပွင်ႇလွင်ႈၵႃႈသင်ၼၼ်ႉ။ ၵႂၢမ်းမဵဝ်းၼႆႉ၊ၸၢင်ႈႁဵတ်းႁႂ်ႈၵူၼ်းၽိတ်းၵၼ်ၵူၺ်းဢၼ်ဝႃႈၼၼ်ႉမႂ်းႁုယူႇဢေႃႈ။-
ၶႃႈဢၼ်ပဵၼ်ၵူၼ်းၸႂ်ႉၸဝ်ႈၽြႃးတၵ်းဢမ်ႇလႆႈၽိတ်းၵၼ်။ မၼ်းတၵ်းလႆႈပဵၼ်ၵေႃႉဢၼ်ၸႂ်လီၸႂ်ဝၢၼ်တေႃႇၵူႈၵေႃႉၵူႈၵူၼ်းလႄႈပဵၼ်သြႃႇဢၼ်လီလႄႈမီးၸႂ်ဢၼ်ၸၢင်ႈယိူၼ်ႉၶၢမ်ႇ၊-
ၸၢင်ႈမီးတင်းၵႂၢမ်းဢၼ်ဢူၼ်ႈဢွၼ်ႇသင်ႇသွၼ်သုင်းမႃႉၶဝ်ၸိူဝ်းဢၼ်ၶတ်းမၼ်းၼၼ်ႉဢေႃႈ။ ၽြႃးပဵၼ်ၸဝ်ႈၸၢင်ႈတၵ်းႁဵတ်းႁႂ်ႈၶဝ်ႁုတၢင်းၽိတ်းၶဝ်လႄႈပိၼ်ႇၸႂ်ၶဝ်ႁႂ်ႈလႆႈႁုၸႅင်ႈသမ်ႇမႃႇတြႃးမႃးဢေႃႈ။-
ပေႃးႁဵတ်းၸိူဝ်ႉၼင်ႇၼၼ်ၸိုင်၊ၶဝ်တၵ်းၶိုၼ်းႁုတူဝ်မႃးလႄႈတၵ်းလႆႈလွတ်ႈဢွၵ်ႇသေတၢင်းဢၼ်မႃႇၼၢတ်ႈၶႂ်ႈႁႂ်ႈၶဝ်လႆႈထွမ်ႇဢဝ်ဢလူဝ်ႇမၼ်းလႄႈတိဢဝ်ၶဝ်ဝႆႉၼၼ်ႉဢေႃႈ။
လွင်ႈတၢင်းၼႆႉၵေႃႈမႂ်းႁုဝႆႉတႃႉ။ ၼႂ်းၶိင်ႇၵႃႇလႃႉလိုၼ်းသုတ်းၼၼ်ႉတၵ်းတေမီးတၢင်းဢၼ်ႁၢႆႉယုတ်ႈလႄႈတၢင်းယၢပ်ႇၽိုတ်ႇၼႃႇဢေႃႈ။-
ၵူၼ်းတင်းလၢႆတၵ်းႁၼ်ဢၵျူဝ်းပုၼ်ႈတူဝ်ၸဝ်ႈၵဝ်ႇ၊တႃၶဝ်တူၺ်းႁၼ်ငိုၼ်းတွင်း၊တေဢုပ်ႇဝၢဝ်းၽႅၼ်သုင်၊တေထၢင်ႇယႂ်ႇတူဝ်ၸဝ်ႈၵဝ်ႇ၊တေယႃႉသရေႇပိူၼ်ႈ၊တေဢမ်ႇထွမ်ႇၵႂၢမ်းပေႃႈမႄႈ၊တေဢမ်ႇၸၢင်ႈႁုၵျေးၸူး၊တေဢမ်ႇမီးတၢင်းဢၼ်မူတ်းၸၢင်ႇ၊-
တေဢမ်ႇၸၢင်ႈမေႃႁၵ်ႉၸူမ်းပႅင်းပိူၼ်ႈ၊တေဢမ်ႇမီးၸႂ်ဢၼ်ဢဵတ်းလူပိူၼ်ႈ၊တေၶႃႉၸိုဝ်ႈၶၢႆသဵင်ပိူၼ်ႈ၊တေမီးတၢင်းဢၼ်ႁၢႆႉမိူၵ်ႈၼႃႇ၊တေလိူင်းၵျၢမ်းၼႃႇ၊တေငိၼ်းၸင်းလွင်ႈတၢင်းဢၼ်လီငၢမ်းၵူႈမဵဝ်း၊-
တေယႃႉသဵတ်ႈၸႃႇ၊တေဢမ်ႇမေႃဝႆႉသတိ၊တေၸၢင်ႈမီးႁူဝ်ၸႂ်ဢၼ်ၽႅၼ်သုင်၊တေၸၢင်ႈၵျိူၵ်ႈႁၵ်ႉထုၵ်ႇၸႂ်တၢင်းဢၼ်မူၼ်ႈပျေႃႇၸေးၸိမ်ႇၵႃႇမၵုင်ႇ၊ၼႃႇသေႁၵ်ႉပႅင်းၽြႃးပဵၼ်ၸဝ်ႈ၊-
တေႁဵတ်းႁၢင်ႈၼပ်ႉယမ်ၽြႃးတြႃးယူႇ၊ၵူၺ်းၵႃႈ၊တၼ်းၶူဝ်းမၼ်းၸဝ်ႈတေဢမ်ႇမီးၼႂ်းတၢင်းၵမ်ၵျၢင်ႉၶဝ်ဢေႃႈ။ ဝႄႈပႅတ်ႈၵူၼ်းမဵဝ်းၼၼ်ႉတႃႉ။-
ၼႂ်းၶဝ်ၼၼ်ႉၵမ်ႈၽွင်ႈ၊ၸၢင်ႈၶဝ်ႈၼႂ်းႁိူၼ်းပိူၼ်ႈၵႂႃႇလႄႈၸူဝ်းဢဝ်မႄႈယိင်းဢၼ်မီးၸႂ်ဢၼ်ဢမ်ႇမၼ်ႈၶိူင်ႇ၊ၸႂ်ဢၼ်ဢမ်ႇၼိမ်ၵွပ်ႈပိူဝ်ႈဢပျတ်ႈ၊ဢိၵ်ႇတင်းၸႂ်ဢၼ်ၸပ်းၸွမ်းဢလူဝ်ႇၵိလေႇသႃႇၵူႈၸိူဝ်ႉၵူႈပိူင်၊-
မႄႈယိင်းဢၼ်ထွမ်ႇဢဝ်သွၼ်ဢဝ်ယူႇသေၵေႃႈ၊ဢမ်ႇၸၢင်ႈႁုၸႅင်ႈသမ်ႇမႃႇတြႃးလႆႈၼၼ်ႉဢေႃႈ။-
မိူၼ်ၸိူဝ်ႉၼင်ႇဢၼ် ယၢၼ်ႇၼေႇ၊ ဢိၵ်ႇတင်း ယမ်ႇပြေႇ၊ သၢၼ်ၶတ်းၵၼ်တင်း မူဝ်းသေႇ၊ ၼၼ်ႉၵူၼ်းၸိူဝ်းဢၼ်မီးႁူဝ်ၸႂ်ဢၼ်ၵူဝ်ႈၵိူၵ်ႇလႄႈယုမ်ႇၽိတ်းယုမ်ႇပိူင်ႈၸိူဝ်းၼၼ်ႉၵေႃႈ၊သၢၼ်ၶတ်းၵၼ်တင်းသမ်ႇမႃႇတြႃးဢေႃႈ။-
ၵူၺ်းၵႃႈ၊ၶဝ်တၵ်းႁဵတ်းလႆႈႁိုင်ႁိုင်ဢမ်ႇၸႂ်ႈ။ လွင်ႈမၼ်းၸမ်ႉ၊ၵူၼ်းတင်းလၢႆတၵ်းႁၼ်တၢင်းႁၢႆႉမိူၵ်ႈၶဝ်ထၢင်ႇထၢင်ႇသႃးသႃးမိူၼ်ၸိူဝ်ႉၼင်ႇတၢင်းႁၢႆႉမိူၵ်ႈၶဝ်သွင်ၵေႃႉထၢင်ႇသႃးၼၼ်ႉဢေႃႈ။
မႂ်းလႆႈၸွမ်းႁုၸွမ်းႁၼ်ၵႂၢမ်းဢၼ်ၵဝ်သင်ႇသွၼ်ပၼ်၊တၢင်းဢၼ်ၵဝ်ၵမ်ၵျၢင်ႉ၊တၢင်းဢၼ်ၵဝ်ဢဵၼ်းဢၢၼ်းၼႂ်းၸူဝ်ႈတႃႇဢသၢၵ်ႈၵဝ်၊တၢင်းဢၼ်ၵဝ်ယုမ်ႇမၢတ်ႈ၊တၢင်းဢၼ်ၵဝ်ယိူၼ်ႉၶၢမ်ႇ၊တၢင်းဢၼ်ၵဝ်ႁၵ်ႉပႅင်း၊တၢင်းဢၼ်ၵဝ်ၸႂ်တႄႇၼိမ်မၼ်ႈၶိူင်ႇယူႇ၊-
တၢင်းဢၼ်ၵဝ်လႆႈၶၢမ်ႇပိူၼ်ႈၼိၵ်ႈၸၢၵ်ႈငႅၼ်းသႄး၊ဢိၵ်ႇတင်းတၢင်းဢၼ်ၵဝ်လႆႈၶၢမ်ႇတုၵ်ႉၶႃႉတၢင်းၽၢၼ်ၸိူဝ်းၼၼ်ႉယဝ်ႉယဝ်ႉဢေႃႈ။ မႂ်းလႆႈႁုႁၼ်ၵႃႈဢၼ်ပဵၼ်မႃးတီႈၵဝ်ၵႃႈတီႈဝဵင်း ဢၼ်ႇတိဢူၵ်ႉ၊ ဝဵင်း ဢိၵေႃးၼိ၊ ဢိၵ်ႇတင်းဝဵင်း လုတ်ႉတရႃႉ၊ ၸိူဝ်းၼၼ်ႉ၊ၵဝ်လႆႈယိူၼ်ႉၶၢမ်ႇဢဝ်တၢင်းဢၼ်ပိူၼ်ႈၼိၵ်ႈၸၢၵ်ႈငႅၼ်းသႄးၵဝ်ထၢၼ်ႇႁိုဝ်ၼၼ်ႉယဝ်ႉဢေႃႈ။ ၵူၺ်းၵႃႈ၊ၸဝ်ႈၽြႃးၵႄႇသႄႇဢဝ်ၵဝ်ဢွၵ်ႇသေလွင်ႈတၢင်းၸိူဝ်းၼၼ်ႉ၊တင်းသဵင်ႈတင်းလူင်ဢေႃႈ။-
ၸႂ်ႈတႄႉယဝ်ႉ၊ၶဝ်ၸိူဝ်းဢၼ်ၶႂ်ႈၵမ်ၵျၢင်ႉၸွမ်းတြႃးၸဝ်ႈၽြႃးၼႂ်း ၸဝ်ႈယေႇသုၶရိၸ်ႈ၊ ၼၼ်ႉတင်းသဵင်ႈတင်းလူတၵ်းလႆႈၶၢမ်ႇတၢင်းဢၼ်ပိူၼ်ႈၼိၵ်ႈၸၢၵ်ႈငႅၼ်းသႄးတႄႉဢေႃႈ။-
ၵူၺ်းၵႃႈ၊ၵူၼ်းႁၢႆႉၵူၼ်းမိူၵ်ႈတင်းသြႃႇဢၼ်သွၼ်ၽိတ်းသွၼ်ပိူင်ႈၸိူဝ်းၼၼ်ႉ၊တၵ်းယဵင်ႈၶႅၼ်းၵူဝ်ႈၵိူၵ်ႇၵႂႃႇတိၵ်းတိၵ်းသေယဝ်ႉ၊ပႅတ်ႉလႅၼ်ပိူၼ်ႈယူႇသေလႄႈတူဝ်ၶဝ်ၵေႃႈၶၢမ်ႇပိူၼ်ႈပႅတ်ႉလႅၼ်ဢေႃႈ။-
ၵူၺ်းၵႃႈ၊မႂ်းၸမ်ႉ၊သိုပ်ႇတႄႇယူႇၼႂ်းတၢင်းဢၼ်မႂ်းလႆႈသွၼ်ဢဝ်ဝႆႉလႄႈယုမ်ႇမၢတ်ႈယူႇမၼ်ႈမၼ်ႈၶိူင်ႇၶိူင်ႇတႃႉ။ ၽူႈလႂ်ပဵၼ်သြႃႇမႂ်းဢၼ်ဝႃႈၼၼ်ႉမႂ်းႁုယူႇဢေႃႈ။-
ပိူဝ်ႈၼႆလႄႈၶုၵ်းၸႂ်လႆႈလွင်ႈတၢင်းဢၼ်ၸဵမ်မိူဝ်ႈမႂ်းယင်းပဵၼ်လုၵ်ႈဢွၼ်ႇၼၼ်ႉ၊မႂ်းလႆႈႁုၸႅင်ႈထမ်ႇမႃႉၵျၢမ်းလိၵ်ႈဢၼ်ၸၢင်ႈပၼ်ပိင်ႇၺႃႇ၊ဢၼ်ၼႄတၢင်းႁႂ်ႈမႂ်းလႆႈတၢင်းဢၼ်ၵႄႇၶျွတ်ႈဢဝ်၊ၵွပ်ႈပိူဝ်ႈတၢင်းဢၼ်ယုမ်ႇမၢတ်ႈ ၸဝ်ႈယေႇသုၶရိၸ်ႈ၊ ၼၼ်ႉတႃႉ။-
ၵျၢမ်းတြႃးတင်းသဵင်ႈတင်းလူင်ပဵၼ်ၵျၢမ်းတြႃးဢၼ်ၽြႃးပဵၼ်ၸဝ်ႈပဝ်ႇသႂၢင်းသႂ်ႇဝႆႉၼႂ်းၸႂ်ၵူၼ်းလႄႈမၼ်းၸၢင်ႈပဵၼ်ဢၵျူဝ်းပုၼ်ႈဢၼ်တၵ်းသင်ႇသွၼ်ပၼ်သမ်ႇမႃႇတြႃးပုၼ်ႈဢၼ်တၵ်းၽုၺ်ႇၼႄဢပျတ်ႈ၊ပုၼ်ႈဢၼ်တၵ်းမႄးတၢင်းၽိတ်း၊ဢိၵ်ႇတင်းပုၼ်ႈဢၼ်တၵ်းသင်ႇလၢတ်ႈႁႂ်ႈမေႃၵမ်ၵျၢင်ႉၸွမ်းတြႃး၊-
ၼင်ႇႁိုဝ်ၵူၼ်းၽြႃးပဵၼ်ၸဝ်ႈတၵ်းပျေႉၸုမ်ႇလႄႈတၼ်းဝႆႉတႃႇတေႁဵတ်းၵၢၼ်ဢၼ်လီဢၼ်ငၢမ်းၵူႈၸိူဝ်ႉၵူႈပိူင်ဢေႃႈ။
ၵဝ်ပၼ်သတိမႂ်းၵႃႈတီႈၽၢႆႇၼႃႈၽြႃးပဵၼ်ၸဝ်ႈ၊ဢိၵ်ႇတင်းၽၢႆႇၼႃႈ ၸဝ်ႈယေႇသုၶရိၸ်ႈ၊ ၸဝ်ႈဢၼ်တၵ်းၸီႇယၢင်ႇတႅပ်းတတ်းတြႃး၊တီႈၵူၼ်းတင်းသဵင်ႈတင်းလူင်ၸႃႉၸဵမ်ၵူၼ်းတၢႆ၊ဢိၵ်ႇတင်းၵူၼ်းလိပ်း၊ၵွပ်ႈပိူဝ်ႈမၼ်းၸဝ်ႈတၵ်းမႃးလႄႈဢုပ်ႉပိူင်ႇမိူၼ်ၸိူဝ်ႉၼင်ႇၶုၼ်ႁေႃၶမ်းဢုပ်ႉပိူင်ႇၼၼ်ႉဢေႃႈ။-
ႁေႃးလၢတ်ႈၼုၵ်ႈၵပၢတ်ႈတြႃးၸဝ်ႈတႃႉ။ ၼႂ်းဢၶိင်ႇဢၼ်သၢင်ႇထုၵ်ႇသေဢမ်ႇဝႃႈ၊ဢၶိင်ႇဢၼ်ဢမ်ႇသၢင်ႇထုၵ်ႇသေဢမ်ႇဝႃႈ၊ပႃးၸႂ်ပႃးၶေႃးသေလႄႈႁေႃးလၢတ်ႈတႃႉ။ ပႃးတင်းၸႂ်ဢၼ်ယၢဝ်းယိုၼ်းယိူၼ်ႉၶၢမ်ႇသေလႄႈၽုၺ်ႇဢွၵ်ႇၼႄပျႃးဢပျတ်ႈ၊ဢိၵ်ႇတင်းသုင်းမႃႉ၊ပၼ်ဢဵၼ်ပၼ်ႁႅင်းပိူၼ်ႈလႄႈသင်ႇသွၼ်ပၼ်လီလီတႃႉ။-
လွင်ႈမၼ်းၸမ်ႉ၊ၶိင်ႇၵႃႇလႃႉဢၼ်ၵူၼ်းတင်းလၢႆတၵ်းတေဢမ်ႇထွမ်ႇဢဝ်ၵႂၢမ်းသုင်းမႃႉ၊ဢၼ်မၢၼ်ႇမႅၼ်ႈၼၼ်ႉတၵ်းႁွတ်ႈထိုင်မႃးလႄႈၶဝ်တၵ်းၸွမ်းဢလူဝ်ႇၵၢင်ၸႂ်တူဝ်ၸဝ်ႈၵဝ်ႇသေ၊ၶဝ်တေႁွင်ႉဢဝ်သြႃႇၼမ်ၼႃႇႁႂ်ႈမႃးသင်ႇသွၼ်ႁေႃးပၼ်မဵဝ်းဢၼ်ၶဝ်ၶႂ်ႈထွမ်ႇၸွမ်းၼင်ႇဢၼ်ၶဝ်ႁူၶူမ်းၶႂ်ႈငိၼ်းၼၼ်ႉဢေႃႈ။-
ၶဝ်တၵ်းဝၢႆႇႁူပႅတ်ႈသေသမ်ႇမႃႇတြႃးသေယဝ်ႉ၊သမ်ႉဝၢႆႇၸူးတီႈဢပုမ်ႇဢၼ်ပဵၼ်ၵႂၢမ်းပဝ်ႇလၢႆၼၼ်ႉဢေႃႈ။-
မႂ်းၸမ်ႉ၊ဝႆႉသတိထိင်းတူဝ်ၸဝ်ႈၵဝ်ႇၼႂ်းလွင်ႈၵူႈၸိူဝ်ႉၵူႈပိူင်လႄႈယိူၼ်ႉၶၢမ်ႇတုၵ်ႉၶႃႉတၢင်းၽၢၼ်တႃႉ။ ပွင်ႁဵတ်းၼႃႈၵၢၼ်သြႃႇႁေႃးၶၢဝ်ႇတြႃးသိူဝ်းပျေႃႇလႄႈႁဵတ်းၼႂ်းၼႃႈၵၢၼ်သြႃႇၼၼ်ႉႁႂ်ႈတဵမ်ထူၼ်ႈတႃႉ။
ၵဝ်ၸမ်ႉ၊ၶိင်ႇၵႃႇလႃႉဢၼ်ၵဝ်တၵ်းလႆႈသၢၵ်ႈလူႇဢသၢၵ်ႈၵဝ်တီႈၸဝ်ႈၽြႃးၼၼ်ႉႁွတ်ႈထိုင်မႃးယဝ်ႉလႄႈၶိင်ႇဢၼ်ၵဝ်တၵ်းလႆႈၸုၼ်ႉဢသၢၵ်ႈၵဝ်ၼၼ်ႉ၊ၸမ်မႃးယဝ်ႉဢေႃႈ။-
ၵဝ်လႆႈၶတ်းၸႂ်ၶတ်းႁႅင်းလႅၼ်ႈၼႂ်းပွႆးလႅၼ်ႈၶေႉၵၼ်ၼၼ်ႉယဝ်ႉယဝ်ႉ။ ၵဝ်လႆႈၶုၼ်ႇလႅၼ်ႈၶၢဝ်းတၢင်းၵဝ်သုတ်းသုတ်းယဝ်ႉ။ ၵဝ်လႆႈပႂ်ႉၵမ်ပႂ်ႉၸွမ်းတြႃးတၢင်းယုမ်ႇမၢတ်ႈယဝ်ႉယဝ်ႉဢေႃႈ။-
ပိူဝ်ႈၼႆလႄႈၸႃႉဢဝ်တေႃႈလဵဝ်ၼႆႉၵႂႃႇ၊သူးတၢင်းဢၼ်သိုဝ်ႈတေႃႇၼၼ်ႉသိမ်းဝႆႉထႃႈပုၼ်ႈၵဝ်ယဝ်ႉယဝ်ႉဢေႃႈ။ သူးၼၼ်ႉ၊ၸဝ်ႈၽြႃးဢၼ်ပဵၼ်ၸဝ်ႈဢၼ်ၸီႇယၢင်ႇသိုဝ်ႈသိုဝ်ႈတေႃႇတေႃႇၼၼ်ႉ၊တၵ်းဢဝ်ပၼ်ၵဝ်ၼႂ်းဝၼ်းၼၼ်ႉဢေႃႈ။ မၼ်းၸဝ်ႈတၵ်းပၼ်ၵဝ်ၵေႃႉလဵဝ်ၵူၺ်းဢမ်ႇၵႃး၊တၵ်းပၼ်ၶဝ်ၸိူဝ်းဢၼ်ပႃးတင်းတၢင်းႁၵ်ႉလႄႈမုင်ႈမွင်းပႂ်ႉထႃႈတၢင်းဢၼ်မၼ်းၸဝ်ႈတၵ်းပေႃႇမႃးၼၼ်ႉ၊ၵူႈၵေႃႉၵူႈၵူၼ်းပႃးဢေႃႈ။
လုၵႃႇ၊ ၵေႃႉလဵဝ်ၵူၺ်း၊မီးယူႇလူၺ်ႈၵၼ်တင်းၵဝ်ယူႇဢေႃႈ။ ႁွင်ႉပႃး မႃႇၵု၊ မႃးလူၺ်ႈၵၼ်တင်းမႂ်းတႃႉ။ မၼ်းၼၼ်ႉ၊ၸၢင်ႈၸွႆႈပွင်ၼႃႈၵၢၼ်ၵဝ်လီၼႃႇဢေႃႈ။-
ၵဝ်ပွႆႇၸႂ်ႉ တုၶႅၵ်ႉ၊ ၵႂႃႇတီႈဝဵင်း ဢေးၽႅတ်ႈ၊ ယဝ်ႉဢေႃႈ။-
မိူဝ်ႈဢၼ်မႂ်းမႃးၼၼ်ႉ၊ဢဝ်သိူဝ်ႈယၢဝ်းၵဝ်ဢၼ်ဝႆႉၵႃႈတီႈ ၵႃႇပု၊ ၼႂ်းဝဵင်း ထရေႃး၊ ၼၼ်ႉဢိၵ်ႇတင်းၽိူၼ်လိၵ်ႈၵဝ်တင်းလၢႆၼၼ်ႉမႃးၸွမ်း၊လိူဝ်တွၼ်းၼႃႇသေပိူၼ်ႈၼၼ်ႉဢဝ်ၽိူၼ်လိၵ်ႈဢၼ်ဢဝ်ၼင်ႁဵတ်းဝႆႉၸိူဝ်းၼၼ်ႉမႃးၸွမ်းသေၵမ်း။
ၸၢင်ႈတွင်းလႅင် ဢလႅၵ်ႉၸၼ်းတႃး၊ ၼၼ်ႉႁဵတ်းၽေးလူင်သႂ်ႇၵဝ်ဢေႃႈ။ ၸဝ်ႈၽြႃးတၵ်းတွပ်ႇတႅၼ်းပၼ်ၸွမ်းၼင်ႇဢၼ်မၼ်းႁဵတ်းပူၼ်ႉမႃးၼၼ်ႉယူႇဢေႃႈ။-
မႂ်းၵေႃႈဝႆႉသတိမၼ်းတႃႉ။ မၼ်းၶတ်းတြႃးဢၼ်ႁဝ်းႁေႃးလၢတ်ႈၼၼ်ႉၼႃႇလူင်လၢင်ဢေႃႈ။
မိူဝ်ႈဢၼ်ၵဝ်လႆႈလၢတ်ႈၵႂၢမ်းၶႄတူဝ်ၸဝ်ႈၵဝ်ႇၵႃႈၼႂ်းလုမ်းပွၵ်ႈဢွၼ်တၢင်းသုတ်းၼၼ်ႉ၊ၽူႈလႂ်ဢမ်ႇယူႇၽၢႆႇၵဝ်လႄႈၵူႈၵေႃႉပွႆႇပႅတ်ႈၵဝ်ဝႆႉဢေႃႈ။ ယႃႇႁႂ်ႈၸဝ်ႈၽြႃးမၢတ်ႈပဵၼ်ဢပျတ်ႈၵႃႈၼိူဝ်ၶဝ်သေၵမ်း။-
ၵူၺ်းၵႃႈ၊ၸဝ်ႈၽြႃးမီးလူၺ်ႈၵၼ်တင်းၵဝ်သေလႄႈပၼ်ဢဵၼ်ပၼ်ႁႅင်းၵဝ်ယူႇဢေႃႈ။ ၵဝ်ၸင်ႇၸၢင်ႈႁေႃးလၢတ်ႈတြႃးၸဝ်ႈတဵမ်ထူၼ်ႈႁႂ်ႈၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းလႆႈငိၼ်းၼၼ်ႉလႄႈၸဝ်ႈၽြႃးၵႄႇသႄႇဢဝ်ဢွၵ်ႇသေၵႃႈတီႈသူပ်းသၢင်ႇသီႈမႃးဢေႃႈ။-
လိူဝ်သေၼၼ်ႉ၊ၸဝ်ႈၽြႃးတၵ်းၵႄႇသႄႇဢဝ်ၵဝ်ဢွၵ်ႇသေၵႃႈၼႂ်းလွင်ႈတၢင်းဢၼ်ႁၢႆႉမိူၵ်ႈတင်းသဵင်ႈတင်းလူင်လႄႈၶျွတ်ႈဢဝ်ၵဝ်ႁႂ်ႈလႆႈႁွတ်ႈထိုင်မိူင်းၽႃႉၵၢင်ႁၢဝ်မၼ်းၸဝ်ႈဢေႃႈ။ ႁႂ်ႈမုၼ်ၽုင်းမၼ်းၸဝ်ႈယႂ်ႇၼႃႇတႃႇသေႇဢမ်ႇထၢတ်ႇသေၵမ်းလူၺ်ႈ။ ဢႃမိၼ်ႈ။
ၵဝ်ၽၢၵ်ႇၵႂၢမ်းတၵ်ႉၼၢႆၵႂႃႇတီႈ ပရီႇသီးလႃႇ၊ ဢိၵ်ႇတင်း ဢႃႇၵုလႃႉ၊ ၶဝ်ၽူဝ်မေး၊ဢိၵ်ႇတင်းၵူၼ်းႁိူၼ်းၵူၼ်းယေး ဢေႃးၼေႇသိၽေႃး၊ ၸိူဝ်းၼၼ်ႉဢေႃႈ။-
ဢေးရတ်ႉတု၊ ၵိုတ်းသဝ်းယူႇၵႃႈတီႈဝဵင်း ၵေႃးရိၼ်ႇထု၊ လႄႈ တရေႃႇၽိမ်ႇ၊ ၼၼ်ႉၵွပ်ႈပိူဝ်ႈမၼ်းဢမ်ႇယူႇလီလႄႈၵဝ်ႁႂ်ႈမၼ်းၵိုတ်းဝႆႉၵႃႈတီႈဝဵင်း မိလိတ်ႉ၊ ပုၼ်ႉဢေႃႈ။-
ၶတ်းၸႂ်မႃးၸူဝ်ႈဢၼ်ဢမ်ႇပႆႇၶဝ်ႈၶိင်ႇၵတ်းၼႆႉတႃႉ။ ဢုပုလု၊ပုတေႇ၊လိၼု၊ၵလေႃးတိ၊ တင်းပီႈၼွင်ႉၶရိၸ်ႈယၢၼ်ႇတင်းလၢႆ၊ၽၢၵ်ႇၵႂၢမ်းမႅတ်ႈတႃႇမႃးပုၼ်ႈမႂ်းဢေႃႈ။
ၶႅၼ်းတေႃႈႁႂ်ႈၸဝ်ႈၽြႃးမီးယူႇလူၺ်ႈၵၼ်တင်းၸႂ်ဝိၺိၺ်ႇမႂ်းသေၵမ်းလူၺ်ႈ။ ႁႂ်ႈၵျေးၸူးၽြႃးပဵၼ်ၸဝ်ႈ၊တႄႇယူႇၵႃႈၼိူဝ်သူၵူႈၵေႃႉၵူႈၵူၼ်းသေၵမ်းလူၺ်ႈ။ လိၵ်ႈတြႃးတိမေႃးသေႇၽိုၼ်တီႈသွင်ယဝ်ႉယဝ်ႉဢေႃႈ။
ၵဝ် ပေႃးလု၊ ၶႃႈၽြႃးပဵၼ်ၸဝ်ႈဢိၵ်ႇတင်းတမၢၼ်ႇ ၸဝ်ႈယေႇသုၶရိၸ်ႈ၊ သမ်ႉလႆႈပဵၼ်ၵေႃႉဢၼ်ၽြႃးပဵၼ်ၸဝ်ႈလိူၵ်ႈၵဵပ်းဢဝ်လႄႈပွႆႇၸႂ်ႉၵႂႃႇႁႂ်ႈလႆႈၸွႆႈၵူၼ်းၽြႃးပဵၼ်ၸဝ်ႈဢၼ်လႆႈလိူၵ်ႈၵဵပ်းဝႆႉတင်းလၢႆမီးတၢင်းယုမ်ႇမၢတ်ႈ၊ဢိၵ်ႇတင်းႁႂ်ႈႁုၸၵ်းသမ်ႇမႃႇတြႃးဢၼ်ၵိုင်ႇၵၼ်တင်းတၢင်းဢၼ်ၼပ်ႉယမ်ၽြႃးတြႃးၼၼ်ႉ၊-
ဢၼ်လွင်ႈတၢင်းၸိူဝ်းၼႆႉတႄႇဝႆႉၼိူဝ်တၢင်းဢၼ်မုင်ႈထႃႈမွင်းထႃႈဢသၢၵ်ႈထႃႇဝရႃႉ ဢၼ်ၽြႃးပဵၼ်ၸဝ်ႈၸဝ်ႈဢၼ်ဢမ်ႇၸၢင်ႈပႅတ်ႉလႅၼ်ပၼ်ၵတိဝႆႉဝႃႈ၊တေပၼ်ဢသၢၵ်ႈၼႆႉတီႈႁဝ်းဝႃႈၼႆၸဵမ်မိူဝ်ႈဢွၼ်တၢင်း ၵမ်ႇၽႃႇတင်းလၢႆပေႃႇပဵၼ်မႃးၼၼ်ႉသေယဝ်ႉ၊-
ၼႂ်းမိူဝ်ႈဢၼ်ၶိင်ႇၵႃႇလႃႉမၼ်းထုၵ်ႇယဝ်ႉၼၼ်ႉ၊ၸဝ်ႈၽြႃးႁႂ်ႈၵတိမၼ်းၸဝ်ႈထၢင်ႇသႃးမႃးၵွပ်ႈပိူဝ်ႈတၢင်းဢၼ်ႁေႃးလၢတ်ႈတြႃးၸဝ်ႈဢၼ်မၼ်းၸဝ်ႈဢၢပ်ႈတႃႇဝုၼ်ႇဝႆႉ၊တီႈၵဝ်လႄႈ၊ၵဝ်ၵေႃႈႁေႃးၸွမ်းၼင်ႇပိင်းၺၢပ်ႈၽြႃးပဵၼ်ၸဝ်ႈ၊ၸဝ်ႈၵႄႇၶျွတ်ႈႁဝ်းၼၼ်ႉ၊-
မီးလိၵ်ႈတႅမ်ႈထိုင် တိတု၊ ဢၼ်ပဵၼ်လုၵ်ႈၸၢႆးၵဝ်ၸႅတ်ႈၸႅတ်ႈၵႃႈၼႂ်းတၢင်းယုမ်ႇမၢတ်ႈဢၼ်ႁဝ်းမီးမိူၼ်မိူၼ်ၵၼ်ၼၼ်ႉဢေႃႈ။ ႁႂ်ႈၽြႃးပေႃႈၸဝ်ႈဢိၵ်ႇတင်း ၸဝ်ႈယေႇသုၶရိၸ်ႈ၊ ဢၼ်ပဵၼ်ၸဝ်ႈၵႄႇၶျွတ်ႈႁဝ်းၼၼ်ႉပၼ်ၵျေးၸူးဢိၵ်ႇတင်းတၢင်းၼိမ်ၶျၢမ်းသႃႇတီႈမႂ်းသေၵမ်းလူၺ်ႈ။
ၵဝ်ဢဝ်မႂ်းၵိုတ်းဝႆႉ၊ၵႃႈၼႂ်းၵုၼ် ၵရေႇတေႇ၊ ႁႂ်ႈမႂ်းလႆႈပွင်ႁဵတ်းပွင်မႄးၵႃႈဢၼ်ယင်းလူဝ်ႇႁဵတ်းလူဝ်ႇသၢင်ႈၼၼ်ႉဢေႃႈ။ ၸွမ်းၼင်ႇဢၼ်ၵဝ်လႆႈသင်ႇလၢတ်ႈမႂ်းဝႆႉၼၼ်ႉယုၵ်ႉတၢင်ႇၵူၼ်းဢုပ်ႉၸိူဝ်းၸဝ်ႈၵႃႈၼႂ်းၵူႈဝၢၼ်ႈၵူႈဝဵင်းတႃႉ။-
ၵူၼ်းဢုပ်ႉၸိူဝ်းၸဝ်ႈၼၼ်ႉၸိုင်၊တၵ်းလႆႈပဵၼ်ၵေႃႉဢၼ်ၵၢင်းလွတ်ႈတင်းတၢင်းဢၼ်ပိူၼ်ႈတၢင်ႇဢပျတ်ႈ၊ၵေႃႉဢၼ်မီးမေးၵေႃႉလဵဝ်ၵူၺ်းလႄႈလုၵ်ႈလၢင်းမၼ်းတင်းလၢႆၵေႃႈတၵ်းလႆႈယုမ်ႇမၢတ်ႈသေၵၢင်းလွတ်ႈတင်းတၢင်းဢၼ်ပိူၼ်ႈသႄႉသွမ်းလႄႈဝႃႈ၊ပဵၼ်လုၵ်ႈဢွၼ်ႇလိူင်းလႄႈဢမ်ႇထွမ်ႇၵႂၢမ်းပေႃႈမႄႈၼၼ်ႉဢေႃႈ။-
လွင်ႈမၼ်းၸမ်ႉ၊သြႃႇဢုပ်ႉၸိူဝ်းၸဝ်ႈၸိုင်၊ၸွမ်းလူၺ်ႈမၼ်းပဵၼ်ၽူႈၵွၼ်းၼႃႈၵၢၼ်ၽြႃးပဵၼ်ၸဝ်ႈလႄႈထိင်းၸိူဝ်းၸဝ်ႈၼၼ်ႉမၼ်းတၵ်းလႆႈၵၢင်းလွတ်ႈတင်း တၢင်းဢၼ်ပိူၼ်ႈတၢင်ႇဢပျတ်ႈဢေႃႈ။ မၼ်းတၵ်းဢမ်ႇလႆႈပဵၼ်ၵေႃႉဢၼ်ၸွမ်းဢလူဝ်ႇတူဝ်ၸဝ်ႈၵဝ်ႇ၊ဢမ်ႇလႆႈပဵၼ်ၵေႃႉဢၼ်ၸႂ်ပွတ်း၊ၵေႃႉဢၼ်မၵ်ႉလဝ်ႈမဝ်းယႃႈ၊ၵေႃႉဢၼ်ၸႂ်ႁၢဝ်ႈၸႂ်ၵျၢမ်း၊ၵေႃႉဢၼ်ၸႂ်ၸပ်းၸႂ်ၸွႆးလွင်ႈမၢၵ်ႈမီး ဢၼ်ဢမ်ႇမူတ်းသႂ်ၼၼ်ႉဢေႃႈ။-
မၼ်းတၵ်းလႆႈပဵၼ်ၵေႃႉဢၼ်ၸူမ်းႁပ်ႉၶႅၵ်ႇ၊ၵေႃႉဢၼ်ၸၢင်ႈႁၵ်ႉပႅင်းလွင်ႈတၢင်းဢၼ်လီဢၼ်မၢၼ်ႇ၊ၵေႃႉဢၼ်မီးဢဵင်ႇသရေႇ၊ၵေႃႉဢၼ်သိုဝ်ႈတေႃႇ၊ၵေႃႉဢၼ်မူတ်းၸၢင်ႇ၊ၵေႃႉဢၼ်ၸၢင်ႈထိင်းတူဝ်ၸဝ်ႈၵဝ်ႇၼၼ်ႉဢေႃႈ။-
မၼ်းတၵ်းလႆႈယိပ်းၵမ် တြႃးသဵတ်ႈၸႃႇၸဝ်ႈဢၼ်မၼ်းလႆႈႁပ်ႉသွၼ်ဢဝ်ဝႆႉၼၼ်ႉမၼ်ႈမၼ်ႈၶိူင်ႇၶိူင်ႇ၊ပုၼ်ႈလွင်ႈၼင်ႇႁိုဝ်မၼ်းတၵ်းမေႃဢဝ်တြႃးဢၼ်မၢၼ်ႇဢၼ်မႅၼ်ႈသင်ႇသွၼ်ပၼ်ဢဵၼ်ပၼ်ႁႅင်းပိူၼ်ႈသေလႄႈၸၢင်ႈၵႄႈလိတ်ႈပႅတ်ႈၵႂၢမ်းၶဝ်ၸိူဝ်းဢၼ်ၶတ်းၵၼ်တင်းတြႃးၸဝ်ႈၸိူဝ်းၼၼ်ႉဢေႃႈ။
လွင်ႈမၼ်းၸမ်ႉ၊ၶဝ်ၸိူဝ်းဢၼ်ယင်းဢမ်ႇထွမ်ႇဢမ်ႇဢဝ်လႄႈဢဝ်ၵႂၢမ်းမဝ်မၢင်ဢၼ်ဢမ်ႇပွင်ႇလွင်ႈၵႃႈသင်ၼၼ်ႉသေလႄႈပႅတ်ႉလႅၼ်ပိူၼ်ႈၼၼ်ႉမီးၼမ်ၼႃႇဢေႃႈ။ ႁၢႆႉလိူဝ်ပိူၼ်ႈၼၼ်ႉပဵၼ်ၶဝ်ၸိူဝ်းဢၼ်သွၼ်ဝႃႈ၊ၵူၼ်းယုမ်ႇမၢတ်ႈလူဝ်ႇၸွမ်းထုင်းၸၢမ်ႇတၢင်းဢၼ်ပၢတ်ႈပၢႆၼင် ၵူၼ်းမဵဝ်း ၵျူး၊ ၶဝ်ၼၼ်ႉဢေႃႈ။-
ထုၵ်ႇလီဢိုတ်းသူပ်းၶဝ်ၼၼ်ႉဢေႃႈ။ ၵွပ်ႈပိူဝ်ႈဝႃႈ၊ၶဝ်ၸႂ်ၸပ်းၸႂ်ၸွႆးငိုၼ်းတွင်းသေလႄႈသင်ႇသွၼ်လွင်ႈဢၼ်ၶဝ်ဢမ်ႇထုၵ်ႇလီသွၼ်ၼၼ်ႉလႄႈၶဝ်လႆႈၶွမ်ႈပိၼ်ႈပႅတ်ႈတၢင်းယုမ်ႇမၢတ်ႈပိူၼ်ႈတင်းႁိူၼ်းတင်းယေးဢေႃႈ။-
သြႃႇမေႃၵႂၢမ်းၼႂ်းၵူၼ်း ၵရေႇတေႇ၊ ၶဝ်ၼင်ႇၵၼ်ၵေႃႉၼိုင်ႈယင်းယၢမ်ႈလၢတ်ႈလွင်ႈၵူၼ်းၶဝ်လႄႈဝႃႈ၊ “ၵူၼ်းမဵဝ်း ၵရေႇတေႇ၊ လၢတ်ႈပႅတ်ႉလၢတ်ႈလႅၼ်သေႇသေႇ၊ မိူၼ်တူဝ်ထိူၼ်ႇႁၢႆႉ၊ၶၢၼ်ႉဢိူၼ်လႄႈၵိၼ်ပူၼ်ႉၵိၼ်လိူဝ်၊” ဝႃႈၼင်ႇၼႆဢေႃႈ။-
ဢၼ်မၼ်းလၢတ်ႈၼၼ်ႉပဵၼ်ဢၼ်ၸိုဝ်ႈၸႂ်ႈဢေႃႈ။-
ၵွပ်ႈၼႆလႄႈၼင်ႇႁိုဝ်ၶဝ်တၵ်းမီးတၢင်းယုမ်ႇမၢတ်ႈဢၼ်မၢၼ်ႇဢၼ်မႅၼ်ႈ၊တၵ်းဢမ်ႇထွမ်ႇဢဝ်ဢပုမ်ႇၵႂၢမ်းလၢႆဢၼ်ၵူၼ်းမဵဝ်း ၵျူး၊ ၶဝ်ၶႆႈၵၼ်ဢုပ်ႇၵၼ်ၼၼ်ႉ၊ဢိၵ်ႇတင်းဢမ်ႇထွမ်ႇဢဝ်ပိင်ႇၺႃႇၵူၼ်းဢၼ်ၶတ်းၵၼ်တင်းတြႃးၸဝ်ႈၽြႃးဢၼ်ၸႅတ်ႈမၢၼ်ႇၼၼ်ႉၸိုင်၊သင်ႇသွၼ်သုင်းမႃႉပၼ်ၶဝ်ၼၵ်းၼၵ်းၼႃၼႃတႃႉ။-
ပုၼ်ႈတႃႇၶဝ်ၸိူဝ်းဢၼ်ၶၢဝ်ၸၢင်ႇၼၼ်ႉၵူႈၸိူဝ်ႉၵူႈမဵဝ်းၶၢဝ်ၸၢင်ႇဢေႃႈ။ ၵူၺ်းၵႃႈ၊ပုၼ်ႈၶဝ်ၸိူဝ်းဢၼ်ႁူဝ်ၸႂ်ၵူဝ်ႈၵိူၵ်ႇလႄႈဢမ်ႇယုမ်ႇမၢတ်ႈၼၼ်ႉၸမ်ႉ၊ဢမ်ႇမီးတၢင်းဢၼ်ၶၢဝ်ၸၢင်ႇသေၸိူဝ်ႉသေမဵဝ်း၊ပိူဝ်ႈဝႃႈ၊ႁူဝ်ၸႂ်ၶဝ်ဢိၵ်ႇတင်းၸႂ်ဢၼ်ႁုတူဝ်ၸဝ်ႈၵဝ်ႇၶဝ်ၼၼ်ႉၵူဝ်ႈၵိူၵ်ႇယူႇၼၼ်ႉဢေႃႈ။-
သူပ်းၶဝ်လၢတ်ႈဝႃႈ၊ၶဝ်ႁုၸၵ်းၽြႃးပဵၼ်ၸဝ်ႈသေၵေႃႈ၊တၢင်းၵမ်တၢင်းၵျၢင်ႉၶဝ်ၼၼ်ႉၼႄပျႃးဝႃႈ၊ၶဝ်ထဵင်ပႅတ်ႈမၼ်းၸဝ်ႈဢေႃႈ။ ၶဝ်ပဵၼ်ၵေႃႉဢၼ်လီႁင်ႈလီၸင်းၼႃႇလႄႈပဵၼ်ၶဝ်ၸိူဝ်းဢၼ်ဢမ်ႇထွမ်ႇၵႂၢမ်းသေလႄႈဢမ်ႇၸၢင်ႈႁဵတ်းလွင်ႈတၢင်းဢၼ်လီဢၼ်ငၢမ်းသေၸိူဝ်ႉသေပိူင်ဢေႃႈ။
မႂ်းၸမ်ႉ၊ႁေႃးလၢတ်ႈတြႃးၵႃႈဢၼ်ပဵၼ်တြႃးဢၼ်မၢၼ်ႇဢၼ်မႅၼ်ႈၼၼ်ႉတႃႉ။-
တိုၵ်းယူင်းႁႂ်ႈပေႃႈထဝ်ႈၵူၼ်းၵႄႇၶဝ်မီးပိင်ႇၺႃႇသတိ၊မီးဢဵင်ႇသရေႇသေထိင်းတူဝ်ၸဝ်ႈၵဝ်ႇတႃႉ။ ႁႂ်ႈၶဝ်မီးၸႂ်ဢၼ်မၼ်ႈၶိူင်ႇၼႂ်းၸႃႉၸဵမ်တၢင်းယုမ်ႇမၢတ်ႈ၊တၢင်းႁၵ်ႉပႅင်း၊ဢိၵ်ႇတင်းတၢင်းယိူၼ်ႉၶၢမ်ႇတႃႉ။-
မိူၼ်ၸိူဝ်ႉၼင်ႇၼၼ်တိုၵ်းယူင်းႁႂ်ႈမႄႈထဝ်ႈၵူၼ်းၵႄႇၶဝ်ၵမ်ၵျၢင်ႉမႅၼ်ႈၼင်ႇၵူၼ်းၼပ်ႉယမ်ၽြႃးတြႃးထုၵ်ႇလီၵမ်ၵျၢင်ႉၼၼ်ႉတႃႉ။ ယႃႇပေႁႂ်ႈၶဝ်ပဵၼ်ၵူၼ်းၶႃႉၸိုဝ်ႈၶၢႆသဵင်ပိူၼ်ႈ၊ၵူၼ်းဢၼ်ၸပ်းလဝ်ႈၸပ်းယႃႈၼၼ်ႉသေလႄႈ၊ႁႂ်ႈၶဝ်မေႃသင်ႇသွၼ်လွင်ႈတၢင်းဢၼ်လီဢၼ်မၢၼ်ႇၼၼ်ႉတႃႉ။-
ႁႂ်ႈၶဝ်ပဵၼ်ၵေႃႉဢၼ် ၸၢင်ႈမေႃသင်ႇသွၼ်သုင်းမႃႉမႄႈႁိူၼ်းၼုမ်ႇတင်းလၢႆႁႂ်ႈၶဝ်ၸၢင်ႈႁၵ်ႉပႅင်းၽူဝ်ၶဝ်ဢိၵ်ႇတင်းလုၵ်ႈလၢင်းၶဝ်သေလႄႈ၊-
ႁႂ်ႈၶဝ်လႆႈပဵၼ်မႄႈႁိူၼ်းဢၼ်ၸၢင်ႈထိင်းတူဝ်ၸဝ်ႈၵဝ်ႇ၊ၵေႃႉဢၼ်ၸႂ်ၶၢဝ်ၸၢင်ႇ၊ၵေႃႉဢၼ်ၸၢင်ႈထိင်းလုမ်းလႃး၊ၼႃႈႁိူၼ်းတႃယေးတူဝ်ၸဝ်ႈၵဝ်ႇ၊ၵေႃႉဢၼ်ၸႂ်လီၸႂ်ဝၢၼ်၊ၵေႃႉဢၼ်ၸၢင်ႈႁပ်ႉၶၢမ်ႇဢဝ်ၽူဝ်တူဝ်ၸဝ်ႈၵဝ်ႇပဵၼ်ငဝ်ႈႁိူၼ်းပုၼ်ႈလွင်ႈၼင်ႇႁိုဝ်ပိူၼ်ႈတၵ်းဢမ်ႇၸၢင်ႈသႄႉသွမ်းတြႃး၊ၽြႃးပဵၼ်ၸဝ်ႈၼၼ်ႉတႃႉ။
ပိူင်လဵဝ်ၵၼ်တိုၵ်းယူင်းႁႂ်ႈၵူၼ်းၸၢႆးၼုမ်ႇၶဝ်ပဵၼ်ၵေႃႉဢၼ်ထိင်းတူဝ်ၸဝ်ႈၵဝ်ႇတႃႉ။-
တူဝ်မႂ်းၵေႃႈႁႂ်ႈလွင်ႈတၢင်းၵူႈၸိူဝ်ႉၵူႈပိူင်ၵမ်ၵျၢင်ႉလီလီငၢမ်းငၢမ်းႁႂ်ႈလႆႈပဵၼ်ပုင်ႇသၢၵ်ႈသေႇတႃႉ။ ၼႂ်းတၢင်းဢၼ်သင်ႇသွၼ်ၼၼ်ႉႁႂ်ႈၸႂ်မႂ်းသိုဝ်ႈလီယူဝ်းလီလႄႈႁႂ်ႈၵႂၢမ်းမႂ်းမၢၼ်ႇမႅၼ်ႈတႃႉ။-
ၼင်ႇႁိုဝ်ပိူၼ်ႈတေဢမ်ႇၸၢင်ႈၸိၼႄးတၢင်ႇဢပျတ်ႈလႄႈ၊ၵေႃႉဢၼ်သၢၼ်ၶတ်းၼၼ်ႉတၵ်းဢမ်ႇမီးသေၸိူဝ်ႉသေပိူင် ဢၼ်မၼ်းသႄႉသွမ်းလႆႈၼၼ်ႉသေယဝ်ႉ၊မၼ်းတၵ်းလႆႈဢူၵ်းလႆႈဢၢႆတူဝ်ၸဝ်ႈၵဝ်ႇၵႂႃႇၼၼ်ႉၸိုင်၊ႁႂ်ႈၵႂၢမ်းမႂ်းမီးၼမ်ႉၼၵ်းတႃႉ။
တိုၵ်းယူင်းႁႂ်ႈၶဝ်ၸိူဝ်းဢၼ်ပဵၼ်ၶႃႈပိူၼ်ႈၼၼ်ႉႁပ်ႉၶၢမ်ႇဢဝ်ဢႃႇၼႃႇၸဝ်ႈၶဝ်သေ၊ၸွမ်းဢလူဝ်ႇၸဝ်ႈၶဝ်ၼႂ်းလွင်ႈတၢင်းၵူႈၸိူဝ်ႉၵူႈပိူင်တႃႉ။ ၶဝ်တၵ်းဢမ်ႇထုၵ်ႇလီၶိုၼ်းတွပ်ႇၶိုၼ်းထဵင်ၸဝ်ႈၶဝ်လႄႈ၊-
ဢမ်ႇထုၵ်ႇလီလၵ်ႉဢဝ်လွမ်ဢဝ်ၵႃႈတီႈၸဝ်ႈၶဝ်ဢေႃႈ။ ၼင်ႇႁိုဝ်ၸဝ်ႈၶဝ်တၵ်းလႆႈႁုႁၼ်ဝႃႈ၊တၢင်းသင်ႇသွၼ်ၽြႃးပဵၼ်ၸဝ်ႈ၊ၸဝ်ႈၵႄႇၶျွတ်ႈႁဝ်းၼၼ်ႉမီးဢၵျူဝ်းၸိုင်၊ၶဝ်ၸိူဝ်းဢၼ်ပဵၼ်ၶႃႈပိူၼ်ႈၼၼ်ႉ ယင်းလူဝ်ႇၼႄပျႃးသဵတ်ႈၸႃႇၶဝ်ၼႂ်းလွင်ႈတၢင်းဢၼ်ၶဝ်ႁဵတ်းၵူႈၸိူဝ်ႉၵူႈပိူင်ၼၼ်ႉဢေႃႈ။
လွင်ႈမၼ်းၸမ်ႉ၊ၼင်ႇႁိုဝ်ၵူၼ်းတင်းသဵင်ႈတင်းလူင်တၵ်းလႆႈၶၢမ်ႇတၢင်းဢၼ်ၵႄႇၶျွတ်ႈဢဝ်ၼၼ်ႉၽြႃးပဵၼ်ၸဝ်ႈလႆႈၼႄပျႃး ၵျေးၸူးမၼ်းၸဝ်ႈဢေႃႈ။-
ၵျေးၸူးၸဝ်ႈၼၼ်ႉသင်ႇသွၼ်သုင်းမႃႉႁဝ်းႁႂ်ႈလႆႈဝႄႈပႅတ်ႈတၢင်းဢၼ်ပိူင်ႈၽြႃးပိူင်ႈတြႃး၊ဢိၵ်ႇတင်းၸႂ်ဢၼ်ၸပ်းၸွႆးၸေးၸိမ်ႇလေႃးၵႃႉသေယဝ်ႉ၊ၼႂ်းၸၢတ်ႈၼႆႉႁႂ်ႈလႆႈမေႃထိင်းတူဝ်ၸဝ်ႈၵဝ်ႇ၊မီးၸႂ်ဢၼ်ပႂ်ႉဢဵင်ႇသရေႇလႄႈ၊ၵမ်ၵျၢင်ႉၼႂ်းတၢင်းဢၼ်ၼပ်ႉယမ် ၽြႃးတြႃးယူႇ၊-
ၼႂ်းၽွင်းယၢမ်းဢၼ်ႁဝ်းပႂ်ႉထႃႈဝၼ်းမၢင်ႇၵလႃႇဢၼ်ႁဝ်းမုင်ႈမွင်းယူႇ၊မိူဝ်ႈဢၼ်မုၼ်သရေႇၽြႃးပဵၼ်ၸဝ်ႈႁဝ်းဢၼ်ယႂ်ႇမျၢတ်ႈၼႃႇဢိၵ်ႇတင်းၸဝ်ႈၵႄႇၶျွတ်ႈႁဝ်း ၸဝ်ႈယေႇသုၶရိၸ်ႈ၊ တၵ်းပေႃႇမႃးထၢင်ႇသႃးၼၼ်ႉဢေႃႈ။-
မၼ်းၸဝ်ႈၸုၼ်ႉဢသၢၵ်ႈမၼ်းၸဝ်ႈပုၼ်ႈႁဝ်းႁႂ်ႈလႆႈထုတ်ႇၼုၵ်ႈဢဝ်ႁဝ်းဢွၵ်ႇသေၵႃႈၼႂ်းတုၸရိူၵ်ႈတင်းသဵင်ႈတင်းလူင်ဢိၵ်ႇတင်းႁဵတ်းႁႂ်ႈႁဝ်းလႆႈပဵၼ်ၵူၼ်းဢၼ်မီးၸႂ်ၶၢဝ်ၸၢင်ႇဢၼ်ပဵၼ်ၵူၼ်းမၼ်းၸဝ်ႈၵူၺ်းသေလႄႈမီးၸႂ်ၶႂ်ႈၵမ်ၵျၢင်ႉ လွင်ႈဢၼ်လီဢၼ်ငၢမ်းၼၼ်ႉဢေႃႈ။
ႁေႃးလၢတ်ႈလွင်ႈတၢင်းၸိူဝ်းၼႆႉတႃႉ။ ဢဝ်တင်းဢႃႇၼႃႇပျေႉပျေႉၸုမ်ႇၸုမ်ႇသေပၼ်ဢဵၼ်ပၼ်ႁႅင်းဢိၵ်ႇတင်းသုင်းမႃႉပၼ်သတိတီႈၶဝ်ၸိူဝ်းဢၼ်ထွမ်ႇဢဝ်မႂ်းၼၼ်ႉတႃႉ။ ယႃႇပေႁႂ်ႈၽူႈလႂ်ႁဵတ်းဢမ်ႇသၢင်းၵိၼ်မႂ်း။
ပၼ်သတိၵူၼ်းတင်းလၢႆႁႂ်ႈၶဝ်ႁပ်ႉၶၢမ်ႇဢဝ်ဢႃႇၼႃႇၶုၼ်မိူင်းၶဝ်တႃႉ။ ႁႂ်ႈၶဝ်ထွမ်ႇဢဝ်ၵႂၢမ်းၶုၼ်လႄႈၽွမ်ႉၸႂ်ၵၼ်ႁဵတ်းလွင်ႈလီၼႂ်းလွင်ႈတၢင်းၵူႈၸိူဝ်ႉၵူႈပိူင်ပၼ်ၶုၼ်တႃႉ။-
သင်ႇလၢတ်ႈႁႂ်ႈၶဝ်ဢမ်ႇသႄႉသွမ်းၽူႈလႂ်သေၵေႃႉသေၵူၼ်း၊ဢမ်ႇၽိတ်းဢမ်ႇထဵင်ပိူၼ်ႈလႄႈဝႆႉၸႂ်ယၢဝ်းယိူၼ်ႉၶၢမ်ႇပိူၼ်ႈလူၺ်ႈၸႂ်ဢၼ်ဢူၼ်ႈဢွၼ်ႇၼႂ်းတၢင်းဢၼ်မိုတ်ႈၵိုဝ်းပိူၼ်ႈၼၼ်ႉတႃႉ။-
လွင်ႈမၼ်းၸမ်ႉ၊မိူဝ်ႈဢွၼ်တၢင်းၼၼ်ႉႁဝ်းၵေႃႈယၢမ်ႈလႆႈပဵၼ်ၵူၼ်းဢၼ်ဢမ်ႇမီးတၢင်းၶႆႈၸႂ်၊ၵူၼ်းဢၼ်ဢမ်ႇၶႂ်ႈထွမ်ႇၵႂၢမ်းဢိၵ်ႇတင်းၵူၼ်းဢၼ်ႁဵတ်းၽိတ်းၼၼ်ႉမႃးယဝ်ႉဢေႃႈ။ ႁဝ်းယၢမ်ႈလႆႈပဵၼ်ၶႃႈၸေးၸိမ်ႇလေႃးၵႃႉၼႆႉမႃးယဝ်ႉလႄႈ၊မူၼ်ႈပျေႃႇလူၺ်ႈၸေးၸိမ်ႇလၢႆၸိူဝ်ႉလၢႆမဵဝ်းမႃးဢေႃႈ။ မိူဝ်ႈၼၼ်ႉႁဝ်းယၢမ်ႈလႆႈႁဵတ်းႁၢႆႉႁဵတ်းမိူၵ်ႈသေၶွႆပိူၼ်ႈဢေႃႈ။ ပိူၼ်ႈၸင်းႁဝ်း၊ႁဝ်းၵေႃႈၸင်းပိူၼ်ႈဢေႃႈ။-
ၵူၺ်းၵႃႈ၊မိူဝ်ႈဢၼ်ၸႂ်ၵရုၼႃႇဢိၵ်ႇတင်းတၢင်းႁၵ်ႉမႅတ်ႈတႃႇၽြႃးပဵၼ်ၸဝ်ႈ၊ၸဝ်ႈဢၼ်ၵႄႇၶျွတ်ႈႁဝ်းပေႃႇမႃးၼၼ်ႉ၊-
မၼ်းၸဝ်ႈၵႄႇသႄႇၶျွတ်ႈဢဝ်ႁဝ်းဢေႃႈ။ လွင်ႈတၢင်းၼႆႉပဵၼ်မႃးၵွပ်ႈပိူဝ်ႈၵုသူဝ်ႇဢၼ်လီဢၼ်ငၢမ်း၊ဢၼ်ႁဝ်းႁဵတ်းဝႆႉဢမ်ႇၸႂ်ႈလႄႈ၊မၼ်းပဵၼ်မႃးၵွပ်ႈပိူဝ်ႈၸဝ်ႈၽြႃးမီးၸႂ်ၵရုၼႃႇဢဵတ်းလူႁဝ်းလႄႈၵႄႇသႄႇၶျွတ်ႈဢဝ်ႁဝ်းလူၺ်ႈတၢင်းဢၼ်သုၵ်ႈပွတ်ႈႁႂ်ႈႁဝ်းၶိုၼ်းၵိူတ်ႇလဵင်ႉမႂ်ႇမႂ်ႇသေ၊မီးဢသၢၵ်ႈမႂ်ႇၼႂ်းဝိၺိၺ်ႇမူတ်းၸၢင်ႇၸဝ်ႈဢေႃႈ၊-
ဢၼ်မၼ်းၸဝ်ႈပၼ်ႁဝ်းၼမ်ၼႃႇၼႂ်း ၸဝ်ႈယေႇသုၶရိၸ်ႈ၊ ၸဝ်ႈၵႄႇၶျွတ်ႈႁဝ်းၼၼ်ႉဢေႃႈ။-
ၵွပ်ႈလူၺ်ႈၵျေးၸူးမၼ်းၸဝ်ႈလႄႈႁဝ်းလႆႈၶၢမ်ႇဢဝ်တၢင်းဢၼ်ၵႄႈလိတ်ႈဢပျတ်ႈႁဝ်းသေလႆႈၶဝ်ႈပႃးပဵၼ်လုၵ်ႈလၢင်းမၼ်းၸဝ်ႈဢၼ်မီးတၢင်းမုင်ႈမွင်းဢသၢၵ်ႈထႃႇဝရႃႉၼၼ်ႉဢေႃႈ။-
ၵႂၢမ်းၼႆႉပဵၼ်ၵႂၢမ်းသဵတ်ႈၸႃႇဢေႃႈ။ ၵဝ်မီးဢလူဝ်ႇၶႂ်ႈႁႂ်ႈမႂ်းၶတ်းၸႂ်ႁေႃးလၢတ်ႈလွင်ႈၸိူဝ်းၼႆႉၼင်ႇႁိုဝ်ၶဝ်ၸိူဝ်းဢၼ်ယုမ်ႇမၢတ်ႈၽြႃးပဵၼ်ၸဝ်ႈတၵ်းဝႆႉသတိပွင်ႁဵတ်းၵၢၼ်လီၵၢၼ်ငၢမ်းဢေႃႈ။ လွင်ႈၸိူဝ်းၼႆႉပဵၼ်လွင်ႈလီသေဢမ်ႇၵႃး၊မၼ်းပဵၼ်လွင်ႈဢၼ်ၸၢင်ႈပၼ်ဢၵျူဝ်းၵူၼ်းတင်းလၢႆဢေႃႈ။-
ဝႄႈပႅတ်ႈၵႂၢမ်းဢၼ်တွပ်ႇထဵင်ၵၼ်၊ဢၼ်ဢမ်ႇပွင်ႇလွင်ႈသင်၊လွင်ႈၸရၢင်းၸိူဝ်ႉၶိူဝ်းပူႇပေႃႈသိုပ်ႇသိုပ်ႇတၢမ်တၢမ်၊ဢိၵ်ႇတင်းတၢင်းဢၼ်ၽိတ်းၵၼ်ထဵင်ၵၼ်၊လူၺ်ႈလွင်ႈတြႃးပိင်းၺၢပ်ႈတင်းလၢႆၼၼ်ႉတႃႉ။ လွင်ႈၸိူဝ်းၼႆႉပဵၼ်လွင်ႈဢၼ်ဢမ်ႇမီးဢၵျူဝ်းလႄႈဢမ်ႇပွင်ႇလွင်ႈသင်ဢေႃႈ။-
ၵေႃႉဢၼ်ၸၢင်ႈၽႄၵိူင်းၶႂၢႆးၵိူင်းၼၼ်ႉၸိုင်၊ပၼ်သတိမၼ်းသွင်ပွၵ်ႈယဝ်ႉၸင်ႇပႄႇပႅတ်ႈမၼ်းတႃႉ။-
ၵူၼ်းၸိူဝ်ႉၼင်ႇၼၼ်ၼၼ်ႉပဵၼ်ၵူၼ်းယႃႉၵူၼ်းၵဝ်းဢၼ်ႁုတၢင်းၽိတ်းတူဝ်ၸဝ်ႈၵဝ်ႇယူႇသေၵေႃႈသိုပ်ႇႁဵတ်းဢပျတ်ႈယူႇၼၼ်ႉဢေႃႈ။
မိူဝ်ႈဢၼ်ၵဝ်ပွႆႇၸႂ်ႉ ဢႃႇတေႇမႃႉ၊ ဢမ်ႇၼၼ် တုၶႅၵ်ႉ၊ ၵႂႃႇၸူးမႂ်းၸိုင်၊ၶတ်းၸႂ်မႃးႁႃၵဝ် ၵႃႈတီႈဝဵင်း ၼိၵေႃးပလိ၊ ပုၼ်ႉတႃႉ။ ၵဝ်ယင်းတၵ်းယူႇၵႃႈတီႈၼၼ်ႈၸူဝ်ႈၶၢဝ်းၶိင်ႇၵတ်းၼႆႉဢေႃႈ။-
ၶတ်းၸႂ်ၸွႆႈထႅမ်သြႃႇဢုပတေႇ ၸေႇၼႃႉ၊ တင်းသြႃႇ ဢႃႇပေႃးလု၊ ၸဵဝ်းလႆႈဢွၵ်ႇတႃဢွၵ်ႇတၢင်းၵႂႃႇတႃႉ။ ၸွႆႈထႅမ်ၶဝ်သွင်ၵေႃႉ၊ယႃႇႁႂ်ႈၶဝ်ၶၢတ်ႇသေၸိူဝ်ႉသေပိူင်။-
ႁႂ်ႈၵူၼ်းႁဝ်းၵူႈၵေႃႉသွၼ်ဢဝ်ဢၵျၢင်ႉဢၼ်ၸၢင်ႈႁဵတ်းလွင်ႈလီၼၼ်ႉ၊ႁႂ်ႈလႆႈၸွႆႈထႅမ်ၶဝ်ၸိူဝ်းဢၼ်ၸုတ်ႈဢၼ်လုတ်ႈၼၼ်ႉတႃႉ။ ယႃႇႁႂ်ႈၶဝ်ယူႇမဝ်ၵိၼ်မၢင်သေၵမ်း။
ၶဝ်ၸိူဝ်းဢၼ်မီးယူႇလူၺ်ႈၵဝ်ၵူႈၵေႃႉၵူႈၵူၼ်းတၵ်ႉၼၢႆသူယူႇဢေႃႈ။ ၶႅၼ်းတေႃႈတၵ်ႉၼၢႆပၼ်ၶၢဝ်ႇတီႈပီႈၼွင်ႉဢၼ်ႁၵ်ႉႁဝ်းၼႂ်းတၢင်းယုမ်ႇမၢတ်ႈၼၼ်ႉတႃႉ။ ႁႂ်ႈၵျေးၸူးၽြႃးပဵၼ်ၸဝ်ႈမီးယူႇလူၺ်ႈၵၼ်တင်းသူၵူႈၵေႃႉၵူႈၵူၼ်းသေၵမ်းလူၺ်ႈ။ လိၵ်ႈတြႃးတိတုယဝ်ႉယဝ်ႉဢေႃႈ။
ၵဝ် ပေႃးလု၊ ဢၼ်လႆႈၶၢမ်ႇတူၵ်းထွင်ႇယူႇၵွပ်ႈပိူဝ်ႈတၢင်းယုမ်ႇမၢတ်ႈၼႂ်း ၸဝ်ႈယေႇသုၶရိၸ်ႈ၊ ၼႆႉဢိၵ်ႇတင်းသြႃႇ တိမေႃးသေႇ၊ ၼွင်ႉႁဝ်းၼႂ်းတၢင်းယုမ်ႇမၢတ်ႈမီးလိၵ်ႈပၼ်ထိုင် ၽိလေႇမုၼ်ႇ၊ ၵေႃႉသႄႈဢၼ်ႁဝ်းႁၵ်ႉပႅင်းလႄႈႁဵတ်းၵၢၼ်ၸဝ်ႈၽြႃးၸွမ်းႁဝ်း၊-
ဢိၵ်ႇတင်းၵူၼ်းၸိူဝ်းဢၼ်ၸုတုမ်ၵၼ်ၵႃႈၼႂ်းႁိူၼ်းသူ၊ဢိၵ်ႇပႃးတင်း ဢပ်ႉပိ၊ ၼွင်ႉယိင်းႁဝ်းၼႂ်းတၢင်းယုမ်ႇမၢတ်ႈ၊ဢိၵ်ႇတင်း ဢႃႇၶိပ်ႉပု၊ ၵေႃႉဢၼ်ႁူမ်ႈတိုၵ်းတေႃးပုၼ်ႈၸဝ်ႈၽြႃးၸွမ်းႁဝ်းၼၼ်ႉဢေႃႈ။
ႁႂ်ႈပေႃႈႁဝ်းၶႃႈ၊ၽြႃးပဵၼ်ၸဝ်ႈတင်းၸဝ်ႈၽြႃး ယေႇသုၸဝ်ႈၶရိၸ်ႈ၊ ပၼ်သုၵျေးၸူးဢိၵ်ႇတင်း တၢင်းၼိမ်ၶျၢမ်းသႃႇတီႈမႂ်းသေၵမ်းလူၺ်ႈ။
မိူဝ်ႈဢၼ်ၵဝ်သူးတွင်းၵူႈပွၵ်ႈၼၼ်ႉ၊ၵဝ်လၢတ်ႈပႃးၸိုဝ်ႈမႂ်း၊ယွင်ႈယေႃးတၢင်ႇၵျေးၸူးၽြႃးပဵၼ်ၸဝ်ႈၵဝ်တႃႇသေႇဢေႃႈ။-
ၵဝ်လႆႈငိၼ်းၶၢဝ်ႇလွင်ႈတၢင်းႁၵ်ႉ၊ဢိၵ်ႇတင်းတၢင်းယုမ်ႇမၢတ်ႈ ဢၼ်မႂ်းမီးၵႃႈတီႈၸဝ်ႈၽြႃး ယေႇသု၊ ဢိၵ်ႇတင်းၵႃႈတီႈၵူၼ်းမူတ်းၸၢင်ႇၸဝ်ႈၽြႃးတင်းလၢႆၼၼ်ႉဢေႃႈ။-
လွင်ႈဢၼ်ၵဝ်သူးတွင်းၸမ်ႉ၊ႁႂ်ႈဢႁုင်ႇတၢင်းယုမ်ႇမၢတ်ႈမႂ်းဢၼ်ႁူမ်ႈပွင်းပိူၼ်ႈၼၼ်ႉ၊လႆႈပဵၼ်ဢၵျူဝ်းပုၼ်ႈမႂ်းၼႂ်းတၢင်းဢၼ်ႁုၸႅင်ႈလွင်ႈဢၼ်လီဢၼ်ငၢမ်းၵူႈၸိူဝ်ႉၵူႈပိူင်ဢၼ်မီးၼႂ်း ၸဝ်ႈၶရိၸ်ႈ၊ ၼၼ်ႉၸိုင်၊ၵဝ်သူးတွင်းဢေႃႈ။-
ၼွင်ႉၵဝ်႟။ ၵွပ်ႈပိူဝ်ႈတၢင်းႁၵ်ႉမႅတ်ႈတႃႇမႂ်းလႆႈႁဵတ်းႁႂ်ႈႁုၸႂ်ၵူၼ်းမူတ်းၸၢင်ႇၸဝ်ႈၽြႃးတင်းလၢႆသၢၵ်ႈသႃႇၼၼ်ႉလႄႈႁူဝ်ၸႂ်ၵဝ်ၸူမ်းသိူဝ်းၼႃႇလူင်လၢင်လႄႈမီးဢဵၼ်ႁႅင်းဢေႃႈ။
ပေႃးဝႃႈတႄႉမၼ်း၊ၵဝ်ႁတ်းဢိင်ပိုင်ႈ ၸဝ်ႈယေႇသုၶရိၸ်ႈ၊ သေပၼ်ဢမိင်ႉႁႂ်ႈမႂ်းႁဵတ်းဢၼ်မႂ်းထုၵ်ႇလီႁဵတ်းၼၼ်ႉဢေႃႈ။-
ၼႂ်းဝႃႈၼၼ်သေၵေႃႈ၊ၵဝ်ဢဝ်တင်းမႅတ်ႈတႃႇၵူၺ်းတွင်းပၢၼ်ႇမႂ်းဢေႃႈ။ ပိၵ်ႉသမ်ႉၵဝ်ပဵၼ် ပေႃးလု၊ ၵေႃႉဢၼ် ၸဝ်ႈယေႇသုၶရိၸ်ႈ၊ ပွႆႇၸႂ်ႉၵႂႃႇႁေႃးတြႃးမၼ်းၸဝ်ႈလႄႈ၊မိူဝ်ႈလဵဝ်ၼႆႉလႆႈၶၢမ်ႇတူၵ်းထွင်ႇယူႇၵွပ်ႈပိူဝ်ႈယုမ်ႇမၢတ်ႈမၼ်းၸဝ်ႈၼၼ်ႉသေၵေႃႈ၊ၵဝ်ယင်းတွင်းပၢၼ်ႇမႂ်း၊-
ပုၼ်ႈတႃႇ ဢေႃးၼေႇသိမ်ႇ၊ ဢၼ်ၵဝ်မၢတ်ႈပဵၼ်လုၵ်ႈၸၢႆးၵဝ်၊ၵေႃႉဢၼ်ၵဝ်ႁႂ်ႈၵိူတ်ႇလဵင်ႉမႃးၽၢႆႇၸႂ်ဝိၺိၺ်ႇၼႂ်းမိူဝ်ႈဢၼ်ၵဝ်တူၵ်းထွင်ႇယူႇၼႆႉဢေႃႈ။-
မိူဝ်ႈဢွၼ်တၢင်းၼၼ်ႉ၊မၼ်းဢမ်ႇမီးဢၵျူဝ်းၵႃႈသင်ပုၼ်ႈတႃႇမႂ်းသေၵေႃႈ၊မိူဝ်ႈလဵဝ်ၼႆႉမၼ်းမီးဢၵျူဝ်းမႃးပုၼ်ႈႁဝ်းတင်းသွင်ၵေႃႉယဝ်ႉဢေႃႈ။
ၵဝ်ပွႆႇမၼ်းၶိုၼ်းမိူဝ်းၵႂႃႇၸူးမႂ်းမိူၼ်ၵၼ်တင်းသူင်ႇႁူဝ်ၸႂ်ၵဝ်မႃးၼၼ်ႉယဝ်ႉ၊ႁပ်ႉတုင်းဢဝ်မၼ်းသေၵမ်း။-
ၸွမ်းၸႂ်ၵဝ်တႄႉၵဝ်ၶႂ်ႈဢဝ်မၼ်းဝႆႉ၊ပဵၼ်ၵေႃႉဢၼ်တၢင်တူဝ်မႂ်းလႄႈလူတူၺ်းလုမ်းလႃးၵဝ်ၼႂ်းမိူဝ်ႈဢၼ်ၵဝ်တူၵ်းထွင်ႇၵွပ်ႈပိူဝ်ႈၶၢဝ်ႇတြႃးသိူဝ်းပျေႃႇၸဝ်ႈယူႇၼၼ်ႉဢေႃႈ။-
ၵူၺ်းၵႃႈ၊ပေႃးမႂ်းယင်းဢမ်ႇပျေႃႇၸႂ်ၸိုင်၊ၵဝ်ဢမ်ႇၶႂ်ႈႁႂ်ႈမႂ်းၸွႆႈထႅမ်ၵဝ်၊ၵဝ်ၶႂ်ႈႁႂ်ႈမႂ်းလႆႈႁဵတ်းၸွမ်းၵႃႈၼင်ႇဢလူဝ်ႇၵၢင်ၸႂ်မႂ်းမီးၼၼ်ႉလႄႈ၊ပေႃးမႂ်းယင်းဢမ်ႇၽွမ်ႉၸိုင်၊ၵဝ်ဢမ်ႇၶႂ်ႈႁဵတ်းသေၸိူဝ်ႉသေပိူင်ဢေႃႈ။-
ၵွပ်ႈပိူဝ်ႈလွင်ႈတၢင်းဢၼ် ဢေႃးၼေႇသိမ်ႇ၊ လႆႈၽၢတ်ႇယၢၼ်မႂ်းၵႂႃႇၸူဝ်ႈၼိုင်ႈၶၢဝ်းၼိုင်ႈၼႆႉ၊ႁဵတ်းႁႂ်ႈမၼ်းလႆႈမႃးၶိုၼ်းယူႇၸွမ်းမႂ်းၵႂႃႇသေႇသေႇၼၼ်ႉဢေႃႈ။-
မၼ်းဢမ်ႇၸႂ်ႈၶႃႈၵူၼ်းၸႂ်ႉယဝ်ႉလႄႈ၊မႂ်းတၵ်းလႆႈမၢတ်ႈမၼ်းလိူဝ်တွၼ်းသေၶႃႈၵူၼ်းၸႂ်ႉၵေႃႉၼိုင်ႈ၊ၸိူဝ်ႉၼင်ႇဢၼ်ပဵၼ်ၼွင်ႉၸၢႆးမႂ်းၼႂ်းတၢင်းယုမ်ႇမၢတ်ႈၼၼ်ႉဢေႃႈ။ ၵဝ်ႁၵ်ႉပႅင်းမၼ်းတႄႉတႄႉ။ ထၢင်ႇဝႃႈ၊မႂ်းၵေႃႈတၵ်းယဵင်ႈၶႅၼ်းႁၵ်ႉပႅင်းမၼ်းၵွပ်ႈပိူဝ်ႈဝႃႈ၊မၼ်းပဵၼ်ၶႃႈမႂ်း၊ဢိၵ်ႇတင်းၼွင်ႉၸၢႆးမႂ်းၼႂ်းၸဝ်ႈၽြႃးၼၼ်ႉဢေႃႈ။
ပိူဝ်ႈၼႆလႄႈ၊ပေႃးမႂ်းမၢတ်ႈၵဝ်ပဵၼ်ၵေႃႉႁူမ်ႈၵၢၼ်လူၺ်ႈၵၼ်တင်းမႂ်းၸိုင်၊ႁပ်ႉၶၢမ်ႇဢဝ်မၼ်းၶိုၼ်းမိူၼ်ၸိူဝ်ႉၼင်ႇဢၼ်မႂ်းႁပ်ႉၶၢမ်ႇဢဝ်ၵဝ်ၼၼ်ႉတႃႉ။-
သင်ဝႃႈ၊မၼ်းလႆႈၽိတ်းပိူင်ႈမႂ်းသေၸိူဝ်ႉသေပိူင်လႄႈထုၵ်ႇၼီႈထုၵ်ႇၶွတ်ႇမႂ်းၸိုင်၊မၢတ်ႈပဵၼ်ပုၼ်ႈတႃႇၵဝ်တႃႉ။-
ၵဝ် ပေႃးလု၊ ဢဝ်တင်းမိုဝ်းတူဝ်ၸဝ်ႈၵဝ်ႇတႅမ်ႈဝႃႈ၊ၵဝ်တေၶိုၼ်းသၢႆႈမႂ်းဢေႃႈ။ (ၵဝ်ဢမ်ႇမီးတီႈတၵ်းပၼ်သတိမႂ်းဝႃႈ၊မႂ်းယင်းပဵၼ်ၼီႈၵဝ်လူၺ်ႈလွင်ႈဢသၢၵ်ႈမႂ်းၼႂ်း ၸဝ်ႈယေႇသု၊ ၼၼ်ႉဢေႃႈ။-)
ၼွင်ႉၸၢႆးၵဝ်႟။ ၶႅၼ်းတေႃႈႁဵတ်းၵျေးၸူးတီႈၵဝ်ၼႂ်းၸဝ်ႈၽြႃးသေၵမ်း။ ႁႂ်ႈၸႂ်ၵဝ်လႆႈမူၼ်ႈပျေႃႇၼႂ်း ၸဝ်ႈၶရိၸ်ႈ၊ သေၵမ်း။
ၵဝ်ယုမ်ႇယမ်ဝႃႈ၊မႂ်းတေထွမ်ႇဢဝ်ၵႂၢမ်းဢၼ်ၵဝ်ယွၼ်းထိုင်မႂ်းၼႆႉၵူၺ်းဢမ်ႇၵႃး၊မႂ်းယင်းတေႁဵတ်းလိူဝ်တွၼ်းသေၼႆႉလူးၵွၼ်ႇလႄႈၵဝ်တႅမ်ႈလိၵ်ႈၼႆႉထိုင်မႂ်းယဝ်ႉ။-
လိူဝ်သေၼၼ်ႉ၊မႄးႁႅၼ်းတီႈၼွၼ်းဝႆႉပုၼ်ႈတႃႇၵဝ်သေၵမ်း။ ပိူဝ်ႈဢၼ်ၵဝ်မုင်ႈမွင်းဝႃႈ၊ၸဝ်ႈၽြႃးတေထွမ်ႇဢဝ်ၵႂၢမ်းသူးတွင်းသူတင်းလၢႆသေလႄႈပၼ်ဢၶႂၢင်ႉႁႂ်ႈၵဝ်လႆႈမႃးတီႈၸူးသူဢေႃႈ။
ဢေႇပႃႇၽရတ်ႉ၊ ၵေႃႉဢၼ်တူၵ်းထွင်ႇယူႇၸွမ်းၵဝ်၊ၵွပ်ႈပိူဝ်ႈတၢင်းယုမ်ႇမၢတ်ႈၼႂ်း ၸဝ်ႈယေႇသုၶရိၸ်ႈ၊-
ဢိၵ်ႇတင်းၸိူဝ်းဢၼ်ႁူမ်ႈၵၢၼ်လူၺ်ႈၵၼ်တင်းၵဝ်၊ မႃႇၵု၊ဢႃႇရိတ်ႉတႃႇၶု၊တေႇမႃႉ၊ တင်း လုၵႃႇ၊ ၶဝ်ၵေႃႈ၊သူင်ႇမႅတ်ႈတႃႇပၼ်ထိုင်မႂ်းယူႇဢေႃႈ။
ႁႂ်ႈၵျေးၸူးၸဝ်ႈၽြႃး ယေႇသုၶရိၸ်ႈ၊ မီးလူၺ်ႈၵၼ်တင်းၸႂ်ဝိၺိၺ်ႇမႂ်းသေၵမ်းလူၺ်ႈ။ လိၵ်ႈတြႃးၽိလေႇမုၼ်ႇယဝ်ႉယဝ်ႉဢေႃႈ။
ၶိင်ႇၵႃႇလႃႉဢၼ်ပူၼ်ႉမႃးၼၼ်ႉ၊ၽြႃးပဵၼ်ၸဝ်ႈဢဝ်တင်းသူပ်းၵႂၢမ်းပရေႃးၽႅတ်ႈ တင်းလၢႆသေလႄႈလၢတ်ႈတေႃႇပူႇမွၼ်ႇႁဝ်းၶဝ်၊ပဵၼ်ပွၵ်ႈပဵၼ်ၵမ်းၼမ်ၼႃႇလူၺ်ႈလွၵ်းလၢႆး၊လၢႆၸိူဝ်ႉလၢႆပိူင်ယဝ်ႉလႄႈ၊-
ၼႂ်းၶိင်ႇၵႃႇလႃႉလိုၼ်းလင်သုတ်းၼႆႉၸမ်ႉ၊ဢဝ်တင်းလုၵ်ႈမၼ်းၸဝ်ႈသေလႄႈလၢတ်ႈတေႃႇႁဝ်းဢေႃႈ။ လုၵ်ႈၸဝ်ႈၼႆႉ၊ၽြႃးပဵၼ်ၸဝ်ႈလိူၵ်ႈဝႆႉႁႂ်ႈလႆႈပဵၼ်ၸဝ်ႈဢၼ်လႆႈၶၢမ်ႇဢဝ်ဢမူၺ်ႇၵႃႈမီးတင်းသဵင်ႈတင်းလူင်လႄႈၵွပ်ႈလူၺ်ႈလုၵ်ႈၸဝ်ႈၼႆႉ၊ၽြႃးပဵၼ်ၸဝ်ႈၽၢၼ်ႇသၢင်းႁဵတ်းပဵၼ်လေႃးၵထၢတ်ႈတင်းလၢႆဝႆႉဢေႃႈ။-
လုၵ်ႈၸဝ်ႈၼႆႉ၊ပဵၼ်သၢႆလႅင်းႁိူဝ်ႈမၢပ်ႈမုၼ်ၽုင်းၽြႃးပဵၼ်ၸဝ်ႈ၊ပဵၼ်ပုင်ႇႁၢင်ႈၸႃႇတိၽြႃးပဵၼ်ၸဝ်ႈလႄႈဢဝ်တင်းၵႂၢမ်းဢၼ်ပျေႉၸုမ်ႇလူၺ်ႈတၼ်းၶူဝ်းၼၼ်ႉ၊ၵမ်ႉထွၵ်ႈၶိူင်ႈပိူင်ၵႃႈမီးတင်းသဵင်ႈတင်းလူင်ဢေႃႈ။ မိူဝ်ႈဢၼ်မၼ်းၸဝ်ႈပႄႇၽဵဝ်ႈပႅတ်ႈဢပျတ်ႈၵူၼ်းတင်းလၢႆၼၼ်ႉၸိုင်၊မၼ်းၸဝ်ႈၼင်ႈယူႇၵႃႈတီႈၽၢႆႇၶႂႃၸဝ်ႈ၊ဢၼ်ပဵၼ်ၸဝ်ႈဢၼၼ်ႇတႃႉတၼ်းၶူဝ်းဢၼ်သုင်မျၢတ်ႈၼၼ်ႉဢေႃႈ။
လုၵ်ႈၸဝ်ႈၼၼ်ႉ၊လႆႈၶၢမ်ႇတၢင်းဢၼ်လိူၵ်ႈဝႆႉ၊ႁႂ်ႈလႆႈယႂ်ႇမျၢတ်ႈသေတမၢၼ်ႇၵၢင်ႁၢဝ်တင်းလၢႆ၊မႅၼ်ႈၵႃႈၼင်ႇဢၼ်ၽြႃးပဵၼ်ၸဝ်ႈပၼ်ၸိုဝ်ႈသဵင်ဢၼ်မျၢတ်ႈၼႃႇသေၸိုဝ်ႈသဵင်ၶဝ်ၼၼ်ႉဢေႃႈ။-
လွင်ႈမၼ်းၸမ်ႉ၊ၽြႃးပဵၼ်ၸဝ်ႈဢမ်ႇတွၼ်ႉလၢတ်ႈတီႈတမၢၼ်ႇၵၢင်ႁၢဝ်ပႃးလႂ်သေပွၵ်ႈလႄႈဝႃႈ၊ “မႂ်းပဵၼ်လုၵ်ႈၸၢႆးၵဝ်ဢေႃႈ။ ၼႂ်းဝၼ်းမိူဝ်ႈၼႆႉၵဝ်ႁႂ်ႈမႂ်းၵိူတ်ႇလဵင်ႉမႃးယဝ်ႉ၊” ဝႃႈၼင်ႇၼႆလႄႈ သမ်ႉလၢတ်ႈထႅင်ႈလႄႈဝႃႈ၊ “ၵဝ်တၵ်းပဵၼ်ပေႃႈမၼ်းဢေႃႈ။ မၼ်းၵေႃႈတၵ်းပဵၼ်လုၵ်ႈၸၢႆးၵဝ်ဢေႃႈ၊” ဝႃႈၼင်ႇၼႆၼၼ်ႉဢေႃႈ။
ၵူၺ်းၵႃႈ၊မိူဝ်ႈဢၼ်ၽြႃးပဵၼ်ၸဝ်ႈပွႆႇၸႂ်ႉလုၵ်ႈတူၼ်ႈမၼ်းၸဝ်ႈမႃးၼႂ်းလေႃးၵႃႉၼၼ်ႉ၊မၼ်းၸဝ်ႈယင်းလၢတ်ႈလႄႈဝႃႈ၊ “ႁႂ်ႈတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈတင်းသဵင်ႈတင်းလူင်၊ ၶုပ်ႉဝႆႈၵူဝ်းၵႂၢႆႇမၼ်းၸဝ်ႈတႃႉ၊” ဝႃႈၼင်ႇၼႆဢေႃႈ။
ဢၼ်ပဵၼ်တမၢၼ်ႇၵၢင်ႁၢဝ်တင်းလၢႆၼၼ်ႉ၊ၽြႃးပဵၼ်ၸဝ်ႈလၢတ်ႈလႄႈဝႃႈၸမ်ႉ၊ “ၽြႃးပဵၼ်ၸဝ်ႈႁဵတ်းႁႂ်ႈတမၢၼ်ႇၵၢင်ႁၢဝ်မၼ်းၸဝ်ႈတင်းလၢႆပဵၼ်မိူၼ်ၸိူဝ်ႉၼင်ႇလူမ်းလႄႈ၊ ၽူႈၸႂ်ႉသွႆမၼ်းၸဝ်ႈတင်းလၢႆ၊သမ်ႉပဵၼ်မိူၼ်ၸိူဝ်ႉၼင်ႇပဵဝ်ၽႆးဢေႃႈ၊” ဝႃႈၼင်ႇၼႆဢေႃႈ။
တီႈလုၵ်ႈၸဝ်ႈၼၼ်ႉၸမ်ႉ၊ၽြႃးပဵၼ်ၸဝ်ႈလၢတ်ႈလႄႈဝႃႈ၊ “ဢူဝ်း၊ၽြႃးပဵၼ်ၸဝ်ႈ။ ပလၢင်ႇၸဝ်ႈႁဝ်းပဵၼ်ပလၢင်ႇၼိၵ်ႈၸႃႉထႃႇဝရႃႉတီႈၶႃႈဢေႃႈ။ ဢႃႇၼႃႇၸၢၵ်ႈၸဝ်ႈႁဝ်းၼၼ်ႉ၊ဢုပ်ႉပိူင်ႇၵူၼ်းၸဝ်ႈႁဝ်းသိုဝ်ႈတေႃႇၼႃႇတီႈၶႃႈဢေႃႈ။
ၸဝ်ႈႁဝ်းႁၵ်ႉတြႃးတၢင်းဢၼ်သိုဝ်ႈတေႃႇလႄႈၸင်းတၢင်းဢၼ်ၽိတ်းပိူင်ႈဢေႃႈ။ ပိူဝ်ႈၼႆလႄႈၽြႃးပဵၼ်ၸဝ်ႈ၊ၸဝ်ႈႁဝ်းၼၼ်ႉဢဝ်တင်းၼမ်ႉမၼ်းတၢင်းဢၼ်သိူဝ်းပျေႃႇသေလႄႈ ပၼ်ၽိၵ်ႈသိၵ်ႈတီႈၸဝ်ႈႁဝ်းလႄႈယုၵ်ႉယွင်ႈဝႆႉၵႃႈၼိူဝ်ၵေႃႉသႄႈၸဝ်ႈႁဝ်းတင်းလၢႆယဝ်ႉဢေႃႈ၊” ဝႃႈၼင်ႇၼႆၵူၺ်းဢမ်ႇၵႃး။
သမ်ႉလၢတ်ႈထႅင်ႈလႄႈဝႃႈ၊ “ၸဝ်ႈၽြႃးတီႈၶႃႈ။ ၸဵမ်မိူဝ်ႈၵေႃႇၸႃႉႁူဝ်ပိုင်းၼၼ်ႉ၊ ၸဝ်ႈႁဝ်းၽၢၼ်ႇသၢင်းလိၼ်မိူင်းလႄႈ၊ ဢဝ်တင်းမိုဝ်းၸဝ်ႈႁဝ်းႁဵတ်းပဵၼ်ၽႃႉၵၢင်ႁၢဝ်တီႈၶႃႈဢေႃႈ။
လွင်ႈတၢင်းၸိူဝ်းၼႆႉ၊တၵ်းလုလႅဝ်ၵႂႃႇသေၵေႃႈ၊ ၸဝ်ႈႁဝ်းတၵ်းတေၵိုတ်းဝႆႉမီးယူႇဢေႃႈ။ လွင်ႈတၢင်းၸိူဝ်းၼၼ်ႉ၊ၸၢင်ႈၵဝ်ႇၸၢင်ႈမွင်ၵႂႃႇမိူၼ်ၸိူဝ်ႉၼင်ႇၶူဝ်းလဵင်းဢေႃႈ။
ၸဝ်ႈႁဝ်းတၵ်းတူပ်ႉၵဵၼ်ၶဝ်ဝႆႉ၊မိူၼ်ၸိူဝ်ႉၼင်ႇသိူဝ်ႈသွၼ်ႉလႄႈ၊ ၶဝ်တၵ်းလႆႈၶၢမ်ႇတၢင်းဢၼ်ပုတ်ႈလၢႆႈ မိူၼ်ၸိူဝ်ႉၼင်ႇၶူဝ်းၼုင်ႈဢေႃႈ။ ၵူၺ်းၵႃႈ၊ၸဝ်ႈႁဝ်းၸမ်ႉ၊ပဵၼ်ပၵ်းၵဝ်ႇပိူင်ၵဝ်ႇယူႇသေႇသေႇသေလႄႈ၊ ၸူဝ်ႈၸၢတ်ႈၸဝ်ႈႁဝ်းဢမ်ႇမီးတီႈသုတ်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈဢမ်ႇတွၼ်ႉမီးဢမိင်ႉ၊တီႈတမၢၼ်ႇၵၢင်ႁၢဝ် ပႃးလႂ်သေပွၵ်ႈလႄႈဝႃႈ၊ “ၼင်ႈယူႇၵႃႈတီႈၽၢႆႇၶႂႃၵဝ်ၼႆႉတေႃႇထိုင်ႁွတ်ႈ၊ ၵဝ်ဢဝ်ရၢၼ်ႇသူႇၵဝ်တင်းလၢႆ၊တမ်းဝၢင်းပၼ်ႁႂ်ႈလႆႈပဵၼ်တီႈတၢင်ႇတိၼ်မႂ်းၼၼ်ႉတႃႉ၊” ဝႃႈၼင်ႇၼႆၼၼ်ႉဢေႃႈ။
တမၢၼ်ႇၵၢင်ႁၢဝ်တင်းလၢႆၼၼ်ႉ၊ပဵၼ်ၼၢမ်ႇဝိၺိၺ်ႇဢၼ်ၶၢမ်ႇတၢင်းၸႂ်ႉတၢင်းသွႆၵႃႈတီႈၽြႃးပဵၼ်ၸဝ်ႈလႄႈလႆႈၶၢမ်ႇတၢင်းဢၼ်ပွႆႇၸႂ်ႉၵႂႃႇၸွႆႈထႅမ်တီႈၶဝ်ၸိူဝ်းဢၼ်တၵ်းလႆႈၶၢမ်ႇဢဝ်တၢင်းဢၼ်ၵႄႇၶျွတ်ႈၼၼ်ႉဢမ်ႇၸႂ်ႈႁိုဝ်း။
ၵွပ်ႈပိူဝ်ႈၸိူဝ်ႉၼင်ႇၼႆလႄႈပုၼ်ႈလွင်ႈၼင်ႇႁိုဝ်ႁဝ်းတၵ်းပႃးၸႂ်ပႃးၶေႃးၼႂ်းတၢင်းဢၼ်ႁဝ်းလႆႈငိၼ်းတေႇသၼႃႇယဝ်ႉၼၼ်ႉၸိုင်၊တၵ်းလႆႈမီးႁူဝ်ၸႂ်ဢၼ်ယဵင်ႈၶႅၼ်းမၼ်ႈၵိုမ်းလႄႈၸပ်းၸွႆးတြႃးၼၼ်ႉဢေႃႈ။-
လွင်ႈမၼ်းၸမ်ႉ၊တေႇသၼႃႇတြႃးၸဝ်ႈဢၼ်မၼ်းၸဝ်ႈဢဝ်တင်းတမၢၼ်ႇၵၢင်ႁၢဝ်တင်းလၢႆ၊ႁေႃးလၢတ်ႈဝႆႉတီႈပူႇမွၼ်ႇႁဝ်းၼၼ်ႉ၊ထၢင်ႇသႃးပဵၼ်ဢၼ်မၢၼ်ႇမႅၼ်ႈၸိုဝ်ႈၸႂ်ႈလႄႈပေႃးသေၵေႃႉသေၵူၼ်းဢမ်ႇၵမ်ၵျၢင်ႉၸွမ်းလႄႈသင်၊ဢမ်ႇထွမ်ႇဢဝ်လႄႈသင်၊တၵ်းလႆႈၶၢမ်ႇတၢမ်ႇဢပျတ်ႈဢၼ်မၼ်းထိူၵ်ႈၶၢမ်ႇၼၼ်ႉဢေႃႈ။-
ပေႃးပဵၼ်ၸိူဝ်ႉၼင်ႇၼႆၸိုင်၊ပေႃးႁဝ်းယင်းဢမ်ႇထွမ်ႇဢမ်ႇဢဝ်၊တြႃးတၢင်းဢၼ်ၵႄႇၶျွတ်ႈဢဝ်ဢၼ်ယႂ်ႇမျၢတ်ႈၼႃႇထၢၼ်ႇၼႆႉၼၼ်ႉၸိုင်၊ႁဝ်းတၵ်းၵၢင်းလွတ်ႈလႆႈၸိူဝ်ႉႁိုဝ်။ တြႃးၼႆႉတူဝ်ၸဝ်ႈၽြႃးႁေႃးလၢတ်ႈဝႆႉဢွၼ်တၢင်းယဝ်ႉလႄႈ၊ၶဝ်ၸိူဝ်းဢၼ်လႆႈငိၼ်းၼၼ်ႉ၊ဢွၼ်ၵၼ်ဢဝ်တင်းသၢၵ်ႈသေႇဢၼ်လီယုမ်ႇသေလႄႈမွၵ်ႇလၢတ်ႈတီႈႁဝ်းဢေႃႈ။-
ၼႂ်းၶိင်ႇလဵဝ်ၵၼ်၊ၽြႃးပဵၼ်ၸဝ်ႈထၢပ်ႈထႅင်ႈသၢၵ်ႈသေႇၵႃႈတီႈၵႂၢမ်းၶဝ်ၸိူဝ်းၼၼ်ႉ၊ၼႂ်းတၢင်းဢၼ်ၼႄပျႃးၼိမိၵ်ႈလၢၵ်ႈၶၼႃႇ၊ဢိၵ်ႇတင်းလွင်ႈတၢင်းဢၼ်လီဢၢမ်း၊ဢိၵ်ႇတင်းတၼ်းၶူဝ်းဢၼ်လၢၵ်ႇလၢႆးၵူႈၸိူဝ်ႉၵူႈပိူင်၊ဢိၵ်ႇတင်းပၼ်သုၵျေးၸူးဝိၺိၺ်ႇမူတ်းၸၢင်ႇၸဝ်ႈ၊ၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇဢေႃႈ။
ၽြႃးပဵၼ်ၸဝ်ႈဢမ်ႇၶၢၼ်းတမၢၼ်ႇၵၢင်ႁၢဝ်တင်းလၢႆဝႆႉႁႂ်ႈလႆႈပဵၼ်ၶုၼ်ဢၼ်ဢုပ်ႉပိူင်ႇၵမ်ႇၽႃႇမႂ်ႇ၊ဢၼ်တၵ်းပဵၼ်မႃးၵမ်းလိုၼ်းဢၼ်ႁဝ်းလၢတ်ႈဝႃႈၼၼ်ႉလႄႈ၊-
မီးၵႂၢမ်းၶၢမ်ႇသၢၵ်ႈသေႇဝႆႉ၊ၼႂ်းၵျၢမ်းလိၵ်ႈတီႈၼိုင်ႈလႄႈဝႃႈ၊ “ၽြႃးပဵၼ်ၸဝ်ႈတီႈၶႃႈ။ ၵူၼ်းၸိုင်၊ပဵၼ်ၵေႃႉၸိူဝ်ႉၼင်ႇႁိုဝ်လႄႈ ၸဝ်ႈႁဝ်းလႆႈၶႆႈၸႂ်၊ဝူၼ်ႉၸႂ်လွင်ႈမၼ်းတီႈၶႃႈ။ ဢမ်ႇၼၼ်ၵေႃႈ၊ လုၵ်ႈၵူၼ်း၊ သမ်ႉပဵၼ်ၵေႃႉၸိူဝ်ႉၼင်ႇႁိုဝ်လႄႈ ၸဝ်ႈႁဝ်းလႆႈလူတူၺ်းလုမ်းလႃးမၼ်းတီႈၶႃႈ။
ၸဝ်ႈႁဝ်းၶျႃးမၼ်းၼၼ်ႉ၊တႅမ်ႇသေတမၢၼ်ႇၵၢင်ႁၢဝ်တင်းလၢႆၵႅပ်ႈၼိုင်ႈသေယဝ်ႉ၊ ၸဝ်ႈႁဝ်းဢဝ်သရၽူႇမုၼ်ၽုင်းသရေႇတိုဝ်းပၼ်မၼ်းသေလႄႈယုၵ်ႉယွင်ႈမၼ်း။
ၸဝ်ႈႁဝ်းႁဵတ်းႁႂ်ႈမၼ်းလႆႈဢုပ်ႉပိူင်ႇၵူႈၸိူဝ်ႉၵူႈပိူင်တီႈၶႃႈဢေႃႈ။” ဝႃႈၼင်ႇၼႆမီးဝႆႉဢေႃႈ။ ဢၼ်ဝႃႈ၊ၽြႃးပဵၼ်ၸဝ်ႈႁဵတ်းႁႂ်ႈမၼ်းပဵၼ်၊ “ၵေႃႉဢၼ်ဢုပ်ႉပိူင်ႇၵူႈၸိူဝ်ႉၵူႈပိူင်” ဝႃႈၼင်ႇၼႆၼၼ်ႉၸိုင်၊လွင်ႈတၢင်းဢၼ်လွတ်ႈသေတၢင်းဢၼ်မၼ်းဢုပ်ႉပိူင်ႇၼၼ်ႉ၊ဢမ်ႇၵိုတ်းၵျၢၼ်ႇဝႆႉသေၸိူဝ်ႉသေမဵဝ်းဢေႃႈ။ ၼႂ်းဝႃႈၼၼ်သေၵေႃႈ၊ႁဝ်းဢမ်ႇပႆႇလႆႈႁၼ်လွင်ႈတၢင်းၵႃႈမီးတင်းသဵင်ႈတင်းလူင်၊လႆႈၶၢမ်ႇဢဝ်တၢင်းဢၼ်ၵူၼ်းဢုပ်ႉပိူင်ႇဝႆႉယဝ်ႉၼၼ်ႉဢေႃႈ။-
ၵူၺ်းၵႃႈ၊ႁဝ်းလႆႈႁၼ် ၸဝ်ႈယေႇသု၊ ၸဝ်ႈဢၼ်လႆႈၶၢမ်ႇတၢင်းဢၼ်ၶျႃးဝႆႉ၊တႅမ်ႇသေတမၢၼ်ႇၵၢင်ႁၢဝ်တင်းလၢႆ ၵႅပ်ႈၼိုင်ႈပုၼ်ႈလွင်ႈၼင်ႇႁိုဝ်မၼ်းၸဝ်ႈတၵ်းလႆႈၶၢမ်ႇတၢႆ၊ပုၼ်ႈၵူၼ်းၵူႈၵေႃႉၵူႈၵူၼ်းၸွမ်းလူၺ်ႈၵျေးၸူးၽြႃးပဵၼ်ၸဝ်ႈသေယဝ်ႉ၊တေႃႈလဵဝ်ၼႆႉ၊ႁဝ်းလႆႈႁၼ်မၼ်းၸဝ်ႈဢၼ်တိုဝ်းသရၽူႇဢၼ်မီးမုၼ်ၽုင်းသရေႇဝႆႉ၊ၵွပ်ႈပိူဝ်ႈဝူၺ်ႇတၼႃႇတၢင်းတၢႆဢၼ်မၼ်းၸဝ်ႈလႆႈၶၢမ်ႇၼၼ်ႉဢေႃႈ။-
လွင်ႈမၼ်းၸမ်ႉ၊ၼႂ်းတၢင်းဢၼ်ဢဝ်လုၵ်ႈလၢင်းၼမ်ၼႃႇ၊သူင်ႇႁွတ်ႈထိုင်ၵႃႈတီႈဢၼ်တၵ်းၸၢမ်ႇၸႃးမုၼ်ၸေးၸိမ်ႇၼၼ်ႉ၊ၽြႃးပဵၼ်ၸဝ်ႈ၊ၸဝ်ႈဢၼ်ၽၢၼ်ႇသၢင်းၵူႈၸိူဝ်ႉၵူႈပိူင်လႄႈဢုပ်ႉထိင်းၼၼ်ႉ၊ထုၵ်ႇလီႁဵတ်းႁႂ်ႈ ၸဝ်ႈယေႇသု၊ ႁွတ်ႈထိုင်တၢင်းဢၼ်ၸေးၸုမ်ႇ ၵွပ်ႈလူၺ်ႈတုၵ်ႉၶႃႉဝူၺ်ႇတၼႃႇလႄႈပဵၼ်ၽူႈဢွၼ်ႁူဝ်ၼႄတၢင်းၵႂႃႇၸူးသဵၼ်ႈတၢင်းဢၼ်ၵႄႇၶျွတ်ႈဢဝ်ဢေႃႈ။
ၸဝ်ႈဢၼ်ၸၢင်ႈႁႂ်ႈမူတ်းၸၢင်ႇ၊ဢိၵ်ႇတင်းၶဝ်ၸိူဝ်းဢၼ်ႁွတ်ႈထိုင်တၢင်းဢၼ်မူတ်းၸၢင်ႇၼၼ်ႉ၊ပဵၼ်မႃးၵႃႈတီႈပေႃႈၸဝ်ႈပႃးလဵဝ်ၵၼ်ဢေႃႈ။ ပိူဝ်ႈၼႆၸင်ႇ ၸဝ်ႈယေႇသု၊ ဢမ်ႇဢူၵ်းဢၢႆလူၺ်ႈလွင်ႈဢၼ်ႁွင်ႉႁဵၵ်ႈၶဝ်ၸိူဝ်းဢၼ်ႁွတ်ႈထိုင်တၢင်းဢၼ်မူတ်းၸၢင်ႇၼၼ်ႉဝႃႈ၊ၼွင်ႉၵဝ်တင်းလၢႆ၊-
ၸွမ်းၼင်ႇဢၼ်မၼ်းၸဝ်ႈလၢတ်ႈတီႈၽြႃးပဵၼ်ၸဝ်ႈလႄႈဝႃႈ၊ “ၵဝ်ၶႃႈတၵ်းႁေႃးမွၵ်ႇလၢတ်ႈၼႃႇမႃႉၸိုဝ်ႈသဵင်ၸဝ်ႈႁဝ်းတီႈၼွင်ႉၵဝ်ၶႃႈတင်းလၢႆဢေႃႈ။ ၵဝ်ၶႃႈတၵ်းႁဵတ်းၵႂၢမ်းယွင်ႈယေႃးၸဝ်ႈႁဝ်းၵႃႈၼႂ်းၵႄႈၵၢင်မူႇၵူၼ်းတင်းလၢႆဢေႃႈ၊” ဝႃႈၼင်ႇၼႆဢေႃႈ။
မၼ်းၸဝ်ႈသမ်ႉလၢတ်ႈထႅင်ႈလႄႈဝႃႈ၊ “ၵဝ်ၶႃႈတၵ်းဢိင်ပိုင်ႈၽြႃးပဵၼ်ၸဝ်ႈဢေႃႈ၊” ဝႃႈၼင်ႇၼႆလႄႈသမ်ႉလၢတ်ႈထႅင်ႈလႄႈဝႃႈ၊ “ၵဝ်ၶႃႈမီးလူၺ်ႈၵၼ်တင်းလုၵ်ႈဢွၼ်ႇၸိူဝ်းဢၼ်ၽြႃးပဵၼ်ၸဝ်ႈပၼ်ၵဝ်ၶႃႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈဢၼ်ဝႃႈ၊လုၵ်ႈဢွၼ်ႇၸိူဝ်းၼၼ်ႉ၊ပဵၼ်ၸႃႇတိၼိူဝ်ႉလိူတ်ႈလႄႈ၊ ၸဝ်ႈယေႇသု၊ ၼၼ်ႉၶၢမ်ႇၵိူတ်ႇလဵင်ႉမႃးၼႂ်းၸႃႇတိၼိူဝ်ႉလိူတ်ႈၼင်ႇၵဝ်ႇ၊ပုၼ်ႈလွင်ႈၼင်ႇႁိုဝ်တၵ်းဢဝ်တင်းတၢင်းတၢႆမၼ်းၸဝ်ႈၼၼ်ႉ၊ယႃႉပႅတ်ႈၶုၼ်မရၼႃႉဢၼ်မီးတၼ်းၶူဝ်းၵႃႈၼိူဝ်တၢင်းတၢႆ၊-
ဢိၵ်ႇတင်းႁႂ်ႈလႆႈပွႆႇလွတ်ႈၶဝ်ၸိူဝ်းဢၼ်ပဵၼ်ၶႃႈ၊ၸူဝ်ႈဢသၢၵ်ႈၶဝ်ၼၼ်ႉၵွပ်ႈပိူဝ်ႈၶဝ်ၵူဝ်ႁႄတြႃးတၢင်းတၢႆၼၼ်ႉဢေႃႈ။-
လွင်ႈၼႆႉပဵၼ်တီႈဢၼ်ထၢင်ႇသႃးယဝ်ႉဝႃႈ၊မၼ်းၸဝ်ႈၸွႆႈထႅမ်တမၢၼ်ႇၵၢင်ႁၢဝ်တင်းလၢႆဢမ်ႇၸႂ်ႈ။ မၼ်းၸဝ်ႈၸွႆႈထႅမ်ၸိူဝ်ႉၶိူဝ်း ဢႃႇပြႃႇႁၢမ်ႇ၊ ဢေႃႈ။-
လွင်ႈတၢင်းၼႆႉၶႂ်ႈဝႃႈ၊ ၸဝ်ႈၶရိၸ်ႈ၊ မီးလွင်ႈဢၼ်တၵ်းလႆႈမိူၼ်ၼွင်ႉတူဝ်ၸဝ်ႈၵဝ်ႇတင်းလၢႆ၊ၵူႈသမ်ႇၵူႈပိူင်ႁႂ်ႈလႆႈပဵၼ်ၶုၼ်ယဵၸ်ႈပရေႃးႁဵၵ်ႈ ဢၼ်မီးၸႂ်ၵရုၼႃႇ၊ဢိၵ်ႇတင်းသဵတ်ႈၸႃႇလႄႈပွင်ႁဵတ်းပွင်ထၢမ်းၵၢၼ်ၽြႃးပဵၼ်ၸဝ်ႈၼႂ်းတၢင်းဢၼ်တၵ်းၽေႇဢပျတ်ႈတုၸရိူၵ်ႈၵူၼ်းတင်းလၢႆဢေႃႈ။-
လွင်ႈမၼ်းၸမ်ႉ၊ၵွပ်ႈပိူဝ်ႈဝႃႈ၊တူဝ်မၼ်းၸဝ်ႈလႆႈၶၢမ်ႇတုၵ်ႉၶႃႉဝူၺ်ႇတၼႃႇ၊ဢိၵ်ႇတင်းလႆႈၶၢမ်ႇတၢင်းဢၼ်ၸၢမ်းတူၺ်းယႃႉယုၵ်ႉၼၼ်ႉယဝ်ႉလႄႈမၼ်းၸဝ်ႈတၢတ်ႈၼိူင်ႇလႆႈ၊ႁႂ်ႈလႆႈၸွႆႈထႅမ်ၶဝ်ၸိူဝ်းဢၼ်လႆႈထူပ်းၺႃးတၢင်းဢၼ်ၸၢမ်းတူၺ်းယႃႉယုၵ်ႉၼၼ်ႉဢေႃႈ။
ပေႃးပဵၼ်ၸိူဝ်ႉၼင်ႇၼႆၸိုင်၊ပီႈၼွင်ႉဢၼ်မူတ်းၸၢင်ႇၸိူဝ်းဢၼ်လႆႈၶၢမ်ႇဢဝ်ၵျေးၸူးဢမူၺ်ႇမိူင်းၵၢင်ႁၢဝ်ၶဝ်႟။ ၶႆႈၸႂ်ဝူၼ်ႉၸႂ်လူၺ်ႈ ၸဝ်ႈယေႇသု၊ ၸဝ်ႈဢၼ်ႁဝ်းယုမ်ႇလႄႈႁပ်ႉတုင်းဢဝ်ဝႃႈ၊ပဵၼ်တမၢၼ်ႇၸဝ်ႈ၊ဢိၵ်ႇတင်းပဵၼ်ၶုၼ်ယဵၸ်ႈပရေႃးႁဵၵ်ႈၼၼ်ႉတႃႉ။-
မၼ်းၸဝ်ႈၼၼ်ႉ၊ပႂ်ႉသဵတ်ႈၸႃႇတေႃႇၽြႃးပဵၼ်ၸဝ်ႈဢၼ်လိူၵ်ႈဢဝ်မၼ်းၸဝ်ႈဝႆႉ၊မိူၼ်ၸိူဝ်ႉၼင်ႇဢၼ် မူဝ်းသေႇ၊ ပႂ်ႉသဵတ်ႈၸႃႇတေႃႇၵူၼ်းၽြႃးပဵၼ်ၸဝ်ႈတင်းလၢႆဢၼ်ပဵၼ်ၵူၼ်းႁိူၼ်းၵူၼ်းယေးမၼ်းၸဝ်ႈၼၼ်ႉဢေႃႈ။-
ၵူၼ်းၵေႃႉဢၼ်ႁဵတ်းႁိူၼ်းၼၼ်ႉ၊ယဵင်ႈၶႅၼ်းမီးသရေႇယႂ်ႇၼႃႇသေႁိူၼ်းလင်ၼၼ်ႉဢေႃႈ။ မိူၼ်ၸိူဝ်ႉၼင်ႇၼၼ်၊ ၸဝ်ႈယေႇသု၊ ယဵင်ႈၶႅၼ်းထိူၵ်ႈၶၢမ်ႇဢဝ်သရေႇယႂ်ႇၼႃႇသေ မူဝ်းသေႇ၊ ဢေႃႈ။-
ႁိူၼ်းလင်လႂ်သေဢမ်ႇဝႃႈ၊ပဵၼ်ၵွပ်ႈပိူဝ်ႈၵူၼ်းသေၵေႃႉၵေႃႉတႄႇႁဵတ်းဢေႃႈ။ ၼင်ႇၼၼ်လႄႈၵေႃႉဢၼ်တႄႇႁဵတ်းၵူႈၸိူဝ်ႉၵူႈပိူင်ၸမ်ႉ၊ပဵၼ်ၽြႃးပဵၼ်ၸဝ်ႈဢေႃႈ။-
မူဝ်းသေႇ၊ ၼၼ်ႉ၊ပႂ်ႉသဵတ်ႈၸႃႇၵႃႈၼႂ်းၼႃႈၵၢၼ်ႁိူၼ်းၽြႃးပဵၼ်ၸဝ်ႈ၊မိူၼ်ၸိူဝ်ႉၼင်ႇလုၵ်ႈလဵင်ႉဢၼ်တၵ်းၶၢမ်ႇသၢၵ်ႈသေႇၵူႈလွင်ႈလွင်ႈ၊ဢၼ်ၽြႃးပဵၼ်ၸဝ်ႈတၵ်းႁေႃးလၢတ်ႈၵမ်းလိုၼ်းၼၼ်ႉဢေႃႈ။-
ၸဝ်ႈၶရိၸ်ႈ၊ ၸမ်ႉ၊ယူႇၼႂ်းဢရႃႇလုၵ်ႈၸၢႆးလႄႈပႂ်ႉသဵတ်ႈၸႃႇသိုဝ်ႈယူဝ်းၵႃႈၼိူဝ်ၵူၼ်းတင်းလၢႆဢၼ်ပဵၼ်ၵူၼ်းႁိူၼ်းၵူၼ်းယေးၽြႃးပဵၼ်ၸဝ်ႈဢေႃႈ။ ပေႃးႁဝ်းတင်းလၢႆမၼ်ႈၶိူင်ႇယူႇၼႂ်းတၢင်းဢၼ်ႁတ်းႁၢၼ်၊ဢိၵ်ႇတင်းသိူဝ်းပျေႃႇယူႇၼႂ်းတၢင်းဢၼ်မုင်ႈမွင်းယူႇၸိုင်၊ႁဝ်းၵေႃႈပဵၼ်ၵူၼ်းႁိူၼ်းၵူၼ်းယေးမၼ်းၸဝ်ႈဢေႃႈ။
ပိူဝ်ႈၼႆၸင်ႇ၊ဝိၺိၺ်ႇမူတ်းၸၢင်ႇၸဝ်ႈႁေႃးလၢတ်ႈဝႃႈ၊ “ၼႂ်းဝၼ်းမိူဝ်ႈၼႆႉ၊ပေႃးသူလႆႈငိၼ်းသဵင် ၽြႃးပဵၼ်ၸဝ်ႈၸိုင်။
ယႃႇပေမီးႁူဝ်ၸႂ်ဢၼ်တိုဝ်တၼ်မိူၼ်ၸိူဝ်ႉၼင်ႇပူႇမွၼ်ႇသူ၊ဢၼ်လုၵ်ႉၽိုၼ်ႉၽြႃးပဵၼ်ၸဝ်ႈ၊ ၼႂ်းမိူဝ်ႈဢၼ်ၶဝ်ၸႅတ်ႈၸၢမ်းတူၺ်းယႃႉယုၵ်ႉၵဝ်၊မိူဝ်ႈဢၼ်ၶဝ်လႆႈယူႇၵႃႈၼႂ်းထိူၼ်ႇလႅင်ႉၼၼ်ႉသေၵမ်း။
ၵႃႈတီႈၼၼ်ႈၶဝ်ၸၢမ်းတူၺ်းယႃႉယုၵ်ႉၵဝ် ၵူႈၸိူဝ်ႉၵူႈပိူင်သေလႄႈ ၶဝ်လႆႈႁၼ်လွင်ႈတၢင်းဢၼ်ၵဝ်ႁဵတ်းတင်းလၢႆၼၼ်ႉသီႇသိပ်းပီတဵမ်တဵမ်ဢေႃႈ။
ၵွပ်ႈပိူဝ်ႈၸိူဝ်ႉၼင်ႇၼႆလႄႈၵဝ်လီႁင်ႈဢဵတ်ႇသဵတ်ႇၵူၼ်းမဵဝ်းၼၼ်ႉလႄႈဝႃႈ၊ ‘ၶဝ်ၸိူဝ်းၼႆႉ၊ၸႂ်ၶဝ်ၽိတ်းတၢင်းယူႇသေႇသေႇလႄႈ ၶဝ်ဢမ်ႇႁုၸၵ်းသဵၼ်ႈတၢင်းဢၼ်ၶဝ်ၵႂႃႇမႃးယူႇၼၼ်ႉဢေႃႈ၊’ ဝႃႈၼင်ႇၼႆဢေႃႈ။
ပိူဝ်ႈၼႆလႄႈၵဝ်ၸႂ်မႆႈၶႂ်ႈၸႃႉလႄႈတိူင်ႇဝႃႈ၊ ‘ၶဝ်တေဢမ်ႇလႆႈၶဝ်ႈၵႃႈတီႈဢၼ်ၵဝ်တၵ်းမႄးဝႆႉပၼ်ႁႂ်ႈၶဝ်ၵိုတ်းသဝ်းယူႇၼိမ်ၼၼ်ႉ၊’ ဝႃႈၼင်ႇၼႆယဝ်ႉ၊” ဝႃႈၼင်ႇၼႆဢေႃႈ။
ပီႈၼွင်ႉၵဝ်ၶဝ်႟။ ၼင်ႇႁိုဝ်ၼႂ်းသူၼႆႉ၊သေၵေႃႉသေၵူၼ်းတေဢမ်ႇမီးႁူဝ်ၸႂ်ဢၼ်ႁၢႆႉမိူၵ်ႈဢၼ်ဢမ်ႇၸၢင်ႈဢမ်ႇယုမ်ႇမၢတ်ႈ၊ဢၼ်ႁႂ်ႈပိူင်ႈဝႄႈဢွၵ်ႇသေတီႈၽြႃးပဵၼ်ၸဝ်ႈဢၼ်ဢသၢၵ်ႈလိပ်းၼၼ်ႉၵႂႃႇၸိုင်၊ဝႆႉသတိတႃႉ။-
မိူဝ်ႈဢၼ်ၶိင်ႇဢၼ်ႁွင်ႉဝႃႈ၊ “ဝၼ်းမိူဝ်ႈၼႆႉ” တႄႇဝႆႉမီးယူႇၼၼ်ႉ၊ၼင်ႇႁိုဝ်ႁူဝ်ၸႂ်သူဢမ်ႇလႆႈတိုဝ်လႆႈတၼ်ၵႂႃႇ ၵွပ်ႈပိူဝ်ႈတၢင်းဢၼ်တုၸရိူၵ်ႈဢပျတ်ႈပႅတ်ႉလႅၼ်ၼၼ်ႉၸိုင်၊ၵေႃႉၼိုင်ႈလႄႈၵေႃႉၼိုင်ႈတိုၵ်းယူင်းၸူဝ်းဢဝ်ၵၼ်ယူႇၵူႈဝၼ်းတႃႉ။-
လွင်ႈမၼ်းၸမ်ႉ၊ပေႃးႁဝ်းမီးၸႂ်ဢၼ်ယုမ်ႇမၢတ်ႈဢိင်ပိုင်ႈမၼ်ႈမၼ်ႈၶိူင်ႇၶိူင်ႇတေႃႇထိုင်တီႈသုတ်းတီႈၵွႆၸိူဝ်ႉၼင်ႇမီးမႃးမိူဝ်ႈၵေႃႇၸႃႉၼၼ်ႉၸိုင်၊ႁဝ်းတင်းသဵင်ႈတင်းမူတ်းလႆႈႁူမ်ႈလူၺ်ႈၵၼ်တင်း ၸဝ်ႈၶရိၸ်ႈ၊ ယဝ်ႉဢေႃႈ။
ၸွမ်းၼင်ႇၵႃႈၼႂ်းၵျၢမ်းလိၵ်ႈလၢတ်ႈဝႆႉလႄႈဝႃႈ၊ “ၼႂ်းဝၼ်းမိူဝ်ႈၼႆႉ ပေႃးသူလႆႈငိၼ်းသဵင် ၽြႃးပဵၼ်ၸဝ်ႈၸိုင်၊ ယႃႇပေဝႆႉႁူဝ်ၸႂ်ၼူၵ်ႇတၼ်လႄႈလုၵ်ႉၽိုၼ်ႉၽြႃးပဵၼ်ၸဝ်ႈမိူၼ်ၸိူဝ်ႉၼင်ႇပူႇမွၼ်ႇသူ၊” ဝႃႈၼင်ႇၼႆၼၼ်ႉဢေႃႈ။
ၶဝ်ၸိူဝ်းဢၼ်လႆႈငိၼ်းသဵင်ၽြႃးပဵၼ်ၸဝ်ႈသေယဝ်ႉ၊လုၵ်ႉၽိုၼ်ႉမၼ်းၸဝ်ႈၼၼ်ႉပဵၼ်ၽူႈလႂ်၊ပဵၼ်ၵူၼ်းၸိူဝ်းဢၼ် မူဝ်းသေႇ၊ ဢွၼ်ၶဝ်ဢွၵ်ႇသေမိူင်း ဢေးၵျိပ်ႉ၊ မႃးၼၼ်ႉ၊တင်းသဵင်ႈတင်းမူတ်းဢမ်ႇၸႂ်ႈႁိုဝ်း။-
ၼႂ်းၸူဝ်ႈသီႇသိပ်းပီတဵမ်တဵမ်ၼၼ်ႉ၊ၽြႃးပဵၼ်ၸဝ်ႈလီႁင်ႈဢဵတ်ႇသဵတ်ႇၽူႈလႂ်။ ပဵၼ်ၵူၼ်းၸိူဝ်းဢၼ်ႁဵတ်းတုၸရိူၵ်ႈဢပျတ်ႈလႄႈလူမ်ႉတၢႆၵႃႈၼႂ်းထိူၼ်ႇလႅင်ႉၼၼ်ႉတင်းသဵင်ႈတင်းမူတ်းဢမ်ႇၸႂ်ႈႁိုဝ်း။-
ၵူၼ်းၸိူဝ်းဢၼ်ၽြႃးပဵၼ်ၸဝ်ႈတိူင်ႇလႄႈဝႃႈ၊ “ၶဝ်တိုၼ်းဢမ်ႇလႆႈၶဝ်ႈလိုဝ်ႈသဝ်းၵႃႈၼႂ်းတီႈဢၼ်ၵဝ်တၵ်းပၼ်ႁႂ်ႈၶဝ်ၵိုတ်းၼိမ်ၼိမ်ၼၼ်ႉ၊” ဝႃႈၼင်ႇၼႆၼၼ်ႉၸိုင်၊လိူဝ်သေၶဝ်ၸိူဝ်းဢၼ်ဢမ်ႇယုမ်ႇမၢတ်ႈၼၼ်ႉ၊တေပဵၼ်ၽူႈလႂ်လူးၵွၼ်ႇ။-
ပိူဝ်ႈၼႆလႄႈ၊ၶဝ်ဢမ်ႇၶဝ်ႈလႆႈၵွပ်ႈပိူဝ်ႈဢမ်ႇယုမ်ႇမၢတ်ႈၼၼ်ႉ၊ႁဝ်းႁုယူႇဢေႃႈ။
မိူဝ်ႈလဵဝ်ၼႆႉ၊ၼင်ႇႁိုဝ်ႁဝ်းတၵ်းလႆႈၶဝ်ႈတီႈၵတ်းယဵၼ်ၶျၢမ်းသႃႇ၊ၸွမ်းၼင်ႇဢၼ်ၽြႃးပဵၼ်ၸဝ်ႈလၢတ်ႈဝႆႉၼၼ်ႉၸိုင်၊မၼ်းၸဝ်ႈဝႆႉၵတိတီႈႁဝ်းယဝ်ႉ။ ပိူဝ်ႈၼႆလႄႈၼင်ႇႁိုဝ်သေၵေႃႉသေၵူၼ်းတၵ်းဢမ်ႇလႆႈၵိုတ်းၵျၢၼ်ႇဝႆႉဢၼ်တေႁပ်ႉဢဝ်ၵတိၸဝ်ႈလွင်ႈဢၼ်တၵ်းလႆႈလိုဝ်ႈသဝ်းယူႇၼိမ်ၼၼ်ႉၸိုင်၊ဢွၼ်ၵၼ်ဝႆႉသတိတႃႉႁဝ်း။-
လွင်ႈမၼ်းၸမ်ႉ၊ၶၢဝ်ႇတြႃးသိူဝ်းပျေႃႇၸဝ်ႈၸိုင်၊ႁွတ်ႈထိုင်တီႈႁဝ်းမိူၼ်မိူၼ်ၵၼ်တင်းၶဝ်ယဝ်ႉ။ ၼႂ်းဝႃႈၼၼ်သေၵေႃႈ၊ၵႂၢမ်းတြႃးဢၼ်ၶဝ်လႆႈငိၼ်းၼၼ်ႉ၊ၵွပ်ႈပိူဝ်ႈဝႃႈ၊ၶဝ်ဢမ်ႇႁပ်ႉတုင်းဢဝ်တင်းႁူဝ်ၸႂ်ဢၼ်ယုမ်ႇမၢတ်ႈလႄႈတြႃးၼၼ်ႉဢမ်ႇပၼ်ဢၵျူဝ်းၶဝ်။-
ပိူဝ်ႈၼႆလႄႈႁဝ်းၸိူဝ်းဢၼ်ယုမ်ႇမၢတ်ႈၼႆႉ၊လႆႈၶဝ်ႈတီႈၵိုတ်းၼိမ်ယဝ်ႉ၊မႅၼ်ႈၸွမ်းၼင်ႇဢၼ်မၼ်းၸဝ်ႈလၢတ်ႈလႄႈဝႃႈ၊ “ၵဝ်ၸႂ်မႆႈၶႂ်ႈၸႃႉတီႈၶဝ်လႄႈတိူင်ႇဝႃႈ၊ ‘ၶဝ်တေဢမ်ႇလႆႈၶဝ်ႈလိုဝ်ႈသဝ်းၵႃႈတီႈဢၼ်ၵဝ်တၵ်းပၼ်ႁႂ်ႈၶဝ်ယူႇၼိမ်ၼိမ်ၼၼ်ႉ၊’ ဝႃႈၼင်ႇၼႆယဝ်ႉ။” ဝႃႈၼင်ႇၼႆၼၼ်ႉဢေႃႈ။ မၼ်းၸဝ်ႈလၢတ်ႈၵႂၢမ်းၶေႃႈၼႆႉ၊ပိၵ်ႉသမ်ႉၵၢၼ်ငၢၼ်းမၼ်းၸဝ်ႈလႆႈယဝ်ႉတူဝ်ႈလီငၢမ်းၸဵမ်မိူဝ်ႈၶိင်ႇၵႃႇလႃႉဢၼ်မၼ်းၸဝ်ႈၽၢၼ်ႇသၢင်းႁဵတ်းပဵၼ်လိၼ်မိူင်းယဝ်ႉၼၼ်ႉဢေႃႈ။-
လွင်ႈမၼ်းၸမ်ႉ၊ၵျၢမ်းလိၵ်ႈတီႈၼိုင်ႈလၢတ်ႈလူၺ်ႈလွင်ႈဝၼ်းတီႈၸဵတ်းၼၼ်ႉလႄႈဝႃႈ၊ “ယၢမ်းမိူဝ်ႈဢၼ်ၵၢၼ်ငၢၼ်းယဝ်ႉတူဝ်ႈလီငၢမ်းၼႂ်းဝၼ်းတီႈၸဵတ်းၼၼ်ႉ၊ၽြႃးပဵၼ်ၸဝ်ႈၵိုတ်းလိုဝ်ႈယူႇၼိမ်ၼိမ်လီလီဢေႃႈ၊” ဝႃႈၼင်ႇၼႆဢေႃႈ။-
လွင်ႈတၢင်းၼႆႉၼင်ႇၵဝ်ႇသမ်ႉလၢတ်ႈထႅင်ႈဝႃႈ၊ “ၶဝ်တေဢမ်ႇလႆႈၶဝ်ႈလိုဝ်ႈသဝ်ႈၵႃႈၼႂ်းတီႈဢၼ်ၵဝ်တၵ်းပၼ်ႁႂ်ႈၶဝ်ၵိုတ်းယူႇၼိမ်ၼိမ်ၼၼ်ႉ၊” ဝႃႈၼင်ႇၼႆဝႆႉဢေႃႈ။-
ၵွပ်ႈပိူဝ်ႈဝႃႈ၊ၵတိၸဝ်ႈမီးဝႆႉ၊ပုၼ်ႈၵမ်ႈၽွင်ႈတႃႇတေလႆႈၶဝ်ႈၵိုတ်းလိုဝ်ႈသဝ်းသေၵေႃႈ၊ၶဝ်ၸိူဝ်းဢၼ်လႆႈငိၼ်းၶၢဝ်ႇတြႃးသိူဝ်းပျေႃႇၸဝ်ႈဢွၼ်တၢင်းပိူၼ်ႈၼၼ်ႉ၊ဢမ်ႇလႆႈၶဝ်ႈလိုဝ်ႈသဝ်း၊ၵွပ်ႈပိူဝ်ႈဢၼ်ဢမ်ႇယုမ်ႇမၢတ်ႈၼၼ်ႉဢေႃႈ။-
ၵွပ်ႈႁွႆးၼႆႉလႄႈၽြႃးပဵၼ်ၸဝ်ႈမၢတ်ႈမၢႆဝႆႉ၊ဝၼ်းၼိုင်ႈလီလီငၢမ်းငၢမ်းဢၼ်ႁွင်ႉဝႃႈ၊ “ဝၼ်းမိူဝ်ႈၼႆႉ” ၼၼ်ႉလႄႈ၊ဝၢႆးသေပီမိူင်းႁိုင်ၼႃႇယဝ်ႉၸင်ႇ၊မၼ်းၸဝ်ႈလၢတ်ႈဢွၵ်ႇလွင်ႈတၢင်းၼႆႉ၊ၵႃႈၼႂ်းၵျၢမ်းဢၼ် တႃႇဝိတ်ႈ၊ တႅမ်ႈဝႆႉလႄႈဝႃႈ၊ “ၼႂ်းဝၼ်းမိူဝ်ႈၼႆႉ၊ပေႃးသူလႆႈငိၼ်းသဵင်ၽြႃးပဵၼ်ၸဝ်ႈၸိုင်၊ ယႃႇပေမီးတၢင်းဢၼ်ႁူဝ်ၸႂ်ၼူၵ်ႇတၼ်၊” ဝႃႈၼင်ႇၼႆၼၼ်ႉဢေႃႈ။
လွင်ႈမၼ်းၸမ်ႉ၊ပေႃး ယေႃးသု၊ လႆႈပၼ်တၢင်းဢၼ်ၵတ်းယဵၼ်ၶျၢမ်းသႃႇတီႈၵူၼ်းတင်းလၢႆ၊ဢၼ်ၽြႃးပဵၼ်ၸဝ်ႈဝႆႉၵတိၼၼ်ႉယဝ်ႉၸိုင်၊ၵမ်းလိုၼ်းၽြႃးပဵၼ်ၸဝ်ႈတေဢမ်ႇမီးတီႈလၢတ်ႈလူၺ်ႈဝၼ်းတၢင်ႇဝၼ်း၊ၸိူဝ်ႉၼင်ႇၼၼ်ထႅင်ႈယဝ်ႉ။-
ပိူဝ်ႈဢၼ်ပဵၼ်ၸိူဝ်ႉၼင်ႇၼၼ်လႄႈဝၼ်းတၢင်းဢၼ်ၵတ်းယဵၼ်ၶျၢမ်းသႃႇယင်းမီးဝႆႉထႅင်ႈပုၼ်ႈၵူၼ်းၽြႃးပဵၼ်ၸဝ်ႈ၊မိူၼ်ၸိူဝ်ႉၼင်ႇဢၼ်ၽြႃးပဵၼ်ၸဝ်ႈၵိုတ်းလိုဝ်ႈယူႇၼိမ်ၼိမ်လီလီၼႂ်းဝၼ်းတီႈၸဵတ်းၼၼ်ႉဢေႃႈ။-
လွင်ႈမၼ်းၸမ်ႉ၊ၽူႈလႂ်သေဢမ်ႇဝႃႈ၊ၵေႃႉဢၼ်လႆႈၶဝ်ႈတီႈတၢင်းဢၼ်ၶျၢမ်းသႃႇၽြႃးပဵၼ်ၸဝ်ႈၼၼ်ႉၵေႃႈ၊တၵ်းလႆႈလိုဝ်ႈၼႂ်းၵၢၼ်တၢင်းႁဵတ်းတူဝ်ၸဝ်ႈၵဝ်ႇ၊မိူၼ်ၸိူဝ်ႉၼင်ႇၽြႃးပဵၼ်ၸဝ်ႈလိုဝ်ႈႁိူဝ်ႈယူႇၼိမ်ၼိမ်လီလီသေၵႃႈတီႈၵၢၼ်ငၢၼ်းမၼ်းၸဝ်ႈၼၼ်ႉဢေႃႈ။-
ၵွပ်ႈပိူဝ်ႈၼႆလႄႈ၊ႁဝ်းဢွၼ်ၵၼ်ၶတ်းၸႂ်၊ၶဝ်ႈတီႈတၢင်းဢၼ်ၵတ်းယဵၼ်ၶျၢမ်းသႃႇၼၼ်ႉတႃႉႁဝ်း။ ၵႃႈၼႂ်းႁဝ်းၼႆႉသေၵေႃႉသေၵူၼ်း၊ယႃႇပေႁႂ်ႈလႆႈလုသုမ်းမိူၼ်ၸိူဝ်ႉၼင်ႇၶဝ်ၸိူဝ်းဢၼ်လႆႈလုသုမ်းၵႂႃႇၼၼ်ႉ၊ၵွပ်ႈပိူဝ်ႈၶဝ်ဢမ်ႇယုမ်ႇမၢတ်ႈၼၼ်ႉဢေႃႈ။
ၼုၵ်ႈၵပၢတ်ႈတြႃး၊ၽြႃးပဵၼ်ၸဝ်ႈၸမ်ႉ၊ဢသၢၵ်ႈလိပ်းယူႇ၊ဢိၵ်ႇတင်းၸၢင်ႈၶိုင်ပွင်သၢင်ႈႁဵတ်းယူႇလႄႈ ၽၢႆသေလၢပ်ႇသၼ်ႇလႅၵ်ႈဢေႃႈ။ ၸၢင်ႈတႅင်းပွင်ႇထၢၼ်ႈပေႃးၸၵ်းၽႄတီႈဢၼ်ၸႂ်တင်းဝိၺိၺ်ႇၶွႆႈၵၼ်၊ဢိၵ်ႇတင်းတီႈဢၼ်ပွင်ႈလုပ်ႇတင်းမၼ်းလုပ်ႇၸပ်းၵၼ်ၼၼ်ႉဢေႃႈ။ ၸၢင်ႈႁုႁၼ်ထိုင်ၼႂ်းႁူဝ်ၸႂ်ၵူၼ်းဢၼ်ၶႆႈၸႂ်လႄႈၵျၢမ်ႇပွင်ၼၼ်ႉဢေႃႈ။-
ၵႃႈတီႈၽၢႆႇၼႃႈမၼ်းၸဝ်ႈၼၼ်ႉ၊ၶိူင်ႈပိူင်ဢၼ်တၵ်းသိူင်ႇဝႆႉလပ်ႉဝႆႉ၊ဢမ်ႇမီးသေၸိူဝ်ႉသေပိူင်လႄႈလွင်ႈတၢင်းၵႃႈမီးတင်းသဵင်ႈတင်းမူတ်းပိုတ်ႇပၢင်ႇသေၽုၺ်ႇဝႆႉမီးယူႇသိုဝ်ႈၼႃႈတႂ်ႈတႃမၼ်းၸဝ်ႈဢေႃႈ။ ပိူဝ်ႈၼႆလႄႈႁဝ်းတၵ်းလႆႈၽုၺ်ႇၼႄၵႃႈဢၼ်ႁဝ်းပဵၼ်ယူႇၼႆႉ၊ထၢင်ႇထၢင်ႇသႃးသႃးၽၢႆႇၼႃႈမၼ်းၸဝ်ႈဢေႃႈ။
ပိူဝ်ႈဝႃႈ၊ႁဝ်းမီးၶုၼ်ယဵၸ်ႈပရေႃးႁဵၵ်ႈဢၼ်သမ်ႇပေႃးလႆႈၶဝ်ႈၵႂႃႇယဝ်ႉၵႃႈၼႂ်းမိူင်းၵၢင်ႁၢဝ်ဢၼ်ဝႃႈ၊ ၸဝ်ႈယေႇသု၊ လုၵ်ႈၽြႃးပဵၼ်ၸဝ်ႈၼၼ်ႉလႄႈ၊ဢွၼ်ၵၼ်တႄႇမၼ်ႈယူႇၼႂ်းတၢင်းယုမ်ႇမၢတ်ႈဢၼ်ႁဝ်းႁပ်ႉတုင်းဢဝ်ယဝ်ႉၼၼ်ႉတႃႉႁဝ်း။-
လွင်ႈမၼ်းၸမ်ႉ၊ၶုၼ်ယဵၸ်ႈပရေႃးႁဵၵ်ႈႁဝ်းၼၼ်ႉဢမ်ႇၸႂ်ႈဝႃႈ၊ပဵၼ်ၵေႃႉဢၼ်ဢမ်ႇဢဵတ်းလူႁဝ်း၊ၵွပ်ႈပိူဝ်ႈတၢင်းဢၼ်ႁႅင်းလဵၵ်ႉႁႅင်းဢူၼ်ႈၼၼ်ႉၵူၺ်း၊ႁဝ်းမီးၶုၼ်ယဵၸ်ႈပရေႃးႁဵၵ်ႈဢၼ်ယၢမ်ႈလႆႈၶၢမ်ႇၸၢမ်းတူၺ်းယႃႉယုၵ်ႉၵူႈၸိူဝ်ႉၵူႈပိူင်၊မိူၼ်ၸိူဝ်ႉၼင်ႇဢၼ်ႁဝ်းလႆႈၶၢမ်ႇၼၼ်ႉယဝ်ႉဢေႃႈ။ ၼႂ်းဝႃႈၼၼ်သေၵေႃႈ၊မၼ်းၸဝ်ႈတိုၼ်းဢမ်ႇမီးဢပျတ်ႈလႃးလႃး။-
ပိူဝ်ႈၼႆလႄႈ ႁဝ်းဢွၼ်ၵၼ်ႁတ်းႁၢၼ်သေလႄႈၶဝ်ႈၸမ်ၵႃႈတီႈပလၢင်ႇၽြႃးပဵၼ်ၸဝ်ႈဢၼ်မီးသုၵျေးၸူးၵရုၼႃႇၼၼ်ႉတႃႉႁဝ်း။ ၵႃႈတီႈၼၼ်ႈႁဝ်းတၵ်းလႆႈႁပ်ႉဢဝ်ၵရုၼႃႇတၢင်းဢဵတ်းလူ၊ဢိၵ်ႇတင်းတၵ်းလႆႈထူပ်းသုၵျေးၸူးတၢင်းလီဢၼ်မၼ်းၸဝ်ႈၸွႆႈထႅမ်ႁဝ်းၼႂ်းမိူဝ်ႈဢၼ်ႁဝ်းလူဝ်ႇၼၼ်ႉဢေႃႈ။
ၶုၼ်ယဵၸ်ႈပရေႃးႁဵၵ်ႈ ၵေႃႉလႂ်သေဢမ်ႇဝႃႈ၊လႆႈၶၢမ်ႇတၢင်းဢၼ်လိူၵ်ႈၵဵပ်းဢဝ်ၵႃႈၼႂ်းၵူၼ်းမဵဝ်းတူဝ်ၸဝ်ႈၵဝ်ႇတင်းလၢႆလႄႈၽြႃးပဵၼ်ၸဝ်ႈၶၢၼ်းဝႆႉတႅၼ်းၵူၼ်းတင်းလၢႆဢၼ်ၸၢပ်ႈသႅင်ႇၵၼ်တင်းၽြႃးပဵၼ်ၸဝ်ႈ၊ႁႂ်ႈလႆႈသၢၵ်ႈလူႇတၢင်းလူႇဢိၵ်ႇတင်းၶိူင်ႈတၢင်းလူႇဢၼ်ၽေႇဢပျတ်ႈဢေႃႈ။-
မၼ်းၼၼ်ႉၵေႃႈ၊ၼႄပျႃးလူၺ်ႈတၢင်းဢၼ်ၸႂ်ယိူၼ်ႉၶၢမ်ႇတေႃႇၵူၼ်းၸိူဝ်းဢၼ်ဢမ်ႇႁုၵႃႈသင်၊ဢိၵ်ႇတင်းၸိူဝ်းဢၼ်ၽိတ်းပိူင်ႈၸိူဝ်းၼၼ်ႉလႆႈ၊ၵွပ်ႈပိူဝ်ႈတူဝ်မၼ်းၵေႃႈမီးတၢင်းဢၼ်ႁႅင်းလဵၵ်ႉႁႅင်းဢူၼ်ႈမိူၼ်ၵူၼ်းတင်းလၢႆၼၼ်ႉဢေႃႈ။-
ပိူဝ်ႈဢၼ်မၼ်းပဵၼ်ၵေႃႉဢၼ်ႁႅင်းလဵၵ်ႉႁႅင်းဢူၼ်ႈၼၼ်ႉ၊မၼ်းတၵ်းလႆႈပဵၼ်ၵေႃႉဢၼ်သၢၵ်ႈလူႇပုၼ်ႈဢပျတ်ႈၵူၼ်းတင်းလၢႆၵူၺ်းဢမ်ႇၵႃး၊တၵ်းလႆႈသၢၵ်ႈလူႇပုၼ်ႈဢပျတ်ႈတူဝ်ၸဝ်ႈၵဝ်ႇၸွမ်းဢေႃႈ။-
ၽူႈလႂ်ၵေႃႈ၊ဢမ်ႇလိူၵ်ႈတူဝ်ၸဝ်ႈၵဝ်ႇႁႂ်ႈပဵၼ်ၶုၼ်ယဵၸ်ႈပရေႃးႁဵၵ်ႈ။ ၽြႃးပဵၼ်ၸဝ်ႈၵူၺ်းႁွင်ႉဢဝ်ၵူၼ်းသေလႄႈႁႂ်ႈပဵၼ်ၶုၼ်ယဵၸ်ႈပရေႃးႁဵၵ်ႈ၊မိူၼ်ၸိူဝ်ႉၼင်ႇမၼ်းၸဝ်ႈႁွင်ႉဢဝ် ဢႃႇရုၼ်ႇ၊ လႆႈပဵၼ်ၶုၼ်ယဵၸ်ႈပရေႃးႁဵၵ်ႈဢေႃႈ။
မိူၼ်ၼင်ႇၼၼ် ၸဝ်ႈၶရိၸ်ႈ၊ ဢမ်ႇယုၵ်ႉယွင်ႈတူဝ်ၸဝ်ႈၵဝ်ႇဝႆႉၼႂ်းဢရႃႇၶုၼ်ယဵၸ်ႈပရေႃးႁဵၵ်ႈ။ ၵူၺ်းၵႃႈ၊လႆႈၶၢမ်ႇတၢင်းဢၼ်ၽြႃးပဵၼ်ၸဝ်ႈယုၵ်ႉယွင်ႈလႄႈလၢတ်ႈဝႃႈ၊ “မႂ်းပဵၼ်လုၵ်ႈၸၢႆးၵဝ်ဢေႃႈ။ ၼႂ်းဝၼ်းမိူဝ်ႈၼႆႉၵဝ်ႁႂ်ႈမႂ်းၵိူတ်ႇလဵင်ႉမႃးယဝ်ႉ၊” ဝႃႈၼင်ႇၼႆၼၼ်ႉဢေႃႈ။-
မၼ်းၸဝ်ႈလၢတ်ႈထႅင်ႈၼႂ်းၵျၢမ်းလိၵ်ႈတီႈၼိုင်ႈလႄႈဝႃႈ၊ “မႂ်းပဵၼ်ယဵၸ်ႈပရေႃးႁဵၵ်ႈထႃႇဝရႃႉ၊ ၸွမ်းၼင်ႇဢရႃႇ မေႇလၶိၸေႇတႅၵ်ႈ၊ ၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ ၼၼ်ႉ၊ၼႂ်းၸူဝ်ႈပၢၼ်ဢၼ်ယင်းပဵၼ်ၸႃႇတိၵူၼ်းၼၼ်ႉၸိုင်၊ပႃးတင်းၼမ်ႉတႃတူၵ်းယူႇသေလႄႈသူးတွင်းလဝ်ႈယွၼ်းတင်းသဵင်ဢၼ်ယႂ်ႇၼႃႇတီႈၽြႃးပဵၼ်ၸဝ်ႈ၊ၸဝ်ႈဢၼ်ၸၢင်ႈၵႄႇသႄႇဢဝ်မၼ်းၸဝ်ႈဢွၵ်ႇသေဝူၺ်ႇတၼႃႇတၢင်းတၢႆၼၼ်ႉဢေႃႈ။ ပိူဝ်ႈဢၼ်မၼ်းၸဝ်ႈပႃးတင်းၸႂ်ဢၼ်ၵူဝ်ယမ်ၼၼ်ႉလႄႈၽြႃးပဵၼ်ၸဝ်ႈထွမ်ႇဢဝ်ၵႂၢမ်းမၼ်းၸဝ်ႈဢေႃႈ။-
ပိၵ်ႉသမ်ႉ၊မၼ်းၸဝ်ႈပဵၼ်လုၵ်ႈၽြႃးပဵၼ်ၸဝ်ႈသေၵေႃႈ၊မၼ်းၸဝ်ႈလႆႈသွၼ်ဢဝ်လွင်ႈတၢင်းဢၼ်ထွမ်ႇဢဝ်လူၺ်ႈဢၼ်လႆႈၶၢမ်ႇတုၵ်ႉၶႃႉတၢင်းၽၢၼ်ၼၼ်ႉဢေႃႈ။-
ပိူဝ်ႈဢၼ်မၼ်းၸဝ်ႈလႆႈၸေးၸုမ်ႇၸိူဝ်ႉၼင်ႇၼၼ်ယဝ်ႉၸင်ႇ၊မၼ်းၸဝ်ႈလႆႈပဵၼ်ငဝ်ႈႁၢၵ်ႈတြႃးတၢင်းဢၼ်ၵႄႇၶျွတ်ႈ၊ဢၼ်ဢမ်ႇသုတ်းဢမ်ႇသဵင်ႈပုၼ်ႈၶဝ်ၸိူဝ်းဢၼ်ထွမ်ႇဢဝ်မၼ်းၸဝ်ႈၼၼ်ႉလႄႈ၊-
ၽြႃးပဵၼ်ၸဝ်ႈပၢဝ်ႇသေႃႇဝႃႈ၊ႁႂ်ႈမၼ်းၸဝ်ႈပဵၼ်ၶုၼ်ယဵၸ်ႈပရေႃးႁဵၵ်ႈၼႂ်းဢရႃႇ မေႇလၶိၸေႇတႅၵ်ႈ၊ ၼၼ်ႉဢေႃႈ။
လွင်ႈ မေႇလၶိၸေႇတႅၵ်ႈ၊ ၼၼ်ႉ၊မီးလွင်ႈဢၼ်တၵ်းလၢတ်ႈၼမ်ၼႃႇသေၵေႃႈ၊ၵွပ်ႈပိူဝ်ႈဢၼ်သူဢမ်ႇႁုထွမ်ႇလႆႈငၢႆႈငၢႆႈလႄႈပဵၼ်ဢၼ်လၢတ်ႈယၢပ်ႇတႄႉတႄႉဢေႃႈ။-
ဝႃႈတႄႉမၼ်း၊ၵွပ်ႈလူၺ်ႈၶိင်ႇၵႃႇလႃႉပေႃးၵုမ်ႇပုၼ်ႈသူထုၵ်ႇလီလႆႈပဵၼ်သြႃႇယဝ်ႉဢေႃႈ။ ၵူၺ်းၵႃႈ၊သူယင်းလူဝ်ႇလႆႈသွၼ်ဢဝ်ဢၼ်ပဵၼ်ၵႂၢမ်းသွၼ်တြႃးၸၼ်ႉငဝ်ႈၽြႃးပဵၼ်ၸဝ်ႈၵႃႈတီႈပိူၼ်ႈထႅင်ႈလႄႈတိုၵ်ႉပဵၼ်ၵေႃႉဢၼ်ၵိၼ်ၼမ်ႉၼူမ်းၵူၺ်းလႄႈဢမ်ႇပႆႇလီၵိၼ်တၢင်းၵိၼ်ဢၼ်ၶႅင်ဢေႃႈ။-
ၵေႃႉဢၼ်ယင်းၵိၼ်ၼမ်ႉၼူမ်းယူႇၼၼ်ႉ၊ယင်းပဵၼ်လုၵ်ႈဢွၼ်ႇယူႇၵူၺ်းလႄႈဢမ်ႇပွင်ႇၸႂ်လွင်ႈတၢင်းဢၼ်သိုဝ်ႈတေႃႇၼၼ်ႉလႃးလႃး။-
ၼႄးၼိုင်ႈၸမ်ႉ၊တၢင်းၵိၼ်ဢၼ်ၶႅင်ၼၼ်ႉပဵၼ်ပုၼ်ႈတႃႇၵူၼ်းလူင်ဢၼ်လႆႈႁဵတ်းလႆႈသၢင်ႈလႄႈထူၼ်ႈတဵမ်ၼႂ်းတၢင်းႁုတၢင်းႁၼ်သေယဝ်ႉ၊မေႃၸၵ်ႉၽႄလွင်ႈလီလွင်ႈၸႃႉၼၼ်ႉဢေႃႈ။
ပိူဝ်ႈၼႆလႄႈဢွၼ်ၵၼ်ဝႆႉပႅတ်ႈဝၢင်းပႅတ်ႈလွင်ႈတၢင်းဢၼ်ပဵၼ်ၵေႃႇၸႃႉငဝ်ႈႁၢၵ်ႈၼႂ်းၽႃႇသႃႇၶရိၸ်ႈယၢၼ်ႇၼၼ်ႉသေလႄႈဢွၼ်ၵၼ်ၶိုၼ်ႈပႃႈၼႃႈႁႂ်ႈႁွတ်ႈထိုင်တၢင်းဢၼ်ပဵၼ်ၵူၼ်းလူင်ဢၼ်ထူၼ်ႈဢၼ်ၵႄႇၼၼ်ႉတႃႉႁဝ်း။ ႁဝ်းဢမ်ႇထုၵ်ႇလီၶိုၼ်းတႄႇငဝ်ႈႁၢၵ်ႈဢၼ်ဝႃႈ၊တၢင်းဢၼ်ပိၼ်ႇၸႂ်သေတၢင်းၵမ်တၢင်းၵျၢင်ႉဢၼ်ၵႂႃႇထိုင်တီႈတၢင်းတၢႆ၊တၢင်းဢၼ်ယုမ်ႇမၢတ်ႈၽြႃးပဵၼ်ၸဝ်ႈ၊-
တၢင်းဢၼ်သွၼ်ဢဝ်လွင်ႈဢၼ်ၶၢမ်ႇဢဝ်မၢင်ႇၵလႃႇပပ်ႉတိၸမ်ႇ၊ မၢင်ႇၵလႃႇတၢင်ႇမိုဝ်း၊တၢင်းဢၼ်လုၵ်ႉၵႃႈတၢင်းတၢႆၶိုၼ်းလိပ်း၊ဢိၵ်ႇတင်းတၢင်းဢၼ်ၸီႇယၢင်ႇထႃႇဝရႃႉၸိူဝ်းၼၼ်ႉတႃႉ။-
ပေႃးဝႃႈၽြႃးပဵၼ်ၸဝ်ႈပၼ်ဢၶႂၢင်ႉၸိုင်၊ႁဝ်းဢွၼ်ၵၼ်ၶိုၼ်ႈၵႂႃႇပႃႈၼႃႈတႃႉ။ ၼႆႉၸမ်ႉ၊မၼ်းပဵၼ်တၢင်းဢၼ်ႁဝ်းတေႁဵတ်းဢေႃႈ။
ႁဝ်းတေပႃးဢဝ်ၶဝ်ၸိူဝ်းဢၼ်တၢင်းယုမ်ႇမၢတ်ႈလုလႅဝ်ၵႂႃႇၼၼ်ႉမႃးၶိုၼ်းသေ၊ၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်မႃးလႆႈၸိူဝ်ႉၼင်ႇႁိုဝ်။ ၶဝ်ၼၼ်ႉလႆႈႁွတ်ႈထိုင်ၵႃႈတီႈဢၼ်လႅင်းၽြႃးပဵၼ်ၸဝ်ႈပွၵ်ႈၼိုင်ႈယဝ်ႉလႄႈလႆႈၸိမ်းတူၺ်းသုၵျေးၸူးၵၢင်ႁၢဝ်သေယဝ်ႉ၊လႆႈၶၢမ်ႇဢဝ်ဢမူၺ်ႇဝိၺိၺ်ႇမူတ်းၸၢင်ႇၸဝ်ႈယဝ်ႉယဝ်ႉ။-
ၶဝ်ယၢမ်ႈၸိမ်းတူၺ်းၵႂၢမ်းတြႃးဢၼ်လီဢၼ်ငၢမ်းၽြႃးပဵၼ်ၸဝ်ႈ၊ဢိၵ်ႇတင်းတၼ်းၶူဝ်းၶိင်ႇၵႃႇလႃႉဢၼ်တၵ်းမႃးၼၼ်ႉယဝ်ႉယဝ်ႉဢေႃႈ။-
ၶဝ်သမ်ႉၽွၵ်ႈပျၢၼ်ႇသေၵႃႈတီႈတၢင်းယုမ်ႇမၢတ်ႈၶဝ်ၼၼ်ႉလႄႈၵမ်းလိုၼ်းၶဝ်တၵ်းဢမ်ႇၶိုၼ်းၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်မႃးလႆႈထႅင်ႈ၊ၵွပ်ႈပိူဝ်ႈၶဝ်တေဢဝ်လုၵ်ႈၽြႃးပဵၼ်ၸဝ်ႈတွၵ်ႇဝႆႉၵႃႈၼိူဝ်သဝ်မႆႉဝႃးမိုဝ်းထႅင်ႈလႄႈႁဵတ်းႁႂ်ႈမၼ်းၸဝ်ႈလႆႈၶၢမ်ႇတၢင်းဢၼ်လူလၢႆသႄႉသွမ်းၼၼ်ႉဢေႃႈ။
လွင်ႈမၼ်းၸမ်ႉ၊လိၼ်ဢၼ်ၵိၼ်ၼမ်ႉၽူၼ်ဢၼ်တူၵ်းသႂ်ႇၵႃႈၼိူဝ်မၼ်းၶိူဝ်းၶိူဝ်းယႂ်းယႂ်းသေလႄႈၸၢင်ႈႁႂ်ႈတူၼ်ႈၽၵ်းယိူဝ်ႈၽၵ်းၶဵဝ်ယႂ်ႇမႃးပုၼ်ႈဢၵျူဝ်းၶဝ်ၸိူဝ်းဢၼ်ၽုၵ်ႇသွမ်ႈၼၼ်ႉၶၢမ်ႇဢဝ်တၢင်းလီမၢင်ႇၵလႃႇၵႃႈတီႈၽြႃးပဵၼ်ၸဝ်ႈဢေႃႈ။-
ၵူၺ်းၵႃႈ၊သင်ဝႃႈလိၼ်ၼၼ်ႉၸၢင်ႈႁႂ်ႈတူၼ်ႈၼၢမ်၊ဢိၵ်ႇတင်းတူၼ်ႈဝင်တင်းလၢႆယႂ်ႇမႃးၵူၺ်းၸိုင်၊မၼ်းဢမ်ႇပွင်ႇလွင်ႈၵႃႈသင်။ မၼ်းယင်းတေလႆႈၶၢမ်ႇၽေးတုၵ်ႉၶႃႉဢၼ်ၽြႃးပဵၼ်ၸဝ်ႈၵိၼ်ႇဝႃႈလႄႈ၊လိုၼ်းသုတ်းၼၼ်ႉတေလႆႈၶၢမ်ႇတၢင်းဢၼ်ၽႆးတုတ်ႇပႅတ်ႈဢေႃႈ။
ပိၵ်ႉသမ်ႉႁဝ်းလၢတ်ႈၸိူဝ်ႉၼင်ႇၼႆသေၵေႃႈ၊ပီႈၼွင်ႉဢၼ်ၵဝ်ႁၵ်ႉၶဝ်႟။ ႁဝ်းတမ်းၸႂ်တမ်းၶေႃးလူၺ်ႈလွင်ႈသူယူႇဢေႃႈ။ ႁဝ်းႁုလွင်ႈဢၼ်သူမီးမၢင်ႇၵလႃႇဢၼ်ယဵင်ႈၶႅၼ်းလီဢၼ်ၸၢပ်ႈသႅင်ႇၵၼ်တင်းတြႃးတၢင်းဢၼ်ၵႄႇၶျွတ်ႈဢဝ်ၼၼ်ႉယူႇဢေႃႈ။-
လွင်ႈမၼ်းၸမ်ႉ၊ၽြႃးပဵၼ်ၸဝ်ႈဢမ်ႇႁဵတ်းတၢင်းဢၼ်ဢမ်ႇတြႃးၼၼ်ႉဢေႃႈ။ မၼ်းၸဝ်ႈဢမ်ႇလူင်ဢမ်ႇလိုမ်းတၢင်းႁဵတ်းသူ၊ဢိၵ်ႇတင်းတၢင်းႁၵ်ႉမႅတ်ႈတႃႇသူ၊ဢၼ်သူထွၵ်ႈလူၺ်ႈၸိုဝ်ႈသဵင်ၸဝ်ႈသေလႄႈၼႄပျႃးၼႂ်းတၢင်းဢၼ်သူၸွႆႈထႅမ်တီႈၵူၼ်းမူတ်းၸၢင်ႇတင်းလၢႆဢၼ်ပူၼ်ႉမႃးယဝ်ႉၼၼ်ႉတေႃႈလဵဝ်ၼႆႉသူယင်းသိုပ်ႇႁဵတ်းယူႇၼၼ်ႉ။-
ဢၼ်ႁဝ်းၶႂ်ႈႁဵတ်းၼႃႇၼႃႇၼၼ်ႉၸမ်ႉ၊ၶႂ်ႈႁႂ်ႈသူၵူႈၵေႃႉတၵ်းမီးဝိရိယႃႉပႃးၸႂ်ပႃးၶေႃးတေႃႇထိုင်တီႈသုတ်း၊ၼင်ႇႁိုဝ်တၢင်းဢၼ်သူမုင်ႈထႃႈမွင်းထႃႈတင်းလၢႆ၊တၵ်းဢွင်ႇမႅင်ႇထၢင်ႇသႃးမႃးဢမၢၼ်ႇၶၼ်ပဵၼ်ၼၼ်ႉဢေႃႈ။-
ႁဝ်းဢမ်ႇၶႂ်ႈႁႂ်ႈသူၶၢၼ်ႉဢိူၼ်လႄႈ၊ၶႂ်ႈႁႂ်ႈသူၵမ်ၵျၢင်ႉမိူၼ်ၶဝ်ၸိူဝ်းဢၼ်ယုမ်ႇမၢတ်ႈလႄႈယိူၼ်ႉၶၢမ်ႇသေယဝ်ႉ၊လႆႈၶၢမ်ႇဢဝ်ဢမူၺ်ႇၵတိၽြႃးပဵၼ်ၸဝ်ႈၼၼ်ႉဢေႃႈ။
မိူဝ်ႈဢၼ်ၽြႃးပဵၼ်ၸဝ်ႈဝႆႉၵတိတေႃႇ ဢႃႇပြႃႇႁၢမ်ႇ၊ ၼၼ်ႉၸိုင်၊ၸွမ်းလူၺ်ႈဢမ်ႇမီးၸဝ်ႈဢၼ်ယႂ်ႇမျၢတ်ႈၼႃႇသေမၼ်းၸဝ်ႈ၊ပုၼ်ႈတၵ်းၵၢဝ်ႇတိူင်ႇၵၢဝ်ႇဝႃႈၼၼ်ႉလႄႈမၼ်းၸဝ်ႈဢဝ်တူဝ်ၸဝ်ႈၵဝ်ႇသေယဝ်ႉ၊ၵၢဝ်ႇတိူင်ႇလႄႈဝႃႈ၊-
“ၵဝ်တၵ်းပၼ်တၢင်းလီတီႈမႂ်း၊ဢိၵ်ႇတင်းႁႂ်ႈၸိူဝ်ႉၶိူဝ်းမႂ်းၼမ်ၵိုၼ်းမႃးဢမၢၼ်ႇၶၼ်ပဵၼ်ဢေႃႈ၊” ဝႃႈၼင်ႇၼႆဢေႃႈ။-
ၼင်ႇၼၼ်လႄႈဢၼ် ဢႃႇပြႃႇႁၢမ်ႇ၊ ယိူၼ်ႉၸႂ်ပႂ်ႉထႃႈၼၼ်ႉ၊မၼ်းလႆႈႁပ်ႉၶၢမ်ႇဢဝ်ၵတိၸဝ်ႈၼၼ်ႉဢေႃႈ။-
ၵူၼ်းႁဝ်းၸၢင်ႈဢဝ်ၵေႃႉဢၼ်ယႂ်ႇမျၢတ်ႈသေတူဝ်ၸဝ်ႈၵဝ်ႇသေၵေႃႉၵေႃႉသေလႄႈတိူင်ႇဝႃႈဢေႃႈ။ တၢင်းဢၼ်တိူင်ႇဝႃႈၼၼ်ႉ၊ႁဵတ်းႁႂ်ႈတၢင်းဢၼ်ၶဝ်တွပ်ႇထဵင်ၵၼ်ၼၼ်ႉထၢတ်ႇယဵၼ်ဢေႃႈ။-
ၽြႃးပဵၼ်ၸဝ်ႈၶႂ်ႈၼႄပျႃးလွင်ႈတၢင်းၵျၢမ်ႇတၢင်းပွင်မၼ်းၸဝ်ႈဢၼ်ဢမ်ႇတွၼ်ႉၽွၵ်ႈပျၢၼ်ႇၶိုၼ်းလႆႈသေပွၵ်ႈၼၼ်ႉတီႈၶဝ်ၸိူဝ်းဢၼ်လႆႈႁပ်ႉၵတိမၼ်းၸဝ်ႈတင်းလၢႆလႄႈမၼ်းၸဝ်ႈၸင်ႇဝႆႉၵတိလူၺ်ႈတၢင်းဢၼ်တိူင်ႇဝႃႈဢေႃႈ။-
လွင်ႈတၢင်းဢၼ်ၽြႃးပဵၼ်ၸဝ်ႈဢမ်ႇၶၢႆႉပုတ်ႈ၊ဢမ်ႇၽွၵ်ႈပျၢၼ်ႇၶိုၼ်းလႆႈ၊ဢိၵ်ႇတင်းလွင်ႈတၢင်းဢၼ်မၼ်းၸဝ်ႈဢမ်ႇဢဝ်တင်းမုသႃႇပႅတ်ႉလႅၼ်ဝႃႈၼႆ၊မီးသွင်ပိူင်ၼႆႉယဝ်ႉ။ ပိူဝ်ႈၼႆလႄႈႁဝ်းၸိူဝ်းဢၼ်လႆႈသွၼ်ႈႁူမ်ႈၽူၺ်းမၼ်းၸဝ်ႈၼႆႉ၊တၵ်းလႆႈတၢင်းဢၼ်သၢၵ်ႈသႃႇဢၼ်ယႂ်ႇၼႃႇပုၼ်ႈလွင်ႈၼင်ႇႁိုဝ်တၵ်းလႆႈယိပ်းၵမ်ဢဝ်တၢင်းဢၼ်မုင်ႈထႃႈမွင်းထႃႈဢၼ်မီးဝႆႉ၊ပႃႈၼႃႈႁဝ်းၼၼ်ႉမၼ်ႈမၼ်ႈၶိူင်ႇၶိူင်ႇဢေႃႈ။-
ႁဝ်းမီးတၢင်းဢၼ်မုင်ႈထႃႈမွင်းထႃႈၼၼ်ႉမိူၼ်ၸိူဝ်ႉၼင်ႇၶေႃလဵၵ်းဢၼ်ၶတ်းႁိူဝ်းဢၼ်ႁႂ်ႈၸႂ်ႁဝ်းမၼ်ႈၶိူင်ႇလႄႈငဝ်ႈမၼ်းၵွင်ႉဝႆႉ၊မၼ်ႈမၼ်ႈၵိုမ်းၵိုမ်းတၢင်းၼႂ်းၽႃႈၵင်ႈထႃႇၼႃႉမူတ်းၸၢင်ႇပုၼ်ႉဢေႃႈ။-
ၸဝ်ႈယေႇသု၊ ပဵၼ်ၽူႈတၢင်တူဝ်ႁဝ်းသေလႄႈလႆႈၶဝ်ႈၵႂႃႇၵႃႈၼႂ်းၼၼ်ႉဢွၼ်တၢင်းႁဝ်းသေယဝ်ႉ၊လႆႈပဵၼ်ၶုၼ်ယဵၸ်ႈပရေႃးႁဵၵ်ႈ ထႃႇဝရႃႉ၊ၵႃႈၼႂ်းဢရႃႇ မေႇလၶိၸေႇတႅၵ်ႈ၊ ယဝ်ႉဢေႃႈ။
မေႇလၶိၸေႇတႅၵ်ႈ၊ ၼႆႉ၊မၼ်းပဵၼ်ၶုၼ်ႁေႃၶမ်းဝဵင်း သႃႇလႅမ်ႇ၊ ဢၼ်ပဵၼ်ယဵၸ်ႈပရေႃးႁဵၵ်ႈ တီႈၽြႃးပဵၼ်ၸဝ်ႈဢၼ်သုင်ၼႃႇသေပိူၼ်ႈဢေႃႈ။ မိူဝ်ႈဢၼ် ဢႃႇပြႃႇႁၢမ်ႇ၊ တိုၵ်းတေႃးပႄႉၼႅင်ႇၶုၼ်ႁေႃၶမ်းသီႇပႃးသေယဝ်ႉ၊ပွၵ်ႈၶိုၼ်းမႃးၼၼ်ႉ၊ မေႇလၶိၸေႇတႅၵ်ႈ၊ ႁပ်ႉႁူဝ်တၢင်းသေလႄႈပၼ်တၢင်းလီတီႈမၼ်းဢေႃႈ။-
ဢႃႇပြႃႇႁၢမ်ႇ၊ ၵေႃႈ၊ဢဝ်ဢုၵ်ႉၸႃႇၵႃႈဢၼ်မၼ်းလႆႈမႃးၼၼ်ႉ၊လူႇတၢၼ်းပၼ်မၼ်းသိပ်းပုၼ်ႈပုၼ်ႈၼိုင်ႈသေဢေႃႈ။ ဢၼၢၵ်ႈဢထိၵ်ႈပႄႇၸိုဝ်ႈသဵင် မေႇလၶိၸေႇတႅၵ်ႈ၊ ၸမ်ႉ၊ဢွၼ်တၢင်းသေပိူၼ်ႈပွင်ႇဝႃႈ၊ “ၶုၼ်ဢၼ်သိုဝ်ႈတေႃႇ” ဝႃႈၼႆလႄႈ၊လိုၼ်းၼၼ်ႉပိူဝ်ႈဢၼ်မၼ်းပဵၼ်ၶုၼ်ႁေႃၶမ်းဝဵင်း သႃႇလႅမ်ႇ၊ လႄႈၸိုဝ်ႈသဵင်မၼ်းသမ်ႉပွင်ႇဝႃႈ၊ “ၶုၼ်တၢင်းၼိမ်၊” ဝႃႈၼႆ။-
ၸႃႉၸဵမ်ပေႃႈမၼ်း၊မႄႈမၼ်းဢိၵ်ႇတင်းၸိူဝ်ႉၶိူဝ်းပူႇမွၼ်ႇမၼ်းပဵၼ်ၽူႈလႂ်ဝႃႈၼႆ၊ၸရၢင်းဢၼ်တႅမ်ႈဝႆႉမၢႆဝႆႉဢမ်ႇမီး။ ယင်းဢမ်ႇမီးဝၼ်းတႄႇၸႃႉဢသၢၵ်ႈ၊ဢမ်ႇမီးဝၼ်းသုတ်းဢသၢၵ်ႈ၊မၼ်းပဵၼ်ၸိူဝ်ႉၼင်ႇလုၵ်ႈၽြႃးပဵၼ်ၸဝ်ႈလႄႈတႄႇယူႇၼႂ်းဢရႃႇယဵၸ်ႈပရေႃးႁဵၵ်ႈတႃႇသေႇဢမ်ႇထၢတ်ႇဢေႃႈ။
ပိူဝ်ႈၼႆၸင်ႇ၊ မေႇလၶိၸေႇတႅၵ်ႈ၊ ယႂ်ႇမျၢတ်ႈၼႃႇထၢၼ်ႇႁိုဝ်၊ဝႃႈၼႆၶႆႈၸႂ်တူၺ်းတႃႉ။ ပေႃႈၸိူဝ်ႉၶိူဝ်းႁဝ်း ဢႃႇပြႃႇႁၢမ်ႇ၊ ၼၼ်ႉယင်းလႆႈဢဝ်ဢုၵ်ႉၸႃႇၵႃႈဢၼ်မၼ်းလႆႈမႃးၵႃႈတီႈပၢင်သိုၵ်းၼၼ်ႉ၊သိပ်းပုၼ်ႈပုၼ်ႈၼိုင်ႈလူႇတၢၼ်းမၼ်းဢေႃႈ။-
ၸိူဝ်ႉၶိူဝ်း လေႇဝိ၊ ၶဝ်လႆႈဢရႃႇယဵၸ်ႈပရေႃးႁဵၵ်ႈမႃးၸွမ်းၼင်ႇတြႃးပိင်းၺၢပ်ႈမီးၼၼ်ႉလႄႈ၊ၶဝ်လႆႈႁပ်ႉဢဝ်တၢင်းလူႇသိပ်းပုၼ်ႈပုၼ်ႈၼိုင်ႈ၊ၵႃႈတီႈၵူၼ်းမဵဝ်း ဢိသရေး၊ ဢၼ်ပိၵ်ႉသမ်ႉပဵၼ်ပီႈၼွင်ႉၵၼ်ၸိူဝ်းဢၼ်လုၵ်ႉၵႃႈတီႈ ဢႃႇပြႃႇႁၢမ်ႇ၊ သိုပ်ႇလူင်းမႃးၼင်ႇၵၼ်သေၵေႃႈ၊ၶဝ်ယင်းလႆႈသၢၵ်ႈလူႇဢေႃႈ။-
ၵူၺ်းၵႃႈ၊ မေႇလၶိၸေႇတႅၵ်ႈ၊ ၸမ်ႉ၊ဢမ်ႇၸႂ်ႈၸိူဝ်ႉၶိူဝ်း လေႇဝိ၊ သေၵေႃႈ၊ယင်းလႆႈႁပ်ႉဢဝ်တၢင်းလူႇသိပ်းပုၼ်ႈပုၼ်ႈၼိုင်ႈ၊ၵႃႈတီႈ ဢႃႇပြႃႇႁၢမ်ႇ၊ ၵေႃႉဢၼ်လႆႈၶၢမ်ႇဢဝ်ၵတိ၊ၽြႃးပဵၼ်ၸဝ်ႈၼၼ်ႉသေယဝ်ႉ၊သမ်ႉယင်းပၼ်တၢင်းလီတီႈ ဢႃႇပြႃႇႁၢမ်ႇ၊ လူးၵွၼ်ႇဢေႃႈ။-
လွင်ႈဢၼ်ဝႃႈ၊ၵေႃႉယႂ်ႇပၼ်တၢင်းလီတီႈၵေႃႉလဵၵ်ႉၼၼ်ႉ၊ဢမ်ႇမီးတီႈတၵ်းတွပ်ႇထဵင်ယဝ်ႉဢေႃႈ။-
ၵႃႈၼႂ်းယဵၸ်ႈပရေႃးႁဵၵ်ႈၶဝ်ၼၼ်ႉ၊ၵူၼ်းၸိူဝ်းဢၼ်ၸၢင်ႈတၢႆတင်းလၢႆၼၼ်ႉလႆႈႁပ်ႉဢဝ်သိပ်းပုၼ်ႈ၊ပုၼ်ႈၼိုင်ႈဢေႃႈ။ ၼႂ်းလွင်ႈ မေႇလၶိၸေႇတႅၵ်ႈ၊ ၸမ်ႉ၊ၵေႃႉဢၼ်ၵျၢမ်းလိၵ်ႈၶၢမ်ႇသၢၵ်ႈသေႇဝႃႈ၊မၼ်းဢသၢၵ်ႈလိပ်းယူႇဢေႃႈ၊ဝႃႈၼင်ႇၼႆၼၼ်ႉလႆႈႁပ်ႉဢဝ်သိပ်းပုၼ်ႈ၊ပုၼ်ႈၼိုင်ႈဢေႃႈ။-
သမ်ႉမီးတီႈတၵ်းလၢတ်ႈလႄႈဝႃႈ၊ၸိူဝ်ႉၶိူဝ်း လေႇဝိ၊ ဢၼ်ၸၢင်ႈႁပ်ႉဢဝ်သိပ်းပုၼ်ႈ၊ပုၼ်ႈၼိုင်ႈၼၼ်ႉ၊လႆႈလူႇတၢၼ်းသိပ်းပုၼ်ႈ၊ပုၼ်ႈၼိုင်ႈတီႈ မေႇလၶိၸေႇတႅၵ်ႈ၊ လူၺ်ႈတၢင်း ဢႃႇပြႃႇႁၢမ်ႇ၊ ဢေႃႈ။-
လွင်ႈမၼ်းၸမ်ႉ၊မိူဝ်ႈဢၼ် မေႇလၶိၸေႇတႅၵ်ႈ၊ ထူပ်း ဢႃႇပြႃႇႁၢမ်ႇ၊ ၼၼ်ႉၸိုင်၊ လေႇဝိ၊ ယင်းဢမ်ႇပႆႇၵိူတ်ႇသေၵႃႈတီႈတူဝ်ပူႇပေႃႈမၼ်းဢေႃႈ။
ထႅင်ႈလွင်ႈၼိုင်ႈၸမ်ႉ၊ပေႃးလွင်ႈတၢင်းဢၼ်ပျေႉၸုမ်ႇၼၼ်ႉ၊ပေႃႇပဵၼ်မႃးၵွပ်ႈလူၺ်ႈၼႃႈၵၢၼ်ယဵၸ်ႈပရေႃးႁဵၵ်ႈ၊ၸိူဝ်ႉၶိူဝ်း လေႇဝိ၊ ဢၼ်ၸၢပ်ႈသႅင်ႇၵၼ်တင်းပိင်းၺၢပ်ႈတြႃး၊ပုၼ်ႈၵူၼ်းမဵဝ်း ဢိသရေး၊ ၼၼ်ႉၸိုင်၊ႁဵတ်းသင်လႄႈသမ်ႉမႃးမီးယဵၸ်ႈပရေႃးႁဵၵ်ႈထႅင်ႈတၢင်ႇပႃးဢၼ်ပေႃႇမႃးၼႂ်းဢရႃႇ မေႇလၶိၸေႇတႅၵ်ႈ၊ လႄႈဢမ်ႇမႃးၼႂ်းဢရႃႇ ဢႃႇရုၼ်ႇ၊ ၼၼ်ႉၼင်ႇႁိုဝ်။-
ပေႃးဢရႃႇယဵၸ်ႈပရေႃးႁဵၵ်ႈမီးတၢင်းဢၼ်လႅၵ်ႈလၢႆႈၸိုင်၊ပိင်းၺၢပ်ႈတြႃးၵေႃႈ၊တၵ်းလႆႈလႅၵ်ႈလၢႆႈဢေႃႈ။-
လွင်ႈၼႆႉၸိုင်၊ၸဝ်ႈၽြႃးႁဝ်းဢၼ်ဢဝ်တင်းၵႂၢမ်းပျႃႇတိၵ်ႈႁေႃးဝႆႉၼၼ်ႉ၊ၸၢပ်ႈသႅင်ႇၵၼ်တင်းၸိူဝ်ႉၶိူဝ်းတၢင်ႇၸိူဝ်ႉတၢင်ႇမဵဝ်းလႄႈၵႃႈၼႂ်းၸိူဝ်ႉၶိူဝ်းမၼ်းၸဝ်ႈၼၼ်ႉဢမ်ႇမီးၽူႈလႂ်ယၢမ်ႈထၢမ်းၼႃႈၵၢၼ်ယဵၸ်ႈပရေႃးႁဵၵ်ႈသေၵေႃႉသေၵူၼ်းဢေႃႈ။-
မၼ်းၸဝ်ႈၼၼ်ႉ၊ၵိူတ်ႇလဵင်ႉမႃးၵႃႈၼႂ်းၸိူဝ်ႉၶိူဝ်း ယုတႃႉ၊ ထၢင်ႇထၢင်ႇသႃးသႃးလႄႈမိူဝ်ႈဢၼ် မူဝ်းသေႇ၊ လၢတ်ႈၵႂၢမ်းဢရႃႇယဵၸ်ႈပရေႃးႁဵၵ်ႈၼၼ်ႉ၊မၼ်းယင်းဢမ်ႇလၢတ်ႈလွင်ႈၸိူဝ်ႉၶိူဝ်းၼၼ်ႉသေၶေႃႈသေၵမ်းဢေႃႈ။
မိူဝ်ႈဢၼ်ယဵၸ်ႈပရေႃးႁဵၵ်ႈတၢင်ႇပႃးပေႃႇမႃးမိူၼ်ၵၼ်တင်း မေႇလၶိၸေႇတႅၵ်ႈ၊ ယဝ်ႉၼၼ်ႉၸိုင်၊လွင်ႈဢၼ်ဝႃႈ၊ၼႃႈၵၢၼ်ယဵၸ်ႈပရေႃးႁဵၵ်ႈၶၢႆႉလႅၵ်ႈလၢႆႈယဝ်ႉၼၼ်ႉ၊ယဵင်ႈၶႅၼ်းထၢင်ႇသႃးမႃးဢေႃႈ။-
မၼ်းလႆႈပဵၼ်ယဵၸ်ႈပရေႃးႁဵၵ်ႈ မႃးၸွမ်းၼင်ႇထုင်းတြႃးၵူၼ်းၶူင်းၵၢင်ၼႆႉဢမ်ႇၸႂ်ႈလႄႈ မၼ်းလႆႈပဵၼ်မႃးၸွမ်းၼင်ႇတၼ်းၶူဝ်းဢသၢၵ်ႈ၊ဢၼ်ဢမ်ႇမီးတီႈသုတ်းတီႈတိူၵ်ႉၼၼ်ႉဢေႃႈ။-
လွင်ႈမၼ်းၸမ်ႉ၊ၵျၢမ်းလိၵ်ႈၶၢမ်ႇသၢၵ်ႈသေႇဝႆႉလႄႈဝႃႈ၊ “မႂ်းပဵၼ်ယဵၸ်ႈပရေႃးႁဵၵ်ႈထႃႇဝရႃႉ ၸွမ်းၼင်ႇဢရႃႇ မေႇလၶိၸေႇတႅၵ်ႈ၊ ဢေႃႈ၊” ဝႃႈၼင်ႇၼႆဢေႃႈ။-
ၼႄးၼိုင်ႈၸမ်ႉ၊ပိင်းၺၢပ်ႈတြႃးၵဝ်ႇၼၼ်ႉလႆႈပႅတ်ႈဝႆႉ၊ၵွပ်ႈပိူဝ်ႈမၼ်းႁႅင်းဢူၼ်ႈလႄႈ ဢမ်ႇမီးဢၵျူဝ်းၵႃႈသင်ၼၼ်ႉဢေႃႈ။-
လွင်ႈမၼ်းၸမ်ႉ၊ပိင်းၺၢပ်ႈတြႃးၼၼ်ႉဢမ်ႇဢဝ်ၽူႈလႂ်သူင်ႇႁွတ်ႈထိုင်တၢင်းဢၼ်ၸေးၸုမ်ႇဢေႃႈ။ လိူဝ်သေၼၼ်ႉ၊တြႃးတၢင်းဢၼ်မုင်ႈထႃႈမွင်းထႃႈ၊ဢၼ်ယဵင်ႈၶႅၼ်းမျၢတ်ႈၼၼ်ႉ တူၵ်းႁွတ်ႈတူၵ်းထိုင်ယဝ်ႉ၊ၵွပ်ႈတြႃးၼၼ်ႉလႄႈ ႁဝ်းလႆႈဢၶႂၢင်ႉဢၼ်သုတ်ႉၸမ်သုတ်ႉၸူးတီႈၽြႃးပဵၼ်ၸဝ်ႈဢေႃႈ။
ပုၼ်ႈလွင်ႈၼႆႉၸိုင်၊ၽြႃးပဵၼ်ၸဝ်ႈလႆႈမီးတၢင်းဢၼ်တိူင်ႇဝႃႈဢေႃႈ။ မိူဝ်ႈဢၼ်ပိူၼ်ႈတၢင်ႇၵေႃႉတၢင်ႇၵူၼ်းတင်းလၢႆ၊လႆႈဢရႃႇယဵၸ်ႈပရေႃးႁဵၵ်ႈၼၼ်ႉ၊ၽြႃးပဵၼ်ၸဝ်ႈဢမ်ႇမီးတၢင်းဢၼ်တိူင်ႇဝႃႈၸိူဝ်ႉၼင်ႇၼၼ်၊-
ၸဝ်ႈယေႇသု၊ ၸမ်ႉ၊ၽြႃးပဵၼ်ၸဝ်ႈမီးတၢင်းဢၼ်တိူင်ႇဝႃႈလႄႈဝႃႈ၊ “ၸဝ်ႈၽြႃးတိူင်ႇၵၢဝ်ႇၵႂၢမ်းသဵတ်ႈၸႃႇဝႆႉ၊တင်းႁူဝ်ၸႂ်ဢၼ်ဢမ်ႇလႅၵ်ႈဢမ်ႇလၢႆႈၼၼ်ႉလႄႈဝႃႈ၊ ‘မႂ်းပဵၼ်ယဵၸ်ႈပရေႃးႁဵၵ်ႈထႃႇဝရႃႉ၊ၸွမ်းၼင်ႇဢရႃႇ မေႇလၶိၸေႇတႅၵ်ႈ၊ ဢေႃႈ’ ဝႃႈၼင်ႇၼႆဢေႃႈ။” မီးမႃးၼင်ႇၼႆဢေႃႈ။
ၵွပ်ႈပိူဝ်ႈလွင်ႈတၢင်းၼႆႉလႄႈ လွင်ႈတၢင်းဢၼ်ပႅၵ်ႇပိူင်ႈၼႆႉ၊ၼႄပျႃးလွင်ႈဢၼ် ၸဝ်ႈယေႇသု၊ လႆႈပဵၼ်ၸဝ်ႈဢႃႇမႃႉၶၢမ်ႇပုၼ်ႈပတိၺိၺ်ႇတြႃး၊ဢၼ်ယဵင်ႈၶႅၼ်းမျၢတ်ႈၼႃႇၼၼ်ႉဢေႃႈ။
ယင်းမီးလွင်ႈပႅၵ်ႇပိူင်ႈတၢင်ႇဢၼ်လူးၵွၼ်ႇဢေႃႈ။ ယဵၸ်ႈပရေႃးႁဵၵ်ႈတၢင်ႇပႃးၼမ်ၼႃႇၸိူဝ်းၼၼ်ႉ၊ၵွပ်ႈပိူဝ်ႈၶဝ်ၸၢင်ႈလႆႈတၢႆလႄႈ ဢမ်ႇၸၢင်ႈသိုပ်ႇႁဵတ်းၼႃႈၵၢၼ်ၶဝ်လႆႈ။-
ၵူၺ်းၵႃႈ၊ ၸဝ်ႈယေႇသု၊ ၸမ်ႉ၊ဢသၢၵ်ႈလိပ်းယူႇၼိၵ်ႈၸႃႉထႃႇဝရႃႉလႄႈ မၼ်းၸဝ်ႈယိပ်းၼႃႈၵၢၼ်ယဵၸ်ႈပရေႃးႁဵၵ်ႈမၼ်းၸဝ်ႈသေႇသေႇယူႇလႄႈ ဢမ်ႇပူတ်းပၼ်တီႈၽူႈလႂ်သေၵေႃႉသေၵူၼ်းဢေႃႈ။-
ပိူဝ်ႈၼႆလႄႈ ၸႃႉၸဵမ်ယၢမ်းမိူဝ်ႈလဵဝ်၊ဢိၵ်ႇတင်းၵၢပ်ႈၵႃႇလႃႉတႃႇသေႇဢမ်ႇထၢတ်ႇ၊မၼ်းၸဝ်ႈတၢတ်ႈၼိူင်ႇႁႂ်ႈလႆႈၶျွတ်ႈဢဝ်ၶဝ်ၸိူဝ်းဢၼ်ဢိင်မၼ်းၸဝ်ႈသေ သုတ်ႉၸမ်သုတ်ႉၸူးတီႈၽြႃးပဵၼ်ၸဝ်ႈ၊ၵွပ်ႈပိူဝ်ႈမၼ်းၸဝ်ႈဢသၢၵ်ႈလိပ်းယူႇၼိၵ်ႈၸႃႉထႃႇဝရႃႉလႄႈ တွင်းပၢၼ်ႇတီႈၽြႃးပဵၼ်ၸဝ်ႈပုၼ်ႈၶဝ်ၼၼ်ႉဢေႃႈ။
ပိူဝ်ႈၼႆလႄႈ ၸဝ်ႈယေႇသု၊ ပဵၼ်ယဵၸ်ႈပရေႃးႁဵၵ်ႈဢၼ်ထုၵ်ႇမႅၼ်ႈပုၼ်ႈႁဝ်းဢေႃႈ။ မၼ်းၸဝ်ႈၼၼ်ႉမူတ်းၸၢင်ႇၶၢဝ်သႂ်ယူႇ၊ၵၢင်းလွတ်ႈတင်းတီႈတၵ်းတၢင်ႇဢပျတ်ႈယူႇ၊ၵၢင်းလွတ်ႈတင်းတၢင်းဢၼ်ၵူဝ်ႈၵိူၵ်ႇယူႇ၊ယူႇၽၢတ်ႇၵၼ်တင်းၶဝ်ၸိူဝ်းဢၼ်မီးဢပျတ်ႈယူႇလႄႈ လႆႈၶၢမ်ႇတၢင်းဢၼ်ယုၵ်ႉယွင်ႈဝႆႉ၊သုင်ၼႃႇသေမိူင်းၵၢင်ႁၢဝ်ပုၼ်ႉၼၼ်ႉဢေႃႈ။-
မၼ်းၸဝ်ႈဢမ်ႇလူဝ်ႇႁဵတ်းတၢင်းဢၼ်သၢၵ်ႈၵၢပ်ႈတၢင်းလူႇပုၼ်ႈဢပျတ်ႈတူဝ်ၸဝ်ႈၵဝ်ႇၵူႈဝၼ်းၼၼ်ႉဢွၼ်တၢင်းပိူၼ်ႈ၊မိူၼ်ၸိူဝ်ႉၼင်ႇယဵၸ်ႈပရေႃးႁဵၵ်ႈတင်းလၢႆ ဢၼ်သၢၵ်ႈလူႇပုၼ်ႈဢပျတ်ႈတၢင်းၽိတ်းတူဝ်ၸဝ်ႈၵဝ်ႇဢွၼ်တၢင်းယဝ်ႉၸင်ႇ၊သၢၵ်ႈလူႇပုၼ်ႈဢပျတ်ႈတၢင်းၽိတ်းပုၼ်ႈၵူၼ်းတင်းလၢႆဢေႃႈ။ ၸဝ်ႈယေႇသု၊ ၸမ်ႉ၊လႆႈသၢၵ်ႈလူႇပွၵ်ႈလဵဝ်ၵူၺ်းမိူဝ်ႈဢၼ်မၼ်းၸဝ်ႈဢဝ်တူဝ်မၼ်းၸဝ်ႈသၢၵ်ႈၵၢပ်ႈတီႈၽြႃးပဵၼ်ၸဝ်ႈၼၼ်ႉဢေႃႈ။-
ပိင်းၺၢပ်ႈတြႃး မူဝ်းသေႇ၊ ၼၼ်ႉ၊ယုၵ်ႉတၢင်ႇၵူၼ်းဢၼ်ဢမ်ႇၸေးဢမ်ႇၸုမ်ႇဝႆႉ၊ၼႂ်းဢရႃႇၶုၼ်ယဵၸ်ႈပရေႃးႁဵၵ်ႈဢေႃႈ။ ၵူၺ်းၵႃႈ၊ၵတိၽြႃးပဵၼ်ၸဝ်ႈဢၼ်တိူင်ႇဝႆႉဝႃႈဝႆႉၼၼ်ႉၸမ်ႉ၊ပိၵ်ႉသမ်ႉမႃးပႃႈလိုၼ်းတြႃး မူဝ်းသေႇ၊ သေၵေႃႈ၊ၶၢၼ်းလုၵ်ႈၸဝ်ႈဢၼ်လႆႈၶၢမ်ႇတၢင်းဢၼ်ႁဵတ်းႁႂ်ႈၸေးၸုမ်ႇၼၼ်ႉတႃႇသေႇဢမ်ႇထၢတ်ႇဢေႃႈ။
ငဝ်ႈၵႂၢမ်းလူင်ဢၼ်ႁဝ်းလၢတ်ႈယူႇတင်းသဵင်ႈတင်းလူင်ၼႆႉပဵၼ်လွင်ႈဢၼ်ဝႃႈ၊ႁဝ်းမီးၶုၼ်ယဵၸ်ႈပရေႃးႁဵၵ်ႈၸိူဝ်ႉၼင်ႇၼႆဢၼ်ၼင်ႈယူႇၽၢႆႇၶႂႃပလၢင်ႇၸဝ်ႈဢၼ်မုၼ်ၽုင်းဢႃႇၼုၽေႃႇယႂ်ႇၼႃႇလူင်လၢင်ၵႃႈၼႂ်းမိူင်းၵၢင်ႁၢဝ်ပုၼ်ႉၼၼ်ႉယဝ်ႉ။-
မၼ်းၸဝ်ႈၼၼ်ႉႁဵတ်းဝၢတ်ႈၽြႃးၸိူဝ်ႉၼင်ႇၶုၼ်ယဵၸ်ႈပရေႃးႁဵၵ်ႈ၊ၵႃႈၼႂ်းထႃႇၼႃႉတီႈမူတ်းၸၢင်ႇသေပိူၼ်ႈဢၼ်ဝႃႈ၊သုမ်ႉထဵင်ၸဝ်ႈၸႅတ်ႈၸႅတ်ႈဢၼ်ဢမ်ႇၸႂ်ႈၵူၼ်းတႄႇႁဵတ်းလႄႈပဵၼ်ထႃႇဝရႃႉၽြႃးတႄႇႁဵတ်းၼၼ်ႉဢေႃႈ။
ၶုၼ်ယဵၸ်ႈပရေႃးႁဵၵ်ႈပႃးလႂ်သေဢမ်ႇဝႃႈ၊လႆႈၶၢမ်ႇတၢင်းဢၼ်ၶၢၼ်းဝႆႉ၊ႁႂ်ႈလႆႈသၢၵ်ႈလူႇၶိူင်ႈတၢင်းလူႇတင်းလၢႆ၊ဢိၵ်ႇတင်းတၢင်းလူႇတူဝ်သတ်းတင်းလၢႆလႄႈၶုၼ်ယဵၸ်ႈပရေႃးႁဵၵ်ႈႁဝ်းၼႆႉၵေႃႈ၊တၵ်းလႆႈသၢၵ်ႈလူႇသေၸိူဝ်ႉသေပိူင်ဢေႃႈ။-
ပိူဝ်ႈဝႃႈယဵၸ်ႈပရေႃးႁဵၵ်ႈ တင်းလၢႆ၊ဢၼ်ႁဵတ်းတၢင်းလူႇၸွမ်းၼင်ႇပိင်းၺၢပ်ႈတြႃးၼၼ်ႉမီးယူႇဝႆႉယဝ်ႉ။ ပေႃးဝႃႈမၼ်းၸဝ်ႈမီးယူႇတီႈၼိူဝ်လိၼ်မိူင်းၼႆႉသေၵေႃႈ၊မၼ်းၸဝ်ႈတေဢမ်ႇလူဝ်ႇပဵၼ်ယဵၸ်ႈပရေႃးႁဵၵ်ႈယဝ်ႉဢေႃႈ။-
ၶဝ်ၼၼ်ႉ၊ယိူင်ႈၸွမ်းပုင်ႇႁၢင်ႈၶိူင်ႈပိူင်ဢၼ်ပဵၼ်သၢႆငၢႆၶိူင်ႈမူတ်းၸၢင်ႇမိူင်းၵၢင်ႁၢဝ်ၸဝ်ႈ၊မိူၼ်ၸိူဝ်ႉၼင်ႇ မူဝ်းသေႇ၊ ၼႂ်းမိူဝ်ႈဢၼ်မၼ်းၸမ်တၵ်းတႄႇႁဵတ်းသုမ်ႉထဵင်ၸဝ်ႈၼၼ်ႉ၊ၽြႃးပဵၼ်ၸဝ်ႈမီးဢမိင်ႉလႄႈဝႃႈ၊ “ၵႃႈၼင်ႇဢၼ်ၼႄပျႃးၵႃႈတီႈမႂ်းၵႃႈၼိူဝ်လွႆမႃးယဝ်ႉၼၼ်ႉႁႂ်ႈလႆႈတႄႇႁဵတ်းၸွမ်းၼင်ႇပုင်ႇႁၢင်ႈမၼ်းၵူႈၸိူဝ်ႉၵူႈပိူင်ၸိုင်၊ႁဵတ်းသတိတႃႉ၊” ဝႃႈၼင်ႇၼႆၼၼ်ႉဢေႃႈ။-
ၵူၺ်းၵႃႈ၊တေႃႈလဵဝ်ၼႆႉၸမ်ႉ၊ ၸဝ်ႈၶရိၸ်ႈ၊ လႆႈႁပ်ႉဢဝ်ဝၢတ်ႈယဵၸ်ႈပရေႃးႁဵၵ်ႈဢၼ်ယဵင်ႈၶႅၼ်းထွတ်ႈမျၢတ်ႈသေဝၢတ်ႈၵဝ်ႇ၊ပိူဝ်ႈဢၼ်မၼ်းၸဝ်ႈလႆႈပဵၼ်ၸဝ်ႈဝူင်ႈၵၢင်ပတိၺိၺ်ႇတြႃး၊ဢၼ်ယဵင်ႈၶႅၼ်းမျၢတ်ႈသေၵဝ်ႇၵွပ်ႈပိူဝ်ႈတႄႇယူႇၼႂ်းၵတိၸဝ်ႈတင်းလၢႆ၊ဢၼ်ယဵင်ႈၶႅၼ်းမျၢတ်ႈသေၵဝ်ႇၼၼ်ႉဢေႃႈ။
လွင်ႈမၼ်းၸမ်ႉ၊ပတိၺိၺ်ႇတြႃးဢၼ်တီႈၼိုင်ႈၼၼ်ႉ၊ပေႃးယင်းဢမ်ႇမီးတီႈၼႄးၸိုင်၊ပတိၺိၺ်ႇတြႃးဢၼ်တီႈသွင်ၼၼ်ႉ၊တၵ်းဢမ်ႇလူဝ်ႇမီးထႅင်ႈယဝ်ႉဢေႃႈ။-
ၵွပ်ႈပိူဝ်ႈၼႆလႄႈ၊ၸဝ်ႈၽြႃးထူပ်းႁၼ်တီႈၼႄးၵူၼ်းမၼ်းၸဝ်ႈတင်းလၢႆ၊မိူဝ်ႈဢၼ်မၼ်းၸဝ်ႈလၢတ်ႈလႄႈဝႃႈ၊ “ၸဝ်ႈၽြႃးမီးဢမိင်ႉၸမ်ႉ၊မိုဝ်ႉဝၼ်းတင်းလၢႆတၵ်းႁွတ်ႈမႃး၊ ၼႂ်းမိူဝ်ႈဢၼ်ၵဝ်တၵ်းၶိုၼ်းမႄးႁဵတ်းပတိၺိၺ်ႇတြႃးဢၼ်မႂ်ႇ၊ လူၺ်ႈၵၼ်တင်းၵူၼ်းမဵဝ်း ဢိသရေး၊ ဢိၵ်ႇတင်းၵူၼ်းမဵဝ်း ယုတႃႉ၊ တင်းလၢႆဢေႃႈ။
ပတိၺိၺ်ႇတြႃးၼႆႉ၊တၵ်းတေဢမ်ႇမိူၼ်ၵၼ်တင်းပတိၺိၺ်ႇတြႃး၊ ဢၼ်ၵဝ်ႁဵတ်းဝႆႉလူၺ်ႈၵၼ်တင်းပူႇမွၼ်ႇၶဝ်၊ ၼႂ်းမိုဝ်ႉဝၼ်းဢၼ်ၵဝ်တိုတ်ႉၸုင်ဢဝ်မိုဝ်းၶဝ်သေလႄႈ၊ ဢွၼ်ၶဝ်ဢွၵ်ႇသေၵႃႈတီႈမိူင်း ဢေးၵျိပ်ႉ၊ မႃးၼၼ်ႉဢေႃႈ။ ၶဝ်ဢမ်ႇတႄႇယူႇၵႃႈၼႂ်းပတိၺိၺ်ႇတြႃးဢၼ်ၵဝ်ပၼ်ၼၼ်ႉယဝ်ႉ။ ပိူဝ်ႈၼႆလႄႈၵဝ်ၵေႃႈဢမ်ႇလူဢမ်ႇတူၺ်းၶဝ်ယဝ်ႉ။
ၼႆႉၸမ်ႉ၊ပဵၼ်ပတိၺိၺ်ႇတြႃးဢၼ်ၵဝ်တၵ်းႁဵတ်းဝႆႉလူၺ်ႈၵၼ်တင်းၵူၼ်းမဵဝ်း ဢိသရေး၊ ၶဝ်၊ ၼႂ်းမိုဝ်ႉဝၼ်းဢၼ်တၵ်းမႃးဢေႃႈ။ ဝႃႈၼႆၸဝ်ႈၽြႃးမီးဢမိင်ႉဢေႃႈ။ ၵဝ်တၵ်းဢဝ်ပိင်းၺၢပ်ႈတြႃးၵဝ်သႂၢင်းသႂ်ႇၵႃႈၼႂ်းၸႂ်ၶဝ်လႄႈ၊ တၵ်းတႅမ်ႈသႂ်ႇဝႆႉၵႃႈၼိူဝ်မၢၵ်ႇႁူဝ်ၸႂ်ၶဝ်ဢေႃႈ။ ၵဝ်တၵ်းပဵၼ်ၽြႃးၶဝ်လႄႈၶဝ်ၵေႃႈတၵ်းပဵၼ်ၵူၼ်းၵဝ်ဢေႃႈ။
ၶဝ်ၼၼ်ႉ၊ပဵၼ်ၸိူဝ်ႉၶိူဝ်းၵၼ်လႄႈသင်၊ပဵၼ်ပီႈၼွင်ႉၵၼ်လႄႈသင်၊ ၵေႃႉၼိုင်ႈလႄႈၵေႃႉၼိုင်ႈဢမ်ႇလူဝ်ႇသင်ႇသွၼ်ပၼ်ၵၼ်လႄႈဝႃႈ၊ ‘ႁုၸၵ်းၸဝ်ႈၽြႃးတႃႉ’ ဝႃႈၼင်ႇၼႆ၊ၵွပ်ႈပိူဝ်ႈ ၶဝ်တင်းသဵင်ႈတင်းလူင်ၸႃႉၸဵမ်ၵေႃႉလဵၵ်ႉတေႃႇထိုင်ၵေႃႉယႂ်ႇ၊ တၵ်းဢွၼ်ၵၼ်ႁုၸၵ်းၵဝ်ဢေႃႈ။
ၵဝ်တၵ်းပႃးတင်းၸႂ်ၵရုၼႃႇလႄႈပွႆႇလွတ်ႈဢပျတ်ႈၶဝ်ဢေႃႈ။ ၵဝ်တၵ်းတေဢမ်ႇမၢတ်ႈဢမ်ႇမၢႆတၢင်းၽိတ်းၶဝ်ထႅင်ႈသေပွၵ်ႈဢေႃႈ။” ဝႃႈၼင်ႇၼႆၸဝ်ႈၽြႃးမီးဢမိင်ႉဢေႃႈ။-
တၢင်းဢၼ်လၢတ်ႈၸၢပ်ႈလူၺ်ႈလွင်ႈပတိၺိၺ်ႇတြႃးဢၼ်မႂ်ႇၼႆႉ၊ၽြႃးပဵၼ်ၸဝ်ႈႁႂ်ႈပတိၺိၺ်ႇတြႃးဢၼ်တီႈၼိုင်ႈၼၼ်ႉၵဝ်ႇၵႂႃႇဢေႃႈ။ ဢၼ်ၵဝ်ႇၵႂႃႇလႄႈမွင်ၵႂႃႇၼၼ်ႉၸိုင်၊တၵ်းၸဵဝ်းႁၢႆလၢႆၵႂႃႇဢေႃႈ။
ပတိၺိၺ်ႇတြႃးဢၼ်တီႈၼိုင်ႈၼၼ်ႉ၊မီးသိၼ်တြႃးဢၼ်တႅမ်ႈဝႆႉပုၼ်ႈလွင်ႈတၢင်းဢၼ်ႁဵတ်းဝၢတ်ႈ၊ဢိၵ်ႇတင်းထႃႇၼႃႉတီႈမူတ်းၸၢင်ႇၵႃႈၼိူဝ်လိၼ်မိူင်းဢေႃႈ။-
ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ၊သုမ်ႉထဵင်ၸဝ်ႈလႆႈတႄႇႁဵတ်းဝႆႉလႄႈထႃႇၼႃႉၽၢႆႇတၢင်းၼွၵ်ႈၼၼ်ႉ၊လႆႈႁွင်ႉႁဵၵ်ႈၸိုဝ်ႈထႃႇၼႃႉတီႈမူတ်းၸၢင်ႇဢေႃႈ။ ၵႃႈၼႂ်းထႃႇၼႃႉၼၼ်ႉ၊မီးၶဵင်ႇတီႈတႆႈၽႆး၊ဢိၵ်ႇတင်းၽိူၼ်ဢၼ်ပုၼ်ႈတႃႇဢဝ်ၶဝ်ႈမုၼ်းသၢၵ်ႈလူႇတီႈၽြႃးပဵၼ်ၸဝ်ႈတၢင်ႇဝႆႉၼၼ်ႉဢေႃႈ။-
ၽၢႆႇပႃႈလင်ၽႃႈၵင်ႈတီႈသွင်ၼၼ်ႉ၊မီးသုမ်ႉထဵင်ၸဝ်ႈဢၼ်ႁွင်ႉႁဵၵ်ႈၸိုဝ်ႈထႃႇၼႃႉတီႈမူတ်းၸၢင်ႇသေပိူၼ်ႈဢေႃႈ။-
ၵႃႈၼႂ်းသုမ်ႉထဵင်ၸဝ်ႈၼၼ်ႉ၊မီးၶဵင်ႇဢၼ်ဢဝ်တင်းၶမ်းႁဵတ်းဝႆႉ၊ပုၼ်ႈတႃႇတၵ်းတုတ်ႇဢၢႆႁွမ်၊ဢိၵ်ႇတင်းမီးတိူၵ်ႈပတိၺိၺ်ႇၸဝ်ႈဢၼ်ဢဝ်တင်းၶမ်းဢုမ်ႇလႄႈၵႃႈၼႂ်းတိူၵ်ႈပတိၺိၺ်ႇၸဝ်ႈၼၼ်ႉ၊မီးမေႃႈၶမ်းဢၼ်ဢဝ်ၶဝ်ႈမုၼ်း မၼ်ႇၼႃႉ၊ သႂ်ႇဝႆႉ၊မီးၶွၼ်ႉတဝ်ႉ ဢႃႇရုၼ်ႇ၊ ဢၼ်ပူင်ႇယွတ်ႈဝႆႉ၊ဢိၵ်ႇတင်းၶႅပ်းမၢၵ်ႇႁိၼ်သွင်ၶႅပ်းဢၼ်တႅမ်ႈပိင်းၺၢပ်ႈတြႃးၸဝ်ႈဝႆႉၼၼ်ႉဢေႃႈ။-
ၵႃႈၼိူဝ်တိူၵ်ႈပတိၺိၺ်ႇၸဝ်ႈၼၼ်ႉ၊မီးၶေႇရုၽဵမ်ႇ ဢၼ်မုၼ်ယႂ်ႇလႄႈၵီႈပိၵ်ႇႁူမ်ႇသုမ်ႇဝႆႉၵႃႈၼိူဝ်ၶဵင်ႇထႃႇၼႃႉတီႈဢၼ်ၽေႇဢပျတ်ႈၼၼ်ႉဢေႃႈ။ ၵူၺ်းၵႃႈ၊မိူဝ်ႈလဵဝ်ၸိုင်၊လွင်ႈတၢင်းၸိူဝ်းၼႆႉ၊ႁဝ်းဢမ်ႇၸၢင်ႈလၢတ်ႈၸေးလၢတ်ႈၸွတ်ႇလႆႈယဝ်ႉ။
လွင်ႈတၢင်းၸိူဝ်းၼႆႉ၊ၶိုင်ပွင်မႄးႁႅၼ်းယဝ်ႉသေ၊ယဵၸ်ႈပရေႃးႁဵၵ်ႈ ၶဝ်ၶဝ်ႈၵႂႃႇၵႃႈၼႂ်းသုမ်ႉထဵင်ၸဝ်ႈၸၼ်ႉၼွၵ်ႈလႄႈႁဵတ်းဝၢတ်ႈၵူႈမိူဝ်ႈၵူႈဝၼ်းဢေႃႈ။-
ၵႃႈၼႂ်းသုမ်ႉထဵင်ၸဝ်ႈၸၼ်ႉၼႂ်းၼၼ်ႉၸမ်ႉ၊ၶုၼ်ယဵၸ်ႈပရေႃးႁဵၵ်ႈပႃးလဵဝ်ၵူၺ်း၊လႆႈပႃးဢဝ်လိူတ်ႈပုၼ်ႈတႃႇတေသၢၵ်ႈလူႇ၊ပုၼ်ႈဢပျတ်ႈတူဝ်ၸဝ်ႈၵဝ်ႇ၊ဢိၵ်ႇတင်းပုၼ်ႈဢပျတ်ႈၵူၼ်းတင်းလၢႆဢၼ်ဢမ်ႇလႆႈတင်ႈၸႂ်လႄႈၽိတ်းပိူင်ႈၼၼ်ႉ၊ယေႈ ပီလႆႈၶဝ်ႈယေႈပွၵ်ႈၵူၺ်းဢေႃႈ။-
လွင်ႈတၢင်းဢၼ်ၶိုင်ပွင်မႄးႁႅၼ်းဝႆႉ၊ၸိူဝ်ႉၼင်ႇၼၼ်ၼၼ်ႉ၊ဝိၺိၺ်ႇမူတ်းၸၢင်ႇၸဝ်ႈသင်ႇသွၼ်ဝႆႉ၊ထၢင်ႇထၢင်ႇသႃးသႃးလွင်ႈဢၼ်ဝႃႈ၊ၸူဝ်ႈဢၼ်သုမ်ႉထဵင်ၸဝ်ႈၸၼ်ႉၼွၵ်ႈယင်းတႄႇယူႇမီးယူႇၼႆႉ၊သဵၼ်ႈတၢင်းဢၼ်ၵႂႃႇၸူးထႃႇၼႃႉတီႈမူတ်းၸၢင်ႇသေပိူၼ်ႈဢမ်ႇပႆႇၽုၺ်ႇၼၼ်ႉလႄႈ၊-
ပဵၼ်ပုင်ႇပမႃႇဢၼ်ၸိၼႄၵႃႈၼႂ်းၶိင်ႇၵႃႇလႃႉမိူဝ်ႈလဵဝ်ဢၼ်ပွင်ႇဝႃႈ၊ဢဝ်ၶိူင်ႈလူႇဢၼ်ပဵၼ်တူဝ်သတ်း၊ဢိၵ်ႇတင်းၶိူင်ႈတၢင်းလူႇတၢင်ႇၸိူဝ်ႉတၢင်ႇမဵဝ်းသေလႄႈသၢၵ်ႈလူႇႁဵတ်းဝၢတ်ႈတီႈၽြႃးပဵၼ်ၸဝ်ႈသေၵေႃႈ၊ဢမ်ႇၸၢင်ႈႁဵတ်းႁႂ်ႈႁူဝ်ၸႂ်ၵေႃႉဢၼ်ႁဵတ်းဝၢတ်ႈသၢၵ်ႈၵၢပ်ႈတၢင်းလူႇၼၼ်ႉႁွတ်ႈထိုင်တၢင်းဢၼ်ၸေးၸုမ်ႇလႆႈၼၼ်ႉဢေႃႈ။-
မၼ်းၵူၺ်းပဵၼ်ၶိူင်ႈပိူင်ဢၼ်ၸၢပ်ႈသႅင်ႇၵၼ်တင်းတၢင်းၵိၼ်တင်းၶူပ်း၊ဢိၵ်ႇတင်းတၢင်းၸုမ်ႇၼမ်ႉႁႂ်ႈမူတ်းသႂ်ၼၼ်ႉၵူၺ်းလႄႈ၊ပဵၼ်သိၼ်တြႃးၽၢႆႇတူဝ်ၵႃႇယႃႉ၊ဢၼ်ၶျႃးပူင်ဝႆႉထႃႈတေႃႇထိုင်ၶိင်ႇၵႃႇလႃႉဢၼ်ၽြႃးပဵၼ်ၸဝ်ႈမႄးတႄႇမႄးႁဵတ်းဝၢတ်ႈဢၼ်မႂ်ႇၼၼ်ႉၵူၺ်းဢေႃႈ။
ၵူၺ်းၵႃႈ၊မိူဝ်ႈဢၼ် ၸဝ်ႈၶရိၸ်ႈ၊ ၵျွမႃးပဵၼ်ၶုၼ်ယဵၸ်ႈပရေႃးႁဵၵ်ႈ၊ဢၼ်ၸၢပ်ႈသႅင်ႇၵၼ်တင်းဢၼ်ထွတ်ႈမျၢတ်ႈဢၼ်ပေႃးမီးဝႆႉယဝ်ႉၼၼ်ႉၸိုင်၊မၼ်းၸဝ်ႈၶဝ်ႈၵႂႃႇၵႃႈၼႂ်းသုမ်ႉထဵင်ၸဝ်ႈဢၼ်ယဵင်ႈၶႅၼ်းယႂ်ႇမျၢတ်ႈသေမိူဝ်ႈဢွၼ်တၢင်းဢၼ်ဢမ်ႇလႆႈဢဝ်မိုဝ်းၵူၼ်းႁဵတ်း၊ဢၼ်ၶႂ်ႈဝႃႈ၊ဢမ်ႇၸႂ်ႈသုမ်ႉထဵင်မိူင်းလေႃးၵႃႉၼႆႉၼၼ်ႉဢေႃႈ။-
မၼ်းၸဝ်ႈယင်းဢမ်ႇဢဝ်လိူတ်ႈပႄႉ၊ဢမ်ႇဢဝ်လိူတ်ႈဝူဝ်းဢွၼ်ႇတင်းလၢႆၼၼ်ႉ၊မၼ်းၸဝ်ႈပႃးဢဝ်လိူတ်ႈတူဝ်ၸဝ်ႈၵဝ်ႇၶဝ်ႈၵႃႈၼႂ်းထႃႇၼႃႉတီႈမူတ်းၸၢင်ႇသေပိူၼ်ႈၼၼ်ႉ၊ပွၵ်ႈလဵဝ်ၵူၺ်း၊ပုၼ်ႈဢၼ်ထုတ်ႇဢဝ်ႁဝ်းႁႂ်ႈႁဝ်းလႆႈၶၢမ်ႇတၢင်းဢၼ်ၵႄႇၶျွတ်ႈဢဝ်တႃႇသေႇၼၼ်ႉဢေႃႈ။-
လွင်ႈမၼ်းၸမ်ႉ၊ပေႃးဢဝ်လိူတ်ႈပႄႉလိူတ်ႈဝူဝ်းတင်းတဝ်ႈဝူဝ်းမႄႈသိုဝ်ႇ တင်းလၢႆၽႅတ်းသႂ်ႇၵႃႈၼိူဝ်ၶဝ်ၸိူဝ်းဢၼ်မီးတၢင်းဢၼ်ၵူဝ်ႈၵိူၵ်ႇၼၼ်ႉ၊တၢတ်ႈၼိူင်ႇႁႂ်ႈတူဝ်ၶၼ်ႇထႃႇၶဝ်မူတ်းၸၢင်ႇလႆႈဢမၢၼ်ႇၶၼ်ပဵၼ်ၸိုင်၊-
လိူတ်ႈ ၸဝ်ႈၶရိၸ်ႈ၊ ၽူႈဢၼ်ဢဝ်တူဝ်ၸဝ်ႈၵဝ်ႇသေလႄႈသၢၵ်ႈၵၢပ်ႈတီႈၽြႃးပဵၼ်ၸဝ်ႈလူၺ်ႈထႃႇဝရႃႉဝိၺိၺ်ႇၼၼ်ႉယဵင်ႈၶႅၼ်းတေတၢတ်ႈၼိူင်ႇလႆႈၵႃႈႁိုဝ်။ လိူတ်ႈမျၢတ်ႈမၼ်းၸဝ်ႈၼၼ်ႉႁဵတ်းႁႂ်ႈႁူဝ်ၸႂ်ၵူၼ်းၸိူဝ်းဢၼ်ၵမ်ၵျၢင်ႉတၢင်းဢၼ်ၸၢပ်ႈသႅင်ႇၵၼ်တင်းတၢင်းတၢႆၼၼ်ႉဝၢႆႇပွၵ်ႈၶိုၼ်းမႃးပွင်ၼႃႈၵၢၼ်ၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉဢေႃႈ။-
ၵွပ်ႈပိူဝ်ႈလွင်ႈတၢင်းၼႆႉလႄႈပိူဝ်ႈဢၼ်မၼ်းၸဝ်ႈလႆႈၶၢမ်ႇတၢႆပုၼ်ႈတၵ်းလႆႈထုတ်ႇဢဝ်ဢပျတ်ႈဢၼ်ၽိတ်းပိူင်ႈၼႂ်းၸူဝ်ႈပၢၼ်ပတိၺိၺ်ႇတြႃးပွၵ်ႈတီႈၼိုင်ႈၼၼ်ႉလႄႈမၼ်းၸဝ်ႈပဵၼ်ၸဝ်ႈဝူင်ႈၵၢင်ပတိၺိၺ်ႇတြႃးဢၼ်မႂ်ႇ၊ႁႂ်ႈၶဝ်ၸိူဝ်းဢၼ်မၼ်းၸဝ်ႈႁွင်ႉဢဝ်ၼၼ်ႉ၊လႆႈၶၢမ်ႇဢဝ်ဢမူၺ်ႇတၢင်းလီမၢင်ႇၵလႃႇထႃႇဝရႃႉဢၼ်ၽြႃးပဵၼ်ၸဝ်ႈပၼ်ၵတိဝႆႉၼၼ်ႉဢေႃႈ။
ပေႃးတေႁႂ်ႈလိၵ်ႈပုၼ်ႈဢၼ်တေပၼ်ဢမူၺ်ႇၼၼ်ႉ၊ႁႂ်ႈတႄႇမၼ်ႈၸိုင်၊တေလႆႈမီးသၢၵ်ႈသေႇပျႃးၼႄဝႃႈၵေႃႉဢၼ်ၶျုၵ်ႈလိၵ်ႈဝႆႉၼၼ်ႉလႆႈတၢႆၵႂႃႇဢမၢၼ်ႇၶၼ်ပဵၼ်ယဝ်ႉဢေႃႈ။-
လွင်ႈမၼ်းၸမ်ႉ၊ပေႃးၵေႃႉဢၼ်ၶျုၵ်ႈလိၵ်ႈဝႆႉၼၼ်ႉ၊ယင်းဢသၢၵ်ႈလိပ်းယူႇၸိုင်၊လိၵ်ႈဢၼ်ၶျုၵ်ႈဝႆႉၼၼ်ႉဢမ်ႇပႆႇမီးဢၵျူဝ်း။ မိူဝ်ႈဢၼ်ၵေႃႉၼၼ်ႉတၢႆၵႂႃႇယဝ်ႉၸင်ႇ၊လိၵ်ႈဢၼ်ၶျုၵ်ႈဝႆႉၼၼ်ႉၸင်ႇမီးဢၵျူဝ်းဢေႃႈ။-
ၵွပ်ႈပိူဝ်ႈဝႃႈ၊ပတိၺိၺ်ႇတြႃးပွၵ်ႈတီႈၼိုင်ႈၼၼ်ႉ၊ၸၢင်ႈပွင်ႁဵတ်းဢၵျူဝ်းၵွပ်ႈလူၺ်ႈလိူတ်ႈၵူၺ်းဢေႃႈ။-
ဢွၼ်တၢင်းသေပိူၼ်ႈၼၼ်ႉ၊ မူဝ်းသေႇ၊ ဢဝ်ပိင်းၺၢပ်ႈၵႃႈဢၼ်ပႃးၼႂ်းတြႃးၸဝ်ႈႁေႃးလၢတ်ႈတီႈၵူၼ်းတင်းသဵင်ႈတင်းလူင်ယဝ်ႉၸင်ႇ၊ဢဝ်ယွတ်ႈတူၼ်ႈယိူဝ်ႈယႃႈႁုတ်ႉသူပ်ႉ ဢိၵ်ႇတင်းၶူၼ်သူဝ်းဢၼ်ယွမ်ႉလႅင်ၼၼ်ႉ၊ဢဝ်ၸုမ်ႇသႂ်ႇၼႂ်းလိူတ်ႈဝူဝ်းဢွၼ်ႇတင်းလိူတ်ႈပႄႉတင်းလၢႆ၊ဢၼ်လေႃးၼမ်ႉၼၼ်ႉသေယဝ်ႉ၊ၽႅတ်းသႂ်ႇၵိၼ်လိၵ်ႈတြႃး၊ဢိၵ်ႇတင်းၵူၼ်းတင်းသဵင်ႈတင်းလူင်လႄႈဝႃႈ၊-
“လိူတ်ႈၼႆႉၸမ်ႉ၊ပဵၼ်လိူတ်ႈပတိၺိၺ်ႇတြႃးဢၼ်ၽြႃးပဵၼ်ၸဝ်ႈပိင်းၺၢပ်ႈဝႆႉတီႈသူတင်းလၢႆဢေႃႈ၊” ဝႃႈၼင်ႇၼႆဢေႃႈ။-
မိူၼ်ၸိူဝ်ႉၼင်ႇၼၼ်၊ မူဝ်းသေႇ၊ ဢဝ်လိူတ်ႈၼၼ်ႉ၊ၽႅတ်းသႂ်ႇၵႃႈၼိူဝ်သုမ်ႉထဵင်ၸဝ်ႈ၊ဢိၵ်ႇတင်းမေႃႈၸိူဝ်းဢၼ်သုင်းတိုဝ်းၵႃႈၼႂ်းတၢင်းဢၼ်ႁဵတ်းဝၢတ်ႈၼၼ်ႉဢေႃႈ။-
တီႈတႄႉမၼ်းၸွမ်းၼင်ႇဢၼ်ထုင်းတြႃးၼၼ်ႉၸမ်ႉ၊ၵူႈၸိူဝ်ႉၵူႈပိူင်ၵမ်ႈၼမ်ၼၼ်ႉလႆႈၶၢမ်ႇတၢင်းဢၼ်ႁဵတ်းႁႂ်ႈမူတ်းသႂ်ၵွပ်ႈလူၺ်ႈလိူတ်ႈဢေႃႈ။ ပေႃးယင်းဢမ်ႇမီးတၢင်းဢၼ်လိူတ်ႈလႆဢွၵ်ႇၸိုင်၊ဢမ်ႇမီးတၢင်းဢၼ်ပွႆႇလွတ်ႈဢပျတ်ႈဢေႃႈ။
ပိူဝ်ႈဢၼ်ပဵၼ်ၸိူဝ်ႉၼင်ႇၼႆလႄႈတၵ်းလႆႈသုၵ်ႈပွတ်ႈပုင်ႇႁၢင်ႈဢၼ်မိူၼ်ၶိူင်ႈပိူင်ဢၼ်မီးၵႃႈၼိူဝ်ၵၢင်ႁၢဝ်ႁႂ်ႈၶၢဝ်ၸၢင်ႇလူၺ်ႈၶိူင်ႈတၢင်းလူႇၸိူဝ်ႉၼင်ႇၼႆဢေႃႈ။ ၵူၺ်းၵႃႈ၊ၶိူင်ႈပိူင်ဢၼ်မီးၵႃႈၼိူဝ်ၵၢင်ႁၢဝ်ၼၼ်ႉတေလႆႈသုၵ်ႈပွတ်ႈႁႂ်ႈၶၢဝ်ၸၢင်ႇလူၺ်ႈၶိူင်ႈတၢင်းလူႇဢၼ်ယဵင်ႈၶႅၼ်းမျၢတ်ႈသေၶိူင်ႈတၢင်းလူႇၸိူဝ်းၼၼ်ႉဢေႃႈ။-
ၵွပ်ႈပိူဝ်ႈဝႃႈ၊ ၸဝ်ႈၶရိၸ်ႈ၊ ဢမ်ႇလႆႈၶဝ်ႈၵႃႈၼႂ်းထႃႇၼႃႉတီႈမူတ်းၸၢင်ႇဢၼ်ဢဝ်မိုဝ်းၵူၼ်းသေလႄႈယိူင်ႈႁဵတ်းၸွမ်းပုင်ႇႁၢင်ႈထႃႇၼႃႉဢၼ်ၸႅတ်ႈၸႅတ်ႈၼၼ်ႉ၊တေႃႈလဵဝ်ၼႆႉမၼ်းၸဝ်ႈၶဝ်ႈၵႃႈၼႂ်းတူဝ်ၵၢင်ႁၢဝ်ႁႂ်ႈလႆႈၼႄပျႃးတူဝ်ၸဝ်ႈၵဝ်ႇပုၼ်ႈႁဝ်းၵႃႈတီႈၽၢႆႇၼႃႈၽြႃးပဵၼ်ၸဝ်ႈဢေႃႈ။-
ၶုၼ်ယဵၸ်ႈပရေႃးႁဵၵ်ႈမဵဝ်း ၵျူး၊ ၶဝ်၊လႆႈပႃးဢဝ်လိူတ်ႈတူဝ်သတ်းလႄႈၶဝ်ႈၵႃႈၼႂ်းထႃႇၼႃႉတီႈမူတ်းၸၢင်ႇသေပိူၼ်ႈၼၼ်ႉၵူႈပီဢေႃႈ။ ၸဝ်ႈၶရိၸ်ႈ၊ ၸမ်ႉ၊ဢမ်ႇလူဝ်ႇၵမ်းၵမ်းၶဝ်ႈၸူးလႄႈသၢၵ်ႈလူႇတူဝ်ၸဝ်ႈၵဝ်ႇမိူၼ်ၸိူဝ်ႉၼင်ႇၶဝ်ဢေႃႈ။-
ပေႃးသၢၵ်ႈလူႇၸိူဝ်ႉၼင်ႇၼၼ်ယူႇၸိုင်၊တႄႇဢဝ်ၸဵမ်မိူဝ်ႈၵမ်ႇၽႃႇၸႃႉတႄႇမႃးၼၼ်ႉမၼ်းၸဝ်ႈလူဝ်ႇလႆႈၵမ်းၵမ်းၶၢမ်ႇတၢႆၶိူဝ်းၶိူဝ်းယႂ်းယႂ်းဢေႃႈ။ တေႃႈလဵဝ်ၼႆႉဢမ်ႇပဵၼ်ၸိူဝ်ႉၼင်ႇၼၼ်၊ၼႂ်းၵၢပ်ႈၵႃႇလႃႉတီႈသုတ်းၼႆႉ၊မၼ်းၸဝ်ႈပေႃႇမႃးပွၵ်ႈလဵဝ်ၵူၺ်းႁႂ်ႈယဝ်ႉတူဝ်ႈၵူႈမဵဝ်းႁႂ်ႈလႆႈပႄႇၽဵဝ်ႈပႅတ်ႈဢပျတ်ႈတင်းလၢႆ၊လူၺ်ႈတၢင်းဢၼ်ဢဝ်တူဝ်ၸဝ်ႈၵဝ်ႇသၢၵ်ႈလူႇၼၼ်ႉဢေႃႈ။-
ၵူၼ်းၵူႈၵေႃႉၵူႈၵူၼ်းၸိုင်၊ၸၢင်ႈတၢႆပွၵ်ႈလဵဝ်ၵူၺ်းလႄႈၵမ်းလိုၼ်းလႆႈၶၢမ်ႇတၢင်းဢၼ်ၽြႃးပဵၼ်ၸဝ်ႈၸီႇယၢင်ႇတြႃးဢေႃႈ။-
မိူၼ်ၼင်ႇၼၼ် ၸဝ်ႈၶရိၸ်ႈ၊ ၵေႃႈဢဝ်တူဝ်ၸဝ်ႈၵဝ်ႇသၢၵ်ႈလူႇပွၵ်ႈလဵဝ်ၵူၺ်း၊ႁႂ်ႈလႆႈႁပ်ႉတုင်းဢဝ်ဢပျတ်ႈၵူၼ်းၼမ်ၼႃႇသေယဝ်ႉ၊တၵ်းတေပေႃႇမႃးထႅင်ႈပွၵ်ႈတီႈသွင်ႁႂ်ႈလႆႈပႄႇၽဵဝ်ႈပႅတ်ႈဢပျတ်ႈဢမ်ႇၸႂ်ႈလႄႈႁႂ်ႈလႆႈၵႄႇၶျွတ်ႈဢဝ်ၶဝ်ၸိူဝ်းဢၼ်မုင်ႈမွင်းပႂ်ႉထႃႈမၼ်းၸဝ်ႈယူႇၼၼ်ႉဢေႃႈ။
ပိင်းၺၢပ်ႈတြႃး ၵျူး၊ ၶဝ်ၼၼ်ႉ၊ယင်းဢမ်ႇၸႂ်ႈပုင်ႇႁၢင်ႈဢၼ်မၢၼ်ႇဢၼ်မႅၼ်ႈၸေးၸေးၸုမ်ႇၸုမ်ႇလႄႈၵူၺ်းပဵၼ်ငဝ်းဢၼ်ထွတ်ႈဢၼ်မျၢတ်ႈဢၼ်တၵ်းပဵၼ်မႃးၵမ်းလိုၼ်းၼၼ်ႉဢေႃႈ။ ဢဝ်ၶိူင်ႈတၢင်းလူႇမဵဝ်းလဵဝ်ၵၼ်သၢၵ်ႈလူႇယူႇသေႇသေႇၵူႈပီၵူႈပီၼၼ်ႉလႄႈတၵ်းႁႂ်ႈၶဝ်ၸိူဝ်းဢၼ်သုတ်ႉၸူးတီႈၽြႃးပဵၼ်ၸဝ်ႈတင်းလၢႆၼၼ်ႉဢမ်ႇမီးတီႈတၵ်းတၢင်ႇဢပျတ်ႈလႆႈဢေႃႈ။-
ပေႃးပဵၼ်ၸိူဝ်ႉၼင်ႇၼင်လႆႈၸိုင်၊ၶဝ်ၸၢင်ႈၶႄးတၵ်းလႆႈၵိုတ်းသဝ်းသေတၢင်းဢၼ်သၢၵ်ႈလူႇယဝ်ႉဢမ်ႇၸႂ်ႈႁိုဝ်း။ ပေႃးၵူၼ်းၸိူဝ်းဢၼ်ႁဵတ်းဝၢတ်ႈတီႈၽြႃးပဵၼ်ၸဝ်ႈၼၼ်ႉလႆႈႁွတ်ႈတၢင်းဢၼ်မူတ်းသႂ်ပွၵ်ႈၼိုင်ႈယဝ်ႉၸိုင်၊ၶဝ်ၸၢင်ႈတၵ်းထၢင်ႇဝႃႈ၊ၶဝ်ဢမ်ႇမီးဢပျတ်ႈထႅင်ႈယဝ်ႉဢေႃႈ။-
ၵူၺ်းၵႃႈ၊လွင်ႈဢၼ်ႁဵတ်းဝၢတ်ႈတၢင်းဢၼ်သၢၵ်ႈလူႇၸိူဝ်ႉၼင်ႇၼၼ်ၵူႈပီၼၼ်ႉ၊ပဵၼ်တၢင်းဢၼ်ႁႂ်ႈၶုၵ်းၸႂ်လႆႈလွင်ႈဢပျတ်ႈၶဝ်ဢေႃႈ။-
လွင်ႈမၼ်းၸမ်ႉ၊လိူတ်ႈဝူဝ်း၊လိူတ်ႈပႄႉလႂ်ၼၼ်ႉ၊ဢမ်ႇၸၢင်ႈပႄႇပႅတ်ႈဢပျတ်ႈလႆႈဢေႃႈ။
ပိူဝ်ႈၼႆလႄႈ၊မိူဝ်ႈဢၼ် ၸဝ်ႈၶရိၸ်ႈ၊ ၸမ်တၵ်းမႃးၵႃႈၼႂ်းလေႃးၵႃႉၼႆႉၼၼ်ႉ၊မၼ်းၸဝ်ႈလဝ်ႈလၢတ်ႈတီႈၽြႃးပဵၼ်ၸဝ်ႈလႄႈဝႃႈ၊ “ၸဝ်ႈႁဝ်းဢမ်ႇမီးဢလူဝ်ႇၶႂ်ႈလႆႈတၢင်းဢၼ်သၢၵ်ႈလူႇတူဝ်သတ်း၊ဢိၵ်ႇတင်းၶိူင်ႈတၢင်းလူႇတီႈၶႃႈဢေႃႈ။ ၵူၺ်းၵႃႈ၊ၸဝ်ႈႁဝ်းမႄးႁႅၼ်းတူဝ်ၶၼ်ႇထႃႇဝႆႉဢၼ်ၼိုင်ႈ၊ပုၼ်ႈၵဝ်ၶႃႈတီႈၶႃႈယဝ်ႉ။
ၸဝ်ႈႁဝ်းဢမ်ႇထုၵ်ႇၸႂ်ၵျိူၵ်ႈၸႂ်ၶိူင်ႈတၢင်းလူႇဢၼ်ၽဝ်ၽႆး၊ ဢိၵ်ႇတင်းၶိူင်ႈတၢင်းလူႇဢၼ်ၽေႇဢပျတ်ႈတင်းလၢႆတီႈၶႃႈဢေႃႈ။
ပိူဝ်ႈၼႆလႄႈၵဝ်ၶႃႈလဝ်ႈလၢတ်ႈလႄႈဝႃႈ၊ ‘ဢူဝ်းၽြႃးပဵၼ်ၸဝ်ႈ၊တူၺ်းၶႃႈလူး။ ၵဝ်ၶႃႈမႃးႁႂ်ႈလႆႈႁဵတ်းၸွမ်း၊ ဢလူဝ်ႇၸဝ်ႈႁဝ်းတီႈၶႃႈဢေႃႈ၊’ ဝႃႈၼင်ႇၼႆ၊ ၵဝ်ၶႃႈႁပ်ႉတုင်းဢဝ်မႅၼ်ႈၸွမ်းၵႃႈၼင်ႇဢၼ်တႅမ်ႈဝႆႉလွင်ႈၵဝ်ၶႃႈ၊ ၵႃႈၼႂ်းၵဵၼ်ၵျၢမ်းလိၵ်ႈၼၼ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။-
ၸဝ်ႈၶရိၸ်ႈ၊ လၢတ်ႈဝႆႉဢွၼ်တၢင်းလႄႈဝႃႈ၊ “ၸဝ်ႈႁဝ်းဢမ်ႇမီးဢလူဝ်ႇၶႂ်ႈလႆႈ၊ဢိၵ်ႇတင်းဢမ်ႇထုၵ်ႇၸႂ်ၵျိူၵ်ႈၸႂ်ၶိူင်ႈတၢင်းလူႇဢၼ်ၽဝ်ၽႆး၊ဢိၵ်ႇတင်းတူဝ်ၶိူင်ႈတၢင်းလူႇဢၼ်တုတ်ႇၽႆးၵႃႈၼိူဝ်ၶဵင်ႇတၢင်းလူႇပုၼ်ႈတၵ်းၽေႇဢပျတ်ႈတင်းလၢႆၼၼ်ႉတီႈၶႃႈဢေႃႈ၊” ဝႃႈၼင်ႇၼႆ၊ပိၵ်ႉသမ်ႉၶိူင်ႈတၢင်းလူႇတင်းလၢႆ၊လႆႈသၢၵ်ႈလူႇမႅၼ်ႈၸွမ်းၼင်ႇပိင်းၺၢပ်ႈတြႃးမီးဝႆႉၼၼ်ႉသေၵေႃႈ။-
မၼ်းၸဝ်ႈၸင်ႇသမ်ႉလၢတ်ႈလႄႈဝႃႈ၊ “တူၺ်းၶႃႈလူး။ ၵဝ်ၶႃႈမႃးႁႂ်ႈလႆႈႁဵတ်းၸွမ်းဢလူဝ်ႇၸဝ်ႈႁဝ်းတီႈၶႃႈဢေႃႈ၊” ဝႃႈၼင်ႇၼႆၼၼ်ႉ၊ပဵၼ်တၢင်းဢၼ်မၼ်းၸဝ်ႈထူမွတ်ႇပႅတ်ႈလၢႆးႁဵတ်းဝၢတ်ႈဢၼ်ၵဝ်ႇတင်းလၢႆသေယဝ်ႉ၊တႄႇႁဵတ်းပၼ်လၢႆးႁဵတ်းဝၢတ်ႈဢၼ်မႂ်ႇဢေႃႈ။-
မႅၼ်ႈၸွမ်းဢလူဝ်ႇၸဝ်ႈၼၼ်ႉလႄႈႁဝ်းလႆႈႁွတ်ႈထိုင်တၢင်းဢၼ်မူတ်းၸၢင်ႇသေဢပျတ်ႈ၊ၵွပ်ႈလူၺ်ႈတၢင်းဢၼ် ၸဝ်ႈယေႇသုၶရိၸ်ႈ၊ ဢဝ်တူဝ်ၸဝ်ႈၵဝ်ႇသၢၵ်ႈလူႇပွၵ်ႈလဵဝ်ပုၼ်ႈတင်းသဵင်တင်းလူင်ၼၼ်ႉဢေႃႈ။
ယဵၸ်ႈပရေႃးႁဵၵ်ႈ ၵျူး၊ ၶဝ်ၵူႈၵေႃႉ၊ဢဝ်ၶိူင်ႈတၢင်းလူႇမဵဝ်းလဵဝ်ၵၼ်ၵမ်းၵမ်းႁဵတ်းဝၢတ်ႈဢၼ်သၢၵ်ႈလူႇၵူႈဝၼ်းယူႇသေၵေႃႈ၊ၶိူင်ႈတၢင်းလူႇၸိူဝ်းၼၼ်ႉဢမ်ႇၽေႇဢပျတ်ႈလႆႈသေပွၵ်ႈ။-
ၸဝ်ႈၶရိၸ်ႈ၊ ၸမ်ႉ၊သၢၵ်ႈလူႇၶိူင်ႈတၢင်းလူႇဢၼ်လဵဝ်ပုၼ်ႈဢပျတ်ႈလႄႈ၊ၶိူင်ႈတၢင်းလူႇၼၼ်ႉပၼ်ဢၵျူဝ်းယူႇသေႇသေႇသေယဝ်ႉ၊ၼင်ႈယူႇၽၢႆႇၶႂႃမိုဝ်းၽြႃးပဵၼ်ၸဝ်ႈဢေႃႈ။-
မိူဝ်ႈလဵဝ်ၼႆႉ၊မၼ်းၸဝ်ႈပႂ်ႉထႃႈယူႇၵႃႈတီႈၼၼ်ႈတေႃႇထိုင်ႁွတ်ႈၽြႃးပဵၼ်ၸဝ်ႈဢဝ်ရၢၼ်ႇသူႇမၼ်းၸဝ်ႈတင်းလၢႆဝၢင်းဝႆႉ၊ႁႂ်ႈပဵၼ်တီႈတၢင်ႇတိၼ်မၼ်းၸဝ်ႈဢေႃႈ။-
လွင်ႈမၼ်းၸမ်ႉ၊မၼ်းၸဝ်ႈဢဝ်တၢင်းဢၼ်သၢၵ်ႈလူႇပွၵ်ႈလဵဝ်ၵူၺ်းၼၼ်ႉ၊ႁဵတ်းႁႂ်ႈၶဝ်ၸိူဝ်းဢၼ်မူတ်းၸၢင်ႇတင်းလၢႆ၊လႆႈၶၢမ်ႇဢဝ်ဢၵျူဝ်းတၢင်းဢၼ်ၸေးၸုမ်ႇယူႇတႃႇသေႇဢေႃႈ။
ၼင်ႇၼၼ်လႄႈဝိၺိၺ်ႇမူတ်းၸၢင်ႇၸဝ်ႈၵေႃႈ၊ၶၢမ်ႇသၢၵ်ႈသေႇလွင်ႈမၼ်းၸဝ်ႈၵႃႈတီႈႁဝ်းလႄႈလၢတ်ႈဝႃႈ။
“ၼႆႉၸမ်ႉ၊ပဵၼ်ပတိၺိၺ်ႇတြႃးဢၼ်ၵဝ်တၵ်းႁဵတ်းလူၺ်ႈၵၼ်တင်းၶဝ်၊ ၼႂ်းမိုဝ်ႉဝၼ်းဢၼ်တၵ်းႁွတ်ႈမႃးၼၼ်ႉဢေႃႈ၊ဝႃႈၼႆၸဝ်ႈၽြႃးမီးဢမိင်ႉဢေႃႈ။ ၵဝ်တၵ်းဢဝ်ပိင်းၺၢပ်ႈတြႃးၵဝ်သႂၢင်းသႂ်ႇၵႃႈၼႂ်းၸႂ်ၶဝ်လႄႈ၊ တၵ်းတႅမ်ႈသႂ်ႇဝႆႉ၊ၵႃႈၼိူဝ်မၢၵ်ႇႁူဝ်ၸႂ်ၶဝ်ဢေႃႈ၊” ဝႃႈၼင်ႇၼႆဢေႃႈ။-
မၼ်းၸဝ်ႈသမ်ႉလၢတ်ႈထႅင်ႈလႄႈဝႃႈ၊ “ၵဝ်တၵ်းတေဢမ်ႇမၢတ်ႈဢမ်ႇတွင်းဢပျတ်ႈလႄႈတၢင်းၽိတ်းၶဝ်ထႅင်ႈသေပွၵ်ႈယဝ်ႉဢေႃႈ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈ၊ပေႃးမီးတၢင်းဢၼ်ပွႆႇလွတ်ႈဢပျတ်ႈၸိူဝ်ႉၼင်ႇၼၼ်ၸိုင်၊ၵမ်းလိုၼ်းဢမ်ႇလူဝ်ႇမီးတၢင်းဢၼ်သၢၵ်ႈလူႇပုၼ်ႈတၵ်းၽေႇဢပျတ်ႈၼၼ်ႉထႅင်ႈသေပွၵ်ႈယဝ်ႉဢေႃႈ။
ပိူဝ်ႈၼႆလႄႈပီႈၼွင်ႉၶဝ်႟။ ၵွပ်ႈပိူဝ်ႈႁဝ်းဢိင်ပိုင်ႈလိူတ်ႈ ၸဝ်ႈယေႇသု၊ လႄႈႁဝ်းမီးဢၶႂၢင်ႉပျေႉပျေႉၸုမ်ႇၸုမ်ႇ၊တႃႇတေၶဝ်ႈၸူးၵႃႈတီႈထႃႇၼႃႉဢၼ်မူတ်းၸၢင်ႇသေပိူၼ်ႈၼၼ်ႉ၊-
ၸွမ်းသဵၼ်ႈတၢင်းဢၼ်မႂ်ႇဢၼ်မၼ်းၸဝ်ႈၽုၺ်ႇပၼ် ဢၼ်ပဵၼ်သဵၼ်ႈတၢင်းဢၼ်ဢသၢၵ်ႈလိပ်းယူႇလႄႈၶဝ်ႈပူၼ်ႉၽႃႈၵင်ႈဢၼ်ဝႃႈ၊တူဝ်ၶၼ်ႇထႃႇမၼ်းၸဝ်ႈၵႂႃႇၼၼ်ႉဢေႃႈ။-
ၼင်ႇၼၼ်လႄႈႁဝ်းမီးၶုၼ်ယဵၸ်ႈပရေႃးႁဵၵ်ႈဢၼ်ဢုပ်ႉပိူင်ႇႁိူၼ်းၽြႃးပဵၼ်ၸဝ်ႈၼၼ်ႉယဝ်ႉ။-
ပိူဝ်ႈၼႆလႄႈႁဝ်းဢွၼ်ၵၼ်ပႃးတင်းႁူဝ်ၸႂ်ဢၼ်ၸိုၼ်ႈၸၢင်ႇဢၼ်တႄႇယူႇၼႂ်းတၢင်းယုမ်ႇမၢတ်ႈ၊ဢိၵ်ႇတင်းႁူဝ်ၸႂ်ဢၼ်ၶၢမ်ႇတၢင်းဢၼ်ႁဵတ်းႁႂ်ႈမူတ်းသႂ်လႄႈလႆႈၵၢင်းလွတ်ႈသေၵႃႈတီႈၸႂ်ဢၼ်ႁုဢပျတ်ႈတူဝ်ၸဝ်ႈၵဝ်ႇ၊တင်းတူဝ်ဢၼ်ဢဝ်ၼမ်ႉသုၵ်ႈပွတ်ႈၶၢဝ်သႂ်ၼၼ်ႉသေလႄႈၶဝ်ႈၸူးၵႃႈတီႈထႃႇဝရႃႉၽြႃးတႃႉႁဝ်း။-
ယင်းဢမ်ႇသုတ်ႉဢမ်ႇယွမ်းလႄႈဢွၼ်ၵၼ်တႄႇမၼ်ႈၶိူင်ႇယူႇၼႂ်းတၢင်းဢၼ်ႁဝ်းမုင်ႈထႃႈမွင်းထႃႈဢၼ်ႁဝ်းလႆႈႁပ်ႉတုင်းဢဝ်ယဝ်ႉၼၼ်ႉတႃႉႁဝ်း။ လွင်ႈမၼ်းၸမ်ႉ၊ၸဝ်ႈဢၼ်ဝႆႉၵတိၸဝ်ႈၼၼ်ႉမီးသဵတ်ႈၸႃႇဢေႃႈ။-
ဢွၼ်ၵၼ်ၶႆႈၸႂ်ဝူၼ်ႉၸႂ်လွင်ႈဢၼ်တၵ်းလႆႈႁဵတ်းၸိူဝ်ႉၼင်ႇႁိုဝ်တိုၵ်းယူင်းၵၼ်၊ႁႂ်ႈၵေႃႉၼိုင်ႈလႄႈၵေႃႉၼိုင်ႈၸၢင်ႈႁၵ်ႉပႅင်းၵၼ်လႄႈၸၢင်ႈၵမ်ၵျၢင်ႉဢၼ်လီဢၼ်ငၢမ်းၼၼ်ႉတႃႉႁဝ်း။-
ဢၼ်ၸုတုမ်ၵၼ်ၼၼ်ႉ၊ယႃႇပေႁႂ်ႈလုတ်ႈမိူၼ်ၸိူဝ်ႉၼင်ႇၵူၼ်းၵမ်ႈၽွင်ႈလုတ်ႈၼၼ်ႉသေၵမ်း။ ၵေႃႉၼိုင်ႈလႄႈၵေႃႉၼိုင်ႈဢွၼ်ၵၼ်ပၼ်ဢဵၼ်ပၼ်ႁႅင်းၵၼ်တႃႉႁဝ်း။ သူၵေႃႈႁုႁၼ်ယူႇ၊မိုဝ်ႉဝၼ်းၸဝ်ႈထႃႇဝရႃႉၽြႃးၼၼ်ႉႁွတ်ႈၸမ်မႃးယူႇတိၵ်းတိၵ်းလႄႈယဵင်ႈၶႅၼ်းၵႆႉၶတ်းၸႂ်ၵၼ်တႃႉႁဝ်း။
လွင်ႈမၼ်းၸမ်ႉ၊ပေႃးႁဝ်းလႆႈႁပ်ႉတုင်းဢဝ်ပိင်ႇၺႃႇဢၼ်ႁုၸႅင်ႈသမ်ႇမႃႇတြႃးသေယဝ်ႉ၊သမ်ႉၶိုၼ်းႁဵတ်းဢပျတ်ႈထႅင်ႈၸိုင်၊ၵမ်းလိုၼ်းယင်းတေဢမ်ႇမီးၶိူင်ႈတၢင်းလူႇပုၼ်ႈဢၼ်တၵ်းၽေႇဢပျတ်ႈယဝ်ႉလႄႈ၊-
တေမီးတၢင်းဢၼ်လီၵူဝ်လီႁႄၼႃႇၼႂ်းတၢင်းဢၼ်ပႂ်ႉထႃႈဢၼ်ၸီႇယၢင်ႇပၼ်တၢမ်ႇ၊ဢိၵ်ႇတင်းတၢင်းဢၼ်ၽႆးတေႃးသႃႉၸဝ်ႈဢၼ်တေမႆႈပႅတ်ႈၶဝ်ၸိူဝ်းဢၼ်သၢၼ်ၶတ်းၵၼ်တင်းၽြႃးပဵၼ်ၸဝ်ႈၼၼ်ႉဢေႃႈ။-
ၵေႃႉဢၼ်ၽိတ်းပိူင်ႈတြႃး မူဝ်းသေႇ၊ ၼၼ်ႉ၊ပေႃးမီးၵူၼ်းၶၢမ်ႇသၢၵ်ႈသေႇသွင်သၢမ်ၵေႃႉၸိုင်၊မၼ်းယင်းဢမ်ႇလႆႈၶၢမ်ႇတၢင်းဢၼ်ဢဵတ်းလူလႄႈတေလႆႈတၢႆဢေႃႈ။-
ပေႃးပဵၼ်ၼၼ်၊ၵေႃႉဢၼ်လူလၢႆတီႈလုၵ်ႈၽြႃးပဵၼ်ၸဝ်ႈလႄႈသင်၊ၵေႃႉဢၼ်သႄႉသွမ်းလိူတ်ႈပတိၺိၺ်ႇတြႃး၊ၽြႃးပဵၼ်ၸဝ်ႈဢၼ်ႁဵတ်းႁႂ်ႈမၼ်းလႆႈမူတ်းၸၢင်ႇၼၼ်ႉလႄႈသင်၊ၵေႃႉဢၼ်ႁဵတ်းဢမ်ႇၼပ်ႉဢမ်ႇၶၢၼ်းဝိၺိၺ်ႇၸဝ်ႈဢၼ်ၸၢင်ႈပၼ်သုၵျေးၸူးၼၼ်ႉလႄႈသင်၊ၵေႃႉၼၼ်ႉတၵ်းလႆႈၶၢမ်ႇတၢမ်ႇဢၼ်ယႂ်ႇၼႃႇထၢၼ်ႇႁိုဝ်ၼၼ်ႉၸိုင်၊ၶႆႈၸႂ်တူၺ်းတႃႉ။-
လွင်ႈမၼ်းၸမ်ႉ၊ႁဝ်းႁုၸၵ်းၸဝ်ႈဢၼ်မီးဢမိင်ႉလႄႈဝႃႈ၊ “တၢင်းဢၼ်ၶိုၼ်းတွပ်ႇတႅၼ်းၼၼ်ႉပဵၼ်ၵၢၼ်ၵဝ်လႄႈၵဝ်တၵ်းၶိုၼ်းတႅၼ်းပၼ်ဢေႃႈ၊” ဝႃႈၼင်ႇၼႆလႄႈ၊သမ်ႉမီးဢမိင်ႉထႅင်ႈလႄႈဝႃႈ၊ “ၸဝ်ႈၽြႃးတၵ်းၸီႇယၢင်ႇတြႃးတီႈၵူၼ်းမၼ်းၸဝ်ႈတင်းလၢႆဢေႃႈ၊” ဝႃႈၼင်ႇၼႆၼၼ်ႉဢေႃႈ။-
တၢင်းဢၼ်ဢမုတူၵ်းၶဝ်ႈၵႃႈၼႂ်းမိုဝ်းၽြႃးပဵၼ်ၸဝ်ႈ၊ၸဝ်ႈဢၼ်ဢသၢၵ်ႈလိပ်းၼၼ်ႉ၊ပဵၼ်ဢမုဢၼ်လီၵူဝ်လီႁႄၼႃႇလူင်လၢင်ဢေႃႈ။
ၶိုၼ်းၶႆႈၸႂ်ဝူၼ်ႉတူၺ်းလွင်ႈတၢင်းဢၼ်ပဵၼ်ၸိူဝ်ႉႁိုဝ်မႃးတီႈသူမိူဝ်ႈဢွၼ်တၢင်းၼၼ်ႉတႃႉ။ ယၢမ်းမိူဝ်ႈၼၼ်ႉ၊ဝၢႆးသေဢၼ်လႅင်းၽြႃးပဵၼ်ၸဝ်ႈထွင်ႇႁိူဝ်ႈၼိူဝ်သူယဝ်ႉၼၼ်ႉၸိုင်၊ပိၵ်ႉသမ်ႉသူလႆႈၶၢမ်ႇတုၵ်ႉၶႃႉတၢင်းၽၢၼ်ၼမ်ၼႃႇသေၵေႃႈ၊သူဢမ်ႇလႆႈသုမ်းၸွမ်းၼႂ်းတၢင်းယၢပ်ႇတၢင်းၽိုတ်ႇသူၼၼ်ႉ။-
မၢင်ၽဝ်ႇသူလႆႈၶၢမ်ႇတၢင်းဢၼ်သႄႉသွမ်း၊ၼိၵ်ႈၸၢၵ်ႈငႅၼ်းသႄးၽၢႆႇၼႃႈပိူၼ်ႈၵူၺ်းဢမ်ႇၵႃး၊မၢင်ၽဝ်ႇသူလႆႈၽွမ်ႉၸႂ်ၵၼ်သေၶဝ်ႈပႃးလူၺ်ႈၵၼ်တင်းၶဝ်ၸိူဝ်းဢၼ်လႆႈၶၢမ်ႇၸိူဝ်ႉၼင်ႇၼၼ်မႃးယဝ်ႉဢေႃႈ။-
သူလႆႈၸဵပ်းၸႂ်ပုၼ်ႈၶဝ်ၸိူဝ်းဢၼ်တူၵ်းထွင်ႇတင်းလၢႆ၊ဢိၵ်ႇတင်းမိူဝ်ႈဢၼ်လႆႈၶၢမ်ႇတၢင်းဢၼ်ပိူၼ်ႈႁိမ်ဢဝ်ၸူၼ်ဢဝ်ဢုၵ်ႉၸႃႇၶူဝ်းလဵင်းသူၵႃႈမီးတင်းမူတ်းသေၵေႃႈ၊သူယင်းမီးၸႂ်သိူဝ်းပျေႃႇလႄႈယိူၼ်ႉၶၢမ်ႇၼၼ်ႉ၊ပိူဝ်ႈဢၼ်သူႁုလွင်ႈဢၼ်သူယင်းမီးထႅင်ႈၽၼ်ႇတႃႇဢၼ်ယဵင်ႈၶႅၼ်းမျၢတ်ႈလႄႈသႄႇမၼ်ႈယူႇသေႇသေႇၼၼ်ႉဢေႃႈ။-
ပိူဝ်ႈၼႆလႄႈယႃႇပေၸုၼ်ႉပႅတ်ႈၸႂ်ဢၼ်ႁတ်းႁၢၼ်သူ၊ဢၼ်ပၼ်သူးဢၼ်ယႂ်ႇၼႃႇတီႈသူၼၼ်ႉ။-
လွင်ႈၼင်ႇႁိုဝ်သူတၵ်းလႆႈႁဵတ်းၸွမ်းဢလူဝ်ႇၽြႃးပဵၼ်ၸဝ်ႈ၊ဢိၵ်ႇတင်းၼင်ႇႁိုဝ်တၵ်းလႆႈႁပ်ႉဢၵျူဝ်းၵႃႈၼင်ႇဢၼ်ၵတိၸဝ်ႈမီးၼၼ်ႉၸိုင်၊သူတၵ်းလႆႈမီးၸႂ်ဢၼ်ယိူၼ်ႉၶၢမ်ႇဢေႃႈ။-
လွင်ႈမၼ်းၸမ်ႉ၊တႅမ်ႈဝႆႉၵႃႈၼႂ်းၵျၢမ်းလိၵ်ႈလႄႈဝႃႈ၊ “ၼႂ်းၶိင်ႇဢၼ်ဢမ်ႇႁိုင်ဢမ်ႇၼၢၼ်း၊ ၸဝ်ႈဢၼ်တၵ်းၵျွမႃးၼၼ်ႉ၊ ယင်းဢမ်ႇႁဵတ်းထိူင်းႁဵတ်းၼၢၼ်းလႄႈတၵ်းၸဵဝ်းႁွတ်ႈမႃးဢေႃႈ။
ၵူၺ်းၵႃႈ၊ၵူၼ်းသိုဝ်ႈတေႃႇၵဝ်တင်းလၢႆ၊ တၵ်းဢွၼ်ၵၼ်ယုမ်ႇမၢတ်ႈလႄႈဢသၢၵ်ႈလိပ်းယူႇဢေႃႈ။ ၼႂ်းဝႃႈၼၼ်သေၵေႃႈ၊ပေႃးသေၵေႃႉသေၵူၼ်းသုတ်ႉၶိုၼ်းတၢင်းလင်ၸိုင်၊ ၸႂ်ဝိၺိၺ်ႇၵဝ်တၵ်းဢမ်ႇလူဝ်ႇဢမ်ႇၵျိူၵ်ႈၵေႃႉၼၼ်ႉဢေႃႈ၊” ဝႃႈၼင်ႇၼႆမီးဝႆႉဢေႃႈ။-
ႁဝ်းၸမ်ႉ၊ပဵၼ်ၵေႃႉဢၼ်သုတ်ႉၶိုၼ်းတၢင်းလင်လႄႈလႆႈႁွတ်ႈတၢင်းလုတၢင်းလႅဝ်ဢမ်ႇၸႂ်ႈ။ ႁဝ်းပဵၼ်ၵေႃႉဢၼ်ယုမ်ႇမၢတ်ႈလႄႈႁႂ်ႈၸႂ်ဝိၺိၺ်ႇႁွတ်ႈတၢင်းဢၼ်ၵႄႇၶျွတ်ႈဢဝ်ဢေႃႈ။
တြႃးတၢင်းဢၼ်ယုမ်ႇမၢတ်ႈၸမ်ႉ၊ပဵၼ်တၢင်းဢၼ်ဝႆႉၸႂ်တမ်းၸႂ်ၼႂ်းလွင်ႈၸိူဝ်းဢၼ်ႁဝ်းမုင်ႈထႃႈမွင်းထႃႈဝႆႉ၊ဢိၵ်ႇတင်းမီးတၢင်းဢၼ်မၼ်ႈၸႂ်ဝႃႈ၊မဵဝ်းဢၼ်ယင်းဢမ်ႇပႆႇလႆႈႁၼ်ၼၼ်ႉမီးယူႇဢမၢၼ်ႇၶၼ်ပဵၼ်ဢေႃႈ။-
ၵွပ်ႈပိူဝ်ႈပႃႇရမီႇတၢင်းယုမ်ႇမၢတ်ႈၼၼ်ႉလႄႈၵူၼ်းမိူဝ်ႈၵွၼ်ႇၸိူဝ်းၼၼ်ႉလႆႈၶၢမ်ႇဢဝ်တၢင်းဢၼ်ၽြႃးပဵၼ်ၸဝ်ႈယိုၼ်ႈမၢတ်ႈႁပ်ႉၶၢမ်ႇဢေႃႈ။
ၵွပ်ႈပိူဝ်ႈတၢင်းယုမ်ႇမၢတ်ႈလႄႈႁဝ်းႁုလွင်ႈဢၼ်ၸၵျႃႇဝလႃႇလႆႈၶၢမ်ႇတၢင်းဢၼ်ၽြႃးပဵၼ်ၸဝ်ႈဢဝ်တင်းဢမိင်ႉသေလႄႈၽၢၼ်ႇသၢင်းႁဵတ်းပဵၼ်ဝႆႉ၊ၵွပ်ႈၼႆလႄႈမဵဝ်းဢၼ်တႃတူၺ်းႁၼ်လႆႈၸိူဝ်းၼႆႉ၊လႆႈၶၢမ်ႇတၢင်းဢၼ်ႁဵတ်းပဵၼ်မႃးသေၵႃႈတီႈမဵဝ်းဢၼ်ဢမ်ႇပေႃႇပဵၼ်မႃးႁႂ်ႈလႆႈႁၼ်ၼၼ်ႉဢေႃႈ။
ၵွပ်ႈပိူဝ်ႈတၢင်းယုမ်ႇမၢတ်ႈလႄႈ ဢႃႇပေႇလႃႉ၊ သၢၵ်ႈလူႇၶိူင်ႈဢၼ်ယဵင်ႈၶႅၼ်းမျၢတ်ႈသေၶိူင်ႈဢၼ် ၵႃႇဢိၼႃႉ၊ သၢၵ်ႈလူႇတီႈၽြႃးပဵၼ်ၸဝ်ႈၼၼ်ႉဢေႃႈ။ ၵွပ်ႈလူၺ်ႈတၢင်းယုမ်ႇမၢတ်ႈမၼ်းၼၼ်ႉလႄႈၽြႃးပဵၼ်ၸဝ်ႈမၢတ်ႈမၼ်းပဵၼ်ၵူၼ်းသိုဝ်ႈတေႃႇပိူဝ်ႈဢၼ်မၼ်းၸဝ်ႈၶၢမ်ႇသၢၵ်ႈသေႇၼႂ်းတၢင်းဢၼ်မၼ်းၸဝ်ႈႁပ်ႉတုင်းဢဝ်တၢင်းလူႇတၢင်းတၢၼ်းမၼ်းၼၼ်ႉဢေႃႈ။ ပိၵ်ႉသမ်ႉ ဢႃႇပေႇလႃႉ၊ ၼၼ်ႉ၊တၢႆယဝ်ႉသေၵေႃႈတေႃႈလဵဝ်ၼႆႉတၢင်းယုမ်ႇမၢတ်ႈမၼ်းယင်းၶၢမ်ႇသၢၵ်ႈသေႇယူႇဢေႃႈ။
ၵွပ်ႈပိူဝ်ႈတၢင်းယုမ်ႇမၢတ်ႈလႄႈ ဢေးၼွၵ်ႉ၊ လႆႈၶၢမ်ႇတၢင်းဢၼ်ဢဝ်ၵႂႃႇၵႃႈတီႈၽြႃးပဵၼ်ၸဝ်ႈ၊ၼင်ႇႁိုဝ်မၼ်းတၵ်းဢမ်ႇလႆႈထူပ်းၺႃးတၢင်းတၢႆၼၼ်ႉဢေႃႈ။ ပိူဝ်ႈဢၼ်ၽြႃးပဵၼ်ၸဝ်ႈယူၵ်ႉသိမ်းဢဝ်မၼ်းၵႂႃႇလႄႈမၼ်းဢမ်ႇပေႃႇဢမ်ႇမီးယဝ်ႉဢေႃႈ။ ၸူဝ်ႈဢၼ်မၼ်းဢမ်ႇပႆႇလႆႈၶၢမ်ႇတၢင်းဢၼ်ဢဝ်ၵႂႃႇၼၼ်ႉ၊မီးၵူၼ်းဢၼ်ပဵၼ်သၢၵ်ႈသေႇလွင်ႈဢၼ်မၼ်းပဵၼ်ၵေႃႉဢၼ်ၽြႃးပဵၼ်ၸဝ်ႈထုၵ်ႇၸႂ်ၵျိူၵ်ႈၸႂ်ၼၼ်ႉဢေႃႈ။-
ပေႃးတၢင်းယုမ်ႇမၢတ်ႈဢမ်ႇမီးၸိုင်၊ဢမ်ႇမီးတၢင်းဢၼ်ထုၵ်ႇၸႂ်ၵျိူၵ်ႈၸႂ်ၽြႃးပဵၼ်ၸဝ်ႈလႆႈဢေႃႈ။ လွင်ႈမၼ်းၸမ်ႉ၊ၵေႃႉဢၼ်သုတ်ႉၸမ်တီႈၽြႃးပဵၼ်ၸဝ်ႈၼၼ်ႉ တၵ်းလႆႈယုမ်ႇမၢတ်ႈလွင်ႈဢၼ်ၽြႃးပဵၼ်ၸဝ်ႈမီးဢသၢၵ်ႈလိပ်းယူႇ၊ဢိၵ်ႇတင်းလွင်ႈဢၼ်မၼ်းၸဝ်ႈပၼ်ဢၵျူဝ်း၊တီႈၶဝ်ၸိူဝ်းဢၼ်ၶတ်းၸႂ်လႄႈသွၵ်ႈႁႃမၼ်းၸဝ်ႈၼၼ်ႉဢေႃႈ။
ၵွပ်ႈပိူဝ်ႈတၢင်းယုမ်ႇမၢတ်ႈလႄႈ ၼူဝ်းဢႃႇ၊ လႆႈငိၼ်းတၢင်းဢၼ်ၽြႃးပဵၼ်ၸဝ်ႈပၼ်သတိလွင်ႈတၢင်းဢၼ်တၵ်းပဵၼ်မႃးၵမ်းလိုၼ်း၊ဢၼ်မၼ်းဢမ်ႇပႆႇႁၼ်ၼၼ်ႉဢေႃႈ။ မၼ်းထွမ်ႇဢဝ်ၽြႃးပဵၼ်ၸဝ်ႈလႄႈတႄႇႁဵတ်းႁိူဝ်းသၢင်းၽေႃးဢၼ်တူဝ်မၼ်းဢိၵ်ႇတင်းၵူၼ်းႁိူၼ်းၵူၼ်းယေးမၼ်းလႆႈလွတ်ႈၸွမ်းၼၼ်ႉဢေႃႈ။ ၸွမ်းၼင်ႇဢၼ်ပဵၼ်မႃးၼၼ်ႉ၊ၵူၼ်းလေႃးၵီႇတင်းလၢႆ၊လႆႈၶၢမ်ႇတၢမ်ႇဢပျတ်ႈလႄႈ ၼူဝ်းဢႃႇ၊ ၸမ်ႉ၊လႆႈၶၢမ်ႇဢဝ်ဢမူၺ်ႇတၢင်းဢၼ်သိုဝ်ႈတေႃႇၵွပ်ႈပိူဝ်ႈတၢင်းယုမ်ႇမၢတ်ႈၼၼ်ႉဢေႃႈ။
ၵွပ်ႈပိူဝ်ႈတၢင်းယုမ်ႇမၢတ်ႈႁဵတ်းႁႂ်ႈ ဢႃႇပြႃႇႁၢမ်ႇ၊ ထွမ်ႇဢဝ်မိူဝ်ႈဢၼ်ၽြႃးပဵၼ်ၸဝ်ႈႁွင်ႉဢဝ်မၼ်း၊ႁႂ်ႈလႆႈၵႂႃႇၵႃႈတီႈမိူင်းဢၼ်ၽြႃးပဵၼ်ၸဝ်ႈဝႆႉၵတိဝႃႈ၊တၵ်းပၼ်မၼ်းၼၼ်ႉဢေႃႈ။ ယင်းဢမ်ႇႁုဝႃႈ၊တေၵႂႃႇတၢင်းလႂ်ၼၼ်ႉလႄႈဢွၵ်ႇမိူင်းတူဝ်ၸဝ်ႈၵဝ်ႇၵႂႃႇဢေႃႈ။-
ၵွပ်ႈပိူဝ်ႈတၢင်းယုမ်ႇမၢတ်ႈလႄႈမၼ်းလႆႈပဵၼ်ၶႅၵ်ႇယူႇၼႂ်းမိူင်းပိူၼ်ႈ၊ဢၼ်ၽြႃးပဵၼ်ၸဝ်ႈဝႆႉၵတိပုၼ်ႈတႃႇမၼ်းၼၼ်ႉဢေႃႈ။ မၼ်းယူႇၵႃႈၼႂ်းသုမ်ႉမူဝ်းၵႃႇမိူၼ်ၸိူဝ်ႉၼင်ႇပဵၼ်ၶႅၵ်ႇၵူၼ်းမိူင်းၼွၵ်ႈၼၼ်ႉမိူၼ်ၵၼ်တင်းလုၵ်ႈလၢၼ်မၼ်းဢၼ်ပဵၼ်၊ ဢိၸၢၵ်ႈ၊ တင်း ယႃႇၵုပ်ႈ၊ ဢၼ်လႆႈႁပ်ႉဢဝ်ၵတိၸဝ်ႈဢၼ်လဵဝ်ၵၼ်ၼၼ်ႉဢေႃႈ။-
လွင်ႈမၼ်းၸမ်ႉ၊ ဢႃႇပြႃႇႁၢမ်ႇ၊ မုင်ႈမွင်းပႂ်ႉထႃႈဝဵင်းဢၼ်မၼ်ႈၶိူင်ႇ၊ဝဵင်းဢၼ်ၽြႃးပဵၼ်ၸဝ်ႈတႄႇႁဵတ်းၼၼ်ႉဢေႃႈ။
ၵွပ်ႈပိူဝ်ႈတၢင်းယုမ်ႇမၢတ်ႈလႄႈမေးမၼ်း ၸႃႇရႃႇ၊ ၵေႃႈ၊လႆႈႁပ်ႉဢဝ်တၼ်းၶူဝ်းဢၼ်ပႃးပတိၵ်ႈသၼ်ႇထေႇလႆႈ၊ၼႂ်းမိူဝ်ႈဢၼ်ဢသၢၵ်ႈဢရွႆႇမၼ်းၵႄႇၼႃႇယဝ်ႉၼၼ်ႉဢေႃႈ။ လွင်ႈမၼ်းၸမ်ႉ၊မၼ်းယုမ်ႇဝႃႈၸဝ်ႈဢၼ်ဝႆႉၵတိၼၼ်ႉ၊ပဵၼ်ၸဝ်ႈဢၼ်မီးသဵတ်ႈၸႃႇၼၼ်ႉဢေႃႈ။-
ဢႃႇပြႃႇႁၢမ်ႇ၊ ၼၼ်ႉ၊ပိၵ်ႉသမ်ႉပဵၼ်မိူၼ်ၵူၼ်းတၢႆယဝ်ႉသေၵေႃႈ၊တၢင်းဢၼ်ဢွၵ်ႇသေၵႃႈတီႈၵူၼ်းၸၢႆးၵေႃႉၼိုင်ႈသေလႄႈၸိူဝ်ႉၶိူဝ်းမဵဝ်းၵူၼ်းလႆႈယႂ်ႇၽႄႈၼမ်ၵိုၼ်းမႃးၼႃႇလူင်လၢင်၊ၼမ်တၢၼ်ႇလၢဝ်ၵၢင်ႁၢဝ်တင်းလၢႆလႄႈ ၼမ်တၢၼ်ႇမဵတ်ႉသၢႆးႁိမ်းၽင်ႇၼမ်ႉသမ်ႇမုၵ်ႈတြႃႇဢၼ်ဢမ်ႇၼပ်ႉဢမ်ႇဢၢၼ်ႇလႆႈၼၼ်ႉဢေႃႈ။
ၶဝ်ၸိူဝ်းဢၼ်ဝႃႈမႃးယဝ်ႉၸိူဝ်းၼၼ်ႉ၊မီးတၢင်းယုမ်ႇမၢတ်ႈလႄႈတၢႆၵႂႃႇပူၼ်ႉၵႂႃႇယဝ်ႉဢေႃႈ။ ၶဝ်ယင်းဢမ်ႇလႆႈၶၢမ်ႇဢဝ်ဢမူၺ်ႇၵျေးၸူးဢၼ်ၽြႃးပဵၼ်ၸဝ်ႈဝႆႉၵတိတီႈၶဝ်ၼၼ်ႉသေၵေႃႈ၊ၶဝ်ယူႇတီႈဢၼ်ၵႆသေလႄႈမုင်ႈႁၼ်ယူႇ၊ႁပ်ႉႁွင်းၸူမ်းတွၼ်ႈယူႇ၊ႁပ်ႉတုင်းဢဝ်လွင်ႈဢၼ်တူဝ်ၸဝ်ႈၵဝ်ႇပဵၼ်ၵူၼ်းတၢင်ႇသိုင်ႇတၢင်ႇမိူင်း၊ဢိၵ်ႇတင်းပဵၼ်ၶႅၵ်ႇဢႃႇၵၼ်ႇတုၵႃႈၼိူဝ်လိၼ်မိူင်းၼႆႉယူႇထၢင်ႇထၢင်ႇသႃးသႃးဢေႃႈ။-
ၶဝ်ၸိူဝ်းဢၼ်လၢတ်ႈၸိူဝ်ႉၼင်ႇၼၼ်ၼၼ်ႉ၊ပဵၼ်တၢင်းဢၼ်ထၢင်ႇသႃးလွင်ႈဢၼ်ၶဝ်သွၵ်ႈႁႃမိူင်းပုၼ်ႈတူဝ်ၸဝ်ႈၵဝ်ႇယူႇဢေႃႈ။-
သင်ဝႃႈ၊ၶဝ်ၶႆႈၸႂ်ဝူၼ်ႉၸႂ်လူၺ်ႈလွင်ႈမိူင်းဢၼ်ၶဝ်ဢွၵ်ႇမႃးၼၼ်ႉၸိုင်၊ၶဝ်ၸၢင်ႈၶႄးတၵ်းမီးဢၶႂၢင်ႉဢၼ်ပွၵ်ႈၶိုၼ်းမိူဝ်းမိူင်းၼၼ်ႉယူႇဢေႃႈ။-
တီႈတႄႉမၼ်း၊ၶဝ်ယင်းမုင်ႈမွင်းမိူင်းဢၼ်ယဵင်ႈၶႅၼ်းမျၢတ်ႈဢၼ်ဝႃႈ၊မိူင်းၵၢင်ႁၢဝ်ပုၼ်ႉၼၼ်ႉဢေႃႈ။ ပိူဝ်ႈၼႆလႄႈၽြႃးပဵၼ်ၸဝ်ႈဢမ်ႇဢူၵ်းဢၢႆပုၼ်ႈတၵ်းလႆႈၶၢမ်ႇႁွင်ႉဝႃႈ၊ပဵၼ်ၽြႃးၶဝ်ဝႃႈၼႆၼၼ်ႉၵွပ်ႈပိူဝ်ႈမၼ်းၸဝ်ႈမႄးႁႅၼ်းဝႆႉဝဵင်းၼိုင်ႈပုၼ်ႈၶဝ်တၵ်းယူႇၼၼ်ႉဢေႃႈ။
ၵွပ်ႈပိူဝ်ႈတၢင်းယုမ်ႇမၢတ်ႈလႄႈ ဢႃႇပြႃႇႁၢမ်ႇ၊ သၢၵ်ႈလူႇလုၵ်ႈၸၢႆးမၼ်း ဢိၸၢၵ်ႈ၊ ၸိူဝ်ႉၼင်ႇပဵၼ်တူဝ်တၢင်းလူႇမိူဝ်ႈဢၼ်ၽြႃးပဵၼ်ၸဝ်ႈၸၢမ်းတူၺ်းၸႂ်မၼ်းၼၼ်ႉဢေႃႈ။ မၼ်းၼၼ်ႉပဵၼ်ၵေႃႉဢၼ်ၽြႃးပဵၼ်ၸဝ်ႈဝႆႉၵတိလူၺ်ႈၵၼ်တင်းမၼ်းလႄႈပုၼ်ႈတႃႇတေဢဝ်လုၵ်ႈၸၢႆးလဵဝ်မၼ်းသၢၵ်ႈလူႇၼၼ်ႉၽွမ်ႉဝႆႉယဝ်ႉဢေႃႈ။-
ၽြႃးပဵၼ်ၸဝ်ႈမီးဢမိင်ႉတီႈမၼ်းဝႆႉလႄႈဝႃႈ၊ “ၵွပ်ႈလူၺ်ႈ ဢိၸၢၵ်ႈ၊ လႄႈၸိူဝ်ႉၶိူဝ်းမႂ်းတၵ်းတႄႇယူႇဢေႃႈ၊” ဝႃႈၼင်ႇၼႆဢေႃႈ။-
ဢႃႇပြႃႇႁၢမ်ႇ၊ ယုမ်ႇလွင်ႈဢၼ်ၽြႃးပဵၼ်ၸဝ်ႈတၢတ်ႈၼိူင်ႇလႆႈ၊ႁႂ်ႈ ဢိၸၢၵ်ႈ၊ လုၵ်ႉသေၵႃႈတၢင်းတၢႆၶိုၼ်းလိပ်းမႃးလႆႈယူႇၼၼ်ႉလႄႈလၢတ်ႈလႆႈဝႃႈ၊မၼ်းလႆႈလုၵ်ႈၸၢႆးမၼ်းၶိုၼ်းမႃးသေၵႃႈတီႈတၢင်းတၢႆဢေႃႈ။
ၵွပ်ႈပိူဝ်ႈတၢင်းယုမ်ႇမၢတ်ႈလႄႈ ဢိၸၢၵ်ႈ၊ ဝႆႉၵတိပုၼ်ႈတၵ်းပၼ်မၢင်ႇၵလႃႇတၢင်းလီပုၼ်ႈဝၼ်းမိူဝ်းၼႃႈၼၼ်ႉတီႈ ယႃႇၵုပ်ႈ၊ တင်း ဢေးသေႃး၊ ဢေႃႈ။
ၵွပ်ႈပိူဝ်ႈတၢင်းယုမ်ႇမၢတ်ႈလႄႈ ယႃႇၵုပ်ႈ၊ ၵေႃႈ၊မိူဝ်ႈဢၼ်ၸမ်ဝၼ်းတၢႆမႃးၼၼ်ႉပၼ်တၢင်းလီတီႈလုၵ်ႈၸၢႆး ယူဝ်းသႅပ်ႈ၊ သွင်ၵေႃႉသေယဝ်ႉ၊ဢိင်ပၢႆၶွၼ်ႉတဝ်ႉမၼ်းသေလႄႈဝႆႈသႃၵူဝ်းၵႂၢႆႇၽြႃးပဵၼ်ၸဝ်ႈဢေႃႈ။
ၵွပ်ႈပိူဝ်ႈတၢင်းယုမ်ႇမၢတ်ႈလႄႈ ယူဝ်းသႅပ်ႈ၊ ၵေႃႈ၊ၸူဝ်ႈဢၼ်မၼ်းဢမ်ႇပႆႇတၢႆၼၼ်ႉမၼ်းလၢတ်ႈလူၺ်ႈလွင်ႈၵူၼ်းမဵဝ်း ဢိသရေး၊ တင်းလၢႆ၊တၵ်းဢွၵ်ႇမိူင်း ဢေးၵျိပ်ႉ၊ ၵႂႃႇၼၼ်ႉသေလႄႈသင်ႇလၢတ်ႈလွင်ႈတၵ်းလႆႈႁဵတ်းၸိူဝ်ႉၼင်ႇႁိုဝ်တီႈတူဝ်တၢႆမၼ်းၼၼ်ႉဢေႃႈ။
ၵွပ်ႈပိူဝ်ႈတၢင်းယုမ်ႇမၢတ်ႈလႄႈပေႃႈမႄႈ မူဝ်းသေႇ၊ ၼၼ်ႉ၊ၵိူတ်ႇလဵင်ႉမၼ်းမႃးယဝ်ႉလႄႈဢဝ်သိူင်ႇဝႆႉသၢမ်လိူၼ်တဵမ်တဵမ်၊ၵွပ်ႈပိူဝ်ႈၶဝ်ႁၼ်လုၵ်ႈဢွၼ်ႇၼၼ်ႉႁၢင်ႈလီလႄႈၶဝ်ဢမ်ႇၵူဝ်ဢမ်ႇႁႄတႃႇတေထဵင်ပႅတ်ႈဢမိင်ႉၶုၼ်ႁေႃၶမ်းဢေႃႈ။
ၵွပ်ႈပိူဝ်ႈတၢင်းယုမ်ႇမၢတ်ႈလႄႈ မူဝ်းသေႇ၊ ၼၼ်ႉ၊မိူဝ်ႈဢၼ်ဢသၢၵ်ႈယႂ်ႇမႃးယဝ်ႉၼၼ်ႉၸိုင်၊မၼ်းဢမ်ႇၶၢမ်ႇႁႂ်ႈၽူႈလႂ်ႁွင်ႉမၼ်းဝႃႈပဵၼ်လုၵ်ႈၸၢႆး၊ဢၼ်လုၵ်ႈယိင်းၶုၼ်ႁေႃၶမ်း ၽႃႇရေႃး၊ လဵင်ႉၼၼ်ႉဢေႃႈ။-
မၼ်းမီးၸႂ်ၶႂ်ႈၶၢမ်ႇတုၵ်ႉၶႃႉတၢင်းၽၢၼ်လူၺ်ႈၵၼ်တင်းၵူၼ်းၽြႃးပဵၼ်ၸဝ်ႈတင်းလၢႆ၊ၼႃႇသေတၢင်းဢၼ်မူၼ်ႈပျေႃႇၵမ်းဢွၼ်ႇၼိုင်ႈၵႃႈၼႂ်းၸေးၸိမ်ႇဢပျတ်ႈၼၼ်ႉဢေႃႈ။-
မၼ်းႁုမၢတ်ႈလွင်ႈတၢင်းဢၼ်ၶၢမ်ႇတၢင်းၽၢၼ်ဢၼ်သႄႉသွမ်းၵွပ်ႈပိူဝ်ႈ ၸဝ်ႈၶရိၸ်ႈ၊ ၼၼ်ႉ၊ပဵၼ်ၸေးၸိမ်ႇဢၼ်ယဵင်ႈၶႅၼ်းမျၢတ်ႈၼႃႇသေၸေးၸိမ်ႇၽၼ်ႇတႃႇမိူင်း ဢေးၵျိပ်ႉ၊ တင်းသဵင်ႈတင်းလူင်ၼၼ်ႉလႄႈမၼ်းမုင်ႈမွင်းတေလႆႈႁပ်ႉဢဝ်ဢၵျူဝ်းၵျေးၸူးၼႂ်းဝၼ်းလိုၼ်းမိူဝ်းၼႃႈၼၼ်ႉဢေႃႈ။
ၵွပ်ႈပိူဝ်ႈတၢင်းယုမ်ႇမၢတ်ႈလႄႈ မူဝ်းသေႇ၊ ၼၼ်ႉ၊ယင်းဢမ်ႇၵူဝ်ဢမ်ႇႁႄတေႃးသႃႉတၢင်းၸႂ်မႆႈၶုၼ်ႁေႃၶမ်းလႄႈဢွၵ်ႇမိူင်း ဢေးၵျိပ်ႉ၊ ၵႂႃႇဢေႃႈ။ မၼ်းမီးၸႂ်မၼ်ႈၶိူင်ႇမိူၼ်ၸိူဝ်ႉၼင်ႇဢၼ်မၼ်းႁၼ်ၽြႃးပဵၼ်ၸဝ်ႈဢၼ်ဢဝ်တင်းတႃတူၺ်းဢမ်ႇႁၼ်လႆႈၼၼ်ႉဢေႃႈ။-
ၵွပ်ႈပိူဝ်ႈတၢင်းယုမ်ႇမၢတ်ႈလႄႈ မၼ်းတႄႇတင်ႈပွႆး ပသၶႃႇ၊ သေလႄႈ၊သင်ႇလၢတ်ႈႁႂ်ႈဢဝ်လိူတ်ႈၽႅတ်းသႂ်ႇတီႈၽၵ်းတူ၊ၼင်ႇႁိုဝ်ၸဝ်ႈတမၢၼ်ႇဢၼ်မႃးယႃႉလုဢဝ်တၢႆၼၼ်ႉ၊တၵ်းဢမ်ႇဢဝ်တၢႆလုၵ်ႈတူၼ်ႈၵူၼ်းမဵဝ်း ဢိသရေး၊ ၶဝ်ၼၼ်ႉဢေႃႈ။
ၵွပ်ႈပိူဝ်ႈတၢင်းယုမ်ႇမၢတ်ႈလႄႈၵူၼ်းမဵဝ်း ဢိသရေး၊ ၶဝ်လႆႈဢၶႂၢင်ႉဢၼ်ပႆၽႃႇလတ်း ပၢင်ႇလၢႆႇလႅင်၊ ၵႂႃႇမိူၼ်ၸိူဝ်ႉၼင်ႇဢၼ်ပႆၵႃႈၼိူဝ်လိၼ်ႁႅင်ႈဢေႃႈ။ ၼႂ်းမိူဝ်ႈဢၼ်ၵူၼ်းမဵဝ်း ဢေးၵျိပ်ႉ၊ ၶဝ်ၶတ်းၸႂ်လႄႈဢၢင်ႈတၵ်းလမ်းၸွမ်းၼၼ်ႉၸိုင်၊ၼမ်ႉလုပ်ႇၶဝ်တၢႆပႅတ်ႈမူတ်းဢေႃႈ။
ၵွပ်ႈပိူဝ်ႈတၢင်းယုမ်ႇမၢတ်ႈလႄႈလမ်းဝဵင်း ယေႇရိၶူဝ်း၊ လႆႈၵၢၼ်ႉတူၵ်းလူမ်ႉၵႂႃႇဝၢႆးသေၵူၼ်းမဵဝ်း ဢိသရေး၊ ၶဝ်၊ပႆလဵပ်ႈႁွပ်ႈၸဵတ်းဝၼ်းတဵမ်တဵမ်ၼၼ်ႉဢေႃႈ။
ၵွပ်ႈပိူဝ်ႈတၢင်းယုမ်ႇမၢတ်ႈလႄႈမႄႈမွၵ်ႇယႃႈ ရႃႇၶပ်ႉ၊ ၼၼ်ႉ၊ယင်းဢမ်ႇလႆႈလုလႆႈလႅဝ်ၸွမ်းၶဝ်ၸိူဝ်းဢၼ်ဢမ်ႇထွမ်ႇဢဝ်ၵႂၢမ်းၽြႃးပဵၼ်ၸဝ်ႈ၊ၵွပ်ႈပိူဝ်ႈမၼ်းႁဵတ်းၵေႃႉသႄႈၵၼ်တင်းၵူၼ်းသွပ်ႇၶၢဝ်ႇၵူၼ်းမဵဝ်း ဢိသရေး၊ ၶဝ်ၸိူဝ်းၼၼ်ႉလႄႈႁပ်ႉတွၼ်ႈဢဝ်ၶဝ်ၼၼ်ႉဢေႃႈ။
လိူဝ်သေၼၼ်ႉ၊တေႁႂ်ႈၵဝ်လၢတ်ႈထႅင်ႈႁိုဝ်း။ လူၺ်ႈလွင်ႈၸႃႉၸဵမ် ၵိတိဢုၼ်ႇ၊ပႃႇရၵ်ႉ၊သၢမ်ႇသုၼ်ႇ၊ယေႇၽတႃႉ၊ ဢိၵ်ႇတင်းလွင်ႈ တႃႇဝိတ်ႈ၊သမူၺ်ႇလႃႉ၊ တင်းပရေႃးၽႅတ်ႈ တင်းလၢႆၸိူဝ်းၼၼ်ႉ၊လၢတ်ႈဢမ်ႇသဵင်ႈလႆႈယဝ်ႉ။-
ၵွပ်ႈပိူဝ်ႈတၢင်းယုမ်ႇမၢတ်ႈလႄႈၶဝ်ၼၼ်ႉလႆႈတိုၵ်းတေႃးပႄႉၼႅင်ႇဝၢၼ်ႈမိူင်းတင်းမူတ်း၊လႆႈၸီႇယၢင်ႇၸွမ်းၼင်ႇတြႃးဢၼ်သိုဝ်ႈတေႃႇ၊လႆႈႁပ်ႉဢဝ်ဢၵျူဝ်းၸွမ်းၼင်ႇၵတိၸဝ်ႈ၊လႆႈဢိုတ်းသူပ်းသၢင်ႇသီႈ၊-
လႆႈမွတ်ႇပႅတ်ႈႁႅင်းၽႆး၊လႆႈလွတ်ႈၽေးလၢပ်ႇၽေးလႅဝ်း၊ၼႂ်းတၢင်းဢၼ်ၶဝ်ႁႅင်းဢူၼ်ႈၼၼ်ႉၵေႃႈလႆႈႁႅင်းယႂ်ႇမႃး၊လႆႈပဵၼ်ၵူၼ်းဢၼ်ႁႅင်းၶႅင်ၼႂ်းၼႃႈသိုၵ်း၊လႆႈပႄႉၼႅင်ႇတပ်ႉသိုၵ်းၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းဢေႃႈ။-
ၵွပ်ႈပိူဝ်ႈတၢင်းယုမ်ႇမၢတ်ႈလႄႈမႄႈယိင်းၶဝ်ၵေႃႈ၊သမ်ႉၶိုၼ်းလႆႈလုၵ်ႈလၢင်းတူဝ်ၸဝ်ႈၵဝ်ႇ၊လုၵ်ႉသေၵႃႈတၢင်းတၢႆၶိုၼ်းလိပ်းမႃးၼၼ်ႉဢေႃႈ။ ၵူၼ်းၵမ်ႈၽွင်ႈယင်းဢမ်ႇႁပ်ႉၶၢမ်ႇဢဝ်တၢင်းဢၼ်လွတ်ႈလႅဝ်းလႄႈလႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသႄးလႄႈတၢႆၵႂႃႇဢေႃႈ။ လွင်ႈမၼ်းၸမ်ႉ၊ၶဝ်ၶႂ်ႈလုၵ်ႉၶိုၼ်းလိပ်းလႄႈမီးဢသၢၵ်ႈဢၼ်ယဵင်ႈၶႅၼ်းမျၢတ်ႈလီၼႃႇၼၼ်ႉဢေႃႈ။-
ၵမ်ႈၽွင်ႈၵေႃႈ၊လႆႈၶၢမ်ႇတၢင်းဢၼ်သႄႉသွမ်းလူလၢႆ၊ဢိၵ်ႇတင်းလႆႈၶၢမ်ႇတၢင်းဢၼ်ပေႃႉယႅၼ်ႉဢမ်ႇၵႃး၊လႆႈၶၢမ်ႇတၢင်းဢၼ်ၽုၵ်ႇမတ်ႉ၊ဢိၵ်ႇတင်းတၢင်းဢၼ်ဢဝ်ၶင်ၼႂ်းၶွၵ်ႈဢေႃႈ။-
ၶဝ်လႆႈၶၢမ်ႇတၢင်းဢၼ်ဢဝ်မၢၵ်ႇႁိၼ်ပိုဝ်ႈသႂ်ႇ၊တၢင်းဢၼ်ဢဝ်လဵၵ်းလိူဝ်ႈထိူဝ်ၶၢတ်ႇပဵၼ်ပွတ်းပဵၼ်တွၼ်ႈ၊လႆႈၶၢမ်ႇတၢင်းဢၼ်ၸၢမ်းတူၺ်းလႄႈယႃႉယုၵ်ႉ၊လႆႈၶၢမ်ႇတၢင်းဢၼ်ဢဝ်လၢပ်ႇၽၼ်းတၢႆၸိူဝ်းၼၼ်ႉဢေႃႈ။ သမ်ႉလႆႈၶၢမ်ႇယၢၵ်ႈၶၢမ်ႇၽၢၼ်ၼႃႇ၊ဢိၵ်ႇတင်းလႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသႄးယူႇလႄႈလႆႈၼုင်ႈမႆၼင်သူဝ်းၼင်ပႄႉသေၵႂႃႇမႃးယူႇဢေႃႈ။-
လေႃးၵႃႉၼႆႉ၊ဢမ်ႇလီဢမ်ႇထုၵ်ႇပုၼ်ႈၶဝ်ယဝ်ႉ။ ၶဝ်ၼၼ်ႉလႆႈလႄႇၵႂႃႇလႄႇမႃးၼႂ်းထိူၼ်ႇလႅင်ႉ၊ၼႂ်းၵႄႈႁူၺ်ႈတႄးလွႆလႄႈလႆႈသွၼ်ႈယူႇၼႂ်းထမ်ႈၼႂ်းႁူးလိၼ်လႂ်ဢေႃႈ။
ၶဝ်တင်းသဵင်ႈတင်းလူင်ၼၼ်ႉ၊ပိၵ်ႉသမ်ႉလႆႈၶၢမ်ႇဢဝ်ဢၵျူဝ်းတၢင်းဢၼ်ယွင်ႈယေႃးၵွပ်ႈပိူဝ်ႈတၢင်းဢၼ်ၶဝ်ယုမ်ႇမၢတ်ႈၼၼ်ႉသေၵေႃႈ၊ၶဝ်ဢမ်ႇလႆႈၶၢမ်ႇဢဝ်ဢၵျူဝ်းၵျေးၸူးၵတိၸဝ်ႈၼၼ်ႉ။-
ၵွပ်ႈပိူဝ်ႈၸိူဝ်ႉၼင်ႇႁိုဝ်ဝႃႈၼႆၸမ်ႉ၊ၽြႃးပဵၼ်ၸဝ်ႈလႆႈတႅပ်းတတ်းၸႂ်သေယဝ်ႉ၊မီးတၢင်းၵျၢမ်ႇတၢင်းပွင်ဢၼ်ယဵင်ႈၶႅၼ်းလီၼၼ်ႉပုၼ်ႈႁဝ်းယဝ်ႉဢေႃႈ။ တၢင်းဢဵၼ်းဢၢၼ်းမၼ်းၸဝ်ႈၼၼ်ႉၸမ်ႉ၊ၶႂ်ႈႁႂ်ႈၶဝ်ၸိူဝ်းဢၼ်သိူၵ်ႈသမ်ႇလႄႈၵႂႃႇမႃးလူၺ်ႈၵၼ်တင်းႁဝ်းၼၼ်ႉၵူၺ်းၸင်ႇ၊တေလႆႈၶၢမ်ႇတၢင်းဢၼ်ႁဵတ်းႁႂ်ႈၸေးၸုမ်ႇဢေႃႈ။
ပိူဝ်ႈၼႆလႄႈၵွပ်ႈပိူဝ်ႈမူႇၵူၼ်းၸိူဝ်းၵူၼ်းဢၼ်ၶၢမ်ႇသၢၵ်ႈသေႇၼမ်ၼႃႇလူင်လၢင်ထၼ်ႇၼႆႉ ဝႅင်းႁွပ်ႈႁဝ်းဝႆႉလႄႈႁဝ်းဢွၼ်ၵၼ်ၶျႃးဝၢင်းမဵဝ်းဢၼ်ႁဵတ်းႁႂ်ႈႁဝ်းႁႅင်းဢူၼ်ႈ၊ဢိၵ်ႇတင်းတုၸရိူၵ်ႈဢပျတ်ႈဢၼ်ၵွပ်ႈၸပ်းႁဝ်းမၼ်ႈၵိုမ်းၼႃႇၼၼ်ႉသေလႄႈ ဢွၼ်ၵၼ်ၶတ်းၸႂ်ၶုၼ်ႇလႅၼ်ႈၼႂ်းသဵၼ်ႈတၢင်းဢၼ်လႅၼ်ႈၶေႉၵၼ်၊ဢၼ်မၢႆဝႆႉပႃႈၼႃႈႁဝ်းၼၼ်ႉတႃႉႁဝ်း။-
ဢွၼ်ၵၼ်ယႅၵ်ႉတူၺ်း ၸဝ်ႈယေႇသု၊ ဢၼ်ႁဝ်းယုမ်ႇမၢတ်ႈဢိင်ပိုင်ႈဝႆႉ၊ၸႃႉၸဵမ်မိူဝ်ႈၵေႃႇၸႃႉတေႃႇထိုင်ႁွတ်ႈတီႈသုတ်းၼၼ်ႉတႃႉႁဝ်း။ မၼ်းၸဝ်ႈၼၼ်ႉ၊ယင်းဢမ်ႇသုတ်ႉဢမ်ႇႁူၼ်ၵွပ်ႈပိူဝ်ႈသဝ်မႆႉဝႃးမိုဝ်းၼၼ်ႉလႄႈ ယင်းဢမ်ႇၵႃး၊ယင်းမီးတၢင်းဢၼ်သိူဝ်းၸူမ်းမူၼ်ႈပျေႃႇလႄႈ ပႂ်ႉထႃႈမၼ်းၸဝ်ႈဝႆႉယဝ်ႉၼၼ်ႉဢေႃႈ။ မၼ်းၸဝ်ႈယင်းဢမ်ႇမၢတ်ႈလွင်ႈတၢင်းဢၼ်လီဢူၵ်းလီဢၢႆလူၺ်ႈတၢင်းဢၼ်လႆႈတၢႆၵႃႈၼိူဝ်သဝ်မႆႉဝႃးမိုဝ်းၼၼ်ႉလႄႈမိူဝ်ႈလဵဝ်ၼႆႉမၼ်းၸဝ်ႈၼင်ႈယူႇၵႃႈတီႈၽၢႆႇၶႂႃပလၢင်ႇၽြႃးပဵၼ်ၸဝ်ႈဢေႃႈ။
လွင်ႈၼင်ႇႁိုဝ်ႁူဝ်ၸႂ်သူႁႅင်းဢမ်ႇဢူၼ်ႈၸႂ်ဢမ်ႇလုၸိုင်၊ဝူၼ်ႉၸႂ်တူၺ်းလွင်ႈဢၼ်မၼ်းၸဝ်ႈလႆႈယိူၼ်ႉၶၢမ်ႇတၢင်းဢၼ်ၵူၼ်းမီးဢပျတ်ႈတင်းလၢႆယႃႉယုၵ်ႉမၼ်းၸဝ်ႈထၢၼ်ႇႁိုဝ်ၼၼ်ႉတႃႉ။-
သူတိုၵ်းတေႃးၵၼ်တင်းတုၸရိူၵ်ႈဢပျတ်ႈလႄႈ ယင်းဢမ်ႇပႆႇလႆႈၶၢမ်ႇတေႃႇထိုင်ႁွတ်ႈလႆႈၶၢမ်ႇတၢင်းဢၼ်ဢဝ်တၢႆလူးၵွၼ်ႇဢေႃႈ။-
ၸွင်ႇသူလူင်လိုမ်းၶေႃႈၵႂၢမ်းဢၼ်တိုၵ်းယူင်းပၼ်ႁႅင်းသူ၊ဢၼ်ၽြႃးပဵၼ်ၸဝ်ႈလၢတ်ႈတေႃႇသူ၊မိူၼ်ၸိူဝ်ႉၼင်ႇဢၼ်မၼ်းၸဝ်ႈလၢတ်ႈတေႃႇလုၵ်ႈၸၢႆးၸဝ်ႈတင်းလၢႆၼၼ်ႉယဝ်ႉႁိုဝ်း။ မၼ်းၸဝ်ႈလၢတ်ႈလႄႈဝႃႈ၊ “လုၵ်ႈၸၢႆးၵဝ်႟။ ယႃႇပေမၢတ်ႈမဝ်မၢင်ၵႂၢမ်းသင်ႇသွၼ်သုင်းမႃႉၸဝ်ႈၽြႃးၼၼ်ႉ၊ ယႃႇပေၸႂ်လု၊ယၢမ်းမိူဝ်ႈဢၼ်မၼ်းၸဝ်ႈပၼ်တၢမ်ႇမႂ်းၼၼ်ႉ။
လွင်ႈမၼ်းၸမ်ႉ၊ၸဝ်ႈၽြႃးသင်ႇသွၼ်သုင်းမႃႉၵေႃႉဢၼ်မၼ်းၸဝ်ႈႁၵ်ႉၼၼ်ႉလႄႈ ပၼ်တၢမ်ႇတီႈၶဝ်ၸိူဝ်းဢၼ်မၼ်းၸဝ်ႈႁပ်ႉတုင်းဢဝ်မိူၼ်ပဵၼ်လုၵ်ႈၸဝ်ႈၼၼ်ႉဢေႃႈ။” ဝႃႈၼင်ႇၼႆဢေႃႈ။-
ဢွၼ်ၵၼ်ယိူၼ်ႉၶၢမ်ႇတၢင်းဢၼ်ၽြႃးပဵၼ်ၸဝ်ႈပၼ်တၢမ်ႇသင်ႇသွၼ်သုင်းမႃႉသူ၊ၸွမ်းၼင်ႇသူပဵၼ်လုၵ်ႈလၢင်းမၼ်းၸဝ်ႈတႃႉ။ လွင်ႈမၼ်းၸမ်ႉ၊လုၵ်ႈလၢင်းဢၼ်ပေႃႈဢမ်ႇသင်ႇသွၼ်သုင်းမႃႉၼၼ်ႉ၊မီးသေၵေႃႉသေၵူၼ်းႁိုဝ်း။-
ပေႃးသူဢမ်ႇၶၢမ်ႇဢဝ်ၵႂၢမ်းသင်ႇသွၼ်သုင်းမႃႉ၊ၸိူဝ်ႉၼင်ႇပဵၼ်လုၵ်ႈလၢင်းမၼ်းၸဝ်ႈၼၼ်ႉလႄႈယူႇၸိုင်၊သူဢမ်ႇၸႂ်ႈလုၵ်ႈဢွၵ်ႇ၊ပဵၼ်လုၵ်ႈဢၼ်မၢၼ်းၸွမ်းတၢင်းၵူၺ်းဢေႃႈ။-
လိူဝ်သေၼၼ်ႉ၊ႁဝ်းမီးပေႃႈဢၼ်ပဵၼ်ၸႃႇတိၵူၼ်းဢၼ်သင်ႇသွၼ်သုင်းမႃႉပၼ်ႁဝ်းလႄႈ ႁဝ်းၵေႃႈရူဝ်ႇသေႇၵူဝ်ယမ်ပေႃႈၼၼ်ႉဢေႃႈ။ လိူဝ်တွၼ်းၼႃႇသေပိူၼ်ႈၼၼ်ႉ ႁဝ်းထုၵ်ႇလီယူႇၼႂ်းတၢင်းဢၼ်ပေႃႈၸႂ်ဝိၺိၺ်ႇဢုပ်ႉထိင်းလႄႈ မီးဢသၢၵ်ႈလိပ်းယူႇၼၼ်ႉဢမ်ႇၸႂ်ႈႁိုဝ်း။-
ပေႃႈဢၼ်ပဵၼ်ၸႃႇတိၵူၼ်းၸိူဝ်းၼၼ်ႉ၊သင်ႇသွၼ်သုင်းမႃႉပၼ်ႁဝ်း၊မိူၼ်ၸိူဝ်ႉၼင်ႇႁၢင်ႈပဵၼ်ဢၼ်လီပုၼ်ႈၶဝ် ၸူဝ်ႈၵမ်းဢွၼ်ႇၼိုင်ႈၵူၺ်းဢေႃႈ။ ၵူၺ်းၵႃႈ၊ၽြႃးပဵၼ်ၸဝ်ႈထွၵ်ႈလူၺ်ႈဢၵျူဝ်းႁဝ်းသေလႄႈ သင်ႇသွၼ်သုင်းမႃႉပၼ်ႁႂ်ႈႁဝ်းလႆႈၶဝ်ႈထိုင်ၵႃႈၼႂ်းတၢင်းဢၼ်မူတ်းၸၢင်ႇမၼ်းၸဝ်ႈဢေႃႈ။-
ၼႂ်းမိူဝ်ႈဢၼ်လႆႈၶၢမ်ႇတၢင်းဢၼ်သုင်းမႃႉၼၼ်ႉ၊မိူၼ်ၼင်ႇႁၢင်ႈယၢမ်းဢၼ်လႆႈၶၢမ်ႇဢဝ်ယူႇၼၼ်ႉ၊ပဵၼ်ဢၼ်လီၸႂ်လဵၵ်ႉလႄႈဢမ်ႇပျေႃႇၸႂ်လႆႈဢေႃႈ။ လိုၼ်းၼၼ်ႉၸင်ႇ၊ၶဝ်ၸိူဝ်းဢၼ်လႆႈၶၢမ်ႇဢဝ်တၢမ်ႇတၢင်းဢၼ်သင်ႇသွၼ်ပၼ်ၼၼ်ႉ၊လႆႈမီးတၢင်းဢၼ်မူၼ်ႈပျေႃႇလႄႈၶျၢမ်းသႃႇသေယဝ်ႉ၊ႁွတ်ႈထိုင်တၢင်းသိုဝ်ႈတေႃႇၼၼ်ႉဢေႃႈ။
ပိူဝ်ႈၼႆလႄႈဢဝ်မိုဝ်းသူဢၼ်ႁိူဝ်ႉၼူၼ်းႁႅင်းဢူၼ်ႈၼၼ်ႉယူၵ်ႉၶိုၼ်ႈလႄႈႁႂ်ႈႁူဝ်ၶဝ်ႇသူဢၼ်သၼ်ႇဝႆယူႇၼၼ်ႉမီးႁႅင်းတႃႉ။-
ႁႂ်ႈယၢင်ႈတိၼ်သူပႆၸွမ်းသဵၼ်ႈတၢင်းဢၼ်သိုဝ်ႈလီလႄႈတိၼ်ဢၼ်ၶေႉယူႇၼၼ်ႉၵေႃႈတၵ်းတေဢမ်ႇပိူင်ႈၵႂႃႇလုတ်ႈၵႂႃႇၵူၺ်းဢမ်ႇၵႃး၊ႁႂ်ႈလႆႈၶၢမ်ႇတၢင်းဢၼ်ယုၵ်ႉယႃႁႂ်ႈႁၢႆတႃႉ။
ၶတ်းၸႂ်ႁႂ်ႈလႆႈထုၵ်ႇမေႃၵၼ်တင်းၵူၼ်းၵူႈၵေႃႉၵူႈၵူၼ်း၊ဢိၵ်ႇတင်းႁႂ်ႈလႆႈတႄႇယူႇၼႂ်းပႃႇရမီႇတၢင်းဢၼ်မူတ်းၸၢင်ႇတႃႉ။ လွင်ႈမၼ်းၸမ်ႉ၊ပေႃးယင်းဢမ်ႇမီးၸႂ်သၽေႃးၸိူဝ်ႉၼင်ႇၼၼ်ၸိုင်၊ၽူႈလႂ်ၵေႃႈဢမ်ႇထူပ်းႁၼ်ထႃႇဝရႃႉၽြႃးလႆႈဢေႃႈ။-
ၼႂ်းသူၼႆႉသေၵေႃႉသေၵူၼ်းၼင်ႇႁိုဝ်တၵ်းဢမ်ႇလုတ်ႈႁၢမ်းၵျေးၸူးၽြႃးပဵၼ်ၸဝ်ႈၸိုင်၊ဝႆႉသတိတႃႉ။ ယႃႇပေႁႂ်ႈၽူႈလႂ်လႆႈပဵၼ်ၸိူဝ်ႉၼင်ႇ “တူၼ်ႈႁၢၵ်ႈၶူမ်” ဢၼ်ဢွၵ်ႇႁုၼ်ႈမႃးလႄႈၵူၼ်းၼမ်ၼႃႇလႆႈလုသုမ်းၵႂႃႇၵွပ်ႈပိူဝ်ႈၵွင်ႉႁႅၼ်ႇမၼ်းပၼ်တၢင်းတုၵ်ႉၶႃႉယၢပ်ႇၸႂ်ၼၼ်ႉ။-
ယႃႇပေႁႂ်ႈၽူႈလႂ်ႁဵတ်းမေႇထုင်ႇဢၼ်ဢမ်ႇတြႃး၊ဢမ်ႇၼၼ်၊ယႃႇပေႁႂ်ႈပဵၼ်ၵေႃႉဢၼ်ဢမ်ႇမီးၸႂ်ၽြႃးၸႂ်တြႃးမိူၼ်ၸိူဝ်ႉၼင်ႇ ဢေးသေႃး၊ ဢၼ်ၶၢႆၵိၼ်ဢရႃႇလုၵ်ႈတူၼ်ႈမၼ်းပုၼ်ႈတၵ်းႁႂ်ႈလႆႈၵိၼ်တၢင်းၵိၼ်တႃႇၼိုင်ႈၵူၺ်းၼၼ်ႉ။-
ၸိူဝ်ႉၼင်ႇဢၼ်သူႁုယူႇၼၼ်ႉ၊ၵမ်းလိုၼ်းမိူဝ်ႈဢၼ်မၼ်းၶိုၼ်းၶႂ်ႈလႆႈတၢင်းလီမၢင်ႇၵလႃႇၵႃႈတီႈပေႃႈမၼ်းၼၼ်ႉၸိုင်၊မၼ်းလႆႈၶၢမ်ႇတၢင်းဢၼ်ထဵင်ပႅတ်ႈဢေႃႈ။ ပိၵ်ႉသမ်ႉမၼ်းပႃးတင်းၼမ်ႉတႃတူၵ်းလႄႈၶတ်းၸႂ်ႁႂ်ႈလႆႈတၢင်းလီၼၼ်ႉၶိုၼ်းသေၵေႃႈ၊မၼ်းဢမ်ႇပဵၼ်လႆႈ၊ၵွပ်ႈပိူဝ်ႈမၼ်းဢမ်ႇမီးဢၶႂၢင်ႉဢၼ်တၵ်းၶိုၼ်းမႄးလႆႈၵႃႈဢၼ်မၼ်းႁဵတ်းပူၼ်ႉမႃးယဝ်ႉၼၼ်ႉဢေႃႈ။
သူဢမ်ႇလႆႈမႃးမိူၼ်ၸိူဝ်ႉၼင်ႇၵူၼ်းမဵဝ်း ဢိသရေး၊ မႃးၵႃႈတီႈလွႆ သိၼႃႉ၊ ဢၼ်ဢဝ်မိုဝ်းတိူဝ်ႉထုၵ်ႇလႆႈၼၼ်ႉ။ လွႆၼၼ်ႉပဵၼ်လွႆဢၼ်ပဵဝ်ၽႆးလုၵ်ႉယူႇ၊လပ်းသိင်ႇမိုတ်ႈယူႇ၊ဢၼ်သဵင်လူမ်းၽိဝ်ႁုင်လင်မေႃးယူႇ၊-
ဢၼ်သဵင်ၼႄးၶရႃႇမေႃးႁုၼ်ႈယူႇ၊ဢိၵ်ႇတင်းသဵင်ၼုၵ်ႈၵပၢတ်ႈၸဝ်ႈမီးယူႇၼၼ်ႉဢမ်ႇၸႂ်ႈ။ မိူဝ်ႈဢၼ်ၵူၼ်းတင်းလၢႆငိၼ်းသဵင်ၸဝ်ႈယဝ်ႉၸိုင်၊ၶဝ်ဢွၼ်ၵၼ်တွင်းပၢၼ်ႇၼင်ႇႁိုဝ်တၵ်းဢမ်ႇလႆႈငိၼ်းသဵင်တၢင်ႇၸိူဝ်ႉတၢင်ႇမဵဝ်းထႅင်ႈၼၼ်ႉဢေႃႈ။-
ၵွပ်ႈပိူဝ်ႈၶဝ်ဢမ်ႇၶၢမ်ႇလႆႈဢမိင်ႉၸဝ်ႈဢၼ်လၢတ်ႈလႄႈဝႃႈ၊ “ပိၵ်ႉသမ်ႉပဵၼ်တူဝ်သတ်းသေၵေႃႈ၊ပေႃးတိူဝ်ႉမႅၼ်ႈလွႆၼၼ်ႉၸိုင်၊ဢဝ်မၢၵ်ႇႁိၼ်ပိုဝ်ႈသႂ်ႇႁႂ်ႈတၢႆတႃႉ၊” ဝႃႈၼင်ႇၼႆၼၼ်ႉဢေႃႈ။-
လွင်ႈတၢင်းဢၼ်လႆႈႁၼ်ၸိူဝ်းၼၼ်ႉ၊ပဵၼ်ဢၼ်လီၵူဝ်လီႁႄၼႃႇလူင်လၢင်ထၢၼ်ႈပေႃး မူဝ်းသေႇ၊ လၢတ်ႈဝႃႈ၊ “ၵဝ်ၵူဝ်ၼႃႇလူင်လၢင်လႄႈသၼ်ႇဝႆယူႇဢေႃႈ၊” ဝႃႈၼင်ႇၼႆဢေႃႈ။
ဢၼ်သူလႆႈႁွတ်ႈထိုင်မႃးၼႆႉၸမ်ႉ၊သူလႆႈႁွတ်ႈထိုင်မႃးၵႃႈတီႈလွႆ ၸိဢုၼ်ႇ၊ ဢိၵ်ႇတင်းၵႃႈတီႈဝဵင်းၽြႃးဢၼ်ဢသၢၵ်ႈလိပ်းဢၼ်ပဵၼ်ဝဵင်း ယေႇရုသလႅမ်ႇ၊ ၵၢင်ႁၢဝ်ဢၼ်တမၢၼ်ႇၵၢင်ႁၢဝ်မႃးၸုတုမ်ၵၼ်လႄႈၼမ်ၼႃႇသမ်ႉပေႃးၼပ်ႉဢၢၼ်ႇဢမ်ႇလႆႈၼၼ်ႉဢေႃႈ။-
သူလႆႈႁွတ်ႈထိုင်ၵႃႈတီႈပၢင်တုမ်ဢၼ်သိူဝ်းပျေႃႇဢၼ်ပဵၼ်ထႃႇၼႃႉလုၵ်ႈတူၼ်ႈၽြႃးပဵၼ်ၸဝ်ႈတင်းလၢႆ၊ၸိူဝ်းဢၼ်ၸိုဝ်ႈသဵင်ၶဝ်လႆႈၶၢမ်ႇတႅမ်ႈဝႆႉ၊ၵႃႈၼႂ်းၸရၢင်းၵၢင်ႁၢဝ်ပုၼ်ႉၼၼ်ႉဢေႃႈ။ သူလႆႈႁွတ်ႈထိုင်ၵႃႈတီႈၽြႃးပဵၼ်ၸဝ်ႈ၊ၸဝ်ႈဢၼ်ၸီႇယၢင်ႇတြႃးတီႈၵူၼ်းဝူၺ်ႇၼေႇယႃႉတင်းသဵင်ႈတင်းလူင်၊ဢိၵ်ႇတင်းၸီႇယၢင်ႇတီႈဝိၺိၺ်ႇၵူၼ်းမူတ်းၸၢင်ႇတင်းလၢႆ၊ဢၼ်လႆႈႁဵတ်းႁႂ်ႈႁွတ်ႈထိုင်တၢင်းဢၼ်ၸေးၸုမ်ႇၼၼ်ႉဢေႃႈ။-
သူလႆႈႁွတ်ႈထိုင်ၵႃႈတီႈ ၸဝ်ႈယေႇသု၊ ဢၼ်ဝႃႈ၊ၸဝ်ႈဝူင်ႈၵၢင်သဵတ်ႈၸႃႇတြႃးမႂ်ႇ၊ဢိၵ်ႇတင်းၵႃႈတီႈလိူတ်ႈဢၼ်ၸုပ်ႉၽႅတ်းသႂ်ႇဢၼ်ပဵၼ်ၵတိၸဝ်ႈ၊ဢၼ်ယဵင်ႈၶႅၼ်းမျၢတ်ႈၼႃႇသေလိူတ်ႈ ဢႃႇပေႇလႃႉ၊ ၽႅတ်းသႂ်ႇၼၼ်ႉဢေႃႈ။
ပိူဝ်ႈၼႆလႄႈလွင်ႈၼင်ႇႁိုဝ်သူတၵ်းဢမ်ႇထဵင်ပႅတ်ႈဢမိင်ႉၸဝ်ႈၼၼ်ႉၸိုင်၊ႁဵတ်းသတိတႃႉ။ ပေႃးၶဝ်ၸိူဝ်းဢၼ်ထဵင်ပႅတ်ႈၵေႃႉဢၼ်သင်ႇသွၼ်ပၼ်တြႃးၸဝ်ႈ၊ၵႃႈၼိူဝ်လိၼ်မိူင်းၼႆႉၼၼ်ႉဢမ်ႇလႆႈၵၢင်းလွတ်ႈတင်းဢပျတ်ႈတႄႉၸိုင်၊ႁဝ်းတင်းလၢႆဢၼ်ထဵင်ပႅတ်ႈတြႃးၸဝ်ႈဢၼ်လုၵ်ႉၵႃႈၼိူဝ်ၵၢင်ႁၢဝ်မႃးၼၼ်ႉယဵင်ႈၶႅၼ်းတၵ်းဢမ်ႇၵၢင်းလွတ်ႈဢပျတ်ႈၼႃႇသေၶဝ်ၸိူဝ်းၼၼ်ႉဢေႃႈ။-
သဵင်ဢမိင်ႉၸဝ်ႈမိူဝ်ႈဢွၼ်ၼႆႉၼၼ်ႉ၊ၶွၼ်းၶဝ်ႇႁႂ်ႈလိၼ်မိူင်းသၼ်ႇဝႆဢေႃႈ။ တေႃႈလဵဝ်ၼႆႉၸမ်ႉ၊မၼ်းၸဝ်ႈဝႆႉၵတိလႄႈဝႃႈ၊ “ၵဝ်တၵ်းသၼ်ႇၶွၼ်းထႅင်ႈပွၵ်ႈၼိုင်ႈဢေႃႈ။ တၵ်းသၼ်ႇၶွၼ်းလိၼ်မိူင်းၵူၺ်းဢမ်ႇၵႃး၊တၵ်းသၼ်ႇၶွၼ်းၵၢင်ႁၢဝ်ၸွမ်းဢေႃႈ၊” ဝႃႈၼင်ႇၼႆဢေႃႈ။-
ၵႂၢမ်းဢၼ်ဝႃႈ၊ “ႁဵတ်းထႅင်ႈပွၵ်ႈၼိုင်ႈ” ဝႃႈၼင်ႇၼႆၼၼ်ႉ၊ၶႂ်ႈဝႃႈ၊တၵ်းယႃႉပႅတ်ႈၶိူင်ႈပိူင်လေႃးၵီႇဢၼ်သၼ်ႇဝႆတင်းလၢႆသေလႄႈၽၢၼ်ႇသၢင်းႁႂ်ႈမီးၶိူင်ႈပိူင်ဢၼ်မႂ်ႇပေႃႇပဵၼ်မႃး ပုၼ်ႈလွင်ႈၼင်ႁိုဝ်ၶိူင်ႈပိူင်ဢၼ်ဢမ်ႇသၼ်ႇဢမ်ႇဝႆတင်းလၢႆတၵ်းတေၵိုတ်းဝႆႉမီးဝႆႉၼၼ်ႉဢေႃႈ။
ၵွပ်ႈပိူဝ်ႈၼႆလႄႈႁဝ်းလႆႈမိူင်းဢၼ်ဢမ်ႇသၼ်ႇၶွၼ်းဝႆလႆႈၼၼ်ႉယဝ်ႉ၊ဢွၼ်ၵၼ်ယွင်ႈယေႃးတၢင်ႇၵျေးၸူးၸဝ်ႈယူႇတႃႉႁဝ်း။ ဢွၼ်ၵၼ်မီးၸႂ်ဢၼ်ရူဝ်ႇသေႇၵူဝ်ယမ်လႄႈၵူဝ်းၵႂၢႆႇဝႆႈၽြႃးပဵၼ်ၸဝ်ႈ၊ၼႂ်းတၢင်းဢၼ်မၼ်းၸဝ်ႈထုၵ်ႇၸႂ်ၵျိူၵ်ႈၸႂ်ၼၼ်ႉတႃႉႁဝ်း။-
လွင်ႈမၼ်းၸမ်ႉ၊ၽြႃးပဵၼ်ၸဝ်ႈႁဝ်းပဵၼ်ၽႆးဢၼ်ၸၢင်ႈမႆႈႁႂ်ႈလုလႅဝ်ဢေႃႈ။
ႁႂ်ႈသူၼင်ႇၵၼ်ႁၵ်ႉပႅင်းၵၼ်ယူႇ၊မိူၼ်ၸိူဝ်ႉၼင်ႇပီႈၼွင်ႉၵၼ်ႁၵ်ႉပႅင်းၵၼ်ၼၼ်ႉတႃႉ။-
ယႃႇပေလိုမ်းႁႂ်ႈမေႃတွၼ်ႈႁပ်ႉ၊ၶႅၵ်ႇၼႃႈမႂ်ႇၵႃႈၼႂ်းႁိူၼ်းသူတႃႉ။ လွင်ႈမၼ်းၸမ်ႉ၊ယၢမ်ႈမီးၵူၼ်းၵမ်ႈၽွင်ႈယင်းဢမ်ႇထၢင်ႇဢမ်ႇထိူမ်လႄႈလႆႈတွၼ်ႈႁပ်ႉၶႅၵ်ႇဢၼ်ပဵၼ်တမၢၼ်ႇၵၢင်ႁၢဝ်ၼၼ်ႉယဝ်ႉဢေႃႈ။-
ၶုၵ်းၸႂ်လႆႈၶဝ်ၸိူဝ်းဢၼ်တူၵ်းထွင်ႇယူႇၼၼ်ႉလႄႈမၢတ်ႈမိူၼ်သူလႆႈတူၵ်းထွင်ႇယူႇၸိူဝ်ႉၼင်ႇၶဝ်ၼၼ်ႉတႃႉ။ ၶုၵ်းၸႂ်လႆႈၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသႄးယူႇၼၼ်ႉလႄႈမၢတ်ႈမိူၼ်သူလႆႈၶၢမ်ႇၸိူဝ်ႉၼင်ႇၶဝ်ၸိူဝ်းၼၼ်ႉတႃႉ။
ႁႂ်ႈလွင်ႈတၢင်းဢၼ်သွင်ႇမၢင်ႇၵလႃႇၼၼ်ႉ၊မီးသရေႇၼႃႈတႃၵႃႈၼႂ်းၵူၼ်းတင်းသဵင်ႈတင်းလူင်လႄႈႁႂ်ႈၽူဝ်တင်းမေးပႂ်ႉသဵတ်ႈၸႃႇတေႃႇၵၼ်တႃႉ။ လွင်ႈမၼ်းၸမ်ႉ၊ၽြႃးပဵၼ်ၸဝ်ႈတၵ်းၸီႇယၢင်ႇတြႃးတီႈၶဝ်ၸိူဝ်းဢၼ်ၽိတ်းၵႃႇမေႇသုဢၼ်ၵူတ်ႉၽူဝ်ၵူတ်ႉမေးပိူၼ်ႈၼၼ်ႉဢေႃႈ။
ႁႂ်ႈၸူဝ်ႈတႃႇဢသၢၵ်ႈသူၵၢင်းလွတ်ႈတင်းၸႂ်လေႃးၽႃႉဢၼ်ၶႂ်ႈလႆႈငိုၼ်းတွင်းလႄႈမီးတၢင်းဢိမ်ႇၸႂ်တဵမ်ၸႂ်လူၺ်ႈဢုၵ်ႉၸႃႇဢၼ်သူမီးဝႆႉၼၼ်ႉၵူၺ်းတႃႉ။ လွင်ႈမၼ်းၸမ်ႉ၊ၽြႃးပဵၼ်ၸဝ်ႈလၢတ်ႈလႄႈဝႃႈ၊ “ၵဝ်တၵ်းဢမ်ႇၽၢတ်ႇယၢၼ်ၵၼ်တင်းသူလႃးလႃး။ ၵဝ်တၵ်းဢမ်ႇၸုၼ်ႉပႅတ်ႈသူလႃးလႃး၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈဢွၼ်ၵၼ်ႁတ်းႁၢၼ်လႄႈလၢတ်ႈဝႃႈ၊ “ထႃႇဝရႃႉၽြႃး၊ပဵၼ်ၸဝ်ႈဢၼ်ၸွႆႈထႅမ်ၵဝ်လႄႈ၊ ၵဝ်တၵ်းဢမ်ႇၵူဝ်ဢမ်ႇႁႄ။ ပိူၼ်ႈတၵ်းႁဵတ်းၵႃႈသင်တီႈၵဝ်လႆႈ၊” ဝႃႈၼင်ႇၼႆတႃႉႁဝ်း။
ၶုၵ်းၸႂ်လႆႈၵူၼ်းလူင်ဢၼ်ဢွၼ်ႁူဝ်သူၸိူဝ်းဢၼ်ႁေႃးလၢတ်ႈၼုၵ်ႈၵပၢတ်ႈတြႃး၊ၽြႃးပဵၼ်ၸဝ်ႈပၼ်သူၼၼ်ႉတႃႉ။ ဝူၼ်ႉၸႂ်လူၺ်ႈလွင်ႈဢၼ်ၶဝ်ၸိူဝ်းၼၼ်ႉလႆႈၵမ်ၵျၢင်ႉလႄႈႁဵတ်းမဵဝ်းဢၼ်မီးဢၵျူဝ်းၵႂႃႇၸိူဝ်ႉၼင်ႇႁိုဝ်ၼၼ်ႉ၊ယိူင်ႈၸွမ်းတၢင်းယုမ်ႇမၢတ်ႈၶဝ်တႃႉ။-
ၸဝ်ႈယေႇသု၊ ၸမ်ႉ၊မိူဝ်ႈဝႃး၊မိူဝ်ႈၼႆႉလႄႈသိုပ်ႇၵႂႃႇတႃႇသေႇၼၼ်ႉ၊ဢမ်ႇလႅၵ်ႈဢမ်ႇလၢႆႈလႄႈပဵၼ်မိူၼ်ၵဝ်ႇဝႆႉယူႇဢေႃႈ။-
ယႃႇပေႁႂ်ႈၵႂၢမ်းသင်ႇသွၼ်ဢၼ်မႂ်ႇ၊ဢၼ်ပႅၵ်ႇပိူင်ႈၸိူဝ်းၼၼ်ႉၼႄတၢင်းႁႂ်ႈသူလႆႈၽိတ်းပိူင်ႈၵႂႃႇ။ တၢင်းဢၼ်ႁဵတ်းႁႂ်ႈၸႂ်မီးႁႅင်းလူၺ်ႈသုၵျေးၸူးၸဝ်ႈၼၼ်ႉပဵၼ်လွင်ႈတၢင်းဢၼ်လီယဝ်ႉလႄႈဢမ်ႇၸႂ်ႈထွမ်ႇဢဝ်တြႃးဢၼ်လၢတ်ႈလွင်ႈလူၺ်ႈတၢင်းၵိၼ်တၢင်းၶူပ်း၊ၶဝ်ၸိူဝ်းဢၼ်ထွမ်ႇဢဝ်တြႃးၼႆႉဢမ်ႇလႆႈၶၢမ်ႇဢဝ်ဢၵျူဝ်းၵႃႈသင်။
ႁဝ်းမီးၶဵင်ႇတၢင်းလူႇဢၼ်ယဵၸ်ႈပရေႃးႁဵၵ်ႈ ၸိူဝ်းဢၼ်ႁဵတ်းဝၢတ်ႈၵႃႈၼႂ်းသုမ်ႉထဵင်ၸဝ်ႈၼၼ်ႉ၊ဢမ်ႇမီးဢၶႂၢင်ႉဢၼ်တၵ်းလႆႈၵိၼ်တၢင်းၵိၼ်သေၸိူဝ်ႉသေပိူင်ၼၼ်ႉဢေႃႈ။-
ၶုၼ်ယဵၸ်ႈပရေႃးႁဵၵ်ႈ ၵျူး၊ ၶဝ်၊ဢဝ်လိူတ်ႈတူဝ်တၢင်းလူႇၼၼ်ႉ၊သႂၢင်းသႂ်ႇၵႃႈၼႂ်းထႃႇၼႃႉတီႈဢၼ်မူတ်းၸၢင်ႇသေပိူၼ်ႈႁႂ်ႈလႆႈသၢၵ်ႈလူႇပုၼ်ႈတၵ်းၽႄႇဢပျတ်ႈတင်းလၢႆဢေႃႈ။ ၵူၺ်းၵႃႈ၊တူဝ်တၢႆသတ်းၼၼ်ႉဢဝ်ဢွၵ်ႇၵႂႃႇၽဝ်ၽႆးပႅတ်ႈၵႃႈၼွၵ်ႈပၢင်တပ်ႉဢေႃႈ။-
ၵွပ်ႈလွင်ႈတၢင်းၼႆႉလႄႈ၊ ၸဝ်ႈယေႇသု၊ ၵေႃႈ၊လႆႈၶၢမ်ႇတၢႆၵႃႈၼွၵ်ႈဝဵင်းပုၼ်ႈလွင်ႈၼင်ႇႁိုဝ်တေႁဵတ်းႁႂ်ႈၵူၼ်းမၼ်းၸဝ်ႈႁွတ်ႈထိုင်တၢင်းဢၼ်မူတ်းၸၢင်ႇလူၺ်ႈလိူတ်ႈတူဝ်မၼ်းၸဝ်ႈၼၼ်ႉဢေႃႈ။-
ပိူဝ်ႈၼႆလႄႈႁဝ်းၵေႃႈဢွၼ်ၵၼ်ဢွၵ်ႇၵႂႃႇၸူးတီႈမၼ်းၸဝ်ႈၵႃႈၼွၵ်ႈပၢင်တပ်ႉလႄႈၶၢမ်ႇဢဝ်တၢင်းဢၼ်လီဢူၵ်းလီဢၢႆလူၺ်ႈၵၼ်တင်းမၼ်းၸဝ်ႈတႃႉႁဝ်း။-
လွင်ႈမၼ်းၸမ်ႉ၊ၵွပ်ႈပိူဝ်ႈဢမ်ႇမီးဝဵင်းဢၼ်တႄႇမၼ်ႈယူႇတႃႇသေႇပုၼ်ႈႁဝ်းတၵ်းယူႇၼႂ်းမိူင်းၵေႃးၵႃႉၼႆႉလႄႈႁဝ်းဢွၼ်ၵၼ်သွၵ်ႈႁႃဝဵင်းဢၼ်တၵ်းပေႃႇမႃးတၢင်းၼႃႈၼၼ်ႉဢေႃႈ။-
ပိူဝ်ႈၼႆလႄႈႁဝ်းဢွၼ်ၵၼ်ဢဝ်ၵႂၢမ်းယွင်ႈယေႃးသေလႄႈသၢၵ်ႈၵၢပ်ႈႁႂ်ႈပဵၼ်ၶိူင်ႈတၢင်းလူႇၵႃႈတီႈၽၢႆႇၼႃႈၽြႃးပဵၼ်ၸဝ်ႈၵႂႃႇတႃႇသေႇတႃႉ။ လွင်ႈမၼ်းၸမ်ႉ၊ပဵၼ်တၢင်းဢၼ်ႁပ်ႉၶၢမ်ႇဢဝ်မၼ်းၸဝ်ႈပဵၼ်ထႃႇဝရႃႉၽြႃးၼၼ်ႉဢေႃႈ။-
ယႃႇပေလူင်လိုမ်းတၢင်းဢၼ်ႁဵတ်းၵျေးၸူးဢၼ်လီတေႃႇၵၼ်လႄႈၽႄမႅင်ႇပၼ်ၵၼ်၊ၵွပ်ႈပိူဝ်ႈၵၢၼ်တၢင်းႁဵတ်းၸိူဝ်းၼၼ်ႉ၊ပဵၼ်ၶိူင်ႈတၢင်းလူႇဢၼ်ထုၵ်ႇၸႂ်ၵျိူၵ်ႈၸႂ်ၽြႃးပဵၼ်ၸဝ်ႈဢေႃႈ။
ထွမ်ႇဢဝ်ၵႂၢမ်းၵူၼ်းဢၼ်ပဵၼ်ၵႄႇပဵၼ်ႁူဝ်သူသေလႄႈႁဵတ်းၸွမ်းတၢင်းဢၼ်ၶဝ်ၶိုင်ပွင်ၼၼ်ႉတႃႉ။ ၶဝ်ၼၼ်ႉ၊ယင်းဢမ်ႇလိုဝ်ႈဢမ်ႇသဝ်းပႂ်ႉဢၵျူဝ်းၸႂ်ဝိၺိၺ်ႇသူယူႇ၊ပိူဝ်ႈဢၼ်ၶဝ်တၵ်းလႆႈတၢင်ႇလဝ်ႈလွင်ႈၼႃႈၵၢၼ်ၶဝ်တီႈၽြႃးပဵၼ်ၸဝ်ႈၵမ်းလိုၼ်းၼၼ်ႉဢေႃႈ။ ပေႃးသူထွမ်ႇဢဝ်ၶဝ်ၸိုင်၊ၶဝ်တၵ်းၸူမ်းၸူမ်းသိူဝ်းသိူဝ်းသေလႄႈႁဵတ်းၼႃႈၵၢၼ်ဢေႃႈ။ ပေႃးဢမ်ႇၼၼ်၊ၶဝ်ၸၢင်ႈၸႂ်လဵၵ်ႉမႆႈၸႂ်လႄႈသူတၵ်းဢမ်ႇၸွႆႈထႅမ်ဢၵျူဝ်းသူၵႃႈသင်ဢေႃႈ။
သူးတွင်းပုၼ်ႈႁဝ်းယူႇတႃႉ။ ႁဝ်းႁုသေႇၶျႃႇလွင်ႈဢၼ်ႁဝ်းပဵၼ်ၵေႃႉဢၼ်မီးႁူဝ်ၸႂ်ဢၼ်ၶၢဝ်ၸၢင်ႇလႄႈၶႂ်ႈႁဵတ်းၶႂ်ႈသၢင်ႈလွင်ႈဢၼ်လီဢၼ်ငၢမ်းၵူၺ်းၵူၺ်းတႃႇသေႇဢေႃႈ။-
ၵဝ်တွင်းပၢၼ်ႇတိုၵ်းယူင်းႁႂ်ႈသူယဵင်ႈၶႅၼ်းသူးတွင်းပုၼ်ႈၵဝ်၊ၼင်ႇႁိုဝ်ၽြႃးပဵၼ်ၸဝ်ႈတၵ်းၸဵဝ်းပွႆႇၸႂ်ႉၵဝ်ၶိုၼ်းၵႂႃႇၸူးတီႈသူၼၼ်ႉဢေႃႈ။
ၶႅၼ်းတေႃႈႁႂ်ႈၽြႃးပဵၼ်ၸဝ်ႈ၊ဢၼ်ပဵၼ်ၸဝ်ႈတၢင်းၼိမ်၊ၸဝ်ႈဢၼ်ၼုၵ်ႈဢဝ်ၸဝ်ႈၽြႃးႁဝ်း ၸဝ်ႈယေႇသု၊ ဢွၵ်ႇသေၵႃႈတီႈတၢင်းတၢႆလႄႈယုၵ်ႉယွင်ႈဝႆႉၼႂ်းဢရႃႇၸဝ်ႈဢၼ်လဵင်ႉထိင်းသူဝ်းဢၼ်ယႂ်ႇမျၢတ်ႈ၊ၵွပ်ႈပိူဝ်ႈလိူတ်ႈပတိၺိၺ်ႇတြႃးထႃႇဝရႃႉၼၼ်ႉ၊-
ပၼ်တၢင်းလီမၢင်ႇၵလႃႇႁႂ်ႈသူၵမ်ၵျၢင်ႉသၢင်ႈႁဵတ်းၸွမ်း၊ဢလူဝ်ႇမၼ်းၸဝ်ႈလႆႈပျေႉပျေႉၸုမ်ႇၸုမ်ႇ၊ဢိၵ်ႇတင်းႁႂ်ႈမၼ်းၸဝ်ႈပွင်ႁဵတ်းပွင်မႄးႁႂ်ႈသူထွၵ်ႈလူၺ်ႈၼႃႇမႃႉၸိုဝ်ႈသဵင် ၸဝ်ႈယေႇသုၶရိၸ်ႈ၊ လႄႈထုၵ်ႇၸႂ်ၵျိူၵ်ႈၸႂ်မၼ်းၸဝ်ႈသေၵမ်းလူၺ်ႈ။ ႁႂ်ႈ ၸဝ်ႈၶရိၸ်ႈ၊ မီးမုၼ်သရေႇယႂ်ႇၵူႈၵမ်ႇၽႃႇသိုပ်ႇသိုပ်ႇတၢမ်တၢမ်သေၵမ်းလူၺ်ႈ။ ဢႃမိၼ်ႈ။
ပီႈၼွင်ႉၶဝ်႟။ ၵွပ်ႈပိူဝ်ႈလိၵ်ႈဢၼ်ၵဝ်တႅမ်ႈၵႂႃႇၼႆႉ၊ဢမ်ႇယၢဝ်းၵႃႈႁိုဝ်လႄႈ၊ၵဝ်တွင်းပၢၼ်ႇႁႂ်ႈသူယိူၼ်ႉၸႂ်သေထွမ်ႇဢဝ်ၵႂၢမ်းဢေႃးဝႃႇတႃႉ၊ဢၼ်ၵဝ်တိုၵ်းယူင်းပၼ်ႁႅင်းသူၼႆႉဢေႃႈ။-
ၵဝ်ၶႂ်ႈႁႂ်ႈသူႁုလွင်ႈဢၼ်ၼွင်ႉၸၢႆးႁဝ်း တိမေႃးသေႇ၊ လႆႈဢွၵ်ႇထွင်ႇၵႂႃႇယဝ်ႉၼၼ်ႉဢေႃႈ။ ပေႃးမၼ်းၸဵဝ်းႁွတ်ႈမႃးၸိုင်၊ၵဝ်တၵ်းၵႂႃႇလူၺ်ႈၵၼ်တင်းမၼ်းလႄႈထူပ်းႁၼ်သူဢေႃႈ။
ၵဝ်သူင်ႇမႅတ်ႈတႃႇပၼ်ထိုင်ၵူၼ်းဢၼ်ပဵၼ်ၵႄႇပဵၼ်ႁူဝ်သူတင်းလၢႆ၊ဢိၵ်ႇတင်းၵူၼ်းဢၼ်မူတ်းၸၢင်ႇတင်းလၢႆယူႇဢေႃႈ။ ပီႈၼွင်ႉၵူၼ်းမိူင်း ဢိတလီႇ၊ တင်းလၢႆၵေႃႈ၊သူင်ႇမႅတ်ႈတႃႇပၼ်သူယူႇဢေႃႈ။
ႁႂ်ႈသုၵျေးၸူးၽြႃးပဵၼ်ၸဝ်ႈ၊မီးၵႃႈၼိူဝ်သူတင်းသဵင်ႈတင်းလူင်သေၵမ်းလူၺ်ႈ။ ဢႃမိၼ်ႈ။ လိၵ်ႈတြႃးႁေႇပြႄးယဝ်ႉယဝ်ႉဢေႃႈ။
ၵဝ် ယႃႇၵုပ်ႈ၊ ဢၼ်ပဵၼ်ၶႃႈၽြႃးပဵၼ်ၸဝ်ႈ၊ဢိၵ်ႇတင်းပဵၼ်ၶႃႈၸဝ်ႈၽြႃး ယေႇသုၶရိၸ်ႈ၊ ၼႆႉသူင်ႇၵႂၢမ်းမႅတ်ႈတႃႇထိုင်ၵူၼ်းၽြႃးပဵၼ်ၸဝ်ႈသိပ်းသွင်ၶိူဝ်း၊ဢၼ်ၽၢတ်ႇၽႄၸွတ်ႇၸႅတ်ႇယူႇၵူႈတီႈၵူႈလႅၼ်ဢေႃႈ။
ပီႈၼွင်ႉၶဝ်႟။ မိူဝ်ႈဢၼ်သူထူပ်းၺႃးတၢင်းဢၼ်ၸၢမ်းတူၺ်းယႃႉယုၵ်ႉလၢႆသမ်ႇလၢႆပိူင်ၼၼ်ႉၸိုင်၊မၢတ်ႈတင်းသဵင်ႈပဵၼ်လွင်ႈတၢင်းဢၼ်လီသိူဝ်းပျေႃႇၵူၺ်းတႃႉ။-
ၵွပ်ႈၸိူဝ်ႉႁိုဝ်လႄႈဝႃႈၸမ်ႉ၊သူႁုလွင်ႈဢၼ်တၢင်းဢၼ်ၸၢမ်းတူၺ်းတၢင်းယုမ်ႇမၢတ်ႈသူၼၼ်ႉ၊တၵ်းႁႂ်ႈတၢင်းယိူၼ်ႉၶၢမ်ႇသူတင်ႈမၼ်ႈၶိူင်ႇဢေႃႈ။-
ႁႂ်ႈတၢင်းယိူၼ်ႉၶၢမ်ႇသူၼၼ်ႉ၊ယင်းဢမ်ႇသုတ်ႉဢမ်ႇယွမ်းလႄႈဢွၼ်သူင်ႇသူႁႂ်ႈႁွတ်ႈထိုင်တၢင်းၸေးၸုမ်ႇလႄႈဢမ်ႇလူဝ်ႇသင်ထႅင်ႈသေဢိတ်းၼၼ်ႉတႃႉ။-
ၼႂ်းသူၼၼ်ႉ၊ပေႃးသေၵေႃႉသေၵူၼ်းလူဝ်ႇပိင်ႇၺႃႇၸိုင်၊ႁႂ်ႈမၼ်းယွၼ်းဢဝ်ၵႃႈတီႈၽြႃးပဵၼ်ၸဝ်ႈ၊ၸဝ်ႈဢၼ်တၵ်းပၼ်တီႈမၼ်းၼၼ်ႉတႃႉ။ လွင်ႈမၼ်းၸမ်ႉ၊ၽြႃးပဵၼ်ၸဝ်ႈမီးၸႂ်ၵရုၼႃႇဢိၵ်ႇတင်းၸႂ်ၸေႇတၼႃႇၵူၺ်းသေယဝ်ႉ၊ပၼ်တီႈၵူၼ်းတင်းသဵင်ႈတင်းလူင်ဢေႃႈ။-
ၵူၺ်းၵႃႈ၊ႁႂ်ႈမၼ်းယင်းဢမ်ႇမီးၸႂ်ဢၼ်ထၢင်ႇဢၼ်ထိူမ်၊ႁႂ်ႈမၼ်းပႃးတင်းၸႂ်ဢၼ်ယုမ်ႇမၢတ်ႈသေလႄႈယွၼ်းဢဝ်တႃႉ။ လွင်ႈမၼ်းၸမ်ႉ၊ၵေႃႉဢၼ်မီးၸႂ်ဢၼ်ထၢင်ႇဢၼ်ထိူမ်ၼၼ်ႉ၊မိူၼ်ၸိူဝ်ႉၼင်ႇလႅင်းၼမ်ႉပိူပ်ႈၼမ်ႉပၢင်ႇလၢႆႇဢၼ်လူမ်းထူဝ်းလႄႈသဵၼ်ၵႂႃႇပိဝ်ၵႂႃႇၼၼ်ႉဢေႃႈ။-
ၵေႃႉၼၼ်ႉယႃႇပေႁႂ်ႈမၼ်းထၢင်ႇၼႂ်းၸႂ်မၼ်းဝႃႈ၊တၵ်းလႆႈသေၸိူဝ်ႉသေပိူင်ၵႃႈတီႈၽြႃးပဵၼ်ၸဝ်ႈၼၼ်ႉတႃႉ။-
ၵေႃႉၸိူဝ်ႉၼင်ႇၼၼ်ၼၼ်ႉ၊ပဵၼ်ၵူၼ်းဢၼ်မီးၸႂ်သွင်ငၢမ်ႈ၊ၵေႃႉဢၼ်ဢမ်ႇၸၢင်ႈတႅပ်းတတ်းၸႂ်လွင်ႈၵႃႈဢၼ်မၼ်းႁဵတ်းတင်းသဵင်ႈတင်းလူင်ၼၼ်ႉဢေႃႈ။
ႁႂ်ႈပီႈၼွင်ႉၵေႃႉဢၼ်ယၢၵ်ႈၽၢၼ်ၼၼ်ႉ၊ႁႂ်ႈမီးတၢင်းဢၼ်သိူဝ်းပျေႃႇမိူဝ်ႈဢၼ်ၽြႃးပဵၼ်ၸဝ်ႈယူၵ်ႉႁႂ်ႈမၼ်းၶိုၼ်ႈမႃးၼၼ်ႉတႃႉ။-
ႁႂ်ႈပီႈၼွင်ႉၵေႃႉဢၼ်မၢၵ်ႈမီးလီပဵၼ်ၼၼ်ႉ၊ႁႂ်ႈမီးတၢင်းသိူဝ်းပျေႃႇမိူဝ်ႈဢၼ်ၽြႃးပဵၼ်ၸဝ်ႈတိုတ်ႉႁႂ်ႈမၼ်းတူၵ်းတီႈတႅမ်ႇၵႂႃႇၼၼ်ႉတႃႉ။ လွင်ႈမၼ်းၸမ်ႉ၊ၵူၼ်းမၢၵ်ႈၵူၼ်းမီးတင်းလၢႆ၊တေလႆႈႁၢႆလၢႆၵႂႃႇမိူၼ်ၸိူဝ်ႉၼင်ႇမွၵ်ႇယိူဝ်ႈမွၵ်ႇယႃႈၼၼ်ႉဢေႃႈ။-
ၵၢင်ဝၼ်းဢွၵ်ႇမႃးလူၺ်ႈသၢႆလႅတ်ႇဢၼ်မႆႈႁႅင်းၼႃႇၼၼ်ႉမႆႈၶႅမ်ႈတူၼ်ႈယိူဝ်ႈယႃႈႁဵဝ်ႇႁႅင်ႈၵႂႃႇသေယဝ်ႉ၊မွၵ်ႇမၼ်းၵေႃႈလူၼ်ႇႁူင်ႈတူၵ်းၵႂႃႇလႄႈႁၢင်ႈၽၢင်မၼ်းဢၼ်ႁၢင်ႈလီၼၼ်ႉၵေႃႈ၊လုလႅဝ်ၵႂႃႇဢေႃႈ။ ပိူင်လဵဝ်ၵၼ်ၵူၼ်းမၢၵ်ႈၵူၼ်းမီးတင်းလၢႆၵေႃႈ၊တၵ်းႁဵဝ်ႇႁႅင်ႈလုလႅဝ်ၵႂႃႇၵႃႈၼႂ်းတၢင်းဢၼ်မၼ်းႁဵတ်းၼၼ်ႉဢေႃႈ။
ၵေႃႉဢၼ်ယိူၼ်ႉၶၢမ်ႇၼႂ်းတၢင်းဢၼ်ၸၢမ်းတူၺ်းယႃႉယုၵ်ႉၼၼ်ႉ၊မီးမၢင်ႇၵလႃႇဢေႃႈ။ လွင်ႈမၼ်းၸမ်ႉ၊မိူဝ်ႈဢၼ်မၼ်းၸုၵ်းၶၢမ်ႇမၼ်ႈၶိူင်ႇလႆႈၼႂ်းတၢင်းဢၼ်ၸၢမ်းတူၺ်းယဝ်ႉၼၼ်ႉၸိုင်၊မၼ်းတေလႆႈသူးသရၽူႇဢသၢၵ်ႈဢၼ်ၽြႃးပဵၼ်ၸဝ်ႈ ဝႆႉၵတိတီႈၶဝ်ၸိူဝ်းဢၼ်ႁၵ်ႉမၼ်းၸဝ်ႈၼၼ်ႉဢေႃႈ။-
ၽူႈလႂ်သေဢမ်ႇဝႃႈ၊ၵေႃႉဢၼ်လႆႈၶၢမ်ႇတၢင်းဢၼ်ဢပျတ်ႈၸူဝ်းၵႂႃႇၸူဝ်းပႆၼၼ်ႉၸိုင်၊ယႃႇႁႂ်ႈၵေႃႉၼၼ်ႉလၢတ်ႈဝႃႈ၊ “ၽြႃးပဵၼ်ၸဝ်ႈၸူဝ်းဢဝ်ႁႂ်ႈၵဝ်ၽိတ်းပိူင်ဢေႃႈ၊” လွင်ႈမၼ်းၸမ်ႉ၊လွင်ႈတၢင်းဢၼ်ႁၢႆႉမိူၵ်ႈၼၼ်ႉ ဢမ်ႇၸူဝ်းဢဝ်ၽြႃးပဵၼ်ၸဝ်ႈလႆႈ။ မၼ်းၸဝ်ႈၵေႃႈတေဢမ်ႇၸူဝ်းဢဝ်ၽူႈလႂ်ႁႂ်ႈၽိတ်းပိူင်ႈၵႂႃႇၼၼ်ႉဢေႃႈ။-
ၵေႃႉဢၼ်လႆႈၶၢမ်ႇတၢင်းဢၼ်ဢပျတ်ႈၸူဝ်းဢဝ်ၵႂႃႇၵွပ်ႈပိူဝ်ႈၸႂ်ၵိလေႇသႃႇတူဝ်ၸဝ်ႈၵဝ်ႇတိုတ်ႉၸၼ်ၵႂႃႇလႄႈတူၵ်းၶမ်ၶိုမ်းၼၼ်ႉဢေႃႈ။-
ၸႂ်ၵိလေႇသႃႇၼၼ်ႉပႃးပတိၵ်ႈသၼ်ႇထေႇလႄႈ ၵိူတ်ႇလဵင်ႉဢပျတ်ႈမႃးဢေႃႈ။ မိူဝ်ႈဢၼ်တူဝ်ဢပျတ်ႈယႂ်ႇတဵမ်ထူၼ်ႈမႃးယဝ်ႉၸိုင်၊သမ်ႉၵိူတ်ႇလဵင်ႉတၢင်းတၢႆဢေႃႈ။
ပီႈၼွင်ႉဢၼ်ၵဝ်ႁၵ်ႉၶဝ်႟။ ယႃႇပေႁႂ်ႈလႆႈၽိတ်းၵႂႃႇပိူင်ႈၵႂႃႇ။
သုၵျေးၸူးဢၼ်မျၢတ်ႈလီလႄႈ ၸေးၸုမ်ႇၵူႈၸိူဝ်ႉၵူႈပိူင်ၼၼ်ႉလုၵ်ႉၵႃႈတီႈၵၢင်ႁၢဝ်မႃးဢေႃႈ။ လုၵ်ႈၵႃႈတီႈၽြႃးပဵၼ်ၸဝ်ႈဢၼ်ၽၢၼ်ႇသၢင်းဢၼ်လႅင်းၵၢင်ႁၢဝ်တင်းလၢႆဢၼ်ဢမ်ႇၶၢႆႉပုတ်ႈလႅၵ်ႈလၢႆႈ၊ဢမ်ႇမီးသၢႆငၢႆဢၼ်တၵ်းၶၢႆႉပုတ်ႈလႅၵ်ႈလၢႆႈၼၼ်ႉဢေႃႈ။-
ၸွမ်းၼင်ႇဢလူဝ်ႇမၼ်းၸဝ်ႈလႄႈမၼ်းၸဝ်ႈႁႂ်ႈႁဝ်းၵိူတ်ႇပဵၼ်မႃးလူၺ်ႈၵႂၢမ်းသဵတ်ႈၸႃႇ၊ပုၼ်ႈလွင်ႈၼင်ႇႁိုဝ်ႁဝ်းတၵ်းလႆႈပဵၼ်မၢၵ်ႇဢၼ်မၢၵ်ႇမႃးဢွၼ်တၢင်းပိူၼ်ႈၵႃႈၼႂ်းၶိူင်ႈပိူင်တင်းမူတ်းဢၼ်မၼ်းၸဝ်ႈၽၢၼ်ႇသၢင်းၼၼ်ႉဢေႃႈ။
ပီႈၼွင်ႉဢၼ်ၵဝ်ႁၵ်ႉၶဝ်႟။ ႁုပွင်ႇလႅင်းၸႂ်လွင်ႈၼႆႉတႃႉ။ ႁႂ်ႈၵူႈၵေႃႉၵူႈၵူၼ်းမေႃဢွၼ်ၵၼ်ထွမ်ႇဢဝ်ၽႂ်းၽႂ်းလႄႈ၊ႁႂ်ႈထိူင်းၼႂ်းတၢင်းဢၼ်တေလၢတ်ႈၵႂၢမ်း၊ႁႂ်ႈထိူင်းၼႂ်းတၢင်းဢၼ်တေႁႂ်ႈၸႂ်မႆႈၶႂ်ႈၸႂ်သူဢွၵ်ႇၼၼ်ႉတႃႉ။-
လွင်ႈမၼ်းၸမ်ႉ၊ၸႂ်မႆႈၶႂ်ႈၸႃႉၵူၼ်းႁဝ်းဢမ်ႇၸၢင်ႈႁဵတ်းႁႂ်ႈတၢင်းသိုဝ်ႈတေႃႇၽြႃးပဵၼ်ၸဝ်ႈပေႃႇပဵၼ်မႃးလႆႈ။-
ပိူဝ်ႈၼႆလႄႈပႄႇပႅတ်ႈဢၵျၢင်ႉဢၼ်ၵူဝ်ႈၵိူၵ်ႇၵူႈၸိူဝ်ႉၵူႈပိူင်၊ဢိၵ်ႇတင်းတၢင်းဢၼ်မိူၵ်ႈလိူင်းၼႃႇၼၼ်ႉလႄႈပႃႈတင်းၸႂ်ဢၼ်ၼိမ်သိမ်ႇဢူၼ်ႈဢွၼ်ႇသေလႄႈႁပ်ႉတုင်းဢဝ်ၼုၵ်ႈၵပၢတ်ႈတြႃးဢၼ်မၼ်းၸဝ်ႈၽုၵ်ႇသွမ်ႈၵႃႈၼႂ်းႁူဝ်ၸႂ်သူလႄႈဢၼ်ၸၢင်ႈၵႄႇၶျွတ်ႈဢဝ်ဝိၺိၺ်ႇသူလႆႈၼၼ်ႉတႃႉ။
ယႃႇပေထွမ်ႇငိၼ်းၼုၵ်ႈၵပၢတ်ႈတြႃးၸဝ်ႈၵူၺ်းလႄႈႁႂ်ႈပဵၼ်ၵေႃႉဢၼ်ၵမ်ၵျၢင်ႉတြႃးတႃႉ။ ပေႃးဢမ်ႇၼၼ်ၸိုင်၊ပဵၼ်တၢင်းဢၼ်ပႅတ်ႉလႅၼ်တူဝ်ၸဝ်ႈၵဝ်ႇဢေႃႈ။-
ၵေႃႉဢၼ်ထွမ်ႇငိၼ်းၵူၺ်းလႄႈယင်းဢမ်ႇၵမ်ၵျၢင်ႉတြႃးၸဝ်ႈၼၼ်ႉ၊ပဵၼ်မိူၼ်ၸိူဝ်ႉၼင်ႇၵေႃႉဢၼ်တူၺ်းၵႃႈၼႂ်းမၢၼ်ႇၸမ်ႈသေလႄႈ ႁၼ်ၼႃႈတူဝ်ၸဝ်ႈၵဝ်ႇၵူၺ်းၼၼ်ႉဢေႃႈ။-
လွင်ႈမၼ်းၸမ်ႉ၊မၼ်းယင်းယႅၵ်ႉတူၺ်းတူဝ်ၸဝ်ႈၵဝ်ႇသေယဝ်ႉ၊ဢွၵ်ႇၵႂႃႇပႅတ်ႈသေလႄႈလိုမ်းပႅတ်ႈႁၢင်ႈၽၢင်မၼ်းၵမ်းလဵဝ်ၼၼ်ႉဢေႃႈ။-
ၵူၺ်းၵႃႈ၊ၵေႃႉဢၼ်ၸႅတ်ႈတူၺ်းၸေးၸေးၸွတ်ႇၸွတ်ႇ၊ၼႂ်းတြႃးဢၼ်ၸေးၸုမ်ႇ၊တြႃးလွင်ႈတၢင်းဢၼ်ႁႂ်ႈၵူၼ်းလွတ်ႈလႅဝ်းလႄႈမၼ်ႈၶိူင်ႇယူႇၼၼ်ႉၸမ်ႉ၊ပိူဝ်ႈဢၼ်ပဵၼ်ၵေႃႉဢၼ်ထွမ်ႇငိၼ်းလႄႈဢမ်ႇလိုမ်းပႅတ်ႈ၊ယင်းပဵၼ်ၵေႃႉဢၼ်ၵမ်ၵျၢင်ႉတြႃးၸဝ်ႈၼၼ်ႉၸိုင်၊ၽြႃးပဵၼ်ၸဝ်ႈတၵ်းပၼ်မၢင်ႇၵလႃႇတၢင်းလီၼႂ်းတၢင်းဢၼ်မၼ်းၵမ်ၵျၢင်ႉၼၼ်ႉဢေႃႈ။
ၸွင်ႇသေၵေႃႉသေၵူၼ်းထၢင်ႇမၼ်းပဵၼ်ၵူၼ်းဢၼ်မီးသိၼ်မီးထမ်းႁိုဝ်း။ ပေႃးၵေႃႉၼၼ်ႉယင်းဢမ်ႇထိင်းသူပ်းတူဝ်ၸဝ်ႈၵဝ်ႇၸိုင်၊သိၼ်ထမ်းမၼ်းၼၼ်ႉတၵ်းပဵၼ်ဢၼ်လၢႆလၢႆဢမ်ႇပွင်ႇလွင်ႈၵႃႈသင်လႄႈပဵၼ်ဢၼ်ပႅတ်ႉလႅၼ်တူဝ်ၸဝ်ႈၵဝ်ႇၵူၺ်းဢေႃႈ။-
သီႇလႃႉသိၼ်ထမ်းဢၼ်ၶၢဝ်ၸၢင်ႇလႄႈၵၢင်းလွတ်ႈတင်းတၢင်းဢၼ်ၵူဝ်ႈၵိူၵ်ႇၵႃႈတီႈၽၢႆႇၼႃႈၽြႃးပဵၼ်ၸဝ်ႈ၊ပေႃႈၸဝ်ႈၼၼ်ႉၸမ်ႉ၊ပဵၼ်တၢင်းဢၼ်လူတူၺ်းလုၵ်ႈဢွၼ်ႇဢၼ်ၽၢၼ်ပေႃႈၽၢၼ်မႄႈ၊ဢိၵ်ႇတင်းမႄႈမၢႆႈတင်းလၢႆ၊ၼႂ်းမိူဝ်ႈဢၼ်ၶဝ်မီးတုၵ်ႉၶႃႉတၢင်းၽၢၼ်ၼၼ်ႉ၊ဢိၵ်ႇတင်းတၢင်းဢၼ်ပႂ်ႉထိင်းတူဝ်ၸဝ်ႈၵဝ်ႇတၵ်းႁႂ်ႈလွတ်ႈၵၢင်းသေတၢင်းဢၼ်ၵူဝ်ႈၵိူၵ်ႇဝူၺ်ႇႁင်ႈလေႃးၵႃႉၼႆႉၼၼ်ႉဢေႃႈ။
ပီႈၼွင်ႉၵဝ်တင်းလၢႆၶဝ်႟။ ၸွမ်းလူၺ်ႈပဵၼ်ၵူၼ်းဢၼ်ယုမ်ႇမၢတ်ႈၸဝ်ႈၽြႃးႁဝ်း ၸဝ်ႈယေႇသုၶရိၸ်ႈ၊ ဢၼ်မုၼ်ၽုင်းယႂ်ႇၼၼ်ႉ၊ယႃႇပေထွၵ်ႈလူၺ်ႈၼႃႈလဵၵ်ႉၼႃႈယႂ်ႇၼၼ်ႉသေၵမ်း။-
ပေႃးၵူၼ်းမၢၵ်ႈၵူၼ်းမီးဢၼ်တိုဝ်းမွင်းၵူၺ်းၶမ်းလႄႈၼုင်ႈၶူဝ်းဢၼ်ႁၢင်ႈလီႁၢင်ႈငၢမ်းၼၼ်ႉၵေႃႉၼိုင်ႈ၊ဢိၵ်ႇတင်းၵူၼ်းယၢၵ်ႈၵူၼ်းၽၢၼ်ဢၼ်ၼုင်ႈၶူဝ်းၵုပ်းၶူဝ်းၽုင်ၼၼ်ႉၵေႃႉၼိုင်ႈ၊ၶဝ်သွင်ၵေႃႉၼၼ်ႉၶဝ်ႈမႃးၼႂ်းပၢင်ၵုမ်သူဝႃႈၼႆတႃႉ။-
သင်ဝႃႈ၊သူႁဵတ်းတၢင်းဢၼ်ၼပ်ႉယမ်တီႈၵေႃႉဢၼ်ၼုင်ႈၶူဝ်းလီၶူဝ်းငၢမ်းၼၼ်ႉသေလႄႈလၢတ်ႈဝႃႈ၊ “ၶႅၼ်းတေႃႈၵျွမႃးၼင်ႈၵႃႈတီႈၼင်ႈဢၼ်လီၼႆႉသေၵမ်းၶႃႈ၊” ဝႃႈၼင်ႇၼႆသေယဝ်ႉ၊သမ်ႉလၢတ်ႈတီႈၵူၼ်းယၢၵ်ႈၵူၼ်းၽၢၼ်ၼၼ်ႉလႄႈဝႃႈ၊ “ၸုၵ်းယူႇၵႃႈတီႈၼၼ်ႈတႃႉ။ ဢမ်ႇၼၼ်ၵေႃႈ၊ၼင်ႈၵႃႈတီႈတႂ်ႈႁိမ်းတိၼ်ၵဝ်ၼႆႉတႃႉ၊” ဝႃႈၼင်ႇၼႆၸိုင်၊-
သူတူၺ်းၼႃႈလဵၵ်ႉၼႃႈယႂ်ႇၵႃႈၼႂ်းသူၼင်ႇၵၼ်ၵၼ်လႄႈတႅပ်းတတ်းလူၺ်ႈတင်းႁူဝ်ၸႂ်ဢၼ်ႁၢႆႉမိူၵ်ႈယဝ်ႉဢေႃႈ။
ပီႈၼွင်ႉဢၼ်ၵဝ်ႁၵ်ႉၶဝ်႟။ ထွမ်ႇငိၼ်းသေၵမ်း။ ၽြႃးပဵၼ်ၸဝ်ႈလိူၵ်ႈၵဵပ်းဢဝ်ၵူၼ်းယၢၵ်ႈၵူၼ်းၽၢၼ်ၼႂ်းလေႃးၵႃႉၼႆႉၼၼ်ႉ၊ႁႂ်ႈၶဝ်လႆႈလိူင်ႇၼမ်မၢၵ်ႈမီးၼႂ်းတၢင်းယုမ်ႇမၢတ်ႈ၊ဢိၵ်ႇတင်းႁႂ်ႈၶဝ်လႆႈၶၢမ်ႇဢဝ်ဢမူၺ်ႇမိူင်းၸဝ်ႈဢၼ်မၼ်းၸဝ်ႈဝႆႉၵတိဝႃႈ၊တေပၼ်ၶဝ်ၸိူဝ်းဢၼ်ႁၵ်ႉမၼ်းၸဝ်ႈၼၼ်ႉဢေႃႈ။-
ၵူၺ်းၵႃႈ၊သူႁဵတ်းဢမ်ႇရူဝ်ႇဢမ်ႇသေႇတီႈၵူၼ်းယၢၵ်ႈၵူၼ်းၽၢၼ်ယဝ်ႉ။ ၽူႈလႂ်ပဵၼ်ၵေႃႉဢၼ်တဵၵ်းငႅၼ်းၼိၵ်ႈၸၢၵ်ႈသူလႄႈတိုတ်ႉလၢၵ်ႈသူၵႂႃႇၵႃႈတီႈၽၢႆႇၼႃႈၶုၼ်ဢၼ်ၸီႇယၢင်ႇတြႃးၼၼ်ႉ။ ပဵၼ်ၶဝ်ၸိူဝ်းဢၼ်မၢၵ်ႈမီးလီပဵၼ်ၼၼ်ႉဢမ်ႇၸႂ်ႈႁိုဝ်း။-
ၶဝ်ၸိူဝ်းၼၼ်ႉ၊သႄႉသွမ်းၼႃႇမႃႉၸိုဝ်ႈသဵင်ၸဝ်ႈမျၢတ်ႈဢၼ်လႆႈဢဝ်ဢၢပ်ႈပၼ်ဝႆႉတီႈသူယဝ်ႉၼၼ်ႉဢေႃႈ။
ပေႃးသူၵမ်ၵျၢင်ႉၸွမ်းပိင်းၺၢပ်ႈတြႃးၸဝ်ႈ၊ၸွမ်းၼင်ႇဢၼ်မႃးၼႂ်းၵျၢမ်းလိၵ်ႈလႄႈဝႃႈ၊ “ၵေႃႉဢၼ်ၸၢပ်ႈသႅင်ႇၵၼ်တင်းသူၼၼ်ႉ၊သူတၵ်းလႆႈႁၵ်ႉမိူၼ်ၸိူဝ်ႉၼင်ႇဢၼ်သူႁၵ်ႉတူဝ်ၸဝ်ႈၵဝ်ႇဢေႃႈ၊” ဝႃႈၼင်ႇၼႆၼၼ်ႉၸိုင်၊သူၵမ်ၵျၢင်ႉလီလီငၢမ်းငၢမ်းယဝ်ႉဢေႃႈ။-
ၵူၺ်းၵႃႈ၊ပေႃးသူတူၺ်းၼႃႈလဵၵ်ႉၼႃႈယႂ်ႇၵူၼ်းၸိုင်၊ပဵၼ်တၢင်းဢၼ်သူႁဵတ်းမႅၼ်ႈဢပျတ်ႈဢေႃႈ။ ပိင်းၺၢပ်ႈတြႃးၵေႃႈ၊လၢတ်ႈၼႄဝႆႉဝႃႈ၊သူပဵၼ်ၵေႃႉဢၼ်ယႃႉလုလႅဝ်ပိင်းၺၢပ်ႈတြႃးဢေႃႈ။-
လွင်ႈမၼ်းၸမ်ႉ၊ၽူႈလႂ်သေဢမ်ႇဝႃႈ၊ၵေႃႉဢၼ်ပႂ်ႉထိင်းပိင်းၺၢပ်ႈတြႃးတင်းသဵင်ႈတင်းမူတ်းလႆႈသေၵေႃႈ၊ပေႃးမၼ်းၽိတ်းပိူင်ႈပူၼ်ႉလိူဝ်ပိင်းၺၢပ်ႈတြႃးသဵၼ်ႈၼိုင်ႈၵူၺ်းၵေႃႈ၊မၼ်းပဵၼ်ၵေႃႉဢၼ်လႆႈၽိတ်းပိူင်ႈပူၼ်ႉလိူဝ်ပိင်းၺၢပ်ႈတြႃးၵႃႈမီးတင်းသဵင်ႈတင်းမူတ်းၼၼ်ႉယဝ်ႉဢေႃႈ။-
မၼ်းၸဝ်ႈပိင်းၺၢပ်ႈဝႆႉလႄႈဝႃႈ၊ “ယႃႇပေႁဵတ်းမေႇထုင်ႇဢၼ်ဢမ်ႇတြႃး၊” ဝႃႈၼင်ႇၼႆသေယဝ်ႉ၊သမ်ႉပိင်းၺၢပ်ႈဝႆႉထႅင်ႈလႄႈဝႃႈ၊ “ယႃႇပေဢဝ်ဢသၢၵ်ႈၵူၼ်းတၢႆ၊” ဝႃႈၼင်ႇၼႆဝႆႉဢေႃႈ။ ပိူဝ်ႈၼႆလႄႈပိၵ်ႉသမ်ႉမႂ်းဢမ်ႇႁဵတ်းမေႇထုင်ႇဢၼ်ဢမ်ႇတြႃးသေၵေႃႈ၊ပေႃးမႂ်းဢဝ်ဢသၢၵ်ႈၵူၼ်းတၢႆၸိုင်၊မႂ်းလႆႈၽိတ်းပိူင်ႈတြႃးယဝ်ႉဢေႃႈ။-
ဢွၼ်ၵၼ်လၢတ်ႈၵႂၢမ်းယူႇ၊ဢိၵ်ႇတင်းၵမ်ၵျၢင်ႉယူႇမိူၼ်ၸိူဝ်ႉၼင်ႇၵေႃႉဢၼ်တၵ်းလႆႈၶၢမ်ႇတၢင်းဢၼ်ၸီႇယၢင်ႇလူၺ်ႈတြႃးဢၼ်ႁႂ်ႈလွတ်ႈလႅဝ်းၼၼ်ႉတႃႉ။-
လွင်ႈမၼ်းၸမ်ႉ၊ၽြႃးပဵၼ်ၸဝ်ႈတၵ်းဢမ်ႇၼႄပျႃးၵရုၼႃႇတၢင်းဢၼ်ဢဵတ်းလူ၊မိူဝ်ႈဢၼ်မၼ်းၸဝ်ႈၸီႇယၢင်ႇတြႃးတီႈၵေႃႉဢၼ်ဢမ်ႇမီးၸႂ်ၵရုၼႃႇၼၼ်ႉဢေႃႈ။ ၵူၺ်းၵႃႈ၊တၢင်းဢၼ်ဢဵတ်းလူၸိုင်၊တၵ်းတေပႄႉၼႅင်ႇၵႃႈၼိူဝ်တၢင်းဢၼ်ၸီႇယၢင်ႇတြႃးၼၼ်ႉဢေႃႈ။
ပီႈၼွင်ႉၵဝ်တင်းလၢႆၶဝ်႟။ ပေႃးသေၵေႃႉသေၵူၼ်းလၢတ်ႈဝႃႈ၊မၼ်းမီးတၢင်းယုမ်ႇမၢတ်ႈဝႃႈၼႆ၊ယင်းဢမ်ႇမီးတၢင်းၵမ်တၢင်းၵျၢင်ႉၵႃႈသင်ၸိုင်၊တၵ်းမီးဢၵျူဝ်းၵႃႈသင်။ ၸွင်ႇတၢင်းယုမ်ႇမၢတ်ႈမၼ်းၵႄႇၶျွတ်ႈဢဝ်မၼ်းလႆႈႁိုဝ်း။-
ပေႃးဝႃႈ၊မီးပီႈၼွင်ႉၸိူဝ်းဢၼ်ဢမ်ႇမီးၶူဝ်းလဵင်းတႃႇတေၼုင်ႈလႄႈဢမ်ႇမီးတၢင်းၵိၼ်တႃႇတေၵိၼ်ၵူႈဝၼ်းၼၼ်ႉဝႃႈၼႆၸိုင်။-
ပေႃးၼႂ်းသူၼၼ်ႉ၊သေၵေႃႉသေၵူၼ်းၵႂႃႇလၢတ်ႈတီႈၶဝ်ၼၼ်ႉလႄႈဝႃႈ၊ “ႁႂ်ႈၽြႃးပဵၼ်ၸဝ်ႈပၼ်တၢင်းလီတီႈသူသေၵမ်းလူၺ်ႈ။ ၼုင်ႈဢုၼ်ႇဢုၼ်ႇတႃႉ။ ၵိၼ်ဢိမ်ႇဢိမ်ႇတႃႉ၊” ဝႃႈၼင်ႇၼႆၵူၺ်းလႄႈ၊ယင်းဢမ်ႇပၼ်ၵႃႈဢၼ်ၶဝ်လူဝ်ႇၼၼ်ႉၸိုင်၊တၵ်းမီးဢၵျူဝ်းၵႃႈသင်။-
မိူၼ်ၸိူဝ်ႉၼင်ႇၼၼ်၊မီးတၢင်းယုမ်ႇမၢတ်ႈဢၼ်လဵဝ်ၵူၺ်းလႄႈပေႃးယင်းဢမ်ႇၵမ်တၢင်းၵျၢင်ႉၸွမ်းၸိုင်၊ပဵၼ်ဢၼ်တၢႆၵူၺ်းဢေႃႈ။
တေမီးသေၵေႃႉၵေႃႉလၢတ်ႈလႄႈဝႃႈ၊ “ၵေႃႉၼိုင်ႈမီးတၢင်းယုမ်ႇမၢတ်ႈသေယဝ်ႉ၊ၵေႃႉၼိုင်ႈသမ်ႉမီးတၢင်းၵမ်တၢင်းၵျၢင်ႉဢေႃႈ၊” ဝႃႈၼင်ႇၼႆဢေႃႈ။ ဢၼ်ၵဝ်ဝႃႈၸမ်ႉ၊ “ၼႄပျႃးလွင်ႈတၢင်းတၢင်းယုမ်ႇမၢတ်ႈၵေႃႉဢၼ်ဢမ်ႇမီးတၢင်းဢၼ်ၵမ်ၵျၢင်ႉၼၼ်ႉတီႈၵဝ်လူး။ ၵဝ်သမ်ႉတၵ်းၼႄပျႃးတၢင်းယုမ်ႇမၢတ်ႈၵဝ်လူၺ်ႈတၢင်းတၢင်းဢၼ်ၵမ်ၵျၢင်ႉၼၼ်ႉတီႈမႂ်းဢေႃႈ၊” ဝႃႈၼင်ႇၼႆဢေႃႈ။-
လွင်ႈဢၼ်ၽြႃးပဵၼ်ၸဝ်ႈမီးသူႇလဵဝ်ၵူၺ်းၼၼ်ႉ၊ၸွင်ႇမႂ်းယုမ်ႇႁိုဝ်း။ လီယဝ်ႉ။ ၽီႁၢႆႉတင်းလၢႆၵေႃႈယုမ်ႇမၢတ်ႈထၢၼ်ႈပေႃးၵူဝ်ႁႄသၼ်ႇဝႆၵႂႃႇဢေႃႈ။-
ၵေႃႉဢၼ်ၸႂ်တိုမ်ၼႆႉ႟။ ၸွင်ႇမႂ်းၶႂ်ႈႁုလွင်ႈဢၼ်တၢင်းယုမ်ႇမၢတ်ႈဢၼ်ဢမ်ႇမီးတၢင်းၵမ်တၢင်းၵျၢင်ႉၼၼ်ႉပဵၼ်ဢၼ်လၢႆလၢႆဢမ်ႇပွင်ႇလွင်ႈၵႃႈသင်ၼၼ်ႉႁိုဝ်း။-
ပူႇပေႃႈႁဝ်း ဢႃႇပြႃႇႁၢမ်ႇ၊ ၼၼ်ႉႁဵတ်းၸိူဝ်ႉၼင်ႇႁိုဝ်လႄႈလႆႈပဵၼ်ၵေႃႉဢၼ်သိုဝ်ႈတေႃႇၵႃႈတီႈၽၢႆႇၼႃႈၽြႃးပဵၼ်ၸဝ်ႈ။ မၼ်းလႆႈပဵၼ်ၵေႃႉၸိူဝ်ႉၼင်ႇၼၼ်၊ၵွပ်ႈပိူဝ်ႈတၢင်းၵမ်တၢင်းၵျၢင်ႉမၼ်းမိူဝ်ႈဢၼ်မၼ်းဢဝ်လုၵ်ႈၸၢႆးမၼ်း ဢိၸၢၵ်ႈ၊ သၢၵ်ႈလူႇၵႃႈၼိူဝ်ၶဵင်ႇတၢင်းလူႇၼၼ်ႉဢမ်ႇၸႂ်ႈႁိုဝ်း။-
ဢမ်ႇႁၼ်ႁိုဝ်း။ ၵွပ်ႈပိူဝ်ႈတၢင်းယုမ်ႇမၢတ်ႈမၼ်း၊ဢိၵ်ႇတင်းတၢင်းၵမ်တၢင်းၵျၢင်ႉမၼ်းပွင်ႁဵတ်းလူၺ်ႈၵၼ်လႄႈတၢင်းယုမ်ႇမၢတ်ႈမၼ်းလႆႈႁွတ်ႈထိုင်တၢင်းဢၼ်ၸေးၸုမ်ႇ၊ၵွပ်ႈပိူဝ်ႈတၢင်းၵမ်တၢင်းၵျၢင်ႉမၼ်းၼၼ်ႉဢေႃႈ။-
မႅၼ်ႈၼင်ႇဢၼ်တႅမ်ႈဝႆႉၵႃႈၼႂ်းၵျၢမ်းလိၵ်ႈလႄႈဝႃႈ၊ “ ဢႃႇပြႃႇႁၢမ်ႇ၊ ၼၼ်ႉယုမ်ႇမၢတ်ႈၽြႃးပဵၼ်ၸဝ်ႈလႄႈၽြႃးပဵၼ်ၸဝ်ႈႁပ်ႉဢဝ်မၼ်းႁႂ်ႈပဵၼ်ၵူၼ်းသိုဝ်ႈတေႃႇဢေႃႈ။” ဢႃႇပြႃႇႁၢမ်ႇ၊ ၵေႃႈ၊လႆႈၶၢမ်ႇတၢင်းဢၼ်ႁွင်ႉဝႃႈ၊ပဵၼ်ၵေႃႉသႄႈၽြႃးပဵၼ်ၸဝ်ႈဢေႃႈ။-
သူဢွၼ်ၵၼ်လႆႈႁၼ်ယဝ်ႉ။ ၵူၼ်းလႆႈၶၢမ်ႇတၢင်းဢၼ်မၢတ်ႈပဵၼ်ၵေႃႉဢၼ်သိုဝ်ႈတေႃႇၽၢႆႇၼႃႈၽြႃးပဵၼ်ၸဝ်ႈ၊ၵွပ်ႈလူၺ်ႈတၢင်းၵမ်ၵျၢင်ႉလႄႈ၊ဢမ်ႇၸႂ်ႈၵွပ်ႈလူၺ်ႈတၢင်းယုမ်ႇမၢတ်ႈမဵဝ်းလဵဝ်ၵူၺ်းဢေႃႈ။
မိူၼ်ၸိူဝ်ႉၼင်ႇၼၼ်မႄႈမွၵ်ႇယႃႈ ရႃႇၶပ်ႉ၊ ၼၼ်ႉၵေႃႈ၊လႆႈပဵၼ်ၵူၼ်းသိုဝ်ႈတေႃႇၽၢႆႇၼႃႈၽြႃးပဵၼ်ၸဝ်ႈ၊ၵွပ်ႈပိူဝ်ႈတၢင်းဢၼ်မၼ်းပွင်မၼ်းႁဵတ်း၊ဢၼ်မၼ်းႁပ်ႉတုင်းဢဝ်ၵူၼ်းသွပ်ႇၶၢဝ်ႇ၊ၵူၼ်းမဵဝ်း ဢိသရေး၊ ၸိူဝ်းဢၼ်လၵ်ႉၶဝ်ႈမႃးၼႂ်းမိူင်းၶဝ်လႄႈမၼ်းၸွႆႈထႅမ်ႁႂ်ႈၶဝ်လႆႈလွတ်ႈဢွၵ်ႇၵႂႃႇၸွမ်းၼင်ႇဢၼ်မၼ်းၼႄႁႂ်ႈၶဝ်ၵႂႃႇၸွမ်းတၢင်းတၢင်ႇသဵၼ်ႈၼၼ်ႉဢေႃႈ။
ၵွပ်ႈပိူဝ်ႈၸိူဝ်ႉၼင်ႇၼၼ်လႄႈမိူၼ်ၸိူဝ်ႉၼင်ႇဢၼ်တူဝ်ၵႃႇယႃႉဢၼ်ဢမ်ႇမီးၸႂ်ဝိၺိၺ်ႇလႄႈပဵၼ်ဢၼ်တၢႆၼၼ်ႉ၊တၢင်းယုမ်ႇမၢတ်ႈဢၼ်ဢမ်ႇမီးတၢင်းၵမ်တၢင်းၵျၢင်ႉၼၼ်ႉၵေႃႈ၊ပဵၼ်ဢၼ်တၢႆယဝ်ႉဢေႃႈ။
ပီႈၼွင်ႉၶဝ်႟။ ၼႂ်းသူၼႆႉ၊ယႃႇပေဢွၼ်ၵၼ်ႁဵတ်းသြႃႇၼမ်ၼႃႇၽႅဝ်။ လွင်ႈမၼ်းၸမ်ႉ၊သူႁုလွင်ႈၸိူဝ်းႁဝ်းဢၼ်ပဵၼ်သြႃႇၼႆႉ၊တေလႆႈၶၢမ်ႇတၢင်းဢၼ်ၸီႇယၢင်ႇတႅပ်းတတ်းယဵင်ႈၶႅၼ်းၼၵ်းၼႃႇသေပိူၼ်ႈဢေႃႈ။-
ႁဝ်းၵႃႈမီးတင်းသဵင်ႈတင်းလူင်ၵႆႉႁဵတ်းၽိတ်းႁဵတ်းပိူင်ႈၶိူဝ်းၶိူဝ်းယႂ်းယႂ်းဢေႃႈ။ ၵေႃႉဢၼ်ဢမ်ႇၸၢင်ႈၽိတ်းပိူင်ႈလူၺ်ႈသူပ်းလူၺ်ႈၵႂၢမ်းမၼ်းၼၼ်ႉ၊ပဵၼ်ၵေႃႉဢၼ်ၸေးၸုမ်ႇလႄႈမၼ်းပဵၼ်ၵေႃႉဢၼ်ၸၢင်ႈပႂ်ႉထိင်းတူဝ်ၸဝ်ႈၵဝ်ႇတင်းတူဝ်တင်းၶိင်းလႆႈဢေႃႈ။-
ပေႃးႁဝ်းဢဝ်ၵၵ်ႉသႂ်ႇသူပ်းမႃႉသေလႄႈ၊ႁႂ်ႈမၼ်းထွမ်ႇၵႂၢမ်းႁဝ်းၸိုင်၊ႁဝ်းသင်ႇႁႂ်ႈမၼ်းဝၢႆႇၸွမ်းတၢင်းဢၼ်ႁဝ်းၶႂ်ႈၵႂႃႇၼၼ်ႉလႆႈဢေႃႈ။-
သမ်ႉတူၺ်းႁိူဝ်းသၢင်းၽေႃးလူး။ ပိၵ်ႉသမ်ႉမၼ်းယႂ်ႇၼႃႇလႄႈလႆႈလွင်ႈၸွမ်းႁႅင်းလူမ်းၵႂႃႇသေၵေႃႈ၊ၸၢင်ႈဝၢႆႇၸွမ်းၵႂႃႇၽၢႆႇတၢင်းဢၼ်ၵူၼ်းႁေႃႈမၼ်းၶႂ်ႈၵႂႃႇၵွပ်ႈပိူဝ်ႈမီးလၢမ်ႈၶတ်းႁၢင်ႁိူဝ်းဢၼ်လဵၵ်ႉလဵၵ်ႉၼၼ်ႉဢေႃႈ။-
မိူၼ်ၸိူဝ်ႉၼင်ႇၼၼ်၊လိၼ်ႉႁဝ်းၼႆႉၵေႃႈ၊ပိၵ်ႉသမ်ႉလဵၵ်ႉထၢၼ်ႇၼႆႉသေၵေႃႈ၊ၸၢင်ႈဢုပ်ႇဝၢဝ်းလူၺ်ႈလွင်ႈဢၼ်ယႂ်ႇဢၼ်လူင်ဢေႃႈ။ ၶႆႈၸႂ်တူၺ်းလွင်ႈထိူၼ်ႇယႂ်ႇထိူၼ်ႇလူင်ဢၼ်ၶၢမ်ႇတၢင်းဢၼ်ၸၢင်ႈမႆႈၵႂႃႇၵွပ်ႈပိူဝ်ႈမုၵ်ႉၽႆးဢွၼ်ႇဢိတ်းၼိုင်ႈၼၼ်ႉတႃႉ။-
လိၼ်ႉၼၼ်ႉပဵၼ်မိူၼ်ၸိူဝ်ႉၼင်ႇၽႆးသေလႄႈၵႃႈၼႂ်းတူဝ်ၶိင်းႁဝ်တင်းမူတ်းၼႆႉ၊လိၼ်ႉပဵၼ်လေႃးၵႃႉဢၼ်ဢမ်ႇမီးသိၼ်ထမ်းၼႃႇသေပိူၼ်ႈလႄႈမီးယူႇၵႃႈၼႂ်းတူဝ်ၵႃႇယႃႉႁဝ်းလႄႈ ၽႄႈတၢင်းဢၼ်ႁၢႆႉမိူၵ်ႈၸွတ်ႇတူဝ်ႈၵႂႃႇၵႃႈၼႂ်းတူဝ်ႁဝ်းတင်းတူဝ်တင်းၶိင်းဢေႃႈ။ မၼ်းၸၢင်ႈဢဝ်ၽႆးငရၢႆးလႄႈတုတ်ႇမႆႈၸူဝ်ႈဢသၢၵ်ႈတၢၼ်းၵူၼ်းႁဝ်းပႅတ်ႈဢေႃႈ။-
ၵူၼ်းႁဝ်းၼႆႉ၊ၸၢင်ႈႁဵတ်းႁႂ်ႈတူဝ်ထိူၼ်ႇႁၢႆႉလႂ်၊ၼူၵ်ႉလႂ်၊တူဝ်ဢၼ်ၸၢင်ႈလိူၼ်ႈၸၢင်ႈၵၢၼ်းလႂ်၊ဢိၵ်ႇတင်းပႃလႂ်တင်းသဵင်ႈတင်းလူင်မေႃယဵၼ်ႇငႄႈမႃးဢေႃႈ။ သတ်းၸိူဝ်းၼႆႉလႆႈၶၢမ်ႇတၢင်းဢၼ်ႁဵတ်းႁႂ်ႈယဵၼ်ႇငႄႈမႃးယဝ်ႉဢေႃႈ။-
ၵူၺ်းၵႃႈ၊ၽူႈလႂ်သေၵေႃႉသေၵူၼ်းဢမ်ႇၸၢင်ႈႁဵတ်းႁႂ်ႈလိၼ်ႉယဵၼ်ႇငႄႈမႃးလႆႈဢေႃႈ။ လိၼ်ႉၼႆႉတဵမ်ဝႆႉတင်းၵွင်ႉတင်းငူၼ်ႉလႄႈၸၢင်ႈႁဵတ်းႁႂ်ႈတၢႆသေလႄႈပဵၼ်ဢၼ်ႁၢႆႉၼႃႇဢမ်ႇၸၢင်ႈထိင်းမၼ်းလႆႈလႃးလႃးဢေႃႈ။-
ႁဝ်းၸၢင်ႈဢဝ်တင်းလိၼ်ႉလႄႈတၢင်ႇၵျေးၸူးတီႈပေႃႈၸဝ်ႈႁဝ်းထႃႇဝရႃႉၽြႃးဢေႃႈ။ လိၼ်ႉဢၼ်လဵဝ်ၼႆႉၼင်ႇၵဝ်ႇ၊ၸၢင်ႈႁဵတ်းတၢင်းဢၼ်လႃႇဢၼ်လင်၊တီႈမဵဝ်းၵူၼ်းဢၼ်ၽြႃးပဵၼ်ၸဝ်ႈၽၢၼ်ႇသၢင်းဝႆႉ၊ၸွမ်းၼင်ႇပုင်ႇႁၢင်ႈမၼ်းၸဝ်ႈၼၼ်ႉဢေႃႈ။-
ၵႃႈၼႂ်းသူပ်းဢၼ်လဵဝ်ၵူၺ်း၊ၶေႃႈၵႂၢမ်းဢၼ်ယွင်ႈယေႃးတၢင်ႇၵျေးၸူး၊ဢိၵ်ႇတင်းၵႂၢမ်းလႃႇၵႂၢမ်းလင်ၸၢင်ႈဢွၵ်ႇမႃးဢေႃႈ။ ပီႈၼွင်ႉၶဝ်႟။ လွင်ႈတၢင်းၸိူဝ်းၼႆႉဢမ်ႇထုၵ်ႇလီႁႂ်ႈပဵၼ်လႃးလႃး။-
ၵႃႈၼႂ်းႁူးၼမ်ႉဢၼ်လဵဝ်ၵူၺ်း၊ၼမ်ႉဝၢၼ်တင်းၼမ်ႉၶူမ်ၸၢင်ႈပုၼ်းဢွၵ်ႇမႃးႁူမ်ႈၵၼ်လႆႈႁိုဝ်း။-
ပီႈၼွင်ႉၶဝ်႟။ တူၼ်ႈမၢၵ်ႇလိူဝ်ႇၸၢင်ႈမၢၵ်ႇမႃးမၢၵ်ႇသၢၼ်ႇလုၼ်ႇလႆႈႁိုဝ်း။ တူၼ်ႈမၢၵ်ႇၸပိတ်ႉၸၢင်ႈမၢၵ်ႇမႃးမၢၵ်ႇလိူဝ်ႇလႆႈႁိုဝ်း။ မိူၼ်ၸိူဝ်ႉၼင်ႇၼၼ်ၼမ်ႉဢွၵ်ႇႁူးဢၼ်လႆဢွၵ်ႇၼမ်ႉၵိူဝ်ၼၼ်ႉ၊ဢမ်ႇၸၢင်ႈလႆဢွၵ်ႇၼမ်ႉဝၢၼ်မႃးလႆႈဢေႃႈ။
ၼႂ်းသူၼႆႉ၊ပေႃးၽူႈလႂ်လၵ်းလႅမ်လႄႈမီးပိင်ႇၺႃႇၸိုင်၊ႁႂ်ႈၵေႃႉၼၼ်ႉၼႄပျႃးတၢင်းၵမ်တၢင်းၵျၢင်ႉဢၼ်လီဢၼ်ငၢမ်းလႄႈႁႂ်ႈမီးၸႂ်ဢူၼ်ႈဢွၼ်ႇၶျႃးတႅမ်ႇ၊ဢိၵ်ႇတင်းႁႂ်ႈမီးပိင်ႇၺႃႇတႃႉ။-
ၵူၺ်းၵႃႈ၊ႁူဝ်ၸႂ်သူၼၼ်ႉပေႃးမီးတၢင်းဢၼ်သီႈၵေႉႁေႈတႃၵၼ်၊ၶွႆၵၼ်၊ၸႂ်ဢၼ်ၽၢတ်ႇဢၼ်ၶူမ်၊ဢိၵ်ႇတင်းၸႂ်ဢၼ်တူၺ်းဢၵျူဝ်းတူဝ်ၸဝ်ႈၵဝ်ႇၸိုင်၊ယႃႇပေဢုပ်ႇဝၢဝ်းလူၺ်ႈပိင်ႇၺႃႇသူလႄႈၽိတ်းပိူင်ႈသဵတ်ႈၸႃႇတြႃး။-
ပိင်ႇၺႃႇၸိူဝ်ႉၼင်ႇၼၼ်ၼၼ်ႉ၊လုၵ်ႉသေၵႃႈတီႈမိူင်းၵၢင်ႁၢဝ်မႃးဢမ်ႇၸႂ်ႈ။ ပဵၼ်ပိင်ႇၺႃႇလေႃးၵႃႉၼႆႉလႄႈဢမ်ႇၸၢပ်ႈသႅင်ႇၵၼ်တင်းၸႂ်ဝိၺိၺ်ႇ၊ပဵၼ်ပိင်ႇၺႃႇၽီႁၢႆႉဢေႃႈ။-
ပေႃးၵႃႈတီႈလႂ်မီးတၢင်းဢၼ်သီႈၵေႉႁေႈတႃၵၼ်ၶွႆၵၼ်၊ဢိၵ်ႇတင်းမီးတၢင်းဢၼ်တူၺ်းဢၵျူဝ်းတူဝ်ၸဝ်ႈၵဝ်ႇၸိုင်၊တီႈၼၼ်ႈတၵ်းမီးတၢင်းဢၼ်ဢၼ်ဢမ်ႇထုၵ်ႇမေႃၵၼ်၊ဢိၵ်ႇတင်းႁဵတ်းတၢင်းဢၼ်ႁၢႆႉဢၼ်မိူၵ်ႈၵူႈၸိူဝ်ႉၵူႈပိူင်ဢေႃႈ။-
ပိင်ႇၺႃႇဢၼ်မႃးၵႃႈတီႈမိူင်းၵၢင်ႁၢဝ်ၸမ်ႉ၊ဢွၼ်တၢင်းသေပိူၼ်ႈပဵၼ်တၢင်းဢၼ်မူတ်းသႂ်ဢေႃႈ။ လိုၼ်းၼၼ်ႉၸင်ႇ၊မီးၸႂ်ဢၼ်သဵတ်ႇလီၼိမ်လီ၊ၸႂ်ဢၼ်ဢူၼ်ႈလီဢွၼ်ႇလီ၊သမ်ႉလၢတ်ႈငၢႆႈဢေႃႈ။ ၸၢင်ႈပျေႉၸုမ်ႇဝႆႉတင်းၸႂ်ၵရုၼႃႇတၢင်းဢၼ်ဢဵတ်းလူလႄႈတၢင်းၵျၢင်ႉဢၼ်လီဢၼ်ငၢမ်းဢေႃႈ။ ဢမ်ႇမီးတၢင်းဢၼ်တူၺ်းၼႃႈလဵၵ်ႉၼႃႈယႂ်ႇ၊ဢိၵ်ႇတင်းဢမ်ႇမီးတၢင်းဢၼ်ၼႃႈသိုဝ်ႈၸႂ်ၵူတ်ႉဢေႃႈ။-
ၶဝ်ၸိူဝ်းဢၼ်ၸၢင်ႈႁဵတ်းႁႂ်ႈမီးတၢင်းၼိမ်ၼၼ်ႉ၊ဝၢၼ်ႇမဵတ်ႉၽၼ်းတၢင်းၼိမ်လႄႈလႆႈပၢတ်ႇဢဝ်တြႃးတၢင်းဢၼ်သိုဝ်ႈတေႃႇဢေႃႈ။
လွင်ႈတၢင်းဢၼ်သူၼင်ႇၵၼ်တိုၵ်းတေႃးၵၼ်၊ၽိတ်းမေႃးၵၼ်ၼၼ်ႉပဵၼ်မႃးၵွပ်ႈလွင်ႈသင်။ ပဵၼ်မႃးၵွပ်ႈပိူဝ်ႈၸႂ်ၵိလေႇသႃႇဢၼ်ၶႂ်ႈလႆႈၸေးၸိမ်ႇၵႃႇမၵုင်ႇ၊ဢၼ်တိုၵ်းတေႃးၵၼ်ယူႇၵႃႈၼႂ်းဢၢင်ႇၵႃႇတူဝ်သူၼၼ်ႉဢမ်ႇၸႂ်ႈႁိုဝ်း။-
သူမီးၸႂ်ၶႂ်ႈလႆႈသေၵေႃႈ၊သမ်ႉဢမ်ႇလႆႈ။ သူၵေႃႈဢဝ်ဢသၢၵ်ႈၵူၼ်းတၢႆဢေႃႈ။ သူလေႃးၽႃႉပူၼ်ႉလိူဝ်လႄႈဢမ်ႇပျေႉၸုမ်ႇၵႃႈၼင်ႇဢလူဝ်ႇတူဝ်ၸဝ်ႈၵဝ်ႇ။ ပိူဝ်ႈၼႆ၊သူၽိတ်းၵၼ်လႄႈတိုၵ်းတေႃးၵၼ်ဢေႃႈ။ သူဢမ်ႇလႆႈၵွပ်ႈပိူဝ်ႈသူဢမ်ႇလဝ်ႈယွၼ်းတီႈၽြႃးပဵၼ်ၸဝ်ႈဢေႃႈ။-
သူလဝ်ႈယွၼ်းသူးတွင်းၵေႃႈဢမ်ႇလႆႈၵွပ်ႈပိူဝ်ႈလၢႆးဢၼ်သူလဝ်ႈယွၼ်းသူးတွင်းၼၼ်ႉၽိတ်းပိူင်ႈဝႆႉ၊ပိူဝ်ႈဝႃႈ၊သူလဝ်ႈယွၼ်းသူးတွင်းႁႂ်ႈလႆႈမူၼ်ႈပျေႃႇၼႂ်းၸေးၸိမ်ႇၵႃႇမၵုင်ႇၼၼ်ႉဢေႃႈ။-
သူၸိူဝ်းဢၼ်ဢမ်ႇမီးသဵတ်ႈၸႃႇၶဝ်႟။ လွင်ႈတၢင်းဢၼ်ႁဵတ်းၵေႃႉႁဵတ်းသႄႈလူၺ်ႈၵၼ်တင်းလေႃးၵီႇၼၼ်ႉ၊ပဵၼ်တၢင်းဢၼ်ၶတ်းၵၼ်တင်းၽြႃးပဵၼ်ၸဝ်ႈဝႃႈၼႆသူဢမ်ႇႁုႁိုဝ်း။ ပိူဝ်ႈၼႆလႄႈၽူႈလႂ်သေဢမ်ႇဝႃႈ၊ပေႃးၶႂ်ႈႁဵတ်းၵေႃႉႁဵတ်းသႄႈတင်းလေႃးၵီႇၸိုင်၊ၵေႃႉၼၼ်ႉပဵၼ်ရၢၼ်ႇသူႇၽြႃးပဵၼ်ၸဝ်ႈဝႃႈၼႆ၊-
သူထၢင်ႇၵႂၢမ်းဢၼ်တႅမ်ႈဝႆႉၵႃႈၼႂ်းၵျၢမ်းလိၵ်ႈၼၼ်ႉလၢတ်ႈဝႃႈ၊ “တၢင်းဢၼ်ၽြႃးပဵၼ်ၸဝ်ႈမႆႈၸႂ်ၵွပ်ႈဝိၺိၺ်ႇဢၼ်မၼ်းၸဝ်ႈႁႂ်ႈတႄႇယူႇၼႂ်းႁဝ်း၊” ဝႃႈၼင်ႇၼႆၼၼ်ႉ၊ပဵၼ်ဢၼ်လၢႆလၢႆဢမ်ႇပွင်ႇလွင်ႈၵႃႈသင်ႁိုဝ်း။-
ၵူၺ်းၵႃႈ၊မၼ်းၸဝ်ႈပၼ်ၵျေးၸူးဢၼ်ယဵင်ႈၶႅၼ်းၼမ်ၼႃႇဢေႃႈ။ ၵွပ်ႈပိူဝ်ႈၼႆလႄႈ၊ၵႃႈၼႂ်းၵျၢမ်းလိၵ်ႈလၢတ်ႈဝႆႉလႄႈဝႃႈ၊ “ၽြႃးပဵၼ်ၸဝ်ႈႁၢမ်ႈတၢပ်ႈႁႄႉၶႅၼ်ၶဝ်ၸိူဝ်းဢၼ်ႁူဝ်ၸႂ်ၽႅၼ်သုင်ၼၼ်ႉလႄႈ၊ပၼ်သုၵျေးၸူးတီႈၶဝ်ၸိူဝ်းဢၼ်ႁူဝ်ၸႂ်ၶျႃးတႅမ်ႇၼၼ်ႉဢေႃႈ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈ၊ဢဝ်တူဝ်ၸဝ်ႈၵဝ်ႇၵွမ်းၼွမ်းၸူးတီႈၽြႃးပဵၼ်ၸဝ်ႈတႃႉ။ တိုၵ်းတေႃးမႃႇၼၢတ်ႈတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊မၼ်းတၵ်းဢွၵ်ႇပၢႆႈသေၵႃႈတီႈသူၵႂႃႇဢေႃႈ။-
သုတ်ႉၸမ်တီႈၽြႃးပဵၼ်ၸဝ်ႈတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊မၼ်းၸဝ်ႈတၵ်းသုတ်ႉၸမ်တီႈသူဢေႃႈ။ ၵူၼ်းဢၼ်မီးဢပျတ်ႈၶဝ်႟။ ႁႂ်ႈမိုဝ်းသူမူတ်းၸၢင်ႇတႃႉ။ ၵူၼ်းၸိူဝ်းဢၼ်မီးၸႂ်သွင်ငၢမ်ႈၶဝ်႟။ ႁဵတ်းႁႂ်ႈႁူဝ်ၸႂ်သူမူတ်းၸၢင်ႇတႃႉ။-
ႁႂ်ႈမီးၸႂ်ဢၼ်ဢမ်ႇသႃႇ၊ၸႂ်ဢၼ်မႆႈၶီလႄႈႁွင်ႉႁႆႈတႃႉ။ ႁႂ်ႈတၢင်းဢၼ်မႂ်းယုမ်ႉၶူဝ်ၼၼ်ႉပိၼ်ႇပဵၼ်တၢင်းဢၼ်မႆႈၸႂ်ၶီၸႂ်တႃႉ။ ႁႂ်ႈတၢင်းဢၼ်မႂ်းမူၼ်ႈပျေႃႇၼၼ်ႉ၊ပိၼ်ႇပဵၼ်တၢင်းဢၼ်ၸႂ်လဵၵ်ႉၸႂ်ဢွၼ်ႇတႃႉ။-
ႁႂ်ႈတူဝ်ၸဝ်ႈၵဝ်ႇၶျႃးတႅမ်ႇၵႃႈတီႈၽၢႆႇၼႃႈၽြႃးပဵၼ်ၸဝ်ႈတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊မၼ်းၸဝ်ႈတၵ်းယုၵ်ႉယွင်ႈသူဢေႃႈ။
ပီႈၼွင်ႉၶဝ်႟။ ယႃႇပေသႄႉသွမ်းတီႈၵၼ်။ ၽူႈလႂ်သေဢမ်ႇဝႃႈ၊ၵေႃႉဢၼ်သႄႉသွမ်းပီႈၼွင်ႉမၼ်း၊ဢမ်ႇၼၼ်တၢင်ႇဢပျတ်ႈတီႈပီႈၼွင်ႉမၼ်းၸိုင်၊ၵေႃႉၼၼ်ႉပဵၼ်ၵေႃႉဢၼ်လႆႈသႄႉသွမ်းလႄႈတၢင်ႇဢပျတ်ႈတီႈပိင်းၺၢပ်ႈတြႃးယဝ်ႉဢေႃႈ။ ပေႃးသူယင်းတၢင်ႇဢပျတ်ႈတီႈပိင်းၺၢပ်ႈတြႃးၸိုင်၊သူဢမ်ႇၸႂ်ႈၵေႃႉဢၼ်ထွမ်ႇဢဝ်ပိင်းၺၢပ်ႈတြႃးလႄႈပဵၼ်ၵေႃႉဢၼ်ၸီႇယၢင်ႇပိင်းၺၢပ်ႈတြႃးဢေႃႈ။-
ၽြႃးပဵၼ်ၸဝ်ႈသူႇလဵဝ်ပႃးလဵဝ်ၵူၺ်း၊ပဵၼ်ၸဝ်ႈဢၼ်ပၼ်ပိင်းၺၢပ်ႈတြႃး၊ဢိၵ်ႇတင်းၸဝ်ႈဢၼ်ၸီႇယၢင်ႇတြႃးဢေႃႈ။ မၼ်းၸဝ်ႈသူႇလဵဝ်ပႃးလဵဝ်ၵူၺ်း၊တၢတ်ႈၼိူင်ႇလႆႈႁႂ်ႈလႆႈၶျွတ်ႈဢဝ်၊ဢိၵ်ႇတင်းယႃႉၽဵဝ်ႈပႅတ်ႈဢေႃႈ။ မႂ်းထၢင်ႇမႂ်းပဵၼ်ၵူၼ်းဢီႈသင်၊မႂ်းႁတ်းတႅပ်းတတ်းတြႃးၵေႃႉဢၼ်ၸၢပ်ႈသႅင်ႇၵၼ်တင်းမႂ်းၼၼ်ႉႁိုဝ်း။
ထွမ်ႇတူၺ်းလူး။ သူၸိူဝ်းဢၼ်ၸၢင်ႈလၢတ်ႈဝႃႈ၊ “မိူဝ်ႈၼႆႉဢမ်ႇၼၼ်မိူဝ်ႈၽုၵ်ႈႁဝ်းတေၵႂႃႇၵႃႈဝဵင်းၼၼ်ႉဝဵင်းၼႆႉလႄႈယူႇၵႃႈတီႈၼၼ်ႈပီၼိုင်ႈ၊ၵႃႉၶၢႆႁႂ်ႈလႆႈၼမ်ႉမျၢတ်ႈၼမ်ၼမ်ဢေႃႈ၊” ဝႃႈၼင်ႇၼႆၼၼ်ႉၶဝ်႟။-
ၼႂ်းဝၼ်းမိူဝ်ႈၽုၵ်ႈတၵ်းပဵၼ်မႃးၸိူဝ်ႉၼင်ႇႁိုဝ်သူယင်းဢမ်ႇႁု။ ဢသၢၵ်ႈသူၼၼ်ႉပဵၼ်ၸိူဝ်ႉၼင်ႇႁိုဝ်။ မၼ်းပဵၼ်ၸိူဝ်ႉၼင်ႇမွၵ်ႇၵုမ်ႈဢၼ်ပေႃႇပဵၼ်မႃးၵမ်းဢွၼ်ႇၼိုင်ႈၵူၺ်းၼၼ်ႉလႄႈသမ်ႉႁၢႆလၢႆၵႂႃႇၼၼ်ႉဢေႃႈ။-
“ပေႃးၽြႃးပဵၼ်ၸဝ်ႈမီးဢလူဝ်ႇၸိုင်၊ႁဝ်းတၵ်းဢသၢၵ်ႈလိပ်းယူႇလႄႈတၵ်းႁဵတ်းဢၼ်ၼႆႉ၊တၵ်းႁဵတ်းဢၼ်ၼၼ်ႉဢေႃႈ၊” ထုၵ်ႇလီၸိူဝ်ႉဝႃႈၼင်ႇၼႆဢေႃႈ။-
ၵူၺ်းၵႃႈ၊တေႃႈလဵဝ်ၼႆႉႁူဝ်ၸႂ်သူၽႅၼ်သုင်လႄႈဢုပ်ႇဝၢဝ်းဢေႃႈ။ တၢင်းဢၼ်ဢုပ်ႇဝၢဝ်းၼၼ်ႉပဵၼ်လွင်ႈဢၼ်ဢမ်ႇထုၵ်ႇဢမ်ႇလီဢေႃႈ။
ပိူဝ်ႈၼႆလႄႈၵေႃႉဢၼ်ႁုဝႃႈ၊လွင်ႈၼၼ်ႉပဵၼ်လွင်ႈတၢင်းလီလႄႈသမ်ႉဢမ်ႇႁဵတ်းၸိုင်၊ၵေႃႉၼၼ်ႉမီးဢပျတ်ႈဢေႃႈ။
ထွမ်ႇငိၼ်းတႃႉ။ ၵူၼ်းမၢၵ်ႈၵူၼ်းမီးၶဝ်႟။ ဢွၼ်ၵၼ်ႁွင်ႉသႅၼ်ႇႁွင်ႉႁႆႈၵွပ်ႈပိူဝ်ႈၽေးတုၵ်ႉၶႃႉဝူၺ်ႇတၼႃႇဢၼ်တၵ်းႁွတ်ႈမႃးၵႃႈၼိူဝ်သူၼၼ်ႉတႃႉ။-
ၸေးၸိမ်ႇဢုၵ်ႉၸႃႇသူၽင်ႉဢုၵႂႃႇယဝ်ႉ။ ၶူဝ်းလဵင်းသူၵေႃႈမူင်ႈမႅင်းၶူပ်းၵိၼ်ပႅတ်ႈယဝ်ႉယဝ်ႉ။-
ငိုၼ်းၶမ်းသူၵေႃႈႁေႃၵိၼ်ပႅတ်ႈယဝ်ႉ။ ႁေႃၼၼ်ႉတၵ်းပဵၼ်သၢၵ်ႈသေႇၼႄပျႃးတၢင်းၵမ်တၢင်းၵျၢင်ႉသူလႄႈၵိၼ်ပႅတ်ႈၼိူဝ်ႉသူမိူၼ်ၸိူဝ်ႉၼင်ႇၽႆးမႆႈၼၼ်ႉဢေႃႈ။ သူလႆႈသိမ်းပႅင်းၸေးၸိမ်ႇဢုၵ်ႉၸႃႇသူဝႆႉ၊ၵႃႈၼႂ်းဝၼ်းလိုၼ်းသုတ်းၼၼ်ႉယဝ်ႉ။-
တူၺ်းလူး။ သူယင်းဢမ်ႇပၼ်ၵႃႈႁႅင်းၵူၼ်းၸိူဝ်းဢၼ်ပၢတ်ႇၶဝ်ႈၵႃႈၼႂ်းတူင်ႈၼႃးသူၼၼ်ႉယဝ်ႉ။ ထွမ်ႇငိၼ်းသဵင်ဢၼ်ၶဝ်ႁွင်ႉသႅၼ်ႇပုၼ်ႈၵႃႈႁႅင်းၶဝ်ၼၼ်ႉတႃႉ။ သဵင်ႁွင်ႉသႅၼ်ႇၵူၼ်းပၢတ်ႈၶဝ်ႈၸိူဝ်းၼၼ်ႉ၊ၶိုၼ်ႈႁွတ်ႈၵႂႃႇထိုင်ႁူထႃႇဝရႃႉၽြႃး၊ၸဝ်ႈဢၼၼ်ႇတႃႉတၼ်းၶူဝ်းပုၼ်ႉယဝ်ႉဢေႃႈ။-
သူၸၢမ်ႇၸႃးၸေးၸိမ်ႇတၢင်းၶျၢမ်းသႃႇလေႃးၵႃႉၼႆႉလႄႈမူၼ်ႈပျေႃႇၼႃႇယဝ်ႉယဝ်ႉ။ သူလဵင်ႉတူဝ်တူဝ်သူႁႂ်ႈပီးလီမၼ်းလီလႄႈပႂ်ႉထႃႈဝၼ်းဢၼ်လႆႈၶၢမ်ႇဢဝ်တၢႆၼၼ်ႉဢေႃႈ။-
သူလႆႈၸီႇယၢင်ႇဢဝ်တၢႆၵူၼ်းဢၼ်သိုဝ်ႈတေႃႇၼၼ်ႉယဝ်ႉ။ မၼ်းၵေႃႈဢမ်ႇတွပ်ႇဢမ်ႇထဵင်သူ။
ပိူဝ်ႈၼႆလႄႈပီႈၼွင်ႉၶဝ်႟။ ယိူၼ်ႉၸႂ်ပႂ်ႉထႃႈတေႃႇထိုင်ႁွတ်ႈၸဝ်ႈၽြႃးၵျွမႃးၼၼ်ႉတႃႉ။ တူၺ်းလူး။ ၸဝ်ႈႁႆႈၸဝ်ႈၼႃးၶဝ်ယိူၼ်ႉၸႂ်ပႂ်ႉထႃႈႁႂ်ႈလႆႈဢဝ်မၢၵ်ႇၼမ်ႉႁူင်းလိၼ်ဢၼ်ထိူၵ်ႈၵႃႈယႂ်ႇၼႃႇၼၼ်ႉဢေႃႈ။ ၶဝ်ၸၢင်ႈယိူၼ်ႉၸႂ်ပႂ်ႉထႃႈၽူၼ်ႁူဝ်ပီ၊ဢိၵ်ႇတင်းၽူၼ်ႁၢင်ပီဢေႃႈ။-
သူၵေႃႈ၊ယိူၼ်ႉၸႂ်လႄႈပႂ်ႉထႃႈယူႇတႃႉ။ ပိူဝ်ႈဢၼ်မိုဝ်ႉဝၼ်းဢၼ်ၸဝ်ႈၽြႃးတၵ်းၵျွမႃးၼၼ်ႉ၊ၸမ်တၵ်းႁွတ်ႈမႃးယဝ်ႉလႄႈႁႂ်ႈၸႂ်သူမၼ်ႈၶိူင်ႇယူႇတႃႉ။
ပီႈၼွင်ႉၶဝ်႟။ ၼင်ႇႁိုဝ်ၽြႃးပဵၼ်ၸဝ်ႈတၵ်းဢမ်ႇၸီႇယၢင်ႇၵႃႈၼိူဝ်သူၸိုင်၊သူၵေႃႉၼိုင်ႈလႄႈၵေႃႉၼိုင်ႈယႃႇပေပွင်ႉမေႃးတၢင်ႇဢပျတ်ႈတီႈၵၼ်။ တူၺ်းလူး။ ၸဝ်ႈဢၼ်ၸီႇယၢင်ႇတြႃးၼၼ်ႉ၊ပေႃးမႃးမီးယူႇၵႃႈတီႈၽၢႆႇၼႃႈၽၵ်းတူဝႆႉယဝ်ႉ။-
ပီႈၼွင်ႉၶဝ်႟။ တူၺ်းပုင်ႇသၢၵ်ႈသေႇပရေႃးၽႅတ်ႈ ၸိူဝ်းဢၼ်ဢိင်ၼႃႇမႃႉၸိုဝ်ႈသဵင်ၽြႃးပဵၼ်ၸဝ်ႈသေလႄႈႁေႃးလၢတ်ႈၸိူဝ်းၼၼ်ႉတႃႉ။ ၶဝ်ၼၼ်ႉပဵၼ်ပုင်ႇသၢၵ်ႈသေႇတီႈလွင်ႈတၢင်းဢၼ်ယိူၼ်ႉၸႂ်ပႂ်ႉထႃႈ၊ဢိၵ်ႇတင်းတၢင်းဢၼ်ၶၢမ်ႇတုၵ်ႉၶႃႉတၢင်းၽၢၼ်ၼၼ်ႉဢေႃႈ။-
တူၺ်းလူး။ ႁဝ်းႁွင်ႉၶဝ်ၸိူဝ်းဢၼ်ယိူၼ်ႉၸႂ်ပႂ်ႉထႃႈၼၼ်ႉ၊ပဵၼ်ၵေႃႉဢၼ်မီးမၢင်ႇၵလႃႇဢေႃႈ။ သူလႆႈငိၼ်းလွင်ႈဢၼ် ယေႃးၽႃႉ၊ ယိူၼ်ႉၸႂ်လႆႈထၢၼ်ႇႁိုဝ်ၼၼ်ႉယဝ်ႉ။ သမ်ႉလႆႈႁုလွင်ႈဢၼ်ၵမ်းလိုၼ်းသုတ်းၼၼ်ႉ၊ထႃႇဝရႃႉၽြႃးပၼ်တၢင်းလီတီႈမၼ်းၸိူဝ်ႉၼင်ႇႁိုဝ်ၼၼ်ႉယဝ်ႉ။ လွင်ႈမၼ်းၸမ်ႉ၊ထႃႇဝရႃႉၽြႃးၸၢင်ႈႁၵ်ႉဢဵတ်းလူလႄႈမီးၸႂ်ၵရုၼႃႇဢေႃႈ။
ပီႈၼွင်ႉၶဝ်႟။ လိူဝ်တွၼ်းၼႃႇသေပိူၼ်ႈ၊ၼႂ်းမိူဝ်ႈဢၼ်သူဝႆႉၵတိသေၸိူဝ်ႉသေပိူင်ၼၼ်ႉၸိုင်၊ယႃႇပေတိူင်ႇၵၢဝ်ႇလႃးလႃး။ ယႃႇပေဢဝ်ၵၢင်ႁၢဝ်ဢိၵ်ႇတင်းလိၼ်မိူင်း၊ဢိၵ်ႇတင်းတၢင်ႇၸိူဝ်ႉတၢင်ႇပိူင်ၼၼ်ႉသေလႄႈတိူင်ႇၵၢဝ်ႇ။ ဢၼ်ၸိုဝ်ႈၸႂ်ႈၸိုင်ႁႂ်ႈလၢတ်ႈဝႃႈ၊ “ၸႂ်ႈဢေႃႈ” ဝႃႈၼႆလႄႈ၊ဢၼ်ဢမ်ႇၸိုဝ်ႈဢမ်ႇၸႂ်ႈၵေႃႈႁႂ်ႈလၢတ်ႈဝႃႈ၊ “ဢမ်ႇၸႂ်ႈ” ဝႃႈၼင်ႇၼႆတႃႉ။ ပေႃးႁဵတ်းၸိူဝ်ႉၼင်ႇၼႆၸိုင်၊သူတေၵၢင်းလွတ်ႈတင်းတၢင်းဢၼ်ၽြႃးပဵၼ်ၸဝ်ႈၸီႇယၢင်ႇၵႃႈၼိူဝ်သူဢေႃႈ။
ၼႂ်းသူၼၼ်ႉ၊ၸွင်ႇသေၵေႃႉသေၵူၼ်းမီးတၢင်းဢၼ်တုၵ်ႉၶႃႉယၢပ်ႇၸႂ်ႁိုဝ်း။ ပေႃးမီးၸိုင်၊ႁႂ်ႈမၼ်းသူးတွင်းတႃႉ။ ၸွင်ႇသေၵေႃႉသေၵူၼ်းမီးတၢင်းဢၼ်သိူဝ်းပျေႃႇႁိုဝ်း။ ပေႃးမီးၸိုင်၊ႁႂ်ႈမၼ်းႁဵတ်းၵႂၢမ်းယွင်ႈယေႃးတႃႉ။-
ၸွင်ႇသေၵေႃႉသေၵူၼ်းမီးတၢင်းၶႆႈတၢင်းပဵၼ်ႁိုဝ်း။ ပေႃးမီးၸိုင်၊ႁႂ်ႈမၼ်းႁွင်ႉဢဝ်ၵူၼ်းဢုပ်ႉၸိူဝ်းၸဝ်ႈတင်းလၢႆမႃးတႃႉ။ ၶဝ်တၵ်းဢိင်ပိုင်ႈၼႃႇမႃႉၸိုဝ်ႈသဵင်ၸဝ်ႈၽြႃးသေလႄႈဢဝ်ၼမ်ႉမၼ်းတႃးၵူၼ်းပဵၼ်ၼၼ်ႉလႄႈသူးတွင်းပုၼ်ႈမၼ်းဢေႃႈ။-
ပေႃးႁဵတ်းၸိူဝ်ႉၼင်ႇၼၼ်ၸိုင်၊တၢင်းသူးတွင်းဢၼ်ပႃးတၢင်းယုမ်ႇမၢတ်ႈၼၼ်ႉ၊တၵ်းႁဵတ်းႁႂ်ႈၵူၼ်းပဵၼ်ၼၼ်ႉၸိုၼ်ႈႁၢႆၶႅၼ်းမႃးလႄႈၸဝ်ႈၽြႃးတၵ်းႁႂ်ႈမၼ်းလုၵ်ႉၶိုၼ်းဢေႃႈ။ ဢပျတ်ႈဢၼ်မၼ်းႁဵတ်းမႅၼ်ႈၼၼ်ႉၵေႃႈ၊မၼ်းၸဝ်ႈတၵ်းပွႆႇလွတ်ႈဢေႃႈ။-
သူၼင်ႇၵၼ်ၵေႃႉၼိုင်ႈလႄႈၵေႃႉၼိုင်ႈ၊ဝုၼ်ႇၶၢမ်ႇတွင်းပၢၼ်ႇတၢင်းၽိတ်းတီႈၵၼ်သေလႄႈသူးတွင်းပုၼ်ႈၵၼ်ႁႂ်ႈလွတ်ႈၵၢင်းသေၽေးတၢင်းၶႆႈတၢင်းပဵၼ်တႃႉ။ ၵႂၢမ်းသူးတွင်းဢၼ်ၵူၼ်းသိုဝ်ႈတေႃႇလဝ်ႈယွၼ်းၼၼ်ႉ၊မီးႁႅင်းတၼ်းၶူဝ်းဢၼ်ယႂ်ႇၼႃႇဢေႃႈ။-
ဢေးလိယႃႉ၊ ၼၼ်ႉပဵၼ်ၵူၼ်းဢၼ်မီးၸႂ်သၽေႃးမိူၼ်ၸိူဝ်ႉၼင်ႇႁဝ်းၵူၺ်းဢေႃႈ။ မၼ်းပႃးၸႂ်ပႃးၶေႃးသူးတွင်းၼင်ႇႁိုဝ်ၽူၼ်တၵ်းဢမ်ႇတူၵ်းၼၼ်ႉ၊ၽူၼ်ၵေႃႈဢမ်ႇတူၵ်းၵႃႈၼိူဝ်လိၼ်မိူင်းလႄႈႁိုင်သၢမ်ပီပၢႆႁူၵ်းလိူၼ်တဵမ်တဵမ်ဢေႃႈ။-
ဝၢႆးၼၼ်ႉ၊မၼ်းသမ်ႉၶိုၼ်းသူးတွင်းလႄႈတွင်ႉၽႃႉၵေႃႈ၊ႁႂ်ႈၽူၼ်တူၵ်းမႃးဢေႃႈ။ လိၼ်မိူင်းၵေႃႈ၊ၸင်ႇမီးမၢၵ်ႇၶဝ်ႈမၢၵ်ႇၼမ်ႉလႂ်မႃးဢေႃႈ။
ပီႈၼွင်ႉၶဝ်႟။ ၼႂ်းသူၼႆႉ၊ပေႃးသေၵေႃႉသေၵူၼ်းၽိတ်းပိူင်ႈသေသဵၼ်ႈတၢင်းသမ်ႇမႃႇတြႃးၵႂႃႇလႄႈၵူၼ်းၵေႃႉဢၼ်ဢွၼ်မၼ်းပွၵ်ႈၶိုၼ်းမႃးၼၼ်ႉ၊-
ႁႂ်ႈမၼ်းႁုဝႃႈ၊တၢင်းဢၼ်ၸွႆႈထႅမ်ႁႂ်ႈၵူၼ်းဢၼ်မီးဢပျတ်ႈပိၼ်ႇၸႂ်မႃးၼၼ်ႉ၊ပဵၼ်တၢင်းဢၼ်ၵႄႇသႄႇၶျွတ်ႈဢဝ်ၸႂ်ဝိၺိၺ်ႇသဵၼ်ႈၼိုင်ႈယဝ်ႉ၊ဢိၵ်ႇတင်းပဵၼ်တၢင်းဢၼ်ႁႂ်ႈလွတ်ႈသေတၢင်းတၢႆ၊ဢိၵ်ႇတင်းလွတ်ႈသေတၢင်းဢၼ်ႁူမ်ႇဢပျတ်ႈဝႆႉၼမ်ၼႃႇၼၼ်ႉဢေႃႈ။ လိၵ်ႈတြႃးယႃႇၵုပ်ႈယဝ်ႉယဝ်ႉဢေႃႈ။
ၵဝ် ပေႇတရု၊ ဢၼ်ပဵၼ်တမၢၼ်ႇ ၸဝ်ႈယေႇသုၶရိၸ်ႈ၊ တႅမ်ႈလိၵ်ႈပၼ်ထိုင်တီႈၶဝ်ၸိူဝ်းဢၼ်ယူႇၽၢတ်ႇၽႄၸွတ်ႇၸႅတ်ႇၵႂႃႇလႄႈလႆႈပဵၼ်ၶႅၵ်ႇဢၼ်သွၼ်ႈယူႇၵႃႈၼႂ်းမိူင်း ပွၼ်ႇတု၊ မိူင်း ၵလႃႇတိ၊ မိူင်း ၵပ်ႉပတေႃးၵိ၊ မိူင်း ဢႃႇသိ၊ ဢိၵ်ႇတင်းမိူင်း ပိသုၼိ၊ ၸိူဝ်းၼၼ်ႉဢေႃႈ။-
သူလႆႈပဵၼ်ၵူၼ်းဢၼ်ၽြႃးပဵၼ်ၸဝ်ႈလိူၵ်ႈၵဵပ်းဝႆႉၸွမ်းၼင်ႇဢလူဝ်ႇၺၢၼ်ႇၽြႃးပေႃႈၸဝ်ႈ၊ဢိၵ်ႇတင်းတၢင်းဢၼ်မႄးႁဵတ်းပဵၼ်ၵူၼ်းမူတ်းၸၢင်ႇ ၵွပ်ႈပိူဝ်ႈဝိၺိၺ်ႇၸဝ်ႈ၊ႁႂ်ႈလႆႈထွမ်ႇဢဝ် ၸဝ်ႈယေႇသုၶရိၸ်ႈ၊ ဢိၵ်ႇတင်းႁႂ်ႈလႆႈၶၢမ်ႇဢဝ်ၵျေးၸူးတၢင်းဢၼ်ဢဝ်လိူတ်ႈမၼ်းၸဝ်ႈၽႅတ်းသႂ်ႇၼၼ်ႉဢေႃႈ။ ႁႂ်ႈၵျေးၸူးဢိၵ်ႇတင်းတၢင်းၼိမ်ၸဝ်ႈယႂ်ႇၼမ်ၵိုၼ်းၼႃႇၵႃႈတီႈသူသေၵမ်းလူၺ်ႈ။
ဢွၼ်ၵၼ်ယွင်ႈယေႃးတၢင်ႇၵျေးၸူးၽြႃးပဵၼ်ၸဝ်ႈဢၼ်ပဵၼ်ပေႃႈၸဝ်ႈၽြႃးႁဝ်း ၸဝ်ႈယေႇသုၶရိၸ်ႈ၊ ၼၼ်ႉတႃႉႁဝ်း။ မၼ်းၸဝ်ႈဢဝ်ၵရုၼႃႇဢၼ်ယႂ်ႇၼႃႇႁႂ်ႈႁဝ်းၵိူတ်ႇလဵင်ႉမႃးမႂ်ႇမႂ်ႇလႄႈလႆႈၶဝ်ႈၼႂ်းဢသၢၵ်ႈလိပ်းဢၼ်မီးတီႈမုင်ႈထႃႈမွင်းထႃႈၵွပ်ႈပိူဝ်ႈ ၸဝ်ႈယေႇသုၶရိၸ်ႈ၊ လုၵ်ႉၵႃႈတၢင်းတၢႆၶိုၼ်းလိပ်းမႃးၼၼ်ႉဢေႃႈ။-
ႁဝ်းၵေႃႈလႆႈဢမူၺ်ႇဢၼ်ဢမ်ႇၸၢင်ႈတူႇၸၢင်ႈၼဝ်ႈ၊ဢမ်ႇၸၢင်ႈလုၸၢင်ႈလႅဝ်၊ဢမ်ႇၸၢင်ႈလူၼ်ႇၸၢင်ႈႁူင်ႈၵႂႃႇဢၼ်ၽြႃးပဵၼ်ၸဝ်ႈသိမ်းပႅင်းဝႆႉ၊ၵႃႈၼႂ်းမိူင်းၵၢင်ႁၢဝ်ပုၼ်ႈသူ၊-
ၸိူဝ်းဢၼ်တၼ်းၶူဝ်းၽြႃးပဵၼ်ၸဝ်ႈပႂ်ႉၵႅတ်ႇၶႄႁႄႉၵင်ႈယူႇၵွပ်ႈပိူဝ်ႈတၢင်းယုမ်ႇမၢတ်ႈလႄႈလႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၼၼ်ႉ၊တၼ်းဝႆႉပုၼ်ႈတႃႇတၵ်းထၢင်ႇသႃးမႃးၵႃႈၼႂ်းၶိင်ႇၵႃႇလႃႉလိုၼ်းသုတ်းၼၼ်ႉဢေႃႈ။
ၵွပ်ႈပိူဝ်ႈသူလႆႈၶၢမ်ႇတုၵ်ႉၶႃႉတၢင်းဢၼ်ၸၢမ်းတူၺ်းယႃႉယုၵ်ႉလၢႆၸိူဝ်ႉလၢႆပိူင်လႄႈမီးတၢင်းဢၼ်မႆႈၸႂ်ၶီၸႂ်ၵမ်းဢွၼ်ႇၼိုင်ႈသေၵေႃႈ၊ထွၵ်ႈလူၺ်ႈၵျေးၸူးဢၼ်ဝႃႈမႃးယဝ်ႉၸိူဝ်းၼၼ်ႉလႄႈမီးၸႂ်ဢၼ်မူၼ်ႈပျေႃႇယူႇတႃႉ။-
တၢင်းဢၼ်ၸၢမ်းတူၺ်းၸိူဝ်းၼၼ်ႉပဵၼ်တၢင်းဢၼ်ၸႅတ်ႈတူၺ်းတၢင်းယုမ်ႇမၢတ်ႈသူဢၼ်မျၢတ်ႈလီၼႃႇၼၼ်ႉဢေႃႈ။ ၶမ်းဢၼ်ၸၢင်ႈယႃႉလုယႃႉလႅဝ်လႆႈၼၼ်ႉၵေႃႈလႆႈၶၢမ်ႇတၢင်းဢၼ်ဢဝ်တင်းၽႆးသေလႄႈၸႅတ်ႈသေးတူၺ်းဢေႃႈ။ ပိူဝ်ႈၼႆလႄႈတၢင်းယုမ်ႇမၢတ်ႈသူဢၼ်ယဵင်ႈၶႅၼ်းမျၢတ်ႈသေၶမ်းၼၼ်ႉၵေႃႈတၵ်းလႆႈၶၢမ်ႇတၢင်းဢၼ်ၸႅတ်ႈသေးတူၺ်းႁႂ်ႈမၼ်းယဵင်ႈၶႅၼ်းတႄႇမၼ်ႈၶိူင်ႇဢေႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊သူတၵ်းလႆႈၶၢမ်ႇဢဝ်တၢင်းဢၼ်ယွင်ႈယေႃး၊တၢင်းဢၼ်မီးမုၼ်သရေႇ၊ဢိၵ်ႇတင်းတၢင်းဢၼ်ယုၵ်ႉယွင်ႈၼႂ်းမိုဝ်ႉဝၼ်း ၸဝ်ႈယေႇသုၶရိၸ်ႈ၊ ပေႃႇမႃးၼၼ်ႉဢေႃႈ။-
ၸဝ်ႈၼၼ်ႉ၊သူဢမ်ႇတွၼ်ႉလႆႈႁၼ်။ ၵူၺ်းၵႃႈ၊သူႁၵ်ႉယူႇဢေႃႈ။ တေႃႈလဵဝ်ၵေႃႈသူယင်းဢမ်ႇလႆႈႁၼ်မၼ်းၸဝ်ႈသေၵေႃႈသူယင်းယုမ်ႇမၢတ်ႈသေယဝ်ႉ၊မီးၸႂ်ဢၼ်သႂၢင်ႇသိူဝ်းၼႃႇဢၼ်လၢတ်ႈဢမ်ႇသဵင်ႈလႆႈ၊ဢိၵ်ႇတင်းပႃးတင်းမုၼ်သရေႇလႄႈၸူမ်းသိူဝ်းၼႃႇ။
ၵွပ်ႈပိူဝ်ႈလႆႈၶၢမ်ႇဢဝ်ဢၵျူဝ်းတၢင်းဢၼ်ယုမ်ႇမၢတ်ႈဢၼ်ဝႃႈ၊တၢင်းဢၼ်ၵႄႇၶျွတ်ႈဢဝ်ၸႂ်ဝိၺိၺ်ႇၼၼ်ႉဢေႃႈ။-
ပရေႃးၽႅတ်ႈ ၸိူဝ်းဢၼ်ႁေႃးလၢတ်ႈလွင်ႈၵျေးၸူးၸဝ်ႈဢၼ်သူလႆႈၶၢမ်ႇဢဝ်ၼၼ်ႉ၊ၶဝ်ဢွၼ်ၵၼ်ၸႅတ်ႈထၢမ်ႁႃဢဝ်ၸေးၸေးၸွတ်ႇၸွတ်ႇလွင်ႈတြႃးတၢင်းဢၼ်ၵႄႇၶျွတ်ႈဢဝ်ၼႆႉ ဝႆႉယဝ်ႉဢေႃႈ။-
ၶဝ်ဢွၼ်ၵၼ်ၶတ်းၸႂ်သွၵ်ႈႁႃၸဝ်ႈၼၼ်ႉ၊ဢိၵ်ႇတင်းဢၶိင်ႇဢၼ်ဝိၺိၺ်ႇ ၸဝ်ႈၶရိၸ်ႈ၊ ဢၼ်တႄႇယူႇၵႃႈၼႂ်းၶဝ်ဢၼ်လႆႈမွၵ်ႇလၢတ်ႈၸိၼႄဝႆႉယဝ်ႉ၊မိူဝ်ႈဢၼ်ၶဝ်လႆႈႁေႃးလၢတ်ႈလွင်ႈတၢင်းဢၼ် ၸဝ်ႈၶရိၸ်ႈ၊ တၵ်းလႆႈၶၢမ်ႇတုၵ်ႉၶႃႉဝူၺ်ႇတၼႃႇသေယဝ်ႉ၊ၵမ်းလိုၼ်းသမ်ႉတၵ်းလႆႈၸၢမ်ႇၸႃးၸေးၸိမ်ႇၼၼ်ႉဢေႃႈ။-
ၽြႃးပဵၼ်ၸဝ်ႈၽုၺ်ႇဢွၵ်ႇၼႄပျႃးတြႃးၼၼ်ႉတီႈပရေႃးၽႅတ်ႈတင်းလၢႆႁႂ်ႈလႆႈပဵၼ်ဢၵျူဝ်းပုၼ်ႈၶဝ်ဢမ်ႇၸႂ်ႈ၊ႁႂ်ႈပဵၼ်ပုၼ်ႈသူဢေႃႈ။ တေႃႈလဵဝ်ၼႆႉသူလႆႈငိၼ်းတြႃးမဵဝ်းလဵဝ်ၵၼ်ဢၼ်ပဵၼ်ၶၢဝ်ႇတြႃးသိူဝ်းပျေႃႇဢၼ်ၶဝ်ၸိူဝ်းဢၼ်လႆႈဝိၺိၺ်ႇမူတ်းၸၢင်ႇၸဝ်ႈလႄႈၽြႃးပဵၼ်ၸဝ်ႈပွႆႇၸႂ်ႉၶဝ်လုၵ်ႉၵႃႈတီႈၼိူဝ်ၵၢင်ႁၢဝ်လူင်းမႃးသေလႄႈႁေႃးလၢတ်ႈတီႈသူၼၼ်ႉဢေႃႈ။ လွင်ႈတၢင်းၸိူဝ်းၼၼ်ႉၸိုင်၊တမၢၼ်ႇၵၢင်ႁၢဝ်တင်းလၢႆယင်းမီးၸႂ်ၶႂ်ႈလူတူၺ်းႁုၸႅင်ႈဢေႃႈ။
ပိူဝ်ႈၼႆလႄႈ ႁႂ်ႈႁူဝ်ၸႂ်သူတၼ်းဝႆႉပုၼ်ႈတၵ်းတူင်ႉတိုၼ်ႇတႃႉ။ မီးသမ်ႇမႃႇသတိလႄႈမီးတၢင်းဢၼ်မုင်ႈထႃႈမွင်းထႃႈၸေးၸေးၸုမ်ႇၸုမ်ႇႁႂ်ႈလႆႈၵျေးၸူးၸဝ်ႈဢၼ်တၵ်းတူၵ်းႁွတ်ႈမႃးၵႃႈတီႈသူၼႂ်းမိူဝ်ႈဢၼ် ၸဝ်ႈယေႇသုၶရိၸ်ႈ၊ တၵ်းပေႃႇမႃးၼၼ်ႉတႃႉ။-
ၸွမ်းလူၺ်ႈသူပဵၼ်လုၵ်ႈလၢင်းဢၼ်ၸၢင်ႈထွမ်ႇဢဝ်ၼၼ်ႉလႄႈယႃႇပေၵမ်ၵျၢင်ႉၸွမ်းတြႃးတၢင်းဢၼ်ၸပ်းၸွႆးဢၼ်သူယၢမ်ႈၵမ်ၵျၢင်ႉၼႂ်းတၢင်းဢၼ်သူဢမ်ႇပွင်ႇဢမ်ႇလႅင်းမိူဝ်ႈဢွၼ်ၼႆႉၼၼ်ႉသေလႄႈ၊-
မီးတၢင်းဢၼ်မူတ်းၸၢင်ႇယူႇၼႂ်းၵႃႈဢၼ်သူၵမ်ၵျၢင်ႉသၢင်ႈႁဵတ်းတင်းသဵင်ႈတင်းလူင်၊မိူၼ်ၸိူဝ်ႉၼင်ႇဢၼ်ၽြႃးပဵၼ်ၸဝ်ႈ၊ၸဝ်ႈဢၼ်ႁွင်ႉဢဝ်သူၼၼ်ႉမူတ်းၸၢင်ႇၼၼ်ႉတႃႉ။-
လွင်ႈမၼ်းၸမ်ႉ၊ၵျၢမ်းလိၵ်ႈတႅမ်ႈဝႆႉလႄႈဝႃႈ၊ “ၵွပ်ႈပိူဝ်ႈၵဝ်မူတ်းၸၢင်ႇၼၼ်ႉသူၵေႃႈမီးတၢင်းဢၼ်မူတ်းၸၢင်ႇတႃႉ၊” ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈ၊ၸဝ်ႈဢၼ်ယင်းဢမ်ႇတူၺ်းၼႃႈလဵၵ်ႉၼႃႈယႂ်ႇၵူၼ်း၊တႅပ်းတတ်းၸွမ်းၼင်ႇတၢင်းၵမ်တၢင်းၵျၢင်ႉၽႂ်ၽႂ်မၼ်းမၼ်းၼၼ်ႉ၊ပေႃးသူသူးတွင်းႁွင်ႉႁႃမၼ်းၸဝ်ႈဝႃႈ၊ “ပေႃႈၸဝ်ႈ” ဝႃႈၼႆၸိုင်၊ရူဝ်ႇသေႇၵူဝ်ယမ်မၼ်းၸဝ်ႈယူႇလႄႈၵမ်ၵျၢင်ႉယူႇၼႂ်းၸူဝ်ႈပၢၼ်ဢၼ်သူယင်းတိုၵ်ႉပဵၼ်ၶႅၵ်ႇၵႃႈၼႂ်းလေႃးၵႃႉၼႆႉတႃႉ။-
သူလႆႈလွတ်ႈသေဢသၢၵ်ႈတၢၼ်းဢၼ်ၵမ်ၵျၢင်ႉသၢင်ႈႁဵတ်းလၢႆလၢႆ ဢမ်ႇပွင်ဢၵျူဝ်းဢၼ်လႆႈသိုပ်ႇၶၢမ်ႇဢဝ်တီႈပူႇမွၼ်ႇသူတင်းလၢႆၼၼ်ႉယဝ်ႉ။ ႁႂ်ႈသူပေႃးလႆႈလွတ်ႈၸိုင်၊မၼ်းၸဝ်ႈဢဝ်တင်းၶိူင်ႈပိူင်ဢၼ်ၸၢင်ႈလုၸၢင်ႈလႅဝ်ဢၼ်ဝႃႈ၊ငိုၼ်းၶမ်းၼၼ်ႉလႄႈထုတ်ႇဢဝ်သူဢမ်ႇၸႂ်ႈ။-
မၼ်းၸဝ်ႈဢဝ်တင်းလိူတ်ႈမျၢတ်ႈ ၸဝ်ႈၶရိၸ်ႈ၊ ဢၼ်ပဵၼ်ၸိူဝ်ႉၼင်ႇသူဝ်းဢွၼ်ႇဢၼ်ၵၢင်းလွတ်ႈတင်းတၢင်းဢၼ်ဢၢင်ႇၵႃႇလုၼၼ်ႉသေလႄႈထုတ်ႇဢဝ်သူဢေႃႈ။-
ၸဝ်ႈၶရိၸ်ႈ၊ ၼၼ်ႉၸမ်ႉ၊ၽြႃးပဵၼ်ၸဝ်ႈလိူၵ်ႈဢဝ်ၸဵမ်မိူဝ်ႈၸူဝ်ႈဢၼ်ၵမ်ႇၽႃႇဢမ်ႇပႆႇတႄႇပႆႇပဵၼ်ၼၼ်ႉယဝ်ႉ၊ၵူၺ်းၵႃႈ၊မၼ်းၸဝ်ႈထၢင်ႇသႃးမႃးၼႂ်းၶိင်ႇၵႃႇလႃႉလိုၼ်းလင်သုတ်းၼႆႉ ပုၼ်ႈၸိူဝ်းသူဢေႃႈ။-
ၵွပ်ႈလူၺ်ႈ ၸဝ်ႈၶရိၸ်ႈ၊ ၼၼ်ႉလႄႈသူလႆႈယုမ်ႇမၢတ်ႈၽြႃးပဵၼ်ၸဝ်ႈ၊ၸဝ်ႈဢၼ်ႁႂ်ႈ ၸဝ်ႈၶရိၸ်ႈ၊ လုၵ်ႉၵႃႈတၢင်းတၢႆၶိုၼ်းလိပ်းမႃးသေယဝ်ႉ၊ပၼ်မုၼ်သရေႇတီႈမၼ်းၸဝ်ႈၼၼ်ႉ၊ၼင်ႇႁိုဝ်တၢင်းယုမ်ႇမၢတ်ႈသူ၊ဢိၵ်ႇတင်းတၢင်းဢၼ်မုင်ႈထႃႈမွင်းထႃႈသူတၵ်းတႄႇယူႇၵႃႈၼႂ်းၽြႃးပဵၼ်ၸဝ်ႈၼၼ်ႉဢေႃႈ။
ၵွပ်ႈပိူဝ်ႈသူထွမ်ႇဢဝ်သမ်ႇမႃႇတြႃးၼၼ်ႉသေလႄႈသူလႆႈပဵၼ်ၵေႃႉဢၼ်ၶၢဝ်ၸၢင်ႇ၊ဢိၵ်ႇတင်းလႆႈမီးႁူဝ်ၸႂ်ဢၼ်ၸၢင်ႈႁၵ်ႉၸၢင်ႈပႅင်းပီႈၼွင်ႉၸိူဝ်းဢၼ်ပဵၼ်ၵူၼ်းယုမ်ႇမၢတ်ႈၼင်ႇၵၼ်ၵၼ်ယဝ်ႉလႄႈ သူၵေႃႉၼိုင်ႈလႄႈၵေႃႉၼိုင်ႈ၊ပႃးၸႂ်ပႃးၶေႃးသေလႄႈႁၵ်ႉပႅင်းၵၼ်တႃႉ။-
လွင်ႈမၼ်းၸမ်ႉ၊သူလႆႈပဵၼ်ၵေႃႉဢၼ်ၵိူတ်ႇပဵၼ်မႃးမႂ်ႇမႂ်ႇ၊ၸွမ်းလူၺ်ႈၸိူဝ်ႉ၊ၼိူဝ်ႉလိူတ်ႈၵူၼ်းဢၼ်ၸၢင်ႈလုလႅဝ်ၼၼ်ႉဢမ်ႇၸႂ်ႈ။ ၸွမ်းလူၺ်ႈၸိူဝ်ႉၼုၵ်ႈၵပၢတ်ႈတြႃးဢၼ်ဢမ်ႇၸၢင်ႈလုလႅဝ်၊ဢၼ်မီးဢသၢၵ်ႈလိပ်းလႄႈတႄႇယူႇၼိၵ်ႈၸႃႉထႃႇဝရႃႉၼၼ်ႉဢေႃႈ။-
မၼ်းမႅၼ်ႈၸွမ်းၵႃႈၼင်ႇဢၼ်တႅမ်ႈဝႆႉၵႃႈၼႂ်း ၵျၢမ်းလိၵ်ႈလႄႈဝႃႈ၊ “မဵဝ်းၵူၼ်းၵႃႈမီးတင်းသဵင်ႈတင်းလူင်ပဵၼ်ၸိူဝ်ႉၼင်ႇတူၼ်ႈယိူဝ်ႈတူၼ်ႈယႃႈဢေႃႈ။ မုၼ်ၽုင်းၵႃႈမီးတင်းသဵင်ႈတင်းလူင်ၵေႃႈပဵၼ်ၸိူဝ်ႉၼင်ႇမွၵ်ႇယိူဝ်ႈမွၵ်ႇယႃႈဢေႃႈ။ တူၼ်ႈယိူဝ်ႈတူၼ်ႈယႃႈၸၢင်ႈႁဵဝ်ႇၵႂႃႇၸွပ်ႈၵႂႃႇဢေႃႈ။ မွၵ်ႇယိူဝ်ႈမွၵ်ႇယႃႈၵေႃႈ ၸၢင်ႈလူၼ်ႇၵႂႃႇႁူင်ႈၵႂႃႇဢေႃႈ။
ၼုၵ်ႈၵပၢတ်ႈၽြႃးပဵၼ်ၸဝ်ႈၸမ်ႉ၊တႄႇယူႇၼိၵ်ႈၸႃႉထႃႇဝရႃႉဢေႃႈ၊” ဝႃႈၼင်ႇၼႆဢေႃႈ။ ၼုၵ်ႈၵပၢတ်ႈတြႃးၼၼ်ႉပဵၼ်ၶၢဝ်ႇတြႃးသိူဝ်းပျေႃႇဢၼ်ႁေႃးလၢတ်ႈတီႈသူၼၼ်ႉဢေႃႈ။
ပိူဝ်ႈၼႆလႄႈသူဢွၼ်ၵၼ်ပႄႇပႅတ်ႈလွင်ႈတၢင်းဢၼ်ႁၢႆႉဢၼ်မိူၵ်ႈၵူႈၸိူဝ်ႉၵူႈပိူင်ဢၼ်ပဵၼ်တၢင်းဢၼ်ပႅတ်ႉလႅၼ်ၵၼ်၊တၢင်းဢၼ်ၼႃႈသိုဝ်ႈၸႂ်ၵူတ်ႉ၊တၢင်းဢၼ်သီႈၵေႉႁေႈတႃၵၼ်ၶွႆၵၼ်တင်းတၢင်းဢၼ်သႄႉသွမ်းၵၼ်ၸိူဝ်းၼၼ်ႉတႃႉ။-
ဢွၼ်ၵၼ်ပဵၼ်ၸိူဝ်ႉၼင်ႇလုၵ်ႈဢွၼ်ႇလႅင်ဢၼ်ၸင်ႇၸႃႉၵိူတ်ႇမႃးလႄႈတွင်ႉမႆႈၶႂ်ႈၵိၼ်ၼမ်ႉၼူမ်းဝိၺိၺ်ႇၸဝ်ႈဢၼ်ၸႅတ်ႈၼၼ်ႉတႃႉ။ ပေႃးၵိၼ်ၸိုင်၊သူတၵ်းယႂ်ႇမႃးၼႂ်းၵျေးၸူးတြႃးတၢင်းဢၼ်ၵႄႇၶျွတ်ႈ။-
ဢၼ်မႅၼ်ႈၼင်ႇတႅမ်ႈဝႆႉၵႃႈၼႂ်းၵျၢမ်းလႄႈဝႃႈ၊ “သူလႆႈၸိမ်းတူၺ်းၵျေးၸူးတၢင်းဢၼ်ၸဝ်ႈၽြႃးႁၵ်ႉဢဵတ်းလူသူၵႃႈႁိုဝ်ၼၼ်ႉယဝ်ႉ၊” ဝႃႈၼင်ႇၼႆၼၼ်ႉဢေႃႈ။
ဢွၼ်ၵၼ်မႃးၸူးၸဝ်ႈၽြႃးဢၼ်ဝႃႈ၊မၢၵ်ႇႁိၼ်ဢၼ်ဢသၢၵ်ႈလိပ်းယူႇ၊ဢၼ်ၵူၼ်းတင်းလၢႆပႄႇပႅတ်ႈႁႂ်ႈပဵၼ်ဢၼ်ဢမ်ႇမီးၵႃႈမီးၶၼ်သေၵေႃႈ၊ၵႃႈတီႈၽၢႆႇၼႃႈၽြႃးပဵၼ်ၸဝ်ႈၸမ်ႉ၊မၼ်းၸဝ်ႈလိူၵ်ႈဝႆႉလႄႈမီးၵႃႈၶၼ်ဢၼ်ယႂ်ႇၼႃႇၼၼ်ႉတႃႉ။-
ဢွၼ်ၵၼ်မႃးပဵၼ်မိူၼ်ၸိူဝ်ႉၼင်ႇမၢၵ်ႇႁိၼ်ဢၼ်ဢသၢၵ်ႈလိပ်းတင်းလၢႆလႄႈၶၢမ်ႇတၢင်းဢၼ်ဢဝ်တူဝ်သူၵေႃႇသၢင်ႈၵႃႈၼႂ်းႁိူၼ်းဝိၺိၺ်ႇၸဝ်ႈ၊တီႈဢၼ်သူလႆႈႁဵတ်းယဵၸ်ႈပရေႃးႁဵၵ်ႈ ဢၼ်မူတ်းၸင်ႇ၊ႁႂ်ႈလႆႈသၢၵ်ႈလူႇၶိူင်ႈတၢင်းလူႇဢၼ်ၸၢပ်ႈသႅင်ႇၵၼ်တင်းဝိၺိၺ်ႇ၊ဢၼ်ၽြႃးပဵၼ်ၸဝ်ႈႁပ်ႉတုင်းဢဝ်ၵွပ်ႈလူၺ်ႈ ၸဝ်ႈယေႇသုၶရိၸ်ႈ၊ ၼၼ်ႉတႃႉ။-
လွင်ႈမၼ်းၸမ်ႉ၊တႅမ်ႈဝႆႉၵႃႈၼႂ်းၵျၢမ်းလိၵ်ႈတႅမ်ႈဝႃႈ၊ “တူၺ်းလူး။ ၵဝ်လိူၵ်ႈၵဵပ်းဢဝ်မၢၵ်ႇႁိၼ်ဢၼ်မီးၵႃႈၶၼ်ယႂ်ႇၼႃႇ၊ ဢၼ်တေႃႈလဵဝ်ၼႆႉ၊ၵဝ်ၶျႃးဝႆႉႁႂ်ႈပဵၼ်မၢၵ်ႇႁိၼ်ႁူဝ်ၸဵင်ႇတိူၵ်ႈၵႃႈၼႂ်းဝဵင်း ၸိဢုၼ်ႇ၊ ဢေႃႈ။ ၵေႃႉဢၼ်ယုမ်ႇမၢတ်ႈဢိင်ပိုင်ႈၵႃႈၼႂ်းမၼ်းၼၼ်ႉ၊ တၵ်းဢမ်ႇတွၼ်ႉလႆႈဢၢႆပိူၼ်ႈသေပွၵ်ႈ၊” ဝႃႈၼင်ႇၼႆဢေႃႈ။
ပုၼ်ႈသူၸိူဝ်းဢၼ်ယုမ်ႇမၢတ်ႈၼႆႉမၼ်းပဵၼ်ဢၼ်ၵႃႈၶၼ်မျၢတ်ႈၼႃႇဢေႃႈ။ ၵူၺ်းၵႃႈ၊ပုၼ်ႈၶဝ်ၸိူဝ်းဢၼ်ဢမ်ႇယုမ်ႇမၢတ်ႈၸမ်ႉ၊ “မၢၵ်ႇႁိၼ်လုၵ်ႈဢၼ်ၶဝ်ၸိူဝ်းဢၼ်တႄႇႁဵတ်းႁိူၼ်းပႅတ်ႈဝႆႉၼၼ်ႉ၊ ပိၼ်ႇပဵၼ်မၢၵ်ႇႁိၼ်ႁူဝ်ၸဵင်ႇတိူၵ်ႈဢေႃႈ၊” ဝႃႈၼင်ႇၼႆၼၼ်ႉ။
ဢိၵ်ႇတင်းထႅင်ႈတီႈၼိုင်ႈသမ်ႉမီးဝႆႉလႄႈဝႃႈ၊ “မၢၵ်ႇႁိၼ်လုၵ်ႈၼႆႉတၵ်းႁႂ်ႈၵူၼ်းၶီႈလိုတ်းမႅၼ်ႈလႄႈ၊ ပဵၼ်ႁိၼ်ၽႃဢၼ်တၵ်းႁႂ်ႈၶဝ်လႆႈလူမ်ႉဢေႃႈ၊” ဝႃႈၼင်ႇၼႆဢေႃႈ။ ၶဝ်ၶီႈလိုတ်းလႄႈလူမ်ႉၵွပ်ႈပိူဝ်ႈၶဝ်ဢမ်ႇထွမ်ႇဢဝ်ၼုၵ်ႈၵပၢတ်ႈတြႃးၸဝ်ႈၼၼ်ႉဢေႃႈ။ ၼႆႉၸမ်ႉ၊ပဵၼ်ဢလူဝ်ႇၽြႃးပဵၼ်ၸဝ်ႈႁႂ်ႈၶဝ်လႆႈထူပ်းၺႃးၸိူဝ်ႉၼင်ႇၼၼ်ဢေႃႈ။
သူၸမ်ႉ၊ပဵၼ်မဵဝ်းဢၼ်မၼ်းၸဝ်ႈလိူၵ်ႈၵဵပ်းဢဝ်၊ပဵၼ်ယဵၸ်ႈပရေႃးႁဵၵ်ႈဢၼ်လႆႈႁဵတ်းဝၢတ်ႈပုၼ်ႈၶုၼ်ႁေႃၶမ်း၊ပဵၼ်ၵူၼ်းဢၼ်မူတ်းၸၢင်ႇ၊ၵူၼ်းဢၼ်မၼ်းၸဝ်ႈထိူၵ်ႈပိူင်ႇပုၼ်ႈလွင်ႈၼင်ႇႁိုဝ်တၵ်းလႆႈၽုၺ်ႇဢွၵ်ႇမွၵ်ႇလၢတ်ႈလွင်ႈၵၢၼ်တၢင်းႁဵတ်းမၼ်းၸဝ်ႈဢၼ်လီဢၢမ်းၼႃႇ၊ၸဝ်ႈဢၼ်ႁွင်ႉဢဝ်သူဢွၵ်ႇသေၵႃႈၼႂ်းလပ်းသိင်ႇလႄႈသႂၢင်းသႂ်ႇၼႂ်းဢၼ်လႅင်းၸဝ်ႈဢၼ်မုၼ်ယႂ်ႇၼႃႇၼၼ်ႉဢေႃႈ။-
မိူဝ်ႈဢွၼ်တၢင်းၼၼ်ႉသူဢမ်ႇၸႂ်ႈၵူၼ်းၽြႃးပဵၼ်ၸဝ်ႈ။ တေႃႈလဵဝ်ၼႆႉၸမ်ႉ၊သူပဵၼ်ၵူၼ်းမၼ်းၸဝ်ႈဢေႃႈ။ မိူဝ်ႈဢွၼ်တၢင်းၼၼ်ႉသူဢမ်ႇလႆႈၶၢမ်ႇဢဝ်ၵျေးၸူးၵရုၼႃႇၸဝ်ႈ။ တေႃႈလဵဝ်ၼႆႉၸမ်ႉ၊သူလႆႈၶၢမ်ႇဢဝ်ၵျေးၸူးၵရုၼႃႇၸဝ်ႈဢေႃႈ။
ၵေႃႉဢၼ်ၵဝ်ႁၵ်ႉၶဝ်႟။ ၵဝ်တွင်းပၢၼ်ႇသူ၊မိူၼ်ၸိူဝ်ႉၼင်ႇဢၼ်သူပဵၼ်ၶႅၵ်ႇမိူင်းၼွၵ်ႈ၊ဢိၵ်ႇတင်းၵူၼ်းပၢႆႈသွၼ်ႈသိုၵ်းဢၼ်ယူႇသဝ်းၵႃႈၼႂ်းလေႃးၵႃႉၼႆႉၼၼ်ႉလႄႈဝႃႈၸမ်ႉ၊ယႃႇပေႁႂ်ႈတူဝ်သူလႆႈတူၵ်းသုမ်းၵႃႈၼႂ်းတၢင်းဢၼ်တူဝ်ၵႃႇယႃႉၸပ်းၸွႆးဢၼ်ၸၢင်ႈတိုၵ်းသိုၵ်းၵၼ်တင်းၸႂ်ဝိၺိၺ်ႇသူၼၼ်ႉသေၵမ်း။-
ႁႂ်ႈတၢင်းၵမ်တၢင်းၵျၢင်ႉသူပဵၼ်ဢၼ်ထုၵ်ႇဢၼ်လီၵႃႈၼႂ်းၵႄႈၵူၼ်းၼွၵ်ႈသႃႇသၼႃႇၸဝ်ႈတင်းလၢႆ၊ပုၼ်ႈလွင်ႈၼင်ႇႁိုဝ်ၼႂ်းမိူဝ်ႈဢၼ်ၶဝ်တၢင်ႇဢပျတ်ႈသႄႉသွမ်းသူဝႃႈ၊ပဵၼ်ၵူၼ်းႁၢႆႉၵူၼ်းမိူၵ်ႈၼၼ်ႉ၊ၶဝ်တၵ်းထွၵ်ႈလူၺ်ႈတၢင်းၵမ်တၢင်းၵျၢင်ႉဢၼ်လီဢၼ်ငၢမ်းသူၼၼ်ႉလႄႈမေႃယွင်ႈယေႃးၵျေးၸူးၽြႃးပဵၼ်ၸဝ်ႈၼႂ်းမိုဝ်ႉဝၼ်းဢၼ်မၼ်းၸဝ်ႈတၵ်းမႃးလူမႃးၸႂ်းၼၼ်ႉတႃႉ။
ထွၵ်ႈလူၺ်ႈၼႃႈၸဝ်ႈၽြႃးသေလႄႈႁပ်ႉၶၢမ်ႇတုင်းဢဝ်ဢမိင်ႉဢႃႇၼႃႇၵူၼ်းတင်းလၢႆ၊ၸိူဝ်းဢၼ်ပဵၼ်ၸဝ်ႈမုၼ်ယႂ်ႇၶုၼ်ႁေႃၶမ်းဢၼ်ပဵၼ်ၸိၵ်းပဵၼ်ၸွမ်၊-
ဢိၵ်ႇတင်းၽွင်းမိူင်းလူင်ၸိူဝ်းဢၼ်ၶုၼ်ႁေႃၶမ်းၶၢၼ်းဝႆႉ၊ႁႂ်ႈလႆႈၸီႇယၢင်ႇပၼ်တၢမ်ႇတီႈၵူၼ်းႁၢႆႉၵူၼ်းမိူၵ်ႈတင်းလၢႆလႄႈသမ်ႉယုၵ်ႉယွင်ႈၵူၼ်းလီၵူၼ်းငၢမ်းတင်းလၢႆၸိူဝ်းၼၼ်ႉတႃႉ။-
လွင်ႈမၼ်းၸမ်ႉ၊ၽြႃးပဵၼ်ၸဝ်ႈမီးဢလူဝ်ႇဢၼ်ႁႂ်ႈသူဢဝ်တၢင်းၵမ်တၢင်းၵျၢင်ႉဢၼ်လီဢၼ်ငၢမ်းဢိုတ်းသူပ်းၵူၼ်းမိူၵ်ႈဢၼ်ဢမ်ႇမီးပိင်ႇၺႃႇတၢင်းႁုတၢင်းႁၼ်ၵႃႈသင်ၸိူဝ်းၼၼ်ႉဢေႃႈ။-
ယူႇၸိူဝ်ႉၼင်ႇၵူၼ်းလွတ်ႈၵူၼ်းလႅဝ်းတႃႉ။ ၼႂ်းဝႃႈၼၼ်သေၵေႃႈယႃႇဢဝ်တၢင်းဢၼ်လွတ်ႈလႅဝ်းသူၼၼ်ႉႁဵတ်းတၢင်းဢၼ်ႁၢႆႉမိူၵ်ႈ။ ဢွၼ်ၵၼ်ၵမ်ၵျၢင်ႉယူႇၸိူဝ်ႉၼင်ႇၶႃႈၽြႃးပဵၼ်ၸဝ်ႈတႃႉ။-
ရူဝ်ႇသေႇၵူၼ်းတင်းသဵင်ႈတင်းလူင်တႃႉ။ ႁၵ်ႉပႅင်းပီႈၼွင်ႉဢၼ်ယုမ်ႇမၢတ်ႈၼင်ႇၵၼ်တႃႉ။ ၵူဝ်ႁႄၽြႃးပဵၼ်ၸဝ်ႈတႃႉ။ ရူဝ်ႇသေႇၵူဝ်ယမ်ၸဝ်ႈမုၼ်ယႂ်ႇၶုၼ်ႁေႃၶမ်းတႃႉ။
လုၵ်ႈၸၢင်ႈတင်းလၢႆၶဝ်႟။ ႁပ်ႉၶၢမ်ႇဢဝ်တၢင်းဢၼ်ပေႃႈလဵင်ႉသူဢုပ်ႉပိူင်ႇၼၼ်ႉတႃႉ။ သူတၵ်းလႆႈၼႄပျႃးၸႂ်ဢၼ်ရူဝ်ႇသေႇၵူဝ်ယမ်ၵႃႈတီႈပေႃႈလဵင်ႉဢၼ်မီးၸႂ်ႁၵ်ႉဢဵတ်းလူ၊ဢၼ်မီးသၽေႃးဢၼ်ၼိမ်သိမ်ႇဢူၼ်ႈဢွၼ်ႇၸိူဝ်းၼၼ်ႉၵူၺ်းဢမ်ႇၸႂ်ႈ၊ပေႃႈလဵင်ႉဢၼ်မီးၸႂ်ႁၢဝ်ႈၸႂ်ၵျၢမ်းၸိူဝ်းၼၼ်ႉၵေႃႈ၊ၼႄပျႃးတၢင်းဢၼ်ရူဝ်ႇသေႇၵူဝ်ယမ်တႃႉ။-
လွင်ႈမၼ်းၸမ်ႉ၊ပေႃးသူထွၵ်ႈလူၺ်ႈၼႃႈၽြႃးပဵၼ်ၸဝ်ႈသေလႄႈယိူၼ်ႉၶၢမ်ႇတၢင်းဢၼ်သႄႉသွမ်းဢၼ်ဢမ်ႇတြႃးလႄႈလႆႈၸဵပ်းၸႂ်ၼၼ်ႉၸိုင်၊ၽြႃးပဵၼ်ၸဝ်ႈတၵ်းပၼ်တၢင်းလီမၢင်ႇၵလႃႇတီႈသူဢေႃႈ။-
ပေႃးယိူၼ်ႉၶၢမ်ႇၵွပ်ႈပိူဝ်ႈမိူဝ်ႈဢၼ်မီးဢပျတ်ႈလႄႈလႆႈၶၢမ်ႇတၢမ်ႇၼၼ်ႉၵူၺ်းၸိုင်၊တၵ်းမီးဢၵျူဝ်းၵႃႈသင်။ ပေႃးယိူၼ်ႉၶၢမ်ႇၼႂ်းမိူဝ်ႈဢၼ်ႁဵတ်းဢၼ်လီဢၼ်ငၢမ်းယူႇလႄႈလႆႈၶၢမ်ႇတၢင်းၽၢၼ်ၼၼ်ႉၸင်ႇတၵ်းမီးဢၵျူဝ်းမၢင်ႇၵလႃႇဢၼ်ယႂ်ႇၼႃႇၵႃႈတီႈၽၢႆႇၼႃႈၽြႃးပဵၼ်ၸဝ်ႈဢေႃႈ။
လွင်ႈမၼ်းၸမ်ႉ၊ၽြႃးပဵၼ်ၸဝ်ႈႁွင်ႉဢဝ်သူႁႂ်ႈလႆႈပဵၼ်ၸိူဝ်ႉၼင်ႇၼၼ်ယဝ်ႉ။ ၸဝ်ႈၶရိၸ်ႈ၊ ၵေႃႈၶၢမ်ႇပုၼ်ႈသူယဝ်ႉလႄႈဝႆႉပဵၼ်ပုင်ႇပမႃႇတီႈသူႁႂ်ႈသူလႆႈၸွမ်းႁွႆးတိၼ်မၼ်းၸဝ်ႈဢေႃႈ။-
မၼ်းၸဝ်ႈယင်းဢမ်ႇႁဵတ်းတုၸရိူၵ်ႈဢပျတ်ႈလႄႈၽူႈလႂ်ဢမ်ႇတွၼ်ႉလႆႈငိၼ်းၵႂၢမ်းမုသႃႇလၢတ်ႈဢွၵ်ႇသူပ်းမၼ်းၸဝ်ႈၼၼ်ႉဢေႃႈ။-
မိူဝ်ႈဢၼ်လႆႈၶၢမ်ႇပိူၼ်ႈသႄႉသွမ်းၼၼ်ႉမၼ်းၸဝ်ႈဢမ်ႇၶိုၼ်းတွပ်ႇၵႂၢမ်းဢၼ်သႄႉသွမ်း။ မိူဝ်ႈဢၼ်လႆႈၶၢမ်ႇတုၵ်ႉၶႃႉဝူၺ်ႇတၼႃႇၼၼ်ႉမၼ်းၸဝ်ႈဢမ်ႇႁိုတ်းဢမ်ႇလွၵ်ႇလႄႈၵူၺ်းမီးတင်းႁူဝ်ၸႂ်ဢၼ်မုင်ႈထႃႈမွင်းထႃႈတီႈၽြႃးပဵၼ်ၸဝ်ႈ၊ၸဝ်ႈဢၼ်ၸီႇယၢင်ႇၸွမ်းၼင်ႇတြႃးၼၼ်ႉဢေႃႈ။-
တူဝ်မၼ်းၸဝ်ႈယင်းပႃးဢဝ်ဢပျတ်ႈတင်းလၢႆ၊ဢၼ်ႁဝ်းၽိတ်းပိူင်ႈၼၼ်ႉလႄႈၵႃႈတီႈသဝ်မႆႉ၊ႁႂ်ႈႁဝ်းလႆႈတၢႆပႅတ်ႈသေၵႃႈတီႈဢပျတ်ႈသေလႄႈလႆႈဢသၢၵ်ႈလိပ်းတီႈတၢင်းဢၼ်သိုဝ်ႈတေႃႇဢေႃႈ။ ၵွပ်ႈပိူဝ်ႈႁွႆးတၢမ်ႇမၼ်းၸဝ်ႈၼၼ်ႉလႄႈတၢင်းၶႆႈတၢင်းပဵၼ်သူလႆႈၸိုၼ်ႈႁၢႆမႃးဢေႃႈ။-
မိူဝ်ႈဢွၼ်တၢင်းၼၼ်ႉသူၽိတ်းပိူင်ႈယူႇမိူၼ်ၸိူဝ်ႉၼင်ႇသူဝ်းဢၼ်ႁၢႆၵႂႃႇၼၼ်ႉဢေႃႈ။ တေႃႈလဵဝ်ၼႆႉၸမ်ႉ၊သူလႆႈၶၢမ်ႇတၢင်းဢၼ်ဢဝ်ပွၵ်ႈၶိုၼ်းမႃးႁႂ်ႈလႆႈၸွမ်းလင်ၵေႃႉဢၼ်လဵင်ႉထိင်းသူဝ်းဢၼ်ဝႃႈ၊ၸဝ်ႈဢၼ်ပႂ်ႉထိင်းဢုပ်ႉပိူင်ႇဝိၺိၺ်ႇသူၼၼ်ႉယဝ်ႉယဝ်ႉဢေႃႈ။
ၵႃႈၼင်ႇဢၼ်ဝႃႈမႃးဢွၼ်တၢင်းယဝ်ႉၼၼ်ႉ၊သူၸိူဝ်းဢၼ်ပဵၼ်မေးတင်းလၢႆၶဝ်႟။ ဢွၼ်ၵၼ်ႁပ်ႉတုင်းၶၢမ်ႇဢဝ်တၢင်းဢၼ်ၽူဝ်သူဢုပ်ႉပိူင်ႇၼၼ်ႉတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ၵႃႈၼႂ်းၽူဝ်သူၵမ်ႈၽွင်ႈၼၼ်ႉပိၵ်ႉသမ်ႉဢမ်ႇထွမ်ႇဢမ်ႇဢဝ်ၼုၵ်ႈၵပၢတ်ႈတြႃးၸဝ်ႈသေၵေႃႈ၊ၵွပ်ႈပိူဝ်ႈတၢင်းၵမ်တၢင်းၵျၢင်ႉသူၼၼ်ႉလႄႈသူတၵ်းၸူဝ်းဢဝ်ၶဝ်လႆႈဢေႃႈ။ သူယင်းဢမ်ႇလႆႈလၢတ်ႈၵႂၢမ်းသေၶေႃႈလႄႈ၊-
ၶဝ်တၵ်းႁၼ်သူဢၼ်ပဵၼ်မေးၶဝ်မေႃၵမ်ၵျၢင်ႉဢၼ်ၸိုၼ်ႈၸၢင်ႇၶၢဝ်သႂ်၊ဢိၵ်ႇတင်းတၢင်းဢၼ်မေႃရူဝ်ႇသေႇၵူဝ်ယမ်ၼၼ်ႉလႄႈၶဝ်တၵ်းၶဝ်ႈမႃးၸွမ်းသူဢေႃႈ။-
သူဢမ်ႇထုၵ်ႇလီႁၢင်ႈၶိူင်ႈပႃႈၼွၵ်ႈ၊ဢၼ်ပဵၼ်တၢင်းဢၼ်ၽၼ်ႉဢၼ်ၽိူဝ်ၶူၼ်ႁူဝ်၊တၢင်းဢၼ်ႁွႆႈဢၼ်တိုဝ်းၶူဝ်းငိုၼ်းၶူဝ်းၶမ်း၊ဢိၵ်ႇတင်းတၢင်းဢၼ်ၼုင်ႈၶူဝ်းၼုင်ႈလဵင်းဢၼ်ၵႃႈဢၼ်ပႅင်းၸိူဝ်းၼၼ်ႉ။-
တၢင်းဢၼ်ႁၢင်ႈလီႁၢင်ႈငၢမ်းသူၼၼ်ႉၵေႃႈ ထုၵ်ႇလီႁၢင်ႈၶိူင်ႈႁူဝ်ၸႂ်ဢၼ်ပဵၼ်တၢင်းဢၼ်ႁၢင်ႈလီႁၢင်ႈငၢမ်းဢၼ်ဢမ်ႇလုလႅဝ်ဢၼ်ဝႃႈ၊ႁူဝ်ၸႂ်ဢၼ်ဢူၼ်ႈဢွၼ်ႇတင်းသၽေႃးဢၼ်ၼိမ်လီ၊ဢၼ်ထိူၵ်ႈၵႃႈထိူၵ်ႈၶၼ်ယႂ်ႇၼႃႇၵႃႈတီႈၽၢႆႇၼႃႈၽြႃးပဵၼ်ၸဝ်ႈၼၼ်ႉဢေႃႈ။-
မႄႈယိင်းမိူဝ်ႈၵွၼ်ႇဢၼ်မူတ်းၸၢင်ႇဢၼ်မုင်ႈထႃႈမွင်းထႃႈထႃႇဝရႃႉၽြႃးၸိူဝ်းၼၼ်ႉႁၢင်ႈၶိူင်ႈတူဝ်ၸဝ်ႈၵဝ်ႇၸိူဝ်ႉၼင်ႇၼၼ်ယူႇသေလႄႈႁပ်ႉၶၢမ်ႇဢဝ်တၢင်းဢၼ်ၽူဝ်ၶဝ်ဢုပ်ႉပိူင်ႇဢေႃႈ။-
ၸႃႇရႃႇ၊ ပဵၼ်ၵေႃႉဢၼ်ႁဵတ်းၸိူဝ်ႉၼင်ႇၼၼ်ဢေႃႈ။ မၼ်းထွမ်ႇသူပ်းဢဝ်ၵႂၢမ်းၽူဝ်မၼ်း ဢႃႇပြႃႇႁၢမ်ႇ၊ လႄႈႁွင်ႉၽူဝ်မၼ်းဝႃႈ၊ “ၸဝ်ႈ” ဝႃႈၼင်ႇၼႆဢေႃႈ။ တေႃႈလဵဝ်ၼႆႉပေႃးသူၵမ်ၵျၢင်ႉလီလီငၢမ်းငၢမ်းလႄႈယင်းဢမ်ႇၵူဝ်ဢမ်ႇသၼ်ႇသေဢိတ်းၸိုင်၊သူပဵၼ်လုၵ်ႈယိင်း ၸႃႇရႃႇ၊ ဢေႃႈ။
မိူၼ်ၸိူဝ်ႉၼင်ႇၼၼ်သူၸိူဝ်းဢၼ်ပဵၼ်ၽူဝ်တင်းလၢႆၶဝ်႟။ ၼႂ်းတၢင်းဢၼ်ယူႇလူၺ်ႈၵၼ်တင်းမေးသူၼၼ်ႉမၢတ်ႈၶဝ်ပဵၼ်ၵေႃႉဢၼ်ႁႅင်းလဵၵ်ႉသေသူသေယဝ်ႉ၊ပႃးၸႂ်ဢဵတ်းလူလႄႈၸွႆႈထႅမ်လူတူၺ်းၶဝ်၊သမ်ႉမၢတ်ႈၶဝ်ပဵၼ်ၽူႈဢၼ်တၵ်းလႆႈၶၢမ်ႇဢဝ်ဢမူၺ်ႇၵျေးၸူးဢသၢၵ်ႈၸဝ်ႈလူၺ်ႈၵၼ်တင်းသူၼၼ်ႉတႃႉ။ လွင်ႈၼင်ႇႁိုဝ်တၵ်းတေဢမ်ႇပဵၼ်တၢင်းဢၼ်ႁႄႉဢၼ်ၶႅၼ်တၢင်းသူးတွင်းပထၼႃႇသူၸိုင်၊ႁဵတ်းၸိူဝ်ႉၼင်ႇၼၼ်တႃႉ။
ၵႂၢမ်းဢၼ်ႁူမ်ႇလူမ်ႈၸမ်ႉ၊သူၵူႈၵေႃႉၵူႈၵူၼ်းမီးႁူဝ်ၸႂ်ဢၼ်ၽွမ်ႉသဵင်ပဵင်းပၢၵ်ႇၵၼ်လႄႈၶႆႈၸႂ်တေႃႇၵၼ်၊ႁၵ်ႉပႅင်းၵၼ်မိူၼ်ၸိူဝ်ႉၼင်ႇပဵၼ်ပီႈၼွင်ႉၵၼ်၊ၸၢင်ႈဢဵတ်းလူၸူမ်းပႅင်းၵၼ်သေယဝ်ႉ၊ၵေႃႉၼိုင်ႈလႄႈၵေႃႉၼိုင်ႈမီးၸႂ်ၶျႃးတႅမ်ႇတေႃႇၵၼ်တႃႉ။-
ယႃႇပေဢဝ်ဢၼ်ႁၢႆႉၶိုၼ်းတွပ်ႇဢၼ်ႁၢႆႉလႄႈယႃႇပေၶိုၼ်းသႄႉသွမ်းတီႈၵေႃႉဢၼ်သႄႉသွမ်းသူၼၼ်ႉ၊ဢဝ်တင်းတၢင်းလီမၢင်ႇၵလႃႇၶိုၼ်းတွပ်ႇပၼ်တႃႉ။ လွင်ႈမၼ်းၸမ်ႉ၊သူပဵၼ်ၵေႃႉဢၼ်ၽြႃးပဵၼ်ၸဝ်ႈႁွင်ႉဢဝ်ႁႂ်ႈလႆႈၶၢမ်ႇဢဝ်ဢမူၺ်ႇတၢင်းလီမၢင်ႇၵလႃႇၼၼ်ႉဢေႃႈ။
မႅၼ်ႈၸိူဝ်ႉၼင်ႇဢၼ်တႅမ်ႈဝႆႉၵႃႈၼႂ်းၵျၢမ်းလိၵ်ႈလႄႈဝႃႈ၊ “ၽူႈလႂ်သေဢမ်ႇဝႃႈ၊ၵေႃႉဢၼ်ၶႂ်ႈလႆႈႁူဝ်ၸႂ်ဢၼ်ၸူမ်းသိူဝ်းလႄႈ၊ ၶႂ်ႈႁၼ်ဝၼ်းဢၼ်လီဢၼ်ငၢမ်းၼမ်ၼႃႇၼၼ်ႉၸမ်ႉ၊ ႁႂ်ႈလိၼ်ႉမၼ်းဝႄႈပႅတ်ႈၵႂၢမ်းဢၼ်ဢမ်ႇလီဢမ်ႇငၢမ်းသေလႄႈ၊ ႁႂ်ႈသူပ်းမၼ်းၵၢင်းလွတ်ႈတင်းၵႂၢမ်းမုသႃႇတႃႉ။
ႁႂ်ႈမၼ်းဝႄႈပႅတ်ႈတုၸရိူၵ်ႈသေလႄႈတႄႇႁဵတ်းသုၸရိူၵ်ႈတႃႉ။ ႁႂ်ႈမၼ်းႁႃတၢင်းဢၼ်ၸၢင်ႈယူႇထုၵ်ႇမေႃၵၼ်တင်းပိူၼ်ႈလႄႈယူႇသဝ်းၵႂႃႇတႃႉ။
လွင်ႈမၼ်းၸမ်ႉ၊မၢၵ်ႇတႃထႃႇဝရႃႉၽြႃးလူတူၺ်းၶဝ်ၸိူဝ်းဢၼ်သိုဝ်ႈတေႃႇလႄႈ၊ ႁူမၼ်းၸဝ်ႈၵေႃႈထွမ်ႇဢဝ်ၵႂၢမ်းသူးတွင်းၶဝ်ၼၼ်ႉယူႇဢေႃႈ။ ၵူၺ်းၵႃႈ၊တီႈၵေႃႉဢၼ်ႁဵတ်းတုၸရိူၵ်ႈၼၼ်ႉထႃႇဝရႃႉၽြႃးဝၢႆႇၼႃႈပႅတ်ႈဢေႃႈ၊” ဝႃႈၼင်ႇၼႆၼၼ်ႉဢေႃႈ။
ပေႃးသူၵႆႉၵမ်ၵျၢင်ႉလီလီငၢမ်းငၢမ်းၸိုင်၊ၽူႈလႂ်တေမႃးယႃႉယုၵ်ႉသူ။-
ပေႃးသူထွၵ်ႈလူၺ်ႈတြႃးတၢင်းဢၼ်သိုဝ်ႈတေႃႇလႄႈသမ်ႉလႆႈၶၢမ်ႇတၢင်းဢၼ်ယၢၵ်ႈၽၢၼ်ၸိုင်၊သူမီးမၢင်ႇၵလႃႇဢေႃႈ။ ယႃႇပေၵူဝ်ႁႄၸွမ်းလွင်ႈတၢင်းဢၼ်ပိူၼ်ႈလႆႈၵူဝ်ႁႄၼၼ်ႉဢမ်ႇၵႃး၊ယႃႇပေတူၵ်းၸႂ်။-
ၵႃႈၼႂ်းႁူဝ်ၸႂ်သူၼၼ်ႉရူဝ်ႇသေႇၵူဝ်ယမ် ၸဝ်ႈၶရိၸ်ႈ၊ ယူႇလႄႈႁုမၢတ်ႈမၼ်းၸဝ်ႈပဵၼ်၊ၸဝ်ႈၽြႃးတႃႉ။ ၼင်ႇႁိုဝ်သူတၵ်းၵႄႈလိတ်ႈၵႂၢမ်းဢၼ်ပိူၼ်ႈတွင်ႈထၢမ်လွင်ႈတၢင်းဢၼ်သူမုင်ႈထႃႈမွင်းထႃႈၼၼ်ႉလႆႈၸိုင်၊တၼ်းဝႆႉတႃႇသေႇဢမ်ႇထၢတ်ႇတႃႉ။ ၵူၺ်းၵႃႈ၊ပႃးတင်းၸႂ်ဢၼ်ဢူၼ်ႈဢွၼ်ႇတင်းၸႂ်ဢၼ်ၼပ်ႉယမ်သေလႄႈၶိုၼ်းလၢတ်ႈတႃႉ။-
ပႂ်ႉထိင်းၸႂ်ဢၼ်ႁုတူဝ်ၸဝ်ႈၵဝ်ႇလီလီတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ၶဝ်ၸိူဝ်းဢၼ်သႄႉသွမ်းသူလူၺ်ႈလွင်ႈတၢင်းဢၼ်သူၵမ်ၵျၢင်ႉဢၼ်လီဢၼ်ငၢမ်းၸွမ်းၼင်ႇတြႃး ၸဝ်ႈၶရိၸ်ႈ၊ ၼၼ်ႉ၊ၶဝ်တၵ်းလႆႈဢၢႆၵႂၢမ်းၶဝ်ၶိုၼ်းဢေႃႈ။-
လွင်ႈမၼ်းၸမ်ႉ၊ပေႃးၽြႃးပဵၼ်ၸဝ်ႈမီးဢလူဝ်ႇႁႂ်ႈႁဝ်းၶၢမ်ႇတၢင်းဢၼ်ယၢၵ်ႈၽၢၼ်ပုၼ်ႈတၢင်းႁဵတ်းဢၼ်လီဢၼ်ငၢမ်းၸိုင်၊ယဵင်ႈၶႅၼ်းမျၢတ်ႈၼႃႇသေတၢင်းဢၼ်လႆႈၶၢမ်ႇၵွပ်ႈပိူဝ်ႈတၢင်းႁဵတ်းဢၼ်ႁၢႆႉဢၼ်မိူၵ်ႈၼၼ်ႉဢေႃႈ။-
ၸဝ်ႈၶရိၸ်ႈ၊ ပဵၼ်ၵူၼ်းသိုဝ်ႈတေႃႇသေၵေႃႈလႆႈၶၢမ်ႇတၢင်ၵူၼ်းဢၼ်ဢမ်ႇသိုဝ်ႈဢမ်ႇတေႃႇတင်းလၢႆလႄႈမၼ်းၸဝ်ႈၶၢမ်ႇတၢႆပွၵ်ႈလဵဝ်၊ပုၼ်ႈဢပျတ်ႈၵူၼ်းတင်းလၢႆႁႂ်ႈလႆႈဢဝ်ႁဝ်းသူင်ႇႁွတ်ႈထိုင်ၽြႃးပဵၼ်ၸဝ်ႈဢေႃႈ။ မၼ်းၸဝ်ႈၶၢမ်ႇတၢႆၼႂ်းတူဝ်ၼိူဝ်ႉလိူတ်ႈသေလႄႈလႆႈလုၵ်ႉၶိုၼ်းလိပ်းမႃးၼႂ်းၸႂ်ဝိၺိၺ်ႇသေယဝ်ႉ၊-
လူၺ်ႈၸႂ်ဝိၺိၺ်ႇၼၼ်ႉလႄႈၵႂႃႇႁေႃးလၢတ်ႈတြႃးၵႃႈတီႈဝိၺိၺ်ႇတင်းလၢႆဢၼ်တူၵ်းထွင်ႇယူႇၸိူဝ်းၼၼ်ႉဢေႃႈ။-
ဝိၺိၺ်ႇၸိူဝ်းၼၼ်ႉပဵၼ်ဝိၺိၺ်ႇၶဝ်ၸိူဝ်းဢၼ်ဢမ်ႇထွမ်ႇဢမ်ႇဢဝ်ၵႂၢမ်းၽြႃးပဵၼ်ၸဝ်ႈ၊ၼႂ်းမိူဝ်ႈဢၼ်မၼ်းၸဝ်ႈၶၼ်ႇထီႇယိူၼ်ႉၸႂ်၊ၼႂ်းၸူဝ်ႈပၢၼ်ဢၼ် ၼူဝ်းဢႃႇ၊ ယင်းတိုၵ်ႉတႄႇႁဵတ်းႁိူဝ်းသၢင်းၽေႃးယူႇၼၼ်ႉဢေႃႈ။ ၵူၼ်းဢၼ်ၵေႇၼႃႇၵႃႈၼႂ်းႁိူဝ်းသၢင်းၽေႃးပႅတ်ႇၵေႃႉၵူၺ်းၼၼ်ႉ လႆႈလွတ်ႈသေတၢင်းဢၼ်ၼမ်ႉထူမ်ႈၼၼ်ႉ၊-
မိူၼ်ၼင်ႇၼၼ်၊မိူဝ်ႈလဵဝ်ၼႆႉမၢင်ႇၵလႃႇပပ်ႉတိၸမ်ႇ ၵေႃႈ၊ၸွႆႈႁႂ်ႈသူလႆႈၶၢမ်ႇဢဝ်တၢင်းဢၼ်ၵႄႇၶျွတ်ႈဢဝ်ၼၼ်ႉဢေႃႈ။ မၢင်ႇၵလႃႇပပ်ႉတိၸမ်ႇၼႆႉၶႂ်ႈဝႃႈ၊တၢင်းဢၼ်သီၶႆးတူဝ်ၵႃႇယႃႉဢမ်ႇၸႂ်ႈလႄႈမၼ်းပဵၼ်တၢင်းဢၼ်ၸႂ်ႁုတူဝ်ၸဝ်ႈၵဝ်ႇမူတ်းသႂ်သေလႄႈဝႆႉၵတိသဵတ်ႈၸႃႇၵႃႈတီႈၽၢႆႇၼႃႈၽြႃးပဵၼ်ၸဝ်ႈဢေႃႈ။ ၼႆႉၸမ်ႉ၊ပဵၼ်တၢင်းဢၼ်ၵႄႇၶျွတ်ႈဢဝ်၊ၵွပ်ႈပိူဝ်ႈ ၸဝ်ႈယေႇသုၶရိၸ်ႈ၊ ဢၼ်လုၵ်ႉသေၵႃႈတၢင်းတၢႆၶိုၼ်းလိပ်းမႃးသေယဝ်ႉ။-
ၶိုၼ်ႈၵႂႃႇၸူးၵႃႈၼိူဝ်မိူင်းၵၢင်ႁၢဝ်သေမီးယူႇၵႃႈတီႈၽၢႆႇၶႂႃမိုဝ်းၽြႃးပဵၼ်ၸဝ်ႈလႄႈဢုပ်ႉပိူင်ႇၵႃႈၼိူဝ်တမၢၼ်ႇၵၢင်ႁၢဝ်တင်းလၢႆ၊ဢိၵ်ႇတင်းဢႃႇၼႃႇၸၢၵ်ႈၽုင်ႇၵၢင်ႁၢဝ်တင်းလၢႆ၊ဢိၵ်ႇတင်းၵႃႈၼိူဝ်တၼ်းၶူဝ်းတင်းလၢႆယူႇၼၼ်ႉဢေႃႈ။
ၵွပ်ႈပိူဝ်ႈဢၼ် ၸဝ်ႈၶရိၸ်ႈ၊ ၶၢမ်ႇတုၵ်ႉၶႃႉတၢင်းၽၢၼ်ၼႂ်းတူဝ်ၼိူဝ်ႉလိူတ်ႈၸိူဝ်ႉၼင်ႇၼၼ်ယဝ်ႉလႄႈသူၵေႃႈ၊ဢဝ်သၽေႃးၸိူဝ်ႉၼင်ႇၼၼ်လႄႈႁႂ်ႈမီးဢဵၼ်မီးႁႅင်းတႃႉ။ လွင်ႈမၼ်းၸမ်ႉ၊ၵေႃႉဢၼ်ၶၢမ်ႇတုၵ်ႉၶႃႉတၢင်းၽၢၼ်ၽၢႆႇၼိူဝ်ႉလိူတ်ႈၼၼ်ႉလႆႈၵၢင်းလွတ်ႈတင်းဝူတ်ႈဢပျတ်ႈယဝ်ႉဢေႃႈ။-
ပိူဝ်ႈၼႆလႄႈတႄႇဢဝ်ၸဵမ်မိူဝ်ႈလဵဝ်ၼႆႉၵႂႃႇ၊ၸူဝ်ႈဢၼ်သူယင်းယူႇၼႂ်းတူဝ်ၼိူဝ်ႉလိူတ်ႈၼႆႉ၊ယင်းဢမ်ႇၵမ်ဢမ်ႇၵျၢင်ႉၸွမ်းဢလူဝ်ႇၸႃႇတိၵတိဢၼ်ၵူၼ်းတင်းလၢႆၸပ်းၸွႆးၼၼ်ႉလႄႈဢွၼ်ၵၼ်ၵမ်ၵျၢင်ႉၸွမ်းဢလူဝ်ႇၽြႃးပဵၼ်ၸဝ်ႈယူႇတႃႉ။-
ၶိင်ႇၵႃႇလႃႉဢၼ်သူၵမ်ၵျၢင်ႉၸွမ်းဢလူဝ်ႇၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ပူၼ်ႉမႃးယဝ်ႉၸိူဝ်းၼၼ်ႉပေႃးၵုမ်ႇပုၼ်ႈသူယဝ်ႉ။ တၢင်းၵမ်တၢင်းၵျၢင်ႉဢၼ်သူၵမ်ၵျၢင်ႉမႃးယဝ်ႉၸိူဝ်းၼၼ်ႉၸမ်ႉ၊ပဵၼ်တၢင်းၵမ်တၢင်းၵျၢင်ႉဢၼ်ဢမ်ႇထုၵ်ႇဢမ်ႇဢၢပ်ႈ၊တၢင်းဢၼ်ၸႂ်ၸပ်းၸွႆးၵႃႇမၵုင်ႇ၊တၢင်းဢၼ်ၵိၼ်လဝ်ႈမဝ်းယႃႈ၊တၢင်းဢၼ်ၵိၼ်မဝ်းလႄႈဢူၼ်မေႃး၊တၢင်းဢၼ်ၵိၼ်မဝ်းၼႂ်းပၢင်ပွႆး၊ဢိၵ်ႇတင်းတၢင်းဢၼ်ဝႆႈႁုၼ်ႇႁၢင်ႈသၢင်းထုဢၼ်လီႁင်ႈဢဵတ်ႇသဵတ်ႇၸိူဝ်းၼၼ်ႉဢေႃႈ။-
ၶဝ်ၸိူဝ်းၼၼ်ႉဢၢမ်းသူၵွပ်ႈပိူဝ်ႈဢၼ်တေႃႈလဵဝ်ၼႆႉသူဢမ်ႇၶဝ်ႈပႃးၸွမ်းၼႂ်းတၢင်းဢၼ်ၶဝ်မိူၵ်ႈလိူင်း၊ဢိၵ်ႇတင်းၼႂ်းတၢင်းဢၼ်ၶဝ်ယူႇမဝ်ၵိၼ်မၢင်ၸိူဝ်းၼၼ်ႉလႄႈၶဝ်သႄႉသွမ်းသူဢေႃႈ။-
ပိူဝ်ႈၼႆလႄႈ ၶဝ်တၵ်းလႆႈၶၢမ်ႇတၢင်းဢၼ်ၸႅတ်ႈဢၼ်ထၢမ်ၽၢႆႇၼႃႈၽြႃးပဵၼ်ၸဝ်ႈ၊ၸဝ်ႈဢၼ်တၼ်းဝႆႉ၊ႁႂ်ႈလႆႈတႅပ်းတတ်းတြႃးတီႈၶဝ်ၸိူဝ်းဢၼ်ဢသၢၵ်ႈလိပ်း၊ဢိၵ်ႇတင်းၶဝ်ၸိူဝ်းဢၼ်တၢႆယဝ်ႉၼၼ်ႉဢေႃႈ။-
ၵွပ်ႈပိူဝ်ႈလွင်ႈတၢင်းၼႆႉလႄႈလႆႈဢဝ်ၶၢဝ်ႇတြႃးသိူဝ်းပျေႃႇၸဝ်ႈႁေႃးလၢတ်ႈတီႈၶဝ်ၸိူဝ်းဢၼ်တၢႆၼၼ်ႉလႄႈပိၵ်ႉသမ်ႉတူဝ်ၼိူဝ်ႉလိူတ်ႈၶဝ်လႆႈၶၢမ်ႇတၢင်းဢၼ်တႅပ်းတတ်းတြႃး၊မိူၼ်ၸိူဝ်ႉၼင်ႇဢၼ်ၵူၼ်းတင်းလၢႆလႆႈၶၢမ်ႇၼၼ်ႉသေၵေႃႈ၊တြႃးၸဝ်ႈလႆႈႁေႃးလၢတ်ႈတီႈၶဝ်ႁႂ်ႈၸႂ်ဝိၺိၺ်ႇၶဝ်လႆႈဢသၢၵ်ႈလိပ်းယူႇ၊မိူၼ်ၸိူဝ်ႉၼင်ႇဢၼ်ၽြႃးပဵၼ်ၸဝ်ႈဢသၢၵ်ႈလိပ်းယူႇၼၼ်ႉဢေႃႈ။
ၶိူင်ႈပိူင်ၵႃႈမီးတင်းသဵင်ႈတင်းလူင်ၸမ်တၵ်းႁွတ်ႈထိုင်တီႈသုတ်းတီႈၵွႆယဝ်ႉဢေႃႈ။ ပိူဝ်ႈၼႆလႄႈဢွၼ်ၵၼ်ပႂ်ႉထိင်းတူဝ်ၸဝ်ႈၵဝ်ႇလႄႈတူင်ႉတိုၼ်ႇဝႆႉ၊ႁႂ်ႈလႆႈသူးတွင်းတႃႉ။-
ဢၼ်လိူဝ်တွၼ်းသေတၢင်ႇမဵဝ်းၸမ်ႉ၊ဢွၼ်ၵၼ်ႁၵ်ႉပႅင်းၵၼ်တႃႉ။ ပိူဝ်ႈဝႃႈ၊တၢင်းႁၵ်ႉမႅတ်ႈတႃႇၸၢင်ႈပွႆႇလွတ်ႈဢပျတ်ႈဢၼ်ၼမ်ၵိုၼ်းၼႃႇၼၼ်ႉဢေႃႈ။-
ယင်းဢမ်ႇမီးၸႂ်ထီႇၸႂ်ၼဵဝ်လႄႈၼင်ႇၵၼ်ၵၼ်ႁဵတ်းဝၢတ်ႈၶၢမ်ႇၶႅၵ်ႇတီႈၵၼ်တႃႉ။-
ၽႂ်ၽႂ်မၼ်းမၼ်းႁႂ်ႈမေႃၸႂ်ႉ၊သုၵျေးၸူးၽြႃးပဵၼ်ၸဝ်ႈဢၼ်ၽၢၵ်ႇဝႆႉပၼ်တီႈႁဝ်းလၢႆၸိူဝ်ႉလၢႆပိူင်ၼၼ်ႉသေလႄႈဢွၼ်ၵၼ်ၸႂ်ႉဢၼ်သူလႆႈႁပ်ႉဢဝ်ၵႃႈတီႈၽြႃးပဵၼ်ၸဝ်ႈၼၼ်ႉဢဝ်ပွင်ႁဵတ်းဢၵျူဝ်းတၢင်းလီပုၼ်ႈၼင်ႇၵၼ်ၵၼ်လီလီငၢမ်းငၢမ်းတႃႉ။-
ၽူႈလႂ်သေဢမ်ႇဝႃႈ၊ၵေႃႉဢၼ်ႁေႃးလၢတ်ႈၼၼ်ႉ ႁႂ်ႈမၼ်းႁေႃးလၢတ်ႈၸိူဝ်ႉၼင်ႇၵႂၢမ်းဢွၵ်ႇသူပ်းၽြႃးပဵၼ်ၸဝ်ႈတႃႉ။ ၵေႃႉဢၼ်ပွင်ႁဵတ်းၼႃႈၵၢၼ်ၼၼ်ႉၵေႃႈ ႁႂ်ႈမၼ်းပွင်ၸွမ်းၵႃႈၼင်ႇဢၼ်ၽြႃးပဵၼ်ၸဝ်ႈပၼ်ႁႅင်းတူဝ်မၼ်းၼၼ်ႉတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ၽြႃးပဵၼ်ၸဝ်ႈတၵ်းလႆႈၶၢမ်ႇတၢင်းဢၼ်ယွင်ႈယေႃးၵွပ်ႈလူၺ်ႈ ၸဝ်ႈယေႇသုၶရိၸ်ႈ၊ ဢေႃႈ။ ႁႂ်ႈၽြႃးပဵၼ်ၸဝ်ႈၼၼ်ႉ၊မီးမုၼ်သရေႇတၼ်းၶူဝ်းၵူႈၵၢပ်ႈၵမ်ႇၽႃႇသိုပ်ႇသိုပ်ႇတၢမ်တၢမ်သေၵမ်းလူၺ်ႈ။ ဢႃမိၼ်ႈ။
ၵေႃႉဢၼ်ၵဝ်ႁၵ်ႉၶဝ်႟။ ယႃႇပေဢၢမ်းၼႂ်းတၢင်းဢၼ်သူလႆႈတုၵ်ႉၶႃႉယၢပ်ႇၸႂ်ၼႃႇလူင်လၢင် ၵွပ်ႈပိူဝ်ႈလႆႈၶၢမ်ႇၸၢမ်းတူၺ်းဢၼ်မႆႈႁွၼ်ႉၼႃႇၼၼ်ႉ၊ႁႂ်ႈမၢတ်ႈဝႃႈ၊လွင်ႈတၢင်းဢၼ်လီဢၢမ်းပေႃႇပဵၼ်မႃးတီႈသူၼၼ်ႉတႃႉ။-
ၵွပ်ႈပိူဝ်ႈသူၶဝ်ႈပႃးလႄႈၶၢမ်ႇတုၵ်ႉၶႃႉတၢင်းၽၢၼ်ႁူမ်ႈလူၺ်ႈၵၼ်တင်း ၸဝ်ႈၶရိၸ်ႈ၊ ၼၼ်ႉလႄႈဢွၼ်ၵၼ်သိူဝ်းပျေႃႇတႃႉ။ ၼင်ႇၼၼ်လႄႈသူတၵ်းလႆႈၸူမ်းသိူဝ်းလႄႈမူၼ်ႈပျေႃႇၼႃႇၼႂ်းမိူဝ်ႈဢၼ်မုၼ်သရေႇမၼ်းၸဝ်ႈတၵ်းပေႃႇမႃးၼၼ်ႉဢေႃႈ။-
သင်ဝႃႈ၊သူလႆႈၶၢမ်ႇတၢင်းဢၼ်သႄႉသွမ်းၵွပ်ႈပိူဝ်ႈဢၼ်သူပဵၼ်တပႄး ၸဝ်ႈၶရိၸ်ႈ၊ ၼၼ်ႉၸိုင်၊သူမီးမၢင်ႇၵလႃႇၵွပ်ႈပိူဝ်ႈဝိၺိၺ်ႇဢၼ်မီးမုၼ်သရေႇယႂ်ႇၼႃႇလႄႈဝိၺိၺ်ႇၽြႃးပဵၼ်ၸဝ်ႈၼၼ်ႉတႄႇသဝ်းယူႇၵႃႈၼိူဝ်သူဢေႃႈ။-
ၼႂ်းသူၼၼ်ႉယႃႇႁႂ်ႈၽူႈလႂ်သေၵေႃႉသေၵူၼ်းလႆႈၶၢမ်ႇတုၵ်ႉၶႃႉတၢင်းၽၢၼ်ၵွပ်ႈပိူဝ်ႈဢပျတ်ႈဢၼ်ဢဝ်ဢသၢၵ်ႈၵူၼ်းတၢႆ၊ဢပျတ်ႈဢၼ်လၵ်ႉပိူၼ်ႈ၊ဢပျတ်ႈဢၼ်ႁဵတ်းၽိတ်းႁဵတ်းပိူင်ႈ၊ဢမ်ႇၼၼ်ဢပျတ်ႈဢၼ်သုၵ်ႉသၢၵ်ႉလႄႈၵဝ်းၸွမ်းၼႂ်းၵၢၼ်ငၢၼ်းပိူၼ်ႈတၢင်ႇၵေႃႉၼၼ်ႉတႃႉ။-
သင်ဝႃႈ၊သူလႆႈၶၢမ်ႇၵွပ်ႈပိူဝ်ႈသူပဵၼ်ၶရိၸ်ႈယၢၼ်ႇၼၼ်ႉၸိုင်၊ယင်းဢမ်ႇဢူၵ်းဢမ်ႇဢၢႆၵွပ်ႈလွင်ႈတၢင်းၼၼ်ႉလႄႈယွင်ႈယေႃးတၢင်ႇၵျေးၸူးၽြႃးပဵၼ်ၸဝ်ႈပိူဝ်ႈဢၼ်သူလႆႈၶၢမ်ႇတၢင်းဢၼ်ႁွင်ႉၸွမ်းၸိုဝ်ႈသဵင် ၸဝ်ႈၶရိၸ်ႈ၊ ၼၼ်ႉတႃႉ။
လွင်ႈမၼ်းၸမ်ႉ၊ၶိင်ႇယၢမ်းဢၼ်တၵ်းတႅပ်းတတ်းတြႃးၼၼ်ႉၸမ်တၵ်းႁွတ်ႈမႃးယဝ်ႉလႄႈၵူၼ်းႁိူၼ်းၵူၼ်းယေးၽြႃးပဵၼ်ၸဝ်ႈ၊တၵ်းလႆႈၶၢမ်ႇတၢင်းဢၼ်တႅပ်းတတ်းဢွၼ်တၢင်းဢေႃႈ။ ပေႃးတႄႇၸႃႉတႅပ်းတတ်းတီႈႁဝ်းဢွၼ်တၢင်းၸိုင်၊တီႈၶဝ်ၸိူဝ်းဢၼ်ဢမ်ႇယုမ်ႇမၢတ်ႈၶၢဝ်ႇတြႃးသိူဝ်းပျေႃႇ၊ဢၼ်လုၵ်ႉသေၵႃႈတီႈၽြႃးပဵၼ်ၸဝ်ႈမႃးၼၼ်ႉၸိုင်၊ၶဝ်ၼၼ်ႉတၵ်းပဵၼ်ၸိူဝ်ႉၼင်ႇႁိုဝ်။-
မႅၼ်ႈၸွမ်းၼင်ႇတႅမ်ႈဝႆႉၵႃႈၼႂ်းၵႂၢမ်းၵျၢမ်းလိၵ်ႈလႄႈဝႃႈ၊ “ပေႃးၵေႃႉဢၼ်သိုဝ်ႈတေႃႇၼၼ်ႉလႆႈၶၢမ်ႇတၢင်းဢၼ်ၵႄႇၶျွတ်ႈဢဝ်ယၢပ်ႇၼႃႇၸိုင်၊ ၵေႃႉဢၼ်ဢမ်ႇၼပ်ႉယမ်ၽြႃးတြႃး၊တင်းၵေႃႉဢၼ်မီးဢပျတ်ႈၼၼ်ႉတၵ်းလွတ်ႈလႆႈၸိူဝ်ႉၼင်ႇႁိုဝ်၊” ဝႃႈၼင်ႇၼႆၼၼ်ႉဢေႃႈ။-
ၵွပ်ႈပိူဝ်ႈၼႆလႄႈၶဝ်ၸိူဝ်းဢၼ်လႆႈၶၢမ်ႇတုၵ်ႉၶႃႉတၢင်းၽၢၼ်ဢၼ်ၸွမ်းၼင်ႇဢလူဝ်ႇၽြႃးပဵၼ်ၸဝ်ႈမီးဝႆႉပုၼ်ႈၶဝ်ၼၼ်ႉႁႂ်ႈၶဝ်ၵမ်ၵျၢင်ႉတၢင်းၵမ်တၢင်းၵျၢင်ႉဢၼ်လီဢၼ်ငၢမ်းယူႇလႄႈဢဝ်ဢသၢၵ်ႈဝိၺိၺ်ႇတူဝ်ၸဝ်ႈၵဝ်ႇ၊ဢၢပ်ႈဝၢင်းၵႃႈတီႈၸဝ်ႈဢၼ်ၽၢၼ်ႇသၢင်းႁဵတ်းပဵၼ်၊ၸဝ်ႈဢၼ်ပႂ်ႉၵတိသဵတ်ႈၸႃႇတႃႇသေႇၼၼ်ႉလႄႈယူႇတႃႉ။
ၵဝ်၊ဢၼ်ပဵၼ်ၵေႃႉဢၼ်လႆႈၶၢမ်ႇတၢင်းဢၼ်ယုၵ်ႉတၢင်ႇဝႆႉ၊ၵႃႈၼႂ်းဢရႃႇၵူၼ်းဢုပ်ႉၸိူဝ်းၸဝ်ႈၼႆႉ၊တိုၵ်းယူင်းၵူၼ်းဢုပ်ႉၸိူဝ်းၸဝ်ႈတင်းလၢႆ၊ဢၼ်မီးယူႇၵႃႈၼႂ်းသူၼၼ်ႉဢေႃႈ။ ၵဝ်ၼႆႉ၊ပဵၼ်ၵေႃႉဢၼ်ၶၢမ်ႇသၢၵ်ႈသေႇလွင်ႈတုၵ်ႉၶႃႉတၢင်းၽၢၼ် ၸဝ်ႈၶရိၸ်ႈ၊ ဢိၵ်ႇတင်းၵေႃႉဢၼ်တၵ်းၶဝ်ႈပႃးၼႂ်းမုၼ်သရေႇၸဝ်ႈဢၼ်တၵ်းပေႃႇမႃးၼၼ်ႉဢေႃႈ။-
ဢၼ်ၵဝ်တိုၵ်းယူင်းသူၸမ်ႉ၊ဢွၼ်ၵၼ်လဵင်ႉထိင်းၽုင်သူဝ်းၽြႃးပဵၼ်ၸဝ်ႈ၊ၽုင်သူဝ်းဢၼ်ဢၢပ်ႈဝႆႉ၊ၼႂ်းမိုဝ်းသူၼၼ်ႉတႃႉ။ ယင်းဢမ်ႇမၢတ်ႈပဵၼ်ၵၢၼ်ဢၼ်ႁဵတ်းလူၺ်ႈၵႂၢမ်းသင်ႇလႄႈႁႂ်ႈပဵၼ်တၢင်းဢၼ်ႁဵတ်းၸွမ်းဢလူဝ်ႇၽြႃးပဵၼ်ၸဝ်ႈဢၼ်ပႃးၸႂ်ပႃးၶေႃးလႄႈလဵင်ႉလူလဵင်ႉထိင်းတႃႉ။ ယင်းဢမ်ႇတူၺ်းႁၼ်ငိုၼ်းၵူၺ်းလႄႈပႃးတင်းၸႂ်ၸေႇတၼႃႇသေယဝ်ႉ၊ပွင်ႁဵတ်းၼႃႈၵၢၼ်မၼ်းၸဝ်ႈတႃႉ။-
ယင်းဢမ်ႇဝႆႉဢႃႇၼႃႇလႄႈဢုပ်ႉၵႃႈၼိူဝ်ၸိူဝ်းၸဝ်ႈဢၼ်ဢၢပ်ႈဝႆႉၵႃႈၼႂ်းမိုဝ်းသူၼၼ်ႉသေလႄႈပဵၼ်ပုင်ႇသၢၵ်ႈသေႇၵႃႈတီႈၽုင်သူဝ်းၸဝ်ႈတႃႉ။-
ပေႃးႁဵတ်းၸိူဝ်ႉၼင်ႇၼၼ်ၸိုင်၊မိူဝ်ႈဢၼ်ၸဝ်ႈလဵင်ႉထိင်းသူဝ်းလူင်ပေႃႇမႃးၼၼ်ႉသူတေလႆႈႁပ်ႉဢဝ်သရၽူႇဢၼ်မီးသရေႇ၊ဢၼ်ဢမ်ႇၸၢင်ႈႁဵဝ်ႇၸၢင်ႈၸွပ်ႈၼၼ်ႉဢေႃႈ။
မိူၼ်ၸိူဝ်ႉၼင်ႇၼၼ်သူၸိူဝ်းဢၼ်ပဵၼ်ၵူၼ်းဢွၼ်ႇၶဝ်႟။ ထွမ်ႇသူပ်းဢဝ်ၵႂၢမ်းၵူၼ်းဢုပ်ႉၸိူဝ်းၸဝ်ႈ၊ၸိူဝ်းၼၼ်ႉတႃႉ။ သူၵူႈၵေႃႉ၊ဢဝ်ႁူဝ်ၸႂ်ဢၼ်ၶျႃးတႅမ်ႇၼၼ်ႉၼုင်ႈမႆတူဝ်ၸဝ်ႈၵဝ်ႇသေ၊ၵေႃႉၼိုင်ႈလႄႈၵေႃႉၼိုင်ႈဢဝ်တူဝ်လူင်းတႅမ်ႇတီႈၵၼ်တႃႉ။ ပိူဝ်ႈဢၼ်ၵႃႈၼႂ်းၵျၢမ်းလိၵ်ႈတႅမ်ႈဝႆႉဝႃႈ၊ “ၽြႃးပဵၼ်ၸဝ်ႈၶတ်းၶႂၢင်ၶဝ်ၸိူဝ်းဢၼ်ႁူဝ်ၸႂ်ၽႅၼ်သုင်ၼၼ်ႉဢေႃႈ။ မၼ်းၸဝ်ႈၼႄပျႃးၵျေးၸူးၸဝ်ႈတီႈၶဝ်ၸိူဝ်းဢၼ်ႁူဝ်ၸႂ်ၶျႃးတႅမ်ႇၼၼ်ႉဢေႃႈ၊” ဝႃႈၼင်ႇၼႆၼၼ်ႉဢေႃႈ။-
ပိူဝ်ႈၼႆလႄႈဢွၼ်ၵၼ်ဢဝ်တူဝ်ၸဝ်ႈၵဝ်ႇၶျႃးတႅမ်ႇ၊ၵႃႈတႂ်ႈမိုဝ်းၽြႃးပဵၼ်ၸဝ်ႈဢၼ်တၼ်းၶူဝ်းယႂ်ႇၼႃႇၼၼ်ႉႁႂ်ႈမၼ်းၸဝ်ႈလႆႈယွင်ႈယေႃးသူၼႂ်းၶိင်ႇၵႃႇလႃႉမၼ်းၸဝ်ႈဢၼ်လီဢၼ်ထုၵ်ႇၼၼ်ႉတႃႉ။-
ပိူဝ်ႈဢၼ်မၼ်းၸဝ်ႈမႆႈၸႂ်ပႂ်ႉထိင်းသူယူႇလႄႈဢွၼ်ၵၼ်ဢဝ်လွင်ႈတၢင်းဢၼ်မႆႈၸႂ်ၽိုတ်ႇၸႂ်တင်းသဵင်ႈတင်းလူင်ၼၼ်ႉဢၢပ်ႈဝၢင်းၵႃႈတီႈမၼ်းၸဝ်ႈတႃႉ။
ဢွၼ်ၵၼ်မီးသမ်ႇမႃႇသတိလႄႈပႂ်ႉယူႇတႃႉ။ ရၢၼ်ႇသူႇသူဢၼ်ဝႃႈ၊မႃႇၼၢတ်ႈၼၼ်ႉပဵၼ်ၸိူဝ်ႉၼင်ႇသၢင်ႇသီႈဢၼ်ႁွင်ႉယူႇလႄႈ၊မၼ်းလႄႇလဵပ်ႈပုၼ်ႈတၵ်းလႆႈၶူပ်းၵိၼ်ၽူႈလႂ်ၼၼ်ႉယူႇဢေႃႈ။-
ဢွၼ်ၵၼ်တႄႇယူႇၼႂ်းတၢင်းယုမ်ႇမၢတ်ႈလႄႈၶတ်းၶႂၢင်ႁႄႉၶႅၼ်မႃႇၼၢတ်ႈတႃႉ။ သူႁုလွင်ႈဢၼ်ပီႈၼွင်ႉသူၸိူဝ်းဢၼ်ယုမ်ႇမၢတ်ႈမိူၼ်သူၼႂ်းမိူင်းၵူၼ်းၼႆႉၵူႈတီႈၵူႈလႅၼ်ၵေႃႈလႆႈၶၢမ်ႇတုၵ်ႉၶႃႉတၢင်းၽၢၼ်မိူၼ်ၵၼ်တင်းသူၼၼ်ႉယူႇဢေႃႈ။-
ၵူၺ်းၵႃႈ၊ဝၢႆးသေဢၼ်သူလႆႈၶၢမ်ႇတုၵ်ႉၶႃႉတၢင်းၽၢၼ်ယဝ်ႉ၊ၵမ်းဢွၼ်ႇၼိုင်ႈၼၼ်ႉ၊ၽြႃးပဵၼ်ၸဝ်ႈဢၼ်ႁဵတ်းၵျေးၸူးတင်းသဵင်ႈတင်းလူင်၊ၽြႃးဢၼ်ႁွင်ႉဢဝ်သူႁႂ်ႈလႆႈၶဝ်ႈပႃးလႄႈၶၢမ်ႇဢဝ်မုၼ်သရေႇထႃႇဝရႃႉ၊ၵွပ်ႈလူၺ်ႈ ၸဝ်ႈၶရိၸ်ႈ၊ ၼၼ်ႉ၊တူဝ်မၼ်းၸဝ်ႈတၵ်းႁႂ်ႈသူၸေးၸုမ်ႇလႄႈမီးဢဵၼ်မီးႁႅင်းယူႇ၊တႄႇမၼ်ႈယူႇၼႂ်းငဝ်ႈႁၢၵ်ႈဢၼ်မၢၼ်ႇဢၼ်မႅၼ်ႈၼၼ်ႉယူႇဢေႃႈ။-
ႁႂ်ႈမၼ်းၸဝ်ႈမီးမုၼ်သရေႇတၼ်းၶူဝ်းၸဝ်ႈၵူႈၵၢပ်ႈၵမ်ႇၽႃႇသိုပ်ႇသိုပ်ႇတၢမ်တၢမ်သေၵမ်းလူၺ်ႈ။ ဢႃမိၼ်ႈ။
ၵဝ်ၸႂ်ႉ သီႇလႃႉ၊ ၵေႃႉဢၼ်ၵဝ်မၢတ်ႈမၼ်းပဵၼ်ၼွင်ႉၵဝ်ဢၼ်မီးသဵတ်ႈၸႃႇၵႃႈၼႂ်းၼႃႈၵၢၼ်ၸဝ်ႈၼၼ်ႉ၊ၸွႆႈတႅမ်ႈလိၵ်ႈဢွၼ်ႇပွတ်းၼႆႉၽၢၵ်ႇထိုင်သူ၊ႁႂ်ႈလႆႈပၼ်ဢဵၼ်ပၼ်ႁႅင်းသူ၊ဢိၵ်ႇတင်းႁႂ်ႈလႆႈၶၢမ်ႇသၢၵ်ႈသေႇလွင်ႈဢၼ်ၼႆႉပဵၼ်ၵျေးၸူးၽြႃးပဵၼ်ၸဝ်ႈၸႅတ်ႈၸႅတ်ႈၼၼ်ႉဢေႃႈ။ ဢွၼ်ၵၼ်တႄႇၼိမ်မၼ်ႈၶိူင်ႇယူႇၵႃႈၼႂ်းၵျေးၸူးတႃႉ။
ၸိူဝ်းၸဝ်ႈမိူင်း ပႃႇပုလုၼ်ႇ၊ ဢၼ်ပဵၼ်မိူၼ်ၸိူဝ်ႉၼင်ႇၼွင်ႉယိင်းသူဢၼ်ၽြႃးပဵၼ်ၸဝ်ႈလိူၵ်ႈၵဵပ်းဝႆႉ၊ဢိၵ်ႇတင်းလုၵ်ႈၸၢႆးၵဝ် မႃႇၵု၊ ၼၼ်ႉတၵ်ႉၼၢႆၽၢၵ်ႇၵႂၢမ်းမႅတ်ႈတႃႇပၼ်သူဢေႃႈ။
ၵေႃႉၼိုင်ႈလႄႈၵေႃႉၼိုင်ႈၼင်ႇၵၼ်ၵၼ်ဢဝ်တင်းတၢင်းၼူမ်ၵၼ်၊ဢၼ်ပဵၼ်မႅတ်ႈတႃႇၶရိၸ်ႈယၢၼ်ႇၼၼ်ႉတၵ်ႉလၢတ်ႈတေႃႇၵၼ်တႃႉ။ ႁႂ်ႈတၢင်းၼိမ်မီးၵႃႈၼိူဝ်သူၸိူဝ်းဢၼ်ပဵၼ်ၵူၼ်း ၸဝ်ႈၶရိၸ်ႈ၊ ၼၼ်ႉၵူႈၵေႃႉၵူႈၵူၼ်းသေၵမ်းလူၺ်ႈ။ လိၵ်ႈတြႃးပေႇတရုၽိုၼ်တီႈၼိုင်ႈယဝ်ႉယဝ်ႉဢေႃႈ။
ၵဝ် သိမုၼ်ႇပေႇတရု၊ ဢၼ်ပဵၼ်ၶႃႈတင်းတမၢၼ်ႇ ၸဝ်ႈယေႇသုၶရိၸ်ႈ၊ ၼႆႉတႅမ်ႈလိၵ်ႈပၼ်ထိုင်ၶဝ်ၸိူဝ်းဢၼ်လႆႈႁပ်ႉဢဝ်တၢင်းယုမ်ႇမၢတ်ႈဢၼ်မျၢတ်ႈလီမိူၼ်မိူၼ်ၵၼ်တင်းႁဝ်း၊လႆႈယုမ်ႇမၢတ်ႈၵွပ်ႈလူၺ်ႈတြႃးတၢင်းသိုဝ်ႈတေႃႇၽြႃးပဵၼ်ၸဝ်ႈႁဝ်း၊ဢိၵ်ႇတင်းၸဝ်ႈၵႄႇၶျွတ်ႈဢၼ်ဝႃႈ၊ ၸဝ်ႈယေႇသုၶရိၸ်ႈ၊ ၼၼ်ႉဢေႃႈ။
ႁႂ်ႈၵျေးၸူးဢိၵ်ႇတင်းတၢင်းၼိမ်၊ယႂ်ႇၼမ်ၵိုၼ်းၼႃႇၵႃႈတီႈသူ၊ၵႃႈၼႂ်းၺၢၼ်ႇတၢင်းဢၼ်ႁုၽြႃးပဵၼ်ၸဝ်ႈ၊ဢိၵ်ႇတင်းၸဝ်ႈႁဝ်း ယေႇသုၶရိၸ်ႈ၊ ၼၼ်ႉသေၵမ်းလူၺ်ႈ။
တၼ်းၶူဝ်းၽြႃးပဵၼ်ၸဝ်ႈဢၼ်မူတ်းၸၢင်ႇၼၼ်ႉ၊ဢဵတ်းလူပၼ်ၵႃႈဢၼ်ႁဝ်းလူဝ်ႇလႆႈဢသၢၵ်ႈလိပ်းၼႂ်းဝၢတ်ႈၽြႃး၊ဝၢတ်ႈတြႃးၵွပ်ႈလူၺ်ႈၺၢၼ်ႇဢၼ်ႁဝ်းႁု၊ၸဝ်ႈဢၼ်ႁွင်ႉဢဝ်ႁဝ်းႁႂ်ႈလႆႈၶဝ်ႈၸၢမ်ႇၸႃးမုၼ်သရေႇၸဝ်ႈ၊ဢိၵ်ႇတင်းလွင်ႈဢၼ်လီဢၼ်မျၢတ်ႈမၼ်းၸဝ်ႈၼၼ်ႉဢေႃႈ။-
ၵွပ်ႈပိူဝ်ႈလွင်ႈတၢင်းၼႆႉလႄႈမၼ်းၸဝ်ႈဢဝ်ၵတိၸဝ်ႈဢၼ်ယႂ်ႇမျၢတ်ႈထိူၵ်ႈၵႃႈၼၼ်ႉ၊ဢၢပ်ႈပၼ်တီႈႁဝ်းဢေႃႈ။ ၵွပ်ႈလူၺ်ႈသူဢိင်ၵတိၸဝ်ႈၸိူဝ်းၼၼ်ႉလႄႈၼင်ႇႁိုဝ်သူတၵ်းလႆႈၵၢင်းလွတ်ႈတၢင်းဢၼ်ၸၢင်ႈလုၸၢင်ႈလႅဝ်ဢၼ်မီးၼႂ်းလေႃးၵႃႉၼႆႉ၊ၵွပ်ႈပိူဝ်ႈတၢင်းဢၼ်ၸႂ်ၸပ်းၸႂ်ၸွႆးၼၼ်ႉသေယဝ်ႉ၊သမ်ႉတၵ်းလႆႈမီးၸႂ်သၽေႃးၸိူဝ်ႉၼင်ႇၸႃႇတိၸဝ်ႈၽြႃးဢၼ်မူတ်းၸၢင်ႇၸိုင်၊ၸင်ႇပဵၼ်ဢေႃႈ။-
ပုၼ်ႈလွင်ႈၼင်ႇႁိုဝ်တၵ်းပဵၼ်ၸိူဝ်ႉၼင်ႇၼၼ်ၸိုင်၊ၶတ်းၸႂ်သေလႄႈဢဝ်သီႇလႃႉသိၼ်ထမ်းထၢပ်ႈထႅင်ႈၼိူဝ်တၢင်းဢၼ်ယုမ်ႇမၢတ်ႈၼၼ်ႉ၊ၼိူဝ်သီႇလႃႉသိၼ်ထမ်းၼၼ်ႉ၊ဢဝ်ၺၢၼ်ႇဢၼ်ႁုၸႅင်ႈထၢပ်ႈထႅင်ႈ၊-
ၼိူဝ်ၺၢၼ်ႇဢၼ်ႁုၸႅင်ႈၼၼ်ႉ၊ဢဝ်တၢင်းဢၼ်ပႂ်ႉထိင်းတူဝ်ၸဝ်ႈၵဝ်ႇထၢပ်ႈထႅင်ႈ၊ၼိူဝ်တၢင်းဢၼ်ပႂ်ႉထိင်းတူဝ်ၸဝ်ႈၵဝ်ႇၼၼ်ႉ၊ဢဝ်တၢင်းဢၼ်ယိူၼ်ႉၶၢမ်ႇထၢပ်ႈထႅင်ႈ၊ၼိူဝ်တၢင်းဢၼ်ယိူၼ်ႉၶၢမ်ႇၼၼ်ႉ၊ဢဝ်တၢင်းဢၼ်ႁဵတ်းဝၢတ်ႈၽြႃးထၢပ်ႈထႅင်ႈ၊-
ၼိူဝ်တၢင်းဢၼ်ႁဵတ်းဝၢတ်ႈၽြႃးၼၼ်ႉ၊ဢဝ်တၢင်းဢၼ်ပီႈၼွင်ႉၸူမ်းပႅင်းၵၼ်ၼၼ်ႉထၢပ်ႈထႅင်ႈ၊ၼိူဝ်တၢင်းဢၼ်ပီႈၼွင်ႉၸူမ်းပႅင်းၵၼ်ၼၼ်ႉ၊ဢဝ်မႅတ်ႈတႃႇထၢပ်ႈထႅင်ႈတႃႉ။-
လွင်ႈတၢင်းၸိူဝ်းၼႆႉ၊ပဵၼ်ပႃႇရမီႇဢၼ်သူလူဝ်ႇမီးဝႆႉလႄႈပေႃးသူႁႂ်ႈပႃႇရမီႇၸိူဝ်းၼႆႉ၊ပျေႉၸုမ်ႇၼမ်ၵိုၼ်းယူႇၵႃႈၼႂ်းသူၸိုင်၊မၼ်းတၵ်းႁဵတ်းႁႂ်ႈသူမီးၸႂ်ၵႆႉလႄႈႁႂ်ႈသူမီးဢၵျူဝ်းၼႂ်းၺၢၼ်ႇဢၼ်ႁုၸၵ်းၸဝ်ႈႁဝ်း ယေႇသုၶရိၸ်ႈ၊ ဢေႃႈ။-
ၵူၺ်းၵႃႈ၊ၽူႈလႂ်သေဢမ်ႇဝႃႈ၊ၵေႃႉဢၼ်ဢမ်ႇမီးပႃႇရမီႇၸိူဝ်ႉၼင်ႇၼႆၼၼ်ႉၸမ်ႉ၊မၢၵ်ႇတႃမၼ်းမွတ်ႇဝႆႉယူႇလႄႈႁၼ်ၵႅပ်ႈၼႃႇဢေႃႈ။ မၼ်းယင်းပဵၼ်ၵေႃႉဢၼ်လိုမ်းပႅတ်ႈတၢင်းဢၼ်သုၵ်ႈပွတ်ႈဢပျတ်ႈၵဝ်ႇမၼ်းၸိူဝ်းၼၼ်ႉယူႇဢေႃႈ။
ပိူဝ်ႈၼႆလႄႈ၊ပီႈၼွင်ႉၵဝ်ၶဝ်႟။ ယဵင်ႈၶႅၼ်းၶတ်းၸႂ်ႁဵတ်းႁႂ်ႈလွင်ႈတၢင်းဢၼ်မၼ်းၸဝ်ႈႁွင်ႉဢဝ်၊ဢိၵ်ႇတင်းတၢင်းဢၼ်မၼ်းၸဝ်ႈလိူၵ်ႈၵဵပ်းဢဝ်သူၼၼ်ႉ၊ပဵၼ်ဢၼ်တႄႇမၼ်ႈယူႇတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊သူတၵ်းတေၵၢင်းလွတ်ႈတင်းတၢင်းဢၼ်တူၵ်းလူမ်ႉၼႂ်းဢပျတ်ႈဢေႃႈ။-
ၵွပ်ႈပိူဝ်ႈလွင်ႈတၢင်းၼႆႉလႄႈမၼ်းၸဝ်ႈတၵ်းဢဵတ်းလူပၼ်ဢၶႂၢင်ႉတီႈသူတႄႉတႄႉႁႂ်ႈလႆႈၶဝ်ႈၸၢမ်ႇၸႃးၵႃႈၼႂ်းမိူင်းထႃႇဝရႃႉၸဝ်ႈၽြႃးႁဝ်း၊ၸဝ်ႈၵႄႇၶျွတ်ႈဢၼ်ဝႃႈ၊ ၸဝ်ႈယေႇသုၶရိၸ်ႈ၊ ၼၼ်ႉဢေႃႈ။
ၵွပ်ႈပိူဝ်ႈလွင်ႈတၢင်းၼႆႉလႄႈပိၵ်ႉသမ်ႉသူလႆႈႁုလွင်ႈတၢင်းၸိူဝ်းၼႆႉ၊ဢိၵ်ႇတင်းလႆႈတႄႇယူႇၼႂ်းသမ်ႇမႃႇတြႃးဢၼ်သူလႆႈဝႆႉယဝ်ႉၼၼ်ႉသေၵေႃႈ၊ၵဝ်တၵ်းတေဢဝ်လွင်ႈတၢင်းၸိူဝ်းၼႆႉသေလႄႈပၼ်သတိသူၵႂႃႇသေႇသေႇဢေႃႈ။-
ၵဝ်ထၢင်ႇၼႂ်းၸူဝ်ႈဢၼ်ၵဝ်ယင်းမီးယူႇၼႂ်းတူဝ်ၶၼ်ႇထႃႇၼႆႉၵဝ်လီပၼ်သတိလႄႈၸူဝ်းဢဝ်သူ၊-
ပိူဝ်ႈဢၼ်ၵဝ်ႁုဝႃႈ၊ၵဝ်တၵ်းလႆႈၸဵဝ်းပႅတ်ႈဝႆႉတူဝ်ၶၼ်ႇထႃႇၵဝ်ၼႆႉၵႂႃႇ၊ၸွမ်းၼင်ႇဢၼ်ၸဝ်ႈၽြႃးႁဝ်း၊ ၸဝ်ႈယေႇသုၶရိၸ်ႈ၊ မွၵ်ႇလၢတ်ႈၵဝ်ဝႆႉ၊လႅင်းလႅင်းၼၼ်ႉဢေႃႈ။-
လိူဝ်သေၼၼ်ႉ၊ၵဝ်တၵ်းၶတ်းၸႂ်ႁႂ်ႈသူလႆႈတွင်းဝႆႉ၊လွင်ႈတၢင်းၸိူဝ်းၼႆႉယူႇတႃႇသေႇ၊လိုၼ်းသေဢၼ်ၵဝ်လၢႆႈၸၢတ်ႈၵႂႃႇၼၼ်ႉဢေႃႈ။
မိူဝ်ႈဢၼ်ႁဝ်းၽုၺ်ႇဢွၵ်ႇမွၵ်ႇလၢတ်ႈသူလွင်ႈတၼ်းၶူဝ်းၸဝ်ႈၽြႃးႁဝ်း၊ ၸဝ်ႈယေႇသုၶရိၸ်ႈ၊ ဢိၵ်ႇတင်းတၢင်းဢၼ်မၼ်းၸဝ်ႈတၵ်းၶိုၼ်းမႃးထႅင်ႈၼၼ်ႉၸိုင်၊ႁဝ်းဢမ်ႇလႆႈဢဝ်ဢပုမ်ႇဢၼ်ပႃးပရိယႄႇၼၼ်ႉသေလႄႈႁေႃးလၢတ်ႈ။ ႁဝ်းပဵၼ်သၢၵ်ႈသေႇဢၼ်လႆႈႁၼ်တၢင်းဢၼ်ယႂ်ႇမျၢတ်ႈမၼ်းၸဝ်ႈၼၼ်ႉဢေႃႈ။-
လွင်ႈမၼ်းၸမ်ႉ၊မၼ်းၸဝ်ႈလႆႈႁပ်ႉဢဝ်ၵုင်ႇသရေႇတင်းမုၼ်ၽုင်းဢႃႇၼုၽေႃႇၵႃႈတီႈၽြႃးပေႃႈၸဝ်ႈၼႂ်းမိူဝ်ႈဢၼ်သဵင်ၸဝ်ႈဢၼ်လုၵ်ႉသေၵႃႈတီႈၸဝ်ႈဢၼၼ်ႇတႃႉတၼ်းၶူဝ်းလၢတ်ႈတီႈမၼ်းၸဝ်ႈလႄႈဝႃႈ၊ “ၵေႃႉၼႆႉပဵၼ်လုၵ်ႈဢၼ်ၵဝ်ႁၵ်ႉၼႃႇ၊ၵေႃႉဢၼ်ၵဝ်ၵျိူၵ်ႈႁၵ်ႉထုၵ်ႇၸႂ်ၼႃႇဢေႃႈ” ဝႃႈၼင်ႇၼႆၼၼ်ႉဢေႃႈ။-
သဵင်ၸဝ်ႈဢၼ်လၢတ်ႈဢွၵ်ႇသေၵႃႈၼႂ်းၵၢင်ႁၢဝ်မႃးၼၼ်ႉ၊တူဝ်ႁဝ်းလႆႈငိၼ်းလီလီ၊ၼႂ်းမိူဝ်ႈဢၼ်ႁဝ်းမီးယူႇလူၺ်ႈၵၼ်တင်းမၼ်းၸဝ်ႈၵႃႈတီႈၼိူဝ်လွႆဢၼ်မူတ်းၸၢင်ႇၼၼ်ႉဢေႃႈ။
လိူဝ်သေၼၼ်ႉ၊ႁဝ်းယင်းမီးၵႂၢမ်းပရေႃးၽႅတ်ႈ ဢၼ်ယဵင်ႈၶႅၼ်းသေႇၶျႃႇလီငၢမ်းၼၼ်ႉယူႇဢေႃႈ။ သူထုၵ်ႇလီမၢတ်ႈတွင်းဝႆႉ၊ၵႂၢမ်းဢၼႃႇၵတ်ႉတိၸဝ်ႈၼၼ်ႉလီလီ၊ၸွမ်းၼင်ႇဢၼ်မၼ်းပဵၼ်မိူၼ်ၸိူဝ်ႉၼင်ႇၵွၵ်းၽႆးလႅင်းထွင်ႇၵႃႈတီႈဢၼ်လပ်းသိင်ႇတေႃႇထိုင်ႁွတ်ႈၶိင်ႇမိုဝ်ႉဝၼ်းႁူဝ်မိူင်းသႂ်လႄႈလၢဝ်ႁူဝ်ၼႂ်ဢွၵ်ႇမႃးၵႃႈၼႂ်းႁူဝ်ၸႂ်သူၼၼ်ႉဢေႃႈ။-
ဢွၼ်တၢင်းသေပိူၼ်ႈ၊သူတၵ်းလႆႈၶုၵ်းၸႂ်လႆႈၵႂၢမ်းပရေႃးၽႅတ်ႈဢၼ်ပႃးၼႂ်းၵျၢမ်းလိၵ်ႈၼႆႉ၊မၼ်းပဵၼ်ၵႂၢမ်းဢၼ်ဢမ်ႇၸၢင်ႈဢဝ်တင်းၺၢၼ်ႇတူဝ်ၸဝ်ႈၵဝ်ႇသေလႄႈၽုၺ်ႇၼႄဢထိၵ်ႈပႄႇမၼ်းလႆႈၼၼ်ႉဢေႃႈ။-
လွင်ႈမၼ်းၸမ်ႉ၊ၵႂၢမ်းပရေႃးၽႅတ်ႈယၢမ်ႈလႆႈပဵၼ်ၸွမ်းၼင်ႇဢလူဝ်ႇၵူၼ်းဢမ်ႇၸႂ်ႈ။ ဝိၺိၺ်ႇမူတ်းၸၢင်ႇၸဝ်ႈတိုၵ်းယူင်းႁူဝ်ၸႂ်ၵူၼ်းတင်းလၢႆၸင်ႇ၊ၶဝ်ဢိင်ၽြႃးပဵၼ်ၸဝ်ႈလႄႈႁေႃးလၢတ်ႈဢေႃႈ။
ၼႂ်းဝႃႈၼၼ်သေၵေႃႈ၊မိၵ်ႉသႃႇပရေႃးၽႅတ်ႈ ၼမ်ၼႃႇဢၼ်ယၢမ်ႈမီးမႃးၵႃႈၼႂ်းၵူၼ်းတင်းလၢႆဢေႃႈ။ မိူၼ်ၸိူဝ်ႉၼင်ႇၼၼ်ၵႃႈၼႂ်းသူၵေႃႈတၵ်းမီးသြႃႇဢၼ်သွၼ်ၽိတ်းသွၼ်ပိူင်ႈၼမ်ၼႃႇဢေႃႈ။ ၶဝ်တၵ်းလွမ်ဢဝ်ၵႂၢမ်းသွၼ်ဢၼ်ပႅၵ်ႇပိူင်ႈမႃးသွၼ်ပၼ်မဵဝ်းဢၼ်ၸၢင်ႈယႃႉႁႂ်ႈလုလႅဝ်လႄႈၶဝ်ယင်းၸၢင်ႈပႄႇပႅတ်ႈၸဝ်ႈၽြႃးဢၼ်ထႆႇဢဝ်ထုတ်ႇဢဝ်ၶဝ်ၼၼ်ႉသေလႄႈၸၢင်ႈႁႂ်ႈတၢင်းလုလႅဝ်ၸဵဝ်းႁွတ်ႈထိုင်တီႈၶဝ်ၶၼ်ၶၼ်ၽႂ်းၽႂ်းဢေႃႈ။-
ၵူၼ်းၼမ်ၼႃႇတၵ်းၸွမ်းထုင်းၸၢမ်ႇဢၼ်ၵူဝ်ႈၵိူၵ်ႇၶဝ်ၼၼ်ႉဢေႃႈ။ ၵွပ်ႈပိူဝ်ႈၶဝ်ၼၼ်ႉလႄႈပိူၼ်ႈတၵ်းသႄႉသွမ်းသဵၼ်ႈတၢင်းသမ်ႇမႃႇတြႃးဢေႃႈ။-
ၶဝ်ၼၼ်ႉလေႃးၽႃႉပူၼ်ႉလိူဝ်ယူႇသေလႄႈတၵ်းဢဝ်တင်းၵႂၢမ်းဢၼ်ၶျေႃးဢၼ်ဝွၼ်းၶၢႆၵိၼ်သူဢေႃႈ။ ၸဵမ်မိူဝ်ႈၶိင်ႇၵႃႇလႃႉႁိုင်ၼႃႇၼၼ်ႉ၊ၸဝ်ႈဢၼ်ၸီႇယၢင်ႇတြႃးၼိူဝ်ၶဝ်ၼၼ်ႉဢမ်ႇယူႇမဝ်မၢင်၊ၸဝ်ႈဢၼ်ႁႂ်ႈၶဝ်လုလႅဝ်ၼၼ်ႉၵေႃႈ ဢမ်ႇလပ်းဢမ်ႇၼွၼ်း။
ၽြႃးပဵၼ်ၸဝ်ႈယင်းဢမ်ႇသေလၢႆတမၢၼ်ႇၵၢင်ႁၢဝ်ၸိူဝ်းဢၼ်ႁဵတ်းၽိတ်းႁဵတ်းပိူင်ႈၼၼ်ႉလႄႈဢဝ်ၶဝ်ၶျႃးသႂ်ႇၵႃႈၼႂ်းၽႆးငရၢႆးတီႈဢၼ်ၸိူၵ်ႈလဵၵ်းမတ်ႉၽုၵ်ႇၶင်ဝႆႉၼႂ်းတီႈဢၼ်လပ်းသိင်ႇတေႃႇထိုင်ဝၼ်းဢၼ်ၸီႇယၢင်ႇတြႃးၼၼ်ႉဢေႃႈ။-
ၽြႃးပဵၼ်ၸဝ်ႈယင်းဢမ်ႇသေလၢႆၵူၼ်းလေႃးၵီႇမိူဝ်ႈၵွၼ်ႇ၊ၼွၵ်ႈသေၵႄႇသႄႇဢဝ် ၼူဝ်းဢႃႇ၊ ၵေႃႉဢၼ်ႁေႃးလၢတ်ႈတြႃးတၢင်းသိုဝ်ႈတေႃႇ၊ဢိၵ်ႇတင်းၵူၼ်းၸဵတ်းၵေႃႉၵူၺ်းၼၼ်ႉလႄႈမၼ်းၸဝ်ႈႁႂ်ႈၼမ်ႉထူမ်ႈပႅတ်ႈၵူၼ်းလေႃးၵီႇတင်းသဵင်ႈတင်းလူင်ၸိူဝ်းဢၼ်ဢမ်ႇၵူဝ်းၵႂၢႆႇၽြႃးပဵၼ်ၸဝ်ႈၼၼ်ႉဢေႃႈ။-
ၽြႃးပဵၼ်ၸဝ်ႈယင်းၸီႇယၢင်ႇပၼ်တၢမ်ႇဝဵင်း သေႃးတုမ်ႇ၊ တင်းဝဵင်း ၵေႃးမေႃးရႃႉ၊ ၼၼ်ႉလႄႈဢဝ်တင်းၽႆးသေလႄႈယႃႉၽဵဝ်ႈပႅတ်ႈသွင်ဝဵင်းၼၼ်ႉ၊ႁႂ်ႈပဵၼ်ပုင်ႇသၢၵ်ႈသေႇပုၼ်ႈၵမ်းလိုၼ်းၸၢင်ႈပဵၼ်မႃးၵႃႈၼိူဝ်ၵူၼ်းၸိူဝ်းဢၼ်ဢမ်ႇၵူဝ်းၵႂၢႆႇၽြႃးပဵၼ်ၸဝ်ႈၼၼ်ႉဢေႃႈ။-
မၼ်းၸဝ်ႈယင်းထုတ်ႇၼုၵ်ႈဢဝ် လေႃးတႃႉ၊ ၵူၼ်းလီၵူၼ်းငၢမ်းၼၼ်ႉဢွၵ်ႇသေၵႃႈၼႂ်းတၢင်းဢၼ်ၵူၼ်းဢၼ်ဢမ်ႇမီးသိၼ်ထမ်းၶဝ်ယႃႉယုၵ်ႉၼၼ်ႉဢေႃႈ။-
ၵူၼ်းလီၵူၼ်းငၢမ်းၵေႃႉၼၼ်ႉ၊ယူႇၼႂ်းၵႄႈၶဝ်ၸိူဝ်းၼၼ်ႉလႄႈမၢၵ်ႇတႃမၼ်းလႆႈႁၼ်၊ႁူမၼ်းလႆႈငိၼ်းလွင်ႈတၢင်းဢၼ်ဢမ်ႇတြႃးၶဝ်ယူႇလႄႈၶမ်ၸႂ်ၶမ်ၶေႃးယူႇၵူႈမိူဝ်ႈၵူႈဝၼ်းဢေႃႈ။-
ၵွပ်ႈလွင်ႈတၢင်းၼႆႉလႄႈထႃႇဝရႃႉၽြႃးႁုႁၼ်လွင်ႈတၢင်းဢၼ်တၵ်းတေလႆႈထုတ်ႇၼုၵ်ႈဢဝ်ၵူၼ်းၸိူဝ်းဢၼ်ၸၢင်ႈမူၼ်ႈပျေႃႇၼႂ်းဝၢတ်ႈၽြႃးတင်းလၢႆ လွတ်ႈသေတၢင်းဢၼ်ၸၢမ်းတူၺ်းယႃႉယုၵ်ႉၼၼ်ႉၸိူဝ်ႉၼင်ႇႁိုဝ်၊ဢိၵ်ႇတင်းတၵ်းတေလႆႈဢဝ်ၵူၼ်းၸိူဝ်းဢၼ်ဢမ်ႇမီးသိၼ်ထမ်းတင်းလၢႆၶင်ဝႆႉ၊ပုၼ်ႈဝၼ်းဢၼ်ၸီႇယၢင်ႇတြႃးလႄႈႁႂ်ႈၶဝ်လႆႈၶၢမ်ႇတၢမ်ႇၸိူဝ်ႉၼင်ႇႁိုဝ်ၼၼ်ႉဢေႃႈ။-
လိူဝ်တွၼ်းၼႃႇသေပိူၼ်ႈ၊ႁႂ်ႈၶဝ်ၸိူဝ်းဢၼ်ၸွမ်းဢလူဝ်ႇၵႃႇမၵုင်ႇတူဝ်ၸဝ်ႈၵဝ်ႇဢၼ်ၵူဝ်ႈၵိူၵ်ႇလႄႈသမ်ႉႁဵတ်းတၢင်းဢၼ်ဢမ်ႇၵူဝ်ယမ်တီႈဢႃႇၼႃႇၽြႃးပဵၼ်ၸဝ်ႈၼၼ်ႉ၊ယဵင်ႈၶႅၼ်းတၵ်းလႆႈၶၢမ်ႇတၢမ်ႇဢေႃႈ။ သြႃႇဢၼ်သွၼ်ၽိတ်းသွၼ်ပိူင်ႈၸိူဝ်းၼၼ်ႉ၊ပဵၼ်ၵူၼ်းဢၼ်ဢမ်ႇၵူဝ်ဢမ်ႇဢၢႆ၊ဢၼ်ၸၢင်ႈၸွမ်းဢလူဝ်ႇတူဝ်ၸဝ်ႈၵဝ်ႇလႄႈယင်းႁတ်းသႄႉသွမ်းၶဝ်ၸိူဝ်းဢၼ်မီးမုၼ်သရေႇၼၼ်ႉဢေႃႈ။-
တမၢၼ်ႇၵၢင်ႁၢဝ်တင်းလၢႆၼၼ်ႉပိၵ်ႉသမ်ႉမီးႁႅင်းတၼ်းၶူဝ်းယႂ်ႇၼႃႇသေသြႃႇဢၼ်သွၼ်ၽိတ်းသွၼ်ပိူင်ႈၸိူဝ်းၼၼ်ႉသေၵေႃႈ၊ယင်းဢမ်ႇသႄႉသွမ်းတၢင်ႇဢပျတ်ႈၶဝ်ၵႃႈတီႈၽၢႆႇၼႃႈၽြႃးပဵၼ်ၸဝ်ႈ။-
ၶဝ်ၸိူဝ်းၼၼ်ႉၸမ်ႉ၊ပဵၼ်ၵူၼ်းဢၼ်ၵမ်ၵျၢင်ႉမိူၼ်ၸိူဝ်ႉၼင်ႇသတ်းၸႅတ်ႈၸႅတ်ႈဢၼ်ၽၢၼ်ႇသၢင်းႁဵတ်းပဵၼ်ဝႆႉ၊ပုၼ်ႈတႃႇတေတိဢဝ်လႄႈဢဝ်တၢႆၼၼ်ႉဢေႃႈ။ ၶဝ်ၸၢင်ႈသႄႉသွမ်းတီႈလွင်ႈတၢင်းဢၼ်တူဝ်ၸဝ်ႈၵဝ်ႇဢမ်ႇႁုၼၼ်ႉဢေႃႈ။ ၶဝ်တၵ်းလႆႈၶၢမ်ႇတၢင်းဢၼ်ယႃႉပႅတ်ႈမိူၼ်ၸိူဝ်ႉၼင်ႇသတ်းၼၼ်ႉသေလႄႈ၊-
ၶဝ်တၵ်းလႆႈၶၢမ်ႇတုၵ်ႉၶႃႉ၊ၸွမ်းၼင်ႇတုၵ်ႉၶႃႉဢၼ်ၶဝ်ပၼ်တီႈပိူၼ်ႈၼၼ်ႉဢေႃႈ။ တၢင်းပျေႃႇၶဝ်ၸမ်ႉ၊ပဵၼ်တၢင်းဢၼ်ႁဵတ်းၵူႈၸိူဝ်ႉၵူႈပိူင်၊ၵႃႈၼႂ်းဢၼ်လႅင်းၵၢင်ဝၼ်းႁႂ်ႈလႆႈပျေႇၸႂ်ၸွမ်းဢလူဝ်ႇၵၢင်ၸႂ်တူဝ်ၶၼ်ႇထႃႇၶဝ်ၼၼ်ႉလႄႈပဵၼ်ဢၼ်သူလီဢူၵ်းဢၢႆဢၼ်သရေႇလုၼႂ်းတၢင်းဢၼ်ၵိၼ်ၶူပ်းလူၺ်ႈၵၼ်တင်းသူ။ ၶဝ်ၵူၺ်းၶႂ်ႈၵိၼ်ပျေႃႇၼႂ်းတၢင်းဢၼ်ၶဝ်ၽိတ်းပိူင်ႈဢေႃႈ။-
မၢၵ်ႇတႃၶဝ်ၼၼ်ႉၵေႃႈ၊တဵမ်ဝႆႉတင်းၵိလေႇသႃႇဢၼ်ၵူတ်ႉမေးပိူၼ်ႈၼၼ်ႉလႄႈဢလူဝ်ႇၵၢင်ၸႂ်ၶဝ်ဢၼ်ၶႂ်ႈႁဵတ်းဢပျတ်ႈၼၼ်ႉၵေႃႈ ဢမ်ႇဢိမ်ႇဢမ်ႇတိူၵ်ႉလႆႈသေပွၵ်ႈ။ ၶဝ်ၸၢင်ႈၸူဝ်းဢဝ်ၵူၼ်းၸိူဝ်းဢၼ်ႁူဝ်ၸႂ်ဢမ်ႇသေႇဢမ်ႇမၼ်ႈၼၼ်ႉၶဝ်ႈၵႂႃႇၵႃႈၼႂ်းတူင်ႇၶိုမ်းဢေႃႈ။ ႁူဝ်ၸႂ်ၶဝ်ၵေႃႈႁဵတ်းတၢင်းဢၼ်လေႃးၽႃႉပူၼ်ႉလိူဝ်ယူႇၶိူဝ်းၶိူဝ်းဢေႃႈ။ ၶဝ်တိုၼ်းပဵၼ်ၵူၼ်းဢၼ်ထုၵ်ႇၽြႃးပဵၼ်ၸဝ်ႈၵိၼ်ႇလႃႇၵိၼ်ႇဝႃႈယဝ်ႉဢေႃႈ။-
ၶဝ်ပိူင်ႈဢွၵ်ႇသေသဵၼ်ႈတၢင်းဢၼ်သိုဝ်ႈတေႃႇၵႂႃႇလႄႈၵႂင်တၢင်းယူႇဢေႃႈ။ ၶဝ်ၸွမ်းသဵၼ်ႈတၢင်း ပႃႇလၢမ်ႇ၊ လုၵ်ႈၸၢႆး ပေႃႇသေႃႇ၊ ဢၼ်ၸႂ်ၸပ်းငိုၼ်းတွင်းဢၼ်လႆႈမႃးၵွပ်ႈပိူဝ်ႈႁဵတ်းဢမ်ႇတြႃးၼၼ်ႉလႄႈ၊-
လႆႈၶၢမ်ႇတၢင်းဢၼ်ႁိုတ်းႁၢတ်ႇၵွပ်ႈပိူဝ်ႈတူဝ်ၸဝ်ႈၵဝ်ႇႁဵတ်းၽိတ်းႁဵတ်းပိူင်ႈဢေႃႈ။ မႃႉလီႈဢၼ်ဢမ်ႇၸၢင်ႈလၢတ်ႈၵႂၢမ်းၼၼ်ႉ၊လႆႈလၢတ်ႈၵႂၢမ်းၵူၼ်းသေလႄႈႁၢမ်ႈတၢပ်ႈႁႄႉၶႅၼ်တၢင်းဢၼ်ယွင်ႇဢၼ်မႃႈပရေႃးၽႅတ်ႈ ၼၼ်ႉဢေႃႈ။
ၶဝ်ၼၼ်ႉ၊ပဵၼ်ၸိူဝ်ႉၼင်ႇၼမ်ႉဢွၵ်ႇႁူးဢၼ်ၼမ်ႉႁႅင်ႈၵႂႃႇ၊ဢိၵ်ႇတင်းမွၵ်ႇၵုမ်ႈဢၼ်ပိဝ်ၵႂႃႇၵႃႈၼႂ်းလူမ်းၼၼ်ႉသေလႄႈၽြႃးပဵၼ်ၸဝ်ႈသိမ်းဝႆႉဢၼ်လပ်းသိင်ႇထႃႇဝရႃႉ၊ဢၼ်ၼႃတၼ်ၼႃႇၼၼ်ႉပုၼ်ႈၶဝ်ဢေႃႈ။-
လွင်ႈမၼ်းၸမ်ႉ၊ၶဝ်ၸၢင်ႈလၢတ်ႈၵႂၢမ်းၽႅၼ်သုင်၊ၵႂၢမ်းပဝ်ႇၵႂၢမ်းလၢႆသေလႄႈဢဝ်တင်းတၢင်းဢၼ်ဢလူဝ်ႇၵၢင်ၸႂ်တူဝ်ၸဝ်ႈၵဝ်ႇၸပ်းၸွႆး၊တၢင်းဢၼ်ၵိလေႇသႃႇပူၼ်ႉလိူဝ်ၸိူဝ်းၼၼ်ႉ၊ႁၢင်ႈဢဝ်ၶဝ်ၸိူဝ်းဢၼ်ၸမ်တၵ်းပၢႆႈလွတ်ႈသေၵႃႈတီႈၵူၼ်းၸိူဝ်းဢၼ်ၵမ်ၵျၢင်ႉတၢင်းဢၼ်ၽိတ်းဢၼ်ပိူင်ႈၸိူဝ်းၼၼ်ႉဢေႃႈ။-
ၶဝ်ဝႆႉၵတိဝႃႈ၊ၶဝ်တေပၼ်ဢၶႂၢင်ႉဢၼ်လွတ်ႈတီႈၵူၼ်းၸိူဝ်းၼၼ်ႉဝႃႈၼႆယူႇသေၵေႃႈ၊တူဝ်ၶဝ်ၸမ်ႉ၊ပဵၼ်ၶႃႈတၢင်းၽိတ်းပိူင်ႈဢၼ်ႁဵတ်းႁႂ်ႈတူဝ်ၸဝ်ႈၵဝ်ႇတူႇၼဝ်ႈၼၼ်ႉဢေႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈဝႃႈၸမ်ႉ၊ၵူၼ်းၸိုင်၊ပဵၼ်ၶႃႈတီႈမဵဝ်းဢၼ်ပႄႉၼႅင်ႇမၼ်းလႆႈၼၼ်ႉဢေႃႈ။-
လွင်ႈမၼ်းၸမ်ႉ၊ပေႃးၵူၼ်းၸိူဝ်းဢၼ်လႆႈလွတ်ႈသေတၢင်းဢၼ်ၵူဝ်ႈၵိူၵ်ႇလေႃးၵီႇမႃး ၵွပ်ႈပိူဝ်ႈၶဝ်ႁုၸၵ်းၸဝ်ႈၽြႃးႁဝ်းၸဝ်ႈၵႄႇၶျွတ်ႈဢၼ်ဝႃႈ၊ ၸဝ်ႈယေႇသုၶရိၸ်ႈ၊ ၼၼ်ႉသေယဝ်ႉ၊သမ်ႉၶိုၼ်းၵမ်ၵျၢင်ႉၸွမ်းၶဝ်ၸိူဝ်းၼၼ်ႉလႄႈၶၢမ်ႇတၢင်းဢၼ်ၶဝ်ပႄႉၼႅင်ႇၸိုင်၊ၸူဝ်ႈဢသၢၵ်ႈၶဝ်ၵမ်းလိုၼ်းၼႆႉ တၵ်းယဵင်ႈၶႅၼ်းႁၢႆႉၼႃႇသေဢၼ်ပဵၼ်ၵမ်းဢွၼ်တၢင်းၼၼ်ႉဢေႃႈ။-
သင်ဝႃႈ၊ၶဝ်ယင်းဢမ်ႇတွၼ်ႉလႆႈႁုသဵၼ်ႈတၢင်းတြႃးတၢင်းဢၼ်သိုဝ်ႈတေႃႇၸိုင်၊ယဵင်ႈၶႅၼ်းလီၼႃႇသေၶဝ်ႁုယဝ်ႉလႄႈ သမ်ႉၶိုၼ်းဝၢႆႇပႅတ်ႈသေသဵၼ်ႈတၢင်းပိင်းၺၢပ်ႈတြႃးဢၼ်မူတ်းၸၢင်ႇ၊ဢၼ်တူဝ်ၸဝ်ႈၵဝ်ႇလႆႈႁပ်ႉဢဝ်ယဝ်ႉၼၼ်ႉဢေႃႈ။-
ထုင်းၵႂၢမ်းပိင်ႇၺႃႇဢၼ်မၢၼ်ႇဢၼ်မႅၼ်ႈဢၼ်ဝႃႈ၊ “မႃၸိုင်၊ၶိုၼ်းၵိၼ်ႁၢၵ်ႈတူဝ်ၸဝ်ႈၵဝ်ႇဢေႃႈ။” ဢိၵ်ႇတင်းဢၼ်ဝႃႈ၊ “မူၵေႃႈသုၵ်ႈသီယဝ်ႉသမ်ႉၶိုၼ်းဢိူၵ်ႇၵူမ်ႇဢေႃႈ” ဝႃႈၼင်ႇၼႆၼၼ်ႉပဵၼ်ၶဝ်ၼၼ်ႉတႄႉဢေႃႈ။
ၵေႃႉသႄႈဢၼ်ၵဝ်ႁၵ်ႉၶဝ်႟။ တေႃႈလဵဝ်ၼႆႉၵဝ်တႅမ်ႈလိၵ်ႈတြႃးၽိုၼ်တီႈသွင်ၼႆႉပၼ်ၵႂႃႇတီႈသူဢေႃႈ။ ၵႃႈၼႂ်းလိၵ်ႈတြႃးတင်းသွင်ၽိုၼ်ၼႆႉ၊ၵဝ်ပၼ်သတိလႄႈတိုၵ်းသူၼ်းယူင်းၸႂ်ဝိၺိၺ်ႇသူဢၼ်သႂ်ၸၢင်ႇ၊-
ႁႂ်ႈသူလႆႈၶုၵ်းၸႂ်လႆႈၵႂၢမ်းပရေႃးၽႅတ်ႈ ဢၼ်မူတ်းၸၢင်ႇတင်းလၢႆႁေႃးလၢတ်ႈဝႆႉထႃႈၸဵမ်မိူဝ်ႈၵွၼ်ႇၼၼ်ႉ၊သမ်ႉႁႂ်ႈလႆႈၶႆႈၸႂ်ထူပ်းပိင်းၺၢပ်ႈတြႃးဢၼ်ၸဝ်ႈၽြႃး၊ၸဝ်ႈၵႄႇၶျွတ်ႈဢၼ်ဢဝ်တင်းတမၢၼ်ႇၸဝ်ႈတင်းလၢႆ၊ႁေႃးတီႈသူဝႆႉၸိူဝ်းၼၼ်ႉဢေႃႈ။-
လွင်ႈတၢင်းဢၼ်သူထုၵ်ႇလီႁုထွမ်ႇဝႆႉဢွၼ်တၢင်းၸမ်ႉ၊ၼႂ်းမိူဝ်ႈဝၼ်းလိုၼ်းသုတ်းၸိူဝ်းၼၼ်ႉ၊ၵူၼ်းပျၢၵ်ႈတင်းလၢႆတၵ်းပေႃႇမႃးႁဵတ်းပျၢၵ်ႈႁဵတ်းၶူဝ်ၸွမ်းၼင်ႇၸႂ်ၶဝ်ဢၼ်ၵိလေႇသႃႇဢုပ်ႉပိူင်ႇဝႆႉၼၼ်ႉသေလႄႈ၊-
လၢတ်ႈဝႃႈ၊ “မၼ်းၸဝ်ႈဝႆႉၵတိတေၶိုၼ်းမႃးဢမ်ႇၸႂ်ႈႁိုဝ်း။ မၼ်းၸဝ်ႈမီးၵႃႈလႂ်။ တႄႇဢဝ်ၸဵမ်မိူဝ်ႈပူႇမွၼ်ႇႁဝ်းၶဝ်ၼွၼ်းလပ်းၵႂႃႇယဝ်ႉၼၼ်ႉ၊လွင်ႈတၢင်းၵႃႈမီးတင်းသဵင်ႈတင်းလူင်၊ယင်းပဵၼ်ယူႇမိူၼ်ၵၼ်တင်းမိူဝ်ႈၵွၼ်ႇဢၼ်တႄႇၸႃႉၽၢၼ်ႇသၢင်းႁဵတ်းပဵၼ်ဝႆႉၼၼ်ႉယူႇဢေႃႈ၊” ဝႃႈၼင်ႇၼႆဢေႃႈ။-
ၶဝ်တိုၼ်းဝႆႉၸႂ်ဢမ်ႇၶႂ်ႈမၢတ်ႈၶႂ်ႈတွင်း၊လွင်ႈဢၼ်ၽႃႉၵၢင်ႁၢဝ်ပေႃႇပဵၼ်မႃးၸဵမ်မိူဝ်ႈၵွၼ်ႇၼၼ်ႉပဵၼ်မႃးၵွပ်ႈပိူဝ်ႈၼုၵ်ႈၵပၢတ်ႈၽြႃးပဵၼ်ၸဝ်ႈလႄႈၽႅၼ်ႇလိၼ်မိူင်းပဵၼ်မႃးသေၵႃႈတီႈၼမ်ႉလႄႈမီးၼမ်ႉလွမ်ႉႁွပ်ႈယူႇၼၼ်ႉ။-
ၵွပ်ႈပိူဝ်ႈၼမ်ႉၼၼ်ႉမၼ်းထူမ်ႈပႅတ်ႈၵူၼ်းမိူင်းလေႃးၵႃႉဢၼ်မီးယူႇမိူဝ်ႈၼၼ်ႉႁႂ်ႈလုလႅဝ်ပႅတ်ႈၵွပ်ႈပိူဝ်ႈၼမ်ႉထူမ်ႈၼၼ်ႉဢေႃႈ။-
ၵွပ်ႈလူၺ်ႈၼုၵ်ႈၵပၢတ်ႈၸဝ်ႈၼၼ်ႉၼင်ႇၵဝ်ႇ၊ၽႃႉၵၢင်ႁၢဝ်တင်းလိၼ်မိူင်းဢၼ်ပေႃႇပဵၼ်မႃးတေႃႈလဵဝ်ၼႆႉ၊လႆႈၶၢမ်ႇတၢင်းဢၼ်သိမ်းဝႆႉ၊တေႃႇထိုင်ႁွတ်ႈမိူဝ်ႈဝၼ်းဢၼ်ၸီႇယၢင်ႇတြႃး၊ႁႂ်ႈလႆႈဢဝ်တင်းၽႆးတုတ်ႇယႃႉပႅတ်ႈပႃးၸဵမ်ၵူၼ်းၸိူဝ်းဢၼ်ဢမ်ႇၵူဝ်းၵႂၢႆႇၽြႃးပဵၼ်ၸဝ်ႈၼၼ်ႉဢေႃႈ။
ၵေႃႉသႄႈဢၼ်ၵဝ်ႁၵ်ႉၶဝ်႟။ ယႃႇလိုမ်းလွင်ႈတၢင်းပိူင်ၼိုင်ႈၼႆႉသေၵမ်း။ ၵႃႈတီႈထႃႇဝရႃႉၽြႃးၼၼ်ႉ၊ဝၼ်းၼိုင်ႈပဵၼ်မိူၼ်ပီမိူင်းႁဵင်ၼိုင်ႈလႄႈပီမိူင်းႁဵင်ၼိုင်ႈၼၼ်ႉၵေႃႈပဵၼ်မိူၼ်ဝၼ်းၼိုင်ႈၵူၺ်းဢေႃႈ။-
ၵူၼ်းၵမ်ႈၽွင်ႈထၢင်ႇဝႃႈ၊ထႃႇဝရႃႉၽြႃးတေဢမ်ႇထိူင်းဢမ်ႇၼၢၼ်းပုၼ်ႈတေႁဵတ်းၸွမ်းဝႆႉၵတိမၼ်းၸဝ်ႈၼၼ်ႉ၊ၵူၺ်းၵႃႈမၼ်းၸဝ်ႈယိူၼ်ႉၸႂ်ဝႆႉၵွပ်ႈပိူဝ်ႈမၼ်းၸဝ်ႈထွၵ်ႈတေႃႇၼႃႈသူတင်းလၢႆမႃးႁိုင်ၼႃႇယဝ်ႉလႄႈဢမ်ႇၶႂ်ႈႁႂ်ႈၽူႈလႂ်လႆႈလုလႅဝ်ၵႂႃႇလႄႈၶႂ်ႈႁႂ်ႈၵူၼ်းၵႃႈမီးတင်းသဵင်ႈတင်းလူင်ၶုၵ်းၸႂ်လႆႈမႆႈၸႂ်ဢပျတ်ႈပိၼ်ႇၸႂ်ၶဝ်ၼၼ်ႉဢေႃႈ။
မိုဝ်ႉဝၼ်းၸဝ်ႈၽြႃးၼၼ်ႉ၊တၵ်းမႃးမိူၼ်ၸိူဝ်ႉၼင်ႇၽူႈလၵ်ႉမႃးလၵ်ႉၶူဝ်းၼၼ်ႉဢေႃႈ။ ၼႂ်းမိုဝ်ႉဝၼ်းၼၼ်ႉၽႃႉၵၢင်ႁၢဝ်တၵ်းႁၢႆလၢႆၵႂႃႇလူၺ်ႈသဵင်ဢၼ်ယႂ်ႇၼႃႇလႄႈလေႃးၵထၢတ်ႈၸိူဝ်းၼႆႉတၵ်းၸိူမ်ႈႁၢႆၵႂႃႇ၊ၵွပ်ႈပိူဝ်ႈထၢတ်ႈဢၼ်မႆႈၼႃႇၼၼ်ႉသေယဝ်ႉ၊လိၼ်မိူင်းဢိၵ်ႇတင်းၶိူင်ႈပိူင်ဢၼ်မီးယူႇ၊ၵႃႈၼႂ်းမၼ်းၵူႈၸိူဝ်ႉၵူႈပိူင်ၼၼ်ႉတၵ်းမႆႈၶႅမ်ႈလပ်ႉႁၢႆၵႂႃႇဢေႃႈ။-
ၵွပ်ႈပိူဝ်ႈဝႃႈၶိူင်ႈပိူင်ၸိူဝ်းၼႆႉတင်းသဵင်ႈတင်းမူတ်း၊တၵ်းလႆႈၶၢမ်ႇတၢင်းဢၼ်ယႃႉပႅတ်ႈၸိူဝ်ႉၼင်ႇၼႆလႄႈ၊သူထုၵ်ႇလီပဵၼ်ၵူၼ်းၸိူဝ်ႉၼင်ႇႁိုဝ်ဝႃႈၼႆၸမ်ႉ၊ဢွၼ်ၵၼ်ၵမ်ၵျၢင်ႉတၢင်းၵမ်တၢင်းၵျၢင်ႉဢၼ်မူတ်းၸၢင်ႇ၊ဢိၵ်ႇတင်းမူၼ်ႈပျေႃႇၼႂ်းဝၢတ်ႈၽြႃးယူႇတႃႉ။-
ဢွၼ်ၵၼ်မုင်ႈမွင်းပႂ်ႉထႃႈမိုဝ်ႉဝၼ်းၸဝ်ႈၽြႃးၼၼ်ႉမႃးထိုင်လႄႈၵမ်ၵျၢင်ႉၵႂႃႇမႃးၼႂ်းတၢင်းဢၼ်မူတ်းၸၢင်ႇလီငၢမ်းတႃႉ။ မိူဝ်ႈဝၼ်းၼၼ်ႉၽႆးတၵ်းမႆႈၶႅမ်ႈပႅတ်ႈၽႃႉၵၢင်ႁၢဝ်လႄႈလေႃးၵထၢတ်ႈတင်းလၢႆၵေႃႈတၵ်းၶၢမ်ႇမႆႈၸိူမ်ႈႁၢႆၵႂႃႇၵွပ်ႈပိူဝ်ႈၽႆးဢၼ်မႆႈၼႃႇၼၼ်ႉဢေႃႈ။-
ၵူၺ်းၵႃႈ၊ၸွမ်းၵႃႈၼင်ႇဢၼ်ၵတိမၼ်းၸဝ်ႈမီးဝႆႉၼၼ်ႉ၊ႁဝ်းမုင်ႈမွင်းပႂ်ႉထႃႈၽႃႉၵၢင်ႁၢဝ်မႂ်ႇတင်းလိၼ်မိူင်းမႂ်ႇ၊တီႈဢၼ်တြႃးတၢင်းသိုဝ်ႈတေႃႇတႄႇဝႆႉမီးယူႇၼၼ်ႉဢေႃႈ။
ၵွပ်ႈပိူဝ်ႈသူပႂ်ႉထႃႈလွင်ႈတၢင်းၸိူဝ်းၼႆႉလႄႈၵေႃႉသႄႈၵဝ်ၶဝ်႟။ ဢွၼ်ၵၼ်ၶတ်းၸႂ်ႁႂ်ႈၵၢင်းလွတ်ႈတင်းဢပျတ်ႈဢၼ်ၵူဝ်ႈၵိူၵ်ႇဢၼ်ယူႇၵႃႈတီႈၽၢႆႇၼႃႈၽြႃးပဵၼ်ၸဝ်ႈလႄႈယူႇၼိမ်ၼိမ်လီလီလူၺ်ႈၵၼ်တင်းမၼ်းၸဝ်ႈတႃႉ။-
ဢွၼ်ၵၼ်ယိုၼ်ႈမၢတ်ႈတၢင်းဢၼ်ၸဝ်ႈၽြႃးႁဝ်းယိူၼ်ႉၸႂ်ၼၼ်ႉ၊ပဵၼ်တၢင်းဢၼ်ၵႄႇၶျွတ်ႈဢဝ်တႃႉ။ မႅၼ်ႈၼင်ႇဢၼ်ၼွင်ႉႁၵ်ႉႁဝ်း ပေႃးလု၊ တႅမ်ႈပၼ်ၵႂႃႇတီႈသူ၊ၸွမ်းၼင်ႇၺၢၼ်ႇပိင်ႇၺႃႇဢၼ်မၼ်းလႆႈၶၢမ်ႇဢဝ်ၼၼ်ႉၵေႃႈ၊-
ၵႃႈၼႂ်းလိၵ်ႈတြႃးမၼ်းၵူႈၽိုၼ်ၼၼ်ႉလႆႈလၢတ်ႈထိုင်လွင်ႈတၢင်းၸိူဝ်းၼႆႉဝႆႉယဝ်ႉဢေႃႈ။ ၵႃႈၼႂ်းလိၵ်ႈမၼ်းၸိူဝ်းၼၼ်ႉ၊ၵမ်ႈၽွင်ႈၵေႃႈႁုပွင်ႇၸႂ် ယၢပ်ႇၼႃႇလႄႈၶဝ်ၸိူဝ်းဢၼ်ဢမ်ႇႁုလီ၊ဢိၵ်ႇတင်းၶဝ်ၸိူဝ်းဢၼ်ၸႂ်ဢမ်ႇတႄႇဢမ်ႇမၼ်ႈၼၼ်ႉဢွၼ်ၵၼ်ၶွမ်ႈပိၼ်ႈတြႃးၸိူဝ်းၼၼ်ႉ၊ဢိၵ်ႇတင်းၵျၢမ်းလိၵ်ႈတၢင်ႇၶေႃႈၸိူဝ်းၼၼ်ႉပႅတ်ႈ၊ၸိူဝ်ႉၼင်ႇဢၼ်ၶဝ်ႁဵတ်းႁႂ်ႈတူဝ်ၶဝ်လုလႅဝ်ၵႂႃႇၼၼ်ႉဢေႃႈ။
ၵေႃႉသႄႈၶဝ်႟။ သူၸမ်ႉ၊ပေႃးလႆႈႁုလွင်ႈတၢင်းၼႆႉယဝ်ႉယဝ်ႉလႄႈၼင်ႇႁိုဝ်သူတၵ်းဢမ်ႇလွင်ႈၸွမ်းၵႂႃႇၵႃႈၼႂ်းတၢင်းၽိတ်းၵူၼ်းဢၼ်ဢမ်ႇတြႃးၸိူဝ်းၼၼ်ႉ၊ဢိၵ်ႇတင်းတၵ်းဢမ်ႇသုတ်ႉယွမ်းၵႂႃႇၵႃႈၼႂ်းတၢင်းဢၼ်တႄႇမၼ်ႈၶိူင်ႇယူႇၼၼ်ႉၸိုင်၊ဢွၼ်ၵၼ်ဝႆႉသတိလီလီတႃႉ။-
ဢွၼ်ၵၼ်ၶိုၼ်ႈယႂ်ႇမႂ်ႇသုင်မႃးၵႃႈၼႂ်းၵျေးၸူးၸဝ်ႈ၊ဢိၵ်ႇတင်းၼႂ်းတၢင်းဢၼ်ႁုၸၵ်းၸဝ်ႈၽြႃးႁဝ်း၊ၸဝ်ႈၵႄႇၶျွတ်ႈဢၼ်ဝႃႈ၊ ၸဝ်ႈယေႇသုၶရိၸ်ႈ၊ ၼၼ်ႉတႃႉ။ ႁႂ်ႈမၼ်းၸဝ်ႈၼၼ်ႉမီးမုၼ်သရေႇၸႃႉၸဵမ်မိူဝ်ႈလဵဝ်လႄႈသိုပ်ႇၵႂႃႇတႃႇသေႇဢမ်ႇထၢတ်ႇသေၵမ်းလူၺ်ႈ။ ဢႃမိၼ်ႈ။ လိၵ်ႈတြႃးပေႇတရုၽိုၼ်တီႈသွင်ယဝ်ႉယဝ်ႉဢေႃႈ။
ႁဝ်းတႅမ်ႈထိုင်သူလွင်ႈၼုၵ်ႈၵပၢတ်ႈတြႃးၸဝ်ႈဢၼ်ဢသၢၵ်ႈလိပ်းယူႇလႄႈမီးယူႇ၊ၸဵမ်မိူဝ်ႈၵေႃႇၸႃႉႁူဝ်ပိုင်းၼၼ်ႉဢေႃႈ။ တြႃးၸဝ်ႈၼၼ်ႉတူဝ်ႁဝ်းလႆႈငိၼ်း၊မၢၵ်ႇတႃတူဝ်ႁဝ်းလႆႈႁၼ်၊တူဝ်ႁဝ်းလႆႈလူလႆႈတူၺ်းယဝ်ႉလႄႈမိုဝ်းႁဝ်းလႆႈယိပ်းလႆႈၵမ်တႄႉတႄႉယဝ်ႉဢေႃႈ။-
ဢသၢၵ်ႈၼၼ်ႉ၊ပဵၼ်တူဝ်ပဵၼ်ႁၢင်ႈမႃးယဝ်ႉလႄႈႁဝ်းလႆႈႁၼ်ယဝ်ႉဢေႃႈ။ ႁဝ်းၸင်ႇၶၢမ်ႇသၢၵ်ႈသေႇလွင်ႈဢသၢၵ်ႈထႃႇဝရႃႉ၊ဢၼ်မီးလူၺ်ႈပေႃႈၸဝ်ႈလႄႈၽုၺ်ႇဢွၵ်ႇမွၵ်ႇပၼ်တီႈႁဝ်းလႆႈႁုလႄႈၼႄပျႃးတီႈသူၼၼ်ႉဢေႃႈ။-
ၵႃႈဢၼ်ႁဝ်းလႆႈႁၼ်၊ဢိၵ်ႇတင်းၵႃႈဢၼ်ႁဝ်းလႆႈငိၼ်းယဝ်ႉၸိူဝ်းၼၼ်ႉၵေႃႈႁဝ်းမွၵ်ႇလၢတ်ႈသူႁႂ်ႈသူလႆႈသိူၵ်ႈသမ်ႇၸမ်ၸႂ်ၵၼ်တင်းႁဝ်း၊ၼႂ်းတၢင်းဢၼ်ႁဝ်းလႆႈဢွၼ်ၵၼ်သိူၵ်ႈသမ်ႇၸမ်ၸႂ်ၵၼ်တင်းပေႃႈၸဝ်ႈ၊ဢိၵ်ႇတင်းလုၵ်ႈမၼ်းၸဝ်ႈ၊ ၸဝ်ႈယေႇသုၶရိၸ်ႈ၊ ၼၼ်ႉဢေႃႈ။-
ႁဝ်းတႅမ်ႈလွင်ႈတၢင်းၸိူဝ်းၼႆႉပၼ်သူႁႂ်ႈတၢင်းဢၼ်သူသိူဝ်းပျေႃႇၼၼ်ႉလႆႈပျေႉၸုမ်ႇဢေႃႈ။
တြႃးသဵင်ၶၢဝ်ႇဢၼ်ႁဝ်းလႆႈငိၼ်းၵႃႈတီႈလုၵ်ႈၸဝ်ႈသေယဝ်ႉ၊မွၵ်ႇလၢတ်ႈသူလႄႈဝႃႈၸမ်ႉ၊ၽြႃးပဵၼ်ၸဝ်ႈပဵၼ်ဢၼ်လႅင်းဢေႃႈ။ တၢင်းဢၼ်လပ်းသိင်ႇဢမ်ႇမီးၵႃႈၼႂ်းမၼ်းၸဝ်ႈလႃးလႃး။-
ပိူဝ်ႈၼႆလႄႈပေႃးႁဝ်းဝႃႈ၊ႁဝ်းသိူၵ်ႈသမ်ႇလႄႈၸမ်ၸႂ်ၵၼ်တင်းမၼ်းၸဝ်ႈဢေႃႈ၊ဝႃႈၼႆလႄႈႁဝ်းသမ်ႉၵမ်ၵျၢင်ႉၵႃႈၼႂ်းဢၼ်လပ်းသိင်ႇယူႇၵူၺ်းၸိုင်၊ပဵၼ်ဢၼ်ႁဝ်းပႅတ်ႉလႅၼ်ယူႇလႄႈပဵၼ်ဢၼ်ႁဝ်းဢမ်ႇၵမ်ၵျၢင်ႉၸွမ်းသဵတ်ႈၸႃႇတြႃးဢေႃႈ။-
ၵူၺ်းၵႃႈ၊ပေႃးႁဝ်းၵမ်ၵျၢင်ႉၼႂ်းဢၼ်လႅင်းမိူၼ်ၸိူဝ်ႉၼင်ႇဢၼ်မၼ်းၸဝ်ႈမီးၼႂ်းဢၼ်လႅင်းယူႇၼၼ်ႉၸိုင်၊ႁဝ်းမီးတၢင်းဢၼ်မိုတ်ႈၵိုဝ်းထုၵ်ႇမေႃၵၼ်လႄႈလိူတ်ႈ ၸဝ်ႈယေႇသု၊ လုၵ်ႈၽြႃးပဵၼ်ၸဝ်ႈၼၼ်ႉသုၵ်ႈပွတ်ႈဢပျတ်ႈႁဝ်းၵႃႈမီးတင်းသဵင်ႈတင်းလူင်ဢေႃႈ။
ပေႃးႁဝ်းဝႃႈ၊ႁဝ်းဢမ်ႇမီးဢပျတ်ႈဝႃႈၼႆၸိုင်၊ပဵၼ်တၢင်းဢၼ်ႁဝ်းပႅတ်ႉလႅၼ်တူဝ်ၸဝ်ႈၵဝ်ႇလႄႈ သဵတ်ႈၸႃႇတြႃးၵေႃႈဢမ်ႇမီးၵႃႈၼႂ်းႁဝ်းဢေႃႈ။-
ၵူၺ်းၵႃႈ၊ပေႃးႁဝ်းၽုၺ်ႇဢွၵ်ႇဢပျတ်ႈႁဝ်းၵႃႈမီးလႄႈဝုၼ်ႇၶၢမ်ႇတွင်းပၢၼ်ႇၸိုင်၊ၸွမ်းၼင်ႇဢၼ်မၼ်းၸဝ်ႈမီးသဵတ်ႈၸႃႇလႄႈတၵ်းတႅပ်းတတ်းၸွမ်းၼင်ႇတြႃးၼၼ်ႉ၊မၼ်းၸဝ်ႈတၵ်းပွႆႇၶႂၢင်းပၼ်ဢပျတ်ႈႁဝ်းၵႃႈမီးသေယဝ်ႉ၊ပႄႇၽဵဝ်ႈပႅတ်ႈဢၼ်ႁဝ်းႁဵတ်းၽိတ်းတင်းမူတ်းၼၼ်ႉဢေႃႈ။-
ပေႃးႁဝ်းဝႃႈ၊ႁဝ်းဢမ်ႇမီးဢပျတ်ႈသေဢိတ်းဝႃႈၼႆၸိုင်၊မိူၼ်ၵၼ်တင်းႁဝ်းႁဵတ်းႁႂ်ႈၽြႃးပဵၼ်ၸဝ်ႈႁဝ်းပဵၼ်ၽြႃးဢၼ်လၢတ်ႈၵႂၢမ်းမုသႃႇလႄႈၼုၵ်ႈၵပၢတ်ႈတြႃးၸဝ်ႈၵေႃႈဢမ်ႇမီးၵႃႈၼႂ်းႁဝ်းဢေႃႈ။
လုၵ်ႈလၢင်းဢၼ်ၵဝ်ႁၵ်ႉၶဝ်႟။ ၼင်ႇႁိုဝ်သူတၵ်းဢမ်ႇႁဵတ်းဢပျတ်ႈမႅၼ်ႈၸိုင်၊ၵဝ်တႅမ်ႈလွင်ႈတၢင်းၸိူဝ်းၼႆႉပၼ်ၵႂႃႇတီႈသူဢေႃႈ။ ၼႂ်းဝႃႈၼၼ်သေၵေႃႈပေႃးသေၵေႃႉသေၵူၼ်းႁဵတ်းဢပျတ်ႈၸိုင်၊ႁဝ်းမီးၸဝ်ႈဝူင်ႈၵၢင်ပႃးၼိုင်ႈဢၼ်ပဵၼ် ၸဝ်ႈယေႇသုၶရိၸ်ႈ၊ ၸဝ်ႈဢၼ်သိုဝ်ႈတေႃႇလႄႈလဝ်ႈယွၼ်းတီႈပေႃႈၸဝ်ႈပုၼ်ႈႁဝ်းဢေႃႈ။-
ၸဝ်ႈၶရိၸ်ႈ၊ ၼၼ်ႉပဵၼ်ၽူႈဢၼ်ပွႆႇလွတ်ႈဢပျတ်ႈႁဝ်းၵူၺ်းဢမ်ႇၵႃး၊ပွႆႇလွတ်ႈပႃးၸဵမ်ဢပျတ်ႈၵူၼ်းလေႃးၵီႇတင်းသဵင်ႈတင်းလူင်ဢေႃႈ။
ၵွပ်ႈပိူဝ်ႈလွင်ႈတၢင်းၼႆႉလႄႈပေႃးႁဝ်းၵမ်ၵျၢင်ႉၸွမ်းပိင်းၺၢပ်ႈတြႃးၸဝ်ႈၸိုင်၊လွင်ႈဢၼ်ႁဝ်းႁုၸၵ်းမၼ်းၸဝ်ႈၼၼ်ႉႁဝ်းတၵ်းလႆႈႁုတႄႉဢေႃႈ။-
ၵေႃႉဢၼ်လၢတ်ႈဝႃႈ၊ “ၵဝ်ႁုၸၵ်းၸဝ်ႈၼၼ်ႉဢေႃႈ” ဝႃႈၼႆသေလႄႈဢမ်ႇၵမ်ၵျၢင်ႉၸွမ်းပိင်းၺၢပ်ႈတြႃးၸဝ်ႈလႄႈယူႇၸိုင်၊မၼ်းပဵၼ်ၵူၼ်းပႅတ်ႉၵူၼ်းလႅၼ်လႄႈသဵတ်ႈၸႃႇတြႃးဢမ်ႇမီးၵႃႈၼႂ်းမၼ်းဢေႃႈ။-
ၵေႃႉဢၼ်ပႂ်ႉၵမ်ပႂ်ႉၸွမ်းတြႃးၸဝ်ႈၼၼ်ႉၸမ်ႉ၊ပဵၼ်ၵေႃႉဢၼ်ပျေႉၸုမ်ႇတင်းတၢင်းႁၵ်ႉမႅတ်ႈတႃႇၽြႃးပဵၼ်ၸဝ်ႈၸႂ်ႈတႄႉဢေႃႈ။ ၵွပ်ႈပိူဝ်ႈၸိူဝ်ႉၼင်ႇၼၼ်လႄႈႁဝ်းႁုလွင်ႈဢၼ်ႁဝ်းမီးၼႂ်းမၼ်းၸဝ်ႈၼၼ်ႉဢေႃႈ။-
ၵေႃႉဢၼ်ဝႃႈ၊ “ၵဝ်တႄႇယူႇၼႂ်းမၼ်းၸဝ်ႈၼၼ်ႉဢေႃႈ” ဝႃႈၼႆၼၼ်ႉတၵ်းလႆႈၵမ်ၵျၢင်ႉၸွမ်းၵႃႈၼင်ႇဢၼ် ၸဝ်ႈယေႇသုၶရိၸ်ႈ၊ ၵမ်ၵျၢင်ႉၼၼ်ႉဢေႃႈ။
ၵေႃႉဢၼ်ၵဝ်ႁၵ်ႉၶဝ်႟။ ပိင်းၺၢပ်ႈဢၼ်ၵဝ်တႅမ်ႈပၼ်ၵႂႃႇတီႈသူၼႆႉပဵၼ်ပိင်းၺၢပ်ႈဢၼ်မႂ်ႇဢမ်ႇၸႂ်ႈ။ ပဵၼ်ပိင်းၺၢပ်ႈၵဝ်ႇဢၼ်မီးဝႆႉတီႈသူၸဵမ်မိူဝ်ႈႁူဝ်ပိုင်းၼၼ်ႉဢေႃႈ။ ပိင်းၺၢပ်ႈၵဝ်ႇၼႆႉပဵၼ်တြႃးသဵင်ၶၢဝ်ႇဢၼ်သူယၢမ်ႈလႆႈငိၼ်းၼၼ်ႉဢေႃႈ။-
ၼႂ်းဝႃႈၼၼ်သေၵေႃႈ၊ပိင်းၺၢပ်ႈဢၼ်ၵဝ်တႅမ်ႈလိၵ်ႈပၼ်ၵႂႃႇတီႈသူတေႃႈလဵဝ်ၼႆႉ၊ပဵၼ်ပိင်းၺၢပ်ႈမႂ်ႇ၊ၵွပ်ႈပိူဝ်ႈပဵၼ်ဢၼ်မၢၼ်ႇမႅၼ်ႈၸိုဝ်ႈၸႂ်ႈၼႂ်းမၼ်းၸဝ်ႈ၊ဢိၵ်ႇတင်းၵႃႈၼႂ်းသူဢေႃႈ။ လွင်ႈမၼ်းၸမ်ႉ၊ဢၼ်လပ်းသိင်ႇႁၢႆၵႂႃႇယဝ်ႉလႄႈဢၼ်လႅင်းၸႅတ်ႈၸႅတ်ႈၼၼ်ႉႁိူဝ်ႈလႅင်းမႃးဢေႃႈ။
ၵေႃႉဢၼ်ဝႃႈ၊ “ၵဝ်မီးၼႂ်းဢၼ်လႅင်းဢေႃႈ” ဝႃႈၼႆလႄႈသမ်ႉၸင်းပီႈၼွင်ႉမၼ်းၼၼ်ႉၸမ်ႉ၊မၼ်းယင်းမီးယူႇၵႃႈၼႂ်းလပ်းသိင်ႇႁၢၼ်ႉတေႃႇမိူဝ်ႈလဵဝ်ဢေႃႈ။-
ၵေႃႉဢၼ်ႁၵ်ႉပီႈၼွင်ႉမၼ်းၼၼ်ႉၸမ်ႉ၊မၼ်းမီးယူႇၵႃႈၼႂ်းဢၼ်လႅင်းဢေႃႈ။ ၼႂ်းမၼ်းၼၼ်ႉ၊လွင်ႈတၢင်းဢၼ်ၸၢင်ႈႁဵတ်းႁႂ်ႈၶီႈလိုတ်းလႄႈလူမ်ႉၼႂ်းဢပျတ်ႈၼၼ်ႉဢမ်ႇမီး။-
ၵေႃႉဢၼ်ၸင်းပီႈၼွင်ႉမၼ်းၼၼ်ႉၸမ်ႉ၊မီးယူႇၼႂ်းလပ်းသိင်ႇလႄႈၵမ်ၵျၢင်ႉၼႂ်းဢၼ်လပ်းသိင်ႇသေယဝ်ႉ၊ယင်းဢမ်ႇႁုတၢင်းဢၼ်မၼ်းၵႂႃႇတီႈလႂ်ယူႇ၊ၵွပ်ႈပိူဝ်ႈဢၼ်လပ်းသိင်ႇႁဵတ်းႁႂ်ႈမၢၵ်ႇတႃမၼ်းဢမ်ႇႁၼ်လႆႈၼၼ်ႉဢေႃႈ။
လုၵ်ႈလၢင်းၶဝ်႟။ ၵဝ်တႅမ်ႈလိၵ်ႈပၼ်ၵႂႃႇတီႈသူၵွပ်ႈပိူဝ်ႈဢပျတ်ႈသူလႆႈပွႆႇလွတ်ႈပၼ်ၵွပ်ႈလူၺ်ႈၼႃႇမႃႉၸိုဝ်ႈသဵင် ၸဝ်ႈၶရိၸ်ႈ၊ ၼၼ်ႉဢေႃႈ။-
ပေႃႈၶဝ်႟။ ၵဝ်တႅမ်ႈလိၵ်ႈပၼ်ၵႂႃႇတီႈသူၵွပ်ႈပိူဝ်ႈသူႁုၸၵ်းမၼ်းၸဝ်ႈဢၼ်မီးယူႇၸဵမ်မိူဝ်ႈႁူဝ်ပိုင်းၼၼ်ႉဢေႃႈ။ ၽူႈမၢဝ်ႇၶဝ်႟။ ၵဝ်တႅမ်ႈလိၵ်ႈပၼ်ၵႂႃႇတီႇသူၵွပ်ႈပိူဝ်ႈသူပႄႉၼႅင်ႇၶုၼ်ၽီႁၢႆႉၼၼ်ႉဢေႃႈ။
လုၵ်ႈဢွၼ်ႇၶဝ်႟။ ၵဝ်တႅမ်ႈလိၵ်ႈပၼ်ၵႂႃႇတီႈသူၵွပ်ႈပိူဝ်ႈသူႁုၸၵ်းပေႃႈၸဝ်ႈၼၼ်ႉဢေႃႈ။ ပေႃႈၶဝ်႟။ ၵဝ်တႅမ်ႈလိၵ်ႈပၼ်ၵႂႃႇတီႈသူၵွပ်ႈပိူဝ်ႈသူႁုၸၵ်းမၼ်းၸဝ်ႈဢၼ်မီးယူႇၸဵမ်မိူဝ်ႈႁူဝ်ပိုင်းၼၼ်ႉဢေႃႈ။ ၽူႈမၢဝ်ႇၶဝ်႟။ ၵဝ်တႅမ်ႈလိၵ်ႈပၼ်တီႈသူၵႂႃႇ၊ၵွပ်ႈပိူဝ်ႈသူမီးဢဵၼ်မီးႁႅင်း၊ၼုၵ်ႈၵပၢတ်ႈတြႃးၽြႃးပဵၼ်ၸဝ်ႈမီးယူႇၵႃႈၼႂ်းသူလႄႈသူပႄႉၼႅင်ႇၶုၼ်ၽီႁၢႆႉၼၼ်ႉလႆႈဢေႃႈ။
ယႃႇပေႁၵ်ႉပႅင်းလေႃးၵႃႉၼႆႉ၊ဢိၵ်ႇတင်းၶိူင်ႈပိူင်ဢၼ်မီးၼႂ်းမၼ်းၼၼ်ႉ။ ပေႃးသေၵေႃႉသေၵူၼ်းႁၵ်ႉပႅင်းလေႃးၵႃႉၼႆႉၸိုင်၊တၢင်းဢၼ်ႁၵ်ႉပေႃႈၸဝ်ႈၼၼ်ႉဢမ်ႇမီးၵႃႈၼႂ်းမၼ်းဢေႃႈ။-
လွင်ႈမၼ်းၸမ်ႉ၊ၶိူင်ႈပိူင်ဢၼ်မီးၵႃႈၼႂ်းလေႃးၵႃႉၼႆႉတင်းသဵင်ႈတင်းလူင်ဢၼ်ဝႃႈ၊တၢင်းဢၼ်ၼိူဝ်ႉလိူတ်ႈၸပ်းၸွႆး၊တၢင်းဢၼ်မၢၵ်ႇတႃၸပ်းၸွႆး၊တၢင်းဢၼ်ႁူဝ်ၸႂ်ၽႅၼ်သုင်လူၺ်ႈၸေးၸိမ်ႇၶူဝ်းၶွင်ၸိူဝ်းၼႆႉ၊ပဵၼ်မႃးၵႃႈတီႈပေႃႈၸဝ်ႈဢမ်ႇၸႂ်ႈ၊ပဵၼ်မႃးၵႃႈတီႈလေႃးၵႃႉၼႆႉဢေႃႈ။-
လေႃးၵႃႉဢိၵ်ႇတင်းတၢင်းဢၼ်ၸပ်းၸွႆးၼႂ်းလေႃးၵႃႉၼႆႉၼၼ်ႉ၊လပ်ႉႁၢႆပူၼ်ႉၵႂႃႇဢေႃႈ။ ၵေႃႉဢၼ်ၵမ်ၵျၢင်ႉၸွမ်းဢလူဝ်ႇၽြႃးပဵၼ်ၸဝ်ႈၸမ်ႉ၊ဢသၢၵ်ႈလိပ်းယူႇၼိၵ်ႈၸႃႉထႃႇဝရႃႉဢေႃႈ။
လုၵ်ႈလၢင်းၶဝ်႟။ ၶိင်ႇယၢမ်းမိူဝ်ႈလဵဝ်ၼႆႉပဵၼ်ၶိင်ႇလိုၼ်းလင်သုတ်းဢေႃႈ။ ၸွမ်းၼင်ႇဢၼ်သူလႆႈငိၼ်းဝႃႈ၊ရၢၼ်ႇသူႇ ၸဝ်ႈၶရိၸ်ႈ၊ ဢၼ်ဝႃႈ၊ ဢၼ်ႇတိၶရိၸ်ႈ၊ တၵ်းပေႃႇမႃးၼၼ်ႉ၊တေႃႈလဵဝ်ၼႆႉရၢၼ်ႇသူႇ ၸဝ်ႈၶရိၸ်ႈ၊ မီးမႃးၼမ်ၼႃႇယဝ်ႉ။ ပိူဝ်ႈၼႆလႄႈႁဝ်းႁုလွင်ႈဢၼ်ၶိင်ႇယၢမ်းမိူဝ်ႈလဵဝ်ၼႆႉပဵၼ်ၶိင်ႇလိုၼ်းလင်သုတ်းဢေႃႈ။-
ၶဝ်ၸိူဝ်းၼၼ်ႉတိုၼ်းဢမ်ႇၸႂ်ႈၵူၼ်းႁဝ်းလႄႈၶဝ်ၸၢင်ႈဢွၵ်ႇသေၵႃႈၼႂ်းႁဝ်းၵႂႃႇဢေႃႈ။ ပေႃးၶဝ်ပဵၼ်ၵူၼ်းႁဝ်းတႄႉၸိုင်၊ၶဝ်တၵ်းယူႇလူၺ်ႈၵၼ်တင်းႁဝ်းဢေႃႈ။ ၶဝ်ဢွၵ်ႇသေၵႃႈၼႂ်းႁဝ်းၵႂႃႇႁႂ်ႈလွင်ႈတၢင်းဢၼ်ၶဝ်ဢမ်ႇၸႂ်ႈၵူၼ်းႁဝ်းၼၼ်ႉလႆႈထၢင်ႇသႃးဢေႃႈ။
သူလႆႈၶၢမ်ႇဢဝ်ဝိၺိၺ်ႇမူတ်းၸၢင်ႇၸဝ်ႈဢၼ် ၸဝ်ႈၶရိၸ်ႈ၊ သွၼ်းလေႃႇတီႈသူၼၼ်ႉယဝ်ႉလႄႈသူတင်းသဵင်ႈတင်းလူင်လႆႈႁုသဵတ်ႈၸႃႇတြႃးဢေႃႈ။-
ၵဝ်တႅမ်ႈလိၵ်ႈပၼ်ၵႂႃႇတီႈသူၵွပ်ႈပိူဝ်ႈသူဢမ်ႇႁုသဵတ်ႈၸႃႇတြႃးဢမ်ႇၸႂ်ႈ။ ၵွပ်ႈပိူဝ်ႈသူႁုသဵတ်ႈၸႃႇတြႃးသေယဝ်ႉ၊ႁုလွင်ႈတၢင်းဢၼ်ပႅတ်ႉဢၼ်လႅၼ်ဢမ်ႇပဵၼ်မႃးၵႃႈတီႈသဵတ်ႈၸႃႇတြႃးၼၼ်ႉလႄႈၵဝ်တႅမ်ႈလိၵ်ႈပၼ်ၵႂႃႇတီႈသူဢေႃႈ။
ပိူဝ်ႈၼႆလႄႈၵေႃႉဢၼ်ၸၢင်ႈပႅတ်ႉၸၢင်ႈလႅၼ်ၼၼ်ႉပဵၼ်ၽူႈလႂ်။ ပဵၼ်ၵေႃႉဢၼ်လၢတ်ႈဝႃႈ ၸဝ်ႈယေႇသု၊ ဢမ်ႇၸႂ်ႈ ၸဝ်ႈၶရိၸ်ႈ၊ ဝႃႈၼင်ႇၼႆၼၼ်ႉဢမ်ႇၸႂ်ႈႁိုဝ်း။ ၵေႃႉၼၼ်ႉပဵၼ် ဢၼ်ႇတိၶရိၸ်ႈ၊ ဢၼ်ပႄႇပႅတ်ႈပေႃႈၸဝ်ႈ၊ဢိၵ်ႇတင်းလုၵ်ႈၸဝ်ႈၼၼ်ႉဢေႃႈ။-
ၵေႃႉဢၼ်ပႄႇပႅတ်ႈလုၵ်ႈၸဝ်ႈၼၼ်ႉၵေႃႈလႆႈပႄႇပႅတ်ႈပေႃႈၸဝ်ႈလႄႈၵေႃႉဢၼ်ႁပ်ႉတုင်းဢဝ်လုၵ်ႈၸဝ်ႈၸမ်ႉ၊ႁပ်ႉတုင်းဢဝ်ပေႃႈၸဝ်ႈဢေႃႈ။
တြႃးသဵင်ၶၢဝ်ႇဢၼ်သူလႆႈငိၼ်းၸဵမ်မိူဝ်ႈႁူဝ်ပိုင်းၼၼ်ႉႁႂ်ႈမီးယူႇၼႂ်းႁူဝ်ၸႂ်သူတႃႉ။ ပေႃးတြႃးၼၼ်ႉတႄႇယူႇၼႂ်းႁူဝ်ၸႂ်သူၸိုင်၊သူတၵ်းတေတႄႇယူႇၼႂ်းလုၵ်ႈၸဝ်ႈ၊ဢိၵ်ႇတင်းၼႂ်းပေႃႈၸဝ်ႈဢေႃႈ။-
ၼႆႉၸမ်ႉ၊ပဵၼ်တၢင်းဢၼ် ၸဝ်ႈၶရိၸ်ႈ၊ ဝႆႉတိဝႃႈ၊တၵ်းပၼ်ဢသၢၵ်ႈထႃႇဝရႃႉတီႈႁဝ်းဢေႃႈ။
ၵဝ်တႅမ်ႈၵႂၢမ်းၼႆႉပၼ်ၵႂႃႇတီႈသူၼၼ်ႉပဵၼ်လွင်ႈၶဝ်ၸိူဝ်းဢၼ်ပႅတ်ႉလႅၼ်သူၼၼ်ႉဢေႃႈ။-
ၵူၺ်းၵႃႈ၊ပုၼ်ႈသူတင်းလၢႆၸမ်ႉ၊ ၸဝ်ႈၶရိၸ်ႈ၊ လႆႈသွၼ်းလေႃႇဝိၺိၺ်ႇၸဝ်ႈၵႃႈၼိူဝ်သူယဝ်ႉ။ ၼႂ်းၸူဝ်ႈဢၼ်ဝိၺိၺ်ႇၸဝ်ႈတႄႇယူႇၼႂ်းသူၼႆႉၸိုင်၊သူဢမ်ႇလူဝ်ႇႁႂ်ႈၽူႈလႂ်လႆႈသင်ႇသွၼ်သုင်းမႃႉသူယဝ်ႉဢေႃႈ။ လွင်ႈမၼ်းၸမ်ႉ၊ဝိၺိၺ်ႇၸဝ်ႈသင်ႇသွၼ်သုင်းမႃႉသူၵူႈၸိူဝ်ႉၵူႈပိူင်လႄႈၵႃႈဢၼ်ဝိၺိၺ်ႇၸဝ်ႈသွၼ်ပၼ်ၼၼ်ႉပဵၼ်ဢၼ်ၽိတ်းဢၼ်ပိူင်ႈဢမ်ႇၸႂ်ႈ။ သွၼ်ပၼ်ဢၼ်မၢၼ်ႇဢၼ်မႅၼ်ႈဢေႃႈ။ ပိူဝ်ႈၼႆလႄႈထွမ်ႇဢဝ်တၢင်းဢၼ်ဝိၺိၺ်ႇၸဝ်ႈသွၼ်ပၼ်ၼၼ်ႉလႄႈတႄႇယူႇၼႂ်း ၸဝ်ႈၶရိၸ်ႈ၊ တႃႉ။
ၸႂ်ႈယဝ်ႉ။ လုၵ်ႈလၢင်းၶဝ်႟။ ပုၼ်ႈလွင်ႈၼင်ႇႁိုဝ်ႁဝ်းတၵ်းလႆႈႁတ်းႁၢၼ်ၼႂ်းမိူဝ်ႈဢၼ်မၼ်းၸဝ်ႈပေႃႇမႃးၼၼ်ႉၸိုင်၊ယင်းဢမ်ႇလူဝ်ႇဢူၵ်းဢၢႆလႄႈတဵတ်ႇမႅပ်းသေၵႃႈတီႈမၼ်းၸဝ်ႈၼႂ်းမိုဝ်ႉဝၼ်းဢၼ်မၼ်းၸဝ်ႈႁွတ်ႈမႃးၼၼ်ႉၸိုင်၊ဢွၼ်ၵၼ်တႄႇယူႇၼႂ်းမၼ်းၸဝ်ႈတႃႉ။-
သူႁုလွင်ႈဢၼ် ၸဝ်ႈၶရိၸ်ႈ၊ ပဵၼ်ၸဝ်ႈသိုဝ်ႈတေႃႇၼၼ်ႉယူႇဢေႃႈ။ ပိူဝ်ႈၼႆလႄႈသူထုၵ်ႇလီႁုလွင်ႈဢၼ်ၶဝ်ၸိူဝ်းဢၼ်ၵမ်ၵျၢင်ႉတြႃးတၢင်းဢၼ်သိုဝ်ႈတေႃႇၼၼ်ႉပဵၼ်လုၵ်ႈလၢင်းၽြႃးပဵၼ်ၸဝ်ႈၼၼ်ႉဢေႃႈ။
ပေႃႈၸဝ်ႈႁၵ်ႉႁဝ်းထၢၼ်ႇႁိုဝ်ဝႃႈၼႆၶႆႈၸႂ်ဝူၼ်ႉၸႂ်တူၺ်းတႃႉ။ မၼ်းၸဝ်ႈႁၵ်ႉႁဝ်းထၢၼ်ႈပေႃးပၼ်ဢၶႂၢင်ႉဢၼ်ႁွင်ႉႁဵၵ်ႈႁဝ်းဝႃႈ၊ပဵၼ်လုၵ်ႈလၢင်းၽြႃးပဵၼ်ၸဝ်ႈဝႃႈၼႆလႄႈႁဝ်းၸိူဝ်းၼႆႉၵေႃႈလႆႈပဵၼ်လုၵ်ႈလၢင်းမၼ်းၸဝ်ႈတႄႉဢေႃႈ။ ၵွပ်ႈၼႆလႄႈၵူၼ်းလေႃးၵီႇတင်းလၢႆဢမ်ႇႁုၸၵ်းႁဝ်းၵွပ်ႈပိူဝ်ႈၶဝ်ဢမ်ႇႁုၸၵ်းၽြႃးပဵၼ်ၸဝ်ႈဢေႃႈ။-
ၵေႃႉဢၼ်ၵဝ်ႁၵ်ႉၶဝ်႟။ တေႃႈလဵဝ်ၼႆႉႁဝ်းပဵၼ်လုၵ်ႈလၢင်းၽြႃးပဵၼ်ၸဝ်ႈဢေႃႈ။ လွင်ႈဢၼ်ၵမ်းလိုၼ်းၼၼ်ႉႁဝ်းတၵ်းပဵၼ်ၸိူဝ်ႉၼင်ႇႁိုဝ်ၼၼ်ႉၸိုင်၊ဢမ်ႇပႆႇတွၼ်ႉထၢင်ႇသႃးသေၵေႃႈ၊ႁဝ်းႁုဝႃႈမိူဝ်ႈဢၼ် ၸဝ်ႈၶရိၸ်ႈ၊ ပေႃႇမႃးၼၼ်ႉၸိုင်၊ႁဝ်းတၵ်းပဵၼ်မိူၼ်ၸိူဝ်ႉၼင်ႇမၼ်းၸဝ်ႈၼၼ်ႉဢေႃႈ။ လွင်ႈမၼ်းၸမ်ႉ၊ႁဝ်းတၵ်းလႆႈႁၼ်မၼ်းၸဝ်ႈ၊ၸွမ်းၵႃႈၼင်ႇဢၼ်မၼ်းၸဝ်ႈပဵၼ်ယူႇၼၼ်ႉဢေႃႈ။-
ပိူဝ်ႈၼႆၸင်ႇၵေႃႉဢၼ်မုင်ႈထႃႈမွင်းထႃႈၼႂ်း ၸဝ်ႈၶရိၸ်ႈ၊ ၼၼ်ႉၸၢင်ႈႁႂ်ႈတူဝ်ၸဝ်ႈၵဝ်ႇမူတ်းၸၢင်ႇမိူၼ်ၸိူဝ်ႉၼင်ႇမၼ်းၸဝ်ႈမူတ်းၸၢင်ႇၼၼ်ႉဢေႃႈ။
ၽူႈလႂ်သေဢမ်ႇဝႃႈ၊ၵေႃႉဢၼ်ႁဵတ်းဢပျတ်ႈၼၼ်ႉၽိတ်းပိူင်ႈပိင်းၺၢပ်ႈတြႃးၽြႃးပဵၼ်ၸဝ်ႈ၊ၵွပ်ႈပိူဝ်ႈဢပျတ်ႈၼၼ်ႉပဵၼ်မဵဝ်းဢၼ်ၽိတ်းပိူင်ႈပိင်းၺၢပ်ႈတြႃးဢေႃႈ။-
သူႁုဝႃႈ၊ ၸဝ်ႈၶရိၸ်ႈ၊ ၵျွလူင်းမႃးႁႂ်ႈလႆႈဢဝ်ဢပျတ်ႈႁဝ်းၵႂႃႇပႅတ်ႈ၊ဢိၵ်ႇတင်းႁုလွင်ႈဢၼ်ၵႃႈၼႂ်းမၼ်းၸဝ်ႈၼၼ်ႉ၊ဢမ်ႇမီးဢပျတ်ႈၼၼ်ႉဢေႃႈ။-
ၵေႃႉဢၼ်တႄႇယူႇၼႂ်း ၸဝ်ႈၶရိၸ်ႈ၊ ၼၼ်ႉ၊ဢမ်ႇတွၼ်ႉသိုပ်ႇႁဵတ်းဢပျတ်ႈ။ ၵေႃႉဢၼ်သိုပ်ႇႁဵတ်းဢပျတ်ႈၼၼ်ႉၸမ်ႉ၊ဢမ်ႇတွၼ်ႉလႆႈႁုလႆႈႁၼ်မၼ်းၸဝ်ႈဢေႃႈ။
လုၵ်ႈလၢင်းၶဝ်႟။ ယႃႇႁႂ်ႈၽူႈလႂ်လႆႈပႅတ်ႉလႅၼ်သူ။ ၽူႈလႂ်သေဢမ်ႇဝႃႈ၊ၵေႃႉဢၼ်ၵမ်ၵျၢင်ႉသိုဝ်ႈလီယူဝ်းလီၼၼ်ႉပဵၼ်ၵူၼ်းသိုဝ်ႈတေႃႇမိူၼ်ၸိူဝ်ႉၼင်ႇဢၼ် ၸဝ်ႈၶရိၸ်ႈ၊ ပဵၼ်ၸဝ်ႈသိုဝ်ႈတေႃႇၼၼ်ႉဢေႃႈ။-
ၵေႃႉဢၼ်သိုပ်ႇႁဵတ်းဢပျတ်ႈယူႇၼၼ်ႉပဵၼ်ၵူၼ်းမႃႇၼၢတ်ႈဢေႃႈ။ လွင်ႈမၼ်းၸမ်ႉ၊မႃႇၼၢတ်ႈၼၼ်ႉႁဵတ်းဢပျတ်ႈမႃးၸဵမ်မိူဝ်ႈၵေႃႇၸႃႉႁူဝ်ပိုင်းၼၼ်ႉဢေႃႈ။ ၼင်ႇၼႆလႄႈလုၵ်ႈၽြႃးပဵၼ်ၸဝ်ႈၵျွလူင်းမႃးႁႂ်ႈလႆႈယႃႉၼႃႈၵၢၼ်တၢင်းႁဵတ်းမႃႇၼၢတ်ႈၼၼ်ႉပႅတ်ႈဢေႃႈ။
ၽူႈလႂ်သေဢမ်ႇဝႃႈ၊ၵေႃႉဢၼ်ပဵၼ်လုၵ်ႈလၢင်းၽြႃးပဵၼ်ၸဝ်ႈၼၼ်ႉဢမ်ႇၸၢင်ႈသိုပ်ႇႁဵတ်းဢပျတ်ႈ။ လွင်ႈမၼ်းၸမ်ႉ၊ၸႂ်သၽေႃးၽြႃးပဵၼ်ၸဝ်ႈတႄႇယူႇၼႂ်းၵေႃႉၼၼ်ႉလႄႈမၼ်းဢမ်ႇၸၢင်ႈသိုပ်ႇႁဵတ်းဢပျတ်ႈ၊ၵွပ်ႈပိူဝ်ႈၽြႃးပဵၼ်ၸဝ်ႈပဵၼ်ပေႃႈၸဝ်ႈမၼ်းၼၼ်ႉဢေႃႈ။-
ၵွပ်ႈလွင်ႈတၢင်းၼႆႉလႄႈ လႆႈႁၼ်လုၵ်ႈလၢင်းၽြႃးပဵၼ်ၸဝ်ႈပဵၼ်ၽူႈလႂ်၊ဢိၵ်ႇတင်းလုၵ်ႈလၢင်းမႃႇၼၢတ်ႈပဵၼ်ၽူႈလႂ်ၼၼ်ႉထၢင်ႇထၢင်ႇသႃးသႃးဢေႃႈ။ ၵေႃႉဢၼ်ဢမ်ႇႁဵတ်းတၢင်းဢၼ်သိုဝ်ႈလီယူဝ်းလီ၊ဢမ်ႇႁၵ်ႉပီႈႁၵ်ႉၼွင်ႉမၼ်းၼၼ်ႉ၊ဢမ်ႇၸႂ်ႈလုၵ်ႈလၢင်းၽြႃးပဵၼ်ၸဝ်ႈဢေႃႈ။
တြႃးသဵင်ၶၢဝ်ႇဢၼ်သူလႆႈငိၼ်းၸဵမ်မိူဝ်ႈႁူဝ်ပိုင်းၼၼ်ႉဝႃႈၸမ်ႉ၊ႁဝ်းၵေႃႉၼိုင်ႈလႄႈၵေႃႉၼိုင်ႈတၵ်းလႆႈႁၵ်ႉပႅင်းၵၼ်ဝႃႈၼႆဢေႃႈ။-
ႁဝ်းတၵ်းဢမ်ႇလႆႈပဵၼ်မိူၼ် ၵႃႇဢိၼႃႉ၊ ၵေႃႉဢၼ်ပဵၼ်ၵူၼ်းမႃႇၼၢတ်ႈလႄႈဢဝ်ၼွင်ႉၸၢႆးတူဝ်ၸဝ်ႈၵဝ်ႇတၢႆၼၼ်ႉ။ ၵွပ်ႈသင်လႄႈ ၵႃႇဢိၼႃႉ၊ ဢဝ်ၼွင်ႉၸၢႆးမၼ်းတၢႆဝႃႈၼႆၸမ်ႉ၊ၵွပ်ႈပိူဝ်ႈၼႃႈၵၢၼ်တၢင်းႁဵတ်းမၼ်းၽိတ်းပိူင်ႈလႄႈၼႃႈၵၢၼ်တၢင်းႁဵတ်းၼွင်ႉၸၢႆးမၼ်းသိုဝ်ႈတေႃႇၼၼ်ႉဢေႃႈ။
ပီႈၼွင်ႉၶဝ်႟။ ပေႃးၵူၼ်းလေႃးၵီႇတင်းလၢႆၸင်းသူၸိုင်၊ယႃႇပေဢၢမ်း။-
ႁဝ်းႁုဝႃႈ၊ႁဝ်းလႆႈပူၼ်ႉလွတ်ႈတၢင်းတၢႆလႄႈၶဝ်ႈၵႂႃႇၵႃႈၼႂ်းတၢင်းဢၼ်ဢသၢၵ်ႈလိပ်းယူႇၼၼ်ႉၵွပ်ႈပိူဝ်ႈႁဝ်းႁၵ်ႉပီႈႁၵ်ႉၼွင်ႉၼၼ်ႉယူႇဢေႃႈ။ ၵေႃႉဢၼ်ဢမ်ႇႁၵ်ႉပီႈႁၵ်ႉၼွင်ႉၼၼ်ႉၸမ်ႉ၊ယင်းယူႇၼႂ်းတၢင်းတၢႆယူႇဢေႃႈ။-
လွင်ႈမၼ်းၸမ်ႉ၊ၵေႃႉဢၼ်ၸင်းပီႈၼွင်ႉတူဝ်ၸဝ်ႈၵဝ်ႇၼၼ်ႉပဵၼ်ၵေႃႉဢၼ်ဢဝ်ဢသၢၵ်ႈၵူၼ်းတၢႆဢေႃႈ။ သူႁုဝႃႈ၊ၵေႃႉဢၼ်ဢဝ်ဢသၢၵ်ႈၵူၼ်းတၢႆၼၼ်ႉဢသၢၵ်ႈထႃႇဝရႃႉဢမ်ႇတႄႇၵႃႈၼႂ်းမၼ်းဢေႃႈ။-
ၵွပ်ႈလွင်ႈတၢင်းၼႆႉလႄႈႁဝ်းလႆႈႁုလွင်ႈတၢင်းႁၵ်ႉမႅတ်ႈတႃႇပဵၼ်ၸိူဝ်ႉၼင်ႇႁိုဝ်ၼၼ်ႉ၊ၵွပ်ႈပိူဝ်ႈ ၸဝ်ႈၶရိၸ်ႈ၊ ၸုၼ်ႉဢသၢၵ်ႈမၼ်းၸဝ်ႈပုၼ်ႈႁဝ်းၼၼ်ႉဢေႃႈ။ ႁဝ်းၵေႃႈတၵ်းလႆႈၸုၼ်ႉဢသၢၵ်ႈပုၼ်ႈပီႈၼွင်ႉဢေႃႈ။-
ၵူၺ်းၵႃႈ၊ပေႃးၵေႃႉဢၼ်မီးၸေးၸိမ်ႇဢုၵ်ႉၸႃႇယူႇလႄႈလႆႈႁၼ်ပီႈၼွင်ႉမၼ်းယၢၵ်ႈၽၢၼ်ယူႇၼၼ်ႉသေၵေႃႈယင်းၶျုၵ်ႈဝႆႉ၊ၸႂ်ၸေႇတၼႃႇတၢင်းဢဵတ်းလူယူႇၸိုင်၊မႅတ်ႈတႃႇၽြႃးပဵၼ်ၸဝ်ႈတၵ်းတႄႇယူႇၼႂ်းၵေႃႉၼၼ်ႉ၊လႆႈၸိူဝ်ႉၼင်ႇႁိုဝ်။-
လုၵ်ႈလၢင်းၶဝ်႟။ ယင်းဢမ်ႇဢဝ်သူပ်းပဝ်ႇၵႂၢမ်းလၢႆၵူၺ်းႁၵ်ႉလႄႈႁႂ်ႈဢွၼ်ၵၼ်ပႃးတင်းတူဝ်တင်းၸႂ်၊ပႃးတင်းသဵတ်ႈၸႃႇသေလႄႈႁၵ်ႉပႅင်းၵၼ်တႃႉႁဝ်း။
ပေႃးႁဝ်းႁၵ်ႉၸိူဝ်ႉၼင်ႇၼၼ်ၸိုင်၊ႁဝ်းႁုလွင်ႈဢၼ်ႁဝ်းၸၢပ်ႈသႅင်ႇၵၼ်တင်းသဵတ်ႈၸႃႇတြႃးလႄႈႁူဝ်ၸႂ်ႁဝ်းဢမ်ႇလႆႈမႆႈၸႂ်ၼႅင်ၸႂ်ၵႃႈတီႈၽၢႆႇၼႃႈၽြႃးပဵၼ်ၸဝ်ႈဢေႃႈ။-
မိူဝ်ႈလႂ်သေဢမ်ႇဝႃႈ၊ပေႃးႁူဝ်ၸႂ်တူဝ်ၸဝ်ႈၵဝ်ႇယင်းတၢင်ႇဢပျတ်ႈတူဝ်ၸဝ်ႈၵဝ်ႇယူႇၸိုင်၊ႁဝ်းႁုဝႃႈၽြႃးပဵၼ်ၸဝ်ႈယႂ်ႇမျၢတ်ႈသေႁူဝ်ၸႂ်ႁဝ်း၊ဢိၵ်ႇတင်းႁုဝႃႈ၊မၼ်းၸဝ်ႈႁုၸႅင်ႈၵူႈၸိူဝ်ႉၵူႈပိူင်ၼၼ်ႉယူႇဢေႃႈ။-
ပိူဝ်ႈၼႆလႄႈ၊ၵေႃႉဢၼ်ၵဝ်ႁၵ်ႉၶဝ်႟။ ပေႃးႁူဝ်ၸႂ်ႁဝ်းဢမ်ႇတၢင်ႇဢပျတ်ႈတူဝ်ၸဝ်ႈၵဝ်ႇယဝ်ႉၸိုင်၊ႁဝ်းလႆႈဢၶႂၢင်ႉဢၼ်ႁတ်းႁၢၼ်ၽၢႆႇၼႃႈၽြႃးပဵၼ်ၸဝ်ႈယဝ်ႉဢေႃႈ။-
ၵႃႈဢၼ်ႁဝ်းသူးတွင်းၼၼ်ႉၸိုင်၊ႁဝ်းလႆႈၵႃႈတီႈၽြႃးပဵၼ်ၸဝ်ႈၵွပ်ႈပိူဝ်ႈႁဝ်းၵမ်ၵျၢင်ႉၸွမ်းပိင်းၺၢပ်ႈမၼ်းၸဝ်ႈလႄႈၵမ်ၵျၢင်ႉၵႃႈဢၼ်ထုၵ်ႇၸႂ်မၼ်းၸဝ်ႈၼၼ်ႉဢေႃႈ။-
ဢၼ်မၼ်းၸဝ်ႈပိင်းၺၢပ်ႈဝႆႉၸမ်ႉ၊ႁဝ်းတၵ်းလႆႈယုမ်ႇမၢတ်ႈၼႃႇမႃႉၸိုဝ်ႈသဵင်လုၵ်ႈမၼ်းၸဝ်ႈ ၸဝ်ႈယေႇသုၶရိၸ်ႈ၊ ဢိၵ်ႇတင်းႁဝ်းၼင်ႇၵၼ်တၵ်းလႆႈႁၵ်ႉပႅင်းၵၼ်မႅၼ်ႈၸွမ်းၼင်ႇဢၼ် ၸဝ်ႈၶရိၸ်ႈ၊ ပိင်းၺၢပ်ႈဝႆႉၼၼ်ႉဢေႃႈ။-
ၵေႃႉဢၼ်ၵမ်ၵျၢင်ႉၸွမ်းပိင်းၺၢပ်ႈမၼ်းၸဝ်ႈၼၼ်ႉ၊တႄႇယူႇၼႂ်းမၼ်းၸဝ်ႈလႄႈမၼ်းၸဝ်ႈၵေႃႈတႄႇယူႇၼႂ်းၵေႃႉၼၼ်ႉဢေႃႈ။ ၵွပ်ႈလွင်ႈတၢင်းၼႆႉလႄႈႁဝ်းႁုဝႃႈ၊ၽြႃးပဵၼ်ၸဝ်ႈတႄႇယူႇၼႂ်းႁဝ်းၵွပ်ႈပိူဝ်ႈဝိၺိၺ်ႇၸဝ်ႈဢၼ်ၽြႃးပဵၼ်ၸဝ်ႈပၼ်ႁဝ်းၼၼ်ႉဢေႃႈ။
ၵေႃႉဢၼ်ၵဝ်ႁၵ်ႉၶဝ်႟။ ယႃႇပေယုမ်ႇၶဝ်ၸိူဝ်းဢၼ်လၢတ်ႈဝႃႈ၊ၶဝ်မီးဝိၺိၺ်ႇၸဝ်ႈဝႃႈၼႆၼၼ်ႉၵႃႈမီးတင်းသဵင်ႈတင်းလူင်။ ၸႅတ်ႈတူၺ်းဝိၺိၺ်ႇဢၼ်ၶဝ်မီးၼၼ်ႉပဵၼ်မႃးၵႃႈတီႈၽြႃးပဵၼ်ၸဝ်ႈႁိုဝ်း၊ဢမ်ႇၸႂ်ႈႁိုဝ်းၼၼ်ႉတႃႉ။ လွင်ႈမၼ်းၸမ်ႉ၊မိၵ်ႉသႃႇပရေႃးၽႅတ်ႈ တင်းလၢႆၶဝ်ႈၵႂႃႇၵႃႈၼႂ်းလေႃးၵႃႉၼႆႉယဝ်ႉဢေႃႈ။-
တၵ်းတေႁဵတ်းၸိူဝ်ႉႁိုဝ်ႁု၊ဝိၺိၺ်ႇၽြႃးပဵၼ်ၸဝ်ႈလႆႈဝႃႈၼႆၸမ်ႉ၊ဝိၺိၺ်ႇဢၼ်ႁပ်ႉဢဝ်လွင်ႈဢၼ် ၸဝ်ႈယေႇသုၶရိၸ်ႈ၊ ၵျွလူင်းမႃးၶၢမ်ႇဢဝ်ၸႃႇတိၵူၼ်းၼၼ်ႉပဵၼ်ဝိၺိၺ်ႇဢၼ်လုၵ်ႉသေၵႃႈတီႈၽြႃးပဵၼ်ၸဝ်ႈမႃးဢေႃႈ။-
ဝိၺိၺ်ႇဢၼ်ဢမ်ႇႁပ်ႉဢဝ်လွင်ႈ ၸဝ်ႈယေႇသု၊ ၼၼ်ႉၸမ်ႉ၊မၼ်းဢမ်ႇၸႂ်ႈဝိၺိၺ်ႇဢၼ်ပဵၼ်မႃးၵႃႈတီႈၽြႃးပဵၼ်ၸဝ်ႈဢေႃႈ။ ဝိၺိၺ်ႇၼၼ်ႉပဵၼ်မႃးၵႃႈတီႈရၢၼ်ႇသူႇ ၸဝ်ႈၶရိၸ်ႈ၊ ဢၼ်ႁွင်ႉဝႃႈ၊ ဢၼ်ႇတိၶရိၸ်ႈ၊ ဢၼ်သူလႆႈငိၼ်းဝႃႈ၊မၼ်းတၵ်းမႃးဝႃႈၼႆၼၼ်ႉတေႃႈလဵဝ်ၼႆႉ၊မၼ်းသမ်ႉပေႃးမႃးမီးယူႇၵႃႈၼႂ်းလေႃးၵႃႉၼႆႉယဝ်ႉဢေႃႈ။
လုၵ်ႈဢွၼ်ႇၶဝ်႟။ သူပဵၼ်ၵူၼ်းၽြႃးပဵၼ်ၸဝ်ႈလႄႈလႆႈပႄႉၼႅင်ႇမိၵ်ႉသႃႇပရေႃးၽႅတ်ႈၶဝ်ၵွပ်ႈပိူဝ်ႈဝိၺိၺ်ႇၸဝ်ႈဢၼ်မီးၼႂ်းသူၼၼ်ႉယဵင်ႈၶႅၼ်းမီးၽုင်းတၼ်းၶူဝ်းယႂ်ႇၼႃႇသေဝိၺိၺ်ႇဢၼ်မီးၵႃႈၼႂ်းလေႃးၵႃႉၼၼ်ႉဢေႃႈ။-
မိၵ်ႉသႃႇပရေႃးၽႅတ်ႈၶဝ်ပဵၼ်ၵူၼ်းလေႃးၵီႇလႄႈၸၢင်ႈလၢတ်ႈလူၺ်ႈၶိူင်ႈပိူင်လေႃးၵႃႉသေလႄႈၵူၼ်းလေႃးၵီႇတင်းလၢႆၵေႃႈၸၢင်ႈထွမ်ႇဢဝ်ၵႂၢမ်းၶဝ်ၼၼ်ႉဢေႃႈ။-
ႁဝ်းၸိူဝ်းၼႆႉၸမ်ႉ၊ပဵၼ်ၵူၼ်းၽြႃးပဵၼ်ၸဝ်ႈဢေႃႈ။ ၽူႈလႂ်သေဢမ်ႇဝႃႈ၊ၵေႃႉဢၼ်ႁုၸၵ်းၽြႃးပဵၼ်ၸဝ်ႈၼၼ်ႉၸၢင်ႈထွမ်ႇဢဝ်ၵႂၢမ်းႁဝ်းသေလႄႈၵေႃႉဢၼ်ဢမ်ႇၸႂ်ႈၵူၼ်းၽြႃးပဵၼ်ၸဝ်ႈၸမ်ႉ၊ဢမ်ႇၸၢင်ႈထွမ်ႇဢဝ်ၵႂၢမ်းႁဝ်းဢေႃႈ။ ထွၵ်ႈလူၺ်ႈလွင်ႈတၢင်းၼႆႉလႄႈႁဝ်းၸၢင်ႈႁုဝိၺိၺ်ႇၸဝ်ႈဢၼ်ၸႅတ်ႈ၊ဢိၵ်ႇတင်းဝိၺိၺ်ႇဢၼ်ၽိတ်းပိူင်ႈဢေႃႈ။
ၵေႃႉဢၼ်ၵဝ်ႁၵ်ႉၶဝ်႟။ ႁဝ်းၵေႃႉၼိုင်ႈလႄႈၵေႃႉၼိုင်ႈႁၵ်ႉၵၼ်တႃႉႁဝ်း။ လွင်ႈမၼ်းၸမ်ႉ၊တၢင်းႁၵ်ႉမႅတ်ႈတႃႇပဵၼ်မႃးၵႃႈတီႈၽြႃးပဵၼ်ၸဝ်ႈဢေႃႈ။ ၽူႈလႂ်သေဢမ်ႇဝႃႈ၊ၵေႃႉဢၼ်ၸၢင်ႈႁၵ်ႉၼၼ်ႉပဵၼ်လုၵ်ႈလၢင်းၽြႃးပဵၼ်ၸဝ်ႈသေလႄႈႁုၸၵ်းၽြႃးပဵၼ်ၸဝ်ႈဢေႃႈ။-
ၵေႃႉဢၼ်ဢမ်ႇၸၢင်ႈႁၵ်ႉၼၼ်ႉ ဢမ်ႇႁုၸၵ်းၽြႃးပဵၼ်ၸဝ်ႈ။ လွင်ႈမၼ်းၸမ်ႉ၊ၽြႃးပဵၼ်ၸဝ်ႈပဵၼ်တၢင်းႁၵ်ႉမႅတ်ႈတႃႇဢေႃႈ။-
ၽြႃးပဵၼ်ၸဝ်ႈႁဵတ်းၸိူဝ်ႉႁိုဝ်ၼႄပျႃးတၢင်းႁၵ်ႉမႅတ်ႈတႃႇမၼ်းၸဝ်ႈဝႃႈၼႆၸမ်ႉ၊မၼ်းၸဝ်ႈပွႆႇၸႂ်ႉလုၵ်ႈၸဝ်ႈပႃးလဵဝ်ၵူၺ်းၼၼ်ႉမႃးၼႂ်းလေႃးၵႃႉၼႆႉႁႂ်ႈႁဝ်းလႆႈဢသၢၵ်ႈလိပ်းယူႇၵွပ်ႈပိူဝ်ႈလုၵ်ႈၸဝ်ႈၼၼ်ႉဢေႃႈ။-
တၢင်းႁၵ်ႉမႅတ်ႈတႃႇဢၼ်ဝႃႈၼၼ်ႉၸမ်ႉ၊ပဵၼ်တၢင်းဢၼ်ႁဝ်းႁၵ်ႉၽြႃးပဵၼ်ၸဝ်ႈၼၼ်ႉဢမ်ႇၸႂ်ႈ။ ပဵၼ်တၢင်းဢၼ်ၽြႃးပဵၼ်ၸဝ်ႈႁၵ်ႉႁဝ်းသေလႄႈပွႆႇၸႂ်ႉလုၵ်ႈၸဝ်ႈမႃးႁႂ်ႈဢပျတ်ႈႁဝ်းလႆႈၶၢမ်ႇတၢင်းဢၼ်ပွႆႇလွတ်ႈၼၼ်ႉဢေႃႈ။
ၵေႃႉဢၼ်ၵဝ်ႁၵ်ႉၶဝ်႟။ ပေႃးၽြႃးပဵၼ်ၸဝ်ႈႁၵ်ႉႁဝ်းထၼ်ႇၼႆႉတႄႉၸိုင်၊ႁဝ်းၵေႃႈ၊ၵေႃႉၼိုင်ႈလႄႈၵေႃႉၼိုင်ႈတၵ်းလႆႈႁၵ်ႉၵၼ်ဢေႃႈ။-
ၽူႈလႂ်ဢမ်ႇတွၼ်ႉလႆႈႁၼ်ၽြႃးပဵၼ်ၸဝ်ႈ။ ၼႂ်းဝႃႈၼၼ်သေၵေႃႈ ပေႃးႁဝ်းႁၵ်ႉၵၼ်ယူႇၸိုင်၊ၽြႃးပဵၼ်ၸဝ်ႈတႄႇယူႇၼႂ်းႁဝ်းသေယဝ်ႉ၊တၢင်းႁၵ်ႉမႅတ်ႈတႃႇမၼ်းၸဝ်ႈၼၼ်ႉပျေႉၸုမ်ႇဝႆႉၼႂ်းႁဝ်းဢေႃႈ။
ႁဝ်းႁုသေႇၶျႃႇလီလီငၢမ်းငၢမ်း၊လွင်ႈဢၼ်ႁဝ်းတႄႇယူႇၼႂ်းၽြႃးပဵၼ်ၸဝ်ႈ၊ဢိၵ်ႇတင်းလွင်ႈဢၼ်ၽြႃးပဵၼ်ၸဝ်ႈတႄႇယူႇၼႂ်းႁဝ်းၵွပ်ႈပိူဝ်ႈမၼ်းၸဝ်ႈပၼ်ဝိၺိၺ်ႇၸဝ်ႈတီႈႁဝ်းၼၼ်ႉဢေႃႈ။-
ႁဝ်းလႆႈႁုႁၼ်ယဝ်ႉၸင်ႇၶၢမ်ႇသၢၵ်ႈသေႇလွင်ႈဢၼ်ပေႃႈၸဝ်ႈပွႆႇၸႂ်ႉလုၵ်ႈၸဝ်ႈမႃးႁႂ်ႈလႆႈပဵၼ်ၸဝ်ႈဢၼ်ၵႄႇၶျွတ်ႈဢဝ်ၵူၼ်းလေႃးၵီႇတင်းလၢႆဢေႃႈ။-
ၽူႈလႂ်သေဢမ်ႇဝႃႈ၊ၵေႃႉဢၼ်ႁပ်ႉတုင်းဝႃႈ၊ ၸဝ်ႈယေႇသု၊ ပဵၼ်လုၵ်ႈၽြႃးပဵၼ်ၸဝ်ႈၼၼ်ႉ၊ၵေႃႉၼၼ်ႉတႄႇယူႇၼႂ်းၽြႃးပဵၼ်ၸဝ်ႈလႄႈၽြႃးပဵၼ်ၸဝ်ႈၵေႃႈ တႄႇယူႇၼႂ်းမၼ်းဢေႃႈ။-
ပိူဝ်ႈၼႆႁဝ်းႁုလႄႈယုမ်ႇမၢတ်ႈတၢင်းႁၵ်ႉမႅတ်ႈတႃႇၽြႃးပဵၼ်ၸဝ်ႈဢၼ်မီးတီႈႁဝ်းၼၼ်ႉယူႇဢေႃႈ။ ၽြႃးပဵၼ်ၸဝ်ႈပဵၼ်တၢင်းႁၵ်ႉမႅတ်ႈတႃႇဢေႃႈ။ ပိူဝ်ႈၼႆလႄႈၽူႈလႂ်သေဢမ်ႇဝႃႈ၊ၵေႃႉဢၼ်တႄႇယူႇၼႂ်းတၢင်းႁၵ်ႉမႅတ်ႈတႃႇၼၼ်ႉၵေႃႉၼၼ်ႉတႄႇယူႇၼႂ်းၽြႃးပဵၼ်ၸဝ်ႈလႄႈၽြႃးပဵၼ်ၸဝ်ႈၵေႃႈတႄႇယူႇၼႂ်းမၼ်းၼၼ်ႉဢေႃႈ။-
ၵႃႈၼႂ်းလွင်ႈတၢင်းၼႆႉတၢင်းႁၵ်ႉမႅတ်ႈတႃႇလႆႈၸေးၸုမ်ႇၼႂ်းႁဝ်း၊ႁႂ်ႈႁဝ်းလႆႈဢၶႂၢင်ႉဢၼ်ႁတ်းႁၢၼ်ၼႂ်းဝၼ်းဢၼ်ၸီႇယၢင်ႇတြႃးၼၼ်ႉၵွပ်ႈပိူဝ်ႈဢၼ်ၵႃႈၼႂ်းလေႃးၵႃႉၼႆႉႁဝ်းပဵၼ်ယူႇမိူၼ်ၸိူဝ်ႉၼင်ႇဢၼ်မၼ်းၸဝ်ႈပဵၼ်ၼၼ်ႉဢေႃႈ။-
တၢင်းႁၵ်ႉမႅတ်ႈတႃႇဢၼ်ဝႃႈၼၼ်ႉၵၢင်းလွတ်ႈတင်းသၢင်ႇဝူၺ်ႇၵႃႉတၢင်းဢၼ်ၵူဝ်ဢၼ်ႁႄဢေႃႈ။ ၼင်ႇၼၼ်လႄႈတၢင်းႁၵ်ႉမႅတ်ႈတႃႇဢၼ်ၸေးၸုမ်ႇၼၼ်ႉၸၢင်ႈပႄႇၽဵဝ်ႈပႅတ်ႈသၢင်ႇဝူၺ်ႇၵႃႉတၢင်းဢၼ်ၵူဝ်ဢၼ်ႁႄဢေႃႈ။ လွင်ႈမၼ်းၸမ်ႉ၊သၢင်ႇဝူၺ်ႇၵႃႉတၢင်းဢၼ်ၵူဝ်ဢၼ်ႁႄၼၼ်ႉ ပဵၼ်လွင်ႈတၢင်းဢၼ်လႆႈၶၢမ်ႇၸီႇယၢင်ႇပၼ်တၢမ်ႇလႄႈၵေႃႉဢၼ်မီးသၢင်ႇဝူၺ်ႇၵႃႉဢၼ်ၵူဝ်ႁႄၼၼ်ႉဢမ်ႇပႆႇၸေးၸုမ်ႇၼႂ်းမႅတ်ႈတႃႇဢေႃႈ။
ႁဝ်းမီးတၢင်းႁၵ်ႉမႅတ်ႈတႃႇၵွပ်ႈပိူဝ်ႈၽြႃးပဵၼ်ၸဝ်ႈႁၵ်ႉႁဝ်းဢွၼ်တၢင်းဢေႃႈ။-
ပေႃးသေၵေႃႉသေၵူၼ်းလၢတ်ႈဝႃႈ၊ “ၵဝ်ႁၵ်ႉၽြႃးပဵၼ်ၸဝ်ႈဢေႃႈ၊” ဝႃႈၼႆလႄႈ၊ယင်းၸင်းပီႈၼွင်ႉမၼ်းၸိုင်၊ၵေႃႉၼၼ်ႉပဵၼ်ၵူၼ်းပႅတ်ႉၵူၼ်းလႅၼ်ဢေႃႈ။ ၵွပ်ႈသင်လႄႈဝႃႈၸမ်ႉ၊ပေႃးမၼ်းယင်းဢမ်ႇၸၢင်ႈႁၵ်ႉပီႈၼွင်ႉဢၼ်မၼ်းလႆႈႁၼ်ယူႇၼၼ်ႉၸိုင်၊မၼ်းတၵ်းႁဵတ်းၸိူဝ်ႉၼင်ႇႁိုဝ်ႁၵ်ႉၽြႃးပဵၼ်ၸဝ်ႈဢၼ်မၼ်းဢမ်ႇတွၼ်ႉႁၼ်သေပွၵ်ႈၼၼ်ႉလႆႈ။-
ၵွပ်ႈလွင်ႈတၢင်းၼႆႉလႄႈ၊ ၸဝ်ႈၶရိၸ်ႈ၊ ဝႆႉပိင်းၺၢပ်ႈတီႈႁဝ်းၸမ်ႉ၊ၵေႃႉဢၼ်ႁၵ်ႉၽြႃးပဵၼ်ၸဝ်ႈၼၼ်ႉမၼ်းတၵ်းလႆႈႁၵ်ႉပီႈၼွင်ႉမၼ်းဢေႃႈ၊ဝႃႈၼင်ႇၼႆဢေႃႈ။
ၽူႈလႂ်သေဢမ်ႇဝႃႈ၊ၵေႃႉဢၼ်ယုမ်ႇမၢတ်ႈလွင်ႈ ၸဝ်ႈယေႇသု၊ ပဵၼ် ၸဝ်ႈၶရိၸ်ႈ ၼၼ်ႉ ၵေႃႉၼၼ်ႉပဵၼ်လုၵ်ႈလၢင်းၽြႃးပဵၼ်ၸဝ်ႈလႄႈၵေႃႉဢၼ်ႁၵ်ႉပေႃႈၸဝ်ႈၼၼ်ႉၸၢင်ႈႁၵ်ႉလုၵ်ႈလၢင်းမၼ်းၸဝ်ႈၼင်ႇၵဝ်ႇဢေႃႈ။-
ၵွပ်ႈလွင်ႈတၢင်းၼႆႉလႄႈႁဝ်းႁုလွင်ႈဢၼ်ႁဝ်းႁၵ်ႉလုၵ်ႈလၢင်းၽြႃးပဵၼ်ၸဝ်ႈတင်းလၢႆၼႂ်းမိူဝ်ႈဢၼ်ႁဝ်းႁၵ်ႉၽြႃးပဵၼ်ၸဝ်ႈသေလႄႈပႂ်ႉၵမ်ပႂ်ႉၸွမ်းပိင်းၺၢပ်ႈမၼ်းၸဝ်ႈတင်းလၢႆၼၼ်ႉဢေႃႈ။-
လွင်ႈမၼ်းၸမ်ႉ၊တၢင်းဢၼ်ႁဝ်းႁၵ်ႉၽြႃးပဵၼ်ၸဝ်ႈၼၼ်ႉ၊ပဵၼ်တၢင်းဢၼ်ႁဝ်းပႂ်ႉၵမ်ပႂ်ႉၸွမ်းပိင်းၺၢပ်ႈမၼ်းၸဝ်ႈၸိူဝ်းၼၼ်ႉဢေႃႈ။ ပိင်းၺၢပ်ႈမၼ်းၸဝ်ႈၸိူဝ်းၼၼ်ႉ၊ပဵၼ်ဢၼ်ပႂ်ႉၵမ်ပႂ်ႉၸွမ်းယၢပ်ႇၼႃႇပုၼ်ႈႁဝ်းဢမ်ႇၸႂ်ႈဢေႃႈ။-
လုၵ်ႈလၢင်းၽြႃးပဵၼ်ၸဝ်ႈၵူႈၵေႃႉၵူႈၵူၼ်းၸၢင်ႈပႄႉၼႅင်ႇၸႂ်သၽေႃးလေႃးၵီႇလႄႈဢၶႂၢင်ႉဢၼ်လႆႈပႄႉၼႅင်ႇၸႂ်သၽေႃးလေႃးၵီႇၼႆႉ၊သမ်ႉပဵၼ်ၵွပ်ႈလူၺ်ႈတၢင်းဢၼ်ႁဝ်းယုမ်ႇမၢတ်ႈဢေႃႈ။-
ၽူႈလႂ်တၵ်းပႄႉၼႅင်ႇၸႂ်သၽေႃးလေႃးၵီႇၼႆႉလႆႈဝႃႈၼႆၸမ်ႉ၊ၵေႃႉဢၼ်ယုမ်ႇမၢတ်ႈလွင်ႈ ၸဝ်ႈယေႇသု၊ ပဵၼ်လုၵ်ႈၽြႃးပဵၼ်ၸဝ်ႈၼၼ်ႉၵူၺ်း၊ပႄႉၼႅင်ႇလႆႈဢေႃႈ။
ၸဝ်ႈယေႇသုၶရိၸ်ႈ၊ ဢၼ်မႃးလူၺ်ႈၼမ်ႉဢၼ်ဝႃႈ၊မၢင်ႇၵလႃႇပပ်ႉတိၸမ်ႇ ဢိၵ်ႇတင်းလူၺ်ႈလိူတ်ႈဢၼ်ဝႃႈ၊တၢင်းတၢႆမၼ်းၸဝ်ႈၼၼ်ႉဢေႃႈ။ မၼ်းၸဝ်ႈမႃးလူၺ်ႈၼမ်ႉလၢႆလၢႆၵူၺ်းဢမ်ႇၸႂ်ႈလႄႈမႃးလူၺ်ႈၼမ်ႉလႄႈလိူတ်ႈဢေႃႈ။-
ဝိၺိၺ်ႇၸဝ်ႈၵေႃႈပဵၼ်ၸဝ်ႈဢၼ်ၶၢမ်ႇသၢၵ်ႈသေႇလွင်ႈတၢင်းၼႆႉၵွပ်ႈပိူဝ်ႈဝိၺိၺ်ႇၸဝ်ႈပဵၼ်သဵတ်ႈၸႃႇတြႃးဢေႃႈ။-
ပိူဝ်ႈၼႆလႄႈမီးသၢၵ်ႈသေႇသၢမ်ပႃးဢၼ်ဝႃႈ၊ဝိၺိၺ်ႇၸဝ်ႈပႃးၼိုင်ႈ၊ၼမ်ႉပႃးၼိုင်ႈတင်းလိူတ်ႈပႃးၼိုင်ႈဢေႃႈ။ သၢမ်ပႃးၼႆႉၽွမ်ႉၵၼ်ၶၢမ်ႇသၢၵ်ႈသေႇဢၼ်လဵဝ်ၵၼ်ဢေႃႈ။-
ပေႃးႁဝ်းယုမ်ႇသၢၵ်ႈသေႇၵူၼ်းလႆႈၸိုင်၊သၢၵ်ႈသေႇၽြႃးပဵၼ်ၸဝ်ႈၼၼ်ႉပဵၼ်ဢၼ်ယဵင်ႈၶႅၼ်းလီယုမ်ႇဢေႃႈ။ သၢၵ်ႈသေႇမၼ်းၸဝ်ႈၼႆႉ၊ပဵၼ်လွင်ႈဢၼ်ၽြႃးပဵၼ်ၸဝ်ႈၶၢမ်ႇသၢၵ်ႈသေႇလူၺ်ႈလွင်ႈလုၵ်ႈမၼ်းၸဝ်ႈဢေႃႈ။-
ပိူဝ်ႈၼႆလႄႈၵေႃႉဢၼ်ယုမ်ႇမၢတ်ႈလုၵ်ႈၽြႃးပဵၼ်ၸဝ်ႈၼၼ်ႉလႆႈသၢၵ်ႈသေႇၼႆႉ၊ၵႃႈၼႂ်းႁူဝ်ၸႂ်တူဝ်ၸဝ်ႈၵဝ်ႇဢေႃႈ။ ၵေႃႉဢၼ်ဢမ်ႇယုမ်ႇမၢတ်ႈၽြႃးပဵၼ်ၸဝ်ႈၼၼ်ႉၸမ်ႉ၊ႁဵတ်းႁႂ်ႈမၼ်းၸဝ်ႈပဵၼ်ၸဝ်ႈဢၼ်ပႅတ်ႉဢၼ်လႅၼ်လႄႈ၊ၵွပ်ႈပိူဝ်ႈမၼ်းဢမ်ႇယုမ်ႇၵႂၢမ်းၽြႃးပဵၼ်ၸဝ်ႈဢၼ်ၶၢမ်ႇသၢၵ်ႈသေႇလွင်ႈလုၵ်ႈမၼ်းၸဝ်ႈၼၼ်ႉဢေႃႈ။-
သၢၵ်ႈသေႇၼၼ်ႉၸမ်ႉ၊ၽြႃးပဵၼ်ၸဝ်ႈပၼ်ဢသၢၵ်ႈထႃႇဝရႃႉတီႈႁဝ်းလႄႈဢသၢၵ်ႈၼၼ်ႉမီးၼႂ်းလုၵ်ႈမၼ်းၸဝ်ႈၼၼ်ႉဢေႃႈ။-
ၵေႃႉဢၼ်လႆႈလုၵ်ႈၸဝ်ႈၼၼ်ႉလႆႈဢသၢၵ်ႈဢေႃႈ။ ၵေႃႉဢၼ်ဢမ်ႇလႆႈလုၵ်ႈၽြႃးပဵၼ်ၸဝ်ႈၸမ်ႉ၊ဢမ်ႇလႆႈဢသၢၵ်ႈဢေႃႈ။
ၵဝ်တႅမ်ႈလွင်ႈတၢင်းၼႆႉပၼ်ၵႂႃႇတီႈသူၸိူဝ်းဢၼ်ယုမ်ႇမၢတ်ႈၸိုဝ်ႈသဵင်လုၵ်ႈၽြႃးပဵၼ်ၸဝ်ႈ၊ႁႂ်ႈသူလႆႈႁုလွင်ႈဢၼ်သူလႆႈဢသၢၵ်ႈထႃႇဝရႃႉၼၼ်ႉဢေႃႈ။-
လွင်ႈတၢင်းဢၼ်ႁဝ်းလႆႈႁတ်းႁၢၼ်ၵႃႈၼႂ်းမၼ်းၸဝ်ႈၸမ်ႉ၊ပေႃးႁဝ်းယွၼ်းသေၸိူဝ်ႉသေပိူင်ဢၼ်မႅၼ်ႈၸွမ်းၼင်ႇဢလူဝ်ႇမၼ်းၸဝ်ႈၸိုင်၊မၼ်းၸဝ်ႈတၵ်းထွမ်ႇဢဝ်တႄႉဢေႃႈ။-
ပေႃးႁဝ်းႁုလွင်ႈဢၼ်မၼ်းၸဝ်ႈထွမ်ႇဢဝ်ၵႃႈဢၼ်ႁဝ်းလဝ်ႈယွၼ်းၼၼ်ႉၸိုင်၊ႁဝ်းႁုလွင်ႈဢၼ်မၼ်းၸဝ်ႈပၼ်ၵႃႈဢၼ်ႁဝ်းလဝ်ႈယွၼ်းၼၼ်ႉယူႇဢေႃႈ။
ပေႃးသေၵေႃႉသေၵူၼ်းႁၼ်ပီႈၼွင်ႉမၼ်းႁဵတ်းဢပျတ်ႈဢၼ်ဢမ်ႇထိူၵ်ႈၶၢမ်ႇတၢမ်ႇတၢႆၸိုင်၊ၵေႃႉၼၼ်ႉတၵ်းလႆႈသူးတွင်းတီႈၽြႃးပဵၼ်ၸဝ်ႈဢၼ်တၵ်းပၼ်ဢသၢၵ်ႈတီႈမၼ်းၼၼ်ႉဢေႃႈ။ လွင်ႈတၢင်းၼႆႉၶႂ်ႈဝႃႈ၊ၶဝ်ၸိူဝ်းဢၼ်ႁဵတ်းဢပျတ်ႈဢၼ်ဢမ်ႇထိူၵ်ႈၶၢမ်ႇတၢမ်ႇတၢႆၼၼ်ႉၵူၺ်းဢေႃႈ။ ယင်းမီးဢပျတ်ႈမဵဝ်းဢၼ်ထိူၵ်ႈၶၢမ်ႇတၢမ်ႇတၢႆၼၼ်ႉလႄႈၵဝ်ဢမ်ႇဝႃႈႁႂ်ႈသူ၊သူးတွင်းတီႈၽြႃးပဵၼ်ၸဝ်ႈပုၼ်ႈဢပျတ်ႈမဵဝ်းၼၼ်ႉဢေႃႈ။-
ၵႃႈဢၼ်ႁဵတ်းၽိတ်းပိူင်ႈတင်းသဵင်ႈတင်းလူင်ပဵၼ်ဢပျတ်ႈဢေႃႈ။ ၼႂ်းဝႃႈၼၼ်သေၵေႃႈ ဢပျတ်ႈဢၼ်ဢမ်ႇထိူၵ်ႈၶၢမ်ႇတၢမ်ႇတၢႆၵေႃႈမီးဢေႃႈ။
ႁဝ်းႁုဝႃႈ၊ၵေႃႉဢၼ်လုၵ်ႉတီႈၽြႃးပဵၼ်ၸဝ်ႈၵိူတ်ႇမႃးၼၼ်ႉဢမ်ႇႁဵတ်းဢပျတ်ႈ၊လွင်ႈမၼ်းၸမ်ႉ၊လုၵ်ႈၽြႃးပဵၼ်ၸဝ်ႈပႂ်ႉလူပႂ်ႉတူၺ်းမၼ်းလႄႈၶုၼ်ၽီႁၢႆႉဢမ်ႇတိူဝ်ႉဢမ်ႇယိပ်းမၼ်းလႆႈဢေႃႈ။
ႁဝ်းႁုဝႃႈ၊ႁဝ်းပဵၼ်ၵူၼ်းၽြႃးပဵၼ်ၸဝ်ႈလႄႈႁုလွင်ႈဢၼ်ၵူၼ်းလေႃးၵီႇတင်းသဵင်ႈတင်းလူင်မီးၼႂ်းမိုဝ်းၶုၼ်ၽီႁၢႆႉၼၼ်ႉယူႇဢေႃႈ။
ႁဝ်းႁုဝႃႈ၊လုၵ်ႈၽြႃးပဵၼ်ၸဝ်ႈမႃးယဝ်ႉလႄႈပၼ်ၺၢၼ်ႇဢၼ်ႁုၸၵ်းၽြႃးပဵၼ်ၸဝ်ႈဢၼ်ၸိုဝ်ႈဢၼ်ၸႂ်ႈ၊တီႈႁဝ်းၼၼ်ႉယူႇဢေႃႈ။ ႁဝ်းတႄႇယူႇၼႂ်းၽြႃးဢၼ်ၸိုဝ်ႈဢၼ်ၸႂ်ႈ၊ဢိၵ်ႇတင်းၼႂ်းလုၵ်ႈမၼ်းၸဝ်ႈ ၸဝ်ႈယေႇသုၶရိၸ်ႈ၊ ၼၼ်ႉဢေႃႈ။ မၼ်းၸဝ်ႈၼၼ်ႉ၊ပဵၼ်ၽြႃးပဵၼ်ၸဝ်ႈဢၼ်ၸိုဝ်ႈဢၼ်ၸႂ်ႈလႄႈဢသၢၵ်ႈထႃႇဝရႃႉၵေႃႈပဵၼ်ဢေႃႈ။
လုၵ်ႈလၢင်းၵဝ်႟။ ဝႄႈပႅတ်ႈသေၽြႃးဢၼ်ဢမ်ႇၸိုဝ်ႈဢမ်ႇၸႂ်ႈတင်းလၢႆတႃႉ။ လိၵ်ႈတြႃးယူဝ်းႁၢၼ်ႇၽိုၼ်တီႈၼိုင်ႈယဝ်ႉယဝ်ႉဢေႃႈ။
ၵဝ်ၵေႃႉဢၼ်ဢသၢၵ်ႈယႂ်ႇၼႆႉ၊တႅမ်ႈပၼ်ၵႂႃႇတီႈၸဝ်ႈၼၢင်းဢၼ်ၽြႃးပဵၼ်ၸဝ်ႈလိူၵ်ႈၵဵပ်းဢဝ်၊ဢိၵ်ႇတင်းလုၵ်ႈလၢင်းမၼ်းတင်းလၢႆ၊ၸိူဝ်းဢၼ်ၵဝ်ႁၵ်ႉၼႃႇတႄႉတႄႉဝႃႈဝႃႈ၊ဢၼ်ၵဝ်ၵေႃႉလဵဝ်ၵူၺ်းဢမ်ႇၵႃး၊ၸႃႉၸဵမ်ၸိူဝ်းဢၼ်ႁုသဵတ်ႈၸႃႇတြႃးတင်းသဵင်ႈတင်းလူင်ၵေႃႈ၊ႁၵ်ႉပႅင်းသူယူႇ၊-
ၵွပ်ႈပိူဝ်ႈသဵတ်ႈၸႃႇတြႃးတႄႇဝႆႉ၊မီးယူႇၼႂ်းႁဝ်းလႄႈသမ်ႉတၵ်းမီးယူႇလူၺ်ႈၵၼ်တင်းႁဝ်းတႃႇသေႇဢမ်ႇထၢတ်ႇၼၼ်ႉဢေႃႈ။
ၶႅၼ်းတေႃႈႁႂ်ႈၽြႃးပေႃႈၸဝ်ႈတင်း ၸဝ်ႈယေႇသုၶရိၸ်ႈ၊ လုၵ်ႈပေႃႈၸဝ်ႈၼၼ်ႉ၊ပၼ်ၵျေးၸူး၊ဢိၵ်ႇတင်းၵရုၼႃႇ၊ဢိၵ်ႇတင်းတၢင်းၼိမ်တီႈႁဝ်းသေလႄႈႁႂ်ႈလွင်ႈတၢင်းၸိူဝ်းၼႆႉပဵၼ်ပုၼ်ႈႁဝ်းၵႃႈၼႂ်းသဵတ်ႈၸႃႇတြႃး၊ဢိၵ်ႇတင်းမႅတ်ႈတႃႇတြႃးသေၵမ်းလူၺ်ႈ။
မိူဝ်ႈဢၼ်ၵဝ်ထူပ်းႁၼ်လုၵ်ႈလၢင်းၸဝ်ႈၼၢင်းၵမ်ႈၽွင်ႈၵမ်ၵျၢင်ႉၸွမ်းသဵတ်ႈၸႃႇတြႃးၸွမ်းၼင်ႇပေႃႈၸဝ်ႈဝႆႉပိင်းၺၢပ်ႈၸဝ်ႈတီႈႁဝ်းၼၼ်ႉၸိုင်၊ၵဝ်သိူဝ်းပျေႃႇၼႃႇလူင်လၢင်ဢေႃႈ။-
ပိူဝ်ႈၼႆလႄႈၸဝ်ႈၼၢင်း႟။ ႁဝ်းၼင်ႇၵၼ်ၵေႃႉၼိုင်ႈလႄႈၵေႃႉၼိုင်ႈ၊ဢွၼ်ၵၼ်ႁၵ်ႉပႅင်းၵၼ်တႃႉႁဝ်း။ ၼႆႉၸမ်ႉ၊ပဵၼ်ပိင်းၺၢပ်ႈမႂ်ႇလႄႈၵဝ်တႅမ်ႈပၼ်သူၵႂႃႇဢမ်ႇၸႂ်ႈ။ ပဵၼ်ပိင်းၺၢပ်ႈဢၼ်ႁဝ်းလႆႈဝႆႉ၊ၸဵမ်မိူဝ်ႈႁူဝ်ပိုင်းၼၼ်ႉၵူၺ်းဢေႃႈ။-
မႅတ်ႈတႃႇတြႃးဢၼ်ၵဝ်လၢတ်ႈဝႃႈၼႆႉ၊ပဵၼ်တၢင်းဢၼ်ႁဝ်းၵမ်ၵျၢင်ႉၸွမ်းပိင်းၺၢပ်ႈတြႃး၊ၽြႃးပဵၼ်ၸဝ်ႈဢေႃႈ။ ပိင်းၺၢပ်ႈတြႃးၸဝ်ႈၼႆႉ၊ပဵၼ်ဢၼ်သူလႆႈငိၼ်းၸဵမ်မိူဝ်ႈႁူဝ်ပိုင်းၼၼ်ႉသေလႄႈပဵၼ်တၢင်းဢၼ်ႁဝ်းၵမ်ၵျၢင်ႉၸွမ်းမႅတ်ႈတႃႇတြႃးဢေႃႈ။
ၵူၼ်းပႅတ်ႉၵူၼ်းလႅၼ်ၼမ်ၼႃႇၵႂႃႇၸူးၵႃႈတီႈလေႃးၵႃႉၵူႈတီႈၵူႈလႅၼ်ယဝ်ႉဢေႃႈ။ ၶဝ်ၸိူဝ်းၼၼ်ႉ၊ပဵၼ်ၵူၼ်းဢၼ်ဢမ်ႇၶၢမ်ႇႁပ်ႉဢဝ်လွင်ႈတၢင်းဢၼ် ၸဝ်ႈယေႇသုၶရိၸ်ႈ၊ မႃးၵိူတ်ႇၼႂ်းၸႃႇတိၵူၼ်းၼၼ်ႉလႄႈၵေႃႉၸိူဝ်ႉၼင်ႇၼၼ်ၼၼ်ႉ၊ပဵၼ်ၵူၼ်းပႅတ်ႉၵူၼ်းလႅၼ်လႄႈပဵၼ်ရၢၼ်ႇသူႇ ၸဝ်ႈၶရိၸ်ႈ၊ ဢၼ်ဝႃႈ၊ ဢၼ်ႇတိၶရိၸ်ႈ ဢေႃႈ။-
ပိူဝ်ႈၼႆလႄႈၼင်ႇႁိုဝ်လွင်ႈတၢင်းဢၼ်ႁဝ်းသူပွင်ႁဵတ်းမႃးတၵ်းဢမ်ႇလုဢမ်ႇႁၢႆလႄႈတၵ်းလႆႈဢၵျူဝ်းပျေႉပျေႉၸုမ်ႇၸုမ်ႇၸိုင်၊သူဢွၼ်ၵၼ်ႁဵတ်းသတိတီႈတူဝ်ၸဝ်ႈၵဝ်ႇတႃႉ။
ၵေႃႉဢၼ်ဢမ်ႇတႄႇယူႇၼႂ်းတေႇသၼႃႇ ၸဝ်ႈၶရိၸ်ႈ၊ လႄႈယင်းပူၼ်ႉလိူဝ်ၼၼ်ႉမၼ်းဢမ်ႇမီးၽြႃးပဵၼ်ၸဝ်ႈ။ ၵေႃႉဢၼ်တႄႇယူႇၼႂ်းတေႇသၼႃႇၸဝ်ႈၼၼ်ႉၸမ်ႉ၊မၼ်းမီးပေႃႈၸဝ်ႈတင်းလုၵ်ႈၸဝ်ႈဢေႃႈ။-
ပေႃးသေၵေႃႉသေၵူၼ်းဢမ်ႇပႃးဢဝ်တင်းတေႇသၼႃႇၸဝ်ႈၼႆႉမႃးၵႃႈတီႈသူၸိုင်၊သူယႃႇပေႁပ်ႉတွၼ်ႈဢဝ်မၼ်းၵႃႈၼႂ်းႁိူၼ်းသူ။ ယႃႇပေတၵ်ႉလၢတ်ႈမၼ်းလႄႈဝႃႈ၊ “ႁႂ်ႈမီးမၢင်ႇၵလႃႇသေၵမ်းလူၺ်ႈ၊” ဝႃႈၼင်ႇၼႆ။-
ပေႃးတၵ်ႉလၢတ်ႈၵေႃႉၼၼ်ႉလႄႈဝႃႈ၊ “ႁႂ်ႈမီးမၢင်ႇၵလႃႇသေၵမ်းလူၺ်ႈ၊” ဝႃႈၼင်ႇၼႆၸိုင်၊သူပဵၼ်ၵေႃႉဢၼ်သိူၵ်ႈသမ်ႇၵၼ်တင်းတၢင်းၵမ်တၢင်းၵျၢင်ႉဢၼ်ႁၢႆႉမိူၵ်ႈမၼ်းတင်းလၢႆၼၼ်ႉဢေႃႈ။
ပိၵ်ႉသမ်ႉၵဝ်မီးလွင်ႈဢၼ်လီတႅမ်ႈပၼ်တီႈသူၵႂႃႇၼမ်ၼႃႇသေၵေႃႈ၊ၵဝ်ဢမ်ႇၶႂ်ႈဢဝ်ၼမ်ႉမိုၵ်ႉတႅမ်ႈသႂ်ႇၵႃႈၼိူဝ်ၸေႈလႄႈၵဝ်မုင်ႈမွင်းႁႂ်ႈလႆႈၵႂႃႇလႄႇထိုင်တီႈသူသေယဝ်ႉ၊ဢုပ်ႇၵုမ်ၵၼ်ပုၼ်ႈလွင်ႈၼင်ႇႁိုဝ်တၢင်းသိူဝ်းပျေႃႇႁဝ်းတၵ်းတဵမ်ထူၼ်ႈဢေႃႈ။
လုၵ်ႈလၢင်းၼွင်ႉယိင်း၊ၸဝ်ႈၼၢင်းဢၼ်ၽြႃးပဵၼ်ၸဝ်ႈလိူၵ်ႈၵဵပ်းဝႆႉၸိူဝ်းၼႆႉ၊တၵ်ႉၼၢႆမႂ်းၼၢင်းယူႇဢေႃႈ။ လိၵ်ႈတြႃးယူဝ်းႁၢၼ်ႇၽိုၼ်တီႈသွင်ယဝ်ႉယဝ်ႉဢေႃႈ။
ၵေႃႉဢၼ်ဢသၢၵ်ႈယႂ်ႇၼႆႉ၊တႅမ်ႈပၼ်ၵႂႃႇၵႃႈတီႈၵေႃႉသႄႈၵဝ် ၵႃႇယု၊ ဢၼ်ၵဝ်ႁၵ်ႉၼႃႇလူင်လၢင်ၼၼ်ႉဢေႃႈ။
ၵေႃႉဢၼ်ၵဝ်ႁၵ်ႉ႟။ ၵဝ်သူးတွင်းပုၼ်ႈလွင်ႈၼင်ႇႁိုဝ်မႂ်းတၵ်းလႆႈလီလႆႈပဵၼ်၊ၼႂ်းၵူႈၸိူဝ်ႉၵူႈပိူင်လႄႈယူႇလီၵိၼ်ဝၢၼ်ယူႇ၊ၸွမ်းၼင်ႇဢၼ်ၸႂ်ဝိၺိၺ်ႇမႂ်းလႆႈလီလႆႈပဵၼ်ယဝ်ႉၼၼ်ႉယူႇဢေႃႈ။-
မိူဝ်ႈဢၼ်ပီႈၼွင်ႉၶရိၸ်ႈယၢၼ်ႇၵမ်ႈၽွင်ႈမႃးလႄႈၶၢမ်ႇသၢၵ်ႈသေႇလွင်ႈဢၼ်မႂ်းမီးသဵတ်ႈၸႃႇၼႂ်းသမ်ႇမႃႇတြႃးယူႇ၊ၸွမ်းၼင်ႇမႂ်းၵႂႃႇမႃးၵမ်ၵျၢင်ႉ၊ၼႂ်းသမ်ႇမႃႇတြႃးယူႇၼၼ်ႉလႄႈၵဝ်ၸူမ်းသိူဝ်းၼႃႇဢေႃႈ။-
ဢမ်ႇမီးလွင်ႈတၢင်းဢၼ်လႂ်၊ဢၼ်ယဵင်ႈၶႅၼ်းၸူမ်းသိူဝ်းၼႃႇသေတၢင်းဢၼ်ၵဝ်လႆႈငိၼ်းလွင်ႈဢၼ်ဝႃႈ၊လုၵ်ႈလၢင်းၵဝ်တင်းလၢႆ၊ၵႂႃႇမႃးၵမ်ၵျၢင်ႉၼႂ်းသမ်ႇမႃႇတြႃးယူႇၼၼ်ႉဢေႃႈ။
ၵေႃႉဢၼ်ၵဝ်ႁၵ်ႉ႟။ မႂ်းၼႆႉမီးသဵတ်ႈၸႃႇၼႃႇလူင်လၢင်ၵႃႈၼိူဝ်ၼႃႈၵၢၼ်ဢၼ်မႂ်းႁဵတ်းပုၼ်ႈပီႈၼွင်ႉၶရိၸ်ႈယၢၼ်ႇၼင်ႇၵၼ်၊ဢိၵ်ႇတင်းလိူဝ်တွၼ်းၼႃႇသေပိူၼ်ႈၼၼ်ႉ၊ဢၼ်မႂ်းႁဵတ်းဝၢတ်ႈတီႈၶဝ်ၸိူဝ်းဢၼ်ပဵၼ်ၶႅၵ်ႇၼၼ်ႉဢေႃႈ။-
ၶဝ်ၸိူဝ်းၼၼ်ႉ၊ၶၢမ်ႇသၢၵ်ႈသေႇလွင်ႈတၢင်းႁၵ်ႉမႂ်းၵႃႈတီႈၽၢႆႇၼႃႈၸိူဝ်းၸဝ်ႈဢေႃႈ။ ပေႃးမႂ်းၸွႆႈထႅမ်ႁႂ်ႈၶဝ်လႆႈသိုပ်ႇၶၢဝ်းတၢင်းၶဝ်ၵႂႃႇၸိုင်၊တၵ်းပဵၼ်လွင်ႈဢၼ်လီဢၼ်ငၢမ်း၊ၸွမ်းၼင်ႇဢလူဝ်ႇၽြႃးပဵၼ်ၸဝ်ႈဢေႃႈ။-
လွင်ႈမၼ်းၸမ်ႉ၊ၶဝ်ၸိူဝ်းၼၼ်ႉဢွၵ်ႇတႃႈပႆတၢင်းၵႂႃႇပုၼ်ႈၼႃႈၵၢၼ် ၸဝ်ႈၶရိၸ်ႈ၊ လႄႈၶဝ်ယင်းဢမ်ႇၶၢမ်ႇဢမ်ႇဢဝ်တၢင်းဢၼ်ၶဝ်ၸိူဝ်းဢၼ်ဢမ်ႇယုမ်ႇမၢတ်ႈၸွႆႈထႅမ်ၶဝ်ၼၼ်ႉဢေႃႈ။-
ပိူဝ်ႈၼႆလႄႈႁဝ်းၸိူဝ်းဢၼ်ပဵၼ်ၶရိၸ်ႈယၢၼ်ႇၼႆႉ၊တၵ်းလႆႈၸွႆႈထႅမ်ၵေႃႉၸိူဝ်ႉၼင်ႇၼၼ်၊ႁႂ်ႈလႆႈပဵၼ်ၵေႃႉဢၼ်ၶဝ်ႈပႃးၼႂ်းၼႃႈၵၢၼ်ၶဝ်ပုၼ်ႈသမ်ႇမႃႇတြႃးၼၼ်ႉဢေႃႈ။
ၵဝ်တႅမ်ႈလိၵ်ႈပွတ်းၼိုင်ႈပၼ်ၵႂႃႇတီႈၸိူဝ်းၸဝ်ႈယဝ်ႉ။ ၵူၺ်းၵႃႈ၊ တယေႃႇတရပ်ႉ၊ ဢၼ်ၶႂ်ႈပဵၼ်ၵႄႇပဵၼ်ႁူဝ်ပိူၼ်ႈၼၼ်ႉ၊ဢမ်ႇၶၢမ်ႇထွမ်ႇဢဝ်ၵႂၢမ်းၵဝ်။-
ပိူဝ်ႈၼႆလႄႈမိူဝ်ႈဢၼ်ၵဝ်မႃးၸိုင်၊ၵဝ်တၵ်းၽိုၼ်ႉဢွၵ်ႇလၢတ်ႈၼႄလွင်ႈတၢင်းဢၼ်မၼ်းႁဵတ်းၵူႈၸိူဝ်ႉၵူႈပိူင်၊လူၺ်ႈလွင်ႈဢၼ်မၼ်းၶႃႉၸိုဝ်ႈၶၢႆသဵင်ႁဝ်းလႄႈလၢတ်ႈၵႂၢမ်းမုသႃႇတေႃႇႁဝ်းၸိူဝ်းၼၼ်ႉဢေႃႈ။ မၼ်းႁဵတ်းထၢၼ်ႇၼၼ်ႉသေၵေႃႈ၊ယင်းဢမ်ႇပျေႇၸႂ်လႄႈမၼ်းဢမ်ႇႁပ်ႉတွၼ်ႈဢဝ်ပီႈၼွင်ႉၶရိၸ်ႈယၢၼ်ႇၸိူဝ်းဢၼ်မႃးၼၼ်ႉဢမ်ႇၵႃး၊ၸၢင်ႈႁၢမ်ႈတၢပ်ႈၶဝ်ၸိူဝ်းဢၼ်ၶႂ်ႈတွၼ်ႈႁပ်ႉဢဝ်ၶဝ်ၼၼ်ႉသေလႄႈယင်းလိုပ်ႈႁေႃႈၶဝ်ဢွၵ်ႇသေၵႃႈတီႈၸိူဝ်းၸဝ်ႈၵႂႃႇဢေႃႈ။
ၵေႃႉဢၼ်ၵဝ်ႁၵ်ႉ႟။ ယႃႇပေယိူင်ႈၸွမ်းမဵဝ်းဢၼ်ဢမ်ႇလီဢမ်ႇငၢမ်း၊ယိူင်ႈၸွမ်းမဵဝ်းဢၼ်လီဢၼ်ငၢမ်းၵူၺ်းတႃႉ။ ၽူႈလႂ်သေဢမ်ႇဝႃႈ၊ၵေႃႉဢၼ်ၵမ်ၵျၢင်ႉဢၼ်လီဢၼ်ငၢမ်းၼၼ်ႉ၊ပဵၼ်ၵူၼ်းၽြႃးပဵၼ်ၸဝ်ႈလႄႈၵေႃႉဢၼ်ၵမ်ၵျၢင်ႉဢမ်ႇလီဢမ်ႇငၢမ်းၼၼ်ႉၸမ်ႉ၊ဢမ်ႇႁုႁၼ်ၽြႃးပဵၼ်ၸဝ်ႈဢေႃႈ။
ၵူၼ်းတင်းသဵင်ႈတင်းလူင်ၶၢမ်ႇသၢၵ်ႈသေႇၽၢႆႇ တေႇမေႇတရိ၊ ယူႇလႄႈ၊သမ်ႇမႃႇတြႃးၵေႃႈၶၢမ်ႇသၢၵ်ႈသေႇယူႇဢေႃႈ။ ၵဝ်ၵေႃႈ၊ၶၢမ်ႇသၢၵ်ႈသေႇၽၢႆႇမၼ်းဢေႃႈ။ သၢၵ်ႈသေႇၵဝ်ပဵၼ်ဢၼ်မၢၼ်ႇမႅၼ်ႈၸိုဝ်ႈၸႂ်ႈၵေႃႈမႂ်းႁုယူႇဢေႃႈ။
ပိၵ်ႉသမ်ႉၵဝ်မီးလွင်ႈဢၼ်လီတႅမ်ႈပၼ်တီႈမႂ်းၵႂႃႇၼမ်ၼႃႇသေၵေႃႈ၊ၵဝ်ဢမ်ႇၶႂ်ႈဢဝ်ၼမ်ႉမိုၵ်ႉတႅမ်ႈသႂ်ႇၵႃႈၼိူဝ်ၸေႈလႄႈ၊-
ၵဝ်မုင်ႈမွင်းႁႂ်ႈလႆႈၸဵဝ်းထူပ်းၺႃးမႂ်းသေယဝ်ႉ၊ႁဝ်းၸင်ႇတေဢုပ်ႇၵုမ်ၵၼ်ၼႃႈတေႃႇၼႃႈဢေႃႈ။
ႁႂ်ႈတၢင်းၼိမ်ၶျၢမ်းသႃႇမီးလူၺ်ႈၵၼ်တင်းမႂ်းသေၵမ်းလူၺ်ႈ။ ၵေႃႉသႄႈတင်းလၢႆ၊တၵ်ႉၼၢႆမႂ်းယူႇဢေႃႈ။ တၵ်ႉၼၢႆပႃးၵေႃႉသႄႈတင်းလၢႆ၊ၵေႃႉလႂ်ၵေႃႉၼၼ်ႉသေၵမ်း။ လိၵ်ႈတြႃးယူဝ်းႁၢၼ်ႇၽိုၼ်တီႈသၢမ်ယဝ်ႉယဝ်ႉဢေႃႈ။
ယုတႃႉ၊ ဢၼ်ပဵၼ်ၶႃႈ ၸဝ်ႈယေႇသုၶရိၸ်ႈ၊ ဢၼ်ပဵၼ်ၼွင်ႉၸၢႆး ယႃႇၵုပ်ႈ၊ တႅမ်ႈလိၵ်ႈပၼ်ၵႂႃႇတီႈသူၸိူဝ်းဢၼ်ၽြႃးပဵၼ်ၸဝ်ႈႁွင်ႉဢဝ်ဝႆႉလႄႈသူလႆႈဢသၢၵ်ႈလိပ်းယူႇၼႂ်းတၢင်းႁၵ်ႉၽြႃးပေႃႈၸဝ်ႈ၊ဢိၵ်ႇတင်းၼႂ်းတၢင်းဢၼ် ၸဝ်ႈယေႇသုၶရိၸ်ႈ၊ ပႂ်ႉလူပႂ်ႉတူၺ်းဝႆႉၼၼ်ႉဢေႃႈ။
ႁႂ်ႈၵရုၼႃႇၸဝ်ႈ၊ဢိၵ်ႇတင်းတၢင်းၼိမ်၊ဢိၵ်ႇတင်းတၢင်းႁၵ်ႉၼမ်ၵိုၼ်းၼႃႇတီႈသူသေၵမ်းလူၺ်ႈ။
ၵေႃႉသႄႈဢၼ်ၵဝ်ႁၵ်ႉၶဝ်႟။ ၼႂ်းမိူဝ်ႈဢၼ်ၵဝ်ယင်းတိုၵ်ႉဢၢင်ႈတၵ်းတႅမ်ႈလိၵ်ႈပၼ်ၵႂႃႇတီႈသူ လွင်ႈတြႃးတၢင်းဢၼ်ၵႄႇၶျွတ်ႈ ဢၼ်ႁဝ်းလႆႈၶၢမ်ႇဢဝ်မိူၼ်မိူၼ်ၵၼ်ၼၼ်ႉယူႇၸိုင်၊ၵဝ်ႁုႁၼ်ဝႃႈ၊မီးလွင်ႈဢၼ်ၵဝ်လီတႅမ်ႈၵမ်းလဵဝ်ႁႂ်ႈလႆႈတိုၵ်းယူင်းပၼ်ဢဵၼ်ပၼ်ႁႅင်းသူပုၼ်ႈလွင်ႈၼင်ႇႁိုဝ်သူတၵ်းယဵင်ႈၶႅၼ်းယုၵ်ႉယွင်ႈတြႃးတၢင်းဢၼ်ယုမ်ႇမၢတ်ႈ၊ဢၼ်ၽြႃးပဵၼ်ၸဝ်ႈပၼ်တီႈၵူၼ်းမူတ်းၸၢင်ႇမၼ်းၸဝ်ႈတင်းလၢႆ ပွၵ်ႈလဵဝ်လႄႈၸုၼ်းၵႂႃႇတႃႇသေႇၼၼ်ႉဢေႃႈ။-
ၵွပ်ႈပိူဝ်ႈၸိူဝ်ႉႁိုဝ်လႄႈဝႃႈၸမ်ႉ၊ၵူၼ်းဢၼ်ဢမ်ႇမီးၽြႃးတြႃးၵမ်ႈၽွင်ႈလၵ်ႉလွမ်ၶဝ်ႈမႃးၵႃႈၼႂ်းၵႄႈႁဝ်းသေယဝ်ႉ၊ၶဝ်ၸိူဝ်းၼၼ်ႉ၊ၸၢင်ႈၶွမ်ႈပိၼ်ႈပႅတ်ႈၶၢဝ်ႇငၢဝ်းတြႃးလွင်ႈၵျေးၸူးၽြႃးပဵၼ်ၸဝ်ႈ၊ႁႂ်ႈလႆႈပိၼ်ႇပဵၼ်ၵိလေႇသႃႇတၢင်းဢၼ်ၵူဝ်ႈၵိူၵ်ႇယူႇ၊ဢိၵ်ႇတင်းၸၢင်ႈထဵင်ပႅတ်ႈၸဝ်ႈႁဝ်း ယေႇသုၶရိၸ်ႈ၊ ဢၼ်ပဵၼ်ၶုၼ်ႁဝ်း၊ၸဝ်ႈၽြႃးႁဝ်းသူႇလဵဝ်ပႃးလဵဝ်ၵူၺ်းၼၼ်ႉ၊ၵႃႈၼႂ်းၵျၢမ်းလိၵ်ႈလၢတ်ႈဝႆႉႁိုင်ၼႃႇယဝ်ႉဝႃႈ၊ၶဝ်ၸိူဝ်းဢၼ်ဢမ်ႇတြႃးၼၼ်ႉတၵ်းလႆႈၶၢမ်ႇတၢင်းဢၼ်ၸီႇယၢင်ႇဢပျတ်ႈဢေႃႈ။
တေႃႈလဵဝ်ၼႆႉ၊ပိၵ်ႉသမ်ႉပေႃးလႆႈႁုလွင်ႈတၢင်းၸိူဝ်းၼႆႉဝႆႉယဝ်ႉသေၵေႃႈ၊ၵဝ်ၶႂ်ႈပၼ်သတိသူ လွင်ႈဢၼ်ၸဝ်ႈၽြႃးၵႄႇသႄႇဢဝ်ၵူၼ်းမဵဝ်း ဢိသရေး၊ ၶဝ်ဢွၵ်ႇမိူင်း ဢေးၵျိပ်ႉ၊ မႃးသေယဝ်ႉ၊ၵမ်းလိုၼ်းသမ်ႉယႃႉပႅတ်ႈၶဝ်ၸိူဝ်းဢၼ်ဢမ်ႇယုမ်ႇမၢတ်ႈၼၼ်ႉဢေႃႈ။-
တမၢၼ်ႇၵၢင်ႁၢဝ်ၸိူဝ်းဢၼ်ဢမ်ႇပႂ်ႉထိင်းဢၶႂၢင်ႉဢႃႇၼႃႇၶဝ်လီလီသေလႄႈၸုၼ်ႉပႅတ်ႈတီႈယူႇတူဝ်ၸဝ်ႈၵဝ်ႇတင်းလၢႆၵေႃႈ၊ယင်းလႆႈၶၢမ်ႇတၢင်းဢၼ်မၼ်းၸဝ်ႈဢဝ်ၸိူၵ်ႈလဵၵ်းမတ်ႉၽုၵ်ႇဝႆႉတႃႇသေႇဢမ်ႇထၢတ်ႇၼၼ်ႉ၊ၶင်ဝႆႉၵႃႈၼႂ်းလပ်းသိင်ႇပုၼ်ႈဢၼ်ၽြႃးပဵၼ်ၸဝ်ႈတၵ်းၸီႇယၢင်ႇပၼ်တၢမ်ႇၼႂ်းမိုဝ်ႉဝၼ်းဢၼ်ယႂ်ႇၼႃႇပုၼ်ႉဢေႃႈ။-
ၶုၵ်းၸႂ်လႆႈၶႆႈၸႂ်ထူပ်းဝဵင်း သေႃးတုမ်ႇ၊ ဢိၵ်ႇတင်းဝဵင်း ၵေႃးမေႃးရႃႉ၊ ဢိၵ်ႇတင်းဝဵင်းဢၼ်မီးႁိမ်းႁွမ်းၸိူဝ်းၼၼ်ႉတႃႉ။ ၵူၼ်းဝဵင်းၸိူဝ်းၼၼ်ႉၽိတ်းပိူင်ႇၵႃႇမေႇသုၵၼ်၊ၵူၼ်းၸၢႆးၼင်ႇၵၼ်ႁဵတ်းလွင်ႈၵႃႇမၵုင်ႇလူၺ်ႈၵၼ်လႄႈၵမ်ၵျၢင်ႉၸိူဝ်ႉၼင်ႇတမၢၼ်ႇၵၢင်ႁၢဝ်ၸိူဝ်းၼၼ်ႉလႄႈၶဝ်ၵေႃႈလႆႈၶၢမ်ႇတၢမ်ႇၽႆးထႃႇဝရႃႉမႆႈၶႅမ်ႈပႅတ်ႈ၊ႁႂ်ႈလႆႈပဵၼ်တၢင်းဢၼ်ပၼ်သတိထၢင်ႇထၢင်ႇသႃးသႃးတီႈၵူၼ်းတင်းလၢႆဢေႃႈ။
မိူၼ်ၸိူဝ်ႉၼင်ႇၼၼ်၊ၵူၼ်းၸိူဝ်းၼၼ်ႉၸၢင်ႈၶႆႈၸႂ်ၸဵၼ်းၸႃးၼႂ်းၽၼ်လႄႈႁဵတ်းႁႂ်ႈတူဝ်ၶဝ်ၵူဝ်ႈၵိူၵ်ႇဢပျတ်ႈယူႇ၊လူလၢႆဢႃႇၼႃႇၶုၼ်ယူႇ၊ဢိၵ်ႇတင်းသႄႉသွမ်းၸဝ်ႈဢၼ်တၼ်းၶူဝ်းယႂ်ႇၼႃႇၼၼ်ႉယူႇဢေႃႈ။-
တမၢၼ်ႇၵၢင်ႁၢဝ် မိၵ်ႉၶေႇလႃႉ၊ ဢၼ်ပဵၼ်ၶုၼ်လူင်တမၢၼ်ႇၵၢင်ႁၢဝ်တင်းလၢႆၼၼ်ႉတေႃႈယင်းဢမ်ႇႁဵတ်းၸိူဝ်ႉၼင်ႇၼၼ်။ ၼႂ်းတၢင်းဢၼ်မၼ်းၽိတ်းၵၼ်တင်းမႃႇၼၢတ်ႈ၊မိူဝ်ႈဢၼ်ၶဝ်တွပ်ႇထဵင်ၵၼ်လူၺ်ႈလွင်ႈၽူႈလႂ်တၵ်းလႆႈဢဝ်တူဝ်ၵႃႇယႃႉ မူဝ်းသေႇ၊ ၼၼ်ႉၸိုင်၊ မိၵ်ႉၶေႇလႃႉ၊ ဢမ်ႇႁတ်းဢဝ်တင်းၵႂၢမ်းဢၼ်သႄႉသွမ်းတၢင်ႇဢပျတ်ႈမႃႇၼၢတ်ႈလႄႈၵူၺ်းလၢတ်ႈဝႃႈ၊ “ႁႂ်ႈထႃႇဝရႃႉၽြႃးၸီႇယၢင်ႇမႂ်းတႃႉ၊” ဝႃႈၼင်ႇၼႆဢေႃႈ။-
ၵူၼ်းၸိူဝ်းၼၼ်ႉၸမ်ႉ၊ၸၢင်ႈသႄႉသွမ်းတၢင်ႇဢပျတ်ႈလွင်ႈတၢင်းဢၼ်ၶဝ်ဢမ်ႇပွင်ႇၸႂ်ၼၼ်ႉသေလႄႈ၊ၶဝ်ၸၢင်ႈဢဝ်လွင်ႈတၢင်းဢၼ်တူဝ်ၸဝ်ႈၵဝ်ႇႁုၸွမ်းၼင်ႇၺၢၼ်ႇၸႃႇတိ၊ဢၼ်မိူၼ်သတ်းဢၼ်ဢမ်ႇမေႃၶႆႈၸႂ်ၸဵၼ်းၸႃးၼၼ်ႉ၊ပဵၼ်လွင်ႈတၢင်းဢၼ်ယႃႉတူဝ်ၸဝ်ႈၵဝ်ႇလုလႅဝ်ဢေႃႈ။-
ၶဝ်မီးဢႃႉမၢင်ႇၵလႃႇယဝ်ႉဢေႃႈ။ လွင်ႈမၼ်းၸမ်ႉ၊ၶဝ်ၸွမ်းသဵၼ်ႈတၢင်း ၵႃႇဢိၼႃႉ၊ ဢေႃႈ။ ၶဝ်ၸႂ်ၸပ်းငိုၼ်းတွင်းထၢၼ်ႈပေႃးဢဝ်တူဝ်ၸဝ်ႈၵဝ်ႇဢၢပ်ႈၼႂ်းသဵၼ်ႈတၢင်း ပႃႇလၢမ်ႇ၊ ဢၼ်ၽိတ်းဢေႃႈ။ ၶဝ်လုၵ်ႉၽိုၼ်ႉမိူၼ်ၸိူဝ်ႉၼင်ႇ ၵေႃးရႃႉ၊ လႄႈလႆႈႁွတ်ႈထိုင်တၢင်းလုလႅဝ်ဢေႃႈ။-
ၶဝ်ပဵၼ်မဵဝ်းဢၼ်ၵူဝ်ႈၵိူၵ်ႇၵႃႈၼႂ်းပွႆးမႅတ်ႈတႃႇသူမိူဝ်ႈဢၼ်ၵိၼ်ပျေႃႇလူၺ်ႈၵၼ်ယူႇ၊ဢမ်ႇမီးတၢင်းၵူဝ်တၢင်းဢၢႆလႄႈတူၺ်းပုၼ်ႈတွင်ႉတူဝ်ၸဝ်ႈၵဝ်ႇၵူၺ်း၊ၶဝ်ပဵၼ်မိူၼ်ၸိူဝ်ႉၼင်ႇမွၵ်ႇၵုမ်ႈဢၼ်ဢမ်ႇပႃးၼမ်ႉၽူၼ်လႄႈလူမ်းထူဝ်းလႄႈပိဝ်ၵႂႃႇ၊မိူၼ်တူၼ်ႈဢၼ်ဢမ်ႇမၢၵ်ႇၼႂ်းၶိင်ႇမၼ်းၼၼ်ႉၵူၺ်းဢမ်ႇၵႃး၊မိူၼ်တူၼ်ႈဢၼ်ႁႅင်ႈတၢႆၵႂႃႇမိူဝ်ႈၶိင်ႇမႆႈလႄႈၶၢမ်ႇတၢင်းဢၼ်ထူၺ်ႈပႃးႁၢၵ်ႈမၼ်းပႅတ်ႈလႄႈ၊-
မိူၼ်လႅင်းၼမ်ႉပိူပ်ႈၼမ်ႉဢၼ်ၵျၢမ်းၼႃႇဢၼ်ၸၢင်ႈႁႂ်ႈတၢင်းလီဢူၵ်းလီဢၢႆၶဝ်ၶွၼ်ႈပဵၼ်ပူၵ်ႉၼမ်ႉမႃးၼၼ်ႉယူႇ၊လၢဝ်ပုင်ႈသၢဝ်းဢၼ်ၽြႃးပဵၼ်ၸဝ်ႈၸတ်းဝႆႉ၊တီႈယူႇပုၼ်ႈမၼ်းၵႃႈၼႂ်းလပ်းသိင်ႇထႃႇဝရႃႉ၊ဢၼ်လိုၵ်ႉလမ်ႇၼႃႇၼၼ်ႉယူႇဢေႃႈ။
ပုၼ်ႈၵူၼ်းၸိူဝ်ႉၼင်ႇၼၼ်ၸိူဝ်းၼၼ်ႉ၊ ဢေးၼွၵ်ႉ၊ ၵေႃႉဢၼ်သိုပ်ႇလူင်းတီႈ ဢႃႇတမ်ႇ၊ မႃးလႆႈ၊ၸဵတ်းသိုပ်ႇၼၼ်ႉႁေႃးလၢတ်ႈဝႆႉလႄႈဝႃႈ၊ “တူၺ်းလူး။ ထႃႇဝရႃႉၽြႃးပႃးဢဝ်တင်းၵူၼ်းမူတ်းၸၢင်ႇမၼ်းၸဝ်ႈပဵၼ်မိုၼ်ႇပဵၼ်သႅၼ်၊-
မႃးႁႂ်ႈလႆႈၸီႇယၢင်ႇၵူၼ်းၵႃႈမီးတင်းသဵင်ႈတင်းလူင်၊ႁႂ်ႈလႆႈပၼ်တၢမ်ႇၶဝ်ၵႃႈဢၼ်ၶဝ်ႁဵတ်းၸွမ်းၼင်ႇဢၼ်ၶဝ်ပဵၼ်ၵေႃႉဢၼ်ဢမ်ႇမီးၽြႃးတြႃး၊ဢိၵ်ႇတင်းၵႂၢမ်းဢၼ်လိူင်းၵျၢမ်းဢၼ်ၵူၼ်းမီးဢပျတ်ႈဢၼ်ဢမ်ႇႁုၽြႃးတြႃး၊လၢတ်ႈၶတ်းၵၼ်တင်းၽြႃးပဵၼ်ၸဝ်ႈၸိူဝ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၶဝ်ၸိူဝ်းၼၼ်ႉပဵၼ်ၵူၼ်းဢၼ်ၸၢင်ႈပွင်ႉမိုၼ်ႇ၊ၸၢင်ႈတၢင်ႇဢပျတ်ႈပိူၼ်ႈ၊ၸၢင်ႈၵမ်ၵျၢင်ႉၸွမ်းဢလူဝ်ႇၵၢင်ၸႂ်တူဝ်ၸဝ်ႈၵဝ်ႇ၊ၸၢင်ႈလၢတ်ႈၵႂၢမ်းဢၼ်ဢုပ်ႇဝၢဝ်းၽႅၼ်သုင်လူၺ်ႈတူဝ်ၸဝ်ႈၵဝ်ႇ၊ၸၢင်ႈၶျေႃးၵိၼ်ဝွၼ်းၵိၼ်ပိူၼ်ႈ၊ပုၼ်ႈဢၵျူဝ်းတူဝ်ၸဝ်ႈၵဝ်ႇဢေႃႈ။
ၵေႃႉဢၼ်ၵဝ်ႁၵ်ႉၶဝ်႟။ ဢွၼ်ၵၼ်ၶုၵ်းၸႂ်လႆႈၶႆႈၸႂ်ထူပ်းၵႂၢမ်းတမၢၼ်ႇၸဝ်ႈ၊ၸဝ်ႈႁဝ်း ယေႇသုၶရိၸ်ႈ၊ တႃႇ။ ၶဝ်ၼၼ်ႉႁေႃးလၢတ်ႈဝႆႉ၊တီႈသူၸဵမ်မိူဝ်ႈဢွၼ်တၢင်းၼၼ်ႉလႄႈဝႃႈ၊-
“ၼႂ်းမိုဝ်ႉဝၼ်းလိုၼ်းသုတ်းပုၼ်ႉၼၼ်ႉ၊ၶဝ်ၸိူဝ်းဢၼ်ၸွမ်းဢလူဝ်ႇၵၢင်ၸႂ်တူဝ်ၸဝ်ႈၵဝ်ႇဢၼ်ဢမ်ႇတြႃးၼၼ်ႉ၊တၵ်းပေႃႇမႃးလႄႈႁဵတ်းပျၢၵ်ႈၶူဝ်သူဢေႃႈ၊” ဝႃႈၼင်ႇၼႆၼၼ်ႉဢေႃႈ။-
ၶဝ်ၼၼ်ႉပဵၼ်ၵေႃႉဢၼ်ၽႄၵိူင်းၶႂၢႆးၵိူင်း၊ပဵၼ်ၵူၼ်းဢၼ်ၵမ်ၵျၢင်ႉသၽေႃးလေႃးၵီႇလႄႈဢမ်ႇမီးဝိၺိၺ်ႇၸဝ်ႈဢေႃႈ။-
သူၸိူဝ်းဢၼ်ၵဝ်ႁၵ်ႉၶဝ်႟။ ဢွၼ်ၵၼ်တႄႇႁဵတ်းႁႂ်ႈတူဝ်ၸဝ်ႈၵဝ်ႇမၼ်ႈၶိူင်ႇၼႂ်းတၢင်းယုမ်ႇမၢတ်ႈဢၼ်မူတ်းၸၢင်ႇၼႃႇသေပိူၼ်ႈၼၼ်ႉယူႇလႄႈႁဵတ်းသူးတွင်းပထၼႃႇၼႂ်းဝိၺိၺ်ႇမူတ်းၸၢင်ႇၸဝ်ႈယူႇ၊-
ပႂ်ႉထိင်းတူဝ်ၸဝ်ႈၵဝ်ၼႂ်းတၢင်းႁၵ်ႉမႅတ်ႈတႃႇၼႂ်းၽြႃးပဵၼ်ၸဝ်ႈယူႇ၊မုင်ႈမွင်းပႂ်ႉထႃႈၵရုၼႃႇၸဝ်ႈႁဝ်း ယေႇသုၶရိၸ်ႈ၊ ဢၼ်ပၼ်ဢသၢၵ်ႈထႃႇဝရႃႉယူႇတႃႉ။
တီႈၵူၼ်းၵမ်ႈၽွင်ႈဢၼ်မီးၸႂ်ဢၼ်ယုမ်ႇၶိုင်ႈၼိုင်ႈဢမ်ႇယုမ်ႇၶိုင်ႈၼိုင်ႈၼၼ်ႉ တိုၵ်းယူင်းႁႂ်ႈၶဝ်ယုမ်ႇတႃႉ။-
တီႈၵမ်ႈၽွင်ႈၵေႃႈ၊ၸၵ်ႉဢဝ်ၶဝ်ဢွၵ်ႇသေၵႃႈတီႈၽႆးတႃႉ။ တီႈၵမ်ႈၽွင်ႈၸမ်ႉ၊ဢဵတ်းလူၶဝ်လူၺ်ႈၸႂ်ဢၼ်ၵူဝ်ၼႃႇလူင်လၢင်တႃႉ။ ၵူၺ်းၵႃႈ၊လီႁင်ႈဢဵတ်ႇသဵတ်ႇၶူဝ်းလဵင်းၶဝ်ဢၼ်မီးၵႂၢၵ်ႈဢၼ်ၵူဝ်ႈၵိူၵ်ႇဢပျတ်ႈၼိူဝ်ႉလိူတ်ႈၶဝ်ၼၼ်ႉတႃႉ။
ၶႅၼ်းတေႃႈ၊ႁႂ်ႈၸဝ်ႈဢၼ်တၢတ်ႈၼိူင်ႇႁႂ်ႈလႆႈၵမ်ႉထွၵ်ႈသူသေၵႃႈတီႈတၢင်းဢၼ်ၶွင်ႈလူမ်ႉ၊ၸဝ်ႈဢၼ်ႁႂ်ႈသူၵၢင်းလွတ်ႈဢပျတ်ႈလႄႈ ႁႂ်ႈသူပျေႉၸုမ်ႇၼႂ်းတၢင်းဢၼ်သိူဝ်းပျေႃႇၽၢႆႇၼႃႈမုၼ်သရေႇၸဝ်ႈ၊-
ၸဝ်ႈဢၼ်ပဵၼ်သူႇလဵဝ်ၽြႃးဢၼ်ဝႃႈ၊ၸဝ်ႈၵႄႇၶျွတ်ႈႁဝ်းၵွပ်ႈလူၺ်ႈ ၸဝ်ႈယေႇသုၶရိၸ်ႈ၊ ၸဝ်ႈၽြႃးႁဝ်းၼၼ်ႉ၊မီးၽုင်းတၼ်းၶူဝ်းဢႃႇၼုၽေႃႇ၊မီးမုၼ်သရေႇဢၼ်ယႂ်ႇမျၢတ်ႈတင်းဢႃႇၼႃႇဢၼ်ဢုပ်ႉပိူင်ႇတႃႇသေႇဢမ်ႇထၢတ်ႇ၊ၸႃႉၸဵမ်ၶိင်ႇၵႃႇလႃႉဢွၼ်တၢင်းသုတ်းပိူၼ်ႈၼၼ်ႉ၊တေႃႈလဵဝ်ၼႆႉတေႃႇထိုင်ႁွတ်ႈမိူဝ်းၼႃႈ၊ၵမ်ႇၽႃႇသိုပ်ႇသိုပ်ႇတၢမ်တၢမ်သေၵမ်းလူၺ်ႈ။ ဢႃမိၼ်ႈ လိၵ်ႈတြႃးယုတႃႉယဝ်ႉယဝ်ႉဢေႃႈ။
ၽိုၼ်လိၵ်ႈၼႆႉ၊ပဵၼ်ဢၼ်မၢတ်ႈမၢႆတႅမ်ႈဝႆႉလွင်ႈတၢင်းဢၼ် ၸဝ်ႈယေႇသု၊ ပၼ်ပျႃႇတိၵ်ႈဝႆႉဢေႃႈ။ ၽြႃးပဵၼ်ၸဝ်ႈပၼ်ပျႃႇတိၵ်ႈၸဝ်ႈၼႆႉ၊ႁႂ်ႈလႆႈၼႄပျႃးလွင်ႈတၢင်းဢၼ်ဢမ်ႇပေႃးႁိုင်တၵ်းပဵၼ်မႃးၼၼ်ႉတီႈၶႃႈမၼ်းၸဝ်ႈတင်းလၢႆဢေႃႈ။ ၸဝ်ႈၶရိၸ်ႈ၊ ၸင်ႇပွႆႇၸႂ်ႉတမၢၼ်ႇၵၢင်ႁၢဝ်မၼ်းၸဝ်ႈႁႂ်ႈမႃးၽုၺ်ႇၼႄလွင်ႈတၢင်းၸိူဝ်းၼႆႉ၊တီႈၶႃႈမၼ်းၸဝ်ႈ ယူဝ်းႁၢၼ်ႇ၊ လႄႈ၊-
ပဵၼ်ၵေႃႉဢၼ်ၶၢမ်ႇသၢၵ်ႈသေႇလွင်ႈတၢင်းၵႃႈဢၼ်မၼ်းလႆႈႁၼ်တင်းသဵင်ႈတင်းမူတ်းဢေႃႈ။ ၼႆႉၸမ်ႉ၊ပဵၼ်ၶေႃႈၵႂၢမ်းဢၼ်မၼ်းမွၵ်ႇလၢတ်ႈၼႄလွင်ႈၼုၵ်ႈၵပၢတ်ႈတြႃး၊ဢိၵ်ႇတင်းၵႂၢမ်းသဵတ်ႈၸႃႇဢၼ် ၸဝ်ႈယေႇသုၶရိၸ်ႈ၊ ၽုၺ်ႇၼႄၼၼ်ႉဢေႃႈ။-
ၵေႃႉဢၼ်ၽတ်းဢၢၼ်ႇလိၵ်ႈတြႃးၼႆႉပၼ်တီႈပိူၼ်ႈၼၼ်ႉမီးမၢင်ႇၵလႃႇဢေႃႈ။ ၶဝ်ၸိူဝ်းဢၼ်ထွမ်ႇဢဝ်ၵႂၢမ်းပျႃႇတိၵ်ႈၼႆႉသေလႄႈၵမ်ၵျၢင်ႉၸွမ်းၵႃႈၼင်ႇဢၼ်တႅမ်ႈဝႆႉၵႃႈၼႂ်းၽိုၼ်လိၵ်ႈၼႆႉၼၼ်ႉၵေႃႈ၊မီးမၢင်ႇၵလႃႇဢေႃႈ။ လွင်ႈမၼ်းၸမ်ႉ၊ၶိင်ႇၵႃႇလႃႉၸမ်တၵ်းႁွတ်ႈထိုင်မႃးယဝ်ႉဢေႃႈ။
ၵဝ် ယူဝ်းႁၢၼ်ႇ၊ တႅမ်ႈလိၵ်ႈပၼ်ၵႂႃႇတီႈၸိူဝ်းၸဝ်ႈၸဵတ်းပႃး၊ဢၼ်မီးယူႇၼႂ်းမိူင်း ဢႃႇသိ၊ ပုၼ်ႉဢေႃႈ။ ႁႂ်ႈသူႁပ်ႉဢဝ်ၵျေးၸူးဢိၵ်ႇတင်းတၢင်းၼိမ်၊ဢၼ်ပဵၼ်မႃးၵႃႈတီႈၽြႃးပဵၼ်ၸဝ်ႈဢၼ်မီးယူႇၸူဝ်ႈပိတ်ႈၸုပၢၼ်ႇ၊ၸဝ်ႈဢၼ်မီးမႃးၸူဝ်ႈဢတိၵ်ႈ၊ၸဝ်ႈဢၼ်တၵ်းမီးယူႇဢၼႃႇၵၢတ်ႈၵႃႇလႃႉၵမ်းလိုၼ်းသေႇသေႇၼၼ်ႉ၊ဢိၵ်ႇတင်းၵႃႈတီႈဝိၺိၺ်ႇၸဵတ်းပႃးဢၼ်မီးယူႇၽၢႆႇၼႃႈပလၢင်ႇၸဝ်ႈ၊-
ဢိၵ်ႇတင်းႁႂ်ႈ ၸဝ်ႈယေႇသုၶရိၸ်ႈ၊ ဢၼ်ပဵၼ်ၸဝ်ႈဢၼ်ပႃးတင်းသဵတ်ႈၸႃႇလႄႈၶၢမ်ႇသၢၵ်ႈသေႇ၊ၸဝ်ႈဢၼ်ပဵၼ်ၸဝ်ႈလုၵ်ႈတူၼ်ႈလႄႈလုၵ်ႉၶိုၼ်းလိပ်း၊ၸဝ်ႈဢၼ်ဢုပ်ႉပိူင်ႇၶုၼ်ႁေႃၶမ်းလေႃးၵီႇတင်းလၢႆၼၼ်ႉမီးၵႃႈၼိူဝ်သူသေၵမ်းလူၺ်ႈ။ မၼ်းၸဝ်ႈႁၵ်ႉႁဝ်းၼႃႇလူင်လၢင်လႄႈမၼ်းၸဝ်ႈၶၢမ်ႇတၢႆတၢင်ႁဝ်း၊ႁႂ်ႈလႆႈပွႆႇၶႂၢင်းပၼ်ဢပျတ်ႈႁဝ်းသေယဝ်ႉ၊-
ဢဝ်ႁဝ်းၶၢၼ်းဝႆႉၼႂ်းဢရႃႇၶုၼ်ႁေႃၶမ်းတၢင်းဢၼ်ဢုပ်ႉပိူင်ႇဢိၵ်ႇတင်းၼႂ်းဢရႃႇယဵၸ်ႈပရေႃးႁဵၵ်ႈ ဢၼ်ႁဵတ်းဝၢတ်ႈၵူဝ်းၵႂၢႆႇၽၢႆႇၼႃႈပေႃႈမၼ်းၸဝ်ႈၽြႃးပဵၼ်ၸဝ်ႈၼၼ်ႉႁႂ်ႈမၼ်းၸဝ်ႈမီးမုၼ်သရေႇဢိၵ်ႇတင်းတၼ်းၶူဝ်းဢႃႇၼႃႇၸၢၵ်ႈတႃႇသေႇသိုပ်ႇသိုပ်ႇတၢမ်တၢမ်သေၵမ်းလူၺ်ႈ။ ဢႃမိၼ်ႈ။
တူၺ်းလူး။ မၼ်းၸဝ်ႈတၵ်းၶီႇမွၵ်ႇၵုမ်ႈမႃးဢေႃႈ။ ၵူၼ်းၵူႈၵေႃႉၵူႈၵူၼ်းဢိၵ်ႇတင်းၵူၼ်းၸိူဝ်းဢၼ်လႆႈတႅင်းမၼ်းၸဝ်ႈၼၼ်ႉတၵ်းမုင်ႈႁၼ်မၼ်းၸဝ်ႈဢေႃႈ။ ၵူၼ်းလေႃးၵီႇတင်းသဵင်ႈတင်းလူင်တၵ်းလႆႈႁွင်ႉႁႆႈပွင်ႉၶၢင်းၵွပ်ႈပိူဝ်ႈမၼ်းၸဝ်ႈဢေႃႈ။ တၵ်းပဵၼ်ၸိူဝ်ႉၼင်ႇၼၼ်တႄႉတႄႉဢေႃႈ။ ဢႃမိၼ်ႈ။
“ၵဝ်ပဵၼ်ၵေႃႇၸႃႉႁူဝ်ပိုင်းဢိၵ်ႇတင်းလိုၼ်းလင်သုတ်းပိူၼ်ႈ ဢေႃႈ၊” ဝႃႈၼႆထႃႇဝရႃႉၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ၸဝ်ႈဢၼ်မီးယူႇၸူဝ်ႈပိတ်ႈၸုပၢၼ်ႇ၊ၸဝ်ႈဢၼ်မီးမႃးၸူဝ်ႈဢတိၵ်ႈ၊ၸဝ်ႈဢၼ်တၵ်းမီးယူႇဢၼႃႇၵၢတ်ႈၵႃႇလႃႉၵမ်းလိုၼ်းသေႇသေႇၼၼ်ႉမီးဢမိင်ႉဢေႃႈ။
ၵဝ်၊ ယူဝ်းႁၢၼ်ႇ၊ ဢၼ်ပဵၼ်ပီႈသူၼႆႉ၊ၸွမ်းၼင်ႇဢၼ်ပဵၼ်တပႄး ၸဝ်ႈယေႇသု၊ ၵေႃႉၼိုင်ႈၼၼ်ႉ၊ပဵၼ်ၵေႃႉသႄႈႁူမ်ႈလူၺ်ႈၵၼ်တင်းသူၵႃႈၼႂ်းတၢင်းဢၼ်ယိူၼ်ႉၶၢမ်ႇတုၵ်ႉၶႃႉတၢင်းၽၢၼ်ဢၼ်တူၵ်းႁွတ်ႈၵႃႈၼိူဝ်ၶဝ်ၸိူဝ်းဢၼ်ၸၢပ်ႈသႅင်ႇၵၼ်တင်းမိူင်းမၼ်းၸဝ်ႈၼၼ်ႉဢေႃႈ။ ၵဝ်လႆႈၶၢမ်ႇတူၵ်းၵႅၼ်းၵႃႈၼႂ်းၵုၼ်ဢၼ်ႁွင်ႉဝႃႈ၊ၵုၼ် ပတ်ႉမု၊ ၵွပ်ႈပိူဝ်ႈၵဝ်ႁေႃးလၢတ်ႈတြႃး၊ၽြႃးပဵၼ်ၸဝ်ႈဢိၵ်ႇတင်းသဵတ်ႈၸႃႇတြႃးဢၼ် ၸဝ်ႈယေႇသု၊ ၼႄပျႃးၼၼ်ႉယူႇယဝ်ႉ။-
ၼႂ်းဝၼ်းၸဝ်ႈၽြႃးၼၼ်ႉဝိၺိၺ်ႇၸဝ်ႈဢုပ်ႉထိင်းၵဝ်လႄႈၵဝ်လႆႈငိၼ်းသဵင်ဢၼ်ယႂ်ႇၼႃႇမေႃးလင်မိူၼ်ၸိူဝ်ႉၼင်ႇသဵင်ၼႄးၶရႃႇၼၼ်ႉ လၢတ်ႈၵႃႈတီႈၽၢႆႇလင်ၵဝ်ဢေႃႈ။-
သဵင်ၼၼ်ႉလၢတ်ႈဝႃႈ၊ “ၵႃႈဢၼ်မႂ်းလႆႈႁၼ်ၼႆႉ၊တႅမ်ႈဝႆႉၼႂ်းၽိုၼ်လိၵ်ႈလႄႈသူင်ႇပၼ်ၵႂႃႇၵႃႈတီႈၸိူဝ်းၸဝ်ႈတင်းလၢႆ၊ဢၼ်မီးၵႃႈၼႂ်းၸဵတ်းဝဵင်း၊ဢၼ်ပဵၼ်ဝဵင်း ဢေးၽႅတ်ႈ၊ ဝဵင်း သမိူဝ်ႇၼႃႉ၊ ဝဵင်း ပေႇရၵမ်ႇ၊ ဝဵင်း ႀွႃႇတိရႃႉ၊ ဝဵင်း သႃႇတိ၊ ဝဵင်း ၽိလတေးလၽိ၊ တင်းဝဵင်း လေႃးတိၵိ၊ ၸိူဝ်းၼႆႉတႃႉ၊” ဝႃႈၼင်ႇၼႆဢေႃႈ။
ၵဝ်ဝၢႆႇတူၺ်းႁႂ်ႈလႆႈႁၼ်ၵေႃႉဢၼ်ႁဵတ်းသဵင်မေႃးမႃးလၢတ်ႈတေႃႇၵဝ်လႄႈၵဝ်လႆႈႁၼ်ၶဵင်ႇတီႈတႆႈၽႆးဢၼ်ဢဝ်တင်းၶမ်းႁဵတ်းဝႆႉၸဵတ်းဢၼ်၊-
ဢိၵ်ႇတင်းၵႃႈၼႂ်းၵႄႈၵၢင်ၶဵင်ႇတီႈတႆႈၽႆးၸိူဝ်းၼၼ်ႉမီးၵေႃႉဢၼ်မိူၼ်ၸိူဝ်ႉၼင်ႇလုၵ်ႈၵူၼ်းၼၼ်ႉၵေႃႉၼိုင်ႈ၊ၼုင်ႈၶူဝ်းယၢဝ်းႁူမ်ႇထိုင်တိၼ်လႄႈဢဝ်သၢႆဢႅဝ်ၶမ်းႁတ်ႉဢူၵ်းမၼ်းဝႆႉဢေႃႈ။-
ၶူၼ်ႁူဝ်မၼ်းၶၢဝ်မိူၼ်ၸိူဝ်ႉၼင်ႇၶူၼ်သူဝ်း၊ဢမ်ႇၼၼ်ၵေႃႈၶၢဝ်မိူၼ်ၸိူဝ်ႉၼင်ႇမူၺ်ႁႃႇဝႆႉလႄႈမၢၵ်ႇတႃမၼ်းၵေႃႈသွင်ႇႁိူဝ်ႈမိူၼ်ၸိူဝ်ႉၼင်ႇပဵဝ်ၽႆးဢေႃႈ။-
တိၼ်မၼ်းႁိူဝ်ႈမၢပ်ႈမိူၼ်တွင်းလိူင်ၸႅတ်ႈၸႅတ်ႈဢၼ်လွမ်ၵႃႈၼႂ်းတဝ်ႈၽႆးၼၼ်ႉလႄႈသဵင်မၼ်းလင်မေႃးမိူၼ်ၸိူဝ်ႉၼင်ႇသဵင်ၼမ်ႉတူၵ်းတၢတ်ႇဢေႃႈ။-
ၵႃႈၼႂ်းမိုဝ်းၶွၼ်ၶႂႃမၼ်းၼၼ်ႉယိပ်းၵမ်ဝႆႉလၢဝ်ၸဵတ်းလုၵ်ႈလႄႈလၢပ်ႇသၢၼ်ႇလႅၵ်ႈဢၼ်မီးၶူမ်းသွင်ၽၢႆႇဢၼ်ၽၢႆၼႃႇၼၼ်ႉၵေႃႈ၊ဢွၵ်ႇမႃးၵႃႈၼႂ်းသူပ်းမၼ်းယူႇဢေႃႈ။ ၼႃႈမၼ်းၵေႃႈႁိူဝ်ႈမၢပ်ႈမိူၼ်ၸိူဝ်ႉၼင်ႇသၢႆလႅင်းၶိင်ႇၵၢင်ဝၼ်းတဵင်ႈၼၼ်ႉဝႆႉဢေႃႈ။-
မိူဝ်ႈဢၼ်ၵဝ်ႁၼ်မၼ်းၸိုင်၊ၵဝ်ၶုပ်ႉမူပ်ႇၵႃႈတီႈႁိမ်းတိၼ်မၼ်းယူႇမိူၼ်ၸိူဝ်ႉၼင်ႇၵူၼ်းတၢႆဢေႃႈ။ မၼ်းၼၼ်ႉဢဝ်မိုဝ်းၶွၼ်ၶႂႃမၼ်းတၢင်ႇသႂ်ႇၵႃႈၼိူဝ်ၵဝ်လႄႈလၢတ်ႈဝႃႈ၊ “ယႃႇပေၵူဝ်။ ၵဝ်ပဵၼ်ၵေႃႇၸႃႉႁူဝ်ပိုင်းဢိၵ်ႇတင်းလိုၼ်းလင်သုတ်းဢေႃႈ။-
ၵေႃႉဢၼ်ဢသၢၵ်ႈလိပ်းၵေႃႈပဵၼ်ဢေႃႈ။ ၵဝ်လႆႈတၢႆယဝ်ႉလႄႈတေႃႈလဵဝ်ၼႆႉ၊ၵဝ်မီးဢသၢၵ်ႈလိပ်းယူႇတႃႇသေႇဢမ်ႇထၢတ်ႇသိုပ်ႇသိုပ်ႇတၢမ်တၢမ်ဢေႃႈ။ ၵဝ်ဢုပ်ႉပိူင်ႇတၢင်းတၢႆဢိၵ်ႇတင်းမိူင်းမရၼႃႉဢေႃႈ။-
ပိူဝ်ႈၼႆလႄႈတႅမ်ႈလွင်ႈတၢင်းဢၼ်မႂ်းႁၼ်ၵႃႈမီး၊ၸႃႉၸဵမ်လွင်ႈတၢင်းဢၼ်ပဵၼ်ယူႇမိူဝ်ႈလဵဝ်၊ဢိၵ်ႇတင်းလွင်ႈတၢင်းဢၼ်တၵ်းပဵၼ်မႃးၵမ်းလိုၼ်းၸိူဝ်းၼၼ်ႉဝႆႉတႃႉ။-
ဢၼၢၵ်ႈဢထိၵ်ႈပႄႇဢၼ်လိုၵ်ႉဢၼ်လမ်ႇ၊လူၺ်ႈလွင်ႈလၢဝ်ၸဵတ်းလုၵ်ႈဢၼ်မီးၼႂ်းမိုဝ်းၶွၼ်ၶႂႃၵဝ်ၸိူဝ်းၼႆႉ၊ဢိၵ်ႇတင်းလွင်ႈၶဵင်ႇတီႈတႆႈၽႆးၶမ်းၸဵတ်းဢၼ်ၸိူဝ်းၼႆႉၸမ်ႉ၊လၢဝ်ၸဵတ်းလုၵ်ႈၼႆႉ၊ပဵၼ်တမၢၼ်ႇၵၢင်ႁၢဝ်ၸိူဝ်းဢၼ်ဢုပ်ႉထိင်းၸိူဝ်းၸဝ်ႈၸဵတ်းပႃးလႄႈၶဵင်ႇတီႈတႆႈၽႆးၶမ်းၸိူဝ်းၼၼ်ႉ၊သမ်ႉပဵၼ်ၸိူဝ်းၸဝ်ႈၸဵတ်းပႃးဢေႃႈ။
“တႅမ်ႈၸိူဝ်ႉၼင်ႇၼႆသေလႄႈသင်ႇလၢတ်ႈၵႂႃႇၵႃႈတီႈတမၢၼ်ႇၵၢင်ႁၢဝ်ၸိူဝ်းၸဝ်ႈဝဵင်း ဢေးၽႅတ်ႈ၊ လႄႈဝႃႈ။ “ၼႆႉၸမ်ႉ၊ပဵၼ်ၵႂၢမ်းတြႃးဢၼ်လုၵ်ႉသေၵႃႈတီႈၸဝ်ႈဢၼ်ယိပ်းၵမ်လၢဝ်ၸဵတ်းလုၵ်ႈဝႆႉၵႃႈၼႂ်းမိုဝ်းၶွၼ်ၶႂႃမၼ်းသေလႄႈပႆၵႂႃႇပႆမႃးယူႇၵႃႈၼႂ်းၵႄႈၵၢင်ၶဵင်ႇတီႈတႆႈၽႆးၸဵတ်းဢၼ်ၼၼ်ႉဢေႃႈ။-
လွင်ႈဢၼ်မႂ်းၵမ်ၵျၢင်ႉၸိူဝ်ႉၼင်ႇႁိုဝ်၊မႂ်းယၢပ်ႇၽိုတ်ႇထၢၼ်ႇႁိုဝ်ဢိၵ်ႇတင်းမႂ်းယိူၼ်ႉၶၢမ်ႇမႃးထၢၼ်ႇႁိုဝ်ၼၼ်ႉၵဝ်ႁုယူႇဢေႃႈ။ ၵဝ်ႁုလွင်ႈဢၼ်မႂ်းဢမ်ႇႁပ်ႉၶၢမ်ႇဢဝ်လႆႈၵူၼ်းဢၼ်ဢမ်ႇတြႃးၸိူဝ်းၼၼ်ႉ၊ဢိၵ်ႇတင်းလွင်ႈဢၼ်မႂ်းၸႅတ်ႈသေးတူၺ်းၶဝ်ၸိူဝ်းဢၼ်ယင်းဢမ်ႇၸႂ်ႈတမၢၼ်ႇၸဝ်ႈလႄႈႁဵတ်းႁၢင်ႈပဵၼ်တမၢၼ်ႇၸဝ်ႈၼၼ်ႉသေယဝ်ႉ၊လႆႈႁုလွင်ႈဢၼ်ၶဝ်ပဵၼ်ၵူၼ်းပႅတ်ႉၵူၼ်းလႅၼ်ၼၼ်ႉဢေႃႈ။-
လွင်ႈဢၼ်မႂ်းဝႆႉၸႂ်ယိုၼ်းၸႂ်ယၢဝ်းလႄႈယိူၼ်ႉၶၢမ်ႇတုၵ်ႉၶႃႉတၢင်းၽၢၼ်ပုၼ်ႈၸိုဝ်ႈသဵင်ၵဝ်ၼၼ်ႉ၊ဢဵၼ်ႁႅင်းမႂ်းယင်းဢမ်ႇဢူၼ်ႈဢွၼ်ႇၵႂႃႇၼၼ်ႉၵေႃႈၵဝ်ႁုယူႇဢေႃႈ။-
ၵူၺ်းၵႃႈ၊ၵဝ်မီးတီႈတၵ်းတၢင်ႇဢပျတ်ႈတီႈမႂ်းၸမ်ႉ၊တေႃႈလဵဝ်ၼႆႉ၊မႂ်းယင်းဢမ်ႇႁၵ်ႉၵဝ်မိူၼ်ၸိူဝ်ႉၼင်ႇဢၼ်မႂ်းႁၵ်ႉမိူဝ်ႈဢွၼ်တၢင်းၼၼ်ႉယဝ်ႉ။-
ၶႆႈၸႂ်ဝူၼ်ႉတူၺ်းလွင်ႈဢၼ်မႂ်းသုတ်ႉယွမ်းၵႂႃႇထၢၼ်ႇႁိုဝ်ယဝ်ႉၼၼ်ႉတႃႉ။ ၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်မႂ်းသေယဝ်ႉ၊ၵမ်ၵျၢင်ႉၶိုၼ်းၵႃႈၼင်ႇဢၼ်မႂ်းယၢမ်ႈလႆႈၵမ်ၵျၢင်ႉမႃးဢွၼ်တၢင်းၼၼ်ႉတႃႉ။ ပေႃးဢမ်ႇၼၼ်၊ၵဝ်တၵ်းၸဵဝ်းမႃးၸူးတီႈမႂ်းလႄႈတၵ်းၶၢႆႉတီႈၶဵင်ႇတႆႈၽႆးမႂ်းပႅတ်ႈဢေႃႈ။-
ၼႂ်းဝႃႈၼၼ်သေၵေႃႈ၊မီးလွင်ႈဢၼ်လီထုၵ်ႇၸႂ်ၵျိူၵ်ႈၸႂ်ၸမ်ႉ၊ၸိူဝ်ႉၼင်ႇဢၼ်ၵဝ်ၸင်းၼၼ်ႉ၊မႂ်းၵေႃႈၸင်းတၢင်းၵမ်တၢင်းၵျၢင်ႉတပႄး ၼိၵေႃးလႃႉ၊ ၼၼ်ႉဢေႃႈ။
“ပိူဝ်ႈၼႆလႄႈပေႃးမႂ်းမီးႁူၸိုင်၊ထွမ်ႇဢဝ်ဢမိင်ႉဢၼ်ဝိၺိၺ်ႇၸဝ်ႈသင်ႇၵႃႈၼိူဝ်ၸိူဝ်းၸဝ်ႈတင်းလၢႆၼၼ်ႉတႃႉ။ “တီႈၶဝ်ၸိူဝ်းဢၼ်ပႄႉၼႅင်ႇၼၼ်ႉၸိုင်၊ၵဝ်တၵ်းလႆႈပၼ်ဢၶႂၢင်ႉဢၼ်တၵ်းလႆႈၵိၼ်မၢၵ်ႇတူၼ်ႈဢသၢၵ်ႈဢၼ်မီးဝႆႉၵႃႈၼႂ်းသူၼ်မိူင်းၽြႃးပဵၼ်ၸဝ်ႈၼၼ်ႉဢေႃႈ။”
“တႅမ်ႈၸိူဝ်ႉၼင်ႇၼႆသေလႄႈသင်ႇလၢတ်ႈၵႂႃႇၵႃႈတီႈတမၢၼ်ႇၵၢင်ႁၢဝ်ၸိူဝ်းၸဝ်ႈဝဵင်း သမိူဝ်ႇၼႃႉ၊ လႄႈဝႃႈ။ “ၼႆႉၸမ်ႉ၊ပဵၼ်ၵႂၢမ်းတြႃးဢၼ်မႃးသေၵႃႈတီႈၸဝ်ႈဢၼ်ပဵၼ်ၵေႃႇၸႃႉႁူဝ်ပိုင်း၊ၸဝ်ႈဢၼ်ပဵၼ်လိုၼ်းလင်သုတ်း၊ၸဝ်ႈဢၼ်တၢႆယဝ်ႉလႄႈသမ်ႉၶိုၼ်းလုၵ်ႉၶိုၼ်းလိပ်းယူႇၼၼ်ႉဢေႃႈ။-
ၵဝ်ႁုတုၵ်ႉၶႃႉတၢင်းယၢပ်ႇမႂ်းယူႇလႄႈၵဝ်ႁုလွင်ႈဢၼ်ပိၵ်ႉသမ်ႉမႂ်းယၢၵ်ႈၽၢၼ်သေၵေႃႈ၊မႂ်းယင်းမီးတၢင်းဢၼ်မၢၵ်ႈမီးတႄႉတႄႉၼၼ်ႉဢေႃႈ။ ၵဝ်ႁုလွင်ႈဢၼ်ၵူၼ်းၸိူဝ်းဢၼ်ယင်းဢမ်ႇၸႂ်ႈၵူၼ်းမဵဝ်း ၵျူး၊ လႄႈႁဵတ်းႁၢင်ႈပဵၼ် ၵျူး၊ ၼၼ်ႉ၊ၶဝ်ႈပႃးၼႂ်းမူႇၸုမ်း ၸႃႇတၢၼ်ႇ၊ လႄႈသႄႉသွမ်းသူၼၼ်ႉဢေႃႈ။-
ယႃပေၵူဝ်တုၵ်ႉၶႃႉဢၼ်မႂ်းၸမ်တၵ်းလႆႈၶၢမ်ႇၼၼ်ႉသေၸိူဝ်ႉသေပိူင်။ ထွမ်ႇလူး။ မႃႇၼၢတ်ႈၸမ်တၵ်းဢဝ်ၵူၼ်းၼႂ်းသူၵမ်ႈၽွင်ႈသႂ်ႇထွင်ႇႁႂ်ႈလႆႈၸႅတ်ႈသေးတူၺ်းသူလႄႈသူတၵ်းလႆႈၶၢမ်ႇတုၵ်ႉၶႃႉသိပ်းဝၼ်းတဵမ်တဵမ်ဢေႃႈ။ ပိၵ်ႉသမ်ႉထိုင်ပဵၼ်တၢင်းတၢႆၼၼ်ႉသေၵေႃႈပႂ်ႉသဵတ်ႈၸႃႇတေႃႇၵဝ်ယူႇတႃႉ။ ပေႃးႁဵတ်းၼင်ႇၼၼ်ၸိုင်၊ၵဝ်တၵ်းပၼ်သူးသရၽူႇဢသၢၵ်ႈတီႈမႂ်းဢေႃႈ။
“ပိူဝ်ႈၼႆလႄႈ၊ပေႃးမႂ်းမီးႁူၸိုင်၊ထွမ်ႇဢဝ်ဢမိင်ႉဢၼ်ဝိၺိၺ်ႇၸဝ်ႈဢၼ်သင်ႇၵႃႈၼိူဝ်ၸိူဝ်းၸဝ်ႈတင်းလၢႆၼၼ်ႉတႃႉ။ “တီႈၶဝ်ၸိူဝ်းဢၼ်ပႄႉၼႅင်ႇၼၼ်ႉတၢင်းတၢႆပွၵ်ႈတီႈသွင်တေဢမ်ႇလႆႈတိူဝ်ႉလႆႈထုၵ်ႇၶဝ်ဢေႃႈ။”
“တႅမ်ႈၸိူဝ်ႉၼင်ႇၼႆသေလႄႈသင်ႇလၢတ်ႈၵႂႃႇၵႃႈတီႈတမၢၼ်ႇၵၢင်ႁၢဝ်ၸိူဝ်းၸဝ်ႈ၊ဝဵင်း ပေႇရၵမ်ႇ၊ လႄႈဝႃႈ။ “ၼႆႉၸမ်ႉ၊ပဵၼ်ၵႂၢမ်းတြႃးဢၼ်လုၵ်ႉသေၵႃႈတီႈၸဝ်ႈဢၼ်မီးလၢပ်ႇသၢၼ်ႇလႅၵ်ႈသွင်ၶူမ်းလႄႈၽၢႆၼႃႇၼၼ်ႉမႃးဢေႃႈ။-
ၵဝ်ႁုတီႈယူႇမႂ်းဢၼ်ဝႃႈ၊တီႈဢၼ်ရႃႇၸႃႉပလၢင်ႇၸႃႇတၢၼ်ႇမီးယူႇၼၼ်ႉဢေႃႈ။ မႂ်းပႂ်ႉသဵတ်ႈၸႃႇတေႃႇၵဝ်လႄႈယင်းဢမ်ႇၸုၼ်ႉဢမ်ႇပႄႇပႅတ်ႈလႄႈမီးတၢင်းဢၼ်မႂ်းယုမ်ႇမၢတ်ႈၵဝ်ပိၵ်ႉသမ်ႉၼႂ်းမိူဝ်ႈဢၼ် ဢၼ်ႇတိပႃႉ၊ ၵေႃႉဢၼ်မီးသဵတ်ႈၸႃႇဢၼ်ၶၢမ်ႇသၢၵ်ႈသေႇၽၢႆႇၵဝ်လႄႈလႆႈၶၢမ်ႇတၢင်းဢၼ်ဢဝ်တၢႆၵႃႈၼႂ်းသူၵႃႈတီႈဢၼ်ၸႃႇတၢၼ်ႇယူႇၼၼ်ႉဢေႃႈ။-
ၵူၺ်းၵႃႈ၊ၵဝ်မီးတီႈတၵ်းတၢင်ႇဢပျတ်ႈတီႈမႂ်းဢိတ်းၼိုင်ႈၸမ်ႉ၊ၼႂ်းသူၼႆႉၵမ်ႈၽွင်ႈၸပ်းၸွမ်းၵႂၢမ်းသင်ႇသွၼ်သြႃႇ ပႃႇလၢမ်ႇ၊ ၵေႃႉဢၼ်သင်ႇသွၼ်ပၼ်ၶုၼ် ပႃႇလႅၵ်ႈ၊ ႁႂ်ႈလႆႈဢွၼ်သူင်ႇၵူၼ်းမဵဝ်း ဢိသရေး၊ ၶဝ်၊တူၵ်းၸူမ်ၵႃႈၼႂ်းဢပျတ်ႈၼႂ်းတၢင်းဢၼ်ၸူဝ်းဢဝ်ႁႂ်ႈၶဝ်ၵိၼ်တၢင်းၵိၼ်ဢၼ်သၢၵ်ႈလူႇၵႃႈတီႈၽၢႆႇၼႃႈႁုၼ်ႇႁၢင်ႈသၢင်းထုၼၼ်ႉယဝ်ႉ၊ဢိၵ်ႇတင်းႁႂ်ႈၶဝ်ႁဵတ်းၸွမ်းဢလူဝ်ႇၵိလေႇသႃႇဢၼ်ဢမ်ႇတြႃးၵႂႃႇၼၼ်ႉဢေႃႈ။-
မိူၼ်ၸိူဝ်ႉၼင်ႇၼၼ်ၼႂ်းမႂ်းၼၼ်ႉ၊ယင်းမီးၵူၼ်းၵမ်ႈၽွင်ႈၸပ်းၸွမ်းၵႂၢမ်းသင်ႇသွၼ်တပႄး ၼိၵေႃးလႃႉ၊ ၼၼ်ႉယူႇဢေႃႈ။-
တေႃႈလဵဝ်ၼႆႉ၊ၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်တႃႉ။ ပေႃးဢမ်ႇၼၼ်ၵဝ်တၵ်းၸဵဝ်းမႃးၸူးတီႈမႂ်းသေယဝ်ႉ၊ဢဝ်တင်းလၢပ်ႇသၢၼ်ႇလႅၵ်ႈဢၼ်ဢွၵ်ႇၵႃႈတီႈသူပ်းၵဝ်မႃးၼၼ်ႉလႄႈတိုၵ်းတေႃးၶဝ်ဢေႃႈ။
“ပိူဝ်ႈၼႆလႄႈ၊ပေႃးသူမီးႁူၸိုင်၊ထွမ်ႇဢဝ်ဢမိင်ႉဢၼ်ဝိၺိၺ်ႇၸဝ်ႈသင်ႇလၢတ်ႈၵႃႈတီႈၸိူဝ်းၸဝ်ႈတင်းလၢႆၼၼ်ႉတႃႉ။ “တီႈၵေႃႉဢၼ်ပႄႉၼႅင်ႇၼၼ်ႉၸိုင်၊ၵဝ်တၵ်းပၼ်ၶဝ်ႈမုၼ်း မၼ်ႇၼႃႉ၊ ဢၼ်သိူင်ႇဝႆႉ၊ဢိၵ်ႇတင်းတၵ်းပၼ်မၢၵ်ႇႁိၼ်ၶၢဝ်ႁူၺ်ႇၼိုင်ႈ၊ဢၼ်ဢဝ်တင်းတူဝ်လိၵ်ႈဢႅၵ်ႉၶရႃႇတႅမ်ႈၸိုဝ်ႈသဵင်ဢၼ်မႂ်ႇဝႆႉၼၼ်ႉဢေႃႈ။ ၼွၵ်ႈသေၵေႃႉဢၼ်လႆႈႁပ်ႉဢဝ်မၢၵ်ႇႁိၼ်ၼၼ်ႉဢမ်ႇမီးၽူႈလႂ်ႁုၸိုဝ်ႈသဵင်ၼၼ်ႉလႆႈ။
“တႅမ်ႈၸိူဝ်ႉၼင်ႇၼႆသေလႄႈသင်ႇလၢတ်ႈၵႂႃႇၵႃႈတီႈတမၢၼ်ႇၵၢင်ႁၢဝ်ၸိူဝ်းၸဝ်ႈဝဵင်း ႀွႃႇတိရႃႉ၊ လႄႈဝႃႈ။ “ၼႆႉၸမ်ႉ၊ပဵၼ်ၵႂၢမ်းတြႃးဢၼ်လုၵ်ႉသေၵႃႈတီႈလုၵ်ႈၽြႃးပဵၼ်ၸဝ်ႈ၊ဢၼ်မၢၵ်ႇတႃၸဝ်ႈသွင်ႇႁိူဝ်ႈမိူၼ်ၸိူဝ်ႉၼင်ႇပဵဝ်ၽႆးလႄႈတိၼ်ၸဝ်ႈႁိူဝ်ႈမၢပ်ႈမိူၼ်တွင်းလိူင်ၼၼ်ႉမႃးဢေႃႈ။-
ၵဝ်ႁုတၢင်းၵမ်တၢင်းၵျၢင်ႉမႂ်းဢေႃႈ။ ၵဝ်ႁုတၢင်းႁၵ်ႉမႅတ်ႈတႃႇမႂ်း၊တၢင်းယုမ်ႇမၢတ်ႈမႂ်း၊တၢင်းႁဵတ်းမႂ်း၊ဢိၵ်ႇတင်းၸႂ်ဢၼ်ယိူၼ်ႉၶၢမ်ႇမႂ်းၼၼ်ႉယူႇဢေႃႈ။ ၵဝ်ႁုလွင်ႈဢၼ်မႂ်းၵမ်ၵျၢင်ႉတေႃႈလဵဝ်ၼႆႉယဵင်ႈၶႅၼ်းၼမ်သေတၢင်းဢၼ်မႂ်းၵမ်ၵျၢင်ႉမႃးမိူဝ်ႈဢွၼ်တၢင်းၼၼ်ႉယူႇဢေႃႈ။-
ၵူၺ်းၵႃႈ၊ၵဝ်မီးတီႈတၵ်းတၢင်ႇဢပျတ်ႈမႂ်းဢိတ်းၼိုင်ႈၸမ်ႉ၊မႂ်းၶၢမ်ႇဢဝ်မႄႈယိင်းဢၼ်မီးၸိုဝ်ႈဝႃႈ၊ ယေႇၸပေႇလႃႉ၊ ဢၼ်ႁွင်ႉႁဵၵ်ႈတူဝ်ၸဝ်ႈၵဝ်ႇဝႃႈ၊ပရေႃးၽႅတ်ႈ ၼၼ်ႉဢေႃႈ။ မၼ်းၼၼ်ႉသင်ႇသွၼ်လႄႈၸူဝ်းဢဝ်ႁႂ်ႈၵူၼ်းၵဝ်တင်းလၢႆၸွမ်းဢလူဝ်ႇၸႂ်ၵိလေႇသႃႇဢၼ်ဢမ်ႇတြႃး၊ဢိၵ်ႇတင်းႁႂ်ႈၵိၼ်တၢင်းၵိၼ်ဢၼ်သၢၵ်ႈလူႇၵႃႈတီႈၽၢႆႇၼႃႈႁုၼ်ႇႁၢင်ႈသၢင်းထုယဝ်ႉၼၼ်ႉဢေႃႈ။-
ၵဝ်ပၼ်ဢၶိင်ႇႁႂ်ႈမႄႈယိင်းၼၼ်ႉၶိုၼ်းၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်မၼ်းသေၵေႃႈမၼ်းယင်းဢမ်ႇၶႂ်ႈပႄႇပႅတ်ႈသေၸႂ်ၵိလေႇသႃႇတူဝ်ၸဝ်ႈၵဝ်ႇဢၼ်ဢမ်ႇတြႃးၼၼ်ႉဢေႃႈ။-
ပိူဝ်ႈၼႆလႄႈၵဝ်တၵ်းဢဝ်မႄႈယိင်းၼၼ်ႉထိမ်ႈပႅတ်ႈဝႆႉ၊ၵႃႈတီႈၵူႇၼွၼ်းတီႈဢၼ်မၼ်းဢိၵ်ႇတင်းၶဝ်ၸိူဝ်းဢၼ်ၽိတ်းပိူင်ႈၵႃႇမေႇသုႁူမ်ႈလူၺ်ႈၵၼ်တင်းမၼ်းၸိူဝ်းၼၼ်ႉႁႂ်ႈလႆႈၶၢမ်ႇတုၵ်ႉၶႃႉတၢင်းၽၢၼ်ဢၼ်လီၵူဝ်ႁႄၼႃႇၼၼ်ႉဢေႃႈ။ ပေႃးၶဝ်ယင်းဢမ်ႇၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်ၶိုၼ်းသေၵႃႈတီႈတၢင်းၽိတ်းဢၼ်ၶဝ်ႁဵတ်းလူၺ်ႈၵၼ်တင်းမႄႈယိင်းၼၼ်ႉၸိုင်၊ၵဝ်တၵ်းႁႂ်ႈတုၵ်ႉၶႃႉတၢင်းၽၢၼ်ၼၼ်ႉတူၵ်းႁွတ်ႈၵႃႈၼိူဝ်ၶဝ်တေႃႈလဵဝ်ၼႆႉဢေႃႈ။-
လုၵ်ႈလၢင်းမၼ်းတင်းလၢႆၵေႃႈ၊ၵဝ်တၵ်းဢဝ်တၢႆပႅတ်ႈဢေႃႈ။ ပေႃးႁဵတ်းၼၼ်ၸင်ႇၸိူဝ်းၸဝ်ႈတင်းသဵင်ႈတင်းလူင်တၵ်းႁုလွင်ႈဢၼ်ၵဝ်ပဵၼ်ၵေႃႉဢၼ်ႁုၸႅင်ႈတပ်းပွတ်ႇႁူဝ်ၸႂ်ၵူၼ်းၵူႈၵေႃႉၼၼ်ႉဢေႃႈ။ ၵဝ်တၵ်းတွပ်ႇတႅၼ်းပၼ်ၸွမ်းၵႃႈၼင်ႇဢၼ်တၢင်းၵမ်တၢင်းၵျၢင်ႉတူဝ်ၽႂ်တူဝ်မၼ်းႁဵတ်းမႃးၼၼ်ႉဢေႃႈ။
“ၵူၺ်းၵႃႈ၊သူၸိူဝ်းဢၼ်ယင်းၵိုတ်းယင်းၵျၢၼ်ႇယူႇၵႃႈၼႂ်းဝဵင်း ႀွႃႇတိရႃႉ၊ ၼႆႉ၊ယင်းဢမ်ႇၸပ်းဢမ်ႇၸွမ်းတၢင်းဢၼ်သွၼ်ၽိတ်းသွၼ်ပိူင်ႈလႄႈယင်းဢမ်ႇသွၼ်ဢဝ်ၵႂၢမ်းဢၼ်ပိူၼ်ႈႁွင်ႉဝႃႈ၊ ‘ၵႂၢမ်းဢၼ်လိုၵ်ႉဢၼ်လမ်ႇ ၸႃႇတၢၼ်ႇ၊ ’ လႄႈယူႇၼၼ်ႉၵဝ်တၵ်းဢမ်ႇဢဝ်ၼႃႈၵၢၼ်တၢင်ႇၸိူဝ်ႉတၢင်ႇမဵဝ်းတၢင်ႇသႂ်ႇၵႃႈၼိူဝ်သူဝႃႈၼႆ၊ၵဝ်ဝႃႈတီႈသူဢေႃႈ။-
သူဢွၼ်ၵၼ်ယိပ်းၵမ်ဢၼ်သူမီးယူႇဝႆႉၼၼ်ႉယူႇတေႃႇထိုင်ႁွတ်ႈၵဝ်မႃးၼၼ်ႉတႃႉ။-
တီႈၶဝ်ၸိူဝ်းဢၼ်ပႄႉၼႅင်ႇလႄႈသမ်ႉၵမ်ၵျၢင်ႉၸွမ်းၵႃႈၼင်ႇဢၼ်ၵဝ်မီးဢလူဝ်ႇတေႃႇထိုင်ႁွတ်ႈတီႈသုတ်းတီႈၵွႆၼၼ်ႉၸိုင်၊ၵဝ်တၵ်းပၼ်ဢႃႇၼႃႇဢၼ်မိူၼ်ၵၼ်တင်းၵႃႈဢၼ်ၵဝ်လႆႈႁပ်ႉဢဝ်သေၵႃႈတီႈပေႃႈၸဝ်ႈၵဝ်ၼၼ်ႉသေလႄႈ၊-
ၵဝ်တၵ်းပၼ်ဢႃႇၼႃႇဢၼ်လႆႈဢုပ်ႉပိူင်ႇၵႃႈၼိူဝ်ၸိူဝ်ႉၶိူဝ်းၵူၼ်းမဵဝ်းတင်းလၢႆလူၺ်ႈၵၼ်းႁွၵ်ႇလဵၵ်းလႄႈတၵ်းယႃႉၶဝ်ပႅတ်ႈမိူၼ်ၸိူဝ်ႉၼင်ႇဢၼ်ယႃႉမေႃႈလိၼ်တႅၵ်ႇယွႆႈၵႂႃႇၼၼ်ႉဢေႃႈ။-
လၢဝ်လႅင်းႁူဝ်မိူင်းသႂ်ၵေႃႈ၊ၵဝ်တၵ်းပၼ်တီႈၶဝ်ဢေႃႈ။
“ပိူဝ်ႈၼႆလႄႈ၊ပေႃးသူမီးႁူၸိုင်၊ထွမ်ႇဢဝ်ဢမိင်ႉဢၼ်ဝိၺိၺ်ႇၸဝ်ႈသင်ႇလၢတ်ႈၵႃႈတီႈၸိူဝ်းၸဝ်ႈတင်းလၢႆၼၼ်ႉတႃႉ။
“တႅမ်ႈၸိူဝ်ႉၼင်ႇၼႆသေလႄႈသင်ႇလၢတ်ႈၵႂႃႇၵႃႈတီႈတမၢၼ်ႇၵၢင်ႁၢဝ်ၸိူဝ်းၸဝ်ႈဝဵင်း သႃႇတိ၊ လႄႈဝႃႈ။ “ၼႆႉၸမ်ႉ၊ပဵၼ်ၵႂၢမ်းဢၼ်မႃးသေၵႃႈတီႈ၊ၸဝ်ႈဢၼ်မီးဝိၺိၺ်ႇၽြႃးပဵၼ်ၸဝ်ႈၸဵတ်းပႃး၊ဢိၵ်ႇတင်းမီးလၢဝ်ၸဵတ်းလုၵ်ႈၼၼ်ႉဢေႃႈ။ ၵဝ်ႁုတၢင်းဢၼ်မႂ်းၵမ်ၵျၢင်ႉၼၼ်ႉယူႇ၊ပိၵ်ႉသမ်ႉမႂ်းပဵၼ်ၵေႃႉဢၼ်တၢႆယဝ်ႉသေၵေႃႈ၊ၵဝ်ႁုမႂ်းယင်းမီးၸိုဝ်ႈမီးသဵင်လႄႈဢသၢၵ်ႈလိပ်းယူႇၼၼ်ႉဢေႃႈ။-
တူင်ႉတိုၼ်ႇလႄႈႁႂ်ႈဢၼ်ယင်းလိူဝ်ယူႇၼၼ်ႉမၼ်ႈၶိူင်ႇၸူဝ်ႈဢၼ်ယင်းဢမ်ႇပႆႇတၢႆၵႂႃႇလုမ်းလုမ်းၼၼ်ႉတႃႉ။ လွင်ႈမၼ်းၸမ်ႉ၊ၵဝ်ထူပ်းလွင်ႈဢၼ်မႂ်းၵမ်ၵျၢင်ႉယူႇၼႆႉ၊ဢမ်ႇပႆႇၸေးၸုမ်ႇၵႃႈတီႈၽၢႆႇၼႃႈၽြႃးပဵၼ်ၸဝ်ႈဢေႃႈ။-
ပိူဝ်ႈၼႆလႄႈၶုၵ်းၸႂ်လႆႈၶႆႈၸႂ်ထူပ်းလွင်ႈတၢင်းဢၼ်မႂ်းလႆႈသွၼ်ဢဝ်၊ဢိၵ်ႇတင်းလွင်ႈတၢင်းဢၼ်မႂ်းလႆႈထွမ်ႇဢဝ်ငိၼ်းဢဝ်ၸိူဝ်းၼၼ်ႉသေလႄႈပႂ်ႉၵမ်ပႂ်ႉၸွမ်းတႃႉ။ ၶုၵ်းၸႂ်လႆႈမႆႈၸႂ်ဢပျတ်ႈလႄႈၶိုၼ်းပိၼ်ႇၸႂ်မႂ်းတႃႉ။ ပေႃးမႂ်းယင်းဢမ်ႇမီးၸႂ်ဢၼ်တူင်ႉတိုၼ်ႇၸိုင်၊ၵဝ်တၵ်းမႃးတီႈမႂ်းၸိူဝ်ႉၼင်ႇၽူႈလၵ်ႉလႄႈၶိင်ႇယၢမ်းဢၼ်ၵဝ်တၵ်းမႃးၼၼ်ႉၵေႃႈ၊မႂ်းတၵ်းဢမ်ႇႁုဢေႃႈ။-
ၵူၺ်းၵႃႈ၊ၵူၼ်းမႂ်းၼႂ်းဝဵင်း သႃႇတိ၊ ၼႆႉ၊ဢိတ်းၼိုင်ႈၵူၺ်း၊ယင်းဢမ်ႇႁႂ်ႈၶူဝ်းၼုင်ႈတူဝ်ၸဝ်ႈၵဝ်ႇၵူဝ်ႈၵိူၵ်ႇလႄႈယူႇဢေႃႈ။ ၶဝ်ၼၼ်ႉ၊တၵ်းဢွၼ်ၵၼ်ၼုင်ႈၶူဝ်းၽိူၵ်ႇၶူဝ်းၶၢဝ်ယူႇသေလႄႈၵႂႃႇမႃးလူၺ်ႈၵၼ်တင်းၵဝ်၊ၵွပ်ႈပိူဝ်ႈၶဝ်ပဵၼ်ၵေႃႉဢၼ်ၵိုင်ႇထိူၵ်ႈၼၼ်ႉဢေႃႈ။-
ၶဝ်ၸိူဝ်းဢၼ်ပႄႉၼႅင်ႇၼၼ်ႉ၊တၵ်းလႆႈၼုင်ႈၶူဝ်းၽိူၵ်ႇၶူဝ်းၶၢဝ်ၸိူဝ်ႉၼင်ႇၼၼ်လႄႈၵဝ်တၵ်းဢမ်ႇမွတ်ႇပႅတ်ႈၸိုဝ်ႈသဵင်ၶဝ်၊ဢွၵ်ႇသေၵႃႈၼႂ်းၽိုၼ်လိၵ်ႈဢသၢၵ်ႈၼၼ်ႉလႃးလႃး။ လွင်ႈဢၼ်ၶဝ်ၸၢပ်ႈသႅင်ႇၵၼ်တင်းၵဝ်ၼၼ်ႉၸိုင်၊ၵဝ်တၵ်းၽုၺ်ႇၼႄထၢင်ႇထၢင်ႇသႃးသႃးၵႃႈတီႈၽၢႆႇၼႃႈပေႃႈၸဝ်ႈၵဝ်၊ဢိၵ်ႇတင်းၵႃႈတီႈၽၢႆႇၼႃႈတမၢၼ်ႇၵၢင်ႁၢဝ်မၼ်းၸဝ်ႈတင်းလၢႆဢေႃႈ။
“ပိူဝ်ႈၼႆလႄႈပေႃးသူမီးႁူၸိုင်၊ထွမ်ႇဢဝ်ဢမိင်ႉဢၼ်ဝိၺိၺ်ႇၸဝ်ႈသင်ႇလၢတ်ႈၵႃႈတီႈၸိူဝ်းၸဝ်ႈတင်းလၢႆၼၼ်ႉတႃႉ။
“တႅမ်ႈၸိူဝ်ႉၼင်ႇၼႆသေလႄႈသင်ႇလၢတ်ႈၵႂႃႇၵႃႈတီႈတမၢၼ်ႇၵၢင်ႁၢဝ်ၸိူဝ်းၸဝ်ႈဝဵင်း ၽိလတေးလၽိ၊ လႄႈဝႃႈ။ “ၼႆႉၸမ်ႉ၊ပဵၼ်ၵႂၢမ်းတြႃးဢၼ်မႃးသေၵႃႈတီႈၸဝ်ႈဢၼ်မူတ်းၸၢင်ႇ၊ၸဝ်ႈဢၼ်မၢၼ်ႇမႅၼ်ႈၸိုဝ်ႈၸႂ်ႈၼၼ်ႉဢေႃႈ။ မၼ်းၸဝ်ႈၼၼ်ႉ၊မီးၵၢၵ်ႇသေႃးၶုၼ် တႃႇဝိတ်ႈ၊ လႄႈမိူဝ်ႈဢၼ်မၼ်းၸဝ်ႈၽုၺ်ႇၽၵ်းတူၼၼ်ႉ၊ၽူႈလႂ်သေၵေႃႉသေၵူၼ်းဢမ်ႇဢိုတ်းႁပ်းလႆႈ။ မိူဝ်ႈဢၼ်မၼ်းၸဝ်ႈဢိုတ်းႁပ်းၽၵ်းတူၼၼ်ႉၽူႈလႂ်သေၵေႃႉသေၵူၼ်းဢမ်ႇၸၢင်ႈၽုၺ်ႇလႆႈဢေႃႈ။-
ၵဝ်ႁုတၢင်းၵမ်တၢင်းၵျၢင်ႉမႂ်းယူႇဢေႃႈ။ ၵဝ်ႁုလွင်ႈဢၼ်ပိၵ်ႉသမ်ႉ၊မႂ်းမီးႁႅင်းဢိတ်းဢွၼ်ႇၼိုင်ႈသေၵေႃႈမႂ်းပႂ်ႉၵမ်ပႂ်ႉၸွမ်းၼုၵ်ႈၵပၢတ်ႈၵဝ်လႄႈပႂ်ႉသဵတ်ႈၸႃႇတေႃႇၵဝ်မႃးယဝ်ႉၼၼ်ႉဢေႃႈ။ ၵဝ်ၽုၺ်ႇပၼ်ၽၵ်းတူဢၼ်ၽူႈလႂ်ဢမ်ႇဢိုတ်းႁပ်းလႆႈၼၼ်ႉဝႆႉၵႃႈတီႈၽၢႆႇၼႃႈမႂ်းယဝ်ႉဢေႃႈ။-
တူၺ်းလူး။ တီႈမူႇၸုမ်းဢၼ်ၸၢပ်ႈသႅင်ႇၵၼ်တင်းၸႃႇတၢၼ်ႇမႃႇၼၢတ်ႈ၊ဢၼ်ယင်းဢမ်ႇၸႂ်ႈၵူၼ်းမဵဝ်း ၵျူး၊ လႄႈပႅတ်ႉလႅၼ်ႁွင်ႉႁဵၵ်ႈတူဝ်ၸဝ်ႈၵဝ်ႇဝႃႈ၊ၵူၼ်းမဵဝ်း ၵျူး၊ ၼၼ်ႉၸမ်ႉ၊ၵဝ်တၵ်းႁႂ်ႈၶဝ်မႃးၶုပ်ႉမူပ်ႇၵႃႈတီႈႁိမ်းတိၼ်မႂ်းလႄႈၶဝ်တင်းသဵင်ႈတင်းမူတ်းတေႁုလွင်ႈဢၼ်ၵဝ်ႁၵ်ႉမႂ်းၼၼ်ႉဢေႃႈ။-
ဢၼ်မႂ်းပႂ်ႉၵမ်ပႂ်ႉၸွမ်းဢမိင်ႉၵဝ်၊ႁႂ်ႈလႆႈယိူၼ်ႉၶၢမ်ႇၼၼ်ႉၸိုင်၊ၵဝ်ၵေႃႈတၵ်းပႂ်ႉလူပႂ်ႉတူၺ်းမႂ်း၊ႁႂ်ႈလႆႈယူႇလူင်ႉလီလွတ်ႈလီၼႂ်းၶိင်ႇဢၼ်ၽေးတုၵ်ႉၶႃႉဢၼ်တၵ်းတူၵ်းႁွတ်ႈမႃးၵႃႈၼိူဝ်လိၼ်မိူင်းႁႂ်ႈလႆႈၸႅတ်ႈတူၺ်းၸၢမ်းတူၺ်းၵူၼ်းဝူၺ်ႇၼေႇယႃႉသတ်ႉတဝႃႇတင်းသဵင်ႈတင်းလူင်ၼၼ်ႉဢေႃႈ။-
ၵဝ်တၵ်းၸဵဝ်းမႃးဢေႃႈ။ ၼင်ႇႁိုဝ်ၽူႈလႂ်တၵ်းဢမ်ႇႁိမ်ဢဝ်လႆႈသူးတၢင်းဢၼ်ပႄႉၼႅင်ႇမႂ်းၼၼ်ႉၵႂႃႇၸိုင်၊ယိပ်းၵမ်ဝႆႉၵႃႈဢၼ်မႂ်းလႆႈယဝ်ႉၼၼ်ႉလီလီတႃႉ၊-
ၵေႃႉဢၼ်ပႄႉၼႅင်ႇၼၼ်ႉ၊ၵဝ်တၵ်းႁႂ်ႈမၼ်းပဵၼ်သဝ်ၵႃႈၼႂ်းၵျွင်းပိၵ်ႈမၢၼ်ႇၽြႃးပဵၼ်ၸဝ်ႈၵဝ်ၼၼ်ႉလႄႈၵမ်းလိုၼ်းမၼ်းတေဢမ်ႇလႆႈၶၢႆႉဢွၵ်ႇၵႂႃႇၵႃႈၼွၵ်ႈ။ ၵႃႈၼိူဝ်မၼ်းၼၼ်ႉ၊ၵဝ်တၵ်းတႅမ်ႈသႂ်ႇၸိုဝ်ႈသဵင်ၽြႃးပဵၼ်ၸဝ်ႈၵဝ်၊ဢိၵ်ႇတင်းၸိုဝ်ႈသဵင်ဝဵင်းၽြႃးပဵၼ်ၸဝ်ႈၵဝ်ဢၼ်ဝႃႈ၊ဝဵင်း ယေႇရုသလႅမ်ႇ၊ မႂ်ႇဢၼ်ပဵၼ်မႃးၵႃႈတီႈၽြႃးပဵၼ်ၸဝ်ႈၵဝ်လႄႈလုၵ်ႉၵႃႈၼိူဝ်ၵၢင်ႁၢဝ်လူင်းမႃးၼၼ်ႉ၊ဢိၵ်ႇတင်းၸိုဝ်ႈသဵင်မႂ်ႇၵဝ်ၼၼ်ႉဢေႃႈ။
“ပိူဝ်ႈၼႆလႄႈ၊ပေႃးမႂ်းမီးႁူၸိုင်၊ထွမ်ႇဢဝ်ဢမိင်ႉဢၼ်ဝိၺိၺ်ႇၸဝ်ႈမီးၵႃႈၼိူဝ်ၸိူဝ်းၸဝ်ႈတင်းလၢႆၼၼ်ႉတႃႉ။
“တႅမ်ႈၸိူဝ်ႉၼင်ႇၼႆသေလႄႈသင်ႇလၢတ်ႈၵႂႃႇၵႃႈတီႈတမၢၼ်ႇၵၢင်ႁၢဝ်ၸိူဝ်းၸဝ်ႈ၊ဝဵင်း လေႃးတိၵိ၊ လႄႈဝႃႈ။ “ၼႆႉၸမ်ႉ၊ပဵၼ်ၵႂၢမ်းတြႃးဢၼ်မႃးသေၵႃႈတီႈၸဝ်ႈဢႃမိၼ်ႈ၊ၸဝ်ႈဢၼ်ၶၢမ်ႇသၢၵ်ႈသေႇဢၼ်မီးသဵတ်ႈၸႃႇလႄႈမၢၼ်ႇမႅၼ်ႈ၊ၸဝ်ႈဢၼ်ပဵၼ်ငဝ်ႈႁူဝ်ပိုင်းဝူၺ်ႇၼေႇယႃႉသတ်ႉတဝႃႇတင်းလၢႆ၊ဢၼ်ၽြႃးပဵၼ်ၸဝ်ႈၽၢၼ်ႇသၢင်းၼၼ်ႉဢေႃႈ။-
ၵဝ်ႁုတၢင်းၵမ်တၢင်းၵျၢင်ႉမႂ်းယူႇလႄႈမႂ်းၼႆႉပဵၼ်ဢၼ်ၵတ်းၵေႃႈဢမ်ႇၸႂ်ႈ၊ပဵၼ်ဢၼ်မႆႈၵေႃႈဢမ်ႇၸႂ်ႈၼၼ်ႉဢေႃႈ။ ၵဝ်ၶႂ်ႈႁႂ်ႈမႂ်းပဵၼ်ဢၼ်ၵတ်းဢမ်ႇၼၼ်ပဵၼ်ဢၼ်မႆႈဢေႃႈ။-
ၵူၺ်းၵႃႈ၊ပိူဝ်ႈဢၼ်မႂ်းၼႆႉ၊ၵတ်းၵေႃႈဢမ်ႇၸႂ်ႈ၊မႆႈၵေႃႈဢမ်ႇၸႂ်ႈ၊ပဵၼ်ဢၼ်ဢုၼ်ႇဢုၼ်ႇဝႆႉၵူၺ်းလႄႈၵဝ်တၵ်းထူမ်ႇမႂ်းပႅတ်ႈဢွၵ်ႇသေပၢၵ်ႇၵဝ်ယဝ်ႉ။-
မႂ်းလၢတ်ႈဝႃႈ၊ ‘ၵဝ်ၼႆႉမၢၵ်ႈမီးဢေႃႈ။ မီးၽၼ်ႇတႃႇဢုၵ်ႉၸႃႇၼမ်ၼႃႇဢေႃႈ။ ၵဝ်ဢမ်ႇလူဝ်ႇၵႃႈသင်ထႅင်ႈယဝ်ႉ၊’ ဝႃႈၼင်ႇၼႆယူႇလႄႈမႂ်းယင်းဢမ်ႇႁုလွင်ႈဢၼ်တူဝ်ၸဝ်ႈၵဝ်ႇယၢပ်ႇၸႂ်ၶၢၼ်ၸႂ်ထၢၼ်ႇႁိုဝ်၊ပဵၼ်ဢၼ်လီဢဵတ်းလူၵႃႈႁိုဝ်ၼၼ်ႉ။ မႂ်းယင်းယၢၵ်ႈၽၢၼ်ၼႃႇလႄႈဢမ်ႇမီးၶူဝ်းမီးလဵင်းၵူၺ်းဢမ်ႇၵႃးယင်းတႃမွတ်ႇဝႆႉဢေႃႈ။-
ပိူဝ်ႈၼႆလႄႈၵဝ်ပၼ်တၢင်းၵျၢမ်ႇတၢင်းပွင်တီႈမႂ်း၊ႁႂ်ႈမႂ်းသိုဝ်ႉၶမ်းတီႈၵဝ်၊သိုဝ်ႉၶမ်းလွတ်ႈငၢၼ်ႇဢၼ်ၶဝ်ႈၽႆးယဝ်ႉၼၼ်ႉ၊ၼင်ႇႁိုဝ်မႂ်းတၵ်းမၢၵ်ႈမီးလီပဵၼ်တႃႉ။ ၶူဝ်းၽိူၵ်ႇၶူဝ်းၶၢဝ်ၵေႃႈသိုဝ်ႉလႄႈၼုင်ႈမႆႁူမ်ႇတူဝ်ပူၺ်မႂ်း၊ပုၼ်ႈတၵ်းၵၢင်းလွတ်ႈတၢင်းဢၼ်ဢၢႆပိူၼ်ႈၼၼ်ႉတႃႉ။ ယႃႈယႃၼမ်ႉမၼ်းၵမ်ႈၽွင်ႈၵေႃႈသိုဝ်ႉလႄႈယွတ်ႇသႂ်ႇမၢၵ်ႇတႃမႂ်းႁႂ်ႈလႆႈႁၼ်လီတႃႉ။-
ၵဝ်ၸၢင်ႈပၼ်တၢမ်ႇတီႈၶဝ်ၸိူဝ်းဢၼ်ၵဝ်ႁၵ်ႉၵႃႈမီးတင်းသဵင်ႈတင်းမူတ်းၼၼ်ႉလႄႈသင်ႇသွၼ်ပၼ်ၶဝ်ဢေႃႈ။ ပိူဝ်ႈၼႆလႄႈတိုၵ်းယူင်းတူဝ်ၸဝ်ႈၵဝ်ႇသေယဝ်ႉ၊ၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်တႃႉ။-
တူၺ်းလူး။ ၵဝ်ၸုၵ်းၵႃႈတီႈၽၢႆႇၼႃႈၽၵ်းတူလႄႈတွႆႇယူႇဢေႃႈ။ ၵေႃႉဢၼ်ငိၼ်းသဵင်ၵဝ်လႄႈၽုၺ်ႇၽၵ်းတူပၼ်ၼၼ်ႉ၊ၵဝ်တၵ်းၶဝ်ႈၸူးၵႃႈၼႂ်းႁိူၼ်းမၼ်းသေၵိၼ်လူၺ်ႈၵၼ်တင်းမၼ်းဢေႃႈ။ မၼ်းၵေႃႈတၵ်းလႆႈၵိၼ်လူၺ်ႈၵၼ်တင်းၵဝ်ဢေႃႈ။-
တီႈၶဝ်ၸိူဝ်းဢၼ်ပႄႉၼႅင်ႇၼၼ်ႉ၊ၵဝ်တၵ်းပၼ်ဢၶႂၢင်ႉဢၼ်လႆႈၼင်ႈႁိမ်းၶၢင်ႈၵဝ်ၵႃႈၼိူဝ်ပလၢင်ႇၵဝ်မိူၼ်ၸိူဝ်ႉၼင်ႇဢၼ်ၵဝ်ပႄႉၼႅင်ႇလႄႈမိူဝ်ႈလဵဝ်ၼႆႉ၊ၼင်ႈယူႇႁိမ်းပေႃႈၸဝ်ႈၵဝ်ၵႃႈၼိူဝ်ပလၢင်ႇမၼ်းၸဝ်ႈၼၼ်ႉဢေႃႈ။
“ပိူဝ်ႈၼႆလႄႈပေႃးသူမီးႁူၸိုင်၊ထွမ်ႇဢဝ်ဢမိင်ႉဢၼ်ဝိၺိၺ်ႇၸဝ်ႈသင်ႇလၢတ်ႈၵႃႈတီႈၸိူဝ်းၸဝ်ႈတင်းလၢႆၼၼ်ႉတႃႉ၊” ဝႃႈၼင်ႇၼႆဢေႃႈ။
ဝၢႆးသေၼၼ်ႉ၊ၵဝ်လႆႈႁၼ်ၼိမိၵ်ႈတၢင်ႇဢၼ်ထႅင်ႈလႄႈလႆႈႁၼ်ၽၵ်းတူၽုၺ်ႇဝႆႉၵႃႈၼိူဝ်ၵၢင်ႁၢဝ်ဢေႃႈ။ သဵင်ဢၼ်ၵဝ်လႆႈငိၼ်းဢွၼ်တၢင်းၼၼ်ႉလင်မေႃးမိူၼ်ၸိူဝ်ႉၼင်ႇသဵင်ၼႄးၶရႃႇလႄႈလၢတ်ႈတေႃႇၵဝ်ၶႃႈလႄႈဝႃႈ။ “ၶိုၼ်ႈမႃးၵႃႈတီႈၼႆႈတႃႉ။ ၵဝ်တၵ်းၼႄပျႃးလွင်ႈဢၼ်တၵ်းပဵၼ်မႃးၵမ်းလိုၼ်းၼၼ်ႉတီႈမႂ်းဢေႃႈ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉၵမ်းလဵဝ်၊ဝိၺိၺ်ႇၸဝ်ႈဢုပ်ႉပိူင်ႇၵဝ်ဝႆႉသေဢေႃႈ။ ၵႃႈၼႂ်းမိူင်းၵၢင်ႁၢဝ်ၼၼ်ႉ မီးပလၢင်ႇဢၼ်ၼိုင်ႈလႄႈမီးၸဝ်ႈပႃးၼိုင်ႈၼင်ႈၵႃႈၼိူဝ်ပလၢင်ႇၼၼ်ႉယူႇဢေႃႈ။-
ၸဝ်ႈဢၼ်ၼင်ႈယူႇၼၼ်ႉႁၢင်ႈၽၢင်ငဝ်းမၼ်းၸဝ်ႈမိူၼ်ၸိူဝ်ႉၼင်ႇသႅင်ဢၼ်မီးၵႃႈ၊သႅင်ၼၵႃးသွႆႈတင်းသႅင်ပတ်ႈတမျႃးသေယဝ်ႉ၊ႁူင်းႁႆးဢၼ်ငဝ်းမၼ်းမိူၼ်ၸိူဝ်ႉၼင်ႇသႅင်မျႃႉၼၼ်ႉၵေႃႈလွမ်ႉႁွပ်ႈပလၢင်ႇၸဝ်ႈဝႆႉဢေႃႈ။-
သမ်ႉမီးပလၢင်ႇသၢဝ်းသီႇဢၼ်လွမ်ႉႁွပ်ႈပလၢင်ႇၸဝ်ႈၼၼ်ႉလႄႈၵႃႈၼိူဝ်ပလၢင်ႇၸိူဝ်းၼၼ်ႉ၊ၵူၼ်းဢၼ်ဢသၢၵ်ႈယႂ်ႇသၢဝ်းသီႇၵေႃႉၼုင်ႈၶူဝ်းၽိူၵ်ႇၶူဝ်းၶၢဝ်ယူႇ၊တိုဝ်းသရၽူႇၶမ်းသေလႄႈၼင်ႈဝႆႉယူႇဢေႃႈ။-
မီးၽႃႉမႅပ်ႈၽႃႉႁွင်ႉ၊ဢိၵ်ႇတင်းမီးသဵင်ဢၼ်လင်မေႃးၵေႃႈလုၵ်ႉသေၵႃႈတီႈပလၢင်ႇၸဝ်ႈပေႃႇပဵၼ်မႃးဢေႃႈ။ ၵႃႈတီႈၽၢႆႇၼႃႈပလၢင်ႇၸဝ်ႈၼၼ်ႉမီးၵွၵ်းၽႆးဢၼ်တႆႈဝႆႉၸဵတ်းလုၵ်ႈဢၼ်ဝႃႈ၊ဝိၺိၺ်ႇၽြႃးပဵၼ်ၸဝ်ႈၸဵတ်းပႃးၼၼ်ႉဢေႃႈ။-
ၵႃႈတီႈၽၢႆႇၼႃႈပလၢင်ႇၸဝ်ႈၼၼ်ႉၵေႃႈမီးၶိူင်ႈပိူင်ဢၼ်မိူၼ်ပၢင်ႇလၢႆႇမၢၼ်ႇပၢင်ႇလၢႆႇၵႅဝ်ႈဢၼ်ႁိူဝ်ႈလႅင်းဝႆႉထၢၼ်ႈပေႃးမိူၼ်ၸိူဝ်ႉၼင်ႇသႅင်ၸိင်ႇၼၼ်ႉဢေႃႈ။ လွမ်ႉႁွပ်ႈသီႇၸဵင်ႇပလၢင်ႇၸဝ်ႈၼၼ်ႉ၊မီးတူဝ်သတ်ႉတဝႃႇဢၼ်ဢသၢၵ်ႈလိပ်းသီႇတူဝ်၊ယေႈတူဝ်ယူႇယေႈၸဵင်ႇလႄႈၵႃႈတီႈတူဝ်ၶဝ်ၼၼ်ႉမီးမၢၵ်ႇတႃၸွတ်ႇၵႂႃႇတင်းတူဝ်တင်းၶိင်းၸဵမ်ၽၢႆႇၼႃႈၽၢႆႇလင်ဢေႃႈ။-
သတ်ႉတဝႃႇတူဝ်တီႈၼိုင်ႈၼၼ်ႉ၊မိူၼ်ၸိူဝ်ႉၼင်ႇသၢင်ႇသီႈဢေႃႈ။ တူဝ်တီႈသွင်ၼၼ်ႉမိူၼ်ၸိူဝ်ႉၼင်ႇဝူဝ်းဢေႃႈ။ တူဝ်တီႈသၢမ်ၼၼ်ႉ မီးၼႃႈမိူၼ်ၸိူဝ်ႉၼင်ႇၼႃႈၵူၼ်းဢေႃႈ။ တူဝ်တီႈသီႇၼၼ်ႉမိူၼ်ၸိူဝ်ႉၼင်ႇႁၢင်ႈၼူၵ်ႉၶၢင်ႇလေႃႉ ဢၼ်မိၼ်ယူႇၼၼ်ႉဢေႃႈ။-
တူဝ်သတ်ႉတဝႃႇသီႇတူဝ်ၼၼ်ႉ၊ယေႈတူဝ်မီးပိၵ်ႇႁူၵ်းဢၼ်လႄႈၵႃႈတီႈပိၵ်ႇၸိူဝ်းၼၼ်ႉမီးမၢၵ်ႇတႃၸွတ်ႇတူဝ်ႈၵႂႃႇၸဵမ်တၢင်းၼွၵ်ႈတၢင်းၼႂ်းဢေႃႈ။ ၶဝ်ၼၼ်ႉ၊ဝၼ်းဝၼ်းၶိုၼ်းၶိုၼ်းႁဵတ်းၵႂၢမ်းယူႇ၊ယင်းဢမ်ႇထၢတ်ႇဢမ်ႇယဵၼ်လႄႈဝႃႈ၊ “ၸဝ်ႈထႃႇဝရႃႉၽြႃးပဵၼ်ၸဝ်ႈဢၼ်မီးမႃးၼႂ်းၸူဝ်ႈဢတိၵ်ႈၵႃႇလႃႉ၊ဢၼ်မီးယူႇၼႂ်းၸူဝ်ႈပိတ်ႈၸုပၢၼ်ႇ၊ ဢၼ်တၵ်းမီးယူႇဢၼႃႇၵၢတ်ႈၵႃႇလႃႉၵမ်းလိုၼ်းသေႇသေႇလႄႈ ပျေႉၸုမ်ႇဝႆႉတင်းဢၼၼ်ႇတႃႉတၼ်းၶူဝ်းလႄႈမူတ်းၸၢင်ႇတီႈၶႃႈဢေႃႈ။ မူတ်းၸၢင်ႇတီႈၶႃႈဢေႃႈ။ မူတ်းၸၢင်ႇတီႈၶႃႈဢေႃႈ၊” ဝႃႈၼင်ႇၼႆယူႇဢေႃႈ။
တူဝ်သတ်ႉတဝႃႇသီႇတူဝ်ၼၼ်ႉႁဵတ်းၵႂၢမ်းယွင်ႈယေႃးမုၼ်ၵုင်ႇသရေႇၸဝ်ႈ၊ဢိၵ်ႇတင်းယွင်ႈယေႃးတၢင်ႇၵျေးၸူးၸဝ်ႈဢၼ်ၼင်ႈယူႇၵႃႈၼိူဝ်ပလၢင်ႇၸဝ်ႈလႄႈဢသၢၵ်ႈလိပ်းယူႇၵူႈၵၢပ်ႈၵမ်ႇၽႃႇသိုပ်ႇသိုပ်ႇတၢမ်တၢမ်ၼၼ်ႉဢေႃႈ။ ၼႂ်းမိူဝ်ႈဢၼ်ၶဝ်ႁဵတ်းၵႂၢမ်းယူႇၼၼ်ႉၸိုင်၊-
ၵူၼ်းဢၼ်ဢသၢၵ်ႈယႂ်ႇသၢဝ်းသီႇၵေႃႉၼၼ်ႉ၊ၶုပ်ႉမူပ်ႇၵႃႈတီႈၽၢႆႇၼႃႈၸဝ်ႈဢၼ်ၼင်ႈယူႇၵႃႈၼိူဝ်ပလၢင်ႇၸဝ်ႈၼၼ်ႉလႄႈဝႆႈသႃၵူဝ်းၵႂၢႆႇမၼ်းၸဝ်ႈဢၼ်ဢသၢၵ်ႈလိပ်းယူႇၵူႈၵၢပ်ႈၵမ်ႇၽႃႇသိုပ်ႇသိုပ်ႇတၢမ်တၢမ်ၼၼ်ႉယူႇသေယဝ်ႉ၊ပူတ်းသရၽူႇတူဝ်ၸဝ်ႈၵဝ်ႇတမ်းဝၢင်းၵႃႈတီႈၽၢႆႇၼႃႈပလၢင်ႇၸဝ်ႈယူႇသေလႄႈႁဵတ်းၵႂၢမ်းဝႃႈ၊
“ၽြႃးပဵၼ်ၸဝ်ႈႁဝ်းၶႃႈထႃႇဝရႃႉၽြႃးတီႈၶႃႈ။ ပိူဝ်ႈဢၼ်ၸဝ်ႈႁဝ်းၽၢၼ်ႇသၢင်းႁဵတ်းပဵၼ်ၶိူင်ႈပိူင်ၵႃႈမီးတင်းသဵင်ႈတင်းလူင်ယဝ်ႉလႄႈ ၶိူင်ႈပိူင်ၸိူဝ်းၼႆႉလႆႈပဵၼ်ယူႇ၊လႆႈဢသၢၵ်ႈလိပ်းယူႇ၊ ၸွမ်းၼင်ႇဢလူဝ်ႇၸဝ်ႈႁဝ်းယဝ်ႉၼၼ်ႉၸိုင်၊ၸဝ်ႈႁဝ်းထိူၵ်ႈၸၢမ်ႇၸႃးမုၼ်သရေႇ၊ဢိၵ်ႇတင်းတၼ်းၶူဝ်းၸဝ်ႈတီႈၶႃႈဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၵဝ်လႆႈႁၼ်ၵႃႈၼႂ်းမိုဝ်းၶွၼ်ၶႂႃၸဝ်ႈဢၼ်ၼင်ႈယူႇၵႃႈၼိူဝ်ပလၢင်ႇၸဝ်ႈၼၼ်ႉမီးၵဵၼ်လိၵ်ႈဢၼ်ဢဝ်တူဝ်လိၵ်ႈတႅမ်ႈသႂ်ႇဝႆႉ၊ၸဵမ်ၽၢႆႇတၢင်းၼႂ်းၽၢႆႇတၢင်းၼွၵ်ႈသေလႄႈ၊ဢဝ်တၼ်းသိၵ်ႈတွၵ်ႇဝႆႉၸဵတ်းၵမ်းၼၼ်ႉ ဢေႃႈ။-
သမ်ႉလႆႈႁၼ်တမၢၼ်ႇၵၢင်ႁၢဝ်ဢၼ်ႁႅင်းယႂ်ႇၼႃႇပႃးၼိုင်ႈ၊ပၢဝ်ႇသေႃႇတင်းသဵင်ဢၼ်ယႂ်ႇၼႃႇလႄႈဝႃႈ၊ “ၽူႈလႂ်ၵိုင်ႇထိူၵ်ႈၵွၵ်းပႅတ်ႈတၼ်းသိၵ်ႈမၼ်းၸိူဝ်းၼၼ်ႉ၊ႁႂ်ႈလႆႈၽုၺ်ႇၵဵၼ်လိၵ်ႈၼၼ်ႉ၊” ဝႃႈၼင်ႇၼႆဢေႃႈ။-
ၵႃႈၼိူဝ်ၵၢင်ႁၢဝ်လႄႈသင်၊ၵႃႈၼိူဝ်လိၼ်မိူင်းၼႆႉလႄႈသင်၊ၵႃႈတႂ်ႈလိၼ်မိူင်းလႄႈသင်၊ဢမ်ႇမီးၽူႈလႂ်တၢတ်ႈၼိူင်ႇတႃႇတေၽုၺ်ႇၵဵၼ်လိၵ်ႈၼၼ်ႉသေလႄႈလူတူၺ်းၵႃႈၼႂ်းမၼ်းလႆႈ။-
ပိူဝ်ႈဢၼ်ၵဝ်ႁုဝႃႈ၊ဢမ်ႇမီးၵေႃႉဢၼ်ထိူၵ်ႈၽုၺ်ႇၵဵၼ်လိၵ်ႈၼၼ်ႉသေလႄႈလူတူၺ်းၵႃႈၼႂ်းမၼ်းလႆႈသေၵေႃႉသေၵူၼ်းၼၼ်ႉၸိုင်၊ၵဝ်ႁွင်ႉႁႆႈႁႅင်းၼႃႇလူင်လၢင်ဢေႃႈ။-
မိူဝ်ႈၼၼ်ႉ၊ၵႃႈၼႂ်းၵူၼ်းဢၼ်ဢသၢၵ်ႈယႂ်ႇၸိူဝ်းၼၼ်ႉၵေႃႉၼိုင်ႈ၊လၢတ်ႈတီႈၵဝ်လႄႈဝႃႈ၊ “ယႃႇပေႁွင်ႉႁႆႈယဝ်ႉ။ တူၺ်းလူး။ သၢင်ႇသီႈဢၼ်ပဵၼ်ၼႂ်းၸိူဝ်ႉၶိူဝ်း ယုတႃႉ၊ ဢၼ်ဝႃႈ၊ၸိူဝ်ႉၶိူဝ်းၶုၼ် တႃႇဝိတ်ႈ၊ ၼၼ်ႉ၊ပႄႉၼႅင်ႇႁႂ်ႈလႆႈယႃႉပႅတ်ႈတၼ်းသိၵ်ႈၸဵတ်းၵမ်းၼၼ်ႉ သေလႄႈၽုၺ်ႇၵဵၼ်လိၵ်ႈၼၼ်ႉလႆႈယဝ်ႉ၊” ဝႃႈၼင်ႇၼႆဢေႃႈ။
ၵမ်းၼၼ်ႉ၊ၵဝ်လႆႈႁၼ်သူဝ်းဢွၼ်ႇၸဝ်ႈတူဝ်ၼိုင်ႈ၊ၸုၵ်းယူႇၵႃႈၼႂ်းၶိုင်ႈၵၢင်ပလၢင်ႇၸဝ်ႈၼၼ်ႉလႄႈတူဝ်သတ်ႉတဝႃႇသီႇတူဝ်တင်းၵူၼ်းဢၼ်ဢသၢၵ်ႈယႂ်ႇၸိူဝ်းၼၼ်ႉလွမ်ႉႁွပ်ႈမၼ်းဝႆႉဢေႃႈ။ သူဝ်းဢွၼ်ႇၸဝ်ႈၼၼ်ႉပေႃႇမႃးၸိူဝ်ႉၼင်ႇႁၢင်ႈလႆႈၶၢမ်ႇတၢင်းဢၼ်ဢဝ်တၢႆယဝ်ႉသေလႄႈမီးၶဝ်ၸဵတ်းလႅမ်ႈ၊ဢိၵ်ႇတင်းမၢၵ်ႇတႃၸဵတ်းႁူၺ်ႇဢၼ်ဝႃႈ၊ဝိၺိၺ်ႇၽြႃးပဵၼ်ၸဝ်ႈၸဵတ်းပႃး၊ဢၼ်လႆႈၶၢမ်ႇတၢင်းဢၼ်ပွႆႇၸႂ်ႉမႃးၵႃႈတီႈလိၼ်မိူင်းၵူႈတီႈၵူႈလႅၼ်ၼၼ်ႉဢေႃႈ။-
သူဝ်းဢွၼ်ႇၸဝ်ႈၼၼ်ႉၵႂႃႇလႄႈဢဝ်ၵဵၼ်လိၵ်ႈဢၼ်မီးၵႃႈၼႂ်းမိုဝ်းၶွၼ်ၶႂႃၸဝ်ႈဢၼ်ၼင်ႈယူႇၵႃႈၼိူဝ်ပလၢင်ႇၸဝ်ႈၼၼ်ႉဢေႃႈ။-
မိူဝ်ႈဢၼ်သူဝ်းဢွၼ်ႇၸဝ်ႈဢဝ်ၵဵၼ်လိၵ်ႈၼၼ်ႉၸိုင်၊တူဝ်သတ်ႉတဝႃႇသီႇတူဝ်ဢိၵ်ႇတင်းၵူၼ်းဢၼ်ဢသၢၵ်ႈယႂ်ႇသၢဝ်းသီႇၵေႃႉၸိူဝ်းၼၼ်ႉ၊ၶုပ်ႉမူပ်ႇၵႃႈတီႈၽၢႆႇၼႃႈသူဝ်းဢွၼ်ႇၸဝ်ႈၼၼ်ႉဢေႃႈ။ ၵႃႈၼႂ်းမိုဝ်းၶဝ်ၵေႃႉလႂ်ၵေႃႉၼၼ်ႉမီးတိင်ႇဢိၵ်ႇတင်းၵွၵ်းၶမ်း၊ဢၼ်တဵမ်ဝႆႉတင်းၼၢမ်ႇသႃႇဢၼ်ဝႃႈ၊ပထၼႃႇတၢင်းသူးတွင်းၵူၼ်းၽြႃးပဵၼ်ၸဝ်ႈတင်းလၢႆၼၼ်ႉဢေႃႈ။-
ၶဝ်ဢွၼ်ၵၼ်ႁဵတ်းၵႂၢမ်းမႂ်ႇယူႇလႄႈဝႃႈ၊ “ၸဝ်ႈႁဝ်းထိူၵ်ႈၶၢမ်ႇဢဝ်ၵဵၼ်လိၵ်ႈၼၼ်ႉ၊ ႁႂ်ႈလႆႈၵွၵ်းပႅတ်ႈလႄႈၽုၺ်ႇတၼ်းသိၵ်ႈၸိူဝ်းၼၼ်ႉဢေႃႈ။ လွင်ႈမၼ်းၸမ်ႉ၊ၸဝ်ႈႁဝ်းၶၢမ်ႇတၢင်းတၢႆသေယဝ်ႉ၊ ဢဝ်တင်းလိူတ်ႈၸဝ်ႈႁဝ်းၼၼ်ႉထုတ်ႇဢဝ်ၵူၼ်းတင်းလၢႆ၊ ၵႃႈၼႂ်းၵူၼ်းၵူႈမိူင်းမိူင်း၊ၵူၼ်းၵူႈၶိူဝ်းၶိူဝ်း၊ဢၼ်လၢတ်ႈၵႂၢမ်းၽႃႇသႃႇၵူႈမဵဝ်းမဵဝ်းၸိူဝ်းၼၼ်ႉပုၼ်ႈၽြႃးပဵၼ်ၸဝ်ႈယဝ်ႉဢေႃႈ။
ၸဝ်ႈႁဝ်းႁဵတ်းႁႂ်ႈၶဝ်ပဵၼ်ယဵၸ်ႈပရေႃးႁဵၵ်ႈ ဢၼ်တၵ်းဢုပ်ႉပိူင်ႇႁူမ်ႈလူၺ်ႈၵၼ်တင်းမၼ်းၸဝ်ႈႁႂ်ႈၶဝ်လႆႈႁဵတ်းဝၢတ်ႈၽြႃးပဵၼ်ၸဝ်ႈႁဝ်းၶႃႈ၊ဢိၵ်ႇတင်းႁႂ်ႈၶဝ်လႆႈဢုပ်ႉပိူင်ႇၵႃႈၼိူဝ်လိၼ်မိူင်းတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၵဝ်သမ်ႉတူၺ်းလႄႈလႆႈငိၼ်းသဵင်တမၢၼ်ႇၵၢင်ႁၢဝ်ဢၼ်မီးပဵၼ်သႅၼ်ပဵၼ်လၢၼ်ႉဢမ်ႇၵႃး၊ထၢၼ်ႈပေႃးဢမ်ႇၼပ်ႉဢၢၼ်ႇလႆႈၼၼ်ႉဢေႃႈ။ ၶဝ်ၸိူဝ်းၼၼ်ႉၸုၵ်းလွမ်ႉႁွပ်ႈၸႃႉၸဵမ်ပလၢင်ႇၸဝ်ႈလႄႈတူဝ်သတ်ႉတဝႃႇသီႇတူဝ်၊ဢိၵ်ႇတင်းၵူၼ်းဢၼ်ဢသၢၵ်ႈယႂ်ႇၸိူဝ်းၼၼ်ႉဢေႃႈ။-
ၶဝ်ႁဵတ်းၵႂၢမ်းလူၺ်ႈသဵင်ဢၼ်ယႂ်ႇၼႃႇလႄႈဝႃႈ၊ “သူဝ်းဢွၼ်ႇၸဝ်ႈဢၼ်ၶၢမ်ႇတၢင်းတၢႆမႃးယဝ်ႉၼႆႉ၊ ထိူၵ်ႈၶၢမ်ႇဢဝ်တၼ်းၶူဝ်း၊ၸေးၸိမ်ႇ၊ပိင်ႇၺႃႇ၊ဢဵၼ်ႁႅင်း၊ၵုင်ႇသရေႇမုၼ်ၽုင်း၊ ဢိၵ်ႇတင်းတၢင်းဢၼ်ယွင်ႈယေႃးတီႈၶႃႈဢေႃႈ၊” ဝႃႈၼင်ႇၼႆဢေႃႈ။-
ၵဝ်သမ်ႉလႆႈငိၼ်းသဵင်ဝူၺ်ႇၼေႇယႃႉသတ်ႉတဝႃႇဢၼ်မီးၵႃႈၼိူဝ်ၵၢင်ႁၢဝ်၊ၵႃႈၼိူဝ်လိၼ်မိူင်း၊ၵႃႈတႂ်ႈလိၼ်မိူင်း၊ဢိၵ်ႇတင်းၵႃႈၼႂ်းပၢင်ႇလၢႆႇ၊မဵဝ်းဢၼ်ဢသၢၵ်ႈလိပ်းယူႇၵႃႈၼႂ်းၸၵျႃႇဝလႃႇ၊ၵႃႈမီးတင်းသဵင်ႈတင်းလူင်ဢွၼ်ၵၼ်ႁဵတ်းၵႂၢမ်းယူႇလႄႈဝႃႈ၊ “ႁႂ်ႈၸဝ်ႈဢၼ်ၼင်ႈၵႃႈၼိူဝ်ပလၢင်ႇၸဝ်ႈဢိၵ်ႇတင်းသူဝ်းဢွၼ်ႇၸဝ်ႈၼႆႉ၊ မီးမၢင်ႇၵလႃႇ၊ၵုင်ႇသရေႇ၊မုၼ်ၽုင်းဢႃႇၼုၽေႃႇ၊ဢိၵ်ႇတင်းဢႃႇၼႃႇတၼ်းၶူဝ်း၊ ၵူႈၵၢပ်ႈၵမ်ႇၽႃႇသိုပ်ႇသိုပ်ႇတၢမ်တၢမ်သေၵမ်းလူၺ်ႈတီႈၶႃႈ၊” ဝႃႈၼင်ႇၼႆဢေႃႈ။-
တူဝ်သတ်ႉတဝႃႇသီႇတူဝ်ၼၼ်ႉၶိုၼ်းလဝ်ႈလၢတ်ႈလႄႈဝႃႈ၊ “ဢႃမိၼ်ႈ” ဝႃႈၼင်ႇၼႆဢေႃႈ။ ၵူၼ်းဢၼ်ဢသၢၵ်ႈယႂ်ႇၸိူဝ်းၼၼ်ႉၵေႃႈ၊ၶုပ်ႉမူပ်ႇလႄႈဝႆႈသႃၵူဝ်းၵႂၢႆႇဢေႃႈ။
မိူဝ်ႈၼၼ်ႉ၊ၵဝ်လႆႈႁၼ်သူဝ်းဢွၼ်ႇၸဝ်ႈၼၼ်ႉၵွၵ်းပႅတ်ႈလႄႈၽုၺ်ႇတၼ်းသိၵ်ႈၵမ်းတီႈၼိုင်ႈၼႂ်းတၼ်းသိၵ်ႈၸဵတ်းၵမ်းၼၼ်ႉ သေလႄႈၵဝ်လႆႈငိၼ်းၼႂ်းတူဝ်သတ်ႉတဝႃႇတူဝ်ၼိုင်ႈၼႂ်းသီႇတူဝ်ၼၼ်ႉ လူၺ်ႈတင်းသဵင်ဢၼ်မိူၼ်သဵင်ၽႃႉလင်ၼၼ်ႉလၢတ်ႈလႄႈဝႃႈ၊ “မႃးတႃႉ၊” ဝႃႈၼင်ႇၼႆဢေႃႈ။-
ၵမ်းၼၼ်ႉ ၵဝ်တူၺ်းလႄႈႁၼ်မႃႉၽိူၵ်ႇတူဝ်ၼိုင်ႈဢေႃႈ။ ၵေႃႉဢၼ်ၶီႇမႃႉၼၼ်ႉ၊ယိပ်းၵမ်ၵၢင်ႇၵူင်လႄႈမၼ်းၼၼ်ႉလႆႈႁပ်ႉဢဝ်သရၽူႇဢၼ်ၼိုင်ႈဢေႃႈ။ မၼ်းၼၼ်ႉမိူၼ်ၸိူဝ်ႉၼင်ႇၵေႃႉဢၼ်ပႄႉၼႅင်ႇလႄႈၶီႇမႃႉဢွၵ်ႇၵႂႃႇႁႂ်ႈလႆႈပႄႉၼႅင်ႇဢေႃႈ။
မိူဝ်ႈဢၼ်သူဝ်းဢွၼ်ႇၸဝ်ႈၼၼ်ႉ၊ၵွၵ်းပႅတ်ႈလႄႈၽုၺ်ႇတၼ်းသိၵ်ႈၵမ်းတီႈသွင်ၼၼ်ႉၵဝ်လႆႈငိၼ်းသတ်ႉတဝႃႇတူဝ်တီႈသွင်ၼၼ်ႉလၢတ်ႈဝႃႈ၊ “မႃးတႃႉ၊” ဝႃႈၼင်ႇၼႆဢေႃႈ။-
ၵမ်းၼၼ်ႉ၊မႃႉလႅင်တူဝ်ၼိုင်ႈဢွၵ်ႇမႃးလႄႈၵေႃႉဢၼ်ၶီႇမႃႉၼၼ်ႉမီးဢႃႇၼႃႇပုၼ်ႈတၵ်းႁဵတ်းႁႂ်ႈလိၼ်မိူင်းပဵၼ်သိုၵ်းပဵၼ်သိူဝ်သေယဝ်ႉ၊ႁႂ်ႈၵေႃႉၼိုင်ႈလႄႈၵေႃႉၼိုင်ႈဢဝ်ၵၼ်တၢႆၼၼ်ႉဢေႃႈ။ မၼ်းၼၼ်ႉလႆႈႁပ်ႉဢဝ်လၢပ်ႇလူင်မၢၵ်ႈၼိုင်ႈဢေႃႈ။
မိူဝ်ႈဢၼ်သူဝ်းဢွၼ်ႇၸဝ်ႈၼၼ်ႉ၊ၵွၵ်းပႅတ်ႈလႄႈၽုၺ်ႇတၼ်းသိၵ်ႈၵမ်းတီႈသၢမ်ၼၼ်ႉၵဝ်လႆႈငိၼ်းသဵင်သတ်ႉတဝႃႇတူဝ်သၢမ်ၼၼ်ႉလၢတ်ႈဝႃႈ၊ “မႃးတႃႉ၊” ဝႃႈၼင်ႇၼႆဢေႃႈ။ ၵမ်းၼၼ်ႉ၊ၵဝ်တူၺ်းလႄႈႁၼ်မႃႉၵႃႈတူဝ်ၼိုင်ႈဢေႃႈ။ ၵေႃႉဢၼ်ၶီႇမႃႉၼၼ်ႉယိပ်းၵမ်ယႃႇၸူႇဢၼ်ၼိုင်ႈၼႂ်းမိုဝ်းမၼ်းဝႆႉဢေႃႈ။-
ၵဝ်လႆႈငိၼ်းသဵင်ဢၼ်လၢတ်ႈဢွၵ်ႇမႃးၵႃႈၼႂ်းၵႄႈဝူင်ႈၵၢင်တူဝ်သတ်ႉတဝႃႇတင်းသီႇတူဝ်ၼၼ်ႉလႄႈဝႃႈ၊ “သၢၼ်ၶဝ်ႈၵျုင်ႇၵွၵ်းၼိုင်ႈ၊တၢၼ်ႇၵႃႈႁႅင်းဝၼ်းၼိုင်ႈ၊ဢိၵ်ႇတင်းသၢၼ်မုယေႃးသၢမ်ၵွၵ်း၊တၢၼ်ႇၵႃႈႁႅင်းဝၼ်းၼိုင်ႈၼင်ႇၵဝ်ႇဢေႃႈ။ ၵူၺ်းၵႃႈ၊ယႃႇပေႁႂ်ႈၼမ်ႉမၼ်းတင်းၼမ်ႉမၢၵ်ႇၸပိတ်ႉလႆႈလု၊” ဝႃႈၼင်ႇၼႆဢေႃႈ။
မိူဝ်ႈဢၼ်သူဝ်းဢွၼ်ႇၸဝ်ႈၼၼ်ႉ၊ၵွၵ်းပႅတ်ႈလႄႈၽုၺ်ႇတၼ်းသိၵ်ႈၵမ်းတီႈသီႇၼၼ်ႉၵဝ်လႆႈငိၼ်းတူဝ်သတ်ႉတဝႃႇတူဝ်တီႈသီႇၼၼ်ႉလၢတ်ႈဝႃႈ၊ “မႃးတႃႉ၊” ဝႃႈၼင်ႇၼႆဢေႃႈ။-
ၵမ်းၼၼ်ႉ၊ၵဝ်တူၺ်းလႄႈႁၼ်မႃႉသဝ်ႈတူဝ်ၼိုင်ႈဢေႃႈ။ ၵေႃႉဢၼ်ၶီႇမႃႉၼၼ်ႉမီးၸိုဝ်ႈဢၼ်ႁွင်ႉႁဵၵ်ႈဝႃႈ၊ၶုၼ်တၢင်းတၢႆဢေႃႈ။ မိူင်းမရၼႃႉၸွမ်းပႃႈလင်မၼ်းယူႇဢေႃႈ။ မၼ်းၼၼ်ႉလႆႈဢုပ်ႉပိူင်ႇမိူင်းလေႃးၵီႇသီႇပုၼ်ႈပုၼ်ႈၼိုင်ႈလႄႈမီးဢႃႇၼႃႇဢၼ်ဢဝ်တၢႆလူၺ်ႈၽေးသိုၵ်းၽေးသိူဝ်၊ၽေးဢၼ်ဢိုပ်းယၢၵ်ႈ၊ၽေးတၢင်းၶႆႈတၢင်းပဵၼ်၊ဢိၵ်ႇတင်းၽေးတူဝ်ထိူၼ်ႇဢေႃႈ။
မိူဝ်ႈဢၼ်သူဝ်းဢွၼ်ႇၸဝ်ႈၼၼ်ႉ၊ၵွၵ်းပႅတ်ႈလႄႈၽုၺ်ႇတၼ်းသိၵ်ႈၵမ်းတီႈႁႃႈၸိုင်၊ၵႃႈတႂ်ႈၶဵင်ႇတၢင်းလူႇၼၼ်ႉၵဝ်လႆႈႁၼ်ဝိၺိၺ်ႇၶဝ်ၸိူဝ်းဢၼ်လႆႈၶၢမ်ႇဢဝ်တၢႆၵွပ်ႈပိူဝ်ႈၶဝ်ႁေႃးလၢတ်ႈၼုၵ်ႈၵပၢတ်ႈၽြႃးပဵၼ်ၸဝ်ႈ၊ဢိၵ်ႇတင်းၵွပ်ႈပိူဝ်ႈၶဝ်မီးသဵတ်ႈၸႃႇၼႂ်းတၢင်းဢၼ်ၶၢမ်ႇသၢၵ်ႈသေႇၼၼ်ႉဢေႃႈ။-
ၶဝ်ပၢဝ်ႇသႅၼ်ႇတင်းသဵင်ဢၼ်ယႂ်ႇၼႃႇလႄႈဝႃႈ၊ “ၸဝ်ႈဢၼၼ်ႇတႃႉတၼ်းၶူဝ်းဢၼ်မူတ်းၸၢင်ႇၸိုဝ်ႈၸႂ်ႈၼၼ်ႉတီႈၶႃႈ႟။ ၸဝ်ႈႁဝ်းယင်းဢမ်ႇၸီႇယၢင်ႇဢပျတ်ႈၵူၼ်းလေႃးၵီႇတင်းလၢႆၼႆႉ၊သမ်ႉယင်းဢမ်ႇပၼ်တၢမ်ႇတီႈၶဝ်ၸိူဝ်းဢၼ်ဢဝ်ႁဝ်းၶႃႈတၢႆၼႆႉလႄႈတေယူႇႁိုင်ထႅင်ႈၵႃႈႁိုဝ်လူးၵွၼ်ႇၶႃႈ၊” ဝႃႈၼင်ႇၼႆဢေႃႈ။-
ၶဝ်ၼၼ်ႉ၊ၵေႃႉလႂ်ၵေႃႉၼၼ်ႉ၊လႆႈႁပ်ႉဢဝ်ၶူဝ်းၼုင်ႈဢၼ်ၽိူၵ်ႇၶၢဝ်ႁင်းၽႂ်ႁင်းမၼ်းသေလႄႈ မၼ်းၸဝ်ႈမီးဢမိင်ႉတီႈၶဝ်လႄႈလၢတ်ႈဝႃႈ၊ “ၸူဝ်ႈဢၼ်ပီႈၼွင်ႉဢိၵ်ႇတင်းၵေႃႉသႄႈသူၸိူဝ်းဢၼ်ႁဵတ်းသၢင်ႈလူၺ်ႈၵၼ်တင်းသူ၊ဢၼ်တၵ်းလႆႈၶၢမ်ႇဢဝ်တၢႆမိူၼ်ၸိူဝ်ႉၼင်ႇသူၼၼ်ႉ၊တၢင်းဢၼ်ၼပ်ႉဢၢၼ်ႇယင်းဢမ်ႇပႆႇတဵမ်ၸိုင်၊သူတၵ်းလႆႈလိုဝ်ႈယူႇၼိမ်ၼိမ်ၵမ်းဢွၼ်ႇၼိုင်ႈလူးၵွၼ်ႇဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်သူဝ်းဢွၼ်ႇၸဝ်ႈၼၼ်ႉ၊ၵွၵ်းပႅတ်ႈလႄႈၽုၺ်ႇတၼ်းသိၵ်ႈၵမ်းတီႈႁူၵ်းၼၼ်ႉၸိုင်၊ၵဝ်တူၺ်းလႄႈႁၼ်တၢင်းဢၼ်ပဵၼ်ဢိင်ႇသၼ်ႇႁႅင်းၼႃႇလူင်လၢင်ဢေႃႈ။ ၵၢင်ဝၼ်းလပ်းသိင်ႇၵႂႃႇမိူၼ်ၸိူဝ်ႉၼင်ႇၽႃႈၶူၼ်ၵျၢမ်းဢၼ်လမ်လႄႈလိူၼ်ၵေႃႈလႅင်ၸၢင်းႁၢင်းၵႂႃႇမိူၼ်ၸိူဝ်ႉၼင်ႇလိူတ်ႈဢေႃႈ။-
လၢဝ်ၵၢင်ႁၢဝ်တင်းလၢႆၵေႃႈ၊တူၵ်းမႃးၵႃႈၼိူဝ်လိၼ်မိူင်းမိူၼ်ၸိူဝ်ႉၼင်ႇမၢၵ်ႇလိူဝ်ႇဢၼ်ဢမ်ႇပႆႇသုၵ်းဢၼ်လုၵ်ႉၵႃႈၼိူဝ်တူၼ်ႈမၼ်းႁူင်ႈတူၵ်းမႃးမိူဝ်ႈဢၼ်လူမ်းလူင်ပတ်ႉထူဝ်းၶွၼ်းၶဝ်ႇတူၼ်ႈမၼ်းၼၼ်ႉဢေႃႈ။-
တွင်ႉၽႃႉၵေႃႈ၊လပ်ႉႁၢႆလၢႆၵႂႃႇမိူၼ်ၸိူဝ်ႉၼင်ႇၵဵၼ်လိၵ်ႈဢၼ်ႁမ်းၵဵၼ်ၵႂႃႇၼၼ်ႉလႄႈလွႆၵူႈလုၵ်ႈဢိၵ်ႇတင်းၵုၼ်ၵူႈလုၵ်ႈၵေႃႈၶၢႆႉတီႈယူႇၶဝ်ၵႂႃႇဢေႃႈ။-
မိူဝ်ႈၼၼ်ႉ၊ၸႃႉၸဵမ်ၶုၼ်ႁေႃၶမ်းလေႃးၵီႇတင်းလၢႆ၊မူးမၢတ်ႈၽွင်းမိူင်း၊ၶုၼ်သိုၵ်းတင်းလၢႆဢိၵ်ႇတင်းၵူၼ်းမၢၵ်ႈၵူၼ်းမီး၊ၵူၼ်းဢၼ်မီးမုၼ်မီးၽုင်း၊ဢိၵ်ႇတင်းၵူၼ်းတၢင်ႇၵေႃႉတၢင်ႇၵူၼ်းၵႃႈမီးတင်းသဵင်ႈတင်းလူင်၊ၵူၼ်းဢၼ်ပဵၼ်ၶႃႈလႄႈၵူၼ်းဢၼ်လွတ်ႈတင်းလၢႆဢွၼ်ၵၼ်ပၢႆႈတဵတ်ႇယူႇၵႃႈၼႂ်းထမ်ႈၼႂ်းငိူပ်ႇၵႃႈၼိူဝ်လွႆတင်းလၢႆဢေႃႈ။-
ၶဝ်လၢတ်ႈတေႃႇလွႆႁိၼ်လွႆၽႃလႄႈဝႃႈ၊ “တူၵ်းသႂ်ႇၵႃႈၼိူဝ်ႁဝ်းလႄႈႁႄႉလပ်ႉႁဝ်းဝႆႉသေၵႃႈတီႈမၢၵ်ႇတႃၸဝ်ႈဢၼ်ၼင်ႈယူႇၵႃႈၼိူဝ်ပလၢင်ႇၸဝ်ႈ၊ဢိၵ်ႇတင်းႁႄႉလပ်ႉသေတၢင်းၸႂ်မႆႈၶႂ်ႈၸႃႉသူဝ်းဢွၼ်ႇၸဝ်ႈၼၼ်ႉသေၵမ်း။-
ဝၼ်းယႂ်ႇဝၼ်းလူင်ဢၼ်မၼ်းၸဝ်ႈၸႂ်မႆႈၶႂ်ႈၸႃႉၼၼ်ႉႁွတ်ႈထိုင်မႃးတီႈၶႃႈယဝ်ႉ။ ၽူႈလႂ်တၵ်းၸုၵ်းၶၢမ်ႇလႆႈ၊” ဝႃႈၼင်ႇၼႆဢေႃႈ။
ဝၢႆးၼၼ်ႉ၊ၵဝ်ႁၼ်တမၢၼ်ႇၵၢင်ႁၢဝ်သီႇပႃးၸုၵ်းယူႇၵႃႈတီႈသီႇၸဵင်ႇလိၼ်မိူင်းလႄႈယိပ်းၵမ်ဢဝ်လူမ်းသီႇၽၢႆႇသီႇၼႃႈဝႆႉ၊ဢမ်ႇႁႂ်ႈလူမ်းလႆႈထူဝ်းပတ်ႉၵႃႈၼိူဝ်လိၼ်မိူင်း၊ၵႃႈၼိူဝ်ပၢင်ႇလၢႆႇဢိၵ်ႇတင်းၵႃႈတီႈတူၼ်ႈမႆႉလႂ်ဢေႃႈ။-
ၵဝ်သမ်ႉႁၼ်တမၢၼ်ႇၵၢင်ႁၢဝ်တၢင်ႇပႃး၊လုၵ်ႉၵႃႈတီႈၸဵင်ႇဝၼ်းဢွၵ်ႇၼၼ်ႉပေႃႇဢွၵ်ႇမႃးလႄႈပႃးဢဝ်တၼ်းသိၵ်ႈၽြႃးပဵၼ်ၸဝ်ႈ၊ၸဝ်ႈဢၼ်ဢသၢၵ်ႈလိပ်းယူႇၼၼ်ႉမႃးဢေႃႈ။ မၼ်းၼၼ်ႉႁွင်ႉပၢဝ်ႇလူၺ်ႈသဵင်ဢၼ်ယႂ်ႇၼႃႇလႄႈလၢတ်ႈတီႈတမၢၼ်ႇၵၢင်ႁၢဝ်သီႇပႃးဢၼ်ၽြႃးပဵၼ်ၸဝ်ႈပၼ်ဢၶႂၢင်ႉၶဝ်ႁႂ်ႈလႆႈပၼ်ၽေးလုလႅဝ်တီႈလိၼ်မိူင်း၊ဢိၵ်ႇတင်းတီႈပၢင်ႇလၢႆႇၼၼ်ႉလႄႈဝႃႈ၊-
“ၸူဝ်ႈဢၼ်ႁဝ်းယင်းဢမ်ႇပႆႇဢဝ်တၼ်းသိၵ်ႈတွၵ်ႇၵႃႈတီႈၼႃႈၽၢၵ်ႇၶႃႈၽြႃးပဵၼ်ၸဝ်ႈႁဝ်းတင်းလၢႆၼၼ်ႉၸိုင်၊ယႃႇပေပၼ်ၽေးလုလႅဝ်ၵႃႈတီႈလိၼ်မိူင်း၊ၵႃႈတီႈပၢင်ႇလၢႆႇ၊ဢိၵ်ႇတင်းၵႃႈတီႈတူၼ်ႈမႆႉတင်းလၢႆသေၵမ်း၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊ၵဝ်လႆႈႁုတၢင်းဢၼ်ၼပ်ႉဢၼ်ဢၢၼ်ႇၵူၼ်းၸိူဝ်းဢၼ်တၼ်းသိၵ်ႈၽြႃးပဵၼ်ၸဝ်ႈလႆႈတွၵ်ႇဝႆႉၵႃႈတီႈၼႃႈၽၢၵ်ႇၶဝ်ၼၼ်ႉ၊မီးသႅၼ်ပၢႆသီႇမိုၼ်ႇသီႇႁဵင်ၵေႃႉယဝ်ႉၼၼ်ႉဢေႃႈ။ ၶဝ်ၼၼ်ႉ၊ပဵၼ်ၸိူဝ်ႉၶိူဝ်းၵူၼ်းမဵဝ်း ဢိသရေး၊ သိပ်းသွင်မဵဝ်း၊-
ဝၢႆးသေၼၼ်ႉ၊ၵဝ်တူၺ်းလႄႈႁၼ်မုၵ်ႉၵူၼ်းၸိူဝ်းၵူၼ်းဢၼ်ၼမ်ၼႃႇ၊ထၢၼ်ႈပေႃးၽူႈလႂ်ၵေႃႈဢမ်ႇၼပ်ႉဢၢၼ်ႇလႆႈၼၼ်ႉဢေႃႈ။ ၶဝ်ၼၼ်ႉ၊ဢွၵ်ႇသေၵႃႈတီႈမဵဝ်းၸိူဝ်ႉၶိူဝ်းၵူၼ်း၊ၵူႈၶိူဝ်းၶိူဝ်း၊ၵူၼ်းၵူႈမိူင်းမိူင်းလူၺ်ႈတၢင်းဢၼ်လၢတ်ႈၵႂၢမ်းၽႃႇသႃႇၵူႈမဵဝ်းမဵဝ်းၼၼ်ႉ၊ၼုင်ႈမႆၶူဝ်းၽိူၵ်ႇၶူဝ်းၶၢဝ်ယူႇ၊ယိပ်းၵမ်ၵိင်ႇတူၼ်ႈမၢၵ်ႇၸုၼ်ႇပလုၼ်ႇ လႄႈမႃးၸုၵ်းၵႃႈတီႈၽၢႆႇၼႃႈပလၢင်ႇၸဝ်ႈ၊ဢိၵ်ႇတင်းၽၢႆႇၼႃႈသူဝ်းဢွၼ်ႇၸဝ်ႈယူႇဢေႃႈ။-
ၶဝ်ႁွင်ႉပၢဝ်ႇလူၺ်ႈတင်းသဵင်ဢၼ်ယႂ်ႇၼႃႇလႄႈဝႃႈ၊ “တၢင်းဢၼ်ၵႄႇၶျွတ်ႈၼၼ်ႉ ပဵၼ်မႃးသေၵႃႈတီႈၽြႃးပဵၼ်ၸဝ်ႈႁဝ်းဢၼ်ၼင်ႈယူႇၵႃႈၼိူဝ်ပလၢင်ႇၸဝ်ႈ၊ဢိၵ်ႇတင်းပဵၼ်မႃးသေၵႃႈတီႈသူဝ်းဢွၼ်ႇၸဝ်ႈတီႈၶႃႈဢေႃႈ၊” ဝႃႈၼင်ႇၼႆဢေႃႈ။-
တမၢၼ်ႇၵၢင်ႁၢဝ်တင်းသဵင်ႈတင်းလူင်ၸုၵ်းလွမ်ႉႁွပ်ႈပလၢင်ႇၸဝ်ႈ၊လွမ်ႉႁွပ်ႈၵူၼ်းဢၼ်ဢသၢၵ်ႈယႂ်ႇတင်းလၢႆ၊ဢိၵ်ႇတင်းလွမ်ႉႁွပ်ႈတူဝ်သတ်ႉတဝႃႇသီႇတူဝ်ၼၼ်ႉသေယဝ်ႉ၊ၶဝ်ဢွၼ်ၵၼ်ၶုပ်ႉမူပ်ႇၵႃႈတီႈၽၢႆႇၼႃႈပလၢင်ႇၸဝ်ႈလႄႈဝႆႈသႃၵူဝ်းၵႂၢႆႇၽြႃးပဵၼ်ၸဝ်ႈယူႇလႄႈ၊-
လဝ်ႈလၢတ်ႈဝႃႈ၊ “ဢႃမိၼ်ႈ။ ႁႂ်ႈတၢင်းလီမၢင်ႇၵလႃႇလႄႈမုၼ်ၽုင်း၊ဢိၵ်ႇတင်းပိင်ႇၺႃႇလႄႈတၢင်းဢၼ်ယွင်ႈယေႃးတၢင်ႇၵျေးၸူး၊ဢိၵ်ႇတင်းၵုင်ႇသရေႇလႄႈဢႃႇၼႃႇတၼ်းၶူဝ်းမီးၵႃႈတီႈၽြႃးပဵၼ်ၸဝ်ႈႁဝ်းၵူႈၵၢပ်ႈၵမ်ႇၽႃႇသိုပ်ႇသိုပ်ႇတၢမ်တၢမ်သေၵမ်းလူၺ်ႈ။ ဢႃမိၼ်ႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၼႂ်းၵူၼ်းဢၼ်ဢသၢၵ်ႈယႂ်ႇၸိူဝ်းၼၼ်ႉၵေႃႉၼိုင်ႈထၢမ်ၵဝ်လႄႈဝႃႈ၊ “ၶဝ်ၸိူဝ်းဢၼ်ၼုင်ႈၶူဝ်းၽိူၵ်ႇၶူဝ်းၶၢဝ်ၸိူဝ်းၼႆႉပဵၼ်ၽူႈလႂ်။ ၶဝ်လုၵ်ႉၵႃႈတီႈလႂ်မႃး၊” ဝႃႈၼင်ႇၼႆလႄႈ၊-
ၵဝ်ၵေႃႈၶိုၼ်းလဝ်ႈလၢတ်ႈလႄႈဝႃႈ၊ “ၸဝ်ႈ႟။ ၵဝ်ၶႃႈဢမ်ႇႁုၶႃႈ။ ၸဝ်ႈႁဝ်းႁုယူႇတီႈၶႃႈဢေႃႈ၊” ဝႃႈၼင်ႇၼႆဢေႃႈ။ မၼ်းၵေႃႈလၢတ်ႈတီႈၵဝ်လႄႈဝႃႈ၊ “ၶဝ်ၸိူဝ်းၼႆႉပဵၼ်ၶဝ်ၸိူဝ်းဢၼ်လွတ်ႈသေၽေးတုၵ်ႉၶႃႉတၢင်းၽၢၼ်ဢၼ်ယႂ်ႇလူင်မႃးသေယဝ်ႉ၊ဢဝ်ၶူဝ်းၼုင်ႈၶဝ်သၵ်ႉသၢႆႇၵႃႈၼႂ်းလိူတ်ႈသူဝ်းဢွၼ်ႇၸဝ်ႈယဝ်ႉလႄႈလႆႈၽိူၵ်ႇလီၶၢဝ်လီဢေႃႈ။-
ပိူဝ်ႈၼႆလႄႈၶဝ်လႆႈၸုၵ်းယူႇၵႃႈတီႈၽၢႆႇၼႃႈပလၢင်ႇၽြႃးပဵၼ်ၸဝ်ႈလႄႈ လႆႈႁဵတ်းဝၢတ်ႈတီႈၽြႃးယူႇဝၼ်းဝၼ်းၶိုၼ်းၶိုၼ်း၊ၵႃႈၼႂ်းၵျွင်းပိၵ်ႈမၢၼ်ႇၸဝ်ႈယဝ်ႉ။ ၸဝ်ႈဢၼ်ၼင်ႈယူႇၵႃႈၼိူဝ်ပလၢင်ႇၸဝ်ႈၼၼ်ႉၵေႃႈ၊တၵ်းၵႅတ်ႇၶႄႁႄႉၵင်ႈပၼ်ၶဝ်ၵွပ်ႈပိူဝ်ႈမၼ်းၸဝ်ႈယူႇလူၺ်ႈၵၼ်တင်းၶဝ်ဢေႃႈ။-
ၵမ်းလိုၼ်းၶဝ်တၵ်းဢမ်ႇလႆႈတွင်ႉမႆႈလႄႈယၢၵ်ႇၼမ်ႉထႅင်ႈယဝ်ႉ။ သၢႆလႅတ်ႇသေဢမ်ႇဝႃႈ၊တၢင်းဢၼ်မႆႈဢၼ်ႁွၼ်ႉၵႃႈသင်သေဢမ်ႇဝႃႈ၊တေဢမ်ႇလႆႈတိူဝ်ႉထုၵ်ႇယႃႉၵဝ်းၶဝ်ထႅင်ႈယဝ်ႉ။-
လွင်ႈမၼ်းၸမ်ႉ၊သူဝ်းဢွၼ်ႇၸဝ်ႈဢၼ်မီးယူႇၵႃႈတီႈၶိုင်ႈၵၢင်ပလၢင်ႇၸဝ်ႈၼၼ်ႉတၵ်းလဵင်ႉတၵ်းထိင်းၶဝ်လႄႈမၼ်းၸဝ်ႈတၵ်းဢွၼ်ၶဝ်သူင်ႇၵႂႃႇတီႈၼမ်ႉဢွၵ်ႇႁူးဢၼ်ပၼ်ဢသၢၵ်ႈၼၼ်ႉဢေႃႈ။ ၽြႃးပဵၼ်ၸဝ်ႈၵေႃႈ၊တၵ်းၸဵတ်ႉပၼ်ၼမ်ႉတႃသေၵႃႈတီႈတႃၶဝ်တင်းမူတ်းဢေႃႈ၊” ဝႃႈၼင်ႇၼႆဢေႃႈ။
မိူဝ်ႈဢၼ်သူဝ်းဢွၼ်ႇၸဝ်ႈၵွၵ်းပႅတ်ႈလႄႈၽုၺ်ႇတၼ်းသိၵ်ႈၵမ်းတီႈၸဵတ်းၼၼ်ႉၸိုင်၊ၵႃႈၼိူဝ်မိူင်းၵၢင်ႁၢဝ်ၼၼ်ႉမီးတၢင်းဢၼ်တဵတ်ႇသဵတ်ႇၵႂႃႇၶိုင်ႈၼႃႇရီႇၼိုင်ႈၸမ်ၸမ်ဢေႃႈ။-
ၵဝ်သမ်ႉလႆႈႁၼ်တမၢၼ်ႇၵၢင်ႁၢဝ်ၸဵတ်းပႃးၸုၵ်းယူႇၵႃႈတီႈၽၢႆႇၼႃႈၽြႃးပဵၼ်ၸဝ်ႈလႄႈၶဝ်ၼၼ်ႉလႆႈႁပ်ႉဢဝ်ၼႄးၶရႃႇၸဵတ်းဢၼ်ဢေႃႈ။
မိူဝ်ႈၼၼ်ႉတမၢၼ်ႇၵၢင်ႁၢဝ်တၢင်ႇပႃး၊ယိပ်းၵမ်ၽၢင်ၽႆးၶမ်းပုၼ်ႈတႃႇတုတ်ႇၽႆးၼၢမ်ႇသႃႇၼၼ်ႉ မႃးၸုၵ်းယူႇၵႃႈတီႈၶဵင်ႇတၢင်းလူႇၼၼ်ႉဢေႃႈ။ မၼ်းၼၼ်ႉလႆႈႁပ်ႉဢဝ်ၼၢမ်ႇသႃႇၼမ်ၼႃႇပုၼ်ႈတႃႇတၵ်းထၢပ်ႈသႂ်ႇထႅင်ႈတီႈပထၼႃႇတၢင်းသူးတွင်းၵူၼ်းၽြႃးပဵၼ်ၸဝ်ႈ၊ဢိၵ်ႇတင်းပုၼ်ႈတႃႇတၵ်းတုတ်ႇၽႆးႁႂ်ႈလႆႈသၢၵ်ႈလူႇၵႃႈၼိူဝ်ၶဵင်ႇတၢင်းလူႇ၊ဢၼ်မီးယူႇၽၢႆႇၼႃႈပလၢင်ႇၸဝ်ႈၼၼ်ႉဢေႃႈ။-
ဢၢႆၵႂၼ်းၼၢမ်ႇသႃႇဢၼ်တုတ်ႇၽႆးၼၼ်ႉဢွၵ်ႇသေၵႃႈၼႂ်းမိုဝ်းတမၢၼ်ႇၵၢင်ႁၢဝ်လူၺ်ႈၵၼ်တင်းပထၼႃႇၵႂၢမ်းသူးတွင်းၵူၼ်းၽြႃးပဵၼ်ၸဝ်ႈတင်းလၢႆသေလႄႈၶိုၼ်ႈၵႂႃႇၵႃႈၼိူဝ်ၽႃႉၽၢႆႇၼႃႈၽြႃးပဵၼ်ၸဝ်ႈဢေႃႈ။-
မိူဝ်ႈၼၼ်ႉ၊တမၢၼ်ႇၵၢင်ႁၢဝ်ၼၼ်ႉဢဝ်ၽၢင်ၽႆးၶမ်းပုၼ်ႈတၵ်းတုတ်ႇၽႆးၼၢမ်ႇသႃႇၼၼ်ႉသေလႄႈဢဝ်ၽႆးသေၵႃႈတီႈၶဵင်ႇတၢင်းလူႇသႂ်ႇဝႆႉႁႂ်ႈတဵမ်သေယဝ်ႉ၊ဢဝ်ၽၢင်ၽႆးၶမ်းၼၼ်ႉထိမ်ႈတူၵ်းၵႃႈၼိူဝ်လိၼ်မိူင်းဢေႃႈ။ မိူဝ်ႈၼၼ်ႉ၊မီးသဵင်ၽႃႉလင်၊ၽႃႉမႅပ်ႈ၊မီးတၢင်းဢၼ်သဵင်ႁုၼ်ႈသဵင်မေႃး၊ဢိၵ်ႇတင်းမီးတၢင်းဢၼ်ဢိင်ႇသၼ်ႇဢေႃႈ။
ၵမ်းၼႆႉ၊တမၢၼ်ႇၵၢင်ႁၢဝ်ၸဵတ်းပႃးဢၼ်ယိပ်းၵမ်ယူႇၼႄးၶရႃႇၸဵတ်းဢၼ်ၼၼ်ႉမႄးႁႅၼ်းႁႂ်ႈလႆႈပဝ်ႇဢေႃႈ။
တမၢၼ်ႇၵၢင်ႁၢဝ်ပႃးတီႈၼိုင်ႈပဝ်ႇၼႄးၶရႃႇမၼ်းလႄႈမၢၵ်ႇႁဵပ်း၊ဢိၵ်ႇတင်းၽႆးဢၼ်လေႃးၵၼ်တင်းလိူတ်ႈၼၼ်ႉ၊တူၵ်းမႃးၵႃႈၼိူဝ်လိၼ်မိူင်းဢေႃႈ။ မိူဝ်ႈၼၼ်ႉလိၼ်သၢမ်ပုၼ်ႈပုၼ်ႈၼိုင်ႈ၊တူၼ်ႈမႆႉသၢမ်ပုၼ်ႈပုၼ်ႈၼိုင်ႈ၊ဢိၵ်ႇတင်းပၢင်ႇယိူဝ်ႈၶဵဝ်ၵႃႈမီးတင်းသဵင်ႈတင်းလူင်လႆႈၶၢမ်ႇတၢင်းဢၼ်မႆႈၶႅမ်ႈပႅတ်ႈဢေႃႈ။
မိူဝ်ႈၼၼ်ႉ၊တမၢၼ်ႇၵၢင်ႁၢဝ်ပႃးတီႈသွင်သမ်ႉပဝ်ႇၼႄးၶရႃႇမၼ်းလႄႈမီးၶိူင်ႈပိူင်မဵဝ်းၼိုင်ႈဢၼ်ပဵၼ်မိူၼ်ၸိူဝ်ႉၼင်ႇလွႆလူင်ဢၼ်ၽႆးမႆႈႁိုင်းယူႇလႄႈထိမ်ႈတူၵ်းသႂ်ႇၵႃႈၼႂ်းပၢင်ႇလၢႆႇဢေႃႈ။ ပၢင်ႇလၢႆႇသၢမ်ပုၼ်ႈပုၼ်ႈၼိုင်ႈပဵၼ်လိူတ်ႈၵႂႃႇဢေႃႈ။-
တူဝ်သတ်းဢၼ်မီးၵႃႈၼႂ်းၼမ်ႉပၢင်ႇလၢႆႇတၢႆၵႂႃႇသၢမ်ပုၼ်ႈပုၼ်ႈၼိုင်ႈ၊ဢိၵ်ႇတင်းႁိူဝ်းသၢင်းၽေႃးတင်းလၢႆၵေႃႈ၊လုလႅဝ်ၵႂႃႇသၢမ်ပုၼ်ႈပုၼ်ႈၼိုင်ႈဢေႃႈ။
မိူဝ်ႈၼၼ်ႉတမၢၼ်ႇၵၢင်ႁၢဝ်ပႃးတီႈသၢမ်ပဝ်ႇၼႄးၶရႃႇမၼ်းလႄႈလၢဝ်လူင်လုၵ်ႈၼိုင်ႈဢၼ်မႆႈႁိုင်းယူႇမိူၼ်ၸိူဝ်ႉၼင်ႇမူၵ်ႇၵၢၼ်ႈၶႄႈၼၼ်ႉ၊လုၵ်ႉသေၵႃႈၼိူဝ်တွင်ႉၽႃႉတူၵ်းလူင်းမႃးၵႃႈၼိူဝ်မႄႈၼမ်ႉသၢမ်ပုၼ်ႈပုၼ်ႈၼိုင်ႈ၊ဢိၵ်ႇတင်းၵႃႈၼိူဝ်ၼမ်ႉဢွၵ်ႇႁူးတင်းလၢႆဢေႃႈ။-
(လၢဝ်ၼၼ်ႉလႆႈၸိုဝ်ႈဝႃႈ၊ “ၶူမ်” ဝႃႈၼႆဢေႃႈ။) ၼမ်ႉသၢမ်ပုၼ်ႈပုၼ်ႈၼိုင်ႈၶူမ်ၵႂႃႇလႄႈၵူၼ်းၼမ်ၼႃႇလႆႈၵိၼ်မႅၼ်ႈၼမ်ႉၼၼ်ႉလႄႈတၢႆၵႂႃႇၵွပ်ႈပိူဝ်ႈၼမ်ႉလီၼၼ်ႉပိၼ်ႇပဵၼ်ၼမ်ႉၶူမ်ၵႂႃႇၼၼ်ႉဢေႃႈ။
မိူဝ်ႈၼၼ်ႉ၊တမၢၼ်ႇၵၢင်ႁၢဝ်ပႃးတီႈသီႇသမ်ႉပဝ်ႇၼႄးၶရႃႇမၼ်းလႄႈတႃဝၼ်းသၢမ်ပုၼ်ႈပုၼ်ႈၼိုင်ႈ၊လုလႅဝ်ၵႂႃႇလႄႈလိူၼ်သၢမ်ပုၼ်ႈပုၼ်ႈၼိုင်ႈ၊လၢဝ်သၢမ်ပုၼ်ႈပုၼ်ႈၼိုင်ႈ၊လပ်းသိင်ႇၵႂႃႇဢေႃႈ။ ဢၼ်လႅင်းၵၢင်ဝၼ်းသၢမ်ပုၼ်ႈပုၼ်ႈၼိုင်ႈ၊ဢၼ်လႅင်းၵၢင်ၶိုၼ်းသၢမ်ပုၼ်ႈပုၼ်ႈၼိုင်ႈ၊ဢမ်ႇမီးယဝ်ႉဢေႃႈ။
ၵမ်းၼၼ်ႉ၊ၵဝ်တူၺ်းလႄႈငိၼ်းသဵင်ၼူၵ်ႉၶၢင်ႇလေႃႉ တူဝ်ၼိုင်ႈ၊မိၼ်ယူႇတီႈဢၼ်သုင်ၼႃႇၵႃႈၼိူဝ်ၽႃႉၵၢင်ႁၢဝ်ၼၼ်ႉလၢတ်ႈတင်းသဵင်ဢၼ်ယႂ်ႇၼႃႇလႄႈဝႃႈ၊ “ဢူဝ်း၊ၽေးဢၼ်လုလႅဝ်။ ၽေးဢၼ်လုလႅဝ်။ ၵူၼ်းၵႃႈၼိူဝ်လိၼ်မိူင်းတင်းလၢႆတၵ်းလုလႅဝ်ၼႃႇလူင်လၢင်ထၢၼ်ႇႁိုဝ်၊ၵွပ်ႈပိူဝ်ႈဝႃႈတမၢၼ်ႇၵၢင်ႁၢဝ်သၢမ်ပႃးဢၼ်ယင်းၵိုတ်းၵျၢၼ်ႇယူႇၼႆႉ၊ၶဝ်ၸမ်တၵ်းပဝ်ႇၼႄးၶရႃႇၶဝ်ယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊တမၢၼ်ႇၵၢင်ႁၢဝ်ပႃးတီႈႁႃႈပဝ်ႇၼႄးၶရႃႇမၼ်းလႄႈၵဝ်ႁၼ်လၢဝ်လုၵ်ႈၼိုင်ႈ၊တူၵ်းသႂ်ႇၵႃႈၼိူဝ်လိၼ်မိူင်းဢေႃႈ။ ၵၢၵ်ႇသေႃးႁူးၶုမ်ငရၢႆးၼၼ်ႉလႆႈၶၢမ်ႇတၢင်းဢၼ်ဢၢပ်ႈဝႆႉၵႃႈတီႈလၢဝ်ၼၼ်ႉဝႆႉယဝ်ႉ။-
လၢဝ်ၼၼ်ႉ၊မိူဝ်ႈဢၼ်ၽုၺ်ႇႁူးၶုမ်ငရၢႆးၼၼ်ႉ၊ၵႂၼ်းၽႆးဢွၵ်ႇႁူးၶုမ်ငရၢႆးမႃးထၢၼ်ႈပေႃးမိူၼ်ၸိူဝ်ႉၼင်ႇၵႂၼ်းတဝ်ႈၽႆးလူင်ဢေႃႈ။ ၵွပ်ႈပိူဝ်ႈၵႂၼ်းၽႆးဢၼ်ဢွၵ်ႇႁူးၶုမ်မႃးၼၼ်ႉလႄႈသၢႆလႅင်းၵၢင်ဝၼ်း၊ဢိၵ်ႇတင်းဢႃႇၵႃႇသႃႉၵၢင်ႁၢဝ်ၵၢမ်ႈမိုတ်ႈလပ်းသိင်ႇၵႂႃႇဢေႃႈ။-
မႅင်းၸၵ်းတႅၼ်တင်းလၢႆမိၼ်ဢွၵ်ႇသေၵႃႈၼႂ်းၵႂၼ်းၽႆးမႃးသေလႄႈလူင်းၸူးၵႃႈၼိူဝ်လိၼ်မိူင်းဢေႃႈ။ မႅင်းၸၵ်းတႅၼ်ၸိူဝ်းၼၼ်ႉလႆႈဢႃႇၼႃႇတၼ်းၶူဝ်းမိူၼ်ၸိူဝ်ႉၼင်ႇဢႃႇၼႃႇတၼ်းၶူဝ်းမႅင်းငေႃးၵႃႈၼိူဝ်လိၼ်မိူင်းၼႆႉဢေႃႈ။-
ၶဝ်ဢမ်ႇလႆႈဢၶႂၢင်ႉဢၼ်တၵ်းပၼ်ၽေးတုၵ်ႉၶႃႉတီႈပၢင်ႇယိူဝ်ႈယႃႈ၊ဢမ်ႇၼၼ်တီႈတူၼ်ႈမႆႉ၊ဢိၵ်ႇတင်းတီႈတူၼ်ႈဢၼ်လိပ်းဢၼ်ၶဵဝ်လႂ်ၸိူဝ်းၼၼ်ႉလႃးလႃးလႄႈၵူၺ်းလႆႈဢၶႂၢင်ႉဢၼ်တၵ်းပၼ်ၽေးတုၵ်ႉၶႃႉတီႈၶဝ်ၸိူဝ်းဢၼ်ဢမ်ႇလႆႈၶၢမ်ႇတၢင်းဢၼ်ဢဝ်တၼ်းသိၵ်ႈၽြႃးပဵၼ်ၸဝ်ႈတွၵ်ႇဝႆႉၵႃႈတီႈၼႃႈၽၢၵ်ႇၶဝ်ၸိူဝ်းၼၼ်ႉဢေႃႈ။-
မႅင်းၸၵ်းတႅၼ်ၸိူဝ်းၼၼ်ႉ၊ဢမ်ႇလႆႈဢၶႂၢင်ႉဢဝ်ၵူၼ်းၸိူဝ်းၼၼ်ႉတၢႆ။ တေလႆႈၼိၵ်ႈၸၢၵ်ႈငႅၼ်းသႄးၶဝ်ႁႃႈလိူၼ်ၵူၺ်းဢေႃႈ။ ဝူၺ်ႇတၼႃႇဢၼ်ၸဵပ်းၵႅၼ်းၼၼ်ႉ၊ပဵၼ်ၸိူဝ်ႉၼင်ႇဝူၺ်ႇတၼႃႇဢၼ်ၵွင်ႉမႅင်းငေႃးၸီႈၼၼ်ႉဢေႃႈ။-
ၼႂ်းၸူဝ်ႈႁႃႈလိူၼ်ၼၼ်ႉ၊ၵူၼ်းတင်းလၢႆတၵ်းသွၵ်ႈႁႃတၢင်းတၢႆဢေႃႈ။ သွၵ်ႈႁႃသေၵေႃႈဢမ်ႇထူပ်းလႆႈ။ ပိၵ်ႉသမ်ႉၶႂ်ႈတၢႆသေၵေႃႈၶုၼ်တၢႆတၵ်းလႅၼ်ႈပၢႆႈပႅတ်ႈၶဝ်ဢေႃႈ။
တူဝ်ႁၢင်ႈမႅင်းၸၵ်းတႅၼ်ၸိူဝ်းၼၼ်ႉ၊မိူၼ်ၸိူဝ်ႉၼင်ႇႁၢင်ႈၽၢင်မႃႉဢၼ်ႁၢင်ႈႁႅၼ်းဝႆႉ၊ပုၼ်ႈတၵ်းတိုၵ်းသိုၵ်းၼၼ်ႉလႄႈၵႃႈၼိူဝ်ႁူဝ်ၶဝ်ၵေႃႈ၊တိုဝ်းၶိူင်ႈပိူင်ဢၼ်မိူၼ်ၸိူဝ်ႉၼင်ႇသရၽူႇၶမ်းၼၼ်ႉဢေႃႈ။ ၼႃႈၶဝ်ၵေႃႈမိူၼ်ၸိူဝ်ႉၼင်ႇၼႃႈၵူၼ်းဢေႃႈ။-
ၶူၼ်ႁူဝ်ၶဝ်ၵေႃႈ၊မိူၼ်ၸိူဝ်ႉၼင်ႇၶူၼ်ႁူဝ်ၽူႈယိင်းဢေႃႈ။ ၶဵဝ်ႈၶဝ်သမ်ႉ၊မိူၼ်ၸိူဝ်ႉၼင်ႇၶဵဝ်ႈသၢင်ႇသီႈဢေႃႈ။-
ႁူဝ်ဢူၵ်းၶဝ်ၼၼ်ႉ၊မိူၼ်ၸိူဝ်ႉၼင်ႇၶႅပ်းလဵၵ်းဢၼ်ႁႄႉၼႃႈဢူၵ်းၼၼ်ႉလႄႈသဵင်ပိၵ်ႇၶဝ်ၼၼ်ႉၵေႃႈ၊မိူၼ်ၸိူဝ်ႉၼင်ႇသဵင်လေႃႉမႃႉသိုၵ်းၼမ်ၼႃႇဢၼ်ၶုၼ်ႇလႅၼ်ႈၵႂႃႇတိုၵ်းသိုၵ်းၼၼ်ႉဢေႃႈ။-
ႁၢင်ၶဝ်ၵေႃႈ၊မီးၵွင်ႉမိူၼ်ၸိူဝ်ႉၼင်ႇၵွင်ႉမႅင်းငေႃးလႄႈၶဝ်ဢဝ်တင်းႁၢင်ၶဝ်ၼၼ်ႉသေလႄႈပၼ်ၽေးတုၵ်ႉၶႃႉတီႈၵူၼ်းတင်းလၢႆႁႃႈလိူၼ်ဢေႃႈ။-
ၶုၼ်ႁေႃၶမ်းၶဝ်ၸမ်ႉ၊ပဵၼ်တမၢၼ်ႇဢၼ်ဢုပ်ႉပိူင်ႇႁူးၶုမ်ငရၢႆးၼၼ်ႉလႄႈၸိုဝ်ႈသဵင်မၼ်းၵႃႈၼႂ်းၵႂၢမ်း ႁေႇပြႄး၊ ၼၼ်ႉႁွင်ႉဝႃႈ၊ “ ဢႃႇပတ်ႉတုင်ႇ၊ ” ဝႃႈၼႆလႄႈ၊ၼႂ်းၵႂၢမ်း ၵရိၵ်ႉ၊ သမ်ႉႁွင်ႉဝႃႈ၊ “ ဢႃႇပေႃးလျုၼ်ႇ၊ ” (ဢၼ်ပွင်ႇဝႃႈ၊ “ ၶုၼ်ယႃႉလုယႃႉလႅဝ်၊ ”) ဝႃႈၼင်ႇၼႆဢေႃႈ။
ၽေးတၢင်းဢၼ်လုလႅဝ်မဵဝ်းၼိုင်ႈပူၼ်ႉၵႂႃႇယဝ်ႉလႄႈၵမ်းလိုၼ်းယင်းမီးၽေးတၢင်းဢၼ်လုလႅဝ်ထႅင်ႈသွင်မဵဝ်းဢၼ်တၵ်းႁွတ်ႈမႃးၼၼ်ႉလူးၵွၼ်ႇဢေႃႈ။
မိူဝ်ႈၼၼ်ႉတမၢၼ်ႇၵၢင်ႁၢဝ်ပႃးတီႈႁူၵ်းၼၼ်ႉ၊ပဝ်ႇၼႄးၶရႃႇမၼ်းလႄႈၵဝ်လႆႈငိၼ်းသဵင်လၢတ်ႈၵႂၢမ်းဢွၵ်ႇမႃးသေၵႃႈတီႈသီႇၸဵင်ႇၶဵင်ႇတၢင်းလူႇၶမ်းဢၼ်မီးၵႃႈတီႈၽၢႆႇၼႃႈၽြႃးပဵၼ်ၸဝ်ႈၼၼ်ႉသေယဝ်ႉ၊-
လၢတ်ႈတီႈတမၢၼ်ႇၵၢင်ႁၢဝ်ပႃးတီႈႁူၵ်းၼၼ်ႉလႄႈဝႃႈ၊ “ပွႆႇတမၢၼ်ႇၵၢင်ႁၢဝ်သီႇပႃးဢၼ်ၶၢမ်ႇတၢင်းဢၼ်မတ်ႉဝႆႉၵႃႈတီႈမႄႈၼမ်ႉလူင် ဢုၽရတ်ႉ၊ ၸိူဝ်းၼၼ်ႉလွတ်ႈတႃႉ၊” ဝႃႈၼင်ႇၼႆဢေႃႈ။-
ႁဵတ်းၼၼ်လႄႈတမၢၼ်ႇၵၢင်ႁၢဝ်သီႇပႃးၼၼ်ႉလႆႈလွတ်ႈလႄႈၶဝ်မႄးႁႅၼ်းဝႆႉပုၼ်ႈၶိင်ႇၼႃႇရီႇ၊ပုၼ်ႈဝၼ်း၊ပုၼ်ႈလိူၼ်၊ပုၼ်ႈပီၼၼ်ႉ၊ႁႂ်ႈလႆႈဢဝ်တၢႆၵူၼ်းတင်းလၢႆသၢမ်ပုၼ်ႈပုၼ်ႈၼိုင်ႈဢေႃႈ။-
ၵဝ်လႆႈငိၼ်းဝႃႈ၊တၢင်းဢၼ်ၼပ်ႉဢၢၼ်ႇၵူၼ်းသိုၵ်းၶီႇမႃႉၼၼ်ႉမီးသွင်ပၢၵ်ႇလၢၼ်ႉဢေႃႈ။-
ၵႃႈၼႂ်းပျႃႇတိၵ်ႈၼိမိၵ်ႈၵဝ်ၼၼ်ႉ၊ၵဝ်လႆႈႁၼ်မႃႉတင်းၵူၼ်းသိုၵ်းၶီႇမႃႉ၊ဢၼ်ၶႅပ်းႁႄႉၼႃႈဢူၵ်းၶဝ်လႅင်မိူၼ်ၽႆးလႄႈသွမ်ႇမိူၼ်ၼင်ႇသႅင်ၼီႇလႃႇ၊သမ်ႉလိူင်မိူၼ်ၼင်ႇၵၢၼ်ႉၼၼ်ႉဢေႃႈ။ ႁူဝ်မႃႉၸိူဝ်းၼၼ်ႉ၊မိူၼ်ၸိူဝ်ႉၼင်ႇႁူဝ်သၢင်ႇသီႈလႄႈၵႃႈၼႂ်းသူပ်းၶဝ်ၼၼ်ႉဢွၵ်ႇၽႆးဢွၵ်ႇၵႂၼ်း၊ဢိၵ်ႇတင်းဢွၵ်ႇၽႆးၵၢၼ်ႉယူႇဢေႃႈ။-
ၵူၼ်းတင်းလၢႆသၢမ်ပုၼ်ႈပုၼ်ႈၼိုင်ႈ၊လႆႈတၢႆလူၺ်ႈၽေးသၢမ်မဵဝ်းဢၼ်ပဵၼ်ၽေးၽႆး၊ၽေးၵႂၼ်းတင်းၽေးၽႆးၵၢၼ်ႉဢၼ်ဢွၵ်ႇသူပ်းမႃႉ၊မႃးၼၼ်ႉဢေႃႈ။-
လွင်ႈမၼ်းၸမ်ႉ၊ဢႃႇၼႃႇတၼ်းၶူဝ်းမႃႉၸိူဝ်းၼၼ်ႉ၊မီးၼႂ်းသူပ်းၶဝ်တင်းမီးၵႃႈတီႈႁၢင်ၶဝ်လႄႈႁၢင်ၶဝ်ၼၼ်ႉမိူၼ်ၸိူဝ်ႉၼင်ႇငူးတင်းလၢႆဢၼ်မီးႁူဝ်သေယဝ်ႉ၊ၶဝ်ဢဝ်တင်းႁၢင်ၶဝ်ၼၼ်ႉပၼ်ၽေးဢုပၢတ်ႈတီႈၵူၼ်းတင်းလၢႆဢေႃႈ။
ၵူၼ်းၸိူဝ်းဢၼ်ယင်းၵိုတ်းယင်းၵျၢၼ်ႇဝႆႉ၊ဢမ်ႇလႆႈတၢႆလူၺ်ႈၽေးဢုပၢတ်ႈၼၼ်ႉၸမ်ႉ၊ယင်းဢမ်ႇပႄႇပႅတ်ႈသေတၢင်းၵမ်တၢင်းၵျၢင်ႉၵဝ်ႇၶဝ်၊ယင်းဢမ်ႇပႄႇပႅတ်ႈသေတၢင်းဢၼ်ဝႆႈၽီလႂ်၊ဝႆႈႁုၼ်ႇႁၢင်ႈသၢင်းထုၶမ်း၊ဝႆႈႁုၼ်ႇႁၢင်ႈသၢင်းထုငိုၼ်း၊ဝႆႈႁုၼ်ႇႁၢင်ႈသၢင်းထုတွင်း၊ဝႆႈႁုၼ်ႇႁၢင်ႈသၢင်းထုမၢၵ်ႇႁိၼ်၊ဢိၵ်ႇတင်းဝႆႈႁုၼ်ႇႁၢင်ႈသၢင်းထုမႆႉ၊ဢၼ်ဢဝ်တင်းမိုဝ်းတူဝ်ၸဝ်ႈၵဝ်ႇႁဵတ်းလႄႈ၊ပဵၼ်ႁုၼ်ႇႁၢင်ႈသၢင်းထုဢၼ်ဢမ်ႇၸၢင်ႈႁၼ်၊ဢမ်ႇၸၢင်ႈငိၼ်း၊ဢမ်ႇၸၢင်ႈပႆလႆႈၸိူဝ်းၼၼ်ႉဢေႃႈ။-
ၶဝ်ယင်းဢမ်ႇၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်သေၵႃႈတီႈၼႂ်းတၢင်းဢၼ်ဢဝ်ဢသၢၵ်ႈၵူၼ်းတၢႆ၊တၢင်းဢၼ်ႁဵတ်းၽီမေႃႇ၊တၢင်းဢၼ်ႁဵတ်းၵိလေႇသႃႇဢၼ်ဢမ်ႇတြႃး၊တၢင်းဢၼ်လၵ်ႉဢၼ်လိူတ်ႇၸိူဝ်းၼၼ်ႉလႄႈယူႇဢေႃႈ။
မိူဝ်ႈၼၼ်ႉ၊တမၢၼ်ႇၵၢင်ႁၢဝ်ဢၼ်ႁႅင်းယႂ်ႇပႃးၼိုင်ႈ၊လုၵ်ႉသေၵႃႈၼိူဝ်ၵၢင်ႁၢဝ်လူင်းမႃးဢေႃႈ။ မၼ်းၼၼ်ႉ၊ၼုင်ႈမႆမွၵ်ႇၵုမ်ႈယူႇလႄႈဢဝ်ႁူင်းႁႆးၶဵၼ်းႁွပ်ႈႁူဝ်မၼ်းယူႇဢေႃႈ။ ၼႃႈမၼ်းႁိူဝ်ႈလႅင်းမိူၼ်ၸိူဝ်ႉၼင်ႇတႃဝၼ်းလႄႈတိၼ်မၼ်းမိူၼ်ၸိူဝ်ႉၼင်ႇမူၵ်ႇသဝ်ၽႆးဢေႃႈ။-
တီႈၼႂ်းမိုဝ်းမၼ်းမီးၵဵၼ်လိၵ်ႈဢွၼ်ႇဢၼ်ၽုၺ်ႇဝႆႉဢေႃႈ။ မၼ်းဢဝ်တိၼ်ၶွၼ်ၶႂႃမၼ်းယဵပ်ႇဝႆႉၵႃႈၼိူဝ်ပၢင်ႇလၢႆႇလႄႈတိၼ်ၶွၼ်သၢႆႉမၼ်းသမ်ႉယဵပ်ႇဝႆႉၵႃႈၼိူဝ်ၵုင်းသေယဝ်ႉ၊-
ႁွင်ႉပၢဝ်ႇလူၺ်ႈတင်းသဵင်ဢၼ်ယႂ်ႇၼႃႇ၊မိူၼ်ၼင်ႇသဵင်သၢင်ႇသီႈႁွင်ႉသႅၼ်ႇၼၼ်ႉဢေႃႈ။ မိူဝ်ႈဢၼ်မၼ်းႁွင်ႉသႅၼ်ႇယဝ်ႉၼၼ်ႉ၊မီးသဵင်ၽႃႉလင်ၶိုၼ်းတွပ်ႇမႃးၸဵတ်းၵမ်းဢေႃႈ။-
မိူဝ်ႈဢၼ်သဵင်ၽႃႉလင်ၸဵတ်းၵမ်းမေႃးလင်ယဝ်ႉၵႂႃႇၼၼ်ႉ၊ၵဝ်ငႃတၵ်းတႅမ်ႈဝႆႉဢေႃႈ။ ၵူၺ်းၵႃႈ၊ၵဝ်ငိၼ်းသဵင်လုၵ်ႉသေၵႃႈတီႈၵၢင်ႁၢဝ်လၢတ်ႈမႃးလႄႈဝႃႈ၊ “သဵင်လၢတ်ႈၽႃႉလင်ၸဵတ်းၵမ်းၼၼ်ႉ ဢဝ်သိူင်ႇဝႆႉဢမ်ဝႆႉတႃႉ။ ယႃႇပေတႅမ်ႈဝႆႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊တမၢၼ်ႇၵၢင်ႁၢဝ်ဢၼ်ၵဝ်ႁၼ်မၼ်းၸုၵ်းယူႇၵႃႈၼိူဝ်ပၢင်ႇလၢႆႇလႄႈၵႃႈၼိူဝ်ၵုင်းၼၼ်ႉ၊ဢဝ်မိုဝ်းၶွၼ်ၶႂႃမၼ်းယူၵ်ႉၶိုၼ်ႈၵႃႈၼိူဝ်ၽႃႉသေယဝ်ႉ၊-
တိူင်ႇၵၢဝ်ႇထိုင်ၼႃႇမႃႉၸိုဝ်ႈသဵင်ၸဝ်ႈၽြႃး၊ဢၼ်ဢသၢၵ်ႈလိပ်းယူႇၵူႈၵၢပ်ႈၵမ်ႇၽႃႇသိုပ်ႇသိုပ်ႇတၢမ်တၢမ်၊ၸဝ်ႈဢၼ်ၽၢၼ်ႇသၢင်းႁဵတ်းပဵၼ်ၸႃႉၸဵမ်ၵၢင်ႁၢဝ်တင်းလိၼ်မိူင်း၊ဢိၵ်ႇတင်းၼမ်ႉသမ်ႇမုၵ်ႈတြႃႇ၊ဢိၵ်ႇတင်းၵႃႈဢၼ်မီးၵႃႈၼႂ်းမၼ်းၵူႈၸိူဝ်ႉၵူႈပိူင်ၼၼ်ႉလႄႈဝႃႈ၊ “ယင်းဢမ်ႇႁႂ်ႈလႆႈထိူင်းလႆႈၼၢၼ်းလႄႈ၊-
ယၢမ်းမိူဝ်ႈဢၼ်တမၢၼ်ႇၵၢင်ႁၢဝ်ပႃးတီႈၸဵတ်း၊ၸမ်တၵ်းပဝ်ႇၼႄးၶရႃႇမၼ်းၼၼ်ႉၸိုင်၊ၽြႃးပဵၼ်ၸဝ်ႈတၵ်းႁႂ်ႈလွင်ႈတၢင်းဢၼ်မၼ်းၸဝ်ႈၶိုင်ပွင်ဝႆႉလိုၵ်ႉလိုၵ်ႉလမ်ႇလမ်ႇဢၼ်မၼ်းၸဝ်ႈမွၵ်ႇလၢတ်ႈဝႆႉတီႈ၊ၶႃႈမၼ်းၸဝ်ႈဢၼ်ဝႃႈ၊ပရေႃးၽႅတ်ႈ တင်းလၢႆၸိူဝ်းၼၼ်ႉ၊လႆႈပျေႉၸုမ်ႇဢမၢၼ်ႇၶၼ်ပဵၼ်ဢေႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊သဵင်ဢၼ်လုၵ်ႉၵႃႈၼိူဝ်ၵၢင်ႁၢဝ်လၢတ်ႈမႃးဢၼ်ၵဝ်လႆႈငိၼ်းၼၼ်ႉ၊သမ်ႉလၢတ်ႈတေႃႇၵဝ်ထႅင်ႈလႄႈဝႃႈ၊ “ၵႂႃႇယွၼ်းဢဝ်ၵဵၼ်လိၵ်ႈဢၼ်ၽုၺ်ႇဝႆႉဢၼ်မီးယူႇၵႃႈၼႂ်းမိုဝ်းတမၢၼ်ႇၵၢင်ႁၢဝ်၊ဢၼ်ၸုၵ်းယူႇၵႃႈၼႂ်းပၢင်ႇလၢႆႇလႄႈၵႃႈၼိူဝ်ၵုင်းၼၼ်ႉတႃႉ၊” ဝႃႈၼင်ႇၼႆဢေႃႈ။
ၵဝ်ၵေႃႈ၊ၵႂႃႇတီႈတမၢၼ်ႇၵၢင်ႁၢဝ်ၼၼ်ႉလႄႈယွၼ်းႁႂ်ႈမၼ်းပၼ်ၵဵၼ်လိၵ်ႈၼၼ်ႉတီႈၵဝ်ဢေႃႈ။ မၼ်းၵေႃႈလၢတ်ႈလႄႈဝႃႈ၊ “ဢဝ်လႄႈၵိၼ်တႃႉ။ တၵ်းႁႂ်ႈတွင်ႉမႂ်းၶူမ်ဢေႃႈ။ ၵူၺ်းၵႃႈ၊ၵႃႈၼႂ်းသူပ်းမႂ်းတၵ်းဝၢၼ်မိူၼ်ၸိူဝ်ႉၼင်ႇၼမ်ႉၽိုင်ႈဢေႃႈ၊” ဝႃႈၼင်ႇၼႆဢေႃႈ။
ၵဝ်ၵေႃႈဢဝ်ၵဵၼ်လိၵ်ႈဢွၼ်ႇဢၼ်မီးၵႃႈၼႂ်းမိုဝ်းမၼ်းၼၼ်ႉသေလႄႈၵိၼ်ဢေႃႈ။ ဢရႃႉသႃႇမၼ်းဝၢၼ်ၸိူဝ်ႉၼင်ႇၼမ်ႉၽိုင်ႈၵႃႈၼႂ်းသူပ်းၵဝ်လႄႈမိူဝ်ႈဢၼ်ဢိုၼ်ၵႂႃႇၼၼ်ႉ၊ၵႃႈၼႂ်းတွင်ႉၵဝ်ၶူမ်ၼႃႇဢေႃႈ။-
တမၢၼ်ႇၵၢင်ႁၢဝ်ၼၼ်ႉလၢတ်ႈတီႈၵဝ်လႄႈဝႃႈ၊ “မႂ်းၼႆႉသမ်ႉၶိုၼ်းတၵ်းလႆႈႁေႃးလၢတ်ႈၵႂၢမ်းတြႃးၽြႃးပဵၼ်ၸဝ်ႈထႅင်ႈတီႈၵူၼ်းၵူႈမိူင်းမိူင်း၊တီႈၵူၼ်းၵူႈၶိူဝ်းၶိူဝ်းဢၼ်လၢတ်ႈၵႂၢမ်းၽႃႇသႃႇၵူႈမဵဝ်းမဵဝ်း၊ဢိၵ်ႇတင်းတီႈၶုၼ်ႁေႃၶမ်းတင်းလၢႆဢေႃႈ၊” ဝႃႈၼင်ႇၼႆဢေႃႈ။
ၵမ်းၼၼ်ႉ၊ၵဝ်လႆႈႁပ်ႉဢဝ်မႆႉဢေႃႈလႅမ်ႈၼိုင်ႈ၊ဢၼ်မိူၼ်မႆႉတႅၵ်ႈၼၼ်ႉလႄႈသမ်ႉလႆႈၶၢမ်ႇဢဝ်ဢမိင်ႉလႄႈဝႃႈ၊ “ၵႂႃႇလႄႈတႅၵ်ႈၵျွင်းပိၵ်ႈမၢၼ်ႇၽြႃးပဵၼ်ၸဝ်ႈ၊တင်းၶဵင်ႇတၢင်းလူႇသေလႄႈၼပ်ႉဢၢၼ်ႇၵူၼ်းၸိူဝ်းဢၼ်ႁဵတ်းဝၢတ်ႈၵူဝ်းၵႂၢႆႇယူႇၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉတႃႉ။-
ယႃႇပေတႅၵ်ႈၸၢၼ်းၽၢႆႇတၢင်းၼွၵ်ႈမၼ်းၼၼ်ႉ။ ဝႆႉပႅတ်ႈသေတႃႉ။ လွင်ႈမၼ်းၸမ်ႉ၊ၸၢၼ်းၼၼ်ႉဢၢပ်ႈပၼ်တီႈၵူၼ်းတၢင်ႇၸိူဝ်ႉတၢင်ႇၶိူဝ်းၶဝ်ယဝ်ႉ။ ၶဝ်ၼၼ်ႉတၵ်းယဵပ်ႇယမ်ႈဝဵင်းမူတ်းၸၢင်ႇႁိုင်သီႇသိပ်းပၢႆသွင်လိူၼ်ဢေႃႈ။-
ၵဝ်တၵ်းပၼ်ဢႃႇၼႃႇတၼ်းၶူဝ်းတီႈၵေႃႉဢၼ်ၶၢမ်ႇသၢၵ်ႈသေႇပုၼ်ႈၵဝ်သွင်ၵေႃႉဢၼ်ၼုင်ႈၼင်ပေႃယူႇသေလႄႈႁေႃးလၢတ်ႈၵႂၢမ်းတြႃးၽြႃးပဵၼ်ၸဝ်ႈႁိုင်ၼိုင်ႈႁဵင်သွင်ပၢၵ်ႇပၢႆႁူၵ်းသိပ်းဝၼ်းၼၼ်ႉဢေႃႈ၊” ဝႃႈၼင်ႇၼႆဢေႃႈ။
ၽူႈဢၼ်ၶၢမ်ႇသၢၵ်ႈသေႇသွင်ၵေႃႉၼၼ်ႉ၊ပဵၼ်တူၼ်ႈသၢၼ်ႇလုၼ်ႇသွင်တူၼ်ႈတင်းၵၼ်းတႆႈၽႆးသွင်ဢၼ်၊ဢၼ်ပူၵ်းတင်ႈဝႆႉၵႃႈတီႈၽၢႆႇၼႃႈၽြႃးဢၼ်ပဵၼ်ၸဝ်ႈလိၼ်မိူင်းၼၼ်ႉဢေႃႈ။-
ပေႃးသေၵေႃႉသေၵူၼ်းဢၢင်ႈၶႂ်ႈႁဵတ်းၽေးဢုပၢတ်ႈသႂ်ႇၶဝ်ၸိုင်၊ၽႆးတၵ်းဢွၵ်ႇသေၵႃႈၼႂ်းသူပ်းၶဝ်သွင်ၵေႃႉမႃးလႄႈယႃႉပႅတ်ႈရၢၼ်ႇသူႇၶဝ်တင်းလၢႆဢေႃႈ။ ႁဵတ်းၸိူဝ်ႉၼင်ႇၼၼ်လႄႈၵေႃႉဢၼ်ဢၢင်ႈၶႂ်ႈႁဵတ်းၽေးဢုပၢတ်ႈသႂ်ႇၶဝ်ၼၼ်ႉ၊တၵ်းလႆႈၶၢမ်ႇတၢင်းဢၼ်ဢဝ်တၢႆဢေႃႈ။-
ၶဝ်ၼၼ်ႉ၊လႆႈဢၶႂၢင်ႉဢႃႇၼႃႇဢၼ်ဢိုတ်းတွင်ႉၽႃႉဝႆႉ၊ဢမ်ႇႁႂ်ႈၽူၼ်လႆႈတူၵ်းၸူဝ်ႈၶိင်ႇဢၼ်ၶဝ်ႁေႃးလၢတ်ႈၶၢဝ်ႇတြႃး၊ၽြႃးပဵၼ်ၸဝ်ႈယူႇ၊ဢိၵ်ႇတင်းဢၶႂၢင်ႉဢႃႇၼႃႇဢၼ်ႁႂ်ႈၼမ်ႉဢွၵ်ႇႁူးတင်းလၢႆ၊ပိၼ်ႇပဵၼ်လိူတ်ႈၵႂႃႇ၊ဢိၵ်ႇတင်းဢၶႂၢင်ႉဢႃႇၼႃႇဢၼ်ဢဝ်ၽေးတၢမ်ႇၵူႈၸိူဝ်ႉၵူႈပိူင်တူၵ်းသႂ်ႇၵႃႈၼိူဝ်လိၼ်မိူင်းၸွမ်းၼင်ႇဢလူဝ်ႇၸႂ်ၶဝ်ၶႂ်ႈႁဵတ်းၼၼ်ႉဢေႃႈ။
မိူဝ်ႈဢၼ်ၶဝ်ႁေႃးတြႃးၸဝ်ႈယဝ်ႉတူဝ်ႈလီငၢမ်းၼၼ်ႉၸိုင်၊တူဝ်ထိူၼ်ႇႁၢႆႉဢၼ်ဢွၵ်ႇႁူးၶုမ်ငရၢႆးမႃးၼၼ်ႉ၊တၵ်းတိုၵ်းတေႃးၶဝ်လႄႈပႄႉၼႅင်ႇသေယဝ်ႉ၊ဢဝ်ၶဝ်တၢႆပႅတ်ႈဢေႃႈ။-
တူဝ်တၢႆၶဝ်ၼၼ်ႉ၊တၵ်းဢဝ်ဝၢင်းဝႆႉၵႃႈၼိူဝ်ၶူၼ်တၢင်းဝဵင်းလူင်တီႈဢၼ်ၸဝ်ႈၶဝ်ၶၢမ်ႇတၢႆၵႃႈၼိူဝ်သဝ်မႆႉဝႃးမိုဝ်းၼၼ်ႉဢေႃႈ။ ဢၼၢၵ်ႈဢထိၵ်ႈပႄႇဝဵင်းလူင်ၼၼ်ႉၶႂ်ႈဝႃႈ၊မိူင်း သေႃးတုမ်ႇ၊ ဢမ်ႇၼၼ်မိူင်း ဢေးၵျိပ်ႉ၊ ဢေႃႈ။-
ၵူၼ်းလၢႆၸိူဝ်ႉၸၢတ်ႈ၊ၵူၼ်းလၢႆမဵဝ်း၊ၵူၼ်းလၢႆၽႃႇသႃႇ၊ၵူၼ်းလၢႆမိူင်း၊တၵ်းဢွၼ်ၵၼ်လူတူၺ်းတူဝ်တၢႆၶဝ်သၢမ်ဝၼ်းပၢႆၶိုင်ႈတဵမ်တဵမ်သေလႄႈတၵ်းတေဢမ်ႇပၼ်ဢၶႂၢင်ႉႁႂ်ႈဢဝ်တူဝ်တၢႆၸိူဝ်းၼၼ်ႉ ၵႂႃႇၽင်ၵႃႈတီႈပႃႇႁဵဝ်ႈဢေႃႈ။-
ၵူၼ်းၵႃႈ၊ၼိူဝ်လိၼ်မိူင်းတင်းလၢႆတၵ်းၸူမ်းသိူဝ်းမူၼ်ႈပျေႃႇၵွပ်ႈပိူဝ်ႈၶဝ်တၢႆၼၼ်ႉလႄႈတၵ်းဢွၼ်ၵၼ်ႁဵတ်းပွႆး၊ၵေႃႉၼိုင်ႈလႄႈၵေႃႉၼိုင်ႈပၼ်ၶွင်ၽၢၵ်ႇလၢၵ်ႈသွင်ႇတီႈၵၼ်၊ၵွပ်ႈပိူဝ်ႈပရေႃးၽႅတ်ႈ သွင်ၵေႃႉၼႆႉလႆႈပၼ်ၽေးတုၵ်ႉၶႃႉတီႈၵူၼ်းလေႃးၵီႇတင်းလၢႆၼႃႇလူင်လၢင်ၼၼ်ႉဢေႃႈ။-
ဝၢႆးသေသၢမ်ဝၼ်းပၢႆၶိုင်ႈတဵမ်တဵမ်ယဝ်ႉၼၼ်ႉၸိုင်၊ၸီႇဝႃႉဢသၢၵ်ႈလုၵ်ႉသေၵႃႈတီႈၽြႃးပဵၼ်ၸဝ်ႈမႃးသေလႄႈၶဝ်ႈၵႃႈၼႂ်းတူဝ်ၶဝ်သေယဝ်ႉ၊ၶဝ်ၵေႃႈလုၵ်ႉၶိုၼ်ႈမႃးဢေႃႈ။ ၵူၼ်းၸိူဝ်းဢၼ်ႁၼ်ၵႃႈမီးတင်းသဵင်ႈတင်းလူင်ၼၼ်ႉၵူဝ်ႁႄၼႃႇလူင်လၢင်ဢေႃႈ။-
မိူဝ်ႈၼၼ်ႉ၊ပရေႃးၽႅတ်ႈသွင်ၵေႃႉၼၼ်ႉလႆႈငိၼ်းသဵင်ဢၼ်ယႂ်ႇၼႃႇဢၼ်လုၵ်ႉသေၵႃႈတီႈၵၢင်ႁၢဝ်လၢတ်ႈတေႃႇၶဝ်လႄႈဝႃႈ၊ “ၶိုၼ်ႈမႃးၵႃႈတီႈၼႆႈတႃႉ၊” ဝႃႈၼင်ႇၼႆလႄႈ၊မိူဝ်ႈဢၼ်ရၢၼ်ႇသူႇတင်းလၢႆပႂ်ႉတူၺ်းယူႇၼၼ်ႉ၊ၶဝ်သွင်ၵေႃႉၶိုၼ်ႈၵႃႈၼိူဝ်ၵၢင်ႁၢဝ်ၵႂႃႇၸွမ်းၵႃႈၼႂ်းမွၵ်ႇၵုမ်ႈသေဢေႃႈ။-
ၼႂ်းၶိင်ႇၼၼ်ႉၵမ်းလဵဝ်၊ဢိင်ႇသၼ်ႇၼႃႇလူင်လၢင်လႄႈဝဵင်းလူင်ၼၼ်ႉသိပ်းပုၼ်ႈပုၼ်ႈၼိုင်ႈ၊လူမ်ႉပင်းၵႂႃႇဢိၵ်ႇတင်းၵူၼ်းၸဵတ်းႁဵင်တၢႆၵႂႃႇဢေႃႈ။ ၶဝ်ၸိူဝ်းဢၼ်ၵိုတ်းၵျၢၼ်ႇယူႇၼၼ်ႉ၊ၵူဝ်ႁႄၼႃႇလူင်လၢင်လႄႈဢွၼ်ၵၼ်ယွင်ႈယေႃးတၢင်းဢၼ်ယႂ်ႇမျၢတ်ႈၽြႃးပဵၼ်ၸဝ်ႈ၊ၸဝ်ႈၵၢင်ႁၢဝ်ယူႇဢေႃႈ။
ၽေးတၢင်းဢၼ်လုလႅဝ်ပွၵ်ႈသွင်ၼၼ်ႉပူၼ်ႉၵႂႃႇယဝ်ႉ။ ၽေးတၢင်းဢၼ်လုလႅဝ်ပွၵ်ႈသၢမ်ၵေႃႈ၊တၵ်းၸဵဝ်းႁွတ်ႈမႃးဢေႃႈ။
မိူဝ်ႈၼၼ်ႉ၊တမၢၼ်ႇၵၢင်ႁၢဝ်ပႃးတီႈၸဵတ်းၼၼ်ႉပဝ်ႇၼႄးၶရႃႇမၼ်းလႄႈသဵင်ယႂ်ႇသဵင်လူင်ၼမ်ၼႃႇလုၵ်ႉသေၵႃႈတီႈၵၢင်ႁၢဝ်လင်မေႃးမႃးလႄႈလၢတ်ႈဝႃႈ၊ “ဢႃႇၼႃႇတၼ်းၶူဝ်းဢၼ်လႆႈဢုပ်ႉပိူင်ႇလေႃးၵႃႉၼႆႉၼၼ်ႉ၊ပဵၼ်ၶွင်ၸဝ်ႈၽြႃးႁဝ်းဢိၵ်ႇတင်းၶွင် ၸဝ်ႈၶရိၸ်ႈ၊ မၼ်းၸဝ်ႈၼၼ်ႉယဝ်ႉလႄႈမၼ်းၸဝ်ႈတၵ်းဢုပ်ႉပိူင်ႇၵူႈၵၢပ်ႈၵမ်ႇၽႃႇသိုပ်ႇသိုပ်ႇတၢမ်တၢမ်ဢေႃႈ၊” ဝႃႈၼင်ႇၼႆဢေႃႈ။-
ၵမ်းၼၼ်ႉ၊ၵူၼ်းဢၼ်ဢသၢၵ်ႈယႂ်ႇသၢဝ်းသီႇၵေႃႉ၊ဢၼ်ၼင်ႈယူႇၵႃႈၼိူဝ်ပလၢင်ႇၶဝ်ဢၼ်ယူႇၽၢႆႇၼႃႈၽြႃးပဵၼ်ၸဝ်ႈၼၼ်ႉ၊ဢွၼ်ၵၼ်ၶုပ်ႉမူပ်ႇဝႆႈသႃၵူဝ်းၵႂၢႆႇၽြႃးပဵၼ်ၸဝ်ႈသေလႄႈ၊-
ဢွၼ်ၵၼ်လဝ်ႈလၢတ်ႈလႄႈဝႃႈ၊ “ၸဝ်ႈထႃႇဝရႃႉၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ ၸဝ်ႈဢၼ်မီးယူႇမိူဝ်ႈပိတ်ႈၸုပၢၼ်ႇ၊ၸဝ်ႈဢၼ်မီးမႃးမိူဝ်ႈဢတိၵ်ႈၵႃႇလႃႉၼၼ်ႉတီႈၶႃႈ႟၊ ၵွပ်ႈပိူဝ်ႈၸဝ်ႈႁဝ်းဢဝ်မႁႃႇတၼ်းၶူဝ်းၸဝ်ႈႁဝ်းသေလႄႈဢုပ်ႉပိူင်ႇၸၢမ်ႇၸႃးၼၼ်ႉ၊ ႁဝ်းၶႃႈယွင်ႈယေႃးတၢင်ႇၵျေးၸူးၸဝ်ႈႁဝ်းတီႈၶႃႈဢေႃႈ။
ၵွပ်ႈပိူဝ်ႈၶိင်ႇၵႃႇလႃႉတၢင်းဢၼ်ၸႂ်မႆႈၶႂ်ႈၸႃႉ ၸဝ်ႈႁဝ်း၊ ဢိၵ်ႇတင်းၶိင်ႇၵႃႇလႃႉဢၼ်ၵူၼ်းတၢႆတင်းလၢႆ၊လႆႈၶၢမ်ႇၸီႇယၢင်ႇတြႃးႁွတ်ႈမႃးၼၼ်ႉ၊ ၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းတင်းလၢႆ၊တဵမ်ဝႆႉတင်းၸႂ်လမ်သႆႈၵမ်ႇတီႈၶႃႈဢေႃႈ။ ၶိင်ႇၵႃႇလႃႉဢၼ်တၵ်းဢဵတ်းလူလႄႈႁဵတ်းၵျေးၸူးပၼ်တီႈၶႃႈၵူၼ်းၸႂ်ႉ၊ၸဝ်ႈႁဝ်းတင်းလၢႆ၊ ဢိၵ်ႇတင်းတီႈပရေႃးၽႅတ်ႈတင်းလၢႆ၊ဢိၵ်ႇတင်းတီႈၵူၼ်းၸဝ်ႈႁဝ်းတင်းလၢႆ၊ ၸိူဝ်းဢၼ်ရူဝ်ႇသေႇၵူဝ်ယမ်ၸဝ်ႈႁဝ်းၵႃႈမီးတင်းသဵင်ႈတင်းလူင်၊ လဵၵ်ႉလဵၵ်ႉယႂ်ႇယႂ်ႇမိူၼ်မိူၼ်ၵၼ်ၼၼ်ႉ၊ႁွတ်ႈမႃးယဝ်ႉတီႈၶႃႈဢေႃႈ။ ၶိင်ႇၵႃႇလႃႉဢၼ်တၵ်းယႃႉၽဵဝ်ႈပႅတ်ႈၶဝ်ၸိူဝ်းဢၼ်မႃးယႃႉၽဵဝ်ႈပႅတ်ႈလိၼ်မိူင်းၼႆႉၼၼ်ႉၵေႃႈ၊ ႁွတ်ႈမႃးယဝ်ႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
ၵႃႈၼႂ်းမိူင်းၵၢင်ႁၢဝ်ၼၼ်ႉ၊ၵျွင်းပိၵ်ႈမၢၼ်ႇၽြႃးပဵၼ်ၸဝ်ႈၽုၺ်ႇဝႆႉလႄႈတိူၵ်ႈပတိၺိၺ်ႇမၼ်းၸဝ်ႈၵေႃႈလႆႈႁၼ်ထၢင်ႇသႃးမီးယူႇၵႃႈတီႈၼၼ်ႈဢေႃႈ။ မိူဝ်ႈၼၼ်ႉတၢင်းဢၼ်ၽႃႉမႅပ်ႈ၊ၽႃႉမေႃးၽႃႉလင်၊ဢိင်ႇသၼ်ႇဢိၵ်ႇတင်းၽူၼ်မၢၵ်ႇႁဵပ်းလူင်တူၵ်းၼၼ်ႉၵေႃႈပေႃႇပဵၼ်မႃးဢေႃႈ။
မိူဝ်ႈၼၼ်ႉ၊ၼိမိၵ်ႈလၢၵ်ႈၶၼႃႇဢၼ်လီဢၢမ်းၼႃႇပေႃႇပဵၼ်မႃးၵႃႈတီႈတွင်ႉၽႃႉဢေႃႈ။ မီးၽူႈယိင်းၵေႃႉၼိုင်ႈ၊ၼုင်ႈမႆတႃဝၼ်းသေလႄႈလိူၼ်မီးၵႃႈတီႈတႂ်ႈတိၼ်မၼ်း၊ၵႃႈတီႈႁူဝ်မၼ်းၼၼ်ႉၵေႃႈ၊တိုဝ်းသရၽူႇဢၼ်ဢဝ်လၢဝ်သိပ်းသွင်လုၵ်ႈႁဵတ်းဝႆႉၼၼ်ႉဢေႃႈ။-
မၼ်းၼၼ်ႉ၊ၸမ်တၵ်းၵိူတ်ႇလဵင်ႉလုၵ်ႈလႄႈ ႁွင်ႉသႅၼ်ႇၵွပ်ႈပိူဝ်ႈလႆႈၶၢမ်ႇဝူၺ်ႇတၼႃႇဢၼ်ၸဵပ်းႁႅင်းၼႃႇလူင်လၢင်ၼၼ်ႉဢေႃႈ။
ၼိမိၵ်ႈလၢၵ်ႈၶၼႃႇတၢင်ႇဢၼ်ၵေႃႈ၊ပေႃႇပဵၼ်မႃးၵႃႈတီႈတွင်ႉၽႃႉဢေႃႈ။ မီးၼၵႃးလူင်ဢၼ်လႅင်ၸၢင်းႁၢင်းတူဝ်ၼိုင်ႈၼၼ်ႉ၊မီးႁူဝ်ၸဵတ်းႁူဝ်တင်းၶဝ်သိပ်းလႅမ်ႈသေယဝ်ႉ၊ၵႃႈၼိူဝ်မၼ်းၸိူဝ်းၼၼ်ႉတိုဝ်းသရၽူႇဝႆႉယေႈႁူဝ်ယေႈဢၼ်ဢေႃႈ။-
မၼ်းဢဝ်ႁၢင်မၼ်းတိုတ်ႉၸၼ်ဢဝ်လၢဝ်ၵၢင်ႁၢဝ်သၢမ်ပုၼ်ႈပုၼ်ႈၼိုင်ႈသေလႄႈထိမ်ႈတူၵ်းသႂ်ႇၵႃႈၼိူဝ်လိၼ်မိူင်းဢေႃႈ။ မၼ်းၸုၵ်းပႂ်ႉထႃႈယူႇၵႃႈတီႈၽၢႆႇၼႃႈၽူႈယိင်းၼၼ်ႉ၊ႁႂ်ႈလႆႈၶူပ်းၵိၼ်လုၵ်ႈဢွၼ်ႇယၢမ်းမိူဝ်ႈဢၼ်လုၵ်ႈဢွၼ်ႇၵိူတ်ႇလဵင်ႉမႃးၵမ်းလဵဝ်ၼၼ်ႉဢေႃႈ။-
မိူဝ်ႈၼၼ်ႉၽူႈယိင်းၼၼ်ႉ၊ၵိူတ်ႇလဵင်ႉမႃးလုၵ်ႈၸၢႆးၵေႃႉဢၼ်တၵ်းဢဝ်တင်းၵၼ်းႁွၵ်ႇလဵၵ်းဢုပ်ႉပိူင်ႇၵႃႈၼိူဝ်ၵူၼ်းမဵဝ်းတင်းလၢႆၼၼ်ႉဢေႃႈ။ လုၵ်ႈဢွၼ်ႇလႅင်ၼၼ်ႉၸိုင်၊လႆႈၶၢမ်ႇတၢင်းဢၼ်ႁိမ်ႁူင်ႇဢဝ်ၵႂႃႇၵႃႈတီႈၽြႃးပဵၼ်ၸဝ်ႈ၊ဢိၵ်ႇတင်းၵႃႈတီႈပလၢင်ႇၸဝ်ႈၼၼ်ႉဢေႃႈ။-
ၽူႈယိင်းၼၼ်ႉၸမ်ႉ၊ပၢႆႈၵႂႃႇၸူးၵႃႈတီႈထိူၼ်ႇလႅင်ႉတီႈဢၼ်ၽြႃးပဵၼ်ၸဝ်ႈမႄးႁႅၼ်းဝႆႉပုၼ်ႈမၼ်းႁႂ်ႈလႆႈၶၢမ်ႇဢဝ်တၢင်းဢၼ်လုမ်းလႃးလဵင်ႉလူဝႆႉ၊ၼိုင်ႈႁဵင်သွင်ပၢၵ်ႇပၢႆႁူၵ်းသိပ်းဝၼ်းဢေႃႈ။
မိူဝ်ႈၼၼ်ႉ၊ၵႃႈၼႂ်းၵၢင်ႁၢဝ်ပဵၼ်သိုၵ်းၵၼ်လႄႈ မိၵ်ႉၶေႇလႃႉ၊ ဢိၵ်ႇတင်းတမၢၼ်ႇၵၢင်ႁၢဝ်မၼ်းတင်းလၢႆတိုၵ်းတေႃးၵၼ်တင်းၼၵႃးဢေႃႈ။ ၼၵႃးၵေႃႈ၊ပႃးဢဝ်တင်းတမၢၼ်ႇၵၢင်ႁၢဝ်မၼ်းတင်းလၢႆၶိုၼ်းတိုၵ်းတေႃးဢေႃႈ။-
ၵူၺ်းၵႃႈ၊ၼၵႃးၼၼ်ႉသုမ်းသိုၵ်းလႄႈမၼ်းဢိၵ်ႇတင်းတမၢၼ်ႇမၼ်းတင်းလၢႆဢမ်ႇမီးဢၶႂၢင်ႉတႃႇတေလႆႈယူႇသဝ်းၵႃႈၼိူဝ်ၵၢင်ႁၢဝ်ၼၼ်ႉယဝ်ႉဢေႃႈ။-
ၼၵႃးလူင်ဢၼ်ဝႃႈ၊ငူးၵဝ်ႇၵဝ်ႇလူင်မိူဝ်ႈၵွၼ်ႇၵွၼ်ႇၼၼ်ႉ၊မီးၸိုဝ်ႈဢၼ်ႁွင်ႉႁဵၵ်ႈဝႃႈ၊ ၸႃႇတၢၼ်ႇမႃႇၼၢတ်ႈ၊ ဢၼ်ပႅတ်ႉလႅၼ်ၵူၼ်းလေႃးၵီႇတင်းသဵင်ႈတင်းမူတ်းၼၼ်ႉ၊လႆႈၶၢမ်ႇတၢင်းဢၼ်ထိမ်ႈတူၵ်းသႂ်ႇၵႃႈၼိူဝ်လိၼ်မိူင်းလူၺ်ႈၵၼ်တင်းတမၢၼ်ႇမၼ်းတင်းလၢႆဢေႃႈ။
ၵမ်းၼၼ်ႉ၊ၵဝ်လႆႈငိၼ်းသဵင်ယႂ်ႇသဵင်လူင်လုၵ်ႉသေၵႃႈတီႈၵၢင်ႁၢဝ်လၢတ်ႈမႃးလႄႈဝႃႈ၊ “တေႃႈလဵဝ်ၼႆႉတၢင်းၵႄႇၶျွတ်ႈၽြႃးပဵၼ်ၸဝ်ႈႁွတ်ႈမႃးယဝ်ႉ။ တေႃႈလဵဝ်ၼႆႉၽြႃးပဵၼ်ၸဝ်ႈလႆႈၼႄပျႃးၽုင်းတၼ်းၶူဝ်းမၼ်းၸဝ်ႈဢၼ်ပဵၼ်ၶုၼ်ႁေႃၶမ်းၼၼ်ႉယဝ်ႉ။ တေႃႈလဵဝ်ၼႆႉ ၸဝ်ႈမေႇသိ၊ ၵေႃႈလႆႈၼႄပျႃးဢႃႇၼႃႇၸၢၵ်ႈမၼ်းၸဝ်ႈယဝ်ႉဢေႃႈ။ ရၢၼ်ႇသူႇဢၼ်ၸုၵ်းယူႇၵႃႈတီႈၽၢႆႇၼႃႈၽြႃးပဵၼ်ၸဝ်ႈႁဝ်းသေလႄႈတၢင်ႇဢပျတ်ႈတီႈပီႈၼွင်ႉႁဝ်းယူႇဝၼ်းဝၼ်းၶိုၼ်းၶိုၼ်းၼၼ်ႉ၊လႆႈၶၢမ်ႇတၢင်းဢၼ်ထိမ်ႈတူၵ်းပႅတ်ႈၵႃႈတႂ်ႈယဝ်ႉဢေႃႈ။-
ပီႈၼွင်ႉႁဝ်းၸိူဝ်းၼၼ်ႉ၊ပႄႉၼႅင်ႇမၼ်းၵွပ်ႈလူၺ်ႈလိူတ်ႈသူဝ်းဢွၼ်ႇၸဝ်ႈ၊ဢိၵ်ႇတင်းၵွပ်ႈလူၺ်ႈၵႂၢမ်းဢၼ်ၶဝ်ၶၢမ်ႇသၢၵ်ႈသေႇၼၼ်ႉသေလႄႈယင်းဢမ်ႇသေလၢႆဢသၢၵ်ႈတူဝ်ၸဝ်ႈၵဝ်ႇပုၼ်ႈတၵ်းလႆႈၶၢမ်ႇတၢႆၼၼ်ႉဢေႃႈ။-
ပိူဝ်ႈၼႆလႄႈၸႃႉၸဵမ်မိူင်းၵၢင်ႁၢဝ်ဢိၵ်ႇတင်းၶဝ်ၸိူဝ်းဢၼ်ယူႇၵႃႈတီႈမိူင်းၵၢင်ႁၢဝ်တင်းသဵင်ႈတင်းမူတ်းၶဝ်႟။ ဢွၼ်ၵၼ်သႂၢင်ႇသိူဝ်းတႃႉ။ လိၼ်မိူင်းတင်းပၢင်ႇလၢႆႇၸမ်ႉ၊မီးဢႃႉမၢင်ႇၵလႃႇဢေႃႈ။ လွင်ႈမၼ်းၸမ်ႉ၊မႃႇၼၢတ်ႈၼၼ်ႉပိူဝ်ႈဢၼ်မၼ်းႁုလွင်ႈဢၼ်မၼ်းမီးဢၶိင်ႇဢိတ်းဢွၼ်ႇၼိုင်ႈၵူၺ်းလႄႈမၼ်းပႃးတင်းတေႃးသႃႉၸႂ်လမ်သႆႈၵမ်ႇၼႃႇသေလႄႈလူင်းၸူးၵႃႈတီႈသူယဝ်ႉ၊” ဝႃႈၼင်ႇၼႆဢေႃႈ။
ၼၵႃးၼၼ်ႉ၊မိူဝ်ႈဢၼ်မၼ်းႁုလွင်ႈဢၼ်တူဝ်မၼ်းလႆႈၶၢမ်ႇတၢင်းဢၼ်ထိမ်ႈတူၵ်းပႅတ်ႈၵႃႈၼိူဝ်လိၼ်မိူင်းၼၼ်ႉၸိုင်၊မၼ်းၵေႃႈလိုပ်ႈလမ်းၸွမ်းၽူႈယိင်းဢၼ်ၵိူတ်ႇလဵင်ႉလုၵ်ႈၸၢႆးၼၼ်ႉဢေႃႈ။-
ၵူၺ်းၵႃႈ၊ၽူႈယိင်းၼၼ်ႉလႆႈႁပ်ႉဢဝ်ပိၵ်ႇၼူၵ်ႉၶၢင်ႇလေႃႉ လူင်သွင်ပိၵ်ႇ၊ႁႂ်ႈလႆႈမိၼ်ပၢႆႈၵႂႃႇၵႃႈတီႈထိူၼ်ႇလႅင်ႉၵႃႈတီႈဢၼ်မၼ်းတၵ်းလႆႈၶၢမ်ႇဢဝ်တၢင်းဢၼ်လုမ်းလႃးလဵင်ႉလူသၢမ်ပီပၢႆၶိုင်ႈတဵမ်တဵမ်၊ပုၼ်ႈတၵ်းၵၢင်းလွတ်ႈၽေးဢၼ်ၼၵႃးတိုၵ်းတေႃးၼၼ်ႉဢေႃႈ။-
မိူဝ်ႈၼၼ်ႉ၊ၼၵႃးၽူႇၼမ်ႉဢွၵ်ႇသူပ်းမၼ်းမႃးမိူၼ်ၸိူဝ်ႉၼင်ႇၼမ်ႉႁွင်ႈလူင်လႆၵႂႃႇၸွမ်းၽၢႆႇလင်ၽူႈယိင်းၼၼ်ႉပုၼ်ႈတၵ်းႁႂ်ႈႁႅင်းၼမ်ႉၼၼ်ႉလႆပႃးဢဝ်တူဝ်မၼ်းၵႂႃႇဢေႃႈ။-
ၵူၺ်းၵႃႈ၊လိၼ်မိူင်းၸွႆႈထႅမ်ၽူႈယိင်းၼၼ်ႉလူၺ်ႈတၢင်းဢၼ်ဢႃႈသူပ်းသေလႄႈ ဢိုၼ်ၵိၼ်ပႅတ်ႈၼမ်ႉဢၼ်ၼၵႃးၽူႇဢွၵ်ႇမႃးၼၼ်ႉဢေႃႈ။-
ၼၵႃးၵေႃႈ၊ၸႂ်မႆႈတေႃးသႃႉတီႈၽူႈယိင်းၼၼ်ႉသေလႄႈဢွၵ်ႇၵႂႃႇတိုၵ်းတေႃးၵၼ်တင်းၸိူဝ်ႉၶိူဝ်းၽူႈယိင်း၊ဢၼ်ပဵၼ်၊ၶဝ်ၸိူဝ်းဢၼ်ပႂ်ႉၵမ်ပႂ်ႉၸွမ်းပိင်းၺၢပ်ႈတြႃး၊ၽြႃးပဵၼ်ၸဝ်ႈသေလႄႈပႂ်ႉၸွမ်းၵႂၢမ်းသၢၵ်ႈသေႇဢၼ် ၸဝ်ႈယေႇသု၊ ႁေႃးလၢတ်ႈၸိူဝ်းၼၼ်ႉဢေႃႈ။-
ၼၵႃးၼၼ်ႉၵေႃႈ၊ၸုၵ်းပႂ်ႉထႃႈယူႇၵႃႈၼိူဝ်ၽင်ႇပၢင်ႇလၢႆႇယူႇဢေႃႈ။
ၵဝ်လႆႈႁၼ်တူဝ်ထိူၼ်ႇႁၢႆႉတူဝ်ၼိုင်ႈ၊ဢွၵ်ႇသေၵႃႈတီႈပၢင်ႇလၢႆႇမႃးဢေႃႈ။ မၼ်းၼၼ်ႉမီးႁူဝ်ၸဵတ်းႁူဝ်၊ဢိၵ်ႇတင်းမီးၶဝ်သိပ်းလႅမ်ႈလႄႈ၊ၵႃႈၼိူဝ်ၶဝ်ယေႈလႅမ်ႈၼၼ်ႉတိုဝ်းသရၽူႇဝႆႉယေႈဢၼ်သေ၊ၵႃႈၼိူဝ်ႁူဝ်ယေႈႁူဝ်သမ်ႉတႅမ်ႈဝႆႉၸိုဝ်ႈသဵင်ဢၼ်ယႃႉသရေႇၽြႃးပဵၼ်ၸဝ်ႈၼၼ်ႉဢေႃႈ။-
တူဝ်ထိူၼ်ႇႁၢႆႉၼၼ်ႉ မိူၼ်ၸိူဝ်ႉၼင်ႇသိူဝ်ၸုမ်ႈလႄႈတိၼ်မၼ်းမိူၼ်ၸိူဝ်ႉၼင်ႇတိၼ်မီဝႆႉ၊သူပ်းမၼ်းၵေႃႈမိူၼ်ၸိူဝ်ႉၼင်ႇသူပ်းသၢင်ႇသီႈဢေႃႈ။ ၼၵႃးၼၼ်ႉဢဝ်တၼ်းၶူဝ်းတူဝ်ၸဝ်ႈၵဝ်ႇ၊ဢိၵ်ႇတင်းဢဝ်ပလၢင်ႇတူဝ်ၸဝ်ႈၵဝ်ႇ၊ဢိၵ်ႇတင်းဢဝ်ဢႃႇၼႃႇတူဝ်ၸဝ်ႈၵဝ်ႇဢၼ်ယႂ်ႇၼႃႇၼၼ်ႉဢၢပ်ႈပၼ်တီႈတူဝ်ထိူၼ်ႇႁၢႆႉၼၼ်ႉဢေႃႈ။-
ၵႃႈၼႂ်းၵွၵ်းႁူဝ်တူဝ်ထိူၼ်ႇႁၢႆႉၼၼ်ႉႁူဝ်ၼိုင်ႈ၊မိူၼ်ၸိူဝ်ႉၼင်ႇႁၢင်ႈမီးႁွႆးၸဵပ်းဢၼ်ၸၢင်ႈႁႂ်ႈထိုင်တၢႆလႆႈၼၼ်ႉဢေႃႈ။ ၵူၺ်းၵႃႈ၊ႁွႆးၸဵပ်းၼၼ်ႉလႆႈယႃႁၢႆဝႆႉယဝ်ႉဢေႃႈ။ ၵူၼ်းလေႃးၵီႇတင်းသဵင်ႈတင်းမူတ်းမီးတၢင်းဢၼ်ဢၢမ်းၼႃႇလူင်လၢင်လႄႈၸွမ်းၽၢႆႇလင်တူဝ်ထိူၼ်ႇႁၢႆႉၼၼ်ႉၵႂႃႇဢေႃႈ။-
ၵူၼ်းတင်းလၢႆဢွၼ်ၵၼ်ဝႆႈၼၵႃးၼၼ်ႉၵွပ်ႈပိူဝ်ႈမၼ်းဢဝ်ဢႃႇၼႃႇမၼ်းဢၢပ်ႈပၼ်ဝႆႉတီႈတူဝ်ထိူၼ်ႇႁၢႆႉၼၼ်ႉဢေႃႈ။ တီႈတူဝ်ထိူၼ်ႇႁၢႆႉၼၼ်ႉၵေႃႈၶဝ်ဝႆႈသေလႄႈလၢတ်ႈဝႃႈ၊ “ၽူႈလႂ်တၵ်းမိူၼ်တူဝ်ထိူၼ်ႇႁၢႆႉၼႆႉ။ ၽူႈလႂ်တၵ်းတိုၵ်းတေႃးၵၼ်တင်းမၼ်းလႆႈ၊” ဝႃႈၼင်ႇၼႆယူႇဢေႃႈ။
တူဝ်ထိူၼ်ႇႁၢႆႉၼၼ်ႉမီးၸႂ်ဢၼ်ၽႅၼ်သုင်လႄႈလၢတ်ႈၵႂၢမ်းဢၼ်ယႃႉသရေႇၽြႃးပဵၼ်ၸဝ်ႈ၊ဢိၵ်ႇတင်းလႆႈၶႂၢင်ႉဢၼ်မီးဢႃႇၼႃႇတၼ်းၶူဝ်းသီႇသိပ်းပၢႆသွင်လိူၼ်တဵမ်တဵမ်ဢေႃႈ။-
မၼ်းၼၼ်ႉၵေႃႈတႄႇၸႃႉသႄႉသွမ်းတၢင်ႇဢပျတ်ႈၽြႃးပဵၼ်ၸဝ်ႈလႄႈၽိတ်းပိူင်ႈၸိုဝ်ႈသဵင်မၼ်းၸဝ်ႈ၊ဢိၵ်ႇတင်းတီႈထႃႇၼႃႉမၼ်းၸဝ်ႈ၊ဢိၵ်ႇတင်းၶဝ်ၸိူဝ်းဢၼ်ယူႇၵႃႈတီႈၵၢင်ႁၢဝ်ၼၼ်ႉဢေႃႈ။-
မၼ်းလႆႈဢၶႂၢင်ႉဢၼ်တၵ်းတိုၵ်းတေႃးၵၼ်တင်းၵူၼ်းၽြႃးပဵၼ်ၸဝ်ႈတင်းလၢႆလႄႈလႆႈပႄႉၼႅင်ႇၼၼ်ႉသေယဝ်ႉ၊လႆႈဢၶႂၢင်ႉဢၼ်လႆႈဢုပ်ႉပိူင်ႇၵႃႈၼိူဝ်ၵူၼ်းၵူႈၶိူဝ်းၶိူဝ်း၊ၵႃႈၼႂ်းၵူႈမိူင်းမိူင်းဢၼ်လၢတ်ႈၵႂၢမ်းၽႃႇသႃႇၵူႈမဵဝ်းမဵဝ်းၼၼ်ႉဢေႃႈ။-
ၵူၼ်းဢၼ်ဢသၢၵ်ႈလိပ်းယူႇၵႃႈၼိူဝ်လိၼ်မိူင်းတင်းသဵင်ႈတင်းမူတ်းၸိူဝ်းဢၼ်ၸိုဝ်ႈသဵင်ၶဝ်ဢမ်ႇပႆႇလႆႈတႅမ်ႈမၢႆဝႆႉၵႃႈၼႂ်းၽိုၼ်လိၵ်ႈဢသၢၵ်ႈသူဝ်းဢွၼ်ႇၸဝ်ႈ၊ဢၼ်ၶၢမ်ႇတၢႆၸႃႉၸဵမ်မိူဝ်ႈငဝ်ႈၵမ်ႇၽႃႇဢမ်ႇပႆႇတႄႇပဵၼ်မႃးၼၼ်ႉ၊ဢွၼ်ၵၼ်ဝႆႈတူဝ်ထိူၼ်ႇႁၢႆႉၼၼ်ႉဢေႃႈ။
ၵမ်းၼၼ်ႉ ၵဝ်လႆႈႁၼ်တူဝ်ထိူၼ်ႇႁၢႆႉတၢင်ႇတူဝ်ပေႃႇဢွၵ်ႇၵႃႈၼိူဝ်လိၼ်မိူင်းမႃးၼၼ်ႉဢေႃႈ။ မၼ်းၼၼ်ႉ၊မီးၶဝ်သွင်လႅမ်ႈဢၼ်မိူၼ်ၸိူဝ်ႉၼင်ႇၶဝ်သူဝ်းဢွၼ်ႇၸဝ်ႈသေလႄႈမၼ်းလၢတ်ႈၵႂၢမ်းမိူၼ်ၸိူဝ်ႉၼင်ႇၼၵႃးလၢတ်ႈၵႂၢမ်းၼၼ်ႉဢေႃႈ။-
မၼ်းယၢမ်ႈၸႂ်ႉဢႃႇၼႃႇတၼ်းၶူဝ်းတူဝ်ထိူၼ်ႇႁၢႆႉတူဝ်ဢွၼ်တၢင်းၼၼ်ႉသိုဝ်ႈၼႃႈတႂ်ႈတႃမၼ်းလႄႈတဵၵ်းငႅၼ်းႁႂ်ႈၵူၼ်းမိူင်းလေႃးၵီႇတင်းလၢႆဝႆႈတူဝ်ထိူၼ်ႇႁၢႆႉဢၼ်မီးႁွႆးၸဵပ်းဢၼ်ၸၢင်ႈႁႂ်ႈထိုင်တၢႆလႆႈ၊ဢၼ်သမ်ႉပေႃးယႃႁၢႆဝႆႉယဝ်ႉၼၼ်ႉဢေႃႈ။-
မၼ်းၼၼ်ႉ၊ယင်းႁဵတ်းၼႄၼိမိၵ်ႈလၢၵ်ႈၶၼႃႇဢၼ်လၢၵ်ႇလၢႆးၼမ်ၼႃႇထၢၼ်ႈပေႃးႁႂ်ႈၽႆးလုၵ်ႉသေၵႃႈၼိူဝ်ၵၢင်ႁၢဝ်တူၵ်းလူင်းမႃးၵႃႈၼိူဝ်လိၼ်မိူင်းသိုဝ်ႈၼႃႈတႂ်ႈတႃၵူၼ်းတင်းလၢႆဢေႃႈ။-
ၵွပ်ႈလူၺ်ႈလွင်ႈၼိမိၵ်ႈလၢၵ်ႈၶၼႃႇဢၼ်မၼ်းလႆႈဢၶႂၢင်ႉသေၼႄပျႃးၽၢႆႇၼႃႈတူဝ်ထိူၼ်ႇႁၢႆႉတူဝ်ဢွၼ်တၢင်းၼၼ်ႉလႄႈမၼ်းပႅတ်ႉလႅၼ်ဢဝ်ၵူၼ်းလေႃးၵီႇတင်းလၢႆၸႂ်ႉႁႂ်ႈၶဝ်ႁဵတ်းႁုၼ်ႇႁၢင်ႈတူဝ်ထိူၼ်ႇႁၢႆႉ၊ဢၼ်လႆႈၶၢမ်ႇတၢမ်ႇႁွႆးၸဵပ်းဢၼ်လႆႈၶၢမ်ႇတၢင်းဢၼ်လႅဝ်းၽၼ်းလႄႈဢသၢၵ်ႈယင်းလိပ်းယူႇၼၼ်ႉဢေႃႈ။-
မၼ်းၼၼ်ႉမီးဢၶႂၢင်ႉဢၼ်လႆႈသႂၢင်းပၼ်ဢသၢၵ်ႈတီႈႁုၼ်ႇႁၢင်ႈတူဝ်ထိူၼ်ႇႁၢႆႉတူဝ်ဢွၼ်တၢင်းၼၼ်ႉ၊ႁႂ်ႈလၢတ်ႈၵႂၢမ်းလႆႈ၊ဢိၵ်ႇတင်းႁႂ်ႈဢဝ်တၢႆၶဝ်ၸိူဝ်းဢၼ်ဢမ်ႇဝႆႈႁုၼ်ႇႁၢင်ႈသၢင်းထုၼၼ်ႉဢေႃႈ။-
မၼ်းသမ်ႉတဵၵ်းငႅၼ်းႁႂ်ႈၵူၼ်းၼႃႈယႂ်ႇလႄႈၼႃႈလဵၵ်ႉ၊ၵူၼ်းၽၢၼ်လႄႈၵူၼ်းမီး၊ၶႃႈလႄႈၵူၼ်းလွတ်ႈၵႃႈမီးတင်းသဵင်ႈတင်းလူင်ၼၼ်ႉႁႂ်ႈဢဝ်တၼ်းသိၵ်ႈတွၵ်ႇဝႆႉၵႃႈတီႈမိုဝ်းၽၢႆႇၶႂႃဢမ်ႇၼၼ်ၵႃႈတီႈၼႃႈၽၢၵ်ႇၶဝ်ဝႆႉဢေႃႈ။-
ၽူႈလႂ်သေဢမ်ႇဝႃႈ၊ပေႃးယင်းဢမ်ႇမီးႁွႆးတၼ်းသိၵ်ႈၼၼ်ႉၸိုင်၊မၼ်းဢမ်ႇမီးဢၶႂၢင်ႉဢၼ်လႆႈသိုဝ်ႉလႆႈၶၢႆသေၸိူဝ်ႉသေပိူင်။ ႁွႆးတၼ်းသိၵ်ႈၼၼ်ႉ၊ပဵၼ်ၸိုဝ်ႈသဵင်တူဝ်ထိူၼ်ႇႁၢႆႉၼၼ်ႉဢေႃႈ။ ဢမ်ႇၼၼ်ပဵၼ်ၼၢမ်ႇပၢတ်ႈဢၼ်တၢင်တူဝ်ၸိုဝ်ႈသဵင်မၼ်းၼၼ်ႉဢေႃႈ။
လွင်ႈဢၼ်ၼႆႉၸမ်ႉ၊ႁႂ်ႈမီးၺၢၼ်ႇပိင်ႇၺႃႇဢၼ်လီတႃႉ။ ပေႃႈၽူႈလႂ်မီးပိင်ႇၺႃႇၸိုင်၊ႁႂ်ႈမၼ်းၼပ်ႉဢၢၼ်ႇတႂၢၵ်ႈဢဝ်ဢၼၢၵ်ႈဢထိၵ်ႈပႄႇၼၢမ်ႇပၢတ်ႈၸိုဝ်ႈတူဝ်ထိူၼ်ႇႁၢႆႉၼၼ်ႉတႃႉ။ လွင်ႈမၼ်းၸမ်ႉ၊ၼၢမ်ႇပၢတ်ႈၼၼ်ႉပဵၼ်ၼၢမ်ႇပၢတ်ႈဢၼ်တႅၼ်းၸိုဝ်ႈသဵင်ၵူၼ်းၵေႃႉၼိုင်ႈဢေႃႈ။ ၼၢမ်ႇပၢတ်ႈၼၼ်ႉၸမ်ႉ၊ပဵၼ်ႁူၵ်းပၢၵ်ႇႁူၵ်းသိပ်းႁူၵ်းဢေႃႈ။
ၵမ်းၼၼ်ႉ၊ၵဝ်တူၺ်းလႄႈႁၼ်သူဝ်းဢွၼ်ႇၸဝ်ႈၸုၵ်းယူႇၵႃႈၼိူဝ်လွႆ ၸိဢုၼ်ႇ၊ လႄႈၵူၼ်းသႅၼ်ပၢႆသီႇမိုၼ်ႇသီႇႁဵင်ၵေႃႉ၊ဢၼ်ဢဝ်တင်းၸိုဝ်ႈသဵင်မၼ်းၸဝ်ႈ၊ဢိၵ်ႇတင်းၸိုဝ်ႈသဵင်ပေႃႈမၼ်းၸဝ်ႈတႅမ်ႈဝႆႉၵႃႈတီႈၼႃႈၽၢၵ်ႇၶဝ်ၼၼ်ႉၵေႃႈမီးယူႇလူၺ်ႈၵၼ်တင်းသူဝ်းဢွၼ်ႇၸဝ်ႈၼၼ်ႉဢေႃႈ။-
ၵဝ်သမ်ႉလႆႈငိၼ်းသဵင်ဢၼ်လင်မေႃးမႃးသေၵႃႈတီႈၵၢင်ႁၢဝ်၊မိူၼ်ၸိူဝ်ႉၼင်ႇသဵင်ၼမ်ႉတူၵ်းတၢတ်ႇတင်းသဵင်ၽႃႉလင်ဢၼ်ယႂ်ႇၼႃႇၼၼ်ႉဢေႃႈ။ သဵင်ဢၼ်ၵဝ်လႆႈငိၼ်းၼၼ်ႉမိူၼ်ၸိူဝ်ႉၼင်ႇသဵင်တိင်ႇဢၼ်ၵူၼ်းလဵတ်းတိင်ႇၶဝ်လဵတ်းယူႇၼၼ်ႉဢေႃႈ။-
ၵူၼ်းသႅၼ်ပၢႆသီႇမိုၼ်ႇသီႇႁဵင်ၵေႃႉၼၼ်ႉၸုၵ်းယူႇၵႃႈတီႈၽၢႆႇၼႃႈပလၢင်ႇၸဝ်ႈ၊ဢိၵ်ႇတင်းၵႃႈတီႈၽၢႆႇၼႃႈတူဝ်သတ်ႉတဝႃႇ၊ဢၼ်ဢသၢၵ်ႈလိပ်းသီႇတူဝ်ဢိၵ်ႇတင်းၵႃႈတီႈၽၢႆႇၼႃႈၵူၼ်းဢၼ်ဢသၢၵ်ႈယႂ်ႇၸိူဝ်းၼၼ်ႉလႄႈႁဵတ်းၵႂၢမ်းဢၼ်မႂ်ႇဢၼ်ၽူႈလႂ်သွၼ်ဢဝ်သေၵေႃႈဢမ်ႇမေႃလႆႈၼၼ်ႉဢေႃႈ။ ၼွၵ်ႈသေၵူၼ်းသႅၼ်ပၢႆသီႇမိုၼ်ႇသီႇႁဵင်ၵေႃႉ၊ဢၼ်လႆႈၶၢမ်ႇတၢင်းဢၼ်ထုတ်ႇဢဝ်သေၵႃႈၼႂ်းမဵဝ်းၵူၼ်းတင်းသဵင်ႈတင်းမူတ်းၼႆႉၵူၺ်း၊မေႃႁဵတ်းၵႂၢမ်းမႂ်ႇၼႆႉဢေႃႈ။-
ၶဝ်ပဵၼ်ၵူၼ်းၸၢႆးဢၼ်ပႂ်ႉထိင်းတူဝ်ၸဝ်ႈၵဝ်ႇဢၼ်ၵၢင်းလွတ်ႈသေတၢင်းဢၼ်ၼွၼ်းလူၺ်ႈၽူႈယိင်းလႄႈပဵၼ်ၵၼ်ႇၺႃႇဝႆႉဢေႃႈ။ ၶဝ်ပဵၼ်ၵေႃႉဢၼ်ၵႂႃႇမႃးၸွမ်းသူဝ်းဢွၼ်ႇၸဝ်ႈၵူႈတီႈၵူႈလႅၼ်ၼၼ်ႉဢေႃႈ။ ၶဝ်ပဵၼ်ၵေႃႉဢၼ်လႆႈၶၢမ်ႇတၢင်းဢၼ်ထုတ်ႇၼုၵ်ႈဢဝ်သေၵႃႈၼႂ်းၵူၼ်းမဵဝ်းတင်းသဵင်ႈတင်းမူတ်းလႄႈပဵၼ်မၢၵ်ႇဢၼ်မၢၵ်ႇဢွၼ်တၢင်းပိူၼ်ႈပုၼ်ႈတႃႇတေသၢၵ်ႈလူႇၽြႃးပဵၼ်ၸဝ်ႈ၊ဢိၵ်ႇတင်းသူဝ်းဢွၼ်ႇၸဝ်ႈၼၼ်ႉဢေႃႈ။-
ပိူဝ်ႈဢၼ်သူပ်းၶဝ်ဢမ်ႇတွၼ်ႉလၢတ်ႈၵႂၢမ်းမုသႃႇလႄႈၶဝ်ၵၢင်းလွတ်ႈဢပျတ်ႈဢေႃႈ။
ၵမ်းၼၼ်ႉ၊ၵဝ်ႁၼ်တမၢၼ်ႇၵၢင်ႁၢဝ်တၢင်ႇပႃးမိၼ်ယူႇၵႃႈၼႂ်းလူမ်းဢၼ်သုင်ၼႃႇဢေႃႈ။ မၼ်းၼၼ်ႉပႃးဢဝ်တင်းၶၢဝ်ႇတြႃးသိူဝ်းပျေႃႇထႃႇဝရႃႉ၊မႃးႁႂ်ႈလႆႈႁေႃးလၢတ်ႈၵႃႈတီႈၵူၼ်းလေႃးၵီႇတင်းလၢႆ၊ၵႃႈၼႂ်းၵူၼ်းၵူႈၶိူဝ်းၶိူဝ်းဢၼ်လၢတ်ႈၵႂၢမ်းၽႃႇသႃႇၵူႈမဵဝ်းမဵဝ်း၊ၵႃႈတီႈၵူႈမိူင်းမိူင်းၼၼ်ႉဢေႃႈ။-
မၼ်းလၢတ်ႈတင်းသဵင်ဢၼ်ယႂ်ႇၼႃႇလႄႈဝႃႈ၊ “ရူဝ်ႇသေႇၵူဝ်ယမ်ၽြႃးပဵၼ်ၸဝ်ႈယူႇလႄႈယွင်ႈယေႃးတၢင်းဢၼ်ယႂ်ႇမျၢတ်ႈမၼ်းၸဝ်ႈတႃႉ။ ၶိင်ႇယၢမ်းဢၼ်မၼ်းၸဝ်ႈတၵ်းၸီႇယၢင်ႇတြႃးတီႈမဵဝ်းၵူၼ်းတင်းလၢႆၼၼ်ႉႁွတ်ႈမႃးယဝ်ႉ။ ဢွၼ်ၵၼ်ဝႆႈသႃၵူဝ်းၵႂၢႆႇၸဝ်ႈဢၼ်ၽၢၼ်ႇသၢင်းႁဵတ်းပဵၼ်ၽႃႉၵၢင်ႁၢဝ်၊လိၼ်မိူင်း၊ဢိၵ်ႇတင်းၼမ်ႉသမ်ႇမုၵ်ႈတြႃႇ၊ဢိၵ်ႇတင်းၼမ်ႉဢွၵ်ႇႁူးတင်းလၢႆၼၼ်ႉတႃႉ၊” ဝႃႈၼင်ႇၼႆဢေႃႈ။
တမၢၼ်ႇၵၢင်ႁၢဝ်ပႃးတီႈသွင်ၸွမ်းၵႂႃႇမွၵ်ႇလၢတ်ႈထႅင်ႈလႄႈဝႃႈ၊ “ဝဵင်းလူင် ပႃႇပုလုၼ်ႇ၊ လူမ်ႉပင်းယဝ်ႉ။ ဝဵင်းလူင် ပႃႇပုလုၼ်ႇ၊ ဢၼ်မၼ်းဢဝ်ၼမ်ႉလဝ်ႈမၢၵ်ႇၸပိတ်ႉမၼ်းဢၼ်ပဵၼ်တၢင်းဢၼ်ႁဵတ်းမေႇထုင်ႇဢၼ်ဢမ်ႇတြႃးၼၼ်ႉတိုၵ်းပၼ်တီႈၵူၼ်းမဵဝ်းတင်းလၢႆၼၼ်ႉလူမ်ႉပင်းယဝ်ႉ၊” ဝႃႈၼင်ႇၼႆဢေႃႈ။
တမၢၼ်ႇၵၢင်ႁၢဝ်ပႃးတီႈသၢမ်သမ်ႉၸွမ်းၶဝ်ၵႂႃႇမွၵ်ႇလၢတ်ႈလူၺ်ႈသဵင်ဢၼ်ယႂ်ႇၼႃႇထႅင်ႈလႄႈဝႃႈ၊ “ၽူႈလႂ်သေဢမ်ႇဝႃႈ၊ၵေႃႉဢၼ်ဝႆႈတူဝ်ထိူၼ်ႇႁၢႆႉ၊ဢိၵ်ႇတင်းႁုၼ်ႇႁၢင်ႈမၼ်းလႄႈၶၢမ်ႇဢဝ်တၢင်းဢၼ်ဢဝ်တၼ်းသိၵ်ႈတွၵ်ႇဝႆႉ၊ၵႃႈတီႈၼႃႈၽၢၵ်ႇမၼ်း၊ဢမ်ႇၼၼ်ၵႃႈတီႈမိုဝ်းမၼ်းၼၼ်ႉ၊-
တၵ်းလႆႈၵိၼ်ၼမ်ႉလဝ်ႈမၢၵ်ႇၸပိတ်ႉၸႅတ်ႈၸႅတ်ႈဢၼ်ပဵၼ်တၢင်းၸႂ်မႆႈၶႂ်ႈၸႃႉၽြႃးပဵၼ်ၸဝ်ႈလႄႈဢၼ်ဢဝ်ထွၵ်ႇသႂ်ႇၵႃႈၼႂ်းၵွၵ်းတေႃးသႃႉမၼ်းၸဝ်ႈၼၼ်ႉဢေႃႈ။ ၵူၼ်းၸိူဝ်းၼၼ်ႉတၵ်းလႆႈၶၢမ်ႇၼိၵ်ႈၸၢၵ်ႈဢၼ်ယႂ်ႇၼႃႇလူၺ်ႈၽႆးဢၼ်လေႃးၵၢၼ်ႉၼၼ်ႉၵႃႈတီႈၽၢႆႇၼႃႈတမၢၼ်ႇၵၢင်ႁၢဝ်ဢၼ်မူတ်းၸၢင်ႇ၊ဢိၵ်ႇတင်းၵႃႈတီႈၽၢႆႇၼႃႈသူဝ်းဢွၼ်ႇၸဝ်ႈၼၼ်ႉဢေႃႈ။-
ၵႂၼ်းၽႆးဢၼ်ၼိၵ်ႈၸၢၵ်ႈငႅၼ်းသႄးၶဝ်ၼၼ်ႉႁိုင်းယူႇၵူႈၵၢပ်ႈၵမ်ႇၽႃႇသိုပ်ႇသိုပ်ႇတၢမ်တၢမ်ဢေႃႈ။ ၶဝ်ၸိူဝ်းဢၼ်ဝႆႈတူဝ်ထိူၼ်ႇႁၢႆႉ၊ဢိၵ်ႇတင်းႁုၼ်ႇႁၢင်ႈမၼ်းသေယဝ်ႉ၊ၶၢမ်ႇဢဝ်တၢင်းဢၼ်တွၵ်ႇၸိုဝ်ႈတွၵ်ႇသဵင်မၼ်းဝႆႉၼၼ်ႉတၵ်းဢမ်ႇမီးတၢင်းဢၼ်သၢၵ်ႈသႃႇၸႂ်ဢမ်ႇဝႃႈၵၢင်ဝၼ်းၵၢင်ၶိုၼ်း၊” ဝႃႈၼင်ႇၼႆဢေႃႈ။
လွင်ႈဢၼ်ၼႆႉၸမ်ႉ၊ပဵၼ်လွင်ႈၵူၼ်းၽြႃးပဵၼ်ၸဝ်ႈတင်းလၢႆၸိူဝ်းဢၼ်ပႂ်ႉၵမ်ပႂ်ႉၸွမ်းပိင်းၺၢပ်ႈတြႃးၽြႃးပဵၼ်ၸဝ်ႈလႄႈယုမ်ႇမၢတ်ႈ ၸဝ်ႈယေႇသု၊ ၼၼ်ႉၶဝ်တၵ်းလႆႈယိူၼ်ႉၶၢမ်ႇဢေႃႈ။
ၵမ်းၼၼ်ႉ၊ၵဝ်လႆႈငိၼ်းသဵင်ဢၼ်လၢတ်ႈမႃးသေၵႃႈတီႈၵၢင်ႁၢဝ်လႄႈဝႃႈ၊ “ၸႃႉၸဵမ်တေႃႈလဵဝ်ၼႆႉလႄႈၶဝ်ၸိူဝ်းဢၼ်တၢႆၼႂ်းၵၢၼ်ငၢၼ်းၸဝ်ႈၽြႃးၼၼ်ႉမီးမၢင်ႇၵလႃႇဢေႃႈ၊ဝႃႈၼႆတႅမ်ႈဝႆႉတႃႉ၊” ဝႃႈၼင်ႇၼႆဢေႃႈ။ ဝိၺိၺ်ႇၸဝ်ႈၵေႃႈၶိုၼ်းလၢတ်ႈလႄႈဝႃႈ၊ “မီးမၢင်ႇၵလႃႇတႄႉဢေႃႈ။ ၶဝ်တၵ်းသိူဝ်းၸူမ်းလႄႈၵိုတ်းလိုဝ်ႈသေၵႃႈတီႈၵၢၼ်ငၢၼ်းဢၼ်ၼၵ်းၼႃႇၼၼ်ႉဢေႃႈ။ လွင်ႈမၼ်းၸမ်ႉ၊ဢၵျူဝ်းၵၢၼ်ငၢၼ်းဢၼ်ၶဝ်ႁဵတ်းၼၼ်ႉတၵ်းၵႂႃႇၸွမ်းၶဝ်ဢေႃႈ၊” ဝႃႈၼင်ႇၼႆဢေႃႈ။
ၵမ်းၼၼ်ႉ၊ၵဝ်တူၺ်းလႄႈႁၼ်မွၵ်ႇၵုမ်ႈဢၼ်ၽိူၵ်ႇၶၢဝ်ၼၼ်ႉလႄႈၵေႃႉဢၼ်ပဵၼ်မိူၼ်ၸိူဝ်ႉၼင်ႇႁၢင်ႈ လုၵ်ႈၵူၼ်း၊ ၼၼ်ႉၼင်ႈယူႇၵႃႈၼိူဝ်မွၵ်ႇၵုမ်ႈယူႇဢေႃႈ။ ၵႃႈၼိူဝ်ႁူဝ်မၼ်းၸဝ်ႈၼၼ်ႉတိုဝ်းသရၽူႇၶမ်းဝႆႉ၊ဢိၵ်ႇတင်းၵႃႈၼႂ်းမိုဝ်းမၼ်းၸဝ်ႈၵေႃႈယိပ်းၵမ်ၶဵဝ်းဢၼ်ၽၢႆၼႃႇၼၼ်ႉဝႆႉဢေႃႈ။-
တမၢၼ်ႇၵၢင်ႁၢဝ်တၢင်ႇပႃးဢွၵ်ႇသေၵႃႈတီႈၵျွင်းပိၵ်ႈမၢၼ်ႇၸဝ်ႈမႃးလႄႈလၢတ်ႈတင်းသဵင်ဢၼ်ယႂ်ႇၼႃႇတေႃႇၸဝ်ႈဢၼ်ၼင်ႈယူႇၵႃႈၼိူဝ်မွၵ်ႇၵုမ်ႈၼၼ်ႉလႄႈဝႃႈ၊ “ဢဝ်ၶဵဝ်းၸဝ်ႈႁဝ်းၼၼ်ႉပၢတ်ႇၶဝ်ႈသေၵမ်း။ ၶဵင်ႇဢၼ်ပၢတ်ႇၶဝ်ႈမႃးထိုင်ၶႃႈယဝ်ႉ။ လိၼ်မိူင်းဢၼ်ဝႃႈ၊ၶဝ်ႈၼၼ်ႉသုၵ်းယဝ်ႉလႄႈထုၵ်ႇလီပၢတ်ႇသိမ်းဢဝ်ၶႃႈယဝ်ႉ၊” ဝႃႈၼင်ႇၼႆဢေႃႈ။-
ၸဝ်ႈဢၼ်ၼင်ႈၵႃႈၼိူဝ်မွၵ်ႇၵုမ်ႈၼၼ်ႉၵေႃႈဢဝ်ၶဵဝ်းမၼ်းၸဝ်ႈသေလႄႈပၢတ်ႇဢဝ်ၶဝ်ႈၵႃႈၼိူဝ်လိၼ်မိူင်းဢေႃႈ။
တမၢၼ်ႇၵၢင်ႁၢဝ်တၢင်ႇပႃးသမ်ႉဢွၵ်ႇမႃးသေၵႃႈတီႈၵျွင်းပိၵ်ႈမၢၼ်ႇၸဝ်ႈမိူင်းၵၢင်ႁၢဝ်လႄႈမၼ်းၵေႃႈမီးၶဵဝ်းဢၼ်ၽၢႆၼႃႇမၢၵ်ႈၼိုင်ႈဢေႃႈ။
မိူဝ်ႈၼၼ်ႉတမၢၼ်ႇၵၢင်ႁၢဝ်တၢင်ႇပႃးဢၼ်ဢုပ်ႉထိင်းၽႆးၼၼ်ႉဢွၵ်ႇသေၵႃႈတီႈၶဵင်ႇတၢင်းလူႇမႃးသေလႄႈလၢတ်ႈတင်းသဵင်ဢၼ်ယႂ်ႇၼႃႇတေႃႇၸဝ်ႈဢၼ်မီးၶဵဝ်းဢၼ်ၽၢႆၼႃႇၼၼ်ႉလႄႈဝႃႈ၊ “ဢဝ်ၶဵဝ်းမႂ်းဢၼ်ၽၢႆၼႃႇၼၼ်ႉပၢတ်ႇသိမ်းဢဝ်မၢၵ်ႇၸပိတ်ႉတင်းလၢႆ၊ၵႃႈၼႂ်းသူၼ်မၢၵ်ႇၸပိတ်ႉဢၼ်မီးၵႃႈၼိူဝ်လိၼ်မိူင်းၼၼ်ႉတႃႉ။ မၢၵ်ႇမၼ်းသုၵ်းယဝ်ႉ၊” ဝႃႈၼင်ႇၼႆဢေႃႈ။-
ပိူဝ်ႈၼႆလႄႈတမၢၼ်ႇၵၢင်ႁၢဝ်ၼၼ်ႉဢဝ်ၶဵဝ်းမၼ်းသေယဝ်ႉ၊လူင်းမႃးၵႃႈၼိူဝ်လိၼ်မိူင်းလႄႈပၢတ်ႇဢဝ်မၢၵ်ႇၸပိတ်ႉတင်းလၢႆသေယဝ်ႉ၊ထိမ်ႈသႂ်ႇၵႃႈၼႂ်းႁၢင်းယဵပ်ႇမၢၵ်ႇၸပိတ်ႉဢၼ်ပဵၼ်တၢင်းၸႂ်မႆႈၶႂ်ႈၸႃႉၽြႃးပဵၼ်ၸဝ်ႈၼၼ်ႉဢေႃႈ။-
မၢၵ်ႇၸပိတ်ႉၸိူဝ်းၼၼ်ႉလႆႈၶၢမ်ႇတၢင်းဢၼ်ယဵပ်ႇၼူတ်ႈၵႃႈၼႂ်းႁၢင်းဢၼ်မီးၵႃႈၼွၵ်ႈဝဵင်းလႄႈလိူတ်ႈလႆဢွၵ်ႇသေၵႃႈတီႈႁၢင်းၼၼ်ႉၵႂႃႇၵႆသွင်ပၢၵ်ႇလၵ်းလႄႈလိုၵ်ႉထူမ်ႈထိုင်ၵၵ်ႉမႃႉဢေႃႈ။
ၵမ်းၼၼ်ႉ၊ၵဝ်ႁၼ်ၼိမိၵ်ႈလၢၵ်ႈၶၼႃႇတၢင်ႇၸိူဝ်ႉတၢင်ႇပိူင်ဢၼ်လီဢၢမ်းၼႃႇၵႃႈၼိူဝ်ၵၢင်ႁၢဝ်ဢေႃႈ။ ၼိမိၵ်ႈလၢၵ်ႈၶၼႃႇၼၼ်ႉပဵၼ်တမၢၼ်ႇၵၢင်ႁၢဝ်ၸဵတ်းပႃး၊ဢၼ်ယိပ်းၵမ်ၽေးဢုပၢတ်ႈလိုၼ်းလင်သုတ်းၸဵတ်းပိူင်ဝႆႉၼၼ်ႉပေႃႇမႃးလႄႈၼႄပျႃးတၢင်းဢၼ်ၽြႃးပဵၼ်ၸဝ်ႈၸႂ်မႆႈၶႂ်ႈၸႃႉလႆႈသုတ်းသဵင်ႈယဝ်ႉၼၼ်ႉဢေႃႈ။
ၵဝ်သမ်ႉႁၼ်ဢၼ်မိူၼ်ၸိူဝ်ႉၼင်ႇပၢင်ႇလၢႆႇၵႅဝ်ႈမၢၼ်ႇဢၼ်လေႃးၵၼ်တင်းၽႆးၼၼ်ႉဢေႃႈ။ သမ်ႉႁၼ်ၶဝ်ၸိူဝ်းဢၼ်ပႄႉၼႅင်ႇတူဝ်ထိူၼ်ႇႁၢႆႉ၊ဢိၵ်ႇတင်းႁုၼ်ႇႁၢင်ႈမၼ်းတင်းၼၢမ်ႇပၢတ်ႈၸိုဝ်ႈသဵင်မၼ်းလႄႈယိပ်းၵမ်ဝႆႉတိင်ႇဢၼ်ၽြႃးပဵၼ်ၸဝ်ႈပၼ်တီႈၶဝ်ၼၼ်ႉသေယဝ်ႉ၊ၸုၵ်းယူႇၵႃႈတီႈႁိမ်းပၢင်ႇလၢႆႇၵႅဝ်ႈမၢၼ်ႇၼၼ်ႉသေလႄႈ၊-
ႁဵတ်းၵႂၢမ်း မူဝ်းသေႇ၊ ၶႃႈၽြႃးပဵၼ်ၸဝ်ႈ၊ဢိၵ်ႇတင်းၵႂၢမ်းသူဝ်းဢွၼ်ႇၸဝ်ႈယူႇလႄႈဝႃႈ၊ “ထႃႇဝရႃႉၽြႃး၊ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်းတီႈၶႃႈ။ ၵၢၼ်တၢင်းႁဵတ်းၸဝ်ႈႁဝ်းမျၢတ်ႈလီလႄႈလီဢၢမ်းၼႃႇတီႈၶႃႈဢေႃႈ။ ၶုၼ်ႁေႃၶမ်းၵူၼ်းမဵဝ်းတင်းလၢႆတီႈၶႃႈ၊ သဵၼ်ႈတၢင်းၸဝ်ႈႁဝ်းသိုဝ်ႈတေႃႇလႄႈမၢၼ်ႇမႅၼ်ႈၼႃႇဢေႃႈ။
ဢူဝ်းၸဝ်ႈၽြႃးတီႈၶႃႈ၊ၽူႈလႂ်တၵ်းဢမ်ႇရူဝ်ႇသေႇၵူဝ်ယမ်ၸဝ်ႈႁဝ်းလႄႈယူႇလႆႈတီႈၶႃႈ။ ၽူႈလႂ်တၵ်းထဵင်ပႅတ်ႈတၢင်းဢၼ်ၽုၺ်ႇပိုတ်ႇႁေႃးလၢတ်ႈလွင်ႈတၢင်းဢၼ်ယႂ်ႇမျၢတ်ႈၸဝ်ႈႁဝ်းၼၼ်ႉလႆႈ။ ၸဝ်ႈႁဝ်းသူႇလဵဝ်ၵူၺ်းမူတ်းၸၢင်ႇ တီႈၶႃႈဢေႃႈ။ ၵူၼ်းမဵဝ်းၵႃႈမီးတင်းသဵင်ႈတင်းမူတ်းတၵ်းမႃး ဝႆႈသႃၵူဝ်းၵႂၢႆႇၸဝ်ႈႁဝ်း၊ ၵွပ်ႈပိူဝ်ႈတၢင်းဢၼ်ၸဝ်ႈႁဝ်းတႅပ်းတတ်း ၸွမ်းၼင်ႇတြႃးၼၼ်ႉ၊ ထၢင်ႇသႃးဝႆႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။
လိုၼ်းၼၼ်ႉၵဝ်ႁၼ်ၵျွင်းပိၵ်ႈမၢၼ်ႇၸဝ်ႈမိူင်းၵၢင်ႁၢဝ်ၽုၺ်ႇပိုတ်ႇလႄႈသုမ်ႉထဵင်ၸဝ်ႈဢၼ်ၸဝ်ႈၽြႃးယူႇသဝ်းၼၼ်ႉမီးဝႆႉၼႂ်းမၼ်းဢေႃႈ။-
တမၢၼ်ႇၵၢင်ႁၢဝ်ၸဵတ်းပႃးဢၼ်ယိပ်းၵမ်ၽေးဢုပၢတ်ႈၸဵတ်းပိူင်ဝႆႉၼၼ်ႉဢွၵ်ႇၵျွင်းပိၵ်ႈမၢၼ်ႇၸဝ်ႈမႃးလႄႈၼုင်ႈမႆၶူဝ်းၽႃႈပၢၼ်ႇဢၼ်ၽိူၵ်ႇၸိုၼ်ႈၶၢဝ်သႂ်ယူႇ၊ဢဝ်သၢႆဢႅဝ်ၶမ်းႁတ်ႉၼႃႈဢူၵ်းၶဝ်ဝႆႉယူႇဢေႃႈ။-
မိူဝ်ႈၼၼ်ႉ၊ၼႂ်းတူဝ်သတ်ႉတဝႃႇဢၼ်ဢသၢၵ်ႈလိပ်းသီႇတူဝ်ၼၼ်ႉတူဝ်ၼိုင်ႈဢဝ်ၵွၵ်းၶမ်းၸဵတ်းၵွၵ်းဢၼ်တဵမ်ဝႆႉတင်းတၢင်းဢၼ်ၸႂ်မႆႈၶႂ်ႈၸႃႉၽြႃးပဵၼ်ၸဝ်ႈ၊ၸဝ်ႈဢၼ်ဢသၢၵ်ႈလိပ်းယူႇၵူႈၵၢပ်ႈၵမ်ႇၽႃႇသိုပ်ႇသိုပ်ႇတၢမ်တၢမ်ၼၼ်ႉပၼ်တီႈတမၢၼ်ႇၵၢင်ႁၢဝ်ၸဵတ်းပႃးၼၼ်ႉဢေႃႈ။-
ၵျွင်းပိၵ်ႈမၢၼ်ႇၸဝ်ႈၵေႃႈတဵမ်ဝႆႉတင်းဢၢႆၵႂၼ်းဢၼ်ဝႃႈ၊မုၼ်ၽုင်းတၼ်းၶူဝ်းၽြႃးပဵၼ်ၸဝ်ႈယူႇလႄႈၸူဝ်ႈဢၼ်ၽေးဢုပၢတ်ႈၸဵတ်းပိူင်ဢၼ်တမၢၼ်ႇၵၢင်ႁၢဝ်ၸဵတ်းပႃးဢဝ်မႃးၼၼ်ႉယင်းဢမ်ႇပႆႇမူတ်းပႆႇႁၢႆၸိုင်၊ၽူႈလႂ်ဢမ်ႇၶဝ်ႈၵႃႈၼႂ်းၵျွင်းပိၵ်ႈမၢၼ်ႇၸဝ်ႈလႆႈ။
ၵမ်းၼၼ်ႉ၊ၵဝ်ငိၼ်းသဵင်လၢတ်ႈၵႂၢမ်းဢၼ်ယႂ်ႇၼႃႇဢွၵ်ႇသေၵႃႈတီႈၵျွင်းပိၵ်ႈမၢၼ်ႇၸဝ်ႈဢၼ်လၢတ်ႈတေႃႇတမၢၼ်ႇၵၢင်ႁၢဝ်ၸဵတ်းပႃးၼၼ်ႉလႄႈဝႃႈ၊ “ၵႂႃႇလႄႈဢဝ်ၵွၵ်းဢၼ်တဵမ်ဝႆႉတင်းတၢင်းဢၼ်ၸႂ်မႆႈၶႂ်ႈၸႃႉၽြႃးပဵၼ်ၸဝ်ႈၼၼ်ႉထွၵ်ႇသႂ်ႇၵႃႈၼိူဝ်လိၼ်မိူင်းတႃႉ၊” ဝႃႈၼင်ႇၼႆဢေႃႈ။
တမၢၼ်ႇၵၢင်ႁၢဝ်ပႃးတီႈၼိုင်ႈၵႂႃႇလႄႈထွၵ်ႇၵွၵ်းမၼ်းတူၵ်းသႂ်ႇၵႃႈၼိူဝ်လိၼ်မိူင်းဢေႃႈ။ ၽေးတုမ်ႇၸဵပ်းတုမ်ႇၽီဢၼ်ၸဵပ်းသႅပ်ႇၼႃႇပေႃႇပဵၼ်မႃးၵႃႈတီႈၶဝ်ၸိူဝ်းဢၼ်လႆႈၶၢမ်ႇတၢင်းဢၼ်တွၵ်ႇတၼ်းသိၵ်ႈတူဝ်ထိူၼ်ႇႁၢႆႉဝႆႉ၊ဢိၵ်ႇတင်းတီႈၶဝ်ၸိူဝ်းဢၼ်ဝႆႈႁုၼ်ႇႁၢင်ႈသၢင်းထုမၼ်းၼၼ်ႉဢေႃႈ။
တမၢၼ်ႇၵၢင်ႁၢဝ်ပႃးတီႈသွင်ထွၵ်ႇၵွၵ်းမၼ်းတူၵ်းသႂ်ႇၵႃႈၼိူဝ်ပၢင်ႇလၢႆႇလႄႈၼမ်ႉပၢင်ႇလၢႆႇၼၼ်ႉပဵၼ်ၵႂႃႇမိူၼ်ၸိူဝ်ႉၼင်ႇလိူတ်ႈၵူၼ်းတၢႆသေယဝ်ႉ၊တူဝ်သတ်ႉတဝႃႇဢၼ်မီးၵႃႈၼႂ်းပၢင်ႇလၢႆႇတင်းမူတ်းတၢႆၵႂႃႇဢေႃႈ။
တမၢၼ်ႇၵၢင်ႁၢဝ်ပႃးတီႈသၢမ်ထွၵ်ႇၵွၵ်းမၼ်းတူၵ်းသႂ်ႇၵႃႈၼႂ်းၼမ်ႉႁွင်ႈၼမ်ႉၵႄး၊ဢိၵ်ႇတင်းၼမ်ႉဢွၵ်ႇႁူးတင်းလၢႆလႄႈၼမ်ႉပဵၼ်လိူတ်ႈၵႂႃႇမူတ်းဢေႃႈ။-
ၵဝ်ငိၼ်းတမၢၼ်ႇၵၢင်ႁၢဝ်ဢၼ်ဢုပ်ႉထိင်းၼမ်ႉၼၼ်ႉလဝ်ႈလၢတ်ႈလႄႈဝႃႈ၊ “ဢူဝ်းၸဝ်ႈဢၼ်မူတ်းၸၢင်ႇဢၼ်မီးယူႇၸူဝ်ႈပိတ်ႈၸုပၢၼ်ႇလႄႈမီးမႃးမိူဝ်ႈဢတိၵ်ႈၵႃႇလႃႉယဝ်ႉၼၼ်ႉတီႈၶႃႈ၊လွင်ႈတၢင်းဢၼ်ၸဝ်ႈႁဝ်းတႅပ်းတတ်းၼႆႉသိုဝ်ႈတေႃႇတီႈၶႃႈဢေႃႈ။-
ၶဝ်ၸိူဝ်းဢၼ်ထွၵ်ႇလိူတ်ႈၵူၼ်းၽြႃးပဵၼ်ၸဝ်ႈတင်းလၢႆ၊ဢိၵ်ႇတင်းလိူတ်ႈပရေႃးၽႅတ်ႈ တင်းလၢႆပႅတ်ႈယဝ်ႉၼၼ်ႉၸဝ်ႈႁဝ်းတိုၵ်းလိူတ်ႈပၼ်ႁႂ်ႈၶဝ်ၵိၼ်တီႈၶႃႈယဝ်ႉ။ ၶဝ်ၵေႃႈထိူၵ်ႈၶၢမ်ႇဢဝ်ၸိူဝ်ႉၼင်ႇၼၼ်တီႈၶႃႈယဝ်ႉဢေႃႈ၊” ဝႃႈၼင်ႇၼႆဢေႃႈ။-
ၵဝ်သမ်ႉလႆႈငိၼ်းသဵင်ဢၼ်ဢွၵ်ႇသေၵႃႈတီႈၶဵင်ႇတၢင်းလူႇမႃးလႄႈဝႃႈ၊ “ထႃႇဝရႃႉၽြႃး၊ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်းတီႈၶႃႈ။ တၢင်းဢၼ်ၸဝ်ႈႁဝ်းတႅပ်းတတ်းတင်းလၢႆၼၼ်ႉသိုဝ်ႈတေႃႇလႄႈမၢၼ်ႇမႅၼ်ႈတီႈၶႃႈဢေႃႈ၊” ဝႃႈၼင်ႇၼႆဢေႃႈ။
တမၢၼ်ႇၵၢင်ႁၢဝ်ပႃးတီႈသီႇထွၵ်ႇၵွၵ်းမၼ်းတူၵ်းသႂ်ႇၵႃႈၼိူဝ်တႃဝၼ်းလႄႈတႃဝၼ်းၵေႃႈ၊မီးဢၶႂၢင်ႉဢၼ်တၵ်းဢဝ်တၢင်းမႆႈမၼ်းၼၼ်ႉမႆႈၶႅမ်ႈပႅတ်ႈၵူၼ်းတင်းလၢႆဢေႃႈ။-
ၵူၼ်းတင်းလၢႆလႆႈမႆႈၶႅမ်ႈၵွပ်ႈပိူဝ်ႈႁႅင်းၽႆးဢၼ်မႆႈယႂ်ႇၼႃႇၼၼ်ႉလႄႈၶဝ်ဢွၼ်ၵၼ်ၵိၼ်ႇလႃႇၸိုဝ်ႈသဵင်ၽြႃးပဵၼ်ၸဝ်ႈ၊ဢၼ်ဢုပ်ႉပိူင်ႇၽေးဢုပၢတ်ႈတင်းလၢႆၼၼ်ႉဢေႃႈ။ ၶဝ်ယင်းဢမ်ႇမီးတၢင်းဢၼ်ၶုၵ်းၸႂ်လႆႈမႆႈၸႂ်ဢပျတ်ႈလႄႈ၊ပိၼ်ႇၸႂ်ႁႂ်ႈလႆႈယွင်ႈယေႃးတၢင်းဢၼ်မျၢတ်ႈလီမၼ်းၸဝ်ႈၼၼ်ႉလႄႈယူႇဢေႃႈ။
တမၢၼ်ႇၵၢင်ႁၢဝ်ပႃးတီႈႁႃႈၼၼ်ႉထွၵ်ႇၵွၵ်းမၼ်းတူၵ်းသႂ်ႇၵႃႈၼိူဝ်ပလၢင်ႇတူဝ်ထိူၼ်ႇႁၢႆႉၼၼ်ႉလႄႈမိူင်းမၼ်းပဵၼ်ဢၼ်လပ်းသိင်ႇၽိတ်းၽိတ်းၵႂႃႇသေယဝ်ႉ၊ၵူၼ်းမိူင်းမၼ်းတင်းလၢႆၵၢပ်ႈၶဵဝ်ႈၵၢပ်ႈလိၼ်ႉတူဝ်ၸဝ်ႈၵဝ်ႇယူႇၵွပ်ႈပိူဝ်ႈယၢပ်ႇၸႂ်ၵိၼ်းၸႂ်ၼႃႇလူင်လၢင်ၼၼ်ႉဢေႃႈ။-
ၶဝ်ၵိၼ်ႇလႃႇၸိုဝ်ႈသဵင်ၽြႃးပဵၼ်ၸဝ်ႈၵၢင်ႁၢဝ်ၵွပ်ႈပိူဝ်ႈဝူၺ်ႇတၼႃႇတုမ်ႇၸဵပ်းတုမ်ႇၽီၶဝ်ၼၼ်ႉဢေႃႈ။ ၼႂ်းဝႃႈၼၼ်သေၵေႃႈၶဝ်ယင်းဢမ်ႇမီးတၢင်းဢၼ်ၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်ၶဝ်ဢေႃႈ။
တမၢၼ်ႇၵၢင်ႁၢဝ်ပႃးတီႈႁူၵ်းၼၼ်ႉထွၵ်ႇၵွၵ်းမၼ်းတူၵ်းသႂ်ႇၵႃႈၼိူဝ်မႄႈၼမ်ႉလူင် ဢုၽရတ်ႉ၊ လႄႈၼမ်ႉလူင်ၼၼ်ႉယူတ်းႁႅင်ႈၵႂႃႇသေယဝ်ႉ၊မႄးႁႅၼ်းသဵၼ်ႈတၢင်းပုၼ်ႈတႃႇၶုၼ်ႁေႃၶမ်းၸိူဝ်းဢၼ်လုၵ်ႉသေၵႃႈတီႈမိူင်းတၢင်းဝၼ်းဢွၵ်ႇမႃးၼၼ်ႉဢေႃႈ။-
ၵဝ်သမ်ႉႁၼ်ၽီဢၼ်ၵူဝ်ႈၵိူၵ်ႇသၢမ်တူဝ်ဢၼ်မိူၼ်ၸိူဝ်ႉၼင်ႇႁၢင်ႈတူဝ်ၶဵတ်ႇဢၼ်ဢွၵ်ႇသေၵႃႈတီႈသူပ်းၼၵႃး၊ဢိၵ်ႇတင်းၵႃႈတီႈသူပ်းတူဝ်ထိူၼ်ႇႁၢႆႉ၊ဢိၵ်ႇတင်းၵႃႈတီႈသူပ်းမိၵ်ႉသႃႇပရေႃးၽႅတ်ႈ မႃးဢေႃႈ။-
ၶဝ်ၼၼ်ႉပဵၼ်ဝိၺိၺ်ႇၽီႁၢႆႉဢၼ်ႁဵတ်းၼႄၼိမိၵ်ႈလၢၵ်ႈၶၼႃႇလႂ်ၼၼ်ႉဢေႃႈ။ ၽီၸိူဝ်းၼၼ်ႉဢွၵ်ႇလႄႈၵႂႃႇၸူးၵႃႈတီႈၶုၼ်ႁေႃၶမ်းလေႃးၵီႇတင်းလၢႆသေယဝ်ႉ၊ႁႂ်ႈၶဝ်ၸုတုမ်ၵၼ်ပုၼ်ႈတၵ်းတိုၵ်းသိုၵ်းၼႂ်းဝၼ်းယႂ်ႇဝၼ်းလူင်ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်းၼၼ်ႉဢေႃႈ။
ၸဝ်ႈၽြႃးမီးဢမိင်ႉလႄႈဝႃႈၸမ်ႉ၊ “တူၺ်းလူး။ ၵဝ်မႃးၸိူဝ်ႉၼင်ႇၽူႈလၵ်ႉဢေႃႈ။ ၵေႃႉဢၼ်တိုၼ်ႇယူႇသေယဝ်ႉ၊ႁႅၼ်းၶူဝ်းၼုင်ႈတၢင်းမႆမၼ်းဝႆႉထႃႈယူႇလႄႈဢမ်ႇႁႂ်ႈလႆႈၵႂႃႇမႃးလူၺ်ႈတူဝ်ပူၺ်လႄႈဢမ်ႇလႆႈဢူၵ်းလႆႈဢၢႆၼၼ်ႉမီးမၢင်ႇၵလႃႇဢေႃႈ၊” ဝႃႈၼင်ႇၼႆဢေႃႈ။
ဝိၺိၺ်ႇၽီႁၢႆႉၸိူဝ်းၼၼ်ႉၵေႃႈဢဝ်ၶုၼ်ႁေႃၶမ်းတင်းလၢႆမႃးၸုတုမ်ၵႃႈတီႈထႃႇၼႃႉဢၼ်ၵႂၢမ်း ႁေႇပြႄး၊ ႁွင်ႉဝႃႈ၊ ဢႃႇမၵေႇတူင်ႇ၊ ၼၼ်ႉဢေႃႈ။
တမၢၼ်ႇၵၢင်ႁၢဝ်ပႃးတီႈၸဵတ်းၼၼ်ႉထွၵ်ႇၵွၵ်းမၼ်းတူၵ်းသႂ်ႇၵႃႈၼႂ်းလူမ်းဢႃႇၵႃႇသႃႉလႄႈသဵင်ဢၼ်ယႂ်ႇၼႃႇၼၼ်ႉလင်မေႃးဢွၵ်ႇမႃးသေၵႃႈတီႈပလၢင်ႇၸဝ်ႈဢၼ်မီးၵႃႈၼႂ်းၵျွင်းပိၵ်ႈမၢၼ်ႇၸဝ်ႈၼၼ်ႉလႄႈဝႃႈ၊ “ယဝ်ႉတူဝ်ႈယဝ်ႉ” ဝႃႈၼင်ႇၼႆဢေႃႈ။-
မိူဝ်ႈၼၼ်ႉ၊မီးၽႃႉမႅပ်ႈ၊ဢိၵ်ႇတင်းသဵင်ၽႃႉလင်ၽႃႉၽႃႇ၊မေႃးႁုၼ်ႈၼႃႇလႄႈဢိင်ႇသၼ်ႇၼႃႇလူင်လၢင်ဢေႃႈ။ တႄႇၸႃႉမိူဝ်ႈဢၼ်ၵူၼ်းလႆႈၶၢမ်ႇတၢင်းဢၼ်ၽၢၼ်ႇသၢင်းႁဵတ်းပဵၼ်မႃးဢိင်ႇသၼ်ႇဢၼ်ႁႅင်းၼႃႇထၢၼ်ႇၼႆႉၼၼ်ႉ၊ဢမ်ႇတွၼ်ႉပဵၼ်မႃးသေပွၵ်ႈ။ ဢိင်ႇသၼ်ႇပွၵ်ႈၼႆႉပဵၼ်ဢၼ်ႁႅင်းၼႃႇသေပိူၼ်ႈဢေႃႈ။-
ဝဵင်းလူင်ၼၼ်ႉတႅၵ်ႇပဵၼ်သၢမ်ၽၢၵ်ႇၵႂႃႇလႄႈ ဝဵင်းတင်းလၢႆၵႃႈၼႂ်းၵူႈမိူင်းမိူင်းၵေႃႈလုလႅဝ်မူတ်းဢေႃႈ။ ၽြႃးပဵၼ်ၸဝ်ႈယင်းဢမ်ႇလိုမ်းပႅတ်ႈဝဵင်းလူင် ပႃႇပုလုၼ်ႇ၊ လႄႈမၼ်းၸဝ်ႈတိုၵ်းပၼ်ႁႂ်ႈၵိၼ်ၼမ်ႉမၢၵ်ႇၸပိတ်ႉဢၼ်ဝႃႈ၊တၢင်းဢၼ်ၸႂ်ႈမႆႈၶႂ်ႈၸႃႉမၼ်းၸဝ်ႈဢၼ်ႁၢဝ်ႉၵျၢမ်းၼႃႇၼၼ်ႉဢေႃႈ။-
ၵုၼ်တင်းသဵင်ႈတင်းလူင်ၵေႃႈပၢႆႈႁၢႆလၢႆၵႂႃႇလႄႈလွႆတင်းလၢႆၵေႃႈလပ်ႉႁၢႆၵႂႃႇမူတ်းဢေႃႈ။-
မၢၵ်ႇႁဵပ်းလူင်ဢၼ်မီးၼမ်ႉၼၵ်းသၢမ်သိပ်းၸွႆႉၼၼ်ႉၵေႃႈလုၵ်ႉသေၵႃႈၼိူဝ်ၵၢင်ႁၢဝ်သေတူၵ်းမႃးသႂ်ႇၵႃႈၼိူဝ်ၵူၼ်းတင်းလၢႆဢေႃႈ။ ၵူၼ်းတင်းလၢႆဢွၼ်ၵၼ်ၵိၼ်ႇလႃႇၽြႃးပဵၼ်ၸဝ်ႈ၊ၵွပ်ႈပိူဝ်ႈၽေးဢုပၢတ်ႈမၢၵ်ႇႁဵပ်းလူင်ၼၼ်ႉဢေႃႈ။ ၽေးဢုပၢတ်ႈၼၼ်ႉပဵၼ်ဢၼ်လီၵူဝ်လီႁႄၼႃႇလူင်လၢင်ဢေႃႈ။
မိူဝ်ႈၼၼ်ႉ၊ၼႂ်းတမၢၼ်ႇၵၢင်ႁၢဝ်ၸဵတ်းပႃးဢၼ်မီးၵွၵ်းၸဵတ်းလုၵ်ႈၼၼ်ႉပႃးၼိုင်ႈမႃးလၢတ်ႈတီႈၵဝ်လႄႈဝႃႈ၊ “မႃးတႃႉ။ ၵဝ်တၵ်းၼႄပျႃးမႂ်းလွင်ႈတၢင်းဢၼ်တၵ်းႁဵတ်းၸိူဝ်ႉၼင်ႇႁိုဝ်ပၼ်တၢမ်ႇတီႈမႄႈမွၵ်ႇယႃႈဢၼ်မီးၸိုဝ်ႈသဵင်ဢၼ်ဝႃႈ၊ဝဵင်းလူင်ဢၼ်တႄႇတင်ႈဝႆႉ၊ၵႃႈတီႈႁိမ်းမႄႈၼမ်ႉဢၼ်ၼမ်ၼႃႇၼၼ်ႉဢေႃႈ။-
ၶုၼ်ႁေႃၶမ်းလေႃးၵီႇတင်းလၢႆႁဵတ်းမေႇထုင်ႇဢၼ်ဢမ်ႇတြႃးလူၺ်ႈၵၼ်တင်းမၼ်းယဝ်ႉ။ ၵူၼ်းလေႃးၵီႇတင်းလၢႆၵေႃႈ၊မဝ်းလူၺ်ႈၼမ်ႉလဝ်ႈမၢၵ်ႇၸပိတ်ႉဢၼ်ပဵၼ်တၢင်းဢၼ်ႁဵတ်းမေႇထုင်ႇဢၼ်ဢမ်ႇတြႃးလူၺ်ႈမၼ်းၼၼ်ႉယဝ်ႉ၊” ဝႃႈၼင်ႇၼႆဢေႃႈ။
ဝိၺိၺ်ႇၸဝ်ႈဢုပ်ႉပိူင်ႇၵဝ်သေယဝ်ႉ၊တမၢၼ်ႇၵၢင်ႁၢဝ်ဢဝ်ၵဝ်ၵႂႃႇသူင်ႇၵႃႈတီႈထိူၼ်ႇလႅင်ႉဢေႃႈ။ တီႈၼၼ်ႈၵဝ်လႆႈႁၼ်မႄႈယိင်းၵေႃႉၼိုင်ႈၼင်ႈယူႇၵႃႈၼိူဝ်တူဝ်ထိူၼ်ႇႁၢႆႉဢၼ်မီးၶူၼ်လႅင်ၵမ်ႇသေလႄႈၵႃႈၼိူဝ်တူဝ်ထိူၼ်ႇတင်းတူဝ်တင်းၶိင်းၼၼ်ႉတႅမ်ႈၼႃႇမႃႉၸိုဝ်ႈသဵင်ဢၼ်ယႃႉသရေႇၽြႃးပဵၼ်ၸဝ်ႈဝႆႉဢေႃႈ။ မၼ်းမီးႁူဝ်ၸဵတ်းႁူဝ်ဢိၵ်ႇတင်းမီးၶဝ်သိပ်းလႅမ်ႈဢေႃႈ။-
မႄႈယိင်းၼၼ်ႉၼုင်ႈၶူဝ်းဢၼ်လႅင်၊ဢိၵ်ႇတင်းၶူဝ်းဢၼ်ၵမ်ႇသေလႄႈဢဝ်တင်းၶိူင်ႈၶူဝ်းၶမ်းလႂ်၊သႅင်လႂ်၊တင်းသႅင်ပူးလႄးလႂ်၊ႁၢင်ႈၶိူင်ႈဝႆႉဢေႃႈ။ ၵႃႈၼႂ်းမိုဝ်းမၼ်းၼၼ်ႉၵေႃႈယိပ်းၵမ်ၵွၵ်းၶမ်းဢၼ်တဵမ်ဝႆႉတင်းတၢင်းဢၼ်လီႁင်ႈလီဝူၺ်ႇ၊ဢိၵ်ႇတင်းတၢင်းဢၼ်ၵူဝ်ႈၵိူၵ်ႇမေႇထုင်ႇဢၼ်ဢမ်ႇတြႃးတူဝ်ၸဝ်ႈၵဝ်ႇၼၼ်ႉဢေႃႈ။-
ၵႃႈတီႈၼႃႈၽၢၵ်ႇမၼ်းၼၼ်ႉ တႅမ်ႈၸိုဝ်ႈတႅမ်ႈသဵင်ဢၼ်မီးဢထိၵ်ႈပႄႇဢၼ်လိုၵ်ႉဢၼ်လမ်ႇလႄႈဝႃႈၸမ်ႉ၊ “ဝဵင်းလူင် ပႃႇပုလုၼ်ႇ၊ ဢၼ်ပဵၼ်မႄႈၵႃႈတီႈမႄႈမွၵ်ႇယႃႈတင်းလၢႆ၊ပဵၼ်မႄႈၵႃႈတီႈတၢင်းဢၼ်လီႁင်ႈလီဝူၺ်ႇၵႃႈၼိူဝ်မိူင်းလေႃးၵႃႉတင်းလၢႆ၊” ဝႃႈၼင်ႇၼႆဝႆႉဢေႃႈ။-
ၵဝ်သမ်ႉႁၼ်မႄႈယိင်းၼၼ်ႉမဝ်းလူၺ်ႈလိူတ်ႈၵူၼ်းၽြႃးပဵၼ်ၸဝ်ႈတင်းလၢႆ၊ဢိၵ်ႇတင်းလူၺ်ႈလိူတ်ႈၶဝ်ၸိူဝ်းဢၼ်လႆႈၶၢမ်ႇတၢႆၵွပ်ႈပိူဝ်ႈၶဝ်မီးသဵတ်ႈၸႃႇတေႃႇ ၸဝ်ႈယေႇသု၊ ၼၼ်ႉဢေႃႈ။ မိူဝ်ႈဢၼ်ၵဝ်ႁၼ်မၼ်းၼၼ်ႉၸိုင်၊ၵဝ်ဢၢမ်းၼႃႇလူင်လၢင်ဢေႃႈ။
တမၢၼ်ႇၵၢင်ႁၢဝ်ၼၼ်ႉၵေႃႈထၢမ်ၵဝ်လႄႈဝႃႈ၊ “ႁဵတ်းသင်လႄႈမႂ်းဢၢမ်းၼႃႇလူင်လၢင်ထၢၼ်ႇၼႆႉ။ ၵဝ်တၵ်းမွၵ်ႇလၢတ်ႈၼႄမႂ်းဢၼၢၵ်ႈဢထိၵ်ႈပႄႇဢၼ်လိုၵ်ႉဢၼ်လမ်ႇလွင်ႈမႄႈယိင်းၼႆႉ၊ဢိၵ်ႇတင်းလွင်ႈတူဝ်ထိူၼ်ႇႁၢႆႉဢၼ်မီးႁူဝ်ၸဵတ်းႁူဝ်၊ဢိၵ်ႇတင်းမီးၶဝ်သိပ်းလႅမ်ႈသေလႄႈပႃးဢဝ်မႄႈယိင်းၵႂႃႇၼၼ်ႉဢေႃႈ။-
တူဝ်ထိူၼ်ႇႁၢႆႉၼၼ်ႉမိူဝ်ႈဢွၼ်တၢင်းၼၼ်ႉယၢမ်ႈမီးဢသၢၵ်ႈမႃးသေလႄႈမိူဝ်ႈလဵဝ်ဢမ်ႇမီးဢသၢၵ်ႈယဝ်ႉ၊မၼ်းတၵ်းဢွၵ်ႇသေမိူင်းမရၼႃႉမႃးလႄႈၵႂႃႇၸူးတီႈဢၼ်လုဢၼ်လႅဝ်ၼၼ်ႉဢေႃႈ။ ၵူၼ်းဢၼ်ယူႇၵႃႈၼိူဝ်လိၼ်မိူင်းတင်းလၢႆ ဢၼ်ၸႃႉၸဵမ်ၵမ်ႇၽႃႇၸႃႉတႄႇပဵၼ်မႃးလႄႈၸိုဝ်ႈသဵင်ၶဝ်ဢမ်ႇလႆႈတႅမ်ႈမၢႆဝႆႉၵႃႈၼႂ်းၵဵၼ်လိၵ်ႈဢသၢၵ်ႈၸိူဝ်းၼၼ်ႉ၊မိူဝ်ႈဢၼ်ၶဝ်ႁၼ်တူဝ်ထိူၼ်ႇႁၢႆႉဢၼ်မိူဝ်ႈၵွၼ်ႇယၢမ်ႈမီးဢသၢၵ်ႈမႃးသေလႄႈမိူဝ်ႈလဵဝ်ဢမ်ႇမီးဢသၢၵ်ႈယဝ်ႉ၊ၵူၺ်းၵႃႈသမ်ႉတေၶိုၼ်းပဵၼ်မႃးထႅင်ႈၼၼ်ႉၸိုင်၊တၵ်းဢၢမ်းၼႃႇလူင်လၢင်ဢေႃႈ။
“လွင်ႈဢၼ်ၼႆႉၸမ်ႉ၊တၵ်းလႆႈမီးၺၢၼ်ႇပိင်ႇၺႃႇဢေႃႈ။ ႁူဝ်ၸဵတ်းႁူဝ်ၼၼ်ႉပဵၼ်လွႆၸဵတ်းလုၵ်ႈဢၼ်မႄႈယိင်းၼၼ်ႉၼင်ႈယူႇၵႃႈၼိူဝ်ၶဝ်ၼၼ်ႉဢေႃႈ။ ၶုၼ်ႁေႃၶမ်းၸဵတ်းပႃးၵေႃႈပဵၼ်ဢေႃႈ။-
ႁႃႈပႃးၼၼ်ႉတူၵ်းယဝ်ႉ။ ပႃးၼိုင်ႈယင်းဢုပ်ႉပိူင်ႇမီးယူႇဢေႃႈ။ ပႃးၼိုင်ႈၸမ်ႉ၊ယင်းဢမ်ႇပႆႇမႃးလူးၵွၼ်ႇ။ မိူဝ်ႈဢၼ်မၼ်းႁွတ်ႈမႃးၼၼ်ႉၸိုင်၊မၼ်းတေလႆႈဢုပ်ႉပိူင်ႇၵမ်းဢွၼ်ႇၼိုင်ႈၵူၺ်းဢေႃႈ။-
တူဝ်ထိူၼ်ႇႁၢႆႉဢၼ်မိူဝ်ႈဢွၼ်တၢင်းယၢမ်ႈမီးဢသၢၵ်ႈမႃးသေလႄႈမိူဝ်ႈလဵဝ်ဢမ်ႇမီးဢသၢၵ်ႈယဝ်ႉၼၼ်ႉၸမ်ႉ၊ပဵၼ်ၶုၼ်ႁေႃၶမ်းပႃးတီႈပႅတ်ႇဢေႃႈ။ မၼ်းၼၼ်ႉပဵၼ်ၵေႃႉဢၼ်ၶဝ်ႈပႃးၵႃႈၼႂ်းၸဵတ်းပႃးၼၼ်ႉၼင်ႇၵဝ်ႇလႄႈပဵၼ်ၵေႃႉဢၼ်ၵႂႃႇၸူးတီႈဢၼ်လုဢၼ်လႅဝ်ဢေႃႈ။
“ၶဝ်သိပ်းလႅမ်ႈဢၼ်မႂ်းႁၼ်ၼၼ်ႉပဵၼ်ၶုၼ်ႁေႃၶမ်းသိပ်းပႃးဢၼ်ယင်းဢမ်ႇပႆႇလႆႈဢုပ်ႉပိူင်ႇမိူင်းၼၼ်ႉဢေႃႈ။ ၵူၺ်းၵႃႈ၊ၶဝ်တိုၼ်းတၵ်းလႆႈဢႃႇၼႃႇဢၼ်ပဵၼ်မိူၼ်ၸိူဝ်ႉၼင်ႇၶုၼ်ႁေႃၶမ်းတင်းလၢႆၼၼ်ႉသေလႄႈဢုပ်ႉပိူင်ႇၼႃႇရီႇၼိုင်ႈလူၺ်ႈၵၼ်တင်းတူဝ်ထိူၼ်ႇႁၢႆႉၼၼ်ႉဢေႃႈ။-
ၶုၼ်ႁေႃၶမ်းသိပ်းပႃးၼၼ်ႉတၵ်းၽွမ်ႉၸႂ်ၵၼ်သေလႄႈဢဝ်ဢႃႇၼႃႇဢိၵ်ႇတင်းတၼ်းၶူဝ်းၶဝ်ၼၼ်ႉဢၢပ်ႈပၼ်တီႈတူဝ်ထိူၼ်ႇႁၢႆႉၼၼ်ႉဢေႃႈ။-
ၶဝ်တၵ်းတိုၵ်းတေႃးၵၼ်တင်းသူဝ်းဢွၼ်ႇၸဝ်ႈဢေႃႈ။ ၵူၺ်းၵႃႈ၊သူဝ်းဢွၼ်ႇၸဝ်ႈၼၼ်ႉၽွမ်ႉလူၺ်ႈၵၼ်တင်းၶဝ်ၸိူဝ်းဢၼ်မၼ်းၸဝ်ႈလိူၵ်ႈၵဵပ်းႁွင်ႉဢဝ်ဝႆႉ၊ပဵၼ်တပႄးဢၼ်မီးသဵတ်ႈၸႃႇတင်းလၢႆၼၼ်ႉလႄႈလႆႈပႄႉၼႅင်ႇဢေႃႈ။ ၵွပ်ႈပိူဝ်ႈမၼ်းၸဝ်ႈပဵၼ်ၸဝ်ႈၽြႃးၵႃႈၼိူဝ်ၽြႃးတင်းလၢႆ၊ပဵၼ်ၶုၼ်ႁေႃၶမ်းၵႃႈၼိူဝ်ၶုၼ်ႁေႃၶမ်းတင်းလၢႆဢေႃႈ။
“မႄႈၼမ်ႉတင်းလၢႆဢၼ်မႂ်းႁၼ်မႄႈမွၵ်ႇယႃႈၼင်ႈယူႇၼၼ်ႉပဵၼ်ၵူၼ်းၵူႈမိူင်းမိူင်း၊ၵူၼ်းၵူႈၸိူဝ်ႉၸၢတ်ႈၵူႈၶိူဝ်းၶိူဝ်း၊ဢၼ်လၢတ်ႈၵႂၢမ်းၽႃႇသႃႇၵူႈမဵဝ်းမဵဝ်းၼၼ်ႉယဝ်ႉ။-
ၶဝ်သိပ်းလႅမ်ႈဢၼ်မႂ်းႁၼ်၊ဢိၵ်ႇတင်းတူဝ်ထိူၼ်ႇႁၢႆႉၼၼ်ႉၶဝ်တၵ်းဢွၼ်ၵၼ်ၸင်းမႄႈမွၵ်ႇယႃႈၼၼ်ႉလႄႈတၵ်းႁိမ်ႁူင်ႇဢဝ်ၵႃႈဢၼ်မၼ်းမီးၼၼ်ႉသေယဝ်ႉ၊ႁႂ်ႈမၼ်းယူႇတူဝ်ပူၺ်သေလႄႈတၵ်းၶူပ်းၵိၼ်ၼိူဝ်ႉမၼ်းဢေႃႈ။ တၵ်းဢဝ်ၽႆးတုတ်ႇမၼ်းပႅတ်ႈဢေႃႈ။-
လွင်ႈမၼ်းၸမ်ႉ၊ၽြႃးပဵၼ်ၸဝ်ႈတိုၵ်းယူင်းၵႃႈၼႂ်းၸႂ်ၶဝ်၊ႁႂ်ႈၶဝ်ႁဵတ်းၸွမ်းတၢင်းၵျၢမ်ႇတၢင်းပွင်မၼ်းၸဝ်ႈ၊ဢိၵ်ႇတင်းၽွမ်ႉၸႂ်ၵၼ်လႄႈဢဝ်တၼ်းၶူဝ်းၶဝ်ဢၢပ်ႈပၼ်တီႈတူဝ်ထိူၼ်ႇႁၢႆႉႁႂ်ႈဢုပ်ႉပိူင်ႇတေႃႇထိုင်ႁွတ်ႈလႆႈဢွင်ႇမႅင်ႇပဵၼ်မႃးၸွမ်းၼင်ႇၼုၵ်ႈၵပၢတ်ႈတြႃး၊ၽြႃးပဵၼ်ၸဝ်ႈမီးဝႆႉၼၼ်ႉဢေႃႈ။
“မႄႈယိင်းဢၼ်မႂ်းႁၼ်ၼၼ်ႉပဵၼ်ဝဵင်းလူင်ဢၼ်ဢုပ်ႉပိူင်ႇၵႃႈၼိူဝ်ၶုၼ်ႁေႃၶမ်းတင်းသဵင်ႈတင်းလူင်ၵႃႈၼိူဝ်လိၼ်မိူင်းၼႆႉဢေႃႈ၊” ဝႃႈၼင်ႇၼႆဢေႃႈ။
လိုၼ်းၼၼ်ႉ၊ၵဝ်ႁၼ်တမၢၼ်ႇၵၢင်ႁၢဝ်ထႅင်ႈပႃးၼိုင်ႈလုၵ်ႉသေၵႃႈၼိူဝ်ၵၢင်ႁၢဝ်လူင်းမႃးဢေႃႈ။ မၼ်းၼၼ်ႉမီးဢႃႇၼႃႇတၼ်းၶူဝ်းဢၼ်ယႂ်ႇၼႃႇလႄႈသၢႆဢရွင်ႇမၼ်းႁဵတ်းႁႂ်ႈလိၼ်မိူင်းႁိူဝ်ႈႁိူင်းၵႂႃႇမူတ်းဢေႃႈ။-
မၼ်းႁွင်ႉသႅၼ်ႇလူၺ်ႈသဵင်ဢၼ်သဵင်ယႂ်ႇၼႃႇလႄႈဝႃႈ၊ “ဝဵင်းလူင် ပႃႇပုလုၼ်ႇ၊ လူမ်ႉပင်းယဝ်ႉ။ မၼ်းပဵၼ်တီႈဢၼ်ၽီႁၢႆႉ၊ဢိၵ်ႇတင်းတီႈဢၼ်ဝိၺိၺ်ႇဢၼ်ၵူဝ်ႈၵိူၵ်ႇတင်းလၢႆယူႇသဝ်းၵႂႃႇယဝ်ႉ။ ပဵၼ်တီႈယူႇတီႈသဝ်းၼူၵ်ႉဢၼ်ၵူဝ်ႈၵိူၵ်ႇၵူႈၸိူဝ်ႉၵူႈမဵဝ်းလႄႈပဵၼ်တီႈဢၼ်လီႁင်ႈဢဵတ်ႇသဵတ်ႇၵႂႃႇၵူႈၸိူဝ်ႉၵူႈပိူင်ယဝ်ႉ။-
လွင်ႈမၼ်းၸမ်ႉ၊ၵူၼ်းမဵဝ်းၵႃႈမီးတင်းသဵင်ႈတင်းလူင်၊ဢွၼ်ၵၼ်ၵိၼ်ၼမ်ႉလဝ်ႈမၢၵ်ႇၸပိတ်ႉဢၼ်ဝႃႈ၊မေႇထုင်ႇဢၼ်ဢမ်ႇတြႃးဝဵင်းၼၼ်ႉယဝ်ႉ။ ၶုၼ်ႁေႃၶမ်းလေႃးၵီႇတင်းလၢႆႁဵတ်းမေႇထုင်ႇဢၼ်ဢမ်ႇတြႃးလူၺ်ႈၵၼ်တင်းမၼ်းယဝ်ႉ။ ၸဝ်ႈၵုၼ်ႇၸဝ်ႈသိၼ်တင်းလၢႆမၢၵ်ႈမီးလီပဵၼ်ၸွမ်းၵႃႇမၵုင်ႇၸေးၸိမ်ႇဢၼ်ဢမ်ႇၸၢင်ႈဢိမ်ႇၸၢင်ႈတိူၵ်ႉလႆႈၼၼ်ႉယဝ်ႉ၊” ဝႃႈၼင်ႇၼႆဢေႃႈ။
ၵမ်းၼၼ်ႉ၊ၵဝ်လႆႈငိၼ်းသဵင်ထႅင်ႈသဵင်ၼိုင်ႈဢၼ်လုၵ်ႉသေၵႃႈၼိူဝ်ၵၢင်ႁၢဝ်လၢတ်ႈမႃးလႄႈဝႃႈ၊ “ၵူၼ်းမဵဝ်းၵဝ်႟။ ဢွၵ်ႇသေၵႃႈၼႂ်းဝဵင်းၼၼ်ႉမႃးတႃႉ။ ဢွၼ်ၵၼ်ဢွၵ်ႇသေၵႃႈၼႂ်းမၼ်းမႃးတႃႉ။ သူတေဢမ်ႇလႆႈၶဝ်ႈပႃးၵႃႈၼႂ်းဢပျတ်ႈ မၼ်းလႄႈ တေဢမ်ႇလႆႈၶၢမ်ႇဢဝ်ၽေးတၢမ်ႇဢၼ်မၼ်းလႆႈၶၢမ်ႇၼၼ်ႉယဝ်ႉ။
လွင်ႈမၼ်းၸမ်ႉ၊ဢပျတ်ႈမၼ်းၵေႃႇၵွင်သုင်ၶိုၼ်ႈထိုင်ၵႃႈၼိူဝ်မိူင်းၵၢင်ႁၢဝ်ပုၼ်ႉယဝ်ႉလႄႈ ၽြႃးပဵၼ်ၸဝ်ႈမၢတ်ႈတွင်းလႆႈတုၸရိူၵ်ႈမၼ်းယူႇဢေႃႈ။
မၼ်းပၼ်သူၸိူဝ်ႉၼင်ႇႁိုဝ်ၵေႃႈတွပ်ႇတႅၼ်းပၼ်မၼ်းၸိူဝ်ႉၼင်ႇၼၼ်တႃႉ။ ၵႃႈၼင်ႇဢၼ်မၼ်းၵမ်ၵျၢင်ႉၼၼ်ႉတွပ်ႇတႅၼ်းပၼ်သွင်ပုၼ်ႈလူးၵွၼ်ႇတႃႉ။ ဢဝ်ၼမ်ႉလဝ်ႈဢၼ်ၶိုၼ်ႇႁႅင်းၼႃႇသေသွင်ပုၼ်ႈၼၼ်ႉထွၵ်ႇသႂ်ႇၵႃႈၼႂ်းၵွၵ်းမၼ်း၊ မိူၼ်ၸိူဝ်ႉၼင်ႇဢၼ်မၼ်းႁႅၼ်းတႄႇႁႅၼ်းတမ်းပၼ်သူၼၼ်ႉတႃႉ။
ၸွမ်းၵႃႈၼင်ႇဢၼ်မၼ်းယွင်ႈယေႃး တူဝ်ၸဝ်ႈၵဝ်ႇလႄႈ မူၼ်ႈပျေႃႇၵႃႈၼႂ်းၵႃႇမၵုင်ႇၸေးၸိမ်ႇမၼ်းၸိူဝ်ႉၼင်ႇႁိုဝ်ၵေႃႈ၊ ႁႂ်ႈမၼ်းလႆႈၶၢမ်ႇဝူၺ်ႇတၼႃႇ၊ဢိၵ်ႇတင်းတၢင်းဢၼ်ၶၢင်းၶီၶၢင်းၽၢၼ်ၸိူဝ်ႉၼင်ႇၼၼ်တႃႉ။ လွင်ႈမၼ်းၸမ်ႉ၊မၼ်းထၢင်ႇၼႂ်းၸႂ်မၼ်းလႄႈဝႃႈ၊ ‘ၵဝ်ၼႆႉပဵၼ်ၼၢင်းႁေႃၶမ်းဢေႃႈ။ ၵဝ်ဢမ်ႇၸႂ်ႈမႄႈမၢႆႈလႄႈၵဝ်ဢမ်ႇႁုၸၵ်းလွင်ႈတၢင်းဢၼ်မႆႈၸႂ်ၶီၸႂ်လႄႈၶၢင်းၶီၶၢင်းၽၢၼ်ၼၼ်ႉ၊’ ဝႃႈၼင်ႇၼႆဢေႃႈ။
ၵွပ်ႈပိူဝ်ႈလွင်ႈတၢင်းၼႆႉလႄႈၼႂ်းဝၼ်းလဵဝ်ၵူၺ်းမၼ်းတၵ်းလႆႈၶၢမ်ႇၽေးဢုပၢတ်ႈ၊ ဢၼ်ပဵၼ်ၽေးယေႃးၵႃႇတၢင်းၶႆႈတၢင်းပဵၼ်၊ဢိၵ်ႇတင်းၽေးတၢင်းဢၼ်ၶီၸႂ်လႄႈ ဢိၵ်ႇတင်းၽေးတၢင်းဢၼ်ၶဝ်ႈၵႃႈမၢၵ်ႇပႅင်းသေယဝ်ႉ၊ မၼ်းတၵ်းလႆႈၶၢမ်ႇတၢင်းဢၼ်မႆႈၶႅမ်ႈၵႃႈၼႂ်းၽႆးဢေႃႈ။ လွင်ႈမၼ်းၸမ်ႉ၊ၸဝ်ႈထႃႇဝရႃႉၽြႃး၊ၽြႃးပဵၼ်ၸဝ်ႈဢၼ်ၸီႇယၢင်ႇတြႃး၊ ၵႃႈၼိူဝ်မၼ်းၼၼ်ႉပဵၼ်ၸဝ်ႈဢၼ်မီး ၽုင်းတၼ်းၶူဝ်းယႂ်ႇၼႃႇဢေႃႈ၊” ဝႃႈၼင်ႇၼႆဢေႃႈ။
ၶုၼ်ႁေႃၶမ်းလေႃးၵီႇတင်းလၢႆ ဢၼ်ႁဵတ်းမေႇထုင်ႇဢၼ်ဢမ်ႇတြႃးလူၺ်ႈၵၼ်တင်းမၼ်းလႄႈမူၼ်ႈပျေႃႇၵႃႈၼႂ်းၵႃႇမၵုင်ႇၸိူဝ်းၼၼ်ႉမိူဝ်ႈဢၼ်ႁၼ်ၵႂၼ်းၽႆးဢၼ်ဢွၵ်ႇသေၵႃႈတီႈဢၼ်ၽႆးမႆႈမၼ်းၼၼ်ႉၸိုင်၊ၶဝ်ဢွၼ်ၵၼ်ႁွင်ႉႁႆႈလႄႈၶၢင်းၶီၶၢင်းၽၢၼ်ပုၼ်ႈမၼ်းဢေႃႈ။-
ၶဝ်ၵူဝ်လႆႈၶဝ်ႈပႃးၸွမ်းလႄႈၶၢမ်ႇဢဝ်ၽေးတၢမ်ႇမၼ်းၼၼ်ႉ၊ၶဝ်ၸင်ႇၸုၵ်းယူႇၵႃႈတီႈၵႆသေလႄႈလၢတ်ႈဝႃႈ၊ “သင်ပႄႉမႃးတုၵ်ႉၶႃႉ။ သင်ပႄႉမႃးလီၵူဝ်လီႁႄထၢၼ်ႇၼႆႉ။ ဝဵင်းလူင် ပႃႇပုလုၼ်ႇ၊ ဝဵင်းဢၼ်ႁႅင်းယႂ်ႇၼႃႇၼႆႉ႟။ ၼႂ်းၼႃႇရီႇၼိုင်ႈၵူၺ်း၊မႂ်းလႆႈၶၢမ်ႇတၢင်းဢၼ်ၸီႇယၢင်ႇပၼ်တၢမ်ႇယဝ်ႉလူင်ပႄႇ၊” ဝႃႈၼင်ႇၼႆဢေႃႈ။
ၸဝ်ႈၵုၼ်ႇၸဝ်ႈသိၼ်လေႃးၵီႇတင်းလၢႆၵေႃႈဢွၼ်ၵၼ်ႁွင်ႉႁႆႈလႄႈၶၢင်းၶီၶၢင်းၽၢၼ်ပုၼ်ႈမၼ်း၊ၵွပ်ႈပိူဝ်ႈၽူႈလႂ်ဢမ်ႇသိုဝ်ႉၵုၼ်ႇၶူဝ်းဢၼ်ၶဝ်ၵႃႉၶၢႆတင်းလၢႆၼၼ်ႉထႅင်ႈယဝ်ႉ၊-
ဢၼ်ပဵၼ်ၶူဝ်းၶမ်း၊ၶူဝ်းငိုၼ်း၊သႅင်လီ၊သႅင်ပူးလႄး၊ၽႃႈပၢၼ်ႇၶျေႃး၊ၽႃႈၶတီႇပႃႇ၊ၽႃႈၽႄး၊ၽႃႈလႅင်၊မႆႉႁွမ်ၵူႈမဵဝ်းမဵဝ်း၊ၶွင်ၸႂ်ႉၵူႈမဵဝ်းမဵဝ်းဢၼ်ဢဝ်ငႃးၸၢင်ႉႁဵတ်း၊မႆႉဢၼ်မီးၵႃႈမီးၶၼ်လႂ်၊ၶိူင်ႈလဵၵ်းၶိူင်ႈတွင်း၊မၢၵ်ႇႁိၼ်ၶၢဝ်၊-
မႆႉၵႅင်းႁွမ်၊ပိူၵ်ႇမႆႉႁွမ်ဢၼ်သႂ်ႇၽၵ်းၵူႈမဵဝ်းမဵဝ်း၊မႆႉၼၢမ်ႇသႃႇ၊ၼမ်ႉမၼ်းႁွမ်ၵူႈမဵဝ်းမဵဝ်း၊လေႃႇပၢၼ်ႇ၊ၼမ်ႉမၢၵ်ႇပိတ်ႉတင်းၼမ်ႉမၼ်းၵိၼ်၊သၢၼ်ၶဝ်ႈၵျုင်ႇလႄႈၽွင်ၶဝ်ႈၵျုင်ႇ၊ဝူဝ်း၊သူဝ်း၊မႃႉ၊လေႃႉရထႃးမႃႉ၊ၶႃႈ၊ဢိၵ်ႇတင်းဢသၢၵ်ႈၵူၼ်းတင်းလၢႆၸိူဝ်းၼၼ်ႉဢေႃႈ။-
ၸဝ်ႈၵုၼ်ႇၸဝ်ႈသိၼ်ၸိူဝ်းၼၼ်ႉလၢတ်ႈတီႈမၼ်းလႄႈဝႃႈ၊ “လွင်ႈတၢင်းဢၼ်လီဢၼ်ငၢမ်းၸိူဝ်းဢၼ်မႂ်းၸႂ်ၸပ်းၸွႆးၶႂ်ႈလႆႈၼႃႇလူင်လၢင်ၼၼ်ႉႁၢႆၵႂႃႇယဝ်ႉ။ ၸေးၸိမ်ႇမႂ်းတင်းၶိူင်ႈၶူဝ်းဢၼ်ၵႃႈၶၼ်ယႂ်ႇတင်းသဵင်ႈတင်းလူင်ၵေႃႈႁၢႆၵႂႃႇယဝ်ႉလႄႈၵမ်းလိုၼ်းမႂ်းတၵ်းဢမ်ႇလႆႈထူပ်းႁၼ်ထႅင်ႈယဝ်ႉ၊” ဝႃႈၼင်ႇၼႆဢေႃႈ။-
ၸဝ်ႈၵုၼ်ႇၸဝ်ႈသိၼ်ၸိူဝ်းဢၼ်လႆႈမၢၵ်ႈမီးလီပဵၼ်လူၺ်ႈတၢင်းဢၼ်ၵႃႈၶၢႆၵႃႈၼႂ်းဝဵင်းၼၼ်ႉတၵ်းဢွၼ်ၵၼ်ၸုၵ်းတီႈဢၼ်ၵႆ၊ၵွပ်ႈပိူဝ်ႈၶဝ်ၵူဝ်လႆႈၶဝ်ႈပႃးၸွမ်းဢၼ်တၵ်းလႆႈၶၢမ်ႇဢဝ်ၽေးတၢမ်ႇမၼ်းၼၼ်ႉလႄႈဢွၼ်ၵၼ်ႁွင်ႉႁႆႈၶၢင်းၶီၶၢင်းၽၢၼ်ယူႇလႄႈလၢတ်ႈဝႃႈ၊-
“သင်ပႄႉမႃးတုၵ်ႉၶႃႉ။ သင်ပႄႉမႃးလီၵူဝ်လီႁႄ၊ပုၼ်ႈဝဵင်းလူင်ထၢၼ်ႇၼႆႉ။ ဝဵင်းၼၼ်ႉယၢမ်ႈၼုင်ႈမႆၽႃႈပၢၼ်ႇၶျေႃး၊ၽႃႈၵမ်ႇ၊ၽႃႈလႅင်လႄႈ ၸၢင်ႈဢဝ်ၶိူင်ႈၶမ်းလႂ်၊သႅင်လႂ်၊သႅင်ပူးလႄးလႂ်ၼၼ်ႉႁၢင်ႈၶိူင်ႈတူဝ်ၸဝ်ႈၵဝ်ႇဢေႃႈ။-
ၼႂ်းၼႃႇရီႇၼိုင်ႈၵူၺ်းၸေးၸိမ်ႇၸိူဝ်းၼႆႉသုမ်းႁၢႆလၢႆၵႂႃႇတင်းသဵင်ႈတင်းမူတ်းယဝ်ႉဢေႃႈ၊” ဝႃႈၼင်ႇၼႆဢေႃႈ။ ၵူၼ်းဢုပ်ႉထိင်းႁိူဝ်းသၢင်းၽေႃးတင်းသဵင်ႈတင်းလူင်၊ဢိၵ်ႇတင်းၵူၼ်းၶီႇႁိူဝ်းသၢင်းၽေႃးလႂ်၊တင်းၵူၼ်းႁိူဝ်းသၢင်းၽေႃးလႂ်၊ပႃးၸဵမ်ၶဝ်ၸိူဝ်းဢၼ်ႁဵတ်းၵၢၼ်လဵင်ႉတွင်ႉၵႃႈတီႈပၢင်ႇလၢႆႇတင်းသဵင်ႈတင်းလူင်ၸိူဝ်းၼၼ်ႉဢွၼ်ၵၼ်ၸုၵ်းယူႇၵႃႈတီႈၵႆၼၼ်ႉလႄႈ၊-
မိူဝ်ႈဢၼ်ၶဝ်ႁၼ်ၵႂၼ်းၽႆးဢၼ်မႆႈဝဵင်းၼၼ်ႉၸိုင်၊ၶဝ်ဢွၼ်ၵၼ်ႁွင်ႉသႅၼ်ႇလႄႈဝႃႈ၊ “ဢမ်ႇတွၼ်ႉမီးဝဵင်းလႂ်ဢၼ်မိူၼ်ဝဵင်းလူင်ၼႆႉ၊” ဝႃႈၼင်ႇၼႆဢေႃႈ။-
ၶဝ်ဢဝ်မုၼ်ႈလိၼ်ၽွၵ်းသႂ်ႇၵႃႈၼိူဝ်ႁူဝ်တူဝ်ၸဝ်ႈၵဝ်ႇယူႇ၊ႁွင်ႉႁႆႈလႄႈၶၢင်းၶီၶၢင်းၽၢၼ်ယူႇသေလႄႈလၢတ်ႈဝႃႈ၊ “သင်ပႄႉမႃးလီၵူဝ်ၼႃႇ။ သင်ႇပႄႉမႃးလီၵူဝ်လီႁႄပုၼ်ႈဝဵင်းလူင်ၼႆႉ။ ဝဵင်းၼၼ်ႉပဵၼ်ဝဵင်းဢၼ်ႁဵတ်းႁႂ်ႈၸဝ်ႈႁိူဝ်းသၢင်းၽေႃးဢၼ်ၶၢမ်ႈပၢင်ႇလၢႆႇၼၼ်ႉလႆႈမၢၵ်ႈမီးလီပဵၼ်ၵွပ်ႈလူၺ်ႈၸေးၸိမ်ႇမၼ်းဢေႃႈ။ ၼႂ်းၼႃႇရီႇၼိုင်ႈၵူၺ်း၊ၵူႈၸိူဝ်ႉၵူႈပိူင်လႆႈသုမ်းႁၢႆၵႂႃႇယဝ်ႉဢေႃႈ။
“ၵၢင်ႁၢဝ်႟။ ပိူဝ်ႈဢၼ်ဝဵင်းၼၼ်ႉလုလႅဝ်ၵႂႃႇယဝ်ႉလႄႈသိူဝ်းပျေႃႇတႃႉ။ ၵူၼ်းၽြႃးပဵၼ်ၸဝ်ႈတင်းလၢႆ၊ဢိၵ်ႇတင်းတမၢၼ်ႇၸဝ်ႈတင်းလၢႆ၊ဢိၵ်ႇတင်းပရေႃးၽႅတ်ႈ ၶဝ်႟။ သိူဝ်းပျေႃႇတႃႉ။ လွင်ႈမၼ်းၸမ်ႉ၊ၽြႃး ပဵၼ်ၸဝ်ႈလႆႈၸီႇယၢင်ႇတြႃးၵႃႈၼိူဝ်မၼ်းၼၼ်ႉပုၼ်ႈသူယဝ်ႉ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊တမၢၼ်ႇၵၢင်ႁၢဝ်ဢၼ်ႁႅင်းယႂ်ႇၼႃႇပႃးၼိုင်ႈဢဝ်မၢၵ်ႇႁိၼ်လုၵ်ႈၼိုင်ႈဢၼ်ယႂ်ႇထၢၼ်ႇမၢၵ်ႇႁိၼ်လူၺ်ၼၼ်ႉသေယဝ်ႉ၊ထိမ်ႈတူၵ်းသႂ်ႇၵႃႈၼႂ်းပၢင်ႇလၢႆႇသေလႄႈလၢတ်ႈဝႃႈ၊ “ဝဵင်းလူင် ပႃႇပုလုၼ်ႇ၊ တၵ်းလႆႈၶၢမ်ႇတၢင်းဢၼ်ထိမ်ႈတူၵ်းသႂ်ႇႁႅင်းၼႃႇမိူၼ်ၸိူဝ်ႉၼင်ႇၼႆလႄႈၵမ်းလိုၼ်းတၵ်းတေဢမ်ႇမီးၽူႈလႂ်ၶိုၼ်းထူပ်းႁၼ်မၼ်းထႅင်ႈယဝ်ႉ။-
သဵင်တိင်ႇသဵင်တရေႃးတင်းလၢႆ၊သဵင်ၵႂၢမ်းဢၼ်ၵူၼ်းလႄႇၵႂႃႇလႄႇမႃးလႄႈလဵတ်းတိင်ႇသေႁွင်ႉမေႃႁွင်ႉၵႂၢမ်း၊ဢိၵ်ႇတင်းသဵင်ပီႇသဵင်ၼႄးၸိူဝ်းၼၼ်ႉၵေႃႈၵမ်းလိုၼ်းတၵ်းတေဢမ်ႇလႆႈလင်လႆႈမေႃးၵႃႈၼႂ်းမႂ်းထႅင်ႈယဝ်ႉ။ ၶဝ်ၸိူဝ်းဢၼ်ပဵၼ်ၸၢင်ႈမႆႉၸၢင်ႈမိုဝ်းတင်းလၢႆၵေႃႈၵမ်းလိုၼ်းတၵ်းဢမ်ႇလႆႈပေႃႇလႆႈမီးမႃးၵႃႈၼႂ်းမႂ်းသေၵေႃႉသေၵူၼ်းယဝ်ႉ။ သဵင်ဢၼ်လူၺ်ၶဝ်ႈၵေႃႈ ၵမ်းလိုၼ်းတၵ်းတေဢမ်ႇလႆႈငိၼ်းၵႃႈၼႂ်းမႂ်းထႅင်ႈယဝ်ႉ။-
သၢႆလႅင်းၵွၵ်းၽႆးၵေႃႈတၵ်းတေဢမ်ႇလႆႈႁိူဝ်ႈလႆႈလႅင်းၵႃႈၼႂ်းမႂ်းထႅင်ႈယဝ်ႉ။ သဵင်ဢၼ်ၽူႈၸၢႆးၽူႈယိင်းသွင်ႇမၢင်ႇၵလႃႇၵေႃႈတၵ်းတေဢမ်ႇလႆႈငိၼ်းၵႃႈၼႂ်းမႂ်းထႅင်ႈယဝ်ႉ။ လွင်ႈမၼ်းၸမ်ႉ၊ၸဝ်ႈၵုၼ်ႇၸဝ်ႈသိၼ်မႂ်းတင်းလၢႆ၊ပဵၼ်ၵူၼ်းဢၼ်မီးၽုင်းယႂ်ႇၼႃႇၵႃႈၼႂ်းမိူင်းလေႃးၵီႇယဝ်ႉ။ မႂ်းဢဝ်တင်းၺၢၼ်ႇပရိယႄႇမႂ်းသေလႄႈပႅတ်ႉလႅၼ်ၵူၼ်းလေႃးၵီႇတင်းလၢႆယဝ်ႉ၊” ဝႃႈၼင်ႇၼႆဢေႃႈ။
ဝဵင်းလူင် ပႃႇပုလုၼ်ႇ၊ လႆႈၶၢမ်ႇတၢမ်ႇဢပျတ်ႈ ၵွပ်ႈပိူဝ်ႈလႆႈထူပ်းႁၼ်လိူတ်ႈပရေႃးၽႅတ်ႈတင်းလၢႆ၊ဢိၵ်ႇတင်းလိူတ်ႈၵူၼ်းၽြႃးပဵၼ်ၸဝ်ႈတင်းလၢႆ၊ဢိၵ်ႇတင်းလိူတ်ႈၵူၼ်းၵႃႈဢၼ်လႆႈၶၢမ်ႇတၢင်းဢၼ်ဢဝ်တၢႆၵႃႈၼိူဝ်လိၼ်မိူင်းၼႆႉတင်းသဵင်ႈတင်းလူင်ၼၼ်ႉၵႃႈၼႂ်းမၼ်းၼၼ်ႉဢေႃႈ။
လိုၼ်းၼၼ်ႉၵဝ်လႆႈငိၼ်းသဵင်ဢၼ်ဢူၼ်မေႃးမိူၼ်ၸိူဝ်ႉၼင်ႇသဵင်ၵူၼ်းၼမ်ၼႃႇဢၼ်ၸုတုမ်ၵၼ်ၵႃႈၼိူဝ်ၵၢင်ႁၢဝ်ၼၼ်ႉလႄႈဝႃႈ၊ “ႁႃႇလေႇလူးယႃႈ တၢင်းဢၼ်ၵႄႇၶျွတ်ႈဢဝ်၊ဢိၵ်ႇတင်းမုၼ်သရေႇလႄႈ ၽုင်းတၼ်းၶူဝ်းၼၼ်ႉမီးတီႈၽြႃးပဵၼ်ၸဝ်ႈႁဝ်းတီႈၶႃႈဢေႃႈ။-
တၢင်းဢၼ်မၼ်းၸဝ်ႈၸီႇယၢင်ႇတႅပ်းတတ်းတြႃးတင်းလၢႆၼၼ်ႉသိုဝ်ႈတေႃႇလႄႈတြႃးၽဵင်ႇပဵင်းတီႈၶႃႈဢေႃႈ။ မၼ်းၸဝ်ႈၸီႇယၢင်ႇတြႃးတီႈမႄႈမွၵ်ႇယႃႈဢၼ်ႁဵတ်းႁႂ်ႈၵူၼ်းလေႃးၵီႇတင်းလၢႆ၊လႆႈလုလႅဝ်ၵွပ်ႈဢၼ်ႁဵတ်းမေႇထုင်ႇဢၼ်ဢမ်ႇတြႃးလူၺ်ႈၵၼ်တင်းမၼ်းၼၼ်ႉယဝ်ႉ။ ၽြႃးပဵၼ်ၸဝ်ႈလႆႈပၼ်တၢမ်ႇဢပျတ်ႈမၼ်းၵွပ်ႈပိူဝ်ႈမၼ်းဢဝ်ၶႃႈၽြႃးပဵၼ်ၸဝ်ႈတင်းလၢႆတၢႆၼၼ်ႉဢေႃႈ၊” ဝႃႈၼင်ႇၼႆဢေႃႈ။-
ၶဝ်သမ်ႉႁွင်ႉသႅၼ်ႇထႅင်ႈပွၵ်ႈၼိုင်ႈလႄႈဝႃႈ၊ “ႁႃႇလေႇလူးယႃႈ။ ၵႂၼ်းၽႆးဢၼ်ဢွၵ်ႇသေၵႃႈၼႂ်းမုၵ်ႉၽႆးဢၼ်မႆႈဝဵင်းလူင်ၼၼ်ႉၵေႃႈလုၵ်ႉမႆႈယူႇတႃႇသေႇဢမ်ႇထၢတ်ႇဢမ်ႇဝၢႆးယဝ်ႉဢေႃႈ၊” ဝႃႈၼင်ႇၼႆဢေႃႈ။-
ၵူၼ်းဢၼ်ဢသၢၵ်ႈယႂ်ႇသၢဝ်းသီႇၵေႃႉ၊ဢိၵ်ႇတင်းတူဝ်သတ်ႉတဝႃႇဢၼ်ဢသၢၵ်ႈလိပ်းသီႇတူဝ်ၼၼ်ႉၶုပ်ႉၶဝ်ႇဝႆႈၽြႃးပဵၼ်ၸဝ်ႈဢၼ်ၼင်ႈယူႇၵႃႈၼိူဝ်ပလၢင်ႇၸဝ်ႈၼၼ်ႉယူႇသေလႄႈလဝ်ႈလၢတ်ႈဝႃႈ၊ “ဢႃမိၼ်ႈ။ ႁႃႇလေႇလူးယႃႈ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉမီးသဵင်လၢတ်ႈဢွၵ်ႇသေၵႃႈၼႂ်းပလၢင်ႇၸဝ်ႈမႃးလႄႈဝႃႈ၊ “ၶႃႈၽြႃးပဵၼ်ၸဝ်ႈတင်းသဵင်ႈတင်းလူင်၊ဢိၵ်ႇတင်းၶဝ်ၸိူဝ်းဢၼ်ရူဝ်ႇသေႇၵူဝ်ယမ်မၼ်းၸဝ်ႈၸဵမ်လဵၵ်ႉၸဵမ်ယႂ်ႇၵႃႈမီးၶဝ်႟။ ဢွၼ်ၵၼ်ယွင်ႈယေႃးၽြႃးပဵၼ်ၸဝ်ႈတႃႉ၊” ဝႃႈၼင်ႇၼႆဢေႃႈ။-
မိူဝ်ႈၼၼ်ႉၵဝ်သမ်ႉလႆႈငိၼ်းသဵင်ဢၼ်ဢူၼ်မေႃးမိူၼ်ၸိူဝ်ႉၼင်ႇသဵင်ၵူၼ်းၼမ်ၼႃႇဢၼ်ၸုတုမ်ၵၼ်၊ဢိၵ်ႇတင်းမိူၼ်ၸိူဝ်ႉၼင်ႇသဵင်ၼမ်ႉတူၵ်းတၢတ်ႇ၊ဢိၵ်ႇတင်းမိူၼ်သဵင်ၽႃႉလင်ၽႃႉၽႃႇၼၼ်ႉလႄႈလၢတ်ႈဝႃႈ၊ “ႁႃႇလေႇလူးယႃႈ။ ထႃႇဝရႃႉၽြႃး၊ၽြႃးပဵၼ်ၸဝ်ႈႁဝ်းၶႃႈဢၼ်ပဵၼ်ၸဝ်ႈဢၼၼ်ႇတႃႉတၼ်းၶူဝ်းၼႆႉဢုပ်ႉပိူင်ႇၸၢမ်ႇၸႃးယူႇဢေႃႈ။-
ဢွၼ်ၵၼ်ၸူမ်းသိူဝ်းလႄႈမူၼ်ႈပျေႃႇတႃႉႁဝ်း။ ဢွၼ်ၵၼ်ယွင်ႈယေႃးတၢင်းဢၼ်မၼ်းၸဝ်ႈယႂ်ႇမျၢတ်ႈၼၼ်ႉတႃႉႁဝ်း။ လွင်ႈမၼ်းၸမ်ႉ၊ၶိင်ႇဝၼ်းပွႆးသွင်ႇမၢင်ႇၵလႃႇသူဝ်းဢွၼ်ႇၸဝ်ႈၼၼ်ႉႁွတ်ႈထိုင်ယဝ်ႉ။ ယိင်းသၢဝ်မၼ်းၵေႃႈႁၢင်ႈၶိူင်ႈဝႆႉပုၼ်ႈပွႆးၼၼ်ႉယဝ်ႉ။-
ယိင်းသၢဝ်ၼၼ်ႉလႆႈၼုင်ႈမႆၽႃႈပၢၼ်ႇၶျေႃးဢၼ်ၽိူၵ်ႇၸိုၼ်ႈၶၢဝ်သႂ်ဝႆႉယဝ်ႉဢေႃႈ၊” ဝႃႈၼင်ႇၼႆဢေႃႈ။ ၽႃႈပၢၼ်ႇၶျေႃးၼၼ်ႉပဵၼ်တၢင်းၵမ်တၢင်းၵျၢင်ႉဢၼ်လီဢၼ်ငၢမ်းၵူၼ်းၽြႃးပဵၼ်ၸဝ်ႈတင်းလၢႆဢေႃႈ။
ၵမ်းၼၼ်ႉ၊တမၢၼ်ႇၵၢင်ႁၢဝ်ၼၼ်ႉလၢတ်ႈတီႈၵဝ်လႄႈဝႃႈ၊ “ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၽိတ်ႈပၢင်းႁႂ်ႈလႆႈၶဝ်ႈပွႆးသွင်ႇမၢင်ႇၵလႃႇသူဝ်းဢွၼ်ႇၸဝ်ႈၼၼ်ႉမီးမၢင်ႇၵလႃႇဢေႃႈ၊ဝႃႈၼႆတႅမ်ႈဝႆႉတႃႉ၊” ဝႃႈၼင်ႇၼႆသေယဝ်ႉ၊သမ်ႉလၢတ်ႈထႅင်ႈလႄႈဝႃႈ၊ “ၵႂၢမ်းၸိူဝ်းၼႆႉပဵၼ်ၵႂၢမ်းတြႃးဢၼ်ဢွၵ်ႇသူပ်းၽြႃးပဵၼ်ၸဝ်ႈဢမၢၼ်ႇၶၼ်ပဵၼ်ဢေႃႈ၊” ဝႃႈၼင်ႇၼႆဢေႃႈ။
ၵဝ်ၵေႃႈၶုပ်ႉမူပ်ႇၵႃႈတီႈႁိမ်းတိၼ်တမၢၼ်ႇၵၢင်ႁၢဝ်သေယဝ်ႉ၊ဝႆႈသႃၵူဝ်းၵႂၢႆႇမၼ်းဢေႃႈ။ ၵူၺ်းၵႃႈ၊မၼ်းလၢတ်ႈတီႈၵဝ်လႄႈဝႃႈ၊ “ယႃႇပေႁဵတ်းၸိူဝ်ႉၼင်ႇၼႆသေၵမ်း။ ၵဝ်ၼႆႉ၊ပဵၼ်ၵေႃႉဢၼ်ပွင်ၵၢၼ်ႁူမ်ႈလူၺ်ႈၵၼ်တင်းမႂ်းလႄႈၶဝ်ႈပႃးၼႂ်းပီႈၼွင်ႉမႂ်းၸိူဝ်းဢၼ်မီးသဵတ်ႈၸႃႇၸွမ်းသမ်ႇမႃႇတြႃးဢၼ်ပဵၼ်မႃးၵႃႈတီႈ ၸဝ်ႈယေႇသု၊ ၼၼ်ႉၵူၺ်းၼင်ႇၵဝ်ႇဢေႃႈ။ ၵူဝ်းၵႂၢႆႇၽြႃးပဵၼ်ၸဝ်ႈတႃႉ၊” ဝႃႈၼင်ႇၼႆဢေႃႈ။ လွင်ႈမၼ်းၸမ်ႉ၊သမ်ႇမႃႇတြႃးဢၼ်ပဵၼ်မႃးၵႃႈတီႈ ၸဝ်ႈယေႇသု၊ ၼၼ်ႉၸိုင်၊ပဵၼ်တြႃးဢၼ်ပဝ်ႇသႂၢင်းပၼ်တီႈပရေႃးၽႅတ်ႈ တင်းလၢႆဢေႃႈ။
မိူဝ်ႈၼၼ်ႉၵဝ်ႁၼ်ၵၢင်ႁၢဝ်ၽုၺ်ႇပိုတ်ႇဝႆႉလႄႈမီးမႃႉၽိူၵ်ႇတူဝ်ၼိုင်ႈဢေႃႈ။ ၸဝ်ႈဢၼ်ၶီႇမႃႉၼၼ်ႉမီးၸိုဝ်ႈႁွင်ႉႁဵၵ်ႈဝႃႈ၊ သဵတ်ႈၸႃႇလႄႈသမ်ႇမႃႇတြႃး၊ ဢေႃႈ။ မၼ်းၸဝ်ႈၸီႇယၢင်ႇၸွမ်းတြႃးဢၼ်သိုဝ်ႈတေႃႇလႄႈတိုၵ်းသိုၵ်းၸွမ်းတြႃးဢၼ်သိုဝ်ႈတေႃႇဢေႃႈ။-
မၢၵ်ႇတႃမၼ်းၸဝ်ႈပဵၼ်ၼင်ႇပဵဝ်ၽႆးလႄႈ ၵႃႈၼိူဝ်ႁူဝ်မၼ်းၸဝ်ႈၵေႃႈတိုဝ်းသရၽူႇဝႆႉၼမ်ၼႃႇဢေႃႈ။ ၸိုဝ်ႈသဵင်ၸဝ်ႈၵေႃႈတႅမ်ႈဝႆႉၵႃႈၼိူဝ်တူဝ်မၼ်းၸဝ်ႈလႄႈၼွၵ်ႈသေမၼ်းၸဝ်ႈဢမ်ႇမီးၽူႈလႂ်ႁုၸိုဝ်ႈသဵင်ၼၼ်ႉလႆႈဢေႃႈ။-
ၶူဝ်းၼုင်ႈဢၼ်မၼ်းၸဝ်ႈၼုင်ႈၼၼ်ႉပဵၼ်ၶူဝ်းၼုင်ႈဢၼ်ၸုမ်ႇသႂ်ႇၵႃႈၼႂ်းလိူတ်ႈလႄႈၸိုဝ်ႈသဵင်မၼ်းၸဝ်ႈၸမ်ႉ၊ႁွင်ႉႁဵၵ်ႈဝႃႈ၊ “ၼုၵ်ႈၵပၢတ်ႈတြႃး၊ၽြႃးပဵၼ်ၸဝ်ႈ၊” ဢေႃႈ။-
တပ်ႉသိုၵ်းၵၢင်ႁၢဝ်တင်းလၢႆၵေႃႈၼုင်ႈၽႃႈပၢၼ်ႇၶျေႃးဢၼ်ၽိူၵ်ႇၸိုၼ်ႈၶၢဝ်သႂ်လႄႈၶီႇမႃႉၽိူၵ်ႇသေၸွမ်းလင်မၼ်းၸဝ်ႈယူႇဢေႃႈ။-
လၢပ်ႇသၢၼ်ႇလႅၵ်ႈဢၼ်ၽၢႆၼႃႇၼၼ်ႉဢွၵ်ႇမႃးသေၵႃႈတီႈသူပ်းမၼ်းၸဝ်ႈၼၼ်ႉပုၼ်ႈဢၼ်တၵ်းၽၼ်းပႄႉၵူၼ်းမဵဝ်းတင်းလၢႆဢေႃႈ။ မၼ်းၸဝ်ႈတၵ်းဢဝ်တင်းၵၼ်းႁွၵ်ႇလဵၵ်းသေလႄႈဢုပ်ႉပိူင်ႇၶဝ်ဢေႃႈ။ မၼ်းၸဝ်ႈတၵ်းဢဝ်ၶဝ်ယဵတ်ႈသႂ်ႇၵႃႈၼႂ်းႁၢင်းယဵပ်ႇၼူတ်ႈမၢၵ်ႇၸပိတ်ႉဢၼ်ဝႃႈ၊တေႃးသႃႉတၢင်းဢၼ်ၸႂ်မႆႈၶႂ်ႈၸႃႉၸဝ်ႈဢၼၼ်ႇတႃႉတၼ်းၶူဝ်းၸဝ်ႈထႃႇဝရႃႉၽြႃးၼၼ်ႉဢေႃႈ။-
မၼ်းၸဝ်ႈမီးၸိုဝ်ႈသဵင်ဢၼ်တႅမ်ႈၸပ်းဝႆႉၵႃႈၼိူဝ်ၶူဝ်းၼုင်ႈၸဝ်ႈ၊ဢိၵ်ႇတင်းၵႃႈတီႈႁိမ်းတၢပ်ႇၶႃၸဝ်ႈၼၼ်ႉႁွင်ႉႁဵၵ်ႈဝႃႈ၊ “ၶုၼ်ႁေႃၶမ်းၵႃႈၼိူဝ်ၶုၼ်ႁေႃၶမ်းတင်းလၢႆ၊ၸဝ်ႈၵႃႈၼိူဝ်ၸဝ်ႈတင်းလၢႆ၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉ၊ၵဝ်ႁၼ်တမၢၼ်ႇၵၢင်ႁၢဝ်တၢင်ႇပႃးၸုၵ်းယူႇၵႃႈၼိူဝ်တႃဝၼ်းသေလႄႈႁွင်ႉပၢဝ်ႇႁွင်ႉသေႃႇလူၺ်ႈတင်းသဵင်ဢၼ်ယႂ်ႇၼႃႇတီႈၼူၵ်ႉတင်းလၢႆဢၼ်မိၼ်ယူႇၵႃႈၼိူဝ်ၽႃႉၵၢင်ႁၢဝ်လႂ်ၼၼ်ႉလႄႈဝႃႈ၊ “ဢွၼ်ၵၼ်မႃးတႃႉ။ မႃးၸုတုမ်ၵၼ်တီႈပွႆးၵိၼ်လဵင်ႉၽြႃးပဵၼ်ၸဝ်ႈ၊-
ႁႂ်ႈလႆႈၵိၼ်ၼိူဝ်ႉၶုၼ်ႁေႃၶမ်းတင်းလၢႆ၊ၼိူဝ်ႉၶုၼ်သိုၵ်းတင်းလၢႆ၊ၼိူဝ်ႉၵူၼ်းသိုၵ်းတင်းလၢႆ၊ဢိၵ်ႇတင်းၼိူဝ်ႉမႃႉတင်းၼိူဝ်ႉၵူၼ်းသိုၵ်းဢၼ်ၶီႇမႃႉတင်းလၢႆ၊ပႃးၸဵမ်ၼိူဝ်ႉၵူၼ်းတင်းလၢႆ၊ဢၼ်ပဵၼ်ၶႃႈလႄႈၵူၼ်းလွတ်ႈလႅဝ်းလဵၵ်ႉလဵၵ်ႉယႂ်ႇယႂ်ႇၸိူဝ်းၼၼ်ႉတႃႉႁဝ်း၊” ဝႃႈၼင်ႇၼႆဢေႃႈ။
မိူဝ်ႈၼၼ်ႉၵဝ်ႁၼ်တူဝ်ထိူၼ်ႇႁၢႆႉလႄႈၶုၼ်ႁေႃၶမ်းလေႃးၵီႇတင်းလၢႆ၊ဢိၵ်ႇတင်းတပ်ႉသိုၵ်းၶဝ်တင်းလၢႆ၊ၸုတုမ်မႃးႁႂ်ႈလႆႈတိုၵ်းတေႃးၵၼ်တင်းၸဝ်ႈဢၼ်ၶီႇမႃႉ၊ဢိၵ်ႇတင်းတပ်ႉသိုၵ်းၸဝ်ႈၼၼ်ႉဢေႃႈ။-
တူဝ်ထိူၼ်ႇႁၢႆႉၼၼ်ႉလႆႈၶၢမ်ႇတၢင်းဢၼ်တိဢဝ်ဝႆႉလူၺ်ႈၵၼ်တင်းမိၵ်ႉသႃႇပရေႃးၽႅတ်ႈ ဢၼ်ဢဝ်တင်းၼိမိၵ်ႈလၢၵ်ႈၶၼႃႇၸိူဝ်းၼၼ်ႉပႅတ်ႉလႅၼ်ၶဝ်ၸိူဝ်းဢၼ်မီးႁွႆးတၼ်းသိၵ်ႈတူဝ်ထိူၼ်ႇႁၢႆႉ၊ဢိၵ်ႇတင်းၶဝ်ၸိူဝ်းဢၼ်ဝႆႈႁုၼ်ႇႁၢင်ႈသၢင်းထုမၼ်းၼၼ်ႉဢေႃႈ။ တူဝ်ထိူၼ်ႇႁၢႆႉတင်းမိၵ်ႉသႃႇပရေႃးၽႅတ်ႈၼၼ်ႉလႆႈၶၢမ်ႇတၢင်းဢၼ်ဢဝ်တူဝ်လိပ်းၶဝ်ထိမ်ႈသႂ်ႇၵႃႈၼႂ်းၼွင်ၽႆးဢၼ်မႆႈလေႃးၵၼ်တင်းၵၢၼ်ႉၼၼ်ႉဢေႃႈ။-
တပ်ႉသိုၵ်းၶဝ်တင်းလၢႆၸမ်ႉ၊လႆႈၶၢမ်ႇတၢင်းဢၼ်ၽၼ်းတၢႆလူၺ်ႈလၢပ်ႇသၢၼ်ႇလႅၵ်ႈဢၼ်ဢွၵ်ႇသေၵႃႈတီႈသူပ်းၸဝ်ႈဢၼ်ၶီႇမႃႉၼၼ်ႉသေလႄႈၼူၵ်ႉတင်းလၢႆၵေႃႈၵိၼ်ၼိူဝ်ႉၶဝ်ၸိူဝ်းၼၼ်ႉထၢၼ်ႈပေႃးဢိမ်ႇတဵမ်ၼႃႇဢေႃႈ။
မိူဝ်ႈၼၼ်ႉ၊ၵဝ်ႁၼ်တမၢၼ်ႇၵၢင်ႁၢဝ်ပႃးၼိုင်ႈဢၼ်လုၵ်ႉသေၵႃႈၼိူဝ်ၵၢင်ႁၢဝ်လူင်းမႃးသေယဝ်ႉ၊ၼႂ်းမိုဝ်းမၼ်းယိပ်းၵမ်ၵၢၵ်ႇသေႃးႁူးၶုမ်ငရၢႆး၊ဢိၵ်ႇတင်းၸိူၵ်ႈလဵၵ်းဢၼ်သဵၼ်ႈယႂ်ႇၼႃႇၼၼ်ႉဢေႃႈ။-
မၼ်းတိဢဝ်ၼၵႃးဢၼ်ဝႃႈ၊ငူးၵဝ်ႇလူင်မိူဝ်ႈၵွၼ်ႇၵွၼ်ႇဢၼ်ပဵၼ် ၸႃႇတၢၼ်ႇမႃႇၼၢတ်ႈ၊ ၼၼ်ႉသေယဝ်ႉ၊မတ်ႉၽုၵ်ႇဝႆႉပုၼ်ႈပီမိူင်းႁဵင်ၼိုင်ႈဢေႃႈ။-
တမၢၼ်ႇၵၢင်ႁၢဝ်ၼၼ်ႉဢဝ်မၼ်းထိမ်ႈတူၵ်းသႂ်ႇၵႃႈၼႂ်းထၢင်ငရၢႆးသေယဝ်ႉ၊ၶတ်းၵၢင်ႇလႄႈတွၵ်ႇၸုမ်ႈဝႆႉၵႃႈတီႈၽၵ်းတူငရၢႆး၊ၼင်ႇႁိုဝ်မၼ်းတၵ်းတေဢမ်ႇပႅတ်ႉလႅၼ်မဵဝ်းၵူၼ်းတင်းလၢႆလႆႈ၊တေႃႇထိုင်ႁွတ်ႈႁဵင်ပီသုတ်းသဵင်ႈၵႂႃႇၼၼ်ႉဢေႃႈ။ လိုၼ်းၼၼ်ႉၸင်ႇ၊မၼ်းတၵ်းလႆႈၶၢမ်ႇတၢင်းဢၼ်ပွႆႇလွတ်ႈၸူဝ်ႈၵမ်းဢွၼ်ႇၼိုင်ႈဢေႃႈ။
ၵမ်းၼၼ်ႉ၊ၵဝ်ႁၼ်ပလၢင်ႇၼမ်ၼႃႇလႄႈၶဝ်ၸိူဝ်းဢၼ်ၼင်ႈယူႇၵႃႈၼိူဝ်ပလၢင်ႇၸိူဝ်းၼၼ်ႉ လႆႈဢၶႂၢင်ႉဢၼ်ၸီႇယၢင်ႇတြႃးဢေႃႈ။ ၵဝ်သမ်ႉႁၼ်ဝိၺိၺ်ႇၶဝ်ၸိူဝ်းဢၼ်လႆႈၶၢမ်ႇတၢင်းဢၼ်တႅပ်းၶေႃးၵွပ်ႈပိူဝ်ႈၶဝ်ၶၢမ်ႇသၢၵ်ႈသေႇလွင်ႈ ၸဝ်ႈယေႇသု၊ ဢိၵ်ႇတင်းၼုၵ်ႈၵပၢတ်ႈတြႃး၊ၽြႃးပဵၼ်ၸဝ်ႈ၊ဢိၵ်ႇတင်းၵွပ်ႈပိူဝ်ႈဢမ်ႇဝႆႈတူဝ်ထိူၼ်ႇႁၢႆႉ၊ဢိၵ်ႇတင်းဢမ်ႇဝႆႈႁုၼ်ႇႁၢင်ႈမၼ်း၊ဢိၵ်ႇတင်းဢမ်ႇႁႂ်ႈဢဝ်တၼ်းသိၵ်ႈတူဝ်ထိူၼ်ႇႁၢႆႉတွၵ်ႇၵႃႈတီႈၼႃႈၽၢၵ်ႇၶဝ်၊ဢမ်ႇၼၼ်ၵႃႈတီႈမိုဝ်းၶဝ်ၸိူဝ်းၼၼ်ႉဢေႃႈ။ ၶဝ်ၸိူဝ်းၼၼ်ႉဢသၢၵ်ႈလိပ်းမႃးၶိုၼ်းလႄႈဢုပ်ႉပိူင်ႇၸိူဝ်ႉၼင်ႇၶုၼ်ႁေႃၶမ်းလူၺ်ႈၵၼ်တင်း ၸဝ်ႈၶရိၸ်ႈ၊ ႁဵင်ပီတဵမ်တဵမ်ဢေႃႈ။-
ၵူၼ်းတၢႆဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉၸမ်ႉ၊ဢမ်ႇလႆႈလုၵ်ႉၶိုၼ်းလိပ်းမႃးတေႃႇထိုင်ႁွတ်ႈပီမိူင်းႁဵင်ၼိုင်ႈသုတ်းသဵင်ႈၵႂႃႇၼၼ်ႉဢေႃႈ။ တၢင်းဢၼ်လုၵ်ႉၶိုၼ်းလိပ်းၼႆႉၸမ်ႉ၊ပဵၼ်ပွၵ်ႈတီႈၼိုင်ႈဢေႃႈ။-
ၶဝ်ၸိူဝ်းဢၼ်လႆႈၶဝ်ႈပႃးၵႃႈၼႂ်းတၢင်းဢၼ်လုၵ်ႉၶိုၼ်းလိပ်းပွၵ်ႈတီႈၼိုင်ႈၼႆႉၼၼ်ႉပဵၼ်ၶဝ်ၸိူဝ်းဢၼ်မီးမၢင်ႇၵလႃႇလႄႈမူတ်းၸၢင်ႇဢေႃႈ။ တၢင်းတၢႆပွၵ်ႈတီႈသွင်တၵ်းတေဢမ်ႇလႆႈပႄႉၼႅင်ႇၶဝ်လႄႈၶဝ်တၵ်းလႆႈပဵၼ်ယဵၸ်ႈပရေႃးႁဵၵ်ႈ ၽြႃးပဵၼ်ၸဝ်ႈတင်း ၸဝ်ႈၶရိၸ်ႈ၊ သေယဝ်ႉ၊တၵ်းလႆႈဢုပ်ႉပိူင်ႇလူၺ်ႈၵၼ်တင်းမၼ်းၸဝ်ႈႁဵင်ပီတဵမ်တဵမ်ဢေႃႈ။
ဝၢႆးသေႁဵင်ပီမိူင်းသုတ်းသဵင်ႈၵႂႃႇယဝ်ႉၼၼ်ႉၸိုင်၊တၵ်းပွႆႇ ၸႃႇတၢၼ်ႇ၊ ဢွၵ်ႇထွင်ႇၵႂႃႇလႄႈ၊-
မၼ်းတၵ်းဢွၵ်ႇမႃးပႅတ်ႉလႅၼ်ၵူၼ်းၵူႈၸိူဝ်ႉၵူႈမဵဝ်းၸွတ်ႇတူဝ်ႈၵႂႃႇၵႃႈၼိူဝ်လိၼ်မိူင်းသီႇၸဵင်ႇပႅတ်ႇၼႃႈ၊ဢၼ်ပဵၼ်ၵူၼ်းမဵဝ်း ၵေႃးၵႃႉ၊ တင်း မႃၵေႃးၵႃႉ၊ ၼၼ်ႉဢေႃႈ။ ၸႃႇတၢၼ်ႇ၊ တၵ်းဢဝ်ၶဝ်ၼမ်ၼႃႇ၊ဢၼ်ၼမ်မိူၼ်မဵတ်ႉသၢႆးၵႃႈၼႂ်းၼမ်ႉသမ်ႇမုၵ်ႈတြႃႇၸိူဝ်းၼၼ်ႉ၊ၸုတုမ်ၵၼ်ပုၼ်ႈတၵ်းတိုၵ်းသိုၵ်းဢေႃႈ။-
ၶဝ်တၵ်းၶီႇသိုၵ်းၶိုၼ်ႈၵႂႃႇႁႂ်ႈၸွတ်ႇၵႃႈၼိူဝ်လိၼ်မိူင်းၼၼ်ႉလႄႈလွမ်ႉႁွပ်ႈတပ်ႉၵူၼ်းၽြႃးပဵၼ်ၸဝ်ႈတင်းလၢႆ၊ဢိၵ်ႇတင်းဝဵင်းဢၼ်မၼ်းၸဝ်ႈႁၵ်ႉၸိူဝ်းၼၼ်ႉဢေႃႈ။ ၵူၺ်းၵႃႈ၊ၽႆးတၵ်းလုၵ်ႉသေၵႃႈၼိူဝ်ၵၢင်ႁၢဝ်တူၵ်းလူင်းမႃးလႄႈယႃႉၽဵဝ်ႈၶဝ်ပႅတ်ႈဢေႃႈ။-
ႁဵတ်းၼၼ်လႄႈ၊ ၸႃႇတၢၼ်ႇ၊ ဢၼ်ပႅတ်ႉလႅၼ်ၶဝ်ၼၼ်ႉလႆႈၶၢမ်ႇတၢင်းဢၼ်ဢဝ်ထိမ်ႈတူၵ်းသႂ်ႇၵႃႈၼႂ်းၼွင်ၽႆးဢၼ်လေႃးၵၼ်တင်းၵၢၼ်ႉ တီႈဢၼ်တူဝ်ထိူၼ်ႇႁၢႆႉတင်းမိၵ်ႉသႃႇပရေႃးၽႅတ်ႈ လႆႈၶမ်ဝႆႉၼၼ်ႉသေယဝ်ႉ၊ၶဝ်တၵ်းလႆႈၶၢမ်ႇဝူၺ်ႇတၼႃႇဢၼ်ယႂ်ႇၼႃႇလူင်လၢင်ၵူႈဝၼ်းၵူႈၶိုၼ်း၊ၸူဝ်ႈၵၢပ်ႈၵမ်ႇၽႃႇသိုပ်ႇသိုပ်ႇတၢမ်တၢမ်ဢေႃႈ။
မိူဝ်ႈၼၼ်ႉၵဝ်ႁၼ်ပလၢင်ႇလူင်ဢၼ်ၽိူၵ်ႇၶၢဝ်၊ဢိၵ်ႇတင်းၸဝ်ႈဢၼ်ၼင်ႈယူႇၵႃႈၼိူဝ်ၼၼ်ႉဢေႃႈ။ မိူဝ်ႈဢၼ်မၼ်းၸဝ်ႈပေႃႇမႃးၼၼ်ႉ၊ၵၢင်ႁၢဝ်တင်းလိၼ်မိူင်းပၢႆႈဢွၵ်ႇသေၵႃႈတီႈၽၢႆႇၼႃႈမၼ်းၸဝ်ႈၵႂႃႇလႄႈဢမ်ႇမီးတီႈယူႇပုၼ်ႈၵၢင်ႁၢဝ်တင်းလိၼ်မိူင်းယဝ်ႉဢေႃႈ။-
ၵဝ်သမ်ႉလႆႈႁၼ်ၶဝ်ၸိူဝ်းဢၼ်တၢႆၵႂႃႇယဝ်ႉ၊ၸဵမ်လဵၵ်ႉၸဵမ်ယႂ်ႇၸုၵ်းယူႇၵႃႈတီႈၽၢႆႇၼႃႈပလၢင်ႇၸဝ်ႈဢေႃႈ။ ၽိုၼ်လိၵ်ႈတင်းလၢႆၽုၺ်ႇဝႆႉလႄႈၽိုၼ်လိၵ်ႈတၢင်ႇၽိုၼ်ဢၼ်ဝႃႈ၊ၽိုၼ်လိၵ်ႈဢသၢၵ်ႈၼၼ်ႉၵေႃႈၽုၺ်ႇဝႆႉမီးယူႇဢေႃႈ။ ၶဝ်ၸိူဝ်းဢၼ်တၢႆၼၼ်ႉလႆႈၶၢမ်ႇတၢင်းဢၼ်ၸီႇယၢင်ႇတြႃးၸွမ်းၵႃႈၼင်ႇဢၼ်တၢင်းၵမ်တၢင်းၵျၢင်ႉၶဝ်လႆႈၶၢမ်ႇတႅမ်ႈမၢႆဝႆႉ၊ၵႃႈၼႂ်းၽိုၼ်လိၵ်ႈၸိူဝ်းၼၼ်ႉဢေႃႈ။-
မိူဝ်ႈၼၼ်ႉ၊ၼမ်ႉသမ်ႇမုၵ်ႈတြႃႇလႆႈဢဝ်ၵူၼ်းတၢႆတင်းလၢႆဢၼ်တၢႆၵႃႈၼႂ်းမၼ်းၼၼ်ႉဢၢပ်ႈပၼ်ဢေႃႈ။ တၢင်းတၢႆဢိၵ်ႇတင်းမိူင်းမရၼႃႉၵေႃႈဢဝ်ၵူၼ်းတၢႆတင်းလၢႆဢၼ်မီးၵႃႈၼႂ်းၶဝ်ၼၼ်ႉဢၢပ်ႈပၼ်ဢေႃႈ။ ႁဵတ်းၼၼ်လႄႈၵူၼ်းၸိူဝ်းၼၼ်ႉလႆႈၶၢမ်ႇတၢင်းဢၼ်ၸီႇယၢင်ႇတြႃးၸွမ်းၵႃႈၼင်ႇဢၼ်ၶဝ်ၵမ်ၵျၢင်ႉႁင်းၽႂ်ႁင်းမၼ်းၼၼ်ႉဢေႃႈ။-
မိူဝ်ႈၼၼ်ႉ တၢင်းတၢႆဢိၵ်ႇတင်းမိူင်းမရၼႃႉၵေႃႈၶၢမ်ႇတၢင်းဢၼ်ဢဝ်ထိမ်ႈတူၵ်းသႂ်ႇၵႃႈၼႂ်းၼွင်ၽႆးသေဢေႃႈ။ ၼွင်ၽႆးၸမ်ႉ၊ပဵၼ်တၢင်းတၢႆပွၵ်ႈတီႈသွင်ဢေႃႈ။-
ၽူႈလႂ်သေဢမ်ႇဝႃႈ၊ပေႃးၸိုဝ်ႈသဵင်မၼ်းဢမ်ႇလႆႈၶၢမ်ႇတၢင်းဢၼ်တႅမ်ႈမၢႆဝႆႉၵႃႈၼႂ်းၽိုၼ်လိၵ်ႈဢသၢၵ်ႈၼၼ်ႉၸိုင်၊ၵေႃႉၼၼ်ႉလႆႈၶၢမ်ႇတၢင်းဢၼ်ဢဝ်ထိမ်ႈတူၵ်းသႂ်ႇၵႃႈၼႂ်းၼွင်ၽႆးဢေႃႈ။
မိူဝ်ႈၼၼ်ႉ၊ၵဝ်လႆႈႁၼ်ၵၢင်ႁၢဝ်မႂ်ႇတင်းလိၼ်မိူင်းမႂ်ႇဢေႃႈ။ လွင်ႈမၼ်းၸမ်ႉ၊ၵၢင်ႁၢဝ်ၵဝ်ႇၵဝ်ႇတင်းလိၼ်မိူင်းၵဝ်ႇၵဝ်ႇၼၼ်ႉႁၢႆၵႂႃႇသဵင်ႈယဝ်ႉ။ ၼမ်ႉသမ်ႇမုၵ်ႈတြႃႇၵေႃႈ ႁၢႆၵႂႃႇလုမ်းလုမ်းယဝ်ႉဢေႃႈ။-
ၵဝ်သမ်ႉႁၼ်ဝဵင်းမူတ်းၸၢင်ႇဢၼ်ဝႃႈ၊ဝဵင်း ယေႇရုသလႅမ်ႇ၊ မႂ်ႇၼၼ်ႉလုၵ်ႉသေၵႃႈတီႈၽြႃးပဵၼ်ၸဝ်ႈဢၼ်မီးၵႃႈၼိူဝ်ၵၢင်ႁၢဝ်ၼၼ်ႉလူင်းမႃးလႄႈမႄးႁႅၼ်းဝႆႉမိူၼ်ၸိူဝ်ႉၼင်ႇယိင်းသၢဝ်ဢၼ်ႁၢင်ႈၶိူင်ႈပုၼ်ႈၽူဝ်မၼ်းၼၼ်ႉဢေႃႈ။-
ၵဝ်လႆႈငိၼ်းသဵင်ဢၼ်ယႂ်ႇၼႃႇဢၼ်လုၵ်ႉသေၵႃႈတီႈပလၢင်ႇၸဝ်ႈလၢတ်ႈဢွၵ်ႇမႃးလႄႈဝႃႈ၊ “တူၺ်းလူး။ ႁိူၼ်းၽြႃးပဵၼ်ၸဝ်ႈမီးယူႇလူၺ်ႈၵၼ်တင်းၵူၼ်းတင်းလၢႆယဝ်ႉ။ မၼ်းၸဝ်ႈတၵ်းယူႇလူၺ်ႈၵၼ်တင်းၶဝ်လႄႈၶဝ်တၵ်းပဵၼ်ၵူၼ်းမၼ်းၸဝ်ႈဢေႃႈ။ ၽြႃးပဵၼ်ၸဝ်ႈၼၼ်ႉတၵ်းယူႇလူၺ်ႈၵၼ်တင်းၶဝ်လႄႈပဵၼ်ၽြႃးပဵၼ်ၸဝ်ႈၶဝ်ဢေႃႈ။-
မၼ်းၸဝ်ႈတၵ်းၸဵတ်ႉပၼ်ၼမ်ႉတႃတင်းမူတ်းသေၵႃႈတီႈတႃၶဝ်လႄႈၵမ်းလိုၼ်းၽေးတၢင်းတၢႆတၵ်းဢမ်ႇမီးထႅင်ႈယဝ်ႉ။ တၢင်းဢၼ်မႆႈၸႂ်လႄႈၶၢင်းၶီၶၢင်းၽၢၼ်၊တၢင်းဢၼ်ႁွင်ႉႁႆႈ၊တၢင်းဢၼ်ၸဵပ်းသႅပ်ႇၸိူဝ်းၼႆႉဢမ်ႇမီးထႅင်ႈယဝ်ႉ။ လွင်ႈမၼ်းၸမ်ႉ၊လွင်ႈတၢင်းဢၼ်ယၢမ်ႈပဵၼ်မႃးၵဝ်ႇၵဝ်ႇၸိူဝ်းၼၼ်ႉႁၢႆၵႂႃႇသဵင်ႈယဝ်ႉဢေႃႈ၊” ဝႃႈၼင်ႇၼႆဢေႃႈ။
ၵမ်းၼၼ်ႉ၊ၸဝ်ႈဢၼ်ၼင်ႈယူႇၵႃႈၼိူဝ်ပလၢင်ႇၸဝ်ႈၼၼ်ႉလၢတ်ႈလႄႈဝႃႈ၊ “တေႃႈလဵဝ်ၼႆႉ၊ၵႃႈဢၼ်မီးတင်းသဵင်ႈတင်းလူင်ၸိုင်၊ၵဝ်ၶိုၼ်းမႄးၽၢၼ်ႇသၢင်းႁဵတ်းပဵၼ်ဢၼ်မႂ်ႇယဝ်ႉ၊” ဝႃႈၼႆသေယဝ်ႉ၊မီးဢမိင်ႉလႄႈဝႃႈ၊ “ၵႂၢမ်းၸိူဝ်းၼႆႉပဵၼ်ၵႂၢမ်းဢၼ်မၢၼ်ႇမႅၼ်ႈၸိုဝ်ႈၸႂ်ႈ၊ၵႂၢမ်းဢၼ်လီယုမ်ႇဢေႃႈ။ တႅမ်ႈဝႆႉတႃႉ၊” ဝႃႈၼင်ႇၼႆဢေႃႈ။-
သမ်ႉလၢတ်ႈတီႈၵဝ်ထႅင်ႈလႄႈဝႃႈ၊ “လွင်ႈတၢင်းယဝ်ႉတူဝ်ႈယဝ်ႉ၊ၵဝ်ပဵၼ် ၸဝ်ႈဢႃႇလၽႃႉ၊ ဢိၵ်ႇတင်း ၸဝ်ႈဢေႃးမေႇၵႃႉ၊ ၸဝ်ႈဢၼ်ပဵၼ်တီႈၸႃႉ၊ဢိၵ်ႇတင်းတီႈသုတ်းဢေႃႈ။ ၵေႃႉဢၼ်ယၢၵ်ႇၼမ်ႉၼၼ်ႉယင်းဢမ်ႇလႆႈပၼ်ၵႃႈပၼ်ၶၼ်မၼ်းလႄႈၵဝ်တၵ်းပၼ်ၵိၼ်ၼမ်ႉဢွၵ်ႇႁူးဢၼ်ပဵၼ်ၼမ်ႉဢသၢၵ်ႈၼၼ်ႉဢေႃႈ။-
ၽူႈလႂ်သေဢမ်ႇဝႃႈ၊ၵေႃႉဢၼ်ပႄႉၼႅင်ႇၼၼ်ႉ တၵ်းလႆႈၶၢမ်ႇဢဝ်ဢမူၺ်ႇၵဝ်၊ၵဝ်တၵ်းပဵၼ်ၽြႃးပဵၼ်ၸဝ်ႈမၼ်းလႄႈမၼ်းၵေႃႈတၵ်းပဵၼ်လုၵ်ႈၸၢႆးၵဝ်ဢေႃႈ။-
ၵူၺ်းၵႃႈ၊ၵေႃႉဢၼ်ၸၢင်ႈၵူဝ်ၸၢင်ႈႁႄ၊ၵေႃႉဢၼ်ဢမ်ႇယုမ်ႇမၢတ်ႈ၊ၵေႃႉဢၼ်ဝူၺ်ႇဢၼ်ႁင်ႈ၊ၵေႃႉဢၼ်ဢဝ်ဢသၢၵ်ႈၵူၼ်းတၢႆ၊ၵေႃႉဢၼ်ၽိတ်းၵႃႇမေႇသု၊ၵေႃႉဢၼ်ႁဵတ်းဢတၢတ်ႈၽီမေႃႇ၊ၵေႃႉဢၼ်ဝႆႈႁုၼ်ႇႁၢင်ႈသၢင်းထု၊ၵေႃႉဢၼ်လၢတ်ႈမုသႃႇတင်းသဵင်ႈတင်းလူင်ၸမ်ႉ၊တီႈယူႇၶဝ်ၼၼ်ႉပဵၼ်ၼွင်ၽႆးဢၼ်လေႃးၵၢၼ်ႉလႄႈမႆႈယူႇ၊ဢၼ်ပဵၼ်တၢင်းတၢႆပွၵ်ႈတီႈသွင်ၼၼ်ႉယဝ်ႉ၊” ဝႃႈၼင်ႇၼႆဢေႃႈ။
ၼႂ်းတမၢၼ်ႇၵၢင်ႁၢဝ်ၸဵတ်းပႃးဢၼ်ဢၼ်ယိပ်းၵမ်ၵွၵ်းၸဵတ်းလုၵ်ႈဢၼ်တဵမ်ဝႆႉတၢင်းၽေးဢုပၢတ်ႈလိုၼ်းလင်သုတ်းၸဵတ်းပိူင်ၼၼ်ႉ၊ပႃးၼိုင်ႈမႃးတၵ်ႉလၢတ်ႈၵဝ်လႄႈဝႃႈ၊ “မႃးတႃႉ။ ၵဝ်တၵ်းၼႄယိင်းသၢဝ်ဢၼ်တၵ်းပဵၼ်မေးသူဝ်းဢွၼ်ႇၸဝ်ႈၼၼ်ႉတီႈမႂ်းဢေႃႈ၊” ဝႃႈၼင်ႇၼႆဢေႃႈ။-
ဝိၺိၺ်ႇၸဝ်ႈဢုပ်ႉပိူင်ႇၵဝ်သေယဝ်ႉ၊တမၢၼ်ႇၵၢင်ႁၢဝ်ဢဝ်ၵဝ်ၵႂႃႇၵႃႈတီႈၸိၵ်းလွႆဢၼ်သုင်ၼႃႇသေလႄႈၼႄပျႃးဝဵင်း ယေႇရုသလႅမ်ႇ၊ ဢၼ်ပဵၼ်ဝဵင်းမူတ်းၸၢင်ႇလုၵ်ႉသေၵႃႈတီႈၽြႃးပဵၼ်ၸဝ်ႈၵႃႈၼိူဝ်ၵၢင်ႁၢဝ်လူင်းမႃးၼၼ်ႉဢေႃႈ။-
ဝဵင်းၼၼ်ႉႁိူဝ်ႈႁိူင်းဝႆႉတင်းမုၼ်သရေႇၽြႃးပဵၼ်ၸဝ်ႈလႄႈသၢႆငဝ်းဢရွင်ႇမိူၼ်ၸိူဝ်ႉၼင်ႇသႅင်လီဢၼ်ထိူၵ်ႈၵႃႈၼႃႇ၊ဢၼ်မိူၼ်ၼင်ႇသႅင်ၼၵႃးသွႆႈလႄႈလႅင်းသႂ်မိူၼ်ဢၼ်ႁိူဝ်ႈလႅင်းမၢၵ်ႇႁိၼ်ၸိင်ႇဢေႃႈ။-
လမ်းဝဵင်းၵေႃႈယႂ်ႇသုင်ၼႃႇလႄႈမီးႁူးၽၵ်းတူသိပ်းသွင်ႁူးဢေႃႈ။ တမၢၼ်ႇၵၢင်ႁၢဝ်သိပ်းသွင်ပႃးၵေႃႈ ပႂ်ႉၽၵ်းတူၽႂ်ၽၵ်းတူမၼ်းယူႇဢေႃႈ။ ၵႃႈၼိူဝ်ၼႃႈၽၵ်းတူၸိူဝ်းၼၼ်ႉၵေႃႈတႅမ်ႈၸိုဝ်ႈသဵင်ၸိူဝ်ႉၶိူဝ်းၵူၼ်းမဵဝ်း ဢိသရေး၊ သိပ်းသွင်ၸိူဝ်ႉၶိူဝ်းဝႆႉဢေႃႈ။-
လမ်းဝဵင်းယေႈၽၢႆႇမီးသၢမ်ၽၵ်းတူလႄႈၽၢႆႇတၢင်းဝၼ်းဢွၵ်ႇမီးသၢမ်ၽၵ်းတူ၊ၽၢႆႇတၢင်းၸၢၼ်းမီးသၢမ်ၽၵ်းတူ၊ၽၢႆႇတၢင်းႁွင်ႇမီးသၢမ်ၽၵ်းတူ၊ၽၢႆႇတၢင်းဝၼ်းတူၵ်းမီးသၢမ်ၽၵ်းတူဢေႃႈ။-
တိၼ်လမ်းဝဵင်းၼၼ်ႉတင်ႈယူႇၵႃႈၼိူဝ်မၢၵ်ႇႁိၼ်သိပ်းသွင်လုၵ်ႈဢေႃႈ။ ၵႃႈၼိူဝ်တိၼ်လမ်းဝဵင်းၸိူဝ်းၼၼ်ႉ၊တႅမ်ႈဝႆႉၸိုဝ်ႈသဵင်တမၢၼ်ႇၸဝ်ႈသိပ်းသွင်ပႃးဢၼ်ပဵၼ်သူဝ်းဢွၼ်ၽြႃးၸိူဝ်းၼၼ်ႉဢေႃႈ။-
တမၢၼ်ႇၵၢင်ႁၢဝ်ဢၼ်မႃးတၵ်ႉလၢတ်ႈတေႃႇၵဝ်ၼၼ်ႉၵႃႈၼႂ်းမိုဝ်းမၼ်းမီးမႆႉတႅၵ်ႈလႅမ်ႈၼိုင်ႈဢၼ်ဢဝ်ၶမ်းႁဵတ်းဝႆႉ၊ပုၼ်ႈတၵ်းတႅၵ်ႈတူၺ်းဝဵင်း၊ဢိၵ်ႇတင်းၽၵ်းတူဝဵင်းတင်းလမ်းဝဵင်းၼၼ်ႉဢေႃႈ။-
ဝဵင်းၼၼ်ႉ၊မီးသီႇၸဵင်ႇသီႇၼႃႈမိူၼ်ၵၼ်ဝႆႉလႄႈၼႃႈယၢဝ်းတင်းၼႃႈၵႂၢင်ႈမၼ်းပဵင်းၵၼ်ဝႆႉဢေႃႈ။ တမၢၼ်ႇၵၢင်ႁၢဝ်ၼၼ်ႉဢဝ်မႆႉတႅၵ်ႈမၼ်းတႅၵ်ႈတူၺ်းဝဵင်းၼၼ်ႉလႄႈၼႃႈယၢဝ်းမၼ်းမီးႁဵင်ပၢႆႁႃႈပၢၵ်ႇလၵ်းဢေႃႈ။ ၼႃႈယၢဝ်း၊ၼႃႈၵႂၢင်ႈ၊တၢင်းသုင်မၼ်းပဵင်းၵၼ်မူတ်းဢေႃႈ။-
မၼ်းတႅၵ်ႈလမ်းဝဵင်းလႄႈတၢင်းသုင်မၼ်းၸွမ်းၼင်ႇသွၵ်ႇၵူၼ်းဢၼ်ဢၼ်မိူၼ်ၵၼ်တင်းသွၵ်ႇတမၢၼ်ႇၵၢင်ႁၢဝ်ၼၼ်ႉမီးပၢၵ်ႇပၢႆသီႇသိပ်းသီႇသွၵ်ႇဢေႃႈ။-
လမ်းဝဵင်းၼၼ်ႉ၊ဢဝ်တင်းသႅင်ၼၵႃးသွႆႈႁဵတ်းဝႆႉဢေႃႈ။ ဝဵင်းၼၼ်ႉသမ်ႉ၊ဢဝ်တင်းၶမ်းၸႅတ်ႈၸႅတ်ႈႁဵတ်းဝႆႉလႄႈလႅင်းသႂ်မိူၼ်ၸိူဝ်ႉၼင်ႇၵႅဝ်ႈဢေႃႈ။-
တိၼ်လမ်းဝဵင်းၸိူဝ်းၼၼ်ႉဢဝ်တင်းသႅင်ရတၼႃႇမျၢတ်ႈဢၼ်ၵႃႈၶၼ်ယႂ်ႇၼႃႇၵူႈမဵဝ်းမဵဝ်းသေလႄႈၵေႃႇႁဵတ်းဝႆႉဢေႃႈ။ တိၼ်လမ်းဝဵင်းလုၵ်ႈတီႈၼိုင်ႈၼၼ်ႉပဵၼ်သႅင်ၼၵႃးသွႆႈ၊လုၵ်ႈတီႈသွင်ပဵၼ်သႅင်ၼီႇလႃႇ၊လုၵ်ႈတီႈသၢမ်ပဵၼ်သႅင်မႁူႇရႃႇ၊လုၵ်ႈတီႈသီႇပဵၼ်သႅင်မျႃႉ၊လုၵ်ႈတီႈႁႃႈပဵၼ်သႅင်ၸၢႆးၶႃးယွတ်ႇ၊-
လုၵ်ႈတီႈႁူၵ်းပဵၼ်သႅင်လႅင်၊လုၵ်ႈတီႈၸဵတ်းပဵၼ်သႅင်လိူင်ၵေႃႇတၼ်ႇ၊လုၵ်ႈတီႈပႅတ်ႇပဵၼ်သႅင်ၶဵဝ်၊လုၵ်ႈတီႈၵဝ်ႈပဵၼ်သႅင်ဢုႀၽယႃး၊လုၵ်ႈတီႈသိပ်းပဵၼ်သႅင်ပတ်ႈတမျႃး၊လုၵ်ႈတီႈသိပ်းဢဵတ်းပဵၼ်သႅင်ဝႃႇၵိၼ်ႇသု၊လုၵ်ႈတီႈသိပ်းသွင်ပဵၼ်သႅင်မွၵ်ႇမၢၵ်ႇၶိူဝ်ဢေႃႈ။-
မႂ်ၽၵ်းတူၵႃႈတီႈၽၵ်းတူသိပ်းသွင်ဢၼ်ၼၼ်ႉပဵၼ်သႅင်ပူးလႄးသိပ်းသွင်ၶႅပ်းဢေႃႈ။ မႂ်ၽၵ်းတူယေႈမႂ်ၼၼ်ႉပဵၼ်သႅင်ပူးလႄးၶႅပ်းလဵဝ်ၵူၺ်းဢေႃႈ။ ၶူၼ်တၢင်းဝဵင်းၼၼ်ႉပဵၼ်ၶမ်းၸႅတ်ႈၸႅတ်ႈလႄႈသႂ်လႅင်းဝႆႉမိူၼ်ၸိူဝ်ႉၼင်ႇၵႅဝ်ႈဢေႃႈ။
ၵဝ်ဢမ်ႇႁၼ်ၵျွင်းပိၵ်ႈမၢၼ်ႇၸဝ်ႈၵႃႈၼႂ်းဝဵင်းလူင်ၼၼ်ႉဢေႃႈ။ လွင်ႈမၼ်းၸမ်ႉ၊ၵျွင်းပိၵ်ႈမၢၼ်ႇၸဝ်ႈၵႃႈၼႂ်းဝဵင်းၼၼ်ႉပဵၼ်ထႃႇဝရႃႉၽြႃး၊ၽြႃးပဵၼ်ၸဝ်ႈ၊ၸဝ်ႈဢၼၼ်ႇတႃႉတၼ်းၶူဝ်း၊ဢိၵ်ႇတင်းသူဝ်းဢွၼ်ႇၸဝ်ႈၼၼ်ႉဢေႃႈ။-
ဝဵင်းလူင်ၼၼ်ႉ၊ဢမ်ႇလူဝ်ႇမီးၵၢင်ဝၼ်း၊ဢမ်ႇၼၼ်ဢမ်ႇလူဝ်ႇမီးလိူၼ်ပုၼ်ႈဢၼ်တၵ်းထွင်ႇပၼ်ဢၼ်လႅင်းၵႃႈၼိူဝ်ဝဵင်းၼၼ်ႉၵွပ်ႈပိူဝ်ႈဢရွင်ႇမုၼ်ၽုင်းၽြႃးပဵၼ်ၸဝ်ႈႁိူဝ်ႈလႅင်းဝႆႉယဝ်ႉလႄႈသူဝ်းဢွၼ်ႇၸဝ်ႈသမ်ႉ၊ပဵၼ်ၵွၵ်းၽႆးၵႃႈၼႂ်းဝဵင်းၼၼ်ႉဢေႃႈ။-
ၵူၼ်းမိူင်းလေႃးၵီႇတင်းလၢႆတေဢွၼ်ၵၼ်ပႆၵႂႃႇပႆမႃးၵႃႈၼႂ်းဢၼ်လႅင်းၼၼ်ႉလႄႈၶုၼ်ႁေႃၶမ်းလေႃးၵီႇတင်းလၢႆၵေႃႈတၵ်းပႃးဢဝ်မုၼ်သရေႇၶဝ်သေလႄႈမႃးၵႃႈၼႂ်းဝဵင်းၼၼ်ႉဢေႃႈ။-
ႁူးၽၵ်းတူဝဵင်းတင်းလၢႆတၵ်းၽုၺ်ႇဝႆႉၵူႈၶိင်ႇလႄႈတေဢမ်ႇဢိုတ်းဝႆႉ၊လွင်ႈမၼ်းၸမ်ႉ၊ၵႃႈတီႈၼၼ်ႈဢမ်ႇမီးၶိင်ႇၵၢင်ၶိုၼ်းဢေႃႈ။-
ၶဝ်တၵ်းဢွၼ်ၵၼ်ပႃးဢဝ်မုၼ်သရေႇတင်းၸေးၸိမ်ႇၵူၼ်းမဵဝ်းၵူႈၸိူဝ်ႉၶိူဝ်းတင်းလၢႆ၊မႃးၵႃႈတီႈဝဵင်းၼၼ်ႉဢေႃႈ။-
ၵူၺ်းၵႃႈ၊မဵဝ်းဢၼ်ၵူဝ်ႈၵိူၵ်ႇ၊ၵေႃႉဢၼ်ႁဵတ်းလွင်ႈဢၼ်ဝူၺ်ႇႁင်ႈ၊ဢိၵ်ႇတင်းၵေႃႉဢၼ်လၢတ်ႈမုသႃႇၼၼ်ႉဢမ်ႇလႆႈၶဝ်ႈၵႃႈၼႂ်းဝဵင်းၼၼ်ႉ။ ၶဝ်ၸိူဝ်းဢၼ်ၸိုဝ်ႈၶဝ်လႆႈၶၢမ်ႇတၢင်းဢၼ်တႅမ်ႈမၢႆဝႆႉၵႃႈၼႂ်းၽိုၼ်လိၵ်ႈဢသၢၵ်ႈသူဝ်းဢွၼ်ႇၸဝ်ႈၼၼ်ႉၵူၺ်းတၵ်းလႆႈၶဝ်ႈၵႃႈၼႂ်းဝဵင်းၼၼ်ႉဢေႃႈ။
တမၢၼ်ႇၵၢင်ႁၢဝ်သမ်ႉၼႄပျႃးၵဝ်ၼမ်ႉမႄႈၼိုင်ႈတီႈဢၼ်ၼမ်ႉဢသၢၵ်ႈလႆယူႇလႄႈသႂ်လႅင်းမိူၼ်ၸိူဝ်ႉၼင်ႇမၢၵ်ႇႁိၼ်ၸိင်ႇၼၼ်ႉဢေႃႈ။ ၼမ်ႉၼၼ်ႉလႆဢွၵ်ႇမႃးသေၵႃႈတီႈပလၢင်ႇဢၼ်ၽြႃးပဵၼ်ၸဝ်ႈ၊ဢိၵ်ႇတင်းသူဝ်းဢွၼ်ႇၸဝ်ႈၼင်ႈယူႇၼၼ်ႉဢေႃႈ။-
ၼမ်ႉၼၼ်ႉ၊လႆလူင်းၸွမ်းၶိုင်ႈၵၢင်သဵၼ်ႈတၢင်းဝဵင်းၼၼ်ႉဢေႃႈ။ ၵႃႈတီႈသွင်ၽင်ႇမႄႈၼမ်ႉၼၼ်ႉမီးတူၼ်ႈဢသၢၵ်ႈဢၼ်ၸၢင်ႈမၢၵ်ႇမၢၵ်ႇမႃးယေႈပီသိပ်းသွင်ပွၵ်ႈ၊ၼႂ်းယေႈလိူၼ်မၢၵ်ႇမႃးယေႈပွၵ်ႈဢေႃႈ။ မႂ်မၼ်းၵေႃႈပဵၼ်ယႃႈယႃပုၼ်ႈဢၼ်တၵ်းယူတ်းယႃမဵဝ်းၵူၼ်းၵူႈၸိူဝ်ႉၸၢတ်ႈတင်းလၢႆဢေႃႈ။-
မဵဝ်းဢၼ်ၽြႃးပဵၼ်ၸဝ်ႈၵိၼ်ႇဝႃႈၼၼ်ႉ၊ဢမ်ႇမီးသေၸိူဝ်ႉသေပိူင်ၵႃႈၼႂ်းဝဵင်းၼၼ်ႉ။ ပလၢင်ႇၽြႃးပဵၼ်ၸဝ်ႈ၊ဢိၵ်ႇတင်းပလၢင်ႇသူဝ်းဢွၼ်ႇၸဝ်ႈၼၼ်ႉတၵ်းမီးယူႇၵႃႈၼႂ်းဝဵင်းၼၼ်ႉလႄႈၶႃႈမၼ်းၸဝ်ႈတင်းလၢႆ၊တၵ်းဢွၼ်ၵၼ်ဝႆႈသႃၵူဝ်းၵႂၢႆႇမၼ်းၸဝ်ႈဢေႃႈ။-
ၶဝ်တၵ်းႁၼ်ၼႃႈမၼ်းၸဝ်ႈလႄႈၸိုဝ်ႈသဵင်မၼ်းၸဝ်ႈၵေႃႈတၵ်းတႅမ်ႈဝႆႉၵႃႈၼိူဝ်ၼႃႈၽၢၵ်ႇၶဝ်ဢေႃႈ။-
ၵႃႈၼႂ်းဝဵင်းၼၼ်ႉဢမ်ႇမီးၶိင်ႇၵၢင်ၶိုၼ်းယဝ်ႉ။ ၶဝ်ဢမ်ႇလူဝ်ႇၵွၵ်းၽႆး။ သၢႆလႅင်းလႅတ်ႇၵေႃႈၶဝ်ဢမ်ႇလူဝ်ႇ။ လွင်ႈမၼ်းၸမ်ႉ၊ထႃႇဝရႃႉၽြႃး၊ၽြႃးပဵၼ်ၸဝ်ႈ၊ပဵၼ်ဢၼ်လႅင်းၶဝ်ယဝ်ႉလႄႈၶဝ်တၵ်းလႆႈဢုပ်ႉပိူင်ႇယူႇမိူၼ်ၸိူဝ်ႉၼင်ႇၶုၼ်ႁေႃၶမ်းတင်းလၢႆသိုပ်ႇသိုပ်ႇတၢမ်တၢမ်တႃႇသေႇဢမ်ႇထၢတ်ႇဢေႃႈ။
မိူဝ်ႈၼၼ်ႉတမၢၼ်ႇၵၢင်ႁၢဝ်ၵေႃႈလၢတ်ႈတီႈၵဝ်လႄႈဝႃႈ၊ “ၵႂၢမ်းၸိူဝ်းၼႆႉ၊ပဵၼ်ၵႂၢမ်းဢၼ်မၢၼ်ႇမႅၼ်ႈၸိုဝ်ႈၸႂ်ႈ၊ၵႂၢမ်းဢၼ်လီယုမ်ႇဢေႃႈ။ ထႃႇဝရႃႉၽြႃး၊ၽြႃးပဵၼ်ၸဝ်ႈ၊ဢၼ်ပဵၼ်ၸဝ်ႈဝိၺိၺ်ႇပရေႃးၽႅတ်ႈ တင်းလၢႆၼၼ်ႉပွႆႇၸႂ်ႉတမၢၼ်ႇၵၢင်ႁၢဝ်မၼ်းၸဝ်ႈမႃးႁႂ်ႈလႆႈၼႄပျႃးလႄႈႁုလွင်ႈတၢင်းဢၼ်ဢမ်ႇပေႃးႁိုင်တၵ်းပဵၼ်မႃးၶၼ်ၶၼ်ၽႂ်းၽႂ်းတီႈၶႃႈမၼ်းၸဝ်ႈတင်းလၢႆယဝ်ႉ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ လၢတ်ႈလႄႈဝႃႈ၊ “တူၺ်းလူး။ ၵဝ်တၵ်းၸဵဝ်းမႃးၶၼ်ၶၼ်ၽႂ်းၽႂ်းဢေႃႈ။ ၶဝ်ၸိူဝ်းဢၼ်ပႂ်ႉၵမ်ပႂ်ႉၸွမ်းၵႂၢမ်းပျႃႇတိၵ်ႈၸဝ်ႈဢၼ်မီးၵႃႈၼႂ်းၽိုၼ်လိၵ်ႈၼႆႉၼၼ်ႉမီးမၢင်ႇၵလႃႇဢေႃႈ၊” ဝႃႈၼင်ႇၼႆဢေႃႈ။
ၵဝ် ယူဝ်းႁၢၼ်ႇ၊ လႆႈငိၼ်းလႆႈႁၼ်လွင်ႈတၢင်းၸိူဝ်းၼႆႉဢေႃႈ။ မိူဝ်ႈဢၼ်ၵဝ်လႆႈငိၼ်းလႆႈႁၼ်ယဝ်ႉၼၼ်ႉ၊ၵဝ်ၶုပ်ႉမူပ်ႇၵႃႈတီႈႁိမ်းတိၼ်တမၢၼ်ႇၵၢင်ႁၢဝ်ဢၼ်ၼႄပျႃးၵဝ်လွင်ႈတၢင်းၸိူဝ်းၼႆႉလႄႈၵဝ်ၵေႃႈထၢၼ်ႈပေႃးၸမ်တၵ်းဝႆႈသႃၵူဝ်းၵႂၢႆႇမၼ်းဢေႃႈ။-
ၵူၺ်းၵႃႈ၊မၼ်းလၢတ်ႈတီႈၵဝ်လႄႈဝႃႈ၊ “ယႃႇပေႁဵတ်းၸိူဝ်ႉၼင်ႇၼႆသေၵမ်း။ ၵဝ်ၼႆႉပဵၼ်ၵေႃႉဢၼ်သၢင်ႈႁဵတ်းလူၺ်ႈၵၼ်တင်းမႂ်းလႄႈၶဝ်ႈပႃးၵႃႈၼႂ်းပီႈၼွင်ႉမႂ်းဢၼ်ပဵၼ်ပရေႃးၽႅတ်ႈတင်းလၢႆ၊ဢိၵ်ႇတင်းၶဝ်ၸိူဝ်းဢၼ်ပႂ်ႉၵမ်ပႂ်ႉၸွမ်းၵႂၢမ်းတြႃးဢၼ်မီးၵႃႈၼႂ်းၽိုၼ်လိၵ်ႈၼႆႉဢေႃႈ။ ဝႆႈသႃၵူဝ်းၵႂၢႆႇၽြႃးပဵၼ်ၸဝ်ႈတႃႉ၊” ဝႃႈၼင်ႇၼႆဢေႃႈ။-
မၼ်းသမ်ႉလၢတ်ႈတီႈၵဝ်လႄႈဝႃႈ၊ “ၵႂၢမ်းပျႃႇတိၵ်ႈၸဝ်ႈဢၼ်မီးၵႃႈၼႂ်းၽိုၼ်လိၵ်ႈၼႆႉၼၼ်ႉယႃႇပေသိူင်ႇဝႆႉဢမ်ဝႆႉ။ လွင်ႈမၼ်းၸမ်ႉ၊ၶိင်ႇၵႃႇလႃႉဢၼ်လွင်ႈတၢင်းၸိူဝ်းၼႆႉတၵ်းပဵၼ်မႃးၼၼ်ႉၸမ်မႃးယဝ်ႉ။-
ႁႂ်ႈၵေႃႉဢၼ်ႁၢႆႉမိူၵ်ႈၼၼ်ႉႁဵတ်းမဵဝ်းဢၼ်ႁၢႆႉမိူၵ်ႈယူႇလူးၵွၼ်ႇတႃႉ။ ႁႂ်ႈၵေႃႉဢၼ်ၵူဝ်ႈၵိူၵ်ႇၼၼ်ႉႁဵတ်းတၢင်းဢၼ်ၵူဝ်ႈၵိူၵ်ႇယူႇလူးၵွၼ်ႇတႃႉ။ ႁႂ်ႈၵေႃႉဢၼ်လီၼၼ်ႉႁဵတ်းလွင်ႈဢၼ်လီယူႇလူးၵွၼ်ႇတႃႉ။ ႁႂ်ႈၵေႃႉဢၼ်မူတ်းၸၢင်ႇၼၼ်ႉၵေႃႈပဵၼ်ၵူၼ်းဢၼ်မူတ်းၸၢင်ႇယူႇလူးၵွၼ်ႇတႃႉ၊” ဝႃႈၼင်ႇၼႆဢေႃႈ။
ၸဝ်ႈယေႇသု၊ လၢတ်ႈလႄႈဝႃႈ၊ “တူၺ်းလူး။ ၵဝ်တၵ်းၸဵဝ်းမႃးၶၼ်ၶၼ်ၽႂ်းၽႂ်းဢေႃႈ။ ၵဝ်တၵ်းပႃးဢဝ်ဢၵျူဝ်းဢပျတ်ႈမႃးႁႂ်ႈလႆႈတွပ်ႇတႅၼ်းပၼ်တီႈၵူႈၵေႃႉၵူႈၵူၼ်းၸွမ်းလူၺ်ႈတၢင်းၵမ်တၢင်းၵျၢင်ႉဢၼ်ၶဝ်လႆႈႁဵတ်းမႃးၼၼ်ႉဢေႃႈ။-
ၵဝ်ပဵၼ်ၸဝ်ႈ ဢႃႇလၽႃႉ၊ ဢိၵ်ႇတင်းၸဝ်ႈ ဢေႃးမေႇၵႃႉ၊ ၸဝ်ႈဢၼ်တႄႇၸႃႉဢွၼ်တၢင်း၊ဢိၵ်ႇတင်းၸဝ်ႈၵမ်းလိုၼ်းသုတ်းဢေႃႈ။
“ၶဝ်ၸိူဝ်းဢၼ်သၵ်ႉသၢႆႇၶူဝ်းၼုင်ႈၶဝ်လႄႈလႆႈဢၶႂၢင်ႉဢၼ်တၵ်းၵိၼ်မၢၵ်ႈတူၼ်ႈဢသၢၵ်ႈသေယဝ်ႉ၊လႆႈဢၶႂၢင်ႉဢၼ်ၶဝ်ႈၵႃႈၼႂ်းၽၵ်းတူဝဵင်းၼၼ်ႉမီးမၢင်ႇၵလႃႇဢေႃႈ။-
ၵူၺ်းၵႃႈ၊ပႃႈၼွၵ်ႈဝဵင်းၸမ်ႉ၊မီးၶဝ်ၸိူဝ်းဢၼ်ဢၵျၢင်ႉလု၊ၵေႃႉဢၼ်ႁဵတ်းဢတၢတ်ႈၽီမေႃႇ၊ၵေႃႉဢၼ်ၽိတ်းၵႃႇမေႇသု၊ၵေႃႉဢၼ်ၸၢင်ႈဢဝ်ဢသၢၵ်ႈၵူၼ်းတၢႆ၊ၵေႃႉဢၼ်ဝႆႈႁုၼ်ႇႁၢင်ႈသၢင်းထု၊ၵေႃႉဢၼ်လၢတ်ႈၵႂၢမ်းမုသႃႇလႄႈႁဵတ်းတၢင်းဢၼ်ပႅတ်ႉလႅၼ်ၸိူဝ်းၼၼ်ႉဢေႃႈ။
“ၵဝ်၊ ယေႇသု၊ ၼႆႉ၊ပွႆႇၸႂ်ႉတမၢၼ်ႇၵၢင်ႁၢဝ်ၵဝ်ၵႂႃႇ၊ႁႂ်ႈလႆႈပိုၼ်ၽၢဝ်ႇမွၵ်ႇလၢတ်ႈလွင်ႈတၢင်းၸိူဝ်းၼႆႉတီႈသူၵႃႈၼႂ်းၸိူဝ်းၸဝ်ႈတင်းလၢႆယဝ်ႉ။ ၵဝ်ၼႆႉ၊ပဵၼ်ၸိူဝ်ႉၶိူဝ်း တႃႇဝိတ်ႈ၊ ဢေႃႈ။ လၢဝ်ႁူဝ်မိူင်းသႂ်ၵေႃႈပဵၼ်ဢေႃႈ၊” ဝႃႈၼင်ႇၼႆဢေႃႈ။
ဝိၺိၺ်ႇၸဝ်ႈ၊ဢိၵ်ႇတင်းယိင်းသၢဝ်ၼၼ်ႉလၢတ်ႈလႄႈဝႃႈ၊ “မႃးသေၵမ်းၶႃႈ၊” ဝႃႈၼင်ႇၼႆဢေႃႈ။ ၶဝ်ၸိူဝ်းဢၼ်ငိၼ်းၵေႃႈတၵ်းလႆႈလၢတ်ႈလႄႈဝႃႈ၊ “မႃးသေၵမ်းၶႃႈ၊” ဝႃႈၼင်ႇၼႆၼင်ႇၵဝ်ႇဢေႃႈ။ ႁႂ်ႈၵေႃႉဢၼ်ယၢၵ်ႇၼမ်ႉၼၼ်ႉမႃးသေၵမ်း။ ႁႂ်ႈၵေႃႉဢၼ်မီးၸႂ်ၶႂ်ႈလႆႈၼမ်ႉဢသၢၵ်ႈၼၼ်ႉယင်းဢမ်ႇပၼ်ၵႃႈမၼ်းၶၼ်မၼ်းလႄႈမႃးႁပ်ႉဢဝ်သေၵမ်း။
ၵဝ် ယူဝ်းႁၢၼ်ႇ၊ ပၼ်သတိတီႈၶဝ်ၸိူဝ်းဢၼ်ငိၼ်းၵႂၢမ်းပျႃႇတိၵ်ႈၸဝ်ႈဢၼ်မီးၵႃႈၼႂ်းၽိုၼ်လိၵ်ႈၼႆႉၵူႈၵေႃႉၵူႈၵူၼ်းၸမ်ႉ၊သင်ဝႃႈ၊သေၵေႃႉသေၵူၼ်းဢဝ်ၵႂၢမ်းသေၸိူဝ်ႉသေပိူင်ထၢပ်ႈသႂ်ႇထႅင်ႈၵႃႈၼႂ်းလွင်ႈတၢင်းၸိူဝ်းၼႆႉၸိုင်၊ၽြႃးပဵၼ်ၸဝ်ႈတၵ်းဢဝ်ၽေးဢုပၢတ်ႈဢၼ်လၢတ်ႈဝႆႉၵႃႈၼႂ်းၽိုၼ်လိၵ်ႈၼႆႉၼၼ်ႉႁွတ်ႈထိုင်ၵႃႈၼိူဝ်ၵေႃႉၼၼ်ႉဢေႃႈ။-
သင်ဝႃႈ၊သေၵေႃႉသေၵူၼ်းၼုၵ်ႈထွၼ်ဢဝ်ၵႂၢမ်းပျႃႇတိၵ်ႈၸဝ်ႈဢၼ်မီးၵႃႈၼႂ်းၽိုၼ်လိၵ်ႈၼႆႉသေၸိူဝ်ႉသေပိူင်ဢွၵ်ႇပႅတ်ႈၸိုင်၊ၽြႃးပဵၼ်ၸဝ်ႈတၵ်းၼုၵ်ႈဢဝ်ဢၶႂၢင်ႉမၼ်းဢၼ်ဝႃႈ၊ဢၶႂၢင်ႉဢၼ်လႆႈၵိၼ်မၢၵ်ႇတူၼ်ႈဢသၢၵ်ႈ၊ဢိၵ်ႇတင်းဢၶႂၢင်ႉဢၼ်လႆႈၶဝ်ႈၵႃႈၼႂ်းဝဵင်းဢၼ်မူတ်းၸၢင်ႇ၊ဢၼ်လၢတ်ႈဝႆႉၵႃႈၼႂ်းၽိုၼ်လိၵ်ႈၼႆႉၼၼ်ႉ၊ဢွၵ်ႇပႅတ်ႈသေၵႃႈတီႈၵေႃႉၼၼ်ႉဢေႃႈ။
ၸဝ်ႈဢၼ်ၶၢမ်ႇသၢၵ်ႈသေႇတီႈလွင်ႈတင်းသဵင်ႈတင်းမူတ်းၸိူဝ်းၼႆႉၵေႃႈလၢတ်ႈလႄႈဝႃႈ၊ “ၵဝ်တၵ်းၸဵဝ်းမႃးၶၼ်ၶၼ်ၽႂ်းၽႂ်းဢမၢၼ်ႇၶၼ်ပဵၼ်ဢေႃႈ၊” ဝႃႈၼင်ႇၼႆဢေႃႈ။ ဢႃမိၼ်ႈ။ ၸဝ်ႈၽြႃး ယေႇသု၊ တီႈၶႃႈ။ ၶႅၼ်းတေႃႈၵျွမႃးသေၵမ်းတီႈၶႃႈ။
ႁႂ်ႈၵျေးၸူး ၸဝ်ႈၽြႃးယေႇသု၊ မီးလူၺ်ႈၵၼ်တင်းၵူၼ်းမူတ်းၸၢင်ႇၵူႈၵေႃႉၵူႈၵူၼ်းသေၵမ်းလူၺ်ႈ။ ၵျၢမ်းပျႃႇတိၵ်ႈယဝ်ႉယဝ်ႉဢေႃႈ။